ADVERTISEMENT

ADVERTISEMENT

എടത്വ സെന്‍റ് അലോഷ്യസ് കോളജില്‍ അന്തര്‍ദേശീയ ശില്പശാലയ്ക്കു തുടക്കം

എടത്വ: ലൈബ്രറി മാനേജ്‌മെന്‍റ് സോഫ്‌റ്റ്‌വെയര്‍ (കോഹ) അന്തര്‍ദേശീയ ശില്പശാലയ്ക്ക് എടത്വ സെന്‍റ് അലോഷ്യസ് കോളജില്‍ തുടക്കമായി. വിവരസാങ്കേതികവിദ്യയുടെ അതിപ്രസരമുള്ള കാലഘട്ടത്തില്‍ ലൈബ്രറി മാനേജ്മെന്‍റ് ആധുനീകരിക്കുക എന്ന ലക്ഷ്യത്തോടെയാണ് ശില്പശാല സംഘടിപ്പിച്ചിരിക്കുന്നത്. മാനേജര്‍ ഫാ. ഫിലിപ്പ് വൈക്കത്തുകാരന്‍ ഉദ്ഘാടനം നിര്‍വഹിച്ചു.

പ്രിന്‍സിപ്പല്‍ പ്രഫ. ഡോ. ജി. ഇന്ദുലാല്‍, ലൈബ്രേറിയന്‍ ഫാ. ടിജോമോന്‍ പി. ഐസക്, ഐക്യുഎസി കോ-ഓര്‍ഡിനേറ്റര്‍ ഡോ. വിനു റ്റി. വടക്കേല്‍ എന്നിവര്‍ പ്രസംഗിച്ചു. കേരളത്തിലെ വിവിധ കോളജുകളില്‍നിന്നുള്ള നിരവധി വിദ്യാര്‍ഥികളും അധ്യാപകരും പങ്കെടുത്തു. കാനഡയില്‍നിന്ന് സോണി സക്കറിയ, ഒമാനില്‍നിന്ന് ഡോ. ബിനു ജാന്‍ മാത്യു, ഫാ. ടിജോമോന്‍ പി. ഐസക് എന്നിവര്‍ പ്രബന്ധങ്ങള്‍ അവതരിപ്പിച്ചു. ശില്പശാല ഇന്ന് സമാപിക്കും.

ADVERTISEMENT

ചാരുംമൂട് മേഖലയിൽ കാർഷിക പ്രതിസന്ധി

ചാരുംമൂട്: പ്രതികൂല കാലാവസ്ഥയും നിരന്തരം ഉണ്ടാവുന്ന കാട്ടുപന്നികൾ ഉൾപ്പെടെയുള്ള വന്യമൃഗ ആക്രമണവും മൂലം ഓണാട്ടുകര ഉൾപ്പെടുന്ന ചാരുംമൂട് മേഖലയിൽ കർഷകർ പ്രതിസന്ധിയിൽ. വിപണികളിൽ ഇപ്പോൾ നാമമാത്ര കാർഷിക ഉത്പന്നങ്ങളാണ് എത്തുന്നത്. ഓണാട്ടുകരയിലെ കിഴക്കൻമേഖലയിലെ വിപണികളിലേക്കു പത്തനംതിട്ട, കൊല്ലം ജില്ലകളിൽനിന്നായിരുന്നു കച്ചവടക്കാർ എത്തിക്കൊണ്ടിരുന്നത്. ആവശ്യാനുസരണം വിഷരഹിത പച്ചക്കറികളും വാഴക്കുലകളും കാർഷിക വിളകളും ലഭിക്കുന്ന ഹരിത വിപണികളായിരുന്നു ഇവിടം. കഴിഞ്ഞ ദിവസം പാലമേൽ പഞ്ചായത്തിലെ വിപണിയിൽ നാമമാത്രമായ രീതിയിൽ മാത്രമാണ് പച്ചക്കറികളും വാഴക്കുലകളും കാർഷിക വിളകളും എത്തിയത്. പന്നിശല്യം രൂക്ഷം കാലംതെറ്റി വരുന്ന മഴയും കാറ്റും ഒരു ഭാഗത്ത് കർഷകർക്കു ദുരിതം സമ്മാനിക്കുമ്പോൾ കാട്ടുപന്നികൾ ഉൾപ്പെടെ കൃഷികളും കാർഷിക വിളകളും നശിപ്പിക്കുന്നത് കർഷകരെ ദുരിതത്തിലാക്കുകയാണ്. ലക്ഷക്കണക്കിന് രൂപയുടെ കാർഷിക വിളകളാണ് കാട്ടുപന്നികൾ നശിപ്പിച്ചുകൊണ്ടിരിക്കുന്നത്. 2018ലെ വെള്ളപ്പൊക്കത്തിൽ കിഴക്കൻ വെള്ളത്തോടൊപ്പം വന്ന കാട്ടുപന്നികൾ ആദ്യം ഇറങ്ങിയത് പാലമേൽ പഞ്ചായത്തിലെ മറ്റപ്പള്ളി, പയ്യനല്ലൂർ, നൂറനാട് എന്നിവിടങ്ങളിൽ ആയിരുന്നു. കൃഷിനശിച്ച കർഷകർക്ക് ഒരു രൂപ പോലും സഹായവും ലഭിച്ചിട്ടില്ല. താമരക്കുളം, ചുനക്കര, നൂറനാട് പഞ്ചായത്തുകളിലും സമാന അവസ്ഥയാണ്. ഓണത്തിനായി കൃഷി ചെയ്ത പച്ചക്കറികളും കൃഷികളും കാറ്റും മഴയും വില്ലനായി എത്തി കവർന്നെടുത്തു. കാട്ടുപന്നികളെ തുരത്താൻ താമരക്കുളം, പാലമേൽ പഞ്ചായത്തുകളിൽ സോളർ വേലികളും മറ്റും സ്ഥാപച്ചെങ്കിലും ശല്യത്തിന് അറുതിയായില്ല. ഏത്തക്കുല വിപണി ഏക്കർ കണക്കിന് സ്ഥലത്താണ് പാലമേൽ, താമരക്കുളം, നൂറനാട്, ചുനക്കര പഞ്ചായത്തുകളിൽ ഏത്തവാഴക്കൃഷി ചെയ്തിരിക്കുന്നത്. വെളിച്ചെണ്ണയുടെ വില കുതിച്ച് കയറുന്നതിനാൽ ഏത്തക്ക ഉപ്പേരിയുടെ ഉൾപ്പെടെ വിലയും ഉയരും. ചക്കിലാട്ടിയ എണ്ണയുടെ പേരിൽ നൽകുന്ന വെളിച്ചെണ്ണയ്ക്ക് ഒരു ലിറ്ററിന് 500ന് മുകളിൽ വിലയായി. കേര ഫെഡ് സപ്ലൈകോ മാർക്കറ്റ് വഴി സബ്‌സിഡി നിരക്കിൽ വെളിച്ചെണ്ണ വില്പന നടത്തുമെന്നു ഭക്ഷ്യ സിവിൽ സപ്ലൈസ് മന്ത്രി ജി.ആർ. അനിൽ കഴിഞ്ഞ ദിവസം പറഞ്ഞിരുന്നു. വെളിച്ചെണ്ണ വില ഓണക്കാലത്ത് കുറഞ്ഞില്ലെങ്കിൽ ഏത്തയ്ക്ക വിപണിയും പ്രതിസന്ധിയിലാവും. നാടൻ ഏത്തക്കുലയ്ക്ക് കിലോയ്ക്ക് 100 രൂപ വരെ ഇപ്പോൾ വിലയുണ്ട്. ഓണത്തിന് വീണ്ടും വില കൂടും. അതേസമയം, വെളിച്ചെണ്ണ വില വീണ്ടും കൂടിയാൽ വാഴക്കുലക്കച്ചവടത്തിന് ഇടിവ് സംഭവിക്കാനാണ് സാധ്യതയെന്നും കർഷകർ ചൂണ്ടിക്കാട്ടുന്നു.

വന്ദേഭാരത് സ്ലീപ്പര്‍ ട്രെയിനുകള്‍ക്ക് ആലപ്പുഴ വഴി സര്‍വീസ് അനുവദിക്കണം: കെ.സി. വേണുഗോപാല്‍

അന്പലപ്പുഴ: സെപ്റ്റംബറില്‍ ആരംഭിക്കുന്ന കേരളത്തിലേക്കുള്ള വന്ദേഭാരത് സ്ലീപ്പര്‍ ട്രെയിനുകള്‍ക്ക് ആലപ്പുഴ വഴി സര്‍വീസ് അനുവദിക്കണമെന്ന് കെ.സി. വേണുഗോപാല്‍ എംപി. ഇക്കാര്യം ആവശ്യപ്പെട്ട് അദ്ദേഹം റെയില്‍വേ മന്ത്രി അശ്വനി വൈഷ്ണവിന് കത്തുനല്‍കി. തിരുവനന്തപുരം-ബംഗളൂരു റൂട്ടില്‍ ഒരു വന്ദേഭാരത് സ്ലീപ്പര്‍ സര്‍വീസുണ്ടാകുമെന്നാണ് റെയില്‍വേ വൃത്തങ്ങളില്‍നിന്ന് മനസിലാക്കുന്നത്. ആലപ്പുഴ വഴിയുള്ള തീരദേശപാത ഏറ്റവും തിരക്കേറിയതും തദ്ദേശീയരും വിനോദസഞ്ചാരികളും ഉള്‍പ്പെടെ നിരവധി യാത്രക്കാര്‍ ആശ്രയിക്കുന്നതുമായ പാതയാണ്. തിരുവനന്തപുരം, കൊച്ചി, തൃശൂര്‍, കോഴിക്കോട് തുടങ്ങിയ പ്രധാന നഗരങ്ങളിലേക്ക് യാത്ര ചെയ്യുന്ന ദൈനംദിന യാത്രക്കാരും ദീര്‍ഘദൂര യാത്രക്കാരും തെരഞ്ഞെടുക്കുന്ന പ്രധാന പാതകളിലൊന്നാണിത്. കഴിഞ്ഞ അഞ്ചു വര്‍ഷത്തിനിടെ ഈ റൂട്ടിലെ യാത്രക്കാരുടെ എണ്ണം 15 ശതമാനം വര്‍ധിച്ചു. ഉത്സവ വിനോദസഞ്ചാര സീസണുകളില്‍ യാത്രക്കാരുടെ എണ്ണം കുത്തനെ വര്‍ധിക്കുമെന്നും വേണുഗോപാല്‍ കത്തില്‍ ചൂണ്ടിക്കാട്ടി. ഇതുവഴി നിലവില്‍ സര്‍വീസ് നടത്തുന്ന വേണാട് എക്സ്പ്രസ്, ജനശതാബ്ദി എക്സ്പ്രസ് തുടങ്ങിയ ട്രെയിനുകള്‍ക്ക് വലിയ തിരക്കാണ്. ജോലിക്കും വിദ്യാഭ്യാസത്തിനും മറ്റാവശ്യങ്ങള്‍ക്കുമായി സഞ്ചരിക്കുന്ന യാത്രക്കാര്‍ അധികമായി ആശ്രയിക്കുന്ന സമയങ്ങള്‍ക്കു പുറമേ ഓണം, ക്രിസ്മസ് പോലുള്ള അവധി ദിവസങ്ങളിലും വലിയ തിരക്കാണ് അനുഭവപ്പെടുന്നതെന്നും കെ.സി. വേണുഗോപാല്‍ എംപി കത്തില്‍ ചൂണ്ടിക്കാട്ടി. വന്ദേഭാരത് പോലുള്ള ഉയര്‍ന്ന ഗതാഗതശേഷിയുള്ള ട്രെയിന്‍ ഈ ആവശ്യകതകള്‍ക്കനുസൃതമായ ദീര്‍ഘകാല പരിഹാരമായി മാറുമെന്നും അദ്ദേഹം പറഞ്ഞു. തിരക്ക് കുറച്ച് സുഗമവും സുരക്ഷിതവുമായ യാത്രയുടെ പ്രാധാന്യം, സാമൂഹിക-സാമ്പത്തിക നേട്ടങ്ങള്‍ എന്നിവ കണക്കിലെടുത്ത് ആലപ്പുഴ വഴിയുള്ള തീരദേശ പാതയിലേക്ക് വന്ദേ ഭാരത് സ്ലീപ്പര്‍ ട്രെയിന്‍ അനുവദിക്കുന്നത് പരിഗണിക്കണമെന്നും കെ.സി. വേണുഗോപാല്‍ ആവശ്യപ്പെട്ടു.

ലോറി തകരാറിലായി; റേഷൻ വിതരണം താറുമാറായി

മങ്കൊമ്പ്: ലോറി തകരാറിലാ യതിനെത്തുടർന്ന് റേഷൻ കടകളിൽ വിതരണത്തിനുള്ള ഭക്ഷ്യധാന്യങ്ങൾ രണ്ടു ദിവസങ്ങളായി പെരുവഴിയിൽ കിടക്കുന്നതായി ആക്ഷേപം. കുട്ടനാട് താലൂക്കിലെ എആർഡി 120, 126 എന്നീ റേഷൻ കടകളിലേക്കുള്ള ഭക്ഷ്യധാന്യങ്ങളാണ് വിതരണത്തിനെത്താതെ വഴിയിൽ കിടക്കുന്നത്. ഡോർ ഡലിവറി സംവിധാനത്തിന്‍റെ ഭാഗമായി കൊണ്ടിവരുന്നതിനിടയിൽ ബുധനാഴ്ചയാണ് ചമ്പക്കുളം സിഎംഐ ആശ്രമത്തിനു സമീപമെത്തിയപ്പോൾ ലോറി തകരാറിലായത്. ഇതെത്തുടർന്ന് പലവട്ടം കരാറുകാരനെയും സപ്ലൈകോ ഉദ്യോഗസ്ഥരെയും സമീപിച്ചു സാധനങ്ങൾ കടകളിലെത്തിക്കാൻ അടിയന്തര നടപടി വേണമെന്ന ആവശ്യപ്പെട്ടതായി വ്യാപാരികളുടെ പ്രതിനിധികൾ പറയുന്നു. എന്നാൽ, ലോറിയുടെ തകരാർ ഉടൻ പരിഹരിക്കാമെന്ന മറുപടിയല്ലാതെ, ഇന്നലെ വൈകുന്നേരം വരെ യാതൊരു നടപടിയും ആയില്ലെന്നും ഇവർ പറയുന്നു. ഭക്ഷ്യധാന്യങ്ങൾ ഗോഡൗണുകളിൽനിന്നും ലോറിയിൽ കയറ്റിയാൽ അന്നുതന്നെ കടകളിൽ ഇറക്കണമെന്നാണു നിബന്ധനയെന്നാണ് വ്യാപാരികൾ പറയുന്നത്. പോർട്ടബിലിറ്റി സംവിധാനമുള്ളതിനാൽ കാർഡുടമകൾക്ക് ഏതു കടകളിൽനിന്നുവേണമെങ്കിലും റേഷൻ സാധനങ്ങൾ വാങ്ങാവുന്നതാണ്. രണ്ടുദിവസത്തെ ഇടവേളയുണ്ടായതോടെ കാർഡുടമകൾ മറ്റു കടകളിൽ നിന്നു സാധനങ്ങൾ വാങ്ങാൻ നിർബന്ധിതരാകും. ഇതോടെ ഈ സാധനങ്ങൾ വിൽക്കപ്പെടാതെ കടകളിലിരിക്കുമെന്ന ആശങ്കയും വ്യാപാരികൾ പങ്കുവയ്ക്കുന്നു.

വിദ്യാർഥിനികളുടെ സത്യസന്ധതയ്ക്ക് പോലീസിന്‍റെ ബിഗ് സല്യൂട്ട്

കറ്റാനം: വനിത സിവിൽ പോലീസ് ഓഫീസറുടെ നഷ്ടപ്പെട്ട സ്വർണമാല തിരികെ നൽകിയ സ്‌കൂൾ വിദ്യാർഥിനികൾക്ക് പോലീസിന്‍റെ ആദരവ്. കറ്റാനം പോപ്പ് പയസ് എച്ച്എസ്എസിലെ അഞ്ചാം ക്ലാസ് വിദ്യാർഥിനികളായ രുദ്ര അനിൽ, അൽഹ ഫാത്തിമ എന്നിവരെയാണ് കുറത്തികാട് പോലീസ് സ്‌കൂളിലെത്തി ആദരിച്ചത്. സ്കൂൾ വളപ്പിൽനിന്നു കളഞ്ഞുകിട്ടിയ സ്വർണമാല ഹെഡ്മാസ്റ്റർ ടി.കെ. സാബുവിനെ വിദ്യാർഥിനികൾ ഏൽപ്പിക്കുകയായിരുന്നു. കുറത്തികാട് പോലീസ് സ്റ്റേഷനിലെ സീനിയർ സിവിൽ പോലീസ് ഓഫീസറും സ്കൂളിലെ എസ്പിസി ഡ്രിൽ ഇൻസ്ട്രക്ടറുമായ ഐ. നെസിയുടെ മാലയാണ് കുട്ടികൾക്ക് കളഞ്ഞുകിട്ടിയത്. കുറത്തികാട് പോലീസ് സ്റ്റേഷനിലെ എസ്എച്ച്ഒ പി.കെ. മോഹിത്, എസ്ഐ ഉദയകുമാർ, എഎസ്ഐമാരായ നൗഷാദ്, പ്രദീപ്‌ കുമാർ, സീനിയർ സിവിൽ പോലീസ് ഓഫീസർ അരുൺ കുമാർ, ഐ. നെസി, രഞ്ജിത്, പ്രവീൺ, ശ്യാം കുമാർ, രാജേഷ് എന്നിവർ സ്‌കൂളിലെത്തി ഉപഹാരം നൽകി വിദ്യാർഥിനികളെ ആദരിക്കുകയായിരുന്നു.

മണ്ഡലകാലം തുടങ്ങാൻ മാസങ്ങൾ മാത്രം; ഇടത്താവളം നിർമാണം ഇഴയുന്നു

ചെങ്ങന്നൂർ: ശബരിമല മണ്ഡലകാലം ആരംഭിക്കാൻ ഇനി ഏതാനും മാസങ്ങൾ മാത്രം ബാക്കി നിൽക്കെ ചെങ്ങന്നൂർ ഇടത്താവള നിർമാണം തീർക്കാനാകുമോയെന്ന് ആശങ്ക. തീർഥാടകർക്കായി ചെങ്ങന്നൂരിൽ നിർമിക്കുന്ന വിശ്രമകേന്ദ്രത്തിന്‍റെ പണി പകുതിയിലധികം ഇനിയം ബാക്കിയാണ്. ഈ മണ്ഡലകാലത്തിനു മുൻപ് ഇടത്താവളം തുറക്കുമെന്ന് ദേവസ്വം ബോർഡും മന്ത്രി സജി ചെറിയാനും നേരത്തെ പ്രഖ്യാപിച്ചിരുന്നു. വിപുല സൗകര്യങ്ങൾ പദ്ധതിയും സൗകര്യങ്ങളും ചെങ്ങന്നൂർ മഹാദേവ ക്ഷേത്രത്തിനു സമീപം കുന്നത്തുമലയിൽ 45 സെന്‍റ് സ്ഥലത്താണ് 10.48 കോടി രൂപ ചെലവിൽ മൂന്നുനില കെട്ടിടം നിർമിക്കുന്നത്. ഏകദേശം 40,000 ചതുരശ്ര അടി വിസ്തീർണമുള്ള ഈ കെട്ടിടം ശബരിമലയുടെ കവാടമായ ചെങ്ങന്നൂരിൽ എത്തിച്ചേരുന്ന ആയിരക്കണക്കിനു തീർഥാടകർക്കു സഹായമാകും. സീസൺ സമയത്ത് പ്രതിദിനം 15,000 മുതൽ 20,000 വരെ തീർഥാടകർ ചെങ്ങന്നൂരിലെത്തുന്നുണ്ട്. താഴത്തെ നിലയിൽ 25 കാറുകൾക്ക് ഒരേസമയം പാർക്ക് ചെയ്യാനുള്ള സൗകര്യമുണ്ട്. ഒന്നാം നിലയിൽ 300 പേർക്കു വിരിവയ്ക്കാനുള്ള സൗകര്യവും ഒരുക്കും. രണ്ടാം നിലയിൽ 350 പേർക്ക് ഒരേസമയം ഭക്ഷണം കഴിക്കാവുന്ന അന്നദാന മണ്ഡപവും പാചകശാലയും ഉണ്ടാകും. മറ്റ് ഇടത്താവളങ്ങൾ: കിഫ്ബി ഫണ്ടിൽനിന്ന് 116 കോടി രൂപ ചെലവഴിച്ച് ചെങ്ങന്നൂർ ഉൾപ്പെടെ ആറ് ഇടത്താവളങ്ങളാണ് നിർമിക്കുന്നത്. കഴക്കൂട്ടം, എരുമേലി, നിലയ്ക്കൽ, ചിറക്കര, മണിയങ്കോട് എന്നിവിടങ്ങളാണ് മറ്റ് ഇടത്താവളങ്ങൾ. ഈ പദ്ധതികൾ സമയബന്ധിതമായി പൂർത്തിയാക്കണമെന്ന് അയ്യപ്പസേവാ സമാജം, ഹിന്ദു ഐക്യവേദി, അയ്യപ്പസേവാ സംഘം തുടങ്ങിയ സംഘടനകൾ ആവശ്യപ്പെട്ടിട്ടുണ്ട്. നിർമാണത്തിലെ കാലതാമസം വലിയ വിമർശനങ്ങൾക്കിടയാക്കിയിട്ടുണ്ട്. മണ്ഡലകാലം തുടങ്ങുന്നതിനു മുൻപ് ഇടത്താവളം തുറക്കാനാകുമോ എന്ന് ഉറ്റുനോക്കുകയാണ് ഭക്തജനങ്ങൾ. നിർമാണത്തിലെ കാലതാമസം 2022ൽ ആരംഭിച്ച നിർമാണമാണ് ഇപ്പോഴും ഇഴഞ്ഞുനീങ്ങുന്നത്. കെട്ടിടത്തിന്‍റെ താഴത്തെ നിലയിലെ വയറിംഗ്, പ്ലംബിംഗ്, ടൈൽസ് തുടങ്ങിയ ജോലികൾ പൂർത്തിയായിട്ടില്ല. ഒന്നാം നില വാർക്കാനുള്ള ജോലികളും പുരോഗമിക്കുന്നു. നിലവിൽ തട്ട് അടിച്ച് കമ്പി കെട്ടുന്ന ജോലികളാണ് നടക്കുന്നത്. പൊതുമേഖലാ സ്ഥാപനമായ നാഷണൽ ബിൽഡിംഗ് കൺസ്ട്രക്ഷൻ കോർപറേഷനാണ് കരാറെടുത്തിരിക്കുന്നത്. ഇവർ ഉപകരാറുകൾ നൽകിയാണ് നിർമാണം നടത്തുന്നത്. നിർമാണം വേഗത്തിലാക്കാൻ കരാറുകാർക്കു നിർദേശം നൽകിയിട്ടുണ്ടെന്നും സീസൺ തുടങ്ങുന്നതിനു മുൻപ് ഇടത്താവളം തുറക്കാൻ കഴിയുമെന്നാണ് പ്രതീക്ഷയെന്നും ഉദ്യോഗസ്ഥർ പറയുന്നു.

ആലപ്പുഴ ഗവ. ഡെന്‍റല്‍ കോളജ് പുതിയ കെട്ടിടം ഉദ്ഘാടനം നാളെ

അമ്പലപ്പുഴ: ആലപ്പുഴ ഗവ. ഡെന്‍റല്‍ കോളജിന്‍റെ പുതിയ കെട്ടിടത്തിന്‍റെ ഉദ്ഘാടനം നാളെ നടക്കും. വൈകിട്ട് മൂന്നിന് മന്ത്രി വീണാ ജോർജ് ഉദ്ഘാടനം നിർവഹിക്കും. എച്ച്. സലാം എംഎൽഎ അധ്യക്ഷത വഹിക്കും. കെ.സി. വേണുഗോപാൽ എംപി മുഖ്യപ്രഭാഷണം നടത്തും. ജില്ലാ കളക്ടർ അലക്സ് വർഗീസ്, മെഡിക്കൽ വിദ്യാഭ്യാസ വിഭാഗം ഡയറക്ടർ ഡോ.കെ.വി. വിശ്വനാഥൻ, അമ്പലപ്പുഴ ബ്ലോക്ക് പഞ്ചായത്ത് പ്രസിഡന്‍റ് ഷീബ രാകേഷ്, വടക്ക് പഞ്ചായത്ത് പ്രസിഡന്‍റ് എസ്. ഹാരിസ്, ജില്ലാ പഞ്ചായത്തംഗം അഞ്ജു, ബ്ലോക്ക് പഞ്ചായത്തംഗം പ്രദീപ്തി സജിത്, മെഡിക്കൽ കോളജ് പ്രിൻസിപ്പൽ ഡോ.ബി. പത്മകുമാർ, ആശുപത്രി സൂപ്രണ്ട് ഡോ. എ. ഹരികുമാർ, വടക്ക് പഞ്ചായത്തംഗം റ്റി. ജയപ്രകാശ്, പിടിഎ പ്രസിഡന്‍റ് കെ.എ. നസീർ, പ്രോതോഡോന്‍റിക്സ് വകുപ്പ് മേധാവി ഡോ. ഷീല വെർജിനിയ റോഡ്രിഗസ് തുടങ്ങിയവർ പ്രസംഗിക്കും. പരിമിതിയില്‍ വീര്‍പ്പുമുട്ടി കഴിഞ്ഞിരുന്ന ഡെന്‍റല്‍ കോളജ് അത്യാധുനിക സൗകര്യങ്ങളോടെ പുതിയ കെട്ടിടത്തിലാണ് പ്രവർത്തിക്കുക. 3.85 കോടി രൂപ ചെലവില്‍ മൂന്നുനിലകളിലായി പൂര്‍ത്തിയാക്കിയ കെട്ടിടം ഇന്ത്യന്‍ ഡെന്‍റല്‍ കൗണ്‍സില്‍ നിര്‍ദേശിച്ച എല്ലാ മാനദണ്ഡങ്ങളും പാലിച്ചാണ് നിര്‍മിച്ചിരിക്കുന്നത്. പഠനത്തിനും പരിശീലനത്തിനും ആവശ്യമായ എല്ലാ സൗകര്യങ്ങളും ഒരുക്കിയിട്ടുണ്ട്. നാല് ക്ലാസ് മുറി, ക്ലിനിക്ക്, 50 പേര്‍ക്ക് ഒരേസമയം പരീക്ഷ എഴുതാന്‍ കഴിയുന്ന ഹാൾ, 500 പേര്‍ക്ക് ഇരിക്കാന്‍ കഴിയുന്ന ഓഡിറ്റോറിയം, വിശാലമായ ലൈബ്രറി, പ്രിന്‍സിപ്പലിനും അധ്യാപകര്‍ക്കും ജീവനക്കാര്‍ക്കും നഴ്‌സുമാര്‍ക്കായി പ്രത്യേകം മുറികള്‍ തുടങ്ങിയ സൗകര്യങ്ങളാണ് കെട്ടിടത്തിൽ ഒരുക്കിയിട്ടുള്ളത്. ഒരു ക്ലാസില്‍ 50 കുട്ടികള്‍ വീതം ആറു ബാച്ചുകളാണ് കോളജിലുള്ളത്. ഓറല്‍ മെഡിസിന്‍ ആൻഡ് റേഡിയോളജി, കൃത്രിമ ദന്തരോഗ വിഭാഗം, മോണ രോഗവിഭാഗം, കണ്‍സര്‍വേറ്റിവ് ഡെന്‍റിസ്ട്രി ആന്‍ഡ് എന്‍ഡോഡോണ്‍ടിക്‌സ്, ദന്തരോഗ വിഭാഗം, ഓറല്‍ ആന്‍ഡ് മാക്‌സിലോഫേഷ്യല്‍ സര്‍ജറി, കുട്ടികളുടെ ദന്തരോഗ വിഭാഗം, സാമൂഹിക ദന്തരോഗ വിഭാഗം, ഓറല്‍ പത്തോളജി തുടങ്ങിയ ഒമ്പതു വിഭാഗങ്ങളാണ് മെഡിക്കല്‍ കോളജിലുള്ളത്. ദിവസം രണ്ടു മണിക്കൂര്‍ തിയറി ക്ലാസുകളും ബാക്കി സമയം പ്രാക്ടിക്കൽ ക്ലാസുകളും നടക്കും. അടിസ്ഥാന സൗകര്യങ്ങൾ കൂടുതൽ മെച്ചമാക്കുന്നതിന്‍റെ ഭാഗമായി ഹോസ്റ്റലുകളും ക്വാര്‍ട്ടേഴ്‌സുകളും അടുത്തഘട്ടത്തില്‍ പൂര്‍ണമാക്കാനുള്ളനടപടികള്‍ പുരോഗമിക്കുകയാണ്. 2014ലാണ് അന്നത്തെ മുഖ്യമന്ത്രി ഉമ്മൻ ചാണ്ടി വണ്ടാനത്ത് ഡെന്‍റല്‍ കോളജിന്‍റെ നിർമാണോദ്ഘാടനം നിർവഹിക്കുന്നത്. തുടർന്ന് പാരാമെഡിക്കൽ ഇൻസ്റ്റിറ്റ്യൂട്ട് കെട്ടിടത്തിൽ കോളജിന്‍റെ പ്രവർത്തനം ആരംഭിച്ചു. മൂന്നു നിലകളുള്ള പുതിയ കെട്ടിട നിർമാണം ആരംഭിച്ചെങ്കിലും ആദ്യനിലമാത്രമാണ് പൂർത്തിയാക്കാനായത്. ഒറ്റ നിലയിൽ നിർമാണം പൂർത്തിയാക്കിയ കെട്ടിടത്തിന് മതിയായ അടിസ്ഥാന സൗകര്യങ്ങൾ ഇല്ലാത്തതിന്‍റെ പേരിൽ കോളജിന്‍റെ പ്രവർത്തനങ്ങൾക്ക് അനുമതി ലഭിച്ചില്ല. തുടർന്നാണ് മറ്റ് രണ്ടു നിലകളുടെ നിർമാണം ആരംഭിച്ചത്.

