ADVERTISEMENT

ADVERTISEMENT

ചെണ്ടുമല്ലി കൃഷിയുമായി എസ്പി കേഡറ്റുകൾ

പനമരം: ഗവ.ഹയർ സെക്കൻഡറി സ്കൂൾ എസ്പിസി യൂണിറ്റ് ഓണക്കാലത്തെ ഉപയോഗത്തിന് ബ്ലോക്ക് പഞ്ചായത്തിന്‍റെ സഹായത്തോടെ വിദ്യാലയ വളപ്പിൽ ചെണ്ടുമല്ലിക്കൃഷിയിറക്കി. തൈ നടീൽ ബ്ലോക്ക് പഞ്ചായത്ത് വൈസ് പ്രസിഡന്‍റ് അബ്ദുൾ ഗഫൂർ കാട്ടി ഉദ്ഘാടനം ചെയ്തു.

എസിപി അഡീഷണൽ ജില്ലാ നോഡൽ ഓഫീസർ കെ. മോഹൻദാസ്, പിടിഎ പ്രസിഡന്‍റ് സി.കെ. മുനീർ, എം. രമേഷ്കുമാർ, ഷീജ ജയിംസ്, കെ. ലല്ലു എന്നിവർ പങ്കെടുത്തു.

ADVERTISEMENT

ഉരുൾ ദുരന്തം: പ്രാർഥനാസംഗമം നടത്തി

കൽപ്പറ്റ: പുഞ്ചിരിമട്ടം ഉരുൾ ദുരന്തത്തിന്‍റെ ഒന്നാം വാർഷികത്തിൽ എസ്‌വൈഎസ് ജില്ലാ കമ്മിറ്റി പ്രാർഥനാസംഗമം നടത്തി. സയ്യിദ് ഫക്രുദ്ദീൻ പൂക്കോയ തങ്ങൾ വെള്ളൂർ പ്രാർഥന നടത്തി. ജില്ലാ പ്രസിഡന്‍റ് ഇബ്രാഹിം ഫൈസി പേരാൽ അധ്യക്ഷത വഹിച്ചു. ജില്ലാ വർക്കിംഗ് പ്രസിഡന്‍റ് കെ. മുഹമ്മദുകുട്ടി ഹസനി, വൈസ് പ്രസിഡന്‍റുമാരായ സുബൈർ ഹാജി, വി.കെ. അബ്ദുറഹ്മാൻ ദാരിമി, ജനറൽ സെക്രട്ടറി കെ.എ. നാസർ മൗലവി, എസ്എംഎഫ് ജില്ലാ വൈസ് പ്രസിഡന്‍റ് സി. മൊയ്തീൻകുട്ടി, സയ്യിദ് സ്വാദിഖ് തങ്ങൾ തുറാബ്, എ.കെ. മുഹമ്മദ് ദാരിമി, കെ.കെ.എം. ഹനീഫൽ ഫൈസി, സിദ്ദിഖ് പിണങ്ങോട്, കുഞ്ഞമ്മദ് കൈതക്കൽ, അബ്ബാസ് മൗലവി കൽപ്പറ്റ, കുഞ്ഞമ്മദ് ഹാജി എടപ്പാറ, അബൂബക്കർ റഹ്മാനി വാളത്തൂർ, പനന്തറ മുഹമ്മദ് ഹാജി, പി.കെ. ഹുസൈൻ ഫൈസി, പൂവൻ കുഞ്ഞബ്ദുള്ള ഹാജി, സി. അബ്ദുൾ ഖാദിർ, മൊയ്തീൻ ഹാജി, പോള മൊയ്തു ദാരിമി, നൗഷാദ് മൗലവി നെല്ലിയന്പം എന്നിവർ പ്രസംഗിച്ചു. സയ്യിദ് ഫക്രുദ്ദീൻ പൂക്കോയ തങ്ങൾ വെള്ളൂർ പ്രാർഥനയ്ക്ക് നേതൃത്വം നൽകി.

പുഞ്ചിരിമട്ടം ദുരന്തം: യൂത്ത് കോണ്‍ഗ്രസ് രാപകൽ സമരം ആരംഭിച്ചു

കൽപ്പറ്റ: പുഞ്ചിരിമട്ടം ദുരന്തത്തിന്‍റെ ഒന്നാം വാർഷികത്തിലും അവഗണന തുടരുന്ന സംസ്ഥാന സർക്കാരിന്‍റെ അനങ്ങപ്പാറ നയത്തിൽ പ്രതിഷേധിച്ചു കളക്ടറേറ്റിനു മുന്നിൽ യൂത്ത് കോണ്‍ഗ്രസ് ജില്ലാ കമ്മിറ്റിയുടെ നേതൃത്വത്തിൽ രാപകൽ സമരം തുടങ്ങി. ദുരന്ത ബാധിതരുടെ ലിസ്റ്റ് ഉണ്ടാക്കാൻ ഒരു വർഷം പൂർത്തിയാകുന്പോഴും സർക്കാരിന് സാധിച്ചിട്ടില്ല. ഒരു തരത്തിലും ഉത്തരവാദിത്വം കാണിക്കാത്ത സംസ്ഥാന സർക്കാർ സന്പൂർണ പരാജയമാണെന്ന് രാപകൽ സമരം ഉദ്ഘാടനം ചെയ്ത ടി. സിദ്ദിഖ് എംഎൽഎ പറഞ്ഞു. ഇലക്ഷൻ സമയത്ത് പിആർ വർക്കിന് ഉപയോഗിക്കാൻ വേണ്ടിയാണ് സർക്കാർ പുനരധിവാസം വച്ച് താമസിപ്പിക്കുന്നതെന്നും അദ്ദേഹം കൂട്ടി ചേർത്തു. യൂത്ത് കോണ്‍ഗ്രസ് ജില്ലാ പ്രസിഡന്‍റ് അമൽ ജോയ് അധ്യക്ഷത വഹിച്ചു. കോണ്‍ഗ്രസ് വക്താവ് സന്ദീപ് വാര്യർ മുഖ്യ പ്രഭാഷണം നടത്തി. ഡിസിസി പ്രസിഡന്‍റ് എൻ.ഡി. അപ്പച്ചൻ, പി.പി. ആലി, കെ.ഇ. വിനയൻ, ബി. സുരേഷ് ബാബു, സി.എ. അരുണ്‍ദേവ്, ലയണൽ മാത്യു, ജഷീർ പള്ളിവയൽ, അഫ്സൽ ചീരാൽ, നിത കേളു, ശ്രീജിത്ത് കുപ്പാടിത്തറ, ഹർഷൽ കോന്നാടൻ, അനീഷ് റാട്ടക്കുണ്ട്, ബിൻഷാദ് കെ. ബഷീർ, മുത്തലിബ് പഞ്ചാര, അസീസ് വാളാട്, ഡിന്‍റോ ജോസ്, ഗൗതം ഗോകുൽദാസ്, മുഹമ്മദ് ഫെബിൻ, കെ. ഹർഷൽ തുടങ്ങിയവർ പ്രസംഗിച്ചു.

പതിമൂന്നുകാരിയെ മർദിച്ച കേസിൽ രണ്ടാനമ്മ അറസ്റ്റിൽ

ഊട്ടി: ഉള്ളത്തി പഞ്ചായത്തിലെ അമ്മനാടിൽ പതിമൂന്നുകാരിയെ മർദിച്ച കേസിൽ രണ്ടാനമ്മയെ പോലീസ് അറസ്റ്റ് ചെയ്തു. അമ്മനാട് സ്വദേസി മണിയുടെ ഭാര്യ വിജയ് (40)യെയാണ് അറസ്റ്റ് ചെയ്തത്. മണിയുടെ ആദ്യ ഭാര്യയിലെ കുഞ്ഞിനെയാണ് ഇവർ നിരന്തരം ഉപദ്രവിച്ചിരുന്നത്. ഇയാളുടെ ആദ്യ ഭാര്യ രാജേശ്വരി മരിച്ചതിനെത്തുടർന്നാണ് വിജയിയെ വിവാഹം ചെയ്തത്. പെണ്‍കുട്ടി സ്കൂളിൽ പ്രധാനാധ്യാപകനോട് വിവരം പറഞ്ഞതിനെത്തുടർന്നാണ് സംഭവം പുറത്തറിഞ്ഞത്. ഇതേത്തുടർന്ന് പുതുമന്ത് പോലീസ് ഇവരെ അറസ്റ്റു ചെയ്യുകയായിരുന്നു.

ദുരിതബാധിതരോടുള്ള നീതിനിഷേധത്തിനെതിരേ യൂത്ത് ലീഗ് ലോംഗ് മാർച്ച് നടത്തി

കൽപ്പറ്റ: ദുരന്ത ബാധിതരോടുള്ള നീതി നിഷേധത്തിനെതിരേ സർക്കാരുകളുടെ കൊള്ളയ്ക്കെതിരേ എന്ന പ്രമേയത്തിൽ മുസ്‌ലിം യൂത്ത് ലീഗ് ജില്ലാ കമ്മിറ്റിയുടെ നേതൃത്വത്തിൽ ദുരന്തഭൂമിയിൽ നിന്ന് വയനാട് കളക്ടറേറ്റിലേക്ക് ലോംഗ് മാർച്ച് നടത്തി. യൂത്ത് ലീഗ് സംസ്ഥാന ജനറൽ സെക്രട്ടറി പി.കെ. ഫിറോസ് മാർച്ച് നയിച്ചു. രാവിലെ പുത്തുമലയിലെ പൊതുശ്മശാനത്തിലെ പ്രാർഥനകൾക്ക് ശേഷം മേപ്പാടി നെല്ലിമുണ്ടയിൽ നിന്ന് മുസ്‌ലിം ലീഗ് ദേശീയ സെക്രട്ടറി പാണക്കാട് സയ്യിദ് മുനവ്വറലി ശിഹാബ് തങ്ങൾ ജാഥാ ക്യാപ്റ്റനും യൂത്ത് ലീഗ് സംസ്ഥാന ജനറൽ സെക്രട്ടറിയുമായ പി.കെ. ഫിറോസിന് പതാക കൈമാറി മാർച്ച് ഫ്ളാഗ് ഓഫ് ചെയ്തു. ദുരിതബാധിതരുടെ പുനരധിവാസത്തിൽ സർക്കാരിന് അനാസ്ഥയാണെന്ന് തങ്ങൾ പറഞ്ഞു. സർവവും നഷ്ടപ്പെട്ട മനുഷ്യരുടെ ആവശ്യങ്ങളെ സർക്കാർ നിസാരമായാണ് കാണുന്നത്. ഉരുൾദുരന്തബാധിതർ നേരിടുന്ന പ്രതിസന്ധികൾക്ക് കാരണം സർക്കാരിന്‍റെ നിസംഗതയാണ്. പുനരധിവാസം പൂർണമായി നടപ്പാക്കുന്നതുവരെ യൂത്ത് ലീഗ് സമരരംഗത്തുണ്ടാകുമെന്നും തങ്ങൾ പറഞ്ഞു. നൂറുകണക്കിന് യൂത്ത് ലീഗ് പ്രവർത്തകർ കാൽനട ജാഥയിൽ അണിനിരന്നു. ദുരന്തബാധിതരുടെ പുനരധിവാസം വേഗത്തിൽ പൂർത്തിയാക്കുക, തുടർ ചികിത്സക്കുള്ള സൗകര്യം ഉറപ്പുവരുത്തുക, തൊഴിൽ പുനരധിവാസം ഉറപ്പാക്കുക, ഭക്ഷ്യസുരക്ഷ ഉറപ്പുവരുത്തുക, ബാങ്ക് ലോണ്‍ സർക്കാർ ഏറ്റെടുക്കുക, അർഹരായവരെ ദുരന്ത പട്ടികയിൽ ഉൾപ്പെടുത്തുക തുടങ്ങിയ ആവശ്യങ്ങൾ ഉന്നയിച്ചാണ് യൂത്ത് ലീഗ് ലോംഗ് മാർച്ച് നടത്തിയത്. മുസ്‌ലിം ലീഗ് ജില്ലാ പ്രസിഡന്‍റ് കെ.കെ. അഹമ്മദ് ഹാജി, ജനറൽ സെക്രട്ടറി ടി. മുഹമ്മദ്, ടി. സിദ്ദിഖ് എംഎൽഎ, ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ, സന്ദീപ് വാര്യർ എന്നിവർ പ്രസംഗിച്ചു. ലോംഗ് മാർച്ചിന് യൂത്ത് ലീഗ് സംസ്ഥാന ട്രഷറർ പി. ഇസ്മായിൽ, ജില്ലാ പ്രസിസന്‍റ് എം.പി. നവാസ്, ജനറൽ സെക്രട്ടറി സി.എച്ച്. ഫസൽ, ട്രഷറർ ഉവൈസ് എടവെട്ടൻ, സീനിയർ വൈസ് പ്രസിഡന്‍റ് എ.പി. മുസ്തഫ, ദേശീയ വൈസ് പ്രസിഡന്‍റ് മുഫീദ തെസ്നി, ജില്ലാ ഭാരവാഹികളായ ജാസർ പാലക്കൽ, ജാഫർ, സമദ് കണ്ണിയൻ, പി.കെ. സലാം തുടങ്ങിയവർ നേതൃത്വം നൽകി.

പുത്തുമല ഹൃദയഭൂമിയിൽ ഇന്ന് സർവമത പ്രാർഥനയും പുഷ്പാർച്ചനയും

അനുസ്മരണ യോഗത്തിൽ മന്ത്രിമാർ പങ്കെടുക്കും കൽപ്പറ്റ: പുഞ്ചിരിമട്ടം പ്രകൃതി ദുരന്തം സംഭവിച്ച് ഒരാണ്ട് പിന്നിടുന്പോൾ പുത്തുമല ജൂലൈ 30 ഹൃദയഭൂമിയിൽ ഇന്ന് രാവിലെ 10ന് സർവമത പ്രാർത്ഥനയും പുഷ്പാർച്ചനയും നടക്കും. സമാനതകളില്ലാത്ത ദുരന്തത്തിൽ സർക്കാർ സംവിധാനത്തിനൊപ്പം പൊതുസമൂഹം ഒന്നാകെ അണിചേർന്ന രക്ഷാപ്രവർത്തനവും ദുരിതാശ്വാസ പ്രവർത്തനങ്ങളും മാതൃകാപരമാണ്. ജില്ലാ ഭരണകൂടവും മേപ്പാടി ഗ്രാമപഞ്ചായത്തും സംയുക്തമായി മേപ്പാടി എംഎസ്എ ഓഡിറ്റോറിയത്തിൽ ഉച്ചയ്ക്ക് 12ന് അനുസ്മരണ യോഗം സംഘടിപ്പിക്കും. ഹൃദയഭൂമിയിലേക്കും തിരിച്ച് മേപ്പാടി ഓഡിറ്റോറിയത്തിലേക്കും പ്രദേശവാസികൾക്ക് എത്താൻ കെഎസ്ആർടിസി സൗകര്യം ഉറപ്പാക്കിയിട്ടുണ്ട്. മേപ്പാടി പഞ്ചായത്ത് ഓഫീസ് പരിസരത്ത് നിന്നും രാവിലെ ഒന്പത് മുതൽ കെഎസ്ആർടിസി സർവീസ് നടത്തും. പുത്തുമല ഹൃദയ ഭൂമിയിലും മേപ്പാടി എംഎസ്എ ഓഡിറ്റോറിയത്തിൽ നടക്കുന്ന യോഗങ്ങളിൽ മന്ത്രിമാരായ കെ. രാജൻ, എ.കെ. ശശീന്ദ്രൻ, ഒ.ആർ. കേളു, പി.എ. മുഹമ്മദ് റിയാസ്, പ്രിയങ്ക ഗാന്ധി വാദ്ര എംപി, എംഎൽഎമാരായ ടി. സിദ്ദിഖ്, ഐ.സി. ബാലകൃഷണൻ, ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ, ജില്ലാ കളക്ടർ ഡി.ആർ. മേഘശ്രീ, കൽപ്പറ്റ ബ്ലോക്ക് പഞ്ചായത്ത് പ്രസിഡന്‍റ് ചന്ദ്രിക കൃഷ്ണൻ, ജില്ലാ പഞ്ചായത്ത് വൈസ് പ്രസിഡന്‍റ് എസ്. ബിന്ദു, മേപ്പാടി ഗ്രാമപഞ്ചായത്ത് പ്രസിഡന്‍റ് കെ. ബാബു, ജനപ്രതിനിധികൾ, രാഷ്ട്രീയ പാർട്ടി പ്രതിനിധികൾ എന്നിവർ പങ്കെടുക്കും. 322 ദുരന്തബാധിതർക്ക് സ്മാർട്ട് കാർഡ് വിതരണം ചെയ്യും കൽപ്പറ്റ: ഉരുൾപൊട്ടൽ ദുരന്തം അതിജീവിച്ച മേപ്പാടി ഗ്രാമപഞ്ചായത്തിലെ 10, 11, 12 വാർഡുകളിലെ 322 കുടുംബങ്ങൾക്ക് ആദ്യഘട്ടത്തിൽ സ്മാർട്ട് കാർഡ് വിതരണം ചെയ്യുന്നു. കളക്ടറേറ്റ് ആസൂത്രണഭവൻ എ.പി.ജെ. ഹാളിൽ ഇന്ന് വൈകുന്നേരം മൂന്നിന് നടക്കുന്ന പരിപാടിയിൽ അഞ്ച് കുടുംബങ്ങൾക്ക് മന്ത്രിമാർ സ്മാർട്ട് കാർഡുകൾ വിതരണം ചെയ്യും. ടൗണ്‍ഷിപ്പ് ഗുണഭോക്താക്കൾക്കായി സർക്കാർ പ്രസിദ്ധീകരിച്ച ഒന്നാംഘട്ട, രണ്ടാംഘട്ട എ, രണ്ടാംഘട്ട ബി പട്ടികകളിൽ ഉൾപ്പെട്ട കുടുംബങ്ങൾക്കാണ് തിരിച്ചറിയൽ കാർഡ് നൽകുന്നത്. ഒരു കുടുംബത്തിന് ഒരു കാർഡ് എന്ന രീതിയിലാണ് കാർഡ് വിതരണം ചെയ്യുന്നത്. കുടുംബാംഗങ്ങളുടെ ഫോട്ടോ, വ്യക്തിഗത വിവരങ്ങൾ കാർഡിൽ രേഖപ്പെടുത്തിയിട്ടുണ്ട്. ദുരന്തബാധിത പ്രദേശത്തെ 250 വിദ്യാർഥികൾക്ക് ലാപ്ടോപ്പുകൾ കൽപ്പറ്റ: ദുരിതബാധിത പ്രദേശത്തെ 250 വിദ്യാർഥികളുടെ പഠനത്തിന് ലാപ്ടോപ്പുകൾ. പത്ത്, പ്ലസ് ടു, എംബിഎ, സിഎംഎ കോഴ്സുകളിൽ പഠിക്കുന്ന 250 വിദ്യാർഥികൾക്കാണ് ലാപ്ടോപ്പ് അനുവദിച്ചത്. ഇതിൽ 10 വിദ്യാർഥികൾക്ക് ജൂലൈ നാലിന് തിരുവനന്തപുരം തൈക്കാട് ഗസ്റ്റ് ഹൗസിൽ നടന്ന പരിപാടിയിൽ മുഖ്യമന്ത്രി പിണറായി വിജയൻ ലാപ്ടോപ് വിതരണം ചെയ്തിരുന്നു. കളക്ടറേറ്റ് ആസൂത്രണഭവൻ എ.പി.ജെ. ഹാളിൽ ഇന്ന് വൈകുന്നേരം മൂന്നിന് നടക്കുന്ന പരിപാടിയിൽ 10 വിദ്യാർഥികൾക്ക് കൂടി ലാപ്ടോപ് വിതരണം ചെയ്യും.

എംഎൽഎ ഫണ്ട് അനുവദിച്ചു

കൽപ്പറ്റ: മുട്ടിൽ പഞ്ചായത്തിൽ എംഎൽഎ ഫണ്ട് അനുവദിച്ചു.മടക്കിമല-കിണ്ടിപ്പാറ-ഇസി മുക്ക്-കന്പളക്കാട് റോഡിന്‍റെ വശങ്ങളിൽ മണ്ണ് നിറയ്ക്കുന്നതിനും ഡ്രൈനേജ്, ഫൂട്ട്പാത്ത് നിർമാണത്തിനും 22 ഉം വൈത്തിരി പഞ്ചായത്തിലെ തളിമലപ്പാലം ജിഎച്ച്എസ്-കരിന്പിൻകണ്ടി ഐഎച്ച്ഡിപി കോളനി റോഡിലെ സെയ്തലവി വീട് പരിസരം മുതൽ വശങ്ങൾ മണ്ണ് നിറയ്ക്കുന്നതിന് പത്തും കോട്ടത്തറ പഞ്ചായത്തിലെ മാങ്ങോട്ടുകുന്ന്-ജൂബിലി റോഡിന്‍റെ വശങ്ങളിൽ മണ്ണ് നിറയ്ക്കുന്നതിന് 20 ഉം ലക്ഷം രൂപ ടി. സിദ്ദിഖ് എംഎൽഎയുടെ ആസ്തി വികസന നിധിയിൽനിന്നു അനുവദിച്ചു. പനമരം പഞ്ചായത്തിലെ പാറപ്പുറം-അയനിമല റോഡ് കോണ്‍ക്രീറ്റ് പ്രവൃത്തിക്ക് മന്ത്രി ഒ.ആർ. കേളുവിന്‍റെ ആസ്തി വികസന നിധിയിൽനിന്നു 15 ലക്ഷം രൂപ അനുവദിച്ചു. പ്രവൃത്തികൾക്ക് ഭരണാനുമതിയായി.

മണ്ണ് പരിശോധന കാന്പയിനും കർഷക പരിശീലന പരിപാടിയും നടത്തി

മാനന്തവാടി: ജില്ലാ മണ്ണ് പര്യവേക്ഷണ അസിസ്റ്റന്‍റ് ഡയറക്ടർ ഓഫീസിന്‍റെയും കൃഷി വകുപ്പിന്‍റെയും സംയുക്താഭിമുഖ്യത്തിൽ മാനന്തവാടി ഷീരോത്പാദക സഹകരണ സംഘം ഹാളിൽ ഏകദിന കർഷക പരിശീലന പരിപാടിയും മണ്ണ് പരിശോധന കാന്പയിനും സംഘടിപ്പിച്ചു. മാനന്തവാടി ബ്ലോക്ക് വികസനകാര്യ സ്റ്റാൻഡിംഗ് കമ്മിറ്റി ചെയർമാൻ കെ.വി. വിജോൾ അധ്യക്ഷത വഹിച്ചു. മാനന്തവാടി ബ്ലോക്ക് പഞ്ചായത്ത് പ്രസിഡന്‍റ് ജസ്റ്റിൻ ബേബി ഉദ്ഘാടനം ചെയ്തു. മണ്ണ് സംരക്ഷണത്തിന്‍റെയും മണ്ണ് പരിപാലനത്തിന്‍റെയും പ്രാധാന്യത്തെക്കുറിച്ച് കർഷകരെ ബോധവൽക്കരിക്കുക എന്ന ലക്ഷ്യത്തോടെയാണ് പരിപാടി ആസൂത്രണം ചെയ്തത്. കാർഷിക അഭിവൃദ്ധിക്കായി മണ്ണ് പരിപാലനം എന്ന വിഷയത്തിൽ സീനിയർ കെമിസ്റ്റ് എം. രവി (സോയിൽ അനലിറ്റിക്കൽ ലാബ് വയനാട്), സസ്യപോഷക മൂലകങ്ങളുടെ പ്രാധാന്യവും മണ്ണ് പരിശോധനയും എന്ന വിഷയത്തിൽ എം. രാഹുൽ രാജ് (ജില്ലാ മണ്ണ് പര്യവേക്ഷണ ഓഫീസർ) എന്നിവർ സെമിനാറുകൾ നയിച്ചു. മാനന്തവാടി ബ്ലോക്കിലെ 200 ഓളം കർഷകർ പങ്കെടുത്തു. ജില്ലാ മണ്ണ് പര്യവേക്ഷണ അസിസ്റ്റന്‍റ് ഡയറക്ടർ വി. അബ്ദുൾ ഹമീദ്, മാനന്തവാടി കൃഷി ഓഫീസർ കെ.എസ്. ആര്യ, മണ്ണ് പര്യവേക്ഷണ ഓഫീസർ എം. രാഹുൽ രാജ് എന്നിവർ പ്രസംഗിച്ചു.

