ADVERTISEMENT

ADVERTISEMENT

വിദ്യാരംഗം കലാ സാഹിത്യ വേദി ഉദ്ഘാടനം

കരിമ്പൻ: മണിപ്പാറ സെന്‍റ് മേരീസ്‌ യുപി സ്കൂളിൽ വിദ്യാരംഗം കലാസാഹിത്യ വേദിയുടെ ഉദ്ഘാടനം മുരിക്കാശേരി സെന്‍റ് മേരീസ്‌ ഹയർ സെക്കൻഡറി സ്കൂൾ പ്രിൻസിപ്പൽ സിബിച്ചൻ തോമസ് നിർവഹിച്ചു. പിടിഎ എക്സിക്യൂട്ടീവംഗം ഷൈൻ സെബാസ്റ്റ്യൻ അധ്യക്ഷത വഹിച്ചു. ഹെഡ്മിസ്ട്രസ് സിസ്റ്റർ കൃപ സിഎംസി, കായികാധ്യാപകൻ എം.എ. ജോസ് എന്നിവർ പ്രസംഗിച്ചു.

ADVERTISEMENT

എം.ഡി. തോമസ് അനുസ്മരണം

പീരുമേട്: ദീർഘകാലം ഡിസിസി പ്രസിഡന്‍റും ജില്ലാ പഞ്ചായത്ത് പ്രസിഡന്‍റും കൺസ്യൂമർ ഫെഡ് ചെയർമാനുമായിരുന്ന എം.ഡി. തോമസ് അനുസ്മരണ സമ്മേളനം പീരുമേട്ടിൽ നടന്നു. എം.ഡി. തോമസ് ഫൗണ്ടേഷന്‍റെ ആഭിമുഖ്യത്തിൽ ഗ്രീൻവാലി ഹാളിൽ ചേർന്ന സമ്മേളനം വാഴുർ സോമൻ എംഎൽഎ ഉദ്ഘാടനം ചെയ്തു. എഐസിസി അംഗം ഇ.എം. ആഗസ്തി അധ്യക്ഷത വഹിച്ചു. കെപിസിസി ജനറൽ സെക്രട്ടറി എസ്. അശോകൻ, കേരള കോൺഗ്രസ്-എം സംസ്ഥാന സെക്രട്ടറി അലക്സ് കോഴിമല, സഹകരണ പെൻഷൻ ബോർഡ് ചെയർമാൻ ആർ. തിലകൻ, മുൻ ഡിസിസി പ്രസിഡന്‍റ് റോയി കെ. പൗലോസ്, ഇബാഹിം കുട്ടി കല്ലാർ, സിപിഐ സംസ്ഥാന കമ്മിറ്റി അംഗം ജോസ് ഫിലിപ്പ്, പീരുമേട് പഞ്ചായത്ത് പ്രസിഡൻ്റ് ആർ. ദിനേശൻ, ഡിസിസി സെക്രട്ടറിമാരായ സിറിയക് തോമസ്, ഷാജി പൈനാടത്ത്, കോൺഗ്രസ് ബ്ലോക്ക് പ്രസിഡന്‍റ് ജോർജ് ജോസഫ്, ഡോ. സജി പോത്തൻ തോമസ്, അഡ്വ. സാബു തോമസ് എന്നിവർ പ്രസംഗിച്ചു. മുതിർന്ന കോൺഗ്രസ് പ്രവർത്തകരായ പി.കെ. ചന്ദ്രശേഖരൻ, വി.സി. ജോസഫ് എന്നിവരെ സമ്മേളനത്തിൽ ആദരിച്ചു. എസ്എസ്എൽസി, പ്ലസ് ടു പരീക്ഷകളിൽ മികച്ച വിജയം നേടിയ വിദ്യാർഥികളെ സമ്മേളനത്തിൽ അനുമോദിച്ചു.

റവന്യു ഓഫീസുകൾക്ക് തുടർച്ചാനുമതി നൽകണം: എൻജിഒ അസോ.

തൊടുപുഴ: കർഷകരുടെ കൈവശഭൂമിക്ക് പട്ടയം നൽകുന്നതിനായി ആരംഭിച്ച ഭൂ പതിവ് ഓഫിസുകളുടെയും ദേശീയ പാത വികസനത്തിന് സ്ഥലം ഏറ്റെടുക്കുന്നതിനായി ആരംഭിച്ച ലാൻഡ് അക്വിസിഷൻ ഓഫീസിന്‍റെയും തുടർച്ചാനുമതി അടിയന്തരമായി നൽകണമെന്ന് എൻജിഒ അസോസിയേഷൻ ജില്ലാ കമ്മിറ്റി ആവശ്യപ്പെട്ടു. പട്ടയ നടപടികൾ വേഗത്തിൽ പൂർത്തിയാക്കാൻ ആരംഭിച്ച ഇടുക്കി, കരിമണ്ണൂർ, നെടുങ്കണ്ടം, കട്ടപ്പന, രാജകുമാരി, മുരിക്കാശേരി, പീരുമേട് ഭൂപതിവ് ഓഫീസുകൾ വഴി ഇതുവരെ അൻപതിനായിത്തിലധികം പട്ടയങ്ങളാണ് വിതരണം നടത്തിയത്. പട്ടയ മിഷന്‍റെ ഭാഗമായി അടുത്ത മാസങ്ങളിൽ ഇരുപതിനായിരത്തോളം പട്ടയങ്ങൾ വിതരണത്തിന് തയാറെടുക്കുന്ന ഓഫീസുകളുടെ തുടച്ചാനുമതിയാണ് സർക്കാർ വൈകിപ്പിക്കുന്നത്. ജില്ലയിലൂടെ കടന്നുപോകുന്ന ദേശീയപാതകളുടെ വികസനത്തിനായി സ്ഥലം ഏറ്റെടുക്കുന്നതിന് കഞ്ഞിക്കുഴിയിൽ ആരംഭിച്ച ലാൻഡ് അക്വിസിഷൻ ഓഫീസിനും തുടർച്ചാനുമതി ലഭിച്ചിട്ടില്ല. കഴിഞ്ഞ മാർച്ച് 31 വരെയാണ് ഈ ഓഫീസുകൾക്ക് പ്രവർത്തനാനുമതി ഉണ്ടായിരുന്നത്. പ്രവർത്തനാനുമതി ഇല്ലാത്തതിനാൽ ജീവനക്കാരുടെ ശന്പളം പോലും മുടങ്ങിയ സാഹചര്യമാണ്. ജില്ലയിലെ പ്രവർത്തനാനുമതി അവസാനിച്ച ഓഫീസുകൾക്ക് അവ ദീർഘിപ്പിച്ചു നൽകുന്നതിന് ധനവകുപ്പ് അനുകൂലമായി റിപ്പോർട്ട് നൽകിയിട്ടും തുടർച്ചാനുമതി ഉത്തരവ് ഇറക്കാത്ത സർക്കാർ നടപടിയിൽ എൻജിഒ അസോസിയേഷൻ ജില്ലാ കമ്മിറ്റി പ്രതിഷേധിച്ചു.

വിശ്വജ്യോതിയിൽ എംബിഎ ബാച്ച് ഉദ്ഘാടനം

വാഴക്കുളം: വിശ്വജ്യോതി സ്കൂൾ ഓഫ് മാനേജ്മെന്‍റ് സ്റ്റഡീസിലെ എംബിഎ പുതിയ ബാച്ചിന്‍റെ ഉദ്ഘാടനം ജിയോജിത്ത് ഫിനാൻഷ്യൽ സർവീസസ് സിഇഒ സി.ജെ. ജോർജ് നിർവഹിച്ചു. കോളജ് മാനേജർ മോണ്‍. പയസ് മലേക്കണ്ടത്തിൽ, ഡയറക്ടർ റവ. ഡോ. പോൾ പാറത്താഴം, പ്രിൻസിപ്പൽ ഡോ. കെ.കെ. രാജൻ, വൈസ് പ്രിൻസിപ്പൽ പ്രഫ. സോമി പി. മാത്യു, ഡിപ്പാർട്ട്മെന്‍റ് കണ്‍സൾട്ടന്‍റ് ഫാ. ജിനോ പുന്നമറ്റത്തിൽ, എംബിഎ വിഭാഗം മേധാവി ഡോ. ഷെല്ലി ജോസ്, ട്രഷറർ കെ.വി. തോമസ് തുടങ്ങിയവർ പ്രസംഗിച്ചു.

തൊമ്മൻകുത്തിൽ അവകാശവുമായി വനംവകുപ്പ്

തൊമ്മൻകുത്ത്: ഇല്ലാത്ത ജണ്ടകൾ ഉണ്ടെന്ന് സ്ഥാപിച്ച് കൈവശഭൂമി വനഭൂമിയെന്ന് വരുത്തിത്തീർക്കാൻ വനം വകുപ്പ് ഗൂഢനീക്കം ആരംഭിച്ചതായി തൊമ്മൻകുത്ത് നാരങ്ങാനം ജാഗ്രതാ സമിതി ആരോപിച്ചു. വിവരാവകാശ പ്രകാരം പുറത്തു വന്ന രേഖയിൽ പുതിയ രണ്ട് ജണ്ടകൾ കാണിച്ചിട്ടുണ്ട്. ഇവ എവിടെയെന്ന് ഇതുവരെ വനം വകുപ്പ് വ്യക്തമാക്കുന്നില്ല. ജിയോ മാപ്പിംഗ് പ്രകാരം ഒരു കയ്യാലയുടെയും നാരങ്ങാനത്ത് കുടിയേറ്റം നടക്കുന്നതിന് മുന്പ് എവിടെയോ ഉണ്ടായിരുന്ന കൽക്കൂട്ടത്തിന്‍റയും അടുത്തുനിന്നാണ് ലൊക്കേഷൻ ഉൾപ്പെടെ കാണിച്ചിട്ടുള്ള ഫോട്ടോ പുറത്തു വിട്ടിരിക്കുന്നത്. ഇത് എന്ന് സ്ഥാപിച്ചതാണെന്ന് വ്യക്തല്ല. വ്യാജ ജണ്ടകൾ ഉണ്ടാക്കി കുരിശ് നിൽക്കുന്ന സ്ഥലം ജണ്ടയ്ക്കുള്ളിലാണെന്ന് വരുത്തി തീർക്കാനുള്ള ശ്രമമാണ് നടക്കുന്നത്. യഥാർഥ ജണ്ടകൾക്ക് പുറത്തുള്ള സ്ഥലത്ത് ഇനിയും അധികാരം സ്ഥാപിക്കാനുള്ള വനം വകുപ്പിന്‍റെ ഒരു നീക്കവും അനുവദിക്കില്ലെന്നും ഇവർ പറഞ്ഞു. നാരങ്ങാനത്ത് തൊമ്മൻകുത്ത് സെന്‍റ് തോമസ് പള്ളി കൈവശഭൂമിയിൽ സ്ഥാപിച്ച കുരിശ് നിൽക്കുന്നതുൾപ്പെടെ കർഷകന്‍റെ ഭൂമി വനഭൂമിയാണെന്ന് വരുത്തി തീർക്കാനുളള ശ്രമമാണ് ഇപ്പോൾ നടത്തുന്നതെന്നും ആക്ഷേപമുയരുന്നുണ്ട്. കൂടാതെ ആനയാടിക്കുത്ത് വിനോദ സഞ്ചാര കേന്ദ്രത്തിന് അടുത്തു വരെയുള്ള ഭാഗം കുടിയൊഴിപ്പിച്ച് ഇവിടം പിടിച്ചടക്കാനും വേണ്ടിയാണ് വനം വകുപ്പിന്‍റെ നീക്കമെന്നും നേതാക്കളായ ഫാ. ജയിംസ് ഐക്കമറ്റം, ഇമാം അബ്ദുൾ സമദ് സഖാഫി, പ്രകാശൻ വടുതലയിൽ, മനോജ് മാമല, സോജൻ കുന്നുംപുറം, ഫ്രാങ്ക്ളിൻ പാലക്കാട്ട് എന്നിവർ ആരോപിച്ചു.

ഉപാസന സാംസ്കാരിക കേന്ദ്രം റൂബി ജൂബിലി നിറവിൽ

തൊടുപുഴ: നാലു പതിറ്റാണ്ടുകളായി തൊടുപുഴയുടെ സാംസ്കാരികമുഖമായി നിലകൊള്ളുന്ന ഉപാസന സാംസ്കാരിക കേന്ദ്രത്തിന്‍റെ റൂബി ജൂബിലി ആഘോഷങ്ങൾക്ക് നാളെ തുടക്കമാകുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. റവ. ഡോ. ആൽബർട്ട് നന്പ്യാപറന്പിൽ സിഎംഐയുടെ നേതൃത്വത്തിൽ ആരംഭിച്ച എറണാകുളം ചാവറ കൾച്ചറൽ സെന്‍ററിനു ശേഷമാണ് 1985 ജനുവരി 28 ന് സിഎംഐ സഭയുടെ കീഴിൽ ഉപാസന സാംസ്കാരിക കേന്ദ്രത്തിനു തുടക്കം കുറിച്ചത്. മുൻ കേരള ഗവർണർ പി. രാമചന്ദ്രനാണ് സാംസ്കാരിക കേന്ദ്രത്തിന്‍റെ ഉദ്ഘാടനം നിർവഹിച്ചത്. പി.ജെ. ജോസഫ് എംഎൽഎ, പി.കെ. കൃഷ്ണൻനായർ, കുട്ടിസാഹിബ് എന്നിവരായിരുന്നു രക്ഷാധികാരികൾ. തുടർന്ന് എല്ലാ ഞായറാഴ്ചകളിലും വിവിധ വിഷയങ്ങളിൽ സെമിനാറുകളും പ്രഭാഷണങ്ങളും സംഘടിപ്പിച്ചു വരികയാണ്. എം.വി. ദേവൻ, ഒ.എൻ.വി. കുറുപ്പ്, സുകുമാർ അഴീക്കോട്, ബാലചന്ദ്രൻ ചുള്ളിക്കാട്, ജെറി അമൽദേവ്, സിപ്പി പള്ളിപ്പുറം, ഡി. വിനയചന്ദ്രൻ, എം. തോമസ് മാത്യു, എം. ലീലാവതി, സ്വാമി സന്ദീപനാനന്ദഗിരി, പെരുന്പടവം ശ്രീധരൻ, ഡോ. ഡി. ബാബുപോൾ, സ്വാമി നിത്യചൈതന്യയതി, ജോ പോൾ, ഏഴാച്ചേരി രാമചന്ദ്രൻ, ജസ്റ്റീസ് വി.കെ. ഷംസുദ്ദീൻ, കുഞ്ഞുണ്ണി മാഷ്, കടമ്മനിട്ട രാമകൃഷ്ണൻ, പി. വത്സല, പി. ഗോവിന്ദപിള്ള, ജോർജ് ഓണക്കൂർ, പി.ജെ. ജോസഫ്, കെ.എം. മാണി, പന്ന്യൻ രവീന്ദ്രൻ, പി.ടി. തോമസ്, എം.കെ. സാനു, ചെമ്മനം ചാക്കോ, അയ്യപ്പണിക്കർ, കെ.എൽ. മോഹനവർമ്മ, ഫാ. വടക്കൻ തുടങ്ങി വിവിധ സാംസ്കാരിക, രാഷ‌്ട്രീയ നായകർ ഇവിടെ നടത്തിയ സെമിനാറുകളിൽ പങ്കെടുത്തിട്ടുണ്ട്. ഇതിനു പുറമേ റിട്ടയർ ചെയ്തവർക്കായി സൗഹൃദ സദസ്, കാവ്യ കഥാവേദി, സംഗീതസന്ധ്യ, ബാലോപാസന, വനിതാ വേദി, യുവവേദി എന്നിവയും ഉപാസനയിൽ സംഘടിപ്പിച്ചു വരുന്നുണ്ട്. ഇതിനു പുറമെ രാവിലെ 9.30 മുതൽ 1.30 വരെയും ഉച്ചകഴിഞ്ഞ് 2.30 മുതൽ 5.30 വരെയും ലൈബ്രറിയും റീഡിംഗ് റൂമും പ്രവർത്തിച്ചുവരുന്നുണ്ട്. ഉപാസന ഓഡിറ്റോറിയത്തിൽ നടക്കുന്ന ആഘോഷപരിപാടികളുടെ ഉദ്ഘാടനം പി.ജെ. ജോസഫ് എംഎൽഎ നിർവഹിക്കും. മൂവാറ്റുപുഴ കാർമൽ പ്രൊവിൻഷ്യൽ ഫാ. മാത്യു മഞ്ഞക്കുന്നേൽ സിഎംഐ അധ്യക്ഷത വഹിക്കും. എംജി യൂണിവഴ്സിറ്റി മുൻ വൈസ് ചാൻസലർ ഡോ. സിറിയക് തോമസ് "ഭാരതം ഇന്നലെ, ഇന്ന്, നാളെ' എന്ന വിഷയത്തിൽ മുഖ്യപ്രഭാഷണം നടത്തും. റൂബി ജൂബിലിയുടെ സമാപന സമ്മേളനം ഡിസംബർ 14ന് വിപുലമായ രീതിയിൽ സംഘടിപ്പിക്കും. പത്രസമ്മേളനത്തിൽ ഡയറക്ടർ ഫാ. പ്രിൻസ് പരത്തനാൽ സിഎംഐ, സെക്രട്ടറി ഡോ. ജോണ്‍ മുഴുത്തേറ്റ്, ജോയിന്‍റ് സെക്രട്ടറിമാരായ തോമസ് കുണിഞ്ഞി, സുകുമാർ അരിക്കുഴ, ലൈബ്രറേറിയൻ ഷാജി മുതുകുളം എന്നിവർ പങ്കെടുത്തു.

കോണ്‍ഗ്രസ് ഗ്രൂപ്പ് പോര്: അശ്ലീല പ്രചാരണത്തിന് കേസ്

ഇടുക്കി: ജില്ലയിലെ പ്രമുഖ കോണ്‍ഗ്രസ് നേതാവിന്‍റെ കുടുംബാംഗങ്ങളെ അപമാനിക്കുന്ന തരത്തിൽ ഉൗമക്കത്തുകൾ പ്രചരിപ്പിച്ചതായി പരാതി. ഇവരുടെ പരാതിയുടെ അടിസ്ഥാനത്തിൽ തൊടുപുഴ പോലീസ് കേസെടുത്തു. സ്ത്രീത്വത്തെ അപമാനിക്കൽ വകുപ്പ് പ്രകാരമാണ് കേസെടുത്തിരിക്കുന്നത്. 15 ലേറെ കത്തുകൾ ഇത്തരത്തിൽ പ്രചരിക്കുന്നുണ്ടെന്ന് പോലീസ് പറഞ്ഞു. തിരുവനന്തപുരം, കട്ടപ്പന എന്നിവിടങ്ങളിൽനിന്നാണ് കത്തുകൾ അയച്ചിരിക്കുന്നത്. ജില്ലയിലെ കോണ്‍ഗ്രസ് നേതാക്കൾക്കാണ് കത്ത് കിട്ടിയത്. ഇവരാണ് വിവരം പരാതിക്കാരിയുടെ ശ്രദ്ധയിൽപെടുത്തിയത്. രാഷ്ട്രീയ, അശ്ലീല പരാമർശങ്ങൾ കത്തിലുണ്ടെന്നാണ് വിവരം. പാർട്ടിയ്ക്കുള്ളിലെ ഗ്രൂപ്പ് പോരിന്‍റെ ഭാഗമായാണ് കത്തുകൾ പ്രചരിപ്പിച്ചതെന്നാണ് സൂചന.

