ADVERTISEMENT

ADVERTISEMENT

അമ്മയുടെ പേരിൽ ഒരു മരം

വെള്ളമുണ്ട: പബ്ലിക് ലൈബ്രറി, മേരാ യുവഭാരത് വയനാട്, ഹയർ സെക്കൻഡറി സ്കൂൾ എൻഎസ്എസ് യൂണിറ്റ് എന്നിവയുടെ സംയുക്താഭിമുഖ്യത്തിൽ അമ്മയുടെ പേരിൽ ഒരു മരം പരിപാടി നടത്തി.

ബ്ലോക്ക് പഞ്ചായത്ത് അംഗം വി. ബാലൻ ഉദ്ഘാടനം ചെയ്തു. ലൈബ്രറി പ്രസിഡന്‍റ് എം. സുധാകരൻ അധ്യക്ഷത വഹിച്ചു. ഹയർ സെക്കൻഡറി സ്കൂൾ എൻഎസ്എസ് പ്രോഗ്രാം ഓഫീസർ ആർ. രേഖ, മേരാ യുവഭാരത് പ്രതിനിധി കെ.എ. അഭിജിത്ത്, എം. മോഹനകൃഷ്ണൻ, അഞ്ജു ജോസഫ്, ലൈബ്രറി സെക്രട്ടറി എം. മണികണ്ഠൻ , എൻഎസ്എസ് വോളണ്ടിയർ മുഹമ്മദ് യസീം എന്നിവർ പ്രസംഗിച്ചു.

ADVERTISEMENT

ബ്യൂട്ടീഷ്യൻമാരുടെ സംഗമം നടത്തി

മേപ്പാടി: ഡോ.മൂപ്പൻസ് മെഡിക്കൽ കോളജ് ഡെർമറ്റോളജി വിഭാഗം ബ്യൂട്ടീഷ്യൻസ് യുണൈറ്റഡ്-2025 എന്ന പേരിൽ ജില്ലയിലെ ബ്യൂട്ടീഷ്യൻമാരുടെ സംഗമം നടത്തി. ബ്യൂട്ടീഷ്യൻമാരുടെ തൊഴിൽ അറിവും വൈദഗ്ധ്യവും വർധിപ്പിക്കുന്നതിനാണ് പരിപാടി സംഘടിപ്പിച്ചത്. കോളജ് എക്സിക്യുട്ടീവ് ട്രസ്റ്റി യു. ബഷീർ ഉദ്ഘാടനം ചെയ്തു. ബ്യൂട്ടീഷ്യൻമാർക്കും കുടുംബാംഗങ്ങൾക്കും ചികിത്സ ആനുകൂല്യം ലഭ്യമാക്കുന്ന സ്പെഷൽ പ്രവിലേജ് കാർഡ് വിതരണം അദ്ദേഹം നിർവഹിച്ചു. ബ്യൂട്ടീഷ്യൻസ് അസോസിയേഷൻ ജില്ലാ പ്രസിഡന്‍റ് രേഖ, സെക്രട്ടറി ധന്യ എന്നിവർ കാർഡുകൾ ഏറ്റുവാങ്ങി. പ്രിൻസിപ്പൽ ഡോ. എലിസബത്ത് ജോസഫ്, അഡീഷണൽ മെഡിക്കൽ സൂപ്രണ്ട് ഡോ. അരുണ്‍ അരവിന്ദ്, ജനറൽ മെഡിസിൻ വിഭാഗം മേധാവി ഡോ. സാറ ചാണ്ടി, ഡെപ്യൂട്ടി ജനറൽ മാനേജർമാരായ സൂപ്പി കല്ലങ്കോടൻ, ഡോ. ഷാനവാസ് പള്ളിയാൽ എന്നിവർ പങ്കെടുത്തു. ഡെർമറ്റോളജി വിഭാഗം മേധാവി ഡോ.ജയദേവ് ബി. ബെഡ്കരൂർ, അസോസിയറ്റ് പ്രഫ.ഡോ.പമേല തെരേസ ജോസഫ്, സീനിയർ റസിഡന്‍റ് ഡോ.കെ.വി. അനഘ എന്നിവർ വിവിധ വിഷയങ്ങളിൽ ക്ലാസ് നൽകി.

നാക് എ ഗ്രേഡ് നേട്ടവുമായി കൽപ്പറ്റ എൻഎംഎസ്എം ഗവ. കോളജ്

കൽപ്പറ്റ: നാക് അക്രഡിറ്റേഷനിൽ എ ഗ്രേഡ് നേട്ടവുമായി കൽപ്പറ്റ എൻഎംഎസ്എം ഗവ. കോളജ്. പട്ടികജാതി-വർഗ-പിന്നാക്കക്ഷേമ മന്ത്രി ഒ.ആർ. കേളു ഇതുസംബന്ധിച്ച ഔദ്യോഗിക പ്രഖ്യാപനം നടത്തി. ഉന്നത വിദ്യാഭ്യാസ രംഗത്തെ മാറ്റങ്ങൾ ഉൾക്കൊണ്ട് എല്ലാ കോളജുകളിലും സർവകലാശാലകളിലും നൈപുണി വികസന കേന്ദ്രങ്ങൾ സർക്കാർ നടപ്പാക്കുമെന്ന് മന്ത്രി പറഞ്ഞു. നാക് സംഘം കോളജിലെ പ്രധാന പഠന വകുപ്പുകൾ, ജൈവ വൈവിധ്യ ഉദ്യാനങ്ങൾ, സൗരോർജ പദ്ധതി, വിവിധ ലാബുകൾ, മീഡിയ സ്റ്റുഡിയോ, ജിംനേഷ്യം, ഭാഷ ലാബ്, ബാംബു ഗാർഡൻ, ബട്ടർഫ്ളൈ ഗാർഡൻ തുടങ്ങിയവ സന്ദർശിച്ചിരുന്നു. കോളജിലെ വിദ്യാർഥികളുടെ ബൗദ്ധിക വളർച്ചയോടൊപ്പം സാമൂഹിക പ്രതിബദ്ധത പരിപോഷിപ്പിക്കാൻ വിഭാവനം ചെയ്ത സതീർഥ്യ, സഹവർത്തിത്വ എന്നീ പ്രവർത്തനങ്ങൾ ബെസ്റ്റ് പ്രാക്ടീസെസ് എന്ന നിലയിൽ സംഘത്തിന്‍റെ ശ്രദ്ധ ആകർഷിച്ചിരുന്നു. ഇ ഊര് വായന കൂട്ടം, സ്പീക്ക് ഔട്ട് ചർച്ച, ഓണസ്റ്റി സെൽഫ് സർവീസ് ഷോപ്പ്, ഗോത്ര വിഭാഗങ്ങൾക്കായുള്ള പഠന സഹായ പ്രവർത്തനങ്ങൾ, ഡിജിക്ലിനിക് പ്രവർത്തനങ്ങൾ എന്നിവ സംഘടിപ്പിച്ചു. നേരത്തെ ഓണ്‍ലൈനായി സമർപ്പിച്ച രേഖകളും സന്ദർശനവും കണക്കിലെടുത്താണ് കോളജിന് ഗ്രേഡ് ലഭിച്ചത്. നാക് സന്ദർശനത്തോടനുബന്ധിച്ച് ഒരു കോടി രൂപയുടെ വികസനപ്രവർത്തനങ്ങളാണ് സർക്കാർ കോളജിൽ നടത്തിയത്. പ്രിൻസിപ്പൽ ഡോ. സുബിൻ പി. ജോസഫ് അധ്യക്ഷത വഹിച്ചു. അധ്യാപകരായ ഡോ.എം.എസ്. രാജി മോൾ, ഡോ.കെ. രാഹുൽ, വർഗീസ് ആന്‍റണി തുടങ്ങിയവർ പ്രസംഗിച്ചു.

നിർമാണ മേഖലയിലെ പ്രതിസന്ധി: സെക്രട്ടേറിയറ്റ് പടിക്കൽ പഞ്ചദിന സത്യഗ്രഹവുമായി പിബിസിഎ

കൽപ്പറ്റ: നിർമാണ മേഖലയിലെ പ്രതിസന്ധിക്ക് പരിഹാരം തേടി പ്രൈവറ്റ് ബിൽഡിംഗ് കോണ്‍ട്രാക്ടേഴ്സ് അസോസിയേഷന്‍റെ നേതൃത്വത്തിൽ 28 മുതൽ ഓഗസ്റ്റ് ഒന്ന് വരെ സെക്രട്ടേറിയറ്റ് പടിക്കൽ സത്യഗ്രഹം നടത്തും. കരാറുകാർക്ക് ലൈസൻസ് അനുവദിക്കുക, പുഴകളിലും നദികളിലും മണൽവാരൽ ആരംഭിക്കുക, സൈറ്റ് ഇൻഷ്വറൻസ് പദ്ധതി നടപ്പാക്കുക, കെ സ്മാർട്ടിലെ അപാകതകൾ പരിഹരിക്കുക, നിർമാണത്തൊഴിലാളികൾക്ക് പെൻഷൻ കുടിശിക സഹിതം അനുവദിക്കുക തുടങ്ങിയ ആവശ്യങ്ങൾ ഉന്നയിച്ചാണ് സമരം. ഒരോ മേഖലകളിൽനിന്നുള്ള കരാറുകാരാണ് വിവിധ ദിവസങ്ങളിൽ സത്യഗ്രഹം അനുഷ്ഠിക്കുക. ആദ്യദിവസം സത്യഗ്രഹത്തിൽ ജില്ലയിൽനിന്നു 25 പേർ പങ്കെടുക്കുമെന്ന് ജില്ലാ സെക്രട്ടറി എൻ.വി. ബാബു, രക്ഷാധികാരി മമ്മീസ മേപ്പാടി, രക്ഷാധികാരി സി.സി. ഏബ്രഹാം, ജില്ലാ കമ്മിറ്റിയംഗം പി.പി. ബെന്നി എന്നിവർ വാർത്താസമ്മേളനത്തിൽ അറിയിച്ചു. ലാഭകരമല്ലാത്തതായി നിർമാണ മേഖല മാറി. പുതിയ കെട്ടിടങ്ങൾ, ഫ്ളാറ്റുകൾ, ബഹുനില വീടുകൾ എന്നിവയുടെ നിർമാണം നാമമാത്രമാണ്. പ്രവാസികളടക്കം നിർമാണ മേഖലയിൽ നിക്ഷേപത്തിനു തയാറാകുന്നില്ല. സാമഗ്രികളുടെ ലഭ്യതക്കുറവും വിലക്കയറ്റവും നിർമാണ മേഖല നേരിടുന്ന മുഖ്യ പ്രശ്നമാണ്. കർണാടകയിൽനിന്നും മറ്റും ഇറക്കുന്ന മണലിന് ഗുണനിലവാരം കുറവാണ്. നിലവാരമില്ലാത്ത മണലും മറ്റും ഉപയോഗിച്ചുള്ള നിർമാണം കെട്ടിടങ്ങളുടെയും വീടുകളുടെയും ആയുസ് കുറയ്ക്കുകയാണ്. നിർമാണം നടന്ന് ഏറെക്കഴിയുംമുന്പ് വീടുകൾ ചോർന്നൊലിക്കുന്നത് അപൂർവതയല്ല. പുഴകളിലെയും നദികളിലെയും മണൽ ശേഖരിച്ച് നിർമാണത്തിന് ലഭ്യമാക്കിയാൽ ഈ അവസ്ഥയ്ക്കു മാറ്റമാകും. നിർമാണ സാമഗ്രികളുടെ ഗുണനിലവാരം ഉറപ്പുവരുത്താനും വില നിയന്ത്രിക്കാനും ഔദ്യോഗിക സംവിധാനം ഉണ്ടാകണം. കരാറുകാർക്ക് ലൈസൻസ് അനുവദിക്കുമെന്ന വാഗ്ദാനം അധികൃതർ പാലിക്കുന്നില്ല. പരിചയസന്പത്ത് മുഖ്യ മാനദണ്ഡമാക്കി ലൈസൻസ് അനുവദിക്കുന്നത് നിർമാണ മേഖലയ്ക്ക് ഗുണം ചെയ്യും. നിർമാണ ഇടങ്ങളിൽ തൊഴിലാളികൾ അപകടങ്ങൾ നേരിടേണ്ടിവരുന്നുണ്ട്. സൈറ്റ് ഇൻഷ്വറൻസ് ഏർപ്പെടുത്തുന്നത് തൊഴിലാളികൾക്കും കരാറുകാർക്കും കെട്ടിടം ഉടമയ്ക്കും ഗുണകരമാണ്. അപകടത്തിൽപ്പെടുന്ന തൊഴിലാളികളെ കരാറുകാർ ആശുപത്രിയിൽ എത്തിക്കുകയും ചികിത്സിക്കുകയും ചെയ്യേണ്ട സ്ഥിതിയാണ് നിലവിൽ. ക്ഷേമ പെൻഷൻ കുടിശികയാകുന്നത് ജോലിയിൽനിന്നു വിരമിച്ച തൊഴിലാളികൾക്ക് വലിയ പ്രയാസം സൃഷ്ടിക്കുകയാണെന്നും പിബിസിഎ ഭാരവാഹികൾ പറഞ്ഞു.

ടൗണ്‍ഷിപ്പിലെ മാതൃക വീടിന്‍റെ നിർമാണം അവസാനഘട്ടത്തിൽ

കൽപ്പറ്റ: എൽസ്റ്റണ്‍ എസ്റ്റേറ്റിൽ തയാറാകുന്ന ടൗണ്‍ഷിപ്പിലെ മാതൃക വീടിന്‍റെ നിർമാണ പ്രവൃത്തി അവസാനഘട്ടത്തിൽ. വീടിന്‍റെ നിലം ഒരുക്കൽ പൂർത്തീകരിച്ച് ടൈൽസ് പാകുന്ന പ്രവൃത്തി ആരംഭിച്ചിട്ടുണ്ട്. ടൗണ്‍ഷിപ്പിൽ ഒരുങ്ങുന്ന മാതൃക വീടിന്‍റെ നിർമാണം 30 ഓടെ പൂർത്തീകരിക്കും. ശുചിമുറി, സിറ്റൗട്ട്, അടുക്കള സ്ലാബ് സ്ഥാപിക്കൽ പ്രവൃത്തികളാണ് ഇനി ചെയ്യാനുള്ളത്. കാലാവസ്ഥ അനുകൂലമെങ്കിൽ വീടിന്‍റെ പെയിന്‍റിംഗ് ഇന്ന് ആരംഭിക്കുമെന്ന് ഊരാളുങ്കൽ ലേബർ സൊസൈറ്റി പ്രതിനിധികൾ അറിയിച്ചു. ജില്ലയിൽ തുടർച്ചയായി പെയ്യുന്ന മഴയിൽ വീടിന്‍റെ ചുമരുകൾ നനയുന്നത് പെയിന്‍റിംഗിന് പ്രതിസന്ധിയാവുകയാണ്. ഹീറ്റർ ഉപകരണങ്ങൾ ഉപയോഗിച്ച് ചുമർ ചൂടാക്കിയശേഷം ചുമരിൽ പുട്ടിയും പെയിന്‍റും അടിക്കാനാണ് തീരുമാനം. 1000 ചതുരശ്രയടിയിലിൽ ഒറ്റ നിലയിൽ പണി തീരുന്ന വീടിന് ഭാവിയിൽ ഇരുനില നിർമിക്കാനുള്ള അടിത്തറയോടെയാണ് തയാറാക്കിയത്. കിടപ്പുമുറി, രണ്ട് മുറികൾ, സിറ്റൗട്ട്, ലിവിംഗ്, സ്റ്റഡി റൂം, ഡൈനിംഗ്, അടുക്കള, സ്റ്റോർ ഏരിയ എന്നിവയാണ് മാതൃക വീട്ടിൽ ഉള്ളത്.

വന്യമൃഗശല്യം: കുറിച്യാട് റേഞ്ച് ഓഫീസിലേക്ക് കർഷകസംഘം മാർച്ച് നടത്തി

സുൽത്താൻ ബത്തേരി: ചെതലയം മേഖലയിലെ വന്യമൃഗ ആക്രമണത്തിന് പരിഹാരം ആവശ്യപ്പെട്ട് കർഷകസംഘം ചെതലയം വില്ലേജ് കമ്മിറ്റിയുടെ നേതൃത്വത്തിൽ മാർച്ച് നടത്തി. ആറാംമൈലിൽ നിന്ന് പ്രതിഷേധവുമായി എത്തിയ പ്രവർത്തകരെ ചെതലയത്ത് കുറിച്യാട് റേഞ്ച് ഓഫീസിനുമുന്നിൽ പോലീസ് തടഞ്ഞു. പ്രവർത്തകർ വലയംഭേദിച്ച് ഉള്ളിൽകയറാൻ ശ്രമിച്ചത് വാക്കേറ്റത്തിലും ഉന്തിലും തള്ളിലും കലാശിച്ചു. സിഐടിയു ജില്ലാസെക്രട്ടറി വി.വി. ബേബി ഉദ്ഘാടനം ചെയ്തു. സമരസമിതി ചെയർമാൻ പി.ഒ. ജോയി അധ്യക്ഷത വഹിച്ചു. കർഷകസംഘം ഏരിയ സെക്രട്ടറി ടി.കെ. ശ്രീജൻ, ലിജോ ജോണി, വി.പി. സുഹാസ്, കൗണ്‍സിലർമാരായ എ.ആർ. ജയകൃഷ്ണൻ, പി.ആർ. നിഷ, സമരസമിതി കണ്‍വീനർ സി.കെ. സത്യരാജ് എന്നിവർ പ്രസംഗിച്ചു. റേഞ്ച് ഓഫീസറുമായി ചർച്ചനടത്തിയെങ്കിലും നേതാക്കൾ മുന്നോട്ടുവച്ച കാര്യങ്ങളിൽ കൃത്യമായ മറുപടി ലഭിക്കാതായതോടെ റേഞ്ച് ഓഫീസറെ തടഞ്ഞുവച്ചു. തുടർന്ന് വയനാട് വന്യജീവിസങ്കേതം മേധാവിയുമായി സമരനേതാക്കൾ ഫോണിൽ ചർച്ചനടത്തി. കഴിഞ്ഞദിവസം കാട്ടാന ആക്രമണത്തിൽ പരിക്കേറ്റ ചെതലയം അടിവാരം തേലാക്കാട്ട് ശിവന് അടിയന്തര ധനസഹായമായി പതിനായിരം രൂപ നൽകും. തുടർചികിത്സ സഹായം നൽകും. ബത്തേരി-പുൽപ്പള്ളി സംസ്ഥാന പാതയ്ക്ക് ഇരുവശവുമുളള അടിക്കാട് ആറ് ദിവസത്തിനകം വെട്ടിമാറ്റും, പട്രോളിംഗ് ശക്തമാക്കും, വനാതിർത്തിയിലെ കിടങ്ങ്, തൂക്ക് വേലി സംവിധാനങ്ങൾ കാര്യക്ഷമമാക്കുമെന്ന ഉറപ്പിലാണ് പ്രതിഷേധം അവസാനിപ്പിച്ചത്.