പുഞ്ചിരിമട്ടം ദുരന്തം : ഭവന പദ്ധതിക്ക് സ്ഥലം കണ്ടെത്താനാകാതെ കോണ്‍ഗ്രസും യൂത്ത് കോണ്‍ഗ്രസും

കൽപ്പറ്റ: മേപ്പാടി പുഞ്ചിരിമട്ടം ഉരുൾ ദുരന്തത്തിന്‍റെ ഒന്നാം വാർഷികദിനത്തിൽ തല താഴ്ത്തി കോണ്‍ഗ്രസും യൂത്ത് കോണ്‍ഗ്രസും. ദുരന്തത്തിനു പിന്നാലെ പ്രഖ്യാപിച്ച ഭവന പദ്ധതികൾക്ക് ആവശ്യമായ ഭൂമി വാങ്ങാൻപോലും കോണ്‍ഗ്രസിനും യൂത്ത് കോണ്‍ഗ്രസിനും കഴിഞ്ഞില്ല. പുഞ്ചിരിമട്ടം ദുരന്തബാധിതർക്കായി കോണ്‍ഗ്രസ് നേതാവും ലോക്സഭ പ്രതിപക്ഷ നേതാവുമായ രാഹുൽഗാന്ധിയാണ് ഭവന പദ്ധതി പ്രഖ്യാപിച്ചത്. യൂത്ത് കോണ്‍ഗ്രസിനുവേണ്ടി സംസ്ഥാന നേതൃത്വവും. ദുരന്തബാധിതരിൽ നൂറിലധികം കുടുംബങ്ങൾക്ക് കോണ്‍ഗ്രസ് വീട് നിർമിച്ചുനൽകുമെന്ന് 2024 ഓഗസ്റ്റ് ആദ്യവാരമാണ് രാഹുൽ ഗാന്ധി പ്രഖ്യാപിച്ചത്. മാസങ്ങൾ കഴിഞ്ഞിട്ടും ഭവനനിർമാണത്തിനു ഭൂമി കണ്ടെത്താനാകാതെ ഉഴലുകയാണ് കോണ്‍ഗ്രസ് ജില്ലാ നേതൃത്വം. ടി. സിദ്ദിഖ് എംഎൽഎയുടെ നേതൃത്വത്തിൽ കൊണ്ടുപിടിച്ചു ശ്രമിക്കുന്നുണ്ടെങ്കിലും നിയമ, സാങ്കേതിക തടസങ്ങൾ ഇല്ലാത്ത ഭൂമി കണ്ടെത്താൻ കഴിയുന്നില്ല. ഏറ്റവും ഒടുവിൽ മേപ്പാടി പഞ്ചായത്തിലെ തൃക്കൈപ്പറ്റയിൽ കണ്ടെത്തിയ ഭൂമി പ്ലാന്‍റേഷൻ പ്രശ്നം ഉള്ളതിനാൽ വാങ്ങാൻ കഴിയാത്ത സ്ഥിതിയാണ്. 100 കുടുംബങ്ങളുടെ പുനരധിവാസത്തിന് ഏകദേശം 10 ഏക്കർ ഭൂമിയാണ് വേണ്ടത്. പദ്ധതിക്കാവശ്യമായ ഭൂമി വാങ്ങുന്നതിന് നീക്കം ഊർജിതമാണെന്ന് ഡിസിസി പ്രസിഡന്‍റ് എൻ.ഡി. അപ്പച്ചൻ പറഞ്ഞു. നിയമതടസമില്ലാത്ത ഭൂമി മുട്ടിൽ പഞ്ചായത്തിൽ ലഭ്യമാണോ എന്ന് പരിശോധിച്ചുവരികയാണെന്ന് അദ്ദേഹം അറിയിച്ചു. രാഹുൽഗാന്ധി പ്രഖ്യാപിച്ച ഭവന പദ്ധതിയുടെ ശിലാസ്ഥാപനം പുഞ്ചിരിമട്ടം ദുരന്തത്തിന്‍റെ ഒന്നാം വാർഷികത്തിനു മുന്പ് നടത്തുമെന്ന് പ്രചാരണമുണ്ടായിരുന്നു. രാഹുൽഗാന്ധിയും സഹോദരിയും വയനാട് എംപിയുമായ പ്രിയങ്ക ഗാന്ധിയും ചേർന്നു ശിലാസ്ഥാപനം നിർവഹിക്കുമെന്ന് ചില മാധ്യമങ്ങളിൽ ഇടംപിടിച്ചു. ഇത് വെറുതെയായതിൽ അസ്വസ്ഥരാണ് കോണ്‍ഗ്രസിലെ താഴ്ത്തട്ട് പ്രവർത്തകർ. ഭവനപദ്ധതിക്ക് ആവശ്യമായ സ്ഥലം സർക്കാർ ലഭ്യമാക്കുമെന്ന പ്രതീക്ഷ കോണ്‍ഗ്രസ് സംസ്ഥാന, ജില്ലാ നേതൃത്വത്തിനു ഉണ്ടായിരുന്നു. എന്നാൽ സ്ഥലം അനുവദിക്കാനാകില്ലെന്ന് കഴിഞ്ഞ ഫെബ്രുവരിയിൽ വിളിച്ചുചേർത്ത, നൂറും അതിലധികവും വീട് വാഗ്ദാനം ചെയ്തവരുടെ യോഗത്തിൽ മുഖ്യമന്ത്രി വ്യക്തമാക്കി. കൽപ്പറ്റ എൽസ്റ്റൻ എസ്റ്റേറ്റിലെ ടൗണ്‍ഷിപ്പിൽ 1,000 ചതുരശ്ര അടി വിസ്തീർണത്തിൽ വീട് നിർമിക്കുന്നതിന് സന്നദ്ധ പ്രസ്ഥാനങ്ങളും രാഷ്ട്രീയ പാർട്ടികളും 30 ലക്ഷം രൂപ വീതം നൽകണമെന്ന നിലപാടും മുഖ്യമന്ത്രി അറിയിച്ചു. ഇതോടെയാണ് ഭവന പദ്ധതിക്ക് സ്വന്തം നിലയിൽ ഭൂമി കണ്ടെത്താൻ കോണ്‍ഗ്രസും മുസ്‌ലിം ലീഗും മറ്റും നിർബന്ധിതമായത്. മുട്ടിൽ പഞ്ചായത്തിലെ വെള്ളിത്തോടിൽ വിലയ്ക്കുവാങ്ങിയ 11.5 ഏക്കറിൽ ഭവനപദ്ധതി യാഥാർഥ്യമാക്കുന്നതിനു നീക്കത്തിലാണ് മുസ്‌ലിം ലീഗ്. 2019 ഓഗസ്റ്റ് എട്ടിലെ പുത്തുമല ഉരുൾദുരന്ത ബാധിത കുടുംബങ്ങളെ പുനരധിവസിപ്പിച്ച മേപ്പാടി പൂത്തകൊല്ലിയിൽ സർക്കാർ ഉടമസ്ഥതയിൽ ഭൂമിയുണ്ട്. സർക്കാർ സന്നദ്ധമെങ്കിൽ ഈ സ്ഥലത്തിന്‍റെ ഭാഗം ന്യായമായ വിലനൽകി വാങ്ങാനും വീടുകളുടെ നിർമാണം നടത്താനും കോണ്‍ഗ്രസ് തയാറാണെന്ന് ഡിസിസി പ്രസിഡന്‍റ് പറഞ്ഞു. യൂത്ത് കോണ്‍ഗ്രസ് സംസ്ഥാന നേതൃത്വം 30 വീടുകളാണ് ഉരുൾദുരന്ത ബാധിത കുടുംബങ്ങൾക്ക് വാഗ്ദാനം ചെയ്തത്. ഇതേത്തുടർന്നു ധനസമാഹരണം നടത്തിയെങ്കിലും ഭൂമി കണ്ടെത്താനും വീടുകളുടെ നിർമാണം തുടങ്ങാനുമായില്ല. ഇത് ഇടതുപക്ഷ യുവജനസംഘടനകളുടേതടക്കം വിമർശനത്തിന് ഇടയാക്കിയിരുന്നു. ടൗണ്‍ഷിപ്പിൽ 100 വീടുകളുടെ നിർമാണത്തിനു ഉപയോഗപ്പെടുത്തുന്നതിന് സ്പോണ്‍സർഷിപ്പ് അസിസ്റ്റൻസ് എന്ന നിലയിൽ കർണാടകയിലെ കോണ്‍ഗ്രസ് സർക്കാർ 20 കോടി രൂപ കഴിഞ്ഞ മാർച്ചിൽ കേരള സർക്കാരിന് കൈമാറിയിരുന്നു.

കന്യാസ്ത്രീകളെ കള്ളക്കേസിൽ കുടുക്കിയതിൽ വ്യാപക പ്രതിഷേധം

പുൽപ്പള്ളി: ഛത്തീസ്ഗഡിലെ ദുർഗിൽ മനുഷ്യക്കടത്ത് ആരോപിച്ച് രണ്ട് കന്യാസ്ത്രീകളെ കള്ളക്കേസിൽ കുടുക്കി റിമാൻഡ് ചെയ്യിച്ചതിൽ വൈഎംസിഎ യൂണിറ്റ് പ്രതിഷേധിച്ചു. വർഷങ്ങളായി രാജ്യത്തിന്‍റെ പല ഭാഗങ്ങളിലും ക്രിസ്ത്യൻ പള്ളികളും വൈദികരും കന്യാസ്ത്രീകളും സഭാ അംഗങ്ങളും കൊടിയ ആക്രമങ്ങൾക്കും പീഡനങ്ങൾക്കും ഇരയാകുന്നതായി യോഗം ചൂണ്ടിക്കാട്ടി. വടക്കേ ഇന്ത്യയിൽ ക്രൈസ്തവരെ വേട്ടയാടുന്ന ബിജെപിയും പോഷക പ്രസ്ഥാനങ്ങളും കേരളത്തിൽ പ്രീണന നയമാണ് സ്വീകരിക്കുന്നത്. ഈ ഇരട്ടത്താപ്പ് അവസാനിപ്പിക്കണമെന്ന് ആവശ്യപ്പെട്ടു. തോമസ് ഒറ്റക്കുന്നേൽ അധ്യക്ഷത വഹിച്ചു. നോബി പള്ളിത്തറ, ലിയോ പിഡിസി, ബിജു തിണ്ടിയത്, ഷാജി മുത്തുമാംകുഴി, ഷിനോജ് കണ്ണംപള്ളി, സാലി ജോജോ മുണ്ടോക്കുഴി എന്നിവർ പ്രസംഗിച്ചു. പുൽപ്പള്ളി: ഛത്തീസ്ഗഡിൽ സിസ്റ്റർ വന്ദന ഫ്രാൻസിസ്, സിസ്റ്റർ പ്രീതി മേരി എന്നിവരെ കള്ളക്കേസിൽ കുടുക്കി റിമാൻഡ് ചെയ്യിച്ചതിനെതിരേ കൃപാലയ സ്കൂളിൽ പ്രതിഷേധം സംഘടിപ്പിച്ചു. പ്ലക്കാർഡുകളേന്തി വിദ്യാർഥികൾ പരിപാടിയിൽ പങ്കാളികളായി. പ്രിൻസിപ്പൽ സിസ്റ്റർ ആൻസീന, പ്രോഗ്രാം കോ ഓർഡിനേറ്റർ ടി.യു. ഷിബു, സിസ്റ്റർ ജിൽസ ടോം, സിസ്റ്റർ ടിസ, സിസ്റ്റർ ആൻസ് മരിയ എന്നിവർ നേതൃത്വം നൽകി. പുൽപ്പള്ളി: കന്യാസ്ത്രീകളെ കള്ളക്കേസിൽപ്പെടുത്തി അറസ്റ്റുചെയ്തതിൽ കെസിസി പെരിക്കല്ലൂർ ഫൊറോന കമ്മിറ്റി പ്രതിഷേധിച്ചു. പ്രസിഡന്‍റ് ജോണി പുത്തൻകണ്ടത്തിൽ അധ്യക്ഷത വഹിച്ചു. അതിരൂപത ജോയിന്‍റ് സെക്രട്ടറി ഷിജു കൂറാനയിൽ, ഫൊറോന ജനറൽ സെക്രട്ടറി ജോബിൻസ് ജോയി, ട്രഷർ റെജി ഉള്ളാടപ്പള്ളിയിൽ, വൈസ് പ്രസിഡന്‍റ് ടോമി ചെന്നെല്ലിക്കുന്നേൽ, ജോയിന്‍റ് സെക്രട്ടറി മാത്യു മുള്ളൂർ, അതിരൂപത പ്രതിനിധികളായ ജോണ്‍ കുളക്കാട്ട്, ബേബി പെരുന്പേൽ എന്നിവർ പ്രസംഗിച്ചു. സുൽത്താൻ ബത്തേരി: ഛത്തീസ്ഗഡിലെ ദുർഗിൽ രണ്ട് മലയാളി കന്യാസ്ത്രീകളെ അകാരണമായി അറസ്റ്റുചെയ്തതിൽ മലങ്കര കാത്തലിക് അസോസിയേഷൻ രൂപത സമിതി പ്രതിഷേധിച്ചു. ക്രൈസ്തവർക്കെതിരായ അക്രമം ആരാധനാലയങ്ങൾക്കുനേരേയുള്ള അതിക്രമം എന്നിവ വർധിക്കുന്നത് കണക്കിലെടുത്ത് ഭരണാധികാരികൾ അടിയന്തരവും നിർണായകവുമായ നടപടികൾ സ്വീകരിക്കണമെന്നു ആവശ്യപ്പെട്ടു. പ്രസിഡന്‍റ് പ്രിൻസ് ഏബ്രഹാം അധ്യക്ഷത വഹിച്ചു. ജനറൽ സെക്രട്ടറി ചാക്കോ നരിമറ്റത്തിൽ, ട്രഷറർ സുമ ഫിലിപ്പ് എന്നിവർ പ്രസംഗിച്ചു. കൽപ്പറ്റ: മഹിളാ കോണ്‍ഗ്രസ് ജില്ല കമ്മിറ്റി കൽപ്പറ്റയിൽ പ്രതിഷേധ ധർണ നടത്തി. കോണ്‍ഗ്രസ് ജില്ല കമ്മിറ്റി വൈസ് പ്രസിഡന്‍റ് ഒ.വി. അപ്പച്ചൻ ഉദ്ഘാടനം ചെയ്തു. ഇന്ത്യൻ ജനാധിപത്യത്തിന്‍റെ കടയ്ക്കൽ കത്തിവയ്ക്കുന്ന നയമാണ് നരേന്ദ്രമോദി സർക്കാർ പിന്തുടരുന്നതെന്നും അതിന്‍റെ ഏറ്റവും ഒടുവിലത്തെ ഉദാഹരണമാണ് രണ്ട് കന്യാസ്ത്രീകളെ ചത്തീസ്ഗഡിൽ ജാമ്യമില്ല വകുപ്പുകൾ ചേർത്ത് അറസ്റ്റ് ചെയ്തു ജയിലിൽ ഇട്ടിരിക്കുന്നത്. മണിപ്പുരിലെ വംശഹത്യയും ഗുജറാത്തിലെ ഗോദ്ര കലാപവും ആൾക്കൂട്ട അക്രമണവും കൊലപാതകങ്ങളും ബുൾഡോസർ രാജും നരേന്ദ്രമോദി സർക്കാരിന്‍റെ ന്യൂനപക്ഷങ്ങളോടുള്ള യഥാർത്ഥ നയമാണ് വ്യക്തമാക്കുന്നത്. വെറുപ്പും വിദ്വേഷവും വിതച്ച് ഹിന്ദുത്വ അജണ്ട നടപ്പാക്കി ജനങ്ങളെ ജാതിയുടെയും വർണത്തിന്‍റെയും പേരിൽ തമ്മിൽ തല്ലിച്ച് രഷ്ട്രീയ ലാഭം കൊയ്യാനാണ് ബിജെപിയും ബജ്റംഗ്ദൾ ഉൾപ്പെടെയുള്ള വർഗീയ ഫാസിസ്റ്റ് ശക്തികളും ശ്രമിക്കുന്നത്. ഇന്ത്യൻ ജനാധിപത്യത്തിന്‍റെയും സാഹോദര്യത്തിന്‍റെയും മതേതരത്വത്തിന്‍റെയും സംരക്ഷണം ഉറപ്പാക്കാൻ ഇന്ത്യൻ നാഷണൽ കോണ്‍ഗ്രസിന്‍റെ നേതൃത്വത്തിൽ സർവശക്തിയും ഉപയോഗിച്ച് പ്രവർത്തിക്കുമെന്നും ഇന്ത്യൻ ഭരണഘടന സംരക്ഷിച്ചുകൊണ്ട് ഫാസിസ്റ്റ് ശക്തികളെ തറപറ്റിക്കുമെന്നും ധർണയിൽ പ്രസംഗിച്ച നേതാക്കൾ പറഞ്ഞു. യോഗത്തിൽ മഹിളാ കോണ്‍ഗ്രസ് ജില്ലാ പ്രസിഡന്‍റ് ജിനി തോമസ് അധ്യക്ഷത വഹിച്ചു. ഗാന്ധിദർശൻ വേദി ജില്ലാ ചെയർമാൻ ഇ.വി. ഏബ്രഹാം, കെ. അജിത, ഉഷാതന്പി, മേഴ്സി സാബു, ഗിരിജ മോഹൻദാസ്, ബീന സജി, ബിന്ദു സജീവ്, ശാലിനി, ജെസി ലെസ്ലി തുടങ്ങിയവർ പ്രസംഗിച്ചു. പുൽപ്പള്ളി: ഛത്തീഡ്ഗഡിൽ ബിജെപി സർക്കാരും സംഘപരിവാർ സംഘടനകളും ചേർന്നു മതന്യൂനപക്ഷങ്ങളെ വേട്ടയാടുകയാണെന്ന് കെപിസിസി ജനറൽ സെക്രട്ടറി കെ.കെ. ഏബ്രഹാം പ്രസ്താവനയിൽ പറഞ്ഞു. നിരപരാധികളായ കന്യാസ്ത്രീകളെ കള്ളക്കേസിൽ കുടുക്കി ജയിലിലടച്ചത് രാജ്യത്തിന്‍റെ മതേതര സങ്കൽപ്പങ്ങളോടുള്ള വെല്ലുവിളിയാണ്. വർഗീയതയെയും ഫാസിസത്തെയും താലോലിക്കുന്ന ഭരണകൂടങ്ങൾ മതേതരത്വം തകർക്കുകയാണ്. കന്യാസ്ത്രീകൾക്കെതിരേ മനുഷ്യക്കടത്തും മതപരിവർത്തന ശ്രമവും ആരോപിച്ച് കേസെടുത്തത് അനുചിതവും അന്യായവുമാണ്. ബജ്റംഗ്ദൾ പ്രവർത്തകരുടെ സമ്മർദത്തിനു വഴങ്ങിയാണ് ഛത്തീസ്ഗഡ് പോലീസ് കന്യാസ്ത്രീകളെ കള്ളക്കേസിൽ കുടുക്കിയത്. നിരപരാധികളായ കന്യാസ്ത്രീകളെ ഉടൻ മോചിപ്പിക്കണമെന്നും ഏബ്രഹാം ആവശ്യപ്പെട്ടു. സുൽത്താൻ ബത്തേരി: ഛത്തീസ്ഗഡിലെ ദുർഗിൽ മനുഷ്യക്കടത്ത് ആരോപിച്ച് രണ്ട് മലയാളി കന്യാസ്ത്രീകളെ തീവ്ര ഹിന്ദുത്വ സംഘടനകളുടെ സമ്മർദ്ദത്തെ തുടർന്ന് അറസ്റ്റ് ചെയ്തു ജയിലിൽ അടച്ചതിനെതിരേ സുൽത്താൻ ബത്തേരി അസംപ്ഷൻ ദേവാലയത്തിലെ വിശ്വാസികൾ പ്രതിഷേധിച്ചു. മതപരിവർത്തനം നടന്നിട്ടില്ലെന്നും രക്ഷിതാക്കളുടെ സമ്മതത്തോടെയാണ് പെണ്‍കുട്ടികൾ യാത്ര ചെയ്തതെന്നും സിസ്റ്റേഴ്സ് ഓഫ് മേരി ഇമ്മാക്കുലേറ്റ് സന്യാസിനി സമൂഹം അറിയിച്ചിട്ടും സന്യസ്തരെ തടഞ്ഞുവയ്ക്കുകയും ഭീഷണിപ്പെടുത്തുകയും തടങ്കിലടയ്ക്കുകയുമായിരുന്നു. ഭരണഘടനക്കെതിരേയും രാജ്യത്തിനെതിരേയും പൗരന്‍റെ സഞ്ചാര സ്വാതന്ത്ര്യത്തിനെതിരേയും പ്രവർത്തിക്കുന്ന ഈ ശക്തികൾ ആരോപിക്കുന്ന ഈ വിഷയത്തിൽ അന്വേഷണം നടത്തി കഴിയുന്നത്ര വേഗം സിസ്റ്റേഴ്സിനെ മോചിതരാക്കണമെന്നും യോഗം ആവശ്യപ്പെട്ടു. പ്രതിഷേധ യോഗത്തിൽ ഫൊറോന വികാരി തോമസ് മണക്കുന്നേൽ അധ്യക്ഷത വഹിച്ചു. ജേക്കബ് മുക്കത്ത്, സണ്ണി നെടുങ്കല്ലേൽ, ഫ്രാൻസിസ് പുലിക്കോട്ടിൽ എന്നിവർ പ്രസംഗിച്ചു. സുൽത്താൻ ബത്തേരി: ഛത്തീസ്ഗഡിൽ കന്യാസ്ത്രീകളെ അറസ്റ്റ് ചെയ്ത പോലീസ് നടപടിയിൽ കേന്ദ്രസർക്കാർ ഇടപെടണമെന്ന് കേരള കോണ്‍ഗ്രസ് -എം സുൽത്താൻ ബത്തേരി മുനിസിപ്പൽ കണ്‍വെൻഷൻ ആവശ്യപ്പെട്ടു. അഡ്വ.എൻ.പി. ജോണ്‍സണ്‍ അധ്യക്ഷത വഹിച്ചു. സംസ്ഥാന ജനറൽ സെക്രട്ടറി കെ.ജെ. ദേവസ്യ, ജില്ലാ ജനറൽ സെക്രട്ടറി വി.പി. അബ്ദുൾഗഫൂർ ഹാജി, പി.എം. ജയശ്രീ, ടോം ജോസ്, കുര്യൻ ജോസഫ്, വി.പി. അബ്ദുൾ റസാഖ്, ബേബി പുളിമൂട്ടിൽ, ടോംസ് നെടുങ്കലേൽ, അതുൽ ബേബി, ജയ്സണ്‍ എന്നിവർ പ്രസംഗിച്ചു. സുൽത്താൻ ബത്തേരി: ജനസേവകരായ രണ്ട് കന്യാസ്ത്രീകളെ അകാരണമായി അറസ്റ്റ് ചെയ്തു ജയിലിൽ അടച്ച ഛത്തീസ്ഗഡ് സർക്കാർ നടപടിക്കെതിരേ കേരള കോണ്‍ഗ്രസ്-എം ബത്തേരി നിയോജകമണ്ഡലം കമ്മിറ്റിയുടെ നേതൃത്വത്തിൽ ബത്തേരിയിൽ പ്രതിഷേധ സദസ് സംഘടിപ്പിച്ചു. നാടിന്‍റെ മതനിരപേക്ഷതയും നിയമവ്യവസ്ഥയെയും വെല്ലുവിളിച്ച് കള്ളക്കേസുകൾ ഉണ്ടാക്കി അധികാര ദുർവിനിയോഗം നടത്തുന്നവരെ നിലയ്ക്ക് നിർത്താൻ സർക്കാരുകൾക്ക് ചുമതലയുണ്ട്. കേരള കോണ്‍ഗ്രസ്-എം നിയോജകമണ്ഡലം കമ്മിറ്റിയുടെ നേതൃത്വത്തിൽ സംഘടിപ്പിച്ച പ്രതിഷേധ സദസ് കെ.ജെ. ദേവസ്യ ഉദ്ഘാടനം ചെയ്തു. ജോസഫ് മാണിശേരി, ടി.ഡി. മാത്യു, മാത്യു ഇടയ്ക്കാട്ട്, വിൽസണ്‍ നെടുങ്കൊന്പിൽ, ബില്ലിഗ്രഹാം, ടോം ജോസ്, റെജി ഓലകരോട്ട്, അബ്ദുൾ ഗഫൂർ ഹാജി, കുര്യൻ ജോസഫ്, സണ്ണി മീനങ്ങാടി, ബേബി പുളിമൂട്ടിൽ, അനിൽ ജോസ്, അന്നമ്മ, അബ്ദുൾ റസാഖ്, ജോർജ് ജോസഫ് തുടങ്ങിയവർ പ്രസംഗിച്ചു. കൽപ്പറ്റ: ബിജെപി ഇന്ത്യൻ മതേതരത്വം തകർക്കുകയാണെന്ന് ഡിസിസി പ്രസിഡന്‍റ് എൻ.ഡി. അപ്പച്ചൻ പ്രസ്താവനയിൽ പറഞ്ഞു. ഛത്തീസ്ഗഡിൽ രണ്ട് കന്യാസ്ത്രീകളെ ബജ്റംഗ്ദൾ പ്രവർത്തകരുടെ പരാതിയിൽ അറസ്റ്റ് ചെയ്ത് ജയിലിലടച്ചത് ഇതിനു ഒടുവിലുത്തെ ഉദാഹരണമാണ്. ക്രൈസ്തവ വേട്ട രാജ്യവ്യാപകമായി നടക്കുകയാണ്. നൂറുകണക്കിന് പള്ളികളാണ് ഇതിനകം തകർത്തത്. രാജ്യത്തെ ക്രിസ്ത്യാനികളും ന്യൂനപക്ഷ സമുദായങ്ങളും കുടിയേറി വന്നവരല്ല. അവർ ഇന്ത്യക്കാരാണ്. ഇന്ത്യൻ ഭരണഘടനയിൽ ഉന്നിപ്പറയുന്ന മതേതരത്വവും ജനാധിപത്യവും തകർക്കാൻ ശ്രമിക്കുന്ന ശക്തികളെ കോണ്‍ഗ്രസ് ശക്തമായി എതിർക്കുമെന്നും അപ്പച്ചൻ പറഞ്ഞു.

