ADVERTISEMENT

ADVERTISEMENT

സ്കൂൾ സുരക്ഷാസമിതി യോഗം

വെഞ്ഞാറമൂട് : വാമനപുരം ഗവ യുപി സ്കൂളിലെ സുരക്ഷാ സമിതി യോഗം ഹെഡ്മാസ്റ്ററുടെ അധ്യക്ഷതയിൽ നടന്നു. വെഞ്ഞാറമൂട് പോലീസ് സബ് ഇൻസ്‌പെക്ടർ വിനോദ്, ഹെൽത്ത്‌ ഇൻസ്‌പെക്ടർ സുരാജ്, കെഎസ്ഇബി പ്രതിനിധികൾ, എക്സൈസ് വകുപ്പ് ഇൻസ്‌പെക്ടർ അരുൺ, വാർഡ് മെമ്പർ ബിനിതകുമാരി, പിടിഎ പ്രസിഡന്‍റ് സാബു, എസ്എംസി ചെയർമാൻ എസ്.ആർ. രജികുമാർ, എംപിടിഎ പ്രസിഡന്‍റ് കാർത്തിക തുടങ്ങിയവർ പങ്കെടുത്തു.

ADVERTISEMENT

തട്ടിപ്പ്: യുവതി അറസ്റ്റിൽ

വിഴിഞ്ഞം: ലോട്ടറി കടയിൽനിന്ന് ലക്ഷങ്ങൾ തട്ടിയ ജീവനക്കാരി അറസ്റ്റിൽ. വിഴിഞ്ഞം കോട്ടപ്പുറം ചരുവിള വീട്ടിൽ അൽഫോൻസാമ്മയെയാണ് വിഴിഞ്ഞം പോലീസ് പിടികൂടിയത്. വിഴിഞ്ഞത്തെ ജെഎംജെ ലോട്ടറി ഏജൻസിയിലെ ജീവനക്കാരിയായിരുന്ന ഇവർ 2019 മുതൽ 2024 വരെ ലോട്ടറി വിറ്റു കിട്ടുന്ന പണം സ്വന്തം അക്കൗണ്ടിലേക്ക് മാറ്റിയതായാണു പരാതി. ചെറുകിട ലോട്ടറി ഏജന്‍റുമാരെ കൊണ്ട് കടം വാങ്ങിപ്പിച്ച് ഈ ലോട്ടറി വിറ്റുകിട്ടിയ പണം ഗൂഗിൾ പേ വഴി സ്വന്തം അക്കൗണ്ടിലേക്ക് മാറ്റിയാണ് തട്ടിപ്പു നടത്തിയതെന്നും ഒരു കോടിയിൽ പരം രൂപ തട്ടിയെടുത്തതായും ഏജൻസി ഉടമ എം വിൽഫ്രഡ് പറയുന്നു. അതേസമയം 25 ലക്ഷത്തോളം രൂപ തട്ടിയെടുത്തെന്ന് പ്രതി സമ്മതിച്ചതായി വിഴിഞ്ഞം പോലീസ് അറിയിച്ചു.

വനിതാ തിയറ്റര്‍ നാടക പരിശീലനക്യാമ്പ്

നെടുമങ്ങാട്: സ്ത്രീധന- ഗാര്‍ഹിക പീഡനങ്ങൾക്കെതിരെ സ്ത്രീശാക്തീകരണ നാടകവുമായി ആനാട് ഗ്രാമപഞ്ചായത്ത്. ഈ വര്‍ഷം ജില്ലയില്‍ ആദ്യമായി നടക്കുന്ന വനിതാജംഗ്ഷന്‍ പരിപാടിയിലാണ് പഞ്ചായത്ത് കനല്‍ എന്ന നാടകവുമായി രംഗത്തെത്തിയത്. കുടുംബങ്ങള്‍ക്കുള്ളില്‍ സ്ത്രീകള്‍ അനുഭവിക്കുന്ന മാനസികവും ശാരീരികവുമായ സങ്കടങ്ങളെ അതിജീവിക്കാനുള്ള പാഠങ്ങളാണ് നാടകം പകര്‍ന്നു നല്‍കുന്നത്. 40-മിനിട്ട് ദൈര്‍ഘ്യമുള്ള ചെറുനാടകത്തില്‍ 20-സ്ത്രീകളാണ് അരങ്ങിലും അണിയറയിലുമായെത്തുന്നത്. ഇരിഞ്ചയം സനല്‍ നാടകരചനയും അനില്‍ കാരേറ്റ് സംവിധാനവും നിര്‍വഹിച്ച നാടകം ജില്ലയിലെ എല്ലാ പഞ്ചായത്തുകളിലുമെത്തും. വീട്ടമ്മമാര്‍ മുതല്‍ വിദ്യാര്‍ഥിനികള്‍ വരെ നാടകത്തില്‍ അഭിനയിക്കുന്നുണ്ട്. കേരള പോലീസിലെ മിനിസ്റ്റീരിയല്‍ സ്റ്റാഫില്‍ നിന്നും വിരമിച്ച ജയകുമാരി, എട്ടാം ക്ലാസുകാരി അബിഷ്ട വരെ നാടകത്തിന് നിറപ്പൊലിമ പകരാന്‍ വേദിയിലെത്തുന്നുണ്ട്.

കളക്ടറേറ്റില്‍ ലീപ് കേരള ഹെല്‍പ്പ് ഡെസ്‌ക് തുടങ്ങി

പേരൂര്‍ക്കട: തദ്ദേശ സ്വയംഭരണ തെരഞ്ഞെടുപ്പിന് മുന്നോടിയായി ലീപ് കേരള (ലോക്കല്‍ ബോഡി ഇലക്‌ഷന്‍ അവയര്‍നെസ് പ്രോഗ്രാം) വോട്ടര്‍ ഹെല്‍പ്പ് ഡെസ്‌ക് കളക്ടറേറ്റില്‍ ആരംഭിച്ചു. ജില്ലാ കളക്ടര്‍ അനുകുമാരി ഉദ്ഘാടനം ചെയ്തു. വോട്ടര്‍ ബോധവത്കരണ പരിപാടി ആരംഭിക്കുക, യോഗ്യരായവരെ വോട്ടര്‍പ്പട്ടികയില്‍ ഉള്‍പ്പെടുത്തുന്നത് ഉറപ്പാക്കുക, വോട്ടിംഗ് പങ്കാളിത്തത്തില്‍ യുവ വോട്ടര്‍മാരുടെ ഇടയിലുള്ള നിസംഗത പരിഹരിക്കുക, തിരഞ്ഞെടുപ്പ് സംവിധാനത്തില്‍ പങ്കാളികളാകേണ്ടതിന്റെ പ്രാധാന്യം വോട്ടര്‍മാരെ ഉദ്ബോധിപ്പിക്കുക തുടങ്ങിയവയാണ് ലീപ് കാന്പയിന്‍റെ ലക്ഷ്യം. വോട്ടിംഗ് മെഷീനുകളുടെ പ്രാഥമിക പരിശോധനയും ജില്ലാ കളക്ടറുടെ നേതൃത്വത്തില്‍ നടത്തി.

വാഹനമോഷണം: പ്രതി പിടിയില്‍

പേരൂര്‍ക്കട: നിരവധി വാഹനമോഷണക്കേസിലെ പ്രതിയെ കന്‍റോൺമെന്‍റ് എസി സ്റ്റ്യു വര്‍ട്ട് കീലറിന്‍റെ നിര്‍ദേശപ്രകാരം പോലീസ് പിടികൂടി. ഒറ്റശേഖരമംഗലം മണ്ഡപത്തിന്‍കടവ് കനാല്‍ക്കര മേലേപുത്തന്‍ വീട്ടില്‍ ഷിജു (27) ആണ് പിടിയിലായത്. വട്ടിയൂര്‍ക്കാവ് തിട്ടമംഗലം എന്‍എസ്പി ലെയിന്‍ 106-ാം നമ്പര്‍ വീട്ടില്‍ വാടകയ്ക്കു താമസിക്കുന്ന പെരുമ്പഴുതൂര്‍ സ്വദേശി വിഷ്ണുവിന്‍റെ ഹോണ്ട ആക്ടീവ സ്‌കൂട്ടര്‍ മോഷണം പോയതുമായി ബന്ധപ്പെട്ടു നടത്തിയ അന്വേഷണത്തിലാണ് പ്രതി പിടിയിലായത്. തമ്പാനൂര്‍, കവടിയാര്‍ ഭാഗങ്ങളിലെ സിസിടിവി ദൃശ്യങ്ങള്‍ പരിശോധിച്ചതില്‍ നിന്നാണ് പ്രതിയെക്കുറിച്ചുള്ള വിവരങ്ങള്‍ ലഭിച്ചത്. വിവിധ സ്റ്റേഷനുകളിലായി 25 വാഹനമോഷണക്കേസുകള്‍ പ്രതിക്കെതിരേയുണ്ട്. ഒളിവിലായിരുന്ന പ്രതിയെ വീടിനു സമീപത്തുനിന്നാണ് പിടികൂടിയത്. അറസ്റ്റിലായ പ്രതിയെ കോടതി റിമാന്‍ഡ് ചെയ്തു.

ശസ്ത്രക്രിയ മുടങ്ങിയ സംഭവം: ബിജെപി റീത്തുവച്ചു പ്രതിഷേധിച്ചു

നെയ്യാറ്റിൻകര : ജനറല്‍ ആശുപത്രിയിൽ ഓപ്പറേഷൻ തിയേറ്റർ അടച്ചിട്ടതിൽ പ്രതിഷേധിച്ച് ബിജെപി ആശുപത്രിയിലേയ്ക്ക് നടത്തിയ മാര്‍ച്ച് പോലീസ് തടഞ്ഞു. പ്രവര്‍ത്തകര്‍ ആശുപത്രി കവാടത്തില്‍ റീത്ത് സമര്‍പ്പിച്ചു. ബിജെപി നെയ്യാറ്റിൻകര നിയോജക മണ്ഡലം കമ്മിറ്റിയുടെ നേതൃത്വത്തില്‍ സംഘടിപ്പിച്ച പ്രതിഷേധ സമരം സൗത്ത് ജില്ലാ പ്രസിഡന്‍റ് മുക്കംപാലമൂട് ബിജു ഉദ്ഘാടനം ചെയ്തു. മണ്ഡലം പ്രസിഡന്‍റ് ഗോപാലകൃഷ്ണന്‍ അധ്യക്ഷനായി. ജില്ലാ ജനറൽ സെക്രട്ടറി ഷിബു ബാലരാമപുരം, വൈസ് പ്രസിഡന്‍റ് മഞ്ചത്തല സുരേഷ് എന്നിവര്‍ പ്രസംഗിച്ചു.

കുടിവെള്ളക്ഷാമം : പാറശാല ഗവ. ആശുപത്രി സൂപ്രണ്ടിനെ ഉപരോധിച്ചു

പാറശാല : പാറശാല സര്‍ക്കാരാശുപത്രിയില്‍ കുടിവെള്ളക്ഷാമം രൂക്ഷം. രോഗികള്‍ കുടിവെള്ളത്തിനായി നെട്ടോട്ടം ഓടുന്നതിനെതിരെ പ്രതിഷേധം ശക്തമായിട്ടുണ്ട്. പൈപ്പ് ലൈൻ മാറ്റി സ്ഥാപിക്കുകയും കുടിവെള്ളക്ഷാമം പരിഹരിച്ചശേഷം പൊട്ടി പൊളിഞ്ഞുകിടക്കുന്ന റോഡ് ടാര്‍ ചെയ്ത് ബലപ്പെടുത്തണമെന്നാവശ്യപ്പെട്ടാണ് കോണ്‍ഗ്രസ് പ്രവര്‍ത്തകര്‍ പാറശാല സര്‍ക്കാര്‍ ആശുപത്രി സൂപ്രണ്ടിനെ ഉപരോധിച്ചത്. പഞ്ചായത്ത് മെമ്പര്‍മാരായ ലവന്‍ ജോയി, വിനയനാഥ്, താര തുടങ്ങിയവര്‍ക്കു പുറമേ കോണ്‍ഗ്രസ് പ്രവര്‍ത്തകരായ വത്സലന്‍ കുഴിഞ്ഞാന്‍വിള, ലത, അമ്പിളി മുള്ളുവിള തുടങ്ങിയ പ്രവര്‍ത്തകരും ചേര്‍ന്നാണ് സൂപ്രണ്ടിനെ ഉപരോധിച്ചത്. സര്‍ക്കാര്‍ ആശുപത്രിയിലെ കുടിവെള്ള ക്ഷാമം പരിഹരിച്ചില്ലെങ്കില്‍ ശക്തമായ പ്രതിഷേധം പരിപാടികള്‍ സംഘടിപ്പിക്കുമെന്നു കോണ്‍ഗ്രസ് മേതാക്കള്‍ മുന്നറിയിപ്പ് നല്‍കി.

ശസ്ത്രക്രിയ മുടങ്ങിയ സംഭവം : നെയ്യാറ്റിൻകര ജനറല്‍ ആശുപത്രിയില്‍ പ്രതിഷേധവുമായി യൂത്ത് കോണ്‍ഗ്രസ്

നെയ്യാറ്റിന്‍കര: നെയ്യാറ്റിന്‍കര ജനറല്‍ ആശുപത്രിയിലെ ശസ്ത്രക്രിയകള്‍ മുടങ്ങിയ സംഭവത്തില്‍ പ്രതിഷേധിച്ച് യൂത്ത് കോണ്‍ഗ്രസ് പ്രവര്‍ത്തകര്‍ ആശുപത്രി സൂപ്രണ്ടിനെ ഉപരോധിച്ചു. നെയ്യാറ്റിൻകര ജനറൽ ആശുപത്രിയിൽ ഓപ്പറേഷൻ തിയറ്ററിലെ ജലസംഭരണിയിലെ കുടിവെള്ളത്തിൽ കോളിഫോം ബാക്ടീരിയയുടെ സാന്നിധ്യം കണ്ടെത്തിയതിനെ തുടർന്നാണ് കഴിഞ്ഞ ദിവസം ഓപ്പറേഷൻ തിയറ്റർ അടച്ചിടുകയും നേരത്തെ നിശ്ചയിച്ചിരുന്ന ചില ശസ്ത്രക്രിയകള്‍ താത്കാലികമായി മാറ്റി വയ്ക്കുകയും ചെയ്തത്. മന്ത്രി വീണാ ജോര്‍ജ് രാജിവയ്ക്കണമെന്നതടക്കമുള്ള മുദ്രാവാക്യങ്ങളുമായി ആശുപത്രി വളപ്പിലെത്തിയ യൂത്ത് കോണ്‍ഗ്രസ് പ്രവര്‍ത്തകര്‍ സൂപ്രണ്ടിനെ ഓഫീസില്‍ ഉപരോധിച്ചു. യൂത്ത് കോണ്‍ഗ്രസ് നെയ്യാറ്റിന്‍കര ബ്ലോക്ക് കമ്മിറ്റിയുടെ നേതൃത്വത്തില്‍ നടന്ന ഉപരോധ സമരത്തിന് നിയോജകമണ്ഡലം പ്രസിഡന്‍റ് വിനീത് നേതൃത്വം നല്‍കി. നേതാക്കളായ ഋഷി എസ്. കൃഷ്ണ, ഷൈന്‍ദാസ്, ശ്യാംലാല്‍, അഹമ്മദ് റൈസ്, അരുണ്‍, ഹരി, അരുണ്‍ സേവ്യര്‍ എന്നിവര്‍ പ്രതിഷേധ സമരത്തില്‍ പങ്കെടുത്തു. നെയ്യാറ്റിന്‍കര പോലീസ് സ്ഥലത്തെത്തി പ്രതിഷേധ സമരക്കാരെ അറസ്റ്റ് ചെയ്ത് നീക്കി.

ഇഎസ്ഐ ക്വാര്‍ട്ടേഴ്സുകള്‍ നിലംപൊത്താറായ നിലയില്‍

അന്തിയുറങ്ങുന്നത് ജീവന്‍ പണയംവച്ച് പേരൂര്‍ക്കട: ഇഎസ്ഐ ആശുപത്രി ജീവനക്കാര്‍ താമസിക്കുന്ന ക്വാര്‍ട്ടേഴ്സുകള്‍ നിലംപൊത്താറായ നിലയില്‍. 12 ഓളം വരുന്ന ക്വാര്‍ട്ടേഴ്സുകളിലായി ജീവനക്കാരും അവരുടെ ആശ്രിതരുമായി ഏകദേശം 40 പേരുണ്ട്. മിക്ക കെട്ടിടങ്ങള്‍ക്കും 60 വര്‍ഷത്തെ പഴക്കമാണ് ഉള്ളത്. കേന്ദ്രസര്‍ക്കാരിന്റെ കീഴിലുള്ള ഇഎസ്ഐ കോര്‍പ്പറേഷനിലെ ക്വാര്‍ട്ടേഴ്സുകളുടെ ദുരവസ്ഥയെക്കുറിച്ച് വര്‍ഷങ്ങളായി ജീവനക്കാര്‍ തന്നെ പറഞ്ഞുവരുന്നതാണ്. കേരളത്തിലെ വിവിധ ജില്ലകളില്‍ നിന്നുള്ളവരാണ് ഇവിടെ ക്വാര്‍ട്ടേഴ്സുകള്‍ എടുത്തു താമസിക്കുന്നത്. 90 ശതമാനം വീടുകളുടെയും മേല്‍ക്കൂരയില്‍ ടാര്‍പോളിന്‍ കെട്ടിയിരിക്കുന്നതുകാണാം. കെട്ടിടങ്ങളുടെ മേല്‍ക്കൂരകള്‍ ഇളകുകയും ഓടുകള്‍ പൊട്ടുകയും ചെയ്തിട്ടുണ്ട്. അതിനൊപ്പം കോണ്‍ക്രീറ്റ് കെട്ടിടങ്ങളില്‍ ഈര്‍പ്പം പിടിച്ചു പായല്‍ വളര്‍ന്ന നിലയിലുമാണ്. മിക്ക വീടുകളുടെയും അടുക്കള ഭാഗങ്ങളില്‍ ആസ്ബസ്റ്റോസ് ഷീറ്റുകളും പാളകളും മറ്റും കാണാനാകും. വെള്ളം ഉള്ളിലേക്ക് വീഴാതിരിക്കാന്‍ ചെയ്തിരിക്കുന്നവയാണ് ഇത്. കെട്ടിടങ്ങളുടെ അവസ്ഥ വിലയിരുത്തുന്നതിനായി ഈ മാസം ഒടുവില്‍ കേന്ദ്രസംഘം പേരൂര്‍ക്കടയിലേക്ക് എത്തുന്നുണ്ട്. അങ്ങനെയെങ്കില്‍ കെട്ടിടങ്ങള്‍ പൊളിച്ചുമാറ്റി ജീവനക്കാരുടെ സുരക്ഷ ഉറപ്പാക്കാനായിരിക്കും അവര്‍ ശ്രമിക്കുക. എന്നാല്‍ നിരവധി ജില്ലകളിലുള്ളവര്‍ താമസിക്കുന്ന പ്രസ്തുത വീടുകള്‍ ഒഴിഞ്ഞുകൊടുത്താല്‍ ഇവര്‍ കൂട്ടത്തോടെ എവിടെ താമസിക്കുമെന്ന ചോദ്യം ഉയരുന്നുണ്ട്. അതേസമയം അത്യാഹിതം ഉണ്ടാകുന്നതിനു മുമ്പ് ജീവനക്കാരെ മാറ്റി കെട്ടിടങ്ങള്‍ പൊളിച്ചുനീക്കേണ്ടതുണ്ട്. കെട്ടിടങ്ങള്‍ അറ്റകുറ്റപ്പണി ചെയ്യാന്‍ സാധിക്കാത്തവിധം ചുമരുകള്‍പോലും ഇളകിവീഴാറായ നിലയിലാണ്. ഇഎസ് ഐ കോര്‍പ്പറേഷനാണ് എന്തെങ്കിലും ചെയ്യേണ്ടതെന്നും ജീവനക്കാരുടെ സുരക്ഷ ഉറപ്പാക്കുന്നതിനൊപ്പം അവര്‍ക്കു സ്വസ്ഥമായി കിടന്നുറങ്ങാനുള്ള സാഹചര്യവും ഉണ്ടാകേണ്ടതുണ്ടെന്നും പേരൂര്‍ക്കട ഇ.എസ്.ഐ ആശുപത്രി സൂപ്രണ്ട് ഡോ. സെന്‍റ് ജോര്‍ജ് പറഞ്ഞു.

