ADVERTISEMENT

ADVERTISEMENT

പോപ്പ് പയസ് സ്‌കൂളിൽ കായികമേള

കറ്റാനം: പോപ്പ് പയസ് ഹയർ സെക്കൻഡറി സ്കൂളിൽ 2025 വർഷത്തെ കായികമേള സംഘടിപ്പിച്ചു. എംഎസ്‌സി സ്കൂൾ കറസ്പോണ്ടന്‍റ് ഫാ. ഡാനിയേൽ തെക്കേടത്ത് ഉദ്ഘാടനം ചെയ്തു. പിടിഎ പ്രസിഡന്‍റ് ഗോപൻ അധ്യക്ഷത വഹിച്ചു. പ്രിൻസിപ്പൽ ടി. മോഹൻ, വർഗീസ് മത്തായി, സി.ടി. വർഗീസ്, ജോജി വർഗീസ്, റോയി കെ. ജോർജ് എന്നിവർ പ്രസംഗിച്ചു.

ADVERTISEMENT

കേന്ദ്ര കൃഷിസംഘം കുട്ടനാട് സന്ദർശിച്ചു

ചമ്പക്കുളം: കേന്ദ്ര സർക്കാരിന്‍റെ ഡിപ്പാർട്ട്മെന്‍റ് ഓഫ് അഗ്രികൾച്ചർ ആൻഡ് ഫാർമേഴ്സ് വെൽഫെയർ വകുപ്പിന്‍റെ മെക്കനൈസേഷൻ ആൻഡ് ടെക്നോളജി ഡിവിഷൻ ജോയിന്‍റ് സെക്രട്ടറിയുടെ നേതൃത്വത്തിലുള്ള ആറംഗ സംഘം കുട്ടനാട്ടിൽ പര്യടനം നടത്തി. വിവിധ പാടശേഖരങ്ങൾ സന്ദർശിച്ചു. ചമ്പക്കുളം കൃഷിഭവന് കീഴിലുളള ചെമ്പടി ചക്കം കരി, നാല് നാല്പത്, തൊള്ളായിരം ഇല്ലിമുറി, മൂലപ്പള്ളി പാടശേഖരങ്ങളും ആറു പങ്ക്, നാലായിരം തുടങ്ങി കൈനകരി കൃഷിഭവന് കീഴിലുളള കായൽ നിലങ്ങളിലും സന്ദർശനം നടത്തിയ സംഘം മങ്കൊമ്പ് നെല്ല് ഗവേഷണ കേന്ദ്രത്തിനു കീഴിലുള്ള കൃഷിയിടവും സന്ദർശിച്ചു. സമുദ്രനിരപ്പിനു താഴെ കൃഷി ചെയ്യുന്ന കുട്ടനാട്ടിലെ കർഷകർ നേരിടുന്ന പ്രശ്നങ്ങൾ മറ്റ്സ്ഥലങ്ങളെ അപേക്ഷിച്ചു വ്യത്യസ്തമാണെന്നും ഇവിടെ അധികമായി കണ്ടുവരുന്ന വരിനെല്ല് വിളവിനെയും കർഷക വരുമാനത്തെയും ദോഷകരമായി ബാധിക്കുന്നതായും സംഘം വിലയിരുത്തി. മങ്കൊമ്പ് എം. എസ്. സ്വാമിനാഥൻ നെല്ല് ഗവേഷണ കേന്ദ്രത്തിൽ കുട്ടനാട്ടിലെ വിവിധ കർഷകസംഘ പ്രതിനിധികളുമായും രാഷ്‌ട്രീയ പ്രതിനിധികളുമായും കൂടിക്കാഴ്ച നടത്തി. ജോയിന്‍റ് സെക്രട്ടറി എസ്. രുക്മിണി നേതൃത്വം കൊടുക്കുന്ന സംഘത്തിൽ എ.എൻ. മിശ്ര (ഡെപ്യുട്ടികമ്മിഷണർ), ഡോ.ദിവ്യാ ബാലകൃഷ്ണൻ, (സീനിയർ സയിന്‍റിസ്റ്റ്) ഡോ. വി മനാസ, (സയന്‍റിസ്റ്റ്) ഡോ. എസ്. വിജയകുമാർ (സയന്‍റിസ്റ്റ്), ഡോ. ആർ. ഗോപിനാഥ്(സയന്‍റിസ്റ്റ്) എന്നിവരോടൊപ്പം സംസ്ഥാന കൃഷി വകുപ്പിലെ ഉദ്യോഗസ്ഥരും മുൻ ഗവർണർ കുമ്മനം രാജശേഖരൻ, ഷാജി രാഘവൻ, കൃഷ്ണകുമാർ, ജോർജ് മാത്യം വാച്ചാപറമ്പിൽ എന്നിവരും ഉണ്ടായിരുന്നു. കുട്ടനാട്ടിലെ പര്യടനം പൂർത്തിയാക്കിയ സംഘം അപ്പർ കുട്ടനാട്ടിലെ പെരിങ്ങര, പള്ളിപ്പാട്, കരിപ്പുഴ തുടങ്ങിയ പ്രദേശങ്ങളും സന്ദർശിച്ചു. മുൻ കേന്ദ്രമന്ത്രിരാജീവ് ചന്ദ്രശേഖർ കേന്ദ്ര കൃഷിമന്ത്രി മുമ്പാകെ2025 ജൂലൈ 31ന് സമർപ്പിച്ച കുമ്മനം രാജശേഖരൻ നേതൃത്വം നല്കിയ മൂന്നംഗ സമിതി, കേരളത്തിലെ നെൽ കൃഷി മേഖല നേരിടുന്ന പ്രശ്നങ്ങൾ സംബന്ധിച്ച് തയ്യാറാക്കിയ റിപ്പോർട്ടിന്‍റെ അടിസ്ഥാനത്തിൽ കേരളത്തിലെ പാലക്കാട്, തൃശൂർ, കുട്ടനാട് പ്രദേശങ്ങളിലെ കൃഷി അനുബന്ധ പ്രശ്നങ്ങൾ സംബന്ധിച്ച പഠനത്തിനാണ് കേന്ദ്രസംഘമെത്തിയത്.

സെൻട്രൽ ട്രാവൻകൂർ സഹോദയ ഫെസ്റ്റിനു തുടക്കമായി

തിരുവല്ല: സെൻട്രൽ ട്രാവൻകൂർ സഹോദയ കോംപ്ലക്സ് കലോത്സവം തിരുവല്ല മാന്താനം കാമ്പസിലെ ചോയ്സ് സ്കൂളിൽ ആരംഭിച്ചു. കേരള സഹോദയ കോംപ്ലക്സുകളുടെ കോൺഫെഡറേഷൻ ജനറൽ സെക്രട്ടറി ഡോ. ദീപ ചന്ദ്രൻ ഉദ്ഘാടനം ചെയ്തു. കലോത്സവത്തിൽ ആലപ്പുഴ, കൊല്ലം, പത്തനംതിട്ട ജില്ലകളിലെ 56 സ്കൂളുകളിൽ നിന്നുള്ള അയ്യായിരത്തിൽ പരം മത്സരാർഥികൾ 140 ഇനങ്ങളിൽ പങ്കെടുക്കുന്നുണ്ട്. നൃത്തം, ഗാനം, വാദ്യസംഗീതം, പാശ്ചാത്യ സംഗീതം, പെൻസിൽ ഡ്രോയിംഗ്, പെയിന്‍റിംഗ്, പ്രബന്ധമെഴുത്ത്, കഥാരചന, കവിതാരചന, പ്രസംഗം, ബാൻഡ്‌ മേളം തുടങ്ങി വിവിധ മത്സരങ്ങൾ നാല് പ്രധാന വേദികളിലും 19 ഉപവേദികളിലും അരങ്ങേറും. മാന്താനം സ്കൂളിലെ മത്സരങ്ങൾ ഇന്നും നാളെയും തുടരും. കലോത്സവത്തിന്‍റെ രണ്ടാം ഘട്ടം തിരുവല്ലയിലെ ബിലീവേഴ്സ് റെസിഡൻഷൽ സ്കൂളിൽ ഒക്ടോബർ 24, 25 തീയതികളിലാണ്. ഉദ്ഘാടനച്ചടങ്ങിൽ പ്രോഗ്രാം കോഓർ‌ഡിനേറ്റർ ചിക്കു ശിവൻ, സെൻട്രൽ ട്രാവൻകൂർ സഹോദയ കോംപ്ലസ് പ്രസിഡന്‍റ് ബിൻസി സൂസൻ ടൈറ്റസ്, സെക്രട്ടറി സിസ്റ്റർ മിനി എലിസബത്ത് ജോസഫ്, ട്രഷറാർ നിഷാ എബി, ചോയ്സ് സ്കൂൾ പ്രിൻസിപ്പൽ അനിഷാ സെൻ, വൈസ് പ്രിൻസിപ്പൽ അന്ന ജോൺ നള്ളൂർ, സ്കൂൾ മാനേജർ അഖിൽ എസ്. മിഥുൻ, ജനറൽ കൺവീനർ ലതാ പ്രകാശ് വൈസ് പ്രസിഡന്‍റ് ഫാ. തോമസ്, സി.എം. ജോസഫ്, ഷേർളി ആൻ തോമസ് തുടങ്ങിയവർ പ്രസംഗിച്ചു.

കുട്ടപ്പപ്പണിക്കർ കൊല: പ്രതിയുമായി തെളിവെടുപ്പ് നടത്തി

ചെങ്ങന്നൂർ: 31 വർഷം മുൻപ് നടന്ന കൊലപാതകക്കേസിലെ പ്രതിയുമായി പോലീസ് തെളിവെടുപ്പ് നടത്തി. ചെറിയനാട് അരിയന്നൂർ ചെന്നങ്കോടത്ത് വീട്ടിൽ കുട്ടപ്പപ്പണിക്കരെ (71) മർദിച്ച് കൊലപ്പെടുത്തിയ കേസിലെ പ്രതിയായ അരിയന്നൂർശേരി കുറ്റിയിൽ പടീറ്റതിൽ ജയപ്രകാശി(57)നെയാണ് ചെങ്ങന്നൂർ പോലീസ് തെളിവെടുപ്പിനായി സംഭവസ്ഥലത്തെത്തിച്ചത്. ചെങ്ങന്നൂർ സിഐ എ.സി. വിപിന്‍റെ നേതൃത്വത്തിലുള്ള പോലീസ് സംഘമാണ് തെളിവെടുപ്പ് നടത്തിയത്. അരിയന്നൂർശേരി പിഐപി കനാൽ ബണ്ടിനു സമീപം ആക്രമണം നടന്ന സ്ഥലം ജയപ്രകാശ് പോലീസിനു കാണിച്ചുകൊടുത്തു. സംഭവം വിശദികരിച്ചു. 1994 നവംബർ 15ന് രാത്രി ഏഴിനാണ് കൊലപാതകത്തിലേക്ക് നയിച്ച സംഭവം നടന്നത്. ജയപ്രകാശിന്‍റെ പിതാവിനെക്കുറിച്ച് മോശമായി സംസാരിച്ചതിനെത്തുടർന്ന് കുട്ടപ്പപ്പണിക്കരെ കല്ലുകൊണ്ട് മർദിക്കുകയായിരുന്നു. ഗുരുതര പരിക്കുകളോടെ കോട്ടയം മെഡിക്കൽ കോളജ് ആശുപത്രിയിൽ ചികിത്സയിലായിരുന്ന അദ്ദേഹം 1994 ഡിസംബർ 15ന് മരിച്ചു. സംഭവത്തിനുശേഷം പിറ്റേന്ന് തന്നെ ജയപ്രകാശ് മുംബൈയിലേക്കും കുട്ടപ്പ പ്പണിക്കർ മരിച്ചതറിഞ്ഞപ്പോൾ സൗദിയിലെ ജോലിസ്ഥലത്തേക്കും മടങ്ങി. 1999-ൽ കോടതി ഇയാളെ പിടികിട്ടാപ്പുള്ളിയായി പ്രഖ്യാപിച്ചു. മൂന്നു വർഷത്തിനുശേഷം കാസർഗോഡ് സ്വദേശി എന്ന വ്യാജപേരിൽ ചെന്നിത്തലയിൽനിന്ന് ഇയാൾ വിവാഹം കഴിച്ചു. എല്ലാ വർഷവും അവധിക്ക് നാട്ടിലെത്തിയിരുന്നെങ്കിലും ഭാര്യവീടിന്‍റെ വിലാസത്തിൽ പാസ്‌പോർട്ട് പുതുക്കിയിരുന്നതിനാൽ ഇയാളെ കണ്ടെത്താൻ പോലീസിനു കഴിഞ്ഞില്ല. രഹസ്യവിവരത്തെത്തുടർന്ന്ജില്ലാ പോലീസ് മേധാവി എം.പി. മോഹനചന്ദ്രന്‍റെ നിർദേശപ്രകാരം ചെങ്ങന്നൂർ ഡിവൈഎസ്പി പി. ബിനുവിന്‍റെ നേതൃത്വത്തിൽ നടത്തിയ അന്വേഷണത്തിലാണ് കഴിഞ്ഞ ദിവസം ചെന്നിത്തല ഒരിപ്രയിലുള്ള ഭാര്യാവീടിന് സമീപത്തുനിന്ന് ജയപ്രകാശിനെ പിടികൂടിയത്. എസ്ഐ എസ്. പ്രദീപ്, സിപിഒമാരായ ബിജോഷ് കുമാർ, വിബിൻ, കെ. ദാസ് എന്നിവർ തെളിവെടുപ്പ് സംഘത്തിലുണ്ടായിരുന്നു.

വിമതവിഭാഗം ഒന്നേകാല്‍ കോടി തിരിമറി നടത്തിയെന്ന് സ്വർണ വ്യാപാരികൾ

ആലപ്പുഴ: സമാന്തര സംഘടന രൂപീകരിച്ചവരെ ജില്ലാ രജിസ്ട്രാര്‍ വഴിവിട്ട് സഹായിച്ചെന്ന ആരോപണവുമായി ഓള്‍ കേരള ഗോള്‍ഡ് ആൻഡ് സില്‍വര്‍ മര്‍ച്ചന്‍റ്സ് അസോസിയേഷന്‍. അസോസിയേഷന്‍ വര്‍ക്കിംഗ് പ്രസിഡന്‍റ് റോയി പാലാത്ര പത്രസമ്മേളനത്തിലാണ് ആരോപണമുന്നയിച്ചത്. തങ്ങള്‍ എ 202/2000 ആയി രജിസ്റ്റര്‍ ചെയ്തു പ്രവര്‍ത്തിച്ചു വരുന്ന സംഘടനയും രജിസ്‌ട്രേഷന്‍ യഥാസമയം പുതുക്കി വരുന്നതുമാണെന്ന് ഓള്‍ കേരള ഗോള്‍ഡ് ആന്‍ഡ് സില്‍വര്‍ മര്‍ച്ചന്‍റ്സ് അസോസിയേഷന്‍ അറിയിച്ചു. ഇക്കാര്യം ജനറല്‍ബോഡി ചേര്‍ന്നു ഭരണഘടനയില്‍ മാറ്റങ്ങള്‍ വരുത്തുകയും മാറ്റങ്ങള്‍ നിയമപ്രകാരം രജിസ്ട്രാറെ ഓഗസ്റ്റ് ഒന്നിനു രേഖാമൂലം അറിയിക്കുകയും ചെയ്തു. എന്നിട്ടും രജിസ്ട്രാറുടെ നിലപാട് മൂലം സംഘടനയുടെ അക്കൗണ്ടില്‍നിന്ന് ഒന്നേകാല്‍ കോടി രൂപ രണ്ടു പ്രാവശ്യമായി വിമതർ പിന്‍വലിച്ചു. ജില്ലാ രജിസ്ട്രാറുടെ നടപടി മൂലം സാമ്പത്തിക നഷ്ടവും സംഘടനാ പ്രവര്‍ത്തനത്തിനു തടസവും നേരിട്ടതായും സംഘടന കുറ്റപ്പെടുത്തി. 2014ല്‍ കൊടുവള്ളി സുരേന്ദ്രന്‍, എസ്. അബ്ദുല്‍ നാസര്‍, ഐമുഹാജി എന്നിവരെ സംഘടനയില്‍നിന്നു പുറത്താക്കി. പുറത്താക്കപ്പെട്ടവര്‍ ചേര്‍ന്നു സമാന്തര സംഘടന രൂപീകരിച്ച് ചിഹ്നം, കൊടി, സംഘടനയുടെ പേര് എന്നിവ അനധികൃതമായി ഉപയോഗിക്കുകയും ബാങ്കില്‍ നിക്ഷേപിച്ച പണം സമാന്തര സംഘടന രൂപീകരിച്ചവര്‍ പിന്‍വലിക്കുകയും ചെയ്‌തെന്നും ഓള്‍ കേരള ഗോള്‍ഡ് ആൻഡ് സില്‍വര്‍ മര്‍ച്ചന്‍റ്സ് അസോസിയേഷന്‍ വര്‍ക്കിംഗ് പ്രസിഡന്‍റ് റോയി പാലത്തറ പത്രസമ്മേളനത്തില്‍ കുറ്റപ്പെടുത്തി. അന്തിമ വിധി വന്നിട്ടില്ലെന്ന് മറുപക്ഷം ആലപ്പുഴ: കേരളത്തിലെ സ്വര്‍ണ വ്യാപാര സമൂഹത്തിലെ 99ശതമാനം പേരും തങ്ങളോടൊപ്പമാണെന്നും ഓള്‍ കേരള ഗോള്‍ഡ് ആന്‍ഡ് സില്‍വര്‍ മര്‍ച്ചന്‍റ്സ് അസോസിയേഷന്‍ തങ്ങളുടേതാണെന്നും പ്രസിഡന്‍റ് കെ. സുരേന്ദ്രന്‍, ജനറല്‍ സെക്രട്ടറി അഡ്വ.എസ്.അബ്ദുല്‍ നാസര്‍ എന്നിവര്‍ പറഞ്ഞു. ഫെബ്രുവരിയില്‍ നടന്ന അസോസിയേഷന്‍ തെരഞ്ഞെടുപ്പില്‍ ദയനീയമായി പരാജയപ്പെട്ടതിനെത്തുടര്‍ന്നാണ് ബി.ഗോവിന്ദനും നാലുപേരും പുറത്തു പോയി മറ്റൊരു വിഭാഗവുമായി ചേര്‍ന്നിരുന്നു. ഇവർ പോയ ശേഷം നിരവധി പരിപാടികള്‍ കേരളത്തില്‍ നടത്തി. കേരളത്തിലെ സ്വര്‍ണ വ്യാപാരികളുടെ സമ്പൂര്‍ണ മഹാസമ്മേളനം ഉള്‍പ്പെടെ തങ്ങള്‍ നടത്തിയിരുന്നുവെന്നും കെ. സുരേന്ദ്രന്‍ അറിയിച്ചു. 2013ൽ സംഘടന പിളര്‍ന്ന ശേഷമുള്ള അവകാശ തര്‍ക്കങ്ങള്‍ വിവിധ കോടതികളില്‍ നടക്കുകയാണെന്നും അന്തിമവിധി ഇതുവരെയും വന്നിട്ടില്ലെന്നും കെ. സുരേന്ദ്രന്‍ അവകാശപ്പെട്ടു. അസോസിയേഷന്‍റെ പഴയ നിയമാവലിയിലും പുതിയ നിയമാവലിയിലും ചെയര്‍മാന്‍ എന്ന സ്ഥാനം ഇല്ലെന്നും ഗോവിന്ദന്‍റെ ചെയര്‍മാന്‍ പദവി സാങ്കല്പികം മാത്രമാണെന്നും ഇരുവരും ആരോപിച്ചു.

കൃഷിനാശം: കേന്ദ്രസർക്കാർ നഷ്ടപരിഹാരം നൽകണം

കുട്ടനാട്: രണ്ടാംകൃഷിയിൽ കുട്ടനാട്ടിൽ ബാക്ടീരിയൽ ബ്ലാസ്റ്റ് മൂലമുള്ള വൻകൃഷി നാശവും വരിനെല്ല്, പീലികവിട എന്നിവയുടെ വളർച്ചമൂലം കർഷകർ നേരിടുന്ന പ്രശ്നങ്ങൾ രാഷ്‌ട്രീയ കിസാൻ മഹാസംഘ് കേന്ദ്രപഠന പ്രതിനിധി സംഘത്തിനു മുമ്പിൽ വിശദീകരിച്ചു. കേന്ദ്രസർക്കാർ കൃഷി പ്രിൻസിപ്പൽ സെക്രട്ടറി രുഗ്മിണി മുമ്പാകെ കുട്ടനാട്ടിലെ കർഷകർ നേരിടുന്ന പ്രധാന പ്രശ്നങ്ങളായ നെല്ല് വില ക്വിറ്റലിന് 3600 രൂപയായി ഉയർത്തുക, കൊയ്ത്ത് കഴിഞ്ഞ ഉടൻ നെല്ല് സംഭരിക്കുകയും നെല്ലിന്‍റെ വില കർഷകർക്ക് ഉടൻ നൽകുകയും ചെയ്യുക, കൈകാര്യച്ചെലവ് സർക്കാർ പൂർണമായും ഏറ്റെടുക്കുകയും ഇർപ്പത്തിന്‍റെ പേരിൽ കീഴിവ് ഇടാക്കുന്ന നടപടി ഇല്ലാതാക്കുകയും ചെയ്യണമെന്നും നിവേദനത്തിൽ ആവശ്യപ്പെട്ടു. രാഷ്‌ട്രീയ കിസാൻ മഹാസംഘ് നേതാക്കന്മാരായ ടോം ജോസഫ് ചമ്പക്കുളം, നൈനാൻ തോമസ് മുളപ്പാംമഠം, ഔസേപ്പച്ചൻ ചെറുകാട്, തോമസ് വർക്കി വടുതല, കൈനകരി കൃഷിഭവനു കീഴിലുള്ള ഉമ്പിക്കാട്ടുപാടശേഖരത്തിലെ കർഷകരായ സതീശൻ, റോയി എന്നിവർ വിഷയങ്ങൾ കേന്ദ്രകൃഷി സംഘത്തിനു മുമ്പിൽ വിശദീകരിക്കുകയും നിവേദനം നൽകുകയും ചെയ്തു.

