അരുവിത്തുറ കോളജിൽ ടെക്ക്ടൈഡ് ലോക യുവജന ദിനാഘോഷം

അരുവിത്തുറ: സെന്‍റ് ജോർജ് കോളജിൽ സെൽഫ് ഫിനാൻസ് കൊമേഴ്സ് വിഭാഗത്തിന്‍റെ ആഭിമുഖ്യത്തിൽ ടെക്ക്ടൈഡ് ലോക യുവജന ദിനാഘോഷം സംഘടിപ്പിച്ചു.

കോളജ് ബർസാർ റവ. ഫാ. ബിജു കുന്നയ്ക്കാട്ട് ഉദ്ഘാടനം നിർവഹിച്ചു. മീനച്ചിൽ താലൂക്ക് ലീഗൽ സർവീസ് സൊസൈറ്റി പാനൽ അഭിഭാഷകൻ അഡ്വ. തോമസ് ജോസഫ് തൂങ്കുഴി ചടങ്ങിൽ മുഖ്യാതിഥിയായിരുന്നു.

സെൽഫ് ഫിനാൻസ് കൊമേഴ്സ് വിഭാഗം മേധാവി പി.സി. അനീഷ്, അധ്യാപകരായ ബിനോയ് സി. ജോർജ്, ജിയോ ജോസ് എന്നിവർ സംസാരിച്ചു.

ADVERTISEMENT

കാർ കെട്ടിടത്തിലേക്ക് ഇടിച്ചുകയറി യുവാവ് മരിച്ചു

കാഞ്ഞിരപ്പള്ളി: കാർ നിയന്ത്രണം വിട്ട് കെട്ടിടത്തിലേക്ക് ഇടിച്ചുകയറി ഒരാൾ മരിച്ചു. തമ്പലക്കാട് പടിഞ്ഞാറേകീച്ചേരി രാജ്മോഹന്‍റെ മകൻ അഭിജിത്ത് (34) ആണ് മരിച്ചത്. അപകടത്തിൽ അഭിജിത്തിന്‍റെ സഹോദരി ആതിര (30), ഭർത്താവ് വിഷ്ണു പ്രസാദ് (30), അയൽവാസി ആലപ്പാട്ടുവയലിൽ ദീപു ഗോപാലകൃഷ്ണൻ (30), വിഷ്ണുവിന്‍റെ ബന്ധു ഹരി (26) എന്നിവർക്ക് പരിക്കേറ്റു. ഇവരെ കാഞ്ഞിരപ്പള്ളി ജനറൽ ആശുപത്രിയിലെത്തിച്ച് പ്രാഥമിക ചികിത്സ നൽകി. വെള്ളിയാഴ്ച രാത്രി 11.15ഓടെ കാഞ്ഞിരപ്പള്ളി കുന്നുംഭാഗത്തായിരുന്നു അപകടം. തന്പലക്കാടുള്ള അഭിജിത്തിന്‍റെ വീട്ടിൽനിന്ന് ചിറക്കടവിലുള്ള വിഷ്ണുവിന്‍റെ വീട്ടിലേക്ക് പോകുംവഴിയാണ് അപകടമുണ്ടായത്. നിയന്ത്രണംവിട്ട കാർ കുന്നുംഭാഗം ജനറൽ ആശുപത്രി പടിക്ക് മുൻവശമുള്ള സ്കാൻറോൺ ലാബിലേക്ക് ഇടിച്ചു കയറുകയായിരുന്നു. അപകടത്തിൽ കാർ പൂർണമായി തകർന്നു. ദീപുവിന്‍റെ പരിക്ക് ഗുരുതരമായതിനാൽ പാലാ മാർ സ്ലീവാ മെഡിസിറ്റിയിലേക്ക് മാറ്റി. വ്യാഴാഴ്ചയായിരുന്നു ആതിരയുടെയും വിഷ്ണുവിന്‍റെയും കല്യാണം. അഭിജിത്ത് ബാംഗളൂരിൽ സ്വകാര്യ കന്പനിയിലാണ് ജോലി. മാതാവ്: ഇന്ദിര. അഭിജിത്തിന്‍റെ സംസ്കാരം വീട്ടുവളപ്പിൽ നടത്തി.

തനിമയില്‍ ഒരുമയില്‍ ധന്യമായി കോട്ടയം അതിരൂപത ദിനാഘോഷം

കോട്ടയം: പുരാതന പാട്ടുകളും നടവിളികളും നിറഞ്ഞ ഭക്തിസാന്ദ്രമായ അന്തരീക്ഷത്തില്‍ ധന്യന്‍ മാര്‍ മാത്യു മാക്കീലിന്‍റെ പുണ്യ കബറിടം സ്ഥിതി ചെയ്യുന്ന ഇടയ്ക്കാട്ട് സെന്‍റ് ജോര്‍ജ് ക്നാനായ കത്തോലിക്ക ഫൊറോന പള്ളിയില്‍ നടത്തപ്പെട്ട 115-ാമത് കോട്ടയം അതിരൂപത ദിനാഘോഷങ്ങള്‍ വൈദികരുടെയും സമര്‍പ്പിതരുടെയും സമുദായാംഗങ്ങളുടെയും സാന്നിധ്യത്താല്‍ ധന്യമായി. ആര്‍ച്ച്ബിഷപ് മാര്‍ മാത്യു മൂലക്കാട്ട് അതിരൂപത ദിനാഘോഷങ്ങള്‍ ഉദ്ഘാടനം ചെയ്തു. സമൂഹബലിയില്‍ ചങ്ങനാശേരി ആര്‍ച്ച്ബിഷപ് മാര്‍ തോമസ് തറയില്‍ മുഖ്യകാര്‍മികത്വം വഹിച്ചു. മാര്‍ മാത്യു മൂലക്കാട്ട്, സഹായമെത്രാന്മാരായ മാര്‍ ജോസഫ് പണ്ടാരശേരില്‍, ഗീവര്‍ഗീസ് മാര്‍ അപ്രേം, പ്രൊ-പ്രോട്ടോസിഞ്ചെല്ലൂസ് ഫാ. തോമസ് ആനിമൂട്ടില്‍, സിഞ്ചെല്ലൂസ് ഫാ. മൈക്കിൾ വെട്ടിക്കാട്ട്, കൂരിയ അംഗങ്ങള്‍, അതിരൂപതയിലെ വൈദികര്‍ എന്നിവര്‍ സഹകാര്‍മികരായി. ധന്യന്‍ മാര്‍ മാത്യു മാക്കീലിന്‍റെ ദീപ്തമായ സ്മരണയിലായിരുന്നു അതിരൂപത ദിനാഘോഷം. മാക്കീല്‍ പിതാവ് അന്ത്യവിശ്രമം കൊള്ളുന്ന ഇടയ്ക്കാട്ട് പള്ളിയില്‍ നടന്ന അതിരൂപതദിനാഘോഷത്തെ ക്‌നാനായ സമൂഹം വലിയ ആഘോഷത്തോടെയാണു വരവേറ്റത്. പൊതുസമ്മേളനത്തില്‍ സഹായമെത്രാന്‍ ഗീവര്‍ഗീസ് മാര്‍ അപ്രേം അനുഗ്രഹപ്രഭാഷണം നടത്തി. വ്യത്യസ്ത മേഖലകളില്‍ പ്രാഗത്ഭ്യം തെളിയിച്ച പ്രതിഭകളെ ആദരിച്ചു. പാസ്റ്ററല്‍ കൗണ്‍സില്‍ സെക്രട്ടറി സാബു കരിശേരിക്കല്‍, പാസ്റ്ററല്‍ കോ ഓര്‍ഡിനേറ്റര്‍ ഫാ. മാത്യു മണക്കാട്ട്, പ്രെസ്ബിറ്ററല്‍ കൗണ്‍സില്‍ സെക്രട്ടറി ഫാ. ഏബ്രഹാം പറമ്പേട്ട്, കെസിസി അതിരൂപത പ്രസിഡന്‍റ് ബാബു പറമ്പടത്തുമലയില്‍, കെസിഡബ്ല‍്യുഎ പ്രസിഡന്‍റ് ഷൈനി ചൊള്ളമ്പേല്‍, സമര്‍പ്പിത സമൂഹങ്ങളുടെ പ്രതിനിധി സിസ്റ്റര്‍ ഇമ്മാക്കുലേറ്റ് എസ്‌വിഎം, കെസിവൈഎല്‍ പ്രസിഡന്‍റ് ജോണിസ് പി. സ്റ്റീഫന്‍ എന്നിവര്‍ പ്രസംഗിച്ചു. സഹായമെത്രാന്‍ മാര്‍ ജോസഫ് പണ്ടാരശേരില്‍ സ്വാഗതവും പ്രൊ-പ്രോട്ടോസിഞ്ചെല്ലൂസ് ഫാ. തോമസ് ആനിമൂട്ടില്‍ കൃതജ്ഞതയും പറഞ്ഞു. പാരമ്പര്യവും തനിമയും സംരക്ഷിക്കുന്നത് പ്രശംസനീയം: മാര്‍ തോമസ് തറയില്‍ കോട്ടയം: പാരമ്പര്യവും തനിമയും സംരക്ഷിക്കാനുള്ള ക്നാനായ സമുദായത്തിന്‍റെ താത്പര്യം പ്രശംസനീയമാണെന്ന് ആർച്ച്ബിഷപ് മാർ തോമസ് മാര്‍ തോമസ് തറയില്‍ വചനസന്ദേശത്തിൽ പറഞ്ഞു. സുവിശേഷം പ്രസംഗിക്കാനും സുവിശേഷത്തിനു സാക്ഷികളാകാനും നമുക്ക് കഴിയണം. ക്നാനായ സമൂഹത്തിലെ പ്രേഷിത ചൈതന‍്യം പ്രശംസനീയമാണ്. ആഗോള സഭയിൽ അനേകം മിഷണറിമാരെ സംഭാവനചെയ്യാൻ കോട്ടയം അതിരൂപതയ്ക്കു കഴിഞ്ഞിട്ടു‌ണ്ട്.

മാറുന്ന രാഷ്‌ട്രീയ സാഹചര്യത്തിലും വര്‍ഗീയ ചിന്തകള്‍ ഏറി വരുന്ന കാലഘട്ടത്തിലും ക്രിസ്ത്യാനിയെ യൂറോപ്പില്‍നിന്നു വന്നവരാണെന്ന് ആക്ഷേപിക്കുമ്പോഴും ക്‌നാനായ സമൂഹം ഇവിടെ നാലാം നൂറ്റാണ്ടു മുതല്‍ നിലനില്‍ക്കുന്നു എന്നത് നമ്മുടെ രാജ്യത്തിനുതന്നെ അഭിമാനിക്കാവുന്ന മതസൗഹാര്‍ദത്തിന്‍റെയും ബഹുസ്വരതയുടെയും ചരിത്രം കൂടിയാണ്. പീഡനങ്ങള്‍ നമ്മെ തളര്‍ത്തരുത്. പീഡനങ്ങളില്‍ സുവിശേഷം പ്രസംഗിക്കാനുള്ള അവസരമായി കാണണം. ചങ്ങനാശേരി വികാരി അപ്പസ്തോലിക്കാ എന്ന നിലയിലുള്ള മാർ മാത‍്യു മാക്കീലിന്‍റെ പ്രവര്‍ത്തനങ്ങള്‍ കേരളസഭയുടെ ചരിത്രത്തില്‍ ഏറ്റവും ആദരിക്കപ്പെടേണ്ടതാണന്നും മാര്‍ തോമസ് തറയില്‍ പറഞ്ഞു. ക്നാനായ സമുദായം കേരളസഭയുടെ അവിഭാജ്യഘടകം: മാര്‍ മാത്യു മൂലക്കാട്ട് കോട്ടയം: ക്നാനായ സമുദായം കേരളസഭയുടെ അവിഭാജ്യ ഘടകമാണെന്നും അതിനെ മാറ്റിനിര്‍ത്തിക്കൊണ്ടുള്ള ഒരു ചരിത്രവും പൂര്‍ണമാകില്ലെന്നും ചരിത്രത്തോട് നീതി പുലര്‍ത്തുകയില്ലെന്നും അതിരൂപതാ ദിനാഘോഷങ്ങള്‍ ഉദ്ഘാടനം ചെയ്തുകൊണ്ട് ആര്‍ച്ച്ബിഷപ് മാര്‍ മാത്യു മൂലക്കാട്ട് പറഞ്ഞു.

സമുദായത്തിന്‍റെ നിലനില്പ് പ്രധാനമാണ്. അതിനെതിരേയുള്ള പ്രവര്‍ത്തനങ്ങള്‍ എവിടെനിന്നു വന്നാലും അംഗീകരിക്കാന്‍ കഴിയില്ല. സ്വവംശവിവാഹനിഷ്ഠ പാലിച്ചു മുന്നോട്ടുപോകാന്‍ കുട്ടികളെ പഠിപ്പിക്കുകയും പ്രോത്സാഹിപ്പിക്കുകയും ചെയ്യണം. നല്ല കുടുംബങ്ങളും നല്ല ദൈവവിളികളും ഉണ്ടായാല്‍ മാത്രമേ സമുദായത്തെ സ്വദേശത്തും വിദേശത്തും നിലനിര്‍ത്തിക്കൊണ്ടു പോകാന്‍ കഴിയുകയുള്ളൂ. ഇന്ത്യയിലെവിടെയും ക്നാനായക്കാര്‍ക്കുവേണ്ടി പള്ളികള്‍ സ്ഥാപിക്കുന്നതിനും അജപാലന പ്രവര്‍ത്തനങ്ങള്‍ നടത്തുന്നതിനും തടസമില്ലെന്ന് ആര്‍ച്ച്ബിഷപ് പഞ്ഞു.

കൊമ്പുകുത്തിയിൽ ആളെക്കൊല്ലി കാട്ടാനയുടെ വിളയാട്ടം തുടരുന്നു

കോരുത്തോട്: കോരുത്തോട്, പെരുവന്താനം പഞ്ചായത്തുകളുടെ വനാതിർത്തി മേഖല വിട്ടൊഴിയാതെ കാട്ടാനശല്യം. കൊമ്പുകുത്തിയിൽ കാട്ടാനയുടെ ആക്രമണത്തിൽ വയോധിക രക്ഷപ്പെട്ടത് അത്ഭുതകരമായി. കൊമ്പുകുത്തി പടലിക്കാട്ട് ദാസന്‍റെ വീട്ടുവരാന്തയിലാണ് വെള്ളിയാഴ്ച രാത്രി കാട്ടാന എത്തിയത്. പകൽ മുഴുവൻ വീടിന് സമീപത്ത് കാട്ടാനയുടെ സാമീപ്യമുണ്ടായിരുന്നു. റബർകറ ഉറയൊഴിക്കുന്ന ടിൻ ഡിഷ്‌ ഉപയോഗിച്ച് പകൽ ശബ്ദമുണ്ടാക്കി കാട്ടാനയെ അകറ്റിനിർത്തും. എല്ലാ ദിവസവും രാത്രിയാകുമ്പോൾ വീടിനോട് ചേർന്ന് പുരയിടത്തിൽ ആഴികൂട്ടിയാണ് വന്യമൃഗങ്ങളെ അകറ്റുന്നത്. എന്നാൽ വെള്ളിയാഴ്ച പകൽ മുഴുവൻ പരിസരത്ത് ആനയുടെ സാമീപ്യമുണ്ടായിരുന്നതിനാൽ വൃദ്ധദമ്പതികളായ ദാസനും ഭാര്യ പുഷ്പയും ഏറെ കരുതലോടെയാണ് ഇരുന്നത്. രാത്രി 11 ഓടെ വീടിന് പുറത്ത് ആനയുടെ സാന്നിധ്യം മനസിലാക്കി. ശബ്ദമുണ്ടാക്കി ആനയെ ഓടിക്കാനായി വരാന്തയിൽ സൂക്ഷിച്ചിരുന്ന ടിൻ ഡിഷ്‌ എടുക്കാൻ പുറത്തിറങ്ങിയ പുഷ്പയുടെ നേരേ കാട്ടാന പാഞ്ഞടുക്കുകയായിരുന്നു. ആന ഓടിവരുന്നതുകണ്ട് ദാസൻ പുഷ്പയെ വലിച്ചുമാറ്റിയതിനാൽ ആനയുടെ ആക്രമണത്തിൽ അകപ്പെടാതെ പുഷ്പ അത്ഭുതകരമായി രക്ഷപ്പെട്ടു. വീടിന്‍റെ വരാന്തയിൽവരെ കയറിയ കാട്ടാന പിന്നീട് പിൻവാങ്ങി. ജീവൻ തിരിച്ചുകിട്ടിയെങ്കിലും സ്വന്തം വീട്ടിൽ ഇനി എങ്ങനെ അന്തിയുറങ്ങുമെന്ന ആശങ്കയാണ് ഈ വൃദ്ധ ദമ്പതികൾ പങ്കുവയ്ക്കുന്നത്. വ്യാഴാഴ്ച കൊമ്പുകുത്തിയിൽ പുളിക്കൽ പത്മനാഭപിള്ളയുടെ വീട്ടുമുറ്റത്ത് കാട്ടാനയെത്തി. ആനയെ കണ്ട് വീട്ടുകാർ നിലവിളിച്ചതോടെ പാഞ്ഞടുത്ത കാട്ടാന പത്മനാഭപിള്ളയുടെ വീടിന്‍റെ കതക് തകർത്തു. മേശ, കട്ടിൽ, ടിവി, അലമാര അടക്കമുള്ള വീട്ടുപകരണങ്ങളും തകർത്തു. വീട്ടുകാർ പരിക്കേൽക്കാതെ അത്ഭുതകരമായി രക്ഷപ്പെട്ടു. ജനവാസമേഖലയിൽ എത്തുന്നത് കൊലയാനയോ? കൊമ്പുകുത്തി മേഖലയോട് ചേർന്നുകിടക്കുന്ന ചെന്നപാറയിൽ കഴിഞ്ഞ ഫെബ്രുവരിയിൽ കാട്ടാനയുടെ ആക്രമണത്തിൽ വീട്ടമ്മ കൊല്ലപ്പെട്ടിരുന്നു. ഇതിന് സമീപത്തായി കഴിഞ്ഞ മാസം റബർ ടാപ്പിംഗ് തൊഴിലാളിയും കാട്ടാനയുടെ ആക്രമണത്തിൽ കൊല്ലപ്പെട്ടു. ഏതാനും മാസങ്ങൾക്കുമുമ്പ് ഈ വനാതിർത്തിയുടെ ഭാഗമായ പീരുമേട്ടിൽ ആദിവാസി സ്ത്രീയെ കാട്ടാന ആക്രമിച്ചു കൊന്നിരുന്നു. ജനവാസ മേഖലയിലെത്തി പതിവായി ആക്രമണം നടത്തുന്നത് ഒറ്റതിരിഞ്ഞ് നടക്കുന്ന മോഴയാനയാണെന്ന് നാട്ടുകാർ പറയുന്നുണ്ടെങ്കിലും ഇത് സ്ഥിരീകരിക്കാൻ വനംവകുപ്പ് തയാറാകുന്നില്ല. മൂന്ന് മനുഷ്യജീവനുകൾ കവർന്ന ആനയെ പിടികൂടി മറ്റ് സ്ഥലത്തേക്ക് വിടേണ്ട ഭാരിച്ച ചുമതല അധികാരികൾ ഏറ്റെടുക്കേണ്ടിവരുമെന്നതാണ് വനംവകുപ്പിന്‍റെ പ്രശ്നം. ഇനിയൊരു മനുഷ്യ ജീവൻ നഷ്ടമാകുമ്പോഴും പതിവ് ന്യായീകരണങ്ങളുമായി അധികാരികൾ എത്തുവാനാണ് സാധ്യത. നാളുകളായി തുടരുന്ന കാട്ടാനശല്യം കാട്ടാനകൾ ജനവാസ മേഖലയിൽ ആക്രമണം നടത്താൻ തുടങ്ങിയിട്ട് വർഷങ്ങൾ കഴിഞ്ഞു. വന്യമൃഗങ്ങളെ അകറ്റാൻ കോടികൾ മുടക്കിയുള്ള പ്രതിരോധ സംവിധാനങ്ങൾ നടത്തുമെന്നാണ് അധികാരികൾ വാഗ്ദാനം ചെയ്യുന്നത്. എന്നാൽ എല്ലാം പ്രഖ്യാപനങ്ങളിൽ മാത്രം ഒതുങ്ങുകയാണ്. വന്യഗങ്ങളെ പ്രതിരോധിക്കുവാനായി നിർമിച്ചിരിക്കുന്ന ട്രഞ്ചുകൾ മറികടന്നാണ് കാട്ടാനകൾ എത്തുന്നതെന്ന് നാട്ടുകാർ പറയുന്നു. കരാർ ഏൽപ്പിച്ച് അശാസ്ത്രീയ നിർമാണം നടത്തി ജനങ്ങളുടെ കണ്ണിൽ പൊടിയിടുകയാണെന്ന ആക്ഷേപവും പ്രദേശവാസികൾ പങ്കുവയ്ക്കുന്നുണ്ട്. വനംമന്ത്രിക്ക് കത്ത് നൽകി സെബാസ്റ്റ്യൻ കുളത്തുങ്കൽ എംഎൽഎ കോരുത്തോട് പഞ്ചായത്തിലെ കൊമ്പുകുത്തിയിലും സമീപപ്രദേശങ്ങളായ ചെന്നാപ്പാറ, മതമ്പ, തുടങ്ങിയ പ്രദേശങ്ങളിലും ആക്രമണം നടത്തുന്ന കാട്ടാനയെ പിടികൂടാൻ നടപടി സ്വീകരിക്കണമെന്ന് ആവശ്യപ്പെട്ട് വനംമന്ത്രി എ.കെ. ശശീന്ദ്രന് സെബാസ്റ്റ്യൻ കുളത്തുങ്കൽ എംഎൽഎ കത്ത് നൽകി. മറ്റ് സ്ഥലങ്ങളിൽ മനുഷ്യജീവന് ഭീഷണിയായ ആനകളെ പിടികൂടിയതുപോലെ കൊമ്പുകുത്തി മേഖലയിലും ഭീഷണി ഉയർത്തുന്ന കാട്ടാനയെ പിടികൂടണമെന്നും എംഎൽഎ ആവശ്യപ്പെട്ടു. കൂടാതെ വനാതിർത്തിയിൽ നടന്നുവരുന്ന ഹാംഗിംഗ് ഫെൻസിംഗ് നിർമാണം എത്രയും വേഗം പൂർത്തീകരിക്കണമെന്നും 20ലധികം വരുന്ന കാട്ടാനക്കൂട്ടത്തെ ഉൾക്കാട്ടിലേക്ക് തിരിച്ചയയ്ക്കണമെന്നും ജനങ്ങളുടെ ജീവനും സ്വത്തിനും മതിയായ സംരക്ഷണം ഉറപ്പുവരുത്തണമെന്നും എംഎൽഎ മന്ത്രിയോട് ആവശ്യപ്പെട്ടിട്ടുണ്ട്.

ഓണവിപണി ഉഷാറായി; തിരക്കേറിത്തുടങ്ങി

കാഞ്ഞിരപ്പള്ളി: ഓണത്തെ വരവേൽക്കാൻ നാടും നഗരവും ഒരുങ്ങി. മിക്കയിടങ്ങളിലും ഓണവിപണികൾ സജീവമായി. പഞ്ചായത്ത്, കൃഷിവകുപ്പ്, സർവീസ് സഹകരണ ബാങ്കുകൾ തുടങ്ങിയവയുടെ ഓണവിപണികളും തുറന്നിട്ടുണ്ട്. കാഞ്ഞിരപ്പള്ളി പഞ്ചായത്ത് കുടുംബശ്രീയുടെ നേതൃത്വത്തിൽ സെപ്റ്റംബർ രണ്ടുമുതൽ നാലുവരെ കുരിശുങ്കൽ വഴിയോര വിശ്രമകേന്ദ്രത്തിൽ ഓണച്ചന്ത ആരംഭിക്കും. കാഞ്ഞിരപ്പള്ളി സഹകരണ കാർഷിക ഗ്രാമ വികസന ബാങ്കിന്‍റെ ആഭിമുഖ്യത്തിൽ കൺസ്യൂമർഫെഡിന്‍റെ 12 ഇനം സബ്സിഡി സാധനങ്ങൾ അടങ്ങിയ ഓണക്കിറ്റ് വിതരണം നാളെ നടക്കും. ഉദ്ഘാടനം രാവിലെ 10ന് ജില്ലാ പഞ്ചായത്തംഗം ജെസി ഷാജൻ നിർവഹിക്കും. രാവിലെ പത്തുമുതൽ ഹെഡ് ഓഫീസ് കാഞ്ഞിരപ്പള്ളി, മുണ്ടക്കയം, എരുമേലി ബ്രാഞ്ചുകളിലും കിറ്റ് വിതരണം നടത്തും. അവശ്യമുള്ളവർ റേഷൻ കാർഡ് കോപ്പിയുമായി വരണമെന്ന് സെക്രട്ടറി അറിയിച്ചു. കുറഞ്ഞ വിലയിൽ ചിറക്കടവ് പഞ്ചായത്ത്, കൃഷിഭവൻ എന്നിവ സംയുക്തമായി നാളെമുതൽ നാലുവരെ ചിറക്കടവ് കൃഷിഭവനിൽ ഓണവിപണി നടത്തും. വിപണിയിലെ മൊത്തവിലയേക്കാൾ 10 ശതമാനം അധികം നൽകി കർഷകരിൽനിന്നു പച്ചക്കറി സംഭരിക്കുന്നുണ്ട്. വിപണിയിലെ ചില്ലറ വില്പന വിലയേക്കാൾ 30 ശതമാനം കുറഞ്ഞ വിലയ്ക്കു പൊതുജനങ്ങൾക്കു നൽകും. എരുമേലിയിൽ കൃഷിവകുപ്പ് കർഷകരിൽനിന്നു കൂടിയ വിലയ്ക്കു വിഷരഹിത നാടൻ പച്ചക്കറി വാങ്ങി വില കുറച്ചു വിൽക്കുന്ന ഓണവിപണി തുറക്കും. കാർഷികവിളകൾക്കു വിപണിയിലെ വിലയേക്കാൾ പത്തു ശതമാനം കൂടുതൽ വില നൽകി കർഷകരിൽനിന്നു വാങ്ങാനാണ് തീരുമാനം. ഇതിനായി വിളകൾ നൽകാൻ ഇന്നുകൂടി അവസരമുണ്ട്. ഇന്ന് ഉച്ചകഴിഞ്ഞ് മൂന്നുമുതൽ എരുമേലി ടൗണിൽ ചാലക്കുഴി കെട്ടിടത്തിലാണ് കൃഷി വകുപ്പിന്‍റെ ഓണവിപണി തുടങ്ങുന്നത്. സെപ്റ്റംബർ നാലു വരെയാണ് വിപണിയുടെ പ്രവർത്തനം. കൃഷിവകുപ്പ് ഇന്നുകൂടി വിളകൾ സംഭരിക്കും വിപണി വിലയേക്കാൾ പത്തു ശതമാനം കൂടുതൽ വില നൽകി കർഷകരിൽനിന്ന് ഇന്നു കൂടി കൃഷിവകുപ്പ് വിളകൾ സംഭരിക്കും. വിവിധ ഇനം വാഴക്കുലകൾ, കപ്പ, ചേന, ചേമ്പ്, കാച്ചിൽ, ഇഞ്ചി, മഞ്ഞൾ തുടങ്ങിയവയും വെണ്ട, പാവയ്ക്ക, കോവയ്ക്ക, മത്തങ്ങ, പടവലങ്ങ, പയർ, ബീൻസ്, തക്കാളി, ചീര, കുമ്പളങ്ങ, വെള്ളരിങ്ങ, മുരിങ്ങ, പച്ചമുളക് തുടങ്ങിയ വിവിധ ഇനങ്ങളിലുള്ള നാടൻ പച്ചക്കറികളും ഇന്നുകൂടി വാങ്ങി സംഭരിക്കും. ഫോൺ: 8848655607.

പത്തനാട്-കുളത്തൂര്‍മൂഴി-താഴത്തുവടകര ഫെറി റോഡ് നവീകരണം ആരംഭിച്ചു

കാഞ്ഞിരപ്പള്ളി: പത്തനാട്-കുളത്തൂര്‍മൂഴി-താഴത്തുവടകര ചിറക്കല്‍പാറ ഫെറി റോഡ് ബിഎംബിസി ടാറിംഗിന് ഏഴു കോടി രൂപ അനുവദിച്ച പ്രവൃത്തിയുടെ നിര്‍മാണം ആരംഭിച്ചതായി ചീഫ് വിപ്പ് ഡോ. എൻ. ജയരാജ് അറിയിച്ചു. സംസ്ഥാന സര്‍ക്കാരിന്‍റെ പ്രത്യേക പാക്കേജില്‍ ഉള്‍പ്പെടുത്തിയാണ് തുക അനുവദിച്ചിരിക്കുന്നത്. പത്തനാട് മുതല്‍ താഴത്തുവടകര ചിറക്കല്‍പാറ കടവില്‍ നിലവില്‍ നിർമാണം ആരംഭിച്ച ചിറക്കല്‍പാറ പാലത്തിലേക്ക് എത്തുന്ന റോഡാണിത്. ആറ് കിലോമീറ്റര്‍ വരുന്ന റോഡ് ഇരുവശങ്ങളിലും ഓടകള്‍ സഹിതം വിവിധ സുരക്ഷാ ഉപകരണങ്ങളോടെ ആധുനിക നിലവാരത്തിലാണ് നിര്‍മിക്കുന്നത്. ഈ റോഡിന്‍റെ താഴത്തുവടകര മുതല്‍ കുളത്തൂര്‍മൂഴി വരെയുള്ള ഭാഗം കിഫ്ബി പദ്ധതിയില്‍ ഉള്‍പ്പെടുത്തി 86 കോടി രൂപ അനുവദിച്ച പ്രവൃത്തിയില്‍ നേരത്തേ ഉള്‍പ്പെടുത്തിയിരുന്നു. ബാക്കി വരുന്ന ഭാഗത്തിന്‍റെ നിർമാണങ്ങളാണ് ഇപ്പോള്‍ ആരംഭിച്ചിരിക്കുന്നതെന്ന് ചീഫ് വിപ്പ് അറിയിച്ചു.

തോടിന്‍റെ സംരക്ഷണഭിത്തി തകർന്നുവീണു

എരുമേലി: തോടിന്‍റെ സംരക്ഷണഭിത്തി ഇടിഞ്ഞുവീണു. ഇതോടെ സമീപത്തെ വീട് അപകടഭീഷണിയിലായി. എരുമേലി പഞ്ചായത്ത്‌ തുമരംപാറ വാർഡിൽ ചപ്പാത്ത് ഭാഗത്താണ് തോടിന്‍റെ സംരക്ഷണ ഭിത്തി തകർന്നുവീണത്. സംരക്ഷണഭിത്തിയുടെ മുകളിലൂടെ ഉണ്ടായിരുന്ന നടപ്പുവഴി ഉൾപ്പെടെ തോട്ടിലേക്ക് തകർന്നുവീണ നിലയിലാണ്. കഴിഞ്ഞ ദിവസമാണ് സംഭവം. ഇതിനു പിന്നാലെ വീണ്ടും തിട്ട ഇടിഞ്ഞുവീണ് അപകടസാധ്യത വർധിച്ചിരിക്കുകയാണെന്ന് വാർഡ് മെംബർ ബിനോയ്‌ ഇലവുങ്കൽ പറഞ്ഞു. പഞ്ചായത്ത്‌ ഭരണസമിതി ഇടപെട്ട് അടിയന്തര പരിഹാര നടപടികൾ സ്വീകരിക്കണമെന്ന് ബിനോയ് ആവശ്യപ്പെട്ടു.

ഓണത്തിരക്കേറി; കുരുങ്ങി വലഞ്ഞ് നഗരം

പാലാ: പാലായിലെത്തുന്നവര്‍ ഗതാഗതക്കുരുക്കില്‍ വലയുന്നു. പാലായിലെ വാഹനത്തിരക്കിന് ആശ്വാസം പകരാന്‍ നിര്‍മിച്ച ബൈപാസിലൂടെ ഇടതടവില്ലാതെ വാഹനങ്ങള്‍ പായുമ്പോള്‍ സിവില്‍ സ്റ്റേഷന്‍ ജംഗ്ഷനില്‍ കുരുക്ക് പതിവാകുന്നു. മെയിന്‍ റോഡിലും ടിബി റോഡിലും പ്രധാന കവലകളിലുമൊക്കെ ഗതാഗതക്കുരുക്കാണ്. ചില സ്ഥലങ്ങളില്‍ അനധികൃത പാര്‍ക്കിംഗാണ് വില്ലൻ. റോഡിന്‍റെ ഇരുവശത്തും വാഹനപാര്‍ക്കിംഗ് വരുന്നതോടെ ഗതാഗതം ദുഷ്കരമാകും. കാല്‍നട യാത്രക്കാരും ബുദ്ധിമുട്ടുകയാണ്. റോഡ് മുറിച്ചുകടക്കാന്‍ ഏറെനേരം കാത്തിരിക്കണം. നഗരത്തിലെ തിരക്കേറിയ നാല്‍ക്കവലകളില്‍ ഗതാഗതം നിയന്ത്രിക്കാന്‍ പോലീസും പാടുപെടുകയാണ്. ബൈപാസും പാലാ-കൂത്താട്ടുകുളം റോഡും സിവില്‍ സ്റ്റേഷന്‍ ജംഗ്ഷനില്‍ സംഗമിക്കുന്നിടത്താണ് ഗതാഗതക്കുരുക്ക് കൂടുതല്‍ കാണപ്പെടുന്നത്. രാമപുരം, വൈക്കം, തൊടുപുഴ റോഡുകളില്‍നിന്ന് ഇവിടേക്ക് എത്തുന്ന വാഹനങ്ങള്‍ ഒന്നാകെ സിവില്‍ സ്റ്റേഷന്‍ ജംഗ്ഷനില്‍ എത്തുമ്പോഴാണ് അഴിയാക്കുരുക്കാകുന്നത്. സിവില്‍ സ്റ്റേഷനു മുന്നിലെ നാലുംകൂടിയ കവലയില്‍ താത്കാലികമായൊരു ട്രാഫിക് ഐലൻഡ് തീര്‍ത്തിട്ടുണ്ടെങ്കിലും ഗതാഗത നിയന്ത്രണം ഫലപ്രദമല്ല. റോഡില്‍നിന്ന് ട്രാഫിക് പോലീസ് ഗതാഗതം നിയന്ത്രിക്കുന്നുണ്ട്. പോലീസിന്‍റെ സാന്നിധ്യമില്ലെങ്കില്‍ പലപ്പോഴും ഗതാഗതം നിലയ്ക്കുന്ന സാഹചര്യമാണുള്ളത്.

ദൈവമാതാവിനെപ്പോലെ തുറവിയുള്ളവരാകണം: മോൺ. ജോസഫ് കണിയോടിക്കൽ

കുറവിലങ്ങാട്: യഥാർഥ ജീവിതസന്തോഷത്തിന് ദൈവമാതാവിനെപ്പോലെ തുറവിയുള്ളവരാകണമെന്ന് പാലാ രൂപത വികാരി ജനറാൾ മോൺ. ജോസഫ് കണിയോടിക്കൽ പറഞ്ഞു. കുറവിലങ്ങാട് ബൈബിൾ കൺവൻഷന്‍റെ മൂന്നാംദിനത്തിൽ വിശുദ്ധ കുർബാന അർപ്പിച്ച് സന്ദേശം നൽകുകയായിരുന്നു അദ്ദേഹം. ഇന്നലെ നടന്ന ജപമാല പ്രദക്ഷിണത്തിന് പിഡിഎം ടീം നേതൃത്വം നൽകി. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, സീനിയർ അസിസ്റ്റന്‍റ് വികാരി ഫാ. ജോസഫ് മണിയഞ്ചിറ, അസി. വികാരിമാരായ ഫാ. പോൾ പാറപ്ലാക്കൽ, ഫാ. ആന്‍റണി വാഴക്കാലായിൽ, ഫാ. ജോസഫ് ചൂരയ്ക്കൽ, ഫാ. തോമസ് താന്നിമലയിൽ എന്നിവർ ശുശ്രൂഷകൾക്കു കാർമികത്വം വഹിച്ചു. കൺവൻഷന്‍റെ നാലാം ദിവസമായ ഇന്ന് ഷംഷാബാദ് രൂപത സഹായ മെത്രാൻ മാർ ജോസഫ് കൊല്ലംപറമ്പിൽ വിശുദ്ധ കുർബാന അർപ്പിച്ച് സന്ദേശം നൽകും.