ചെറുകാട്ടൂർ സെന്‍റ് സെബാസ്റ്റ്യൻസ് ഇടവക പ്ലാറ്റിനം ജൂബിലി: പുരാവസ്തു പ്രദർശനം നടത്തി

മാനന്തവാടി: ചെറുകാട്ടൂർ സെന്‍റ് സെബാസ്റ്റ്യൻസ് ഇടവക പ്ലാറ്റിനം ജൂബിലി വർഷത്തിന്‍റെ ഭാഗമായി രണ്ട് നൂറ്റാണ്ടോളം പഴക്കമുള്ള പുരാവസ്തുക്കളുടെ പ്രദർശനവും മത്സരവും സംഘടിപ്പിച്ചു. കാർഷിക ഉപകരണങ്ങൾ, വീട്ടുപകരണങ്ങൾ, സംഗീത ഉപകരണങ്ങൾ, നാണയശേഖരങ്ങൾ, എന്നിവയുടെ അപൂർവങ്ങളിൽ അപൂർവങ്ങളായ 1000 ത്തോളം വസ്തുക്കളാണ് പ്രദർശനത്തിലുണ്ടായിരുന്നത്. കാർഷിക ഉപകരണങ്ങളായ കലപ്പ, കൊഴു, നുകം, ഞേഞ്ഞിൽ, പുൽപ്പാറ്റി, വീശുമുറം, പറ, കൊരന്പ, ഇടങ്ങഴി, സേർ, കൊരുക്കട്ട, വീട്ടുപകരണങ്ങളായ കിണ്ടി, കോളാന്പി, ചിരവ, അടച്ചൂറ്റി, മണ്ണെണ്ണ വിളക്ക്, പെട്രോൾ മാക്സ്, റാന്തൽ, ചിമ്മിണി, ഓട്ടു വിളക്ക്, പാതാളക്കരണ്ടി, പുല്ലുമാന്തി, നിലംതല്ലി, നൂറ്റാണ്ടുകൾ പഴക്കമുള്ള കട്ടിലുകൾ, സംഗീതോപകരണങ്ങളായ ഹാർമോണിയം, വയലിൻ, ഓടക്കുഴൽ, കളിവീണ, ഗ്രാമഫോണ്‍, മൗത്ത് ഓർഗണ്‍, തബല, തോൽച്ചെണ്ട, ഇടക്ക, മദ്ദളം, ട്രിപ്പിൾ ഡ്രം, ആദ്യകാല കാമറകൾ, വ്യത്യസ്ത കാലഘട്ടങ്ങളിലെയും രാജ്യങ്ങളിലെയും വ്യത്യസ്ത മൂല്യങ്ങളിലുള്ളതുമായ നാണയങ്ങൾ എന്നിവ പുതിയ തലമുറയ്ക്ക് പരിചയപ്പെടുത്തുക കൂടിയായിരുന്നു പ്രദർശനത്തിന്‍റെ ലക്ഷ്യം. വിജയികൾക്ക് യഥാക്രമം 7500, 5000, 2500 എന്നിങ്ങനെ കാഷ് പ്രൈസുകളും മത്സരത്തിൽ പങ്കെടുത്ത എല്ലാവർക്കും 1000 രൂപ വീതം പ്രോത്സാഹന സമ്മാനവും നൽകി. പ്രദർശന മത്സരം പനമരം ഗ്രാമപഞ്ചായത്ത് വൈസ് പ്രസിഡന്‍റ് തോമസ് പാറക്കാലയിൽ ഉദ്ഘാടനം ചെയ്തു. ഇടവക വികാരി ജോസ് കപ്യാരുമലയിൽ അധ്യക്ഷത വഹിച്ചു. സിഎംഎൽ രൂപത ഡയറക്ടർ ഫാ. സന്തോഷ് ഒറവാറന്തറ മുഖ്യപ്രഭാഷണം നടത്തി. എം.എം. സണ്ണി മൂലക്കര, ഇ.ജെ. സെബാസ്റ്റ്യൻ ഇടയകൊണ്ടാട്ട്, സണ്ണി ചെറുകാട്ട്, ജോർജ് ഊരാശേരിയിൽ, ഫാ. അമൽ മന്ത്രിക്കൽ, ഫാ. നിഥിൻ ആലക്കാതടത്തിൽ എന്നിവർ പ്രസംഗിച്ചു. മാനന്തവാടി രൂപത റെക്ടർ ഫാ. സജി നെടുങ്കല്ലേൽ സമ്മാനദാനം നടത്തി. ജോർജ് തെക്കേതൊട്ടിയിൽ, ബിനിൽ മുള്ളൻമടയ്ക്കൽ, രഞ്ജിത് മുതുപ്ലാക്കൽ, സിബി വെള്ളക്കുഴി എന്നിവർ നേതൃത്വം നൽകി.

അങ്കണവാടി പ്രവർത്തകർക്കായി ശിൽപ്പശാല സംഘടിപ്പിച്ചു

കൽപ്പറ്റ: അങ്കണവാടി പ്രവർത്തകർക്കായി ശൈശവ പൂർവകാല വിദ്യാഭ്യാസവും പരിചരണവും എന്ന വിഷയത്തിൽ സെൻട്രൽ ബ്യൂറോ ഓഫ് കമ്മ്യൂണിക്കേഷൻ വയനാട് ഫീൽഡ് ഓഫീസ് ഏകദിന ശിൽപശാല സംഘടിപ്പിച്ചു. കൽപ്പറ്റ ബ്ലോക്ക് പഞ്ചായത്ത് പ്രസിഡന്‍റ് ചന്ദ്രിക കൃഷ്ണൻ ഉദ്ഘാടനം ചെയ്തു. സമൂഹത്തെ വാർത്തെടുക്കുന്നതിൽ വളരെ വലിയ പങ്കാണ് അങ്കണവാടി അധ്യാപകർ വഹിക്കുന്നതെന്നും അതിനു തക്കവണ്ണം ഉയർന്ന പ്രാധാന്യം അങ്കണവാടി പ്രവർത്തകർക്ക് ലഭിക്കണമെന്നും അവർ അഭിപ്രായപ്പെട്ടു. കൽപ്പറ്റ മുനിസിപ്പൽ കൗണ്‍സിലർ എം.കെ. ഷിബു അധ്യക്ഷത വഹിച്ചു. ഫീൽഡ് പബ്ലിസിറ്റി ഓഫീസർ എം.വി. പ്രജിത്ത് കുമാർ, ഐസിഡിഎസ് സിഡിപിഒ കെ. സന്ധ്യ, സൂപ്പർവൈസർ കെ. ഷംന തുടങ്ങിയവർ പ്രസംഗിച്ചു. മോണ്ടിസോറി ട്രെയ്നർ പ്രഭിത ജയരാജ്, ജില്ലാ ശിശുസംരക്ഷണ യൂണിറ്റ് പ്രൊട്ടക്ഷൻ ഓഫീസർ മജേഷ് രാമൻ എന്നിവർ ക്ലാസെടുത്തു. തുടർന്ന് കേന്ദ്രാവിഷ്കൃത പദ്ധതികളെക്കുറിച്ച് ക്ലാസും ക്വിസ് മത്സരവും നടന്നു. ബാലുശേരി മനോരഞ്ജൻ ആർട്സ് അവതരിപ്പിച്ച കലാപരിപാടിയും അരങ്ങേറി. ഐസിഡിഎസ് കൽപ്പറ്റ പ്രോജക്ട് ഓഫീസിന്‍റെ സഹകരണത്തോടെയാണ് ഏകദിന ശില്പശാല നടത്തിയത്. പ്രോജക്ടിനു കീഴിലെ അങ്കണവാടി അധ്യാപകർ പങ്കെടുത്തു.

ഛത്തീസ്ഗഡിലെ മലയാളി കന്യാസ്ത്രീകളുടെ അറസ്റ്റ് അന്യായം: കത്തോലിക്ക കോണ്‍ഗ്രസ്

കൽപ്പറ്റ: ഛത്തീസ്ഗഡിലെ കന്യാസ്ത്രീകളെ അന്യായമായി അറസ്റ്റ് ചെയ്യുകയും തടവിൽ വയ്ക്കുകയും ചെയ്ത സംഭവത്തിൽ കത്തോലിക്ക കോണ്‍ഗ്രസ് കൽപ്പറ്റ മേഖലാ സമിതി അപലപിക്കുകയും പ്രതിഷേധം രേഖപ്പെടുത്തുകയും ചെയ്തു. മതന്യൂനപക്ഷങ്ങൾക്ക് ഭരണഘടന ഉറപ്പു നൽകുന്ന മൗലിക അവകാശങ്ങൾക്ക് മേലുള്ള കടന്നുകയറ്റമാണ് ഛത്തീസ്ഗഡ് സർക്കാരും റെയിൽവേ ഉദ്യോഗസ്ഥരും അടങ്ങുന്ന അധികാര വർഗം നടത്തിയത്. എല്ലാ രേഖകളും ഉൾപ്പെടെ സഞ്ചരിച്ചവരുടെ സഞ്ചാരസ്വാതന്ത്ര്യം ഹനിക്കുന്ന നടപടിയാണ് റെയിൽവേ അധികാരികളുടെ ഭാഗത്തുനിന്നും ഉണ്ടായത്. ഉത്തരേന്ത്യയിൽ പലയിടങ്ങളിലും സന്യസ്ത വസ്ത്രം ധരിച്ച് സഞ്ചരിക്കാൻ പോലും കഴിയാത്ത സാഹചര്യമാണ് നിലവിലുള്ളതെന്ന് യോഗം അഭിപ്രായപ്പെട്ടു. പാവപ്പെട്ടവരുടെയും ആദിവാസി ഗോത്ര വിഭാഗങ്ങളുടെയും ഉന്നതിക്കായി അവരുടെ ഇടയിൽ ആരോഗ്യ സംരക്ഷണ പ്രവർത്തനങ്ങളും വിദ്യാഭ്യാസ പുരോഗതിക്കുമായി പ്രവർത്തിക്കുന്ന സന്യസ്തരെ മനുഷ്യകടത്തുകാരായും മതപരിവർത്തകരായും ചിത്രീകരിക്കുന്നത് നിഗൂഢ ലക്ഷ്യങ്ങളുടെ ഭാഗമാണെന്ന് യോഗം ഉദ്ഘാടനം ചെയ്ത കത്തോലിക്കാ കോണ്‍ഗ്രസ് മാനന്തവാടി രൂപതാ പ്രസിഡന്‍റ് ജോണ്‍സണ്‍ തൊഴുത്തുങ്കൽ പറഞ്ഞു. യോഗത്തിൽ മേഖലാ പ്രസിഡന്‍റ് സജി ഫിലിപ്പ് അധ്യക്ഷത വഹിച്ചു. കൽപ്പറ്റ മേഖല ഡയറക്ടർ ഫാ. ഷിജു ഐക്കരക്കാനായിൽ അനുഗ്രഹ പ്രഭാഷണം നടത്തി. കൽപ്പറ്റ ഫൊറോനാ വികാരി ഫാ. ജോണി പെരുമാട്ടിക്കുന്നേൽ മുഖ്യപ്രഭാഷണം നടത്തി. മേഖലാ സെക്രട്ടറി ജോണ്‍സണ്‍ കുറ്റിക്കാട്ടിൽ, മേഖല വൈസ് പ്രസിഡന്‍റ് ഷിബിൻ കാഞ്ഞിരത്തിങ്കൽ, ഗ്ലോബൽ വനിതാ പ്രതിനിധി റാണി വർഗീസ് മറ്റത്തിൽ എന്നിവർ പ്രസംഗിച്ചു. സിബി ഒഴികെയിൽ(യൂണിറ്റ് പ്രസിഡന്‍റ്), രാജൻ ബാബു പാലംമൂട്ടിൽ (യൂണിറ്റ് സെക്രട്ടറി), ജിബോയ് വൈപ്പന, ജയിംസ് മേലെപള്ളി, ജെന്നി ഈപ്പൻ തുടങ്ങിയവർ നേതൃത്വം നൽകി. സന്യസ്തരുടെ അറസ്റ്റ്: കത്തോലിക്കാ കോണ്‍ഗ്രസ് പ്രതിഷേധിച്ചു സുൽത്താൻ ബത്തേരി: ഛത്തീസ്ഗഡിലെ ദുർഗിൽ മനുഷ്യകടത്താരോപിച്ച് രണ്ട് കന്യാസ്ത്രീകളെ അറസ്റ്റ് ചെയ്തതിൽ കത്തോലിക്ക കോണ്‍ഗ്രസ് ബത്തേരി ഫൊറോന എക്സിക്യുട്ടീവ് യോഗം പ്രതിഷേധിച്ചു. പെണ്‍കുട്ടികളെ കയ്യേറ്റം ചെയ്യുകയും കാര്യങ്ങൾ മനസിലാക്കാതെയും വിശദീകരണം ഉൾക്കൊള്ളാതെയുമാണ് അറസ്റ്റ് നടന്നതെന്നും ഇത് ശരിയായ നടപടിയല്ലെന്നും യോഗം വിലയിരുത്തി. അവശതയനുഭവിക്കുന്ന സമൂഹത്തിലെ ജനങ്ങളെ മുഖ്യധാരയിലേക്ക് കൊണ്ടുവരാനും അവരുടെ ക്ഷേമ പ്രവർത്തനങ്ങൾക്കുമായി പ്രവർത്തിക്കുന്ന ക്രൈസ്തവ സഭയെയും സന്യാസ സമൂഹങ്ങളെയും താറടിക്കുന്ന തരത്തിലുള്ള പ്രവർത്തനങ്ങളെ യോഗം അപലപിച്ചു. മാതാപിതാക്കളുടെ അനുവാദത്തോടെ യാത്രചെയ്ത പെണ്‍കുട്ടികളെ മതപരിവർത്തനം നടത്തി എന്ന തരത്തിൽ ചിത്രീകരിക്കുന്നത് മതേതര രാജ്യത്തിൽ സ്വതന്ത്രമായി സഞ്ചരിക്കാനുള്ള പൗരന്‍റെ അവകാശത്തെയാണ് ഹനിക്കുന്നത് എന്നും യോഗം വിലയിരുത്തി. സംഭവത്തിൽ നീതിപൂർവമായ അന്വേഷണം വേണമെന്നും അറസ്റ്റിലായ കന്യാസ്ത്രീകളെ ഉടൻ മോചിപ്പിക്കണമെന്നും യോഗം ആവശ്യപ്പെട്ടു. മേഖല പ്രസിഡന്‍റ് ഡേവി മാങ്കുഴ അധ്യക്ഷത വഹിച്ചു. ഫാ. ജോസ് മേച്ചേരിൽ, ചാൾസ് വടശേരി, ജോഷി കാരക്കുന്നേൽ, സാജു പുലിക്കോട്ടിൽ, തോമസ് പട്ടമന, ജേക്കബ് ബത്തേരി, സെബാസ്റ്റ്യൻ ചക്കാലക്കൽ, മോളി മാമൂട്ടിൽ, സ്മിത അടവിച്ചിറ എന്നിവർ പ്രസംഗിച്ചു. മതേതര ഇന്ത്യയോടുള്ള വെല്ലുവിളി: ആം ആദ്മി പാർട്ടി കൽപ്പറ്റ: ഛത്തീസ്ഗഡിൽ മനുഷ്യക്കടത്തും നിർബന്ധിത മതപരിവർത്തനവും ആരോപിച്ച് മലയാളി കന്യാസ്ത്രീകളെ അറസ്റ്റു ചെയ്തതിനെതിരേ ആം ആദ്മി പാർട്ടി ജില്ലാ കമ്മിറ്റി പ്രതിഷേധം രേഖപ്പെടുത്തി. ബജ്രംഗ് ദൾ പോലെയുള്ള സംഘടനകൾ ന്യൂനപക്ഷങ്ങൾക്ക് നേരെ അഴിച്ചുവിടുന്ന ഉത്തരം ആക്രമണങ്ങൾ മതേതര ഇന്ത്യയോടുളള വെല്ലുവിളിയാണെന്ന് ജില്ലാ പ്രസിഡന്‍റ് ഡോ.എ.ടി. സുരേഷ് കുറ്റപ്പെടുത്തി. യോഗത്തിൽ ജില്ലാ സെക്രട്ടറി പോൾസണ്‍ തോമാട്ടുചാൽ, മനു മത്തായി, ബാബു തച്ചറോത്, ഗഫൂർ കോട്ടത്തറ, ഷെറിൻ റോയ്, ഇ.വി. തോമസ് എന്നിവർ പ്രസംഗിച്ചു. പുൽപ്പള്ളി: ഛത്തീസ്ഗഡിൽ മലയാളി കന്യാസ്ത്രീകളെ അറസ്റ്റ് ചെയ്തസംഭവം മത സ്വാതന്ത്രത്തോടും ഇന്ത്യൻ ഭരണഘടനയോടുമുള്ള വെല്ലുവിളിയാണെന്ന് ജനതാദൾ-എസ് ജില്ലാ കമ്മിറ്റി കുറ്റപ്പെടുത്തി. രാജ്യത്തിന്‍റെ വിവിധ ഭാഗങ്ങളിൽ ന്യൂനപക്ഷങ്ങൾക്ക് നേരേ നിരന്തരമായ അധിക്രമണങ്ങളാണ് നടന്നുകൊണ്ടിരിക്കുന്നത്. ഈ ഗുരുതര സാഹചര്യങ്ങൾ മതേതര സമൂഹം ഒറ്റക്കെട്ടായി ചെറുത്തു തോൽപ്പിക്കണമെന്നും യോഗം ആവശ്യപ്പെട്ടു. യോഗത്തിൽ ജില്ലാ പ്രസിഡന്‍റ് കുര്യാക്കോസ് മുള്ളൻമട അധ്യക്ഷത വഹിച്ചു. ജില്ലാ ജനറൽ സെക്രട്ടറി ബെന്നി കുറുന്പാലക്കാട്ട്, വി.പി. വർക്കി, എ.ജെ. കുര്യൻ, അന്നമ്മ പൗലോസ്, കെ. കുമാരൻ, അയ്യപ്പൻ എന്നിവർ പ്രസംഗിച്ചു. പുൽപ്പള്ളി: ഛത്തീസ്ഗഡിൽ കന്യാസ്ത്രീകളെ അറസ്റ്റ് ചെയ്തതിൽ കത്തോലിക്ക കോണ്‍ഗ്രസ് പുൽപ്പള്ളി മേഖല സമിതി പ്രതിഷേധിച്ചു. മതപരിവർത്തനം, മനുഷ്യക്കടത്ത് തുടങ്ങിയ വ്യാജ ആരോപണങ്ങൾ ഉന്നയിച്ച് ബജ്റംഗ ദൾ പ്രവർത്തകർ കയ്യേറ്റം ചെയ്തതിലും വ്യാജപരാതി നൽകി സിസ്റ്റർ വന്ദന ഫ്രാൻസിസിനെയും സിസ്റ്റർ പ്രീതി മേരിയെയും അറസ്റ്റ് ചെയ്തതിലും കത്തോലിക്ക കോണ്‍ഗ്രസ് പുൽപ്പള്ളി മേഘല കമ്മിറ്റി പ്രതിഷേധിച്ചു. രാജ്യത്തിന്‍റെ വിവിധ ഭാഗങ്ങളിൽ ക്രൈസ്തവർക്ക് നേരേ വർധിച്ചുവരുന്ന അക്രമസംഭവങ്ങളുടെ ഭാഗമാണിതെന്നു സംശയിക്കണ്ടിയിരിക്കുന്നു. മതന്യൂനപക്ഷങ്ങളുടെ ഭരണഘടനാപരമായ അവകാശങ്ങളുടെ ഗുരുതര ലംഘനമാണിതെന്നും യോഗം കുറ്റപ്പെടുത്തി. ഫാ. സുനിൽ വട്ടുക്കുന്നേൽ യോഗം ഉദ്ഘാടനം ചെയ്തു. സുനിൽ പാലമറ്റം അധ്യക്ഷത വഹിച്ചു. ഡോ.കെ.പി. സാജു, ബീന കരുമാംകുന്നേൽ, ജയിംസ് മറ്റത്തിൽ, ജോർജ് കൊല്ലിയിൽ, തോമസ് പാഴൂക്കാല, ജോർജ് കച്ചിറമറ്റം, ജോസ് പള്ളത്ത്, ഷിനോയി തുണ്ടത്തിൽ എന്നിവർ പ്രസംഗിച്ചു.