നിവേദനം നൽകി ചങ്ങനാശേരി അതിരൂപത

ചമ്പക്കുളം: ചങ്ങനാശേരി അതിരൂപതയുടെ സംഘം കുട്ടനാട് സന്ദർശിച്ച കേന്ദ്രകൃഷിസംഘത്തെ കണ്ടു നിവേദനം നൽകി. മുഖ്യ വികാരി ജനറല്‍ ഫാ.ആന്‍റണി ഏത്തയ്ക്കാട്ട് കുട്ടനാടന്‍ കര്‍ഷകര്‍ നേരിടുന്ന പ്രധാന പ്രശ്‌നങ്ങള്‍ സംഘം മുന്‍പാകെ അവതരിപ്പിച്ചു. സമയബന്ധിതമായി നെല്ല് വില ലഭ്യമാക്കുക, ഉത്പാദനച്ചെലവ് അടിസ്ഥാനമാക്കി താങ്ങുവില നിശ്ചയിക്കുക, ഇന്‍ഷ്വറന്‍സ് പദ്ധതികള്‍ കര്‍ഷകര്‍ക്കു ഗുണകരമാകുന്ന രീതിയില്‍ ക്രമീകരിക്കുക, റാംസര്‍ സൈറ്റിന്‍റെ ആനുകൂല്യം കുട്ടനാടന്‍ കര്‍ഷകര്‍ക്ക് ലഭ്യമാക്കുക, വിത്ത് വളം കീടനാശിനികള്‍ മുതലായവയുടെ വില നിയന്ത്രിക്കുക, കുട്ടനാട്ടിലെ വെള്ളക്കെട്ട് ഒഴിവാക്കാൻ നടപടി സ്വീകരിക്കുക തുടങ്ങിയ ആവശ്യങ്ങൾ നിവേദനത്തിൽ ഉണ്ട്. ക്രിസ് ഡയറക്ടര്‍ ഫാ. തോമസ് താന്നിയത്ത്, ഫാ. മോഹന്‍ മുടന്താഞ്ഞിലില്‍, എകെസിസി അതിരൂപത ഡയറക്ടര്‍ ഫാ. സാവിയോ മാനാട്ട്, കര്‍ഷക പ്രമുഖന്‍ ജോസ് ജോണ്‍ വെങ്ങാന്തറ എന്നിവരും സംഘത്തിലുണ്ടായിരുന്നു.

കുട്ടനാട് സ്റ്റഡീസ് ആൻഡ് റിസര്‍ച്ച് സെന്‍റര്‍ ഇന്നുതുറക്കും

ബെന്നി ചിറയിൽ ചങ്ങനാശേരി: എസ്ബി കോളജില്‍ കുട്ടനാട് സ്റ്റഡീസ് ആൻഡ് റിസര്‍ച്ച് സെന്‍റര്‍ ഇന്നുതുറക്കും. കുട്ടനാടിന്‍റെ സുസ്ഥിരവികസനം, നിലനില്‍പ്പ്, കാര്‍ഷിക പരിസ്ഥിതി പഠനം, ഗവേഷണം എന്നിവയ്ക്കുവേണ്ടിയാണ് പുതിയ സെന്‍റര്‍ തുറക്കുന്നത്. കുട്ടനാട് ഇന്നലെ, ഇന്ന്, നാളെ സെന്‍ററില്‍ തുടര്‍ച്ചയായ വിശകലനം നടത്തും. ഉച്ചകഴിഞ്ഞു രണ്ടിന് കോളജിലെ കര്‍ദിനാള്‍ മാര്‍ പടിയറ സെന്‍ററില്‍ ആലപ്പുഴ ജില്ലാ കളക്ടര്‍ അലക്‌സ് വര്‍ഗീസ് ഉദ്ഘാടനം ചെയ്യും. ആര്‍ച്ച്ബിഷപ് മാര്‍ തോമസ് തറയില്‍ മുഖ്യപ്രഭാഷണം നടത്തും. കോളജ് മാനേജര്‍ മോണ്‍. ആന്‍റണി എത്തയ്ക്കാട്ട്, പ്രിന്‍സിപ്പല്‍ റവ.ഡോ. ടെഡി കാഞ്ഞൂപ്പറമ്പില്‍ എന്നിവര്‍ പ്രസംഗിക്കും. കുട്ടനാടിന്‍റെ ഹൈഡ്രോളജി, കൃഷി, മത്സ്യബന്ധനം വിവിധ ഉപജീവനോപാധികള്‍ തുടങ്ങിയ വിഷയങ്ങള്‍ക്കാണ് പ്രഥമ പരിഗണന. അധ്യാപകരുടെയും വിദ്യാര്‍ഥികളുടെയുമൊപ്പം പൊതുജന പങ്കാളിത്തവും ഗവേഷണ പ്രവര്‍ത്തനങ്ങളില്‍ ഉറപ്പാക്കും. വിവരശേഖരം സജ്ജമാക്കും സെന്‍റ് ബര്‍ക്ക്മാന്‍സ് കോളജിലെ വിശാലമായ ലൈബ്രറിയുടെ ഭാഗമായാണ് കുട്ടനാട് വിജ്ഞാനകേന്ദ്രം സ്ഥാപിക്കുന്നത്. കുട്ടനാടുമായി ബന്ധപ്പെട്ട് ലഭ്യമായ എല്ലാ പുസ്തകങ്ങളും ലേഖനങ്ങളും ഇലക്‌ട്രോണിക് സ്രോതസുകളും ലഭ്യമാക്കും. വിദ്യാര്‍ഥികള്‍ക്കും ഗവേഷകര്‍ക്കും ഉപയോഗപ്രദമായരീതിയില്‍ ഏറ്റവും മികച്ച റഫറന്‍സ് കേന്ദ്രമാക്കി മാറ്റും. റവ.ഡോ. ടെഡി കാഞ്ഞൂപ്പറമ്പില്‍ എസ്ബി കോളജ് പ്രിന്‍സിപ്പല്‍ സ്റ്റുഡന്‍റ്സ് റിസര്‍ച്ച് ഫോറം രൂപീകരിക്കും കോളജിലെ കുട്ടനാട് പ്രദേശത്തുനിന്നുള്ള വിദ്യാര്‍ഥികളെ ഉള്‍പ്പെടുത്തി കുട്ടനാട് സ്റ്റുഡന്‍റ്സ് റിസര്‍ച്ച് ഫോറം രൂപീകരിച്ച് സ്ഥിരവും കൃത്യവുമായ ഒരു വിവരശേഖരണം ഉറപ്പാക്കും. ലഭിക്കുന്ന വിവരങ്ങള്‍ കുട്ടനാട് മേഖലയുമായി ബന്ധപ്പെട്ട അധ്യാപകര്‍ ഉള്‍പ്പെടുന്ന ടീച്ചേഴ്‌സ് റിസര്‍ച്ച് ഫോറം പരിഗണിക്കേണ്ട ഗവേഷണവിഷയങ്ങളുടെ ഒരു മുന്‍ഗണനാക്രമം തയാറാക്കും. അധ്യാപകരുടെ നേതൃത്വത്തില്‍ വിഷയത്തെ ആഴത്തില്‍ പഠിച്ച് രാജ്യത്തിനകത്തും പുറത്തുമുള്ള മികച്ച സ്ഥാപനങ്ങളും ശാസ്ത്രജ്ഞരുമായുള്ള കോളാബറേഷനിലൂടെ നൂതനവും കുട്ടനാടിന്‍റെ സാഹചര്യങ്ങള്‍ക്ക് അനുയോജ്യമായ പരിഹാരങ്ങള്‍ നിര്‍ദേശിക്കും. ഡോ. റൂബിന്‍ ഫിലിപ്പ് കുട്ടനാട് സ്റ്റഡീസ് ആൻഡ് റിസര്‍ച്ച് സെന്‍റര്‍ കോ-ഓര്‍ഡിനേറ്റര്‍ ഒരുനെല്ലും ഒരുമീനും പദ്ധതി 12 മാസവും വരുമാനം ലഭിക്കുന്ന ഒരുനെല്ലും ഒരുമീനും പദ്ധതി നടപ്പാക്കണം. വര്‍ഷകാലത്ത് നെല്ലും കൊയ്ത്തിനുശേഷം വേനല്‍ക്കാലത്ത് മത്സ്യകൃഷിയും കര്‍ഷകര്‍ക്ക് ഗുണകരമാണ്. പാടശേഖരങ്ങളുടേയും കായലുകളുടേയും ബണ്ടുകള്‍ ബലപ്പെടുത്തിയാല്‍ ഫാം റോഡുകള്‍ മെച്ചമാകും. ബണ്ടിന്‍റെ വശങ്ങളില്‍ പച്ചക്കറി കൃഷിയിറക്കാനാകും. താന്‍ കാലങ്ങളോളം കൃഷി ചെയ്തിരുന്ന ചിത്തിരക്കായലില്‍ ഏഴര കിലോമീറ്റര്‍ ദൂരത്തില്‍ ഫാം റോഡ് സജ്ജമാണ്. ജോസ് ജോണ്‍ വെങ്ങാന്തറ (കുട്ടനാട്ടിലെ മുതിര്‍ന്ന കര്‍ഷകന്‍) കാത്തിരിക്കാന്‍ സമയമില്ല കര്‍ഷകരും കര്‍ഷകത്തൊ ഴിലാളികളും ജീവിത മത്സരത്തിന്‍റെ എല്ലാ രംഗങ്ങളിലും പിന്നാക്കം പോകുന്നു. അടിസ്ഥാന വിഷയങ്ങള്‍ പഠിക്കാനും ഗവേഷണത്തിലൂടെ രക്ഷാപദ്ധതികള്‍ കരുപ്പിടിപ്പിക്കാനും ആധികാരികതയും വിശ്വാസ്യതയുമുള്ള ഒരു സംവിധാനം അനിവാര്യമാണ്. അതിനാണ് എസ്ബി കോളജില്‍ സെന്‍റര്‍ ഫോര്‍ കുട്ടനാട് സ്റ്റഡീസ് ആൻഡ് റിസര്‍ച്ച് സെന്‍റര്‍ തുടക്കംകുറിക്കുന്നത്. വര്‍ഗീസ് കണ്ണമ്പള്ളി ഡയറക്ടര്‍ ബോര്‍ഡംഗം, കുട്ടനാട് സ്റ്റഡീസ് ആൻഡ് റിസര്‍ച്ച് സെന്‍റർ

നെല്ല് പുഴുങ്ങിക്കുത്ത് വ്യവസായങ്ങൾ പുനരാരംഭിക്കണം: കർഷക ഫെഡറേഷൻ

ആലപ്പുഴ: കുട്ടനാട്ടിലെ കർഷകരുടെ രക്ഷയ്ക്കായി നെല്ല് പുഴുങ്ങിക്കുത്ത് വ്യവസായം പുനരാരംഭിക്കണമെന്ന് കേരള സംസ്ഥാന നെൽ- നാളികേര കർഷക ഫെഡറേഷൻ. കുട്ടനാട് കേന്ദ്രീകരിച്ച് ധാരാളം അരി ഉത്പാദന കേന്ദ്രങ്ങൾ ഉണ്ടായിരുന്നു. ചെറുതും വലുതുമായി പുഴുങ്ങിക്കുത്ത് കേന്ദ്രങ്ങൾ ശരാശരി 15 എണ്ണം പഞ്ചായത്ത് അടിസ്ഥാനത്തിൽ പ്രവർത്തിച്ചിരുന്നു. അനുബന്ധമായി നെല്ലുകുത്തുമില്ലുകളും പ്രവർത്തിച്ചിരുന്നു. സഹകരണ സംഘങ്ങളുടെ സാമ്പത്തിക പിന്തുണ നൽകിക്കൊണ്ട് നെല്ല് പുഴുങ്ങിക്കുത്ത് വ്യവസായം ചെറു സഹകരണ സംഘങ്ങൾ മുഖേന ആരംഭിച്ചാൽ കാർഷിക മേഖലയുടെ പ്രതിസന്ധിക്കും തൊഴിൽ മേഖലയുടെ സംരക്ഷണത്തിനും ഒരു പരിധി വരെ പരിഹാരം കണ്ടെത്താൻ ആകുമെന്ന് കർഷക സംഗമം ഉദ്ഘാടനം ചെയ്ത് കർഷക ഫെഡറേഷൻ പ്രസിഡന്‍റ് ബേബി പാറക്കാടൻ പറഞ്ഞു. ഫെഡറേഷന്‍റെ ആഭിമുഖ്യത്തിൽ നടത്തിയ കർഷകസംഗമത്തിൽ വർക്കിംഗ് പ്രസിഡന്‍റ് ആന്‍റണി കരിപ്പാശേരി അധ്യക്ഷത വഹിച്ചു. പി.എ. കുഞ്ഞുമോൻ, ജോ നെടുങ്ങാട്, ഹക്കീം മുഹമ്മദ് രാജാ, ജോസ് ടി. പൂണിചിറ, റോയി വേലിക്കെട്ടിൽ, എൻ.എൻ. ഗോപിക്കുട്ടൻ, തോമസുകുട്ടി വാഴപ്പള്ളിക്കളം, ഇ. ഖാലിദ്, ജോർജ് തോമസ് ഞാറക്കാട്, ബിനു നെടുമ്പുറം എന്നിവർ പ്രസംഗിച്ചു.

കുടുംബാരോഗ്യ കേന്ദ്രം ഉദ്ഘാടനം

കായംകുളം: ആർദ്രം പദ്ധതിയിൽ പത്തിയൂർ കുടുംബാരോഗ്യ കേന്ദ്രത്തിൽ നിർമിച്ച പുതിയ കെട്ടിടത്തിന്‍റെ ഉദ്ഘാടനം മന്ത്രി വീണാ ജോർജ് നിർവഹിച്ചു. യു. പ്രതിഭ എംഎൽഎ അധ്യക്ഷയായി. മുതുകുളം ബ്ലോക്ക് പഞ്ചായത്ത് പ്രസിഡന്‍റ് ഡി. അംബുജാക്ഷി മുഖ്യപ്രഭാഷണം നടത്തി. പത്തിയൂർ പഞ്ചായത്ത് പ്രസിഡന്‍റ് എൽ. ഉഷ, ജില്ലാ മെഡിക്കൽ ഓഫീസർ ഡോ. ജമുനാ വർഗീസ്, പഞ്ചായത്ത് വൈസ് പ്രസിഡന്‍റ് മനു ചെല്ലപ്പൻ, ബ്ലോക്ക് പഞ്ചായത്തംഗങ്ങളായ എം. ജനുഷ, മണി വിശ്വനാഥ് തുടങ്ങിയവർ പ്രസംഗിച്ചു.

കേന്ദ്രമന്ത്രി സുരേഷ് ഗോപിയുടെ പ്രസ്താവന രാഷ്‌ട്രീയനേട്ടത്തിനുവേണ്ടി: സിപിഐ

ആലപ്പുഴ: കേന്ദ്രമന്ത്രി സുരേഷ് ഗോപി ആലപ്പുഴയുടെ വ്യാവസായികരംഗത്തെക്കുറിച്ച് നടത്തിയ പ്രസ്താവന അനുചിതവും അറിവില്ലായ്മയുമാണെന്ന് സിപിഐ ജില്ലാ കൗണ്‍സില്‍ പ്രസ്താവനയിലൂടെ അറിയിച്ചു. ആലപ്പുഴ ജില്ലയിലെ തലയെടുപ്പുള്ള എല്ലാ വ്യാവസായിക സ്ഥാപനങ്ങളും കമ്യുണിസ്റ്റ് പാർട്ടിയുടെയും പാർട്ടി നേതാവായിരുന്ന ടി.വി. തോമസിന്‍റെയും ഭരണകാലത്ത് സ്ഥാപിക്കപ്പെട്ടിട്ടുള്ളതാണെന്ന സത്യം ആർക്കും നിരാകരിക്കാൻ കഴിയുന്നതല്ല. ഇന്നും ആലപ്പുഴയിൽ തലയെടുപ്പോടെ നിലകൊള്ളുന്ന കേരള സ്റ്റേറ്റ്സ് ഡ്രഗ്സ് ആൻഡ് ഫാർമസ്യൂട്ടിക്കൽസ്, ആട്ടോകാസ്റ്റ്, കയർ കോർപറേഷൻ, ഫോം മാറ്റിംഗ്സ് ഇന്ത്യ ലിമിറ്റഡ്, കേരള സ്പിന്നേഴ്സ്, കയർ ഫെഡ്, കയർത്തൊഴിലാളികളെ സംരക്ഷിക്കുന്നതിനായി സ്ഥാപിച്ച പ്രാഥമിക കയർ സഹകരണസംഘങ്ങളും മാറ്റ്സ് ആൻഡ് മാറ്റിംഗ്സ് സൊസൈറ്റികളും തുടങ്ങി ജില്ലയിലെ എല്ലാ വ്യവസായ സ്ഥാപനങ്ങളും കമ്യുണിസ്റ്റ് പാർട്ടിയുടെ ഭാവനാപൂർണമായ തീരുമാനങ്ങളുടെ സൃഷ്ടിയാണ്. കേരളത്തിന്‍റെ പൊതു രാഷ്ട്രീയത്തെക്കുറിച്ചും ആലപ്പുഴയുടെ സമരചരിത്രത്തെക്കുറിച്ചും ബോധ്യമില്ലാതെ കേന്ദ്രമന്ത്രി നടത്തുന്ന വിലകുറഞ്ഞ ജല്പനങ്ങളെ അർഹിക്കുന്ന അവജ്ഞയോടെ കേരള സമൂഹം തള്ളിക്കളയുമെന്ന് സിപിഐ ജില്ലാ കമ്മിറ്റി പ്രസ്താവനയിലൂടെ അഭിപ്രായപ്പെട്ടു.

പായിപ്പാട് ജലോത്സവ തർക്കം: വീയപുരം ചുണ്ടൻ തന്നെ ജേതാവ്

ഹരിപ്പാട്: പായിപ്പാട് ജലോത്സവത്തിലെ ഫൈനൽ മത്സരത്തിലുണ്ടായ തർക്കം പരിഹരിച്ച് ചെങ്ങന്നൂർ റവന്യു ഡിവിഷണൽ ഓഫീസർ ഔദ്യോഗിക ഉത്തരവ് പുറപ്പെടുവിച്ചു. വീയപുരം ചുണ്ടൻ ഒരു നെല്ലട വ്യത്യാസത്തിൽ ഫിനിഷിംഗ് ലൈൻ ആദ്യം കടന്നതായി ജൂറി അംഗങ്ങൾ സ്ഥിരീകരിച്ചു. കഴിഞ്ഞ 22ന് ആർഡിഒ ചേംബറിൽ നടന്ന യോഗത്തിൽ മേരിപ്പാടം ചുണ്ടൻവള്ള സമിതി, വീയപുരം ചുണ്ടൻവള്ള സമിതി, പായിപ്പാട് വള്ളംകളി സമിതി അംഗങ്ങൾ, ജഡ്ജസ് എന്നിവർ പങ്കെടുത്തു. ജൂറി അംഗങ്ങൾ ഔദ്യോഗിക രേഖകളും വിഡിയോ ദൃശ്യങ്ങളും വിശദമായി പരിശോധിച്ചു. ഇരുകരകളിലും സ്ഥാപിച്ച ഔദ്യോഗിക കാമറകളിൽനിന്നുള്ള വീ ഡിയോകൾ പലതവണ പരിശോധിച്ച ശേഷമാണ് വീയപുരം ചുണ്ടന്‍റെ വിജയം സ്ഥിരീകരിച്ചത്. ചെങ്ങന്നൂർ ആർടിഒ വിജയസേനൻ, ചെങ്ങന്നൂർ ഡെപ്യൂട്ടി പോലീസ് സൂപ്രണ്ട് എം.കെ. ബിനുകുമാർ, കായംകുളം ഡെപ്യൂട്ടി പോലീസ് ടി. ബിനുകുമാർ, കെഎസ്ബിആർഎ പ്രസിഡന്‍റ് ആർ.കെ. കുറുപ്പ് എന്നിവരായിരുന്നു ജൂറി അംഗങ്ങൾ.