ഉഴവൂർ കണ്ണോത്തുകുളത്ത് കുട്ടികൾക്ക് പാർക്ക് ഒരുങ്ങുന്നു

ഉഴവൂർ: പഞ്ചായത്തിലെ കണ്ണോത്തുകുളത്ത് കുട്ടികൾക്കായി പാർക്ക് ഒരുങ്ങുന്നു. ഉഴവൂർ ബ്ലോക്ക് പഞ്ചായത്ത് വൈസ് പ്രസിഡന്‍റ് ഡോ. സിന്ധുമോൾ ജേക്കബിന്‍റെ നേതൃത്വത്തിലാണ് പാർക്ക് നിർമിക്കുന്നത്. പഞ്ചായത്തിലെ ചിറയിൽകുളത്ത് ബ്ലോക്ക് പഞ്ചായത്തിന്‍റെ നേതൃത്വത്തിൽ ത്രിതല പഞ്ചായത്തുകളുടെയും എംപി, എംഎൽഎ എന്നിവരുടെയും ഫണ്ട് ലഭ്യമാക്കി നിർമിച്ച ഹാപ്പിനെസ് പാർക്കിൽ വിനോദത്തിനും വ്യായാമത്തിനുമായി നൂറുകണക്കിനാളുകൾ എത്തുന്ന സാഹചര്യത്തിലാണ് ബ്ലോക്ക് പരിധിയിൽ പുതിയ പാർക്ക് ഒരുക്കുന്നത്. ബ്ലോക്ക് പഞ്ചായത്ത് കഴിഞ്ഞ സാമ്പത്തിക വർഷം 12 ലക്ഷം രൂപയും ജില്ലാ പഞ്ചായത്ത് ഏഴു ലക്ഷം രൂപയും ഈ പദ്ധതിക്കായി വകയിരുത്തിയിരുന്നു. കണ്ണോത്തുകുളം നവീകരണം, ശുചിത്വസമുച്ചയം നിർമാണം, തോട്‌ സംരക്ഷണം, ഓട നിർമാണം എന്നീ പ്രവർത്തനങ്ങൾ ഇതിന്‍റെ ഭാഗമായി നടത്തിയിരുന്നു. ഈ വർഷത്തെ പദ്ധതിയിൽ ഉൾപ്പെടുത്തി ചിൽഡ്രൻസ് പാർക്കിന് ഉപകരണങ്ങൾ വാങ്ങാൻ മൂന്നു ലക്ഷം രൂപയും പാർക്കിൽ മിനി മാസ്റ്റ് ലൈറ്റ് സ്ഥാപിക്കുന്നതിനായി 1.50 ലക്ഷം രൂപയും വകയിരുത്തിയിട്ടുണ്ടെന്ന് ഡോ. സിന്ധുമോൾ ജേക്കബ് പറഞ്ഞു. കുട്ടികൾക്കുള്ള ഊഞ്ഞാൽ, മെറിഗോ റൗണ്ട്, റോക്കർ ഫിഷ്, ടണൽ സ്ലൈഡർ, ഡ്രാഗൺ വാക്ക് എന്നിവയാണ് പാർക്കിൽ ലക്ഷ്യമിടുന്നത്. എംസി റോഡിൽനിന്നു രണ്ടു കിലോമീറ്റർ ദൂരത്തിനുള്ളിലെന്നതും ഉഴവൂർ, വെളിയന്നൂർ പഞ്ചായത്തുകളുടെ അതിർത്തി പ്രദേശമെന്നതും കാരണം കൂടുതൽ ആളുകൾക്ക് പാർക്കിന്‍റെ പ്രയോജനം നേടാനാകുമെന്ന വിലയിരുത്തലുമുണ്ട്.

യൂത്ത് ഫ്രണ്ട്-എം യുവജനറാലി

കടുത്തുരുത്തി: രാജ്യത്തിനാകെ അഭിമാനമായി കുറവിലങ്ങാട്ട് എത്തിച്ച സയന്‍സ് സിറ്റിയല്ലാതെ ബൃഹത്തായ എന്തെങ്കിലും വികസന പദ്ധതികള്‍ കടുത്തുരുത്തിയില്‍ എത്തിയിട്ടുണ്ടോയെന്ന് ജനങ്ങള്‍ പരിശോധിക്കണമെന്ന് കേരള കോണ്‍ഗ്രസ്-എം ചെയര്‍മാന്‍ ജോസ് കെ. മാണി എംപി. യൂത്ത് ഫ്രണ്ട്-എം കടുത്തുരുത്തിയില്‍ സംഘടിപ്പിച്ച യുവജനറാലിയോടനുബന്ധിച്ച പൊതുസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. എംഎല്‍എ ഫണ്ടും എംപി ഫണ്ടും വിനിയോഗിച്ചുള്ള പ്രവര്‍ത്തനങ്ങളല്ല ഒരു നാടിന്‍റെ വികസന അടയാളങ്ങളായി മാറേണ്ടത്. ബൃഹത്തായ പദ്ധതികളും ജനോപകാരപ്രദമായ സംരംഭങ്ങളുമാണ് ഒരു നാടിന്‍റെ വികസന അടയാളങ്ങള്‍. മികച്ച പ്രോജക്‌ടുകള്‍ സര്‍ക്കാരിന് മുന്നില്‍ സമര്‍പ്പിക്കുവാന്‍ കഴിയാതിരിക്കുന്നത് അതത് മേഖലകളിലെ ജനപ്രതിനിധികളുടെ നിരുത്തരവാദപരമായ പ്രവര്‍ത്തനമായി മാത്രമേ കാണാന്‍ കഴിയുകയുള്ളൂ. വികസനം തിരിഞ്ഞുനോക്കാത്ത നാടെന്ന കടുത്തുരുത്തി നിയോജകമണ്ഡലത്തിന്‍റെ പേരുദോഷം മാറ്റിയെടുക്കുമെന്നും ജോസ് കെ. മാണി പറഞ്ഞു. യൂത്ത് ഫ്രണ്ട്-എം നിയോജകമണ്ഡലം പ്രസിഡന്‍റ് ബിബിന്‍ വെട്ടിയാനിയുടെ അധ്യക്ഷതയില്‍ ചേര്‍ന്ന യോഗത്തില്‍ മുന്‍ എംപി തോമസ് ചാഴികാടന്‍, പ്രമോദ് നാരായൺ‍ എംഎല്‍എ, സ്റ്റീഫന്‍ ജോര്‍ജ്, ലോപ്പസ് മാത്യു, ഡിനു ചാക്കോ, ബ്രൈറ്റ് വട്ടനിരപ്പേല്‍, ബിറ്റു വൃന്ദാവന്‍, റോണി വലിയപറമ്പന്‍, സണ്ണി തെക്കേടം, ജോസ് പുത്തന്‍കാല, തോമസ് ടി. കീപ്പുറം, സക്കറിയാസ് കുതിരവേലി, സാജന്‍ തൊടുക, ജോര്‍ജുകുട്ടി ആഗസ്തി, നിര്‍മല ജിമ്മി, ഡോ. സിന്ധുമോള്‍ ജേക്കബ് എന്നിവര്‍ പ്രസംഗിച്ചു.

മാതാവിന്‍റെ പിറവിത്തിരുനാൾ

കുറവിലങ്ങാട് പള്ളിയിൽ നാളെ കൊടിയേറും കുറവിലങ്ങാട്: മരിയൻ പ്രത്യക്ഷീകരണങ്ങളിലൂടെ ആഗോളതീർഥാടന കേന്ദ്രമായ കുറവിലങ്ങാട് മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന ദേവാലയത്തിൽ പരിശുദ്ധ ദൈവമാതാവിന്‍റെ പിറവിത്തിരുനാളിന് നാളെ കൊടിയേറും. നാളെ രാവിലെ 7.30ന് ആർച്ച്പ്രീസ്റ്റ് റവ.ഡോ. തോമസ് മേനാച്ചേരി തിരുനാൾ കൊടിയേറ്റും. തുടർന്ന് ലദീഞ്ഞും വിശുദ്ധ കുർബാനയും. നോമ്പിലെ എല്ലാ ദിവസങ്ങളിലും രാവിലെ 5.30, 6.30, 7.30, 11.00, 5.00 എന്നീ സമയങ്ങളിൽ വിശുദ്ധ കുർബാന. മാസാദ്യവെള്ളിയാഴ്ചയും ഞായറാഴ്ചയും കൂടുതൽ സമയങ്ങളിൽ വിശുദ്ധ കുർബാനയുണ്ട്. ബൈബിൾ കൺവൻഷൻ സമാപനദിനമായ നാളെ വൈകുന്നേരം 4.30ന് മുട്ടുചിറ റൂഹാദ്ക്കുദിശ ഫൊറോന വികാരി ഫാ. ഏബ്രഹാം കൊല്ലിത്താനത്തുമലയിൽ വിശുദ്ധ കുർബാനയർപ്പിച്ച് സന്ദേശം നൽകും. നോമ്പിന്‍റെ വിവിധദിവസങ്ങളിലായി മുട്ടുചിറ ഫൊറോന, രാമപുരം, കാളികാവ്, രത്‌നഗിരി ഇടവകകളുടെയും കത്തോലിക്കാ കോൺഗ്രസ്, പിതൃവേദി, മാതൃവേദി, എസ്എംവൈഎം, ഡിസിഎംഎസ്, ജീസസ് യൂത്ത് സംഘടനകളുടെയും നേതൃത്വത്തിൽ മുത്തിയമ്മ തീർഥാടനങ്ങൾ നടക്കും. നോമ്പിന്‍റെ ഓരോ ദിവസവും വ്യത്യസ്തമായ ദിനാചരണങ്ങളും നടക്കുന്നുണ്ട്. കുറവിലങ്ങാട് നസ്രാണി മഹാസംഗമവാർഷികവും ദിനാചരണത്തോടനുബന്ധിച്ച് നടക്കും. സമാപനദിനത്തിൽ പത്തിന് പാലാ രൂപതാധ്യക്ഷൻ മാർ ജോസഫ് കല്ലറങ്ങാട്ട് വിശുദ്ധ കുർബാനയർപ്പിച്ച് സന്ദേശം നൽകും. എല്ലാദിവസവും അഞ്ചിനുള്ള വിശുദ്ധ കുർബാനയെതുടർന്ന് ജപമാല, മെഴുകുതിരി പ്രദക്ഷിണം നടക്കും. വിവിധ ദിവസങ്ങളിൽ എംഎസ്ടി ഡയറക്ടർ ജനറൽ റവ.ഡോ. വിൻസെന്‍റ് കദളിക്കാട്ടിൽ പുത്തൻപുരയിൽ, ഭരണങ്ങാനം വിശുദ്ധ അൽഫോൻസാ തീർഥാടന കേന്ദ്രം റെക്ടർ റവ.ഡോ. അഗസ്റ്റിൻ പാലയ്ക്കപറമ്പിൽ, പാലാ സെന്‍റ് തോമസ് കത്തീഡ്രൽ വികാരി റവ.ഡോ. ജോസ് കാക്കല്ലിൽ, വടവാതൂർ പൗരസ്ത്യ വിദ്യാപീഠം പ്രസിഡന്‍റ് റവ.ഡോ. പോളി മണിയാട്ട്, പാലാ രൂപത ചാൻസലർ റവ.ഡോ. ജോസഫ് കുറ്റിയാങ്കൽ, ചേർപ്പുങ്കൽ മാർ സ്ലീവാ മെഡിസിറ്റി സിഇഒ റവ.ഡോ. അഗസ്റ്റിൻ കൂട്ടിയാനിയിൽ എന്നിവർ വിശുദ്ധ കുർബാനയർപ്പിക്കും. കാഞ്ഞിരപ്പള്ളി പഴയപള്ളിയിൽ ഇന്നു കൊടിയേറും കാഞ്ഞിരപ്പള്ളി: സീറോ മലബാർ മേജർ ആർക്കി എപ്പിസ്കോപ്പൽ മരിയൻ തീർഥാടന കേന്ദ്രമായ കാഞ്ഞിരപ്പള്ളി പഴയ പള്ളിയിൽ പരിശുദ്ധ കന്യകാമറിയത്തിന്‍റെ ജനനത്തിരുനാളിനൊരുക്കമായുള്ള എട്ടുനോമ്പാചരണത്തിന് ഇന്ന് കൊടിയേറും. വൈകുന്നേരം നാലിന് കത്തീഡ്രൽ വികാരിയും ആർച്ച് പ്രീസ്റ്റുമായ റവ.ഡോ. കുര്യൻ താമരശേരി കൊടിയേറ്റും. തുടർന്ന് വിശുദ്ധ കുർബാന. നാളെ മുതൽ എട്ടുവരെ രാവിലെ അഞ്ചിനും 6.30നും 8.15നും 10നും ഉച്ചയ്ക്ക് 12നും രണ്ടിനും വൈകുന്നേരം 4.30നും രാത്രി ഏഴിനും വിശുദ്ധ കുർബാന. തിരുനാൾ ദിവസങ്ങളിൽ വൈകുന്നേരം 6.15ന് ജപമാല പ്രദക്ഷിണമുണ്ടായിരിക്കും. നാളെ വൈകുന്നേരം 4.30ന് കല്യാൺ രൂപത നിയുക്ത ആർച്ച്ബിഷപ് മാർ സെബാസ്റ്റ്യൻ വാണിയപ്പുരയ്ക്കൽ, നാലിന് വൈകുന്നേരം 4.30ന് കർദിനാൾ മാർ ജോർജ് ആലഞ്ചേരി, ഏഴിന് വൈകുന്നേരം 4.30ന് മാർ മാത്യു അറയ്ക്കൽ, എട്ടിന് വൈകുന്നേരം 4.30ന് മാർ ജോസ് പുളിക്കൽ എന്നിവർ വിശുദ്ധ കുർബാനയർപ്പിക്കും. സെപ്റ്റംബർ മൂന്നിന് രാവിലെ 11.30ന് കാഞ്ഞിരപ്പള്ളി രൂപത എസ്എംവൈഎം, മാതൃവേദി, നാലിന് രാവിലെ 11.30ന് മിഷൻലീഗ്, ആറിന് വിവിധ ഇടവകകൾ എന്നിവയുടെ നേതൃത്വത്തിൽ മരിയൻ തീർഥാടനം നടത്തും. തിരുനാൾ ദിവസങ്ങളിൽ കഴുന്ന്, സമർപ്പണം എന്നീ നേർച്ചകൾ നടത്തുന്നതിനും നേർച്ചക്കഞ്ഞി ലഭിക്കുന്നതിനുമുള്ള സൗകര്യങ്ങൾ ക്രമീകരിച്ചിട്ടുണ്ട്. ഭക്തജനങ്ങൾക്ക് തിരുനാൾ തിരുക്കർമങ്ങളിൽ പങ്കെടുക്കുന്നതിന് ഇരുപതിനായിരം പേർക്ക് ഇരിക്കാവുന്ന പന്തൽ സൗകര്യവും വാഹനപാർക്കിംഗിനുള്ള ക്രമീകരണങ്ങളും ഏർപ്പെടുത്തിയിട്ടുണ്ട്. തിരുനാളിന്‍റെ വിജയത്തിനായി കത്തീഡ്രൽ വികാരിയും ആർച്ച്പ്രീസ്റ്റുമായ റവ.ഡോ. കുര്യൻ താമരശേരി, ഫാ. ജോസഫ് ആലപ്പാട്ടുകുന്നേൽ, ഫാ. തോമസ് മുളങ്ങാശേരി, ഫാ. തോമസ് നല്ലൂർകാലായിപറമ്പിൽ, കൈക്കാരന്മാരായ കെ.സി. ഡൊമിനിക് കരിപ്പാപ്പറമ്പിൽ, ഏബ്രഹാം കെ. അലക്സ് കൊല്ലംകുളം, പി.കെ. കുരുവിള പിണമറുകിൽ, ടി.സി. ചാക്കോ വാവലുമാക്കൽ, ജനറൽ കൺവീനർ മാത്തച്ചൻ മാളിയേക്കൽ, പബ്ലിസിറ്റി കൺവീനർ ബിജു പത്യാല എന്നിവരുടെ നേതൃത്വത്തിൽ വിവിധ കമ്മിറ്റികൾ പ്രവർത്തിച്ചുവരുന്നു. ളാലം പഴയ പള്ളിയില്‍ പാലാ: ളാലം പഴയ പള്ളിയിൽ എട്ടുനോമ്പ് തിരുനാളിന് കൊടിയേറി. പുതുതായി നിര്‍മിച്ച കൊടിമരത്തിന്‍റെ വെഞ്ചരിപ്പും കൊടിയേറ്റുകര്‍മവും മാര്‍ ജോസഫ് കല്ലറങ്ങാട്ട് നിര്‍വഹിച്ചു. വികാരി ഫാ. ജോസഫ് തടത്തില്‍, കത്തീഡ്രല്‍ പള്ളി വികാരി റവ.ഡോ. ജോസ് കാക്കല്ലില്‍, ളാലം പുത്തന്‍പള്ളി വികാരി ഫാ. ജോര്‍ജ് മൂലേച്ചാലില്‍, പാസ്റ്ററല്‍ അസിസ്റ്റന്‍റ് ഫാ. ജോസഫ് ആലഞ്ചേരില്‍, സഹവികാരിമാരായ ഫാ. സ്‌കറിയ മേനാംപറമ്പില്‍, ഫാ. ആന്‍റണി നങ്ങാപറമ്പില്‍ എന്നിവര്‍ സഹകാര്‍മികരായി. എട്ടിനാണ് പ്രധാന തിരുനാള്‍. തിരുനാള്‍ ദിനങ്ങളില്‍ രാവിലെ 5.30നും ഏഴിനും 9.30നും വൈകുന്നേരം നാലിനും ഏഴിനും വിശുദ്ധ കുര്‍ബാന. വൈകുന്നേരം 5.45ന് ജപമാല പ്രദക്ഷിണവും ഉണ്ടായിരിക്കും. മാനത്തൂര്‍ പള്ളിയില്‍ മാനത്തൂര്‍: സെന്‍റ് മേരീസ് പള്ളിയില്‍ പരിശുദ്ധ കന്യകമറിയത്തിന്‍റെ പിറവിത്തിരുനാളും എട്ടുനോമ്പാചരണവും നാളെമുതല്‍ എട്ടുവരെ ആഘോഷിക്കും. നാളെ രാവിലെ 6.30ന് കൊടിയേറ്റ്, വിശുദ്ധ കുര്‍ബാന - ഫാ. കുര്യന്‍ കോട്ടയില്‍. വൈകുന്നേരം 4.30ന് വിശുദ്ധ കുര്‍ബാന, വചനസന്ദേശം, നൊവേന - ഫാ. തോമസ് കാലാച്ചിറയില്‍. രണ്ടുമുതല്‍ ആറുവരെ ദിവസവും രാവിലെ 6.30നും വൈകുന്നേരം 4.30നും വിശുദ്ധ കുര്‍ബാന, നൊവേന, വചനസന്ദേശം. അഞ്ചിനു വൈകുന്നേരം 6.30ന് മേരിനാമധാരീസംഗമം നടത്തും. ‌ഏഴിന് വൈകുന്നേരം നാലിന് വിശുദ്ധ കുര്‍ബാന, നൊവേന - ഫാ. മാത്യു കവളംമാക്കല്‍. സന്ദേശം - റവ.ഡോ. ജോസ് കോട്ടയില്‍. തുടര്‍ന്ന് പ്രദക്ഷിണം, ഗാനമേള. എട്ടിനു രാവിലെ 9.30നു തിരുനാള്‍ കുര്‍ബാന - ഫാ. ജോസ് തറപ്പേല്‍. സന്ദേശം - റവ.ഡോ. ജോസഫ് തടത്തില്‍. തുടര്‍ന്ന് പ്രദക്ഷിണം, തിരുനാള്‍ സദ്യ. ഒമ്പതിനു രാവിലെ 6.30ന് വിശുദ്ധ കുര്‍ബാന, സെമിത്തേരി സന്ദര്‍ശനം. കളത്തൂർ പള്ളിയിൽ കളത്തൂർ: സെന്‍റ് മേരീസ് പള്ളിയിൽ പരിശുദ്ധ ദൈവമാതാവിന്‍റെ പിറവിത്തിരുനാളും എട്ടുനോമ്പ് ആചരണവും കുടുംബ വിശുദ്ധീകരണ ധ്യാനവും സെപ്റ്റംബർ ഒന്നുമുതൽ 14 വരെ നടക്കും. എട്ടുവരെ തീയതികളിൽ രാവിലെ 6.15ന് വിശുദ്ധ കുർബാന, വൈകുന്നേരം 5.30ന് വിശുദ്ധ കുർബാന, നൊവേന, സന്ദേശം, മെഴുകുതിരി ജപമാല പ്രദക്ഷിണം. എട്ടുമുതൽ 11 വരെ കുടുംബ വിശുദ്ധീകരണ ധ്യാനം. ധ്യാനത്തിന്‍റെ ഭാഗമായി നാലു ദിവസങ്ങളിൽ അഞ്ചിനു വിശുദ്ധ കുർബാനയും ഗാനശുശ്രുഷയും വചനപ്രഘോഷണങ്ങളും ആരാധനയും. ദിവ്യരക്ഷക സഭയിലെ ഫാ. റോയി വെളിയത്തിൽ ധ്യാനം നയിക്കും. 12, 13, 14 തീയതികളിൽ തിരുനാൾ ആഘോഷം. 12നു വൈകുന്നേരം 5.15ന് വികാരി ഫാ. സൈറസ് വേലംപറമ്പിൽ തിരുനാൾ കൊടിയേറ്റും. 13ന് 6.15ന് അസി. വികാരി ഫാ. ജോൺസ് ചുക്കനാനിക്കൽ വിശുദ്ധ കുർബാനയർപ്പിക്കും. അഞ്ചിന് വിശുദ്ധ കുർബാന, സന്ദേശം - ഫാ. ജോസഫ് ചൂരയ്ക്കൽ. 6.45ന് പ്രദക്ഷിണം വിശുദ്ധ റീത്ത കപ്പേളയിലേക്ക്. 8.45ന് പള്ളിയിൽ സമാപന ആശീർവാദം, തിരുശേഷിപ്പ് വണക്കം. പ്രധാന തിരുനാൾ ദിനമായ 14ന് രാവിലെ 5.30നും ഏഴിനും വിശുദ്ധ കുർബാന. 10ന് തിരുനാൾ കുർബാന - ഫാ. അഗസ്റ്റിൻ കണ്ടെത്തിക്കുടിലിൽ. പാലാ രൂപത ബൈബിൾ അപ്പൊസ്തലേറ്റ് ഡയറക്ടർ ഫാ. ആൽബിൻ പുതുപ്പറമ്പിൽ സന്ദേശം നൽകും. തുടർന്ന് തിരുനാൾ പ്രദക്ഷിണം. കപ്പാട് മാര്‍ സ്ലീവാ പള്ളിയില്‍ കപ്പാട്: മാര്‍ സ്ലീവാ തീര്‍ഥാടന പള്ളിയില്‍ എട്ടുനോമ്പാചരണവും വിശുദ്ധ കുരിശിന്‍റെ പുകഴ്ചയുടെ തിരുനാളും നാളെ മുതല്‍ 14 വരെ നടക്കുമെന്ന് വികാരി ഫാ. ആന്‍റണി മണിയങ്ങാട്ട്, അസിസ്റ്റന്‍റ് വികാരി ഫാ. മാത്യു നിരപ്പേല്‍ എന്നിവര്‍ അറിയിച്ചു. നാളെമുതല്‍ അഞ്ചു വരെ രാവിലെ 5.30നും വൈകുന്നേരം 4.30നും ജപമാല, വിശുദ്ധ കുര്‍ബാന. ആറിന് രാവിലെ 5.30ന് ജപമാല, വിശുദ്ധ കുര്‍ബാന, വൈകുന്നേരം അഞ്ചിന് വിശുദ്ധ കുര്‍ബാന, ജപമാല പ്രദക്ഷിണം. ഏഴിനു രാവിലെ 5.30നും ഏഴിനും 10നും വൈകുന്നേരം നാലിനും വിശുദ്ധ കുര്‍ബാന, രാവിലെ 6.30ന് ജപമാല. എട്ടിനു രാവിലെ 5.30ന് ജപമാല, വിശുദ്ധ കുര്‍ബാന. വൈകുന്നേരം 4.30ന് ജപമാല, വിശുദ്ധ കുര്‍ബാന, നേര്‍ച്ച വിതരണം. 12നു രാവിലെ 5.30ന് വിശുദ്ധ കുര്‍ബാന, വൈകുന്നേരം 4.30ന് കൊടിയേറ്റ്, വിശുദ്ധ കുര്‍ബാന, സെമിത്തേരി സന്ദര്‍ശനം. 13നു രാവിലെ 5.30നും ഏഴിനും വിശുദ്ധ കുര്‍ബാന, രാവിലെ എട്ടു മുതല്‍ 4.30 വരെ ആരാധന, 5.30ന് ദിവ്യകാരുണ്യ പ്രദക്ഷിണം. വിശുദ്ധ കുരിശിന്‍റെ പുകഴ്ചയുടെ തിരുനാള്‍ ദിനമായ 14നു രാവിലെ 5.30നും എട്ടിനും വൈകുന്നേരം നാലിനും വിശുദ്ധ കുര്‍ബാന, വൈകുന്നേരം ആറിന് പ്രദക്ഷിണം, രാത്രി ഏഴിന് നാടകം. ഇളങ്ങുളം സെന്‍റ് മേരീസ് പള്ളിയില്‍ ഇളങ്ങുളം: സെന്‍റ് മേരീസ് പള്ളിയില്‍ എട്ടുനോമ്പാചരണവും പരിശുദ്ധ കന്യകമറിയത്തിന്‍റെ പിറവിത്തിരുനാളും നാളെമുതല്‍ എട്ടുവരെ നടക്കുമെന്ന് വികാരി ഫാ. ഡാര്‍വിന്‍ വാലുമണ്ണേല്‍, അസിസ്റ്റന്‍റ് വികാരി ഫാ. ജോയിസ് തെക്കേവയലില്‍ എന്നിവര്‍ അറിയിച്ചു. നാളെമുതല്‍ ആറുവരെ എല്ലാ ദിവസവും രാവിലെ 5.45ന് ജപമാല, 6.15ന് വിശുദ്ധ കുര്‍ബാന, വൈകുന്നേരം 4.30ന് ജപമാല, അഞ്ചിന് വിശുദ്ധ കുര്‍ബാന, സന്ദേശം. ഏഴിനു രാവിലെ 5.20നും ഏഴിനും 9.30നും വൈകുന്നേരം നാലിനും വിശുദ്ധ കുര്‍ബാന, രാവിലെ 6.30നും 9.10നും ഉച്ചകഴിഞ്ഞ് 3.30നും ജപമാല. എട്ടിനു രാവിലെ 5.45ന് ജപമാല, 6.15ന് വിശുദ്ധ കുര്‍ബാന, സന്ദേശം. വെച്ചൂച്ചിറ സെന്‍റ് ജോസഫ്സ് വലിയപള്ളിയിൽ വെച്ചൂച്ചിറ: സെന്‍റ് ജോസഫ്സ് വലിയപള്ളിയിൽ എട്ടുനോന്പാചരണവും പരിശുദ്ധ കന്യകമറിയത്തിന്‍റെ പിറവിത്തിരുനാളും നാളെമുതൽ എട്ടുവരെ നടക്കുമെന്ന് വികാരി ഫാ. ജേക്കബ് പാണ്ടിയാംപറന്പിൽ അറിയിച്ചു. നാളെ രാവിലെ ഒന്പതു മുതൽ വൈകുന്നേരം നാലുവരെ അഖണ്ഡ ജപമാല, നാലിന് പൊതുജപമാല, കൊടിയേറ്റ്, 4.30ന് വിശുദ്ധ കുർബാന, സന്ദേശം. രണ്ട്, മൂന്ന് തീയതികളിൽ രാവിലെ 8.30 മുതൽ വൈകുന്നേരം നാലുവരെ അഖണ്ഡ ജപമാല, നാലിന് പൊതുജപമാല, 4.30ന് വിശുദ്ധ കുർബാന, സന്ദേശം. നാലിന് രാവിലെ 8.30 മുതൽ വൈകുന്നേരം നാലുവരെ അഖണ്ഡ ജപമാല, നാലിന് വിശുദ്ധ കുർബാന, സന്ദേശം. അഞ്ചിനു രാവിലെ ആറിന് ജപമാല, 6.30നു വിശുദ്ധ കുർബാന, സന്ദേശം, തുടർന്ന് വൈകുന്നേരം നാലുവരെ അഖണ്ഡ ജപമാല. ആറിനു രാവിലെ 8.30 മുതൽ വൈകുന്നേരം നാലുവരെ അഖണ്ഡ ജപമാല, നാലിന് പൊതുജപമാല, 4.30ന് വിശുദ്ധ കുർബാന, സന്ദേശം, നൊവേന. ഏഴിനു രാവിലെ ആറിന് ജപമാല, 6.30ന് വിശുദ്ധ കുർബാന, സന്ദേശം, 9.30ന് ജപമാല, 10.15ന് വിശുദ്ധ കുർബാന, സന്ദേശം, തുടർന്ന് വൈകുന്നേരം നാലുവരെ അഖണ്ഡ ജപമാല. എട്ടിനു രാവിലെ ഒന്പതുമുതൽ വൈകുന്നേരം നാലുവരെ അഖണ്ഡ ജപമാല, നാലിനു തിരുനാൾ കുർബാന, സന്ദേശം, തുടർന്ന് പ്രദക്ഷിണം, നേർച്ചവിതരണം.

സംസ്ഥാന യോഗ ചാമ്പ്യഷിപ്

പാലാ: സംസ്ഥാന സ്പോര്‍ട്സ് കൗണ്‍സിലിന്‍റെ സഹകരണത്തോടെ യോഗ അസോസിയേഷന്‍ ഓഫ് കേരള സംഘടിപ്പിക്കുന്ന പത്താമത് സംസ്ഥാന യോഗ ചാമ്പ്യന്‍ഷിപ്പിന് പാലായില്‍ തുടക്കമായി. മൂന്നു ദിവസമായി പാലാ സെന്‍റ് തോമസ് കോളജ് ഓഡിറ്റോറിയത്തില്‍ നടക്കുന്ന ചാമ്പ്യന്‍ഷിപ് മന്ത്രി വി.എന്‍. വാസവന്‍ ഉദ്ഘാടനം ചെയ്തു. യോഗ അസോസിയേഷന്‍ ഓഫ് കേരള സംസ്ഥാന പ്രസിഡന്‍റ് ബി. ബാലചന്ദ്രന്‍ അധ്യക്ഷത വഹിച്ചു. ഇന്നു നടക്കുന്ന സമാപന യോഗത്തില്‍ ജോസ് കെ. മാണി എംപി ട്രോഫിയും സര്‍ട്ടിഫിക്കറ്റുകളും വിതരണം ചെയ്യും.

സപ്ലൈകോ ഓണം ഫെയർ

ഈരാറ്റുപേട്ട: സപ്ലൈകോയുടെ പൂഞ്ഞാർ നിയോജകമണ്ഡലം ഓണംഫെയർ സപ്ലൈകോ ഈരാറ്റുപേട്ട സൂപ്പർമാർക്കറ്റിൽ ഇന്നു രാവിലെ 11ന് സെബാസ്റ്റ്യൻ കുളത്തുങ്കൽ എംഎൽഎ ഉദ്ഘാടനം ചെയ്യും. മുനിസിപ്പൽ ചെയർപേഴ്സൺ സുഹ്‌റ അബ്ദുൾ ഖാദർ അധ്യക്ഷത വഹിക്കും. നാലു വരെയാണ് ഫെയർ. നിയോജകമണ്ഡലങ്ങളിലെ നിശ്ചിത സ്ഥലങ്ങളിലൂടെ സഞ്ചരിക്കുന്ന മൊബൈൽ ഓണച്ചന്ത ഇന്നു രാവിലെ 9.30ന് ഭരണങ്ങാനം, 11ന് ഇടമറ്റം, ഉച്ചകഴിഞ്ഞ് 1.30 ന് നടയ്ക്കൽ, മൂന്നിന് പിണ്ണാക്കനാട്, 4.30ന് കുന്നോന്നി, ആറിന് പാതാമ്പുഴ എന്നീ സ്ഥലങ്ങളിൽ എത്തിച്ചേരും.

അരുവിത്തുറ കോളജിൽ എൻഎസ്എസ് സപ്തദിന സഹവാസ സ്പെഷ്യൽ ക്യാമ്പിന് തുടക്കം

അരുവിത്തുറ: സെന്‍റ് ജോർജ് കോളജ് എൻഎസ്എസ് യൂണിറ്റിന്‍റെ ആഭിമുഖ്യത്തിൽ സംഘടിപ്പിക്കുന്ന സപ്തദിന സ്പെഷ്യൽ ക്യാമ്പിന് തുടക്കമായി. സംസ്ഥാന യുവജന കമ്മീഷൻ അംഗം അബേഷ് അലോഷ്യസ് ഉദ്ഘാടനം നിർവഹിച്ചു. കോളേജ് മാനേജർ വെരി റവ.ഫാ. സെബാസ്റ്റ്യൻ വെട്ടുകല്ലേൽ അധ്യക്ഷത വഹിച്ചു. ബർസാർ റവ. ഫാ. ബിജു കുന്നയ്ക്കാട്ട്, വൈസ് പ്രിൻസിപ്പൽ ഡോ. ജിലു ആനി ജോൺ, എൻഎസ്എസ് പ്രോഗ്രാം ഓഫീസർമാരായ ഡോ. ഡെന്നി തോമസ്, മരിയ ജോസ് തുടങ്ങിയവർ സംസാരിച്ചു. സുസ്ഥിര വികസനത്തിനായി എൻഎസ്എസ് യുവത എന്ന മുദ്രാവാക്യവുമായി ആരംഭിച്ചിരിക്കുന്ന ക്യാമ്പിൽ വിവിധ ചർച്ചാ ക്ലാസുകൾ, സാമൂഹ്യ സമ്പർക്ക പരിപാടികൾ, നൈപുണ്യ വികസന പ്രവർത്തനങ്ങൾ, പ്രകൃതി പഠന യാത്രകൾ, സെമിനാറുകൾ, സിമ്പോസിയങ്ങൾ, വൃദ്ധ സദന സന്ദർശനങ്ങൾ, അനാഥ മന്ദിരത്തിലെ കലാപരിപാടികൾ, മെഡിക്കൽ ക്യാമ്പ്, ശ്രമദാനം തുടങ്ങി നിരവധി പരിപാടികൾ ഉൾപ്പെടുത്തിയിട്ടുണ്ട്.