കാട്ടാനകളെ മുതുമലയിലെ ഉൾവനത്തിലേക്ക് തുരത്തും: യോഗം വിളിച്ചു ചേർത്തു

ഗൂഡല്ലൂർ: ശ്രീമധുര പഞ്ചായത്തിലെ കാട്ടാന ശല്യത്തിന് ശാശ്വത പരിഹാരം കാണണമെന്ന നാട്ടുകാരുടെ ആവശ്യത്തെത്തുടർന്ന് അന്പലമൂല പള്ളിയിൽ ഉന്നത ഉദ്യോഗസ്ഥർ പങ്കെടുത്ത യോഗം വിളിച്ചു. കഴിഞ്ഞ ദിവസം നാട്ടുകാർ കാട്ടാന ശല്യത്തിനെതിരേ അന്പലമൂലയിൽ റോഡ് ഉപരോധ സമരം നടത്തിയിരുന്നു. യോഗം വിളിച്ചു ചേർക്കാമെന്ന അധികാരികളുടെ ഉറപ്പിനെത്തുടർന്നാണ് അന്ന് സമരം അവസാനിപ്പിച്ചിരുന്നത്. കാട്ടാനകളെ മുതുമല വന്യജീവി സങ്കേതത്തിലെ ഉൾവനത്തിലേക്ക് തുരത്തിയോടിക്കുക, വനാതിർത്തിയിൽ വെർച്വൽ സോളാർ ഫെൻസിംഗ് ഏർപ്പെടുത്തുക തുടങ്ങിയ ആവശ്യങ്ങൾ നാട്ടുകാർ യോഗത്തിൽ ഉന്നയിച്ചു. ഈ ആവശ്യങ്ങൾ അധികാരികൾ അംഗീകരിച്ചു. ആനമലയിലെ സോളാർ വെർച്വൽ ഫെൻസിംഗ് സംവിധാനം അന്പലമൂലയിൽ പരീക്ഷിക്കാനും യോഗത്തിൽ തീരുമാനിച്ചു. ആനകളെ തുരത്താൻ പ്രത്യേക സംഘത്തെ നിയോഗിക്കുമെന്നും ഉറപ്പ് നൽകിയിട്ടുണ്ട്. നൂറുകണക്കിന് പേർ യോഗത്തിൽ പങ്കെടുത്തു. യോഗത്തിൽ ഗൂഡല്ലൂർ ഡിഎഫ്ഒ വെങ്കിടേഷ് പ്രഭു അധ്യക്ഷത വഹിച്ചു. ഗൂഡല്ലൂർ ഡിവൈഎസ്പി വസന്തകുമാർ, റവന്യു വകുപ്പ് ഉദ്യോഗസ്ഥർ, സിഐ രാജേന്ദ്ര പ്രസാദ്, ഗൂഡല്ലൂർ റേഞ്ചർ രാധാകൃഷ്ണൻ, അഡ്വ.എം. ദ്രാവിഡമണി, മുൻ പഞ്ചായത്ത് പ്രസിഡന്‍റ് സുനിൽ തുടങ്ങിയവർ സംബന്ധിച്ചു.

അന്പലവയൽ ക്ഷീരോത്പാദക സഹകരണ സംഘം പൊതുയോഗം നടത്തി

അന്പലവയൽ: ക്ഷീരോത്പാദക സഹകരണ സംഘത്തിന്‍റെ 2024-2025 വർഷത്തെ പൊതുയോഗവും കൂടുതൽ മാർക്ക് നേടി വിജയിച്ച ക്ഷീര കർഷകരുടെ മക്കളെയും സംഘത്തിലെ മികച്ച ക്ഷീര കർഷകരെയും ആദരിക്കൽ ചടങ്ങും സുൽത്താൻ ബത്തേരി ഐ.സി. ബാലകൃഷ്ണൻ എംഎൽഎ ഉദ്ഘാടനം ചെയ്തു. സംഘം പ്രസിഡന്‍റ് എ.പി. കുര്യാക്കോസ് അധ്യക്ഷത വഹിച്ചു. പഞ്ചായത്ത് പ്രസിഡന്‍റ് സി.കെ. ഹഫ്സത്ത്, വാർഡ് അംഗം എം.യു. ജോർജ്, ക്ഷീരവികസന ഓഫീസർ പി.പി. പ്രജീഷ്, മിൽമ പി ആൻഡ് ഐ ജില്ലാ ഹെഡ് പി.പി. പ്രദീപ്, സംഘത്തിന്‍റെ വൈസ് പ്രസിഡന്‍റ് ഫാത്തിമ സലിം, സംഘം ഡയറക്ടർമാരായ കെ.കെ. ബാബു, എ.എക്സ്. ജോസഫ്, സി.കെ. പുഷ്പരാജൻ, പി.ടി. പ്രദീപ്, പി. ശശി, പ്രസന്ന അജികുമാർ, ജോളി ഷിബു, സംഘം സെക്രട്ടറി കെ. ഉമ്മർ എന്നിവർ പ്രസംഗിച്ചു.

പരിസ്ഥിതി ധ്വംസനം തുടരുന്നു: വയനാട് പ്രകൃതിസംരക്ഷണ സമിതി

കൽപ്പറ്റ: പുഞ്ചിരിമട്ടം ഉരുൾ ദുരന്തത്തിന് ശേഷവും രാഷ്ട്രീയ പാർട്ടികളും ഭരണാധികാരികളും വികസന ജ്വരം മൂർച്ഛിച്ച സംഘടിത ലോബികളും പരിസ്ഥിതി ധ്വംസനത്തിൽ നിന്നും അണുവിട പിൻവാങ്ങിയിട്ടില്ലെന്ന് വയനാട് പ്രകൃതിസംരക്ഷണ സമിതി. പശ്ചിമഘട്ട മലനിരകൾക്കു നേരെയുള്ള അതിക്രമം പതിൻമടങ്ങ് വർധിക്കുകയാണ്. ദുരന്തം കഴിഞ്ഞിട്ട് ഒരു വർഷമായെങ്കിലും ലോകോത്തര പുനരധിവാസമെന്ന് ഉദ്ഘോഷിക്കപ്പെട്ട ഇരകളുടെ പുനരധിവാസം മറ്റൊരു ദുരന്തമായി നാടിനെ വേട്ടയാടുകയാണിപ്പോഴും. മുഖ്യമന്ത്രിയുടെ ദുരിതാശ്വാസ നിധിയിലേക്കെത്തിയ 800 ഓളം കോടിയിൽ ദുരിത ബാധിതരായവർക്ക് ഒരു കോടി രൂപ വച്ച് പണമായി നൽകിയാൽ പോലും ഇരകൾ എന്നേ രക്ഷപ്പെട്ടേനെ. അവർ ജീവിതം കരുപ്പിടിപ്പിച്ചേനെ. ടൗണ്‍ഷിപ്പ് ആധുനികതട്ടിപ്പിന്‍റെ പുത്തൻ വെള്ളാനയാണ്. ഒരു വർഷമായിട്ടും മാതൃകാ വീടിന്‍റെ നിർമാണം പോലും പൂർത്തിയായിട്ടില്ല. ഏറ്റവും മുന്തിയ വീടു നിർമാണ വസ്തുക്കൾ ഉപയോഗിച്ച് നിർമിച്ചാലും 15 ലക്ഷം രൂപയ്ക്ക് അനായാസം തീരേണ്ട വീട് ഒന്നിന് 25 ലക്ഷത്തിന് ഊരാളുങ്കലിന് ടെൻഡർ വിളിക്കാതെയാണ് നൽകിയത്. സർക്കാരിന് പൂർണ ഉടമസ്ഥതയുള്ളതെന്ന് സുപ്രീം കോടതിയും ഹൈക്കോടതിയും വിധിയെഴുതിയ തോട്ടഭൂമി കോടികൾ പ്രതിഫലം നൽകി ഏറ്റെടുത്തതും അഴിമതിയാണ്. പ്രതിപക്ഷ നേതാവ് ഇതിനെതിരേ ഒരക്ഷരം മിണ്ടിയിട്ടില്ല. ദുരിതാശ്വാസ നിധിയിലെ ഭീമമായ തുകയിൽ 200 കോടി നീക്കി വച്ചത് മുണ്ടക്കൈ, ചൂരൽമല പ്രദശത്തേ റോഡ് നിർമാണത്തിനും ചൂരൽമല ടൗണ്‍ പുനരുജ്ജീവനത്തിനുമാണ്. ദുരന്ത ശേഷം മനുഷ്യരൊന്നും കാര്യമായി അധിവസിക്കാത്ത പ്രദേശത്തൂടെ റോഡുകൾ നിർമിക്കാൻ ഊരാളുങ്കലിന് ടെൻഡറില്ലാതെ കരാർ കൊടുത്തത് റിസോർട്ടുകാരെയും ഊരാളുങ്കലിനെയും ഒന്നിച്ചു സഹായിക്കാനാണ്. വലിയൊരു തുക മാറ്റിവച്ചത് പുന്നപ്പുഴ പുനരുജ്ജീവനത്തിനാണ്. അതി ഭയാനകയായ മണ്ണിടിച്ചിലിന്ന് ശേഷം ലക്ഷക്കണക്കിന്ന് ടണ്‍ മണ്ണും പാറയും മറ്റവശിഷ്ടങ്ങളും നീക്കം ചെയ്യാനുള്ള തീരുമാനത്തെ പ്രതിപക്ഷകക്ഷികളോ സ്ഥലം എംഎൽഎയൊ എംപിയോ ചോദ്യം ചെയ്യാത്തത് അർഥഗർഭമാണ്. പതിനായിരക്കണക്കിന് ഘന മീറ്റർ പാറയിലാണ് ഇവരുടെ കണ്ണ് എന്ന് വ്യക്തമാണ്. ജോണ്‍ മത്തായി കമ്മിറ്റി അപഹാസ്യവും അസംബന്ധവുമായ ശിപർശകളാണ് സമർപ്പിച്ചത്. ദുരന്തത്തെക്കുറിച്ച് വസ്തുനിഷ്ടമായും ആഴത്തിലുള്ളതുമായ പഠനം ജോണ്‍ മത്തായി നടത്തിയില്ല. കമ്മിറ്റി നിശ്ചയിച്ച ഗോ സോണും നോ ഗോ സോണും അശാസ്ത്രീയവും ജനവിരുദ്ധവും പരിസ്ഥിതി വിരുദ്ധവുമായിരുന്നു. വയനാട്ടിലെ മലഞ്ചരിവുകളിലുള്ള അനധികൃത അനിയന്ത്രിത ടൂറിസം ഇന്നും അരങ്ങുതകർക്കുകയാണ്. മലഞ്ചരിവുകളിലെ അരക്ഷിത പ്രദേശങ്ങളിൽ താമസിക്കുന്ന 4500 കുടുംബങ്ങളെ അടിയന്തരമായി മാറ്റിപ്പാർപ്പിക്കണമെന്ന് കേന്ദ്ര-സംസ്ഥാന സർക്കാരുകൾ നിശ്ചയിച്ച വിവിധ കമ്മിറ്റികൾ ശിപാർശ ചെയ്തിനെക്കുറിച്ച് സർക്കാരോ ജനപ്രതിനിധികളോ ചിന്തിക്കുന്നില്ല. അവരെ മാറ്റിപ്പാർപ്പിക്കുന്നതിന്നു പകരം കള്ളാടിയിൽ നിന്നും ആനക്കാംപൊയിലിലെക്ക് ഇരട്ട തുരങ്കം നിർമിക്കാനുള്ള ഭഗീരഥ ശ്രമത്തിലാണ് സർക്കാർ. റിയൽ എസ്റ്റേറ്റു മാഫിയക്കും വൻകിട കരാറുകാർക്കും വേണ്ടിയാണെന്ന് വയനാട് പ്രകൃതി സംരക്ഷണ സമിതി ആവശ്യപ്പെട്ടു. യോഗത്തിൽ എൻ. ബാദുഷ അധ്യക്ഷത വഹിച്ചു. തച്ചന്പത്ത് രാമകൃഷ്ണൻ, ബാബു മൈലന്പാടി, തോമസ് അന്പലവയൽ, എ.വി. മനോജ്, സി.എ. ഗോപാലകൃഷ്ണൻ, പി.എം. സുരേഷ്, എം. ഗംഗാധരൻ, സണ്ണി മരക്കടവ്, ഒ.ജെ. പൗലോസ് എന്നിവർ പ്രസംഗിച്ചു.

നിയന്ത്രണംവിട്ട് ലോറി മറിഞ്ഞു

പുൽപ്പള്ളി: പുൽപ്പള്ളിയിൽ നിയന്ത്രണംവിട്ട ലോറി മറിഞ്ഞു. പനമരം ഭാഗത്ത് നിന്ന് ചിരട്ടയുമായി പുൽപ്പള്ളിയിലേക്ക് വന്ന ലോറിയാണ് താഴെയങ്ങാടി ഇറക്കത്തിൽ നിയന്ത്രണം വിട്ട് മതിലിലിടിച്ച് റോഡിന് കുറുകെ മറിഞ്ഞത്. ഇന്നലെ വൈകുന്നേരത്തോടെയായിരുന്നു അപകടം. ലോറി ഡ്രൈവറേയും ക്ലീനറേയും സാരമായ പരിക്കുകളോടെ ബത്തേരി ആശുപത്രിയിൽ പ്രവേശിപ്പിച്ചു. അപകടസമയത്ത് മറ്റ് വാഹനങ്ങളില്ലാതിരുന്നതിനാൽ വൻ അപകടം ഒഴിവായി.

ജാഗ്രത സെമിനാർ നടത്തി

പുൽപ്പള്ളി: ഇഞ്ചിക്കൃഷിയിടങ്ങളിൽ പടർന്നുപിടിക്കുന്ന രോഗബാധയെ നിയന്ത്രിക്കുന്നതുമായി ബന്ധപ്പെട്ട് മറുനാടൻ കർഷക സംഘടനയായ യുഎഫ്പിഎ പുൽപ്പള്ളിയിൽ ജാഗ്രതാ സെമിനാർ സംഘടിപ്പിച്ചു. രോഗനിയന്ത്രണത്തിനുള്ള പ്രതിവിധികൾ കാർഷിക വിദഗ്ധർ സെമിനാറിൽ കർഷകരെ പരിചയപ്പെടുത്തി. ചെയർമാൻ എമിൻസണ്‍ തോമസ് ഉദ്ഘാടനം ചെയ്തു. നാഷണൽ മെന്‍റർ കെ.എസ്. സാബു, ആർ. പ്രേം കുമാർ, ഡോ. ഗവാസ് രാഗേഷ്, അജീഷ് ആന്‍റണി കമ്മന, പി.എൽ. ബിപിൻ, ബേബി പെരുങ്കുഴി തുടങ്ങിയവർ പ്രസംഗിച്ചു. വാഴ, കാപ്പി, കുരുമുളക് തുടങ്ങിയ കൃഷികളിലെ രോഗപ്രതിരോധ വിഷയങ്ങളും സെമിനാറിൽ ചർച്ച ചെയ്തു. കാർഷിക രംഗത്തെ സംശയങ്ങൾക്ക് മറുപടി നൽകുന്നതിനായി സംഘടനയുടെ നേതൃത്വത്തിൽ ടോൾ ഫ്രീ നന്പർ സംവിധാനം നടപ്പാക്കാൻ തയാറെടുക്കുകയാണെന്നും ഭാരവാഹികൾ അറിയിച്ചു.

ഇഞ്ചി കർഷകർക്ക് അടിയന്തര സഹായം നൽകണം: കേരള കോണ്‍ഗ്രസ്-എം

സുൽത്താൻ ബത്തേരി: വയനാട്ടിലും കർണാടകയിലും വൈറസ്ബാധ മൂലം വ്യാപകമായി ഇഞ്ചി കൃഷി നശിച്ച കർഷകർക്ക് അടിയന്തര സാന്പത്തിക സഹായം നൽകണമെന്ന് കേരള കോണ്‍ഗ്രസ്-എം സുൽത്താൻ ബത്തേരി നിയോജകമണ്ഡലം കണ്‍വൻഷൻ സർക്കാരിനോട് ആവശ്യപ്പെട്ടു. ഇഞ്ചി കൃഷി വ്യാപകമായി പഴുപ്പ് ബാധിച്ച് ദിവസങ്ങൾ കൊണ്ട് നശിച്ചു പോകുകയാണ്. നിലവിൽ വിപണിയിലുള്ള രോഗപ്രതിരോധ മരുന്നുകൾ പ്രയോഗിക്കുന്നുണ്ടെങ്കിലും രോഗത്തെ ചെറുക്കാൻ കഴിയുന്നില്ലെന്ന് കർഷകർ പറയുന്നു. കർണാടകയിലും മറ്റും ഇഞ്ചി കൃഷി ചെയ്യുന്നതിന് മലയാളികളായ കർഷകർ ബഹുഭൂരിപക്ഷവും ബാങ്കുകളിൽ നിന്നും മറ്റു ധനകാര്യ സ്ഥാപനങ്ങളിൽ നിന്നും വ്യക്തികളിൽ നിന്നും വായ്പയെടുത്തും മറ്റുമാണ് ഇഞ്ചി കൃഷി നടത്തുന്നത്. കൃഷിനാശം മൂലം ഭീമമായ സാന്പത്തിക ബാധ്യത സാധാരണക്കാരായ കർഷകർക്ക് വന്നുചേർന്നിരിക്കുകയാണ്. ഇങ്ങനെയുള്ള കർഷകരെ സഹായിക്കുന്നതിന് സർക്കാർ സംവിധാനങ്ങൾ തയാറാകണമെന്നും രോഗബാധമൂലം നശിച്ച കൃഷിയിടങ്ങൾ സന്ദർശിച്ച് പരിഹാര നടപടികൾ കൈക്കൊള്ളുന്നതിന് ആവശ്യമായ അടിയന്തര ഇടപെടൽ സർക്കാരിന്‍റെ ഭാഗത്ത് നിന്ന് ഉണ്ടാകണമെന്നും കണ്‍വൻഷൻ ആവശ്യപ്പെട്ടു. കേരള കോണ്‍ഗ്രസ്-എം സംസ്ഥാന ജനറൽ സെക്രട്ടറി കെ. ജെ. ദേവസ്യ കണ്‍വൻഷൻ ഉദ്ഘാടനം ചെയ്തു. നിയോജകമണ്ഡലം പ്രസിഡന്‍റ് ടി.ഡി. മാത്യു അധ്യക്ഷത വഹിച്ചു. ജില്ലാ പ്രസിഡന്‍റ് ജോസഫ് മാണിശേരി, എൻ.എ. ബില്ലി ഗ്രഹാം, കുര്യൻ ജോസഫ്, കെ.കെ. ബേബി, വിൽസണ്‍ നെടുങ്കുന്പിൽ, അബ്ദുൾ ഗഫൂർ ഹാജി, പി.എം. ജയശ്രീ, ടി.കെ. അന്നമ്മ, ലിസി ലോപ്പസ്, ജോണ്‍സണ്‍, വി.എം. ജോസഫ്, കെ.വി. സണ്ണി, ജോർജ് ജോസഫ്, ജോയ് വാദ്യപള്ളി, ടി.എം. ജോസഫ്, അനിൽ ജോസ്, മാത്യു എടയക്കാട്ട് തുടങ്ങിയവർ പ്രസംഗിച്ചു.

ഫർണിച്ചർ കടയ്ക്ക് തീയിട്ടു

മാനന്തവാടി: ആറാട്ടുതറയിൽ ഫർണീച്ചർ കടയിൽ സാമൂഹ്യവിരുദ്ധർ തീയിട്ടു. ചെന്നലായി സ്വദേശി സുനിലിന്‍റെ കടയിലെ തടികളുൾപ്പെടുന്ന സാമഗ്രികകളാണ് ഇന്നലെ പുലർച്ചെ മൂന്നോടെ സാമൂഹ്യവിരുദ്ധർ തീവച്ച് നശിപ്പിച്ചത്. നാട്ടുകാരും അഗ്നിരക്ഷാസേനയും ചേർന്ന് തീയണച്ചു. ആറാട്ടുതറയിലെ സ്ഥാപനത്തിൽ തീ കത്തിപ്പടർന്നത് പ്രദേശവാസികൾ അറിച്ചതിനെ തുടർന്ന് സ്ഥലത്തെത്തിയ അഗ്നിരക്ഷാസേനയും നാട്ടുകാരും ചേർന്ന് അണയ്ക്കുകയായിരുന്നു. പിൻവശത്തെ വാതിൽ തുറന്ന് പ്രവേശിച്ച മോഷ്ടാക്കൾ കടയിലെ വാർണിഷും പശയുമുൾപ്പെടെപ്പടെയുള്ളവ ഉപയോഗിച്ചാണ് തീ വച്ചത്. ഒഴിഞ്ഞ വാർണിഷ് കുപ്പികൾ സ്ഥലത്ത് നിന്നും കണ്ടെത്തി. കടയിൽ നിന്നും പ്ലെയറും ഗ്ലാസ് കട്ടറും മോഷണം പോയി. പ്ലെയർ സമീപത്തെ വാട്ടർ സർവീസ് സ്റ്റേഷനിൽ കണ്ടെത്തി. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചു.