ശ്രീകൃഷ്ണജയന്തിക്ക് കെട്ടിയ കൊടിതോരണങ്ങൾ നശിപ്പിച്ച് സിപിഎം ഓഫീസിൽ കൊണ്ടിട്ട യുവാവ് പിടിയിൽ

തഴക്കര: ശ്രീകൃഷ്ണജയന്തിയോടനുബന്ധിച്ചുള്ള കൊടിതോരണങ്ങള്‍ നശിപ്പിച്ച് സിപിഎം ഓഫീസിനു മുന്നില്‍ കൊണ്ടിട്ട സംഭവത്തില്‍ യുവാവിനെ പോലീസ് പിടികൂടി. മാവേലിക്കര തഴക്കര കുന്നം അമ്പാടിയില്‍ അജയ് കൃഷ്ണ(22)യാണ് ചെങ്ങന്നൂര്‍ ഡിവൈഎസ്പിയുടെ പ്രത്യേക അന്വേഷണസംഘവും മാവേലിക്കര പോലീസ് ഇന്‍സ്പെക്ടര്‍ സി. ശ്രീജിത്തിന്‍റെ നേതൃത്വത്തിലുള്ള പോലീസും ചേര്‍ന്ന് പിടികൂടിയത്. കഴിഞ്ഞ 14ന് പുലര്‍ച്ചെയാണ് നാട്ടില്‍ കലാപ അന്തരീക്ഷം സൃഷ്ടിക്കുന്നതിനായി മാവേലിക്കര പൈനുംമൂട് ജംഗ്ഷന്‍ മുതല്‍ കുന്നം ധര്‍മശാസ്താ ക്ഷേത്രത്തിന്‍റെ മുന്‍വശംവരെ ശ്രീകൃഷ്ണജയന്തിയോടനുബന്ധിച്ച കെട്ടിയിരുന്ന കൊടികള്‍ നശിപ്പിക്കുകയും കുറച്ചു കൊടികള്‍ തഴക്കര വേണാട് ജംഗ്ഷനു സമീപമുള്ള സിപിഎമ്മിന്‍റെ പാര്‍ട്ടി ഓഫീസിനു മുന്‍വശം കൊണ്ടിടുകയും ചെയ്തതായി മാവേലിക്കര പോലീസില്‍ പരാതി ലഭിച്ചത്. പ്രതിയെ കുടുക്കിയത് സിസിടിവി ദൃശ്യം പരാതിയില്‍ കേസ് രജിസ്റ്റര്‍ ചെയ്തതിന്‍റെ അടിസ്ഥാനത്തില്‍ ആലപ്പുഴ ജില്ലാ പോലീസ് മേധാവി എം.പി. മോഹനചന്ദ്രന്‍ നായരുടെ നിര്‍ദേശപ്രകാരം ചെങ്ങന്നൂര്‍ ഡിവൈഎസ്പി എം.കെ. ബിനുകുമാറിന്‍റെ മേല്‍നോട്ടത്തില്‍ അന്വേഷണസംഘം രൂപീകരിക്കുകയും ഊര്‍ജിത അന്വേഷണം നടത്തുകയുമായിരുന്നു. കുന്നത്തേയും സമീപ പ്രദേശങ്ങളിലെയും സിസിടിവി ദൃശ്യങ്ങള്‍ പരിശോധിച്ചപ്പോള്‍ ഒരാള്‍ ബൈക്കില്‍ എത്തി കൊടികള്‍ നശിപ്പിക്കുന്നതായി കണ്ടെത്തിയതോടെയാണ് പ്രതി പിടിയിലായത്.

മോഷണക്കേസിലെ പ്രതി 14 വർഷങ്ങൾക്കുശേഷം പിടിയിൽ

മാന്നാർ: മോഷണക്കേസിൽ ജാമ്യത്തിൽ ഇറങ്ങി മുങ്ങിയ പ്രതി 14 വർഷങ്ങൾക്കുശേഷം പിടിയിൽ. നിരണം ആശാൻകുടി പുതുവൽ വീട്ടിൽ സജിത്തി(32)നെയാണ് മാന്നാർ പോലീസ് പിടികൂടിയത്. 2011ൽ മാന്നാർ കുറ്റിയിൽ ജംഗ്ഷനിലെ വ്യാപാരസ്ഥാപനത്തിൽ മോഷണം നടത്തിയ കേസിൽ മാന്നാർ പോലീസ് സജിത്തിനെ പിടികൂടിയിരുന്നു. തുടർന്ന് റിമാൻഡിൽ കഴിയവേ ജാമ്യത്തിൽ ഇറങ്ങി മുങ്ങിയ ഇയാളെ കോടതി പിടികിട്ടാപ്പുള്ളിയായി പ്രഖ്യാപിച്ച് എൽപി വാറണ്ട് പുറപ്പെടുവിച്ചിരുന്നു. ജാമ്യത്തിൽ ഇറങ്ങി മുങ്ങിയ ഇയാൾ 10 വർഷത്തോളം കണ്ണൂരിലും പിന്നീട് റാന്നിയിലെ പല മേഖലകളിലും ഒളിവിൽ കഴിയുകയായിരുന്നു. മാന്നാർ പോലീസ് ഇൻസ്പെക്ടർ ടി. രജീഷ്കുമാറിന്‍റെ നേതൃത്വത്തിൽ മാന്നാർ/പേലിസ് സംഘം നടത്തിയ സമഗ്രമായ അന്വേഷണത്തിൽ റാന്നി ഉന്നക്കാവിൽനിന്നു പ്രതിയെ പിടികൂടുകയായിരുന്നു. ചെങ്ങന്നൂർ ഫസ്റ്റ് ക്ലാസ് മജിസ്ട്രേറ്റ് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

ജോഷി ചിറയിലിന്‍റെ നിര്യാണത്തിൽ അനുശോചിച്ചു

കുട്ടനാട്: കോൺഗ്രസ് കുട്ടനാട് ബ്ലോക്ക് ജനറൽ സെക്രട്ടറിയും എകെസിസിയുടെ ഫൊറോന ഭാരവാഹിയും വില്ലേജ് ബോട്ട് ക്ലബ്ബിന്‍റെ ഭാരവാഹിയുമായിരുന്ന ജോഷി ചിറയിലിന്‍റെ ആകസ്മിക നിര്യാണത്തിൽ ബ്ലോക്ക് കോൺഗ്രസ് കമ്മിറ്റി അനിശോചിച്ചു. സംസ്കാര ശുശ്രൂഷയ്ക്കുശേഷം തോട്ടുവാത്തല തിരുഹൃദയ ദേവാലയ പാരീഷ് ഹാളിൽ സംഘടിപ്പിച്ച അനുശോചന സമ്മേളനത്തിൽ കോൺഗ്രസ് മണ്ഡലം പ്രസിഡന്‍റ് ഡി. ജോസഫ് അധ്യക്ഷത വഹിച്ചു. ബ്ലോക്ക് വൈസ് പ്രസിഡന്‍റ് നോബിൻ പി. ജോൺ അനുശോചന പ്രമേയം അവതരിപ്പിച്ചു. ജില്ലാ കോൺഗ്രസ് കമ്മിറ്റി വൈസ് പ്രസിഡന്‍റുമാരായ സജി ജോസഫ്, ടിജിൻ ജോസഫ്, ജില്ലാ ജനറൽ സെക്രട്ടറിമാരായ പ്രതാപൻ പറവേലി, പ്രമോദ് ചന്ദ്രൻ, സെബാസ്റ്റ്യൻ വർഗീസ്, സാജു കടമാട്, എസ്.ഡി. രവി, ഡി. ലോനപ്പൻ, സന്തോഷ് പട്ടണം, ബിജു ചെത്തിശേരി, പ്രതീപ്കുമാർ, സി.ടി. തോമസ് കാച്ചാംകോടം, ജോഷി കൊല്ലാറ, പി.എസ്. തോമസ് തുടങ്ങിയവർ അനുശോചിച്ചു.

എടത്വ- മാമ്പുഴക്കരി റോഡിന്‍റെ ശോച്യാവസ്ഥ പരിഹരിക്കണം

എടത്വ: മാമ്പുഴക്കരി-എടത്വ റോഡിന്‍റെ നിർമാണം ഉടനെ പൂർത്തിയാക്കണമെന്ന് എടത്വ കോൺഗ്രസ്‌ മണ്ഡലം ജനറൽ ബോഡി. വീയപുരം മുതല്‍ മുളയ്ക്കാംതുരുത്തിവരെ റോഡ് പുനര്‍നിര്‍മിക്കാന്‍ 132 കോടി രൂപ അനുവദിച്ചിട്ടും കുട്ടനാട് നിയോജകമണ്ഡലത്തില്‍ ഉള്‍പ്പെട്ട ഏറ്റവും പ്രധാന്യമുള്ള മാമ്പുഴക്കരി-പുതുക്കരി-കളങ്ങര-എടത്വ വരെയുള്ള ഭാഗം കാല്‍നട യാത്രക്കാര്‍ക്കു പോലും യാത്ര ചെയ്യാന്‍ പറ്റാത്ത അവസ്ഥയിലാണ്. എടത്വയിൽനിന്ന് ഏറ്റവും എളുപ്പത്തിൽ എസി റോഡിൽ എത്താൻ പറ്റുന്ന റോഡാണ് വലിയ അപകടാവസ്ഥയിൽ കിടക്കുന്നത്. ഡിസിസി വൈസ് പ്രസിഡന്‍റ് സജി ജോസഫ് ഉദ്ഘാടനം ചെയ്തു. കോൺഗ്രസ് മണ്ഡലം പ്രസിഡന്‍റ് ആന്‍റണി കണ്ണംകുളം അധ്യക്ഷത വഹിച്ചു. ഡിസിസി വൈസ് പ്രസിഡന്‍റ് റ്റിജിൻ ജോസഫ്, അഡ്വ. പ്രതാപൻ പറവേലി, ജെ.റ്റി. റാംസെ, പോളി തോമസ്, ജിൻസി ജോളി, ആൻസി ബിജോയി, മറിയാമ്മ ജോർജ്, ആനി ഈപ്പൻ, സ്റ്റാർലി ജോസഫ്, സോണിച്ചൻ തെക്കെടം, ജോസി പറത്തറ, ഷാജി ആനന്ദാലയം, എസ്. സനൽകുമാർ, ജസ്റ്റിൻ മാളിയേക്കൽ എന്നിവർ പ്രസംഗിച്ചു.

മൂത്രം വിൽക്കപ്പെടും! ബാനർ ഉയർന്നു, അധികാരികൾക്ക് അനക്കം വച്ചു

കൈനകരി: കൈനകരി പഞ്ചായത്തിലെ മുണ്ടയ്ക്കൽ ഓവർ ഹെഡ് വാട്ടർ ടാങ്കാണ് ഇപ്പോൾ നാട്ടിൽ ചർച്ചാവിഷയം. ചാന്പ്യൻസ് ബോട്ട് ലീഗ് നടന്ന ദിവസം ടാങ്കിനുമേൽ ഉയർന്ന ഒരു ബാനറാണ് ടാങ്കിനെ ശ്രദ്ധാകേന്ദ്രമാക്കിയത്. മൂത്രം വിൽക്കപ്പെടും എന്ന വലിയ ഫ്ളക്സ് ബോർഡാണ് കഴിഞ്ഞ 19ന് ജലസംഭരണിക്കു മുകളിൽ ഉയർന്നത്. വെള്ളത്താൽ ചുറ്റപ്പെട്ട പ്രദേശമാണെങ്കിലും കുടിവെള്ളത്തിനു ഏറെ ബുദ്ധിമുട്ടുള്ള പ്രദേശമാണ് കൈനകരി. പഞ്ചായത്തിലെ പമ്പാനദിക്കു കിഴക്കുള്ള രണ്ടു മുതൽ എട്ടു വരെയുള്ള വാർഡുകളിൽ കുടിവെള്ളം വിതരണം നടത്തുന്നത് മുണ്ടയ്ക്കൽ ജലസംഭരണിയിൽനിന്നാണ്. എന്നാൽ, പല ദിവസങ്ങളിലും ജലവിതരണം മുടങ്ങുന്ന സ്ഥിതിയായിരുന്നു. മാത്രമല്ല ടാങ്കിന്‍റെ ചുവട്ടിലും വാൽവിനു മീതെയും വർഷം മുഴുവൻ മലിനജലം കെട്ടിക്കിടക്കുന്ന സ്ഥിതിയിലുമാണ്. ഇതിൽ പ്രതിഷേധിച്ചാണ് വള്ളംകളി ദിനത്തിൽ "മൂത്രം വിൽക്കപ്പെടും' എന്ന ബാനർ ടാങ്കിനു മുകളിൽ നാട്ടുകാർ ഉയർത്തിയത്. മുടങ്ങുന്ന വെള്ളം പള്ളാത്തുരുത്തിയിൽ നിലവിലിരുന്ന മൂന്നു കുഴൽ കിണറുകളിൽ ഒന്നിൽനിന്നാണ് രണ്ടര കിലോമീറ്റർ മാറി പമ്പാനദിയും കടന്നുള്ള മുണ്ടയ്ക്കൽ ഓവർ ഹെഡ് ടാങ്കിൽ വെള്ളം എത്തിച്ചിരുന്നത്. രാത്രിയിൽ ടാങ്കിൽ വെള്ളം നിറച്ച് വാർഡ് അടിസ്ഥാനത്തിൽ തെക്കോട്ടും വടക്കോട്ടും ഇടവിട്ടുള്ള ദിവസങ്ങളിലായിരുന്നു വെള്ളം വിതരണം ചെയ്തിരുന്നത്. മിക്ക ദിവസങ്ങളിലും പല വാർഡുകളിലും ആവശ്യത്തിനുള്ള വെള്ളം എത്തിയിരുന്നില്ല. കൂടാതെ പള്ളാത്തുരുത്തിയിലെ കുഴൽക്കിണർ തകരാറിലാകുമ്പോഴെല്ലാം ഈ ടാങ്കിൽനിന്നുള്ള വെള്ളം വിതരണവും മുടങ്ങുന്നതും പതിവായിരുന്നു. വെള്ളക്കെട്ടിലെ ടാങ്ക് നിലവിലുള്ള പുറംബണ്ടിനേക്കാളും സമീപ പുരയിടങ്ങളേ ക്കാളും രണ്ട് അടിയോളം താഴ്ചയിലാണ് ടാങ്ക് സ്ഥിതി ചെയ്യുന്ന പുരയിടം. അതിനാൽ വർഷം മുഴുവൻ ഈ പുരയിടം വെള്ളക്കെട്ടാണ്. മലിനജലം നിറഞ്ഞ് വൃത്തിഹീനമാണ് ടാങ്കിന്‍റെ ചുറ്റുവട്ടം. തെക്ക് ഭാഗത്തേക്കും വടക്കു ഭാഗത്തേക്കും വെള്ളം തുറന്നു വിടാനുള്ള വാൽവുകൾ പുരയിടത്തേക്കാൾ താഴ്ന്നാണ് സ്ഥാപിച്ചിരിക്കുന്നത്. അതു മലിനജലത്തിലുമാണ്. ജലസംഭരണി സ്ഥിതി ചെയ്യുന്ന പുരയിടം കാട് മൂടി ഇഴജന്തുക്കളുടെയും ക്ഷുദ്രജീവികളുടെയും താവളമായി. വാൽവ് തുറക്കുമ്പോഴും അല്ലാതെയും പുരയിടത്തിൽ കെട്ടിക്കിടക്കുന്ന മലിനജലം ജലവിതരണ പൈപ്പുകളിലൂടെ വെള്ളത്തിൽ കലരുന്നു എന്നാണ് നാട്ടുകാരുടെ പരാതി. ഗോവണി തകരാറിൽ ജലസംഭരണിയിലേക്കുള്ള ഗോവണിപ്പടികൾ മുഴുവൻ അപകടകരമായ രീതിയിൽ കോൺക്രീറ്റ് പൊളിഞ്ഞ് കമ്പികൾ തെളിഞ്ഞു കാണാം. ഈ ഗോവണിയിൽ ആളുകൾ കയറാതിരിക്കാൻ തടസങ്ങളൊന്നും സ്ഥാപിച്ചിട്ടില്ല. പലപ്പോഴും മദ്യപസംഘത്തിനും സാമൂഹ്യ വിരുദ്ധർക്കും ഇതു സൗകര്യമാകുന്നു. ഇതു സമീപവാസികൾക്കും ശല്യമാണ്. ബാനർ പ്രതിഷേധം നടത്തിയിട്ടാണെങ്കിലും ഇപ്പോൾ കുഴൽക്കണർ നിർമാണത്തിനു ശ്രമം തുടങ്ങിയതിൽ നാട്ടുകാർ സന്തോഷത്തിലാണ്. വെള്ളം ശുദ്ധമോ? ഇവിടെനിന്നു വിതരണം ചെയ്യുന്ന വെള്ളം ശുദ്ധമാണോയെന്നു പരിശോധിക്കാൻ നിർവാഹമില്ല. എന്നാണ് ക്ലോറിനേഷൻ നടത്തിയതെന്ന കാര്യത്തിൽ യാതൊരു വിവരവും ഇല്ല. ടാങ്ക് പരിസരം അടിയന്തരമായി വൃത്തിയാക്കണം. - നോബിൻ പി. ജോൺ പഞ്ചായത്ത് മെംബർ

കനാലുകളിൽ വെള്ളമൊഴുകും; മന്ത്രിമാർ യോഗം ചേർന്നു

ചെങ്ങന്നൂർ: ചെങ്ങന്നൂരിലെ പിഐപി കനാലുകളിൽ ജലവിതരണം തടസപ്പെടുന്ന സംഭവത്തിൽ, മന്ത്രി റോഷി അഗസ്റ്റിന്‍റെ അധ്യക്ഷതയിൽ മന്ത്രിമാരായ സജി ചെറിയാൻ, പി. പ്രസാദ് എന്നിവർ യോഗം ചേർന്നു. അടിയന്തരമായി പ്രശ്നം പരിഹരിക്കാൻ യോഗം നിർദേശിച്ചു. മണിയാർ ബാരേജിൽ നടക്കുന്ന നവീകരണമാണ് ജലവിതരണം തടസപ്പെടാൻ കാരണം. ജലവിതരണം പൂർണമായും നിർത്തിവച്ചാൽ 2,500 ഹെക്ടറിലധികം നെൽകൃഷിയും മറ്റ് വിളകളും നാശത്തിലേക്കു നീങ്ങും. ഈ ദുരന്തസാധ്യത മുന്നിൽ കണ്ടാണ് മന്ത്രിമാരുടെ യോഗം ചേർന്നത്. മണിയാർ ബാരേജിലെ 5 സ്പിൽവേ ഷട്ടറുകളും 2 സ്ലൂയിസ് ഗേറ്റുകളും മാറ്റുന്ന ജോലികളാണ് നടക്കുന്നത്. പ്രതികൂല കാലാവസ്ഥയും കാർഷിക പ്രവർത്തനങ്ങളും കാരണം ജോലികൾ പലതവണ മാറ്റിവയ്ക്കേണ്ടി വന്നു. ഇതോടെ നവീകരണം നീണ്ടുപോവുകയായിരുന്നു. രണ്ടു ജില്ലകളെ ബാധിക്കും നിർമാണപ്രവർത്തനങ്ങളുടെ പേരിൽ കർഷകരെ പ്രതിസന്ധിയിലാക്കരുതെന്ന് മന്ത്രി സജി ചെറിയാൻ ആവശ്യപ്പെട്ടു. കാർഷിക ആവശ്യങ്ങൾക്കായി ഡിസംബർ മുതൽ മാർച്ച് വരെ ജലം ആവശ്യമായതിനാൽ, ആ മാസങ്ങളിൽ നിർമാണം നിർത്തിവച്ച് ജലവിതരണം ഉറപ്പാക്കണം. കൂടാതെ, നവംബർ വരെ ജലവിതരണത്തെ ബാധിക്കാത്ത തരത്തിലുള്ള ജോലികൾ മാത്രം ചെയ്യാൻ സാധിക്കുമെന്നും അദ്ദേഹം ചൂണ്ടിക്കാട്ടി. ആലപ്പുഴ, പത്തനംതിട്ട ജില്ലകളെ ഇതു ഗുരുതരമായി ബാധിക്കുമെന്നും കാർഷിക മേഖലയെ തളർത്തുന്ന ഇത്തരം നടപടികൾ വലിയ പ്രതിഷേധത്തിനു കാരണമാകുമെന്നും മന്ത്രി പി. പ്രസാദ് പറഞ്ഞു.

കലണ്ടറും ദിശയും റഡാറും... സിദ്ധാർഥിന്‍റെ വഴികൾ വിസ്മയകരം

ചെങ്ങന്നൂർ: കണക്കുകൂട്ടലിൽ മറ്റുള്ളവരുടെ കണക്കുകൂട്ടൽ തെറ്റിക്കുന്ന ഒരാൾ പാണ്ടനാടുണ്ട്. പതിനാലുകാരൻ സിദ്ധാർഥ് ആർ. പിള്ള. 2010നും 2030നും ഇടയിലുള്ള ഏതു തീയതി ചോദിച്ചാലും നിമിഷങ്ങൾക്കകം ഏതു ദിവസമാണെന്നു കൃത്യമായി പറഞ്ഞുതരും. പാണ്ടനാട് നോർത്ത് തൈലത്തിൽ രതീഷ് വി. പിള്ളയുടെയും ലക്ഷ്മി നായരുടെയും മൂത്തമകനായ സിദ്ധാർഥ്, പാണ്ടനാട് സ്വാമി വിവേകാനന്ദ ഹയർ സെക്കൻഡറി സ്‌കൂളിലെ ഒമ്പതാം ക്ലാസ് വിദ്യാർഥിയാണ്. നാലാം വയസിൽത്തന്നെ സിദ്ധാർഥിന്‍റെ ഈ കഴിവ് മാതാപിതാക്കൾ തിരിച്ചറിഞ്ഞിരുന്നു. മുൻപ് നടന്ന സംഭവങ്ങളുടെ തീയതികൾ ഏതു ദിവസമാണെന്ന് അവൻ ചെറുപ്പത്തിൽത്തന്നെ ഓർത്തു വച്ചിരുന്നുവെന്ന് അമ്മ ലക്ഷ്മി പറയുന്നു. എങ്ങനെയാണ് ഈ കഴിവ് നേടിയത് എന്നു ചോദിച്ചാൽ സിദ്ധാർഥിന്‍റെ മറുപടി ലളിതമാണ് - കൂട്ടലും കിഴിക്കലും. വേറിട്ട കഴിവുകൾ കലണ്ടറിലെ ദിവസങ്ങൾ ഓർത്തുവയ്ക്കുക മാത്രമല്ല, ഗൂഗിൾ മാപ്പിന്‍റെ സഹായമില്ലാതെ സ്ഥലങ്ങൾ കണ്ടെത്താനും സിദ്ധാർഥിന് അപാരമായ കഴിവുണ്ട്. ഒരു സ്ഥലം ഗൂഗിൾ മാപ്പിൽ നോക്കി മനസിലാക്കിയ ശേഷം പിന്നീട് മാപ്പിന്‍റെ സഹായമില്ലാതെ കണ്ടെത്താൻ സാധിക്കും. വിമാനങ്ങളിൽ ഉപയോഗിക്കുന്ന റഡാർ മാപ്പിനെക്കുറിച്ചും അതിലൂടെ വിമാനങ്ങൾ പോകുന്ന വഴികളെക്കുറിച്ചും സിദ്ധാർഥിനു വ്യക്തമായ ധാരണയുണ്ട്. ഒരു ട്രാവൽ വ്ലോഗർ ആകാനാണ് സിദ്ധാർഥിന്‍റെ ആഗ്രഹം. പ്രതീക്ഷയോടെ കുടുംബം സിദ്ധാർഥിന്‍റെ ഈ കഴിവുകൾ തിരിച്ചറിഞ്ഞ സ്‌കൂളിലെ പ്രഥമാധ്യാപിക സ്മിത എസ്. കുറുപ്പ് അവനെ കൂടുതൽ പ്രോത്സാഹിപ്പിക്കുന്നുണ്ട്. വിശേഷ ദിവസങ്ങളും മറ്റും ഓർത്തു വയ്ക്കാനുള്ള കഴിവും അവനുണ്ടെന്ന് ടീച്ചർ പറയുന്നു. സിദ്ധാർഥിന്‍റെ മുത്തശിയും ഇതേ സ്‌കൂളിലെ മുൻ അധ്യാപികയുമായ ഓമനയമ്മയും സിദ്ധാർഥിന്‍റെ കഴിവിൽ അതീവ സന്തോഷത്തിലാണ്. കണക്കിലെ കണക്കുകൂട്ടലുകൾക്കപ്പുറം, ദിശാബോധത്തിലും റഡാർ മാപ്പുകളെക്കുറിച്ചുള്ള അറിവിലും സിദ്ധാർഥ് കാണിക്കുന്ന ഈ വൈഭവം ഭാവിയിൽ പ്രയോജനം ചെയ്യുമെന്ന പ്രതീക്ഷയിലാണ് കുടുംബം.