വയോധികൻ ബസിൽനിന്നു വീണു മരിച്ചു

ശാന്തമ്പാറ: സ്വകാര്യ ബസിൽനിന്നു വീണ് വയോധികൻ മരിച്ചു. ശാന്തൻപാറ ചൂണ്ടൽ സ്വദേശി സെൽവരാജ് (64)ആണ് മരിച്ചത്. ഇന്നലെ രാവിലെ 11.30 നാണ് അപകടം ഉണ്ടായത്. പൂപ്പാറയിൽനിന്നു സ്വകാര്യ ബസിൽ കയറിയ സെൽവരാജ് ചൂണ്ടലിൽ എത്തിയപ്പോൾ ബസിൽനിന്ന് ഇറങ്ങുന്നതിനിടെ റോഡിലേക്ക് വീഴുകയായിരുന്നു. വീഴ്ച്ചയിൽ തലക്ക് ഗുരുതരമായി പരിക്കേറ്റ ഇയാളെ രാജകുമാരിയിലെ സ്വകാര്യ ആശുപത്രിയിൽ എത്തിച്ചെങ്കിലും മരിച്ചു. മൃതദേഹം പോസ്റ്റ്മാർട്ടത്തിനായി മൃതദേഹം അടിമാലി താലൂക്ക് ആശുപത്രിയിലേക്ക് മാറ്റി. ഭാര്യ: ശങ്കരമ്മ. മക്കൾ: ഉമാ മഹേശ്വരി (ശാന്തൻപാറ പഞ്ചായത്തംഗം), ശരണ്യ, ഭാനുപ്രിയ. മരുമക്കൾ: ശ്രീകുമാർ, അൻപഴകൻ, ജിതിൻ.

കൊന്നത്തടി കുടിവെള്ള പദ്ധതി അന്തിമ ഘട്ടത്തിൽ: മന്ത്രി റോഷി അഗസ്റ്റിൻ

ചെറുതോണി: ജൽജീവൻ മിഷൻ പദ്ധതിയുടെ ഭാഗമായി കൊന്നത്തടി പഞ്ചായത്തിലെ മുഴുവൻ വീടുകളിലും കുടിവെള്ളം എത്തിക്കുന്ന പ്രവൃത്തികൾക്ക് 146.8 കോടി അനുവദിച്ചതായി മന്ത്രി റോഷി അഗസ്റ്റിൻ അറിയിച്ചു. പൊന്മുടി ഡാമിൽ സ്ഥാപിക്കുന്ന ഫ്ളോട്ടിംഗ് പന്പിൽനിന്നു പ്രതിദിനം 22 ദശലക്ഷം ലിറ്റർ ഉത്പാദനശേഷിയുള്ള ശുദ്ധീകരണശാലയിലേക്ക് ജലമെത്തിച്ച് വിതരണം ചെയ്യുന്നതാണ് പദ്ധതി. ശുദ്ധീകരിച്ച ജലം പ്ലാന്‍റിനോടനുബന്ധിച്ചുള്ള പന്പ്ഹൗസിൽനിന്നു പൂതാളി, നാടുകാണി, ആൽപ്പാറ, പന്നിയാർകുട്ടി എന്നിവിടങ്ങളിലെ ടാങ്കിലേക്കെത്തിക്കും. തുടർന്ന് ആൽപാറ ടാങ്കിൽനിന്ന് ഇഞ്ചപതാൽ ടാങ്കിലേക്കും പൂതാളി ടാങ്കിൽനിന്നു കണ്ണാടിപ്പാറ, കുരുവിളാസിറ്റി ടാങ്കുകളിലേക്കും പന്പിംഗ് മെയിനായി പണിക്കൻകുടി ടോപ് ടാങ്കിലേക്കും വെള്ളം എത്തിക്കും. കുരുവിളാസിറ്റി ടാങ്കിൽനിന്നു മെയിൻ പന്പിംഗ് ടാങ്കായ കുരിശുകുത്തി ടാങ്കിലേക്കും ഗ്രാവിറ്റി വഴി നിലവിലെ ചിന്നാർ, ഇഞ്ചത്തൊട്ടി ടാങ്കുകളിലേക്കും പണിക്കൻകുടി ടോപ് ടാങ്കിൽനിന്നു പണിക്കൻകുടി, പറുസിറ്റി എന്നീ ടാങ്കുകളിലേക്കും വെള്ളം എത്തിക്കും. പൂതാളി ടാങ്കിൽനിന്നു മെയിൻ പന്പിംഗ് ടാങ്കായ തിങ്കൾകാട് ടാങ്കിലേക്ക് വെള്ളമെത്തിച്ച് അവിടെനിന്നു പന്പ് ചെയ്ത് കരിമലയിലെ ടാങ്കിലേക്ക് എത്തിക്കും. കൊന്നത്തടി പഞ്ചായത്തിൽ 7863 കണക്‌ഷൻ നൽകാനാണ് ലക്ഷ്യമിടുന്നത്. ശുദ്ധീകരണശാല നിർമിക്കുന്ന സ്ഥലത്തെ മരങ്ങൾ നീക്കം ചെയ്യുന്നതിന് ഇതിനോടകം അനുമതി ലഭിച്ചിട്ടുണ്ടെന്നും മന്ത്രി പറഞ്ഞു.

ഇരട്ടയാർ സെന്‍റ് തോമസിൽ എസ്പിസി യൂണിറ്റ് ഉദ്ഘാടനം

ഇരട്ടയാർ: ഇരട്ടയാർ സെന്‍റ് തോമസ് ഹയർ സെക്കൻഡറി സ്കൂളിൽ പുതിയതായി അനുവദിച്ച സ്റ്റുഡന്‍റ് പോലീസ് കേഡറ്റ് യൂണിറ്റിന്‍റെ ഉദ്ഘാടനം മന്ത്രി റോഷി അഗസ്റ്റിൻ നിർവഹിച്ചു. ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാംകുന്നേൽ അധ്യക്ഷത വഹിച്ച യോഗത്തിൽ ഇടുക്കി രൂപത വികാരി ജനറാൾ മോണ്‍. ജോസ് കരിവേലിക്കൽ അനുഗ്രഹ പ്രഭാഷണം നടത്തി. ഇടുക്കി എഎസ്പി ഇമ്മാനുവൽ പോൾ പദ്ധതി വിശദീകരണവും ഗ്രാമപഞ്ചായത്ത് പ്രസിഡന്‍റ് ആനന്ദ് സുനിൽകുമാർ സിപിഒ സർട്ടിഫിക്കറ്റ് വിതരണവും നടത്തി. കട്ടപ്പന എസ്എച്ച്ഒ ടി.സി. മുരുകൻ എസ്പിസി യൂണിഫോം വിതരണവും അസിസ്റ്റന്‍റ് നോഡൽ ഓഫീസർ എസ്.ആർ. സുരേഷ് ബാബു എസ്പിസി ഓഫീസ് ഉദ്ഘാടനവും നിർവഹിച്ചു. ലഹരിവിരുദ്ധ മത്സരങ്ങളിൽ വിജയിച്ച വിദ്യാർഥികളെ സ്കൂൾ മാനേജർ ഫാ. സഖറിയാസ് കുമ്മണ്ണൂപ്പറന്പിൽ ആദരിച്ചു. ചടങ്ങിൽ വാർഡ് മെന്പർ ജിൻസണ്‍ വർക്കി, ഹെഡ്മാസ്റ്റർ എം. വി. ജോർജുകുട്ടി, പിടിഎ പ്രസിഡന്‍റ് സിജോ ഇലന്തൂർ, എംപിടിഎ പ്രസിഡന്‍റ് ബിനു ജസ്റ്റിൻ, ജിറ്റോ മാത്യു, ലിജോ ജോയി, എ‌ഡ‌‌്‌വിൻ ജോസഫ് എന്നിവർ പ്രസംഗിച്ചു.

നായ്ക്കൾക്ക് അടി(മാലി)പൊളി!

സ്വന്തം ലേഖകർ അടിമാലിക്കാരുടെ കാര്യം കഷ്ടം തന്നെ. നഗരത്തിൽ ഇറങ്ങിയാൽ നായകടി ഏല്ക്കാതെ തിരിച്ചുപോകാൻ പറ്റിയാൽ ഭാഗ്യം. രാത്രിയാണ് ആക്രമണം കൂടുതൽ. ദീര്‍ഘദൂര ബസ് കാത്തു നില്‍ക്കുന്നവരും ഭക്ഷണം കഴിക്കാന്‍ എത്തുന്നവരും താലൂക്കാശുപത്രിയിലെ രോഗികള്‍ക്കു കൂട്ടിരിപ്പുകാരായി എത്തുന്നവരുമൊക്കെയാണ് തെരുവു നായകളുടെ ഭീഷണി നേരിടുന്നത്. ടൗണില്‍ രാത്രികാലത്തു കൂട്ടമായി നടക്കുന്ന തെരുവ് നായ്ക്കള്‍ വാഹനങ്ങള്‍ക്കു കുറുകെ ചാടുന്നതും കാല്‍നടയാത്രികര്‍ക്കു നേരെ കുരച്ചു ചാടുന്നതുമൊക്കെ പതിവാകുകയാണ്. മാര്‍ക്കറ്റ് ജംഗ്ഷനിലും ബസ് സ്റ്റാന്‍ഡ് പരിസരത്തുമെല്ലാം തെരുവ് നായ്ക്കളുടെ കൂട്ടമാണ്. കൂട്ടമായി നടക്കുന്ന നായ്ക്കളെ തുരത്തിയോടിക്കാന്‍ ശ്രമിച്ചാല്‍ കൂട്ടത്തോടെ ആക്രമിക്കും. അതുകൊണ്ടു പലരും കണ്ടില്ലെന്നു നടിക്കും. നായ്ക്കള്‍ പെറ്റുപെരുകിയതോടെ രാത്രികാലത്തും പുലര്‍ച്ചെയും അടിമാലി ടൗണിലെത്തുന്നവര്‍ വലിയ ബുദ്ധിമുട്ടാണ് നേരിടുന്നത്. ടൗണിലെ തെരുവ് നായ ശല്യത്തിനു പരിഹാരം കാണാന്‍ ഇടപെടല്‍ വേണമെന്നു വ്യാപാരി വ്യവസായി ഏകോപന സമിതി അടിമാലി യൂണിറ്റ് പ്രസിഡന്‍റ് പി.എം. ബേബി ആവശ്യപ്പെട്ടു. (അവസാനിച്ചു.)

ഭാരവാഹികളുടെ സ്ഥാനാരോഹണം

രാജാക്കാട്: രാജാക്കാട് ലയൺസ് ക്ലബ് ഭാരവാഹികളുടെ സ്ഥാനാരോഹണവും പുതിയ അംഗങ്ങളുടെ അംഗത്വപ്രവേശനവും നടത്തി. രാജാക്കാട് മർച്ചന്‍റ്സ് അസോസിയേഷൻ ഹാളിൽ നടന്ന ചടങ്ങിൽ പ്രസിഡന്‍റ് ടി.എസ്. സുർജിത് അധ്യക്ഷത വഹിച്ചു. 2025-26 വർഷത്തെ ഭാരവാഹികളായി എ.വി. സുരേഷ് ബാബു - പ്രസിഡന്‍റ്, വി.എസ്. പുഷ്പജൻ - സെക്രട്ടറി, ബെന്നി മാത്യു - ട്രഷറർ എന്നിവരുടെ നേതൃത്വത്തിലുള്ള ഭാരണസമിതി ചുമതലയേറ്റു.അഡ്വ. വി. അമർനാഥ് നേതൃത്വം നൽകി. റീജണൽ ചെയർപേഴ്സൻ പി.വി. ബേബി സേവനപ്രവർത്തനങ്ങളുടെ ഉദ്ഘാടനം നടത്തി. സോൺ ചെയർപേഴ്സൻ പി.വി. രാജു, ഏരിയ കോ-ഒാർഡിനേറ്റർമാരായ എ.പി. ബേബി, ജയിംസ് തെങ്ങുംകുടി, റീജൺ സെക്രട്ടറി കെ.പി. ജെയിൻ തുടങ്ങിയവർ പ്രസംഗിച്ചു.

നിക്ഷേപത്തുക നൽകുന്നില്ല; പരാതിയുമായി ദമ്പതികള്‍

കട്ടപ്പന: പുതിയ ബസ് സ്റ്റാന്‍ഡില്‍ പ്രവര്‍ത്തിക്കുന്ന നഗരസഭയുടെ വനിതാ സഹകരണ സംഘത്തില്‍ നിക്ഷേപിച്ച പണം തിരികെ ലഭിച്ചില്ലെന്ന പരാതിയുമായി വയോദമ്പതികള്‍. പോത്താനിക്കാട് കൈപ്പനാനിക്കല്‍ കെ. ജോസഫ്, ഭാര്യ റോസക്കുട്ടി എന്നിവരാണ് പരാതിയുമായി രംഗത്തെത്തിയത്. 2022ല്‍ 7.5 ശതമാനം പലിശ നല്‍കാമെന്ന ഉറപ്പില്‍ ഇവര്‍ 25,000 രൂപ നിക്ഷേപിച്ചു. തുടര്‍ന്ന് 2023ല്‍ 8.75 ശതമാനം പലിശ നല്‍കാമെന്ന ഉറപ്പില്‍ 30,000 രൂപ കൂടിനിക്ഷേപിച്ചു. എന്നാല്‍, തുക നിക്ഷേപിച്ചതിനുശേഷം ഇതുവരെ പലിശ പോലും ലഭിച്ചിട്ടില്ല. നിക്ഷേപ തുക എങ്കിലും തിരികെ നല്‍കണമെന്ന് ആവശ്യപ്പെട്ട് ഇവര്‍ കോ-ഓപറേറ്റീവ് സൊസൈറ്റിയുടെ പടി കയറിയിറങ്ങുകയാണ്. സമാന രീതിയില്‍ നിക്ഷേപിച്ച മറ്റ് മറ്റുള്ളവര്‍ക്കും നിക്ഷേപത്തുക തിരികെ ലഭിക്കാനുണ്ടെന്നാണ് ഇവര്‍ പറയുന്നത്. തങ്ങള്‍ ലോണ്‍ കൊടുത്ത തുകകള്‍ തിരികെ ലഭിക്കാത്തതാണ് കാരണമെന്നാണ് സംഘം അധികൃതര്‍ പറയുന്നത്. ബാങ്കിലെ മുന്‍ സെക്രട്ടറിയാണ് ലോണ്‍ കൊടുത്തതെന്നും ബന്ധപ്പെട്ടവര്‍ പറഞ്ഞതായി ഇവര്‍ പറയുന്നു. എന്നാല്‍ ഈ തുകകള്‍ ഒന്നും തിരികെ ലഭിക്കാതെ വന്നതോടെയാണ് നിക്ഷേപകര്‍ക്ക് തുക തിരികെ നല്‍കാന്‍ കഴിയാത്ത സാഹചര്യമുണ്ടായതെന്നും 1.5 കോടി രൂപ കടം ഉണ്ടെന്നുമാണ് സൊസൈറ്റി അധികൃതര്‍ പറയുന്നത്. നിക്ഷേപത്തുക തിരികെ ലഭിക്കാതായതോടെ നിയമനടപടി അടക്കമുള്ള മാര്‍ഗങ്ങളിലേക്ക് നീങ്ങാനാണ് ഇവരുടെ തീരുമാനം.

ആലപ്പുഴ-മധുര സംസ്ഥാനപാതയിൽ ഗതാഗതം ദുരിതപൂർണം

ചെറുതോണി: ആലപ്പുഴ- മധുര സംസ്ഥാന പാതയിൽ വാഹനയാത്ര ദുരിതമാകുന്നു. കഞ്ഞിക്കുഴി മുതൽ പഴയരിക്കണ്ടം വരെയുള്ള റോഡിലാണ് വാഹന യാത്ര ദുരിതപൂർണമായിരിക്കുന്നത്. തള്ളക്കാനം മുതൽ പഴയരിക്കണ്ടം വരെയുള്ള അഞ്ചു കീലോമീറ്റർ ദൂരം മൂന്നു കോടി രൂപ വകയിരുത്തി മൂന്ന് വർഷം മുൻപ് നിർമാണം പൂർത്തിയാക്കിയതാണ്. ഈ ഭാഗത്താണ് ഇപ്പോൾ വാഹന യാത്ര ഏറെ ദുരിതമായിരിക്കുന്നത്. ദിനംപ്രതി നൂറുകണക്കിന് വാഹനങ്ങൾ കടന്നുപോകുന്ന ഈ സംസ്ഥാന പാതയിൽ രണ്ട് കലുങ്കുകൾ ഗർത്തം രൂപപ്പെട്ട് അപകടാവസ്ഥയിലാണ്. പൊതുമരാമത്ത് അധികൃതരെ അറിയിച്ചെങ്കിലും റിബൺ വലിച്ച് കെട്ടുക മാത്രമാണ് ചെയ്തത്. ബിഎംബിസി നിലവാരത്തിൽ ചേലച്ചുവട്-വണ്ണപ്പുറം റോഡ് നിർമാണം പൂർത്തിയാക്കുമെന്ന് അധികൃതർ നിരവധി തവണ പ്രഖ്യാപനങ്ങൾ നടത്തിയിട്ടുണ്ടെങ്കിലും ഇതുവരെയും നടപടി ഉണ്ടായിട്ടില്ല. അടിയന്തരമായി റോഡ് ബിഎംബിസി നിലവാരത്തിൽ നിർമിച്ച് വാഹന യാത്രികർക്ക് സുരക്ഷ ഒരുക്കണമെന്നാണ് നാട്ടുകാരുടെ ആവശ്യം.