ക്വാണ്ടം കംമ്പ്യൂട്ടിംഗിന്‍റെ സാധ്യതകൾ തേടി അരുവിത്തുറ കോളജിൽ ശിൽപശാല

അരുവിത്തുറ: കംമ്പ്യൂട്ടിംഗ് മേഖലയിലെ നിർണായക വഴിത്തിരിവായ ക്വാണ്ടം കംമ്പ്യൂട്ടിംഗിന്‍റെ സാധ്യതകൾ തേടി അരുവിത്തുറ സെന്‍റ് ജോർജസ് കോളജിൽ ശില്പശാല സംഘടിപ്പിച്ചു. പാലാ സെന്‍റ് തോമസ് കോളജിലെ ഫിസിക്സ് വിഭാഗം അസിസ്റ്റന്‍റ് പ്രഫസറായ ഡോ. ഡിന്‍റുമോൻ ജോയ്, ക്വാണ്ടം കംമ്പ്യൂട്ടിംഗിന്‍റെ തത്വങ്ങൾ, നിലവിലെ ട്രെൻഡുകൾ, ഭാവി സാധ്യതകൾ എന്നിവയെക്കുറിച്ച് വിദ്യാർഥികളുമായി സംവദിച്ചു. ക്യൂബിറ്റുകൾ, ക്വാണ്ടം അൽഗോരിതങ്ങൾ, ക്വാണ്ടം സുപ്രീമസി തുടങ്ങിയ തുടങ്ങിയ നൂതന ആശയങ്ങൾ കംമ്പ്യൂട്ടിംഗ് രംഗത്ത് വിപ്ലവകരമായ മാറ്റങ്ങൾക്ക് കാരണമാകുമെന്ന് അദ്ദേഹം പറഞ്ഞു. വ്യവസായങ്ങളിലും ശാസ്ത്ര ഗവേഷണങ്ങളിലും ക്വാണ്ടം കംമ്പ്യൂട്ടിംഗിനുള്ള സാധ്യതകളെക്കുറിച്ചും ഇന്ത്യയുടെ ദേശീയ ക്വാണ്ടം മിഷൻ രാജ്യത്തെ ബഹുദൂരംമുന്നിലെത്തിക്കുമെന്നും അദ്ദേഹം പറഞ്ഞു. ക്വാണ്ടം സാങ്കേതികവിദ്യകളിലും ആപ്ലിക്കേഷനുകളിലും ശാസ്ത്രീയവും വ്യാവസായികവുമായ ഗവേഷണ-വികസന പ്രവർത്തനങ്ങൾ ശക്തിപ്പെടുത്താനും നൂതന കണ്ടുപിടിത്തങ്ങൾ പ്രോത്സാഹിപ്പിക്കാനും ഈ രംഗത്ത് ഇന്ത്യയെ ഒരു ആഗോള ശക്തിയായി മാറ്റാനും ലക്ഷ്യമിടുന്നതാണ് എൻക്യുഎം എന്ന് അദ്ദേഹം അഭിപ്രായപ്പെട്ടു. ചടങ്ങിൽ ക്യാമ്പസിലെ കംമ്പ്യൂട്ടർ ആപ്ലിക്കേഷൻ സ്റ്റുഡൻസ് അസോസിയേഷന്‍റെ ഉദ്ഘാടനവും അദ്ദേഹം നിർവഹിച്ചു. കോളജ് കോഴ്‌സ് കോഓർഡിനേറ്ററും ബർസാറുമായ റവ. ഫാ. ബിജു കുന്നയ്ക്കാട്ട്, വൈസ് പ്രിൻസിപ്പൽ ഡോ. ജിലു ആനി ജോൺ, കംമ്പ്യൂട്ടർ ആപ്ലിക്കേഷൻസ് വിഭാഗം മേധാവി ഡോ. ജെസ്റ്റിൻ ജോയ്, അസോസിയേഷൻ ഫാക്കൽറ്റി കോഓർഡിനേറ്റർ ഡോ. സൗമ്യ ജോർജ്, വിദ്യാർഥി പ്രതിനിധി ആൻജോ ജോയൻ എന്നിവർ സംസാരിച്ചു.

മാര്‍ സെബാസ്റ്റ്യന്‍ വാണിയപ്പുരയ്ക്കലിന് അനുമോദനം

കോട്ടയം: കല്യാണ്‍ രൂപതയുടെ ആര്‍ച്ച്ബിഷപ്പായി നിയമിതനായ കെസിബിസി എസ്‌സി/എസ്ടി/ബിസി കമ്മീഷന്‍ വൈസ് ചെയര്‍മാന്‍ ബിഷപ് മാര്‍ സെബാസ്റ്റ്യന്‍ വാണിയപ്പുരയ്ക്കലിനെ കമ്മീഷന്‍ യോഗം അനുമോദിച്ചു. ചെയര്‍മാന്‍ ബിഷപ് ഗീവര്‍ഗീസ് മാര്‍ അപ്രേം അധ്യക്ഷത വഹിച്ചു. കമ്മീഷന്‍ സെക്രട്ടറി ഫാ. ജോസുകുട്ടി ഇടത്തിനകം, ഡിസിഎംഎസ് സംസ്ഥാന പ്രസിഡന്‍റ് ജയിംസ് ഇലവുങ്കല്‍ എന്നിവര്‍ പ്രസംഗിച്ചു.

സഹകരണ നയത്തിനെതിരേ എആര്‍ ഓഫീസ് ധര്‍ണ ഇന്ന്

ചങ്ങനാശേരി: കേന്ദ്ര-സംസ്ഥാന സര്‍ക്കാരുകളുടെ സഹകരണവിരുദ്ധ നയങ്ങളില്‍ പ്രതിഷേധിച്ച് സഹകരണ സംഘം ജീവനക്കാരുടെ സംഘടന കേരള കോഓപറേറ്റീവ് എംപ്ലോയീസ് ഫ്രണ്ട് ചങ്ങനാശേരി താലൂക്ക് കമ്മിറ്റിയുടെ നേതൃത്വത്തില്‍ ചങ്ങനാശേരി സഹകരണ അസിസ്റ്റന്‍റ് രജിസ്ട്രാര്‍ ഓഫീസിന് മുമ്പില്‍ ഇന്ന് മൂന്നിനു ധര്‍ണ നടത്തും. കെപിസിസി നിര്‍വാഹകസമിതി അംഗം ജോഷി ഫിലിപ്പ് ഉദ്ഘാടനം ചെയ്യും. സമരത്തില്‍ താലൂക്കിലെ രാഷ്‌ട്രീയ സഹകാരി സംഘടനാ പ്രവര്‍ത്തകര്‍ പങ്കെടുക്കുമെന്ന് കെസിഇഎഫ് താലൂക്ക് സെക്രട്ടറി സ്വാതി കൃഷ്ണന്‍ ഇ.ബി. അറിയിച്ചു.

വലിയകുളം ജംഗ്ഷന്‍ വികസനം : നിവേദനവും പ്രചാരണവുമായി അസോസിയേഷനുകൾ

ചങ്ങനാശേരി: വലിയകുളം ജംഗ്ഷന്‍റെ വികസനത്തിനായി നിവേദനവും പ്രചാരണവുമായി 10 റെസിഡന്‍റ്സ് അസോസിയേഷനുകളുടെ കൂട്ടായ്മ രംഗത്ത്. വലിയകുളം-പാത്തിക്കല്‍ മുക്ക് റോഡിന്‍റെ വലിയകുളം ജംഗ്ഷന്‍ ഭാഗം വീതി കൂട്ടിയാലേ അപകടങ്ങള്‍ ഒഴിവാകൂവെന്നും റോഡ് വികസനത്തിന് തടമായിയി നില്‍ക്കുന്നത് സര്‍ക്കാര്‍ വക കുളം പുറമ്പോക്ക് ഭൂമിയില്‍ നിയമ വിരുദ്ധമായി പ്രവര്‍ത്തിക്കുന്ന തടിമില്ലും അനുബന്ധ സ്ഥാപനമാണെന്നും റെസിഡന്‍റ് അസോസിയേഷന്‍ ചൂണ്ടിക്കാട്ടുന്നു. അനധികൃത കൈവശക്കാരെ ഒഴിപ്പിച്ച് വലിയകുളം ജംഗ്ഷന്‍റെ വികസനത്തിനായി വലിയകുളം വികസന സമിതി കണ്‍വീനര്‍ സണ്ണി സക്കറിയാസ് കണ്ടത്തിപ്പറമ്പില്‍ പതിറ്റാണ്ടുകളായി നടത്തിയ നിയമ പോരാട്ടങ്ങളുടെ ഫലമായി കൈയേറ്റം ഒഴിവാക്കാന്‍ ആവശ്യമായ സര്‍ക്കാര്‍ ഉത്തരവുകള്‍ സമ്പാദിച്ചിരുന്നു. എന്നാല്‍ ഈ ഉത്തരവുകള്‍ നടപ്പിലാക്കാന്‍ പഞ്ചായത്ത്, താലൂക്ക്, ജില്ലാ തലത്തിലുള്ള അധികാരികള്‍ ഗുരുതരവീഴ്ച വരുത്തിയതിനാല്‍ നടപടികള്‍ അനിശ്ചിതത്വത്തിലാണ്. വലിയകുളം-പാത്തിക്കല്‍മുക്ക് റോഡ്, വാഴൂര്‍ റോഡില്‍ ചേരുന്ന ഭാഗത്ത് തടിമില്ല് സ്ഥിതി ചെയ്യുന്ന സ്ഥലത്തെ വളവ് നിവര്‍ത്തി വീതി കൂട്ടാന്‍ 1996ല്‍ വകുപ്പ് 4.5 സെന്‍റ് സ്ഥലം അനുവദിച്ച് അലോട്ട്‌മെന്‍റ് നടത്തിയിരുന്നു. ജംഗ്ഷന്‍റെ വികസനത്തിന് തടസം നില്‍ക്കുന്ന തടിമില്ല് പൊളിച്ചുനീക്കി റോഡ് വീതികൂട്ടി അപകടങ്ങള്‍ ഒഴിവാക്കി യാത്രക്കാര്‍ക്കും വാഹനങ്ങള്‍ക്കും സുരക്ഷ ഒരുക്കണമെന്ന് മുന്‍പഞ്ചായത്ത് പ്രസിഡന്‍റിന്‍റെ റിപ്പോര്‍ട്ടുമുണ്ട്. മുഖ്യമന്ത്രിക്കും മന്ത്രിമാര്‍ക്കും നിവേദനം സമര്‍പ്പിക്കും വലിയകുളം ജംഗ്ഷന്‍ വികസനത്തിനുള്ള നിവേദനങ്ങളും പ്രചാരണങ്ങള്‍ക്കും വലിയകുളം, പേള്‍ ഗാര്‍ഡന്‍, ഗ്രീന്‍ഗാര്‍ഡന്‍, പ്രത്യാശ, റോസ് ഗാര്‍ഡന്‍, ജ്യോതിസ്, ശാന്തിനഗര്‍, ലൗഷോര്‍, ഡിവൈന്‍നഗര്‍ റസിഡന്‍റ്സ് അസോസിയേഷനുകളാണ് നേതൃത്വം നല്‍കുന്നത്. ഇതിനായി ഒപ്പുശേഖരണം നടത്തി മുഖ്യമന്ത്രി, റവന്യു, തദ്ദേശസ്വയംഭരണവകുപ്പ് മന്ത്രിമാര്‍, കൊടിക്കുന്നില്‍ സുരേഷ് എംപി, ജോബ് മൈക്കിള്‍ എംഎല്‍എ, കോട്ടയം ജില്ലാ കളക്ടര്‍, വാഴപ്പള്ളി പഞ്ചായത്ത് പ്രസിഡന്‍റ് എന്നിവര്‍ക്ക് സമര്‍പ്പിക്കും. സോജപ്പന്‍ മാത്യു വലിയകുളം റെസിഡന്‍റ്സ് അസോസിയേഷൻ പ്രസിഡന്‍റ്, ഇമ്മാനുവേല്‍ വര്‍ഗീസ് ഗ്രീന്‍ഗാര്‍ഡന്‍ റെസിഡന്‍റ്സ് അസോസിയേഷൻ പ്രസിഡന്‍റ്

മംഗളൂരു സെന്‍ട്രല്‍ - തിരുവനന്തപുരം സെന്‍ട്രല്‍ എക്‌സ്പ്രസിന് ചങ്ങനാശേരി സ്റ്റേഷനില്‍ സ്റ്റോപ്പ്

ചങ്ങനാശേരി: മംഗളൂരു സെന്‍ട്രല്‍- തിരുവനന്തപുരം സെന്‍ട്രല്‍ എക്‌സ്പ്രസിന് (16348) ചങ്ങനാശേരി സ്റ്റേഷനില്‍ സ്റ്റോപ്പ് അനുവദിച്ചു. കൊടിക്കുന്നില്‍ സുരേഷ് എംപിയുടെ ആവര്‍ത്തിച്ചുള്ള നിവേദനങ്ങള്‍ക്കും റെയില്‍വേ മന്ത്രാലയവുമായും ദക്ഷിണ റെയില്‍വേ അധികൃതരുമായും നടത്തിയ തുടര്‍ച്ചയായ ചര്‍ച്ചകളെയും തുടര്‍ന്നാണ് സ്റ്റോപ്പ് ലഭിച്ചത്. കോവിഡ് കാലത്ത് ഈ ട്രെയിനിന്‍റെ ചങ്ങനാശേരിയിലെ സ്റ്റോപ്പ് നിര്‍ത്തലാക്കിയിരുന്നു. മംഗളൂരു-തിരുവനന്തപുരം റൂട്ടിലെ പ്രധാന സ്ഥലങ്ങളിലേക്ക് നേരിട്ട് കണക്റ്റിവിറ്റി നല്‍കുന്നതിലൂടെ ചങ്ങനാശേരിയിലെയും സമീപ പ്രദേശങ്ങളിലെയും യാത്രക്കാര്‍ക്ക് പ്രത്യേകിച്ച് വിദ്യാര്‍ഥികള്‍ക്കും ദൈനംദിന യാത്രക്കാര്‍ക്കും തീര്‍ഥാടകര്‍ക്കും വളരെയധികം പ്രയോജനം ചെയ്യും. രാത്രി 12.30നാണ് ഈ ട്രെയിന്‍ ചങ്ങനാശേരിയില്‍ എത്തുന്നത്. വേളാങ്കണ്ണി എക്‌സ്പ്രസ് ട്രെയിന്‍ ആഴ്ചയില്‍ മൂന്നു ദിവസം ചങ്ങനാശേരി: എറണാകുളം-വേളാങ്കണ്ണി എക്‌സ്പ്രസ് ട്രെയിന്‍ നിലവില്‍ നടത്തുന്ന സര്‍വീസ് ആഴ്ചയില്‍ രണ്ടുദിവസത്തില്‍നിന്ന് മൂന്നു ദിവസമായി വര്‍ധിപ്പിച്ചു. ഈ ട്രെയിന്‍ ഡെയ്‌ലി സര്‍വീസാക്കി മാറ്റുന്നതിനുള്ള നടപടി പുരോഗമിക്കുകയാണെന്ന് കൊടിക്കുന്നില്‍ സുരേഷ് എംപി പറഞ്ഞു. നിലമ്പൂര്‍ റോഡ് -കോട്ടയം എക്‌സ്പ്രസ് കൊല്ലത്തേക്ക് നീട്ടുന്നതിനെക്കുറിച്ച് റെയില്‍വേ ബോര്‍ഡ് നേരത്തെതന്നെ അനുകൂല നിലപാട് സ്വീകരിച്ചിട്ടുണ്ടെന്നും നിലവിലുള്ള ഫിക്‌സഡ് ടൈം കോറിഡോര്‍ ബ്ലോക്ക് പുനഃക്രമീകരിക്കുന്നതിന് റെയില്‍വേ ബോര്‍ഡിന്‍റെ അന്തിമ അംഗീകാരം ലഭിച്ച ശേഷം ഓണത്തിന് മുന്നോടിയായി ട്രെയിന്‍ കൊല്ലത്തേക്ക് നീട്ടാന്‍ കഴിയുമെന്ന പ്രതീക്ഷയുണ്ടെന്നും എംപി കൂട്ടിച്ചേര്‍ത്തു. കോട്ടയം വഴി നിലവില്‍ സര്‍വീസ് നടത്തുന്ന മെമ്മു ട്രെയിനുകളിലെ തിരക്ക് കുറയ്ക്കുന്നതിനായി എട്ടു കോച്ചുകളുള്ള ട്രെയിനുകള്‍ 12ഉം 16ഉം കോച്ചുകളായി വര്‍ധിപ്പിക്കാനുള്ള പ്രോപ്പോസല്‍ റെയില്‍വേ ബോര്‍ഡ് അംഗീകരിച്ചിട്ടുണ്ടെന്നും എംപി പറഞ്ഞു. ട്രെയിനുകളുടെ സ്റ്റോപ്പുകള്‍ക്കായി പരിശ്രമങ്ങള്‍ തുടരും കേരളത്തില്‍ മെച്ചപ്പെട്ട റെയില്‍വേ കണക്റ്റിവിറ്റിക്കും അടിസ്ഥാന സൗകര്യങ്ങള്‍ക്കും വേണ്ടിയുള്ള ജനങ്ങളുടെ ആവശ്യങ്ങള്‍ ഉന്നയിക്കുന്നത് തുടരും. മണ്ഡലത്തിലും സംസ്ഥാനത്തുടനീളവും കൂടുതല്‍ ട്രെയിന്‍ സ്റ്റോപ്പുകള്‍ ഉറപ്പാക്കുന്നതിനും യാത്രക്കാര്‍ക്ക് സൗകര്യങ്ങള്‍ മെച്ചപ്പെടുത്തുന്നതിനും കൂടുതല്‍ ശ്രമങ്ങള്‍ നടന്നുവരികയാണ്. കൊടിക്കുന്നില്‍ സുരേഷ് എംപി, മാവേലിക്കര

വിജയാശംസകളുമായി ചങ്ങനാശേരി ജനാവലി; നെഹ്റു ട്രോഫി സ്വന്തമാക്കാന്‍ ചങ്ങനാശേരി ബോട്ട് ക്ലബ്

ചങ്ങനാശേരി: ഇന്ന് പുന്നമടക്കായലില്‍ നടക്കുന്ന ആവേശകരമായ നെഹ്റുട്രോഫി വള്ളംകളിയില്‍ മിന്നിത്തിളങ്ങി ട്രോഫി സ്വന്തമാക്കാന്‍ ചങ്ങനാശേരി ബോട്ട് ക്ലബ്. വിജയാശംസകളും പ്രാര്‍ഥനകളുമായി ചങ്ങനാശേരി ജനത. ദീര്‍ഘനാളുകളിലെ തീവ്ര പരിശീലനത്തെത്തുടര്‍ന്നാണ് ചങ്ങനാശേരി ക്ലബ്ബിന്‍റെ ചുണക്കുട്ടന്മാര്‍ ജലരാജന്‍ ചമ്പക്കുളം ചുണ്ടനില്‍ തുഴയെറിയുന്നത്. ചങ്ങനാശേരി റേഡിയോ മീഡിയ വില്ലേജ് എക്സിക്യൂട്ടീവ് ഡയറക്ടര്‍ ഫാ. ജോഫി പുതുപ്പറമ്പില്‍, ബര്‍സാര്‍ ഫാ. ലിബിന്‍ തുണ്ടുകളം എന്നിവരുടെ മേല്‍നോട്ടത്തില്‍ സണ്ണിച്ചന്‍ ഇടിമണ്ണിക്കല്‍ ക്യാപ്റ്റന്‍, ബൈജപ്പന്‍ ലീഡിംഗ് ക്യാപ്റ്റന്‍, 12 ഓര്‍ഗനൈസിംഗ് കമ്മിറ്റിയംഗങ്ങള്‍ എന്നിവരടങ്ങുന്ന സമിതിയാണ് ചങ്ങനാശേരി ബോട്ട് ക്ലബ്ബിന്‍റെ സംഘാടക സമിതിയംഗങ്ങള്‍. തെരഞ്ഞെടുക്കപ്പെട്ട 85 പേരാണ് തുഴച്ചില്‍കാര്‍. ഒമ്പതു നിലക്കാരും അഞ്ച് പങ്കായക്കാരും ഉണ്ടാകും. 15 ഡയറക്ടര്‍ ബോര്‍ഡംഗങ്ങളും അറുനൂറിലേറെയുള്ള ഫാന്‍സ് അസോസിയേഷനും ചങ്ങനാശേരി ബോട്ട് ക്ലബ്ബിന്‍റെ വിജയത്തിനായി ഊണും ഉറക്കവുമില്ലാതെ പ്രോത്സാഹനവുമായി രംഗത്തുണ്ട്. കഴിഞ്ഞതവണ ആദ്യമായി ചങ്ങനാശേരി നെഹ്‌റുട്രോഫി വള്ളംകഴിക്കെത്തിയ ചങ്ങനാശേരി ബോട്ട് ക്ലബ് വലിയ ദിവാന്‍ജി ചുണ്ടനില്‍ തുഴഞ്ഞ് സിബിഎല്‍ യോഗ്യത നേടിയിരുന്നു. നഗരത്തിന് ആവേശം പകര്‍ന്ന് വിളംബരറാലി ചങ്ങനാശേരി ബോട്ട് ക്ലബ്ബിനും ചമ്പക്കുളം ചുണ്ടനും വിജയാശംസകള്‍ നേര്‍ന്ന് ചങ്ങനാശേരിയില്‍ വിളംബര റാലി സംഘടിപ്പിച്ചു. മീഡിയാ വില്ലേജ് അങ്കണത്തില്‍നിന്നു അഞ്ച് വിളക്ക് സ്‌ക്വയറിലേക്കായിരുന്നു റാലി. തൃക്കൊടിത്താനം എസ്എച്ച്ഒ എം.ജെ. അരുണ്‍ റാലി ഫ്‌ളാഗ് ഓഫ് ചെയ്തു. ജോബ് മൈക്കിള്‍ എംഎല്‍എ മുഖ്യപ്രഭാഷണം നടത്തി. സിബിസി രക്ഷാധികാരി ഫാ. സെബാസ്റ്റ്യന്‍ പുന്നശേരി, ക്യാപ്റ്റന്‍ സണ്ണി ഇടിമണ്ണിക്കല്‍, മീഡിയ വില്ലേജ് എക്‌സിക്യൂട്ടീവ് ഡയറക്ടര്‍ ഫാ. ജോഫി പുതുപ്പറമ്പ്, ബര്‍സാര്‍ ഫാ. ലിബിന്‍ തുണ്ടുകളം, ചങ്ങനാശേരി മര്‍ച്ചന്‍റസ് അസോസിയേഷന്‍ പ്രസിഡന്‍റ് ജോണ്‍സണ്‍ പ്ലാന്തോട്ടം, റാലി കോ-ഓര്‍ഡിനേറ്റര്‍ ജോബി തൂമ്പുങ്കല്‍, ബോട്ട്‌ജെട്ടി വികസനസമിതി എക്‌സിക്യൂട്ടീവംഗം കെ.എസ്. ആന്‍റണി എന്നിവര്‍ പ്രസംഗിച്ചു.

ജീ ബിന്‍ വിതരണം

ഞീഴൂര്‍: പഞ്ചായത്തിന്‍റെ നേതൃത്വത്തില്‍ നടക്കുന്ന മാലിന്യസംസ്‌കരണ പ്രവര്‍ത്തനത്തിന്‍റെ ഭാഗമായി വീടുകളില്‍ ജീ ബിന്‍ വിതരണം നടത്തി. വിതരണോദ്ഘാടനം പഞ്ചായത്ത് പ്രസിഡന്‍റ് ശ്രീകലാ ദിലീപ് നിര്‍വഹിച്ചു. വൈസ് പ്രസിഡന്‍റ് കെ.പി. ദേവദാസ്, മെംബര്‍മാരായ ബീനാ ഷിബു, ലില്ലി മാത്യു, ലിസി ജീവന്‍, അശോക് കുമാര്‍, ഷൈനി സ്റ്റീഫന്‍, സെക്രട്ടറി ബിജു എം. മാത്യൂസ്, അസിസ്റ്റന്‍റ് സെക്രട്ടറി ശ്രീകുമാര്‍, വിഇഒമാരായ ചാന്ദ്‌നി, ബിനീഷ് എന്നിവര്‍ പ്രസംഗിച്ചു.

രഥഘോഷയാത്ര സമാപിച്ചു

വൈക്കം: എൻഎസ്എസ് വൈക്കം യൂണിയന്‍റെ നേതൃത്വത്തിൽ സെപ്റ്റംബർ 13ന് നടക്കുന്ന നായർ മഹാസമ്മേളനത്തിന്‍റെ മുന്നോടിയായി നടത്തിയ വിളംബര രഥഘോഷയാത്ര സമാപിച്ചു. വൈക്കം യൂണിയനിലെ13 മേഖലകളിൽ പര്യടനം നടത്തിയശേഷം വൈക്കം വലിയ കവലയിൽ എത്തിയ രഥഘോഷയാത്രയെ ടൗണിലെ ആറു കരയോഗങ്ങൾ ചേർന്ന് സ്വീകരിച്ചു. മേഖലാ ചെയർമാൻ ബി. ജയകുമാർ, കൺവീനർ എസ്.യു. കൃഷ്ണകുമാർ, എസ്. മധു, എസ്. ഹരിദാസൻ നായർ, പി. ശിവരാമകൃഷ്ണൻ, കെ.പി. രവികുമാർ, ശ്രീഹർഷൻ, കെ.എം. നാരായണൻ നായർ, എം.വിജയകുമാർ, എസ്. പ്രതാപ്, രാജേന്ദ്ര ദേവ് എന്നിവർ നേതൃത്വം നല്കി. വനിതാ സമാജം ഭാരവാഹികൾ ആരതി നടത്തി. വലിയ കവലയിൽനിന്നു നിരവധി വാഹനങ്ങളുടെ അകമ്പടിയോടെ രഥഘോഷയാത്ര ബോട്ട് ജെട്ടിയിൽ സമാപിച്ചു. സമാ പനയോഗത്തിൽ യൂണിയൻ പ്രസിഡന്‍റ് പി.ജി.എം. നായർ കാരിക്കോട്, വൈസ് പ്രസിഡന്‍റ് പി. വേണുഗോപാൽ, സെക്രട്ടറി അഖിൽ ആർ.നായർ എന്നിവർ പ്രസംഗിച്ചു. സെപ്റ്റംബർ രണ്ടിന് പതാക ദിനം.ഒൻപതിന് സമ്മേളന നഗറായ ബീച്ച് മൈതാനിയിൽ പതാക ഉയർത്തും. സെപ്റ്റംബർ 13ന് ഉച്ചകഴിഞ്ഞ് 3.30 ന് ബീച്ച് മൈതാനിയിൽ നടക്കുന്ന മഹാസമ്മേളനത്തിൽ യൂണിയനിലെ 97 കരയോഗങ്ങളിൽനിന്നായി 25,000 അംഗങ്ങൾ പങ്കെടുക്കും.

ഓർമകളുടെ ട്രെയിൻ കയറി കുറവിലങ്ങാട്ടേക്ക് വീണ്ടും മാർ പട്ടേരിൽ

കുറവിലങ്ങാട്: ജീവിതത്തിൽ ആദ്യമായി ട്രെയിനിൽ കയറിയത് മംഗലാപുരത്തുനിന്നു കുറവിലങ്ങാട്ട് പോകാനായിരുന്നുവെന്ന് നിയുക്ത മെത്രാൻ മാർ ജയിംസ് പട്ടേരിൽ. വൈദിക വിദ്യാർഥിയായി ക്ലാരറ്റ്ഭവനിലേക്കുള്ള യാത്ര. കൂത്താട്ടുകുളം വടകരയിൽനിന്നു മംഗലാപുരത്തേക്കു കുടിയേറിയ കുടുംബത്തെ കുറവിലങ്ങാടുമായും പ്രത്യേകിച്ച് മുത്തിയമ്മയുമായി വിളക്കിച്ചേർത്ത യാത്രകളുടെ തുടക്കമായിരുന്നു അത്. ബൽത്തങ്ങാടി രൂപത നിയുക്ത മെത്രാനായി തെരഞ്ഞെടുക്കപ്പെട്ട ശേഷം ആദ്യമായി കുറവിലങ്ങാട് പള്ളിയിലെത്തിയ മാർ ജയിംസ് പട്ടേരിയുടെ വാക്കുകളിൽ കുറവിലങ്ങാടിനോടും മുത്തിയമ്മയോടുമുള്ള സ്നേഹം നിറഞ്ഞുനിന്നു. ഭാരതത്തിൽ ആദ്യമായി കുറവിലങ്ങാട് പ്രവർത്തനം തുടങ്ങിയ ക്ലാരീഷ്യൻ സഭയ്ക്ക് കുറവിലങ്ങാട് മുത്തിയമ്മ തെളിച്ചുനൽകിയ നീരുറവ ഉള്ളിടത്തോളം കാലം ദൈവവിളിക്കു കുറവുണ്ടാകില്ലെന്ന് ഉറപ്പുണ്ടെന്നു മാർ പട്ടേരിൽ പറഞ്ഞു. വൈദികനായ ശേഷം മൂന്നു വർഷം ക്ലാരറ്റ് ഭവനിലെ സേവനത്തിനിടെ മുത്തിയമ്മയുടെ അരികിലെത്താനും പള്ളിയിലെ ശുശ്രൂഷകളിൽ പങ്കുചേരാനുമായി. കുറവിലങ്ങാട് മൂന്നുനോമ്പ് തിരുനാളിലെത്തി വാങ്ങിയ ഒരു പെട്ടി ഇപ്പോഴും വീട്ടിലുണ്ടെന്നും മാർ ജയിംസ് പറഞ്ഞു. മാർ ജയിംസ് പട്ടേരിയെ ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, സീനിയർ അസി. വികാരി ഫാ. ജോസഫ് മണിയഞ്ചിറ, അസി. വികാരിമാരായ ഫാ. പോൾ കുന്നുംപുറത്ത്, ഫാ. ആന്‍റണി വാഴക്കാലായിൽ, ഫാ. ജോസഫ് ചൂരയ്ക്കൽ, ഫാ. തോമസ് താന്നിമലയിൽ, പാസ്റ്ററൽ അസിസ്റ്റന്‍റുമരായ ഫാ. ജോസ് കോട്ടയിൽ, ഫാ. പോൾ മഠത്തിക്കുന്നേൽ, കൈക്കാരന്മാർ, പള്ളിയോഗാംഗങ്ങൾ, കുടുംബകൂട്ടായ്മ ഭാരവാഹികൾ എന്നിവർ ചേർന്നു സ്വീകരിച്ചു. ക്ലരീഷ്യൻ സഭ പ്രൊവിൻഷ്യൽ സുപ്പീരിയർ ഫാ. സിബി ഞാവള്ളിക്കുന്നേൽ, ക്ലാരറ്റ് ഭവൻ സുപ്പീരിയർ ഫാ. തോമസ് പൈങ്ങോട്ടൂർ എന്നിവരും നിയുക്ത മെത്രാനൊപ്പം എത്തിയിരുന്നു. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി അദ്ദേഹത്തെ സ്വാഗതം ചെയ്തു. സെക്രട്ടറി ബെന്നി കോച്ചേരി ആശംസ നേർന്നു.

മാര്‍ സ്ലീവാ മെഡിസിറ്റിയില്‍ ഡിമന്‍ഷ്യ കെയര്‍ പ്രോഗ്രാം

പാലാ: മാര്‍ സ്ലീവാ മെഡിസിറ്റിയുടെ നേതൃത്വത്തില്‍ ഡിമന്‍ഷ്യ ബാധിച്ചവര്‍ക്കു വേണ്ടി ദി റീ കണക്‌ട് എന്ന പേരില്‍ ഡിമന്‍ഷ്യ കെയര്‍ പ്രോഗ്രാം ആരംഭിച്ചു. ജില്ലാ കളക്ടര്‍ ചേതന്‍കുമാര്‍ മീണ ഉദ്ഘാടനം നിര്‍വഹിച്ചു. പ്രായമായവര്‍ നേരിടുന്ന ആരോഗ് പ്രശ്‌നം മാത്രമല്ല ഒരു സാമൂഹികപ്രശ്‌നം കൂടിയാണ് ഡിമന്‍ഷ്യ എന്ന് കളക്ടര്‍ പറഞ്ഞു. ആശുപത്രി മാനേജിംഗ് ഡയറക്ടര്‍ മോണ്‍. ജോസഫ് കണിയോടിക്കല്‍ അധ്യക്ഷത വഹിച്ചു. നൂതന ചികിത്സാമാര്‍ഗങ്ങളിലൂടെ മറവിരോഗത്തിന് പ്രതിരോധം സൃഷ്ടിക്കാനുള്ള മാര്‍ഗങ്ങളാണ് മാര്‍ സ്ലീവാ മെഡിസിറ്റിയുടെ നേതൃത്വത്തില്‍ നടപ്പാക്കുന്നതെന്ന് അദ്ദേഹം പറഞ്ഞു. ഡിമന്‍ഷ്യ കെയര്‍ പ്രോഗ്രാമിന്‍റെ ഭാഗമായുള്ള വിആർ ടൂള്‍ ആന്‍ഡ് ന്യൂറോബ്ലൂം, എല്‍ഡേഴ്‌സ് മെമ്മറി വര്‍ക്ക് ബുക്ക് എന്നിവയുടെ പ്രകാശനവും മുഖ്യപ്രഭാഷണവും പാലാ നഗരസഭാ ചെയര്‍പേഴ്‌സണ്‍ തോമസ് പീറ്റര്‍ നിര്‍വഹിച്ചു. റീ കണക്‌ട് പ്രോഗ്രാമിനെക്കുറിച്ച് ന്യൂറോളജി വിഭാഗം കണ്‍സള്‍ട്ടന്‍റ് ഡോ. ജോസി ജെ. വള്ളിപ്പാലം വിശദീകരിച്ചു. ന്യൂറോളജി വിഭാഗം സീനിയര്‍ കണ്‍സള്‍ട്ടന്‍റ് ഡോ. അരുണ്‍ ജോര്‍ജ് തറയാനില്‍, ഈസ്ഡിമന്‍ഷ്യ ടെക്‌നോളജീസ് പ്രൈവറ്റ് ലിമിറ്റഡ് സിഇഒ ജോസ് ജോളി പൈനാടത്ത്, ചീഫ് ഓഫ് മെഡിക്കല്‍ സര്‍വീസസ് എയര്‍ കോമഡോര്‍ ഡോ. പോളിന്‍ ബാബു എന്നിവര്‍ പ്രസംഗിച്ചു.

മൊബൈൽഫോൺ അപഹരിച്ച യുവാവ് പിടിയിൽ

തലയോലപ്പറമ്പ്: ബൈക്കിലെത്തി ഫോണ്‍ തട്ടിയെടുത്തുകടന്ന പ്രതിയെ പോലീസ് പിടികൂടി. ഫോണ്‍ ചെയ്യാനെന്ന വ്യാജേന വഴിയരികില്‍നിന്ന ആളുടെ മൊബൈല്‍ ഫോണ്‍ കൈക്കലാക്കിയശേഷം തിരിച്ചുനല്‍കാതെ ബൈക്കിൽ കടന്നുകളഞ്ഞ കേസിൽ എറണാകുളം മോനപ്പള്ളിപുത്തൻകുരിശ് കോണത്തുപറമ്പിൽ കെ.എസ്. അജിത്തെന്ന അരുണി(21)നെയാണ് തലയോലപ്പറമ്പ് പോലീസ് അറസ്റ്റ് ചെയ്തത്. പ്രതിയെ ചോദ്യം ചെയ്തതിനെത്തുടർന്ന് മൊബൈൽ ഫോൺ പ്രതിയുടെ ഭാര്യവീടിന് സമീപത്തെ പുരയിടത്തിൽ ഒളിപ്പിച്ചതായി തിരിച്ചറിഞ്ഞു. വൈക്കം ഡിവൈഎസ്പി ടി.ബി. വിജയന്‍റെ നിർദേശ പ്രകാരം തലയോലപ്പറമ്പ് എസ്എച്ച്ഒ വിപിൻ ചന്ദ്രന്‍റെ നേതൃത്വത്തിൽ എസ്ഐ കെ.ജി. ജയകുമാർ, എസ്ഐ സുധീരൻ, എഎസ്ഐ സുജമോൾ, സീനിയർ സിവിൽ പോലീസ് ഓഫീസർ രാജേഷ്‌കുമാർ, എസ്. ശ്യാംകുമാർ, സീനിയർ സിവിൽ പോലീസ് ഓഫീസർ അരുൺ പ്രകാശ്, സുജീഷ്, കെ.കെ. അനീഷ് എന്നിവർ ചേർന്നാണ് പ്രതിയെ അറസ്റ്റ് ചെയ്തത്. കോടതിയില്‍ ഹാജരാക്കിയ പ്രതിയെ റിമാന്‍ഡ്‌ ചെയ്തു.