ആർദ്രം പദ്ധതിയിലൂടെ ഗുണനിലവാരമുള്ള ചികിത്സ: മന്ത്രി വീണാ ജോർജ്

ഹരിപ്പാട്: ആർദ്രം പദ്ധതിയിലൂടെ സംസ്ഥാന സർക്കാർ ഉറപ്പാക്കുന്നത് ഗുണനിലവാരമുള്ള ചികിത്സയെന്ന് മന്ത്രി വീണാ ജോർജ് പറഞ്ഞു. ചേപ്പാട് പഞ്ചായത്തിലെ കുടുംബാരോഗ്യ കേന്ദ്രത്തിന്‍റെയും ജനകീയ ലാബിന്‍റെയും ഉദ്ഘാടനം പഞ്ചായത്ത് അങ്കണത്തിൽ നടന്ന ചടങ്ങിൽ നിർവഹിച്ച് സംസാരിക്കുകയായിരുന്നു മന്ത്രി. ഇന്ത്യയിൽ ഏറ്റവുമധികം ആയുർദൈർഘ്യമുള്ളവർ കേരളത്തിലാണ്. ആരോഗ്യം ആനന്ദം അകറ്റാം അർബുദം എന്ന കാമ്പയിനിലൂടെ ഇതുവരെ 18.50 ലക്ഷം പേര്‍ കാൻസർ പരിശോധനയ്ക്ക് വിധേയരായി. കേരളത്തിൽ ഇന്ന് എല്ലാ ആരോഗ്യകേന്ദ്രങ്ങളിലും ലാബുകളും പരിശോധന സൗകര്യങ്ങളുമുണ്ട്. സംസ്ഥാനത്ത് ഇതുവരെ 885 ആരോഗ്യകേന്ദ്രങ്ങളെ കുടുംബാരോഗ്യകേന്ദ്രങ്ങളാക്കിയെ ന്നും മന്ത്രി പറഞ്ഞു. സംസ്ഥാന സർക്കാരിന്‍റെ ആർദ്രം പദ്ധതിയുടെ ഭാഗമായി ഹെൽത്ത് ഗ്രാന്‍റിൽനിന്ന് 37 ലക്ഷം രൂപയും പഞ്ചായത്ത് തനത് ഫണ്ടിൽനിന്ന് 11 ലക്ഷം രൂപയും വിനിയോഗിച്ചാണ് കുടുംബാരോഗ്യകേന്ദ്രത്തിന്‍റെ നിർമാണം. നാട്ടുകാരുടെയും ആശുപത്രി മാനേജ്‌മെന്‍റ് കമ്മിറ്റിയുടെയും സംയുക്ത ശ്രമഫലമായാണ് നാലു ലക്ഷം രൂപ ചെലവിൽ ജനകീയ ലാബിന്‍റെ നിർമാണം പൂർത്തീകരിച്ചത്. രമേശ് ചെന്നിത്തല എംഎൽഎ അധ്യക്ഷനായി. ചേപ്പാട് പഞ്ചായത്ത് പ്രസിഡന്‍റ് എം.കെ. വേണുകുമാർ, മുതുകുളം ബ്ലോക്ക്‌ പഞ്ചായത്ത്‌ വൈസ് പ്രസിഡന്‍റ് ജി. ഉണ്ണികൃഷ്ണൻ, പഞ്ചായത്ത് വൈസ് പ്രസിഡന്‍റ് ബിന്ദു രാജേന്ദ്രൻ, ജില്ലാ പഞ്ചായത്തംഗം എ. ശോഭ, പഞ്ചായത്ത് സ്ഥിരംസമിതി അധ്യക്ഷരായ ഡി. കൃഷ്ണകുമാർ, എസ്. വിജയകുമാരി, കെ. വിശ്വപ്രസാദ്, പഞ്ചായത്തംഗങ്ങളായ എം. മണിലേഖ തുടങ്ങിയവർ പങ്കെടുത്തു.

ദയനീയം, ഈ ഗ്രാമീണ റോഡുകൾ; പാലമേൽ പഞ്ചായത്തിൽ റോഡുകൾ തകർന്നു

ചാരുംമൂട്: പാലമേൽ പഞ്ചായത്തിലെ ഗ്രാമീണ റോഡുകൾ തകർന്നതോടെ ജനം ദുരിതത്തിലായി. കാൽനടയാത്ര പോലും ദുഷ്കരമായ റോഡുകൾ നന്നാക്കാൻ അധികൃതർ നടപടി സ്വീകരിക്കാത്തതിനെതിരേ നാട്ടുകാരുടെ പ്രതിഷേധം ഉയരുകയാണ്. പാലമേൽ പഞ്ചായത്തിലെ 11-ാം വാർഡിലെ വിവിധ റോഡുകളായ മൈലാടുംമുകൾ- മന്ദിരത്തിൽ റോഡ്, ആദിക്കാട്ടുകുളങ്ങര- അമ്പോലിച്ചിറ- കുറ്റിയിൽ റോഡ്, മുങ്ങിനാൽ ഏല - പയ്യനല്ലൂർ റോഡ്, ആദിക്കാട്ടുകുളങ്ങര -പുതുക്കുളം, ആദിക്കാട്ടുകുളങ്ങര പുലച്ചാതിവിള പള്ളിക്കൽ പഞ്ചായത്ത് പടിക്കൽ റോഡ് എന്നിവയാണ് സഞ്ചാരയോഗ്യമല്ലാതായി തകർന്നു കിടക്കുന്നത്. മൈലാടും മുകൾ- മന്ദിരത്തിൽ റോഡ് എംപി ഫണ്ട് ഉപയോഗിച്ച് ഒരു വർഷം മുമ്പ് പണി തുടങ്ങിയെങ്കിലും പാതിവഴിയിൽ ഉപേക്ഷിച്ച നിലയിലാണ്. 2024 ഫെബ്രുവരിയിൽ 22 ലക്ഷം രൂപ ഉപയോഗിച്ചാണ് റോഡിന്‍റെ നിർമാണം തുടങ്ങിയത്. എന്നാൽ, പണി പൂർത്തിയാക്കിയില്ല. റോഡിന്‍റെ നിർമാണസമയത്ത് കോൺട്രാക്ടർ സാധനങ്ങൾ കടത്തിക്കൊണ്ടുപോകാൻ ശ്രമിച്ചെന്ന് ആരോപിച്ച് നാട്ടുകാർ രംഗത്തുവന്നിരുന്നു. ആദിക്കാട്ടുകുളങ്ങര അമ്പോലിച്ചിറ കുറ്റിയിൽ റോഡിലൂടെ ദിനംപ്രതി നിരവധി സ്കൂൾ ബസുകളാണ് കടന്നുപോകുന്നത്. കുറ്റിയിൽ എൽപിഎസ്, തെങ്ങമം, പയ്യനല്ലൂർ, ആനയടി ഭാഗത്തേക്കുള്ള പ്രധാന റോഡാണിത്. പയ്യനല്ലൂർ ഗവ. സ്കൂളിലേക്ക് എളുപ്പത്തിൽ എത്തിച്ചേരാനുള്ള റോഡാണ് ആദിക്കാട്ടുകുളങ്ങര- പുലച്ചാതി വിളറോഡ്. കായംകുളം പുനലൂർ റോഡിൽനിന്നു പള്ളിക്കൽ പഞ്ചായത്തിലേക്ക് എളുപ്പം എത്തിച്ചേരാനുള്ള റോഡും തകർന്ന് തരിപ്പണമായിട്ട് മാസങ്ങളായി. നൂറുകണക്കിന് കർഷകർ വ്യാപകമായി കൃഷി ചെയ്യുന്ന പുതുക്കുളത്തേക്ക് എത്താനുള്ള ആദിക്കാട്ടുകുളങ്ങര- പുതുക്കുളം റോഡും ദുരിതപൂർണമാണ്. പാലമേൽ പഞ്ചായത്തിന്‍റെ അധീനതയിലുള്ള റോഡുകളിലൂടെ ദിനംപ്രതി നൂറുകണക്കിന് വാഹനങ്ങളാണ് കടന്നുപോകുന്നത്. തകർന്ന് കിടക്കുന്ന റോഡുകളിൽ അപകടങ്ങളും പതിവായിരിക്കുകയാണ്. റോഡുകൾ അടിയന്തരമായി പുനർനിർമിക്കാനുള്ള നടപടികൾ സ്വീകരിക്കണമെന്നാണ് നാട്ടുകാരുടെ ആവശ്യം.

വേമ്പനാട്ടുകായലിലെ ചാനൽ ബോയകൾ നശിക്കുന്നു; പുനഃസ്ഥാപിക്കാൻ നടപടിയില്ല

പൂച്ചാക്കൽ: വേമ്പനാട്ട് കായലിലെ ദേശീയ ജലപാതയിൽ ജലയാനങ്ങൾക്ക് ദിശ അറിയാനായി സ്ഥാപിച്ച ചാനൽ ബോയകൾ പലതും നശിക്കുന്നു. രാത്രികാലങ്ങളിലും പ്രതികൂല കാലാവസ്ഥയിലും ഉൾപ്പെടെ ജലയാനങ്ങൾക്ക് ചാലും ദിശയും തിരിച്ചറിയാനാണ് ബോയകൾ കായലിൽ സ്ഥാപിച്ചത്. എന്നാൽ, കായലിൽ സ്ഥാപിച്ച പല ബോയകളും പ്രവർത്തന രഹിതവും ഒഴുകി നടക്കുന്നതുമാണ്. കായലിൽ ഒഴുകിപ്പോകുന്നവ കരയ്ക്കടിഞ്ഞു നശിക്കുകയും ചെയ്യുന്നുണ്ട്. പാണാവള്ളി - പെരുമ്പളം ഫെറിയിലും തവണക്കടവ് - വൈക്കം ഫെറിയിലുമാണ് ഇപ്പോൾ ചാനൽ ബോയകൾ പ്രവർത്തിക്കുന്നത്. ഇവിടങ്ങളിൽ ബോട്ട്, ജങ്കാർ സർവീസുകൾ ഉള്ളതാണ്. കായലിൽ പൊങ്ങിക്കിടക്കുന്ന ബോയകളും അതിലെ ചെറിയ വെളിച്ചവുമാണ് ചാലിന്‍റെയും ദിശയുടെയും അടയാളം. ജലയാനങ്ങൾക്ക് സുരക്ഷിതമായി സഞ്ചരിക്കാവുന്ന രീതിയിൽ ആഴമേറിയ ഭാഗം മുൻകൂട്ടി കണ്ടെത്തി അതിന്‍റെ വശങ്ങളിലാണ് പോർട്ട് വിഭാഗത്തിന്‍റെ നേതൃത്വത്തിൽ ബോയകൾ സ്ഥാപിച്ചത്. ബോയകൾ ഇല്ലാതെ വരുന്നത് ജലയാനങ്ങൾക്ക് സുരക്ഷിതമായി സർവീസ് നടത്താൻ തടസമാകുന്നുണ്ട്. പാണാവള്ളി അഞ്ചുതുരുത്ത് കടവിലും തവണക്കടവ് ഫെറിയിലുമാണ് ബോയകൾ കരയ്ക്കടിഞ്ഞ നിലയിലുള്ളത്. ഇവ പുനഃസ്ഥാപിക്കുന്നതിനുള്ള നടപടി അധികൃതർ സ്വീകരിക്കണമെന്ന ആവശ്യം ശക്തമായിട്ടുണ്ട്.

കെട്ടിട സമുച്ചയ ഉദ്ഘാടനവും വാർഷികവും

മാന്നാർ: ചെന്നിത്തല മഹാത്മാ എച്ച്എസ്എസ് ഫോർ ബോയ്സ് കെട്ടിട സമുച്ചയ ഉദ്ഘാടനവും വാർഷികാഘോഷവും നാളെ നടക്കുമെന്ന് ഭാരവാഹികൾ വാർത്താസമ്മേളനത്തിൽ അറിയിച്ചു. 1953ൽ സ്ഥാപിച്ച് 2012ൽ ഹയർ സെക്കൻഡറിയായി ഉയർത്തിയ വിദ്യാഭ്യാസ സ്ഥാപനമാണ് ചെന്നിത്തല മഹാത്മാ എച്ച്എസ്എസ്. ക്ലാസ് മുറികളും ഹൈടെക് സംവിധാനമുള്ളതും റോബോട്ടിക് അടൽ ടിങ്കറിംഗ് ലാബ്, സ്പെയിസ് മ്യൂസിയം തുടങ്ങി വിവിധ ആധുനിക സാങ്കേതിക വിദ്യകൾ പഠിപ്പിക്കുന്ന സംരംഭങ്ങളാൽ സമ്പന്നവുമാണ്. ആധുനിക സൗകര്യങ്ങളോടെയും നിയമാനുസൃതമായ അംഗീകാരങ്ങളോടെയും നിർമാണം പൂർത്തിയാക്കിയ പുതിയ കെട്ടിട സമുച്ചയത്തിന്‍റെ ഉദ്ഘാടനം നാളെ രാവിലെ 10.30ന് മന്ത്രി സജി ചെറിയാൻ നിർവഹിക്കും. സ്കൂൾ മാനേജിംഗ് കമ്മിറ്റി പ്രസിഡന്‍റ് സി.കെ. ചെറിയാൻ കോട്ടപ്പുറത്ത് അധ്യക്ഷത വഹിക്കും. പൂർവ വിദ്യാർഥിയും വികസന പ്രവർത്തനങ്ങളുടെ മാർഗ നിർദേശകനുമായ രമേശ്‌ ചെന്നിത്തല എംഎൽഎ വാർഷിക ആഘോഷങ്ങൾ ഉദ്ഘാടനം ചെയ്യും. കെട്ടിടനിർമാണത്തിന് നേതൃത്വം നൽകിയ മുൻ മാനേജർ കൃഷ്ണൻ നമ്പൂതിരി, സി.പി. പ്രഭാകരൻപിള്ള എന്നിവരെ ആദരിക്കും. സ്കൂൾ മാനേജർ ഗോപി മോഹനൻ നായർ, അനിൽകുമാർ, പഞ്ചായത് പ്രസിഡന്‍റ് വിജയമ്മ ഫിലേന്ദ്രൻ, ആതിര, സുകുമാരി തങ്കച്ചൻ, സിന്ധു ഹമീദ് തുടങ്ങിയവർ പ്രസംഗിക്കും.

പെരിയാർ ഇ.വി. രാമസ്വാമി സ്മാരകം നിർമാണോദ്ഘാടനം ഉടൻ

പൂച്ചാക്കൽ: വൈക്കം സത്യഗ്രഹ സമരപ്പോരാളി പെരിയാർ ഇ.വി. രാമസ്വാമി സ്മാരകം അരൂക്കുറ്റിയിൽ നിർമിക്കുന്നതിനുള്ള ഒരുക്കങ്ങൾ പുരോഗമിക്കുന്നു. കേരള സർക്കാർ തമിഴ്നാടിന് നൽകിയ അര ഏക്കറോളം സ്ഥലമാണ് നിർമാണോദ്ഘാടനത്തിനായി ഒരുങ്ങുന്നത്. വെള്ളിയാഴ്ച തമിഴ്നാട് മന്ത്രി ഇ.വി. വേലുവും സംസ്ഥാന സാംസ്കാരിക മന്ത്രി സജി ചെറിയാനും ചേർന്ന് സ്മാരകത്തിന്‍റെ ശിലാസ്ഥാപനം നിർവഹിക്കും. ദലീമ ജോജോ എംഎൽഎയുടെ നേതൃത്വത്തിൽ മറ്റ് ജനപ്രതിനിധികൾ സ്ഥലം സന്ദർശിച്ച് ഒരുക്കങ്ങൾ വിലയിരുത്തി. അരൂക്കുറ്റി ബോട്ടുജെട്ടിക്കു സമീപം ചൗക്കയ്ക്കു സമീപമുള്ള ആരോഗ്യവകുപ്പിന്‍റെ 58 സെന്‍റ് സ്ഥലമാണ് തമിഴ്നാട് സർക്കാരിന് എല്ലാ രേഖകളും സഹിതം കൈമാറിയത്. വൈക്കം സത്യഗ്രഹത്തിലെ നേതാക്കളെ തിരുവിതാംകൂർ രാജാവിന്‍റെ നിർദേശ പ്രകാരം അറസ്റ്റ് ചെയ്തപ്പോൾ നേതൃത്വം ഏറ്റെടുത്താണ് രാമസ്വാമി നായ്ക്കർ എത്തിയത്. തമിഴ്നാട്ടിൽ സമരം നയിച്ച രാമസ്വാമി നായ്ക്കർ പ്രസംഗങ്ങളിലൂടെ ആയിരങ്ങളെ സമരത്തിന്‍റെ ഭാഗമാക്കി മാറ്റിയിരുന്നു. സമരം ശക്തമായതോടെ രാമസ്വാമി നായ്ക്കർ അടക്കമുള്ള സമരനേതാക്കളെ അറസ്റ്റ് ചെയ്ത് തടവിലാക്കിയത് അരൂക്കുറ്റി ചൗക്ക ജയിലിലായിരുന്നു. രാമസ്വാമി നായ്ക്കറിനെ ജയിലിൽ പാർപ്പിച്ച സ്ഥലത്ത് സ്മാരകം സ്ഥാപിക്കുമെന്ന് തമിഴ്നാട് മുഖ്യമന്ത്രി സ്റ്റാലിൻ നിയമസഭയിൽ പ്രഖ്യാപിച്ചിരുന്നു. അരൂക്കുറ്റിയും വൈക്കം സത്യഗ്രഹവും തമ്മിലുള്ള ബന്ധത്തെക്കുറിച്ചും നിയമസഭയിൽ മന്ത്രി വിശദീകരിച്ചിരുന്നു. ഇതേത്തുടർന്നാണ് അരൂക്കുറ്റിയിൽ തമിഴ്നാട് സർക്കാർ പ്രതിനിധികൾ എത്തിയതും സ്ഥലം കണ്ടെത്തിയതും.1140.98 സ്ക്വയർഫീറ്റ് വിസ്തീർണത്തിലുള്ള കെട്ടിടത്തിന്‍റെ നിർമാണം അഞ്ചുമാസത്തിനുള്ളിൽ പൂർത്തിയാക്കാനാണ് ലക്ഷ്യമിടുന്നത്.

