ADVERTISEMENT

ADVERTISEMENT

ആന്‍റി റാഗിംഗ് ബോധവത്കരണ സെമിനാർ

ഇലഞ്ഞി: വിസാറ്റ് ഗ്രൂപ്പ്‌ ഓഫ് ഇൻസ്റ്റിറ്റ്യൂഷനിൽ ആന്‍റി റാഗിംഗ് ബോധവത്കരണ സെമിനാർ സംഘടിപ്പിച്ചു. ഇന്‍റേണൽ ക്വാളിറ്റി അഷുറൻസ് സെല്ലിന്‍റെ ആഭിമുഖ്യത്തിൽ നടന്ന സെമിനാർ കൂത്താട്ടുകുളം പോലീസ് സബ് ഇൻസ്‌പെക്ടർ പി.വി. ശാന്തകുമാർ ഉദ്ഘാടനം ചെയ്തു.

വിസാറ്റ് ഗ്രൂപ്പ്‌ ഓഫ് ഇൻസ്ടിട്യൂഷൻ ഡയറക്ടർ ഡോ. കെ. ദിലീപ്, വിസാറ്റ് എൻജി‍നിയറിംഗ് കോളജ് പ്രിൻസിപ്പൽ ഡോ. കെ.ജെ. അനൂപ്, വിസാറ്റ് ആർട്സ് ആൻഡ് സയൻസ് കോളജ് വൈസ് പ്രിൻസിപ്പൽ ഡോ. ലാലി ആന്‍റണി, പബ്ലിക് റിലേഷൻ ഓഫീസർ ഷാജി ആറ്റുപുറം, ഐക്യുഎസി കോർഡിനേറ്റർ അസി. പ്രഫ. ദിവ്യ നായർ,

ആന്‍റി റാഗിംഗ് സെൽ കോർഡിനേറ്റർമാരായ അസി. പ്രഫ. ജി. അഞ്ജന, അസി. പ്രഫ. നീതു പൗലോസ്, ആന്‍റി റാഗിംഗ് സെൽ സ്റ്റുഡന്‍റ്സ് കോർഡിനേറ്റർമാരായ ആദിത്യ നിരഞ്ജൻ വിനോദ്, ഭരത് രാജ്‌, ആശ സനൽകുമാർ തുടങ്ങിയവർ സംസാരിച്ചു. തുടർന്ന് സബ് ഇൻസ്‌പെക്ടർ ശാന്തകുമാറിന്‍റെ നേതൃത്വത്തിൽ ആന്‍റി റാഗിംഗ് ബോധവൽക്കരണ ക്ലാസ് നടന്നു.

ADVERTISEMENT

കാർ സ്കൂട്ടറിലിടിച്ച് തലകീഴായി മറിഞ്ഞു

ഉദയംപേരൂർ: കാർ നിയന്ത്രണംവിട്ട് സ്കൂട്ടറിൽ ഇടിച്ച് തലകീഴായി മറിഞ്ഞു. പുല്ലുകാട്ട് കാവിന് സമീപത്ത് ഇന്നലെ ഉച്ചയ്ക്ക് 12ഓടെയായിരുന്നു അപകടം. കാർ സ്കൂട്ടറിൽ ഇടിച്ച ശേഷം തൊട്ടടുത്തുള്ള താഴ്ന്ന പറമ്പിലേയ്ക്ക് തലകീഴായി മറിയുകയായിരുന്നു. ഉടൻ നാട്ടുകാരെത്തി പരിക്കേറ്റവരെ ആശുപത്രിയിലെത്തിച്ചു. ആരുടെയും പരുക്ക് ഗുരുതരമല്ല.

ബിരിയാണി പാഴ്‌സലിനെച്ചൊല്ലി ട്രാഫിക് സ്റ്റേഷനില്‍ ഹോംഗാര്‍ഡുകള്‍ തമ്മിൽത്തല്ലി

രണ്ടുപേർക്ക് പരിക്ക് പള്ളുരുത്തി: വിരമിക്കല്‍ ചടങ്ങിന്‍റെ ഭാഗമായി നടത്തിയ സല്‍ക്കാരത്തിനിടെ ബാക്കി വന്ന ബിരിയാണി പാഴ്‌സല്‍ ചെയ്ത സംഭവത്തെ ചൊല്ലി ഹോം ഗാര്‍ഡുകള്‍ തമ്മിൽത്തല്ലി. ഹോം ഗാര്‍ഡുകളായ ജോര്‍ജ്, രാധാകൃഷ്ണന്‍ എന്നിവര്‍ക്ക് പരിക്കേറ്റു. പള്ളുരുത്തി ട്രാഫിക് പോലീസ് സ്‌റ്റേഷന് മുന്നിലാണ് സംഭവം. പള്ളുരുത്തി ട്രാഫിക് പോലീസ് സ്‌റ്റേഷനുമായി ബന്ധപ്പെട്ട് ജോലി ചെയ്യുന്ന ഹോംഗാര്‍ഡിന്‍റെ വിരമിക്കല്‍ ചടങ്ങിന്‍റെ ഭാഗമായി പോലീസ് ഉദ്യോഗസ്ഥര്‍ക്കും ഹോം ഗാര്‍ഡുകള്‍ക്കും ഉച്ചഭക്ഷണമായി ബിരിയാണി ഒരുക്കിയിരുന്നു. എല്ലാവരും ഭക്ഷണം കഴിച്ചതിനുശേഷം ബാക്കി വന്ന ബിരിയാണി പാഴ്സല്‍ ചെയ്യുന്നതിനിടെ ഒരാള്‍ക്ക് ചിക്കന്‍ കഷണം കൂടുതല്‍ എടുത്തതിനെയും മറ്റൊരാള്‍ക്ക് കുറഞ്ഞുപോ‌യതിനെയും ചൊല്ലി ഇരുവരും തമ്മില്‍ തര്‍ക്കം ഉണ്ടാവുകയും അടിപിടിയില്‍ കലാശിക്കുകയുമായിരുന്നു. തമ്മിലടിയില്‍ രാധാകൃഷ്ണന്‍റെ തലയ്ക്ക് പരിക്കേറ്റു. ഇദ്ദേഹത്തെ ജനറല്‍ ആശുപത്രിയില്‍ പ്രവേശിപ്പിച്ചു. ഇരുവരും തമ്മില്‍ നേരത്തെ വൈരാഗ്യമുണ്ടായിരുന്നതായി സഹപ്രവര്‍ത്തകരായ ഗാര്‍ഡുകള്‍ പറയുന്നു. സംഭവത്തില്‍ ഇതുവരെ പരാതി ലഭിച്ചിട്ടില്ലെന്നും അന്വേഷണം നടത്തുന്നുണ്ടെന്നും പള്ളുരുത്തി പോലീസ് പറഞ്ഞു.

കേരളത്തിന്‍റെ ചികിത്സാമികവിന് വരകളിലൂടെ നന്ദി അറിയിച്ച് കെനിയന്‍ ചിത്രകാരി

കൊച്ചി: ചികിത്സയ്ക്കായി കെനിയൻ സംഘത്തോടൊപ്പം എത്തിയ കെനിയന്‍ ചിത്രകാരി ജോയ് റിച്ചു കേരളത്തിന്‍റെ ചികിത്സാ മികവിന് നന്ദി അറിയിച്ചത് തന്‍റെ കലാസൃഷ്ടിയിലൂടെ. രാജഗിരി ആശുപത്രിയിലെ വിശാലമായ ലോബിയില്‍ സ്ഥാപിച്ച കാന്‍വാസില്‍ ഈ ആഫ്രിക്കന്‍ ചിത്രകാരി വരച്ച് തീര്‍ത്ത ചിത്രം ഒരുപാട് അര്‍ത്ഥങ്ങള്‍ ഉള്‍ക്കൊള്ളുന്നതായിരുന്നു. ചികിത്സയും സാംസ്‌കാരിക പര്യടനവും സമന്വയിപ്പിച്ച യാത്രയുടെ ഭാഗമായി ജോയ് റിച്ചു അടക്കം 20 അംഗസംഘമാണ് രാജഗിരി ആശുപത്രിയില്‍ എത്തിയത്. മെഡിക്കല്‍ ടൂറിസത്തിന് അനുയോജ്യമാണ് കേരളത്തിന്‍റെ ഭൂപ്രകൃതിയും ഇവിടുത്തെ മികവുറ്റ ആരോഗ്യ പ്രവര്‍ത്തകരുമെന്ന് ജോയ് റിച്ചു അഭിപ്രായപ്പെട്ടു. കെനിയന്‍ വേരുകളും അന്താരാഷ്ട്ര യാത്രകളും ഇടകലരുന്നതാണ് റിച്ചുവിന്‍റെ സൃഷ്ടികള്‍. കൊക്കകോള, പോര്‍ഷെ, ന്യൂയോര്‍ക്ക് ടൈംസ്, മാസ്റ്റര്‍കാര്‍ഡ് ഉള്‍പ്പെടെയുള്ള ആഗോള ബ്രാന്‍ഡുകള്‍ക്ക് വേണ്ടി അവര്‍ പ്രവര്‍ത്തിച്ചിട്ടുണ്ട്. കൊക്കകോളയുടെ ആദ്യത്തെ ആഫ്രിക്കന്‍ പ്രചോദിത പാനീയമായ വൂസാഹ് രൂപകല്‍പ്പന ചെയ്തത് ജോയ് റിച്ചുവാണ്. കാന്‍സ് ലയണ്‍സ് സീ ഇറ്റ് ബി ഇറ്റ് അവാര്‍ഡ് 2024ല്‍ അവര്‍ സ്വന്തമാക്കി.

അഭിലാഷ് വധം: പ്രതികളുടെ ജീവപര്യന്തം : ഹൈക്കോടതി ശരിവച്ചു

വൈപ്പിൻ: മുനമ്പം സ്വദേശിയായ അഭിലാഷിനെ കൊലപ്പെടുത്തിയ കേസിൽ കൃഷ്ണകുമാർ എന്ന മുനമ്പം കൃഷ്ണൻ അടക്കമുള്ള ആറു പ്രതികളുടെ ജീവപര്യന്തം ശിക്ഷ ഹൈക്കോടതി ശരിവച്ചു. വിചാരണക്കോടതിയുടെ വിധിക്കെതിരെ മുനമ്പം സ്വദേശികളായ പ്രതികൾ നൽകിയ അപ്പീലാണ് ഹൈക്കോടതി തള്ളിയത്. അഭിലാഷിന്‍റെയും മുനമ്പം കൃഷ്ണന്‍റെയും ഗുണ്ടാ സംഘങ്ങൾ തമ്മിലുള്ള കുടിപ്പകയാണ് കൊലപാതകത്തിനു കാരണം. 2005 മേയ് 19നാണ് അഭിലാഷിനെ പറവൂർ പെരുമ്പടന്നയിൽ വച്ച് വെട്ടിക്കൊലപ്പെടുത്തിയത്. കേസിൽ നോർത്ത് പറവൂർ പോലീസ് സ്റ്റേഷനിൽ രജിസ്റ്റർ ചെയ്ത കേസിൽ പറവൂർ അഡിഷണൽ ജില്ലാ സെഷൻസ് കോടതി ഗുണ്ടാ തലവൻ മുനമ്പം കൃഷ്ണൻ, സഹോദരങ്ങൾ ആയ ബാബു, ബൈജു, കൂടാതെ വിശപ്പൻ എന്ന് വിളിക്കുന്ന രമേശ്‌,സുരേഷ്, കുമാർ എന്നിവർക്ക് ജീവപര്യന്തം ശിക്ഷ വിധിച്ചിരുന്നു. പ്രതികൾ 2019 മുതൽ വിയ്യൂർ സെൻട്രൽ ജയിലിൽ ശിക്ഷ അനുഭവിച്ചുവരുന്നവരാണ്.

യുവാവിനെ ആക്രമിച്ചു : കവര്‍ച്ച; പ്രതികള്‍ പിടിയില്‍

കൊച്ചി: യുവാവിനെ ആക്രമിച്ച് മൊബൈൽ ഫോണും പണവും കവര്‍ന്ന കേസിലെ പ്രതികള്‍ അറസ്റ്റില്‍. കൊല്ലം സ്വദേശികളായ കരുനാഗപ്പിള്ളി തൊടിയൂര്‍ സീനത്ത് മന്‍സിലില്‍ മുഹമ്മദ് അലി (26), ഭൂതകുളം കളക്കോട് തുണ്ടില്‍ ഫിറോസ്(23)എന്നിവരെയാണ് എറണാകുളം നോര്‍ത്ത് പോലീസ് അറസ്റ്റ് ചെയ്തത്. 17ന് പുലര്‍ച്ചെയായിരുന്നു കേസിനാസ്പദമായ സംഭവം. നോര്‍ത്ത് മേല്‍പ്പാലത്തിനു സമീപത്തുവച്ച് പത്തനംതിട്ട സ്വദേശിയായ യുവാവിനെ ആക്രമിച്ച് പരിക്കേല്‍പ്പിച്ച ശേഷം മൊബൈല്‍ ഫോണും പണവും അപഹരിക്കുകയായിരുന്നു. സുഹൃത്തിനെ കാണാന്‍ നഗരത്തിലെത്തിയ യുവാവിനെയാണ് പ്രതികള്‍ ആക്രമിച്ചത്. സംഭവത്തിനു ശേഷം ഒളിവില്‍ പോയ പ്രതികളെ എറണാകുളം നോര്‍ത്ത് പ്രിന്‍സിപ്പല്‍ എസ് ഐ എയിന്‍ ബാബുവിന്‍റെ നേതൃത്വത്തിലുള്ള അന്വേഷണസംഘമാണ് പിടികൂടിയത്.

കോണ്‍ഗ്രസിന് പങ്കില്ല: മുഹമ്മദ് ഷിയാസ്

കൊച്ചി: സിപിഎം വനിതാ നേതാവ് കെ.ജെ.ഷൈനിനെതിരായ സൈബര്‍ ആക്രമണത്തില്‍ കോണ്‍ഗ്രസിനോ, ഔദ്യോഗിക കോണ്‍ഗ്രസ് ഹാന്‍ഡിലുകള്‍ക്കോ ബന്ധമില്ലെന്ന് ഡിസിസി പ്രസിഡന്‍റ് മുഹമ്മദ് ഷിയാസ് പത്രസമ്മേളനത്തില്‍ പറഞ്ഞു. പത്രത്തില്‍ വന്ന വാര്‍ത്തയാണ് സമൂഹമാധ്യമങ്ങളില്‍ പ്രചരിക്കുന്നതെന്നും ഇതെങ്ങനെയാണ് കോണ്‍ഗ്രസിന്‍റെ തലയില്‍ കെട്ടിവയ്ക്കുകയെന്നും അദ്ദേഹം പറഞ്ഞു. സിപിഎമ്മിന്‍റെ ഉത്തരവാദിത്വപ്പെട്ട ജില്ലാ സെക്രട്ടറി തന്നെ ഇത്രയധികം മോശമായ പ്രസ്താവന നടത്തിയത് അപലപനീയമാണ്. പ്രസ്താവന പിന്‍വലിക്കണം. സിപിഎമ്മിലെ അധികാര തര്‍ക്കം കോണ്‍ഗ്രസിന്‍റെ തലയില്‍ കെട്ടിവയ്ക്കാനാണ് സിപിഎം ജില്ലാ സെക്രട്ടറി ശ്രമിക്കുന്നതെന്നും മുഹമ്മദ് ഷിയാസ് പറഞ്ഞു. സമൂഹ മാധ്യമങ്ങള്‍ക്ക് വാര്‍ത്ത എങ്ങനെ ലഭിച്ചു, എങ്ങനെയാണ് ഈ വാര്‍ത്ത പത്രത്തില്‍ വന്നത്, ഇത്തരം കാര്യങ്ങള്‍ ജില്ലാ സെക്രട്ടറി അന്വേഷിക്കുന്നത് നല്ലതായിരിക്കും. സിപിഎമ്മിനകത്തെ അധികാര രാഷ്ട്രീയത്തിന്‍റെ പിന്നില്‍ നടന്ന ഗൂഡാലോചനകളും അതുമായി ബന്ധപ്പെട്ട വാര്‍ത്തകളാണ് ഇത്. അതെങ്ങനെയാണ് കോണ്‍ഗ്രസിന്‍റെ തലയില്‍ കെട്ടിവയ്ക്കുന്നത്. സിപിഎം നേതാക്കള്‍ തമ്മിലുള്ള തര്‍ക്കങ്ങള്‍ അന്വേഷിക്കേണ്ട ജില്ലാ സെക്രട്ടറി കോണ്‍ഗ്രസിനെ പഴിച്ചതില്‍ കാര്യമില്ല. മാധ്യമങ്ങളിലൂടെ കോണ്‍ഗ്രസിനെതിരേ അടിസ്ഥാനരഹിതമായ കാര്യങ്ങള്‍ ആരോപിക്കുന്നത് എന്ത് അടിസ്ഥാനത്തിലാണ്. സമീപകാലങ്ങളില്‍ സ്ത്രീകള്‍ക്കും കുട്ടികള്‍ക്കും എതിരായി ഉയര്‍ന്നു വരുന്ന എല്ലാ ആക്രമണങ്ങള്‍ക്കും എതിരെ ശക്തമായ നിലപാടാണ് പാര്‍ട്ടിയും നേതാക്കളും സ്വീകരിച്ചിട്ടുള്ളത്. ഇരകള്‍ക്ക് അനുകൂല നിലപാടെടുക്കുന്ന പാര്‍ട്ടിയാണ് കോണ്‍ഗ്രസ് എന്ന് ജനങ്ങള്‍ക്ക് ബോധ്യമുണ്ടെന്നും അദ്ദേഹം പറഞ്ഞു.

രാഷ്ട്രീയമായും നിയമപരമായും നേരിടും: കെ.എന്‍. ഉണ്ണികൃഷ്ണന്‍

കൊച്ചി: സാമൂഹ്യമാധ്യമങ്ങളിലൂടെ തനിക്കെതിരെ നടത്തിക്കൊണ്ടിരിക്കുന്ന വ്യാജപ്രചരണങ്ങളെ രാഷ്ട്രീയമായും നിയമപരമായും നേരിടുമെന്ന് കെ.എന്‍.ഉണ്ണികൃഷ്ണന്‍ എംഎല്‍എ. തെറ്റായ പ്രചരണം നടത്തുന്നവരെ നിയമത്തിന്‍റെ മുന്നില്‍ എത്തിക്കും. കമ്യൂണിസ്റ്റ് പ്രസ്ഥാനത്തെയും ഇടതുപക്ഷത്തെയും തകര്‍ക്കുന്നതിന് നേതാക്കന്മാരെ തേജോവധം ചെയ്യുകയും അപകീര്‍ത്തിപ്പെടുത്തുകയും ചെയ്യുകയെന്നത് വലതുപക്ഷ രാഷ്ട്രീയ ശക്തികള്‍ എന്നും സ്വീകരിച്ചുപോരുന്ന രീതിശാസ്ത്രം ആണ്. ഒരു ഗീബല്‍സിയന്‍ തന്ത്രമാണ് ഇവിടെ പയറ്റുന്നത്. തകര്‍ന്നുകൊണ്ടിരിക്കുന്ന കോണ്‍ഗ്രസ് രാഷ്ട്രീയത്തെ ഉയര്‍ത്തെഴുന്നേല്പിക്കാനും ജീര്‍ണതയുടെ അഗാധ ഗര്‍ത്തങ്ങളില്‍ നിന്നും രക്ഷ നേടുന്നതിനുമുള്ള ഒരു നെറികെട്ട പ്രചാരണം മാത്രമാണിതെന്നും കെ.എന്‍.ഉണ്ണികൃഷ്ണന്‍ പറഞ്ഞു.

വ്യാജപ്രചാരണം; കെ.ജെ. ഷൈന്‍ പരാതി നല്‍കി

കൊച്ചി: സാമൂഹ്യമാധ്യമങ്ങളിലൂടെ തനിക്കെതിരെ നടത്തുന്ന അപവാദ പ്രചാരണങ്ങള്‍ക്കെതിരെ സിപിഎം പറവൂര്‍ ഏരിയ കമ്മിറ്റി അംഗം കെ.ജെ.ഷൈന്‍ മുഖ്യമന്ത്രിക്കും ഡിജിപിക്കും വനിതാ കമ്മീഷനും പരാതി നല്‍കി. ആന്തരിക ജീര്‍ണതകള്‍മൂലം കേരള സമൂഹത്തിനുമുന്നില്‍ തല ഉയര്‍ത്താനാകാത്ത വലതുപക്ഷ രാഷ്ട്രീയത്തെ രക്ഷിക്കാന്‍ തന്‍റെ പേരും ചിത്രവും വച്ച് അപമാനിക്കാന്‍ ശ്രമിച്ച സാമൂഹമാധ്യമ ഹാന്‍ഡിലുകള്‍ക്കും മാധ്യമങ്ങള്‍ക്കുമെതിരെ തെളിവുകള്‍ സഹിതമാണ് പരാതി നല്‍കിയതെന്ന് കെ.ജെ.ഷൈന്‍ ഫേസ്ബുക്കില്‍ കുറിച്ചു. രാഷ്ട്രീയ പ്രവര്‍ത്തക, ജനപ്രതിനിധി, അധ്യാപക സംഘടനാ നേതാവ് എന്നീ തലങ്ങളില്‍ പ്രവര്‍ത്തിച്ചു കൊണ്ടിരിക്കുന്ന തന്നെക്കുറിച്ചും തന്‍റെജീവിത പങ്കാളിയെക്കുറിച്ചും കഴിഞ്ഞ കുറച്ചു ദിവസങ്ങളായി സാമൂഹ്യമാധ്യമങ്ങളിലൂടെ വ്യാജപ്രചരണങ്ങളാണ് നടത്തിക്കൊണ്ടിരിക്കുന്നത്. രാഷ്ട്രീയമായും വ്യക്തിപരമായും തകര്‍ക്കുകയെന്ന ലക്ഷ്യത്തോടെയുള്ള നെറികെട്ട, ജീര്‍ണതയുടെ രാഷ്ട്രീയത്തെ നിയമപരമായും രാഷ്ട്രീയമായും നേരിടും. പൊതുപ്രവര്‍ത്തനം നടത്തുന്നത് സ്ത്രീകളുടെകൂടി അവകാശമാണെന്ന ബോധ്യം വരുന്നതരത്തില്‍ പൊതുസമൂഹവും ഭരണസംവിധാനവും ഇടപെടുമെന്ന വിശ്വാസം തനിക്കുണ്ടെന്നും കെ.ജെ.ഷൈന്‍ ഫേസ്ബുക്കില്‍ കുറിച്ചു. പിന്നിൽ കോണ്‍ഗ്രസെന്ന് സിപിഎം കൊച്ചി: കോണ്‍ഗ്രസിന്‍റെ വികൃതമായ മുഖത്തെ മൂടിവയ്ക്കാന്‍, സിപിഎമ്മിന്‍റെ ജനകീയ നേതാക്കന്മാരെ കരിവാരി തേയ്ക്കാനുള്ള ശ്രമമാണ് കോണ്‍ഗ്രസിലെ സോഷ്യല്‍ മീഡിയ സംഘം ചെയ്യുന്നതെന്ന് സിപിഎം ജില്ലാ സെക്രട്ടറി എസ്.സതീഷ്. കേള്‍ക്കുന്നവര്‍ക്ക് ശരിയെന്ന് തോന്നിപ്പിക്കും വിധം സമയവും സ്ഥലവും എല്ലാം പറഞ്ഞ് ഒരു വ്യാജ വീഡിയോ ഇവര്‍ ചെയ്യുന്നു. തുടര്‍ന്ന് പ്രചാരണം നടത്തുന്നു. ഇത്തരം ഹീനമായ പ്രവര്‍ത്തികളിലൂടെ ജനപ്രതിനിധികളെയും മാതൃകാ പ്രവര്‍ത്തനം നടത്തുന്ന വനിതാ നേതാക്കളെയും തകര്‍ക്കാമെന്നും കോണ്‍ഗ്രസിന്റെ ജീര്‍ണത മറച്ചുവയ്ക്കാന്‍ കഴിയുമെന്നും കരുതേണ്ട. ഇത്തരം പ്രവര്‍ത്തികളെ രാഷ്ട്രീയമായും നിയമപരമായും നേരിടും. ശരിയായി പൊതുപ്രവര്‍ത്തന രംഗത്ത് നില്‍ക്കുന്ന മുഴുവന്‍ വനിതാ പ്രവര്‍ത്തകരെയും സംരക്ഷിക്കുകയും പിന്തുണയ്ക്കുമെന്നും അദ്ദേഹം പറഞ്ഞു. രാഹുല്‍ മാങ്കൂട്ടത്തിലിന്‍റെ വിഷയം പുറത്തുവന്നതോടെകൂടി വലിയ രൂപത്തില്‍ കോണ്‍ഗ്രസിന്‍റെ ജീര്‍ണതയുടെ മുഖം വെളിവാക്കപ്പെട്ടു. ഇതിനെ പ്രതിരോധിക്കാന്‍ സോഷ്യല്‍ മീഡിയയിലൂടെ ഇരകളെ വ്യക്തിഹത്യ നടത്തിയും വ്യാജ പ്രചരണങ്ങള്‍ അഴിച്ചുവിട്ടും കോണ്‍ഗ്രസിന്‍റെ സോഷ്യല്‍ മീഡിയ വിഭാഗം നടത്തുന്ന പ്രചാരണങ്ങള്‍ കേരളം കണ്ടുകൊണ്ടിരിക്കുകയാണ്. കോണ്‍ഗ്രസ് വനിതാ നേതാക്കന്മാരെ പോലും തെറിവിളിക്കാനും ആക്ഷേപിക്കാനും ഇവര്‍ക്ക് മടിയില്ലെന്നും എസ്.സതീഷ് പറഞ്ഞു.