എടത്വ സെന്‍റ് അലോഷ്യസ് കുട്ടികള്‍ ഇന്‍റേണ്‍ഷിപ്പിലേക്ക്

എടത്വ: സെന്‍റ് അലോഷ്യസ് ഹയര്‍ സെക്കൻഡറി സ്‌കൂളിലെ വിദ്യാര്‍ഥികള്‍ ഇന്‍റേണ്‍ഷിപ്പിലേക്ക്. 2024-25 വര്‍ഷത്തെ മാരത്തണ്‍ മത്സരത്തിലാണ് എട്ടാം ക്ലാസ് വിദ്യാര്‍ഥികളായ യദു കൃഷ്ണന്‍, ശിവനന്ദന്‍, കെ.എസ്. യദു, ഏഴാം ക്ലാസ് വിദ്യാര്‍ഥികളായ അക്ഷയ് സന്തോഷ്, ശ്രീദേവ് സുരേഷ്, കെ.എസ്. അനന്തകൃഷ്ണന്‍ എന്നിവര്‍ സ്റ്റുഡന്‍റ് ഇന്നവേഷന്‍ പ്രോഗ്രാമിലേക്ക് തെരഞ്ഞെടുക്കപ്പെട്ടത്. ഈ കുട്ടികള്‍ക്ക് ആവശ്യമായ ധനസഹായം, ഇന്‍റേണ്‍ഷിപ്പ് എന്നിവ നല്‍കുന്നത് അടല്‍ ഇന്നവേഷന്‍ മിഷന്‍, മിനിസ്റ്ററി ഓഫ് എഡ്യൂക്കേഷന്‍, മിനിസ്റ്ററി ഓഫ് ഇന്നവേഷന്‍ സെല്‍ എന്നിവ ചേര്‍ന്നാണ്. ദേശീയ തലത്തില്‍ ഒരു ലക്ഷം ആശയങ്ങള്‍ കുട്ടികള്‍ വിവിധ സംസ്ഥാനങ്ങളില്‍ നിന്നുമായി സമര്‍പ്പിച്ചു. ഇതില്‍നിന്നു ശ്രദ്ധേയമായ 1000 ആശയങ്ങള്‍ ആണ് തെരഞ്ഞെടുക്കപ്പെട്ടിട്ടുള്ളത്. കുട്ടനാട് വിദ്യാഭ്യാസ ജില്ലയില്‍നിന്ന് ഏറ്റവും കൂടുതല്‍ പ്രോട്ടോടൈപ്പുകള്‍ സമര്‍പ്പിച്ചത് സെന്‍റ് അലോഷ്യസ് ഹയര്‍ സെക്കൻഡറി സ്‌കൂളില്‍ നിന്നുമാണ്. സ്‌കൂളിലെ എടിഎല്‍ ലാബിന്‍റെ സഹായത്താലാണ് കുട്ടികള്‍ തങ്ങളുടെ പ്രോട്ടോടൈപ്പുകള്‍ നിര്‍മിച്ചത്. 25 ടീമുകളില്‍ നിന്നും 74 കുട്ടികള്‍ സ്‌കൂള്‍ ഇന്നവേഷന്‍ മാരത്തണില്‍ പങ്കെടുത്തു. എടിഎല്‍ കോ ഓര്‍ഡിനേറ്ററും അധ്യാപകനുമായ ജെസ്റ്റില്‍ കെ. ജോണ്‍, ഹെഡ്മാസ്റ്റര്‍ ജിനോ ജോസഫ് എന്നിവര്‍ നേതൃത്വം നല്‍കി.

ബിന്ദുവിന്‍റെ 150 പവന്‍ എവിടെ: സഹോദരന്‍ പ്രവീണ്‍

ചേർത്തല: തന്‍റെ ആദ്യ പരാതിയിൽ കൃത്യമായി നടപടി കൈക്കൊണ്ടിരുന്നെങ്കിൽ അന്വേഷണം ഇത്രയും സങ്കീർണമാകുമായിരുന്നില്ലെന്ന് ചേർത്തല കടക്കരപ്പള്ളി സ്വദേശിനി ബിന്ദു പത്മനാഭന്‍റെ സഹോദരൻ പ്രവീൺകുമാർ. ആദ്യ അന്വേഷണത്തിൽ പാളിച്ച ഉണ്ടായി എന്നാണ് കരുതുന്നത്. എന്നാല്‍, ഇപ്പോഴത്തെ അന്വേഷണം തൃപ്തികരമാണ്. ആദ്യ അന്വേഷണത്തിലുണ്ടായ പാളിച്ചയാണ് ഇന്നും കേസ് തെളിയിക്കാനാവാതെ കുഴയാൻ കാരണം. 150 പവനിലേറെ സ്വർണാഭരണങ്ങൾ ബിന്ദുവിന്‍റെ കൈയിലുണ്ടായിരുന്നു. മാതാപിതാക്കളുടെ സമ്പാദ്യമായിരുന്നു ഇത്. ഈ ആഭരണത്തെപ്പറ്റി അന്വേഷിക്കണം. കൂടാതെ വ്യാജരേഖകൾ ചമച്ച് ബിന്ദുവിന്‍റെ പേരിലുള്ള വസ്തുവകൾ വിറ്റിരുന്നു. ഇതിലൂടെ ലഭിച്ച വൻതുക എവിടെ പോയെന്നും അന്വേഷണം നടത്തണം. ഇത് രണ്ടും ആദ്യഘട്ടത്തിൽ ഉണ്ടായില്ല. 1999 ലാണ് ജോലി തേടി ഇറ്റലിയിലേക്കു പോകുന്നത്. ഇതിനുശേഷം ബിന്ദുവിനെ കണ്ടിട്ടില്ല. സഹോദരിയുമായി അകൽച്ച ഒന്നും ഉണ്ടായിരുന്നില്ലെന്നും പ്രവീണ്‍ പറഞ്ഞു. 2017 ലാണ് ബിന്ദുവിനെ കാണാനില്ലെന്ന് കാട്ടി താൻ ചേർത്തല പോലീസിൽ പരാതി നൽകിയത്. അതിന് രണ്ടു മാസം മുമ്പ് താൻ നേരിട്ട് സെബാസ്റ്റ്യന്‍റെ വീട്ടിൽപോയി ബിന്ദു എവിടെ എന്ന് അന്വേഷിച്ചിരുന്നു. അന്നേ അയ്യാളുടെ പെരുമാറ്റത്തിൽ സംശയം തോന്നിരുന്നു. ചേർത്തലയിലെ എച്ച്ഡിഎഫ്സി ബാങ്കിൽ 50 ലക്ഷം രൂപ ബിന്ദു നിക്ഷേപിച്ചിട്ടുണ്ടെന്ന് സെബാസ്റ്റ്യൻ തന്നോട് പറഞ്ഞു. ഇതിനിടയിൽ ഒരു സ്ത്രീയോട് ബിന്ദുവിനെപ്പറ്റി തിരക്കുന്നതുപോലെ ഫോണിൽ സംസാരിച്ച് അഭിനയിച്ചു. സെബാസ്റ്റ്യന്‍റെ പെരുമാറ്റത്തിൽ അന്നേ സംശയമുണ്ടായിരുന്നതായും പ്രവീൺ പറഞ്ഞു. ഡിഎൻഎ ടെസ്റ്റിനായി രക്തം നൽകാൻ ഇറ്റലിയിൽനിന്ന് ചേർത്തലയിൽ വന്നതായിരുന്നു പ്രവീൺ.

സെബാസ്റ്റ്യന്‍ പിടിയിലായത് വെട്ടിമുകളില്‍നിന്ന്

കോട്ടയം: ചേര്‍ത്തലയിലെ നാലു ദുരൂഹമരണങ്ങളില്‍ പങ്കുണ്ടെന്നു സംശയിക്കുന്ന സെബാസ്റ്റ്യന്‍ (67)പോലീസ് കസ്റ്റഡിയിലാകുന്നത് ഏറ്റുമാനൂര്‍ വെട്ടിമുകളിലെ ഭാര്യവീട്ടില്‍ നിന്ന്. അതിരമ്പുഴ സ്വദേശിനി ജെയ്‌നമ്മയുടെ തിരോധാനത്തില്‍ ചോദ്യം ചെയ്യാന്‍ കോട്ടയം ക്രൈംബ്രാഞ്ച് ഓഫീസിലേക്കു വിളിച്ചുവരുത്തുമ്പോള്‍ ഇക്കാര്യം സെബാസ്റ്റ്യന്‍ ഭാര്യയോടു പറഞ്ഞിരുന്നില്ല. പോലീസ് സ്‌റ്റേഷനിലേക്ക് പോകുന്നതിനു തലേന്ന് വൈകുന്നേരം വെട്ടിമുകളിലുള്ള ഒരു കടയില്‍നിന്ന് സ്‌കൂള്‍ വിദ്യാര്‍ഥിനിയായ മകള്‍ക്ക് നോട്ട് ബുക്കും പേപ്പറും വാങ്ങിക്കൊടുത്തിരുന്നു. ഇതേ കടയില്‍ വീട്ടുസാധനങ്ങള്‍ വാങ്ങിയതില്‍ പന്തീരായിരം രൂപ സെബാസ്റ്റ്യന്‍ കൊടുക്കാനുണ്ട്. പതിമൂന്ന് വര്‍ഷം മുന്‍പാണ് ചേര്‍ത്തല പള്ളിപ്പുറം ഒന്‍പതാം വാര്‍ഡ് ചെങ്ങുംതറ സെബാസ്റ്റ്യന്‍ അന്പത്തിയാറാം വയസില്‍ വെട്ടിമുകളിലെത്തി നാല്‍പത്തിയഞ്ചു വയസുകാരിയെ വിവാഹം ചെയ്തത്. കുറച്ചുകാലം മാത്രമാണ് ഇവര്‍ ചേര്‍ത്തലയിലെ വീട്ടില്‍ താമസിച്ചത്. ഭാര്യയും മകളും ഏറെക്കാലവും വെട്ടിമുകളിലെ വീട്ടില്‍ മാതാപിതാക്കള്‍ക്കൊപ്പമാണ്. സെബാസ്റ്റ്യന്‍റെ ഭാര്യാ സഹോദരന്‍ അവിവാഹിതനാണ്. ഇടയ്ക്കിടെ സെബാസ്റ്റ്യന്‍ വെട്ടിമുകളില്‍ വന്നു താമസിക്കുകയും ചേര്‍ത്തലയിലേക്കെന്ന പേരില്‍ ദിവസങ്ങളോളം പലയിടങ്ങളിലും സഞ്ചരിക്കുകയും ചെയ്തിരുന്നു. ചേര്‍ത്തലയില്‍ പണമിടപാടുണ്ടെന്നും പലിശ വാങ്ങാന്‍ പോവുകയാണെന്നും ഭാര്യയെ ധരിപ്പിച്ചാണ് ഇയാള്‍ പോയിരുന്നത്. ജെയ്‌നമ്മയുടെ ദുരൂഹമരണത്തില്‍ സെബാസ്റ്റ്യന്‍ അറസ്റ്റിലായത് പത്രത്തിലും ചാനലുകളിലുംനിന്നാണ് അറിഞ്ഞതെന്ന് ഭാര്യ പറയുന്നു. ഭര്‍ത്താവ് ഇത്രത്തോളം ക്രൂരത ചെയ്യുമെന്നു വിശ്വസിക്കാനാവുന്നില്ലെന്നും ഇവര്‍ കരുതുന്നു. ഭാര്യക്കൊപ്പം ചോദ്യം ചെയ്തു കോട്ടയം: ജെയ്‌നമ്മയുടെ കൊലപാതകത്തില്‍ ഉള്‍പ്പെടെ വിവിധ കേസുകളില്‍ പോലീസ് സംശയിക്കുന്ന ചേര്‍ത്തല സ്വദേശി സെബാസ്റ്റ്യനെ ഇന്നലെ ഭാര്യയുടെ സാന്നിധ്യത്തില്‍ കോട്ടയം ക്രൈം ബ്രാഞ്ച് ചോദ്യം ചെയ്തു. ഇന്നലെ രാവിലെ പതിനൊന്നുമുതല്‍ നാലു മണിക്കൂര്‍ ചോദ്യം ചെയ്തു. സെബാസ്റ്റ്യന്‍ നടത്തിയതായി സംശയിക്കുന്ന കൃത്യങ്ങളെപ്പറ്റി വിവരവുമില്ലെന്നാണ് ഭാര്യയുടെ മൊഴി. വെട്ടിമുകളിലും ചേര്‍ത്തലയിലും മറ്റും ഭര്‍ത്താവ് മാറിമാറി താമസിക്കുന്നതിനാല്‍ ജെയ്‌നമ്മ കൊല്ലപ്പെട്ട ദിവസം സെബാസ്റ്റ്യന്‍ എവടെയായിരുന്നുവെന്ന് ഇവര്‍ ഓര്‍മിക്കുന്നില്ല. ചേര്‍ത്തലയിലെ വീട്ടില്‍ ഇവര്‍ വളരെ കുറച്ചുകാലമേ താമസിച്ചിട്ടുള്ളൂ. സെബാസ്റ്റ്യന്‍റെ കൃത്യങ്ങളിലൊന്നിലും ഭാര്യക്ക് അറിവോ പങ്കോ ഇല്ലെന്നാണ് സൂചന. ആറ് ദിവസം തുടരെ ചോദ്യം ചെയ്തിട്ടും സെബാസ്റ്റ്യന്‍ യാതൊന്നും പറയാന്‍ തയാറാകുന്നില്ല. ജെയ്‌നമ്മയെ കൊലചെയ്തതില്‍ വ്യക്തമായ തെളിവുകള്‍ നിരത്തിയപ്പോള്‍ പരസ്പരവിരുദ്ധ മറുപടിയാണ് നല്‍കുന്നത്. ഗൗരവത്തില്‍ ചോദ്യം ചെയ്യുമ്പോള്‍ പുച്ഛഭാവത്തില്‍ ചിരിക്കും. ചിലപ്പോള്‍ തല കുമ്പിട്ടിരിക്കും. പ്രമേഹമുള്ളതിനാല്‍ ക്ഷീണവും ഉറക്കവും അഭിനയിക്കും. ഈ സാഹചര്യത്തിലാണ് ഭാര്യയെ വിളിച്ചുവരുത്തിയത്. യാതൊരു ഭാവഭേദവുമില്ലാതെ ഭാര്യയോട് വീട്ടുവിശേഷങ്ങള്‍ പ്രതി ആരായുകയും ചെയ്തു. സെബാസ്റ്റ്യന്‍റെ കൂര്‍മ ബുദ്ധി വലയ്ക്കുന്നു ചേര്‍ത്തല: സ്ത്രീകളുടെ തിരോധാനകേസ് അന്വേഷിക്കുന്ന ക്രൈംബ്രാഞ്ച് സംഘത്തിന് സെബാസ്റ്റ്യന്‍റെ കൂർമബുദ്ധിയും തന്ത്രങ്ങളും വലിയ അന്വേഷണം ദുഷ്കരമാക്കുന്നു. എസ്എസ്എല്‍സി വിദ്യാഭ്യാസം മാത്രമുള്ള സെബാസ്റ്റ്യന്‍ ആദ്യം ഒരു സ്വകാര്യ ബസിലെ ജീവനക്കാരനായിരുന്നു. പിന്നീട് അംബാസിഡര്‍ കാര്‍ വാങ്ങി ടാക്സി ഓടി. ഇതിനിടയിലാണ് സ്ഥലക്കച്ചവട രംഗത്തേക്ക് ഇറങ്ങുന്നത്. ഈ കാലയളവിലാണ് കാണാതായെന്നു പറയുന്ന സ്ത്രീകളുമായി സെബാസ്റ്റ്യന്‍ ബന്ധപ്പെടുന്നത്. നാലു സ്ത്രീകളുടെ തിരോധാനക്കേസ് മുന്നിലുണ്ടെങ്കിലും അതു സെബാസ്റ്റ്യനുമായി കണക്ട് ചെയ്യാന്‍ കൃത്യമായ തെളിവ് കണ്ടെത്താന്‍ ഇതുവരെയും അന്വേഷണ സംഘത്തിനു കഴിഞ്ഞിട്ടില്ല. ഡോഗ് സ്ക്വാഡ്, ഫോറന്‍സിക് വിദഗ്ധര്‍, റഡാര്‍ സംവിധാനം തുടങ്ങി എല്ലാവിധ രീതിയിലും അന്വേഷണം നടത്തിയിട്ടും സെബാസ്റ്റ്യനെതിരെ കൃത്യമായ തെളിവുകൾ ഇനിയും ലഭിച്ചിട്ടില്ല. സെബാസ്റ്റ്യന്‍റെ വീട്ടില്‍നിന്നു ലഭിച്ച അസ്ഥിക്കഷണങ്ങളുടെ ഡിഎന്‍എ പരിശോധനാഫലം കാണാതായ സ്ത്രീകളുടേതാണെന്നു തെളിഞ്ഞാല്‍ മാത്രമേ ഇയാളെ പ്രതിക്കൂട്ടിലാക്കാനാകൂ. അതേസമയം, ക്രൈംബ്രാഞ്ചിന്‍റെ ചോദ്യം ചെയ്യലിൽ ആരോഗ്യപ്രശ്നം ചൂണ്ടികാട്ടിയാണ് നിസഹകരിക്കുകയാണ് ഇയാൾ. കുറ്റമൊന്നും ചെയ്തിട്ടില്ലെന്നാണ് നിലപാട്. നാലു സ്ത്രീകളെ കൊലപ്പെടുത്തിയ സംഭവത്തില്‍ സെബാസ്റ്റ്യന്‍ കുറ്റക്കാരനാണെന്ന രീതിയിലുള്ള പ്രചരണം നടക്കുമ്പോഴും അയാള്‍ സൗമ്യനാണെന്നും ഇങ്ങനെയുള്ള കാര്യങ്ങള്‍ ചെയ്യുമെന്നു വിശ്വസിക്കുന്നില്ലെന്നുമാണ് സെബാസ്റ്റ്യന്‍റെ ഭാര്യ പോലും പറയുന്നത്.

സ്ത്രീകളുടെ ദുരൂഹ തിരോധാനം: വീട്ടുവളപ്പിൽ റഡാർ പരിശോധന

ചേർത്തല: ദുരൂഹ സാഹചര്യത്തിൽ സ്ത്രീകളെ കാണാതായ കേസിൽ പ്രതി സെബാസ്റ്റ്യന്‍റെയും അടുപ്പക്കാരിയായിരുന്ന റോസമ്മയുടെയും വീട്ടുവളപ്പിൽ ക്രൈംബ്രാഞ്ച് പരിശോധന നടത്തി. മണിക്കൂറുകൾ നീണ്ട പരിശോധനയിൽ സെബാസ്റ്റ്യന്‍റെ വീട്ടിലെ അടുപ്പിൽനിന്നു ജയ്നമ്മയുടേതെന്നു സംശയിക്കുന്ന വാച്ചിന്‍റെ ഭാഗങ്ങൾ കത്തിച്ച നിലയിൽ കണ്ടെത്തി. റോസമ്മയുടെ വീട്ടില്‍ കോഴിവളർത്താനായി കെട്ടിയ ഷെഡിൽ റഡാറിൽ സിഗ്നൽ കിട്ടിയ ഭാഗങ്ങൾ പോലീസ് രേഖപ്പെടുത്തി നിയന്ത്രണത്തിലാക്കി. അടുത്ത ദിവസം ഇവിടെ പൊളിച്ചു പരിശോധിക്കും. ഏഴു മീറ്റർ ആഴത്തിൽ നാലു സ്ത്രീകളുടെ തിരോധാനവുമായി ബന്ധപ്പെട്ട് പള്ളിപ്പുറം ചെങ്ങത്തറ സി.എം. സെബാസ്റ്റ്യന്‍റെ വീട്ടില്‍ ക്രൈംബ്രാഞ്ച് സംഘം ആധുനിക റഡാര്‍ ഉപയോഗിച്ചാണ് പരിശോധന നടത്തിയത്. ഭൂമിയുടെ ഉപരിതലം സിഗ്നലുകള്‍ ഉപയോഗിച്ചു ചിത്രീകരിക്കുന്ന ഗ്രൗണ്ട് പെനെട്രേറ്റിംഗ് റഡാര്‍ (ജിപിആര്‍) സംവിധാനമാണ് ഇതിനായി സ്ഥലത്തെത്തിച്ചത്. ഭൂമിയുടെ അടിയിലേക്ക് ഏഴുമീറ്റര്‍ ആഴം വരെയുള്ള വസ്തുക്കളുടെ വ്യക്തമായ സൂചന ലഭിക്കുമെന്നതാണ് ഈ ഉപകരണത്തിന്‍റെ പ്രത്യകത. ശനിയാഴ്ച സെബാസ്റ്റ്യനുമായി ക്രൈംബ്രാഞ്ച് സംഘം തെളിവെടുപ്പ് നടത്തിയിരുന്നു. വീടിനകത്തുണ്ടായിരുന്ന ഗ്രാനൈറ്റ് പാകിയ മുറിയുടെ തറ പൊളിച്ചു പരിശോധിച്ചു. തുടര്‍ന്നു സമീപമുള്ള കുളവും തോടുകളും അഗ്നിശമനസേനയുടെ മോട്ടോര്‍ ഉപയോഗിച്ചു വെള്ളം വറ്റിച്ചു പരിശോധന നടത്തിയപ്പോള്‍ അസ്ഥിക്കഷണങ്ങളും ലേഡീസ് ബാഗും തുണിക്കഷണങ്ങളും കണ്ടെത്തിയിരുന്നു. പുരയിടത്തില്‍ എവിടെയാണ് കാണാതായവരുടെ ശരീരം മറവുചെയ്തിരിക്കുന്നതെന്നറിയാനാണ് ആധുനിക റഡാര്‍ സംവിധാനം എത്തിച്ചത്. 12 സ്ഥലങ്ങൾ സംശയാസ്പദം ചേർത്തല: സ്ത്രീകളുടെ തിരോധനവുമായി ബന്ധപ്പെട്ട് ഇന്നലെ രാവിലെ ആരംഭിച്ച റഡാര്‍ പരിശോധനയിൽ പ്രതി സെബാസ്റ്റ്യന്‍റെ പുരയിടത്തിൽ സംശയാസ്പദ സിഗ്നൽ ലഭിച്ച 12 സ്ഥലങ്ങൾ മാർക്ക് ചെയ്തിട്ടുണ്ട്. തിരുവനന്തപുരത്തുനിന്നു ഭൗമശാസ്ത്ര ഉദ്യോഗസ്ഥരാണ് റഡാറുമായി കാടുകയറി പുരയിടത്തിൽ പരിശോധനയ്ക്ക് എത്തിയത്. ഈ മാര്‍ക്ക് ചെയ്ത ഭാഗത്താണ് മണ്ണുമാന്തി യന്ത്രം ഉപയോഗിച്ചു കുഴിച്ചു തുടങ്ങിയിട്ടുണ്ട്. അടയാളപ്പെടുത്തിയ സ്പോട്ടില്‍ തറനിരപ്പില്‍നിന്നു രണ്ടര മീറ്ററോളം കുഴിയെടുത്ത് മണ്ണ് പരിശോധിച്ചു. മാര്‍ക്കുചെയ്ത ഭാഗത്തെ രണ്ടു തെങ്ങ് പിഴുതു മാറ്റിയ ശേഷം പരിശോധിച്ചു. ഇവിടെനിന്നു സംശയാസ്പദമായ ചില വസ്തുക്കള്‍ ഫോറന്‍സിക് വിദഗ്ധര്‍ എടുത്തെങ്കിലും മൃതദേഹ അവശിഷ്ടങ്ങള്‍ കണ്ടെത്താന്‍ കഴിഞ്ഞില്ല. പരിശോധന വൈകുന്നേരം വരെ നീണ്ടു. കോട്ടയം ആലപ്പുഴ ക്രൈംബ്രാഞ്ച് സംഘത്തിന്‍റെ നേതൃത്വത്തിലാണ് ഇന്നലെ സെബാസ്റ്റ്യന്‍റെ വീട്ടില്‍ പരിശോധന നടത്തിയത്. ചേർത്തല സ്വദേശിനികളായ കടക്കരപ്പള്ളി പത്മവിലാസത്തിൽ ബിന്ദു പത്മനാഭൻ, വാരനാട് ശാസ്താംകവല വെളിയിൽ വീട്ടിൽ ഐഷ, ഏറ്റുമാനൂർ സ്വദേശിനി ജെയനമ്മ, ചേര്‍ത്തല തെക്ക് പ‌ഞ്ചായത്ത് വള്ളാകുന്നത്ത് വെളി വീട്ടില്‍ സിന്ധു എന്നിവരെ കാണാതായ സംഭവത്തിലാണ് അന്വേഷണം നടക്കുന്നത്. ഏറ്റുമാനൂർ സ്വദേശിനി ജെയനമ്മയെ കാണാതായ സംഭവത്തിലാണ് സെബാസ്റ്റ്യനെ പ്രതിചേര്‍ത്ത് അന്വേഷിക്കുന്നത്. സെബാസ്റ്റ്യന്‍റെ വീട്ടിൽ ക്രൈംബ്രാഞ്ച് നടത്തിയ നേരത്തെ പരിശോധനയിൽ മൃതദേഹ അവശിഷ്ട‌ങ്ങൾ ലഭിച്ചതോടെ കാണാതായ നാലുപേരുടെയും അടുത്ത ബന്ധുക്കള്‍ ഡിഎന്‍എ പരിശോധനയ്ക്കായി രക്തസാമ്പിളുകള്‍ നല്‍കിയിട്ടുണ്ട്. രണ്ടുദിവസത്തിനുള്ളില്‍ പരിശോധനാഫലം ലഭിക്കുമെന്നാണ് ക്രൈംബ്രാഞ്ച് സംഘം പറയുന്നത്.