എസ്ബി കോളജിൽ കുട്ടനാട് പഠനഗവേഷണകേന്ദ്രം ഉദ്ഘാടനം നാളെ

ചമ്പക്കുളം: ചങ്ങനാശേരി എസ്ബി കോളജിൽ ആരംഭിക്കുന്ന സെന്‍റർ ഫോർ കുട്ടനാട് സ്റ്റഡീസ് ആൻഡ് റിസർച്ച് സെന്‍ററിന്‍റെ ഉദ്ഘാടനവും ഇ. ജോൺ ജേക്കബ്, ഷെവ. ഐ.സി. ചാക്കോ അനുസ്മരണ പ്രഭാഷണങ്ങളും നാളെ രണ്ടിന് നടക്കും. കുട്ടനാട് മേഖലയുടെ സുസ്ഥിര വികസനത്തിനും നിലനില്പിനും കാർഷിക പരിസ്ഥിതി സാമൂഹിക പങ്കാളിത്ത പദ്ധതികൾ വിഭാവനം ചെയ്ത് നടപ്പാക്കുന്നതിനാണ് സെന്‍റർ ഫോർ കുട്ടനാട് സ്റ്റഡീസ് ആൻഡ് റിസർച്ച്. എസ്ബി കോളജ് മാനേജർ മോൺ. ആന്‍റണി എത്തയ്ക്കാട്ട് ആശീർവാദകർമം നിർവഹിക്കും. കർദിനാൾ ആന്‍റണി പടിയറ ഹാളിൽ നടക്കുന്ന പൊതുസമ്മേളനം ആലപ്പുഴ ജില്ലാ കളക്ടർ അലക്സ് വർഗീസ് ഉദ്ഘാടനം ചെയ്യും. ചങ്ങനാശേരി ആർച്ച് ബിഷപ് മാർ തോമസ് തറയിൽ അധ്യക്ഷത വഹിക്കും. തുടർന്ന് ഇ. ജോൺ ജേക്കബ്, ഷെവ. ഐ.സി. ചാക്കോ അനുസ്മരണ പ്രഭാഷണങ്ങളും നടക്കും. കളക്ടർ അലക്സ് വർഗീസ് സന്ദേശവും മാർ തോമസ് തറയിൽ അനുഗ്രഹ പ്രഭാഷണവും മാനേജർ ഫാ. ആന്‍റണി എത്തയ്ക്കാട്ട് ആമുഖ പ്രസംഗവും നടത്തും. സെന്‍ററിന്‍റെ ദർശനാവതരണവും ധാരണാപത്രസമർപ്പണവും മുഖ്യ ബനഫാക്‌ടർ ജോസ് ജോൺ വേങ്ങാന്ത്ര നിർവഹിക്കും. മലയാള മനോരമ മാനേജിംഗ് എഡിറ്റർ ജേക്കബ് മാത്യു ഇ. ജോൺ ജക്കബ് അനുസ്മരണവും ഡോ. സിസ്റ്റർ മാർഗരറ്റ് മരിയ ജോസ് എസ്എബിഎസ് ഷെവലിയർ ഐ.സി. ചാക്കോ അനുസ്മരണവും നടത്തും. എസ്ബി കോളജ് പ്രിൻസിപ്പൽ ഡോ. റ്റെഡി കാഞ്ഞൂപ്പറമ്പിൽ, ജയ് ചാക്കോ ഇലഞ്ഞിക്കൽ, വർഗീസ് കണ്ണമ്പള്ളി എന്നിവർ പ്രസം ഗിക്കും. കുട്ടനാട്ടിലെ കർഷക, സന്നദ്ധ സംഘടനകൾ, വിദ്യാർഥികൾ, ഗവേഷകർ തുടങ്ങി വിവിധ മേഖലകളിൽ കുട്ടനാടുമായി ബന്ധപ്പെട്ട് പ്രവർത്തിക്കുന്നവർക്കുള്ള ആധികാരിക അക്കാദമിക് ഗവേഷണ സൗകര്യം ഒരുക്കി നല്കാൻ കേന്ദ്രത്തിനാകുമെന്ന് അണിയറ പ്രവർത്തകരായ, ഡോ. ജോ പ്രസാദ് മാത്യു, ഡോ. റൂബിൻ ഫിലിപ്പ്, ഫാ. മോഹൻ മുടന്താഞ്ഞിലി, ഫാ. സ്കറിയ സ്രാമ്പിക്കൽ, ആന്‍റണി ചമ്പക്കുളം എന്നിവർ അറിയിച്ചു.

സിസ്റ്റർ അനിമ ജോസഫിന് ഒന്നാം റാങ്ക്

ആലപ്പുഴ: എൽഎൽഎമ്മിൽ ഉന്നതവിജയം നേടി മലയാളി. വെൽസ് യൂണിവേഴ്സിറ്റിയിൽ മാസ്റ്റേഴ്സ് ഇൻ കോൺസ്റ്റിറ്റ്യൂഷൻ ആൻഡ് അഡ്മിനിസ്ട്രേറ്റീവ് ലോയിലാണ് സിസ്റ്റർ അനിമ ജോസഫ് ഒന്നാം റാങ്ക് നേടിയത്. ചെന്നൈയിൽ നടന്ന ചടങ്ങിൽ അക്കാഡമിക് എക്സലൻസ് പുരസ്‌കാരം സിസ്റ്റർ അനിമ ഏറ്റുവാങ്ങി. സുപ്രീംകോടതി ജഡ്ജിമാരായ ജസ്റ്റീസ് എൻ. കോട്ടിസ്വർ സിംഗ്, ആർ. മഹാദേവൻ എന്നിവരും മദ്രാസ് ഹൈക്കോടതി ചീഫ് ജസ്റ്റീസ് അടക്കമുള്ളവരും ചടങ്ങിൽ പങ്കെടുത്തു. എഎസ്എംഐ ചേർത്തല ഗ്രീൻ ഗാർഡൻസ് സഭാംഗമായ സിസ്റ്റർ അനിമ നെടുമുടി സ്വദേശിയാണ്.

മണൽക്കടത്ത് അവസാനിപ്പിച്ചിട്ട് വേണം ഫെസ്റ്റ് നടത്താനെന്ന് കോൺഗ്രസ്

അമ്പലപ്പുഴ: മണൽക്കടത്ത് അവസാനിപ്പിച്ചിട്ട് വേണം ഫെസ്റ്റ് നടത്താനെന്ന് കോൺഗ്രസ്. തോട്ടപ്പള്ളിയിൽ ബീച്ച് ഫെസ്റ്റ് എന്ന പേരിൽ എംഎൽഎയുടെ നേതൃത്വത്തിൽ നടക്കുന്നത് സിപിഎമ്മിന്‍റെ തെരഞ്ഞെടുപ്പ് സ്റ്റണ്ടും തികഞ്ഞ രാഷ്ട്രീയ തട്ടിപ്പുമാണെന്ന് അമ്പലപ്പുഴ ബ്ലോക്ക് കോൺഗ്രസ് കമ്മിറ്റി ആരോപിച്ചു. കടൽത്തീരം കരിമണൽ മാഫിയയ്ക്ക് തീറെഴുതി കൊടുത്തവർ തീരദേശ ജനതയുടെ മുമ്പിൽ കപടനാടകം കളിക്കുകയാണ്. ശിലാഫലകത്തിൽ പേര് കൊത്താനും ഫ്ലക്സ് ബോർഡിൽ തല വയ്ക്കാനും വാർത്തകളിൽ ഇടം നേടാനുമുള്ള ഓട്ടത്തിൽ നാട്ടിലെ അനിവാര്യമായ ജനക്ഷേമ പദ്ധതികളും പരിപാടികളും ഉത്തരവാദിത്വപ്പെട്ടവർ ബോധപൂർവം മറക്കുന്നത് മാപ്പർഹിക്കാത്ത തെറ്റാണെന്നും ബ്ലോക്ക് കോൺഗ്രസ് നേതൃയോഗം വിലയിരുത്തി. കരിമണൽ കമ്പനിയുടെ പണം ഉപയോഗിച്ച് സിപിഎം നടത്തുന്ന ഈ മാമാങ്കത്തിൽ നാടിനെ സ്നേഹിക്കുന്ന തീരദേശവാസികൾ പങ്കെടുക്കില്ല. തൊഴിലുറപ്പ് തൊഴിലാളികൾ, കുടുംബശ്രീ -ആശാ പ്രവർത്തകർ, അങ്കണവാടി ജീവനക്കാർ ഉൾപ്പെടെ സർക്കാർ- അർധസർക്കാർ സ്ഥാപനങ്ങളിൽ തൊഴിലെടുക്കുന്നവരെയും നിർബന്ധിതമായി പരിപാടികളിൽ പങ്കെടുപ്പിക്കാനുള്ള ശ്രമമാണ് പഞ്ചായത്ത് തലത്തിൽ നടക്കുന്നതെന്നും ബ്ലോക്ക് കോൺഗ്രസ് പ്രസിഡന്‍റ് ടി.എ. ഹാമിദ് ആരോപിച്ചു.

നേത്ര പരിശോധനയും കണ്ണട വിതരണവും

എടത്വ: ലയണ്‍സ് ക്ലബ് ഓഫ് എടത്വ എലൈറ്റ്‌സിന്‍റെയും പച്ച ലൂര്‍ദ് മാതാ ഹയര്‍ സെക്കന്‍ഡറി സ്‌കൂള്‍ നാഷണല്‍ സര്‍വീസ് സ്‌കീം യൂണിറ്റിന്‍റെയും സംയുക്താഭിമുഖ്യത്തില്‍ സൗജന്യ നേത്ര പരിശോധനയും കണ്ണടവിതരണവും നടന്നു. പച്ച ലൂര്‍ദ് മാതാ പള്ളി അസി. വികാരി ഫാ. തോമസ് കൊച്ചുതറ ഉദ്ഘാടനം നിര്‍വഹിച്ചു. എടത്വ ലയണ്‍സ് ക്ലബ്ബ് എലൈറ്റ്‌സ് പ്രസിഡന്‍റ് ടെഡി സക്കറിയ അധ്യക്ഷത വഹിച്ചു. ലയണ്‍സ് ക്ലബ് റീജണല്‍ ചെയര്‍പേഴ്‌സണ്‍ വിജയകുമാര്‍ മുഖ്യപ്രഭാഷണം നടത്തി. പഞ്ചായത്തംഗങ്ങളായ ബിന്ദു തോമസ്, മോന്‍സി കരിക്കംപള്ളില്‍, പുഷ്പമ്മ ചെറിയാന്‍, പ്രിന്‍സിപ്പാല്‍ എലിസബത്ത് മാത്യു, ലയണ്‍സ് ക്ലബ്ബ് ഭാരവാഹികളായ ബിന്നി കെ. ഫിലിപ്പ്, ജേക്കബ് മാമ്മന്‍, പി.കെ. പ്രശാന്തന്‍, ഹെഡ്മിസ്ട്രസ് അന്നമ്മ ജോസഫ്, പിടിഎ പ്രസിഡന്‍റ് ജിനു വര്‍ഗീസ്, എന്‍എസ്എസ് പ്രോഗ്രാം ഓഫീസര്‍ കെ.എ. സിന്ധുമോള്‍, പ്രോഗ്രാം കോ-ഓര്‍ഡിനേറ്റര്‍ ബി. ശ്രീജിത്ത് എന്നിവര്‍ പ്രസംഗിച്ചു. മുന്നൂറിലേറെ പേരുടെ കാഴ്ച പരിശോധനയും കണ്ണട വിതരണവും നടന്നു.

തോട്ടപ്പള്ളിയിലെ കരിമണൽ ഖനനം: പൊതുതാത്പര്യ ഹർജി വാദം കേൾക്കാൻ മാറ്റി

അമ്പലപ്പുഴ: തോട്ടപ്പള്ളിയിലെ കരിമണൽ ഖനനം പൊതു താത്പര്യ ഹർജി വാദം കേൾക്കാൻ മാറ്റിവച്ചു. കരിമണൽ ഖനനംമൂലം ഉപ്പുവെള്ളം കയറി കുട്ടനാട്ടിലെ നെൽകൃഷി നശിച്ചതിൽ കർഷകർക്ക് നഷ്ടപരിഹാരം നല്കണമെന്നാവശ്യപ്പെട്ട് കേരള ഹൈക്കോടതിയിൽ നലകിയ പൊതുതാത്പര്യ ഹർജി വിശദമായ വാദം കേൾക്കാൻ ഒക്ടോബർ ഏഴിലേക്ക് മാറ്റി. ചീഫ് ജസ്റ്റീസ് നിതിൻ മഥുകർ ജാംദറും ജസ്റ്റീസ് ബസന്ത് ബാലാജിയും ഉൾപ്പെട്ട ബഞ്ചാണ് കേസ് പരിഗണിച്ചത്. എസ്‌യുസിഐ പ്രവർത്തകൻ ആർ. അർജുനൻ നലകിയ പൊതുതാത്പര്യ ഹർജിയാണ് കോടതി പരിഗണിച്ചത്.സുപ്രീം കോടതിയിലെ മുതിർന്ന അഭിഭാഷകൻ പ്രശാന്ത് ഭൂഷൺ, അഡ്വ. ലിജു വി. സ്റ്റീഫൻ എന്നിവരാണ് ഹർജിക്കാരനുവേണ്ടി ഹാജരായത്. തീരം നഷ്ടപ്പെടുന്ന കരിമണൽ ഖനനത്തിനെതിരേ 1565 ദിവസമായി നാട്ടുകാർ സമരത്തിലാണ്‌. സമരക്കാർക്കെതിരേ കള്ളക്കേസുകളെടുത്തും പോലീസ് മർദനം അഴിച്ചുവിട്ടും കുട്ടനാടിനെ രക്ഷിക്കാനെന്ന പേരിൽ കരിമണൽ ഖനനം നടത്തുകയാണ് സർക്കാർ. സ്വകാര്യ കരിമണൽ കമ്പനിയിൽ നിന്നും കോടികൾ അഴിമതി പണം കൈപ്പറ്റിയതും വൻ വിവാദമായിരുന്നു.

ഹുബ്ബളി–ബംഗളൂരു–കൊല്ലം സ്പെഷൽ ട്രെയിൻ അനുവദിച്ചെന്ന് കൊടിക്കുന്നിൽ സുരേഷ്

മാവേലിക്കര: യാത്രക്കാരുടെ തിരക്ക് പരിഗണിച്ച് ഹുബ്ബളി-ബംഗളൂരു-കൊല്ലം സ്പെഷൽ ട്രെയിൻ സർവീസ് അനുവദിച്ചതായി കൊടിക്കുന്നിൽ സുരേഷ് എംപി അറിയിച്ചു. ഹുബ്ബളിയിൽനിന്ന് കൊല്ലത്തേക്ക് (ട്രെയിൻ നമ്പർ 07313) 2025 സെപ്റ്റംബർ 28 മുതൽ ഡിസംബർ 28 വരെ എല്ലാ ഞായറാഴ്ചയും സർവീസ് നടത്തും. തിരികെ കൊല്ലം -ഹുബ്ബളി (ട്രെയിൻ നമ്പർ 07314) സർവീസ് 29 മുതൽ ഡിസംബർ 29 വരെ എല്ലാ തിങ്കളാഴ്ചയും നടത്തും. മാവേലിക്കര ലോക്സഭാ മണ്ഡലത്തിലെ ചങ്ങനാശേരി, ചെങ്ങന്നൂർ, മാവേലിക്കര, ശാസ്താംകോട്ട എന്നീ പ്രധാന സ്റ്റേഷനുകളിൽ ഈ പ്രത്യേക സർവീസിന് സ്റ്റോപ്പ് അനുവദിച്ചിരിക്കുന്നത് ബം ഗളൂരു അടക്കമുള്ള സ്ഥലങ്ങളിൽ ജോലി നോക്കുന്നതും പഠനത്തിനായി പോയിട്ടുള്ളതുമായ ആയിരക്കണക്കിന് യാത്രക്കാർക്ക് സഹായകരമാണ്. ഈ പ്രത്യേക സർവീസ് അനുവദിക്കണമെന്ന ആവശ്യം ഉന്നയിച്ച് റെയിൽവേ മന്ത്രി, റെയിൽവേ ബോർഡ് ചെയർമാൻ, സൗത്ത് സെൻട്രൽ റെയിൽവേ ജനറൽ മാനേജർ എന്നിവർക്ക് കത്ത് നൽകുകയും തുടർന്ന് ആശയവിനിമയങ്ങൾ നടത്തുകയും ചെയ്തതിന്‍റെ ഫലമായാണ് ഈ തീരുമാനം ഉണ്ടായതെന്ന് എംപി വ്യക്തമാക്കി. ശബരിമല തീർഥാടകർക്കും മറ്റ് യാത്രക്കാർക്കും ഒരുപോലെ ഗുണം ലഭിക്കുന്ന തരത്തിൽ മണ്ഡലത്തിനകത്തെ പ്രധാന സ്റ്റേഷനുകളിൽ സ്റ്റോപ്പുകൾ അനുവദിച്ചിരിക്കുന്നത് ഏറെ ഗുണകരമാണ്. മണ്ഡലത്തിലെ ജനങ്ങളുടെ ആവശ്യത്തിന് ഇതിലൂടെ പരിഹാരം കാണാനായിട്ടുണ്ടെന്ന് എംപി പറഞ്ഞു.

ബിന്ദു പത്മനാഭന്‍ കേസ്: പ്രതി സെബാസ്റ്റ്യനെ ഇന്നു കോടതിയില്‍ ഹാജരാക്കും

ചേര്‍ത്തല: കടക്കരപ്പള്ളി സ്വദേശിനി ബിന്ദു പത്മനാഭന്‍ കൊലപാതകക്കേസില്‍ പ്രതിയായ പള്ളിപ്പുറം സ്വദേശി സെബാസ്റ്റ്യനെ കസ്റ്റഡിയില്‍ വിട്ടുകിട്ടാനുള്ള ക്രൈംബ്രാഞ്ചിന്‍റെ അപേക്ഷ കോടതി ഇന്നു പരിഗണിക്കും. കഴിഞ്ഞദിവസമാണ് ബിന്ദു പത്മനാഭന്‍ തിരോധാന കേസില്‍ സംസ്ഥാന ക്രൈംബ്രാഞ്ച് സെബാസ്റ്റ്യനെതിരേ കൊലക്കുറ്റത്തിനു കേസെടുത്തത്. ഇതുസംബന്ധിച്ച് ചൊവ്വാഴ്ച കോടതി കേസ് പരിഗണിച്ചെങ്കിലും ജയിലില്‍നിന്നു ചില സാങ്കേതിക കാരണങ്ങളാല്‍ സെബാസ്റ്റ്യനെ എത്തിക്കാന്‍ കഴിയാത്ത സാഹചര്യത്തിലാണ് ചേര്‍ത്തല ജുഡീഷല്‍ മജിസ്‌ട്രേറ്റ് കോടതി കേസ് പരിഗണിക്കുന്നത് ഇന്നത്തേക്കുമാറ്റിയത്. ഏറ്റുമാനൂര്‍ സ്വദേശിനി ജയ്‌നമ്മയെ കൊലപ്പെടുത്തിയ കേസിലാണ് സെബാസ്റ്റ്യന്‍ റിമാന്‍ഡില്‍ ജയിലിലുളളത്. ബിന്ദു പത്മനാഭന്‍ കേസില്‍ തെളിവെടുപ്പിനായി ഏഴുദിവസത്തെ കസ്റ്റഡിയാണ് അന്വേഷണസംഘം തേടിയിരിക്കുന്നത്.

സ്മാർട്ടായി നൂറനാട് പഞ്ചായത്തിലെ അങ്കണവാടികൾ

ചാരുംമൂട്: അങ്കണവാടികൾ ആധുനികവത്കരിക്കുന്നതിന്‍റെ ഭാഗമായി നൂറനാട് പഞ്ചായത്തിൽ ആറ് അങ്കണവാടി കെട്ടിടങ്ങൾ സ്മാർട്ടായി. പഞ്ചായത്ത് പ്രസിഡന്‍റ് സ്വപ്ന സുരേഷ് സ്മാർട്ട് അങ്കണവാടികളുടെ ഉദ്ഘാടനം നിർവഹിച്ചു. ഇടപ്പോൺ കിഴക്ക് വാർഡ്‌ മൂന്ന്, പുലിമേൽ വാർഡ് 16, പഴഞ്ഞിയൂർക്കോണം വാർഡ് അഞ്ച്, തത്തമുന്ന വാർഡ് ഒമ്പത്, ഇടക്കുന്നം വാർഡ് 12, പുതുപ്പള്ളിക്കുന്നം വടക്ക് വാർഡ് 11 എന്നിവിടങ്ങളിലെ അങ്കണവാടികളാണ് സ്മാർട്ടായത്. എല്ലായിടത്തും ഫർണിച്ചറുകൾ, ഫ്രിഡ്ജ്, ടെലിവിഷൻ എന്നിവയടക്കം പുതിയ ഉപകരണങ്ങളും പഞ്ചായത്ത് വിതരണം ചെയ്തു.

ബാങ്കേഴ്സ് മീറ്റ് സംഘടിപ്പിച്ചു

മാവേലിക്കര: സൂക്ഷ്മ ചെറുകിട ഇടത്തരം സംരംഭങ്ങളുടെ അഭിവൃദ്ധിയും ഉന്നമനവും ലക്ഷ്യംവച്ചു വേൾഡ് ബാങ്ക് സഹായത്തോടുകൂടി കേന്ദ്ര-സംസ്ഥാന സർക്കാരുകൾ സംയുക്തമായി നടപ്പിലാക്കുന്ന റാമ്പ് റേസിംഗ് ആൻഡ് ആക്സിലറേറ്റിംഗ് എംഎസ്എംഇ പെർഫോമൻസ് പദ്ധതിയുടെ ഭാഗമായി ജില്ലാ വ്യവസായ കേന്ദ്രം ആലപ്പുഴയും മാവേലിക്കര താലൂക്ക് വ്യവസായ ഓഫീസും ചേർന്ന് മാവേലിക്കര പഞ്ചവടി കൺവൻഷൻ സെന്‍ററിൽ ബാങ്കേഴ്‌സ് മീറ്റ് സംഘടിപ്പിച്ചു. മാവേലിക്കര മുനിസിപ്പൽ ചെയർമാൻ നൈനാൻ സി. കുറ്റിശ്ശേരിൽ ഉദ്ഘാടനം ചെയ്തു. മാവേലിക്കര ഉപജില്ലാ വ്യവസായ ഓഫീസർ ഉണ്ണികൃഷ്ണൻ അധ്യക്ഷത വഹിച്ചു. വിവിധ ബാങ്ക് അവരുടെ സ്കീമുകൾ സംരംഭകർക്കായി പരിചയപ്പെടുത്തുകയും സംരംഭകർ അവരവരുടെ പ്രോജക്ടുകൾ അവതരിപ്പിക്കുകയും സംശയനിവാരണം നടത്തുകയും ചെയ്തു. ബാങ്കുകളും സംരംഭകരും ഉൾപ്പെടെ 110 ഓളം പേർ പരിപാടിയിൽ പങ്കെടുത്തു. വ്യവസായ വികസനം ഓഫീസർമാർ ആശംസകൾ അറിയിച്ചു.

