ADVERTISEMENT

ADVERTISEMENT

മരം വീണ് ഗതാഗതം തടസപ്പെട്ടു

കോലഞ്ചേരി: പാങ്കോട് - അച്ചപ്പൻകവല റോഡിൽ കാൽവരി മൗണ്ടിന് സമീപം വട്ടമരം വൈദ്യുതി ലൈനിന്‍റെ മുകളിലൂടെ റോഡിന് കുറുകെ വീണ് ഗതാഗതം തടസപ്പെട്ടു. രാവിലെ ഒൻപതിനാണ് സംഭവം.

പട്ടിമറ്റം അഗ്നിരക്ഷാ നിലയം ഒഫീസർ എൻ.എച്ച്. അസൈനാരുടെ നേതൃത്വത്തിൽ സേനാംഗങ്ങളായ ഇ. സതീഷ് ചന്ദ്രൻ, ആർ. ഷുഹൈബ്, കെ.കെ. ബിബി, എസ്. വിഷ്ണു, പി.വി. വിജീഷ്, അഖിൽ ദേവ്, ഷബീർ, ജോണി എന്നിവരും കെഎസ്ഇബി ജീവനക്കാരും ചേർന്ന് മരം മുറിച്ച് നീക്കി.

ADVERTISEMENT

വിലക്കയറ്റം; കാറ്ററിംഗ് ഉടമകള്‍ സമരത്തിലേക്ക്

കൊച്ചി: നിത്യോപയോഗ സാധനങ്ങളുടെ അനിയന്ത്രിത വിലക്കയറ്റം തടയണം, അനധികൃത കാറ്ററിംഗ് സ്ഥാപനങ്ങളെ നിയന്ത്രിക്കാന്‍ സര്‍ക്കാര്‍ അടിയന്തര നടപടി സ്വീകരിക്കണം തുടങ്ങിയ ആവശ്യങ്ങള്‍ ഉന്നയിച്ച് ഓള്‍ കേരള കാറ്ററേഴ്‌സ് അസോസിയേഷന്‍ (എകെസിഎ) സമരത്തിലേക്ക്. ജൂലൈ എട്ടിന് നടത്തുന്ന സെക്രട്ടേറിയറ്റ് ധര്‍ണയ്ക്കു മുന്നോടിയായി ജില്ലാ കമ്മറ്റിയുടെ നേതൃത്വത്തില്‍ ഇന്നും നാളെയും എറണാകുളം ജില്ലയില്‍ വാഹന പ്രചാരണ ജാഥ നടത്തും.

പോലീസിനെ കണ്ട് കഞ്ചാവ് ഉപേക്ഷിച്ച് രക്ഷപ്പെട്ടയാൾ കുടുങ്ങി

കൊച്ചി: പോലീസിനെ കണ്ട് കഞ്ചാവ് ഉപേക്ഷിച്ച് രക്ഷപ്പെട്ട് ഒളിവിൽ കഴിഞ്ഞിരുന്ന യുവാവ് അറസ്റ്റിലായി‍. മുളവുകാട് സ്വദേശി യദു കൃഷ്ണ(21)നെ മുളവുകാട് പോലീസാണ് പിടികൂടിയത്. മുളവുകാട് പ്രദേശത്ത് യുവാക്കള്‍ക്ക് കഞ്ചാവ് വില്പന നടത്തുന്നെന്ന രഹസ്യവിവരത്തെ തുടര്‍ന്ന് പ്രതി പോലീസിന്‍റെ നിരീക്ഷണത്തിലായിരുന്നു. കഴിഞ്ഞ 20ന് മുളവുകാട് നോര്‍ത്തിലെ കണ്ടല്‍ക്കാട്ടില്‍ ഇയാളുണ്ടെന്നറിഞ്ഞ് ഇവിടെ എത്തിയ പോലീസിനെ കണ്ട് പ്രതി കൈവശം ഉണ്ടായിരുന്ന 1.074 കിലോ ഗ്രാം കഞ്ചാവ് അടങ്ങിയ ബാഗ് ഉപേക്ഷിച്ച് രക്ഷപ്പെടുകയായിരുന്നു. തുടര്‍ന്ന് ഇടുക്കി, കോയമ്പത്തൂര്‍, ഡല്‍ഹി എന്നിവിടങ്ങളില്‍ ഒളിവില്‍ താമസിച്ച ശേഷം മുളവുകാട് എത്തിയപ്പോഴാണ് പോലീസ് പിടികൂടിയത്. മുമ്പും കഞ്ചാവ് കേസില്‍ ഇയാളെ പോലീസ് അറസ്റ്റ് ചെയ്തിട്ടുണ്ട്.

ഭീഷണിപ്പെടുത്തി പണം കവര്‍ന്ന കേസ്: മുഖ്യപ്രതി അറസ്റ്റില്‍

കൊച്ചി: നടുറോഡില്‍ വച്ച് ഭീഷണിപ്പെടുത്തി പണം കൊള്ളയടിച്ച കേസിലെ പ്രധാന പ്രതി കൊല്ലം കരുനാഗപ്പള്ളി സ്വദേശി നൗഫലി‍(22)നെ എറണാകുളം സെന്‍ട്രല്‍ പോലീസ് അറസ്റ്റ് ചെ യ്തു. കഴിഞ്ഞ ഞായറാഴ്ച ഉച്ചയ്ക്ക് രണ്ടിന് എറണാകുളം പെന്‍റാ മേനകയിലായിരുന്നു സംഭവം. സീ ഷെല്‍ ബാറിന് മുന്‍വശത്ത് നിന്നിരുന്നയാളെ മൂന്നുപേര്‍ ചേര്‍ന്ന് സമീപത്തെ എസ്ബിഐ ബാങ്കിനു മുന്‍വശത്തേക്ക് കൂട്ടിക്കൊണ്ട് പോയി ഭീഷണിപ്പെടുത്തി പോക്കറ്റില്‍ നിന്നു 3,500 രൂപയും എടിഎം കാർഡുപയോഗിച്ച് 7,300 രൂപ പിന്‍വലിച്ചെടുപ്പിക്കുകയുമായിരുന്നു. സിസിടിവി കേന്ദ്രീകരിച്ച് നടത്തിയ അന്വേഷണത്തില്‍ എംജി റോഡിലെ ഡോർമട്രിയില്‍നിന്നാണ് പ്രതിയെ പിടികൂടിയത്. കരുനാഗപ്പള്ളി പോലീസ് സ്റ്റേഷനില്‍ രജിസ്റ്റര്‍ ചെയ്ത പോക്‌സോ കേസിലും ഇയാൾ പ്രതിയാണ്. കോടതിയില്‍ ഹാജരാക്കി റിമാന്‍ഡ് ചെയ്തു.

പെൺസുഹൃത്തിന്‍റെ ആൾക്കാരെ ഭയന്ന് പാഞ്ഞ ബൈക്ക് യാത്രികൻ അപകടത്തിൽപ്പെട്ടു

മരട്: പെൺസുഹൃത്തിന്‍റെ ആൾക്കാരെ ഭയന്ന് ചീറിപ്പാഞ്ഞ ബൈക്ക് നിയന്ത്രണം നഷ്ടപ്പെട്ട് സ്കൂട്ടറിൽ ഇടിച്ചുണ്ടായ അപകടത്തിൽ സ്കൂട്ടർ യാത്രികനും കാൽനടയാത്രക്കാരിക്കും പരിക്കേറ്റു. കുന്നലക്കാട്ട് റോഡിൽ വാടകയ്ക്കു താമസിക്കുന്ന സ്മിതാ രാജു (48), ബംഗാൾ സ്വദേശി അൽ അമീൻ (28) എന്നിവർക്കാണ് പരിക്കേറ്റത്. ഇരുവരെയും ആശുപത്രിയിൽ പ്രവേശിപ്പിച്ചു. അപകടത്തിൽ സ്കൂട്ടർ തകർന്നു. അപകടത്തിനുശേഷം ആളുകൾ കൂടിയതോടെ ബൈക്ക് യാത്രികനായ തിരുവനന്തപുരം സ്വദേശി ജിഷ്ണു (30) ഓടി രക്ഷപ്പെട്ടു. രാവിലെ 9.15ഓടെ തോമസ്പുരം ജംഗ്ഷനിലായിരുന്നു അപകടം. മാർട്ടിൻപുരം ഭാഗത്തുകൂടി വാഹനത്തിൽ പിന്തുടർന്നവരിൽ നിന്നു രക്ഷപ്പെടാനാണ് അമിത വേഗത്തിൽ ബൈക്ക് ഓടിച്ചതെന്നാണ് യാത്രക്കാരൻ പറഞ്ഞത്. അപകടത്തിനുശേഷം, തന്നെ വാഹനത്തിലുണ്ടായിരുന്നവർ പിടികൂടാതിരിക്കാൻ പോലീസ് സ്റ്റേഷനിലേക്കാണ് ഓടിയതെന്നും യുവാവ് പറഞ്ഞു. ഒപ്പം താമസിക്കുന്ന പെൺസുഹൃത്തിന്‍റെ ആൾക്കാരായിരുന്നു വാഹനത്തിലെന്നാണ് യുവാവ് പോലീസിനോട് പറഞ്ഞത്. വ്യാജ നമ്പറായിരുന്നു വാഹനത്തിന്‍റേത്. ഫോൺ ലൊക്കേഷനിൽ യുവാവ് കോട്ടയം വഴി തിരുവനന്തപുരത്തിന് മടങ്ങുന്നതായാണ് കണ്ടതെന്നും അന്വേഷണം നടത്തുന്നതായും പോലീസ് പറഞ്ഞു.

നിരക്ക് വര്‍ധനയോടെ വിദ്യാര്‍ഥികള്‍ക്ക് പുതുക്കിയ യാത്രാ പാസ് പുറത്തിറക്കി മെട്രോ

കൊച്ചി: വിദ്യാര്‍ഥികള്‍ക്ക് നേരത്തെ ഉണ്ടായിരുന്ന വിവിധയിനം യാത്രാ പാസുകള്‍ നിര്‍ത്തലാക്കി നിരക്ക് വര്‍ധനയോടെയുള്ള പുതുക്കിയ ഒറ്റ യാത്രാ പാസ് കൊച്ചി മെട്രോ (കെഎംആര്‍എല്‍) പുറത്തിറക്കി. ഒരു മാസം പരമാവധി 50 യാത്രകള്‍ നടത്താവുന്ന 1100 രൂപയുടെ പ്രതിമാസ യാത്രാ പാസാണ് ഇപ്പോള്‍ പുറത്തിറക്കിയിട്ടുള്ളത്. നേരത്തെ 30 ദിവസത്തെ യാത്രാ പാസിന് 900 രൂപയായിരുന്നു. ഇതാണ് 200 രൂപ വര്‍ധിപ്പിച്ച് അവതരിപ്പിച്ചിരിക്കുന്നത്. 900 രൂപയുടെ പാസിന് എത്ര തവണ വേണമെങ്കിലും യാത്ര ചെയ്യാമായിരുന്നു. പുതിയ പാസില്‍ 50 യാത്രകള്‍ മാത്രമേ പാടുള്ളൂ. പുതിയ പാസ് ഉപയോഗിച്ച് ഏത് സ്റ്റേഷനുകളില്‍ നിന്ന് കയറുകയും ഇറങ്ങുകയും ചെയ്യാം. എന്നാല്‍ നേരത്തെയുണ്ടായിരുന്ന പാസില്‍ കയറുന്നതിനും ഇറങ്ങുന്നതിനും സ്റ്റേഷനുകള്‍ നിജപ്പെടുത്തിയിരുന്നു. 45 ദിവസം ഉപയോഗിക്കാന്‍ കഴിയുന്ന 600 രൂപയുടെ വിദ്യാ 45, ഒരു ദിവസം ഉപയോഗിക്കാന്‍ കഴിയുന്ന 50 രൂപയുടെ വിദ്യ വണ്‍ എന്നീ പാസുകള്‍ മുന്പുണ്ടായിരുന്നു. ഇവ രണ്ടും ഇപ്പോള്‍ ഇല്ല. പാസ് ഉപയോഗിക്കുന്നതിലൂടെ സാധാരണ ടിക്കറ്റ് നിരക്കിനേക്കാള്‍ 33 ശതമാനത്തിന്‍റെ ഇളവ് വിദ്യാര്‍ഥികള്‍ക്ക് ലഭിക്കുമെന്ന് കെഎംആര്‍എല്‍ മാനേജിംഗ് ഡയറക്ടര്‍ ലോക്‌നാഥ് ബഹ്‌റ പറഞ്ഞു. 50 യാത്രയ്ക്ക് 2,200 രൂപ നല്‍കേണ്ട സ്ഥാനത്ത് 1,650 രൂപയേ വരുന്നുള്ളു. അതായത് പ്രതിമാസ പാസ് എടുക്കുന്നതിലുടെ വിദ്യാര്‍ഥികള്‍ക്ക് 550 രൂപ ലാഭിക്കാമെന്നും ബഹ്‌റ പറഞ്ഞു. പാസ് ലഭിക്കുന്നതിനുള്ള പ്രായപരിധി 30 വയസാണ്. വിദ്യാലയ മേധാവി നല്‍കുന്ന സാക്ഷ്യപത്രം, സ്റ്റുഡന്‍റ്സ് ഐഡി കാര്‍ഡ്, പ്രായം തെളിയിക്കുന്ന രേഖ എന്നിവ സഹിതം മെട്രോ സ്റ്റേഷനുകളില്‍നിന്ന് ജൂലൈ ഒന്ന് മുതല്‍ പാസ് എടുക്കാം. വിദ്യാര്‍ഥികള്‍ക്കുള്ള പാസ് കൈമാറ്റം ചെയ്യാനോ ദുരുപയോഗം ചെയ്യാനോ അനുവദിക്കില്ല. പാസിലെ തുക റീ ഫണ്ട് അനുവദിക്കില്ല. ഇന്ത്യയില്‍ നാഗ്പുര്‍, പൂനെ മെട്രോകള്‍ മാത്രമാണ് വിദ്യാര്‍ഥികള്‍ക്ക് ഡിസ്‌കൗണ്ട് യാത്രാ പാസ് അനുവദിക്കുന്നത്. അവിടെ നല്‍കുന്ന പരമാവധി ഡിസ്‌കൗണ്ട് 30 ശതമാനമാണ്. എന്നാല്‍ കൊച്ചി മെട്രോ 33 ശതമാനം ഡിസ്‌കൗണ്ടിലാണ് വിദ്യാര്‍ഥികള്‍ക്ക് പാസ് നല്‍കുന്നതെന്നും കെഎംആര്‍എല്‍ അവകാശപ്പെട്ടു.

യുവാവിനെ വാനിൽ മരിച്ചനിലയിൽ കണ്ടെത്തിയ സംഭവം : കൊലപാതകം ദന്പതികൾ കസ്റ്റഡിയിൽ

ഇടക്കൊച്ചി: ഇടക്കൊച്ചി ഇന്ദിരാഗാന്ധി റോഡിന് സമീപം ഒഴിഞ്ഞ പറമ്പിൽ നിർത്തിയിട്ടിരുന്ന ഇൻസുലേറ്റഡ് വാനിൽ യുവാവിനെ മരിച്ച നിലയിൽ കണ്ടെത്തിയ സംഭവം ആസൂത്രിത കൊലപാതകമെന്ന് പോലീസ്. സംഭവത്തിൽ ദന്പതികളെ പോലീസ് കസ്റ്റഡിയിലെടുത്തു. പള്ളുരുത്തി സ്വദേശി തോപ്പിൽ വീട്ടിൽ ഷിഹാബ് (39), ഭാര്യ ഷെഹന (32) എന്നിവരെയാണ് പോലീസ് കസ്റ്റഡിയിലെടുത്തത്. പള്ളുരുത്തി പെരുമ്പടപ്പ് പാർക്ക് റോഡിൽ വഴിയകത്ത് വീട്ടിൽ അക്ബറിന്‍റെ മകൻ ആഷിക്കി(30)നെയാണ് ഇൻസുലേറ്റഡ് വാനിന്‍റെ മുൻ സീറ്റിൽ ദൂരൂഹ സാഹചര്യത്തിൽ തിങ്കളാഴ്ച രാത്രിയോടെ ചോര വാർന്ന് മരിച്ച നിലയിൽ കണ്ടെത്തിയത്. ആത്മഹത്യയെന്ന് ആദ്യം കരുതിയിരുന്നെങ്കിലും പിന്നീട് കൊലപാതകമാണെന്ന് ആരോപിച്ച് ആഷിക്കിന്‍റെ കുടുംബം രംഗത്തെത്തി. ഇതേത്തുടർന്ന് പള്ളുരുത്തി പോലീസ് അന്വേഷണം നടത്തിയപ്പോഴാണ് കൊലപാതകത്തിന്‍റെ ചുരുളഴിഞ്ഞത്. ആഷിക്കിന്‍റെ കൂടെയുണ്ടായായിരുന്ന യുവതിയും ഭർത്താവും ചേർന്നാണ് കൊലപാതകം നടത്തിയതെന്ന് പോലീസ് പറഞ്ഞു. കുത്താൻ ഉപയോഗിച്ച കത്തി ഓൺലൈനിൽ വാങ്ങിയതാണ്. കത്തി പ്രതികളുടെ വീട്ടിൽ നിന്ന് പോലീസ് കണ്ടെടുത്തു. ആഷിക്കിന്‍റെ ഇരു തുടകളിലും കാൽപാദത്തിലും ആഴത്തിൽ മുറിവേറ്റ് രക്തം നഷ്ടപ്പെട്ടതാണ് മരണകാരണം. കഴുത്തിലും പരിക്കുള്ളതായി പോലീസ് പറഞ്ഞു. മാർക്കറ്റുകളിൽ മീൻ വിതരണം ചെയ്യുന്ന ജോലിയായിരുന്നു ആഷിക്കിന്. പിടിയിലായ ഷിഹാബും ഷെഹനയും കുറ്റം സമ്മതിച്ചെെന്നും സംഭവത്തിൽ കൂടുതൽ അന്വേഷണം നടത്തുകയാണെന്നും മട്ടാഞ്ചേരി അസിസ്റ്റന്‍റ് കമ്മീഷണർ ഉമേഷ് ഗോയൽ പറഞ്ഞു. കൊലപാതകം ആസൂത്രിതം പ്രതികളായ ഷിഹാബിനും ഷെഹനയ്ക്കും ആഷിക്കിനോടുമുള്ള പകയാണ് കൊലപാതകത്തിൽ എത്തിച്ചതെന്ന് പോലീസ്. മരണപ്പെട്ട ആഷിക്കും പ്രതിയായ ഷെഹനയും ദീർഘനാളായി അടുപ്പത്തിലായിരുന്നു. ഭർത്താവ് അറിഞ്ഞതിനെ തുടർന്ന് ആഷിക്കുമായുള്ള ബന്ധത്തിൽ നിന്ന് ഒഴിവാകണമെന്ന് പറഞ്ഞു. തുടർന്ന് പീഡിപ്പിച്ചുവെന്ന് കാണിച്ച് ഷെഹനയെ കൊണ്ട് ആഷിക്കിനെതിരെ പോലീസിൽ പരാതി നൽകി. ഇതേത്തുടർന്ന് ആഷിക്ക് 24 ദിവസത്തോളം ജയിലിലാവുകയും ചെയ്തു. ജയിലിൽ നിന്ന് ഇറങ്ങിയതിനു ശേഷം ഷെഹനയുടെ നഗ്നചിത്രം തന്‍റെ കൈവശമുണ്ടെന്നും അത് പരസ്യപ്പെടുത്തുമെന്ന് പറഞ്ഞ് ആഷിക്ക് ഭീഷണിപ്പെടുത്തി. തുടർന്ന് ആഷിക്കിനെ കൊലപ്പെടുത്താൽ തീരുമാനിക്കു കയായിരുന്നു എന്ന് ഇരുവരും പോലീസിനോട് പറഞ്ഞു. മണിക്കൂറുകൾക്കുള്ളിൽ കൊലപാതകത്തിന്‍റെ ചുരുളഴിച്ച് പോലീസ് ഇടക്കൊച്ചി: ആത്മഹത്യയെന്ന് കരുതിയ സംഭവം മണിക്കൂറുകൾ പിന്നിട്ടപ്പോൾ കൊലപാതകമായി. പിടിയിലായ ഷെഹനയെയും ഭർത്താവ് ഷിഹാബിനെയും പോലീസ് ചോദ്യം ചെയ്തതോടെയാണ് കൊലപാതകത്തിന്‍റെ ചുരുളഴിഞ്ഞത്. ആഷിക്കും യുവതിയും കൃത്യം നടന്ന വാഹനത്തിൽ യാത്ര ചെയ്യുകയും ഒഴിഞ്ഞ പറമ്പിൽ പാർക്ക് ചെയ്തു കഴിഞ്ഞ് ഭർത്താവായ ഷിഹാബിനെ സംഭവ സ്ഥലത്തേക്ക് ഷെഹന വിളിച്ചു വരുത്തുകയുമായിരുന്നു. ആഷിക്കിനെ കുത്തി പരിക്കേൽപ്പിച്ചതിനു ശേഷം ഷിഹാബ് സംഭവസ്ഥലത്ത് നിന്നു കടന്നു. ചോര വാർന്ന് മരണം ഉറപ്പാക്കിയതിനു ശേഷമാണ് ഷെഹന നാട്ടുകാരെ വിവരമറിയിക്കുന്നത്. തനിക്ക് അപകടത്തിൽ പരിക്കേറ്റെന്നും ആശുപത്രിയിൽ കൊണ്ടുപോകാൻ സഹായിക്കണമെന്നും ആവശ്യപ്പെട്ട് ആഷിക്ക് വിളിച്ചെന്നും സ്ഥലത്തെത്തുമ്പോൾ കാലിൽ നിന്ന് രക്തം വാർന്ന നിലയിലായിരുന്നുവെന്നും താൻ കൂടി ചേർന്നാണ് നാട്ടുകാരോടൊപ്പം ആഷിക്കിനെ ആശുപത്രിയിലേക്ക് മാറ്റിയതെന്നുമാണ്‌ യുവതി ആദ്യം പോലീസിനോട് പറഞ്ഞിരുന്നത്. കൂടുതൽ ചോദ്യം ചെയ്തപ്പോഴാണ് ഇരുവരും ചേർന്നാണ് കൊലപാതകം നടത്തിയതെന്ന് സമ്മതിച്ചതെന്ന് പോലീസ് പറഞ്ഞു.

ഭക്ഷ്യസുരക്ഷാ വകുപ്പിന്‍റെ പരിശോധനകള്‍ ഇങ്ങനെ പോരാ...

കൊച്ചി: യുവതി അടക്കം നാലു പേര്‍ക്ക് ഭക്ഷ്യവിഷബാധയേറ്റ സംഭവത്തിനു ശേഷവും ജില്ലയില്‍ പരിശോധനകളിലടക്കം മൊല്ലെപ്പോക്ക് തുടര്‍ന്ന് ഭക്ഷ്യസുരക്ഷാ വിഭാഗം. ഉദ്യോഗസ്ഥരുടെ കുറവാണ് പ്രധാന പ്രതിസന്ധിയായി ഇവർ ഉയര്‍ത്തിക്കാട്ടുന്നത്. അതേസമയം അത്യാഹിതം സംഭവിക്കുമ്പോള്‍ മാത്രം ഉയരുന്ന പരിശോധനകള്‍ കൃത്യമായ ഇടവേളകളില്‍ നടത്തണമെന്നതാണ് ഉയരുന്ന പ്രധാന ആവശ്യം. അടുത്തിടെ കൊച്ചി നഗരത്തില്‍ നിന്നു വന്ദേഭാരത് അടക്കമുള്ള ട്രെയിനുകളില്‍ വിതരണം ചെയ്യുന്നതിനായി തയാറാക്കിയ ഭക്ഷണം പഴകിയതാണെന്നും വൃത്തിഹീനമായ സാഹചര്യത്തിലാണ് പാചകം ചെയ്യുന്നതെന്നും കണ്ടെത്തിയിരുന്നു. ഗുരുതര വീഴ്ചകള്‍ കണ്ടെത്തിയിട്ടും മറ്റ് പരിശോധനകൾ നടത്തുകയോ മറ്റിടങ്ങളിലേക്ക് വ്യാപിപ്പിക്കുകയോ ചെയ്തിരുന്നില്ല. പകര്‍ച്ചവ്യാധികളടക്കം ജില്ലയിൽ റിപ്പോര്‍ട്ട് ചെയ്യുമ്പോഴും വകുപ്പ് ഉണര്‍ന്ന് പ്രവര്‍ത്തിക്കുന്നില്ലെന്നും ആക്ഷേപവും ഉയരുന്നു. ഭക്ഷണശാലകളുടെ ലൈസന്‍സ് അടക്കം പരിശോധിക്കുന്ന നടപടികൾ കടകളില്‍ നേരിട്ട് നടത്തേണ്ട ഭക്ഷ്യസുരക്ഷാ വകുപ്പ് ഉദ്യോഗസ്ഥരെ ഒരിക്കല്‍പ്പോലും കണ്ടിട്ടില്ലെന്ന് കച്ചവടക്കാര്‍ തന്നെ സമ്മതിക്കുന്നു. ഒരു നിയോജകമണ്ഡലത്തിന് ഒരു ഫുഡ്‌സേഫ്റ്റി ഓഫീസര്‍ എന്നതാണ് കണക്ക്. എന്നാല്‍ ജില്ലയിലെ എല്ലാ നിയോജകമണ്ഡലങ്ങളിലും ഫുഡ്‌സേഫ്റ്റി ഓഫീസര്‍മാരില്ലെന്നത് വകുപ്പിന്‍റെ തന്നെ രേഖകളില്‍ വ്യക്തമാക്കുന്നു. അനിഷ്ട സംഭവങ്ങള്‍ നടക്കുമ്പോള്‍ മാത്രമാണ് പരിശോധനകളും നടപടികളും സ്വീകരിക്കുന്നത്. പലതും പരമാവധി നാലു ദിവസം നീണ്ടും നില്‍ക്കുന്ന പരിശോധനകളും. ഗുരുതരമായ നിയമലംഘനങ്ങള്‍ ശ്രദ്ധയില്‍പ്പെട്ടാല്‍പ്പോലും പിഴ ചുമത്തുകമാത്രമാണ് നടപടി. പലരും തുക വേഗമടച്ച് കട പഴയപടി തുറക്കുകയും ചെയ്യുന്നു.

