അരുവിത്തുറ കോളജിൽ പ്ലേസ്മെന്‍റ് സെൽ പ്രവർത്തനോദ്ഘാടനവും കരിയർ ഗൈഡൻസ് സെമിനാറും

അരുവിത്തുറ: വിദ്യാർഥികൾക്ക് തൊഴിലവസരങ്ങളുടെ അക്ഷയ ഖനി ഒരുക്കാൻ അരുവിത്തുറ സെന്‍റ് ജോർജസ് കോളജിലെ പ്ലേസ്മെന്‍റ് സെല്ലിന്‍റെ പുതിയ അധ്യയന വർഷത്തെ പ്രവർത്തനങ്ങൾക്ക് തിരിതെളിഞ്ഞു.

പ്ലേസ്മെന്‍റ് സെല്ലിന്‍റെയും കരിയർ സെമിനാറിന്‍റെയും ഉദ്ഘാടനം ഇന്ത്യൻ ഇൻസ്റ്റിറ്റ്യൂട്ട് ഓഫ് ഇൻഫർമേഷൻ ടെക്നോളജി വലവൂരിലെ ഇലക്ട്രോണിക്സ് ആൻഡ് കമ്യൂണിക്കേഷൻ വിഭാഗം പ്രഫസർ ഡോ. മിലിന്ത് തോമസ് തേമാലിൽ ഉദ്ഘാടനം ചെയ്തു.

ബിരുദാനന്തര വിദ്യാഭ്യാസവും തൊഴിലവസര സാധ്യതകളും എന്ന വിഷയത്തിൽ അദ്ദേഹം ക്ലാസ് നയിച്ചു. കോളജ് ബർസാർ റവ.ഫാ. ബിജു കുന്നയ്ക്കാട്ട് അധ്യക്ഷത വഹിച്ചു.

വൈസ് പ്രിൻസിപ്പൽ ഡോ. ജിലു ആനി ജോൺ, പ്ലേസ്മെന്‍റ് സെൽ കോഓർഡിനേറ്റർമാരായ ഡോ. ജെമിനി ജോർജ്, ബിനോയ് സി. ജോർജ്, പി.സി. അനീഷ് തുടങ്ങിയവരും സംസാരിച്ചു.

കഴിഞ്ഞവർഷം കലാലയത്തിൽ നിന്നും പ്ലേസ്മെന്‍റ് സെല്ലിലൂടെ നൂറോളം വിദ്യാർഥികൾ വിവിധ അന്താരാഷ്‌ട്ര കമ്പനികളിൽ ഉദ്യോഗം നേടിയിരുന്നു.

ADVERTISEMENT

നായ ശല്യത്തിൽ പൊറുതിമുട്ടി അതിരമ്പുഴ

അതിരമ്പുഴ: എവിടെ നോക്കിയാലും നായ്ക്കൂട്ടങ്ങൾ. സ്വസ്ഥമായി വഴി നടക്കാനാകുന്നില്ല. വാഹനങ്ങൾക്കു മുന്നിൽ ചാടിയും ഇവ അപകടമുണ്ടാക്കുന്നു. അതിരമ്പുഴയിൽ തെരുവുനായ്ക്കൾ ഇല്ലാത്ത സ്ഥലങ്ങളില്ല. മാർക്കറ്റ്, പള്ളി മൈതാനം, റെയിൽവേ സ്റ്റേഷൻ, ഐടിഐ, മാറാമ്പ്, ശ്രീകണ്ഠമംഗലം, കോട്ടമുറി തുടങ്ങിയ സ്ഥലങ്ങളിലെല്ലാം നായ്ക്കൂട്ടങ്ങൾ വിഹരിക്കുകയാണ്. പത്തിലേറെ നായ്ക്കളുടെ കൂട്ടം മാർക്കറ്റിൽ വെയ്റ്റിംഗ് ഷെഡും കടത്തിണ്ണകളും കൈയേറിയ നിലയിലാണ്. കഴിഞ്ഞദിവസം മാർക്കറ്റിനു സമീപമുള്ള ഒരു വീട്ടിലെ കാർപോർച്ചിൽ തമ്പടിച്ച ഈ നായകൾ വീട്ടുകാർക്കും ഭീഷണിയായി. രാത്രിയിൽ ഇരുചക്ര വാഹനങ്ങൾക്കു മുന്നിലേക്കു നായ്ക്കൂട്ടം ചാടിവീഴുന്നത് അപകടത്തിനിടയാക്കുന്നു. ഭീതിയോടെയാണ് രാത്രിയിൽ യാത്ര ചെയ്യുന്നത്. സന്ധ്യക്കും പുലർച്ചെയും കാൽനട യാത്ര അസാധ്യമാണ്. നായഭീതിയിൽ പ്രഭാത നടത്തംതന്നെ നിർത്തിയവർ ഏറെയാണ്. പള്ളി മൈതാനത്തും പരിസരങ്ങളിലും തമ്പടിച്ചിരിക്കുന്ന നായകൾ നാലു സ്കൂളുകളിലെ മൂവായിരത്തോളം കുട്ടികൾക്കും ഭീഷണിയാണ്. പൊതുസ്ഥലങ്ങളിൽ ഭക്ഷണാവശിഷ്‌ടങ്ങൾ തള്ളുന്നതാണ് നായകൾ കൂട്ടമായി എത്താനുള്ള കാരണം. മാർക്കറ്റിൽ പഞ്ചായത്തു വക സ്ഥലത്ത് വൻതോതിലാണ് മാലിന്യം തള്ളുന്നത്. പഞ്ചായത്തിന്‍റെ ഭാഗത്തുനിന്ന് നടപടി ഉണ്ടാകുന്നില്ല. അതിരമ്പുഴ പള്ളിക്കു തെക്കുവശം മാത്തത്തോട്ടിൽ കലുങ്കിനടിയിലും പള്ളി മൈതാനത്ത് വെയിറ്റിംഗ് ഷെഡിനു സമീപവും റെയിൽവേസ്റ്റേഷനും ഐടിഐക്കും സമീപവും മാലിന്യം വൻതോതിൽ തള്ളുന്നുണ്ട്. പൊതുസ്ഥലങ്ങളിൽ ചിലർ നായ്ക്കൾക്ക് ഭക്ഷണം കൊടുക്കുന്നതാണ് ഒരേസ്ഥലത്ത് നായ്ക്കൾ കൂട്ടമായി തമ്പടിക്കാൻ ഇടയാക്കുന്നത്. നായ സ്നേഹികൾ നായ്ക്കൾക്ക് പൊതുസ്ഥലത്ത് ഭക്ഷണം നൽകുന്നത് നിരോധിക്കണമെന്നാണ് നാട്ടുകാർ ആവശ്യപ്പെടുന്നത്. പൊതുസ്ഥലത്ത് മാലിന്യം തള്ളുന്നവരെയും പൊതുസ്ഥലത്ത് നായ്ക്കൾക്ക് ഭക്ഷണം നൽകുന്നവരെയും ഒരുപോലെ നിയന്ത്രിക്കാൻ പഞ്ചായത്ത് അധികൃതർ തയ്യാറാകണം.

പ്രസാദ് ഇറങ്ങിയാൽ വരാൽ വരാതിരിക്കില്ല

കൈപ്പുഴ: വലയുമായി മാഞ്ഞൂർ മേമ്മുറി സ്വദേശി പ്രസാദ് പാടത്തിറങ്ങിയാൽ വരാൽ ഒാടിവന്നു കയറും. ഉൾനാടൻ മീൻപിടിത്തത്തിൽ രണ്ടു പതിറ്റാണ്ട് പിന്നിടുന്ന മരങ്ങാട്ടുകുന്നേൽ പ്രസാദിനെ തേടി ആളുകൾ പ്രധാനമായും എത്തുന്നത് വരാലിനെ വാങ്ങാനാണ്. വെള്ളം വറ്റിക്കുന്ന പാടങ്ങളിലും തോട്ടിലുമാണ് പ്രധാന മീൻപിടിത്തം. വട്ടവല, കുത്തുവല, വീശുവല ഇവയൊക്കെയുമായിട്ടാണ് പ്രസാദ് ഇറങ്ങുന്നത്. നാടന്‍ വരാല്‍ നാട്ടു മീനുകളിലെ രാജാവാണ്. ഏറ്റവുമധികം ആവശ്യക്കാരുള്ളതും വരാലിനാണ്. സീസണില്‍ കിലോഗ്രാമിന് 500 രൂപ വരെ കിട്ടും. നാടന്‍ വരാലിന്‍റെ ഔഷധ ഗുണം തന്നെയാണ് വിലകൂടാന്‍ കാരണം. ശസ്ത്രക്രിയകള്‍ക്കു ശേഷം മുറിവ് പെട്ടെന്നുണങ്ങാനും പൊട്ടിയ അസ്ഥികള്‍ പെട്ടെന്നു പൂര്‍വസ്ഥിതിയിലാകാനും എണ്ണയോ തേങ്ങയോ ചേര്‍ക്കാതെ വരാല്‍ മീന്‍ പുളിയിട്ട് വറ്റിച്ച കറി ഉത്തമമാണെന്നാണ് പഴമക്കാര്‍ പറയുന്നു. വലിയ വരാല്‍ മീനുകളെ നിക്ഷേപിച്ച വെള്ളം വെട്ടുകല്ല് ഉപയോഗിച്ചു കെട്ടിടങ്ങൾ നിർമിക്കുന്പോൾ ചാന്തിൽ ചേർക്കാൻ ചിലർ ഉപയോഗിച്ചിരുന്നു. സുര്‍ക്കി മിശ്രിതത്തില്‍ ചേര്‍ക്കുന്ന വെള്ളം വരാല്‍ മത്സ്യത്തെ ജീവനോടെ ഇട്ടവെള്ളമാണ്. വലിയ വാര്‍പ്പുകളില്‍ മത്സ്യത്തെ ജീവനോടെ സൂക്ഷിക്കും. വരാലിന്‍റെ ശ്വസന പ്രക്രിയവഴി ഈ വെള്ളം വഴുവഴുപ്പും പശയുള്ളതായും മാറുന്നു. ഭിത്തി നിര്‍മിക്കുമ്പോള്‍ ഈ വെള്ളത്തില്‍ മുക്കിയശേഷം വെട്ടുകല്ലുകള്‍ പാകുന്നു. അത് നല്ല ഉറപ്പുള്ളതായി കാലങ്ങളോളം നിലനില്‍ക്കും. പ്രസാദിന്‍റെ ഇഷ്ടമീനും വരാലാണ്. 20 വര്‍ഷമായി നാടന്‍ മീന്‍ ടൂറിസ്റ്റ് റിസോര്‍ട്ട്, ബാറുകള്‍, ഷാപ്പ് എന്നിവിടങ്ങളില്‍ വിറ്റാണ് പ്രസാദിന്‍റെ ഉപജീവനം. ഈ തൊഴിലില്‍നിന്നു ലഭിച്ച വരുമാനംകൊണ്ട് മൂന്നു പെണ്‍മക്കളെയും പഠിപ്പിച്ചു. നഴ്‌സിംഗ്, ഡിഗ്രി, പ്ലസ് ടു തലങ്ങളില്‍ അവരെത്തി. വരുമാനം കൃത്യമായി പറയാനാവില്ല. ചിലപ്പോള്‍ രണ്ടായിരം രൂപ വരെ കിട്ടിയേക്കാം. ചിലപ്പോള്‍ ഒന്നും കിട്ടില്ല. ഇത്രയും പറഞ്ഞിട്ട് വലയുമായി പ്രസാദ് വരാലിനെ തേടി തോട്ടിലേക്ക് ഇറങ്ങി.

ഹൈമാസ്റ്റ് ലൈറ്റ് തകരാറിൽ: മെഡി. കോളജ് ബസ് സ്റ്റാൻഡ് ഇരുട്ടിൽ

ഗാന്ധിനഗര്‍: മെഡിക്കല്‍ കോളജ് ബസ് സ്റ്റാന്‍ഡ് നാളുകളായി ഇരുട്ടില്‍. സ്റ്റാന്‍ഡിന്‍റെ എതിര്‍വശത്ത് ഹൈമാസ്റ്റ് ലൈറ്റ് സ്ഥാപിച്ചിട്ടുണ്ടെങ്കിലും മാസങ്ങളായി ഇതു പ്രവര്‍ത്തിക്കുന്നില്ല. ഇതേത്തുടര്‍ന്ന് സ്റ്റാന്‍ഡ് രാത്രികാലങ്ങളില്‍ ഇരുട്ടിലാണ്. വിവിധ ജില്ലകളില്‍നിന്ന് ദിവസവും മെഡിക്കല്‍ കോളജ് ആശുപത്രിയിലെത്തുന്ന ആയിരക്കണക്കിന് രോഗികളും ആശുപത്രിയിലെ ജീവനക്കാരും ബസ് കാത്തുനില്‍ക്കുന്ന സ്റ്റാന്‍ഡാണ് മാസങ്ങളായി ഇരുട്ടിലായിരിക്കുന്നത്. കടകളിലെ വെട്ടത്തിലാണ് രാത്രികാലങ്ങളില്‍ യാത്രക്കാര്‍ ബസ് കാത്തുനില്‍ക്കുന്നത്. ഹൈമാസ്റ്റ് ലൈറ്റിന്‍റെ തകരാര്‍ പരിഹരിക്കാത്തതിനാലാണ് സ്റ്റാന്‍ഡ് ഇരുട്ടില്‍ തുടരുന്നത്. ആര്‍പ്പൂക്കര പഞ്ചായത്തിന്‍റെ പരിധിയിലാണ് സ്റ്റാന്‍ഡ്. ഹൈമാസ്റ്റ് ലൈറ്റ് പ്രവര്‍ത്തിപ്പിക്കുന്നതിൽ പഞ്ചായത്ത് അധികാരികള്‍ അനാസ്ഥ തുടരുകയാണെന്ന ആരോപണമുണ്ട്. മെഡിക്കല്‍കോളജ് ആശുപത്രി അത്യാഹിതവിഭാഗം കവാടവും ഇരുട്ടിലാണ്. ഇവിടെയും വഴിവിളക്കില്ല. അടുത്ത കാലത്ത് ഇവിടെ മന്ത്രി വി.എന്‍. വാസവന്‍ അനുവദിച്ച തുകകൊണ്ട് ഹൈമാസ്റ്റ് സ്ഥാപിച്ചെങ്കിലും പ്രവര്‍ത്തനോദ്ഘാടനം നീളുകയാണ്.

ഫാ. എ. തോമസ് വേങ്കടത്തിന്‍റെ സ്ഥാനാരോഹണം 21ന്

കോട്ടയം: മലങ്കര യാക്കോബായ സുറിയാനി സഭ കോട്ടയം ഭദ്രാസനത്തിലെ സീനിയര്‍ വൈദികന്‍ ഫാ. എ. തോമസ് വേങ്കടത്തിന്‍റെ കോര്‍എപ്പിസ്‌കോപ്പ സ്ഥാനാരോഹണം 21ന്. കോട്ടയം സെന്‍റ് ജോസഫ്‌സ് കത്തീഡ്രലില്‍ രാവിലെ 6.15നു വിശുദ്ധ കുര്‍ബാന മധ്യേ ഭദ്രാസന മെത്രാപ്പോലീത്തയും എപ്പിസ്‌കോപ്പല്‍ സുന്നഹദോസ് സെക്രട്ടറിയുമായ ഡോ. തോമസ് മാര്‍ തീമോത്തിയോസ് കോര്‍എപ്പിസ്‌കോപ്പ സ്ഥാനം നല്‍കും. ഭദ്രാസന മെത്രാപ്പോലീത്ത ഡോ. തോമസ് മാര്‍ തിമോത്തിയോസിന്‍റെ ശിപാര്‍ശപ്രകാരം കോര്‍എപ്പിസ്‌കോപ്പ സ്ഥാനം സംബന്ധിച്ച് ആകമാന സുറിയാനി സഭാ പരമാധ്യക്ഷന്‍ പരിശുദ്ധ ഇഗ്നാത്തിയോസ് അപ്രേം ദ്വിതീയന്‍ പാത്രിയര്‍ക്കീസ് ബാവയുടെ കല്പന നേരത്തേ ലഭിച്ചിരുന്നു. തിരുവഞ്ചൂര്‍ മര്‍ത്ത്മറിയം പള്ളി ഇടവകയിൽ വേങ്കടത്ത് ചെറിയാന്‍ അന്ത്രയോസ്-ഏലിയാമ്മ ദമ്പതികളുടെ മകനായി 1960ല്‍ ജനിച്ചു. 1988ഡിസംബര്‍ 11ന് ഡോ. ഗീവര്‍ഗീസ് മാര്‍ ഗ്രീഗോറിയോസ് മെത്രാപ്പോലീത്തയില്‍നിന്നു വൈദികപട്ടം സ്ഥീകരിച്ചു. ഭദ്രാസനത്തിലെ 25 പള്ളികളിലും യുഎസില്‍ നോര്‍ത്ത് കരോളൈനയിലെ ഷാര്‍ലറ്റ് സെന്‍റ് ജോര്‍ജ് പള്ളിയിലും സേവനം ചെയ്തു. സഭാ മാനേജിംഗ് കമ്മിറ്റിയംഗം, അഖില മലങ്കര യൂത്ത് അസോസിയേഷന്‍ വൈസ് പ്രസിഡന്‍റ്, വൈദിക സൊസൈറ്റി സെക്രട്ടറി, വൈദികസംഘം കോട്ടയം ഭദ്രാസന കമ്മിറ്റിയംഗം, ഭദ്രാസന കൗണ്‍സിൽ അംഗം തുടങ്ങിയ സ്ഥാനങ്ങള്‍ വഹിച്ചു. കാലംചെയ്ത യാക്കോബ് മാര്‍ യൂലിയോസ്, ബെന്യാമിന്‍ ജോസഫ് മാര്‍ ഒസ്താത്തിയോസ് മെത്രാപ്പോലീത്താമാരുടെ സെക്രട്ടറിയായിരുന്നു. നിലവില്‍ പാമ്പാടി ഈസ്റ്റ് മര്‍ത്ത്മറിയം ചെറിയ പള്ളി, മീനടം സെന്‍റ് ജോണ്‍സ് പള്ളി എന്നിവിടങ്ങളില്‍ സേവനമനുഷ്ഠിക്കുന്നു. ഭദ്രാസന ശുശ്രൂഷകസംഘം വൈസ്പ്രസിഡന്‍റുമാണ്. ഇവാഞ്ചലിക് അസോസിയേഷന്‍ കമ്മിറ്റിയംഗം, തിരുവഞ്ചൂര്‍ വൈഎംസിഎ രക്ഷാധികാരി, മഞ്ഞിനിക്കര തീര്‍ഥാടകസംഘം വൈസ് പ്രസിഡന്‍റ് എന്നീ നിലകളിലും പ്രവർത്തിക്കുന്നു. മണര്‍കാട് സെന്‍റ് മേരീസ് കോളജ് സുറിയാനി അധ്യാപകനായിരുന്നു. ഭാര്യ: വത്സമ്മ തോമസ്. മക്കള്‍: അലക്‌സ് തോമസ് (ഐടി മാനേജര്‍, ഇന്‍റര്‍ഗ്രോ ബ്രാന്‍ഡ് കൊച്ചി), അഡ്വ. എല്‍സ എലിസബത്ത് തോമസ്. മരുമക്കള്‍: ഷാനി ആന്‍ അലക്‌സ് (അധ്യാപിക, കളമശേരി രാജഗിരി പബ്ലിക് സ്‌കൂള്‍), തോമസ് സാബു (പ്രഫസര്‍, മണര്‍കാട് സെന്‍റ് മേരീസ് കോളജ്).

ത്രിപുര സ്വദേശിയുടെ കളഞ്ഞുപോയ പഴ്സ് കണ്ടെത്തി നല്‍കി യുവാവും ഏറ്റുമാനൂര്‍ പോലീസും

ഏറ്റുമാനൂർ: ഏറ്റുമാനൂർ പോലീസിന്‍റെ അവസരോചിത ഇടപെടലിലും യുവാവിന്‍റെ സത്യസന്ധതയിലും ത്രിപുര സ്വദേശിക്ക് നഷ്ടപ്പെട്ട പണം തിരികെ ലഭിച്ചു. ബസ് യാത്രയ്ക്കിടെ നഷ്ടപ്പെട്ട പഴ്സാണ് ത്രിപുര സ്വദേശിക്ക് തിരികെ ലഭിച്ചത്. ഞായറാഴ്ച രാത്രി പാലായിൽനിന്ന് എം ആൻഡ് എം ബസിൽ യാത്ര ചെയ്ത ത്രിപുര സ്വദേശി ഹൃദയദാസിന്‍റെ 15,000 രൂപ അടങ്ങിയ പഴ്സാണ് നഷ്ടപ്പെട്ടത്. യാത്ര ചെയ്ത ബസ് ഏതാണെന്ന് ഹൃദയ ദാസിന് അറിവുണ്ടായിരുന്നില്ല. ഹൃദയദാസ് ഏറ്റുമാനൂർ പോലീസ് സ്റ്റേഷനിൽ പരാതി നൽകിയതിനെത്തുടർന്ന് നടത്തിയ അന്വേഷണത്തിൽ പാലാ റൂട്ടിൽ സർവീസ് നടത്തുന്ന എം ആൻഡ് എം ബസ് ക്ലീൻ ചെയ്യുമ്പോൾ കാണക്കാരി പള്ളിപ്പടി സ്വദേശി വടക്കേമറ്റപ്പള്ളി വീട്ടിൽ ജോസിന്‍റെ മകൻ എബിന് വണ്ടിയിൽക്കിടന്ന് പഴ്സ് കിട്ടിയതായി വിവരം ലഭിച്ചു. പട്രോളിംഗ് ഡ്യൂട്ടിയിൽ ഉണ്ടായിരുന്ന എസ്ഐ ഉദയൻ കെ., സിവിൽ പോലീസ് ഓഫീസർ പ്രദീപ്‌ എന്നിവർ സ്ഥലത്തെത്തി പഴ്സ് ഹൃദയ് ദാസിന്‍റേതാണെന്ന് തിരിച്ചറിയുകയായിരുന്നു. ഏറ്റുമാനൂർ എസ്ഐ അഖിൽദേവ് എ.എസ്. ഇന്നലെ ഹൃദയ് ദാസിനെയും എബിനെയും സ്റ്റേഷനിൽ വിളിച്ചുവരുത്തി. എസ്എച്ച്ഒ അൻസൽ എ.എസിന്‍റെ സാന്നിധ്യത്തിൽ എബിൻ, ഹൃദയ് ദാസിന് പഴ്സ് കൈമാറി. ഏറ്റുമാനൂരിൽ ഡെവൺ കറി പൗഡർ കമ്പനി ജീവനക്കാരനായ എബിൻ അധിക വരുമാനത്തിനായാണ് ബസ് ക്ലീനിംഗ് ജോലി ചെയ്തു വന്നിരുന്നതെന്ന് പോലീസ് ഉദ്യോഗസ്ഥർ പറഞ്ഞു.

66 ഗ്രാമീണ റോഡുകള്‍ക്ക് നിര്‍മാണ അനുമതി ലഭിച്ചു: ഫ്രാന്‍സിസ് ജോര്‍ജ്

കോട്ടയം: പ്രധാനമന്ത്രി ഗ്രാമീണ സഡക് യോജന (പിഎംജിഎസ്‌വൈ ) പദ്ധതി പ്രകാരം കോട്ടയം ലോക്‌സഭാ മണ്ഡലത്തിലെ 66 ഗ്രാമീണ റോഡുകള്‍ക്കു നിര്‍മാണാനുമതി ലഭിച്ചതായി ഫ്രാന്‍സിസ് ജോര്‍ജ് എംപി. ജനവാസ കേന്ദ്രങ്ങളെ തമ്മില്‍ ബന്ധിപ്പിക്കുന്നതും കുറഞ്ഞത് ആറു മീറ്റര്‍ വീതിയെങ്കിലുമുള്ള മണ്‍റോഡുകളെയാണ് പദ്ധതിയില്‍ ഉള്‍പ്പെടുത്തിയത്. അനുമതി ലഭിച്ച റോഡുകള്‍ ഉന്നത നിലവാരത്തില്‍ നിര്‍മിക്കുന്നതിനുള്ള പ്രോജക്ട് റിപ്പോര്‍ട്ട് ഉടന്‍ തയാറാക്കും. ജില്ലയിലെ വിവിധ നിയോജക മണ്ഡലങ്ങളിലുള്ള 55 റോഡുകളുടെ 112 കിലോമീറ്ററും എറണാകുളം ജില്ലയിലെ പിറവം നിയോജക മണ്ഡത്തിലെ 11 റോഡുകളുടെ 15 കിലോമീറ്റര്‍ ദൂരവുമാണ് പദ്ധതിയില്‍ ഉള്‍പ്പെടുത്തിയിരിക്കുന്നത്. കേന്ദ്രത്തില്‍നിന്ന് അനുമതി ലഭിക്കുന്നതോടെ സര്‍വേ പൂര്‍ത്തിയാക്കി സമര്‍പ്പിച്ചിട്ടുള്ള മറ്റു റോഡുകളെയും പദ്ധതിയില്‍ ഉള്‍പ്പെടുത്തുമെന്ന് ഫ്രാന്‍സിസ് ജോര്‍ജ് പറഞ്ഞു. കേന്ദ്ര സര്‍ക്കാര്‍ 60 ശതമാനം, സംസ്ഥാന സര്‍ക്കാര്‍ 40ശതമാനം തുകകള്‍ മുടക്കിയാണ് പദ്ധതി നടപ്പാക്കുന്നത്. റോഡുകളുടെ അടിഭാഗം ശക്തമായി ബലപ്പെടുത്തിയതിനുശേഷം ഉന്നത നിലവാരത്തില്‍ ടാര്‍ ചെയ്യുകയും ഇരുവശങ്ങളും കോണ്‍ക്രീറ്റ് ചെയ്യുന്ന വിധത്തിലാണ് എസ്റ്റിമേറ്റ് തയാറാക്കുക. ഈ റോഡുകളില്‍ ആവശ്യമായ സ്ഥലങ്ങളില്‍ കലുങ്കുകളും പാലങ്ങളും നിര്‍മിക്കും. അഞ്ചു വര്‍ഷത്തെ റോഡ് പരിപാലനവും ഉള്‍പ്പെടുത്തിയാണ് പ്ലാനും എസ്റ്റിമേറ്റും തയാറാക്കുന്നത്. റോഡുകളുടെ നിര്‍മാണം പൂര്‍ത്തിയാകുന്നതോടെ വികസനരംഗത്ത് വലിയ മുന്നേറ്റമുണ്ടാകുമെന്നും ഫ്രാന്‍സിസ് ജോര്‍ജ് പറഞ്ഞു.

മേൽപാലങ്ങളുടെ അപ്രോച്ച് റോഡുകള്‍ തകര്‍ന്ന് യാത്രാ ദുരിതം

ചങ്ങനാശേരി: റെയില്‍വേ മേല്‍പാലം കടക്കാന്‍ വാഹനങ്ങളുടെ നീണ്ടനിര. മേല്‍പ്പാലത്തിന്‍റെ ഇരുഭാഗത്തും തകര്‍ന്നു കിടക്കുന്ന അപ്രോച്ച് റോഡ് ഭാഗത്തെ കുഴികളില്‍ ചെറുതും വലുതുമായ വാഹനങ്ങള്‍ ഇറങ്ങിക്കയറാന്‍ സമയമെടുക്കുന്നതാണ് പാലത്തില്‍ വാഹനങ്ങള്‍ കുരുങ്ങാന്‍ കാരണം. ഇത് അക്ഷരാര്‍ഥത്തില്‍ വാഴൂര്‍ റോഡില്‍ കുരിശുംമൂടു മുതല്‍ ഒന്നാംനമ്പര്‍ ബസ് സ്റ്റാന്‍ഡ് വരെയും ചങ്ങനാശേരി ബൈപാസിലും വാഹനസഞ്ചാരം കുരുക്കുകയാണ്. റെയിൽവേ ബൈപാസ് ജംഗ്ഷനിലും റോഡ് തകർന്നിട്ടുണ്ട്. കുരുക്കുമുറുകുന്പോൾ റെയിൽവേ ജംഗ്ഷനിലെ സിഗ്നൽ സംവിധാനം ട്രാഫിക് പോലീസ് ഓഫാക്കി കഠിനാധ്വാനം ചെയ്താണ് പരിഹാരമുണ്ടാക്കുന്നത്. മഴ തോരുന്പോഴേ മേല്‍പാലത്തിലെ അപ്രോച്ച് റോഡിന്‍റെ തകര്‍ച്ച പരിഹരിക്കാന്‍ സത്വര നടപടികള്‍ സ്വീകരിക്കണമെന്ന ആവശ്യമാണ് ഉയരുന്നത്. പാറേല്‍ പള്ളി ഭാഗത്തുനിന്നു കവലയിലെത്താന്‍ 25 മിനിറ്റ് പാറേല്‍ പള്ളി ഭാഗത്തുനിന്നു നിരങ്ങിനീങ്ങുന്ന സ്വകാര്യബസുകളടക്കം വാഹനങ്ങള്‍ ചങ്ങനാശേരി കവലയില്‍ എത്താന്‍ 20നും 30നും ഇടയില്‍ മിനിറ്റ് എടുക്കേണ്ടിവരുന്നു. ഇതിനാല്‍, സ്വകാര്യ ബസുകളുടെ സമയക്രമം തെറ്റുന്നു. രാവിലെ സ്‌കൂളുകളിലും കോളജുകളിലുമെത്തേണ്ട വിദ്യാര്‍ഥികള്‍, അധ്യാപകര്‍, സര്‍ക്കാര്‍ സ്ഥാപനങ്ങളിലുള്‍പ്പെടെ വിവിധ സ്ഥാപനങ്ങളിലെ ജീവനക്കാർ തുടങ്ങി ആർക്കും സമയക്ലിപ്തത പാലിക്കാനാവുന്നില്ല. പൈപ്പുകളിടാന്‍ കുഴിച്ച റോഡ് പൂര്‍വസ്ഥിതിയില്‍ എത്തിക്കുന്നതും വൈകുന്നു ജല്‍ജീവന്‍, അമൃത് പദ്ധതികള്‍ക്കായി പാറേല്‍പ്പള്ളി ഭാഗത്ത് വെട്ടിപ്പൊളിച്ച ഫുട്പാത്തുകള്‍ പൂര്‍വസ്ഥിതിയില്‍ ആക്കാത്തതും യാത്രക്കാര്‍ക്കു വലിയ ദുരിതമാണ്. വാഴൂര്‍ റോഡില്‍ പാറേല്‍പ്പള്ളി കിണര്‍ ഭാഗത്തുനിന്നുമാരംഭിച്ച് ഫാത്തിമാപുരത്തെത്തുന്ന റോഡിന്‍റെ ഇരുവശങ്ങളിലും പൈപ്പ് സ്ഥാപിച്ചെങ്കിലും റോഡ് പൂര്‍വസ്ഥിതിയില്‍ എത്തിക്കുന്നത് വൈകുന്നതുമൂലം വാഹനസഞ്ചാരം അതീവ ദുരിതമാണ്. കവിയൂര്‍ റോഡിന്‍റെ ശോച്യാവസ്ഥയും കുരുക്ക് ചങ്ങനാശേരി-കവിയൂര്‍ റോഡിന്‍റെ തകര്‍ച്ച ഈ റോഡിലെയും ഗതാഗതം തടസപ്പെടുത്തുന്നു. പായിപ്പാട്, നാലുകോടി കവലകളിലും ഇരൂപ്പ, ഫാത്തിമാപുരം ഭാഗങ്ങളിലും റോഡ് തകര്‍ന്ന നിലയിലാണ്. ഫാത്തിമാപുരം റെയില്‍വേ മേല്‍പാലത്തിന്‍റെ അപ്രോച്ച് റോഡുകളും തകര്‍ച്ചയിലാണ്. പെരുന്ന-എസ്ബി കോളജ് ഭാഗത്തും തിരക്ക് നിര്‍മാണത്തിലിരിക്കുന്ന കെഎസ്ആര്‍ടിസി സ്റ്റേഷനു മുമ്പില്‍ കോട്ടയം ഭാഗത്തേക്കും മുനിസിപ്പല്‍ ഓഫീസിനു മുമ്പില്‍ തിരുവല്ല ഭാഗത്തേക്കുള്ള കെഎസ്ആര്‍ടിസി ബസുകളും നിര്‍ത്തുന്നത് എന്‍എച്ച് 183 (എംസി)റോഡില്‍ പെരുന്ന മുതല്‍ എസ്ബി കോളജ് ഭാഗം വരേയും ഗതാഗതം കുരുക്കുകയാണ്. ട്രാഫിക് പോലീസും നെട്ടോട്ടം ട്രാഫിക് എന്‍ഫോഴ്‌സ്‌മെന്‍റ് പോലീസ് നഗരത്തിലെ ഗതാഗത പ്രതിസന്ധി പരിഹരിക്കാന്‍ നെട്ടോട്ടമോടുകയാണ്. അടിസ്ഥാനപ്രശ്‌നങ്ങൾ ചര്‍ച്ച ചെയ്തു പരിഹരിക്കാത്തതിനാൽ പോലീസ് സേനയും ബുദ്ധിമുട്ടുകയാണ്. ഗതാഗത ഉപദേശകസമിതി യോഗം ഇനിയും വൈകരുത് നഗരത്തിലെ ഗതാഗതത്തിരക്കിനു പരിഹാരം കാണാന്‍ നഗരസഭാധികൃതര്‍ അടിയന്തരമായി ട്രാഫിക് ഉപദേശക സമിതി യോഗം വിളിച്ചുചേര്‍ക്കണമെന്ന ആവശ്യം ഉയരുകയാണ്. അല്ലാത്ത പക്ഷം ഓണക്കാലമാകുമ്പോള്‍ നഗരം ഗതാഗതക്കുരുക്കില്‍ വീര്‍പ്പുമുട്ടും. ട്രാഫിക് ഉപദേശക സമിതി താഴെപ്പറയുന്ന ആവശ്യങ്ങൾ പരിഗണിക്കണം. •റോഡുകളുടെ തകര്‍ച്ചയ്ക്ക് പരിഹാരം കാണണം. • എന്‍എച്ച്-183(എംസി റോഡില്‍)ല്‍ മതുമൂല മുതല്‍ ളായിക്കാട് വരെയുള്ള ഭാഗങ്ങളില്‍ സിഗ്നലുകളും ഡിവൈഡര്‍ ലൈനുകളും സീബ്ര ക്രോസിംഗുക ളും സ്ഥാപിക്കണം. • മാര്‍ക്കറ്റ് റോഡില്‍ രൂക്ഷമാകുന്ന കുരുക്കഴിക്കാൻ നടപടിവേണം. • വഴിവാണിഭങ്ങളിലെ വര്‍ധന പരിശോധിക്കണം. • പെരുന്ന രാജേശ്വരി ജംഗ്ഷനില്‍ തട്ടുകടകള്‍ക്കു മുമ്പിലെ വാഹനപാര്‍ക്കിംഗ് മറ്റു വാഹനങ്ങള്‍ക്ക് ദുരിതമാകുന്നുണ്ടോയെന്ന് വിലയിരുത്തണം. • എസ്എച്ച് ജംഗ്ഷനില്‍ സുരക്ഷാ ക്രമീകരണങ്ങള്‍ ശക്തമാക്കണം. •ആറുവര്‍ഷം മുമ്പ് നഗരത്തിലെ ഓട്ടോകള്‍ക്ക് നമ്പര്‍ നല്‍കി പാര്‍ക്കിംഗ് ഏരിയാകളും ഏര്‍പ്പെടുത്തിയിരുന്നു. എന്നാലിപ്പോള്‍ നഗരസഭാ നമ്പറില്ലാത്ത നിരവധി ഓട്ടോകള്‍ പാര്‍ക്ക് ചെയ്ത് ഓടുന്നു. ഇതു പരിശോധിച്ച് എണ്ണം നിയന്ത്രിക്കണം. •ഫുട്പാത്തുകളിലൂടെയുള്ള കാല്‍നടയാത്ര സുഗമമാക്കണം. •വൈദ്യുതി തൂണുകളിലും ഫുട്പാത്തുകളിലും സ്ഥാപിച്ചിരിക്കുന്ന ഫ്‌ളെക്‌സ്‌ബോര്‍ഡുകള്‍ നീക്കം ചെയ്യണം. •ഓണക്കാലത്ത് റോഡിലെ കുരുക്ക് ഒഴിവാക്കാൻ നഗരത്തിൽ പാർക്കിംഗ് ക്രമീകരണങ്ങളും ഏർപ്പെടുത്തണം.

