സ്റ്റെല്ലാ മാരിസിൽ ഓണാഘോഷം

കൂടരഞ്ഞി: സ്റ്റെല്ലാ മാരിസ് ഇംഗ്ലീഷ് മീഡിയം സ്കൂളിൽ ഓണാഘോഷം വിവിധ കലാപരിപാടികളോടെ നടത്തി. തകൃതോണം എന്ന പേരിൽ നടന്ന പരിപാടി പഞ്ചായത്ത് വൈസ് പ്രസിഡന്‍റ് മേരി തങ്കച്ചൻ ഉദ്ഘാടനം ചെയ്തു. തോമസ് വലിയപറമ്പൻ ഓണ സന്ദേശം നൽകി.

ചടങ്ങിൽ സ്റ്റെല്ലാ മാരിസ് ബോർഡിംഗ് സ്കൂൾ ചെയർമാൻ ഡെന്നീസ് ജോസ്, ചെയർപേഴ്സൺ സീന, സിസ്റ്റർ മേരി, ആൽവിയ മെറിൻ സിജോ എന്നിവർ പ്രസംഗിച്ചു. തുടർന്ന് കുട്ടികളുടെയും അധ്യാപകരുടെയും വിവിധ കലാപരിപാടികൾ നടന്നു.

ADVERTISEMENT

ദേശീയ കായിക ദിനം ആഘോഷിച്ചു

പുല്ലൂരാംപാറ: സെന്‍റ് ജോസഫ്സ് ഹൈസ്ക്കൂളിൽ ദേശീയ കായിക ദിനം ആഘോഷിച്ചു. ആഘോഷങ്ങളുടെ ഭാഗമായി പട്ടം പറത്തൽ വിദഗ്ധൻ ചാർളി മാത്യു പറയൻകുഴിയെ ആദരിച്ചു. പുല്ലൂരാംപാറ സ്വദേശിയായ ഇദ്ദേഹം നാഷണൽ കൈറ്റ് ചാമ്പ്യൻഷിപ്പ് 2025-ലെ ഗോൾഡ് മെഡൽ ജേതാവാണ്. വാർഡ് മെമ്പർ മേഴ്സി പുളിക്കാട്ട് ചാർളിയെ പൊന്നാട അണിയിച്ചു. സ്കൂൾ പിടിഎ പ്രസിഡന്‍റ് വിൽസൺ താഴത്തുപറമ്പിൽ ഉപഹാരസമർപ്പണം നടത്തി. പ്രധാനധ്യാപകൻ ജോളി ജോസഫ് ഉണ്ണിയേപ്പിള്ളിൽ, യുപി സ്കൂൾ ഹെഡ്മാസ്റ്റർ സിബി കുര്യാക്കോസ്, ജിൻസി തോമസ്, പി.എം. എഡ്വേർഡ്, റെജി സെബാസ്റ്റ്യൻ തുടങ്ങിയവർ പ്രസംഗിച്ചു.

വടകര നഗരസഭയിലെ രണ്ട് ഉദ്യോഗസ്ഥർക്ക് സസ്പെൻഷൻ

വടകര: ഗുരുതരമായ ക്രമക്കേടുകൾ നടത്തിയെന്ന ആരോപണത്തെ തുടർന്ന് വടകര നഗരസഭയിലെ രണ്ട് ഉദ്യോഗസ്ഥരെ അന്വേഷണ വിധേയമായി സർവീസിൽ നിന്നും സസ്പെൻഡ് ചെയ്തു. അസിസ്റ്റന്‍റ് എൻജിനീയർ വി. അജിത് കുമാർ, രണ്ടാം ഗ്രേഡ് ഓവർസീയർ പി.പി. അനിഷ എന്നിവരെയാണ് 1960 ലെ കേരള സിവിൽ സർവീസ് (തരംതിരിയ്ക്കലും നിയന്ത്രണവും അപ്പീലും) ചട്ടം 10 പ്രകാരം എൽഎസ്ജിഡി പ്രിൻസിപ്പൽ ഡയറക്ടർ സസ്പെൻഡ് ചെയ്തത്. വടകര നഗരസഭ എൻജിനീയറിംഗ് വിഭാഗത്തിൽ ക്രമക്കേടുകളും ചട്ടലംഘനങ്ങളും നടക്കുന്നതായി ആരോപിച്ച് സദ്ഭരണ മോണിറ്ററിംഗിന്‍റെ ഭാഗമായുള്ള വാട്സ്ആപ്പ് നമ്പറിൽ ലഭിച്ച പരാതിയുടെയും പൊതുജനങ്ങളിൽ നിന്നും ലഭിച്ച രഹസ്യവിവരത്തിന്‍റെയും അടിസ്ഥാനത്തിൽ നടത്തിയ പരിശോധനയിലാണ് ഗുരുതരമായ ക്രമക്കേടുകൾ കണ്ടെത്തിയത്. ഇതേ തുടർന്നാണ് രണ്ട് ഉദ്യോഗസ്ഥർക്കെതിരായ സസ്പെൻഷൻ നടപടി.

വീണ്ടും ക്ഷേത്ര ഭണ്ഡാരം കുത്തിത്തുറന്ന് മോഷണം

നാദാപുരം: പുറമേരിയിൽ വീണ്ടും ക്ഷേത്ര ഭണ്ഡാരം കുത്തി തുറന്ന് മോഷണം. പുറമേരി കുനിങ്ങാട് വടക്കേടത്ത് പുത്തൻപുരയിൽ കുടുംബ ക്ഷേത്രത്തിലാണ് ശനിയാഴ്ച്ച മോഷണം നടന്നത്. ക്ഷേത്രത്തിന് മുൻവശത്തെ ഭണ്ഡാരമാണ് കുത്തിത്തുറന്ന് പണം കവർന്നത്. ക്ഷേത്രത്തിന് സമീപത്തെ വീട്ടുമുറ്റത്ത് നാണയങ്ങൾ ഉപേക്ഷിക്കപ്പെട്ട നിലയിൽ കണ്ടതോടെ നാട്ടുകാർ നടത്തിയ അന്വേഷണത്തിലാണ് ഭണ്ഡാരം കുത്തിത്തുറന്നത് ശ്രദ്ധയിൽ പെട്ടത്. ഇവിടെ നിന്ന് വാക്കത്തിയും, ഇരുമ്പ് പൈപ്പും ഉപേക്ഷിക്കപ്പെട്ട നിലയിൽ കണ്ടെത്തി. കൂടാതെ രക്തം പുരണ്ട നിലയിൽ വസ്ത്രവും ഇവിടെ കണ്ടെത്തി. ഭണ്ഡാരം തകർക്കുന്നതിനിടെ മോഷ്ടാവിന് പരിക്കേറ്റതായാണ് സൂചന. നാട്ടുകാർ വിവരം അറിയിച്ചതിനെ തുടർന്ന് നാദാപുരം എസ്ഐ എം.പി. വിഷ്ണുവിന്‍റെ നേതൃത്വത്തിൽ പോലീസ് ക്ഷേത്രത്തിൽ പരിശോധന നടത്തി. കഴിഞ്ഞ ദിവസം സമീപത്തെ കുഞ്ഞല്ലൂർ നരസിംഹ മൂർത്തി ക്ഷേത്രത്തിലെ രണ്ട് ഭണ്ഡാരങ്ങൾ തകർത്ത് പണം കവർന്നിരുന്നു. ഇതിന് പിന്നാലെയാണ് വീണ്ടും മോഷണം നടന്നത്.

ഹോം ഷോപ്പ് പദ്ധതി: 15ാം വാര്‍ഷികാഘോഷത്തിന് തുടക്കം

കോഴിക്കോട്: ഹോം ഷോപ്പ് പദ്ധതിയുടെ പതിനഞ്ചാം വാര്‍ഷികാഘോഷ പരിപാടികള്‍ക്ക് തുടക്കമായി. ബാലുശേരി ഗ്രീന്‍ അരീന ഓഡിറ്റോറിയത്തില്‍ നടന്ന പരിപാടി ടി.പി. രാമകൃഷ്ണന്‍ എംഎല്‍എ ഉദ്ഘാടനം ചെയ്തു. കെ.എം. സച്ചിന്‍ ദേവ് എംഎല്‍എ സമ്മാനദാനം നടത്തി. പഞ്ചായത്ത് പ്രസിഡന്‍റ് രൂപലേഖ കൊമ്പിലാട് അധ്യക്ഷത വഹിച്ചു. 700 ഓളം ഹോം ഷോപ്പ് അംഗങ്ങള്‍ പരിപാടിയുടെ ഭാഗമായി. കലാപരിപാടികള്‍, അവാര്‍ഡ് വിതരണം തുടങ്ങിയ പരിപാടിയുടെ ഭാഗമായി നടന്നു. ഹോംഷോപ്പ് പദ്ധതിയില്‍ മികച്ച പഞ്ചായത്തായി തെരഞ്ഞെടുത്ത മണിയൂര്‍ പഞ്ചായത്തിനുള്ള പുരസ്‌കാരം കുടുംബശ്രീ എക്‌സിക്യൂട്ടീവ് ഡയറക്ടര്‍ എച്ച്. ദിനേശില്‍ നിന്ന് പ്രസിഡന്‍റ് ടി.കെ. അഷറഫ് ഏറ്റുവാങ്ങി. ബാലുശേരി ബ്ലോക്ക് പഞ്ചായത്ത് പ്രസിഡന്‍റ് വി.കെ. അനിത, തിരുവമ്പാടി പഞ്ചായത്ത് പ്രസിഡന്‍റ് ബിന്ദു ജോണ്‍സണ്‍, സ്ഥിരം സമിതി അധ്യക്ഷ ലിസി മാളിയേക്കല്‍, കുടുംബശ്രീ ജില്ലാ മിഷന്‍ കോ - ഓര്‍ഡിനേറ്റര്‍ പി.സി. കവിത, ജില്ലാ പ്രോഗ്രാം മാനേജര്‍ നീതു, അസിസ്റ്റന്‍റ് കോര്‍ഡിനേറ്റര്‍മാര്‍ തുടങ്ങിയവര്‍ പങ്കെടുത്തു.

കെഎസ്ആര്‍ടിസി ബസ് സര്‍വീസിന് എതിരല്ലെന്ന് എഐടിയുസി

കോഴിക്കോട്: റെയില്‍വേ സ്‌േറ്റഷനില്‍ നിന്ന് രാത്രികാലത്ത് ബാലുശേരിയിലേക്കു കെഎസ്ആര്‍ടിസി ബസ് സര്‍വീസ് നടത്തുന്നതിനു എഐടിയുസി ഓട്ടോ സെക്ഷന്‍ എതിരല്ലെന്ന് സെക്രട്ടറി എന്‍. പി കോയട്ടി. ബസ് ആരും തടഞ്ഞിട്ടില്ലെന്നും അദ്ദേഹം അറിയിച്ചു. ബാലുശേരിയിലേക്ക് സര്‍വീസ് ആരംഭിച്ച ബസ് കഴിഞ്ഞ ദിവസം ഒരു വിഭാഗം ഓട്ടോ തൊഴിലാളികള്‍ ബസ് തടഞ്ഞ സാഹചര്യത്തിലാണ് യൂണിയന്‍റെ നിലപാട് വ്യക്തമാക്കിയത്. നഗരത്തില്‍ ഓട്ടോറിക്ഷകള്‍ക്ക് ജോലിയില്ലാത്ത അവസ്ഥയാണെന്ന് അദ്ദേഹം പറഞ്ഞു. 4337 സിസി ഓട്ടോറിക്ഷകള്‍ക്ക് പുറമെ ഹരിത ട്രിബൂണലുകളുടെ പേര് പറഞ്ഞ് വീണ്ടും 3000 സിസി പെര്‍മിറ്റുകള്‍ നല്‍കി.രാത്രിയില്‍ ഓട്ടോ സര്‍വ്വീസിനായി ഓറഞ്ച് സിസി പെര്‍മ്മിറ്റുകളും നല്‍കി. മൊത്തം 7500- ല്‍ പരം പെര്‍മിറ്റുകളിലായി പകലിലും രാത്രിയിലുമായി ഒന്‍പതിനായിരത്തോളം ഓട്ടോറിക്ഷകള്‍ സിറ്റിയില്‍ സര്‍വ്വീസ് നടത്തുന്നുണ്ട്. രണ്ടറ്റം കൂട്ടി മുട്ടിക്കാന്‍ നട്ടോട്ടം ഓടുകയാണ് തൊഴിലാളികള്‍. ഓട്ടോ തൊഴിലാളികളുടെ പ്രയാസങ്ങളും പ്രതിസന്ധികളും മനസിലാക്കാതെ സച്ചിന്‍ദേവ്എംഎല്‍എയുടെ മുന്‍കൈയില്‍ കൈകൊണ്ട ഈ പൊതുനന്മ ആയിരക്കണക്കിന് കുടുംബാംഗങ്ങളെ പട്ടിണിക്കിട്ട് ആകുമ്പോള്‍ ഉണ്ടാവുന്ന ആശങ്ക തൊഴിലാളികള്‍ക്കുണ്ടെന്ന് അദ്ദേഹം പറഞ്ഞു. സ്വര്‍ണം പണയം വച്ചും പലതരത്തിലുള്ള വായ്പകള്‍ എടുത്തുമാണ് മിക്കവരും ഓട്ടോറിക്ഷകള്‍ വാങ്ങിയിട്ടുള്ളത്. നഗരത്തില്‍ തക്കതായ പാര്‍ക്കിംഗ് സംവിധാനം ഈ ഓട്ടോകള്‍ക്കില്ല. പലയിടത്ത് നിര്‍ത്തി സര്‍വ്വീസ് ചെയ്യുമ്പോള്‍ പുറകില്‍ പോലീസ് വന്നത് ഓട്ടോയുടെ ഫോട്ടോ എടുത്ത് അനധികൃത പാര്‍ക്കിംഗ് പേര് പറഞ്ഞ് 500 തൊട്ട് 1000 രൂപവരെ പിഴ ഈടാക്കുന്നു. മാത്രമല്ല ഓട്ടോ കമ്പനികള്‍ മെയിന്‍റനന്‍സിന്‍റെ പേരില്‍ വലിയ തുക ഈടാക്കുന്നുമുണ്ട്. ബാങ്ക് അടവ് മുടങ്ങാതിരിക്കാനാണ് രാത്രി കാലങ്ങളില്‍ ജോലി ചെയ്തു മുന്നോട്ട് പോകുന്നത്. സര്‍ക്കാര്‍ ഒന്‍പതിനായിരത്തോളം വരുന്ന ഓട്ടോ തൊഴിലാളികളുടെ കുടുംബത്തെ സംരക്ഷിക്കണമെന്നാവശ്യപ്പെട്ട് ഓട്ടോ ഡ്രൈവേഴ്‌സ് കോ- ഓര്‍ഡിനേഷന്‍ കമ്മിറ്റി ഗതാഗത മന്ത്രി ഗണേഷ് കുമാറിനും സച്ചിന്‍ ദേവ് എംഎല്‍എക്കും കത്ത് നല്‍കിയിട്ടുണ്ട്.

മലബാർ ടൂറിസം മീറ്റ് സംഘടിപ്പിച്ചു

കോഴിക്കോട്: മലബാറിന്‍റെ സമഗ്ര ടൂറിസം വളർച്ച ലക്ഷ്യമാക്കി കേന്ദ്ര ടൂറിസം വകുപ്പുമായി സഹകരിച്ച് സർക്കാർ സമഗ്ര ടൂറിസം വികസന പദ്ധതി നടപ്പിലാക്കണമെന്ന് എം.കെ. രാഘവൻ എംപി പറഞ്ഞു. മലബാർ ടൂറിസം കൗൺസിലിന്‍റെ നേതൃത്വത്തിൽ ജില്ലാ പഞ്ചായത്ത്, ഡിടിപിസി എന്നിവരുടെ സഹകരണത്തോടെ സംഘടിപ്പിച്ച മലബാർ ടൂറിസം മീറ്റ് 2025 ഹോട്ടൽ ടിയാറയിൽ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ജനപ്രതിനിധികൾ എന്ന നിലക്ക് ഞാനടക്കമുള്ള പാർലിമെന്‍റ് അംഗങ്ങളുടെ പൂർണ പിന്തുണ ഇതിനുണ്ടാകും. മലബാറിലെ പല ക്ഷേത്രങ്ങളിലും ഉത്സവങ്ങൾക്കടക്കം വിദേശികൾ ധാരാളമായി വരുന്ന കാഴ്ചയാണിന്ന്. പക്ഷേ നമുക്കിത് ഉപയോഗപ്പെടുത്തുവാൻ സാധിക്കുന്നില്ല. ജിസിസി അടക്കമുള്ള ഗൾഫ് രാജ്യങ്ങളിൽ നിന്നുള്ള മെഡിക്കൽ ടൂറിസത്തിന് മലബാറിന് അനന്തസാധ്യതയാണുള്ളത്. പക്ഷേ ഇത് എത്രത്തോളം നമുക്ക് ഉപയോഗപ്പെടുത്തുവാൻ പറ്റുന്നുണ്ട്. ആറുമാസത്തിനുള്ളിൽ കോഴിക്കോട് എയർപോർട്ടിന്‍റെ റൺവേ വികസനം പൂർത്തിയാകും. അതോടു കൂടി ഈ രംഗത്തെ യാത്രാ സൗകര്യ കുറവ് പരിഹരിക്കപ്പെടുമെന്നും അദ്ദേഹം പറഞ്ഞു. ചടങ്ങിൽ മലബാർ ടൂറിസം കൗൺസിൽ പ്രസിഡന്‍റ് സജീർ പടിക്കൽ അധ്യക്ഷത വഹിച്ചു. കേരള ട്രാവൽ മാർട്ട് പ്രസിഡന്‍റ് ജോസ് പ്രദീപ്, മലബാർ ചേംബർ പ്രസിഡന്‍റ് നിത്യാനന്ദ് കമ്മത്ത്, മലബാർ ടൂറിസം കൗൺസിൽ സെക്രട്ടറി രജീഷ് രാഘവൻ, ഷബീർ നെക്സ്റ്റേയ്, താഹിർ ടിയാരാ, അഷറഫ് വെള്ളാങ്കൽ വളാഞ്ചേരി, അബു ജുനൈദ് എന്നിവർ ചടങ്ങിൽ പ്രസംഗിച്ചു. എംടിഎം 2025 എക്സലൻസ് അവാർഡുകൾ അബ്ബാസ് പുളിമൂട്ടിൽ, കെ. മോഹൻ, യാസീർ അറഫാത്ത് എന്നിവർ ഏറ്റുവാങ്ങി.

