ADVERTISEMENT

ADVERTISEMENT

പ്രമാടം നേതാജി സ്കൂളിൽ പ്രതിഭാസംഗമം

പത്തനംതിട്ട: പ്രമാടം നേതാജി ഹയർ സെക്കൻഡറി സ്കൂളിലെ പ്രതിഭാസംഗമം ഡോ. റോയ്സ് മല്ലശേരി ഉദ്ഘാടനം ചെയ്തു. സമ്മേളനത്തിൽ പിടിഎ പ്രസിഡന്‍റ് അനന്തവിഷ്ണു അധ്യക്ഷത വഹിച്ചു.

ഡോ. ആർ. സുനിൽകുമാർ, പ്രിൻസിപ്പൽ ബി. ആശ, എംപിറ്റിഎ പ്രസിഡന്‍റ് സുനു ജോൺ, ഹെഡ്മിസ്ട്രസ് സി. ശ്രീലത, സ്റ്റാഫ്‌ സെക്രട്ടറി വി.എം. അമ്പിളി, അജി ഡാനിയേൽ എന്നിവർ പ്രസംഗിച്ചു.സംഗമത്തിൽ പ്രതിഭകൾക്ക് ആദരം നൽകി.

ADVERTISEMENT

സ്കൂളുകളിൽ ചാന്ദ്രദിനാചരണം

കലഞ്ഞൂർ ഗവ.എൽപി സ്കൂൾ കലഞ്ഞൂർ: അൻപത്തിയാറ് വർഷം മുമ്പ് ചന്ദ്രനിൽ ഇറങ്ങി ടീമിന് അഭിവാദ്യമർപ്പിച്ച് കലഞ്ഞൂർ ഗവ.എൽപിഎസ് ശാസ്ത്ര ക്ലബ്.റോക്കറ്റ് മാതൃകകൾ, ഫ്ലാഷ് കാർഡുകൾ,സചിത്ര ചാർട്ടുകൾ എന്നിവ നിർമിച്ച വിദ്യാർഥികൾ ചാന്ദ്ര ദിനാചരണം വേറിട്ടതാക്കി. പ്രഥമാധ്യാപകൻ ഫിലിപ്പ് ജോർജ് ഉദ്ഘാടനം ചെയ്തു. ശാസ്ത്ര ക്ലബ് കോ - ഓർഡിനേറ്റർ വീണ വി. നായർ അധ്യക്ഷത വഹിച്ചു. ഷൈനി തോമസ്, വിദ്യാർഥികളായ ദിന മേരി റിനു, വി.നിഖിത, എസ്. അയിഷ, അജല അനൂപ്, എ. അരുണിമ, പാർവണ ആർ. നായർ എന്നിവർ പ്രസംഗിച്ചു. സെന്‍റ് ജോർജ്സ് ഹൈസ്കൂളിൽ‌ ചുങ്കപ്പാറ: സെന്‍റ് ജോർജ്സ് ഹൈസ്കൂളിലെ സയൻസ് ക്ലബിന്‍റെ ആഭിമുഖ്യത്തിൽ ചാന്ദ്രദിനത്തോടനുബന്ധിച്ച് കുട്ടികൾക്കായി ആംസ്ട്രോഗ് 2.ഒ എന്ന ബോർഡ് ഗെയിമിലൂടെ രസകരമായ രീതിയിൽ കളിയിലൂടെ ചാന്ദ്രദിന അറിവ് പകർന്നു നൽകി. സ്കൂളിലെ അധ്യാപകരായ റീനു ഏലിയാസ്, ബിന്നി മരിയ ബാബു എന്നിവർ രൂപകല്പന ചെയ്ത മത്സരം ഹെഡ്മാസ്റ്റർ വർഗീസ് ജോസഫ് ഡൈസ്ആദ്യ റോൾ ചെയ്ത് ഉദ്ഘാടനം ചെയ്തു. സയൻസ് അധ്യാപകരായ ടി.ഇ. ബീന, മറിയാമ്മ ആന്‍റണി, സ്റ്റെഫി തോമസ്, അനി മാത്യു എന്നിവർ നേതൃത്വം നൽകി.