കുടുംബങ്ങൾ സ്വർഗമെന്ന് അറിയപ്പെടണം: മോൺ. സെബാസ്റ്റ്യൻ വേത്താനത്ത്

കുറവിലങ്ങാട്: കുടുംബങ്ങൾ സ്വർഗമെന്ന് അറിയപ്പെടണമെന്നു പാലാ രൂപത വികാരി ജനറാൾ മോൺ. സെബാസ്റ്റ്യൻ വേത്താനത്ത് പറഞ്ഞു. പത്താമത് കുറവിലങ്ങാട് ബൈബിൾ കൺവൻഷന്‍റെ രണ്ടാം ദിനത്തിൽ വിശുദ്ധ കുർബാന അർപ്പിച്ച് സന്ദേശം നൽകുകയായിരുന്നു അദ്ദേഹം. മൂന്നാം ദിനമായ ഇന്നു വൈകുന്നേരം നാലിന് ജപമാല പ്രദക്ഷിണം. പള്ളിയോഗ പ്രതിനിധികളും കുടുംബകൂട്ടായ്മ ഭാരവാഹികളും നേതൃത്വം നൽകും. 4.30ന് വികാരി ജനറാൾ മോൺ. ജോസഫ് കണിയോടിക്കൽ വിശുദ്ധ കുർബാന അർപ്പിച്ചു സന്ദേശം നൽകും. തുടർന്ന് ഫാ. സേവ്യർഖാൻ വട്ടായിലും ഫാ. ബിനോയി കരിമരുതുങ്കലും നേതൃത്വം നൽകുന്ന വചനപ്രഘോഷണം. നാളെ 4.30ന് വികാരി ജനറാൾ മോൺ. ജോസഫ് മലേപ്പറമ്പിൽ വിശുദ്ധ കുർബാന അർപ്പിച്ചു സന്ദേശം നൽകും. സമാപന ദിനമായ സെപ്റ്റംബർ ഒന്നിന് 4.30ന് മുട്ടുചിറ പരിശുദ്ധ റൂഹാദ്ക്കുദിശ ഫൊറോന വികാരി ഫാ. ഏബ്രഹാം കൊല്ലിത്താനത്തുമലയിൽ വിശുദ്ധ കുർബാന അർപ്പിക്കും.

മുണ്ടാറിലെ ജനജീവിത മുന്നേറ്റത്തിന് പദ്ധതികൾ ആവിഷ്കരിക്കും: ഫ്രാൻസിസ് ജോർജ് എംപി

മുണ്ടാർ: നാലുവശവും വെള്ളത്താൽ ചുറ്റപ്പെട്ട, ഗതാഗത സൗകര്യമില്ലാത്ത മുണ്ടാറിലെ ജനങ്ങളുടെ ജീവിതമുന്നേറ്റത്തിനു പദ്ധതികൾ ആവിഷ്കരിക്കുമെന്ന് ഫ്രാൻസിസ് ജോർജ് എംപി. വൈക്കം നിയോജക മണ്ഡലത്തിലെ ഏറ്റവും അവികസിത പ്രദേശമായ മുണ്ടാറിന്‍റെ സമഗ്ര വികസനം ലക്ഷ്യമാക്കി നിരവധി പദ്ധതികൾക്കു രൂപംകൊടുത്തിട്ടുണ്ടെന്നും അവ അടിയന്തരമായി നടപ്പാക്കുമെന്നും അദ്ദേഹം പറഞ്ഞു. മുണ്ടാർ വികസനവുമായി ബന്ധപ്പെട്ട് വള്ളത്തിൽ യാത്ര ചെയ്ത് ജനങ്ങളുടെ പരാതികൾ കേട്ടും ദുരിതങ്ങൾ ബോധ്യപ്പെട്ടും മുണ്ടാറിന്‍റെ ശോച്യാവസ്ഥയ്ക്ക് പരിഹാരം കാണുമെന്നും അദ്ദേഹം ജനങ്ങൾക്ക് ഉറപ്പുനൽകി. പ്രധാനമന്ത്രിയുടെ ഗ്രാമീണ റോഡ് നിർമാണ പദ്ധതിയിൽ മുണ്ടാറുമായി ബന്ധപ്പെട്ട് നാലു റോഡുകൾ നിർമിക്കുന്നതിന് പ്രാഥമിക അനുമതിയായിട്ടുണ്ട്. യുഡിഎഫ് വൈക്കം നിയോജക മണ്ഡലം ചെയർമാൻ പോൾസൺ ജോസഫ്, നേതാക്കളായ ടി.എം. മനോജ്, കെ.ടി. തോമസ്, ബ്ലോക്ക് പഞ്ചായത്ത് അംഗം ജിഷ രാജപ്പൻ നായർ, വി.ജി. ജനാർദനൻ, മുൻപഞ്ചായത്ത് അംഗങ്ങളായ വി.കെ. വേദമൂർത്തി, സരള മധു, കെ.ജെ. ജയിംസ് എന്നിവർ എംപിയോടൊപ്പമുണ്ടായിരുന്നു.

ക്രിസ്റ്റോണിൽ ഇന്‍റർ - ഡോജോ കരാട്ടെ ചാമ്പ്യൻഷിപ്

തെള്ളകം: കുട്ടികളുടെ സർഗാത്മക കഴിവുകളിൽ പരിശീലനം നൽകുന്ന തെള്ളകം എംസിബിഎസ് ക്രിസ്റ്റോൺ മീഡിയയിൽ ഒകെജിഎസ്കെ ഇന്‍റർ - ഡോജോ കരാട്ടെ ചാമ്പ്യൻഷിപ് നടന്നു. എറണാകുളം, കോട്ടയം ജില്ലകളിൽ കരാട്ടെ പരിശീലിക്കുന്ന കുട്ടികൾക്കായുള്ള സംസ്ഥാനതല മത്സരങ്ങളാണ് ഇവിടെ നടന്നത്. സഹകരണ തുറമുഖ മന്ത്രി വി.എൻ. വാസവൻ ഉദ്ഘാടനം ചെയ്തു. എംസിബിഎസ് എമ്മാവൂസ് വികാർ പ്രൊവിൻഷ്യൽ ഫാ. ടിജോ മുണ്ടുനടയ്ക്കൽ അധ്യക്ഷത വഹിച്ചു. ക്രിസ്റ്റോൺ മീഡിയ ഡയറക്ടർ ഫാ. ചാക്കോ വടക്കേത്തലക്കൽ എംസിബിഎസ്, ഒകെജിഎസ്കെ സ്റ്റൈൽ ചീഫ് കെ.ജി. സന്തോഷ്, അനൂപ് കെ. ജോൺ എന്നിവർ പ്രസംഗിച്ചു. വിജയികൾക്ക് അതിരമ്പുഴ ഗ്രാമപഞ്ചായത്ത് പ്രസിഡന്‍റ് ജോസ് അമ്പലക്കുളം, മെംബർ ആലീസ് ജോസഫ്, ഫാ. മാത്യൂസ് കുരിശുംമൂട്ടിൽ, ഫാ. അൻസൽ നടുത്തൊട്ടിയിൽ എന്നിവർ മെഡലുകൾ സമ്മാനിച്ചു. വിജയികൾ അടുത്ത ജനുവരിയിൽ ചെന്നൈയിൽ നടക്കുന്ന ദേശീയതല മത്സരത്തിനു യോഗ്യത നേടി.

വിശുദ്ധ അല്‍ഫോന്‍സാമ്മയുടെ ജന്മഗൃഹം എഫ്സിസി ഏറ്റെടുത്തിട്ട് 50 വര്‍ഷങ്ങള്‍

കോട്ടയം: കുടമാളൂരിലുള്ള വിശുദ്ധ അല്‍ഫോന്‍സാമ്മയുടെ ജന്മഗൃഹം ഫ്രാന്‍സിസ്‌കന്‍ ക്ലാരസഭ ഏറ്റെടുത്തിട്ട് 50 വര്‍ഷങ്ങള്‍ പൂര്‍ത്തിയാകുന്നു. വിശുദ്ധ അല്‍ഫോന്‍സാമ്മയുടെ ഓര്‍മകള്‍ തുടിക്കുന്ന ഈ ഭവനം പരിപാവനവും പൂജ്യവുമായി പഴക്കവും തനിമയും പാരമ്പര്യവും കൈവിടാതെ ഫ്രാന്‍സിസ്‌കന്‍ ക്ലാരസഭ സന്യാസിനികള്‍ സൂക്ഷിക്കുന്നു. അനേകരുടെ അഭയകേന്ദ്രവും പ്രാര്‍ഥനാ ഭവനവുമാണ് ഇന്ന് അല്‍ഫോന്‍സാ ഭവന്‍. വിശുദ്ധ അല്‍ഫോന്‍സാമ്മയുടെ മൂത്തസഹോദരി മുട്ടത്തുപാടത്ത് പെണ്ണമ്മയുടെ ഇളയമകള്‍ തെറമ്മയില്‍നിന്നാണ് ഭവനം ഏറ്റെടുക്കുന്നത്. 1975 സെപ്റ്റംബര്‍ എട്ടു മുതല്‍ സന്യാസിനികള്‍ ഇവിടെ താമസം തുടങ്ങി. അല്‍ഫോന്‍സാമ്മ ജനിച്ച മുറി, കട്ടില്‍, കുട്ടിക്കാലത്ത് ഉപയോഗിച്ച വസ്തുക്കള്‍, അല്‍ഫോന്‍സാമ്മയുടെ പിതാവ് ജോസഫ് മരുന്നുണ്ടാക്കാന്‍ ഉപയോഗിച്ച പഞ്ചലോഹത്തില്‍ പൊതിഞ്ഞ കല്ല് തുടങ്ങിയ ഇവിടെ പൂജ്യമായി സൂക്ഷിക്കുന്നു. കഴിഞ്ഞ 37 വര്‍ഷമായി ഓഗസ്റ്റ് മാസത്തില്‍ ചങ്ങനാശേരി അതിരൂപത മിഷന്‍ ലീഗിന്‍റെ ആഭിമുഖ്യത്തില്‍ അല്‍ഫോന്‍സാ ജന്മഗൃഹത്തിലേക്ക് കുട്ടികളും മുതിര്‍ന്നവരും അല്‍ഫോന്‍സാ തീര്‍ഥാടനം നടത്തിവരുന്നു. വിശുദ്ധ അല്‍ഫോന്‍സാമ്മയുടെ ജന്മദിന തിരുനാള്‍ ഓഗസ്റ്റ് 19ന് 10 ദിവസം നീണ്ടുനില്‍ക്കുന്ന നവനാള്‍ പ്രാര്‍ഥനയോടെ ഇവിടെ ആഘോഷിക്കുന്നു. ഓരോ ദിവസവും നിരവധി തീര്‍ഥാടകരാണ് ജന്മഗൃഹം സന്ദര്‍ശിക്കുന്നതിനും പ്രാര്‍ഥിക്കുന്നതിനുമായി ഇവിടെയെത്തുന്നത്. സിസ്റ്റര്‍ എലൈസ് മേരിയാണ് ഇപ്പോള്‍ സുപ്പീരിയറായി പ്രവര്‍ത്തിക്കുന്നത്. ജൂബിലി ആഘോഷങ്ങളുടെ ഭാഗമായി നാളെ കൃതജ്ഞതാബലിയും പൊതുസമ്മേളനവും നടക്കും. രാവിലെ 11ന് വിശുദ്ധ കുര്‍ബാന. തുടര്‍ന്നു നടക്കുന്ന സമ്മേളനം ആര്‍ച്ച്ബിഷപ് മാര്‍ ജോസഫ് പെരുന്തോട്ടം ഉദ്ഘാടനം ചെയ്യും. എഫ്‌സിസി സുപ്പീരിയര്‍ ജനറല്‍ സിസ്റ്റര്‍ ലിറ്റി എഫ്‌സിസി അധ്യക്ഷത വഹിക്കും. കുടമാളൂര്‍ സെന്‍റ് മേരീസ് മേജര്‍ ആര്‍ക്കി എപ്പിസ്‌കോപ്പല്‍ തീര്‍ഥാടനകേന്ദ്രം ആര്‍ച്ച്പ്രീസ്റ്റ് ഫാ. ജോയി മംഗലത്തില്‍ അനുഗ്രഹ പ്രഭാഷണം നടത്തും. മാന്നാനം ആശ്രമം പ്രിയോര്‍ റവ. ഡോ. കുര്യന്‍ ചാലങ്ങാടി സിഎംഐ, ആര്‍പ്പൂക്കര പഞ്ചായത്ത് പ്രസിഡന്‍റ് ദീപ ജോസ്, സെന്‍റ് മൈക്കിള്‍സ് വാര്‍ഡ് പ്രസിഡന്‍റ് റോയി സേവ്യര്‍, ചങ്ങനാശേരി പ്രൊവിന്‍ഷ്യല്‍ സുപ്പീരിയര്‍ സിസ്റ്റര്‍ ബ്രിജി എഫ്‌സിസി, അല്‍ഫോന്‍സാ ഭവന്‍ സുപ്പീരിയര്‍ സിസ്റ്റര്‍ എലൈസ് മേരി എഫ്‌സിസി എന്നിവര്‍ പ്രസംഗിക്കും. സമ്മേളനത്തോടനുബന്ധിച്ച് ചങ്ങനാശേരി സെന്‍റ് ആന്‍സ് ഹൈസ്‌കൂള്‍ വിദ്യാര്‍ഥിനികൾ അവതരിപ്പിക്കുന്ന നൃത്തശില്പവും ഉണ്ടായിരിക്കും.

കാര്‍ ബുള്ളറ്റുമായി കൂട്ടിയിടിച്ചു; രണ്ടു പേര്‍ക്കു ഗുരുതര പരിക്ക്

പാമ്പാടി: നിയന്ത്രണം വിട്ട കാര്‍ ബുള്ളറ്റുമായി കൂട്ടിയിടിച്ചുണ്ടായ അപകടത്തില്‍ രണ്ടു പേര്‍ക്കു പരിക്ക്. ഇരുചക്രവാഹന യാത്രികരായ പൂതകുഴി മാനങ്ങാടിയില്‍ എം.ജെ. സതീഷ് ( 48 ), പ്ലാത്താനം പി.എ. ജോസ് (40) എന്നിവര്‍ക്കാണ് പരിക്കേറ്റത്. ഇരുവരുടെയും പരിക്ക് ഗുരുതരമാണ്. ആലാംപള്ളി-മാന്തുരുത്തി റോഡില്‍ ഇലക്കൊടിഞ്ഞി കവലയ്ക്കു സമീപം ഇന്നലെ ഉച്ചകഴിഞ്ഞ് 2.30 നായിരുന്നു അപകടം. ആലാംപള്ളി ഭാഗത്തേക്കുപോയ കെഎസ്ഇബി സബ്‌സ്റ്റേഷന്‍ അസിസ്റ്റന്‍റ് എന്‍ജിനിയര്‍ കുറുമ്പനാടം പടിഞ്ഞാറേക്കുറ്റ് ആനി സഖറിയയുടെ(55) വാഹനമാണ് അപകടത്തില്‍പ്പെട്ടത്. ഇവര്‍ക്കും സാരമായി പരിക്കേറ്റു. കാര്‍ നിയന്ത്രണംവിട്ട് എതിര്‍ദിശയില്‍ വന്ന ബൈക്കില്‍ ഇടിക്കുകയായിരുന്നു. സമീപത്ത് നിര്‍ത്തിയിട്ട ബൈക്കിലും കാറിലും ഇടിച്ചാണ് വാഹനം നിന്നത്. വാഹനങ്ങള്‍ ഭാഗികമായി തകര്‍ന്നു. പാമ്പാടി പോലീസ് സ്ഥലത്തെത്തി. പരിക്കേറ്റവരെ ആദ്യം പാമ്പാടി താലൂക്ക് ആശുപത്രിയിലും തുടര്‍ന്ന് കോട്ടയം മെഡിക്കല്‍ കോളേജിലും പ്രവേശിപ്പിച്ചു.

ബസ് ജീവനക്കാരെ കൈയേറ്റം ചെയ്ത സംഭവം: സഹോദരങ്ങൾ അറസ്റ്റിൽ

പാമ്പാടി: സ്വകാര്യ ബസ് ജീവനക്കാരെ കൈയേറ്റം ചെയ്ത‍ കേസില്‍ സഹോദരങ്ങളായ പ്രതികള്‍ അറസ്റ്റില്‍. കൂരോപ്പട വയലില്‍പീടികയില്‍ അലക്‌സ്‌മോന്‍ വി. സെബാസ്റ്റ്യന്‍ (37), സഹോദരന്‍ വരുണ്‍ വി. സെബാസ്റ്റ്യന്‍ (42) എന്നിവരെയാണു പാമ്പാടി പോലീസ് പിടികൂടിയത്. കഴിഞ്ഞ ബുധനാഴ്ചയായിരുന്നു കേസിനാസ്പദമായ സംഭവം. സ്‌കൂട്ടറിന് സൈഡ് കൊടുക്കാത്തതിലുള്ള വിരോധംമൂലം ബസ് ജീവനക്കാരെ കൈയേറ്റം ചെയ്യുകയായിരുന്നു. അന്നേദിവസം രാത്രി 8.45ന് പാമ്പാടിയില്‍നിന്നു പള്ളിക്കത്തോട്ടിലേക്ക് യാത്രക്കാരുമായി പോയ മേരിമാതാ ബസിലെ ജീവനക്കാര്‍ക്കാണ് സൈഡ് നല്‍കിയില്ലെന്ന പേരില്‍ മര്‍ദനമേറ്റത്. ബസ് മാക്കല്‍പ്പടി ‌സ്റ്റോപ്പില്‍ നിര്‍ത്തിയപ്പോള്‍ പ്രതികള്‍ ബസ് തടഞ്ഞ് ഹെല്‍മെറ്റ് ഉപയോഗിച്ച് ആക്രമിക്കുകയായിരുന്നു. ആക്രമണത്തില്‍ ബസിന്‍റെ മുന്‍വശത്തെ ചില്ല് തകര്‍ന്നു. 40,700 രൂപയുടെ നാശനഷ്ടം സംഭവിച്ചിട്ടുണ്ട്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

കുടുംബശ്രീ ഓണം ഫെയര്‍ ചങ്ങനാശേരിയില്‍

കോട്ടയം: കുടുംബശ്രീ ജില്ലാതല ഓണം ഫെയര്‍ ഇന്നു മുതല്‍ സെപ്റ്റംബര്‍ മൂന്നുവരെ ചങ്ങനാശേരി പുതൂര്‍ മൈതാനത്ത് നടത്തും. രാവിലെ 9.30ന് ജോബ് മൈക്കിള്‍ എംഎല്‍എ ഉദ്ഘാടനം ചെയ്യും. നഗരസഭാ വൈസ് ചെയര്‍മാന്‍ മാത്യൂസ് ജോര്‍ജിന്‍റെ അധ്യക്ഷതയില്‍ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍ ആദ്യവില്പന നടത്തും. ചിപ്‌സ്, നാടന്‍ പലഹാരങ്ങള്‍, കറിപൗഡറുകള്‍, ധാന്യപ്പൊടികള്‍, വെളിച്ചെണ്ണ, അച്ചാറുകള്‍, കരകൗശല വസ്തുക്കള്‍, ഏത്തക്കുല, പുളി, പപ്പടം, സോപ്പ്, സോപ്പ് ഉത്പന്നങ്ങള്‍, പച്ചക്കറികള്‍ തുടങ്ങിയവ ലഭ്യമാണ്. 15 ഇനം ഉത്പന്നങ്ങള്‍ അടങ്ങിയ ഓണക്കിറ്റ് 750 രൂപ നിരക്കില്‍ വാങ്ങാം. പായസമേളയും അച്ചാര്‍ മേളയുമുണ്ട്. ഓണസദ്യ തിരുവോണംവരെ കോട്ടയം: കുടുംബശ്രീ ഓണസദ്യ ഓര്‍ഡറുകള്‍ പതിനായിരം കടന്നു. തിരുവോണത്തിനു രാവിലെവരെ വീടുകളില്‍ സദ്യ എത്തിക്കാനുള്ള ക്രമീകരണങ്ങളുണ്ട്. ഉത്രാടത്തിനാണ് ഏറ്റവും കൂടുതല്‍ ബുക്കിംഗ് ലഭിച്ചിരിക്കുന്നത്. വിവിധയിടങ്ങളിലെ സിഡിഎസ് വോളണ്ടിയര്‍മാരാണ് ബുക്കിംഗ് സ്വീകരിക്കുന്നത്. വിഭവങ്ങളുടെയും ഓര്‍ഡറുകളുടെയും എണ്ണമനുസരിച്ച് നിരക്കില്‍ വ്യത്യാസമുണ്ട്. കലാപരിപാടികള്‍ അവതരിപ്പിക്കാന്‍ അവസരം കോട്ടയം: ജില്ലാ ഭരണകൂടത്തിന്‍റെ നേതൃത്വത്തിലുള്ള ജില്ലാതല ഓണാഘോഷത്തിന്‍റെ ഭാഗമായി സെപ്റ്റംബര്‍ മൂന്നുമുതല്‍ എട്ടുവരെ തിരുനക്കര മൈതാനത്ത് കലാപരിപാടികള്‍ അവതരിപ്പിക്കാന്‍ ജില്ലയിലെ കലാകാരന്മാര്‍ക്കും സ്‌കൂള്‍/കോളജ് വിദ്യാര്‍ഥികള്‍ക്കും അവസരം. താത്പര്യമുള്ളവര്‍ ജില്ലാ ടൂറിസം പ്രൊമോഷന്‍ കൗണ്‍സിലില്‍ രജിസ്റ്റര്‍ ചെയ്യണം. ഫോണ്‍: 0481 2560479. ദര്‍ശന കള്‍ച്ചറല്‍ സെന്‍ററുമായി സഹകരിച്ച് സെപ്റ്റംബര്‍ ഏഴിന് രാവിലെ 11ന് തിരുവാതിരകളി മത്സരവും വൈഎംസിഎ, ഗാന്ധിനഗര്‍ റോട്ടറി ക്ലബ്ബുമായി സഹകരിച്ച് കോട്ടയം വൈഎംസിഎ ഹാളില്‍ രാവിലെ ഒന്പത് മുതല്‍ 12 വരെ അത്തപ്പൂക്കള മത്സരവും നടത്തും. ഫോൺ 9400896783, 9447124222, 9400509367. സ്‌നേഹസംഗമം കോട്ടയം: മെഡിക്കല്‍ കോളജ് ആശുപത്രിക്കുസമീപം മലങ്കര ഓര്‍ത്തഡോക്‌സ് സഭയുടെ നേതൃത്വത്തില്‍ നടത്തുന്ന മാര്‍ ഗ്രിഗോറിയോസ് കാരുണ്യനിലയത്തില്‍ ഓണത്തോടനുബന്ധിച്ച് സ്‌നേഹസംഗമം നടന്നു. കാരുണ്യനിലയം മാനേജിംഗ് ട്രസ്റ്റി ഡോ. യൂഹാനോന്‍ മാര്‍ ദീയസ്‌കോറോസ് മെത്രാപ്പോലീത്താ അധ്യക്ഷത വഹിച്ചു. ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാ ബാവാ ഉദ്ഘാടനം ചെയ്തു. മെഡിക്കല്‍ കോളജ് പ്രിന്‍സിപ്പല്‍ ഡോ. വര്‍ഗീസ് പുന്നൂസ് കൗണ്‍സിലിംഗ് ക്ലാസ് എടുത്തു. രോഗികള്‍ക്ക് ഡയാലിസിസ് കിറ്റുകളും ഓണക്കിറ്റുകളും വിതരണം ചെയ്തു. സര്‍ജിക്കല്‍ വിഭാഗത്തിലേക്കുള്ള പുതിയ വീല്‍ചെയറുകളും സ്ട്രെച്ചറുകളും കാതോലിക്കാ ബാവ മെഡിക്കൽ കോളജ് പ്രിന്‍സിപ്പലിനു കൈമാറി. കാരുണ്യനിലയം സെക്രട്ടറി ഫാ. ബിറ്റു കെ. മാണി, ട്രഷറര്‍ ഫാ. ജോണ്‍ കോര്‍എപ്പിസ്‌കോപ്പ ചിറത്തിലാട്ട് തുടങ്ങിയവര്‍ പ്രസംഗിച്ചു.

മണര്‍കാട് കവലയിലെ നവീകരിച്ച കുരിശുപള്ളിയുടെ കൂദാശയും പരിചമുട്ടുകളി അരങ്ങേറ്റവും ഇന്ന്

മണര്‍കാട്: സെന്‍റ് മേരീസ് യാക്കോബായ സുറിയാനി കത്തീഡ്രലിന്‍റെ മണര്‍കാട് കവലയിലെ നവീകരിച്ച കുരിശുപള്ളിയുടെ കൂദാശയും പരിചമുട്ടുകളിയുടെ അരങ്ങേറ്റവും ഇന്നു നടക്കും. കുരിശുപള്ളിയുടെ കൂദാശ വൈകുന്നേരം അഞ്ചിന് സന്ധ്യാപ്രാര്‍ഥനയെത്തുടര്‍ന്ന് ഡോ. തോമസ് മാര്‍ തിമോത്തിയോസ് മെത്രാപ്പോലീത്താ നിര്‍വഹിക്കും. കുരിശുപള്ളിയുടെ റൂഫിംഗ് നവീന രീതിയിലേക്ക് മാറ്റി. ഇരുവശങ്ങളിലെയും ജനലുകളുടെ വലിപ്പംകൂട്ടി ഗ്ലാസ് ഇട്ടു. ഇതോടെ കെകെ റോഡിലൂടെയും പാലാ റോഡിലൂടെയും പോകുന്നവര്‍ക്ക് കുരിശുപള്ളിക്കുള്ളിലെ മാതാവിന്‍റെയും ഉണ്ണിയേശുവിന്‍റെയും ചിത്രം ദര്‍ശിക്കാന്‍ സാധിക്കും. എല്‍ഇഡി സ്ട്രിപ്പ് ലൈറ്റ്, സ്‌പോട്ട് ലൈറ്റ് തുടങ്ങി ആധുനിക രീതിയിലുള്ള വെളിച്ച സംവിധാനങ്ങളും സ്ഥാപിച്ചു. കത്തീഡ്രലിന്‍റെ ആഭിമുഖ്യത്തില്‍ പ്രാചീന ക്രിസ്തീയ കലാരൂപമായ പരിചമുട്ടുകളി അഭ്യസിച്ച ഇടവകയിലെ കുട്ടികളുടെ അരങ്ങേറ്റം ഇന്നു വൈകുന്നേരം 6.30ന് കത്തീഡ്രല്‍ അങ്കണത്തില്‍ നടക്കും. ഇടവകയിലെ 50ലധികം കുട്ടികളാണ് മൂന്നു മാസം നീണ്ടുനിന്ന പരിശീലനത്തിലൂടെ പരിചമുട്ടുകളി അഭ്യസിച്ചത്.

തിരയേണ്ട, അരിയേണ്ട; ഓണസദ്യക്കുള്ള പച്ചക്കറി ഇവിടെ റെഡി

പാമ്പാടി: പച്ചക്കറി വാങ്ങാനും അരിഞ്ഞു തയാറാക്കാനുമുള്ള സമയം ലാഭിച്ചാണു പാമ്പാടിക്കാര്‍ ഇത്തവണ ഓണസദ്യയൊരുക്കുക. വെറും മൂന്നു മാസങ്ങള്‍കൊണ്ട് ഹിറ്റായ ‘റെഡി ടു കുക്ക്’ വിപണനകേന്ദ്രത്തില്‍ അരിഞ്ഞു റെഡിയാക്കിയ പച്ചക്കറികള്‍ ഒരുപാടു വീടുകളിലെ സദ്യയുടെ ഭാഗമാകും. പാമ്പാടി സര്‍വീസ് സഹകരണ ബാങ്കിന്‍റെ കേന്ദ്രത്തില്‍നിന്നുള്ള ഓണം സ്‌പെഷല്‍ പച്ചക്കറിക്കൂട്ടുകള്‍ 31 വരെ ബുക്കു ചെയ്യാം. ഉത്രാടദിവസം ഉച്ചകഴിഞ്ഞാണ് വിതരണം. അവിയലിനും സാമ്പാറിനുമുള്ള അരിഞ്ഞ പച്ചക്കറികള്‍ ഓരോ കിലോ വീതവും മെഴുക്കുപുരട്ടിക്കുള്ളത് അരക്കിലോയും ഏത്തക്കായയും ഉള്‍പ്പെടുന്ന കിറ്റാണ് ഓണം സ്‌പെഷല്‍. 12 പേര്‍ക്കുള്ള സദ്യ വിഭവങ്ങളടങ്ങളിയ കിറ്റിന് 749 രൂപയാണു വില. അവിയല്‍, സാമ്പാര്‍, മെഴുക്കുപുരട്ടി, തോരന്‍ തുടങ്ങിയവയ്ക്കുള്ള അരക്കിലോ പാക്കറ്റുകളും ഇവിടെ കിട്ടും. ഓരോ പാക്കറ്റിലും തേങ്ങാ ചിരകിയത്, പച്ചമുളക്, സവാള, ഉള്ളി എന്നിവയുമുണ്ട്. സാമ്പാര്‍, അവിയല്‍ കിറ്റുകള്‍ക്ക് 60 രൂപയാണു വില. ദിവസവും മുന്നൂറിലേറെ പായ്ക്കറ്റുകള്‍ വില്‍ക്കുന്നുണ്ടെന്ന് പാമ്പാടി സര്‍വീസ് സഹകരണ ബാങ്ക് പ്രസിഡന്‍റ് വി.എം. പ്രദീപ് പറഞ്ഞു. പഞ്ചായത്ത് ഷോപ്പിംഗ് കോംപ്ലക്‌സിലെ പച്ചക്കറി സ്റ്റാളില്‍ പാമ്പാടിയില്‍നിന്നു മാത്രമല്ല, അയല്‍ പ്രദേശങ്ങളില്‍നിന്നും ആളുകളെത്തുന്നുണ്ട്. ബാങ്ക് ഓഫീസിനോട് ചേര്‍ന്നു പ്രവര്‍ത്തിക്കുന്ന കാര്‍ഷിക വികസന വിപണന കേന്ദ്രത്തിലാണ് പച്ചക്കറികള്‍ അരിഞ്ഞു പായ്ക്കറ്റിലാക്കുന്നത്. നാലു സ്ത്രീകള്‍ ഇവിടെ ജോലി ചെയ്യുന്നുണ്ട്. അരിയുന്നതു മുതല്‍ ചില്ലറില്‍വച്ച് സൂക്ഷിക്കുന്നതിനാല്‍ ഫ്രഷായിത്തന്നെ ഉപഭോക്താക്കള്‍ക്ക് ലഭിക്കും. കര്‍ഷകര്‍ക്കു പിന്തുണ നല്‍കുന്നതിന്‍റെ ഭാഗമായി നാട്ടില്‍നിന്നു ലഭിക്കുന്ന പച്ചക്കറികളും കിറ്റുകളില്‍ ഉള്‍പ്പെടുത്തിയിട്ടുണ്ട്. ഉണക്കക്കപ്പകൊണ്ടുള്ള ബിരിയാണിക്കൂട്ട്, റെഡി ടു കുക്ക് ഇടിയപ്പം, ഉപ്പുമാവ്, ചക്കകൊണ്ടുള്ള പുട്ടുപൊടി, പൊക്കാളി അരിയുടെ പുട്ടുപൊടി തുടങ്ങി സഹകരണ മേഖലയില്‍നിന്നുള്ള മറ്റുത്പന്നങ്ങളുടെയും വില്പന ഇവിടെയുണ്ട്. ബുക്കിംഗിന്. 9495683814, 9495344619.

കഞ്ചാവുമായി ഇതര സംസ്ഥാനക്കാരൻ പിടിയിൽ

കോട്ടയം: നഗരമധ്യത്തില്‍ വന്‍ ലഹരി വേട്ട. ഒരു കിലോ കഞ്ചാവും 27.5 ഗ്രാം കഞ്ചാവ് മിഠായിയും മൂന്ന് ഗ്രാം ബ്രൗണ്‍ ഷുഗറുമായി ഇതരസംസ്ഥാന തൊഴിലാളിയെ എക്‌സൈസ് പിടികൂടി. അസം സ്വദേശി കാസിം അലിയെയാണ് പിടികൂടിയത്. രഹസ്യ വിവരത്തെ പിന്തുടര്‍ന്നു നടത്തിയ പരിശോധനയിലാണ് പ്രതിയെ ഇയാളെ പിടികൂടിയത്. ചെല്ലിയൊഴുക്കം റോഡിലെ ലോഡ്ജ് കേന്ദ്രീകരിച്ച് ഇതര സംസ്ഥാന തൊഴിലാളികളുടെ നേതൃത്വത്തില്‍ വന്‍ തോതില്‍ ലഹരിമരുന്ന് എത്തിക്കുന്നതായാണ് വിവരം ലഭിച്ചത്. ഇതേത്തുടര്‍ന്ന് എക്‌സെസ് സംഘം മുറിയില്‍ നടത്തിയ പരിശോധനയിലാണ് കാസിം അലിയുടെ പക്കൽനിന്നും കഞ്ചാവും ബ്രൗണ്‍ ഷുഗറും പിടികൂടിയത്.

അരുവിക്കുഴി ലൂർദ്മാതാ പള്ളിയിൽ തിരുനാൾ

അരുവിക്കുഴി: ലൂർദ്മാതാ പള്ളിയിൽ പരിശുദ്ധ കന്യകമറിയത്തിന്‍റെ പിറവിത്തിരുനാളും എട്ടുനോന്പാചരണവും സെപ്റ്റംബർ ഒന്നു മുതൽ എട്ടുവരെ നടക്കും. ഒന്നു മുതൽ ആറുവരെ ദിവസവും വൈകുന്നേരം 4.30ന് ജപമാല, വിശുദ്ധ കുർബാന, നൊവേന. ഫാ. ബാബു വരിക്കമാക്കിയിൽ സിഎസ്ടി, ഫാ. സൈജു തുരുത്തിയിൽ എംസിബിഎസ്, ഫാ. ജിൻസൺ കീടംകുറ്റിയിൽ എംസിബിഎസ്, ഫാ. ജേക്കബ് അത്തിക്കളം, ഫാ. മാത്യു കുന്നുംപുറം എംസിബിഎസ്, ഫാ. ചാൾസ് തോപ്പിൽ സിഎസ്ടി എന്നിവർ യഥാക്രമം കാർമികത്വം വഹിക്കും. ഏഴിന് രാവിലെ 6.30ന് ജപമാല, വിശുദ്ധകുർബാന, നൊവേന: ഫാ. ലൈജു കണിച്ചേരിൽ. തിരുനാൾ ദിനമായ എട്ടിനു വൈകുന്നേരം 4.30ന് ജപമാല, വിശുദ്ധ കുർബാന, നൊവേന: ഫാ. സോണി തെക്കുംമുറി. തുടർന്ന് മെഴുകുതിരികളേന്തി ജപമാല പ്രദിക്ഷണം. പാച്ചോർനേർച്ച. തിരുനാൾ ആഘോഷങ്ങൾക്ക് വികാരി ഫാ. സെബാസ്റ്റ്യൻ ശൗര്യാമാക്കിൽ, കൈക്കാരന്മാരായ തങ്കച്ചൻ പുല്ലാട്ടുകാല, ജോഷി പുലുന്പേത്തകിടിയിൽ എന്നിവർ നേതൃത്വം നൽകും.

ജീസസ് ഫ്രണ്ട്‌സിന്‍റെ ഒത്തുചേരൽ നാളെ

കോട്ടയം: ജീസസ് ഫ്രണ്ട്‌സ് കോട്ടയത്തിന്‍റെ ആഭിമുഖ്യത്തില്‍ നാളെ ഉച്ചകഴിഞ്ഞു മൂന്നു മുതല്‍ വൈകുന്നരം 6.30 വരെ കോട്ടയം ദര്‍ശന ഓഡിറ്റോറിയത്തില്‍ ഒത്തുചേരല്‍ സംഗമം സംഘടിപ്പിക്കും. തിരുവഞ്ചൂര്‍ രാധാകൃഷണന്‍ എംഎല്‍എ, രാ‌ഷ്‌ട്രദീപിക ലിമിറ്റഡ് മാനേജിംഗ് ഡയറക്ടര്‍ ഫാ. മൈക്കിള്‍ വെട്ടിക്കാട്ട്, നവജീവന്‍ ട്രസ്റ്റി പി.യു. തോമസ്, മുനിസിപ്പല്‍ ചെയര്‍പേഴ്സണ്‍ ബിന്‍സി സെബാസ്റ്റ്യന്‍ തുടങ്ങിയ പ്രമുഖര്‍ പങ്കെടുക്കും. സമൂഹത്തിലെ പാവപ്പെട്ടവരും നിരാലംബരുമായവരുടെ കണ്ണീരൊപ്പി ആശ്വസിപ്പിക്കുകയും അവര്‍ക്കു താമസത്തിന് തണലൊരുക്കി സഹായിച്ചുവരുന്ന 45 ജീവകാരുണ്യ സ്ഥാപനങ്ങളുടെ ഡയറക്ടര്‍മാരെ സംഗമത്തില്‍ ആദരിക്കും. കഴിഞ്ഞ 32 വര്‍ഷമായി കോട്ടയത്തും പരിസരത്തും ജീവകാരുണ്യ പ്രവര്‍ത്തനങ്ങള്‍ ചെയ്ത സംഭവങ്ങളുടെ ഓര്‍മകളില്‍ നിന്നെഴുതിയ ‘മീനച്ചിലാറും ഓര്‍മകളും’ എന്ന പുസ്തകത്തിന്‍റെ രണ്ടാംഭാഗമായ ‘ചാരം മൂടിയ കനലുകള്‍’ എന്ന പുസ്തകം യോഗത്തില്‍ പ്രകാശനം ചെയ്യും. ‘പത്രധര്‍മം സാമൂഹ്യനന്മയ്ക്ക് ഒരു നേര്‍കാഴ്ച’ എന്ന വിഷയത്തില്‍ ഷാജന്‍ സ്‌കറിയ പ്രഭാഷണം നടത്തും.