കളക്ടറുടെ ഉത്തരവ് അവഗണിച്ചു; മരം വീണ് വീടിനു നാശം

കറുകച്ചാൽ: അയൽവാസിയുടെ പറമ്പിൽനിന്ന കൂറ്റൻ ചാര് മരം വീണ് വീടിനു നാശം നേരിട്ടു. ചമ്പക്കര കുറുപ്പൻകവല മാക്കിപാലം ഭാഗത്ത് തുണ്ടിയിൽ ടി.ടി. മുരുകന്‍റെ വീടിനാണു നാശം സംഭവിച്ചത്. ഇന്നലെ രാവിലെ 7.15 ഓടെയാണ് സംഭവം. കളക്ടറുടെ ഉത്തരവ് ഉണ്ടായിട്ടും വെട്ടിമാറ്റാതിരുന്ന മരമാണ് വീടിന് മുകളിൽ വീണതെന്നു നാട്ടുകാർ പറയുന്നു. നഷ്ടപരിഹാരം നൽകാനും മരം മുറിച്ചുനീക്കാനും സ്ഥലമുടമ വിസമ്മതിച്ചതോടെ പഞ്ചാത്തംഗത്തിന്‍റെ നേതൃത്വത്തിൽ നാട്ടുകാർ റോഡ് ഉപരോധിച്ചു. അപകടവിവരം മുരുകൻ സ്ഥലമുടമയോട് പറഞ്ഞെങ്കിലും നടപടി സ്വീകരിക്കാൻ ഇയാൾ തയ്യാറായില്ല. വിവരമറിഞ്ഞ് വാർഡംഗം കിരൺകുമാറിന്‍റെ നേതൃത്വത്തിൽ വീണ്ടും സ്ഥലമുടമയോടു സംസാരിച്ചെങ്കിലും മരം മുറിക്കില്ലെന്നും നഷ്ടപരിഹാരം കൊടുക്കില്ലെന്നും അറിയിച്ചു. ഇതോടെ വാർഡംഗത്തിന്‍റെ നേതൃത്വത്തിൽ നാട്ടുകാർ റോഡ് ഉപരോധിച്ചു. വിവരമറിഞ്ഞ് കറുകച്ചാൽ പോലീസ്, ചീഫ് വിപ്പ് ഡോ.എൻ. ജയരാജ്, പഞ്ചായത്ത് സെക്രട്ടറി, തഹസിൽദാർ അടക്കമുള്ളവർ സ്ഥലത്തെത്തി. സ്ഥലമുടമ ഒത്തുതീർപ്പിന് തയ്യാറാകാതെ വന്നതോടെ വിഷയം കളക്ടറെ അറിയിച്ചു. കളക്ടറുടെ നിർദേശപ്രകാരം ഇന്നു മരം മുറിച്ചു മാറ്റാൻ പഞ്ചായത്ത് അധികൃതർ തീരുമാനിച്ചു. അപകടാവസ്ഥയിലുള്ള മരം മുറിക്കണമെന്ന് മുരുകൻ പലവട്ടം സ്ഥലമുടമയോട് പറഞ്ഞതാണ്. നടപടിയുണ്ടാകാതെ വന്നപ്പോൾ കറുകച്ചാൽ പഞ്ചായത്തിലും ജില്ലാ കളക്ടർക്കും പരാതി നൽകിയിരുന്നു. കളക്ടറുടെ നിർദേശപ്രകാരം പഞ്ചായത്ത് സെക്രട്ടറി മരം മുറിക്കണമെന്നാവശ്യപ്പെട്ട് നോട്ടീസ് നൽകിയിട്ടും ഉടമ മരം മുറിക്കാൻ തയ്യാറായില്ല. സെക്രട്ടറിക്കെതിരേ ഇയാൾ കേസ് നൽകിയതായി പഞ്ചായത്ത് അധികൃതരും പറയുന്നു.

കല്‍ക്കെട്ട് ഇടിഞ്ഞ് കുംബിക്കപ്പുഴ പാലം അപകടാവസ്ഥയില്‍

നെടുംകുന്നം: പുന്നവേലി റോഡിലെ കുംബിക്കപ്പുഴ പാലം കല്‍ക്കെട്ടിടിഞ്ഞ് അപകടാവസ്ഥയില്‍. മുളയംവേലി - നെടുംകുന്നം പഞ്ചായത്തിലെ 10, 11 വാര്‍ഡുകളെ ബന്ധിപ്പിക്കുന്ന കുംബിക്കപ്പുഴ പാലത്തിന്‍റെ അടിഭാഗത്തെ പ്രധാന കൽക്കെട്ടാണ് ഇടിഞ്ഞ് അപകടാവസ്ഥയിലായത്. നിരവധി വാഹനങ്ങളും യാത്രക്കാരും കടന്നുപോകുന്ന പാലത്തിന്‍റെ അപകടാവസ്ഥ പരിഹരിച്ചു പാലം വേഗം നീക്കി സഞ്ചാരയോഗ്യമാക്കുന്നതിന് അധികാരികള്‍ ഇടപെടണമെന്നാണ് നാട്ടുകാരുടെ ആവശ്യം.

എണ്ണക്കാച്ചിറയിലെ കുടുംബങ്ങള്‍ക്ക് പട്ടയം അനുവദിക്കണം: അപു ജോണ്‍ ജോസഫ്

ചങ്ങനാശേരി: കുറിച്ചി പഞ്ചായത്തിലെ എണ്ണക്കാച്ചിറയോടുള്ള അവഗണന അവസാനിപ്പിക്കണമെന്നും പട്ടയമില്ലാത്ത അമ്പതോളം വരുന്ന കുടുംബങ്ങൾക്ക് ഉടന്‍ പട്ടയം അനുവദിക്കണമെന്നും കേരള കോണ്‍ഗ്രസ് സംസ്ഥാന കോഓര്‍ഡിനേറ്റര്‍ അപു ജോണ്‍ ജോസഫ്. എണ്ണക്കാചിറയില്‍ കേരള കോണ്‍ഗ്രസ് പുനര്‍നിര്‍മിച്ച സമര വീടിന്‍റെ സമര്‍പ്പണം നിര്‍വഹിച്ചു പ്രസംഗിക്കുകയായിരുന്നു അദ്ദേഹം. കുറിച്ചി പഞ്ചായത്തിലെ എണ്ണക്കാച്ചിറ നിവാസികളോട് പഞ്ചായത്ത് അധികൃതര്‍ കാണിക്കുന്ന അവഗണനയില്‍ പ്രതിഷേധിച്ച് ഒരു വിധവയ്ക്കു വീട് നിര്‍മിച്ചാണ് കേരള കോണ്‍ഗ്രസ് സമരം പ്രഖ്യാപിച്ചിരിക്കുന്നത്. കേരള കോണ്‍ഗ്രസ് സംസ്ഥാന സ്റ്റീയറിംഗ് കമ്മിറ്റിയംഗം ഡോ. ജോബിന്‍ എസ്. കൊട്ടാരം അധ്യക്ഷത വഹിച്ചു. പാര്‍ട്ടി വൈസ്‌ചെയര്‍മാന്‍ കെ.എഫ്. വര്‍ഗീസ്, ഉന്നതാധികാര സമിതിയംഗങ്ങളായ വി.ജെ. ലാലി, സി.ഡി വത്സപ്പന്‍, ഏലിയാസ് സഖറിയ, നിയോജകമണ്ഡലം പ്രസിഡന്‍റ് മാത്തുക്കുട്ടി പ്ലാത്താനം, അഡ്വ. ചെറിയാന്‍ ചാക്കോ, ജോര്‍ജുകുട്ടി മാപ്പിളശേരി, ജെയ്സ് വെട്ടിയാര്‍, കുര്യന്‍ തൂമ്പുങ്കല്‍, ജിക്കു കുര്യാക്കോസ്, റോയി ചാണ്ടി, ജോസഫ് ആന്‍റണി എന്നിവര്‍ പ്രസംഗിച്ചു.

പേവിഷബാധയേറ്റ് ചത്ത നായ കടിച്ച നായ്ക്കളേയും പൂച്ചയേയും പിടികൂടി പ്രതിരോധ കുത്തിവയ്പ്പെടുത്തു

വൈക്കം: പേവിഷബാധയേറ്റ് ചത്ത തെരുവുനായ കടിച്ചു പരിക്കേൽപ്പിച്ചതായി സംശയിക്കുന്ന മൂന്ന് തെരുവുനായ്ക്കളേയും ഒരു പൂച്ചയേയും പിടികൂടി പ്രതിരോധ വാക്സിൻ നൽകി. നായ്ക്കളെയും പൂച്ചയേയും കൂട്ടിൽ നിരീക്ഷണത്തിലാക്കി. വൈക്കം നഗരസഭ 17-ാം വാർഡിൽ തോട്ടുവക്കത്ത് കെവി കനാലോരത്ത് കഴിഞ്ഞ ദിവസം പേവിഷബാധയേറ്റ് ചത്ത തെരുവുനായയുടെ കടിയേറ്റ തെരുവുനായെ അവശനിലയിൽ കണ്ടതോടെ നാട്ടുകാർ മുൻനഗരസഭാ ചെയർ പേഴ്സണും വാർഡു കൗൺസിലറുമായ രാധികശ്യാമിനെ അറിയിച്ചതിനെത്തുടർന്ന് തെരുവുനായ്ക്കളെ പിടി കൂടുന്നതിൽ വൈദഗ്ധ്യം നേടിയ ആളെത്തി നായ്ക്കളെയും പൂച്ചയേയും പിടികൂടി കൂട്ടിലാക്കി.തുടർന്ന് വെറ്ററിനറി ഡോക്ടറെത്തി വാക്സിനേഷൻ നടത്തി. കഴിഞ്ഞ ദിവസം പേവിഷബാധയേറ്റു ചത്ത തെരുവുനായ കടിച്ച നാലുപേരിൽ വഴിയോരത്തെ ഷെഡിൽ കഴിയുന്ന വയോധികനേയും വാർഡ്കൗൺസിലർ രാധികശ്യാമും നാട്ടുകാരും ചേർന്ന് വൈക്കം താലൂക്ക് ആശുപത്രിയിലെത്തിച്ചു പ്രതിരോധ കുത്തിവയ്പ്പെടുത്തു. സംഭവമറിഞ്ഞ് നഗരസഭാ ചെയർപേഴ്സൺ പ്രീതാ രാജേഷ്, വികസന സ്റ്റാൻഡിംഗ് കമ്മിറ്റി ചെയർപേഴ്സൺ സിന്ധുസജീവൻ, കൗൺസിലർമാർ തുടങ്ങിയവരും സ്ഥലത്തെത്തി. തോട്ടുവക്കത്തും കെവി കനാലോരത്തും വേമ്പനാട്ട് കായൽക്കരയിലും മുമ്പ് പലതവണ പേവിഷബാധയേറ്റ തെരുവുനായ്ക്കളുടെ ആക്രമണത്തിൽ വയോധികർക്കും സ്ത്രീകൾക്കുമടക്കം നിരവധി പേർക്ക് ഗുരുതരമായി പരിക്കേറ്റിട്ടുണ്ട്. തോട്ടുവക്കത്തും നഗരത്തിലെ പ്രധാന വീഥികളിലും ഉൾപ്രദേശത്തെ വഴികളിലും വിജനമായ പുരയിടങ്ങളിലും ആൾതാമസമില്ലാത്ത വീടുകളിലും തെരുവുനായക്കൂട്ടം കടിപിടികൂടി തമ്പടിക്കുന്നതിനാൽ ജനം ഭീതിയോടെയാണ് നിരത്തിലിറങ്ങുന്നത്.

കൊതവറപാലം പുനർനിർമിക്കും: ഫ്രാൻസിസ് ജോർജ് എംപി

തലയാഴം: ഉല്ലല-കൊതവറ റോഡിലെ കാലപ്പഴക്കത്താൽ അപകടാവസ്ഥയിലായ കൊതവറ പാലവും സമീപ റോഡും പുനർനിർമിക്കുന്നതിനു ശ്രമം നടത്തുമെന്ന് ഫ്രാൻസിസ് ജോർജ് എംപി. അപകട സ്ഥിതിയിലായ പാലവും റോഡും സന്ദർശിച്ച് സ്ഥിതിഗതികൾ വിലയിരുത്തിയ ശേഷമാണ് അദ്ദേഹം ഇക്കാര്യം പറഞ്ഞത്. പൊതുമരാമത്തുവകുപ്പിന്‍റെ കീഴിലുള്ള റോഡായതിനാൽ ചില സാങ്കേതിക തടസങ്ങൾ ഉണ്ടെന്നും അവ പരിഹരിച്ച ശേഷം തുടർ നടപടികളിലേക്ക് കടക്കുമെന്നും എംപി പറഞ്ഞു. യുഡിഎഫ് നിയോജക മണ്ഡലം ചെയർമാൻ പോൾസൺ ജോസഫ്, വി. പോപ്പി, വി.എം. ഷാജി, പഞ്ചായത്തംഗം കെ. ബിനിമോൻ, സേവ്യർ കണ്ടാപറമ്പിൽ, ജെൽജി വർഗീസ്, ജോഷി ജോസഫ്, തങ്കച്ചൻ തുടങ്ങിയവർ എംപിക്കൊപ്പമുണ്ടായിരുന്നു.

കുട്ടിക്കര്‍ഷക പദ്ധതി വിത്തും കൈക്കോട്ടും ഉദ്ഘാടനം ചെയ്തു

കടുത്തുരുത്തി: അര്‍ച്ചന വിമന്‍സ് സെന്‍റര്‍ കടുത്തുരുത്തി റീജിയണിന്‍റെ നേതൃത്വത്തില്‍ കര്‍ഷക ദിനാചരണത്തിന്‍റെ ഭാഗമായി കുട്ടിക്കര്‍ഷക പദ്ധതി വിത്തും കൈക്കോട്ടും ഉദ്ഘാടനം ചെയ്തു. കാര്‍ഷിക സംസ്‌കാരം പുതുതലമുറയില്‍ വളര്‍ത്തിയെടുക്കേണ്ടതിന്‍റെ ആവശ്യകത മനസിലാക്കി അര്‍ച്ചന വിമന്‍സ് സെന്‍റര്‍ കടുത്തുരുത്തി റീജിയണും കടുത്തുരുത്തി ഗവണ്‍മെന്‍റ് വൊക്കേഷണല്‍ ഹയര്‍ സെക്കൻഡറി സ്‌കൂളും സംയുക്തമായി വിത്തും കൈകോട്ടും കുട്ടിക്കര്‍ഷക പദ്ധതിക്ക് തുടക്കം കുറിച്ചു. അര്‍ച്ചന വിമന്‍സ് സെന്‍റര്‍ ഡയറക്ടര്‍ മിസ് ത്രേസ്യാമ്മ മാത്യു അധ്യക്ഷത വഹിച്ച യോഗത്തില്‍ മോന്‍സ് ജോസഫ് എംഎല്‍എ കര്‍ഷക ദിനാചരണവും വിത്തും കൈക്കോട്ടും പദ്ധതി ഉദ്ഘാടനം ചെയ്തു. കര്‍ഷകദിന സന്ദേശവും റീജിയണില്‍ മികച്ച രീതിയില്‍ കൃഷി ചെയ്യുന്ന അംഗങ്ങള്‍ക്ക് വനിത കര്‍ഷകമിത്ര അവാര്‍ഡ് വിതരണവും കൃഷി ഓഫീസര്‍ ആര്‍. സിദ്ധാര്‍ത്ത് നിര്‍വഹിച്ചു. പഞ്ചായത്തംഗം ജാന്‍സി സണ്ണി, അധ്യാപകരായ ലിന്‍സി ചാക്കോ, ഡോ. രാജശ്രീ മോഹനന്‍, പ്രൊജക്‌ട് മാനേജര്‍ പോള്‍സണ്‍ കൊട്ടാരത്തില്‍, സീനിയര്‍ പ്രോഗ്രാം ഓഫീസര്‍ ഷൈനി ജോഷി, റീജിയണ്‍ ലീഡര്‍ റ്റിനു ഫ്രാന്‍സിസ്, യൂണിറ്റ് ഓഫീസര്‍ ഷീജ സജി, സുമ ബാബു, ബിന്‍സി ബിജു, സന്ധ്യ മോഹന്‍, ശ്രീദേവി സുബ്ബരായന്‍, പി.സി. ജഗദമ്മ, അനുജ മനോജ്, ആര്യ പി. അനില്‍കുമാര്‍, അഞ്ചുമോള്‍ കെ. മാത്യു, ലത സരിന്‍, കുമാരി കരുണാകരന്‍, ആശ മോള്‍ ഷിജോയ് തുടങ്ങിയവര്‍ പ്രസംഗിച്ചു. കര്‍ഷക ദിനാചരണത്തോടനുബന്ധിച്ചു കമ്യൂണിറ്റി ആക്‌ഷന്‍ ഗ്രൂപ്പിലെ അംഗങ്ങള്‍ക്ക് പച്ചക്കറി തൈയും ഗ്രോ ബാഗ് വിതരണവും കര്‍ഷകദിന കലാ പരിപാടികളും സമ്മാന ദാനവും നടന്നു.

പഞ്ചായത്ത് കമ്യൂണിറ്റി ഹാളിന്‍റെ ഉദ്ഘാടനം

ഞീഴൂര്‍: മോന്‍സ് ജോസഫ് എംഎല്‍എയുടെ പ്രാദേശിക വികസന ഫണ്ടില്‍നിന്ന് അനുവദിച്ച 25 ലക്ഷം രൂപ ഉപയോഗിച്ച് നവീകരിച്ച ഞീഴൂര്‍ പഞ്ചായത്ത് കമ്യൂണിറ്റി ഹാളിന്‍റെ ഉദ്ഘാടനം മോന്‍സ് ജോസഫ് എംഎല്‍എ നിര്‍വഹിച്ചു. പഞ്ചായത്ത് പ്രസിഡന്‍റ് ശ്രീകലാ ദിലീപ് അധ്യക്ഷത വഹിച്ചു. വൈസ് പ്രസിഡന്‍റ് കെ.പി. ദേവദാസ്, ബ്ലോക്ക് പഞ്ചായത്ത് പ്രസിഡന്‍റ് ജോണ്‍സണ്‍ കൊട്ടുകാപ്പിള്ളി, ജനപ്രതിനിധികൾ തുടങ്ങിയവർ പ്രസംഗിച്ചു.

ക്വിസ് മത്സരം നടത്തി

വൈക്കം: സ്വാതന്ത്ര്യദിനത്തോടനബന്ധിച്ച് വൈക്കം ടൗൺ റോട്ടറി ക്ലബ്ബ് താലൂക്കിലെ ഹൈസ്കൂൾ വിദ്യാർഥികൾക്കായി ക്വിസ് മത്സരം നടത്തി. ക്ലബ്ബ് പ്രസിഡന്‍റ് കെ.എസ്. വിനോദിന്‍റെ അധ്യക്ഷതയിൽ നടന്ന യോഗത്തിൽ വൈക്കം നഗസഭാ ചെയർപേഴ്സൺ പ്രീതാരാജേഷ് ക്വിസ് മത്സരം ഉദ്ഘാടനം ചെയ്തു. ക്വിസ് മത്സരത്തിൽ വടക്കേനട ഗവൺമെന്‍റ് ഗേൾസ് ഹയർ സെക്കൻഡറി സ്കൂൾ ഒന്നാം സമ്മാനവും തെക്കേനട ഗവൺമെന്‍റ് ഹയർ സെക്കൻഡറി സ്കൂൾ രണ്ടാം സ്ഥാനവും വൈക്കം ശ്രീനാരായണ ഹയർ സെക്കൻഡറി സ്കൂൾ, വൈക്കം വെസ്റ്റ് ഗവൺമെന്‍റ് വൊക്കേഷണൽ ഹയർ സെക്കൻഡറി സ്കൂൾ എന്നിവ മൂന്നാം സമ്മാനവും പങ്കിട്ടു. വിജയികൾക്ക് കാഷ് അവാർഡുകളും സർട്ടിഫിക്കറ്റും വിതരണം ചെയ്തു.

വൈക്കം - വെച്ചൂർ റോഡ് ജനകീയ സമിതി യോഗം ചേർന്നു

വൈക്കം: വൈക്കം - വെച്ചൂർ റോഡ് വീതികൂട്ടി ആധുനിക നിലവാരത്തിൽ പുനർനിർമിക്കുന്നതുമായി ബന്ധപ്പെട്ട് രൂപീകരിച്ച ജനകീയസമതിയുടെ യോഗം ഉല്ലല ശിവരഞ്ജിനി ഓഡിറ്റോറിയത്തിൽ നടന്നു . ജനകീയസമിതി പ്രസിഡന്‍റ് പി. സുഗതന്‍ അധ്യക്ഷത വഹിച്ചു. റോഡ് വികസനവുമായി ബന്ധപ്പെട്ട് ഭൂമി ഏറ്റെടുക്കുന്നതിനായി കിഫ്ബിയിൽനിന്ന് അനുവദിച്ച 85.77 കോടി രൂപ കെആർഎഫ്ബി മുഖേന കിഫ്ബിയുടെ ഭൂമി ഏറ്റെടുക്കൽ ഓഫീസിന് കൈമാറിയതായി സി.കെ. ആശ എംഎൽഎ പറഞ്ഞു. ജനകീയ സമിതി കൺവീനർ കെ.കെ. രഞ്ജിത്ത്, തലയാഴം പഞ്ചായത്ത് പ്രസിഡന്‍റ് രമേശ് പി.ദാസ്, കെ.കെ. ഗണേശൻ, എം.ഡി. ബാബുരാജ്, ജനപ്രതിനിധികൾ, വിവിധ രാഷ്‌ട്രീയ കക്ഷി പ്രതിനിധികൾ, കെആർഎഫ്ബി, കിഫ്ബി ഉദ്യോഗസ്ഥർ തുടങ്ങിയവർ പങ്കെടുത്തു.

കുടുംബ സംഗമം നടത്തി

വൈക്കം: താലൂക്ക് ചെത്തുതൊഴിലാളി യൂണിയൻ എഐടിയുസി ഫാമിലി വെൽഫെയർ സൊസൈറ്റിയുടെ ആഭിമുഖ്യത്തിൽ കുടുംബസംഗമവും സ്കോളർഷിപ്പ് വിതരണവും നടത്തി. കുടുംബ സംഗമം മുൻമന്ത്രി മുല്ലക്കര രത്നാകരൻ ഉദ്ഘാടനം ചെയ്തു. വെൽഫെയർ സൊസൈറ്റി പ്രസിഡന്‍റ് ബി. രാജേന്ദ്രൻ അധ്യക്ഷത വഹിച്ചു. യൂണിയൻ പ്രസിഡന്‍റ് വി.ബി. ബിനു സ്കോളർഷിപ്പുകൾ വിതരണം നടത്തി. ടി.എൻ. രമേശൻ, മുൻ എംഎൽഎ കെ. അജിത്, എം.ഡി. ബാബുരാജ് തുടങ്ങിയവർ പ്രസംഗിച്ചു.

ഗവ. വൊക്കേഷണൽ എച്ച്എസ്എസിന് മികച്ച നാഷണൽ സർവീസ് സ്കീമിനുള്ള അവാർഡ്

കുമരകം: ഈ വർഷത്തെ ഏറ്റവും മികച്ച നാഷണൽ സർവീസ് സ്കീമിനുള്ള ജില്ലാ തല അവാർഡ് കുമരകം ഗവൺമെന്‍റ് വൊക്കേഷണൽ ഹയർ സെക്കൻഡറി സ്കൂളിന്. സംസ്ഥാനത്തെ നാഷണൽ സർവീസ് സ്കീം പ്രവർത്തനങ്ങൾ വിലയിരുത്തി ഇതുവരെ നടത്തിയിട്ടുള്ള പ്രവർത്തനങ്ങളുടെ അവലോകനത്തെ അടിസ്ഥാനമാക്കിയാണ് അവാർഡ് പ്രഖ്യാപിച്ചത്. ആതുര സേവന പ്രവർത്തനങ്ങൾ, കുമരകം കമ്യൂണിറ്റി ഹെൽത്ത് സെന്‍ററിൽ രോഗികൾക്കും കൂട്ടിരിപ്പുകാർക്കും ഭക്ഷണവിതരണം, നിരാലംബർക്ക് ധനസഹായവും മരുന്നുവിതരണവും, സാമൂഹ്യ വനവത്കരണ പരിപാടികൾ തുടങ്ങി ഒട്ടനവധി ശ്രദ്ധേയ പ്രവർത്തനങ്ങളാണ് കഴിഞ്ഞ വർഷങ്ങളിൽ ഇവർ നടത്തിവന്നിരുന്നത്. അടുത്തമാസം പകുതിയോടെ തിരുവനന്തപുരത്ത് നടക്കുന്ന ചടങ്ങിൽ വിദ്യാഭ്യാസ മന്ത്രി സ്കൂളിന് അവാർഡ് നൽകും.

ചേര്‍ത്തലയിൽ സ്ത്രീകളുടെ തിരോധാനം; സെബാസ്റ്റ്യനെതിരേ കൂടുതല്‍ തെളിവുകള്‍

കോട്ടയം: ചേര്‍ത്തല കടക്കരപ്പള്ളി സ്വദേശിനി ബിന്ദു പത്മനാഭന്‍, ചേര്‍ത്തല നഗരസഭ ഏഴാം വാര്‍ഡ് നെടുമ്പ്രക്കാട് വെളിയില്‍ ഐഷ എന്നിവരുടെ തിരോധാനത്തില്‍ ക്രൈം ബ്രാഞ്ചിന് നിര്‍ണായകമായ സൂചനകള്‍. ഇരുവരെയും ചേര്‍ത്തല പള്ളിപ്പുറം സ്വദേശി ചെങ്ങുംതറ സെബാസ്റ്റ്യനും കൂട്ടാളികളും ചേര്‍ന്ന് അരുംകൊല ചെയ്തുവെന്നതിന് സാഹചര്യ തെളിവുകള്‍ ലഭിച്ച സാഹചര്യത്തില്‍ സെബാസ്റ്റ്യനെ ആലപ്പുഴ ക്രൈംബ്രാഞ്ച് കസ്റ്റഡിയില്‍ വാങ്ങും. അതിരമ്പുഴ സ്വദേശി ജെയ്‌നമ്മയെ കൊലപ്പെടുത്തി ആഭരണങ്ങള്‍ കവര്‍ന്ന കേസില്‍ സെബാസ്റ്റ്യന്‍ റിമാന്‍ഡിലാണ്. ഈ കേസില്‍ രണ്ടു തവണ ജുഡീഷല്‍ കസ്റ്റഡിയില്‍ ചോദ്യം ചെയ്തിട്ടും പ്രതി മൗനം പാലിക്കുകയാണ്. ബിന്ദുവിനെ സെബാസ്റ്റ്യനും ഫ്രാങ്ക്‌ളിൻ, പൊന്നപ്പന്‍, മനോജ് എന്നീ കൂട്ടാളികള്‍ ചേര്‍ന്ന് സെബാസ്റ്റ്യന്‍റെ വീട്ടില്‍വച്ചു വകവരുത്തിയെന്നാണ് സൂചന. ഫ്രാങ്ക്‌ളിനെ ഉടന്‍ കസ്റ്റഡിയിലെടുക്കും. ഐഷയെ ക്വട്ടേഷന്‍ സംഘത്തെ ഉപയോഗിച്ചു കൊലപ്പെടുത്തിയെന്നും സെബാസ്റ്റ്യന്‍ നേരിട്ട് ഇതില്‍ പങ്കുചേര്‍ന്നില്ലെന്നുമാണ് സൂചന. സെബാസ്റ്റ്യന്‍ പലപ്പോഴായി ഉപയോഗിച്ചിരുന്ന മൂന്നു മൊബൈൽ ഫോണുകളുടെ കോള്‍ ഡേറ്റ പരിശോധിച്ചുള്ള അന്വേഷണത്തിലാണു കൂട്ടാളികളെക്കുറിച്ച് വിവരം ലഭിച്ചത്. ബിന്ദു പത്മനാഭനെ സെബാസ്റ്റ്യനും വസ്തു ഇടനിലക്കാരനായ സുഹൃത്ത് ഫ്രാങ്ക്‌ളിനും ചേര്‍ന്ന് പള്ളിപ്പുറത്തെ വീട്ടില്‍ ശുചിമുറിയില്‍വച്ചു കൊലപ്പെടുത്തിയതായി പ്രദേശവാസിയായ ശശികല നടത്തിയ വെളിപ്പെടുത്തലുകളുടെ അടിസ്ഥാനത്തിലാണ് നിലവില്‍ അന്വേഷണം. സെബാസ്റ്റ്യന്‍റെ സുഹൃത്ത് അയല്‍വാസിയായ റോസമ്മയ്ക്ക് ഇക്കാര്യങ്ങൾ വ്യക്തമായി അറിയാമെന്ന് പോലീസ് കരുതുന്നു. പലതവണ ചോദ്യം ചെയ്തപ്പോഴും ഇവര്‍ പരസ്പരവിരുദ്ധമായ മറുപടിയാണ് നല്‍കുന്നത്. പള്ളിപ്പുറത്തെ വീട്ടുവളപ്പില്‍നിന്നു കണ്ടെടുത്ത അസ്ഥിയുടെ ഡിഎന്‍എ ഫലം അടുത്തദിവസം പുറത്തുവരുമ്പോള്‍ കൊല്ലപ്പെട്ടത് ആരെന്ന് വ്യക്തമാകും. സെബാസ്റ്റ്യന്‍റെ വീട്ടില്‍നിന്ന് കണ്ടെടുത്ത രക്തസാമ്പിളുകള്‍ അതിരമ്പുഴ സ്വദേശി ജെയ്‌നമ്മയുടേതാണെന്ന് ഫോറന്‍സിക് പരിശോധനയില്‍ വ്യക്തമായിട്ടുണ്ട്. ഇതുകൂടാതെ സിന്ധുവിന്‍റെ തിരോധാനത്തിലും സെബാസ്റ്റ്യനു പങ്കുള്ളതായാണ് സംശയിക്കുന്നത്. ചേര്‍ത്തല നഗരസഭ ഏഴാം വാര്‍ഡ് നെടുമ്പ്രക്കാട് വെളിയില്‍ ഐഷയെ അഞ്ച് വര്‍ഷങ്ങള്‍ക്ക് മുന്‍പാണ് കാണാതായത്. സെബാസ്റ്റ്യനുമായി സാമ്പത്തിക ഇടപാട് ഇവര്‍ക്കും ഉണ്ടായിരുന്നു. മനോജിന്‍റെ മരണത്തിലും ദുരൂഹത കോട്ടയം: ബിന്ദു പത്മനാഭന്‍റെ തിരോധാനവുമായി ബന്ധപ്പെട്ടു ചോദ്യം ചെയ്യാനായി പോലീസ് വിളിപ്പിച്ച വേളയിലാണ് സെബാസ്റ്റ്യന്‍റെ വിശ്വസ്തനും ഇടപാടുകളില്‍ സഹായിയുമായ ഓട്ടോറിക്ഷാ ഡ്രൈവര്‍ പള്ളിപ്പുറം തൈക്കൂട്ടത്തില്‍ എസ്. മനോജിനെ (46) 2018 ജൂണ്‍ 28ന് തൂങ്ങിമരിച്ച നിലയില്‍ കണ്ടെത്തിയത്. ബിന്ദുവിന്‍റെ കൊലപാതകം സംബന്ധിച്ച് സെബാസ്റ്റ്യനും താനുള്‍പ്പെടെ കൂട്ടാളികള്‍ക്കുമുള്ള പങ്ക് പറയേണ്ടിവരുമെന്ന ഭീതിയില്‍ ജീവനൊടുക്കിയതായാണ് നാട്ടില്‍ പറയുന്നത്. എന്നാല്‍ മനോജ് സംഭവങ്ങള്‍ പോലീസിനോടു പറയുമോ എന്ന സംശയത്തില്‍ സെബാസ്റ്റ്യന്‍ കൊലപ്പെടുത്തിയെന്നാണ് നിലവിലെ സംശയം. സെബാസ്റ്റ്യനും ബിന്ദുവും പതിവായി യാത്ര ചെയ്തിരുന്നതു മനോജിന്‍റെ ഓട്ടോയിലായിരുന്നു. ബിന്ദു തിരോധാനക്കേസില്‍ മനോജിനെ മുന്‍പും ചോദ്യം ചെയ്തിരുന്നു. എന്നാല്‍ മനോജ് ബിഗ് ഷോപ്പറില്‍ നിറയെ നോട്ടുകളുമായി പോകുന്നതു കണ്ടതായുള്ള വിവരത്തിന്‍റെ അടിസ്ഥാനത്തില്‍ വീണ്ടും ചോദ്യം ചെയ്യാന്‍ പോലീസ് വിളിപ്പിച്ചു. ഇയാളെ ചോദ്യം ചെയ്താല്‍ അക്കാലത്ത് ഒളിവിലായിരുന്ന സെബാസ്റ്റ്യനെ കണ്ടെത്തുന്നതിനൊപ്പം കൂടുതല്‍ വിവരങ്ങളും ലഭിക്കുമെന്നു പോലീസ് പ്രതീക്ഷിച്ചിരുന്നു. ബിഗ് ഷോപ്പറില്‍ കൊണ്ടുപോയത് അമ്മാവനു ലോട്ടറി അടിച്ച പണമാണെന്നാണു സുഹൃത്തുക്കളോട് ഇയാൾ പറഞ്ഞത്. സെബാസ്റ്റ്യന്‍റെ നാട്ടിലെ വിളിപ്പേരാണ് അമ്മാവന്‍. വിവരം ലഭിച്ച പോലീസ് ചോദ്യം ചെയ്യാന്‍ വിളിപ്പിച്ച ദിവസം രാവിലെ വീട്ടില്‍ മനോജ് തൂങ്ങിമരിക്കുകയായിരുന്നു.