കൊങ്ങണംഭദ്രകാളി ക്ഷേത്രത്തിൽ മോഷണം

നെടുമങ്ങാട്: കെ‌ാങ്ങണം ഭദ്രകാളി ക്ഷേത്രത്തിൽ കമ്മിറ്റി ഒ‌ാഫിസിലെയും കാണിക്കവഞ്ചിയുടെയും പൂട്ടു തകർത്ത് മോഷണം. കമ്മിറ്റി ഒ‌ാഫിസിൽ ഉണ്ടായിരുന്ന 20,000 രൂപയോളം കവർന്നതായി ക്ഷേത്ര ഭാരവാഹികൾ പറഞ്ഞു. ചൊവാഴ്ച്ച രാത്രിയാണ് മോഷണം. നടന്നത്. ആര്യനാട് പെ‌ാലീസ് അന്വേഷണം ആരംഭിച്ചു

പ്രണയമഞ്ഞ് പെയ്ത ഓഗസ്റ്റ് സന്ധ്യ..!

തിരുവനന്തപുരം: പുതിയ കാലത്തെ ഉന്മാദം തുടിക്കുന്ന പ്രണയവും ഒരു ചെന്പനീർപ്പൂവിന്‍റെ മണമുള്ള ഓമൽ പ്രണയവും വൈലോപ്പിള്ളി സംസ്കൃതി ഭവന്‍റെ സന്ധ്യയിൽ ഇന്നലെ മഞ്ഞിൽ കണങ്ങളായി പൊഴിഞ്ഞു വീണു... പാടി പെയ്ത പ്രണയ വർഷങ്ങളെ ഉണർത്തുവാൻ വൈലോപ്പിള്ളി സംസ് കൃതി ഭവൻ ഒരുക്കിയ അനുരാഗത്തിന്‍റെ ഓഗസ്റ്റിന്‍റെ സമാപന സന്ധ്യയിൽ എസ്.പി. ദേവാനന്ദും ദേവിക വി. നായരും നവതരംഗമായി. അഴലിന്‍റെ ആഴങ്ങളിൽ എന്നു പേരിട്ട പ്രണയസംഗീതത്തിൽ 2000 മുതൽ 2025 വരെയുള്ള മലയാളം, തമിഴ്, ഹിന്ദി പ്രണയഗാനങ്ങൾ നിറഞ്ഞു. 2019-ൽ പുറത്തിറങ്ങിയ അന്പിളി എന്ന ചിത്രത്തിലെ ആരാധികെ... എന്ന ഗാനത്തിലെ എന്‍റെ നെഞ്ചാകെ നീയല്ലെ... എന്ന വരികൾ യുവത്വത്തിന്‍റെ ഹൃദയമിടിപ്പായി... കഭി അൽവിദാ നകഹന എന്ന സിനിമയിലെ മിതുവാ... ദേവാനന്ദ് പാടിയതും വേറിട്ട പ്രണയത്തിന്‍റെ മാറ്റൊലിയായി മുഴങ്ങി.... ഹാരിസ് ജയരാജിന്‍റെ സംഗീതത്തിൽ ഒരു കാലം കൊണ്ടാടിയ വസീഗര... എന്ന ഗാനം ദേവിക പാടിയത് ബോംബെ ജയശ്രീയുടെ സംഗീതഭാവം ആവാഹിച്ചാണ്. ഇതോടൊപ്പം സ്വം എന്ന ചിത്രത്തിലെ ഒരു ചെന്പനീർ പൂവിറുത്തു ഞാനോമലേ... എന്ന ഗാനവും അലിഞ്ഞുചേർന്നു. അനുരാഗത്തിന്‍റെ ഓഗസ്റ്റിന്‍റെ ഭാഗമായി വൈലോപ്പിള്ളി സംസ്കൃതി ഭവൻ സംഘടിപ്പിച്ച പ്രണയ ഗാനാലാപന മത്സര വിജയികൾക്കുള്ള സമ്മാനദാനം വിജോയ് അലക്സാണ്ടറും ലേഖ കെ. നായരും ചേർന്നു സമ്മാനിച്ചു. സംസ്കൃതി ഭവൻ വൈസ് ചെയർമാൻ ജി. എസ്. പ്രദീപ്, മെന്പർ സെക്രട്ടറി പി. എസ്. മനേഷ് എന്നിവർ പ്രസംഗിച്ചു.

ഇരുന്നൂറിലേറെ കരള്‍മാറ്റ ശസ്ത്രക്രിയകളെന്ന നാഴികക്കല്ലുമായി കിംസ്ഹെല്‍ത്ത്

തിരുവനന്തപുരം: കരള്‍ മാറ്റിവയ്ക്കല്‍ ശസ്ത്രക്രിയയിലൂടെ ജീവിതം തിരികെ പിടിച്ചവരുടെ സംഗമം നടത്തി കിംസ്ഹെല്‍ത്ത്. മുതിര്‍ന്നവരിലും കുട്ടികളിലുമായി 200ലേറെ കരള്‍ മാറ്റിവയ്ക്കല്‍ ശസ്ത്രക്രിയകള്‍ വിജയകരമായി പൂര്‍ത്തിയാക്കിയതിനോടനുബന്ധിച്ചാണ് പരിപാടി സംഘടിപ്പിച്ചത്. ചലച്ചിത്ര താരം ലക്ഷ്മി ഗോപാലസ്വാമി മുഖ്യാതിഥിയായി. ഇതോടനുബന്ധിച്ചു നടന്ന ചടങ്ങിൽ പീഡിയാട്രിക് ഗ്യാസ്ട്രോഎന്‍ററോളജി, ഹെപ്പറ്റോളജി ആന്‍ഡ് ഐഇഎം ക്ലിനിക്കും ഉദ്ഘാടനം ചെയ്തു. കിംസ്ഹെല്‍ത്ത് ചെയര്‍മാനും മാനേജിംഗ് ഡയറക്ടറുമായ ഡോ. എം.ഐ സഹദുള്ള അധ്യക്ഷത വഹിച്ചു. ഹെപ്പറ്റോബൈലറി, പാന്‍ക്രിയാറ്റിക് ആൻഡ് ലിവര്‍ ട്രാന്‍സ്പ്ലാന്‍റ് വിഭാഗം സീനിയര്‍ കണ്‍സള്‍ട്ടന്‍റ് ഡോ. ടി.യു ഷബീറലി ഡിപ്പാര്‍ട്ട്മെന്‍റിന്‍റെ പ്രവര്‍ത്തനങ്ങളെക്കുറിച്ചും നേട്ടങ്ങളെക്കുറിച്ചും പരിപാടിയില്‍ വിശദീകരിച്ചു. കിംസ്ഹെല്‍ത്ത് സഹസ്ഥാപകന്‍ ഇ.എം നജീബ് ആശംസകള്‍ അറിയിച്ചു. പീഡിയാട്രിക് ഗ്യാസ്ട്രോഎന്‍ററോളജി, ഹെപ്പറ്റോളജി ആൻഡ് ലിവര്‍ ട്രാന്‍സ്പ്ലാന്‍റ്് വിഭാഗം അസോസിയേറ്റ് കണ്‍സള്‍ട്ടന്‍റ് ഡോ. അനു കെ. വാസു സ്വാഗതവും ട്രാന്‍സ്പ്ലാന്‍റ് സര്‍വീസസ് ക്ലിനിക്കല്‍ ചെയര്‍ ആന്‍ഡ് സീനിയര്‍ കണ്‍സള്‍ട്ടന്‍റ് ഡോ. ഷിറാസ് അഹമ്മദ് റാത്തര്‍ നന്ദിയും രേഖപ്പെടുത്തി. ഗ്യാസ്‌ട്രോഎന്‍ട്രോളജി വിഭാഗം സീനിയർ കൺസൾട്ടന്‍റ് ഡോ. മധു ശശിധരൻ ചടങ്ങിൽ പങ്കെടുത്തു.

നിയന്ത്രണംവിട്ട കാർ കനാലിലേക്ക് മറിഞ്ഞു

കാട്ടാക്കട: നിയന്ത്രണംവിട്ട കാർ കനാലിലേക്ക് മറിഞ്ഞ് കുട്ടികളുൾപ്പെടെ നാലംഗ കുടുംബം അത്ഭുതകരമായി രക്ഷപ്പെട്ടു. കാട്ടാക്കട വീരണകാവ് ജംഗ്ഷനു സമീപം നെയ്യാറിന്‍റെ 20 അടിയോളം താഴ്ചയുള്ള കനാലിലാണ് ചൊവ്വാഴ്ച രാത്രി 12.30 ഓടെ കാർ നിയന്ത്രണം തെറ്റി തലകീഴായി മറിഞ്ഞത്. വീരണകാവ് സ്വദേശിയായ അഭിലാഷ്-ചിഞ്ചു ദമ്പതികളും ഇവരുടെ രണ്ടു മക്കളുമാ ണു കാറിൽ ഉണ്ടായിരുന്നത്.തമിഴ്നാട് മാർത്താണ്ഡത്തു പോയി മടങ്ങിവരവേ ആയിരുന്നു അപകടം. സുരക്ഷാ വേലികളില്ലാത്ത റോഡിന്‍റെ വശത്തുകൂടി കുത്തനെ കനാലിലേക്ക് പതിക്കുകയായിരുന്നു കാർ. തലകീഴായി മറിഞ്ഞു വെള്ളത്തിലേക്കു വീണ വാഹനത്തിൽനിന്ന് ഇവർക്കു സുരക്ഷിതരായി ഇറങ്ങാൻ സാധിച്ചു. ഒരു കുട്ടിക്ക് മാത്രമാണ് നേരിയ പരിക്കുള്ളത്. ബഹളംകേട്ടു സമീപവാസികളും വാഹനത്തിൽനിന്നും പുറത്തിറങ്ങിയ സുഭാഷ് ഒരു ബന്ധുവിനെ വിളിച്ചുമാണ് അപകടത്തിൽപെട്ടവരെ കരയ്ക്കു കയറിയത്. തലകീഴായി കിടന്ന കാറിനെ പൂർവസ്ഥിതിയിൽ ആക്കി. കനാലിൽ വെള്ളം കുറവുണ്ടായിരുന്നതിനാൽ മറ്റ് അനിഷ്ട സംഭവമുണ്ടായില്ല. രാവിലെ 10 മണിയോടെ ക്രൈൻ ഉപയോഗിച്ച് ഒരു മണിക്കൂർ നേരത്തെ പരിശ്രമത്തിനൊടുവിൽ കാർ പുറത്തെത്തിച്ചു. ഈ സമയം കാട്ടാക്കട നെയ്യാർഡാം റോഡിൽ ഗതാഗത തടസമുണ്ടായി. കാറിന്‍റെ മുകൾഭാഗവും വശങ്ങളുമെല്ലാം തകർന്നിട്ടുണ്ട്. ഒരു വർഷത്തിനിടെ ഇവിടെ ടൂറിസ്റ്റ് വാഹനം ഉൾപ്പെടെ അഞ്ചാമത്തെ വാഹനമാണുണ്ടായത്. പട്ടക്കുളം മുതൽ കള്ളിക്കാട് വരെയുള്ള ഭാഗങ്ങളിൽ പലയിടത്തും മീറ്ററുകളോളമാണു കനാലിന്‍റെ വശങ്ങളിൽ സുരക്ഷാ വേലിയില്ലാത്തത്. ഇടുങ്ങിയ റോഡിലൂടെ വലിയ വാഹനങ്ങൾ സമാന്തരമായി കടന്നു പോകുന്നത് അപകടാവസ്ഥയിലാണ്. ചെറുവാഹനങ്ങൾ ഇതിനിടയിൽ പെട്ടുപോയാൽ കനാലിലേക്കു പതിക്കുമെന്നതും ഉറപ്പാണ്. റോഡിന്‍റെ വശങ്ങളിൽ നിൽക്കുന്ന കാടുവെട്ടിത്തെളിച്ച് ഇവിടെ അപകട മുന്നറിയിപ്പ് സംവിധാനം എങ്കിലും ഒരുക്കണമെന്നാണ് യാത്രക്കാരുടെയും നാട്ടുകാരുടെയും ആവശ്യം.

യുവാവിനെ കുത്തിപ്പരിക്കേല്‍പ്പിച്ച സംഭവം; മൊട്ട ഷാജി അറസ്റ്റില്‍

പേരൂര്‍ക്കട: യുവാവിനെ കത്തികൊണ്ട് കുത്തിപ്പരിക്കേല്‍പ്പിച്ച സംഭവത്തില്‍ ശംഖുമുഖം സ്വദേശി മൊട്ട ഷാജി എന്ന ഷാജി (40) യുടെ അറസ്റ്റ് ഫോര്‍ട്ട് പോലീസ് രേഖപ്പെടുത്തി. ആറ്റുകാല്‍ കൊഞ്ചിറവിള കല്ലടിമുഖം ഫ്ളാറ്റില്‍ താമസിച്ചു വരുന്ന അനൂപിനെ (18) കുത്തിപ്പരിക്കേല്‍പ്പിച്ച സംഭവത്തിലാണ് അറസ്റ്റ്. ശനിയാഴ്ച രാത്രി 10.30നായിരുന്നു കേസിനാസ്പദമായ സംഭവം. മൊട്ട ഷാജി 8000 രൂപ അനൂപിന്‍റെ സുഹൃത്തായ വിഷ്ണുവിന്‍റെ അമ്മയ്ക്ക് കടമായി നല്‍കിയിരുന്നു. ഈ പണം ഏഴുമാസമായിട്ടും തിരികെ കൊടുക്കാത്തതിനെച്ചൊല്ലിയായിരുന്നു ഇരുവരും തമ്മില്‍ വാക്കുതര്‍ക്കമുണ്ടായത്.

ലോ അക്കാഡമിയില്‍ എസ്എഫ്ഐ- എബിവിപി സംഘര്‍ഷം : രണ്ടു വിദ്യാര്‍ഥികള്‍ക്കു പരിക്ക്

പേരൂര്‍ക്കട: ലോ അക്കാഡമിയില്‍ ബുധനാഴ്ചയുണ്ടായ സംഘര്‍ഷത്തില്‍ രണ്ടുപേര്‍ക്ക് പരിക്കേറ്റു. രാവിലെ 11 മണിയോടുകൂടിയാണ് എസ്എഫ്ഐ-എബിവിപി സംഘര്‍ഷമുണ്ടായത്. പുറത്തുനിന്നും എബിവി പി പ്രവര്‍ത്തകര്‍ കാമ്പസിലേക്ക് അതിക്രമിച്ചു കയറി ആക്രമിക്കുകയായിരുന്നുവെന്നാണ് എസ്എഫ്ഐക്കാര്‍ പറയുന്നത്. അതേസമയം പ്രകോപനമില്ലാതെ എസ്എഫ്ഐക്കാര്‍ ആക്രമിച്ചതായി എബിവിപി പ്രവര്‍ത്തകരും ആരോപിക്കുന്നു. പത്തോളം വിദ്യാര്‍ഥികളാണ് സംഘര്‍ഷത്തില്‍ ഏര്‍പ്പെട്ടത്. സംഭവത്തില്‍ എബിവിപി പ്രവര്‍ത്തകനായ അതുല്‍കൃഷ്ണയ് ക്ക് ഹെല്‍മെറ്റു കൊണ്ടുള്ള അടിയില്‍ ഗുരുതരമായി പരിക്കേറ്റു. ഇയാളെ ആറ്റുകാല്‍ ആശുപത്രിയില്‍ പ്രവേശിപ്പിച്ചു. എസ്എഫ് ഐ പ്രവര്‍ത്തകനായ ഗൗതം കൃഷ്ണയ്ക്കു നെറ്റിക്കു സാരമായി പരിക്കേറ്റു. ഇയാള്‍ ആശുപത്രിയില്‍ പ്രാഥമിക ചികിത്സ തേടി. അതേസമയം കുറച്ചുനാളുകള്‍ക്കു മുമ്പ് ഇരു വിഭാഗങ്ങളും തമ്മിലുണ്ടായിരുന്ന വിഷയത്തിന്‍റെ ചുവടുപിടിച്ചാണു അടിപിടി ഉണ്ടായതെന്നു പേരൂര്‍ക്കട പോലീസ് അറിയിച്ചു.