എസ്എൻഡിപി നേതാവിന്‍റെ വീടിന് നേരെ ആക്രമണം

വടകര: വടകരയിൽ എസ്എൻഡിപി നേതാവിന്‍റെ വീടിന് നേരെ ആക്രമണം. എസ്എന്‍ഡിപി യോഗം വടകര യൂണിയന്‍ പ്രസിഡന്‍റ് എം.എം. ദാമോദരന്‍റെ വീടിനു നേരെയാണ് ആക്രമണം ഉണ്ടായത്. ജനല്‍ചില്ലുകള്‍ അക്രമികള്‍ അടിച്ചു തകര്‍ത്തു. മകളോടൊപ്പം മലപ്പുറം താനൂരിലായിരുന്ന ദാമോദരനും ഭാര്യയും ഇന്നലെ രാത്രിയാണ് വടകര കുറുമ്പൊയിലെ മീത്തലെ മഠത്തില്‍ വീട്ടിലെത്തിയത്. ഇതിനു പിന്നാലെയാണ് അര്‍ധരാത്രിയോടെ വീട്ടിന്‍റെ മുന്‍ഭാഗത്തെ ജനല്‍ചില്ലുകള്‍ അക്രമികള്‍ തകര്‍ത്തത്. ശബ്ദം കേട്ടു ഉണര്‍ന്ന വീട്ടുകാർ ആ സമയത്ത് തന്നെ സ്റ്റേഷനില്‍ അറിയിച്ചതനുസരിച്ച് പോലീസ് സ്ഥലത്തെത്തി. ഒന്നില്‍ കൂടുതലുള്ള അക്രമികള്‍ ചില്ലുകള്‍ തകര്‍ത്ത് കടന്നുകളഞ്ഞു. സിസിടിവി കാമറ പിഴുതെറിഞ്ഞതിനു ശേഷമായിരുന്നു മുഴുവന്‍ ജനലുകളും ഒരേ സമയം അടിച്ചു തകര്‍ത്തത്. ഒരു പരമ്പര പോലുള്ള ആക്രമണമാണ് യൂണിയന്‍ നേതാക്കള്‍ക്ക് നേരെ വര്‍ഷങ്ങളായി നടക്കുന്നതെന്ന് യൂണിയന്‍ നേതൃത്വം അറിയിച്ചു.

ലോറിയിടിച്ച് ബസ് യാത്രക്കാരന് പരിക്ക്

കൊയിലാണ്ടി: സ്വകാര്യ ബസിൽ യാത്ര ചെയ്യുകയായിരുന്ന യാത്രക്കാരന് ലോറിയിടിച്ച് പരിക്ക്. കൊയിലാണ്ടി പരപ്പിൽ വളപ്പിൽ അഷ്റഫിനാണ് പരിക്കേറ്റത്. കോഴിക്കോട് നിന്നും കുടുംബസമേതം വരുകയായിരുന്ന അഷ്റഫ് ബസിന്‍റെ സൈഡിലിരിക്കവെ ലോറിയിടിക്കുകയായിരുന്നു. കോരപ്പുഴ പാലം കഴിഞ്ഞ ഉടനെയായിരുന്നു സംഭവം. തുടർ‌ന്ന് കോഴിക്കോട് നിന്നും നാദാപുരം പെരിങ്ങത്തൂരിലേക്ക് പോവുകയായിരുന്ന മസാഫി ബസിലെ ജീവനക്കാർ ബസ് കൊയിലാണ്ടി സ്റ്റാൻഡിൽ നിർത്താതെ കൊയിലാണ്ടി താലൂക്ക് ആശുപത്രിയിലെക്ക് എത്തിച്ചു. അഷറഫിന്‍റെ കൈക്കാണ് പരിക്കേറ്റത്. ഇടിച്ച ലോറി നിർത്താതെ പോയി.

ഓണാഘോഷം സംഘടിപ്പിച്ചു

പുല്ലൂരാംപാറ: സെന്‍റ് ജോസഫ്സ് യുപി സ്കൂളിലെ ഓണാഘോഷപരിപാടി "ഓണത്തകൃതി' വാർഡ് മെമ്പർ മേഴ്‌സി പുളിക്കാട്ട് ഉദ്ഘാടനം ചെയ്തു. കുട്ടികൾ ആർപ്പുവിളികളോടെ മാവേലിയെ വരവേറ്റു. വിദ്യാർഥികൾക്കും അധ്യാപകർക്കും രക്ഷിതാക്കൾക്കുമായി വിവിധ ഓണക്കളികൾ സ്കൂൾ അങ്കണത്തിൽ നടത്തി. സ്കൂൾ മാനേജർ ഫാ. കുര്യാക്കോസ് മുഖാലയിൽ, പിടിഎ പ്രസിഡന്‍റ് സോണി മണ്ഡപത്തിൽ, എംപിടിഎ പ്രസിഡന്‍റ് ജിൻസ് മാത്യു, ഹെഡ്മാസ്റ്റർ സിബി കുര്യാക്കോസ് തുടങ്ങിയവർ സന്നിഹിതരായിരുന്നു. വിഭവസമൃദ്ധമായ ഓണസദ്യയോടെ പരിപാടികൾ അവസാനിച്ചു.

വീട്ടുമുറ്റത്തെ ചന്ദനമരം മുറിച്ച് കടത്തി

കുറ്റ്യാടി: 25 വർഷം പഴക്കമുള്ള ചന്ദനമരം മോഷണം പോയി. കക്കട്ടിൽ സഹകരണ ബാങ്കിനു സമീപത്തുള്ള ചട്ടിപറമ്പത്ത് ഷാജുവിന്‍റെ വീട്ടുമുറ്റത്തു നിന്നുമാണ് വ്യാഴാഴ്ച രാത്രി ചന്ദനമരം മുറിച്ചു കടത്തിയത്. ആറ് മാസം മുൻപ് ചന്ദനം കച്ചവടം ചെയ്യാനായി വീട്ടിൽ ആളുകൾ വന്നിരുന്നതായി ഷാജു പറഞ്ഞു. ഏകദേശം അറുപതിനായിരത്തോളം രൂപ വിലമതിക്കുന്ന തടി മരമാണ് യന്ത്രവാളുപയോഗിച്ച് മുറിച്ചു കടത്തിയത്. രാവിലെ ഉണർന്നപ്പോഴാണ് മരം കടത്തിയത് വീട്ടുകാരുടെ ശ്രദ്ധയിൽപെട്ടത്. കുറ്റ്യാടി പോലീസിൽ പരാതി നൽകി.

പ്രസ് ക്ലബ് ഓണാഘോഷം വര്‍ണാഭമായി

കോഴിക്കോട്: കാലിക്കറ്റ് പ്രസ് ക്ലബ് ഓണാഘോഷം വര്‍ണാഭമായി. മാനാഞ്ചിറ ബി.ഇ.എം സ്‌കൂളില്‍ പൂക്കളമത്സരം, പായസമത്സരം, വിവിധ കലാപരിപാടികള്‍, ഓണസദ്യ എന്നിവയോടെയായിരുന്നു ആഘോഷം. എം.കെ രാഘവന്‍ എം.പി ഉദ്ഘാടനം ചെയ്തു. മേയര്‍ ഡോ. ബീന ഫിലിപ്പ് മുഖ്യാതിഥിയായി. പ്രസ് ക്ലബ് പ്രസിഡന്‍റ് ഇ.പി മുഹമ്മദ് അധ്യക്ഷത വഹിച്ചു. ഫോറസ്റ്റ് കണ്‍സര്‍വേറ്റര്‍ ആര്‍. കീര്‍ത്തി, സിപിഎം ജില്ലാ സെക്രട്ടറി എം. മെഹബൂബ്, ഡിസിസി പ്രസിഡന്‍റ് കെ. പ്രവീണ്‍കുമാര്‍, മുസ്ലിം ലീഗ് ജില്ലാ ജനറല്‍ സെക്രട്ടറി ടി.ടി ഇസ്മായില്‍, സംസ്ഥാന ഹൗസിംഗ് ബോര്‍ഡ് ചെയര്‍മാന്‍ ടി.വി ബാലന്‍, ജില്ലാ സ്പോര്‍ട്സ് കൗണ്‍സില്‍ പ്രസിഡന്‍റ് ഒ. രാജഗോപാല്‍, പിആര്‍ഡി ഡപ്യൂട്ടി ഡയറക്ടര്‍ സി. മണിലാല്‍, കെവിവിഇഎസ് ജില്ലാ പ്രസിഡന്‍റ് പി.കെ ബാപ്പു ഹാജി, കണ്‍സ്യൂമര്‍ ഫെഡ് റീജ്യണല്‍ മാനേജര്‍ പി.കെ അനില്‍കുമാര്‍, കെഎന്‍ഇഎഫ് ജില്ലാ സെക്രട്ടറി സി. രതീഷ്‌കുമാര്‍, സീനിയര്‍ മജണലിസ്റ്റ്‌സ് ഫോറംസംസ്ഥാന ജനറല്‍ സെക്രട്ടറി കെ.പി വിജയകുമാര്‍, കമാല്‍ വരദൂര്‍,പ്രസ് ക്ലബ് സെക്രട്ടറി പി.കെ സജിത് ,ട്രഷറര്‍ പി. പ്രജിത് എന്നിവര്‍ പ്രസംഗിച്ചു.

അഗസ്ത്യൻമുഴിയിലും മണാശേരിയിലും വാഹനാപകടം; മൂന്ന് പേർക്ക് പരിക്ക്

മുക്കം: മുക്കം നഗരസഭയിലെ മണാശേരിയിലും അഗസ്ത്യൻമുഴിയിലുമുണ്ടായ വാഹനാപകടങ്ങളിൽ മൂന്ന് പേർക്ക് സാരമായി പരിക്കേറ്റു. എടവണ്ണ- കൊയിലാണ്ടി സംസ്ഥാന പാതയിൽ സെന്‍റ് ജോസഫ്സ് ആശുപത്രിക്ക് സമീപം ഗുഡ്‌സ് ഓട്ടോറിക്ഷ നിയന്ത്രണം വിട്ട് റോഡരികിലെ വൈദ്യുതി പോസ്റ്റുകളിൽ ഇടിക്കുകയായിരുന്നു. അപകടത്തിൽ ഗുഡ്‌സ് ഓട്ടോ ഡ്രൈവർക്ക് തലക്കും കാലിനും പരിക്കേറ്റു. ഇയാളെ സെന്‍റ് ജോസഫ്സ് ആശുപത്രിയിൽ പ്രവേശിപ്പിച്ചു. അപകടത്തിൽ ഗുഡ്‌സ് ഓട്ടോറിക്ഷയുടെ മുൻവശം പൂർണമായും തകർന്നു. ഇന്നലെ വൈകീട്ട് 5:45 ഓടെയായിരുന്നു അപകടം. മണാശേരിയിലുണ്ടായ വാഹനാപകടത്തിൽ രണ്ട് സ്ത്രീകൾക്കാണ് പരിക്കേറ്റത്. നിയന്ത്രണം വിട്ടകാർ സ്കൂട്ടറിന്‍റെ പുറകിൽ ഇടിച്ചാണ് അപകടം. വൈകിട്ട് 3.30 ഓടെയായിരുന്നു അപകടം. മുക്കം ഭാഗത്തു നിന്നും കോഴിക്കോട് ഭാഗത്തേക്ക് പോവുന്ന സ്കൂട്ടറിലാണ് കാർ ഇടിച്ചത്. സ്കൂട്ടർ യാത്രക്കാരായ സ്ത്രീകൾക്ക് സാരമായി പരിക്കേറ്റിട്ടുണ്ട്. ഇവരെ മുക്കം കെഎംസിടി ആശുപത്രിയിൽ പ്രവേശിപ്പിച്ചു.

എട്ടുനോമ്പ് ആചരണത്തിന് നാളെ തുടക്കമാവും

കൂരാച്ചുണ്ട്: സെന്‍റ് തോമസ് ഫൊറോന ഇടവകയിൽ എട്ടുനോമ്പ് ആചരണവും, പരിശുദ്ധ കന്യകാമറിയത്തിന്‍റെ ജനന തിരുനാളും, വിമലഹൃദയ പ്രതിഷ്ഠക്കും നാളെ തുടക്കം. എല്ലാ ദിവസങ്ങളിലും രാവിലെ ആറിന് ആരാധന, ജപമാല, കുമ്പസാരം, 6.30ന് വിശുദ്ധ കുർബാന, തിരുനാൾ ഒരുക്ക പ്രാർത്ഥന, ഒന്പതിന് രോഗീ സന്ദർശനം, വൈകിട്ട് നാലിന് കുമ്പസാരം, അഞ്ചിന്‌ വിശുദ്ധ കുർബാന, തിരുനാൾ ഒരുക്ക പ്രാർത്ഥന. പ്രധാന തിരുനാൾ ദിനമായ എട്ടിന് രാവിലെ ആറിന് ആരാധന, ജപമാല, കുമ്പസാരം, 6.30ന് വിശുദ്ധ കുർബാന, വിമലഹൃദയ പ്രതിഷ്ഠ, ലദീഞ്ഞ്, നേർച്ച, വൈകിട്ട് 3.30ന് കുമ്പസാരം, നാലിന് ജപമാല, 4.30 ആഘോഷമായ വിശുദ്ധ കുർബാന, സന്ദേശം, വിമല ഹൃദയ പ്രതിഷ്ഠ, ലദീഞ്ഞ്, നേർച്ച.

കൂരാച്ചുണ്ടിൽ സാംസ്കാരിക നിലയം പ്രവൃത്തി തടഞ്ഞു

കൂരാച്ചുണ്ട്: പഞ്ചായത്തിൽ നടക്കുന്ന സാംസ്കാരിക നിലയത്തിന്‍റെ നിർമാണ പ്രവൃത്തി കൂരാച്ചുണ്ട് ഡിവൈഎഫ്ഐ പ്രവർത്തകർ തടഞ്ഞു. തുടർന്ന് പ്രവൃത്തി നിർത്തിവച്ചു. കൂരാച്ചുണ്ട് ടൗണിൽ ബാലുശേരി റോഡിലുണ്ടായിരുന്ന മത്സ്യ മാർക്കറ്റ് കെട്ടിടമാണ് സാംസ്കാരിക നിലയമാക്കി മാറ്റി നിർമിക്കുന്നത്. ഇതിന്‍റെ അറ്റകുറ്റപ്പണി നടന്നു വരികെയാണ് സമരക്കാർ ഇന്നലെ തടഞ്ഞത്. കൂരാച്ചുണ്ടിൽ മത്സ്യ മാർക്കറ്റില്ലാതെ സാംസ്കാരിക നിലയത്തിന്‍റെ നിർമാണ പ്രവർത്തനങ്ങൾ നടത്താൻ അനുവദിക്കില്ലെന്നും മത്സ്യ മാർക്കറ്റ് പുനസ്ഥാപിക്കണമെന്നും സമരക്കാർ ആവശ്യപ്പെട്ടു. വി.കെ.ഹസീന, വി.എസ് സോണറ്റ്, സഫീർ, സി. റഷീദ്, കെ.ജി. അക്ഷയ് എന്നിവർ നേതൃത്വം നൽകി.

