ജൈവ വൈവിധ്യ പരിപാലന ബോധവത്കരണ ശില്പശാല

വടക്കഞ്ചേരി: വടക്കഞ്ചേരി പഞ്ചായത്തിലെ ജൈവ വൈവിധ്യ പരിപാലന സമിതിയുടെ നേതൃത്വത്തിൽ ജൈവ വൈവിധ്യ ക്ലബ്ബുകളിലെ വിദ്യാർഥികൾക്കായി ബോധവത്കരണ ശില്പശാല നടത്തി.

പഞ്ചായത്ത് പ്രസിഡന്‍റ് ലിസി സുരേഷ് ഉദ്ഘാടനം ചെയ്തു. വികസനകാര്യ സ്റ്റാൻഡിംഗ്‌ കമ്മിറ്റി ചെയർപേഴ്സൺ അഡ്വ.കെ.പി. ശ്രീകല അധ്യക്ഷത വഹിച്ചു. ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ രശ്മി ഷാജി, ബിഎംസി മെംബർ സെക്രട്ടറി എ. ശിവശങ്കരൻ , ജൈവ വൈവിധ്യ ബോർഡ് ജില്ലാ കോ-ഓർഡിനേറ്റർ വി. സിനിമോൾ, കെഎംസി അംഗങ്ങളും പ്രസംഗിച്ചു.

ഇരിങ്ങാലക്കുട ക്രൈസ്റ്റ് കോളജിലെ സുവോളജി വിഭാഗം അസിസ്റ്റന്‍റ് പ്രഫസർ ഡോ.സി. ബിജോയ് ജൈവവൈവിധ്യത്തിന്‍റെ പ്രസക്തിയെക്കുറിച്ച് ക്ലാസെടുത്തു.

ADVERTISEMENT

കരിപ്പാലി പാലത്തിൽ മത്സ്യക്കച്ചവടം; മാലിന്യനിക്ഷേപ കേന്ദ്രമായി പുഴ

വടക്കഞ്ചേരി: കുടിവെള്ള പദ്ധതി പ്രവർത്തിക്കുന്ന മംഗലംപുഴയുടെ കൈവഴിയായ കരിപ്പാലി പുഴപ്പാലത്തിൽ പരസ്യമായി മീൻവില്പന നടക്കുമ്പോഴും നടപടിയെടുക്കാതെ അധികൃതർ. ദിവസവും രാവിലെയാണ് ഇവിടെ മത്സ്യക്കച്ചവടം. മൊത്തമായി മത്സ്യം കൊണ്ടുവന്ന് ചെറുകിട മത്സ്യ വില്പനക്കാർക്ക് വിൽക്കുന്നത് ഇവിടെവച്ചാണ്. വാഹനങ്ങളിൽ നിന്നുള്ള മലിനജലവും ചീഞ്ഞുനാറുന്നതും കേടുവന്നതുമായ മത്സ്യങ്ങൾ തള്ളുന്നതും പുഴയിലേക്കാണ്. പുഴയിൽ ഒഴുക്കുള്ള സമയമാണെങ്കിൽ എല്ലാം ഒഴുകിപ്പോകും. അതല്ലെങ്കിൽ അവിടെകിടന്ന് ദുർഗന്ധം വമിച്ച് വഴി നടക്കാനാകാത്ത സ്ഥിതിയാകും. ഇതുകൂടാതെ അറവുമാലിന്യങ്ങളും കക്കൂസ് മാലിന്യങ്ങൾ ഉൾപ്പെടെ ഈ പാലത്തിലും റോഡിന്‍റെ രണ്ടുവശത്തും പുഴയിലുമാണ് തള്ളുന്നത്. മറ്റു മാലിന്യ ചാക്കുകൾ തള്ളുന്നതും പുഴയിലേക്കാണ്. പാലത്തിൽ വാഹനം നിർത്തി പുഴയിലേക്ക് മാലിന്യം വലിച്ചെറിയും. രാത്രി സമയങ്ങളിലാണ് ഈ വിധമുള്ള മാലിന്യം തള്ളുന്നത്. നിരവധി കുടിവെള്ള പദ്ധതികളാണ് ഈ പുഴകളിലുള്ളത്. ആളുകൾ കുളിക്കുന്നതും തുണി കഴുകുന്നതും ഈ വെള്ളത്തിൽ തന്നെയാണ്. മൂവായിരത്തോളം കുട്ടികൾ പഠിക്കുന്ന സ്കൂളും മറ്റു സ്ഥാപനങ്ങളുമുള്ള റോഡാണിത്. ഈ മാലിന്യ വഴിയിലൂടെ വേണം കുട്ടികൾക്ക് സ്കൂളിലെത്താൻ. തീറ്റ സമൃദ്ധമായതിനാൽ നായ്കൂട്ടങ്ങളും പന്നിക്കൂട്ടങ്ങളും ഇവിടെ നിറയുകയാണ്. തെരുവുനായ്ക്കൾ റോഡിനു കുറുകെ പാഞ്ഞ് വാഹന യാത്രികർ അപകടത്തിൽപ്പെടുന്നതും കുറവല്ല. മംഗലം - ഗോവിന്ദാപുരം സംസ്ഥാനപാതയിൽ നിന്നും കരിപ്പാലി പാലം മുതൽ നൂറുമീറ്ററോളം ദൂരം ആളൊഴിഞ്ഞ പ്രദേശമാണ്. ഇതാണ് മാലിന്യം തള്ളുന്നവർക്കു സൗകര്യമാകുന്നത്. രാത്രിയിൽ ഇവിടെ വെളിച്ച സംവിധാനവുമില്ല. പ്രായമായി അവശതയുള്ള വളർത്തു നായ്ക്കളെ ഉപേക്ഷിക്കുന്നതും ഇവിടെയാണിപ്പോൾ. നേരത്തെ കരിപ്പാലി പാലത്തിനടുത്ത് മാലിന്യം തള്ളുന്നവരെ പിടികൂടാൻ കാമറ സ്ഥാപിച്ചിരുന്നു. ഇപ്പോൾ ഇത് പ്രവർത്തിക്കുന്നില്ല. ഇവിടെ മാലിന്യം നിക്ഷേപിക്കരുതെന്ന ബോർഡ് പഞ്ചായത്ത് സ്ഥാപിച്ചിട്ടുണ്ടെങ്കിലും അതിനൊന്നും വില കൽപിക്കുന്നില്ല. കാമറകളുടെ പ്രവർത്തനം പുനസ്ഥാപിച്ച് മാലിന്യം തളർന്നവർക്കെതിരെ നടപടി സ്വീകരിക്കണമെന്നാണ് ആവശ്യം. പാലത്തിലുള്ള മത്സ്യ വില്പനയും നിരോധിക്കണം. മതിയായ തെരുവു വിളക്കുകൾ സ്ഥാപിച്ചും മാലിന്യ നിക്ഷേപം ഒഴിവാക്കണം. കിഴക്കഞ്ചേരി ,വണ്ടാഴി എന്നീ രണ്ട് പഞ്ചായത്തുകളുടെ അതിർത്ത പ്രദേശമാണ് കരിപ്പാലി പാലം ഭാഗം.

നന്ദിയോട് ആശുപത്രിയിൽ ഞായറാഴ്ചകളിൽ ചികിത്സക്കെത്തുന്നവർ കാത്തിരിക്കണം

വണ്ടിത്താവളം: നന്ദിയോട് കുടുംബാരോഗ്യ കേന്ദ്രത്തിൽ ഡോക്ടർമാരുടെ കുറവുകാരണം ഇന്നലെയും ചികത്സക്കെത്തിയവർ മണിക്കൂറുകളോളം വലഞ്ഞു. മൂന്ന് ഡോക്ടർമാരുടെ തസ്തിക നിലവിലുണ്ടെങ്കിലും ഞായറാഴ്ച ദിവസം ഒരു ഡോക്ടാണുണ്ടാവുക. ചില ഞായറാഴ്ച ദിവസങ്ങളിൽ ഡോക്ടറില്ലാതെ ചികിത്സക്കു വന്നവർ തിരിച്ചുപോകാറുമുണ്ട്. പ്രതിദിനം ശരാശരി 200 മുതൽ 250 വരെ പേർ ചികിത്സക്കെത്താറുണ്ട്. ഫാർമസിയിൽ ആവശ്യത്തിനു മരുന്നുകളും മറ്റു ജീവനക്കാരും നിലവിലുണ്ട്. എന്നാൽ ഡോക്ടർമാർ എത്തിയില്ലെങ്കിൽ ഒരു തരത്തിലുള്ള സേവനവും ലഭ്യമല്ല. നല്ലേപ്പിള്ളി, എരുത്തേമ്പതി, നടുപ്പുണി, വണ്ണാമട, ഒഴലപ്പതി കുടുംബാരോഗ്യകേന്ദ്രങ്ങളുടെ പ്രവർത്തനങ്ങളെല്ലാം നന്ദിയോട് ആശുപത്രിയുടെ നിയന്ത്രണത്തിലാണുള്ളത്. നന്ദിയോട് ആശുപത്രിയിൽ കിടത്തി ചികത്സക്കായി കോടികൾ മുടക്കി നിർമിക്കുന്ന കെട്ടിടം അവസാന ഘട്ടത്തിലാണ്. ഇത്രയും സൗകര്യങ്ങൾ നിലവിലുണ്ടായിരുന്നിട്ടും മതിയായ ചികിത്സ ഇപ്പോഴും കിട്ടാറില്ലെന്ന ആക്ഷേപവും ശക്തമാണ്. വൈകുന്നേരം ആറുമണിവരെ ഒപി പ്രവർത്തിക്കുമെന്ന് കൊട്ടിഘോഷിച്ചാണ് കുടുംബാരോഗ്യ കേന്ദ്രം ഉദ്ഘാടനം നടന്നത്. നിലവിൽ ഒരുമണിവരെ മാത്രമെ ഒപി പ്രവർത്തിക്കുകയുള്ളു എന്നതും ദുരിതമായിട്ടുണ്ട്.

കൂട്ടായ്മയുടെ ഉത്സവമായി സമന്വയ ഓണാഘോഷം

കല്ലടിക്കോട്: സമന്വയ കലാ സംസ്കാരിക വേദിയുടെ ഓണാഘോഷം വിവിധ പരിപാടികളോടെ സ്നേഹ സംഗമമായി ആഘോഷിച്ചു. കരിമ്പ ഗ്രാമ പഞ്ചായത്ത്‌ പ്രസിഡന്‍റ് പി.എസ്. രാമചന്ദ്രൻ ഉദ്ഘാടനം ചെയ്തു. സമന്വയ സെക്രട്ടറി വി.പി.ജയരാജൻ അധ്യക്ഷത വഹിച്ചു. പാലക്കാട് ജില്ലാ പഞ്ചായത്ത് സെക്രട്ടറി എം. രാമൻകുട്ടി, കവി വിനയചന്ദ്രൻ പുലാപ്പറ്റ, എഴുത്തുകാരി ബിന്ദു പി. മേനോൻ എന്നിവർ മുഖ്യാതിഥികളായി പങ്കെടുത്തു. കരിമ്പ ഗവ. ഹയർ സെക്കന്ററി സ്കൂളിൽ നടത്തിയ ഓണാഘോഷത്തിൽ ഓണപ്പൂക്കളം, സാംസ്‌കാരിക സമ്മേളനം, ഓണപ്പാട്ടുകൾ, കൈകൊട്ടിക്കളി, തിരുവാതിരക്കളി, ഓണസദ്യ, ഓണക്കളികൾ തുടങ്ങിയ വൈവിധ്യമാർന്ന പരിപാടികൾ അരങ്ങേറി. തിരുവാതിരക്കളിയിൽ ഒന്നും രണ്ടും മൂന്നും സ്ഥാനം നേടിയവരെ കാഷ് അവാർഡും സർട്ടിഫിക്കറ്റും നൽകി ആദരിച്ചു. സി.പി. കോമളവല്ലി, ടി.കെ. ബിന്ദു, എം.പി. വിനോദ്, എം. ബൾക്കീസ്, കെ.എസ്.സുധീർ പ്രസംഗിച്ചു.

തൃത്താല കാർഷിക കാർണിവലിന് ഇന്നു തുടക്കം

തൃത്താല: ഓണത്തോടനുബന്ധിച്ച് തൃത്താല മണ്ഡലത്തിൽ നടത്തുന്ന കാർഷിക കാർണിവലിനു മുന്നോടിയായി നടന്ന ജനകീയ വിളവെടുപ്പ് മഹോത്സവം പ്രൗഢഗംഭീരമായി. മന്ത്രി എം.ബി. രാജേഷ് നടപ്പാക്കുന്ന സുസ്ഥിര തൃത്താലയുടെ ഭാഗമായാണ് കാർഷിക കാർണിവൽ സംഘടിപ്പിക്കുന്നത്. വിളവെടുപ്പ് മഹോത്സവത്തിന്‍റെ ഉദ്ഘാടനം മന്ത്രി നിർവഹിച്ചു. വാദ്യാഘോഷ അകമ്പടിയോടെ തിരുമിറ്റക്കോട് ഗ്രാമ പഞ്ചായത്തിലെ ആറങ്ങോട്ടുകരയിൽ നിന്നും ആരംഭിച്ച വിളവെടുപ്പ് മഹോത്സവം പടിഞ്ഞാറങ്ങാടിയിൽ സമാപിച്ചു. സമാപന സമ്മേളനം പടിഞ്ഞാറങ്ങാടിയിൽ സിനിമാതാരം വി.കെ. ശ്രീരാമൻ നിർവഹിച്ചു. കപ്പൂർ ഗ്രാമപഞ്ചായത്ത് പ്രസിഡന്‍റ് ഷറഫുദീൻ കളത്തിൽ അധ്യക്ഷനായി. മന്ത്രി എം.ബി. രാജേഷ് മുഖ്യപ്രഭാഷണം നടത്തി. നാടക പ്രവർത്തകൻ ഹേമന്ത് കുമാർ മുഖ്യാതിഥിയായി. കൃഷി അസി. ഡയറക്ടർ മാരിയത്ത് കിബിത്തിയ, നവകേരളം ജില്ലാ കോ-ഓർഡിനേറ്റർ പി. സെയ്തലവി, ജനപ്രതിനിധികൾ, ഉദ്യോഗസ്ഥർ തുടങ്ങിയവർ പങ്കെടുത്തു. ഇന്നുമുതൽ മൂന്നുവരെ പടിഞ്ഞാറങ്ങാടിയിലാണ് ജനകീയ കാർഷികോത്സവം സംഘടിപ്പിക്കുന്നത്. പ്രദർശന വിപണനമേള,കാർഷിക പ്രദർശനം,കാർഷിക സംരംഭകരുടെയും പ്രഫഷണലുകളുടെയും സംഗമം,കാർഷിക സാഹിത്യോത്സവം, പുസ്തകോത്സവം,കാർഷിക സെമിനാറുകൾ -സംവാദങ്ങൾ,പ്രാദേശിക കാർഷിക തനത് സാംസ്കാരിക പരിപാടികൾ എന്നിവയുമുണ്ടായിരിക്കും. കാർഷിക കാർണിവലി ഭാഗമായി ജില്ലാതല കർഷക ചന്തയുടെ ഉദ്ഘാടനവും സാംസ്കാരിക പരിപാടികളുടെ ഉദ്ഘാടനവും ഇന്നു വൈകുന്നേരം നാലിന് മന്ത്രി എം.ബി. രാജേഷ് നിർവ്വഹിക്കും. തൃത്താല ബ്ലോക്ക് പഞ്ചായത്ത് പ്രസിഡന്‍റ് അഡ്വ.വി.പി. റജീന അധ്യക്ഷയാകും. ജില്ലാ കളക്ടർ എം എസ് മാധവിക്കുട്ടി മുഖ്യ പ്രഭാഷണം നടത്തും. ചലച്ചിത്ര സംവിധായകൻ ലാൽ ജോസ് മുഖ്യാഥിതിയാകും. സംസ്ഥാന ചലച്ചിത്ര അവാർഡ് ജേതാവ് ബീന ആർ. ചന്ദ്രൻ അവതരിപ്പിക്കുന്ന ഏകാങ്ക നാടകവുമുണ്ടായിരിക്കും.