മുക്കുപണ്ടം പണയം വെച്ച് രൂപ തട്ടിയെടുത്തയാൾ പിടിയിൽ

അടൂർ: സ്വകാര്യ ധനകാര്യ സ്ഥാപനത്തിൽ മുക്കുപണ്ടം പണയം വച്ച് 18.56 ലക്ഷം രൂപ തട്ടിയെടുത്ത സംഭവത്തിൽ ഒരാൾ അറസ്റ്റിൽ. ഏഴംകുളം പ്ലാന്‍റേഷൻ മുക്കിൽ വാടകയ്ക്ക് താമസിക്കുന്ന കരുനാഗപ്പള്ളി കല്ലേലിഭാഗം പുത്തൻപുരയിൽ വീട്ടിൽ ബിപിനെ യാണ് (47) അടൂർ പോലീസ് അറസ്റ്റ് ചെയ്തത്. അടൂർ നഗരത്തിലുള്ള സ്വകാര്യ ധനകാര്യ സ്ഥാപനത്തിൽ നിന്നാണ് ബിപിൻ 2024-25 കാലഘട്ടത്തിൽ പലപ്പോഴായിട്ട്മുക്കുപണ്ടം പണയം വച്ച് പണം തട്ടിയെടുത്തത്. ഓഡിറ്റിംഗിനിടെയാണ് സ്വർണം മുക്കുപണ്ടമാണെന്ന് ധനകാര്യ സ്ഥാപന അധികൃതർ തിരിച്ചറിഞ്ഞത്. തുടർന്ന് പണയം വച്ച രേഖകളിൽ നിന്നും ബിപിന്‍റേതാണ് ഉരുപ്പടികളെന്നു തെളിഞ്ഞു. അടൂർ പോലീസിൽ നൽകിയ പരാതിയേ തുടർന്ന് എസ്എച്ച്ഒ ശ്യാം മുരളി,എസ്ഐ നകുലരാജൻ, എഎസ്ഐ കെ.എസ്.മഞ്ജുമോൾ, സിപിഒമാരായ രാജഗോപാൽ, ഡി.ജിനു, എസ്.സുനിത എന്നിവരുടെ നേതൃത്വത്തിൽ നടന്ന അന്വേഷണത്തിലാണ് ബിപിനെ അറസ്റ്റ് ചെയ്തത്.

സ്കൂൾ കുട്ടികളുടെ സുരക്ഷ വർധിപ്പിക്കണം: എഐവൈഎഫ്

തിരുവല്ല: റോഡ് അപകടങ്ങൾ വർധിക്കുന്ന പശ്ചാത്തലത്തിൽ സ്കൂൾ കുട്ടികളുടെ സുരക്ഷ വർധിപ്പിക്കാൻ വിവിധ മാർഗ നിർദേശങ്ങൾ ഉൾപ്പെടുത്തി എഐവൈഎഫ് തിരുവല്ല മണ്ഡലം കമ്മിറ്റി പോലീസിനു പരാതി നൽകി. കുട്ടികൾക്ക് ട്രാഫിക് ബോധവത്കരണ ക്ലാസുകൾ സംഘടിപ്പിക്കുക, സ്കൂളുകൾക്ക് മുൻപിൽ വാഹനങ്ങളുടെ വേഗ നിയന്ത്രണത്തിന് സംവിധാനങ്ങൾ ഒരുക്കുക,ഗതാഗതം നിയന്ത്രിക്കാൻ രാവിലെയും വൈകുന്നേരവും കൂടുതൽ പോലീസുകാരെ വിന്യസിക്കുകയും രക്ഷാബോർഡുകളും ട്രാഫിക് സിഗ്നലുകളും സ്പീഡ് ബ്രേക്കറും സ്ഥാപിക്കുക തുടങ്ങി വിവിധ ആവശ്യങ്ങളും നിർദ്ദേശങ്ങളുമാണ് ട്രാഫിക് പോലീസ് യൂണിറ്റിനു കൈമാറിയത്. മണ്ഡലം സെക്രട്ടറി വിഷ്ണു ഭാസ്കർ, മേഖല പ്രസിഡന്‍റ് ശ്രീവൽസ് തമ്പി, വൈസ് പ്രസിഡന്‍റ് മനോ്‌ കൊച്ചുവീട്ടിൽ, കമ്മിറ്റി അംഗങ്ങളായ അനിൽ രാജ്, മനീഷ് മാത്യു എന്നിവർ പങ്കെടുത്തു.