ലോക ഒആർഎസ് വാരം ആചരിച്ചു

കൽപ്പറ്റ: ഇന്ത്യൻ അക്കാദമി ഓഫ് പീഡിയാട്രിക്സിന്‍റെയും ജില്ലാ ഗവ. മെഡിക്കൽ കോളജിന്‍റെയും ആഭിമുഖ്യത്തിൽ ലോക ഒആർഎസ് വാരം ആചരിച്ചു. ഡെപ്യൂട്ടി ഡിഎംഒ ഡോ. ആൻസി മേരി ജേക്കബ് ഉദ്ഘാടനം ചെയ്തു. വയറിളക്ക മരണങ്ങൾ തടയുന്നതിൽ ഒആർഎസിനുള്ള പ്രാധാന്യത്തെക്കുറിച്ച് പൊതുജനങ്ങളിലും വിദ്യാർഥികളിലും ജീവനക്കാരിലും അവബോധം സൃഷ്ടിക്കുക എന്ന ലക്ഷ്യത്തോടെയാണ് പരിപാടി സംഘടിപ്പിച്ചത്. സിപ്പ് സ്മാർട്ട് സ്റ്റേ സ്ട്രോംഗ് സെ യെസ് ടു ഒആർഎസ് എന്നതാണ് ഈ വർഷത്തെ മുദ്രാവാക്യം. ബോധവത്കരണ ക്ലാസിനെ തുടർന്ന് നഴ്സിംഗ് വിദ്യാർഥികൾക്കായി ക്വിസ് മത്സരം, പോസ്റ്റർ രചന മത്സരം എന്നിവ നടത്തി. മത്സര വിജയികൾക്ക് സമ്മാനം വിതരണം ചെയ്തു. ഇന്ത്യൻ അക്കാദമി ഓഫ് പീഡിയാട്രിക്സ് പ്രസിഡന്‍റ് ഡോ. ചന്ദ്രശേഖരൻ അധ്യക്ഷത വഹിച്ചു. പീഡിയാട്രിക്ക് വകുപ്പ് തലവൻ ഡോ. വിനോദ് കുമാർ, ആർസിഎച്ച് ഓഫീസർ ഡോ. ജെറിൻ എസ്. ജെറോഡ്, ഡെപ്യൂട്ടി സൂപ്രണ്ടന്‍റ് ഡോ. മൃദുലാൽ, ഡോ. ഹൈറുന്നീസ, നഴ്സിംഗ് സൂപ്രണ്ടന്‍റ് ബിനി മോൾ തോമസ് എന്നിവർ പ്രസംഗിച്ചു.

കാട്ടാന പരിഭ്രാന്തി പരത്തി

ഗൂഡല്ലൂർ: നെല്ലാക്കോട്ട പഞ്ചായത്തിലെ പാട്ടവയൽ നെല്ലാക്കണ്ണിയിൽ കാട്ടാന പരിഭ്രാന്തി പരത്തി. റോഡിന് സമീപം നിർത്തിയിട്ട ബൈക്ക് ആന ഭാഗികമായി കേടുവരുത്തി. ഇന്നലെ പുലർച്ചെയാണ് ആന ജനവാസ മേഖലയിൽ ഇറങ്ങിയത്. നെല്ലാക്കണ്ണിക്കടുത്ത് വനമുണ്ട്. പ്രഭാത സവാരിക്ക് ഇറങ്ങിയവർ ആനയെ കണ്ട് ഓടി രക്ഷപ്പെട്ടു. ആനശല്യം പരിഹരിക്കണമെന്ന് പ്രദേശവാസികൾ ആവശ്യപ്പെട്ടു.

പാടന്തറയിലെ വന്യജീവി ശല്യം: കളക്ടർക്ക് നിവേദനം നൽകി

ഗൂഡല്ലൂർ: ദേവർഷോല പഞ്ചായത്തിലെ പാടന്തറ മേഖലയിൽ വർധിച്ച വന്യജീവി ശല്യത്തിന് പരിഹാരം തേടി നാട്ടുകാർ ജില്ലാ കളക്ടർ ലക്ഷ്മി ഭവ്യതന്നീറുവിന് നിവേദനം നൽകി. മക്കളിൻ ഉരുമൈകുറൽ വാട്സാപ്പ് കൂട്ടായ്മയാണ് നിവേദനം നൽകിയത്. എംഎൽഎ അഡ്വ.പൊൻ ജയശീലൻ, വിജയകുമാർ, റിൻഷാദ് പാടന്തറ തുടങ്ങിയവർ ഉൾപ്പെടുന്നതായിരുന്നു നിവേദകസംഘം. പാടന്തറ, കെണിയംവയൽ, ത്രീ ഡിവിഷൻ, മാരക്കര, ആലവയൽ, ചെളുക്കാടി, സർക്കാർമൂല ഭാഗങ്ങളിൽ ഭീതി പരത്തുന്ന കാട്ടാനകളെ ഉൾവനത്തിലേക്ക് തുരത്തുക, വനമേഖലയിൽ നിരന്തരം എത്തുന്ന കടുവയെ കൂടുവച്ച് പിടിക്കുക, വനാതിർത്തികളിൽ കിടങ്ങ് നിർമിക്കുക, സോളാർ വേലികൾ സ്ഥാപിക്കുക തുടങ്ങിയ ആവശ്യങ്ങൾ നിവേദനത്തിലുണ്ട്. പ്രശ്ന പരിഹാരത്തിന് ഇടപെടുമെന്ന് കളക്ടർ ഉറപ്പുനൽകിയതായി എംഎൽഎ പറഞ്ഞു.

മരിയനാട് എസ്റ്റേറ്റ് തൊഴിലാളികൾക്കുള്ള നഷ്ടപരിഹാരവിതരണം ആരംഭിച്ചു

പുൽപ്പള്ളി: ഇരുളം മരിയനാട് എസ്റ്റേറ്റ് തൊഴിലാളികൾക്കുള്ള നഷ്ടപരിഹാര തുക വയനാട് പാക്കേജിലുൾപ്പെടുത്തി വിതരണം ചെയ്യുന്നതിന്‍റെ വിതരണോദ്ഘാടനം നടത്തി. ഇരുളം രാഗം ഓഡിറ്റോറിയത്തിൽ ഇന്നലെ നടന്ന പരിപാടി പട്ടികജാതി-വർഗ-പിന്നാക്കക്ഷേമ മന്ത്രി ഒ.ആർ. കേളു ഉദ്ഘാടനം ചെയ്തു. ആകെയുള്ള 141 തൊഴിലാളികൾക്ക് അക്കൗണ്ട് വഴിയാണ് പണം ലഭിക്കുക. സുൽത്താൻ ബത്തേരി ഇരുളം വില്ലേജിൽ കേരള ഫോറസ്റ്റ് ഡവലപ്മെന്‍റ് കോർപറേഷന്‍റെ ഉടമസ്ഥതയിലുണ്ടായിരുന്നതും പിന്നീട് പ്രവർത്തനം നിർത്തലാക്കിയതുമായ മരിയനാട് എസ്റ്റേറ്റിലെ തൊഴിൽ നഷ്ടപ്പെട്ട 141 തൊഴിലാളികൾക്ക് നഷ്ടപരിഹാരം നൽകുന്നതിനായി വയനാട് വികസന പാക്കേജിൽ ഉൾപ്പെടുത്തി മരിയനാട് പുനരധിവാസ പദ്ധതി പ്രകാരം അഞ്ച് കോടി രൂപയാണ് അനുവദിച്ചത്. സർക്കാർ നിയമങ്ങളുടെയും ഉത്തരവുകളുടെയും അടിസ്ഥാനത്തിൽ തൊഴിലാളി നിയമ പ്രകാരം ജീവനക്കാരുടെ സർവീസ് അനുസരിച്ചാണ് ആനുകൂല്യ തുക വിതരണം ചെയ്തത്. ബന്ധപ്പെട്ട വകുപ്പ് പുറപ്പെടുവിച്ച മാനദണ്ഡങ്ങൾക്കനുസൃതമായി തൊഴിലാളികൾ നഷ്ടപരിഹാരത്തിന് യോഗ്യരാണെന്ന് സ്ഥിരീകരിച്ചിരുന്നു. സംസ്ഥാന ആസൂത്രണ ബോർഡിന്‍റെ നേതൃത്വത്തിൽ വയനാട് വികസന പാക്കേജിൽ ഉൾപ്പെടുത്തി അഞ്ചു കോടി രൂപയുടെ പദ്ധതികൾക്ക് ഭരണാനുമതി നൽകുന്നതിനായി ജില്ലാ കളക്ടറുടെ അധ്യക്ഷതയിൽ പ്രോജക്ട് ഇംപ്ലിമെന്‍റേഷൻ യൂണിറ്റ് രൂപീകരിച്ചിരുന്നു. മരിയനാട് എസ്റ്റേറ്റ് 2004ൽ പ്രവർത്തനം അവസാനിപ്പിച്ചതോടെ ഇവിടെ ജോലി ചെയ്ത തൊഴിലാളികൾക്ക് ജോലി നഷ്ടപ്പെട്ടു. തൊഴിലാളികളുടെ ഗ്രാറ്റുവിറ്റി, പിരിച്ചുവിടൽ നഷ്ടപരിഹാരം, ഇതുവരെയുള്ള പലിശ എന്നിവ നൽകാനാണ് വയനാട് പാക്കേജിൽ തുക അനുവദിച്ചത്. ഓരോ വർഷം സേവനം ചെയ്തതിന് 15 ദിവസത്തെ വേതന നിരക്കിൽ പിരിച്ചുവിടൽ നഷ്ടപരിഹാരവും ഗ്രാറ്റുവിറ്റിയും കണക്കാക്കി. പിരിച്ചുവിടൽ നഷ്ട പരിഹാരം തുക 2005 മുതൽ 10 ശതമാനം പലിശയും 15 ശതമാനം ഗ്രാറ്റുവിറ്റി പലിശയും കണക്കാക്കിയാണ് നൽകിയത്. ജീവനക്കാരുടെ ഹാജർ രേഖകൾ, ഇപിഎഫ് വിവരങ്ങൾ എന്നിവ അടിസ്ഥാനമാക്കിയാണ് തുക തിട്ടപ്പെടുത്തിയത്. എസ്റ്റേറ്റിൽ ഒൻപത് വർഷം സേവനം പൂർത്തിയാക്കിയ 136 ജീവനക്കാരും അഞ്ചുവർഷം പൂർത്തിയാക്കിയ രണ്ടു ജീവനക്കാരും ഒരു വർഷം പൂർത്തിയാക്കിയ ഒരു ജീവനക്കാരനും രണ്ട് താത്കാലിക ജീവനക്കാരുമാണ് ആനുകൂല്യത്തിന് അർഹരായത്. ഇതിൽ 21 പേർ മരണപ്പെട്ടു. ഐ.സി. ബാലകൃഷ്ണൻ എംഎൽഎ അധ്യക്ഷനായ പരിപാടിയിൽ പനമരം ബ്ലോക്ക് പഞ്ചായത്ത് പ്രസിഡന്‍റ് ഗിരിജ കൃഷ്ണൻ, പൂതാടി ഗ്രാമപഞ്ചായത്ത് പ്രസിഡന്‍റ് മിനി കൃഷ്ണൻ, ജില്ലാ കളക്ടർ ഡി.ആർ. മേഘശ്രീ, ഡെപ്യൂട്ടി പ്ലാനിംഗ് ഓഫീസർ കെ.എസ്. ശ്രീജിത്ത്, ജില്ലാ ലേബർ ഓഫീസർ സി. വിനോദ് കുമാർ, വിവിധ തൊഴിലാളി യൂണിയൻ പ്രതിനിധികൾ, ഉദ്യോഗസ്ഥർ, ജനപ്രതിനിധികൾ എന്നിവർ പങ്കെടുത്തു.

ചുഴലി മിൽമ പ്ലാന്‍റിനു മുന്പിൽ ക്ഷീര കർഷകരുടെ ധർണ 29ന്

കൽപ്പറ്റ: മലബാർ ഡയറി ഫാർമേഴ്സ് അസോസിയേഷൻ ജില്ലാ കമ്മിറ്റിയുടെ നേതൃത്വത്തിൽ 29ന് രാവിലെ 10ന് നഗരത്തിലെ ചുങ്കം കവലയിൽനിന്നു ചുഴലിയിലെ മിൽമ ഡയറി പ്ലാന്‍റിലേക്ക് പ്രകടനവും തുടർന്നു ധർണയും നടത്തും. പാൽ സംഭരണവില ലിറ്ററിന് 70 രൂപയാക്കുക, കാലിത്തീറ്റകൾക്ക് അനുവദിക്കുന്ന സബ്സിഡിക്ക് തുല്യമായ തുക ക്ഷീര കർഷകരുടെ ബാങ്ക് അക്കൗണ്ടിൽ ലഭ്യമാക്കുക, ആവശ്യത്തിന് വെറ്ററിനറി ഡോക്ടർമാരെ നിയമിച്ച മൃഗ ചികിത്സാമേഖല ശക്തീകരിക്കുക, പാൽവില ചാർട്ട് പരിഷ്കരിക്കുക തുടങ്ങിയ ആവശ്യങ്ങൾ ഉന്നയിച്ചാണ് സമരമെന്ന് അസോസിയേഷൻ സംസ്ഥാന വർക്കിംഗ് പ്രസിഡന്‍റ് എം.ആർ. ജനകൻ, ജില്ലാ പ്രസിഡന്‍റ് മത്തായി പുള്ളോർക്കുടി, സെക്രട്ടറി കെ.സി. അന്നമ്മ, ജില്ലാ കമ്മിറ്റിയംഗം ബിന്ദു ജയ എന്നിവർ വാർത്താസമ്മേളനത്തിൽ അറിയിച്ചു. ഉത്പാദനച്ചെലവിന് ആനുപാതികമായി പാൽ സംഭരണ വില നിശ്ചയിക്കാൻ ഉത്തരവാദപ്പെട്ടർ തയാറാകാത്ത സാഹചര്യത്തിലാണ് സമരം. ഒരു ലിറ്റർ പാൽ ഉത്പാദിപ്പിക്കുന്നതിന് തീറ്റച്ചെലവ് മാത്രം 50ൽ അധികം രൂപ വരും. എന്നാൽ കർഷകരിൽനിന്നു സംഭരിക്കുന്ന 3.2 ഫാറ്റും 8.3 എസ്എൻഎഫുമുള്ള പാൽ ലിറ്ററിന് സംഘങ്ങൾ മുഖേന ശരാശരി 40.15 രൂപയാണ് നൽകുന്നത്. ക്ഷീര മേഖലയിൽ കർഷകർക്കു പിടിച്ചുനിൽക്കാൻ കഴിയാത്ത സാഹചര്യമാണ്. പശുക്കളിലെ രോഗ ചികിത്സയ്ക്കു ചെലവ് അനുദിനം വർധിക്കുകയാണ്. വെറ്ററിനറി ഡോക്ടർമാരുടെ രാത്രി സേവനം വൈകുന്നേരം നാല് മുതൽ അർധരാത്രി വരെ മാത്രമാണ് ലഭിക്കുന്നത്. രാത്രി സേവനം ഉപയോഗപ്പെടുത്തുന്നതിന് വലിയ തുക ചെലവിടേണ്ട സ്ഥിതിയാണ്. ജില്ലയിലടക്കം കർഷകർ ക്ഷീരമേഖലയിൽനിന്നു പിൻവാങ്ങുകയാണ്. ഇത് പശുക്കളുടെ എണ്ണവും പാൽ ഉത്പാദനവും ഗണ്യമായി കുറയുന്നതിന് കാരണമായി. പ്രതിദിനം സംഭരിക്കുന്ന പാലിന്‍റെ അളവ് കുറഞ്ഞതോടെ ജീവനക്കാർക്ക് മുടങ്ങാതെ ശന്പളം നൽകാൻ പോലും ചില സംഘങ്ങൾ പ്രയാസപ്പെടുകയാണ്. കാലിത്തീറ്റകൾക്കു അനുവദിക്കുന്ന സബ്സിഡികളുടെ ഗുണം ഇടനിലക്കാർക്കാണ് ലഭിക്കുന്നത്. ഇടനിലക്കാരിൽ ചിലർ വിതരണത്തിന് എത്തിക്കുന്ന കാലിത്തീറ്റകൾക്ക് മതിയായ ഗുണനിലവാരമില്ല. സബ്സിഡി കർഷകർക്ക് പണമായി നേരിട്ടുനൽകുന്നത് മേത്തരം കാലിത്തീറ്റകൾ വാങ്ങുന്നതിനു സഹായകമാകും. പാൽവില വർധിപ്പിക്കുന്നതിനൊപ്പം ഇൻസെന്‍റീവ് അനുവദിച്ചും ക്ഷീര കർഷകരെ പ്രോത്സാഹിപ്പിക്കണം. ഏറ്റവും ഒടുവിൽ 2022ലാണ് പാലിന്‍റെ സംഭരണ വില ലിറ്ററിന് അഞ്ച് രൂപ വർധിപ്പിച്ചത്. ഇതിന്‍റെ ഗുണം കർഷകർക്ക് ലഭിച്ചില്ല. പാൽ വില ചാർട്ടിലെ അപാകമാണ് ഇതിനു കാരണം. ക്ഷീരകർഷകർ നേരിടുന്ന പ്രതിസന്ധിയെക്കുറിച്ച് മിൽമയുടെ തലപ്പത്തുള്ളവർക്ക് ബോധ്യമുണ്ട്. എങ്കിലും അടുത്തിടെ ചേർന്ന മിൽമ ഡയറക്ടർ ബോർഡ് യോഗം പാൽ സംഭരണ വില വർധിപ്പിക്കേണ്ടെന്നാണ് തീരുമാനിച്ചത്. ക്ഷീര കർഷകർ ഉന്നയിക്കുന്ന ആവശ്യങ്ങളോട് മിൽമ മുഖം തിരിച്ചാൽ സംസ്ഥാന വ്യാപകമായി ശക്തമായ സമരത്തിന് അസോസിയേഷൻ നിർബന്ധിതമാകുമെന്നും ഭാരവാഹികൾ പറഞ്ഞു.

മണിയങ്കോട്-പാറക്കടവ് പാലത്തിന് 10.5 കോടിയുടെ ഭരണാനുമതി

കൽപ്പറ്റ: നിയോജകമണ്ഡലത്തിലെ മണിയങ്കോട്-പാറക്കടവ് പാലത്തിന് 10.5 കോടി രൂപയുടെ ഭരണാനുമതിയായതായി ടി. സിദ്ദിഖ് എംഎൽഎ അറിയിച്ചു. 40ൽ അധികം കുടുംബങ്ങൾക്ക് ഉപകാരപ്പെടുന്ന പാലം പ്രദേശവാസികളുടെ ദീർഘകാലാവശ്യമാണ്. കോവക്കുനി, മൈലാടി ഉന്നതികളിലേക്കുള്ള യാത്ര പാലം പണിയുന്നതോടെ സുഗമമാകും. നിലവിൽ മരപ്പാലമാണ് ഉപയോഗത്തിൽ. കാലവർഷത്തിൽ മരപ്പാലം ഒലിച്ചുപോകുകയും ഉന്നതികൾ ഒറ്റപ്പെടുകയും ചെയ്യാറുണ്ട്.