സബ് രജിസ്ട്രാർ ഓഫീസുകളിൽ വിജിലൻസ് പരിശോധന

തൊടുപുഴ: സംസ്ഥാന വ്യാപകമായി നടന്ന പരിശോധനയുടെ ഭാഗമായി ജില്ലയിലെ വിവിധ സബ് രജിസ്ട്രാർ ഓഫീസുകളിൽ വിജിലൻസ് ഇന്നലെ മിന്നൽ റെയ്ഡ് നടത്തി. തൊടുപുഴ, ഉടുമ്പൻചോല, ദേവികുളം, പീരുമേട് എന്നിവിടങ്ങളിലായിരുന്നു പരിശോധന. രണ്ടിടത്ത് ക്രമക്കേട് കണ്ടെത്തിയതായി സൂചനയുണ്ട്. ആധാരമെഴുത്തുകാരും ചില ഓഫീസ് ജീവനക്കാരും തമ്മിൽ ഗൂഗിൾ പേ വഴി സാമ്പത്തിക ഇടപാടുകൾ നടത്തിയതായി വിജിലൻസ് ഉദ്യോഗസ്ഥർ കണ്ടെത്തി. ഉടുമ്പൻചോലയിൽ 15,000 രൂപയുടെയും ദേവികുളത്ത് 91,000 രൂപയുടെയും ഇടപാടുകൾ നടന്നതായാണ് വിവരം. ദേവികുളത്ത് അരലക്ഷം രൂപയുടെയും 41,000 രൂപയുടെയും രണ്ട് സാമ്പത്തിക ഇടപാടുകളാണ് നടത്തിയത്. ഇക്കാര്യത്തിൽ ജീവനക്കാർ നൽകിയ വിശദീകരണം തൃപ്തികരമല്ലെന്ന് ഉദ്യോഗസ്ഥർ പറഞ്ഞു. സംശയമുള്ളയിടങ്ങളിൽ രേഖകളിന്മേൽ കൂടുതൽ പരിശോധന നടത്തിയാലേ ക്രമക്കേട് നടന്നിട്ടുണ്ടോ എന്ന കാര്യം വ്യക്തമാകൂവെന്ന് വിജിലൻസ് അറിയിച്ചു. ഇന്നലെ വൈകുന്നേരം നാലിന് ആരംഭിച്ച പരിശോധന രാത്രി വൈകിയും തുടരുകയാണ്.

ചൊക്രമുടിയില്‍ ഒരു പട്ടയംകൂടി റദ്ദാക്കി

രാജാക്കാട്: ചൊക്രമുടി കൈയേറ്റ വിഷയത്തില്‍ വീണ്ടും റവന്യൂ വകുപ്പിന്‍റെ നടപടി. ഒരു അനധികൃത പട്ടയംകൂടി ദേവികുളം സബ് കളക്ടര്‍ റദ്ദ് ചെയ്തു. ചൊക്രമുടിയുടെ തുടക്കത്തിലുള്ള വിന്‍റര്‍ ഗാര്‍ഡന്‍ റിസോര്‍ട്ട് സ്ഥിതി ചെയ്യുന്ന ഭൂമിയുടെ പട്ടയമാണ് റദ്ദ് ചെയ്തത്. പട്ടയത്തില്‍ പറഞ്ഞിരിക്കുന്ന സര്‍വേ നമ്പറും എല്‍എ നമ്പറും വ്യാജമാണെന്നു കണ്ടെത്തിയാണ് കൈയേറി വ്യാജപട്ടയം ചമച്ചെന്നതിന്‍റെ അടിസ്ഥാനത്തില്‍ പട്ടയം റദ്ദ് ചെയ്ത് ഉത്തരവിറക്കിയത്. ഇതോടെ ചൊക്രമുടിയില്‍ റദ്ദ് ചെയ്ത പട്ടയങ്ങളുടെ എണ്ണം അഞ്ചായി. ഒരേക്കര്‍ അഞ്ച് സെന്‍റിന്‍റെ പട്ടയമാണ് റദ്ദ് ചെയ്തത്. 274/1എന്ന സര്‍വേ നമ്പറില്‍ എല്‍ എ 926/69 മേരിക്കുട്ടി വര്‍ഗീസ് വാഴവരയില്‍ എന്ന പട്ടയമാണ് വ്യാജമാണെന്നു കണ്ടെത്തി ദേവികുളം സബ് കളക്ടര്‍ ജയകൃഷ്ണന്‍ റദ്ദ് ചെയ്തത്. പട്ടയമുള്‍പ്പെട്ടതായി കാണിച്ചിരിക്കുന്ന സര്‍വേ നമ്പര്‍ ചൊക്രമുടിയില്‍ കിലോമീറ്ററുകള്‍ അകലെ ബൈസണ്‍വാലി വില്ലേജിന്‍റെ പടിഞ്ഞാറേ ഭാഗത്താണ്. 27/1ല്‍പെട്ട സര്‍ക്കാര്‍ ഭൂമി കൈയേറിയതാണെന്നാണ് അന്വേഷണ സംഘം പറയുന്നത്. രേഖകൾ ഇല്ല ഉടുമ്പന്‍ചോല താലൂക്ക് ഓഫീസിലെത്തി നേരിട്ട് അന്വേഷണ സംഘം നടത്തിയ പരിശോധനയില്‍ പട്ടയം നല്‍കുന്ന ഓഫീസില്‍ സൂക്ഷിക്കുന്ന പട്ടയവുമായി നേരിട്ട് ബന്ധപ്പെട്ട അപേക്ഷ രജിസ്റ്റര്‍, പതിവ് ഉത്തരവ് രജിസ്റ്റര്‍, പട്ടയം നല്‍കുന്ന രജിസ്റ്റര്‍, പട്ടയ മഹസര്‍, പതിവ് ലിസ്റ്റ് എന്നിവയൊന്നും ഇല്ലെന്ന് കണ്ടെത്തി. ആറ് ഹിയറിംഗുകളും നടത്തി. എന്നാല്‍, പട്ടയം റദ്ദ് ചെയ്യാതിരിക്കുന്നതിനു തക്ക രേഖകള്‍ ഒന്നും തന്നെ ഹാജരാക്കിയില്ലെന്ന് റവന്യൂവകുപ്പ് പറയുന്നു. തുടര്‍ന്നാണ് പട്ടയം റദ്ദ് ചെയ്തത്. പരിശോധന തുടരും വരും ദിവസങ്ങള്‍ സ്ഥലം ഏറ്റെടുക്കുന്ന നടപടികളിലേയ്ക്കും റവന്യൂ വകുപ്പ് നീങ്ങുമെന്നാണ് ലഭിക്കുന്ന വിവരം. പാറ പുറംപോക്കായ സര്‍ക്കാര്‍ ഭൂമി കൈയേറി വ്യാജ പട്ടയമുണ്ടാക്കി അതീവ പരിസ്ഥിതിപ്രാധാന്യമുള്ള മേഖലയില്‍ വന്‍കിട നിര്‍മാണം നടത്തിയതിനെത്തുടര്‍ന്ന് വിവാദങ്ങള്‍ ഉയര്‍ന്നിരുന്നു. തുടര്‍ന്ന് വിഷയത്തില്‍ അന്വേഷണം ആവശ്യപ്പെട്ടു സിപിഐ ഇടുക്കി ജില്ലാ സെക്രട്ടറി കെ. സലിംകുമാര്‍ റവന്യൂ മന്ത്രിയെ സമീപിച്ചു. ഇതിന്‍റെ അടിസ്ഥാനത്തില്‍ റവന്യൂ മന്ത്രി കെ. രാജന്‍റെ നിര്‍ദേശ പ്രകാരം ഇടുക്കി ജില്ലാ കളക്ടറാണ് പ്രത്യേക അന്വേഷണ സംഘത്തിനു രൂപം നല്‍കിയത്.

ന്യൂമാൻ കോളജിൽ കൊമേഴ്സ് ഗവേഷണകേന്ദ്രം ഉദ്ഘാടനം

തൊടുപുഴ: ന്യൂമാൻ കോളജിൽ കൊമേഴ്സ് ഗവേഷണകേന്ദ്രം ഉദ്ഘാടനം ചെയ്തു. എംജി സർവകലാശാല സിൻഡിക്കറ്റംഗം ഡോ. എ.എസ്. സുമേഷ് ഉദ്ഘാടനം നിർവഹിച്ചു. കോളജിലെ ഗവേഷണ മേഖലയ്ക്ക് ഗവേഷണ കേന്ദ്രം ഉൗർജം പകരുമെന്ന് അദ്ദേഹം പറഞ്ഞു. പുതിയ നാലു വർഷ ബിരുദ പ്രോഗ്രാമിൽ ഡിപ്പാർട്ട്മെന്‍റിൽ നിന്നു ബികോം ഓണേഴ്സ് വിത്ത് റിസർച്ച് ഡിഗ്രി നൽകുന്ന തലത്തിലേക്ക് ഉയരാൻ ഇതിലൂടെ അവസരം ലഭിച്ചിരിക്കുകയാണെന്നും അദ്ദേഹം പറഞ്ഞു. കോളജ് മാനേജർ മോണ്‍. ഡോ. പയസ് മലേക്കണ്ടത്തിൽ അധ്യക്ഷത വഹിച്ചു. പ്രിൻസിപ്പൽ ഡോ. ജെന്നി കെ. അലക്സ്, മുൻ പ്രിൻസിപ്പൽ ഡോ. തോംസണ്‍ ജോസഫ്, ഡോ. ജോണ്‍സണ്‍ വർഗീസ്, ഡോ. സാജു ഏബ്രഹാം, ഡിപ്പാർട്ട്മെന്‍റ് മേധാവി ക്യാപ്റ്റൻ പ്രജീഷ് സി. മാത്യു, ബർസാർ ഫാ.ബെൻസണ്‍ എൻ. ആന്‍റണി, സെൽഫ് ഫിനാൻസ് വിഭാഗം ഡയറക്ടർ ഫാ. അലൻ വെള്ളാംകുന്നേൽ, റിസർച്ച് ഡയറക്ടർ ഡോ. ബിജോയി തോമസ്, ഡോ. ബോണി ബോസ് എന്നിവർ പ്രസംഗിച്ചു. ഡിപ്പാർട്ട്മെന്‍റിലെ കഴിഞ്ഞവർഷത്തെ റാങ്ക് ജേതാക്കൾ, കായികമേഖലയിൽ മികച്ച നേട്ടങ്ങൾ കൈവരിച്ചവർ, റിപ്പബ്ലിക് ദിന ക്യാന്പിൽ പങ്കെടുത്ത എൻസിസി കേഡറ്റുകൾ, എസിസിഎ, സിഎംഎ പരീക്ഷ വിജയിച്ചവർ, മികച്ച പ്ലേസ്മെന്‍റ് ലഭിച്ച വിദ്യാർഥികൾ, കലാരംഗത്ത് നേട്ടം കൈവരിച്ചവർ എന്നിവരെ ആദരിച്ചു. ഡോ. ദിവ്യ ജയിംസ്, അനിത തോമസ്, എബി തോമസ്, ജോയൽ ജോർജ്, ഫിയോണ ബെന്നി എന്നിവർ നേതൃത്വം നൽകി.

കത്തോലിക്ക കോൺഗ്രസ് നേതൃശില്പശാല ഇന്ന് രാജമുടിയിൽ

ചെറുതോണി: കത്തോലിക്ക കോൺഗ്രസ് ഇടുക്കി രൂപത സമിതിയുടെ നേതൃത്വത്തിൽ ഇന്ന് രാജമുടി പോപ്പ് ഫ്രാൻസിസ് നഗറിൽ നേതൃപഠന ശില്പശാല നടക്കും. ഇന്ന് വൈകുന്നേരം നാലിന് പതാക ഉയർത്തും. തുടർന്ന് ശില്പശാലയുടെ ഉദ്ഘാടനം കത്തോലിക്ക കോൺഗ്രസ് ഗ്ലോബൽ പ്രസിഡന്‍റ് പ്രഫ. രാജീവ് കൊച്ചുപറമ്പിൽ നിർവഹിക്കും. ഇടുക്കി രൂപത പ്രസിഡന്‍റ് ജോർജ് കോയിക്കൽ അധ്യക്ഷത വഹിക്കും. യോഗത്തിൽ ഇടുക്കി രൂപത മുഖ്യ വികാരി ജനറാൾ മോൺ. ജോസ് കരിവേലിക്കൽ അനുഗ്രഹപ്രഭാഷണം നടത്തും. രൂപത ഡയറക്ടർ ഫാ. ഫ്രാൻസിസ് ഇടവക്കണ്ടം, ജനറൽ സെക്രട്ടറി സിജോ ഇലന്തൂർ, ട്രഷറർ ജോസഫ് ചാണ്ടി തേവർപറമ്പിൽ, ഗ്ലോബൽ സെക്രട്ടറി ജോർജുകുട്ടി പുന്നക്കുഴിയിൽ, വൈസ് പ്രസിഡന്‍റ് സാബു കുന്നുംപുറം, യൂത്ത് കൗൺസിൽ രൂപത കോ-ഒാർഡിനേറ്റർ ജെറിൻ ജെ. പട്ടാംകുളം, വിമൻസ് കൗൺസിൽ രൂപത കോ-ഓർഡിനേറ്റർ റിൻസി സിബി, പ്രോഗ്രാം കോ-ഒാർഡിനേറ്റർ ടോമി കണ്ടത്തിൽ തുടങ്ങിയവർ പ്രസംഗിക്കും. "ഉണരട്ടെ നേതൃത്വം ഉയരട്ടെ സമുദായം' എന്ന വിഷയത്തെ ആസ്പദമാക്കി നടക്കുന്ന ശില്പശാലയിൽ ഡോ. കെ.എം ഫ്രാൻസിസ്, പീറ്റർ രാജ്, ഡോ. ജോസുകുട്ടി ജെ. ഒഴുകയിൽ തുടങ്ങിയവർ ക്ലാസുകൾ നയിക്കും. ശില്പശാലയിൽ രൂപതയിലെ വിവിധ ഇടവകകളിൽനിന്നായി 300 ഓളം നേതാക്കൾ പങ്കെടുക്കും.

കുറുക്കന്മാർ കൂട്ടത്തോടെ ജനവാസമേഖലകളിൽ

തൊടുപുഴ: ജില്ലയിൽ പല പഞ്ചായത്തുകളിലും കുറുക്കന്മാരുടെ ശല്യം രൂക്ഷം. മുൻകാലങ്ങളെ അപേക്ഷിച്ച് കുറുക്കന്മാരുടെ എണ്ണം വലിയ തോതിൽ വർധിച്ചിട്ടുണ്ട്. കാടുപിടിച്ചു കിടക്കുന്ന പുരയിടങ്ങളും തോട്ടങ്ങളുമാണ് കുറുക്കന്മാർ താവളമാക്കിയിരിക്കുന്നത്. ഇടവെട്ടി പഞ്ചായത്തിലും തൊടുപുഴ മുനിസിപ്പാലിറ്റിയുടെ ചില മേഖലകളിലും ശല്യമുണ്ട്. കൂടാതെ മലങ്കര കനാലിന്‍റെ കാടുപിടിച്ചു കിടക്കുന്ന കാച്ച്മെന്‍റ് ഏരിയായും കുറുക്കന്മാരുടെ താവളമാണ്. ഇടവെട്ടി പഞ്ചായത്തിലെ മാർത്തോമ്മ, ചാലംകോട്, മലങ്കര എസ്റ്റേറ്റിലെ ചൊക്കൻപാറ എന്നിവിടങ്ങളിൽ കുറുക്കന്മാരുടെ ശല്യം അതിരൂക്ഷമാണ്. ഇവിടെയെല്ലാം കാടുകയറിക്കിടക്കുന്ന റബർതോട്ടങ്ങളും ആൾതാമസം കുറഞ്ഞ പുരയിടങ്ങളുമുണ്ട്. ഇവിടെയൊക്കെ നൂറുകണക്കിന് കുറുക്കന്മാർ ഉണ്ടെന്ന് നാട്ടുകാർ പറയുന്നു. കുഞ്ഞുങ്ങൾ ഉൾപ്പെടെ കൂട്ടമായാണ് ഇവയുടെ സഞ്ചാരം. പലപ്പോഴും മഴക്കാലത്താണ് ഇവ പുറത്തിറങ്ങുന്നത്. ഒട്ടേറെ വീടുകളിൽനിന്നു കോഴികളെ കുറുക്കന്മാർ പിടികൂടിയതായി നാട്ടുകാർ പറഞ്ഞു. നേരത്തേ ആളുകളെയും മറ്റും കാണുന്പോൾ ഇവ പുറത്തിറങ്ങില്ലായിരുന്നു. എന്നാൽ ഇപ്പോൾ തെരുവുനായ്ക്കളെ പോലെ ഇവയും ജനവാസ കേന്ദ്രങ്ങളിൽ വിഹരിക്കുകയാണ്. ചില കോഴിഫാം നടത്തിപ്പുകാർ ആളൊഴിഞ്ഞ പുരയിടങ്ങളിലും മറ്റും ചത്ത കോഴികളുടെ അവശിഷ്ടങ്ങൾ തള്ളാറുണ്ട്. ഇത്തരം സ്ഥലങ്ങളിൽ കുറുക്കന്മാരുടെ എണ്ണം ക്രമാതീതമായി വർധിച്ചിട്ടുണ്ട്. കുറുക്കന്മാരുടെ ശല്യം വർധിച്ചതോടെ ജനങ്ങൾ ഭീതിയിലാണ്. ഇപ്പോൾ കോഴികളെ കൊന്നൊടുക്കുന്ന കുറുക്കന്മാർ കുട്ടികളെയും മറ്റും ആക്രമിക്കുമോയെന്ന ഭീതിയുമുണ്ട്. അടുത്ത നാളുകളിൽ സംസ്ഥാനത്ത് കുറുക്കന്മാർ മനുഷ്യരെ ആക്രമിച്ച സംഭവങ്ങളുമുണ്ടായി. ഇവ കടിച്ചാൽ പ്രതിരോധ കുത്തിവയ്പെടുത്തില്ലെങ്കിൽ പേ വിഷബാധയ്ക്കുള്ള സാധ്യതയുമേറെയാണ്. കാടുപിടിച്ചു കിടക്കുന്ന മേഖലകൾ വെട്ടിത്തെളിച്ച് ഇവയെ വാസസ്ഥലത്തുനിന്നു തുരത്തുകയാണ് പ്രധാനമായും ചെയ്യേണ്ടതെന്ന് നാട്ടുകാർ പറയുന്നു. നേരത്തേ തൊഴിലുറപ്പു പദ്ധതിയിൽ ഉൾപ്പെടുത്തി ഇത്തരത്തിലുള്ള കാടുകൾ വെട്ടിത്തെളിച്ചിരുന്നു. ഇപ്പോൾ തൊഴിലുറപ്പ് പദ്ധതിയിൽ ഇത്തരം പ്രവർത്തനങ്ങൾ നടത്തുന്നില്ല. അതിനാൽ കുറ്റിക്കാടുകൾ കാട്ടുപന്നികളുടെയും കുറുക്കന്മാരുടെയും കേന്ദ്രമായി മാറിയിട്ടുണ്ട്. വനംവകുപ്പും ഇക്കാര്യത്തിൽ യാതൊരു നടപടികളും സ്വീകരിക്കുന്നില്ലെന്നാണ് ജനങ്ങളുടെ പരാതി.