റെയില്‍വേ സ്റ്റേഷനിലെ പഴയ നടപ്പാലം പൊളിച്ചുനീക്കാൻ തുടങ്ങി

കോട്ടയം: റെയില്‍വേ സ്റ്റേഷനിലെ പഴയ നടപ്പാലം പൊളിച്ചുനീക്കല്‍ ആരംഭിച്ചു. രണ്ട്, മൂന്ന് നമ്പര്‍ പ്ലാറ്റ്‌ഫോമുകളിലേക്ക് ഈ പാലം വഴിയാണു യാത്രക്കാര്‍ പോയിരുന്നത്. പാലത്തിനടിയിലായി പ്രവര്‍ത്തിച്ചിരുന്ന ഇലക്ട്രിക്കല്‍ സ്റ്റാഫ് ഓഫീസ് മറ്റൊരിടത്തേക്ക് മാറ്റാനും തീരുമാനമുണ്ട്. കഴിഞ്ഞ ദിവസമാരംഭിച്ച പൊളിച്ചുനീക്കല്‍ പ്രവര്‍ത്തനങ്ങള്‍ പുരോഗമിക്കുകയാണ്. ബ്രേക്കര്‍ ഉപയോഗിച്ച് കോണ്‍ക്രീറ്റ് മുറിച്ചുമാറ്റിയാണ് പ്രവര്‍ത്തനം. ഈ പാലത്തിനു പകരം പുതിയത് പണിയാനാണ് തീരുമാനം. പൊളിച്ചുമാറ്റാനുള്ള പ്രാഥമിക നടപടികള്‍ 31ന് അവസാനിക്കും. നടപ്പാലത്തിന് വീതി നന്നേ കുറവാണ്. കാലപ്പഴക്കമുള്ളതിനാല്‍ സഞ്ചാരം പ്രായോഗികമല്ല. അപകടസാധ്യതകൂടി കണക്കിലെടുത്താണ് പാലം പൊളിച്ചു നീക്കുന്നത്. പാലം പൊളിച്ചുമാറ്റല്‍ നടക്കുന്നതിനാല്‍ ട്രെയിന്‍ സര്‍വീസുകള്‍ക്കും നിയന്ത്രണമേര്‍പ്പെടുത്തിയിട്ടുണ്ട്. ഇതിന്‍റെ ഭാഗമായി മംഗളൂരു ജംഗ്ഷന്‍ - തിരുവനന്തപുരം നോര്‍ത്ത് സ്‌പെഷല്‍ ട്രെയിന്‍ 30 മിനിറ്റ് വൈകി ഓടുമെന്നും പുലര്‍ച്ചെ 5.15ന് കോട്ടയത്തുനിന്ന് യാത്ര ആരംഭിക്കുന്ന കോട്ടയം- നിലമ്പൂര്‍ എക്സ്പ്രസ് 17, 19, 23, 29 തീയതികളില്‍ ഏറ്റുമാനൂരില്‍ നിന്നു പുലര്‍ച്ചെ 5.27നാകും യാത്ര ആരംഭിക്കുക.

നിസാർ ഓർമയായി; "അപ്പുവിന്‍റെ ദുഃഖ'ത്തിലൂടെ സംവിധാന രംഗത്തേക്ക്

ബെന്നി ചിറയില്‍ ചങ്ങനാശേരി: അപ്പുവിന്‍റെ ദുഃഖമെന്ന ലഘുചിത്രത്തിലൂടെയായിരുന്നു നിസാര്‍ അബ്ദുല്‍ഖാദര്‍ ചലച്ചിത്ര സംവിധാന രംഗത്തേക്ക് 1984-ൽ കാല്‍വയ്പു നടത്തിയത്. വിദ്യാഭ്യാസ വിഷയങ്ങളായിരുന്നു പ്രമേയം. തുടര്‍ന്ന് 1985 കാലഘട്ടത്തില്‍ നിസാര്‍ എഴുതി സംവിധാനം ചെയ്ത പെരുവഴിയമ്പലം എന്ന നാടകം ഏറെ ശ്രദ്ധനേടിയതായി ഈ നാടകത്തില്‍ തൃക്കോവിലപ്പന്‍റെ വേഷമണിഞ്ഞ ചലച്ചിത്രതാരം ചീരഞ്ചിറ സ്വദേശി ഷാജി സുരേഷ് കണ്ണമ്പള്ളി ദീപികയോടു പറഞ്ഞു. 1994ലാണ് സുദിനം എന്ന ചിത്രം സംവിധാനം ചെയ്തത്. 21 ദിനങ്ങള്‍കൊണ്ടാണ് സുദിനം എന്ന ചലച്ചിത്രം പുറത്തിറക്കിയത്. തുടര്‍ന്ന് പ്രശസ്തമായ ഇരുപത്തഞ്ചിലേറ ചിത്രങ്ങളാണ് നിസാര്‍ സംവിധാനം ചെയ്തത്. പലതും ഹിറ്റായി. ത്രീ മെന്‍ ആര്‍മി, അച്ഛന്‍ രാജാവ് അപ്പന്‍ ജേതാവ്, ഓട്ടോ ബ്രദേഴ്‌സ്, അപരന്‍മാര്‍ നഗരത്തില്‍, ജനനായകന്‍ തുടങ്ങിയ ചിത്രങ്ങള്‍ തിയറ്ററുകളില്‍ കൈയടി നേടിയവയില്‍പ്പെടുന്നു. 2021ല്‍ കളേഴ്‌സ് എന്ന തമിഴ് ചിത്രവും 2023ല്‍ ടൂമെന്‍ ആര്‍മി എന്ന ചിത്രവും അദ്ദേഹം സംവിധാനം ചെയ്തു. സര്‍വകലാശാല കലോത്സവങ്ങള്‍ക്കായി വിവിധ കോളജുകള്‍ക്കായി നിസാര്‍ നിരവധി നാടകങ്ങളും സംവിധാനം ചെയ്തിട്ടുണ്ട്. ചങ്ങനാശേരി വലിയകുളം പാത്തിക്കല്‍മുക്കിലുള്ള മകള്‍ സൗമ്യയുടെ ഐഷ മന്‍സിലില്‍ പൊതുദര്‍ശനത്തിനു വച്ചിരിക്കുന്ന മൃതദേഹത്തില്‍ ചലച്ചിത്ര, രാഷ്ട്രീയ, സാംസ്‌കാരിക രംഗങ്ങളിലെ നിരവധി പ്രമുഖര്‍ ആദരവ് അര്‍പ്പിച്ചു.

കോഴഞ്ചേരിയിൽ അച്ചായന്‍സ് ഗോള്‍ഡ് ഷോറൂം തുടങ്ങി

കോഴഞ്ചേരി: അച്ചായന്‍സ് ഗോള്‍ഡ് 28-ാമത് ഷോറൂം കോഴഞ്ചേരി വണ്‍വേ റോഡില്‍ ജനഡിസ് ആര്‍ക്കേഡില്‍ പ്രവര്‍ത്തനമാരംഭിച്ചു. ചലച്ചിത്രതാരം ഭാവനയും അച്ചായന്‍സ് ഗോള്‍ഡ് എംഡി ടോണി വര്‍ക്കിച്ചനും ചേര്‍ന്ന് ഉദ്ഘാടനം നിര്‍വഹിച്ചു. അച്ചായന്‍സ് ഗോള്‍ഡ് ജനറല്‍ മാനേജര്‍ ഷിനില്‍ കുര്യന്‍, പഞ്ചായത്ത് പ്രസിഡന്‍റ് സാലിം ഫിലിപ്പ് എന്നിവര്‍ പ്രസംഗിച്ചു.

കേര പദ്ധതി നടപ്പാക്കൽ റബർ കർഷക താത്പര്യങ്ങൾക്ക് വിരുദ്ധമെന്ന് ആക്ഷേപം

കോട്ടയം: കേരള കാലാവസ്ഥ അതിജീവന കാര്‍ഷിക മൂല്യവര്‍ധക വിപണന ശൃംഖല നവീകരണ പദ്ധതി (കേര ) പ്രകാരം റബറിന്‍റെ ആവര്‍ത്തന കൃഷിക്ക് അപേക്ഷിക്കുന്ന കര്‍ഷകര്‍ക്ക് (₹ 75,000) റബര്‍ ബോര്‍ഡില്‍നിന്ന് ലഭ്യമാകുന്ന സബ്സിഡി (₹40,000) നിഷേധിക്കുന്ന കേരള സര്‍ക്കാരിന്‍റെ നയം തിരുത്തണമെന്ന് റബര്‍ ഉത്പാദക സംഘങ്ങളുടെ ദേശീയ കൂട്ടായ്മ ജനറല്‍ സെക്രട്ടറി ബാബു ജോസഫ് സംസ്ഥാന സര്‍ക്കാരിനോട് ആവശ്യപ്പെട്ടു. കേര പദ്ധതി അപേക്ഷകർക്ക് റബർബോർഡിന്‍റെ സഹായത്തിന് അപേക്ഷിക്കാൻ കഴിയില്ല. കേരളത്തിൽ മാത്രമുള്ള കേര പദ്ധതിയില്‍ കർഷകർ ചേരുന്നതിലൂടെ ഇവിടെ റബര്‍ ബോര്‍ഡ് സബ്സിഡിക്ക് അപേക്ഷകരില്ലാതാകുകയും റബര്‍ ബോര്‍ഡ് സേവനങ്ങള്‍ കുറയുകയും ചെയ്യും. റബര്‍ ബോര്‍ഡ് ഫീല്‍ഡ് ഓഫീസര്‍മാര്‍ക്ക് പകരം താത്കാലിക നിയമനം ലഭിച്ച കേര ഫീല്‍ഡ് ഓഫീസർമാരാണ് ഈ സ്‌കീം നടപ്പാക്കുന്നത്. ഇവരുടെ പ്രവര്‍ത്തനത്തില്‍ റബര്‍ ബോര്‍ഡ് ഉദ്യോഗസ്ഥര്‍ക്ക് നിയന്ത്രണമില്ല. പക്ഷേ, കേരയിലെ താത്കാലിക ജീവനക്കാര്‍ തയാറാക്കുന്ന റിപ്പോര്‍ട്ട് റബര്‍ ബോര്‍ഡ് സാക്ഷ്യപ്പെടുത്തണം. ഫലത്തിൽ, കേര റബര്‍ ബോര്‍ഡിന്‍റെ സമാന്തര സംവിധാനമാകും. കേവലം അഞ്ച് വര്‍ഷത്തേക്കുള്ള ഈ പദ്ധതി റബര്‍ ബോര്‍ഡിന്‍റെ പ്രവര്‍ത്തങ്ങളുടെ താളം തെറ്റിക്കും. വടക്കുകിഴക്കന്‍ സംസ്ഥാനങ്ങളില്‍ ഇതേപോലെ റബര്‍ വികസന പദ്ധതികളുണ്ട്. അവിടെ 1.5 ലക്ഷം രൂപ വരെ സഹായമുണ്ട്. എന്നാല്‍, പണം റബര്‍ ബോര്‍ഡ് വഴിയാണ് വിതരണം ചെയ്യുന്നത്. കേര പദ്ധതിയില്‍ കേരള സര്‍ക്കാര്‍ നല്‍കാന്‍ ഉദ്ദേശിക്കുന്ന അധിക തുക ( ₹35,000) റബര്‍ ബോര്‍ഡ് വഴി വിതരണം ചെയ്താല്‍ കേരള സര്‍ക്കാരിന്‍റെ ദുര്‍വ്യയങ്ങള്‍ ഇല്ലാതാകുന്നതിനും റബര്‍ ബോര്‍ഡ് പ്രവര്‍ത്തനം ശക്തിപ്പെടുന്നതിനും ഇടയാക്കും. കേന്ദ്ര സര്‍ക്കാര്‍ ഇപ്പോള്‍ത്തന്നെ റബര്‍ ബോര്‍ഡിന്‍റെ കേരളത്തിലെ പ്രവര്‍ത്തനങ്ങള്‍ കുറച്ചുവരികയാണ്. കേരളത്തില്‍ സബ്സിഡി അപേക്ഷകള്‍ കുറഞ്ഞാല്‍ പലരും ഭീതിപ്പെട്ടിരുന്ന റബര്‍ ബോർഡിന്‍റെ കേരളത്തിലെ ജീവനക്കാരുടെ സ്ഥലംമാറ്റം അടക്കം വേഗത്തിലാകുമെന്നും റബർ ബോർഡ് പ്രവർത്തനങ്ങൾ ഇല്ലാതാകുമെന്നും ബാബു ജോസഫ് പറഞ്ഞു.

ആശമാരുടെ പ്രതിഷേധ സംഗമം; പന്തല്‍ പൊളിക്കാനുളള നീക്കം തിരുവഞ്ചൂര്‍ ഇടപെട്ട് തടഞ്ഞു

കോട്ടയം: ആശമാരുടെ പ്രതിഷേധ സംഗമത്തിന്‍റെ പന്തല്‍ പൊളിക്കാനുള്ള നീക്കം തിരുവഞ്ചൂര്‍ രാധാകൃഷ്ണന്‍ എംഎല്‍എ ഇടപെട്ട് തടഞ്ഞു. ആശാ സമരത്തിന്‍റെ അഞ്ചാംഘട്ടമായ പഞ്ചായത്തുകള്‍ കേന്ദ്രീകരിച്ചുള്ള സമരപരിപാടികളുടെ ഭാഗമായി കേരള ആശ ഹെല്‍ത്ത് വര്‍ക്ക് അസോസിയേഷനും ആശാ സമര സഹായ സമിതിയും ഇന്നലെ രാവിലെ കളക്ടറേറ്റിനുമുമ്പില്‍ നടത്തിയ പ്രതിഷേധ സംഗമത്തിനിടയിലാണു പന്തല്‍ പൊളിക്കാന്‍ പോലീസ് ശ്രമിച്ചത്. കളക്ടറേറ്റിനു മുമ്പില്‍ ഇന്നലെ രാവിലെ സമരത്തിനായി പന്തല്‍ കെട്ടിയപ്പോള്‍ത്തന്നെ ഒരു പോലീസുകാരനെത്തി സമരക്കാരോട് പന്തല്‍ കെട്ടുന്നതു നിയമവിരുദ്ധമാണെന്ന് പറഞ്ഞു. എന്നാല്‍ ഇവിടെ സ്ഥിരമായി പന്തല്‍ കെട്ടുന്നതാണെന്നു പറഞ്ഞ് സമരക്കാര്‍ പന്തല്‍കെട്ടി സമരം ആരംഭിച്ചു. തുടര്‍ന്ന് പന്തല്‍ പൊളിക്കുന്നതിനായി ആളുകള്‍ എത്തി. പ്രതിഷേധക്കാര്‍ എതിര്‍ത്തെങ്കിലും പന്തലിന്‍റെ ഷീറ്റുകളും വിരിച്ച തുണികളും മറ്റും അഴിക്കാന്‍ തുടങ്ങി. ഏഴോളം ഷീറ്റുകള്‍ പൊളിക്കാനെത്തിയവര്‍ മാറ്റി. ഈ സമയത്താണ് സമരം ഉദ്ഘാടനം ചെയ്യുന്നതിനായി തിരുവഞ്ചൂര്‍ രാധാകൃഷ്ണന്‍ എംഎല്‍എ എത്തിയത്. എംഎല്‍എ പ്രസംഗിക്കുന്നതിനു മുമ്പില്‍ ഗോവണി വച്ച് ഷീറ്റ് പൊളിക്കാന്‍ ആരംഭിച്ചപ്പോള്‍ ആരാണ് പന്തല്‍ പൊളിക്കുന്നതെന്നും ആരുടെ ഉത്തരവാണെന്നും എംഎല്‍എ ചോദിച്ചു. പോലീസ് നിര്‍ദേശ പ്രകാരമാണെന്നു പൊളിക്കാനെത്തിയവര്‍ പറഞ്ഞപ്പോള്‍ പന്തലിനു സമീപമുള്ള സീനിയര്‍ പോലീസ് ഉദ്യോഗസ്ഥരോട് എത്താന്‍ എംഎല്‍എ ആവശ്യപ്പെട്ടു. പന്തല്‍ പൊളിക്കാനുള്ള ഉത്തരവ് കാണിക്കാന്‍ എംഎല്‍എ ആവശ്യപ്പെട്ടെങ്കിലും ഉത്തരവില്ലെന്നും ജില്ലാ പോലീസ് ചീഫിന്‍റെ നിര്‍ദേശമുണ്ടെന്നുമാണു പോലീസ് ഉദ്യോഗസ്ഥ പറഞ്ഞത്. പൊളിക്കാന്‍ പറ്റില്ലെന്നും പൊളിച്ചാല്‍ കളക്ടറേറ്റിനകത്തു കയറി സമരം നടത്തുമെന്നും താന്‍ സമരക്കാരോടൊപ്പം പന്തലില്‍ ഇരിക്കുകയാണെന്നും എംഎല്‍എ കര്‍ക്കശമായി പോലീസ് ഉദ്യോഗസ്ഥരോടു പറഞ്ഞു. ഇതോടെ സമരക്കാര്‍ പോലീസിനെതിരേ മുദ്രവാക്യം വിളിച്ചു. ഏറെനേരം പോലീസുമായി സമരക്കാര്‍ വാക്കുതര്‍ക്കം നടത്തിയതിനൊടുവില്‍ പൊളിക്കല്‍ ഉപേക്ഷിച്ച് പോലീസ് പിന്‍വാങ്ങി. തുടര്‍ന്ന് ഉച്ചകഴിഞ്ഞ് ഒന്നുവരെ സമരം തുടര്‍ന്നു. യുഡിഎഫ് ജില്ലാ കണ്‍വീനര്‍ ഫില്‍സണ്‍ മാത്യൂസ്, കേരള കോണ്‍ഗ്രസ് നേതാവ് വി.ജെ. ലാലി, ആശാ സമര സഹായ സമിതി സെക്രട്ടറി എം.കെ. ബിജു, കേരള ആശാ ഹെല്‍ത്ത് വര്‍ക്ക് അസോസിയേഷന്‍ സെക്രട്ടറി ആശാ രാജ് എന്നിവര്‍ പ്രസംഗിച്ചു. ആശാ വര്‍ക്കര്‍മാരുടെ സമരം അടിച്ചമര്‍ത്തുന്നതിന്‍റെ ഭാഗമായിട്ടാണ് സമരപ്പന്തല്‍ പൊളിക്കാന്‍ സര്‍ക്കാര്‍ നീക്കം നടത്തിയതെന്ന് സമരസഹായ സമിതി ആരോപിച്ചു.

സമന്വയ മൾട്ടി സെൻസറി പാർക്കിൽ 21 ലക്ഷത്തിന്‍റെ വികസനം

കുറവിലങ്ങാട്: ഉഴവൂർ ബ്ലോക്ക് പഞ്ചായത്തിന്‍റെ നേതൃത്വത്തിൽ പട്ടിത്താനത്ത് പ്രവർത്തിക്കുന്ന മൾട്ടി സെൻസറി പാർക്കിൽ 21 ലക്ഷം രൂപയുടെ വികസന പദ്ധതികൾ നടപ്പിലാക്കും. ജില്ലാ, ബ്ലോക്ക് പഞ്ചായത്തുകളുടെ നേതൃത്വത്തിലാണ് പുതിയ പദ്ധതികൾ നടപ്പിലാക്കുന്നത്. മൾട്ടി സെൻസറി റൂം, പാർക്ക് എന്നിവയ്ക്കായി ബ്ലോക്ക് പഞ്ചായത്ത് 6.6 ലക്ഷം രൂപ വകയിരുത്തിയിട്ടുള്ളതായി ബ്ലോക്ക് പഞ്ചായത്ത് പ്രസിഡന്‍റ് രാജു ജോൺ, വൈസ് പ്രസിഡന്‍റ് ഡോ. സിന്ധുമോൾ ജേക്കബ്, സ്റ്റാൻഡിംഗ് കമ്മിറ്റി അധ്യക്ഷ കൊച്ചുറാണി സെബാസ്റ്റ്യൻ എന്നിവർ അറിയിച്ചു. വിവിധ ഉപകരണങ്ങൾ വാങ്ങാൻ ജില്ലാ പഞ്ചായത്ത് 14.87 ലക്ഷം രൂപ അനുവദിച്ചിട്ടുണ്ട്. സംസാരവൈകല്യമുള്ള കുട്ടികൾക്ക് വിവിധ തെറാപ്പികൾ മൾട്ടി സെൻസറി പാർക്കിൽ ലഭ്യമാക്കിയിട്ടുണ്ട്. ആറ് വയസിനു താഴെയുള്ള കുട്ടികൾക്ക് നിഷ് മുഖേനയും 18 വയസിന് താഴെയുള്ളവർക്ക് എസ്എസ്കെയുടെയും നേതൃത്വത്തിലാണ് പരിചരണം നൽകുന്നത്. സ്പീച്ച് തെറാപ്പി, ഫിസിയോതെറാപ്പി, സ്‌പെഷൽ എഡ്യൂക്കേഷൻ തുടങ്ങിയവ ലഭ്യമാണ്. ഗ്രൂപ്പ് തെറാപ്പി, വ്യക്തിഗത സെഷൻസ്, ഡീറ്റെയിൽഡ് സ്പീച്ച് ആൻഡ് ലാംഗ്വേജ് അസസ്‌മെന്‍റ്, റീഇവാലുവേഷൻ ഓഫ് സ്പീച്ച് ആൻഡ് ലാംഗ്വേജ് സ്‌കിൽസ്, ഡെമോൺസ്‌ട്രേഷൻ തെറാപ്പി, പേരന്‍റൽ കൗൺസലിംഗ് എന്നിവയും ലഭ്യമാക്കിയിട്ടുണ്ട്.

പാലാ - തൊടുപുഴ റോഡ്: ഏഴു വർഷം, 300 അപകടം, 50 മരണം

പാലാ: പാലാ-തൊടുപുഴ റോഡില്‍ ഏഴു വര്‍ഷത്തിനിടെ 300 അപകടങ്ങളും 50ലധികം മരണങ്ങളും ഉണ്ടായിട്ടും പിഡബ്ല്യുഡിക്ക് അനക്കമില്ല. ഇത്രയും അപകടങ്ങൾ ഉണ്ടായിട്ടും ആവശ്യത്തിനു സ്പീഡ് ബ്രേക്കര്‍ സ്ഥാപിക്കാൻപോലും അധികൃതർക്കു കഴിഞ്ഞിട്ടില്ല. റോഡില്‍ രണ്ടിടത്ത് കാമറ സ്ഥാപിച്ചെങ്കിലും പ്രവര്‍ത്തിക്കുന്നില്ല. പ്രവിത്താനം ഭാഗത്തും കരിങ്കുന്നം ഭാഗത്തുമാണ് കാമറകള്‍ ചത്തിരിക്കുന്നത്. അപകടങ്ങള്‍ കൂടുതല്‍ സംഭവിക്കുന്ന സ്ഥലങ്ങളില്‍ വേഗനിയന്ത്രണ സംവിധാനങ്ങള്‍ സ്ഥാപിക്കാൻ പോലീസും മോട്ടോര്‍വാഹന വകുപ്പും തയാറായിട്ടില്ല. പലതവണ ഇതു സംബന്ധിച്ച പരാതികള്‍ നല്‍കിയെങ്കിലും പൊതുമരാമത്ത് വകുപ്പും അനങ്ങുന്നില്ല. ഓവര്‍ ടേക്കിംഗ് അസാധ്യം 25.4 കിലോമീറ്റര്‍ ദൂരമുള്ള കോലാനി-പാലാ റോഡില്‍ 13.1 കിലോമീറ്റര്‍ ദൂരം ഓവര്‍ടേക്ക് ചെയ്യാനാവാത്ത റോഡാണ്. 12.3 കിലോമീറ്റര്‍ മാത്രമാണ് സുരക്ഷിതമായി മറികടക്കാവുന്ന ഭാഗം. സ്‌കൂള്‍ സോണുകള്‍ തുടങ്ങുന്നിടത്തും അവസാനിക്കുന്നിടത്തും മഞ്ഞ റംബിള്‍ സ്ട്രിപ്പുകള്‍, പെഡസ്ട്രിയന്‍ ക്രോസിംഗില്‍ നിര്‍ബന്ധിത വേഗനിയന്ത്രണം എന്നിവ റോഡിൽ ഇല്ല. വാഹനങ്ങൾ പെരുകിയത് അനുസരിച്ചുള്ള സംവിധാനങ്ങളും ഏർപ്പെടുത്തിയിട്ടില്ല. ഇരുട്ടിലായ റോഡ് റോഡില്‍ സ്ഥാപിച്ചിരിക്കുന്ന സോളാര്‍ ലൈറ്റുകള്‍ നശിച്ചിട്ട് നാളുകളായി. ഓരോ 40 മീറ്ററിനും ഒരു സോളാര്‍ ലൈറ്റ് എന്ന രീതിയില്‍ പൊന്‍കുന്നം മുതല്‍ തൊടുപുഴ വരെ 50 കിലോമീറ്ററോളം ദൂരത്തില്‍ നൂറുകണക്കിനു ലൈറ്റുകളാണ് സ്ഥാപിച്ചത്. ഇതില്‍ ഭൂരിഭാഗവും തെളിയുന്നില്ല. അപകടത്തില്‍ വാഹനം ഇടിച്ചു തകരുന്ന സോളാർ‍ ലൈറ്റിന് ഒരു ലക്ഷത്തില്‍പരം രൂപയാണ് കെഎസ്ടിപി നഷ്ടപരിഹാരം ഈടാക്കുന്നത്. നഷ്ടപരിഹാരം കിട്ടിയിട്ടും ലൈറ്റുകള്‍ പുനഃസ്ഥാപിക്കാന്‍ അധികാരികള്‍ തയാറാകുന്നില്ലെന്നു നാട്ടുകാര്‍ പറയുന്നു. ഈ റോഡിലെ സോളാര്‍ ലൈറ്റിലെ ബാറ്ററിയും മറ്റു ഭാഗങ്ങളും മോഷണം പോകുന്നതും പതിവാണ്. നിയമനടപടി സ്വീകരിക്കും പാലാ: റോഡപകടങ്ങള്‍ കുറയ്ക്കാന്‍ സെന്‍റര്‍ ഫോര്‍ കണ്‍സ്യൂമര്‍ എഡ്യൂക്കേഷന്‍ നിയമ നടപടികളിലേക്ക്. പാലാ-തൊടുപുഴ സംസ്ഥാന പാതയില്‍ കഴിഞ്ഞ ദിവസം മുണ്ടാങ്കലിലുണ്ടായ ദാരുണമായ റോഡപകടത്തിന്‍റെ പശ്ചാത്തലത്തിലാണ് നിയമപോരാട്ടം. വിശദമായ പരാതി ചീഫ് സെക്രട്ടറി, പോലീസ് മേധാവി, ഗതാഗത, പൊതുമരാമത്ത്, ആരോഗ്യ സെക്രട്ടറിമാര്‍, ട്രാന്‍സ്പോര്‍ട്ട് കമ്മീഷണര്‍, ഇന്ത്യന്‍ റോഡ് കോണ്‍ഗ്രസ് ഡയറക്ടര്‍ എന്നിവര്‍ക്ക് സെന്‍ററിന്‍റെ മാനേജിംഗ് ട്രസ്റ്റി ജയിംസ് വടക്കന്‍ നല്‍കിക്കഴിഞ്ഞു. കഴിഞ്ഞ ഏഴു വര്‍ഷത്തിനുള്ളില്‍ 50ല്‍പരം മരണങ്ങളുണ്ടായ പാലാ-തൊടുപുഴ ഹൈവേയിലെ ഗതാഗതസുരക്ഷയെക്കുറിച്ച് അടിയന്തര വിദഗ്ധ പരിശോധന ഉണ്ടാവണമെന്നാണ് ആവശ്യം.

വെല്ലുവിളികളെ അവസരങ്ങളാക്കണം: ജ്യോതിസ് മോഹൻ

പാലാ: പഠനമികവിനും സമഗ്രവ്യക്തിത്വ വികാസത്തിനും അനുയോജ്യമായ അവസരങ്ങള്‍ ഉപയോഗപ്പെടുത്തിയും ഓരോ പരിമിതിയിലും ഒളിഞ്ഞിരിക്കുന്ന അവസരങ്ങള്‍ തിരിച്ചറിഞ്ഞും സ്‌കൂള്‍ വിദ്യാഭ്യാസകാലത്തുതന്നെ വിദ്യാര്‍ഥികള്‍ ഉന്നതമായ ലക്ഷ്യങ്ങള്‍ നേടുവാനായി അധ്വാനിച്ചു തുടങ്ങണമെന്ന് ഇന്‍കം ടാക്‌സ് കമ്മീഷണര്‍ ജ്യോതിസ് മോഹന്‍ പറഞ്ഞു. എല്‍എസ്എസ്, യുഎസ്എസ്, എന്‍എംഎംഎസ് വിജയികളായ വിദ്യാര്‍ഥികളെ അനുമോദിക്കാനായി പാലാ സിവില്‍ സര്‍വീസ് ഇന്‍സ്റ്റിറ്റ്യൂട്ടില്‍ നടന്ന സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മുടങ്ങാതെയുള്ള പത്രവായന സിവില്‍ സര്‍വീസ് ഉള്‍പ്പെടെയുളള മത്സരപ്പരീക്ഷകള്‍ വിജയിക്കുന്നതിന് അനിവാര്യമാണെന്ന് ഇക്കഴിഞ്ഞ സിവില്‍ സര്‍വീസ് പരീക്ഷയില്‍ 703-ാം റാങ്ക് നേടിയ നസ്‌റിന്‍ പി. ഫാസിം പറഞ്ഞു. യോഗത്തില്‍ ഇന്‍സ്റ്റിറ്റ്യൂട്ട് മാനേജര്‍ മോണ്‍. സെബാസ്റ്റ്യന്‍ വേത്താനത്ത് അധ്യക്ഷത വഹിച്ചു. പാലാ കോര്‍പറേറ്റ് എഡ്യൂക്കേഷണല്‍ ഏജൻസി സെക്രട്ടറി ഫാ. ജോര്‍ജ് പുല്ലുകാലായില്‍, പ്രിന്‍സിപ്പല്‍ ഡോ. വി.വി. ജോര്‍ജുകുട്ടി ഒട്ടലാങ്കല്‍, വൈസ് പ്രിന്‍സിപ്പല്‍ ഫാ. സെബാസ്റ്റ്യന്‍ ചാമക്കാലായില്‍, സിസ്റ്റര്‍ അമല ജോസ് എഫ്‌സിസി എന്നിവര്‍ പ്രസംഗിച്ചു.