അപകടാവസ്ഥയിലുള്ള ബസ് കാത്തിരിപ്പ് കേന്ദ്രം പൊളിച്ചു മാറ്റണമെന്ന്

പുൽപ്പള്ളി: താന്നിത്തെരുവിൽ അപകടാവസ്ഥയിലുള്ള ബസ് കാത്തിരിപ്പ് കേന്ദ്രം പൊളിച്ചുമാറ്റണമെന്ന്. താന്നിത്തെരുവ് കവലയിൽ രണ്ട് പതിറ്റാണ്ടിന് മുന്പ് നിർമിച്ച ബസ് കാത്തിരിപ്പ് കേന്ദ്രം അപകടാവസ്ഥയിലായിട്ട് വർഷങ്ങളായെങ്കിലും അറ്റകുറ്റപ്പണികൾ നടത്താനോ പൊളിച്ച് പുതിയത് നിർമിക്കാനോ അധികൃതർ തയാറല്ല. സാങ്കേതികത്വം പറഞ്ഞ് നടപടികൾ വൈകിപ്പിക്കുകയാണെന്നാണ് നാട്ടുകാർ പറയുന്നത്. പുൽപ്പള്ളിയിൽ നിന്നും കാപ്പിസെറ്റ്, അന്പത്താറ്, വണ്ടിക്കടവ്, മീനങ്ങാടി ഉൾപ്പെടെയുള്ള റൂട്ടുകളിലേക്കുള്ള യാത്രക്കാർ ഏറെ ഉപയോഗിക്കുന്ന ബസ് കാത്തിരിപ്പ് കേന്ദ്രം കൂടിയാണിത്. കേന്ദ്രത്തിന്‍റെ അടിത്തറ ഇളകിയും ചുമരുകൾ പൊളിഞ്ഞും ഏത് നിമിഷവും തകർന്നുവീഴാവുന്ന അവസ്ഥയിലാണ്. രണ്ട് കോളജുകളിലേയും ഒരു സ്കൂളിലേയും വിദ്യാർഥികൾ ബസ് കാത്തുനിൽക്കുന്ന ഇടംകൂടിയായിട്ടുപോലും അധികൃതർ തിരിഞ്ഞുനോക്കുന്നില്ല. കാപ്പിസെറ്റ് - പയ്യന്പള്ളി റോഡ് കിഫ്ബി ഫണ്ടുപയോഗിച്ച് റോഡ് വീതികൂട്ടി ടാറിംഗ് പ്രവൃത്തികൾ പൂർത്തിയാക്കുകയും റോഡിന്‍റെ ഇരുവശവും ഇന്‍റർലോക്ക് വിരിച്ച് കാൽനടയാത്രക്കാർക്ക് സൗകര്യമൊരുക്കിയിട്ടും ഈ വാഹന കാത്തിരിപ്പ് കേന്ദ്രം പൊളിച്ച് പുതിയത് നിർമിക്കാൻ നടപടിയില്ല. പ്രദേശവാസികൾ പഞ്ചായത്തിനും പൊതുമരാമത്ത് വകുപ്പിനും പരാതി നൽകിയതിനെ തുടർന്ന് റോഡ് നവീകരണ പ്രവൃത്തിയോടൊപ്പം ബസ് കാത്തിരിപ്പ് കേന്ദ്രം പൊളിച്ചുനീക്കണമെന്ന് കരാറുകാർക്ക് നിർദേശം നൽകിയിരുന്നു. എന്നാൽ റോഡ് നിർമാണം പൂർത്തിയായി ഒരു വർഷം കഴിഞ്ഞിട്ടും അപകടാവസ്ഥയിലുള്ള ബസ് കാത്തിരിപ്പ് കേന്ദ്രം പൊളിച്ചു നീക്കുന്നതിൽ ബന്ധപ്പെട്ടവർ ഉദാസീനത കാണിക്കുകയാണ്. അടിയന്തരമായി ബസ് കാത്തിരിപ്പ് കേന്ദ്രം പൊളിച്ചുമാറ്റി പുതിയത് നിർമിക്കണമെന്നാണ് പ്രദേശവാസികളുടെ ആവശ്യം.

ഓണത്തെ വരവേൽക്കാൻ ഒരു കൊട്ടപ്പൂവും ഒരു മുറം പച്ചക്കറിയും

പനമരം: ഓണത്തെ വരവേൽക്കുന്നതിനായി പനമരം ബ്ലോക്ക് പഞ്ചായത്ത് വാർഷിക പദ്ധതിയിൽ ഉൾപ്പെടുത്തി 30 ഏക്കർ സ്ഥലത്ത് പൂ കൃഷിയും പച്ചക്കറി കൃഷിയും ആരംഭിക്കും. പനമരം ബ്ലോക്ക് പഞ്ചായത്തിലെ ചെറുകാട്ടൂരിൽ പ്രവർത്തിക്കുന്ന ഫിനിക്സ് കുടുംബശ്രീ യൂണിറ്റ് പനമരം ബ്ലോക്ക് പഞ്ചായത്ത് കോന്പൗണ്ടിൽ പൂ കൃഷി ചെയ്യുന്നതിന്‍റെ ഉദ്ഘാടനം പനമരം ബ്ലോക്ക് പഞ്ചായത്ത് കോന്പൗണ്ടിൽ മല്ലിക തൈ നട്ട് പനമരം ബ്ലോക്ക് പഞ്ചായത്ത് പ്രസിഡന്‍റ് ഗിരിജാ കൃഷ്ണൻ നിർവഹിച്ചു. ചടങ്ങിൽ വൈസ് പ്രസിഡന്‍റ് അബ്ദുൾ ഗഫൂർ കാട്ടി അധ്യക്ഷത വഹിച്ചു. പനമരം ബ്ലോക്ക് പഞ്ചായത്ത് അസിസ്റ്റന്‍റ് അഗ്രികൾച്ചറൽ ഡെപ്യൂട്ടി ഡയറക്ടർ കെ. സുമിന പദ്ധതി വിശദീകരിച്ചു. ചടങ്ങിൽ പനമരം ഗ്രാമപഞ്ചായത്ത് പ്രസിഡന്‍റ് ലക്ഷ്മി ആലക്കമുറ്റം, വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ മേഴ്സി ബെന്നി, ബ്ലോക്ക് പഞ്ചായത്ത് അംഗങ്ങളായ ലൗലി ഷാജു, അന്നക്കുട്ടി ഉണ്ണിക്കുന്നേൽ, രജനി ചന്ദ്രൻ, ബ്ലോക്ക് പഞ്ചായത്ത് സെക്രട്ടറി പി.പി. ഷിജി, കൃഷി ഓഫീസർമാർ തുടങ്ങിയവർ പ്രസംഗിച്ചു.

നട്ടുവളർത്തിയ മരങ്ങൾ മുറിക്കുന്നതിനുള്ള നിയന്ത്രണം ഒഴിവാക്കണമെന്ന്

പനമരം: കർഷകർ നട്ടുവളർത്തിയ മരങ്ങൾ മുറിക്കുന്നതിനും നീക്കം ചെയ്യുന്നതിനും വനം വകുപ്പ് ബാധകമാക്കിയ നിയന്ത്രണങ്ങൾ ഒഴിവാക്കണമെന്ന് ടിന്പർ മർച്ചന്‍റ്സ് അസോസിയേഷൻ മേഖലാ കണ്‍വൻഷൻ ആവശ്യപ്പെട്ടു. ടിന്പർ വ്യവസായ പുരോഗതിയും തൊഴിൽ മേഖലയിലെ സുരക്ഷയും സുഗമമായ പ്രവർത്തനവും ഉറപ്പുവരുത്തുന്നതിന് സർക്കാർ ഇടപെടുക, ജില്ലയിൽ മരം, വിറക്, കട്ടൻസ് കയറ്റിറക്കിന് അംഗീകാരമുള്ള തൊഴിലാളികളുടെ പേരുവിവരം തൊഴിൽ വകുപ്പ് പ്രസിദ്ധപ്പെടുത്തുക, വനത്തിൽ വീണുകിടക്കുന്നതും പാതയോരങ്ങളിൽ മുറിച്ചിട്ടതുമായ ഈട്ടി ഉൾപ്പെടെ വിലപിടിപ്പുള്ള മരങ്ങൾ നശിക്കുന്നത് തടയുക, പട്ടയഭൂമികളിൽ നിൽക്കുന്നതും സർക്കാർ റിസർവ് ചെയ്തതുമായ മരങ്ങൾ വില ഈടാക്കി ഭൂവുടമകൾക്ക് വിട്ടുകൊടുക്കുക തുടങ്ങിയ ആവശ്യങ്ങളും ഉന്നയിച്ചു. മരത്തിന്‍റെ ഉപയോഗം കുറഞ്ഞതും വിവിധ ഇനം തടികളുടെ വിലത്തകർച്ചയും വർധിച്ച കൂലിച്ചെലവും ടിന്പർ വ്യവസായ മേഖലയെ ബാധിച്ചതായി കണ്‍വൻഷൻ വിലയിരുത്തി. ജില്ലാ സെക്രട്ടറി കെ.സി.കെ. തങ്ങൾ ഉദ്ഘാടനം ചെയ്തു. മേഖലാ പ്രസിഡന്‍റ് എ. സലിം അത്താണി അധ്യക്ഷത വഹിച്ചു. കെ. നാസിർ, മുസ്തഫ ഐക്കാരൻ, ഷമീർ മഞ്ചേരി, റജി പാലുകുന്ന്, ടി.പി. അബ്ദുൾ റസാഖ്, എം. മാലിക്ക്, കെ. മെഹറൂഫ്, പി. നാസർ, എം. ഷമിർ, മൂസ, ബിജു, സമദ്, സാജൻ തോമസ് എന്നിവർ പ്രസംഗിച്ചു.

നിയന്ത്രണംവിട്ട കാർ ഇടിച്ച് വൈദ്യുതി പോസ്റ്റ് തകർന്നു

മാനന്തവാടി: നിയന്ത്രണംവിട്ട കാർ ഇടിച്ച് വൈദ്യുതി പോസ്റ്റ് തകർന്നു. മാനന്തവാടി വള്ളിയൂർക്കാവ് റോഡിൽ ബിവറേജ് ഒൗട്ലെറ്റിന് സമീപം ഇന്നലെ രാവിലെ ഒന്പതോടെയായിരുന്നു അപകടം. മാനന്തവാടി കാനറ ബാങ്ക് ജീവനക്കാരൻ അരുണ്‍ ഓടിച്ചിരുന്നു കാറാണ് എതിരേ വന്ന കാറിനെ വെട്ടിച്ച് മാറ്റുന്നതിനിടെ പോസ്റ്റിലിടിച്ചത്. കാറിന്‍റെ മുൻഭാഗത്ത് സാരമായ കേടുപാടുകൾ സംഭവിച്ചു. പോസ്റ്റ് ചരിഞ്ഞതിനെ തുടർന്ന് വൈദ്യുതി വിതരണവും തടസപ്പെട്ടു.കെഎസ്ഇബി ജീവനക്കാരെത്തി പോസ്റ്റ് മാറ്റി സ്ഥാപിച്ചു.

ദുരന്ത ഭൂമിയിൽ നിന്ന് ദത്തു നൽകിയ 13 വളർത്തുമൃഗങ്ങൾ വളരുന്നത് കേരളത്തിന് പുറത്ത്

കൽപ്പറ്റ: പുഞ്ചിരിമട്ടം ഉരുൾപൊട്ടൽ ദുരന്തത്തിൽ ഉടമസ്ഥർ മരിച്ചതിനെ തുടർന്ന് ദത്തു നൽകിയ 13 വളർത്തുമൃഗങ്ങൾ വളരുന്നത് കേരളത്തിന് പുറത്ത്. ഒന്പത് പൂച്ചകൾ, അഞ്ച് പൂച്ചക്കുട്ടികൾ, രണ്ട് നായകൾ എന്നീ വളർത്തു മൃഗങ്ങളെയാണ് സന്നദ്ധ സംഘടനയായ പീപ്പിൾ ഫോർ എത്തിക്കൽ ട്രീറ്റ്മെന്‍റ് ഓഫ് ആനിമൽസ് (പിഇടിഎ) വഴി സംസ്ഥാന മൃഗസംരക്ഷണ വകുപ്പ് ദത്തു നൽകിയത്. ഇതിൽ അവശ നിലയിൽ ലഭിച്ച ഒരു പൂച്ചയും രണ്ട് പൂച്ചക്കുട്ടിയും കൊണ്ടുപോകുന്ന വഴിയിൽ മരണപ്പെട്ടു. ബാക്കി 13 വളർത്തുമൃഗങ്ങളും കേരളത്തിന് പുറത്ത് സുഖമായിരിക്കുന്നുവെന്ന് പിഇടിഎ സീനിയർ ഡയറക്ടർ (വെറ്ററിനറി അഫയേഴ്സ്) ഡോ. മിനി അരവിന്ദൻ പറഞ്ഞു. മുണ്ടക്കൈ, ചൂരൽമല ഭൂമിയിൽ നിന്ന് ലഭിച്ച വളർത്തുമൃഗങ്ങൾ ഉത്തർപ്രദേശ്, രാജസ്ഥാൻ, ഹിമാചൽ പ്രദേശ് തുടങ്ങിയ സംസ്ഥാനങ്ങളിലാണ് ദത്തു നൽകിയിരിക്കുന്നത്. ദുരന്തത്തിൽ ആകെ 2775 മൃഗങ്ങൾ ചത്തു. ഇതിൽ 81 പശുക്കൾ, 50 മുയലുകൾ, 16 ആടുകൾ, അഞ്ച് എരുമകൾ, 2623 കോഴികൾ എന്നിവയുൾപ്പെടുന്നു. 202 ക്ഷീരകർഷകർക്ക് നഷ്ടം സംഭവിച്ചു. ദുരന്തത്തിൽ പരിക്കുപറ്റിയ 234 വളർത്തുമൃഗങ്ങൾക്ക് മൃഗസംരക്ഷണ വകുപ്പ് ചികിത്സ നൽകി. രക്ഷപ്പെട്ട മൃഗങ്ങൾക്കായി സ്വകാര്യ വ്യക്തികൾ, ക്ഷീരകർഷക സംഘങ്ങൾ, വെറ്ററിനറി കോളജ് പൂർവ വിദ്യാർഥികൾ എന്നിവർ മുഖേന ലോഡ് കണക്കിന് തീറ്റയും പോഷകാഹാരവും ലഭ്യമാക്കി. കന്നുകാലികൾ നഷ്ടപ്പെട്ട 23 കർഷകർക്ക് നഷ്ടപരിഹാരമായി ഇതുവരെ 18.02 ലക്ഷം രൂപ വിതരണം ചെയ്തിട്ടുണ്ട്. 178 കുടുംബങ്ങളെ ഉപജീവനം പുനഃസ്ഥാപിച്ചു നൽകേണ്ട പദ്ധതിയിലേക്ക് തെരഞ്ഞെടുത്തു. ഇതിൽ 78 കുടുംബങ്ങളെ ഉടൻ സഹായം നൽകേണ്ട ചുരുക്കപട്ടികയിലും ഉൾപ്പെടുത്തി. എൽസ്റ്റണ്‍ എസ്റ്റേറ്റിൽ ഉയരുന്ന പുനരധിവാസ വീടുകൾ പൂർത്തിയാക്കിയശേഷം തങ്ങളുടെ ഉപജീവനം പുനഃസ്ഥാപിക്കുന്ന പദ്ധതികൾ മുന്നോട്ടുകൊണ്ടുപോയാൽ മതിയെന്ന് ക്ഷീര കർഷകർ ആവശ്യപ്പെട്ടതായി അധികൃതർ പറഞ്ഞു.

മഴയും റെഡ് അലർട്ടും: ജില്ലയിലെ ടൂറിസം മേഖല പ്രതിസന്ധിയിൽ

സുൽത്താൻ ബത്തേരി: മഴ ആസ്വദിച്ച് ടൂറിസം കേന്ദ്രങ്ങൾ സന്ദർശിക്കാൻ മുൻവർഷങ്ങളിലെല്ലാം നൂറ് കണക്കിന് ആളുകളാണ് വയനാട്ടിലേക്ക് എത്തിയിരുന്നത്. എന്നാൽ പുഞ്ചിരിമട്ടം ഉരുൾ ദുരന്തത്തിന് ശേഷം ശക്തമായ മഴ മുന്നറിയിപ്പും അടിക്കിടയുണ്ടാവുന്ന റെഡ് അലർട്ടുമാണ് തിരിച്ചടിയായിരിക്കുന്നത്. ഇത് ജില്ലയിലേക്കെത്തുന്ന സഞ്ചരികളുടെ എണ്ണത്തിൽ ഗണ്യമായ കുറവാണ് വരുത്തിയത്. കഴിഞ്ഞ രണ്ടാഴ്ചയായി അവധി ദിവസങ്ങളിലെ മഴയും റെഡ് അലർട്ടും വിനോദസഞ്ചാരികൾ എത്തുന്നതിനെ പ്രതികൂലമായി ബാധിച്ചിട്ടുണ്ട്. ടൂറിസം മേഖലയെ പ്രോത്സാഹിപ്പിക്കാനായി ടൂറിസം വകുപ്പ് മണ്‍സൂണ്‍ ഫെസ്റ്റിലൂടെ മഡ് ഫുട്ബോളും കബടിയും വടംവലിയും തടാക കയാക്കിംഗും നടപ്പാക്കുന്പോഴാണ് ശക്തമായ മഴമുന്നറിയിപ്പും റെഡ് അലർട്ടും പ്രതിസന്ധിയാകുന്നത്. കഴിഞ്ഞ നാല് ദിവസത്തെ റെഡ് അലർട്ട് കാരണം ജില്ലയിലെ എല്ലാ വിനോദ സഞ്ചാര കേന്ദ്രങ്ങളും അടഞ്ഞുകിടക്കുകയായിരുന്നു. യെല്ലോ അലേർട്ട് ആയതോടെ കുറുവ ദ്വീപ്, സൂചിപ്പാറ, കാന്തൻപാറ, തൊള്ളിയിരംകണ്ടി, ചെന്പ്ര, മീൻമുട്ടി, നീലിമല വ്യൂപോയിന്‍റ് എന്നിവയൊഴികെയുള്ളവ തുറന്നു. ജില്ലയിലെ കാനന സഫാരിഅടക്കം നിലച്ചു. ഇതോടെ ടൂറിസം കേന്ദ്രങ്ങൾ നിർജീവമാണ്. ഈ മേഖലയെ ആശ്രയിച്ചുകഴിയുന്ന ആയിരക്കണക്കിന് ആളുകളെയും അവരുടെ കുടുംബങ്ങളെയുമാണ് ഇത് ബാധിക്കുന്നത്.