സ്‌കൂട്ടര്‍ ഇടിച്ച് ചികിത്സയിലിരുന്ന ഗൃഹനാഥന്‍ മരിച്ചു

എടത്വ: റോഡ് മുറിച്ചു കടക്കുന്നതിനിടെ യുവതികള്‍ സഞ്ചരിച്ച സ്‌കൂട്ടര്‍ ഇടിച്ച് പരിക്കേറ്റ് ചികിത്സയിലിരുന്ന ഗൃഹനാഥന്‍ മരിച്ചു. എടത്വ മരിയാപുരം തുണ്ടിപ്പറമ്പില്‍ റ്റി.എന്‍. മോഹനന്‍ (71) ആണ് മരിച്ചത്. തിങ്കളാഴ്ച ഉച്ചയ്ക്ക് 12ന് എടത്വ-തകഴി സംസ്ഥാനപാതയില്‍ കേളമംഗലം മോട്ടര്‍തറയ്ക്കു സമീപമാണ് അപകടം. ഗുരുതര പരിക്കുകളോടെ പരുമല ആശുപത്രിയില്‍ പ്രവേശിപ്പിച്ച മോഹനന്‍ ഇന്നലെ രാവിലെ 10ന് മരിക്കുകയായിരുന്നു. രണ്ടു യുവതികള്‍ സഞ്ചരിച്ച സ്‌കൂട്ടറാണ് മോഹനനെ ഇടിച്ചുവീഴ്ത്തിയത്. കരിങ്കല്ല് കോണ്‍ട്രാക്ടറായ മോഹനന്‍ കേളമംഗലം ഭാഗത്ത് കല്ല് ഇറക്കുന്നതുമായി ബന്ധപ്പെട്ട് എത്തിയതാണ്. കടമാട്, കരീശേരില്‍, ചന്ദനപ്പറമ്പ് കുടുംബക്കാവ് ശ്രീദേവീ ക്ഷേത്രത്തിന്‍റെ മുഖ്യരക്ഷാധികാരിയും ക്ഷേത്രം ശാന്തിയുമാണ്. എടത്വ പോലീസ് മേല്‍നടപടി സ്വീകരിച്ചു. സംസ്‌കാരം ഇന്നു മൂന്നിന് വീട്ടുവളപ്പില്‍. ഭാര്യ: ഉഷ. പൊടിയാടി പീടികപ്പറമ്പില്‍ കുടുംബാംഗമാണ്. മക്കള്‍: സുഭാഷ്, സുനിത. മരുമക്കള്‍: സജി, മഞ്ജു.

താക്കോൽദ്വാര ശസ്ത്രക്രിയയിൽ നൂറോളം കല്ലുകൾ നീക്കി

തൊടുപുഴ: കടുത്ത വയറു വേദനയെത്തുടർന്ന് ആശുപത്രിയിലെത്തിയ 44 കാരന്‍റെ വൃക്കയിൽനിന്നു നൂറോളം കല്ലുകൾ നീക്കം ചെയ്തു. മുതലക്കോടം ഹോളിഫാമിലി ആശുപത്രിയിൽ നടത്തിയ ശസ്ത്രക്രിയയിലാണ് കല്ലുകൾ നീക്കിയത്. ആശുപത്രിയിലെ പരിശോധനയിൽ വൃക്കയിൽ കല്ലുകൾ കണ്ടെത്തിയതിനെത്തുടർന്ന് ന്യൂറോളജിസ്റ്റ് ഡോ. ആർ. ശരവണന്‍റെ നേതൃത്വത്തിൽ നടത്തിയ നൂതന താക്കോൽ ദ്വാര ശസ്ത്രക്രിയയിലൂടെ കല്ലുകൾ നീക്കം ചെയ്തു.

മണ്ണാറശാല വലിയമ്മ സാവിത്രി അന്തർജനം ശതാഭിഷക്തയായി

ഹരിപ്പാട്: മണ്ണാറശാല നാഗരാജ ക്ഷേത്രത്തിലെ വലിയമ്മ സാവിത്രി അന്തർജനം ശതാഭിഷിക്തയായി. നിലവറത്തളത്തിൽ നടന്ന ചടങ്ങിൽ ആയിരക്കണക്കിന് ഭക്തരും കുടുംബാംഗങ്ങളും പങ്കാളികളായി. പുലർച്ചേ ഗണപതിഹോമത്തോടെയായിരുന്നു തുടക്കം. പിന്നാലെ മൃത്യുഞ്ജയഹോമം, വിഷ്ണുപൂജ എന്നിവയും നടന്നു. തുടർന്ന് ശതാഭിഷേക കലശപൂജ തുടങ്ങി. പന്തൽ വൈദികൻ ദാമോദരൻ നമ്പൂതിരിയുടെ മുഖ്യകാർമികത്വത്തിലെ ദശദാനമാണ് തുടർന്നു നടന്നത്. പ്രത്യക്ഷപശുദാ നത്തിനുള്ള ഒരുക്കങ്ങളായിരുന്നു പിന്നീട് നടന്നത്. വൈദികശ്രേഷ്ഠൻ ശ്രീധരൻ നമ്പൂതിരിക്കാണ് പശുവിനെയും കിടാവിനെയും ദാനം ചെയ്തത്. ശതാഭിഷേകത്തിന്‍റെ ഏറ്റവും പ്രധാനചടങ്ങായിരുന്ന കലശാഭിഷേകം. തന്ത്രി പടിഞ്ഞാറേ പുല്ലാംവഴി ദേവൻ കൃഷ്ണൻ നമ്പൂതിരിയാണ് കലശാഭിഷേകം നടത്തിയത്. കലശാഭിഷേകത്തിനു ശേഷം കുടുംബാംഗങ്ങൾ വലിയമ്മയ്ക്ക് ദക്ഷിണനൽകി പ്രാർഥിച്ചു. തുടർന്ന് വലിയമ്മ ഇല്ലത്തിന്‍റെ തെക്കേവാതിലിൽ ഭക്തർക്ക് ദർശനം നൽകി. വലിയമ്മയുടെ ശതാഭിഷേകം ഇല്ലത്തെ നിലവറയിൽ നടന്നതിനൊപ്പം മണ്ണാറശാല ക്ഷേത്രത്തിലും വിശേൽ ചടങ്ങുകളുണ്ടായിരുന്നു. വൈകുന്നേരം വരെ നീണ്ട സദ്യയിൽ ആയിരക്കണക്കിന് ഭക്തരാണ് പങ്കാളികളായത്. മണ്ണാറശാല വലിയമ്മയുടെ ശതാഭിഷേകത്തോടനുബന്ധിച്ച് കഴിഞ്ഞ ദിവസം നടന്ന ആഘോഷ പരിപാടികളിൽ കൃഷിവകുപ്പ് മന്ത്രി പി. പ്രസാദ് പങ്കെടുത്തു. ഇന്നലെ സിനിമാതാരങ്ങളായ ദേവൻ, അനുശ്രീ, ജില്ലാ കളക്ടർ അലക്സ് വർഗീസ്, നഗരസഭ ചെയർമാൻ കെ.കെ. രാമകൃഷ്ണൻ ഉൾപ്പെടെ നിരവധി പ്രമുഖരാണ് ക്ഷേത്രത്തിലെത്തിയത്.

നെഹ്റുട്രോഫി: നഗരസഭാതല സബ് കമ്മിറ്റികള്‍ രൂപീകരിച്ചു

ആലപ്പുഴ: നഗരസഭയുടെ നേതൃത്വത്തിൽ 71-ാമത് നെഹ്റുട്രോഫി ജലോത്സവത്തിനു മുന്നോടിയായി സാംസ്കാരിക പരിപാടികൾ, സാംസ്കാരിക ജാഥ എന്നിവ ഏകോപിപ്പിക്കുന്നതിനായി നഗരസഭയില്‍ വിവിധ സബ് കമ്മിറ്റികള്‍ രൂപീകരിച്ചു. നഗരസഭാതല കമ്മിറ്റിയുടെ രക്ഷാധികാരികളായി കെ.സി. വേണുഗോപാല്‍ എംപി, എംഎല്‍എമാരായ പി.പി. ചിത്തരഞ്ജന്‍, എച്ച്. സലാം, കളക്ടര്‍ അലക്സ് വര്‍ഗീസ്, ജില്ലാ പോലീസ് മേധാവി മോഹനചന്ദ്രന്‍, സബ്കളക്ടര്‍ സമീര്‍ കൃഷ്ണ എന്നിവര്‍ ചുമതല വഹിക്കും. പ്രോഗ്രാം കമ്മിറ്റി ചെയര്‍പേഴ്സണ്‍ കെ.കെ. ജയമ്മ, കണ്‍വീനര്‍ പി.എസ്.എം. ഹുസൈന്‍, കമ്മിറ്റി അംഗങ്ങള്‍ ആയി എം.ആര്‍. പ്രേം, സൗമ്യരാജ്, റീഗോ രാജു, ഡി.പി. മധു, പി.എസ്. ഫൈസല്‍, ഇല്ലിക്കല്‍ കുഞ്ഞുമോന്‍, അജയ് സുധീന്ദ്രന്‍, പി.കെ. സദാശിവന്‍പിള്ള, സുരേഷ് , റോയ് പി. തീയോച്ചന്‍, സുദര്‍ശനന്‍ വര്‍ണം എന്നിവരെയും തീരുമാനിച്ചു. സാംസ്കാരിക ഘോഷയാത്ര കമ്മിറ്റി ആര്‍. വിനിത, വോളന്‍റിയര്‍ ആന്‍ഡ് ഡിസിപ്ലിന്‍ കമ്മിറ്റി ചെയര്‍മാന്‍ ബി. മെഹബൂബ്, ലൈറ്റ് - സൗണ്ട് ആൻഡ് സ്റ്റേജ് എം.ജി. സതീദേവി, പബ്ലിസിറ്റി ആൻഡ് മീഡിയ ആനന്ദ് ബാബു, ഹരിത പ്രോട്ടോകോള്‍ എ.എസ് . കവിത, ദീപാലങ്കാരം നസീര്‍ പുന്നയ്ക്കല്‍, ഫുഡ് കമ്മിറ്റി ബി. അജേഷ് എന്നിവരെ യഥാക്രമം എട്ടു സബ് കമ്മിറ്റികളുടെ ചെയര്‍മാന്‍മാരായി തെരഞ്ഞെടുത്തു. ടിക്കറ്റ് വില്‍പ്പന നാളെമുതല്‍ ആലപ്പുഴ: പുന്നമടക്കായലില്‍ നടക്കുന്ന 71-ാമത് നെഹ്റു ട്രോഫി വള്ളംകളിയുടെ ടിക്കറ്റ് വില്‍പ്പന നാളെ ആരംഭിക്കും. ആലപ്പുഴ ജില്ലയിലെയും എറണാകുളം, കോട്ടയം, പത്തനംതിട്ട, കൊല്ലം എന്നീ സമീപ ജില്ലകളിലെയും എല്ലാ പ്രധാന സര്‍ക്കാര്‍ ഓഫീസുകളില്‍നിന്നും ടിക്കറ്റുകള്‍ ലഭിക്കും. കൂടാതെ പ്രമുഖ ബാങ്കുകള്‍ വഴി ഓണ്‍ലൈനായും ടിക്കറ്റുകള്‍ ലഭിക്കും. നാലുപേര്‍ക്ക് പ്രവേശനം ലഭിക്കുന്ന നെഹ്‌റു പവലിയനിലെ പ്ലാറ്റിനം കോര്‍ണര്‍ ടിക്കറ്റ് വില 25,000 രൂപയാണ്. 10,000 രൂപയാണ് ഒരാള്‍ക്ക് പ്രവേശനം ലഭിക്കുന്ന പ്ലാറ്റിനം കോര്‍ണര്‍ ടിക്കറ്റ് നിരക്ക്. പ്ലാറ്റിനം കോര്‍ണ്‍ ടിക്കറ്റുകള്‍ എടുക്കുന്നവരെ പവലിയനിലെത്തിക്കാന്‍ പ്രത്യേക ബോട്ട് സൗകര്യം ഏര്‍പ്പെടുത്തിയിട്ടുണ്ട്. ഇവര്‍ക്ക് ഭക്ഷണസൗകര്യവും പവലിയനില്‍ തന്നെ ഒരുക്കിയിട്ടുണ്ട്. നെഹ്‌റു പവലിയിനിലെ ടൂറിസ്റ്റ് ഗോള്‍ഡ് ടിക്കറ്റ് 3000 രൂപ, ടൂറിസ്റ്റ് സില്‍വര്‍ 2500, കോണ്‍ക്രീറ്റ് പവലിയനിലെ റോസ് കോര്‍ണര്‍ 1500, വിക്ടറി ലെയ്‌നിലെ വുഡന്‍ ഗ്യാലറി 500, ഓള്‍ വ്യൂ വുഡന്‍ ഗാലറി 400, ലേക്ക് വ്യൂ ഗോള്‍ഡ് 200, ലോണ്‍ 100 എന്നിങ്ങനെയാണ് മറ്റു ടിക്കറ്റുകളുടെ നിരക്ക്. പന്തൽ കാൽനാട്ട് കർമം നടത്തി ആലപ്പുഴ: നെഹ്റു ട്രോഫി വള്ളംകളിയുടെ പന്തൽ നിർമാണത്തിന് ഔദ്യോഗിക തുടക്കമായി. പുന്നമട ഫിനിഷിംഗ് പോയിന്‍റിൽ പന്തൽ കാൽനാട്ടുകർമം എൻടിബിആർ സൊസൈറ്റി ചെയർമാനും ജില്ലാ കളക്ടറുമായ അലക്സ് വർഗീസ് നിർവഹിച്ചു. മുനിസിപ്പൽ ചെയർപേഴ്സൺ കെ.കെ. ജയമ്മ അധ്യക്ഷത വഹിച്ചു. നഗരസഭ അംഗം എം.ആർ. പ്രേം, ഇൻഫ്രാസ്ട്രക്ചർ കമ്മിറ്റി കൺവീനറും ഇറിഗേഷൻ എക്സിക്യൂട്ടീവ് എൻജിനിയറുമായ വിനോദ് പി.എസ്, ഇൻഫ്രാസ്ട്രക്ചർ കമ്മിറ്റിയംഗങ്ങളായ എസ്.എം. ഇക്ബാൽ, എ.വി. മുരളി, ജോസ് കാവനാട്, ബേബി കുമാരൻ, ടോമിച്ചൻ ആന്‍റണി, എം.വി. ഹൽത്താഫ്, കെ.പി. ഹരൺബാബു, സണ്ണി മുടന്താഞ്ജലി, ജോണി മുക്കം, കെ.എം.അഷ്റഫ്, റജി ജോബ്, അസി. എക്സിക്യൂട്ടീവ് എൻജിനിയർ രഞ്ജു രാജൻ, അസി. എൻജിനിയർ ദിലീപ് എന്നിവർ പ്രസംഗിച്ചു.

ഹിരോഷിമ ദിനാചരണം

ചേപ്പാട്: ചേപ്പാട് ക്രൈസ്റ്റ് കിംഗ് ഹയർ സെക്കൻഡറി സ്‌കൂളിലെ ഹിരോഷിമ- നാഗസാക്കി ദിനാചരണം ശ്രദ്ധേയമായി. സമാധാനത്തിന്‍റെ പ്രതീകമായ വെള്ളരിപ്രാവിനെ പറത്തിയാണ് സ്‌കൂളിലെ നാഷണൽ സർവീസ് സ്‌കീമിന്‍റെ നേതൃത്വത്തിൽ വിദ്യാർഥികളും അധ്യാപകരും ചേർന്ന് ഹിരോഷിമ ദിനം ആചരിച്ചത്. ലോകത്ത് യുദ്ധമല്ല സമാധാനമാണ് വേണ്ടതെന്ന സന്ദേശവുമായി വിദ്യാർഥികൾ യുദ്ധ വിരുദ്ധ പ്രതിജ്ഞചൊല്ലി. ഹിരോഷിമയിലെ അമേരിക്കയുടെ അണുബോബ് ആക്രമണത്തിൽ രക്തസാക്ഷിയാവേണ്ടിവന്ന ജപ്പാനീസ് പെൺകുട്ടി സഡാക്കോ സസാക്കിയുടെ സ്മരണയ്ക്കായി വിദ്യാർഥികൾ അനേകം ഒറിഗാമി കൊക്കുകളെ കടസാലുകൊണ്ട് നിർമിച്ചാണ് ഹിരോഷിമ ദിനാചരണത്തിന് സ്‌കൂളിൽ വേദി ഒരുക്കിയത്. സ്‌കൂൾ പ്രിൻസിപ്പൽ ബിനു കെ. ശാമുവേൽ ഉദ്‌ഘാടനം ചെയ്തു. പിടി എ പ്രസിഡന്‍റ് സുനിൽകുമാർ അധ്യക്ഷത വഹിച്ചു. മാധ്യമ പ്രവർത്തകൻ നൗഷാദ് മാങ്കാംകുഴി, അധ്യാപകരായ സിൻസി പി. സെബാസ്റ്റ്യൻ, ജൂലി ജോയ് എന്നിവർ പ്രസംഗിച്ചു.

മെറിറ്റ് അവാർഡ് വിതരണം

അമ്പലപ്പുഴ: പുന്നപ്ര ഡോ. അംബേദ്കർ മെമ്മോറിയൽ ഗവ. മോഡൽ റസിഡൻഷ്യൽ സ്കൂളിൽ മെറിറ്റ് അവാർഡ് വിതരണം സംഘടിപ്പിച്ചു. വിജയമധുരം എന്ന പേരിൽ സംഘടിപ്പിച്ച പരിപാടി എച്ച്. സലാം എംഎൽഎ ഉദ്ഘാടനം ചെയ്തു. സ്കൂൾ ഓഡിറ്റോറിയത്തിൽ നടന്ന പരിപാടിയിൽ പിടിഎ പ്രസിഡന്‍റ് ദിലേഖ് സി രാജ് അധ്യക്ഷനായി. പുന്നപ്ര വടക്ക് പഞ്ചായത്ത് പ്രസിഡന്‍റ് സജിത സതീശൻ, സിനിമ മിമിക്രിതാരം മധു പുന്നപ്ര, പഞ്ചായത്തംഗം സാജൻ ഏബ്രഹാം, പട്ടികജാതി ക്ഷേമ സമിതിയംഗം ഡി. ബിനുമോൻ, സ്കൂൾ പ്രധാനാധ്യാപിക എസ്. ജ്യോതിശ്രീ, ഹയർ സെക്കൻഡറി സ്റ്റാഫ് സെക്രട്ടറി ടി. എ. റസീല, എച്ച്എസ് സ്റ്റാഫ് സെക്രട്ടറി കെ.ജെ. അലോഷ്യസ്, സീനിയർ സൂപ്രണ്ട് പി.ഐ. സിന്ധു എന്നിവർ പ്രസംഗിച്ചു. പ്രിൻസിപ്പൽ വി.എം. പ്രമീളാകുമാരി സ്വാഗതം പറഞ്ഞു.

കാത്തിരിപ്പിനു വിരാമം, ചാരുംമൂട് മിനി സിവിൽസ്റ്റേഷൻ നിർമാണം തുടങ്ങി

ചാരുംമൂട്: വർഷങ്ങളുടെ കാത്തിരിപ്പിനൊടുവിൽ ചാരുംമൂട് മിനി സിവിൽസ്റ്റേ ഷൻ കെട്ടിടത്തിന്‍റെ നിർമാണം ആരംഭിച്ചു. 5.22 കോടി രൂപയുടെ ഭരണാനുമതിയാണ് ലഭിച്ചത്. കെപി റോഡിനു സമീപം ചാരുംമൂട് കരിമുളയ്ക്കൽ പാലൂത്തറ ജംഗ്‌ഷനു സമീപമുള്ള 46 സെന്‍റ് സ്ഥലത്താണ് കെട്ടിടം പണിയുന്നത്. ചുനക്കര പഞ്ചായ ത്തിന്‍റെ പബ്ലിക് മാർക്കറ്റായും പിന്നീട് കാളച്ചന്തയായും അതിനുശേഷം മോട്ടോർവാഹനവകുപ്പിന്‍റെ ഡ്രൈവിംഗ് ടെസ്റ്റ് ഗ്രൗണ്ടായും സ്ഥലം ഉപയോഗിച്ചുവരികയായിരുന്നു. കഴിഞ്ഞ എൽഡിഎഫ് സർക്കാരിന്‍റെ കാലത്ത് മന്ത്രി ജി. സുധാകരനാണ് മിനി സിവിൽ സ്റ്റേഷൻ നിർമിക്കാൻ കരിമുളയ്ക്കലിൽ ശിലാഫലകം സ്ഥാപിച്ചത്. നിർമാണം വൈകിയതോടെ സ്ഥലം കാടുകയറിയിരുന്നു. ഒരുവർഷം മുമ്പാണ് ഭരണാനുമതി ലഭിച്ചത്. സിവിൽസ്റ്റേഷൻ കെട്ടിടം പൂർത്തിയായശേഷം ഇതിനു സമീപത്തെ റോഡിന്‍റെ വശത്തുള്ള കടമുറികൾ പൊളിച്ചുനീക്കും. ചാരുംമൂട്, നൂറനാട് മേഖലകളിൽ സ്വന്തമായി സ്ഥലവും കെട്ടിടവുമില്ലാതെ പ്രവർത്തിച്ചുവരുന്ന സർക്കാർ ഓഫീസുകൾ ഇവിടേക്കു മാറ്റാനാണ് തീരുമാനം. നിലവിൽ അംഗീകരിച്ച എആർ ഡ്രോയിംഗ് പ്രകാരം സിവിൽസ്റ്റേഷന്‍റെ താഴത്തെ നിലയിൽ ഡയറി എക്സ്‌റ്റൻഷൻ ഓഫീസ്, മറ്റ് ഓഫീസുകൾക്കായുള്ള മുറികൾ, ടോയ്‌ലറ്റ് ബ്ലോക്ക്, ലോബി, പോർച്ച്, ഇലക്ട്രിക്കൽ റൂം, ലിഫ്റ്റ് റൂം എന്നിവയുണ്ടാകും. ഒന്നാം നിലയിൽ നൂറനാട് എക്സൈസ് റേഞ്ച് ഓഫീസിനുള്ള മുറികൾ, ടോയ്‌ലറ്റ് ബ്ളോക്ക്, ലോബി, ഇലക്ട്രിക്കൽ റും, ലീഫ്റ്റ് റൂം, പാസേജ് എന്നിവയാണുള്ളത്. രണ്ടാം നിലയിൽ സ്പെഷൽ തഹസിൽദാർ ഓഫീസ്, എഇഒ ഓഫീസ്, കോൺഫറൻസ് ഹാൾ, ലോബി, ഇലക്ട്രിക്കൽ റൂം, പാസേജ്, ടോയ്‌ലറ്റ് ബ്ലോക്ക് എന്നിവയാണുള്ളത്. രണ്ടു ഹെഡ്റൂമോടു കൂടിയ ലൈറ്റ് റൂഫിംഗും ഓപ്പൺ ടെറസും ചേർന്നതാണ് ടെറസ് ഭാഗം. ചാരുംമൂട് കേന്ദ്രമായി വരുന്ന സർക്കാർ ഓഫീസുകൾക്കുള്ള മുറികൾകൂടി കെട്ടിടത്തിൽ ഉൾപ്പെടുത്തിയിട്ടുണ്ട്. കെട്ടിടംപണി വേഗം പൂർത്തിയാക്കുമെന്നും റവന്യു മന്ത്രിയുടെ സൗകര്യം നോക്കി നിർമാണ ഉദ്ഘാടനം നടത്തുമെന്നും എം.എസ്. അരുൺകുമാർ എംഎൽഎ പറഞ്ഞു.

മുഹമ്മയിൽ വനിതാ ജിംനേഷ്യം

മുഹമ്മ: വനിത സൗഹൃദ പഞ്ചായത്ത് എന്ന ലക്ഷ്യം പ്രാവർത്തികമാക്കുന്നതിന്‍റെ ഭാഗമായി സ്ത്രീകളുടെ ശാരീരികവും മാനസികവുമായ ശാക്തീകരണത്തിനായി പഞ്ചായത്തിലെ മുഴുവൻ വനിതകൾക്കുമായി വനിതാ ജിംനേഷ്യം പ്രവർത്തനം തുടങ്ങി. മൂന്നു ലക്ഷം രൂപയാണ് ചെലവ്. പഞ്ചായത്ത് പ്രസിഡന്‍റ് സ്വപ്ന ഷാബു അധ്യക്ഷയായി. ജില്ലാ പഞ്ചായത്ത് പ്രസിഡന്‍റ് കെ.ജി. രാജേശ്വരി പ്രവർത്തനോദ്ഘാടനം നിർവഹിച്ചു. പഞ്ചായത്ത് വൈസ് പ്രസിഡന്‍റ് എൻ.ടി. റെജി, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ സി.ഡി. വിശ്വനാഥൻ, പഞ്ചായത്തംഗങ്ങളായ വി. വിഷ്ണു, കുഞ്ഞുമോൾ ഷാനവാസ്, ഷെജിമോൾ സജീവ്, നിഷാപ്രദീപ്, ഡോ. ബിനുലക്ഷ്മൺ എന്നിവർ പ്രസംഗിച്ചു.

കന്യാസ്ത്രീകള്‍ക്കെതിരേയുള്ള എഫ്‌ഐആര്‍ റദ്ദ് ചെയ്യണം

എടത്വ: ഛത്തീസ്ഗഡില്‍ അന്യായമായി അറസ്റ്റ് ചെയ്ത് ജാമ്യത്തില്‍ വിട്ടയച്ച കന്യാസ്ത്രീകളുടെ പേരിലുള്ള എഫ്‌ഐആര്‍ റദ്ദു ചെയ്യണമെന്ന് കത്തോലിക്ക കോണ്‍ഗ്രസ്. കന്യാസ്ത്രീകള്‍ക്കെതിരെയുള്ള ആള്‍ക്കൂട്ട വിചാരണയ്ക്കു നേതൃത്വം നല്‍കിയവരെ മാതൃകാപരമായി ശിക്ഷിക്കാനും ന്യൂനപക്ഷങ്ങള്‍ക്കെതിരെയുള്ള അക്രമങ്ങള്‍ക്ക് അറുതിവരുത്താനും ബന്ധപ്പെട്ടവര്‍ തയാറാകണമെന്ന് കത്തോലിക്ക കോണ്‍ഗ്രസ് ചങ്ങങ്കരിയില്‍ നടന്ന പ്രതിഷേധ സംഗമത്തില്‍ ആവശ്യപ്പെട്ടു. സംഗമം പ്രീസ്റ്റ് ഇന്‍ചാര്‍ജ്ജ് ഫാ. റ്റിജോ മതിലകത്തുകുഴി ഉദ്ഘാടനം ചെയ്തു. യൂണിറ്റ് പ്രസിഡന്‍റ് വര്‍ഗീസ് വേലിക്കളം അധ്യക്ഷത വഹിച്ചു. എടത്വ ഫൊറോനാ പ്രസിഡന്‍റ് തോമസ് ഫ്രാന്‍സിസ് മുഖ്യപ്രഭാഷണം നടത്തി. കുര്യന്‍ കൊച്ചുപറമ്പില്‍, ജോസുകുട്ടി പുരയ്ക്കല്‍ എന്നിവര്‍ പ്രസംഗിച്ചു.