യുവാവിനെ തോട്ടിൽ മരിച്ചതിൽ കണ്ടെത്തി

മാനന്തവാടി: വയനാട് പേര്യ ചപ്പാരത്ത് യുവാവിനെ തോട്ടിൽ മരിച്ച നിലയിൽ കണ്ടെത്തി. കുമാരൻ (45) നെയാണ് മരിച്ച നിലയിൽ കണ്ടെത്തിയത്. ഞായറാഴ്ച രാത്രിയായിട്ടും വീട്ടിൽ തിരിച്ചെത്താത്തിനെത്തുടർന്ന് ഇന്നലെ നടത്തിയ തെരച്ചിലാണ് വീടിനടുത്തുള്ള തോട്ടിൽ മരിച്ച നിലയിൽ കണ്ടെത്തിയത്. മൃതദേഹം മാനന്തവാടി മോർച്ചറിയിൽ.

ഓട്ടോറിക്ഷയ്ക്ക് പിറകിൽ ലോറി ഇടിച്ച് ഓട്ടോ ഡ്രൈവർ മരിച്ചു

മാനന്തവാടി: ഓട്ടോറിക്ഷയ്ക്ക് പിറകിൽ ലോറി ഇടിച്ച് ഓട്ടോ ഡ്രൈവറായ മദ്രസ അധ്യാപകൻ മരിച്ചു. കോറോം കൂട്ടപ്പാറ വൈശ്യൻ യാസിൻ അയൂബ് (45) ആണ് മരിച്ചത്. സംസ്കാരം ഇന്ന് കോറോം ജുമാമസ്ജിദ് ഖബർസ്ഥാനിൽ. കൂട്ടപ്പാറ അങ്കണവാടിക്ക് സമീപം ഇന്നലെ ഉച്ചയ്ക്ക് ഓട്ടോറിക്ഷയ്ക്ക് പിറകിൽ ലോറി ഇടിക്കുകയായിരുന്നു. ഓട്ടോറിക്ഷാ ഡ്രൈവറും പൂരിഞ്ഞി സിറാജുൽഹുദാ മദ്രസ സദർ മുഅല്ലിമുമാണ്. മൃതദേഹം മാനന്തവാടി മെഡിക്കൽ കോളജ് മോർച്ചറിയിൽ. ഭാര്യ: സെൽമ. മക്കൾ: ആബിദ, ആതിദ, അഫ്ലഹ, അസ്ലഹ.

തോണി മറിഞ്ഞ് ഓട്ടോറിക്ഷ ഡ്രൈവർ മരിച്ചു

മാനന്തവാടി: തോണി മറിഞ്ഞ് ഓട്ടോറിക്ഷാ ഡ്രൈവർ മരിച്ചു. പടിഞ്ഞാറത്ത പുതുശേരിക്കടവിലെ ബാങ്ക്കുന്നിലെ മാണിക്യ നിവാസിൽ ബാലകൃഷ്ണനാണ് (50) മരിച്ചത്. തോണിയിലുണ്ടായിരുന്ന കുട്ടി അടക്കമുള്ള മൂന്ന് പേരെ രക്ഷപ്പെടുത്തി. ഇന്നലെ ഉച്ചകഴിഞ്ഞ് 2.30നാണ് സംഭവം. കുന്നമംഗലം തേർത്ത് കുന്നിൽ വെള്ളം കയറി കിടക്കുന്ന വയലിന് അപ്പുറത്ത് താമസിക്കുന്നവരെ മറുകര എത്തിക്കുന്നതിനുവേണ്ടി പടിഞ്ഞാറത്തറ ഗ്രാമപഞ്ചായത്ത് ഏർപ്പെടുത്തിയ തോണിയാണ് അപകടത്തിൽപ്പെട്ടത്. ബാലകൃഷ്ണനും ഒരു കുട്ടിയും അടക്കമുള്ള അഞ്ച് പേർ സഞ്ചരിച്ച തോണി മറിയുകയായിരുന്നു. തോണിയിലുണ്ടായിരുന്ന തെന്നടിയിൽ ബിനോയി കുട്ടി അടക്കമുള്ള മൂന്ന് പേരെ രക്ഷപ്പെടുത്തി.മൃതദേഹം മാനന്തവാടി മെഡിക്കൽ കോളജ് മോർച്ചറിയിൽ. ഭാര്യ: പൂർണിമ, മക്കൾ: ശാഹിൽ, ശാർണിമ.

വി.എസ് അനുസ്മരണം നടത്തി

കൽപ്പറ്റ: മലയാള ഐക്യവേദി ജില്ലാ സമിതി വി.എസ്. അനുസ്മരണം നടത്തി. മുനിസിപ്പൽ കൗണ്‍സിലർ പി. വിനോദ്കുമാർ അധ്യക്ഷത വഹിച്ചു. പുരോഗമന കലാസാഹിത്യ സംഘം ജില്ലാ സെക്രട്ടറി എം. ദേവകുമാർ അനുസ്മരണ പ്രഭാഷണം നടത്തി. മുനിസിപ്പൽ കൗണ്‍സിലർമാരായ എം.കെ. ഷിബു, പി.കെ. റജുല, മലയാള ഐക്യവേദി ജില്ലാ പ്രസിഡന്‍റ് പ്രീത ജെ. പ്രിയദർശിനി, സെക്രട്ടറി എം.എം. ഗണേഷ്, കണ്‍വീനർ കെ.എ. അഭിജിത്ത്, പി.കെ. ജയചന്ദ്രൻ, ബാവ കെ. പാലുകുന്ന്, സി.വി. ഉഷ, താജ്മൻസൂർ, സി. ജയരാജൻ, പി.കെ. ഷാഹിന എന്നിവർ പ്രസംഗിച്ചു.

മാനന്തവാടിയിൽ ഇ മാലിന്യം ശേഖരണം തുടങ്ങി

മാനന്തവാടി: നഗരസഭയിൽ ഇ മാലിന്യ ശേഖരണം ഹരിതകർമസേന തുടങ്ങി. ശേഖരിക്കുന്ന മാലിന്യം ക്ലീൻ കേരള കന്പനിക്ക് കൈമാറും. നഗരസഭാ ചെയർപേഴ്സണ്‍ സി.കെ. രത്നവല്ലി ഉദ്ഘാടനം ചെയ്തു. വൈസ് ചെയർമാൻ ജേക്കബ് സെബാസ്റ്റ്യൻ അധ്യക്ഷത വഹിച്ചു. വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ ലേഖ രാജീവൻ, കൗണ്‍സിലർമാരായ പി.വി. ജോർജ്, നാരായണൻ, ബാബു പുല്ലികൽ, സെക്രട്ടറി അനിൽ രാമകൃഷ്ണൻ, ഹെൽത്ത് ഇൻസ്പെക്ടർ ജി. സന്തോഷ്, സുനിൽകുമാർ എന്നിവർ പ്രസംഗിച്ചു.

യൂക്യാറ്റ്: ക്വിസ് മത്സരം നടത്തി

മാനന്തവാടി: കത്തോലിക്കാസഭയുടെ യുവജന മതബോധന ഗ്രന്ഥമായ യൂക്യാറ്റ് അടിസ്ഥാനമാക്കി കെസിവൈഎം മാനന്തവാടി രൂപതസമിതി ദ്വാരക പാസ്റ്ററൽ സെന്‍ററിൽ സംഘടിപ്പിച്ച യൂക്യാറ്റ് ക്വിസ് മത്സരത്തിൽ കൊട്ടിയൂർ യൂണിറ്റ് ഒന്നാം സ്ഥാനം നേടി. പയ്യന്പള്ളി, ബത്തേരി യൂണിറ്റുകൾ യഥാക്രമം ഒന്ന്, രണ്ട് സ്ഥാനം കരസ്ഥമാക്കി. രൂപതയിലെ വിവിധ യൂണിറ്റുകളിൽനിന്നു 26 ടീം പങ്കെടുത്ത മത്സരം മേരിമാതാ കോളജ് അധ്യാപകൻ ഫാ.പ്രകാശ് വെട്ടിക്കൽ നിയന്ത്രിച്ചു. കെസിവൈഎം രൂപത പ്രസിഡന്‍റ് ബിബിൻ പിലാപ്പിള്ളിൽ, ഡയറക്ടർ ഫാ.സാന്േ‍റാ അന്പലത്തറ, വൈസ് പ്രസിഡന്‍റ് ആഷ്ന പാലാരിക്കുന്നേൽ, ജനറൽ സെക്രട്ടറി വിമൽ കൊച്ചുപുരയ്ക്കൽ, സെക്രട്ടറി ഡ്യൂണ മരിയ കിഴക്കേമണ്ണൂർ, ട്രഷറർ നവീൻ ജോസ് പുലകുടിയിൽ, ആനിമേറ്റർ സിസ്റ്റർ റോസ് ടോം എസ്എബിഎസ്, രൂപത സിൻഡിക്കറ്റ് അംഗം ജിഷിൻ മുണ്ടയ്ക്കാതടത്തിൽ തുടങ്ങിയവർ നേതൃത്വം നൽകി.

കാട്ടാന ശല്യത്തിന് അറുതിയില്ല: മൂടക്കൊല്ലിയിലെ ജനങ്ങൾ പ്രക്ഷോഭവുമായി രംഗത്ത്

സുൽത്താൻ ബത്തേരി: മൂടക്കൊല്ലി, വാകേരി മേഖലയിലെ കാട്ടാനശല്യം അനുദിനം വർധിച്ചുവരുന്പോഴും വനം വകുപ്പ് നിസംഗത പുലർത്തുകയാണെന്ന് പ്രദേശവാസികൾ. കാട്ടാന ശല്യത്താൽ പൊറുതിമുട്ടിയ ജനങ്ങൾ വനം വകുപ്പിനെതിരേ ശക്തമായ പ്രക്ഷോഭവുമായി രംഗത്തിറങ്ങാൻ തീരുമാനിച്ചു. കഴിഞ്ഞ ദിവസവും ജനവാസമേഖലയിൽ കാട്ടാനയിറങ്ങി പ്രദേശത്തെ നാല് കർഷകരുടെ വിളകളാണ് വ്യാപകമായി നശിപ്പിച്ചത്. സ്ഥിരമായി കാട്ടാന ഒരേ മേഖലയിലൂടെ എത്തിയിട്ടും പ്രതിരോധിക്കാൻ വനം വകുപ്പ് നടപടി സ്വീകരിക്കുന്നില്ലെന്നാണ് ജനങ്ങളുടെ ആക്ഷേപം. കഴിഞ്ഞ ദിവസം മൂടക്കൊല്ലിയിലെ ചെരിക്കപറന്പിൽ രഞ്ജിത്ത്, കരികുളത്ത് അജീഷ്, കാട്ടികൊല്ലി വാസു എന്നിവരുടെ തെങ്ങ്, കാപ്പി, വാഴ എന്നീ വിളകളാണ് തആന നശിപ്പിച്ചത്. രണ്ട് ആനകളാണ് മേഖലയിൽ സ്ഥിരമായി എത്തുന്നത്. വനാതിർത്തിയിലെ പ്രതിരോധ വേലിയും കിടങ്ങുമില്ലാത്ത ഭാഗത്തുകൂടെയാണ് ജനവാസമേഖലയിലേക്ക് ആന എത്തുന്നത്. ആനയിറങ്ങുന്നത് പ്രതിരോധിക്കാൻ നടപടിയെടുക്കണമെന്ന് നിരവധി തവണ ആവശ്യപ്പെട്ടങ്കിലും യാതൊരു മടപടിയും സ്വീകരിച്ചില്ല. സന്ധ്യമയങ്ങുന്നതോടെ ആനയുടെ താവളമായി മാറുകയാണ് ഇവിടുത്തെ ജനവാസമേഖലകൾ. ശല്യക്കാരായ ആനകളെ മയക്കുവെടിവച്ച് പിടികൂടുകയോ വന്യമൃഗങ്ങൾ കാടിറങ്ങാതിരിക്കാൻ ശക്തമായ നടപടിയോ സ്വീകരിച്ചില്ലെങ്കിൽ മേഖലയിൽ വനം വകുപ്പിനെതിരെ ശക്തമായ പ്രതിരോധം ഏർപ്പെടുത്തുമെന്ന് പ്രദേശവാസികൾ മുന്നറിയിപ്പ് നൽകി.

മുണ്ടക്കൽ ഉന്നതിയിൽ ഉൗരുത്സവം നടത്തി

വെള്ളമുണ്ട: പട്ടികവർഗഗ്ഗ വികസന വകുപ്പിന്‍റെ സുവർണ ജൂബിലി ആഘോഷത്തിന്‍റെ ഭാഗമായി മുണ്ടക്കൽ ഉന്നതിയിൽ ഉൗരുത്സവം സംഘടിപ്പിച്ചു. ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ജുനൈദ് കൈപ്പാണി ഉദ്ഘാടനം ചെയ്തു. ഗോത്ര തനിമയും സംസ്കാരവും പ്രകടമാകുന്നതാണ് ഉൗരുത്സവങ്ങളെന്ന് അദ്ദേഹം പറഞ്ഞു. ഉൗരുമൂപ്പൻ എൻ. ശ്രീധരൻ അധ്യക്ഷത വഹിച്ചു. വാർഡ് അംഗം അബ്ദുള്ള കണിയാങ്കണ്ടി, ടിഇഒ ബാബു എം. പ്രസാദ്, എസ്ഐ എ. ഷമീർ, പട്ടികവർഗ പ്രാമോട്ടർമാരായ സുബിൻ രാജ്, വി. സന്ധ്യ, എം. നാരായണൻ എന്നിവർ പ്രസംഗിച്ചു. തരിയോട്: ഉൗരുത്സവത്തിന്‍റെ തരിയോട് പഞ്ചായത്തുതല ഉദ്ഘാടനം മടത്തുവയൽ ഉന്നതിയിൽ പ്രസിഡന്‍റ് ഷമീം പാറക്കണ്ടി നിർവഹിച്ചു. പഞ്ചായത്ത് അംഗം ചന്ദ്രൻ മടത്തുവയൽ അധ്യക്ഷത വഹിച്ചു. ടിഇഒ സി. വിനീഷ, സോഷ്യൽ വർക്കർ വിജയലക്ഷ്മി, സാമൂഹിക പഠനമുറി ഫെസിലിറ്റേറ്റർ യു.എ. ധന്യ, ഉൗരുമൂപ്പൻ രാമൻ മടത്തുവയൽ, പട്ടികവർഗ പ്രമോട്ടർ ഒ.കെ. ധനിഷ, പുഷ്പ മടത്തുവയൽ എന്നിവർ പ്രസംഗിച്ചു. ക്ലാസ്, ചർച്ച, കലാപരിപാടികൾ എന്നിവ നടന്നു. പട്ടികവർഗ പ്രമോട്ടർ എം.വി. വിശ്വന്ത് സ്വാഗതവും ഉണ്ണി മടത്തുവയൽ നന്ദിയും പറഞ്ഞു.

കെ. പോളിന്‍റെ ഛായാചിത്രം അനാച്ഛാദനം ചെയ്തു

കോട്ടത്തറ: വൈത്തിരി ബ്ലോക്ക് കോണ്‍ഗ്രസ് വൈസ് പ്രസിഡന്‍റും യുഡിഎഫ് കണ്‍വീനറും പഞ്ചായത്ത് അംഗവുമായിരുന്നു കെ. പോളിന്‍റെ ഛായാചിത്രം മണ്ഡലം കമ്മിറ്റി ഓഫീസിൽ ഡിസിസി പ്രസിഡന്‍റ് എൻ.ഡി. അപ്പച്ചൻ അനാച്ഛാദനം ചെയ്തു. അനുസ്മരണ യോഗം അദ്ദേഹം ഉദ്ഘാടനം ചെയ്തു. മണ്ഡലം പ്രസിഡന്‍റ് സി.സി. തങ്കച്ചൻ അധ്യക്ഷത വഹിച്ചു. സാബു പോൾ, പോൾസണ്‍ കൂവക്കൽ, മാണി ഫ്രാൻസിസ്, സുരേഷ്ബാബു വാളൽ, പി.പി. റെനീഷ്, ഒ.ജെ. മാത്യു, ജോസ് മേട്ടയിൽ, വി.ഡി. രാജു, സി. കെ. ഇബ്രായി, ജോസ് പീയൂസ്, എം.വി. ടോമി, കെ. വേണുഗോപാൽ, വി.എം. ഷാജു, വി.ഡി. സാബു എന്നിവർ പ്രസംഗിച്ചു.

പഞ്ചായത്ത് ലൈസൻസ് പുതുക്കുന്നില്ല; തലപ്പുഴയിൽ വ്യാപാരികൾ സമരത്തിലേക്ക്

മാനന്തവാടി: തലപ്പുഴയിൽ 80 ഓളം വ്യാപാരസ്ഥാപനങ്ങൾക്ക് പഞ്ചായത്ത് ലൈസൻസ് പുതുക്കിനൽകുന്നില്ലെന്നു പരാതി. വർഷങ്ങളായി തലപ്പുഴയിൽ വ്യാപാരം ചെയ്യുന്നവരാണ് ലൈസൻസ് നിഷേധം നേരിടുന്നത്. കെട്ടിടത്തിനുമുകളിൽ മഴമറയും ഷീറ്റും വലിച്ചുകെട്ടിയെന്ന കാരണം പറഞ്ഞാണ് ലൈസൻസ് പുതുക്കാത്തതെന്നു വ്യാപാരികൾ പറയുന്നു. മഴമറയും ഷീറ്റും കെട്ടിയത് മാനദണ്ഡങ്ങൾ പാലിക്കാതെയാണെന്നാണ് പഞ്ചായത്തിന്‍റെ വാദം.ലൈസൻസ് പുതുക്കാത്തത് വ്യാപാരികൾക്ക് പ്രതിസന്ധിയായി. ബാങ്കുകളിൽനിന്നടക്കം വായ്പയെടുത്താണ് പലരും കച്ചവടം മുന്നോട്ടുകൊണ്ടുപോകുന്നത്. തദ്ദേശ സ്വയംഭരണ മന്ത്രി നടത്തിയ അദാലത്തിൽ വ്യാപാര സംഘടന നൽകിയ പരാതിയുടെ അടിസ്ഥാനത്തിൽ ഒരു മാസത്തിനകം ലൈസൻസ് പ്രശ്നത്തിനു പരിഹാരം കാണണമെന്ന് നിർദേശം നൽകിയിരുന്നു. എന്നിട്ടും പഞ്ചായത്തിന്‍റെ ഭാഗത്തുനിന്നു പരിഹാരനടപടികൾ ഉണ്ടാകുന്നില്ലെന്ന് വ്യാപാരികൾ കുറ്റപ്പെടുത്തി. മുൻവർഷങ്ങളിൽ കെട്ടിടത്തോടുചേർന്ന് ഷീറ്റ് വലിച്ചുകെട്ടിയെങ്കിലും ലൈസൻസ് പുതുക്കിയിരുന്നതായി അവർ ചൂണ്ടിക്കാട്ടി. ലൈസൻസുകൾ പുതുക്കാൻ നടപടി സ്വീകരിച്ചില്ലെങ്കിൽ ശക്തമായ സമരം സംഘടിപ്പിക്കാനാണ് വ്യാപാരികളുടെ തീരുമാനം.

തൊണ്ടാർ, കടമാൻതോട് പദ്ധതികൾ: ആശങ്ക അകറ്റണമെന്ന് സ്വതന്ത്ര കർഷക സംഘം

കൽപ്പറ്റ: തൊണ്ടാർ, കടമാൻതോട് ജലസേചന പദ്ധതികൾ നടപ്പാക്കുന്നതിൽ ജനങ്ങൾക്കുള്ള ആശങ്ക പരിഹരിക്കണമെന്ന് സ്വതന്ത്ര കർഷക സംഘം ജില്ലാ കമ്മിറ്റി ആവശ്യപ്പെട്ടു. നിരവധി കുടുംബങ്ങളെ കുടിയൊഴിയാൻ നിർബന്ധിതമാക്കുന്നതാണ് പദ്ധതികളെന്ന് യോഗം ചൂണ്ടിക്കാട്ടി. ജനഹിതം മാനിക്കാതെ പദ്ധതികളുമായി സർക്കാർ മുന്നാട്ടുപോകുന്നത് ദൂരവ്യാപകമായ പ്രത്യാഘാതങ്ങൾക്ക് കാരണമാകുമെന്ന് മുന്നറിയിപ്പ് നൽകി. കർഷകരോടുള്ള അവഗണനയിൽ പ്രതിഷേധിച്ച് ഓഗസ്റ്റ് 11ന് കൃഷിഭവനുകൾക്ക് മുന്പിൽ സമരം സംഘടിപ്പിക്കാൻ തീരുമാനിച്ചു. സംസ്ഥാന സെക്രട്ടറി പി.കെ. അബ്ദുൾ അസീസ് ഉദ്ഘാടനം ചെയ്തു. ജില്ലാ വൈസ് പ്രസിഡന്‍റ് ലത്തീഫ് അന്പലവയൽ അധ്യക്ഷത വഹിച്ചു. സംസ്ഥാന കൗണ്‍സിലർ മായൻ മുതിര, സി. മുഹമ്മദ്, അബൂബക്കർ തന്നാണി, ഷംസുദ്ദീൻ ബിദർക്കാട്, സലിം കേളോത്ത്, പി.കെ. മൊയ്തീൻകുട്ടി, എം.എം. ഹുസൈൻ, കുഞ്ഞിമുഹമ്മദ് പറന്പൻ, ആർ.പി. അസ്ലം തങ്ങൾ എന്നിവർ പ്രസംഗിച്ചു. കെ.ടി. കുഞ്ഞബ്ദുള്ള സ്വാഗതവും അലവി വടക്കേതിൽ നന്ദിയും പറഞ്ഞു.