കർക്കടക വാവുബലി: ആയിരങ്ങൾ ബലിതർപ്പണം നടത്തി

സുൽത്താൻ ബത്തേരി/കാട്ടിക്കുളം: തെക്കൻ കാശിയെന്നു പുകൾപെറ്റ തിരുനെല്ലിയിലേതടക്കം ജില്ലയുടെ വിവിധ ഭാഗങ്ങളിലെ ക്ഷേത്രങ്ങളിൽ കർക്കടകവാവ് ദിനത്തിൽ ആയിരങ്ങൾ പിതൃതർപ്പണം നടത്തി. തിരുനെല്ലി മഹാവിഷ്ണുക്ഷേത്രത്തിനു സമീപം പാപനാശിനിക്കരയിൽ ഇന്നലെ പുലർച്ചെ മൂന്നിന് ആരംഭിച്ച ബലിതർപ്പണം ഉച്ചയ്ക്ക് ഒന്നോടെയാണ് സമാപിച്ചത്. തിരുനെല്ലിയിലേക്ക് ബുധനാഴ്ച ഉച്ചകഴിഞ്ഞ് ആരംഭിച്ച ജനപ്രവാഹം ഇന്നലെ രാവിലെയും തുടർന്നു. ബലിസാധന വിതരണത്തിന് പ്രത്യേക കൗണ്ടർ പ്രവർത്തിച്ചതും കൂടുതൽ കർമികളെ ഏർപ്പെടുത്തിയതും ഭക്തർക്കു സൗകര്യമായി. ഭക്തജനങ്ങൾക്കു സുഗമമായി തിരുനെല്ലിയിൽ വന്നുപോകുന്നതിന് ഗതാഗത ക്രമീകരണം ഏർപ്പെടുത്തിയിരുന്നു. സ്വകാര്യ വാഹനങ്ങൾ കാട്ടിക്കുളത്ത് തടയാതെ തിരുനെല്ലി ക്ഷേത്രപരിസരം വരെ കടത്തിവിട്ടു. വണ്‍വേ സംവിധാനം ഏർപ്പെടുത്തി നിട്ടറ, പനവല്ലി വഴിയാണ് വാഹനങ്ങൾ തിരിച്ചുവിട്ടത്. വിവിധ സ്ഥലങ്ങളിൽനിന്നു തിരുനെല്ലി ക്ഷേത്രംവരെ കെഎസ്ആർടിസി ബസുകൾ സർവീസ് നടത്തി. പൊൻകുഴി ശ്രീരാമക്ഷേത്രത്തിൽ കർക്കടകവാവ് ദിനത്തിൽ ആയിരങ്ങൾ പിതൃതർപ്പണം നടത്തി. പുലർച്ചെ മൂന്നരയോടെയാണ് ബലികർമങ്ങൾ ആരംഭിച്ചത്. ക്ഷേത്രം ശാന്തി ഗിരീഷ് അയ്യർ ബലികർമ്മങ്ങൾക്ക് നേതൃതത്വം നൽകി. ക്ഷേത്ര പരിസരത്ത് ഒരേ സമയം 500പേർക്ക് ഇരിക്കാവുന്ന പ്രത്യേക ബലിത്തറയും ഒരുക്കിയിരുന്നു. ബലിതർപ്പണത്തിന് എത്തുന്ന ഭക്തരുടെ തിരക്ക് കണക്കിലെടുത്ത് വലിയസുരക്ഷയും ഒരുക്കിയിരുന്നു. പുഴയിൽ അഗ്നിരക്ഷാസേനയുടെ നേതൃത്വത്തിൽ വടം കെട്ടിതിരിക്കുകയും കർമങ്ങൾ കഴിയുന്നതുവരെ ഡിങ്കിയിൽ ജീവനക്കാർ പുഴയിൽ നിലയുറപ്പക്കുകയും ചെയ്തിരുന്നു. റവന്യു വകുപ്പിന്‍റെ നേതൃത്വത്തിലായിരുന്നു വിവിധ വകുപ്പുകളെ ഏകോപിപ്പിച്ചുകൊണ്ടുള്ള പ്രവർത്തനങ്ങൾ. കെസ്ആർടിസിയും സ്വകാര്യബസുകളും പുലർച്ചെ നാല് മുതൽ സുൽത്താൻ ബത്തേരിയിൽ നിന്ന് പൊൻകുഴിയിലേക്ക് സർവീസും നടത്തി. അതിർത്തി സംസ്ഥാനങ്ങളായ കർണാടക, തമിഴ്നാട് എന്നിവിടങ്ങളിൽ നിന്നടക്കം നിരവധിപേർ പിതൃതർപ്പണം നടത്തുന്നതിനായി പൊൻകുഴിയിലെത്തിയിരുന്നു. ദേശീയപാതയിലെ തിരക്ക് നിയന്ത്രിക്കാൻ കർണാടക ഭാഗത്തുനിന്ന് വരുന്ന ചരക്ക് ലോറികൾ അതിർത്തിയിലും കേരളത്തിൽ നിന്നുള്ള ചരക്ക് ലോറികൾ കല്ലൂരും മുത്തങ്ങയിലുമായി തടഞ്ഞിട്ടു. ബലികർമ്മങ്ങൾ പൂർത്തിയായ ശേഷമാണ് ചരക്ക് വാഹനങ്ങൾ കടത്തിവിട്ടത്. പിതൃതർപ്പണം കഴിഞ്ഞെത്തുന്നവക്ക് സത്യസായി സേവാസംഘടനയുടെ നേതൃത്വത്തിൽ ചുക്കുകാപ്പിയും സേവാഭാരതിയുടെ നേതൃത്വത്തിൽ ലഘുഭക്ഷണവും സൗജന്യമായി വിതരണം ചെയ്തു. പാന്പ്ര ചേലക്കൊല്ലി ശിവക്ഷേത്രത്തിന്‍റെ കടവിൽ നൂറുകണക്കിനാളുകൾ ബലിതർപ്പണം നടത്തി. പുലർച്ചെ അഞ്ചിന് തുടങ്ങിയ ബലിതർപ്പണത്തിന് ആചാര്യൻ സനൽ മാരാർ മുഖ്യകാർമികത്വം വഹിച്ചു. ക്ഷേത്രം മേൽശാന്തി കാവേരി ഇല്ലം നാരായണൻ നന്പൂതിരിയുടെ മുഖ്യകാർമികത്വത്തിൽ ക്ഷേത്രത്തിൽ പിതൃപൂജയും വിശേഷാൽ പൂജകളും നടത്തി. കോളേരി ശ്രീനാരായണ ഷണ്‍മുഖ ക്ഷേത്രത്തിൽ പുലർച്ചെ നാലിന് ബലിതർപ്പണം ആരംഭിച്ചു. നരസിപ്പുഴയുടെ തീരത്ത് ക്ഷേത്രം മേൽശാന്തി തെക്കേമഠം പ്രശാന്ത് ശർമയുടെ നേതൃത്വത്തിലായിരുന്നു കർമങ്ങൾ. മണിയങ്കോട് മഹാവിഷ്ണു ക്ഷേത്ര പരിസരത്ത് പ്രത്യേകം സജ്ജമാക്കിയ ഇടത്തിൽ നിരവധി പേർ ബലിതർപ്പണം നടത്തി. ഹരികൃഷ്ണൻ നന്പൂതിരി കാർമികനായി.

സ്കൂൾ ചുറ്റുമതിലിന്‍റെ അടിത്തറ തകർന്നിട്ട് ഒരു വർഷം: നന്നാക്കാൻ നടപടിയില്ല

സുൽത്താൻ ബത്തേരി: സ്കൂൾ ചുറ്റുമതിലിന്‍റെ കരിങ്കൽകെട്ട് തകർന്നിട്ടും പുനർനിർമ്മിക്കാൻ നടപടിയില്ല. നൂറ് കണക്കിന് വിദ്യാർഥികൾ പഠിക്കുന്നതും ദേശീയപാതയോരത്തെ സ്കൂളുമായ മൂലങ്കാവ് ഗവ. ഹയർസെക്കൻഡറി സ്കൂളിന്‍റെ ചുറ്റുമതിന്‍റെ അടിത്തറ തകർന്നതാണ് ഭീഷണിയായിരിക്കുന്നത്. കഴിഞ്ഞ മഴക്കാലത്താണ് ചുറ്റുമതിലിന്‍റെ കരിങ്കല്ലുകൊണ്ട് തീർത്ത അടിത്തറ തകർന്നത്. ഇത് ഇടിഞ്ഞ് സമീപത്തെ ഓവുചാലിലേക്കാണ് പതിച്ചത്. നിലവിൽ ചുറ്റുമതിലിന്‍റെ അടിത്തറ തകർന്ന ഭാഗത്തുകൂടിയാണ് സ്കൂൾ മുറ്റത്തുനിന്ന് മഴവെള്ളം പുറത്തേക്ക് ഒഴുകുന്നത്. ഇത് ചുറ്റുമതിൽ കൂടുതൽ തകരാനും കാരണമാകും. ചുറ്റുമതിലിൽ പാഴ്മരങ്ങൾ വളരുന്നത് വെട്ടികളയാത്തതും ഭീഷണിയായി മാറിയിട്ടുണ്ട്. ചുറ്റുമതിൽ മഴയിൽ കൂടുതൽ തകർന്നാൽ ദേശീയപാതയിലേക്ക് പതിക്കാനും സാധ്യതയുണ്ട്. ഇത് വലിയഅപകടത്തിന് വഴിവച്ചേക്കും. ചുറ്റുമതിലിന്‍റെ തകർന്ന ഭാഗം പുനർ നിർമിക്കണമെന്ന് ആവശ്യപ്പെട്ട് ജില്ലാകളക്ടർ, ജില്ലാപ്പഞ്ചായത്ത്, ഗ്രാമപ്പഞ്ചായത്ത് എന്നിവർക്ക് കത്ത് നൽകിയിട്ടും ആരും തിരിഞ്ഞുനോക്കുന്നില്ലെന്ന് ആക്ഷേപമുണ്ട്. അപകടാവസ്ഥയിലായ ചുറ്റുമതിലിനോട് ചേർന്ന് ദേശീയപാതയോരത്ത് നിരവധി വാഹനങ്ങൾ പാർക്കുചെയ്യുന്ന സ്ഥലം കൂടിയാണ്. ഇടിഞ്ഞഭാഗത്തോട് ചേർന്ന് ഇലക്ട്രിക് പോസ്റ്റുമുണ്ട്. മതിൽ ഇടിഞ്ഞാൽ വലിയ അപകടം സംഭവിച്ചേക്കാം. അതിനാൽ ചുറ്റുമതിലിന്‍റെ അടിത്തറ പുനർനിർമിച്ച് സുരക്ഷയൊരുക്കണമെന്ന ആവശ്യമാണ് ഉയരുന്നത്.

കർഷകരെ കണ്ണീരിലാഴ്ത്തി വാഴക്കുലയുടെ വില കുത്തനെ ഇടിഞ്ഞു

സുൽത്താൻ ബത്തേരി: പ്രതികൂല കാലാവസ്ഥയെ അതിജീവിച്ച് കൃഷി സംരക്ഷിച്ചുപോന്ന നേന്ത്രവാഴ കർഷകർക്ക് വിളവെടുപ്പ് സമയത്തെ വിലയിടിവ് കനത്ത പ്രഹരമായി. 35 രൂപയിൽ താഴാതെ നിന്നിരുന്ന വില കുത്തനെ കുറഞ്ഞ് 21 രൂപയിലെത്തി. പച്ചക്കായുടെ വില കുറഞ്ഞതിന് ആനുപാതികമായി പഴത്തിന്‍റെയും വില കുറഞ്ഞു. 35 മുതൽ 40 രൂപയാണ് പഴത്തിന്‍റെ വില. ഉത്പാദന വർധനയും നിപ്പയുമായി ബന്ധപ്പെട്ട പ്രചാരണം ഉണ്ടായതുമാണ് വിലക്കുറവിന് പ്രധാന കാരണമായി കച്ചവടക്കാർ പറയപ്പെടുന്നത്. ഇവയ്ക്ക് പുറമെ നേന്ത്രവാഴയിൽ ഭൂരിഭാഗവും ചിപ്സ് നിർമാണത്തിനായാണ് പോകുന്നത്. വെളിച്ചെണ്ണയുടെ വില അഞ്ഞൂറിലേക്ക് അടുത്തതോടെ ചിപ്സ് നിർമാണം കുറഞ്ഞു. അതോടെ നേന്ത്രക്കായുടെ ആവശ്യവും കുറഞ്ഞു. ഇതും വിലയിടിവിന് കാരണമായി. ഓണം വിവപണി മുന്നിൽ കണ്ടാണ് കർഷകർ ധനകാര്യ സ്ഥാപനങ്ങളിൽ നിന്ന് കടമെടുത്തും മറ്റും കൃഷിയിറക്കിയത്. ഓണത്തിന് ചിപ്സിനും ശർക്കരവരട്ടിക്കും നല്ല ഡിമാൻഡ് ഉണ്ടകും. എന്നാൽ വെളിച്ചെണ്ണയുടെ വില വർധനയും നിപ്പയുടെ പേരിലുള്ള പ്രചാരണങ്ങളും കാര്യങ്ങൾ തകിടം മറിച്ചു. സാധാരണ ഈ സമയത്ത് 35 രൂപയിൽ വില കുറഞ്ഞിട്ടില്ല. 60 രൂപ വരെ വില ഉയർന്ന സമയവുമുണ്ട്. ഒന്നാം നന്പർ കായ്ക്കാണ് 22 രൂപയുള്ളത്. സെക്കൻഡ് ക്വാളിറ്റിക്ക് 14 രൂപയാണ് ഇന്നലെത്തെ മാർക്കറ്റ്. ഒരു വാഴ നട്ട് അത് വിൽപ്പനയ്ക്ക് പാകമാകുന്നതുവരെ കർഷകന് ഒരു വാഴയ്ക്ക് വരുന്നചെലവ് 250 മുതൽ 300 രൂപ വരെയാണ്. ഒരു വാഴക്കുല കൊടുത്താൽ ഇപ്പോൾ ഉത്പാദന ചെലവിന്‍റെ പകുതിപോലും കിട്ടാത്ത സാഹചര്യമാണ്. അതിനാൽ വില വർധിക്കുമെന്ന് കരുതി കർഷകർ കുലവെട്ടി മാർക്കറ്റിലെത്തിക്കാതെ തോട്ടത്തിൽ തന്നെ നിർത്തുകയാണ്. കർഷകർ വൻ സാന്പത്തിക പ്രതിസന്ധിയിലേയ്ക്ക് കൂപ്പുകുത്തിയിരിക്കുകയാണ്.

കർക്കടക വാവുബലി: തിരുനെല്ലിയിൽ ബലിതർപ്പണം തുടരുന്നു

കാട്ടിക്കുളം: തെക്കൻ കാശിയെന്നു പുകൾപെറ്റ തിരുനെല്ലിയിലെ ശ്രീ മഹാവിഷ്ണു ക്ഷേത്രത്തിൽ കർക്കടകവാവ് ദിനത്തിൽ പിതൃതർപ്പണം തുടരുന്നു. തിരുനെല്ലിയിലേക്ക് ഇന്നലെ ഉച്ചകഴിഞ്ഞ് ആരംഭിച്ചതാണ് ജനപ്രവാഹം. ഇന്നു രാവിലെയും ഭക്തരുടെ ഒഴുക്കിനാണ് തിരുനെല്ലി സാക്ഷ്യം വഹിക്കുന്നത്. പുലർച്ച മൂന്നിന് തുടങ്ങിയ ബലിതർപ്പണം ഉച്ചയ്ക്ക് ഒന്നു വരെ തുടരും. ബലിസാധന വിതരണത്തിന് പ്രത്യേക കൗണ്ടർ പ്രവർത്തിക്കുന്നതും കൂടുതൽ കർമികളെ ഏർപ്പെടുത്തിയതും പിതൃതർപ്പണത്തിന് എത്തിയവർക്ക് സൗകര്യമായി. ഭക്തജനങ്ങൾക്കു സുഗമമായി തിരുനെല്ലിയിൽ വന്നുപോകുന്നതിന് ഗതാഗത ക്രമീകരണം ഏർപ്പെടുത്തിയിട്ടുണ്ട്. സ്വകാര്യ വാഹനങ്ങൾ കാട്ടിക്കുളത്ത് തടയാതെ തിരുനെല്ലി ക്ഷേത്രപരിസരം വരെ കടത്തിവിടുന്നുണ്ട്. വണ്‍വേ സംവിധാനം ഏർപ്പെടുത്തി നിട്ടറ, പനവല്ലി വഴിയാണ് വാഹനങ്ങൾ തിരിച്ചുവിടുന്നത്. അന്പല ത്തിനടുത്ത് ആളുകളെ ഇറക്കിയശേഷം പാർക്കിംഗിന് വാഹനങ്ങൾക്ക് നിട്ടറ റോഡിലാണ് സൗകര്യം. വിവിധ സ്ഥലങ്ങളിൽനിന്നു തിരുനെല്ലി ക്ഷേത്രംവരെ കെഎസ്ആർടിസി ബസുകൾ സർവീസുണ്ട്. ബത്തേരി പൊൻകുഴിയിൽ ബലിതർപ്പണം പുലർച്ചെ നാലിന് തുടങ്ങി. ഒരേസമയം 500 പേർക്ക് ബലിതർപ്പണം നടത്താവുന്ന ബലിത്തറ ക്ഷേത്രത്തിന് അഭിമുഖമായി സജ്ജീകരിച്ചിട്ടുണ്ട്. പൊൻകുഴിയിൽ ഇന്നലെ എത്തിയവർക്ക് സൗജന്യ താമസത്തിന് ക്ഷേത്രക്കമ്മിറ്റി സൗകര്യം ഒരുക്കി.

വയോധികനെ ഇടിച്ച ഓട്ടോറിക്ഷ കണ്ടെത്തി; ഡ്രൈവർ അറസ്റ്റിൽ

മാനന്തവാടി: വയോധികനെ ഇടിച്ചുതെറിപ്പിച്ചശേഷം നിർത്താതെപോയ ഓട്ടോറിക്ഷ പോലീസ് കണ്ടെത്തി. ഓട്ടോ ഡ്രൈവർ നല്ലൂർനാട് അത്തിലൻ ഹംസയെ(49) അറസ്റ്റുചെയ്തു. ഓട്ടോ കസ്റ്റഡിയിലെടുത്തു. ജൂലൈ ഏഴിന് രാത്രി അയലമൂലയിൽനിന്നു മോളിത്തോടിലേക്ക് നടന്നുപോകുകയായിരുന്ന മോളിത്തോട് സ്വദേശി വി.കെ. ജോണിയെയാണ്(61)ഓട്ടോ ഇടിച്ചത്. തെറിച്ചുവീണ് ഗുരുതര പരിക്കേറ്റ ജോണിയെ ഗൗനിക്കാതെ ഹംസ ഓട്ടോയുമായി കടക്കുകയായിരുന്നു. അപകടത്തിൽ വലതുകാലിന്‍റെ എല്ല് പൊട്ടിയ ജോണി ചികിത്സയിലാണ്. ഇൻസ്പെക്ടർ എസ്എച്ച്ഒ പി. റഫീഖ്, എസ്ഐ അതുൽ മോഹൻ, സീനിയർ സിവിൽ പോലീസ് ഓഫീസർമാരായ ടി.കെ. ജോബി, ബി. ബിജു, സിവിൽ പോലീസ് ഓഫീസർമാരായ ഷിന്‍റോ ജോസഫ്, കെ.വി. രഞ്ജിത്ത്, എ.ബി. ശ്രീജിത്ത്, അരുണ്‍, അനുരാജ് എന്നിവരടങ്ങുന്ന സംഘം ദിവസങ്ങൾ നീണ്ട അന്വേഷണത്തിനൊടുവിലാണ് ഓട്ടോ കണ്ടെത്തിയത്. ദൃക്സാക്ഷികൾ ഉണ്ടായിരുന്നില്ല. 150 ഓളം സിസിടിവി ദൃശ്യങ്ങളും നിരവധി ഓട്ടോറിക്ഷകളും വർക്ക്ഷോപ്പുകളും മറ്റു സ്ഥലങ്ങളും പരിശോധിച്ചാണ് അപകടത്തിനിടയാക്കിയ ഓട്ടോ തിരിച്ചറിഞ്ഞത്. വാഹനത്തിന്‍റെ സൈഡ് മിറർ മിറർ പൊട്ടിയതും ഇടിച്ച ഭാഗം ചെറുതായി ചളുങ്ങിയതും കേസിൽ തുന്പായി.