ഹരിതമിത്രം 2.0 പൈലറ്റ് റണ്‍ നഗരസഭയില്‍ തുടക്കം

ആലപ്പുഴ: നഗരത്തിലെ എല്ലാ വീടുകളും വാണിജ്യ സ്ഥാപനങ്ങളും സര്‍ക്കാര്‍ സ്ഥാപനങ്ങളും ഹരിതമിത്രം ആപ്പിന്‍റെ പരിധിയില്‍ വന്നതോടെ കെ-സ്മാര്‍ട്ടുമായി ലിങ്ക് ചെയ്ത് വീടുകളുടെയും സ്ഥാപനങ്ങളുടെയും കെട്ടിട നമ്പരുമായി ബന്ധിപ്പിക്കുന്ന പ്രവര്‍ത്തനങ്ങള്‍ക്ക് തുടക്കം കുറിച്ചു. നഗരത്തിലെ മുഴുവന്‍ കേന്ദങ്ങളിലും ഹരിതകര്‍മസേനാംഗങ്ങളുടെ സേവനം ഉറപ്പാക്കുന്നതിനാണ് ഹരിതമിത്രം 2.0 ലക്ഷ്യമിടുന്നത്. ഉപഭോക്താക്കള്‍ക്ക് നേരിട്ട് ആപ്പിന്‍റെ സേവനം ഉപയോഗപ്പെടുത്തുന്ന സിറ്റിസണ്‍ ലോഗിനും ഇതില്‍ ലഭ്യമാണ്. കെട്ടിടനമ്പരിന്‍റെ അടിസ്ഥാനത്തില്‍ ഹരിതകര്‍മസേനാംഗങ്ങള്‍ ഓരോ വീടിന്‍റെയും സ്ഥാപനത്തിന്‍റെയും വിവര ശേഖരണം നടത്തി ആപ്പിലേക്ക് അപ് ലോഡ് ചെയ്യുന്നു. ഹരിതമിത്രം 1.0 ആപ്പിലെ സാങ്കേതിക തകരാറുകള്‍ പരിഹരിച്ചുള്ള പുതിയ വെര്‍ഷനാണ് അവതരിപ്പിക്കുന്നത്. നഗരസഭയുടെ രേഖകളില്ലാത്ത ഏതെങ്കിലും കെട്ടിടനമ്പര്‍ ഉള്‍പ്പെട്ടാല്‍ വേഗം തിരിച്ചറിയാനും കുടിശികയുള്ള കെട്ടിടങ്ങളുടെ വിവരം, മുന്‍കൂറായി പണം അടയ്ക്കാനുള്ള സൗകര്യം എന്നിവ പുതിയ ആപ്പിലൂടെ സാധിക്കും. ജില്ലയില്‍ ആലപ്പുഴ നഗരസഭയിലും കൈനകരി പഞ്ചായത്തിലും പൈലറ്റ് റണ്‍ ആയി നടപ്പിലാക്കുന്ന പദ്ധതികൾ ജനപ്രതിനിധികള്‍, കുടുംബശ്രീ, സന്നദ്ധ പ്രവര്‍ത്തകര്‍ എന്നിവരുടെ സേവനത്തോടെ പൂര്‍ത്തീകരിക്കുന്നതിന് കൗണ്‍സില്‍ തീരുമാനിച്ചു. നഗരസഭ ചെയര്‍പേഴ്സണ്‍ കെ.കെ. ജയമ്മ അധ്യക്ഷത വഹിച്ച കൗണ്‍സിലില്‍ വൈസ് ചെയര്‍മാന്‍ പി.എസ്.എം. ഹുസൈന്‍, സ്ഥിരം സമിതി അധ്യക്ഷരായ എം.ആര്‍. പ്രേം, എ.എസ്. കവിത, നസീര്‍ പുന്നയ്ക്കല്‍, ആര്‍. വിനിത, എല്‍ഡിഎഫ് പാര്‍ലമെന്‍ററി പാര്‍ട്ടി ലീഡര്‍ സൗമ്യരാജ്, കക്ഷിനേതാക്കളായ റീഗോ രാജു, ഡി.പി. മധു, പി. രതീഷ് തുടങ്ങിയവര്‍ പ്രസംഗിച്ചു.

ആധുനിക ഗൈനക്കോളജി വിഭാഗം ഒരുക്കി മാലക്കര ആശുപത്രി

ചെങ്ങന്നൂർ: ആധുനിക ഗൈനക്കോളജി വിഭാഗം ഒരുക്കി മാലക്കരയിലെ സെന്‍റ് തോമസ് ആശുപത്രി. സിംഗപ്പൂർ ആസ്ഥാനമായി ഇന്ത്യയിൽ പ്രവർത്തിക്കുന്ന കിൻഡർ മെഡിക്കൽ ഗ്രൂപ്പ് ആണ് ആശുപത്രിയിൽ ഗൈനക്കോളജി വിഭാഗം ഒരുക്കുന്നത്. പണമില്ലാത്തതുകൊണ്ട് ഒരു സ്ത്രീക്കും ചികിത്സ നിഷേധിക്കില്ല എന്ന ബോർഡ് ആശുപത്രിക്കു മുന്നിൽ സ്ഥാപിച്ചിട്ടുണ്ട്. ലാഭത്തിനപ്പുറം സേവനം നൽകുകയാണ് ലക്ഷ്യമെന്ന് അധികൃതർ പറയുന്നു. 2025 ഒക്ടോബർ ഒന്നിനു പ്രവർത്തനം തുടങ്ങും. 2011ൽ ചേർത്തലയിൽ കിൻഡർ വുമൺ ആശുപത്രിയും ഫെർട്ടിലിറ്റി സെന്‍ററും ആരംഭിച്ചാണ് കിൻഡർ മെഡിക്കൽ ഗ്രൂപ്പ് ഇന്ത്യയിൽ പ്രവർത്തനം തുടങ്ങിയത്. തുടർന്ന് 2018ൽ കൊച്ചിയിലും 2022ൽ ബംഗളൂരുവിലും 2023ൽ ആലപ്പുഴയിലും കിൻഡർ ആശുപത്രികൾ ആരംഭിച്ചു. ഡോ. എ. ചെറിയാന്‍റെയും ഡോ. രാജമ്മ ചെറിയാന്‍റെയും നേതൃത്വത്തിൽ സ്ഥാപിതമായതും ഇപ്പോൾ ഡോ. ചാർലിയുടെ മേൽനോട്ടത്തിൽ സേവനം നൽകുന്നതുമായ സെന്‍റ് തോമസ് ആശുപത്രിയുമായി ചേർന്നാണ് സംരംഭം. സമൂഹത്തിന്‍റെ മുഴുവൻ ആരോഗ്യപരിപാലനത്തിനും ജീവകാരുണ്യപ്രവർത്തനങ്ങൾക്കും കിൻഡർ ആശുപത്രി കൈത്താങ്ങാകുമെന്ന് അധികൃതർ പറഞ്ഞു.

ആശുപത്രി വാർഡിലെ സ്റ്റാൻഡുകൾ സ്റ്റാൻഡ് വിട്ടു!

അമ്പലപ്പുഴ: രോഗികൾക്കു ഡ്രിപ്പിടാൻ സ്റ്റാൻഡില്ല. ട്രിപ് ഇടണമെങ്കിൽ മരുന്നു തീരും വരെ കൂട്ടിരിപ്പുകാർ ബോട്ടിലും പിടിച്ചുകൊണ്ടു നിൽക്കണം. ആലപ്പുഴ മെഡിക്കൽ കോളജ് ആശുപത്രിയിലെ സ്ഥിതിയാണിത്. ഇതിനൊപ്പം യൂണിറ്റ് ചീഫുമാർ വാർഡുകളിൽ പരിശോധനയ്ക്കെത്താറില്ലെന്ന പരാതി വേറെ. നൂറുകണക്കിനു രോഗികൾ എത്തുന്ന ആശുപത്രിയിൽ ജീവനക്കാരുടെ കുറവു കൂടിയാകുന്പോൾ രോഗികളുടെ കാര്യം കഷ്ടം. ആവശ്യത്തിനു സ്റ്റാൻഡില്ലാത്തതിനാൽ ഒരു രോഗിയുടെ ഉപയോഗ ശേഷം മാത്രമേ മറ്റൊരു രോഗിക്കു ഡ്രിപ് സ്റ്റാൻഡ് ലഭിക്കൂ. ഇതുമൂലം പല രോഗികൾക്കും ആവശ്യ സമയത്തു ഡ്രിപ് നൽകാനാനാവാത്ത സ്ഥിതിയാണ്. രോഗികളുടെ ബന്ധുക്കൾ ഡ്രിപ് സ്റ്റാൻഡ് ആവശ്യപ്പെടുമ്പോൾ ജീവനക്കാർ നിസഹായതോടെ കൈമലർത്തുന്നു. ജീവനക്കാരുടെ നെട്ടോട്ടം നഴ്സുമാർ ഉൾപ്പെടെയുള്ള ജീവനക്കാരും ആവശ്യത്തിന് പല വാർഡുകളിലുമില്ല. ഇതോടെ ഡ്യൂട്ടിയുള്ളവർ നെട്ടോട്ടമോടേണ്ട സ്ഥിതിയാണ്. നഴ്സുമാർ ഉൾപ്പെടെയുള്ളവരുടെ കുറവിനെക്കുറിച്ച് ഏറെക്കാലമായി പരാതിയുണ്ടെങ്കിലും ഇതുവരെ ജീവനക്കാർ എത്തിയിട്ടില്ല. കൂടാതെ പല വാർഡിലും യൂണിറ്റ് ചീഫുമാരായ ഡോക്ടർമാരെ കണികാണാൻ പോലുമില്ലെന്നാണ് രോഗികളുടെ ബന്ധുക്കളുടെ പരാതി. കേസ് ഷീറ്റിൽ യൂണിറ്റ് ചീഫിന്‍റെ പേര് കാണുമെങ്കിലും ഭൂരിഭാഗം യൂണിറ്റ് ചീഫുമാരും വാർഡുകളിൽ രോഗികളെ പരിശോധിക്കാനായി എത്താറില്ലത്രേ. പിജി, ഹൗസ് സർജൻമാർ മാത്രമാണ് വാർഡുകളിലെ രോഗികളെ പരിശോധിക്കുന്നത്. പഴയ സ്റ്റാഫ് പാറ്റേൺ ലക്ഷങ്ങളും കോടികളും ചെലവഴിച്ച് ആധുനിക കെട്ടിടങ്ങൾ നിർമിച്ചാൽ മാത്രം പോരാ അതിനുള്ളിൽ സൗകര്യങ്ങൾകൂടി ഒരുക്കണമെന്നാണ് ആവശ്യം. പതിറ്റാണ്ടുകൾക്കു മുമ്പുള്ള സ്റ്റാഫ് പാറ്റേണിലാണ് ആലപ്പുഴ മെഡിക്കൽ കോളജ് ആശുപത്രി ഇപ്പോഴും പ്രവർത്തിക്കുന്നത്. സർക്കാരിന്‍റെ സാമ്പത്തിക പ്രതിസന്ധിയാണ് ജീവനക്കാരുടെ കൂട്ടാൻ തടസമെന്നു പറയുന്നു. ജീവനക്കാരുടെ ക്ഷാമം പരിഹരിക്കണമെന്നു വിവിധ സർവീസ് സംഘടനകളും ഏറെക്കാലമായി ആവശ്യപ്പെടുന്നുണ്ടെങ്കിലും തീരുമാനമാകുന്നില്ല.

കെട്ടിടത്തിന്‍റെ മേൽക്കൂരയിലെ അറ്റകുറ്റപ്പണിക്കിടെ ഷീറ്റ് തകർന്ന് യുവാവിന് ദാരുണാന്ത്യം

തുറവൂർ: പൊതുമേഖലാ സ്ഥാപനമായ കയർകമ്പനി കെട്ടിടത്തിന്‍റെ മേൽക്കൂരയിലെ അറ്റകുറ്റപ്പണിക്കിടെ ഷീറ്റ് തകർന്ന് യുവാവിന് ദാരുണാന്ത്യം. തുറവൂർ വളമംഗലം വടക്ക് പുത്തൻകരിയിൽ സുധീർ-സുനി ദമ്പതികളുടെ മകൻ സായന്ത് (24) ആണ് മരിച്ചത്. ആലപ്പുഴ ബീച്ചിന് സമീപത്തെ ഫോംമാറ്റിംഗ്സ് കമ്പനിയിൽ ഇന്നലെ രാവിലെ 11.30നാണ് സംഭവം. കമ്പനിയിൽ ലാറ്റക്സ് ബാക്കിംഗ് പ്ലാന്‍റിന്‍റെ മേൽക്കൂരയുടെ മുകളിൽ കയറി പണിയെടുക്കുന്നതിനിടെ ഷീറ്റ് തകർന്ന് യുവാവ് താഴേക്ക് വീഴുകയായിരുന്നു . 40 അടിയോളം ഉയർച്ചയിൽനിന്ന് പ്ലാന്‍റിലെ തറയിലേക്കാണ് വീണത്. തലയ്ക്ക് ഗുരുതര പരിക്കേറ്റ ഇയാളെ വണ്ടാനം മെഡിക്കൽ കോളജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

ശക്തമായ കാറ്റും തിരമാലയും; മത്സ്യ ബന്ധനം നിലച്ചു

അമ്പലപ്പുഴ: ന്യൂനമർദത്തെത്തുടർന്ന് കടലിൽ ശക്തമായ തിരമാലയും കാറ്റും ഉയർന്നതിനാൽ ജില്ലയുടെ തീരത്ത് മത്സ്യബന്ധനം നിലച്ചു. കാലാവസ്ഥ ഗവേഷണ കേന്ദ്രത്തിന്‍റെ മുന്നറിയിപ്പ് അവഗണിച്ചു ചില വള്ളങ്ങൾ ഇന്നലെ പുലർച്ചെ തോട്ടപ്പള്ളി ഹാർബറിൽനിന്ന് ഇറക്കി പോയെങ്കിലും കാറ്റും കടലും ക്ഷോഭിച്ചതോടെ തിരികെപ്പോന്നു. പൊന്തുവലക്കാരും പോയില്ല. കള്ളക്കടൽ പ്രതിഭാസമുന്നറിയിപ്പുമുണ്ട്. പുറംകടലിൽ ഉയർന്നുപൊങ്ങുന്ന കൂറ്റൻ തിരമാലകൾ പലഭാഗത്തും കരയിലേക്ക് ആഞ്ഞടിക്കുന്നുണ്ട്. ട്രോളിംഗ് നിരോധനം അവസാനിച്ചതിനു ശേഷം കടലിലേക്കുപോയ ബോട്ടുകൾ പലതും ആഴക്കടലിൽ മത്സ്യബന്ധനത്തിലാണ്. ഒരാഴ്ച പണിയെടുക്കാനുള്ള ഇന്ധനവും ഭക്ഷണസാമഗ്രഹികളും വെള്ളവും പാചകം ചെയ്യേണ്ട ഉപകരണങ്ങളും കരുതിയാണ് ഇവർ പോയിരിക്കുന്നത്. കടൽ കൂടുതൽ പ്രക്ഷുബ്‌ധമായാൽ ഇവർ തിരികെ കരയണയും. നീണ്ടകരയിലും തോപ്പുംപടി ഹാർബറിലുമാണ് ജില്ലയിൽനിന്നുള്ള ബോട്ടുകൾ അടുക്കുന്നത്. നിരോധനം അവസാനിച്ചു കടലിൽ പോയബോട്ടുകൾക്ക് ആദ്യ ദിനം പ്രതീക്ഷിച്ചത്ര മത്സ്യം ലഭിച്ചിരുന്നില്ല. അടിക്കടിമാറുന്ന കാലാവസ്ഥ തങ്ങളുടെ പ്രതീക്ഷകളെ തകർത്തെന്നാണ് ഈ മേഖലയിലെ തൊഴിലാളികൾ പറയുന്നത്.

നെല്ലിന് ബാക്ടീരിയല്‍ ഇലകരിച്ചില്‍; ജാഗ്രത വേണമെന്ന് കീടനിരീക്ഷണ കേന്ദ്രം

ആലപ്പുഴ: ജില്ലയിലെ കരുവാറ്റ, നെടുമുടി, കൈനകരി, തകഴി, നീലംപേരൂര്‍ കൃഷിഭവനുകളുടെ പരിധിയില്‍വരുന്ന രണ്ടാംകൃഷി ഇറക്കിയ പാടശേഖരങ്ങളില്‍ ബാക്ടീരിയല്‍ ഇലകരിച്ചില്‍ രോഗലക്ഷണങ്ങള്‍ കണ്ടെത്തിയതായി കീടനിരീക്ഷണ കേന്ദ്രം(കെസിപിഎം) അറിയിച്ചു. നെല്ല് വിതച്ച് 35 മുതല്‍ 85 ദിവസം വരെ പ്രായമായ പാടശേഖരങ്ങളിലാണ് രോഗലക്ഷണങ്ങള്‍ കണ്ടുവരുന്നത്. പ്രാരംഭദിശയില്‍ത്തന്നെ പാടശേഖര അടിസ്ഥാനത്തില്‍ നിയന്ത്രണ മാര്‍ഗങ്ങള്‍ സ്വീകരിച്ചാല്‍ മാത്രമേ രോഗം ഫലപ്രദമായി നിയന്ത്രണ വിധേയമാക്കാന്‍ കഴിയൂ എന്ന് കെസിപിഎം കളര്‍കോട് പ്രൊജക്ട് ഡയറക്ടര്‍ അറിയിച്ചു. വെള്ളവും വളവുമൊക്കെ വലിച്ചെടുക്കുന്ന ചെടിയുടെ നാളികളില്‍ ബാക്ടീരിയല്‍ കോശങ്ങള്‍ നിറയുന്നതുമൂലം വെള്ളത്തിന്‍റെയും മൂലകങ്ങളുടെയും മുകളിലേക്കുള്ള ആഗീരണം തടസപ്പെടുന്നു. ഇതിന്‍റെ ബാഹ്യലക്ഷണമാണ് ഇലകരിച്ചില്‍. ഇപ്പോള്‍ നിലനില്‍ക്കുന്ന കാലാവസ്ഥ രോഗവ്യാപനത്തിന് വളരെ അനുകൂലമാണെന്നും പ്രൊജക്ട് ഡയറക്ടര്‍ പറഞ്ഞു. മഴയിലൂടെയും കാറ്റില്‍ ഇലത്തുമ്പുകള്‍ തമ്മിലുരസുന്നതുവഴിയും വയലില്‍കയറ്റുന്ന വെള്ളത്തിലൂടെയും വളരെ വേഗത്തില്‍ രോഗവ്യാപനം നടക്കും. നിയന്ത്രണ മാര്‍ഗങ്ങള്‍ ഇങ്ങനെ: =പച്ചച്ചാണകം കിഴികെട്ടി തൂമ്പു ഭാഗത്ത് ഇടുകയോ, ചാണക സ്ളറി പാടശേഖരത്തില്‍ ഒഴിച്ചു കൊടുക്കുകയോ ചെയ്യാം. അല്ലാത്ത പക്ഷം ബ്ലീച്ചിംഗ് പൗഡര്‍ ഏക്കറിന് രണ്ട് കിലോഗ്രാം എന്ന തോതില്‍ ചെറിയ മസ്ലിന്‍ കിഴികളിലാക്കി വെള്ളം കയറ്റുന്ന സ്ഥലങ്ങളില്‍ വയ്ക്കാം. =രോഗത്തിന്‍റെ പ്രാംരംഭഘട്ടത്തില്‍ ബ്രോണോപോള്‍ 100 ശതമാനം (ബയോനോള്‍) 5 ഗ്രാം 10 ലിറ്റര്‍ വെള്ളത്തില്‍, 3 മില്ലി ഫില്‍വെറ്റ്/ടീപോള്‍ (പശ) കൂടി ചേര്‍ത്ത് തളിച്ചുകൊടുക്കാം. മുകളിലെ ഇലകള്‍ നന്നായി നനയത്തക്ക വിധം തളിക്കണം. =രോഗം കൂടുതല്‍ വ്യാപിച്ചിട്ടുണ്ടെങ്കില്‍ സ്ട്രപ്റ്റോസൈക്ലിന്‍ രണ്ട് ഗ്രാം, കോപ്പര്‍ ഓക്സീക്ലോറൈഡ് മൂന്ന് ഗ്രാം എന്നിവ ഓരോന്നും 10 ലിറ്റര്‍ വെള്ളത്തില്‍ എന്ന അളവില്‍ കലക്കി 10 ലിറ്ററിന് മൂന്ന് മില്ലി ഫില്‍വെറ്റ്/ടീപോള്‍ കൂടി ചേര്‍ത്ത് തളിച്ചുകൊടുക്കാം. =ജൈവ മാര്‍ഗങ്ങള്‍ അവലംബിക്കുന്ന കര്‍ഷകര്‍ക്ക് 20 ഗ്രാം സ്യൂഡോമോണാസ് ഫ്ളൂറസെന്‍സ് ഒരു ലിറ്റര്‍ വെള്ളത്തില്‍ അല്ലെങ്കില്‍ സ്യൂഡോമോണാസ് ഫ്ളൂറസെന്‍സ്, ബാസിലസ് സബ്റ്റിലിസ് എന്നിവ ഓരോന്നും 20 ഗ്രാം വീതം ഒരു ലിറ്റര്‍ വെള്ളത്തില്‍ മേല്‍ സൂചിപ്പിച്ച അളവില്‍ പശ കൂടി ചേര്‍ത്ത് (3 മില്ലി 10 ലിറ്റര്‍ വെള്ളം) തളിക്കുന്നതും ഫലപ്രദമാണ്. =പൊട്ടാസ്യം, സിലിക്ക എന്നീ മൂലകങ്ങള്‍ രോഗ പ്രതിരോധത്തിന് ഫലപ്രദമാണ്. 13:0:45 തളിവളം 10 ലിറ്ററിന് 100 ഗ്രാം, 25 മില്ലി സിലിക്ക, 4 മില്ലി ഫില്‍വെറ്റ്/ടീപോള്‍ എന്നിവ ചേര്‍ത്ത് തളിക്കുന്നതും രോഗപ്രതിരോധത്തിന് സഹായിക്കും. =തുടര്‍ച്ചയായി വെളളം കെട്ടിനില്‍ക്കാതെ ഇടയ്ക്കിടെ വെള്ളം വറ്റിക്കുന്നത് രോഗവ്യാപനത്തിന്‍റെ തോത് കുറയ്ക്കും. എന്നാല്‍ അമ്ലത കൂടുതലുള്ള നിലങ്ങള്‍ അധികം ഉണങ്ങാതെ ശ്രദ്ധിക്കണം.

കരീലക്കുളങ്ങര ജംഗ്‌ഷനിൽ അടിപ്പാത നിർമിക്കണമെന്ന്

കായംകുളം: ദേശീയ പാതയിലെ തിരക്കേറിയ ജംഗ്‌ഷനായ കരീലക്കുളങ്ങരയിൽ അടിപ്പാത നിർമിക്കണമെന്ന ആവശ്യം ശക്‌തമാകുന്നു. പ്രദേശ വാസികളും യാത്രക്കാരും ഉൾപ്പടെ വിവിധ ആവശ്യങ്ങൾക്കായി കരീലക്കുളങ്ങര ജംഗ്‌ഷനെ ആശ്രയിക്കുന്ന ആയിരങ്ങളെ ഒറ്റപ്പെടുത്തുന്ന രീതിയിൽ നടക്കുന്ന ദേശീയപാത നിർമാണത്തിനെതിരേ ഇപ്പോൾ ജനകീയ പ്രതിഷേധം ഉയരുകയാണ്. കണ്ടല്ലൂർ, മുതുകുളം പഞ്ചായത്തിലെയും പത്തിയൂർ പഞ്ചായത്തിലെ ആറ് വാർഡുകളിലും ഉൾപ്പെട്ട ദേശീയപാതക്ക് ഇരുവശവും താമസിക്കുന്ന ജനങ്ങൾക്ക് പ്രദേശങ്ങൾ തമ്മിൽ ബന്ധപ്പെടാനുള്ള സ്വാതന്ത്ര്യം നിഷേധിച്ചുള്ള നിർമാണമാണ് നടക്കുന്നതെന്ന് നാട്ടുകാർ ആരോപിക്കുന്നു. ജംഗ്‌ഷനിൽ അടിപ്പാതയില്ലാത്തതിനാൽ കായകുളം ഭാഗത്തേക്കോ ഹരിപ്പാട് ഭാഗത്തേയ്ക്കോ രണ്ട് കിലോമീറ്ററോളം സഞ്ചരിച്ചാൽ മാത്രമേ റോഡ് മറികടക്കാൻ കഴിയൂ. പത്തിയൂർ പഞ്ചായത്തിലെ പ്രധാന വ്യാപാര കേന്ദ്രവും സഹകരണ സ്പിന്നിംഗ് മില്ലും ഉൾപ്പടെ ഒട്ടേറെ സ്ഥാപനങ്ങൾ കരീലക്കുളങ്ങരയിൽ പ്രവർത്തിക്കുന്നുണ്ട്. ജംഗ്‌ഷനിൽ നിന്ന് ഒരു കിലോമീറ്ററിനുള്ളിലാണ് ബാങ്കുകൾ, മാർക്കറ്റ്, ഓഡിറ്റോറിയം, നിർമാണത്തിലിരിക്കുന്ന മൾട്ടിസ്പെഷാലിറ്റി ആശുപത്രി , പോലീസ് സ്‌റ്റേഷനായി പുതിയ കെട്ടിടം നിർമിക്കുന്ന സ്‌ഥലം, വ്യവസായസ്ഥാപനം തുടങ്ങുന്നതിനായി കേരള ബാങ്ക് സ്വന്തമാക്കിയ സ്ഥലം, പോസ്റ്റോഫീസ്, ഇഎസ്ഐ ഡിസ്പ‌ൻസറി എന്നിവയെല്ലാം ഉള്ളത്. കരീലക്കുളങ്ങര - ഭഗവതിപ്പടി റോഡിലൂടെയാണ് കോട്ടയം മെഡിക്കൽ കോളജ്, ചെട്ടികുളങ്ങര ക്ഷേത്രം, പത്തിയൂരിലെ സർക്കാർ ഓഫീസുകൾ, മാവേലിക്കര, ചെങ്ങന്നൂർ ആർഡിഒ ഓഫീസ് എന്നീ വിടങ്ങളിലേക്ക് ജനങ്ങൾ സഞ്ചരിക്കുന്നത്. ജംഗ്‌ഷനിൽ അടിപ്പാതയില്ലെങ്കിൽ ഇവിടേക്ക് പോകാനുള്ള റോഡിലേക്ക് എത്താൻ രണ്ട് കിലോമീറ്റർ സഞ്ചരിക്കണം. കൂടാതെ കരീലക്കുളങ്ങര ജംഗ്‌ഷനിലെ വ്യാപാര മേഖലയും പ്രതിസന്ധിയിലാകും. പത്ത് കോടിയിലേറെ രൂപ ചെലവഴിച്ചാണ് കരീലക്കുളങ്ങര മല്ലിക്കാട്ടുകടവ്-ഭഗവതിപ്പടി റോഡ് ഉന്നത നിലവാരത്തിൽ പൊതുമരാമത്ത് വകുപ്പ് നിർമിച്ചത്. അടിപ്പാതയില്ലെങ്കിൽ ഇരുദിശകളിൽനിന്നു വരുന്ന ഈ റോഡ് നേരിട്ട് ദേശീയപാത മറികടന്ന് പോകുന്ന സൗകര്യവും ഇല്ലാതാകും അതിനാൽ പ്രാദേശികമായ പ്രാധാന്യം കണക്കിലെടുത്ത് കരീലക്കുളങ്ങരയിൽ അടിപ്പാത എന്ന ആവശ്യം നിറവേറ്റാൻ ദേശീയപാത അഥോറിറ്റി തയാറാകണമെന്നാണ് ജനങ്ങൾ ആവശ്യപ്പെടുന്നത്. കായംകുളം ദേശീയപാതയിൽ നിർമിക്കുന്നത് എട്ട് അടിപ്പാതകൾ കായംകുളം: മണ്ഡലത്തിൽ ദേശീയപാത 66ന്‍റെ വികസനവുമായി ബന്ധപ്പെട്ട് നിർമിക്കുന്നത് എട്ട് അടിപ്പാതകൾ. ഓച്ചിറ, കൃഷ്ണപുരം, കുന്നത്താലുംമൂട് ജംഗ്ഷൻ, കായംകുളം ജിഡിഎം ജംഗ്ഷൻ, പുത്തൻറോഡ് ജംഗ്ഷൻ, രാമപുരം ഹൈസ്കൂൾ ജംഗ്ഷൻ, ഒഎൻകെ ജംഗ്‌ഷൻ, കെഎസ്ആർടിസി ജംഗ്‌ഷൻ എന്നിവിടങ്ങളിലാണ് അടിപ്പാതകൾ നിർമിക്കുന്നത്. കായംകുളത്ത് ഉയരപ്പാത നിർമിക്കണമെന്ന ആവശ്യവുമായി നിരവധി ജനകീയ പ്രക്ഷോഭ സമരങ്ങൾ നടന്നെങ്കിലും ഉയരപ്പാത പരിഗണിക്കപ്പെട്ടില്ല.