വർണോത്സവമായി യുബിഎസ് ഗാർഡനിലെ ചെണ്ടുമല്ലി കൃഷിയുടെ വിളവെടുപ്പ്

വടക്കഞ്ചേരി: തേനിടുക്കിലുള്ള യുബിഎസ് ഗാർഡനിൽ യുവസംരംഭകർ കൃഷിയിറക്കിയ അഞ്ചക്കറിലെ ചെണ്ടുമല്ലി പൂക്കളുടെ വിളവെടുപ്പ് വർണോത്സവമായി മാറി. സമൂഹത്തിലെ വിവിധ രംഗത്ത് പ്രവർത്തിക്കുന്ന വലിയ ജനാവലിയുടെ സാന്നിധ്യത്തിലായിരുന്നു വിളവെടുപ്പ്. തരിശായി കിടന്നിരുന്ന ഭൂപ്രദേശം ഇപ്പോൾ പൂക്കാടായി. മുൻ മന്ത്രി കെ.ഇ. ഇസ്മയിലും സിനിമാരംഗത്തുള്ള പാർവതി ഫ്ളവേഴ്സ് ഉടമ വാസു പാർവതിയും ചേർന്ന് വിളവെടുപ്പ് ഉദ്ഘാടനം ചെയ്തു. ഹൈബ്രീഡ് ഇനം 45,000 ചെണ്ടുമല്ലി ചെടികളിലാണ് പൂക്കൾ നിറഞ്ഞത്. മഞ്ഞയും ചുവപ്പും കളറിൽ തിങ്ങി നിറഞ്ഞ് ഇതളുകളുള്ള നല്ല വലുപ്പമുള്ള പൂക്കൾ. മറ്റു വിളകളെല്ലാം നാട്ടിൽ പരീക്ഷണ വിധേയമായിട്ടുണ്ടെങ്കിലും വടക്കഞ്ചേരി മേഖലയിൽ ഏക്കർ കണക്കിന് സ്ഥലത്ത് വ്യാപാരാടിസ്ഥാനത്തിൽ ഇത്തരത്തിൽ ചെണ്ടുമല്ലി കൃഷി നടത്തുന്നതും ഇതാദ്യമാണ്. കാർഷിക മേഖലയിലേക്ക് പുതിയ സംരംഭങ്ങളുമായി കടന്നുവരണമെന്ന ചിന്തയിലാണ് കുറഞ്ഞ കാലയളവിനുള്ളിൽ ആദായം കിട്ടുന്ന പൂ കൃഷിയിലേക്ക് തിരിഞ്ഞതെന്ന് പൂ കൃഷിക്ക് നേതൃത്വം നൽകിയ യുബിഎസ് ബിനേഷ് പറഞ്ഞു. വടക്കഞ്ചേരി പഞ്ചായത്ത് പ്രസിഡന്‍റ് ലിസി സുരേഷും കൃഷി ഓഫീസർ ജ്യോതിയും സർവ പിന്തുണയും പ്രോത്സാഹനവും പ്രഖ്യാപിച്ചതോടെ ഓണം കളറാക്കാൻ ഇറങ്ങുകയായിരുന്നു യുവ സംഘം. ജൈവ രീതിയിലാണ് കൃഷി. തുടർച്ചയായ മഴ ആശങ്ക ഉണ്ടാക്കിയെങ്കിലും പൂക്കൾക്ക് വലിയ പ്രശ്നമുണ്ടാക്കിയിട്ടില്ല. കുന്നക്കാട് സജിൽ ഉണ്ണികൃഷ്ണനായിരുന്നു പൂകൃഷിയുടെ പൂർണ സമയ പരിചരണ ചുമതല. യുബിഎസ് ഗാർഡനിലെ ഓണാഘോഷങ്ങളുടെ ഭാഗമായി വയോജനങ്ങൾ, അംഗ പരിമിതർ തുടങ്ങിയവർക്ക് ഓണപ്പുടവകളും വിതരണം ചെയ്തു. പഞ്ചായത്ത് പ്രസിഡന്‍റ് ലിസി സുരേഷ്, മുൻ മന്ത്രി കെ.ഇ. ഇസ്മയിൽ, കേര കേസരി സി.ആർ. ഭവദാസ്, കേരള വ്യാപാരി വ്യവസായി എകോപന സമിതി പ്രസിഡന്‍റ് കെ.എം. ജലീൽ, വ്യാപാരി സംരക്ഷണ സമിതി ചെയർമാൻ ബോബൻ ജോർജ്, സുരേഷ് വേലായുധൻ, മോഹനൻ പള്ളിക്കാട്, പഞ്ചായത്ത് അംഗങ്ങളായ എ.ടി. വർഗീസ് കുട്ടി, രശ്മി ഷാജി, കെ. മോഹൻദാസ്, ദേവദാസ്, സി. മുത്തു, അൻവർ, സതീഷ് കുമാർ, ഉഷാകുമാരി പഞ്ചായത്ത് മുൻ പ്രസിഡന്‍റ് പി. ഗംഗാധരൻ, ജനാർദനൻ പുതുശേരി, റെജി കെ. മാത്യു, എം.കെ. ശശി, എം. ബിനേഷ്, അനിത ബിനേഷ്, എ.സി. ഉണ്ണികൃഷ്ണൻ പ്രസംഗിച്ചു. വിവിധ കലാപരിപാടികളും ഓണസദ്യയും ഒരുക്കിയിരുന്നു.

ജലജന്യ രോഗങ്ങള്‍ക്കെതിരേ ജാഗ്രത പുലര്‍ത്തണം: മന്ത്രി എം.ബി. രാജേഷ്

പട്ടാന്പി: ജലജന്യ രോഗങ്ങള്‍ക്കെതിരെ സമൂഹം ജാഗ്രത പുലര്‍ത്തണമെന്ന് മന്ത്രി എം.ബി. രാജേഷ്. അമീബിക് മസ്തിഷ്‌ക ജ്വര പ്രതിരോധ പ്രവര്‍ത്തനങ്ങളുടെ ഭാഗമായി സര്‍ക്കാര്‍ നടപ്പാക്കുന്ന ജലമാണ് ജീവന്‍ പദ്ധതിയുടെ ക്ലോറിനേഷന്‍ ആറങ്ങോട്ടുകരയില്‍ ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. തിരുമറ്റക്കോട് പഞ്ചായത്തിലെ ആറങ്ങോട്ടുകരയില്‍ സംഘടിപ്പിച്ച ക്ലോറിനേഷന്‍ പരിപാടിയില്‍ പഞ്ചായത്ത് പ്രസിഡന്‍റ് ടി. സുഹറ അധ്യക്ഷയായി. ഹരിത കേരള മിഷന്‍ ജില്ലാ കോ- ഓർഡിനേറ്റര്‍ പി സൈതലവി, ജനപ്രതിനിധികള്‍, ആരോഗ്യ വകുപ്പ് ഉദ്യോഗസ്ഥര്‍, പഞ്ചായത്ത് തല ഉദ്യോഗസ്ഥര്‍ എന്നിവര്‍ പങ്കെടുത്തു.

കടപ്പാറ സ്കൂളിലെ കുട്ടികൾക്ക് ഇനി സർക്കാർ മെനു പ്രകാരം ഉച്ചഭക്ഷണം

മംഗലംഡാം: ആദിവാസി മേഖലയിലെ കുട്ടികൾക്കായുള്ള കടപ്പാറ ഗവൺമെന്‍റ് എൽപി സ്കൂളിലെ കുട്ടികൾക്കിനി ഉച്ചഭക്ഷണം സർക്കാർ മെനു പ്രകാരം കഴിക്കാം. സർക്കാർ മെനു പ്രകാരം ഉച്ചഭക്ഷണം കൊടുക്കാൻ പ്രതിസന്ധി നേരിട്ട ഘട്ടത്തിലാണ് നെന്മാറ ആസ്ഥാനമായി പ്രവർത്തിക്കുന്ന ഒരു എൻജിഒ സ്ഥാപനമായ സെന്‍റർ ഫോർ ലൈഫ് സ്കിൽസ് ലേണിംഗ് എന്ന സംഘടനയാണ് ആശ്വാസമായി എത്തിയത്.സ്കൂളിൽ നടന്ന ഓണാഘോഷത്തോടനുബന്ധിച്ചുള്ള പരിപാടിയിൽ സംഘടനയുടെ എക്സിക്യുട്ടീവ് അംഗമായ ചിജീഷ് ഒരു മാസത്തേക്കുള്ള പലവ്യഞ്ജന സാധനങ്ങൾ ഹെഡ്മിസ്ട്രസ് എം. സബിത ടീച്ചർക്ക് കൈമാറി. എല്ലാ മാസവും ഗ്രോസറി ഇനങ്ങൾ വിദ്യാലയത്തിൽ എത്തിച്ചു നൽകാമെന്ന വാഗ്ദാനവും സംഘടന നൽകിയിട്ടുണ്ട്. ഓണാഘോഷ പരിപാടികളുടെ ഉദ്ഘാടനം മംഗലംഡാം സിഐ ബിപിൻ പി. മാത്യു നിർവഹിച്ചു. വാർഡ് മെംബർ ബീന ഷാജി അധ്യക്ഷത വഹിച്ചു. പോലീസിനു പുറമെ എക്സൈസ്, ബിആർസി പ്രതിനിധികൾ, സ്പോൺസർമാർ, നാട്ടുകാർ, പൂർവ വിദ്യാർഥികൾ എന്നിവർ പങ്കെടുത്തു. ഓണാഘോഷത്തോടനുബന്ധിച്ചു നടന്ന വിവിധ മത്സര വിജയികളായ കുട്ടികൾക്കും രക്ഷിതാക്കൾക്കുമുള്ള സമ്മാന വിതരണവും നടന്നു. അധ്യാപകരായ എ. ജാസ്മിൻ, കെ.യു. അൻസിയ , വാസു, രതീഷ് , മേരി, ജെസി എന്നിവർ പ്രവർത്തനങ്ങൾക്ക് നേതൃത്വം നല്കി.

കുലുക്കല്ലൂർ പാടശേഖരത്തിൽ ഒന്നാംവിള വിളവെടുപ്പ്

ഷൊർണൂർ: ഒന്നരപ്പതിറ്റാണ്ടിനുശേഷം കുലുക്കല്ലൂർ പാടശേഖരത്തിൽ ഒന്നാംവിള നെൽക്കൃഷി വിളവെടുപ്പ്. നാലുപാടശേഖരങ്ങളിലാണ് ഇത്തവണ ഒന്നാംവിള നെൽക്കൃഷി നടപ്പാക്കിയത്. 40 ഏക്കേറാളംവരുന്ന സ്ഥലത്ത് കർഷക കൂട്ടായ്മയിലായിരുന്നു കൃഷിപ്രവർത്തനം. വിവിധ പാടശേഖരസമിതികളുടെയും പഞ്ചായത്തിന്‍റെയും സഹകരണത്തോടെയാണ് പഞ്ചായത്തിൽ വ്യാപകമായി ഒന്നാംവിള നെൽക്കൃഷിയിറക്കിയത്. മുൻപ് ചിലയിടങ്ങളിൽ ഒന്നാംവിള ഇറക്കിയിരുന്നെങ്കിലും ഇത്രയുംകൂടൂതൽ സ്ഥലത്ത് കൃഷിയിറക്കുന്നത് 15 വർഷങ്ങൾക്കുശേഷമാണ്. കുലുക്കല്ലൂർ, പുറമത്ര, മപ്പാട്ടുകര, മുളയൻകാവ്, വണ്ടുംതറ പാടശേഖരങ്ങളിലാണ് പ്രധാനമായും ഒന്നാംവിള കൃഷി നടപ്പാക്കിയത്. കർഷകർക്ക് ഉഴവുകൂലിയും വിത്തുമെല്ലാം പഞ്ചായത്ത് സൗജന്യമായി നൽകിയിരുന്നു. ജ്യോതി വിത്തുപയോഗിച്ചാണ് കൃഷി നടപ്പാക്കിയത്. പല കാരണങ്ങളാലും ഒന്നാംവിള നെൽക്കൃഷിയിൽനിന്നും കർഷകർ പിൻതിരിയുന്ന സാഹചര്യമാണുണ്ടായിരുന്നത്. ഇതിനൊരു മാറ്റം ലക്ഷ്യമിട്ടാണ് ഇത്തവണ അഞ്ച് പാടശേഖരങ്ങളിൽ ഒന്നാംവിള കൃഷിയിറക്കിയത്. 50 ഏക്കറിൽ കൃഷിചെയ്യാനാണ് ലക്ഷ്യമിട്ടിരുന്നതെങ്കിലും ചിലയിടങ്ങളിൽ കൃഷി നടപ്പാക്കാനായില്ല. കുലുക്കല്ലൂർ പാടശേഖരത്തു നടന്ന ചടങ്ങിൽ പഞ്ചായത്ത് പ്രസിഡന്‍റ് വി. രമണി കൊയ്ത്തുത്സവം ഉദ്ഘാടനംചെയ്തു.

അയിലൂരിൽ കുടിവെള്ളടാങ്ക് വിതരണം

അയിലൂർ: ഗ്രാമപഞ്ചായത്ത് ജനകീയാസൂത്രണ പദ്ധതി 2025-26 ജനക്ഷേമ പ്രവർത്തനത്തിന്റെ ഭാഗമായി പട്ടികജാതി വിഭാഗത്തിൽപ്പെട്ട 150കുടുംബങ്ങൾക്ക് കുടിവെള്ള ടാങ്ക് വിതരണം നടത്തി. പഞ്ചായത്ത് പ്രസിഡന്‍റ് എസ്. വിഘ്നേഷ് ഉദ്ഘാടനം നിർവ്വഹിച്ചു. വൈസ് പ്രസിഡന്‍റ് റെജീന ചാന്ത് മുഹമ്മദ് അധ്യക്ഷയായ പരിപാടിയിൽ വികസനകാര്യ സ്റ്റാൻഡിംഗ് കമ്മിറ്റി ചെയർമാൻ കെ. കണ്ണനുണ്ണി സ്വാഗതം പറഞ്ഞു. ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ മവിത വിശ്വനാഥൻ, വാർഡ് മെംബർമാരായ പുഷ്പാകരൻ, ഉമാ സതീശൻ, വത്സല ശിവദാസൻ, ദേവദാസ്, സുമ പരമേശ്വരൻ, ജിജാ റോയ്, തുടങ്ങിയവർ പങ്കെടുത്ത പരിപാടിയിൽ പഞ്ചായത്ത് അസിസ്റ്റന്‍റ് സെക്രട്ടറി മേരി സിൽവസ്റ്റർ നന്ദി രേഖപ്പെടുത്തി.

വചനഗിരി പള്ളിയിൽ എട്ടുനോമ്പാചരണവും തിരുനാളാഘോഷവും കൊടിയേറി

വടക്കഞ്ചേരി: കണച്ചിപരുത വചനഗിരി സെന്‍റ് ജോർജ് പള്ളിയിൽ പരിശുദ്ധ ദൈവമാതാവിന്‍റെ ജനന തിരുനാളിനും എട്ടുനോമ്പാചരണത്തിനും കൊടിയേറി. പാലക്കുഴി പുഷ്പഗിരി ആശ്രമം സുപ്പീരിയർ ഫാ. പ്രസാദ് കുരിശിങ്കൽ സിഎസ്ടി കൊടിയേറ്റി ദിവ്യബലിക്ക് കാർമികത്വം വഹിച്ചു. വരുംദിവസങ്ങളിൽ ഫാ. സണ്ണി വാഴേപ്പറമ്പിൽ, ഫാ. നിതിൻ മണിയങ്കേരിക്കളം, ഫാ. ആനന്ദ് അമ്പൂക്കൻ, ഫാ. ആൽബിൻ വടക്കേ പീടിക സിഎസ്എസ്ആർ, ഫാ. മാത്യു മുളങ്ങാശേരിൽ എംഎസ്ടി, ഫാ. ടോണി ചേക്കയിൽ, ഫാ. റോബി കൂന്താണിയിൽ എന്നിവർ തിരുകർമങ്ങൾക്ക് കാർമികത്വം വഹിക്കും. ഏഴിനു വൈകുന്നേരം കുർബാനയ്ക്കുശേഷം ജപമാല പ്രദക്ഷിണവും നടക്കും. എട്ടിന് ജനനത്തിരുനാൾ ദിനത്തിലെ വിശുദ്ധ കുർബാനയോടെ തിരുനാൾ സമാപിക്കും. തിരുനാൾ ദിനങ്ങളിൽ വൈകുന്നേരം നാലരക്ക് ജപമാല, വിശുദ്ധ കുർബാന, സന്ദേശം ലദീഞ്ഞ്, നേർച്ച എന്നിവയുണ്ടാകും. തിരുനാൾ പരിപാടികൾക്ക് വികാരി ഫാ. ഹെൽബിൻ മീമ്പള്ളിൽ കൈക്കാരന്മാരായ ബെന്നി കളമ്പുകാട്ട് ബോബി മുണ്ടക്കൽ എന്നിവർ നേതൃത്വം നൽകും.