ദീപിക നമ്മുടെ ഭാഷ പദ്ധതി ജില്ലാതല ഉദ്ഘാടനം നാളെ

പെരുമ്പാവൂർ: ദീപിക നമ്മുടെ ഭാഷ പദ്ധതിയുടെ ജില്ലാതല ഉദ്ഘാടനം നാളെ പെരുമ്പാവൂർ കൂവപ്പടി സെന്‍റ് ആൻസ് പബ്ലിക് സ്കൂളിൽ നടക്കും. ഉച്ചകഴിഞ്ഞ് രണ്ടിന് ബെന്നി ബഹനാൻ എംപി ഉദ്ഘാടനം ചെയ്യും. ചടങ്ങിൽ ദീപിക കൊച്ചി റസിഡന്‍റ് മാനേജർ ഫാ. സൈമൺ പള്ളുപ്പെട്ട അധ്യക്ഷത വഹിക്കും. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ, കുവപ്പടി പഞ്ചായത്ത് പ്രസിഡന്‍റ് മായ കൃഷ്ണകുമാർ, സ്കൂൾ പ്രിൻസിപ്പൽ സിസ്റ്റർ ഗ്രേസി പോൾ, മാനേജർ സിസ്റ്റർ പുഷ്പറാണി, കൂവപ്പടി സർവീസ് സഹകരണ ബാങ്ക് പ്രസിഡന്‍റ് പി.വി. തോമസ് എന്നിവർ പങ്കെടുക്കും. സ്കൂളിലേക്കുള്ള ദീപിക കോപ്പികൾ സ്പോൺസർ ചെയ്തിരിക്കുന്നത് പവിഴം റൈസ് ഉടമ ജോർജ് നമ്പ്യാട്ടുകുടി, ഗോൾഡൻ ഗ്രൂപ്പ് ഉടമ ബോബിൻ ചിറയത്ത് എന്നിവരാണ്.

ഭക്ഷ്യവിഷബാധ ഹോട്ടലിന്‍റെ ലൈസന്‍സ് റദ്ദാക്കി

കൊച്ചി: രവിപുരം ഷിപ്‌യാര്‍ഡിനടുത്തുള്ള റിയല്‍ അറേബ്യ ഹോട്ടലില്‍നിന്നു ഷവര്‍മ, ഷവായ് വിഭവങ്ങള്‍ കഴിച്ച നാലുപേർ‍ക്ക് ഭക്ഷ്യ വിഷബാധയേറ്റ സംഭവത്തിൽ ഹോട്ടലിന്‍റെ ലൈസന്‍സ് റദ്ദാക്കി. ഹോട്ടലില്‍ പരിശോധന നടത്തിയ ആരോഗ്യ വകുപ്പും ഭക്ഷ്യസുരക്ഷാ വകുപ്പുമാണ് ലൈസന്‍സ് റദ്ദാക്കിയത്. വേണ്ടത്ര വൃത്തിയും മറ്റു മാനദണ്ഡങ്ങളും പാലിക്കാതെയാണ് ഹോട്ടല്‍ പ്രവര്‍ത്തിച്ചിരുന്നതെന്ന് നഗരസഭയും ആരോഗ്യ വകുപ്പും കണ്ടെത്തി. നിലവിൽ അറ്റകുറ്റപ്പണിക്കായി ഹോട്ടല്‍ അടച്ചിട്ടിരിക്കുകയാണ്. നഗരസഭ നിഷ്‌കര്‍ഷിച്ചിട്ടുള്ള സുരക്ഷാ മാനദണ്ഡങ്ങള്‍ പൂര്‍ണമായും നടപ്പാക്കിയ ശേഷം മാത്രമേ സ്ഥാപനം തുറക്കാന്‍ പാടുള്ളൂ എന്നുകാട്ടി ഹോട്ടലിന് കൊച്ചി കോര്‍പറേഷനും നോട്ടീസ് നല്‍കി. ഈ സ്ഥാപനത്തിന് ലൈസന്‍സ് ഉണ്ടായിരുന്നെങ്കിലും ഇവരുടെതന്നെ കലൂരുള്ള സ്ഥാപനത്തിന് ലൈസന്‍സ് ഉണ്ടായിരുന്നില്ല. ഈ സ്ഥാപനവും അടച്ചുപൂട്ടിച്ചതായി കോര്‍പറേഷന്‍ ആരോഗ്യ സ്ഥിരം സമിതി അധ്യക്ഷന്‍ ടി.കെ. അഷ്‌റഫ് പറഞ്ഞു. ഓണ്‍ലൈനായും നേരിട്ടും ഭക്ഷണം വാങ്ങി കഴിച്ചവർക്കാണ് ഭക്ഷ്യവിഷബാധ ഉണ്ടായത്. ഷവര്‍മയും ഷവായിയും കഴിച്ച ഇരിങ്ങാലക്കുട സ്വദേശികളായ മൂന്നു പേരുടെ ആരോഗ്യനില വഷളായതിനെ തുടര്‍ന്ന് എറണാകുളത്തെ സ്വകാര്യ ആശുപത്രിയില്‍ പ്രവേശിപ്പിച്ചിരിക്കുകയാണ്.

കോലഞ്ചേരി ടൗണിൽ തെരുവ് നായശല്യം രൂക്ഷമാകുന്നു

കോലഞ്ചേരി: ടൗണിൽ തെരുവ് നായശല്യം രൂക്ഷമാകുന്നു. ടൗണിലെത്തുന്ന നൂറുകണക്കിന് വാഹന - കാൽനട യാത്രക്കാർക്ക് ഭീഷണിയായി വ്യാപാര സ്ഥാപനങ്ങൾക്ക് മുന്നിൽ തെരുവ് നായ കൂട്ടമായി നിലയുറപ്പിച്ചിരിക്കുകയാണ്. ആളുകൾക്ക് വ്യാപാര സ്ഥാപനങ്ങളിലേക്ക് കയറാൻ പോലും കഴിയാത്ത വിധം ചിലയിടങ്ങളിൽ ഇവ നടവഴിയിൽ കിടക്കുകയാണ്. ചില സമയങ്ങളിൽ നായ്ക്കൾ പരസ്പരം ആക്രമിച്ച് ദേശീയപാത മുറിച്ച് കടക്കുന്നത് വാഹന യാത്രക്കാർക്കും ഭീഷണിയാവുകയാണ്. ഇവയെ വാഹനങ്ങൾ തട്ടുന്നത് മൂലം രക്ഷപ്പെടുന്നതിനായി അതിവേഗം പല ദിശകളിലേക്ക് കുരച്ചുകൊണ്ട് പായുന്നതും ആളുകളിൽ ഭീതി ഉണ്ടാക്കുന്നു. ചില വ്യാപാര സ്ഥാപനങ്ങളുടെ മുന്നിൽ ഇവയ്ക്ക് മൃഗപ്രേമികൾ ഭക്ഷണമിട്ട് കൊടുക്കുന്നതും കാര്യങ്ങൾ വഷളാക്കുന്നുണ്ട്. ഇതുമൂലം ഇവ ഇവിടങ്ങളിൽ കൂട്ടംകൂടി കിടക്കുന്നതും ടൗണിൽ കാണാം. നൂറ് കണക്കിന് സ്കൂൾ, കോളജ് വിദ്യാർഥികളും ടൗണിലൂടെ യാത്ര ചെയ്യുന്നുണ്ട്. വിഷയത്തിൽ വേണ്ടത്ര ശ്രദ്ധ പുലർത്തി അധികൃതർ നടപടികൾ സ്വീകരിക്കണമെന്നാണ് ജനങ്ങളുടെ ആവശ്യം.

എം.ജെ. ജേക്കബിനെ ആദരിച്ച് കേരള നിയമസഭ

കൂത്താട്ടുകുളം: അന്തർദേശീയ കായിക മത്സരങ്ങളിൽ പങ്കെടുത്ത് മെഡലുകളും സ്ഥാനങ്ങളും കരസ്ഥമാക്കിയ മുൻ എംഎൽഎ എം.ജെ. ജേക്കബിനെ കേരള നിയമസഭ ആദരിച്ചു. സ്പീക്കർ എ.എൻ. ഷംസീർ ഉപഹാര സമർപ്പണം നടത്തി. ചടങ്ങിൽ മന്ത്രിമാരായ കെ.എൻ. ബാലഗോപാൽ, കെ. രാജൻ, ഗവ. ചീഫ് വിപ്പ് എൻ. ജയരാജ്, ഡെപ്യൂട്ടി സ്പീക്കർ ചിറ്റയം ഗോപകുമാർ, നിയമസഭാ സെക്രട്ടറി എൻ. കൃഷ്ണകുമാർ എന്നിവർ പങ്കെടുത്തു. ചൈന, ജപ്പാൻ, ഫിലിപ്പൈൻസ്, മലേഷ്യ തുടങ്ങിയ രാജ്യങ്ങളിൽ നടന്ന ഏഷ്യൻ മാസ്റ്റേഴ്സ് അത്‌‌ലറ്റിക് ചാന്പ്യൻഷിപ്പുകളിലും ഫ്രാൻസ്, സ്പെയിൻ, ഓസ്ട്രേലിയ, ഫിൻലാൻഡ്, അമേരിക്ക എന്നീ രാജ്യങ്ങളിൽ നടന്ന ലോക മാസ്റ്റേഴ്സ് ചാന്പ്യൻഷിപ്പുകളിലും രാജ്യത്തെ പ്രതിനിധീകരിച്ച് മെഡലുകളും സ്ഥാനങ്ങളും എം.ജെ. ജേക്കബ് നേടി. മൂന്നു തവണ തിരുമാറാടി പഞ്ചായത്ത് പ്രസിഡന്‍റ്, കാക്കൂർ സഹകരണ ബാങ്ക് പ്രസിഡന്‍റ്, പാന്പാക്കുട ബ്ലോക്ക് പഞ്ചായത്ത് വൈസ് ചെയർമാൻ, എറണാകുളം ജില്ലാ പഞ്ചായത്ത് സ്ഥിരംസമിതി അധ്യക്ഷൻ, എംഎൽഎ എന്നീ നിലകളിൽ പ്രവർത്തിച്ചിട്ടുണ്ട്.

തകർന്ന് തരിപ്പണമായി ജനറൽ ആശുപത്രി റോഡ്

മൂവാറ്റുപുഴ: ജനറൽ ആശുപത്രി റോഡ് തകർന്ന് തരിപ്പണമായതോടെ വലഞ്ഞ് രോഗികൾ. ദിവസവും നൂറുകണക്കിന് രോഗികളെത്തുന്ന ജില്ലയിലെ കിഴക്കൻ മേഖലയിലെ പ്രധാന സർക്കാർ ആതുരാലയത്തിലേക്കുള്ള റോഡിനാണ് ഈ ദുരവസ്ഥ. മഴക്കാലമായതോടെ കുഴികളിൽ മലിനജലം കെട്ടിക്കിടന്ന് പകർച്ചവ്യാധി ഭീഷണിയും നിലനിൽക്കുന്നുണ്ട്. ആശുപത്രിയുടെ പ്രവേശന കവാടം മുതൽ പരിസരം മുഴുവൻ കുണ്ടും കുഴിയുമായി മാറിയിരിക്കുകയാണ്. കെട്ടികിടക്കുന്ന മലിന ജലത്തിലൂടെവേണം രോഗികൾ ആശുപത്രിയിൽ പ്രവേശിക്കാൻ. റോഡുകളുടെ ശോചനീയാവസ്ഥയേക്കുറിച്ച് നഗരസഭാധ്യക്ഷൻ അധ്യക്ഷനായ എച്ച്എംസി കമ്മിറ്റി അടിയന്തര നടപടി സ്വീകരിക്കണമെന്ന് നഗരസഭാംഗം ജാഫർ സാദിഖ് ആവശ്യപ്പെട്ടു. വർഷങ്ങളായി റോഡ് ടാർ ചെയ്യാതെ തകർന്നുകിടക്കുകയാണ്. സ്ത്രീകളും കുട്ടികളുമടക്കം ഏറെ ബുദ്ധിമുട്ടിയാണ് ജനറൽ ആശുപത്രിയിൽ ചികിത്സതേടി എത്തുന്നത്. അത്യാഹിത വിഭാഗത്തിൽ നിന്നും കിടത്തി ചികിത്സക്കായി വാർഡുകളിലേക്ക് വീൽചെയറിൽ കൊണ്ടുപോകുന്ന രോഗികളുടെ അവസ്ഥ ഏറെ ദയനീയമാണ്. ആംബുലൻസടക്കം വരുന്ന റോഡ് എത്രയും വേഗം ടാർ ചെയ്ത് സഞ്ചാരയോഗ്യമാക്കണമെന്നാണ് ജനങ്ങളുടെ ആവശ്യം.

കറുകടം മൗണ്ട് കാർമൽ കോളജിൽ ബിരുദദാനം

കോതമംഗലം: കറുകടം മൗണ്ട് കാർമൽ കോളജ് പിജി, ഡിഗ്രി വിദ്യാർഥികളുടെ ബിരുദദാന ചടങ്ങ് നടത്തി. പരിപാടിയുടെ ഭാഗമായി സംഘടിപ്പിച്ച സമ്മേളനം കോതമംഗലം എംഎ കോളജ് പ്രിൻസിപ്പൽ മഞ്ജു കുര്യൻ ഉദ്ഘാടനം നിർവഹിച്ചു. മാനേജർ റവ.ഡോ. ബോബി തറക്കുന്നേൽ അധ്യക്ഷത വഹിച്ചു. കോളജ് പേട്രണും സെന്‍റ് തോമസ് പ്രൊവിൻസിന്‍റെ പ്രൊവിൻഷ്യൽ സുപ്പീരിയറുമായ ഫാ. തങ്കച്ചൻ ഞാളിയത്ത് മുഖ്യപ്രഭാഷണം നടത്തി. കോളജ് പ്രിൻസിപ്പൽ ഫാ. ഷാജി മംഗലത്ത് വിദ്യാർഥികൾക്ക് പ്രതിജ്ഞ വാചകം ചൊല്ലിക്കൊടുത്തു. ഫാ. എബിൻ വഴക്കുഴ, പ്രോഗ്രാം കണ്‍വീനർ ബിബി വി. മാത്യു എന്നിവർ പങ്കെടുത്തു.

തോട്ടക്കരയിൽ കാർ കനാലിൽ വീണു

മൂവാറ്റുപുഴ/വാഴക്കുളം: തോട്ടകരയിൽ വീണ്ടും കാർ കനാലിലേയ്ക്കു വീണു. പണ്ടപ്പിള്ളി - തൊടുപുഴ റോഡിലെ എംവിഐപി കനാൽ ഒഴുകുന്ന തോട്ടക്കര ഭാഗത്താണ് തിങ്കളാഴ്ച രാത്രി നിയന്ത്രണംവിട്ട കാർ കനാലിൽ പതിച്ചത്. കാറിലുണ്ടായിരുന്ന കല്ലൂർക്കാട് സ്വദേശി അലൻ അത്ഭുതകരമായി രക്ഷപ്പെട്ടു. കഴിഞ്ഞ മൂന്ന് മാസത്തിനിടെ മൂന്നാമത്തെ കാറാണ് ഇവിടെ അപകടത്തിൽപ്പെടുന്നത്. അപകടങ്ങൾ തുടർക്കഥയായതോടെ പഞ്ചായത്ത് അധികൃതർ പൊതുമരാമത്തു വകുപ്പിനും ജലവിഭവ മന്ത്രിക്കും സുരക്ഷാ സംവിധാനങ്ങൾ സ്ഥാപിക്കണമെന്ന് ആവശ്യപ്പെട്ട് പരാതി നൽകിയിരുന്നു. ഇതേതുടർന്ന് പൊതുമരാമത്ത് ഉദ്യോഗസ്ഥർ സ്ഥലത്തെത്തി പരിശോധന നടത്തിയെങ്കിലും തുടർ നടപടികളൊന്നുമുണ്ടായിട്ടില്ല. റോഡിൽനിന്ന് 20 അടി താഴ്ച്ചയുള്ള കനാലിലേക്കാണ് വാഹനങ്ങൾ വീഴുന്നത്. റോഡ് സംരക്ഷണഭിത്തി നിർമിച്ചാൽ ഒഴിവാക്കാവുന്ന അപകടങ്ങളാണ് അധികൃതരുടെ അനാസ്ഥമൂലം തുടരുന്നത്. ശബരിമല തീർഥാടകരുടെ പ്രധാന പാതയായ പണ്ടപ്പിള്ളി - പാറക്കടവ് റോഡിലൂടെ ഒട്ടേറെ സ്കൂൾ വാഹനങ്ങളും കടന്നുപോകുന്നുണ്ട്. അധികൃതർ ഉടൻ സംരക്ഷണ ഭിത്തി നിർമിച്ച് അപകടം ഒഴിവാക്കാൻ വേണ്ട നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

വാഴക്കുളം സൗജന്യ ഡയാലിസ് സെന്‍ററിന് 10 ലക്ഷം നൽകി ജെയിൻ യൂണിവേഴ്സിറ്റി

വാഴക്കുളം: വാഴക്കുളം ചാരിറ്റബിൾ ട്രസ്റ്റിന്‍റെ ആഭിമുഖ്യത്തിൽ വാഴക്കുളം സെന്‍റ് ജോർജ് ആശുപത്രിയുടെ സഹകരണത്തോടെ നടപ്പാക്കുന്ന സൗജന്യ ഡയാലിസിസ് സെന്‍ററിന് കാക്കനാട് ഇൻഫോ പാർക്കിൽ പ്രവർത്തിക്കുന്ന ജെയിൻ യൂണിവേഴ്സിറ്റി പത്തു ലക്ഷം നൽകി. വാഴക്കുളം ചാരിറ്റബിൾ ട്രസ്റ്റ് ഓഫീസിൽ ചേർന്ന യോഗത്തിൽ ട്രസ്റ്റ് ചെയർമാൻ സിജു സെബാസ്റ്റ്യൻ താണിക്കൽ ജെയിൻ യൂണിവേഴ്സിറ്റി ഡയറക്ടർ ടോം ജോസഫിൽനിന്നും തുക ഏറ്റുവാങ്ങി. വാഴക്കുളം സെന്‍റ് ജോർജ് ഫൊറോന പള്ളി വികാരി ഫാ. ജോർജ് പൊട്ടയ്‌ക്കൽ യോഗം ഉദ്ഘാടനം ചെയ്തു. വർത്തമാന കാലഘട്ടത്തിൽ അനേകം പേർ കിഡ്നി രോഗത്താൽ വലയുന്പോൾ അവർക്ക് ജീവിതം മുന്നോട്ടു കൊണ്ടുപോകാനുള്ള ഏക ആശ്രയമാണ് സൗജന്യ ഡയാലിസിസ് സെന്‍ററുകളെന്ന് ടോം ജോസഫ് പറഞ്ഞു. മഞ്ഞള്ളൂർ പഞ്ചായത്ത് വൈസ് പ്രസിഡന്‍റ് ടോമി തന്നിട്ടാമാക്കൽ, ട്രസ്റ്റ് സെക്രട്ടറി ജോണി മെതിപ്പാറ, മാത്യൂസ് നന്പേലി, പഞ്ചായത്തംഗം ജോസ് കൊട്ടുപ്പുള്ളി, ബ്ലോക്ക് പഞ്ചായത്തംഗം പ്രഫ. ജോസ് അഗസ്റ്റിൻ, തോമസ് വർഗീസ് തുടങ്ങിയവർ പ്രസംഗിച്ചു.

തിരുമാറാടിയിൽ പാറമടയ്‌ക്ക് അനുമതി നിഷേധിച്ചു

തിരുമാറാടി: പഞ്ചായത്ത് മൂന്നാം വാർഡിലെ പാറമടയ്‌ക്ക് അനുമതി നിഷേധിച്ചു. ക്വാറി പ്രവർത്തിപ്പിക്കുന്നതിനായി റോണ്‍കോ ഗ്രാനൈറ്റ് പ്രൈവറ്റ് ലിമിറ്റഡ് നൽകിയ അപേക്ഷ അനുവദിക്കേണ്ടതില്ലെന്ന് തിരുമാറാടി പഞ്ചായത്ത് ഭരണസമിതി യോഗം ഏകകണ്ഠമായി പഞ്ചായത്ത് സെക്രട്ടറിക്ക് നിർദേശം നൽകി. 3.8316 ഹെക്ടർ സ്ഥലത്ത് ക്വാറി പ്രവർത്തിപ്പിക്കുന്നതിനായാണ് റോണ്‍കോ പ്രൈവറ്റ് ലിമിറ്റഡ് എന്ന സ്ഥാപനത്തിന് വേണ്ടി ജോണി റോയി എന്ന വ്യക്തി കെ-സ്വിഫ്ട് വഴി അപേക്ഷ നൽകിയത്. പാരിസ്ഥിതികാനുമതി, എക്സ്പ്ലോസീവ് ലൈസൻസ്, കേരള മലിനീകരണ നിയന്ത്രണ ബോർഡിൽ നിന്നുള്ള അനുമതി, ഡയറക്ടർ ഓഫ് മൈനിംഗ് ജിയോളജിയുടെ ലെറ്റർ ഓഫ് ഇൻഡന്‍റ്, ഇറിഗേഷൻ വകുപ്പ് എറണാകുളം എക്സിക്യൂട്ടീവ് എൻജിനീയറുടെ എൻഒസി, സർവേ മാപ്പ് സ്ഥലത്തിന്‍റെ ഉടമസ്ഥാവകാശം തെളിയിക്കുന്ന രേഖകൾ എന്നിവയും അപേക്ഷയോടൊപ്പം നൽകിയിരുന്നു. മൂന്നാം വാർഡ് പ്രത്യേക ഗ്രാമസഭാ യോഗം പാറമട അനുവദിക്കരുതെന്ന് തീരുമാനിച്ചിട്ടുള്ള സാഹചര്യത്തിലും പാറമട പ്രവർത്തനം ആരംഭിച്ചാൽ പഞ്ചായത്ത് ഉടമസ്ഥതത്തിലുള്ള റോഡിനും പട്ടിയാനിപ്പുഴ കുടിവെള്ള വിതരണ പദ്ധതിക്കും കുടുക്കപ്പാറ തടയണയ്ക്കും കേടുപാടുകൾ സംഭവിക്കുമെന്നതിനാലും ക്വാറിക്ക് അനുമതി നൽകാൻ കഴിയില്ലെന്ന് പഞ്ചായത്ത് കമ്മിറ്റി സെക്രട്ടറിക്ക് നിർദേശം നൽകി. യോഗത്തിൽ പഞ്ചായത്ത് പ്രസിഡന്‍റ് സന്ധ്യാമോൾ പ്രകാശ് അധ്യക്ഷത വഹിച്ചു.

ഡീ പോൾ ഇൻസ്റ്റിറ്റ്യൂട്ടിൽ രക്തദാന ക്യാമ്പ് സംഘടിപ്പിച്ചു

അങ്കമാലി: ഡീപോൾ ഇൻസ്റ്റിറ്റ്യൂട്ട് ഓഫ് സയൻസ് ആൻഡ് ടെക്നോളജി, അങ്കമാലി ഡിസ്റ്റ് എൻഎസ്എസ് യൂണിറ്റിന്‍റെ നേതൃത്വത്തിൽ രക്തദാന ക്യാമ്പ് സംഘടിപ്പിച്ചു. ഐഎംഎ ആലുവ ശാഖയും സ്റ്റേറ്റ് ബാങ്ക് ഓഫ് ഇന്ത്യയും സഹകരിച്ചാണ് ക്യാമ്പ് സംഘടിപ്പിച്ചത്. ചടങ്ങിൽ എൻഎസ്എസ് പ്രോഗ്രാം ഓഫീസർ ഡോ. എം.എസ്. അനീഷ് സ്വാഗതം ആശംസിച്ചു. പ്രിൻസിപ്പൽ ഫാ. ജോണി ചാക്കോ മംഗലത്ത് അധ്യക്ഷത വഹിച്ചു. ഐഎംഎയെയും എസ്ബിഐയെയും പ്രതിനിധീകരിച്ച് വിവിധ പ്രതിനിധികൾ അനുഭവങ്ങൾ പങ്കുവച്ചു . ബിഎസ്‌ഡബ്ല്യു വിഭാഗത്തിലെ എൻഎസ്എസ് പ്രവർത്തകനായ സായിഗോപാൽ നന്ദി രേഖപ്പെടുത്തി. വിദ്യാർഥികളും അധ്യാപകരും ക്യാമ്പിൽ പങ്കെടുത്ത് രക്തം ദാനം ചെയ്തു.