ക്ഷേത്ര മേല്‍ശാന്തി പദം ചെട്ടികുളങ്ങരയമ്മയുടെ അനുഗ്രഹം

മാവേലിക്കര: മറ്റംവടക്ക് കല്ലമ്പള്ളില്‍ അജിനാരായണന്‍ നമ്പൂതിരി(39) ചെട്ടികുളങ്ങര ദേവീക്ഷേത്രത്തില്‍ പുറപ്പെടാ മേല്‍ശാന്തിയായി നറുക്കെടുക്കപ്പെട്ടത് ചെട്ടികുളങ്ങരയമ്മയുടെ അനുഗ്രഹമാണെന്നാണ് അദ്ദേഹത്തിന്‍റെ ഭാഷ്യം. 13 വയസു മുതല്‍ കരകളിലെ പറയെടുപ്പിനുള്‍പ്പെടെ ദേവിയെ എഴുന്നള്ളിച്ചിട്ടുള്ളയാളാണ് നാട്ടുകാര്‍ അജി എന്ന ഓമനപ്പേരില്‍ വിളിക്കുന്ന അജിനാരായണന്‍. രാവിലെ ഉലച്ചിക്കാട്ട് ക്ഷേത്രത്തിലെ പ്രഭാത പൂജകള്‍ക്ക് ശേഷം 10.30ന് വീട്ടിലെത്തി വീട്ടിലെ തേവാരത്തില്‍ മന്ത്രജപം നടത്തിക്കൊണ്ടിരിക്കെയാണ് നറുക്കെടുക്കപ്പെട്ട വിവരം സൃഹൃത്തുക്കള്‍ വിളിച്ചറിയിക്കുന്നത്. മുത്തച്ഛനും അച്ഛനും ഇരുന്ന സ്ഥാനത്തേക്ക് എത്താന്‍ സാധിച്ചത് വലിയ ഭാഗ്യമാണെന്നും അജിനാരായണന്‍ നമ്പൂതിരി പറഞ്ഞു. വിവരം അറിഞ്ഞയുടന്‍ ക്ഷേത്രത്തില്‍ എത്തിച്ചേര്‍ന്നു. സ്വകാര്യ ധനകാര്യ സ്ഥാപനത്തിന്‍റെ ചെട്ടികുളങ്ങര ശാഖയിലെ അസിസ്റ്റന്‍റ് മാനേജറായ ഭാര്യ എ. ആര്യദേവി അന്തര്‍ജനവും ക്ഷേത്രത്തില്‍ എത്തിയിരുന്നു. ഇരുവരും ഒരുമിച്ചു ക്ഷേത്രത്തില്‍ തൊഴുത് മറ്റു നടപടി ക്രമങ്ങളും പൂര്‍ത്തിയാക്കിയാണ് മടങ്ങിയത്. കുടുംബത്തിലെ മൂന്നാമന്‍ പുറപ്പെടാ മേല്‍ശാന്തി പദം വരുന്നതിന് മുന്‍പ് മുത്തച്ഛനായ കല്ലമ്പള്ളില്‍ ഇല്ലം ഈശ്വരന്‍നമ്പൂതിരി 20 വര്‍ഷക്കാലത്തോളം ചെട്ടികുളങ്ങര ദേവീക്ഷേത്ര മേല്‍ശാന്തിയായിരുന്നു. പിന്നീട് പിതൃസഹോദരനായ കല്ലമ്പള്ളി ഇല്ലം ജി. വാമനന്‍ നമ്പൂതിരി 2015-16 വര്‍ഷം ചെട്ടികുളങ്ങര പുറപ്പെടാ മേല്‍ശാന്തിയായിരുന്നു. ഇതിനുശേഷം കല്ലമ്പള്ളില്‍നിന്ന് മൂന്നാമതായി ചെട്ടികുളങ്ങര മേല്‍ശാന്തി പദത്തിലേക്ക് എത്തുന്നയാളാണ് അജിനാരായണന്‍. കരകളിലെ പറയെടുപ്പ്, അന്‍പൊലി, കുംഭഭരണി എഴുന്നള്ളിപ്പ് എന്നിവയില്‍ സജീവമായി ഭഗവതിയെ എഴുന്നള്ളിക്കുന്നതില്‍ പ്രധാനികളാണ് അജിനാരായണന്‍ നമ്പൂതിരിയും അദ്ദേഹത്തിന്‍റെ പിതാവ് കെ.ഇ. നാരായണന്‍ നമ്പൂതിരിയും. ആദ്യ ശ്രമത്തില്‍ത്തന്നെ മേല്‍ശാന്തി പദം ചെട്ടികുളങ്ങര ക്ഷേത്രത്തിലേ പുറപ്പെടാ മേല്‍ശാന്തി ലിസ്റ്റില്‍ ആദ്യമായാണ് അജി നാരായണന്‍ നമ്പൂതിരി അപേക്ഷിക്കുന്നത്.ആദ്യ പ്രാവശ്യംതന്നെ അഞ്ച് പേരില്‍ ഒരാളായി ലിസ്റ്റില്‍ ഇടം നേടുകയും നറുക്കെടുക്കപ്പെടുകയുമായിരുന്നു. 2006ല്‍ ദേവസ്വം ബോര്‍ഡില്‍ സേവനം ആരംഭിച്ചു. തൃക്കരിയൂര്‍ ദേവീക്ഷേത്രം, പാവുമ്പ മഹാദേവ ക്ഷത്രം, വെട്ടികുളങ്ങര ക്ഷേത്രം, വെള്ളംകുളങ്ങര ക്ഷേത്രം, എരുവ ക്ഷേത്രം, ശ്രീകൃഷ്ണ ക്ഷേത്രം എന്നിവിടങ്ങളില്‍ സേവനം അനുഷ്ടിച്ചിട്ടുണ്ട്. 2021 മുതല്‍ കഴിഞ്ഞ വര്‍ഷം വരെ ചെട്ടികുളങ്ങര ക്ഷേത്രത്തിലെ കീഴ്ശാന്തിയായിരുന്നു. നിലവില്‍ ഉലച്ചിക്കാട്ട് ശ്രീകൃഷ്ണ ക്ഷേത്രത്തിലെ മേല്‍ശാന്തിയാണ്.

ദുരൂഹതകള്‍ നിറഞ്ഞൊരു വീട്, ജീവിതം അതിലേറെ വിചിത്രം

കോട്ടയം: നാലു സ്ത്രീകളുടെ തിരോധാനത്തില്‍ പ്രതിയെന്ന സംശയിക്കുന്ന ചേര്‍ത്തല പള്ളിപ്പുറം പഞ്ചായത്ത് ഒന്‍പതാം വാര്‍ഡ് ചെങ്ങുംതറ സെബാസ്റ്റ്യന് നിലവില്‍ 68 വയസ്. ഇയാള്‍ ഏറ്റുമാനൂര്‍ വെട്ടിമുകള്‍ സ്വദേശിനിയെ വിവാഹം ചെയ്തത് 55-ാം വയസിലാണ്. ഭാര്യയും പതിനൊന്ന് വയസുള്ള മകളും വെട്ടിമുകളിലുണ്ട്. സെബാസ്റ്റ്യന്‍ അടുത്ത കാലത്തും വെട്ടിമുകളില്‍ ഭാര്യാവീട്ടിലുണ്ടായിരുന്നതായി പ്രദേശവാസികള്‍ പറയുന്നു. കൊലപാതകം, തട്ടിപ്പ്, വഞ്ചന തുടങ്ങിയ വിവിധ കേസുകളില്‍ അറസ്റ്റ് ഒഴിവാക്കാനാണു വെട്ടിമുകളിലെത്തിയിരുന്നതെന്ന് സംശയിക്കുന്നു. ഇവിടെയും സെബാസ്റ്റ്യന്‍ പലരില്‍നിന്നു പണവും കടകളില്‍നിന്ന് സാധനങ്ങള്‍ കടവും വാങ്ങിയിട്ടുള്ളതായി പറയുന്നു. ബ്രോക്കര്‍ ജോലിയും സ്ഥിരം യാത്രകളും ലോഡ്ജുകളില്‍ താമസവും പതിവാക്കിയ സെബാസ്റ്റ്യന്‍ ദിവസങ്ങള്‍ കൂടുമ്പോഴാണു ചേര്‍ത്തലയിലെ വീട്ടില്‍ എത്തിയിരുന്നത്. വീടിനോടു ചേര്‍ന്ന രണ്ടരയേക്കര്‍ സ്ഥലത്ത് ഇയാള്‍ കൃഷി ചെയ്തിരുന്നില്ല. വനംപോലെ കാടുകയറിയ സ്ഥലത്തിനു നടുക്കുള്ള വീടും എന്നും ദുരൂഹതകള്‍ നിറഞ്ഞതാണ്. കുളങ്ങളില്‍ മാംസം തിന്നുന്ന പിരാന, ആഫ്രിക്കന്‍ മുഷി തുടങ്ങിയ മീനുകളെ ഇയാള്‍ വളര്‍ത്തിയിരുന്നു. നാട്ടില്‍ അമ്മാവന്‍ എന്നാണ് ഇയാള്‍ അറിയപ്പെടുന്നത്. അതിക്രൂരവും പൈശാചികവുമായ മനസിന്‍റെ ഉടമയാണ് ഇയാളെന്ന് നാട്ടുകാര്‍ക്ക് വിശ്വസിക്കാനാകുന്നില്ല. അതിരമ്പുഴ സ്വദേശിനി ജെയ്‌നമ്മയുടെ കൊലപാതകത്തില്‍ തെളിവുകള്‍ നിരത്തി ഏഴു ദിവസം ചോദ്യം ചെയ്തിട്ടും പ്രതി വ്യക്തമായ മറുപടി നല്‍കുന്നില്ല. ജെയ്‌നമ്മയെ പരിചയമുണ്ടായിരുന്നു എന്നതല്ലാതെ എന്തിനു കൊന്നു, എങ്ങനെ കൊന്നു, ആരുടെ സഹായം കിട്ടി എന്നിവയ്ക്ക് മറുപടിയില്ല. പ്രമേഹബാധിതനായ സെബാസ്റ്റ്യന്‍ ശാരീരിക അസ്വസ്ഥതകള്‍ നിരത്തി ചോദ്യങ്ങളോടു സഹകരിക്കുന്നില്ല. നാലുനേരം മരുന്നും ഭക്ഷണവും കൃത്യസമയത്ത് ഇയാള്‍ക്ക് നിര്‍ബന്ധമാണ്. കാലില്‍ ചെറിയ മുറിവുള്ളതിനാല്‍ രാവിലെ ആശുപത്രിയിലെത്തിച്ച് ഡ്രസിംഗ് നടത്തേണ്ടതും പോലീസ്തന്നെ. കാണാതായ നാലു സ്ത്രീകളെയും അറിയാമെന്നല്ലാതെ കൊലപ്പെടുത്തിയതായി സമ്മതിക്കുന്നുമില്ല. സ്ത്രീകളുടെ തിരോധാനം സംബന്ധിച്ച കേസുകളില്‍ ചോദ്യം ചെയ്തിട്ടും തന്ത്രപരമായി അന്വേഷണം വഴിതെറ്റിക്കുകയായിരുന്നു. സെബാസ്റ്റ്യന്‍, ആര്‍ക്കും പിടികൊടുക്കാത്ത ക്രിമിനല്‍ സ്ത്രീകളെ വശീകരിച്ചു വലയില്‍ വീഴ്ത്തുന്നതില്‍ അതിവിദഗ്ധനായിരുന്നു സീരിയല്‍ കില്ലറെന്നു പോലീസ് വിശേഷിപ്പിക്കുന്ന സെബാസ്റ്റ്യന്‍. കുടുംബപ്രശ്‌നങ്ങള്‍, സ്വത്തുതര്‍ക്കം തുടങ്ങിയവയില്‍ ബുദ്ധിമുട്ടുന്ന തനിച്ചു കഴിയുന്ന സ്ത്രീകളെ കണ്ടെത്തി ചങ്ങാത്തം കൂടുന്നതാണ് ഇയാളുടെ രീതി. 2024ല്‍ കാണാതായ അതിരമ്പുഴ സ്വദേശി ജെയ്‌നമ്മ, ചേര്‍ത്തല കടക്കരപ്പള്ളി സ്വദേശി ബിന്ദു പദ്മനാഭന്‍ (2002), ചേര്‍ത്തല വാരനാട് സ്വദേശി ഐഷ (2012), ചേര്‍ത്തല വള്ളാകുന്നം സ്വദേശി സിന്ധു (2020)എന്നിവരുടെ തിരോധാനക്കേസുകളാണ് സെബാസ്റ്റ്യനെ പിന്തുടരുന്നത്. ഇതുകൂടാതെയും സമാനമായ കൃത്യങ്ങള്‍ ഇയാള്‍ നടത്തിയിരുന്നോ എന്നും പോലീസ് തെരയുന്നു. വ്യക്തിപരമായ പ്രശ്‌നപരിഹാരങ്ങള്‍ക്ക് ധ്യാനകേന്ദ്രങ്ങളിലും പ്രാര്‍ഥനാകേന്ദ്രങ്ങളിലും സന്ദര്‍ശനം പതിവാക്കുന്ന സ്ത്രീകളുമായി സൗഹൃദം കൂടും. കുടുംബവിഹിതത്തിന് വ്യവഹാരം നടത്തുന്ന സ്ത്രീകളും വലയില്‍പ്പെട്ടു. അതിരമ്പുഴ സ്വദേശിനി ജെയ്‌നമ്മയെ സെബാസ്റ്റ്യന്‍ പരിചയപ്പെട്ടത് എന്ന്, എവിടെവച്ച് എന്നതില്‍ വ്യക്തതയില്ല. ആലപ്പുഴയിലെ ഒരു പ്രാർഥനാലയത്തില്‍ ജെയ്‌നമ്മ പതിവായി പോയിരുന്നുവെന്നും അവിടെ വച്ചാണ് സെബാസ്റ്റ്യനെ പരിചയപ്പെട്ടതെന്നും പറയപ്പെടുന്നു. എന്നാല്‍ ഏറ്റുമാനൂരില്‍ ഭാര്യയുടെ വീട്ടിലെത്തിയ വേളയിലാണ് ജെയ്‌നമ്മയെ പരിചയപ്പെട്ടതെന്നും സംശയമുണ്ട്. എവിടെ യാത്രപോയാലും ആറു പവനോളം ആഭരണങ്ങള്‍ ജെയ്‌നമ്മ ധരിച്ചിരുന്നു. ഒരു ആത്മീയ പ്രസിദ്ധീകരണം വിതരണം ചെയ്യാന്‍ സെബാസ്റ്റ്യനും ജെയ്നമ്മയും ഒരുമിച്ചു യാത്ര ചെയ്തിരുന്നതായി സൂചനയുണ്ട്. ജെയ്‌നമ്മയുടെ മൊബൈല്‍ ഫോണ്‍ ലൊക്കേഷന്‍ മുന്‍പ് പലപ്പോഴും ചേര്‍ത്തല പള്ളിപ്പുറത്ത് പോലീസ് സ്ഥിരീകരിച്ചിട്ടുണ്ട്. 2024 ഡിസംബര്‍ 21 മുതല്‍ 23 വരെ പാലായില്‍ നടന്ന ബൈബിൾ കണ്‍വന്‍ഷനില്‍ ജെയ്‌നമ്മ പങ്കെടുത്തിരുന്നതായി സഹോദരന്‍ സാവിയോ പറഞ്ഞു. ധ്യാനത്തിനുശേഷം 24ന് കുറിച്ചിത്താനത്തുള്ള സാവിയോയുടെ വീട്ടിലെത്തുമെന്നും പറഞ്ഞിരുന്നു. 24ന് വരാതായശേഷം നടത്തിയ അന്വേഷണങ്ങളില്‍ ജെയ്‌നമ്മയെ കണ്ടെത്താനായില്ല. മൊബൈല്‍ ഫോണില്‍ വിളിച്ചാല്‍ ബെല്ലുണ്ടെങ്കിലും ഫോണ്‍ എടുക്കാറില്ലായിരുന്നു. പാലായില്‍നിന്ന് ധ്യാനത്തിനുശേഷം ജെയ്‌നമ്മ ചേര്‍ത്തലയില്‍ എത്തിയിരുന്നതായാണ് മൊബൈല്‍ ലൊക്കേഷന്‍. അങ്ങനെയെങ്കില്‍ 23നോ പിറ്റേന്നോ സെബാസ്റ്റ്യന്‍ ഇവരെ കൊലപ്പെടുത്തി ആഭരണങ്ങള്‍ കൈവശപ്പെടുത്തിയിട്ടുണ്ടാകും. പണയംവച്ച ആഭരണങ്ങള്‍ ചേര്‍ത്തലയിലെ സ്വകാര്യ ധനകാര്യസ്ഥാപനത്തില്‍നിന്നു പോലീസ് കണ്ടെടുത്തിട്ടുണ്ട്. ഏഴു വര്‍ഷമായി സംശയനിഴലില്‍; ഒരു കേസിലും പിടികൊടുത്തില്ല കോടികളുടെ സ്വത്തിനുടമ ചേര്‍ത്തല കടക്കരപ്പള്ളി സ്വദേശിനി ബിന്ദു പത്മനാഭന്‍റെ തിരോധാനവുമായി ബന്ധപ്പെട്ട് 2018ലാണ് സെബാസ്റ്റ്യന്‍ പോലീസിന്‍റെ സംശയനിഴലില്‍ വരുന്നത്. ബിന്ദു മൊബൈല്‍ ഫോണ്‍ ഉപയോഗിക്കാതിരുന്നതും സെബാസ്റ്റ്യന്‍ നുണപരിശോധനയ്ക്ക് വിസമ്മതിച്ചതും കാരണം തെളിവ് ലഭിക്കാതെ അന്വേഷണം പ്രതിസന്ധിയിലായി. പിന്നീടാണ് ഏറ്റുമാനൂര്‍ സ്വദേശിനി ജെയ്നമ്മയുടെ തിരോധാനവും അന്വേഷണവുമുണ്ടായത്. ജെയ്നമ്മ മൊബൈല്‍ ഉപയോഗിച്ചിരുന്നത് കാരണമാണ് സെബാസ്റ്റ്യനിലേക്ക് സംശയം നീണ്ടത്. ജെയ്‌നമ്മയെ അപായപ്പെടുത്തിയശേഷം ഫോണ്‍ കൈവശപ്പെടുത്തിയ സെബാസ്റ്റ്യന്‍ പലപ്പോഴും ബന്ധുക്കള്‍ക്ക് മിസ്ഡ് കോള്‍ ചെയ്തിരുന്നു. ജെയ്‌നമ്മയുടെ സഹോദരനും സഹോദരിക്കും മിസ്ഡ് കോളുകള്‍ ലഭിച്ചപ്പോഴൊക്കെ പോലീസിനെ സമീപിച്ചെങ്കിലും ലൊക്കേഷന്‍ ചേര്‍ത്തലയാണെന്നും അവിടെ പരാതിപ്പെടാനും ആവര്‍ത്തിച്ചുകൊണ്ടിരുന്നു. അവസാനം മേലുകാവിലും ഈരാറ്റുപേട്ടയിലും ലൊക്കേഷന്‍ കണ്ടതോടെയാണ് അന്വേഷണം മുന്നോട്ടുപോയതും വ്യക്തമായ തെളിവുകള്‍ ലഭിച്ചതും. ജെയ്‌നമ്മ ജീവിച്ചിരിപ്പുണ്ടെന്ന് ബന്ധുക്കളെ തെറ്റിദ്ധരിപ്പിക്കുകയായിരുന്നു പ്രതിയുടെ ലക്ഷ്യം. വാരനാട് സ്വദേശിനി ഐഷയുടെ തിരോധാനത്തിലും സെബാസ്റ്റ്യനു പങ്കുള്ളതായി കരുതുന്നു. ആലപ്പുഴ ജില്ലാ ക്രൈംബ്രാഞ്ചാണ് ഐഷ തിരോധാനം അന്വേഷിക്കുന്നത്. ബിന്ദു പത്മനാഭന്‍റെ തിരോധാനം അന്വേഷിക്കുന്നത് ക്രൈംബ്രാഞ്ചാണ്. ബിന്ദുവിന്‍റെ കുടുംബവീടിനോടു ചേര്‍ന്ന് സര്‍ക്കാരിന്‍റെ ലൈഫ് ഭവനപദ്ധതിക്കായി നീക്കിവച്ച 30 സെന്‍റ് സ്ഥലം വ്യാജ പ്രമാണം ചമച്ചു സെബാസ്റ്റ്യന്‍ കൈമാറ്റം ചെയ്തിരുന്നു. ബിന്ദുവിന്‍റെ പിതാവ് പത്മനാഭന്‍ വരുത്തിയ അബ്കാരി കുടിശികയിലേക്കു കണ്ടുകെട്ടിയ വസ്തുവാണു വ്യാജ പ്രമാണം ചമച്ചു പോക്കുവരവ് ചെയ്തു ബാങ്കില്‍നിന്നു വായ്പയെടുത്തത്. 20 വര്‍ഷം മുന്‍പു ജപ്തി ചെയ്ത വസ്തു ലേലത്തിനു വച്ചെങ്കിലും ആരും ഏറ്റെടുക്കാതെ വന്നതോടെ സര്‍ക്കാരിലേക്കു കണ്ടുകെട്ടി. ഈ വസ്തുവിന്‍റെ അതിരുകള്‍ കാണിച്ച് ചേര്‍ത്തല സ്വദേശിയായ ആധാരമെഴുത്തുകാരനെക്കൊണ്ട് പ്രമാണം രജിസ്റ്റര്‍ ചെയ്തു. ഇതു വില്ലേജ് ഓഫീസില്‍ പോക്കുവരവ് ചെയ്യാതെ വസ്തു വിറ്റതായി മറ്റൊരു പ്രമാണമുണ്ടാക്കി പോക്കുവരവു നടത്തി സഹകരണ ബാങ്കില്‍നിന്നു വായ്പയെടുത്തു. വായ്പ കുടിശികയായതോടെ ബാങ്ക് ജപ്തിക്കെത്തിയപ്പോഴാണ് സര്‍ക്കാര്‍ ഏറ്റെടുത്ത സ്ഥലമാണെന്നു കണ്ടെത്തിയത്. ബിന്ദു പത്മനാഭന്‍റെ തിരോധാനവുമായി ബന്ധപ്പെട്ട കേസിലെ മുഖ്യപ്രതിയാണ് സെബാസ്റ്റ്യനെന്ന് അന്നുതന്നെ പോലീസ് സംശയിച്ചിരുന്നു. സെബാസ്റ്റ്യന്‍റെ എല്ലാ ഇടപാടുകള്‍ക്കും സഹായിയായിരുന്ന ചെങ്ങണ്ട സ്വദേശി ഓട്ടോഡ്രൈവര്‍ മനോജിന്‍റെ ആത്മഹത്യയിലും ദുരൂഹതയുണ്ട്. സെബാസ്റ്റ്യന്‍റെ എല്ലാ ചെയ്തികളും അറിയാമായിരുന്ന മനോജിനെ ഇയാള്‍ വകവരുത്തിയതാണെന്നാണ് സംശയം. ബിന്ദു പദ്മനാഭനെക്കുറിച്ച് സെബാസ്റ്റ്യന്‍ പറഞ്ഞിട്ടുണ്ടെന്നു ഭാര്യ ആലപ്പുഴ: ചേര്‍ത്തല തിരോധാന കേസില്‍ ബിന്ദു പദ്മനാഭനെക്കുറിച്ച് സെബാസ്റ്റ്യന്‍ പറഞ്ഞിട്ടുണ്ടെന്നു സെബാസ്റ്റ്യന്‍റെ ഭാര്യയുടെ വെളിപ്പെടുത്തല്‍. കേസില്‍ ആദ്യം കാണാതായ ബിന്ദു പദ്മനാഭന്‍റെ പേര് അറിയാമെന്ന് സെബാസ്റ്റ്യന്‍റെ ഭാര്യ മാധ്യമങ്ങളോടു പറഞ്ഞു. ബിന്ദുവിന്‍റെ ഒഴികെയുള്ള പേരുകള്‍ സെബാസ്റ്റ്യന്‍ പറഞ്ഞുകേട്ടിട്ടില്ലെന്നും അവര്‍ പറഞ്ഞു. ബിന്ദുവിന്‍റെ പേര് എറണാകുളത്തെ സ്ഥലവുമായി ബന്ധപ്പെട്ട് കേട്ടതാണ്. ഈ സ്ത്രീകള്‍ ആരുമായും സാമ്പത്തിക ഇടപാടുകള്‍ ഉള്ളതായി പറഞ്ഞിട്ടില്ല. സെബാസ്റ്റ്യന്‍റെ ഭാഗത്തുനിന്ന് ഇതുവരെ മോശം പെരുമാറ്റം ഉണ്ടായിട്ടില്ലെന്നും ഭാര്യ പറഞ്ഞു. 2008ലായിരുന്നു സെബാസ്റ്റ്യനുമായുള്ള വിവാഹം. 17 വര്‍ഷം ഒരുമിച്ച് ജീവിച്ചു. തന്നോടും കുഞ്ഞിനോടും എല്ലാവരോടും വളരെ സ്നേഹമുള്ള വ്യക്തിയായിരുന്നുവെന്നും കൂള്‍ ആയിട്ടാണ് എപ്പോഴും നടക്കുന്നതെന്നും അവര്‍ പറഞ്ഞു. ഇത്തരമൊരു കാര്യം ചെയ്യുമെന്ന് തോന്നിയിട്ടില്ലെന്നും ഭാര്യ പറഞ്ഞു. സെബാസ്റ്റ്യന്‍ സാധു ആണെന്നാണ് തനിക്ക് തോന്നുന്നത്. തന്നോട് അങ്ങനെയായിരുന്നു ഇത്രയും കാലം. പിന്നീടുള്ള കാര്യങ്ങളൊന്നും അറിയില്ലന്നും അവര്‍ വ്യക്തമാക്കി. സെബാസ്റ്റ്യന് സാമ്പത്തിക ബുദ്ധിമുട്ട് ഉണ്ടായിരുന്നു. ഇതുവരെ മോശം പെരുമാറ്റം ഉണ്ടായിട്ടില്ല. കുടുംബത്തിനകത്തും പുറത്തും സൗമ്യന്‍. ആരോടും മറ്റ് പ്രശ്നങ്ങള്‍ ഉള്ളതായി പറഞ്ഞിട്ടില്ല. സെബാസ്റ്റ്യനെക്കുറിച്ച് കേള്‍ക്കുന്ന വിവരങ്ങള്‍ വിശ്വസിക്കാന്‍ കഴിയുന്നില്ല. സെബാസ്റ്റ്യന് ആരോഗ്യ പ്രശ്നങ്ങളുണ്ട്. പ്രമേഹ രോഗിയാണ്. കാലിനും പ്രശ്നങ്ങളുണ്ട്. അങ്ങനെയുള്ള ഒരാള്‍ ഇങ്ങനെ ഒരു കാര്യം ചെയ്യുമെന്ന് വിശ്വസിക്കാന്‍ പറ്റുന്നില്ലെന്നും അവര്‍ പറഞ്ഞു.