കാറ്റിലും മഴയിലും വയനാട്ടിൽ വ്യാപകനാശം; നിരവധി ഇടങ്ങളിൽ മരം കടപുഴകി

കഠിനാധ്വാനം ചെയ്ത് അഗ്നി-രക്ഷാസേന, രണ്ട് ദുരിതാശ്വാസ ക്യാന്പ് തുറന്നു കൽപ്പറ്റ/സുൽത്താൻ ബത്തേരി: ശനിയാഴ്ച രാത്രി കാറ്റിലും മഴയിലും വയനാട്ടിൽ വ്യാപക നാശം. നിരവധി സ്ഥലങ്ങളിൽ മരം കടപുഴകി. ചിലേടങ്ങളിൽ മരം വീണ് ഇലക്ട്രിക് പോസ്റ്റ് തകർന്നു. വീടുകൾക്ക് നാശനഷ്ടമുണ്ടായി. ഇന്നലെ രാത്രി വടക്കേ വയനാട്ടിലെ തവിഞ്ഞാൽ, തൊണ്ടർനാട്, പടിഞ്ഞാത്തറ പഞ്ചായത്തുകളിലും മാനന്തവാടി മുനിസിപ്പാലിറ്റിയിലുമാണ് കനത്ത മഴ പെയ്തത്. വൃഷ്ടിപ്രദേശത്ത് മഴ ശക്തമായതിനാൽ ബാണാസുരസാഗർ അണയുടെ രണ്ട് സ്പിൽവേ ഷട്ടർ ഇന്നലെ രാവിലെ 10 ഓടെ 85 സെന്‍റി മീറ്ററായി ഉയർത്തി. സെക്കൻഡിൽ 100 ക്യുമെക്സ്(ഒരു ലക്ഷം ലിറ്റർ) വെള്ളമാണ് പുഴയിലേക്ക് ഒഴുക്കുന്നത്. രാവിലെ എട്ടിന് ഷട്ടറുകൾ 75 സെന്‍റി മീറ്ററായി ഉയർത്തിയിരുന്നു. ജില്ലയിൽ പുഴകളും തോടുകളും നിറഞ്ഞൊഴുകുകയാണ്. ഇന്നലെ തലപ്പുഴ കരകവിഞ്ഞ ഭാഗങ്ങളിൽനിന്നു വെള്ളം ഇറങ്ങിത്തുടങ്ങി. മക്കിമലയ്ക്കടുത്ത് പുഴയിൽ കലക്കവെള്ളം കുത്തിയൊഴുകിയത് വനത്തിൽ മണ്ണിടിച്ചിൽ ഉണ്ടായതിനെത്തുടർന്നാണെന്ന സംശയത്തിനു സ്ഥിരീകരണമായില്ല. മാനന്തവാടി താലൂക്കിൽ രണ്ട് ദുരിതാശ്വാസ ക്യാന്പ് തുറന്നു. തിരുനെല്ലി എസ്എയുപി സ്കൂളിലും പിലാക്കാവ് സെന്‍റ് ജോസഫ്സ് എൽപി സ്കൂളിലുമാണ് ക്യാന്പ് ആരംഭിച്ചത്. രണ്ട് ക്യാന്പുകളിലുമായി 30 കുടുംബങ്ങളിലെ 25 പുരുഷൻമാരും 43 സ്ത്രീകളും 28 കുട്ടികളുമുണ്ട്. ചെതലയം, പൊൻകുഴി, പാടിച്ചിറ,കൊളഗപ്പാറ, നൂൽപ്പുഴ, അരിവയൽ, മന്ദംകൊല്ലി, കാരംകൊല്ലി, കുന്പളേരി, മുണ്ടേരി, സുഗന്ധഗിരി, മേപ്പാടി, വൈത്തിരി, ചുണ്ടേൽ, കമ്മന, വളളിയൂർക്കാവ്-കൂവണക്കുന്ന് റോഡ്, പേര്യ 36, ബത്തേരി-പനമരം റോഡിലെ മൂന്നാനക്കുഴി തുടങ്ങിയ സ്ഥലങ്ങളിലാണ് മരം കടപുഴകിയത്. മരങ്ങൾ റോഡിലേക്ക് മറിഞ്ഞതിനെത്തുടർന്നുണ്ടായ ഗതാഗത തടസം അഗ്നി-രക്ഷാസേന കഠിനാധ്വാനം ചെയ്താണ് നീക്കിയത്. പേര്യയിൽ മരം കടപുഴകിയത് നെടുംപൊയിൽ-മാനന്തവാടി റോഡിൽ ഗതാഗത തടസത്തിനു കാരണമായി. പൊഴുതന കോളിച്ചാൽ വയൽക്കുന്ന് ഉന്നതിയിലെ ബാബുവിന്‍റെ വീടിനു മുകളിൽ മരം വീണു. മണിക്കൂറുകൾ നീണ്ട പരിശ്രമത്തിലൂടെ വീടിനു കൂടുതൽ നാശം ഉണ്ടാകാതെ മരം മുറിച്ചുനീക്കി. വള്ളിയൂർക്കാവ്-കാവടിക്കുന്ന് റോഡിൽ മരം വീണ് ഇലക്ട്രിക് പോസ്റ്റ് തകർന്നു. കാട്ടിക്കുളം അണമലയിൽ മരം വീണ് വീടിന്‍റെ മേൽക്കൂര തകർന്നു. പനക്കുന്നേൽ നാരായണന്‍റെ വീടിനു മുകളിലാണ് മരം പതിച്ചത്. വീട്ടിലുണ്ടായിരുന്ന നാരായണനും ഭാര്യയും പരിക്കില്ലാതെ രക്ഷപ്പെട്ടു. വീടിന്‍റെ അടുക്കള ഭാഗം പൂർണമായും നശിച്ചു. കമ്മനയിൽ മരം വീണ് വീടിനു നാശമുണ്ടായി. ബത്തേരി മൂലങ്കാവിൽ വിളക്കുന്നിൽ സണ്ണിയുടെ വീടിനു മുകളിലേക്ക് കമുക് മറിഞ്ഞു. ശക്തമായ മഴയിൽ സുൽത്താൻ ബത്തേരി പോലീസ് സ്റ്റേഷന്‍റെ ചുറ്റുമതിൽ ഭാഗികമായി തകർന്നു. സ്റ്റേഷനുപുറകിലെ ചുറ്റുമതിലാണ് ഇന്ന് പുലർച്ചെ തകർന്നത്. മുന്പ് തകർന്നതിനോട് ചേർന്നാണ് മഴയിൽ വീണ്ടും മതിൽ തകർന്നത്. സ്റ്റേഷന്‍റെ പുറകിലെ തകരഷീറ്റ് മേഞ്ഞ ചാർത്തിന്‍റെ ഒരുഇരുന്പുതൂണും ഇളകിമാറി. ചുറ്റുമതിൽ ഇടിഞ്ഞത് സ്റ്റേഷൻ കെട്ടിടത്തിനും ഭീഷണിയായിട്ടുണ്ട്. വൈദ്യുതി വിതരണം പുനസ്ഥാപിക്കാൻ യുദ്ധകാലാടിസ്ഥാനത്തിലുള്ള പ്രവർത്തനങ്ങളാണ് നടത്തുന്നത്. ബത്തേരി ഈസ്റ്റ് സെക്ഷന് കീഴിൽ 11 ഹൈടെൻഷൻ പോസ്റ്റുകളും 10 ലോ ടെൻഷൻ പോസ്റ്റുകളുമാണ് കാറ്റിൽ മരം വീണും മറ്റും നിലംപതിച്ചത്. 165 സ്ക്വയർ കിലോമീറ്റർ വരുന്ന സെക്ഷന് കീഴിൽ മിക്കയിടത്തും വൈദ്യുതി ലൈനിലേക്ക് മരത്തിന്‍റെ കന്പുകളും മറ്റും ഓടിഞ്ഞ് വീണ് വൈദ്യുതി വിതരണം തടസപ്പെട്ടു. യുദ്ധകാലാടിസ്ഥാനത്തിലാണ് വൈദ്യുതി വിതരണ പുനസ്ഥാപിക്കാനുള്ള നടപടി സ്വീകരിച്ചുവരുന്നതെന്ന് കഐസ്ഇബി അസിസ്റ്റന്‍റ് എൻജിനിയർ പറഞ്ഞു. തുടർച്ചയായി പെയ്ത മഴയിൽ പുഴംകുനി ഉന്നതിക്ക് സമീപം പുഴ കരകവിഞ്ഞതോടെ ഉന്നതിയിലുള്ളവർ വെള്ളപൊക്ക ഭീഷണിയിലാണ്. മുത്തങ്ങ ആലത്തൂർ റോഡിൽ വെള്ളം കയറിയതിനെ തുടർന്ന് ഇതുവഴിയുള്ള ഗതാഗതവും ഇന്നലെ രാവിലെ തടസപ്പെട്ടിരുന്നു. മഴയ്ക്ക് നേരിയ ശമനം ഉണ്ടായതോടെ വെള്ളം ഇറങ്ങിത്തുടങ്ങി. ബത്തേരി മേഖലയിൽ കണ്ണങ്കോട്, കല്ലൂർ, കോളിപാളി പാടശേഖരം, കാക്കത്തോട്, മൻമഥമൂല തുടങ്ങിയ സ്ഥലങ്ങൾ വെള്ളപ്പൊക്ക ഭീഷണിയിലാണ്. കല്ലുമുക്ക് മംഗലത്ത് കുര്യാക്കോസിന്‍റെയും പാപ്ലശേരി കവളമറ്റത്ത് പുതുപറന്പിൽ റഷീദിന്‍റെ വീടിന് മുകളിലേക്കുമാണ് തെങ്ങ് വീണ് നാശം സംഭവിച്ചത്. റഷീദിന്‍റെ വീട് ഭാഗികമായി തകർന്നു. ഇന്നലെ രാവിലെ ഒന്പതോടെയാണ് സംഭവം. തെങ്ങ് വീഴുന്നതിന് പത്ത് മിനിറ്റ് മുൻപാണ് റഷീദ് വീട്ടിൽ നിന്നു പോയത്. ആരും വീട്ടിൽ ഉണ്ടായിരുന്നില്ല. അടുക്കള ഭാഗം പൂർണമായും തകർന്നു. കാറ്റിലും മഴയിലും ബത്തേരി മേഖലയിൽ മാത്രം ലക്ഷങ്ങളുടെ നാശനഷ്ടമാണ് സംഭവിച്ചത്. ബത്തേരി താലൂക്ക് പ്രധാന റോഡുകളിൽ മരം കടപുഴകി വീണ് ഗതാഗതം തടസപ്പെട്ടു. കഴിഞ്ഞദിവസം രാത്രി മുത്തങ്ങ പൊൻകുഴി ക്ഷേത്രത്തിനു സമീപം മരം കടപുഴകി വീണ് ദേശീയപാതയിൽ ഒരു മണിക്കൂറോളം ഗതാഗതം തടസപ്പെട്ടു. ബത്തേരിയിൽ നിന്നും അഗ്നിരക്ഷാസേന എത്തിയാണ് ഗതാഗതം പുനഃസ്ഥാപിച്ചത്. ബത്തേരി - പുൽപ്പള്ളി വനപാതയിൽ അഞ്ചാംമൈലിൽ വൈദ്യുതി പോസ്റ്റ് വീണു ഗതാഗതം തടസപ്പെട്ടു അന്പലവയലിലും ബീനാച്ചി - മാനന്തവാടി റോഡിൽ മൂന്നാനക്കുഴി, അരിവയിൽ തുടങ്ങിയ സ്ഥലങ്ങളിലും മരം കടപുഴകി വീഴുകയും ഗതാഗതം തടസപ്പെടുകയും ചെയ്തു. ഇന്നലെ രാവിലെ എട്ടരയ്ക്ക് അവസാനിച്ച 24 മണിക്കൂറിൽ തവിഞ്ഞാൽ പഞ്ചായത്തിലാണ് കൂടുതൽ അളവിൽ മഴ ലഭിച്ചത്-150.33 എംഎം. തൊണ്ടർനാട് പഞ്ചായത്തിൽ 145.06 എംഎം മഴ രേഖപ്പെടുത്തി. പടിഞ്ഞാറത്ത പഞ്ചായത്തിൽ 141.15ഉം മാനന്തവാടി മുനിസിപ്പാലിറ്റിയിൽ 130.4 ഉം എംഎം മഴ പെയ്തു. മറ്റു പഞ്ചായത്തുകളിൽ പെയ്ത മഴയുടെ കണക്ക് മില്ലി മീറ്ററിൽ: തിരുനെല്ലി-91.55. എടവക-81.5, വെള്ളമുണ്ട-71, തരിയോട്-71, പൊഴുതന-98.58, വൈത്തിരി-118.92, മേപ്പാടി-82.2, മൂപ്പൈനാട്-48.83, അന്പലവയൽ-48.6, നെൻമേനി-43.8, മുട്ടിൽ-67.49, കണിയാന്പറ്റ-73.06, വെങ്ങപ്പള്ളി-53.1, കോട്ടത്തറ-59.1, പനമരം-40.18, മുള്ളൻകൊല്ലി-44.2, പുൽപ്പള്ളി-31.26, പൂതാടി-40.72, മീനങ്ങാടി-56.51, നൂൽപ്പുഴ-41. ബത്തേരി മുനിസിപ്പാലിറ്റിയിൽ 40.33 മീല്ലി മീറ്റർ മഴ ലഭിച്ചു. കൽപ്പറ്റ മുനിസിപ്പാലിറ്റിയിൽ 59.15 എംഎം മഴ പെയ്തു.

യുവാവ് പുഴയിൽ മരിച്ച നിലയിൽ

കാട്ടിക്കുളം: തിരുനെല്ലി കോളിദാർ ഉന്നതിയിലെ ചിന്നൻ-ചിന്നു ദന്പതികളുടെ മകൻ സജിയെ (30) പനവല്ലി പുഴയിൽ മരിച്ച നിലയിൽ കണ്ടെത്തി. പുഴയിൽ സർവാണി കൊല്ലി ഉന്നതിഭാഗത്ത് ഇന്നലെ രാവിലെയാണ് മൃതദേഹം പ്രദേശവാസികളുടെ ശ്രദ്ധയിൽപ്പെട്ടത്. പോലീസിന്‍റെ സാന്നിധ്യത്തിൽ മൃതദേഹം പുറത്തെടുത്തപ്പോഴാണ് ആളെ തിരിച്ചറിഞ്ഞത്.

കാർഗിൽ വിജയദിനം ആഘോഷിച്ചു

കൽപ്പറ്റ: കാർഗിൽ വിജയത്തിന്‍റെ 26-ാം വാർഷികം കേരള സ്റ്റേറ്റ് എക്സ് സർവീസസ് ലീഗ് ജില്ലാ കമ്മിറ്റിയുടെ നേതൃത്വത്തിൽ കാക്കവയൽ ജമാൻ സ്മൃതി മണ്ഡപത്തിൽആഘോഷിച്ചു. മീനങ്ങാടി പഞ്ചായത്ത് പ്രസിഡന്‍റ് കെ.ഇ. വിനയൻ ഉദ്ഘാടനം ചെയ്തു. സ്മൃതിമണ്ഡപത്തിൽ അദ്ദേഹം പുഷ്പചക്രം സമർപ്പിച്ചു. എക്സ് സർവീസസ് ലീഗ് ജില്ലാ പ്രസിഡന്‍റ് മത്തായികുഞ്ഞ് പുതുപ്പിള്ളിൽ, സെക്രട്ടറിമാരായ വി. അബ്ദുള്ള, വസന്തകുമാരി, കേണൽ സുരേഷ് ബാബു, ക്യാപ്റ്റൻ വി.കെ. ശശീന്ദ്രൻ, മത്തായി, സുലോചന, എം.പി. തങ്കച്ചൻ, ഉണ്ണിക്കൃഷ്ണൻ, രവീന്ദ്രൻ കോട്ടത്തറ, അന്നമ്മ പൗലോസ്, ബാബു കാക്കവയൽ, പ്രദീപൻ, ഓനച്ചൻ, ടോമി എന്നിവർ പ്രസംഗിച്ചു. സെൻട്രൽ ബ്യൂറോ ഓഫ് കമ്മ്യൂണിക്കേഷൻ ജില്ലാ ഫീൽഡ് ഓഫീസിന്‍റെ നേതൃത്വത്തിൽ പൂക്കോട് ഏകലവ്യ മോഡൽ റസിഡൻഷ്യൽ സ്കൂളിൽ നടന്ന ആഘോഷം പ്രിൻസിപ്പൽ സൂര്യപ്രതാപ് സിംഗ് ഉദ്ഘാടനം ചെയ്തു. ഡെപ്യൂട്ടി എച്ച്എം റെജിമോൾ അധ്യക്ഷത വഹിച്ചു. മാനേജർ ഒ. നൗഷാദ്, ഫീൽഡ് പബ്ലിസിറ്റി ഓഫീസർ എം.വി. പ്രജിത്ത്കുമാർ, അമൽ ആസാദ് എന്നിവർ പ്രസംഗിച്ചു.വിദ്യാർഥികൾക്ക് പ്രശ്നോത്തരി, ദേശഭക്തിഗാനം, പോസ്റ്റർ നിർമാണം എന്നി ഇനങ്ങളിൽ മത്സരം നടത്തി. ബാലുശേരി പൗർണമി തിയേറ്റേഴ്സും സ്കൂൾ വിദ്യാർഥികളും കലാപരിപാടികൾ അവതരിപ്പിച്ചു. കാർഗിൽ യുദ്ധ വിജയം വാർഷികാഘോഷത്തിന്‍റെ ഭാഗമായി ബിജെപി ജില്ലാ കമ്മിറ്റിയുടെ നേതൃത്വത്തിൽ കാക്കവയൽ ജവാൻ സ്മൃതിമണ്ഡപത്തിൽ പുഷ്പാർച്ചന നടത്തി.പ്രസിഡന്‍റ് പ്രശാന്ത് മലവയൽ അനുസ്മരണ പ്രഭാഷണം നടത്തി. കാർഗിൽ യുദ്ധത്തിൽ പങ്കെടുത്ത വിമുക്തഭടൻ ഒ.എം. ബാലനെ ആദരിച്ചു. പുനത്തിൽ രാജൻ, എം.പി. സുകുമാരൻ, ടി.എം. സുബീഷ്, വിമുക്തഭടൻ അശോകൻ പടിഞ്ഞാറത്തറ, സന്ധ്യ, ശിവദാസൻ എന്നിവർ പ്രസംഗിച്ചു.

കനാൽ തകർന്ന് നെൽക്കൃഷി നശിച്ചു

സുൽത്താൻ ബത്തേരി: പൂളവയലിൽ കനാൽ തകർന്ന് വെള്ളം വയലിലേക്ക് കുത്തിയൊലിച്ച് ഏക്കർ കണക്കിന് നെൽക്കൃഷി നശിച്ചു. കഴിഞ്ഞദിവസത്തെ മഴയിൽ കനാലിന്‍റ ഒരു ഭാഗം തകർന്ന് സമീപത്തെ കൈത്തോട് ഗതിമാറി വയലിലൂടെ ഒഴുകിയാണ് കൃഷി നശിച്ചത്. വട്ടിളി അനന്തന്‍റെ പാടത്താണ് വെള്ളം കയറിയത്. 10 ദിവസം മുന്പ് കനാലിന്‍റെ മറ്റൊരു ഭാഗം തകർന്ന് വെള്ളം കുത്തിയൊഴുകി ഇദ്ദേഹത്തിന്‍റെ പാടത്ത് കൃഷി നശിച്ചിരുന്നു. കഴിഞ്ഞ തവണ വെള്ളം കയറി കൃഷി നശിച്ചപ്പോൾ കനാൽ പൊളിച്ചുനീക്കുന്നതിനു ജില്ലാ കളക്ടർക്കടക്കം അപേക്ഷ നൽകിയിരുന്നു. എന്നാൽ കനാലിന്‍റെ ഉടമാവകാശത്തിൽ വകുപ്പുകൾ തമ്മിൽ തർക്കം നിലനിൽക്കുന്നതിനാൽ നടപടിയായില്ല. രണ്ടരപതിറ്റാണ്ട് പഴക്കമുള്ള കനാൽ ജനങ്ങൾക്ക് ഉപദ്രവകരമായതിനാൽ പൊളിച്ചുനീക്കണമെന്ന് നിരവധി തവണ ആവശ്യപ്പെട്ടിട്ടും അധികൃതർ കൂട്ടാക്കുന്നില്ലെന്ന് പൂളവയലിലെ കർഷകർ പറഞ്ഞു.

തകർന്നുവീഴാറായ കെട്ടിടത്തിൽ ഒരു പഞ്ചായത്ത് കാര്യാലയം

പുൽപ്പള്ളി: തകർന്നുവീഴാറായ കെട്ടിടത്തിൽ ഒരു പഞ്ചായത്ത് ഓഫീസ്. മുള്ളൻകൊല്ലി പഞ്ചായത്ത് കാര്യാലയമാണ് ദുർബലാവസ്ഥയിലുള്ള കെട്ടിടത്തിൽ പ്രവർത്തിക്കുന്നത്.കെട്ടിടത്തിന്‍റെ പല ഭാഗങ്ങളും അടർന്നു വിഴുന്ന സ്ഥിതിയിലാണ്. ജീവനക്കാർ ഭീതിയോടെയാണ് ഓഫീസിൽ ജോലി ചെയ്യുന്നത്. വിവിധ ആവശ്യങ്ങൾക്ക് ഓഫീസിൽ എത്തുന്ന പൊതുജനങ്ങളുടെ സ്ഥിതിയും വിഭിന്നമല്ല. പഞ്ചായത്ത് ഓഫീസ് സുരക്ഷിതമായ കെട്ടിടത്തിലേക്ക് ഉടൻ മാറ്റണമെന്ന് ആം ആദ്മി പാർട്ടി മുള്ളൻകൊല്ലി പഞ്ചായത്ത് കമ്മിറ്റി ആവശ്യപ്പെട്ടു. പഞ്ചായത്തിലെ തകർന്ന റോഡുകൾ മഴ മാറിയാലുടൻ സഞ്ചാരയോഗ്യമാക്കണമെന്ന ആവശ്യവും ഉന്നയിച്ചു. വിവിധ ആവശ്യങ്ങൾ ഉന്നയിച്ച് 29ന് രാവിലെ 10ന് പഞ്ചായത്ത് ഓഫീസ് മാർച്ചും ധർണയും നടത്താൻ തീരുമാനിച്ചു. ബത്തേരി മണ്ഡലം പ്രസിഡന്‍റ് ലിയോ കൊല്ലവേലിൽ ഉദ്ഘാടനം ചെയ്തു. മുള്ളൻകൊല്ലി പഞ്ചായത്ത് കമ്മിറ്റി പ്രസിഡന്‍റ് കെ.സി. വർഗീസ് അധ്യക്ഷത വഹിച്ചു. ആന്‍റണി പൂത്തോട്ടയിൽ, ഷാജി വണ്ടന്നൂർ, കെ.ജി. ബെന്നി, ഉലഹന്നാൻ മേമാട്ട്, ഷിനോജ് കാനാട്ട്, ഷിബി വണ്ടന്നൂർ, സിജു പൂത്തോട്ടയിൽ എന്നിവർ പ്രസംഗിച്ചു.

വാഹനപരിശോധനയ്ക്കിടെ കൊക്കയിൽ ചാടിയ യുവാവ് പിടിയിൽ

വൈത്തിരി: താമരശേരി ചുരത്തിലെ ഒന്പതാം വളവിനു സമീപം വ്യൂപോയിന്‍റിൽ പോലീസിന്‍റെ വാഹന പരിശോധനയ്ക്കിടെ കൊക്കയിൽ ചാടിയ യുവാവ് പിടിയിൽ. മലപ്പുറം തിരൂരങ്ങാടി സ്വദേശി ഷെഫീഖിനെയാണ്(30)വൈത്തിരി പോലീസ് ഇന്നലെ രാവിലെ കസ്റ്റഡിയിലെടുത്തത്. കഴിഞ്ഞദിവസം രാവിലെയാണ് ഇയാൾ കൊക്കയിൽ ചാടിയത്. പോലീസും ഫയർ ആൻഡ് റസ്ക്യൂ ഫോഴ്സും ഡ്രോണ്‍ ഉൾപ്പെടെ എത്തിച്ച് തെരച്ചിൽ നടത്തിയെങ്കിലും യുവാവിനെ കണ്ടെത്താൻ കഴിഞ്ഞില്ല. ഷെഫീഖ് സഞ്ചരിച്ച കാറിൽ പരിശോധനയിൽ 20.35 ഗ്രാം എംഡിഎംഎ കണ്ടെത്തിയിരുന്നു. ഇന്നലെ രാവിലെ ലക്കിടി ഓറിയന്‍റൽ കോളജ് പരിസരത്ത് ഇയാളെ കണ്ടതായ വിവരത്തിന്‍റെ അടിസ്ഥാനത്തിൽ പോലീസ് എത്തുകയും കസ്റ്റഡിയിലെടുക്കുകയുമായിരുന്നു. യുവാവിനെ വൈത്തിരി ഗവ.ആശുപത്രിയിൽ പ്രവേശിപ്പിച്ചു. 2025 ഫെബ്രുവരിയിൽ മുത്തങ്ങയിൽ 93 ഗ്രാം എംഡിഎംഎയുമായി ഷെഫീഖ് ബത്തേരി പോലീസിന്‍റെ പിടിയിലായിരുന്നു.