ആലുവ ജില്ലാ ആശുപത്രിയിൽ രാത്രിയിൽ ഡോക്ടർമാരില്ലെന്ന് പരാതി

ആലുവ: ആലുവ ഗവ. ജില്ലാ ആശുപത്രിയിൽ അത്യാഹിത വിഭാഗത്തിൽ രാത്രികാലങ്ങളിൽ കൂടുതൽ ഡോക്ടർമാരെ നിയമിക്കണമെന്ന ആവശ്യം ശക്തമാകുന്നു. അത്യാഹിത വിഭാഗത്തിൽ അടിയന്തിര കേസുകൾ ഒന്നിലേറെ വന്നാൽ ഒരു ഡോക്ടറിന് മാത്രമായി കൈകാര്യം ചെയ്യാനാകുന്നില്ലെന്നാണ് പരാതി. ഒരു ഡോക്ടർ മാത്രം കാഷ്വാലിറ്റിയിൽ ഉള്ളതിനാൽ നീണ്ട ക്യൂ ആണ് എപ്പോഴും ഉള്ളത്. ആക്സിഡന്‍റ് തുടങ്ങിയ അത്യാഹിതങ്ങൾ സംഭവിച്ചാൽ ഓ പി യിലുള്ള അതേ ഡോക്ടർ തന്നെയാണ് കൈകാര്യം ചെയ്യുന്നത്. കാത്തുനിന്ന് മടുത്തിട്ട് മറ്റ് ആശുപത്രിയിലേക്ക് പോകാൻ നിർധനരായ രോഗികൾ നിർബന്ധിതരാകുന്നതായും ആക്ഷേപമുണ്ട്. കാഷ്വാലിറ്റിയിൽ എത്തുന്ന രോഗികൾക്ക് ചീട്ട് തൊട്ടടുത്ത് കൗണ്ടറിൽ നിന്നാണ് നൽകിയിരുന്നത്. എന്നാൽ കഴിഞ്ഞ ഒരു മാസമായി ജീവനക്കാരില്ലായെന്ന പേരിൽ അരകിലോമീറ്റർ ദൂരെയാണ് രാത്രികാല കൗണ്ടർ തുറന്നിരിക്കുന്നത്. കൗണ്ടർ തിരികെ അത്യാഹിത വിഭാഗത്തിൽ പ്രവർത്തിക്കണമെന്ന് രോഗികൾ ആവശ്യപ്പെട്ടു. ജനപ്രതിനിധികളും, സംഘടനകളും പല തവണ പരാതി പറഞ്ഞിട്ടും ആവശ്യത്തിന് ഡോക്ടർമാരെയും ജീവനക്കാരെയും നിയമിക്കാൻ സർക്കാർ ഇതുവരെയും തയാറായിട്ടില്ല. അടിയന്തിര പ്രാധാന്യം ഉള്ളതിനാൽ അത്യാഹിത വിഭാഗത്തിൽ കൂടുതൽ ഡോക്ടർമാരെ നിയമിക്കാൻ ആരോഗ്യ വകുപ്പ് തയ്യാറാകണമെന്ന് ചൂർണിക്കര ഗ്രാമപഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ മുഹമ്മദ് ഷെഫീക്ക് ആവശ്യപ്പെട്ടു.

ഇന്‍റർനാഷണൽ ടാക്സേഷൻ: ഏകദിന സെമിനാർ നടത്തി

കൊച്ചി: ഐസിഎഐ ഇന്‍റർനാഷണൽ ടാക്സേഷൻ കമ്മിറ്റിയും ഐസിഎഐ എറണാകുളം ബ്രാഞ്ചും സംയുക്തമായി ഇന്‍റര്‍നാഷണല്‍ ടാക്‌സേഷനില്‍ ഏകദിന സെമിനാര്‍ നടത്തി. ഗോകുലം കണ്‍വന്‍ഷന്‍ സെന്‍ററില്‍ നടന്ന സെമിനാർ കൊച്ചി ഇന്‍കം ടാക്‌സ് പ്രിന്‍സിപ്പല്‍ കമ്മീഷണര്‍ സ്വപ്‌ന നാണു അമ്പാട്ട് ഉദ്ഘാടനം ചെയ്തു. ഇന്‍റര്‍നാഷണല്‍ ടാക്‌സേഷന്‍ ഇന്‍കം ടാക്‌സ് ജോയിന്‍റ് കമ്മീഷണര്‍ എം.രഘു മുഖ്യപ്രഭാഷണം നടത്തി. പ്രതിദിനം മാറുകയും വളരുകയും ചെയ്യുന്നതാണ് ഇന്‍റർനാഷണൽ ടാക്സേഷനെന്ന് കൊച്ചി ഇന്‍കം ടാക്‌സ് പ്രിന്‍സിപ്പല്‍ കമ്മീഷണര്‍ സ്വപ്‌ന നാണു അമ്പാട്ട് പറഞ്ഞു. അതുകൊണ്ടുതന്നെ ചാർട്ടേഡ് അക്കൗണ്ടന്‍റുമാർക്ക് ഇക്കാര്യത്തിൽ വലിയ പങ്കാളിത്തം വഹിക്കാനുണ്ടെന്നും അവർ പറഞ്ഞു. ഇന്‍റർനാഷണൽ ടാക്സേഷൻ കമ്മിറ്റി ചെയർമാൻ സഞ്ജയ് കുമാർ അഗർവാൾ, സെന്‍ട്രല്‍ കൗണ്‍സില്‍ അംഗം ബാബു ഏബ്രഹാം കള്ളിവയലില്‍ എന്നിവര്‍ സംസാരിച്ചു. ഐസിഎഐ കൊച്ചി ബ്രാഞ്ച് ചെയര്‍മാന്‍ എ.എസ്.ആനന്ദ് സ്വാഗതവും സെക്രട്ടറി രൂപേഷ് രാജഗോപാല്‍ നന്ദിയും പറഞ്ഞു.

കഞ്ചാവ് ചെടികൾ കണ്ടെത്തി

വരാപ്പുഴ: കാവിൽനട ചെമ്മായം - കോട്ടുവള്ളിക്കാവ് റോഡിൽ കരതോപ്പിൽ വീട്ടിൽ അജിത്ത്കുമാറിന്‍റെ ഉടമസ്ഥതയിലുള്ള കെട്ടിടത്തിന് സമീപത്തുള്ള ഒഴിഞ്ഞ പറമ്പിൽ നിന്ന് രണ്ട് കഞ്ചാവ് ചെടികൾ കണ്ടെത്തി. വരാപ്പുഴ എക്സൈസ് റേഞ്ച് ഇൻസ്പെക്ടർ നീതു മനോഹരന് ലഭിച്ച രഹസ്യവിവരത്തിന്‍റെ അടിസ്ഥാനത്തിൽ നടന്ന പരിശോധനയിലാണ് 75,58 സെന്‍റീമീറ്റർ നീളമുള്ള കഞ്ചാവ് ചെടികൾ കണ്ടെത്തിയത്. ആരെങ്കിലും നട്ടുവളർത്തിയതാണോയെന്ന് വ്യക്തമല്ല. സംഭവത്തിൽ പോലീസ് കേസെടുത്തു.

ആലുവ-പെരുമ്പാവൂർ സ്വകാര്യ ബസ് റൂട്ടിൽ വെള്ളക്കെട്ട് രൂക്ഷം

ആലുവ: ആലുവ-പെരുമ്പാവൂർ സ്വകാര്യ ബസ് റൂട്ടിൽ രാജഗിരി ആശുപത്രി മുതൽ കാർമൽ ആശുപത്രി വരെ പലയിടത്തും വെള്ളക്കെട്ട് രൂക്ഷമായി. കുഴികളുടെ ആഴം അറിയാനാകാതെ ഇരുചക്ര യാത്രികർ മറിഞ്ഞ് വീഴുന്ന നിരവധി സംഭവങ്ങൾ ആവർത്തിക്കുന്നതായി പരാതികളും ഉയർന്നിട്ടുണ്ട്. കീഴ്മാട്-എടത്തല -ചൂർണിക്കര ഗ്രാമപഞ്ചായത്തുകളുടെ അതിർത്തികൾ പങ്കിടുന്ന പ്രധാന റോഡുകളിലെയും ഇടറോഡുകളിലേയും പൊതു കാനകൾ വൃത്തിയാക്കാൻ തയാറാകുന്നില്ലെന്നാണ് പ്രധാന പരാതി. രാജഗിരി ആശുപത്രിക്ക് സമീപം കാലവർഷം തുടങ്ങിയ അന്നു മുതൽ വെള്ളക്കെട്ടാണ്. കീഴ്മാട്, എടത്തല പഞ്ചായത്തുകൾ പരസ്പരം പഴിചാരി കൈകഴുകയാണിവിടെ. ചൂണ്ടി ജംഗ്ഷനാണെങ്കിൽ താറുമാറായിട്ട് മാസങ്ങളായി. ഹൈക്കോടതി വിശദീകരണം ചോദിച്ചതോടെ കുറച്ച് മെറ്റൽ വിതറി പൊതുമരാമത്ത് വകുപ്പ് സ്ഥലം വിട്ടു. കാൽനടക്കാർക്ക് ചെളിവെള്ളത്തിലൂടെയല്ലാതെ നടക്കാനും കഴിയില്ല. വലിയ കുഴികളാണ് ഇവിടെയുള്ളത്. കാൽമൽ ആശുപത്രിക്കു സമീപത്തെ പെട്രോൾ പമ്പ് മേഖലയും കനത്ത വെള്ളക്കെട്ടിലാണ്. ഇരുവശത്തും റോഡ് ഉയർന്ന നിലയിലായതിനാൽ മഴവെള്ളം പെട്രോൾ പമ്പിന് സമീപം ഒഴുകിപ്പോകാനാകാതെ കെട്ടികിടക്കുകയാണ്. കീഴ്മാട് - ചൂർണിക്കര പഞ്ചായത്തുകളാണ് റോഡിന് ഇരുവശത്തുമായി വരുന്നത്. കിലോമീറ്ററുകൾ നീളുന്ന റോഡിലെ വെള്ളക്കെട്ട് ഒഴിവാക്കാൻ ഇനി ആരെ സമീപിക്കണമെന്ന ആശങ്കയിലാണ് വ്യാപാരികളും പ്രദേശവാസികളും.

ജില്ലാ വയോജന കലാമേള; വിജയികളെ ആദരിച്ചു

മരട്: ജില്ലാ വയോജന കലാമേളയിൽ ഓവറോൾ ചാമ്പ്യൻഷിപ്പ് നേടിയ മരട് നഗരസഭയിലെ വയോജന ക്ലബ്ബ് അംഗങ്ങളെ ആദരിച്ചു. നഗരസഭാ ചെയർമാൻ ആന്‍റണി ആശാംപറമ്പിൽ അധ്യക്ഷത വഹിച്ച ചടങ്ങിൽ ഫോർട്ട് കൊച്ചി ആർഡിഒ കെ. മീര മത്സരാർഥികളെ ആദരിച്ചു. നഗരസഭ വൈസ് ചെയർപേഴ്സൺ അഡ്വ. രശ്മി സനിൽ, സ്ഥിരം സമിതിയധ്യക്ഷന്മാരായ റിയാസ്, കെ. മുഹമ്മദ്, റിനി തോമസ്, ബേബി പോൾ, ശോഭ ചന്ദ്രൻ, ബിനോയ് ജോസഫ്, കൗൺസിലർമാരായ സി.ആർ. ഷാനവാസ്, ചന്ദ്രകലാധരൻ, വയോമിത്രം കോ ഓർഡിനേറ്റർ ശ്രുതി മെറിൻ തുടങ്ങിയവർ പ്രസംഗിച്ചു.

ഡയാലിസിസ് മെഷീന്‍ കൈമാറി

കൊച്ചി: എറണാകുളം വൈഎംസിഎയുടെ ആഭിമുഖ്യത്തില്‍ ഡയാലിസിസ് മെഷീനുകള്‍ കൈമാറി. എറണാകുളം വൈഎംസിഎ ഹാളില്‍ നടന്ന ചടങ്ങില്‍ കളക്ടര്‍ എന്‍.എസ്.കെ. ഉമേഷ് ഡയാലിസിസ് മെഷീനുകള്‍ ലിസി ഹോസ്പിറ്റല്‍ ജോയിന്‍റ് ഡയറക്ടര്‍ ഫാ. റെജു കണ്ണമ്പുഴയ്ക്ക് കൈമാറി. പ്രസിഡന്‍റ് ഡോ. ടെറി തോമസ് ഇടത്തൊട്ടി അധ്യക്ഷത വഹിച്ചു. ഹൃദ്രോഗവിദഗ്ധന്‍ ഡോ. ജോസ് ചാക്കോ പെരിയപ്പുറത്തെ ചടങ്ങില്‍ ആദരിച്ചു. യാക്കോബായ സഭ മെത്രാപ്പോലീത്ത ഡോ. കുര്യാക്കോസ് മാര്‍ തെയോഫിലോസ് അനുഗ്രഹ പ്രഭാഷണം നടത്തി. മാര്‍ ബസേലിയസ് ദന്തല്‍ കോളജ് പ്രിന്‍സിപ്പല്‍ ഡോ. ബൈജു പോള്‍, മുന്‍ നാഷണല്‍ പ്രസിഡന്‍റ് ജസ്റ്റീസ് ബെഞ്ചമിന്‍ കോശി, സോഷ്യല്‍ സര്‍വീസ് കമ്മിറ്റി ചെയര്‍മാന്‍ ഏബ്രഹാം വി. സൈമണ്‍, വൈസ് പ്രസിഡന്‍റ് മാത്യു മുണ്ടാട്ട്, സ്‌പോര്‍ട്‌സ് ആന്‍ഡ് ഗെയിംസ് കമ്മിറ്റി ചെയര്‍മാന്‍ ഡോ. ബിജിത് ജോര്‍ജ് ഏബ്രഹാം, ട്രഷറര്‍ ഷോണ്‍ ജെഫ് ക്രിസ്റ്റഫര്‍, ജനറല്‍ സെക്രട്ടറി ആന്‍റോ ജോസഫ്, അസോസിയേറ്റ് ജനറല്‍ സെക്രട്ടറി സജി ഏബ്രഹാം എന്നിവര്‍ പ്രസംഗിച്ചു.

എഴുത്തുവഴികളെ അറിയാൻ ഭാഷാ വിദ്യാർഥികൾ "സന്ധ്യ'യിൽ

കൊച്ചി: സാഹിത്യ നിരൂപണത്തിന്‍റെയും എഴുത്തിന്‍റെയും വഴികളെക്കുറിച്ചു മലയാളത്തിന്‍റെ ഗുരുനാഥൻ പ്രഫ. എം.കെ. സാനുവുമായി ആശയവിനിമയം നടത്തി കോളജ് വിദ്യാർഥികൾ. തൃക്കാക്കര ഭാരതമാതാ കോളജിലെ രണ്ട്, മൂന്ന് വർഷ മലയാള വിഭാഗം വിദ്യാർഥികളാണു വായന വാരാചരണത്തിന്‍റെ ഭാഗമായി സാനുമാഷിന്‍റെ എറണാകുളത്തെ വസതിയായ 'സന്ധ്യ'യിലെത്തിയത്. നിറഞ്ഞ ചിരിയോടെയാണ് മാഷ് വിദ്യാർഥികളെ വരവേറ്റത്. മലയാളം വിദ്യാർഥികളുടെ ചോദ്യങ്ങളോട് അദ്ദേഹം മനസു തുറന്നു. മലയാള നിരൂപണം, ചങ്ങമ്പുഴ നക്ഷത്രങ്ങളുടെ സ്നേഹ ഭാജനം എന്ന കൃതി, റാം കെയറോഫ് ആനന്ദി, വായന എന്നിവയെല്ലാം ചർച്ചകളിൽ വിഷയങ്ങളായി. മനസിൽ തട്ടാത്ത, വായിച്ച് സ്വയം ആകർഷണം തോന്നാത്ത ഒരു കൃതിയെയും നിരൂപണം ചെയ്യരുതെന്നു മാഷിന്‍റെ ഓർമപ്പെടുത്തൽ. നിരൂപണത്തിൽ വ്യക്തിതാല്പര്യങ്ങൾ പ്രതിഫലിക്കരുതെന്നും അദ്ദേഹം പറഞ്ഞു. ചങ്ങന്പുഴ എന്ന പുഴ കടക്കാതെ ഒരു കവിയും ഉണ്ടായിട്ടില്ലെന്ന മാഷിന്‍റെ വിലയിരുത്തൽ വിദ്യാർഥികൾ കൈയടിയോടെയാണ് വരവേറ്റത്. വിദ്യാർഥികളായ ബിറ്റു, മാഹിൻ, ഫാത്തിമ ഷമീർ, നന്ദന എന്നിവരെല്ലാം സാനുമാഷിനോട് ചോദ്യങ്ങൾ പങ്കുവച്ചു. മലയാളം വകുപ്പ് മേധാവി ഡോ. അനീഷ് പോൾ, അധ്യാപകരായ ഡോ. തോമസ് പനക്കളം, ഡോ. ലിജി ജോസഫ്, ഡോ.വർഗീസ് പോൾ എന്നിവരും വിദ്യാർഥികൾക്കൊപ്പം ഉണ്ടായിരുന്നു.

വൈദികർക്കെതിരായ കേസ് പിൻവലിക്കണം: കെസിവൈഎം

ഫോർട്ടുകൊച്ചി: പുത്തം തോട് മുതൽ ഫോർട്ട്കൊച്ചി വരെ ടെട്രാപോഡ് നിർമാണം യുദ്ധകാലാടിസ്ഥാനത്തിൽ പൂർത്തിയാക്കി തീരദേശ ജനത അനുഭവിക്കുന്നകടലാക്രമണത്തിന് ശാശ്വത പരിഹാരം എത്രയും പെട്ടെന്ന് ഉണ്ടാകുവാൻ വേണ്ടി കൊച്ചി-ആലപ്പുഴ രൂപതകളിലെ വൈദികരുടെ നേതൃത്വത്തിൽ തോപ്പുംപടി ബിഒടി പാലത്തിന് സമീപം നടന്ന സമാധാനപരമായ പ്രതിഷേധത്തിൽ പങ്കെടുത്തവർക്കെതിരെ രജിസ്റ്റർ ചെയ്ത കേസ് പിൻവലിക്കണമെന്നും അത് പ്രതിഷേധാർഹമെന്നും കെസിവൈഎം കൊച്ചി രൂപത അഭിപ്രായപ്പെട്ടു. സമാധാനപരമായ പ്രതിഷേധത്തിൽ പങ്കെടുത്ത പത്തോളം പുരോഹിതർക്കും കെആർഎൽസിസി വൈസ് പ്രസിഡന്‍റിനുമെതിരെയാണ് കേസ് രജിസ്റ്റർ ചെയ്തിരിക്കുന്നത്. കെസിവൈഎം കൊച്ചി രൂപത ഡയറക്ടർ ഫാ. മെൽട്ടസ് കൊല്ലശേരി പ്രതിഷേധയോഗം ഉദ്ഘാടനം ചെയ്തു. രൂപത പ്രസിഡന്‍റ് ഡാനിയ ആന്‍റണി അധ്യക്ഷത വഹിച്ചു. ജനറൽ സെക്രട്ടറി ഹെസ്‌ലിൻ ഇമ്മാനുവൽ, ജോയിന്‍റ് ഡയറക്ടർ ഫാ. ജോഷി ഏലശേരി, ലേ ആനിമേറ്റർ ലിനു തോമസ്, കണ്ണമാലി മേഖല എക്സിക്യൂട്ടീവ് ആൽവിൻ ജോസഫ്, ട്രഷറർ ജോർജ് ജിക്സൺ എന്നിവർ സംസാരിച്ചു. വൈസ് പ്രസിഡന്‍റുമാരായ ക്ലിന്‍റൺ ഫ്രാൻസീസ്, ജീവ റെജി, സെക്രട്ടറിമാരായ സനൂപ് ദാസ്, അക്ഷയ മരിയ, ഡയസ് ആന്‍റണി, അരുൺ ജോസ്, എക്സിക്യൂട്ടീവ് അംഗങ്ങളായ ബേസിൽ റിച്ചാർഡ്, ടോം ആന്‍റണി, അരുൺ പീറ്റർ, ആഷിൽ അഗസ്റ്റിൻ, അലൻ ജോസഫ് എന്നിവർ സന്നിഹിതരായിരുന്നു.

പഴകിയ ഭക്ഷണസാധനങ്ങൾ വിതരണം ചെയ്ത ഉദയംപേരൂരിലെ ബേക്കറി അടച്ചുപൂട്ടാൻ നോട്ടീസ്

ഉദയംപേരൂർ: ഉദയംപേരൂരിൽ പഴകിയ ഭക്ഷണസാധനങ്ങൾ കണ്ടെടുത്ത ബേക്കറി അടച്ചുപൂട്ടി. ഉദയംപേരൂർ പഞ്ചായത്ത് 16-ാം വാർഡിൽ ന്യൂ സ്റ്റാർ ബേക്കറിയിൽ നടത്തിയ പരിശോധനയിലാണ് കാലാവധി കഴിഞ്ഞതും പൂപ്പൽ ബാധിച്ചതുമായ ഹൽവ, പേഡ, ക്രീംറോൾ, പാൽ, സ്ട്രോബറി സിറപ്പ്, സ്ക്വാഷ്, ഭക്ഷ്യസുരക്ഷാ മാനദണ്ഡ പ്രകാരമുള്ള ലേബൽ പതിപ്പിക്കാത്ത ബ്രെഡ് പാക്കറ്റുകൾ, മറ്റ് ബേക്കറി സാധനങ്ങൾ തുടങ്ങി വലിയ അളവിൽ വിൽപ്പനയ്ക്ക് വച്ചിരുന്ന ഭക്ഷണസാധനങ്ങളാണ് പിടിച്ചെടുത്ത് നശിപ്പിച്ചത്. ജലഗുണനിലവാര പരിശോധന സർട്ടിഫിക്കറ്റും ബേക്കറി ജീവനക്കാർക്ക് ഹെൽത്ത് കാർഡുമില്ലായിരുന്നു. അടുക്കള വൃത്തിഹീനമായ സാഹചര്യത്തിലായിരുന്നു. ഇതേത്തുടർന്ന് ബേക്കറി അടച്ചുപൂട്ടാൻ നോട്ടീസ് നൽകുകയായിരുന്നു. പഞ്ചായത്ത് ലോക്കൽ പബ്ലിക്ക് ഹെൽത്ത് ഓഫീസർക്ക് ലഭിച്ച ഭക്ഷ്യവിഷബാധ പരാതിയെ തുടർന്നാണ് ബേക്കറിയിൽ ആരോഗ്യ വകുപ്പും ഭക്ഷ്യസുരക്ഷാ വകുപ്പും സംയുക്തമായി പരിശോധന നടത്തിയത്. ലോക്കൽ പബ്ലിക്ക് ഹെൽത്ത് ഓഫീസർ ഡോ. ഐ.കെ. സാവിത്രിയുടെ നേതൃത്വത്തിൽ ഭക്ഷ്യസുരക്ഷാ ഓഫീസർ ആതിരാ ദേവി, എച്ച്ഐ റാഫി ജോസഫ്, ജെഎച്ച്ഐമാരായ സി.ടി. അനൂജ , വൈഷ്ണവി എസ്. വിജയൻ, എ.എസ്. ജാസ്മിൻ , ഭക്ഷ്യസുരക്ഷാ ഓഫീസ് അസി. വി.ജി. ധന്യ എന്നിവരടങ്ങിയ സംഘമാണ് പരിശോധനയിൽ പങ്കെടുത്തത്.