പൊളിച്ചു നീക്കേണ്ടത് സുരക്ഷിതമല്ലാത്ത 46 സ്‌കൂള്‍ കെട്ടിടങ്ങള്‍

ജനകീയ വിഷയങ്ങൾ ചർച്ച ചെയ്ത് ജില്ല വികസന സമിതി യോഗം കോഴിക്കോട്: പൊതുവിദ്യാലയങ്ങളുടെ ഫിറ്റ്നസുമായി ബന്ധപ്പെട്ട് പ്രത്യേക സംഘം നടത്തിയ പരിശോധനയുടെ അടിസ്ഥാനത്തില്‍ 46 കെട്ടിടങ്ങള്‍ പൊളിച്ചു മാറ്റേണ്ടതായി കണ്ടെത്തി. ജില്ലാ വികസന സമിതി യോഗത്തില്‍ ജില്ലാ വിദ്യാഭ്യാസ അധികൃതര്‍ അറിയിച്ചതാണ് ഇക്കാര്യം. ഇതില്‍ ഒമ്പത് കെട്ടിടങ്ങള്‍ അറ്റകുറ്റപണി നടത്തി നിലനിര്‍ത്താമെന്നും സുരക്ഷാ പ്രശ്നമുള്ള കെട്ടിടങ്ങളില്‍ നിലവില്‍ ക്ലാസുകള്‍ നടക്കുന്നില്ലെന്നും വിദ്യാഭ്യാസ വകുപ്പ് യോഗത്തെ അറിയിച്ചു. നവകേരള സദസിന്റെ ഭാഗമായി ജില്ലയില്‍ അനുമതി ലഭിച്ച 91 കോടി രൂപയുടെ 23 പദ്ധതികളുടെ നിലവിലെ പുരോഗതി യോഗം വിലയിരുത്തി. 21 പദ്ധതികളുടെ ഡിപിആര്‍ സര്‍ക്കാരിലേക്ക് ഭരണാനുമതിക്കായി സമര്‍പ്പിച്ചിട്ടുണ്ട്. ബാക്കി രണ്ട് പദ്ധതികളുടെ റിപ്പോര്‍ട്ട് ഉടന്‍ സമര്‍പ്പിക്കും. ജല്‍ ജീവന്‍ മിഷന്‍ പദ്ധതികളുടെ നിലവിലെ സ്ഥിതി യോഗം പരിശോധിച്ചു. പദ്ധതിക്കായി പൊളിച്ച റോഡുകളുടെ പുനരുദ്ധാരണം പൂര്‍ത്തിയാക്കാന്‍ പൊതുമരാമത്ത് വകുപ്പിനോടും കേരള ജല അഥോറിറ്റിയോടും നിര്‍ദേശിച്ചു. ദേശീയപാത പ്രവൃത്തി: ജില്ലാ ഭരണകൂടം ഇടപെടണമെന്ന് ദേശീയപാത പ്രവൃത്തി ത്വരിതഗതിയില്‍ പൂര്‍ത്തിയാക്കാന്‍ ജില്ലാ ഭരണകൂടം ഇടപെടണമെന്ന് ടി.പി. രാമകൃഷ്ണന്‍ എംഎല്‍എ ജില്ലാ വികസന സമിതി യോഗത്തില്‍ ആവശ്യപ്പെട്ടു. പേരാമ്പ്ര താലൂക്ക് ആശുപത്രിയില്‍ മണ്ണു മാറ്റാത്തത് നിര്‍മ്മാണ പ്രവൃത്തിക്ക് തടസം സൃഷ്ടിക്കുന്നുണ്ട്. വേങ്ങാപ്പറ്റ, ചെറുവണ്ണൂര്‍ സ്‌കൂളുകളിലും ഇതേ പ്രയാസം നേരിടുന്നുണ്ടെന്നും എം എല്‍ എ അറിയിച്ചു. ദേശീയപാത വികസനവുമായി ബന്ധപ്പെട്ട് സമയ പരിധി നിശ്ചയിച്ച് പ്രവൃത്തികള്‍ നടത്തണമെന്നും സര്‍വീസ് റോഡുകള്‍ യാത്ര യോഗ്യമാക്കണമെന്നും കെ.കെ. രമ എംഎല്‍എ ആവശ്യപ്പെട്ടു. റവന്യൂ ടവറിന്‍റെ പ്രവൃത്തി ആരംഭിക്കുന്നതിനുള്ള നടപടികള്‍ വേഗത്തിലാക്കാനും എംഎല്‍എ നിര്‍ദ്ദേശിച്ചു. ബേബി മെമ്മോറിയല്‍ ആശുപത്രിക്കും ക്രിസ്ത്യന്‍ കോളജിനും ഇടയിലുള്ള റോഡിനും മലാപ്പറമ്പ് ഇഖ്‌റ ആശുപത്രി റോഡിന് സമീപവും അനധികൃതമായി വാഹനങ്ങള്‍ പാര്‍ക്ക് ചെയ്യുന്നത് ഗതാഗത തടസം സൃഷ്ടിക്കുന്നുണ്ടെന്ന് സച്ചിന്‍ദേവ് എംഎല്‍എ പറഞ്ഞു. അനധികൃത പാര്‍ക്കിംഗിനെതിരെ കൃത്യമായ നിയന്ത്രണമുണ്ടാകുമെന്നും ഇതിനായുള്ള നിര്‍ദേശങ്ങള്‍ ട്രാഫിക്ക് പോലീസിന് നല്‍കുമെന്നും ജില്ല കളക്ടര്‍ സ്നേഹില്‍ കുമാര്‍ സിംഗ് അറിയിച്ചു. വെസ്റ്റ്ഹില്‍ റെയില്‍വേ സ്റ്റേഷന്‍ പരിസരത്ത് റെയില്‍വെ ഭൂമിയിലെ അപകടകരമായ മരങ്ങള്‍ മുറിച്ചുമാറ്റുന്നതിന് നടപടി ഉണ്ടാകണമെന്ന് തോട്ടത്തില്‍ രവീന്ദ്രന്‍ എംഎല്‍എ ആവശ്യപ്പെട്ടു. ഭൂമി തരം മാറ്റലുമായി ബന്ധപ്പെട്ട നടപടികളും കോര്‍പറേഷന്‍ പരിധിയിലെ റോഡുകളിലെ കുഴികള്‍ അടയ്ക്കുന്നതിനുള്ള നടപടികളും വേഗത്തിലാക്കാനും എംഎല്‍എ ആവശ്യപ്പെട്ടു. വിലങ്ങാട് പുഴ: സര്‍വെ വേഗത്തിലാക്കണം വിലങ്ങാട് ഉരുള്‍പൊട്ടലിന്‍റെ ഭാഗമായി വിലങ്ങാട് പുഴയുടെ കരയിടിഞ്ഞ ഭാഗങ്ങള്‍ നവീകരിക്കുന്നതിനുള്ള സര്‍വേ നടപടികള്‍ വേഗത്തിലാക്കണമെന്ന് ഇ.കെ. വിജയന്‍ എംഎല്‍എ പറഞ്ഞു. പെരിഞ്ചേരിക്കടവ് റഗുലേറ്റര്‍ കം ബ്രിഡ്ജ്, മൊകേരി കോളേജിലെ ലേഡീസ് ഹോസ്റ്റല്‍ നിര്‍മ്മാണം, കുന്നുമ്മല്‍ കമ്മ്യൂണിറ്റി ഹാള്‍, കുറ്റ്യാടി ഡയാലിസിസ് കെട്ടിട നിര്‍മ്മാണം എന്നീ പ്രവൃത്തികളുടെ പുരോഗതി കെ പി കുഞ്ഞമ്മദ് കുട്ടി എംഎല്‍എ പരിശോധിച്ചു.

തുരങ്കപാത പ്രവൃത്തി ഉദ്ഘാടനം; വാഹനങ്ങൾ പാർക്ക് ചെയ്യാൻ ക്രമീകരണങ്ങൾ ഏർപ്പെടുത്തി

ആനക്കാംപൊയിൽ: ആനക്കാംപൊയിൽ- കള്ളാടി- മേപ്പാടി തുരങ്കപാത പ്രവൃത്തി ഉദ്ഘാടനത്തിന്‍റെ ഭാഗമായി ചടങ്ങിന് എത്തുന്നവരുടെ വാഹനങ്ങൾ പാർക്ക് ചെയ്യാൻ ക്രമീകരണങ്ങൾ ഏർപ്പെടുത്തി. ഒഫീഷ്യൽ വാഹനങ്ങൾ: സെന്‍റ് മേരീസ് പള്ളിക്ക് മുൻവശത്തുള്ള മൈതാനം. മാധ്യമപ്രവർത്തകരുടെയും മീഡിയ വാഹനങ്ങളുടെയും പാർക്കിംഗ്: സ്റ്റേജിന് സമീപത്തുള്ള സെന്‍റ് മേരീസ് പാരിഷ് ഹാളിന്‍റെ പാർക്കിംഗ് ഏരിയ. മുച്ചക്ര / നാല് ചക്ര വാഹനങ്ങൾ: ആളുകളെ ചെറുശേരി റോഡിൽ ഇറക്കിവിട്ട ശേഷം സ്കൂളിന്‍റെ ഗ്രൗണ്ടിൽ പാർക്ക് ചെയ്യാം. ഇരുചക്ര വാഹനങ്ങൾ: ആനക്കാംപൊയിൽ ഗവ. എൽപി സ്കൂൾ ഗ്രൗണ്ട്. ബസുകൾ: ആനക്കാംപൊയിൽ സെന്‍റ് മേരീസ് ഷോപ്പിംഗ് കോംപ്ലക്സിൽ ആളുകളെ ഇറക്കിയ ശേഷം മുത്തപ്പൻപ്പുഴ - കണ്ടപ്പംചാൽ റോഡിൽ ഒരു വശത്തായി പാർക്ക് ചെയ്യണം. വാഹനഗതാഗതം നിയന്ത്രിക്കാനായി നൂറോളം വോളണ്ടിയർമാരെയും പോലീസിനെയും നിയോഗിച്ചിട്ടുണ്ട്.

ബംഗളൂരുവിലേക്ക് ഇന്ന് സ്‌പെഷല്‍ ട്രെയിന്‍

കോഴിക്കോട്: ഓണക്കാലത്തെ തിരക്ക് കണക്കിലെടുത്ത് മംഗളൂരുവിൽനിന്ന് ബംഗളൂരുവിലേക്കും തിരിച്ചും സ്‌പെഷല്‍ ട്രെയിന്‍ ഏര്‍പ്പെടുത്തി. ഇന്നും നാളെയുമാണ് സര്‍വീസ്. 06003 നമ്പര്‍ മംഗളൂരു സെന്‍ട്രല്‍ -എസ്എംവിടി ബംഗളൂരു എക്‌സ്പ്രസ് ഇന്ന് രാത്രി 11ന് മംഗളൂരവില്‍ നിന്ന് പുറപ്പെട്ട് തിങ്കളാഴ്ച ഉച്ചയ്ക്ക് 2.30ന് ബംഗളൂരുവില്‍ എത്തും. ബംഗളൂരുവില്‍ നിന്ന് മംഗളൂരു സെന്‍ട്രലിലേക്കുള്ള 06004 നമ്പര്‍ എക്‌സ്പ്രസ് സ്‌പെഷല്‍ ട്രെയിന്‍ തിങ്കളാഴ്ച ഉച്ചയ്ക്ക് 3.50ന് ബംഗളുരൂവില്‍ നിന്ന് പുറപ്പെട്ട് ചൊവ്വാഴ്ച രാവിലെ 7.15ന് മംഗളൂരുവില്‍ എത്തും. ഒരു എസി ടുടയര്‍ കോച്ച്‌, മൂന്ന് എസി ത്രീടയര്‍ കോച്ച്‌, 14 ജനറല്‍ സെക്കന്‍ഡ് ക്ലാസ് കോച്ച്‌, എന്നിവ ഇതിലുണ്ടാകും. കാസര്‍കോട്, കാഞ്ഞങ്ങാട്, പയ്യന്നൂര്‍, കണ്ണൂര്‍, തലശേരി, വടകര, കോഴിക്കോട്, തിരൂര്‍, ഷൊര്‍ണൂര്‍ ജംഗ്ഷന്‍, പാലക്കാട് ജംഗ്ഷന്‍, പോടന്നൂര്‍ ജംഗ്ഷന്‍, തിരുപ്പൂര്‍, ഈറോഡ് ജംഗ്ഷന്‍, സേലം ജംഗ്ഷന്‍, ബംഗരപേട്ട് ജംഗ്ഷന്‍, കൃഷ്ണരാജപുരം എന്നിവിടങ്ങളില്‍ സ്‌റ്റോപ്പ് ഉണ്ടാകുമെന്ന് റെയില്‍വേ അറിയിച്ചു. താമരശേരി ചുരത്തില്‍ ഗതാഗത നിയന്ത്രണം നിലനില്‍ക്കുന്ന സാഹചര്യത്തില്‍ ബംഗളൂരുവില്‍ നിന്ന് മലബാറിലേക്കുള്ള യാത്രക്കാര്‍ക്ക് ഈ ട്രെയിന്‍ ചെറിയ ആശ്വാസമാകും.

കാലുകൊണ്ട് ഒപ്പു ചാർത്തി ആസിം വെളിമണ്ണ വോട്ടവകാശമുള്ള പൗരനായി

മുക്കം: വിധിക്ക് മുന്നിൽ പകച്ച് നിൽക്കാതെ തന്‍റെ ശാരീരിക പരിമിതികളെ നിശ്ചയദാർഢ്യത്തോടെ നേരിട്ട്‌ ഉയരങ്ങൾ കീഴടക്കിയ ആസിം വെളിമണ്ണ വോട്ടവകാശമുള്ള പൗരനായി. ഹിയറിംഗിന്‍റെ അവസാന ദിവസം ഓമശേരി പഞ്ചായത്ത്‌ ഓഫീസിലെത്തിയ ആസിം പഞ്ചായത്ത്‌ സെക്രട്ടറി കെ. ഗിരീഷ്‌ കുമാറിന്‌, വോട്ട്‌ ചേർത്തുന്നതിനുള്ള അപേക്ഷയായ ഫോറം 4 ഉം അനുബന്ധ രേഖകളും കാൽ വിരലുകൾക്കിടയിൽ പേന വച്ച്‌ മനോഹരമായ ഒപ്പ്‌ ചാർത്തി കാലുകൊണ്ട്‌ തന്നെ കൈമാറി. രേഖകൾ പരിശോധിച്ച്‌ പഞ്ചായത്ത്‌ സെക്രട്ടറി അപേക്ഷ അപ്രൂവ്‌ ചെയ്തതോടെ ആസിം വെളിമണ്ണ തദ്ദേശ തെരഞ്ഞെടുപ്പിൽ വോട്ടവകാശമുള്ള പൗരനായി മാറി. പഞ്ചായത്ത്‌ വികസന സ്റ്റാൻഡിംഗ്‌ കമ്മിറ്റി ചെയർമാൻ യൂനുസ്‌ അമ്പലക്കണ്ടി, ക്ഷേമകാര്യ സ്റ്റാൻഡിംഗ്‌ കമ്മിറ്റി ചെയർപേഴ്സൺ സീനത്ത്‌ തട്ടാഞ്ചേരി, ആരോഗ്യ-വിദ്യാഭ്യാസ സ്റ്റാൻഡിംഗ്‌ കമ്മിറ്റി മുൻ ചെയർമാൻ സൈനുദ്ദീൻ കൊളത്തക്കര എന്നിവർ സന്നിഹിതരായിരുന്നു. വെളിമണ്ണ എൽപി സ്കൂളിലെ പഠനശേഷം പ്രസ്തുത സ്കൂൾ യുപി സ്കൂളാക്കി മാറ്റുന്നതിനുള്ള പോരാട്ടത്തിലൂടെയാണ്‌ 90 ശതമാനം ശാരീരിക വൈകല്യമുള്ള ആസിം വെളിമണ്ണ ശ്രദ്ദേയനാവുന്നത്‌. വൈകല്യങ്ങളോട്‌ പൊരുതി ജീവിത നേട്ടങ്ങൾ കൈവരിക്കുന്ന ആസിമിന്‌ 2025 ആദ്യപാദത്തിൽ സംസ്ഥാന യുവജന കമ്മീഷൻ പ്രഥമ യുവപ്രതിഭാ പുരസ്കാരം ലഭിച്ചിരുന്നു. ഇരു കൈകളുമില്ലാതെയാണ് ആസിം ജനിച്ചത്‌. വൈകല്യത്തെ നീന്തിത്തോൽപ്പിച്ച്‌ ദേശീയ-അന്തർ ദേശീയ പുരസ്കാരങ്ങൾ നേടിയിട്ടുണ്ട്‌ ഈ മിടുക്കൻ. ഓമശേരി പഞ്ചായത്തിലെ വെളിമണ്ണയെന്ന കൊച്ചു ഗ്രാമത്തിൽ നിന്ന് ലോകത്തിന്‍റെ നെറുകയിലേക്കാണ് ആസിം നീന്തിക്കയറിയത്‌. പാരീസിൽ നടന്ന ലോക പാരാ സ്വിമ്മിംഗ് സീരീസിൽ മത്സരിക്കാനും അവസരം ലഭിച്ചിട്ടുണ്ട്‌. നിലവിൽ നീലേശ്വരം ഗവ. ഹയർ സെക്കൻഡറി സ്കൂളിൽ പ്ലസ്‌ ടു വിദ്യാർഥിയാണ്‌ ആസിം. മദ്‌റസ അധ്യാപകനായ വെളിമണ്ണ ആലത്തുകാവിൽ മുഹമ്മദ്‌ സയീദ്‌ യമാനിയുടെയും ജംഷീനയുടെയും മൂത്ത മകനാണ് ഈ വിദ്യാർഥി പ്രതിഭ.