തൈക്കാട് പരിശുദ്ധ സ്വർഗാരോപിത മാത പള്ളിയിൽ തിരുനാളാഘോഷം തുടങ്ങി

തിരുവനന്തപുര: ലത്തീൻ അതിരൂപതയിൽ തൈക്കാട് പരിശുദ്ധ സ്വർഗാരോപിത മാത പള്ളിയിൽ ഇടവക മധ്യസ്ഥയായ പരിശുദ്ധ കന്യകാമറിയത്തിന്‍റെ 144-ാം വാർഷിക തിരുനാളും സ്വതന്ത്ര ഇടവകയായി പ്രഖ്യാപിച്ചതിന്‍റെ 50-ാം വാർഷിക ആഘോഷങ്ങൾക്കും തുടക്കം കുറിച്ചു. ഇടവക വികാരി ഫാ. സജു റോൾഡൻ കൊടിയേറ്റം നിർവഹിച്ചു. 13 വരെ എല്ലാ ദിവസവും വൈകുന്നേരം അഞ്ചിനു ജപമാല, ലിറ്റിനി, നൊവേന, ദിവ്യബലി, വചനപ്രഘോഷണം എന്നിവയും ഉണ്ടായിരിക്കും. ഇന്നലെ നടന്ന ശുശ്രൂഷകൾക്ക് കൊയിത്തൂർക്കോണം ഇടവക വികാരി ഫാ. ശാന്തപ്പനും അതിരൂപത ടിഒ‌ടി ഡയറക്ടർ മോൺ. ജെയിംസ് കുലാസും കാർമികരായി. ഇന്നു പേട്ട ഫെറോന വികാരി ഫാ. റോഡ്രിക്‌സ് കുട്ടി പുല്ലുവിളയും ഫെറോന വികാരി ഡോ. ഡൈസണും നാളെ ചൈൽഡ് കമ്മീഷൻ സെക്രട്ടറി ഫാ. നിജു അജിത്, മീഡിയ കമ്മീഷൻ സെക്രട്ടറി ഫാ. വിജിൽ ജോർജ് എന്നിവരും നേതൃത്വം നൽകും. ഒന്പതിനു അതിരൂപത ബിസിസി സെക്രട്ടറി ഫാ സനീഷ് പുന്നക്കാമുഗൾ, ഇടവക വികാരി ഫാ. ഇമ്മാനുവൽ എന്നിവരും 10നുജൂബിലി ആശുപത്രി ഡയറക്ടർ ഫാ. ലെനിൻ രാജ്, പുഷ്‌പഗിരി ഇടവകവികാരി ഫാ. പൻക്രിഷ്യസ് എന്നിവർ നേതൃത്വം നൽകും. 11 ന് ബിഷപ് സെക്രട്ടറി ഫാ. ബിജോയ്, അതിരൂപത പ്രൊക്കുറേറ്റർ ഫാ. ജൂലിയസ് സാവിയോ എന്നിവരും 12നു ഡോൺ ബോസ്കോ സെന്‍ററിലെ ഫാ. ജിജി കലവനാൻ, ഫാ. തോമസ് മേക്കാടൻ എന്നിവരും 13നു കിള്ളിപ്പാലം ഇടവക വികാരി ഫാ. ആന്‍റോ ഡിക്സൻ, കൊല്ലംകോട് ഇടവക സഹവികാരി ഫാ. ജിതിൻ ജോൺ എന്നിവരും 14നു രാവിലെ 6.30ന് ഇടവകവികാരി ഫാ. സജു റോൾഡനും നേതൃത്വം നൽകും. വൈകുന്നേരം 5.30നു സന്ധ്യാവന്ദന പ്രാർഥനയ്ക്ക് പാളയം ഫൊറോന വികാരി ഫാ. വിൽഫ്രഡും വചനപ്രഘോഷണത്തിനു അതിരൂപത യുവജന ഡയറക്ടർ ഫാ. ഡാർവിൻ ഫെർണാണ്ടസും നേതൃത്വം നൽകും. തുടർന്നു മാതാവിന്‍റെ തിരുസ്വരൂപം വഹിച്ചുള്ള പ്രദക്ഷിണവും ആശീർവാദവും നടക്കും. തിരുനാൾ ദിവസമായ 15നു രാവിലെ പത്തിനു തുണ്ടത്തിൽ ഇടവക വികാരി ഫാ. ജെറാൾഡ് ദാസനും വട്ടിയൂർക്കാവ് ഫെറോന വികാരി ഫാ. അനീഷ് ഫെർണാണ്ട‌സും നേതൃത്വം നൽകുന്ന ആഘോഷമായ തിരുനാൾ സമൂഹബലിയും പരിശുദ്ധ കുർബാനയുടെ പ്രദക്ഷിണവും ആശീർവാദവും ഉണ്ടായിരിക്കും. തുടർന്ന് കൊടിയിറക്കും.

ഹിരോഷിമാദിനം: സുഡാക്കോ പക്ഷിയുടെ മാതൃക സൃഷ്ടിച്ച് സെന്‍റ് ജോൺസിലെ വിദ്യാർഥികൾ

തിരുവനന്തപുരം: സമാധാനത്തിന്‍റെ പ്രതീകമായ സുഡാക്കോ പക്ഷിയുടെ മാതൃക സൃഷ്ടിച്ച് സെന്‍റ് ജോൺസ് മോഡൽ സ്കൂൾ വിദ്യാർഥികൾ. ഐക്യദാർഢ്യം പ്രകടിപ്പിച്ച് മന്ത്രി മുഹമ്മദ് റിയാസ് വന്നുചേർന്നപ്പോൾ വിദ്യാർഥികൾക്കെല്ലാം അതിശയവും സന്തോഷവും. രണ്ടാം ലോക മഹായുദ്ധത്തിന്‍റെ ഭാഗമായ ഹിരോഷിമ ദുരന്തത്തിന്‍റെ എൺപതാം വാർഷികാഘോഷത്തിന്‍റെ ഭാഗമായാണ് സെന്‍റ് ജോൺസ് സ്കൂൾ ആയിരം സുഡാക്കോ പക്ഷികളുടെ മാതൃക സൃഷ്ടിച്ച് വേറിട്ട പ്രവർത്തനം നടത്തിയത്. വിദ്യാർഥികൾ അവർ തയാറാക്കിയ സുഡാക്കോ പക്ഷികളെ ഉയർത്തിയപ്പോൾ മന്ത്രി റിയാസും പ്രിൻസിപ്പൽ ഫാ. ജോസ് ചരുവിലും എംഎൽഎമാരായ കടകംപള്ളി സുരേന്ദ്രനും അഡ്വ. വി. ജോയിയും സുഡാക്കോയുടെ വലിയ മാതൃക ഉയർത്തിക്കാട്ടി ഐക്യദാർഢ്യം പ്രകടിപ്പിച്ചു. സ്കൂളിലെ ഹയർ സെക്കൻഡറി വിഭാഗത്തിന്‍റെ രജത ജൂബിലി ആഘോഷത്തിന്‍റെ ഭാഗമായിട്ടൊരുക്കിയ ദുരന്തത്തിന്‍റെ എൺപതാണ്ടുകൾ എന്ന ഫോട്ടോ പ്രദർശനം തിരുവനന്തപുരം വൈഎം സിഎയുമായി സഹകരിച്ചാണ് ചടങ്ങു സംഘടിപ്പിച്ചത്. സ്കൂളിലെ സോഷ്യൽ സയൻസ് ക്ലബും നാഷണൽ സർവീസ് സ്കീമും പരിപാടിയുമായി സഹകരിച്ചു. ഫോട്ടോ പ്രദർശനത്തിന്‍റെ സമാപനം നാളെ തിരുവിതാംകൂർ രാജകുടുംബാംഗം അവിട്ടം തിരുനാൾ ആദിത്യവർമ നിർവഹിക്കുമെന്ന് പ്രിൻസിപ്പൽ ഫാ. ജോസ് ചരുവിൽ പറഞ്ഞു. പ്രിൻസിപ്പൽ ഫാ. ജോസ് ചരുവിലിന്‍റെ അധ്യക്ഷതയിൽ ടൂറിസം മന്ത്രി മുഹമ്മദ് റിയാസ് ചടങ്ങ് ഉത്ഘാടനം ചെയ്തു. എംഎൽഎമാരായ കടകംപള്ളി സുരേന്ദ്രൻ,അഡ്വ. വി. ജോയി, വൈഎംസി എ വൈസ് പ്രസിഡന്‍റ് ് ബിൻസി വി. തോമസ്, വൈസ് പ്രിൻസിപ്പൽ അജീഷ് കുമാർ, ജൂബിലി കൺവീനർ ബിന്നി സാഹിതി, ബിജു കെ. ജോർജ് തുടങ്ങിയവർ നേതൃത്വം നൽകി. സ്കൂളിലെ ചിത്ര കലാ അധ്യാപകൻ ജിനി ജോസമാണ് സുഡാക്കോ യുടെ മാതൃക നിർമിച്ചത്.

മത്സ്യത്തൊഴിലാളിയെ കടലിൽ കാണാതായി

ആറു പേർ നീന്തി രക്ഷപ്പെട്ടു തിരുവനന്തപുരം: മീൻ പിടുത്തത്തിനിടയിൽ വള്ളം തിരയിൽ പെട്ടു മറിഞ്ഞു മത്സ്യത്തൊഴിലാളിയെ കാണാതായി. വള്ളത്തിലുണ്ടായിരുന്ന മറ്റ് ആറുപേർ നീന്തി രക്ഷപ്പെട്ടു. വെട്ടുകാട് തൈ വിളകം വീട്ടിൽ അലക്സ് പെരേരയെ (60)യാണ് സെന്‍റ് ആൻഡ്രൂസ് ഭാഗത്തെ കടലിൽ കാണാതായായത്. ഇന്നലെ രാവിലെ ആറോടെ സെന്‍റ് ആൻഡ്രൂസിൽ (പുത്തൻതോപ്പ് മത്സ്യഗ്രാമം) നിന്ന് ഏഴു മത്സ്യത്തൊഴിലാളികളുമായി മീൻ പിടിക്കാൻ പോയ വള്ളമാണ് ഇതിനു സമീപത്തെ കടലിൽ തിരയിൽപെട്ടു മറിഞ്ഞത്. വള്ളത്തിലുണ്ടായിരുന്ന മമറ്റ് ആറുപേർ നീന്തി രക്ഷപ്പെട്ടെങ്കിലും അലക്സ് പെരേരയെ കണ്ടെത്താനായില്ല. വള്ളത്തിലുണ്ടായിരുന്ന മേരി ജോണ്‍, ജെയിംസ്, ആന്‍റണി, ജോയി, തദയൂസ്, ജെയിംസ് ആന്‍റണി എന്നിവരാണ് നീന്തി രക്ഷപ്പെട്ടത്. തീരത്തുനിന്ന് അരക്കിലോമീറ്റർ ദൂരത്ത് എത്തിയപ്പോൾ ഉണ്ടായ ശക്തമായ തിരയിൽപ്പെട്ടു വള്ളം മറിയുകയായിരുന്നുവെന്ന് രക്ഷപ്പെട്ടത്തിയവർ പറഞ്ഞു. വള്ളത്തിനു കേടുപാടുകളുണ്ടായി. കോസ്റ്റൽ പോലീസും മറൈൻ എൻഫോഴ്സ്മെന്‍റും മത്സ്യത്തൊഴിലാളികളും സെന്‍റ് ആൻഡ്രൂസ്, പുത്തൻതോപ്പ് ഭാഗങ്ങളിൽ തെരച്ചിൽ നടത്തുകയാണ്. വിഴിഞ്ഞം കോസ്റ്റൽ പോലീസ് കേസെടുത്തു. കാണാതായ മത്സ്യത്തൊഴിലാളിയെ കണ്ടെത്തുന്നതിന് കോസ്റ്റ് ഗാർഡിന്‍റെയും നാവികസേനയുടെയും സഹായം വേണമെന്നു സ്വതന്ത്രമത്സ്യത്തൊഴിലാളി ഫെഡറേഷൻ സംസ്ഥാന പ്രസിഡന്‍റ് പി. സ്റ്റെല്ലസ് ആവശ്യപ്പെട്ടു.

ജവഹർ നഗർ വസ്തു തട്ടിപ്പ് : മണികണ്ഠനെ വസന്തയുടെ വീട്ടിലെത്തിച്ച് തെളിവെടുത്തു

പേരൂര്‍ക്കട: വസ്തുതട്ടിപ്പു കേസിലെ പ്രതി അനന്തപുരി മണികണ്ഠനെ കരകുളം സ്വദേശിനി വസന്തയുടെ മരുതൂരിലെ വീട്ടിലെത്തിച്ച് തെളിവെടുപ്പു നടത്തി. ഇന്നലെ രാവിലെ 11 മണിയോടുകൂടിയാണ് മണികണ്ഠനെ മരുതൂരില്‍ എത്തിച്ചത്. ഇയാളുടെ ഒരു സുഹൃത്തായ സുനില്‍ ബാബു തോമസ് ആണ് വസന്തയെ മണികണ്ഠനു പരിചയപ്പെടുത്തി നല്‍കിയത്. ജവഹര്‍ നഗറിലെ വസ്തുവുടമയായ ഡോറ അസറിയ ക്രിപ്‌സുമായി വസന്തയ്ക്ക് രൂപസാദൃശ്യമുണ്ടെന്നു സുനിലാണ് മണികണ്ഠനോടു പറയുന്നത്. ഇതിന്‍റെ അടിസ്ഥാനത്തിലാണ് മെഡിക്കല്‍കോളജില്‍ ശാരീരിക അവശതകളെ തുടര്‍ന്ന് ചികിത്സയില്‍ കഴിഞ്ഞിരുന്ന വസന്തയെ സബ്‌രജിസ്ട്രാര്‍ ഓഫീസിലേക്ക് കൊണ്ടുവരുന്നതും ഫോട്ടോയെടുക്കുന്നതും വ്യാജരേഖ ചമയ്ക്കുന്നതും. വസന്തയ്ക്കു ചികിത്സാ സഹായം വാങ്ങിനല്‍കാമെന്നു പറഞ്ഞാണ് ഇവരെ സബ്‌രജിസ് ട്രാര്‍ ഓഫീസില്‍ എത്തിക്കുന്നത്. സുനില്‍ വയോധികയായ വസന്തയെ മണികണ്ഠനു പരിചയപ്പെടുത്തിയതു മരുതൂരില്‍ വച്ചാണെന്നു പോലീസ് പറഞ്ഞു. ഒരുതവണയാണ് വസന്തയുടെ വീട്ടില്‍ മണികണ്ഠന്‍ എത്തിയത്. ഡോറയുടെ മുഖത്തിനു പകരം വസന്തയുടെ മുഖം വ്യാജരേഖകളില്‍ ചേര്‍ക്കാന്‍ സാധിക്കുമോയെന്നും സംശയമുണ്ടാകാത്തവിധം കാര്യങ്ങള്‍ സാധിച്ചെടുക്കാനാകുമോയെന്നും അറിയുന്നതിനുവേണ്ടിയാണ് ഇയാള്‍ എത്തിയത്. നേരിട്ടുകണ്ടു വസന്തയുടെ ഫോട്ടോ ഉപയോഗിക്കാനാകുമെന്നു തീര്‍ച്ചപ്പെടുത്തുന്നതിനായിരുന്നു മണികണ്ഠന്‍റെ വരവ്. താന്‍ ഒരുതവണ മാത്രമേ ഇവിടെ വന്നിട്ടുള്ളൂവെന്ന് ഇയാള്‍ പോലീസിനോടു പറഞ്ഞു. ബുധനാഴ്ചത്തെ തെളിവെടുപ്പു പൂര്‍ത്തീകരിച്ചശേഷം മണികണ്ഠനെ തിരികെ സ്റ്റേഷനില്‍ എത്തിച്ചു. വ്യാഴാഴ്ച മണികണ്ഠനെ ഇയാളുടെ വാടകവീട്ടിലും യഥാര്‍ത്ഥ വീട്ടിലുമെത്തിച്ചു തെളിവെടുക്കുമെന്നു മ്യൂസിയം സിഐ അറിയിച്ചു.

പ്ലംബിംഗ് ജോലിക്കിടെ യുവാവ് കെട്ടിടത്തിൽനിന്നും വീണ് മരിച്ചു

കാരക്കോണം: പ്ലംബിംഗ് ജോലിക്കിടെ രണ്ടുനില കെട്ടിടത്തിൽനിന്നും വീണ് യുവാവ് മരിച്ചു. കന്നുമാമൂട് ചെറുകുരൽക്കാല വീട്ടിൽ ഇന്പരാജിന്‍റെയും സരസത്തിന്‍റെയും മകൻ ലിബിൻ രാജ്(26) അണ് മരിച്ചത്. സംസ്കാരം ഇന്ന് എട്ടിന് വീട്ടുവളപ്പിൽ. കഴിഞ്ഞ കൊറ്റാമത്തുവച്ചായിരുന്നു സംഭവം. ജോലി തുടങ്ങിയ ഉടൻതന്നെ താഴേക്ക് വീഴുകയായിരുന്നു. ഉടൻതന്നെ തിരുവനന്തപുരം മെഡിക്കൽ കോളജ് ആശുപത്രിയിലെത്തിച്ചെങ്കിലും ഇന്നലെ മരിച്ചു. രോഗിയായി അച്ഛനും അമ്മയും സഹോദരിയുമടങ്ങിയ കുടുംബത്തിന്‍റെ ഏക ആശ്രയമായിരുന്നു ലിബിൻ രാജ്. പാറശാല പോലീസ് മേൽനടപടികൾ സ്വീകരിച്ചു.

ഓട്ടോ ഡ്രൈവർ കുഴഞ്ഞുവീണ് മരിച്ചു

കിളിമാനൂർ: കിളിമാനൂർ പഞ്ചായത്ത് ബസ്റ്റാൻഡ് സ്റ്റാൻഡിലെ ഓട്ടോ ഡ്രൈവർ കുഴഞ്ഞു വീണു മരിച്ചു. കൊടുവഴന്നൂർ വലിയകാട് മഹേഷ് ഭവനിൽ മഹേഷ് (35)ആണ് മരിച്ചത്. രണ്ടുദിവസമായി മഹേഷ് സ്വകാര്യ ബസിൽ കണ്ടക്ടറായി ജോലി നോക്കുകയായിരുന്നു. വർക് ഷോപ്പിൽ കിടക്കുന്ന ഓട്ടോറിക്ഷയുടെ പണി എന്തായി എന്നറിയാൻ സ്വകാര്യബസിലെ ജോലിക്കിടെ പുതിയകാവിൽ ഇറങ്ങിയപ്പോഴായിരുന്നു കുഴഞ്ഞു വീണത്. ഉടനെ കിളിമാനൂരിലെ സ്വകാര്യ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. കിളിമാനൂർ പോലീസ് മേൽ നടപടി സ്വീകരിച്ചു.