രാഘവിന് നാടിന്‍റെ യാത്രാമൊഴി

മാവേലിക്കര: കീച്ചേരിക്കടവ് അപകടത്തില്‍ അച്ചന്‍കോവിലാറ്റില്‍ മുങ്ങിമരിച്ച രാഘവ് കാര്‍ത്തിക്കിന് നാടിന്‍റെ യാത്രാമൊഴി. മാവേലിക്കര കല്ലുമല അക്ഷയ് ഭവനത്തില്‍ കാര്‍ത്തികേയന്‍റെയും ഗീതയുടെയും മകന്‍ രാഘവ് കാര്‍ത്തിക്കിന്‍റെ (24) മൃതദേഹം വന്‍ ജനാവലിയുടെ സാന്നിധ്യത്തിലാണ് സംസ്‌കരിച്ചത്. രാഘവിന്‍റെ ഇളയ സഹോദരന്‍ അദ്വൈത് കാര്‍ത്തിക്ക് ചിതയ്ക്ക് തീകൊളുത്തി. മൂന്നുമണിയോടെ മൃതദേഹം വീട്ടിലെത്തിച്ചു. എം.എസ്. അരുണ്‍ കുമാര്‍ എംഎല്‍എ, തെക്കേക്കര പഞ്ചായത്ത് പ്രസിഡന്‍റ് ഡോ. കെ. മോഹന്‍കുമാര്‍ എന്നിവരടക്കം നിരവധിയാളുകള്‍ അന്തിമോപചാരമര്‍പ്പിച്ചു. രാഘവന് ഒപ്പം ജോലി ചെയ്തിരുന്ന തൃക്കുന്നപ്പുഴ കിഴക്ക് വടക്ക്മുറിയില്‍ മണികണ്ഠന്‍ ചിറയില്‍ ബിനുഭവനത്തില്‍ ഗോപിയുടെയും അംബുജാക്ഷിയുടെയും മകന്‍ ബിനുവും (42) അപകടത്തില്‍ മരിച്ചിരുന്നു. അഞ്ചുപേര്‍ രക്ഷപ്പെട്ടു. തിങ്കള്‍ പകല്‍ 1.15 നായിരുന്നു അപകടം.

തെക്കേക്കര സ്കൂളിൽ അവധിയെടുക്കാതെ വെള്ളം

ഹരിപ്പാട്: സ്കൂൾ തുറന്ന് രണ്ടു മാസം കഴിഞ്ഞിട്ടും പള്ളിപ്പാട് തെക്കേക്കര ഗവ. എൽപി സ്കൂൾ വളപ്പ് വെള്ളത്തിൽത്തന്നെ. ഏറെ ബുദ്ധിമുട്ടിയാണ് അധ്യാപകരും കുട്ടികളും ഇവിടെയെത്തുന്നത്. റോഡിൽനിന്നു സ്കൂളിലേക്കുള്ള വഴി മുഴുവൻ വെള്ളമാണ്. സ്കൂൾ പരിസരമാകെ മലിനജലം. സ്കൂൾ പരിസരം മുഴുവൻ വെള്ളത്തിലായതിനാൽ ഇവിടെ പ്രവേശനോത്സവം നടന്നിരുന്നില്ല. രണ്ടു ദിവസം കളക്ടർ സ്കൂളിന് അവധിയും നൽകിയിരുന്നു. വെള്ളമിറങ്ങിയ ശേഷമാണ് പിന്നീട് ക്ലാസ് തുടങ്ങിയത്. എന്നാൽ, രണ്ടു മാസത്തിനിടെ നാലു തവണയാണ് വെള്ളപ്പൊക്കമുണ്ടായത്. അപ്പോഴൊക്കെ സ്കൂളും പരിസരവും മുങ്ങി. മാലിന്യം അടിയുന്നു വെള്ളപ്പൊക്കത്തിൽ വന്നടിയുന്ന മാലിന്യം സ്കൂൾ പരിസരമാകെയുണ്ട്. ഇതു ഗുരുതരമായ ആരോഗ്യ പ്രശ്നങ്ങൾക്കു കാരണമാകുന്നു. സമീപത്തെ കുളം നിറയുമ്പോഴും സ്കൂൾ പരിസരം വെള്ളത്തിലാകും. വെള്ളമിറങ്ങുമ്പോൾ സ്കൂളും പരിസരവും വൃത്തിയാക്കുന്നതിനു ബന്ധപ്പെട്ടവർ തയാറാകുന്നില്ലെന്നും ആക്ഷേപമുണ്ട്. അച്ചൻകോവിലാറിന്‍റെ തീരത്തെ ഇരുപത്തെട്ടിൽ കടവിലാണ് തെക്കേക്കര സ്കൂൾ. ആറ് ചുറ്റിയാണ് ഇവിടെയൊഴുകുന്നത്. വെള്ളം ഉയരുമ്പോൾ നേരേ സ്കൂളിലേക്ക് ഒഴുകിയെത്തുകയാണ്. വെള്ളപ്പൊക്കം മൂലം പ്രധാന റോഡും തകർന്നു. സ്കൂളിന്‍റെ പരിസരങ്ങളിലെ വീടുകളിലും വെള്ളം ഒഴിഞ്ഞിട്ടില്ല. അതേസമയം, വെള്ളക്കെട്ടിന്‍റെ ദുരിതങ്ങളുണ്ടെങ്കിലും ക്ലാസുകൾ മുടങ്ങാതെ നടക്കുന്നതായി പ്രധാനാധ്യാപിക എലിസബത്ത് പറഞ്ഞു. ഇനിയും പൊളിക്കുന്നില്ല വീഴാറായ കെട്ടിടം തെക്കേക്കര ഗവ എൽപി സ്കൂളിലെ ഉപയോഗശൂന്യമായ കെട്ടിടം പൊളിക്കാത്തതും ഭീഷണിയാണ്. കുട്ടികൾ ഈ കെട്ടിടത്തിലേക്കു കയറാൻ സാധ്യതയുണ്ട്. അപകട മുന്നറിയിപ്പു നൽകിയിട്ടുണ്ട്. കെട്ടിടത്തിന്‍റെ മേൽക്കൂരകൾ പൂർണമായും തകർന്ന അവസ്ഥയിലാണ്. കാറ്റിലും മഴയിലും ഓടുകൾ പറന്നുപോകുന്നതും പതിവാണ്. തുടർച്ചയായുള്ള വെള്ളപ്പൊക്കവും കെട്ടിടത്തെ കൂടുതൽ അപകട സ്ഥിതിയിലാക്കി. കെട്ടിടം അപകടനിലയിലായതിനാൽ എൻടിപിസി നിർമിച്ചു നൽകിയ മറ്റൊരു കെട്ടിടത്തിലാണ് ഇപ്പോൾ ക്ലാസുകൾ നടക്കുന്നത്. പഴയ കെട്ടിടം പൊളിച്ചുമാറ്റണമെന്നാവശ്യപ്പെട്ട് പൊതുമരാമത്ത് വകുപ്പിനു കത്തു നൽകിയിരുന്നതായി പള്ളിപ്പാട് പഞ്ചായത്തധികൃതർ പറഞ്ഞു. എന്നാൽ, തുടർനടപടികളായിട്ടില്ല. ഇതാണ് പൊളിക്കൽ വൈകാൻ കാരണം.

"പണിക്കിറങ്ങുന്നില്ലെന്ന് പറഞ്ഞവനെ ഞാന്‍ നിര്‍ബന്ധിച്ച് ഇറക്കി'

ഇന്നു പണിക്കിറങ്ങുന്നില്ല എന്നു പറഞ്ഞിരുന്ന രാഘവിനെ താന്‍ നിര്‍ബന്ധിച്ചാണ് ഇന്നത്തെ കോണ്‍ക്രീറ്റിന് ഇറക്കിയതെന്നു രാഘവിന്‍റെ ജ്യേഷ്ഠന്‍ അക്ഷയ് കാര്‍ത്തിക്. ഇന്നലെ തങ്ങള്‍ ഇരുവരും ഒരുമിച്ച് ഇപ്പോള്‍ രാഘവ് വാടകയ്ക്കു താമസിക്കുന്ന ഒച്ചിറയില്‍ ഉണ്ടായിരുന്നു. അവിടെനിന്ന് ഒരുമിച്ചാണ് താന്‍ നിലവില്‍ താമസിക്കുന്ന കടവൂരുള്ള വീട്ടിലെത്തിയത്. അവിടെ എത്തിയപ്പോഴേക്കും ഇന്നു കോണ്‍ക്രീറ്റിന് വരുന്നില്ല എന്ന് രാഘവ് അക്ഷയോടു പറഞ്ഞു. ഉച്ചവരെയുള്ള പണിയല്ലേയുള്ളു. അതുകഴിഞ്ഞ് നമുക്ക് ഒരുമിച്ചുപോയി ഇറച്ചിയൊക്കെ വാങ്ങി ആഹാരം കഴിക്കാമെന്നൊക്കെ പറഞ്ഞിരുന്നതാണ്. വലിയ ശബ്ദം കേട്ട് നട്ടു പോയതാണെന്നു മനസിലായപ്പോള്‍ നട്ട് ഞാന്‍ മുറുക്കാം എന്നു താന്‍ പറഞ്ഞെന്നും അതിനെ അവഗണിച്ച് ഒരു ചിരിയോടെ ട്രസിന് അടുത്തേക്കു പോയതും പൊടുന്നനെ തകര്‍ന്നു വീഴുന്നതുമാണ് കണ്ടതെന്നും വിതുമ്പലോടെ അക്ഷയ് പറഞ്ഞു.

ദുഃഖഭൂമിയായി കീച്ചേരികടവ്

മാവേലിക്കര: പാലത്തിന്‍റെ സ്പാൻ തകർന്ന് അപകടം സംഭവിച്ച കീച്ചേരിക്കടവിൽ രാഘവ് കാര്‍ത്തിക്കിന്‍റെ ബന്ധുക്കളുടെയും ബിനുവിന്‍റെ ജ്യേഷ്ഠൻ ബിജുവിന്‍റെയും നിലവിളി കൂടി നിന്നവരുടെയും കണ്ണുനനച്ചു. രാഘവിന്‍റെ മാതാവ് ഗീതയുടെ അലമുറയിട്ടുള്ള കരച്ചിൽ എല്ലാവർക്കും നൊന്പരം പകർന്നു. അഞ്ചു മാസത്തെ മാത്രം ദാമ്പത്യമാണ് രാഘവിനും ആതിരയ്ക്കും ഉണ്ടായത്. ആതിരയെ ആശ്വസിപ്പിക്കാൻ ആളുകൾ ബുദ്ധിമുട്ടി. ബന്ധുക്കളില്‍ പലരും രാഘവ് അവരെ ചേര്‍ത്തു പിടിച്ച് പല പ്രതിസന്ധികളിലും രക്ഷപ്പെടുത്തിയ കഥകള്‍ പറഞ്ഞു കരയുന്നതു കാണാമായിരുന്നു. അച്ഛന്‍ കാര്‍ത്തികേയന്‍ കടവിലേക്ക് കണ്ണുംനട്ട് സ്തംഭിച്ച് ഇരുന്നു. ജനപ്രതിനിധികള്‍, ഉദ്യോഗസ്ഥര്‍, പ്രദേശവാസികളില്‍ ചിലരുടെയും മുഖത്തും സങ്കടം ഘനീഭവിച്ചതോടെ കീച്ചേരിക്കടവ് ദുഃഖമൂകമായി. പ്രത്യാരോപണങ്ങള്‍ പാടില്ല: യു. പ്രതിഭ എംഎല്‍എ അപകട സമയത്ത് ആരോപണ പ്രത്യാരോപണങ്ങള്‍ ഒഴിവാക്കണമെന്നു കായംകുളം എംഎല്‍എ യു.പ്രതിഭ. രാഷ്‌ട്രീയം വേണം എന്നാൽ, ഇത്തരത്തിലുള്ള ദുഷിച്ച രാഷ്‌ട്രീയം പാടില്ല. പാലത്തിന് എന്തു പറ്റിയതാണെന്ന് തനിക്ക് അറിയില്ല. അത് എന്‍ജിനിയര്‍മാര്‍ പറയേണ്ട കാര്യമാണ്. അപകടത്തില്‍പ്പെട്ടവരെ രക്ഷിക്കുക എന്നതിനാണ് ഏതൊരു അപകട സമയത്തും പ്രഥമ പരിഗണന കൊടുക്കേണ്ടത്. നിര്‍മാണത്തിലെ വീഴ്ച നേരത്തെ ചൂണ്ടിക്കാട്ടി കീച്ചേരില്‍ കടവ് പാലത്തിന്‍റെ ത്തിലെ അപാകത മുന്‍പേ ചൂണ്ടിക്കാട്ടിയതായിരുന്നുവെന്നു വാര്‍ഡ് മെമ്പര്‍ സോവല്ലി പറഞ്ഞു. ശക്തമായ ഒഴുക്കിൽ ഒഴുകി വന്ന മരം ഇടിച്ച് ട്രസിന്‍റെ ഒരു തൂണ്‍ തകര്‍ന്നു പോയി. അതുമാറ്റി പുതിയ തൂണ്‍ സ്ഥാപിച്ചപ്പോള്‍ സുരക്ഷാ പരിശോധനകള്‍ നടത്തിയില്ല. അപകടമുണ്ടായപ്പോൾ പാലത്തിന്‍റെ സൂപ്പര്‍വൈസറോട് എത്ര തൊഴിലാളികള്‍ ഉണ്ടായിരുന്നു കോണ്‍ക്രീറ്റിന് എന്നു ചോദിച്ചപ്പോള്‍ അറിയില്ലായിരുന്നുവെന്നായിരുന്നു മറുപടി. സോമവല്ലി (വാര്‍ഡ് മെമ്പര്‍) സുരക്ഷാ മാനദണ്ഡം പാലിച്ചില്ല ഒരു സുരക്ഷാ മാനദണ്ഡങ്ങളും പാലിക്കാതെയായിരുന്നു പാലത്തിന്‍റെ പണി. ഫോം വര്‍ക്ക് പൂര്‍ത്തിയായ ശേഷം സേഫ്റ്റി എന്‍ജിനിയര്‍ പരിശോധിച്ച് അപകടം ഇല്ല എന്ന് ഉറപ്പ് വരുത്തിയ ശേഷം വേണം കോണ്‍ക്രീറ്റ് ചെയ്യാന്‍. കോണ്‍ക്രീറ്റ് ഇടുമ്പോള്‍ പാലിക്കേണ്ട നിബന്ധനകള്‍ പാലിച്ചിട്ടില്ല. ഇതിനുപയോഗിച്ച മെറ്റീരിയലുകളുടെ കാര്യത്തിലും സംശയമുണ്ട്. മുരളീധരന്‍ (പ്രദേശവാസി) ബിജുവിനു രക്ഷകരായത് ഇതരസംസ്ഥാന തൊഴിലാളികൾ അനുജന്‍ ബിനുവും രാഘവ് കാര്‍ത്തിക്കും ഒഴുക്കില്‍പ്പെട്ടതു കണ്ട് അവരെ രക്ഷിക്കാനായി ആറ്റിലേക്ക് എടുത്തു ചാടിയ തൃക്കുന്നപുഴ കിഴക്ക് വടക്ക്മുറിയില്‍ മണികണ്ഠന്‍ ചിറയില്‍ ബിജുവിനു രക്ഷകരായതു മൂന്ന് അതിഥി തൊഴിലാളികള്‍. കീച്ചേര കടവിനു സമീപം വീടിന്‍റെ നിര്‍മാണത്തിൽ ഏര്‍പ്പെട്ടുകൊണ്ടിരുന്ന ബീഹാര്‍ ബേത്യ സ്വദേശികളായ ശത്രുഘ്നന്‍ സാഹിനി(40), അനില്‍ഷാ(32), സിഹിബ് റാവു(52) എന്നിവരാണ് ബിജുവിനെ രക്ഷിച്ചത്. ഇവര്‍ ഉച്ചയ്ക്ക് ആഹാരം കഴിച്ച ശേഷം വിശ്രമിക്കുകയായിരുന്നു. ശബ്ദം കേട്ട് ഓടിയെത്തിയപ്പോള്‍ മൂന്നു പേര്‍ ഒഴുക്കില്‍പ്പെട്ടതാണ് മൂവരും കണ്ടത്. ഉടന്‍തന്നെ കയര്‍ ഇട്ടു കൊടുത്ത് ഇവരെ രക്ഷപ്പെടുത്താനായി ശ്രമിച്ചു. ബിജുവിനെ രക്ഷിക്കാന്‍ സാധിച്ചെങ്കിലും മറ്റു രണ്ടുപേരും അപ്പോഴേക്കും താഴ്ന്നു പോയിരുന്നു. സാഹിത് റാവുവും ശത്രുഘനന്‍ സാഹിനിയും ഇരുപത് വര്‍ഷമായും അനില്‍ ഷാ എട്ട് വര്‍ഷമായും കേരളത്തില്‍ ജോലി ചെയ്തു വരുന്നവരാണ്.

കില്ലര്‍ സെബാസ്റ്റ്യന്‍: ചോദ്യംചെയ്യൽ തുടരുന്നു ; കൊലപാതകങ്ങളുടെ ചുരുളഴിക്കാന്‍ ക്രൈംബ്രാഞ്ച്

കോട്ടയം: അതിരമ്പുഴ കോട്ടമുറി കാക്കനാട്ടുകാലായില്‍ കെ.എ. മാത്യുവിന്‍റെ ഭാര്യ ജെയ്നമ്മയുടെ തിരോധാനത്തില്‍ അന്വേഷണം തുടങ്ങിയ കോട്ടയം ക്രൈംബ്രാഞ്ച് നിലവില്‍ നാലോ അഞ്ചോ പേരുടെ തിരോധാനം സംബന്ധിച്ച് അന്വേഷിക്കുകയാണ്. ജെയ്‌നമ്മയുടെ ബന്ധുക്കള്‍ നല്‍കിയ പരാതിയുടെയും സൂചനകളുടെയും അടിസ്ഥാനത്തിലാണ് ചേര്‍ത്തല പള്ളിപ്പുറം സ്വദേശി സെബാസ്റ്റ്യനെ ചോദ്യം ചെയ്യാന്‍ കോട്ടയം ക്രൈംബ്രാഞ്ച് കസ്റ്റഡിയിലെടുത്തത്. കോട്ടയം ക്രൈം ബ്രാഞ്ച് മൂന്നു ദിവസം ചോദ്യം ചെയ്തിട്ടും ജെയ്‌നമ്മയെ കൊലപ്പെടുത്തി സ്വര്‍ണാഭരണങ്ങള്‍ കവര്‍ന്നതായി സെബാസ്റ്റ്യന്‍ സമ്മതിച്ചിട്ടില്ല. എന്നാല്‍ സ്വര്‍ണം വിറ്റതായി പോലീസ് തെളിവടക്കം കണ്ടെത്തുകയും ചെയ്തു. ജെയ്‌നമ്മയുടെ ഫോണ്‍ കൈവശം വച്ച് അവര്‍ ജീവിച്ചിരിപ്പുണ്ടെന്ന് തെറ്റിദ്ധരിപ്പിക്കാന്‍ സെബാസ്റ്റ്യന്‍ പലപ്പോഴും ബന്ധുക്കളെ മിസ്ഡ് കോള്‍ ചെയ്തിരുന്നു. തിരികെ വിളിച്ചപ്പോള്‍ മറുപടി ലഭിക്കുകയോ ഫോണ്‍ എടുക്കുകയോ ചെയ്തില്ല. മിസ്ഡ് കോളിനു തൊട്ടുപിന്നാലെ ഫോണ്‍ ഓഫ് ആക്കുന്നതും പതിവായിരുന്നു. മിസ്ഡ് കോള്‍ സംബന്ധിച്ച് ക്രൈംബ്രാഞ്ച് നടത്തിയ ശാസ്ത്രീയ അന്വേഷണമാണ് നാല് ദുരൂഹമരണം ചുരുളഴിയുന്ന സാഹചര്യത്തിലേക്കെത്തിയത്. നാലു സ്ത്രീകള്‍ക്കു പുറമെ കൃത്യങ്ങള്‍ക്ക് കൂട്ടാളികളായിരുന്ന രണ്ട് പുരുഷന്മാരെയും സെബാസ്റ്റ്യന്‍ വക വരുത്തിയതായാണ് സൂചന. സെബാസ്റ്റ്യന്‍റെ വീട്ടുവളപ്പില്‍ കണ്ടെത്തിയ ശരീരാവശിഷ്ടങ്ങള്‍ ജെയ്‌നമ്മയുടേതാണോ എന്നതില്‍ സംശയമുണ്ട്. ജയ്നമ്മയുടെ സഹോദരന്‍ സാവിയോ, സഹോദരി ആന്‍സി എന്നിവരുടെ രക്തസാമ്പിളുകള്‍ ഡിഎന്‍എ പരിശോധനയ്ക്കായി ശേഖരിച്ചിട്ടുണ്ട്. ഡിഎന്‍എ പരിശോധനാഫലം ലഭിച്ചെങ്കില്‍ മാത്രമേ കൊലചെയ്യപ്പെട്ടത് ജയ്നമ്മ തന്നെയാണോ എന്നു സ്ഥിരീകരിക്കാനാകൂ. ക്ലിപ്പിട്ട ഒരു പല്ല് കണ്ടെടുത്തത് ചേര്‍ത്തല സ്വദേശി ഐഷയുടേതാണെന്ന് സംശയിക്കുന്നു. ജെയ്‌നമ്മയുടെ പല്ലിന് ക്ലിപ്പുണ്ടായിരുന്നില്ല. ജെയ്‌നമ്മയെ സെബാസ്റ്റ്യന്‍ കൊലപ്പെടുത്തി എന്നത് പോലീസ് സ്ഥിരീകരിക്കുന്നു. എന്നാല്‍ മൃതദേഹം എവിടെ മറവു ചെയ്തുവെന്ന് സെബാസ്റ്റ്യന്‍ പറയുന്നില്ല. ഒരാഴ്ച തുടരെ ചോദ്യം ചെയ്തിട്ടും രോഗവും ക്ഷീണവും മറവിയും നടിച്ച് സെബാസ്റ്റ്യന്‍ തന്ത്രപരമായി ഒഴിഞ്ഞുമാറുകയാണ്. പ്രതി പ്രമേഹത്തിന് മരുന്ന് കഴിക്കുന്നുണ്ട്. കാലിലെ മുറിവ് ദിവസവും ആശുപത്രിയിലെത്തി ഡ്രസ് ചെയ്യുന്നു. നാലു നേരം കൃത്യമായി ഭക്ഷണം വേണമെന്നും നിര്‍ബന്ധമുണ്ട്. സെബാസ്റ്റ്യനില്‍നിന്ന് വിവരങ്ങള്‍ ലഭിക്കേണ്ടതിനാല്‍ പോലീസ് സംയമനം പുലര്‍ത്തുന്നു. കോട്ടയം ക്രൈംബ്രാഞ്ച് ടീം പൂര്‍ണമായി ചേര്‍ത്തലയില്‍ ക്യാമ്പ് ചെയ്ത് തെരച്ചിലും ചോദ്യം ചെയ്യലും തുടരുകയാണ്. മൊഴികളില്‍ വൈരു‌ധ്യം ജെയ്നമ്മ പള്ളിപ്പുറത്തെ വീട്ടില്‍ച്ചാണ് കൊല്ലപ്പെട്ടതെന്നുറപ്പിച്ചാണ് കോട്ടയം ക്രൈംബ്രാഞ്ചിന്‍റെ നടപടികള്‍ മുന്നോട്ടു പോകുന്നത്. കാണാതായ, 2024 ഡിസംബര്‍ 23-നു തന്നെ ഇവര്‍ കൊല്ലപ്പെട്ടിട്ടുണ്ടെന്നും ശരീരാവശിഷ്ടങ്ങള്‍ പള്ളിപ്പുറത്തെ വീട്ടുവളപ്പില്‍ തന്നെയുണ്ടെന്നുമാണ് കണക്കാക്കുന്നത്. സെബാസ്റ്റ്യന്‍ കുറ്റസമ്മതം നടത്തിയെങ്കിലും ശരീരാവശിഷ്ടങ്ങളുടെ കാര്യത്തില്‍ വ്യക്തത നല്‍കിയിട്ടില്ല. ജെയ്‌നമ്മ ധരിച്ചിരുന്ന സ്വര്‍ണാഭരണങ്ങളടക്കം അപഹരിച്ച് പണയംവെക്കുകയും പിന്നീട് എടുത്ത് വില്‍ക്കുകയുമായിരുന്നു. ഇവ പോലീസ് വീണ്ടെടുത്തിട്ടുണ്ട്. കസ്റ്റഡിയിലുള്ള പ്രതി പരസ്പരവിരുദ്ധമായ മൊഴികളിലൂടെ ഉദ്യോഗസ്ഥരെ വട്ടംകറക്കുകയാണെന്നാണു സൂചന. ലിസ്റ്റില്‍ അവസാനമെത്തിയത് ഐഷ ഐഷയെ 2012 മേയ് 13നാണ് കാണാതായത്. ഫോണ്‍ വന്നതിനെ തുടര്‍ന്ന് ബാങ്കിലേക്കെന്ന് പറഞ്ഞ് വീട്ടില്‍ നിന്നിറങ്ങി. കുടുംബസ്വത്ത് തര്‍ക്കം നിലനിന്നിരുന്ന ഐഷയ്ക്ക് സമീപവാസിയുടെ അഞ്ച് സെന്‍റ് സ്ഥലം വാങ്ങിനല്‍കാന്‍ മുന്‍കൈയെടുത്തത് സെബാസ്റ്റ്യനായിരുന്നു. തിരുവിഴ ക്ഷേത്രത്തിലേക്ക് പോയ സിന്ധുവിനെ 2020 ഒക്ടോബര്‍ 19നാണ് കാണാതായത്. സെബാസ്റ്റ്യനുമായി ബന്ധപ്പെടുത്തുന്ന തെളിവുകള്‍ ലഭിച്ചിട്ടില്ല. ആലപ്പുഴ ജില്ലയില്‍ മാത്രമല്ല, സമീപജില്ലകളിലും സെബാസ്റ്റ്യന്‍ കുറ്റകൃത്യങ്ങള്‍ നടത്തിയതായി ജെയ്‌നമ്മയുടെ തിരോധാനത്തോടെ വ്യക്തമായതിനാല്‍ കോട്ടയം, എറണാകുളം, കൊല്ലം ജില്ലകളില്‍നിന്നു സമീപകാലത്തു കാണാതായ സ്ത്രീകളുടെ വിവരങ്ങളും പോലീസ് ശേഖരിക്കുന്നുണ്ട്. അര്‍ത്തുങ്കല്‍ പൊലീസ് സ്റ്റേഷന്‍ പരിധിയില്‍നിന്നു അഞ്ചു വര്‍ഷം മുന്‍പു കാണാതായ ചേര്‍ത്തല തെക്ക് വള്ളാക്കുന്നത്തുവെളി സിന്ധുവിന്‍റെ കേസ് വീണ്ടും അന്വേഷിക്കാന്‍ പൊലീസ് തീരുമാനിച്ചതും ഈ സാഹചര്യം പരിഗണിച്ചാണ്. കോട്ടയം ക്രൈംബ്രാഞ്ച് എസ്പി ഗിരീഷ് പി. സാരഥി, ക്രൈംബ്രാഞ്ച് ആലപ്പുഴ എസ്പി ഷൗക്കത്ത് അലി, ചേര്‍ത്തല എഎസ്പി ഹരീഷ് ജെയ്ന്‍, ചേര്‍ത്തല തഹസില്‍ദാര്‍ എസ്. ഷീജ, റവന്യൂ വകുപ്പ് ഉദ്യോഗസ്ഥര്‍, അഗ്നിശമനസേന, ഫോറന്‍സിക് വിദഗ്ദര്‍, ഡോഗ് സ്‌ക്വാഡ് തുടങ്ങിയവര്‍ തെളിവെടുപ്പിൽ പങ്കെടുത്തു.