തെരുവുനായ ശല്യം: പ്രക്ഷോഭം സംഘടിപ്പിക്കും

ചേര്‍ത്തല: ജീവനു ഭീഷണിയായ തെരുവുനായ ശല്യത്തിനെതിരേ നടപടിയെടുക്കേണ്ട തദ്ദേശസ്വയം ഭരണ സ്ഥാപനങ്ങളുടെ നിഷേധാത്മക നിലപാടിനെതിരേ കേരള കോണ്‍ഗ്രസ് പ്രക്ഷോഭം സംഘടിപ്പിക്കുന്നു. തെരുവുനായകളുടെ പുനരധിവാസം സംബന്ധിച്ച് അടിയന്തരമായി നടപടി സ്വീകരിക്കണമെന്ന് ആവശ്യപ്പെട്ടു കേരള കോൺഗ്രസ് സംസ്ഥാന ഉന്നത അധികാര സമിതി അംഗം സിറിയക് കാവിലിന്‍റെ നേതൃത്വത്തിലാണ് പ്രക്ഷോഭ പരിപാടികൾ സംഘടിപ്പിക്കുന്നത്. 25ന് രാവിലെ 10.30ന് ചേർത്തല മുനിസിപ്പൽ ഓഫീസിനു മുമ്പിൽ ധർണ നടത്തും. യുഡിഎഫ് ആലപ്പുഴ ജില്ലാ ചെയർമാൻ സി.കെ. ഷാജിമോഹൻ ഉദ്ഘാടനം ചെയ്യും. തുടർന്നുള്ള ദിവസങ്ങളിൽ ബ്ലോക്ക് പഞ്ചായത്തുകളുടെയും പഞ്ചായത്തുകളുടെയും മുന്നിൽ കേരള കോണ്‍ഗ്രസ് ധർണ നടത്തും. ഇതിനായി താലൂക്ക് തല സമരസമിതിക്ക് രൂപം നൽകി.

എയിംസ് ആലപ്പുഴയില്‍തന്നെ വേണം: എല്‍എഫ്‌സി

ആലപ്പുഴ: കേരളത്തില്‍ വരാന്‍ പോകുന്ന എയിംസ് ആലപ്പുഴ ജില്ലയില്‍തന്നെ വേണമെന്ന് ലാറ്റിന്‍ ഫ്രറ്റേര്‍ണിറ്റി കോണ്‍ഗ്രസ് കമ്മിറ്റി ആവശ്യപ്പെട്ടു. ജലജന്യരോഗങ്ങളുടെ പ്രഭവകേന്ദ്രമായ ആലപ്പുഴയില്‍ ആരോഗ്യ സംവിധാനങ്ങളുടെ പരിമിതികളുണ്ട്. എയിംസ് നേടിയെടുക്കാനായി കെ.സി. വേണുഗോപാല്‍ എംപി നടത്തുന്ന ശ്രമങ്ങള്‍ക്ക് എല്‍എഫ്‌സി പിന്തുണ പ്രഖ്യാപിച്ചു. ഡോ.കെ.എസ്. മനോജ് അധ്യക്ഷത വഹിച്ചു. ജനറല്‍ സെക്രട്ടറി ടെന്‍സന്‍ ജോണ്‍കുട്ടി, സോളമന്‍ അറയ്ക്കല്‍, നെല്‍സണ്‍ മാണിയപ്പൊഴി, പി.ജെ. വിത്സണ്‍, പ്രിറ്റി തോമസ്, തോമസ് കണ്ടത്തില്‍, ക്ലീറ്റസ് കളത്തില്‍, സുജ അനില്‍, ജോണ്‍കുട്ടി പടാകുളം, എ.പി. ഇഗ്നേഷ്യസ്, കെ.എസ്. ഡൊമിനിക് എന്നിവര്‍ പ്രസംഗിച്ചു.

പി.കെ. കുര്യാക്കോസ് ഫൗണ്ടേഷന്‍ രൂപീകരണവും അനുസ്മരണവും

ചേര്‍ത്തല: കെഎസ്‌യു പ്രസ്ഥാനത്തിന് ഊടും പാവും നൽകിയ കർമയോഗിയായിരുന്നു പി.കെ. കുര്യാക്കോസ് എന്നും ആദ്ദേഹം ഉയർത്തിപ്പിടിച്ച ആശയങ്ങളും ത്യാഗനിർഭരമായ ജീവിതവും പുതുതലമുറയ്ക്ക് ആവേശദായകവുമാണെന്ന് കെ.സി. വേണുഗോപാൽ എംപി പറഞ്ഞു. പി.കെ. കുര്യാക്കോസ് ഫൗണ്ടേഷൻ രൂപീകരണവും അനുസ്മരണവും ഉദ്ഘാടനം ചെയ്യുകയായിരുന്നു അദ്ദേഹം. ചേർത്തല എൻഎസ്എസ് ഓഡിറ്റോറിയത്തിൽ നടന്ന ചടങ്ങില്‍ കെപിസിസി സെക്രട്ടറി ബി. ബൈജു അധ്യക്ഷത വഹിച്ചു. ഷാനിമോൾ ഉസ്മാൻ മുഖ്യപ്രഭാഷണം നടത്തി. സിപിഎം ജില്ലാ കമ്മിറ്റി അംഗം എസ്. രാധാകൃഷ്ണൻ ബിഡിജെഎസ് സംസ്ഥാന സെക്രട്ടറി പി.എസ്. ജ്യോതിഷ്, യുഡിഎഫ് ജില്ലാ ചെയർമാൻ സി.കെ. ഷാജിമോഹൻ, എസ്. ശരത്, കെ.ആർ. രാജേന്ദ്രപ്രസാദ്, സി.വി. തോമസ്, സി.ഡി. ശങ്കർ, മനോജ് കുമാർ, ടി.സുബ്രഹ്മണ്യ ദാസ്, എസ്. കൃഷ്ണകുമാർ, കെ.സി. ആന്‍റണി, ടി.എസ്. രഘുവരൻ, ബിജു കോയിക്കര, ജയലക്ഷ്മി അനിൽകുമാർ, പെരുമ്പളം ഗോപി, ഡോ. ബേബി കമലം, അജയ് ജുവൽ കുര്യാക്കോസ്, എ.ഡി. തോമസ്, ഫൗണ്ടേഷൻ ചെയർമാൻ സജി കുര്യാക്കോസ് എന്നിവർ പ്രസംഗിച്ചു.

കൊടുംവളവില്‍ കെണിയായി കലുങ്ക്

എടത്വ: കൊടുംവളവില്‍ അപകടക്കെണിയായി പച്ച കോട്ടയില്‍ കലുങ്ക്. 2021 ല്‍ ടിപ്പര്‍ലോറി കയറിയാണ് പാലത്തിന്‍റെ കൈവിരിയും സ്ലാബും തകര്‍ന്നത്. പാലത്തിന്‍റെ പുനര്‍നിര്‍മാണത്തിന് അഞ്ചുവര്‍ഷം കഴിഞ്ഞിട്ടും ഫണ്ടില്ല. പാലം അപകടനിലയില്‍ ആയതോടെ പൊതുജനങ്ങള്‍ എടത്വ പഞ്ചായത്തില്‍ പരാതിപ്പെട്ടു. പരാതിയില്‍ തീര്‍പ്പ് ലഭിക്കാതെ വന്നതോടെ മുഖ്യമന്ത്രിയുടെ പരാതി പരിഹാര അദാലത്തില്‍ നിവേദനം നല്‍കി. അദാലത്തില്‍ കൊടുത്ത നിവേദനത്തിന്‍റെ അടിസ്ഥാനത്തില്‍ എടത്വ പഞ്ചായത്തുമായി നാട്ടുകാര്‍ ബന്ധപ്പെട്ടു. ഫണ്ടിന്‍റെ അപര്യാപ്ത ചൂണ്ടിക്കാട്ടി പുനര്‍നിര്‍മാണം നീണ്ടുപോയി. പാലത്തിന്‍റെ പുനര്‍നിര്‍മാണം ആവശ്യപ്പെട്ട് അഞ്ചു വര്‍ഷത്തിനിടെ നാട്ടുകാര്‍ കയറിയിറങ്ങാത്ത ഓഫീസുകളില്ല. നിര്‍മാണത്തിന്‍റെ നിജസ്ഥിതി അറിയാന്‍ പ്രദേശവാസിയായ വിജോ ജോസഫ് പഞ്ചായത്ത് സെക്രട്ടറിക്ക് കത്തു നല്‍കി. പാലത്തിന്‍റെ പുനര്‍നിര്‍മാണം ദേശീയ ഗ്രാമീണ തൊഴിലുറപ്പ് പദ്ധതിയില്‍ ഉള്‍പ്പെടുത്തി എസ്റ്റിമേറ്റ് തയാറാക്കിയിട്ടുണ്ടെന്നും അനുമതി ലഭ്യമാകുന്ന മുറയ്ക്ക് പാലത്തിന്‍റെ നിര്‍മാണം നടക്കുമെന്നുമാണ് സെക്രട്ടറി അറിയിച്ചത്. പ്രദേശത്തെ നൂറിലേറെ കുടുംബങ്ങള്‍ ആശ്രയിക്കുന്ന പാലമാണ് അപകടനിലയില്‍ കിടക്കുന്നത്. റോഡിലെ വളവ് തിരിഞ്ഞെത്തുന്ന ഇരുചക്രവാഹനങ്ങളും ഓട്ടോയും നിയന്ത്രണം വിട്ട് കൈവിരിയില്ലാത്ത പാലത്തിനു താഴെയുള്ള ഇടത്തോട്ടില്‍ വീഴാറുള്ളത് പതിവാണെന്ന് പ്രദേശവാസികള്‍ പറയുന്നു. വിദ്യാര്‍ഥികളുടെ സ്‌കൂള്‍ വാഹനങ്ങള്‍ ഉള്‍പ്പെടെ നിരവധി വാഹനങ്ങള്‍ ഈ റോഡിലൂടെ കടന്നുപോകാറുണ്ട്. സര്‍ക്കാര്‍-സര്‍ക്കാര്‍ ഇതര സ്ഥാപനങ്ങള്‍, ദേവാലയങ്ങള്‍, പച്ച, എടത്വ പ്രദേശത്തെ സ്‌കൂളുകള്‍, മാര്‍ക്കറ്റ് തുടങ്ങിയ സ്ഥലങ്ങളിലേക്ക് നിരവധി യാത്രക്കാരാണ് സഞ്ചരിക്കുന്നത്. പാലത്തിന്‍റെ ശോച്യാവസ്ഥ പരിഹരിച്ച് അപകട രഹിതമായ യാത്രാ സൗകര്യം ഉറപ്പാക്കണമെന്നാണ് നാട്ടുകാരുടെ ആവശ്യം.

അടിപ്പാത-കൊപ്പാറ റോഡ് തകർന്നു

ഹരിപ്പാട്: കരുവാറ്റ വഴിയമ്പലത്തുനിന്നു റെയിൽവേ അടിപ്പാത വഴി കൊപ്പാറക്കടവ് വരെയുള്ള റോഡിലെ കുഴികൾ വാഹന യാത്രക്കാർക്ക് ദുരിതമാകുന്നു. മഴ പെയ്താൽ റോഡ് വെള്ളക്കെട്ടാകും. റോഡിലൂടെ കാൽനടയാത്രക്കാർക്കുപോലും പോകാനാകാത്ത സ്ഥിതിയാണ്. വാഹനങ്ങൾ പോകുമ്പോൾ കാൽനടക്കാരുടെ ദേഹത്ത് വെള്ളം തെറിക്കുന്നത് പതിവാണ്.ഒരുവശത്ത് തോടായതിനാൽ വശത്തേക്ക് മാറാനും കഴിയില്ല. കരുവാറ്റ പഞ്ചായത്ത് അഞ്ചാം വാർഡിലാണ് റോഡ്. റോഡ് ടാർ ചെയ്യുന്നതിന് 15.13 ലക്ഷം രൂപയും വൈദ്യുതിത്തൂണുകൾ മാറ്റിയിടുന്നതിന് 86,000 രൂപയും അനുവദിച്ചിരുന്നു. എന്നാൽ, അനുവദിച്ച തുക കൊണ്ട് റോഡിലെ കുറച്ചുഭാഗം മാത്രമാണ് ടാർ ചെയ്തത്. തോപ്പിൽ മുതൽ 200 മീറ്ററോളം ഭാഗമാണ് പൂർണമായും തകർന്നിരിക്കുന്നത്. ഇരുചക്രവാഹനങ്ങളും ഓട്ടോറിക്ഷകളും ഉൾപ്പെടെയുള്ള വാഹനങ്ങളാണ് കൂടുതലായും ഇതുവഴി പോകുന്നത്. ദേശീയപാതയിൽനിന്നു കൊപ്പാറക്കടവ് പാലംവഴി ചെറുതനയിലും വീയപുരത്തും എളുപ്പമെത്താവുന്ന റോഡായതിനാൽ ഏറെ ആൾക്കാരുടെ ആശ്രയമാണിത്. ഇരുചക്രവാഹനങ്ങളിൽ യാത്ര ചെയ്യുന്നവർ അപകടത്തിൽപ്പെടുന്നത് പതിവാണ്. റോഡ് സഞ്ചാരയോഗ്യമാക്കണമെന്നാണ് നാട്ടുകാരുടെ ആവശ്യം.

നടുവൊടിഞ്ഞ് നാട്ടുകാർ

അന്പലപ്പുഴ: റോഡ് തകർന്നുകിടന്നിട്ട് ഒന്നരപ്പതിറ്റാണ്ട് കഴിഞ്ഞു. തകർന്ന റോഡിലുടെ യാത്ര ചെയ്ത് നടുവൊടിഞ്ഞ് നാട്ടുകാർ. പുറക്കാട് കന്നിട്ടക്കടവ് റോഡിനാണ് ഈ ദുരവസ്ഥ. ഉമ്മൻ ചാണ്ടി സർക്കാരിന്‍റെ കാലത്ത് ഒറ്റത്തവണ തീർപ്പാക്കൽ പദ്ധതി പ്രകാരം പൊതു മരാമത്ത് വകുപ്പാണ് റോഡ് നിർമിച്ചത്. പഞ്ചായത്തിന്‍റെ ഉടമസ്ഥതയിലുള്ള റോഡ് ഇതുവരെ പൊതുമരാമത്ത് വകുപ്പിന് കൈമാറിയിട്ടില്ല. അതുകൊണ്ടുതന്നെ റോഡിന്‍റെ അറ്റകുറ്റപ്പണി നടത്തേണ്ടതും പഞ്ചായത്താണ്. എന്നാൽ, ലക്ഷങ്ങൾ ചെലവുവരുന്ന അറ്റകുറ്റപ്പണി നടത്താൻ പഞ്ചായത്തിന്‍റെ പക്കൽ ഫണ്ടില്ലാത്തതിനാൽ നടുവൊടിയുന്നത് ഇതിലേ യാത്ര ചെയ്യുന്ന നാട്ടുകാരുടേതാണത്രെ. ഒന്നര കി. മീറ്ററോളം ദൂരമുള്ള റോഡ് വർഷങ്ങളായി തകർന്നുകിടന്നതിനെത്തുടർന്ന് നാട്ടുകാർ ചെയ്ത നിരന്തര സമരഫലമായാണ് ടാറിംഗ് നടത്തിയത്. എന്നാൽ, റോഡ് തകർന്ന് വർഷങ്ങൾ കഴിഞ്ഞിട്ടും ഇതിന്‍റെ അറ്റകുറ്റപ്പണി നടത്താൻ അധികൃതർ തയാറായിട്ടില്ല. കുണ്ടും കുഴിയും നിറഞ്ഞ റോഡിലൂടെ ഓടുന്ന ഓട്ടോറിക്ഷകൾക്ക് വർക്ക് ഷോപ്പിൽനിന്നിറങ്ങാൻ നേരമില്ലെന്നാണ് ഡ്രൈവർമാർ പറയുന്നത്. മഴയായാൽ കുഴിയിൽ വീണ് യാത്രക്കാരുടെ നടുവൊടിയുന്നതും വാഹനങ്ങൾക്ക് തകരാർ സംഭവിക്കുന്നതും പതിവാണ്. അടിയന്തരമായി റോഡ് ഗതാഗതയോഗ്യമാക്കണമെന്നാവശ്യപ്പെട്ട് ഏതാനും ആഴ്ച മുൻപ് നാട്ടുകാർ സമരം നടത്തിയിരുന്നു. ഇനി അടുത്ത ഘട്ട സമരം സംഘടിപ്പിക്കാനാണ് നാട്ടുകാരുടെ തീരുമാനം.

ജെയ്‌നമ്മ കൊലക്കേസിൽ അന്വേഷണം ഇഴയുന്നു

കോട്ടയം: ചേര്‍ത്തല സ്വദേശി സെബാസ്റ്റ്യന്‍ നടത്തിയതായി കരുതുന്ന കൊലപാതകങ്ങളില്‍ വ്യക്തമായ തെളിവു നിരത്താനാവാതെ ക്രൈംബ്രാഞ്ച്. അതിരമ്പുഴ സ്വദേശിനി ജെയ്‌നമ്മയുടെ കൊലപാതകത്തില്‍ അറസ്റ്റിലായി രണ്ടു മാസം പിന്നിടുമ്പോഴും പഴുതടച്ച തെളിവു നിരത്തി കുറ്റപത്രം തയാറാക്കാന്‍ ക്രൈം ബ്രാഞ്ചിന് സാധിച്ചിട്ടില്ല. ചേര്‍ത്തല പള്ളിപ്പുറം ചൊങ്ങുംതറ സി.എം. സെബാസ്റ്റ്യന്‍റെ വീട്ടുവളപ്പില്‍ കത്തിക്കരിഞ്ഞ നിലയില്‍ കണ്ടെത്തിയ അസ്ഥി കൊല്ലപ്പെട്ട ജെയ്‌നമ്മയുടേതാണോ എന്നറിയാന്‍ നടത്തുന്ന ഡിഎന്‍എ ടെസ്റ്റ് ഫലം ഒന്നര മാസമായിട്ടും ലഭിച്ചിട്ടില്ല. ഒന്നിലേറെ തവണ തീയിടുകയും പിന്നീട് കുഴിച്ചിടുകയും ചെയ്ത അസ്ഥിയില്‍നിന്ന് ഡിഎന്‍എ ലഭിക്കാന്‍ താമസമുണ്ടാകുമെന്നാണ് പോലീസ് പറയുന്നത്. ബിന്ദു പദ്മനാഭന്‍ എവിടെ? അതേസമയം സമാനമായ രീതിയില്‍ സെബാസ്റ്റ്യന്‍ വകവരുത്തിയതായി സംശയിക്കുന്ന ചേര്‍ത്തല കടക്കരപ്പള്ളി സ്വദേശിനി ബിന്ദു പദ്മനാഭന്‍റെ തിരോധാനത്തിലും തെളിവുകള്‍ ലഭ്യമായിട്ടില്ല. സെബാസ്റ്റ്യന്‍റെ സൗഹൃദവലയത്തിലായിരിക്കെ കാണാതായ വാരനാട് സ്വദേശി ഐഷക്ക് എന്തു സംഭവിച്ചു എന്നതില്‍ ചേര്‍ത്തല പോലീസ് നടത്തിവരുന്ന അന്വേഷണവും ഫലം കണ്ടിട്ടില്ല. ചേര്‍ത്തലയില്‍ സെബാസ്റ്റ്യന്‍റെ വീട്ടിനുള്ളിലും സമീപത്തെ കുളത്തിലുമായി കണ്ടെത്തിയ വാച്ച്, ബാഗ്, വസ്ത്രം എന്നിവയുടെ അവശിഷ്ടങ്ങള്‍ ആരുടേത് എന്നതിലും വ്യക്തത വന്നിട്ടില്ല. അസ്ഥിയുടെ ഭാഗം ജെയ്‌നമ്മയുടേതാണോ ബിന്ദു പദ്മനാഭന്‍റേതാണോ എന്നതില്‍ വ്യക്തത വരാതെ അന്വേഷണം മുന്നോട്ടുപോകില്ല. സെബാസ്റ്റ്യന്‍റെ വീട്ടിലെ കുളിമുറിയില്‍ കണ്ടെത്തിയ രക്തക്കറ ജെയ്‌നമ്മയുടേതാണെന്നു പരിശോധനയില്‍ കണ്ടെത്തിയിരുന്നു. 2024 ഡിസംബര്‍ 23ന് വൈകുന്നേരം കാണാതായ ജെയ്‌നമ്മയുടെ മൊബൈല്‍ ഫോണ്‍ പിന്നീടും സെബാസ്റ്റ്യന്‍റെ കൈവശമുണ്ടായിരുന്നു. രണ്ടു മാസം മുന്‍പ് ഏറ്റുമാനൂര്‍ വെട്ടിമുകളിലെ ഭാര്യവീട്ടില്‍ നിന്ന് അറസ്റ്റിലായപ്പോള്‍ ഈ ഫോണ്‍ പോലീസ് കണ്ടെടുത്തിരുന്നു. ഡിസംബര്‍ 23ന് വൈകുന്നേരം ജെയ്‌നമ്മ ചേര്‍ത്തലയില്‍ സെബാസ്റ്റ്യന്‍റെ വീട്ടില്‍ എത്തിയതായി മൊബൈല്‍ ഫോണ്‍ ലൊക്കേഷന്‍ വ്യക്തമാക്കുന്നുണ്ട്. ജെയ്‌നമ്മയെ എങ്ങനെ വകവരുത്തിയെന്നോ ആരുടെ സഹായം ലഭിച്ചുവെന്നോ മൃതദേഹം എവിടെ മറവുചെയ്‌തെന്നോ വ്യക്തമല്ല. ഇരുപതു ദിവസം സെബാസ്റ്റ്യനെ ചോദ്യം ചെയ്തിട്ടും പ്രതി നിര്‍ണായക ചോദ്യങ്ങള്‍ക്ക് മറുപടി നല്‍കാന്‍ തയാറായിരുന്നില്ല. ഡിഎന്‍എ ഫലം വരാതെ അന്വേഷണം മുന്നോട്ടുപോയിട്ടു കാര്യമില്ലെന്നാണ് പോലീസ് നിഗമനം. ബിന്ദു പദ്മനാഭന്‍ തിരോധാനക്കേസില്‍ സെബാസ്റ്റ്യന്‍റെ അറസ്റ്റ് രേഖപ്പെടുത്തിയിട്ടില്ല. ജെയ്‌നമ്മ വധക്കേസില്‍ ആഴ്ചകള്‍ക്കുള്ളില്‍ കുറ്റപത്രം സമര്‍പ്പിക്കാനായില്ലെങ്കില്‍ പ്രതിക്ക് ജാമ്യം ലിക്കാനുള്ള സാഹചര്യമാണ് മുന്നിലുള്ളത്. ബിന്ദു പദ്മനാഭന്‍ തിരോധാനക്കേസില്‍ ഏഴു വര്‍ഷം മുന്‍പ് സാഹചര്യത്തെളിവുകളോടെ പ്രതിയെ ചോദ്യം ചെയ്‌തെങ്കിലും കേസ് തേഞ്ഞുമാഞ്ഞുപോയിരുന്നു.