അഡ്വക്കേറ്റ്സ് ഫോറം ഭാരവാഹികൾ

മൂവാറ്റുപുഴ: ഓള്‍ കേരള നോട്ടറി അഡ്വക്കേറ്റ്സ് ഫോറം എറണാകുളം ജില്ല പ്രസിഡന്‍റായി ജോണി മെതിപ്പാറ (മൂവാറ്റുപുഴ), ജനറല്‍ സെക്രട്ടറിയായി ടി.കെ. കുഞ്ഞുമോന്‍ (ആലുവ) എന്നിവരെ തെരഞ്ഞെടുത്തു. മറ്റ് ഭാരവാഹികള്‍ ട്രഷറര്‍ - രാജു ജി. ഷേണോയ്, വൈസ് പ്രസിഡന്‍റുമാര്‍ - ലെജി എബ്രഹാം, അനീദ ബീഗം, സെക്രട്ടറി - ശാലിനി കൃഷ്ണകുമാര്‍. കമ്മിറ്റിയംഗങ്ങള്‍ - സി.കെ ജോര്‍ജ്, എം.എം അലിക്കുഞ്ഞ്, പി.എന്‍ സിന്ധു, ബിജു പി. തോമസ്, എ.ആര്‍ ബിജോയ്, ഓള്‍ കേരള നോട്ടറി അഡ്വക്കേറ്റ്സ് ഫോറത്തിന്‍റെ ജില്ലാ സമ്മേളനത്തിലാണ് തെരഞ്ഞെടുപ്പ് നടത്തിയത്. ജില്ലാ സമ്മേളനം മുന്‍ ആക്ടിംഗ് ചീഫ് ജസ്റ്റിസ് സി.കെ. അബ്ദുല്‍ റഹീം ഉദ്ഘാടനം ചെയ്തു. ഫോറം സംസ്ഥാന സെക്രട്ടറി പി.എ. ഇസ്മായില്‍ ഖാന്‍ അധ്യക്ഷത വഹിച്ചു. സംസ്ഥാന ജനറല്‍ സെക്രട്ടറി അബ്ദുല്‍ ഖാദര്‍ കണ്ണേഴത്ത് സര്‍ട്ടിഫിക്കറ്റ് വിതരണം നടത്തി. സംസ്ഥാന ട്രഷറര്‍ റസാഖ് ക്ലാസ് നയിച്ചു. ചടങ്ങില്‍ സീനിയര്‍ നോട്ടറിമാരായ വീരാവുണ്ണി, ജോര്‍ജ്, ആയിഷ യൂസുഫ്, ലെജി എബ്രഹാം എന്നിവരെ ആദരിച്ചു. എറണാകുളം ജില്ലയിലെ വിവിധ കോര്‍ട്ട് സെന്‍ററുകളില്‍നിന്നുള്ള നോട്ടറി അഭിഭാഷകര്‍ സമ്മേളനത്തില്‍ പങ്കെടുത്തു.

ലയൺസ് ഇന്‍റർനാഷണൽ പീസ് പോസ്റ്റർ മത്സരം ജില്ലാതല ഉദ്ഘാടനം

കോതമംഗലം: ലയൺസ് ഇന്‍റർനാഷണൽ ഡിസ്ട്രിക്ട് 318 സിയുടെ ആഭിമുഖ്യത്തിൽ പീസ് പോസ്റ്റർ മത്സരം നടത്തി. ജില്ലാതല ഉദ്ഘാടനം കോതമംഗലം എംഎ ഇന്‍റർനാഷണൽ സ്കൂളിൽ നടന്നു. ഡിസ്ട്രിക്ട് ഗവർണർ കെ.ബി. ഷൈൻ കുമാർ ഉദ്ഘാടനം നിർവഹിച്ചു. പീസ് പോസ്റ്റർ ഡിസ്ട്രിക്ട് സെക്രട്ടറി ബോബി പോൾ അധ്യക്ഷത വഹിച്ചു. എംഎ ഇന്‍ററർനാഷണൽ സ്കൂൾ പ്രിൻസിപ്പൽ കെ.അനിത നായർ, ഡിസ്ട്രിക്ട് കാബിനറ്റ് സെക്രട്ടറി സജി ചമേലി ഡിസ്ട്രിക്ട് കാബിനറ്റ് ട്രഷറര്‍ വർഗീസ് ജോസഫ്, ചീഫ് പ്രോഗ്രാം കോ-ഓർഡിനേറ്റർ അഡ്വ. ജോസ് മംഗലി, റീജണൽ ചെയർമാൻ എൽദോസ് ഐസക്, സോൺ ചെയർമാൻ ഡിജിൽ സെബാസ്റ്റ്യൻ, കോതമംഗലം ഗ്രേറ്റർ ലയൺസ് ക്ലബ് പ്രസിഡന്‍റ് റെബി ജോർജ്, ക്ലബ് സെക്രട്ടറി കെ.എം.കോരച്ചൻ എന്നിവർ പ്രസംഗിച്ചു. ലയൺസ് ഇന്‍റർനാഷണൽ പ്രോഗ്രാമിന്‍റെ ഭാഗമാണ് പീസ് പോസ്റ്റർ മത്സരം. കലയിലൂടെയും സർഗാത്മകതയിലൂടെയും സമാധാനത്തെക്കുറിച്ചുള്ള തങ്ങളുടെ കാഴ്ചപ്പാട് പ്രകടിപ്പിക്കാൻ യുവ വിദ്യാർഥികളെ പ്രോത്സാഹിപ്പിക്കുക എന്നതാണ് ഇതിന്‍റെ ലക്ഷ്യം. ടുഗദർ ആസ് വൺ എന്ന പ്രമേയത്തെ അടിസ്ഥാനമാക്കി 11-13 പ്രായക്കാർക്കായി നടത്തുന്ന മത്സരത്തിലെ വിജയിക്ക് 5000 യുഎസ് ഡോളറും രണ്ടു കുടുംബാംഗങ്ങൾക്കൊപ്പം യുഎസിലേക്കുള്ള യാത്രയുമാണ് സമ്മാനം. 23 മെറിറ്റ് അവാർഡ് ജേതാക്കൾക്ക് 500 യുഎസ് ഡോളർ വീതം സമ്മാനമായി ലഭിക്കും.

ജപ്തി നടപടിക്കെതിരേ പ്രതിഷേധവുമായി മുന്‍ പഞ്ചായത്ത് പ്രസിഡന്‍റ്

മൂവാറ്റുപുഴ: സഹകരണ ബാങ്കിന്‍റെ ജപ്തി നടപടിക്കെതിരേ പ്രതിഷേധവുമായി മുന്‍ പഞ്ചായത്ത് പ്രസിഡന്‍റ്. ഏനാനല്ലൂര്‍ സഹകരണ ബാങ്കിന്‍റെ ജപ്തി നടപടിക്കെതിരേ ആയവന പഞ്ചായത്ത് മുൻ പ്രസിഡന്‍റ് പി.എസ് അജീഷാണ് പ്രതിഷേധമുയർത്തിയത്. ബാങ്ക് അധികൃതർ സഹകരണ വകുപ്പ് ഉദ്യോഗസ്ഥരുടെ നേതൃത്വത്തിൽ പോലീസ് സഹായത്തോടെ പുന്നമറ്റം സ്വദേശിയായ സലീമിന്‍റെ വീട്ടില്‍ ഇന്നലെ ജപ്തിക്കെത്തിയപ്പോഴാണ് മുൻ പ്രസിഡന്‍റ് പ്രതിഷേധവുമായെത്തിയത്. 2018ല്‍ പരസ്പര ജാമ്യത്തില്‍ സലീമും ഭാര്യയും 20,000 രൂപ വീതം ബാങ്കില്‍ നിന്ന് വായ്പ എടുത്തിരുന്നു. പല പ്രാവശ്യം നേരിട്ടും തപാൽ മുഖേനയും ആവശ്യപ്പെട്ടിട്ടും തിരിച്ചടവ് ഉണ്ടാകാത്ത സാഹചര്യത്തിലാണ് സഹകരണ വകുപ്പ് ഉദ്യോഗസ്ഥർ നിയമപ്രകാരം ജപ്തി നടത്താനെത്തിയത്. പണം അടയ്ക്കുന്നതിന് രണ്ട് ദിവസത്തെ സാവകാശം കൂടി വേണമെന്ന് വീട്ടുകാർ ആവശ്യപ്പെട്ടു. എന്നാൽ ഒരാളുടെയെങ്കിലും വായ്പ പൂര്‍ണമായും അടയ്ക്കണമെന്ന നിലപാടിലായിരുന്നു അധികൃതർ. വായ്പക്കാരുടെ കുടുംബാംഗങ്ങളുടെ വാർദ്ധക്യ സഹജമായ രോഗാവസ്ഥയും കുട്ടികളുടെ വിദ്യാഭ്യാസാവശ്യവുമാണ് വായ്പ തിരിച്ചടവിന് തടസമായതെന്ന് അജീഷ് പറഞ്ഞു. ഏതാനും ദിവസത്തെ സാവകാശം ചോദിച്ചപ്പോൾ പണമടച്ചില്ലെങ്കില്‍ ജപ്തി ചെയ്യും എന്ന അധികൃതരുടെ നിലപാടിനെയാണ് എതിർത്തതെന്നും അജീഷ് അറിയിച്ചു. തുടർന്ന് 38,000 രൂപ നല്‍കി ഒരാളുടെ ബാധ്യത അവസാനിപ്പിച്ചതോടെയാണ് അധികൃതര്‍ ജപ്തി നടപടിയില്‍നിന്ന് പിന്‍മാറിയത്. ഇതര വായ്പ ഏതാനും ദിവസങ്ങൾക്കകം അടച്ചു തീർക്കണമെന്ന നിർദേശവും അധികൃതര്‍ നല്‍കി. ഏഴു വർഷമായ വായ്പക്ക് സാധാരണ പലിശ മുതലിലും അധികരിച്ച സാഹചര്യത്തിൽ നിയമപരമായ നടപടിക്രമങ്ങൾ പൂര്‍ത്തിയാക്കിയാണ് ജപ്തിക്കെത്തിയതെന്ന് അധികൃതർ അറിയിച്ചു.

അഭിമാനത്തിന്‍റെ "പച്ചത്തുരുത്തിൽ' ന്യൂമാൻ കോളജ്

തൊടുപുഴ: കേരള സർക്കാരിന്‍റെ പച്ചത്തുരുത്ത് പുരസ്കാരം തൊടുപുഴ ന്യൂമാൻ കോളജിന്. ഇടുക്കി ജില്ലയിലെ ഏറ്റവും മികച്ച പച്ചത്തുരുത്തായി സർക്കാർ തെരഞ്ഞെടുത്ത കോളജിനുള്ള പുരസ്കാരം ന്യൂമാൻ കോളജ്, പത്തനംതിട്ട ജില്ലാ കളക്ടർ എസ്. ഹരികിഷോറിൽനിന്ന് ഏറ്റുവാങ്ങി. 1964ൽ സഹ്യന്‍റെ മടിത്തട്ടിൽ, തൊടുപുഴയാറിന്‍റെ സമീപത്ത് സ്ഥാപിതമായ കോളജാണ് കലാലയ വിഭാഗത്തിൽ മികച്ച പച്ചത്തുരുത്തായി അംഗീകരിക്കപ്പെട്ടത്. 2021ൽ ഹരിത കേരളം മിഷന്‍റെ ഇടപെടലിലൂടെ ഏകദേശം 10 സെന്‍റ് വരണ്ട ഭൂമിയിൽ തുടക്കമിട്ട പച്ചത്തുരുത്ത് ഇന്ന് ഒരേക്കറിൽ, അതിജീവനത്തിന്‍റെ മാതൃകയും ജൈവവൈവിധ്യ സംരക്ഷണത്തിന്‍റെ അടയാളവുമായി മാറി. ന്യൂമാനിലെ ബൊട്ടാണിക്കൽ ഗാർഡനിൽ വ്യത്യസ്ത വിഭാഗത്തിലുൾപ്പെട്ട വിവിധയിനം സസ്യങ്ങളെ നട്ട് പരിപാലിക്കുമ്പോൾ തുളസി, അശ്വഗന്ധ, ശംഖുപുഷ്പം തുടങ്ങിയ ആയുർവേദ സസ്യങ്ങളും ഇവിടെയുണ്ട്. സുഗന്ധവ്യഞ്ജനങ്ങളെ "സ്പൈസ് ഗാർഡൻ' എന്ന വിഭാഗത്തിൽ പരിപാലിക്കുന്നു. ഏലം, കുരുമുളക്, കറുവപ്പട്ട, ഇഞ്ചി, ഗ്രാമ്പൂ തുടങ്ങിയ സസ്യങ്ങൾ ഇവിടെയുണ്ട്. ആന്തൂറിയം, ജെർബറ, റോസ്, ഗ്ലാഡിയോളസ് തുടങ്ങിയ പുഷ്പങ്ങൾ കാന്പസിനെ കൂടുതൽ സുന്ദരിയാക്കുന്നു. ജ്യോതിശാസ്ത്രത്തിന്‍റെ അടയാളങ്ങളായ 27 ഇനം സസ്യങ്ങളെ "സ്റ്റാർ ഫോറസ്റ്റ്' എന്ന വിഭാഗത്തിൽ ഉൾപ്പെടുത്തി സംരക്ഷിച്ചിട്ടുണ്ട്. "ഫ്ലോറ ഓഫ് ന്യൂമാൻ’ എന്ന ശാസ്ത്രഗ്രന്ഥവും പുറത്തിറക്കിയിട്ടുണ്ട്. ഹരിതകേരളം മിഷന്‍റെ നേതൃത്വത്തിൽ ആരംഭിച്ച "നെറ്റ് സീറോ കാർബൺ കേരളം ജനങ്ങളിലൂടെ' എന്ന പദ്ധതിയിൽ ന്യൂമാൻ കോളജിനെയും ഉൾപ്പെടുത്തിയിട്ടുണ്ട്. അഞ്ഞൂറിലധികം വൃക്ഷങ്ങൾ കലാലയത്തിന്‍റെ വിവിധ മേഖലകളിൽ പരിപാലിക്കുന്നതിലൂടെ കാർബൺ സെക്കസ്ട്രേഷനിൽ കോളജ് പുതിയ മാതൃക സൃഷ്ടിക്കുകയാണ്. കോളജ് രക്ഷധികാരിയായ മാർ ജോർജ് മഠത്തിക്കണ്ടത്തിൽ, മാനേജർ മോൺ. ഡോ.പയസ് മലേകണ്ടത്തിൽ, കോർപറേറ്റ് എഡ്യൂക്കേഷൻ സെക്രട്ടറി റവ.ഡോ.പോൾ പാറത്താഴം എന്നിവരുടെ മേൽനോട്ടത്തിൽ ബയോഡൈവേഴ്സിറ്റി ക്ലബ് കോർഡിനേറ്റർ ഡോ. ജയ്ബി സിറിയക്, കോളജ് ബർസാർ ഫാ. ബെൻസൺ ആന്‍റണി, വൈസ് പ്രിൻസിപ്പൽ ഡോ. സാജു എബ്രഹാം, അധ്യാപകർ, അനധ്യാപകർ,വിദ്യാർഥികൾ തുടങ്ങിയവരുടെ ഒത്തൊരുമയും കഠിനാധ്വാനവുമാണ് നേട്ടത്തിനു പിന്നിലെന്ന് പ്രിൻസിപ്പൽ ഡോ.ജെന്നി കെ. അലക്സ് അറിയിച്ചു.

എസ്പിസി പാസിംഗ് ഔട്ട് പരേഡ്

കോലഞ്ചേരി: വെണ്ണിക്കുളം സെന്‍റ് ജോർജസ് ഹയർ സെക്കൻഡറി സ്കൂളിലെ സൂപ്പർ സീനിയർ സ്റ്റുഡന്‍റ് പോലീസ് കേഡറ്റുകളുടെ (എസ്പിസി) പാസിംഗ് ഔട്ട് പരേഡ് നടത്തി. തിരുവാണിയൂർ പഞ്ചായത്ത് പ്രസിഡന്‍റ് സി.ആർ. പ്രകാശ് അഭിവാദ്യം സ്വീകരിച്ചു. രണ്ടുവർഷത്തെ ചിട്ടയായ പരിശീലനം പൂർത്തിയാക്കിയ 41 കേഡറ്റുകളാണ് രണ്ട് പ്ലട്ടൂണുകൾ ആയി തിരിഞ്ഞ് പാസിംഗ് പരേഡിന് മൈതാനത്ത് അണിനിരന്നത്. എറണാകുളം റൂറൽ എഡിഎൻഒ പി.എസ്. മുഹമ്മദ് അഷറഫ് കേഡറ്റുകൾക്ക് സത്യപ്രതിജ്ഞ ചൊല്ലിക്കൊടുത്തു. സ്കൂൾ മാനേജർ ഐ.കെ. ജോർജ്, സ്കൂൾ ബോർഡ് ചെയർമാനും കരിങ്ങാച്ചിറ കത്തീഡ്രൽ വികാരിയുമായ ഫാ. റ്റിജോ മർക്കോസ്, കരിങ്ങാച്ചിറ കത്തീഡ്രൽ ട്രസ്റ്റി എം.പി. പോൾ, ചോറ്റാനിക്കര പോലീസ് സബ് ഇൻസ്പെക്ടർ പി.ഇ. ഷാജി, വാർഡ് മെമ്പർമാരായ സജി പീറ്റർ, എം.എൻ. മനു, ഹെഡ്മാസ്റ്റർ ബെൻസൺ വർഗീസ്, പ്രിൻസിപ്പാൾ ഗ്ലെന്നിസ് രാജൻ, പിടിഎ പ്രസിഡന്‍റ് അജി കൊട്ടാരത്തിൽ, മാതൃസംഘം ചെയർപേഴ്സണും ബ്ലോക്ക് പഞ്ചായത്ത് മെമ്പറുമായ ഓമന നന്ദകുമാർ, സന്തോഷ് ടി.കെ. എന്നിവർ പരേഡിന്‍റെ ഫ്രണ്ട് സല്യൂട്ട് അഭിവാദ്യം സ്വീകരിച്ചു. ലക്ഷ്മി എസ്. വാര്യർ പരേഡ് കമാൻഡറായും ഏയ്ഞ്ചൽ ബെന്നി സെക്കൻഡ് ഇന്‍ കമാൻഡറായും അർജുൻ ബിജു, ആർ. ഗൗരി ലക്ഷ്മി എന്നിവർ പ്ലട്ടൂൺ കമാൻഡർമാരായും പാസിംഗ് ഔട്ട് പരേഡ് മുന്നിൽ നിന്ന് നയിച്ചു. സുബ്രത മൈത്തി ബെസ്റ്റ് കേഡറ്റായി തെരഞ്ഞെടുക്കപ്പെട്ടു.

വാരപ്പെട്ടി ഐസൊലേഷൻ വാർഡ് ഉടൻ പ്രവർത്തനമാരംഭിക്കും

കോതമംഗലം: നിയോജക മണ്ഡലം തല ഐസൊലേഷൻ വാർഡ് വാരപ്പെട്ടിയിൽ ഉടൻ പ്രവർത്തനം ആരംഭിക്കുമെന്ന് മന്ത്രി വീണാ ജോർജ് നിയമസഭയിൽ അറിയിച്ചു. ഐസൊലേഷൻ സെന്‍ററിന്‍റെ നിർമാണം വേഗത്തിൽ പൂർത്തീകരിച്ച് സെന്‍ററിന്‍റെ പ്രവർത്തനങ്ങൾ ആരംഭിക്കണമെന്നുള്ള ആന്‍റണി ജോൺ എംഎൽഎയുടെ ചോദ്യത്തിന് മറുപടിയായിട്ടാണ് നിയമസഭയിൽ മന്ത്രി ഇക്കാര്യം സഭയിൽ വ്യക്തമാക്കിയത്. കോതമംഗലം മണ്ഡലത്തിൽ വാരപ്പെട്ടി പഞ്ചായത്തിലെ ഐസൊലേഷൻ സെന്‍ററിന്‍റെ നിർമാണം നിലവിൽ 95 ശതമാനം പൂർത്തീകരിച്ചിട്ടുണ്ട്.10 കിടക്കകളുള്ള ഐസൊലേഷൻ വാർഡിനു വേണ്ട മെഡിക്കൽ, ഗ്യാസ് സൗകര്യങ്ങൾ ഉൾപ്പെടെ എല്ലാവിധ ഉപകരണങ്ങളും ഉൾപ്പെടുന്ന 2400 സ്വയർ ഫീറ്റ് വിസ്തീർണമുള്ള പ്രീ എൻജിനിയറിംഗ് സ്ട്രക്‌ചറുകളും ഉപയോഗിച്ചുള്ള നിർമാണമാണ് നടന്നുവരുന്നത്. 10 ഐസിയു ബെഡ്, ഡോക്ടർ റൂം -ഒന്ന്, നഴ്സിംഗ് സ്റ്റേഷൻ, പ്രൊസീഡിയർ റൂം, ഏഴ് ടോയ്‌ലറ്റ്, മെഡിക്കൽ ഗ്യാസ് പ്ലാന്‍റ് എന്നീ സൗകര്യങ്ങളാണ് ഐസൊലേഷൻ വാർഡിൽ ഒരുക്കിയിരിക്കുന്നത്. എംഎൽഎ ഫണ്ടും, കിഫ്ബി ഫണ്ടും, തുല്യമായി വിനിയോഗിച്ച് 1,75,96,748 രൂപയാണ് ഐസോലേഷൻ വാർഡ് നിർമാണത്തിനായി അനുവദിച്ചിരിക്കുന്നത്. ഇലക്ട്രിക് കണക്ഷൻ ലഭിക്കുന്ന മുറയ്ക്ക് പ്രവർത്തനം ആരംഭിക്കുമെന്നും അറിയിച്ചു.

കോട്ടപ്പടിയിൽ സൗജന്യ മെഗാ മെഡിക്കൽ ക്യാമ്പ് നാളെ

കോതമംഗലം: കോട്ടപ്പടി മാർ ഏലിയാസ് കോളജ് സോഷ്യൽ വർക്ക് ഡിപ്പാർട്ട്മെന്‍റിന്‍റെ നേതൃത്വത്തിൽ കോതമംഗലം ഐഎംഎയുമായി സഹകരിച്ച് 20-ന് രാവിലെ 10 മുതൽ ഉച്ചയ്ക്ക് രണ്ട് വരെ സൗജന്യ മെഗാ മെഡിക്കൽ ക്യാമ്പ് നടത്തുന്നു. മാർ ഏലിയാസ് കോളജ് ഓഡിറ്റോറിയത്തിൽ നടത്തുന്ന ക്യാമ്പിൽ ജനറൽ മെഡിസിൻ, ഹൃദയ, നേത്ര, ദന്ത, ശ്രവണ, രക്ത പരിശോധനകളും മരുന്നുകളും ലഭ്യമാകും. ദി ഐ ഫൗണ്ടേഷൻ സൂപ്പർ സ്പെഷാലിറ്റി ഹോസ്പിറ്റൽ, ഇന്ദിരാഗാന്ധി ഡെന്‍റൽ കോളജ്, പീസ് വാലി നെല്ലിക്കുഴി, ആസ്റ്റർ മെഡിസിറ്റി തുടങ്ങിയ സ്ഥാപനങ്ങൾ ക്യാമ്പിൽ സഹകരിക്കുന്നുണ്ട്. ആദ്യം രജിസ്റ്റർ ചെയ്യുന്ന 100 വനിതാ ഗുണഭോക്താക്കൾക്ക് സൗജന്യ പോഷകാഹാര കിറ്റ് നൽകും. വിവരങ്ങൾക്ക് 8129414122

നിരോധിത പുകയില ഉത്പന്നങ്ങളുമായി മൂന്നുപേർ പിടിയിൽ

വൈപ്പിൻ: നിരോധിച്ച 40 പാക്കറ്റ് പുകയില ഉത്പന്നങ്ങളുമായി മൂന്നു പേരെ മുളവുകാട് പോലീസ് കസ്റ്റഡിയിലെടുത്തു. പള്ളുരുത്തി സ്വദേശി അജുബാൻ (31), കണ്ണൂർ മുട്ടം സ്വദേശികളായ അഷ്കർ (25), മുഹമ്മദ് ഇമ്രാൻ (19) എന്നിവരാണ് പിടിയിലായത്. പോലീസ് പെട്രോളിംഗിനിടെ കാളമുക്ക് ഗോശ്രീ പാലത്തിന് സമീപം പെട്ടിക്കടയിൽ നടത്തിയ പരിശോധനയിൽ 13 പാക്കറ്റ് ഹാൻസും 27 പാക്കറ്റ് കൂൾ ലിപ്പുമാണ് പോലീസ് പിടിച്ചെടുത്തത്. കേസെടുത്ത ശേഷം മൂവരെയും ജാമ്യത്തിൽ വിട്ടയച്ചു.