ബാണസുരസാഗർ അണയുടെ ഷട്ടർ 75 സെന്‍റി മീറ്ററായി ഉയർത്തും

കൽപ്പറ്റ: വ്യഷ്ടിപ്രദേശത്ത് മഴ തുടരുന്നതിനാൽ ബാണാസുരസാഗർ അണക്കെട്ടിന്‍റെ സ്പിൽവേ ഷട്ടറുകൾ ഇന്നു രാവിലെ എട്ടിന് 75 സെന്‍റി മീറ്ററായി ഉയർത്തി സെക്കൻഡിൽ 61 ക്യുമെക്സ് വെള്ളം പുഴിയിലേക്ക് ഒഴുക്കുമെന്ന് എക്സിക്യുട്ടീവ് എൻജിനിയർ അറിയിച്ചു. നിലവിൽ രണ്ട്, മൂന്ന് ഷട്ടറുകൾ 60 സെന്‍റി മീറ്റർ ഉയർത്തി സെക്കൻഡിൽ 48.8 ക്യുമെക്സ് വെള്ളം ഒഴുക്കുന്നുണ്ട്. കരമാൻ തോട്, പനമരം പുഴയോരങ്ങളിലും താഴ്ന്ന പ്രദേശങ്ങളിലും താമസിക്കുന്നവർ ജാഗ്രത പാലിക്കണം.

അതിഥി തൊഴിലാളികളുടെ വാസസ്ഥലം പരിശോധിച്ച് സുരക്ഷ ഉറപ്പാക്കണം: ജില്ലാ വികസന സമിതി

കൽപ്പറ്റ: ജില്ലയിലെ അതിഥി തൊഴിലാളികളുടെ വാസസ്ഥലം പരിശോധിച്ച് സുരക്ഷ ഉറപ്പുവരുത്തണമെന്ന് കളക്ടറേറ്റിലെ ആസൂത്രണഭവൻ എ.പി.ജെ ഹാളിൽ ചേർന്ന ജില്ലാ വികസന സമിതി യോഗത്തിൽ പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു നിർദേശം നൽകി. പൊഴുതന പഞ്ചായത്തിലെ സുഗന്ധഗിരിയിൽ താമസിക്കുന്നവർക്ക് വിവിധ ആവശ്യങ്ങൾക്ക് വനം വകുപ്പിന്‍റെ എൻഒസി ആവശ്യമാകുന്നതിനാൽ ഐടിഡിപിയും വനം വകുപ്പും സംയുക്തമായി കാര്യങ്ങൾ കൈകാര്യം ചെയ്യണമെന്നും ഉന്നതിക്കാർക്ക് പട്ടയം അനുവദിക്കുന്നതിനു നടപടികളിൽ തീരുമാനം എടുക്കണമെന്നും മന്ത്രി ആവശ്യപ്പെട്ടു. നാഷണൽ ഹൈവേയുടെ ഓരങ്ങളിലെ കാട് വെട്ടിമാറ്റാനും പുൽപ്പള്ളി-ചേകാടി റോഡിൽ വനത്തിലൂടെയുള്ള ഭാഗങ്ങളിൽ ഒടിഞ്ഞുവീഴാറായ മരങ്ങൾ മുറിച്ചുമാറ്റാനും ജില്ലാ കളക്ടർ ഡി.ആർ മേഘശ്രീ നിർദേശം നൽകി. അപകടാവസ്ഥയിലുള്ള മരങ്ങളും ചില്ലകളും മുറിച്ചു മാറ്റുന്നതിന് 26 തദ്ദേശസ്ഥാപനങ്ങളിൽനിന്ന് ലഭിച്ച 585 അപേക്ഷകളുടെ അടിസ്ഥാനത്തിൽ 407 മരങ്ങൾ മുറിച്ചുമാറ്റി. നാഷണൽ ഹൈവേയിലും വനം വകുപ്പിന് കീഴിലുള്ള സ്ഥലങ്ങളിലും അപകടാവസ്ഥയിലുള്ള മരങ്ങൾ ഒരാഴ്ചയ്ക്കകം മുറിച്ചുമാറ്റണം. ഓരോ തദ്ദേശ സ്ഥാപനവും അതിനു കീഴിലുള്ള ജല സംഭരണികൾ പരിശോധിക്കണം. അപകടങ്ങൾ ഒഴിവാക്കുന്നതിന് ശക്തമായ നിരീക്ഷണം നടത്തണം. വിദ്യാർഥികളുടെ കൊഴിഞ്ഞുപോക്ക് തടയാൻ ജില്ലയിലെ എല്ലാ പഞ്ചായത്തുകളും ഡ്രോപ്പ് ഒൗട്ട് ഫ്രീ പദ്ധതി നടപ്പാക്കണമെന്നും കളക്ടർ നിർദേശിച്ചു. ബാണാസുര ഡാമിനുവേണ്ടി ഏറ്റെടുത്ത കുതിരപാണ്ടി റോഡിന് പകരം അനുവദിച്ച പാത സഞ്ചാരയോഗ്യമാക്കുന്നതിന് കഐസ്ഇബി നടപടി സ്വീകരിക്കണമെന്ന് യോഗം ആവശ്യപ്പെട്ടു. അനധികൃത ടെന്‍റുകൾ, സുരക്ഷാ സംവിധാനങ്ങളില്ലാത്ത റിസോർട്ടുകൾ, അനുമതിയില്ലാതെ പ്രവർത്തിക്കുന്ന വിനോദസഞ്ചാരകേന്ദ്രങ്ങൾ എന്നിവ മാർഗനിർദേശങ്ങൾ പാലിക്കുന്നപക്ഷം നിയമ വിധേയമാക്കാൻ മാർഗരേഖ തയാറാക്കിയതായി എഡിഎം അറിയിച്ചു. 15 കോടി രൂപ ചെലവഴിച്ച് മാസങ്ങൾ മുന്പ് നവീകരിച്ച മുള്ളൻകൊല്ലി-മരക്കടവ് റോഡ് തകർന്ന അവസ്ഥയിലാണെന്നു പ്രിയങ്ക ഗാന്ധി എംപിയുടെ പ്രതിനിധി കെ.എൽ. പൗലോസ് ചൂണ്ടിക്കാട്ടി. റോഡിന്‍റെ ശോച്യാവസ്ഥയ്ക്കു സത്വര പരിഹാരം കാണണമെന്ന് അദ്ദേഹം ആവശ്യപ്പട്ടു. ബത്തേരിയിലെ അമ്മയും കുഞ്ഞും ആശുപത്രി എത്രയും പെട്ടന്നു പ്രവർത്തനക്ഷമമാക്കണമെന്ന് ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ ആവശ്യപ്പെട്ടു. ജില്ലാ പ്ലാനിംഗ് ഓഫീസർ എം. പ്രസാദൻ, ബ്ലോക്ക് പഞ്ചായത്ത് പ്രസിഡന്‍റ് ചന്ദ്രിക കൃഷ്ണൻ, നഗരസഭാ ചെയർമാൻ ടി.ജെ. ഐസക്, സബ് കളക്ടർ മിസാൽ സാഗർ ഭരത്, അസിസ്റ്റന്‍റ് കളക്ടർ പി.പി. അർച്ചന തുടങ്ങിയവരും പങ്കെടുത്തു.

തദ്ദേശ തെരഞ്ഞെടുപ്പ് അട്ടിമറിക്കാൻ നീക്കം: കോൺഗ്രസ്

കൽപ്പറ്റ: തദ്ദേശസ്ഥാപനങ്ങളിലേക്ക് നടക്കാനിരിക്കുന്ന തെരഞ്ഞെടുപ്പ് അട്ടിമറിക്കാൻ ഭരണ, ഉദ്യോഗസ്ഥ തലങ്ങളിൽ നീക്കം നടക്കുന്നതായി ജില്ലാ കോണ്‍ഗ്രസ് കമ്മിറ്റി ആരോപിച്ചു. കരട് വോട്ടർ പട്ടിക പുറത്തിറങ്ങിയപ്പോൾ വ്യാപക ക്രമക്കേടുകളാണ് മറനീക്കിയത്. 1,300 വോട്ട് അധികരിക്കാതെ വാർഡ് പുനർനിർണയം നടത്തണമെന്ന തെരഞ്ഞെടുപ്പ് കമ്മീഷന്‍റെ മാനദണ്ഡം മറികടന്ന് 2,000 വോട്ടുകൾ വരെ ചില വാർഡുകളിൽ വരുന്ന രീതിയിലാണ് പുനർനിർണയം നടന്നത്. പല വാർഡുകളിലും അതിർത്തിയിൽ താമസിക്കുന്നവരെ കൂട്ടത്തോടെ മറ്റു വാർഡുകളിലേക്ക് മാറ്റി. കള്ളക്കളികളിലൂടെ ത്രിതല പഞ്ചായത്തുകളും മുനിസിപ്പാലിറ്റികളും പിടിക്കാനുള്ള ഗൂഢതന്ത്രം ഉദ്യോഗസ്ഥരുടെ സഹായത്തോടെ നടപ്പാക്കാനാണ് ഇടതുപക്ഷം ശ്രമിക്കുന്നത്. അപാകതകൾ പരിഹരിച്ച് വാർഡ് വിഭജനം നടത്തണമെന്നും വോട്ടർ പട്ടിക തയാറാക്കണമെന്നും യോഗം ആവശ്യപ്പെട്ടു.പ്രസിഡന്‍റ് എൻ.ഡി. അപ്പച്ചൻ അധ്യക്ഷത വഹിച്ചു.

കരടി ആക്രമണത്തിൽ പരിക്കേറ്റയാൾ ദുരിതത്തിൽ

സുൽത്താൻ ബത്തേരി: കരടികളുടെ ആക്രമണത്തിൽ പരിക്കേറ്റ പട്ടികവർഗക്കാരൻ ദുരിതത്തിൽ. ചെതലയം കൊമ്മഞ്ചേരി കാട്ടുനായ്ക്ക ഉന്നതിയിലെ ഗോപിയാണ്(45)ദുരിതം അനുഭവിക്കുന്നത്. ചികിത്സയ്ക്കു പണമില്ലാതെ വിഷമിക്കുകയാണ് ഇദ്ദേഹം. പരിക്കു മാറാത്തതിനാൽ ജോലിക്കുപോകാൻ കഴിയുന്നില്ല. കഴിഞ്ഞ ഏപ്രിലിൽ വിറക് ശേഖരിക്കാൻ വനത്തിൽ പോയപ്പോഴാണ് ഗോപിയെ രണ്ട് കരടികൾ ആക്രമിച്ചത്. ഗോപിയുടെ ഇടതുകൈത്തണ്ടയ്ക്ക് ഗുരുതര പരുക്കറ്റു. കഴുത്തിലും ചുമലിലും കരടികളുടെ നഖമിറങ്ങി മുറിവേറ്റു. ആഴ്ചകളോളം ആശുപത്രിയിൽ കഴിഞ്ഞശേഷമാണ് വീട്ടിൽ തിരിച്ചെത്തിയത്. ചുമലിലെയും കഴുത്തിലെയും മുറിവ് ഉണങ്ങിയെങ്കിലും കൈത്തണ്ടയുടെ പരിക്ക് പൂർണമായും മാറിയില്ല. വന്യമൃഗ ആക്രമണത്തിൽ ഗുരുതര പരിക്കേറ്റ് ജോലിക്ക് പോകാൻ കഴിയാത്ത സാഹചര്യത്തിത്തിലും ഗോപിക്ക് നഷ്ടപരിഹാരം നൽകാൻ വനം വകുപ്പ് തയാറാകുന്നില്ല. ഇതിൽ ഉന്നതിയിലും പുറത്തും ഉള്ളവരിൽ പ്രതിഷേധം ശക്തമാണ്. നഷ്ടപരിഹാരം അനുവദിക്കുന്നതു വൈകിയാൽ ശക്തമായ സമരം സംഘടിപ്പിക്കാനാണ് പ്രദേശവാസികളുടെ തീരുമാനം.

പുഞ്ചിരിമട്ടം ദുരന്തം: സർവമത പ്രാർഥനയും അനുസ്മരണവും 30ന്

കൽപ്പറ്റ: പുഞ്ചിരിമട്ടം ഉരുൾ ദുരന്തത്തിന്‍റെ ഒന്നാം വാർഷികദിനമായ 30ന് മേപ്പാടി പഞ്ചായത്തിന്‍റെ നേതൃത്വത്തിൽ സർവമത പ്രാർഥന, പുഷ്പാർച്ചന എന്നിവ നടത്തുമെന്ന് പ്രസിഡന്‍റ് കെ. ബാബു, വൈസ് പ്രസിഡന്‍റ് രാധ രാമസ്വാമി, വികസനകാര്യ സ്റ്റാൻഡിംഗ് കമ്മിറ്റി ചെയർമാൻ വി. നാസർ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ രാജു ഹെജമാടി, പത്താം വാർഡ് മെംബർ എൻ.കെ. സുകുമാരൻ എന്നിവർ വാർത്താസമ്മേളനത്തിൽ അറിയിച്ചു. ഉരുൾ ദുരന്തത്തിൽ മരിച്ചതിൽ തിരിച്ചറിയാത്തവരെയും മൃതദേഹ ഭാഗങ്ങളും സംസ്കരിച്ച പുത്തുമല ഹൃദയഭൂമിയിൽ രാവിലെ 10നാണ് സർവമത പ്രാർഥനയും പുഷ്പാർച്ചനയും. ഇവിടെനിന്നു ആളുകൾ മൗനജാഥയായി പുത്തുമല മദ്രസ അങ്കണത്തിലെത്തും. ഇവിടെ ചേരുന്ന അനുസ്മരണ യോഗത്തിൽ മന്ത്രിമാർ അടക്കം ജനപ്രതിനിധികൾ, ഉദ്യോഗസ്ഥർ, രാഷ്ട്രീ, സമൂഹിക, സാംസ്കാരിക രംഗങ്ങളിലെ പ്രമുഖർ പങ്കെടുക്കും.

ആറാം വർഷവും നെൽക്കൃഷി ഇറക്കി നീലഗിരി കോളജ്

താളൂർ: തുടർച്ചയായി ആറാംവർഷവും നെൽക്കൃഷിയിറക്കി നീലഗിരി കോളജ്. കാന്പസിനു സമീപം ആറ് ഏക്കർ പാടത്താണ് വിദ്യാർഥികളും നൈബർഹുഡ് കമ്മ്യൂണിറ്റിയിൽ ഉൾപ്പെട്ട 40 വീട്ടുകാരും ചേർന്ന് ഞാറ് നാട്ടിയത്. 200ൽ അധികം വിദ്യാർഥികൾ പാടത്തിറങ്ങി. തൊണ്ടി ഇനം നെല്ലാണ് ഇക്കുറി കൃഷി ചെയ്യുന്നത്. കൊവിഡ് കാലത്ത് കോളജിൽ തുടങ്ങിയ ഗ്രീൻ പോസിറ്റീവ് കാർഷിക പദ്ധതിയുടെ ഭാഗമായാണ് നെൽക്കൃഷി നടത്തുന്നത്. പാടത്തും പറന്പിലും ഇറങ്ങി ശീലമില്ലാത്ത പുതുതലമുറയിൽ കൃഷിയിൽ ആഭിമുഖ്യം സൃഷ്ടിക്കുന്നതിനു ആവിഷ്കരിച്ചതാണ് പദ്ധതിയെന്ന് കോളജ് മാനേജിംഗ് ഡയറക്ടർ ഡോ.റാഷിദ് ഗസാലി പറഞ്ഞു.

ഉരുൾ അനാഥരാക്കിയ പെണ്‍കുട്ടികൾക്ക് രണ്ട് "അജ്ഞാത’രുടെ കരുതൽ

കൽപ്പറ്റ: 2024 ജൂലൈ 30ലെ പുഞ്ചിരിമട്ടം ഉരുൾ ദുരന്തത്തിൽ ഉള്ളുലഞ്ഞ അനേകം ആളുകളിൽ ഒരാളായിരുന്നു പാലക്കാട് സ്വദേശിയായ സുധാകരൻ(പേര് യഥാർത്ഥമല്ല). ദിവസങ്ങൾ പിന്നിടുന്പോൾ ഈ 45കാരന്‍റെ മനസിലെ നീറ്റൽ കൂടി. ദുരന്തത്തിൽ ഏഴ് കുട്ടികൾക്ക് അച്ഛനും അമ്മയും നഷ്ടമായി എന്നറിഞ്ഞപ്പോളായിരുന്നു അത്. എന്തെങ്കിലും ചെയ്യണമെന്ന് അയാൾ തീർച്ചപ്പെടുത്തി. കാറിന്‍റെ പ്രതിമാസ അടവ് ആയിടെ അവസാനിച്ചതിനാൽ തുക വയനാട്ടിലെ കുട്ടികൾക്ക് നൽകാമെന്ന് തീരുമാനിച്ചു. സ്വകാര്യ സ്കൂളിൽ അധ്യാപികയായ ഭാര്യയോടും വിദ്യാർഥിയായ മകനോടും ഇക്കാര്യം പറഞ്ഞപ്പോൾ അവർക്കും സമ്മതം. ഫോണ്‍ നന്പർ സംഘടിപ്പിച്ച് സുധാകരൻ ജില്ലാ ശിശു സംരക്ഷണ ഓഫീസറെ വിളിച്ചു. ദുരന്തത്തിൽ മാതാപിതാക്കൾ നഷ്ടപ്പെട്ടതിൽ മൂന്നു പെണ്‍കുട്ടികൾക്ക് എല്ലാ മാസവും 2,000 രൂപ വീതം നൽകാനുള്ള സന്നദ്ധത അറിയിച്ചു. തന്‍റെ പേരുവിവരം കുട്ടികളടക്കം അറിയരുതെന്നു നിർദേശിച്ചു. സ്വകാര്യ സ്ഥാപനത്തിൽ ജീവനക്കാരനായ സുധാകരൻ ഒരിക്കൽപോലും വയനാട് കണ്ടിട്ടില്ല. അയാൾക്ക് ഇവിടെ ബന്ധുക്കളോ സുഹൃത്തുക്കളോ ഇല്ല. സാധാരണക്കാരനായ അദ്ദേഹത്തിനു വലിയ സന്പാദ്യവുമില്ല. എങ്കിലും മൂന്നു പെണ്‍കുട്ടികൾക്കു സാന്പത്തിക പിന്തുണ നൽകാനുള്ള തീരുമാനത്തിൽനിന്നു പിന്നാക്കം പോയില്ല. "നാലാം ക്ലാസിൽ പഠിക്കുന്പോൾ അച്ഛൻ മരിച്ച എനിക്ക് പിതാവിന്‍റെ സ്നേഹവും കരുതലും അനുഭവിക്കാൻ ഭാഗ്യമുണ്ടായില്ല. എന്നെ സംബന്ധിച്ച് ഒരു കുട്ടിയും വിഷമിക്കാൻ പാടില്ല’ എന്നാണ് സുധാകരൻ ജില്ലാ ശിശു സംരക്ഷണ ഓഫീസറോട് പറഞ്ഞത്. 2024 നവംബർ മുതൽ ഓരോ മാസവും സുധാകരൻ മൂന്ന് പെണ്‍കുട്ടികൾക്കായി 6,000 രൂപ സർക്കാർ മുഖേന ലഭ്യമാക്കുന്നുണ്ട്. ഇപ്പോൾ 14, എട്ട്, അഞ്ച് വയസുള്ള പെണ്‍കുട്ടികൾക്കാണ് സഹായം. എല്ലാ മാസവും ജില്ലാ ശിശു സംരക്ഷണ ഓഫീസിൽ വിളിച്ച് സുധാകരൻ കുട്ടികളുടെ കാര്യം തിരക്കുന്നുണ്ട്. സാധ്യമാകുന്നിടത്തോളം സഹായം തുടരണമെന്നാണ് സുധാകരന്‍റെ ആഗ്രഹം. 2018ൽ മലപ്പുറം കവളപ്പാറയിൽ പ്രകൃതിദുരന്തമുണ്ടായപ്പോൾ അവശ്യസാധനങ്ങളുമായി സുധാകരൻ എത്തിയിരുന്നു. മറ്റൊരു സ്നേഹപ്രവാഹം വയനാട്ടിലേക്ക് ഒഴുകുന്നത് ബംഗൂരുവിൽനിന്നാണ്. പ്രശസ്ത സ്ഥാപനത്തിൽനിന്നു ഡീനായി വിരമിച്ച തൃശൂർ സ്വദേശിനിയാണ് കുട്ടികളെ ചേർത്തുപിടിക്കുന്നത്. അച്ഛനും അമ്മയും നഷ്ടപ്പെട്ട രണ്ട് പെണ്‍കുട്ടികൾക്ക് അവർ പ്രതിമാസം 4,000 രൂപ വീതം ലഭ്യമാക്കുന്നുണ്ട്. 2024 ഓഗസ്റ്റിൽ തുടങ്ങിയ സഹായം തുടരുകയാണ്. ദുരന്തം ആർക്കും എപ്പോൾ വേണമെങ്കിലും സംഭവിക്കാം. കുട്ടികൾ നന്നായി ഇരിക്കണം. നന്നായി പഠിച്ച് സന്തോഷത്തോടെ മുന്നോട്ടു പോകണം. മറ്റൊന്നും വേണ്ടതില്ല-പേര് വെളിപ്പെടുത്താൻ ആഗ്രഹിക്കാത്ത അവർ പറഞ്ഞു. ഏഴു കുട്ടികളിൽ അടുത്തിടെ 18 തികഞ്ഞ രണ്ടുപേർ ഒഴികെയുള്ളവർ സർക്കാരിന്‍റെ കിൻഷിപ്പ് ഫോസ്റ്റർ കെയർ പദ്ധതിയിൽ അടുത്ത ബന്ധുക്കളുടെ സംരക്ഷണത്തിലാണ്. അച്ഛനും അമ്മയും നഷ്ടപ്പെട്ട കുട്ടികൾക്ക് 10 ലക്ഷംരൂപ വീതവും ആരെങ്കിലും ഒരാൾ നഷ്ടപ്പെട്ടവർക്ക് അഞ്ച് ലക്ഷം രൂപ വീതവും സഹായം സർക്കാർ ലഭ്യമാക്കിയിട്ടുണ്ട്. 19 കുട്ടികൾക്ക് കേന്ദ്ര സർക്കാരിന്‍റെ സ്പോണ്‍സർഷിപ്പ് പദ്ധതിയിൽ പ്രതിമാസം 4,000 രൂപ കിട്ടുന്നുണ്ട്. പിതാവും മാതാവും നഷ്ടപ്പെട്ട ആറ് കുട്ടികൾക്ക് സ്വകാര്യ സംഘടനകളും വ്യക്തികളും സംസ്ഥാന സർക്കാർ മുഖേന 31.24 ലക്ഷം രൂപ കൈമാറിയിട്ടുണ്ട്. ഇതിനുപുറമേയാണ് പേര് വെളിപ്പെടുത്താൻ ആഗ്രഹിക്കാത്ത രണ്ട് വ്യക്തികളുടെ സഹായം.