കുട്ടപ്പപ്പണിക്കർ കൊല: പ്രതിയെ കുടുക്കിയത് ചെങ്ങന്നൂർ പോലീസിന്‍റെ അന്വേഷണ മികവ്

ചെങ്ങന്നൂർ: 31 വർഷമായി പ്രതിയെ അറസ്റ്റ് ചെയ്യാൻ കഴിയാത്തതിന്‍റെ പേരിൽ വിചാരണ മുടങ്ങിക്കിടന്ന കുട്ടപ്പപ്പണിക്കർ കൊലക്കേസിന് ഇനി ജീവൻ വയ്ക്കും. ചെങ്ങന്നൂർ പോലീസിന്‍റെ അന്വേഷണ മികവാണ് മൂന്നു പതിറ്റാണ്ടിനു ശേഷം പ്രതിയെ അറസ്റ്റ് ചെയ്യാൻ വഴിയൊരുക്കിയത്. തന്‍റെ പിതാവിനെക്കുറിച്ച് കുട്ടപ്പപ്പണിക്കർ എന്ന വയോധികൻ മോശമായി ചിലതൊക്കെ പറഞ്ഞു എന്നതിന്‍റെ പേരിൽ 26 വയസ് ഉണ്ടായിരുന്ന ജയപ്രകാശ് 31 വർഷം മുന്പു നടത്തിയ മർദനമാണ് ഒടുവിൽ കൊലപാതകമായി പരിണമിച്ചത്. 1994 നവംബർ 15നു രാത്രി ഏഴിന് ശേഷം വീട്ടിലേക്കു നടന്നുപോവുകയായിരുന്ന 71 വയസുകാരനായ കുട്ടപ്പപ്പണിക്കരെ കനാലിനു സമീപത്തു വച്ച് ജയപ്രകാശ് ചോദ്യം ചെയ്തു. വാക്കേറ്റം കൈയേറ്റത്തിലെത്തി. മർദനം, കൊലപാതകം പ്രകോപിതനായ ജയപ്രകാശ് കല്ലുകൊണ്ടും കൈകൊണ്ടും മർദിക്കുകയും ചവിട്ടുകയും ചെയ്തെന്നാണ് പോലീസ് കണ്ടെത്തൽ. ഗുരുതര പരിക്കേറ്റ കുട്ടപ്പപ്പണിക്കരെ കോട്ടയം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ആക്രമണത്തിനു ശേഷം ജയപ്രകാശ് മുംബൈയിലേക്കു കടന്നു. എന്നാൽ, ഡിസംബർ നാലിനു കുട്ടപ്പപ്പണിക്കർ മരിച്ചു. ഇതോടെ കുടുങ്ങുമെന്നു കരുതിയ പ്രതി അവിടെനിന്നു സൗദി അറേബ്യയിലേക്കു രക്ഷപ്പെട്ടു. പ്രതിയെ കണ്ടെത്താൻ പോലീസ് വ്യാപക അന്വേഷണം നടത്തിയെങ്കിലും ഒരു തുന്പും കിട്ടിയില്ല. 1997ൽ പോലീസ് കോടതിയിൽ കുറ്റപത്രം സമർപ്പിച്ചു. സംഭവം കഴിഞ്ഞ് അഞ്ചു വർഷമായിട്ടും പ്രതിയെ പോലീസിനു കണ്ടത്താൻ സാധിക്കാത്തതിനെത്തുടർന്ന് 1999ൽ ജയപ്രകാശിനെ പിടികിട്ടാപ്പുള്ളിയായി കോടതി പ്രഖ്യാപിച്ചു. സംഭവത്തോടെ ജയപ്രകാശിന്‍റെ സഹോദരങ്ങളും മറ്റും സ്ഥലവും വീടും വീറ്റ് ഇവിടെനിന്നു പോയി. ഇതോടെ പ്രതിയെ കിട്ടാനുള്ള സാധ്യത വീണ്ടും കുറഞ്ഞു. വലയിലേക്ക് ഇതിനിടെ, ആലപ്പുഴ ജില്ലാ പോലീസ് മേധാവി എം.പി. മോഹനചന്ദ്രൻ ജില്ലയിലെ പെൻഡിംഗ് കേസുകളുടെ ലിസ്റ്റ് എടുത്തു. കുട്ടപ്പപ്പണിക്കരുടെ കേസ് ശ്രദ്ധയിൽപ്പെട്ടു. കേസ് പുനരന്വേഷിക്കാൻ ചെങ്ങന്നൂർ ഡിവൈഎസ്പി എം കെ. ബിനുകുമാറിന്‍റെ മേൽനോട്ടത്തിൽ ഇൻസ്പെക്ടർ എ.സി. വിപിന്‍റെ നേതൃത്വത്തിൽ പ്രത്യേക സംഘത്തെ നിയോഗിച്ചു. ഇവർ നടത്തിയ അന്വേഷണത്തിൽ പ്രതിയുടെ സഹോദരി കാസർഗോഡ് കാഞ്ഞങ്ങാട്ടും സഹോദരൻ പൂനയിലും താമസിക്കുന്നതായി കണ്ടെത്തി. ഇവരെ ചോദ്യം ചെയ്തതിൽനിന്നു ജയപ്രകാശ് ഗൾഫിലാണെന്നു വ്യക്തമായി. ഇതോടെ പോലീസ് അന്വേഷണവും നിരീക്ഷണവും ശക്തമാക്കി. ചെന്നിത്തല കാരാഴ്മയിൽനിന്നു പ്രതി വിവാഹം കഴിച്ചിട്ടുണ്ടെന്നും പോലീസ് കണ്ടെത്തി. അവധിക്കാലത്ത് ഇയാൾ ഭാര്യയുടെ നാട്ടിൽ എത്തുന്നുണ്ടെന്ന രഹസ്യവിവരം ലഭിച്ചു. ഇതോടെ വലയൊരുക്കി കാത്തിരുന്ന പോലീസിന്‍റെ കൈകളിലേക്കു പ്രതി വന്നു വീഴുകയായിരുന്നു. ചെന്നിത്തല ഒരിപ്രം ഇന്ദീവരം വീടിനു സമീപത്തുനിന്നാണ് പ്രതിയെ പിടികൂടിയത്. കോടതിയിൽ ഹാജരാക്കി ഇയാളെ റിമാൻഡ് ചെയ്തു. കൂടുതൽ തെളിവെടുപ്പിനായി പ്രതിയെ പോലീസ് കസ്റ്റഡിയിൽ വിട്ടുകിട്ടാനായി പ്രത്യേക അപേക്ഷ കോടതിയിൽ നൽകുമെന്ന് പോലീസ് പറഞ്ഞു.

ടിഡി മെഡിക്കല്‍ കോളജില്‍ ഹൈമാസ്റ്റ് ലൈറ്റ് ഉദ്ഘാടനം ചെയ്തു

ആലപ്പുഴ: കെ.സി. വേണുഗോപാല്‍ എംപിയുടെ തനത് ഫണ്ടില്‍നിന്ന് മെഡിക്കല്‍ കോളജിലും ഹോസ്പിറ്റലിലും ഹൈമാസ്റ്റ് ലൈറ്റ് സ്ഥാപിച്ചു. ഏകദേശം ഇരുപതു ലക്ഷം രൂപയാണ് ചെലവ്. വിളക്കുകള്‍ കെ.സി വേണുഗോപാല്‍ ഉദ്ഘാടനം ചെയ്തു. ചടങ്ങില്‍ പിടിഎ പ്രസിഡന്‍റ് സി. ഗോപകുമാര്‍ അധ്യക്ഷത വഹിച്ചു. വൈസ് പ്രിന്‍സിപ്പല്‍ ഡോ. എസ്.ജെ. ജെസി, ആശുപത്രി സൂപ്രണ്ട് ഡോ. എ. ഹരികുമാര്‍, പിടിഎ വൈസ് പ്രസിഡന്‍റ് ഷാജി വാണിയപുരയ്ക്കല്‍, ട്രഷറര്‍ ഡോ. സ്മിത ജി. രാജ്, ചെയര്‍പേഴ്‌സണ്‍ സാന്‍ മരിയ ബേബി, പിടിഎ എക്‌സിക്യൂട്ടീവ് അംഗങ്ങളായ കെ. സലില്‍ കുമാര്‍, എസ്. പുഷ്പരാജന്‍, എസ്. ഹാരിസ്, ആശുപത്രി വികസന സമിതി അംഗം യു.എം. കബീര്‍ എന്നിവര്‍ പങ്കെടുത്തു. കോളജിന്‍റെ വികസനവുമായി ബന്ധപ്പെട്ട് പി ടിഎ യും യൂണിയനുംനിവേദനംനല്‍കി.

തുമ്പോളി കപ്പൂച്ചിന്‍ ആശ്രമ ദേവാലയത്തില്‍ തിരുനാള്‍

ആലപ്പുഴ: തുമ്പോളി കപ്പൂച്ചിന്‍ ആശ്രമ ദേവാലയത്തില്‍ വിശുദ്ധ കൊച്ചുത്രേസ്യയുടെ തിരുനാള്‍ നാളെ ആരംഭിക്കും. ഇന്നു രാവിലെ 6.30ന് ദിവ്യബലി വൈകുന്നേരം 5.45ന് ജപമാല, നൊവേന, ദിവ്യബലി-ഫാ. ജോസി ജോസഫ്. നാളെ രാവിലെ 6.30ന് ദിവ്യബലി, വിശുദ്ധ ഫ്രാന്‍സിസിന്‍റെ നൊവേന വൈകുന്നേരം 5.45ന് ജപമാല, ദിവ്യബലി, പ്രസുദേന്തി വാഴ്ച, കൊടിയേറ്റ്- ഫാ. പോള്‍ ജെ. അറയ്ക്കല്‍. തുടര്‍ന്ന് ദിവ്യബലി മുഖ്യകാര്‍മികന്‍ ആലപ്പുഴ ബിഷപ് ഡോ. ജയിംസ് റാഫേല്‍ ആനാപറമ്പില്‍. സഹകാര്‍മികര്‍ ഫാ. പോള്‍ ജെ. അറയ്ക്കല്‍, ഫാ. ജോസഫ് അല്‍ഫോണ്‍സ് കൊല്ലാപറമ്പില്‍. 25ന് രാവിലെ 6.30ന് ദിവ്യബലി, വിശുദ്ധ ഫ്രാന്‍സിസിന്‍റെ നൊവേന, വൈകുന്നേരം 5.45ന് ജപമാല മുഖ്യകാര്‍മികന്‍ ഫാ. ക്രിസ്റ്റഫര്‍ എം. അര്‍ഥശേരില്‍. വചനപ്രഘോഷണം ഫാ. സേവ്യര്‍ കുടിയാംശേരി. 26ന് രാവിലെ 6.30ന് ദിവ്യബലി വിശുദ്ധ ഫ്രാന്‍സിസിന്‍റെ നൊവേന വൈകുന്നേരം 5.45ന് ജപമാല, ദിവ്യബലി (സീറോ മലബാര്‍ റീത്തില്‍). മുഖ്യകാര്‍മികന്‍ ഫാ. സെബാസ്റ്റ്യന്‍ ചൂരനോലിക്കല്‍ വിസി. 27ന് രാവിലെ 6.30ന് ദിവ്യബലി വിശുദ്ധ ഫ്രാന്‍സിസിന്‍റെ നൊവേന വൈകുന്നേരം 5.30ന് തിരുസ്വരൂപം എഴുന്നള്ളിക്കല്‍, ദിവ്യബലി മുഖ്യകാര്‍മികന്‍ മോണ്‍. ജോയ് പുത്തന്‍വീട്ടില്‍. വചനപ്രഘോഷണം ഫാ. സെബാസ്റ്റിയന്‍ വലിയവീട്ടില്‍. 28ന് പ്രധാന തിരുനാള്‍ ദിനം. രാവിലെ 8.15ന് വിശുദ്ധ ഫ്രാന്‍സിസിന്‍റെ നൊവേന, രാവിലെ 8.30ന് പ്രഥമ ദിവ്യകാരുണ്യ സ്വീകരണം, വൈകുന്നേരം നാലിന് തിരുനാള്‍ സമൂഹബലി. മുഖ്യകാര്‍മികന്‍ ഫാ. ജോസഫ് പഴമ്പാശേരി ഒഎഫ്എം ക്യാപ്. വചനപ്രഘോഷണം- ഫാ. പ്രസാദ് സിപ്രിയന്‍ ഒഎഫ്എം ക്യാപ്. തുടര്‍ന്ന് പ്രദക്ഷിണം പരിശുദ്ധ കുര്‍ബാനയുടെ ആശീര്‍വാദം, രാത്രി 12ന് കൊടിയിറക്ക്.

കാൽലക്ഷം പേരുടെ ഒപ്പുശേഖരണം ആരംഭിച്ചു

കായംകുളം: തീരദേശത്തെയും മധ്യതിരുവിതാം കൂറിലെയും പ്രധാന സ്റ്റേഷനായ കായംകുളം ജംഗ്‌ഷൻ റെയിൽവേ സ്റ്റേഷനോടുള്ള അവഗണനയ്ക്കെതിരേയും വന്ദേ ഭാരത്, രാജധാനി ഉൾപ്പെടെയുള്ള മുഴുവൻ ട്രെയിനുകൾക്കും സ്റ്റോപ്പ് അനുവദിക്കുക തുടങ്ങിയ ആവശ്യങ്ങൾ ഉന്നയിച്ച് റെയിൽവേ ആക‌്ഷൻ കൗൺസിൽ കേന്ദ്ര റെയിൽവേ മന്ത്രിക്ക് സമർപ്പിക്കുന്ന കാൽലക്ഷം യാത്രക്കാരുടെ ഒപ്പു ശേഖരണം ആരംഭിച്ചു. ഒപ്പു ശേഖരണത്തിന്‍റെ ഉദ്ഘാടനം ആദ്യകാല കമ്യുണിസ്റ്റ് നേതാവും മുൻ നഗരസഭാ ചെയർമാനുമായ കെ. നാരായണൻ നിർവഹിച്ചു. ആക‌്ഷൻ കൗൺസിൽ പ്രസിഡന്‍റ് യു. മുഹമ്മദ് അധ്യക്ഷത വഹിച്ചു. നഗരസഭാ ചെയർപേഴ്സൺ പി. ശശികല, കൃഷ്ണപുരം പഞ്ചായത്ത് പ്രസിഡന്‍റ് ശ്രീഹരി, കണ്ടല്ലൂർ പഞ്ചായത്ത് പ്രസിഡന്‍റ് പ്രസന്നകുമാരി, തോമസ് എം. മാത്തുണ്ണി, പാലമുറ്റത്ത് വിജയകുമാർ, ടോം ജേക്കബ് , എ. ത്വാഹാ മൗലവി, കെപിസിസി സെക്രട്ടറിമാരായ അഡ്വ. ഇ. സമീർ, കറ്റാനം ഷാജി, ഡോ. ചേരാവള്ളി ശശി തുടങ്ങിയവർ പങ്കെടുത്തു.

പെരുമ്പളം പാലം ഡിസംബറില്‍ തുറക്കും

ആലപ്പുഴ: അവസാനഘട്ട നിര്‍മാണം പുരോഗമിക്കുന്ന പെരുമ്പളം പാലത്തിന്‍റെനിര്‍മാണപ്രവര്‍ത്തനങ്ങള്‍ വിലയിരുത്തുന്നതിന് ദലീമ ജോജോ എംഎല്‍എ സ്ഥലം സന്ദര്‍ശിച്ചു. ദ്വീപില്‍ ദുരിതജീവിതം അനുഭവിച്ചുവന്ന ഒരുകൂട്ടം ജനങ്ങളോടുള്ള സര്‍ക്കാരിന്‍റെ കരുതലിന്‍റെ പ്രതീകമാണ് 100 കോടി രൂപ മുടക്കി നിര്‍മിക്കുന്ന പാലമെന്ന് എംഎല്‍എ പറഞ്ഞു. പാലത്തിന്‍റെ നിര്‍മാണ പ്രവര്‍ത്തനങ്ങള്‍ പൂര്‍ത്തീകരിച്ചു കഴിഞ്ഞു. ഇപ്പോള്‍ സമീപനപാത നിര്‍മാണം അതിവേഗം പുരോഗമിക്കുകയാണ്. ഡിസംബറോടെ പെരുമ്പളം നിവാസികള്‍ക്ക് പാലം സമര്‍പ്പിക്കാനാകുമെന്നും എംഎല്‍എ പറഞ്ഞു. ഊരാളുങ്കല്‍ ലേബര്‍ കോണ്‍ട്രാക്ട് സൊസൈറ്റി നേതൃത്വത്തിലാണ് വേമ്പനാട് കായലിന് കുറുകെ പെരുമ്പളം ദ്വീപ് നിവാസികളുടെ സ്വപ്ന പദ്ധതിയായ പാലം നിര്‍മിക്കുന്നത്. സമീപന പാതയ്ക്കുള്ള നിര്‍മാണ പ്രവര്‍ത്തനങ്ങളും അതിവേഗം പുരോഗമിക്കുകയാണ്. വടുതലഭാഗത്തെ റോഡ് നിര്‍മാണം 95 ശതമാനവും പെരുമ്പളം ഭാഗത്ത് 70 ശതമാനവും പൂര്‍ത്തീകരിച്ചിട്ടുണ്ട്. കരയിലെ രണ്ട് തൂണുകള്‍ അടക്കം 34 തൂണുകളിലാണ് പാലം നിലയുറപ്പിക്കുന്നത്. 1157 മീറ്റര്‍ നീളവും 11 മീറ്റര്‍ വീതിയുമുള്ള പാലത്തില്‍ രണ്ടുവരി ഗതാഗതത്തിന് യോഗ്യമായ 7.5 മീറ്റര്‍ വീതിയുള്ള പാതയും ഇരുവശങ്ങളിലും 1.5 മീറ്റര്‍ വീതമുള്ള നടപ്പാതയുമുണ്ട്. ദേശീയ ജലപാത കടന്നുപോകുന്ന ദിശയായതിനാല്‍ ബാര്‍ജ്, വലിയ യാനങ്ങള്‍ എന്നിവ തടസമില്ലാതെ കടന്നുപോകുന്നതിന് നടുവില്‍ ബോസ്ട്രിങ് ആര്‍ച്ച് മാതൃക വരുന്ന രീതിയിലാണ് നിര്‍മാണം. വടുതല ഭാഗത്തും പെരുമ്പളം ഭാഗത്തും 300 മീറ്റര്‍ നീളത്തിലാണ് സമീപന റോഡുകള്‍ നിര്‍മിക്കുന്നത്. കായലിന് കുറുകെ നിര്‍മിക്കുന്ന കേരളത്തിലെ ഏറ്റവും നീളമേറിയ ഈ പാലം പൂര്‍ത്തീകരിക്കുന്നതോടെ ദ്വീപ് നിവാസികളുടെയും മറ്റാവശ്യങ്ങള്‍ക്കായി ഇവിടെ എത്തുന്നവരുടെയും വര്‍ഷങ്ങളായുള്ള യാത്രാദുരിതത്തിനാണ് പരിഹാരമാകുന്നത്. ചേര്‍ത്തല- അരൂക്കുറ്റി റോഡില്‍ നിന്നു പെരുമ്പളം ദ്വീപ് വഴി വൈക്കം-പൂത്തോട്ട-തൃപ്പൂണിത്തുറ സംസ്ഥാനപാതയെ ബന്ധിപ്പിക്കുന്ന റോഡിന്റെ ആദ്യഘട്ടം എന്ന നിലയിലാണ് പാലം വിഭാവനം ചെയ്തിരിക്കുന്നത്. തൈക്കാട്ടുശ്ശേരി ബ്ലോക്് പഞ്ചായത്ത് പ്രസിഡന്‍റ് വി.ആര്‍. രജിത, പെരുമ്പളം പഞ്ചായത്ത് പ്രസിഡന്‍റ് വി. ആശ, ബി. വിനോദ്, ഊരാളുങ്കല്‍ ലേബര്‍ കോണ്‍ട്രാക്ട് സൊസൈറ്റി പ്രതിനിധികള്‍, രാഷ്ട്രീയപാര്‍ട്ടി പ്രതിനിധികള്‍ എന്നിവരും സന്ദര്‍ശനത്തില്‍ എംഎല്‍എക്കൊപ്പമുണ്ടായിരുന്നു.