മുലയൂട്ടല്‍ ബോധവത്കരണ എക്‌സിബിഷന്‍

മെഡിക്കല്‍കോളജ്: ലോക മുലയൂട്ടല്‍ വാരാചരണത്തോടനുബന്ധിച്ച് മുലയൂട്ടുന്ന അമ്മമാര്‍ക്കായി തിരുവനന്തപുരം എസ്എടി ആശുപത്രിയില്‍ മുലയൂട്ടല്‍ ബോധവത്കരണ എക്‌സിബിഷന്‍ സംഘടിപ്പിച്ചു. റിക്രിയേഷന്‍ ഹാളില്‍ നടന്ന ചടങ്ങ് ആശുപത്രി സൂപ്രണ്ട് ഡോ. എസ്. ബിന്ദു ഉദ്ഘാടനം ചെയ്തു. ആശുപത്രിയിലെ നവജാത ശിശു വിഭാഗം, നഴ്‌സിംഗ് വിഭാഗം, ഗൈനക്കോളജി വിഭാഗം എന്നിവയുടെ സംയുക്താഭിമുഖ്യത്തിലാണ് പരിപാടി സംഘടിപ്പിച്ചത്. ആശുപത്രി ആര്‍എംഒ ഡോ. എ. ഷെര്‍മിന്‍ നസ്രിന്‍, നിയോനാറ്റോളജി വിഭാഗം മേധാവി ഡോ. രാധിക, മുന്‍ മേധാവി ഡോ. ശോഭ കുമാര്‍, ഡോ. അശ്വതി, ഗൈനക്കോളജി വിഭാഗം മേധാവി ഡോ. സുജമോള്‍ ജേക്കബ്, ചീഫ് നഴ്‌സിംഗ് ഓഫീസര്‍ ശ്യാമില, സീനിയര്‍ നഴ്‌സിംഗ് ഓഫീസര്‍ കെ. ജ്യോതി എന്നിവരും വിവിധ വിഭാഗങ്ങളിലെ ജീവനക്കാരും വിദ്യാര്‍ഥികളും നേതൃത്വം നല്‍കി. ബോധവത്കരണ എക്‌സിബിഷന്‍ ഏഴിന് സമാപിക്കും.

രാജധാനി ബാറില്‍ മോഷണം; പണവും മദ്യവും കവര്‍ന്നു

പേരൂര്‍ക്കട: കിഴക്കേക്കോട്ടയിലെ ശ്രീ രാജധാനി ബാറിലുണ്ടായ മോഷണത്തില്‍ പണവും മദ്യവും കവര്‍ന്നു. ചൊവ്വാഴ്ച പുലര്‍ച്ചെ 1 മണിയോടുകൂടിയാണ് മോഷണം നടന്നതെന്നാണ് അനുമാനം. ഇവിടെനിന്ന് 91,000 രൂപയും നാലുകുപ്പി മദ്യവുമാണ് മോഷ്ടാവ് കൊണ്ടുപോയത്. രാവിലെ 10 മുതല്‍ രാത്രി 11 മണിവരെയാണ് ബാറിന്‍റെ പ്രവര്‍ത്തനം. സിസിടിവി കാമറ പരിശോധിച്ചതില്‍ നിന്ന് അസ്വാഭാവികമായ രീതിയില്‍ ആരും ബാറിനുള്ളിലേക്ക് കയറുന്നതായി കാണാനായില്ല. ബാറിന് മുന്‍വശത്തെ ഷട്ടറും പൂട്ടും അതേപടി കിടപ്പുണ്ട്. ബാറിനു പിറകുവശത്തുകൂടിയാണ് മോഷ്ടാവ് ഉള്ളിലേക്ക് കടന്നതെന്നാണ് അനുമാനമെന്നും ഫോര്‍ട്ട് പോലീസ് അറിയിച്ചു. ബാര്‍ പ്രവര്‍ത്തിച്ചിരുന്ന സമയത്ത് മോഷ്ടാവ് ഉള്ളില്‍ക്കയറി ഒളിച്ചിരുന്നശേഷം മോഷണം നടത്തിയതാണെന്നു കരുതുന്നു. മങ്കി ക്യാപ്പ് ധരിച്ചെത്തിയ മോഷ്ടാവിന്‍റെ കണ്ണുകള്‍ മാത്രമാണ് സിസിടിവി ദൃശ്യങ്ങളില്‍ കാണാനാകുന്നത്. ഒരു ഹാക്‌സാ ബ്ലേഡ്, കമ്പി, സ്പാനര്‍ തുടങ്ങിയവയുമായി മോഷ്ടാവ് പുറത്തുപോകുന്നതിന്‍റെ ദൃശ്യങ്ങളും പോലീസിനു ലഭിച്ചിട്ടുണ്ട്. മേശയ്ക്കുള്ളിലിരുന്ന രൂപയാണ് കവര്‍ച്ച ചെയ്യപ്പെട്ടത്. ഫോര്‍ട്ട് പോലീസ് കേസെടുത്ത് അന്വേഷണം ആരംഭിച്ചു.

മെഗാ സമ്മാനോത്സവം 2കെ26

പൂവാർ: ദക്ഷിണ കേരള മഹായിടവക തിരുപുറം ഡിസ്ട്രിക്ടിലെ വേദമുത്തു മെമ്മോറിയൽ സിഎസ്ഐ പ്ലാന്തോട്ടം സഭയുടെ അൾത്താര പുനരുദ്ധാരണത്തിന്‍റെ ധനശേഖരണാർഥം മെഗാ സമ്മാനോത്സവം 2 കെ 26-ന്‍റെ ഉദ്ഘാടനം മഹായിടവക സെക്രട്ടറി ഡോ. ടി.ടി. പ്രവീൺ നിർവഹിച്ചു. ഓലത്താന്നി സഭാശുശ്രൂഷകൻ റവ. ഫാ. എസ്.ടി. സുനിൽ രാജ് തിരുവത്താഴ ശുശ്രൂഷ നിർവഹിച്ചു. സുരേഷ് ബാബു അധ്യക്ഷത വഹിച്ചു. റവ. എസ്.പി. സ്റ്റാർവിൻ പ്രകാശ്, റവ. സിബിൻ, ജേക്കബ് ജയൻ, ടി.എസ് അനിൽ എന്നിവർ പങ്കെടുത്തു. അഞ്ച് കൂപ്പണുകൾ അടങ്ങിയ മെഗാ സമ്മാനോത്സവം 2 കെ 26ന്‍റെ ബുക്ക്‌ലെറ്റ് പൂവാർ സർക്കിൾ ഇൻസ്പെക്ടർ സുജിത്ത് കുടുംബത്തിന് ഒന്ന് എന്ന ക്രമത്തിൽ കൈമാറി.

ചൊറിയന്‍ പുഴുക്കളുടെ പേടിയില്‍ ഊളമ്പാറയിലെ പട്ടാള കാന്‍റീൻ

പേരൂര്‍ക്കട: ചെറിയന്‍ പുഴുക്കളുടെ ഉപദ്രവം മൂലം പട്ടാള കാന്‍റീനിലെ ജീവനക്കാരും സാധനങ്ങള്‍ വാങ്ങാനെത്തുന്നവരും ദുരിതത്തില്‍. കാന്‍റീനിനു സമീപത്തെ ഒരു കെട്ടിട പരിസരത്തുണ്ടായിരുന്ന കൂറ്റന്‍ മുരിങ്ങയില്‍ നിന്നാണ് പുഴുക്കള്‍ കൂട്ടത്തോടെ കാന്‍റീൻ പരിസരത്തു പ്രവേശിച്ചതെന്നാണു ജീവനക്കാര്‍ പറയുന്നത്. ഒരാഴ്ചയിലേറെയായി ചൊറിയന്‍ പുഴുക്കളുടെ ഉപദ്രവം കാന്‍റീനില്‍ ഉണ്ട്. കാന്‍റീനിലേക്കു കടക്കുന്നതിനുള്ള ചെറിയ ഗേറ്റിനു സമീപം മുതല്‍ കോണിപ്പടികള്‍ ഇറങ്ങുന്ന ഭാഗം വരെയാണ് ഇവ മനുഷ്യര്‍ക്ക് ഉപദ്രവവുമായി കൂട്ടത്തോടെ ചേക്കേറിയിരിക്കുന്നത്. മേല്‍ക്കൂരയിലൂടെ തൂങ്ങിയിറങ്ങി ജനങ്ങളുടെ ശരീരത്തിലും ഇവ എത്തുന്നു. കഴിഞ്ഞ രണ്ടുമൂന്നു ദിവസത്തിനിടെ രണ്ടു ജീവനക്കാര്‍ക്കും മൂന്നു പൊതുജനങ്ങള്‍ക്കും പുഴുവിന്‍റെ കടിയേറ്റു. ഇവയുടെ ശല്‍ക്കങ്ങള്‍ ശരീരത്തില്‍ വീണു ഒരു ജീവനക്കാരന്‍റെ മുഖം ചുവന്നു തുടുക്കുകയുണ്ടായി. പാറ്റയെ അകറ്റുന്നതിന് ഉപയോഗിക്കുന്ന ഹിറ്റ് പ്രയോഗിച്ചിട്ടും കാര്യമായ ഫലമുണ്ടാകുന്നില്ല. ചാകുന്ന പുഴുക്കളെക്കാള്‍ ഇരട്ടി പുഴുക്കള്‍ വന്നുകൊണ്ടിരിക്കുന്നു. ഇവയെ അകറ്റാന്‍ ചിലര്‍ ഉപ്പുവിതറിയിട്ടും ഫലമുണ്ടായിട്ടില്ല. കസേരകളിലിരിക്കുന്നവരുടെ പാൻസുകളിലും ഷര്‍ട്ടുകളിലും കയറിപ്പറ്റുന്ന ഇവ ശരീരത്തിലേക്കു കടന്നു ചൊറിച്ചിലുണ്ടാകുകയാണ് ചെയ്യുന്നത്. ചൊറിയന്‍ പുഴുക്കളുടെ ഉപദ്രവം സംബന്ധിച്ച് അധികൃതര്‍ ഇവിടെയെത്തുന്ന പൊതുജനങ്ങള്‍ക്ക് മുന്നറിയിപ്പ് നല്‍കുന്നുണ്ട്.

അനധികൃത ഉപകരണങ്ങൾ പിടിച്ചെടുത്തു

വിഴിഞ്ഞം: അനധികൃത ലൈറ്റ് ഫിഷിംഗിനായി ഉപകരണങ്ങൾ സൂക്ഷിച്ച വള്ളം ഫിഷറീസ് വകുപ്പധികൃതർ പിടികൂടി. പൂന്തുറ സ്വദേശി ബേബി ജോണിന്‍റെ വള്ളമാണ് കസ്റ്റഡിയിൽ എടുത്തത്. വിഴിഞ്ഞം ഫിഷറീസ് അസിസ്റ്റന്‍റ് ഡയറക്ടർ എസ്. രാജേഷിന്‍റെ നിർദേശപ്രകാരം മറൈൻ എൻഫോഴ്‌സ്‌മെന്‍റ് സിവിൽ പോലീസ് ഓഫീസർ വി. വിനിൽ, ലൈഫ് ഗാർഡുമാരായ എം. പനിയടിമ, ജമാലുദീൻ, കൃഷ്ണൻ, നസ്രത്ത്‌, ഡേവിഡ്‌സൺ അലിക്കണ്ണ് എന്നിവർ വിഴിഞ്ഞം ഹാർബറിൽ നടത്തിയ പരിശോധനയിലാണ് വള്ളം പിടികൂടിയത്. അനധികൃതവും അശാസ്ത്രീയവുമായ മത്സ്യബന്ധനം തടയുന്നതിന്‍റെ ഭാഗമായിട്ടായിരുന്നു മിന്നൽ പരിശോധന. പിടികൂടിയ വള്ളത്തിന്‍റെ ഉടമയ്ക്കെതിരേ കേരള മത്സ്യബന്ധന നിയന്ത്രണ നിയമ നടപടി സ്വീകരിക്കുമെന്നും കടലിൽ മത്സ്യസമ്പത്ത് കുറയാൻ കാരണമാകുന്ന നിയമവിരുദ്ധ പ്രവർത്തനങ്ങൾ നടത്തുന്ന ബോട്ടുകൾക്കെതിരെ നടപടി കർശനമാക്കുമെന്നും ഫിഷറീസ് അധികൃതർ അറിയിച്ചു.

അങ്കണവാടി ടീച്ചർക്ക് സസ്പെൻഷൻ : രണ്ടര വയസുകാരനെ മാന്തിയ പൂച്ച ചത്തു; ആശങ്കയിൽ രക്ഷകർത്താക്കൾ

കുറ്റിച്ചൽ: രണ്ടര വയസുകാരനെ മാന്തിയ പൂച്ച ചത്തു, ആശങ്കയിൽ രക്ഷകർത്താക്കൾ. കുറ്റിച്ചൽ കുഴിയംകോണം അങ്കണവാടിയിലെ കുഴിയംകോണം സ്വദേശി സൈനബയുടെ മകൻ ഹൈസ് ഖാനെയാണ് പൂച്ച മാന്തിയത്. കളിക്കുന്നതിനിടെയാണ് പൂച്ച മാന്തിയത്. എന്നാൽ ഈ വിവരം അങ്കണവാടി അധ്യാപിക നിഷ മറച്ചു വച്ചു. ശരീരത്തിൽ മാന്തൽ കണ്ട് മാതാവ് സൈനബ തിരക്കിയപ്പോഴാണ് പൂച്ച മാന്തിയതായി അറിയുന്നത്. ടീച്ചറോട് ഈ വിവരം ചോദിച്ചെങ്കിലും അവർ സമ്മതിച്ചില്ല. തുടർന്ന് മാതാവ് കുട്ടിയുമായി ആരോഗ്യകേന്ദ്രത്തിൽ പോയപ്പോൾ പൂച്ച മാന്തിയതായി സ്ഥിരീകരിക്കുകയും കുട്ടിക്ക് ആന്‍റി റാബീസ് വാക്സിൻ നൽകുകയും ചെയ്തു. തുടർന്ന് വീട്ടമ്മ ഉയർന്ന ഉദ്യോഗസ്ഥർക്ക് പരാതി നൽകി. ഇവർ നടത്തിയ അന്വേഷണത്തിൽ അധ്യാപിക തെറ്റ് ചെയ്തതായി കണ്ടെത്തുകയും അവരെ സസ്പെൻഡ് ചെയ്യുകയും ചെയ്തു. ഇതിനിടയക്കാണ് ഇന്നലെ പൂച്ച ചത്തത്. ഇതോടെയാണ് രക്ഷിതാക്കൾ ആശങ്കയിലായത്.

യുവാവിനെ വെട്ടിപ്പരിക്കേല്‍പ്പിച്ച കേസിലെ ഒന്നാംപ്രതി പിടിയില്‍

തിരുവല്ലം: ബൈക്കിലെത്തി യുവാവിനെ വാളുകൊണ്ട് തലയില്‍ വെട്ടിപ്പരിക്കേല്‍പ്പിച്ചും റോഡില്‍ ചവിട്ടിതള്ളിയിട്ടു മര്‍ദിക്കുകയും ചെയ്ത സംഭവത്തിലെ ഒന്നാം പ്രതിയെ തിരുവല്ലം പോലീസ് അറസ്റ്റ് ചെയ്തു. തിരുവല്ലം പാപ്പാന്‍ചാണി ചരുവിള പുത്തന്‍വീട്ടില്‍ സൂരജിനെ (24) യാണ് തിരുവല്ലം പോലീസ് അറസ്റ്റ് ചെയ്തത്. ഇയാള്‍ക്കൊപ്പമുണ്ടായിരുന്ന രണ്ടാം പ്രതി തിരുവല്ലം സ്വദേശി രഞ്ജിത്തിനെ പോലീസ് സംഭവദിവസം തന്നെ പിടികൂടിയിരുന്നു. സൂരജിന്‍റെ സമീപവാസിയായ ബിബിനെ (30)യാണ് പ്രതികള്‍ ആക്രമിച്ച് പരിക്കേല്‍പ്പിച്ചത്. കഴിഞ്ഞ മേയ് 11നു രാത്രി പത്തോടെ‍യായിരുന്നു ആക്രമണം നടന്നതെന്ന് പോലീസ് പറഞ്ഞു. വീടിനു സമീപത്ത് ബൈക്ക് റെയ്‌സിംഗ് നടത്തി ഒച്ചപ്പാടുണ്ടായതു ബിബിന്‍ ചോദ്യം ചെയ്തതില്‍ പ്രകോപിതരായ യുവാക്കള്‍ ബൈക്കിലെത്തുകയും വീട്ടിലേയ്ക്ക് പോകുകയായിരുന്ന ബിബിനെ തടഞ്ഞുനിര്‍ത്തുകയും തുടര്‍ന്ന് സൂരജ് കൈയില്‍ കരുതിയിരുന്ന വാളുപയോഗിച്ച് ബിബിന്‍റെ തലയില്‍ വെട്ടുകയുമായിരുന്നു. വെട്ടേറ്റ് നിലത്തുവീണ ബിബിനെ പ്രതികള്‍ ചവിട്ടിയും പരിക്കേല്‍പ്പിച്ചതായി പോലീസ് പറഞ്ഞു. ബിബിന്‍റെ നിലവിളികേട്ടു സമീപവാസികള്‍ ഓടി എത്തിയതോടെ പ്രതികള്‍ ബൈക്കില്‍ കയറി രക്ഷപ്പെടുകയായിരുന്നു. നാട്ടുകാരുടെ നേതൃത്വത്തില്‍ ബിബിനെ ആശുപത്രിയില്‍ എത്തിച്ചശേഷവും പ്രതികള്‍ വീണ്ടുമെത്തി ബിബിന്‍റെ വീടിനുനേരേ തടിക്കഷണങ്ങളും ബിയര്‍കുപ്പികളും എറിഞ്ഞതായും പോലീസ് അറിയിച്ചു. തിരുവല്ലം പോലീസ് സംഘം ഒളിസങ്കേതത്തില്‍നിന്നും അറസ്റ്റ് ചെയ്ത പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

അങ്കണവാടി കിണറ്റിനുള്ളില്‍നിന്ന് മൂര്‍ഖന്‍ പാമ്പിനെ പിടികൂടി

പാറശാല: അയ്ങ്കാമം കാട്ടവിള അങ്കണവാടി കിണറ്റിനുള്ളില്‍നിന്ന് കൂറ്റന്‍ മൂര്‍ഖന്‍ പാമ്പിനെ പിടികൂടി. കഴിഞ്ഞദിവസം ഉച്ചയ്ക്ക് അങ്കണവാടി കുഞ്ഞുങ്ങള്‍ക്ക് ഭക്ഷണം നല്‍കിയശേഷം തറ കഴുകുന്നതിനായി വെള്ളം എടുക്കുന്നതിനായി കിണറ്റിനുള്ളിലേക്കു നോക്കിയപ്പോഴാണു പാമ്പിനെ കണ്ടെത്തിയത്. നിറയെ വെള്ളം ഉണ്ടായിരുന്ന കിണറ്റില്‍ മുകളില്‍ വലവിരിച്ചിരുന്നു ഇതുവഴി കിണറ്റിനുള്ളില്‍ പതിച്ച പാമ്പ് വെള്ളത്തിനു മുകളില്‍ പൊങ്ങി കിടക്കുകയായിരുന്നു. ഈ സമയം പന്ത്രണ്ടോളം കുട്ടികള്‍ അങ്കണവാടിയില്‍ ഉണ്ടായിരുന്നു. ഈ കിണറ്റിലെ ജലം കുട്ടികള്‍ കുടിക്കുന്നതിനായി ഉപയോഗിക്കുന്നതല്ലെന്നും വാഷിംഗിനു മാത്രമാണ് ഉപയോഗിക്കുന്നതെന്നും ടീച്ചര്‍ നിര്‍മല പറഞ്ഞു. സ്നേക് കാച്ചർ വെള്ളറട രോഹിതിനെ വിളിച്ചറിയിച്ചതിനെത്തുടര്‍ന്നു രോഹിത് എത്തി പാമ്പിനെ പിടികൂടി. ഏകദേശം അഞ്ചരയടിയോളം നീളമുള്ള പിടികൂടിയ പാമ്പിനെ വനംവകുപ്പിനു കൈമാറിയശേഷം വനത്തില്‍ തുറന്നുവിടും.