ചുരം ഗതാഗതം സുഗമമാക്കാന്‍ ശാസ്ത്രീയ നടപടി സ്വീകരിക്കണം: ജില്ലാ വികസന സമിതി

കോഴിക്കോട്: താമരശേരി ചുരത്തിലെ മണ്ണിടിച്ചില്‍ മൂലമുള്ള അപകടം ഇല്ലാതാക്കാനുള്ള ശാസ്ത്രീയ നടപടികള്‍ സ്വീകരിക്കണമെന്ന് കോഴിക്കോട് ജില്ലാ വികസന സമിതി യോഗം. കനത്ത മഴയെത്തുടര്‍ന്നുള്ള നീരൊഴുക്കില്‍ താമരശേരി, കുറ്റ്യാടി ചുരങ്ങളില്‍ രൂപപ്പെടുന്ന മണ്ണിടിച്ചില്‍ ഉത്കണ്ഠ സൃഷ്ടിക്കുന്നതാണെന്ന് ജില്ല വികസന സമിതി വിലയിരുത്തി. പ്രശ്‌ന പരിഹാരത്തിനായി ബദല്‍ പാതകളുടെ സാധ്യത പരിശോധിക്കാന്‍ ടി.പി. രാമകൃഷ്ണന്‍ എംഎല്‍എ അവതരിപ്പിച്ച പ്രമേയത്തില്‍ ആവശ്യപ്പെട്ടു. ആനക്കാംപൊയില്‍- കള്ളാടി -മേപ്പാടി തുരങ്കപാതയുടെ പ്രവൃത്തി ആരംഭിക്കുന്നതിനുള്ള സര്‍ക്കര്‍ നടപടികളെ യോഗം അഭിനന്ദിച്ചു. ചുരം വഴിയല്ലാതെ കോഴിക്കോട്-വയനാട് ജില്ലകളെ ബന്ധിപ്പിക്കുന്ന പൂഴിത്തോട്-പടിഞ്ഞാറത്തറ റോഡ് നിര്‍മാണത്തിന് പ്രത്യേക പരിഗണന നല്‍കണമെന്നും സമിതി ആവശ്യപ്പെട്ടു. ഊരാളുങ്കല്‍ ലേബര്‍ കോണ്‍ട്രാക്ട് സൊസൈറ്റി 1.5 കോടി രൂപ ചെലവഴിച്ച് റോഡിന്‍റെ സാധ്യതാ പഠനം പൂര്‍ത്തിയാക്കി വരുകയാണ്. വനത്തിലൂടെ കടന്നുപോകുന്ന റോഡിന് കേന്ദ്ര വനംപരിസ്ഥിതി വകുപ്പുകളുടെ അംഗീകാരം ലഭിക്കുന്നതിനുള്ള നടപടികള്‍ ത്വരിപ്പെടുത്തണമെന്നും വികസന സമിതി യോഗം ആവശ്യപ്പെട്ടു. കളക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന ജില്ലാ വികസന സമിതി യോഗത്തില്‍ ജില്ലാ കളക്ടര്‍ സ്നേഹില്‍കുമാര്‍ സിംഗ് അധ്യക്ഷത വഹിച്ചു. എംഎല്‍എമാരായ ടി.പി. രാമകൃഷ്ണന്‍, തോട്ടത്തില്‍ രവീന്ദ്രന്‍, കെ.പി. കുഞ്ഞമ്മദ് കുട്ടി, പി.ടി.എ. റഹീം, ഇ.കെ. വിജയന്‍, കെ.കെ. രമ, സച്ചിന്‍ ദേവ്, ജില്ലാ പഞ്ചായത്ത് പ്രസിഡന്‍റ് ഷീജ ശശി, സബ് കളക്ടര്‍ ഗൗതം രാജ്, എഡിഎം പി. സുരേഷ്, ഡെപ്യൂട്ടി പ്ലാനിംഗ് ഓഫീസര്‍ സി.പി. സുധീഷ് എന്നിവര്‍ പങ്കെടുത്തു.

ഓണത്തിരക്കിലമർന്ന് ജനം : വാഹനത്തിരക്കില്‍ വീര്‍പ്പുമുട്ടി നഗരം

കോഴിക്കോട്: തിരുവോണം അടുത്തെത്തിനില്‍ക്കെ വാഹനത്തിരക്കില്‍ നഗരം വീര്‍പ്പുമുട്ടുന്നു. മിക്ക ജംഗ്ഷനുകളിലും ഗതാഗത കുരുക്കാണ്. കനത്ത മഴയത്ത് വെള്ളക്കെട്ട് ഉയരുന്നതും ഗതാഗത തടസത്തിനു വഴിവയ്ക്കുന്നുണ്ട്. വാഹനങ്ങള്‍ വഴി തിരിച്ചുവിട്ടിട്ടും ഗതാഗത കുരുക്കുണ്ടാകുന്നതാണ് പോലീസ് നേരിടുന്ന പ്രതിസന്ധി. മലാപറമ്പ് ജംഗ്ഷന്‍, എരഞ്ഞിപ്പാലം ജംഗഷ്ന്‍, കാരപ്പറമ്പ് ജംഗഷ്ന്‍, കരിക്കാകുളം റോഡ്, മാങ്കാവ് ബേക്കറി ജംഗ്ഷന്‍ തുടങ്ങിയ റോഡുകളില്‍ ഉണ്ടാകുന്ന കുരുക്ക് മണിക്കൂറുകളോളം നീളുന്നതാണ്. എരഞ്ഞിപ്പാലം ജംഗ്ഷനിലൂടെ മാത്രം 1.06 ലക്ഷം വാഹനങ്ങള്‍ ഒരുദിവസം കടന്നു പോകുന്നുണ്ടെന്നാണ് കണക്ക്. മറ്റ് പ്രധാന ജംഗ്ഷനുകളില്‍ പലതിലും എണ്‍പതിനായിരത്തിനടുത്ത് വാഹനങ്ങള്‍ കടന്നുപോകുന്നുണ്ട്. കാരപ്പറമ്പ് ജംഗഷനില്‍ മിക്ക സമയത്തും നീളുന്ന വാഹന നിരയാണ്. രാത്രി എട്ടുകഴിഞ്ഞാല്‍ ഗതാഗതം നിയന്ത്രിക്കാന്‍ ഇവിടെ ആരുമില്ലാത്തിനാല്‍ വാഹനങ്ങള്‍ തോന്നുംപോലെ ഓടുകയാണ്. എല്ലാ ജംഗ്ഷനുകളിലും രാവിലെയും രാത്രിയും രണ്ടിലേറെ ട്രാഫിക് പോലീസുകാരെ ഡ്യൂട്ടിക്ക് നിയോഗിക്കുന്നുണ്ട്. എന്നിട്ടും തിരക്ക് നിയന്ത്രിക്കാനാവാത്ത സാഹചര്യമാണ്. കുരുക്ക് മുറുകുമ്പോള്‍ മേലുദ്യോഗസ്ഥരില്‍ നിന്നുതുടങ്ങി യാത്രക്കാരില്‍ നിന്നുവരെ പഴി കേള്‍ക്കേണ്ടി വരുന്നതും ഇവരാണ്. വാഹന നിയന്ത്രണത്തിനൊപ്പം നിയമ ലംഘനങ്ങള്‍ക്കെതിരേയുള്ള നടപടികളും മറ്റു പിഴയീടാക്കലും ട്രാഫിക് ഡ്യൂട്ടിയിലുള്ള പോലീസിന്‍റെ ഉത്തരവാദിത്വമാണ്. ഇതു രണ്ടും ഒരുമിച്ച് കൊണ്ടുപോകാന്‍ പാടുപെടുകയാണ് പോലീസുകാര്‍. നഗരത്തിലെ അനധികൃത പാര്‍ക്കിംഗും പ്രയാസം സൃഷ്ടിക്കുന്നു. പ്രധാന റോഡുകളുടെ വശങ്ങളില്‍ വാഹനങ്ങള്‍ തലങ്ങും വിലങ്ങും നിര്‍ത്തിയിടുന്നത് വലിയ പ്രതിസന്ധിയാണ് ഉണ്ടാക്കുന്നത്. നടപ്പാതകളില്‍ പോലും വാഹനങ്ങള്‍ നിര്‍ത്തിയിടുന്ന അവസ്ഥയാണ്. മെഡിക്കല്‍ കോളജ് ഭാഗത്തേക്കുള്ള വാഹനങ്ങളും തൊണ്ടയാട് നിന്ന് നഗരത്തിലേക്ക് എത്തുന്ന വാഹനങ്ങളും കടന്നുപോകുന്ന പൊറ്റമ്മല്‍ ജംഗ്ഷനില്‍ തിരക്കൊഴിഞ്ഞ നേരമില്ല. ദേശീയപാത ബൈപാസില്‍ നിന്ന് തൊണ്ടയാട് സര്‍വീസ് റോഡിലേക്ക് എത്തുന്ന വാഹനങ്ങളും പാലാഴി ഭാഗത്തെ സര്‍വീസ് റോഡിലേക്കിറങ്ങുന്ന വാഹനങ്ങളും മാങ്കാവ് ഭാഗത്ത് നിന്ന് കുതിരവട്ടം ഭാഗം വഴിയുള്ള വാഹനങ്ങളും പൊറ്റമ്മലിലാണ് വന്നുചേരുന്നത്. പൊറ്റമ്മല്‍ ജംഗ്ഷനില്‍ നിന്ന് കുതിരവട്ടം ഭാഗത്തേക്കുള്ള വാഹനങ്ങള്‍ കടന്നുപോകാന്‍ കഴിയാതെ വന്നാല്‍ ഇവിടെ ഗതാഗതകുരുക്ക് രൂക്ഷമാണ്. കുതിരവട്ടം റോഡിന്‍റെ വീതി കൂട്ടുകയാണ് പോംവഴിയെന്ന് ട്രാഫിക് പോലീസ് പറയുന്നു. സ്‌കൂള്‍ പൂട്ടിയതോടെ നഗരത്തിലേക്ക് സാധനങ്ങള്‍ വാങ്ങാന്‍ എത്തുന്നവരുടെ എണ്ണം വന്‍തോതില്‍ ഉയര്‍ന്നിട്ടുണ്ട്.ഓണം അടുക്കുന്നതോടെ തിരക്ക് ഇനിയും കൂടും. മിക്കവരും കാറുകളിലാണ് എത്തുന്നത്.ഒരാള്‍ മാത്രമാണെങ്കില്‍ പോലും കാര്‍ കൊണ്ടുവരുന്നു. ഇരുചക്രവാഹനങ്ങളും പതിന്‍മടങ്ങ് കൂടിയിട്ടുണ്ട്. ഓണക്കാലവത്ത് നഗരത്തില്‍ ഗതാഗതകുരുക്ക് വര്‍ഷങ്ങളായി തുടരുന്ന പ്രതിഭാസമാണ്. കാറുകളുടെ നീണ്ട പ്രവാഹമാണ് പലയിടത്തും പ്രശ്‌നമാവുന്നത്. ഒരാള്‍ മാത്രം സഞ്ചരിക്കുന്ന കാറുകള്‍ നഗരത്തിലേക്ക് കടക്കരുത് എന്ന മട്ടിലുള്ള നിര്‍ദേശങ്ങളൊക്കെ കഴിഞ്ഞ വര്‍ഷങ്ങളില്‍ ഉണ്ടായിരുന്നു. ഇത്തവണ അത്തരത്തിലുള്ള നിയന്ത്രണങ്ങള്‍ വന്നിട്ടില്ല. ഏതായാലും പോലീസ് കുഴങ്ങുന്ന വിധത്തിലാണ് ഗതാഗതകുരുക്ക് തുടരുന്നത്.

ട്രെയിൻ ഇടിച്ച് വയോധികൻ മരിച്ചു

കൊയിലാണ്ടി: ട്രെയിൻ ഇടിച്ച് വയോധികൻ മരിച്ചു. വിയ്യൂർ വഴി പോക്ക് കുനിയിൽ അരീക്കൽ താഴ കുഞ്ഞിരാമനാണ് (67) ആണ് മരിച്ചത്. ആനക്കുളം റെയിൽവേ ട്രാക്കിൽ 10.50ന് റെയിൽ മുറിച്ച് കടക്കവെ തിരുവനന്തപുരത്തേക്ക് പോവുകയായിരുന്ന ഏറനാട് എക്സ്പ്രസ് ഇടിക്കുകയായിരുന്നു. ഭാര്യ: ശോഭ. മക്കൾ: ബിന്ദു, ബിനിത. മരുമക്കൾ: അനീഷ്, വിനീഷ്. സഹോദരങ്ങൾ: രാജൻ, ശിവൻ, ഗീത.

ഡയാലിസിസ് മെഷീൻ ഉദ്ഘാടനം

തിരുവമ്പാടി: ലിസ ഡയാലിസിസ് സെന്‍ററിൽ പെയിൻ ആൻഡ് പാലിയേറ്റീവ് കെയർ സെന്‍ററിന്‍റെയും കടവ് കൂട്ടായ്മ ചാരിറ്റബിൾ ട്രസ്റ്റിന്‍റെയും സഹകരണത്തോടെ വാങ്ങിയ പുതിയ ഡയാലിസിസ് മെഷീൻ മെഡിക്കൽ ഡയറക്ടർ ഡോ. പി.എം. മത്തായി ഉദ്ഘാടനം ചെയ്തു. ഇതോടെ ലിസ ഡയാലിസിസ് സെന്‍ററിൽ അഞ്ച് മെഷീൻ പ്രവർത്തന സജ്ജമാണ്. ലിസ പാലിയേറ്റീവ് പ്രസിഡന്‍റ് കെ.സി. മാത്യു കൊച്ചുകൈപ്പേൽ അധ്യക്ഷത വഹിച്ചു. ഡോ. പ്രവീൺ മാത്യു, നെഫ്റോളജിസ്‌റ്റ് ഡോ. ടി. വിശ്വാസ്, ഡയാലിസിസ് ഇൻ ചാർജ് നീതു ജോൺ, ടെക്നീഷ്യൻ ചിഞ്ജു ടി. തോമസ്, കടവ് കൂട്ടായ്മ ചാരിറ്റബ്ൾ ട്രസ്റ്റ് ഭാരവാഹികളായ ഇ.കെ. രാജൻ, വിശ്വനാഥൻ, പാലിയേറ്റീവ് നേഴ്സ് ബിജി ജോസ് എന്നിവർ പ്രസംഗിച്ചു.

വോളണ്ടിയേഴ്സിന് പരിശീലനം നൽകി

കോടഞ്ചേരി: അമീബിക്ക് മസ്തിഷ്ക ജ്വര ഭീഷണി നിലനിൽക്കുന്ന സാഹചര്യത്തിൽ മാസ് ക്ലോറിനേഷൻ പ്രോഗ്രാമിന്‍റെ ഭാഗമായി പഞ്ചായത്തിലെ ആശാപ്രവർത്തകർക്കും സന്നദ്ധ പ്രവർത്തകർക്കും പരിശീലനം നൽകി. പഞ്ചായത്ത് പ്രസിഡന്‍റ് അലക്സ്‌ തോമസ് ചെമ്പകശേരി ഉദ്ഘാടനം നിർവഹിച്ചു. മെഡിക്കൽ ഓഫീസർ ഡോ. കെ. ഹസീന അധ്യക്ഷത വഹിച്ചു.കോടഞ്ചേരി കുടുംബാരോഗ്യ കേന്ദ്രത്തിന്‍റെ നേതൃത്വത്തിലാണ് പരിശീലനം നൽകിയത്. എച്ച്ഐമാരായ ജോബി ജോസഫ്, ദിൽജിന എന്നിവർ വിഷയം അവതരിപ്പിച്ചു. പഞ്ചായത്ത് വൈസ് പ്രസിഡന്‍റ് ജമീല അസീസ്, വാർഡ് മെമ്പർമാരായ വാസുദേവൻ ഞാറ്റുകാലായിൽ, സൂസൻ കോഴപ്ലാക്കൽ, വനജ വിജയൻ, ബിന്ദു ജോർജ് എന്നിവർ പ്രസംഗിച്ചു.