നൂറനാട് ലെപ്രസി സാനിട്ടോറിയത്തിൽ ഒപി കഴിഞ്ഞാൽ ഡോക്ടറില്ല

ചാരുംമൂട്: നൂറനാട് ലെപ്രസി സാനിട്ടോറിയം ആശുപത്രിയില്‍ ഒപി സമയം കഴിഞ്ഞാല്‍ ഡോക്ടര്‍മാരുടെ സേവനം ലഭിക്കാത്തത് രോഗികളെ ദുരിതത്തിലാക്കുന്നു. രാവിലെ എത്തുന്ന ഡോക്ടര്‍മാര്‍ ഉച്ചയ്ക്ക് ഒന്നോടെ ഒപി പൂര്‍ത്തിയാക്കി മടങ്ങും. ഉച്ചയ്ക്കുശേഷം അത്യാഹിതവിഭാഗത്തില്‍ എത്തുന്നവര്‍ക്കു പോലും ഇപ്പോള്‍ ഡോക്ടര്‍മാരുടെ സേവനം ലഭ്യമാകുന്നില്ലന്നാണ് പരാതി. സാനിട്ടോറിയം അന്തേവാസികള്‍ക്കുവേണ്ടി നിര്‍മിച്ച പുതിയ കെട്ടിടത്തില്‍ ഒപി വിഭാഗം ആരംഭിക്കുകയും മള്‍ട്ടി സ്‌പെഷാലിറ്റി ആശുപത്രിയായി സാനിട്ടോറിയത്തെ ഉയര്‍ത്തുകയും ചെയ്തെങ്കിലും വേണ്ടത്ര ഡോക്ട്ടര്‍മാരോ അടിസ്ഥാന സൗകര്യങ്ങളോ ഏര്‍പ്പെടുത്തിയിട്ടില്ല. ശസ്ത്രക്രിയ വിഭാഗം, എക്‌സ്‌റേ വിഭാഗം, ലാബ് എന്നിവയും ഉച്ചവരെ മാത്രമേ പ്രവര്‍ത്തിക്കുന്നുള്ളൂ. ജനങ്ങള്‍ക്കു പ്രയോജനകരമായരീതിയില്‍ ആശുപ്രതിയുടെ പ്രവര്‍ത്തനം മെച്ചപ്പെടുത്തണമെന്നാണ് ആവശ്യം. എഴുപത്തിയഞ്ചോളം അന്തേവാസികള്‍ ലെപ്രസി സാനിട്ടോറിയത്തില്‍ താമസക്കാരായുണ്ട്. രാത്രികാലങ്ങളില്‍ അന്തേവാസികള്‍ക്ക് അത്യാവശ്യമായി ഡോക്ടറുടെ സേവനം ആവശ്യമായാല്‍ ഡോക്ടറെ ഫോണിലൂടെ ബന്ധപ്പെടുകയാണ് ഇപ്പോള്‍ നൈറ്റ് ഡ്യൂട്ടിയിലുള്ള നഴ്സുമാര്‍ ചെയ്യുന്നത്. ഡോക്ടറുമായി ഫോണില്‍ ബന്ധപ്പെടുകയും അന്തേവാസിക്കുണ്ടാകുന്ന രോഗവിവരങ്ങള്‍ അറിയിക്കുകയും ചെയ്യും. രോഗം കുടിയാല്‍ ഡോക്ടറുടെ നിര്‍ദേശപ്രകാരം അന്തേവാസിയെ രാത്രിയില്‍ തന്നെ വണ്ടാനം മെഡിക്കല്‍ കോളജിലേക്കു മാറ്റും. ഓക്്‌സിജന്‍ പ്ലാന്‍റ് ഉള്‍പ്പെടെ എല്ലാവിധ സൗകര്യവും എട്ട് ഡോക്ടര്‍മാരുടെ സേവനവും നൂറനാട് സാനിട്ടോറിയത്തിനുണ്ട്. എംപി, എംഎല്‍എ എന്നിവര്‍ ഇടപെട്ട് ഒപി വിഭാഗത്തിന്‍റെ സേവനം 24 മണിക്കൂര്‍ ആക്കുകയും ഡോക്ടറുടെ സേവനം മുഴുവന്‍ സമയവും ഏര്‍പ്പെടുത്തുകയും ലാബ്, എക്‌സ്റേ എന്നിവയുടെ പ്രവര്‍ത്തനം 24 മണിക്കൂറാക്കുകയും ചെയ്യുന്നതിന് ആരോഗ്യവകുപ്പുമായി ബന്ധപ്പെട്ട് നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

നൂറനാട് ജംഗ്‌ഷനിൽ ടേക്ക് എ ബ്രേക്ക് ശുചിമുറി

ചാരുംമൂട്: ജനങ്ങളുടെ പ്രാഥമിക ആവശ്യങ്ങള്‍ നിറവേറ്റാന്‍ നൂറനാട് ജംഗ്ഷനില്‍ ടേക്ക് എ ബ്രേക്ക് ആധുനിക ശുചിമുറി യാഥാര്‍ഥ്യമാവുന്നു. ഇവിടം കേന്ദ്രീകരിച്ച് പൊതുശുചിമുറി വേണമെന്ന വര്‍ഷങ്ങളായുള്ള നാട്ടുകാരുടെ ആവശ്യമാണ് ഇപ്പോള്‍ യാഥാര്‍ഥ്യമാവുന്നത്. പാലമേല്‍ പഞ്ചായത്തും ഭരണിക്കാവ് ബ്ലോക്ക് പഞ്ചായത്തും ചേര്‍ന്ന് 35 ലക്ഷം രൂപ മുടക്കിയാണ് നൂറനാട് മൃഗാശുപത്രി കോമ്പൗണ്ടില്‍ ആധുനിക ശുചിമുറി നിര്‍മിക്കുന്നത്. സര്‍ക്കാര്‍ സ്ഥാപനങ്ങളും പബ്ലിക്ക് മാര്‍ക്കറ്റും ഒട്ടേറെ സ്ഥാപനങ്ങളും കെപി റോഡിലെ തിരക്കേറിയ നൂറനാട് ജംഗ്ഷന്‍ കേന്ദ്രീകരിച്ച് പ്രവര്‍ത്തിക്കുന്നുണ്ട്. ശുചിമുറി നിര്‍മിക്കുന്നതോടെ പോലീസ് സ്റ്റേഷന്‍, സബ്ട്രഷറി, സബ് രജിസ്ട്രാര്‍ ഓഫീസ് എന്നിവിടങ്ങളില്‍ എത്തുന്നവര്‍ക്ക് ശുചിമുറി ഉപയോഗിക്കാൻ പറ്റും. ചാരുംമൂട്ടില്‍ ഇ ടോയ്‌ലറ്റ് കാടുകയറി നശിക്കുന്നു ചാരുംമുട്ടില്‍ വരുന്ന പൊതുജനങ്ങള്‍ക്കും സ്‌കൂള്‍ കുട്ടികള്‍ക്കും വ്യാപാരികള്‍ക്കും പ്രയോജനപ്പെടുന്ന തരത്തില്‍ വര്‍ഷങ്ങള്‍ക്ക് മുമ്പ് സ്ഥാപിച്ച ഇ ടോയ്‌ലറ്റ് ഇപ്പോള്‍ കാടുകയറി നശിക്കുകയാണ്. ലക്ഷങ്ങള്‍ വിനിയോഗിച്ചു നിര്‍മിച്ച ഇ ടോയ്‌ലറ്റ് ജനങ്ങള്‍ക്ക് പ്രയോജനമില്ലാതെ വെറും കാഴ്ചവസ്തുവായി മാറി. ജനത്തിരക്കേറിയ ചാരുംമൂട് ജംഗ്ഷന് വടക്കുവശം വര്‍ഷങ്ങള്‍ക്ക് മുമ്പ് സ്ഥാപിച്ച ഇ-ടോയ്‌ലറ്റാണ് ഉപയോഗശൂന്യ മായി തുരുമ്പെടുത്ത് നശിക്കുന്നത്. ഇതുമൂലം യാത്രക്കാര്‍ ഉള്‍പ്പെടെ ജംഗ്ഷനില്‍ എത്തുന്നവര്‍ പ്രാഥമിക ആവശ്യം നിറവേറ്റാന്‍ സൗകര്യമില്ലാതെ ദുരിതത്തിലാണ്. ശുചിത്വമിഷന്‍റെ സഹായത്തോടെ ചുനക്കര പഞ്ചായത്തിന്‍റെ 2012-13 ലെ ജനകീയാസൂത്രണ പദ്ധതിയില്‍ ഉള്‍പ്പെടുത്തി ലക്ഷങ്ങള്‍ ചെലവഴിച്ചാണ് കൊല്ലം- തേനി ദേശീയപാതയില്‍ ചാരുംമൂട് ജംഗ്ഷന് വടക്ക് ഭാഗത്തുള്ള കാത്തിരിപ്പ് കേന്ദ്രത്തിനു സമീപം ഇ ടോയ്‌ലറ്റ് സ്ഥാപിച്ചത്. അഞ്ചു ലക്ഷം രൂപയോളമായിരുന്നു നിര്‍മാണത്തിനായി ചെലവഴിച്ചത്. എന്നാല്‍, നിര്‍മാണം പൂര്‍ത്തിയാക്കി വര്‍ഷങ്ങള്‍ കഴിഞ്ഞിട്ടും ഇതു പ്രവര്‍ത്തനക്ഷമമായില്ല. ദിവസേന ആയിരക്കണക്കിന് ആളുകള്‍ വന്നുചേരുന്ന ചാരുംമൂട്ടില്‍ ശുചി മുറി സൗകര്യം ഇല്ലാത്തത് യാത്രക്കാര്‍ക്കും പൊതുജനങ്ങള്‍ക്കും ഏറെ ബുദ്ധിമുട്ട് ഉണ്ടാകുമ്പോഴാണ് ഒരു പ്രയോജനവും ഇല്ലാതെ ഇ-ടോയിലറ്റ് നശിച്ചുകൊണ്ടിരിക്കുന്നത്.

പൂച്ചാക്കൽ പോസ്റ്റ് ഓഫീസ് കെട്ടിടം കാണാമറയത്ത്

പൂച്ചാക്കല്‍: പൂച്ചാക്കലിലെ തപാല്‍ ഓഫീസ് അന്വേഷിച്ച് ജനം വലയുന്നു. നിലവില്‍ പ്രവര്‍ത്തിച്ചിരുന്ന വാടകക്കെട്ടിടത്തില്‍നിന്ന് മറ്റൊരു വാടകക്കെട്ടിടത്തിലേക്ക് കഴിഞ്ഞദിവസം ഓഫീസ് മാറ്റിയിരുന്നു. എന്നാല്‍, ഇപ്പോള്‍ റോഡില്‍നിന്നു നോക്കിയാല്‍ കാണാത്തരീതിയില്‍ മറ്റ് കെട്ടിടങ്ങളുടെ പുറകിലാണ് ഓഫീസ് പ്രവൃത്തിക്കുന്നത്. കെട്ടിടം മാറ്റിയ വിവരം എഴുതിയ പോസ്റ്റര്‍ പഴയകെട്ടിടത്തിന്‍റെ ഭിത്തിയില്‍ പതിപ്പിച്ചിട്ടുണ്ടെങ്കിലും പലരും അത് ശ്രദ്ധിക്കാതെയാണ് തപാല്‍ ഓഫീസ് അന്വേഷിച്ച് നടക്കുന്നത്. തപാല്‍ വകുപ്പിന് സ്വന്തമായി സ്ഥലമുണ്ടായിട്ടും കെട്ടിടം നിര്‍മിക്കാന്‍ നടപടിയില്ല. അരനൂറ്റാണ്ടിലേറെയായി പുച്ചാക്കല്‍ പോസ്റ്റ് ഓഫീസ് വാടകക്കെട്ടിടത്തിലാണ് പ്രവര്‍ത്തിക്കുന്നത്. ചേര്‍ത്തല അരൂക്കുറ്റി റോഡില്‍ പൂച്ചാക്കല്‍ പോലീസ് സ്റ്റേഷനു സമീപമാണ് പതിറ്റാണ്ടുകള്‍ക്ക് മുന്‍പ് പോസ്റ്റല്‍ വകുപ്പ് കെട്ടിടം നിര്‍മിക്കുന്നതിന് സ്വന്തമായി സ്ഥലമുള്ളത്. ഇന്ന് ലക്ഷങ്ങള്‍ വിലമതിക്കുന്ന ഈ സ്ഥലം ചുറ്റും കമ്പിവേലി കെട്ടി സംരക്ഷിച്ചിട്ടുണ്ടെങ്കിലും കുറ്റിക്കാടുകള്‍ നിറഞ്ഞുകിടക്കുകയാണ്. പൂച്ചാക്കല്‍ പഴയപാലത്തിന്‍റെ തെക്കേക്കരയിലാണ് നിലവില്‍ പോസ്റ്റ് ഓഫീസ് പ്രവര്‍ത്തിക്കുന്നത്. ഇവിടെ സ്ഥലപരിമിതി മൂലം തിങ്ങി ഞെരുങ്ങി പ്രവര്‍ത്തിക്കുന്നതിനിടയില്‍ കെട്ടിടത്തിന്‍റെ മുന്‍വശം പൊതുമരാമത്ത് വകുപ്പിന്‍റെ നിര്‍ദേശപ്രകാരം പൊളിച്ചുമാറ്റേണ്ടിയും വന്നു. ഇതോടെ വെയിലും മഴയും ഏറ്റാണ് പോസ്റ്റ് ഓഫീസില്‍ എത്തുന്ന മഹിളാ പ്രധാന്‍ ഏജന്‍റുമാര്‍ ഉള്‍പ്പെടെയുള്ളവര്‍ വന്നുപോകുന്നത്. നാലാള്‍ ഒരേസമയം പോസ്റ്റ് ഓഫീസില്‍ എത്തിയാല്‍ പുറത്തു നില്‍ക്കേണ്ട സ്ഥിതിയുമാണ്. ഇതേത്തുടര്‍ന്നാണ് മറ്റൊരു വാടകക്കെട്ടിടത്തിലേക്ക് ഓഫീസ് മാറ്റിയത്. അതും ഇപ്പോള്‍ കാണാമറയത്താണുള്ളത്. പോലീസ് സ്റ്റേഷനു സമീപത്തുള്ള പോസ്റ്റല്‍ വകുപ്പിന്‍റെ സ്ഥലത്ത് പോസ്റ്റ് ഓഫീസിന് കെട്ടിടം നിര്‍മിക്കുകയല്ലാതെ ജനങ്ങളുടെ പ്രശ്നത്തിന് മറ്റൊരു പ്രതിവിധിയുമില്ല.

ജിമ്പെയര്‍ വസന്തോത്സവം 2025 ചമ്പക്കുളത്ത്

ചമ്പക്കുളം: കുട്ടനാട് ഫൈന്‍ ആര്‍ട്‌സ് സൊസൈറ്റിയുടെ ഇഷ്ടവീട് നിര്‍മാണ പ്രവര്‍ത്തനത്തിനായി സംഘടിപ്പിച്ചിരിക്കുന്ന ജിമ്പെയര്‍ വസന്തോത്സവം2025 27, 28 തീയതികളില്‍ ചമ്പക്കുളം കല്ലൂര്‍ക്കാട് സെന്‍റ് മേരീസ് ബസിലിക്ക ഹാളില്‍ നടക്കും. 27ന് രാവിലെ 9.30ന് ചമ്പക്കുളം പടിപ്പുരയ്ക്കല്‍ ക്ഷേത്രത്തിനു സമീപത്തുനിന്ന് ആരംഭിക്കുന്ന സാംസ്‌കാരിക ഘോഷയാത്രയോടെ രണ്ടു ദിവസം നീണ്ടുനിൽക്കുന്ന വസന്തോത്സവത്തിന് അരങ്ങുണരും. 10.30ന് നടക്കുന്ന സാംസ്‌കാരിക സമ്മേളനം മന്ത്രി വി.എന്‍. വാസവന്‍ ഉദ്ഘാടനം ചെയ്യും. തോമസ് കെ. തോമസ് എംഎല്‍എ മുഖ്യാതിഥിയായിരിക്കും. ചടങ്ങില്‍ പൊന്‍കുന്നം വര്‍ക്കി പുരസ്‌കാരം സി.കെ. സദാശിവന് ഫ്രാന്‍സിസ് ടി. മാവേലിക്കര സമ്മാനിക്കും. പ്രഫ. എന്‍. ഗോപിനാഥപിള്ള പൊന്‍കുന്നം വര്‍ക്കി അനുസ്മരണ പ്രഭാഷണം നടത്തും. 11.30ന് കലാമേള പുന്നപ്ര അപ്പച്ചന്‍ ഉദ്ഘാടനം ചെയ്യും. തുടര്‍ന്ന് ജില്ലയിലെ 15 പ്രമുഖ ടീമുകള്‍ പങ്കെടുക്കുന്ന കൈകൊട്ടിക്കളി മത്സരം. വൈകുന്നേരം 5.30ന് കുട്ടനാട് ഫാസ് അവതരിപ്പിക്കുന്ന ലഘുനാടകം മത്തായിയുടെ മരണം. 6.30ന് കോഴിക്കോട് രംഗഭാഷയുടെ നാടകം മിഠായിത്തെരുവ് (പ്രവേശനം പാസ് മൂലം). 28 ഞായര്‍ രാവിലെ ഒമ്പതിന് പ്രഭാസുതന്‍ രാമങ്കരിയുടെ സംഗീതകച്ചേരി. നൃത്തനൃത്യങ്ങള്‍, ഗാനമേള, കവിയരങ്ങ്. വൈകുന്നേരം മൂന്നിന് പ്രതിഭാസംഗമം ഉത്ഘാടനം ആര്‍സി ചാരിറ്റബിള്‍ ട്രസ്റ്റ് ചെയര്‍മാന്‍ റെജി ചെറിയാന്‍ പ്രഥമ ജോണ്‍സണ്‍ പുളിങ്കുന്ന് പുരസ്‌കാരം പ്രശസ്ത സിനിമ നാടക അഭിനേതാവ് പ്രമോദ് വെളിയനാടിന് സമ്മാനിക്കും. വസന്തോത്സവം-2025ന്‍റെ ടൈറ്റില്‍ സ്‌പോണ്‍സര്‍ ജിമ്പെയര്‍ ചൈല്‍ഡ് ഡവലപ്മെന്‍റ് സെന്‍റര്‍ ചങ്ങനാശേരിയുടെ സ്ഥാപകന്‍ ഡോ. ജോര്‍ജ് പടനിലത്തെ സി.കെ. സദാശിവന്‍ ആദരിക്കും. അഞ്ചിന് കുട്ടനാട് ഫാസ് അവതരിപ്പിക്കുന്ന ലഘുനാടകം സ്വപ്ന സഞ്ചാരികള്‍. ആറിന് ടെലിവിഷന്‍ താരങ്ങളായ നസീര്‍ സംക്രാന്തി, പോള്‍സണ്‍ കൂത്താട്ടുകുളം, ഭാസി വൈക്കം മുതലായ പ്രമുഖര്‍ പങ്കെടുക്കുന്ന മെഗാഷോ. (മെഗാഷോ പ്രവേശനം പാസ് മൂലം) കലാരംഗത്ത് പ്രവര്‍ത്തിക്കുന്ന ഒരു കുടുംബത്തിന് അടച്ചുറപ്പുള്ള ഒരു വീട് വച്ച് നല്കാനുള്ള പണം സമാഹരിക്കുകയാണ് ജിമ്പെയര്‍ വസന്തോത്സവം2025 ലക്ഷ്യം വയ്്കുന്നതെന്ന് ഭാരവാഹികളായ അഗസ്റ്റിന്‍ ജോസഫ്, കെ.സി. രമേശ്കുമാര്‍, വി. വിത്താവന്‍ എന്നിവര്‍ പത്രസമ്മേളനത്തില്‍ അറിയിച്ചു.

കുടിവെളളം പാഴാകുന്നു; കണ്ണുപൊത്തി വാട്ടർ അഥോറിറ്റി

ഹരിപ്പാട്: ജലവിതരണ പൈപ്പുകൾ പൊട്ടി പലയിടങ്ങളിലും കുടിവെള്ളം പാഴാകുന്നെങ്കിലും ജല അഥോറിറ്റി നടപടി സ്വീകരിക്കുന്നില്ലെന്ന് ആക്ഷേപം. മുതുകുളം തെക്ക് തെക്കോട്ടിൽ റോഡിൽ പുത്രേഴത്തു കിഴക്കുഭാഗത്തും ഷാപ്പുമുക്ക്-പള്ളിമുക്ക് റോഡിൽ പഴതറ ജംഗ്ഷനു തെക്കുഭാഗത്തും ചെങ്കിലാത്തുമുക്ക് റോഡിൽ ആലിൻചുവടിനു സമീപവുമാണ് ശുദ്ധജലം നഷ്ടപ്പെടുന്നത്. തെക്കോട്ടിൽ റോഡിൽ കൊട്ടാരം സ്‌കൂൾ ഭാഗത്തേക്കു പോകുന്ന കോൺക്രീറ്റ് റോഡിന്‍റെ തുടക്കത്തിലാണ് പൈപ്പിന് ചോർച്ചയുള്ളത്. ഇവിടെ കുടിവെള്ളം നഷ്ടപ്പെടാൻ തുടങ്ങിയിട്ട് ആഴ്ചകളായി. വലിയതോതിലാണ് ജലം പുറത്തേക്ക് ഒഴുകുന്നത്. അതിനാൽ, കോൺക്രീറ്റ് റോഡ് പൊളിഞ്ഞു തുടങ്ങി. പഴതറ ജംഗ്ഷനു തെക്കുഭാഗത്ത് കലുങ്കിനോട് ചേർന്നാണ് പൊട്ടിയൊലിക്കുന്നത്. ഇവിടെയും പൊട്ടിയിട്ട് ആഴ്ചകളായി. റോഡും പൊളിഞ്ഞിളകാനും തുടങ്ങിയിട്ടുണ്ട്. ആലിൻചുവടിന് 100 മീറ്ററോളം തെക്കുമാറി റോഡിനു പടിഞ്ഞാറേ അരികു ചേർന്നാണ് ചോർച്ചയുളളത്. ശക്തിയായാണ് വെള്ളം പുറത്തേക്ക് ഒഴുകുന്നത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]