കുടിവെള്ളപദ്ധതി സൊസൈറ്റിയിലെ അഴിമതി ആരോപണം അന്വേഷിക്കും

സീതത്തോട്: സീതത്തോട് മൂന്നുകല്ല് കുടിവെള്ള പദ്ധതിയുമായി ബന്ധപ്പെട്ടുയർന്ന അഴിമതി ആരോപണത്തെ സംബന്ധിച്ച് അന്വേഷണം നടത്താൻ കോന്നി ഡിവൈഎസ്പിക്കു നിർദേശം. സൊസൈറ്റി അംഗം എം.ഡി. സ്റ്റാലിൻ മുഖ്യമന്ത്രിക്കു നൽകിയ പരാതിയേ തുടർന്നാണ് നിർദേശമുണ്ടായത്. അന്വേഷണത്തിന് ഉത്തരവ് ലഭിച്ചതോടെ ഡിവൈഎസ്പി ബന്ധപ്പെട്ടവരിൽ നിന്നും പ്രാഥമിക വിവരങ്ങൾ തേടി. വർഷങ്ങൾക്കു മുന്പ് രൂപീകരിച്ച മൂന്നുകല്ല് കുടിവെള്ള പദ്ധതി സൊസൈറ്റിയുടെ നടത്തിപ്പ് ചുമതല സിപിഐ പ്രാദേശിക നേതാക്കൾക്കാണ്. സൊസൈറ്റിയുടെ പേരിലുള്ള പണം തട്ടിച്ചതും ആൾമാറാട്ടം നടത്തി പ്രസിഡന്‍റിന്‍റെ കള്ള ഒപ്പിട്ട് സർക്കാരിലേക്ക് രേഖകൾ സമർപ്പിച്ചതുമായ വിഷയത്തിലാണ് അന്വേഷണം ആവശ്യപ്പെട്ടിരിക്കുന്നതെന്ന് എം.ഡി. സ്റ്റാലിൻ പറഞ്ഞു. സൊസൈറ്റിയുടെ പൊതുയോഗം വർഷങ്ങളായി നടക്കുന്നില്ല. ഇതേത്തുടർന്ന് രജിസ്ട്രാർക്ക് വിവരാവകാശ നിയമപ്രകാരം നൽകിയ അപേക്ഷയുടെ മറുപടി ലഭിച്ചപ്പോഴാണ് ആൾമാറാട്ടം നടത്തി രേഖകൾ സമർപ്പിച്ചത് ശ്രദ്ധയിൽപെട്ടതെന്നും ഇക്കാര്യം ചൂണ്ടിക്കാട്ടിയാണ് പരാതി നൽകിയതെന്നും പറയുന്നു.

