വെള്ളപ്പൊക്ക നിയന്ത്രണം: സിമ്പോസിയം സംഘടിപ്പിക്കും
1568931
Friday, June 20, 2025 11:40 PM IST
കോട്ടയം: മീനച്ചിലാറ്റിലെ വെള്ളപ്പൊക്കം നിയന്ത്രിക്കുന്നതിന് സമഗ്രമായ പദ്ധതികള്‍ക്ക് അടിയന്തരമായി രൂപം നല്‍കണമെന്ന് കേരള കോണ്‍ഗ്രസ് -എം. ഇതിനായി വിദഗ്ധരെ പങ്കെടുപ്പിച്ച് ഇന്നു രാവിലെ 11ന് കോട്ടയം പ്രസ് ക്ലബില്‍ സിമ്പോസിയം സംഘടിപ്പിക്കും. ജില്ലാ പ്രസിഡന്റ് പ്രഫ. ലോപ്പസ് മാത്യുവിന്‍റെ അധ്യക്ഷതയില്‍ ചെയര്‍മാന്‍ ജോസ് കെ. മാണി എംപി ഉദ്ഘാടനം ചെയ്യും. ചീഫ് വിപ്പ് ഡോ. എന്‍. ജയരാജ്, ജോബ് മൈക്കിള്‍ എംഎല്‍എ, സെബാസ്റ്റ്യന്‍ കുളത്തുങ്കല്‍ എംഎല്‍എ എന്നിവര്‍ സംബന്ധിക്കും.
കുട്ടനാട് അന്തര്‍ദേശീയ കൃഷി ഗവേഷണ കേന്ദ്രം ഡയറക്ടര്‍ ഡോ. കെ.ജി. പത്മകുമാര്‍, എംആര്‍വിപി എക്സിക്യൂട്ടീവ് എന്‍ജിനിയര്‍ കെ. ശ്രീകല, നദീ സംയോജന സമിതി കണ്‍വീനര്‍ കെ. അനില്‍കുമാര്‍, വ്യാപാരി വ്യവസായി ഏകോപന സമിതി യൂത്ത് വിംഗ് പാലാ യൂണിറ്റ് പ്രസിഡന്റ് ജോണ്‍ മൈക്കിള്‍ എന്നിവര്‍ വിഷയാവതരണം നടത്തും.
മീനച്ചിലാര്‍, മണിമലയാര്‍ എന്നീ നദികളുടെ സമീപവാസികള്‍ ഏതാനും വര്‍ഷങ്ങളായി തുടര്‍ച്ചയായ വെള്ളപ്പൊക്ക ഭീഷണിയിലാണ്. ഏറ്റുമാനൂര്‍- പൂഞ്ഞാര്‍ ഹൈവേ ഉള്‍പ്പെടെ പ്രധാന റോഡുകളില്‍ വെള്ളം കയറി ഗതാഗതം നിരന്തരം തടസപ്പെടുന്നു. പാലാ, ഈരാറ്റുപേട്ട തുടങ്ങിയ പട്ടണങ്ങളിലെ വ്യാപാരസ്ഥാപനങ്ങള്‍ മഴക്കാലത്ത് വെള്ളപ്പൊക്ക ഭീഷണിയിലാണ്. നദികളും തോടുകളും കരകവിഞ്ഞൊഴുകുന്നതുമൂലം വ്യാപകമായ കൃഷി നാശമാണുണ്ടാകുന്നത്. വീടുകളില്‍ വെള്ളം കയറിയാലുണ്ടാവുന്ന ദുരവസ്ഥയും സാമ്പത്തിക നഷ്ടവും താങ്ങാവുന്നതിനപ്പുറമാണ്.
ഇതിന് ശാശ്വതമായ പരിഹാരം കണ്ടെത്തുന്നതിനുള്ള പ്രായോഗികമായ പദ്ധതികള്‍ സിമ്പോസിയത്തില്‍ ചര്‍ച്ച ചെയ്യും. നിര്‍ദേശങ്ങള്‍ ക്രോഡീകരിച്ച് സർക്കാരിനു മുമ്പില്‍ സമര്‍പ്പിക്കാനും തുടര്‍ നടപടികള്‍ക്ക് സര്‍ക്കാരില്‍ സമ്മര്‍ദം ചെലുത്തുമെന്നും ജില്ലാ പ്രസിഡന്റ് ലോപ്പസ് മാത്യു, ഉന്നതാധികാര സമതിയംഗം വിജി എം. തോമസ്, ജില്ലാ ജനറല്‍ സെക്രട്ടറി ഔസേപ്പച്ചന്‍ വാളിപ്ലാക്കല്‍, നിയോജക മണ്ഡലം പ്രസിഡന്റ് ജോജി കുറത്തിയാടന്‍ എന്നിവര്‍ പത്രസമ്മേളനത്തില്‍ അറിയിച്ചു.