ആലുവ സെന്‍റ് മേരീസ് സ്കൂളിന് മുന്നിൽ അനധികൃത പാർക്കിംഗെന്ന് പരാതി

ആലുവ: സെന്‍റ് മേരീസ് ഹൈസ്‌കൂള്‍ പ്രവേശന കവാടത്തില്‍ അനധികൃത വാഹന പാര്‍ക്കിംഗ് കാരണം മറ്റു വാഹനങ്ങള്‍ക്ക് കടന്നു പോകാനാകുന്നില്ലെന്ന് പരാതി. ഇന്നലെ അധ്യാപക യോഗ്യത പരീക്ഷയായ കെ ടെറ്റ് പരീക്ഷയുടെ ചോദ്യപ്പേപ്പര്‍ വഹിച്ചു വന്ന മിനി ലോറി വിദ്യാലയത്തിലേക്ക് കടക്കാനാവാതെ ഏറെ വിഷമിച്ചു. തുടര്‍ന്ന് ഉടമകളെ കണ്ടെത്തി വാഹനങ്ങള്‍ മാറ്റിയശേഷമാണ് ലോറി സ്‌കൂള്‍ കോന്പൗണ്ടിലേക്ക് കയറ്റാനായത്. പോലീസിനോട് നിരന്തരം പരാതി പറഞ്ഞിട്ടും യാതൊരു നടപടിയും ഉണ്ടാകുന്നില്ലെന്ന് പ്രധാന അധ്യാപകന്‍ ജെയ്‌മോന്‍ പറഞ്ഞു. നോ പാര്‍ക്കിംഗ് ബോര്‍ഡ് വച്ചാല്‍ തൊട്ടടുത്ത ദിവസം കാണാതാകുകയാണ് പതിവ്. കഴിഞ്ഞ ദിവസം കായിക മേള നടന്നപ്പോഴും വാഹനങ്ങള്‍ക്ക് കടന്നു പോകാന്‍ ബുദ്ധിമുട്ടിയിരുന്നു. പിഎസ്‌സി പരീക്ഷയടക്കം വിവിധ പരീക്ഷകളുടെ സ്ഥിരകേന്ദ്രം കൂടിയാണ് സെന്‍റ് മേരീസ് ഹൈസ്‌കൂള്‍.

വൈപ്പിൻ ബ്ലോക്കിൽ സിപിഎമ്മിന്‍റെ വികസനജാഥ : ജനങ്ങളെ തെറ്റിദ്ധരിപ്പിക്കാനെന്ന് പ്രതിപക്ഷം

വൈപ്പിൻ : വൈപ്പിൻ ബ്ലോക്ക് പഞ്ചായത്തിന്‍റെ അഞ്ചുവർഷത്തെ ഭരണ നേട്ടങ്ങൾ ജനങ്ങളിൽ എത്തിക്കാൻ സിപിഎം വൈപ്പിൻ ബ്ലോക്കിൽ സുസ്ഥിര വികസന ജാഥ നടത്തി. രണ്ടുദിവസം നീണ്ടു നിന്ന ജാഥ പെരുമ്പിള്ളിയിൽ സിപിഎം ഏരിയ സെക്രട്ടറി എ.പി. പ്രിനിൽ ഉദ്ഘാടനം ചെയ്തു. പി. ഡി. ലൈജു അധ്യക്ഷനായി. അതേസമയം വികസന നേട്ടങ്ങൾ, എന്നുപറഞ്ഞ് സിപിഎം നടത്തുന്ന വികസന ജാഥ ജനങ്ങളെ തെറ്റിദ്ധരിപ്പിക്കാനെന്ന് ബ്ലോക്ക്പഞ്ചായത്ത് പ്രതിപക്ഷമായ കോൺഗ്രസ് ആരോപിച്ചു. ബ്ലോക്കിലെ അഞ്ചുവർഷത്തെ ഭരണം വെറും പ്രഖ്യാപനങ്ങളിൽ മാത്രമായി ഒതുങ്ങിയെന്നാണ് പ്രതിപക്ഷ നേതാവ് അഗസിൻ പറയുന്നത്. വികസനം ലക്ഷ്യമാക്കി ബ്ലോക്ക് പഞ്ചായത്ത് നടത്തിയ വികസന ശില്പശാലയിൽ ഉയർന്നുവന്ന ഒരു പദ്ധതി പോലും ഭരണസമിതിക്ക് നടപ്പിലാക്കാൻ കഴിഞ്ഞില്ലെന്നത് ഏറ്റവും വലിയ ഉദാഹരണമാണെന്നും ഇദ്ദേഹം ചൂണ്ടിക്കാട്ടി. മാത്രമല്ല വിജിലൻസ് കേസും, ഞാറക്കൽ ആശുപത്രിയിലെ കെട്ടിട നമ്പർ ലഭ്യമാക്കാൻ തീരുമാനമില്ലാതെ സ്വകാര്യ ഏജൻസി യെ ഏൽപ്പിച്ച അഴിമതി ആരോപണവും ഭരണത്തിന്‍റെ നിറം കെടുത്തിയെന്ന് പ്രതിപക്ഷം ചൂണ്ടിക്കാട്ടി.

അങ്കമാലിയിൽ ത്രിദിന ദേശീയ നൃത്തോത്സവം "ത്രിഭംഗി' ഇന്നു മുതൽ

അങ്കമാലി: കേരള സംഗീത നാടക അക്കാദമി സംഘടിപ്പിക്കുന്ന "ത്രിഭംഗി മധ്യമേഖല ദേശീയ നൃത്തോത്സവം" ഇന്ന് മുതൽ നടക്കും. അങ്കമാലി എ.പി. കുര്യന്‍ സ്മാരക സിഎസ്എ ഓഡിറ്റോറിയത്തിലാണ് ഈ ത്രിദിന നൃത്തോത്സവം അരങ്ങേറുന്നത്. പ്രശസ്ത നര്‍ത്തകിയും നൃത്താധ്യാപികയുമായ ചിത്ര സുകുമാരനാണ് ഫെസ്റ്റിവല്‍ ഡയറക്ടര്‍ ഇന്ന് വൈകീട്ട് അഞ്ചിന് അക്കാദമി ചെയര്‍പേഴ്‌സണ്‍ മട്ടന്നൂര്‍ ശങ്കരന്‍കുട്ടി നൃത്തോത്സവം ഉദ്ഘാടനം ചെയ്യും. അക്കാദമി സെക്രട്ടറി കരിവെള്ളൂര്‍ മുരളി ആമുഖഭാഷണം നടത്തും. കലാമണ്ഡലം ക്ഷേമാവതി വിശിഷ്ടാതിഥിയായി പങ്കെടുക്കും. സ്വാഗതസംഘം ചെയര്‍പേഴ്‌സണ്‍ അഡ്വ. കെ.കെ. ഷിബു അധ്യക്ഷത വഹിക്കും. ബെന്നി ബെഹനാന്‍ എംപി, റോജി എം.ജോണ്‍ എംഎല്‍എ എന്നിവർ മുഖ്യാതിഥികളായി പങ്കെടുക്കും. മധ്യമേഖല "ത്രിഭംഗി" ദേശീയ നൃത്തോത്സവത്തെ വ്യവസായ മന്ത്രി പി. രാജീവ് അഭിസംബോധനചെയ്യും. വാർത്താസമ്മേളനത്തിൽ സ്വാഗതസംഘം ചെയർമാൻ അഡ്വ. കെ.കെ. ഷിബു, ജനറൽ കൺവീനർ ടോണി പറമ്പി, സിഎസ്എ വൈസ് പ്രസിഡന്‍റ് എം.പി. രാജൻ, ട്രഷറർ കെ.എൻ. വിഷ്ണു മാസ്റ്റർ, പ്രോഗ്രാം കമ്മിറ്റി ചെയർപേഴ്സൺ മായറാണി, കൺവീനർ പ്രിയ കിഷോർ എന്നിവർ പങ്കെടുത്തു.

എംജി യൂണിവേഴ്സിറ്റി ആർച്ചറി ചാമ്പ്യൻഷിപ്പ്: യുസി, മഹാരാജാസ് ജേതാക്കൾ

ആലുവ: യുസി കോളജിൽ നടന്ന മഹാത്മാഗാന്ധി സർവകലാശാലാ ഇന്‍റർസോൺ ആർച്ചറി ചാമ്പ്യൻഷിപ്പിൽ പുരുഷ വിഭാഗത്തിൽ ആലുവ യുസി കോളജും വനിതാ വിഭാഗത്തിൽ എറണാകുളം മഹാരാജാസ് കോളജും ജേതാക്കളായി. പുരുഷ വിഭാഗത്തിൽ നെടുങ്കണ്ടം എംഇഎസ് കോളജും എറണാകുളം മഹാരാജാസ് കോളജും യഥാക്രമം രണ്ടും മൂന്നും സ്ഥാനങ്ങൾ നേടി. വനിതാ വിഭാഗത്തിൽ എംഇഎസ് കോളജ് നെടുങ്കണ്ടം, ആലുവ യുസി കോളജ് എന്നിവർ രണ്ടും മൂന്നും സ്ഥാനങ്ങൾ കരസ്ഥമാക്കി. ഒക്ടോബറിൽ പഞ്ചാബിലെ ഗുരുകാശി സർവകലാശാലയിൽ നടക്കുന്ന അഖിലേന്ത്യാ അന്തർ സർവകലാശാലാ ചാമ്പ്യൻഷിപ്പിൽ വിജയികൾ പങ്കെടുക്കും.

യുവാവിനെ കാപ്പ ചുമത്തി നാടുകടത്തി

കൊച്ചി: നിരവധി കേസുകളിലെ പ്രതിയായ യുവാവിനെ കാപ്പ നിയമപ്രകാരം നാടുകടത്തി. എറണാകുളം കണയന്നൂര്‍ കസ്തൂര്‍ബാ നഗറില്‍ വലിയന്തറ മെജോ ജോസി(26)നെയാണ് നാടുകടത്തിയത്. കൊച്ചി സിറ്റി പോലീസ് കമ്മീഷണര്‍ പുട്ട വിമലാദിത്യയുടെ ഉത്തരവു പ്രകാരം ഒരു വര്‍ഷത്തേക്ക് കൊച്ചി സിറ്റി പരിധിയില്‍ പ്രവേശിക്കുന്നത് വിലക്കികൊണ്ടാണ് ഉത്തരവ്. ഉത്തരവ് ലംഘിച്ചാല്‍ മൂന്നുവര്‍ഷം വരെ നീളുന്ന തടവുശിക്ഷ ലഭിക്കും. ഇയാള്‍ക്കെതിരെ എറണാകുളം ടൗണ്‍ സൗത്ത് പോലീസ് സ്‌റ്റേഷനില്‍ നരഹത്യാശ്രമം, കഠിന ദേഹോപദ്രവം,അടിപിടി തുടങ്ങിയ വകുപ്പുകളിൽ ആറോളം കേസുകള്‍ നിലവിലുണ്ട്.

അംബേദ്കർ ഗ്രാമം പദ്ധതിക്ക് അനുമതിയായി: പി. രാജീവ്

ആലുവ: കടുങ്ങല്ലൂര്‍ ഗ്രാമപഞ്ചായത്തിലെ കണിയാംകുന്ന് പുതുവല്‍പറമ്പ് നഗറില്‍ അംബേദ്കര്‍ ഗ്രാമം പദ്ധതിയും കളമശേരി എച്ച്എംടി നഗറില്‍ അംബേദ്കര്‍ സെറ്റിൽമെന്‍റ് പദ്ധതിയും നടപ്പാക്കുന്നതിന് സര്‍ക്കാര്‍ അനുമതി ലഭിച്ചതായി മന്ത്രി പി. രാജീവ് അറിയിച്ചു. അടിസ്ഥാന സൗകര്യങ്ങള്‍ വികസിപ്പിക്കുന്നതിന് ഒരു കോടി രൂപയുടെ വീതം വികസന പ്രവര്‍ത്തനങ്ങളാണ് നടക്കുക. റോഡുകള്‍, ഫുട്പാത്തുകള്‍, ആശയവിനിമയ സൗകര്യങ്ങള്‍, കുടിവെള്ള സൗകര്യങ്ങള്‍, ഡ്രെയിനേജ് സൗകര്യങ്ങള്‍, വൈദ്യുതീകരണം, തെരുവ് വിളക്കുകള്‍, സാനിറ്റേഷന്‍, ഭവന പുനരുദ്ധാരണം, മാലിന്യ നിര്‍മാര്‍ജനം, പൊതു സൗകര്യങ്ങള്‍ മെച്ചപ്പെടുത്തല്‍, സംരക്ഷണ ഭിത്തി നിര്‍മാണം, ഇറിഗേഷന്‍, വരുമാനദായകപദ്ധതികള്‍, ഇന്‍റര്‍നെറ്റ് കണക്ഷന്‍ ലഭ്യമാക്കല്‍ തുടങ്ങി വ്യത്യസ്ത വികസന പ്രവര്‍ത്തനങ്ങള്‍ ഇവിടെ ഏറ്റെടുക്കും.

ദേശീയ ആരോഗ്യ മാധ്യമ ഉച്ചകോടി 20 മുതല്‍ കൊച്ചിയില്‍

കൊച്ചി: എറണാകുളം പ്രസ്‌ ക്ലബ് ആസ്റ്റര്‍ മെഡ്‌സിറ്റി, ഐഎംഎ കൊച്ചി എന്നിവരുമായി സഹകരിച്ച് സംഘടിപ്പിക്കുന്ന നാഷണല്‍ ഹെല്‍ത്ത് ജേര്‍ണലിസം സമ്മിറ്റ് 20, 21 തീയതികളില്‍ കൊച്ചിയില്‍ നടക്കും. 20ന് രാവിലെ 10.30ന് ജസ്റ്റീസ് ദേവന്‍ രാമചന്ദ്രന്‍ ഉദ്ഘാടനം ചെയ്യും. കലൂര്‍ ഐഎംഎ ഹൗസില്‍ നടക്കുന്ന പരിപാടിയിൽ രാജ്യത്തിന്‍റെ വിവിധ ഭാഗങ്ങളില്‍ നിന്നെത്തുന്ന മുപ്പതിലേറെ മാധ്യമപ്രവര്‍ത്തകര്‍ പങ്കെടുക്കും. എറണാകുളം പ്രസ്‌ ക്ലബ് പ്രസിഡന്റ് ആര്‍. ഗോപകുമാര്‍ അധ്യക്ഷത വഹിക്കും. ആസ്റ്റര്‍ മെഡ്‌സിറ്റി സിഇഒ ഡോ. നളന്ദ ജയദേവ് ആമുഖപ്രസംഗം നടക്കും. എംപിമാരായ ബെന്നി ബഹനാന്‍, ഹൈബി ഈഡന്‍, ടി.ജെ. വിനോദ് എംഎല്‍എ എന്നിവര്‍ പങ്കെടുക്കും. വിവിധ സെഷനുകളില്‍ പ്രിസ്ക്രൈബിംഗ് ദി റൈറ്റ് ഡോസേജ്, സെക്കന്‍ഡ് വിക്ടിം, നാവിഗേറ്റിംഗ് ഗ്രേ സോണ്‍സ്, ഹീല്‍ ഇന്‍ ഇന്ത്യ, ഇന്റര്‍സെക്ഷന്‍ ഓഫ് എഐ, ലേര്‍ണിംഗ് ഫ്രം കോവിഡ് തുടങ്ങിയ വിഷയങ്ങള്‍ ചര്‍ച്ച ചെയ്യും. വൈകുന്നേരം 4.30ന് നടക്കുന്ന ഫയര്‍ സൈഡ് ചാറ്റില്‍ പത്മഭൂഷണ്‍ ജേതാവ് ഡോ. ജോസ് ചാക്കോ പെരിയപ്പുറം ചികിത്സാ രംഗത്തെ അനുഭവങ്ങള്‍ പങ്കുവയ്ക്കും. 21ന് ഉച്ചയ്ക്ക് 2.30ന് നടക്കുന്ന സമാപന സമ്മേളനം പ്രതിപക്ഷ നേതാവ് വി.ഡി. സതീശന്‍ ഉദ്ഘാടനം ചെയ്യും. കൊച്ചി മേയര്‍ എം. അനില്‍കുമാര്‍ മുഖ്യാതിഥിയാകും. ആസ്റ്റര്‍ മെഡ്‌സിറ്റി ചീഫ് ഓപ്പറേറ്റിംഗ് ഓഫീസര്‍ ഡോ. ഷുഹൈബ് ഖാദര്‍, ഐഎംഎ കൊച്ചിന്‍ സെക്രട്ടറി ഡോ. സച്ചിന്‍ സുരേഷ് തുടങ്ങിയവര്‍ പത്രസമ്മേളനത്തില്‍ പങ്കെടുത്തു.

ലയൺസ് ഇന്‍റർനാഷണൽ പീസ് പോസ്റ്റർ മത്സരം ജില്ലാതല ഉദ്ഘാടനം

കോതമംഗലം: ലയൺസ് ഇന്‍റർനാഷണൽ ഡിസ്ട്രിക്ട് 318 സിയുടെ ആഭിമുഖ്യത്തിൽ പീസ് പോസ്റ്റർ മത്സരം നടത്തി. ജില്ലാതല ഉദ്ഘാടനം കോതമംഗലം എംഎ ഇന്‍റർനാഷണൽ സ്കൂളിൽ നടന്നു. ഡിസ്ട്രിക്ട് ഗവർണർ കെ.ബി. ഷൈൻ കുമാർ ഉദ്ഘാടനം നിർവഹിച്ചു. പീസ് പോസ്റ്റർ ഡിസ്ട്രിക്ട് സെക്രട്ടറി ബോബി പോൾ അധ്യക്ഷത വഹിച്ചു. എംഎ ഇന്‍ററർനാഷണൽ സ്കൂൾ പ്രിൻസിപ്പൽ കെ.അനിത നായർ, ഡിസ്ട്രിക്ട് കാബിനറ്റ് സെക്രട്ടറി സജി ചമേലി ഡിസ്ട്രിക്ട് കാബിനറ്റ് ട്രഷറര്‍ വർഗീസ് ജോസഫ്, ചീഫ് പ്രോഗ്രാം കോ-ഓർഡിനേറ്റർ അഡ്വ. ജോസ് മംഗലി, റീജണൽ ചെയർമാൻ എൽദോസ് ഐസക്, സോൺ ചെയർമാൻ ഡിജിൽ സെബാസ്റ്റ്യൻ, കോതമംഗലം ഗ്രേറ്റർ ലയൺസ് ക്ലബ് പ്രസിഡന്‍റ് റെബി ജോർജ്, ക്ലബ് സെക്രട്ടറി കെ.എം.കോരച്ചൻ എന്നിവർ പ്രസംഗിച്ചു. ലയൺസ് ഇന്‍റർനാഷണൽ പ്രോഗ്രാമിന്‍റെ ഭാഗമാണ് പീസ് പോസ്റ്റർ മത്സരം. ടുഗദർ ആസ് വൺ എന്ന പ്രമേയത്തെ അടിസ്ഥാനമാക്കി 11-13 പ്രായക്കാർക്കായി നടത്തുന്ന മത്സരത്തിലെ വിജയിക്ക് 5000 യുഎസ് ഡോളറും രണ്ടു കുടുംബാംഗങ്ങൾക്കൊപ്പം യുഎസിലേക്കുള്ള യാത്രയുമാണ് സമ്മാനം. 23 മെറിറ്റ് അവാർഡ് ജേതാക്കൾക്ക് 500 യുഎസ് ഡോളർ വീതം സമ്മാനമായി ലഭിക്കും.

ജില്ലാ കളക്ടര്‍ക്ക് സ്വീകരണം

കൊച്ചി: എറണാകുളം വൈഎംസിഎയുടെ ആഭിമുഖ്യത്തില്‍ ജില്ലാ കളക്ടര്‍ ജി. പ്രിയങ്കയ്ക്ക് സ്വീകരണം നല്‍കി. ചടങ്ങ് ടി.ജെ. വിനോദ് എംഎല്‍എ ഉദ്ഘാടനം ചെയ്തു. വൈഎംസിഎ പ്രസിഡന്റ് മാത്യു മുണ്ടാട്ട് അധ്യക്ഷത വഹിച്ചു. വൈഎംസിഎയുടെ 2025-26ലെ പ്രവര്‍ത്തനോദ്ഘാടനം ജില്ലാ കളക്ടര്‍ ജി. പ്രിയങ്ക നിര്‍വഹിച്ചു. നിര്‍ധനരായ ഹൃദ്രോഗികള്‍ക്കുള്ള ശസ്ത്രക്രിയയ്ക്കുള്ള ധനസഹായം ലിസി ആശുപത്രിയിലെ കാര്‍ഡിയാക് അനസ്‌തേഷ്യ വകുപ്പ് മേധാവി ഡോ. ജേക്കബ് ഏബ്രഹാമിന് കളക്ടര്‍ കൈമാറി. കൂടാതെ ഡയാലിസിസ് കൂപ്പണും നിര്‍ധനരായ രോഗികള്‍ക്ക് വിതരണം ചെയ്തു. വൈഎംസിഎയുടെ പ്രസിദ്ധീകരണമായ വൈഎംസിഎ പള്‍സിന്‍റെ പ്രകാശനം ടി.ജെ. വിനോദ് എംഎല്‍എ നിര്‍വഹിച്ചു.

ലക്ഷദ്വീപ് സ്‌കൂളുകള്‍ക്ക് റോബോട്ടിക് കിറ്റുകള്‍ നല്‍കി

കൊച്ചി: ലക്ഷദ്വീപില്‍ കേരളത്തിലെ പാഠ്യപദ്ധതി പിന്തുടരുന്ന ഒമ്പത് ദ്വീപുകളിലെ പത്താം ക്ലാസ് വിദ്യാര്‍ഥികള്‍ക്കായി കേരള ഇന്‍ഫ്രാസ്ട്രക്ചര്‍ ആന്‍ഡ് ടെക്‌നോളജി ഫോര്‍ എഡ്യുക്കേഷന്‍ (കൈറ്റ്) റോബോട്ടിക് പഠനത്തിനായി റോബോട്ടിക് കിറ്റുകള്‍ വിതരണം ചെയ്തു. മൂന്ന് വിദ്യാര്‍ഥികള്‍ക്ക് ഒരു കിറ്റ് എന്ന നിലയില്‍ ആകെ 100 റോബോട്ടിക് കിറ്റുകളാണ് കൈറ്റ് നല്‍കിയത്. കിറ്റ് വിതരണത്തിനൊപ്പം ലക്ഷദ്വീപിലെ ഹൈസ്‌കൂള്‍ തലത്തില്‍ ഐസിടി പാഠപുസ്തകങ്ങള്‍ പഠിപ്പിക്കുന്ന അധ്യാപകര്‍ക്കും ഡയറ്റ് ഫാക്കല്‍റ്റികള്‍ക്കുമായി അഞ്ചു ദിവസത്തെ പ്രത്യേക പരിശീലനത്തിനും തുടക്കമായി. കൈറ്റിന്‍റെ എറണാകുളത്തുള്ള റീജണല്‍ റിസോഴ്‌സ് സെന്ററിലാണ് പരിശീലനം. മന്ത്രി വി. ശിവന്‍കുട്ടി ഓണ്‍ലൈനായി പരിശീലന പരിപാടി ഉദ്ഘാടനം ചെയ്തു. കൈറ്റ് സിഇഒ കെ. അന്‍വര്‍ സാദത്ത് സ്‌കൂളുകള്‍ക്കുള്ള റോബോട്ടിക് കിറ്റുകള്‍ വിതരണം ചെയ്തു.

യൂദാപുരം പള്ളിയിൽ വിശുദ്ധ യൂദാശ്ലീഹായുടെ തിരുനാൾ നേർച്ചസദ്യ പന്തലിന് കാൽനാട്ടി

അങ്കമാലി: ചരിത്ര പ്രസിദ്ധമായ അങ്കമാലി യൂദാപുരം തീർഥാടന കേന്ദ്രത്തിൽ അത്ഭുത പ്രവർത്തകനായ വിശുദ്ധ യൂദാശ്ലീഹായുടെ തിരുനാളിന് ഒരുക്കുന്ന നേർച്ചസദ്യയുടെ പന്തലിന്‍റെ കാൽനാട്ടുകർമം നടത്തി. ഇടവക വികാരിയും റെക്ടറുമായ ഫാ. സെബാസ്റ്റ്യൻ കറുകപ്പിള്ളിയുടെ കാർമ്മികത്വത്തിൽ ആശീർവദിച്ച യൂദാശ്ലീഹായുടെ ചിത്രം ആലേഖനം ചെയ്ത പതാക പന്തലിലെ കൊടി മരത്തിൽ സ്ഥാപിച്ചാണ് പന്തലിന്‍റെ കാൽനാട്ട് കർമ്മം നടത്തിയത്. ചടങ്ങിൽ ബെന്നി ബഹനാൻ എംപി, സഹവികാരി ഫാ. എബി ഫ്രാൻസീസ് ഡ്യൂറോം, തുറവൂർ പഞ്ചായത്ത് പ്രസിഡന്‍റ് ജെസി ജോയ്, വൈസ് പ്രസിഡന്‍റ് റോയ് ചിറയ്ക്കൽ, മെമ്പർമാരായ എം.എസ്. ശ്രീകാന്ത്, സാലി വിൽസൻ, ബ്ലോക്ക് പഞ്ചായത്ത് മെമ്പർ സീലിയ വിന്നി, പ്രസുദേന്തിമാരായ ഡോ. വർഗീസ് മൂലൻ , സുബിൻ ജോർജ്, ഡോ. പ്രിയങ്ക എഡിസൺ, സഞ്ജയ് യോഹന്നാൻ, തിരുനാൾ കമ്മിറ്റി കൺവീനർ ഹെർബർട്ട് ജെയിംസ്, സെക്രട്ടറി ഒ.ജി. കിഷോർ, കൈക്കാരന്മാരായ വില്യം പ്ലാസിഡ്, കിഷോർ പാപ്പാളി, സിസ്റ്റർ റോസ് മിറ്റി, മീഡിയ കൺവീനർ ടി.പി. ചാക്കോച്ചൻ തുടങ്ങിയവർ പങ്കെടുത്തു. ഒക്ടോബർ 30 നാണ് ചരിത്ര പ്രസിദ്ധമായ ഊട്ടുതിരുന്നാൾ. മൂന്ന് ലക്ഷം പേർക്കാണ് ഈ വർഷം നേർച്ച സദ്യ ഒരുക്കുന്നത്. നവനാൾ നൊവേന ഒക്ടോബർ 17 ന് ആരംഭിയ്ക്കും. വിപുലമായ ഒരുക്കങ്ങളും ആരംഭിച്ചു.