പുതിയകാവിൽചിറ വിശ്രമകേന്ദ്രം വീണ്ടും സജീവമാകും; ടൂറിസം പദ്ധതിക്കു പുതുജീവൻ

അടൂർ: ഹൈസ്കൂൾ ജംഗ്ഷനിലെ പുതിയകാവിൽചിറയ്ക്കും വഴിയോര വിശ്രമകേന്ദ്രത്തിനും ശാപമോക്ഷം. മതിയായ സംരക്ഷണമില്ലാതെ കിടന്നതിനേ തുടർന്ന് ചിറയിൽ നടപ്പാക്കിയ സൗന്ദര്യവത്കരണ പദ്ധതികൾ താറുമാറായിരുന്നു. ഹോട്ടൽ ആരാം പാർക്ക് നടത്തിപ്പിനുള്ള അനുമതി അടൂർ സ്വദേശികളായ മൂന്ന് യുവാക്കൾ നേടിയെടുത്തതോടെ ടൂറിസം പദ്ധതിക്കു പുതുജീവൻ കൈവരിക്കുമെന്നാണ് പ്രതീക്ഷ. നിലവിൽ കെട്ടിടത്തിനുള്ളിൽ അറ്റകുറ്റപ്പണികൾ നടന്നുവരികയാണ്. ഓണത്തിന് ഹോട്ടൽ പ്രവർത്തിപ്പി ക്കാനാകുമെന്ന പ്രതീക്ഷയിലാണ് നടത്തിപ്പുകാർ. പുതിയകാവിൽ ചിറയിൽ ബോട്ടും അലങ്കര വൈദ്യുതി ദീപങ്ങളും കുട്ടികൾക്കുള്ള പാർക്കും ക്രമീകരിക്കും. പ്രഭാത സഞ്ചാരത്തിനു ചിറയ്ക്കു ചുറ്റുമുള്ള നടപ്പാത നവീകരിക്കും. സംസ്കാരിക പരിപാടികൾക്കുള്ള ഇടമായി ഇതിനെ മാറ്റുകയാണ് ലക്ഷ്യം. ജില്ലാ ടൂറിസം പ്രമോഷൻ കൗൺസിലിന്‍റെ അധീനതയിലുള്ളതാണ് കെട്ടിടവും ചിറയും. ഡിടിപിസി വക കെട്ടിടത്തിൽ പ്രവർത്തിച്ചിരുന്ന ഹോട്ടൽ അടച്ചുപൂട്ടിയിട്ട് ഒരു വർഷത്തിലേറെയായി. ഹോട്ടൽ പൂട്ടിയതോടെ ചിറയുടെ പരിസരങ്ങൾ സാമൂഹിക വിരുദ്ധരുടെ താവളമായി മാറിയിരുന്നു. ആദ്യഘട്ടത്തിൽ ചിറയിലെ പായൽ ജില്ലാ കളക്ടറുടെ നിർദേശപ്രകാരം പൂർണമായി നീക്കിയിരുന്നു. ബംഗളൂരുവിൽ നിന്നുമെത്തിച്ച സ്വകാര്യ ഏജൻസിയുടെ പായൽ വാരുന്ന യന്ത്രം ഉപയോഗിച്ചാണ് പായൽ നീക്കം ചെയ്തത്. കിഫ്ബിയുടെ ടൂറിസം ഹബ് എന്ന പേരിൽ പദ്ധതി നടപ്പാക്കാൻ നേരത്തേ തീരുമാനിച്ചിരുന്നു. മൂന്ന് മൾട്ടിപ്ലസ് തിയേറ്ററുകൾ, മൂന്ന് വലിയ കെട്ടിടങ്ങൾ, ഓപ്പൺ എയർ തിയേറ്റർ, കൺവൻഷൻ സെന്‍റർ, ലേസർ ഷോ നീന്തൽകുളങ്ങൾ, മ്യൂസിക്കല്‍ ഫൗണ്ടന്‍, സൈക്കിള്‍പാത, നടപ്പാത,വെള്ളത്തിനുള്ളില്‍ തണല്‍ അക്വേറിയം, കാൽ കൊണ്ട് ചവിട്ടി നീക്കാവുന്ന ബോട്ടുകൾ, തൂക്കുപാലം, മാലിന്യ സംസ്കരണ പ്ളാന്‍റ് അടക്കമുള്ള വികസന പദ്ധതികൾ പുതിയകാവില്‍ ചിറയില്‍ നടപ്പിലാക്കുന്നതിനാണ് രൂപരേഖ തയാറാക്കിയിരിക്കുന്നത്.