ഫാ. സി.ടി. വയലില്‍: കരുണാര്‍ദ്ര സ്‌നേഹം ചൊരിഞ്ഞ വൈദികന്‍

ചങ്ങനാശേരി: അശരണര്‍ക്കും നിര്‍ധനകുടുംബങ്ങള്‍ക്കും ആശ്വാസം പകര്‍ന്ന ഫാ. സി.ടി. വയലില്‍ വിടവാങ്ങി. എസ്ബി കോളജിലെ മലയാളംവിഭാഗം അധ്യാപകനായിരുന്ന വയലിലച്ചന്‍റെ മലയാളം ക്ലാസുകള്‍ വിദ്യാര്‍ഥികള്‍ ഏറെ ഇഷ്ടപ്പെട്ടിരുന്നു. 12 വര്‍ഷം വടവാതൂര്‍ സെമിനാരിയിലും എട്ടുവര്‍ഷം എസ്ബി കോളജിലും അധ്യാപകനായിരുന്നു. സഹഅധ്യാപകര്‍ക്ക് പ്രിയപ്പെട്ട സുഹൃത്തായിരുന്നു. പൗരോഹിത്യ സ്വീകരണത്തിന്‍റെ അറുപതാം വാര്‍ഷികം ലഘൂകരിച്ച് ആറു കുടുംബങ്ങള്‍ക്ക് വയലിലച്ചന്‍ വീടുകള്‍ നിര്‍മിച്ചുനല്‍കിയിരുന്നു. മേജര്‍ ആര്‍ച്ച്ബിഷപ് കര്‍ദിനാള്‍ മാര്‍ ബസേലിയോസ് ക്ലീമിസ് കാതോലിക്കാ ബാവ, ആര്‍ച്ച്ബിഷപ് മാര്‍ ജോസഫ് പെരുന്തോട്ടം, മാര്‍ മാത്യു അറയ്ക്കല്‍ എന്നിവര്‍ വയലിലച്ചന്‍റെ ശിഷ്യന്മാരാണ്. ദിവംഗതനായ മാര്‍ ജോസഫ് പവ്വത്തില്‍ സഹപാഠിയായിരുന്നു. പ്രശസ്ത വാഗ്മിയായിരുന്ന വയലിലച്ചന്‍റെ ശാന്തവും സരസവുമായ പ്രഭാഷണങ്ങള്‍ ഏറെ ശ്രദ്ധിക്കപ്പെട്ടിരുന്നു. കരിസ്മാറ്റിക് പ്രസ്ഥാനത്തിന്‍റെ തുടക്കക്കാരില്‍ ഒരാളുമാണ് ഫാ. തോമസ് വയലില്‍ എന്ന സി.ടി. വയലില്‍. അയര്‍ക്കുന്നം വയലില്‍ പരേതരായ ചാക്കോ പൈലോ, ഏലിയാമ്മ ദമ്പതികളുടെ മകനായി 1934 ഓഗസ്റ്റ് ആറിന് ജനിച്ചു. പൂന പേപ്പല്‍ സെമിനാരിയില്‍ വൈദിക പഠനം പൂര്‍ത്തിയാക്കിയ അദ്ദേഹം 1963 സെപ്റ്റംബര്‍ 21ന് പൗരോഹിത്യം സ്വീകരിച്ചു. ഫാ. സി.ടി. വയലിലിന്‍റെ സംസ്കാരശുശ്രൂഷകള്‍ ഇന്ന് ഉച്ചയ്ക്ക് ഒന്നിന് അയര്‍ക്കുന്നം മെത്രാഞ്ചേരിലുള്ള സഹോദരപുത്രന്‍ വയലില്‍ സാജുവിന്‍റെ ഭവനത്തില്‍ ഷംഷാബാദ് സഹായമെത്രാന്‍ മാര്‍ തോമസ് പാടിയത്തിന്‍റെ കാര്‍മികത്വത്തില്‍ ആരംഭിക്കും. തു‌ട‌ർന്ന് 2.30ന് അയര്‍ക്കുന്നം സെന്‍റ് സെബാസ്റ്റ്യന്‍സ് പള്ളിയില്‍ ആര്‍ച്ച്ബിഷപ് മാര്‍ തോമസ് തറയില്‍, ആര്‍ച്ച്ബിഷപ് എമെരിറ്റസ് മാര്‍ ജോസഫ് പെരുന്തോട്ടം എന്നിവരുടെ മുഖ്യകാര്‍മികത്വത്തിലുള്ള സമൂഹബലിയെത്തുടര്‍ന്ന് മൃതദേഹം സംസ്കരിക്കും.

കുമരകത്ത് ഇനി ഉത്സവനാളുകൾ

കുമരകം: നെഹ്റു ട്രോഫി മത്സരത്തിന്‍റെ ഫലം ഇന്നറിയാമെങ്കിലും കുമരകത്ത് വള്ളംകളിയുടെ ആവേശം ഒരാഴ്ചയെങ്കിലും നീളും. 122 -ാമത് കുമരകം വള്ളംകളിയുടെ വിളംബര ഘാേഷയാത്ര നാളെ നടക്കുന്നതോടെ ആഘോഷങ്ങൾക്കു തിരിതെളിയും. മൂന്നിന് ശ്രീകുമാരമംഗലം ക്ഷേത്ര മൈതാനിയിൽനിന്നും കുമരകം പഞ്ചായത്തിന്‍റെയും ശ്രീനാരായണ പബ്ലിക് ബോട്ട് റേസ് ക്ലബ്ബിന്‍റെയും സംയുക്താഭിമുഖ്യത്തിൽ ആരംഭിക്കുന്ന സാംസ്കാരിക ഘോഷയാത്ര കുമരകം ആറ്റാമംഗലം പള്ളി പാരീഷ് ഹാളിൽ എത്തിച്ചേരും. തൃശൂരിൽനിന്നുള്ള പുലിപ്പടയും റാഗി പറക്കുന്ന ചെമ്പരുന്തും ചടുല നൃത്ത ചുവടുകളോടെ തരുണീമണികളും ത്രസിപ്പിക്കുന്ന അസുര താളവും ബാൻഡുമേളവും ശിങ്കാരിമേളവുമെല്ലാം വിളംബരഘാേഷയാത്രക്ക് മികവേകും. ആറിന് വിവിധ കലാപരിപാടികൾ പാരീഷ് ഹാളിൽ അരങ്ങേറും. കവണാറ്റിൻകരയിൽ 37-ാമത് ടൂറിസം ജലമേള ആറിന് കവണാറിൽ നടക്കും. രണ്ടിന് ശ്രിശക്തീശ്വരം ക്ഷേത്രകടവിൽ നിന്നും ജലഘോഷയാത്ര ആരംഭിക്കും മൂന്നിനാണ് മത്സരവള്ളംകളി. ഏഴിന് കോട്ടത്തോട്ടിൽ നടക്കുന്ന ശ്രീനാരായണ ജയന്തി മത്സര വള്ളംകളിയോടെയാണ് കുമരകത്തെ ഓണാഘോഷങ്ങൾക്കു തിരശീല വീഴുക. ശ്രീകുമാരമംഗലം ക്ഷേത്രത്തിൽനിന്നാരംഭിക്കുന്ന ചരിത്രപ്രസിദ്ധമായ ജലഘോഷയാത്രയിൽ അനേകം കളിവള്ളങ്ങളും കേരളീയ കലാരൂപങ്ങളും അണിചേരും.

കൊമ്പുകുത്തിയിൽ കാട്ടാന ആക്രമണം

മുണ്ടക്കയം: കോരുത്തോട് പഞ്ചായത്തന്‍റെ കൊമ്പുകുത്തിയിൽ കാട്ടാനശല്യം രൂക്ഷം. കഴിഞ്ഞ ദിവസം രാത്രി കൊമ്പുകുത്തിയിൽ പുളിക്കൽ പത്മനാഭപിള്ളയുടെ വീട്ടുമുറ്റത്ത് കാട്ടാനയെത്തി. ആനയെ കണ്ട് ഭയന്ന് വീട്ടുകാർ നിലവിളിച്ചതോടെ ആന വീടിന്‍റെ കതക് കുത്തിപ്പൊളിച്ചു. വീടിനകത്തുണ്ടായിരുന്ന കട്ടിൽ, മേശ, ടിവി അടക്കമുള്ള ഗൃഹോപകരണങ്ങളും നശിപ്പിച്ചു. വീട്ടുകാർ പരിക്കേൽക്കാതെ അത്ഭുതകരമായി രക്ഷപ്പെട്ടു. ഏറെനേരം ഭീകരാന്തരീക്ഷം സൃഷ്ടിച്ച ശേഷമാണ് കാട്ടാന ഇവിടെനിന്നു മടങ്ങിയത്. മേഖലയിൽ ഏറെനാളായി കാട്ടാനശല്യം അതിരൂക്ഷമാണ്. നാട്ടുകാർ പരാതിപ്പെടുമ്പോൾ പേരിന് വനംവകുപ്പ് ഉദ്യോഗസ്ഥരെത്തി ആനകളെ കാട്ടിലേക്ക് തുരത്തുമെങ്കിലും മണിക്കൂറുകൾക്ക് ശേഷം ഇവ വീണ്ടും ജനവാസ മേഖലയിലേക്ക് മടങ്ങുകയാണ്. സംരക്ഷണവേലികൾ നിർമിക്കുമെന്ന് അധികാരികൾ വാഗ്ദാനം നൽകുന്നുണ്ടെങ്കിലും ഇതൊന്നും പ്രാവർത്തികമാകുന്നില്ലെന്നു മാത്രമല്ല ഓരോ ദിവസവും വന്യമൃഗശല്യം വർധിക്കുകയാണ്.

നടൻ വിജയരാഘവനെ ആദരിച്ചു

കോട്ടയം: ദേശീയ ചലച്ചിത്ര അവാര്‍ഡ് ജേതാവായ വിജയരാഘവനെ കോട്ടയം സിറ്റസണ്‍ ഫോറം ആദരിച്ചു. നഗരസഭ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍ അധ്യക്ഷതവഹിച്ചു. തിരുവഞ്ചൂര്‍ രാധാകൃഷ്ണന്‍ എംഎല്‍എ വിജയരാഘവനെ പൊന്നാട അണിയിച്ചു. കോട്ടയം അതിരൂപത വികാരി ജനറാള്‍ ഫാ. മൈക്കിള്‍ വെട്ടിക്കാട്ട് മുഖ്യപ്രഭാഷണം നടത്തി. കാരിത്താസ് ആശുപത്രി ഡറക്ടര്‍ റവ. ഡോ. ബിനു കുന്നത്ത്, മാന്നാനം കെഇ സ്‌കൂള്‍ പ്രിന്‍സിപ്പല്‍ റവ.ഡോ. ജയിംസ് മുല്ലശേരി, ദര്‍ശന സാംസ്‌കാരിക കേന്ദ്രം ഡയറക്ടര്‍ ഫാ. എമില്‍ പുള്ളിക്കാട്ടില്‍, പ്രോഗ്രാം കോ-ഓര്‍ഡിനേറ്റര്‍ മാത്യു കൊല്ലമലക്കരോട്ട് എന്നിവര്‍ പ്രസംഗിച്ചു.

കോട്ടയം അതിരൂപത ദിനാഘോഷം ഇന്ന്

കോട്ടയം: കോട്ടയം ക്‌നാനായ അതിരൂപതാദിനാചരണം ഇന്നു രാവിലെ 10ന് ഇടയ്ക്കാട്ട് സെന്‍റ് ജോര്‍ജ് ക്നാനായ കത്തോലിക്കാ ഫൊറോന പള്ളിയില്‍ നടക്കും. പുരാതന പാട്ടുകള്‍ പാടി നടവിളിയോടെ ബിഷപ്പുമാരെ സ്വീകരിക്കും. ആര്‍ച്ച്ബിഷപ് മാര്‍ മാത്യു മൂലക്കാട്ട് ദീപം തെളിക്കും. തുടര്‍ന്ന് ആര്‍ച്ച്ബിഷപ് മാര്‍ തോമസ് തറയിലിന്‍റെ മുഖ്യകാര്‍മികത്വത്തില്‍ വിശുദ്ധ കുര്‍ബാന. മാര്‍ ജോസഫ് പണ്ടാരശേരില്‍, ഗീവര്‍ഗീസ് മാര്‍ അപ്രേം, വൈദികര്‍ തുടങ്ങിയവര്‍ കൃതജ്ഞതാബലിയില്‍ പങ്കെടുക്കും. പൊതുസമ്മേളനം മാര്‍ മാത്യു മൂലക്കാട്ട് ഉദ്ഘാടനം ചെയ്യും. ഗീവര്‍ഗീസ് മാര്‍ അപ്രേം അനുഗ്രഹപ്രഭാഷണം നടത്തും. വ്യത്യസ്ത മേഖലകളില്‍ പ്രാഗല്ഭ്യം തെളിയിച്ചവരെ പാസ്റ്ററല്‍ കൗണ്‍സില്‍ സെക്രട്ടറി സാബു കരിശേരിക്കല്‍ പരിചയപ്പെടുത്തി മാര്‍ മാത്യു മൂലക്കാട്ട് ആദരിക്കും. അതിരൂപതയില്‍ ഒരു വര്‍ഷത്തില്‍ നടത്തപ്പെട്ട പരിപാടികളുടെ അവതരണം പാസ്റ്ററല്‍ കോ-ഓര്‍ഡിനേറ്റര്‍ ഫാ. മാത്യു മണക്കാട്ട് നിര്‍വഹിക്കും. പ്രെസ്ബിറ്ററല്‍ കൗണ്‍സില്‍ സെക്രട്ടറി ഫാ. ഏബ്രാഹാം പറമ്പേട്ട്, കെസിസി പ്രസിഡന്‍റ് ബാബു പറമ്പടത്തുമലയില്‍, സമര്‍പ്പിത സമൂഹങ്ങളുടെ പ്രതിനിധി സിസ്റ്റര്‍ ഇമ്മാക്കുലേറ്റ് എസ്‌വിഎം, കെസിഡബ്ല്യുഎ പ്രസിഡന്‍റ് ഷൈനി ചൊള്ളമ്പേല്‍, കെസിവൈഎല്‍ പ്രസിഡന്‍റ് ജോണിസ് പി. സ്റ്റീഫന്‍ എന്നിവര്‍ പ്രസംഗിക്കും. മാര്‍ ജോസഫ് പണ്ടാരശേരില്‍ സ്വാഗതവും പ്രൊ-പ്രോട്ടോസിഞ്ചെല്ലൂസ് ഫാ. തോമസ് ആനിമൂട്ടില്‍ കൃതജ്ഞതയും അര്‍പ്പിക്കും.

ജെയ്‌നമ്മ കൊലപാതകം: ഡിഎന്‍എ ഫലത്തിനുശേഷം തുടരന്വേഷണം

കോട്ടയം: അതിരമ്പുഴ സ്വദേശി ജെയ്‌നമ്മയുടെ കൊലപാതകത്തില്‍ കൂടുതല്‍ അന്വേഷണം ഡിഎന്‍എ ഫലം വന്നതിനു ശേഷമെന്ന് ക്രൈംബ്രാഞ്ച്. കേസില്‍ അറസ്റ്റിലായ ചേര്‍ത്തല പള്ളിപ്പുറം ചൊങ്ങുംതറ സി.എം. സെബാസ്റ്റ്യന്‍റെ വീട്ടുവളപ്പില്‍നിന്നു കണ്ടെടുത്ത അസ്ഥിക്കഷ്ണങ്ങളുടെ ഡിഎന്‍എ ഫലത്തിനായി പോലീസ് കാത്തിരിക്കുകയാണ്. അസ്ഥിക്കഷ്ണങ്ങള്‍ കരിഞ്ഞ നിലയിലായതിനാലാണ് ഡിഎന്‍എ വൈകുന്നത്. ഇത് സ്ത്രീയുടെ അസ്ഥിയാണെന്നു വ്യക്തമായിട്ടുണ്ട്. ജെയ്‌നമ്മയെ കൂടാതെ ചേര്‍ത്തല വാരനാട് സ്വദേശി ഐഷ, കടക്കരപ്പള്ളി സ്വദേശി ബിന്ദു പത്മനാഭന്‍ എന്നിവരുടെ തിരോധാനത്തിലും ദുരൂഹത നിലനില്‍ക്കുകയാണ്. ബിന്ദുവിനെയും ഐഷയെയും സെബാസ്റ്റ്യന്‍ വകവരുത്തിയതായാണ് സാഹചര്യത്തെളിവുകള്‍. എന്നാല്‍ തുടര്‍ച്ചയായ ചോദ്യംചെയ്യലില്‍, ഇരുവര്‍ക്കും എന്തു സംഭവിച്ചെന്ന് പ്രതി പറയുന്നില്ല. ഡിഎന്‍എ ഫലം ജെയ്‌നമ്മയുടേതാണെങ്കില്‍ കേസില്‍ വ്യക്തമായ തെളിവാകും. സെബാസ്റ്റ്യന്‍റെ വീട്ടിലെ കുളിമുറിയില്‍ കണ്ടെത്തിയ രക്തത്തുള്ളികള്‍ ജെയ്‌നമ്മയുടേതാണെന്ന് ഫോറന്‍സിക് പരിശോധനയില്‍ തെളിഞ്ഞിരുന്നു. അസ്ഥിക്കഷ്ണങ്ങള്‍ ജെയ്‌നമ്മയുടേതല്ലെങ്കില്‍ മൃതദേഹം എവിടെ മറവുചെയ്തുവെന്നത് കണ്ടെത്തണം. ഐഷയും ബിന്ദുവും എവിടെയെന്നതിലും തുടരന്വേഷണം നടത്തണം. ജെയ്‌നമ്മ തിരോധാനത്തില്‍ തുടരെ പതിനാറ് ദിവസം സെബാസ്റ്റ്യനെ ചോദ്യം ചെയ്തിട്ടും പരസ്പരവിരുദ്ധമായ മറുപടിയാണ് ഇയാള്‍ പോലീസിനു നല്‍കുന്നത്.

ഇന്നു ജലപ്പൂരം

എം.ജെ. ജോസ് ആലപ്പുഴ: ആലപ്പുഴയിൽ ഇന്നു ജലപ്പൂരം. പുരുഷാരം വഞ്ചിപ്പാട്ടും തുഴത്താളവുമായി പുന്നമടക്കായലിൽ ഇന്നു ഒന്നു ചേരും. വള്ളംകളി പ്രേമികൾക്ക് ഇന്ന് ഉത്സവദിനം. 2025ലെ നെഹ്റു ട്രോഫി ആരടിക്കും? ആലപ്പുഴ കാത്തിരിക്കുന്നു. ആയിരക്കണക്കിനു സഞ്ചാരികൾ ഇന്നു പുന്നമടയിൽ ഒത്തുചേരും. ജലപൂരത്തിൽ തുഴവെഞ്ചാമരം വീശി കൊമ്പ് കുലുക്കി പായുന്ന ഗജചുണ്ടന്മാരെ കണ്ട് ഇരുകരകളിലെയും പുരുഷാരം ആരവം മുഴക്കും. നെഹ്‌റു ട്രോഫി വള്ളംകളി എന്നത് ഒരു മത്സരത്തേക്കാൾ വള്ളങ്ങളുടെ കണ്ണും മനസും നിറയ്ക്കുന്ന ഒരു ഘോഷയാത്രയാണ്. ചുണ്ടൻ വള്ളങ്ങൾ , മറ്റുതരം വള്ളങ്ങൾ, നൂറുകണക്കിനു തുഴക്കാർ എന്നിങ്ങനെ അണിനിരക്കുന്ന മനോഹര ഘോഷയാത്ര. ഒരുമയുടെയും സ്നേഹത്തിന്‍റെയും ഐക്യത്തിന്‍റെയും സന്ദേശം വിളിച്ചോതി കേരളം ഇന്നു നെഹ്റു ട്രോഫി ജലമേളയ്ക്കു സാക്ഷ്യം വഹിക്കും. ഇന്നു നടക്കുന്ന 71-ാമത് നെഹ്‌റു ട്രോഫി വള്ളംകളി ലോഗോ ആരോഗ്യ, വനിതാ, ശിശുക്ഷേമ മന്ത്രി വീണ ജോർജും ചലച്ചിത്ര താരം കാളിദാസ് ജയറാമും സംയുക്തമായി അനാച്ഛാദനം ചെയ്തായിരുന്നു പ്രചാരണങ്ങളുടെ തുടക്കം. കാക്കത്തമ്പുരാട്ടി വള്ളം തുഴയുന്ന ചിത്രമാണത്. ആലപ്പുഴ വട്ടായലിലെ കാക്കരിയിൽനിന്നുള്ള എസ്. അനുപമയാണ് ലോഗോ രൂപകല്പന ചെയ്തത്. ആലപ്പുഴയ്ക്ക് ഇനി ഉദ്വേഗം ജനിപ്പിക്കുന്ന കാത്തിരിപ്പിന്‍റെ നിമിഷങ്ങളാണ്. 2025ലെ നെഹ്റുട്രോഫിയിൽ ആരു മുത്തമിടുമെന്ന ആകാംക്ഷ ഒാളമടിക്കുന്ന പുന്നമടയിലേക്ക് എല്ലാ ചുവടുകളും എല്ലാ കണ്ണുകളും. സമയത്തിന്‍റെ അടിസ്ഥാനത്തില്‍ ആദ്യമെത്തുന്ന 16 ചുണ്ടന്‍ വള്ളങ്ങളാണ ഫൈനലില്‍ മാറ്റുരയ്ക്കുക. ട്രാക്ക് ചുവടെ: ചുണ്ടന്‍ 16,15,14,13 തേർഡ് ലൂസേഴ്‌സ് ഫൈനൽ ട്രാക്ക് 1- 13 ട്രാക്ക് 2- 15 ട്രാക്ക് 3- 14 ട്രാക്ക് 4- 16 ചുണ്ടന്‍ 12,11,10,09 സെക്കന്റ് ലൂസേഴ്‌സ് ഫൈനൽ ട്രാക്ക് 1- 9 ട്രാക്ക് 2- 12 ട്രാക്ക് 3- 10 ട്രാക്ക് 4- 11 ചുണ്ടന്‍ 08,07,06,05 ലൂസേഴ്‌സ് ഫൈനൽ ട്രാക്ക് 1- 06 ട്രാക്ക് 2- 07 ട്രാക്ക് 3- 05 ട്രാക്ക് 4-08 ചുണ്ടന്‍ 04,03,02,01 ഫൈനൽ ട്രാക്ക് 1- 04 ട്രാക്ക് 2- 02 ട്രാക്ക് 3- 01 ട്രാക്ക് 4- 03 ഇരുട്ടുകുത്തി സി ഫൈനല്‍ ട്രാക്ക് 1- 04 ട്രാക്ക് 2- 02 ട്രാക്ക് 3- 01 ട്രാക്ക് 4- 03 ഇരുട്ടുകുത്തി ബി ഫൈനല്‍ ട്രാക്ക് 1- 01 ട്രാക്ക് 2- 04 ട്രാക്ക് 3- 03 ട്രാക്ക് 4- 0 വള്ളങ്ങളുടെ ഹീറ്റ്‌സുകളും ട്രാക്കുകളും ചുണ്ടന്‍ ഹീറ്റ്സ് 1 ട്രാക്ക് 1- ആനാരി ചുണ്ടൻ ട്രാക്ക് 2- വെള്ളംകുളങ്ങര ട്രാക്ക് 3- ശ്രീവിനായകൻ ട്രാക്ക് 4- കാരിച്ചാൽ ഹീറ്റ്സ് 2 ട്രാക്ക് 1- കരുവാറ്റ ട്രാക്ക് 2- ചെറുതന പുത്തൻചുണ്ടൻ ട്രാക്ക് 3- നടുവിലെ പറമ്പൻ ട്രാക്ക് 4- പായിപ്പാടൻ 2 ഹീറ്റ്സ് 3 ട്രാക്ക് 1- ചമ്പക്കുളം ട്രാക്ക് 2- തലവടി ചുണ്ടന്‍ ട്രാക്ക് 3- മേൽപ്പാടം ചുണ്ടൻ ട്രാക്ക് 4- ആലപ്പാടൻ ഹീറ്റ്സ് 4 ട്രാക്ക് 1- സെന്‍റ് ജോർജ് ട്രാക്ക് 2- നടുഭാഗം ട്രാക്ക് 3- നിരണം ട്രാക്ക് 4- വലിയ ദിവാൻജി ഹീറ്റ്സ് 5 ട്രാക്ക് 1- സെൻറ് പയസ് ടെൻത് ട്രാക്ക് 2- ജവഹർ തായങ്കരി ട്രാക്ക് 3- പായിപ്പാടൻ ട്രാക്ക് 4- വള്ളമില്ല ഹീറ്റ്സ് 6 ട്രാക്ക് 1- വീയപുരം ട്രാക്ക് 2- ആയാപറമ്പ് പാണ്ടി ട്രാക്ക് 3- വള്ളമില്ല ട്രാക്ക് 4- വള്ളമില്ല ചുരുളന്‍ ഫൈനല്‍ മാത്രം ട്രാക്ക് 1- വേലങ്ങാടന്‍ ട്രാക്ക് 2- കോടിമത ട്രാക്ക് 3- മൂഴി ട്രാക്ക് 4- വള്ളമില്ല ഇരുട്ടുകുത്തി എ ഗ്രേഡ്‌ (ഫൈനല്‍ മാത്രം) ട്രാക്ക് 1- തുരുത്തിത്തറ ട്രാക്ക് 2- പി.ജി. കർണ്ണന്‍ ട്രാക്ക് 3- പടക്കുതിര ട്രാക്ക് 4- മൂന്ന് തൈക്കൽ ട്രാക്ക് 5-മാമ്മുടൻ ഇരുട്ടുകുത്തി ബി ഗ്രേഡ് ഹീറ്റ്സ് 1 ട്രാക്ക് 1- തുരുത്തിപ്പുറം ട്രാക്ക് 2- താണിയൻ ദ ഗ്രേറ്റ് ട്രാക്ക് 3- ശ്രീഭദ്ര ട്രാക്ക് 4- ഗോതുരുത്ത് പുത്രന്‍ ഹീറ്റ്സ് 2 ട്രാക്ക് 1- സെൻറ് ആൻറണീസ് ട്രാക്ക് 2- സെൻറ് സെബാസ്റ്റ്യൻ നമ്പർ 1 ട്രാക്ക് 3- ശ്രീമുത്തപ്പൻ ട്രാക്ക് 4- ഹനുമാൻ നമ്പർ 1 ഹീറ്റ്സ് 3 ട്രാക്ക് 1- ദാനിയേൽ ട്രാക്ക് 2- സെന്റ് ജോസഫ് ട്രാക്ക് 3- പുത്തൻ പറമ്പൻ ട്രാക്ക് 4- പൊഞ്ഞനത്തമ്മ ഹീറ്റ്സ് 4 ട്രാക്ക് 1- കുറുപ്പ് പറമ്പന്‍ ട്രാക്ക് 2- വള്ളമില്ല ട്രാക്ക് 3- വെണ്ണക്കലമ്മ ട്രാക്ക് 4- ജലറാണി ഹീറ്റ്സ് 5 ട്രാക്ക് 1- ശ്രീ ഗുരുവായൂരപ്പന്‍ ട്രാക്ക് 2- വലിയ പണ്ഡിതൻ ട്രാക്ക് 3- വള്ളമില്ല ട്രാക്ക് 4- രവണൻ ഇരുട്ടുകുത്തി സി ഗ്രേഡ് ഹീറ്റ്്സ് 1 ട്രാക്ക് 1- ചെറിയപണ്ഡിതൻ ട്രാക്ക് 2- പമ്പാവാസൻ ട്രാക്ക് 3- മയിൽവാഹനൻ ട്രാക്ക് 4- തട്ടകത്തമ്മ ഹീറ്റ്സ് 2 ട്രാക്ക് 1- ഹനുമാൻ നമ്പർ 2 ട്രാക്ക് 2- ശ്രീ മുരുകൻ ട്രാക്ക് 3- മയില്‍പ്പീലി ട്രാക്ക് 4- വടക്കുംപുറം ഹീറ്റ്സ് 3 ട്രാക്ക് 1- സെൻറ് ജോസഫ് നമ്പർ 2 ട്രാക്ക് 2- -- സെൻറ് സെബാസ്റ്റ്യൻ നമ്പർ 2 ട്രാക്ക് 3- കാശിനാഥൻ ട്രാക്ക് 4- വള്ളമില്ല ഹീറ്റ്സ് 4 ട്രാക്ക് 1- -- മാടപ്ലാത്തുരുത്ത് ട്രാക്ക് 2- ജിബി തട്ടകൻ ട്രാക്ക് 3- വള്ളമില്ല ട്രാക്ക് 4- ഗോതുരുത്ത് വെപ്പ് എ ഗ്രേഡ് ഹീറ്റ്സ് 1 ട്രാക്ക് 1- ആശ പുളിക്കക്കളം ട്രാക്ക് 2- ജയ് ഷോട്ട് ട്രാക്ക് 3- നെപ്പോളിയൻ ട്രാക്ക് 4- അമ്പലക്കടവൻ ട്രാക്ക് 5 ഷോട്ട് പുളിക്കത്തറ വെപ്പ് ബി ഗ്രേഡ് ഫൈനല്‍ മാത്രം ട്രാക്ക് 1- പി.ജി കരിപ്പുഴ ട്രാക്ക് 2- വള്ളമില്ല ട്രാക്ക് 3- പുന്നത്രപുരയ്ക്കൽ ട്രാക്ക് 4- ചിറമേൽ തോട്ടുകടവൻ

മുണ്ടക്കയത്ത് ഇറങ്ങിയാൽ നായകടി സൗജന്യം!

മുണ്ടക്കയം: മുണ്ടക്കയം ടൗണിലും സമീപപ്രദേശങ്ങളിലും തെരുവുനായശല്യം കാരണം ജനങ്ങൾക്കു വഴി നടക്കാൻ കഴിയാത്ത സ്ഥിതി. രാത്രിയെന്നോ പകലെന്നോ വ്യത്യാസമില്ലാതെ തെരുവുനായ്ക്കൾ ജനവാസ മേഖലയിൽ തമ്പടിക്കുന്നത് പൊതുജനങ്ങൾക്കു ഭീഷണിയായി മാറുകയാണ്. കഴിഞ്ഞ ദിവസം മുണ്ടക്കയം പൈങ്ങനായിൽ രണ്ടുപേർക്കു തെരുവുനായയുടെ കടിയേറ്റിരുന്നു. ഇന്നലെ രാത്രി മുണ്ടക്കയം ഇളംബ്രാമല സ്വദേശി സതീഷിന്‍റെ ഓട്ടോറിക്ഷയുടെ സീറ്റും പടുതയും കൂട്ടമായെത്തിയ നായ്ക്കൾ കടിച്ചുകീറി നശിപ്പിച്ചു. പൈങ്ങന, 31-ാംമൈൽ, വരിക്കാനി, ചെളിക്കുഴി അടക്കമുള്ള പ്രദേശങ്ങളിൽ തെരുവുനായ്ക്കൾ ഭീഷണി ഉയർത്തുന്നുണ്ട്. രാത്രികാലങ്ങളിൽ മുണ്ടക്കയം ടൗണും ബൈപാസും തെരുവുനായ്ക്കളുടെ വിഹാരകേന്ദ്രമാണ്. നായ്ക്കളെ ഇറക്കിവിടുന്നോ? പലപ്പോഴും തെരുവുനായ്ക്കളുടെ ആക്രമണത്തിൽനിന്നു പലരും ഭാഗ്യംകൊണ്ടാണ് രക്ഷപ്പെടുന്നത്. വൈകുന്നേരങ്ങളിലും പ്രഭാതത്തിലും വ്യായാമത്തിനും വിശ്രമത്തിനുമൊക്കെയായി നിരവധി ആളുകൾ മുണ്ടക്കയം ബൈപാസ് തെരഞ്ഞെടുക്കുന്നുണ്ട്. എന്നാൽ, തെരുവുനായ്ക്കളെ പേടിച്ചുവേണം ഇവിടെ ഇറങ്ങി നടക്കാൻ. തെരുവനായ്ക്കളെ സംരക്ഷിക്കാനോ നിയന്ത്രിക്കാനോ ഉള്ള സംവിധാനങ്ങളൊന്നും മുണ്ടക്കയം മേഖലയിലോ സമീപ പ്രദേശങ്ങളിലോ ഇല്ല. ഇതിനിടെ, മറ്റു സ്ഥലങ്ങളിൽനിന്നു തെരുവുനായ്ക്കളെ കൂട്ടത്തോടെ മുണ്ടക്കയം മേഖലയിൽ കൊണ്ടുവന്ന് ഇറക്കിവിടുന്നതായും പരാതിയുണ്ട്. രാത്രികാലങ്ങളിൽ വിജനമാകുന്ന മുണ്ടക്കയം ബൈപാസിൽ തെരുവുനായ്ക്കളെ കൂട്ടത്തോടെ ഇറക്കിവിടുന്നുണ്ടെന്നാണ് നാട്ടുകാരുടെ ആരോപണം. ജനങ്ങളുടെ സുരക്ഷ ഉറപ്പാക്കുവാൻ അധികൃതർ നടപടിയെടുക്കണമെന്ന ആവശ്യമാണ് ഉയരുന്നത്.

ടി.കെ. ലതികയ്ക്ക് ലോംഗ് സർവീസ് അവാർഡ്

കാഞ്ഞിരപ്പള്ളി: കേരള സ്റ്റേറ്റ് ഭാരത് സ്കൗട്ട്സ് ആൻഡ് ഗൈഡ്സ് സംസ്ഥാനതലത്തിൽ നൽകുന്ന ലോംഗ് സർവീസ് ഡെക്കറേഷൻ അവാർഡിന് കാഞ്ഞിരപ്പള്ളി എകെജെഎം ഹയർ സെക്കൻഡറി സ്കൂൾ അധ്യാപിക ടി.കെ. ലതിക അർഹയായി. തിരുവനന്തപുരം ശിക്ഷക്സദനിൽ നടന്ന ചടങ്ങിൽ സ്കൗട്ട്സ് ആൻഡ് ഗൈഡ്സ് സംസ്ഥാന ചീഫ് കമ്മീഷണറും സംസ്ഥാന പൊതുവിദ്യാഭ്യാസ ഡയറക്ടറുമായ എൻ.എസ്. ഉമേഷിൽനിന്ന് അവാർഡ് ഏറ്റുവാങ്ങി. കാഞ്ഞിരപ്പള്ളി വിദ്യാഭ്യാസ ജില്ലാ കബ് ബുൾബുൾ കമ്മീഷണറായും എകെജെഎം ഹയർ സെക്കൻഡറി സ്കൂൾ ഗൈഡ് ക്യാപ്റ്റനായും സേവനം ചെയ്യുന്ന ടി.കെ. ലതികയ്ക്ക് ഗൈഡ് ക്യാപ്റ്റനായി ദീർഘകാലം നൽകിയ സേവനത്തിനാണ് അവാർഡ്. സ്കൂളിൽ ചേർന്ന അനുമോദന യോഗത്തിൽ സ്കൂൾ മാനേജർ ഫാ. പീറ്റർ മുല്ലൂപറമ്പിൽ, പ്രിൻസിപ്പൽ ഫാ. അഗസ്റ്റിൻ പീടികമലയിൽ, സ്കൗട്ട് അഡൾട്ട് റിസോഴ്സ് ജില്ലാ കമ്മീഷണർ ഫാ. വിൽസൺ പുതുശേരി, പിടിഎ പ്രസിഡന്‍റ് ജോജി ജോസഫ് തുടങ്ങിയവർ പ്രസംഗിച്ചു.