കട്ടിപ്പാറ ഗവ. ഹോമിയോ ഡിസ്പെൻസറിക്ക് കായകൽപ് അവാർഡ്

താമരശേരി: കട്ടിപ്പാറ പഞ്ചായത്ത് ഗവ. ഹോമിയോ ഡിസ്പെൻസറിക്ക് കേരള ആയുഷ് കായകൽപ് അവാർഡ് ലഭിച്ചു. തിരുവനന്തപുരം ജിമ്മി ജോർജ് ഇൻഡോർ സ്റ്റേഡിയത്തിൽ നടന്ന ചടങ്ങിൽ മന്ത്രി വീണ ജോർജിൽ നിന്ന് പഞ്ചായത്ത് പ്രസിഡന്‍റ് പ്രേംജി ജെയിംസ്, മെഡിക്കൽ ഓഫീസർ ഡോ. കെ. ഇന്ദു, ആരോഗ്യ സ്റ്റാൻഡിംഗ് കമ്മിറ്റി ചെയർമാൻ അഷ്റഫ് തണ്ടിയേക്കൽ, പഞ്ചായത്ത് സെക്രട്ടറി നൗഷാദ് അലി എന്നിവർ ഏറ്റുവാങ്ങി. കോഴിക്കോട് ജില്ലയിലെ മികച്ച ഹോമിയോ ഡിസ്പെൻസറിയായി കണ്ടെത്തിയാണ് അവാർഡ് നൽകിയത്.

മാവേലിക്കസ് 2025 ; പൂക്കള മത്സരം നാളെ

കോഴിക്കോട്: സംസ്ഥാന സര്‍ക്കാരിന്‍റെ ഓണാഘോഷം മാവേലിക്കസ് 2025 ന്‍റെ ഭാഗമായി സംഘടിപ്പിക്കുന്ന പൂക്കളമത്സരം 31ന് ജില്ലയിലെ വിവിധ കേന്ദ്രങ്ങളിലായി നടക്കും. വിവിധ വിഭാഗങ്ങളിലായി നടക്കുന്ന പൂക്കള മത്സരത്തിനുള്ള വേദികള്‍ നഗരത്തിലെ ഏഴ് കേന്ദ്രങ്ങളിലായി സജ്ജമായി. മത്സരത്തില്‍ പങ്കെടുക്കാന്‍ ആഗ്രഹിക്കുന്നവര്‍ക്ക് മുന്‍കൂട്ടിയുള്ള രജിസ്‌ട്രേഷന്‍ ഇല്ലാതെയും മത്സരദിവസം രാവിലെ എട്ടു മുതല്‍ ഒമ്പത് വരെ മത്സരത്തിനായി അതാത് സെന്‍ററുകളില്‍ നേരിട്ടെത്തി രജിസ്റ്റര്‍ ചെയ്ത് പങ്കെടുക്കാം. രാവിലെ 9.30 മുതല്‍ 12.30 വരെയാണ് മത്സരം നടക്കുക. മത്സരത്തില്‍ ജില്ലാതലത്തില്‍ വിജയികളാകുന്ന ആദ്യ മൂന്നു സ്ഥാനക്കാര്‍ക്ക് മൂന്ന് ലക്ഷം, രണ്ട് ലക്ഷം, ഒരു ലക്ഷം രൂപ വീതം സമ്മാനമായി ലഭിക്കും. ആദ്യ മൂന്നു മെഗാ പ്രൈസിനു പുറമെ ഓരോ വിഭാഗത്തിലും ഒന്നാമതെത്തുന്നവര്‍ക്ക് 10,000 രൂപ വീതം സമ്മാനവും ലഭിക്കും. സംസ്ഥാന വിനോദസഞ്ചാര വകുപ്പിന്‍റെയും ജില്ലാ ടൂറിസം പ്രമോഷന്‍ കൗണ്‍സിലിന്‍റെയും കേരള ആര്‍ട്‌സ് ആന്‍ഡ് ക്രാഫ്റ്റ് വില്ലേജിന്‍റെയും നേതൃത്വത്തിലാണ് മാവേലിക്കസ് 2025 സംഘടിപ്പിക്കുന്നത്.

വിളംബര ജാഥ നടത്തി

കൂടരഞ്ഞി: കള്ളാടി - മേപ്പാടി തുരങ്കപാതയുടെ നിർമാണ പ്രവർത്തി മുഖ്യമന്ത്രി പിണറായി വിജയൻ ഉദ്ഘാടനം ചെയ്യുന്നതിന്‍റെ പ്രചാരണാർഥം കൂടരഞ്ഞിയിൽ പഞ്ചായത്തിന്‍റെ നേതൃത്വത്തിൽ വിളംബര ജാഥ നടത്തി. ജാഥ കൂടരഞ്ഞി പോസ്റ്റ്‌ ഓഫീസ് ജംഗ്ഷനിൽ നിന്നും ആരംഭിച്ച് പഞ്ചായത്ത് ഓഫീസ് പരിസരത്ത് സമാപിച്ചു. ചടങ്ങിൽ പഞ്ചായത്ത്‌ പ്രസിഡന്‍റ് ആദർശ് ജോസഫ് അധ്യക്ഷത വഹിച്ചു. വിവിധ രാഷ്ട്രീയ കക്ഷി നേതാക്കളായ പി.എം. തോമസ്, ഷൈജു കോയിനിലം, അബ്ദുറഹ്മാൻ, സണ്ണി പെരുകിലം തറപ്പേൽ, എൻ.ഐ. അബ്ദുൾ ജബ്ബാർ, വ്യാപാരി വ്യവസായി പ്രതിനിധി മുഹമ്മദ്‌ പാതിപ്പറമ്പിൽ എന്നിവർ പ്രസംഗിച്ചു.

ഹൈക്കോടതി ഉത്തരവ് ലംഘിച്ചുള്ള പാറഖനനം നിർത്തണമെന്ന്

കുറ്റ്യാടി: ഹൈക്കോടതി ഉത്തരവ് ലംഘിച്ച് മരുതോങ്കര പാമ്പിരിയൻ പാറ ക്വാറിയിൽ നടക്കുന്ന ഖനനം നിർത്താൻ നടപടി സ്വീകരിക്കണമെന്ന് സിറ്റിസൺസ് ഫോറം ഫോർ പീസ് ആൻഡ് ജസ്റ്റിസ് യോഗം ആവശ്യപ്പെട്ടു. പാരിസ്ഥിതികാനുമതിയുടെ കാലാവധി നീട്ടിക്കിട്ടിയ എല്ലാ ക്വാറികളുടെയും പ്രവർത്തനം നിർത്തിവെക്കണമെന്ന് ഓഗസ്റ്റ് 26 നാണ് ഹൈക്കോടതി ഉത്തരവിറക്കിയത്. ഇത് വക വെക്കാതെയാണ് ക്വാറി ഉടമ ‌ ഖനനം തുടരുന്നത്. ഇത് കോടതി അലക്ഷ്യമാണ്. ഉരുൾപൊട്ടൽ സാധ്യതയുള്ളതും നൂറോളം കുടുംബങ്ങൾ താമസിക്കുന്നതുമായ പ്രദേശത്തെ ഖനന പ്രവർത്തനങ്ങൾ നിർത്തിവെക്കണമെന്ന് ആവശ്യപ്പെട്ടു പ്രദേശവാസികളുടെ കർമ്മ സമിതി അധികാരികൾക്ക് നിവേദനം നൽകിയതാണ്. ഇതെല്ലാം അവഗണിക്കപ്പെടുകയാണ് ഉണ്ടായതെന്ന് യോഗം കുറ്റപ്പെടുത്തി. ഉടൻ‌ തന്നെ ഖനനം നിർത്തിയില്ലെങ്കിൽ പ്രത്യക്ഷ സമരപരിപാടികൾ ആരംഭിക്കാൻ യോഗം തീരുമാനിച്ചു. ചെയർമാൻ മൊയ്തു കണ്ണങ്കോടൻ, ജനറൽ കൺവീനർ ടി. നാരായണൻ വട്ടോളി, സി.കെ. കരുണാകരൻ, പി. അബ്ദുൾ മജീദ് എന്നിവർ പ്രസംഗിച്ചു.

കനത്ത മഴയിൽ വീടിന്‍റെ പിൻഭാഗത്തെ മൺഭിത്തി ഇടിഞ്ഞു

പെരുവണ്ണാമൂഴി: കനത്ത മഴയിൽ വീടിന്‍റെ ഭിത്തി ഇടിഞ്ഞു. ചക്കിട്ടപാറ പഞ്ചായത്തിൽ 11-ാം വാർഡിലെ പിള്ളപ്പെരുവണ്ണ ചാലിൽ സബീഷിന്‍റെ വീടിന്‍റെ പിൻഭാഗത്തെ മൺ ഭിത്തിയാണ് കനത്ത മഴയിൽ ഇടിഞ്ഞത്. വീടിന് അപായ ഭീഷണിയുണ്ട്. പ്ലംബിംഗ് നശിച്ച നിലയിലാണ്. പേരാമ്പ്ര വില്ലേജ് ഓഫിസീൽ പരാതി നൽകി.

വാഹനം ഫ്ലാഗ് ഓഫ് ചെയ്തു

താമരശേരി: ഹെൽത്ത് കെയർ ഫൗണ്ടേഷൻ ബഹറൈൻ, ജിദ്ദ പ്രവാസികളുടെ കൂട്ടായ്മയിൽ കാരുണ്യതീരത്തിലെ ഭിന്നശേഷിക്കാർക്കും കമ്മ്യൂണിറ്റി ക്ലിനിക്കിലെ രോഗികൾക്കും യാത്ര സൗകര്യം വിപുലീകരിക്കുന്നതിനായി ഒരുക്കിയ വാഹനത്തിന്‍റെ ഫ്ലാഗ് ഓഫ് ജില്ലാ പോലീസ് മേധാവി (വടകര റൂറൽ) കെ.ഇ. ബൈജു നിർവഹിച്ചു. ഹെൽത്ത് കെയർ ഫൗണ്ടേഷൻ വൈസ് പ്രസിഡന്‍റ് കെ. അബ്ദുൾ മജീദ് അധ്യക്ഷത വഹിച്ചു. കട്ടിപ്പാറ പഞ്ചായത്ത് വൈസ് പ്രസിഡന്‍റ് ബിന്ദു സന്തോഷ്, വേൾഡ് മലയാളി കൗൺസിൽ മലബാർ പ്രൊവിൻസ് ചെയർമാൻ കെ.പി.യു. അലി, ഷിയാസ് കൊടുവള്ളി, സകരിയ പൂനത്ത്, നിജിൽ, റഊഫ് അവേലം, മുജീബ് അവേലം തുടങ്ങിയവർ പ്രസംഗിച്ചു. ഹെൽത്ത് കെയർ ഫൗണ്ടേഷൻ പ്രസിഡന്‍റ് ഡോ. ബഷീർ പൂനൂർ ഉപഹാര സമർപ്പണം നടത്തി.

യുഡിഎഫ് പ്രതിഷേധ പ്രകടനം നടത്തി

കൂരാച്ചുണ്ട്: വടകര എംപി ഷാഫി പറമ്പിലിനെ ഡിവൈഎഫ്ഐ പ്രവർത്തകർ കയ്യേറ്റം ചെയ്തതിൽ പ്രതിഷേധിച്ച് കൂരാച്ചുണ്ടിൽ യുഡിഎഫ് പഞ്ചായത്ത് കമ്മിറ്റിയുടെ നേതൃത്വത്തിൽ പ്രതിഷേധ പ്രകടനവും പൊതുയോഗവും സംഘടിപ്പിച്ചു. പഞ്ചായത്ത് പ്രസിഡന്‍റ് ഒ.കെ. അമ്മദ് ഉദ്ഘാടനം ചെയ്തു. കോൺഗ്രസ് മണ്ഡലം പ്രസിഡന്‍റ് ജോസ് വെളിയത്ത് അധ്യക്ഷത വഹിച്ചു. യുഡിഎഫ് കൺവീനർ വി.എസ്. ഹമീദ്, മണ്ഡലം വൈസ് പ്രസിഡന്‍റ് ഷാജു കാരക്കട, കുര്യൻ ചെമ്പനാനി, അഷറഫ് ഓടക്കയിൽ, പഞ്ചായത്തംഗം അരുൺ ജോസ്, സുബിൻ കൊച്ചുവീട്ടിൽ സിമിലി ബിജു എന്നിവർ പ്രസംഗിച്ചു. പഞ്ചായത്തംഗം ജെസി ജോസഫ്, ജോൺസൺ എട്ടിയിൽ, ജെറിൻ കുര്യാക്കോസ്, അസീസ് വട്ടുകുനി, സാദിഖ് ഓണാട്ട്, സെബാസ്റ്റ്യൻ വടക്കേക്കുന്നേൽ തുടങ്ങിയവർ നേതൃത്വം നൽകി.

ഷാഫി പറമ്പിലിനെ തടഞ്ഞത് പ്രതിഷേധാര്‍ഹം: കേരളാ കോണ്‍ഗ്രസ്

കോഴിക്കോട്: വടകരയില്‍ ഡിവൈഎഫ്‌ഐ പ്രവര്‍ത്തകര്‍ ഷാഫി പറമ്പില്‍ എംപിയെ തടഞ്ഞ് അസഭ്യവര്‍ഷം നടത്തിയതില്‍ കേരളാ കോണ്‍ഗ്രസ് കോഴിക്കോട് ജില്ലാ പ്രസിഡന്‍റ് പി.എം ജോര്‍ജും ജനറല്‍ സെക്രട്ടറി രാജീവ് തോമസും പ്രതിഷേധം രേഖപ്പെടുത്തി. ഈ രീതി കേരളത്തില്‍ കേട്ടുകേള്‍വിപോലുമില്ലാത്തതാണെന്നും സിപിഎമ്മിന്‍റെ നടപടിയെ ശക്തമായി അപലപിക്കുന്നുവെന്നും നേതാക്കള്‍ പറഞ്ഞു. ഇടതുപക്ഷത്തെ ഏറ്റവും സ്വീകാര്യതയുള്ള നേതാവെന്ന് അവര്‍ കരുതുന്ന കെ.കെ. ശൈലജയെ ഒന്നേ കാല്‍ ലക്ഷത്തോളം വോട്ടുകള്‍ക്ക് പരാജയപ്പെടുത്തിയതിലുള്ള പക പോക്കലാണ് ഷാഫി പറമ്പിലിനെതിരേ സിപിഎമ്മും ഡിവൈഎഫ്‌ഐയും ഇപ്പോഴും തുടര്‍ന്നുകൊണ്ടിരിക്കുന്നത്. ഈ രീതി തികച്ചും അപഹാസ്യവും പ്രതിഷേധാര്‍ഹവുമാണെന്ന് ഇരുവരും പറഞ്ഞു.

ചെണ്ടുമല്ലി കൃഷി വിളവെടുപ്പ് നടത്തി

കൂരാച്ചുണ്ട്: പഞ്ചായത്ത് 2025 - 26 വാർഷിക പദ്ധതിയിൽ ഉൾപ്പെടുത്തി കല്ലാനോട് ഏഴാം വാർഡിൽ ഉദയ കുടുംബശ്രീയുടെ നേതൃത്വത്തിൽ ആരംഭിച്ച ചെണ്ടുമല്ലി കൃഷിയുടെ വിളവെടുപ്പ് ഉദ്ഘാടനം പഞ്ചായത്ത് പ്രസിഡന്‍റ് ഒ.കെ. അമ്മദ് നിർവഹിച്ചു. വാർഡ് മെമ്പർ സിമിലി ബിജു അധ്യക്ഷത വഹിച്ചു. യോഗത്തിൽ കൂരാച്ചുണ്ട് കൃഷി ഓഫീസർ പി.പി. രാജി പദ്ധതിയെ കുറിച്ച് വിശദീകരിച്ചു. വാർഡ് പഞ്ചായത്തംഗം അരുൺ ജോസ്, സിഡിഎസ് ചെയർപേഴ്സൺ കാർത്തിക വിജയൻ, സിഡിഎസ് മെമ്പർ സിനി ജിനോ, കൃഷി അസിസ്റ്റന്‍റ് ടി.വി. പ്രബിത, ഉദയ കുടുംബശ്രീ അംഗങ്ങളായ ബബിതാ ബാലകൃഷ്ണൻ, നബീസ കളത്തിൽ തുടങ്ങിയവർ പ്രസംഗിച്ചു.