എന്‍ജിന്‍ റൂമില്‍ വെള്ളം കയറി; കപ്പല്‍ 30 സെന്‍റീമീറ്റര്‍ കൂടി ചരിഞ്ഞു

കൊച്ചി: ആശങ്ക വര്‍ധിപ്പിച്ച് ബേപ്പൂരിന് സമീപം പുറംകടലില്‍ തീപിടിച്ച 'വാന്‍ഹായ് 503' കപ്പലിലെ എന്‍ജിന്‍ റൂമിലേക്ക് വെള്ളം കയറി തുടങ്ങിയതോടെ കപ്പല്‍ 30 സെന്‍റി മീറ്റര്‍ കൂടി ചരിഞ്ഞു. വെള്ളം കയറുന്ന തോത് ഇനിയും കൂടിയാല്‍ കപ്പല്‍ മുങ്ങിയേക്കാമെന്ന സൂചനയാണ് ഡയറക്ടര്‍ ജനറല്‍ ഒഫ് ഷിപ്പിംഗ് നല്‍കുന്നത്. അതിനിടെ കപ്പലില്‍നിന്ന് വോയേജ് ഡാറ്റ റെക്കോഡര്‍ (വിഡിആര്‍) വീണ്ടെടുത്തു. വൈകാതെ ഇത് തീരത്തെത്തിക്കും. കപ്പലിന്‍റെ മാസ്റ്റര്‍ നാളെ കൊച്ചിയിലെത്തുമെന്നാണ് വിവരം. അദ്ദേഹത്തിന്‍റെ സാന്നിധ്യത്തില്‍ വിഡിആറില്‍ നിന്നുള്ള വിവരങ്ങള്‍ 26ന് വേര്‍തിരിച്ചെടുക്കും. ഇതില്‍ കസ്റ്റംസ്, ലോജിസ്റ്റിക്‌സ് എന്നിവരുടെ സാന്നിധ്യവും ഉറപ്പാക്കിയിട്ടുണ്ട്. വിഡിആറില്‍ നിന്നുള്ള വിവരങ്ങള്‍ കപ്പല്‍ അപകടത്തിന്‍റെ കാരണങ്ങള്‍ കണ്ടെത്താന്‍ സഹായിക്കുമെന്നാണ് കരുതുന്നത്. കപ്പല്‍ ഇന്ത്യന്‍ എക്‌സ്‌ക്യൂസീവ് ഇക്കണോമിക് സോണിന് പുറത്തേക്ക് മാറ്റണമെന്നാണ് ഡിജിഎസിന്‍റെ നിര്‍ദേശം. ഇന്ത്യന്‍ തീരത്ത് നിന്ന് 200 നോട്ടിക്കല്‍ മൈല്‍ അകലെ വലിച്ചു കൊണ്ടുപോകാനാണ് ലക്ഷ്യം. 24 മണിക്കൂറിനുള്ളില്‍ ചിലപ്പോള്‍ ഈ നിര്‍ദേശം നടപ്പാക്കിയേക്കും. എന്‍ജിന്‍ റൂം, ഡൈവിംഗ് സാഹചര്യം എന്നിവ ആശ്രയിച്ചായിരിക്കും ഇത്. ശ്രീലങ്കയിലെ ഹമ്പന്‍ടോട്ട തുറമുഖത്തേക്ക് കപ്പല്‍ നീക്കുന്നതിനുള്ള സാധ്യതകള്‍ പരിശോധിച്ചു വരികയാണ്. പാരിസ്ഥിതിക അനുമതികളും സുരക്ഷാ പ്രോട്ടോക്കോളും അനുസരിച്ചാകും തുടര്‍നടപടികള്‍. അതേസമയം മറ്റ് അപകടകരമായ നിലയിലേക്ക് നീങ്ങിയാല്‍ കാലതാമസം കൂടാതെ മാറ്റുന്നതിനുള്ള നടപടികളും ഉണ്ടാകും.

കടലേറ്റം: താലൂക്ക് ഓഫീസ് മാർച്ച് നടത്തി കോൺഗ്രസ്

കൊച്ചി: കണ്ണമാലി പ്രദേശത്ത് തുടര്‍ച്ചയായുണ്ടാകുന്ന കടല്‍കയറ്റത്തിന് അടിയന്തര പരിഹാരം കാണുക, തകർന്ന വീടുകൾക്ക് നഷ്ടപരിഹാരം നൽകുക, സമരം ചെയ്ത വൈദികര്‍ക്കെതിരെ അന്യായമായി കേസെടുത്ത നടപടി പിന്‍വലിക്കുക തുടങ്ങിയ ആവശ്യങ്ങള്‍ ഉന്നയിച്ച് കോണ്‍ഗ്രസ് കൊച്ചി താലൂക്ക് ഓഫിസിലേക്കു മാർച്ച് നടത്തി. സേവ് കണ്ണമാലി എന്ന മുദ്രാവാക്യവുമായി നടത്തിയ മാർച്ച് ഡിസിസി പ്രസിഡന്‍റ് മുഹമ്മദ് ഷിയാസ് ഉദ്ഘാടനം ചെയ്തു. തീരദേശത്തെ കടലെടുക്കുമ്പോഴും സര്‍ക്കാരിന്‍റെ പഠനം തീരുന്നില്ലെന്ന് അദ്ദേഹം ആരോപിച്ചു. കോടികള്‍ ഉപയോഗിച്ച് ചെയ്യുന്ന പദ്ധതികളെ പോലും സംരക്ഷിക്കാനുള്ള ഉത്തരവാദിത്തം സര്‍ക്കാരിനില്ല. ചെല്ലാനം തീരത്ത് ടെട്രാപോഡുകള്‍ സ്ഥാപിച്ചെന്ന് പറയുന്നവർ അത് സംരക്ഷിക്കാനുള്ള പുലിമുട്ടുകള്‍ പോലും ഇതുവരെ നിര്‍മിച്ചിട്ടില്ലെന്നും അദ്ദേഹം പറഞ്ഞു. മാര്‍ച്ച് താലൂക്ക് ഓഫിസിന് മുന്നില്‍ പോലീസ് തടഞ്ഞു. ഡിസിസി ജനറല്‍ സെക്രട്ടറി എം.പി. ശിവദത്തന്‍ അധ്യക്ഷത വഹിച്ചു. കെപിസിസി ജനറല്‍ സെക്രട്ടറി ദീപ്തി മേരി വര്‍ഗീസ്, ഡൊമിനിക് പ്രസന്‍റേഷന്‍, എന്‍. വേണുഗോപാല്‍, ടോണി ചമ്മിണി, എം.ആര്‍. അഭിലാഷ് തുടങ്ങിയവർ പ്രസംഗിച്ചു.

പച്ചക്കറി വ്യാപാരത്തിന്‍റെ മറവിൽ കഞ്ചാവ് കച്ചവടം; രണ്ട് പേർ പിടിയിൽ

പെരുമ്പാവൂർ: പച്ചക്കറി വ്യാപാരത്തിന്‍റെ മറവിൽ കഞ്ചാവ് കച്ചവടം നടത്തിയിരുന്ന രണ്ടു പേരെ 14 കിലോഗ്രാം കഞ്ചാവുമായി പോലീസ് പിടികൂടി. തിരുപ്പൂർ പരപ്പാളയം കുമാരസ്വാമി ലേഔട്ടിൽ സന്തോഷ് (36), പാലക്കാട് കുഴൽമന്ദം ചിതലി മരത്തക്കാട് വീട്ടിൽ രതീഷ് അയ്യപ്പൻ (45) എന്നിവരെയാണ് റൂറൽ ജില്ലാ ഡാൻസാഫ് ടീമും പെരുമ്പാവൂർ പോലീസും ചേർന്ന് അറസ്റ്റ് ചെയ്തത്. മിനി പിക്കപ്പ് വാനിലാണ് കഞ്ചാവ് കടത്തിയത്. ജില്ലാ പോലീസ് മേധാവി എം. ഹേമലതയ്ക്ക് ലഭിച്ച രഹസ്യവിവരത്തിന്‍റെ അടിസ്ഥാനത്തിലായിരുന്നു പരിശോധന. രാത്രി പ്രധാനപാതയിലൂടെ വരികയായിരുന്ന വാഹനംചേലാമറ്റത്ത് വച്ച് പോലീസ് നിർത്താൻ ആവശ്യപ്പെട്ടെങ്കിലും ഊടുവഴിയിലേക്ക് അമിത വേഗതയിൽ പാഞ്ഞു പോവുകയായിരുന്നു. വാഹനം പിന്തുടർന്ന് പോലീസ് സാഹസികമായാണ് പ്രതിക ളെയും വാഹനവും പിടികൂടിയത്. ഒഡീഷയിൽ നിന്ന് 3,000 രൂപയ്ക്ക് വാങ്ങി ഇവിടെ 30,000 രൂപയ്ക്കാണ് മറിച്ചു വിറ്റിരുന്നത്. പിക്കപ്പ് വാനിൽ മറ്റ് പെട്ടികൾക്കൊപ്പമാണ് കഞ്ചാവ് ഒളിപ്പിച്ചിരുന്നത്. പ്രത്യേകം പായ്ക്ക് ചെയ്ത നിലയിലായിരുന്നു. ഇടയ്ക്ക് വച്ച് കഞ്ചാവ് പായ്ക്കറ്റ് ആർക്കെങ്കിലും കൈമാറിയിട്ടുണ്ടോ എന്നും ഇവരിൽ നിന്ന് കഞ്ചാവ് വാങ്ങുന്നവരെക്കുറിച്ചും പോലീസ് അന്വേഷണം നടത്തു ന്നുണ്ട്. പതിവായി കഞ്ചാവ് കടത്തുന്നവരാണ് പ്രതി കളെന്ന് പോലീസ് പറഞ്ഞു. ജില്ലാ പോലീസ് മേധാവി എം. ഹേമലതയുടെ നേതൃത്വത്തിൽ എഎസ്പി ശക്തി സിംഗ് ആര്യ, നർക്കോട്ടിക് സെൽ ഡിവൈഎസ്പി ജെ. ഉമേഷ് കുമാർ, ഇൻസ്പെക്ടർ ടി.എം സൂഫി, എസ്ഐ പി.എം. റാസിഖ്, ഡാൻസാഫ് ടീം എന്നിവരാണ് അന്വേഷണ സംഘത്തിലുണ്ടാ യിരുന്നത്.

മൂന്ന് റെയില്‍വേ സ്റ്റേഷനുകളിൽ നിന്ന് മെട്രോയിലേക്ക് ആകാശപ്പാത

കൊച്ചി: ജില്ലയിലെ മുന്നു പ്രധാന റെയില്‍വേ സ്റ്റേഷനുകളില്‍ നിന്ന് മെട്രോ സ്റ്റേഷനുകളിലേക്ക് ആകാശപാത നിര്‍മിക്കുന്നതിനു പച്ചക്കൊടി. എറണാകുളം ജംഗ്ഷന്‍, എറണാകുളം ടൗണ്‍, തൃപ്പൂണിത്തുറ റെയില്‍വേ സ്റ്റേഷനുകളില്‍ സ്‌കൈ വാക്ക്‌വേകള്‍ നിര്‍മിക്കുന്നതിനാണ് റെയില്‍വേ ഇപ്പോള്‍ പച്ചക്കൊടി വീശിയിരിക്കുന്നത്. ആകാശപാത നിര്‍മിക്കുന്നതിനാവശ്യമായ ഭൂമി ഉപയോഗത്തിന് കൊച്ചി മെട്രോ റെയില്‍ ലിമിറ്റഡിന് ഇളവുകള്‍ നല്‍കുമെന്ന് റെയില്‍വേ വൃത്തങ്ങള്‍ അറിയിച്ചു. കെഎംആര്‍എല്ലാണ് നിര്‍മാണം നടത്തേണ്ടത്. അതിനുള്ള അനുമതി റെയില്‍വേ നല്‍കും. കൂടാതെ ഭൂമിയുടെ വിലയില്‍ ഇളവ് നല്‍കുന്ന കാര്യവും റെയില്‍വേയുടെ ആലോചനയിലുണ്ട്. മുന്പ് എറണാകുളം നോര്‍ത്ത്, സൗത്ത് റെയില്‍വേ സ്റ്റേഷനുകളില്‍ നിന്ന് മെട്രോ സ്റ്റേഷനുകളിലേക്ക് ആകാശപാത എന്ന ആശയം കെഎംആര്‍എല്‍ അവതരിപ്പിച്ചെങ്കിലും പലവിധ കാരണങ്ങളാല്‍ അത് മുന്നോട്ട് പോയില്ല. ഇപ്പോള്‍ ഇരു സ്റ്റേഷനുകളുടേയും പുനര്‍നിര്‍മാണത്തിന്‍റെ ഭാഗമായാണ് ആകാശപാതയ്ക്കും ഗ്രീന്‍ സിഗ്നല്‍ തെളിഞ്ഞത്. യാത്രക്കാരുടെ ഏറെക്കാലത്തെ ആവശ്യമാണ് റെയില്‍വേ സ്റ്റേഷനുകളില്‍ നിന്ന് മെട്രോ സ്റ്റേഷനുകളിലേക്കുള്ള ആകാശപാത. രണ്ടു കോടിയിലധികം യാത്രക്കാര്‍ എറണാകുളം സൗത്ത് റെയില്‍വേ സ്റ്റേഷനിൽ മാത്രം ഓരോ വര്‍ഷവും വരികെയും പോകുകയും ചെയ്യുന്നുണ്ടെന്നാണ് കണക്ക്. നോര്‍ത്ത് റെയില്‍വേ സ്റ്റേഷനില്‍ ഒരു കോടിയും തൃപ്പൂണിത്തുറയില്‍ ഒന്നര ലക്ഷവുമാണ് യാത്രക്കാരുടെ എണ്ണം. ഇവരിലേറെയും കണക്ടിവിറ്റിക്കായി മെട്രോയെ ആശ്രയിക്കുന്നവരാണ്. മെട്രോ സ്റ്റേഷനിലേക്ക് ആകാശപാത വന്നാല്‍ അതുപകാരപ്പെടുമെന്ന് ഓള്‍ കേരള റെയില്‍വേ യൂസേഴ്‌സ് അസോസിയേഷന്‍ ഭാരവാഹികള്‍ പറഞ്ഞു.

വട്ടവലക്കാരെ കൈവെടിഞ്ഞ് പല്ലിമീൻ

വൈപ്പിൻ: മൺസൂണിൽ തീരക്കടലിൽ സമൃദ്ധമായി കാണാറുള്ള പല്ലിമീനുകൾ ഇക്കുറി എവിടെ പോയി. പല്ലിമീനിനായി തീരത്ത് കൊട്ടിപ്പെയ്ത്തു നടത്തുന്ന വട്ടവലക്കാരുടെ ആവലാതിയാണിത്. കഴിഞ്ഞ കുറെ ദിവസങ്ങളായി മത്സ്യബന്ധനത്തിനു പോയി കാര്യമായ കോളൊന്നും ലഭിക്കാതെ തിരികെ പോരുന്ന ഇവർ പറയുന്നത് കടലമ്മ ഇക്കുറി തങ്ങളെയും കൈവിട്ടുവെന്നാണ്. സാധാരണ മൺസൂൺ തുടക്കത്തിൽ തന്നെ വലനിറയെ പല്ലിമീൻ കിട്ടാറുള്ളതാണ്. എന്നാൽ ഇക്കുറി പല്ലിമീൻ തീരത്ത് വളരെ വിരളമായിട്ടെ കാണുന്നുള്ളൂ. അതേ സമയം കഴിഞ്ഞ ദിവസം തീരത്തോട് അടുത്തു നീട്ടു വല ഉപയോഗിച്ച് മത്സ്യബന്ധനം നടത്തുന്ന ചില വഞ്ചിക്കാർക്ക് പല്ലിമീൻ ലഭിച്ചിരുന്നു.

ലഹരി വിരുദ്ധ ബോധവത്കരണ സൈക്കിള്‍ യാത്ര

കൊച്ചി: കൊല്ലം വെസ്റ്റ് പോലീസ് സ്റ്റേഷന്‍ റിട്ടയേര്‍ഡ് എസ്‌ഐ ഷാജഹാന്‍ നയിക്കുന്ന കൊച്ചി വാട്ടർ മെട്രോയിലൂടെയുള്ള ലഹരി വിരുദ്ധ ബോധവത്കരണ സൈക്കിള്‍ യാത്ര കെഎംആര്‍എല്‍ എംഡി ലോക്‌നാഥ് ബെഹ്‌റ ഫ്‌ളാഗ് ഓഫ് ചെയ്തു. കൊല്ലത്തുനിന്ന് തുടങ്ങിയ യാത്ര കൊട്ടാരക്കര, കോട്ടയം, എറണാകുളം, തൃശൂര്‍, കണ്ണൂര്‍, കാസര്‍ഗോഡ്, മഞ്ചേശ്വരം, പാലക്കാട്, അട്ടപ്പാടി, അഗളി എന്നിവിടങ്ങള്‍ സന്ദര്‍ശിച്ച ശേഷമാണ് കൊച്ചി മെട്രോയില്‍ എത്തിച്ചേര്‍ന്നത്. ജെഎല്‍എന്‍ സ്റ്റേഡിയത്തില്‍ നിന്ന് ആരംഭിച്ച മെട്രോ യാത്രയ്ക്ക് ശേഷം ഹെക്കോര്‍ട്ട്-ഫോര്‍ട്ട്‌കൊച്ചി റൂട്ടില്‍ വാട്ടര്‍ മെട്രോയിലും ബോധവത്കരണ പരിപാടി അവതരിപ്പിച്ചു. 2025 കിലോമീറ്റര്‍ യാത്ര ചെയ്ത് ജൂലൈ രണ്ടിന് ലഹരി വിരുദ്ധ ബോധവത്കരണ സൈക്കിള്‍ യാത്ര കൊല്ലത്ത് സമാപിക്കും.

റൂറൽ ജില്ലയ്ക്ക് ഏഴ് പോലീസ് ജീപ്പുകൾകൂടി

ആലുവ: ആവശ്യത്തിനു വാഹനങ്ങളില്ലാതെ ബുദ്ധിമുട്ടുകയായിരുന്ന റൂറൽ ജില്ലയിലെ സബ് ഡിവിഷനുകൾക്കും പോലീസ് സ്റ്റേഷനുകൾക്കുമായി ഏഴ് പോലീസ് ജീപ്പുകൾ നിരത്തിലിറക്കി. ഇന്നലെ നടന്ന ചടങ്ങിൽ ജില്ലാ പോലീസ് മേധാവി എം. ഹേമലതയാണ് ഫ്ലാഗ് ഓഫ് ചെയ്തത്. അഞ്ച് ജീപ്പുകൾ ആലുവ, പെരുമ്പാവൂർ, മൂവാറ്റുപുഴ, പുത്തൻകുരിശ്, മുനമ്പം സബ് ഡിവിഷനുകൾക്കും രണ്ടെണ്ണം ചെങ്ങമനാട്, രാമമംഗലം എന്നീ പോലീസ് സ്റ്റേഷനുകൾക്കുമാണ് ലഭിക്കുക.

കളക്ടറേറ്റിനുള്ളിൽ മരപ്പട്ടി ചത്ത നിലയിൽ

കാക്കനാട്: കളക്ടറേറ്റ് സമുച്ചയത്തിൽ പ്രവർത്തിക്കുന്ന ക്ഷീര വികസന വകുപ്പിന്‍റെ ഓഫീസിനുള്ളിൽ മരപ്പട്ടിയെ ചത്ത നിലയിൽ കണ്ടെത്തി. രാവിലെ ഓഫീസിലെത്തിയ ജീവനക്കാരാണ് ഫയൽ റാക്കുകൾക്കു സമീപം മരപ്പട്ടിയുടെ ജഡം കണ്ടത്. ജീവനക്കാർ അറിയിച്ചതിനെ തുടർന്ന് ഉച്ചയോടെ വനപാലകരെത്തി മരപ്പട്ടിയുടെ ജഡം ചാക്കിലാക്കി കൊണ്ടുപോയി. കാടുമൂടിക്കിടക്കുന്ന കളക്ടറേറ്റ് വളപ്പിൽ തെരുവുനായകളും വിഷപ്പാമ്പുകളും പെരുകിയിട്ടും വളപ്പും പരിസരവും വൃത്തിയാക്കാൻ ജില്ലാ ഭരണകൂടം ഇതുവരെ യാതൊരു നടപടിയും സ്വീകരിച്ചിട്ടില്ല. കളക്‌ട്രേറ്റ് സമുച്ചയത്തിന്‍റെ പല നിലകളിലും ഉപയോഗശൂന്യമായ സാധന സാമഗ്രികൾ കൂട്ടിയിട്ട നിലയിലാണ്. ഇവിടം കാട്ടുപൂച്ച, മരപ്പട്ടി എന്നിങ്ങനെയുള്ള ജീവികൾ താവളമാക്കിയിരിക്കുകയാണ്. കളക്ടറുടെ ചേമ്പറിന്‍റെ മച്ചിനുള്ളിൽ കയറിയ മരപ്പട്ടികൾ ദിവസങ്ങളോളം അതിനുള്ളിൽ തന്നെയായിരുന്നു. ഇവയെ പുറത്തെത്തിക്കാൻ പലവട്ടം ശ്രമിച്ചിട്ടും നടന്നിരുന്നില്ല. മഴക്കാലമായതോടെ കളക്ടറേറ്റ് വളപ്പും പരിസരവും പുല്ലുകളും മറ്റും വളർന്ന് കുറ്റിക്കാടുകളായി മാറി. ഇക്കാര്യത്തിൽ പൊതുമരാമത്ത് വകുപ്പ് അധികൃതർക്ക് അനങ്ങാപ്പാറയമാണെന്ന് ജീവനക്കാർ ആരോപിച്ചു.

കപ്പലപകടം, കടലാക്രമണം; ദുരിതക്കയത്തില്‍ തീരമേഖല

കൊച്ചി: ജില്ലയിലെ തീരമേഖലയെ വറുതിയിലാക്കി കപ്പലപകടങ്ങള്‍ക്ക് പിന്നാലെ എത്തിയ കടലാക്രമണം. വൈപ്പിന്‍, എടവനക്കാട്, നായരമ്പലം, ഞാറക്കല്‍, കണ്ണമാലി, ടെട്രാപോഡ് സംരക്ഷണ ഭിത്തി ഒരുക്കാത്ത ചെല്ലാനത്തിന്റെ ഒരുഭാഗം എന്നിവിടങ്ങളിലാണ് ഇക്കുറി കടലാക്രമണം രൂക്ഷമായത്. ഇതോടെ പ്രദേശത്തെ മത്സ്യത്തൊഴിലാളി കുടുംബങ്ങള്‍ ദുരിതക്കയത്തിലാണ്. കപ്പലപകടങ്ങള്‍ക്ക് പിന്നാലെ മത്സ്യ വ്യാപാരത്തില്‍ ഇടിവുണ്ടായി. നഷ്ടം സഹിച്ച് മത്സ്യത്തൊഴിലാളികള്‍ മുന്നോട്ടു പോകുന്നതിനിടെ ട്രോളിംഗ് നിരോധനവും എത്തിയതോടെ ജില്ലയിലെ 800ഓളം ബോട്ടുകള്‍ കരയ്ക്കടിഞ്ഞു. ഇതിനുതൊട്ടുപിന്നാലെയാണ് തീരത്തെ വറുതിയിലാക്കി കടലാക്രമണവും കനത്തത്. വെള്ളം കയറിയ വീടുകളില്‍ പലതും ഇനിയും വാസയോഗ്യമായിട്ടില്ല. പലതും ഭാഗികമായി തകര്‍ന്ന നിലയിലുമാണ്. ഭൂരിഭാഗം തൊഴിലാളികളുടെയും ചെറുവള്ളവും വലയും നഷ്ടപ്പെട്ടിട്ടുണ്ട്. തീരത്തുനിന്ന് 12 നോട്ടിക്കല്‍ മൈല്‍ അകലെ നിന്നും പരമ്പരാഗത രീതിയില്‍ മത്സ്യബന്ധനം നടത്തുന്നതിന് നിരോധനം ബാധകമല്ല. എന്നാല്‍ നിശ്ചിത വലിപ്പം ഇല്ലാത്ത ചെറുമത്സ്യങ്ങളെ പിടികൂടുന്നത് നിയമവിരുദ്ധമാണ്. 10 സെന്‍റീമീറ്റര്‍ വലിപ്പമില്ലാത്ത മത്തിയും 14 സെന്‍റീ മീറ്റര്‍ വലിപ്പമില്ലാത്ത അയിലയും പിടിക്കരുത്. അത്തരം ബോട്ടുകളെ കര്‍ശനമായ നിയമത്തിന് വിധേയമാക്കും. എന്നാല്‍ നിലവിലെ സാഹചര്യത്തില്‍ വലകളടക്കം നശിച്ചതും, ഉയര്‍ന്ന തിരമാല മുന്നറിയിപ്പും ഇതിന് തിരിച്ചടിയായി. സര്‍ക്കാര്‍ സഹായം അപര്യാപ്തം മത്സ്യത്തൊഴിലാളികള്‍ക്കുള്ള സംസ്ഥാന സര്‍ക്കാരിന്‍റെ ധനസഹായം അപര്യാപ്തമെന്ന് മത്സ്യത്തൊഴിലാളികളും സംഘടനകളും വ്യക്തമാക്കുന്നു. കപ്പലപകടത്തിന് പിന്നാലെ കപ്പലിന്‍റെ അവശിഷ്ടങ്ങള്‍ കുടുങ്ങിയത് മൂലം നിരവധി ബോട്ടുകള്‍ക്ക് ലക്ഷങ്ങളുടെ നാശനഷ്ടമാണ് ഉണ്ടായിരിക്കുന്നത്. 1500 രൂപ വീതം രണ്ടു മാസത്തെ ധനസഹായമാണ് സര്‍ക്കാര്‍ നിലവില്‍ നല്‍കുന്നത്. ഗുണഭോക്താക്കളുടെ ലിസ്റ്റ് തയാറാകുന്ന മുറയ്ക്ക് ഇവ തൊഴിലാളികളുടെ അക്കൗണ്ടിലേക്ക് എത്തും. സൗജന്യ റേഷന്‍വിതരണവും ഉടന്‍ തുടങ്ങും.

നിലന്പൂർ ഫലം സർക്കാരിനേറ്റ കനത്ത തിരിച്ചടി: ഷിബു തെക്കുംപുറം

കൊച്ചി: ജനങ്ങളെ കൊള്ളയടിക്കുകയും നിരന്തരം കബളിപ്പിക്കുകയും ചെയ്യുന്ന സർക്കാരിനേറ്റ കനത്ത തിരിച്ചടിയാണ് നിലമ്പൂർ ഉപതെരഞ്ഞെടുപ്പിലുണ്ടായതെന്നു യുഡിഎഫ് ജില്ലാ കൺവീനർ ഷിബു തെക്കുംപുറം പറഞ്ഞു. സർക്കാരിന് വാഴ്ത്തുപാട്ടുകൾ രചിക്കുന്നവരല്ല, നിലമ്പൂരിലെ സാധാരണക്കാരെ പോലെ ആത്മാഭിമാനത്തോടെ പ്രതികരിക്കുന്നവരാണ് നാടിനെ വീണ്ടെടുക്കുന്നത്. അധികാരത്തിൽ തുടരാൻ ഇനിയൊരു നിമിഷം പോലും അർഹതയില്ലാത്ത സർക്കാരാണ് പിണറായിയുടേതെന്നും അദ്ദേഹം പറഞ്ഞു.