ഓണം മൂഡിലായി നാട്, എങ്ങും ആഘോഷങ്ങള്‍

കാഞ്ഞിരപ്പള്ളി: തിരുവോണത്തെ വരവേല്‍ക്കാന്‍ ഒരുങ്ങുകയാണ് മലയാളികള്‍. സ്‌കുളുകളിലും കോളജുകളിലും വിവിധ സ്ഥാപനങ്ങളിലും ഓണാഘോഷങ്ങള്‍ വിവിധ രീതികളില്‍ നടക്കുന്നു. ഇളങ്ങുളം: രണ്ടാംമൈൽ ഒരുമ പുരുഷസ്വയംസഹായ സംഘത്തിന്‍റെ വാർഷികവും ഓണാഘോഷവും നാളെ നടക്കും. വൈകുന്നേരം നാലിന് സാംസ്‌കാരിക സമ്മേളനം ജോസ് കെ. മാണി എംപി ഉദ്ഘാടനം ചെയ്യും. കുട്ടികൾക്കും മുതിർന്നവർക്കും വിവിധ മത്സരങ്ങൾ നടത്തും. രാത്രി എട്ടിന് നാടകം. കാഞ്ഞിരപ്പള്ളി: കുന്നുംഭാഗം സെന്‍റ് ജോസഫ്‌സ് പബ്ലിക് സ്‌കൂളിലെ ഓണാഘോഷം സംസ്ഥാന ബാലസാഹിത്യ ഇന്‍സ്റ്റിറ്റ്യൂട്ട് ഭരണസമിതി അംഗവും കഥാകാരിയും കവയിത്രിയുമായ സിജിത അനില്‍ ഉദ്ഘാടനം ചെയ്തു. ഡോ. സിസ്റ്റർ ലിസ് മരിയ, സിസ്റ്റർ മെര്‍ലിന്‍ കാഞ്ഞിരത്തിങ്കല്‍, വൈസ് പ്രിന്‍സിപ്പല്‍ സിസ്റ്റർ റോസ്‌ബെല്‍ എന്നിവര്‍ പ്രസംഗിച്ചു. മെഗാ തിരുവാതിര, കുട്ടികളുടെ വിവിധ കലാപരിപാടികൾ എന്നിവ നടത്തി. പൊന്‍കുന്നം: ജനകീയ വായനശാലയുടെ ഓണാഘോഷം സെപ്റ്റംബര്‍ മൂന്നിന് രാവിലെ ഒന്പതിന് നടക്കും. ലൈബ്രറി കൗണ്‍സില്‍ പഞ്ചായത്ത് നേതൃസമിതി പ്രസിഡന്‍റ് ഒ.എം.എ. കരീം ഉദ്ഘാടനം ചെയ്യും.

ഓണസദ്യയുടെ കൂറ്റൻ മാതൃകയൊരുക്കി ആനക്കല്ല് സെന്‍റ് ആന്‍റണീസ് പബ്ലിക് സ്‌കൂൾ

കാഞ്ഞിരപ്പള്ളി: സ്‌കൂൾ അങ്കണത്തിൽ ഓണസദ്യയുടെ കൂറ്റൻ മാതൃകയൊരുക്കി ആനക്കല്ല് സെന്‍റ് ആന്‍റണീസ് പബ്ലിക് സ്‌കൂൾ. പാഴ്‌വസ്‌തുക്കൾ ഉപയോഗിച്ച് 25 അടി നീളത്തിലും പത്തടി വീതിയിലും വാഴയിലയുടെ മാതൃകയുണ്ടാക്കി അതിൽ ഓണസദ്യയുടെ വിഭവങ്ങളാണ് ഒരുക്കിയിരിക്കുന്നത്. പപ്പടം, പഴം, പായസം തുടങ്ങി 21 വിഭവങ്ങളുടെ മാതൃകയാണ് ആകർഷണീയമായ രീതിയിൽ തയാറാക്കിയിരിക്കുന്നത്. എൽകെജി മുതൽ പന്ത്രണ്ടാം ക്ലാസ് വരെയുള്ള കുട്ടികൾ ഏറെ കൗതുകത്തോടെയാണ് സ്‌കൂൾ അങ്കണത്തിലൊരുക്കിയിരിക്കുന്ന ഓണസദ്യ യുടെ മാതൃക കാണാനും ആസ്വദിക്കാനും എത്തുന്നത്. സ്കൂ‌ളിലെ കലാധ്യാപകരായ കെ.കെ. ജയിംസുകുട്ടി, അലൻ കെ. ജോസഫ് എന്നിവരുടെ നേതൃത്വത്തിലാണ് ഓണസദ്യയുടെ കൂറ്റൻ മാതൃക തയാറാക്കിയത്. ഇതോടൊപ്പം മനോഹരമായ പൂക്കളവും ഒരുക്കിയിട്ടുണ്ട്. ഓണാഘോഷ പരിപാടികളോടനുബന്ധിച്ച് മുഴുവൻ കുട്ടികളെയും പങ്കെടുപ്പിച്ചു വിവിധയിനം മത്സരങ്ങൾ നടത്തി. പായസവിതരണത്തോടെയാണ് ആഘോഷങ്ങൾ സമാപിച്ചത്. പ്രിൻസിപ്പൽ ഫാ. ആന്‍റണി തോക്കനാട്ട് ഓണസന്ദേശം നൽകി.

കേരള കോൺഗ്രസ്-എം മണ്ഡലം കൺവൻഷൻ

കാഞ്ഞിരപ്പള്ളി: കേരള കോൺഗ്രസ്-എം കാഞ്ഞിരപ്പള്ളി മണ്ഡലം കൺവൻഷൻ നാളെ വൈകുന്നേരം 5.30ന് കാഞ്ഞിരപ്പള്ളി സർക്കിൾ സഹകരണ യൂണിയൻ ഹാളിൽ നടക്കും. ചീഫ് വിപ്പ് ഡോ. എൻ. ജയരാജ്‌ കൺവൻഷൻ ഉദ്ഘാടനം ചെയ്യും. മണ്ഡലം പ്രസിഡന്‍റ ഷാജൻ മണ്ണംപ്ലാക്കൽ അധ്യക്ഷത വഹിക്കും. സെബാസ്റ്റ്യൻ കുളത്തുങ്കൽ എംഎൽഎ മുഖ്യപ്രഭാഷണം നടത്തും. ജോബ് മൈക്കിൾ എംഎൽഎ മുഖ്യാതിഥിയായിരിക്കും. പ്രഫ. ലോപ്പസ് മാത്യു, എ.എം. മാത്യു, ജെസി ഷാജൻ, ജോളി മടുക്കക്കുഴി, റിജോ വളാന്തറ, ബിജു ചക്കാല, റോസമ്മ പുളിക്കൽ, ജോയി നെല്ലിയാനി, ടി.ജെ. മോഹനൻ, ദിലീപ് ആന്‍റണി, ജോഷി അഞ്ചനാട്ട്, ഷാജി പുതിയാപറമ്പിൽ, കെ.ആർ. സജി, അജു പനക്കൽ, മനോജ്‌ ചീരാംകുഴി എന്നിവർ പ്രസംഗിക്കും. കാഞ്ഞിരപ്പള്ളിയിലെ പാർട്ടിയുടെ മുതിർന്ന നേതാക്കളെ ആദരിക്കും. പൊൻകുന്നം: കേരള കോൺഗ്രസ്-എം ചിറക്കടവ് മണ്ഡലം കൺവൻഷൻ നാളെ വൈകുന്നേരം 4.30ന് പടനിലം കെ.എം. മാണി നഗറിൽ നടക്കും. ചീഫ് വിപ്പ് ഡോ. എൻ. ജയരാജ് കൺവൻഷൻ ഉദ്ഘാടനം ചെയ്യും. മണ്ഡലം പ്രസിഡന്‍റ് ഷാജി നല്ലേപ്പറമ്പിൽ അധ്യക്ഷത വഹിക്കും. ജോബ് മൈക്കിൾ എംഎൽഎ മുഖ്യപ്രഭാഷണം നടത്തും. എ.എം. മാത്യു ആനിത്തോട്ടം, ഷാജി പാമ്പൂരി, സുമേഷ് ആൻഡ്രൂസ്, ആന്‍റണി മാർട്ടിൻ, കെ.എ. ഏബ്രഹാം, ഫിനോ പുതുപ്പറമ്പിൽ, രാഹുൽ ബി. പിള്ള എന്നിവർ പ്രസംഗിക്കും. പാർട്ടിയുടെ ആദ്യകാല പ്രവർത്തകരെയും വിവിധ മേഖലകളിൽ വിജയം കൈവരിച്ച പ്രമുഖരെയും ചടങ്ങിൽ ആദരിക്കും.

കാർഷിക തൊഴിൽ പരിശീലന പരിപാടി

വെളിച്ചിയാനി: പാറത്തോട് സർവീസ് സഹകരണബാങ്കിന്‍റെ നേതൃത്വത്തിൽ വെളിച്ചിയാനി സെന്‍റ് ജോസഫ്സ് സ്കൂൾ ഹാളിൽ കാർഷിക തൊഴിൽ പരിശീലന പരിപാടി നടത്തി. നബാർഡ് ഡിഡിഎം റജി വർഗീസ് ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് കെ.കെ. ശശികുമാർ അധ്യക്ഷത വഹിച്ചു. ബാങ്ക് പ്രസിഡന്‍റ് ജോർജുകുട്ടി ആഗസ്തി, ഡയറക്ടർ ബോർഡ് അംഗങ്ങളായ റെജി അങ്ങേവീട്ടിൽ, കെ.പി. സുജിലൻ, ഗോപിനാഥ്, സുബിൻ കല്ലൂക്കുന്നേൽ, പ്രിൻസ് വെട്ടം, വിജയമ്മ വിജയലാൽ, ഷേർളി വർഗീസ്, സെക്രട്ടി രേഖാമോൾ, പ്രോജക്‌ട് കോ-ഓർഡിനേറ്റർ ബിബിൻ ജോസഫ് തുടങ്ങിയർ പ്രസംഗിച്ചു. ആൻസി മാത്യു ക്ലാസ് നയിച്ചു. നൂറിലധികം കർഷക പ്രതിനിധികൾ പങ്കെടുത്തു.

മാർ സെബാസ്റ്റ്യൻ വാണിയപ്പുരയ്ക്കലിന് ആശംസകളർപ്പിച്ച് കാഞ്ഞിരപ്പള്ളി രൂപത

കാഞ്ഞിരപ്പള്ളി: കല്യാൺ അതിരൂപതയുടെ മെത്രാപ്പോലീത്തയായി നിയമിതനായ മാർ സെബാസ്റ്റ്യൻ വാണിയപ്പുരയ്ക്കലിന് ആശംസകളറിച്ച് മാതൃരൂപതയായ കാഞ്ഞിരപ്പള്ളി. തീക്ഷ്ണതയോടെ അജപാലന ശുശ്രൂഷ നിർവഹിക്കുന്ന മാർ വാണിയപ്പുരയ്ക്കലിന് ഏൽപ്പിക്കപ്പെട്ട പുതിയ ശുശ്രൂഷയിൽ കാഞ്ഞിരപ്പള്ളി രൂപതയൊന്നാകെ സന്തോഷിക്കുകയും പ്രാർഥനാശംസകൾ നേരുകയും ചെയ്യുന്നതായി കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ. മാർ വാണിയപ്പുരയ്ക്കലിലൂടെ കല്യാൺ അതിരൂപത ദൈവഹിതാനുസരണം തുടർന്നും മുന്നേറാനിടയാകട്ടെയെന്നും മാർ ജോസ് പുളിക്കൽ ആശംസിച്ചു. പുതിയ അതിരൂപതയായി ഉയർത്തപ്പെട്ട കല്യാൺ അതിരൂപത മെത്രാപ്പോലീത്ത മാർ സെബാസ്റ്റൻ വാണിയപ്പുരയ്ക്കലിനൊപ്പം നിയുക്ത മെത്രാപ്പോലിത്തമാരായ മാർ സെബാസ്റ്റ്യൻ വടക്കേൽ, മാർ പ്രിൻസ് പാണേങ്ങാടൻ, മാർ കുര്യാക്കോസ് ഭരണികുളങ്ങര, ബൽത്തങ്ങാടി അദിലാബാദ് രൂപതകളുടെ മെത്രാന്മാരായി നിയുക്തരായ ഫാ. ജയിംസ് പട്ടേലിൽ, ഫാ. ജോസഫ് തച്ചാറാത്ത് എന്നിവർക്കും മാർ മാത്യു അറയ്ക്കലിനൊപ്പം രൂപത കുടുംബത്തിന്‍റെ ആശംസകളറിയിക്കുന്നതായി മാർ ജോസ് പുളിക്കൽ പറഞ്ഞു.

ഇങ്ങനെ വേണോ? അല്പം വെയ്റ്റ് ചെയ്യൂ!

എലിവാലി: കൊല്ലപ്പള്ളി-മേലുകാവ് റോഡില്‍ എലിവാലി പള്ളി ജംഗ്ഷനിലെ വെയ്റ്റിംഗ് ഷെഡിന്‍റെ നിര്‍മാണം അശാസ്ത്രീയമെന്നു നാട്ടുകാരുടെ പരാതി. റോഡില്‍നിന്നു നിശ്ചിത അകലം പാലിക്കാതെയാണ് വെയ്റ്റിംഗ് ഷെഡ് നിർമിക്കുന്നതെന്നാണ് ആക്ഷേപം. യാത്രക്കാര്‍ക്കു ബസില്‍ കയറാനും ഇറങ്ങാനും സാധിക്കാത്ത വിധത്തിലാണ് പണികള്‍ ആരംഭിച്ചിരിക്കുന്നത്. അതുപോലെ യാത്രക്കാര്‍ വെയ്റ്റിംഗ് ഷെഡില്‍ കയറണമെങ്കിലും ഗോവണി വയ്‌ക്കേണ്ട സ്ഥിതിയാണെന്നു ചൂണ്ടിക്കാണിക്കപ്പെടുന്നു. പിഡബ്ല്യുഡി റോഡിലേക്കു തള്ളിനിൽക്കുന്നതിനാല്‍ അപകടത്തിനും വാഹനങ്ങൾക്കു മാർഗതടസത്തിനും വഴിവയ്ക്കും. ജിയോവാലി പള്ളി വക ഷോപ്പിംഗ് കോംപ്ലക്‌സ് മറച്ചാണ് നിർമാണമെന്ന പരാതിയും ഉയർന്നിട്ടുണ്ട്. വെയ്റ്റിംഗ് ഷെഡ് നിര്‍മാണത്തിനു മുമ്പും ശേഷവും ബന്ധപ്പെട്ട അധികാരികള്‍ക്കു പരാതി നൽകിയിട്ടും യാതൊരു നടപടിയും സ്വീകരിച്ചിട്ടില്ലെന്നു നാട്ടുകാര്‍ പറയുന്നു. അശാസ്ത്രീയ നിര്‍മാണത്തിനെതിരേ നാളെ രാവിലെ എട്ടിന് എലിവാലി ജംഗ്ഷനില്‍ ആം ആദ്മി പാര്‍ട്ടി നേതൃത്വത്തില്‍ പ്രതിഷേധയോഗം സംഘടിപ്പിക്കും. പാര്‍ട്ടി ജില്ലാ വൈസ് പ്രസിഡന്‍റ് റോയി വെള്ളരിങ്ങാട്ട് വിഷയാവതരണം നടത്തും.

കുടുംബങ്ങൾ സ്വർഗമെന്ന് അറിയപ്പെടണം: മോൺ. സെബാസ്റ്റ്യൻ വേത്താനത്ത്

കുറവിലങ്ങാട്: കുടുംബങ്ങൾ സ്വർഗമെന്ന് അറിയപ്പെടണമെന്നു പാലാ രൂപത വികാരി ജനറാൾ മോൺ. സെബാസ്റ്റ്യൻ വേത്താനത്ത് പറഞ്ഞു. പത്താമത് കുറവിലങ്ങാട് ബൈബിൾ കൺവൻഷന്‍റെ രണ്ടാം ദിനത്തിൽ വിശുദ്ധ കുർബാന അർപ്പിച്ച് സന്ദേശം നൽകുകയായിരുന്നു അദ്ദേഹം. മൂന്നാം ദിനമായ ഇന്നു വൈകുന്നേരം നാലിന് ജപമാല പ്രദക്ഷിണം. പള്ളിയോഗ പ്രതിനിധികളും കുടുംബകൂട്ടായ്മ ഭാരവാഹികളും നേതൃത്വം നൽകും. 4.30ന് വികാരി ജനറാൾ മോൺ. ജോസഫ് കണിയോടിക്കൽ വിശുദ്ധ കുർബാന അർപ്പിച്ചു സന്ദേശം നൽകും. തുടർന്ന് ഫാ. സേവ്യർഖാൻ വട്ടായിലും ഫാ. ബിനോയി കരിമരുതുങ്കലും നേതൃത്വം നൽകുന്ന വചനപ്രഘോഷണം. നാളെ 4.30ന് വികാരി ജനറാൾ മോൺ. ജോസഫ് മലേപ്പറമ്പിൽ വിശുദ്ധ കുർബാന അർപ്പിച്ചു സന്ദേശം നൽകും. സമാപന ദിനമായ സെപ്റ്റംബർ ഒന്നിന് 4.30ന് മുട്ടുചിറ പരിശുദ്ധ റൂഹാദ്ക്കുദിശ ഫൊറോന വികാരി ഫാ. ഏബ്രഹാം കൊല്ലിത്താനത്തുമലയിൽ വിശുദ്ധ കുർബാന അർപ്പിക്കും.

മാര്‍ സ്ലീവാ മെഡിസിറ്റിയില്‍ ഡിമന്‍ഷ്യ കെയര്‍ പ്രോഗ്രാം

പാലാ: മാര്‍ സ്ലീവാ മെഡിസിറ്റിയുടെ നേതൃത്വത്തില്‍ ഡിമന്‍ഷ്യ ബാധിച്ചവര്‍ക്കു വേണ്ടി ദി റീ കണക്‌ട് എന്ന പേരില്‍ ഡിമന്‍ഷ്യ കെയര്‍ പ്രോഗ്രാം ആരംഭിച്ചു. ജില്ലാ കളക്ടര്‍ ചേതന്‍കുമാര്‍ മീണ ഉദ്ഘാടനം നിര്‍വഹിച്ചു. പ്രായമായവര്‍ നേരിടുന്ന ആരോഗ് പ്രശ്‌നം മാത്രമല്ല ഒരു സാമൂഹികപ്രശ്‌നം കൂടിയാണ് ഡിമന്‍ഷ്യ എന്ന് കളക്ടര്‍ പറഞ്ഞു. ആശുപത്രി മാനേജിംഗ് ഡയറക്ടര്‍ മോണ്‍. ജോസഫ് കണിയോടിക്കല്‍ അധ്യക്ഷത വഹിച്ചു. നൂതന ചികിത്സാമാര്‍ഗങ്ങളിലൂടെ മറവിരോഗത്തിന് പ്രതിരോധം സൃഷ്ടിക്കാനുള്ള മാര്‍ഗങ്ങളാണ് മാര്‍ സ്ലീവാ മെഡിസിറ്റിയുടെ നേതൃത്വത്തില്‍ നടപ്പാക്കുന്നതെന്ന് അദ്ദേഹം പറഞ്ഞു. ഡിമന്‍ഷ്യ കെയര്‍ പ്രോഗ്രാമിന്‍റെ ഭാഗമായുള്ള വിആർ ടൂള്‍ ആന്‍ഡ് ന്യൂറോബ്ലൂം, എല്‍ഡേഴ്‌സ് മെമ്മറി വര്‍ക്ക് ബുക്ക് എന്നിവയുടെ പ്രകാശനവും മുഖ്യപ്രഭാഷണവും പാലാ നഗരസഭാ ചെയര്‍പേഴ്‌സണ്‍ തോമസ് പീറ്റര്‍ നിര്‍വഹിച്ചു. റീ കണക്‌ട് പ്രോഗ്രാമിനെക്കുറിച്ച് ന്യൂറോളജി വിഭാഗം കണ്‍സള്‍ട്ടന്‍റ് ഡോ. ജോസി ജെ. വള്ളിപ്പാലം വിശദീകരിച്ചു. ന്യൂറോളജി വിഭാഗം സീനിയര്‍ കണ്‍സള്‍ട്ടന്‍റ് ഡോ. അരുണ്‍ ജോര്‍ജ് തറയാനില്‍, ഈസ്ഡിമന്‍ഷ്യ ടെക്‌നോളജീസ് പ്രൈവറ്റ് ലിമിറ്റഡ് സിഇഒ ജോസ് ജോളി പൈനാടത്ത്, ചീഫ് ഓഫ് മെഡിക്കല്‍ സര്‍വീസസ് എയര്‍ കോമഡോര്‍ ഡോ. പോളിന്‍ ബാബു എന്നിവര്‍ പ്രസംഗിച്ചു.

ഓണം മൂഡിലായി നാട്, എങ്ങും ആഘോഷങ്ങള്‍

പാലാ: തിരുവോണത്തെ വരവേല്‍ക്കാന്‍ ഒരുങ്ങുകയാണ് മലയാളികള്‍. സ്‌കുളുകളിലും കോളജുകളിലും വിവിധ സ്ഥാപനങ്ങളിലും ഓണാഘോഷങ്ങള്‍ വിവിധ രീതികളില്‍ നടക്കുന്നു. പാലാ: സെന്‍റ് തോമസ് ഹയര്‍ സെക്കന്‍ഡറി സ്‌കൂളില്‍ ഓണാഘോഷം വിവിധ പരിപാടികളോടെ നടത്തി. പാലാ മുനിസിപ്പല്‍ വൈസ് ചെയര്‍പേഴ്‌സണ്‍ ബിജി ജോജോ ഉദ്ഘാടനം ചെയ്തു. സ്‌കൂള്‍ അങ്കണത്തില്‍നിന്ന് ആരംഭിച്ച വിളംബരറാലി പിടിഎ പ്രസിഡന്‍റ് വി.എം. തോമസ് ഫ്‌ളാഗ് ഓഫ് ചെയ്തു. വാദ്യമേളത്തിന്‍റെ അകമ്പടിയോടെ നടന്ന റാലിയില്‍ ഓണവുമായി ബന്ധപ്പെട്ട ഐതിഹ്യത്തിലെ കഥാപാത്രങ്ങളുടെ വേഷമണിഞ്ഞ് കുട്ടികള്‍ പങ്കെടുത്തു. പൊതുസമ്മേളനത്തില്‍ ഫാ. മാത്യു വെണ്ണായിപ്പള്ളില്‍ സന്ദേശം നൽകി. പ്രിന്‍സിപ്പല്‍ റെജിമോന്‍ കെ. മാത്യു, ചെയര്‍പേഴ്‌സണ്‍ അനീഷ് മാത്യൂസ് എന്നിവര്‍ പ്രസംഗിച്ചു. കുട്ടികളുടെ വിവിധ കലാപരിപാടികളും ഉണ്ടായിരുന്നു. രാമപുരം: മാര്‍ ആഗസ്തീനോസ് കോളജില്‍ സ്റ്റാഫ് അംഗങ്ങള്‍ക്കായി ഓറിയന്‍റേഷന്‍ പ്രോഗ്രാം സംഘടിപ്പിച്ചു. ഓണസംസ്‌കാരം വിജ്ഞാനത്തിലേക്ക് എന്ന വിഷയത്തില്‍ നടത്തിയ ബോധവത്കരണ പരിപാടി മുന്‍ എംജി യൂണിവേഴ്‌സിറ്റി വൈസ് ചാന്‍സലറും ദേശീയ വിദ്യാഭ്യാസ ന്യൂനപക്ഷ കമ്മീഷന്‍ അംഗവുമായ ഡോ. സിറിയക് തോമസ് ഉദ്ഘാടനം ചെയ്തു. കോളജ് മാനേജര്‍ ഫാ. ബെര്‍ക്കുമാന്‍സ് കുന്നുംപുറം അധ്യക്ഷത വഹിച്ചു. പ്രിന്‍സിപ്പല്‍ ഡോ. റെജി വര്‍ഗീസ് മേക്കാടന്‍, വൈസ് പ്രിന്‍സിപ്പല്‍മാരായ ഫാ. ജോസഫ് ആലഞ്ചേരില്‍, സിജി ജേക്കബ്, അഡ്മിനിസ്ട്രേറ്റീവ് ഓഫീസര്‍മാരായ രാജീവ് ജോസഫ്, പ്രകാശ് ജോസഫ്, ഐക്യുഎസി കോ-ഓര്‍ഡിനേറ്റര്‍ കിഷോര്‍, സ്റ്റാഫ് സെക്രട്ടറി സുനില്‍ കെ. ജോസഫ് തുടങ്ങിയവര്‍ പ്രസംഗിച്ചു. കുര്യനാട്: സെന്‍റ് ആൻസ് ഹയർ സെക്കൻഡറി സ്‌കൂളിൽ ഓണാഘോഷം - ആരവം 2025 നടത്തി. മലയാളി മങ്ക, കസേരകളി, ചാക്കിൽച്ചാട്ടം, തിരി കത്തിച്ചോട്ടം, ബോംബിംഗ് ദ സിറ്റി, വടംവലി തുടങ്ങിയ മത്സരങ്ങൾ കുട്ടികൾ ആവേശത്തോടെ ഏറ്റുവാങ്ങി. കുട്ടികളും അധ്യാപികമാരും അമ്മമാരും ചേർന്നൊരുക്കിയ മെഗാ തിരുവാതിര വേറിട്ട അനുഭവമായി. സാംസ്‌കാരിക സമ്മേളനത്തിൽ സാഹിത്യകാരൻ തേക്കിൻകാട് ജോസഫ് സന്ദേശം നൽകി. പഞ്ചായത്തംഗം സാബു തെങ്ങുംപള്ളിൽ, പ്രിൻസിപ്പൽ ഫാ. ജോബി മാത്തൻകുന്നേൽ, വൈസ് പ്രിൻസിപ്പൽ ജാൻസി തോമസ്, പിടിഎ പ്രസിഡന്‍റ് എൻ.ഡി. പൈലി എന്നിവർ പ്രസംഗിച്ചു.

പൂഞ്ഞാർ ഫൊറോന പള്ളിയിൽ മാതാവിന്‍റെ പിറവിത്തിരുനാളും എട്ടുനോമ്പാചരണവും

പൂഞ്ഞാർ: സെന്‍റ് മേരീസ് ഫൊറോന പള്ളിയിൽ മാതാവിന്‍റെ പിറവിത്തിരുനാളും എട്ടുനോമ്പാചരണവും നാളെ മുതൽ സെപ്റ്റംബർ ഒന്പതു വരെ ആഘോഷിക്കും. നാളെ രാവിലെ 5.30നും ഏഴിനും 9.45നും 11.30 നും വിശുദ്ധ കുർബാന, വൈകുന്നേരം നാലിന് വിശുദ്ധ കുർബാന, സന്ദേശം, കൊടിയേറ്റ് - ബിഷപ് മാർ ജോസഫ് സ്രാമ്പിക്കൽ. ആറിനു പുറത്തുനമസ്കാരം - ഫാ. അഗസ്റ്റിൻ കണ്ടത്തിൽക്കുടിലിൽ. സെപ്റ്റംബർ ഒന്നുമുതൽ ആറുവരെ എല്ലാ ദിവസവും രാവിലെ 5.30നും 6.30നും പത്തിനും വൈകുന്നേരം 4.30നും വിശുദ്ധ കുർബാന. വൈകുന്നേരത്തെ വിശുദ്ധ കുർബാനയ്ക്കു ശേഷം ജപമാല-മെഴുകുതിരി പ്രദക്ഷിണം. ഏഴിനു രാവിലെ 5.30നും ഏഴിനും 9.45നും 11.30നും വൈകുന്നേരം 4.30നും വിശുദ്ധ കുർബാന, സന്ദേശം, നൊവേന. ഉച്ചകഴിഞ്ഞ് മൂന്നിന് തിരുസ്വരൂപ പ്രതിഷ്ഠ. വൈകുന്നേരം ആറിന് തിരുനാൾ പ്രദക്ഷിണം. സന്ദേശം - റവ. ഡോ. കുര്യൻ മുക്കാംകുഴി യിൽ. ഒന്പതിനു പ്രദക്ഷിണം സമാപനം. എട്ടിനു രാവിലെ 5.30നും 6.30നും വിശുദ്ധ കുർബാന, നൊവേന. 9.30ന് മേരീനാമധാരീ സംഗമം. പത്തിന് തിരുനാൾ കുർബാന - ഫാ. മാത്യു വെണ്ണായിപ്പള്ളി. സന്ദേശം - റവ.ഡോ. ഷീൻ പാലയ്ക്കത്തടത്തിൽ. 12ന് തിരുനാൾ പ്രദക്ഷിണം. ഒന്നിന് സ്നേഹവിരുന്ന്. വൈകുന്നേരം 5.30ന് വിശുദ്ധ കുർബാന, സന്ദേശം, നൊവേന - ഫാ. ജോസഫ് കദളിയിൽ. 6.30ന് തിരുസ്വരൂപ പുനഃപ്രതിഷ്ഠ. ഒന്പതിനു രാവിലെ 5.30നു വിശുദ്ധ കുർബാന, സെമിത്തേരി സന്ദർശനം. തുടർന്ന് കൊടിയിറക്ക്.

പാലാ രൂപതയും വിളക്കുമാടവും ആഹ്ലാദത്തില്‍

പാലാ: ഉജ്ജൈന്‍ ആര്‍ച്ച്ബിഷപ്പായി മാര്‍ സെബാസ്റ്റ്യന്‍ വടക്കേല്‍ (72) നിയമിതനായതിന്‍റെ ആഹ്ലാദത്തിൽ പാലാ രൂപതയും ജന്മനാടായ വിളക്കുമാടവും വടക്കേല്‍ കുടുംബവും. പാലാ രൂപതയില്‍പ്പെട്ട വിളക്കുമാടം സെന്‍റ് ഫ്രാന്‍സിസ് സേവ്യര്‍ ഇടവകാംഗമാണ്. ആത്മീയചൈതന്യം നിറഞ്ഞു നില്‍ക്കുന്ന പ്രാര്‍ഥനാനിരതമായ ജീവിതമാണ് അദ്ദേഹത്തിന്‍റേതെന്നു നാട്ടുകാരും വിശ്വാസികളും സാക്ഷ്യപ്പെടുത്തുന്നു. കഴിഞ്ഞ മാസം ഭരണങ്ങാനത്ത് വിശുദ്ധ അല്‍ഫോന്‍സാമ്മയുടെ തിരുനാളില്‍ പങ്കെടുക്കുന്നതിനും വിശുദ്ധ കുര്‍ബാന അര്‍പ്പിച്ച് സന്ദേശം നല്‍കുന്നതിനും അദ്ദേഹം എത്തിയിരുന്നു. നാട്ടിലെത്തുമ്പോഴൊക്കെ അയല്‍വാസികളോടും ബന്ധുമിത്രാദികളോടും കൂടാതെ പാലാ ബിഷപ്സ് ഹൗസിലെത്തി മാര്‍ ജോസഫ് പള്ളിക്കാപറമ്പിലിനോടും മാര്‍ ജോസഫ് കല്ലറങ്ങാട്ടിനോടും സ്‌നേഹാന്വേഷണങ്ങള്‍ നടത്തിയേ മടങ്ങാറുള്ളൂ. വിളക്കുമാടം വടക്കേല്‍ പരേതരായ ദേവസ്യയുടെയും മേരിയുടെയും മകനായി 1952 ഒക്ടോബര്‍ ഏഴിനാണ് ജനനം. പത്താം ക്ലാസ് വരെ വിളക്കുമാടം സെന്‍റ് ജോസഫ്‌സ് ഹൈസ്‌കൂളില്‍ പഠനം. തുടര്‍ന്ന് സെന്‍റ് തോമസ് മിഷനറി സൊസൈറ്റി വൈദിക വിദ്യാര്‍ഥിയായി മേലമ്പാറ ദീപ്തിയില്‍ പഠനം. 1979 ഏപ്രില്‍ 19നു വൈദികനായി. മേലമ്പാറ ദീപ്തി സെമിനാരിയില്‍ പ്രഫസര്‍, റെക്ടര്‍ എന്നീ നിലകളില്‍ പ്രവര്‍ത്തിച്ചു. റോമില്‍നിന്നു കാനന്‍ നിയമത്തില്‍ പിഎച്ച്ഡി നേടിയ അദ്ദേഹം ഉജ്ജൈന്‍ കത്തീഡ്രല്‍ വികാരി, എംഎസ്ടി സഭാ ഡയറക്ടര്‍ ജനറല്‍ തുടങ്ങിയ നിലകളിലും പ്രവര്‍ത്തിച്ചു. 1998 സെപ്റ്റംബര്‍ എട്ടിന് ഉജ്ജൈന്‍ രൂപതയുടെ അധ്യക്ഷനായി നിയമിതനായി. ഇപ്പോള്‍ മെത്രാപ്പോലീത്ത പദവിയിലേക്ക്. വി.ഡി.തോമസ്, റോസമ്മ ചെത്തിമറ്റത്തില്‍, ജോസ്, മാത്യു, ജെസി കാരക്കാട്ട് എന്നിവരാണു സഹോദരങ്ങള്‍.

ഓർമകളുടെ ട്രെയിൻ കയറി കുറവിലങ്ങാട്ടേക്ക് വീണ്ടും മാർ പട്ടേരിൽ

കുറവിലങ്ങാട്: ജീവിതത്തിൽ ആദ്യമായി ട്രെയിനിൽ കയറിയത് മംഗലാപുരത്തുനിന്നു കുറവിലങ്ങാട്ടേക്കായിരുന്നുവെന്ന് നിയുക്ത മെത്രാൻ മാർ ജയിംസ് പട്ടേരിൽ. വൈദിക വിദ്യാർഥിയായി ക്ലാരറ്റ്ഭവനിലേക്കുള്ള യാത്ര. കൂത്താട്ടുകുളം വടകരയിൽനിന്നു മംഗലാപുരത്തേക്കു കുടിയേറിയ കുടുംബത്തെ കുറവിലങ്ങാടുമായും പ്രത്യേകിച്ച് മുത്തിയമ്മയുമായി വിളക്കിച്ചേർത്ത യാത്രകളുടെ തുടക്കമായിരുന്നു അത്. ബൽത്തങ്ങാടി രൂപത നിയുക്ത മെത്രാനായി തെരഞ്ഞെടുക്കപ്പെട്ട ശേഷം ആദ്യമായി കുറവിലങ്ങാട് പള്ളിയിലെത്തിയ മാർ ജയിംസ് പട്ടേരിയുടെ വാക്കുകളിൽ കുറവിലങ്ങാടിനോടും മുത്തിയമ്മയോടുമുള്ള സ്നേഹം നിറഞ്ഞുനിന്നു. ഭാരതത്തിൽ ആദ്യമായി കുറവിലങ്ങാട് പ്രവർത്തനം തുടങ്ങിയ ക്ലാരീഷ്യൻ സഭയ്ക്ക് കുറവിലങ്ങാട് മുത്തിയമ്മ തെളിച്ചുനൽകിയ നീരുറവ ഉള്ളിടത്തോളം കാലം ദൈവവിളിക്കു കുറവുണ്ടാകില്ലെന്ന് ഉറപ്പുണ്ടെന്നു മാർ പട്ടേരിൽ പറഞ്ഞു. വൈദികനായ ശേഷം മൂന്നു വർഷം ക്ലാരറ്റ് ഭവനിലെ സേവനത്തിനിടെ മുത്തിയമ്മയുടെ അരികിലെത്താനും പള്ളിയിലെ ശുശ്രൂഷകളിൽ പങ്കുചേരാനുമായി. കുറവിലങ്ങാട് മൂന്നുനോമ്പ് തിരുനാളിലെത്തി വാങ്ങിയ ഒരു പെട്ടി ഇപ്പോഴും വീട്ടിലുണ്ടെന്നും മാർ ജയിംസ് പറഞ്ഞു. മാർ ജയിംസ് പട്ടേരിയെ ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, സീനിയർ അസി. വികാരി ഫാ. ജോസഫ് മണിയഞ്ചിറ, അസി. വികാരിമാരായ ഫാ. പോൾ കുന്നുംപുറത്ത്, ഫാ. ആന്‍റണി വാഴക്കാലായിൽ, ഫാ. ജോസഫ് ചൂരയ്ക്കൽ, ഫാ. തോമസ് താന്നിമലയിൽ, പാസ്റ്ററൽ അസിസ്റ്റന്‍റുമരായ ഫാ. ജോസ് കോട്ടയിൽ, ഫാ. പോൾ മഠത്തിക്കുന്നേൽ, കൈക്കാരന്മാർ, പള്ളിയോഗാംഗങ്ങൾ, കുടുംബകൂട്ടായ്മ ഭാരവാഹികൾ എന്നിവർ ചേർന്നു സ്വീകരിച്ചു. ക്ലരീഷ്യൻ സഭ പ്രൊവിൻഷ്യൽ സുപ്പീരിയർ ഫാ. സിബി ഞാവള്ളിക്കുന്നേൽ, ക്ലാരറ്റ് ഭവൻ സുപ്പീരിയർ ഫാ. തോമസ് പൈങ്ങോട്ടൂർ എന്നിവരും നിയുക്ത മെത്രാനൊപ്പം എത്തിയിരുന്നു. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി അദ്ദേഹത്തെ സ്വാഗതം ചെയ്തു. സെക്രട്ടറി ബെന്നി കോച്ചേരി ആശംസ നേർന്നു.