കാർഷിക വനവത്കരണ പദ്ധതി കർഷക ദ്രോഹം: സുരേഷ് കോശി

പത്തനംതിട്ട: കർഷകർക്കു ദ്രോഹകരമായ കാർഷിക വനവത്കരണ പദ്ധതി കേന്ദ്ര സർക്കാർ ഉപേക്ഷിക്കണമെന്ന് കർഷക കോൺഗ്രസ് സംസ്ഥാന വൈസ് പ്രസിഡന്‍റ് സുരേഷ് കോശി. കർഷക കോൺഗ്രസ് ചെന്നീർക്കര മണ്ഡലം കൺവൻഷൻ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കൃഷിയിടത്തിൽ മരങ്ങൾ നടുകയും അതിന്‍റെ വളർച്ച ഉൾപ്പെടെയുള്ള കാര്യങ്ങൾ നാഷണൽ ടിംബർ പോർട്ടലിൽ രജിസ്റ്റർ ചെയ്യുകയും വേണമെന്ന കർശന വ്യവസ്ഥ സാധാരണ കർഷകരെ സംബന്ധിച്ച് പ്രായോഗികമല്ലെന്ന് സുരേഷ് കോശി പറഞ്ഞു. നടുന്ന മരങ്ങൾ മുറിക്കേണ്ടിവരുമ്പോൾ വിവിധ വകുപ്പുകളുടെ അനുമതി ആവശ്യമായി വരികയും ഇതു കർഷകരെ മരങ്ങൾ നാട്ടുപിടിപ്പിക്കുന്നതിൽ നിന്നും പിന്തിരിപ്പിക്കുകയും പഴയ ലൈസൻസ് രാജിലേക്കും അഴിമതിയിലേക്കും ഇതു വഴിതെളിക്കുമെന്നും അദ്ദേഹം ചൂണ്ടിക്കാട്ടി. മണ്ഡലം പ്രസിഡന്‍റ് ടി. ഡി. രാജേന്ദ്രൻ അധ്യക്ഷതയിൽ ചേർന്ന യോഗത്തിൽ മികച്ച പത്ത് കർഷകരെ ആദരിച്ചു. കർഷക ക്ഷേമനിധി ബോർഡ്‌ ഡയറക്ടറായി നിയമിതനായ സുരേഷ് കോശിയെയും യോഗത്തിൽ ആദരിച്ചു. സംസ്ഥാന ഭാരവാഹികളായ എം. കെ. പുരുഷോത്തമൻ, ജോജി ഇടക്കുന്നിൽ, അജി അലക്സ്‌, ബാബുജി ഈശോ, ജില്ലാ പ്രസിഡന്‍റ് സിറാജുദ്ദീൻ,ഡിസിസി ജനറൽ സെക്രട്ടറി ബോധേശ്വര പണിക്കർ, ഗ്രാമപഞ്ചായത്തംഗം ആർ. രാമചന്ദ്രൻ നായർ, കർഷക കോൺഗ്രസ്‌ ജില്ലാ സെക്രട്ടറി രഞ്ജൻ പുത്തൻ പുരയ്ക്കൽ തുടങ്ങിയവർ പ്രസംഗിച്ചു.

മദേഴ്സ് ഫോറം അർധവാർഷിക അസംബ്ലി

കോന്നി: മലങ്കര സുറിയാനി കത്തോലിക്കാ സഭ പത്തനംതിട്ട രൂപതയിലെ കോന്നി വൈദിക ജില്ലയിലെ മലങ്കര കാത്തലിക് മദേഴ്സ് ഫോറത്തിന്‍റെ അർധവാർഷിക അസംബ്ലി മുറിഞ്ഞകൽ സെന്‍റ് തെരേസാസ് ദേവാലയത്തിൽ ഫാ. ബിജോയ് ജേക്കബ് തുണ്ടിയത്ത് ഉദ്ഘാടനം ചെയ്തു. ജില്ലാ പ്രസിഡന്‍റ് ലീലാമ്മ ജേക്കബ് അധ്യക്ഷത വഹിച്ച യോഗത്തിൽ ജില്ലാ ഡയറക്ടർ ഫാ. മാത്യു കുന്നുംപുറത്ത്, രൂപത പ്രസിഡന്‍റ് ഷീജ ഏബ്രഹാം, രൂപത ആനിമേറ്റർ സിസ്റ്റർ അനന്ത എസ്ഐസി, അന്നമ്മ ചാക്കോ, ഷാന തോമസ്, മിനി ഡേവിഡ്, ജെനി ഈശോ, ലിജി, സുലു സെബാസ്റ്റ്യൻ,മേഴ്സി റോയ് എന്നിവർ പ്രസംഗിച്ചു.