വികസന പദ്ധതികൾ സമയബന്ധിതമായി പൂർത്തിയാക്കണം: ജില്ലാ വികസന സമിതി

പാലക്കാട്: ജില്ലയിൽ നടന്നുകൊണ്ടിരിക്കുന്ന വിവിധ വികസനപ്രവർത്തനങ്ങളും പദ്ധതികളും സമയബന്ധിതമായി പൂർത്തീകരിക്കണമെന്നു കഴിഞ്ഞദിവസം ചേർന്ന ജില്ലാ വികസനസമിതി യോഗം ആവശ്യപ്പെട്ടു. പദ്ധതി വിഹിതം ചെലവഴിക്കുന്നതിൽ വകുപ്പുകൾ കൂടുതൽ ശ്രദ്ധ ചെലുത്തണമെന്നും യോഗം ആവശ്യപ്പെട്ടു. കളക്ടറേറ്റ് കോണ്‍ഫ്രൻസ് ഹാളിൽ ചേർന്ന യോഗത്തിൽ ജില്ലാ കളക്ടർ എം.എസ് മാധവിക്കുട്ടി അധ്യക്ഷത വഹിച്ചു. നെന്മാറ വിത്തനശ്ശേരി ചാണ്ടിച്ചാല ലക്ഷം വീട് ഉന്നതിയിലെ ജീർണാവസ്ഥയിലായ വീടുകൾ നവീകരിക്കുന്നതിനും ലൈഫ് പദ്ധതിയിൽ ഉൾപ്പെടുത്തി ഒറ്റവീടാക്കി മാറ്റുന്നതിനുമായി പ്രത്യേക പാക്കേജ് തയ്യാറാക്കി സർക്കാരിലേക്ക് സമർപ്പിക്കാൻ തദ്ദേശ വകുപ്പ് ജോയിന്‍റ് ഡയറക്ടർക്ക് ജില്ലാ കളക്ടർ നിർദേശം നൽകി. മുതലമട, അട്ടപ്പാടി, കൊല്ലങ്കോട് പിഎച്ച്സികളിൽ നിലനിൽക്കുന്ന ഒഴിവുകൾ ഉടൻ നികത്തുമെന്ന് ജില്ലാ മെഡിക്കൽ ഓഫീസർ അറിയിച്ചു. മുണ്ടൂർ- തൂത റോഡ് പ്രവൃത്തി കഴിഞ്ഞപ്പോൾ സമീപവാസികളുടെ വീടുകൾ റോഡ് നിരപ്പിന് താഴെയായ വിഷയം പരിഹരിച്ചു വരുന്നതായും ശേഷിക്കുന്നവ പരിഹരിക്കുന്നതിനായി സംയുക്ത പരിശോധന നടത്തുമെന്നും പി. മമ്മിക്കുട്ടി എം.എൽ.എയുടെ ചോദ്യത്തിനുത്തരമായി കെ.എസ്.ടി.പി അധികൃതർ അറിയിച്ചു. മുഖ്യമന്ത്രിയുടെ തദ്ദേശ റോഡ് പുനരുദ്ധാരണ പദ്ധതിയിൽ ഉൾപ്പെടുത്തി നവീകരിക്കാനായി ജില്ലയിൽ നിന്നും തിരഞ്ഞെടുത്ത എല്ലാ റോഡുകളുടെയും ടെൻഡർ പൂർത്തിയായതായും 84 റോ!ഡുകളുടെ പ്രവൃത്തി പുരോഗമിക്കുന്നതായും എ. പ്രഭാകരൻ എംഎൽഎയുടെ ചോദ്യത്തിനുത്തരമായി ജില്ലാ കളക്ടർ അറിയിച്ചു. ഒറ്റപ്പാലം താലൂക്ക് ആശുപത്രിയിൽ ബ്ലഡ് ബാങ്കിന്‍റെ പ്രവർത്തനം സെപ്റ്റംബർ പത്തോകൂടി ആരംഭിക്കാൻ സാധിക്കുന്ന വിധത്തിൽ ഡോക്ടറെ നിയമിക്കണമെന്ന് കെ. പ്രേകുമാർ എംഎൽഎ യോഗത്തിൽ ആവശ്യപ്പെട്ടു. മീനാക്ഷിപുരം ബസ് സ്റ്റാന്‍റ് അറ്റകുറ്റപ്പണി നടത്തി നവീകരിക്കണമെന്ന് വൈദ്യുതി വകുപ്പ് മന്ത്രിയുടെ പ്രതിനിധി ആവശ്യപ്പെട്ടു. വടക്കഞ്ചേരി ടൗണിലെ അനധികൃത പാർക്കിങ് ഒഴിവാക്കുന്നതിനുള്ള നടപടികൾ സ്വീകരിക്കാൻ ആർടിഒക്കും അനധികൃത വഴിയോര കച്ചവടങ്ങൾ നീക്കം ചെയ്യാൻ തദ്ദേശ വകുപ്പ് ജോയിന്‍റ് ഡയറക്ടർക്കും ജില്ലാ കളക്ടർ നിർദേശം നൽകി. യോഗത്തിൽ എംഎൽഎമാരായ പി. മമ്മിക്കുട്ടി, കെ. പ്രേംകുമാർ, എ. പ്രഭാകരൻ, കെ. ബാബു, കെ.ഡി. പ്രസേനൻ, ഒറ്റപ്പാലം സബ്കളക്ടർ അഞ്ജീത് സിംഗ്, എഡിഎം കെ. സുനിൽകുമാർ, ജില്ലാ പ്ലാനിംഗ് ഓഫീസർ ഏലിയാമ്മ നൈനാൻ, മന്ത്രി കെ. കൃഷ്ണൻകുട്ടിയുടെ പ്രതിനിധി എസ്. വിനോദ് ബാബു, വിവിധ വകുപ്പ് ജില്ലാതല ഉദ്യോഗസ്ഥർ തുടങ്ങിയവർ സംബന്ധിച്ചു.

വടക്കഞ്ചേരിയിൽ കോൺഗ്രസ് ഭവൻ ഉദ്ഘാടനം

വടക്കഞ്ചേരി: ടൗണിൽ ഷാ ടവറിൽ പുതുതായി നിർമിച്ച കോൺഗ്രസ് ഭവൻ ഡിസിസി പ്രസിഡന്‍റ് എ. തങ്കപ്പൻ ഉദ്ഘാടനം ചെയ്തു. മണ്ഡലം പ്രസിഡന്‍റ് ഇല്യാസ് പടിഞ്ഞാറെകളം അധ്യക്ഷത വഹിച്ചു. കെപിസിസി ജനറൽ സെക്രട്ടറി സി. ചന്ദ്രൻ മുഖ്യപ്രഭാഷണം നടത്തി. അഡ്വ. തോലന്നൂർ ശശിധരൻ, വി. സുദർശനൻ, അഡ്വ.എം. ദിലീപ് , റെജി കെ.മാത്യു , യൂത്ത് കോൺഗ്രസ് ജില്ലാ പ്രസിഡന്‍റ് കെ.എസ്. ജയഘോഷ്, കെഎസ്‌യു ജില്ല പ്രസിഡന്‍റ് നിഖിൽ കണ്ണാടി, യൂത്ത് കോൺസ് സംസ്ഥാന സെക്രട്ടറി പ്രതീഷ് മാധവൻ,ഗ്രാമ പഞ്ചായത്ത് അംഗങ്ങളായ കെ. മോഹൻദാസ് , സി. മുത്തു, സി.കെ. ദേവദാസ് , ജി.സതീഷ് കുമാർ, ശ്രീനാഥ് വെട്ടത്ത്, യൂത്ത്കോൺഗ്രസ് മണ്ഡലം പ്രസിഡന്‍റ് സുനിൽ ചുവട്ടുപാടം, ജോണി ഡയൻ, പി.എസ്. മുജീബ്, സുഗുണൻ എസ്. നായർ, എം.പി. ശശികല, പ്രിയ സുരേഷ്, വി.എൻ. ചെല്ലമ്മ എന്നിവർ പ്രസംഗിച്ചു.

കേരള കോൺഗ്രസ്- ജോസഫ് ഏകദിന ഉപവാസം

കല്ലടിക്കോട്‌: കോങ്ങാട് മണ്ഡലത്തിലെ നിരവധി ജനകീയ പ്രശ്നങ്ങളിൽ ശാശ്വത പരിഹാരം ആവശ്യപ്പെട്ട് കേരള കോൺഗ്രസ് -ജോസഫ്‌ പ്രവർത്തകർ തച്ചമ്പാറ ടൗണിൽ നടത്തിയ ഏകദിന ഉപവാസം കേരള കോൺഗ്രസ് സംസ്ഥാന കോ-ഓർഡിനേറ്റർ അപു ജോൺ ജോസഫ് ഉദ്ഘാടനം ചെയ്തു. നിയോജകമണ്ഡലം പ്രസിഡന്‍റ് ബിജു ജോസഫ് അധ്യക്ഷനായി. 1963ൽ ആരംഭിച്ച കാഞ്ഞിരപ്പുഴ ഡാം കമ്മീഷൻ ചെയ്യുക, കേന്ദ്ര- സംസ്ഥാന സർക്കാരുകൾ അടിയന്തിരസഭ വിളിച്ചു ചേർത്തുകൊണ്ട് നിയമനിർമ്മാണം നടത്തി ഉപദ്രവകാരികളായ തെരുവുനായ്ക്കളെ ഉന്മൂലനം ചെയ്യാൻ പഞ്ചായത്തുകളുടെ അധികാരം പുനസ്ഥാപിക്കുക., പാലക്കയത്തുള്ള തച്ചമ്പാറ കുടുംബാരോഗ്യകേന്ദ്രം കമ്മ്യൂണിറ്റി ഹെൽത്ത് സെന്‍ററായി ഉയർത്തുക, ബജറ്റിൽ ഉൾപ്പെടുത്തിയ തച്ചമ്പാറ കണ്ണോട്-പള്ളിക്കുറിപ്പ് പാലം ഉടൻ യാഥാർത്ഥ്യമാക്കുക, തൊഴിലുറപ്പ് മേഖലയിലെ അനാസ്ഥ അവസാനിപ്പിക്കുക തുടങ്ങിയ ആവശ്യങ്ങൾ ഉന്നയിച്ചായിരുന്നു ഉപവാസം. കേരള കോൺഗ്രസ് ജില്ലാ കമ്മിറ്റി അംഗം ജോർജ് തച്ചമ്പാറ, മണ്ഡലം പ്രസിഡന്‍റ് കുര്യാക്കോസ് തുടങ്ങിയവർ പ്രസംഗിച്ചു.

ഗ്രാമീണ ഭവന കുടിവെള്ള പദ്ധതി പ്രവര്‍ത്തന ഉദ്ഘാടനം ഇന്ന്

പാലക്കാട്: ജല്‍ ജീവന്‍ മിഷന്‍ പദ്ധതിയില്‍ ഉള്‍പ്പെടുത്തി തരൂര്‍ നിയോജക മണ്ഡലത്തിലെ കോട്ടായി ഗ്രാമപഞ്ചായത്തില്‍ പൂർത്തീകരിച്ച കുടിവെള്ള പദ്ധതിയുടെ ഉദ്ഘാടനം ഇന്ന് ഉച്ചക്ക് 12 ന് ജലവിഭവ മന്ത്രി റോഷി അഗസ്റ്റിന്‍ നിര്‍വഹിക്കും. കോട്ടായി ഗ്രാമപഞ്ചായത്തില്‍ മുട്ടിക്കടവ് പ്രദേശത്ത് കിണറും പമ്പ് ഹൗസും, അഞ്ച് ദശലക്ഷം ലിറ്റർ കപ്പാസിറ്റിയുള്ള ജലശുദ്ധീകരണ ശാല, ഓടന്നൂര്‍, കോട്ടായി സോണുകളിലേക്കായി രണ്ട് ഉന്നതതല ജലസംഭരണികള്‍, മോട്ടോര്‍ പമ്പ് സെറ്റുകള്‍, ട്രാന്‍സ്‌ഫോമറുകള്‍, കണക്ഷനുകള്‍ നല്‍കുന്ന പ്രവൃത്തി, പമ്പിങ് മെയിന്‍, വിതരണ ശൃംഖല സ്ഥാപിക്കല്‍ എന്നീ പ്രവൃത്തികളാണ് ഈ പദ്ധതിയില്‍ ഉള്‍പ്പെടുത്തി പൂര്‍ത്തികരിച്ചിട്ടുളളത്. കോട്ടായി ജലശുദ്ധീകരണശാലയ്ക്ക് സമീപം നടക്കുന്ന പരിപാടിയില്‍ പി.പി. സുമോദ് എംഎല്‍എ അധ്യക്ഷനാകും. കെ. രാധാകൃഷ്ണന്‍ എംപി മുഖ്യാതിഥിയാകും. ജില്ലാ പഞ്ചായത്ത് പ്രസിഡന്‍റ് കെ. ബിനുമോള്‍, ജില്ലാ കളക്ടര്‍ എം.എസ്. മാധവിക്കുട്ടി എന്നിവര്‍ പങ്കെടുക്കും.

പുതുനഗരം മേൽപ്പാലത്തിനരികിലെ വെള്ളക്കെട്ടിനു പരിഹാരമില്ല

പുതുനഗരം: റെയിൽവേ ഓർബ്രിഡ്ജിനു സമീപം പുതുനഗരം പ്രധാനപാതയിൽ വെള്ളക്കെട്ടിനു പരിഹാരമായില്ല. റോഡിലെ വീതിക്കുറവും വെള്ളക്കെട്ടും വാഹനയാത്രികർക്കു ഒരുപോലെ പ്രശ്നമുണ്ടാക്കുന്നു. വീതികുറഞ്ഞ റോഡിലെ വെള്ളക്കെട്ടിനിരുവശത്തും വ്യാപാരസ്ഥാപനങ്ങളുണ്ട്. വെള്ളക്കെട്ടിൽ വാഹനമിറങ്ങിയാൽ മഴവെള്ളം വ്യാപാരസ്ഥാപനങ്ങളിലേക്കും കാൽനട യാത്രക്കാരുടേയും ദേഹത്തേക്കു തെറിക്കും. ഇതിനെചൊല്ലി കാൽനടയാത്രക്കാരും വാഹനമോടിക്കുന്നവരും തമ്മിലുള്ള വഴക്കും പതിവായിട്ടുണ്ട്. മഴ ശമിക്കുന്നതുവരെയും ഈ വെള്ളക്കെട്ടുണ്ടാകും. വ്യാപാരികളും നാട്ടുകാരും പല തവണ പൊതുമരാമത്ത് അധികൃതർക്കു പരാതി സമർപ്പിച്ചിട്ടും നാളിതുവരെ നടപടിയൊന്നുമില്ല.

വിട്ടുമാറാത്ത മഴ ഓണവിപണിയെ തളർത്തി; വ്യാപാരികൾ അങ്കലാപ്പിൽ

വടക്കഞ്ചേരി: ഓണവിപണി ലക്ഷ്യംവച്ച് വലിയ സ്റ്റോക്ക് ഉൾപ്പെടെ ഒരുക്കിയ വ്യാപാരികൾ വലിയ അങ്കലാപ്പിലാണ്.മഴയാണ് പ്രധാന വില്ലനാകുന്നത്. പുറത്തിറങ്ങാനാകാത്ത വിധമാണ് ഇടക്ക് തോരാമഴ ചൊരിയുന്നത്. പത്തോളം പഞ്ചായത്തുകളുടെ സിരാകേന്ദ്രമായ വടക്കഞ്ചേരി ടൗണിലേക്കുള്ള റോഡുകളെല്ലാം തകർന്നുകിടക്കുന്നതും കൂനിമേൽ കുരു എന്നമട്ടിൽ വിപണിക്ക് വിനയായി. പ്രാദേശികമായി സാധനങ്ങൾ വാങ്ങി ആളുകൾ പുറത്തിറങ്ങുന്നില്ല. പച്ചക്കറി ഉൾപ്പെടെയുള്ളവയുടെ വിലക്കയറ്റം ജനങ്ങൾക്കും ബുദ്ധിമുട്ടുണ്ടാകുന്നുണ്ട്. കാട്ടുമൃഗങ്ങളുടെ ആക്രമണംമൂലം കാർഷികവിളകൾ ഇല്ലാതായത് ഓണവിപണിക്കും വലിയ പ്രഹരമാണ്. മലയോര പ്രദേശങ്ങളിൽ വാഴകൃഷി അപൂർവമായി. ഇതിനാൽ നാടൻ നേന്ത്രക്കായയുടെലഭ്യത കുറഞ്ഞു. പഴത്തിനും കായഉപ്പേരികൾക്കും വില കൂടി. രണ്ട് ദിവസം മഴ മാറി നിന്നാൽ ആശ്വാസമാകുമെന്ന് വ്യാപാരികൾ പറയുന്നത്. വ്യാപാരി സംരക്ഷണ സമിതിയുടെ നേതൃത്വത്തിൽ നടന്ന ഓണാഘോഷപരിപാടികൾക്ക് ചെയർമാൻ ബോബൻ ജോർജ്, പ്രസിഡന്‍റ് സി.കെ. അച്യുതൻ, സെക്രട്ടറി സതീഷ് ചാക്കോ, ട്രഷറർ സഫർ ഇമ്മേരിയാസ്, അബ്ദുൾ കലാം, ഗോപിനാഥൻ, ഷാജി, അബ്ദുൾ റഹിമാൻ, വൈശാഖ്, വനിതാവിംഗ് അംഗങ്ങളായ ഏവൂർ പ്രീതാവാര്യർ, അസീന, ജെസി, ബിന്ദു നേതൃത്വം നൽകി.