ദീപിക നമ്മുടെ ഭാഷ പദ്ധതി : നെടുങ്ങപ്ര സെന്‍റ് ആന്‍റണീസ് യുപി സ്കൂളിൽ

പെരുമ്പാവൂർ : നെടുങ്ങപ്ര സെന്‍റ് ആന്‍റണീസ് യുപി സ്കൂളിൽ ദീപിക നമ്മുടെ ഭാഷ പദ്ധതിയുടെ ഉദ്ഘാടനം മുടിക്കരായി സെന്‍റ് പീറ്റർ ആൻഡ്‌ പോൾ ഫൊറോനാ വികാരി ഫാ. ജെയിംസ് കക്കുഴിയും നെടുങ്ങപ്ര സെന്‍റ് ആന്‍റ്ണീസ് പള്ളി വികാരിയും സ്കൂൾ മാനേജരുമായ ഫാ. പൗലോസ് നെടുംതടത്തിലും ചേർന്ന് സ്കൂൾ ലീഡർമാരായ അദ്വൈത് ഷബിൻ, ആരാധ്യ പി. അഭിലാഷ് എന്നിവർക്ക്് ദീപിക പത്രം നൽകി നിർവഹിച്ചു. ദീപിക ഫ്രണ്ട്‌സ് ക്ലബ്‌ മുടിക്കരായി ഫൊറോന പ്രസിഡന്‍റ് രാജു മാങ്കുഴ, സ്കൂൾ പ്രധാനാധ്യാപിക സിസ്റ്റർ റിയ, അധ്യാപകരായ ജിൻസി പോൾ, റിൻസി സെബാസ്റ്റ്യൻ, ബെന്‍റില ബെന്നി, കണിക തോമസ്, ദീപിക ഏരിയ മാനേജർ റ്റി.എ. നിബിൻ എന്നിവർ സംസാരിച്ചു.

സമരപ്രഖ്യാപനം ഫലിച്ചു : ഗോശ്രീ മേൽപ്പാലത്തിലെ കുഴികൾ നികത്തി

വൈപ്പിൻ : നാട്ടുകാരുടെ സമരപ്രഖ്യാപനം വന്നതോടെ ഗോശ്രീ വല്ലാർപാടം മേൽപാലത്തിലെ കുഴികൾ നികത്തി നാഷണൽ ഹൈവേ അധികൃതർ തടിയൂരി. ഈ സാഹചര്യത്തിൽ ഇന്ന് നാഷണൽ ഹൈവേ അഥോറിറ്റി എറണാകുളം ഓഫീസിനു മുന്നിൽ റസിഡന്‍റ്സ് അസോസിയേഷനുകളുടെ അപ്പക്സ് സംഘടനയായ ഫ്രാഗ് നടത്താൻ നിശ്ചയിച്ചിരുന്ന പ്രതിഷേധ സമരം ഉപേക്ഷിച്ചു. ഈ മേൽപ്പാലത്തിലെ കുഴികൾ നികത്താതെ ദേശീയപാത അധികൃതർ യാത്രക്കാരെ വട്ടം കറക്കുകയായിരുന്നു. ഇതിനിടെ ഇവിടെ പലപ്പോഴും ചെറുവാഹനങ്ങൾ അപകടത്തിൽപ്പെടാൻ തുടങ്ങി. ഇതേത്തുടർന്ന് അപകടത്തിൽപ്പെട്ടവരും അവരുടെ ബന്ധുക്കളും ചേർന്നാണ് ഫ്രാഗിന്‍റെ നേതൃത്വത്തിൽ ഇന്ന് പ്രതിഷേധ സമരത്തിന് ആഹ്വാനം ചെയ്തിരുന്നത്.

ബൈക്കിടിച്ച് കാൽനടയാത്രികൻ മരിച്ചു

ചെറായി: റോഡ് മുറിച്ചുകടക്കുന്നതിനിടെ ബൈക്ക് ഇടിച്ച് കാൽനടയാത്രക്കാരൻ മരിച്ചു. എടവനക്കാട് ബ്ലാവേലിൽ ഗോപിയുടെ മകൻ ഷാജി (54) ആണ് മരിച്ചത്. ഇന്നലെ പുലർച്ചെ നാലിന് എടവനക്കാട് എഇഒ സ്റ്റോപ്പിലായിരുന്നു അപകടം. ഉടൻ കുഴുപ്പിള്ളിയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംസ്കാരം ഇന്ന് ഉച്ചയ്ക്ക് 12ന് നായരമ്പലം പൊതുശ്മശാനത്തിൽ. ഭാര്യ: ജയ. മക്കൾ: ആതിര, ആരതി.

മംഗലത്തുതാഴത്തെ കലുങ്ക് പുനർനിർമാണം പൂർത്തിയായി

കൂത്താട്ടുകുളം: പാലാ റോഡിൽ മംഗലത്തുതാഴത്തെ കലുങ്ക് പുനർനിർമാണം പൂർത്തിയായി. 17 ദിവസം കൂടി കഴിഞ്ഞാൽ ഗതാഗതത്തിന് തുറന്നു കൊടുക്കും. കോൺഗ്രീറ്റ് ബലവത്താകാനുള്ള ദിവസങ്ങൾ പൂർത്തിയായ ശേഷമേ തുറന്നു നൽകുവെന്ന് അധികൃതർ പറഞ്ഞു. റോഡിലെ ഗതാഗതം പൂർണമായി നിരോധിച്ചശേഷം കലുങ്ക് പൂർണമായും പൊളിച്ചുനീക്കിയത് പ്രദേശവാസികൾക്കും വ്യാപാരികൾക്കും ഏറെ ബുദ്ധിമുട്ട് ഉണ്ടാക്കി. നഗരസഭയിലെ മൂന്നു ഡിവിഷനുകളിലെ ജനങ്ങൾ കിലോമീറ്ററുകൾ ചുറ്റിയും നടന്നുമാണ് നഗരത്തിലെത്തുന്നത്. ഒരു കോടി 20 ലക്ഷം രൂപ ചിലവഴിച്ചാണ് ഒരു വർഷം മുമ്പ് രാമപുരം കവല മുതൽ മംഗലത്തുതാഴം വരെയുള്ള റോഡ് നവീകരണവും കലുങ്ക് നിർമാണവും പൂർത്തീകരിച്ചത്. നിർമാണം പൂർത്തിയായി ആഴ്ചകൾ കൊണ്ട് റോഡ് തകർന്നു. ഒരുമാസം മുമ്പ് കലുങ്കിന്‍റെ മുകൾഭാഗത്തെ കോൺക്രീറ്റ് സ്ലാബ് തകർന്നതിന്‍റെ അടിസ്ഥാനത്തിലാണ് കലുങ്ക് പൂർണമായി പൊളിച്ചു നിർമിച്ചത്. കലുങ്ക് നിർമിച്ച കരാറുകാരന്‍റെ ചെലവിലാണ് പുനർനിർമാണം നടന്നിരിക്കുന്നത്. കലുങ്കിന്‍റെ ഇരുവശങ്ങളിലും ഉള്ള അപ്രോച്ച് റോഡുകളും പൊളിച്ചു നീക്കിയ ടൈലുകളും പൂർവസ്ഥിതിയിലാക്കുന്ന മുറയ്ക്ക് റോഡ് തുറന്നു നൽകും.

ഭൂതത്താൻകെട്ട് മിനി ജല വൈദ്യുത പദ്ധതി എത്രയും വേഗം പൂർത്തീകരിക്കും: മന്ത്രി

കോതമംഗലം: ഭൂതത്താൻകെട്ട് മിനി ജല വൈദ്യുത പദ്ധതിയുമായി ബന്ധപ്പെട്ട് കെഎസ്എബിയും കരാർ കമ്പനിയുമായുള്ള മീറ്റിംഗിന്‍റെ അടിസ്ഥാനത്തിലും തുടർന്നുള്ള ഹൈക്കോടതി ഉത്തരവിന്‍റെ അടിസ്ഥാനത്തിലും പദ്ധതി എത്രയും വേഗം പൂർത്തീകരിക്കുന്നതിനുള്ള തുടർനടപടികൾ കെഎസ്ഇബി സ്വീകരിക്കുമെന്ന് വൈദ്യുതി മന്ത്രി എ.കെ. കൃഷ്ണൻകുട്ടി നിയമസഭയിൽ അറിയിച്ചു. ഭൂതത്താൻകെട്ട് മിനി ജല വൈദ്യുത പദ്ധതിയുടെ ശേഷിക്കുന്ന പ്രവർത്തികൾ പൂർത്തീകരിച്ചു പദ്ധതി അടിയന്തരമായി കമ്മീഷൻ ചെയ്യണമെന്ന് ആവശ്യപ്പെട്ടുകൊണ്ട് ആന്‍റണി ജോൺ എംഎൽഎയുടെ സബ്മിഷന് മറുപടിയായിട്ടാണ് മന്ത്രി ഇക്കാര്യം വ്യക്തമാക്കിയത്.

കോതമംഗലത്ത് കൗണ്‍സിലറുടെ നേതൃത്വത്തിൽ 25 കുടുംബങ്ങള്‍ക്ക് വീടൊരുങ്ങി

25 വീടുകളുടെ സമര്‍പ്പണവും 6 വീടുകളുടെ താക്കോല്‍ദാനവും 20ന് കോതമംഗലം: കോതമംഗലത്ത് കൗണ്‍സിലറുടെ നേതൃത്വത്തിൽ 25 കുടുംബങ്ങള്‍ക്ക് വീടൊരുങ്ങി. കോതമംഗലം നഗരസഭ 18-ാം വാര്‍ഡില്‍ കൗണ്‍സിലര്‍ ഷിബു കുര്യാക്കോസിന്‍റെ നേതൃത്വത്തിലാണ് വീടുകളുടെ നിര്‍മാണം പൂര്‍ത്തിയാക്കിയത്. 25 വീടുകളുടെ സമര്‍പ്പണവും ആറ് വീടുകളുടെ താക്കോല്‍ദാനവും 20ന് രാവിലെ 9.30-ന് പ്രതിപക്ഷ നേതാവ് വി.ഡി. സതീശന്‍ ഉദ്ഘാടനം ചെയ്യും. 1.25 ഏക്കര്‍ സ്ഥലത്ത് മൂന്ന് സെന്‍റ് വീതം സ്ഥലത്താണ് വില്ലകള്‍ പോലെ റോഡിന് ഇരുവശത്തുമായാണ് ചെറു വീടുകള്‍ നിര്‍മിച്ചിരിക്കുന്നത്. 3.5 കോടി രൂപയാണ് നിര്‍മാണച്ചെലവ്. വാടക കെട്ടിടങ്ങളിലും വാസയോഗ്യമല്ലാത്ത വീടുകളിലും താമസിച്ചിരുന്നവർ വീടെന്ന സ്വപ്‌നം യാഥാര്‍ഥ്യമായതിന്‍റെ സന്തോഷത്തിലാണ്. തെരഞ്ഞെടുപ്പ് വേളയില്‍ വീട് സന്ദര്‍ശന സമയത്താണ് ഇവരുടെ ദുരവസ്ഥ ശ്രദ്ധയില്‍പ്പെട്ടതെന്ന് ഷിബു കുര്യാക്കോസ് പറഞ്ഞു. വീടില്ലാത്ത നിരവധി പേര്‍ ഇനിയുമുണ്ട്. ഇത്തരത്തില്‍ നൂറ് വീട് നിര്‍മിച്ച് നല്‍കണമെന്നാണ് തന്‍റെ സ്വപ്‌നമെന്ന് ഷിബു പറഞ്ഞു. മാര്‍ ബേസില്‍ സ്‌കൂളിന് പിന്നില്‍ 500 മീറ്റര്‍ മാറി കുരൂര്‍ തോടിന് അരുകിലായി ഇന്ദിരാനഗറിലാണ് 25 ഭവനങ്ങള്‍ നിര്‍മിച്ചിരിക്കുന്നത്. പ്രധാനമന്ത്രി ആവാസ് യോജന പദ്ധതിയിലൂടെ 16 വീടുകളും ലയണ്‍സ് ക്ലബ് മുഖേന അഞ്ച് വീടുകളുമാണ് നിര്‍മിച്ചിരിക്കുന്നത്. ലയണ്‍സ് ക്ലബ് ഇതു കൂടാതെ 13 ലക്ഷം രൂപ കൂടി നിര്‍മാണ സഹായമായി നല്‍കിയിരുന്നു. നാല് പേര്‍ക്ക് ഏഴ് ലക്ഷം രൂപയുടെ വായ്പയിലൂടെയാണ് വീട് പണിത് നല്‍കിയിരിക്കുന്നത്. സ്ഥലം വാങ്ങിയാണ് ഓരോരുത്തര്‍ക്കും 500 മുതല്‍ 650 ചതുരശ്രയടി വിസ്തീര്‍ണത്തിലാണ് വീട് നിര്‍മിച്ച് നല്‍കിയത്. 16 അടി വീയില്‍ വഴിയും വെളിച്ചവും വെള്ളവും ലഭ്യമാക്കിയിട്ടുണ്ട്. വീടുകളുടെ സമര്‍പ്പണ ചടങ്ങില്‍ സിനിമാ താരം സിദ്ദിഖ് മുഖ്യാതിഥിയാവും. കോതമംഗലം രൂപതാധ്യക്ഷന്‍ ജോര്‍ജ് മഠത്തിക്കണ്ടത്തില്‍, ഏലിയാസ് മാര്‍ യൂലിയോസ് മെത്രാപ്പോലീത്ത എന്നിവര്‍ അനുഗ്രപ്രഭാഷണം നടത്തും. ആന്‍റണി ജോണ്‍ എംഎല്‍എ അധ്യക്ഷത വഹിക്കും. എംപിമാരായ ഡീന്‍ കുര്യാക്കോസ്, ബെന്നി ബഹനാന്‍, എംഎല്‍എമാരായ മാത്യു കുഴല്‍നാടന്‍, എല്‍ദോസ് കുന്നപ്പിള്ളി, റോജി എം. ജോണ്‍, മുന്‍ മന്ത്രി ടി.യു. കുരുവിള, ജില്ല പഞ്ചായത്ത് പ്രസിഡന്‍റ് മനോജ് മൂത്തേടന്‍, നഗരസഭാധ്യക്ഷന്‍ കെ.കെ. ടോമി, ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീര്‍ എന്നിവര്‍ പെങ്കെടുക്കും.

മൗണ്ട് കാർമൽ കോളജിന് മിനിസ്റ്റേഴ്‌സ് എക്സലൻസ് അവാർഡ്

കോതമംഗലം: ഉന്നത വിദ്യാഭ്യാസ മേഖലയിൽ മികവു പുലർത്തുന്ന സ്ഥാപനങ്ങൾക്കായി സംസ്ഥാന സർക്കാർ ഏർപ്പെടുത്തിയ എക്സലൻഷ്യ-2025 മിനിസ്റ്റേഴ്‌സ് എക്സലൻസ് അവാർഡ് കറുകടം മൗണ്ട് കാർമൽ കോളജിന് ലഭിച്ചു. തിരുവനന്തപുരം ടാഗോർ തീയറ്ററിൽ നടന്ന ചടങ്ങിൽ മന്ത്രി ആർ. ബിന്ദുവിൽനിന്നും കറുകടം മൗണ്ട് കാർമൽ കോളജിന് വേണ്ടി പ്രിൻസിപ്പൽ ഫാ. ഷാജി മംഗലത്ത്, ഐക്യുഎസി കോർഡിനേറ്റർ മിസ്. അനീറ്റ സാറ തങ്കച്ചൻ, ഐക്യുഎസി സെക്രട്ടറി രമ്യ ചന്ദ്രൻ എന്നിവർ ചേർന്ന് ഏറ്റുവാങ്ങി. നാക് എപ്ലസ്പ്ലസ്, എപ്ലസ്, എ ഗ്രേഡ് നേടിയിട്ടുള്ള സ്ഥാപനങ്ങളേയും എൻഐആർഎഫ്, കെഐആർഎഫ് എന്നിവയിൽ മുന്നിൽ നിൽക്കുന്ന സ്ഥാപനങ്ങളേയും മിനിസ്റ്റേഴ്സ‌് അവാർഡ് നൽകി ആദരിച്ചു.

കടവൂരില്‍ ഓപ്പണ്‍ ജിംനേഷ്യം ഉദ്ഘാടനം ചെയ്തു

പോത്താനിക്കാട്: കടവൂര്‍ ഗവ. വൊക്കേഷണല്‍ ഹയര്‍ സെക്കന്‍ഡറി സ്കൂള്‍ കോമ്പൗണ്ടില്‍ ബ്ലോക്ക് പഞ്ചായത്ത് ഫണ്ട് ഉപയോഗിച്ചു നിര്‍മിച്ച ഓപ്പണ്‍ ജിംനേഷ്യത്തിന്‍റെ ഉദ്ഘാടനം കോതമംഗലം ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീര്‍ നിര്‍വഹിച്ചു. പൈങ്ങോട്ടൂര്‍ പഞ്ചായത്ത് പ്രസിഡന്‍റ് ജിജി ഷിജു അധ്യക്ഷത വഹിച്ചു. ജില്ലാപഞ്ചായത്തംഗം റാണിക്കുട്ടി ജോര്‍ജ്, ബ്ലോക്ക് പഞ്ചായത്ത് വൈസ് പ്രസിഡന്‍റ് ഡയാന നോബി, പഞ്ചായത്ത് വൈസ് പ്രസിഡന്‍റ് സാബു മത്തായി, ബ്ലോക്ക് പഞ്ചായത്തംഗങ്ങളായ ജോമി തെക്കേക്കര, ജെയിംസ് കോറമ്പേല്‍, സാലി ഐപ്പ്, ആനീസ് ഫ്രാന്‍സിസ് തുടങ്ങിയവര്‍ പ്രസംഗിച്ചു.

പിറവം ഐടിഐയിൽ യുവ സംരംഭക സംഗമം

പിറവം: എംഎസ്എം ഐടിഐയില്‍ യുവ സംരംഭക സംഗമം നടത്തി. പരിപാടിയുടെ ഉദ്ഘാടനം എംഎസ്എം ഐടിഐ രക്ഷാധികാരി ബിഷപ്പ് യൂഹാനോൻ മാർ തിയോഡോഷ്യസ് നിർവഹിച്ചു. ചടങ്ങിൽ മുനിസിപ്പൽ ചെയർപേഴ്സൺ ജൂലി സാബു, വൈസ് ചെയർമാൻ കെ.പി. സലിം, കൗൺസിലർ ഏലിയാമ്മ ഫിലിപ്പ് എന്നിവർ പങ്കെടുത്തു. പുതിയ അധ്യായന വർഷ ആരംഭിക്കുന്നതിന്‍റെ ഭാഗമായി നടന്ന ചടങ്ങിലാണ് മികച്ച സംരംഭകരെ ആദരിക്കലും ഐടിഐ കാമ്പസിൽ തുടങ്ങുന്ന ആൽഫ ഇൻഡസ്ട്രീസിന്‍റെ ഉദ്ഘടനവും നടന്നത്. യുവ സംരഭക സംഗമത്തിൽ മികച്ച യുവ സംരംഭകനും സംസ്ഥാന കർഷക അവാർഡ് ജേതാവുമായ മോനു മാമ്മൻ, മികച്ച വ്യവസായ സംരംഭകൻ സോണി ജോൺ, ഐടിഐ മുൻ സ്റ്റുഡന്‍റും പ്രധാനമന്ത്രിയുടെ അവാർഡ് ജേതാവുമായ കെ.കെ. ബിനു എന്നിവർക്കു എക്സലൻസ് അവാർഡ് നൽകി ആദരിച്ചു. തുടർന്ന് മുഖാമുഖം മോട്ടിവേഷൻ സംവാദം നടന്നു. ഐടിഐയില്‍ കഴിഞ്ഞ വർഷം വിജയം നേടിയവരെ പുരസ്കാരം നൽകി ആദരിച്ചു. സർട്ടിഫിക്കറ്റുകളും വിതരണം ചെയ്തു. ചടങ്ങിൽ ഐടിഐ ഡയറക്ടർ ഫാ.ഡോ. വർഗീസ് ബേബി മടത്തിക്കുന്നത്ത്, പ്രിസിപ്പൽ നീതു സോമൻ എന്നിവർ പ്രസംഗിച്ചു.

കുന്നത്തുനാട് മണ്ഡലത്തിൽ പുതുതായി 2864 മുൻഗണനാ റേഷൻ കാർഡുകൾ

കോലഞ്ചേരി: സർക്കാർ അധികാരത്തിൽ വന്നശേഷം കുന്നത്തുനാട് മണ്ഡലത്തിൽ പുതുതായി 2864 പേർക്ക് മുൻഗണന റേഷൻ കാർഡുകളും 164 പേർക്ക് എഎവൈ റേഷൻ കാർഡുകളും വിതരണം ചെയ്തതായി ഭക്ഷ്യ പൊതുവിതരണ മന്ത്രി ജി.ആർ. അനിൽ നിയമസഭയിൽ വ്യക്തമാക്കി. ഇതു സംബന്ധിച്ച പി.വി. ശ്രീനിജിൻ എംഎൽഎ യുടെ നിയമസഭാ ചോദ്യത്തിന് മറുപടിയായിട്ടാണ് മന്ത്രി ഇക്കാര്യം അറിയിച്ചത്. സർക്കാർ അധികാരത്തിൽ വന്നശേഷം കുന്നത്തുനാട് മണ്ഡലത്തിൽനിന്നും മുൻഗണന വിഭാഗത്തിലേക്കുള്ള കാർഡുകൾക്കായി 3527 അപേക്ഷകളും എഎ വൈ കാർഡുകൾക്കായി 183 അപേക്ഷകളും സർക്കാരിൽ ലഭ്യമായിട്ടുണ്ട്. ഇതിനിന്നാണ് 2864 പേർക്ക് മുൻഗണന കാർഡുകളും 164 പേർക്ക് എ എ വൈ കാർഡുകളും അനുവദിച്ചത്. അനർഹരായ 1085 പേരെ മുൻഗണനാ കാർഡുകളിൽ നിന്നും 198 പേരെ എഎവൈ കാർഡുകളിൽനിന്നും ഒഴിവാക്കിയതായും മന്ത്രി അറിയിച്ചു.

താറാവ് കൂട്ടിൽനിന്നും പെരുമ്പാമ്പിനെ പിടികൂടി

പോത്താനിക്കാട്: തെക്കേ പുന്നമറ്റത്ത് താറാവ് കൂട്ടിൽ കയറിയ പെരുമ്പാമ്പിനെ പിടികൂടി കുളമാവ് വനമേഖലയിൽ തുറന്നു വിട്ടു. കുഴിവേലിക്കുന്നേൽ വിജയന്‍റെ താറാവ് കൂട്ടിനുള്ളിലെ വലയിൽ കുടുങ്ങിക്കിടന്ന പെരുമ്പാമ്പിനെ അയൽവാസിയായ കോൺഗ്രസ് ബൂത്ത് പ്രസിഡന്‍റ് ബാബു ഭാർഗവനാണ് ഇന്നലെ രാവിലെ കണ്ടെത്തിയത്. ഉടൻ വനപാലകരെ വിളിച്ചു വിവരമറിയച്ചതിനെ തുടർന്ന് കാളിയാർ ഫോറസ്റ്റ് ഓഫീസിലെ ഉദ്യോഗസ്ഥരെത്തി പാമ്പിനെ പിടികൂടുകയായിരുന്നു.

കൂത്താട്ടുകുളത്തെ റോഡുകളുടെ അറ്റകുറ്റപ്പണികൾ തിങ്കളാഴ്ച മുതൽ

കൂത്താട്ടുകുളം: വിവിധ റോഡുകളുടെ അറ്റകുറ്റപ്പണികൾ തിങ്കളാഴ്ച മുതൽ ആരംഭിക്കും. കൂത്താട്ടുകുളം മാർക്കറ്റ് റോഡ്, കൂത്താട്ടുകുളം-പാലാ റോഡ്, കമ്പം-തേനി ഹൈവേയുടെ ഭാഗമായിട്ടുള്ള പാലക്കുഴ റോഡ് തുടങ്ങിയ റോഡുകളുടെ അറ്റപ്പണികൾ ആദ്യഘട്ടത്തിൽ പൂർത്തിയാകും. കാലാവസ്ഥ അനുകൂലമല്ലാത്തതിനാൽ കുഴികളിൽ മെറ്റൽ നികത്തിയാകും പണികൾ നടത്തുക. കാലാവസ്ഥ അനുകൂലമാകുന്ന മുറയ്ക്ക് ടാറിംഗ് ജോലികൾ ആരംഭിക്കും. കൂത്താട്ടുകുളം-പാലാ റോഡിൽ രാമപുരം കവല മുതൽ മംഗലത്തുതാഴം വരെയുള്ള റോഡ് പൂർണമായി തകർന്നിട്ട് രണ്ട് മാസത്തിലേറെയായി. കാൽനടയാത്രയ്ക്ക് പോലും കഴിയാത്ത അവസ്ഥയിലാണ് നിലവിൽ ഈ റോഡ്. മംഗലത്തു താഴത്തെ കലുങ്ക് നിർമാണത്തിനായി നിലവിൽ ഈ റോഡിലെ ഗതാഗതം പൂർണമായി നിരോധിച്ചിരിക്കുകയാണ്. ഗതാഗത നിരോധന കാലയളവിൽ റോഡിൽ അറ്റകുറ്റപ്പണികൾ നടത്താത്തതിൽ വലിയ ആക്ഷേപം നിലവിലുണ്ട്. ഗതാഗതം നിരോധിച്ച സാഹചര്യത്തിൽ ഈ പ്രദേശത്തെ കച്ചവട സ്ഥാപനങ്ങളിലും പ്രദേശത്ത് താമസിക്കുന്നവർക്കും വലിയ ബുദ്ധിമുട്ടുകളാണ് ഉണ്ടാകുന്നത്. കാലാവസ്ഥ അനുകൂലമായ സാഹചര്യത്തിൽ റോഡിന്‍റെ അറ്റകുറ്റപ്പണികൾ നടത്താതെ മഴ ആരംഭിച്ചപ്പോൾ നിർമാണ പ്രവർത്തനങ്ങൾ തുടങ്ങുന്നത് വലിയ ആക്ഷേപത്തിന് ഇടയാക്കുന്നുണ്ട്.