സുരക്ഷാ ഓഡിറ്റിൽ ഇവയും ഉൾപ്പെടുമോ ? അശ്രദ്ധ തുടരുന്നു; അപകടങ്ങൾ പതിയിരിക്കുന്നു

പത്തനംതിട്ട: കൊല്ലം തേവലക്കര സ്കൂളിൽ ഉണ്ടായ അപകടത്തേ തുടർന്ന് സംസ്ഥാനത്തെ സ്കൂളുകളിൽ സുരക്ഷാ ഓഡിറ്റിനു നിർദേശം നൽകിയിരിക്കേ പരിസരങ്ങളിലെ അപകട സാധ്യതകൾ കൂടി പരിഹരിക്കപ്പെടണമെന്ന ആവശ്യം. സ്കൂളുകളോടു ചേർന്ന റോഡുകൾ, സംരക്ഷണ ഭിത്തികൾ, കലുങ്കുകൾ എന്നിവയുടെ ശോച്യാവസ്ഥ, സമീപ പുരയിടങ്ങളിലെ വൃക്ഷ ശിഖരങ്ങൾ, തെരുവുനായ്ക്കൾ തുടങ്ങിയ പ്രശ്നങ്ങളിൽ പരിഹാരം ഉണ്ടാക്കേണ്ടത് ഇതര സർക്കാർ വകുപ്പുകളാണ്. സ്കൂളുകളുടെ ഭൗതിക സാഹചര്യം മെച്ചപ്പെടുത്താനുള്ള പ്രവർത്തനങ്ങളിൽ ഇവ ഉൾപ്പെടാറില്ല. ഇക്കാരണം കൊണ്ടുതന്നെ ഇത്തരം പ്രശ്നങ്ങൾ സുരക്ഷ ഓഡിറ്റിന്‍റെ ഭാഗമാകാനിടയില്ല. കഴിഞ്ഞ ദിവസങ്ങളിൽ സുരക്ഷയുമായി ബന്ധപ്പെട്ടു പ്രഥമാധ്യാപകരിൽ നിന്നു വിവരങ്ങൾ തേടിയപ്പോഴും സ്കൂൾ കെട്ടിടങ്ങളുടെ നിലവാരം, വൈദ്യുതി പ്രശ്നങ്ങൾ തുടങ്ങിയവയാണ് പ്രധാനമായും ഉൾപ്പെടുത്തിയിട്ടുള്ളത്. സ്കൂൾ വളപ്പുകളിൽ ഉപയോഗശൂന്യമായ കെട്ടിടങ്ങൾ പൊളിച്ചുനീക്കുന്നതിൽ പോലും നേരിട്ടുള്ള തീരുമാനം സുരക്ഷ ഓഡിറ്റിന്‍റെ ഭാഗമായി ഉണ്ടാകാനിടയില്ല. പഴയ കെട്ടിടങ്ങൾ പൊളിച്ചു നീക്കാൻ വിദ്യാഭ്യാസ വകുപ്പിന്‍റെ നിലവിലുള്ള ചട്ടങ്ങൾക്കുള്ളിൽ നിന്നു മാത്രമേ നടപടികളെടുക്കാനാകൂവെന്ന നിലപാടാണ് വിദ്യാഭ്യാസ ഓഫീസർമാർ സ്വീകരിക്കുന്നത്. മൈലപ്ര സ്കൂൾ വഴിയിൽ കൈവരി തകർന്ന കലുങ്ക് മൈലപ്ര: നൂറു കണക്കിനു വിദ്യാർഥികൾ കടന്നു പോകുന്ന മൈലപ്ര ജംഗ്ഷൻ - വല്യയന്തി - കടമ്മനിട്ട റോഡിലെ സ്കൂൾ ജംഗ്ഷനിലെ കലുങ്കിന്‍റെ കൈവരി നഷ്ടപ്പെട്ടിട്ട് വർഷങ്ങളായി. എസ്എച്ച് സ്കൂളിനു സമീപത്തെ തോടിനു കുറുകെയുള്ള