മഴ വില്ലനായി; പപ്പടം ഉണക്കൽ ഡ്രയറുകളിൽ

വടക്കഞ്ചേരി: ഓണദിവസങ്ങളിലെ തോരാമഴയിൽ വലിയ ധർമസങ്കടത്തിലാണ് പപ്പട നിർമാതാക്കൾ. ഉണ്ടാക്കുന്ന പപ്പടം വെയിലിൽ ഉണക്കിയെടുക്കാൻ വഴിയില്ല. അത്തത്തിനു മുമ്പുവരെ നല്ല വെയിൽ ഉണ്ടായിരുന്നു. എന്നാൽ പിന്നീട് കാലാവസ്ഥ മാറി. പകൽ മുഴുവൻ മഴ പെയ്യുന്ന സ്ഥിതി. ഓണസദ്യയിലെ പ്രധാനിയാണ് പപ്പടം. ചെറിയ പപ്പടം മുതൽ വലിയ പപ്പടം വരെ സദ്യക്ക് നിർബന്ധമാണ്. കുലത്തൊഴിലായി പപ്പടം ഉണ്ടാക്കുന്ന കുടുംബങ്ങളുടെ വർഷത്തിലെ പ്രധാന വരുമാന സീസണാണ് ഓണം. ഇതിനാൽ വലിയ സാമ്പത്തിക ബാധ്യത സഹിച്ചും ചെറുകിട വ്യവസായ സംരംഭമായി ലക്ഷങ്ങൾ വിലവരുന്ന ഡ്രയറുകൾ വാങ്ങിയാണ് ഇപ്പോൾ പല പപ്പടനിർമാണ യൂണിറ്റുകളും പ്രവർത്തിക്കുന്നതെന്ന് മുടപ്പല്ലൂർ കൈക്കോളത്തറയിലെ ശ്രീകൃഷ്ണ പപ്പട നിർമാണ യൂണിറ്റ് നടത്തുന്ന കൃഷ്ണൻ പറഞ്ഞു. മണിക്കൂറിൽ 30 കിലോ വരെ പപ്പടം ഉണക്കാവുന്ന ഡ്രയറാണ് പല യൂണിറ്റുകളിലുമുള്ളത്. വൈദ്യുതിയിലാണ് ഇതിന്‍റെ പ്രവർത്തനം. മഴ തുടരുന്നതിനാൽ പപ്പടം ഉണക്കിയെടുക്കാൻ ഡ്രയർ തന്നെയാണ് ആശ്രയം. വൈദ്യുതി ചാർജ് കൂടും. ഇത് പപ്പട നിർമാണ ചെലവും കൂട്ടുന്നുണ്ടെന്ന് കൃഷ്ണൻ പറഞ്ഞു. കഴിഞ്ഞ വർഷത്തെ അപേക്ഷിച്ച് ഉഴുന്നിൻ പരിപ്പിന് മാത്രമാണ് വിലയിൽ വലിയ മാറ്റമില്ലാത്തത്. ഉപ്പ് മുതൽ പപ്പടക്കാരം വരെയുള്ള മറ്റ് എല്ലാ കൂട്ടുകൾക്കും വില കൂടി. ഒരു കിലോയുടെ 25 പാക്കറ്റുകളുള്ള ഒരു ചാക്ക് ഉപ്പിന് നൂറ് രൂപ കൂടിയിട്ടുണ്ടെന്ന് പപ്പട നിർമാതാക്കൾ പറയുന്നു. ഇക്കുറി ഓണ ദിവസങ്ങളിൽ മുഹൂർത്തദിവസങ്ങൾ അടുത്തടുത്ത് വരുന്നതിനാൽ എത്ര പപ്പടം ഉണ്ടാക്കിയാലും അത് അധികമാകില്ലെന്നാണ് നിർമാതാക്കളുടെ കണക്കുകൂട്ടൽ. നല്ല പപ്പടമാണെങ്കിൽ അതിന് ആവശ്യക്കാർ ഏത് കാലത്തുമുണ്ട്. നാല് ഇഞ്ച് മുതൽ ആറ് ഇഞ്ച് വരെയുള്ള പപ്പടമുണ്ട്. ഓണം സ്പെഷൽ വല്യപപ്പടവും വിപണിയിലെത്തും. കുറഞ്ഞ വിലക്ക് ഗുണമേന്മയില്ലാത്ത പപ്പട വിപണിയിലെത്തുന്നത് കുലതൊഴിലായിട്ടുള്ള പപ്പട നിർമാതാക്കൾക്ക് വലിയ തിരിച്ചടിയാകുന്നുണ്ട്. ഉയർന്ന വിലക്ക് ഉഴുന്നുമാവ് ഉൾപ്പെടെയുള്ള സാധനങ്ങൾ വാങ്ങി നല്ല പപ്പടം ഉണ്ടാക്കി കടയിലെത്തിച്ചാൽ മത്സരിക്കേണ്ടി വരുന്നത് ഗുണമേന്മയില്ലാത്ത പപ്പടവുമായാണെന്ന് പപ്പട നിർമാണം കുലത്തൊഴിലായി ചെയ്തുവരുന്ന മുടപ്പല്ലൂർ കൈക്കോളത്തറയിലെ പപ്പട നിർമാതാക്കൾ പറയുന്നു. കാഴ്ചയിൽ പപ്പടമെല്ലാം ഒരു പോലെയാണെങ്കിലും ഗുണത്തിൽ വലിയ അന്തരമുണ്ട്. കൃത്രിമ പപ്പടം രോഗങ്ങൾക്കും വഴിവക്കും. ഗുണമേന്മ പരിശോധിച്ച് മനുഷ്യന് ഹാനികരമാകുന്ന ഭക്ഷ്യസാധനങ്ങൾ കണ്ടെത്തി നിരോധിക്കാൻ സംവിധാനമില്ലാത്തതിനാൽ വ്യാജപപ്പടവുമായി മത്സരിക്കേണ്ടി വരുന്നെന്ന് വീരശൈവസഭ ഭാരവാഹികൾ പറയുന്നു. പപ്പടതറകളിൽ നിന്നും വിലകുറവിൽ പപ്പടം വാങ്ങി ഉയർന്ന വിലക്ക് വിറ്റ് ലാഭം കൊയ്യുന്നതിൽ കച്ചവടക്കാരും പുറകിലല്ല. കൈക്കോളതറക്കു പുറമെ കാവശേരി വേപ്പിലശേരി, ഒലവക്കോട് ആണ്ടിമഠം, കൊടുവായൂർ, കുനിശേരി, കഞ്ചിക്കോട് തുടങ്ങിയ സ്ഥലങ്ങളിലും കുലതൊഴിലായി പപ്പടം നിർമിക്കുന്ന കുടുംബങ്ങളുണ്ട്.

നാട്ടിലെവിടെയും ഓണാഘോഷങ്ങളുടെ ആർപ്പുവിളികൾ

വടക്കഞ്ചേരി: ഓണപരീക്ഷ കഴിഞ്ഞ് സ്കൂളുകൾ അടച്ചതോടെ നാട്ടിലെവിടെയും കളികളും ആഘോഷങ്ങളുടെ ആർപ്പുവിളികളുമായി നാടുണർന്നു. കിഴക്കഞ്ചേരി: വക്കാല ത്രിവേണി ഫാർമേഴ്സ് ക്ലബ്ബിന്‍റെ ആഭിമുഖ്യത്തിൽ ഇന്ന് രാവിലെ 10ന് വക്കാല ഈഴവ സമുദായ ഹാളിൽ നടക്കുന്ന ഓണാഘോഷ പരിപാടികൾ കെ.ഡി. പ്രസേനൻ എംഎൽഎ ഉദ്ഘാടനം ചെയ്യും. കണ്ണമ്പ്ര: കൊട്ടേക്കാട് വായനശാല, ബാലവേദി, വനിതാവേദി, യുവത എന്നിവയുടെ സംയുക്താഭിമുഖ്യത്തിലുള്ള ഓണാഘോഷ പരിപാടികൾ മൂന്ന്, നാല്, അഞ്ച്, ഏഴ് തീയതികളിലായി നടക്കും. കല്ലിങ്കൽപാടം: യുണൈറ്റഡ് ആർട്സ് ആൻഡ് സ്പോർട്സ് ക്ലബ്ബും വായനശാലയും സംഘടിപ്പിക്കുന്ന ഓണാഘോഷ പരിപാടികൾ ഇന്നുമുതൽ സെപ്റ്റംബർ അഞ്ച് വരെയുള്ള തീയതികളിൽ നടക്കും. ജില്ലാതലത്തിലുള്ള വോളി, ചെസ്റ്റ് ടൂർണമെന്റുകൾ ഉൾപ്പെടെ മത്സരങ്ങൾ ഉണ്ടാകും. വള്ളിയോട്: മിച്ചാരംകോട് സൗഹൃദ ജനകീയ കൂട്ടായ്മ, വായനശാല എന്നിവയുടെ ഓണാഘോഷ പരിപാടികൾ സെപ്റ്റംബർ ആറിന് നടക്കും. ഉച്ചകഴിഞ്ഞ് ഒന്നുമുതൽ സൗഹൃദ ഗ്രൗണ്ടിലാണ് പരിപാടികളുടെ അരങ്ങേറ്റം.

കത്തോലിക്ക കോൺഗ്രസ് കർഷക പ്രതിഷേധജ്വാല

വടക്കഞ്ചേരി: വന്യജീവി ആക്രമണങ്ങൾക്കു ശാശ്വതപരിഹാരം കാണണമെന്നാവശ്യപ്പെട്ടും കാർഷികകടങ്ങൾ ഇളച്ചു നൽകാത്തതിൽ പ്രതിഷേധിച്ചും കേന്ദ്ര-സംസ്ഥാന സർക്കാരുകളുടെ കർഷകഅവഗണയിൽ പ്രതിഷേധിച്ചും കത്തോലിക്ക കോൺഗ്രസ് വടക്കഞ്ചേരി, മംഗലംഡാം, മേലാർകോട്, തത്തമംഗലം ഫൊറോന സമിതികളുടെ സംയുക്താഭിമുഖ്യത്തിൽ വടക്കഞ്ചേരിയിൽ കർഷക പ്രതിഷേധ ജ്വാല നടത്തി. ഗ്ലോബൽ പ്രസിഡന്‍റ് പ്രഫ. രാജീവ് കൊച്ചുപറമ്പിൽ ഉദ്ഘാടനം ചെയ്തു. രൂപത വൈസ് പ്രസിഡന്‍റ് ജോസ് വടക്കേക്കര അധ്യക്ഷത വഹിച്ചു. ഗ്ലോബൽ ജനറൽ സെക്രട്ടറി ഡോ. ജോസുകുട്ടി ഒഴുകയിൽ, ഗ്ലോബൽ വൈസ് പ്രസിഡന്‍റുമാരായ ബെന്നി ആന്‍റണി, തോമസ് ആന്‍റണി, ഗ്ലോബൽ സെക്രട്ടറി ഡെന്നി തെങ്ങുംപള്ളി, വർക്കിംഗ് കമ്മിറ്റി അംഗം ജിജോ അറയ്ക്കൽ, രൂപത ഡയറക്ടർ ഫാ. ചെറിയാൻ ആഞ്ഞിലിമൂട്ടിൽ, രൂപത ജനറൽ സെക്രട്ടറി ആന്‍റണി കുറ്റിക്കാടൻ, ട്രഷറർ രൂപത ജോസ് മുക്കട, ഫൊറോന പ്രസിഡന്‍റുമാരായ വിൽസൺ കൊള്ളന്നൂർ, ബെന്നി മറ്റപ്പിള്ളി, ജോയ് ഫിലിപ്പ്, രൂപത യൂത്ത് കൗൺസിൽ ജനറൽ കോ-ഓർഡിനേറ്റർ എബി വടക്കേക്കര പ്രസംഗിച്ചു.

ചെറുപുഷ്പം യുപി സ്കൂളിൽ ഓണാഘോഷം

വടക്കഞ്ചേരി: ചെറുപുഷ്പം ഇംഗ്ലീഷ് മീഡിയം യുപി സ്കൂളിൽ ഓണാഘോഷം വർണാഭമായി. കുട്ടികളുടെ വിവിധങ്ങളായ കലാവിരുന്നായിരുന്നു ഓണാഘോഷങ്ങളുടെ ഹൈലൈറ്റ്. കുട്ടികളുടെ മഹാബലി, വാമനൻ, ഓണപ്പാട്ട്, പുലിക്കളി, തുമ്പിതുള്ളൽ, കഥകളി, ചെണ്ടമേളം, കൈ കൊട്ടിക്കളി, വടംവലി, വള്ളംകളി, കളരി, തെയ്യം, ഓണനൃത്തം, മോഹിനിയാട്ടം, എൽകെജി കുട്ടികളുടെ റാം വാക്ക്, പൂക്കളം എന്നിങ്ങനെ ഒന്നിനൊന്ന് മികവുണർത്തുന്നതായിരുന്നു പരിപാടികളെല്ലാം. പിടിഎ പ്രസിഡന്‍റ് ബാലകൃഷ്ണൻ അധ്യക്ഷത വഹിച്ചു. വൈസ് പ്രസിഡന്‍റ് ഓണസന്ദേശം നൽകി. ഹെഡ്മിസ്ട്രസ് സിസ്റ്റർ റോസ്മിൻ വർഗീസ്, സ്റ്റാഫ് പ്രതിനിധി സമീക്ഷ ടീച്ചർ എന്നിവർ പ്രസംഗിച്ചു. ഓണപായസവിതരണത്തോടെയായിരുന്നു സമാപനം.

മൂലത്തറ ഇടതുകനാലിൽനിന്നും വൈദ്യുതോത്പാദനത്തിനു തുടക്കം

ചിറ്റൂർ: പട്ടഞ്ചേരി പഞ്ചായത്തിലെ കന്നിമാരി പള്ളിമൊക്കിൽ മൂലത്തറ ഇടതുകനാൽ വെള്ളത്തിൽ നിന്ന് ജലചക്രമുപയോഗിച്ച് വൈദ്യുതി ഉത്പാദിപ്പിച്ച് കെഎസ്ഇബി. ആദ്യഘട്ടത്തിൽ പരീക്ഷണാടിസ്ഥാനത്തിൽ പവർ ഗ്രിഡിലൂടെ 100 വീടുകളിലേക്കാണ് വൈദ്യുതിയെത്തിക്കുന്നത്. കഴിഞ്ഞദിവസം ജലചക്രമുപയോഗിച്ച് പരീക്ഷണയോട്ടം നടത്തി. അഞ്ചു കിലോവാട്ട് കപ്പാസിറ്റി എന്ന നിലയിൽ ഒരു മണിക്കൂറിൽ അഞ്ച് യൂണിറ്റ് വൈദ്യുതിയാണ് ഉത്പാദിപ്പിച്ചത്. പദ്ധതിയിലൂടെ പ്രതിദിനം 240 യൂണിറ്റ് വൈദ്യുതി ഉത്പാദിപ്പിക്കാൻ ആകുമെന്നാണ് പ്രതീക്ഷയെന്നും കനാലിലെ വെള്ളത്തിന്‍റെ തോത് ഉയർന്നാൽ പ്രതീക്ഷയ്ക്കൊത്തു വൈദ്യുതി ഉല്പാദിപ്പിക്കാനാകുമെന്നും അധികൃതർ പറഞ്ഞു. മന്ത്രി കെ. കൃഷ്ണൻകുട്ടിയുടെ സാന്നിധ്യത്തിലാണ് ജലചക്രത്തിന്‍റെ പരീക്ഷണ ഓട്ടം നടത്തിയത്. ജില്ലയിൽ തന്നെ ആദ്യമായാണ് കനാൽ വെള്ളത്തിൽ വൈദ്യുതി ഉത്പാദനം നടത്തുന്നത്. പരീക്ഷണ ഉത്പാദനം വിജയകരമായിരുന്നന്ന്െ അധികൃതർ അറിയിച്ചു. ഭാവിയിൽ സംസ്ഥാനവ്യാപകമായി ഇത്തര ത്തിലുള്ള ചെലവുകുറഞ്ഞ വൈദ്യുതി ഉദ്പാദിപ്പിക്കാനും വൈദ്യുതി വകുപ്പ് ലക്ഷ്യമിടുന്നുണ്ട്.