നഗരത്തിലെ ഗതാഗതക്കുരുക്ക് പരിഹരിക്കാൻ തീരുമാനം

തൊടുപുഴ: നഗരത്തിലെ ഗതാഗതം സംബന്ധിച്ച വിഷയങ്ങൾ അവലോകനം ചെയ്യുന്നതിന് ഗതാഗത ഉപദേശകസമിതി യോഗം ചേർന്നു. മോർ ജംഗ്ഷൻ ഉൾപ്പടെ പ്രധാന സ്ഥലങ്ങളിലെ ഗതാഗതക്കുരുക്ക് പരിഹരിക്കുന്നത് സംബന്ധിച്ച് ചർച്ച ചെയ്തു. ബേബി മെമ്മോറിയൽ ആശുപത്രി ജംഗ്ഷനിലെ ഗതാഗതക്കുരുക്ക് പരിഹരിക്കാൻ സ്ഥലം ഏറ്റെടുപ്പ് നടപടികൾ വേഗത്തിലാക്കാൻ റവന്യു അധികൃതർക്ക് നിർദേശം നൽകും. നഗരത്തിലെ വാഹന പാർക്കിംഗ് സംബന്ധിച്ച് ലീഗൽ സർവീസ് അഥോറിറ്റി മുൻപാകെ ഉന്നയിച്ച വിഷയത്തിലും ജില്ലാ കളക്ടറുടെ നിർദേശപ്രകാരം നഗരത്തിലെ ഓട്ടോ സ്റ്റാൻഡുകൾ ക്രമീകരിക്കുന്നതിലും അടിയന്തര നടപടി സ്വീകരിക്കും. കോതായിക്കുന്നിലെ ബസ് സ്റ്റാൻഡിന്‍റെ മാതൃകയിൽ മങ്ങാട്ടുകവല മുനിസിപ്പൽ ബസ് സ്റ്റാൻഡ് ഷോപ്പിംഗ് കോംപ്ലക്സിന്‍റെ മുൻവശത്ത് യാത്രക്കാർക്ക് കൂടുതൽ സൗകര്യപ്രദമാകുംവിധം ആധുനിക രീതിയിൽ നവീകരിക്കും. നാലുവരിപ്പാത ഉൾപ്പെടെ പ്രധാന റോഡുകളിൽ രൂപം കൊണ്ട കുഴികൾ ഉടൻ അടയ്ക്കുമെന്നും പ്രധാന പോയിന്‍റുകളിൽ സീബ്ര ലൈൻ വരയ്ക്കുമെന്നും പിഡബ്ല്യുഡി അധികൃതർ യോഗത്തിൽ അറിയിച്ചു. നോ പാർക്കിംഗ് ഏരിയകളിൽ മുന്നറിയിപ്പ് ബോർഡ് സ്ഥാപിക്കാനും യോഗം തീരുമാനിച്ചു. നഗരസഭാ ചെയർമാൻ കെ. ദീപക് അധ്യക്ഷത വഹിച്ചു. ഡിവൈഎസ്പി പി.കെ. സാബു, ട്രാഫിക് പോലീസ് ഉദ്യോഗസ്ഥർ, പൊതുമരാമത്ത്, മോട്ടോർ വാഹനവകുപ്പ് ഉദ്യോഗസ്ഥർ എന്നിവർ പങ്കെടുത്തു.

മാതൃയാനം പദ്ധതി: യാത്ര ചെയ്തത് 1478 അമ്മമാർ

ഇടുക്കി: പ്രസവാനന്തരം ആശുപത്രിയിൽനിന്ന് നവജാതശിശുവുമായി വീട്ടിലെത്താൻ അമ്മമാർക്കായി ആവിഷ്കരിച്ച മാതൃയാനം പദ്ധതി വിജയകരമായി മുന്നോട്ട്. പ്രസവത്തിനായി സർക്കാർ ആശുപത്രികളെ ആശ്രയിക്കുന്ന സാന്പത്തികമായി പിന്നാക്കം നിൽക്കുന്ന സ്ത്രീകൾക്ക് ഏറെ സഹായകമായ മാതൃയാനം പദ്ധതി രണ്ട് വർഷം പിന്നിടുന്പോൾ ജില്ലയിൽ 1478 അമ്മമാരെയും കുഞ്ഞുങ്ങളെയുമാണ് സുരക്ഷിതമായി വീടുകളിൽ എത്തിച്ചത്. പ്രസവശേഷം അമ്മയെയും കുഞ്ഞിനെയും സൗജന്യമായി വാഹനത്തിൽ വീട്ടിലെത്തിക്കുന്ന സർക്കാരിന്‍റെ മികവുറ്റ പദ്ധതിയാണ് മാതൃയാനം. പ്രസവം നടക്കുന്ന ജില്ലയിലെ സർക്കാർ ആശുപത്രികളിലാണ് പദ്ധതി നിലവിലുള്ളത്. എം-പാനൽ ചെയ്ത ടാക്സികളിൽ യാത്രക്കാരുടെ സുരക്ഷിതത്വം ഉറപ്പാക്കുന്നതിന് ജിപിഎസ് സംവിധാനമുള്ള മൊബൈൽ ആപ്ലിക്കേഷനും തയാറാക്കിയിട്ടുണ്ട്. എപിഎൽ, ബിപിഎൽ വ്യത്യാസമില്ലാതെ എല്ലാ കുടുംബങ്ങൾക്കും പ്രയോജനം നൽകിയാണ് പദ്ധതി മുന്നോട്ട് പോകുന്നത്. നെടുങ്കണ്ടം താലൂക്ക് ആശുപത്രി- 365, പീരുമേട് താലൂക്ക് ആശുപത്രി-126, തൊടുപുഴ ജില്ലാ ആശുപത്രി- 417, ഇടുക്കി മെഡിക്കൽ കോളജ്- 215, അടിമാലി താലൂക്ക് ആശുപത്രി- 355 എന്നിങ്ങനെയാണ് സർക്കാരിന്‍റെ സൗജന്യയാത്രാ സൗകര്യം പ്രയോജനപ്പെടുത്തിയവരുടെ എണ്ണം. ജനനി ശിശുസുരക്ഷ കാര്യക്രമ പദ്ധതിയുടെ ഭാഗമായി സംസ്ഥാന സർക്കാർ മാതൃയാനം പദ്ധതിക്കായി മാസം 39,000 രൂപയോളമാണ് ചെലവഴിക്കുന്നത്.

ചോരച്ചാലുകൾ തീർത്ത് നെല്ലാപ്പാറ വളവ്

തൊടുപുഴ: തൊടുപുഴ- പാലാ റൂട്ടിലെ നെല്ലാപ്പാറ വളവിലെ റോഡിൽ അപകടങ്ങൾ തുടർക്കഥയാകുന്പോൾ മോട്ടോർ വാഹന വകുപ്പ് മുന്നോട്ടു വച്ച നിർദേശങ്ങൾ ഇപ്പോഴും ഫയലിൽ. പുനലൂർ- മൂവാറ്റുപുഴ സംസ്ഥാന പാതയുടെ ഭാഗമായ റോഡിന്‍റെ അശാസ്ത്രീയ നിർമാണമാണ് അപകടകാരണമെന്നു വർഷങ്ങൾക്കു മുന്പുതന്നെ ആക്ഷേപമുയർന്നിരുന്നു. വളവുകൾ അതേപടി നിലനിർത്തിയാണ് കെഎസ്ടിപി റോഡിനു വീതി കൂട്ടിയത്. വളവ് ഇല്ലാതാക്കാൻ ഭൂമി ഏറ്റെടുത്തെങ്കിലും ഈ ശ്രമം പിന്നീട് ഉപേക്ഷിച്ചു. റോഡ് വീതി കൂടിയതോടെ വളവുകളുള്ള റോഡിൽ വാഹനങ്ങൾ അമിത വേഗമെടുക്കുന്നതാണ് അപകടം കൂട്ടുന്നത്. 27 കൊടുംവളവ് 132 കിലോമീറ്റർ പാതയിൽ 27 കൊടും വളവുകളുള്ള നെല്ലാപ്പാറയിലാണ് ഏറ്റവും കൂടുതൽ അപകടങ്ങൾ. കഴിഞ്ഞ ദിവസവും ഇവിടെ ലോഡ് കയറ്റി വന്ന ലോറി മറിഞ്ഞിരുന്നു. ശനിയാഴ്ച രാത്രി എട്ടോടെ നെല്ലാപ്പാറ കുരിശുപള്ളി വളവിൽനിന്നാണ് താഴ്ചയിലേക്കു ലോറി മറിഞ്ഞത്. ഇറക്കത്തിൽ നിയന്ത്രണം വിട്ട ലോറി റോഡരികിലെ ട്രാൻസ്ഫോമർ ഇടിച്ചു തകർത്താണ് താഴേക്കു പതിച്ചത്. റബർഷീറ്റുമായി വന്ന തമിഴ്നാട് രജിസ്ട്രേഷൻ ലോറിയാണ് അപകടത്തിൽപെട്ടത്. മുപ്പതടിയോളം താഴേക്കു പതിച്ച വാഹനത്തിൽനിന്നു ഡ്രൈവർ നിസാര പരിക്കോടെ രക്ഷപ്പെട്ടു. കെഎസ്ആർടിസി ബസുകൾ ഉൾപ്പെടെ ഒട്ടേറെ വാഹനങ്ങൾ ഇവിടെ അപകടത്തിൽപ്പെട്ടിട്ടുണ്ട്. അപകട സാധ്യത കുറയ്ക്കാൻ മോട്ടോർ വാഹന വകുപ്പ് ഏതാനും നിർദേശങ്ങൾ മുന്നോട്ടുവച്ചിരുന്നു. എന്നാൽ, ഇതൊന്നും നടപ്പായില്ല. ഇപ്പോൾ കുഴി നികത്തി ടൈൽ പാകുന്ന ജോലികൾ മാത്രമാണ് ആരംഭിച്ചിരിക്കുന്നത്. മുഖ്യമന്ത്രി ഇടപെട്ടിട്ടും നാലു വർഷം മുന്പ് നെല്ലാപ്പാറയിലെ അപകടങ്ങളെ സംബന്ധിച്ചു മുഖ്യമന്ത്രിക്കു വിവരാവകാശ പ്രവർത്തകനായ ടോം തോമസ് പൂച്ചാലിൽ പരാതി നൽകി. മുഖ്യമന്ത്രിയുടെ ഓഫീസിൽനിന്നു പൊതുമരാമത്ത് നിരത്ത് വിഭാഗം എൻജനിയറോട് ആവശ്യമായ നടപടിയെടുക്കാൻ നിർദേശിച്ചിരുന്നു. എന്നാൽ, ഇതിനു ശേഷവും കാര്യമായ നടപടികൾ ഒന്നും ഉണ്ടായില്ല. അപകടമൊഴിവാക്കാൻ ചെയ്യേണ്ടത് അപകടമൊഴിവാക്കാൻ മോട്ടോർ വാഹന വകുപ്പ് നൽകിയ നിർദേശങ്ങൾ: കുത്തിറക്കവും കൊടും വളവുമാണ് ഇവിടെ കെണിയാകുന്നത്. റോഡിൽ വേഗനിയന്ത്രണത്തിനായി ആ ഭാഗത്ത് റംബിൾ സ്ട്രൈപ്സും റിഫ്ളക്ടീവ് സ്റ്റഡുകളും സ്ഥാപിക്കണം. ഒരു വശം വലിയ ഗർത്തമായതിനാൽ ബലമുള്ള കോണ്‍ക്രീറ്റ് ബാരിയറുകൾ, വാഹനങ്ങൾ ഇടിച്ചാൽ ആഘാതം കുറയ്ക്കാൻ റിഫ്ളക്ടറോടു കൂടിയ റബർ കുഷ്യനുള്ള റോളർ ഫെൻസ്, എല്ലാ വളവുകൾക്കും ഏതാനും മീറ്റർ മുന്നിലായി അപകട മുന്നറിയിപ്പ് ബോർഡുകൾ, രാത്രി മുന്നറിയിപ്പിനായി സോളാർ ബ്ലിങ്കിംഗ് ലൈറ്റ് എന്നിവ ഉണ്ടാകണം. വഴിവിളക്കുകൾ തെളിക്കണം. പതിവായി അപകടമുണ്ടാകുന്ന കുരിശുപള്ളി വളവിൽ ഹൈമാസ്റ്റ് ലൈറ്റ് സ്ഥാപിക്കണം. പാലാ റോഡിൽനിന്നു വരുന്ന ഭാഗത്തു സ്ഥലം ഏറ്റെടുത്തു വീതി കൂട്ടണം.

കലയന്താനി സ്കൂളിൽ എസ്പിസി യൂണിറ്റ് ഉദ്ഘാടനം

കലയന്താനി: സെന്‍റ് ജോർജ് ഹയർ സെക്കൻഡറി സ്കൂളിൽ എസ്പിസി യൂണിറ്റ് ഉദ്ഘാടനം ചെയ്തു. ഇളംദേശം ബ്ലോക്ക് പഞ്ചായത്ത് പ്രസിഡന്‍റ് ടോമി തോമസ് കാവാലം അധ്യക്ഷത വഹിച്ചു. ജില്ലാ അഡീഷണൽ പോലീസ് സൂപ്രണ്ടും എസ്പിസി ജില്ലാ നോഡൽ ഓഫീസറുമായ ഇമ്മാനുവൽ പോൾ ഉദ്ഘാടനം ചെയ്തു. സ്കൂൾ മാനേജർ റവ. ഡോ. ജോർജ് താനത്തുപറന്പിൽ മുഖ്യ പ്രഭാഷണം നടത്തി. എസ്പിസി ഓഫീസ് ഉദ്ഘാടനം ജില്ലാ പഞ്ചായത്തംഗം പ്രഫ. എം.ജെ. ജേക്കബ് നിർവഹിച്ചു. കേഡറ്റുകളുടെ യൂണിഫോം വിതരണോദ്ഘാടനം തൊടുപുഴ സിഐ മഹേഷ്കുമാറും എസ്പിസി ലൈബ്രറി ഉദ്ഘാടനം തൊടുപുഴ ഡിഇഒ ഷീബ മുഹമ്മദും നിർവഹിച്ചു. എസ്പിസി ഇടുക്കി അഡീഷണൽ നോഡൽ ഓഫീസർ എസ്.ആർ. സുരേഷ് ബാബു പദ്ധതി വിശദീകരിച്ചു. തൊടുപുഴ സബ് ഡിവിഷണൽ നോഡൽ ഓഫീസർ ഇ.എസ്. സിയാദ്, പ്രിൻസിപ്പൽ ജിജി ഫിലിപ്പ്, മുൻ ഹെഡ്മാസ്റ്റർ ജോഷി മാത്യു, പൂർവ വിദ്യാർഥി സംഘടനാ പ്രസിഡന്‍റ് ജോപ്പി സെബാസ്റ്റ്യൻ, പിടിഎ പ്രസിഡന്‍റ് ഷിജു ജോസ്, കമ്യൂണിറ്റി പോലീസ് ഓഫീസർ ലീന ജയിംസ്, ബീറ്റ് പോലീസ് ഓഫീസർ കെ.എ. യാസീൻ, ഡ്രിൽ ഇൻസ്ട്രക‌്ടേഴ്സ് രാജേഷ് ഖാൻ, ഫാത്തിമ ഷഹർബാൻ എന്നിവർ പ്രസംഗിച്ചു. ഹെഡ്മാസ്റ്റർ ഫാ. ആന്‍റണി പുലിമലയിൽ സ്വാഗതവും കമ്യൂണിറ്റി പോലീസ് ഓഫീസർ വി. ദിപു നന്ദിയും പറഞ്ഞു.

ടൂറിസ്റ്റുകൾക്കും രക്ഷയില്ല

സ്വന്തം ലേഖകർ മൂന്നാറിൽ പോയാൽ കാഴ്ചകളും കാണാം, കൂട്ടമായി എത്തുന്ന നായകളുടെ ആക്രമണത്തിൽനിന്നു രക്ഷ നേടാൻ പരക്കം പായുന്ന ആളുകളെയും കാണാം. രണ്ടു മാസത്തിനിടെ മൂന്നാറിൽ സഞ്ചാരികൾ അടക്കം 22 പേരെയാണ് തെരുവു നായ്ക്കൾ കടിച്ചുകീറിയത്. നായ ആക്രമണങ്ങൾ തടയാൻ ആരുമൊന്നും ചെയ്യുന്നില്ലെന്ന പരാതി രൂക്ഷമായിരുന്നു. ഇതിനിടയിലാണ് ഇപ്പോൾ മൂന്നാർ പഞ്ചായത്ത് 200 നായ്ക്കളെ കൊന്നു കുഴിച്ചുമൂടിയെന്ന പരാതിയും ഉയർത്തി ചിലർ പോലീസിൽ കേസ് കൊടുത്തിരിക്കുന്നത്. പ്രതിരോധ കുത്തിവയ്പ് നൽകാനെന്ന പേരിൽ നായ്ക്കളെ പിടിച്ചുകൊണ്ടുപോയി കൊന്നെന്നായിരുന്നു പരാതി. എന്നാൽ, കൊണ്ടുപോയിട്ട് കുത്തിവയ്പ് നൽകാൻ കഴിയാതെ വന്നതിനാൽ നായ്ക്കളെ തിരികെ പഴയ മൂന്നാറിൽ ഇറക്കിവിട്ടെന്നാണ് പഞ്ചായത്ത് ചൂണ്ടിക്കാട്ടുന്നത്. തൊടുപുഴ ആനിമൽ റെസ്ക്യു ടീം അംഗങ്ങളായ എം.എ. കീർത്തിദാസ്, എം.ബി. ഓമന എന്നിവരാണ് പരാതിക്കാർ. വ്യാപക ആക്രമണം യഥാർഥ പ്രശ്നത്തിനു നേരേ കണ്ണടയ്ക്കുന്നവരാണ് ഇത്തരം പരാതികൾ ഉയർത്തുന്നതെന്നു പൊതുപ്രവർത്തകർ കുറ്റപ്പെടുത്തുന്നു. കഴിഞ്ഞ മേയിൽ മൂന്നാർ ടൗണിൽ 16 വിനോദ സഞ്ചാരികളെ തെരുവുനായ്ക്കൾ ആക്രമിച്ചിരുന്നു. ഇവരെ അടിമാലി സർക്കാർ ആശുപത്രിയിൽ എത്തിച്ചാണ് ചികിത്സ നൽകിയത്. ഒരാഴ്ചയ്ക്കു ശേഷം ദേവികുളത്ത് ആറു വിദ്യാർഥികളെ നായ്ക്കൾ ആക്രമിച്ചു. ദേവികുളം സർക്കാർ സ്കൂളിലെ എട്ടാം ക്ലാസ് വിദ്യാർഥികളെ ആയിരുന്നു നായ്ക്കൾ ആക്രമിച്ചത്. പുലി പിടിച്ചാൽ പരാതിയില്ല! പ്രശ്നം വഷളായിട്ടും പഞ്ചായത്ത് അധികൃതർ നടപടി എടുക്കുന്നില്ലെന്ന ആരോപണം ഉയരുന്നതിനിടെയായിരുന്നു തൊടുപുഴ സ്വദേശികൾ പോലീസിൽ പരാതി നൽകിയത്. ആഴ്ചകൾക്കു മുന്പ് ദേവികുളത്ത് വീട്ടുമുറ്റത്തു കിടക്കുകയായിരുന്ന നായയെ പുലി കടിച്ചെടുത്ത സംഭവം ഉണ്ടായിരുന്നു. അന്നു നായ്ക്കളെ സംരക്ഷിക്കണമെന്ന് ആവശ്യപ്പെട്ട് ആരും രംഗത്തുവന്നില്ല. നിരവധി നായ്ക്കളെയാണ് പുലികൾ പലേടത്തായി പിടിക്കുന്നത്.