സിസിടിവി കാമറ നിരീക്ഷണത്തില്‍: പള്ളിപ്പുറം പള്ളി തിരുനാൾ അവലോകനയോഗം ചേര്‍ന്നു

ചേര്‍ത്തല: പള്ളിപ്പുറം സെന്‍റ് മേരീസ് ഫൊറോനാ പള്ളിയില്‍ പരിശുദ്ധ ദൈവമാതാവിന്‍റെ സ്വർഗാരോപണ കൊംബ്രേരിയ ജൂബിലി തിരുനാളിന്‍റെ ഒരുക്കങ്ങളുടെ ഭാഗമായി വിവിധ സർക്കാർ വകുപ്പ് മേധാവികളുടെ അവലോകനയോഗം ചേര്‍ന്നു. തിരുനാൾ ദിവസങ്ങളിൽ പള്ളിയും പള്ളിപ്പരിസരങ്ങളും സിസിടിവി കാമറ നിരീക്ഷണത്തിലായിരിക്കും. ആരോഗ്യവകുപ്പിന്‍റെ നേതൃത്വത്തില്‍ പള്ളിക്കടവ് ബോട്ട് ജെട്ടിയിൽ ശുചിത്വമിഷന്‍റെ ഭാഗമായി ഇ-ടോയ്‌ലറ്റ് സ്ഥാപിക്കാമെന്ന് ഉറപ്പ് നൽകി. വൈക്കം-പള്ളിക്കടവ് ബോട്ട് സർവീസ് രാത്രി 9.30 വരെ ഉണ്ടായിരിക്കും. യോഗത്തില്‍ ദലീമ ജോജോ എംഎൽഎ അധ്യക്ഷത വഹിച്ചു. പള്ളിപ്പുറം പള്ളി വികാരി റവ.ഡോ. പീറ്റർ കണ്ണമ്പുഴ സ്വാഗതം പറഞ്ഞു. ചേർത്തല തഹസില്‍ദാർ എസ്. ശ്രീജ, പോലീസ് ഉദ്യോഗസ്ഥർ, ആരോഗ്യവിഭാഗം, പഞ്ചായത്ത്-വില്ലേജ് ഉദ്യോഗസ്ഥർ, അഗ്നിശമനസേന, വാട്ടർ അഥോറിറ്റി, ബോട്ട് സർവീസ്, ഫുഡ് ഇൻസ്പെക്ടർ, കെഎസ്ഇബി, മോട്ടോര്‍വാഹനവകുപ്പ് എന്നിവിടങ്ങളിലെ ഉദ്യോഗസ്ഥർ, ബ്ലോക്ക് പഞ്ചായത്ത് പ്രസിഡന്‍റും പഞ്ചായത്ത് ജനപ്രതിനിധികളും പങ്കെടുത്തു. ട്രസ്റ്റിമാരായ ബെന്നി ജോൺ പാലക്കൽ, ജോസഫ് സെന്തോ, വൈസ് ചെയർമാൻ റോണി ചെറിയാൻ കോയിപ്പറമ്പിൽ, കൗൺസിൽ സെക്രട്ടറി സിബി ജോസഫ് എന്നിവർ പ്രസംഗിച്ചു.

ഇനി പൊളിക്കും, ആലപ്പുഴ വാട്ടര്‍ ടൂറിസം

ആലപ്പുഴ: ജില്ലയെ ലോകനിലവാരത്തിലുള്ള ജല വിനോദസഞ്ചാര കേന്ദ്രമാക്കി പരിവര്‍ത്തനം ചെയ്യാനുള്ള ഗ്ലോബല്‍ വാട്ടര്‍ വണ്ടര്‍ലാന്‍ഡ് പദ്ധതിക്കു തുടക്കം. കേന്ദ്രസര്‍ക്കാര്‍ വായ്പയായി അനുവദിക്കുന്ന 74.95 കോടി രൂപയുടെ പദ്ധതികള്‍ സംസ്ഥാന സര്‍ക്കാരിന്‍റെ നേതൃത്വത്തിലാണ് നടപ്പിലാക്കുന്നത്. കേരള ടൂറിസം ഇന്‍ഫ്രാസ്ട്രക്ഷന്‍ ലിമിറ്റഡിനെയാണ് പദ്ധതി നടത്തിപ്പിനുള്ള നോഡല്‍ ഏജന്‍സിയായി നിശ്ചയിച്ചിട്ടുള്ളത്. സ്വദേശ് ദര്‍ശന്‍ -രണ്ട് പദ്ധതിയുടെ ഭാഗമായാണ് ആലപ്പുഴ ഗ്ലോബല്‍ വാട്ടര്‍ വണ്ടര്‍ലാന്‍ഡ് പദ്ധതി. പ്രഥമയോഗം ജില്ലാ കളക്ടര്‍ അലക്‌സ് വര്‍ഗീസിന്‍റെ അധ്യക്ഷതയില്‍ നടന്നു. എംഎല്‍എമാരായ പി.പി. ചിത്തരഞ്ജന്‍, എച്ച്.സലാം എന്നിവർ പങ്കെടുത്തു. നിര്‍മാണം അടുത്ത വര്‍ഷം ഫെബ്രുവരിയിൽത്തന്നെ പൂര്‍ത്തിയാക്കത്തക്ക വിധം സംവിധാനങ്ങള്‍ ഒരുക്കമെന്നു ജില്ലാ കളക്ടര്‍ യോഗത്തില്‍ പറഞ്ഞു. എല്ലാ അനുമതികളും വിവിധ വകുപ്പുകള്‍ എത്രയും വേഗം നൽകാൻ നടപടിയെടുക്കും. ഊരാളുങ്കല്‍ ലേബര്‍ കോണ്‍ട്രാക്ട് സൊസൈറ്റിയാണ് കരാറുകാർ. ആലപ്പുഴയുടെ ടൂറിസം വികസനത്തിന്‍റെ മാസ്റ്റര്‍ പ്ലാനിലെ ആദ്യഘട്ടമായി പദ്ധതി മാറുമെന്നു പദ്ധതിയുടെ രൂപരേഖ അവതരിപ്പിച്ചുകൊണ്ട് കേരള ടൂറിസം ഇന്‍ഫ്രാസ്ട്രക്ഷന്‍ ലിമിറ്റഡ് മാനേജിംഗ് ഡയറക്ടര്‍ ഡോ. മനോജ് കുമാര്‍ കിനി പറഞ്ഞു. യോഗത്തില്‍ വിവിധ വകുപ്പുകളുടെ ജില്ലാതല ഉദ്യോഗസ്ഥരുംപങ്കെടുത്തു. പദ്ധതി ഇങ്ങനെ ബീച്ചിന്‍റെ വികസനം, കനാല്‍ പുനരുദ്ധാരണം, കായല്‍ തീരത്തുള്ള ക്രൂയിസ് ടെര്‍മിനല്‍ എന്നിവ കോര്‍ത്തിണക്കിയുള്ള ബീച്ച് കായല്‍ ടൂറിസത്തിന്‍റെ സമഗ്രവികസനമാണ് ലക്ഷ്യം. ജലനൃത്തം സംവിധാനം, കിയോസ്‌ക്കുകള്‍, റസ്റ്ററന്‍റുകള്‍, റസ്റ്റ് റൂമുകള്‍, പരിപാടികള്‍ സംഘടിപ്പിക്കാനുള്ള സ്ഥലം എന്നിവ ബീച്ചില്‍ ഒരുക്കും. കനാല്‍ പുനരുദ്ധാരണത്തിന്‍റെ ഭാഗമായി പ്ലാസ, ബോട്ട് ഡെക്ക്, ബോട്ടുജെട്ടിയുടെ പുനരുദ്ധാരണം, അമിനിറ്റിസ് എന്നിവ ഉണ്ടാകും. കായലിനോടു ചേർന്നു നിര്‍മിക്കുന്ന ഇന്‍റര്‍നാഷണല്‍ ക്രൂയിസ് ടെര്‍മിനലില്‍ ബോട്ട് ടെര്‍മിനല്‍, കഫറ്റീരിയ, ബോട്ട് ഡക്കുകള്‍ എന്നിവ ഉണ്ടാവും.

മണ്ണാറശാല വലിയമ്മ സാവിത്രി അന്തർജനം ശതാഭിഷിക്തയാകുന്നു

ഹരിപ്പാട്: മണ്ണാറശാല നാഗരാജക്ഷേത്രത്തിലെ മുഖ്യപൂജാരിണി (മണ്ണാറശാല വലിയമ്മ) സാവിത്രി അന്തർജനത്തിന്‍റെ ശതാഭിഷേകം നാളെ നടക്കും. രാവിലെ 5.30ന് ക്ഷേത്രത്തിൽ വിശേഷാൽ പൂജ, ഹോമം, പ്രത്യക്ഷപശുദാനം, ദശദാനം തുടങ്ങിയ ചടങ്ങുകൾ നടക്കും. 9.30 മുതൽ 12 വരെ സംഗീതസദസ്, 10.30ന് പിറന്നാൾ സദ്യ എന്നിവ നടക്കും. ഇന്ന് വൈകിട്ട് 4ന് തിരുവാതിരകളി, സന്താനഗോപാലം കഥകളി എന്നിവയോടെ ആഘോഷ പരിപാടികൾക്കു തുടക്കമാവും. വലിയമ്മയായിരുന്ന ഉമാദേവി അന്തർജനത്തിന്‍റെ നിര്യാണത്തെത്തുടർന്ന് രണ്ടുവർഷം മുൻപാണ് സാവിത്രി അന്തർജനം വലിയമ്മയായി അഭിഷിക്തയായത്. തുടർന്ന്, ഒരുവർഷത്തോളം പുജാദികർമങ്ങൾ സ്വായത്തമാക്കി. ഇതിനു ശേഷമാണ് വലിയമ്മയുടെ ചുമതല ഏറ്റെടുത്തത്. കോട്ടയം നട്ടാശേരി കാഞ്ഞിരക്കോട്ടില്ലത്ത് ശങ്കരൻ നമ്പൂതിരിയുടെയും ആര്യാദേവി അന്തർജനത്തിന്‍റെയും മകളാണ്. 13-ാം വയസിൽ മണ്ണാറശാല ഇല്ലത്തെ എം.വി. സുബ്രഹ്മണ്യൻ നമ്പൂതിരി വിവാഹം കഴിച്ചുകൊണ്ടുവന്നതാണ്. സുബ്രഹ്മണ്യൻ നമ്പൂതിരി 2016 നവംബർ അഞ്ചിന് അന്തരിച്ചു.

ആലപ്പുഴ ജനറൽ ആശുപത്രിയിൽ നിർമിക്കുന്ന പുതിയ ബ്ലോക്കിന്‍റെ സ്ഥല പരിശോധന നടത്തി

ആലപ്പുഴ: നവകേരള സദസിന്‍റെ ഭാഗമായി ഏഴുകോടി രൂപ ചെലവിൽ ആലപ്പുഴ ജനറൽ ആശുപത്രിയിൽ നിർമിക്കുന്ന പുതിയ ബ്ലോക്കിന്‍റെ സ്ഥല പരിശോധന നടത്തി. ഒരു മണ്ഡലത്തിൽ ഏഴു കോടിയിൽ അധികരിക്കാത്ത പദ്ധതികളാണ് ഏറ്റെടുക്കുന്നത്. നവകേരള സദസിൽ ഉയർന്നുവന്ന നിർദേശങ്ങളിൽനിന്ന് അമ്പലപ്പുഴ മണ്ഡലത്തിൽ നിർദേശിക്കപ്പെട്ട പദ്ധതിയാണിത്. മൂന്നു നിലകളിലായി അത്യാഹിത വിഭാഗമാണ് ഇവിടെ പൂർത്തിയാക്കുക. ഇതിൽ രണ്ടുനില കെട്ടിടം ആദ്യ ഘട്ടത്തിൽ പൂർത്തിയാക്കും. ആശുപത്രിയിലെ പഴയ ഒപി, ഐപി ബ്ലോക്കിന് സമീപത്ത് താത്കാലികമായി നിർമിച്ചതും ഷീറ്റുമേഞ്ഞതുമായ പഴയ കെട്ടിടങ്ങൾ എന്നിവ പൊളിച്ചുമാറ്റിയാകും പുതിയ ബ്ലോക്ക് നിർമിക്കുന്നത്. ആശുപത്രിയിലെ അടിസ്ഥാന സൗകര്യ വികസനങ്ങൾ വർധിപ്പിക്കുന്നതിന്‍റെ ഭാഗമായി 117 കോടി രൂപ ചെലവിൽ പൂർത്തിയാക്കിയ ബഹുനില ഒപി മന്ദിരം മാസങ്ങൾക്ക് മുമ്പ് മുഖ്യമന്ത്രി നാടിന് സമർപ്പിച്ചിരുന്നു. രാവിലെ 8.30 ഓടെ ആരംഭിച്ച സ്ഥല പരിശോധന ഒന്നരമണിക്കൂർ നീണ്ടു. എച്ച്. സലാം എംഎൽഎ, നഗരസഭാ ചെയർപേഴ്സൺ കെ.കെ. ജയമ്മ, സ്ഥിരം സമിതി അധ്യക്ഷരായ എം. ആർ. പ്രേം, എ. എസ്. കവിത, ചീഫ് ആർക്കിടെക്റ്റ് വി.എസ്. ഗിരീഷ്, ഡെപ്യൂട്ടി ആർക്കിടെക്റ്റുമാരായ ചാന്ദ്നി ഉണ്ണികൃഷ്ണൻ, എ. സുധീർ, പൊതുമരാമത്ത് കെട്ടിട വിഭാഗം എക്സിക്യൂട്ടീവ് എൻജിനിയർ റംലാബീവി, അസി. എക്സിക്യൂട്ടീവ് എൻജിനിയർ ബി. സോണിയ, അസി. എൻജിനിയർ പവിത്ര, ആശുപത്രി ഡെപ്യൂട്ടി സൂപ്രണ്ട് ഡോ. വേണുഗോപാൽ, ആർഎംഒ ഡോ. ആശ മോഹൻദാസ്, ഇലക്ട്രിക്കൽ വിഭാഗം അസി. എക്സിക്യൂട്ടീവ് എൻജിനിയർ എസ്. ശിവപ്രസാദ്, സഞ്ജു എന്നിവർ ഒപ്പമുണ്ടായിരുന്നു.

എസ്‌സി വനിതകൾക്ക് ഇരുചക്രവാഹനം

മുഹമ്മ: പഞ്ചായത്ത് നേതൃത്വത്തില്‍ എസ്‌സി വനിതകള്‍ക്ക് സ്വയം തൊഴിലിനായി ഇരുചക്രവാഹനങ്ങള്‍ വിതരണം ചെയ്തു. 15 യുവതികള്‍ക്കാണ് പദ്ധതിയുടെ ഭാഗമായി വാഹനങ്ങള്‍ നല്‍കിയത്. പഞ്ചായത്ത് പ്രസിഡന്‍റ് സ്വപ്ന ഷാബു വിതരണോദ്ഘാടനം നിര്‍വഹിച്ചു. വൈസ് പ്രസിഡന്‍റ് എന്‍.ടി. റെജി അധ്യക്ഷനായി. 10,24,785 രൂപയാണ് പദ്ധതിക്കായി നീക്കിവച്ചിട്ടുള്ളത്. ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ സി.ഡി. വിശ്വനാഥന്‍, ആരോഗ്യ വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍പേഴ്സണ്‍ പി.എന്‍. നസീമ, ജി. സതീഷ്, നിഷ പ്രദീപ്, കെ.എസ്. ദാമോദരന്‍, എസ്.ടി. റെജി, കുഞ്ഞുമോള്‍ ഷാനവാസ്, ഷെജിമോള്‍ സജീവ് എന്നിവര്‍ പ്രസംഗിച്ചു.

ആന്‍റണി രത്നസ്വാമി മരിയസഖ്യത്തിന് കേരളത്തില്‍ അടിത്തറ പാകിയ കര്‍മയോഗി: ബിഷപ് ആനാപറമ്പില്‍

ആലപ്പുഴ: മരിയ ഭക്തിയുടെ ജ്വലിക്കുന്ന പ്രകാശമായി ലോകമെങ്ങും പടര്‍ന്നു കിടക്കുന്ന ഭക്തസംഘടനയായ ലിജിയന്‍ ഓഫ് മേരി(മരിയ സഖ്യം)ക്ക് കേരളസഭയില്‍ അടിത്തറപാകിയ കര്‍മയോഗിയായിരുന്നു ആന്‍റണി രത്‌നസ്വാമിയെന്ന് ആലപ്പുഴ ബിഷപ് ഡോ. ജയിംസ് ആനാപറമ്പില്‍. ചങ്ങനാശേരി, വിജയപുരം, പാലാ രൂപതകളില്‍ കേരള എന്‍വോയ് എന്ന നിലയില്‍രത്നസ്വാമി ചെയ്ത സേവനങ്ങള്‍ നിസ്തുലമായിരുന്നുവെന്നും അദ്ദേഹം പറഞ്ഞു. ആന്‍റണി രത്‌നസ്വാമി സ്മാരകസമിതി മൗണ്ട് കാര്‍മല്‍ കത്തീഡ്രല്‍ പാരിഷ് ഹാളില്‍ സംഘടിപ്പിച്ച രത്‌നസ്വാമി ജന്മശതാബ്ദിസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. രത്‌നസ്വാമിയുടെ ത്യാഗപൂര്‍ണമായ സേവനങ്ങള്‍ മരിയ ഭക്തര്‍ക്ക് എന്നും വഴി കാട്ടിയായിരിക്കുമെന്ന് വിജയപുരം രൂപത സഹായമെത്രാന്‍ ഡോ. ജസ്റ്റിന്‍ മഠത്തില്‍പറമ്പില്‍അനുസ്മരണാ പ്രസംഗത്തില്‍ പറഞ്ഞു. ഡോ. കെ.എസ്. മനോജിന്‍റെ അധ്യക്ഷതയില്‍ ആലപ്പുഴ രൂപത കോര്‍പറേറ്റ് മാനേജര്‍ ഫാ. നെല്‍സണ്‍ തൈപ്പറമ്പില്‍, ഫൊറോനാ വികാരി ഫാ. ഫ്രാന്‍സിസ് കൊടിയനാട്, വിജയപുരം രൂപത ലീജിയന്‍ ഓഫ് മേരി ആധ്യാത്മിക നിയന്താവ് ഫാ. ജോര്‍ജ് ലോബോ, നഗരസഭാ പ്രതിപക്ഷ നേതാവ് റീഗോ രാജു, ജസ്റ്റിന്‍ ബ്രൂസ്, ടോമി രത്തിനം, ഡോ. അധീന മിനി അഗസ്റ്റിന്‍, ഡോ. ഫ്രഡറിക് പോള്‍ എന്നിവര്‍ പ്രസംഗിച്ചു. ഫാ. നെല്‍സണ്‍ തൈപ്പറമ്പില്‍ രചിച്ച, എ. രത്‌നസ്വാമി മലയാളക്കരയുടെ മരിയ സൈനികന്‍ എന്ന ഗ്രന്ഥം ബിഷപ് ആനാപറമ്പില്‍ പ്രകാശനം ചെയ്തു.

ഓണം: സ്പെഷല്‍ ഡ്രൈവുമായി എക്സൈസ്

ആലപ്പുഴ: ഓണക്കാലത്ത് മദ്യവും മയക്കുമരുന്നുമായി ബന്ധപ്പെട്ട കുറ്റകൃത്യങ്ങള്‍ തടയുന്നതിനും എന്‍ഫോഴ്‌സ്‌മെന്‍റ് പ്രവര്‍ത്തനം ശക്തിപ്പെടുത്തുന്നതിനുമായി ജില്ലയില്‍ എക്‌സൈസ് വകുപ്പ് സ്‌പെഷല്‍ ഡ്രൈവ് നടത്തും. നാലിന് രാവിലെ ആറുമുതല്‍ സെപ്റ്റംബര്‍ പത്തിന് രാത്രി 12വരെയാണ് സ്‌പെഷല്‍ ഡ്രൈവ് നടത്തുന്നത്. ജനറല്‍ ആശുപത്രിക്കു സമീപമുള്ള ഡെപ്യൂട്ടി എക്‌സൈസ് കമ്മീഷണറുടെ ഓഫീസില്‍ 24 മണിക്കൂറും പ്രവര്‍ത്തിക്കുന്ന ജില്ലാതല കണ്‍ട്രോള്‍ റൂം ഉണ്ട്. പൊതുജനങ്ങള്‍ക്ക് വ്യാജമദ്യ നിര്‍മാണം, മദ്യ-മയക്കുമരുന്ന് അടക്കമുള്ള ലഹരിവസ്തുക്കളുടെ കടത്ത്, വില്‍പ്പന, ഉപഭോഗം തുടങ്ങിയവ സംബന്ധിച്ച രഹസ്യവിവരങ്ങള്‍ താഴെ പറയുന്ന നമ്പരുകളില്‍ വിളിച്ച് അറിയിക്കാം. വിവരങ്ങള്‍ നല്‍കുന്നവര്‍ പേരു വിവരങ്ങള്‍ വെളിപ്പെടുത്തേണ്ടതില്ല. വിവരം നല്കുന്ന വർക്ക് റിവാര്‍ഡും ചട്ടങ്ങള്‍ പ്രകാരം പാരിതോഷികവും നല്‍കുന്നതാണെന്ന് ആലപ്പുഴ ഡെപ്യൂട്ടി എക്സൈസ് കമീഷണര്‍ അറിയിച്ചു. എക്‌സൈസ് കണ്‍ട്രോള്‍ റൂം ആലപ്പുഴ: 0477-2252049, എക്‌സൈസ് കണ്‍ട്രോള്‍ റൂം -ടോള്‍ ഫ്രീ നമ്പറുകള്‍: 1800 425 2696, 155358, എക്‌സൈസ് എന്‌ഫോഴ്‌സ്മെന്‍റ് & ആന്‍റി നര്‍ക്കോട്ടിക് സ്‌പെഷല്‍ സ്‌ക്വാഡ് ആലപ്പുഴ: 0477-2251639, അസി. എക്‌സൈസ് കമ്മീഷണര്‍ (എന്‍ഫോഴ്സ്‌മെന്‍റ്) ആലപ്പുഴ: 9496002864, എക്‌സൈസ് ഡെപ്യൂട്ടി കമ്മീഷണര്‍ ആലപ്പുഴ: 9447178056, എക്‌സൈസ് സര്‍ക്കിള്‍ ഓഫീസ് ചേര്‍ത്തല: 0478-2813126, 9400069483 (സിഐ) 9400069484 (ഇഐ), എക്‌സൈസ് സര്‍ക്കിള്‍ ഓഫീസ് ആലപ്പുഴ: 0477-2230183.

മൂക്കു പൊത്തി നാട്ടുകാർ; കണ്ണു പൊത്തി പഞ്ചായത്ത്

തുറവൂർ: ശുചിത്വ പരിപാടികൾ ഗംഭീരമായി നടക്കുമ്പോഴും നാട്ടിൽ പലേടത്തും മാലിന്യക്കൂ ന്പാരം. കുത്തിയതോട് - തുറവൂർ പഞ്ചായത്തുകളിലെ അതിരുപങ്കിടുന്ന പള്ളിത്തോട് -ചാവടി റോഡിന്‍റെ ഇരുവശങ്ങളിലും തള്ളിയിരിക്കുന്ന മാലിന്യങ്ങൾകൊണ്ടാണ് നൂറുകണക്കിനു ജനങ്ങൾ ദുരിതമനുഭവിക്കുന്നത്. ശുചിത്വ വാരാചരണവും ശുചിത്വ മാസാചരണവും പൊടിപൊടിക്കുന്പോഴാണ് ഇവിടെ ജനങ്ങളുടെ ദുരവസ്ഥ. നിരവധി ചാക്ക് ഇറച്ചി, കോഴി മാലിന്യങ്ങളാണ് പള്ളിത്തോട് - ചാവടി റോഡിന്‍റെ തെക്കുഭാഗത്തായി തോട്ടിൽ തള്ളിയിരിക്കുന്നത് . ഒഴുകിപ്പരന്ന് മാലിന്യങ്ങൾ കഴിഞ്ഞ ദിവസമുണ്ടായ വെള്ളപ്പൊക്കത്തെത്തുടർന്ന് ഈ മാലിന്യങ്ങൾ പള്ളിത്തോട് റോഡിൽ നിരന്നു. വാഹനങ്ങൾ കയറിയിറങ്ങി മുഴുവൻ പ്രദേശവും മാലിന്യവും നാറ്റവുമാണ്. ഈ തോടിന്‍റെ സമീപത്തെ പാടശേഖരങ്ങളുടെ തീരത്തു താമസിക്കുന്ന നൂറുകണക്കിനു ജനങ്ങളും വലയുകയാണ്. ത്വക്ക് രോഗങ്ങളും മറ്റു ശ്വാസകോശ രോഗങ്ങളും ഈ മേഖലയിൽ കൂടുതലാണ്. മാലിന്യങ്ങൾ ഒഴുകിയെത്തി ഈ പ്രദേശത്തെ കിണറുകളി ലും തോടുകളിലും കുളങ്ങളിലും വീണതോടെ ശുദ്ധജലത്തിനായി ജനം പലവഴി ഓടുകയാണ്. പരാതി നൽകിയിട്ടും പഞ്ചായത്തുകൾ യാതൊരു നടപടിയും സ്വീകരിച്ചിട്ടില്ല. മാലിന്യം വരുന്ന വഴി പള്ളിത്തോട്, ചാവടി, നാലുകുളങ്ങര, തുറവൂർ, മനക്കോടം തുടങ്ങിയ പ്രദേശങ്ങളിൽ പ്രവർത്തിക്കുന്ന ഒട്ടുമിക്ക അറവുശാലകൾക്കും കോഴിക്കടകൾക്കും മാലിന്യങ്ങൾ സംസ്കരിക്കാനുള്ള സംവിധാനം ഇല്ല. ഇതു നോക്കാതെയാണ് പഞ്ചായത്തുകൾ പ്രവർത്തിക്കാൻ അനുമതി നൽകിയിരിക്കുന്നത്. പള്ളിത്തോട് - ചാവടി ഭാഗങ്ങളിൽ കാമറകൾ സ്ഥാപിക്കണമെന്ന ആവശ്യം നേരത്തെ തന്നെ ഉയർന്നതാണ്. ജനകീയ സമരത്തെത്തുടർന്ന് കാമറ സ്ഥാപിക്കുമെന്നു കുത്തിയതോട്, തുറവൂർ പഞ്ചായത്ത് അധികൃതർ പ്രഖ്യാപിച്ചെങ്കിലും മുന്നോട്ടുപോയില്ല. കഴിഞ്ഞ രാത്രിയിലും ചാക്കിൽക്കെട്ടി മാലിന്യങ്ങൾ ഇവിടെ തള്ളിയിട്ടുണ്ട്. പള്ളിത്തോട് - ചാവടി റോഡിന്‍റെ ഇരുവശങ്ങളിലുമുള്ള തോടുകളിൽ തള്ളിയിരിക്കുന്ന ഇറച്ചി മാലിന്യങ്ങൾ അടിയന്തരമായി നീക്കണമെന്നാണ് നാട്ടുകാരുടെ ആവശ്യം.