ബാറ്ററി മോഷ്ടിച്ചെന്നാരോപിച്ച് മർദനം; നിയമസഭയിൽ ഉന്നയിച്ച് എംഎൽഎ

മൂവാറ്റുപുഴ: ഇന്‍വെര്‍ട്ടര്‍ ബാറ്ററി മോഷ്ടിച്ചെന്നാരോപിച്ച് മൂവാറ്റുപുഴ പോലീസ് ആരക്കുഴ വള്ളിക്കട സ്വദേശിയായ അമല്‍ ആന്‍റണിയെ ആളുമാറി മര്‍ദിച്ച സംഭവം നിയമസഭയില്‍ അടിയന്തര പ്രമേയ ചര്‍ച്ചയ്ക്കിടെ ഉന്നയിച്ച് മാത്യു കുഴല്‍നാടന്‍ എംഎല്‍എ. എന്നാല്‍ പോലീസിന്‍റെ പ്രവര്‍ത്തിയെ ന്യായീകരിക്കുന്ന വാദമാണ് മുഖ്യമന്ത്രി നിയമസഭയില്‍ എംഎല്‍എയ്ക്ക് മറുപടിയായി നല്‍കിയത്. സിസിടിവി ദൃശ്യങ്ങളുടെ അടിസ്ഥാനത്തില്‍ അന്വേഷണത്തിനിടെയുണ്ടായ നിസഹകരണം മൂലമാണ് അമലിനെ സ്റ്റേഷനിലേക്ക് കൊണ്ടുപോയതെന്നും കടയുടമയുടെ സ്ഥിരീകരണത്തിന് ശേഷം വിട്ട് അയക്കുകയാണ് ചെയ്തതെന്നും മുഖ്യമന്ത്രി സഭയില്‍ പറഞ്ഞു. സംഭവത്തില്‍ വ്യാപകമായ പ്രതിഷേധങ്ങള്‍ ഉയര്‍ന്നിട്ടും ഒരു മാസത്തില്‍ അധികം പിന്നിട്ടിട്ടും നിയമസഭയില്‍ ചോദ്യം ഉയര്‍ന്നപ്പോള്‍ മാത്രമാണ് ഉന്നത ഉദ്യോഗസ്ഥര്‍ റിപ്പോര്‍ട്ട് നല്‍കാന്‍ പോലും തയ്യാറായത്. കാക്കി കുപ്പായം ധരിച്ച് അഴിമതിയും, അക്രമവും, ഗുണ്ടായിസവും നടത്തുന്ന ഉദ്യോഗസ്ഥരെ സംരക്ഷിക്കുന്ന സമീപനമാണ് സര്‍ക്കാരിന്‍റെതെന്നും എംഎല്‍എ കുറ്റപ്പെടുത്തി. കഴിഞ്ഞ 12നാണ് സംഭവം നടന്നത്. അമല്‍ നിരപരാധിയാണെന്ന് തെളിഞ്ഞതോടെ വീട്ടിലേക്ക് പൊയ്‌ക്കൊള്ളാന്‍ പോലീസ് നിര്‍ദേശിക്കുകയായിരുന്നു. പോലീസ് മര്‍ദനത്തില്‍ അമലിന്‍റെ മുതുകിനും കഴുത്തിനും ഗുരുതര പരിക്കേറ്റിരുന്നതാണ് മെഡിക്കല്‍ റിപ്പോര്‍ട്ട്. ഒരു മാസത്തിനു ശേഷവും ചികിത്സയിലാണ്.

മഴ: കച്ചേരിത്താഴത്തെ ഗര്‍ത്തം മൂടുന്നത് വൈകുന്നു

മൂവാറ്റുപുഴ: കച്ചേരിത്താഴത്തെ ഗര്‍ത്തം മൂടുന്നത് അവസാന ഘട്ടത്തിലെത്തിലെത്തിയപ്പോഴേയ്ക്കും മഴ പെയ്തതോടെ നിര്‍ത്തിവച്ചു. കഴിഞ്ഞ മാസം 11ന് സ്‌കൂള്‍ ബസിന്‍റെ ചക്രം കുഴിയില്‍ വീണതോടെയാണു വലിയ പാലത്തിനു സമീപം കുഴി രൂപപ്പെട്ടത്. ചെറുതായി രൂപപ്പെട്ട കുഴി പിന്നീട് വലിയ ഗര്‍ത്തമായി മാറുകയായിരുന്നു. കുഴിയുടെ കാരണവും പരിഹാരവും കണ്ടെത്താന്‍ നടത്തിയ പഠനങ്ങളുടെ റിപ്പോര്‍ട്ട് സമര്‍പ്പിക്കാന്‍ വൈകിയതും എല്ലാം ഒട്ടേറെ വ്യാപാര സ്ഥാപനങ്ങളെ അടച്ചു പൂട്ടലിന്‍റെ വക്കിലെത്തിച്ചു. കഴിഞ്ഞ ദിവസം മാത്യു കുഴല്‍നാടന്‍ എംഎല്‍എ പങ്കെടുത്ത കിഫ്ബി യോഗത്തിലാണ് കുഴി മൂടാന്‍ അനുമതി നല്‍കിയത്. ഇതോടെ ശനിയാഴ്ച്ച മുതല്‍ കരിങ്കല്ല് നിറച്ച് ഇതിനു മുകളില്‍ മെറ്റലും അതിനു മുകളില്‍ ജിഎസ്ബി മിശ്രിതവും ചേര്‍ത്ത് അഞ്ച് അടിയോളം കുഴി മൂടി. ഈ ആഴ്ചയില്‍ തന്നെ കുഴി പൂര്‍ണമായി മൂടാന്‍ കഴിയുമെന്നാണ് ഉദ്യോഗസ്ഥര്‍ പറഞ്ഞിരുന്നത്. എന്നാല്‍ ചൊവ്വാഴ്ച രാത്രി മഴ പെയ്തതോടെ ഇന്നലെ നിര്‍മാണ പ്രവര്‍ത്തികള്‍ നിര്‍ത്തിവയ്ക്കുകയായിരുന്നു. നഗര റോഡ് വികസനത്തിന്‍റെ ഭാഗമായുള്ള റോഡ് ടാറിംഗ് കുഴി മൂലം പാലത്തിലേക്ക് എത്തിക്കാന്‍ കഴിഞ്ഞിട്ടില്ല. കുഴി പൂര്‍ണമായി മൂടുന്നതോടെ പാലം വരെയുള്ള ടാറിംഗ് പൂര്‍ത്തിയാകും. പാലത്തിലെ കുഴികള്‍ അടച്ചുള്ള പാലം ടാറിംഗും ഉടനെ തന്നെ ഉണ്ടാകുമെന്ന് ഉദ്യോഗസ്ഥര്‍ പറഞ്ഞു. ഇതിനു ശേഷമായിരിക്കും നഗര റോഡ് വികസനത്തിന്‍റെ അന്തിമ ഘട്ടം ആരംഭിക്കുകയുള്ളു. നഗരത്തിലെ റോഡ് പൂര്‍ണമായും തുറന്നുകൊടുത്തെങ്കിലും കച്ചേരിത്താഴത്ത് കുഴി മൂടാത്തതിനാല്‍ ഇവിടെ ഗതാഗതകുരുക്ക് രൂക്ഷമാണ്.

കന്നി 20 പെരുന്നാൾ: വിളംബര ഘോഷയാത്ര നടത്തി

കോതമംഗലം: മാർ തോമ ചെറിയ പള്ളിയിൽ കബറടക്കിയിരിക്കുന്ന പരിശുദ്ധ എൽദോ മാർ ബസേലിയോസ് ബാവയുടെ 340-ാം ഓർമ്മ പെരുന്നാളിന് (കന്നി - 20) തുടക്കം കുറിച്ചുകൊണ്ടുള്ള വിളംബര ഘോഷയാത്ര നടത്തി. പരിശുദ്ധ ബാവ മലങ്കരയിൽ പ്രഥമ കുർബാന അർപ്പിച്ച പള്ളിവാസലിൽനിന്നും കോതമംഗലം മാർ തോമ ചെറിയ പള്ളിയിലേക്കാണ് ഘോഷയാത്ര നടത്തിയത്. ഹൈറേഞ്ച് മേഖല മെത്രാപ്പോലീത്ത ഏലിയാസ് മാർ അത്തനാസിയോസ് ഘോഷയാത്ര ഫ്ലാഗ് ഓഫ് ചെയ്തു. ഹൈറേഞ്ചിലെ വിവിധ ദേവാലയങ്ങൾ സന്ദർശിച്ച ഘോഷയാത്ര അടിമാലി ടൗണിൽ പഞ്ചായത്ത് പ്രസിഡന്‍റ് സൗമ്യ സുനിൽ ഹാരാർപ്പണം നടത്തി സ്വീകരിച്ചു. കോതമംഗലത്തെ വിവിധ ദേവാലയങ്ങൾ സന്ദർശിച്ച ഘോഷയാത്രക്ക് മുനിസിപ്പൽ ഓഫീസിന് മുമ്പിൽ വൈസ് ചെയർ പേഴ്സൺ സിന്ധു ഗണേശ്, സ്ഥിരം സമിതി ചെയർമാൻ നൗഷാദ്, പ്രതിപക്ഷ നേതാവ് എ ജി ജോർജ്, മറ്റ് കൗൺസിലർമാർ എന്നിവർ ചേർന്ന് സ്വീകരണം നൽകി. തുടർന്ന് ഗാന്ധി സ്ക്വയറിൽ ഡീൻ കുര്യാക്കോസ് എം പി ടൗൺ മർച്ചന്‍റ് അസോസിയേഷൻ, അങ്ങാടി മർച്ചന്‍റ് അസോസിയേഷൻ, പള്ളി വക സ്ഥാപനങ്ങളിലെ അംഗങ്ങൾ, രാഷ്ട്രീയ സാമൂഹിക സാമുദായിക നേതാക്കൾ എന്നിവർ ചേർന്ന് തീർത്ഥാടന വിളംബര ഘോഷയാത്രയെ സ്വീകരിച്ചു. പള്ളിയിൽ എത്തിച്ചേർന്ന ഘോഷയാത്രയെ ഏലിയാസ് മാർ യൂലിയോസ് മെത്രാപ്പോലീത്ത ആശിർവദിച്ചു. വിളംബര ഘോഷയാത്രയ്ക്ക് വികാരി ഫാ. ജോസ് മാത്യു തേച്ചത്തുകുടി, സഹ വികാരിമാരായ ഫാ. സാജു ജോർജ്, ഫാ. എൽദോസ് ചെങ്ങമനാട്ട്, ഫാ. അമൽ കുഴികണ്ടത്തിൽ, ഫാ. നിയോൺ പാലോസ്, ഫാ. സിച്ചു രാജു, തന്നാണ്ട് ട്രസ്റ്റിമാരായ കെ.കെ. ജോസഫ്, എബി ചേലാട്ട്, വർക്കിംഗ് കമ്മിറ്റി അംഗങ്ങൾ, മാനേജിംഗ് കമ്മിറ്റി അംഗങ്ങൾ എന്നിവർ നേതൃത്വം നൽകി.

പോക്സോ കേസിൽ വൈദികന്‍റെ ശിക്ഷ മരവിപ്പിച്ചു

ന്യൂഡൽഹി: എറണാകുളം പുത്തന്‍വേലിക്കര പോക്‌സോ കേസില്‍ പ്രതിചേര്‍ക്കപ്പെട്ടിരുന്ന വൈദികന്‍റെ ശിക്ഷ സുപ്രീംകോടതി മരവിപ്പിച്ചു. പുത്തന്‍വേലിക്കര കുരിശിങ്കല്‍ ലൂര്‍ദ്മാതാ പള്ളി വികാരിയായിരുന്ന എഡ്വിന്‍ ഫിഗറസിന്‍റെ ശിക്ഷയാണു കോടതി മരവിപ്പിച്ചത്. ചീഫ് ജസ്റ്റീസ്‌ ബി.ആർ. ഗവായ്, ജസ്റ്റീസ്‌ കെ.വിനോദ് ചന്ദ്രൻ എന്നിവരടങ്ങിയ ബെഞ്ചിന്‍റേതാണു തീരുമാനം. കേസില്‍ വൈദികന് ഹൈക്കോടതി വിധിച്ച 20 വര്‍ഷം തടവെന്ന ശിക്ഷയ്‌ക്കെതിരേ നല്‍കിയ അപ്പീല്‍ പരിഗണിച്ചാണ് സുപ്രീംകോടതി ഉത്തരവ്. അപ്പീലിൽ സുപ്രീംകോടതി തീരുമാനമെടുക്കുംവരെയാണു ശിക്ഷ മരവിപ്പിച്ചത്. ഹൈക്കോടതി നൽകിയ ശിക്ഷയിൽ പകുതിയോളം ശിക്ഷാ കാലാവധി അനുഭവിച്ച സാഹചര്യത്തിലാണു നടപടി. കേസിലെ ഒന്നാം പ്രതിയാണ് എഡ്വിന്‍ ഫിഗറസ്. കേസിലെ രണ്ടാം പ്രതിയും എഡ്വിന്‍ ഫിഗറസിന്‍റെ സഹോദരനുമായ സിൽവസ്റ്റർ ഫിഗറസിന്‍റെ ശിക്ഷ നേരത്തേ ഹൈക്കോടതി റദ്ദാക്കിയിരുന്നു.

തീരദേശ മാനേജ്മെന്‍റ് പ്ലാൻ അന്തിമഘട്ടത്തിൽ: കെ.എൻ. ഉണ്ണികൃഷ്ണൻ എംഎൽഎ

വൈപ്പിൻ: കാലാവസ്ഥ വ്യതിയാനം മൂലമുള്ള ഓരുവെള്ള ഭീഷണിയിൽ നിന്ന് വൈപ്പിൻ ദ്വീപിനെ സംരക്ഷിക്കുന്നതിന് എൻസിസിആർ പഠനറിപ്പോർട്ടിന്‍റെ അടിസ്ഥാനത്തിൽ തയാറാക്കുന്ന തീരദേശ മാനേജ്മെന്‍റ് പ്ലാൻ അന്തിമ ഘട്ടത്തിലാണെന്നു മന്ത്രി കെ. രാജൻ ഉറപ്പു നൽകിയതായി കെ.എൻ. ഉണ്ണികൃഷ്ണൻ എംഎൽഎ അറിയിച്ചു. പദ്ധതിക്ക് അംഗീകാരം ലഭിച്ചാൽ അനുയോജ്യമായ രീതിയിൽ തീരദേശ സംരക്ഷണ നടപടികൾ നിർദേശിക്കാനാകും. തീരശോഷണം സംസ്ഥാന സവിശേഷ ദുരന്തമായി സംസ്ഥാന സർക്കാർ പ്രഖ്യാപിച്ചതു പ്രകാരം ദുരന്തബാധിതർക്ക് ദുരിതാശ്വാസത്തിന് അർഹതയുണ്ടെന്നും മന്ത്രി അറിയിച്ചു. പുഴ, കായൽ, കടൽ, മറ്റ് ജല സ്രോതസുകൾ എന്നിവിടങ്ങളിൽ നിന്നുള്ള അധികജലം മൂലമുണ്ടാകുന്ന വെള്ളപ്പൊക്കത്തെ തുടർന്ന് ദുരിതത്തിലാകുന്നവരും ദുരിതാശ്വാസത്തിന് അർഹരാണ്. ഇതിനായി ജലസേചന വകുപ്പും സംസ്ഥാന ദുരന്ത നിവാരണ അഥോറിറ്റിയും ചേർന്നു സാങ്കേതികപഠനം നടത്തി പദ്ധതി ദേശീയ ദുരന്ത നിവാരണ അഥോറിറ്റിക്കു സമർപ്പിക്കാനുള്ള നടപടികൾ അവസാന ഘട്ടത്തിലാണെന്നും മന്ത്രി എംഎൽഎയെ അറിയിച്ചു.

ആയുര്‍വേദ മെഗാ മെഡിക്കല്‍ ക്യാന്പ് നടത്തി

കൊച്ചി: ആയുര്‍വേദ മെഡിക്കല്‍ അസോസിയേഷന്‍ ഓഫ് ഇന്ത്യ (എഎംഎഐ) ജില്ലാ കമ്മിറ്റിയും എറണാകുളം സിറ്റി ഏരിയയും എറണാകുളം പ്രസ് ക്ലബ്ബുമായി സഹകരിച്ച് സ്‌പെഷാലിറ്റി മെഗാ മെഡിക്കല്‍ ക്യാമ്പ് സംഘടിപ്പിച്ചു. എറണാകുളം പ്രസ്‌ക്ലബില്‍ സബ് കളക്ടര്‍ ജി. സായി കൃഷ്ണ ഉദ്ഘാടനം ചെയ്തു. പ്രസ് ക്ലബ് പ്രസിഡന്‍റ് ആര്‍.ഗോപകുമാര്‍ അധ്യക്ഷത വഹിച്ചു. പ്രസ് ക്ലബ് സെക്രട്ടറി ഷജില്‍ കുമാര്‍, കെയുഡബ്ല്യുജെ സംസ്ഥാന സമിതിയംഗം ജിപ്‌സണ്‍ സിക്കേര, ജില്ലാ നിര്‍വാഹക സമിതിയംഗം ഒ.പി. ജിഷ, അസോസിയേഷന്‍ ഓഫ് ഇന്ത്യ എറണാകുളം ജില്ലാ സെക്രട്ടറി ഡോ. എലിസബത്ത് മാത്യു, ജില്ലാ പ്രസിഡന്‍റ് ഡോ. മനു ആര്‍. മംഗലത്ത് തുടങ്ങിയവര്‍ പങ്കെടുത്തു. അസ്ഥി, ത്വക് രോഗങ്ങള്‍, ജീവിതശൈലി രോഗങ്ങള്‍, ഉദരരോഗങ്ങള്‍, നേത്ര ചികിത്സ, സ്ത്രീരോഗങ്ങള്‍ തുടങ്ങി എട്ടോളം സ്‌പെഷാലിറ്റികളിലായി നൂറോളം പേര്‍ പങ്കെടുത്തു. ഡോ. രോഹിത്ത് രവി, ഡോ.ഗംഗ ശശിധരന്‍, ഡോ. യമുന, ഡോ. ബിന്‍സ ഹസന്‍, ഡോ. എമിലിന്‍ കെ. ജോര്‍ജ്, ഡോ. ഗ്രീഷ്മ പ്രമോദ്, ഡോ. ജയചന്ദ്രന്‍, ഡോ. ജിഷ്ണു വേണുഗോപാല്‍, ഡോ. അഞ്ജന ശ്രീധര്‍, ഡോ. ദേവദാസ് ഡോ. ടോണി തോമസ് എന്നിവര്‍ നേതൃത്വം നല്‍കി.

റോഡ് നിർമാണത്തിലെ അപാകത : അങ്കമാലിയിൽ നഗരസഭാ സെക്രട്ടറിയെ ഉപരോധിച്ചു

അങ്കമാലി: നഗരസഭയ്ക്കും വ്യാപാരഭവനും ഇടയ്ക്കുള്ള പൊതുറോഡിന്‍റെ നിർമാണത്തിലെ അപാകതയും മറ്റു പോരായ്മകളും ഉന്നയിച്ചുകൊണ്ട് നൽകിയ പരാതിക്ക് നടപടി എടുക്കാത്തതിനെ തുടർന്ന് ബിജെപി മണ്ഡലം കമ്മിറ്റിയുടെ നേതൃത്വത്തിൽ അങ്കമാലി നഗരസഭാ സെക്രട്ടറിയെ ഉപരോധിച്ചു. ഗതാഗതക്കുരുക്കിനാൽ വീർപ്പുമുട്ടുന്ന അങ്കമാലി പട്ടണത്തിൽ കെ എസ് ആർ ടി സി ബസ്റ്റാൻഡിൽ നിന്നും ടി ബി ജംഗ്ഷനിലേക്ക് എളുപ്പത്തിൽ എത്തിച്ചേരാവുന്ന ഏകമാർഗമാണ് നഗരസഭാ കെട്ടിടത്തിനു മുൻപിലൂടെയും വ്യാപാരഭവൻ കെട്ടിടത്തിന്‍റെ ഇടയിലൂടെയും കടന്നുപോകുന്ന ഈ റോഡ്. എന്നാൽ റോഡിന്‍റെ ഒരു വശം വളരെ വീതി കൂടുതലും നഗരസഭ കെട്ടിടത്തിനു മുൻവശം വീതി തീരെ കുറഞ്ഞ സാഹചര്യവുമാണ്. ഈ റോഡിന്‍റെ വീതികൂട്ടി പ്രശ്നം പരിഹരിക്കണമെന്ന് അഭിപ്രായമുണ്ടെങ്കിലും ഭരണപക്ഷത്തെ ഏതാനും കൗൺസിലർമാരുടെ പിടിവാശിയാണ് ഇതിന് തടസമായി നിൽക്കുന്നതെന്ന് ഒരു വിഭാഗം ആരോപിക്കുന്നു. നഗരസഭയും വ്യാപാരഭവനും ഇക്കാര്യത്തിലുള്ള പിടിവാശി അവസാനിപ്പിച്ച് അങ്കമാലി ടൗണിലെ ഗതാഗതക്കുരുക്കിന് പരിഹാരം കാണണമെന്ന് ബി ജെപി ഉന്നയിക്കുന്ന ആവശ്യം. അടുത്ത ദിവസം തന്നെ വ്യാപാരഭവനും മുനിസിപ്പൽ അധികൃതരുമായി ചർച്ച നടത്തി പ്രശ്നം രമ്യമായി പരിഹരിക്കാമെന്ന് സെക്രട്ടറിയുടെയും എക്സിക്യൂട്ടീവ് എൻജിനീയറുടെയും ഉറപ്പിന്മേലാണ് സമരം അവസാനിപ്പിച്ചത്. ബിജെപി ജില്ലാ സെക്രട്ടറി എൻ. മനോജ്, മണ്ഡലം പ്രസിഡന്‍റ് രാഹുൽ പാറക്കടവ്, നഗരസഭ കൗൺസിലർമാരായ എ.വി. രഘു, സന്ദീപ് ശങ്കർ തുടങ്ങിയവർ പങ്കെടുത്തു.

മലിനജലം റോഡിൽ ഒഴുക്കി: ഡ്രൈവർക്കെതിരെ കേസ്

വൈപ്പിൻ: മത്സ്യം കയറ്റി പോകുന്ന ഇൻസുലേറ്റ് വാനിലെ മലിനജലം രാത്രിയിൽ രഹസ്യമായി റോഡിൽ ഒഴുക്കിയ ഡ്രൈവറെയും വാഹനത്തെയും മുളവുകാട് പോലീസ് കസ്റ്റഡിയിലെടുത്തു. ചൊവ്വാഴ്ച രാത്രി 7.30ന് കാളമുക്ക് എൽഎൻജി റോഡിലെ പാലത്തിന് സമീപത്താണ് വാഹനത്തിൽ നിന്നും മലിനജലം ഒഴുക്കിയത്. ഈ സമയം ഇതുവഴി വന്ന പോലീസ് പെട്രോളിൽ വാഹനം ഇത് കാണുകയും ഡ്രൈവർ പള്ളിപ്പുറം സ്വദേശിയായ ഷാജി-64യെയും വാഹനവും കസ്റ്റഡിയിൽ എടുക്കുകയായിരുന്നു. കേസെടുത്തശേഷം ഡ്രൈവറെ ജാമ്യത്തിൽ വിട്ടയച്ചു.

മഞ്ഞപ്ര പഞ്ചായത്തിലെ ചാറ്റുപാടം പച്ചത്തുരുത്തിന് മുഖ്യമന്ത്രിയുടെ പുരസ്‌കാരം

അങ്കമാലി : മികച്ച പച്ച തുരുത്തുകൾക്ക് മുഖ്യമന്ത്രി ഏർപ്പെടുത്തിയ പുരസ്കാരത്തിന് മഞ്ഞപ്ര ഗ്രാമപഞ്ചായത്തിലെ ചാറ്റുപാടം പച്ചത്തുരുത്ത് അർഹയായി. തിരുവനന്തപുരം ടാഗോർ ഹാളിൽ നടന്ന ചടങ്ങിൽ മഞ്ഞപ്ര ഗ്രാമപഞ്ചായത്ത് പ്രസിഡന്‍റ് വത്സലകുമാരി വേണു പുരസ്കാരം ഏറ്റുവാങ്ങി. സംസ്ഥാന ജൈവ വൈവിധ്യ ചെയർമാൻ ഡോ. ആർ അനിൽകുമാർ പുരസ്കാരം കൈമാറി.