വടക്കേക്കര സ്‌കൂളില്‍ ഭക്ഷ്യമേള

വടക്കേക്കര: ഗവൺമെന്‍റ് ഹയര്‍ സെക്കന്‍ഡറി സ്‌കൂളില്‍ പോഷകാഹാര പ്രദര്‍ശനവും ഭക്ഷ്യ മേളയും മാടപ്പള്ളി ബ്ലോക്ക് പഞ്ചായത്ത് മെംബര്‍ വര്‍ഗീസ് ആന്‍റണി ഉദ്ഘാടനം ചെയ്തു. ഹെഡ്മിസ്ട്രസ് എന്‍. നൂര്‍ജഹാന്‍ അധ്യക്ഷത വഹിച്ചു. സുജ മേരി ജോര്‍ജ്, സുമിത ഐസക് എന്നിവര്‍ പ്രസംഗിച്ചു.

ഇത്തിത്താനം പള്ളിയില്‍ ഇടവകത്തിരുനാള്‍

ഇത്തിത്താനം: ഇത്തിത്താനം സെന്‍റ് മേരീസ് പള്ളിയില്‍ എട്ടുനോമ്പാചരണവും ഇടവക തിരുനാളും 31 മുതല്‍ സെപ്റ്റംബര്‍ എട്ടുവരെ നടക്കും. 31ന് വൈകുന്നേരം നാലിന് വികാരി ഫാ. ഫ്രാന്‍സിസ് പുല്ലുകാട്ട് കൊടിയേറ്റും. തുരുത്തി ഫെറോനാപള്ളി വികാരി ഫാ. ജേക്കബ് ചീരംവേലില്‍ വിശുദ്ധ കുര്‍ബാനയര്‍പ്പിക്കും. സെപ്റ്റംബര്‍ ഒന്നുമുതല്‍ ഏഴുവരെ തീയതികളില്‍ രാവിലെ ആറിനും വൈകുന്നേരം 4.30ന് വിശുദ്ധകുര്‍ബാന. വിവിധ ദിവസങ്ങളില്‍ ഫാ. വില്‍സണ്‍ ചാവറക്കുടിലില്‍, ഫാ. മാത്യു വടക്കേടത്ത്, ഫാ. ജേക്കബ് അഞ്ചുപങ്കില്‍, റവ.ഡോ. സാവിയോ മാനാട്ട്, റവ.ഡോ. സിറിയക് വലിയകുന്നുംപുറം, റവ.ഡോ. ജോസ് തെക്കേപ്പുറത്ത്, ഫാ. ആന്‍റണി പോരൂക്കര, ഫാ. ആന്‍സിലോ തുരുത്തിപ്പറമ്പില്‍ എന്നിവര്‍ വിശുദ്ധ കുര്‍ബാന അര്‍പ്പിച്ച് സന്ദേശം നല്‍കും. പ്രധാന തിരുനാള്‍ ദിനമായ എട്ടിന് വൈകുന്നേരം 4.30ന് മോണ്‍. ജോണ്‍ തെക്കേക്കര ആഘോഷമായ തിരുനാള്‍ കുര്‍ബാനയര്‍പ്പിക്കും. ഫാ. ആന്‍റണി കാച്ചാംകോട്, ഫാ. ഡെന്‍സി മുണ്ടുനടയ്ക്കല്‍ എന്നിവര്‍ സഹകാര്‍മികരായിരിക്കും. ആറിന് പള്ളിയില്‍നിന്നാരംഭിച്ച് കുതിരപ്പടി, കല്ലുകടവ്, ചാലച്ചിറവഴി തിരുനാള്‍ പ്രദക്ഷിണം. തുടര്‍ന്ന് ആകാശവിസ്മയം, താളമേള പ്രദര്‍ശനം, ആദ്യഫലലേലം. അഞ്ചിന് വൈകുന്നേരം വിശുദ്ധകുര്‍ബാനയ്ക്കുശേഷം പൂര്‍വികസ്മരണ, 6.45ന് ഇടവകാംഗങ്ങള്‍ അവതരിപ്പിക്കുന്ന വിവിധകലാപരിപാടികള്‍, ഏഴിന് വൈകുന്നേരം അഞ്ചിന് ഗാനസന്ധ്യ.

കോണ്‍ഗ്രസ് ജനസമ്പര്‍ക്ക പരിപാടി ഇന്നുമുതല്‍

കോട്ടയം: തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പ് പ്രചരണവുമായി കോണ്‍ഗ്രസ് ജനസമ്പര്‍ക്ക പരിപാടി ഇന്നുമുതല്‍ സെപ്റ്റംബര്‍ രണ്ടു വരെ നടക്കും. ജില്ലയിലെ 1431 വാര്‍ഡുകളിലും ഇന്നു രാവിലെ എട്ടുമുതല്‍ ഗൃഹസമ്പര്‍ക്ക പരിപാടി ആരംഭിക്കും. ജില്ലയിലെ എല്ലാ നേതാക്കളും അവരവരുടെ വാര്‍ഡുകളില്‍ ഭവന സന്ദര്‍ശനത്തില്‍ പങ്കാളികളാകുമെന്നും തദ്ദേശ തെരഞ്ഞെടുപ്പില്‍ ജില്ലയില്‍ മികച്ച വിജയം ഉണ്ടാകുമെന്നും ഡിസിസി പ്രസിഡന്‍റ് നാട്ടകം സുരേഷ് പറഞ്ഞു.

കുറിച്ചിയില്‍ ബന്ദിപ്പൂ ഉത്സവം

കുറിച്ചി: ഓണവിപണി ലക്ഷ്യമിട്ട് കുറിച്ചി പഞ്ചായത്ത് വാര്‍ഡ് 12ലെ മഹാദേവന്‍ വയോജന അയല്‍ക്കൂട്ടം അംഗങ്ങളുടെ നേതൃത്വത്തില്‍ നടത്തിയ ബന്ദിപ്പൂ കൃഷിയുടെ വിളവെടുപ്പ് പഞ്ചായത്ത് പ്രസിഡന്‍റ് സുജാത സുശീലന്‍ ഉദ്ഘാടനം ചെയ്തു. വാര്‍ഡ് മെംബര്‍ ബിജു എസ്. മേനോന്‍ അധ്യക്ഷത വഹിച്ച ചടങ്ങില്‍ വിവിധ സ്റ്റാന്‍ഡിംഗ് കമ്മിറ്റി ചെയര്‍പേഴ്സണ്‍മാരായ പ്രീതാകുമാരി കെ., പ്രശാന്ത് മനന്താനം, പഞ്ചായത്തംഗം അനീഷ് തോമസ്, അയല്‍ക്കൂട്ടം ഭാരവാഹികളായ കെ.കെ. രാജു, പൊന്നമ്മ രാജപ്പന്‍ തുടങ്ങിയവര്‍ പ്രസംഗിച്ചു. കുറിച്ചി പഞ്ചായത്ത് 2025-26 വാര്‍ഷിക പദ്ധതിയില്‍ ഉള്‍പ്പെടുത്തി 1,38,000 രൂപ സബ്‌സിഡി നല്‍കിയാണ് ബന്ദി വിവിധ വാര്‍ഡുകളിലെ കുടുംബശ്രീ മുഖേന കൃഷി ഇറക്കിയത്. ഈ വര്‍ഷത്തെ പ്രതികൂല കാലാവസ്ഥ അതിജീവിച്ച് നൂറുമേനി വിളവാണ് കുടുംബശ്രീ അംഗങ്ങള്‍ നേടിയത്. ബന്ദിപ്പൂ ആവശ്യമുള്ളവര്‍ക്ക് +91 8139018484 നമ്പരില്‍ വിളിക്കാം.

കുടുംബശ്രീ ജില്ലാതല ഓണം വിപണനമേള നാളെ മുതല്‍ ചങ്ങനാശേരിയില്‍

ചങ്ങനാശേരി: കുടുംബശ്രീ ജില്ലാതല ഓണം വിപണന മേള നാളെ മുതല്‍ സെപ്റ്റംബര്‍ മൂന്നുവരെ ചങ്ങനാശേരി പിഎംജെ ഗ്രൗണ്ടില്‍ സംഘടിപ്പിക്കും. സംരംഭകര്‍, ഉപഭോക്താക്കള്‍, കുടുംബശ്രീ പ്രവര്‍ത്തകര്‍, തദ്ദേശസ്വയംഭരണ സ്ഥാപനങ്ങള്‍ കുടുംബശ്രീ ഉദ്യോഗസ്ഥര്‍ എന്നിവരുടെ സാന്നിധ്യവും സഹകരണവും കുടുംബശ്രീ വിപണന മേളയിലുണ്ടാകും. തനിമയും പരിശുദ്ധിയും കേരളീയതയുമുള്ള ഗുണനിലവാരമുള്ളതും മായം കലരാത്തതുമായ ഉത്പന്നങ്ങള്‍ മിതമായ നിരക്കില്‍ ലഭ്യമാക്കുക എന്ന ഉദ്ദേശത്തോടെയാണ് ഓണം വിപണനമേളകള്‍ സംഘടിപ്പിക്കുന്നത്. ഓണം കുടുംബശ്രീക്കൊപ്പം എന്ന ടാഗ് ലൈനോടെ ചങ്ങനാശേരി നഗരസഭാ കുടുംബശ്രീ സിഡിഎസിന്‍റെ ആഭിമുഖ്യത്തിലാണ് ഈ വര്‍ഷത്തെ ജില്ലാതല ഓണം വിപണനമേള ചങ്ങനാശേരിയില്‍ സംഘടിപ്പിക്കുന്നത്. നാളെ രാവിലെ 9.30ന് ചങ്ങനാശേരി നഗരസഭാ വൈസ് ചെയര്‍മാന്‍ മാത്യൂസ് ജോര്‍ജിന്‍റെ അധ്യക്ഷതയില്‍ ജോബ് മൈക്കിള്‍ എംഎല്‍എ ജില്ലാതല മേളയുടെ ഉദ്ഘാടനം നിര്‍വഹിക്കും. നഗരസഭാ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍ ആദ്യ വില്പന നിര്‍വഹിക്കും. കുടുംബശ്രീ ജില്ലാ മിഷന്‍ കോ-ഓര്‍ഡിനേറ്റര്‍ അഭിലാഷ് ദിവാകര്‍ മുഖ്യപ്രഭാഷണം നടത്തും. കുടുംബശ്രീ ഗ്രൂപ്പുകള്‍ തയാറാക്കിയ ചിപ്‌സുകള്‍, നാടന്‍ പലഹാരങ്ങള്‍ ശുദ്ധമായ വെളിച്ചെണ്ണയില്‍ തയാറാക്കിയ ചിപ്‌സ്, നാടന്‍ പലഹാരങ്ങള്‍, കറിപൗഡറുകള്‍, ധാന്യപ്പൊടികള്‍, വെളിച്ചെണ്ണ, പലതരം അച്ചാറുകള്‍, കരകൗശല വസ്തുക്കള്‍, ഏത്തക്കുല, പുളി, പപ്പടം, സോപ്പ്, സോപ്പ് ഉല്‍പന്നങ്ങള്‍, പച്ചക്കറികള്‍ തുടങ്ങി നിരവധി ഉത്പന്നങ്ങള്‍ മേളയില്‍ ലഭ്യമാണ്. കൂടാതെ 15 ഇനം ഉത്പന്നങ്ങള്‍ അടങ്ങിയ കുടുംബശ്രീ ഓണക്കിറ്റ് 750 രൂപ നിരക്കില്‍ മേളയില്‍ നിന്നും ലഭിക്കും. പായസമേളയും അച്ചാര്‍ മേളയും ഒരുക്കിയിട്ടുണ്ട്. എല്ലാ ദിവസവും കുടുംബശ്രീ അംഗങ്ങളുടെ വിവിധ കലാപരിപാടികള്‍ ഉണ്ടായിരിക്കും. ചങ്ങനാശേരി നഗരസഭയിലും മാടപ്പള്ളി ബ്ലോക്കിലും ഉള്‍പ്പെട്ട കുടുംബശ്രീ സിഡിഎസുകളിലെ 35ലധികം സംരംഭകര്‍ മേളയില്‍ പങ്കെടുക്കും. തൊഴില്‍ രജിസ്‌ട്രേഷന്‍ കൗണ്ടര്‍ തൊഴില്‍ രഹിതരായ യുവതിയുവാക്കള്‍ക്കു തൊഴില്‍ നല്‍കുന്നതിന് വേണ്ടി കുടുംബശ്രീ വിജ്ഞാന കേരളം ഓണത്തിന് ഒരു ലക്ഷം തൊഴില്‍ പദ്ധതിയുടെ ഭാഗമായി പ്രത്യേക രജിസ്‌ട്രേഷന്‍ കൗണ്ടറും മേളയില്‍ പ്രവര്‍ത്തിക്കും. രജിസ്ട്രേഷന്‍ നടത്തുന്നവര്‍ക്ക് വിവിധ സ്ഥാപനങ്ങള്‍ മുഖാന്തിരം തൊഴില്‍ ലഭ്യമാക്കുന്നതാണ്.

കേരളത്തിലെ 80 നോണ്‍-ഡെലിവറി പോസ്റ്റ് ഓഫീസുകള്‍ അടച്ചുപൂട്ടുന്നു

ചങ്ങനാശേരി: കേരളത്തില്‍ ഏകദേശം 80ഓളം നോണ്‍-ഡെലിവറി പോസ്റ്റ് ഓഫീസുകള്‍ അടച്ചുപൂട്ടാനുള്ള നീക്കം ഡിപ്പാര്‍ട്ട്‌മെന്‍റ് ആരംഭിച്ചു. ചങ്ങനാശേരി പരിധിയിലെ പെരുന്ന, മാര്‍ക്കറ്റ്, കോളജ് പോസ്റ്റ് ഓഫീസുകള്‍ അടക്കം നിരവധി ഓഫീസുകള്‍ അടച്ചുപൂട്ടാനുള്ള പട്ടികയില്‍ ഉള്‍പ്പെടുത്തിയിട്ടുണ്ട്. വിദ്യാര്‍ഥികള്‍ക്കും വ്യാപാരികള്‍ക്കും ചെറുകിട സംരംഭകര്‍ക്കും മുതിര്‍ന്ന പൗരന്മാര്‍ക്കും ഉള്‍പ്പെടെ നിരവധി വിഭാഗങ്ങള്‍ക്ക് ഇത്തരം നോണ്‍-ഡെലിവറി പോസ്റ്റ് ഓഫീസുകള്‍ അനിവാര്യമായ സേവനങ്ങള്‍ നല്‍കുന്നുണ്ട്. പൊതുജനങ്ങളുടെ സാമ്പത്തിക ഇടപാടുകള്‍ക്കും ആശയവിനിമയത്തിനും വിവിധ സര്‍ക്കാര്‍ പദ്ധതികളുടെ ആനുകൂല്യങ്ങള്‍ ലഭ്യമാക്കുന്നതിനും തപാല്‍ സേവനങ്ങളുടെ സാന്നിധ്യം അത്യന്താപേക്ഷിതമാണ്. പൂട്ടരുത്, നവീകരിച്ച് നിലനിര്‍ത്തണം നോണ്‍-ഡെലിവറി പോസ്റ്റ് ഓഫീസുകള്‍ അടച്ചുപൂട്ടുന്നത് പൊതുജനങ്ങള്‍ക്ക് വലിയ ബുദ്ധിമുട്ടുകള്‍ സൃഷ്ടിക്കും. അടിസ്ഥാന തപാല്‍ സേവനങ്ങള്‍ക്കായി ആളുകള്‍ക്കു ദൂരെയുള്ള ഓഫീസുകളെ ആശ്രയിക്കേണ്ടി വരും. അടച്ചുപൂട്ടല്‍ നടപടികള്‍ക്കു പകരം ഇത്തരം ഓഫീസുകള്‍ നവീകരിച്ച് ജനങ്ങള്‍ക്ക് കൂടുതല്‍ കാര്യക്ഷമമായ സേവനങ്ങള്‍ നല്‍കുന്ന രീതിയില്‍ ശക്തിപ്പെടുത്തണം. കൊടിക്കുന്നില്‍ സുരേഷ് എംപി മാവേലിക്കര പാര്‍ലമെന്‍റ് നിയോജകമണ്ഡലം

വലിയകുളം ബ്ലാക്ക്‌സ്‌പോട്ട് ജംഗ്ഷനില്‍ ഇനിയെങ്കിലും വേണ്ടേ സുരക്ഷ?

ചങ്ങനാശേരി: നാറ്റ്പാക് അപകടമേഖലയായി പ്രഖ്യാപിച്ചിരിക്കുന്ന ചങ്ങനാശേരി-വാഴൂര്‍ റോഡിലെ വലിയകുളം ജംഗ്ഷനില്‍ സുരക്ഷാ ക്രമീകരണങ്ങള്‍ വൈകരുതെന്ന അഭിപ്രായം ഉയരുന്നു. ചീരഞ്ചിറ, പുതുച്ചിറ റോഡുകള്‍ വാഴൂര്‍ റോഡില്‍ സംഗമിക്കുന്ന ജംഗ്ഷനാണിത്. കുരിശുംമൂട്, തെങ്ങണ ഭാഗങ്ങളില്‍നിന്നും അതിവേഗതയില്‍ വാഹനങ്ങളെത്തുമ്പോള്‍ ചീരഞ്ചിറ റോഡില്‍നിന്നും ജംഗ്ഷനിലേക്കു പ്രവേശിക്കുന്ന വാഹനങ്ങള്‍ അപകടത്തില്‍പ്പെടുന്നത് പതിവാണ്. ചീരഞ്ചിറ റോഡില്‍നിന്നു വരുന്ന വാഹനങ്ങളുടെ കാഴ്ചമറയ്ക്കുന്ന തരത്തിലാണ് ജംഗ്ഷനിലെ തടിമില്ല് സ്ഥിതി ചെയ്യുന്നത്. ഈ റോഡില്‍നിന്നു തെങ്ങണ, കുരിശുംമൂട് ഭാഗങ്ങളിലേക്കു തിരിയുമ്പോള്‍ വാഴൂര്‍ റോഡിലൂടെ വേഗത്തില്‍ എത്തുന്ന വാഹനങ്ങളുമായി കൂട്ടിയിടിക്കുന്നതും പതിവാണ്. ഈ ജംഗ്ഷനില്‍ വിവിധ അപകടങ്ങളിലായി ഒരു ഡസനോളം ആളുകള്‍ മരണപ്പെടുകയും പരിക്കേറ്റ ഏതാനുംപേര്‍ ചികിത്സയിലുമാണ്. ദിശാബോര്‍ഡുകള്‍ മാഞ്ഞു ജംഗ്ഷനാണെന്ന് അറിയിക്കുന്ന ദിശാബോര്‍ഡുകള്‍ ഇവിടെയില്ല. ചങ്ങനാശേരി -വാഴൂര്‍ റോഡില്‍ ഡിവൈഡര്‍, സീബ്രാ ലൈനുകളും അപ്രത്യക്ഷമാണ്. മടുക്കമൂടിനും വലിയകുളത്തിനുമിടയിലുള്ള നേരിയ വളവും കയറ്റവും അപകടസാധ്യത വര്‍ധിപ്പിക്കുന്നു. അനധികൃത കൈയേറ്റങ്ങളും പാര്‍ക്കിംഗും ഏറെ പ്രശ്‌നങ്ങള്‍ സൃഷ്ടിക്കുന്നു. വലിയകുളം-ചീരഞ്ചിറ-പാറപ്പാട്ടുപടി റോഡ് വികസനസാധ്യതാ പട്ടികയില്‍ വലിയകുളത്തുനിന്നുമാരംഭിച്ച് ചീരഞ്ചിറവഴി തെങ്ങണ-ഏറ്റുമാനൂര്‍ റോഡില്‍ പ്രവേശിക്കുന്ന റോഡും പാത്തിക്കല്‍മുക്ക്-പുതുച്ചിറ-ഏനാചിറ റോഡും വികസന സാധ്യതാപട്ടികയിലുള്ളതാണ്. ഈ റോഡുകളുടെ വികസനം സാധ്യമായാല്‍ കുരിശുംമൂട്, തെങ്ങണ ജംഗ്ഷനുകളിലെ ഗതാഗതക്കുരുക്കും തടസങ്ങളും ഒരു പരിധിവരെ ഒഴിവാക്കാനാകുമെന്നാണ് വിദഗ്ധര്‍ ചൂണ്ടിക്കാട്ടുന്നത്. ഈ റോഡുകളുടെ വികസനത്തിന് വലിയകുളം ജംഗ്ഷന്‍റെ വളര്‍ച്ച അനിവാര്യമാണ്. വലിയകുളം ജംഗ്ഷനടുത്തുള്ള സ്വകാര്യഫ്‌ളാറ്റും ചീരഞ്ചിറ ബാങ്കിനു സമീപത്ത് ആരംഭിക്കുന്ന സ്വകാര്യ ഗോഡൗണും പ്രവര്‍ത്തനക്ഷമമാകുമ്പോള്‍ വലിയകുളത്തെ തിരക്ക് വര്‍ധിക്കാനിടയുണ്ട്. ഈ സാഹചര്യങ്ങള്‍ മുന്‍കൂട്ടി കണ്ട് നടപടികള്‍ സ്വീകരിക്കാന്‍ വാഴപ്പള്ളി പഞ്ചായത്ത്, പൊതുമരാമത്തുവകുപ്പ്, ജനപ്രതിനിധികള്‍ തുടങ്ങിയവര്‍ കൂട്ടായ ആലോചനകള്‍ നടത്തണമെന്ന നിര്‍ദേശവും ഉയര്‍ന്നിട്ടുണ്ട്.

അയ്യന്‍കാളി ജന്മദിനം ആഘോഷിച്ചു

കോട്ടയം: അഖില കേരള ചേരമര്‍ ഹിന്ദു മഹാസഭ സംസ്ഥാന കമ്മിറ്റിയുടെ നേതൃത്വത്തില്‍ കോട്ടയത്ത് നടത്തിയ അയ്യന്‍കാളിയുടെ 162-ാം ജന്മദിനാഘോഷം തിരുവഞ്ചൂര്‍ രാധാകൃഷ്ണന്‍ എംഎല്‍എ ഉദ്ഘാടനം ചെയ്തു. സംസ്ഥാനത്ത് കിഫ്ബി ഫണ്ട് വിനിയോഗത്തില്‍ പട്ടികജാതി സമൂഹത്തെ പരിഗണിക്കാത്തത് ഇവരോടു കാണിച്ച വഞ്ചനയാണെന്നും ഈ ഫണ്ട് പട്ടിക വിഭാഗങ്ങളുടെ ഉന്നമനത്തിനായി ഉപയോഗിച്ചിരുന്നെങ്കില്‍ ലൈഫ് അടക്കമുള്ള ഭവന പദ്ധതികളിലുള്ള പരാതികള്‍ക്കു പരിഹാരം കാണാമായിരുന്നുവെന്നും അദ്ദേഹം പറഞ്ഞു. മഹാസഭ പ്രസിഡന്‍റ് എസ്. ബാബു അധ്യക്ഷത വഹിച്ചു. എസ്എസ്എല്‍സി, പ്ലസ്ടു വിദ്യാഭ്യാസ അവാര്‍ഡ് വിതരണം കോട്ടയം മുനിസിപ്പല്‍ ചെയര്‍പേഴ്‌സന്‍ ബിന്‍സി സെബാസ്റ്റ്യന്‍ നിര്‍വഹിച്ചു. സംസ്ഥാന ജനറല്‍ സെക്രട്ടറി സി.കെ. സനില്‍കുമാര്‍, സംസ്ഥാന വൈസ് പ്രസിഡന്‍റ് മുട്ടമ്പലം ശ്രീകുമാര്‍, ഓര്‍ഗനെെസിംഗ് സെക്രട്ടറി എസ്. കൃഷ്ണകുമാര്‍, യൂത്ത് മൂവ്‌മെന്‍റ് ജനറല്‍ സെക്രട്ടറി എസ്. കണ്ണന്‍, മഹിളാസമാജം സംസ്ഥാന പ്രസിഡന്‍റ്, രാധാമണി പൊന്നന്‍, വൈസ് പ്രസിഡന്‍റ് മഞ്‌ജു ചന്ദ്രബാബു, ഖജാന്‍ജി ശോഭന ഗോപി, ജോയിന്‍റ് സെക്രട്ടറി അമ്മിണി സുകുമാരന്‍ തുടങ്ങിയവര്‍ പ്രസംഗിച്ചു.

നാടെങ്ങും ഓണാഘോഷം

കല്ലറ: കേരള സാമൂഹ്യ സുരക്ഷാ മിഷന്‍ വയോമിത്രം പദ്ധതിയുടെയും കല്ലറ സഹൃദയ പകല്‍വീട് വയോജന ക്ലബ്ബിന്‍റെയും നേതൃത്വത്തില്‍ ഓണാഘോഷം നടത്തി. കല്ലറ പഞ്ചായത്ത് പ്രസിഡന്‍റ് ജോണി തോട്ടുങ്കല്‍ ഉദ്ഘാടനം ചെയ്തു. വയോജന ക്ലബ് പ്രസിഡന്‍റ് ടി.ഐ. ദാമോധരന്‍ അധ്യക്ഷത വഹിച്ചു. ഡോ. രാധാമണി, ഡോ.ജോയല്‍, സാമൂഹ്യ സുരക്ഷാ മിഷന്‍ കോ-ഓര്‍ഡിനേറ്റര്‍ ജോജി ജോസഫ്, ഐസിഡിഎസ് സൂപ്പര്‍വൈസര്‍ കെ. ശ്രീജിഷ, അജിത് കുമാര്‍, തോമസ് മണപ്പാടാന്‍ എന്നിവര്‍ പ്രസംഗിച്ചു. കടുത്തുരുത്തി: കാണക്കാരി പഞ്ചായത്ത് എട്ടാം വാര്‍ഡിലെ മൈത്രിനഗര്‍ റസിഡനന്‍റ്സ് വെല്‍ഫെയര്‍ അസോസിയേഷന്‍റെ ഓണാഘോഷവും കുടുംബമേളയും 30ന് കാണക്കാരി ആശുപത്രിപ്പടി ജംഗ്ഷനിലുളള എസ്എന്‍ഡിപി ഓഡിറ്റോറിയത്തില്‍ നടക്കും. രാവിലെ ഒമ്പതു മുതല്‍ കായിക കലാമത്സരങ്ങളും ഉച്ചയ്ക്ക് ഓണസദ്യയും തുടര്‍ന്ന് പൊതുസമ്മേളനവും നടക്കും. അസോസിയേഷന്‍ പ്രസിഡന്‍റ് കാണക്കാരി അരവിന്ദാക്ഷന്‍ അധ്യക്ഷത വഹിക്കും. ആഘോഷപരിപാടികള്‍ മന്ത്രി വി.എന്‍. വാസവന്‍ ഉദ്ഘാടനം ചെയ്യും. സംസ്ഥാന മന്ത്രിസഭയിലെ ഏറ്റവും നല്ല ജനകീയ മന്ത്രിക്കുളള അസോസിയേഷന്‍റെ പുരസ്‌കാരം മന്ത്രി വി.എന്‍. വാസവന് യോഗത്തില്‍ സമ്മാനിക്കും. മോന്‍സ് ജോസഫ് എംഎല്‍എയ്ക്കും പുരസ്‌കാരം സമ്മാനിക്കും. ലഹരിക്കെതിരേ ഓട്ടന്‍തുളളല്‍ നടത്തുന്ന എക്സൈസ് ഇന്‍സ്പെക്ടര്‍ വി. ജയരാജിനെയും വിദ്യാഭ്യാസ രംഗത്തെ ഉന്നതവിജയം നേടിയ കുട്ടികളെയും മന്ത്രി പുരസ്‌കാരം നല്‍കി ആദരിക്കും. പഞ്ചായത്ത് പ്രസിഡന്‍റ് അംബിക സുകുമാരന്‍ കലാകായിക മത്സരവിജയികള്‍ക്ക് സമ്മാനം നല്‍കും. എക്സൈസ് ഇന്‍സ്പെക്ടര്‍ ജയരാജിന്‍റെ ഓട്ടന്‍തുളളല്‍, സിം ദക്ഷിണകലാസമിതിയുടെ കൈകൊട്ടിക്കളി, പ്രഫ. സാം രാജിന്‍റെ മാജിക് ഷോ, ധ്വനി മ്യൂസിക്കിന്‍റെ ഗാനമേള തുടങ്ങിയ പരിപാടികളും നടക്കും.

തലയോലപ്പറമ്പിൽ കാർഷിക ഗ്രാമോത്സവം നാളെ

തലയോലപ്പറമ്പ്: തലയോലപ്പറമ്പ് സെന്‍റ് ജോര്‍ജ് പള്ളി ഫാമിലി യൂണിറ്റിന്‍റെ നേതൃത്വത്തില്‍ സഹൃദയ വെല്‍ഫെയര്‍ സര്‍വീസസ് എറണാകുളത്തിന്‍റെയും തലയോലപ്പറമ്പ് പൗരാവലിയുടെയും സഹകരണത്തോടെ നടത്തുന്ന സമൃദ്ധി -2025 കാര്‍ഷിക ഗ്രാമോത്സവം നാളെ രാവിലെ എട്ടിന് ആരംഭിക്കും. കാര്‍ഷിക വിപണന പ്രദര്‍ശന വേദികള്‍, വിഷയാധിഷ്ഠിത, കലാ, സാംസ്‌കാരിക സംഗമം, ബിരിയാണി ചലഞ്ച്,ഭക്ഷണ, പാനീയ കൗണ്ടറുകള്‍ എന്നിവ മേളയുടെ ഭാഗമായുണ്ടാകും.11.30ന് ഗ്രാമോത്സവം മന്ത്രി വി.എന്‍.വാസവന്‍ ഉദ്ഘാടനംചെയ്യും. ചെയര്‍മാന്‍ റവ.ഡോ. ബെന്നി മാരാപറമ്പിലിന്‍റെ അധ്യക്ഷതയില്‍ ചേരുന്ന യോഗത്തില്‍ ഫാ. ജോസ് കൊളുത്തുവള്ളില്‍ ആമുഖ പ്രസംഗം നടത്തും. സി.കെ. ആശ എംഎല്‍എ മുഖ്യാതിഥിയായിരിക്കും.തലയോലപ്പറമ്പ് പഞ്ചായത്ത് പ്രസിഡന്റ് ഷിജി വിന്‍സെന്‍റ്, കൈക്കാരന്‍ തങ്കച്ചന്‍ കളമ്പുകാട്,ജനറല്‍ കണ്‍വീനര്‍ ഇമ്മാനുവേല്‍ അരയത്തേല്‍, ഷേര്‍ളി ജോസ് വേലിക്കകത്ത് എന്നിവര്‍ പ്രസംഗിക്കും. തുടര്‍ന്ന് വിവിധ വിഷയങ്ങളില്‍ സെമിനാര്‍ നടക്കും. വൈകുനേരം 6.30ന് ചലച്ചിത്രനടന്‍ ജയന്‍ ചേര്‍ത്തല കലാസന്ധ്യ ഉദ്ഘാടനം ചെയ്യും.സിസ്റ്റര്‍ മെര്‍ലിന്‍ ഫ്രാന്‍സിസ് അധ്യക്ഷത വഹിക്കും.സുഭാഷ് പുഞ്ചക്കോട്ടില്‍, ജെറിന്‍ പാറയില്‍ എന്നിവര്‍ പ്രസംഗിക്കും. 31ന് രാവിലെ 9.30ന്ഫാ.ജോസ് കൊളുത്തുവള്ളിലിന്‍റെ അധ്യക്ഷതയില്‍ ചേരുന്ന യോഗത്തില്‍ ബിഷപ് മാര്‍ തോമസ് ചക്യത്ത് മികച്ച കര്‍ഷകരെ ആദരിക്കും. റിന്‍സണ്‍ പന്നിക്കോട്ടില്‍, ആന്‍റണി കളമ്പുകാടന്‍ എന്നിവര്‍ പ്രസംഗിക്കും.11ന് ഹരിത കര്‍മസേന അംഗങ്ങളെ ഡോ.ജോസ് പുഞ്ചക്കോട്ടില്‍ ആദരിക്കും. വൈകുന്നേരം ആറിന് സഹവികാരി ഫാ. ആല്‍ജോ കളപ്പുരയ്ക്കലിന്‍റെ അധ്യക്ഷതയില്‍ ചേരുന്ന സമാപന സമ്മേളനത്തില്‍ കെ. ഫ്രാന്‍സിസ് ജോര്‍ജ് എംപി ആരോഗ്യപ്രവര്‍ത്തകരെ ആദരിക്കും. വികാരി റവ. ഡോ.ബെന്നി ജോണ്‍ മാരാംപറമ്പില്‍, ഫാ.ജോസ് കൊളുത്തുവള്ളില്‍,സഹവികാരി ഫാ. ആല്‍ജോ കളപ്പുരയ്ക്കല്‍, ഇമ്മാനുവേല്‍ അരയത്തേല്‍, കൈക്കാരന്‍മാരായ റിന്‍സന്‍പന്നിക്കോട്ടില്‍, തങ്കച്ചന്‍ കളമ്പുകാട് എന്നിവര്‍ നേതൃത്വം നല്‍കും.

കെവി കനാൽ ശുചീകരണം തുടങ്ങി

വൈക്കം: ചെളിയും മാലിന്യങ്ങളും പോളയും അടിഞ്ഞ് നീരൊഴുക്ക് തടസപ്പെട്ട കെവി കനാൽ ശുചീകരിച്ച് നീരൊഴുക്ക് സുഗമമാക്കി. കനത്ത തോതിൽ ചെളി അടിഞ്ഞും മരങ്ങൾ കടപുഴകിവീണും കനാലിലെ നീരൊഴുക്ക് തടസപ്പെട്ട നിലയിലായിരുന്നു.മാലിന്യങ്ങൾ അടിഞ്ഞ് തോട്ടുവക്കം പാലത്തിനടിയിലൂടെ വെള്ളം ഒഴുകിപ്പോകാത്ത സ്ഥിതിയിലായിരുന്നത് ദീപികയടക്കമുള്ള മാധ്യമങ്ങൾ റിപ്പോർട്ട് ചെയ്തിരുന്നു. വിവിധ കർഷക സംഘടനകളും രാഷ്‌ട്രീയ പാർട്ടികളും കെവി കനാലിലെ മാലിന്യം നീക്കി നീരൊഴുക്കു ശക്തമാക്കണമെന്നാവശ്യപ്പെട്ട് സമരങ്ങൾ സംഘടിപ്പിച്ചിരുന്നു. തലയോലപ്പറമ്പ്, കല്ലറ, ഉദയനാപുരം പഞ്ചായത്തിലെ കർഷകർക്ക് ശുദ്ധജല ലഭ്യത ഉറപ്പാക്കാനും ഉൾപ്രദേശത്തെ ജനങ്ങളുടെ വെള്ളപ്പൊക്ക കെടുതികളുടെ രൂക്ഷത കുറക്കാനും കെവി കനാൽ ആഴംകൂട്ടി ശുചീകരിച്ചതുമൂലംകഴിയും.