സ്വീകരണങ്ങൾ ഏറ്റുവാങ്ങി തലവടി ചുണ്ടൻ നീരണഞ്ഞു

എടത്വ: ഓളപ്പരപ്പിലെ പോരാട്ടത്തിനൊരുങ്ങി തലവടി ചുണ്ടൻ നീരണിഞ്ഞു. നൂറുകണക്കിന് ജലോത്സവ പ്രേമികളെ ആവേശത്തിലാക്കി ഇന്നലെ രാവിലെ 9.16ന് വള്ളത്തിന്‍റെ ശില്പി കോയിൽമുക്ക് സാബു നാരായണൻ ആചാരിയുടെ നേതൃത്വത്തിൽ നീരണിയിക്കൽ ചടങ്ങ് നടന്നു. രാവിലെ 5.30ന് മരങ്ങാട്ട് ഇല്ലം ശംഭു നമ്പൂതിരിയുടെ കാർമികത്വത്തിൽ അഷ്ടദ്രവ്യ മഹാഗണപതി ഹോമത്തോടെ ചടങ്ങുകൾ ആരംഭിച്ചു. തുടർന്ന് തലവടി സെന്‍റ് ജോണ്‍സ് പള്ളി വികാരി ഫാ. റജി ചാക്കോ തോമസ് വള്ളം ആശീർവദിച്ചു. നെഹ്‌റുട്രോഫി, സിബിഎൽ ഉൾപ്പെടെയുള്ള മത്സര വളംകളിൽ ഇനി തലവടി ചുണ്ടൻ കാണികളുടെ ആവേശമായി മാറും. യുബിസി കൈനകരിയുടെ കൈകാര്യത്തിലാണ് തലവടി ചുണ്ടൻ ജലമാമാങ്കത്തിന് ഇറങ്ങുന്നത്. തലവടി ചുണ്ടൻ കഴിഞ്ഞതവണ നടന്ന സിബിഎൽ മത്സരങ്ങളിൽ യോഗ്യത നേടിയിരുന്നു. നീരണിയിക്കൽ ചടങ്ങിന് മുന്നോടിയായി നടന്ന പൊതുസമ്മേളനം തലവടി പഞ്ചായത്ത് പ്രസിഡന്‍റ് ഗായത്രി ബി. നായർ ഉദ്ഘാടനം ചെയ്തു. തലവടി ടൗൺ ബോട്ട് ക്ലബ് പ്രസിഡന്‍റ് റിക്സൺ എടത്തിൽ അധ്യക്ഷത വഹിച്ചു. പഞ്ചായത്തംഗം പ്രിയ അരുൺ, രക്ഷാധികാരി ഷിനു എസ്. പിള്ള, സെക്രട്ടറി കെ.ആർ. ഗോപകുമാർ, ട്രഷറർ പ്രിൻസ് പാലത്തിങ്കൽ, വൈസ് പ്രസിഡന്‍റ് അജിത്ത് പിഷാരത്ത്, ജോ. സെക്രട്ടറി ഡോ. ജോൺസൺ വി. ഇടിക്കുള, കൺവീനർമാരായ പി.ഡി. രമേശ് കുമാർ, ജോജി ജെ. വയലപ്പള്ളി, അരുൺ പുന്നശേരിൽ, ജോമോൻ ചക്കാലയിൽ, ജെറി മാമ്മുട്ടിൽ, ബിജു പറമ്പുങ്കൽ, സുനിൽ വെട്ടിക്കൊമ്പിൽ, ഷിനു ദാമോദരന്‍, ആർ. അനിൽകുമാർ, ടിനു തോമസ് എന്നിവര്‍ പ്രസംഗിച്ചു. തലവടി ഗണപതി ക്ഷേത്രം, തിരുപനയനൂർകാവ് ക്ഷേത്രം, ആനപ്രമ്പാൽ ക്ഷേത്രം, വ്യാസപുരം ക്ഷേത്രം, പമ്പ ബോട്ട് റേസ് ഫിനിഷിങ്ങ് പോയിന്‍റ്, പമ്പ ബോട്ട് റേസ് ക്ലബ്ബിന്‍റെ നേതൃത്വത്തില്‍ നീരേറ്റുപുറത്ത് പമ്പ ബോട്ട് റേസ് വാട്ടർ സ്റ്റേഡിയം, നാരകക്കറമുട്ട് എന്നിവിടങ്ങളില്‍ വള്ളത്തിന് സ്വീകരണം നൽകി. എടത്വ സെന്‍റ് ജോർജ് ഫൊറോന പള്ളി, തലവടി സെന്‍റ് തോമസ് ഓർത്തഡോക്സ് പള്ളി, ചക്കുളത്തുകാവ് ക്ഷേത്രം എന്നിവിടങ്ങളില്‍ ചുണ്ടൻ വള്ളത്തിന്‍റെ കൂമ്പ് എത്തിച്ച് പ്രാർഥന നടത്തിയിരുന്നു.

തലവടിയിൽ പുറത്താക്കലും അകത്താക്കലുമായി സിപിഎം

എടത്വ: തലവടി പഞ്ചായത്തില്‍ പുറത്താക്കലും അകത്താക്കലുമായി സിപിഎം പ്രാദേശിക നേതൃത്വം. പഞ്ചായത്ത് സ്റ്റാന്‍ഡിംംഗ് കമ്മിറ്റി ചെയര്‍പേഴ്‌സണായ ലോക്കല്‍ കമ്മിറ്റി അംഗത്തെ പുറത്താക്കി. കേരള കോണ്‍ഗ്രസ്-ജേക്കബ് പ്രാദേശിക നേതാവിനെ പാര്‍ട്ടി അംഗത്വം നല്‍കി സ്വീകരിച്ചു. കഴിഞ്ഞ തദ്ദേശ സ്വയംഭരണ തെരഞ്ഞെടുപ്പ് മുതല്‍ തലവടി പഞ്ചായത്തിലെ സിപിഎം പ്രാദേശിക രാഷ്ട്രീയം കലുഷിതമാണ്. കഴിഞ്ഞ തെരഞ്ഞെടുപ്പില്‍ സംവരണ സീറ്റില്‍ മത്സരിച്ച് വിജയിച്ച കൊച്ചുമോള്‍ ഉത്തമന് അവസാന ടേമില്‍ പ്രസിഡന്‍റ് സ്ഥാനം ലഭിക്കുമെന്ന് പ്രതീക്ഷിച്ചിരുന്നു. എന്നാല്‍, പഞ്ചായത്ത് സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ സ്ഥാനം നല്‍കി കൊച്ചുമോള്‍ ഉത്തമനെ പാര്‍ട്ടി അനുനയിപ്പിച്ചിരുന്നു. സിപിഎം-സിപിഐ പോര് മുറുകിയതോടെ നിലവിലെ പഞ്ചായത്ത് പ്രസിഡന്‍റിനും വൈസ് പ്രസിഡന്‍റിനുമെതിരേ സിപിഐ കോണ്‍ഗ്രസിന്‍റെ പിന്തു ണയോടെ അവിശ്വാസം കൊണ്ടുവന്നിരുന്നു. അവിശ്വാസ പ്രമേയത്തില്‍ രഹസ്യ പിന്തുണ നല്‍കിയെന്നാരോപിച്ചാണ് പഞ്ചായത്ത് സ്റ്റാന്‍ഡിംഗ്് കമ്മിറ്റി ചെയര്‍പേഴ്‌സണായ കൊച്ചുമോള്‍ ഉത്തമനെ പുറത്താക്കിയത്. കൊച്ചുമോള്‍ ഉത്തമനേയും മറ്റൊരു പ്രാദേശിക സിപിഎം പ്രവര്‍ത്തകന്‍ കെ.പി. വിശ്വരാജിനേയും പുറത്താക്കിയതായി സിപിഎം നേതൃത്വം പോസ്റ്റര്‍ ഇറക്കിയിട്ടുണ്ട്. പട്ടികജാതി സമുദായത്തില്‍നിന്നുള്ള കൊച്ചുമോള്‍ ഉത്തമന്‍ നിലവില്‍ അ ങ്കണവാടി അധ്യാപിക കൂടിയാണ്. കഴിഞ്ഞദിവസം തലവടി പഞ്ചായത്തിലെ കേരള കോണ്‍ഗ്രസ് (ജേക്കബ്) പ്രദേശിക വനിത നേതാവ് സിപിഎമ്മില്‍ ചേര്‍ന്നിരുന്നു. വനിത നേതാവിനെ പാര്‍ട്ടി അംഗത്വം നല്‍കി സ്വീകരിച്ചതിനു പിന്നില്‍ ഇടതു സ്വതന്ത്രയായ പഞ്ചായത്തംഗത്തെ പുറത്താക്കാനുള്ള നീക്കമെന്ന് സൂചനയുണ്ട്. ഇടതു സ്വതന്ത്ര അവിശ്വാസ പ്രമേയത്തിന് രഹസ്യ പിന്‍തുണ നല്‍കിയെന്നാണ് സിപിഎമ്മിന്‍റെ ആരോപണം. ഇക്കുറി ഈ വര്‍ഡില്‍നിന്ന് സിപിമ്മില്‍ ചേര്‍ന്ന വനിത നേതാവിനെ മത്സരിപ്പിക്കാനാണ് രഹസ്യനീക്കം നടക്കുന്നത്. തദ്ദേശ തെരഞ്ഞെടുപ്പ് അടുത്തതോടെ സിപിഎം നേതൃത്വം പഞ്ചായത്ത് ഭരണം രണ്ടാംവട്ടവും കൈപ്പിടിയില്‍ ആക്കാനുള്ള ശ്രമമാണ് നടത്തുന്നത്. വിഘടിച്ച് നില്‍ക്കുന്ന സിപിഐ പ്രാദേശിക ഘടകത്തെ ഒപ്പം കൂട്ടാന്‍ ജില്ലാ നേതൃത്വത്തിന്‍റെ സഹായവും തേടുന്നുണ്ട്. സിപിഎം പുറത്താക്കിയ അംഗങ്ങളെ അനുനയിപ്പിച്ച് കൂടെ കൂട്ടാന്‍ യുഡിഎഫും എന്‍ഡിഎയും തിരക്കിട്ട ചര്‍ച്ചകളും ആരംഭിച്ചിട്ടുണ്ട്.

കെപി റോഡ് നാഥനില്ലാക്കളരി

ചാരുംമൂട്: ഗതാഗത തിരക്കേറിയ കെപി റോഡിലെ സ്‌കൂളുകളുടെ മുന്നില്‍ രാവിലെയും വൈകുന്നേരവും ഉണ്ടാകുന്ന തിരക്ക് നിയന്ത്രിക്കാന്‍ പോലീസ് സേവനം ഉറപ്പാക്കണമെന്ന ആവശ്യം ശക്തമാവുന്നു. കുട്ടികളുടെ തിരക്കും നിയന്ത്രണമില്ലാതെ പായുന്ന വാഹനങ്ങളും വലിയ അപകട സാധ്യതയാണ് സൃഷ്ടിക്കുന്നത്. അപകടങ്ങള്‍ ഉണ്ടാകും മുമ്പേ അത് ഒഴിവാക്കാനുള്ള നടപടികള്‍ സ്വീകരിക്കണമെന്നാണ് ആവശ്യം. കെ പി റോഡില്‍ കറ്റാനത്തിനും ആദിക്കാട്ടുകുളങ്ങരയ്ക്കും ഇടയില്‍ മൂന്ന് ഹയര്‍ സെക്കന്‍ഡറി സ്‌കൂളുകളും അഞ്ച് എല്‍പി, യുപി സ്‌കൂളുകളും പ്രവര്‍ത്തിക്കുന്നുണ്ട്. ഓരോ ഹയര്‍ സെക്കന്‍ഡറി സ്‌കൂളിലും 2500ന് മുകളില്‍ വിദ്യാര്‍ഥികളാണുള്ളത്. രാവിലെയും വൈകുന്നേരവും ബസിലും സൈക്കിളിലും കാല്‍നടയായും യാത്ര ചെയ്യുന്ന വിദ്യാര്‍ഥികളെ കൊണ്ട് റോഡ് നിറയും. നൂറനാട് സിബിഎം ഹൈസ്‌കൂള്‍ കെപി റോഡിലെ ഏറ്റവും തിരക്കേറിയ വശത്താണ് സ്ഥിതി ചെയ്യുന്നത്. അമിത വേഗത്തിലാണ് വാഹനങ്ങള്‍ അടൂര്‍ ഭാഗത്തേ ക്കും കായംകുളം ഭാഗത്തേക്കും പായുന്നത്. റോഡ് മുറിച്ചുകടക്കാന്‍ ശ്രമിക്കുന്ന വിദ്യാര്‍ഥികള്‍ക്ക് ഓടി മാറാന്‍ പോലും കഴിയാത്ത അവസ്ഥയാണ്. ഒരു സിവില്‍ പൊലീസ് ഓഫിസറെ നിയമിച്ചാല്‍ വിദ്യാര്‍ഥികളുടെ സുരക്ഷ ഉറപ്പ് വരുത്താന്‍ കഴിയും. മുമ്പ് വല്ലപ്പോഴുമെങ്കിലും ഹോംഗാര്‍ഡിന്റെ സേവനം സ്‌കൂളുകള്‍ക്കു മുമ്പില്‍ ലഭ്യമാക്കിയിരുന്നു. ഇപ്പോള്‍ അതുമില്ല.അമിത വേഗത്തിലാണ് ബസു കളും സ്വകാര്യ വാഹനങ്ങളും കെപി റോഡിലൂടെ കടന്നു പോകുന്നത്. ടിപ്പറുകള്‍ക്ക് സമയം ക്രമീകരിച്ചിട്ടുണ്ടെങ്കിലും പല പ്പോഴും അതും പാലിക്കപ്പെടാറില്ല. നിരവധി അപകടങ്ങള്‍ കഴി ഞ്ഞ മൂന്ന് വര്‍ഷത്തിനുള്ളില്‍ ഈ സ്ഥലങ്ങളില്‍ ഉണ്ടായിട്ടുണ്ട്. എസ്പിസി വിദ്യാര്‍ഥികളും എന്‍സിസി കേഡറ്റ്‌സും വാഹന നിയന്ത്രണത്തിന് ഇറങ്ങിനിന്നാലും ബൈക്ക് യാത്രികര്‍ ഇവരെ മാനിക്കാറില്ല. രാവിലെ എട്ടര മുതല്‍ 10 വരെയും വൈകിട്ട് മൂന്നര മുതല്‍ അഞ്ച് വരെയും സ്‌കൂളിന് മുന്നില്‍ വാഹനങ്ങള്‍ നിയന്ത്രിക്കാനായി പൊലീസ് സേവനം ഏര്‍പ്പെടുത്തിയാല്‍ വലിയ ദുരന്തങ്ങള്‍ ഉണ്ടാകുന്നത് തടയാന്‍ കഴിയും.

ബിജെപിയുടെ തനിനിറം ജനം തിരിച്ചറിഞ്ഞു: ഫാ. സേവ്യര്‍ കുടിയാംശേരി

ആലപ്പുഴ: യൂത്ത് കോണ്‍ഗ്രസ് ആലപ്പുഴ ജില്ലാ കമ്മിറ്റിയുടെ നേതൃത്വത്തില്‍ ഛത്തീസ്ഗഡിലെ ദുര്‍ഗില്‍ റിമാന്‍ഡിലായി ജാമ്യം ലഭിച്ച കന്യാസ്ത്രീകള്‍ക്കു പിന്തുണ അറിയിച്ച് നടത്തിയ ക്യാന്‍ഡില്‍ ലൈറ്റ് മാര്‍ച്ച് ആലപ്പുഴ രൂപത പിആര്‍ഒ ഫാ. സേവ്യര്‍ കുടിയാംശേരി ഉദ്ഘാടനം ചെയ്തു. ഛത്തീസ്ഗഡിലെ സംഭവത്തോടുകൂടി രാജ്യത്തെ ജനങ്ങള്‍ ബിജെപിയുടെ യഥാര്‍ഥ മുഖം തിരിച്ചറിഞ്ഞെന്ന് കുടിയാംശേരി പറഞ്ഞു. ജില്ലാ പ്രസിഡന്‍റ് ഡോ. എം.പി. പ്രവീണ്‍ അധ്യക്ഷത വഹിച്ചു. സംസ്ഥാന ഭാരവാഹികളായ റഹീം വെറ്റക്കാരന്‍, ഷമീം ചീരാമത്, എ.ഡി. തോമസ്, എം. ശ്രീക്കുട്ടന്‍, മുബാറക്ക് പതിയങ്കര, ഷാഹുല്‍ പുതിയപറമ്പില്‍, വി.കെ. നാഥന്‍, ഷിജു താഹ, റിനു ഭൂട്ടോ, നായിഫ് നാസര്‍, ഷാജി ജമാല്‍, പ്രജീഷ, അജി കൊടിവീടന്‍, ഷാനി ബിന്‍ത്, ഷാനു ഭൂട്ടോ, മനു പൂനിയില്‍ തുടങ്ങിയവര്‍ പ്രസംഗിച്ചു.

എഫ്‌ഐആര്‍ റദ്ദാക്കണം: കുട്ടനാട് വൈഎംസിഎ

ആലപ്പുഴ: ഛത്തീസ്ഗഡില്‍ കന്യാസ്ത്രീകള്‍ക്കെതിരേ ഫയല്‍ ചെയ്ത എഫ്ഐആര്‍ ഉടന്‍ റദ്ദാക്കണമെന്ന് കുട്ടനാട് വൈഎംസിഎ ആവശ്യപ്പെട്ടു. ന്യൂനപക്ഷ വിഭാഗങ്ങളെ പിഡിപ്പിക്കാനും അപമാനിക്കാനും പതിവായി ദുരുപയോഗിക്കുന്ന മതപരിവര്‍ത്തന നിരോധനിയമവും റദ്ദ് ചെയ്യാന്‍ കേന്ദ്ര സര്‍ക്കാര്‍ തയാറാകണമെന്നും കുട്ടനാട് വൈഎംസിഎ ആവശ്യപ്പെട്ടു. വൈഎംസിഎ യോഗത്തില്‍ കുട്ടനാട് വൈഎംസിഎ പ്രസിഡന്‍റ് ടോമിച്ചന്‍ മേപ്പുറം അധ്യക്ഷത വഹിച്ചു. വൈഎംസിഎ സംസ്ഥാന വൈസ് ചെയര്‍മാന്‍ കുര്യന്‍ തുമ്പൂങ്കല്‍ ഉദ്്ഘാടനം ചെയ്യ്തു. കേരള റീജന്‍ സെക്രട്ടറി റെജി പി. വര്‍ഗീസ് മുഖ്യപ്രഭാഷണം നടത്തി. കുട്ടനാട് വൈഎംസിഎ ജനറല്‍ സെക്രട്ടറി ഔസേപ്പച്ചന്‍ ചെറുകാട്, നൈനാന്‍ തോമസ് മുളപ്പാംമഠം, കെ.ജെ. ജയിംസ് കൊച്ചുകുന്നേല്‍, ബാബു വടക്കേക്കളം, അലക്‌സാണ്ടര്‍ പുത്തന്‍പുര, സുനില്‍ കുര്യാളശേരി, ടോമിച്ചന്‍ ചേന്നാട്ടുശേരി,കെ.സി. ജോസഫ് കണിയാംപറമ്പില്‍ എന്നിവര്‍ പ്രസംഗിച്ചു.

യുവതി കുത്തേറ്റു മരിച്ചു; ഭർത്താവ് ഒളിവിൽ

പുല്ലാട്: വീട്ടുവഴക്കിനിടെ ഭാര്യ കുത്തേറ്റു മരിച്ചു; ഭർത്താവ് ഒളിവിൽ. യുവതിയുടെ അച്ഛനും ബന്ധുവിനും പരിക്ക്. പുല്ലാട് കാഞ്ഞിരപ്പാറ ആലുംതറ ആഞ്ഞാലിക്കല്‍ ശാരിമോളാണ് (ശ്യാമ - 35) കുത്തേറ്റു മരിച്ചത്. വീട്ടുവഴക്കിനിടെ മദ്യലഹരിയിലായിരുന്ന ഭർത്താവ് അജികുമാർ ശാരിമോളെ കുത്തിവീഴ്ത്തിയശേഷം ഓടി രക്ഷപ്പെടുകയായിരുന്നെന്ന് പോലീസ് പറഞ്ഞു. ഭാര്യയും ഭര്‍ത്താവും തമ്മിലുള്ള വഴക്ക് ഒഴിവാക്കാന്‍ ശ്രമിച്ച ശാരിമോളുടെ അച്ഛന്‍ ശശി, ശശിയുടെ സഹോദരി രാധാമണി എന്നിവർക്കും ഗുരുതരമായി പരിക്കേറ്റു. ശനിയാഴ്ച രാത്രി 9.30നാണ് സംഭവം. ഗുരുതരമായി പരിക്കേറ്റ ശാരിമോളെ കോട്ടയം മെഡിക്കൽ കോളജിലെത്തിച്ചെങ്കിലും ഇന്നലെ പുലർച്ചെ മരിച്ചു. ശശിയും രാധാമണിയും അപകടനില തരണം ചെയ്‌തെങ്കിലും ഇപ്പോഴും കോട്ടയം മെഡിക്കല്‍ കോളജ് ആശുപത്രിയിലെ തീവ്രപരിചരണ വിഭാഗത്തിലാണ്. രാധാമണി സംഭവം നടന്ന വീടിന്‍റെ എതിര്‍ഭാഗത്താണ് താമസിക്കുന്നത്. ശാരിമോളുടെ വീട്ടിലെ കരച്ചിലും മറ്റും കേട്ട് ഓടിയെത്തുകയായിരുന്നു ഇവര്‍. മരണപ്പെട്ട ശാരിമോള്‍ ബ്യൂട്ടിപാര്‍ലര്‍ ജീവനക്കാരിയാണ്. മക്കൾ: ആവണി, വേണി, ശ്രാവണി. വെല്‍ഡറായി ജോലി ചെയ്യുന്ന അജി (38) കവിയൂർ സ്വദേശിയാണ്. ലഹരിക്കടിമയായ ഇയാളുമായി ബന്ധപ്പെട്ട് കോയിപ്രം പോലീസ് സ്റ്റേഷനിൽ നിരവധി കേസുകളുണ്ടെന്ന് പോലീസ് പറഞ്ഞു. സംഭവത്തെത്തുടര്‍ന്ന് നാട്ടുകാരും പോലീസും തെരച്ചില്‍ നടത്തിയെങ്കിലും അജിയെ പിടികൂടാന്‍ കഴിഞ്ഞില്ല. മൊബൈല്‍ ഫോണ്‍ ഉപേക്ഷിച്ചാണ് പ്രതി ഓടി രക്ഷപ്പെട്ടതെന്ന് പോലീസ് പറഞ്ഞു. ജില്ലാ പോലീസ് മേധാവി ആര്‍. ആനന്ദ് സംഭവസ്ഥലത്തെത്തി. ശാസ്ത്രീയ അന്വേഷണ സംഘവും വിരലടയാള വിദഗ്ധരും സ്ഥലത്തെത്തി തെളിവുകളെടുത്തു. ഭര്‍ത്താവ് അജികുമാറില്‍ നിന്നും ശാരിമോള്‍ക്ക് മര്‍ദനമേല്‍ക്കുന്നത് പതിവായിരുന്നെന്ന് നാട്ടുകാര്‍ പറഞ്ഞു. പ്രൈമറി, എൽകെജി ക്ലാസുകളിൽ പഠിക്കുന്ന മൂന്ന് പെൺകുട്ടികളാണ് ഇവർക്കുള്ളത്.

എന്‍എസ്എസ് താലൂക്ക് യൂണിയന് 4.5 കോടിയുടെ ബജറ്റ്

ചേര്‍ത്തല: ജീവകാരുണ്യനിധിക്ക് മുന്‍തൂക്കം നല്‍കിക്കൊണ്ടുള്ള ചേര്‍ത്തല താലൂക്ക് എന്‍എസ്എസ് യൂണിയന്‍റെ 4.5 കോടിയുടെ ബജറ്റിന് അംഗീകാരം. യൂണിയന്‍റെ 89-ാമത് വാര്‍ഷിക പൊതുയോഗത്തില്‍ യൂണിയന്‍ സെക്രട്ടറി എസ്. ജയകൃഷ്ണന്‍ അവതരിപ്പിപ്പ ബജറ്റില്‍ ഭവനനിര്‍മാണം, ചികിത്സാധനസഹായം, വിവാഹധനസഹായം, സാന്ത്വനപദ്ധതി, വാര്‍ധക്യകാല പെന്‍ഷന്‍ പദ്ധതി, ഭവനപദ്ധതി എന്നിവയ്ക്കായി 33,18,000 രൂപയും വിദ്യാഭ്യാസ പ്രോത്സാഹനത്തിനായി ആറുലക്ഷം രൂപയും വകയിരുത്തിയിട്ടുണ്ട്. എന്‍എസ്എസ് ഡയറക്ടര്‍ ബോര്‍ഡംഗം പ്രഫ. ഇലഞ്ഞിയില്‍ രാധാകൃഷ്ണന്‍ അധ്യക്ഷത വഹിച്ചു. ജാതി സെന്‍സസ് ഭാരതത്തിന്‍റെ മതേതര സങ്കല്പങ്ങള്‍ക്ക് എതിരാണെന്നും സര്‍ക്കാരിന്‍റെ നടപടി പുനഃപരിശോധിക്കണമെന്നും യോഗം ആവശ്യപ്പെട്ടു. യൂണിയന്‍ വൈസ് പ്രസിഡന്‍റ് എസ്. മുരളീകൃഷ്ണന്‍ സ്വാഗതവും എന്‍എസ്എസ് ഇന്‍സ്‌പെക്ടര്‍ യു. ജയകൃഷ്ണന്‍ നന്ദിയും പറഞ്ഞു.

വി.എസിന്‍റെ സമരപോരാട്ടങ്ങൾ ചരിത്രമായി രേഖപ്പെടുത്തും: കെ.കെ. ശൈലജ

കായംകുളം: വിഎസിന്‍റെ സമരപോരാട്ടങ്ങൾ കേരളത്തിന്‍റെ ചരിത്രമായി രേഖപ്പെടുത്തുമെന്ന് സിപിഎം കേന്ദ്ര കമ്മിറ്റിയംഗം കെ.കെ. ശൈലജ എംഎൽഎ. കായംകുളത്ത് വി.എസ്. അച്യുതാനന്ദൻ അനുസ്മരണ യോഗം ഉദ്ഘാടനം ചെയ്യുകയായിരുന്നു കെ.കെ. ശൈലജ. തൊഴിലാളികളുടെ അവകാശങ്ങൾക്കായും നാടിന്‍റെ വികസനത്തിനായും വി.എസ് നടത്തിയ പോരാട്ടങ്ങൾ രാഷ്ട്രീയ വിദ്യാർഥികൾ പഠിക്കണം. ഏതൊരു വിഷയവും പഠിച്ച് അവതരിപ്പിക്കുകയെന്നത് വിഎസിന്‍റെ പ്രത്യേകതയാണെന്നും കെ.കെ. ശൈലജ പറഞ്ഞു. എസ്എൻഡിപി യൂണിയൻ ഹാളിൽ ചേര്‍ന്ന യോഗത്തിൽ ജില്ലാ കമ്മിറ്റിയംഗം പി. ഗാനകുമാർ അധ്യക്ഷനായി. ഏരിയ സെക്രട്ടറി ബി. അബിൻഷാ അനുശോചന പ്രമേയം അവതരിപ്പിച്ചു. സംസ്ഥാന കൺട്രോൾ കമ്മീഷൻ ചെയർമാൻ കെ.എച്ച്. ബാബുജാൻ, ജില്ലാ സെക്രട്ടറിയേറ്റംഗം ജി. ഹരിശങ്കർ, യു. പ്രതിഭ എംഎൽഎ, ഷെയ്ക് പി. ഹാരിസ്, എ. ഷാജഹാൻ എന്നിവർ പ്രസംഗിച്ചു.

സ്‌കൂൾ കെട്ടിടം ഉദ്ഘാടനം ചെയ്തു

മങ്കൊമ്പ്: കൈനടി എ.ജെ. ജോൺ മെമ്മോറിയൽ ഹയർ സെക്കൻഡറി സ്‌കൂളിൽ പുതുതായി നിർമിച്ച ശതാബ്ദി സ്്മാരക കെട്ടിടത്തിന്‍റെ ആശീർവാദവും ഉദ്ഘാടനകർമവും ചങ്ങനാശേരി ആർച്ച്ബിഷപ് മാർ തോമസ് തറയിൽ നിർവഹിച്ചു. കോർപറേറ്റ് മാനേജർ ഫാ. ആന്‍റണി മൂലയിൽ അധ്യക്ഷത വഹിച്ചു. നവീകരിച്ച സ്‌കൂൾ ഗ്രൗണ്ടിന്‍റെ ഉദ്ഘാടനം കൊടിക്കുന്നിൽ സുരേഷ് എംപി, നവീകരിച്ച ലാബിന്‍റെ ഉദ്ഘാടനം തോമസ് കെ. തോമസ് എംഎൽഎ, ചുറ്റുമതിലിന്‍റെ നിർമാണോദ്ഘാടനം ജോബ് മൈക്കിൾ എംഎൽഎ എന്നിവർ നിർവഹിച്ചു. സ്‌കൂൾ മാനേജർ ഫാ. തോമസ്് കമ്പിയിൽ, പഞ്ചായത്ത് പ്രസിഡന്‍റ് ടി.കെ. തങ്കച്ചൻ, ശിവദാസ് ആതിര, ജോസുകുട്ടി തൊടുകയിൽ, പ്രിൻസിപ്പൽ സിൽജോ സി. കണ്ടത്തിൽ, ടിറ്റോ ഏബ്രഹാം, ജോജോ ആന്‍റണി, പി.ജെ. ബിജുമോൻ, ഹെഡ്മിസ്ട്രസ് ഷേർളി തോമസ്, പിടിഎ പ്രസിഡന്‍റ് റെജി തോമസ് തുടങ്ങിയവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]