കോടതിയിൽവച്ച് പിതാവും മകനും ചേർന്നു വക്കീലിനെ മർദിച്ചു

നെടുമങ്ങാട്: കോടതിയിൽവച്ച് പിതാവും മകനും ചേർന്നു വക്കീലിനെ മർദിച്ചതായി പരാതി. കരകുളം പേരൂർക്കോണം കോട്ടുകാൽ കോണത്ത് വീട്ടിൽ സലീം, മകൻ അൻവർ സലീം എന്നിവർ ചേർന്നു വക്കീലും ലീഗൽ കൺസൾട്ടന്‍റുമായ ആർ.സി. പ്രകാശിനെ മർദിച്ചുവെന്നാണ് പരാതി. നെടുങ്ങാട് മുൻസിഫ് കോടതിയിൽ ഇന്നലെ ഉച്ചക്ക് 12 നായിരുന്നു സംഭവം. സിവിൽ കേസുമായി ബന്ധപ്പെട്ടു മീഡിയേഷനുവേണ്ടി എതിർ കക്ഷികൾ ഹാജരുണ്ടായിരുന്നു. മീഡിയേഷന്‍റെ ഭാഗമായി എതിർ വിഭാഗത്തിനു വക്കീൽ ഇല്ലാത്തതിനാൽ ഫോമിൽ ഒപ്പിടാൻ ആവശ്യപ്പെട്ടപ്പോഴാണ് ചീത്ത വിളിച്ച് അക്രമണം നടത്തിയതെന്നു പ്രകാശ് പറഞ്ഞു. താടിയെല്ലിലും മുഖത്തും ശരീരത്തിലും ഇരുവരും ചേർന്നു മർദിച്ചതായും മർദനത്തിനിടെ 5000 രൂപ വില വരുന്ന വാച്ച് നഷ്ടപ്പെട്ടതായും പ്രകാശ് പരാതിയിൽ പറയുന്നു. മജിസ്ട്രേറ്റിന്‍റെ മുന്നിൽ വച്ചായിരുന്നു മർദനം. പോലീസെത്തിയപ്പോൾ അൻവർ സലീം ഓടി രക്ഷപ്പെട്ടങ്കിലും പിതാവ് സലീ മിനെ പോലീസ് പിടികൂടി. സ്റ്റേഷനിൽ കൊണ്ടുവരും വഴി നെഞ്ചുവേദന അനുഭവപ്പെട്ടതിനെ തുടർന്ന് ഇയാളെ ആശുപത്രിയിൽ പ്രവേശിപ്പിച്ചു. മർദനമേറ്റ പ്രകാശിന്‍റെ മൊഴി രേഖപ്പെടുത്തിയ ശേഷം പോലീസ് കേസെടുത്തു. കേന്ദ്ര സർക്കാറിന്‍റെ അഡീഷണൽ സ്റ്റാൻഡിംഗ് കൗൺസിലറായ പ്രകാശിനെ ആക്രമിച്ച സംഭവത്തിൽ കൃത്യനിർവഹണം തടസപ്പെടുത്തിയതിനും മർദനമേൽപ്പിച്ചതിനും കേസെടുത്തതായും നെടുമങ്ങാട് എസ്എച്ച് ഒ രാജേഷ്കുമാർ പറഞ്ഞു.

പോലീസ് ഇൻസ്പെക്ടർക്ക് ഡോക്ടറേറ്റ്

തിരുവനന്തപുരം: ദേശീയ സുരക്ഷയുടെ ഭാഗമായുള്ള തീരദേശ സുരക്ഷയിൽ മത്സ്യത്തൊഴിലാളികളുടെ പങ്കിനെ സംബന്ധിച്ച് നടത്തിയ പഠനത്തിന് കേരള കേന്ദ്ര സർവകലാശാലയിൽ നിന്നുഡോക്ടറേറ്റു നേടി പോലീസ് ഇൻസ്പെക്ടർ. കേരളാ പോലീസിലെ ബി. സജികുമാറിനാണു ഡോക്ടറേറ്റു ലഭിച്ചത്. 26 വർഷത്തെ സേവനത്തിനിടെ സ്തുത്യർഹ സേവനത്തിനുള്ള രാഷ്ട്രപതിയുടെയും മുഖ്യമന്ത്രിയുടെയും പോലീസ് മെഡലുകൾ ലഭിച്ചിട്ടുണ്ട്. വിവിധ കേസുകളിലായി ഓൺലൈൻ തട്ടിപ്പിലൂടെ കേരളത്തിൽനിന്നും കോടികൾ തട്ടിയെടുത്ത 11 നൈജീരിയക്കാരെ ഉത്തരേന്ത്യയുടെ പല ഭാഗങ്ങളിൽനിന്നും അറസ്റ്റ് ചെയ്തതിനും കുറ്റാന്വേഷണ രംഗത്തെ മികവിനും മൂന്നു ബാഡ്ജ് ഓഫ് ഓണറുകളും നേടിയിട്ടുണ്ട്. മികച്ചസേവനത്തിനുള്ള നിരവധി അവാർഡുകളും സജികുമാർ നേടി. വിജിലൻസിൽ തിരുവനന്തപുരം സ് പെഷൽ സെല്ലിൽ ജോലി ചെ യ്യുന്ന ഇദ്ദേഹം പോലീസ് ഓഫീസേഴ്സ് അസോസിയേഷൻ സിറ്റി ജില്ലാ പ്രസിഡൻാണ്.

മാറനല്ലൂർ പൊതുശ്മശാനത്തിന്‍റെ അവസ്ഥ അതിദയനീയം

അറ്റകുറ്റപ്പണികളില്ലാതെ കാടു മൂടി റോഡ് ഊരൂട്ടമ്പലം: അറ്റകുറ്റപ്പണികൾ നടത്താതെ തകർന്നുകിടക്കുന്ന റോഡ്, വശങ്ങളിൽ വളർന്നു പന്തലിച്ചുനിൽക്കുന്ന പാഴ്ച്ചെടികൾ, മൃതദേഹം സംസ്്കരിക്കുന്നതിനായി മണിക്കൂറുകളോളം കാത്തുകിടക്കേണ്ട സ്ഥിതി, മാറനല്ലൂർ പൊതുശ്മശാനത്തിലെ ഇപ്പോഴത്തെ അവസ്ഥയാണിത്. റോഡു വശങ്ങളിൽ വീതി കൂട്ടി തറയോടുപാകി ഇരുമ്പുവേലികൾ സ്ഥാപിച്ചു നവീകരണം നടത്തുമെന്ന വാഗ്ദാനം കടലാസി ൽ മാത്രമൊതുങ്ങി. സമീപത്തെ വിവിധ പഞ്ചായത്തുകളിൽനിന്നും, നഗരപ്രദേശങ്ങളിൽനിന്നും മൃതദേഹം സംസ്‌കരിക്കുന്നതിനുവേണ്ടി മാറനല്ലൂരിലെ പൊതുശ്മശാനത്തിലെത്തുന്നുണ്ട്. വൈദ്യുതശ്മശാനത്തിന്‍റെ നിർമാണം പൂർത്തിയായതോടുകൂടിയാണ് കഴിഞ്ഞ ആറുവർഷം മുൻപ് മാറനല്ലൂരിൽ പൊതുശ്മശാനം പ്രവർത്തനം ആരംഭിച്ചത്. കോവിഡ് കാലത്ത് മൃതദേഹം പലപ്പോഴും സംസ്‌കരിക്കാൻ കഴിയാതെവന്നതിനെത്തുടർന്നാണ് വൈദ്യുതശ്മശാനത്തോടൊപ്പം വാതകശ്മശാനവും നിർമിക്കാൻ പഞ്ചായത്ത് തീരുമാനമെടുത്തത്. ഇതേത്തുടർന്ന് വിവിധ ഫണ്ടുകൾ ലഭിച്ചതോടെ വാതകശ്മശാനവും അടുത്തിടെ നിർമിച്ചു. വാതകശ്മശാനത്തിന്‍റെ പ്രവർത്തനം ആരംഭിച്ചു മാസങ്ങൾ പിന്നിട്ടപ്പോൾത്തന്നെ വൈദ്യുതശ്മശാനം തകരാറിലായി. വാതകശ്മശാനം മാത്രമാണ് മാറനല്ലൂരിൽ ഇപ്പോൾ പ്രവർത്തിക്കുന്നത്. മൃതദേഹം സംസ്‌കരണത്തിനുവേണ്ടി എത്തുന്നവർക്കു പലപ്പോഴും കാത്തുകിടക്കേണ്ടിവരുന്നുണ്ട്. വാതകശ്മശാനത്തിന്‍റെ മാത്രം പ്രവർത്തനം പഞ്ചായത്തിനും കനത്ത നഷ്ടമാണുണ്ടാക്കുന്നത്. ഒരു മൃതദേഹം സംസ്‌കരിക്കുന്നതിനു വൈദ്യുതിച്ചെലവ് 500-ൽത്താഴെ വരുമ്പോൾ വാതകത്തിന് അത് 2400 രൂപയോളം വരുന്നു. ശ്മശാനത്തിലേക്കു പോകുന്ന റോഡിന്‍റെ ചിലയിടങ്ങളിലെ വീതിക്കുറവും റോഡിനു വശങ്ങളിലായി വളർന്നു പന്തലിച്ചുകിടക്കുന്ന പാഴ്ച്ചെടികളും അപകടക്കെണിയാകുന്നുണ്ട്.റോഡ് കടന്നുപോകുന്നതിനു സമീപത്തായാണു രണ്ടു വലിയ പാറക്കുളങ്ങൾ സ്ഥിതിചെയ്യുന്നത്. രണ്ട് വാഹനങ്ങൾ ഇരുദിശയിൽനിന്നു ഒരുമിച്ചെത്തിയാൽ റോഡിനു വശത്തു കാടുകയറിക്കിടക്കുന്നതു കാരണം ഏതെങ്കിലും ഒരു വാഹനം പുറകിലോട്ടു മാറ്റിയാൽമാത്രമേ ഇതര വാഹനത്തിനു കടന്നുപോകാൻ സാധിക്കൂ. അതും സൂക്ഷിച്ചില്ലെങ്കിൽ ചിലപ്പോൾ പാറക്കുളത്തിലേക്കു വീഴുന്ന അവസ്ഥയും നിലവിലുണ്ട്. ഇതിനു പരിഹാരമായി കുളത്തിനു സമീപം കമ്പിവേലികൾ തീർക്കുമെന്നും റോഡ് നവീകരിക്കുമെന്നും അറിയിച്ചെങ്കിലും ഒന്നും ഇതുവരെ നടപ്പിലാക്കാനായിട്ടില്ലെന്ന ആക്ഷേപവും ശക്തമാണ്.

നാര്‍ഡിന്‍റെ പതിനെട്ടാം വാര്‍ഷികം ആഘോഷിച്ചു

നെയ്യാറ്റിന്‍കര: പൊതുപ്രവർത്തകര്‍ക്കു സഹാനുഭൂതിയുടെ സന്മനസുണ്ടാകണമെന്നും നിശ്ചയദാർഢ്യവും നല്ല മനസും പൊതുപ്രവര്‍ത്തകര്‍ക്ക് അനിവാര്യമായ ഗുണങ്ങളാണെന്നും പ്രതിപക്ഷ നേതാവ് വി.ഡി. സതീശന്‍ അഭിപ്രായപ്പെട്ടു. നെയ്യാറ്റിന്‍കര അസോസിയേഷന്‍ ഫോര്‍ റൂറല്‍ ഡവലപ്പ്മെന്‍റി (നാര്‍ഡ്) ന്‍റെ 18-ാം വാര്‍ഷികാഘോഷം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. നാര്‍ഡ് ചെയര്‍മാന്‍ കൂടിയായ നെയ്യാറ്റിന്‍കര നഗരസഭ ആരോഗ്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ ജെ. ജോസ് ഫ്രാങ്ക്ളിന്‍റെ അധ്യക്ഷതയില്‍ ചേര്‍ന്ന യോഗത്തില്‍ നെയ്യാറ്റിന്‍കര രൂപത വികാരി ജനറാള്‍ മോണ്‍. ജി. ക്രിസ്തുദാസ് അനുഗ്രഹപ്രഭാഷണവും നിംസ് മെഡിസിറ്റി എംഡി ഡോ. എം.എസ്. ഫൈസല്‍ഖാന്‍ മുഖ്യപ്രഭാഷണവും നടത്തി. വിളവംകോട് എംഎല്‍എ ഡോ. താരഹൈ ക്യുത് ബര്‍ട്ട്, മുന്‍ മന്ത്രി അഡ്വ. വി.എസ്. ശിവകുമാര്‍, എഐസിസി അംഗം നെയ്യാറ്റിന്‍കര സനല്‍ എന്നിവര്‍ മുഖ്യാതിഥികളായി. ഡിസിഡി ജനറൽ സെക്രട്ടറിമാരായ മാരായമുട്ടം സുരേഷ്, വി. ഭൂവനചന്ദ്രൻനായർ, നഗരസഭ സ്റ്റാന്‍ഡിംഗ് കമ്മിറ്റി ചെയര്‍മാന്‍ കെ.കെ. ഷിബു, കൗണ്‍സിലര്‍ കൂട്ടപ്പന മഹേഷ്, നാർഡ് ചീഫ് കോ- ഓർഡിനേറ്റർ ജി.ആർ. അനിൽ, എന്‍.ആര്‍.സി. നായര്‍, നാർഡ് രക്ഷാധികാരി മാമ്പഴക്കര രാജശേഖരൻനായർ എന്നിവര്‍ പ്രസംഗിച്ചു. ലൈഫ് ഫൗണ്ടേഷന്‍ ഡയറക്ടര്‍ എസ്.ജി. ബീനാമോള്‍, സംഗീതജ്ഞന്‍ രാജീവ് ആദികേശവ്, പുരാവസ്തു സംരക്ഷകന്‍ വി.ജെ. എബി എന്നിവരെ യോഗത്തില്‍ ആദരിച്ചു. വിദ്യാഭ്യാസ സഹായവിതരണം, പെരുന്പഴുതൂര്‍ നോയല്‍ മ്യൂസിക് ആന്‍ഡ് ഡാന്‍സ് അക്കാദമിയിലെ കുട്ടികളുടെ കലാവിരുന്ന്, പുരാവസ്തു പ്രദര്‍ശനം എന്നിവയും നടന്നു.

പോലീസുകാരനെ കടിച്ചു പരിക്കേൽപ്പിച്ചു

വിഴിഞ്ഞം : മദ്യപിച്ച് വീട്ടിൽ പ്രശ്നമുണ്ടാക്കിയ യുവാവിനെ പിടിക്കാൻ പോയ പോലീസുകാരനെ പ്രതി ദേഹമാസകലം കടിച്ച് പറിച്ചു. സിനിമാസ്‌റ്റൈലിൽ തലകൊണ്ട് മുഖത്തിട്ടിച്ചു പരിക്കേൽപ്പിച്ചു. പ്രതിയായ വിഴിഞ്ഞം കരയടി വിളാകം സ്വദേശി മുഹമ്മദ് ഷബീൻ (28)നെ അറസ്റ്റ് ചെയ്തു. തിങ്കളാഴ്ച രാത്രി പത്തോടെയായിരുന്നു സംഭവം. മദ്യപിച്ചെത്തിയ ഷബിൻ സ്വന്തം വീട് അടിച്ച് തകർത്ത ശേഷം പിതാവായ നസീറിനെ ആക്രമിക്കുന്നതായ വിവരം നാട്ടുകാർ വിഴിഞ്ഞം പോലീസിൽ അറിയിക്കുയായിരുന്നു. വിവരമറിഞ്ഞ് സി.ഐ. പ്രകാശിന്‍റെ നേതൃത്വത്തിലുള്ള പോലീസ് സംഘം നസീറിന്‍റെ വീട്ടിൽ എത്തി. ഷബീനെ സമാധാനപ്പെടുത്താൻ ശ്രമിക്കുന്നതിനിടയിൽ യുവാവ് പോലീസുകാർക്കു നേരെ തിരിഞ്ഞു. തടയാൻ ശ്രമിച്ച പോലിസുകാരൻ കണ്ണനെ ക്രൂരമായി ആക്രമിച്ചു. നിമിഷനേരംകൊണ്ടു തോളിലും നെഞ്ചിലും കഴുത്തിലും കാലിലും കടിച്ച് പരിക്കേൽപ്പിച്ചു. തലകൊണ്ട് മുഖത്തിടിച്ചു. ഒടുവിൽ കൂടെയുണ്ടായിരുന്നവർ ചേർന്നു കീഴ്പ്പെടുത്തിയ ഷബീനെ സ്റ്റേഷനിൽ എത്തിച്ചു. പരിക്കേറ്റ കണ്ണൻ വിഴിഞ്ഞം സർക്കാർ ആശുപത്രിയിൽ ചികിത്സതേടിയ ശേഷം അവധിയിൽ പോയി. ഷബീന്‍റെ പിതാവ് നസീറിനെയും ആശുപത്രിയിൽ പ്രവേശിപ്പിച്ചു. വീട് അടിച്ചു തകർത്തതിനും പോലീസിനെയും ആക്രമിച്ച കുറ്റത്തിനും കേസെടുത്ത പോലിസ് ഷബീ നെ കോടതിയിൽ ഹാജരാക്കി.