ആലുവ നഗരസഭാ ഫണ്ട് വിനിയോഗം : ഇന്‍റേണൽ വിജിലൻസ് അന്വേഷണം പ്രഖ്യാപിച്ചു

ആലുവ: ചട്ടവിരുദ്ധമായി ധന വിനിയോഗങ്ങൾ നടത്തുന്നുവെന്ന പരാതിയിൽ ആലുവാ നഗരസഭയ്ക്കെതിരെ തദ്ദേശ സ്വയംഭരണ വകുപ്പിന്‍റെ ഇന്‍റേണൽ വിജിലൻസ് അന്വേഷണം പ്രഖ്യാപിച്ചു. പ്രതിപക്ഷ കൗൺസിലർ എൻ. ശ്രീകാന്ത് നൽകിയ പരാതിയിലാണ് അന്വേഷണം. മുനിസിപ്പൽ കൗൺസിലിന്‍റെ മുൻകൂർ അനുമതി തേടാതെ അടിയന്തിര സാഹചര്യങ്ങളിൽ ധനവിനിയോഗം ചെയ്യാമെന്ന മുനിസിപ്പൽ ആക്ട് സെക്‌ഷൻ 15 തുടർച്ചയായി ദുരുപയോഗം ചെയ്തെന്നാണ് പരാതി. ഇന്നലെ കാക്കനാട് നടന്ന സിറ്റിംഗിൽ പരാതിക്കാരനിൽ നിന്ന് കൂടുതൽ തെളിവുകൾ തദ്ദേശ സ്വയം ഭരണ വകുപ്പിന്‍റെ ഇന്‍റേണൽ വിജിലൻസ് ശേഖരിച്ചു. പൊതുജന സുരക്ഷയ്ക്കു വേണ്ടി കൗൺസിലിന്‍റെ അനുമതി ഇല്ലാതെ മുനിസിപ്പാലിറ്റിയുടെ ഫണ്ട് ചെലവഴിക്കാമെന്നും കൗൺസിലിന്‍റെ അടുത്ത യോഗത്തിൽ അംഗീകാരം വാങ്ങണമെന്നുമാണ് ചട്ടം. എന്നാൽ സുരക്ഷയുമായി ബന്ധമില്ലാത്ത പദ്ധതികളിൽ പോലും കൗൺസിൽ അംഗീകാരം തേടാതെ പണം ചെലവിടുന്നുവെന്ന പരാതിയിൽ ഇന്‍റേണൽ വിജിലൻസ് മൂന്ന് മാസം മുമ്പ് നടത്തിയ പ്രാഥമിക അന്വേഷണത്തിനു ശേഷമാണ് അടുത്ത നടപടികളിലേക്ക് കടക്കുന്നത്.

ഗതാഗത നിയമ ലംഘനങ്ങള്‍ക്ക് പിഴ: അദാലത്ത് ഇന്നുമുതല്‍

കൊച്ചി: വിവിധ ഗതാഗത നിയമലംഘനങ്ങള്‍ക്ക് പോലീസും മോട്ടോര്‍ വാഹന വകുപ്പും ഇ ചെല്ലാന്‍ മുഖേന നല്‍കിയിട്ടുള്ള ട്രാഫിക് ഫൈനുകളില്‍ യഥാസമയം പിഴ അടക്കാന്‍ സാധിക്കാത്തതും, നിലവില്‍ കോടതിയില്‍ ഉള്ളതുമായ ചെല്ലാനുകളില്‍ പ്രോസിക്യൂഷന്‍ നടപടികള്‍ക്ക് ശിപാര്‍ശ ചെയ്തിട്ടുള്ളവ ഒഴികെയുള്ള ചെല്ലാനുകളും പിഴയൊടുക്കി തുടര്‍നടപടികളില്‍ നിന്നും ഒഴിവാകാന്‍ അവസരം. ഇതിനായി കൊച്ചി സിറ്റി പോലീസും മോട്ടോര്‍ വാഹന വകുപ്പും (എന്‍ഫോഴ്‌സ്‌മെന്‍റ് വിഭാഗം) ചേര്‍ന്ന് മെഗാ അദാലത്ത് സംഘടിപ്പിക്കുന്നു. ഹൈക്കോടതിക്ക് സമീപം കൊച്ചി സിറ്റി പോലീസ് എന്‍ഫോഴ്‌സ്‌മെന്‍റ് യൂണിറ്റില്‍ ഇന്നും നാളെയുമാണ് അദാലത്ത്. രാവിലെ 10 മുതല്‍ വൈകിട്ട് നാല് വരെ ട്രാഫിക് എന്‍ഫോഴ്‌സ്‌മെന്‍റ് വെസ്റ്റ് യൂണിറ്റില്‍ സജ്ജീകരിച്ചിരിക്കുന്ന പ്രത്യേക കൗണ്ടറുകളില്‍ പൊതുജനങ്ങള്‍ക്ക് നേരിട്ട് എത്തി പിഴ ഒടുക്കാം. ഫോൺ: 04842394218.

സിപിഎം മുൻ ബ്രാഞ്ച് സെക്രട്ടറിക്ക് കുത്തേറ്റ സംഭവം: പ്രതിയെ പിടികൂടി

മട്ടാഞ്ചേരി: സിപിഎം മുൻ ബ്രാഞ്ച് സെക്രട്ടറിക്ക് കുത്തേറ്റ സംഭവത്തിൽ പ്രതി ഫോർട്ട്കൊച്ചി വെളി സ്വദേശി മുരളി(57)നെ ഫോർട്ട്കൊച്ചി പൊലിസ് അറസ്റ്റ് ചെയ്തു. അറസ്റ്റിലായ മുരളി സിപിഎം ഫോർട്ട്കൊച്ചി വെളി ബ്രാഞ്ച് സെക്രട്ടറി ബിന്ദുവിന്‍റെ ഭർത്താവാണ്. ഫോർട്ട്കൊച്ചി സൗത്ത് ലോക്കൽ കമ്മിറ്റിയിലെ വെളി ബ്രാഞ്ചിന്‍റെ മുൻ സെക്രട്ടറിയായ ഈസ്റ്റ് ഓടത്തനെല്ല് വീട്ടിൽ റൂഫസ് ഫർണാണ്ടസി(53) നെയാണ് മുരളി കുത്തിപ്പരിക്കേൽപ്പിച്ചത്. ഞായറാഴ്ച വൈകിട്ട് നാലരയോട ഫോർട്ട്കൊച്ചി വെളി ജംഗ്ഷനിലായിരുന്നു സംഭവം. മുരളിയുടെ ഭാര്യ ബിന്ദുവുമായി റൂഫസിനുള്ള തർക്കമാണ് കുത്തിൽ കലാശിച്ചത്. ഇത് സംബന്ധിച്ച് നേരത്തേ പാർട്ടിക്ക് പരാതി നൽകിയിരുന്നു. മദ്യപിച്ചെത്തിയ മുരളി റൂഫസിന്‍റെ ഇടത് നെഞ്ചിന്‍റെ താഴെയും വയറിനും കുത്തുകയായിരുന്നു. റൂഫസ് ശസ്ത്രക്രിയയെ തുടർന്ന് കോട്ടയം മെഡിക്കൽ കോളജ് അത്യാഹിത വിഭാഗത്തിൽ ചികിത്സയിലാണ്. അതേ സമയം സംഭവത്തിന് പിന്നിൽ പാർട്ടിയിലെ വിഭാഗീയതയാണെന്നും വിവരമുണ്ട്.

കാഞ്ഞൂർ‌ സെന്‍റ് സെബാസ്റ്റ്യൻസ് എച്ച്എസിൽ "ദീപിക നമ്മുടെ ഭാഷ പദ്ധതി

കാഞ്ഞൂർ‌: കാഞ്ഞൂർ‌ സെന്‍റ് സെബാസ്റ്റ്യൻസ് ഹൈസ്കൂളിൽ "ദീപിക നമ്മുടെ ഭാഷ പദ്ധതി'ക്കു തുടക്കമായി. സ്കൂൾ അസി. മാനേജർ ഫാ. ജോസ് വലിയകടവിൽ വിദ്യാർഥി പ്രതിനിധികൾക്ക് ദീപിക ദിനപത്രം കൈമാറി ഉദ്ഘാടനം നിർവഹിച്ചു. പ്രധാനാധ്യാപിക ശാലി തൊമ്മി അധ്യക്ഷത വഹിച്ചു. ദീപിക സർക്കുലേഷൻ‌ മാനേജർ ബിനോ വർഗീസ്, ഏരിയാ മാനേജർ നിബിൻ അലോഷ്യസ് എന്നിവർ പ്രസംഗിച്ചു.

ട്വന്‍റി 20 ഓഫീസ് ഉദ്ഘാടനം ചെയ്തു

കിഴക്കമ്പലം: പഞ്ചായത്ത് പഴങ്ങനാട് വാർഡിലെ ട്വന്‍റി 20യുടെ പുതിയ പാർട്ടി ഓഫീസ് കിഴക്കമ്പലം പഞ്ചായത്ത് പ്രസിഡന്‍റ് മിനി രതീഷ് ഉദ്ഘാടനം നിർവഹിച്ചു. വാർഡ് പ്രസിഡന്‍റ് ജിജോയുടെ അധ്യക്ഷതയിൽ കൂടിയ യോഗത്തിൽ വൈസ് പ്രസിഡന്‍റ് ജിൻസി അജി, ബ്ലോക്കംഗം കെ.വി. രാജു, വിദ്യാഭ്യാസകാര്യ സ്ഥിരംസമിതി അധ്യക്ഷൻ ജനീസ് കാച്ചപ്പള്ളി, നിയോജക മണ്ഡലം കമ്മിറ്റി മെമ്പർ ബേബി ജോൺ, വാർഡംഗം ഷീബാ ജോർജ് തുടങ്ങിയവർ ആശംസകൾ അർപ്പിച്ചു. രക്ഷാധികാരി ജോർജേട്ടന്റെ 80ആം പിറന്നാൾ കേക്ക് മുറിച്ച് ആഘോഷിച്ചു. തുടർന്ന് വാർഡ് വൈസ് പ്രസിഡന്‍റ് പോൾ ജേക്കബ് കോയിക്കര നന്ദി രേഖപ്പെടുത്തി.

വൈദികർക്കെതിരേ കേസ്:നടപടികൾ പിൻവലിക്കാൻ പ്രതിഷേധ ജ്വാല

ഫോർട്ടുകൊച്ചി: കടലാക്രമണം തടയുന്നതിലുള്ള സർക്കാർ അനാസ്ഥയെക്കെതിരെ ആലപ്പുഴ കൊച്ചി രൂപതകൾ സംയുക്തമായി സംഘടിപ്പിച്ച വൈദികരുടെ ഉപവാസ പ്രതിഷേധത്തിനും റാലിക്കുമേതിരെ കേസെടുത്ത സർക്കാർ നടപടി പിൻവലിക്കണമെന്നാവശ്യപെട്ട് ജനകീയ വേദിയുടെ നേതൃത്വത്തിൽ പ്രതിഷേധ ജ്വാല തെളിയിച്ചു. കൊച്ചി ചെല്ലാനം ജനകിയ വേദിയുടെ നേതൃത്വത്തിൽ കാട്ടിപ്പറമ്പിൽ നടന്ന പന്തം കൊളുത്തി പ്രതിഷേധ ജ്വാല തെളിക്കൽ ജനറൽ സെക്രട്ടറി വി.ടി. സെബാസ്റ്റ്യൻ ഉദ്ഘാടനം ചെയ്തു. യോഗത്തിൻ തുഷാർ നിർമൽ, എ.എൻ. കുര്യൻ തുടങ്ങിയവർ പ്രസംഗിച്ചു. ജൂലൈ മൂന്നിന് മന്ത്രിതലത്തിൽ തീരുമാനം ഉണ്ടാകുമെന്നാണ് കളക്ടർ അറിയിച്ചിട്ടുള്ളത്. ഈ സാഹചര്യത്തിൽ ജനകീയവേദി മത്സ്യത്തൊഴിലാളി ഫെഡറേഷൻ, ചെല്ലാനം മെർച്ചന്‍റ്സ് യൂണിയൻ, വ്യാപാരി വ്യവസായി ഏകോപന സമിതി, ബസ് ഓണേഴ്സ് അസോസിയേഷൻ എന്നിവരുടെ സംയുക്ത ആഭിമുഖ്യത്തിൽ ജൂൺ 30ന് നടത്താൻ ഇരുന്ന ജനകീയ ഹർത്താൽ മാറ്റിവച്ചതായി വി.ടി. സെബാസ്റ്റ്യൻ അറിയിച്ചു.

രാജഗിരി പബ്ലിക് സ്കൂളിൽ "അക്വലേഡ് 25'

കളമശേരി: രാജഗിരി പബ്ലിക് സ്‌കൂളില്‍ സിബിഎസ്ഇ പത്ത്, പന്ത്രണ്ട് ക്ലാസുകളില്‍ ഉന്നത വിജയം നേടിയ വിദ്യാര്‍ഥികളെ ആദരിച്ചു. സമ്മേളനത്തില്‍ (അക്വലേഡ് 25) കൊച്ചി ഇന്‍കം ടാക്‌സ് അഡീഷണല്‍ കമ്മീഷണര്‍ ജ്യോതിസ് മോഹന്‍ മുഖ്യാതിഥിയായി. സിഎംഐ പ്രൊവിന്‍ഷ്യാളും മാനേജരുമായ ഫാ. ബെന്നി നല്‍ക്കര, രാജഗിരി പബ്ലിക് സ്‌കൂള്‍ ഡയറക്ടര്‍ ഫാ. പൗലോസ് കിടങ്ങേന്‍, പ്രിന്‍സിപ്പല്‍ റൂബി ആന്‍റണി എന്നിവര്‍ പ്രസംഗിച്ചു. സ്‌കൂളിലെ പന്ത്രണ്ടാം ക്ലാസ് വിദ്യാര്‍ഥിയായിരുന്ന റീഹാന്‍ ജോസഫ് 500 ല്‍ 499 മാര്‍ക്ക് നേടിയിരുന്നു.

കരുമാല്ലൂർ-കുന്നുകര കുടിവെള്ള പദ്ധതി നിർമാണം ആരംഭിച്ചു

നെടുമ്പാശേരി: കരുമാല്ലൂർ - കുന്നുകര കുടിവെള്ള വിതരണ കിഫ്ബി പദ്ധതിയുടെ നിർമാണോദ്ഘാടനം നടത്തി. കുന്നുകരയിൽ നടന്ന ചടങ്ങിൽ മന്ത്രി റോഷി അഗസ്റ്റിൻ നിർമാണോദ്ഘാടനം നിർവഹിച്ചു. കൊച്ചിയിൽ നടപ്പാക്കുന്ന എഡിബി പദ്ധതിയിൽ ആലുവയിലെ 190 എംഎൽഡി പദ്ധതിയും ഉൾപ്പെടുത്തിയതോടെ മേഖലയിലെ കുടിവെള്ള ക്ഷാമത്തിന് പരിഹാരമാവുകയാണെന്ന് റോഷി അഗസ്റ്റിൻ പറഞ്ഞു. അടുത്ത 50 വർഷത്തേക്ക് കുന്നുകര, കരുമാല്ലൂർ പഞ്ചായത്തുകളിലെ മുഴുവൻ ജനങ്ങൾക്കും ആവശ്യമായ കുടിവെള്ള ലഭ്യത ഉറപ്പാക്കുന്നതാണ് പദ്ധതിയെന്ന് മന്ത്രി പി. രാജീവ് പറഞ്ഞു. സംസ്ഥാന സർക്കാർ 51.30 കോടി രൂപയാണ് കിഫ്ബി മുഖേന കുന്നുകര - കരുമാല്ലൂർ പദ്ധതിക്കായി അനുവദിച്ചത്. ടെണ്ടർ പൂർത്തിയാക്കി 48.52 കോടി രൂപയുടെ ഭരണാനുമതി നൽകി. നേരത്തെ ഒൻപത് എംഎൽഡി ആയി നിശ്ചയിച്ചിരുന്ന കുടിവെള്ള പദ്ധതിക്ക് ആവശ്യമായ ഭൂമി 2022ലാണ് ഏറ്റെടുത്തത്. ചടങ്ങിൽ ബ്ലോക്ക് പഞ്ചായത്ത് പ്രസിഡന്‍റുമാരായ ടി.വി. പ്രദീഷ്, രമ്യ തോമസ്, പഞ്ചായത്ത് പ്രസിഡന്‍റുമാരായ സൈന ബാബു, സബിത നാസർ എന്നിവർ സംസാരിച്ചു.

ലഹരിക്കെതിരെ ജനകീയ അനുഭവ സദസ്

ആലുവ: ലഹരിവിരുദ്ധ ദിനാചരണത്തിന്‍റെ ഭാഗമായി ആലുവ ചൂണ്ടി ഭാരത്‌മാതാ ആർട്സ് ആൻഡ് കൊമേഴ്സ് കോളജിൽ ലഹരിവിരുദ്ധ ജനകീയ അനുഭവ സദസ് സംഘടിപ്പിച്ചു. എറണാകുളം ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ ഉദ്ഘാടനം ചെയ്തു. ലഹരിവിരുദ്ധ പ്രവർത്തനത്തിന്‍റെ മുൻനിര പ്രവർത്തകർ, ലഹരിയെ അതിജീവിച്ചവർ, വിദ്യാർഥികൾ,അധ്യാപകർ എന്നിവർ പങ്കെടുത്തു. തദ്ദേശ വകുപ്പ് അസി. ഡയറക്ടർ ബി. സുധീർ യോഗത്തിൽ അധ്യക്ഷത വഹിച്ചു. ഡോ. അജീഷ് രാമചന്ദ്രൻ, ഡോ. ആരതി കൃഷ്ണൻ, ഡയറക്ടർ ഫാ.ജേക്കബ് പുതുശേരി, പ്രിൻസിപ്പൽ ഡോ. സിബി മാത്യു തുടങ്ങിയവർ പ്രസംഗിച്ചു. ജില്ലാ തദ്ദേശ വകുപ്പ്, ജില്ലാ പഞ്ചായത്ത്, ആരോഗ്യവകുപ്പ്, രാഷ്ട്രീയ ഗ്രാം സ്വരാജ് അഭിയാൻ എന്നിവയുടെ സംയുക്ത ആഭിമുഖ്യത്തിലാണ് സദസ് സംഘടിപ്പിച്ചത്.

റെയിൽവേ ട്രാക്കിലെ മാലിന്യം: നിവേദനം നൽകി

അങ്കമാലി: അങ്കമാലി - റെയിൽവേ ട്രാക്കിലെ മാലിന്യങ്ങൾ നീക്കം ചെയ്യണമെന്ന് ആവശ്യപ്പെട്ട് യൂത്ത് കോൺഗ്രസ് മണ്ഡലം ഭാരവാഹികൾ റെയിൽവേ സ്റ്റേഷൻ മാസ്റ്റർക്ക് നിവേദനം നൽകി. പകർച്ചാവ്യാധികൾ പടരുന്ന ഈ സമയത്തും അങ്കമാലി റെയിൽവേ സ്റ്റേഷൻ പരിസരത്ത് ചെന്നാൽ എങ്ങും മാലിന്യങ്ങൾ നിറഞ്ഞ് കിടക്കുകയാണ്. പ്ലാസ്റ്റിക് കവറുകളും, ചായ ഗ്ലാസുകൾ കൊണ്ടും റെയിൽവേട്രാക്കും പരിസരങ്ങളും നിറഞ്ഞു കിടക്കുകയും വെള്ളം കെട്ടിക്കിടന്ന് കൊതുകുകൾ പെരുകയും ചെയ്യുന്ന സാഹചര്യം ഉള്ളതിനാൽ ഈ പ്രദേശത്ത് മഴക്കാല ശുചീകരണ പ്രവർത്തനങ്ങൾ നടത്തണമെന്ന് യൂത്ത് കോൺഗ്രസ് പ്രിസിഡന്‍റ് റിൻസ് ജോസ് ആവശ്യപ്പെട്ടു.

വിദ്യാഭ്യാസ പുരസ്കാര വിതരണം

പെരുമ്പാവൂർ: കൂവപ്പടി സർവീസ് സഹകരണ ബാങ്കിന്‍റെ ആഭിമുഖ്യത്തിൽ എസ്എസ്എൽസി, പ്ലസ്ടു പരീക്ഷകളിൽ എല്ലാ വിഷയങ്ങൾക്കും എ പ്ലസ് കരസ്ഥമാക്കിയ സഹകാരികളുടെ മക്കൾക്ക് പുരസ്കാരങ്ങൾ വിതരണം ചെയ്തു. ഉന്നത വിദ്യാഭ്യാസ മേഖലയിൽ മികച്ച നേട്ടങ്ങൾ കൈവരിച്ച വരെയും ചടങ്ങിൽ ആദരിച്ചു. ബാങ്ക് പ്രസിഡന്‍റ് തോമസ് പൊട്ടോളിയുടെ അധ്യക്ഷതയിൽ ചേർന്ന യോഗം എൽദോസ് കുന്നപ്പിള്ളി എംഎൽഎ ഉദ്ഘാടനം ചെയ്തു. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ, പഞ്ചായത്ത് പ്രസിഡന്‍റ് മായ കൃഷ്ണകുമാർ, വൈസ് പ്രസിഡന്‍റ് എം.ഒ. ജോസ്, ബ്ലോക്ക് പഞ്ചായത്തംഗം മോളി തോമസ്, പഞ്ചായത്തംഗങ്ങൾ, ബാങ്ക് ഭരണ സമിതിയംഗങ്ങൾ തുടങ്ങിയവർ സംസാരിച്ചു.

തിരുനാൾ:വിശുദ്ധ ഡോൺ ബോസ്കോ പള്ളിയിൽ

പറവൂർ: പറവൂർ വിശുദ്ധ ഡോൺ ബോസ്കോ പള്ളിയിൽ തിരുഹൃദയ തിരുനാൾ 27 മുതൽ 29 വരെ തീയതികളിൽ ആഘോഷിക്കും. 27ന് രാവിലെ 6.30ന് ദിവ്യബലി നൊവേന ആരാധന.10.15ന് കൊടിയേറ്റം തുടർന്ന് പൊന്തിഫിക്കൽ ദിവ്യബലിക്ക് വരാപ്പുഴ രൂപത സഹായ മെത്രാൻ ഡോ. ആന്‍റണി വാലുങ്കൽ മുഖ്യകാർമികത്വം വഹിക്കും. വൈകിട്ട് 5നും, 6.30 നും ദിവ്യബലി, നൊവേന, ആരാധന. 28ന് രാവിലെ 6.30ന് ദിവ്യബലി നിത്യസഹായ മാതാവിന്‍റെ നൊവേന, വൈകിട്ട് 5 30ന് ദിവ്യബലി, നൊവേന, ആരാധന. കോട്ടപ്പുറം രൂപത വികാരി ജനറൽ മോൺ. റോക്കി റോബിൻ കളത്തിൽ മുഖ്യകാർമികനാകും. 29ന് ഊട്ടുതിരുനാൾ ദിനം. രാവിലെ 6 30ന് ദിവ്യബലി, നൊവേന, ആരാധന. മുഖ്യകാർമികൻ ഫാ. ക്ലോഡിൻ ബിവേര. 9ന് പ്രസുദേന്തി വാഴ്ച. 10.15ന് ഊട്ടുസദ്യ ആശിർവാദം 10.30ന് പൊന്തിഫിക്കൽ ദിവ്യബലിക്ക് കോട്ടപ്പുറം രൂപത ബിഷപ് ഡോ. അംബ്രോസ് പുത്തൻവീട്ടിൽ മുഖ്യകാർമികനാകും. ജൂലൈ 4നാണ് എട്ടാമിടം. പത്രസമ്മേളനത്തിൽ വികാരി ഫാ. പ്രിൻസ് പടമാട്ടുമ്മൽ സഹവികാരി ഫാ. ബിയോൺ കോണത്ത് ജനറൽ കൺവീനർ നെൽസൺ തട്ടാരശേരി തുടങ്ങിയവർ പങ്കെടുത്തു.