കാലാവസ്ഥ വ്യതിയാനം: സംസ്ഥാനതല പരിശീലനം തുടങ്ങി

മാനന്തവാടി: കാലാവസ്ഥ വ്യതിയാനം, പ്രകൃതി ദുരന്തങ്ങളിൽ മുന്നറിയിപ്പ്, ദുരന്തമുഖങ്ങളിലെ ശാസ്ത്രീയ രക്ഷാപ്രവർത്തനം, ദുരിതാശ്വാസ-പുനരധിവാസ പദ്ധതികളുടെ രൂപീകരണം എന്നീ വിഷയങ്ങളിൽ ത്രിദിന പരിശീലനം വയനാട് സോഷ്യൽ സർവീസ് സൊസൈറ്റി ഹാളിൽ ആരംഭിച്ചു. കാരിത്താസ് ഇന്ത്യയും കേരള സോഷ്യൽ സർവീസ് ഫോറവും സംയുക്തമായി സംഘടിപ്പിച്ച പരിശീലനം ബ്ലോക്ക് പഞ്ചായത്ത് പ്രസിഡന്‍റ് ജസ്റ്റിൻ ബേബി ഉദ്ഘാടനം ചെയ്തു. കാലാവസ്ഥാവ്യതിയാനം, പ്രകൃതിദുരന്തങ്ങൾ എന്നിവ മൂലം സമൂഹം നേരിടുന്ന വെല്ലുവിളികൾ വർധിക്കുന്ന സാഹചര്യത്തിൽ "ഒരുങ്ങിയിരിക്കുക’ എന്നത് സുപ്രധാനമാണെന്നും ഇതിനകം ഉണ്ടായ ദുരന്തങ്ങളിൽനിന്നു പാഠം ഉൾക്കൊണ്ട് ദീർഘകാല ശാസ്ത്രീയ പ്രതിരോധ സംവിധാനങ്ങൾ രൂപപ്പെടുത്തേണ്ടതുണ്ടെന്നും അദ്ദേഹം പറഞ്ഞു. ഡബ്ല്യുഎസ്എസ്എസ് എക്സിക്യുട്ടീവ് ഡയറക്ടർ ഫാ. ജിനോജ് പാലത്തടത്തിൽ അധ്യക്ഷത വഹിച്ചു. കേരള സോഷ്യൽ സർവീസ് ഫോറം എക്സിക്യുട്ടീവ് ഡയറക്ടർ ഫാ. ജേക്കബ് മാവുങ്കൽ മുഖ്യപ്രഭാഷണം നടത്തി. കാരിത്താസ് ഇന്ത്യ ടീം ലീഡർ ഡോ.വി.ആർ. ഹരിദാസ്, സംസ്ഥാന കോഓർഡിനേറ്റർ അബീഷ് ആന്‍റണി, ഡബ്ല്യുഎസ്എസ്എസ് പ്രോഗ്രാം ഓഫീസർ പി.എ. ജോസ്, കേരളാ സോഷ്യൽ സർവീസ് ഫോറം പ്രോഗ്രാം മാനേജർ എബി ജോർജ് എന്നിവർ പ്രസംഗിച്ചു. സംസ്ഥാനത്തെ വിവിധ സോഷ്യൽ സർവീസ് സൊസൈറ്റികളിൽനിന്നു 35 പേരാണ് പരിശീലനത്തിൽ പങ്കെടുക്കുന്നത്. റേഡിയോ മാറ്റൊലി, ആദിമ ഫാർമേഴ്സ് പ്രൊഡ്യൂസർ ഓർഗനൈസേഷൻ തുടങ്ങിയ സ്ഥാപനങ്ങളിലെ സന്ദർശനം പരിശീലനത്തിന്‍റെ ഭാഗമാണ്. കാരിത്താസ് ഇന്ത്യ ലീഡ് മാനേജർ ഡോ.ജയ്സണ്‍ വർഗീസാണ് മുഖ്യ പരിശീലകൻ. കാലാവസ്ഥ വ്യതിയാനത്തിന്‍റെ തിക്തഫലങ്ങൾ അതിജീവിക്കാൻ ജനങ്ങളെ പ്രാപ്തരാക്കുക, പ്രകൃതിദുരന്ത പ്രതിരോധശേഷി ഉയർത്തുന്നതിന് പദ്ധതികൾ ആവിഷ്കരിക്കുക, ജനകീയ കർമസേന രൂപീകരിക്കുക, ദുരന്ത മാനേജ്മെന്‍റ് പ്ലാനുകളുടെ രൂപീകരണത്തിന് നേതൃത്വം നൽകാൻ ടീമിനെ സജ്ജമാക്കുക എന്നിവ പരിശീലന ലക്ഷ്യമാണെന്നു അദ്ദേഹം പറഞ്ഞു.

ഭക്ഷ്യയോഗ്യമായ ഇലകളുടെ പ്രദർശനം നടത്തി

വൈത്തിരി: മെച്ചന ഗവ.എൽപി സ്കൂളിൽ ഭക്ഷ്യയോഗ്യമായ 15ൽപരം ഇലകളുടെ പ്രദർശനം നടത്തി. ഉച്ചഭക്ഷണത്തിന് ഇലക്കറികൾ കുട്ടികൾക്ക് വിളന്പി. കർക്കടകത്തിൽ ഭക്ഷണക്രമത്തിൽ ഉൾപ്പെടുത്തേണ്ട 10 ഇനം ഇലകൾ പ്രധാനാധ്യാപിക കെ.എ. അമ്മുജ വിദ്യാർഥികൾക്ക് പരിചയപ്പെടുത്തി. അധ്യാപകരായ പി.ബി. സരിത, എ.ജെ. അരുണ്‍പ്രകാശ്, എ.എസ്. ജസ്ലിൻ, പി.വി. അഞ്ജു, പി. മുഹമ്മദ്ഷെരീഫ് എന്നിവർ നേതൃത്വം നൽകി.

കടുവാ ശല്യം പരിഹരിക്കണമെന്ന്

പുൽപ്പള്ളി: സീതാമൗണ്ട് ഐശ്വര്യക്കവലയിൽ പശുക്കിടാവിനെ കൊന്ന കടുവയെ കുടുവച്ച് പിടിക്കണമെന്ന് പ്രദേശവാസികൾ ആവശ്യപ്പെട്ടു. കഴിഞ്ഞദിവസം രാത്രിയാണ് കടുവ പശുക്കുട്ടിയെ കൊന്നത്. ഇതിനുശേഷം സ്ഥലംവിട്ട കടുവ തിരിച്ചെത്തി ജഡം ഭക്ഷിച്ചത് ജനങ്ങളെ ആശങ്കയിലാക്കി. വനം വകുപ്പ് സ്ഥാപിച്ച കാമറയിൽ കടുവയുടെ ചിത്രം പതിഞ്ഞിരുന്നു. ജനങ്ങൾ തിങ്ങിപ്പാർക്കുന്ന പ്രദേശമാണ് ഐശ്വര്യക്കവല. കടുവ സാന്നിധ്യം മൂലം വളർത്തുമൃഗങ്ങളെ പകൽ കൃഷിടിയങ്ങളിൽ കെട്ടാൻ മടിക്കുകയാണ് കർഷകർ. ആളുകൾ വീടിനു പുറത്ത് നടക്കുന്നത് ഭീതിയോടെയാണ്. പശുക്കുട്ടിയെ കൊന്ന ദിവസം കൂട് വച്ചിരുന്നുവെങ്കിൽ കടുവയെ പിടിക്കാമായിരുന്നുവെന്നാണ് നാട്ടുകാരുടെ അഭിപ്രായം. കടുവയെ പിടിക്കാൻ നടപടി വൈകുന്ന പക്ഷം സമരം സംഘടിപ്പിക്കാനാണ് അവരുടെ തീരുമാനം.

നോട്ട്ബുക്ക് ചലഞ്ച് നടത്തി

നടവയൽ: സെന്‍റ് തോമസ് എൽപി സ്കൂൾ വിദ്യാർഥികൾ നിർധന കുടുംബങ്ങളിൽനിന്നുള്ള സഹപാഠികൾക്കായി നോട്ട്ബുക്ക് ചലഞ്ച് നടത്തി. പ്രധാനാധ്യാപകൻ ബെന്നി, അധ്യാപകരായ സിസ്റ്റർ മഞ്ജു ജോണ്‍, വി.എം. സിന്‍റ, എം.സി. ഷെല്ലിമോൾ എന്നിവർ നേതൃത്വം നൽകി. ചലഞ്ചിൽ കുട്ടികളുടെ വലിയ പങ്കാളത്തം ഉണ്ടായതായി ഹെഡ്മാസ്റ്റർ പറഞ്ഞു.

കർഷക അവാർഡിന് 25 വരെ അപേക്ഷിക്കാം

കൽപ്പറ്റ: കാർഷിക വികസന കർഷക ക്ഷേമ വകുപ്പ് 2024ലെ സംസ്ഥാനതല കർഷക അവാർഡിന് അപേക്ഷ ക്ഷണിച്ചു. ഭിന്നശേഷി വിഭാഗത്തിലെ കർഷകൻ/കർഷക, കാർഷിക മേഖലയിലെ മികച്ച സ്റ്റാർട്ടപ്പ്, അതത് വർഷങ്ങളിൽ കൃഷി വകുപ്പിന്‍റെ പ്രത്യേക പദ്ധതികൾ മികവോടെ നടപ്പാക്കുന്ന കൃഷി ഭവനുള്ള അവാർഡ്, മികച്ച കൃഷി ജോയിന്‍റ് ഡയറക്ടർ, ഡെപ്യൂട്ടി ഡയറക്ടർ, കൃഷി എൻജിനിയർ, മികച്ച തദ്ദേശ സ്വയംഭരണ സ്ഥാപനത്തിനുള്ള സി. അച്യുതമേനോൻ സ്മാരക അവാർഡ്, മികച്ച കൃഷിഭവനുള്ള വി.വി. രാഘവൻ സ്മാരക അവാർഡ്, പത്മശ്രീ കെ. വിശ്വനാഥൻ (മിത്രാനികേതൻ) മെമ്മോറിയൽ നെൽക്കതിർ അവാർഡ്, ജൈവകൃഷി നടത്തുന്ന ഊര്/ക്ലസ്റ്റർ, സിബി കല്ലിങ്കൽ സ്മാരക കർഷകോത്തമ അവാർഡ്, കേരകേസരി, പൈതൃക കൃഷി/ വിത്ത് സംരക്ഷണം/ വിളകളുടെ സംരക്ഷണ പ്രവർത്തനം നടത്തുന്ന ഊര് / വ്യക്തി, ജൈവ കർഷകൻ, യുവ കർഷക/ യുവകർഷകൻ, ഹരിത മിത്ര, ഹൈടെക് കർഷകൻ, കർഷക ജ്യോതി, തേനീച്ച കർഷകൻ, കർഷക തിലകം (വനിത), ശ്രമശക്തി അവാർഡ്, കാർഷിക മേഖലയിലെ നൂതന ആശയം, കർഷക ഭാരതി, കാർഷിക പ്രവർത്തനത്തിൽ ഏർപ്പെട്ടിരിക്കുന്ന (ട്രാൻസ്ജെൻഡർ), ക്ഷോണിസംരക്ഷണ അവാർഡ്, മികച്ച കൂണ്‍ കർഷക/ കർഷകൻ, ചക്ക സംസ്കരണം/ മൂല്യവർധന മേഖലയിലെ വ്യക്തി/ഗ്രൂപ്പ്, കൃഷിക്കൂട്ടങ്ങൾക്കുള്ള അവാർഡ്, കർഷക വിദ്യാർഥി (സ്കൂൾ, ഹയർസെക്കൻഡറി, കലാലയം), കാർഷിക മേഖലയിൽ കയറ്റുമതി വ്യക്തി/ഗ്രൂപ്പ്, പ്രാഥമിക കാർഷിക വായ്പാ സഹകരണ സംഘങ്ങൾ, മികച്ച എഫ്പിഒ /എഫ്പിസി, കാർഷിക ഗവേഷണത്തിന് എം.എസ്. സ്വാമിനാഥൻ അവാർഡ്, റസിഡൻസ് അസോസിയേഷൻ, മികച്ച വിദ്യാഭ്യാസ സ്ഥാപനം, മികച്ച സ്പെഷൽ സ്കൂൾ, പച്ചക്കറി ക്ലസ്റ്റർ, പോഷക തോട്ടം, മികച്ച പൊതുമേഖല സ്ഥാപനം (കൃഷി വകുപ്പ് ഒഴികെ), സ്വകാര്യ സ്ഥാപനംകൃഷി വകുപ്പ് ഒഴികെ (കൃഷി വകുപ്പുമായി ബന്ധമില്ലാത്ത സ്ഥാപനം), ഫാം ഓഫീസർ, കൃഷി ഓഫീസർ, അസിസ്റ്റന്‍റ് കൃഷി ഓഫീസർ /കൃഷി അസിസ്റ്റന്‍റ് തുടങ്ങി 40 ഓളം വിഭാഗങ്ങളിലേക്കാണ് അപേക്ഷ ക്ഷണിച്ചത്. കൃഷി ഭൂമിയുടെ രേഖകൾ, നടപ്പാക്കിയ കാർഷിക പ്രവർത്തനങ്ങളുടെ വിശദാംശങ്ങൾ സഹിതമുള്ള അപേക്ഷ 23നകം അതത് കൃഷി ഭവനുകളിൽ നൽകണം. അപേക്ഷയും കൂടുതൽ വിവരങ്ങളും കൃഷി വകുപ്പിന്‍റെ www.keralaagricutlure.gov.ശി ൽ ലഭിക്കും. ഫോണ്‍: 04936 202506.

കടുവയെ കൂട് വച്ച് പിടിക്കണമെന്ന്

ഗൂഡല്ലൂർ: ദേവർഷോല സർക്കാർമൂല സ്വകാര്യ എസ്റ്റേറ്റിലെ തേയിലക്കാട്ടിനുള്ളിൽ തന്പടിച്ച കടുവയെ കൂട് വച്ച് പിടിക്കണമെന്ന് നാട്ടുകാർ വനംവകുപ്പിനോട് ആവശ്യപ്പെട്ടു. എസ്റ്റേറ്റ് കാടുമൂടി കിടക്കുകയാണ്. കാട്ടിനുള്ളിൽ കടുവയും ആനയും തന്പടിച്ചിരിക്കുകയാണ്. ആക്രമണകാരിയായ കടുവ ഇതുവരെ പശു, ആട് ഉൾപ്പടെ ആറ് വളർത്തു ജീവികളെ കൊലപ്പെടുത്തി. ഇരയെ തേടി പിടിക്കാൻ പറ്റാത്ത കടുവയാണിവിടെ ചുറ്റിത്തിരിയുന്നതെന്നാണ് സംശയിക്കുന്നത്. പാടന്തറ, സർക്കാർമൂല, കാവതിവയൽ, മാരക്കര, കെണിയംവയൽ, ത്രീഡിവിഷൻ തുടങ്ങിയ ഭാഗങ്ങളിൽ ഭീതി പരത്തി വരികയാണ്. ആനയെ കൊണ്ടും കടുവയെ കൊണ്ടും നാട്ടുകാർ പൊറുതിമുട്ടിയിരിക്കുകയാണ്. എസ്റ്റേറ്റ് തൊഴിലാളികൾക്ക് ജോലിക്ക് പോകാൻ പോലും പറ്റാത്ത അവസ്ഥയാണുള്ളത്. തേയിലക്കാട്ടിൽ കടുവ ഒളിച്ചിരിക്കുന്നതായി സംശയം ഉണ്ട്. ഇതേത്തുടർന്ന് ഇന്നലെ ജോലിക്കെത്തിയ സ്ത്രീകൾ ഉൾപ്പെടെയുള്ള തോട്ടം തൊഴിലാളികൾ ജോലിക്ക് ഇറങ്ങാതെ മടങ്ങി പോകുകയായിരുന്നു. കടുവയെ കൂട് വച്ച് പിടിക്കണമെന്ന് തൊഴിലാളികളും ആവശ്യപ്പെട്ടു.

തദ്ദേശ തെരഞ്ഞെടുപ്പ് കരട് വോട്ടർപട്ടിക; വയനാട്ടിൽ 6,02,917 വോട്ടർമാർ

കൽപ്പറ്റ: തദ്ദേശ സ്വയംഭരണ സ്ഥാപനങ്ങളിലേക്കുള്ള പൊതുതെരഞ്ഞെടുപ്പിന് മുന്നോടിയായുള്ള വോട്ടർപട്ടികയുടെ കരട് സംസ്ഥാന തെരഞ്ഞെടുപ്പ് കമ്മീഷൻ പ്രസിദ്ധീകരിച്ചപ്പോൾ വയനാട് ജില്ലയിൽ 6,02,917വോട്ടർമാർ. സ്ത്രീകൾ-310146, പുരുഷൻമാർ-292765, ട്രാൻസ്ജെൻഡർ-ആറ് എന്നിങ്ങനെയാണ് ജില്ലയിലെ കണക്ക്. അന്തിമ വോട്ടർപട്ടിക ഓഗസ്റ്റ് 30ന് പ്രസിദ്ധീകരിക്കും.സംസ്ഥാനത്ത് ആകെ 1034 തദ്ദേശ സ്ഥാപനങ്ങളിലെ 20,998 വാർഡുകളിലായി 2,66,78,256 വോട്ടർമാരാണ് കരട് പട്ടികയിലുള്ളത്. ഇതിൽ 1,26,32,186 പുരുഷൻമാരും, 1,40,45,837 സ്ത്രീകളും, 233 ട്രാൻസ്ജെൻഡർ വോട്ടർമാരുമാണ്. കരട് വോട്ടർപട്ടിക എല്ലാ തദ്ദേശ സ്ഥാപനങ്ങളിലും, വില്ലേജ്, താലൂക്ക് ഓഫീസുകളിലും, സംസ്ഥാന തിരഞ്ഞെടുപ്പ് കമ്മീഷന്‍റെ ഔദ്യോഗിക വെബ്സൈറ്റായ sec.kerala.gov.in പരിശോധനയ്ക്ക് ലഭ്യമാകും. വോട്ടർപട്ടികയിൽ പേര് ചേർക്കാനും തിരുത്താനും ഓഗസ്റ്റ് ഏഴ് വരെ അവസരമുണ്ട്. 2025 ജനുവരി ഒന്നിനോ അതിനുമുൻപോ 18 വയസ് പൂർത്തിയായവർക്ക് വോട്ടർപട്ടികയിൽ പേര് ചേർക്കാം.വോട്ടർപട്ടികയിൽ പേര് ചേർക്കുന്നതിനും (ഫോറം 4), ഉൾക്കുറിപ്പുകൾ തിരുത്തുന്നതിനും (ഫോറം 6), സ്ഥാനമാറ്റം വരുത്തുന്നതിനും (ഫോറം 7) സംസ്ഥാന തെരഞ്ഞെടുപ്പ് കമ്മീഷന്‍റെ വെബ്സൈറ്റായ sec.kerala.gov.in വഴി ഓണ്‍ലൈനായി അപേക്ഷിക്കാം. ഓണ്‍ലൈനായി അപേക്ഷിക്കുന്പോൾ ലഭിക്കുന്ന കംപ്യൂട്ടർ ജനറേറ്റഡ് നോട്ടീസിലെ തീയതിയിൽ ആവശ്യമായ രേഖകളുമായി ഹിയറിംഗിന് നേരിട്ട് ഹാജരാകണം. വോട്ടർപട്ടികയിൽ നിന്ന് പേര് ഒഴിവാക്കുന്നത് സംബന്ധിച്ച ആക്ഷേപങ്ങൾ (ഫോറം 5) ഓണ്‍ലൈനായി രജിസ്റ്റർ ചെയ്യുകയും അതിന്‍റെ പ്രിന്‍റൗട്ടിൽ അപേക്ഷകനും ആ വാർഡിലെ ഒരു വോട്ടറും ഒപ്പിട്ട് നേരിട്ടോ തപാലിലൂടെയോ ഇലക്ടറൽ രജിസ്ട്രേഷൻ ഓഫീസർക്ക് സമർപ്പിക്കണം. ഓണ്‍ലൈൻ അല്ലാതെയും നിശ്ചിത ഫോറത്തിൽ ഇലക്ഷൻ രജിസ്ട്രേഷൻ ഓഫീസർക്ക് അപേക്ഷ നൽകാവുന്നതാണ്. ഗ്രാമപഞ്ചായത്തുകളിലും മുനിസിപ്പാലിറ്റികളിലും അതാത് സ്ഥാപനങ്ങളിലെ സെക്രട്ടറിമാരും കോർപറേഷനുകളിൽ അഡീഷണൽ സെക്രട്ടറിയുമാണ് ഇലക്ടറൽ രജിസ്ട്രേഷൻ ഓഫീസർമാർ. അപേക്ഷകളിലും ആക്ഷേപങ്ങളിലും ഇലക്ടറൽ രജിസ്ട്രേഷൻ ഓഫീസർമാർ എടുക്കുന്ന നടപടിക്കെതിരേ തദ്ദേശസ്വയംഭരണ വകുപ്പ് ജില്ലാ ജോയിന്‍റ് ഡയറക്ടർക്ക് ഉത്തരവ് തീയതി മുതൽ 15 ദിവസത്തിനകം അപ്പീൽ നൽകാം.