ട്രിപ്പിൾ ഐടി ടു സയൻസ് സിറ്റി പദ്ധതി വരുന്നു

കുറവിലങ്ങാട്: ഉന്നത വിദ്യാഭ്യാസരംഗത്ത് ശ്രദ്ധേയ നേട്ടമായ വലവൂരിലുള്ള ഇന്ത്യൻ ഇൻസ്റ്റിറ്റ്യൂട്ട് ഓഫ് ഇൻഫർമേഷൻ ടെക്നോളജിയുടെയും (ഐഐഐടി) കോഴായിലുള്ള കേരള സയൻസ് സിറ്റിയുടെയും സാധ്യതകൾ സംയുക്തമായി പ്രയോജനപ്പെടുത്താൻ പദ്ധതികൾ ആലോചനയിൽ സജീവമാകുന്നു. ട്രിപ്പിൾ ഐടിയും സയൻസ് സിറ്റിയും യാഥാർഥ്യമാക്കുന്നതിനു നേതൃത്വം നൽകിയ ജോസ് കെ. മാണി എംപിയുടെ പരിശ്രമത്തിലാണ് പുതിയ നീക്കവും സജീവമാകുന്നത്. ഇതുസംബന്ധിച്ച നിർദേശം അധികൃതർക്ക് സമർപ്പിച്ചിട്ടുള്ളതായി ജോസ് കെ. മാണി എംപി അറിയിച്ചു. വിജ്ഞാന സമ്പാദനത്തിനൊപ്പം പ്രായോഗിക പരിശീലനത്തിനും നിർവഹണത്തിനും വേദിയൊരുങ്ങുമെന്നതാണ് പുതിയ പദ്ധതിയുടെ നേട്ടം. ഒരു മാസത്തിനുള്ളിൽ ഗവേഷകരടക്കമുള്ള പതിനായിരത്തോളം പേർ സയൻസ് സിറ്റി സന്ദർശിച്ചുവെന്നത് അനന്തസാധ്യതകളാണ് വിളിച്ചോതുന്നത്. ആദ്യഘട്ടമായ സയൻസ് സെന്‍ററിന് പിന്നാലെ ആംഫി തിയേറ്റർ, ഒബ്സർവേറ്ററി, പ്ലാനറ്റോറിയം, മോഷൻ സിമുലേറ്റർ എന്നിങ്ങനെയുള്ള വികസനം കൂടി യാഥാർഥ്യമാകുമ്പോൾ സന്ദർശകരുടെ എണ്ണത്തിൽ വലിയ വർധനവുണ്ടാകും. രാജ്യത്ത് അഞ്ചിടങ്ങളിൽ മാത്രമുള്ള സൈബർ സെക്യൂരിറ്റി കമാൻഡോ പരിശീലനമടക്കമുള്ള പാഠ്യപദ്ധതിയുൾപ്പെട്ട കോഴ്സുകളാണ് ട്രിപ്പിൾ ഐടി സമ്മാനിക്കുന്നത്. കോട്ടയം ട്രിപ്പിൾ ഐടിയിൽ രണ്ടായിരത്തോളം വിദ്യാർഥികൾ പഠിക്കുന്നുണ്ട്. ട്രിപ്പിൾ ഐടിക്കു സമീപം ഇൻഫോ പാർക്ക് അനുവദിക്കുന്നതിനായി അഞ്ചു കോടി രൂപ സംസ്ഥാന ബജറ്റിൽ അനുവദിച്ചിട്ടുള്ളതും പ്രതീക്ഷയുടെ പുതുനാമ്പായി മാറിയിട്ടുണ്ട്. വലവൂർ ട്രിപ്പിൾ ഐടിയും കോഴായിലെ സയൻസ് സിറ്റിയുമായി 15 കിലോമീറ്ററിന്‍റെ ദൂരം മാത്രമാണുള്ളത്. ശാസ്ത്രവിദ്യാർഥികളുടെ സാന്നിധ്യം സയൻസ് സിറ്റിയിൽ സജീവമാകുന്നതോടെ ഇവിടത്തെ ആക്‌ടിവിറ്റി ഹബ്ബും ഇന്നവേഷൻ സെന്‍ററും പുതിയ ശാസ്ത്രനേട്ടങ്ങളുടെ പിറവിക്കു സാക്ഷ്യം വഹിക്കും.

അപകടക്കെണിയായി മുണ്ടക്കയം നഗരമധ്യത്തിലെ കുഴി

മുണ്ടക്കയം: മുണ്ടക്കയം ടൗണിൽ കൂട്ടിക്കൽ കവലയിൽ റോഡിന്‍റെ മധ്യത്തിൽ രൂപപ്പെട്ടിരിക്കുന്ന കുഴി അപകടങ്ങൾക്കിടയാക്കുന്നു. മുണ്ടക്കയം ടൗണിൽനിന്ന് കൂട്ടിക്കൽ ഭാഗത്തേക്ക് തിരിയുന്ന റോഡിൽ രൂപപ്പെട്ടിരിക്കുന്ന ഗർത്തമാണ് സ്ഥിരം അപകടങ്ങൾക്ക് വേദിയാകുന്നത്. ‌കൂട്ടിക്കൽ റോഡിൽനിന്ന് ഇറക്കമിറങ്ങിവരുന്ന വാഹനയാത്രക്കാരുടെ ശ്രദ്ധയിൽ കുഴി പെടാതെ പോകുകയും അപകടം സംഭവിക്കുകയുമാണ് ചെയ്യുന്നത്. കൂടുതലും ഇരുചക്ര വാഹനങ്ങളാണ് ഇവിടെ അപകടത്തിൽപ്പെടുന്നത്. ദേശീയപാതയിൽനിന്നു കൂട്ടിക്കൽ റോഡിലേക്ക് തിരിയുന്ന വാഹനങ്ങൾ കുഴിയിൽ വീഴാതെ വെട്ടിച്ച് മാറ്റുന്നതും അപകടങ്ങൾക്ക് ഇടയാക്കുന്നുണ്ട്. അപകടം ഇവിടെ പതിവായതോടെ ഓട്ടോറിക്ഷാ തൊഴിലാളികളുടെയും നാട്ടുകാരുടെയും നേതൃത്വത്തിൽ കുഴിയിൽ വാഴനട്ട് പ്രതിഷേധിച്ചിരുന്നു. വലിയ അപകടങ്ങൾക്ക് വഴിവയ്ക്കാതെ റോഡിലെ കുഴി മൂടാൻ അധികാരികൾ നടപടി സ്വീകരിക്കണമെന്ന ആവശ്യമാണ് ഉയരുന്നത്.

പൂഞ്ഞാർ മണ്ഡലത്തെ വന്യജീവി ആക്രമണ വിമുക്തമാക്കും: സെബാസ്റ്റ്യൻ കുളത്തുങ്കൽ എംഎൽഎ

എരുമേലി: പൂഞ്ഞാർ നിയോജകമണ്ഡലത്തെ വന്യജീവി ആക്രമണവിമുക്ത മേഖലയാക്കി മാറ്റുകയാണ് ലക്ഷ്യമെന്ന് സെബാസ്റ്റ്യൻ കുളത്തുങ്കൽ എംഎൽഎ. നിയോജകമണ്ഡലത്തിൽ എരുമേലി ഫോറസ്റ്റ് റേഞ്ചിന് കീഴിൽ നിർമാണം പൂർത്തീകരിച്ച സൗരോർജ തൂക്കുവേലികളുടെ ആദ്യഘട്ട ഉദ്ഘാടനം മൂക്കൻപെട്ടിയിൽ നിർവഹിക്കുകയായിരുന്നു എംഎൽഎ. മനുഷ്യ-വന്യജീവി സംഘർഷം ലഘൂകരിക്കുന്നതിനും മനുഷ്യജീവനും കാർഷിക വിളകളും സംരക്ഷിക്കുന്നതിനുമായി സംസ്ഥാന വനംവകുപ്പിന്‍റെ പ്ലാൻ ഫണ്ട്, കൃഷി വകുപ്പ് മുഖേന ആർകെവിവൈ ഫണ്ട്, നബാർഡ് ഫണ്ട് എന്നീ ഫണ്ടുകൾ സംയോജിപ്പിച്ച് 7.34 കോടി രൂപ അനുവദിച്ചാണ് പൂഞ്ഞാർ നിയോജകമണ്ഡലത്തിലെ 30 കിലോമീറ്ററോളം വരുന്ന വനമേഖല പൂർണമായും പ്രതിരോധ സംവിധാനങ്ങൾ ഒരുക്കി സുരക്ഷിതമാക്കുന്നതെന്ന് എംഎൽഎ പറഞ്ഞു. ഒന്നാംഘട്ടമായി കോയിക്കക്കാവ് മുതൽ പായസപ്പടി വരെ 9.5 കിലോമീറ്ററും മഞ്ഞളരുവി മുതൽ പാക്കാനം വരെ 3.7 കിലോമീറ്ററും തൂക്ക് സൗരവേലുകൾ സ്ഥാപിച്ചു. കിടങ്ങ്, ഹാംഗിംഗ് ഫെൻസിംഗ്, സോളാർ ഫെൻസിംഗ് എന്നിവ സ്ഥാപിച്ച് വന്യജീവി ആക്രമണം പൂർണമായും പ്രതിരോധിക്കുന്ന കേരളത്തിലെ ആദ്യ നിയോജകമണ്ഡലമായി പൂഞ്ഞാറിനെ മാറ്റുമെന്നും എംഎൽഎ പറഞ്ഞു. പഞ്ചായത്ത് പ്രസിഡന്‍റ് മറിയാമ്മ സണ്ണി അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ്, കോട്ടയം ഡിവിഷണൽ ഫോറസ്റ്റ് ഓഫീസർ പ്രഫുൽ ആഗ്രവാൾ, വനംവകുപ്പ് എരുമേലി റേഞ്ച് ഓഫീസർ കെ. ഹരിലാൽ, കോരുത്തോട് പഞ്ചായത്ത് പ്രസിഡന്‍റ് ജാൻസി സാബു, ജനപ്രതിനിധികൾ, കൃഷി ഓഫീസർമാർ, വിവിധ രാഷ്‌ട്രീയ-സാമൂഹ്യ-സംഘടനാ നേതാക്കൾ തുടങ്ങിയവർ പ്രസംഗിച്ചു.

വിളവെടുപ്പ് ഉത്സവം

മുണ്ടക്കയം: കണ്ണിമല ഫാർമേഴ്സ് ക്ലബ്ബിന്‍റെ നേതൃത്വത്തിൽ കാർഷികവിളകളുടെ വിളവെടുപ്പ് ഉത്സവം നടത്തി. ക്ലബ് പ്രസിഡന്‍റ് പി.ഡി. ജോൺ പവ്വത്ത് ഉദ്ഘാടനം ചെയ്തു. ബേബിച്ചൻ പ്ലാക്കാട്ട് അധ്യക്ഷത വഹിച്ചു. ദിലീഷ് ദിവാകരൻ, സാബു തോമസ്, ടി.പി. ആന്‍റണി, കെ.എൻ. ഷിബു തുടങ്ങിയവർ പ്രസംഗിച്ചു. ക്ലബിന്‍റെ കൃഷി കോ-ഓർഡിനേറ്റർമാരായ ലുയിസ് തോമസ്, ടി.എസ്. മോഹൻദാസ് എന്നിവരുടെ നേതൃത്വത്തിൽ നടത്തിയ വാഴ, ചേന, കപ്പ അടക്കമുള്ള പച്ചക്കറികളുടെ വിളവെടുപ്പാണ് നടത്തിയത്.

എരുമേലി അസംപ്ഷൻ ഫൊറോന പള്ളി സുവർണ ജൂബിലി സമാപിച്ചു

എരുമേലി: ചെറിയ സമൂഹങ്ങളായി ആരംഭിച്ച് വളർന്നുപന്തലിച്ച ഒരു വടുവൃക്ഷമാണ് സഭയെന്നും അതിന്‍റെ ശാഖകളാണ് ഇടവകകളും ഫൊറോനകളുമെന്നും ചങ്ങനാശേരി അതിരൂപത മുൻ മെത്രാപ്പോലീത്ത മാർ ജോസഫ് പെരുന്തോട്ടം. എരുമേലി അസംപ്ഷൻ പള്ളിയെ ഫൊറോനയായി ഉയർത്തിയതിന്‍റെ സുവർണ ജൂബിലി സമാപന സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു മാർ പെരുന്തോട്ടം. ക്രൈസ്തവസഭയുടെ സാന്നിധ്യം ലോകത്ത് എവിടെയെത്തിയാലും ആ പ്രദേശങ്ങൾ ആത്മീയമായും സാമൂഹികമായും വളരുമെന്നും മനുഷ്യന് അന്തസായി ജീവിക്കാനുള്ള ചുറ്റുപാടുകൾ സൃഷ്ടിക്കുകയാണ് ക്രൈസ്തവസഭ ചെയ്യുന്നതെന്നും യോഗത്തിൽ അധ്യക്ഷത വഹിച്ച കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ പറഞ്ഞു. മോൺ. ജോർജ് ആലുങ്കൽ, എരുമേലി പഞ്ചായത്ത് പ്രസിഡന്‍റ് മറിയാമ്മ സണ്ണി, പാസ്റ്ററൽ കൗൺസിൽ സെക്രട്ടറി പ്രഫ. ജൂബി മാത്യു, ഫൊറോന വികാരി ഫാ. വർഗീസ് പുതുപ്പറമ്പിൽ, ഫാ. കുര്യാക്കോസ് വടക്കേടത്ത്, കൈക്കാരൻ സജി ജോർജ് തകടിയേൽ എന്നിവർ പ്രസംഗിച്ചു. ഈ വർഷത്തെ പൊതുപരീക്ഷകളിൽ ഉന്നത വിജയം നേടിയവരെ യോഗത്തിൽ ആദരിച്ചു. 1975ൽ ചങ്ങനാശേരി ആർച്ച്ബിഷപ് മാർ ആന്‍റണി പടിയറയാണ് എരുമേലി അസംപ്ഷൻ പള്ളിയെ ഫൊറോനയായി ഉണർത്തിയത്.

ബിടിസി ഉദ്ഘാടനവും എച്ച്ഡിസി സര്‍ട്ടിഫിക്കറ്റ് വിതരണവും

കാഞ്ഞിരപ്പള്ളി: രൂപത വിശ്വാസജീവിത പരിശീലനകേന്ദ്രം വിശ്വാസജീവിത പരിശീലകര്‍ക്കായി നടത്തുന്ന ത്രിദിന ക്യാമ്പായ ബേസിക് ട്രെയ്‌നിംഗ് കോഴ്‌സ് (ബിടിസി) ഉദ്ഘാടനവും 2024-25 അധ്യയന വര്‍ഷത്തില്‍ എച്ച്ഡിസി കോഴ്‌സ് പൂര്‍ത്തിയാക്കിയവരുടെ സര്‍ട്ടിഫിക്കറ്റ് വിതരണവും പൊടിമറ്റം നിര്‍മല റിന്യൂവല്‍ സെന്‍ററില്‍ നടത്തി. ബിഷപ് മാര്‍ ജോസ് പുളിക്കല്‍ ക്യാമ്പ് ഉദ്ഘാടനം ചെയ്ത് എച്ച്ഡിസി 2024-25 ബാച്ചിന്‍റെ സര്‍ട്ടിഫിക്കറ്റ് വിതരണം നടത്തി. കാഞ്ഞിരപ്പള്ളി രൂപത വിശ്വാസജീവിത പരിശീലന ഡയറക്ടര്‍ ഫാ. തോമസ് വാളന്മനാലിന്‍റെ നേതൃത്വത്തില്‍ വൈദികരും സന്യസ്തരും അല്മായരും അടങ്ങുന്ന റിസോഴ്‌സ് ടീം ക്ലാസുകള്‍ നയിച്ചു. സമാപന സമ്മേളനത്തില്‍ രൂപത പ്രോട്ടോസിഞ്ചെല്ലൂസ് റവ.ഡോ. ജോസഫ് വെള്ളമറ്റം ബിടിസി കോഴ്‌സ് പൂര്‍ത്തിയാക്കിയവര്‍ക്ക് സര്‍ട്ടിഫിക്കറ്റുകള്‍ വിതരണം ചെയ്തു. വികാരി ജനറല്‍ ഫാ. ബോബി അലക്‌സ് മണ്ണംപ്ലാക്കല്‍, ചാന്‍സലര്‍ ഫാ. മാത്യു ശൗര്യാംകുഴിയില്‍, രൂപത പ്രൊക്കുറേറ്റര്‍ ഫാ. ഫിലിപ്പ് തടത്തില്‍ എന്നിവര്‍ പ്രസംഗിച്ചു.

കൂട്ടിക്കലിൽ 11 വീടുകളുടെ താക്കോൽദാനം 21ന്

കോട്ടയം: ഉരുള്‍പൊട്ടല്‍ തകര്‍ത്ത കൂട്ടിക്കലില്‍ സെബാസ്റ്റ്യന്‍ കുളത്തുങ്കല്‍ എംഎല്‍എയുടെ നേതൃത്വത്തില്‍ 11 കുടുംബങ്ങള്‍ക്ക് വീടുകള്‍ നല്‍കും. പൂഞ്ഞാര്‍ എംഎല്‍എ സര്‍വീസ് ആര്‍മി, റോട്ടറി ഇന്‍റര്‍നാഷണല്‍ ഡിസ്ട്രിക്‌ട് 3211, പാലാ റോട്ടറി ക്ലബ് എന്നിവയുടെ സഹകരണത്തോടെ നിര്‍മിച്ച വീടുകളുടെ താക്കോലാണ് 21നു കൈമാറുന്നത്. പൂഞ്ഞാര്‍ മണ്ഡലത്തിലെ വിവിധ ഭാഗങ്ങളിലായി ലക്ഷ്യമിടുന്ന 10 പുതിയ വീടുകളുടെ നിര്‍മാണ ഉദ്ഘാടനവും നടത്തും. 2021ലെ കൂട്ടിക്കല്‍ ഉരുള്‍പൊട്ടലില്‍ ഭൂരഹിതരും ഭവനരഹിതരുമായ മുന്നൂറിലേറെപ്പേര്‍ക്ക് സംസ്ഥാന സര്‍ക്കാരും വിവിധ സ്ഥാപനങ്ങളും സംഘടനകളും‍ വീടുകള്‍ നിര്‍മിച്ച് നല്‍കിയിരുന്നു. വിവിധ മാനദണ്ഡങ്ങള്‍ മൂലം സര്‍ക്കാര്‍തല പദ്ധതിയുടെ നേട്ടം ലഭിക്കാത്തവരില്‍നിന്നു തെരഞ്ഞെടുത്ത 11 പേര്‍ക്കാണ് സെബാസ്റ്റ്യന്‍ കുളത്തുങ്കല്‍ എംഎല്‍എയുടെ നേതൃത്വത്തില്‍ കൂട്ടിക്കല്‍ താളുങ്കലില്‍ വീട് നിര്‍മിച്ചത്. എംഎല്‍എയുടെ അഭ്യര്‍ഥനയെത്തുടര്‍ന്ന് സി.വൈ.എ. റൗഫ് വീടുനിര്‍മാണത്തിന് 60 സെന്‍റ് സ്ഥലം സൗജന്യമായി നല്‍കുകയായിരുന്നു. 21നു രാവിലെ 11നു കൂട്ടിക്കല്‍ സെന്‍റ് മേരീസ് ഓര്‍ത്തഡോക്സ് പള്ളി പാരിഷ് ഹാളില്‍ നടക്കുന്ന വീടുകളുടെ താക്കോല്‍ദാനച്ചടങ്ങ് മന്ത്രി റോഷി അഗസ്റ്റിന്‍ ഉദ്ഘാടനം ചെയ്യും. സെബാസ്റ്റ്യന്‍ കുളത്തുങ്കല്‍ എംഎല്‍എ അധ്യക്ഷത വഹിക്കും. കെ.ജെ. തോമസ് ഗുണഭോക്താക്കള്‍ക്ക് ഉടമസ്ഥാവകാശ രേഖകള്‍ കൈമാറും. ഇതോടെ കൂട്ടിക്കലിലെ പ്രളയപുനരുദ്ധാരണം പൂര്‍ണമാകുമെന്ന് സെബാസ്റ്റ്യന്‍ കുളത്തുങ്കല്‍ എംഎല്‍എ പറഞ്ഞു. വീട് പോയ എല്ലാവര്‍ക്കും വീട് നല്‍കി. സിപിഎം 25 വീടുകളും വിവിധ സന്നദ്ധസംഘടനകളുടേതടക്കം 100ലധികം വീടുകളും നിര്‍മിച്ചു. നശിച്ച റോഡുകളും ഓഫീസുകളും പാലങ്ങളും പുനര്‍നിര്‍മിച്ചു. പത്രസമ്മേളനത്തില്‍ എംഎല്‍എയ്ക്കൊപ്പം കൂട്ടിക്കല്‍ പഞ്ചായത്ത് പ്രസിഡന്‍റ് ബിജോയ് ജോസ് മുണ്ടുപാലം, പാലാ റോട്ടറി ക്ലബ് പ്രസിഡന്‍റ് ജോഷി വെട്ടുകാട്ടില്‍, റോട്ടറി ഡിസ്ട്രിക്‌ട് 3211 അസിസ്റ്റന്‍റ് ഗവര്‍ണര്‍ ആന്‍റണി വൈപ്പന എന്നിവര്‍ പങ്കെടുത്തു.

പോലീസ് വാഹനത്തിനു നേരേ അതിക്രമം; പ്രതി പിടിയില്‍

ഈരാറ്റുപേട്ട: മദ്യപിച്ച് വാഹനമോടിച്ച് പോലീസ് വാഹനത്തിന് കേടുപാടുകള്‍ വരുത്തിയ ആള്‍ തിടനാട് പോലീസിന്‍റെ പിടിയിലായി. അരുവിത്തുറ പുത്തന്‍പുരയ്ക്കല്‍ ഷെഫീഖ് (35) ആണ് പിടിയിലായത്. കഴിഞ്ഞ ദിവസം രാത്രി 11.35ന് കാഞ്ഞിരപ്പള്ളി -ഈരാറ്റുപേട്ട റോഡില്‍ അപകടകരമായ രീതിയില്‍ വാഹനം ഓടിക്കുകയും നൈറ്റ് പട്രോള്‍ ഡ്യൂട്ടിയില്‍ ഉണ്ടായിരുന്ന എസ്ഐ റോബി ജോസ്, സിപിഒ ജിബിന്‍ സിബി എന്നീ പോലീസ് ഉദ്യോഗസ്ഥര്‍ക്ക് നേരേ വാഹനം ഓടിച്ചു കൊണ്ടുവരികയും പോലീസ് വാഹനത്തില്‍ ഇടിപ്പിക്കുകയും കേടുപാടുകള്‍ വരുത്തുകയും ചെയ്തു. സ്റ്റേഷനില്‍ എത്തിച്ച പ്രതി അവിടെയും അക്രമാസക്തനായി. ഇയാള്‍ മദ്യലഹരിയിലായിരുന്നുവെന്നും ഈരാറ്റുപേട്ട, തിടനാട്, മുണ്ടക്കയം, കാഞ്ഞിരപ്പള്ളി സ്റ്റേഷനുകളില്‍ നിരവധി ക്രിമിനല്‍ കേസുകളില്‍ പ്രതിയാണ് ഇയാളെന്നും പോലീസ് പറഞ്ഞു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

കാഞ്ഞിരപ്പള്ളി ബസ് സ്റ്റാൻഡിലേക്കുള്ള പുത്തനങ്ങാടി റോഡ് തകർന്നു തരിപ്പണമായി

കാഞ്ഞിരപ്പള്ളി: ദേശീയപാതയിൽനിന്നു കാഞ്ഞിരപ്പള്ളി ബസ് സ്റ്റാൻഡിലേക്കു പ്രവേശിക്കുന്ന പുത്തനങ്ങാടി റോഡ് തകര്‍ന്നു തരിപ്പണമായി. വീതിക്കുറവു മൂലം ഗതാഗതം ദുഷ്കരമായ ഇവിടെ റോഡ് കൂടി തകർന്നതോടെ കാര്യങ്ങൾ കൂടുതൽ പരിതാപകരമായി. ഇവിടെ നേരത്തേ കോണ്‍ക്രീറ്റ് ചെയ്ത ഭാഗത്തിനു മുകളില്‍ റോഡ് ടാര്‍ ചെയ്തിരുന്നു. ഇപ്പോൾ ഈ ടാറിംഗും അടിയിലെ കോൺക്രീറ്റും തകർന്നു പലേടത്തും വലിയ കുഴികളായിരിക്കുകയാണ്. ബസുകൾ കടന്നുപോകുമ്പോൾ കുഴികളിൽ ചാടിയും ബസിന്‍റെ അടിവശം ഇടിച്ചും റോഡ് കൂടുതൽ തകരുന്ന സ്ഥിതിയാണ്. കണ്ണുതുറക്കൂ പഞ്ചായത്തേ... ദേശീയപാതയിൽനിന്നു സ്റ്റാൻഡിലേക്കു കയറുന്ന ഭാഗത്തു കഷ്ടിച്ച് ഒരു ബസിനു മാത്രം കടന്നുപോകാൻ കഴിയുന്ന വീതിയേ ഉള്ളൂ. ബസ് സ്റ്റാന്‍ഡിലേക്കുള്ള ബസുകള്‍ മാത്രമല്ല, കച്ചവട സ്ഥാപനങ്ങളിലേക്കു ലോഡുമായടക്കം വാഹനങ്ങള്‍ കടന്നുപോകുന്ന പാതയില്‍ ഇപ്പോള്‍ യാത്ര ദുഷ്‌കരമാണ്. പലപ്പോഴും ഇരുചക്ര വാഹനങ്ങള്‍ കുഴികളില്‍ ചാടി നിയന്ത്രണം വിടുന്നതും പതിവാണ്. കഴിഞ്ഞ മാസം ബസ് സ്റ്റാന്‍ഡ് ദേശീയപാതയുമായി ചേരുന്ന ഭാഗത്തു സ്ലാബുകള്‍ ഒടിഞ്ഞ് അപകടാവസ്ഥയിലായതിനെത്തുടർന്ന് അറ്റകുറ്റപ്പണികള്‍ക്കായി സ്റ്റാന്‍ഡ് പത്തു ദിവസം അടച്ചിരുന്നു. അന്നു ടാറിംഗ് തകര്‍ന്ന ഭാഗവും നന്നാക്കണമെന്നു വ്യാപാരികളും ബസ് ഉടമകളും ആവശ്യപ്പെട്ടിരുന്നു. എന്നാല്‍, ഇതു നടന്നില്ല. മഴ ശക്തമാകുകയും ചെറിയ കുഴികള്‍ വലുതാവുകയും ചെയ്തതോടെ യാത്ര സാഹസികമായി. എത്രയും വേഗം റോഡ് നന്നാക്കി അപകടാവസ്ഥ ഒഴിവാക്കണമെന്നാണ് ആവശ്യം.

ചങ്ങനാശേരിയില്‍ 24 മണിക്കൂറും പ്രവര്‍ത്തിക്കുന്ന നീതി മെഡി.‍ സ്റ്റോറും ലബോറട്ടറിയും; ഉദ്ഘാടനം നാളെ

ചങ്ങനാശേരി: കോട്ടയം ജില്ല ആശുപത്രി സഹകരണ സംഘം (ഡിസിഎച്ച്)ന്‍റെ നേതൃത്വത്തില്‍ ചങ്ങനാശേരിയില്‍ 24 മണിക്കൂറും പ്രവര്‍ത്തിക്കുന്ന നീതി മെഡിക്കല്‍ സ്റ്റോറും ലബോറട്ടറിയും പ്രവര്‍ത്തനമാരംഭിക്കുന്നു. നാളെ രാവിലെ 10ന് മന്ത്രി വി.എന്‍. വാസവന്‍ ഉദ്ഘാടനം ചെയ്യും. ചങ്ങനാശേരി ഹെഡ് പോസ്റ്റ് ഓഫീസിന് എതിര്‍വശത്തുള്ള നഗരസഭാ ഷോപ്പിംഗ് കോംപ്ലക്‌സിലാണ് മെഡിക്കല്‍ സ്റ്റോറും ലബോറട്ടറിയും ആരംഭിക്കുന്നത്. എല്ലാ ലാബ് പരിശോധനകളും കുറഞ്ഞ നിരക്കില്‍ ഇവിടെ നടത്താം. ഇതിനു പുറമേ സീനിയര്‍ സിറ്റിസണിന് പത്തുശതമാനം ഡിസ്‌കൗണ്ടും ഡിസിഎച്ചിന്‍റെ ചങ്ങനാശേരി ബ്രാഞ്ചില്‍ ലഭിക്കും. ജോബ് മൈക്കിള്‍ എംഎല്‍എ അധ്യക്ഷത വഹിക്കും. മുനിസിപ്പല്‍ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍, ജില്ല സഹകരണ അര്‍ബന്‍ ബാങ്ക് പ്രസിഡന്‍റ് ടി.ആര്‍. രഘുനാഥന്‍, കാപ്‌കോസ് ചെയര്‍മാന്‍ കെ.എം. രാധാകൃഷ്ണന്‍, ഡിസിഎച്ച് പ്രസിഡന്‍റ് സി.ജെ. ജോസഫ്, വൈസ് പ്രസിഡന്‍റ് കെ.എന്‍. വേണുഗോപാല്‍, കെ.സി. ജോസഫ്, അഡ്മിനിസ്‌ട്രേറ്റീവ് ഓഫീസര്‍ കെ.എം. മോഹനന്‍ എന്നിവര്‍ പ്രസംഗിക്കും.

ചങ്ങനാശേരി ബോട്ട് ക്ലബിന്‍റെ പരിശീലനം പുരോഗമിക്കുന്നു

ചങ്ങനാശേരി: മീഡിയാ വില്ലേജ് നേതൃത്വം കൊടുക്കുന്ന സിബിസിയുടെ നെഹ്‌റു ട്രോഫി മത്സരത്തിനായുള്ള പരിശീലനം കിടങ്ങറയിൽ ആരംഭിച്ചു. അതിരൂപത വികാരി ജനറാള്‍ മോണ്‍. ആന്‍റണി എത്തയ്ക്കാട്ട് ഫ്‌ളാഗ് ഓഫ് നിര്‍വഹിച്ചു. ചങ്ങനാശേരിയിലെ രാഷ്‌ട്രീയ, വ്യവസായ, സാമൂഹിക രംഗത്തെ പ്രമുഖര്‍ പങ്കെടുത്ത പരിപാടിയില്‍ ബോട്ട് ക്ലബിന്‍റെ ക്യാപ്റ്റന്‍ സണ്ണി ഇടിമണ്ണിക്കല്‍ മുഖ്യപ്രഭാഷണം നടത്തി. കിടങ്ങറ പള്ളി വികാരി ഫാ. സിറിള്‍ ചേപ്പില, ഫാ. ലിബിന്‍ തുണ്ടുകളം, ഷാജി പാലാത്ര, ടോമി അര്‍ക്കാഡിയ, ഗിരീഷ് കോനാട്ട്, അഡ്വ.പി.എസ്. ശ്രീധരന്‍, എച്ച്. മുസമ്മില്‍, ടിന്‍സു മാത്യു, ടോം സി. വാടയില്‍, ടോണി സി. കല്ലുകളം, ഡോ. ജോസഫ് തോമസ്, സി.എം. മാത്യു, ഷാജന്‍ ഓവേലില്‍, സോനു പതാലില്‍, ജോര്‍ജുകുട്ടി കട്ടപ്പുറം, ജോസഫ് ഏബ്രഹാം തെക്കേക്കര എന്നിവര്‍ പ്രസംഗിച്ചു.

ലഹരിക്കെതിരേ യുവാക്കള്‍ മുന്നിട്ടിറിങ്ങണം: ജോബ് മൈക്കിള്‍

ചങ്ങനാശേരി: മാനവരാശിക്ക് ഭീഷണിയായ ലഹരിയെ തുരത്താന്‍ യുവാക്കള്‍ മുന്നിട്ടിറിങ്ങണമെന്ന് ജോബ് മൈക്കിള്‍ എംഎല്‍എ. വിദേശരാജ്യങ്ങളിലെ ഏറ്റവും വലിയ മലയാളി സംഘടനയായ ഫോമയുടെയും ചങ്ങനാശേരി യുവജന വേദിയുടെയും സംയുക്ത ആഭിമുഖ്യത്തില്‍ അന്താരാഷ്‌ട്ര യുവജന വാരാചരണത്തോടനുബന്ധിച്ച് ഫോമാ വൈസ് പ്രസിഡന്‍റ് ശാലു പുന്നൂസ് നേതൃത്വം നല്‍കിയ "രാസലഹരിക്കെതിരേ യുവജന കൂട്ടയോട്ടം' ഉദ്ഘാടനം ചെയ്യുകയായിരുന്നു അദ്ദേഹം. യുവജനവേദി പ്രസിഡന്‍റ് എം.എ. സജാദ് അധ്യക്ഷത വഹിച്ചു. സിനിമാതാരം കൃഷ്ണപ്രസാദ്, ചങ്ങനാശേരി പോലീസ് സബ് ഇന്‍സ്‌പെക്ടര്‍ ആര്‍.പി. ടിനു, ഫോമാ കേരള ഇന്‍ ചാര്‍ജ് പീറ്റര്‍ കുളങ്ങര, വി.ജെ ലാലി, ജോമി ജോസഫ്, ശ്യാം സാംസണ്‍, ലിബിന്‍ പുന്നശേരി, ജൂബിന്‍ ജോണ്‍സണ്‍, അസ്ഹര്‍ മുഹമ്മദ്, സി. രമേശന്‍ തുടങ്ങിയവർ പ്രസംഗിച്ചു.