മു‌ട്ടുചിറ, കടുത്തുരുത്തി പള്ളികളിൽ എട്ടുനോമ്പ് തിരുനാള്‍

മുട്ടുചിറ: റൂഹാദ്കുദിശാ ഫൊറോനാ പള്ളിയില്‍ പരിശുദ്ധ ദൈവമാതാവിന്‍റെ ജനനത്തിരുനാളിനൊരുക്കമായുള്ള എട്ടുനോമ്പ് സെപ്റ്റംബർ ഒന്നിന് ആരംഭിക്കും. നോമ്പ് ദിനങ്ങളില്‍ വിശുദ്ധ കുര്‍ബാനയ്‌ക്കൊപ്പം ദൈവമാതാവിന്‍റെ നൊവേനയും ഉണ്ടായിരിക്കും. ‍ ദിവസവും വൈകുന്നേരം അഞ്ചിന് റംശ, 5.30ന് നൊവേന, തുടര്‍ന്ന് വിശുദ്ധ കുര്‍ബാന, ജപമാല പ്രദക്ഷിണം എന്നീ തിരുക്കർമ ങ്ങൾ നടക്കും. എല്ലാ ദിവസവും വൈകുന്നേരം നാലു മുതലും എട്ടിന് തിരുനാള്‍ ദിനം മുഴുവനും പരിശുദ്ധ അമ്മയുടെ മുടി എഴുന്നള്ളിക്കുന്നതിന് സൗകര്യം ഉണ്ടായിരിക്കും. ഒന്നിന് രോഗീദിനമായും മൂന്നിന് ആരാധനാ ദിനമായും നാലിന് അഖണ്ഡ ജപമാല പ്രാര്‍ഥനാ ദിനമായും അഞ്ചിന് ബൈബിള്‍ പാരായണ ദിനമായും ആചരിക്കും. മാതാവ് പ്രത്യക്ഷപ്പെട്ട കുറവിലങ്ങാട് മുത്തിയമ്മയുടെ സവിധത്തിലേക്ക് പരിശുദ്ധ ദൈവമാതാവിന്‍റെ പിറവിത്തിരുനാളിന് ഒരുക്കമായി മുട്ടുചിറ ഫൊറോനയുടെ മുത്തിയമ്മ തീര്‍ഥാടനം നടത്തും. രണ്ടിനു രാവിലെ 10.30ന് വിവിധ ഇടവകകളില്‍ നിന്നുള്ള തീര്‍ഥാടകര്‍ പനങ്കുഴയ്ക്കല്‍ സ്മാരക പാര്‍ക്കില്‍ സംഗമിക്കും. തുടര്‍ന്ന് ജപമാല ചൊല്ലി പദയാത്രയായി മുത്തിയമ്മയുടെ സവിധത്തിലെത്തി 11 മണിക്ക് ദിവ്യബലി അര്‍പ്പിക്കും. മാതൃവേദി മുട്ടുചിറ ഫൊറോനയുടെ ആഭിമുഖ്യത്തില്‍ മുട്ടുചിറ ഫൊറോന വിധവാസംഗമം മൂന്നിനു രാവിലെ 9.30ന് ആരംഭിച്ച് 12.30ന് സമാപിക്കും. പ്രധാന തിരുനാള്‍ ദിനമായ എട്ടിന് വൈകുന്നേരം 4.30ന് ഇടവകയിലെ മേരീ നാമധാരികളുടെ സംഗമം നടക്കും. വികാരി ജനറാള്‍ മോണ്‍ ജോസഫ് കണിയോടിക്കല്‍ വിശുദ്ധ കുര്‍ബാനയര്‍പ്പിച്ചു സന്ദേശം നല്‍കും. തുടര്‍ന്ന് ജപമാല പ്രദക്ഷിണം, ലദീഞ്ഞ്. കടുത്തുരുത്തി: കടുത്തുരുത്തി വലിയപള്ളിയില്‍ പരിശുദ്ധ കന്യകമറിയത്തിന്‍റെ പിറവിത്തിരുനാളും എട്ടുനോമ്പാചരണവും പള്ളിയുടെ കല്ലിട്ട തിരുനാളും സെപ്റ്റംബര്‍ ഒന്നു മുതല്‍ എട്ടു വരെ ആചരിക്കും. ഒന്നിനു രാവിലെ ആറിന് ജപമാല. തുടര്‍ന്ന് വികാരി ഫാ. ജോണ്‍സണ്‍ നീലനിരപ്പേല്‍ കൊടിയേറ്റും. 6.30ന് വിശുദ്ധ കുര്‍ബാന. രണ്ടിനു രാവിലെ ആറിന് ജപമാല, തുടര്‍ന്ന് വിശുദ്ധ കുര്‍ബാന, സന്ദേശം - ഫാ.ജോണി നടുത്തടം. മൂന്നിനു രാവിലെ ആറിന് ജപമാല, 6.30 ന് വിശുദ്ധ കുര്‍ബാന, സന്ദേശം - ഫാ. ജസ്റ്റിന്‍ പെരിയപ്പുറം. നാലിനു രാവിലെ ആറിന് ജപമാല തുടര്‍ന്ന് വിശുദ്ധ കുര്‍ബാന, സന്ദേശം - ഫാ. ബാബു പാറത്തോട്ടുംകരയില്‍. അഞ്ചിനു രാവിലെ 5.45ന് ജപമാല, കുമ്പസാരം, 6.15ന് വിശുദ്ധ കുര്‍ബാന, സന്ദേശം - ഫാ. സ്റ്റാന്‍ലി മങ്ങാട്ട്, 7.15 നും, വൈകുന്നേരം അഞ്ചിനും വിശുദ്ധ കുര്‍ബാന ഉണ്ടായിരിക്കും. ആറിനു രാവിലെ ആറിന് ജപമാല, വിശുദ്ധ കുര്‍ബാന, സന്ദേശം - ഫാ. ബിനോ ചേരിയില്‍. ഏഴിന് രാവിലെ 6.30 ന് ജപമാല, വിശുദ്ധ കുര്‍ബാന - ഫാ. ബൈജു മുകളേല്‍, 9.30ന് വിശുദ്ധ കുര്‍ബാന. എട്ടിന് പരിശുദ്ധ കന്യകമറിയത്തിന്‍റെ ജനനത്തിരുനാളും ദേവാലയത്തിന്‍റെ കല്ലിട്ട തിരുനാളും ആഘോഷിക്കും. രാവിലെ ആറിന് ജപമാല, തിരുനാള്‍ പാട്ടുകുര്‍ബാന, സന്ദേശം - ഫാ. ബോബി കൊച്ചുപറമ്പില്‍. തുടര്‍ന്ന് പ്രദക്ഷിണം സമാപനാശീര്‍വാദം.

അപകടത്തിലായ അരയാലിന് അന്ത്യം

കുറുപ്പന്തറ: മാഞ്ഞൂര്‍ ഗവണ്‍മെന്‍റ് എല്‍പി സ്‌കൂളിന് മുന്നില്‍ റോഡിനോട് ചേര്‍ന്നുള്ള നടപ്പാതയില്‍ അടിഭാഗം ദ്രവിച്ച് അപകടാവസ്ഥയിലായിരുന്ന അരയാല്‍ വെട്ടിനീക്കാൻ തുടങ്ങി. മരം അപകട ഭീഷണിയുയര്‍ത്തുന്നതായി കഴിഞ്ഞ ദിവസം ദീപിക റിപ്പോര്‍ട്ട് ചെയ്തിരുന്നു. അവധിദിവസമായ ഇന്നലെ രാവിലെ മുതല്‍ പോലീസിന്‍റെ സഹായത്തോടെ ഗതാഗതം നിയന്ത്രിച്ചാണ് മരം വെട്ടൽ ആരംഭിച്ചത്. തിരക്കേറിയ ഏറ്റുമാനൂര്‍-വൈക്കം റോഡിന്‍റെ ഓരത്ത് നില്‍ക്കുന്ന മരമായതിനാല്‍ ഗതാഗതം നിയന്ത്രിച്ചാണ് മരം വെട്ടുന്നത്. കമ്പുകള്‍ വെട്ടി വടത്തില്‍ കെട്ടിയാണ് താഴെയിറക്കുന്നത്. ഇന്നലെ കനത്ത മഴയായതിനാല്‍ പണികള്‍ ഉദ്ദേശിച്ച വേഗത്തില്‍ നടന്നില്ല. എങ്കിലും മരത്തിന്‍റെ വലിയ ശിഖരങ്ങള്‍ പലതും വെട്ടിയിറക്കാനായി. പിഡബ്ല്യുഡിയുടെ നേതൃത്വത്തിലാണ് മരം വെട്ടിനീക്കുന്നത്. സ്‌കൂളിനു മുന്നിലെ മരം അപകടാവസ്ഥയിലാണെന്നും മരം വെട്ടി നീക്കണമെന്നും ആവശ്യപെട്ട് പ്രധാനാധ്യാപിക പഞ്ചായത്തിന് അപേക്ഷ നല്‍കിയിരുന്നു. പഞ്ചായത്ത് അപേക്ഷ പിഡബ്യൂഡിക്ക് കൈമാറി. പിഡബ്ല്യുഡി അപേക്ഷ ജില്ലാ പഞ്ചായത്തിന്‍റെ ട്രീ കമ്മിറ്റിക്ക് കൈമാറുകയും അടിയന്തര സ്വഭാവമുള്ളതിനാല്‍ ട്രീ കമ്മിറ്റി മരം വെട്ടി നീക്കാന്‍ അനുമതി നല്‍കുകയുമായിരുന്നു. മരത്തിന്‍റെ അടിഭാഗത്ത് ആഴത്തിലുള്ള വിടവുണ്ടായിരുന്ന അവസ്ഥയിലായിരുന്നു. പാമ്പുകളടക്കമുള്ള ഇഴജന്തുക്കള്‍ മരത്തിനു ചുവട്ടിലുള്ള ഈ വിടവ് താവളമാക്കിയിരുന്നു. പുറമേയുള്ള വേരിലാണ് മരം നിന്നിരുന്നത്. സ്‌കൂള്‍ കുട്ടികളും കാല്‍നടയാത്രക്കാരും ഉള്‍പ്പെടെ മരത്തിനു ചുവട്ടിലൂടെയാണ് സഞ്ചരിച്ചിരുന്നത്. മരം മറിഞ്ഞാല്‍ സ്‌കൂള്‍ കെട്ടിടത്തിന് മുകളിലേക്കോ കോട്ടയം-എറണാകുളം സംസ്ഥാന പാതയിലേക്കോ വീഴു ന്ന സ്ഥിതിയായിരുന്നു. റോഡരികില്‍ നില്‍ക്കുന്ന ഈ മരം കൂടാതെ സ്‌കൂള്‍ കോമ്പൗണ്ടിലും അപകടാവസ്ഥയില്‍ ഒരു പാഴ്മരം സ്ഥിതി ചെയ്യുന്നുണ്ട്. ഇതും ഈ അവധിക്കാലത്തുതന്നെ വെട്ടിനീക്കുമെന്ന് പഞ്ചായത്ത് വൈസ്പ്രസിഡന്‍റ് ബിജു കൊണ്ടുകാലാ അറിയിച്ചു.

ആറ്റില്‍ ചാടിയ യുവതിയെ രക്ഷപ്പെടുത്തി

കോട്ടയം: കോടിമത പാലത്തില്‍നിന്നു യുവതി ആറ്റില്‍ ചാടി. ഇന്നലെ വൈകുന്നേരം 5.30 നായിരുന്നു സംഭവം. യുവതിയെ പോലീസും നാട്ടുകാരും ചേര്‍ന്നു രക്ഷപ്പെടുത്തി. പരിക്കേറ്റ ഇവരെ ജില്ലാ ജനറല്‍ ആശുപത്രിയില്‍ പ്രവേശിപ്പിച്ചു. കോടിമത പാലത്തില്‍നിന്ന് യുവതി ആറ്റിലേക്ക് ചാടുന്നതു കണ്ട നാട്ടുകാരിലൊരാള്‍ ഒപ്പം ചാടിയാണ് യുവതിയെ രക്ഷപ്പെ ടുത്തിയത്. വെസ്റ്റ് പോലീസ് സ്ഥലത്തെത്തി.

കളഞ്ഞുകിട്ടിയ പഴ്സ് തിരികെക്കൊടുത്ത് ഇതരസംസ്ഥാന തൊഴിലാളി

പാമ്പാടി: കളഞ്ഞുകിട്ടിയ പണമടങ്ങിയ പഴ്‌സ് ഉടമയ്ക്കു തിരികെക്കൊടുത്ത് ബംഗാള്‍ സ്വദേശിയായ അജിത് ഒറാവു മാതൃകയായി. കഴിഞ്ഞദിവസം പൊന്‍കുന്നം-കോട്ടയം റൂട്ടില്‍ സർവീസ് നടത്തുന്ന ബസിലാണ് അരീപ്പറമ്പ് സ്വദേശി കെ.എന്‍. സോമന്‍റെ പഴ്‌സ് നഷ്ടപ്പെട്ടത്. തുടര്‍ന്ന് സോമന്‍ പാമ്പാടി പോലീസില്‍ പരാതിപ്പെട്ടിരുന്നു. പഴ്‌സ് ബംഗാള്‍ സ്വദേശിയായ അജിത്തിനാണ് ലഭിച്ചത്. തുടര്‍ന്ന് പഴ്‌സില്‍നിന്ന് ലഭിച്ച ഫോണ്‍ നമ്പര്‍ ഉപയോഗിച്ചു മലയാളം വശമില്ലാത്ത അജിത് സോമനെ വിളിച്ച് ബംഗാളി ഭാഷയില്‍ വിവരമറിയിച്ചു. ഭാഷ വശമില്ലാത്ത സോമന്‍ ഉടന്‍തന്നെ പാമ്പാടി സ്റ്റേഷന്‍ എസ്‌ഐ ഉദയകുമാറിനു തന്നെ വിളിച്ച ബംഗാള്‍ സ്വദേശിയുടെ നമ്പര്‍ കൈമാറി. തുടര്‍ന്ന് സ്റ്റേഷനിൽനിന്ന് അജിത്തുമായി ബന്ധപ്പെട്ട് കൂടുതല്‍ വിവരങ്ങള്‍ മനസിലാക്കുകയായിരുന്നു. തുടര്‍ന്ന് ഇന്നലെ രാവിലെ ബംഗാള്‍ സ്വദേശിയുടെ കോണ്‍ട്രാക്‌ടര്‍ പഴ്‌സുമായി സ്റ്റേഷനിലെത്തി പണവും വിലപ്പെട്ട രേഖകളുമടങ്ങിയ പഴ്‌സ് സോമന് കൈമാറുകയായിരുന്നു.

മലരിക്കല്‍ അദ്ഭുതപ്പെടുത്തുന്ന വിജയം: സി.ടി. അരവിന്ദ് കുമാര്‍

കോട്ടയം: മലരിക്കല്‍ അദ്ഭുതപ്പെടുത്തുന്ന വിജയം, കേരളമാകെ ഏറ്റെടുക്കണമെന്നു എംജി യൂണിവേഴ്‌സിറ്റി വൈസ് ചാന്‍സലര്‍ സി.ടി. അരവിന്ദ് കുമാര്‍. മീനച്ചിലാര്‍ മീനന്തറയാര്‍ കൊടുരാര്‍ പുനര്‍ സംയോജന പദ്ധതിയുടെ എട്ടാം വാര്‍ഷികാഘോഷം കോട്ടയം അര്‍ബന്‍ ബാങ്ക് ഹാളില്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഡോ. ജേക്കബ് ജോര്‍ജ് അധ്യക്ഷത വഹിച്ചു. പദ്ധതി കോ-ഓര്‍ഡിനേറ്റര്‍ കെ അനില്‍കുമാര്‍, നഗരസഭാ പ്രതിപക്ഷ നേതാവ് ഷീജാ അനില്‍, നാസര്‍ ചാത്തന്‍ കോട്ടുമാലിയില്‍, ഗോപു നട്ടാശേരി, ഷാജിമോന്‍ വട്ടപ്പള്ളില്‍, നഗരസഭാ പ്രതിപക്ഷ നേതാവ് ഷീജാ അനില്‍, എബ്രഹാം കുര്യന്‍, ബി. ശശികുമാര്‍ തുടങ്ങിയവര്‍ പ്രസംഗിച്ചു. മലരിക്കല്‍ മോഡല്‍ ഗ്രാമീണ ടൂറിസം കേന്ദ്രങ്ങള്‍ സാധ്യമായ എല്ലാ സ്ഥലങ്ങളിലും ഹരിതകേരളം മിഷന്‍റെ ഭാഗമായി ഉയര്‍ത്തിക്കൊണ്ടു വരുമെന്നും പദ്ധതി കോ-ഓര്‍ഡിനേറ്റര്‍ കെ.അനില്‍കുമാര്‍ അറിയിച്ചു.

മൊബൈല്‍ ഫോണ്‍ മോഷ്ടിച്ച ബംഗാൾ സ്വദേശി അറസ്റ്റിൽ

കോട്ടയം: റെയില്‍വേ സ്റ്റേഷനിൽനിന്ന് യാത്രക്കാരന്‍റെ മൊബൈല്‍ ഫോണ്‍ മോഷ്ടിച്ച കേസില്‍ വെസ്റ്റ് ബംഗാള്‍ സ്വദേശി അറസ്റ്റിലായി. വെസ്റ്റ് ബംഗാള്‍ ഉത്തര്‍ ദീജാപൂര്‍ ജില്ലയില്‍ ബലിജോലെയില്‍ നജീറുല്‍ ഹഖി (31)നെയാണ് കോട്ടയം റെയില്‍വേ പോലീസ് സംഘം പിടികൂടിയത്. ഇക്കഴിഞ്ഞ 23നായിരുന്നു കേസിനാസ്പദമായ സംഭവം. പുലര്‍ച്ചെ നാലോടെ സ്റ്റേഷനിലെ വിശ്രമമുറിയില്‍ വിശ്രമിക്കുകയായിരുന്ന യാത്രക്കാരന്‍റെ മൊബൈല്‍ ഫോണ്‍ മോഷ്ടിച്ച് പ്രതി കടന്നുകളയുകയായിരുന്നു. ഇന്നലെ നാഗമ്പടം റെയില്‍വേ പ്ലാറ്റ്ഫോമിലൂടെ നടക്കുകയായിരുന്ന ഇയാളെ ചോദ്യം ചെയ്തപ്പോഴാണ് മോഷണവിവരം പുറത്തറിയുന്നത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

വ്യാപാരിയെ ഭീഷണിപ്പെടുത്തി പണം തട്ടിയ പ്രതികള്‍ അറസ്റ്റില്‍

കോട്ടയം: ചങ്ങനാശേരി സ്വദേശിയെ തടഞ്ഞുവച്ച് ഭീഷണിപ്പെടുത്തി പണം തട്ടിയ കേസിലെ പ്രതികള്‍ അറസ്റ്റില്‍. ആനിക്കാട് ചെങ്ങളം നായിപ്ലാവ് സാജന്‍ ജോര്‍ജ് (47), കൂരോപ്പട ളാക്കാട്ടൂര്‍ ഉള്ളന്നൂര്‍ അനൂപ് ജി. നായര്‍ (47) എന്നിവരെയാണ് പള്ളിക്കത്തോട് പോലീസ് അറസ്റ്റ് ചെയ്തത്. ഇക്കഴിഞ്ഞ് ജൂണ്‍ 18ന് വൈകുന്നേരം പള്ളിക്കത്തോട് സമോവര്‍ ഗ്രാന്‍ഡ് റെസ്റ്ററന്‍റിലായിരുന്നു സംഭവം. ഇവിടെത്തിയ ചങ്ങനാശേരി സ്വദേശിയായ ബിസിനസുകാരനെ വ്യാപാരസ്ഥാപനങ്ങള്‍ പൂട്ടിക്കുമെന്നും മറ്റും ഭീഷണിപ്പെടുത്തുകയും രണ്ടു കോടി രൂപ ആവശ്യപ്പെടുകയും കൈയില്‍ ഉണ്ടായിരുന്ന ഒരു ലക്ഷം രൂപ തട്ടിയെടുക്കുകയുമായിരുന്നു പ്രതികള്‍. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

നീണ്ടൂർ തൃക്കേൽ സ്റ്റേഡിയം നവീകരണം തുടങ്ങി

ഏറ്റുമാനൂര്‍: കോട്ടയം ജില്ലയില്‍ വിവിധ കായിക പദ്ധതികള്‍ക്കായി 64 കോടി രൂപയുടെ ഭരണാനുമതി ലഭിച്ചിട്ടുണ്ടെന്ന് മന്ത്രി വി.എന്‍. വാസവന്‍. നീണ്ടൂരില്‍ ഒരു പഞ്ചായത്ത് ഒരു കളിക്കളം പദ്ധതിയുടെ ഭാഗമായി തൃക്കേല്‍ സ്റ്റേഡിയത്തിന്‍റെ നിര്‍മാണോദ്ഘാടനം നിര്‍വഹിച്ചു പ്രസംഗിക്കുകയായിരുന്നു മന്ത്രി. ഒരു കോടി രൂപ മുടക്കിയാണ് സ്റ്റേഡിയം നിർമിക്കുന്നത്. സംസ്ഥാന കായിക വകുപ്പിന്‍റെ 50 ലക്ഷം രൂപയും ഏറ്റുമാനൂര്‍ എംഎല്‍എ കൂടിയായ മന്ത്രി വാസവന്‍റെ വികസന ഫണ്ടില്‍നിന്ന് 50 ലക്ഷം രൂപയും ചെലവിട്ടാണ് നിര്‍മാണം. ഒരേക്കറോളം വരുന്ന ഗ്രൗണ്ടില്‍ ഫെന്‍സിങ്, സ്ട്രീറ്റ് ലൈറ്റ്, ഡ്രെയ്‌നേജ് സംവിധാനം, ഓപ്പണ്‍ ജിം എന്നിവയും ഇന്‍ഡോര്‍ സ്‌പോര്‍ട്ട്‌സ് ഫ്‌ളോറിംഗും സജ്ജീകരിക്കും. ഫുട്‌ബോള്‍, ക്രിക്കറ്റ് എന്നീ ഇനങ്ങള്‍ക്കായി ഏകദേശം 90 മീറ്റര്‍ നീളത്തിലും 35 വീതിയിലുമാണ് ഗ്രൗണ്ട് നിര്‍മിക്കുന്നത്. നീണ്ടൂര്‍ പഞ്ചായത്ത് പ്രസിഡന്‍റ് വി.കെ. പ്രദീപ് അധ്യക്ഷത വഹിച്ചു. വൈസ് പ്രസിഡന്‍റ് ആലീസ് ജോസഫ്, ജില്ലാ പഞ്ചായത്ത് പൊതുമരാമത്ത് സ്ഥിരംസമിതി അധ്യക്ഷ ഹൈമി ബോബി, എം.കെ. ശശി, പി.ടി. ബാബു, തോമസ് കോട്ടൂര്‍, ഷൈനി ഷാജി എന്നിവര്‍ പ്രസംഗിച്ചു.

നാടെങ്ങും ഓണാഘോഷം

മാലം: തണല്‍ റെസിഡന്‍റ്സ് അസോസിയേഷന്‍റെ രണ്ടാം ഓണാഘോഷം 30ന് കുന്നത്തുമാലിയില്‍ എലിസബത്ത് ഇട്ടിയുടെ പുരയിടത്തില്‍ ഉച്ചകഴിഞ്ഞു മൂന്നു മുതല്‍ അസോസിയേഷന്‍ പ്രസിഡന്‍റ് ടി.വി. നാരായണ ശര്‍മയുടെ അധ്യക്ഷതയില്‍ നടക്കും. പഞ്ചായത്ത് പ്രസിഡന്‍റ് കെ.സി. ബിജു ഉദ്ഘാടനം ചെയ്യും. സംസ്ഥാന വെയ്റ്റ് ലിഫ്റ്റിംഗ് ചാന്പ്യന്‍ഷിപ്പിലെ ഗോള്‍ഡ് മെഡല്‍ ജേതാവ് റവ.ജെ. മാത്യു കോര്‍എപ്പിസ്‌കോപ്പ മണവത്ത്, ദേശീയ ത്രോബോള്‍ ചാന്പ്യന്‍ഷിപ്പില്‍ കേരള ടീമിനെ നയിച്ച അമല്‍ രതീഷ് വലിയവീട്ടില്‍ തുടങ്ങിയവരെ അനുമോദിക്കും. എസ്എന്‍ പുരം: സിജെഎം പബ്ലിക് ലൈബ്രറി ആന്‍ഡ് ആര്‍ട്‌സ് ക്ലബിന്‍റെ ഓണാഘോഷം ആറിന് ലൈബ്രറിയില്‍ നടക്കും. രാവിലെ 8.30 മുതല്‍ വിവിധ മത്സരങ്ങള്‍ നടത്തും. വൈകുന്നേരം 5.30ന് ലൈബ്രറി പ്രസിഡന്‍റ് ശ്രീകുമാര്‍ ഗോകുലം അധ്യക്ഷത വഹിക്കും. ചാണ്ടി ഉമ്മന്‍ എംഎല്‍എ പൊതുസമ്മേളനം ഉദ്ഘാടനം ചെയ്യും. ജില്ലാ പഞ്ചായത്ത് വൈസ്പ്രസിഡന്‍റ് ടി.എന്‍. ഗിരീഷ് കുമാര്‍ വിദ്യാഭ്യാസ അവാര്‍ഡുകളുടെ വിതരണോദ്ഘാടനവും പൊന്നോണ സമ്പാദ്യപദ്ധതിയുടെ ഉദ്ഘാടനം ബ്ലോക്ക് പഞ്ചായത്തംഗം ജിജി അഞ്ചാനിയും നിര്‍വഹിക്കും. പഞ്ചായത്ത് പ്രസിഡന്‍റ് അമ്പിളി മാത്യു മുതിര്‍ന്ന അംഗങ്ങളെ ആദരിക്കും.

മണര്‍കാട് പള്ളി പെരുന്നാളിന് വിപുലമായ ക്രമീകരണങ്ങൾ

മണര്‍കാട്: സെന്‍റ് മേരീസ് യാക്കോബായ സുറിയാനി കത്തീഡ്രലില്‍ വിശുദ്ധ ദൈവമാതാവിന്‍റെ ജനനപ്പെരുന്നാളിനോട് അനുബന്ധിച്ചുള്ള എട്ടുനോമ്പ് പെരുന്നാളിന്‍റെ ക്രമീകരണങ്ങള്‍ പൂര്‍ത്തിയായി. വ്രതശുദ്ധിയോടെ എട്ടുനോമ്പ് ആചരിച്ച് പെരുന്നാളില്‍ പങ്കെടുക്കാന്‍ ആയിരങ്ങളാണ് ഒഴുകിയെത്തുക. ഏകദേശം 60 ലക്ഷം വിശ്വാസികള്‍ പെരുന്നാള്‍ ദിനങ്ങളില്‍ മണർകാട് പള്ളിയിൽ എത്തിച്ചേരുമെന്ന് പ്രതീക്ഷിക്കുന്നത്. സര്‍ക്കാര്‍ വകുപ്പുകളുടെ ഏകോപനത്തോടെ വിപുലമായ ക്രമീകരണങ്ങളാണ് പെരുന്നാളിനായി ഒരുക്കിയിരിക്കുന്നത്. പള്ളിയിലേക്കുള്ള റോഡുകളുടെ അറ്റകുറ്റപ്പണികള്‍ ത്വരിതഗതിയില്‍ നടന്നുകൊണ്ടിരിക്കുന്നു. ഭക്തജനങ്ങളുടെ സൗകര്യാര്‍ഥം പെരുന്നാളിനോടനുബന്ധിച്ച് പള്ളി പരിസരത്ത് പോലീസ്, എക്സൈസ്, ഫയര്‍ഫോഴ്സ്, റവന്യു, ഹെല്‍ത്ത് ഡിപ്പാര്‍ട്ട്മെന്‍റുകള്‍ക്കായി വിവിധ കൗണ്ടറുകള്‍ പ്രവര്‍ത്തിക്കുന്നതിനുള്ള ക്രമീകരണങ്ങള്‍ ചെയ്തു. പെരുന്നാളിനോടനുബന്ധിച്ച് പള്ളിയുടെ വടക്കുവശത്തെ മൈതാനത്ത് താത്കാലിക ബസ് സ്റ്റാന്‍ഡ് പ്രവര്‍ത്തിക്കും. സംസ്ഥാനത്തിന്‍റെ വിവിധ ഭാഗങ്ങളില്‍നിന്നു കെഎസ്ആര്‍ടിസി പ്രത്യേക സര്‍വീസ് നടത്തും. സുരക്ഷ, ഗതാഗത നിയന്ത്രണം പെരുന്നാള്‍ ദിനങ്ങളില്‍ പ്രത്യേക സുരക്ഷയ്ക്കായി പള്ളിയിലും പരിസരങ്ങളിലും നിലവിലുള്ള സിസിടിവി കാമറകള്‍ക്കു പുറമേ കൂടുതല്‍ കാമറകള്‍ സ്ഥാപിച്ചു പോലീസ് നിരീക്ഷണം ശക്തമാക്കും. വാഹന ഗതാഗതം നിയന്ത്രിക്കുന്നതിനുള്ള ക്രമീകരണങ്ങള്‍ പോലീസ് ഉദ്യോഗസ്ഥരുടെ നേതൃത്വത്തില്‍ തയാറാക്കി. സെപ്റ്റംബര്‍ ആറ്, ഏഴ്, എട്ട് തീയതികളില്‍ വണ്‍വേ സംവിധാനം നടപ്പിലാക്കുന്നതിനുള്ള നടപടികള്‍ ക്രമീകരിച്ചു. പെരുന്നാള്‍ ദിനങ്ങളില്‍ പള്ളിയില്‍ എത്തിച്ചേരുന്ന ഭക്തജനങ്ങള്‍ക്ക് വിപുലമായ പാര്‍ക്കിംഗ് സൗകര്യമാണ് ഒരുക്കിയിരിക്കുന്നത്. തെക്കുവശത്തും വടക്കുവശത്തുമുള്ള മൈതാനങ്ങളിലും സെന്‍റ് മേരീസ് കോളജ് ഗ്രൗണ്ട്, സെന്‍റ് മേരീസ് ഐടിഐ ഗ്രൗണ്ട് എന്നിവിടങ്ങളിലും പാര്‍ക്കിംഗ് സൗകര്യം സജ്ജീകരിച്ചിട്ടുണ്ട്. ചടങ്ങുകൾ തത്സമയം കത്തീഡ്രലിന്‍റെ ഔദ്യോഗിക ഫേസ്ബുക്ക് പേജിലും യൂട്യൂബ് ചാനലിലും വെബ്സൈറ്റിലും പെരുന്നാളിന്‍റെ പ്രധാന ചടങ്ങുകള്‍ തത്സമയം സംപ്രേക്ഷണം ചെയ്യും. എട്ടുനോമ്പ് പെരുന്നാളിന്‍റെ പ്രധാന ചടങ്ങുകള്‍ എസിവി, ഗ്രീന്‍ ചാനല്‍ മണര്‍കാട് എന്നീ ടെലിവിഷന്‍ ചാനലുകളിലും ലഭ്യമാണ്. നേര്‍ച്ച-വഴിപാടുകള്‍, പെരുന്നാള്‍ ഓഹരി എന്നിവയ്ക്ക് ഓണ്‍ലൈനിലൂടെ പണം അടയ്ക്കാം. വിശ്വാസികളുടെ പ്രാര്‍ഥനാ ആവശ്യങ്ങള്‍ കത്തീഡ്രലിന്‍റെ ഇ-മെയില്‍ വിലാസത്തിലോ വാട്സ്ആപ്പ് നമ്പറിലേക്കോ അയയ്ക്കാം. പെരുന്നാളിന് എത്തിച്ചേരുന്ന ഭക്തജനങ്ങള്‍ക്കു ശുചിത്വവും മെച്ചപ്പെട്ടതുമായ ഭക്ഷണ പദാര്‍ഥങ്ങള്‍ മിതമായ നിരക്കില്‍ ലഭ്യമാക്കാന്‍ പള്ളിവക താത്കാലിക കാന്‍റീന്‍ പ്രവര്‍ത്തിക്കും. എല്ലാ ഭക്തജനങ്ങള്‍ക്കും സെപ്റ്റംബര്‍ ഒന്നു മുതല്‍ ഏഴു വരെ വടക്കുവശത്തെ പാരീഷ് ഹാളില്‍ സൗജന്യ നേര്‍ച്ചക്കഞ്ഞി ലഭിക്കും. എട്ടുനോമ്പ് പെരുന്നാളിനോടനുബന്ധിച്ചുള്ള വൈദ്യുത ദീപാലങ്കാരങ്ങള്‍ സെപ്റ്റംബര്‍ ഒന്നു മുതല്‍ 14 വരെ ഉണ്ടായിരിക്കുമെന്നു ഭാരവാഹികള്‍ പറഞ്ഞു.

കുരുന്നുകൾക്ക് കളിവീടൊരുങ്ങി; നാലു കുടുംബങ്ങൾക്ക് വീടുകളും

കോട്ടയം: പാറമ്പുഴ ബേത്‌ലഹേം ഇടവകയിലെ മുൻകാല യുവദീപ്തി-എസ്‌എംവൈഎം പ്രവർത്തകരുടെ കൂട്ടായ്മയായ ഹെൽപ്പിംഗ് ഹാൻഡ് പാറമ്പുഴയുടെ നേതൃത്വത്തിൽ പൂർത്തിയാക്കിയ നാലു വീടുകളുടെ താക്കോൽ ദാനവും അതോടൊപ്പം തങ്ങളുടെ മാതൃവിദ്യാലയത്തിലെ പുതുതലമുറയിലെ കുരുന്നുകൾക്കായി നിർമിക്കുന്ന ‘കളിവീട്’ ചിൽഡ്രൻസ് പാർക്കിന്‍റെ വെഞ്ചരിപ്പും ഇന്ന് ഉച്ചകഴിഞ്ഞു 2:30ന് പാറമ്പുഴ ഹോളി ഫാമിലി ഹൈസ്‌കൂൾ ഓഡിറ്റോറിയത്തിൽ നടക്കും. കഴിഞ്ഞ അഞ്ചു വർഷമായി പ്രവർത്തിക്കുന്ന ഈ കൂട്ടായ്മയുടെ ഇരുപതാമത്തെ ചാരിറ്റി ഭവനമാണ് ഇത്. കർദിനാൾ മാർ ജോർജ് ആലഞ്ചേരി സമ്മേളനത്തിൽ മുഖ്യാതിഥിയായി പങ്കെടുക്കും. സ്‌കൂൾ മാനേജർ ഫാ. മാത്യു ചൂരവടി അധ്യക്ഷത വഹിക്കും. എംഎസ്എം സെർവന്‍റ് ജനറൽ ഫാ. സെബാസ്റ്റ്യൻ മണപ്പാത്തുപറമ്പിൽ അനുഗ്രഹപ്രഭാഷണം നടത്തും. നഗരസഭാധ്യക്ഷ ബിൻസി സെബാസ്റ്റ്യൻ മുഖ്യപ്രഭാഷണം നടത്തും. മുൻ ഹെഡ്മാസ്റ്റർ വി.എം. തോമസിന്‍റെ ഭാര്യ മേരി തോമസ് വടക്കേഅയ്മനംകുഴി താക്കോൽ സമർപ്പണം നടത്തും. ഗാന്ധിനഗർ സ്റ്റേഷൻഹൗസ് ഓഫീസർ ടി. ശ്രീജിത്ത് എസ്പിസി ക്യാമ്പ് ഉദ്ഘാടനം ചെയ്യും. നഗരസഭാ കൗൺസിലർമാരായ സാബു മാത്യു, എം.എ. ഷാജി, സ്‌കൂൾ ഹെഡ്മിസ്ട്രസ് ജാൻസിമോൾ അഗസ്റ്റിൻ, പേരൂർ സഹകരണ ബാങ്ക് പ്രസിഡന്‍റ് റെജി പ്രദീപ്, ചങ്ങനാശേരി അതിരൂപത ലിറ്റർജിക്കൽ ആർട്ട് ഡയറക്ടർ ഫാ. ജേക്കബ് കൂരോത്ത്, അസിസ്റ്റന്‍റ് മാനേജർ ഫാ. സിറിയക് കാഞ്ഞിരത്തുംമൂട്ടിൽ, പിടിഎ പ്രസിഡന്‍റ് ബിജോ ജോസഫ്, സ്‌കൂൾ പൂർവവിദ്യാർഥി പ്രിൻസ് ലൂക്കോസ്, ഹെൽപ്പിംഗ് ഹാൻഡ് മെംബർ പ്രിൻസ്മോൻ ഏബ്രഹാം, പാറമ്പുഴ ബേത്‌ലഹേം ചർച്ച് ട്രസ്റ്റി ഷാജി ജോസഫ് ചുങ്കക്കരോട്ട് എന്നിവർ പ്രസംഗിക്കും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]