പെരിങ്ങോട്ടുകര വ്യാജ പീഡനക്കേസ്: രണ്ടു പ്രതികള്‍ കൊച്ചിയില്‍ പിടിയില്‍

കൊച്ചി: പെരിങ്ങോട്ടുകര ദേവസ്ഥാനവുമായി ബന്ധപ്പെട്ട വ്യാജ പീഡനക്കേസില്‍ രണ്ടു പ്രതികള്‍ പിടിയില്‍. കേസില്‍ പ്രതികളായ ശ്രീരാഗ് കാനാടി, സ്വാമിനാഥന്‍ കാനാടി എന്നിവരാണ് ബാനസവാടി എസിപി ഉമാശങ്കറിന്‍റെ നേതൃത്വത്തിലുള്ള പ്രത്യേക അന്വേഷണസംഘം കൊച്ചി വരാപ്പുഴയിലെ അപ്പാര്‍ട്ട്മെന്‍റില്‍ അറസ്റ്റ് ചെയ്തത്. ഇവരുടെ ബാങ്ക് അക്കൗണ്ടുകള്‍ കേന്ദ്രീകരിച്ച് നടത്തിയ അന്വേഷണത്തിലാണ് അറസ്റ്റ്. കേസില്‍ പ്രതി ചേര്‍ക്കപ്പെട്ടതോടെ ഇവര്‍ ഒളിവില്‍ പോവുകയായിരുന്നു. കേസിലെ മറ്റൊരു പ്രതി പ്രവീണ്‍ കാനാടി ഇപ്പോഴും ഒളിവിലാണ്. പെരിങ്ങോട്ടുകര ദേവസ്ഥാനം തന്ത്രിക്കും മരുമകന്‍ ടി.എ.അരുണിനും എതിരെ ഉന്നയിച്ച പീഡന പരാതിക്ക് പിന്നില്‍ ഹണി ട്രാപ്പാണെന്ന് നേരത്തെ കര്‍ണാടക പോലീസ് കണ്ടെത്തിയിരുന്നു. ഈ കേസില്‍ സ്ത്രീകളടക്കം അഞ്ചുപേരെ പോലീസ് നേരത്തെ അറസ്റ്റ് ചെയ്തിരുന്നു. ഹണി ട്രാപ്പില്‍ കോടികളുടെ പണമിടപാട് ഇതുമായി ബന്ധപ്പെട്ട് നടന്നുവെന്നും പോലീസ് നേരത്തെ കണ്ടെത്തിയിരുന്നു. ഈ കേസിലാണ് പ്രവീണിനെ ഒന്നാം പ്രതിയാക്കി ബംഗളൂരു പോലീസ് കേസെടുത്തത്.

ഗിഫ്റ്റ് ഓഫ് റീഡിംഗ് വിജയികള്‍ക്ക് സ്‌കോളര്‍ഷിപ്പ് കൈമാറി

കൊച്ചി: റോട്ടറി ക്ലബ്ബ് ഓഫ് കൊച്ചിന്‍ മിഡ് ടൗണ്‍ കുട്ടികളില്‍ വായനാശീലം വര്‍ധിപ്പിക്കല്‍ ലക്ഷ്യമിട്ട് എറണാകുളം എസ്ആര്‍വി സ്‌കൂളില്‍ നടപ്പിലാക്കുന്ന ഗിഫ്റ്റ് ഓഫ് റീഡിംഗ് സ്‌കോളര്‍ഷിപ്പ് പദ്ധതിയിലെ ജൂലൈ, ഓഗസ്റ്റ് മാസങ്ങളിലെ വിജയികള്‍ക്ക് സ്‌കോളര്‍ഷിപ്പ് കൈമാറി. ജൂലൈ ഒന്നിനാണ് പുസ്തക വായനയില്‍ മികവ് തെളിയിക്കുന്ന എല്‍പി, യുപി, ഹൈസ്‌കൂള്‍, ഹയര്‍സെക്കന്‍ഡറി വിഭാഗം വിദ്യാര്‍ഥികള്‍ക്ക് എല്ലാ മാസവും സ്‌കോളര്‍ഷിപ്പ് നല്‍കുമെന്ന് എസ്ആര്‍വിഎസ് ഫ്രണ്ട്‌സ് ചെയര്‍മാനും റോട്ടറി മുന്‍ ഡിസ്ട്രിക്ട് പ്രസിഡന്‍റുമായ ആര്‍ക്കിടെക്റ്റ് പ്രഫ.ബി.ആര്‍. അജിത് പ്രഖ്യാപിച്ചത്. എസ്ആര്‍വി സ്‌കൂള്‍ ഓഡിറ്റോറിയത്തില്‍ സംഘടിപ്പിച്ച സ്‌കോളര്‍ഷിപ്പ് വിതരണ ചടങ്ങില്‍ റോട്ടറി ക്ലബ്ബ് ഓഫ് കൊച്ചിന്‍ മിഡ്ടൗണ്‍ പ്രസിഡന്‍റ് അഡ്വ. പി. ഗോപകുമാര്‍ അധ്യക്ഷത വഹിച്ചു. പ്രഫ. ബി.ആര്‍ അജിത് വിജയികള്‍ക്ക് സ്‌കോളര്‍ഷിപ്പുകള്‍ കൈമാറി. എസ്ആര്‍വി ഹൈസ്‌കൂള്‍ പ്രിന്‍സിപ്പല്‍ എ.എന്‍. ബിജു, വൊക്കേഷണല്‍ ഹയര്‍സെക്കന്‍ഡറി സ്‌കൂള്‍ പ്രിന്‍സിപ്പല്‍ ജിന്‍സി ജോസഫ്, ഹൈസ്‌കൂള്‍ പ്രധാനാധ്യാപിക ടി.കെ. സീമ, യുപി സ്‌കൂള്‍ പ്രധാനാധ്യാപിക പി.പി. സജിനി, റോട്ടറി ക്ലബ്ബ് ഓഫ് കൊച്ചിന്‍ മിഡ്ടൗണ്‍ മുന്‍ പ്രസിഡന്‍റുമാരായ ടി.ടി. തോമസ്, കെ.കെ.ജോര്‍ജ് തുടങ്ങിയവര്‍ സംസാരിച്ചു.

മാർ തൂങ്കുഴി സഭയ്ക്കു പുതുദിശാബോധം പകർന്ന ഇടയശ്രേഷ്ഠൻ: എറണാകുളം-അങ്കമാലി അതിരൂപത

കൊച്ചി: സവിശേഷമായ നേതൃശുശ്രൂഷയിലൂടെ സഭയ്ക്കും സമൂഹത്തിനും ക്രിസ്തുവിന്‍റെ ലാളിത്യവും കാലഘട്ടത്തിന്‍റെ ആവശ്യമനുസരിച്ചുള്ള പുതുദിശാബോധവും പകർന്ന ഇടയശ്രേഷ്ഠനാണു കാലം ചെയ്ത ആർച്ച്ബിഷപ് മാർ ജേക്കബ് തൂങ്കുഴിയെന്ന് എറണാകുളം-അങ്കമാലി അതിരൂപത അനുസ്മരിച്ചു. അര നൂറ്റാണ്ടു പിന്നിട്ട പൗരോഹിത്യ ജീവിതത്തിലൂടെയും മൂന്നു രൂപതകളിലെ ഇടയശുശ്രൂഷകളിലൂടെയും മാർ തൂങ്കുഴി സുവിശേഷസന്ദേശങ്ങളെ അനേകരിലേക്കെത്തിക്കുന്നതിനും ക്രിസ്തു സാക്ഷ്യം തെളിമയോടെ പ്രകാശിപ്പിക്കുന്നതിലും ശ്രദ്ധിച്ചു. ആഴമാർന്ന ജീവിതാനുഭവങ്ങളും സ്നേഹാർദ്രമായ ജീവിതശൈലിയും സമന്വയിപ്പിച്ചു സഭാശുശ്രൂഷകളെ അദ്ദേഹം കൂടുതൽ മഹത്വപൂർണവും സ്വീകാര്യതയുമുള്ളതാക്കി. സഭയുടെ ദൗത്യങ്ങൾ ജീവിതഗന്ധിയും മനുഷ്യോന്മുഖവുമാകണമെന്നും കാലോചിതമായ പുതുക്കലുകൾ വേണമെന്നുമുള്ള ദർശനമാണ് മാർ തൂങ്കുഴിയുടെ ശുശ്രൂഷാജീവിതത്തെ വേറിട്ടു നിർത്തുന്നത്. മാനന്തവാടി, താമരശേരി രൂപതകളിലും തൃശൂർ അതിരൂപതയിലും അദ്ദേഹത്തിന്‍റെ നേതൃശൈലി സഭയുടെ മാത്രമല്ല, സമൂഹത്തിന്‍റെയും മൂല്യനിർമിതിക്കും വളർച്ചയ്ക്കും പ്രചോദനമായിട്ടുണ്ട്. സേവനം ചെയ്ത രൂപതകൾക്കുള്ളിൽ ഒതുങ്ങുന്നതായിരുന്നില്ല മാർ തൂങ്കുഴിയുടെ ജീവിതം ചെലുത്തിയ സ്വാധീനം. കേരളസഭയ്ക്കാകെയും പുതുദിശാബോധം നൽകാനാവുന്ന ഇടപെടലുകൾ അദ്ദേഹം നടത്തി. പ്രവർത്തനരീതി കൊണ്ടും ചിന്താധാരകൊണ്ടും എന്നും എറണാകുളം- അങ്കമാലി അതിരൂപതയോട് സാമീപ്യം പുലർത്തിയ മാർ തൂങ്കുഴി, ഉറച്ച നിലപാടുകളുടെ പ്രവാചകധർമം സധൈര്യം ഏറ്റെടുത്തു ദൈവജനത്തിന് എന്നും നല്ല ഇടയനായിത്തീർന്നു. മാർ തൂങ്കുഴിയുടെ നിര്യാണം സഭയ്ക്കും പ്രത്യേകമായി എറണാകുളം- അങ്കമാലി അതിരൂപതയ്ക്കും തീരാനഷ്ടമാണ്. അദ്ദേഹം തന്‍റെ ശുശ്രൂഷാജീവിതത്തിൽ പുലർത്തിയ സവിശേഷതകൾ വർത്തമാനകാല സഭയ്ക്കും അതിന്‍റെ നല്ല നാളെകൾക്കും പ്രചോദനമാകും. കേരളസഭയ്ക്കു വിസ്മരിക്കാനാകാത്ത സംഭാവനകൾ‌ നൽകിയ മാർ ജേക്കബ് തൂങ്കുഴിയുടെ സ്വർഗപ്രാപ്തിയിൽ എറണാകുളം -അങ്കമാലി അതിരൂപതയിലെ പിതാക്കന്മാരുടെയും വൈദികരുടെയും സമർപ്പിതരുടെയും വിശ്വാസികളുടെയും പ്രാർഥനകൾ നേരുന്നതായും അതിരൂപത അനുശോചനസന്ദേശത്തിൽ പറഞ്ഞു.

ദീപിക നമ്മുടെ ഭാഷ പദ്ധതി : മുടിക്കരായി സെന്‍റ് റീത്താസ് എൽപി സ്കൂളിൽ

പെരുമ്പാവൂർ : മുടിക്കരായി സെന്‍റ് റീത്താസ് എൽപി സ്കൂളിൽ ദീപിക നമ്മുടെ ഭാഷ പദ്ധതിയുടെ ഉദ്ഘാടനം പിട്ടാപ്പിള്ളിൽ ഏജൻസീസിന്‍റെ ഡയറക്ടർ ഫ്രാൻസിസ് പി. പിട്ടാപ്പിള്ളിയും ഇടവക വികാരിയും സ്കൂൾ മാനേജരുമായ ഫാ. ജെയിംസ് കക്കുഴിയും ചേർന്ന് സ്കൂൾ ചെയർപേഴ്സൺ ശ്രേയ ഗിരീഷ്, ലീഡർ കെ.പി. ദേവജ് എന്നിവർക്ക് ദീപിക പത്രം നൽകി നിർവഹിച്ചു. ദീപിക ഫ്രണ്ട്‌സ് ക്ലബ്‌ ഫൊറോന പ്രസിഡന്‍റ് രാജു മാങ്കുഴ, സെക്രട്ടറി ഷൈജു ഇഞ്ചക്കൽ, സ്കൂൾ പ്രധാനാധ്യാപിക ഡീന മാത്യു, ദീപിക ഏജന്‍റ് എം.ഒ. ദേവസി,അധ്യാപകരായ മരിയറ്റ് ഡോമി, ജീന തോമസ്,നിഷ ജോസഫ്,അനീഷ്‌ ‌ കെ. തങ്കച്ചൻ, ദീപിക ഏരിയ മാനേജർ റ്റി.എ. നിബിൻ എന്നിവർ സംസാരിച്ചു. പത്രം സ്കൂളിൽ സ്പോൺസർ ചെയ്തത് പെരുമ്പാവൂർ പിട്ടാപ്പിള്ളിൽ ഏജൻസീസ് ആണ്.

കത്തോലിക്ക കോൺഗ്രസ് ശക്തിപ്പെടേണ്ടത് കാലത്തിന്‍റെ ആവശ്യം: മാർ പാംബ്ലാനി

കൊച്ചി: വർത്തമാനകാല ആവശ്യങ്ങൾ തിരിച്ചറിഞ്ഞ് സഭയുടെയും സമുദായത്തിന്‍റെയും ശബ്ദമാകാൻ കത്തോലിക്ക കോൺഗ്രസിനു കഴിയണമെന്ന് ആർച്ച്ബിഷപ് മാർ ജോസഫ് പാംപ്ലാനി. എറണാകുളം - അങ്കമാലി അതിരൂപതയിൽ സംഘടനയുടെ പുതിയ ഭാരവാഹികളുടെ നേതൃസംഗമം ഉദ്ഘാടനം ചെയ്യുകയായിരുന്നു അദ്ദേഹം. സമുദായ അംഗങ്ങളുടെ ന്യായമായ ആവശ്യങ്ങൾക്കുവേണ്ടി പ്രവാചക ധീരതയോടെ ശക്തമായ നിലപാടുകളെടുക്കാൻ സാധിച്ചെങ്കിൽ മാത്രമേ കത്തോലിക്ക കോൺഗ്രസിന് സഭയിലും സമൂഹത്തിലും ഒരു തിരുത്തൽ ശക്തിയാകാനാൻ കഴിയൂവെന്നും മാർ പാംബ്ലാനി ഓർമിപ്പിച്ചു. അതിരൂപത പ്രസിഡന്‍റ് എസ്.ഐ. തോമസ് അധ്യക്ഷത വഹിച്ചു. ജനറൽ സെക്രട്ടറി ബേബി പൊട്ടനാനിയിൽ, ട്രഷറർ ജോൺസൺ പടയാട്ടി, ഗ്ലോബൽ വൈസ് പ്രസിഡന്‍റ് ബെന്നി ആന്‍റണി, ഗ്ലോബൽ സെക്രട്ടറി ഫ്രാൻസിസ് മൂലൻ, ജോസ് ആന്‍റണി, സെജോ ജോൺ തുടങ്ങിയവർ പ്രസംഗിച്ചു. കത്തോലിക്ക കോൺഗ്രസ് കേന്ദ്ര സമിതിയുടെ നേതൃത്വത്തിൽ ഒക്ടോബറിൽ നടക്കുന്ന അവകാശ സംരക്ഷണ യാത്രയ്ക്ക് അതിരൂപതയുടെ സ്വീകരണം കാലടിയിൽ ഒരുക്കും. അതിരൂപത സമിതിയുടെ നേതൃത്വത്തിലുള്ള വിവിധ സബ്കമ്മറ്റികളേയും യോഗത്തിൽ പ്രഖ്യാപിച്ചു.

റോഡുകൾക്ക് അറ്റകുറ്റപ്പണി: 99 ലക്ഷം രൂപ അനുവദിച്ചു

ആലുവ: ആലുവ നിയോജക മണ്ഡലത്തിലെ 11 പിഡബ്ല്യൂഡി റോഡുകൾക്ക് അറ്റകുറ്റപ്പണികൾ നടത്തുന്നതിന് 99 ലക്ഷം രൂപ അനുവദിച്ചു. ഭരണാനുമതി ലഭിച്ച പദ്ധതിയുടെ ടെണ്ടർ നടപടികൾ പൂർത്തീകരിച്ച് എത്രയും വേഗം റോഡുകളുടെ അറ്റകുറ്റപ്പണികൾ ആരംഭിക്കുമെന്നും അൻവർ സാദത്ത് എംഎൽഎ അറിയിച്ചു. എടത്തല-തായ്ക്കാട്ടുക്കര, എടത്തല-പേങ്ങാട്ടുശ്ശേരി, മൂന്നാം മൈൽ-കിഴക്കമ്പലം, പൂക്കാട്ടുപടി ലൂപ്പ്, ഇടപ്പള്ളി-മുവാറ്റുപുഴ, കുഴിവേലിപ്പടി-വെട്ടിക്കുഴ, എൻഎഡി-എച്ച്എംടി, നസ്രത്ത്-കാർമൽ, പള്ളിക്കവല-ഡിസ്‌പെൻസറി, ആലുവ-മൂന്നാർ, ആലുവ-വരാപ്പുഴ എന്നീ റോഡുകൾക്കാണ് ഫണ്ട് അനുവദിച്ചിരിക്കുന്നത്.

മാലിന്യ ശുദ്ധീകരണ പ്ലാന്‍റിലെ സാധന സാമഗ്രികൾ കാണാതായതായി പരാതി

ആലുവ: പാലസ് റോഡില്‍ പ്രവര്‍ത്തനം നിലച്ച ആലുവ നഗരസഭയുടെ ട്രീറ്റ്‌മെന്‍റ് പ്ലാന്‍റ് കെട്ടിടത്തിലെ ശിലാഫലകങ്ങള്‍ അടക്കം സാധനസമഗ്രികള്‍ കാണാതായതായി ജില്ലാ പോലീസ് മേധാവിക്ക് പരാതി. സമീപത്തെ അദ്‌വൈതാശ്രമം അധികൃതരുമായി വഴിത്തര്‍ക്കം, സ്ഥലത്തര്‍ക്കം, കൊടികള്‍ എടുത്തുമാറ്റല്‍ തുടങ്ങിയവ ഉണ്ടായതിന് പിന്നാലെയാണ് പുതിയ സംഭവവികാസം.

കിഴക്കന്പലത്ത് വയോജനങ്ങൾക്ക് സഞ്ചരിക്കുന്ന ആശുപത്രി

കിഴക്കമ്പലം: കിഴക്കമ്പലം പഞ്ചായത്തിന്‍റെ 2025-26 വാര്‍ഷിക പദ്ധതിയില്‍ ഉള്‍പ്പെട്ട വയോജനങ്ങള്‍ക്ക് സഞ്ചരിക്കുന്ന ആശുപത്രി എന്ന പദ്ധതിയുടെ ഉദ്ഘാടനം കിഴക്കമ്പലം സബ് സെന്‍ററില്‍ വെച്ച് പഞ്ചായത്ത് പ്രസിഡന്‍റ് മിനി രതീഷ് നിര്‍വഹിച്ചു. ആരോഗ്യ സ്റ്റാൻഡിംഗ് കമ്മിറ്റി പേഴ്‌സണ്‍ ജെനിസ് പി.കാച്ചപ്പിള്ളി അധ്യക്ഷത വഹിച്ചു. പഞ്ചായത്ത് സെക്രട്ടറി ടി. അജി, മെഡിക്കല്‍ ഓഫീസര്‍ ഡോ. പ്രീതി, സ്ഥിരം സമിതി അധ്യക്ഷരായ എ.ബിനു, ആര്‍. ബിന്ദു, ബ്ലോക്ക് മെമ്പര്‍ കെ.വി. രാജു, ഡോ.മേഘ എന്നിവര്‍ പങ്കെടുത്തു. 60 വയസിനു മുകളിലുള്ള വയോജനങ്ങള്‍ക്ക് ഓരോ വാര്‍ഡിലും നിശ്ചയിക്കപ്പെട്ട കേന്ദ്രങ്ങളില്‍ മാസത്തില്‍ രണ്ട് പ്രാവശ്യം ഡോക്ടറുടെ സേവനവും ആവശ്യമായ മരുന്നുകളും സൗജന്യമായി ലഭ്യമാക്കുക എന്ന ഉദ്ദേശത്തോടെ നടത്തപ്പെടുന്ന പദ്ധതിയാണ് ഇത്.

ഗോശ്രീ മേൽപ്പാലത്തിലെ ടാറിംഗ്: നാളെ ദേശീയപാതാ ഓഫീസ് മുന്നിൽ പ്രതിഷേധം

വൈപ്പിൻ: ഗോശ്രീ റോഡിൽ വല്ലാര്‍പാടം കണ്ടെയ്‌നര്‍ ടെര്‍മിനലിനു മുന്നിലുള്ള മേൽപ്പാലത്തിലെ കുഴികൾ നികത്തണമെന്നാവശ്യപ്പെട്ട് 19ന് രാവിലെ 10 ന് ദേശീയപാത അഥോറിറ്റി ഓഫീസിനു മുന്നിൽ സമരം. കുഴികളിൽ വീണ് പരിക്കുപറ്റിയവരെയും ഇവരുടെ ബന്ധുക്കളെയും സംഘടിപ്പിച്ച് വൈപ്പിനിലെ റസിഡൻസ് അസോസിയേഷനുകളുടെ അപ്പക്സ് സംഘടനയായ ഫ്രാഗ് ആണ് പ്രതിഷേധ പരിപാടിക്ക് നേതൃത്വം നൽകുന്നത്. മേല്‍പ്പാലത്തിലെ ടാറിംഗ് പൊട്ടിപ്പൊളിഞ്ഞ് പലയിടത്തും അപകടകരമായ കുഴികള്‍ രൂപം കൊണ്ടിട്ട് മാസങ്ങളായിട്ടും അറ്റ കുറ്റപ്പണികൾക്ക് നടപടിയില്ല. ചെറുവാഹനങ്ങള്‍ ദിവസേന ഈ കുഴികളില്‍ വീണ് അപകടം സംഭവിക്കുന്നു. ഈയടുത്ത് ഒരു കുടുംബം മുഴുവന്‍ ഇവിടെ അപകടത്തിൽപ്പെട്ട് ആശുപത്രിയിലായി ഈ സാഹചര്യത്തിൽ ദേശീയപാത അഥോറിറ്റിയുടെ കണ്ണുതുറപ്പിക്കാനാണ് പ്രത്യക്ഷ സമരവുമായി രംഗത്തിറങ്ങിയിരിക്കുന്നതെന്ന് ഫ്രാഗ് ജനറൽ സെക്രട്ടറി അനിൽ പ്ലാവിയൻസ് അറിയിച്ചു.

ഇരുന്പനം റിഫൈനറി റോഡിൽ അപകടക്കെണി തീർത്ത് ടാങ്കർ ലോറികളുടെ പാർക്കിംഗ്

ഇരുമ്പനം: ഇരുചക്ര വാഹന യാത്രക്കാർക്കും കാൽനടയാത്രക്കാർക്കും അപകടക്കെണിയായി റോഡരികിൽ ടാങ്കർ ലോറികളുടെ പാർക്കിംഗ്. ഇരുമ്പനം വിളക്ക് ജംഗ്ഷനിൽ നിന്നും കിഴക്കോട്ട് റിഫൈനറി റോഡിൽ ചിത്രപ്പുഴ വരെയുള്ള റോഡിന്‍റെ ഇരുവശങ്ങളിലുമാണ് കൂറ്റൻ ടാങ്കർ ലോറികൾ മറ്റ് യാത്രക്കാർക്ക് അപകടകരമായ രീതിയിൽ നിർത്തിയിടുന്നത്. റോഡിന്‍റെ ടാർ ഭാഗത്തുനിന്നും കഷ്ടിച്ച് ഒന്നരയടി മാത്രം അകലമിട്ടാണ് ഇവിടെ ടാങ്കർ ലോറികൾ മുതൽ ട്രെയിലർ ലോറികൾ വരെ പാർക്ക് ചെയ്യുന്നത്. ഭാരവാഹനങ്ങൾ നിരന്തരം അതിവേഗത്തിൽ പായുന്ന റിഫൈനറി റോഡിൽ, ഇതുമൂലം ഇരുചക്ര വാഹനങ്ങൾ ഉൾപ്പെടെയുള്ള ചെറുവാഹനങ്ങൾ വലിയ വാഹനങ്ങൾക്ക് സൈഡ് നൽകുവാൻ കഷ്ടപ്പെടുകയാണ്. കൂടാതെ റോഡരികിൽ നിർത്തിയിട്ടിരിക്കുന്ന ലോറികൾ പെട്ടെന്ന് റോഡിലേയ്ക്ക് ഓടിച്ചു കയറ്റുന്നതും ഇവിടെ അപകട സാധ്യത വർധിപ്പിക്കുന്നുണ്ട്. സഹായി പോലുമില്ലാതെ ഡ്രൈവർ മാത്രമായി വരുന്ന ടാങ്കർ ലോറികൾ റോഡരികിലെ പാർക്കിംഗിനും നിർത്തിയിട്ടയിടത്ത് നിന്ന് തിരിച്ച് യാത്ര പുറപ്പെടാനും പിന്നിൽ ഒരാൾ പോലും നോക്കാനില്ലാതെയാണ് വാഹനം റോഡിലേയ്ക്ക് കയറ്റി പുറകോട്ടും മറ്റും തിരിക്കുന്നത്. വേഗതയിൽ വരുന്ന ഇരുചക്ര വാഹന യാത്രക്കാർ ഇത്തരം സന്ദർഭങ്ങളിൽ ആയുസിന്‍റെ ബലം കൊണ്ടു മാത്രം രക്ഷപ്പെടുന്ന സ്ഥിതിയാണുള്ളത്. ഇരുമ്പനം സീപോർട്ട്-എയർപോർട്ട് റോഡിൽ ലോറികളുടെ പാർക്കിംഗ് തടയുന്നതിനായി റോഡരികിൽ കോൺക്രീറ്റ് കുറ്റികൾ സ്ഥാപിച്ചതിന് ശേഷമാണ് റിഫൈനറി റോഡിൽ ലോറികളുടെ പാർക്കിംഗ് അനിയന്ത്രിതമായ വിധം വർധിച്ചിരിക്കുന്നത്. അധികൃതരുടെ ശ്രദ്ധ ഇക്കാര്യത്തിൽ അടിയന്തിരമായി വേണമെന്നാണ് നാട്ടുകാർ ആവശ്യപ്പെടുന്നത്.

നഷ്ടപരിഹാര പാക്കേജില്‍ വ്യക്തത വരുത്താതെ സര്‍ക്കാര്‍ : കോന്തുരുത്തിക്കാര്‍ക്കു നല്‍കിയ വാക്ക് പാഴാകുമോ‍?