ഉടുന്പൻചോലയിൽ ആയുർവേദ മെഡിക്കൽ കോളജ് വരുന്നു

ഇടുക്കി: ഉടുന്പൻചോലയിൽ പുതിയ സർക്കാർ ആയുർവേദ മെഡിക്കൽ കോളജ് ആശുപത്രി ആരംഭിക്കുന്നതിനു സർക്കാർ ഉത്തരവ്. ഉടുന്പൻചോല പഞ്ചായത്ത് സൗജന്യമായി വിട്ടുനൽകിയ കമ്യൂണിറ്റി ഹാളിലാണ് ആശുപത്രി പ്രവർത്തിക്കുക. ഈ കെട്ടിടത്തിൽ സൗകര്യങ്ങളൊരുക്കാൻ 2.20 കോടിയുടെ ഭരണാനുമതി ലഭിച്ചു. എത്രയും വേഗം ജില്ലയുടെ സ്വപ്നമായ മെഡിക്കൽ കോളജ് തുടങ്ങാനാണ് ലക്ഷ്യമിടുന്നതെന്നു മന്ത്രി വീണ ജോർജ് അറിയിച്ചു. മെഡിക്കൽ കോളജ് സാധ്യമാകുന്നതോടെ വിവിധ സ്പെഷാലിറ്റി ചികിത്സകൾ ജില്ലയിൽ സാധാരണക്കാർക്ക് ലഭ്യമാകും. പ്രായോഗിക കാര്യങ്ങൾ ചർച്ച ചെയ്യാനായി നാളെ നെടുങ്കണ്ടത്ത് അവലോകന യോഗം ചേരും. ആശുപത്രിയുടെ നിർമാണം പൂർത്തിയാക്കുന്പോഴേക്കും വിദ്യാർഥി പ്രവേശനവും നടത്താനാണ് ആലോചനയെന്ന് എം.എം.മണി എംഎൽഎ പറഞ്ഞു. സൗകര്യങ്ങൾ ഒപി വിഭാഗവും 50 കിടക്കകളോടുകൂടിയ കിടത്തി ചികിത്സയുമാണ് ലക്ഷ്യം. എട്ട് സ്പെഷാലിറ്റി ഒപി വിഭാഗങ്ങളുണ്ടാകും. റിസപ്ഷൻ, രജിസ്ട്രേഷൻ, അത്യാഹിത വിഭാഗം, ഡയഗ്നോസ്റ്റിക്സ് സോണ്‍, ക്രിയകൽപ, ഫിസിയോതെറാപ്പി, യോഗ, ഡിസ്പെൻസറി എന്നീ സൗകര്യങ്ങളൊരുക്കും. ഒന്നാം ഘട്ടത്തിൽ ഒപി തുടങ്ങാൻ വേണ്ട തസ്തികകളുടെ പ്രപ്പോസൽ സർക്കാരിന്‍റെ പരിഗണനയിലാണ്. 20.85 ഏക്കറിൽ ഉടുന്പൻചോല മാട്ടുതാവളത്തു കണ്ടെത്തിയ 20.85 ഏക്കർ സ്ഥലത്താണ് മെഡിക്കൽ കോളജ് കെട്ടിടം നിർമിക്കാൻ ഒരുങ്ങുന്നത്. ഈ കെട്ടിടം യാഥാർഥ്യമാക്കുന്നതിനു മുന്പുതന്നെ ജനങ്ങൾക്കു സേവനം ലഭ്യമാക്കാനാണ് കമ്യൂണിറ്റി ഹാളിൽ മെഡിക്കൽ കോളജ് ആശുപത്രിക്കു തുടക്കമിടുന്നത്. ഇടുക്കി വികസന പാക്കേജിൽ 2022 -23 സാന്പത്തിക വർഷം അനുവദിച്ച 10 കോടി ഉപയോഗിച്ചുള്ള ആശുപത്രി ഒപിഡി കോംപ്ലക്സിന്‍റെ നിർമാണത്തിനുള്ള സാങ്കേതിക അനുമതി ലഭിച്ചിട്ടുണ്ട്. പദ്ധതിയുടെ ടെൻഡർ നടപടി പുരോഗമിക്കുകയാണ്. 2024-25 സാന്പത്തിക വർഷത്തെ ബജറ്റിൽ അനുവദിച്ച ഒരു കോടി രൂപ ഉപയോഗിച്ച് 272 മീറ്റർ ചുറ്റുമതിൽ നിർമിച്ചിട്ടുണ്ട്. ബാക്കി സ്ഥലത്തുകൂടി ചുറ്റുമതിൽ നിർമിക്കാനും പ്രവേശന കവാടം സ്ഥാപിക്കാനുമായി 2025-26 സാന്പത്തിക വർഷത്തെ ബജറ്റിൽ ഒരു കോടിയുടെ ഭരണാനുമതി നൽകിയിട്ടുണ്ട്. രണ്ടാം ഘട്ടം 100 കിടക്കകൾ നാഷണൽ കമ്മീഷൻ ഫോർ ഇന്ത്യൻ സിസ്റ്റം ഓഫ് മെഡിസിന്‍റെ മാനദണ്ഡപ്രകാരം രണ്ടാമത്തെ ഘട്ടത്തിൽ കിടക്കകളുടെ എണ്ണം 100 ആയി കൂട്ടും. അഡ്മിനിസ്ട്രേറ്റീവ് സെക്ഷൻ, അക്കാദമിക് സെക്‌ഷൻ എന്നിവയുടെ നിർമാണം ആരംഭിച്ച് വിദ്യാർഥി പ്രവേശനം നടത്താവുന്ന രീതിയിലാണ് പദ്ധതി വിഭാവനം ചെയ്യുന്നത്.

സിങ്കുകണ്ടത്ത് കാട്ടാന വീണ്ടും വീട് തകർത്തു

രാജാക്കാട്: ചിന്നക്കനാലിൽ വീണ്ടും കാട്ടാന ആക്രമണം. സിങ്കുകണ്ടത്ത് ആക്രമണകാരിയായ ചക്കക്കൊമ്പൻ ഒരു വീട് പൂർണമായും തകർത്തു. നടുവിൽ മറിയക്കുട്ടിയുടെ വീടാണ് തകർത്തത്. ബുധനാഴ്ച പുലർച്ചെ മൂന്നിന് ആയിരുന്നു കാട്ടാനയുടെ ആക്രമണം. അടുത്ത നാളുകളിലായി മേഖലയിൽ വ്യാപകമായ നാശനഷ്ടമാണ് ചക്കക്കൊമ്പൻ വരുത്തുന്നത്. കാട്ടാന പ്രതിരോധത്തിനു വനംവകുപ്പ് കാര്യക്ഷമമായി ഇടപെടുന്നില്ലെന്ന ആരോപണവും ശക്തമാണ്. പുലർച്ചെ ജനവാസ മേഖലയിൽ എത്തിയ ചക്കക്കൊമ്പൻ മറിയക്കുട്ടിയുടെ വീട് പൂർണമായും ഇടിച്ചു തകർത്തു. മറിയക്കുട്ടി കോട്ടയത്തെ ആശുപത്രിയിൽ ചികിത്സയ്ക്കായി പോയിരുന്നു. സമീപവാസിയായ രാജരത്നത്തെ വീടിന് കാവൽ ഏൽപ്പിച്ചിരുന്നു. ഓടി രക്ഷപ്പെട്ടു വീടിന് മുൻപിൽ തീയിട്ട് രാജരത്നം ഉറങ്ങാതെ കാവലിരിക്കുമ്പോൾ ആണ് ചക്കക്കൊമ്പൻ എത്തുന്നത്. തൊട്ടടുത്തെത്തിയ ആനയെ കണ്ട് ഭയന്ന് രാജരത്നം ഓടി രക്ഷപ്പെട്ടു. പിന്നാലെ കാട്ടാന വീട് പൂർണമായും ഇടിച്ചു തകർക്കുകയായിരുന്നു. വീട്ടുപകരണങ്ങളും പൂർണമായി നശിച്ചു. 301 ഉന്നതിയിലും സിങ്കുകണ്ടത്തും സമീപപ്രദേശങ്ങളിലുമായി നിരവധി വീടുകളും ഏക്കർ കണക്കിന് കൃഷിയും കാട്ടാന നശിപ്പിച്ചിട്ടുണ്ട്. മേഖലയിലുള്ളവരുടെ കൈവശഭൂമി ആയതിനാൽ നഷ്ടപരിഹാരമായി സർക്കാരിൽനിന്ന് ഒന്നും ലഭിക്കുന്നില്ല. നടപടിയില്ല കാട്ടാന നിരീക്ഷണത്തിനായി ആർആർടി സംഘത്തെ നിയോഗിച്ചിട്ടുണ്ടെങ്കിലും ഇവരുടെ സേവനം കാര്യക്ഷമമല്ല എന്നതാണ് നാട്ടുകാരുടെ ആരോപണം. വീടും കൃഷിയിടവും നഷ്ടമായവർക്ക് നഷ്ടപരിഹാരം നൽകുന്നതിനും കാട്ടാനയെ ജനവാസ മേഖലയിൽനിന്നു തുരത്തുന്നതിനും നടപടി സ്വീകരിക്കണമെന്ന് ചിന്നക്കനാൽ ഗ്രാമ പഞ്ചായത്ത് പ്രസിഡന്‍റ് എൻ എം. ശ്രീകുമാർ ആവശ്യപ്പെട്ടു.

ഇരട്ടയാർ സെന്‍റ് തോമസ് സ്കൂളിൽ അഗ്രോഫെസ്റ്റ്

കട്ടപ്പന: ഇരട്ടയാർ സെന്‍റ് തോമസ് ഹയർ സെക്കൻഡറി സ്കൂളിൽ കാർഷിക വിളകളുടെയും കാർഷിക ഉപകരണങ്ങളുടെയും പ്രദർശനം ’അഗ്രോഫെസ്റ്റ്-25’സംഘടിപ്പിച്ചു. പഞ്ചായത്ത് പ്രസിഡന്‍റ് ആനന്ദ് സുനിൽകുമാർ ഉദ്ഘാടനം ചെയ്തു. സുഗന്ധവ്യഞ്ജനങ്ങൾ, കിഴങ്ങുവർഗങ്ങൾ, പച്ചക്കറികൾ, ഇലവർഗങ്ങൾ, പഴവർഗങ്ങൾ, പയർ വർഗങ്ങൾ തുടങ്ങി 300ൽ പരം ഉൽപ്പന്നങ്ങൾ അഗ്രോഫെസ്റ്റിലുണ്ടായിരുന്നു. അസിസ്റ്റന്‍റ് മാനേജർ ഫാ. പ്രിൻസ് പുളിയാങ്കൽ അധ്യക്ഷത വഹിച്ചു. ഇരട്ടയാർ കൃഷി ഓഫീസർ ഡെല്ല തോമസ് മുഖ്യപ്രഭാഷണം നടത്തി. പഞ്ചായത്തംഗം ജിൻസണ്‍ വർക്കി, പ്രിൻസിപ്പൽ ജിജി ഏബ്രഹാം, ഹെഡ്മാസ്റ്റർ എം.വി. ജോർജുകുട്ടി, പിടിഎ പ്രസിഡന്‍റ് സിജോ ഇലന്തൂർ, എംപിടിഎ പ്രസിഡന്‍റ് ബിനു ജസ്റ്റിൻ, കണ്‍വീനർ രാജി പി. ജോസഫ് എന്നിവർ പ്രസംഗിച്ചു. അധ്യാപകരായ റെജിമോൾ തോമസ്, കൊച്ചുറാണി ജോസഫ്, സിജി മാത്യൂ, സെലിൻ ജോസഫ്, സുമി ഏബ്രഹാം, സിൽജ പീറ്റർ, ജാൻസി മാത്യൂ, എബി ടി. ജെയിംസ്, ഷിബു എം. കോലംകുഴി, ബിൻസ് ദേവസ്യ, ജിറ്റോ മാത്യു, സിബിൻ ജോസഫ് എന്നിവർ നേതൃത്വം നൽകി.

മരിയൻ കോളജിൽ തെരഞ്ഞെടുപ്പ് ബോധവത്കരണം

കുട്ടിക്കാനം: മരിയൻ കോളജിലെ സ്കൂൾ ഓഫ് സോഷ്യൽ വർക്കിന്‍റെ (ബിഎസ്ഡബ്ല്യു) ഒന്നാം വർഷ ബിരുദ വിദ്യാർഥികളുടെ ആഭിമുഖ്യത്തിൽ തെരഞ്ഞെടുപ്പ് ബോധവത്കരണ പരിപാടി സംഘടിപ്പിച്ചു. കോളജ് ഇലക്‌ടറൽ ലിറ്ററസി ക്ലബ്ബിന്‍റെ സഹകരണത്തോടെ നടന്ന പരിപാടിയിൽ കട്ടപ്പന തഹസിൽദാർ (ലാൻഡ് അക്വിസിഷൻ ഓഫീസ്) ജി. ജീവ മുഖ്യ പ്രഭാഷണം നടത്തി. പീരുമേട് താലൂക്ക് ഇലക്‌ഷൻ മാസ്റ്റർ ട്രെയിനർ വിഷ്ണു വോട്ടർ പട്ടികയിൽ പേര് ചേർക്കുന്നതിന്‍റെ വിശദമായ പരിശീലനം കുട്ടികൾക്ക് നൽകി. തെരഞ്ഞെടുപ്പ് നടപടിക്രമങ്ങൾ, വോട്ടർമാരുടെ അവകാശങ്ങൾ, തെരഞ്ഞെടുപ്പുമായി ബന്ധപ്പെട്ട നിയമപരമായ കാര്യങ്ങൾ തുടങ്ങിയവയെക്കുറിച്ച് അദ്ദേഹം മാർഗനിർദേശങ്ങളും നൽകി. പരിപാടിയിൽ സോഷ്യൽ വർക്ക് വിഭാഗം മേധാവി ഡോ. പി.ജെ. ജസ്റ്റിൻ, അധ്യാപകരായ ഡോ. ജോബി ബാബു, അനിതാമോൾ ബാബു, വിദ്യാർഥി പ്രതിനിധികളായ ആൻ റിയ, ദിനശ്രീ, അൽജോ എന്നിവർ പ്രസംഗിച്ചു.

റെഡ് റണ്‍ മാരത്തണ്‍ മത്സരം

ഇടുക്കി: ജില്ലാ എയ്ഡ്സ് നിയന്ത്രണ സൊസൈറ്റി, ജില്ലാ മെഡിക്കൽ ഓഫീസ്, ജില്ലാ ദേശീയ ആരോഗ്യ ദൗത്യം, എൻഎസ്എസ് കേരള എന്നിവയുടെ ആഭിമുഖ്യത്തിൽ അന്താരാഷ്ട്ര യുവജന ദിനാചരണത്തിനോടനുബന്ധിച്ച് റെഡ് റണ്‍ മാരത്തണ്‍ മത്സരം സംഘടിപ്പിച്ചു. ജില്ലാ കളക്ടർ വി. വിഗ്നേശ്വരി ഫ്ളാഗ് ഓഫ് ചെയ്തു. കളക്‌ടറേറ്റ് ജംഗ്ഷൻ മുതൽ ഇടുക്കി മെഡിക്കൽ കോളജ് ജംഗ്ഷൻ വരെ അഞ്ച് കിലോമീറ്റർ ദൂരത്തിലായിരുന്നു മാരത്തണ്‍. മത്സരത്തിൽ ആദ്യ മൂന്ന് സ്ഥാനം കരസ്ഥമാക്കിയവർക്ക് യഥാക്രമം 5,000, 4,000, 3,000 രൂപ കാഷ് അവാർഡും സർട്ടിഫിക്കറ്റും സമ്മാനിച്ചു. ജില്ലാ മെഡിക്കൽ ഓഫീസർ ഡോ. കെ.എൻ. സതീഷ് , ജില്ലാ ടി ബി ഓഫീസർ ഡോ. ആശിഷ് മോഹൻ കുമാർ, ഡെപ്യൂട്ടി ഡിഎംഒ ഡോ. ശരത് ജി റാവു, ജില്ലാ ആർസിഎച്ച് ഓഫീസർ ഡോ. സിബി ജോർജ്, ജില്ലാ മലേറിയ ഓഫീസർ വി.എസ്.രാജേഷ്, ജിബിൻ ജോസഫ്, വി.ആർ. ഷെലാഭായി എന്നിവർ പ്രസംഗിച്ചു.

ദുരന്ത വാർഷികദിനത്തിൽ പ്രാർഥനകളോടെ പെട്ടിമുടി

മൂന്നാർ: അഞ്ചു വർഷം മുന്പു നടന്ന ദുരന്തത്തിന്‍റെ ഓർമദിനത്തിൽ പെട്ടിമുടി പ്രാർഥനാ മുഖരിതമായി. മഹാദുരന്തത്തിൽ ജീവൻ പൊലിഞ്ഞ ഉറ്റവരുടെ ഓർമകളുമായി ബന്ധുക്കൾ വിവിധ ഇടങ്ങളിലായി പ്രാർഥനകളർപ്പിച്ചു. വിവിധ വിഭാഗങ്ങളിൽപ്പെട്ട മതനേതാക്കളുടെ നേതൃത്വത്തിൽ മരിച്ചവരെ സംസ്കരിച്ച സ്ഥലത്തു തന്നെയായിരുന്നു പ്രാർഥന നടന്നത്. കന്പനി മാനേജിംഗ് ഡയറക്ടർ മാത്യു ഏബ്രാഹം ശവകുടീരത്തിൽ സ്മരണാഞ്ജലി അർപ്പിച്ചു. രാജമലയിൽ സെന്‍റ് തെരേസാസ് പള്ളിയിൽ മരിച്ചവർക്കായി പ്രത്യേക പ്രാർഥനാ ശുശ്രൂഷകൾ നടന്നു. രാഷ‌്ട്രീയ പ്രവർത്തകരും ജനപ്രതിനിധികളും സാമൂഹ്യ-സാംസ്കാരിക രംഗങ്ങളിലെ പ്രമുഖർ ഉൾപ്പെടെയുള്ള നിരവധി പേർ പെട്ടിമുടിയിൽ എത്തി. മരിച്ചവരുടെ തമിഴ്നാട്ടിൽ താമസിക്കുന്ന ബന്ധുക്കളുംഎത്തിയിരുന്നു. 2020 ഓഗസ്റ്റ് ആറിനു രാത്രി പെട്ടിമുടിയിൽ ഉണ്ടായ ഉരുൾപൊട്ടലിൽ തൊഴിലാളി കുടുംബങ്ങളിലെ 70 പേരുടെ ജീവനുകളാണ് നഷ്ടപ്പെട്ടത്. മരിച്ചവർക്കു വേണ്ടി പ്രാർഥന നടത്തുന്പോഴും അപകടത്തിൽപ്പെട്ടവരെ കണ്ടുകിട്ടാതെ നാലു കുടുംബങ്ങൾ ഇന്നും തോരാത്ത കണ്ണീരുമായി കഴിയുന്നുണ്ട്.