വെള്ളായണി ജലോത്സവം സെപ്റ്റംബര്‍ ആറിന്: സ്വാഗതസംഘം രൂപീകരിച്ചു

നേമം: വെള്ളായണി കായലില്‍ അയ്യങ്കാളി ജലോത്സവം സെപ്റ്റംബര്‍ ആറിനു വൈകുന്നേരം മൂന്നിനു നടക്കും. ജലോത്സവ കമ്മിറ്റിയുടെ ഉദ്ഘാടനം എം.വിന്‍സന്‍റ് എംഎല്‍എ നിർവഹിച്ചു ജില്ലാ പഞ്ചായത്ത് പ്രസിഡന്‍റ് ഡി. സുരേഷ്‌കുമാര്‍ ചടങ്ങിൽ അധ്യക്ഷത വഹിച്ചു. വള്ളംകളി ട്രസ്റ്റ് ചെയര്‍മാന്‍ ആര്‍. മോശ, ജനറല്‍ സെക്രട്ടറി ബി. ശശിധരന്‍, ബി. മോഹനന്‍ എന്നിവരുടെ നേതൃത്വത്തില്‍ ജലോത്സവകമ്മിറ്റിയെ തെരഞ്ഞെടുത്തു. ചെയര്‍മാനായി എം. വിന്‍സന്‍റ് എംഎല്‍എ, ജനറല്‍ കണ്‍വീനറായി ജില്ലപഞ്ചായത്ത് പ്രസിഡന്‍റ് ഡി. സുരേഷ് കുമാര്‍, കണ്‍വീനറായി ജില്ല കളക്ടര്‍ അനു കുമാരി, രക്ഷാധികാരികളായി കേന്ദ്രമന്ത്രി സുരേഷ് ഗോപി, സംസ്ഥാന മന്ത്രിമാരായ മുഹമ്മദ് റിയാസ്, വി. ശിവന്‍കുട്ടി, ജി.ആര്‍. അനില്‍, ശശി തരൂര്‍ എംപി എന്നിവരെ തെരഞ്ഞെടുത്തു. വര്‍ക്കിംഗ് ചെയര്‍മാന്‍മാരായി അഡ്വ. പുഞ്ചക്കരി ജി. രവീന്ദ്രന്‍ നായര്‍, അഡ്വ. സുബോധന്‍, അഡ്വ. എസ്. സുരേഷ്, കോ-ഓര്‍ഡിനേഷന്‍ കമ്മിറ്റിയംഗങ്ങളായി കല്ലിയൂര്‍ പഞ്ചായത്ത് പ്രസിഡന്‍റ് എം.സോമശേഖരന്‍ നായര്‍, വെങ്ങാനൂര്‍ പഞ്ചായത്ത് പ്രസിഡന്‍റ് വിജയപ്രദീപ്, പള്ളിച്ചല്‍ പഞ്ചായത്ത് പ്രസിഡന്‍റ് രാകേഷ്, നേമം ബ്ലോക്ക് പഞ്ചായത്ത് പ്രസിഡന്‍റ് എസ്.കെ. പ്രീജ, ജില്ലാ പഞ്ചായത്തംഗം ഭഗത് റൂഫസ്, കൗണ്‍സിലര്‍ എം.ആര്‍. ഗോപന്‍, ബ്ലോക്ക് അംഗങ്ങളായ വി.ലതാകുമാരി, ആര്‍. വസുന്ധരന്‍, പഞ്ചായത്ത് അംഗം കെ.കെ. ചന്തുകൃഷ്ണ, മീഡിയ കോ-ഓര്‍ഡിനേറ്ററായി ശ്യാം വെണ്ണിയൂർ, പ്രോഗ്രാം കമ്മറ്റി ചെയര്‍മാനായി എം.വിനുകുമാർ എന്നിവരെയും തെരഞ്ഞെടുത്തു.

തിരുവനന്തപുരം വിമാനത്താവളത്തില്‍ 13 കിലോ ഹൈബ്രിഡ് കഞ്ചാവുമായി ഒരാള്‍ പിടിയില്‍

വലിയതുറ: തിരുവനന്തപുരം അന്താരാഷ്ട്ര വിമാനത്താവളത്തില്‍ 13 കിലോ ഹൈബ്രിഡ് കഞ്ചാവുമായി ഒരാള്‍ പിടിയില്‍. കോഴിക്കോട് സ്വദേശി സുധീഷ് ടെന്‍സനാണു പിടിയിലായത്. കഴിഞ്ഞ ദിവസം പുലര്‍ച്ചെ 3.00 മണിയോടെ വിമാനത്താവള അധികൃതര്‍ക്കുലഭിച്ച രഹസ്യ വിവരത്തിന്‍റെ അടിസ്ഥാനത്തിലാണ് ഇയാളെ പിടികൂടിയത്. തായ്‌ലാന്‍ഡില്‍നിന്നും ലഭിച്ച കഞ്ചാവ് ഇയാള്‍ ബാങ്കോക്കു വഴി ദുബൈയിലേയ്ക്കും അവിടെനിന്നും തിരുവനന്തപുരത്തും എത്തിക്കുകയായിരുന്നു. ഇയാളുടെ കൈവശമുണ്ടായിരുന്ന ബാഗിനുള്ളിൽ ഒളിപ്പിച്ച നിലയിലായിരുന്നു കഞ്ചാവ് കൊണ്ടുവന്നത്. അധികൃതര്‍ക്കു ലഭിച്ച വിവരത്തിൻ‌റെ അടിസ്ഥാനത്തില്‍ തിരുവനന്തപുരം സിറ്റി ഡാന്‍സാഫ് സംഘവും വിമാനത്താവളത്തിനു പുറത്ത് ക്യാംപ് ചെയ്തിരുന്നു. തിരുവനന്തപുരം ഡിആര്‍ഐ (ഡയറക്ടറേറ്റ് ഓഫ് റവന്യൂ ഇന്‍റലിജന്‍സ്) ക്ക് കൈമാറിയ പ്രതിയെ വിശദമായി ചോദ്യം ചെയ്തുവരുന്നു.

കുടിവെള്ളത്തില്‍ കോളിഫോം ബാക്ടീരിയ

ജനറല്‍ ആശുപത്രിയിലെ ശസ്ത്രക്രിയകള്‍ മാറ്റിവച്ചു നെയ്യാറ്റിന്‍കര: നെയ്യാറ്റിൻകര ജനറൽ ആശുപത്രിയിൽ ഓപ്പറേഷൻ തിയറ്ററിലെ ജലസംഭരണിയിലെ കുടിവെള്ളത്തിൽ കോളിഫോം ബാക്ടീരി യയുടെ സാന്നിധ്യം കണ്ടെത്തിയതിനെ തുടർന്ന് ഓപ്പറേഷൻ തിയറ്റർ അടച്ചിട്ടു. ഇന്നലെ നടത്താനിരുന്ന ശസ്ത്രക്രിയകളും താത്കാലികമായി മാറ്റി വച്ചു. ഓപ്പറേഷന്‍ തിയറ്ററിലെ ജലസംഭരണിയിലെ കുടിവെള്ളം രോഗികള്‍ക്ക് ഉപയോഗയോഗ്യമാണോ എന്നു പരിശോധിക്കുന്ന പതിവുണ്ട്. ബാക്ടീരിയയുടെ അംശം കണ്ടെത്തിയതിനെത്തുടര്‍ന്ന് ജലസംഭരണി പൂര്‍ണമായും ജലരഹിതമാക്കുകയും ശുദ്ധമാക്കുകയും ചെയ്യും. തുടര്‍ന്നു വീണ്ടും വെള്ളം നിറച്ചതിനുശേഷം സാന്പിള്‍ പരിശോധനയ്ക്ക് അയക്കും. ഉപയോഗയോഗ്യമെന്ന ഫലം ലഭിച്ചതിനുശേഷം ഓപ്പറേഷന്‍ തിയറ്റര്‍ തുറന്നു പ്രവര്‍ത്തിപ്പിക്കുമെന്ന് ആശുപത്രി സൂപ്രണ്ട് അറിയിച്ചു. നെയ്യാറ്റിന്‍കര ജനറല്‍ ആശുപത്രിയിലെ ശസ്ത്രക്രിയകള്‍ മാറ്റി വച്ച സംഭവം നേരത്തെയും ഉണ്ടായിട്ടുണ്ട്. കനത്ത മഴയില്‍ ജനറല്‍ ആശുപത്രിയിലെ ഓപ്പറേഷന്‍ തിയറ്ററില്‍ വെള്ളം കയറിയതിനെത്തുടര്‍ന്നു മാസങ്ങള്‍ക്കുമുന്പ് ദിവസങ്ങളോളം തിയറ്റര്‍ അടച്ചിട്ടു. അണുനശീകരണത്തിനു ശേഷമുള്ള പരിശോധനഫലത്തിന്‍റെ അടിസ്ഥാനത്തിലാണു പിന്നീട് തിയറ്റര്‍ തുറന്നത്. നെയ്യാറ്റിന്‍കരയുടെ പ്രധാന ജലസ്രോതസായ നെയ്യാറില്‍ കോളിഫോം ബാക്ടീരിയയുടെ സാന്നിധ്യത്തിനു കാരണമാകുന്ന വിധത്തില്‍ നഗരത്തിലെ മാലിന്യമൊഴുക്കി വിടുന്നതായി ആരോപണമുണ്ട്. ജല അഥോറിറ്റിയുടേതുള്‍പ്പെടെ വിവിധ കുടിവെള്ള പദ്ധതികളുടെ ആശ്രയകേന്ദ്രം നെയ്യാറാണെന്ന യാഥാര്‍ഥ്യം നിലനില്‍ക്കുന്പോള്‍ തന്നെയാണ് ഇത്തരത്തില്‍ മാലിന്യം വലിച്ചെറിയലും ഒഴുക്കലുമൊക്കെ തുടരുന്നത്.

സിപിഐ ജില്ലാ സമ്മേളനം ഇന്ന് ആരംഭിക്കും : മാങ്കോട് രാധാകൃഷ്ണൻ ജില്ലാ സെക്രട്ടറിയായി തുടരും

തിരുവനന്തപുരം : സിപിഐ തിരുവനന്തപുരം ജില്ലാ സമ്മേളനം ഇന്ന് ആരംഭിക്കും. നിലവിലെ ജില്ലാ സെക്രട്ടറി മാങ്കോട് രാധാകൃഷ്ണൻ ജില്ലാ സെക്രട്ടറിയായി തുടരും. 11 ജില്ലാ സമ്മേളനങ്ങൾ പൂർത്തിയായ ശേഷമാണു തിരുവനന്തപുരം സമ്മേളനം ചേരുന്നത്. പത്തനംതിട്ട, കോട്ടയം സമ്മേളനങ്ങളാണ് ഇനി നടക്കാനുള്ളത്. സെപ്റ്റംബർ എട്ടു മുതൽ 12 വരെ ആലപ്പുഴയിലാണു സംസ്ഥാന സമ്മേളനം. ഇതുവരെ നടന്ന ജില്ലാ സമ്മേളനങ്ങളിൽ പാർട്ടി നേതൃത്വത്തിനെതിരെയും സിപിഐ മന്ത്രിമാർക്കെതിരെയും വിമർശനമുയർന്നിരുന്നു. സർക്കാരിന്‍റെ പ്രവർത്തനത്തെ സംബന്ധിച്ചു വലിയ വിമർശനമാണു ജില്ലാ സമ്മേളനങ്ങളിൽ ഉണ്ടായത്. സിപിഐ സിപിഎം പറയുന്നതും കേട്ടു പ്രവർത്തിക്കുന്ന പാർട്ടിയായി മാറി. ഇടതുമുന്നണി യോഗത്തിൽ സിപിഎം പറയുന്നതുംകേട്ടു അനുസരണയോടെ തിരിച്ചുവരുന്ന പാർട്ടി സെക്രട്ടറിയായി ബിനോയ് വിശ്വം മാറിയെന്നടക്കമുള്ള വിമർശനങ്ങളും സമ്മേളനങ്ങളിൽ ഉയർന്നിരുന്നു. തിരുവനന്തപുരം ജില്ലാ സമ്മേളനത്തിലും ഈ വിമർശനങ്ങൾ അതേപടി ആവർത്തിക്കുമെന്നുള്ളതും ഉറപ്പാണ്. 51-അംഗങ്ങളാണു ജില്ലാ കൗണ്‍സിലുള്ളത്. 18 അംഗ എക്സിക്യൂട്ടീവും നിലവിലുണ്ട്.കെ.എസ്. അരുണും പള്ളിച്ചൽ വിജയനുമാണു ജില്ലാ അസിസ്റ്റന്‍റ് സെക്രട്ടറിമാർ. ജില്ലാ സെക്രട്ടറി മാങ്കോട് രാധാകൃഷ്ണൻ സംസ്ഥാന നേതൃത്വവുമായി ചേർന്നുപോകുന്ന നേതാവാണ്. അതുകൊണ്ടുതന്നെ അദ്ദേഹത്തെ മാറ്റി മറ്റൊരാളെ സെക്രട്ടറിയാക്കേണ്ട സാഹചര്യം നിലവിൽ സിപിഐ സംസ്ഥാന നേതൃത്വത്തിനു മുന്നിലില്ല. കൂടാതെ ജില്ലയിലെ മന്ത്രി കൂടിയായ ജി.ആർ.അനിലിന്‍റെ വിശ്വസ്തൻ കൂടിയാണു രാധാകൃഷ്ണൻ. ഈ ബന്ധവും അദ്ദേഹത്തിനു ഗുണകരമാകും. നാളെ വൈകുന്നേരം മൂന്നു മണിക്കു പാളയം രക്തസാക്ഷിമണ്ഡപത്തിൽ നിന്നും റെഡ് വോളണ്ടിയർ മാർച്ച് ആരംഭിക്കും. മാർച്ച് പുത്തരിക്കണ്ടം മൈതാനിയിൽ സമാപിക്കും. തുടർന്നു നടക്കുന്ന പൊതുസമ്മേളനം സിപിഐ സംസ്ഥാന സെക്രട്ടറി ബിനോയ് വിശ്വം ഉദ്ഘാടനം ചെയ്യും. എട്ട്, ഒൻപതു തീയതികളിൽ വഴുതക്കാട് ടാഗോർ തീയേറ്ററിലാണു പ്രതിനിധി സമ്മേളനം നടക്കുക.

മുന്‍ ഭര്‍ത്താവിന് എതിരേ കള്ളക്കേസ്; യുവതി പിടിയില്‍

പേരൂര്‍ക്കട: മുന്‍ ഭര്‍ത്താവിനെ കേസില്‍ കുടുക്കുന്നതിന് വ്യാജരേഖ നിർമിച്ചു പരാതി നല്‍കിയ യുവതി പിടിയില്‍. നിലമ്പൂര്‍ സ്വദേശിനി നിഷാന (34) യാണ് പിടിയിലായത്. മുന്‍ ഭര്‍ത്താവിനെതിരേ വ്യാജരേഖ നിർമിച്ചശേഷം 50 ലക്ഷം രൂപ നഷ്ടപരിഹാരം ആവശ്യപ്പെട്ട് ഇവര്‍ തിരുവനന്തപുരം കുടുംബകോടതിയില്‍ കേസ് ഫയല്‍ചെയ്യുകയുണ്ടായി. ഇതേതുടർന്നു രേഖ വ്യാജമായി ഉണ്ടാക്കിയതാണെന്നു കാണിച്ച് ഇവരുടെ മുന്‍ ഭര്‍ത്താവ് തെളിവുസഹിതം ഹൈക്കോടതിയെ സമീപിക്കുകയായിരുന്നു. തിരുവനന്തപുരം ഫസ്റ്റ്ക്ലാസ് മജിസ്‌ട്രേറ്റ് കോടതിയുടെ നിർദേശപ്രകാരം ഫോര്‍ട്ട് പോ ലീസ് സംഭവത്തില്‍ കേസെടുക്കുകയും അന്വേഷണം ആരംഭിക്കുകയുംചെയ്തു. ഗുരുതരമായ കുറ്റകൃത്യമാണെന്നും രേഖകള്‍ വ്യാജമാണെന്നും അന്വേഷണത്തില്‍ ബോധ്യപ്പെട്ടതോടുകൂടി പോലീസ് കോടതിയില്‍ റിപ്പോര്‍ട്ട് സമര്‍പ്പിക്കുകയായിരുന്നു.തുടര്‍ന്നാണ് ഇവരുടെ അറസ്റ്റുണ്ടായത്. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

വസന്തയുടെ വ്യാജ ആധാര്‍ കാര്‍ഡ് നിര്‍മിച്ചത് സെയ്ദാലി

പേരൂര്‍ക്കട: അനന്തപുരി മണികണ്ഠന്‍റെ ഉറ്റസുഹൃത്തായ സെയ്ദലിയാണ് വസന്തയുടെ ഫോട്ടോ ഉപയോഗിച്ച് വ്യാജ ആധാര്‍ കാര്‍ഡ് തയാറാക്കിയത്. ഇയാള്‍ 2015ല്‍ തൃശൂര്‍ ടൗണ്‍ പോലീസ് സ്റ്റേഷന്‍ പരിധിയില്‍ പൂങ്കുന്നത്ത് അമ്മമാരുടേതായ ഒരു അഗതിമന്ദിരം നടത്തിയിരുന്നു. ഭര്‍ത്താക്കന്മാര്‍ വിദേശത്തായിട്ടുള്ളവരുടെ വസ്തു വിരലടയാളം പതിച്ച് കൈക്കലാക്കിയതുമായി ബന്ധപ്പെട്ട് ഇവിടെ പോലീസ് ഇയാള്‍ക്കെതിരേ കേസുകള്‍ രജിസ്റ്റര്‍ ചെയ്തിരുന്നു. ഈ സംഭവത്തില്‍ സെയ്ദാലി അറസ്റ്റിലാകുകയും 110 ദിവസത്തെ ജയില്‍വാസത്തിനുശേഷം ജാമ്യം നേടി മുങ്ങുകയുമായിരുന്നു. സെയ്ദാലിയുടെ ഭാര്യ സ്മിത സെയ്ദാലി, ഇവരുടെ സുഹൃത്ത് ഗായത്രി എന്നിവരും ഈ കേസില്‍ പ്രതികളാകുകയും ജയില്‍വാസം അനുഭവിക്കുകയും ചെയ്തിരുന്നു. കോടതിയില്‍ ഹാജരാകാതിരുന്ന പ്രതികളെ കണ്ടെത്തുന്നതിനായി കോടതി വാറണ്ട് പുറപ്പെടുവിച്ചിരുന്നു. നീണ്ട 10 വര്‍ഷത്തിനുശേഷമാണു സെയ്ദാലിയെ ശാസ്തമംഗലത്തെ ഒരു ഫ്‌ളാറ്റില്‍ നിന്നു വസ്തുതട്ടിപ്പു കേസുമായി പിടികൂടുന്നത്. ഇയാളുടെ ഭാര്യയും അവരുടെ സുഹൃത്തും ഇപ്പോഴും ഒളിവിലാണെന്നു പോലീസ് അറിയിച്ചു. photo: കേസിലെ പ്രതിയായ വസന്ത