കൊച്ചി: നാലു പതിറ്റാണ്ടായി കോന്തുരുത്തി പുഴ പുറമ്പോക്കില്‍ താമസിക്കുന്ന 129 കുടുംബങ്ങളുടെ പുനരധിവാസ പാക്കേജില്‍ വ്യക്തത വരുത്താതെ സര്‍ക്കാര്‍. പുനരധിവസിപ്പിക്കുന്നതില്‍ ഹൈക്കോടതി വിധി നടപ്പാക്കുമെന്ന് പറയുമ്പോഴും ഭൂരഹിതര്‍ക്കുള്ള ഭവന നിര്‍മാണ നയത്തിന്‍റെ അടിസ്ഥാനത്തിലുള്ള 9.15 ലക്ഷം വീതമുള്ള നഷ്ടപരിഹാരമാകും നല്‍കുകയെന്ന സൂചനയാണ് ടി.ജെ. വിനോദ് എംഎല്‍എയുടെ ചോദ്യത്തിന് മറുപടിയായി മന്ത്രി വി.എന്‍. വാസവന്‍ സഭയെ അറിയിച്ചത്. പുനരധിവാസത്തിനായി സ്ഥലം കണ്ടെത്താന്‍ കഴിയാതെ വന്നതോടെ ഹൈക്കോടതിയുടെ ഇടപെടലിനെ തുടര്‍ന്ന് ഒരു കുടുംബത്തിന് 19 ലക്ഷം വീതം നഷ്ടപരിഹാരം നല്‍കാമെന്ന് സര്‍ക്കാര്‍ ഉറപ്പ് നല്‍കിയിരുന്നു. ഇതിനായി 24.82 കോടി സ്‌പെഷല്‍ പുനരധിവാസ പാക്കേജായി സര്‍ക്കാര്‍ പ്രഖ്യാപിക്കുകയും ചെയ്തതാണ്. എന്നാല്‍ കഴിഞ്ഞ അഞ്ച് വര്‍ഷമായി പ്രഖ്യാപനം നടപ്പാക്കാന്‍ സര്‍ക്കാരിനായില്ല. ഇതിനെതിരെ പരാതിക്കാര്‍ നല്‍കിയ കോടതിയലക്ഷ്യ ഹര്‍ജി 23ന് പരിഗണിക്കാനിരിക്കെയാണ് 9.15 ലക്ഷം മാത്രമേ നിയമപ്രകാരം നല്‍കാനാകുകയൂള്ളൂ എന്ന നിലപാട് സര്‍ക്കാര്‍ നിയമസഭയെ അറിയിച്ചത്. ഇതിന് സര്‍ക്കാര്‍ വിഹിതമായ 11.655 കോടി രൂപ നല്‍കാന്‍ തീരുമാനം എടുത്തിട്ടുണ്ടെന്നും മന്ത്രി പറഞ്ഞു. എന്നാല്‍ കോടതി വിധിക്ക് വിധേയമായി മാത്രമേ തുടര്‍നടപടികള്‍ ഉണ്ടാവുകയുള്ളൂവെന്നും മന്ത്രി പറഞ്ഞു. കൊച്ചി മെട്രോ റെയില്‍ ലിമിറ്റഡ് നിര്‍വഹണ ഏജന്‍സിയായി നടപ്പാക്കുന്ന കനാല്‍ നവീകരണ പദ്ധതിയില്‍ ഉള്‍പ്പെട്ട പുഴയാണ് കോന്തുരുത്തി പുഴ. ആദ്യം കോന്തുരുത്തിയെ പദ്ധതിയില്‍ ഉള്‍പ്പെടുത്തിയിരുന്നില്ല. ഇരുകരകളിലെയും കൈയേറ്റങ്ങള്‍ ഒഴിപ്പിച്ച് പുഴയെ വീണ്ടെടുക്കണമെന്നും നീരൊഴുക്കു തടസപ്പെടുത്തി നിര്‍മിച്ച റോഡ് പൊളിച്ചു കളയണമെന്നും ഹൈക്കോടതി വിധിച്ചതിനെ തുടര്‍ന്നാണ് കോന്തുരുത്തി പുഴയെയും കനാല്‍ നവീകരണ പദ്ധതിയില്‍ ഉള്‍പ്പെടുത്തിയത്. 3716.10 കോടി ആകെ ചെലവ് വരുന്ന പദ്ധതിയില്‍ 41.33 കോടിയാണ് കോന്തുരുത്തി പുഴയുടെ പുനര്‍നവീകരണത്തിനായി ചെലവഴിക്കുന്നത്. ഈ പദ്ധതി നടപ്പാക്കുമ്പോള്‍ വീടും സ്ഥലവും നഷ്ടപ്പെടുന്നവര്‍ക്കായാണ് പുനരധിവാസ പാക്കേജ് പ്രഖ്യാപിച്ചത്. പാക്കേജ് പ്രഖ്യാപിച്ചെങ്കിലും തുക കൈമാറിയിട്ടില്ലാത്തതിനാല്‍ നിലവിലുള്ള വീടിന്‍റെ കേടുപാടുകള്‍ പോലും പരിഹരിക്കാനാകാതെ ദുരിതത്തിലാണ് ഈ 129 കുടുംബങ്ങള്‍. തുരുത്തിക്കോളനിക്കാര്‍ക്ക് 23 ലക്ഷത്തിന്‍റെ ഭവനം നിര്‍മിച്ച് നല്‍കുമ്പോള്‍ കോന്തുരുത്തി പുഴയോരത്ത് താമസിക്കുന്നവര്‍ക്ക് 9.15 ലക്ഷം മാത്രം നല്‍കുന്നത് നീതികേടാണെന്നും സ്ഥലം വാങ്ങി വീടുവയ്ക്കാന്‍ ആവശ്യമായ നഷ്ടപരിഹാര തുകയാണ് നല്‍കേണ്ടതെന്നും മുന്‍ ഡിവിഷന്‍ കൗണ്‍സിലര്‍ സി.കെ. പീറ്റര്‍ ആവശ്യപ്പെട്ടു.

വിധവയുടെ വീടിനു പൂട്ടിട്ട് സ്വകാര്യ പണമിടപാട് സ്ഥാപനം ജീവനക്കാർ

രക്ഷയ്ക്കെത്തി കൗൺസിലർ പള്ളുരുത്തി: പള്ളുരുത്തി പെരുമ്പടപ്പ് കോണത്ത് വിധവയായ വീട്ടമ്മയുടെ വീട് കുത്തിത്തുറന്നശേഷം വേറെ താഴുകളിട്ട് പൂട്ടി സ്വകാര്യ പണമിടപാട് സ്ഥാപനം. എറണാകുളത്ത് പ്രവർത്തിക്കുന്ന ആധാർ ഹൗസിംഗ് ഫിനാൻസ് കമ്പനിയാണ് വായ്പാ കുടിശിഖയുടെ പേരു പറഞ്ഞ് വീട്ടുകാരില്ലാത്ത സമയം വീടുപൂട്ടി സ്ഥലംവിട്ടത്. പള്ളുരുത്തി കോണം സ്വദേശിനിയായ നാലുകണ്ടത്തിൽ സജിത 2017ൽ സ്ഥാപനത്തിൽ പത്ത് ലക്ഷം രൂപ വായ്പയെടുത്തിരുന്നു. പിന്നീട് 13 ലക്ഷത്തി എൺപതിനായിരം രൂപയോളം തിരിച്ചടച്ചു. ഇതിനിടെ ഏതാനും മാസങ്ങളായി വായ്പ മുടങ്ങിയതിനെ തുടർന്നാണ് മുന്നറിയിപ്പില്ലാതെ സ്ഥാപനത്തിന്‍റെ ആളുകൾ എത്തി വീടിന്‍റെ വാതിൽ കുത്തിത്തുറന്ന് വേറെ താഴുകൾ പിടിപ്പിച്ച് വീട് പൂട്ടിയത്. ഇതിനിടെ അയൽവീട്ടുകാർ വിവരം അറിയിച്ചതിനെ തുടർന്ന് വീട്ടുടമ എത്തിയെങ്കിലും വീട് തുറന്നു നൽകാൻ പണമിടപാട് സ്ഥാപനം തയാറായില്ല. ഒന്നാം ക്ലാസിൽ പഠിക്കുന്ന കുട്ടി തലയുമായി ബന്ധപ്പെട്ട അസുഖത്തിന് സ്ഥിരമായി കഴിക്കുന്ന മരുന്ന് പോലും കൊടുക്കാൻ പണമിടപാട് സ്ഥാപനം സമ്മതിച്ചില്ലെന്ന് വീട്ടുകാർ പറയുന്നു. കുട്ടികളുടെ പഠനോപകരണങ്ങളും ഭക്ഷണവും ഉൾപ്പെടെ എടുക്കാൻ കഴിഞ്ഞില്ല. പെട്ടിക്കട നടത്തുകയാണ് സജിത. ഭർത്താവ് ഉപേക്ഷിച്ചു പോയ ഇവരുടെ മകളും വിദ്യാർഥികളായ കുട്ടികളുമാണ് വീട്ടിൽ താമസം. സംഭവം നടക്കുമ്പോൾ വീട്ടിൽ താമസിച്ചിരുന്ന വാടകക്കാരും സ്ഥലത്തുണ്ടായിരുന്നില്ല. ഇനി 13 ലക്ഷം രൂപ കൂടി അടയ്ക്കണമെന്നാണ് പണമിടപാട് സ്ഥാപനം വീട്ടുകാർക്ക് നല്കിയിരിക്കുന്ന നിർദേശം. ഇതിനിടെ സംഭവമറിഞ്ഞെത്തിയ കൗൺസിലർ അഭിലാഷ് തോപ്പിലും കോൺഗ്രസ് പ്രവർത്തകരും നാട്ടുകാരും ചേർന്ന് വീട് പൂട്ടിയിരുന്ന താഴെയും മുകളിലുമുള്ള നാല് താഴുകളും പൊളിച്ചുനീക്കി വീട്ടുകാരെ അകത്തു കയറ്റി. സംഭവമറിഞ്ഞ് പള്ളുരുത്തി പോലീസും സ്ഥലത്തെത്തിയിരുന്നു. ഡിസിസി സെക്രട്ടറി എൻ.ആർ.ശ്രീകുമാർ, വി.എഫ്.ഏണസ്റ്റ്, എം.എ.ജോസി, കെ.എ.അഫ്സൽ എന്നിവരും ഉണ്ടായിരുന്നു.

വയോധികനെ ആക്രമിച്ച് പരിക്കേൽപ്പിച്ചു : മധ്യവയസ്കൻ പിടിയിൽ

കാലടി: വയോധികനെ ആക്രമിച്ച് പരിക്കേൽപ്പിച്ച കേസിൽ മധ്യവയസ്കൻ പിടിയിൽ. തുറവുർ പൊയ്ത്തുരുത്ത് കണ്ണംപുഴ വീട്ടിൽ ജോസഫി(55)നെയാണ് കാലടി പോലീസ് പിടികൂടിയത്. തിങ്കളാഴ്ച വൈകീട്ട് പൊയ്ത്തുരുത്ത് സ്വദേശിയായ 72 കാരനെയാണ് പറമ്പിൽ അതിക്രമിച്ച് കയറി അസഭ്യം പറഞ്ഞ് ആക്രമിച്ച് പരിക്കേൽപ്പിച്ചത്. സോളാർ പാനലിന്‍റെ കേബിളും, കുടിവെള്ള പൈപ്പും നശിപ്പിച്ചു. വ്യക്തിവൈരാഗ്യമാണ് കാരണം. വിവിധ സ്റ്റേഷനുകളിൽ മധ്യവയസ്കനെതിരെ കേസുകളുണ്ട്. ഇൻസ്പെക്ടർ അനിൽ കുമാർ ടി മേപ്പിള്ളി, എസ്ഐമാരായ ജയിംസ്, ഉണ്ണി, എഎസ്ഐ ഷൈജു എന്നിവരാണ് അന്വേഷണ സംഘത്തിലുള്ളത്.

ഓട്ടോയില്‍ പുകവലി വിലക്കിയ ഡ്രൈവർക്കു മർദനം

ചെറായി: ഓട്ടോറിക്ഷയിലിരുന്ന് പുകവലിക്കുന്നത് വിലക്കിയ ഓട്ടോ ഡ്രൈവറെ യാത്രക്കാരന്‍ മര്‍ദിച്ചതായി പരാതി. ചെറായി ഓട്ടോ സ്റ്റാന്‍ഡിലെ ഡ്രൈവര്‍ ചെറായി ചുങ്കത്ത് പറമ്പില്‍ ദിനരാജനാണ് (65) മര്‍ദനമേറ്റത്. കഴിഞ്ഞ ദിവസം ചെറായി ഓട്ടോ സ്റ്റാന്‍ഡിലായിരുന്നു സംഭവം. ഡ്രൈവറുടെ പരാതിയെ തുടര്‍ന്ന് ചെറായി കരുത്തല സ്വദേശി സുനി രാജിനെതിരെ മുനമ്പം പോലീസ് കേസെടുത്തു.

കാപ്പ ചുമത്തി ജയിലിലടച്ചു

വാഴക്കുളം: വധശ്രമ കേസിൽ ഉൾപ്പെട്ട യുവാവിനെതിരേ കാപ്പ ചുമത്തി. വാഴക്കുളം ചേന്നാട്ട് സൻസൽ (കണ്ണൻ -23) നെയാണ് കാപ്പ ചുമത്തി വിയ്യൂർ സെൻട്രൽ ജയിലിൽ അടച്ചത്. റൂറൽ ജില്ലാ പോലീസ് മേധാവി എം. ഹേമലതയുടെ റിപ്പോർട്ടിന്‍റെ അടിസ്ഥാനത്തിൽ ജില്ല കളക്ടർ ജി.പ്രിയങ്കയാണ് ഉത്തരവിട്ടത്. വാഴക്കുളം, കല്ലൂർക്കാട്, മൂവാറ്റുപുഴ, കോട്ടയം ജില്ലയിലെ രാമപുരം എന്നീ പോലീസ് സ്റ്റേഷൻ പരിധികളിൽ കൊലപാതകശ്രമം, അടിപിടി, ദേഹോപദ്രവം, കഞ്ചാവ് ഉപയോഗം, സ്ത്രീകൾക്കെതിരേയുള്ള കുറ്റകൃത്യം തുടങ്ങി നിരവധി കേസുകളിൽ പ്രതിയാണ് ഇയാൾ. കഴിഞ്ഞ മേയിൽ കല്ലൂർക്കാട് പോലീസ് രജിസ്റ്റർ ചെയ്ത ബലാത്സംഗ കേസിൽ പ്രതിയായതിനെ തുടർന്നാണ് കാപ്പ ചുമത്തിയത്. കല്ലൂർക്കാട് സിഐ കെ. ഉണ്ണികൃഷ്ണന്‍റെ നേതൃത്വത്തിൽ വാഴക്കുളം എസ്ഐ പ്രദീപ്മോൻ, എഎസ്ഐ എസ്. വിനു, സീനിയർ സിവിൽ പോലീസ് ഓഫീസർ ബിജേഷ്, സിവിൽ പോലീസ് ഓഫീസർ അനൂപ് എന്നിവർ ഉൾപ്പെട്ട സംഘമാണ് ഇയാളെ അറസ്റ്റ് ചെയ്തത്.

സ്വർണ വ്യാപാരികൾ കാതുകുത്തി കമ്മലിടൽ നടത്തി

കൊച്ചി: ഓൾ കേരള ഗോൾഡ് ആൻഡ് സിൽവർ മർച്ചന്‍റ്സ് അസോസിയേഷൻ എറണാകുളം ജില്ലാ കമ്മിറ്റിയുടെ നേതൃത്വത്തിൽ കാതുകുത്തി കമ്മലിടൽ, രക്തദാന ക്യാമ്പ്, സ്വർണ തൊഴിലാളികളെ ആദരിക്കൽ എന്നിവ നടത്തി. സംസ്ഥാന വൈസ് പ്രസിഡന്‍റ് അബ്ദുൽ അസീസ് ഏർബാദ് ഉദ്ഘാടനം ചെയ്തു. ജില്ലാ പ്രസിഡന്‍റ് ഷഫീഖ് എജിഡി അധ്യക്ഷത വഹിച്ചു. സംസ്ഥാന സെക്രട്ടറി എൻ.ടി.കെ. ബാപ്പു, സംസ്ഥാന കൗൺസിൽ അംഗം ഹുസൈൻ അലൈൻ, ജില്ലാ ജനറൽ സെക്രട്ടറി സിറിയക് വി.ജോസഫ്, ട്രഷറർ സമീർ ഫാത്തൂം, സെക്രട്ടറി അനിൽകുമാർ സംഗീത്, ഷാൻ അലൈൻ തുടങ്ങിയവർ പ്രസംഗിച്ചു. 300 വ്യാപാരികളുടെ രക്തദാന സമ്മതപത്രം സ്വീകരിച്ചു. 20 സ്വർണ തൊഴിലാളികളെ ചടങ്ങിൽ ആദരിച്ചു.

ഭർത്താവ് മരിച്ചത് അറിയാതെ ഭാര്യ കൂട്ടിരുന്നത് മൂന്നു നാൾ

തറയിൽ കിടന്ന മൃതദേഹം പുഴുവരിച്ചു അരൂർ: ഭർത്താവ് മരിച്ചത് മനസിലാകാതെ മാനസിക വെല്ലുവിളി നേരിടുന്ന ഭാര്യ അതേ വീട്ടിൽ കഴിഞ്ഞത് മൂന്നു ദിവസം. എഴുപുന്ന പഞ്ചായത്ത് 12ാം വാർഡിൽ എരമല്ലൂർ തേരേഴത്ത് ഗോപി (72) ആണ് മരിച്ചത്. മാനസിക വെല്ലുവിളി നേരിടുന്നയാളാണ് ഗോപിയുടെ ഭാര്യ ഷീല. ഗോപി മരിച്ചത് ഷീലയ്ക്ക് മനസിലാകാതെ വന്നതാവാം വിവരം പുറത്തറിയാൻ വൈകിയതെന്ന് കരുതുന്നു. മൂന്ന് ദിവസം മൃതദേഹത്തോടൊപ്പം ഇതേ വീട്ടിൽ കഴിഞ്ഞ ഷീലയ്ക്ക് മൃതദേഹത്തിൽ പുഴുവരിച്ചിട്ട് പോലും ഗോപി മരിച്ചെന്ന കാര്യം മനസിലായില്ല. ചൊവ്വാഴ്ച ഉച്ചയോടുകുടി ഗോപിയുടെ ഭാര്യാ സഹോദരനായ രമേശൻ ഇവരുടെ വീട്ടിൽ എത്തിയപ്പോഴാണ് ഗോപി നിലത്ത് മരിച്ചുകിടക്കുന്നതായി കണ്ടത്. ഗോപിയെയും ഷീലയെയും പരിശേധനയ്ക്ക് കൊണ്ടുപോകാനായി എത്തി‌‌യതായിരുന്നു രമേശൻ. മരണവിവരമറിഞ്ഞ് നാട്ടുകാരും പഞ്ചായത്ത് അധികൃതരും അടക്കം സ്ഥലത്തെത്തി. മൃതദേഹം പോസ്റ്റ്മോർട്ടത്തിനുശേഷം വീട്ടുവളപ്പിൽ സംസ്കരിച്ചു.

നഗരത്തിൽ യുവാക്കളെ കത്തിമുനയിൽ നിർത്തി കവർച്ച; പ്രതികൾ ഒളിവിൽ

കൊച്ചി: നഗരത്തിൽ യുവാക്കളെ കത്തിമുനയിൽ നിർത്തി മർദിച്ച് പണംതട്ടിയതായി പരാതി. ഇന്നലെ പുലർച്ചെ 2.15 ഓടെ എറണാകുളം നോർത്ത് മേൽപ്പാലത്തിനു സമീപമായിരുന്നു സംഭവം. പത്തനംതിട്ട മെഴുവേലി സ്വദേശിയായ 33കാരനും, സുഹൃത്തും എറണാകുളം സ്വദേശിയുമായ 25 കാരനുമാണ് മർദനമേറ്റത്. സംഭവത്തിൽ മൂന്നുപേർക്കായി എറണാകുളം നോർത്ത് പോലീസ് അന്വേഷണം ആരംഭിച്ചു. മർദനമേറ്റ പത്തനംതിട്ട സ്വദേശി രാവിലെ പോലീസ് സ്റ്റേഷനിലെത്തി പരാതിപ്പെടുകയായിരുന്നു. നോർത്ത് മേൽപ്പാലത്തിലൂടെ നടന്നുപോകുകയായിരുന്നു യുവാക്കളെ ബൈക്കിലെത്തിയ പ്രതികൾ തടഞ്ഞുനിർത്തി. തുടർന്ന് 33കാരനെ മാത്രം മേൽപ്പാലത്തിന് മുകളിലേക്ക് കൂട്ടിക്കോണ്ടുപോയി. ഇവിടെവച്ച് മർദിച്ചു. തുടർന്ന് 25കാരനെ സൗത്ത് റെയിൽവേ സ്റ്റേഷൻ ഭാഗത്ത് എത്തിച്ച് കത്തികാട്ടി പണം തട്ടിയെടുക്കുകയായിരുന്നു. 9,500 രൂപയും കൈയിലുണ്ടായിരുന്ന സ്മാർട്ട് ഫോണുമാണ് തട്ടിയെടുത്ത്. തുടർന്ന് പ്രതികൾ കടന്നുകളഞ്ഞു.

20 ഗ്രാം ഹെറോയിനുമായി ആസാം സ്വദേശിനി പിടിയില്‍

പെരുമ്പാവൂര്‍: 20 ഗ്രാം ഹെറോയിനുമായി ഇതര സംസ്ഥാനത്തൊഴിലാളിയായ യുവതി പിടിയില്‍. ആസാം ഹൈബ്ര ഗാവ് കച്ചമരി സ്വദേശിനി സലീമ ബീഗമാ(28)ണ് വില്പനയ്ക്കായി റോഡില്‍ നില്‍ക്കുന്ന സമയത്ത് കാഞ്ഞിരക്കാട് നിന്ന് പെരുമ്പാവൂര്‍ എഎസ്പിയുടെ പ്രത്യേക അന്വേഷണസംഘം പിടികൂടിയത്. രഹസ്യ വിവരത്തെ തുടര്‍ന്ന് കുറച്ചുനാളുകളായി ഇവര്‍ നിരീക്ഷണത്തിലായിരുന്നു. ആസാമില്‍ നിന്ന് എത്തിക്കുന്ന ഹെറോയിന്‍ ഇവിടെ ചെറിയ ബോട്ടിലുകള്‍ ആക്കി വില്പന നടത്തുകയായിരുന്നു. ഒരു ബോട്ടിലിന് 1000 നിരക്കിലായിരുന്നു വില്പന. ഇതരസംസ്ഥാന തൊഴിലാളികള്‍ ആയിരുന്നു ഇവരില്‍ നിന്ന് മയക്കുമരുന്ന് വാങ്ങിയിരുന്നത്. പെരുമ്പാവൂര്‍ എഎസ്പി ഹാര്‍ദിക് മീണ, ഇന്‍സ്‌പെക്ടര്‍ ടി.എം. സൂഫി, എസ്‌ഐമാരായ റിന്‍സ് എം. തോമസ്, പി.എം. റാസിക് തുടങ്ങിയവരാണ് അന്വേഷണ സംഘത്തില്‍ ഉണ്ടായിരുന്നത്.

മെട്രോ ഫീഡര്‍ ബസ് സര്‍വീസ് ഇന്‍ഫോപാര്‍ക്ക് ഫേസ് ടുവിലേക്കും

കൊച്ചി: കളമശേരിയില്‍ നിന്ന് നേരിട്ട് ഇന്‍ഫോപാര്‍ക്കിലേക്കുള്ള കൊച്ചി മെട്രോ ഫീഡര്‍ ബസ് സര്‍വീസ് ഇന്‍ഫോ പാര്‍ക്ക് ഫേസ് ടുവിലേക്കും ദീര്‍ഘിപ്പിച്ചു. സര്‍വീസുകളുടെ എണ്ണവും കൂട്ടിയിട്ടുണ്ട്. കളമശേരി മെട്രോ സ്റ്റേഷനില്‍ നിന്ന് രാവിലെ 7.50, 8.10, 9.01 സമയങ്ങളിലും ഉച്ചയ്ക്ക് 2.42 നുമാണ് ഫേസ് 2 ലേക്കുള്ള സര്‍വീസ്.