അധ്യാപക നിയമനം: ടീച്ചേഴ്സ് ഗിൽഡ് പ്രതിഷേധിച്ചു

കാഞ്ഞിരപ്പള്ളി: ഭിന്നശേഷി സംവരണത്തിന് അധ്യാപക തസ്തിക മാറ്റിവയ്ക്കുന്ന ക്രിസ്ത്യൻ എയ്ഡഡ് സ്കൂളുകളിലെ മറ്റു നിയമനങ്ങൾ അംഗീകരിക്കണമെന്ന ആവശ്യം നിരസിച്ച് വിദ്യാഭ്യാസ വകുപ്പ് പുറത്തിറക്കിയ ഉത്തരവിനെതിരേ കാഞ്ഞിരപ്പള്ളി രൂപത കാത്തലിക് ടീച്ചേഴ്സ് ഗിൽഡ് പ്രതിഷേധിച്ചു. തികച്ചും വിവേചനപരമായ ഉത്തരവിലൂടെ പന്ത്രണ്ടായിരത്തോളം അധ്യാപക നിയമനങ്ങളാണ് അനിശ്ചിതത്വത്തിലായത്. എൻഎസ്എസ് മാനേജ്മെന്‍റിന് അനുകൂലമായി ലഭിച്ച സുപ്രീം കോടതി വിധിയുടെ പശ്ചാത്തലത്തിൽ പുറപ്പെടുവിച്ച ഉത്തരവ് തങ്ങൾക്കും ബാധകമാക്കണമെന്ന മറ്റു മാനേജ്മെന്‍റുകളുടെ വാദം അംഗീകരിക്കാതെയും കോടതികളിൽ നൽകേണ്ട മറുപടികൾ വൈകിച്ചും സുപ്രീംകോടതിയിൽ കേസ് ഫയൽ ചെയ്യുന്നതിന് കാലതാമസം സൃഷ്ടിച്ചും സർക്കാർ നടത്തിയ നീക്കം അധ്യാപക സമൂഹത്തോടുള്ള വെല്ലുവിളിയാണെന്ന് യോഗം വിലയിരുത്തി. . പ്രസിഡന്‍റ് വിൻസന്‍റ് ജോർജിന്‍റെ അധ്യക്ഷതയിൽ ചേർന്ന സമ്മേളനം രൂപത ഡയറക്ടർ ഫാ. ഏബ്രഹാം കൊച്ചുവീട്ടിൽ ഉദ്ഘാടനം ചെയ്തു. ജനറൽ സെക്രട്ടറി സിറിയക് മാത്യു, എക്സിക്യൂട്ടീവ് അംഗങ്ങളായ റോബി കെ. തോമസ്, ഷെറിൻ മേരി ജോണ്‍, തോമസ് ഡൊമിനിക്, ജോമോൻ ജോസഫ്, റോണി സെബാസ്റ്റ്യൻ എന്നിവർ പ്രസംഗിച്ചു.

താക്കോൽദ്വാര ശസ്ത്രക്രിയയിൽ നൂറോളം കല്ലുകൾ നീക്കി

തൊടുപുഴ: കടുത്ത വയറു വേദനയെത്തുടർന്ന് ആശുപത്രിയിലെത്തിയ 44കാരന്‍റെ വൃക്കയിൽനിന്നു നൂറോളം കല്ലുകൾ നീക്കം ചെയ്തു. മുതലക്കോടം ഹോളിഫാമിലി ആശുപത്രിയിൽ നടത്തിയ ശസ്ത്രക്രിയയിലാണ് കല്ലുകൾ നീക്കിയത്. ആശുപത്രിയിലെ പരിശോധനയിൽ വൃക്കയിൽ കല്ലുകൾ കണ്ടെത്തിയതിനെത്തുടർന്ന് ന്യൂറോളജിസ്റ്റ് ഡോ. ആർ. ശരവണന്‍റെ നേതൃത്വത്തിൽ നടത്തിയ നൂതന താക്കോൽ ദ്വാര ശസ്ത്രക്രിയയിലൂടെ കല്ലുകൾ നീക്കം ചെയ്തു.

വോട്ടർ പട്ടിക: ഹെൽപ്പ് ഡെസ്ക് തുടങ്ങി

ഇടുക്കി: കരട് വോട്ടർ പട്ടികയിൽ പേരു ചേർക്കുന്നതുമായി ബന്ധപ്പെട്ട് കളക്ടറേറ്റിൽ ഹെൽപ്പ് ഡെസ്ക് ആരംഭിച്ചു. ജില്ലാ കളക്ടർ വി. വിഗ്നേശ്വരി ഉദ്ഘാടനം ചെയ്തു. വോട്ടർ പട്ടികയിൽ പേരുണ്ടോ എന്ന് പരിശോധിക്കാനും പേരു ചേർക്കുന്നതിനും മേൽവിലാസം ഉൾപ്പെടെയുള്ള കാര്യങ്ങളിൽ തെറ്റുണ്ടെങ്കിൽ തിരുത്താനുമുള്ള അപേക്ഷ സമർപ്പിക്കാനുള്ള അവസരം വോട്ടർ ഹെൽപ്പ് ഡെസ്ക് വഴി ലഭിക്കും. ജൂലൈ 23നാണ് കരട് വോട്ടർ പട്ടിക പ്രസിദ്ധീകരിച്ചത്. പേര് ചേർക്കുന്നതിനും പട്ടികയിൽ ഭേദഗതി വരുത്തുന്നതിനും ഒരു വാർഡിൽനിന്ന് മറ്റൊരു വാർഡിലേക്കോ പോളിംഗ് സ്റ്റേഷനിലേക്കോ സ്ഥാനമാറ്റം വരുത്തുന്നതിനും പേര് ഒഴിവാക്കുന്നതിനുമുള്ള അപേക്ഷകൾ നാളെ വരെ നൽകാം. സംസ്ഥാന തെരഞ്ഞെടുപ്പ് കമ്മീഷന്‍റെ kerala.gov.in വെബ്സൈറ്റിലാണ് ഓണ്‍ലൈൻ അപേക്ഷകൾ സമർപ്പിക്കേണ്ടത്. 2025 ജനുവരി ഒന്നിനോ അതിന് മുേൻപാ 18 വയസ് പൂർത്തിയായവർക്ക് പേര് ചേർക്കാം. വാർഡ് പുനർവിഭജനത്തെത്തുടർന്ന് തദ്ദേശസ്ഥാപനങ്ങളിൽ നിലവിലുണ്ടായിരുന്ന വോട്ടർപട്ടിക പുതിയ വാർഡുകളിൽ ഡീലിമിറ്റേഷൻ ഉത്തരവ് അടിസ്ഥാനമാക്കിയാണ് പുനഃക്രമീകരിച്ചത്. നിലവിലെ വോട്ടർപട്ടിക പുനഃക്രമീകരിച്ചതിലെ പിഴവുമൂലം വാർഡോ പോളിംഗ് സ്റ്റേഷനോ മാറിയിട്ടുണ്ടെങ്കിൽ അവ തിരുത്തുന്നതിന് സ്വമേധയാ നടപടി സ്വീകരിക്കുന്നതിന് ഇലക്‌ടറൽ രജിസ്ട്രേഷൻ ഓഫീസർമാർക്ക് തെരഞ്ഞെടുപ്പ് കമ്മീഷൻ നിർദേശം നൽകിയിട്ടുണ്ട്. എഡിഎം ഷൈജു പി. ജേക്കബ്, ഡെപ്യൂട്ടി കളക്ടർമാരായ അതുൽ സ്വാമിനാഥൻ, സുജ വർഗീസ് എന്നിവർ പ്രസംഗിച്ചു.

വീടുകയറി മർദനം: യുവാവ് അറസ്റ്റിൽ

കരിമണ്ണൂർ: അയൽവാസികൾ തമ്മിലുണ്ടായ വഴക്കിനെത്തുടർന്ന് ഗൃഹനാഥനെയും മാതാവിനെയും ക്രൂരമായി മർദിച്ച സംഭവത്തിൽ യുവാവ് അറസ്റ്റിൽ. കരിമണ്ണൂർ പാഴൂക്കര പുളിക്കൽ മനുപ്രസാദിനും മാതാവ് രാധാമണിക്കുമാണ് മർദനമേറ്റത്. സംഭവവുമായി ബന്ധപ്പെട്ട് തളിപ്പറന്പ് നടുവിൽവെളളാട് കുന്നുംപുറത്ത് അതുലിനെയാണ് (26) കരിമണ്ണൂർ പോലീസ് അറസ്റ്റ് ചെയ്തത്. കഴിഞ്ഞ ദിവസം രാവിലെ 7.30ഓടെയാണ് മനുപ്രസാദ് കുടുംബമായി താമസിക്കുന്ന വീട്ടിൽ അതിക്രമിച്ചു കയറി പ്രതി അതിക്രമം നടത്തിയത്. മനുപ്രസാദിനെ മാരകായുധം ഉപയോഗിച്ച് ആക്രമിക്കുകയായിരുന്നു. പരിക്കേറ്റ മനു പ്രസാദും മാതാവും ആശുപത്രിയിൽ ചികിൽസയിലാണ്. മനുപ്രസാദിന്‍റെ കുടുംബവുമായി ശത്രുതയുണ്ടായിരുന്ന അയൽവീട്ടുകാരുടെ ബന്ധുവാണ് പ്രതിയെന്ന് പോലീസ് പറഞ്ഞു. എസ്ഐ അലക്സാണ്ടർ, എസ്‌സിപിഒമാരായ എ.ടി. അജിത്, രജനീഷ് എന്നിവർ ചേർന്നാണ് പ്രതിയെ പിടികൂടിയത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.

പട്ടാപ്പകൽ കാന്തല്ലൂർ ടൗണിൽ കാട്ടാനക്കൂട്ടം

മറയൂർ: ഉച്ചനേരത്ത് കാന്തല്ലൂർ ടൗണ്‍ ഇന്നലെ ഭീതിയുടെ നിഴലിലായിരുന്നു. മൂന്ന് കൊന്പനാനകൾ പട്ടാപ്പകൽ ടൗണിലേക്ക് ഇറങ്ങിയത് നാട്ടുകാരെ ഞെട്ടിച്ചു. ഉച്ചയ്ക്ക് 1.30ന് ടൗണിലെ അങ്കണവാടിക്കു സമീപം എത്തിയ കാട്ടാനകൾ അവിടെ കളിച്ചുകൊണ്ടിരുന്ന കുട്ടികളെ ഭയപ്പെടെുത്തി. പ്രദേശ വാസികളും ജീപ്പ് ഡ്രൈവർമാരും ഒന്നിച്ച് മുന്നിട്ടിറങ്ങി ശബ്ദമുണ്ടാക്കി ആനകളെ പെരുമല ഭാഗത്തേക്ക് തുരത്തി. തുടർന്ന് വനംവകുപ്പ് ഉദ്യോഗസ്ഥർ സ്ഥലത്തെത്തിയെങ്കിലും കാട്ടാനകൾ പെരുമലയിൽ നിലയുറപ്പിച്ചിരിക്കുകയാണ്. ഓണത്തോടനുബന്ധിച്ച് കിഴങ്ങ് ഉൾപ്പെടെയുള്ള പച്ചക്കറികളും വിളവെടുപ്പിന് പാകമായി നിൽക്കുന്ന സമയത്ത് കാട്ടാനകളിറങ്ങിയത് കർഷകരെയും ആശങ്കയിലാഴ്ത്തിയിരിക്കുകയാണ്.

മങ്ങാട്ടുകവല ഷോപ്പിംഗ് കോംപ്ലക്സ് ഉടൻ തുറന്നുകൊടുക്കും

തൊടുപുഴ: മങ്ങാട്ടുകവല ബസ് സ്റ്റാന്‍ഡിനോടനുബന്ധിച്ച് നിർമാണം പൂർത്തീകരിച്ച ഷോപ്പിംഗ് കോംപ്ലക്സ് ഈ മാസം അവസാനത്തോടെ പ്രവർത്തനസജ്ജമാകുമെന്ന് നഗരസഭാ ചെയർമാൻ കെ. ദീപക് പറഞ്ഞു. കെട്ടിടം നിർമാണം പൂർത്തിയാക്കി ഉദ്ഘാടനം നടത്തിയിട്ട് വർഷങ്ങളായെങ്കിലും ഫയർ ഫോഴ്സിന്‍റെ അനുമതി ഉൾപ്പെടെ ലഭിക്കാത്തതിനാൽ കെട്ടിടം തുറന്നുനൽകാനായില്ല. ഇത് ഏറെ ആക്ഷേപത്തിനു കാരണമായിരുന്നു. ഇതിനിടെ നഗരസഭയിൽ അവിശ്വാസത്തിലൂടെ എൽഡിഎഫിന് ഭരണം നഷ്ടമാകുകയും യുഡിഎഫ് അധികാരത്തിൽ എത്തുകയും ചെയതു. തുടർന്നു ഷോപ്പിംഗ് കോംപ്ലക്സ് തുറന്നുപ്രവർത്തിക്കുന്നതിനു തടസമായിരുന്ന ജോലി പൂർത്തീകരിക്കാൻ ആവശ്യമായ നടപടി സ്വീകരിക്കുകയായിരുന്നു. അവശേഷിച്ചിരുന്ന ഇലക‌്ട്രിക്കൽ ജോലികൾ, ടൈൽ വിരിക്കൽ, വാട്ടർടാങ്ക് സ്ഥാപിക്കൽ തുടങ്ങിയവയും പൂർത്തീകരിച്ചു. ഇനി നഗരസഭ പൊതുമരാമത്ത് വിഭാഗം മുറികൾക്ക് നന്പരിട്ട് നൽകണം. മൂന്നുനിലകളിലായാണ് ഷോപ്പിംഗ് കോംപ്ലക്സ് നിർമിച്ചിട്ടുള്ളത്. ഇതിൽ ഗ്രൗണ്ട് ഫ്ളോറും ഒന്നാംനിലയും വാണിജ്യ ആവശ്യങ്ങൾക്ക് സ്വകാര്യവ്യക്തികൾക്കാണ് വിട്ടുനൽകുന്നത്. നിലവിൽ 36 മുറികൾ ലേലത്തിൽ പോയിട്ടുണ്ട്. രണ്ടാംനില പൂർണമായും സർക്കാർ ഓഫീസുകൾക്കായി മാറ്റിവച്ചിരിക്കുകയാണ്. ഷോപ്പിംഗ് കോംപ്ലക്സ് പൂർണമായും പ്രവർത്തന സജ്ജമാകുന്നതോടെ മങ്ങാട്ടുകവലയുടെ വികസനത്തിനു കുതിപ്പേകും. ഇതിനു പുറമേ നഗരസഭ ബസ് സ്റ്റാന്‍ഡിനു സമീപം നിർമാണംപൂർത്തിയാക്കിയ ഷീ ലോഡ്ജ് കംഫർട്ട് സ്റ്റേഷൻ തുറക്കുന്നതിനുള്ള നടപടികളും അന്തിമഘട്ടത്തിലാണ്. സെപ്റ്റിക് ടാങ്കുകൾ ഉൾപ്പെടെ സ്ഥാപിച്ചുകഴിഞ്ഞു. നേരത്തേ ഇവിടെ സ്ഥാപിച്ചിരുന്ന ടാപ്പുകളും പൈപ്പുകളും മറ്റും സാമൂഹ്യവിരുദ്ധർ നശിപ്പിച്ചതിനാൽ ഇവ വീണ്ടും സ്ഥാപിക്കേണ്ടതുണ്ട്. അവശേഷിക്കുന്ന ജോലികൾ വേഗത്തിൽപൂർത്തീകരിച്ച് ഓണത്തിനു മുന്പ് പ്രവർത്തന സജ്ജമാക്കാനാണ് ശ്രമം.

ഇത് ആരുടെ ആസ്ഥാനം?

സ്വന്തം ലേഖകർ ജില്ലാ ആസ്ഥാന മേഖല തെരുവു നായ്ക്കളാൽ മനുഷ്യരുടെ പൊറുതിമുട്ടിയ അവസ്ഥയിൽ. ഉടമസ്ഥരില്ലാത്ത നൂറു കണക്കിനുനായ്ക്കളാണ് പ്രദേശവാസികൾക്കും പൊതുജനങ്ങൾക്കും ഉപദ്രവമായി പാഞ്ഞുനടക്കുന്നത്. വീട്ടിൽ ഓമനിച്ചു വളർത്തുന്ന നായകളെ പലരും ബാധ്യതയോ ശല്യമോ പ്രായമോ ആകുമ്പോൾ കൂടു തുറന്നു വിടുകയോ ആൾപാർപ്പില്ലാത്ത ഇടങ്ങളിലോ വനമേഖലയിലോ തുറന്നു വിടുകയോ ആണ് ചെയ്യുന്നത്. ഇവ വൈകാതെ സമീപത്തുള്ള ടൗണുകളിലും കോളനികളിലുമെത്തി അവിടെ താവളമാക്കും. ഇതിനൊപ്പം തെരുവുനായ്ക്കൾ ഇണ ചേർന്നു പെരുകുന്നവ കൂടിയാകുന്പോൾ മാസം തോറും ഇവയുടെ എണ്ണം കൂടുന്ന സ്ഥിതിയാണ്. കരിന്പനെ വിറപ്പിച്ചു കഴിഞ്ഞ ദിവസം കരിമ്പൻ ടൗണിനെ തെരുവുനായ ആക്രമണം വിറപ്പിച്ചു. തെരുവുനായയുടെ പരാക്രമത്തിൽ അഞ്ചു പേർക്കു കടിയേറ്റിരുന്നു. ടൗണിലൂടെ അലഞ്ഞു നടന്നിരുന്ന തെരുവുനായ വ്യാപാരിയെയും വഴിയാത്രക്കാരെയും ഓടിച്ചിട്ടു കടിക്കുകയായിരുന്നു. പലർക്കും മാരകമായ മുറിവേറ്റു. സംഭവം കണ്ട് ഓടിക്കൂടിയ നാട്ടുകാർ ഒടുവിൽ ആക്രമണം ഒഴിവാക്കാൻ നായയെ തല്ലിക്കൊല്ലുകയായിരുന്നു. ഹൈറേഞ്ചിലെ ഒട്ടുമിക്ക ടൗണുകളിലെയും സ്ഥിതി ഇതു തന്നെയാണ്. ആശുപത്രിയിലും രക്ഷയില്ല പൊതുജനങ്ങൾ ഏറെ എത്തുന്ന ഇടുക്കി മെഡിക്കൽ കോളജ് ആശുപത്രി പരിസരത്തും കളക്‌ടറേറ്റ് പരിസരങ്ങളിലും നായകൾ തലങ്ങും വിലങ്ങും കൂട്ടത്തോടെ വിളയാടുകയാണ്. റോഡരികിൽ ആളുകൾ തള്ളുന്ന ഭക്ഷണാവശിഷ്ടങ്ങൾക്കായി പോരടിക്കുന്ന നായ്ക്കളുടെ ഇടയിൽ ചെന്നുപെട്ടാൽ കാൽനട യാത്രികരുടെ കാര്യം കഷ്ടമാകും. പലേടങ്ങളിൽനിന്നായി വന്ധ്യംകരണം നടത്താൻ പിടിച്ചുകൊണ്ടു വരുന്ന നായ്ക്കളെ അതേ സ്ഥലത്തു തിരികെ കൊണ്ടു വിടുന്നതിനു പകരം ആളൊഴിഞ്ഞ പ്രദേശങ്ങളിലും ടൗണുകൾക്കു സമീപവും ഉപേക്ഷിക്കുന്നതായും ആക്ഷേപമുണ്ട്. പൊതുസമൂഹത്തിനു ഭീഷണിയായ തെരുവുനായ്ക്കളെ ഷെൽട്ടർ ഹോമിൽ പാർപ്പിക്കുകയോ തുരത്തുകയോ ചെയ്യണമെന്നാണ് പൊതുജനങ്ങളുടെ ആവശ്യം... (തുടരും).