രണ്ടാഴ്ചയ്ക്കിടെ രണ്ടാമതും കാട്ടാനക്കൂട്ടം കൃഷി നശിപ്പിച്ചു

കോതമംഗലം: കീരംപാറ പഞ്ചായത്തിൽ രണ്ടാഴ്ചക്കിടെ രണ്ടാമതും കാട്ടാനക്കൂട്ടമിറങ്ങി വ്യാപകമായി കൃഷി നശിപ്പിച്ചു. അഞ്ചാം വാർഡ് ചീക്കോട് തെക്കേച്ചാൽ ഭാഗത്ത് നെടുങ്കല്ലേൽ ജോർജിന്‍റെ പുരയിടത്തിൽ കയറിയ കാട്ടാനക്കൂട്ടം പൈനാപ്പിൾ, കവുങ്ങ് തുടങ്ങിയ കൃഷികളാണ് നശിപ്പിച്ചത്. രണ്ടാഴ്ചയ്ക്കുള്ളിൽ രണ്ടു തവണയാണ് ആനക്കൂട്ടം ഇവിടെ കൃഷി നശിപ്പിക്കുന്നത്. മുന്പെങ്ങും ഈ പ്രദേശത്ത് കാട്ടാനകൾ എത്തിയിട്ടില്ല. ജനവാസമേഖലയിൽ വന്യജീവികളെത്തി മനുഷ്യ ജീവനു ഭീഷണി ഉയർത്തുന്നതും കൃഷി നശിപ്പിക്കുന്നതും പതിവായത് ജനങ്ങളിൽ ആശങ്ക പരത്തിയിട്ടുണ്ട്. തടിക്കുളം ഫോറസ്റ്റ് സ്റ്റേഷൻ പരിധിയിൽ ആന വാച്ചർമാരോ ആർആർടി സംഘമോ ഇല്ലാത്തതാണ് ആനകൾ കൃഷിയിടത്തിൽ ഇറങ്ങുന്നത് തടയാൻ കഴിയാത്തതെന്ന് സ്ഥലം സന്ദർശിച്ച ജനപ്രതിനിധികളും കർഷകരും ചൂണ്ടിക്കാട്ടി. ജനങ്ങളെ വന്യജീവി ആക്രമണങ്ങളിൽനിന്ന് സംരക്ഷിക്കാൻ സർക്കാർ ഇടപെടണമെന്ന് കീരംപാറ പഞ്ചായത്ത് പ്രസിഡന്‍റ് ഗോപി മുട്ടത്ത് ആവശ്യപ്പെട്ടു.

കുടുംബത്തെ പണിതുയർത്താൻ ശ്രമിക്കണം: മാർ മഠത്തിക്കണ്ടത്തിൽ

മൂവാറ്റുപുഴ: വൈധവ്യത്തിന്‍റെ ഓർമകളിൽ ജീവിതത്തെ തളച്ചിടാതെ കുടുംബത്തെ പണിതുയർത്താനും സഭയോട് ചേർന്ന് ദൈവരാജ്യ നിർമിതിക്കായി പ്രവർത്തിക്കാനും തയാറാകണമെന്ന് കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ. കോതമംഗലം രൂപത യൂദിത്ത് നവോമി ഫോറത്തിന്‍റെ ആഭിമുഖ്യത്തിൽ ലോക വിധവ ദിനത്തോടനുബന്ധിച്ച് മൂവാറ്റുപുഴ നെസ്റ്റ് പാസ്റ്ററൽ സെന്‍ററിൽ നടന്ന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. രൂപത ഡയറക്ടർ റവ.ഡോ. ആന്‍റണി പുത്തൻകുളം അധ്യക്ഷത വഹിച്ചു. നഗരസഭാംഗം ജോയിസ് മേരി ആന്‍റണി മുഖ്യപ്രഭാഷണം നടത്തി. മൂവാറ്റുപുഴ ഹോളി മാഗി ഫൊറോന പള്ളി വികാരി റവ.ഡോ. മാനുവൽ പിച്ചളക്കാട്ട് അനുഗ്രഹ പ്രഭാഷണം നടത്തി. യൂദിത്ത് നവോമി കെസിബിസി ജനറൽ സെക്രട്ടറി മേരി ജോണ്‍ മാർഗരേഖ പ്രകാശനം ചെയ്തു. മാതൃവേദി രൂപത പ്രസിഡന്‍റ് ജാൻസി മാത്യു, രൂപത അനിമേറ്റർ സിസ്റ്റർ കാരുണ്യ, രൂപത വൈസ് പ്രസിഡന്‍റ് ലിസി സെബാസ്റ്റ്യൻ, മിനി മാനുവൽ ജൂഡി, ജെസി ജെയിംസ്, ഷീജ റെന്നി എന്നിവർ പ്രസംഗിച്ചു. ചടങ്ങിൽ വിവിധ മത്സരങ്ങളിൽ വിജയികളായവർക്ക് സമ്മാനങ്ങളും വിതരണം ചെയ്തു. തുടർന്നു കലാപരിപാടികളും അരങ്ങേറി.

അയ്യങ്കാളിയുടെ പ്രതിമ അനാച്ഛാദനം 30ന്

മൂവാറ്റുപുഴ: അധസ്ഥിത ജനതയുടെ വിമോചന പോരാളിയായിരുന്ന മഹാത്മ അയ്യങ്കാളിയുടെ സ്മാരകം മൂവാറ്റുപുഴയിൽ യാഥാർഥ്യമാകുന്നു. അയ്യങ്കാളിയുടെ ശാശ്വത സ്മരണ നിലനിർത്തുന്നതിന് മൂവാറ്റുപുഴ നഗരസഭ അദ്ദേഹത്തിന്‍റെ പൂർണകായ പ്രതിമ 30ന് അനാച്ഛാദനം ചെയ്യും. പ്രതിപക്ഷ നേതാവ് വി.ഡി. സതീശൻ സ്മാരകം നാടിന് സമർപ്പിക്കും. ദളിത് പിന്നോക്ക ജനവിഭാഗങ്ങളുടെ ദീർഘകാല ആവശ്യമാണ് നിറവേറുന്നതെന്ന് നഗരസഭാധ്യക്ഷൻ പി.പി. എൽദോസ് പറഞ്ഞു. തൊടുപുഴ വെള്ളിയാമറ്റം ചാമപ്പാറയിൽ ജൂബിലന്‍റ് ഉണ്ണി എന്ന ശിൽപ്പിയാണ് ആറര അടി ഉയരമുള്ള പൂർണകായ പ്രതിമ തീർത്തിരിക്കുന്നത്. ഇതിന്‍റെ അവസാന മിനുക്കു പണിയിലാണ് ശിൽപ്പി. കന്പി, അയണ്‍ നെറ്റ്, കളിമണ്ണ്, സിമന്‍റ് തുടങ്ങിയവ ഉപയോഗിച്ച് ഒരു ടണ്‍ ഭാരം വരുന്ന പ്രതിമയാണ് നിർമിച്ചിരിക്കുന്നത്. സംസ്ഥാനത്തിന്‍റെ വിവിധ ഭാഗങ്ങളിൽ ഒട്ടേറെ ശിൽപ്പങ്ങളും കൗതുക നിർമിതികളും മഹാത്മാഗാന്ധിയടക്കം പ്രമുഖരുടെ പ്രതിമയും നിർമിച്ച് ശ്രദ്ധേയനായ കലാകാരനാണ് ജൂബിലിയന്‍റ് ഉണ്ണി. പി.ഒ ജംഗ്‌ഷനിൽ ജനറൽ ആശുപത്രിക്ക് സമീപമാണ് അയ്യങ്കാളിയുടെ പ്രതിമ സ്ഥാപിക്കുന്നത്. ഇതിനാവശ്യമായ പീഠം അടക്കമുള്ള സൗകര്യങ്ങളെല്ലാം ഒരുക്കിയിട്ടുണ്ട്. രാവിലെ 11ന് നടക്കുന്ന സമർപ്പണ സമ്മേളനത്തിൽ ഡീൻ കുര്യാക്കോസ് എംപി, എംഎൽഎമാരായ മാത്യു കുഴൽനാടൻ, പി.വി. ശ്രീനിജിൻ, അനൂപ് ജേക്കബ്, എൽദോസ് കുന്നപ്പിളളി, കെപിഎംഎസ് ജനറൽ സെക്രട്ടറി പുന്നല ശ്രീകുമാർ, നഗരഭാധ്യക്ഷൻ പി.പി. എൽദോസ്, വൈസ് ചെയർപേഴ്സണ്‍ സിനി ബിജു, ജോസ് കുര്യാക്കോസ്, അജി മുണ്ടാട്ട്, മീര കൃഷ്ണൻ, നിസ അഷറഫ്, പി.എം. അബ്ദുൾ സലാം തുടങ്ങിയവർ പങ്കെടുക്കും.

കൂറ്റൻ രാജവെമ്പാലയെ പിടികൂടി

കോതമംഗലം: ഊന്നുകൽ നമ്പൂരിക്കൂപ്പിൽ കൽക്കുരിശിന് സമീപം കണ്ടെത്തിയ കൂറ്റൻ രാജവെമ്പാലയെ പിടികൂടി. ഊന്നുകല്ലൽ നമ്പൂരിക്കുപ്പ് പള്ളിയുടെ കൽക്കുരിശിനോട് ചേർന്ന് ഇന്നലെ വൈകുന്നേരം 5.30 ഓടെയാണ് ആദ്യം രാജവെമ്പാലയെ കണ്ടത്. പള്ളിയിലെ ജീവനക്കാരനാണ് ആദ്യം പാമ്പിനെ കണ്ടത്. ആളനക്കം കേട്ടതോടെ പാമ്പ് തൊട്ടടുത്തുള്ള കൃഷിയിടത്തിലൊളിച്ചു. തുടർന്ന് വനപാലകർ വിവരമറിയിച്ചതിനെതുടർന്ന് പാമ്പുപിടുത്ത വിദഗ്‌ധൻ ജുവൽ ജൂഡി സ്ഥലത്തെത്തി അതിസാഹസികമായി പിടികൂടുകയായിരുന്നു. 13 അടിയോളം നീളമുണ്ടായിരുന്നു. പാമ്പിനെ വനം വകുപ്പിന് കൈമാറി.

തിരുമാറാടി പഞ്ചായത്ത് ഓഫീസിനു മുന്നിൽ യുഡിഎഫിന്‍റെ കുത്തിയിരിപ്പ് സമരം

തിരുമാറാടി: ജൽജീവൻ മിഷൻ പദ്ധതി പ്രദേശത്ത് ചെങ്കൽമട ആരംഭിക്കുന്നതുമായി ബന്ധപ്പെട്ട് വൻ സാന്പത്തിക ആരോപണം ഉയർന്നതിനെതിരെ തിരുമാറാടി പഞ്ചായത്ത് ഓഫീസിനു മുന്നിൽ യുഡിഎഫ് അംഗങ്ങൾ കുത്തിയിരിപ്പ് സമരം നടത്തി. ജൽജീവൻ മിഷൻ കുടിവെള്ള പദ്ധതിയുടെ ജലസംഭരണി പണിയാൻ ഉദ്ദേശിച്ചിരിക്കുന്ന മണ്ടലം മലയിൽ ചെങ്കൽമട ആരംഭിക്കുന്നതിന് 25 ലക്ഷം കൈക്കൂലിയും മട പ്രവർത്തനത്തിൽ 25 ശതമാനം ഷെയറും സിപിഐ ജില്ലാ എക്സിക്യൂട്ടീവംഗം ഡിവിൻ ദിനകരൻ ആവശ്യപ്പെട്ടെന്ന് നേതാക്കൾ ആരോപിച്ചു. 2021ൽ ആരംഭിച്ച് 2024 ഓഗസ്റ്റിൽ പൂർത്തീകരിക്കേണ്ട തിരുമാറാടിയിലെ ജൽജീവൻ മിഷൻ കുടിവെള്ള പദ്ധതി എങ്ങുമെത്താതെ നിൽക്കുകയാണ്. പദ്ധതിക്കായി ജലസംഭരണി സ്ഥാപിക്കേണ്ട മണ്ടലം മലയിലെ സ്ഥലം ഏറ്റെടുക്കാതെ വെട്ടിമൂട് എംവിഐപി വക സ്ഥലത്ത് പന്പ് ഹൗസ് സ്ഥാപിച്ചിട്ട് ഇതുവരെയായിട്ടും റവന്യൂ വകുപ്പ് നടപടി സ്വീകരിക്കാതെ നീട്ടിക്കൊണ്ടുപോവുകയാണ്. തിരുമാറാടിയിലെ ജലജീവൻ മിഷൻ കുടിവെള്ള പദ്ധതിയുമായി ബന്ധപ്പെട്ട് വൻ സാന്പത്തിക ആരോപണം ഉയർന്നിരിക്കുന്ന സാഹചര്യത്തിൽ വിഷയം പഞ്ചായത്ത് കമ്മിറ്റിയിൽ അടിയന്തരമായി ചർച്ച ചെയ്യണമെന്ന് ആവശ്യപ്പെട്ട് പ്രതിപക്ഷ യുഡിഎഫ് പഞ്ചായത്തംഗങ്ങളായ അനിത ബേബി, നെവിൻ ജോർജ്, എം.സി. അജി, ബീന ഏലിയാസ്, ആതിര സുമേഷ്, സുനി ജോണ്‍സണ്‍ എന്നിവർ പഞ്ചായത്ത് സെക്രട്ടറിക്ക് കത്ത് നൽകി.

എന്‍റെ നാട് പെയ്ൻ ആന്‍ഡ് പാലിയേറ്റീവ് കെയർ വാർഷികം

കോതമംഗലം: എന്‍റെ നാട് പെയ്ൻ ആന്‍ഡ് പാലിയേറ്റീവ് കെയർ ട്രസ്റ്റ് രണ്ടാം വാർഷികം ഏലിയാസ് മാർ അത്തനാസിയോസ് മെത്രാപ്പോലീത്ത ഉദ്ഘാടനം ചെയ്തു. എന്‍റെ നാട് ചെയർമാൻ ഷിബു തെക്കുംപുറം അധ്യക്ഷത വഹിച്ചു. അംഗത്വ കാന്പയിൻ ഉദ്ഘാടനം ധർമഗിരി ആശുപത്രി അഡ്മിനിസ്ട്രേറ്റർ സിസ്റ്റർ ജോസ്മിൻ നിർവഹിച്ചു. മാർത്തോമ ചെറിയ പള്ളി ട്രസ്റ്റി കെ.കെ. ജോസഫ് മുഖ്യാതിഥിയായിരുന്നു. സണ്ണി വർക്കി, എൽസി ജോസഫ്, എം.എം. അബ്ദുറഹ്മാൻ, എം.കെ. സുകു, ഷിബു കുര്യാക്കോസ്, പ്രഫ. കെ.എം. കുര്യാക്കോസ്, ബാബു ഏലിയാസ്, സി.കെ. സത്യൻ, ജോഷി പൊട്ടയ്ക്കൽ, കെ.പി. കുര്യാക്കോസ്, ജോർജ് അന്പാട്ട്, സി.ജെ. എൽദോസ്, ജോഷി കുര്യാക്കോസ്, പി.എ. പാദുഷ, ജെയിംസ് കോറന്പേൽ എന്നിവർ പ്രസംഗിച്ചു.

തെരുവുനായ ശല്യത്തിൽ പ്രതിഷേധം

പിറവം: പിറവത്ത് തെരുവുനായ്ക്കളുടെ ശല്യം വ്യാപകമായ സംഭവത്തിൽ കേരള പ്രദേശ് ഗാന്ധി ദർശൻ വേദി പിറവം ബ്ലോക്ക് കമ്മിറ്റി പ്രതിഷേധിച്ചു. കഴിഞ്ഞ രണ്ടു ദിവസങ്ങളിലായുണ്ടായ തെരുവ് നായ്ക്കളുടെ ആക്രമണത്തിൽ നാലു പേർക്ക് പരിക്കേറ്റിരുന്നു. പരിക്കേറ്റവർക്ക് അടിയന്തരമായി നഷ്ടപരിഹാരം നൽകുന്നതിനു തയാറാകണം. നായ കടിച്ചാൽ വാക്സിനേഷൻ സൗകര്യം പിറവം, മൂവാറ്റുപുഴ താലൂക്ക് ആശുപത്രികളിൽ ഇല്ല. ഇവിടങ്ങളിലെ ആശുപത്രികളിൽ വാക്സിൻ ലഭ്യമാക്കാനുള്ള നടപടി സ്വീകരിക്കണമെന്നും യോഗം ആവശ്യപ്പെട്ടു. യോഗത്തിന്‍റെ ഉദ്ഘാടനം പിറവം യുഡിഎഫ് ചെയർമാൻ ഷാജു ഇലഞ്ഞിമറ്റം നിർവഹിച്ചു. ചെയർമാൻ പ്രശാന്ത് പ്രഹ്ലാദ് അധ്യക്ഷത വഹിച്ചു.

പിറവം സ്കൂൾ രണ്ടാംഘട്ട നിർമാണം ആരംഭിക്കുന്നു

പിറവം: ഗവ. ഹയര്‍സെക്കന്‍ഡറി സ്കൂളിന്‍റെ രണ്ടാംഘട്ട നിര്‍മാണ പ്രവർത്തനങ്ങൾ അടിയന്തരമായി പൂര്‍ത്തിയാക്കുന്നതിനായി അനൂപ്‌ ജേക്കബ്‌ എംഎല്‍എയുടെ അധ്യക്ഷതയില്‍ യോഗം ചേര്‍ന്നു. ഒരു മാസത്തിനുള്ളില്‍ നിര്‍മാണ പ്രവൃത്തികള്‍ ആരംഭിക്കാന്‍ എംഎല്‍എ നിര്‍ദേശം നല്‍കിയിട്ടുണ്ട്. നാല് ക്ലാസ് റൂം, ലൈബ്രറി, റീഡിംഗ് റൂം, സ്റ്റാഫ് റൂം ഉള്‍പ്പെടെയുള്ളവയാണ് രണ്ടാംഘട്ട പദ്ധതിയിൽ ഉള്‍പ്പെടുന്നത്. ഡെപ്പോസിറ്റ് വര്‍ക്ക് ആയി ഏറ്റെടുത്ത് അക്രഡിറ്റഡ് ഏജന്‍സിയെകൊണ്ട് നിര്‍മാണം പൂര്‍ത്തിയാക്കാമെന്ന് കൈറ്റ് ഉദ്യോഗസ്ഥര്‍ യോഗത്തില്‍ അറിയിച്ചു.

മികവ് പുലർത്തി എംബിറ്റ്സ് കോളജ്

കോതമംഗലം: സ്റ്റേറ്റ് ബോർഡ് ഓഫ് ടെക്നിക്കൽ എഡ്യൂക്കേഷൻ 2025 ഏപ്രിലിൽ നടത്തിയ ഡിപ്ലോമ പരീക്ഷയിൽ എംബിറ്റ്സ് കോളജിൽ നിലവിലുള്ള എല്ലാ പോളിടെക്നിക് ബാച്ചുകളിലൂടെയും ഓവറോൾ റിസൾട്ടിൽ എറണാകുളം ജില്ലയിൽ ഒന്നാമത് എത്തിയതായി പ്രിൻസിപ്പൽ അറിയിച്ചു. ഇലക്ട്രിക്കൽ ആന്‍ഡ് ഇലക്ട്രോണിക്സ് വിഭാഗത്തിൽ സംസ്ഥാന തലത്തിൽ മൂന്നാമത് എത്താനും എംബിറ്റ്സ് പോളിടെക്നിക് കോളജിന് സാധിച്ചു. അധ്യാപകരുടെയും വിദ്യാർഥികളുടെയും കൂട്ടായ ശ്രമഫലവും നൈറ്റ് സ്റ്റഡി ഉൾപ്പടെയുള്ള പ്രവർത്തനങ്ങളിലൂടെയാണ് ഈ നേട്ടം കൈവരിക്കാൻ സാധിച്ചതെന്നു പ്രിൻസിപ്പൽ അറിയിച്ചു. അഭിമാനനേട്ടത്തിൽ ജീവനക്കാരും വിദ്യാർഥികളും പരസ്പരം മധുരം പങ്കുവച്ചു.

നവാഗതരെ സ്വീകരിച്ച് നിർമല കോളജ്

മൂവാറ്റുപുഴ: നവാഗതരായ വിദ്യാർഥികൾക്ക് സ്വീകരണം ഒരുക്കി നിർമല കോളജ്. 2025 അധ്യയന വർഷത്തിൽ വിവിധ പിജി കോഴ്സുകളിലേക്ക് അഡ്മിഷനെടുത്ത വിദ്യാർഥികളുടെ പ്രവേശനോത്സവം വിവിധ പരിപാടികളോടെ നടത്തി. ദീക്ഷാരംഭ് എന്ന പേരിൽ കോളജ് ഓഡിറ്റോറിയത്തിൽ നടത്തിയ പരിപാടി മഹാത്മാഗാന്ധി സർവകലാശാല പ്രഫ. എം.എച്ച്. ഇല്ല്യാസ് ഉദ്ഘാടനം ചെയ്തു. മുഴുവൻ വിദ്യാർഥികൾക്കും ചന്ദന തൈകൾ നൽകിയാണ് അധ്യാപകർ വിദ്യാർഥികളെ വരവേറ്റത്. വിതരണം ചെയ്ത ചന്ദന തൈകൾ വിദ്യാർഥികളും അധ്യാപകരും ചേർന്ന് വകുപ്പടിസ്ഥാനത്തിൽ ക്യാന്പസിന്‍റെ വിവിധ ഇടങ്ങളിൽ ചന്ദനോദ്യാനം നിർമിക്കും. വിവിധ പിജി പ്രോഗ്രാമുകളിലായി 200ൽപ്പരം വിദ്യാർഥികളാണ് കോളജിൽ പ്രവേശനം നേടിയത്. രണ്ട് ദിവസങ്ങളിലായി നടക്കുന്ന ദീക്ഷാരംഭിൽ കരിക്കുലം അവതരണം, പൂർവ വിദ്യാർഥികളുമായി സംവാദം, കരിയർ ഓറിയന്‍റേഷൻ, വിവിധ ട്രെയിനിംഗ് പ്രോഗ്രാമുകൾ എന്നിവയാണ് ഉൾപ്പെടുത്തിയിരിക്കുന്നത്. കേരളത്തിലെ ഉന്നത വിദ്യാഭ്യാസ സ്ഥാപനങ്ങൾ ലോകോത്തര നിലവാരമുള്ളതാണെന്നും അഭിരുചിക്കനുസരിച്ച് ശരിയായ കോഴ്സുകൾ തെരഞ്ഞെടുത്താൽ വിദേശ രാജ്യങ്ങളിൽ പോയി വഞ്ചിതരാകാതെ ഉയർന്ന ജോലി കരസ്ഥമാക്കാമെന്നും പ്രഫ. എം.എച്ച്. ഇല്ല്യാസ് പറഞ്ഞു. കോതമംഗലം രൂപത ഹയർ എഡ്യുക്കേഷൻ സെക്രട്ടറി ഫാ. പോൾ പാറത്താഴം ചടങ്ങിൽ അധ്യക്ഷത വഹിച്ചു. കോളജ് പ്രിൻസിപ്പൽ റവ.ഡോ. ജസ്റ്റിൻ കെ. കുര്യാക്കോസ്, ബർസാർ ഫാ. പോൾ കളത്തൂർ, വൈസ് പ്രിൻസിപ്പൽമാരായ സോണി കുര്യാക്കോസ്, ജിജി കെ. ജോസഫ്, അഡ്മിഷൻ നോഡൽ ഓഫീസർ മാത്യൂസ് കെ. മനയാനി എന്നിവർ പ്രസംഗിച്ചു.

തേങ്ങയിടാൻ കയറിയ തൊഴിലാളി തെങ്ങിലിരുന്ന് മരിച്ചു

കൊച്ചി: തേങ്ങ ഇടുന്നതിനിടെ ബോധരഹിതനായ തൊഴിലാളി തെങ്ങുകയറ്റയന്ത്രത്തിലിരുന്ന് മരിച്ചു. വരാപ്പുഴ മുട്ടിനകം മാട്ടുമ്മപറമ്പില്‍ ഉണ്ണികൃഷ്ണനാണ് (49) മരിച്ചത്. ഇന്നലെ രാവിലെയായിരുന്നു സംഭവം. എളമക്കര കരുവേലിപ്പറമ്പിലെ വീട്ടുവളപ്പിലെ തെങ്ങിനുമുകളില്‍ കയറിയ ഉണ്ണിക്കൃഷ്ണന്‍ ബോധരഹിതനാകുകയും തലകീഴായി തെങ്ങുകയറ്റയന്ത്രത്തില്‍ കുടുങ്ങുകയായിരുന്നു. ഹൃദയാഘാതമാകാം മരണകാരണമെന്നാണ് പ്രാഥമിക നിഗമനം. തെങ്ങിന് മുകളിലെത്തിയ ഉണ്ണിക്കൃഷ്ണന്‍ ആദ്യം ഓല വെട്ടി താഴെയിട്ടിരുന്നു. പിന്നീട് ശബ്ദം ഒന്നും കേൾക്കാതായതോടെ വീട്ടുകാര്‍ പുറത്തിറങ്ങി നോക്കിയപ്പോഴാണ് ഉണ്ണിക്കൃഷ്ണന്‍ മുകളില്‍ തൂങ്ങിക്കിടക്കുന്നത് കണ്ടത്. വിവരമറിയിച്ചതിനെ തുടർന്ന് അഗ്‌നി രക്ഷാസേനയെത്തി നാലു മണിക്കൂര്‍ നേരത്തെ ശ്രമത്തിനൊടുവിലാണ് ഉണ്ണിക്കൃഷ്ണനെ താഴെയിറക്കിയത്. ഉടൻ ആശുപത്രിയിൽ എത്തിച്ചെങ്കിലും മരിച്ചിരുന്നു.