വാഹനാപകടം; കുട്ടമ്പുഴ മുന്‍ പഞ്ചായത്ത് പ്രസിഡന്‍റ് സി.ജെ. എല്‍ദോസ് അന്തരിച്ചു

കോതമംഗലം: വാഹനാപകടത്തില്‍ ഗുരുതര പരിക്ക േറ്റ് ചികിത്സയിലായിരുന്ന കുട്ടമ്പുഴ പഞ്ചായത്ത് മുന്‍ പ്രസിഡന്‍റ് കീരംപാറ ഊഞ്ഞാപ്പാറ ചെങ്ങമനാട്ട് സി.ജെ.എല്‍ദോസ് (69) അന്തരിച്ചു. കോഴിപ്പിള്ളി-മലയിന്‍കീഴ് ബൈപാസ് റോഡില്‍ തിങ്കളാഴ്ചയുണ്ടായ വാഹനാപകടത്തില്‍ പരിക്കേറ്റ് ആലുവയിലെ സ്വകാര്യ ആശുപത്രിയില്‍ ചികിത്സയിലായിലിരിക്കെ ഇന്നലെ രാവിലെയാണ് മരണം സംഭവിച്ചത്. എല്‍ദോസ്‌ സഞ്ചരിച്ച ബൈക്കിന് പിന്നില്‍ സ്വകാര്യ ബസ് ഇടിച്ചായിരുന്നു അപകടം. കോണ്‍ഗ്രസ് കവളങ്ങാട് ബ്ലോക്ക് കമ്മറ്റി വൈസ് പ്രസിഡന്‍റ്, വീക്ഷണം കവളങ്ങാട് പ്രാദേശിക ലേഖകൻ, ഐഎന്‍ടിയുസി താലൂക്ക് റീജണല്‍ കമ്മറ്റി വൈസ് പ്രസിഡന്‍റ്, കര്‍ഷക കോണ്‍ഗ്രസ് സംസ്ഥാന കമ്മിറ്റി അംഗം, സേവാദള്‍ ജില്ലാ വൈസ് പ്രസിഡന്‍റ്, എന്‍റെ നാട് ഹൈപവര്‍ കമ്മിറ്റി അംഗം, എല്‍ഐസി ഏജന്‍റ്, എന്നീ നിലകളില്‍ പ്രവര്‍ത്തിച്ചുവരികയായിരുന്നു. സംസ്‌കാരം ഇന്ന് 10ന് ഊഞ്ഞാപ്പാറയിലെ ശുശ്രൂഷയ്ക്കുശേഷം കുറ്റിയാംചാല്‍ സീനായ്ക്കുന്ന് സെന്‍റ് ജോര്‍ജ് യാക്കോബായ സുറിയാനി പള്ളിയിൽ. ഭാര്യ: മിനി (കുട്ടന്പുഴ വനിതാ സര്‍വീസ് സഹകരണ സംഘം സെക്രട്ടറി). മക്കള്‍: ബേസില്‍, മരിയ. മരുമക്കള്‍: മെറിന്‍, ജോയല്‍. മലയോര കർഷകരുടെ ഉന്നമനത്തിനായി പ്രവർത്തിച്ച നേതാവ് കോതമംഗലം: കോതമംഗലത്തിന് നഷ്ടമായത് മലയോര കുടിയേറ്റ കർഷകരുടെയും ആദിവാസികളുടെയും ഉന്നമനത്തിനായി പ്രവർത്തിച്ച സൗമ്യനായ നേതാവിനെ. കുട്ടമ്പുഴ മേഖലയിലെ ഈറ്റത്തൊഴിലാളികൾക്കിടയിൽ പ്രവർത്തിച്ച് യൂണിയന് രൂപം നൽകി അവരുടെ ഉന്നമനത്തിനായി സി.ജെ. എല്‍ദോസ് ദീർഘകാലം പ്രവർത്തിച്ചു. 1995ൽ എ.കെ. ആന്‍റണി മന്ത്രിസഭയിൽ വൈദ്യുതി മന്ത്രിയായിരുന്ന ജി. കാർത്തികേയനിൽനിന്നു മാമലക്കണ്ടത്തേക്ക് വൈദ്യുതി എത്തിക്കാൻ ആദ്യമായി ഒടിപി സാങ്ഷൻ (സ്പെഷൽ ഓർഡർ) വാങ്ങിയത് സി.ജെ. എൽദോസ് ആയിരുന്നു. പഴയ ആലുവ മൂന്നാർ രാജപാത തുറന്ന് സഞ്ചാരയോഗ്യമാക്കുന്നതിനുള്ള ശ്രമങ്ങളിലും അദ്ദേഹം മുൻനിരയിലുണ്ടായിരുന്നു.

കമ്മീഷണർ ഓഫീസ് മാർച്ച്: കെഎസ്‌യു പ്രവർത്തകർ റിമാൻഡിൽ

കൊച്ചി: കമ്മീഷണർ ഓഫീസ് മാർച്ചിനിടെ പൊതുമുതൽ നശിപ്പിച്ച സംഭവത്തിൽ അറസ്റ്റിലായ കെഎസ്‌യു പ്രവർത്തകർ റിമാൻഡിൽ. കെഎസ്‌യു ജില്ലാ പ്രസിഡന്‍റ് കെ.എം. കൃഷ്ണലാൽ (25)അടക്കം എട്ടുപേരെയാണ് റിമാൻഡ് ചെയ്തത്. പോലീസ് മർദനത്തിൽ പ്രതിഷേധിച്ച് ചൊവ്വാഴ്ചയാണ് കെഎസ്‌യു ജില്ലാ കമ്മിറ്റിയുടെ നേതൃത്വത്തിൽ മാർച്ച് നടത്തിയത്. കെഎസ്‌യു സംസ്ഥാന ജനറൽ സെക്രട്ടറി മിവ ജോളി(28), സംസ്ഥാന ഉപാധ്യക്ഷ ആൻ സെബാസ്റ്റ്യൻ(27), ജില്ലാ ഭാരവാഹികളായ അമർ മിഷുത്ത്(28), മോണി ചാക്കോ(27), ആഷിൻ പോൾ (24), അസിൽ ജബ്ബാർ (23),ഡേവീസ് പോൾ,സി.ബി. സഫാൻ(27) എന്നിവരാണ് റിമാൻഡിലായ മറ്റു പ്രർത്തകർ. പ്രവർത്തകരും പോലീസും തമ്മിലുണ്ടായ ഏറ്റുമുട്ടലിനിടെ കല്ലേറിൽ പോലീസിന്‍റെ ജലപീരങ്കി വാഹനത്തിന്‍റെ ചില്ല് തകർന്നിരുന്നു. കണ്ടാലറിയാവുന്ന നൂറാേളം പേർക്കെതിരെ പോലീസ് കേസെടുത്തിട്ടുണ്ട്.

ചന്ദേര്‍കുഞ്ജ് അപ്പാര്‍ട്ട്‌മെന്‍റ് ബി, സി ടവറുകളിലെ താമസക്കാര്‍ ഒരാഴ്ചയ്ക്കകം ഒഴിയണം: ഹൈക്കോടതി

കൊച്ചി: പൊളിച്ചു നീക്കാന്‍ ഉത്തരവിട്ട വൈറ്റില ചന്ദേര്‍കുഞ്ജ് അപ്പാര്‍ട്ട്‌മെന്‍റിലെ ബി,സി ടവറുകളിലെ താമസക്കാര്‍ ഏഴ് ദിവസത്തിനകം ഒഴിയണമെന്ന് ഹൈക്കോടതി. ബലക്ഷയമുള്ള ടവറുകള്‍ പൊളിച്ച് പുതിയത് പണിയുന്നതിന് അഞ്ചു വര്‍ഷണെങ്കിലും കാലതാമസമുണ്ടാകും. ഒഴിയുന്ന ഫ്ളാറ്റുടമകള്‍ക്ക് അതുവരെ താമസിക്കാന്‍ വാടക നല്‍കുന്നതും നഷ്ടപരിഹാരത്തില്‍ ഉള്‍പ്പെടുന്നുണ്ട്. ആദ്യ ആറു മാസത്തേക്ക് വാടകയിനത്തില്‍ 2.97 കോടി എഡബ്ല്യുഎച്ച്ഒ കെട്ടിവച്ചതായി ജില്ലാ കളക്ടറുടെ നേതൃത്വത്തിലുള്ള സമിതി കോടതിയെ അറിയിച്ചു. ബി ടവറിലെ 74 പേരും സി ടവറിലെ 78 ഉടമകളുമാണ് നഷ്ടപരിഹാരമായി ലഭിക്കുന്ന വാടക വാങ്ങി മാറി താമസിക്കാന്‍ തയാറായിട്ടുള്ളത്. ശേഷിക്കുന്നവര്‍ക്ക് താത്പര്യമുണ്ടെങ്കില്‍ അവര്‍ക്കും അനുവദിക്കും. വാടക കരാര്‍ ഹാജരാക്കുന്ന പക്ഷം സമയാസമയങ്ങളില്‍ ഇവര്‍ക്ക് തുക വര്‍ധിപ്പിച്ചു നല്‍കണമെന്നും ഡിവിഷന്‍ ബെഞ്ച് ഉന്നതതല സമിതിയോട് നിര്‍ദേശിച്ചു. നഷ്ടപരിഹാരവുമായി ബന്ധപ്പെട്ട സിംഗിള്‍ബെഞ്ച് ഉത്തരവിലെ വ്യവസ്ഥകള്‍ ചോദ്യം ചെയ്ത് അന്തേവാസികളുടെ കൂട്ടായ്മയും ആര്‍മി വെല്‍ഫെയല്‍ ഹൗസിംഗ് ഓര്‍ഗനൈസേഷനും സമര്‍പ്പിച്ച അപ്പീലുകള്‍ തീര്‍പ്പാക്കിയാണ് ജസ്റ്റീസ് അമിത് റാവല്‍, ജസ്റ്റീസ് പി.വി.ബാലകൃഷ്ണന്‍ എന്നിവരുള്‍പ്പെട്ട ഡിവിഷന്‍ ബെഞ്ചിന്‍റെ ഉത്തരവ്. ‌ അപ്പാര്‍ട്ട്‌മെന്‍റ് പണിയാനും പുനരധിവാസത്തിനും 175 കോടി രൂപ മുടക്കാനാണ് എഡബ്ല്യുഎച്ച്ഒ സമ്മതിച്ചിട്ടുള്ളത്. എന്നാല്‍ നിര്‍മാണചെലവ് കാലാകാലങ്ങളില്‍ ഉയരുമെന്നതിനാല്‍ 211.49 കോടി വേണ്ടി വരുമെന്നാണ് ജില്ലാ ഭരണകൂടത്തിന്‍റെ നിഗമനം. എത്രതുക വേണ്ടി വന്നാലും അത് എഡബ്ല്യുഎച്ച്ഒ വഹിക്കണമെന്ന് ഡിവിഷന്‍ ബെഞ്ച് വ്യക്തമാക്കി. വായ്പയെടുത്ത് ഫഌറ്റ് വാങ്ങുകയും നിലവില്‍ മറ്റിടങ്ങളില്‍ താമസിക്കുകയും ചെയ്യുന്നവര്‍ വായ്പയുടെയും ഇഎംഐ അടയ്ക്കുന്നതിന്‍റെയും രേഖകള്‍ ഹാജരാക്കിയാല്‍ നിശ്ചിത നിരക്കില്‍ വാടക അനുവദിക്കണമെന്നും കോടതി വ്യക്തമാക്കി. ഉടമകള്‍ക്ക് നഷ്ടപരിഹാരത്തിനായി ബന്ധപ്പെട്ട അഥോറിറ്റികളെ സമീപിക്കുന്നതിന് തടസമില്ല. ഇതിന് അനുമതി നിഷേധിച്ച എഡബ്ല്യുഎച്ച്ഒയുടെ നടപടി ഡിവിഷന്‍ ബെഞ്ച് റദ്ദാക്കിയിട്ടുണ്ട്.

വാഹനാപകടത്തിൽ ബൈക്ക് യാത്രികനായ യുവാവ് മരിച്ചു

കളമശേരി: കളമശേരി എച്ച്എംടി റോഡിലുണ്ടായ വാഹനാപകടത്തിൽ ബൈക്ക് യാത്രികനായ യുവാവ് മരിച്ചു. പാനായിക്കുളം തച്ചോത്ത് പറമ്പിൽ പോളിന്‍റെ മകൻ ജസ്റ്റിൻ(23)ആണ് മരിച്ചത്. ബൈക്കിൽ ഒപ്പം സഞ്ചരിച്ചിരുന്നു സുഹൃത്ത് അഭിജിത്ത് സജീവ് മെഡിക്കൽ കോളജിൽ ചികിത്സയിലാണ്. ചൊവ്വാഴ്ച രാത്രിയിൽ കളമശേരി മെഡിക്കൽ കോളജ് ഭാഗത്തുനിന്നും വരികയായിരുന്ന ബൈക്കിൽ പുറകിലൂടെ അമിതവേഗതയിലെത്തിയ വാഹനം ഇടിച്ചാണ് അപകടമുണ്ടായത്. അപകടമുണ്ടാക്കിയ വാഹനം തിരിച്ചറിഞ്ഞിട്ടില്ല. പോലീസ് മേൽ നടപടികൾ സ്വീകരിച്ചു. പോസ്റ്റ്മോർട്ടത്തിനു ശേഷം മൃതദേഹം ഇന്നലെ പനായിക്കുളം ലിറ്റിൽ ഫ്ളവർ പള്ളിയിൽ സംസ്കരിച്ചു. മതാവ്: ഷൈനി. സഹോദരൻ: ക്രിസ്റ്റി.

വയോധികന്‍റെ മൃതദേഹം അഴുകിയ നിലയില്‍

അരൂര്‍: വയോധികന്‍റെ മൃതദേഹം വീടിനുള്ളില്‍ അഴുകിയ നിലയില്‍ കണ്ടെത്തി. എഴുപുന്ന പഞ്ചായത്ത് 12-ാം വാര്‍ഡ് തരേത്ത് ഗോപി (72) ആണ് മരിച്ചത്. സ്വാഭാവിക മരണമാണെന്ന് പോലീസ് സ്ഥിരീകരിച്ചു. ഭാര്യ:ഷീല. ഇവർക്കു മക്കളില്ല. മൃതദേഹം പോസ്റ്റ്മോർട്ടത്തിനുശേഷം വടുതലയിലെ പൊതുശ്മശാനത്തില്‍ സംസ്‌കരിച്ചു.

കഞ്ചാവ് കേസ്: പ്രതികള്‍ക്ക് മൂന്ന് വര്‍ഷം കഠിന തടവ്

കൊച്ചി: കഞ്ചാവ് കേസ് പ്രതികൾക്കെതിരെ മൂന്നു വര്‍ഷം കഠിന തടവും 20,000 രൂപ പിഴയും ശിക്ഷ വിധിച്ചു. വയനാട് സ്വദേശികളായ ലക്കിടി റായന്‍ മരക്കാര്‍ വീട്ടില്‍ അനസ്, കണിയമ്പുഴ മമ്മോക്കര്‍ വീട്ടില്‍ ഇജാസ് അഹമ്മദ് എന്നിവരെയാണ് എറണാകുളം അഡീഷണല്‍ ജില്ലാ സെഷന്‍സ് കോടതി ജഡ്ജി വി.പി.എം. സുരേഷ്‌ ബാബു ശിക്ഷിച്ചത്. 2017 നവംബര്‍ ഒന്നിന് ഉച്ചയ്ക്ക് ഒന്നിനാണ് 1.931 കിലോ കഞ്ചാവുമായി ബോള്‍ഗാട്ടി ജംഗ്ഷനില്‍ നിന്ന് പ്രതികളെ പിടികൂടിയത്. മുളവുകാട് പോലീസ് രജിസ്റ്റര്‍ ചെയ്ത കേസിലാണ് വിധി. മൂന്നാം പ്രതി നൗഷീര്‍ ഒളിവിലാണ്.

കാറും ടാങ്കര്‍ ലോറിയും കൂട്ടിയിടിച്ചു; ഒരാള്‍ക്ക് പരിക്ക്

വരാപ്പുഴ: ദേശീയപാതയിൽ ടാങ്കര്‍ ലോറിയും കാറും കൂട്ടിയിടിച്ചു ഒരാള്‍ക്ക് പരിക്കേറ്റു. കാർ യാത്രക്കാരനായ ചെറായി സ്വദേശി വിനോദിന്‍റെ കൈക്കാണ് പരിക്കേറ്റത്. ഇന്നലെ രാവിലെ കൂനമ്മാവ് ബിടിഎം കോളജിന് സമീപമായിരുന്നു അപകടം. വരാപ്പുഴ ഭാഗത്ത് നിന്നു പറവൂര്‍ ഭാഗത്തേക്ക് വരികയായിരുന്നു കാർ എതിർദിശയിൽ നിന്നു വന്ന ടാങ്കര്‍ ലോറി യുമായി കൂട്ടിയിടിക്കുകയായിരുന്നു. അപകടത്തില്‍ കാറിന്‍റെ മുന്‍ഭാഗം പൂർണമായും തകര്‍ന്നു. കാറിലുണ്ടായിരുന്ന വിനോദിന്‍റെ കുടുംബത്തിന് നിസാര പരിക്കേറ്റു. സംഭവത്തിൽ വരാപ്പുഴ പോലീസ് കേസ് എടുത്തു.

അങ്കമാലി കുണ്ടന്നൂര്‍ ബൈപ്പാസ് : അവശേഷിക്കുന്ന സര്‍വേ ഒക്ടോബറിൽ

അടുത്തമാസം 3 എ പുനർവിജ്ഞാപനമെന്ന് ദേശീയപാത അഥോറിറ്റി കൊച്ചി: എന്‍എച്ച് 544ലെ തിരക്ക് കുറയ്ക്കാന്‍ രൂപകല്പന ചെയ്ത അങ്കമാലി- കുണ്ടന്നൂര്‍ പുതിയ ഹൈവേ നിര്‍മാണത്തോടനുബന്ധിച്ചുള്ള ഭൂമി എറ്റെടുക്കലിനുള്ള 3 എ വിജ്ഞാപനം അടുത്തമാസം വീണ്ടും പുറപ്പെടുവിക്കും. വിജ്ഞാപനം പുറപ്പെടുവിച്ചാല്‍ രണ്ടു മാസത്തിനകം അവശേഷിക്കുന്ന പ്രദേശത്ത് സര്‍വേ പൂര്‍ത്തിയാക്കും. നേരത്തെ പുറപ്പെടുവിച്ച 3 എ വിജ്ഞാപനം കാലഹരണപ്പെട്ടതോടെയാണ് പുതിയ വിജ്ഞാപനം ആവശ്യമായി വന്നത്. മന്ത്രി പി. രാജീവിന്‍റെ അധ്യക്ഷതയില്‍ ചേര്‍ന്ന അവലോകന യോഗത്തിലാണ് ദേശീയപാതാ അഥോറിറ്റി ഇതു സംബന്ധിച്ച തീരുമാനം അറിയിച്ചത്. അങ്കമാലി മുതല്‍ കുണ്ടന്നൂര്‍ വരെ 44 കിലോമീറ്റര്‍ ആറുവരിപ്പാതയാണ് നിര്‍മിക്കേണ്ടത്. ഇതിനായി 18 വില്ലേജുകളിലായി 201 ഹെക്ടര്‍ സ്ഥലമാണ് പദ്ധതിക്കായി ഏറ്റെടുക്കേണ്ടത്. കുണ്ടന്നൂര്‍ നെട്ടൂരില്‍ നിന്ന് ആരംഭിച്ച് അങ്കമാലി കരയാംപറമ്പിലെത്തുന്നതാണ് നിലവിലെ അലൈന്‍മെന്‍റ്. 45 മീറ്റര്‍ വീതിയിലാണ് റോഡ് നിര്‍മാണം. പുതിയ റോഡ് വരുന്നതോടെ വൈറ്റില, ഇടപ്പള്ളി, കളമശേരി, ആലുവ പ്രദേശങ്ങളിലെ തിരക്ക് ഒഴിവാക്കി യാത്ര ചെയ്യാനാകും. സര്‍വേ അവശേഷിക്കുന്നത് 21.5 ഹെക്ടറില്‍ ബൈപ്പാസിനായി ഏറ്റെടുക്കുന്ന 201 ഹെക്ടറില്‍ 21.5 ഹെക്ടറിലാണ് ഇനി സര്‍വേ അവശേഷിക്കുന്നത്. 290 ഹെക്ടര്‍ ഏറ്റെടുക്കാനായിരുന്നു നിര്‍ദ്ദേശമെങ്കിലും പിന്നീടത് 201 ഹെക്ടറായി നിജപ്പെടുത്തി. ഇതില്‍ 160 ഹെക്ടര്‍ പ്രദേശത്തെ സര്‍വേ നേരത്തെ പൂര്‍ത്തിയാക്കിയിരുന്നു. പുഴയും കല്ലിടാത്ത സ്ഥലവും ഉള്‍പ്പെടെ 19.5 ഹെക്ടര്‍ പ്രദേശം ഒഴിവാക്കി. അവശേഷിക്കുന്ന 21.5 ഹെക്ടറില്‍ 3 എ പുനര്‍ വിജ്ഞാപനത്തിനു ശേഷം അടിയന്തര പ്രാധാന്യത്തോടെ സര്‍വേ പൂര്‍ത്തിയാക്കാനാണ് തീരുമാനം. നേരത്തെ 49 ജീവനക്കാരാണ് സര്‍വേ ജോലികളില്‍ പങ്കെടുത്തത്. 67 ഹെക്ടര്‍ സ്ഥലം 3ഡി വിജ്ഞാപനത്തിനായി ദേശീയപാതാ അഥോറിറ്റിക്ക് കൈമാറുകയും ചെയ്തിരുന്നു. സര്‍വേ പൂര്‍ത്തിയാക്കിയ ബാക്കി സ്ഥലത്തിന്റെ സ്‌കെച്ച് ഉടന്‍ തയാറാക്കാന്‍ മന്ത്രി നിര്‍ദേശം നല്‍കി. 3 എ പുനര്‍വിജ്ഞാപനം ഒക്ടോബറില്‍ നടന്നാല്‍ രണ്ട് മാസത്തിനകം തന്നെ 3 ഡി വിജ്ഞാപനത്തിലേക്ക് കടക്കാനാകുമെന്നാണ് പ്രതീക്ഷ. പ്രതിഷേധം ഫലം കണ്ടു രണ്ടര വര്‍ഷത്തിനകം പൂര്‍ത്തിയാക്കാന്‍ ലക്ഷ്യമിട്ടിരുന്ന പദ്ധതി അധികൃതരുടെ അനാസ്ഥമൂലം അവതാളത്തിലായതോടെ രാഷ്ട്രീയ പാര്‍ട്ടികളടക്കം രംഗത്തെത്തിയിരുന്നു. അനിശ്ചിതത്വം നീക്കി പദ്ധതി വേഗത്തില്‍ പൂര്‍ത്തിയാക്കണമെന്നായിരുന്നു പ്രതിഷേധക്കാരുടെ ആവശ്യം. ജില്ലയിലെ കോണ്‍ഗ്രസ് ജനപ്രതിനിധികളുടെ നേതൃത്വത്തില്‍ പ്രതിഷേധ യോഗങ്ങളും സംഘടിപ്പിച്ചിരുന്നു. ഭൂമിയേറ്റെടുക്കലിന് 3 എ വിജ്ഞാപനം ഇറങ്ങിയാല്‍ ഒരു വര്‍ഷത്തിനകം അതിര്‍ത്തിക്കല്ലുകള്‍ സ്ഥാപിച്ച് 3 ഡി വിജ്ഞാപനം ഇറക്കിയാലെ നടപടികള്‍ പൂര്‍ത്തിയാകൂ. ഡിപിആര്‍ പ്രകാരം അതിര്‍ത്തിക്കല്ലുകള്‍ സ്ഥാപിക്കേണ്ടത് ദേശീയപാത അഥോറിറ്റിയാണ്. 3 എ വിജ്ഞാപനം ഇറങ്ങി ഒരു വര്‍ഷം പൂര്‍ത്തിയായ കഴിഞ്ഞ 29നകം നടപടികള്‍ പൂര്‍ത്തിയാകാത്തതിനാല്‍ 3 ഡി വിജ്ഞാപനം ഇറക്കാന്‍ അഥോറിറ്റിക്കായിരുന്നില്ല. ഇതോടെ 3 എ വിജ്ഞാപനം റദ്ദായിരുന്നു.

ബോട്ടിൽ നിന്നു വീണ മത്സ്യത്തൊഴിലാളിയെ കാണാതായി

ചെറായി: മത്സ്യബന്ധനത്തിനിടെ ബോട്ടിൽ നിന്നു കാൽവഴുതി കടലിലേക്ക് വീണ തൊഴിലാളിയെ കാണാതായി. തമിഴ്നാട് കന്യാകുമാരി സ്വദേശി കിരു ഭരൻ യുഗൈൻ കുളന്തൈ (26) നെയാണ് കാണാതായത്. തിങ്കളാഴ്ച രാവിലെ കൊച്ചിക്ക് പടിഞ്ഞാറാണ് അപകടം സംഭവിച്ചത്. കൂടെയുണ്ടായിരുന്നവർ ഉടൻ തെരച്ചിൽ നടത്തിയെങ്കിലും കണ്ടെത്താനായില്ല. 11ന് രാത്രി മുനമ്പം മിനി ഹാർബറിൽ നിന്ന് മത്സ്യബന്ധനത്തിനു പോയ പള്ളിപ്പുറം കാവാലംകുഴി ജോംസണിന്‍റെ ഉടമസ്ഥതയിലുള്ള അർപ്പുതനായകി എന്ന ബോട്ടിലെ ജീവനക്കാരനാണ്. ഫോർട്ട്കൊച്ചി കോസ്റ്റൽ പോലീസ് കേസ് എടുത്തു.

40 കിലോ കഞ്ചാവുമായി രണ്ട് യുവാക്കള്‍ പിടിയില്‍

ഏലൂര്‍: കൊച്ചി സിറ്റി ഡാന്‍സാഫ് സംഘവും ഏലൂര്‍ പോലീസും നടത്തിയ വാഹന പരിശോധനയില്‍ 40 കിലോഗ്രാം കഞ്ചാവുമായി രണ്ട് യുവാക്കളെ പിടികൂടി. മുര്‍ഷിദാബാദ് സ്വദേശികളായ എസ്.കെ. സൂരജ് (18), എസ്.കെ. രാജു (19) എന്നിവരെയാണ് ഏലൂര്‍ പഴയ ആനവാതില്‍ ജംഗ്ഷന് സമീപം നത്തിയ പരിശോധനയില്‍ പിടികൂടിയത്. ഇവരുടെ പക്കല്‍ നിന്ന് 40 കിലോ കഞ്ചാവും കണ്ടെടുത്തു. പ്രതികളെ കളമശേരി മജിസ്‌ട്രേറ്റ് കോടതിയില്‍ ഹാജരാക്കി റിമാഡ് ചെയ്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]