ദീപിക കളർ ഇന്ത്യ ജില്ലാതല മത്സരം നാളെ കട്ടപ്പനയിൽ

കട്ടപ്പന: ഇന്ത്യയുടെ 79-ാമത് സ്വാതന്ത്ര്യദിനാഘോഷത്തിന്‍റെ ഭാഗമായി നടത്തുന്ന ദീപിക കളർ ഇന്ത്യ മത്സരത്തിന്‍റെ ജില്ലാതല ഉദ്ഘാടനം നാളെ കട്ടപ്പന ഡോണ്‍ബോസ്കോ സ്കൂളിൽ നടക്കും. ഉച്ചയ്ക്ക് ഒന്നിന് മന്ത്രി റോഷി അഗസ്റ്റിൻ ഉദ്ഘാടനം ചെയ്യും. ഡിഎഫ്സി സംസ്ഥാന പ്രസിഡന്‍റ് ലോറൻസ് ഏബ്രഹാം മുഖ്യ പ്രഭാഷണം നടത്തും. ഡിഎഫ്സി ഇടുക്കി രൂപത ഡയറക്ടർ ഫാ. ജോസഫ് കൊല്ലംകൊന്പിൽ, ഡിഎഫ്സി രൂപത പ്രസിഡന്‍റ് വി.ടി. തോമസ്, ഡോണ്‍ബോസ്കോ സ്കൂൾ പ്രിൻസിപ്പൽ ഫാ. വർഗീസ് ഇടത്തിച്ചിറ എസ്ഡിബി, മാനേജർ ഫാ. വർഗീസ് തണ്ണിപ്പാറ എസ്ഡിബി, അഡ്മിനിസ്ട്രേറ്റർ ഫാ. ജയിംസ് പ്ലാക്കാട്ടിൽ എസ്ഡിബി, ജനറാൾ ഫാ. അജീഷ് കീത്താപ്പള്ളിൽ എസ്ഡിബി, കോ-ഓർഡിനേറ്റർ ജോജോ ഏബ്രഹാം തുടങ്ങിയവർ പ്രസംഗിക്കും. ലഹരിക്കെതിരേയുള്ള പോരാട്ടവും ഭാരതത്തിന്‍റെ ഐക്യവും അഖണ്ഡതയും ഉൗട്ടി ഉറപ്പിക്കാനുളള സന്ദേശവും കുട്ടികൾക്കു പകർന്നുനൽകാൻ ലക്ഷ്യമിട്ടാണ് അഖിലേന്ത്യാ തലത്തിൽ ദീപിക കളർ ഇന്ത്യ മത്സരം നടത്തുന്നത്.

ചീയപ്പാറയില്‍ സഞ്ചാരികളുടെ തിരക്ക്

അടിമാലി: ജലസമൃദ്ധമായ ചീയപ്പാറ വെള്ളച്ചാട്ടം കാണാന്‍ സഞ്ചാരികളുടെ തിരക്ക്. കൊച്ചി - ധനുഷ്‌കോടി ദേശീയപാതയിലൂടെ മൂന്നാറിലേക്ക് സഞ്ചരിക്കുന്നവരുടെ ശ്രദ്ധ കവരുന്നതാണ് തട്ട് തട്ടായി താഴേക്ക് പതിക്കുന്ന ചീയപ്പാറ വെള്ളച്ചാട്ടം. വേനലിന് ശേഷം മണ്‍സൂണ്‍ എത്തിയതോടെ വറ്റിവരണ്ടു കിടന്നിരുന്ന ചീയപ്പാറ വെള്ളച്ചാട്ടം സജീവമായി. ദിവസവും നൂറുകണക്കിന് സഞ്ചാരികളാണ് ചീയപ്പാറയില്‍ ഇറങ്ങി ജലപാതത്തിന്‍റെ ഭംഗിയാസ്വദിച്ച് കടന്നുപോകുന്നത്. വിദേശ വിനോദസഞ്ചാരികളും അയല്‍ സംസ്ഥാനങ്ങളില്‍നിന്ന് എത്തുന്നവരുമൊക്കെയാണ് ചീയപ്പാറയില്‍ ഇറങ്ങുന്നത്. പച്ചപ്പിന് നടുവിലാണ് ചീയപ്പാറ ജലസമൃദ്ധി തീര്‍ക്കുന്നത്. സഞ്ചാരികളുടെ തിരക്കാരംഭിച്ചതോടെ വെള്ളച്ചാട്ടങ്ങളുമായി ചേര്‍ന്നുനിന്നിരുന്ന വ്യാപാരീ സമൂഹവും സജീവമാണ്. വേനലില്‍ പൂര്‍ണമായി വറ്റിവരളും വരെ ചീയപ്പാറ വെള്ളച്ചാട്ടത്തില്‍ സഞ്ചാരികളുടെ ഈ തിരക്ക് തുടരും.

വൈഗ ഡാം നിറയുന്നു

കുമളി: മുല്ലപ്പെരിയാർ അണക്കെട്ടിലെ വെള്ളം എത്തിക്കുന്ന തമിഴ്നാട്ടിലെ വൈഗ ഡാം നിറയുന്നു. ഇന്നലെ ഉച്ചയോടെ ജലനിരപ്പ് 69 അടിയിലെത്തി.അണക്കെട്ട് തുറക്കുന്നതിന് മുന്നോടിയായി മൂന്നാം മുന്നറിയിപ്പ് തമിഴ്നാട് സർക്കാർ നല്കി. 71 അടിയാണ് അണക്കെട്ടിന്‍റെ പരമാവധി സംഭരണശേഷി. സെക്കൻഡിൽ 1577 ഘനയടി വെള്ളം തേക്കടിയിൽനിന്ന് അണക്കെട്ടിലേക്ക് ഒഴുകിയെത്തുന്നുണ്ട്. അണക്കെട്ട് പ്രദേശത്ത് മഴയില്ലെങ്കിലും മുല്ലപ്പെരിയാർ അന്നക്കെട്ടിലെ വെള്ളം വൈഗ ഡാമിൽ തമിഴ്നാട് പരമാവധി സംഭരിക്കുന്നുണ്ട്.

പെട്ടിമുടിയുടെ നോവിന് അഞ്ചാണ്ട്

മൂന്നാർ: പച്ചപുതച്ച മലനിരകളിൽ ചോരപ്പാടുകൾ തീർത്ത് പൊട്ടിയിറങ്ങിയ ഉരുൾ 70 പേരുടെ ജീവൻ കവർന്നെടുത്ത ദുരന്തം സംഭവിച്ചിട്ട് അഞ്ചു വർഷം തികയുന്ന ഇന്ന് പെട്ടിമുടി ഉറ്റവരുടെ ഓർമകളാൽ പ്രാർഥനാമുഖരിതമാകും. 2020 ഓഗസ്റ്റ് ആറിന് രാത്രി 10.30ന് പെട്ടിമുടിയിലുണ്ടായ ഉരുൾപൊട്ടൽ സംസ്ഥാനം കണ്ട ഏറ്റവും വലിയ പ്രകൃതി ദുരന്തങ്ങളിൽ ഒന്നായി മാറുകയായിരുന്നു. മരണഞ്ഞവരുടെ ഓർമകളുമായി ഇന്നു പെട്ടിമുടിയിൽ പ്രത്യേക പ്രാർത്ഥനകൾ നടക്കും. മരിച്ചവരെ സംസ്കരിച്ച സ്ഥലത്തു തന്നെയാവും പ്രാർഥനാ ചടങ്ങുകൾ. കെഡിഎച്ച്പി കന്പനിയുടെ ഉന്നത ഉദ്യോഗസ്ഥർ രാവിലെ സ്ഥലത്ത് സ്മരണാജ്ഞലികൾ അർപ്പിക്കും. രാവിലെ ഒൻപതിന് എല്ലാ എസ്റ്റേറ്റുകളിലും തൊഴിലാളികളുടെ നേതൃത്വത്തിൽ മൗനപ്രാർഥനകൾ നടത്തും. രാജമലയിലെ സെന്‍റ് തെരേസാസ് ദേവാലയത്തിൽ പരേതർക്കായിപ്രത്യേക പ്രാർഥന നടക്കും. പ്രതികൂല കാലാവസ്ഥയിലും മരിച്ചവരുടെ വിദൂരത്തുള്ള ബന്ധുക്കൾ പ്രാർഥനകൾക്കായി എത്തുമെന്നാണ് പ്രതീക്ഷിക്കുന്നത്. ഒരു കിലോമീറ്ററിലധികം ഉയരമുള്ള മലമുകളിൽനിന്നു ആർത്തലച്ച് എത്തിയ മലവെള്ളപ്പാച്ചിലിൽ എസ്റ്റേറ്റിലെ നാലു ലയങ്ങൾ മണ്ണിനടിയിലായി. അവിടെയുണ്ടായിരുന്ന ലേബർ ക്ലബും കാന്‍റീനും തകർന്നടിഞ്ഞു. കെട്ടിടങ്ങൾ നിലനിന്ന സ്ഥലം പാറകളും മണ്ണും വന്നടിഞ്ഞ് യുദ്ധസമാന ഭൂമിയായി. ഒരു മാസത്തോളം നീണ്ടുനിന്ന രക്ഷാപ്രവർത്തനങ്ങൾക്ക് സമാനതകളില്ലായിരുന്നു. ദേശീയ ദുരന്തനിവാരണ സേനയോടെപ്പം മുന്നൂറിലധികം സന്നദ്ധപ്രവർത്തകരും രക്ഷാപ്രവർത്തനത്തിൽ പങ്കു ചേർന്നു. ഇരുപതു ദിവസത്തെ തെരച്ചിലിൽ കാണാതായ 70 പേരിൽ 66 പേരെയും കണ്ടെത്തി. മരിച്ചവർക്കു വേണ്ടി പ്രാർഥനകൾ നടത്തുന്പോഴും നാലു കുടുംബങ്ങളാണ് ഇന്നും തോരാത്ത കണ്ണീരുമായി കഴിയുന്നത്.

ചെറുതോണിയിൽ സിവിൽ സ്റ്റേഷൻ ഉയരും

ഇടുക്കി: ഏറെക്കാലമായി ചർച്ചകളിൽ നിൽക്കുന്ന ചെറുതോണി സിവിൽ സ്റ്റേഷൻ ഒന്ന സ്വപ്നം ഒടുവിൽ യാഥാർഥ്യത്തിലേക്കു ചുവടുവയ്ക്കുന്നു. ചെറുതോണി ടൗണ്‍ ഹാളിനു സമീപം മിനി സിവിൽ സ്റ്റേഷന്‍റെ ആദ്യ ഘട്ട നിർമാണത്തിന് 10 കോടി അനുവദിച്ചതായി മന്ത്രി റോഷി അഗസ്റ്റിൻ അറിയിച്ചു. ജില്ലാ ആസ്ഥാനത്തു പലേടത്തായി പ്രവർത്തിക്കുന്ന വിവിധ ഓഫീസുകൾ ഒരു കുടക്കീഴിലേക്കു മാറ്റുകയെന്ന ലക്ഷ്യത്തോടെയാണ് മിനി സിവിൽ സ്റ്റേഷൻ നിർമിക്കുന്നത്. ഇതിനായി മൂന്ന് ഏക്കർ സ്ഥലം കൈമാറിയിരുന്നു. മൂന്നു ബ്ലോക്കുകൾ കെട്ടിട നിർമാണത്തിനുള്ള സാങ്കേതിക അനുമതി കിട്ടാനുള്ള നടപടി തുടങ്ങി. ഇതു ലഭ്യമാക്കുന്നതോടെ ടെൻഡർ വിളിച്ചു നിർമാണം തുടങ്ങും. 4,460 ചതുരശ്ര മീറ്റർ വിസ്തീർണമുള്ള കെട്ടിടമാണ് രൂപകല്പന ചെയ്തിരിക്കുന്നത്. മൂന്നു ബ്ലോക്കുകളായാണ് നിർമാണം പൂർത്തിയാക്കുക. ഇതിൽ ആദ്യത്തെ ബ്ലോക്കാണ് ഇപ്പോൾ നിർമിക്കുക. 1,600 ചതുരശ്ര മീറ്റർ വിസ്തീർണമാണ് നാലു നിലകളിലായി ഈ ബ്ലോക്കിലുള്ളത്. മറ്റ് രണ്ട് ബ്ലോക്കുകൾ യഥാക്രമം 1590 ചതുരശ്ര മീറ്ററും 1290 ചതുരശ്ര മീറ്ററും വിസ്തീർണം ഉള്ളവയാണ്. ഈ ബ്ലോക്കുകളുടെ താഴത്തെ നില പൂർണമായും പാർക്കിംഗിന് ഉപയോഗിക്കും. ഒന്നാം നിലയിൽ സബ് ട്രഷറി പ്രവർത്തിക്കും. ബാക്കി നിലകളിൽ താലൂക്ക് സപ്ലൈ ഓഫീസ്, സോയിൽ കണ്‍സർവേഷൻ, ലീഗൽ മെട്രോളജി, ജോയിന്‍റ് രജിസ്ട്രാർ ഓഫീസുകളും പ്രവർത്തിക്കുമെന്നു മന്ത്രി അറിയിച്ചു. രൂപകല്പന ഇങ്ങനെ നിലവിൽ നിർമിക്കുന്ന ബ്ലോക്കിന്‍റെ താഴത്തെ നിലയിൽ കാന്‍റീൻ, ഇലക്‌ട്രിക്കൽ റൂം, റിക്കാർഡ്സ് റൂം, ഡൈനിംഹ് ഹാൾ, കിച്ചൻ എന്നിവയും ഒന്ന് രണ്ട് നിലകളിൽ താലൂക്ക് ഓഫീസും മൂന്നാം നിലയിൽ മെഷീൻ റൂം, ലോബി, സ്റ്റോർ, സ്റ്റെയർ റൂം എന്നിവയുമാണ് വിഭാവനം ചെയ്തിരിക്കുന്നത്.

വാഴത്തോപ്പിൽ കൃഷി ഓഫീസറില്ല; സമരം നടത്തുമെന്ന് യുഡിഎഫ്

ചെറുതോണി: വാഴത്തോപ്പ് പഞ്ചായത്തിലെ കൃഷിഭവൻ നാഥനില്ലാതായി മാറിയിരിക്കുകയാണെന്ന് യുഡിഎഫ് ആരോപിച്ചു. രണ്ടു മാസങ്ങൾക്ക് മുൻപ് കൃഷി ഓഫീസർ സ്ഥലം മാറിപ്പോയിരുന്നു. പിന്നീട് പകരം കൃഷി ഓഫീസർ ഇതുവരെ ചാർജ് എടുത്തിട്ടില്ല. ഒരു കൃഷി ഓഫീസറും രണ്ട് കൃഷി അസിസ്റ്റന്‍റുമാരും വേണ്ടിടത്ത് ഒരു കൃഷി അസിസ്റ്റന്‍റു മാത്രമാണിവിടുള്ളത്. കാലവർഷം രൂക്ഷമായി തുടരുന്ന സമയത്തു പഞ്ചായത്തിൽ കൃഷി നാശം സംഭവിച്ചാൽ സ്ഥലം സന്ദർശിക്കാൻ പോലും ആളില്ലാത്ത അവസ്ഥയാണ്. കഞ്ഞിക്കുഴി പഞ്ചായത്തിലെ കൃഷി ഓഫീസർക്ക് വാഴത്തോപ്പ് പഞ്ചായത്തിന്‍റെഅധികച്ചുമതല നൽകിയിരിക്കുകയാണ്. 2025-26 വർഷത്തെ പദ്ധതികൾ നടപ്പാക്കേണ്ട സമയത്താണ് നിലവിൽ ഉണ്ടായിരുന്ന കൃഷി ഒാഫീസറെ സ്ഥലം മാറ്റുകയും പകരം ആളെ നിയമിക്കാതിരിക്കുകയും ചെയ്തിരിക്കുന്നത്. കഞ്ഞിക്കുഴിയും വാഴത്തോപ്പും വലിയ പഞ്ചായത്തായതിനാൽ ഒരു കൃഷി ഓഫീസറെ വച്ച് പദ്ധതികൾ പൂർത്തീകരിക്കുവാൻ സാധിക്കുകയില്ല. 2025-26 സാമ്പത്തിക വർഷത്തെ പദ്ധതിയിൽപ്പെടുത്തി കൃഷി ഭവൻ നടപ്പാക്കേണ്ട രാസ, ജൈവ വളങ്ങളുടെ വിതരണം, ജാതി തൈ, തെങ്ങിൻ തൈ, കുറ്റികുരുമുളക്, കാമുകിൻ തൈ വിതരണം ഉൾപ്പെടെ ഓട്ടേറെ പദ്ധതികൾ നടപ്പാക്കേണ്ട സന്ദർഭത്തിലാണ് ഓഫീസറെ സ്ഥലം മാറ്റിയത്. ഈ പദ്ധതികൾ മഴക്കാലം തീരുന്നതിനു മുൻപ് നടപ്പാക്കിയെങ്കിൽ മാത്രമേ കർഷകർക്ക് പ്രയോജനം ലഭിക്കുകയുള്ളു. പുതിയ 15 പ്രോജക‌്ടുകളും മൂന്ന് സ്പിൽ ഓവർ പ്രൊജക‌്ടുകളും ഉൾപ്പെടെ 18 പ്രൊജ‌ക‌്ടാണ് ഈ വർഷം നടപ്പാക്കേണ്ടത്. ഇതിന് എല്ലാം കൂടി ആകെ വകയിരുത്തിയിരിക്കുന്നത് 86,75,331 രൂപയാണ്. അടിയന്തരമായി വാഴത്തോപ്പ് കൃഷി ഭവനിൽ മുഴുവൻ സമയ കൃഷി ഓഫീസറെ നിയമിച്ചില്ലെങ്കിൽ ജില്ലാ കൃഷി ഓഫീസ് ഉൾപ്പെടെ കേന്ദ്രീകരിച്ച് ശക്തമായ സമര പരിപാടികൾ യുഡിഎഫിന്‍റെ നേതൃത്വത്തിൽ നടത്തുമെന്ന് പഞ്ചായത്തംഗങ്ങളായ വിൻസന്‍റ് വള്ളാടി, ടിന്‍റു സുഭാഷ്, സെലിൻ വിത്സൺ, കൂട്ടായി കറുപ്പൻ, ഏലിയാമ്മ ജോയി, അജേഷ് കുമാർ, ആലീസ് ജോസ് എന്നിവർ അറിയിച്ചു.