പട്ടാമ്പി പുതിയപാലം സ്ഥലമെടുപ്പ് നടപടികൾക്കു തുടക്കമായി

ഷൊർണൂർ: പട്ടാമ്പിയിൽ പുതിയപാലം നിർമാണത്തിന് സ്ഥലമേറ്റെടുപ്പ് നടപടികൾ തുടങ്ങി. ഭാരതപ്പുഴയിൽ പുതിയ പാലം നിർമിക്കണമെന്ന ജനകീയാവശ്യത്തിന് പതിറ്റാണ്ടുകളുടെ പഴക്കമുണ്ട്. ഈ ആവശ്യത്തിനാണ് പരിഹാരമാകുന്നത്. പാലത്തിനും അപ്രോച്ച് റോഡിനും ആവശ്യമായ സ്ഥലമേറ്റെടുപ്പാണ് നടത്തുന്നത്. പട്ടാമ്പി നഗരസഭയിലെയും തൃത്താല പഞ്ചായത്തിലെയും സ്ഥലങ്ങളാണ് ഏറ്റെടുക്കേണ്ടത്. പട്ടാമ്പി വില്ലേജിലെ 15 ഭൂമി ഉടമകളിൽ നിന്നും തൃത്താല വില്ലേജിലെ 24 ഭൂമി ഉടമകളിൽ നിന്നുമാണ് പാലത്തിനും റോഡിനും ആവശ്യമായ സ്ഥലം ഏറ്റെടുക്കാനുള്ളത്. ഭൂമിയുടെ ഉടമകൾക്കു ഭൂമിക്ക് ന്യായമായ വില നൽകിയായിരിക്കും സ്ഥലം ഏറ്റെടുക്കുക എന്നു നേരത്തെ മുഹമ്മദ് മുഹ്സിൻ എംഎൽഎ ഉടമകൾക്ക് ഉറപ്പ് നൽകിയിട്ടുണ്ട്. പട്ടാമ്പി പട്ടണത്തിന്‍റെ ഭാഗമായ പട്ടാമ്പി നഗരസഭയെയും തൃത്താല പഞ്ചായത്തിനെയും ബന്ധിപ്പിച്ച് ഭാരതപ്പുഴയ്ക്ക് കുറുകെയുള്ള പട്ടാമ്പിപാലത്തിനു പകരമായാണ് പുതിയ പാലത്തിന് അനുമതി. മഴക്കാലത്ത് ഭാരതപ്പുഴ നിറ‍ഞ്ഞു നിലവിലെ പട്ടാമ്പി പാലത്തിൽ വെള്ളം കയറി ദിവസങ്ങളോളം ഗതാഗത തടസം നേരിടാൻ തുടങ്ങിയതോടെയാണ് പട്ടാമ്പിയിൽ പുതിയ പാലം വേണമെന്ന ആവശ്യം ശക്തമായതും പുതിയ പാലം നിർമാണത്തിന് സർക്കാർ അനുമതിയും ഫണ്ടും ലഭിച്ചത്. രണ്ട് വർഷത്തിനകം പുതിയ പാലം നിർമാണം നടത്തുമെന്നാണ് ബന്ധപ്പെട്ടവർ അറിയിച്ചിരിക്കുന്നത്. പുതിയ പാലം നിർമാണം പൂർത്തിയായാൽ പഴയ പാലം ക‍ാൽനട യാത്രക്കാർക്കും ചെറു വണ്ടികൾക്കുമായി നിലനിർത്തും. ഭൂവുടമകൾക്കു കൃത്യമായ നഷ്ടപരിഹാരം നൽകുമെന്ന് കളക്ടറുടെ ഉത്തരവിൽ പറയുന്നുണ്ട്. പാലത്തിന്‍റെ ടെൻഡർ നടപടികൾ പൂർത്തീകരിച്ച് നിർമാണ പ്രവർത്തനങ്ങൾ മാസങ്ങൾക്ക് മുമ്പ് ആരംഭിച്ചെങ്കിലും മഴ കാരണം രണ്ട് മാസമായി പണി നിർത്തിവച്ചിരിക്കയാണ്. പുഴയിലെ തൂണുകളുടെ പൈലിംഗ് ജോലികൾ പുരോഗമിക്കുന്നതിനിടെയാണ് മഴ കനത്തത്. മഴ മാറി പുഴയിലെ വെള്ളം കുറയുന്നതോടെ നിർമാണ പ്രവർത്തനങ്ങൾ പുനരാരംഭിക്കും. 50 കോടി രൂപയാണ് പുതിയ പാലം നിർമാണത്തിന് പ്രതീക്ഷിക്കുന്ന ചെലവ്. 30.86 കോടി രൂപ അനുവദിച്ചിട്ടുണ്ട്. 370.9 മീറ്റർ നീളത്തിലാണ് പുതിയ പാലം നിർമിക്കുന്നത്. 7.5 മീറ്റർ റോഡും, 1.5 മീറ്റർ വീതിയിൽ നടപ്പാലവും ഉണ്ടാകും. ഇരു ഭാഗത്തേക്കും അനുബന്ധ റോഡുകളും പദ്ധതിയിൽ ഉൾപ്പെടും. കേരളറോഡ്ഫണ്ട് ബോർഡിനാണ് നിർമാണചുമതല.

പെരിങ്ങോട്ടുകുറിശിയിൽ വിവിധ പദ്ധതികളുടെ ഉദ്ഘാടനവും ഓണക്കിറ്റ് വിതരണവും

കുഴൽമന്ദം: പെരിങ്ങോട്ടുകുറിശ്ശി ഗ്രാമപഞ്ചായത്ത് 2025- 26 വാർഷിക പദ്ധതിയിൽ ഉൾപ്പെടുത്തി നടപ്പാക്കുന്ന വിവിധ പദ്ധതികളുടെ ഉദ്ഘാടനവും ഓണക്കിറ്റ് വിതരണവും നടന്നു. പട്ടികജാതി വിഭാഗത്തിലുള്ളവർക്കായി വിവാഹ ധനസഹായവും പഠനമുറിയും, പൊതുവിഭാഗത്തിലും പട്ടികജാതി വിഭാഗത്തിലുമുള്ള ഗുണഭോക്താക്കൾക്ക് ഭവന പുനരുദ്ധാരണ ധനസഹായം തുടങ്ങിയ പദ്ധതികളുടെ ഉദ്ഘാടനമാണ് നടന്നത്. വിതരണോദ്ഘാടനം ജില്ലാ പഞ്ചായത്ത് അംഗം അഭിലാഷ് തച്ചങ്കാട് നിർവഹിച്ചു. ഗ്രാമപഞ്ചായത്ത് പ്രസിഡന്‍റ് കെ.എം കേരളകുമാരി അധ്യക്ഷയായി. അതിദരിദ്രർക്കും ക്ഷയരോഗികൾക്കുമാണ് ഓണകിറ്റുകൾ വിതരണം ചെയ്തത്. 72 കിറ്റുകൾ അതിദരിദ്രർക്കും 20 കിറ്റുകൾ ക്ഷയരോഗികൾക്കും വിതരണം ചെയ്തു. പരിപാടിയിൽ വൈസ് പ്രസിഡന്‍റ് ഇ.പി. പൗലോസ്, സെക്രട്ടറി ഇൻചാർജ്ജ് എ.ഇ. മനോജ്, എ.വി. ഗോപിനാഥ്, പി.സി. രമണി സുനിത, പ്രിയ,സുഷമ എന്നിവർ പങ്കെടുത്തു.

പാലിയേറ്റീവ് സൊസൈറ്റി വാർഷിക പൊതുയോഗം

ആലത്തൂർ: പാലിയേറ്റീവ് കെയർ സൊസൈറ്റി പാടൂർ കാവശേരിയുടെ വാർഷിക പൊതുയോഗം ആലത്തൂർ പോലീസ് ഇൻസ്പെക്ടർ ടി.എൻ. ഉണ്ണികൃഷ്ണൻ ഉദ്ഘാടനം ചെയ്തു. പാലിയേറ്റീവ് കെയർ സൊസൈറ്റി പ്രസിഡന്‍റ് സുനന്ദ രമേഷ് അധ്യക്ഷത വഹിച്ചു. പാലിയേറ്റീവ് കെയർ ജില്ലാ കൂട്ടായ്മ പ്രസിഡന്‍റ് വി.പി ഹുസൈൻ മുഖ്യപ്രഭാഷണം നടത്തി. എക്സിക്യൂട്ടീവ് മെംബർ ടി. രതീഷ് റിപ്പോർട്ട് അവതരിപ്പിച്ചു. സൊസൈറ്റി സെക്രട്ടറി വി. വിജയമോഹനൻ, ട്രഷറർ കെ. ഉണ്ണികൃഷ്ണൻ, പഞ്ചായത്ത് മെംബർ പി. കേശവദാസ്, കെ. സുചിത്ര, പാടൂർ എഎൽപി സ്കൂൾ ഹെഡ്മാസ്റ്റർ കെ. കണ്ണൻ, എൻ. രാജേന്ദ്രവർമ്മ, എം. ശിവനാരായണൻ, എ. സുരേന്ദ്രൻ, കെ. കുട്ടപ്പൻ എന്നിവർ പ്രസംഗിച്ചു.

സ്കൂൾകുട്ടികൾക്കുള്ള മെഗാ ഹെൽത്ത് ചെക്കപ്പ് ക്യാമ്പ്

കോയമ്പത്തൂർ: സിന്ധി ഇന്‍റർനാഷണൽ സ്കൂൾ, കോവൈ ഡയബറ്റിക്സ് സ്പെഷ്യാലിറ്റി സെന്‍റർ ആൻഡ് ഹോസ്പിറ്റൽ രാംനഗർ, റോട്ടറി ക്ലബ് ഓഫ് കോയമ്പത്തൂർ സായ് സിറ്റി എന്നിവയുമായി സഹകരിച്ച് തടകം റോഡിലെ സ്കൂൾ പരിസരത്ത് "ബൂട്ട് ക്യാമ്പ് ടു റീബൂട്ട് യുവർ ഹെൽത്ത് - 2025’ എന്ന പേരിൽ ഒരു മെഗാ ഹെൽത്ത് ചെക്ക്-അപ്പ് ക്യാമ്പ് സംഘടിപ്പിച്ചു. വിദ്യാർഥികൾ, രക്ഷിതാക്കൾ, അധ്യാപകർ, ജീവനക്കാർ എന്നിവരുൾപ്പെടെ 800-ലധികം പേർ പങ്കെടുത്തു.കോയമ്പത്തൂരിലെ പ്രശസ്ത സ്ഥാപനങ്ങളിൽ നിന്നുള്ള ഡോക്ടർമാരുടെയും ആരോഗ്യ സംരക്ഷണ വിദഗ്ധരുടെയും കൺസൾട്ടേഷനുകളും സ്ക്രീനിംഗുകളും മൾട്ടി-ഡിസിപ്ലിനറി ക്യാമ്പിൽ ഉണ്ടായിരുന്നു. ക്യാമ്പിൽ കുട്ടികൾക്ക് കണ്ണ്, ചെവി, ദന്ത പരിശോധനകൾ നടത്തി. മുതിർന്നവർക്ക് പ്രമേഹം, രക്തസമ്മർദ്ദം, ഹൃദയ, നേത്ര പരിശോധനകൾ എന്നിവ നടത്തി. കൂടാതെ, ശാരീരിക ആരോഗ്യം, പോഷകാഹാരം, വ്യായാമം എന്നിവയെക്കുറിച്ചുള്ള ബോധവത്കരണ സെഷനുകളും നടന്നു. ഡയറ്റീഷ്യൻമാർ ഭക്ഷണ മാർഗനിർദേശം നൽകി. ഫിസിയോതെറാപ്പിസ്റ്റുകൾ പതിവ് വ്യായാമത്തിന്‍റെ പ്രാധാന്യം വിശദീകരിച്ചു. സ്കൂൾ ചെയർമാൻ കമലേഷ് വി. രഹേജ, പ്രിൻസിപ്പൽ ഭാഗ്യലക്ഷ്മി ശ്രീനിവാസൻ, റോട്ടറി ക്ലബ് പ്രസിഡന്‍റ് ഹാൽതുറൈ എന്നിവർ പരിപാടിയിൽ പങ്കെടുത്തു. കോവൈ ഡയബറ്റിക്സ് സ്പെഷ്യാലിറ്റി സെന്‍റർ ആൻഡ് ഹോസ്പിറ്റലാണ് ക്രമീകരണങ്ങൾ ഏകോപിപ്പിച്ചത്.

പോലീസ് പെൻഷനേഴ്സ്‌ കൂട്ടായ്മ കുടുംബസംഗമം

പാലക്കാട്: പോലീസ് പെൻഷനേഴ്സ്‌ ഒരുമ കൂട്ടായ്മ ഓണാഘോഷവും കുടുംബസംഗമവും മാധവരാജാ ക്ലബ് ഓഡിറ്റോറിയത്തിൽ നടത്തി. ക്ലബ് പ്രസിഡന്‍റ് എ.കെ. നാരായണൻ ഉദ്ഘാടനം ചെയ്തു. കൂട്ടായ്മ പ്രസിഡന്‍റ് ജി. ബാബു അധ്യക്ഷനായിരുന്നു. സെക്രട്ടറി വി. രവീന്ദ്രൻ സ്വാഗതവും. റിട്ടയേഡ് ഡിവൈഎസ്പി വി.എസ്. മുഹമ്മദ് കാസിം, എം. നൂർ മുഹമ്മദ്, എം. അനന്തകൃഷ്ണൻ എന്നിവർ പ്രസംഗിച്ചു. ഡെപ്യൂട്ടി ഡയറക്ടർ ഓഫ് നേഴ്സിംഗായി പ്രമോഷൻ ലഭിച്ച കെ. രാധാമണിയെയും, രാഷ്ട്രപതിയുടെ പോലീസ് മെഡൽ നേടിയ ബി. സുരേന്ദ്രനെയും ചടങ്ങിൽ ആദരിച്ചു.

ഇന്ത്യൻ ആരോഗ്യമേഖലയുടെ സംഭാവനകൾ ശ്രദ്ധേയം: ഡോ.ജി. ഭക്തവത്സം

പാലക്കാട്: ലോക ആരോഗ്യമേഖലയ്ക്ക് ഇന്ത്യൻ ഡോക്ടർമാരുടെ പരിജ്ഞാനവും ഗവേഷണവും മാതൃകയാകുന്നുണ്ടെന്ന് കോയമ്പത്തൂർ കെ.ജി. ഹോസ്പിറ്റൽ ചെയർമാൻ ഡോ.ജി. ഭക്തവത്സം. പാലക്കാട് യൂമെഡ് ഹോസ്പിറ്റൽ വാർഷികാഘോഷ പരിപാടി ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ചടങ്ങിൽ യൂമെഡ് ആശുപത്രി ചെയർമാനും സീനിയർ ന്യൂറോളജിസ്റ്റുമായ ഡോ. എം. പ്രദീപ് അധ്യക്ഷത വഹിച്ചു. നഗരസഭ അധ്യക്ഷ പ്രമീള ശശിധരൻ, സീനിയർ അഭിഭാഷകൻ പി.ബി. മേനോൻ, ഡോ. പി.കെ. രാജഗോപാൽ, റിട്ട. എഎസ്പി കെ.എൽ. രാധാകൃഷ്ണൻ, സാമൂഹിക പ്രവർത്തകൻ നിഖിൽ കൊടിയത്തൂർ തുടങ്ങിയവർ പ്രസംഗിച്ചു.

അമലഗിരി അടിപ്പെരണ്ട പള്ളിയിൽ എട്ടുനോമ്പ് പെരുന്നാളിനു കൊടിയേറി

നെന്മാറ: അമലഗിരി അടിപ്പെരണ്ട മലങ്കര സുറിയാനി കത്തോലിക്ക പള്ളിയിൽ എട്ടുനോമ്പ് പെരുന്നാളിനു കൊടിയേറി. ഇടവകവികാരി ഫാ. ജോർജ് കയ്യാനിക്കൽ കൊടിയേറ്റി. നാളെ തുടങ്ങി എട്ടുദിവസം വരെയാണ് പെരുന്നാൾ. നാളെ വൈകുന്നേരം 4.30 ന് ജപമാല, ഫാ.ജോർജ് കയ്യാനിക്കൽ കാർമികത്വം വഹിക്കുന്ന വിശുദ്ധ കുർബാന, മധ്യസ്ഥ പ്രാർഥന. ഏഴിന് വൈകുന്നേരം 4.30ന് ജപമാല, വിശുദ്ധ കുർബാന. 6.30ന് റാസ. പള്ളിയിൽനിന്ന് ആരംഭിച്ച് അടിപ്പരണ്ട കവലവഴി പള്ളിയിലേക്ക്. എട്ടിനു രാവിലെ 8.30ന് പ്രഭാതപ്രാർഥനയ്ക്കുശേഷം ആഘോഷമായ തിരുനാൾ കുർബാനയ്ക്ക് ഫാ. വർഗീസ് പന്തീരായിതടത്തിൽ കാർമികത്വം വഹിക്കും. നേർച്ചസദ്യ, കൊടിയിറക്ക് എന്നിവയും നടക്കും.

ചുള്ളിമട പാലത്തിലേക്കുളള ഗ്രാമീണ റോഡ് ഗതാഗതയോഗ്യമാക്കണം: കോൺഗ്രസ്

ആലത്തൂർ: ആലത്തൂർ - എരിമയൂർ ഗ്രാമപഞ്ചായത്തുകളെ ബന്ധിപ്പിക്കുന്ന കൂട്ടമൂച്ചി - ചുള്ളിമട പാലത്തിലേക്ക് പോകുന്ന പഞ്ചായത്ത് റോഡിന്‍റെ ശോചനീയാ അവസ്ഥ പരിഹരിക്കണമെന്ന് നാലാം വാർഡ് കോൺഗ്രസ് കമ്മിറ്റി യോഗം ബന്ധപ്പെട്ടവരോടാവശ്യപ്പെട്ടു. ഏകദേശം 12 കോടി രൂപ ചെലവഴിച്ചു നിർമിച്ച കൂട്ടമൂച്ചി - ചുള്ളിമട പാലത്തിന്‍റെ ഉദ്ഘാടനം വൈകുകയാണ്. പഞ്ചായത്ത് ഭരണസമിതി മുൻകൈയെടുത്തു യാത്ര സൗകര്യം ഒരുക്കണമെന്നാണ് കൂട്ടമൂച്ചി നിവാസികളും കുമ്പളക്കോട് തൃപ്പാളൂർ വാർഡ് കോൺഗ്രസ് കമ്മിറ്റി യോഗവും ആവശ്യപ്പെടുന്നത്. പാലത്തിന്‍റെ ഉദ്ഘാടനത്തിനുമുമ്പ് ഗ്രാമീണ റോഡുകൂടി വൃത്തിയാക്കിയാൽ മാത്രമേ പൊതുജനത്തിനു പ്രയോജനം പൂർണമായി ലഭിക്കൂ. കെ.വി. ശ്രീജിത്ത് അധ്യക്ഷത വഹിച്ചു. ഐഎൻടിയുസി ജില്ലാ ജനറൽ സെക്രട്ടറി തൃപ്പാളൂർ ശശി, മുൻ ഗ്രാമപഞ്ചായത്ത് മെംബർ കെ. ഹരിദാസ്, വാർഡ് കോൺഗ്രസ് പ്രസിഡന്‍റുരായ സുമേഷ് തൃപ്പാളൂർ, ശിവദാസൻ എന്നിവർ പങ്കെടുത്തു.