ഇത് മായം ചേര്‍ക്കാത്ത വിജയം : 15 വര്‍ഷം പിന്നിട്ട് കുടുംബശ്രീ ഹോംഷോപ്പ്‌

ഓഗസ്റ്റില്‍ മാത്രം ജില്ലയില്‍ നടന്നത് 1.10 കോടി രൂപയുടെ കച്ചവടം കോഴിക്കോട്: മായം ചേര്‍ക്കാത്ത നാടന്‍ ഉത്പന്നങ്ങള്‍ ഹോം ഷോപ്പ് എന്ന പേരില്‍ വീടുകളിലെത്തിച്ച് ജീവിത വിജയം കൊയ്ത് ജില്ലയിലെ കുടുംബശ്രീ വനിതകള്‍. വിപണനത്തില്‍ ബദല്‍ വികസിപ്പിച്ചെടുത്ത് വിജയകരമായ 15 വര്‍ഷങ്ങള്‍ പൂര്‍ത്തിയാക്കുന്ന ഹോം ഷോപ്പ് പദ്ധതിയിലൂടെ ഓഗസ്റ്റില്‍ മാത്രം കോഴിക്കോട് ജില്ലയില്‍ നടന്നത് 1.10 കോടി രൂപയുടെ കച്ചവടമാണ്. "നല്ലതു വാങ്ങുക നന്മ ചെയ്യുക' എന്ന മുദ്രാവാക്യം അന്വര്‍ത്ഥമാക്കി പരിശുദ്ധമായ നാട്ടുരുചികള്‍ വിപണിയിലെത്തിക്കുന്ന ഹോം ഷോപ്പുകള്‍ ഷോപ്പ് ഉടമകള്‍, ബ്ലോക്ക് കോ-ഓര്‍ഡിനേറ്റര്‍മാര്‍, ഓഫീസ് സ്റ്റാഫുകള്‍, മാനേജ്‌മെന്‍റ് ടീം തുടങ്ങി വിവിധ തട്ടുകളിലായി 1500-ല്‍ അധികം പേര്‍ക്കാണ് ഉപജീവന മാര്‍ഗം തീര്‍ക്കുന്നത്. മൂന്ന് ഉല്‍പാദന യൂണിറ്റുകളും ഏഴ് ഉല്‍പന്നങ്ങളും 25 ഹോംഷോപ്പ് ഉടമകളുമായി 2010 ജൂലൈ 29-ന് കൊയിലാണ്ടിയില്‍ ആരംഭിച്ച പദ്ധതിയിലൂടെ ഇന്ന് നിര്‍മിക്കുന്നത് 130-ല്‍ അധികം വ്യത്യസ്ത ഉത്പന്നങ്ങളാണ്. 60-ല്‍ അധികം ഉല്‍പാദന യൂണിറ്റുകളും പദ്ധതിയ്ക്കു കീഴിലുണ്ട്. 500 ഓളം വനിതകളാണ് വീടുകളില്‍ നേരിട്ട് ഉത്പന്നങ്ങള്‍ എത്തിക്കുന്നത്. വിപണനത്തില്‍ കോഴിക്കോട് തീര്‍ത്ത വിജയമാതൃക മറ്റ് ജില്ലകളിലേക്കും വ്യാപിപ്പിക്കാനുള്ള ഒരുക്കത്തിലാണ് കുടുംബശ്രീ. വീടുകളില്‍ വില്‍പന നടത്തുന്ന ഷോപ്പ് ഓണര്‍മാര്‍ക്ക് "ശ്രീനിധി' എന്ന പേരില്‍ സമ്പാദ്യപദ്ധതിയും നടത്തിവരുന്നു. മാസവരുമാനത്തിനു പുറമെ അംഗങ്ങളുടെ പേരില്‍ നിശ്ചിത തുക ബാങ്കില്‍ നിക്ഷേപിക്കുന്ന പദ്ധതി വനിതകള്‍ക്ക് നല്‍കുന്ന സാമ്പത്തിക ഭദ്രത ചെറുതല്ല. ഒപ്പം, ആരോഗ്യസുരക്ഷ പദ്ധതിയും വിദ്യാഭ്യാസ സ്‌കോളര്‍ഷിപ്പ് പദ്ധതിയും ഷോപ്പ് ഓണര്‍മാരുടെ ജീവിതം സുരക്ഷിതമാക്കാനുദ്ദേശിച്ച് നടത്തിവരുന്നു. ഒമ്പതാം ക്ലാസ് മുതല്‍ പന്ത്രണ്ടാം ക്ലാസ് വരെ പഠിക്കുന്ന കുട്ടികള്‍ക്ക് പ്രതിവര്‍ഷം 1200 രൂപ വീതം വിദ്യാഭ്യാസ സ്‌കോളര്‍ഷിപ്പായി നല്‍കി വരുന്നു. അംഗങ്ങളുടെ സാമൂഹ്യ ക്ഷേമവും ജീവിതസുരക്ഷയും ഉറപ്പാക്കി വനിതകളെ സാമ്പത്തിക, സാമൂഹിക സ്വതന്ത്ര്യത്തിലേക്കെത്തിക്കുന്ന പദ്ധതി സ്‌കോച്ച് ഓര്‍ഡര്‍ ഓഫ് മെറിറ്റ് ദേശീയഅവാര്‍ഡ് ഉള്‍പ്പെടെ നിരവധി പുരസ്‌കാരങ്ങള്‍ നേടിയിട്ടുണ്ട്. ഈ രംഗത്ത് പദ്ധതി മുന്നോട്ടുവയ്ക്കുന്ന വിജയ മാതൃക പഠിക്കാന്‍ വിദേശ രാജ്യങ്ങളില്‍ നിന്നുള്‍പ്പെടെ പഠനസംഘവും എത്താറുണ്ട്. നോര്‍വേ ഓസ്ലെ, ന്യൂയോര്‍ക്ക് ആസ്ഥാനമായുള്ള സര്‍വകലാശാലകള്‍, പാറ്റ്‌നയിലെ ഡെവലപ്‌മെന്‍റ് മാനേജ്‌മെന്‍റ് ഇന്‍സ്റ്റിറ്റ്യൂട്ടിലെ ഉദ്യോഗസ്ഥര്‍, മധ്യപ്രദേശ് ഭാരത് ഗ്യാന്‍ വിജ്ഞാന്‍ സമിതി പ്രവര്‍ത്തകര്‍, പുണെ പഠനസംഘം, ഗൂഡല്ലുര്‍ ജസ്റ്റ് ചെയ്ഞ്ച് പ്രവര്‍ത്തകര്‍ തുടങ്ങി നിരവധി പഠനസംഘങ്ങള്‍ മാതൃക പഠനവിഷയമാക്കിയിട്ടുണ്ട്.

ഓണാഘോഷത്തിന് കണ്ണൂരിൽനിന്ന് രൂപമാറ്റം വരുത്തിയ കാർ; പൊല്ലാപ്പിലായി വിദ്യാർഥികൾ

നാദാപുരം: ഓണാഘോഷത്തിന് മാറ്റ് കൂട്ടാൻ കണ്ണൂരിൽ നിന്ന് നാദാപുരത്ത് എത്തിച്ച രൂപമാറ്റം വരുത്തിയ കാർ പോലീസ് കസ്റ്റഡിയിലെടുത്തു. കാറിന്‍റെ ഇരു ഭാഗത്തും ഡോറുകളിൽ നിറയെ വർണ്ണ ചിത്രങ്ങൾ, സ്ഫോടന ശബ്ദം പുറപ്പെടുവിക്കുന്ന സൈലൻസർ എന്നിവ ഘടിപ്പിച്ച കാറാണ് പോലീസ് പിടികൂടിയത്. വെള്ളിയാഴ്ച്ച രാവിലെ ഇരിങ്ങണ്ണൂരിലാണ് സംഭവം. കടും വർണ്ണ കളറുകൾ ചാലിച്ച് കാതടിപ്പിക്കുന്ന ശബ്ദവുമായി ചീറി പാഞ്ഞ കെ എൽ 07 എ ബി 8764 രജിസ്ട്രേഷൻ എസ്റ്റിം കാറാണ് നാദാപുരം എസ്ഐ എം.പി. വിഷ്ണുവും സംഘവും പിടികൂടിയത്. ഇരിങ്ങണ്ണൂർ സ്കൂളിലെ കുട്ടികളാണ് ഇൻസ്റ്റഗ്രാമിൽ പരിചയപ്പെട്ട പാപ്പിനിശേരി സ്വദേശിയോട് സ്കൂളിലെ ഓണാഘോഷത്തിന് കാർ ആവശ്യപ്പെട്ടത്. യുവാവിന്‍റെ ഇൻസ്റ്റാഗ്രാം പേജിലാണ് കാറിന്‍റെ ചിത്രങ്ങൾ കുട്ടികൾ കണ്ടത്. തുടർന്ന് ഒരു ദിവസത്തേക്ക് 6000 രൂപ വാടകയാക്ക് കാർ വാങ്ങുകയായിരുന്നു. തുടർന്ന് ടൗണിൽ രണ്ട് റൗണ്ട് ഘോര ശബ്ദവുമുള്ള കാറിൽ കറങ്ങുമ്പോഴേക്കും പോലീസ് എത്തി പിടികൂടുകയായിരുന്നു. നാദാപുരം - തലശേരി റോഡിൽ പോലീസ് സ്റ്റേഷന് മുന്നിലൂടെ കാർ ചീറിപ്പാഞ്ഞതോടെയാണ് പോലീസുകാർ ഉണർന്നത്. കാർ പിടികൂടുമ്പോൾ ഡ്രൈവർക്കൊപ്പം ഡ്രസ് കോഡ് ധരിച്ച് വിദ്യാർഥികളും ഉണ്ടായിരുന്നു. പിടികൂടിയ കാറിന്‍റെ ഉടമക്കെതിരേ കേസ് എടുക്കുമെന്നും ട്രാഫിക് നിയമങ്ങൾ ലംഘിച്ചതിന് ഡ്രൈവർക്ക് നോട്ടീസ് നൽകുമെന്നും പോലീസ് അറിയിച്ചു.

കോഴിക്കോട് മെഡിക്കല്‍ കോളജിലെ ശസ്ത്രക്രിയകള്‍ പുനരാരംഭിച്ചു

കോഴിക്കോട്: കോഴിക്കോട് മെഡിക്കല്‍ കോളജിലെ ആന്‍ജിയോപ്ലാസ്റ്റി അടക്കമുള്ള അടിയന്തര ശസ്ത്രക്രിയാ ചികിത്സകള്‍ പുനരാരംഭിച്ചു. ആശുപത്രിയില്‍ ശസ്ത്രക്രിയ ഉപകരണങ്ങള്‍ സ്റ്റോക്കില്ലാത്തതിനെത്തുടര്‍ന്നുണ്ടായ പ്രതിസന്ധി പരിഹരിക്കാന്‍ താത്കാലിക നടപടി സ്വീകരിച്ചതായി പ്രിന്‍സിപ്പല്‍ അറിയിച്ചു. അവശ്യ ഉപകരണങ്ങളുടെ സ്റ്റോക്ക് ഇല്ലാത്തതിനാല്‍ രണ്ടു ദിവസമായി മെഡിക്കല്‍ കോളജില്‍ ആന്‍ജിയോപ്ലാസ്റ്റി അടക്കമുള്ള അടിയന്തര ചികിത്സകള്‍ നിര്‍ത്തിവച്ചിരിക്കുകയായിരുന്നു. വിതരണ കമ്പനികള്‍ക്കു കുടിശിക നല്‍കാതായതോടെയാണ് അവര്‍ ഉപകരണ വിതരണം നിറുത്തിയത്. ആശുപത്രിയുടെ ഫണ്ടില്‍നിന്ന് തുക ലഭ്യമാക്കി വിതരണക്കാരുടെ കുടിശ്ശികയുടെ ഒരു വിഹിതം നല്‍കാനുള്ള നടപടി ആരംഭിച്ചതോടെയാണ് ഉപകരണങ്ങള്‍ ലഭ്യമാക്കി ഇന്നലെ അടിയന്തര ശസ്ത്രക്രിയകള്‍ പുനരാരംഭിച്ചത്. ആരോഗ്യ മന്ത്രി ഇടപെട്ട് കാരുണ്യ ബെനവലന്‍റ് ഫണ്ടില്‍നിന്ന് അടിയന്തരമായി ഫണ്ട് ലഭ്യമാക്കാന്‍ ശ്രമം ആരംഭിച്ചിട്ടുണ്ട്. 30നകം കുടിശികയുടെ ഒരു വിഹിതം നല്‍കാനാവുമെന്നാണ് പ്രതീക്ഷ. ഉപകരണ വിതരണം പുനരാരംഭിക്കുന്നതിന് ഏജന്‍സികളുമായി ചര്‍ച്ച തുടരുകയാണെന്നും പ്രിന്‍സിപ്പല്‍ അറിയിച്ചു.2025 മാര്‍ച്ച് വരെയുള്ള കുടിശിക 34.90 കോടിയിലധികമായതോടെയാണ് സ്റ്റെന്‍റ് അടക്കമുള്ള ഹൃദയ ശസ്ത്രക്രിയ ഉപകരണങ്ങളുടെ വിതരണം ഏജന്‍സികള്‍ നിര്‍ത്തിവച്ചത്.

ഐഒസി പ്ലാന്‍റിലെ ഒഴിഞ്ഞ ടാങ്കില്‍ തീപിടിത്തം

കോഴിക്കോട്: ഫറോക്ക് ഐഒസി പ്ലാന്‍റിലെ ഒഴിഞ്ഞ ഇന്ധന സംഭരണിയിലെ വെല്‍ഡിംഗ് ജോലിക്കിടെ തീപിടുത്തം. രണ്ടു തൊഴിലാളികള്‍ക്ക് പരിക്കേറ്റു. ഇവരെ സ്വകാര്യ ആശുപത്രിയില്‍ പ്രവേശിപ്പിച്ചു. ഇന്നലെ രാവിലെയാണ് സംഭവം. ഒരു മാസത്തോളമായി കാലിയായികിടന്നിരുന്ന എഥനോള്‍ ടാങ്കിലെ അറ്റകുറ്റപ്പണിക്കിടെയാണ് ചെറിയ തോതില്‍ തീപിടിത്തമുണ്ടായത്. മീഞ്ചന്തയില്‍ നിന്നുള്ള ഫയര്‍ഫോഴ്‌സ് യൂണിറ്റുകള്‍ എത്തുന്നതിന് മുമ്പു തന്നെ ഐഒസി ജീവനക്കാര്‍ തന്നെ തീ നിയന്ത്രണ വിധേയമാക്കിയിരുന്നു. മീഞ്ചന്ത അഗ്‌നിരക്ഷാ യൂണിറ്റില്‍ നിന്നു എത്തിയ മൂന്ന് യൂണിറ്റുകള്‍ സുരക്ഷാ മുന്‍കരുതലിന്‍റെ ഭാഗമായി വെള്ളം ചീറ്റി സംഭരണി തണുപ്പിച്ചു. തീപിടിത്തമുണ്ടായി ഒരു മിനിട്ടിനുള്ളില്‍ അണയ്ക്കാന്‍ കഴിഞ്ഞുവെന്ന് ഐഒസി അധികൃതര്‍ അറിയിച്ചു. രണ്ട് കരാര്‍ തൊഴിലാളികള്‍ വൈദ്യശുശ്രൂഷയിലാണ്. അവരുടെ അവസ്ഥ ഗുരുതരമല്ല. പ്ലാന്‍റിന്‍റെ പ്രവര്‍ത്തനത്തെ തീപിടിത്തം ബാധിച്ചിട്ടില്ലെന്നും ഐഒസി അറിയിച്ചു.

ഓണ വിപണിയില്‍ സജീവമാകാന്‍ കുടുംബശ്രീയും

കോഴിക്കോട്: പല നിറത്തിലുള്ള ജമന്തികള്‍ പൂത്തുനില്‍ക്കുന്ന പാടങ്ങള്‍. പാവലും, പടവലവും മത്തനുമൊക്കെ വിളഞ്ഞുനില്‍ക്കുന്ന കൃഷിയിടങ്ങള്‍. ഓണക്കൃഷിയില്‍ കുടുംബശ്രീ വിതച്ചതെല്ലാം നൂറുമേനിയാണ്. വിഷരഹിതവും ഗുണമേന്മയുള്ളതുമായ പച്ചക്കറിയും പൂക്കളും ഓണവിപണിയില്‍ എത്തിക്കാനാണ് കുടുംബശ്രീ ഗ്രൂപ്പുകള്‍ കൃഷിയിറക്കിയത്. പച്ചക്കറിക്കായി ഓണക്കനി പദ്ധതിയും പൂക്കള്‍ക്കായി നിറപൊലിമ പദ്ധതിയും നടപ്പാക്കി ഓണവിപണിയില്‍ സജീവമാകുകയാണ് കുടുംബശ്രീ. ജില്ലയില്‍ 596 ജെ എല്‍ ജിയിലെ 2527 അംഗങ്ങളുടെ കീഴില്‍ 325 ഏക്കറില്‍ പച്ചക്കറിയും 325 ജെ എല്‍ ജിയിലെ 1374 അംഗങ്ങളുടെ കീഴില്‍ 137 ഏക്കറില്‍ പൂക്കളും കൃഷിചെയ്തിരുന്നു. മേയ് അവസാനമാണ് സംഘകൃഷി ഗ്രൂപ്പുകള്‍ കൃഷിപ്പണി തുടങ്ങിയത്. ഓഗസ്റ്റ് അവസാനത്തോടെ തന്നെ പൂക്കളും പച്ചക്കറികളും വിളവെടുപ്പിന് ഒരുങ്ങി. വെണ്ട, വഴുതന, തക്കാളി, പയര്‍, മത്തന്‍, കുമ്പളം, പടവലം, പാവയ്ക്ക, പയര്‍, മുളക്, ചീര, തുടങ്ങിയവയുടെ വിളവെടുപ്പ് തുടങ്ങി. ജൈവ പച്ചക്കറികളായതിനാല്‍ ആവശ്യക്കാര്‍ ചോദിച്ച് എത്തുന്നുണ്ട്. ഓണക്കനി, നിറപ്പൊലിമ പദ്ധതികള്‍ ഇതിനകം തന്നെ പൊതുജനങ്ങള്‍ക്കിടയില്‍ മികച്ച രീതിയില്‍ സ്വീകാര്യത നേടിക്കഴിഞ്ഞു. കുടുംബശ്രീ സിഡിഎസിലും കടകളിലുമാണ് നിലവില്‍ വില്‍പ്പന. ഓണച്ചന്തകള്‍ ആരംഭിക്കുന്നതോടെ പച്ചക്കറികള്‍ ചന്തകളിലേക്കും നല്‍കും. ഇടനിലക്കാരെ ആശ്രയിക്കാതെ കച്ചവടക്കാരിലേക്കു ഈ കാര്‍ഷിക ഉത്പന്നങ്ങള്‍ നേരിട്ട് എത്തിക്കുക എന്നതും ഇതിന്‍റെ മറ്റൊരു ലക്ഷ്യമാണ്. മഞ്ഞ, ഓറഞ്ച് നിറങ്ങളിലുള്ള ചെണ്ടുമല്ലിപ്പൂക്കളാണ് കൃഷിചെയ്തത്. അതിശക്തമായ മഴയില്‍ ചിലയിടത്ത് കൃഷിനാശം സംഭവിച്ചെങ്കിലും വീണ്ടും തൈകള്‍ നട്ടിരുന്നു. അത്യുത്പാദന ശേഷിയുള്ള ഹൈബ്രിഡ് ഇനങ്ങളുടെ വിത്തും തൈകളുമാണ് കര്‍ഷകര്‍ക്കായി കുടുംബശ്രീ നഴ്‌സറികള്‍ മുഖേന ലക്ഷ്യമാക്കിയത്. തുറയൂര്‍ പഞ്ചായത്തിലെ കുടുംബശ്രീ സിഡിഎസ് പഞ്ചായത്തിന് സമീപം നടത്തിയ പൂക്കൃഷി കഴിഞ്ഞദിവസം വിളവെടുപ്പുത്സവം നടത്തിയിരുന്നു. അതേസമയം കാര്‍ഷിക ഉത്പന്നങ്ങളോടൊപ്പം കുടുംബശ്രീ സംരംഭങ്ങള്‍ തയാറാക്കുന്ന വിവിധ മൂല്യവര്‍ധിത ഉത്പന്നങ്ങളും ഓണവിപണിയില്‍ ലഭ്യമാക്കും.