ചിങ്ങപ്പുലരിയില്‍ കർഷകരെ ആദരിച്ച് നാട്

ചങ്ങനാശേരി: നഗരസഭ, കൃഷി ഭവന്‍ എന്നിവയുടെ സംയുക്താഭിമുഖ്യത്തില്‍ നഗരസഭ ഹാളില്‍ കര്‍ഷകദിനാചരണം നടത്തി. നഗരസഭ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍ അധ്യക്ഷത വഹിച്ചു. ജോബ് മൈക്കിള്‍ എംഎല്‍എ ഉദ്ഘാടനം നിര്‍വഹിച്ചു. വൈസ് ചെയര്‍മാന്‍ മാത്യൂസ് ജോര്‍ജ് മികച്ച കര്‍ഷകരെ ആദരിച്ചു. ടെസ വര്‍ഗീസ്, എല്‍സമ്മ ജോബ്, ഉഷ മുഹമ്മദ് ഷാജി, ബീന ജോബി, സന്തോഷ് ആന്‍റണി, റെജി കേളമ്മാട്ട്, കുഞ്ഞുമോള്‍ സാബു എന്നിവര്‍ പ്രസംഗിച്ചു. ചങ്ങനാശേരി: സീനിയര്‍ ചേംബര്‍ ഇന്‍റര്‍നാഷണല്‍ കര്‍ഷകദിനാചരണം നടത്തി. പ്രസിഡന്‍റ് ജയിംസുകുട്ടി ഞാലിയില്‍ അധ്യക്ഷത വഹിച്ചു. നാഷണല്‍ വൈസ് പ്രസിഡന്‍റ് അഡ്വ. ബോബന്‍ തെക്കേല്‍ ഉദ്ഘാടനം ചെയ്തു. ലീജിയന്‍ ഏര്‍പ്പെടുത്തിയ കര്‍ഷകശ്രീ പുരസ്‌കാരങ്ങള്‍ ജോണി കൊല്ലമന, മാത്യു ജോസഫ് എന്നിവര്‍ ഏറ്റുവാങ്ങി. ബിജു നെടിയകാലാപ്പറമ്പില്‍, സോണി ജോസഫ് എന്നിവര്‍ പ്രസംഗിച്ചു.

വേണ്ടത് ഹൃദയ പരിവര്‍ത്തനം: മോണ്‍. ആന്‍റണി എത്തയ്ക്കാട്ട്

തുരുത്തി ബൈബിള്‍ കണ്‍വന്‍ഷന്‍ നാളെ സമാപിക്കും തുരുത്തി: പരസ്പരമുള്ള വെറുപ്പും വിദ്വേഷവും മാറ്റി പുതിയൊരു ഹൃദയം സൃഷ്ടിക്കണമെന്ന് ചങ്ങനാശേരി അതിരൂപത വികാരി ജനറാള്‍ മോണ്‍. ആന്‍റണി എത്തയ്ക്കാട്ട്. തുരുത്തി മര്‍ത്ത്മറിയം ഫൊറോന പള്ളിയില്‍ ഫാ. സേവ്യര്‍ ഖാന്‍ വട്ടായില്‍ നയിക്കുന്ന അഭിഷേകാഗ്‌നി ബൈബിള്‍ കണ്‍വന്‍ഷന്‍റെ മൂന്നാം ദിവസം വിശുദ്ധ കുര്‍ബാന അര്‍പ്പിച്ചു സന്ദേശം നല്‍കുകയായിരുന്നു അദ്ദേഹം. വികാരി ഫാ. ജേക്കബ് ചീരംവേലില്‍ അധ്യക്ഷത വഹിച്ചു. അട്ടപ്പാടി സെഹിയോന്‍ ധ്യാനകേന്ദ്രം ഡയറക്ടര്‍ ഫാ. സേവ്യര്‍ ഖാന്‍ വട്ടായില്‍, ചെത്തിപ്പുഴ മൗണ്ട് കാര്‍മല്‍ ധ്യാനകേന്ദ്രം ഡയറക്ടര്‍ സിസ്റ്റര്‍ ടെസ്‌ലിന്‍ എന്നിവര്‍ വചനപ്രഘോഷണവും ആരാധനയും നയിച്ചു. ഇന്നു പകല്‍ പൊതുകുമ്പസാരം നടക്കും. മൂന്നരയ്ക്ക് ജപമാല, നാലിനു നടക്കുന്ന വിശുദ്ധ കുര്‍ബാനയ്ക്ക് അതിരൂപത വികാരി ജനറാള്‍ മോണ്‍. സ്‌കറിയ കന്യാകോണില്‍ മുഖ്യകാര്‍മികത്വം വഹിക്കും. ഫാ. സേവ്യര്‍ ഖാന്‍ വട്ടായില്‍ വചനപ്രഘോഷണം നടത്തും. സമാപനദിനമായ നാളെ മൂന്നരയ്ക്ക് ജപമാല, നാലിന് വിശുദ്ധ കുര്‍ബാനയ്ക്ക് തുരുത്തി ഫൊറോനയിലെ വൈദികര്‍ കാര്‍മികത്വം വഹിക്കും. ബിഷപ് ജോഷ്വാ മാര്‍ ഇഗ്‌നാത്തിയോസ് സമാപന സന്ദേശം നല്‍കും. തുടര്‍ന്ന് ഫാ. സേവ്യര്‍ ഖാന്‍ വട്ടായില്‍ വചനപ്രഘോഷണവും ദിവ്യകാരുണ്യ ആരാധനയും നയിക്കും.

പുരപ്പുറം നിറയെ പച്ചക്കറികളുമായി രമാദേവിയുടെ കാർഷിക വിപ്ലവം

ബെന്നി ചിറയില്‍ ചങ്ങനാശേരി: പെരുന്ന ആവണിയില്‍ രമാദേവിയുടെ രണ്ടു വീടുകള്‍ നിറയെ വിളഞ്ഞുനില്‍ക്കുന്ന പച്ചക്കറികള്‍ കണ്‍കുളിര്‍ക്കുന്ന ഹരിതാഭ കാഴ്ചയാണ്. മത്തങ്ങ, വഴുതന, കുലവഴുതന, ഓണാട്ടുവഴുതന, വയലറ്റ് നീളന്‍, മാലാഖ, കോഴിക്കോടന്‍ വെങ്ങരി തുടങ്ങി എട്ടിനങ്ങളിലാണ് വഴുതന വിളഞ്ഞിരിക്കുന്നത്. വെണ്ട ആണെങ്കില്‍ ആനക്കൊമ്പന്‍ (പച്ച, ചുവപ്പ്), അരുണ, കസ്തൂരി തുടങ്ങിയ ഇനങ്ങള്‍. ഉജ്വല, ജ്വാലസഖി, വെള്ളക്കാന്താരി, വയലറ്റ് തുടങ്ങി എരിവ് കൂടിയതും കുറഞ്ഞതുമായ മുളകിനങ്ങള്‍. അരുണ, മയില്‍പ്പീലി, സുന്ദരി, മോഹിനി, പൊന്നാങ്കണി തുടങ്ങി അരഡസന്‍ ചീര ഇനങ്ങള്‍. പെരുന്ന സുബ്രമണ്യംസ്വാമി ക്ഷേത്രം റോഡിന്‍റെ തുടക്കത്തിലാണ് പതിമൂന്നര സെന്‍റിലുള്ള രണ്ടു വീടുകളുടെ മട്ടുപ്പാവുകളിലെ രമാദേവിയുടെ കൃഷിയിടം‍. മംഗള, ലോല, ഗീതിക, അനശ്വര, കാര്‍ക്കൂന്തല്‍ തുടങ്ങിയ പയറിനങ്ങളും ഈ വീട്ടമ്മയുടെ കൃഷിയിടത്തില്‍ തിങ്ങിവിളയുന്നു. പന്തളം സ്വദേശിനിയായ രമാദേവി ബോട്ടണിയില്‍ ബിരുദാനന്ദര ബിരുദം നേടിയിട്ടുണ്ട്. മുത്തശി കാര്‍ത്ത്യായനിയില്‍നിന്നു നേടിയ കൃഷി അറിവാണ് പെരുന്നയിലെ ആവണി വീടിന്‍റെ മട്ടുപ്പാവിനെയും പരിസരങ്ങളെയും കഴിഞ്ഞ കാല്‍ നൂറ്റാണ്ടിലധികമായി കാര്‍ഷിക സമൃദ്ധിയിലേക്കു നയിച്ചത്. മഞ്ഞള്‍, മുരിങ്ങ, അരിനെല്ലി, വിവിധതരം നാരകം, ഓമക്ക, സപ്പോര്‍ട്ട, പേര, ആത്ത, പീനട്ട് ബട്ടര്‍, ചെറി തുടങ്ങിയവയെല്ലാം ഈ പുരപ്പുറത്ത് 365 ദിവസവും വിളയുന്നു. ചാക്ക്, എച്ച്ഡിപി ബാഗ്, പ്ലാസ്റ്റിക് ബേസണ്‍, കണ്ടെയ്‌നറുകള്‍, തെര്‍മോകോള്‍ പെട്ടികള്‍ തുടങ്ങിയവയില്‍ തികച്ചും ശാസ്ത്രീയവും ജൈവ രീതിയിലുമാണ് കൃഷി. പുരപ്പുറത്ത് വിളയുന്ന കാര്‍ഷികോത്പന്നങ്ങള്‍ വില്‍ക്കുന്നതിനൊപ്പം "രമ ടെറസ് ഗാര്‍ഡന്‍’എന്ന ബ്രാന്‍ഡില്‍ ഈ വീട്ടമ്മ വന്‍തോതില്‍ വിത്തിനങ്ങളും വിറ്റുവരുന്നു. രമാസ് ടെറസ് ഗാര്‍ഡന്‍ എന്ന യുട്യൂബ് ചാനലിലൂടെ കാര്‍ഷിക വിഭവങ്ങളും വിത്തിനങ്ങളും വില്‍ക്കുന്നതിനൊപ്പം പുത്തന്‍ കാര്‍ഷിക അറിവുകള്‍ വീട്ടമ്മമാരുള്‍പ്പെടെയുള്ളവര്‍ക്ക് പകരാനും രമാദേവിക്കു കഴിയുന്നു. കാര്‍ഷിക മികവിന് നിരവധി പുരസ്‌കാരങ്ങളും രമാദേവിയെ തേടിയെത്തിയിട്ടുണ്ട്. കഴിഞ്ഞവര്‍ഷം കോട്ടയം ജില്ലയിലെ മികച്ച കര്‍ഷകയായും തെരഞ്ഞെടുക്കപ്പെട്ടിരുന്നു. ഫോണ്‍. 9446468569.

വാഹനാപകട കേസിൽ 65 ലക്ഷം നഷ്ടപരിഹാരം നൽകാൻ വിധി

പാലാ: വാഹനാപകടത്തിൽ മരിച്ച കൂട്ടിക്കൽ സ്വദേശി ഷാജിയുടെ ഭാര്യക്കും മക്കൾക്കും മാതാവിനും നഷ്ടപരിഹാരവും പലിശയും ഉൾപ്പെടെ 65 ലക്ഷം രൂപ നൽകാൻ പാലാ മോട്ടോർ ആക്സിഡന്‍റ്സ് ക്ലെയിം ട്രിബ്യൂണൽ ജഡ്ജ് കെ.പി. പ്രദീപ് ഉത്തരവ് പുറപ്പെടുവിച്ചു. 2019ൽ കൂട്ടിക്കലിൽ ബൈക്കിൽ ലോറി ഇടിച്ചുണ്ടായ അപകടത്തിലാണ് ഷാജി മരിച്ചത്. ന്യൂ ഇന്ത്യ ഇൻഷ്വറൻസ് കമ്പനി ഹർജിക്കാർക്ക് തുക നൽകാനാണ് കോടതി വിധി. ഹർജിക്കാർക്ക് വേണ്ടി അഡ്വക്കറ്റുമാരായ ബിജു ഇളംതുരുത്തിയിൽ, ബിസിമോൻ ചെമ്പൻകുളം, ബിബിൻ മാടപ്പള്ളി, മരിയ തോമസ്എന്നിവർ കോടതിയിൽ ഹാജരായി.

മെഡിസിന്‍ ബാങ്ക് പദ്ധതിയുടെ ഉദ്ഘാടനം

കടുത്തുരുത്തി: ഞീഴൂര്‍ നിത്യസഹായകന്‍ ട്രസ്റ്റിന്‍റെ നേതൃത്വത്തിലുള്ള മെഡിസിന്‍ ബാങ്ക് പദ്ധതിയുടെ ഉദ്ഘാടനം കടുത്തുരുത്തി സെന്‍റ് മേരീസ് വലിയപള്ളിയില്‍ കടുത്തുരുത്തി സെന്‍റ് മേരീസ് ഫൊറോനാ താഴത്തുപള്ളിവികാരി ഫാ. മാത്യു ചന്ദ്രന്‍കുന്നേല്‍ നിര്‍വഹിച്ചു. വലിയപള്ളി വികാരി ഫാ. ജോണ്‍സണ്‍ നീലനിരപ്പേല്‍ വെഞ്ചരിപ്പ് നിര്‍വഹിച്ചു. നിത്യസഹായകന്‍ ട്രസ്റ്റ് പ്രസിഡന്‍റ് അനില്‍ ജോസഫ് അധ്യക്ഷത വഹിച്ചു. കടുത്തുരുത്തി വ്യാപാരി വ്യവസായി ഏകോപന സമിതി പ്രസിഡന്‍റ് സാനിച്ചന്‍ കണിയാംപറമ്പില്‍, മെഡിസിന്‍ ബാങ്ക് പ്രമോട്ടര്‍ ലംബോച്ചന്‍ മാത്യു പന്നിവേലില്‍, ഹോം കോ-ഓര്‍ഡിനേറ്റര്‍ ജിയോ കുന്നശ്ശേരില്‍, നിത്യസഹായകന്‍ അമ്മവീട് സെക്രട്ടറി വി.കെ. സിന്ധു, വൈസ് പ്രസിഡന്‍റ് കെ.കെ. സുരേന്ദ്രന്‍ എന്നിവര്‍ പ്രസംഗിച്ചു. ആരംഭത്തില്‍ 15 കേന്ദ്രങ്ങളില്‍ മരുന്നുകള്‍ക്കായി കളക്ഷന്‍ ബോക്‌സുകള്‍ സ്ഥാപിച്ചിട്ടുണ്ട്. ഉപയോഗ ശേഷമുള്ള മരുന്നുകള്‍, ഡയപ്പര്‍, അണ്ടര്‍ പാഡുകള്‍, മെഡിക്കല്‍ ഉപകരണങ്ങള്‍, ഹോസ്പ്പിറ്റല്‍ കട്ടിലുകള്‍ എന്നിവ ഉള്‍പ്പെടെ ഉപകരണങ്ങള്‍ മെഡിസിന്‍ ബാങ്ക് വഴി ശേഖരിക്കും. തുടര്‍ന്ന് ആവശ്യക്കാര്‍ക്ക് ഇവ വിതരണം ചെയ്യുന്ന പദ്ധതിയാണ് മെഡിസിന്‍ ബാങ്ക്. തോമസ് അഞ്ചമ്പില്‍, കെ.കെ. സുരേന്ദ്രന്‍, അര്‍ജുന്‍ തൈക്കൂട്ടത്തില്‍, ജോമിന്‍ ചാലില്‍, ക്ലാരമ്മ ബാബു, റൂബി ആര്യന്തടം, നഴ്സ് മാരായ റീത്ത ജയ്സണ്‍, സൗമ്യ, ജയ്സണ്‍ പാലയില്‍, ചാക്കോച്ചന്‍ കുര്യന്തടം, ജയിംസ് കാവാട്ടുപറമ്പില്‍ എന്നിവര്‍ നേതൃത്വം നല്‍കി.

കർഷകരെ വഞ്ചിക്കാൻ അനുവദിക്കില്ല: കത്തോലിക്ക കോൺഗ്രസ്

പാലാ: കർഷകരുടെ നിലനിൽപ്പിനായി ഏതറ്റംവരെയും പോരാടുമെന്നും അവരെ വഞ്ചിക്കാനുള്ള എല്ലാ നീക്കങ്ങളും തടയുമെന്നും കത്തോലിക്ക കോൺഗ്രസ് പാലാ രൂപത ഡയറക്ടർ റവ. ഡോ. ജോർജ് വർഗീസ് ഞാറക്കുന്നേൽ. കത്തോലിക്ക കോൺഗ്രസ് പാലാ രൂപതാസമിതി ചിങ്ങം ഒന്നിന് നടത്തിയ കർഷക വഞ്ചനാദിനാചരണം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഒരു നൂറ്റാണ്ടിലേറെയായുള്ള കത്തോലിക്ക കോൺഗ്രസിന്‍റെ സമരങ്ങളിൽ ഏറെയും കർഷകർക്കു വേണ്ടിയും അവരുടെ അവകാശങ്ങൾക്ക് വേണ്ടിയും ആയിരുന്നു. വന്യജീവി അക്രമണം തടയാൻ സർക്കാരുകൾ നിയമനിർമണം നടത്തിയില്ലെങ്കിൽ കത്തോലിക്കാ കോൺഗ്രസ് ശക്തമായ പ്രക്ഷോഭവുമായി മുന്നോട്ടു പോകുമെന്ന് അദ്ദേഹം പറഞ്ഞു. രൂപത പ്രസിഡന്‍റ് ഇമ്മാനുവൽ നിധീരി അധ്യക്ഷത വഹിച്ച യോഗത്തിൽ ഫാ. കുര്യൻ തടത്തിൽ, ജോയി കണിപ്പറമ്പിൽ, ആൻസമ്മ സാബു, ജോൺസൺ വീട്ടിയാങ്കൽ, പയസ് കവളംമാക്കൽ, ജോൺസൺ ചെറുവള്ളി, ബെന്നി കിണറ്റുകര, സാബു പ്ലാത്തോട്ടം, ടോമിച്ചൻ പഴയ മഠം, ജോർജ് തൊടുവനാൽ, ജോ സെബാസ്റ്റ്യൻ, വർഗീസ് ജോർജ് ഇളംതുരുത്തിയിൽ, ജിമ്മി കൊച്ചെട്ടൊന്നിൽ തുടങ്ങിയവർ പ്രസംഗിച്ചു.

ചുവടു ദ്രവിച്ച അരയാല്‍ മരം അപകടഭീഷണി

കുറുപ്പന്തറ: മാഞ്ഞൂര്‍ ഗവണ്‍മെന്‍റ് എല്‍പി സ്‌കൂളിന് മുന്നില്‍ റോഡിനോട് ചേര്‍ന്നുള്ള നടപ്പാതയില്‍ അടിഭാഗം ദ്രവിച്ചു നില്‍ക്കുന്ന അരയാല്‍ മരം അപകടഭീഷണിയുയര്‍ത്തുന്നു. മരത്തിന്‍റെ അടിഭാഗത്ത് ആഴത്തിലുള്ള വിടവുണ്ട്. പാമ്പുകളടക്കമുള്ള ഇഴജന്തുക്കള്‍ മരത്തിന്‍റെ ചുവട്ടിലുള്ള ഈ വിടവ് താവളമാക്കിയിട്ടുണ്ട്. പുറമേയുള്ള വേരിലാണ് നിലവില്‍ മരം നില്‍ക്കുന്നത്. സ്‌കൂള്‍ കുട്ടികളും കാല്‍നടയാത്രക്കാരും മരത്തിന്‍റെ ചുവട്ടിലൂടെയാണ് സഞ്ചരിക്കുന്നത്. മരം ഉടന്‍തന്നെ വെട്ടി നീക്കിയില്ലെങ്കില്‍ വലിയ അപകടം ഏതുസമയത്തും സംഭവിക്കാമെന്ന് അവസ്ഥയാണുള്ളതെന്ന് നാട്ടുകാര്‍ പറയുന്നു. മരം മറിഞ്ഞാല്‍ സ്‌കൂള്‍ കെട്ടിടത്തിന് മുകളിലേക്കോ കോട്ടയം-എറണാകുളം സംസ്ഥാന പാതയിലേക്കോ ആകും വീഴുക. ഇത് വലിയ അപകടത്തിന് കാരണമാകും. പലതവണ പഞ്ചായത്തിലും പൊതുമരാമത്ത് വകുപ്പിനും സ്‌കൂള്‍ അധികൃതരും നാട്ടുകാരും പരാതി നല്‍കിയെങ്കിലും യാതൊരു നടപടിയും ഉണ്ടായിട്ടില്ല.

വൈക്കം - തോട്ടകം - വാക്കേത്തറ കല്ലുപുരയ്ക്കൽ റോഡ് നവീകരണത്തിന് 25 കോടി

വൈക്കം: തലയാഴം, കല്ലറ പഞ്ചായത്തുകളിലൂടെ കടന്ന് വൈക്കം - കോട്ടയം റോഡിനു സമാന്തര പാതയായി വിഭാവനം ചെയ്ത വൈക്കം - തോട്ടകം - വാക്കേത്തറ കല്ലുപുരയ്ക്കൽ റോഡ് ആധുനിക നിലവാരത്തിൽ പുനർ നിർമ്മിക്കുന്നതിനായി 25കോടിരൂപഅനുവദിച്ചു ടെണ്ടർനടപടികളിലേക്ക് കടക്കുന്നതായി സി.കെ. ആശ എഎൽഎ. ഈറോഡിൽ തലയാഴം- കല്ലറ പഞ്ചായത്തുകളെ ബന്ധിപ്പിച്ച് കെ.വി. കനാലിനു കുറുകെതീർത്ത ഉയരം കൂടിയ പാലത്തിന്‍റെ സമീപറോഡ് നിർമാണം അനശ്ചിതത്തിലായത് റോഡിന്‍റെ നിർമാണതിന് തടസമായിരുന്നു. ചെളി നിറഞ്ഞ പ്രദേശത്ത് സമീപ റോഡ് നിർമ്മിച്ചാൽ റോഡ് വൈകാതെ തകരുമെന്ന വിദഗ്ധ അഭിപ്രായത്തെ തുടർന്ന് റോഡ് നിർമാണത്തിന് കിഫ്ബി അനുവദിച്ച 20 കോടിക്ക് പുറമെ സമീപ റോഡിനായി അഞ്ചുകോടി രൂപകൂടി അനുവദിച്ചു. ഇവിടെ സമീപ റോഡിനുപകരം പാലം പോലെ തന്നെ സ്പാനിട്ട് താഴേക്ക് ഇരുവശവും 52 മീറ്റർ നീളത്തിൽ വാർക്കുന്നതിന് സംസ്ഥാന സർക്കാരിന്‍റെ ഡിസൈൻ വിംഗ് ഡിസൈൻ തയ്യാറാക്കി എസ്റ്റിമേറ്റ് പ്രകാരമുള്ള പണം അനുവദിച്ചു.നിർമാണ പ്രവർത്തനങ്ങൾ ഉടൻ ആരംഭിക്കാനാകുമെന്നും എംഎൽഎ പറഞ്ഞു.

മെഡിക്കൽ കോളജ് ആശുപത്രി സൂപ്രണ്ട് ഓഫീസിനു മുന്നിൽ വിരമിച്ച ജീവനക്കാരുടെ ധർണ

ഗാന്ധിനഗർ: മെഡിക്കൽ കോളജ് ആശുപത്രിയിൽനിന്നു വിരമിച്ച നഴ്സിംഗ് അസിസ്റ്റന്‍റ് ജീവനക്കാരും കുടുംബാംഗങ്ങളും ആശുപത്രി സൂപ്രണ്ട് ഓഫീസിനു മുന്നിൽ പ്രതിഷേധ ധർണ നടത്തി. ആശുപത്രി സേവനത്തിൽനിന്നു വിരമിച്ചിട്ട് ഏഴുമാസം കഴിഞ്ഞിട്ടും പെൻഷൻ ലഭിക്കാത്തതിനെത്തുടർന്നാണ് ധർണ നടത്തിയത്. ചാണ്ടി ഉമ്മൻ എംഎൽഎ ധർണ ഉദ്ഘാടനം ചെയ്തു. പെൻഷൻ സമരസമിതി കൺവീനർ പി.ടി. ബാബു അധ്യക്ഷത വഹിച്ചു. എൻജിഒ അസോസിയേഷൻ ജില്ലാ പ്രസിഡന്‍റ് സതീഷ് ജോർജ് മുഖ്യപ്രഭാഷണം നടത്തി. ഷാഹുൽ ഹമീദ്, എൻ.എം. സുധാകരൻ, റെനി പോൾ, സാലിയമ്മ കുര്യൻ എന്നിവർ പ്രസംഗിച്ചു.

ഭാരത് സ്‌കൗട്സ് ആന്‍ഡ് ഗൈഡ്‌സ് അവാര്‍ഡുകള്‍ പ്രഖ്യാപിച്ചു

കോട്ടയം: കേരള സ്റ്റേറ്റ് ഭാരത് സ്‌കൗട്സ് ആന്‍ഡ് ഗൈഡ്‌സ് കോട്ടയം ജില്ലാ അസോസിയേഷന്‍റെ നേതൃത്വത്തില്‍ ഏകദിന സെമിനാര്‍ മൗണ്ട് കാര്‍മല്‍ ഹയര്‍ സെക്കന്‍ഡറി സ്‌കൂളില്‍ നടന്നു. കോട്ടയം ഡിഇഒ എം. ആര്‍. സുനിമോള്‍ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ ഉദ്ഘാടനം നിര്‍വഹിച്ചു. സംസ്ഥാന കമ്മീഷണര്‍ ശ്രീകുമാരി തങ്കച്ചി മുഖ്യപ്രഭാഷണം നടത്തി. 2024 - 25 വര്‍ഷത്തെ പ്രവര്‍ത്തനമികവിന് മികച്ച കബ് യൂണിറ്റ് ലിസ്യൂ എല്‍പി സ്‌കൂള്‍ ഇത്തിത്താനം, മികച്ച ബുള്‍ബുള്‍ യൂണിറ്റ് ലിസ്യു എല്‍പി സ്‌കൂള്‍ ഇത്തിത്താനം, ഹൈസ്‌കൂള്‍ വിഭാഗം മികച്ച സ്‌കൗട്ട് യൂണിറ്റ് ഡോണ്‍ ബോസ്‌കോ എച്ച്എസ് പുതുപ്പള്ളി, മികച്ച ഗൈഡ് യൂണിറ്റ് സെന്‍റ് തോമസ് എച്ച്എസ് തോട്ടയ്ക്കാട്, ഹയര്‍ സെക്കന്‍ഡറി വിഭാഗം മികച്ച സ്‌കൗട്ട് യൂണിറ്റ് എന്‍എസ്എസ് എച്ച്എസ്എസ് ചങ്ങനാശേരി, മികച്ച ഗൈഡ് യൂണിറ്റ് സെന്‍റ് ജോസഫ്‌സ് എച്ച്എസ്എസ് ചങ്ങനാശേരി, മികച്ച റോവര്‍ യൂണിറ്റ് ഇത്തിത്താനം എച്ച്എസ്എസ് മലകുന്നം, മികച്ച റേഞ്ചര്‍ യൂണിറ്റ് എംടി എച്ച്എസ്എസ് കോട്ടയം. വൈസ് പ്രസിഡന്‍റ് ജോളി വര്‍ഗീസ്, ജില്ലാ സെക്രട്ടറി ജോസഫ് വര്‍ഗീസ് റോയി പി. ജോര്‍ജ്, ആന്‍സി മേരി ജോണ്‍, പി.ആര്‍. സുധീര്‍, അഞ്ജന ജെ., സിസ്റ്റര്‍ രാജിത എന്നിവര്‍ പ്രസംഗിച്ചു.

പ്രതിരോധ കൂട്ടായ്മ നടത്തി

കോട്ടയം: ഗാര്‍ഹികാതിക്രമ പ്രതിരോധ സമിതി ജില്ലാ കമ്മിറ്റിയുടെ നേതൃത്വത്തില്‍ തിരുനക്കര ഗാന്ധിപ്രതിമയ്ക്കു സമീപം പന്തംകൊളുത്തിയും മെഴുകുതിരികള്‍ തെളിച്ചും പ്രതിരോധ കൂട്ടായ്മ നടത്തി. ഗാര്‍ഹികാതിക്രമങ്ങള്‍ ഒറ്റക്കെട്ടായി പ്രതിരോധിക്കുക എന്ന മുദ്രാവാക്യമുയര്‍ത്തിയാണ് കൂട്ടായ്മ നടത്തിയത്. സമിതിയുടെ സംസ്ഥാന കമ്മിറ്റി അംഗങ്ങളായ ഗിരിജ പാര്‍വതി, ത്രേസ്യാമ്മ മാത്യു, സ്മിത കൃഷ്ണന്‍കുട്ടി, ജില്ലാ കണ്‍വീനര്‍ പി.കെ. ജയശ്രീ, ഡോ. കൊച്ചുറാണി ഏബ്രഹാം, ഡോ. തെരേസ ജോസഫ്, സിഎസ്ഐ കാണക്കാരി ലോ കോളജ് പ്രിന്‍സിപ്പല്‍ ഡോ. ജോയ്‌സി കരിങ്ങാട്ടില്‍, സ്മിത കൃഷ്ണന്‍കുട്ടി, സുബൈദ ലത്തീഫ്, വനിതാ സാഹീതി ജില്ലാ സെക്രട്ടറി പി.കെ. ജലജാ മണി എന്നിവര്‍ പ്രസംഗിച്ചു.

സെന്‍റ് ഫിലോമിനാസിൽ ‘മെറിറ്റ-2025’

ആര്‍പ്പൂക്കര: സെന്‍റ് ഫിലോമിനാസ് ഗേള്‍സ് ഹൈസ്‌കൂളില്‍ ‘മെറിറ്റ-2025’ നടത്തി. മന്ത്രി വി.എന്‍. വാസവന്‍ ഉദ്ഘാടനം നിര്‍വഹിച്ചു. കണ്‍വീനര്‍ സിസ്റ്റര്‍ റ്റെസി ജോര്‍ജ്, ഹെസ്മിസ്ട്രസ് സിസ്റ്റര്‍ മേരി മണിയാപറമ്പില്‍ സിഎംസി, ആര്‍പ്പൂക്കര പഞ്ചായത്ത് പ്രസിഡന്‍റ് ദീപ ജോസ്, വാര്‍ഡ് മെംബര്‍ റോയ് പുതുശേരി, സിഎംസി ചങ്ങനാശേരി ഹോളി ക്വീന്‍സ് പ്രൊവിന്‍സ് വിദ്യാഭ്യാസ കൗണ്‍സിലര്‍ സിസ്റ്റര്‍ ആനി തോമസ് സിഎംസി, അന്നമ്മ മാണി, സിസ്റ്റർ കുസുമം റോസ് സിഎംസി, പി.സി. മനോജ് എന്നിവര്‍ പ്രസംഗിച്ചു.

കെപിസിസി വിചാർ വിഭാഗ് പ്രതിഷേധ ധർണ നടത്തി

കോട്ടയം: ജനാധിപത്യം സംരക്ഷിക്കാൻ എല്ലാവർക്കും അണിചേരാമെന്ന് ടോമി കല്ലാനി. കെപിസിസി വിചാർ വിഭാഗ് ജില്ലാ കമ്മിറ്റിയുടെ ആഭിമുഖ്യത്തിൽ കോട്ടയം ഗാന്ധി സ്ക്വയറിൽ നടത്തിയ പ്രതിഷേധ ധർണ ഉദ്ഘാടനം ചെയ്യുകയായിരുന്നു അദ്ദേഹം. ജില്ലാ പ്രസിഡന്‍റ് പ്രഫ. ഡോ.കെ.എം. ബെന്നി അധ്യക്ഷത വഹിച്ചു. പി.എച്ച്. നൗഷാദ്, ബേബിച്ചൻ തിടനാട്, ടോമി പൂവക്കോട്, രാജൻ ചൂരക്കുളം, മാത്തച്ചൻ പാമ്പാടി, ജോസ് ജോസഫ്, ജോൺസൺ എം.എം., ഡോ. ബിനു സചിവോത്തമപുരം, ഡോ. ഷാജി ജോസഫ്, പ്രഫ. തോമസ് ഏബ്രഹാം എന്നിവർ പ്രസംഗിച്ചു.

മോഷണ ശ്രമത്തിനിടെ പിടിയില്‍

കോട്ടയം: മോഷണ ശ്രമത്തിനിടെ മധ്യവയസ്കൻ പിടിയില്‍. പാലക്കാട് ഒലവക്കോട് കൈലാസ്പറമ്പില്‍ ബാലൻ (59)ആണ് കോട്ടയം വെസ്റ്റ് പോലീസിന്‍റെ പിടിയിലായത്. ഇന്നലെ പുലർച്ചെ തിരുവാതുക്കല്‍ ജംഗ്ഷനില്‍ ആനന്ദമന്ദിരം ബേക്കേഴ്‌സ് എന്ന സ്ഥാപനത്തിന്‍റെ പുറകുവശത്തെ കതകിന്‍റെ പൂട്ട് പൊളിച്ച് മോഷണശ്രമം നടത്തുന്പോഴാണ് ഇയാൽ പിടിയിലായത്. പ്രതിയെ കോടതിയില്‍ ഹാജരാക്കി.