കോയന്പത്തൂരിൽ 28.5 കോടി ചെലവിൽ ബഹുനില കാർപാർക്കുകൾ നിർമിക്കും

കോയമ്പത്തൂർ: നഗരത്തിലെ 3 സ്ഥലങ്ങളിൽ 28.5 കോടിരൂപ ചെലവിൽ ബഹുനില കാർപാർക്കുകൾ നിർമിക്കാൻ തീരുമാനം. കോയമ്പത്തൂരിലെ ക്രോസ് കട്ട് റോഡ്, രാജ വീഥി, റേസ് കോഴ്‌സ് റോഡ് എന്നിവിടങ്ങളിലെ ഗതാഗതക്കുരുക്ക് കുറയ്ക്കുന്നതിനും പാർക്കിംഗ് സൗകര്യങ്ങൾ മെച്ചപ്പെടുത്തുന്നതിനുമായി ബഹുനില കാർ പാർക്കുകൾ നിർമിക്കുന്നതിനുള്ള പ്രവർത്തനങ്ങൾ ആരംഭിക്കാനാണ് കോർപറേഷൻ തീരുമാനിച്ചത്. ക്രോസ്കട്ട് റോഡിലെ നിലവിലുള്ള കോർപറേഷൻ കാർപാർക്ക് സമുച്ചയം നവീകരിക്കാനും 9.5 കോടി രൂപ ചെലവിൽ 95 ഇരുചക്ര വാഹനങ്ങൾക്കും 84 കാറുകൾക്കും പാർക്കിംഗ് സൗകര്യം ഒരുക്കാനും തീരുമാനിച്ചു. രാജ വീഥിയിൽ 9.5 കോടി രൂപ ചെലവിൽ 50 ഇരുചക്ര വാഹനങ്ങൾക്കും 100 കാറുകൾക്കും ഒരു ബഹുനില കാർ പാർക്ക് നിർമിക്കാനും റേസ് കോഴ്‌സ് ഏരിയയിലെ കെ.ജി. തീയറ്ററിന് എതിർവശത്തുള്ള കോർപറേഷന്‍റെ സ്ഥലത്ത് 9.5 കോടി രൂപ ചെലവിൽ 95 ഇരുചക്ര വാഹനങ്ങൾക്കും 84 കാറുകൾക്കും ഒരു ബഹുനില കാർ പാർക്ക് നിർമിക്കാനും പ്രമേയങ്ങൾ പാസാക്കി. മുനിസിപ്പൽ അഡ്മിനിസ്ട്രേഷൻ ഡയറക്ടറേറ്റിന് അംഗീകാരത്തിനായി സമർപ്പിച്ച് പ്രവൃത്തി ആരംഭിക്കാനാണ് പദ്ധതി.

"ജലമാണ് ജീവൻ' യോഗം ചേർന്നു

നെന്മാറ: ഗ്രാമപഞ്ചായത്തിൽ ജലമാണ് ജീവൻ കാന്പയിനിന്‍റെ ഭാഗമായി കൂടിയാലോചന യോഗം ചേർന്നു. പഞ്ചായത്ത് ഹാളിൽ നടന്ന പരിപാടി പ്രസിഡന്‍റ് പ്രബിതാ ജയൻ ഉദ്ഘാടനം ചെയ്തു. അമീബിക് മസ്തിക ജ്വരത്തിന്‍റെ അപകടസാധ്യതയും ശാസ്ത്രീയ വസ്തുതകളും കമ്യൂണിറ്റി ഹെൽത്ത് സെന്‍റർ ജൂണിയർ ഹെൽത്ത് ഇൻസ്പെക്ടർ എസ്. അരുണ്‍കുമാർ വിശദീകരിച്ചു. കിണർ ക്ലോറിനേഷനെക്കുറിച്ച് നവകേരളം കർമപദ്ധതി റിസോഴ്സ് പേഴ്സണ്‍ എസ്.വി. പ്രേംദാസ് വിശദീകരിച്ചു. യോഗത്തിൽ നെന്മാറ ഗ്രാമപഞ്ചായത്ത് വൈസ് പ്രസിഡന്‍റ് സി. പ്രകാശൻ അധ്യക്ഷനായി. വാർഡ്മെംബർമാർ, അസിസ്റ്റന്‍റ് സെക്രട്ടറി കെ.ജി. നിജീഷ്, പഞ്ചായത്ത് ഹെൽത്ത് ഇൻസ്പെക്ടർ ജെ. സഹന, ആശ പ്രവർത്തകർ, ഹരിതകർമ സേനാംഗങ്ങൾ, എന്നിവർ പങ്കെടുത്തു.

എസ്. പുരന്ദരദാസിനെ ആദരിച്ചു

വണ്ടിത്താവളം: മൊഖോ ഇന്‍റര്‍നാഷണല്‍ ഫിലിം ഫെസ്റ്റിവലില്‍ മികച്ച സംവിധായകനായി തെരഞ്ഞെടുക്കപ്പെട്ട എസ്. പുരന്ദരദാസിനേയും സംഘത്തെയും പട്ടഞ്ചേരി ഗ്രാമീണ ഗ്രന്ഥശാലയുടെ ആഭിമുഖ്യത്തില്‍ ആദരിച്ചു. യോഗം സിനിമാസംവിധായകന്‍ ഫാറൂഖ് അബ്ദുല്‍റഹിമാന്‍ ഉദ്ഘാടനം ചെയ്തു. ലൈബ്രറി കൗണ്‍സില്‍ സംസ്ഥാന കൗണ്‍സിലംഗം ജയകൃഷ്ണന്‍ അധ്യക്ഷനായി. പത്രപ്രവര്‍ത്തകന്‍ വി.എം. ഷണ്‍മുഖദാസ്, വിജയകൃഷ്ണന്‍ (കൂടാരം), കലാസംവിധായകന്‍ അശ്വിന്‍, രാജഗോപാലന്‍, ഗുണശേഖരന്‍, രാമന്‍ ഉറവ്, സി.എം. ശങ്കരനാരായണന്‍, ജയ്‌സി എന്നിവര്‍ പ്രസംഗിച്ചു.

അമ്മമാരുടെ മഹാകുടുംബസംഗമം

വടക്കഞ്ചേരി: കോൺഗ്രസ് വടക്കഞ്ചേരി മണ്ഡലം കമ്മിറ്റിയുടെ നേതൃത്വത്തിൽ ലഹരിയിൽ നിന്ന് സ്വാതന്ത്ര്യം, ലഹരിക്കെതിരേ അമ്മമാർ എന്ന സന്ദേശവുമായി അമ്മമാർക്കായി മഹാ കുടുംബസംഗമവും ഉന്നതവിജയം നേടിയ എസ്എസ്എൽസി, പ്ലസ്‌ ടു വിദ്യാർഥികൾക്കുള്ള അനുമോദനവും സംഘടിപ്പിച്ചു. വടക്കഞ്ചേരി പഞ്ചായത്ത് കമ്യൂണിറ്റി ഹാളിൽ നടന്ന പരിപാടികൾ മുൻമന്ത്രി വി.സി. കബീർ മാസ്റ്റർ ഉദ്ഘാടനം ചെയ്തു. മണ്ഡലം പ്രസിഡന്‍റ് ഇല്ല്യാസ് പടിഞ്ഞാറെക്കളം അധ്യക്ഷത വഹിച്ചു. കെപിസിസി സെക്രട്ടറി പ്രഫ.കെ.എ. തുളസി മുഖ്യപ്രഭാഷണം നടത്തി. ദേശീയ സംസ്ഥാന തലങ്ങളിൽ മികച്ച പ്രകടനം നടത്തിയ കായിക താരങ്ങളെയും ചടങ്ങിൽ ആദരിച്ചു. കെപിസിസി മെംബർ വി. സുദർശനൻ, ഡിസിസി സെക്രട്ടറി ഡോ. അർസലൻ നിസാം, കോൺഗ്രസ് ബ്ലോക്ക് പ്രസിഡന്‍റ് അഡ്വ.എം. ദിലീപ്, വടക്കഞ്ചേരി കോ-ഓപറേറ്റീവ് സർവീസ് ബാങ്ക് പ്രസിഡന്‍റ് റെജി കെ. മാത്യു, ഗ്രാമപഞ്ചായത്ത് അംഗങ്ങളായ സി. മുത്തു, സി.കെ. ദേവദാസ്, ജി. സതീഷ് കുമാർ, അമ്പിളി മോഹൻദാസ്, കോൺഗ്രസ് മണ്ഡലം ഭാരവാഹികളായ ജോണി ഡയൻ, എ. ജോസ് ചുവട്ടുപാടം, എം.പി. ശശികല, സുനിൽ ചുവട്ടുപാടം, പി.എസ്. മുജീബ് പ്രസംഗിച്ചു.

നെല്ലിയാന്പതി ബാലഭവനിൽ മെഡിക്കൽ ക്യാന്പ് നടത്തി

നെല്ലിയാന്പതി: പ്രാഥമിക ആരോഗ്യ കേന്ദ്രത്തിന്‍റെ ആഭിമുഖ്യത്തിൽ പകർച്ചവ്യാധി നിയന്ത്രണവും കുഞ്ഞുങ്ങളുടെ ആരോഗ്യവും മുൻനിർത്തി മെഡിക്കൽ ക്യാന്പ് നടത്തി. മെഡിക്കൽ ഓഫീസർ ഡോ. മനു തോമസിന്‍റെ നേതൃത്വത്തിൽ ചന്ദ്രാമല ബാലാഭവനിലാണ് ക്യാന്പ് സംഘടിപ്പിച്ചത്. മെഡിക്കൽ ക്യാന്പിൽ 26 ഓളം കുട്ടികളെ മെഡിക്കൽ ഓഫീസർ പരിശോധിക്കുകയും മരുന്ന് വിതരണം നടത്തുകയും ചെയ്തു. കുട്ടികളിലെ പോഷകാഹാര കുറവ്, കുട്ടികളിലെ കുഷ്ഠരോഗ ലക്ഷണങ്ങൾ, അലർജി, പനി, മറ്റു രോഗലക്ഷണങ്ങൾ എന്നിവ പരിശോധിച്ച് മരുന്നുകൾ വിതരണം ചെയ്തു. കുട്ടികളിൽ കണ്ടുവരുന്ന പകർച്ചവ്യാധിയും അവ പ്രതിരോധിക്കേണ്ട രീതിയും സംബന്ധിച്ച് മെഡിക്കൽ ഓഫീസർ ഡോ. മനു തോമസ് ആരോഗ്യ ബോധവത്കരണ ക്ലാസ് എടുത്തു. പബ്ലിക് ഹെൽത്ത് നഴ്സ് സഹീത, ജൂണിയർ പബ്ലിക് ഹെൽത്ത് നഴ്സ് സുദിന സുരേന്ദ്രൻ, ജൂണിയർ ഹെൽത്ത് ഇൻസ്പെക്ടർമാരായ ബി. അഫ്സൽ, എസ്. ശരണ്‍റാം, സൈനു സണ്ണി എന്നിവരും ക്യാന്പിന് നേതൃത്വം നൽകി.

ഭക്ഷ്യസുരക്ഷാ വകുപ്പിന്‍റെ ഓണക്കാലപരിശോധന 51 കേന്ദ്രങ്ങളിൽ

പാലക്കാട്: ഓണത്തിന് മുന്നോടിയായി ജില്ലയിലെ വിവിധ ഭാഗങ്ങളിൽ ഭക്ഷ്യസുരക്ഷാ വകുപ്പ് നടത്തുന്ന പരിശോധന തുടരുന്നു. മാർക്കറ്റുകൾ, ഹോട്ടലുകൾ, ബേക്കറികൾ എന്നിവ കേന്ദ്രീകരിച്ചാണ് പരിശോധന നടക്കുന്നത്. തരൂർ, പട്ടാന്പി, ചിറ്റൂർ, തൃത്താല എന്നീ 4 സർക്കിളുകൾക്ക് കീഴിലായി 51 കേന്ദ്രങ്ങളിലാണ് ഇന്നലെ പരിശോധന നടത്തിയത്. ഇതിൽ ചിറ്റൂർ, തൃത്താല സർക്കിളുകൾ സിവിൽ സപ്ലൈസ് വകുപ്പുമായി ചേർന്ന് സംയുക്തമായാണ് പരിശോധന സംഘടിപ്പിച്ചത്. നാല്സാന്പിളുകൾ ശേഖരിച്ച് ലാബിലേക്ക് പരിശോധനയ്ക്ക് അയച്ചു. ഓരോ സ്ഥാപനങ്ങൾക്ക് വീതം തിരുത്തൽ നോട്ടീസും, കോന്പൗണ്ടിംഗ് നോട്ടീസ് നൽകി. ഒരു സ്ഥാപനത്തിന് മെച്ചപ്പെടുത്തൽ നോട്ടീസ് നൽകുകയും ചെയ്തു.

കൊടുന്തിരപ്പുള്ളി വിമലഹൃദയ പള്ളിയിൽ എട്ടുനോമ്പാചരണം നാളെമുതൽ

പാലക്കാട്: കൊടുന്തിരപ്പുള്ളി വിമലഹൃദയ ദേവാലയത്തിൽ പരിശുദ്ധ കന്യകാമറിയത്തിന്‍റെ പിറവിത്തിരുനാളിന് ഒരുക്കമായുള്ള എട്ടുനോമ്പാചരണം നാളെ ആരംഭിക്കും. വൈകുന്നേരം 5.30 ന് പാലക്കാട് രൂപത ചാൻസലർ ഫാ. ഗിൽബർട്ട് എട്ടൊന്നിൽ കൊടിയേറ്റും. തുടർന്ന് വിശുദ്ധ കുർബാന അർപ്പിക്കും. വികാരി ഫാ.ടോജി ചെല്ലങ്കോട്ട് സന്നിഹിതനായിരിക്കും. രണ്ടിന് ചൊവ്വ മുതൽ ആറാം തിയതിവരെ എല്ലാ ദിവസവും വൈകുന്നേരം 4.45 ന് ആരാധനയും 5.30 നു വിശുദ്ധ കുർബാനയും ഉണ്ടായിരിക്കും. ഫാ. ഫ്രെഡി അരിക്കാടൻ, ഫാ. ജിബിൻ കണ്ടത്തിൽ, ഫാ. ടിബിൻ കരോട്ടുപുല്ലുവേലിപ്പാറയിൽ, ഫാ. ഷിൻസ് കാക്കാനിയിൽ, ഫാ. എബി പൊറുത്തൂർ എന്നിവർ കാർമികത്വം വഹിക്കും. ഏഴിനു രാവിലെ ഏഴുമണിക്കു പാലന ഹോസ്പിറ്റൽ ഡയറക്ടർ ഫാ. വാൾട്ടർ തേലപ്പിള്ളി സിഎംഐ വിശുദ്ധ കുർബാന അർപ്പിക്കും. പ്രധാന തിരുനാൾ ദിനമായ എട്ടിന് വൈകുന്നേരം 4.30 ന് ആഘോഷമായ തിരുനാൾ കുർബാന ആരംഭിക്കും. വള്ളിയോട് സെന്‍റ് മേരീസ് പോളിടെക്നിക് അസിസ്റ്റന്‍റ് ഡയറക്ടർ ഫാ. ആനന്ദ് അമ്പൂക്കൻ മുഖ്യകാർമ്മികത്വം വഹിക്കും. മുണ്ടൂർ യുവക്ഷേത്ര കോളജ് വൈസ് പ്രിൻസിപ്പൽ ഫാ. ഷൈജു പരിയാത്ത് തിരുനാൾസന്ദേശം നൽകും. തുടർന്ന് പരിശുദ്ധ കന്യകാമറിയത്തിന്‍റെ തിരുസ്വരൂപം വഹിച്ചുകൊണ്ട് കൊടുന്തിരപ്പുള്ളി ജംഗ്ഷനിലേക്ക് ജപമാലപ്രദക്ഷിണം ഉണ്ടാകും. രാത്രി ഊട്ടുനേർച്ചയും നടത്തും. തിരുനാളിന്‍റെ നടത്തിപ്പിന് വികാരി ഫാ.ടോജി ചെല്ലങ്കോട്ട്, കൈക്കാരന്മാരായ വിൽസൺ പുലിക്കോട്ടിൽ, ആന്‍റണി ലൂയിസ് തൈപ്പറമ്പിൽ, ജനറൽ കൺവീനർ സെബാസ്റ്റ്യൻ പുത്തൻപുരയ്ക്കൽ, ജോയിന്‍റ് കൺവീനർ വിൻസി ജെയ്സൺ തലക്കോട്ടൂർ എന്നിവർ നേതൃത്വം നൽകും.