തുമ്പിച്ചാലിലെ താമരക്കൃഷിക്ക് ഭീഷണിയായി രാസമാലിന്യം

ആലുവ: പ്രകൃതി രമണീയമായ തുമ്പിച്ചാൽ തടാകത്തിലേക്ക് മഴക്കാലം മറയാക്കി നാലാം മൈൽ വ്യവസായ മേഖലകളിൽനിന്ന് രാസമാലിന്യം ഒഴുകുന്നതായി പരാതി. തുമ്പിച്ചാലിൽ നിന്നുള്ള വെള്ളത്തിൽ കൈയും കാലും കഴുകുമ്പോൾ പലപ്പോഴും ശക്തമായ ചൊറിച്ചിലാണ് അനുഭവപ്പെടുന്നതെന്നാണ് ആക്ഷേപം. ഇന്നലെ ചേർന്ന കീഴ്മാട് പഞ്ചായത്ത് ആറാം വാർഡ് ഗ്രാമസഭയിലാണ് പരാതി ഉയർന്നത്. രാസമാലിന്യ മൊഴുക്കുന്നത് തടയുന്നതിന് അടിയന്തര നടപടി ഉണ്ടാവണമെന്ന് ആറാം വാർഡ് ഗ്രാമസഭ ആവശ്യപ്പെട്ടു. അടിയന്തര നടപടി ഉണ്ടാവുമെന്നും പഞ്ചായത്ത് പ്രസിഡന്‍റ് സതി ലാലു പറഞ്ഞു. 2022 ഒക്ടോബറിൽ വൻതോതിൽ മാലിന്യങ്ങൾ ഒഴുകി തുമ്പിച്ചാലിലെ മുഴുവൻ മത്സ്യങ്ങളും ചത്തുപൊങ്ങുകയും താമരക്കൃഷി അടക്കം കരിഞ്ഞ് ഉണങ്ങുകയും ചെയ്തിരുന്നു. മലിനീകരണ നിയന്ത്രണ ബോർഡിലെ ഉദ്യോഗസ്ഥർ അടക്കമുള്ളവർ വന്ന് പരിശോധിച്ചെങ്കിലും യാതൊരു നടപടിയും ഉണ്ടായില്ലെന്നും വാർഡ് യോഗത്തിൽ പങ്കെടുത്തവർ കുറ്റപ്പെടുത്തി.

പച്ചക്കറി, ചെണ്ടുമല്ലി കൃഷി ആരംഭിച്ചു

വാഴക്കുളം: ഓണം കുടുംബശ്രീയോടൊപ്പം ഓണക്കനി, നിറപ്പൊലിമ പദ്ധതികൾക്ക് ആവോലി പഞ്ചായത്തിൽ തുടക്കമായി. വിഷരഹിത പച്ചക്കറികൾ ലഭ്യമാക്കുന്നതിന് പച്ചക്കറി കൃഷിയും ഓണപ്പൂക്കളമൊരുക്കാൻ ചെണ്ടുമല്ലി കൃഷിയുമാണ് ആവോലി പഞ്ചായത്ത് കുടുംബശ്രീ സിഡിഎസിന്‍റെ നേതൃത്വത്തിൽ ജെഎൽജി കർഷകർ ആരംഭിച്ചത്. ആവോലി അമ്പലം കവലയ്ക്കു സമീപം മൂന്നേക്കറോളം വരുന്ന സ്ഥലത്താണ് പച്ചക്കറി കൃഷി ആരംഭിച്ചിട്ടുള്ളത്. ആവോലി പഞ്ചായത്ത് പ്രസിഡന്‍റ് ഷെൽമി ജോൺസ് ഉദ്ഘാടനം നിർവഹിച്ചു. ചെയർപേഴ്സൺ സ്മിത വിനു നേതൃത്വം നൽകി.

പിറവത്ത് തെരുവുനായ ആക്രമണം; ഒരാൾക്ക് പരിക്കേറ്റു

പിറവം: പിറവത്ത് വീണ്ടും തെരുവ് നായയുടെ ആക്രമണം. പാഴൂർ വടക്കില്ലത്ത് വടക്കേമന ഗോതൻ നമ്പൂതിരിപ്പാടിനെയാണ് ആക്രമിച്ചത്. ഇന്നലെ വൈകുന്നേരം വീടിന്‍റെ സിറ്റൗട്ടിൽ ഇരിക്കുമ്പോഴാണ് ആക്രമണം ഉണ്ടായത്. ഇദ്ദേഹത്തിന്‍റെ നേരെ നായ കുരച്ചു ചാടുകയായിരുന്നു. നിലത്തു വീണുപോയ നമ്പൂതിരിപ്പാടിന് കൈക്കു പൊട്ടലേറ്റു. കൂടാതെ തോളിനും കാലിനും മുറിവേറ്റു. വീട്ടിലുള്ള മറ്റ് അംഗങ്ങൾ ഓടിയെത്തിയാണ് നായയെ ഓടിച്ചത്. പിറവം താലൂക്ക് ആശുപത്രിയിൽ എത്തിച്ച അദ്ദേഹത്തെ വിദഗ്ധ ചികിത്സക്കായി മൂവാറ്റുപുഴ താലൂക്ക് ആശുപത്രിയിലേക്ക് മാറ്റി. കഴിഞ്ഞ ദിവസം പാലച്ചുവട്ടിൽ നാലോളം തെരുവ് നായ്ക്കൾ ചേർന്ന് 75കാരനെ ആക്രമിച്ചിരുന്നു. ആക്രമണത്തിനിടെ ഒരു വിരൽ അറ്റുപോവുകയും ശരീരത്തിന്‍റെ പല ഭാഗത്തും കടിയേറ്റ തോട്ടുപുറത്ത് ജോർജ് കോട്ടയം മെഡിക്കൽ കോളജിൽ ചികിത്സയിലാണ്. പിറവം നഗരസഭയിലെല്ലായിടത്തും തെരുവ് നായ്ക്കളെകൊണ്ട് നാട്ടുകാർ പൊറുതിമുട്ടിയിരിക്കുകയാണ്. ഇവ വളർത്തു മൃഗങ്ങളേയും ആക്രമിച്ച് കൊല്ലുകയാണ്. കുട്ടികളെ സ്കൂളിൽ വിടാൻ പോലും മാതാപിതാക്കൾക്ക് ഭയപ്പാടാണ്. പിറവം ടൗണിൽ പോലും ഓരോ ജംഗ്ഷനിലും എട്ടും പത്തും നായ്ക്കൾ വീതമാണ് തമ്പടിച്ചിരിക്കുന്നത്.

സ്വർണമാല മോഷ്ടിച്ച പ്രതി കർണാടകയിൽ പിടിയിൽ

കൂത്താട്ടുകുളം: പാലക്കുഴ സ്വദേശിയുടെ സ്വർണമാല മോഷ്ടിച്ച് കടന്നുകളഞ്ഞ പ്രതിയെ പോലീസ് കർണാടകയിൽനിന്നു പിടികൂടി. പാലക്കുഴ മംഗലത്തുപറമ്പിൽ അരുൺ സോമനെ(28)യാണ് കൂത്താട്ടുകുളം പോലീസ് കർണാടകയിലെ കുടകിൽനിന്നു പിടികൂടിയത്. പാലക്കുഴ പുന്നക്കൽ സാജു നൽകിയ പരാതിയുടെ അടിസ്ഥാനത്തിൽ മൊബൈൽ ടവർ ലൊക്കേഷൻ കേന്ദ്രീകരിച്ച് നടത്തിയ അന്വേഷണത്തിൽ അരുൺ സോമൻ കർണാടകയിലെ കുടകിൽ ഉണ്ടെന്ന് കണ്ടെത്തുകയായിരുന്നു. മേയ് 29ന് സാജുവിന്‍റെ വീട്ടിൽ സൂക്ഷിച്ചിരുന്ന നാല് പവനോളം സ്വർണമാല പ്രതി മോഷ്ടിച്ചത്. പിടിയിലായ അരുൺ കുറ്റം സമ്മതിച്ചിട്ടുണ്ട്. സാജുവിന്‍റെ വീട്ടിൽനിന്ന് മോഷ്ടിച്ച സ്വർണമാല കൂത്താട്ടുകുളം മാർക്കറ്റ് റോഡിൽ പ്രവർത്തിക്കുന്ന സ്വർണ കടയിൽ വിറ്റ് പണം വാങ്ങുകയായിരുന്നു. തുടർന്ന് മാർക്കറ്റ് റോഡിൽ തന്നെ പ്രവർത്തിക്കുന്ന മണി എക്സ്ചേഞ്ച് സെന്‍റർ വഴി പണം സ്വന്തം അക്കൗണ്ടിലേക്ക് ട്രാൻസ്ഫർ ചെയ്യുകയും ചെയ്തു. പോലീസ് നടത്തിയ അന്വേഷണത്തിൽ സ്വർണമാല വിറ്റ് ഇയാൾക്ക് രണ്ട് ലക്ഷം രൂപ ലഭിച്ചിട്ടുള്ളതായും ഈ തുകയിൽനിന്നു 60,000 രൂപ വിനിയോഗിച്ച് കാർ വാങ്ങിയിട്ടുള്ളതായും കണ്ടെത്തി. ബാക്കി തുക അരുൺ ആഡംബര ജീവിതത്തിനായി ഉപയോഗിക്കുകയായിരുന്നു. സാജുവിന്‍റെ വീടിനു മുകളിൽ ഭക്ഷണ സാധനങ്ങൾ ഉണ്ടാക്കി വിൽക്കുന്ന യൂണിറ്റിൽ താൽക്കാലിക ജോലിക്ക് എത്തിയതായിരുന്നു അരുൺ. പ്രതിയെ കോടതിയിൽ ഹാജരാക്കി റിമാൻഡ് ചെയ്യും. 2023ൽ വാഹന മോഷണക്കേസിൽ കൂട്ടുപ്രതി ഇയാൾ.

വടകര സെന്‍റ് ജോൺസ് കത്തോലിക്കാ പള്ളിയിൽ തിരുനാളിന് കൊടിയേറി

കൂത്താട്ടുകുളം: വടകര സെന്‍റ് ജോൺസ് കത്തോലിക്കാ പള്ളിയിൽ വിശുദ്ധ യോഹന്നാൻ മാംദാനയുടെ ജനന തിരുനാളിന് വികാരി ഫാ.ജോൺ പുതിയാമറ്റം കൊടിയേറ്റി. ഇന്നു മുതൽ 24 വരെയാണ് തിരുനാൾ ആഘോഷിക്കുന്നത്. നാളെ രാവിലെ 6.30ന് കുർബാന, വൈകുന്നേരം നാലിനു വിശുദ്ധ രൂപം പൊതുവണക്കത്തിനായി പ്രതിഷ്ഠിക്കും, അഞ്ചിനു കുർബാന, നൊവേന, വൈകുന്നേരം 6.30 നു പ്രദക്ഷിണം, ആശിർവാദം. 24ന് രാവിലെ 6.30 നു കുർബാന, 10 നു തിരുനാൾ കുർബാന, സന്ദേശം, ഉച്ചയ്ക്ക് 12നു പ്രദക്ഷിണം, ആശിർവാദം, 12.45 നു ഊട്ടുനേർച്ചയോടെ തിരുനാൾ ആഘോഷങ്ങൾ സമാപിക്കുമെന്ന് ഫാ. ജോൺ പുതിയാമറ്റം, സഹവികാരി ഫാ.മാത്യു പനങ്ങാട്ട് എന്നിവർ അറിയിച്ചു.

അറ്റകുറ്റപ്പണികൾ പൂർത്തിയാക്കി; നഗരസഭാ പൊതുശ്മശാനം പൂർണസജ്ജം

മൂവാറ്റുപുഴ: അറ്റകുറ്റപ്പണികൾക്കായി അടച്ച മൂവാറ്റുപുഴ നഗരസഭ പൊതുശ്മശാനം പൂർണ പ്രവർത്തന സജ്ജമാക്കി തുറന്നു നൽകിയതായി നഗരസഭ ചെയർമാൻ പി.പി. എൽദോസ്. നഗരസഭയുടെ തനതു ഫണ്ടില്‍നിന്നു 3,95,000 രൂപ ചെലവഴിച്ചാണ് നഗരസഭ ക്രിമറ്റോറിയം വീണ്ടും പ്രവര്‍ത്തന സജ്ജമാക്കിയതെന്നും ചെയർമാൻ വ്യക്തമാക്കി. ഇന്നലെ ഇവിടെ ഒരു മൃതദേഹം സംസ്കരിച്ചു. ഒരേ ദിവസം ഒന്നിലധികം സംസ്ക്കാരം നടത്താൻ കഴിയുന്ന വിധമാണ് ക്രിമറ്റോറിയം സജ്ജീകരിച്ചിരിക്കുന്നത്. നഗരസഭാ ക്രിമറ്റോറിയം അനിവാര്യ അറ്റകുറ്റപ്പണികള്‍ക്കായി കഴിഞ്ഞ മേയ്‌ രണ്ടിനാണ് താത്കാലികമായി പ്രവര്‍ത്തനം നിര്‍ത്തിവച്ചത്. കാലപ്പഴക്കത്താല്‍ പ്രവര്‍ത്തന രഹിതമായ ക്രിമറ്റോറിയത്തിന്‍റെ സ്ക്രബിംഗ് ടാങ്ക് പുനര്‍നിര്‍മിച്ചു. സ്ക്രബിംഗ് ടാങ്കിന്‍റെ പ്രവര്‍ത്തനം നിലച്ചതിനെതുടര്‍ന്ന് ക്രിമേഷന്‍ ചേംബറില്‍നിന്നും വരുന്ന 1200 ഡിഗ്രി സെല്‍ഷ്യസ് വരെയുള്ള താപം നേരിട്ട് ബ്ലോവര്‍ ഫാനിലേക്ക് കടന്നത്‌ കാരണം തകരാറിലായ ബ്ലോവര്‍ ഫാനിന്‍റെ കേസിംഗ്, ബെയറിംഗ്, ഷാഫ്റ്റ് എന്നിവ മാറ്റി. ബ്ലോവര്‍ ഫാനിലേക്കുള്ള ഡക്ട്സ് പുനര്‍നിര്‍മിച്ചും അധിക താപത്താല്‍ കേടുപാട് വന്ന ക്രിമേഷന്‍ ബെഡ് അറ്റകുറ്റപ്പണികള്‍ നടത്തിയും കേടായ ഒരു ബര്‍ണര്‍ മാറ്റിവച്ചും എല്ലാ ബര്‍ണറുകളുടെയും താപ പ്രതിരോധ കവചങ്ങള്‍ പുതുക്കി പണിതുമാണ് ക്രിമറ്റോറിയം പ്രവർത്തന സജ്ജമാക്കിയത്. പൊതുശ്മശാനം താത്കാലികമായി അടച്ചത് നഗര പ്രദേശത്ത് മരിക്കുന്നവരുടെ സംസ്ക്കാരത്തിന് ചെറിയ ബുദ്ധിമുട്ടുകൾ നേരിട്ടിരുന്നു. ഇത് തിരിച്ചറിഞ്ഞ് വേഗത്തിൽ അറ്റകുറ്റപ്പണികൾ പൂർത്തിയാക്കുകയായിരുന്നുവെന്ന് ചെയർമാൻ വ്യക്തമാക്കി. മൂവാറ്റുപുഴ നഗരസഭയ്‌ക്ക് പുറമെ സമീപ പഞ്ചായത്തുകളിലെയും കൂത്താട്ടുകുളം, തൊടുപുഴ, കടയിരിപ്പ് പ്രദേശങ്ങളിലെയും ജനങ്ങൾ ഈ ക്രിമറ്റോറിയത്തെ ശവ സംസ്ക്കാരത്തിനായി ആശ്രയിക്കുന്നുണ്ട്. സ്ഥലപരിമിതി മൂലം വീട്ടു വളപ്പുകളിൽ മൃതദേഹങ്ങൾ സംസ്കരിക്കാൻ കഴിയാത്തവർക്ക് ആശ്വാസമാകുന്നതാണ് മൂവാറ്റുപുഴ നഗരസഭ പൊതു ശ്മശാനം.

തൃപ്പൂണിത്തുറ റെയിൽവെ സ്റ്റേഷനെ എറണാകുളത്തിന്‍റെ കിഴക്കൻ കവാടമാക്കും: ഹൈബി ഈഡൻ എംപി

തൃപ്പൂണിത്തുറ: തൃപ്പൂണിത്തുറ റെയിൽവെ സ്റ്റേഷനെ എറണാകുളത്തിന്‍റെ കിഴക്കൻ കവാടമായി വികസിപ്പിക്കുമെന്ന് ഹൈബി ഈഡൻ എംപി. ട്രുറയുടെ നേതൃത്വത്തിൽ നടന്ന സായാഹ്ന പ്രതിഷേധ ധർണ ഉദ്ഘാടനം ചെയ്തു കൊണ്ട് പ്രസംഗിക്കുകയായിരുന്നു അദ്ദേഹം. അമൃതഭാരത് പദ്ധതിയുടെ ഭാഗമായി 4.75 കോടി രൂപയുടെ പ്രവർത്തനങ്ങൾ പൂർത്തിയാക്കുമെന്നും രണ്ടാം പ്ലാറ്റ്ഫോമിന്‍റെ പുനരുദ്ധാരണവും ലിഫ്റ്റ് സ്ഥാപിക്കലുമടക്കമുള്ള ബാക്കി പ്രവർത്തനങ്ങൾ കൂടി ഉടൻ നടപ്പാക്കുമെന്നും എംപി പറഞ്ഞു. ട്രുറ ചെയർമാൻ വി.പി. പ്രസാദ് അധ്യക്ഷത വഹിച്ചു. കെ. ബാബു എംഎൽഎ, വി.സി. ജയേന്ദ്രൻ, അംബികാ സോമൻ, എസ്.കെ. ജോയി, എം. സന്തോഷ്കുമാർ, എം. രവി, സേതുമാധവൻ മൂലേടത്ത് തുടങ്ങിയവർ പ്രസംഗിച്ചു. അന്യായമായ പാർക്കിംഗ് ഫീസ് വർധന പിൻവലിക്കുക, ദീർഘദൂര ട്രെയിനുകൾക്ക് സ്റ്റോപ്പനുവദിക്കുക, ടിക്കറ്റ് കൗണ്ടറിൽ കൂടുതൽ സ്റ്റാഫിനെ നിയമിക്കുക, മുഴുവൻ സമയവും ആർപിഎഫ് സംവിധാനം ഏർപ്പെടുത്തുക. പ്രീപെയ്ഡ് ഓട്ടോ സംവിധാനം ഏർപ്പെടുത്തുക തുടങ്ങിയ ആവശ്യങ്ങൾ ഉന്നയിച്ചു കൊണ്ടായിരുന്നു ധർണ.

കുട്ടികളുടെ കൈയെഴുത്ത് മാസിക പ്രകാശനം ചെയ്തു

നെടുമ്പാശേരി: പാറക്കടവ് ബ്ലോക്ക് പഞ്ചായത്തിന്‍റെ ബാലസൗഹൃദ പദ്ധതിയുടെ ഭാഗമായി അങ്കണവാടികൾ കേന്ദ്രീകരിച്ചു നടത്തിയ ലഹരി വിരുദ്ധ പ്രവർത്തനങ്ങളുടെ ഭാഗമായി കുട്ടികളുടെ സർഗ സൃഷ്ടികൾ ഉൾപ്പെടുത്തിക്കൊണ്ട് കൈയെഴുത്ത് മാസിക പ്രകാശനവും പോസ്റ്റർ പ്രദർശനവും സംഘടിപ്പിച്ചു. പരിപാടിയുടെ ഉദ്ഘാടനം ബ്ലോക്ക് പഞ്ചായത്ത് പ്രസിഡന്‍റ് ടി.വി. പ്രദീഷ് നിർവഹിച്ചു. വൈസ് പ്രസിഡന്‍റ് താര സജീവ് അധ്യക്ഷയായിരുന്നു. സ്ഥിരം സമിതി അധ്യക്ഷരായ സി.എം. വർഗീസ്, ആനി കുഞ്ഞുമോൻ,ബ്ലോക്ക് മെമ്പർമാരായ അമ്പിളി ഗോപി, അമ്പിളി അശോകൻ, റൈജി സിജോ, എന്നിവർ സംസാരിച്ചു. ബ്ലോക്ക് തലത്തിൽ നടത്തിയ ലഹരിവിരുദ്ധ പോസ്റ്റർ രചന മത്സരത്തിന്‍റെ സമ്മാനദാനം ചടങ്ങിൽ നടത്തി. പോസിറ്റീവ് പാരന്‍റിംഗ് എന്ന വിഷയത്തെ ആസ്പദമാക്കി ബ്ലോക്ക് ശിശുവികസന ഓഫീസർ ഗീതാഞ്ജലി ക്ലാസ് എടുത്തു. കമ്യൂണിറ്റി വിമൻസ് ഫെസിലിറ്റേറ്റർ അലീഷ ജോർജ്, ബ്ലോക്ക് പഞ്ചായത്ത് സെക്രട്ടറി ഇൻ ചാർജ് സജി അഗസ്റ്റിൻ എന്നിവർ സംസാരിച്ചു. കൈയെഴുത്തു മാസികക്കായി രചനകൾ തയാറാക്കിയ കുട്ടികളും അവരുടെ മാതാപിതാക്കളും പരിപാടിയിൽ പങ്കെടുത്തു.

രാജഗിരി വിശ്വജ്യോതി കോളജിൽ ദേശീയ സെമിനാറിനു തുടക്കമായി

പെരുമ്പാവൂർ: വേങ്ങൂർ രാജഗിരി വിശ്വജ്യോതി കോളേജും ഐകെഎസ് റിസർച്ച് ഇനീഷ്യേറ്റീവ് ഓഫ് പിവൈആർടിസിയും സംയുക്തമായി "ഇന്ത്യൻ സൈക്കോളജിയും യോഗയും" എന്ന വിഷയത്തിൽ സംഘടിപ്പിച്ച ത്രിദിന സെമിനാർ ഗവർണർ രാജേന്ദ്ര വിശ്വനാഥ ആർലേക്കർ ഉദ്ഘാടനം ചെയ്തു. ചടങ്ങിൽ രാജഗിരി വിശ്വജ്യോതി കോളജ് അസോസിയേറ്റ് ഡയറക്ടർ ഫാ. ഡിബിൻ കരിങ്ങേൻ, എ.പി.ജെ. അബ്ദുൽ കലാം ടെക്നോളജിക്കൽ യൂണിവേഴ്സിറ്റി വൈസ് ചാൻസലർ ഡോ. കെ. ശിവപ്രസാദ്, പിവൈആർടിസി റിസർച്ച് ഡയറക്ടർ ഡോ. മേഘ ജോബി, പ്രജ്ഞ പ്രവാഹ് നാഷണൽ കൺവീനർ ജെ. നന്ദകുമാർ, പിവൈആർടിസി പ്രസിഡന്‍റ് ഡോ. എ. രാധാകൃഷ്ണൻ, അഡ്വ. സുന്ദരൻ ഗോവിന്ദ്, ജി.ബി. ദിനചന്ദ്രൻ, ഡോ. കെ. ശിവപ്രസാദ് എന്നിവർ സംസാരിച്ചു. ചടങ്ങിൽ റവ. ഡോ. അഗസ്റ്റിൻ തോട്ടക്കരയ്ക്ക് ജ്ഞാന ശ്രേഷ്ഠ പുരസ്കാരവും, ഡോ. എം.ഐ. ജോസഫിന് ഭാരതീയ മനോവിജ്ഞാൻ വിഭൂഷൻ പുരസ്കാരവും നൽകി ആദരിച്ചു. രാജഗിരി വിശ്വജ്യോതി കോളജിൽ ദേശീയ സെമിനാറിനു തുടക്കമായി പെരുമ്പാവൂർ: വേങ്ങൂർ രാജഗിരി വിശ്വജ്യോതി കോളേജും ഐകെഎസ് റിസർച്ച് ഇനീഷ്യേറ്റീവ് ഓഫ് പിവൈആർടിസിയും സംയുക്തമായി "ഇന്ത്യൻ സൈക്കോളജിയും യോഗയും" എന്ന വിഷയത്തിൽ സംഘടിപ്പിച്ച ത്രിദിന സെമിനാർ ഗവർണർ രാജേന്ദ്ര വിശ്വനാഥ ആർലേക്കർ ഉദ്ഘാടനം ചെയ്തു. ചടങ്ങിൽ രാജഗിരി വിശ്വജ്യോതി കോളജ് അസോസിയേറ്റ് ഡയറക്ടർ ഫാ. ഡിബിൻ കരിങ്ങേൻ, എ.പി.ജെ. അബ്ദുൽ കലാം ടെക്നോളജിക്കൽ യൂണിവേഴ്സിറ്റി വൈസ് ചാൻസലർ ഡോ. കെ. ശിവപ്രസാദ്, പിവൈആർടിസി റിസർച്ച് ഡയറക്ടർ ഡോ. മേഘ ജോബി, പ്രജ്ഞ പ്രവാഹ് നാഷണൽ കൺവീനർ ജെ. നന്ദകുമാർ, പിവൈആർടിസി പ്രസിഡന്‍റ് ഡോ. എ. രാധാകൃഷ്ണൻ, അഡ്വ. സുന്ദരൻ ഗോവിന്ദ്, ജി.ബി. ദിനചന്ദ്രൻ, ഡോ. കെ. ശിവപ്രസാദ് എന്നിവർ സംസാരിച്ചു. ചടങ്ങിൽ റവ. ഡോ. അഗസ്റ്റിൻ തോട്ടക്കരയ്ക്ക് ജ്ഞാന ശ്രേഷ്ഠ പുരസ്കാരവും, ഡോ. എം.ഐ. ജോസഫിന് ഭാരതീയ മനോവിജ്ഞാൻ വിഭൂഷൻ പുരസ്കാരവും നൽകി ആദരിച്ചു.