ജവഹർനഗർ വസ്തുതട്ടിപ്പ് കേസ് : പ്രതികളുമായി സബ്‌ രജിസ്ട്രാര്‍ ഓഫീസില്‍ തെളിവെടുത്തു

പേരൂര്‍ക്കട: ജവഹര്‍ നഗറിലെ വസ്തുതട്ടിപ്പുമായി ബന്ധപ്പെട്ട് പോലീസ് കസ്റ്റഡിയില്‍ വാങ്ങിയ പ്രതികളെ ശാസ്തമംഗലം സബ്‌ രജിസ്ട്രാര്‍ ഓഫീസിലും ഒരു സ്റ്റുഡിയോയിലും തെളിവെടുപ്പിനെത്തിച്ചു. ചൊവ്വാഴ്ച ഉച്ചതിരിഞ്ഞാണ് അനന്തപുരി മണികണ്ഠന്‍, സുനില്‍ ബാബു തോമസ് എന്നിവരെ തെളിവെടുപ്പിനായി കൊണ്ടുവന്നത്. വ്യാജ രേഖകള്‍ ഉപയോഗിച്ച് ആധാരം രജിസ്റ്റര്‍ ചെയ്തതുമായി ബന്ധപ്പെട്ട രേഖകള്‍ പരിശോധിച്ച് ഉറപ്പുവരുത്തിയ പോലീസ് പ്രതികള്‍ എപ്രകാരമാണ് സംഭവദിവസം ഓഫീസില്‍ എത്തിയതെന്നും ആരാഞ്ഞു. ആധാരം രജിസ്റ്ററാക്കിയ 2025 ജനുവരി നാലിനു മരുതൂര്‍ ഭാഗത്തുനിന്ന് ഒരു ടാക്‌സി പിടിച്ച് കരകുളം സ്വദേശിനി വസന്ത, ഇവരുടെ ചെറുമകള്‍ എന്നിവരെ കാറില്‍ കയറ്റിവിട്ടു. വസന്തയ്ക്ക് പരസഹായമില്ലാതെ നടക്കാന്‍ സാധിക്കാത്തതിനാലാണ് ചെറുമകളെയും ഒപ്പം കൂട്ടിയത്. ചികിത്സാ സഹായം വാങ്ങിനല്‍കാമെന്നു പറഞ്ഞുവിശ്വസിപ്പിച്ചാണ് മണികണ്ഠന്‍ വസന്തയെ സബ്‌ രജിസ്ട്രാര്‍ ഓഫീസിലേക്കു കൊണ്ടുവന്നത്. അതിനുശേഷം സുനില്‍ തന്‍റെ ബൈക്കില്‍ സബ്‌ രജിസ്ട്രാര്‍ ഓഫീസിലെത്തി. അനന്തപുരി മണികണ്ഠന്‍ തന്‍റെ കിള്ളിപ്പാലത്തെ ഓഫീസില്‍ നിന്നാണ് സ്‌കൂട്ടറിലാണ് സബ്‌ രജിസ്ട്രാര്‍ ഓഫീസില്‍ എത്തിയത്. പോലീസ് സിസിടിവി ദൃശ്യങ്ങള്‍ പരിശോധിച്ച് കാര്യങ്ങള്‍ക്കു വ്യക്തത വരുത്തി. വ്യാജ ആധാര്‍ കാര്‍ഡ് ഉണ്ടാക്കിയെടുക്കുന്നതിനായി വസന്തയുടെ ഫോട്ടോ മണികണ്ഠന്‍ തന്‍റെ മൊബൈല്‍ ഫോണില്‍ എടുക്കുകയായിരുന്നു. പിന്നീട് ഇതു ശാസ്തമംഗലത്തെ ഒരു സ്റ്റുഡിയോയിലെത്തിയാണ് പ്രിന്‍റ് എടുത്തത്. അതേസമയം സ്റ്റുഡിയോ ജീവനക്കാര്‍ വസന്തയെ തിരിച്ചറിഞ്ഞിട്ടില്ല. ആധാരം രജിസ്റ്റര്‍ ചെയ്യുന്ന നടപടികള്‍ പൂര്‍ത്തീകരിച്ചശേഷം വന്ന കാറില്‍ തന്നെയാണ് വസന്തയും ചെറുമകളും തിരികെപ്പോയത്.

മദ്ധ്യവയസ്കനെ മരിച്ചനിലയില്‍ കണ്ടെത്തി

മെഡിക്കല്‍കോളജ്: മദ്ധ്യവയസ്കനെ ഷെഡ്ഡിനുള്ളില്‍ മരിച്ചനിലയില്‍ കണ്ടെത്തി. കരമന നെടുങ്കാട് മേലേ മങ്ങാട്ടുകോണത്ത് കുതിരവിളാകത്ത് വീട്ടില്‍ പി. സുരേഷ് (52) ആണ് മരിച്ചത്. അവിവാഹിതനായിരുന്നു. ഇന്നലെ വൈകുന്നേരം വീടിനു സമീപത്തെ ഷെഡ്ഡിലായിരുന്നു മൃതദേഹം കണ്ടെത്തിയത്. മൃതദേഹത്തിനു രണ്ടുദിവസത്തെ പഴക്കമുണ്ടെന്ന് പോലീസ് അറിയിച്ചു. ഹൃദയാഘാതമാകാം മരണകാരണമെന്നു കരുതുന്നു. കരമന പോലീസ് മേല്‍നടപടികള്‍ സ്വീകരിച്ചു. മൃതദേഹം തിരുവനന്തപുരം മെഡിക്കല്‍കോളജ് ആശുപത്രി മോര്‍ച്ചറിയില്‍. സഹോദരങ്ങള്‍: പി. രാജന്‍, പി. സെല്‍വന്‍, പരേതനായ വിജയന്‍.

വിഴിഞ്ഞം അന്താരാഷ്ട്ര തുറമുഖം: രണ്ടാംഘട്ട നിർമാണത്തിന് ഇനിയും തുടക്കമായില്ല

വിഴിഞ്ഞം: വിഴിഞ്ഞം അന്താരാഷ്ട്ര തുറമുഖത്തിന്‍റെ ഒന്നാം ഘട്ട വിജയം ആഘോഷിച്ചെങ്കിലും രണ്ടാം ഘട്ട നിർമാണത്തിന് ഇനിയും തുടക്കമായില്ല. ഉടൻ തുടങ്ങുമെന്നു മാസങ്ങൾക്കു മുൻപേ അധികൃതർ അറിയിച്ചെങ്കിലും ഒന്നും നടന്നില്ല. കടൽക്ഷോഭവും കാലാവസ്ഥാവ്യതിയാനവും പുലിമുട്ടിനായുള്ള കല്ലിടലിനും തടസമായി. ഏകദേശം 1000 കോടിയിൽപ്പരം രൂപയാണ് രണ്ടാംഘട്ട നിർമാണത്തിന് അധികൃതർ പ്രതീക്ഷിക്കുന്നത്. രണ്ടും മൂന്നും ഘട്ടങ്ങൾ പൂർത്തിയാകുന്നതും പ്രതീക്ഷിച്ചു ലോകത്തിലെ നിരവധി കപ്പൽ കമ്പനികൾ രംഗത്തുണ്ട്. ഇവർക്കു വിഴിഞ്ഞത്ത് കപ്പൽ അടുപ്പിക്കണമെങ്കിൽ തുറമുഖം പൂർണ സജ്ജമാകണം. നിലവിൽ 800 മീറ്റർ നീളവും 400 മീറ്റർവീതിയുമുള്ള ബർത്തിനെ എംഎസ്സി ഷിപ്പിംഗ് കമ്പനി കൈ യടക്കിയിരിക്കുകയാണ്. മാസത്തിൽ 40 മുതൽ 50 വരെ അടുക്കുന്ന കപ്പലുകളിൽ മിക്കവയും എംഎസ്‌സിയുടേതു മാത്രമാണ്. ലോകത്തിലെ മറ്റ് അഞ്ചോളം പ്രമുഖ കമ്പനികൾ ഇതിനോടകം വിഴിഞ്ഞത്തിന്‍റെ സാധ്യതകൾ തേടിയെത്തിയതായാണറിവ്. ബർത്ത് ഒഴിവില്ലാത്തത് ഈകമ്പനികൾക്ക് തിരിച്ചടിയായി. 2024 ജൂലൈ 11 നാണ് സാൻഫെർണാണ്ടോ എന്ന ആദ്യകപ്പൽ വിഴിഞ്ഞത്ത് അടുപ്പിച്ച് തുടക്കം കുറിച്ചത്. ട്രയൽ റൺ കഴിഞ്ഞ് ഡിസംബറിൽ വ്യാവസായിക തുറമുഖമായി മാറിയ വിഴിഞ്ഞത്തു കഴിഞ്ഞ ദിവസം വരെ ചരക്കുമായി 425 കപ്പൽ അടുത്തു. ഒന്പതുലക്ഷം കണ്ടെയ്നറുകളും സുഗമമായി കൈകാര്യം ചെയ്തു. ലോകത്തിലെ ഏതു തരം തുറമുഖങ്ങളോടും കിടപിടിക്കാൻ പാകത്തിൽ വിഴിഞ്ഞം തുറമുഖം വളർന്നെങ്കിലും കൂടുതൽ കപ്പലുകളെ അടുപ്പിക്കാൻ പാകത്തിൽ എത്തണമെങ്കിൽ രണ്ടും മൂന്നും ഘട്ടം പൂർണ്ണമാകണം. 2028-ൽ രണ്ടാംഘട്ടം പൂർണമാക്കുമെന്ന് പ്രഖ്യാപിച്ചിട്ടു പുലിമുട്ടുപോലും പൂർ ത്തിയാക്കാനായിട്ടില്ല.

അന്താരാഷ്ട്ര ലോകം സംഘർഷാത്മകമായിരിക്കുന്നു: രാഷ്ട്രീയ നിരീക്ഷകൻ ഡോ. മോഹൻ വർഗീസ്

നാലാഞ്ചിറ: അന്താരാഷ്ട്ര ലോകം സംഘർഷാത്മകമായിരിക്കുന്നുവെന്ന് പ്രമുഖ രാഷ്ട്രീയ നിരീക്ഷകനും ടെലിവിഷൻ ഡിബേറ്ററുമായ ഡോ. മോഹൻ വർഗീസ് അഭിപ്രായപെട്ടു. നാലാഞ്ചിറ സെന്‍റ് ജോൺസ് മോഡൽ ഹയർ സെക്കൻഡറി സ്കൂളിന്‍റെ പ്ലസ്ടു വിഭാഗം രജത ജൂബിലി ആഘോഷത്തിന്‍റെ ഭാഗമായി നടത്തുന്ന പ്രഭാഷണ പരമ്പരയിൽ പ്രസംഗിക്കുകയായിരുന്നു അദ്ദേഹം. അമേരിക്കയുടെ നിലവിലെ നിലപാടുകൾ മറ്റു രാജ്യങ്ങൾക്ക് ഒരു ഭീഷണി തന്നെയാണ്. മൈഗ്രേഷൻ അടക്കമുള്ള വിഷയങ്ങൾ കൈ കൊള്ളുന്ന ട്രമ്പിന്‍റെ നിലപാട് ഒരു ഭീഷണിയാണ്. റഷ്യയിലും ഉക്രയിനിലും ഇ സ്രായിലുമൊക്കെ സംഘർഷ ഭരിത മാക്കാനുള്ള ശ്രമങ്ങൾ ഗുരുതര പ്രത്യാഘാതങ്ങൾ സൃഷ്ടിക്കും- അദ്ദേഹം കൂട്ടി ച്ചേർത്തു. ജൂബിലിയുടെ ഭാഗമായി 12 വിഷയങ്ങളിൽ പ്രഭാഷണങ്ങളും ചർച്ചകളും സംഘടിപ്പിച്ചു വരുന്നതായി പ്രിൻസിപ്പൽ ഫാ. ജോസ് ചരുവിൽ പറഞ്ഞു. ‌സാഹിത്യം, ചരിത്രം, ഭരണ ഘടന തുടങ്ങിയ വിഷയങ്ങളിൽ വരും നാളുകളാൽ പ്രഭാഷണങ്ങൾ സംഘടിപ്പിക്കുമെന്നും അദ്ദേഹം പറഞ്ഞു. പ്രിൻസിപ്പൽ ഫാ. ജോസ് ചരുവിൽ അധ്യക്ഷത വഹിച്ചു. വൈസ് പ്രിൻസിപ്പൽ അജീഷ് കുമാർ, ജൂബിലി കൺവീനർ ബിന്നി സാഹിതി, പൊളിറ്റിക്കൽ അധ്യാപകൻ ടി. ഷിജു എന്നിവർ പ്രസംഗിച്ചു.

പപ്പ നാടകം കാണാൻ വന്ന കഥ പങ്കുവച്ച് ഹാരിസ് ഡാനിയൽ

തിരുവനന്തപുരം: യൂണിവേഴ് സിറ്റി കോളജിൽ പഠിക്കുന്ന കാലത്ത് താൻ അഭിനയിച്ച തമിഴ്നാടകം കാണാൻ പപ്പ യൂണിവേഴ്സിറ്റി കോളജിന്‍റെ മതിൽ ചാടി വന്നിരുന്നുവെന്ന് ഹാരിസ് ഡാനിയൽ. മലയാള സിനിമയുടെ പിതാവ് ജെ. സി. ഡാനിയൽ തന്‍റെ നാടകം കാണാൻ മതിൽ ചാടി കടന്നുവന്ന കാര്യം ഹാരിസ് ഡാനിയൽ ഇന്നലെ ഓർമിച്ചത് പൊട്ടിച്ചിരിയോടെയാണ്. ഹോട്ടൽ റീജൻസി ഗ്രാൻഡിൽ ജെ.സി. ഡാനിയൽ ഫൗണ്ടേഷൻ സംഘടിപ്പിച്ച ഹാരിസ് ഡാനിയലിന്‍റെ നവതി ആഘോഷ ചടങ്ങിൽ വച്ചാണ് ഏഴുപതിറ്റാണ്ടിനു പിന്നിലെ നാടകാഭിനയ നിമിഷങ്ങളിലേക്കു അദ്ദേഹം നടന്നു പോയത്. കോളജിൽ ഒരു തമിഴ് ഹാസ്യ നാടകമാണ് ഞാനും കൂട്ടുകാരും ചേർന്ന് അവതരിപ്പിച്ചത്. അതിൽ സ്ത്രീ വേഷമായിരുന്നു എനിക്ക്. ഹാരിസ് ഡാനിയൽ പറഞ്ഞു. എന്‍റെ അഭിനയം കാണാൻ പപ്പയ്ക്കു വലിയ ആഗ്രഹമുണ്ടെന്നറിഞ്ഞപ്പോൾ എനിക്കാകെ അങ്കലാപ്പായി. പപ്പ മുന്നിൽ വന്നിരുന്നാൽ അഭിനയിക്കാൻ പ്രയാസം വരുമെന്നതിനാൽ നാടകം കാണാനുള്ള പാസ് ഞാൻ പപ്പയ്ക്ക് നല്കിയില്ല. യൂണിവേഴ്സിറ്റി കോളജിന്‍റെ മുക്കുംമൂലയും നല്ല പരിചയമുണ്ടായിരുന്നു പപ്പയ്ക്ക്. അതിനാൽ യൂണിവേഴ്സിറ്റി ഓഫീസിന്‍റെ മുൻ വശത്തുള്ള റോഡുവഴി വന്ന് കോളജിന്‍റെ മതിൽ ചാടിക്കടന്നു നാടകവേദിയിൽ എത്തി. സദസിൽ നിന്നുമുയർന്ന വൻ കരഘോഷത്തിനിടയിൽ ഹാരിസ് ഡാനിയൽ പറഞ്ഞു. യൂണിവേഴ്സിറ്റി കോളജ് വിദ്യാർഥിയായിരുന്ന കാലത്ത് തനിക്കു മലയാളം നല്ല വശമുണ്ടായിരുന്നില്ല എന്നും ഹാരിസ് ഡാനിയൽ കൂട്ടിച്ചേർത്തു. മലയാളം പാട്ടുകൾ എനിക്കു വലിയ ഇഷ്ടമായിരുന്നു. കൂട്ടുകാർ പാടാൻ പറയുന്പോൾ തമിഴിൽ പാട്ടെഴുതി എടുത്താണ് പാടിയിരുന്നത്. ജെ. സി. ഡാനിയൽ ഫൗണ്ടേഷൻ ചെയർപേഴ്സണ്‍ സോന എസ്. നായരുടെ സ്നേഹനിർബന്ധത്തിനു വഴങ്ങി കളിയ്ക്കല്ലെ എന്ന് ചൊല്ലും പെണ്ണല്ലെ നീ... എന്ന ഗാനവും ഹാരിസ് ഡാനിയൽ പാടി. ഹാരിസ് ഡാനിയലിന്‍റെ സഹധർമിണി സുശീലാറാണി ഡാനിയൽ, മകൾ അഡലിൻ ഡാനിയൽ, മരുമകൻ ഡോ. രാജ്കുമാർ ഡാനിയൽ എന്നിവർ വേദിയിൽ ഹാരിസ് ഡാനിയലിനൊപ്പം ഉണ്ടായിരുന്നു. നവതി ആഘോഷച്ചടങ്ങിന്‍റെ ഭാഗമായി പിറന്നാൾ കേക്ക് ഹാരിസ് ഡാനിയലും മന്ത്രി രാമചന്ദ്രൻ കടന്നപ്പള്ളിയും സോന എസ്. നായരും ചേർന്നു മുറിച്ചു. ചലച്ചിത്ര അക്കാഡമി ചെയർമാൻ പ്രേംകുമാർ, നെയ്യാറ്റിൻകര മുൻസിപ്പാലിറ്റി ചെയർമാൻ പി. കെ. രാജ്മോഹനൻ, ഭാരത് ഭവൻ മെന്പർ സെക്രട്ടറി ഡോ. പ്രമോദ് പയ്യന്നൂർ, ചലച്ചിത്ര സംവിധായകൻ ജോയ് കെ. മാത്യു, ഡോ. പ്രകാശൻ ഗുരുക്കൾ, ജെ.സി. ഡാനിയൽ ഫൗണ്ടേഷൻ സെക്രട്ടറി സാബു കൃഷ്ണ, ആറ്റുകാൽ തന്പി തുടങ്ങിയവർ ആശംസാപ്രസംഗം നടത്തി. എം. വിൻസന്‍റ് എംഎൽഎ, ചലച്ചിത്ര നിർമാതാവ് ദിനേശ് പണിക്കർ, സൂര്യ കൃഷ്ണമൂർത്തി, ഹാരിസ് ഡാനിയലിന്‍റെ കുടുംബാംഗങ്ങൾ, എൽഐസി അസോസിയേഷൻ ഭാരവാഹികൾ തുടങ്ങിയവർ ഹാരിസ് ഡാനിയലിനെ പൊന്നാട ചാർത്തി ആദരിച്ചു. ‌അഗസ്തീശ്വരം കെഎൻഇ ഐഎൽ മെമ്മോറിയൽ പാസ്റ്ററേറ്റ് പള്ളി പാസ്റ്റർ റവ. എം. കിത്തിയൻ, പള്ളി കമ്മിറ്റി അംഗം തമിലൻ ഡി. ജാനി എന്നിവർ ജന്മദിന പ്രാർഥനയും ആശംസാ പ്രസംഗവും നടത്തി. രഞ്ജു പിറവത്തിന്‍റെ സംഗീത വിരുന്നും ഉണ്ടായിരുന്നു. സ്വന്തം ലേഖിക