കാപ്പനിയമം ലംഘിച്ച പ്രതിയെ അറസ്റ്റ് ചെയ്ത് ജയിലിലടച്ചു

കോഴിക്കോട്: കാപ്പ നിയമം ലംഘിച്ച നിരവധി ക്രിമിനല്‍ കേസുകളിലെ പ്രതിയെ അറസ്റ്റ് ചെയ്ത് ജയിലില്‍ അടച്ചു.വെസ്റ്റ്ഹില്‍ കോന്നാട് കരുവള്ളിമീത്തല്‍ വീട്ടില്‍ ജോഷി (26) യെയാണ് മാവൂര്‍ പോലീസ് സ്റ്റേഷന്‍ സബ്ബ് ഇന്‍സ്‌പെക്ടര്‍ രമേശ്, എഎസ്‌ഐ സന്തോഷ് എന്നിവര്‍ ചേര്‍ന്ന് പിടികൂടിയത്. വെള്ളയില്‍ പോലീസ് സ്റ്റേഷന്‍ പരിധിയിലെ അറിയപ്പെടുന്ന റൗഡിയായ പ്രതിക്ക് വെള്ളയില്‍, കസബ എന്നീ പോലീസ് സ്റ്റേഷനുകളിലായി നിരവധി കേസുകള്‍ നിലവിലുണ്ട്. തുടരെ ക്രിമിനല്‍ കേസുകളില്‍ ഉള്‍പ്പെട്ടതിനെ തുടര്‍ന്ന് കാപ്പ ഉത്തരവ് പ്രകാരം പ്രതി കോഴിക്കോട് സിറ്റി പോലീസ് പരിധിയില്‍ പ്രവേശിക്കരുതെന്നും, എന്തെങ്കിലും തരത്തിലുള്ള കുറ്റകൃത്യങ്ങളില്‍ ഏര്‍പ്പെടരുത് എന്നുമുള്ള കാപ്പ നിബന്ധന നല്‍കുകയായിരുന്നു. എന്നാല്‍ ഈ ഉത്തരവ് നിലനില്‍ക്കെ പ്രതി മാവൂരില്‍ എത്തി കാപ്പ നിയമലംഘനം നടത്തി. ഗുരുതര കുറ്റകൃത്യങ്ങള്‍ ചെയ്ത് തുടര്‍ച്ചയായി ക്രിമിനല്‍ കേസുകളില്‍ ഉള്‍പ്പെട്ടുവരുന്ന പ്രതിയെ അറസ്റ്റ് രേഖപ്പെടുത്തിയ ശേഷം കോടതിയില്‍ ഹാജരാക്കി.

വിജിലിന്‍റെ തിരോധാനം : തെരച്ചില്‍ നിര്‍ത്തി; ഇനി രണ്ടു ദിവസം കഴിഞ്ഞ്

കോഴിക്കോട്: കാണാതായ വെസ്റ്റ്ഹില്‍ ചുങ്കം സ്വദേശി വിജിലിന്‍റെ മൃതദേഹാവശിഷ്ടങ്ങള്‍ക്കായുള്ള തെരച്ചില്‍ താല്‍ക്കാലികമായി നിര്‍ത്തി.പോലീസ് കസ്റ്റഡിയില്‍ വിട്ട രണ്ടു പ്രതികളെയും തിരിച്ച് ഇന്നലെ േകാടതിയില്‍ ഹാജരാക്കി. പ്രതികളായ എരഞ്ഞിപ്പാലം കുളങ്ങരകണ്ടി കെ.കെ നിഖില്‍, വേങ്ങേരി സ്വദേശി ദീപേഷ് എന്നിവരെയാണ് കോടതിയില്‍ ഹാജരാക്കിയത്. ഇനി തിങ്കളാഴ്ച കസ്റ്റഡിയില്‍ വാങ്ങിയശേഷം മാത്രമേ തെരച്ചില്‍ പുനരാരംഭിക്കുകയുള്ളു. സരോവരത്തിലെ ചതുപ്പിലെ വെള്ളക്കെട്ടും പ്രതികൂലമായ കാലാവസ്ഥയുമാണ് തെരച്ചിലിനു തടസമായത്. മഴ കുറഞ്ഞാല്‍ അനുകൂലമായ അന്തരീക്ഷമുണ്ടാകുമെന്നാണ് പോലീസ് കുരുതുന്നത്. ബുധനാഴ്ച ചതുപ്പിലെ വെള്ളം മോട്ടോര്‍വച്ച് അടിച്ച് ഒഴിവാക്കിയായിരുന്നു തെരച്ചില്‍ നടത്തിയത്. എന്നാല്‍ ചുറ്റുഭാഗങ്ങളിലും വെള്ളം നിറഞ്ഞതിനാല്‍ ചതുപ്പിലുള്ള വെള്ളം മോട്ടോര്‍ ഉപയോഗിച്ച് മറ്റൊരിടത്തേക്ക് പമ്പ് ചെയ്യാന്‍ സാധിക്കാത്ത സ്ഥിതിവന്നു. ക്വാറിവേസ്റ്റും മണ്ണും ചതുപ്പില്‍ നിക്ഷേപിച്ച് വഴിയൊരുക്കിയിട്ടുണ്ട്. ഇന്നലെ മഴ കുറഞ്ഞുവെങ്കിലും തെരച്ചില്‍ കാര്യമായി നടന്നില്ല.കസ്റ്റഡി കാലാവധി കഴിഞ്ഞതിനാല്‍ രണ്ടു പ്രതികളെയും തിരിച്ച് േകാടതിയില്‍ ഹാജരാക്കി. തിങ്കളാഴ്ച പോലീസ് കസ്റ്റഡിയില്‍ വിട്ടുകിട്ടുന്നതിനു വീണ്ടും അപേക്ഷ നല്‍കും.

മലയോരത്ത് വികസനത്തിന്‍റെ ചിറകടി; തുരങ്കപാത നിര്‍മാണം നാളെ തുടങ്ങും

കോഴിക്കോട്: മലയോരത്ത് വികസനത്തിന്‍റെ ചിറകടിയുയരുകയായി. രാജ്യത്തെ ദൈര്‍ഘ്യമേറിയ ഇരട്ട ടണല്‍പാതയ്ക്ക് നാളെ തുടക്കം കുറിക്കും. സംസ്ഥാനത്തിന്‍റെ വികസന കുതിപ്പിനു പുതിയ അധ്യായം കുറിക്കുന്ന ആനക്കാംപൊയില്‍- കള്ളാടി- മേപ്പാടി തുരങ്കപാതയുടെ നിര്‍മാണ പ്രവര്‍ത്തികള്‍ 31ന് വൈകിട്ട് നാലിനു ആനക്കാംപൊയില്‍ സെന്‍റ് മേരീസ് യുപി സ്‌കൂള്‍ ഗ്രൗണ്ടില്‍ മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. ഒട്ടേറെ പ്രത്യേകതകളുമായാണ് തുരങ്കപാത യാഥാര്‍ഥ്യമാകുന്നത്. ലോകത്തെ ഏറ്റവും ആധുനിക സാങ്കേതിക വിദ്യയായ ന്യൂ ആസ്ട്രിയന്‍ ടണലിംഗ് രീതിയുപയോഗിച്ചാണ് തുരങ്കം നിര്‍മിക്കുന്നത്. യൂറോപ്പിലെ ആല്‍പ്‌സ് പര്‍വത നിരകളില്‍ ഗതാഗത വാര്‍ത്താ വിനിമയ സംവിധാനം ഒരുക്കുന്നതിനായി വികസിപ്പിച്ചെടുത്ത സാങ്കേതിക വിദ്യയാണിത്. സിലിണ്ടര്‍ ആകൃതിയിലുള്ള ഭീമാകാരനായ ടണല്‍ ബോറിംഗ് മെഷിന്‍ ഉപയോഗിച്ചാണ് തുരങ്കം നിര്‍മിക്കുക. നിര്‍മാണത്തിനിടയില്‍ സ്വാഭാവികമായും ഉണ്ടാകുന്ന കല്ലും മണ്ണും പാറയും ചെളിയും നീക്കം ചെയ്യുന്നതിനുള്ള സംവിധാനം ഇതിലുണ്ട്. നിര്‍മാണ സമയത്തുണ്ടാകുന്ന പ്രകമ്പനത്തെ ലഘുകരിക്കാനും സാധിക്കും. 8.73 കിലോമീറ്റര്‍ വരുന്ന പാതയില്‍ 8.1 കിലോമീറ്റര്‍ ടണല്‍ ആണ്. എട്ടുകിലോമീറ്റര്‍ ദൈര്‍ഘ്യമുള്ള ഒരൊറ്റ പാറയിലാണ് ടണല്‍ നിര്‍മിക്കുന്നത്. പത്തു മീറ്റര്‍ വീതിയുള്ള ഇരട്ടകുഴലിന്‍റെ ആകൃതിയിലാണ് തുരങ്കം രൂപകല്‍പ്പന ചെയ്തിട്ടുള്ളത്. രണ്ടു ടണലുകളം തമ്മില്‍ 15 മീറ്റര്‍ അകലമുണ്ട്. ഏഴര മീറ്റര്‍ മുതല്‍ എട്ടുമീറ്റര്‍ വരെ ഉയരത്തിലാണ് ടണലിന്‍റെ ഉള്‍വശം ഉണ്ടാവുക. ഓരോ 300 മീറ്ററിലും ടണലുകളെ പരസ്പരം ബന്ധിപ്പിക്കും. ഡിജിറ്റല്‍ സാങ്കേതിക വിദ്യ പ്രയോജനപ്പെടുത്തി നിര്‍മിക്കുന്ന പ്രകാശ സ്രോതസുകള്‍ തുരങ്കത്തിനകത്തെ ഇരുട്ടകറ്റും. ശുദ്ധവായു ലഭിക്കുന്നതിനു വായുനിര്‍ഗമന മാര്‍ഗങ്ങളും അകത്ത് ഒരുക്കുന്നുണ്ട്.തുരങ്കത്തിന്‍റെ വടക്കെ അറ്റത്തും തെക്കെ അറ്റത്തും കൗണ്ടറുകള്‍ സ്ഥാപിച്ച് പ്രവേശനത്തിനു കംപ്യൂട്ടർ വത്കൃത നിയന്ത്രണ സംവിധാനമൊരുക്കും. യന്ത്രത്തകരാര്‍ ഉണ്ടായാല്‍ വാഹനങ്ങള്‍ ഒതുക്കി നിര്‍ത്തുന്നതിനുള്ള സംവിധാനങ്ങളും ഉണ്ടാകും. കിഫ്ബി പദ്ധതയില്‍ 2134.5 കോടി ചെലവിലാണ് തുരങ്കപാത നിര്‍മിക്കുന്നതെന്ന് ലിന്‍റോ ജോസഫ് എംഎല്‍എ വാര്‍ത്താസമ്മേളനത്തില്‍ അറിയിച്ചു.കൊങ്കണ്‍ റെയില്‍വേ കോര്‍പഷേന്‍ ലിമിറ്റഡാണ് നിര്‍വഹണ ഏജന്‍സി. കോഴിേക്കാട്, വയനാട് ജില്ലകളിലായി 33 ഹെക്ടര്‍ ഭൂമിയാണ് ഇതിനായി ഏറ്റെടുത്തിട്ടുള്ളത്. ടണല്‍ റോഡിലേക്കുള്ള പ്രധാനപാതയുടെ പ്രവൃത്തി ആരംഭിച്ചിട്ടുണ്ട്. രണ്ടു പാക്കേജുകളിലായാണ് നിര്‍മാണം. പാലവും അപ്രോച്ച് േറാഡും ആദ്യത്തെ പാക്കേജിലും ടണല്‍പാത രണ്ടാമത്തെ പാക്കേജിലുമാണ്. നാലുവരി ഗതാഗതമാണ് ഉണ്ടാവുക. പാത യാഥാര്‍ഥ്യമാകുന്നതോടെ ആനക്കാംപൊയിലില്‍ നിന്ന് 22 കിലോമീറ്റര്‍ കൊണ്ട് മേപ്പാടിയില്‍ എത്താം. ഉദ്ഘാടന ചടങ്ങില്‍ മന്ത്രി പി.എ മുഹമ്മദ് റിയാസ് അധ്യക്ഷത വഹിക്കും.മന്ത്രിമാരായ കെ.എന്‍ ബാലഗോപാല്‍, എ.കെ ശശീന്ദ്രന്‍ , ഒ.ആര്‍ കേളു എന്നിവര്‍ വിശിഷ്ടാതിഥികളായിരിക്കും. വാര്‍ത്താസമ്മേളനത്തില്‍ തിരുവമ്പാടി ഗ്രാമപഞ്ചായത്ത് പ്രസിഡന്‍റ് ബിന്ദു ജോണ്‍സണ്‍, വി.കെ. വിനോദ്, ടി. വിശ്വനാഥന്‍ എന്നിവരും സംബന്ധിച്ചു.

സമൂഹ വിവാഹം 30 ന്

കോഴിക്കോട്: യൂത്ത് മുന്നേറ്റം ചാരിറ്റി കൂട്ടായ്മ കമ്മറ്റിയുടെ നേതൃത്വത്തില്‍ മതഭേദമന്യേ പാവപ്പെട്ട ഏഴ് യുവതി-യുവാക്കളുടെ വിവാഹം നടത്തുന്നു. എല്ലാ ചെലവുകളും വഹിച്ചാണ് വിവാഹം. 30 ന് വൈകുന്നേരം നാലിന് വയനാട് റോഡ് മൂഴിക്കല്‍ ബസാറിന് സമീപം പ്രത്യേകം സജ്ജീകരിച്ച നഗരിയിലാണ് വിവാഹമെന്ന് സംഘാടകര്‍ വാര്‍ത്താസേമ്മളനത്തില്‍ അറിയിച്ചു. 2000 കുടുംബങ്ങള്‍ അടക്കം 6000 പേര്‍ ചടങ്ങിനെത്തും. സാമൂഹ്യ സാംസ്‌കാരിക രംഗത്തെ പ്രമുഖര്‍ ചടങ്ങില്‍ പങ്കെടുക്കും. ചെയര്‍മാന്‍ ആഷിക് ചെലവൂര്‍, ജന. കണ്‍വീനര്‍ നവാസ് മൂഴിക്കല്‍, രക്ഷാധികാരി അബ്ദുള്‍ അസീസ് ഷാള്‍, എം കെ അബ്ദുല്ലത്തീഫ്, റഹീം പള്ളിത്താഴം എന്നിവര്‍ വാര്‍ത്താസമ്മേളനത്തില്‍ സംബന്ധിച്ചു.