കർഷകർ രാജ്യത്തിന്‍റെ നട്ടെല്ല്: ചാണ്ടി ഉമ്മൻ എംഎൽഎ

കൂരോപ്പട: കർഷകർ രാജ്യത്തിന്‍റെ നട്ടെല്ലാണെന്ന് ചാണ്ടി ഉമ്മൻ എംഎൽഎ. കൂരോപ്പട പഞ്ചായത്തിന്‍റെ കർഷകദിനാചരണം ഉദ്ഘാടനം ചെയ്യുകയായിരുന്നു ചാണ്ടി ഉമ്മൻ. സമ്മേളനത്തിൽ അമ്പിളി മാത്യു അധ്യക്ഷത വഹിച്ചു. പഞ്ചായത്തിലെ തെരഞ്ഞെടുത്ത 12 മികച്ച കർഷകരെ ചടങ്ങിൽ ആദരിച്ചു. പഞ്ചായത്ത് വൈസ് പ്രസിഡന്‍റ് ഗോപി ഉല്ലാസ്, ബ്ലോക്ക്-ഗ്രാമ പഞ്ചായത്ത് അംഗങ്ങളായ ടി.എം. ജോർജ്, ആശ ബിനു, അനിൽ കൂരോപ്പട, ഷീല ചെറിയാൻ, സന്ധ്യ സുരേഷ്, കുഞ്ഞൂഞ്ഞമ്മ കുര്യൻ, മഞ്ജു കൃഷ്ണകുമാർ, ദീപ്തി ദിലീപ്, ബാബു വട്ടുകുന്നേൽ, കൃഷി അസിസ്റ്റന്‍റ് കെ.കെ. അശോകൻ, എസ്ബിഐ മാനേജർ സനൽ ഫിലിപ്പ് ചെറിയാൻ തുടങ്ങിയവർ പ്രസംഗിച്ചു. കാർഷിക സെമിനാറിന് ഡോ. തോമസ് മാത്യു നേതൃത്വം നൽകി. കർഷകദിനാഘോഷം അയ്മനം: പഞ്ചായത്തിന്‍റെയും കൃഷിഭവന്‍റെയും സംയുക്താഭിമുഖത്തിൽ നടന്ന കർഷകദിനാചരണം മന്ത്രി വി.എൻ. വാസവൻ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് വിജി രാജേഷ് അധ്യക്ഷത വഹിച്ചു. പഞ്ചായത്തിലെ മികച്ച കർഷകരെ മന്ത്രി പൊന്നാടയണിയിച്ച് ആദരിച്ചു. മുതിർന്ന കർഷകൻ ജോസഫ് പരുത്തിക്കാട്ടിൽ, മികച്ച നെൽ കർഷകൻ ജയിംസ് കെ.സി. കളമ്പുകാട്ടുശേരി, മികച്ച കേരകർഷകൻ മനോജ് പാഞ്ചേരിൽ, മികച്ച പച്ചക്കറി കർഷകൻ ഷൈജു എം.വി. മുണ്ടുചിറയിൽ, മികച്ച സമ്മിശ്ര കർഷകൻ പി.യു. ജോൺ പരുത്തിക്കാട്ടിൽ, മികച്ച വനിതാ കർഷക പി.കെ. ജയശ്രീ ചന്ദ്രത്തിൽകുന്നേൽ, പട്ടികജാതി കർഷകൻ കൊച്ചുമോൻ ഇല്ലിത്തറ, മികച്ച വിദ്യാർഥി കർഷക ഹന്നാമരിയ അജിത് മുപ്പാത്തിയിൽ, മികച്ച ജൈവകർഷകൻ മാത്യുസ് കുരുവിള കോട്ടപ്പറമ്പിൽ, മികച്ച ക്ഷീരകർഷകൻ ജോൺ ജോസഫ് കളമ്പുകാട്ടുശേരി, മികച്ച മത്സ്യ കർഷകൻ കുര്യൻ മൂന്നുമൂലയിൽ, മികച്ച പുഷ്പ കൃഷി കർഷകൻ ഐപ്പ് ജോൺ മണലേൽ, മികച്ച കർഷകത്തൊഴിലാളി ഏലിയാമ്മ മാർക്കോസ് പന്നക്കൽച്ചിറ, മികച്ച പാടശേഖര സെക്രട്ടറി സരളപ്പൻ തെക്കേകോൺ - വിരുത്തിക്കോട് പാടശേഖരം, മികച്ച പാടശേഖരസമിതി - മാഞ്ചിറമുട്ട് പാടശേഖര നെല്ലുത്പാദക സമിതി എന്നിവരെയാണ് മന്ത്രി ആദരിച്ചത്. വൈസ് പ്രസിഡന്‍റ് മനോജ് കരീമഠം, കൃഷി ഓഫീസർ രമ്യരാജ് തുടങ്ങിയവർ പ്രസംഗിച്ചു. പാമ്പാടി: പഞ്ചായത്തിന്‍റെയും കൃഷിഭവന്‍റെയും ആഭിമുഖ്യത്തിൽ കർഷകദിനാചരണവും മികച്ച കർഷക-കർഷകത്തൊഴിലാളി ആദരവും അവാർഡ് വിതരണവും നടത്തി. പഞ്ചായത്ത്‌ പ്രസിഡന്‍റ് ഡാലി റോയിയുടെ അധ്യക്ഷതയിൽ ചാണ്ടി ഉമ്മൻ എംഎൽഎ ഉദ്ഘാടനം ചെയ്തു. ജില്ലാ കാർഷിക വികസനസമിതി അംഗം രാധാകൃഷ്ണൻ മുതിർന്ന കർഷകൻ ഗീവർഗീസിനെ ആദരിച്ചു. ജില്ലാ പഞ്ചായത്തംഗം രാധ വി. നായർ, കൃഷി ഡെപ്യൂട്ടി ഡയറക്ടർ പി.ജി. സീന, കൃഷി അസിസ്റ്റന്‍റ് ഡയറക്ടർ ട്രീസ, പഞ്ചായത്ത്‌ മെംബർമാർ, സഹകരണ ബാങ്ക് അംഗങ്ങൾ, കാർഷിക വികസനസമിതി അംഗങ്ങൾ തുടങ്ങിയവർ പ്രസംഗിച്ചു. അകലക്കുന്നം: പഞ്ചായത്തിന്‍റെയും കാര്‍ഷികവികസന സമിതിയുടെയും കൃഷി ഭവന്‍റെയും സംയുക്താഭിമുഖ്യത്തില്‍ കര്‍ഷക ദിനം വിപുലമായി ആചരിച്ചു. ദിനാചരണത്തിന്‍റെ ഭാഗമായി കാര്‍ഷിക സെമിനാറും വിളംബര ജാഥയും മികച്ച കര്‍ഷകരെ ആദരിക്കല്‍ ചടങ്ങും നടത്തി. അകലക്കുന്നം പഞ്ചായത്ത് ഹാളില്‍ നടന്ന പൊതുസമ്മേളനം ചാണ്ടി ഉമ്മന്‍ എംഎല്‍എ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് സിന്ധു അനില്‍കുമാര്‍ അധ്യക്ഷയായിരുന്നു. പാമ്പാടി ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയി മണിയങ്ങാട്ട് മുഖ്യപ്രഭാഷണം നടത്തി. ബ്ലോക്ക് കൃഷി അസിസ്റ്റന്‍റ് ഡയറക്ടര്‍ ട്രീസ സെലിന്‍ ജോസഫ് പദ്ധതി വിശദീകരണം നടത്തി. "കാര്‍ഷിക സംരംഭകത്വം" എന്ന വിഷയത്തില്‍ അകലക്കുന്നം അഗ്രോ പ്രോഡ്യൂസ് കമ്പനി സിഇഒ ടോം ജേക്കബ് ആലയ്ക്കല്‍ ക്ലാസെടുത്തു. പഞ്ചായത്തിലെ മികച്ച കര്‍ഷകരായി തെരഞ്ഞെടുക്കപ്പെട്ട മത്തായി ജോസഫ് പറമ്പകത്ത്, ജയിംസ് എം. ജേക്കബ് മാമ്പുഴയ്ക്കല്‍, തങ്കപ്പന്‍പിള്ള വാഴക്കാലായില്‍, അരവിന്ദാക്ഷന്‍ മരുതനാടിയില്‍, സോളി ടോമി ഈരൂരിക്കല്‍, ആര്‍.എന്‍. രാജു രണ്ടുപ്ലാക്കല്‍, ബിന്ദുമോള്‍ ജോസഫ് വാവലുമാക്കല്‍, അനി കെ.കെ. കവലയ്ക്കല്‍ എന്നീ കര്‍ഷകരെ പൊന്നാടയണിയിച്ച് ആദരിച്ചു. ജില്ലാ പഞ്ചായത്ത് മെംബര്‍ ജോസ്‌മോന്‍ മുണ്ടയ്ക്കല്‍,അകലക്കുന്നം പഞ്ചായത്ത് വൈസ് പ്രസിഡന്‍റ് മാത്തുക്കുട്ടി ഞായര്‍കുളം, ശ്രീലത ജയന്‍, ജേക്കബ് തോമസ്, ജാന്‍സി ബാബു തുടങ്ങിയവര്‍ പ്രസംഗിച്ചു. മണര്‍കാട്: മണര്‍കാട് പഞ്ചായത്തിന്‍റെയും കൃഷിഭവന്‍റെയും ആഭിമുഖ്യത്തില്‍ നടത്തിയ കര്‍ഷകദിനം ചാണ്ടി ഉമ്മന്‍ എംഎല്‍എ ഉദ്ഘാടനം ചെയ്തു. പ്രസിഡന്‍റ് കെ.സി. ബിജു അധ്യക്ഷത വഹിച്ചു. ജില്ലാ പഞ്ചായത്തംഗം റെജി എം. പീലിപ്പോസ്, വൈസ് പ്രസിഡന്‍റ് ജെസി ജോണ്‍, കൃഷിവകുപ്പ് ഡെപ്യൂട്ടി ഡയറക്ടര്‍ പി.ജി. സീന, കൃഷി ഓഫീസര്‍ എ.ആര്‍. ഗൗരി, പഞ്ചായത്തംഗങ്ങളായ ജിജി മണര്‍കാട്, രാധാ സുരേഷ്, കൃഷി അസിസ്റ്റന്‍റ് പി.എസ്. സന്ധ്യമോള്‍ എന്നിവര്‍ പ്രസംഗിച്ചു. മികച്ച കര്‍ഷകരെ ചാണ്ടി ഉമ്മന്‍ എംഎല്‍എ ആദരിച്ചു. കൃഷിഭവനിലെ പുതുക്കി പണിത ഓഡിറ്റോറിയത്തിന്‍റെ ഉദ്ഘാടനം പഞ്ചായത്ത് പ്രസിഡന്‍റ് കെ.സി. ബിജു നിര്‍വഹിച്ചു. കോട്ടയം: കര്‍ഷകദിനത്തോടനുബന്ധിച്ച് കോട്ടയം സോഷ്യല്‍ സര്‍വീസ് സൊസൈറ്റിയുടെ നേതൃത്വത്തില്‍ കര്‍ഷകദിനാചരണവും കാര്‍ഷിക സെമിനാറും സംഘടിപ്പിച്ചു. അതിരമ്പുഴ പഞ്ചായത്ത് പ്രസിഡന്‍റ് ജോസ് ജോസഫ് അമ്പലക്കുളം ഉദ്ഘാടനം ചെയ്തു. കോട്ടയം മുനിസിപ്പല്‍ ചെയര്‍പേഴ്സണ്‍ ബിന്‍സി സെബാസ്റ്റ്യന്‍ അധ്യക്ഷത വഹിച്ചു. ഏറ്റുമാനൂര്‍ മുനിസിപ്പല്‍ ചെയര്‍പേഴ്‌സണ്‍ ലൗലി ജോര്‍ജ്, ഡയറക്ടര്‍ ഫാ. സുനില്‍ പെരുമാനൂര്‍, സിജോ തോമസ് എന്നിവര്‍ പ്രസംഗിച്ചു. കാര്‍ഷിക സെമിനാറിന് ഡോ.എന്‍.കെ. ശശിധരന്‍ നേതൃത്വം നല്‍കി. മികച്ച ജൈവകര്‍ഷകനെ ആദരിച്ചു അകലക്കുന്നം: പഞ്ചായത്തിലെ മികച്ച ജൈവകര്‍ഷകനുള്ള അവാര്‍ഡ് അരവിന്ദാക്ഷന്‍ മരുതനാടിക്ക് ലഭിച്ചു. പഞ്ചായത്തില്‍ നടന്ന കര്‍ഷകദിനാചരണത്തിന്‍റെ ഭാഗമായാണ് ജൈവകര്‍ഷകനെ ആദരിച്ചത്. പഞ്ചായത്ത് ഹാളില്‍ നടന്ന ചടങ്ങില്‍ ചാണ്ടി ഉമ്മന്‍ എംഎല്‍എയില്‍നിന്നും അവാര്‍ഡ് എറ്റുവാങ്ങി. മികച്ച ക്ഷീരകര്‍ഷകന്‍ കൂടിയായ അരവിന്ദാക്ഷന്‍ പശുക്കളെയും ആടുകളെയും വളര്‍ത്തുന്നുണ്ട്. കന്നുകാലികളുടെ ചാണകം മാത്രമാണ് വീടിനോടു ചേര്‍ന്നുള്ള സ്ഥലത്ത് കൃഷിക്ക് വളമായി ഉപയോഗിക്കുന്നത്. കൊറോണക്കാലത്താണ് അരവിന്ദാക്ഷന്‍ കൃഷിയിലേക്കും കന്നുകാലി വളര്‍ത്തലിലേക്കും ഇറങ്ങിത്തിരിച്ചത്. പത്ര ഏജന്‍റ് കൂടിയായ അരവിന്ദാക്ഷന്‍ ദീപിക ഉൾപ്പെടെയുള്ള പ്രമുഖ പത്രങ്ങളുടെ വിതരണക്കാരൻകൂടിയാണ്. ഭാര്യ ഗീതയും മക്കള്‍ സൂര്യയും ആര്യയും പത്രവിതരണത്തിലും കൃഷിയിലും കന്നുകാലി വളര്‍ത്തലിലും അരവിന്ദാക്ഷനെ സഹായിക്കുന്നു. നെല്ലിക്കുന്ന് വായനശാലയുടെ ലൈബ്രേറിയന്‍കൂടിയാണ് അരവിന്ദാക്ഷന്‍.

കോട്ടയത്ത് തെരുവുനായ്ക്കളുടെ വിളയാട്ടം

കോട്ടയം: കോട്ടയം നഗരത്തില്‍ തെരുവുനായ്ക്കളുടെ വിളയാട്ടം. നായയുടെ കടിയേല്‍ക്കാതെ നഗരവാസികളും സ്‌കൂള്‍ കൂട്ടികള്‍ ഉള്‍പ്പെടെയുള്ള യാത്രക്കാരും വ്യാപാരികളും തലനാഴിരയ്ക്കാണ് രക്ഷപ്പെടുന്നത്. ബേക്കര്‍ ജംഗ്ഷന്‍, ശാസ്ത്രി റോഡ്, ചന്ത, കെഎസ്ആര്‍ടിസി ബസ്‌സ്റ്റാൻഡ് പരിസരം, തിരുനക്കര, നാഗന്പടം ബസ്‌സ്റ്റാൻഡ്, റെയിൽവേ സ്റ്റേഷൻ എന്നിവിടങ്ങളാണ് നായ്ക്കളുടെ പ്രധാന വിഹാരകേന്ദ്രങ്ങള്‍. നൂറുകണക്കിനു യാത്രക്കാര്‍ ഉപയോഗിക്കുന്ന ശാസ്ത്രി റോഡിലെ ബസ് കാത്തിരിപ്പു കേന്ദ്രം തെരുവുനായ്ക്കള്‍ കൈയേറിയിരിക്കുകയാണ്. കോഴഞ്ചേരി, കുമളി, പാലാ തുടങ്ങി വിവിധ ഇടങ്ങളിലേക്കുള്ള ബസുകള്‍ കാത്തുനില്‍ക്കുന്ന നിരവധി യാത്രക്കാരാണ് ഇതുമൂലം പൊറുതിമുട്ടിയിരിക്കുന്നത്. കാത്തിരിപ്പു കേന്ദ്രത്തിലേക്ക് കാലെടുത്തുവച്ചാല്‍ നായ കടിക്കുമെന്നതാണ് സ്ഥിതി. ഇരിപ്പിടങ്ങളില്‍ ഇരിക്കാനായി ഒരുങ്ങിയാല്‍ നായ്ക്കൾ ഓടി അടുത്തേക്കെത്തും, സൂക്ഷിച്ചില്ലെങ്കില്‍ കടി ഉറപ്പാണ്. സംഘമായി എത്തുന്നതിനാല്‍ ആട്ടിയോടിക്കുക പ്രയാസം. ആക്രമണസ്വഭാവം പുലര്‍ത്തുന്ന നായ്ക്കൂട്ടം മുറുമുറുത്താണ് യാത്രക്കാരുടെ നേരേ പാഞ്ഞടുക്കുന്നത്. രാത്രികാലങ്ങളില്‍ യാത്രക്കാര്‍ ഭീതിയോടെയാണ് ഇവിടെ നില്‍ക്കുന്നത്. വെളിച്ചക്കുറവുമൂലം നായകള്‍ അടുത്തെത്തിയാല്‍ മാത്രമേ അറിയാന്‍ സാധിക്കൂ. ഇരുട്ടത്ത് പതുങ്ങിക്കിടക്കുന്ന നായക്കൂട്ടം ആളുകളെത്തിയാല്‍ കുരച്ചുചാടുകയാണ്. സ്‌കൂള്‍ കോളജ് വിദ്യാര്‍ഥികള്‍ നായ്ക്കള്‍ പുറകെ എത്തുമ്പോള്‍ ഇറങ്ങി ഓടുകയാണ്. നഗരസഭയുടെ മൂക്കിന്‍തുമ്പത്തെ ബസ് സ്റ്റോപ്പിലെ സ്ഥിതിവിശേഷമാണിത്. കാറിൽ എസിയുടെ തണുപ്പിൽ സുഖമായി യാത്ര ചെയ്യുന്ന നഗര ഭരണാധികാരികള്‍ നായപ്രശ്‌നം കണ്ടില്ലെന്നു നടിക്കുകയാണ്. തെരുവുനായ്ക്കളെ പിടികൂടുന്നതിനായി യാതൊരു നടപടിയും നഗരസഭയുടെ ഭാഗത്തുനിന്നുണ്ടാകുന്നില്ലെന്ന വ്യാപക പരാതിയുണ്ട്. തെരുവുനായശല്യം പരിഹരിക്കാന്‍ നഗരസഭ നടപടിയെടുക്കാത്തതില്‍ വ്യാപാരികളും പ്രതിഷേധത്തിലാണ്. അതേസമയം, കോടിമത എബിസി സെന്‍ററില്‍ നായ്ക്കളെ വന്ധ്യംകരിച്ച് നായ്ക്കളുടെ ശല്യം ഒഴിവാക്കാനുള്ള ജില്ലാ ഭരണ കൂടത്തിന്‍റെ പദ്ധതിയില്‍ നഗരസഭയും പങ്കാളിയാണെന്നും മുനിസിപ്പാലിറ്റിയിലെ 52 വാര്‍ഡുകളില്‍നിന്നും നായ്ക്കളെ പിടികൂടി വന്ധ്യംകരിക്കുന്ന നടപടിക്കു മാത്രമേ നഗരസഭയ്ക്ക് അധികാരമുള്ളൂവെന്നും ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍ പറഞ്ഞു.

ഓണസദ്യ വേണോ..? കുടുംബശ്രീ വീട്ടിലെത്തിക്കും

കോട്ടയം: ഇക്കൊല്ലം ഓണസദ്യ കുടുംബശ്രീ വീടുകളിലെത്തിച്ചുതരും. തൂശനില, കുത്തരിച്ചോറ്, അവിയല്‍, സാമ്പാര്‍, കാളന്‍, തോരന്‍, അച്ചാറുകള്‍, പച്ചടി, കിച്ചടി, ഉപ്പേരി, പപ്പടം, പായസം എന്നിങ്ങനെ 17 വിഭവങ്ങള്‍ ഉത്രാടത്തലേന്നുവരെ വീട്ടിലെത്തിക്കും. ജില്ലയില്‍ എവിടെനിന്ന് വേണമെങ്കിലും ഓണസദ്യ ഓര്‍ഡര്‍ ചെയ്യാം. ഇതിനായി കുടുംബശ്രീ 11 ബ്ലോക്കുകള്‍ കേന്ദ്രീകരിച്ച് കോള്‍ സെന്‍ററുകള്‍ പ്രവര്‍ത്തനം തുടങ്ങി. കോള്‍ സെന്‍ററുകളുടെ പ്രവര്‍ത്തനം എംഇസി (മൈക്രോ എന്‍റര്‍പ്രൈസ് കണ്‍സള്‍ട്ടന്‍റ്) ഗ്രൂപ്പുകളുടെ മേല്‍നോട്ടത്തിലാണ്. ഈ മാസം 20 മുതല്‍ ഓര്‍ഡറുകള്‍ സ്വീകരിച്ചു തുടങ്ങും. ഓര്‍ഡറുകള്‍ നല്‍കുന്നതിന് മൂന്നുദിവസം മുന്‍പ് ബുക്ക് ചെയ്യണം. കുടുംബശ്രീയുടെ കഫേ യൂണിറ്റുകള്‍ വഴിയാണ് സദ്യകള്‍ എത്തിച്ചുനല്‍കുന്നത്. കുറഞ്ഞത് അഞ്ച് ഊണെങ്കിലും ബുക്ക് ചെയ്താലേ ഈ സേവനം ലഭിക്കൂ. ആവശ്യക്കാരുടെ താത്പര്യമനുസരിച്ച് വിഭവങ്ങള്‍ തെരഞ്ഞെടുക്കാനും അവസരമുണ്ട്. ഇതിനനുസരിച്ച് നിരക്കില്‍ വ്യത്യാസം വരും. 26 കൂട്ടം വിഭവങ്ങളുമായി കുറവിലങ്ങാട് കുടുംബശ്രീ പ്രീമിയം കഫെ പ്രത്യേകം ഓണസദ്യ ഒരുക്കുന്നുണ്ട്. ബുക്കിംഗിന് വൈക്കം: 9656262097, 9946 188523. കടുത്തുരുത്തി: 9645099503, 9562853798. ഏറ്റുമാനൂര്‍: 9074634161. നീണ്ടൂര്‍: 8281291556, 9746694875. ഉഴവൂര്‍: 9744112624,9633738319. മാഞ്ഞൂര്‍: 9496723589, 9061512638. ളാലം: 9745963125, 9544723468. ഈരാറ്റുപേട്ട: 9074121650, 8910584668. കാഞ്ഞിരപ്പള്ളി: 8921418324, 9633704092. വാഴൂര്‍: 9847846797, 8943886245, ചിറക്കടവ്: 9544950850, 9544033498. പാമ്പാടി: 8086343520, 7034621159. മാടപ്പള്ളി: 8547784509, 9947231905, കോട്ടയം സൗത്ത്: 7558926773, 9497095036.

അധ്വാനം കര്‍ഷകന്, നേട്ടം കച്ചവടക്കാരന്

കോട്ടയം: റബറിനും തെങ്ങിനും ബദലായി റംബുട്ടാന്‍ കൃഷി വ്യാപകമായതോടെ വിലസ്ഥിരതയില്‍ ആശങ്ക. ഇക്കൊല്ലം മോശമല്ലാത്ത വിളവു ലഭിച്ചതും സീസണില്‍ ഒരുമിച്ചു പഴുത്തു പാകമായതും വില ഇടിയാന്‍ കാരണമായി. മഴ കനത്തതോടെ ഈ മാസത്തിന്‍റെ തുടക്കത്തില്‍ ഏറെ മരങ്ങളിലും റംബുട്ടാന്‍ പഴുത്തു പാകമായി. മരം പൊതിയുന്ന വല കൊത്തിക്കീറി പക്ഷികള്‍ അകത്തുകടന്ന് കായ തിന്നാല്‍ തുടങ്ങിയതോടെ വേഗത്തില്‍ വിളവെടുപ്പ് നടത്താന്‍ കര്‍ഷകര്‍ നിര്‍ബന്ധിതരായി. സംസ്ഥാനത്ത് ഫലം തന്നുതുടങ്ങിയ അഞ്ചു ലക്ഷത്തോളം റംബുട്ടാന്‍ മരങ്ങളുള്ളതായാണ് കണക്ക്. ഇവയില്‍നിന്ന് ഇരുപതിനായിരം ടണ്‍ മുതല്‍ മുപ്പതിനായിരം ടണ്‍ വരെയാണ് വാര്‍ഷിക ഉത്പാദനം. റംബുട്ടാന്‍ സംഭരിക്കാന്‍ സര്‍ക്കാര്‍, സഹകര ഏജന്‍സികളോ ഇല്ലാത്തതും പ്രത്യേകം മാര്‍ക്കറ്റ് സംവിധാനമില്ലാത്തതുമാണ് പ്രധാന പരിമിതി. നിലവില്‍ നാട്ടിന്‍പുറങ്ങളിലെത്തി ഇടനിലക്കാരും ചില്ലറ വ്യാപാരികളും തുച്ഛമായ വില നല്‍കി കര്‍ഷകരെ ചൂഷണം ചെയ്യുകയാണ്. മരങ്ങളില്‍ വല പൊതിയാന്‍ വൈദഗ്ധ്യം വ്യാപാരികളുടെ ജോലിക്കാര്‍ക്കു മാത്രമേയുള്ളൂ. അതിനാല്‍ ഇത്തരം വ്യാപാരികള്‍ക്ക് നിസാര വിലയ്ക്ക് ഫലം നല്‍കാന്‍ നിര്‍ബന്ധിതരാകുന്നു. കിലോയ്ക്ക് 80-100 രൂപയ്ക്ക് മാസങ്ങള്‍ക്കു മുന്പ് കച്ചവടം ഉറപ്പിച്ച് നിസാര തുക അഡ്വാന്‍സ് നല്‍കിയശേഷം 180 രൂപയ്ക്ക് മറിച്ചുവില്‍ക്കുന്ന ഇടനിലക്കാരും കച്ചവടക്കാരുമുണ്ട്. സംസ്ഥാനത്ത് നിലവില്‍ 200 കോടി രൂപയുടെ റംബുട്ടാന്‍ വിളവുള്ളതാ യിട്ടാണ്് കണക്ക്. വര്‍ഷത്തില്‍ ഒരു സീസണില്‍ മാത്രം വിളവു ലഭിക്കുന്ന സാഹചര്യത്തില്‍ കിലോയ്ക്ക് കുറഞ്ഞത് 150 രൂപ വില ലഭിച്ചാല്‍ മാത്രമേ കര്‍ഷകര്‍ക്ക് നേട്ടമുള്ളൂ. കേരളത്തിന് പുറത്ത് വിദേശങ്ങളിലും വടക്കേ ഇന്ത്യന്‍ മാര്‍ക്കറ്റിലും റംബുട്ടാന് ആവശ്യക്കാരേറെയുണ്ട്. ചെന്നൈ, ബംഗളൂരു എന്നിവിടങ്ങളിലും വലിയ ഡിമാന്‍ഡുണ്ട്. റംബുട്ടാന്‍ പഴങ്ങളുടെ മൂല്യവര്‍ധനാ സാധ്യതകളും സംസ്ഥാനം പ്രയോജനപ്പെടുത്തുന്നില്ല.

വിപണിയില്ല; കൊക്കോ കര്‍ഷകര്‍ ദുരിതത്തില്‍

കോട്ടയം: കൊക്കോ കൃഷി ചെയ്ത കര്‍ഷകര്‍ വില്‍പന നടത്താനാകാതെ ബുദ്ധിമുട്ടുന്നു. വിപണിയില്‍നിന്നു കൊക്കോക്കുരു നേരിട്ടു സംഭരിച്ചുകൊണ്ടിരുന്ന കാംകോയും കാഡ്ബറീസും ഇപ്പോള്‍ സംഭരണം നിര്‍ത്തിവച്ചിരിക്കുകയാണ്. നാട്ടിന്‍പുറങ്ങളിലെ മലഞ്ചരക്കു കടകളും കര്‍ഷകരില്‍നിന്നു കുരു വാങ്ങുന്നില്ല. തുടര്‍ച്ചയായ മഴമൂലം ഡയറുകളിലാണ് കര്‍ഷകര്‍ കുരു ഉണങ്ങുന്നത്. അന്താരാഷ്‌ട്ര വിപണിയില്‍ കൊക്കോക്കുരുവിന് 600 രൂപയ്ക്കു മുകളിലാണ് വില. പച്ച കൊക്കോ സംഭരിക്കുന്ന ചില കേന്ദ്രങ്ങള്‍ പ്രവര്‍ത്തിക്കുന്നുണ്ടെങ്കിലും ഇത്തരത്തില്‍ വില്‍പന നടത്തുന്നത് കര്‍ഷകര്‍ക്ക് വന്‍ നഷ്ടമാണ് ഉണ്ടാക്കുന്നത്. പച്ചക്കുരുവിന് 80 രൂപയില്‍ താഴെ മാത്രമാണ് കര്‍ഷകര്‍ക്കു ലഭിക്കുന്നത്. ഉണങ്ങിയതിന് 360 രൂപ വരെ കര്‍ഷകര്‍ക്ക് ലഭിക്കും. കഴിഞ്ഞ വര്‍ഷം മുതലാണ് കൊക്കോയ്ക്ക് വില വര്‍ധിക്കാന്‍ തുടങ്ങിയത്. 700 രൂപയ്ക്കു മുകളില്‍ വരെ വില ഉയര്‍ന്നിരുന്നു. ഇതോടെ ജില്ലയില്‍ മാത്രം 5,000 ഏക്കറിനു മുകളില്‍ പുതുതായി കൊക്കോ കൃഷി ആരംഭിച്ചിട്ടുണ്ട്. ഉയര്‍ന്ന വില കൊടുത്തു തൈകള്‍ വാങ്ങി കൃഷി ചെയ്ത കര്‍ഷകരുടെ ഉത്പന്നങ്ങള്‍ കൂടി വരുംനാളുകളില്‍ വിപണിയില്‍ എത്തുന്പോള്‍ പ്രതിസന്ധി രൂക്ഷമാകും. ഇടനിലക്കാരുടെ ഇടപെടലാണ് കമ്പനികളെ സംഭരണത്തില്‍നിന്നു പിന്നോട്ട് മാറ്റിയതെന്ന് ആക്ഷേപമുണ്ട്. ആന്ധ്രപ്രദേശ്, കര്‍ണാടക തുടങ്ങി സംസ്ഥാനങ്ങളില്‍നിന്ന് ഇടനിലക്കാര്‍ വഴിയാണ് സംഭരണം മുന്‍കാലങ്ങളില്‍ നടന്നിരുന്നത്. ഇവരുടെ ഇടപെടലാണ് ഇപ്പോഴത്തെ പ്രതിസന്ധിക്കു കാരണം. ഈ വിഷയത്തില്‍ സര്‍ക്കാര്‍ ഇടപെടല്‍ അടിയന്തരമായി ഉണ്ടാകണമെന്ന ആവശ്യം ശക്തമാണ്.

അങ്കണവാടികളില്‍ ഇതുവരെ ബിരിയാണി വേവായിട്ടില്ല

കോട്ടയം: അങ്കണവാടി കുട്ടികള്‍ക്ക് മന്ത്രി വീണാ ജോര്‍ജ് നല്‍കിയ ബിരിയാണി ഉറപ്പ് നടപ്പായില്ല. പ്രവേശനോത്സവ ദിവസം ചില അങ്കണവാടികളില്‍ മുട്ട ബിരിയാണി വിളമ്പിയതല്ലാതെ ബിരിയാണിച്ചെമ്പു പോലും വാങ്ങാനായിട്ടില്ല. ഒരു കുട്ടിക്ക് അഞ്ചു രൂപയാണ് ഭക്ഷണത്തിന് സര്‍ക്കാര്‍ വിഹിതം. ഒരു മുട്ടയ്ക്ക് ഏഴു രൂപയും ഒരു കിലോ ബിരിയാണി അരിക്ക് 120 രൂപയുമുള്ളപ്പോള്‍ ഒരു കുട്ടിക്കും ബിരിയാണി നല്‍കാനാവില്ല. അധിക ഫണ്ട് ലഭിക്കാതെ ആയയുടെയും അധ്യാപികയുടെയും വേതനത്തില്‍നിന്ന് ബിരിയാണി നല്‍കുക അസാധ്യം. മാത്രവുമല്ല ഏറെ ആയമാര്‍ക്കും ബിരിയാണി പാചകം വശവുമില്ല. മുട്ട ബിരിയാണി, പുലാവ് ഉള്‍പ്പെടെയാണ് മെനു പരിഷ്‌കരിച്ചിരുന്നത്. പഞ്ചസാരയുടെയും ഉപ്പിന്‍റെയും അളവ് കുറച്ച് പോഷക മാനദണ്ഡ പ്രകാരം ഊര്‍ജവും പ്രോട്ടീനും ഉള്‍പ്പെടുത്തി രുചികരമാക്കിയാണ് ഭക്ഷണ മെനു പരിഷ്‌കരിച്ചത്. ഇതു കൂടാതെ പാലും മുട്ടയും മുളപ്പിച്ച പയറും ന്യൂട്രിലഡുവും ഒക്കെ മെനുവിലുട്ടുണ്ട്. മെനുവിനെക്കുറിച്ചും ഉള്‍പ്പെടുത്തേണ്ട പോഷക മൂല്യത്തെക്കുറിച്ചുമൊക്കെ ജീവനക്കാര്‍ക്ക് ബോധവത്കരണം നല്‍കിയ ശേഷം ഒരുമാസത്തിനകം പുതിയ മെനു നടപ്പാക്കുമെന്നായിരുന്ന വനിതാ ശിശുവികസന വകുപ്പിന്‍റെ പ്രഖ്യാപനം. അരിക്കലമല്ലാതെ ബിരിയാണി ചെമ്പ് ഒരു അങ്കണവാടിയിലുമില്ല. പാത്രം വാങ്ങാനുള്ള പണംകൂടി അനുവദിക്കണമെന്ന് അധ്യാപികമാര്‍ പറയുന്നു.