പുകലമാളത്ത് കാട്ടാനശല്യം അതിരൂക്ഷം

സുൽത്താൻബത്തേരി: ചെതലയം പുകലമാളത്ത് കാട്ടാനശല്യം അതിരൂക്ഷം. വീടിനു സമീപംവരെ എത്തിയാണ് ആനകൾ മനുഷ്യജീവന് ഭീഷണി ഉയർത്തുന്നത്. വലിയ കൃഷിനാശവും ആനകൾ വരുത്തുന്നുണ്ട്. വനത്തോടു ചേർന്നുള്ള പ്രദേശമാണ് പുകലമാളം. കഴിഞ്ഞദിവസം പുകലമാളത്ത് ഇറങ്ങിയ കാട്ടാന തയ്യിൽ ഷമീർ, പാട്ടത്തൊടി ആലി, മുണ്ടൻതൊടി റഷീദ് എന്നിവരുടെ തെങ്ങ്, വാഴ, കപ്പ കൃഷികൾ നശിപ്പിച്ചു. ബത്തേരി-പുൽപ്പള്ളി റോഡിനടുത്താണ് ഷമീറിന്‍റെ വീട്. ഇദ്ദേഹത്തിന്‍റെ മുറ്റത്തുനിന്ന തെങ്ങിൻതൈയും റഷീദിന്‍റെ വീട്ടുവളപ്പിലെ തെങ്ങും കപ്പയും ആന നശിപ്പിച്ചു. സന്ധ്യമയങ്ങുന്നതോടെ ജനവാസ മേഖലയൽ എത്തുന്ന ആനകൾ നേരം പുലർന്നതിനുശേഷമാണ് വനത്തിലേക്ക് മടങ്ങുന്നത്. സാന്നിധ്യം അറിഞ്ഞ് തുരത്താനിറങ്ങുന്നവർക്കു നേരേ ആനകൾ പാഞ്ഞടുക്കാറുണ്ട്. ചെതലയം വളാഞ്ചേരി അടിവാരത്ത് കർഷകൻ തേലക്കാട്ട് ശിവനെ കാട്ടാന തുന്പിക്കൈയ്ക്ക് തട്ടിയെറിഞ്ഞത് കഴിഞ്ഞ ദിവസമാണ്. വാരിയെല്ലിനും നട്ടെല്ലിനും പരിക്കേറ്റ ഇദ്ദേഹം ചികിത്സയിലാണ്. വനാതിർത്തിയിലെ വന്യജീവി പ്രതിരോധ സംവിധാനങ്ങൾ കുറ്റമറ്റതാക്കണമെന്നാണ് പുകലമാളം നിവാസികളുടെ ആവശ്യം.

ബ്യൂട്ടീഷ്യൻമാരുടെ സംഗമം നടത്തി

മേപ്പാടി: ഡോ.മൂപ്പൻസ് മെഡിക്കൽ കോളജ് ഡെർമറ്റോളജി വിഭാഗം ബ്യൂട്ടീഷ്യൻസ് യുണൈറ്റഡ്-2025 എന്ന പേരിൽ ജില്ലയിലെ ബ്യൂട്ടീഷ്യൻമാരുടെ സംഗമം നടത്തി. ബ്യൂട്ടീഷ്യൻമാരുടെ തൊഴിൽ അറിവും വൈദഗ്ധ്യവും വർധിപ്പിക്കുന്നതിനാണ് പരിപാടി സംഘടിപ്പിച്ചത്. കോളജ് എക്സിക്യുട്ടീവ് ട്രസ്റ്റി യു. ബഷീർ ഉദ്ഘാടനം ചെയ്തു. ബ്യൂട്ടീഷ്യൻമാർക്കും കുടുംബാംഗങ്ങൾക്കും ചികിത്സ ആനുകൂല്യം ലഭ്യമാക്കുന്ന സ്പെഷൽ പ്രവിലേജ് കാർഡ് വിതരണം അദ്ദേഹം നിർവഹിച്ചു. ബ്യൂട്ടീഷ്യൻസ് അസോസിയേഷൻ ജില്ലാ പ്രസിഡന്‍റ് രേഖ, സെക്രട്ടറി ധന്യ എന്നിവർ കാർഡുകൾ ഏറ്റുവാങ്ങി. പ്രിൻസിപ്പൽ ഡോ. എലിസബത്ത് ജോസഫ്, അഡീഷണൽ മെഡിക്കൽ സൂപ്രണ്ട് ഡോ. അരുണ്‍ അരവിന്ദ്, ജനറൽ മെഡിസിൻ വിഭാഗം മേധാവി ഡോ. സാറ ചാണ്ടി, ഡെപ്യൂട്ടി ജനറൽ മാനേജർമാരായ സൂപ്പി കല്ലങ്കോടൻ, ഡോ. ഷാനവാസ് പള്ളിയാൽ എന്നിവർ പങ്കെടുത്തു. ഡെർമറ്റോളജി വിഭാഗം മേധാവി ഡോ.ജയദേവ് ബി. ബെഡ്കരൂർ, അസോസിയറ്റ് പ്രഫ.ഡോ.പമേല തെരേസ ജോസഫ്, സീനിയർ റസിഡന്‍റ് ഡോ.കെ.വി. അനഘ എന്നിവർ വിവിധ വിഷയങ്ങളിൽ ക്ലാസ് നൽകി.

നാക് എ ഗ്രേഡ് നേട്ടവുമായി കൽപ്പറ്റ എൻഎംഎസ്എം ഗവ. കോളജ്

കൽപ്പറ്റ: നാക് അക്രഡിറ്റേഷനിൽ എ ഗ്രേഡ് നേട്ടവുമായി കൽപ്പറ്റ എൻഎംഎസ്എം ഗവ. കോളജ്. പട്ടികജാതി-വർഗ-പിന്നാക്കക്ഷേമ മന്ത്രി ഒ.ആർ. കേളു ഇതുസംബന്ധിച്ച ഔദ്യോഗിക പ്രഖ്യാപനം നടത്തി. ഉന്നത വിദ്യാഭ്യാസ രംഗത്തെ മാറ്റങ്ങൾ ഉൾക്കൊണ്ട് എല്ലാ കോളജുകളിലും സർവകലാശാലകളിലും നൈപുണി വികസന കേന്ദ്രങ്ങൾ സർക്കാർ നടപ്പാക്കുമെന്ന് മന്ത്രി പറഞ്ഞു. നാക് സംഘം കോളജിലെ പ്രധാന പഠന വകുപ്പുകൾ, ജൈവ വൈവിധ്യ ഉദ്യാനങ്ങൾ, സൗരോർജ പദ്ധതി, വിവിധ ലാബുകൾ, മീഡിയ സ്റ്റുഡിയോ, ജിംനേഷ്യം, ഭാഷ ലാബ്, ബാംബു ഗാർഡൻ, ബട്ടർഫ്ളൈ ഗാർഡൻ തുടങ്ങിയവ സന്ദർശിച്ചിരുന്നു. കോളജിലെ വിദ്യാർഥികളുടെ ബൗദ്ധിക വളർച്ചയോടൊപ്പം സാമൂഹിക പ്രതിബദ്ധത പരിപോഷിപ്പിക്കാൻ വിഭാവനം ചെയ്ത സതീർഥ്യ, സഹവർത്തിത്വ എന്നീ പ്രവർത്തനങ്ങൾ ബെസ്റ്റ് പ്രാക്ടീസെസ് എന്ന നിലയിൽ സംഘത്തിന്‍റെ ശ്രദ്ധ ആകർഷിച്ചിരുന്നു. ഇ ഊര് വായന കൂട്ടം, സ്പീക്ക് ഔട്ട് ചർച്ച, ഓണസ്റ്റി സെൽഫ് സർവീസ് ഷോപ്പ്, ഗോത്ര വിഭാഗങ്ങൾക്കായുള്ള പഠന സഹായ പ്രവർത്തനങ്ങൾ, ഡിജിക്ലിനിക് പ്രവർത്തനങ്ങൾ എന്നിവ സംഘടിപ്പിച്ചു. നേരത്തെ ഓണ്‍ലൈനായി സമർപ്പിച്ച രേഖകളും സന്ദർശനവും കണക്കിലെടുത്താണ് കോളജിന് ഗ്രേഡ് ലഭിച്ചത്. നാക് സന്ദർശനത്തോടനുബന്ധിച്ച് ഒരു കോടി രൂപയുടെ വികസനപ്രവർത്തനങ്ങളാണ് സർക്കാർ കോളജിൽ നടത്തിയത്. പ്രിൻസിപ്പൽ ഡോ. സുബിൻ പി. ജോസഫ് അധ്യക്ഷത വഹിച്ചു. അധ്യാപകരായ ഡോ.എം.എസ്. രാജി മോൾ, ഡോ.കെ. രാഹുൽ, വർഗീസ് ആന്‍റണി തുടങ്ങിയവർ പ്രസംഗിച്ചു.

നിർമാണ മേഖലയിലെ പ്രതിസന്ധി: സെക്രട്ടേറിയറ്റ് പടിക്കൽ പഞ്ചദിന സത്യഗ്രഹവുമായി പിബിസിഎ

കൽപ്പറ്റ: നിർമാണ മേഖലയിലെ പ്രതിസന്ധിക്ക് പരിഹാരം തേടി പ്രൈവറ്റ് ബിൽഡിംഗ് കോണ്‍ട്രാക്ടേഴ്സ് അസോസിയേഷന്‍റെ നേതൃത്വത്തിൽ 28 മുതൽ ഓഗസ്റ്റ് ഒന്ന് വരെ സെക്രട്ടേറിയറ്റ് പടിക്കൽ സത്യഗ്രഹം നടത്തും. കരാറുകാർക്ക് ലൈസൻസ് അനുവദിക്കുക, പുഴകളിലും നദികളിലും മണൽവാരൽ ആരംഭിക്കുക, സൈറ്റ് ഇൻഷ്വറൻസ് പദ്ധതി നടപ്പാക്കുക, കെ സ്മാർട്ടിലെ അപാകതകൾ പരിഹരിക്കുക, നിർമാണത്തൊഴിലാളികൾക്ക് പെൻഷൻ കുടിശിക സഹിതം അനുവദിക്കുക തുടങ്ങിയ ആവശ്യങ്ങൾ ഉന്നയിച്ചാണ് സമരം. ഒരോ മേഖലകളിൽനിന്നുള്ള കരാറുകാരാണ് വിവിധ ദിവസങ്ങളിൽ സത്യഗ്രഹം അനുഷ്ഠിക്കുക. ആദ്യദിവസം സത്യഗ്രഹത്തിൽ ജില്ലയിൽനിന്നു 25 പേർ പങ്കെടുക്കുമെന്ന് ജില്ലാ സെക്രട്ടറി എൻ.വി. ബാബു, രക്ഷാധികാരി മമ്മീസ മേപ്പാടി, രക്ഷാധികാരി സി.സി. ഏബ്രഹാം, ജില്ലാ കമ്മിറ്റിയംഗം പി.പി. ബെന്നി എന്നിവർ വാർത്താസമ്മേളനത്തിൽ അറിയിച്ചു. ലാഭകരമല്ലാത്തതായി നിർമാണ മേഖല മാറി. പുതിയ കെട്ടിടങ്ങൾ, ഫ്ളാറ്റുകൾ, ബഹുനില വീടുകൾ എന്നിവയുടെ നിർമാണം നാമമാത്രമാണ്. പ്രവാസികളടക്കം നിർമാണ മേഖലയിൽ നിക്ഷേപത്തിനു തയാറാകുന്നില്ല. സാമഗ്രികളുടെ ലഭ്യതക്കുറവും വിലക്കയറ്റവും നിർമാണ മേഖല നേരിടുന്ന മുഖ്യ പ്രശ്നമാണ്. കർണാടകയിൽനിന്നും മറ്റും ഇറക്കുന്ന മണലിന് ഗുണനിലവാരം കുറവാണ്. നിലവാരമില്ലാത്ത മണലും മറ്റും ഉപയോഗിച്ചുള്ള നിർമാണം കെട്ടിടങ്ങളുടെയും വീടുകളുടെയും ആയുസ് കുറയ്ക്കുകയാണ്. നിർമാണം നടന്ന് ഏറെക്കഴിയുംമുന്പ് വീടുകൾ ചോർന്നൊലിക്കുന്നത് അപൂർവതയല്ല. പുഴകളിലെയും നദികളിലെയും മണൽ ശേഖരിച്ച് നിർമാണത്തിന് ലഭ്യമാക്കിയാൽ ഈ അവസ്ഥയ്ക്കു മാറ്റമാകും. നിർമാണ സാമഗ്രികളുടെ ഗുണനിലവാരം ഉറപ്പുവരുത്താനും വില നിയന്ത്രിക്കാനും ഔദ്യോഗിക സംവിധാനം ഉണ്ടാകണം. കരാറുകാർക്ക് ലൈസൻസ് അനുവദിക്കുമെന്ന വാഗ്ദാനം അധികൃതർ പാലിക്കുന്നില്ല. പരിചയസന്പത്ത് മുഖ്യ മാനദണ്ഡമാക്കി ലൈസൻസ് അനുവദിക്കുന്നത് നിർമാണ മേഖലയ്ക്ക് ഗുണം ചെയ്യും. നിർമാണ ഇടങ്ങളിൽ തൊഴിലാളികൾ അപകടങ്ങൾ നേരിടേണ്ടിവരുന്നുണ്ട്. സൈറ്റ് ഇൻഷ്വറൻസ് ഏർപ്പെടുത്തുന്നത് തൊഴിലാളികൾക്കും കരാറുകാർക്കും കെട്ടിടം ഉടമയ്ക്കും ഗുണകരമാണ്. അപകടത്തിൽപ്പെടുന്ന തൊഴിലാളികളെ കരാറുകാർ ആശുപത്രിയിൽ എത്തിക്കുകയും ചികിത്സിക്കുകയും ചെയ്യേണ്ട സ്ഥിതിയാണ് നിലവിൽ. ക്ഷേമ പെൻഷൻ കുടിശികയാകുന്നത് ജോലിയിൽനിന്നു വിരമിച്ച തൊഴിലാളികൾക്ക് വലിയ പ്രയാസം സൃഷ്ടിക്കുകയാണെന്നും പിബിസിഎ ഭാരവാഹികൾ പറഞ്ഞു.

ടൗണ്‍ഷിപ്പിലെ മാതൃക വീടിന്‍റെ നിർമാണം അവസാനഘട്ടത്തിൽ

കൽപ്പറ്റ: എൽസ്റ്റണ്‍ എസ്റ്റേറ്റിൽ തയാറാകുന്ന ടൗണ്‍ഷിപ്പിലെ മാതൃക വീടിന്‍റെ നിർമാണ പ്രവൃത്തി അവസാനഘട്ടത്തിൽ. വീടിന്‍റെ നിലം ഒരുക്കൽ പൂർത്തീകരിച്ച് ടൈൽസ് പാകുന്ന പ്രവൃത്തി ആരംഭിച്ചിട്ടുണ്ട്. ടൗണ്‍ഷിപ്പിൽ ഒരുങ്ങുന്ന മാതൃക വീടിന്‍റെ നിർമാണം 30 ഓടെ പൂർത്തീകരിക്കും. ശുചിമുറി, സിറ്റൗട്ട്, അടുക്കള സ്ലാബ് സ്ഥാപിക്കൽ പ്രവൃത്തികളാണ് ഇനി ചെയ്യാനുള്ളത്. കാലാവസ്ഥ അനുകൂലമെങ്കിൽ വീടിന്‍റെ പെയിന്‍റിംഗ് ഇന്ന് ആരംഭിക്കുമെന്ന് ഊരാളുങ്കൽ ലേബർ സൊസൈറ്റി പ്രതിനിധികൾ അറിയിച്ചു. ജില്ലയിൽ തുടർച്ചയായി പെയ്യുന്ന മഴയിൽ വീടിന്‍റെ ചുമരുകൾ നനയുന്നത് പെയിന്‍റിംഗിന് പ്രതിസന്ധിയാവുകയാണ്. ഹീറ്റർ ഉപകരണങ്ങൾ ഉപയോഗിച്ച് ചുമർ ചൂടാക്കിയശേഷം ചുമരിൽ പുട്ടിയും പെയിന്‍റും അടിക്കാനാണ് തീരുമാനം. 1000 ചതുരശ്രയടിയിലിൽ ഒറ്റ നിലയിൽ പണി തീരുന്ന വീടിന് ഭാവിയിൽ ഇരുനില നിർമിക്കാനുള്ള അടിത്തറയോടെയാണ് തയാറാക്കിയത്. കിടപ്പുമുറി, രണ്ട് മുറികൾ, സിറ്റൗട്ട്, ലിവിംഗ്, സ്റ്റഡി റൂം, ഡൈനിംഗ്, അടുക്കള, സ്റ്റോർ ഏരിയ എന്നിവയാണ് മാതൃക വീട്ടിൽ ഉള്ളത്.

വന്യമൃഗശല്യം: കുറിച്യാട് റേഞ്ച് ഓഫീസിലേക്ക് കർഷകസംഘം മാർച്ച് നടത്തി

സുൽത്താൻ ബത്തേരി: ചെതലയം മേഖലയിലെ വന്യമൃഗ ആക്രമണത്തിന് പരിഹാരം ആവശ്യപ്പെട്ട് കർഷകസംഘം ചെതലയം വില്ലേജ് കമ്മിറ്റിയുടെ നേതൃത്വത്തിൽ മാർച്ച് നടത്തി. ആറാംമൈലിൽ നിന്ന് പ്രതിഷേധവുമായി എത്തിയ പ്രവർത്തകരെ ചെതലയത്ത് കുറിച്യാട് റേഞ്ച് ഓഫീസിനുമുന്നിൽ പോലീസ് തടഞ്ഞു. പ്രവർത്തകർ വലയംഭേദിച്ച് ഉള്ളിൽകയറാൻ ശ്രമിച്ചത് വാക്കേറ്റത്തിലും ഉന്തിലും തള്ളിലും കലാശിച്ചു. സിഐടിയു ജില്ലാസെക്രട്ടറി വി.വി. ബേബി ഉദ്ഘാടനം ചെയ്തു. സമരസമിതി ചെയർമാൻ പി.ഒ. ജോയി അധ്യക്ഷത വഹിച്ചു. കർഷകസംഘം ഏരിയ സെക്രട്ടറി ടി.കെ. ശ്രീജൻ, ലിജോ ജോണി, വി.പി. സുഹാസ്, കൗണ്‍സിലർമാരായ എ.ആർ. ജയകൃഷ്ണൻ, പി.ആർ. നിഷ, സമരസമിതി കണ്‍വീനർ സി.കെ. സത്യരാജ് എന്നിവർ പ്രസംഗിച്ചു. റേഞ്ച് ഓഫീസറുമായി ചർച്ചനടത്തിയെങ്കിലും നേതാക്കൾ മുന്നോട്ടുവച്ച കാര്യങ്ങളിൽ കൃത്യമായ മറുപടി ലഭിക്കാതായതോടെ റേഞ്ച് ഓഫീസറെ തടഞ്ഞുവച്ചു. തുടർന്ന് വയനാട് വന്യജീവിസങ്കേതം മേധാവിയുമായി സമരനേതാക്കൾ ഫോണിൽ ചർച്ചനടത്തി. കഴിഞ്ഞദിവസം കാട്ടാന ആക്രമണത്തിൽ പരിക്കേറ്റ ചെതലയം അടിവാരം തേലാക്കാട്ട് ശിവന് അടിയന്തര ധനസഹായമായി പതിനായിരം രൂപ നൽകും. തുടർചികിത്സ സഹായം നൽകും. ബത്തേരി-പുൽപ്പള്ളി സംസ്ഥാന പാതയ്ക്ക് ഇരുവശവുമുളള അടിക്കാട് ആറ് ദിവസത്തിനകം വെട്ടിമാറ്റും, പട്രോളിംഗ് ശക്തമാക്കും, വനാതിർത്തിയിലെ കിടങ്ങ്, തൂക്ക് വേലി സംവിധാനങ്ങൾ കാര്യക്ഷമമാക്കുമെന്ന ഉറപ്പിലാണ് പ്രതിഷേധം അവസാനിപ്പിച്ചത്.

ലോക ഒആർഎസ് വാരം ആചരിച്ചു

കൽപ്പറ്റ: ഇന്ത്യൻ അക്കാദമി ഓഫ് പീഡിയാട്രിക്സിന്‍റെയും ജില്ലാ ഗവ. മെഡിക്കൽ കോളജിന്‍റെയും ആഭിമുഖ്യത്തിൽ ലോക ഒആർഎസ് വാരം ആചരിച്ചു. ഡെപ്യൂട്ടി ഡിഎംഒ ഡോ. ആൻസി മേരി ജേക്കബ് ഉദ്ഘാടനം ചെയ്തു. വയറിളക്ക മരണങ്ങൾ തടയുന്നതിൽ ഒആർഎസിനുള്ള പ്രാധാന്യത്തെക്കുറിച്ച് പൊതുജനങ്ങളിലും വിദ്യാർഥികളിലും ജീവനക്കാരിലും അവബോധം സൃഷ്ടിക്കുക എന്ന ലക്ഷ്യത്തോടെയാണ് പരിപാടി സംഘടിപ്പിച്ചത്. സിപ്പ് സ്മാർട്ട് സ്റ്റേ സ്ട്രോംഗ് സെ യെസ് ടു ഒആർഎസ് എന്നതാണ് ഈ വർഷത്തെ മുദ്രാവാക്യം. ബോധവത്കരണ ക്ലാസിനെ തുടർന്ന് നഴ്സിംഗ് വിദ്യാർഥികൾക്കായി ക്വിസ് മത്സരം, പോസ്റ്റർ രചന മത്സരം എന്നിവ നടത്തി. മത്സര വിജയികൾക്ക് സമ്മാനം വിതരണം ചെയ്തു. ഇന്ത്യൻ അക്കാദമി ഓഫ് പീഡിയാട്രിക്സ് പ്രസിഡന്‍റ് ഡോ. ചന്ദ്രശേഖരൻ അധ്യക്ഷത വഹിച്ചു. പീഡിയാട്രിക്ക് വകുപ്പ് തലവൻ ഡോ. വിനോദ് കുമാർ, ആർസിഎച്ച് ഓഫീസർ ഡോ. ജെറിൻ എസ്. ജെറോഡ്, ഡെപ്യൂട്ടി സൂപ്രണ്ടന്‍റ് ഡോ. മൃദുലാൽ, ഡോ. ഹൈറുന്നീസ, നഴ്സിംഗ് സൂപ്രണ്ടന്‍റ് ബിനി മോൾ തോമസ് എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]