കസ്തൂർബ വനിതാ ഗാന്ധിദർശൻ വേദി ഭാരവാഹികൾ ചുമതലയേറ്റു

കൽപ്പറ്റ: ഗാന്ധി ദർശൻ വേദിയുടെ വനിതാ വിഭാഗമായ കസ്തൂർബ വനിതാ ഗാന്ധിദർശൻ വേദി ജില്ലാ ഭാരവാഹികൾ ചുമതലയേറ്റു. ഇതിനു ഡിസിസി ഓഫീസിൽ സംഘടിപ്പിച്ച ചടങ്ങ് യുഡിഎഫ് ജില്ലാ കണ്‍വീനർ പി.ടി. ഗോപാലക്കുറുപ്പ് ഉദ്ഘാടനം ചെയ്തു. കസ്തൂർബ വനിതാ ഗാന്ധിദർശൻ വേദി ജില്ലാ ചെയർപേഴ്സണ്‍ ചിന്നമ്മ ജോസ് അധ്യക്ഷത വഹിച്ചു. ഗാന്ധിദർശൻ വേദി ജില്ലാ ചെയർമാൻ ഇ.വി. ഏബ്രഹാം ഭാരവാഹികൾക്ക് സത്യപ്രതിജ്ഞ ചൊല്ലിക്കൊടുത്തു. ടി. സിദ്ദിഖ് എംഎൽഎ ഉമ്മൻ ചാണ്ടി അനുസ്മരണം നടത്തി. കെപിസിസി അംഗം പി.പി. ആലി, കെ.വി. പോക്കർ ഹാജി, കെ.ജി. വിലാസിനി, എള്ളിൽ മുസ്തഫ, പി.വി. ആന്‍റണി, ലേഖ രാജീവ്, അഡ്വ. ഗ്ലാഡിസ് ചെറിയാൻ, ഗിരിജ മോഹൻദാസ്, ലില്ലി മാത്യു, ശ്യാമള സുനി, സുധാദേവി, ശ്യാമള സുനി, ഒ.ജെ. ബിന്ദു, ഐ.ബി. മൃണാളിനി, ബീന സജി, ഷൈജി, ത്രേസ്യാമ്മ വർഗീസ്, ബിജി വിൻസന്‍റ്, ജയപ്രഭ, ഷൈല ജീസസ് എന്നിവർ പ്രസംഗിച്ചു.

എകെഎസ്ടിയു ധർണ നടത്തി

കൽപ്പറ്റ: ഓൾ കേരള സ്കൂൾ ടീച്ചേഴ്സ് യൂണിയൻ ജില്ലാ കമ്മിറ്റിയുടെ നേതൃത്വത്തിൽ കളക്ടറേറ്റ് പരിസരത്ത് ധർണ നടത്തി. സംസ്ഥാനത്തോടുള്ള കേന്ദ്ര അവഗണന അവസാനിപ്പിക്കുക, വിദ്യാഭ്യാസ മേഖലയിലെ വർഗീയ അജൻഡകളെ ചെറുത്തുതോൽപ്പിക്കുക, ശന്പള പരിഷ്കരണം നടപ്പാക്കുക, ഡിഎ, ലീവ് സറണ്ടർ ആനുകൂല്യങ്ങൾ പുനഃസ്ഥാപിക്കുക, ഉച്ചഭക്ഷണം, സൗജന്യ യൂണിഫോം, വിദ്യാവാഹിനി പദ്ധതികൾക്ക് ആവശ്യമായ തുക വകയിരുത്തുക, പ്രീ പ്രൈമറി സംവിധാനം പരിഷ്കരിക്കുക, കായികാധ്യാപകരുടെ പ്രശ്നങ്ങൾ പരിഹരിക്കുക, പൊതുവിഭ്യാഭ്യാസ മേഖലയുടെ സമഗ്ര പരിഷ്കരണം യാഥാർഥ്യമാക്കുക തുടങ്ങിയ ആവശ്യങ്ങൾ ഉന്നയിച്ചായിരുന്നു ധർണ. സംസ്ഥാന എക്സിക്യുട്ടീവ് കമ്മിറ്റി അംഗം സി. ബിജു ഉദ്ഘാടനം ചെയ്തു. ജില്ല പ്രസിഡന്‍റ് വി.ആർ. പ്രകാശ് അധ്യക്ഷത വഹിച്ചു. ജോയിന്‍റ് കൗണ്‍സിൽ ജില്ലാ സെക്രട്ടറി ടി.ഡി. സുനിൽമോൻ, കെജിഒഎഫ് ജില്ലാ സെക്രട്ടറി അമൽ വിജയ്, എകെഎസ്ടിയു സംസ്ഥാന കമ്മിറ്റി മുൻ അംഗം സ്റ്റാൻലി ജേക്കബ്, ജില്ലാ വൈസ് പ്രസിഡന്‍റ് സുനിൽ അഗസ്റ്റിൻ, ജില്ലാ സെക്രട്ടറി ശ്രീജിത്ത് വാകേരി, ട്രഷറർ എൻ.വി. കരുണാകരൻ എന്നിവർ പ്രസംഗിച്ചു.

വി.എസ്. അച്യുതാനന്ദന്‍റെ നിര്യാണത്തിൽ അനുശോചിച്ചു

കൽപ്പറ്റ: സ്വാതന്ത്ര്യാനന്തരം അടിച്ചമർത്തപ്പെട്ടവർക്കും തൊഴിലാളികൾക്കും കർഷകർക്കും വേണ്ടി കേരളത്തിൽ നടന്ന സമര പോരാട്ടങ്ങൾക്ക് പുതിയ അധ്യായം കുറിച്ച ധീരനായ കമ്മ്യൂണിസ്റ്റായിരുന്നു വി.എസ്. അച്യുതാനന്ദൻ എന്ന് എൻസിപി-എസ് ജില്ലാ കമ്മിറ്റി അനുസ്മരിച്ചു. എൻസിപി-എസ് ജില്ലാ പ്രസിഡന്‍റ് ഷാജി ചെറിയാൻ, സംസ്ഥാന സെക്രട്ടറി സി.എം. ശിവരാമൻ, ജില്ലാ ബ്ലോക്ക് നേതാക്കളായ പി.പി. സദാനന്ദൻ, സി.ടി. നളിനാഷൻ, കെ.വി. റെനിൽ, അനൂപ് ജോജോ, സലിം കടവൻ, മമ്മൂട്ടി എളങ്ങോളി, ഷൈജു വി. കൃഷ്ണ, എം. ശ്രീകുമാർ, എ.പി. ഷാബു, ടി.പി. നൂറുദ്ദീൻ, എം.കെ. ബാലൻ, ജയിംസ് മാങ്കുത്തയിൽ, കെ.സി. സ്റ്റീഫൻ, എച്ച്. സൈമണ്‍, സി.എം. വത്സല, രാജൻ മൈക്കിൾ, സുരേന്ദ്ര ബാബു, ജോർജ് മുള്ളൻകൊല്ലി തുടങ്ങിയവർ അനുശോചനം രേഖപ്പെടുത്തി. കൽപ്പറ്റ: വി.എസ്. അച്യുതാനന്ദന്‍റെ നിര്യാണത്തിൽ സിപിഐ-എംഎൽ സംസ്ഥാന കമ്മിറ്റി അനുശോചിച്ചു. ദുഖങ്ങളും കഷ്ടപാടുകളും നിറഞ്ഞു നിന്ന ജീവിതാരംഭം നൽകിയ സഹനശേഷിയും വ്യവസ്ഥയുടെ ക്രൂരതകളോടുള്ള തിരിച്ചറിവും മനുഷ്യനെ മനുഷ്യനായി കാണുന്ന ഒരു സാമൂഹ്യവ്യവസ്ഥ എന്ന സ്വപ്നം വിഎസിന്‍റെ മനസിൽ ഇടം നേടി. വർഗരഹിത സമൂഹമെന്ന ആ സ്വപ്നം യാഥാർത്ഥ്യമാക്കാൻ കമ്മ്യൂണിസ്റ്റ് പാർട്ടി അംഗവും പോരാളിയും നേതൃത്വവുമായി മാറി. അദ്ദേഹവും അദ്ദേഹത്തിന്‍റെ പാർട്ടിയും പ്രത്യയശാസ്ത്ര വ്യതിയാനത്തിൽപ്പെട്ട് മുന്നോട്ട് പോകുന്പോഴും തന്‍റെ തീക്ഷണമായ ജീവിതാനുഭങ്ങളിൽ നിന്ന് ആർജിച്ചെടുത്ത വർഗപക്ഷപാതിത്വം കൈയൊഴിയാതെയും അരികുവത്കരിക്കപ്പെടുന്നവരോടൊപ്പവും എന്നും നിലകൊണ്ട ധീരനായ പോരാളിയായിരുന്നു വി.എസ്. അച്യുതാനന്ദനെന്ന് കമ്മിറ്റി അനുസ്മരിച്ചു. പി.പി. കുഞ്ഞിരാമൻ (സെക്രട്ടറി), സാം പി. മാത്യു (അസിസ്റ്റന്‍റ് സെക്രട്ടറി) എന്നിവർ പ്രസംഗിച്ചു. കൽപ്പറ്റ: മുതിർന്ന കമ്മ്യൂണിസ്റ്റ് നേതാവും മുൻ മുഖ്യമന്ത്രിയുമായിരുന്ന വി.എസ്. അച്യുതാനന്ദന്‍റെ നിര്യാണത്തിൽ ആർജെഡി കൽപ്പറ്റ മണ്ഡലം കമ്മിറ്റി അനുശോചിച്ചു. ജനകീയ നേതാവ്, നിയമസഭാ സാമാജികൻ, പ്രതിപക്ഷനേതാവ്, മുഖ്യമന്ത്രി തുടങ്ങിയ സ്ഥാനങ്ങളിൽ എതിരാളികളെ പിന്നിലാക്കി ജനഹൃദയങ്ങളിൽ സ്ഥാനം നേടിയ വിഎസിന്‍റെ വിയോഗം കേരള ജനതയ്ക്കും ഇടതുപക്ഷ പ്രസ്ഥാനത്തിനും കനത്ത നഷ്ടമാണുണ്ടാക്കിയതെന്ന് യോഗം അഭിപ്രായപ്പെട്ടു. മണ്ഡലം പ്രസിഡന്‍റ് പി.കെ. രാജൻ അധ്യക്ഷത വഹിച്ചു. നാസർ കുരുണിയൻ, എം.വി. മണിയൻ, യു.എ. അജ്മൽ സാജിദ്, അഷ്റഫ് പുതുശേരി, എം.പി. ഷൈജു, കെ.കെ. വത്സല, ഷൈജൽ കൈപ്പ, കെ.എ. സനൂഷ് കുമാർ എന്നിവർ പ്രസംഗിച്ചു.

ശക്തമായ മഴയിൽ വീട് ഭാഗികമായി തകർന്നു

സുൽത്താൻ ബത്തേരി: ശക്തമായ മഴയിൽ വീട് ഭാഗികമായി തകർന്നു. നൂൽപ്പുഴ മാറോട് ശശിധരന്‍റെ വീടാണ് തകർന്നത്. കഴിഞ്ഞ ദിവസം പുലർച്ചെ ഒന്നരയോടെയാണ് സംഭവം. ശശിധരന്‍റെ വീടിന്‍റെ അടുക്കളഭാഗം ശക്തമായ മഴയിൽ തകർന്നുവീഴുകയായിരുന്നു. ചിമ്മിനിയടക്കമുള്ള ഭാഗമാണ് വലിയ ശബ്ദത്തോടെ തകർന്ന് വീണത്. ഈസമയം വീട്ടിലുണ്ടായിരുന്ന ശശിധരനും ഭാര്യയും മക്കളും പുറത്തേക്ക് ഓടി രക്ഷപ്പെട്ടു. നിരവധി സാധനങ്ങൾ തകർന്നുവീണ അവശിഷ്ടങ്ങൾക്കടിയിലായി. അടുക്കള തകർന്നതോടെ വീടിനുപുറത്താണ് ഭക്ഷണം പാകംചെയ്യുന്നത്. ചിമ്മിനി തകർന്നതോടെ വീടിന്‍റെ മറ്റ് ഭാഗങ്ങൾക്കും കേടുപാടുകൾ സംഭവിച്ചിട്ടുണ്ട്. ഇരുപത്തിമൂന്ന് വർഷം പഴക്കമുളള വീടാണ് മഴയിൽ തകർന്നത്. വീട്ടിൽ താമസിക്കാൻ പറ്റാത്ത സാഹചര്യമാണെന്നും പുതിയ വീട് അനുവദിക്കണമെന്നുമാണ് കുടുംബം ആവശ്യപ്പെടുന്നത്.

കോഴികൊല്ലി നാരങ്ങാക്കടവിൽ കോണ്‍ക്രീറ്റ് പാലം നിർമിക്കുന്നു

ഗൂഡല്ലൂർ: നെല്ലിയാളം നഗരസഭയിലെ കോഴികൊല്ലി നാരങ്ങാക്കടവിൽ കോണ്‍ക്രീറ്റ് പാലം നിർമിക്കും. കഴിഞ്ഞ ദിവസം ആർഡിഒ ഓഫീസിൽ ചേർന്ന ജനപ്രതിനിധികളുടെയും ഉദ്യോഗസ്ഥരുടെയും യോഗത്തിലാണ് ഇക്കാര്യത്തിൽ തീരുമാനം. 30 ലക്ഷം രൂപ ചെലവിലാണ് പാലം പണിയുക. നാരങ്ങാക്കടവ് പാലം കഴിഞ്ഞവർഷം കനത്ത മഴയിൽ ഒലിച്ചു പോയിരുന്നു. പകരം പാലം നിർമിക്കുന്നതിന് നാട്ടുകാർ സമ്മർദം ചെലുത്തിയപ്പോൾ ഇരുന്പുപാലം നിർമിക്കാൻ വനം വകുപ്പ് തീരുമാനിക്കുകയും പ്രവൃത്തി ആരംഭിക്കുകയും ചെയ്തു. ഇരുന്പുപാലം നിർമിക്കുന്നതിനെതിരേ നാട്ടുകാർ സിപിഎമ്മിന്‍റെ നേതൃത്വത്തിൽ നഗരസഭാകാര്യാലയത്തിനു മുന്പിൽ സമരം നടത്തി. ഈ പശ്ചാത്തലത്തിൽ ചേർന്ന യോഗത്തിലാണ് കോണ്‍ക്രീറ്റ് പാലം നിർമിക്കാൻ തീരുമാനമായത്. ആർഡിഒ ഗുണശേഖരന്‍റെ അധ്യക്ഷതയിൽ ചേർന്ന യോഗത്തിൽ ഡിഎഫ്ഒ വെങ്കിടേഷ് പ്രഭു, മുൻ എംഎൽഎ എം. ദ്രാവിഡമണി, വാർഡ് കൗണ്‍സിലർ ഭുവനേശ്വരൻ, എൻ. വാസു, രമേശ്, അസൈൻ, ഷാജി, രവികുമാർ, സുബൈർ, ഷംസുദ്ദീൻ, സുലൈമാൻ, കുഞ്ഞലവി, ഗോപാലൻ തുടങ്ങിയവർ പങ്കെടുത്തു.

കാട്ടാനാക്രമണത്തിൽ സ്ത്രീ കൊല്ലപ്പെട്ടതിൽ പ്രതിഷേധിച്ച് കൊളപ്പള്ളിയിൽ നാട്ടുകാർ റോഡ് ഉപരോധിച്ചു

പന്തല്ലൂർ: ചേരങ്കോട് ഗ്രാമ പഞ്ചായത്തിലെ അമ്മങ്കാവിൽ കാട്ടാനആക്രമണത്തിൽ സ്ത്രീ കൊല്ലപ്പെട്ടതിൽ പ്രതിഷേധിച്ച് കൊളപ്പള്ളി ടൗണിൽ നാട്ടുകാർ റോഡ് ഉപരോധിച്ചു. കാട്ടാന ശല്യത്തിന് ശാശ്വത പരിഹാരം കാണണമെന്നാവശ്യപ്പെട്ടാണ് സമരം നടത്തിയത്. രാവിലെ പത്ത് മുതൽ ഉച്ചയ്ക്ക് 1.30 വരെയാണ് സമരം നടത്തിയത്. സ്ത്രീകൾ ഉൾപ്പെടെ നൂറുക്കണക്കിന് പേർ സമരത്തിൽ പങ്കെടുത്തു. വിവരമറിഞ്ഞ് ദേവാല ഡിവൈഎസ്പി ജയപാൽ, എസിഎഫ്, പന്തല്ലൂർ തഹസിൽദാർ സിറാജുന്നീസ, ഗൂഡല്ലൂർ എംഎൽഎ പൊൻ ജയശീലൻ, മുൻ എംഎൽഎ എം. ദ്രാവിഡമണി, ബിദർക്കാട് റേഞ്ചർ രവി തുടങ്ങിയവർ സ്ഥലത്തെത്തി സമരക്കാരുമായി ചർച്ച നടത്തി. പ്രശ്നത്തിന് പരിഹാരം കാണുമെന്ന് ഉറപ്പ് നൽകിയതിനെത്തുടർന്നാണ് ഉച്ചയോടെ സമരം അവസാനിപ്പിച്ചത്. കൊളപ്പള്ളിയിൽ മൂന്നര മണിക്കൂർ വാഹന ഗതാഗതം തടസപ്പെട്ടു. റോഡിന്‍റെ ഇരുഭാഗങ്ങളിലും ധാരാളം വാഹനങ്ങൾ കുടുങ്ങി കിടന്നിരുന്നു. വനാതിർത്തിയിൽ കിടങ്ങ് നിർമിക്കുകയും സോളാർ വേലി സ്ഥാപിക്കുകയും ചെയ്യും, പത്ത് ലക്ഷം രൂപ നഷ്ട പരിഹാരം നൽകും, കാട്ടാനയെ വനത്തിലേക്ക് തുരത്തും തുടങ്ങിയ കാര്യങ്ങളാണ് സമരക്കാർക്ക് അധികാരികൾ ഉറപ്പ് നൽകിയത്. അതേസമയം പ്രതിഷേധം തണുപ്പിക്കാനും പൊതുജനങ്ങളുടെ കണ്ണിൽ പൊടിയിടാനുമുള്ള അധികാരികളുടെ തന്ത്രമാണിതെന്നാണ് ജനങ്ങൾ ആരോപിക്കുന്നത്.