ഞാറ്റുവേല ആരംഭവും ഫലവൃക്ഷത്തൈ വിതരണവും

അങ്കമാലി: തുറവൂർ സെന്‍റ് അഗസ്റ്റിൻസ് ഇടവക കേന്ദ്ര സമിതിയുടെ നേതൃത്വത്തിൽ ഞാറ്റുവേല ആരംഭവും ഫലവൃക്ഷ തൈകളുടെ വിതരണവും സംയുക്തമായി സംഘടിപ്പിച്ചു. ഇടവക വൈസ് ചെയർമാൻ ജോയ് പടയാട്ടിൽ അധ്യക്ഷത വഹിച്ച സമ്മേളനത്തിൽ ഇടവക വികാരി ഫാ. ആന്‍റണി പുതിയാപറമ്പിൽ ഉദ്ഘാടനം ചെയ്തു. ചാലക്കുടി ഫോറസ്റ്റ് റേഞ്ച് ഓഫീസ് ഓഫീസർ സി.എസ്. സൗമ്യ മുഖ്യാഥിതിയായി പങ്കെടുത്തു. സഹവികാരി ഫാ. നിഖിൽ പടയാട്ടി പരിസ്ഥിതി സംരക്ഷണ പ്രതിജ്ഞ നടത്തി. ഇടവക ട്രസ്റ്റിമാരായ കുര്യൻ തളിയൻ , സിബി പാലമറ്റം , മദർ സുപ്പീരിയർ സിസ്റ്റർ ഡിവോഷ്യാ ,ഫാമിലി യൂണിയൻ സെൻട്രൽ കമ്മിറ്റി ജനറൽ സെക്രട്ടറി സിൽവി ബൈജു , ട്രഷറർ ബിജു വളപ്പിലാൻ , ജോയിന്‍റ് സെക്രട്ടറിമാരായ ബാബു വടക്കുംതല, ജെസി ജോസഫ് ചുണ്ടനായി തുടങ്ങിയവർ പ്രസംഗിച്ചു. ദിനാചരണ ഭാഗമായി ദേവാലയ പരിസരത്ത് കുടുംബ യൂണീറ്റുകളുടെ നേതൃത്വത്തിൽ ഫലവൃക്ഷ തൈകൾ നടൽ, ഇടവകയിലെകുടുംബങ്ങൾക്ക് പച്ചക്കറിത്തൈകളുടെ വിതരണം, കുടുംബ യൂണീറ്റുകളിലേക്ക് ഫലവൃക്ഷ തൈ വിതരണം എന്നിവ സംഘടിപ്പിച്ചു. ഫലവൃക്ഷ തൈകൾ നട്ട് നന്നായി പരിപാലിക്കുന്ന കുടുംബങ്ങളെ തുടർന്ന് ഇടവകയിൽ ആദരിക്കും.

വിശുദ്ധ തോമസ് മൂർ ദിന അനുസ്മരണ യോഗം സംഘടിപ്പിച്ചു

തോപ്പുംപടി: കെസിവൈഎം കൊച്ചി രൂപത വിശുദ്ധ തോമസ് മൂറിന്‍റെ അനുസ്മരണ യോഗം സംഘടിപ്പിച്ചു. കെആർഎൽസിബിസി യുവജന കമ്മീഷൻ സെക്രട്ടറി ഫാ. അനൂപ് ആന്‍റൺ അനുസ്മരണ യോഗം ഉദ്ഘാടനം ചെയ്തു. കെസിവൈഎം കൊച്ചി രൂപത പ്രസിഡന്‍റ് ഡാനിയ ആന്‍റണി അധ്യക്ഷത വഹിച്ചു. കെസിവൈഎം കൊച്ചി രൂപത ഡയറക്ടർ ഫാ. മെൽറ്റസ് കൊല്ലശേരി ആമുഖ പ്രഭാഷണം നടത്തി. തോപ്പുംപടി സെന്‍റ് സെബാസ്റ്റ്യൻസ് പള്ളി വികാരി ഫാ. ടോമി ചമ്പക്കാട്ട്, കെസിവൈഎം മുൻ സംസ്ഥാന ജനറൽ സെക്രട്ടറി ക്രിസ്റ്റി ചക്കാലക്കൽ, കെസിവൈഎം കൊച്ചി രൂപത മുൻ ജനറൽ സെക്രട്ടറി ടോസി പൂപ്പന, കെസിവൈഎം കൊച്ചി രൂപത വൈസ് പ്രസിഡന്‍റ് ക്ലിന്‍റൺ ഫ്രാൻസിസ്, കെസിവൈഎം കൊച്ചി രൂപത എക്സിക്യൂട്ടീവ് അംഗം ബേസിൽ റിച്ചാർഡ്, സംസ്ഥാന സിൻഡിക്കേറ്റ് അംഗം അന്ന സിൽഫ, സംസ്ഥാന സെനറ്റംഗം കാസി പൂപ്പന, തോപ്പുംപടി യൂണിറ്റ് പ്രസിഡന്‍റ് സയന ഫിലോമിന എന്നിവർ സംസാരിച്ചു.

പൊട്ടിപ്പൊളിഞ്ഞ് ചെറായി ബീച്ചിലെ വാക്‌വേ

ചെറായി: കാലപ്പഴക്കത്താൽ ചെറായി ബീച്ചിലെ നടപ്പാതയിലെ ടൈലുകൾ തകർന്നു. ഇതാകട്ടെ ഇപ്പോൾ സന്ദർശകർക്ക് അപകടക്കെണിയായിരിക്കുകയാണ്. വാക് വേയുടെ തെക്കും വടക്കും ഭാഗത്തായി ഒന്നു രണ്ടിടളിലാണ് ടൈൽ ഇളകുകയും പൊട്ടിത്തകരുകയും ചെയ്തിട്ടുള്ളത്. ഇതുമൂലം വാക് വേയിലൂടെ നടന്ന് പോകുന്നവർ ഇതിൽ തട്ടി അപകടകങ്ങളും സംഭവിക്കുക പതിവാണെന്ന് നാട്ടുകാർ പറയുന്നു. എന്നാൽ പരാതികൾ ഉയർന്നിട്ടും അറ്റകുറ്റപ്പണികൾ നടത്താൻ ആളില്ല.

തുമ്പിച്ചാലിലെ താമരക്കൃഷിക്ക് ഭീഷണിയായി രാസമാലിന്യം

ആലുവ: പ്രകൃതി രമണീയമായ തുമ്പിച്ചാൽ തടാകത്തിലേക്ക് മഴക്കാലം മറയാക്കി നാലാം മൈൽ വ്യവസായ മേഖലകളിൽ നിന്ന് രാസമാലിന്യം ഒഴുകുന്നതായി പരാതി. തുമ്പിച്ചാലിൽ നിന്നുമുള്ള വെള്ളത്തിൽ കൈയും കാലും കഴുകുമ്പോൾ പലപ്പോഴും ശക്തമായ ചൊറിച്ചിലാണ് അനുഭവപ്പെടുന്നതെന്നാണ് ആക്ഷേപം. ഇന്നലെ ചേർന്ന കീഴ്മാട് ഗ്രാമപഞ്ചായത്ത് ആറാം വാർഡ് ഗ്രാമ സഭയിലാണ് പരാതി ഉയർന്നത്. രാസമാലിന്യ മൊഴുക്കുന്നത് തടയുന്നതിന് അടിയന്തര നടപടി ഉണ്ടാവണമെന് ആറാം വാർഡ് ഗ്രാമസഭ ആവശ്യപ്പെട്ടു. അടിയന്തര നടപടി ഉണ്ടാവുമെന്നും പഞ്ചായത്ത് പ്രസിഡന്‍റ് സതി ലാലു പറഞ്ഞു. 2022 ഒക്ടോബറിൽ വൻതോതിൽ മാലിന്യങ്ങൾ ഒഴുകി തുമ്പിച്ചാലിലെ മുഴുവൻ മത്സ്യങ്ങളും ചത്തുപൊങ്ങുകയും താമര കൃഷി അടക്കം കരിഞ്ഞ് ഉണങ്ങുകയും ചെയ്തിരുന്നു. മലിനീകരണ നിയന്ത്രണ ബോർഡിലെ ഉദ്യോഗസ്ഥർ അടക്കമുള്ളവർ വന്ന് പരിശോധിച്ചെങ്കിലും യാതൊരു നടപടിയും ഉണ്ടായില്ലെന്നും വാർഡ് യോഗത്തിൽ പങ്കെടുത്തവർ കുറ്റപ്പെടുത്തി.

വൈദികർക്കെതിരായ കേസ്; കണ്ണമാലിയിൽ പ്രതിഷേധ ജ്വാല

ഫോർട്ടുകൊച്ചി: കണ്ണമാലിയിലേയും ചെറിയകടവിലേയും ദുരിതമനുഭവിക്കുന്നവർക്ക് പിന്തുണ നല്കി ഉപവാസസമര നടത്തിയ വൈദികർക്കെതിരെ കള്ളക്കേസ് എടുത്ത പോലീസ് നടപടിക്കെതിരെ കണ്ണമാലി മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ പ്രതിഷേധ ജ്വാല തെളിയിച്ചു. ജില്ലാ കമ്മിറ്റി അംഗം ഷാജി കുറുപ്പശേരി ഉദ്ഘാടനം ചെയ്തു. മണ്ഡലം പ്രസിഡന്‍റ് ജോഷി ആന്‍റണി അധ്യക്ഷത വഹിച്ചു. ബ്ലോക്ക് ഭാരവാഹികളായ കെ.ജെ. ജെൽട്ടൻ, തോമസ് ആന്‍റണി, പീറ്റർ കണ്ണമാലി, സമ്മേൽ അരശേരിൽ, രാജൻ കൈതവളപ്പിൽ , സേവിയർ തോലാട്ട് തുടങ്ങിയവർ സംസാരിച്ചു.

ഭാരതമാത ലോ കോളജിൽ "ഞാറ്റുവേല' ഇഞ്ചിക്കൃഷിക്ക് തുടക്കമായി

ആലുവ: ചൂണ്ടി ഭാരതമാത സ്കൂൾ ഓഫ് ലീഗൽ സ്റ്റഡീസിൽ ഞാറ്റുവേല' എന്ന പേരിൽ ഇഞ്ചിക്കൃഷിക്ക് തുടക്കമായി. കോളജ് ഡയറക്ടറും, പ്രിൻസിപ്പൽ ഇൻ ചാർജുമായ റവ. ഡോ. ബിജു ആന്‍റണി തേയ്ക്കാനത്ത് വിത്ത് നട്ട് ഉദ്ഘാടനം ചെയ്തു. അസിസ്റ്റന്‍റ് ഡയറക്ടർ റവ. ഫാ. ജോമിഷ് വട്ടക്കര, ഡോ. സുരണ്യ എസ്. കുമാർ, ബി. ശ്യാമ എന്നിവർ പ്രസംഗിച്ചു. അധ്യാപകരും വിദ്യാർഥികളും വിത്തു നടുന്നതിൽ പങ്കാളികളായി. കോളജ് പരിസ്ഥിതി ക്ലബ്ബും, ഐക്യുഎസിയും സഹകരിച്ചാണ് പദ്ധതി നടപ്പാക്കുന്നത്.

പൊതുമരാമത്ത് വകുപ്പ് അനാസ്ഥയ്ക്കെതിരെ കുഴിയടയ്ക്കൽ പ്രതിഷേധം

കളമശേരി: സംസ്ഥാന പാതയായ ഇടപ്പള്ളി-പുക്കാട്ടുപടി റൂട്ടിൽ വ്യാപകമായി കുഴികൾ രൂപപ്പെട്ടിട്ടും പൊതുമരാമത്ത് വകുപ്പ് നടപടിയെടുക്കാത്തതിൽ പ്രതിഷേധം. പൊതുമരാമത്ത് വകുപ്പിന്‍റെ അനാസ്ഥയ്ക്കെതിരേ മുസ്ലിം യൂത്ത് ലീഗ് പ്രവർത്തകർ കുഴിയടച്ചു പ്രതിഷേധിച്ചു. മുണ്ടം പാലം മുതൽ തേവക്കൽ വരെയുള്ള ഭാഗങ്ങളിലാണ് കൂടുതൽ അപകടകരമായ കുഴികളുള്ളത്. എല്ലാ ദിവസവും രാത്രിയിൽ അടക്കം നിരവധി അപകടങ്ങളാണ് ഈ പ്രദേശത്ത് ഉണ്ടായിക്കൊണ്ടിരിക്കുന്നത്. ഇരുചക്ര വാഹനയാത്രികരാണ് കൂടുതലായി ഇവിടെ അപകടത്തിൽപ്പെടുന്നത്. ജില്ലയിലെ ഏറ്റവും തിരക്കേറിയ പാതകൂടിയായ ഇവിടെ ഒട്ടേറെ വിദ്യാഭ്യാസ സ്ഥാപനങ്ങളും, ഹോസ്പിറ്റലുകളും, ആരാധനാലയങ്ങളും സ്ഥിതി ചെയ്യുന്ന പ്രദേശം കൂടിയാണ്. റോഡിൽ കുഴികൾ രൂപപ്പെട്ടതു മൂലം ഗതാഗത സടസമുണ്ടാകുന്നു. പരാതികൾ പിഡബ്ല്യുഡി ഉദ്യോഗസ്ഥരെ അറിയിച്ചെങ്കിലും ഇതുവരെ പരിഹാരമുണ്ടായിട്ടില്ല. ഇതിൽ പ്രതിഷേധിച്ചാണ് മുസ്ലിം യൂത്ത് ലീഗ് കങ്ങരപ്പടി ശാഖ കമ്മിറ്റിയുടെ ആഭിമുഖ്യത്തിൽ കുഴി അടക്കൽ സമരം നടത്തിയത്.

ശ്രേഷ്‌ഠ കാതോലിക്കാ ബാവയ്ക്ക് പൗരസ്വീകരണം നൽകി

തൃപ്പൂണിത്തുറ: യാക്കോബായ സുറിയാനി ഓർത്തഡോക്സ് സഭയുടെ നവാഭിഷിക്തനായ ശ്രേഷ്‌ഠ കാതോലിക്കാ ബസേലിയോസ് ജോസഫ് ബാവയ്ക്ക് തൃപ്പൂണിത്തുറ പൗരാവലിയുടെ ആഭിമുഖ്യത്തിൽ സ്വീകരണം നൽകി. ലായം കൂത്തമ്പലത്തിൽ നടന്ന സ്വീകരണ സമ്മേളനം കെ. ബാബു എംഎൽഎ ഉദ്ഘാടനം ചെയ്തു. നഗരസഭ ചെയർപേഴ്‌സൺ രമ സന്തോഷ് അധ്യക്ഷത വഹിച്ചു. പാലസ് ട്രസ്റ്റ് അഡ്‌മിനിസ്‌ട്രേഷൻ ബോർഡ് പ്രസിഡന്‍റ് എസ്. അനുജൻ കൊച്ചി രാജകുടുംബത്തിന്‍റെ ചിഹ്നമടങ്ങിയ ഉപഹാരം നൽകി. അനൂപ് ജേക്കബ് എംഎൽഎ, ഫാ. ജോഷി വേഴപ്പറമ്പിൽ, ഫാ. ആന്‍റണി ഫ്രാൻസിസ്, ഫാ. ഗ്രിഗർ ആർ. കൊള്ളന്നൂർ, പുലിയന്നൂർ ശശി നമ്പൂതിരിപ്പാട്, ഇബ്രാഹിം കാമിൽ സഖാഫി, പി. വാസുദേവൻ, കെ.വി. സാജു , ശ്രീക്കുട്ടൻ തുണ്ടത്തിൽ തുടങ്ങിയവർ പ്രസംഗിച്ചു. കെ. ബാബു എംഎൽഎ, പാലസ് ട്രസ്റ്റ് അഡ്‌മിനിസ്‌ട്രേഷൻ ബോർഡ് പ്രസിഡന്‍റ് എസ്. അനുജൻ എന്നിവർ ചേർന്ന് ബാവയ്ക്ക് മംഗളപത്രം സമർപ്പിച്ചു.

കുപ്രസിദ്ധ ഗുണ്ട പിടിയിൽ

അരൂർ: ഒളിവിൽ കഴിഞ്ഞിരുന്ന കുപ്രസിദ്ധ ഗുണ്ട പോലീസ് പിടിയിൽ. ഭായി നസീർ, തമ്മനം ഫൈസൽ, ആലുവ ഗുണ്ടാ മനാഫ്, വെടിമരം ശ്യാം, ചുക്ക് നജീബ് എന്നീ കുപ്രസിദ്ധ ഗുണ്ടകളുടെ അനുയായിയായ ബെന്നി എന്നറിയപ്പെടുന്ന കുര്യാക്കോസിനെയാണ് അരൂർ പോലീസ് അറസ്റ്റു ചെയ്തത്. തിരുവനന്തപുരം, ആലപ്പുഴ, മലപ്പുറം, എറണാകുളം, കോഴിക്കോട് ജില്ലകളിൽ കൊലപാതക ശ്രമം, വീട് കയറി ആക്രമണം, ആയുധ നിയമം മുതലായ കുറ്റകൃത്യങ്ങളിൽ ഉൾപ്പെട്ടിട്ടുള്ളയാളാണ് ബെന്നി. ഇയാൾ അടുത്തിടെ ആലപ്പുഴയിൽ നടന്ന ഗുണ്ടാ സംഗമത്തിലും പങ്കെടുത്തിരുന്നു. കോഴിക്കോട് തിരുവമ്പാടിയിൽനിന്ന് മണിക്കൂറുകൾ നീണ്ട പരിശ്രമത്തിനൊടുവിലാണ് ഇയാളെ പിടികൂടിയത്. അരൂർ പോലീസ് സ്റ്റേഷൻ ഇൻസ്പെക്ടർ കെ.ജി. പ്രതാപചന്ദ്രൻ, എസ്ഐ ഗീതു മോൾ എന്നിവരടങ്ങിയ സംഘമാണ് പ്രതിയെ അറസ്റ്റു ചെയ്തത്.

എംപി അവാര്‍ഡ് 2025 വിതരണം ചെയ്തു

കൊച്ചി: എറണാകുളം പാര്‍ലമെന്‍റ് മണ്ഡലത്തില്‍ ഹയര്‍ സെക്കൻഡറി പരീക്ഷയില്‍ എല്ലാ വിഷയത്തിനും എ പ്ലസ് നേടിയ വിദ്യാര്‍ഥികള്‍ക്കായി ഹൈബി ഈഡന്‍ എംപി ഏര്‍പ്പെടുത്തിയ എംപി അവാര്‍ഡ് 2025ന്‍റെ വിതരണോദ്ഘാടനം നടൻ ടൊവിനോ നിർവഹിച്ചു. അറിവ് വളരെ വേഗത്തില്‍ സഞ്ചരിക്കുന്ന കാലഘട്ടത്തില്‍ അതിനൊപ്പം ഓടിയെത്താനുള്ള ശ്രമകരമായ ദൗത്യം വിദ്യാര്‍ഥികളുടെ ഭാഗത്തുനിന്ന് ഉണ്ടാകണമെന്ന് ഹൈബി ഈഡന്‍ എംപി പറഞ്ഞു. മണ്ഡലത്തിലെ 86 സ്‌കൂളുകളില്‍ നിന്നായി 1128 വിദ്യാര്‍ഥികള്‍ക്കാണ് അവാര്‍ഡ് നല്‍കിയത്. വിദ്യാഭ്യാസ നിലവാരം ഉയര്‍ത്തുന്നതിനൊപ്പം തന്നെ കുട്ടികള്‍ക്ക് അവരുടെ പാഷന്‍ ഫോളോ ചെയ്യാന്‍ കഴിയണമെന്ന് ചടങ്ങില്‍ പങ്കെടുത്ത ജെയിന്‍ ഡീംഡ് ടു ബി യൂണിവേഴ്‌സിറ്റി ഡയറക്ടര്‍ ന്യൂ ഇനീഷ്യേറ്റീവ്‌സ് ഡോ. ടോം ജോസഫ് പറഞ്ഞു. ജെയിന്‍ ഡീംഡ് ടു ബി യൂണിവേഴ്‌സിറ്റി കൊച്ചിയുമായി സഹകരിച്ചാണ് പദ്ധതി നടപ്പാക്കിയത്. മണ്ഡലത്തില്‍ പ്ലസ്ടു പരീക്ഷയില്‍ 100 ശതമാനം വിജയം നേടിയ തോപ്പുംപടി സെന്‍റ് സെബാസ്റ്റ്യന്‍ എച്ച്എസ്എസ്, കളമശേരി രാജഗിരി എച്ച്എസ്എസ് എന്നീ സ്‌കൂളുകളെ ആദരിച്ചു. പ്ലസ്ടു പരീക്ഷയില്‍ മുഴുവന്‍ മാര്‍ക്കും കരസ്ഥമാക്കിയ സെന്‍റ് തെരേസാസ് എച്ച്എസ്എസിലെ ദേവിക ശ്രീജിത്തിനെ അനുമോദിച്ചു. എറണാകുളം സെന്‍റ് തെരേസാസ് കോളജില്‍ നടന്ന ചടങ്ങില്‍ ടി.ജെ. വിനോദ് എംഎല്‍എ, ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍, ജില്ലാ കളക്ടര്‍ എന്‍.എസ്.കെ. ഉമേഷ്, സെന്‍റ് തെരേസാസ് കോളജ് വൈസ് പ്രിന്‍സിപ്പൽ സിസ്റ്റര്‍ സുചിത തുടങ്ങിയവര്‍ പങ്കെടുത്തു.

കുട്ടമശേരി മേഖലയിൽ തെരുവുനായ ശല്യം രൂക്ഷം; നിരവധി പേർക്ക് കടിയേറ്റു

ആലുവ: കീഴ്മാട് ഗ്രാമപഞ്ചായത്തിലെ കുട്ടമശേരി അമ്പലപ്പറമ്പ് ,സൂര്യ നഗർ എന്നിവിടങ്ങളിൽ നായ ശല്യം രൂക്ഷമാകുന്നു. കഴിഞ്ഞ രണ്ടാഴ്ചയ്ക്കുള്ളിൽ അഞ്ചു പേർക്കാണ് തെരുവുനായകളുടെ കടിയേറ്റത്. ഇന്നലെ സൂര്യ നഗറിന് സമീപം നായ കുറുകെ ചാടിയതിനെത്തുടർന്ന് ഇരുചക്ര യാത്രികന് റോഡിൽ മറിഞ്ഞുവീണ് പരിക്കേറ്റു. മനക്കക്കാട് സ്വദേശി ശ്യാം ( 32 ) ആണ് വാഹന അപകടത്തിൽപ്പെട്ടത്. അമ്പലപ്പറമ്പ് വാരിക്കാട്ടുകുടി വീട്ടിൽ ഫാത്തിമ, അശ്വതി നിലയത്തിൽ നന്ദനൻ, അതിഥി തൊഴിലാളി അടക്കമുള്ളവർക്കാണ് രണ്ടാഴ്ചയ്ക്കിടെ നായയുടെ കടിയേറ്റത്. ഇതുകൂടാതെ നിരവധി പേർക്ക് നായയുടെ ആക്രമങ്ങളിൽ നിന്ന് രക്ഷപ്പെടാൻ ശ്രമിക്കുന്നതിനിടെ പരിക്കുപറ്റിയിട്ടുണ്ട്. മുതിർന്നവർ അടക്കം ഭീതിയോടെയാണ് കുട്ടമശേരി മേഖലയിൽ യാത്ര ചെയ്യുന്നത്. മദ്രസയിലും സ്കൂളുകളിലുംപോകുന്ന വിദ്യാർഥികളും ആശങ്കയിലാണ്. തെരുവു നായ ശല്യം ഇല്ലാതാക്കാൻ അടിയന്തിരമായി പഞ്ചായത്ത് അധികൃതർ ഇടപെടണമെന്ന് പ്രദേശവാസികൾ ആവശ്യപ്പെട്ടു.

നഗ്നഫോട്ടോ കാട്ടി പണം തട്ടാന്‍ ശ്രമം : യുവതി അടക്കം മൂന്നുപേര്‍ അറസ്റ്റില്‍

കൊച്ചി: നഗ്ന ഫോട്ടോ കാണിച്ച് ഭീഷണിപ്പെടുത്തി പണംതട്ടാന്‍ ശ്രമിച്ച കേസില്‍ യുവതി അടക്കം മൂന്നുപേര്‍ അറസ്റ്റില്‍. പാലക്കാട് ചിറ്റൂര്‍ സ്വദേശിനി ഗ്രീഷ്മ (29), പത്തനംതിട്ട കോന്നി സ്വദേശി അനു ജോര്‍ജ്(25), നിലമ്പൂര്‍ ചുങ്കത്തറ സ്വദേശി പി.എം. അബിന്‍ മാത്യു(32) എന്നിവരെ കളമശേരി പോലീസ് ആണ് പിടികൂടിയത്. ഇടപ്പള്ളി സ്വദേശിയായ യുവാവുമായി മുമ്പ് സൗഹൃദത്തിലായിരുന്ന ഗ്രീഷ്മ, യുവാവിന്‍റെ നഗ്ന ഫോട്ടോകള്‍ കാണിച്ചു ഭീഷണിപ്പെടുത്തി പത്ത് ലക്ഷം രൂപ ആവശ്യപ്പെടുകയും പണം നല്‍കിയില്ലെങ്കില്‍ സ്ത്രീ പീഡനക്കേസില്‍പ്പെടുത്തുമെന്ന് പറഞ്ഞു നിരന്തരം ഭീഷണിപ്പെടുത്തുകയുമായിരുന്നു. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]