വേമ്പനാട് തുഴപ്പുരയാണ് കളിവള്ളങ്ങളെ കുതിപ്പിക്കുന്നത്

കെ.എന്‍. ബാബു ചിങ്ങവനം: ഓളപ്പരപ്പില്‍ കരിനാഗങ്ങളെപ്പോലെ ചുണ്ടനും വെപ്പും ഇരുട്ടുകുത്തിയും പള്ളിയോടങ്ങളുമൊക്കെ പറന്നുവരുന്ന വിസ്മയത്തിനു പിന്നില്‍ ചിങ്ങവനത്തെ ഒരു നിര തൊഴിലാളികളുടെ അധ്വാനമുണ്ട്. വള്ളങ്ങള്‍ക്ക് കുതിക്കാന്‍ കരുത്തായി മാറുന്ന തുഴകളേറെയും പണിതൊരുക്കുന്നത് ഇവിടത്തെ പണിശാലയിലാണ്. പനച്ചിക്കാട്, പാറക്കുളത്ത് മ്ലാംതടത്തില്‍ ബിനുവിന്‍റെ വേമ്പനാട് തുഴനിര്‍മാണ ശാലയില്‍ വള്ളംകളികള്‍ക്ക് മുന്നോടിയായി തൊഴിലാളികള്‍ ഊണും ഉറക്കവും ഉപേക്ഷിച്ചുള്ള പണിയിലാണ്. വീശിത്തുഴയുന്ന വിവിധ തരം തുഴകള്‍ പണിതൊരുക്കുക ക്ലേശകരമായ അധ്വാനമാണ്. മൂപ്പെത്തിയ ചൂണ്ടപ്പന വെട്ടിക്കീറി ചെത്തി രാകി മിനുക്കി വേണം പരുവപ്പെടുത്താന്‍. കേരളത്തിലെ ഒട്ടുമുക്കാലും പേരെടുത്ത വള്ളങ്ങള്‍ക്കും പാറക്കുളത്തെ വേമ്പനാടില്‍നിന്നാണ് തുഴ കൊടുക്കുന്നതെന്ന് ഉടമ ബിനു പറയുന്നു. മൂപ്പെത്തിയ പന കിട്ടാനില്ലെന്നത് ഇക്കാലത്ത് വലിയ പരിമിതിയാണ്. കയറ്റിറക്ക് കൂലി വര്‍ധന, വെട്ടുകൂലി വർധന ഇവയെല്ലാം സാരമായി ബാധിക്കുന്നുണ്ട്. കിഴക്കന്‍ പ്രദേശങ്ങളില്‍ നിന്നു മാത്രമേ പരുവമൊത്ത പന ലഭിക്കുകയുള്ളൂ. 500 രൂപ മുതല്‍ മുകളിലേക്കാണ് വില. തോട്ടങ്ങളിലും ഉള്‍പ്രദേശങ്ങളിലുംനിന്ന് വെട്ടുന്ന പനകള്‍ വാഹനങ്ങളിലെത്തിക്കുന്നതും ശ്രമകരമാണ്. അഞ്ച്, ആറ്, പത്ത് അടി കണക്കിലാണ് ബോട്ട് ക്ലബ്ബുകള്‍ ആവശ്യപ്പെടുന്നതനുസരിച്ച് നിര്‍മാണം. മുമ്പ് ചുണ്ടന്‍ വള്ളങ്ങളുടെ തുഴകള്‍ അഞ്ച് ഇഞ്ച് വീതിയിലാണ് നിര്‍മിച്ചിരുന്നെങ്കില്‍ ഇപ്പോള്‍ ഏഴ്, ഏഴര, എട്ട് ഇഞ്ച് വരെ വീതിയിലാണ് പണിയുന്നത്. ഇതിനനുസരിച്ചാണ് തടി മഴു ഉപയോഗിച്ച് കീറിയെടുക്കുന്നത്. യന്ത്രോപകരണങ്ങള്‍ ഒന്നുമില്ലാതെ ഉളിയും ചിന്തേരുംകൊണ്ടു തുഴ പരുവപ്പെടുത്തി സാന്‍ഡ് പേപ്പറും ഗ്രൈന്‍ഡറും ഉപയോഗിച്ച് മിനുക്കിയെടുക്കും. പേരമര തടിയില്‍ തീര്‍ത്ത പിടികൂടി വയ്ക്കുന്നതോടെ നിര്‍മാണം പൂര്‍ത്തിയായി. പരിചയ സമ്പന്നനായ തൊഴിലാളിക്ക് നാല് മണിക്കൂര്‍ വേണം ഒരു തുഴ പണി തീര്‍ക്കാന്‍. ചുണ്ടന്‍ വള്ളങ്ങള്‍ക്ക് 80 മുതല്‍ 100 വരെയാണ് തുഴകളുടെ എണ്ണം. ചെലവും അധ്വാനവും നോക്കിയാല്‍ പണിക്കൂലി പോലും ലഭിക്കാത്ത നിലയിലാണ് തുഴനിര്‍മാണമെന്ന് തൊഴിലാളികള്‍ പറയുന്നു.

തുറവൂർ ഉയരപ്പാതയുടെ ബീമുകൾ നിലം പതിച്ചു; ഒഴിവായത് വൻദുരന്തം

തുറവൂർ: അരൂർ-തുറവൂര്‍ ഉയരപ്പാത നിര്‍മാണത്തിന്‍റെ ഭാഗമായി സ്ഥാപിച്ചിരുന്ന ഇരുമ്പ് ബീമുകള്‍ അഴിച്ചുമാറ്റുന്നതിനിടയില്‍ നിലം പതിച്ചു. തലനാരിഴയ്ക്ക് ഒഴിവായത് വന്‍ദുരന്തം. അതേസമയം, ബീമുകള്‍ കൊണ്ടുപോകാനായി തൂണിനടിയില്‍ പാര്‍ക്ക് ചെയ്തിരുന്ന പുള്ളര്‍ ലോറി തകര്‍ന്നു. തുറവൂര്‍ കവലയ്ക്കു സമീപം ഇന്നലെ രാവിലെ ആറരയോടെയായിരുന്നു സംഭവം. കോണ്‍ക്രീറ്റ് ഗര്‍ഡറുകള്‍ക്ക് താങ്ങായി താത്കാലികമായി സ്ഥാപിച്ച ബീമുകള്‍ക്ക് 80 ടണ്‍ ഭാരമാണുള്ളത്. ബീമുകള്‍ ഇറക്കുമ്പോള്‍ ഗതാഗതം തടസപ്പെടുത്തിയതിനാല്‍ വന്‍ദുരന്തം ഒഴിവാകുകയായിരുന്നു. എന്നാല്‍, ബീമുകള്‍ വീണതിനെ ത്തുടര്‍ന്ന് ദേശീയപാതയില്‍ തുറവൂര്‍ ജംഗ്ഷന്‍ ഗതാഗതക്കുരുക്കിലായി. പ്രദേശത്ത് വാഹനങ്ങളുടെ നീണ്ടനിര പ്രത്യക്ഷപ്പെട്ടു.

റിട്ട. എസ്ഐ മരിച്ച നിലയില്‍

മുത്തോലി: റിട്ട. എസ്ഐയെ ലോഡ്ജില്‍ മരിച്ച നിലയില്‍ കണ്ടെത്തി. പുലിയന്നൂര്‍ തെക്കേല്‍ ടി.ജി സുരേന്ദ്രനെ (61)യാണ് മുത്തോലി കവലയ്ക്കു സമീപമുള്ള ലോഡ്ജില്‍ മരിച്ച നിലയില്‍ കണ്ടെത്തിയത്. വിരമിച്ച ശേഷം ഇയാള്‍ കടപ്പാട്ടൂരിലെ പെട്രോള്‍ പമ്പില്‍ ജോലി ചെയ്തു വരികയായിരുന്നു. വീട്ടുകാരുമായി പിണങ്ങി ഒരു വര്‍ഷത്തോളമായി ലോഡ്ജിലാണ് താമസിച്ചുവന്നിരുന്നതെന്ന് ബന്ധുക്കല്‍ പറഞ്ഞു. രണ്ട് ദിവസമായി പമ്പിലെത്താതിരുന്നതിനെത്തുടര്‍ന്ന് ഇന്നലെ അന്വേഷിച്ചെത്തിയപ്പോഴാണ് മരണവിവരമറിഞ്ഞത്. കട്ടിലില്‍നിന്നു നിലത്ത് കിടക്കുന്ന നിലയിലാണ് മൃതദേഹം കണ്ടെത്തിയത്. മരണകാരണം വ്യക്തമായിട്ടില്ല. പാലാ പോലീസ് സ്ഥലത്തെത്തി മേല്‍നടപടികള്‍ സ്വീകരിച്ചു.

ശബരിമല തീർഥാടകരുടെ കാറിടിച്ച് സ്‌കൂട്ടർ യാത്രികൻ മരിച്ചു

എരുമേലി: ശബരിമല തീർഥാടകരുടെ കാർ നിയന്ത്രണം തെറ്റി വഴിയാത്രക്കാരനെ ഇടിച്ചുവീഴ്ത്തിയ ശേഷം സ്‌കൂട്ടർ യാത്രികനെയും ഇടിച്ചു തെറിപ്പിച്ചു. അപകടത്തിൽ സ്‌കൂട്ടർ യാത്രികൻ മരിച്ചു. കോട്ടയം കുമ്മനം സ്വദേശിയും എരുമേലി തുമരംപാറയിൽ താമസക്കാരനുമായ ഖദീജപറമ്പിൽ അബ്ദുൾ ജലീൽ (ബാബു -62) ആണ് മരിച്ചത്. ഇന്നലെ രാവിലെ 6.30-ഓടെ എരുമേലി-മുണ്ടക്കയം റോഡിൽ ചരളയ്ക്ക് സമീപമാണ് അപകടം നടന്നത്. ശബരിമല ദർശനത്തിനായി തമിഴ്നാട്ടിൽനിന്നു വന്ന തീർഥാടകർ സഞ്ചരിച്ച കാർ എരുമേലിയിൽനിന്നു പമ്പ റോഡിലേക്ക് പോകാൻ പ്രപ്പോസ്- മുക്കൂട്ടുതറ റോഡിലൂടെ ചരളയിലെത്തിയപ്പോഴാണ് നിയന്ത്രണം തെറ്റി പാഞ്ഞത്. റോഡരികിലൂടെ നടന്നുപോവുകയായിരുന്ന പൊതുപ്രവർത്തകൻ പ്രപ്പോസ് കണ്ടത്തിൽ ലൂയിസ് ഡേവിഡിനെ (54) യാണ് പിന്നിലൂടെ വന്ന കാർ ആദ്യം ഇടിച്ചത്. വാഹനം പാഞ്ഞെത്തുന്ന ശബ്ദം കേട്ട് പെട്ടന്നു തിരിഞ്ഞു നോക്കിയ ലൂയിസ് ഒഴിഞ്ഞുമാറിയെങ്കിലും കാറിന്‍റെ ഒരു വശം ഇടിച്ചു ലൂയിസ് റോഡിൽ വീഴുകയായിരുന്നു. ഇതിനിടെ മുന്നോട്ടു പാഞ്ഞ് റോഡിന്‍റെ നടുവിലേക്ക് വന്ന കാർ എതിരേ വരികയായിരുന്ന സ്കൂട്ടറിൽ ഇടിക്കുകയായിരുന്നു. സ്കൂട്ടറിൽ സഞ്ചരിച്ച അബ്ദുൾ ജലീൽ റോഡരികിലുള്ള പൊന്തക്കാട്ടിലേക്ക് തെറിച്ചു വീണു. ലൂയിസ് ഡേവിഡ് പോലീസിൽ അറിയിച്ചതിനെത്തുടർന്ന് ആംബുലൻസ് എത്തിച്ച് അബ്ദുൾ ജലീലിനെ കാഞ്ഞിരപ്പള്ളി ജനറൽ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. കൈയിലും മുഖത്തും പരിക്കേറ്റ ലൂയിസ് എരുമേലി കുടുംബാരോഗ്യ കേന്ദ്രത്തിൽ ചികിത്സ തേടി. അബ്ദുൾ ജലീലിന്‍റെ മൃതദേഹം ഇന്നലെ വൈകുന്നേരം കുമ്മനം ജുമാ മസ്ജിദ് ഖബർസ്ഥാനിൽ കബറടക്കി. നാദിറ ആണ് ഭാര്യ. മക്കൾ: അമാനുള്ള, അബ്ദുള്ള, ഹബീബുള്ള.

കര്‍ഷകരെ ചേര്‍ത്തുപിടിച്ചു നാട്

കാഞ്ഞിരപ്പള്ളി: നാടിന്‍റെ നട്ടെല്ലായ കര്‍ഷകരെ ചേര്‍ത്തു പിടിച്ച് വിവിധ സംഘടനകളും തദ്ദേശസ്വയംഭരണ സ്ഥാപനങ്ങളും കര്‍ഷക ദിനാചരണം നടത്തി. നാടിന്‍റെ വിവിധ ഭാഗങ്ങളില്‍ സമ്മേളനങ്ങളും ബോധവത്കരണ ക്ലാസുകളും മികച്ച കര്‍ഷകരെ ആദരിക്കലും നടന്നു. കൃഷി ഭവനുകളും വിവിധ പരിപാടികളുമായി രംഗത്തുണ്ടായിരുന്നു. മുണ്ടക്കയം: ഇൻഫാം മുണ്ടക്കയം കാർഷിക താലൂക്കിന്‍റെ നേതൃത്വത്തിൽ കർഷക ദിനാചരണവും പച്ചക്കപ്പ വിൽപ്പന ഉദ്ഘാടനവും നടത്തി. മുണ്ടക്കയം വ്യാകുലമാതാ ഫൊറോന പള്ളി ഓഡിറ്റോറിയത്തിൽ നടന്ന സമ്മേളനം താലൂക്ക് രക്ഷാധികാരി റവ.ഡോ. ജയിംസ് മുത്തനാട്ട് ഉദ്ഘാടനം ചെയ്തു. ഇൻഫാം മുണ്ടക്കയം കാർഷിക താലൂക്ക് ഡയറക്ടർ ഫാ. മനു കിളികൊത്തിപ്പാറ അധ്യക്ഷത വഹിച്ചു. ജോയിന്‍റ് ഡയറക്ടർ ഫാ. ബിനോയ് വർഗീസ് മഞ്ഞക്കുഴകുന്നേൽ കർഷകദിന സന്ദേശവും പച്ചക്കപ്പ വിതരണോദ്ഘാടനവും നിർവഹിച്ചു. സമ്മേളനത്തിൽ കാർഷിക വിളകളുടെ ഉത്പാദനവും വിതരണവും സംസ്കരണവും എന്ന വിഷയത്തിൽ ടോമി ആയല്ലൂകുന്നേലും കൃഷിയുടെ പ്രാധാന്യം എന്ന വിഷയത്തിൽ കാർഷിക താലൂക്ക് പ്രസിഡന്‍റ് സണ്ണി വെട്ടുകല്ലേലും ക്ലാസ് നയിച്ചു. കാർഷിക താലൂക്ക് സെക്രട്ടറി ഷാജി ജോസഫ്, ട്രഷറർ ചാക്കോച്ചൻ വെട്ടിക്കാട്ട്, ഇൻഫാം മുണ്ടക്കയം താലൂക്ക് മഹിളാ സമാജ് പ്രസിഡന്‍റ് ഗ്രേസി ജോസഫ്, ജില്ലാ പ്രതിനിധി ജോസ് പാലൂക്കുന്നേൽ തുടങ്ങിയവർ പ്രസംഗിച്ചു. ചിറക്കടവ്: പഞ്ചായത്തിന്‍റെയും കൃഷി ഭവന്‍റെയും ആഭിമുഖ്യത്തിൽ കർഷക ദിനം ആചരിച്ചു. ചീഫ് വിപ്പ് ഡോ. എൻ. ജയരാജ് ഉദ്ഘാടനം നിർവഹിച്ചു. പഞ്ചായത്ത് പ്രസിഡന്‍റ് സി.ആർ. ശ്രീകുമാർ അധ്യക്ഷത വഹിച്ചു. ജനപ്രതിനിധികൾ, രാഷ്‌ട്രീയ നേതാക്കൾ, കൃഷി ഉദ്യോഗസ്ഥർ എന്നിവർ പ്രസംഗിച്ചു. എലിക്കുളം: പഞ്ചായത്തിന്‍റെയും കൃഷിഭവന്‍റെയും സംയുക്താഭിമുഖ്യത്തിൽ കർഷകദിനം ആചരിച്ചു. പഞ്ചായത്ത് പ്രസിഡന്‍റ് ജിമ്മിച്ചൻ ഈറ്റത്തോട്ടിന്‍റെ അധ്യക്ഷതയിൽ പാമ്പാടി ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയി മണിയങ്ങാട്ട് ഉദ്ഘാടനം ചെയ്തു. ജില്ലാ പഞ്ചായത്തംഗങ്ങളായ ജെസി ഷാജൻ, ജോസ്മോൻ മുണ്ടയ്ക്കൽ, പഞ്ചായത്ത് വൈസ് പ്രസിഡന്‍റ് സൂര്യമോൾ, ഷേർളി അന്ത്യാങ്കളം, അഖിൽ അപ്പുക്കുട്ടൻ, സിനി ജോയ് , മാത്യൂസ് പെരുമനങ്ങാട്ട്, നിർമല ചന്ദ്രൻ, ജയിംസ് ജീരകത്തിൽ,പഞ്ചായത്ത് സെക്രട്ടറി മാർട്ടിൻ ജോർജ്, കൃഷി ഓഫീസർ കെ. പ്രവീൺ, അസിസ്റ്റന്‍റ് കൃഷി ഓഫീസർ എ.ജെ.അലക്സ് റോയ്, തുടങ്ങിയവർ പ്രസംഗിച്ചു. ഡോ. സ്മിത രവി കാർഷിക പഠനക്ലാസ് നയിച്ചു. യോഗത്തിൽ മികച്ച കർഷകരേയും കർഷക തൊഴിലാളികളെയും ആദരിച്ചു.

വനമേഖല ഫെൻസിംഗ്: ഒന്നാംഘട്ടം ഉദ്ഘാടനം ഇന്ന്

എരുമേലി: കോരുത്തോട്, മുണ്ടക്കയം, എരുമേലി പഞ്ചായത്തുകളിലായി വനമേഖലയിൽ 30 കിലോമീറ്റർ ഫെൻസിംഗ് നിർമാണത്തിന്‍റെ ഒന്നാംഘട്ടം പൂർത്തിയായി. ഉദ്ഘാടനം ഇന്ന് ഉച്ചകഴിഞ്ഞ് മൂന്നിന് മൂക്കൻപെട്ടി എസ്എൻഡിപി ഹാളിൽ ചേരുന്ന യോഗത്തിൽ സെബാസ്റ്റ്യൻ കുളത്തുങ്കൽ എംഎൽഎ നിർവഹിക്കും. 7.34 കോടി ചെലവിട്ടാണ് വന്യജീവികൾ കാടിറങ്ങുന്നത് തടയാനുള്ള പ്രതിരോധ സംവിധാനങ്ങൾ ഒരുക്കുന്നത്. 30 കിലോമീറ്റർ വനമേഖല പൂർണമായും കിടങ്ങും ഹാംഗിംഗ് ഫെൻസിംഗുകളും സോളാർ ഫെൻസിംഗുകളും മറ്റും സ്ഥാപിച്ച് ജനങ്ങളുടെ ജീവനും കൃഷിയും സംരക്ഷിക്കുന്നതാണ് പദ്ധതി. നിലവിൽ എരുമേലി പഞ്ചായത്തിൽപ്പെട്ട കോയിക്കാക്കാവ് മുതൽ പായസപ്പടി വരെയുള്ള 9.5 കിലോമീറ്റർ ദൂരവും മഞ്ഞളരുവി മുതൽ പാക്കാനം വരെയുള്ള 3.7 കിലോമീറ്റർ ദൂരവും ഹാംഗിംഗ് ഫെൻസിംഗുകൾ പൂർത്തീകരിച്ചുകഴിഞ്ഞു. അവശേഷിക്കുന്ന ജോലികൾ രണ്ട് മാസത്തിനകം പൂർത്തിയാക്കുമെന്നും ഇതോടെ വന്യജീവി ആക്രമണം പ്രതിരോധിക്കുന്ന ആദ്യ നിയോജകമണ്ഡലമായി പൂഞ്ഞാർ മാറുമെന്നും എംഎൽഎ പറഞ്ഞു. യോഗത്തിൽ എരുമേലി പഞ്ചായത്ത് പ്രസിഡന്‍റ് മറിയാമ്മ സണ്ണി അധ്യക്ഷത വഹിക്കും. ജില്ലാ പഞ്ചായത്ത്‌ പ്രസിഡന്‍റ് ഹേമലത പ്രേംസാഗർ മുഖ്യപ്രഭാഷണം നടത്തും. ബ്ലോക്ക് പഞ്ചായത്ത് പ്രസിഡന്‍റ് അജിതാ രതീഷ്, കോട്ടയം ഡിവിഷണൽ ഫോറസ്റ്റ് ഓഫീസർ പ്രഫുൽ അഗർവാൾ, ത്രിതല പഞ്ചായത്ത് ജനപ്രതിനിധികൾ, വിവിധ രാഷ്ട്രീയകക്ഷി നേതാക്കൾ തുടങ്ങിയവർ പ്രസംഗിക്കും.

ബഹുജന മാർച്ചും ധർണയും ഇന്ന്

മുണ്ടക്കയം: പെരുവന്താനം പഞ്ചായത്തിലെ യുഡിഎഫ് ഭരണസമിതിയുടെ അഴിമതിക്കും കെടുകാര്യസ്ഥതയ്ക്കുമെതിരേ പഞ്ചായത്ത് ഓഫീസിലേക്ക് ബഹുജന മാർച്ചും ധർണയും സംഘടിപ്പിക്കുമെന്ന് എൽഡിഎഫ് നേതാക്കൾ പത്രസമ്മേളനത്തിൽ അറിയിച്ചു. നിലവിലെ യുഡിഎഫ് ഭരണം പെരുവന്താനം പഞ്ചായത്തിനെ വികസന കാര്യത്തിൽ 25 വർഷം പിന്നോട്ട് എത്തിച്ചിരിക്കുകയാണ്. കഴിഞ്ഞ എൽഡിഎഫ് ഭരണസമിതിയുടെ കാലത്ത് കൊണ്ടുവന്ന കേരളത്തിലെ തന്നെ ശ്രദ്ധേയമായ മഹാനടൻ തിലകന്‍റെ പേരിലുള്ള മണിക്കൽ ലേക്ക് ആൻഡ് പാർക്കും ഏകയം ടൂറിസം പദ്ധതിയും തകർത്തു. പ്രധാന വിനോദ സഞ്ചാര കേന്ദ്രമായ പാഞ്ചാലിമേടിന്‍റെ ടൂറിസം സാധ്യതകളെ വനം വകുപ്പുമായി ചേർന്ന് ഇല്ലാതാക്കാനുള്ള ശ്രമമാണ് ഇപ്പോഴത്തെ ഭരണസമിതി നടത്തുന്നത്. ഭരണസമിതിയിലെ തമ്മിലടിയും അഴിമതിയും പഞ്ചായത്തിന് വികസന മുരടിപ്പിൽ എത്തിച്ചിരിക്കുകയാണെന്നും എൽഡിഎഫ് നേതാക്കൾ കുറ്റപ്പെടുത്തി. ഇന്ന് ഉച്ചകഴിഞ്ഞ് മൂന്നിന് നടക്കുന്ന ബഹുജന മാർച്ചും ധർണയും സിപിഎം ഇടുക്കി ജില്ല സെക്രട്ടറി സി.വി. വർഗീസ് ഉദ്ഘാടനം ചെയ്യും. കേരള കോൺഗ്രസ് - എം സംസ്ഥാന ജനറൽ സെക്രട്ടറി അലക്സ് കോഴിമല, പി.എസ്. രാജൻ, ജോസ് ഫിലിപ്പ്, കെ.ടി. ബിനു, എം.ജെ. വാവച്ചൻ, എം.ടി. സജി, സജിമോൻ വെട്ടിയാങ്കൽ, ഷാജി ഒഴാക്കോട്ടയിൽ തുടങ്ങിയവർ പ്രസംഗിക്കും. പത്രസമ്മേളനത്തിൽ ബേബി മാത്യു, എം.സി. സുരേഷ്, സജിമോൻ വെട്ടിയാങ്കൽ, ഷാജി ഒഴാക്കോട്ടയിൽ തുടങ്ങിയവർ പങ്കെടുത

മാലിന്യ നിക്ഷേപകേന്ദ്രമായി വണ്ടൻപതാൽ തേക്കിൻകൂപ്പ്

മുണ്ടക്കയം: ജൈവ, അജൈവ മാലിന്യങ്ങളുടെ നിക്ഷേപ കേന്ദ്രമായി വണ്ടൻപതാൽ തേക്കിൻകൂപ്പ് മാറുന്നു. മുണ്ടക്കയം-കോരുത്തോട് റോഡിൽ വണ്ടൻപതാൽ വനം വകുപ്പ് ഓഫീസ് മുതൽ പനയ്ക്കച്ചിറ വരെയുള്ള തേക്കിൻകൂപ്പ് ഭാഗത്തെ പല പ്രദേശങ്ങളിലും മാലിന്യ നിക്ഷേപം വ്യാപകമായിരിക്കുകയാണ്. പനയ്ക്കച്ചിറ ആനക്കുളം കവലയ്ക്ക് സമീപമുള്ള ഭാഗങ്ങളിൽ വലിയ തോതിലാണ് സാമൂഹ്യവിരുദ്ധർ മാലിന്യം തള്ളിയിരിക്കുന്നത്. പ്ലാസ്റ്റിക് കവറുകളിലും ചാക്കിലും കെട്ടി വ്യാപാരസ്ഥാപനങ്ങളിലെയും വീടുകളിലെയും മാലിന്യം വൻതോതിലാണ് നിക്ഷേപിക്കുന്നത്. ഇതിൽ ജൈവ അജൈവ മാലിന്യങ്ങൾ തുടങ്ങി വീട്ടിലെ ഉപയോഗശൂന്യമായ വസ്തുക്കൾ വരെയുണ്ട്. മഴ പെയ്യുമ്പോൾ ഈ മാലിന്യങ്ങൾ സമീപത്തെ തോട്ടിലേക്ക് ഒഴുകിയെത്തുകയും ജലാശയങ്ങളെ മാലിന്യപൂരിതമാക്കുകയും ചെയ്യും. കൂടാതെ പ്രദേശത്ത് കാട്ടുപന്നി, കാട്ടുപോത്ത് അടക്കമുള്ള വന്യ മൃഗങ്ങളുടെ ശല്യവും രൂക്ഷമാണ്. ഏതാനും മാസങ്ങൾക്കു മുമ്പാണ് റോഡ് മുറിച്ചുകടന്ന കാട്ടുപോത്ത് വാഹനമിടിച്ച് ചത്തത്. മുൻപും പലതവണ കാട്ടുപന്നി അടക്കമുള്ള വന്യമൃഗങ്ങൾ വാഹനത്തിന് മുന്നിൽച്ചാടി അപകടമുണ്ടായ സംഭവം ഉണ്ടായിട്ടുണ്ട്. വനവിസ്തൃതി വർധിപ്പിക്കാനും വന്യമൃഗങ്ങളെ സംരക്ഷിക്കുവാനും വ്യഗ്രത കാണിക്കുന്ന വനംവകുപ്പ് ഉദ്യോഗസ്ഥർ സ്വന്തം ഓഫീസിനുതൊട്ട് സമീപം വരെ വലിയതോതിൽ മാലിന്യം നിക്ഷേപിച്ചിട്ടും യാതൊരു നടപടിയും സ്വീകരിക്കുന്നില്ലെന്നും ആക്ഷേപം ശക്തമാണ്. വേലികെട്ടുകയും കാമറകൾ സ്ഥാപിക്കുകയും രാത്രികാലങ്ങളിൽ പരിശോധന ശക്തമാക്കുകയും ചെയ്താൽ അനധികൃത മാലിന്യ നിക്ഷേപം തടയുവാനും സാമൂഹ്യവിരുദ്ധരെ പിടികൂടുവാനും കഴിയുമെന്ന് നാട്ടുകാർ പറയുന്നു.

കർഷകന് ചെമ്മലമറ്റം സ്കൂളിന്‍റെ ആദരവ്

ചെമ്മലമറ്റം: ലിറ്റിൽഫ്ളവർ ഹൈസ്കൂൾ വിദ്യാർഥികൾ കർഷക ദിനത്തോടനുബന്ധിച്ച് ചെമ്മലമറ്റത്തെ മികച്ച കർഷകനായ പൊരിയത്ത് സെബാസ്റ്റ്യൻ ഫ്രാൻസിസിനെ ആദരിച്ചു. പൂർണമായും ജൈവവളം ഉപയോഗിച്ച് കൃഷി ചെയ്യുന്ന സെബാസ്റ്റ്യൻ പൊരിയത്തിന്‍റെ കൃഷിത്തോട്ടത്തിൽ വിവിധ തരത്തിലുള്ള കൃഷികളാണ് നടത്തുന്നത്. ഇതിനോടകം നിരവധി പുരസ്കാരങ്ങൾ നേടിയ സെബാസ്റ്റ്യൻ ഫ്രാൻസിസിന് തിടനാട് പഞ്ചായത്തിന്‍റെ പുരസ്കാരവും ലഭിച്ചിട്ടുണ്ട്. സെബാസ്റ്റ്യന്‍റെ കൃഷിത്തോട്ടത്തിൽ നടന്ന ചടങ്ങിൽ ഹെഡ്മാസ്റ്റർ ജോബെറ്റ് തോമസ് പൊന്നാട അണിയിച്ച് ആദരിച്ചു. അധ്യാപകരായ ജിജി ജോസഫ്, വി. അജിത് എന്നിവർ നേതൃത്വം നൽകി. തുടർന്ന് വിവിധ കൃഷി രീതികളെ കുറിച്ച് സെബാസ്റ്റ്യൻ ഫ്രാൻസിസ് വിദ്യാർഥികൾക്ക് ക്ലാസ് എടുത്തു.

കർഷകരെ വഞ്ചിക്കാൻ അനുവദിക്കില്ല: കത്തോലിക്ക കോൺഗ്രസ്

മൂന്നിലവ്: കർഷകരുടെ നിലനിൽപ്പിനായി ഏതറ്റംവരെയും പോരാടുമെന്നും അവരെ വഞ്ചിക്കാനുള്ള എല്ലാ നീക്കങ്ങളും തടയുമെന്നും കത്തോലിക്ക കോൺഗ്രസ് പാലാ രൂപത ഡയറക്ടർ റവ. ഡോ. ജോർജ് വർഗീസ് ഞാറക്കുന്നേൽ. കത്തോലിക്ക കോൺഗ്രസ് പാലാ രൂപതാസമിതി ചിങ്ങം ഒന്നിന് നടത്തിയ കർഷക വഞ്ചനാദിനാചരണം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഒരു നൂറ്റാണ്ടിലേറെയായുള്ള കത്തോലിക്ക കോൺഗ്രസിന്‍റെ സമരങ്ങളിൽ ഏറെയും കർഷകർക്കു വേണ്ടിയും അവരുടെ അവകാശങ്ങൾക്ക് വേണ്ടിയും ആയിരുന്നു. വന്യജീവി ആക്രമണം തടയാൻ സർക്കാരുകൾ നിയമനിർമണം നടത്തിയില്ലെങ്കിൽ കത്തോലിക്കാ കോൺഗ്രസ് ശക്തമായ പ്രക്ഷോഭവുമായി മുന്നോട്ടു പോകുമെന്ന് അദ്ദേഹം പറഞ്ഞു. രൂപത പ്രസിഡന്‍റ് ഇമ്മാനുവൽ നിധീരി അധ്യക്ഷത വഹിച്ച യോഗത്തിൽ ഫാ. കുര്യൻ തടത്തിൽ, ജോയി കണിപ്പറമ്പിൽ, ആൻസമ്മ സാബു, ജോൺസൺ വീട്ടിയാങ്കൽ, പയസ് കവളംമാക്കൽ, ജോൺസൺ ചെറുവള്ളി, ബെന്നി കിണറ്റുകര, സാബു പ്ലാത്തോട്ടം, ടോമിച്ചൻ പഴയ മഠം, ജോർജ് തൊടുവനാൽ, ജോ സെബാസ്റ്റ്യൻ, വർഗീസ് ജോർജ് ഇളംതുരുത്തിയിൽ, ജിമ്മി കൊച്ചെട്ടൊന്നിൽ തുടങ്ങിയവർ പ്രസംഗിച്ചു.

പാലായിൽ ഓണം ഖാദിമേള 20ന്

പാലാ: ജില്ലാ ഖാദി ഗ്രാമവ്യവസായ ഓഫീസിന്‍റെ ആഭിമുഖ്യത്തില്‍ മിനി സിവില്‍ സ്റ്റേഷനില്‍ 20 ന് ഓണം ഖാദി മേള നടത്തും. രാവിലെ 10.30 ന് മീനച്ചില്‍ തഹസില്‍ദാര്‍ ലിറ്റിമോള്‍ തോമസ് മേള ഉദ്ഘാടനം ചെയ്യും. സംസ്ഥാന ഖാദി ബോര്‍ഡ് അംഗം കെ.എസ്. രമേഷ് ബാബു അധ്യക്ഷത വഹിക്കും. ‌ഖാദി തുണിത്തരങ്ങള്‍ക്ക് 30 ശതമാനം സര്‍ക്കാര്‍ റിബേറ്റും സര്‍ക്കാര്‍, അര്‍ധ സര്‍ക്കാര്‍, പൊതുമേഖലാ, സഹകരണ സ്ഥാപനങ്ങളിലെ ജീവനക്കാര്‍ക്ക് ഒരു ലക്ഷം രൂപ വരെ ക്രെഡിറ്റ് സൗകര്യവും ലഭിക്കും. ഖാദി ഷര്‍ട്ട്, മുണ്ടുകള്‍, കൊട്ടാടി തോര്‍ത്ത്, ജൂട്ട് സില്‍ക്ക് സാരി, കുപ്പടം സാരി, കോട്ടണ്‍ സാരി, ചുരിദാര്‍ സെറ്റുകള്‍, ബെഡ് ഷീറ്റ്, ഗ്രാമ വ്യവസായ ഉത്പന്നങ്ങളായ തേന്‍, മരച്ചക്കിലാട്ടിയ എള്ളെണ്ണ, സോപ്പ്, പശ തുടങ്ങിയവയും മേളയിലുണ്ട്. ഓരോ ആയിരം രൂപയുടെ പര്‍ച്ചേസിനും ഓരോ സമ്മാന കൂപ്പണ്‍ നല്‍കും. വൈകുന്നേരം അഞ്ചിന് മേള സമാപിക്കും.