നൻമ കേണിച്ചിറ മേഖലാ സമ്മേളനം നടത്തി

കേണിച്ചിറ: മലയാള കലാകാരൻമാരുടെ ദേശീയ സംഘടനയായ നൻമയുടെ മേഖലാ സമ്മേളനം നടത്തി. ജില്ലാ പ്രസിഡന്‍റ് കെ.വി. സ്റ്റാനി ഉദ്ഘാടനം ചെയ്തു. മേഖലാ പ്രസിഡന്‍റ് കെ.എസ്. ജോസഫ് അധ്യക്ഷത വഹിച്ചു. സംസ്ഥാന വൈസ് പ്രസിഡന്‍റ് വിൻസണ്‍ സാമുവൽ മുഖ്യപ്രഭാഷണം നടത്തി. മേഴ്സി സാബു, എവണ്‍ പ്രമോദ്, എസ്. ചിത്രകുമാർ, എം.എൻ. ദിവാകരൻ, മനു മത്തായി, വിശാലാക്ഷി ചന്ദൻ, കലാമണ്ഡലം റെസി ഷാജിദാസ്, ടി.ഐ. ജയിംസ്, എം.എസ്. ഷിജിത്ത് എന്നിവർ പ്രസംഗിച്ചു. കേരള സംഗീത നാടക അക്കാദമി അവാർഡ് ജേതാവ് ജോണ്‍സണ്‍ ഐക്കര, തെയ്യം കലാകാരൻ പൊങ്ങിണി ശ്രീധരൻ എന്നിവരെ ആദരിച്ചു. കലാസംഘങ്ങൾക്കു സ്വീകരണം നൽകി. കലാപ്രതിഭകളെ അനുമോദിച്ചു.

നെൻമേനി ശുദ്ധജല വിതരണ സൊസൈറ്റിയെപ്പറ്റി പഠിക്കാൻ വിദേശികൾ

സുൽത്താൻ ബത്തേരി: മാതൃകാ ജനകീയ പദ്ധതിയായ നെൻമേനി ശുദ്ധജല വിതരണ പദ്ധതിയെപ്പറ്റി പഠിക്കുന്നതിനായി 29 വിദേശ രാജ്യങ്ങളിൽ നിന്നുള്ള പ്രതിനിധികൾ നെൻമേനിയിലെത്തി. ഇവർ പദ്ധതിയെപ്പറ്റി പഠനം നടത്തുകയും ഗ്രാമീണ ജനങ്ങളുമായി ആശയവിനിമയം നടത്തുകയും പദ്ധതി മാതൃക പദ്ധതിയാണെന്ന് വിലയിരുത്തുകയും ചെയ്തതായി സൊസൈറ്റി ഭാരവാഹികൾ വാർത്താ സമ്മേളനത്തിൽ അറിയിച്ചു. കേരള വാട്ടർ അതോറിറ്റിയുടെ കീഴിലുണ്ടായിരുന്ന പദ്ധതി 2005ൽ ജലനിധി പദ്ധതിയുടെ ഭാഗമായി. 2007ൽ ജനകീയ സമിതിയായ നെൻമേനി ശുദ്ധജല വിതരണ സൊസൈറ്റിയെ ഏൽപ്പിച്ചു. 389 ഹൗസ് കണക്ഷനും 253 പൊതുടാപ്പും ഉണ്ടായിരുന്ന പദ്ധതി സൊസൈറ്റിയുടെ കീഴിലേക്ക് മാറിയപ്പോഴേക്കും 5065 കണക്ഷനും 53 പൊതുടാപ്പും എന്ന നിലയിലേയ്ക്ക് മാറി. കഴിഞ്ഞ 10 വർഷത്തിനുള്ളിൽ പലവിധകാരണങ്ങളാൽ ജല വിതരണം മുടങ്ങിയത് 82 ദിവസം മാത്രമാണ്.ജനകീയ സമിതിയുടെ നേതൃത്വത്തിൽ നല്ല നിലയിൽ പ്രവർത്തിക്കുന്ന ശുദ്ധജല വിതരണ പദ്ധതിയിൽ ഒരു ദിവസം വേണ്ടി വരുന്നത് 16 ലക്ഷം ലിറ്റർ വെള്ളമാണ്. ചീരാൽ വില്ലേജിലെ മുഴുവൻ പ്രദേശങ്ങളിലെയും മലവയൽ മുതൽ മലങ്കര, പാലക്കുനിവരെയുള്ള പ്രദേശങ്ങളിലുമാണ് ജലവിതരണം നടത്തുന്നത്. നിലവിലുള്ള കണക്ഷന് പുറമേ ഇനിയും ആയിരം പേർക്കുകൂടി കണക്ഷൻ നൽകാനുള്ള കപ്പാസിറ്റിയാണുള്ളത്. ജനകീയ സൊസൈറ്റിയുടെ കീഴിലുള്ള ഈ സ്ഥാപനം പാലിയേറ്റീവ് പ്രവർത്തന രംഗത്തും സജീവമായി പ്രവർത്തിക്കുന്നു. മേഖലയിലെ കിടപ്പ് രോഗികളായ 20 പേർക്ക് മാസം തോറും ആയിരം രൂപ വീതം നൽകുകയും ചെയ്യുന്നുണ്ട്. വാർത്താസമ്മേളനത്തിൽ ട്രൈബൽ ഡെവലപ്പ്മെന്‍റ് സ്പെഷലിസ്റ്റ് എ. യോഹന്നാൻ, നെൻമേനി ശുദ്ധജല വിതരണ സൊസൈറ്റി പ്രസിഡന്‍റ് പി.എം. കുര്യാക്കോസ്, ഉപദേശക സമിതി അംഗം പി.കെ. കുര്യൻ, എക്സിക്യുട്ടീവ് അംഗങ്ങളായ ബിജു, പി.സി. വിജയകുമാർ എന്നിവർ പങ്കെടുത്തു.

കൃഷി ഓഫീസറെ ആദരിച്ചു

പുൽപ്പള്ളി: കേരള കാർഷിക സർവകലാശാലയിൽനിന്നു ഡോക്ടറേറ്റ് നേടിയ സാന്ദ്ര മരിയ സാജുവിനെ പഞ്ചായത്ത് കാർഷിക വികസന സമിതിയുടെ നേത്യത്വത്തിൽ ആദരിച്ചു. ബെന്നി കുറുന്പാലക്കാട്ട് അധ്യക്ഷത വഹിച്ചു. പഞ്ചായത്ത് പ്രസിഡന്‍റ് ടി.എസ്. ദിലീപ്കുമാർ മെമന്‍റോ നൽകി. ഡോ. ജോമറ്റ് കോതവഴിക്കൽ, കൃഷി അസിസ്റ്റന്‍റ് രഞ്ജിനി, ശശിധരൻ മാസ്റ്റർ,ബേബി കൈനികുടി, ജോയി, സണ്ണി കൊറ്റനാട്ട് എന്നിവർ പ്രസംഗിച്ചു.

ഒയിസ്ക വരാഘോഷം: സെമിനാർ നടത്തി

കൽപ്പറ്റ: ഒയിസ്ക ഇന്‍റർനാഷണൽ ചാപ്റ്ററിൽ ഒയിസ്ക വാരാഘോഷം ആരംഭിച്ചു. ഇതിന്‍റെ ഭാഗമായി പരിസ്ഥിതി-ജൈവ വൈവിധ്യ സംരംക്ഷണ സെമിനാർ സംഘടിപ്പിച്ചു. ശ്രദ്ധേയമായ പ്രവർത്തനം കാഴ്ച വച്ച പരിസ്ഥിതി പ്രവർത്തകരെ ആദരിച്ചു. ഓയിസ്ക ജില്ലാ സെക്രട്ടറി അഡ്വ.അബ്ദുൾ റഹ്മാൻ കാതിരി ഉദ്ഘാടനം ചെയ്തു. ചാപ്റ്റർ പ്രസിഡന്‍റ് ഡോ.എ.ടി. സുരേഷ് അധ്യഷത വഹിച്ചു. സി.ഡി. സുനീഷ്, കെ.ഐ. വർഗീസ്, എം. ഉമ്മർ, ഡോ.ടി.സി. അനിത, ഷംന നസീർ, ഡോ.മണിലാൽ, പി. ഓമന എന്നിവർ പ്രസംഗിച്ചു. ഡി. ശരവണൻ(ആരണ്യ ഓറോവിൽ പുതുച്ചേരി), എസ്. ഭാരതിദാസൻ(അരുളകം നേച്ചർ കണ്‍സർവേഷൻ സൊസൈറ്റി, കോയന്പത്തൂർ), വൈൽഡ് ലൈഫ് ബയോളജിസ്റ്റ് ഡോ. ജിക്രിസ്റ്റാഫർ മാർത്താണ്ടം, ഫോറസ്റ്റ് ഇക്കോളജിസ്റ്റ് ഡോ.കന്തവേലു(തിരുച്ചിറപ്പിള്ളി) എന്നിവർ വിഷയങ്ങൾ അവതരിപ്പിച്ചു. എൽദോ ഫിലിപ്പ്, നിഷ ദേവസ്യ എന്നിവർ സംസാരിച്ചു.

റോഡ് സംരക്ഷണ ഭിത്തികളുടെ നിർമാണ പ്രവൃത്തികൾ പുരോഗമിക്കുന്നു

ഗൂഡല്ലൂർ: ഊട്ടി-മസിനഗുഡി പാതയിലെ കല്ലട്ടി ചുരത്തിൽ റോഡ് സംരക്ഷണഭിത്തികളുടെ നിർമാണ പ്രവൃത്തികൾ പുരോഗമിക്കുന്നു. റോഡ് അപകടങ്ങൾ കുറയ്ക്കുന്നതിന് പൊതുമരാമത്ത് പുതിയ സംവിധാനങ്ങൾ ഇവിടെ പരീക്ഷിച്ചു വരികയാണ്. റോഡോരങ്ങളിൽ റോളറുകൾ സ്ഥാപിച്ചിട്ടുണ്ട്. ഏറ്റവും കൂടുതൽ വാഹനാപകടങ്ങൾ സംഭവിക്കുന്ന മേഖലയാണിത്. അതുകൊണ്ടാണ് ഈ റൂട്ടിൽ അപകടങ്ങൾ കുറയ്ക്കുന്നതിനുള്ള മാർഗങ്ങൾ സ്വീകരിച്ചിരിക്കുന്നത്.

വിദ്യാർഥികളെ അനുമോദിച്ചു

മുട്ടിൽ: കുട്ടമംഗലം പഴശി ട്രൈബൽ ലൈബ്രറിയിൽ സംഘടിപ്പിച്ച സ്നേഹാദരം പരിപാടിയിൽ പ്രദേശത്ത് കഴിഞ്ഞ അധ്യയനവർഷം എസ്എസ്എൽസി, പ്ലസ് ടു പരീക്ഷകൾ വിജയിച്ചവരെയും ജില്ലാ സബ്ജൂണിയർ ഫുട്ബോൾ ടീം ക്യാപ്റ്റനായി തെരഞ്ഞെടുത്ത മുഹമ്മദ് മിദ്ലാജ്നെയും അനുമോദിച്ചു. പഞ്ചായത്ത് അംഗം ആയിഷ കാര്യങ്ങൽ ഉദ്ഘാടനം ചെയ്തു. മെമന്‍റോ വിതരണം അവർ നിർവഹിച്ചു. സതീഷ്കുമാർ അധ്യക്ഷത വഹിച്ചു. യുവ എഴുത്തുകാരി ഫർഹാന പാറു ബഷീർ അനുസ്മരണ പ്രഭാഷണം നടത്തി. വൈത്തിരി താലൂക്ക് ലൈബ്രറി കൗണ്‍സിൽ സെക്രട്ടറി സി. എം. സുമേഷ്, ജില്ലാ ലൈബ്രറി കൗണ്‍സിൽ അംഗം എ.കെ. മത്തായി, തുടങ്ങിയവർ പ്രസംഗിച്ചു.

നിഖ്യ സൂന്നഹദോസ് വാര്‍ഷികാഘോഷം നടത്തി

വയനാട്: യുണൈറ്റഡ് ക്രിസ്ത്യന്‍ ഫോറം കോടഞ്ചേരി മേഖലയുടെ ആഭിമുഖ്യത്തില്‍ നിഖ്യ സുന്നഹദോസിന്‍റെ 1700-ാം വാര്‍ഷികാഘോഷവും അനുസ്മരണവും സംഘടിപ്പിച്ചു. കോടഞ്ചേരി സെന്‍റ് മേരീസ് ഫൊറോന പാരിഷ് ഹാളില്‍ നടന്ന ചടങ്ങ് യാക്കോബായ സുറിയാനി സഭ കോഴിക്കോട് ഭദ്രാസനം മെത്രാപ്പോലീത്ത പൗലോസ് മോര്‍ ഐറേനിയോസ് ഉദ്ഘാടനം ചെയ്തു. താമരശേരി ബിഷപ് മാര്‍ റെമീജിയോസ് ഇഞ്ചനാനിയില്‍ അധ്യക്ഷത വഹിച്ചു. മലങ്കര ഓര്‍ത്തഡോക്‌സ് സുറിയാനി സഭ മലബാര്‍ ഭദ്രാസനം മെത്രാപ്പോലീത്ത ഗീവര്‍ഗീസ് മോര്‍ പക്കോമിയോസ് ചടങ്ങിൽ പങ്കെടുത്തു. യാക്കോബായ സുറിയാനി സഭ പെരുമ്പാവൂര്‍ മേഖല മെത്രാപ്പോലീത്ത മാത്യൂസ് മോര്‍ അഫ്രേം, കുന്നോത്ത് ഗുഡ് ഷെപ്പേഡ് മേജര്‍ സെമിനാരി പ്രഫ. ഫാ. ആന്‍റണി തറേക്കടവില്‍ എന്നിവര്‍ ക്ലാസുകള്‍ക്ക് നേതൃത്വം നല്‍കി.

മദ്യനയം: മത നേതാക്കൾ സർക്കാരിൽ സമ്മർദം ചെലുത്തണം

പനമരം: ജനദ്രോഹകരമായ നിലവിലെ മദ്യനയത്തിൽ മാറ്റം വരുത്താൻ മത നേതാക്കൾ സംയുക്തമായി സർക്കാരിൽ സമ്മർദം ചെലുത്തണമെന്ന് കേരള മദ്യനിരോധന സമിതി സംസ്ഥാന പ്രസിഡന്‍റ് ഇയ്യാച്ചേരി കുഞ്ഞികൃഷ്ണൻ അഭ്യർഥിച്ചു. സമിതിയുടെ ജില്ലാ കണ്‍വൻഷൻ പനമരത്ത് ഉദ്ഘാടനം ചെയ്യുകയായിരുന്നു അദ്ദേഹം. ജില്ലാ പ്രസിഡന്‍റ് സി.കെ. ദിവാകരൻ അധ്യത വഹിച്ചു. തങ്ങൾ അധികാരത്തിലെത്തിയാൽ മദ്യത്തിന്‍റെ ലഭ്യതയും ഉപയോഗവും നിയന്ത്രിക്കുമെന്ന് തെരഞ്ഞെടുപ്പ് പ്രകടന പത്രികയിൽ വാഗ്ദാനം നൽകിയവർ കഴിഞ്ഞ ഒൻപത് വർഷം കൊണ്ട് 32 ഇരട്ടി ബാറുകളാണ് തുറന്നത്. ഇത് കടുത്ത ജനവഞ്ചനയാണെന്ന് യോഗം വിലയിരുത്തി. സമിതി മഹിളാവേദി സംസ്ഥാന സെക്രട്ടറി ഇയ്യാച്ചേരി പത്മിനി, ഡോ.പി. ലക്ഷ്മണൻ, അബു ഗൂഡലായി, പ്രജീഷ്, പി.ആർ. സ്വതന്ത്ര മീനങ്ങാടി, വെള്ളസോമൻ, എൻ.യു. ബേബി, മുജീബ് റഹ്മാൻ, മണിനാരായണൻ, കെ.ആർ. ഗോപി, വി.ജി. ശശി, ഖാലിദ് പനമരം എന്നിവർ പ്രസംഗിച്ചു.

ഇഞ്ചികൃഷി രോഗവ്യാപനം; കൃഷിയിടങ്ങൾ വിദഗ്ധ സംഘം സന്ദർശിച്ചു

കൽപ്പറ്റ: കാർഷിക വികസന കർഷകക്ഷേമ വകുപ്പിന്‍റെ നേതൃത്വത്തിൽ രോഗവ്യാപനമുള്ള ജില്ലയിലെ ഇഞ്ചി കൃഷിയിടങ്ങളിൽ വിദഗ്ധ സംഘം സന്ദർശനം നടത്തി. മൾട്ടി ഡിസിപ്ലിനറി ഡയഗ്നോസ്റ്റിക് സംഘമാണ് കൃഷിയിടങ്ങൾ സന്ദർശിച്ചത്. ഇഞ്ചി കൃഷിയിൽ വ്യാപകമായി വരുന്ന കുമിൾമൂലം ഉണ്ടാവുന്ന ഇലകരിച്ചിൽ (പെർകുലേറിയ) ബാധിച്ച കൃഷിയിടങ്ങളിലാണ് എം.ഡി.ഡി.റ്റി ടീം പരിശോധന നടത്തിയത്. കാറ്റിലൂടെയും രാത്രിയിലെ കുറഞ്ഞ താപനില, കൂടിയ അന്തരീക്ഷ ആർദ്രത, മഞ്ഞ് എന്നിവയിലൂടെയാണ് പെട്ടന്നുള്ള രോഗവ്യാപനത്തിന് കാരണമാകുന്നത്. ഇഞ്ചിയുടെ നടീൽ സമയത്ത് മുൻകരുതലായി സ്യൂഡോമോണാസ് ഫ്ളൂറസെൻസെന്ന ജൈവ കുമിൾ നാശിനി (1 ലിറ്റർ വെള്ളത്തിൽ 20 ഗ്രാം എന്ന അളവിൽ) മണ്ണിൽ ചേർത്ത് കൊടുക്കൽ, തോട്ടത്തിൽ നീർവാർച്ചയുണ്ടെന്ന് ഉറപ്പാക്കൽ, കുമ്മായം, വളം എന്നിവ ചേർക്കൽ, രോഗ ബാധയുള്ള ചെടിയുടെ ഭാഗങ്ങൾ യഥാസമയം നീക്കെം ചെയ്യൽ എന്നിവ ഉറപ്പാക്കണം. ഇഞ്ചി തോട്ടങ്ങളിൽ രോഗലക്ഷണങ്ങൾ കണ്ട് തുടങ്ങിയാൽ കുമിൾ നാശിനി ചെടികളിൽ തളിക്കണം. പരിശോധനയിൽ പ്രിൻസിപ്പൽ കൃഷി ഓഫീസർ ഇൻചാർജ് കെ.ബിന്ദു, കൃഷി ഡെപ്യൂട്ടി ഡയറക്ടർ കെ.കെ രാമുണ്ണി, കൃഷി വിജ്ഞാൻ കേന്ദ്രം മേധാവി ഡോ. വി.പി രാജൻ,അന്പലവയൽആർ.എ.ആർ.എസ് അസിസ്റ്റന്‍റ് പ്രൊഫസർ ഡോ എൻ.പി ലിഷ്മ, ജില്ലാ പ്ലാന്‍റ് ഹെൽത്ത് മാനേജർ അനുശ്രീ മോഹൻ,കൃഷിഭവൻ ഉദ്യോഗസ്ഥർ നേതൃത്വം നൽകി.