ഷാഫി പറമ്പിലിനെ തടഞ്ഞത് പ്രതിഷേധാര്‍ഹം:കേരളാ കോണ്‍ഗ്രസ്

കോഴിക്കോട്: ജനങ്ങള്‍ തിരഞ്ഞെടുത്ത ഒരു ജനപ്രതിനിധിയെ തന്‍റെകുറ്റത്തിന് വഴിയില്‍ തടഞ്ഞു നിര്‍ത്തി അസഭ്യവര്‍ഷം നടത്തിയ സിപിഎമ്മിന്‍റെ നടപടി പ്രതിഷേധാര്‍ഹവും അപലപനീയവുമാണെന്ന് കേരളാ കോണ്‍ഗ്രസ് കോഴിക്കോട് ജില്ലാ പ്രസിഡന്‍റ് പി.എം ജോര്‍ജും ജനറല്‍ സെക്രട്ടറി രാജീവ് തോമസൂം പ്രസ്താവനയില്‍ പറഞ്ഞു. വടകരയില്‍ സിപിഎം അനുഭാവികളുടെ അടക്കം വോട്ടുകള്‍ ലഭിക്കുകയും ഇടതുപക്ഷത്തെ ഏറ്റവും സ്വീകാര്യതയുള്ള നേതാവെന്ന് അവര്‍ കരുതുന്ന ഷൈലജയെ ഒന്നേ കാല്‍ ലക്ഷത്തോളം വോട്ടുകള്‍ക്ക് പരാജയപ്പെടുത്തുകയും ചെയ്തതിലുള്ള പകപോക്കലാണ് ഷാഫി പറമ്പിലിനെതിരെ സിപിഎമ്മും ഡിവൈഎഫ്‌ഐയും തുടര്‍ന്നുകൊണ്ടിരിക്കുന്നത്. ഈ രീതി തികച്ചും അപഹാസ്യവും പ്രതിഷേധാര്‍ഹവുമാണെന്നും ഇരുവരും പറഞ്ഞു.

"മദേർസ് ഈവ്' മഹാ സംഗമം നടത്തി

കട്ടിപ്പാറ: കട്ടിപ്പാറ തിരുകുടുംബ ദേവാലയത്തിൽ ഇടവകയിലെ അമ്മമാരുടെ മഹാസംഗമം "മദേർസ് ഈവ്' നടത്തി. സിഒഡി ഡയറക്ടർ ഫാ. സായ് പാറൻകുളങ്ങര ഉദ്ഘാടനം ചെയ്തു. ഫാ. മിൽട്ടൺ മുളങ്ങശേരി, സിസ്റ്റർ വിമല, സിസ്റ്റർ ലിൻസ, കെ.യു. ബെസി, ജിൻസി തോമസ്, സുനി മേൽവെട്ടം, ബിന്ദു നാലൊന്നുകാട്ടിൽ, ജിജി കൊഴുവനാൽ എന്നിവർ പ്രസംഗിച്ചു. മാത്യു ഇമ്മാനുവൽ മേൽവെട്ടം ക്ലാസുകൾ നയിച്ചു. ട്രസ്റ്റിമാർ, കുടുംബ യൂണിറ്റ് സെക്രട്ടറിമാർ, മാതൃവേദി എക്സിക്യൂട്ടീവ് അംഗങ്ങൾ തുടങ്ങിയവർ പരിപാടികൾക്ക് നേതൃത്വം നൽകി.

ലോഗോ പ്രകാശനം ചെയ്തു

താമരശേരി: കട്ടിപ്പാറ നസ്രത്ത് യുപി സ്കൂൾ സുവർണ്ണ ജൂബിലി ആഘോഷത്തിന്‍റെ ലോഗോ കട്ടിപ്പാറ പഞ്ചായത്ത് പ്രസിഡന്‍റ് പ്രേംജി ജെയിംസ് പ്രകാശനം ചെയ്തു. സ്കൂൾ മാനേജർ ഫാ. മിൽട്ടൻ മുളങ്ങാശേരി അധ്യക്ഷത വഹിച്ചു. കൊടുവള്ളി ബ്ലോക്ക് പഞ്ചായത്ത് മെമ്പർ നിതീഷ് കല്ലുള്ളതോട്, പ്രധാന അധ്യാപിക സിസ്റ്റർ ലിൻസി തോമസ്, ഹോളി ഫാമിലി ഹൈസ്കൂൾ പ്രധാനാധ്യാപിക കെ.യു. ബെസി, നസ്രത്ത് എൽപി സ്കൂൾ പ്രധാന അധ്യാപിക ചിപ്പി രാജ് എന്നിവർ പ്രസംഗിച്ചു. 101 അംഗ സ്വാഗതം സംഘം രൂപികരിച്ചു. സ്വാഗത സംഘം ചെയർമാനായി പ്രേംജി ജെയിംസ്കൺവീനറായി സിസ്റ്റർ ലിൻസി തോമസ് എന്നിവരെ തെരഞ്ഞെടുത്തു.

പുലി സാന്നിധ്യം പ്രദേശവാസികൾക്ക് സംരക്ഷണം നൽകണമെന്ന്

കോടഞ്ചേരി: ചെമ്പുകടവിൽ പുലിയുടെ സാന്നിധ്യം സിസിടിവിയിൽ വ്യക്തമായിട്ടും വനംവകുപ്പ് നടപടി സ്വീകരിക്കാത്തതിൽ പ്രതിഷേധിച്ച് കർഷക കോൺഗ്രസ് കോടഞ്ചേരി മണ്ഡലം കമ്മിറ്റി പ്രദേശത്ത് അഗ്നിവലയം തീർത്തു. പ്രദേശവാസികൾ ഭീതിയിലാണെന്നും പുലി മലയോര മേഖലയിൽ നിരന്തരം പ്രത്യക്ഷപ്പെട്ടിട്ടും വനം വകുപ്പ് ഇരുട്ടിൽ തപ്പുകയാണെന്ന് കർഷക കോൺഗ്രസ് നേതാക്കൾ പറഞ്ഞു. പ്രതിഷേധ അഗ്നി വലയം മണ്ഡലം കോൺഗ്രസ് പ്രസിഡന്‍റ് വിൻസെന്‍റ് വടക്കേമുറിയിൽ ഉദ്ഘാടനം ചെയ്തു. കർഷക കോൺഗ്രസ് മണ്ഡലം പ്രസിഡന്‍റ് സാബു അവണ്ണൂർ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് അലക്സ് തോമസ് ചെമ്പകശേരി മുഖ്യപ്രഭാഷണം നടത്തി. ബ്ലോക്ക് കോൺഗ്രസ് കമ്മിറ്റി സെക്രട്ടറിമാരായ ജിജി എലുവാലുങ്കൽ, ബേബി കോട്ടപ്പള്ളി, ബേബി കളപ്പുര, ബേബിച്ചൻ വട്ടുകുന്നേൽ, ബിജു ഓത്തിക്കൽ, ബാലകൃഷ്ണൻ തീകുന്നേൽ, ജോർജ് പുത്തൻപുര, ജെയിംസ് അഴകത്ത് എന്നിവർ പ്രസംഗിച്ചു.

വോട്ട് അധികാർയാത്രക്ക് പിന്തുണ; യുഡിഎഫ് നൈറ്റ് മാർച്ച് നടത്തി

പേരാമ്പ്ര: ജനാധിപത്യ സംരക്ഷണത്തിനും രാജ്യത്തെ ജനങ്ങളുടെ വോട്ട് അവകാശത്തിനുമായി പ്രതിപക്ഷ നേതാവ് രാഹുൽ ഗാന്ധി നടത്തുന്ന വോട്ട് അധികാർ യാത്രക്ക് ഐക്യദാർഢ്യം പ്രകടിപ്പിച്ച് യുഡിഎഫ് ജില്ലാ കമ്മിറ്റി പേരാമ്പ്രയിൽ നൈറ്റ് മാർച്ച് സംഘടിപ്പിച്ചു. കല്ലോട് ബൈപാസ് ജംഗ്ഷനിൽ നിന്ന് ആരംഭിച്ച മാർച്ച് പേരാമ്പ്ര ബസ്റ്റ് സ്റ്റാൻഡിൽ സമാപിച്ചു. ഷാഫി പറമ്പിൽ എംപിയുടെ നേതൃത്വത്തിലാണ് മാർച്ച് നടത്തിയത്. നൂറുകണക്കിന് പ്രവർത്തകർ നൈറ്റ് മാർച്ചിൽ പങ്കാളികളായി. യുഡിഎഫ് ജില്ലാ ചെയർമാൻ കെ. ബാലനാരായണൻ, കൺവീനർ അഹമ്മദ് പുന്നക്കൽ, അഡ്വ. പ്രവീൺ കുമാർ, പാറക്കൽ അബ്ദുള്ള, സൂപ്പി നരിക്കാട്ടേരി, സത്യൻ കടിയങ്ങാട്, ടി.കെ. ഇബ്രാഹിം, ടി.പി. ചന്ദ്രൻ, കെ.എ. ജോസൂട്ടി, മുനീർ എരവത്ത്, രാജൻ മരുതേരി, കെ.കെ. വിനോദൻ, പി.കെ. രാഗേഷ്, ടി.കെ.എ. ലത്തീഫ്, സുരേഷ് വാളൂർ, എം.കെ.സി. കുട്ട്യാലി, എസ്. സുനന്ദ് എന്നിവർ നേതൃത്വം നൽകി.

ചങ്ങരോത്ത് കാട്ടുപന്നി ശല്യം രൂക്ഷം

ചങ്ങരോത്ത്: ചങ്ങരോത്ത് കാട്ടുപന്നി ശല്യം രൂക്ഷം. വലിയപറമ്പ് കോഴിക്കുന്നമ്മൽ വിനോദന്‍റെ കൃഷിയിടത്തിൽ കാട്ടുപന്നിയിറങ്ങി കൃഷി നശിപ്പിച്ചു. നട്ടു പരിപാലിക്കുന്ന വാഴ അടക്കമുള്ളവയാണ് തകർത്തത്. വർഷങ്ങളായി മേഖലയിലെ ജനങ്ങൾ അനുഭവിക്കുന്ന വന്യമൃഗ ശല്യത്തിന് ഒരു നടപടിയും ഗ്രാമപഞ്ചായത്തോ, കൃഷി-വനം വകുപ്പോ എടുക്കുന്നില്ലെന്ന് വ്യാപക പരാതിയുണ്ട്. ഒരു രൂപ പോലും നഷ്ടപരിഹാരമായി കർഷകന് ഇവിടെ ലഭിക്കുന്നില്ലെന്നും ആക്ഷേപമുണ്ട്.

അപകടാവസ്ഥയിലുള്ള മരകൊമ്പ് മുറിച്ചു നീക്കി

കൊയിലാണ്ടി: അപകടാവസ്ഥയിലുള്ള മരക്കൊമ്പ് മുറിച്ചുമാറ്റി. ഇന്നലെ രാവിലെ ഒന്പതോടെയാണ് കൊയിലാണ്ടി ബപ്പങ്ങാട് ജംഗ്ഷനിൽ മരക്കൊമ്പ് പൊട്ടി അപകടാവസ്ഥയിലായത്. തുടർന്ന് കൊയിലാണ്ടിയിൽ നിന്നും സീനിയർ ഫയർ ആൻഡ് റെസ്ക്യു ഓഫീസർ ബി.കെ. അനൂപിന്‍റെ നേതൃത്വത്തിൽ അഗ്നിരക്ഷാസേന എത്തുകയും മരത്തിൽ കയറി പൊട്ടിയ മരകൊമ്പ് മുറിച്ച് മാറ്റുകയുമായിരുന്നു.

മൈജിയിൽ വിലക്കുറവുമായി രാപകൽ സെയിൽ

കോഴിക്കോട്: മൈജി ഓണം മാസ് ഓണത്തിനൊപ്പം ഗാഡ്ജറ്റ്‌സിലും അപ്ലയൻസസിലും മാസ് വിലക്കുറവിന്‍റെ രാവും പകലും സെയിൽ ഇന്നും നാളെയുമായി നടക്കും. കസ്റ്റമേഴ്‌സിന്‍റെ തിരക്ക് കാരണം കൂടുതൽ സൗകര്യപ്രദമായ പർച്ചേസൊരുക്കുവാൻ മൈജി ഫ്യൂച്ചർ ഷോറൂമുകൾ രാത്രി 12 വരെ തുറന്ന് പ്രവർത്തിക്കുന്നു എന്നുള്ളതാണ് സെയിലിന്‍റെ പ്രത്യേകത. ഓണം ഇഎംഐ ഓഫറിൽ 30, 000 രൂപ വരെ കാഷ് ബാക്ക്, 12 000 രൂപ വരെ ഇൻസ്റ്റന്‍റ് ഡിസ്‌കൗണ്ട്, ഒരു ഇഎംഐ സൗജന്യം എന്നിങ്ങനെ ഓഫറുകൾ ലഭ്യമാണ്. രാവും പകലും സെയിലിന്‍റെ ഭാഗമായി ഐ ഫോൺ 15 നൊപ്പം ആപ്പിൾ അഡാപ്റ്റർ, മൈജിയുടെ ഒരു വർഷ പ്രൊട്ടക്ഷൻ പ്ലാനും 2 വർഷ എക്‌സ്ട്രാ വാറന്‍റിയും ലഭിക്കും. കൂടാതെ 5,000 രൂപ ബാങ്ക് കാഷ് ബാക്കും ഉണ്ട്. ടെക്നോ 5ജി സ്മാർട്ട്‌ഫോൺ വെറും 8,888 രൂപക്ക് വാങ്ങാൻ അവസരമുള്ളപ്പോൾ മൈജിയുടെ കില്ലർ പ്രൈസിൽ റെഡ്മി പാഡ് സ്വന്തമാക്കാം. മൊബൈൽ ഫോണുകളിൽ കേരളത്തിലെ ഏറ്റവും വലിയ റീട്ടെയിലർ മൈജിയാണ്. ഇക്കാരണത്താൽ ഏറ്റവും കുറഞ്ഞ വിലകളും ഓഫറുകളും നൽകാൻ മൈജിയ്ക്ക് കഴിയുന്നു. കൂടാതെ ടിവി, ലാപ്‌ടോപ്പ്, ഏസി, വാഷിംഗ് മെഷീൻ, റെഫ്രിജറേറ്റർ, കിച്ചൺ ആൻഡ് സ്മോൾ അപ്ലയൻസസ് എന്നിവയ്ക്കെല്ലാം മൈജിയിൽ വന്പിച്ച വിലകുറവാണുള്ളത്.‌ ഓണം പ്രമാണിച്ച് മൈജി കെയറിലും ഓഫറുകളുണ്ട്. വീട്ടിലെത്തി റിപ്പയർ ചെയ്യാൻ 7994 111 666 എന്ന നമ്പറിൽ വിളിക്കാവുന്നതാണ്.

കാട്ടുപന്നി ആക്രമണം രൂക്ഷം : കാട്ടു പന്നി ആക്രമണത്തിൽ യുവാവിന് പരിക്ക്

നാദാപുരം: അരൂർ നടേമ്മലിൽ വീണ്ടും കാട്ടു പന്നി ആക്രമണത്തിൽ യുവാവിന് പരിക്ക്. അരൂർ നടേമ്മലിലെ പൂവന്‍റവിട റിഫാദിനെ (22) യാണ് കാട്ടു പന്നി ആക്രമിച്ചത്. ഇയാൾ കോഴിക്കോട് മെഡിക്കൽ കോളജ് ആശുപത്രിയിൽ ചികിത്സ തേടി. രാത്രി വീട്ടിലേക്ക് ബൈക്കിൽ പോകുന്നതിനിടയിൽ അരൂർ നടേമ്മൽ തൈക്കണ്ടി മുക്ക് -കുയ്യടി മുക്ക് റോഡിൽ വച്ചാണ് പന്നി ആക്രമിച്ചത്. ഈ പ്രദേശത്ത് തന്നെ നിരവധി പേർക്ക് നേരത്തെ കാട്ട് പന്നി ആക്രമണത്തിൽ പരിക്കേറ്റിരുന്നു. ബാംഗ്ലൂരിൽ ബിരുദാനന്തര വിദ്യാർഥിയാണ് റിഫാദ്. നിരവധി തവണ പഞ്ചായത്തിൽ പരാതിപ്പെട്ടിട്ടും നടപടികളുണ്ടായിട്ടില്ലെന്ന് നാട്ടുകാർ പറയുന്നു. ഏറെ കാലമായി അരൂർ കല്ലുമ്പുറം ഹരിത വയൽ, കല്ലുമ്പുറം, പെരുമുണ്ടച്ചേരി ഭാഗങ്ങളിൽ നിരവധി പേരുടെ കൃഷി നശിപ്പിച്ചിട്ടുണ്ട്. കായപ്പനിച്ചിയിലെ രശ്മി കുമാരന്‍റെ നിരവധി വാഴകൾ കാട്ടു പന്നി നശിപ്പിച്ച ു . വര്‍ഷങ്ങളായി വാഴകൃഷി ചെയ്യുന്ന കുമാരന്‍റെ നിരവധി വാഴകള്‍ വെള്ളം കയറി നശിച്ചിരുന്നു. ഇതിന് പിന്നാലെയാണ് കാട്ടുപന്നികള്‍ കൂടി കൃഷിനശിപ്പിക്കാൻ തുടങ്ങിയത്. കുലക്കാറായ 50 ലേറെ വാഴകളാണ് പന്നികള്‍ നശിപ്പിച്ചത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]