പാറമടയ്ക്ക് അനുമതിക്കെതിരേ പ്രതിഷേധധർണ നടത്തി

പല്ലശന: പഞ്ചായത്തിലെ രണ്ടാംവാർഡിൽ പ്രവർത്തനം നിർത്തിവെച്ചിരുന്ന പാറമടയ്ക്ക് വീണ്ടും അനുമതിനൽകിയ തീരുമാനത്തിൽ പ്രതിഷേധിച്ച് നാട്ടുകാർ പഞ്ചായത്തിനുമുന്നിൽ ധർണ നടത്തി. നൂറുകണക്കിനു കുടുംബങ്ങളുടെ ജീവനും സ്വത്തിനും ഭീഷണിയായതും 500 ഏക്കറോളം വരുന്ന കൃഷിസ്ഥലം നാശമാക്കാനിടവരുന്ന പാറമടയ്ക്കെതിരേ നാട്ടുകാർ ഒരുവർഷമായി സമരത്തിലാണ്. പാറപൊട്ടിച്ച സമയത്തു വീടിനുമുകളിൽ കല്ല് വീണപ്പോൾ നാട്ടുകാരുടെ പരാതിയുടെ അടിസ്ഥാനത്തിൽ സെക്രട്ടറി പ്രവർത്തനം നിർത്തിവയ്ക്കാൻ ഉത്തരവിട്ടിരുന്നു. എന്നാൽ നിയമലംഘനം നടത്തി പാറപൊട്ടിച്ചുവന്ന ക്വാറി ഉടമയ്ക്ക് അനുകൂലമായി പഞ്ചായത്ത് സമിതിയിലെ 10 ഭരണപക്ഷ അംഗങ്ങൾ ചേർന്ന് അനുവാദംകൊടുത്തത്. പ്രതിപക്ഷ മെംബർമാരായ കോൺഗ്രസ്‌ അംഗങ്ങൾ വിയോജനക്കുറിപ്പ് നൽകി യോഗം ബഹിഷ്കരിച്ചു. തുടർന്നു നിയമനടപടികളുമായി മുന്നോട്ടുപോകാനും തീരുമാനമായി. പ്രതിഷേധ ധർണ സമരസമിതി കൺവീനർ സി. ഗോപാലകൃഷ്ണന്‍റെ അധ്യക്ഷതയിൽ സമരസമിതി ചെയർമാനും രണ്ടാം വാർഡ് മെംബറുമായ എസ്. അശോകൻ ഉദ്ഘാടനം ചെയ്തു.

ലൂർദ്മാത പള്ളിയിൽ മാതാവിന്‍റെ ജനനത്തിരുനാളിനും എട്ടുനോമ്പാചരണത്തിനും ഇന്നു തുടക്കമാകും

വടക്കഞ്ചേരി: മരിയൻ തീർഥകേന്ദ്രമായ വടക്കഞ്ചേരി ലൂർദ്മാതാ ഫൊറോന പള്ളിയിലെ പരിശുദ്ധ കന്യകാമറിയത്തിന്‍റെ ജനന തിരുനാളിനും എട്ടുനോമ്പാചരണത്തിനും ഇന്ന് തുടക്കമാകും. വൈകുന്നേരം നാലരയ്ക്ക് ആഘോഷമായ കുർബാന, പ്രസംഗം, നൊവേന, ലദീഞ്ഞ്, നേർച്ച വിതരണം. തുടർന്ന് സെപ്റ്റംബർ ആറ് വരെയുള്ള ദിവസങ്ങളിൽ വൈകുന്നേരം അഞ്ചിനാണ് ആഘോഷമായ കുർബാനയും മറ്റുതിരുക്കർമങ്ങളും നടക്കുക. ജനന തിരുനാൾ ആഘോഷം നടക്കുന്ന സെപ്റ്റംബർ ഏഴിന് രാവിലെ എട്ടിന് ആഘോഷമായ കുർബാന, വചനസന്ദേശം, നൊവേന, ലദീഞ്ഞ്, സ്നേഹവിരുന്ന് എന്നീ ശുശ്രൂഷകളുണ്ടാകും. പഞ്ചാബ് ജലന്തർ രൂപത ബിഷപ് മാർ ജോസ് സെബാസ്റ്റ്യൻ തെക്കുംചേരിക്കുന്നേൽ കാർമികനാകും. സെപ്റ്റംബർ എട്ടിന് വൈകീട്ട് നാലരക്ക് ആഘോഷമായ കുർബാനയും മറ്റു തിരുകർമങ്ങളും ഉണ്ടാകും. ദിവസവും പതിവുപോലെ ആറരക്കുള്ള കുർബാന ഉണ്ടാകും. ഇന്നും സെപ്റ്റംബർ ഏഴിന് ഞായറാഴ്ചയും രാവിലെ ഒമ്പതരക്കുള്ള കുർബാന ഉണ്ടായിരിക്കുന്നതല്ല. ഫാ. ജിറ്റോ കപ്യാരുമലയിൽ ടിഒആർ, ഫാ. മെൽവിൻ ചൊവ്വല്ലൂർ, ഫാ. ഐബിൻ പെരുമ്പിള്ളിൽ, ഫാ. അരുൺ വാളിപ്ലാക്കൽ, ഫാ. എഡ്വിൻ കൊമ്പൻ, ഫാ. ബർണാന്‍റോ കുറ്റിക്കാടൻ, റവ.ഡോ. സേവ്യർ മാറാമറ്റം, ഫാ. ടോണി ചേക്കയിൽ എന്നീ വൈദികരാണ് ഓരോ ദിവസത്തെയും തിരുക്കർമങ്ങൾക്ക് കാർമികത്വം വഹിക്കുക. ഫൊറോന വികാരി ഫാ. റെജി പെരുമ്പിള്ളിൽ, അസി. വികാരി ഫാ. ടോണി ചേക്കയിൽ, കൈകാരന്മാരായ സണ്ണി നടയത്ത്, ബാബു തെങ്ങുംപള്ളി എന്നിവരുടെ നേതൃത്വത്തിലാണ് തിരുനാൾ പരിപാടികൾ.

നാലുമാസം പ്രായമുള്ള കുഞ്ഞ് പാൽ കുടിക്കുന്നതിനിടെ മരിച്ചു

വണ്ടിത്താവളം: മീനാക്ഷിപുരത്ത് നാലുമാസം പ്രായമായ പെൺകുഞ്ഞ് പാൽ ശ്വാസനാളത്തിൽ കുടുങ്ങി മരിച്ചു. സർക്കാർപതി പാർഥിപൻ - സംഗീത ദന്പതികളുടെ മകളാണ് മരിച്ചത്. വെള്ളിയാഴ്ച വൈകുന്നേരം 5.30ന് കുഞ്ഞ് പാൽ കുട്ടിക്കാനാവാതെ നിശ്ചലാവസ്ഥയിലായത്. ഉടൻതന്നെ ആംബുലൻസിൽ ജില്ലാ ആശുപത്രിയിൽ എത്തിച്ചു. പോസ്മോർട്ടം നടത്തിയതിൽ പാൽ ശ്വാസനാളത്തിൽ കുടുങ്ങിയതാണ് മരണകാരണമെന്ന് സ്ഥിരീകരിച്ചു. നാലു മാസം പ്രായമായ കുഞ്ഞിന് വളർച്ചക്കുറവുണ്ടായിരുന്നു. രണ്ടുവർഷം മുൻപ് ഇവരുടെ ആദ്യത്തെ കുഞ്ഞും നാലു മാസം പ്രായത്തിൽ മരിച്ചിരുന്നു. പാർഥിപന്‍റെ മൊഴിയിൽ പോലീസ് മേൽനടപടികൾ സ്വീകരിച്ചു.

ജില്ലാതല ഓണാഘോഷ പരിപാടികൾ സെപ്റ്റംബർ നാലുമുതൽ

പാലക്കാട്: സംസ്ഥാന ടൂറിസം വകുപ്പ്, ജില്ലാ ഭരണകൂടം, ജില്ലാ ടൂറിസം പ്രൊമോഷൻ കൗണ്‍സിൽ എന്നിവയുടെ സംയുക്ത ആഭിമുഖ്യത്തിൽ സംഘടിപ്പിക്കുന്ന ജില്ലാതല ഓണാഘോഷ പരിപാടികൾക്ക് സെപ്റ്റംബർ നാലിന് തുടക്കമാവും. പാലക്കാട് രാപ്പാടി ഓപ്പണ്‍ എയർ ഓഡിറ്റോറിയം, വെള്ളിയാങ്കല്ല് പൈതൃക പാർക്ക്, ശ്രീകൃഷ്ണപുരം ബാപ്പുജി ചിൽഡ്രൻസ് പാർക്ക്, പോത്തുണ്ടി ഉദ്യാനം എന്നിവിടങ്ങളിലായി വിവിധ വേദികളിലാണ് ഇത്തവണ പരിപാടികൾ അരങ്ങേറുന്നത്. സെപ്റ്റംബർ ഏഴുവരെ പരിപാടികൾ നീണ്ടു നിൽക്കും. സെപ്റ്റംബർ നാലിന് വൈകുന്നേരം 5.30ന് രാപ്പാടി ഓപ്പണ്‍ എയർ ഓഡിറ്റോറിയത്തിൽ കലാമണ്ഡലം വിവേകും സംഘവും അവതരിപ്പിക്കുന്ന മിഴാവ് മേളത്തോടെ പരിപാടികൾക്ക് തുടക്കമാകും. തുടർന്ന് ഉദ്ഘാടന സമ്മേളനം. ചലച്ചിത്രതാരം ശ്രുതി ജയനും സംഘവും നൃത്തപരിപാടികൾ അവതരിപ്പിക്കും, രാത്രി എട്ടിന് സ്വരലയ പാലക്കാടിന്‍റെ ഉത്രാടരാവ് എന്ന കലാപരിപാടിയും നടക്കും. അഞ്ചിന് വൈകുന്നേരം അഞ്ചിന് മണ്ണൂർ ചന്ദ്രനും സംഘവും അവതരിപ്പിക്കുന്ന പൊറാട്ടുകളിയും 5.30 ന് പത്മശ്രീ രാമചന്ദ്രപുലവരും സംഘവും അവതരിപ്പിക്കുന്ന തോൽപ്പാവക്കൂത്തും നടക്കും. വെള്ളിയാങ്കല്ല് പൈതൃക പാർക്കിൽ സെപ്റ്റംബർ ആറിന് വൈകുന്നേരം ആറിന് കൊച്ചിൻ കൈരളി കമ്യൂണിക്കേഷൻസിന്‍റെ ഗാനമേളയും സെപ്റ്റംബർ ഏഴിന് സരിത റഹ്മാൻ നയിക്കുന്ന ഗാനസന്ധ്യയും കലാമണ്ഡലം ഐശ്വര്യയും സംഘവും അവതരിപ്പിക്കുന്ന നൃത്തസന്ധ്യയും അരങ്ങേറും. ശ്രീകൃഷ്ണപുരം ബാപ്പുജി ചിൽഡ്രൻസ് പാർക്കിൽ സെപ്റ്റംബർ ആറിന് വൈകുന്നേരം 5.30 ന് കലാമണ്ഡലം അഭിജേഷും സംഘവും അവതരിപ്പിക്കുന്ന ചാക്യാർകൂത്ത്, വൈകുന്നേരം 6.30 ന് സാരംഗ് ഓർക്കസ്ട്രയുടെ ഗാനമേള എന്നിവ നടക്കും. സെപ്റ്റംബർ ഏഴിന് വൈകുന്നേരം 5.30 ന് വിശ്വനാഥപുലവരും സംഘവും അവതരിപ്പിക്കുന്ന തോൽപ്പാവക്കൂത്ത്, വൈകുന്നേരം 6.30 ന് വടക്കൻസ് പാലക്കാട് അവതരിപ്പിക്കുന്ന മെഗാ ഇവന്‍റ് എന്നിവയാണ് പരിപാടികൾ. പോത്തുണ്ടി ഉദ്യാനത്തിൽ സെപ്റ്റംബർ ആറിന് വൈകുന്നേരം നാലിന് കൈതോല നാടൻ പാട്ടുകൂട്ടത്തിന്‍റെ അല്ലിപ്പൂങ്കാവ്, വൈകുന്നേരം ആറിന് സപ്തസ്വരം ഓർക്കസ്ട്രയുടെ മെലോഡീയസ് ഹിറ്റ്സ് പരിപാടികളും സെപ്റ്റംബർ ഏഴിന് വൈകുന്നേരം 4.30 ന് ജനാർദനൻ പുതുശേരിയും സംഘവും അവതരിപ്പിക്കുന്ന ആവണിപ്പാട്ടുകൾ, ആറിന് പാട്ടൊരുമ പാലക്കാട് അവതരിപ്പിക്കുന്ന പാട്ടുത്സവം തുടങ്ങിയ കലാപരിപാടികളും നടക്കും.

കാഞ്ഞിരപ്പുഴ റൂറൽ ക്രെഡിറ്റ് കോ- ഓപ്പറേറ്റീവ് സൊസൈറ്റിയുടെ നവീകരിച്ച ഓഫീസ് ഉദ്ഘാടനം

കാഞ്ഞിരപ്പുഴ: കാഞ്ഞിരപ്പുഴ റൂറൽ ക്രെഡിറ്റ് കോ- ഓപ്പറേറ്റീവ് സൊസൈറ്റിയുടെ നവീകരിച്ച ഓഫീസ് കെടിഡിസി ചെയർമാൻ പി.കെ. ശശി ഉദ്ഘാടനം ചെയ്തു. സൊസൈറ്റി പ്രസിഡന്‍റ് എ. രാജഗോപാൽ അധ്യക്ഷനായി. പഞ്ചായത്ത് ഉപാധ്യക്ഷൻ സിദ്ദിഖ് ചേപ്പോടൻ, വാർഡ് മെംബർ പി. രാജൻ, പൊറ്റശേരി സർവീസ് സഹകരണ ബാങ്ക് പ്രസിഡന്‍റ് ജോയി ജോസഫ്, കാഞ്ഞിരപ്പുഴ സഹകരണ അർബൻ ക്രെഡിറ്റ് സൊസൈറ്റി പ്രസിഡന്‍റ് മുഹമ്മദ് ചെറൂട്ടി, ക്ഷീരോത്പാദക സഹകരണസംഘം പ്രസിഡന്‍റ് ബേബി ചെറുകര, വ്യാപാരി വ്യവസായി ഏകോപനസമിതി യൂണിറ്റ് പ്രസിഡന്‍റ് ജോർജ് നമ്പുശേരി, സിപിഎം മുൻ ലോക്കൽ സെക്രട്ടറിമാരായ കെ. ലിലീപ്കുമാർ, അരുൺ ഓലിക്കൽ, അബൂബക്കർ ചിറക്കൽപ്പടി, പി. ഉണ്ണികൃഷ്ണൻ, ബാലൻ പൊറ്റശേരി എന്നിവർ പ്രസംഗിച്ചു. മികച്ച സഹകാരിക്കുള്ള ഓവൻ പുരസ്കാരം നേടിയ പി.എ. ഉമ്മറിനെ ആദരിച്ചു.

താലൂക്ക് ആശുപത്രി ജീവനക്കാര്‍ക്കായി പുതിയ സ്റ്റാഫ് ക്വാര്‍ട്ടേഴ്‌സ് വരുന്നു

ചിറ്റൂര്‍: താലൂക്ക് ആശുപത്രി ജീവനക്കാര്‍ക്കായുള്ള പുതിയ സ്റ്റാഫ് ക്വാര്‍ട്ടേഴ്‌സ് നിര്‍മാണ പ്രവൃത്തികള്‍ക്കു തുടക്കമാവുന്നു. ആശുപത്രിക്ക് എതിർവശത്തെ ജീര്‍ണാവസ്ഥയിലുള്ള പഴയ കെട്ടിടങ്ങള്‍ പൊളിച്ചുമാറ്റി ഫ്‌ളാറ്റ് മാതൃകയിലാണ് പുതിയ കെട്ടിടം നിര്‍മിക്കുക. 2019-20 ലെ സംസ്ഥാന ബജറ്റില്‍ സ്റ്റാഫ് ക്വാര്‍ട്ടേഴ്‌സ് നിര്‍മാണത്തിനായി പത്തുകോടി രൂപ വകയിരുത്തിയിരുന്നു. ആധുനിക സൗകര്യങ്ങളോടുകൂടി ആറുനിലകളോടുകൂടിയ കെട്ടിടമാണ് വിഭാവനം ചെയ്തിരിക്കുന്നത്. കെട്ടിടത്തില്‍ 15 കുടുംബങ്ങള്‍ക്ക് താമസിക്കാനുള്ള സൗകര്യമുണ്ടാകും. സിവില്‍ പ്രവൃത്തികള്‍ക്കായി 8.9 കോടി രൂപയും ഇലക്ട്രിക്കല്‍ പ്രവൃത്തികള്‍ക്ക് 1.1 കോടി രൂപയുമാണ് വകയിരുത്തിയിട്ടുള്ളത് നിർമാണപ്രവർത്തനങ്ങൾക്കായുള്ള നടപടിക്രമങ്ങൾ പൂർത്തീകരിച്ചിട്ടുണ്ട്. മൂന്നുവർഷം മുൻപ് ലഭിച്ച സാങ്കേതിക അനുമതി ധനകാര്യ വകുപ്പിൽനിന്ന് പുതുക്കി കിട്ടേണ്ടതുണ്ടെന്നും തുടർന്ന് പ്രവർത്തനം വേഗത്തിൽ ആരംഭിക്കുമെന്നും സ്ഥലം എംഎൽഎ മന്ത്രി കെ. കൃഷ്ണൻകുട്ടി പറഞ്ഞു.