സ്കൂൾ ബാൻഡ് ടീം അരങ്ങേറ്റത്തിലേക്ക്

ചെറുതോണി: പഴയരിക്കണ്ടം ഗവ. ഹൈസ്കൂളിലെ നാലുമുതൽ ഏഴുവരെ ക്ലാസുകളിൽ പഠിക്കുന്ന കുട്ടികളെ ഉൾപ്പെടുത്തി ആരംഭിച്ച ബാൻഡ് ട്രൂപ്പ് പരിശീലനം പൂർത്തിയാക്കി അരങ്ങേറ്റം നാളെ രാവിലെ 10ന് നടത്തും. അരങ്ങേറ്റ സമ്മേളനം ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാംകുന്നേൽ ഉദ്ഘാടനം ചെയ്യും. കഞ്ഞിക്കുഴി പഞ്ചായത്ത് പ്രസിഡന്‍റ് വക്കച്ചൻ വയലിൽ, ജില്ലാ പഞ്ചായത്തംഗം ഷൈനി റെജി, പഞ്ചായത്ത് വൈസ് പ്രസിഡന്‍റ് രാജേശ്വരി രാജൻ, ഇടുക്കി ബ്ലോക്ക് പഞ്ചായത്തംഗം ഉഷ മോഹനൻ, പൊതുവിദ്യാഭ്യാസ ഉപ ഡയറക്ടർ പി.സി. ഗീത, പരിശീലകൻ വർഗീസ് തുടങ്ങിയവർ പങ്കെടുക്കും. തുടർന്ന് ജില്ലാ പഞ്ചായത്തംഗം ഷൈനി റെജി ഒൻപതു ലക്ഷം രൂപ അനുവദിച്ച് പൂർത്തീകരിച്ച വിവിധ പദ്ധതികളുടെയും കഞ്ഞിക്കുഴി പഞ്ചായത്ത് 12 ലക്ഷം രൂപ അനുവദിച്ച് നിർമാണം പൂർത്തീകരിച്ച കുടിവെള്ള ടാങ്കിന്‍റെയും ഐ ടി ലാബിന്‍റെയും ഉദ്ഘാടനവും പിടിഎ ജനറൽ ബോഡിയും നടക്കും.

ലഹരിവിരുദ്ധ സന്ദേശയാത്ര

നെടുങ്കണ്ടം: കേരള സര്‍ക്കാരിന്‍റെ ലഹരിവിരുദ്ധ കാമ്പയിനായ വിമുക്തിയുടെ ഭാഗമായി നെടുങ്കണ്ടം ഗവ. പോളി ടെക്നിക് കോളജും റോട്ടറി ഈസ്റ്റ് ഹില്‍സ് ക്ലബും സംയുക്തമായി നെടുങ്കണ്ടത്ത് ലഹരിവിരുദ്ധ സന്ദേശയാത്ര നടത്തി. കിഴക്കേക്കവലയില്‍നിന്ന് ആരംഭിച്ച റാലി ഗ്രാമപഞ്ചായത്ത് പ്രസിഡന്‍റ് പ്രിമി ലാലിച്ചന്‍ ഉദ്ഘാടനം ചെയ്തു. എസ്ഐ ലിജോ പി. മാണി റാലി ഫ്ളാഗ് ഓഫ് ചെയ്തു. കോളജിലെ വിദ്യാര്‍ഥികളും അധ്യാപകരും റാലിയില്‍ പങ്കെടുത്തു. റാലി പടിഞ്ഞാറേക്കവല ബസ് സ്റ്റാൻഡിൽ സമാപിച്ച ശേഷം വിദ്യാര്‍ഥികള്‍ ഫ്ളാഷ് മോബ് അവതരിപ്പിച്ചു. എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ജി. വിജയകുമാര്‍ ലഹരിവിരുദ്ധ സന്ദേശം നല്‍കി. കോളജ് സ്റ്റാഫ് സെക്രട്ടറി എ. നിഷാദ്, എക്‌സൈസ് ഇന്‍സ്‌പെക്ടര്‍ എം.ബി. പ്രമോദ്, റോട്ടറി അസി. ഗവര്‍ണര്‍ പി.കെ. ഷാജി, സോജന്‍ കുര്യാക്കോസ്, ഷിജു ഉള്ളിരുപ്പില്‍, ആര്‍. സജീവ്, പ്രിന്‍സിപ്പൽ അരുണ്‍ തോമസ്, ബെറ്റ്‌സി ബാബു, എന്‍.ടി, ജയന്‍ തുടങ്ങിയവര്‍ പ്രസംഗിച്ചു.

ചീയപ്പാറ ദുരന്തത്തിന് ഇന്ന് 12 വയസ്

അടിമാലി: മൂന്നു പേരുടെ ജീവന്‍ കവര്‍ന്ന ചീയപ്പാറ ദുരന്തത്തിന് 12 വയസ്. 2013 ഒാഗസ്റ്റ് അഞ്ചിന് രാവിലെ 8.30നായിരുന്നു ചീയപ്പാറ വെള്ളച്ചാട്ടത്തിന് സമീപം മണ്ണിടിച്ചില്‍ ഉണ്ടായത്. 2013 ഒാഗസ്റ്റ് അഞ്ചിനും ചീയപ്പാറ വെള്ളച്ചാട്ടം കാണാന്‍ ധാരാളം സഞ്ചാരികള്‍ വെള്ളച്ചാട്ടത്തിനരികിലും റോഡിലുമൊക്കെയായി നിന്നിരുന്നു. പെട്ടെന്ന് വെള്ളച്ചാട്ടത്തിനരികില്‍നിന്ന് ഏതാനും ദൂരമകലെ കല്ലും മണ്ണും ഇടിഞ്ഞ് റോഡിലേക്ക് പതിച്ചു. ഇതോടെ ഇവിടെ പെട്ടെന്ന് ദുരന്തഭൂമിയായി മാറുകയയിരുന്നു. രക്ഷാപ്രവര്‍ത്തനത്തിനൊടുവില്‍ മൂന്നു പേരുടെ ജീവന്‍ നഷ്ടമായതായി സ്ഥിരീകരിച്ചു. ഏതാനും ുപേർക്ക് പരിക്കേറ്റു. മനോഹര കാഴ്ച്ചയുടെ താഴ്‌വാരത്തേക്ക് ദുരന്തം ഒരു മണ്‍കൂനയായി ഇടിഞ്ഞെത്തിയിട്ട് 12 വര്‍ഷം തികഞ്ഞു. ദുരന്തമുഖത്തുനിന്നു തലനാരിഴയ്ക്ക് രക്ഷപ്പെട്ടയാളാണ് ശാന്ത. വെള്ളച്ചാട്ടത്തിനരികില്‍ ദേശിയപാതയോരത്ത് വഴിയോരക്കട നടത്തുകയായിരുന്നു അവർ. മൂന്ന് തവണയായിട്ടാണ് മണ്ണിടിഞ്ഞെത്തിയതെന്ന് ശാന്തയോര്‍ക്കുന്നു.മൂന്നാമത്തെ തവണ മണ്ണിടിഞ്ഞെത്തിയതോടെ വഴിയോരക്കട തകര്‍ന്നു. ദുരന്ത മുഖത്തുനിന്നു ജീവന്‍ തിരികെ കിട്ടിയത് ഇന്നും ഭീതിയോടെയാണ് ശാന്ത ഓര്‍ക്കുന്നത്. പിന്നീടൊരിക്കലും ചീയപ്പാറയില്‍ മണ്ണിടിഞ്ഞിട്ടില്ല. ചീയപ്പാറ വെള്ളച്ചാട്ടത്തിന്‍റെ ഭംഗി കണ്ട് മടങ്ങുന്ന ഒട്ടുമിക്കവര്‍ക്കും ഇന്ന് ഒരു പതിറ്റാണ്ട് മുമ്പുണ്ടായ ദുരന്ത കഥ അറിയുകയുമില്ല.

വയോധികനിൽനിന്ന് പണം അപഹരിച്ചതായി പരാതി

രാജാക്കാട്: എഴുപതു വയസുള്ള വയോധികനെ കബളിപ്പിച്ച് പണം കവർന്നതായി പരാതി. രാജാക്കാട് പഞ്ചായത്തിലെ കൊച്ചുമുല്ലക്കാനം നിവാസിയായ നടുപ്പറമ്പിൽ എൻ. കൃഷ്ണദാസാണ് കബളിപ്പിക്കപ്പെട്ടത്. കഴിഞ്ഞ ശനിയാഴ്ച ഇദ്ദേഹത്തിന്‍റെ സാമൂഹ്യ സുരക്ഷാ പെൻഷൻ എടുക്കുന്നതിനായി രാജാക്കാട് ഫെഡറൽ ബാങ്കിന്‍റെ എ ടി എം കൗണ്ടറിൽ എത്തിയിരുന്നു. ഇടപാട് നടത്തുന്നതിന് അറിവില്ലാത്തതിനാൽ എടിഎം കൗണ്ടറിൽ ഇടപാട് നടത്താനെത്തിയ മറ്റൊരാളെ കാർഡ് ഏൽപ്പിച്ചു. മെഷിനിൽ കാർഡ് പതിച്ച ശേഷം അക്കൗണ്ടിൽ പണമില്ലെന്നു പറഞ്ഞു പുറത്തുനിന്നിരുന്ന കൃഷ്ണദാസിനെ എടിഎം കാർഡ് തിരികേ ഏൽപ്പിക്കുകയും ചെയ്തു. അവിടെനിന്ന് അടുത്തുള്ള എസ്ബിഐയുടെ ബ്രാഞ്ചിൽ അന്വേഷിച്ചപ്പോൾ 1,500 രൂപ പിൻവലിച്ചതായി ബാങ്കധികൃതർ അറിയിച്ചു. കാർഡ് കൈമാറിയ ആളെ പരിചയമില്ലെന്നു കൃഷ്ണദാസ് പറഞ്ഞു. ഇതു സംബന്ധിച്ച് ഇദ്ദേഹം രാജാക്കാട് പോലീസിൽ പരാതിപ്പെട്ടു.

കന്യാസ്ത്രീമാരുടെ അറസ്റ്റ്: എൽഡിഎഫ് പ്രതിഷേധ സദസ് സംഘടിപ്പിച്ചു

തൊടുപുഴ: കന്യാസ്ത്രീമാരെ കള്ളക്കേസിൽ കുടുക്കി അറസ്റ്റ് ചെയ്ത് ജയിലിൽ അടച്ച സംഭവത്തിൽ പ്രതിഷേധിച്ച് എൽഡിഎഫ് തൊടുപുഴ നിയോജക മണ്ഡലം കമ്മിറ്റിയുടെ നേതൃത്വത്തിൽ ജാഥയും പ്രതിഷേധ സദസും സംഘടിപ്പിച്ചു. സിപിഎം തൊടുപുഴ വെസ്റ്റ് ഏരിയാ കമ്മിറ്റി ഓഫീസ് പരിസത്തുനിന്ന് ആരംഭിച്ച ജാഥ മുനിസിപ്പൽ മൈതാനിയിൽ സമാപിച്ചു. തുടർന്നു നടന്ന പ്രതിഷേധ സദസ് സിപിഎം സംസ്ഥാന സെക്രട്ടേറിയറ്റംഗം കെ.കെ. ജയചന്ദ്രൻ ഉദ്ഘാടനം ചെയ്തു. കേരള കോണ്‍ഗ്രസ്-എം നിയോജകമണ്ഡലം പ്രസിഡന്‍റ് ജിമ്മി മറ്റത്തിപ്പാറ ആധ്യക്ഷത വഹിച്ചു. സിപിഎം സംസ്ഥാന കമ്മിറ്റിയംഗം കെ.പി. മേരി, കേരള കോണ്‍ഗ്രസ്-എം ഉന്നതാധികാര സമിതിയംഗം പ്രഫ. കെ.ഐ. ആന്‍റണി, ജില്ലാ സെക്രട്ടേറിയറ്റംഗം മുഹമ്മദ് ഫൈസൽ, തൊടുപുഴ വെസ്റ്റ് ഏരിയാ സെക്രട്ടറി ടി.അർ. സോമൻ, ഈസ്റ്റ് ഏരിയാ സെക്രട്ടറി ലിനു ജോസ്, സിപിഐ ജില്ലാ സെക്രട്ടറി കെ. സലിം കുമാർ, താലൂക്ക് സെക്രട്ടറി വി.അർ. പ്രമോദ്, ജനാധിപത്യ കേരള കോണ്‍ഗ്രസ് സംസ്ഥാന ജനറൽ സെക്രട്ടറി ജോർജ് അഗസ്റ്റിൻ, കേരള കോണ്‍ഗ്രസ്-ബി സംസ്ഥാന സെക്രട്ടറി പോൾസണ്‍ മാത്യു, ഐഎൻഎൽ സംസ്ഥാന സെക്രട്ടറി എം.എം. സുലൈമാൻ, ജനതാദൾ -എസ് ജില്ലാ വൈസ് പ്രസിഡന്‍റ് പി.പി. അനിൽകുമാർ, എൻസിപി തൊടുപുഴ നിയോജക മണ്ഡലം പ്രസിഡന്‍റ് ജെയ്സണ്‍ തേവാലത്ത് തുടങ്ങിയവർ പ്രസംഗിച്ചു.

രാസലഹരി കടത്ത്: മൂന്നംഗ സംഘം പിടിയിൽ

കട്ടപ്പന: രാസ ലഹരിക്കടത്ത് സംഘത്തിലെ മൂന്നംഗ സംഘത്തെ കട്ടപ്പന പോലീസ് ബംഗളൂരുവില്‍നിന്നു പിടികൂടി. കഴിഞ്ഞ മാസം നഗരത്തില്‍ എംഡിഎംഎയുമായി ഒരാള്‍ പിടിയിലായതുമായി ബന്ധപ്പെട്ട കേസില്‍ നടത്തിയ തുടര്‍ അന്വേഷണത്തിലാണ് അറസ്റ്റ്. കണ്ണൂര്‍ പുത്തൂര്‍ കെസി മുക്ക് മീത്തലെപ്പറമ്പത്ത് അരുണ്‍ ഭാസ്‌കര്‍ (30), കോഴിക്കോട് കൊയിലാണ്ടി തുയ്യാടന്‍കണ്ടി ജോജിറാം ജയറാം (35), കര്‍ണാടക സ്വദേശി ഭീമപ്പ എസ്. ഹൊസമാനി (52) എന്നിവരാണ് അറസ്റ്റിലായത്. ജൂലൈ 15ന് ബംഗളുരുവില്‍നിന്നു വില്‍പ്പനയ്ക്കായി കട്ടപ്പനയിലെത്തിച്ച 27 ഗ്രം എംഡിഎംഎയുമായി കോഴിക്കോട് കൊയിലാണ്ടി ഷാലീന ഹൗസില്‍ ഫാരിസ് മുഹമ്മദിനെ (31) അറസ്റ്റ് ചെയ്തിരുന്നു. ഇയാളില്‍നിന്നാണ് അരുണ്‍ ഭാസ്‌കര്‍ ഉള്‍പ്പെട്ട സംഘത്തെക്കുറിച്ച് വിവരം ലഭിച്ചത്. എംഡിഎംഎ ഇവർക്ക് എത്തിച്ചുനൽകിയ സുഹൈൽ കഴിഞ്ഞ ദിവസം എംഡിയുമായി ഡൽഹി പോലീസിന്‍റെ പിടിയിലായിട്ടുണ്ട്.

വിമല കപ്പ്: പബ്ലിക് സ്കൂൾ ടീം ചാന്പ്യന്മാർ

തൊടുപുഴ: വിമല പബ്ലിക് സ്കൂൾ സിൽവർ ജൂബിലിയോടനുബന്ധിച്ച് നടത്തിയ വിമല കപ്പ് സീസണ്‍ ഫോർ എവറോളിംഗ് ട്രോഫിക്കായുള്ള ഫുട്ബോൾ ടൂർണമെന്‍റ് സ്കൂൾ ഇൻഡോർ സ്റ്റേഡിയത്തിൽ നടന്നു. സ്കൂൾ പ്രിൻസിപ്പൽ സിസ്റ്റർ എലൈസ് സിഎംസി ഉദ്ഘാടനം ചെയ്തു. ജൂണിയർ, സീനിയർ വിഭാഗങ്ങളിലായി വിവിധ സ്കൂളുകളിൽനിന്നുള്ള ഇരുപതോളം ടീമുകൾ പങ്കെടുത്തു. ജൂണിയർ, സീനിയർ വിഭാഗങ്ങളിൽ വിമല പബ്ലിക് സ്കൂൾ ടീം ചാന്പ്യന്മാരായി. കലൂർ മേരി ലാന്‍ഡ് പബ്ലിക് സ്കൂൾ ജൂണിയർ വിഭാഗത്തിൽ റണ്ണറപ്പായി. സീനിയർ വിഭാഗത്തിൽ പെരുന്പാവൂർ അമൃത വിദ്യാലയമാണ് റണ്ണറപ്പ്. സ്കൂൾ ലോക്കൽ മാനേജർ സിസ്റ്റർ സീന മരിയ, വൈസ് പ്രിൻസിപ്പൽ സിസ്റ്റർ ലിസ്ബത്ത് എന്നിവർ ജേതാക്കൾക്ക് ട്രോഫികളും കാഷ് അവാർഡും സർട്ടിഫിക്കറ്റും വിതരണം ചെയ്തു. കായികാധ്യാപകരായ എസ്. സുബിൻ, സാന്‍റോ സാജു, ഡോണ്‍ സിബി, അജിഷ്മ എന്നിവർ നേതൃത്വം നൽകി.

മറയൂരിനെ വിറപ്പിച്ച് ചക്കക്കൊന്പൻ

മറയൂർ: ചക്കയോടുള്ള ചക്കക്കൊന്പന്‍റെ പ്രേമം മറയൂർ ബാബുനഗർ ഗ്രാമത്തെ ഒരു രാത്രി മുഴുവൻ വിറപ്പിച്ചു. ചിന്നാർ വന്യജീവി സങ്കേതത്തിൽ നിന്നെത്തിയ ചക്കക്കൊന്പൻ രാത്രി 8:30ന് ബാബു നഗർ പെട്രോൾ പന്പ് ജംഗ്ഷനോടു ചേർന്നുള്ള ഗ്രാമത്തിൽ കടന്നുകയറി. വീടിന്‍റെ മുറ്റത്തുനിന്ന് ചക്ക തിന്നതിനുശേഷം അവിടെ നിർത്തിയിട്ടിരുന്ന ജീപ്പിന്‍റെ പിൻവശം തകർത്തു. രാത്രിയിലെ ഭീതി നാട്ടുകാരുടെ ഉറക്കം നഷ്ടടുത്തി. 200ലധികം കുടുംബങ്ങൾ താമസിക്കുന്ന ബാബുനഗറിൽ താമസിക്കുന്നത്. രാത്രി 10 ഓടെ മറയൂർ ആർആർടിയും വനംവകുപ്പ് ജീവനക്കാരും ചേർന്ന് ആനയെ ഗ്രാമത്തിൽനിന്നു പുറത്താക്കി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]