നാടിന്‍റെ വികസനത്തിന് സംരംഭ നിക്ഷേപം അനിവാര്യം: ടി. സിദ്ദിഖ് എംഎൽഎ

കൽപ്പറ്റ: നാടിന്‍റെ വികസനത്തിന് സംരംഭ നിക്ഷേപങ്ങൾ അനിവാര്യമെന്ന് താലൂക്ക്തല നിക്ഷേപ സംഗമത്തിൽ ടി. സിദ്ദിഖ് എംഎൽഎ. ജില്ലാ വ്യവസായ കേന്ദ്രത്തിന്‍റെ ആഭിമുഖ്യത്തിൽ കൈനാട്ടി റോയൽ ക്രൗണിൽ നടത്തിയ വൈത്തിരി താലൂക്ക്തല നിക്ഷേപ സംഗമം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. സംരംഭകർ വ്യവസായ നിക്ഷേപ സാഹചര്യങ്ങൾ പ്രയോജനപ്പെടത്തി കൂടുതൽ തൊഴിലവസരങ്ങൾ സൃഷ്ടിച്ച് മാതൃകയാവണം. സംസ്ഥനത്ത് സർക്കാർ നടപ്പാക്കിയ ഈസ് ഓഫ് ഡൂയിങ് ബിസിനസ് റേറ്റിംഗിന്‍റെ ഭാഗമായി ലൈസൻസിംഗ് നടപടികളിലെ ഇളവുകൾ, നിയമ ഭേദഗതി സംബന്ധിച്ച് സംരംഭകർക്ക് അറിവുണ്ടാവണം. തൊഴിൽ സാധ്യതകൾ വർധിപ്പിച്ച് ഉത്പാദന ക്ഷമതയിലും പ്രതിശീർഷ വരുമാനത്തിലും വളർച്ചയുണ്ടാക്കാൻ സംരംഭകർക്ക് കഴിയണം. വ്യവസായ വകുപ്പിന്‍റെ നേതൃത്വത്തിൽ ഉത്പാദന സേവന മേഖലകളിലെ സമഗ്ര പുരോഗതി, വ്യവസായ സംരംഭകരെ കണ്ടെത്തൽ, സംരംഭകർക്ക് പ്രചോദനവും മാർഗ്ഗനിർദ്ദേശങ്ങളും നൽകാൻ സാധിക്കണമെന്നും എംഎൽഎ പറഞ്ഞു. വൈത്തിരി താലൂക്കിൽ ഉത്പാദന മേഖലയിൽ 50 കോടി നിക്ഷേപം നടത്തിയ സംരംഭകനായ എം.ടി. സുധീഷിനെ എംഎൽഎ ആദരിച്ചു. വ്യവസായ വകുപ്പ്, ബാങ്കുകൾ നടപ്പാക്കുന്ന വിവിധ പദ്ധതികൾ, വിവിധ വകുപ്പുകളിൽ നിന്നും ലഭിക്കേണ്ട അനുമതികൾ, മലിനീകരണ നിയന്ത്രണ ബോർഡ് ക്ലിയറൻസ് തുടങ്ങിയ വിഷയങ്ങൾ താലൂക്ക്തല നിക്ഷേപ സംഗമത്തിൽ സംവദിച്ചു. ജില്ലാ വ്യവസായ കേന്ദ്രം ജനറൽ മാനേജർ ബി. ഗോപകുമാർ അധ്യക്ഷനായ പരിപാടിയിൽ ജില്ലാ ലീഡ് ബാങ്ക് മാനേജർ ടി.എം. മുരളീധരൻ, തദ്ദേശ സ്വയംഭരണ വകുപ്പ് അസിസ്റ്റന്‍റ് ഡയറക്ടർ ജോമോൻ ജോർജ്, വൈത്തിരി താലൂക്ക് വ്യാവസായ ഓഫീസർ എൻ. അയ്യപ്പൻ, വ്യവസായ വികസന ഓഫീസർ ജി.എസ്. സ്മിത എന്നിവർ പ്രസംഗിച്ചു.

പുലിയുടെ ആക്രമണത്തിൽ വളർത്തു മൃഗത്തിന് പരിക്കേറ്റു

സുൽത്താൻ ബത്തേരി: നെൻമേനി പഞ്ചായത്തിലെ ചീരാലിൽ വീണ്ടും പുലിയുടെ ആക്രമണം. കരിങ്കാളികുന്നിൽ കുറ്റിപ്പുറത്ത് രാധാകൃഷ്ണന്‍റെ നായയെയാണ് ഞായറാഴ്ച രാത്രി പുലി ആക്രമിച്ച് പരിക്കേൽപ്പിച്ചത്. കഴിഞ്ഞ രണ്ട് മാസത്തിനിടെ കരിങ്കാളിക്കുന്നിൽ മാത്രം മൂന്നാമത്തെ വളർത്തുമൃഗത്തെയാണ് പുലി ആക്രമിച്ചത്. രാത്രി പതിനൊന്നോടെ വീടിനുസമീപത്തെ നായക്കൂട്ടിൽ നിന്ന് കരച്ചിൽ കേട്ടു. ഈസമയം വീട്ടുകാർ ഉണർന്ന് ലൈറ്റിട്ട് നോക്കിയപ്പോൾ പുലി ഇരുളിലേക്ക് മറയുന്നതാണ് കണ്ടത്. പിന്നീട് നായയെ പരിശോധിച്ചപ്പോൾ കഴുത്തിൽ വലിയ മുറിവ് കണ്ടെത്തി. പിന്നീട് ഡോക്ടറെ കാണിച്ച് പത്ത് തുന്നലിടേണ്ടിയും വന്നു. ചീരാൽ നന്പ്യാർകുന്ന് മേഖലകളിൽ കഴിഞ്ഞ നാല് മാസത്തിനിടെ പതിനഞ്ച് വളർത്തുമൃഗങ്ങളാണ് പുലിയുടെ ആക്രമണത്തിനിരയായത്. ഇതിൽ നാല് പശുക്കിടാവും ആറ് ആടും അഞ്ച് വളർത്തുനായ്ക്കളും ഉൾപ്പെടും. ഇവയ്ക്ക് പുറമെയാണ് തെരുവ് നായ്ക്കളെ പുലി പിടികൂടിയത്. മേഖലയിൽ രണ്ട് പുലികളെ പിടികൂടിയെങ്കിലും മാസങ്ങളായി ചീരാൽ മേഖലയിൽ തുടർന്നുവരുന്ന പുലി ശല്യത്തിന് ഇപ്പോഴും മാറ്റമുണ്ടായിട്ടില്ല. പുലിയുടെ സാന്നിധ്യം മേഖലയിൽ സ്ഥിരമായതോടെ കരിങ്കാളികുന്നിൽ പുലിക്കായി കൂട് സ്ഥാപിച്ചു. എന്നാൽ പുലി കൂട്ടിൽ അകപ്പെട്ടില്ല. പുലിയെ ഭയന്ന് ജനങ്ങൾ തോട്ടങ്ങളിലെ ജോലി പോലും ഉപേക്ഷിച്ചു. ക്ഷീരമേഖലയിലെ കർഷകർ സൊസൈറ്റികളിൽ രാവിലെ പാൽ അളക്കാൻ പോകുതും ഭീതിയോടെയാണ്. ജനവാസമേഖലയിലിറങ്ങി ജനങ്ങളുടെ ജീവനും സ്വത്തിനും ഭീക്ഷണിയായി തീർന്ന പുലികളെ കൂട് വച്ച് പിടികൂടാൻ കാത്ത് നിൽക്കാതെ മയക്കുവെടി വച്ച് പിടികൂടണമെന്നാണ് ജനങ്ങളുടെ ആവശ്യം. മേപ്പാടി റേഞ്ചിലേയും തോട്ടാമൂല ഫോറസ്റ്റ് സെക്ഷന് കീഴിലുമുള്ള വനപാലകരും സ്ഥലത്ത്് ക്യാന്പ് ചെയ്ത് പട്രോളിംഗ് നടത്തുന്നുണ്ട്. ഐശ്വര്യക്കവലയിൽ കടുവ പശുക്കിടാവിനെ കൊന്നു പുൽപ്പള്ളി: സീതാമൗണ്ട് ഐശ്വര്യക്കവലയിൽ പശുക്കിടാവിനെ കടുവ കൊന്നു. മാടത്താനി അമ്മിണിയുടെ രണ്ട് വയസ് പ്രായമുള്ള പശുക്കിടാവാണ് കടുവയ്ക്കിരയായത്. ഇന്നലെ വൈകുന്നേരം 4.30 ഓടെയാണ് സംഭവം. വീടിന് സമീപത്തെ റോഡരികിൽ പുല്ലുതീറ്റുന്നതിനായി കെട്ടിയിട്ട പശുക്കിടാവിനെയാണ് കടുവ ആക്രമിച്ചത്.

പശുക്കിടാവിന്‍റെ കരച്ചിൽകേട്ട് നാട്ടുകാരെത്തിയപ്പോൾ കടുവ പശുക്കിടാവിനെ കടിച്ചുവലിച്ച് തൊട്ടടുത്ത കന്നാരംപുഴയോരത്തെ കൃഷിയിടത്തിലേക്ക് കൊണ്ടുപോവുകയായിരുന്നു. തുടർന്ന് നാട്ടുകാർ ബഹളമുണ്ടാക്കിയതോടെ പശുക്കിടാവിന്‍റെ ജഡം ഉപേക്ഷിച്ച് കടുവ സമീപത്തെ കൃഷിയിടത്തിലേക്ക് ഓടിമറഞ്ഞു. വിവരമറിഞ്ഞ് വനംവകുപ്പ് ഉദ്യോഗസ്ഥർ സ്ഥലത്തെത്തി പ്രദേശത്ത് തെരച്ചിൽ നടത്തി. കടുവ വീണ്ടും വരാനിടയുള്ളതിനാൽ എത്രയും വേഗം കൂട് സ്ഥാപിച്ച് കടുവയെ പിടികൂടണമെന്നാണ് നാട്ടുകാരുടെ ആവശ്യം. വനംവകുപ്പ് ഉദ്യോഗസ്ഥർക്കെതിരെ നാട്ടുകാർ പ്രതിഷേധിച്ചതിനെ തുടർന്ന് പുൽപ്പള്ളിയിൽനിന്നും പോലീസും സ്ഥലത്തെത്തിയിരുന്നു. പശുക്കിടാവിന്‍റെ ഉടമയ്ക്ക് വെറ്ററിനറി ഡോക്ടറുടെ റിപ്പോർട്ടിന്‍റെ അടിസ്ഥാനത്തിൽ അർഹമായ നഷ്ടപരിഹാരം നൽകുമെന്ന് വനംവകുപ്പ് ഉദ്യോഗസ്ഥർ പറഞ്ഞു. കർണാടക വനത്തോട് ചേർന്ന പ്രദേശത്താണ് പശുക്കിടാവിനുനേരെ കടുവയുടെ ആക്രമണമുണ്ടായത്. കർണാടക വനത്തിൽ നിന്നും ജനവാസ മേഖലയിലേക്ക് കടുവയിറങ്ങുന്നത് നിത്യസംഭവമായി മാറിയിരിക്കുകയാണെന്ന് നാട്ടുകാർ പറഞ്ഞു.

മാർ ഇവാനിയോസ് അനുസ്മരണ പദയാത്ര

മാനന്തവാടി: ധന്യൻ മാർ ഇവാനിയോസ് വലിയ മെത്രാപ്പോലീത്തായുടെ 72-ാമത് ഓർമപ്പെരുന്നാളും തീർഥാടന പദയാത്രയും മേഖലയിലെ മലങ്കര സുറിയാനി കത്തോലിക്കാ ദേവാലയങ്ങളുടെ നേതൃത്വത്തിൽ നടത്തി. ലിറ്റിൽ ഫ്ളവർ സ്കൂൾ അങ്കണത്തിൽ ആരംഭിച്ച പദയാത്ര മാനന്തവാടി പ്രോട്ടോ വികാരി ഫാ.തോമസ് തുണ്ടിയിൽ വളളിക്കുരിശ് കൈമാറി ഉദ്ഘാടനം ചെയ്തു. ഓർമപ്പെരുന്നാളിൽ ബഥനി സന്ന്യസസഭ സൂപ്പിരിയർ ജനറൽ റവ.ഡോ.ഗീർവർഗീസ് കുറ്റിയിൽ മുഖ്യകാർമികനായി. ഫാ.വർഗീസ് മറ്റമന, ഫാ.തോമസ് തുണ്ടിയിൽ, ഫാ.ജോണ്‍ പനച്ചിപറന്പിൽ, ഫാ.വർഗീസ് ചൂരക്കുഴി, ഫാ.തോമസ് ചമതയിൽ, ഫാ.സണ്ണി വെട്ടിക്കാട്ടിൽ, ഫാ.ഡേവിഡ് ആലിങ്കൽ എന്നിവർ സഹകാർമികരായി. ഓർമപ്പെരുന്നാളിന്‍റെ ഭാഗമായി ചേർന്ന യോഗത്തിൽ പാസ്റ്ററൽ കൗണ്‍സിൽ സെക്രട്ടറി ബേബി നീർക്കുഴി, എംസിഎ സഭാതല വൈസ് പ്രസിഡന്‍റ് ഷാജി തോമസ്, ബത്തേരി രൂപത എംസിഎ പ്രസിഡന്‍റ് പ്രിൻസ് ഏബ്രഹാം, രൂപത പാസ്റ്ററൽ കൗണ്‍സിൽ അംഗം ബിജു നാരോക്കാട്ട്, ഫിലിപ്പ് കൊട്ടേക്കാട്ട്, സിസ്റ്റർ ജെസ്വിൻ, സിസ്റ്റർ മനോജ്ഞ, സീന ബൈജു, അലിൻഡ എന്നിവർ പ്രസംഗിച്ചു. മാർ ഇവാനിയോസ് അനുസ്മരണ ക്വിസ് മത്സര വിജയികൾക്കും പരീക്ഷകളിൽ ഉന്നത വിജയം നേടിയ വിദ്യാർഥികൾക്കും സമ്മാനം നൽകി. മേഖലയിലെ പാസ്റ്ററൽ കൗണ്‍സിൽ, എംസിഎ, എംസിഎംഎഫ്, എംസിവൈഎം അംഗങ്ങൾ ആഘോഷത്തിനു നേതൃത്വം നൽകി.

വി.എസ്. അച്യുതാനന്ദന്‍റെ നിര്യാണത്തിൽ അനുശോചിച്ചു

കൽപ്പറ്റ: വി.എസ്. അച്യുതാനന്ദന്‍റെ നിര്യാണത്തിൽ സിപിഎം ജില്ലാ കമ്മിറ്റി അനുശോചിച്ചു. വയനാടിന്‍റെയും പോരാട്ട നായകനായിരുന്നു. കർഷക കർഷകതൊളിലാളി പ്രക്ഷോഭങ്ങളുടെ നേതൃത്വമായി ജില്ലയിൽ പലതവണയെത്തി. പാർട്ടി സംസ്ഥാന സെക്രട്ടറിയും പ്രതിപക്ഷ നേതാവുമായിരിക്കെ വയനാടിന്‍റെ പ്രശ്നങ്ങളിൽ നിരന്തരം ഇടപെട്ടു. കൃഷിനാശത്തിലും വിലയിടിവിലും കാർഷിക മേഖല തകർന്ന നാളുകളിൽ പ്രക്ഷോഭങ്ങൾക്ക് നേതൃത്വമായി. വരൾച്ചയും കർഷക ആത്മഹത്യയും അതിരൂക്ഷമായ 2005 ൽ പുൽപ്പള്ളി മേഖല സന്ദർശിച്ച് വിഷയം നിയമസഭയിൽ ഉയർത്തി. മുഖ്യമന്ത്രിയായപ്പോൾ കാർഷിക കടാശ്വാസ കമീഷൻ രൂപീകരിച്ച് കർഷകരെ ആത്മഹത്യയിൽനിന്ന് കരകയറ്റി. ആദിവാസി ഭൂസമരങ്ങൾക്ക് പിന്തുണ നൽകി. ഭൂസമരകേന്ദ്രങ്ങൾ സന്ദർശിച്ചു. വിഎസ് മുഖ്യമന്ത്രിയായിരിക്കെ വനവാകാശ നിയമപ്രകാരം അയ്യായിരം ആദിവാസികൾക്ക് ഭൂമി നൽകി. പൂക്കോട് വെറ്ററിനറി സർവകലാശാല സ്ഥാപിക്കുന്നതിനുള്ള ആക്ട് പാസാക്കി. വിദ്യാഭ്യാസ സ്ഥാപനങ്ങളും നിരവധി വികസന പദ്ധതികളും ജില്ലയ്ക്കായി നടപ്പാക്കിയെന്നും ജില്ലാ കമ്മിറ്റി അനുശോചനക്കുറിപ്പിൽ പറഞ്ഞു. ഇന്ത്യയിലെ കമ്മ്യൂണിസ്റ്റ് പ്രസ്ഥാനത്തിന്‍റെ കരുത്തുറ്റ നായകൻ: കെ.ജെ. ദേവസ്യ സുൽത്താൻ ബത്തേരി: ഇന്ത്യയിലെ കമ്മ്യൂണിസ്റ്റ് പ്രസ്ഥാനത്തിന്‍റെ കരുത്തുറ്റ നായകനായിരുന്നു വി.എസ്. അച്യുതാനന്ദനെന്ന് കേരള കോണ്‍ഗ്രസ്-എം സംസ്ഥാന ജനറൽ സെക്രട്ടറി കെ.ജെ. ദേവസ്യ. കമ്മ്യൂണിസ്റ്റുകാരുടെ മാത്രമല്ല ഇല്ലായ്മയെ അടുത്തറിഞ്ഞും മുതലാളിത്തത്തിന്‍റെ കടന്നുകയറ്റത്തിനെതിരേ പ്രതികരിക്കുകയും ചെയ്ത ധീര സഖാവായിരുന്നു. വിഎസിന്‍റെ നിര്യാണത്തിൽ അഗാധമായ ദുഃഖം രേഖപ്പെടുത്തുന്നതായും കെ.ജെ. ദേവസ്യ പറഞ്ഞു.

തെനേരി ക്ഷീരസംഘം വാർഷിക പൊതുയോഗം നടത്തി

കാക്കവയൽ: തെനേരി ക്ഷീരസംഘം വാർഷിക പൊതുയോഗം നടത്തി. പ്രസിഡന്‍റ് പി.ടി. ഗോപാലക്കുറുപ്പ് അധ്യക്ഷത വഹിച്ചു. 2024-25ൽ കൂടുതൽ പാൽ അളന്ന കർഷകരെ അദ്ദേഹം ആദരിച്ചു. സംഘം അംഗങ്ങളുടെ മക്കളിൽ പരീക്ഷകളിൽ ഉന്നത വിജയം നേടിയവർക്കുള്ള സ്കോളർഷിപ്പ് കൽപ്പറ്റ ക്ഷീര വികസന ഓഫീസർ സി.എച്ച്. ഹുസ്ന വിതരണം ചെയ്തു. എംആർഡിഎഫിൽനിന്നുള്ള ചികിത്സാസഹായധനം മിൽമ പി ആൻഡ് ഐ ജില്ലാ മേധാവി പി.പി. പ്രദീപൻ കൈമാറി. സംഘം ഡയറക്ടർ വി.ജെ. ബാബു സ്വാഗതവും സെക്രട്ടറി കെ.യു. എൽദോ നന്ദിയും പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]