മികച്ച ജൈവ കര്‍ഷകനെ ആദരിച്ചു

അകലക്കുന്നം: പഞ്ചായത്തിലെ മികച്ച ജൈവ കര്‍ഷകനുള്ള അവാര്‍ഡ് അരവിന്ദാക്ഷന്‍ മരുതനാടിക്ക് ലഭിച്ചു. പഞ്ചായത്തില്‍ നടന്ന കര്‍ഷകദിനാചരണത്തിന്‍റെ ഭാഗമായാണ് ജൈവ കര്‍ഷകനെ ആദരിച്ചത്. പഞ്ചായത്ത് ഹാളില്‍ നടന്ന ചടങ്ങില്‍ ചാണ്ടി ഉമ്മന്‍ എംഎല്‍എയില്‍ നിന്ന് അവാര്‍ഡ് ഏറ്റുവാങ്ങി. അരവിന്ദാക്ഷന്‍ ഒരു മികച്ച ക്ഷീരകര്‍ഷന്‍ കൂടിയാണ്. പശുക്കളെയും ആടുകളെയും വളര്‍ത്തിവരുന്നു. മൃഗങ്ങളുടെ ചാണകം ഉപയോഗിച്ച് മാത്രമാണ് വീടിനോട് ചേര്‍ന്നുള്ള സ്ഥലത്ത് കൃഷി ചെയ്യുന്നത്. കൊറോണക്കാലത്താണ് അരവിന്ദാക്ഷന്‍ കൃഷിയിലേക്കും കന്നുകാലി വളര്‍ത്തലിലേക്കും ഇറങ്ങിത്തിരിച്ചത്. പത്ര ഏജന്‍റുകൂടിയായ അരവിന്ദാക്ഷന്‍ ദീപിക ഉൾപ്പെടെ പ്രമുഖ പത്രങ്ങളുടെ ഏജന്‍റു കൂടിയാണ്. ഭാര്യ ഗീതയും മക്കള്‍ സൂര്യയും ആര്യയും പത്രവിതരണത്തിലും കൃഷിയിലും കന്നുകാലി വളര്‍ത്തലിലും അരവിന്ദാക്ഷനെ സഹായിക്കുന്നു. നെല്ലിക്കുന്ന് വായനശാലയുടെ ലൈബ്രേറിയന്‍ കൂടിയാണ് അരവിന്ദാക്ഷന്‍.

കര്‍ഷകരെ ചേര്‍ത്തുപിടിച്ച് നാട്

പാലാ: നാടിന്‍റെ നട്ടെല്ലായ കര്‍ഷകരെ ചേര്‍ത്തുപിടിച്ച് വിവിധ സംഘടനകളും തദ്ദേശസ്വയംഭരണ സ്ഥാപനങ്ങളും കര്‍ഷക ദിനാചരണം നടത്തി. ഇന്നലെ നാടിന്‍റെ വിവിധ ഭാഗങ്ങളില്‍ സമ്മേളനങ്ങളും ബോധവത്കരണ ക്ലാസുകളും മികച്ച കര്‍ഷകരെ ആദരിക്കലും നടന്നു. കൃഷി ഭവനുകളും വിവിധ പരിപാടികളുമായി രംഗത്തുണ്ടായിരുന്നു. തലപ്പലം: നാടിന്‍റെ നട്ടെല്ലായ കര്‍ഷകരെ പ്രോത്സാഹിപ്പിക്കാനും കൃഷിയെ സംരക്ഷിക്കാനും എല്ലാവര്‍ക്കും കടമയുണ്ടെന്ന് മാണി സി. കാപ്പന്‍ എംഎല്‍എ. തലപ്പലം പഞ്ചായത്ത്, കൃഷി ഭവന്‍, കാര്‍ഷിക വികസന സമിതി, സഹകരണ ബാങ്ക്, എസ്ബി, മീനച്ചില്‍ ഈസ്റ്റ് ബാങ്ക്, കേരള ഗ്രാമീണ്‍ ബാങ്ക്, കെവിവിഇഎസ് എന്നിവയുടെ സംയുക്താഭിമുഖ്യത്തില്‍ നടത്തിയ കര്‍ഷക ദിനാഘോഷം ഉദ്ഘാടനം ചെയ്യുകയായിരുന്നു അദ്ദേഹം. വിവിധ മേഖലകളില്‍ പ്രാഗത്ഭ്യം തെളിയിച്ച പത്ത് കര്‍ഷകരെ മാണി സി. കാപ്പന്‍ ആദരിച്ചു. തലപ്പലം സര്‍വീസ് സഹകരണ ബാങ്ക് ഓഡിറ്റോറിയത്തില്‍ നടന്ന യോഗത്തില്‍ തലപ്പലം പഞ്ചായത്ത് പ്രസിഡന്‍റ് ആനന്ദ് ജോസഫ് അധ്യക്ഷത വഹിച്ചു. ജില്ലാ പഞ്ചായത്ത് മെംബര്‍ ഷോണ്‍ ജോര്‍ജ്, ബ്‌ളോക്ക് പഞ്ചായത്ത് മെംബര്‍മാരായ മേഴ്‌സി മാത്യു, ആര്‍. ശ്രീകല, ജെറ്റോ ജോസഫ്, പഞ്ചായത്ത് വൈസ് പ്രസിഡന്‍റ് സ്റ്റെല്ലാ ജോയി, സഹകരണ ബാങ്ക് പ്രസിഡന്‍റ് ഷിബി ജോസഫ്, എം.ജെ. സെബാസ്റ്റ്യന്‍, ബൈജു തോമസ് തയ്യില്‍, ജോമി ബെന്നി, നിഷാ ഷൈബി, ചിത്രാ സജി, കെ.ജെ സെബാസ്റ്റ്യന്‍ തുടങ്ങിയവര്‍ പ്രസംഗിച്ചു. തുടര്‍ന്ന് കാര്‍ഷിക ക്വിസും പച്ചക്കറിത്തൈ വിതരണവും നടത്തി.

പ്ലാറ്റിനം ജൂബിലി സ്മാരകമായി തിരുവചനപഠനമത്സരവുമായി പാലാ രൂപത

കുറവിലങ്ങാട്: പ്ലാറ്റിനം ജൂബിലി ആഘോഷങ്ങളുടെ ഓർമകൾ നിലനിർത്താൻ വചനപഠന മത്സരവുമായി പാലാ രൂപത. രൂപത ഇവാഞ്ചലൈസേഷൻ, കുടുംബകൂട്ടായ്മ, മീഡിയ കമ്മീഷൻ എന്നിവയുടെ നേതൃത്വത്തിലാണ് ജീവമന്ന എന്ന പേരിലുള്ള വചനപഠനമത്സരം ഒരുക്കിയിട്ടുള്ളത്. ആറ് കാറ്റഗറികളിലായി നാല് തലങ്ങളിലായാണ് മത്സരം. കുടുംബകൂട്ടായ്മ, ഇടവക, ഫൊറോന, രൂപത എന്നിങ്ങനെയാണ് മത്സരതലങ്ങൾ. കുട്ടികൾ, അഞ്ച് മുതൽ ഏഴുവരെ, എട്ടുമുതൽ 12 വരെ ക്ലാസുകൾ എന്നിങ്ങനെയാണ് ആദ്യ മൂന്ന് കാറ്റഗറികൾ. 18-30, 31-55, 56ന് മുകളിൽ എന്നിങ്ങനെ പ്രായത്തിലുള്ളവരാണ് മറ്റ് മൂന്ന് കാറ്റഗറികൾ. 2026 മേയ് 10ന് രണ്ടിനാണ് ഗ്രാൻഡ് ഫിനാലെ. ജനുവരിയിൽ കുടുംബകൂട്ടായ്മ തലത്തിലും മാർച്ച് 27ന് ഇടവകതലത്തിലും ഏപ്രിൽ 26ന് ഫൊറോന തലത്തിലും മത്സരങ്ങൾ നടത്തുമെന്ന് കുടുംബകൂട്ടായ്മ രൂപത ഡയറക്ടർ ഫാ. ജോസഫ് അരിമറ്റത്തിൽ പറഞ്ഞു. സുവിശേഷങ്ങളും അപ്പസ്‌തോലപ്രവർത്തനങ്ങളുമാണ് പഠനഭാഗമായി നിർദ്ദേശിച്ചിട്ടുള്ളത്. വിശ്വാസപരിശീലന കേന്ദ്രങ്ങളിലും മത്സരങ്ങൾ നടത്തും. വചനഭാഗങ്ങൾ മനഃപാഠമാക്കുന്നതും മത്സരത്തിന്‍റെ ഭാഗമാണ്. 100 വചനങ്ങൾ പഠിക്കുന്ന എല്ലാവർക്കും ജീവമന്നാ സമ്മാനം രൂപതാതലത്തിൽ നൽകും. 119ാം സങ്കീർത്തനം മനഃപാഠമാക്കുന്ന വിശ്വാസപരിശീലന വിദ്യാർഥികൾക്ക് 2000 രൂപ കാഷ് അവാർഡ് പ്രഖ്യാപിച്ചിട്ടുണ്ട്. പഠനഭാഗങ്ങൾ ഉൾക്കൊള്ളിച്ച് പ്രത്യേക പുസ്തകവും പ്രസിദ്ധീകരിച്ചിട്ടുണ്ട്. കാൽലക്ഷം രൂപയാണ് ഒന്നാം സമ്മാനം. 15,000, 10,000, 5,000, 3,000 എന്നിങ്ങനെയാണ് രണ്ടുമുതൽ അഞ്ചുവരെ സ്ഥാനങ്ങൾ നേടുന്നവർക്കുള്ള കാഷ് പ്രൈസ്. എല്ലാ വിജയികൾക്കും മെമന്‍റോയും നൽകും. പഠനപദ്ധതിയുടെ ഉദ്ഘാടനം മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന കേന്ദ്രത്തിൽ കുടുംബകൂട്ടായ്മ പാലാ രൂപത ഡയറക്ടർ ഫാ. ജോസഫ് അരിമറ്റത്തിൽ നിർവഹിച്ചു. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി അധ്യക്ഷത വഹിച്ചു. ജീവമന്ന പഠനസഹായിയായി തയാറാക്കിയ പുസ്തകത്തിന്‍റെ പ്രകാശനം ഇടവക കുടുംബകൂട്ടായ്മ ജനറൽ ലീഡർ ബോബിച്ചൻ നിധീരിക്ക് നൽകി ആർച്ച്പ്രീസ്റ്റ് പ്രകാശനം ചെയ്തു. അസിസ്റ്റന്‍റ് വികാരിമാരായ ഫാ. പോൾ കുന്നുംപുറത്ത്, ഫാ. ആന്‍റണി വാഴക്കാലായിൽ, കുടുംബകൂട്ടായ്മ ജനറൽ ലീഡർ ബോബിച്ചൻ നിധീരി എന്നിവർ പ്രസംഗിച്ചു. കൈക്കാരന്മാരും യോഗപ്രതിനിധികളും വിശ്വാസപരിശീലകരും വിദ്യാർഥികളും പങ്കെടുത്തു.

ഇല്ലിക്കൽകല്ലിലെ അപകടഭീഷണി; താലൂക്ക് വികസനസമിതി നിര്‍ദേശം കടലാസിലുറങ്ങുന്നു

പാലാ: വിനോദസഞ്ചാര കേന്ദ്രമായ ഇല്ലിക്കല്‍കല്ലിലെ കുടക്കല്ലുകളില്‍ വിള്ളലുകള്‍ സംഭവിച്ചുവെന്ന നാട്ടുകാരുടെയും പഞ്ചായത്തു പ്രസിഡന്‍റുമാരുടെയും പരാതിയില്‍ പരിശോധന വേണമെന്ന താലൂക്ക് വികസന സമിതിയുടെ നിര്‍ദേശം കടലാസിലുറങ്ങുന്നു. അടിയന്തരമായി ജില്ലയിലെ ദുരന്ത നിവാരണ അഥോറിറ്റിയും മൈനിംഗ് ആൻഡ് ജിയോളജി ഉദ്യോഗസ്ഥരും ചേര്‍ന്ന് പരിശോധിക്കണമെന്ന ആവശ്യം ശക്തമായി. വന്‍ പാറക്കഷണം താഴേക്കു പതിച്ചാല്‍ താഴ്‌വാരത്തുള്ള നിരവധി വീടുകള്‍ക്ക് അപകടഭീഷണിയാണ്. ഇവിടത്തെ മലനിരകളില്‍ മുമ്പ് പാറമട പ്രവര്‍ത്തിച്ചിരുന്നു. ഇതിലെ സ്‌ഫോടനങ്ങളുടെ പ്രകമ്പനത്താലാണ് മുകള്‍ ഭാഗത്തെ പാറകള്‍ക്ക് വിള്ളല്‍ സംഭവിച്ചതെന്ന് നാട്ടുകാര്‍ പറയുന്നു. ദുരന്തനിവാരണ അഥോറിറ്റിയും മൂന്നിലവ്, തലനാട് പഞ്ചായത്ത് അധികൃതരും റവന്യൂ ഉദ്യോഗസ്ഥരും പൊതുപ്രവര്‍ത്തകരും ഉള്‍പ്പെടുന്ന സംഘം പരിശോധിച്ച് റിപ്പോര്‍ട്ട് പാലാ ആര്‍ഡിഒയ്ക്ക് നല്‍കണമെന്ന നിര്‍ദേശമാണ് നടപടിയില്ലാതെ ഇഴയുന്നത്. മാണി സി. കാപ്പന്‍ എംഎല്‍എ അധ്യക്ഷത വഹിച്ച താലൂക്ക് വികസന സമിതിയോഗത്തില്‍ നിര്‍ദേശം ഉയര്‍ന്നിട്ട് മാസം മൂന്നു കഴിഞ്ഞു. ഇക്കാര്യം സംബന്ധിച്ച് താലൂക്ക് വികസന യോഗങ്ങളില്‍ സമിതിയംഗം പീറ്റര്‍ പന്തലാനി നൽകിയ പരാതിയിന്മേല്‍ ചര്‍ച്ച ചെയ്യുകയും പരിശോധിക്കാന്‍ നിര്‍ദേശം നല്‍കുകയുമായിരുന്നു. ഇതിനായി തഹസില്‍ദാരെ ചുമതലപ്പെടുത്തുകയും ചെയ്തിരുന്നു. തുടര്‍ നടപടി സ്വീകരിക്കാതെ ഉദ്യോഗസ്ഥര്‍ അനാസ്ഥ കാട്ടുകയാണന്ന് ആക്ഷേപം ഉയര്‍ന്നിട്ടുണ്ട്. 2000 അടിക്കുമേല്‍ ഉയരത്തിലുള്ള കുടകല്ലില്‍ ഉണ്ടായിട്ടുള്ള വിള്ളലുകള്‍ സംബന്ധിച്ച് സമീപത്തെ പഞ്ചായത്ത് പ്രസിഡന്‍റുമാരും മീനച്ചില്‍ താലൂക്ക് വികസന സമിതിയോഗത്തില്‍ പരാതി ഉന്നയിച്ചിരുന്നു. ഒരു നടപടിയും ഇതുവരെ ഉദ്യോഗസ്ഥര്‍ സ്വീകരിച്ചിട്ടില്ല. മഴ ശക്തി പ്രാപിച്ചതോടെ നാട്ടുകാര്‍ ആശങ്കയിലാണ്.നേരിയ ഭൂചലനങ്ങളോ മറ്റ് പ്രകൃതിക്ഷോഭങ്ങളോ സംഭവിച്ചാല്‍ വന്‍ ദുരന്തമുണ്ടാകാന്‍ സാധ്യത ഏറെയാണ്. മേലടുക്കം, പഴുക്കാക്കാനം, മങ്കൊമ്പ് പ്രദേശങ്ങളിലെ ജീവനും സ്വത്തിനും സംരക്ഷണം ഉറപ്പാക്കുന്നതിനും ജനങ്ങളുടെ ഭയാശങ്കകള്‍ അകറ്റുന്നതിനും അടിയന്തര നടപടി സ്വീകരിക്കണമെന്നാണ് ആവശ്യം.

ആരോഗ്യമേഖലയ്ക്കെതിരേ ആസൂത്രിത ആക്രമണം: മന്ത്രി വീണ

ചങ്ങനാശേരി ജനറല്‍ ആശുപത്രി നവീകരണത്തിന് തുടക്കം ചങ്ങനാശേരി: കേരളത്തിന്‍റെ ആരോഗ്യമേഖലയ്ക്കെതിരേ അതിശക്തവും ആസൂത്രിതവുമായ ആക്രമണങ്ങള്‍ ഉണ്ടെന്നും അവയെ പൂച്ചെണ്ടായി സ്വീകരിക്കുന്നുവെന്നും ആരോഗ്യമന്ത്രി വീണാ ജോര്‍ജ്. ചങ്ങനാശേരി ജനറല്‍ ആശുപത്രി പുതിയ കെട്ടിടത്തിന്‍റെ നിര്‍മാണോദ്ഘാടനം നിര്‍വഹിച്ചു പ്രസംഗിക്കുകയായിരുന്നു മന്ത്രി. കിഫ്ബിയിലൂടെ 80.41 കോടി രൂപ മുടക്കിയാണ് ചങ്ങനാശേരി ജനറല്‍ ആശുപത്രിയില്‍ അഞ്ചുനില കെട്ടിടം ഉള്‍പ്പെടെയുള്ള ആധുനിക സജ്ജീകരണങ്ങള്‍ ഒരുങ്ങുന്നതെന്നും മന്ത്രി പറഞ്ഞു. ആര്‍ദ്രം പദ്ധതിയിലൂടെ 2.05 കോടി രൂപ വിനിയോഗിച്ച് നടപ്പാക്കുന്ന അസ്ഥിരോഗ വിഭാഗം ഒപി, ദേശീയ ആരോഗ്യ ദൗത്യം പദ്ധതിയിലൂടെ ഒരു കോടി രൂപ ചിലവഴിച്ചു നിര്‍മിച്ച നേത്രരോഗ വിഭാഗം ഓപ്പറേഷന്‍ തിയേറ്റര്‍, 1.87 കോടി രൂപയുടെ മലിനജല സംസ്‌കരണ പ്ലാന്‍റ് എന്നിവയുടെ ഉദ്ഘാടനവും ഫിസിയോതെറാപ്പി ബ്ലോക്കിന്‍റെ ശിലാസ്ഥാപനവും മന്ത്രി നിര്‍വഹിച്ചു. ജനറല്‍ ആശുപത്രി പരിസരത്തുനടന്ന ചടങ്ങില്‍ ജോബ് മൈക്കിള്‍ എംഎല്‍എ അധ്യക്ഷത വഹിച്ചു. നഗരസഭാ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍, മാടപ്പള്ളി ബ്ലോക്ക് പഞ്ചായത്ത് പ്രസിഡന്‍റ് എന്‍. രാജു, പഞ്ചായത്ത് പ്രസിഡന്‍റുമാരായ മണിയമ്മ രാജപ്പന്‍, സുജാത സുശീലന്‍, നഗരസഭ വൈസ് പ്രസിഡന്‍റ് മാത്യൂസ് ജോര്‍ജ്, ആരോഗ്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ എല്‍സമ്മ ജോബ്, നഗരസഭാംഗം ബീന ജോബി, ജില്ലാ മെഡിക്കല്‍ ഓഫീസര്‍ ഡോ.എന്‍. പ്രിയ, ജനറല്‍ ആശുപത്രി സൂപ്രണ്ട് ബി.കെ. പ്രസീദ തുടങ്ങിയവര്‍ പങ്കെടുത്തു.

കുടുംബങ്ങളില്‍ മക്കള്‍ക്കു പ്രത്യാശ പകരുന്ന അനുഭവം നിറയണം: മാര്‍ തോമസ് തറയില്‍

അഭിഷേകാഗ്‌നി കണ്‍വന്‍ഷനിലേക്ക് വിശ്വാസീപ്രവാഹം തുരുത്തി: കുടുംബങ്ങളില്‍ പ്രത്യാശയും പ്രോത്സാഹനവും പകരുന്ന വാക്കുകളും പ്രവൃത്തികളും ഉണ്ടാകണമെന്ന് ആര്‍ച്ച്ബിഷപ് മാര്‍ തോമസ് തറയില്‍. തുരുത്തി മര്‍ത്ത് മറിയം ഫൊറോന പള്ളിയില്‍ ഫാ. സേവ്യര്‍ ഖാന്‍ വട്ടായില്‍ നയിക്കുന്ന അഭിഷേകാഗ്നി ബൈബിള്‍ കണ്‍വന്‍ഷന്‍റെ രണ്ടാം ദിനം അനുഗ്രഹ പ്രഭാഷണം നടത്തുകയായിരുന്നു ആര്‍ച്ച്ബിഷപ്. മോശം വാക്കുകള്‍ മക്കളുടെ ആത്മവിശ്വാസവും മനസാന്നിധ്യവും തകര്‍ക്കും. അതിനാല്‍ പുതുതലമുറയ്ക്ക് ആത്മവിശ്വാസം പകരുന്ന സുവിശേഷാധിഷ്ഠിത കുടുംബാന്തരീക്ഷം ഉണ്ടാകണമെന്നും ആര്‍ച്ച്ബിഷപ് കൂട്ടിച്ചേര്‍ത്തു. അതിരൂപത വികാരി ജനറാള്‍ മോണ്‍. മാത്യു ചങ്ങങ്കരി വിശുദ്ധകുര്‍ബാനയ്ക്ക് മുഖ്യകാര്‍മികത്വം വഹിച്ചു. അട്ടപ്പാടി സെഹിയോന്‍ ധ്യാനകേന്ദ്രം ഡയറക്ടര്‍ ഫാ. സേവ്യര്‍ ഖാന്‍ വട്ടായില്‍ വചനപ്രഘോഷണവും ആരാധനയും നയിച്ചു. കണ്‍വന്‍ഷന്‍റെ ഉദ്ഘാടനം എമെരിറ്റസ് ആർച്ച്ബിഷപ് മാര്‍ ജോസഫ് പെരുന്തോട്ടം കഴിഞ്ഞ ദിവസം നിർവഹിച്ചു. ഇന്നു വൈകുന്നേരം 3.30ന് ജപമാല, നാലിന് വിശുദ്ധകുര്‍ബാന. അതിരൂപത വികാരി ജനറാള്‍ മോണ്‍. ആന്‍റണി എത്തയ്ക്കാട്ട് മുഖ്യകാര്‍മികത്വം വഹിക്കും. തുടര്‍ന്ന് ഫാ. സേവ്യര്‍ ഖാന്‍ വട്ടായില്‍ വചന പ്രഘോഷണം നടത്തും. 19ന് കണ്‍വന്‍ഷന്‍ സമാപിക്കും. കൺവൻഷന് ഫൊറോന വികാരി ഫാ. ജേക്കബ് ചീരംവേലിൽ, അസിസ്റ്റന്‍റ് വികാരി ഫാ. ജൂലിയസ് തീന്പലങ്ങാട്ട് തുടങ്ങിയവർ നേതൃത്വം നൽകുന്നു.

എംഎല്‍എ ഓഫീസിലേക്ക് യൂത്ത് കോണ്‍ഗ്രസ് മാര്‍ച്ച്

ചങ്ങനാശേരി: നിയോജകമണ്ഡലത്തിലെ തകര്‍ന്നുകിടക്കുന്ന വിവിധ റോഡുകള്‍ അടിയന്തരമായി പുനര്‍നിര്‍മിച്ചു ജനങ്ങളുടെ യാത്രാദുരിതം പരിഹരിക്കണമെന്നാവശ്യപ്പെട്ട് യൂത്ത് കോണ്‍ഗ്രസ് ചങ്ങനാശേരി നിയോജകമണ്ഡലം കമ്മിറ്റിയുടെ നേതൃത്വത്തില്‍ എംഎല്‍എ ഓഫീസിലേക്ക് നടത്തിയ മാര്‍ച്ച് പോലീസുമായുള്ള ഏറ്റുമുട്ടലില്‍ കലാശിച്ചു. മാര്‍ച്ച് ടിബിയുടെ മുന്പില്‍ ഡിവൈഎസ്പി കെ.പി. ടോംസണിന്‍റെ നേതൃത്വത്തില്‍ തടഞ്ഞതോടെയാണ് സംഘര്‍ഷം ആരംഭിച്ചത്. ടിബി റോഡില്‍ ഏറെ നേരം ഗതാഗതം മുടങ്ങി. കെപിസിസി നിര്‍വാഹകസമിതി അംഗം ജോഷി ഫിലിപ്പ് ഉദ്ഘാടനം ചെയ്തു. യൂത്ത് കോണ്‍ഗ്രസ് നിയോജകമണ്ഡലം പ്രസിഡന്‍റ് ഡെന്നീസ് ജോസഫ് അധ്യക്ഷത വഹിച്ചു. യൂത്ത് കോണ്‍ഗ്രസ് ജില്ലാ പ്രസിഡന്‍റ് എം. ഗൗരിശങ്കര്‍ മുഖ്യപ്രഭാഷണം നടത്തി. കെ.കെ. കൃഷ്ണകുമാര്‍, സോബിച്ചന്‍ കണ്ണമ്പള്ളി, അഡ്വ. ബിബിന്‍ കടന്തോട്, റിച്ചി സാം ലൂക്കോസ്, അരുണ്‍ ബാബു, എമില്‍ ജോസഫ്, എബിന്‍ ആന്‍റണി, സുധി ജോസഫ്, ടോണി കുട്ടമ്പേരുര്‍, വിനീഷ് മഞ്ചാടിക്കര, നിജു വാണിയപുരയ്ക്കല്‍, നിധീഷ് കോച്ചേരി തുടങ്ങിയവര്‍ പ്രസംഗിച്ചു. പ്രതിഷേധ മാര്‍ച്ച് നടത്തിയ യൂത്ത് കോണ്‍ഗ്രസ് ഭാരവാഹികള്‍ക്കെതിരേ പോലീസ് കേസ് രജിസ്റ്റര്‍ ചെയ്തു. പിന്നീട് ജാമ്യത്തില്‍ വിട്ടു.

ദളിത് ക്രൈസ്തവരോടുള്ള വിവേചനം അവസാനിപ്പിക്കണം: മാര്‍ തോമസ് തറയിൽ

കോട്ടയം: മതേതര രാജ്യത്ത് ദളിത് ക്രൈസ്തവരോടു വിവേചനമാണെന്നും ഈ വിവേചനം അവസാനിപ്പിക്കണമെന്നും ചങ്ങനാശേരി ആര്‍ച്ച്ബിഷപ് മാര്‍ തോമസ് തറയില്‍. കഴിഞ്ഞ 75 വര്‍ഷമായി ഭരണഘടനാ അവകാശങ്ങള്‍ നിഷേധിക്കപ്പെടുന്ന ദളിത് ക്രൈസ്തവ സമൂഹത്തോട് ഐക്യദാര്‍ഢ്യം പ്രഖ്യാപിച്ച് ചങ്ങനാശേരി അതിരൂപതയുടെ നേതൃത്വത്തില്‍ അതിരൂപതയിലെ വിവിധ സംഘടനകളുമായി ചേര്‍ന്ന് കോട്ടയം ഗാന്ധി സ്‌ക്വയറില്‍ നടത്തിയ നീതിഞായര്‍ ഐക്യദാര്‍ഢ്യ സമ്മേളനം ഉദ്ഘാടനം ചെയ്യുകയായിരുന്നു ആര്‍ച്ച്ബിഷപ് മാര്‍ തോമസ് തറയില്‍. ചങ്ങനാശേരി അതിരൂപത മുഖ്യവികാരി ജനറാള്‍ ഫാ. ആന്‍റണി എത്തയ്ക്കാട്ട് അധ്യക്ഷത വഹിച്ചു. ചങ്ങനാശേരി അതിരൂപത ഡിസിഎംഎസ് ഡയറക്‌ടര്‍ ഫാ. ബെന്നി കുഴിയടിയില്‍ നീതിഞായര്‍ സന്ദേശം നല്‍കി. ഡിസിഎംഎസ് അതിരൂപത പ്രസിഡന്‍റ് ഡോ. സിജോ ജേക്കബ് വിഷയാവതരണം നടത്തി. കെ. ഫ്രാന്‍സിസ് ജോര്‍ജ് എംപി, ഫാ. ജോസഫ് ചമ്പക്കുളത്തില്‍, ഫാ. സാവിയോ മാനാട്ട്, ഫാ. ജോജോ പള്ളിച്ചിറ, അരുണ്‍ ടോം, റോയി കപ്പാങ്കല്‍, പ്രഫ. റോസമ്മ സോണി, ജയിംസ് ഇലവുങ്കല്‍, റിന്‍സ് വര്‍ഗീസ്, മാത്യു ജോസഫ്, ബിജു സെബാസ്റ്റ്യന്‍ തുടങ്ങിയവര്‍ പ്രസംഗിച്ചു. കോട്ടയം മേഖലയിലെ വിവിധ ഫൊറോന വികാരിമാര്‍, അതിരൂപത ഭാരവാഹികള്‍, രാഷ്‌ട്രീയ സാമൂഹിക രംഗത്തെ പ്രമുഖര്‍ തുടങ്ങിയവര്‍ സമ്മേളനത്തില്‍ പങ്കെടുത്തു.

നവജീവൻ ട്രസ്റ്റ് ജന്മവാര്‍ഷികം ആഘോഷം

ആര്‍പ്പൂക്കര: നവജീവൻ ട്രസ്റ്റിന്‍റെ 34-ാം ജന്മദിന വാര്‍ഷികം ആഘോഷിച്ചു. നവജീവനില്‍ നടന്ന പൊതുസമ്മേളനം കുടമാളൂര്‍ സെന്‍റ് മേരീസ് മേജര്‍ ആര്‍ക്കി എപ്പിസ്‌കോപ്പല്‍ തീര്‍ഥാടന ദേവാലയം ആര്‍ച്ച്പ്രീസ്റ്റ് റവ.ഡോ. ജോര്‍ജ് മംഗലത്തില്‍ ഉദ്ഘാടനം ചെയ്തു. നവജീവന്‍ ട്രസ്റ്റി പി.യു. തോമസ് അധ്യക്ഷത വഹിച്ചു. രാ‌ഷ്‌ട്രദീപിക ലിമിറ്റഡ് മാനേജിംഗ് ഡയറക്ടര്‍ ഫാ. മൈക്കിള്‍ വെട്ടിക്കാട്ട് അനുഗ്രഹപ്രഭാഷണം നടത്തി. മുന്‍ വ്യോമയാന സെക്രട്ടറി റോയി പോള്‍ മുഖ്യപ്രഭാഷണം നടത്തി.

തലയോലപ്പറമ്പ് സിഎച്ച്സിക്ക് വാഹനം ലഭ്യമാക്കണം

തലയോലപ്പറമ്പ്: വാഹനമില്ലാത്തത് തലയോലപ്പറമ്പ് സാമൂഹിക ആരോഗ്യ കേന്ദ്രത്തിന്‍റെ പ്രവർത്തനത്തെ പ്രതികൂലമായിബാധിക്കുന്നു. തലയോലപ്പറമ്പ് സിഎച്ച്സിക്ക് ഉണ്ടായിരുന്ന വാഹനം 15 വർഷ കാലാവധി പൂർത്തിയായതിനെത്തുടർന്ന് ഷെഡിൽ കയറ്റി. കഴിഞ്ഞ രണ്ടു വർഷമായി ഇവിടെ വാഹനമില്ല. തലയോലപ്പറമ്പിലെ അഞ്ചു സബ് സെന്‍ററുകളിൽ പ്രതിരോധ കുത്തിവയ്പ്, വൈദ്യപരിശോധനാ ക്യാമ്പ് എന്നിവയുമായി ബന്ധപ്പെട്ട് സിഎച്ച്സി അധികൃതർ ഇപ്പോൾ എത്തുന്നത് സ്വകാര്യവാഹനത്തിലാണ്. പുതിയ വാഹനം ലഭ്യമാക്കുന്നതിന് പല തവണ നിവേദനം നൽകിയിട്ടും ആരോഗ്യ വകുപ്പ് നടപടി സ്വീകരിച്ചില്ല. തലയോലപറമ്പ് സിഎച്ച്സി കടുത്തുരുത്തി ബ്ലോക്ക് പഞ്ചായത്തിനു കീഴിലായതിനാൽ വാഹനത്തിന്‍റെ വാടകയ്ക്കും മറ്റുമായി ബ്ലോക്ക് പഞ്ചായത്ത് ഫണ്ട് അനുവദിക്കുന്നുണ്ട്. സിഎച്ച്സിയിൽ വാഹനമില്ലാതായതോടെ ഡ്രൈവറെ വൈക്കം താലൂക്ക് ആശുപത്രിയിലേക്കു മാറ്റി. സ്വന്തമായി വാഹനമില്ലാത്തതിനാൽ അടിയന്തരഘട്ടങ്ങളിൽ സബ് സെന്‍ററുകളിൽ എത്താൻ കഴിയാറില്ലെന്നും പുതിയ വാഹനം ലഭ്യമാക്കാൻ ആരോഗ്യ വകുപ്പ് നടപടി സ്വീകരിക്കണമെന്നുമാണ് നാട്ടുകാരുടെ ആവശ്യം.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]