ജീവൻ രക്ഷിക്കുന്നവർ സ്വയരക്ഷയ്ക്കു വേണ്ടി നിലവിളിക്കുന്നു: വി.ഡി. സതീശൻ

തിരുവനന്തപുരം: ലൈഫ് ഗാർഡ്മാരുടെ തൊഴിൽ പ്രശ്നങ്ങൾ പരിഹരിക്കണമെന്ന് ആവശ്യപ്പെട്ട് കേരളാ ലൈഫ്ഗാർഡ് എംപ്ലോയീസ് യൂണിയൻ (ഐഎൻടിയുസി) നേതൃത്വത്തിൽ ലൈഫ്ഗാഡുമാർ സെക്രട്ടറിയേറ്റ് മാർച്ചും ധർണ്ണയും നടത്തി. ടൂറിസം വകുപ്പിന് കീഴിൽ 30 വർഷത്തിലധികമായി ജോലി ചെയ്യുന്ന ലൈഫ് ഗാർഡ്മാരെ സ്ഥിരപ്പെടുത്തുക, സേവനത്തിനിടെ മരണമടഞ്ഞവരുടെ ആശ്രിതർക്ക് ആശ്രിത നിയമനം നൽകുക, സാമൂഹ്യ സുരക്ഷാ പദ്ധതികളായ ഇഎസ്ഐ, ഇപിഎഫ്, പെൻഷൻ എന്നിവ നടപ്പാക്കുക, ഗ്രാറ്റുവിറ്റി ഏർപ്പെടുത്തുക, വനിതകളെ കൂടി ലൈഫ് ഗാർഡുമാരായി നിയമിക്കുക, വേതന വർധന നടപ്പാക്കുക. ഇടതുമുന്നണി ഗവൺമെന്‍റ് റദ്ദുചെയ്ത ഫുഡ്, യൂണിഫോം വാഷിംഗ് അലവൻസുകൾ പുനഃസ്ഥാപിക്കുക, 2021നു ശേഷമുള്ള യൂണിഫോം, റെസ്ക്യൂ ഉപകരണങ്ങൾ അടിയന്തരമായി വിതരണം ചെയ്യുക തുടങ്ങിയ ആവശ്യങ്ങൾ ഉന്നയിച്ചാണ് തൊഴിലാളികൾ സെക്രട്ടേറിയേറ്റ് മാർച്ചും ധർണ്ണയും നടത്തിയത്. കേരളാ ലൈഫ്ഗാർഡ് എംപ്ലോയീസ് യൂണിയൻ (ഐഎൻടിയുസി) സംസ്ഥാന പ്രസിഡന്‍റ് വി.ആർ. പ്രതാപൻ അധ്യക്ഷത വഹിച്ചു. എം. വിൻസന്‍റ് എംഎൽഎ സമരപ്രഖ്യാപന സന്ദേശം നടത്തി. വി.ജെ. ജോസഫ്, ചെമ്പഴന്തി അനിൽ, എസ്. സുന്ദരേശൻ, റോജിൻഗോമസ്, ബാബുജി, ആന്‍റ ണി ആൽബർട്ട്, ജലിൻ ജയരാജ്, മലയം ശ്രീകണ്ഠൻ നായർ, കൃഷ്ണവേണി ജി. ശർമ, എം.എസ്. താജുദ്ദീൻ, എം. ഉണ്ണികൃഷ്ണൻ, ശങ്കർ വർക്കല, അക്ഷയ്, അനിൽ ജസ്റ്റസ്, അനൂപ്, യു. പ്രദീപ് തുടങ്ങിയവർ പ്രസംഗിച്ചു.

അദാനി റോയൽസ് കപ്പ് ക്രിക്കറ്റ്: വിഴിഞ്ഞം ബാച്ച്മേറ്റ്സിന് കിരീടം

കോവളം: പ്രഥമ അദാനി റോയൽസ് കപ്പ് ക്രിക്കറ്റ് ടൂർണമെന്‍റിൽ വിഴിഞ്ഞം ബാച്ച്മേറ്റ്സിനു കിരീടം. അവസാന പന്തുവരെ ആവേശം അലതല്ലിയ കലാശപ്പോരാട്ടത്തിൽ ഹിറ്റേഴ്സ് എയർപോർട്ടിനെ പരാജയപ്പെടുത്തിയാണ് വിഴിഞ്ഞം കിരീടത്തിൽ മുത്തമിട്ടത്. ഫൈനലിൽ ആദ്യം ബാറ്റ് ചെയ്ത ഹിറ്റേഴ്സ് എയർപോർട്ട്, നിശ്ചിത അഞ്ച് ഓവറിൽ നാല് വിക്കറ്റ് നഷ്ടത്തിൽ 62 റണ്‍സെടുത്തു. മറുപടി ബാറ്റിംഗിനിറങ്ങിയ വിഴിഞ്ഞം ബാച്ച്മേറ്റ്സ് ഒൻപത് വിക്കറ്റിന്‍റെ തകർപ്പൻ വിജയം സ്വന്തമാക്കി. വിഴിഞ്ഞത്തിനു വേണ്ടി ഓപ്പണർ ഇമ്മാനുവേൽ തകർപ്പൻ പ്രകടനം കാഴ്ച്ചവച്ചപ്പോൾ അവസാന ഓവറിലെ അവസാന പന്തിൽ ബൗണ്ടറി നേടിക്കൊണ്ട് ബാച്ച്മേറ്റ്സ് ലക്ഷ്യം മറികടന്നു (64/1).22 പന്തിൽനിന്ന് 56 റണ്‍സ് അടിച്ചുകൂട്ടിയ ഇമ്മാനുവേലിന്‍റെ ഒറ്റയാൾ പോരാട്ടമാണ് ടീമിന് വിജയമൊരുക്കിയത്. ടൂർണമെന്‍റിൽ 207 റണ്‍സ് നേടിയ ഇമ്മാനുവേൽ തന്നെയാണ് കളിയിലെ താരവും ടൂർണമെന്‍റിലെ താരവും. മികച്ച ബൗളറായി മച്ചന്പീസ് വിഴിഞ്ഞത്തിന്‍റെ താരം വിജയിയെയും തിരഞ്ഞെടുത്തു. 16 ടീമുകൾ പങ്കെടുത്ത ടൂർണമെന്‍റിൽ ആദ്യ സെമിയിൽ അരോമ എയർപോർട്ടിനെ പരാജയപ്പെടുത്തിയാണ് വിഴിഞ്ഞം ബാച്ച്മേറ്റ്സ് ഫൈനലിൽ ഇടംപിടിച്ചത്. രണ്ടാം സെമിയിൽ ക്രേസി 11 വിഴിഞ്ഞത്തെ തകർത്ത് ഹിറ്റേഴ്സ് എയർപോർട്ടും കലാശക്കളിക്ക് യോഗ്യത നേടി. വിജയികൾക്കുള്ള സമ്മാനങ്ങൾ കോവളം എംഎൽഎ എം. വിൻസെന്‍റ്, വിഴിഞ്ഞം വോയേജ് ചർച്ച് വികാരി ഫാ.ഡോ. നിക്കോളാസ് എന്നിവർ വിതരണം ചെയ്തു. കൗണ്‍സിലർ പനത്തുറ ബൈജു, സർക്കിൾ ഇൻസ്പെക്ടർ പ്രകാശ്, അദാനി പോർട്ട് കോർപ്പറേറ്റ് അഫയേഴ്സ് ഹെഡ് ഡോ. അനിൽ ബാലകൃഷ്ണൻ,അദാനി ട്രിവാൻഡ്രം എയർപോർട്ട് ചീഫ് ഓഫീസർ രാഹുൽ ഭട്കോട്ടി, കേരള റീജിയണൽ കോർപ്പറേറ്റ് കമ്മ്യൂണിക്കേഷൻസ് ഹെഡ് മഹേഷ് ഗുപ്തൻ, ട്രിവാൻഡ്രം റോയൽസ് മാനേജ്മെന്‍റ് പ്രതിനിധി മനോജ് മത്തായി, ടീം പി.ആർ മേധാവി ഡോ. മൈതിലി, ട്രിവാൻഡ്രം റോയൽസ് ഫീൽഡിംഗ കോച്ച് മഥൻ മോഹൻ തുടങ്ങിയവർ പങ്കെടുത്തു.

ജവഹർ നഗർ വസ്തുതട്ടിപ്പ് : അനന്തപുരി മണികണ്ഠനെയും സുനിലിനെയും കസ്റ്റഡിയില്‍ വാങ്ങി

പേരൂര്‍ക്കട: ജവഹര്‍ നഗറിലെ വസ്തുതട്ടിപ്പുമായി ബന്ധപ്പെട്ട് അനന്തപുരി മണികണ്ഠനെയും സുനില്‍ ബാബു തോമസിനെയും മ്യൂസിയം പോലീസ് കസ്റ്റഡിയില്‍ വാങ്ങി. നാലുദിവസത്തേക്കാണ് കോടതിയില്‍ അപേക്ഷ സമര്‍പ്പിച്ച് പ്രതികളെ കസ്റ്റഡിയില്‍ വാങ്ങിയത്. ചൊവ്വാഴ്ച മുതല്‍ പ്രതികളെ വിവിധ സ്ഥലങ്ങളില്‍ തെളിവെടുപ്പിനായി കൊണ്ടുപോകും. മണികണ്ഠനെ ഇയാളുടെ പുത്തന്‍കോട്ടയിലെ വീട്ടിലും മേലാംകോട്ടെ വാടകവീട്ടിലും കിള്ളിപ്പാലത്തെ ആധാരമെഴുത്ത് ഓഫീസിലും ശാസ്തമംഗലം സബ് രജിസ്ട്രാര്‍ ഓഫീസിലും തെളിവെടുപ്പിന് എത്തിക്കുമെന്നാണു സൂചന. ‌ അനില്‍ തമ്പിക്കുവേണ്ടി ഡോറ അസറിയ ക്രിപ്‌സിന്‍റെ പേരിലുള്ള 10 കോടിയിലേറെ മതിപ്പുവില വരുന്ന വസ്തുവും വീടും തട്ടിയെടുക്കുന്നതിനുവേണ്ടി വ്യാജ രേഖകള്‍ ഉപയോഗിച്ച് ആധാരം രജിസ്റ്റര്‍ ചെയ്തുവെന്നതാണ് മണികണ്ഠനെതിരേയുള്ള കുറ്റം. അതേസമയം ഇയാളുടെ സുഹൃത്ത് സുനില്‍ ബാബു തോമസാണ് കരകുളം സ്വദേശിനിയായ വസന്തയെ മണികണ്ഠന് പരിചയപ്പെടുത്തിയത്. ഡോറയുമായി പ്രായത്തിലും രൂപത്തിലും സാദൃശ്യമുള്ളയാളെ കണ്ടെത്തേണ്ടുന്നത് ആധാരം രജിസ്റ്റര്‍ ചെയ്യാന്‍ അനിവാര്യമായിരുന്നു. ഇതുകൂടാതെ ധനനിശ്ചയ പ്രമാണത്തില്‍ കള്ളസാക്ഷിയായി ഒപ്പിട്ടിരിക്കുന്നതും സുനിലാണ്. സുനിലിനെയും സബ്‌രജിസ്ട്രാര്‍ ഓഫീസിലെത്തിച്ച് തെളിവെടുപ്പ് നടത്തും. കേസിലെ പ്രധാന പ്രതി അനില്‍ തമ്പി ഇപ്പോഴും ഒളിവിലാണെങ്കിലും ഇയാളെക്കുറിച്ച് കൂടുതല്‍ വിവരങ്ങള്‍ അറിയുന്നതിനും കേസിന്‍റെ മര്‍മ്മപ്രധാനമായ ഭാഗം കണ്ടെത്തുന്നതിനും അനന്തപുരി മണികണ്ഠനെ ചോദ്യം ചെയ്യേണ്ടതുണ്ട്. എന്നാല്‍ എല്ലാ കള്ളത്തരവും തന്നെക്കൊണ്ടു ചെയ്യിച്ചത് അനില്‍ തമ്പിയാണെന്നു മാത്രമായിരുന്നു അറസ്റ്റിലായ ദിവസം മണികണ്ഠനു പറയാനുണ്ടായിരുന്നത്. ആഴ്ചകളായി ഒഴിവില്‍ക്കഴിഞ്ഞു വരുന്ന അനില്‍ തമ്പിയെ കണ്ടെത്തുന്നതിനുള്ള അന്വേഷണം പോലീസ് ഊര്‍ജ്ജിതമായി നടത്തുന്നുണ്ട്.

എക്‌സ് റേ യൂണിറ്റ് പ്രവര്‍ത്തനം നിര്‍ത്തിയിട്ട് അഞ്ചു ദിവസം; യൂത്ത് കോണ്‍ഗ്രസ് പ്രതിഷേധിച്ചു

പാറശാല: പാറശാല താലൂക്ക് ആശുപത്രിയില്‍ അഞ്ചു ദിവസമായി എക്‌സ് റേ യൂണിറ്റ് പ്രവര്‍ത്തിക്കുന്നില്ല. കാരണം തിരക്കിയപ്പോഴാണ് അറിയുന്നത് ആറു മാസം മുമ്പ് എക്‌സ് റേ മെഷീനു തകരാർ സംഭവിച്ചിരുന്നുവെന്നും അക്കാര്യം അപ്പോ തന്നെ എക്‌സ് റേ വിഭാഗത്തിലെ ജീവനക്കാര്‍ മേല്‍തട്ടില്‍ അറിയിച്ചിരുന്നും. എന്നാല്‍ തകരാര്‍ പരിഹരിക്കാതെ മുന്നോട്ട് പോയതാണു ഇപ്പോൾ മെഷീനു വലിയ തകരാര്‍ സംഭവിക്കാന്‍ കാരണം. ആശുപത്രി അധികൃതരുടെ വീഴ്ച തന്നെയാണ് എക്‌സ് റേ തകരാറിലായതിന് കാരണം. നിരവധി രോഗികളാണു ദുരിതത്തിലായത്. യൂത്ത് കോണ്‍ഗ്രസ് പാറശാല നിയോജക മണ്ഡലം പ്രസിഡന്‍റ് ബ്രമിന്‍ ചന്ദ്രന്‍റെ നേതൃത്വത്തില്‍ പ്രവര്‍ത്തകര്‍ എക്‌സ് റേ റൂമിനു മുന്നില്‍ കുത്തിയിരുന്ന് പ്രതിഷേധിച്ചു. ഒടുവില്‍ ആശുപത്രി അധികൃതരും പോലീസും പ്രവര്‍ത്തകരുമായി നടത്തിയ ചര്‍ച്ചയില്‍ നാളെ തന്നെ തകരാര്‍ പരിഹരിച്ച് പ്രവര്‍ത്തനം ആരംഭിക്കുമെന്ന് ആശുപത്രി സൂപ്രണ്ട് രേഖ മൂലം ഉറപ്പു നല്‍കി തുടര്‍ന്നു പ്രതിഷേധം അവസാനിച്ച് സമരക്കാര്‍ പിരിഞ്ഞു. കൊല്ലയില്‍ ശാം ലാല്‍, വിനയനാഥ്, ശാലിനി രാജേഷ്, അജയന്‍, പാറശാല അഭിലാഷ്, വിബിന്‍ തുടങ്ങിയവര്‍ പ്രസംഗിച്ചു.

നെട്ടുകാൽത്തേരി തുറന്ന ജയിലിൽ മത്സ്യകൃഷി വിളവെടുപ്പ്

നെയ്യാർഡാം: നെട്ടുകാൽത്തേരി തുറന്ന ജയിലിൽ മത്സ്യകൃഷി വിളവെടുത്തു. പാറശാല എംഎൽഎ സി.കെ. ഹരീന്ദ്രൻ ഉദ്ഘാടനം നിർവ്വഹിച്ചു. ഫിഷറീസ് വകുപ്പിന്‍റെ സഹായത്താൽ നടപ്പാക്കിയ പദ്ധതിയിൽ റോഹു, കട്‌ല, ഗ്രാസ്‌കാർപ്പ്, ഇനത്തിൽപെട്ട 1,000 കിലോ മത്സ്യമാണ് ജയിലിലെ ചെക്ക് ഡാമിൽ നിന്നും വിളവെടുത്തത്. തിരുവനന്തപുരം ജില്ലയിലെ സെൻട്രൽ ജയിൽ ഉൾപ്പെടെ‌‌യുള്ള ജയിലുകളിലെ അന്തേവാസികൾക്ക് ആവശ്യമായ മത്സ്യം വിളവെടുപ്പു ദിവസം എത്തിക്കാനായി. കൂടാതെ തുറന്ന ജയിലിനു പുറത്തുള്ള സെയിൽസ് കൗണ്ടർ വഴി പൊതുജനങ്ങൾക്കും മത്സ്യം വിറ്റഴിച്ചു. തുറന്ന ജയിൽ സൂപ്രണ്ട് എസ്. സജീവ്, കള്ളിക്കാട് പഞ്ചായത്ത് പ്രസിഡന്‍റ് പന്ത ശ്രീകുമാർ, വാർഡ് അംഗം ശ്രീകല, ഫിഷറീസ് അസിസ്റ്റന്‍റ് ഡയറക്ടർ സജീവ്, ഫിഷറീസ് കോ - ഓർഡിനേറ്റർ ജീന, ഫിഷറീസ് പ്രമോട്ടർ അജയകുമാർ എന്നിവർ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]