വണ്ടാഴി ഗ്രാമപഞ്ചായത്തിൽ വാദ്യോപകരണ വിതരണം

വടക്കഞ്ചേരി: വണ്ടാഴി ഗ്രാമപഞ്ചായത്ത് 2024-25 വാർഷിക പദ്ധതിയിൽ ഉൾപ്പെടുത്തി എസ്‌സി വിഭാഗത്തിൽപ്പെട്ടവർക്ക് വാദ്യോപകരണങ്ങൾ വിതരണം ചെയ്തു. കെ.ഡി. പ്രസേനൻ എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് കെഎൽ. രമേഷ് അധ്യക്ഷത വഹിച്ചു. വൈസ് പ്രസിഡന്‍റ് പി. ശശികല, ജില്ലാ പഞ്ചായത്ത് മെംബർ ആർ. ചന്ദ്രൻ, പി.എച്ച്. സെയ്താലി, പി. ശശികുമാർ, സുബിത മുരളീധരൻ, എസ്. ഷക്കീർ, ഡിനോയ് കോമ്പാറ, ആർ. ഗംഗാധരൻ, എസ്. സന്തോഷ് എന്നിവർ പ്രസംഗിച്ചു.

യുവജന കമ്മീഷൻ അദാലത്ത്: ജില്ലയിൽ 11 പരാതികൾ തീർപ്പാക്കി

പാലക്കാട്: യുവജനങ്ങളുടെ പ്രശ്നപരിഹാരത്തിനായി കേരള സംസ്ഥാന യുവജന കമ്മീഷൻ നടത്തിയ ജില്ലാതല അദാലത്തിൽ 11 പരാതികൾ തീർപ്പാക്കി. കളക്ടറേറ്റ് കോണ്‍ഫറൻസ് ഹാളിൽ നടന്ന അദാലത്തിൽ 20 പരാതികൾ പരിഗണിച്ചു. ശേഷിക്കുന്ന ഒൻപത് പരാതികൾ അടുത്ത സിറ്റിംഗിൽ പരിഗണിക്കും. ഏഴ് പരാതികൾകൂടി പുതുതായി ലഭിച്ചു. തൊഴിൽതർക്കങ്ങൾ, സൈബർ തട്ടിപ്പുകൾ, ഗാർഹികപീഡനം, സാമൂഹ്യ മാധ്യമങ്ങളിലൂടെയുള്ള അപകീർത്തിപ്പെടുത്തൽ, വിദ്യാഭ്യാസ സ്ഥാപനങ്ങളിലെ ഫീസ് സംബന്ധമായ വിഷയങ്ങൾ, പിഎസ് സി യുമായി ബന്ധപ്പെട്ട കാര്യങ്ങൾ തുടങ്ങിയ വിവിധ വിഷയങ്ങളുമായി ബന്ധപ്പെട്ട പരാതികളാണ് അദാലത്തിൽ ലഭിച്ചത്. യുവജനങ്ങളുടെ പ്രശ്നങ്ങൾക്ക് ഫലപ്രദമായ പരിഹാരം കാണാൻ കമ്മീഷൻ പ്രതിജ്ഞാബദ്ധമാണെന്ന് യുവജന കമ്മീഷൻ ചെയർമാൻ എം. ഷാജർ പറഞ്ഞു. യുവജനങ്ങളുടെ മാനസികാരോഗ്യം മെച്ചപ്പെടുത്തുന്നതിനുള്ള പദ്ധതികളും ലഹരിവിരുദ്ധ കാന്പയിനുകളും സജീവമായി നടപ്പാക്കി വരികയാണെന്നും അദ്ദേഹം കൂട്ടിച്ചേർത്തു. കമ്മീഷൻ അംഗങ്ങളായ കെ. ഷാജഹാൻ, പി.സി. വിജിത, എച്ച്. ശ്രീജിത്ത്, അഡ്മിനിസ്ട്രേറ്റീവ് ഓഫീസർ കെ. ജയകുമാർ, സംസ്ഥാന കോ-ഓർഡിനേറ്റർ അഡ്വ. എം. രണ്‍ദീഷ്, അസിസ്റ്റന്‍റ് പി. അഭിഷേക് എന്നിവർ പങ്കെടുത്തു.

അർബൻ സൊസൈറ്റിയിൽ മുക്കുപണ്ടം പണയംവയ്ക്കാൻ ശ്രമം; രണ്ടുപേർ അറസ്റ്റിൽ

ശ്രീകൃഷ്ണപുരം: കടമ്പഴിപ്പുറം അർബൻ ഗ്രാമീൺ സൊസൈറ്റിയിൽ 10 പവൻ മുക്കുപണ്ടം പണയംവയ്ക്കാൻ ശ്രമിച്ച രണ്ടുപേരെ പോലീസ് പിടികൂടി. ആലങ്ങാട് സ്വദേശികളായ ഷമീർ, ഉണ്ണികൃഷ്ണൻ എന്നിവരാണ് പിടിയിലായത്. കഴിഞ്ഞ 20 ന് അമ്പലപ്പാറ സ്വദേശിയായ വിശ്വനാഥൻ എന്നയാൾ 11 പവൻ മുക്കുപണ്ടം ഇതേ സ്ഥാപനത്തിൽ പണയംവച്ച് 7.17 ലക്ഷം രൂപ കൈപ്പറ്റിയിരുന്നു. വിശ്വനാഥനാണ് ഷമീറിനെയും ഉണ്ണികൃഷ്ണനേയും മുക്കുപണ്ടം പണയം വയ്ക്കാൻ കൊണ്ടുവന്നത്. സംശയം തോന്നിയ സൊസൈറ്റി അധികൃതർ പോലീസിൽ വിവരമറിയിക്കുകയായിരുന്നു. തുടർന്നുനടത്തിയ പരിശോധനയിൽ ഇവർ കൊണ്ടുവന്നത് മുക്കുപണ്ടമാണെന്നു കണ്ടെത്തി. രണ്ടുപേർക്കുമെതിരേ പോലീസ് കേസെടുത്തു. സംഭവത്തിൽ കൂടുതൽ അന്വേഷണം നടന്നുവരികയാണ്.

വണ്ടാഴിയിൽ കോൺഗ്രസ് പ്രതിഷേധപ്രകടനം

വടക്കഞ്ചേരി: വടകരയിൽ ഷാഫി പറമ്പിൽ എംപി യെ വഴിയിൽ തടഞ്ഞ ഡിവൈഎഫ്ഐ ഗുണ്ടകൾക്കെതിരെ നിയമനടപടിയെടുക്കണമെന്നാവശ്യപ്പെട്ട് കോൺഗ്രസ്, യൂത്ത് കോൺഗ്രസ് വണ്ടാഴി മണ്ഡലം കമ്മിറ്റികളുടെ നേതൃത്വത്തിൽ വണ്ടാഴിയിൽ പ്രതിഷേധപ്രകടനം നടത്തി. കർഷക കോൺഗ്രസ് ജില്ല സെക്രട്ടറി കെ.സി. അരവിന്ദാക്ഷൻ മാസ്റ്റർ ഉദ്ഘാടനം ചെയ്തു. കോൺഗ്രസ് മണ്ഡലം പ്രസിഡന്‍റ് കെ.എം. ശശീന്ദ്രൻ അധ്യക്ഷത വഹിച്ചു. കോൺഗ്രസ് ബ്ലോക്ക് സെക്രട്ടറിമാരായ എം. സുരേഷ്‌കുമാർ, എൻ. വിഷ്ണു, യൂത്ത് കോൺഗ്രസ് മണ്ഡലം പ്രസിഡന്‍റ് ആർ. അനീഷ്, കർഷക കോൺഗ്രസ് മണ്ഡലം പ്രസിഡന്‍റ് എസ്. പ്രദീപ്‌ പ്രസംഗിച്ചു.

പഞ്ചായത്ത് പദ്ധതികളിൽ അഴിമതി ആരോപണം; വടക്കഞ്ചേരിയിൽ യൂത്ത് കോൺഗ്രസ് പ്രതിഷേധം

വടക്കഞ്ചേരി: വടക്കഞ്ചേരി ഗ്രാമം റോഡിലെ ടാറിംഗ് ഉൾപ്പെടെയുള്ള വർക്കുകളിൽ വൻ അഴിമതിയാരോപണവുമായി പഞ്ചായത്തിനെതിരെ പ്രതിഷേധവുമായി യൂത്ത് കോൺഗ്രസ് പ്രവർത്തകർ. രാഷ്ട്രീയ വിവേചനത്തിന്‍റെ പേരിൽ നാലരവർഷം ഗ്രാമം റോഡിന്‍റെ പുനരുദ്ധാരണത്തിന് ഫണ്ട് അനുവദിക്കാതിരിക്കുകയും സമരങ്ങൾക്കൊടുവിൽ റീടാറിംഗ് നടന്നെങ്കിലും ടാറിംഗ് നടത്തി ഒരു മാസം തികയും മുമ്പേ വിവിധ ഇടങ്ങളിൽ കുഴികൾ രൂപപ്പെട്ടു. പഞ്ചായത്തിന്‍റെ വലിയ അഴിമതിയാണ് ഇതു വ്യക്തമാക്കുന്നതെന്ന് നേതാക്കൾ ആരോപിച്ചു. അഴിമതിക്കാർക്കെതിരെ നിയമനടപടി സ്വീകരിക്കണമെന്നാവശ്യപ്പെട്ട് യൂത്ത് കോൺഗ്രസ് വടക്കഞ്ചേരി മണ്ഡലം കമ്മിറ്റിയുടെ നേതൃത്വത്തിൽ പ്രതിഷേധ പ്രകടനവും പൊതുയോഗവും നടത്തി. പ്രതിഷേധയോഗം കോൺഗ്രസ് മണ്ഡലം പ്രസിഡന്‍റ് ഇല്യാസ് പടിഞ്ഞാറെകളം ഉദ്ഘാടനം ചെയ്തു. യൂത്ത് കോൺഗ്രസ് മണ്ഡലം പ്രസിഡന്‍റ് സുനിൽ ചുവട്ടുപാടം അധ്യക്ഷത വഹിച്ചു. റെജി കെ. മാത്യു, ബാബു മാധവൻ, മോഹിത് ചുവട്ടുപാടം, ബാദുഷ പ്രധാനി, സുഗുണൻ കെ. നായർ, കെ. അഭിജിത് പ്രസംഗിച്ചു.

കത്തോലിക്ക കോൺഗ്രസ് നേതൃത്വപരിശീലന ശില്പശാല

വടക്കഞ്ചേരി: കത്തോലിക്ക കോൺഗ്രസ് ഗ്ലോബൽ സമിതിയുടെ ആഭിമുഖ്യത്തിൽ രൂപത സമിതിയുടെ സഹകരണത്തോടെ വടക്കഞ്ചേരി ലൂർദ്മാത ഫൊറോന പള്ളി ഹാളിൽ നടന്ന നേതൃത്വ പരിശീലന ശില്പശാല ഗ്ലോബൽ പ്രസിഡന്‍റ് പ്രഫ. രാജീവ് കൊച്ചുപറമ്പിൽ ഉദ്ഘാടനം ചെയ്തു. രൂപത വൈസ് പ്രസിഡന്‍റ് ജോസ് വടക്കേക്കര അധ്യക്ഷത വഹിച്ചു. ഗ്ലോബൽ ജനറൽ സെക്രട്ടറി ഡോ. ജോസുകുട്ടി ഒഴുകയിൽ, ഗ്ലോബൽ വൈസ് പ്രസിഡന്‍റ് ബെന്നി ആന്‍റണി എന്നിവർ സെഷനുകൾ നയിച്ചു. ഗ്ലോബൽ വൈസ് പ്രസിഡന്‍റ് തോമസ് ആന്‍റണി, ഗ്ലോബൽ സെക്രട്ടറി ഡെന്നി തെങ്ങുംപള്ളി, വർക്കിംഗ് കമ്മിറ്റി അംഗം ജിജോ അറയ്ക്കൽ, രൂപത ഡയറക്ടർ ഫാ. ചെറിയാൻ ആഞ്ഞിലിമൂട്ടിൽ, ഫൊറോന വികാരി ഫാ.അഡ്വ. റെജി പെരുമ്പിള്ളിൽ, രൂപത ജനറൽ സെക്രട്ടറി ആന്‍റണി കുറ്റിക്കാടൻ, ട്രഷറർ ജോസ് മുക്കട, മേലാർകോട് ഫൊറോന ഡയറക്ടർ ഫാ. ക്രിസ് കോയിക്കാട്ടിൽ, ഫൊറോന പ്രസിഡന്‍റുമാരായ വിൽസൺ കൊള്ളന്നൂർ, ബെന്നി മറ്റപ്പിള്ളിൽ, ജോയ് ഫിലിപ്പ്, രൂപത യൂത്ത് കൗൺസിൽ ജനറൽ കോ-ഓർഡിനേറ്റർ എബി വടക്കേക്കര എന്നിവർ നേതൃത്വം നൽകി.

പാലക്കാട് നഗരസഭാപരിധിയിൽ ആയിരം പനവിത്തുകൾ നടും

പാലക്കാട്: ഹരിത കേരള മിഷന്‍റെ നേതൃത്വത്തിൽ നടപ്പാക്കുന്ന ഒരുതൈ നടാം വൃക്ഷവത്കരണ കാന്പയിനിന്‍റെ ഭാഗമായി ആയിരം പനവിത്തുകൾ നട്ടുപിടിപ്പിച്ചു. പാലക്കാട് നഗരസഭാ പരിധിയിൽ നടത്തിയ പരിപാടി നഗരസഭാ ചെയർപേഴ്സണ്‍ പ്രമീള ശശിധരൻ ഉദ്ഘാടനം ചെയ്തു. ജൂണ്‍ അഞ്ചുമുതൽ സെപ്റ്റംബർ 30 വരെ ഒരു കോടി വൃക്ഷത്തൈകൾ നട്ടുപിടിപ്പിക്കുക എന്നതാണ് കാന്പയിനിന്‍റെ ലക്ഷ്യം. ഗവ.വിക്ടോറിയ കോളജിലെ എൻഎസ്എസ് വിദ്യാർഥികളാണ് പനവിത്തുകൾ ശേഖരിച്ച് ഹരിതകേരളമിഷനു നൽകിയത്. കോട്ടമൈതാനത്ത് നടന്ന പരിപാടി നഗരസഭ വൈസ് ചെയർമാൻ ഇ. കൃഷ്ണദാസ് അധ്യക്ഷനായി. ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ പി. സ്മിതേഷ്, കൗണ്‍സിലർ സെലീന ബീവി, ഹരിതകേരളമിഷൻ ജില്ലാ കോ-ഓർഡിനേറ്റർ പി. സൈതലവി, ഹരിതകേരളമിഷൻ ബ്ലോക്ക് കോ-ഓർഡിനേറ്റർ റഷീദ്, ക്ലീൻസിറ്റി മാനേജർ പി. മണി പ്രസാദ്, വിക്ടോറിയ കോളജ് എൻഎസ്എസ് പ്രോഗ്രാം ഡയറക്ടർ ആശ എന്നിവർ പ്രസംഗിച്ചു. വിക്ടോറിയ കോളജ് എൻഎസ്എസ് യൂണിറ്റ് പ്രതിനിധികൾ, നഗരസഭ ആരോഗ്യ വിഭാഗം ജീവനക്കാർ, ഹരിതകർമസേനാംഗങ്ങൾ തുടങ്ങിയവർ പങ്കെടുത്തു.

മാനസമിത്ര ദ്വിദിന ശില്പശാല

പട്ടാന്പി: നിയോജകമണ്ഡലത്തിലെ മാനസമിത്ര പദ്ധതി കേരളത്തിലെ വിദ്യാർഥികളുടെ മാനസികാരോഗ്യ സംരക്ഷണത്തിൽ നാഴികകല്ലാണെന്ന് മന്ത്രി വി. ശിവൻകുട്ടി. സമഗ്ര മാനസികാരോഗ്യ പരിപാടിയായ ‘മാനസമിത്ര’യുടെ ഭാഗമായുള്ള ദ്വിദിന ശില്പശാല ഓണ്‍ലൈനായി ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. വർത്തമാന കാലഘട്ടത്തിൽ അക്കാദമിക് കാര്യങ്ങൾക്കപ്പുറം മാനസികാരോഗ്യത്തിന്കൂടി പ്രാധാന്യം നൽകണം. വിദ്യാർഥികൾക്ക് മികച്ച വിദ്യാഭ്യാസത്തിന് ഇത് സഹായകമാകുമെന്നും മന്ത്രി പറഞ്ഞു. കൊപ്പം നക്ഷത്ര റീജൻസിയിൽ നടന്ന പരിപാടിയിൽ മുഹമ്മദ് മുഹ്സിൻ എംഎൽഎ അധ്യക്ഷനായി. ഡോ.ഹംസ പറന്പിൽ മുഖ്യാഥിതിയായി. സ്കോൾ കേരളം എക്സിക്യൂട്ടീവ് ഡയറക്ടർ ഡോ. ജിനേഷ്കുമാർ, ശ്രദ്ധ കണ്‍വീനർ കെ.പി. ആഷിഫ്, ഡോ, ഷാരോണ്‍, ഡോ. പി.കെ. റഹീമുദ്ദീൻ, വിവിധ ജനപ്രതിനിധികൾ, രാഷ്ട്രീയപാർട്ടി പ്രതിനിധികൾ തുടങ്ങിയവർ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]