കലുങ്കാണ് അപകടാവസ്ഥയിലായിരിക്കുന്നത്. എട്ടുവർഷം മുന്പ് കലുങ്കിന്‍റെ കൈവരി നഷ്ടപ്പെട്ടതാണെന്നും ഇതു പുനഃസ്ഥാപിക്കുന്നതിലേക്ക് നിരവധി പരാതികൾ നൽകിയതായും പൊതു പ്രവർത്തകനായ ഗീവർഗീസ് തറയിൽ പറഞ്ഞു. സ്കൂൾ ബസുകളും നിരവധി വാഹനങ്ങളും കടന്നുപോകുന്ന പാതയാണിത്. റോഡ് ജില്ലാ പഞ്ചായത്തിന്‍റെ ചുമതലയിലാണെങ്കിലും മുന്പ് പിഡബ്ല്യുഡി പണികഴിപ്പിച്ചതാണ് കലുങ്ക്. കലുങ്കിന് വീതി കൂട്ടി പുനർനിർമിക്കണമെന്നാവശ്യവുമുണ്ട്. സ്കൂളിനു സമീപത്തെ കലുങ്കിലൂടെ കുട്ടികൾ കാൽനട യാത്രയായും സഞ്ചരിക്കാറുണ്ട്. സ്കൂൾ ഗ്രൗണ്ടിലേക്കും ഹയർ സെക്കൻഡറി സ്കൂളിലേക്കുമൊക്കെ കുട്ടികൾ കലുങ്ക് കടന്നുവേണം പോകാൻ. ഒരു വാഹനത്തിനു കഷ്ടിച്ചു കടന്നപോകാൻ കഴിയുന്ന കലുങ്കാണിത്. വാഹനങ്ങൾ വരുന്പോൾ കുട്ടികൾ ഓടിമാറുകയാണ് പതിവ്. പലപ്പോഴും തെരുവുനായ്ക്കളും കലുങ്കിനു സമീപത്തു തന്പടിക്കാറുണ്ട്. ഇവയെ കണ്ട് ഭയന്ന് കുട്ടികൾ ഓടിമാറുന്നതും പതിവുകാഴ്ച. കൈവരികൾ നഷ്ടപ്പെട്ട പാലത്തിൽ നിന്നു വീഴാതെ കുട്ടികൾ തലനാരിഴയ്ക്കാണ് പലപ്പോഴും രക്ഷപ്പെടുന്നത്. ചീക്കനാൽ സ്കൂൾ വളപ്പിൽ കിണറിനു സംരക്ഷണം ഒരുക്കാൻ ആറുമാസം ഓമല്ലൂർ: ചീക്കനാൽ ഗവൺമെന്‍റ് എൽപി സ്കൂളിനുവേണ്ടി നിർമിച്ച കിണർ ഉ‍യർത്തിക്കെട്ടാനുള്ള നടപടിക്രമങ്ങൾ പൂർത്തീകരിക്കാൻ വേണ്ടിവന്നത് ആറുമാസം. 1.5 ലക്ഷം രൂപയുടെ ജോലി തുടങ്ങാൻ കരാറുകാരൻ കാലതാമസം വരുത്തുകയായിരുന്നെന്നാണ് ആക്ഷേപം. കരാർ കാലാവധി ആറുമാസമുള്ളതിനാൽ സ്കൂൾ വളപ്പിലായാലും കിണർ അങ്ങനെ തന്നെ കിടക്കട്ടേയെന്ന് അധികൃതരും കരുതിയിട്ടുണ്ടാകാം. കഴിഞ്ഞയാഴ്ച കൊല്ലം തേവലക്കരയിൽ സ്കൂൾ വളപ്പിൽ വിദ്യാർഥി ഷോക്കേറ്റു മരിച്ചതിനു പിന്നാലെ നടന്ന അന്വേഷണങ്ങളിലാണ് ചീക്കനാൽ സ്കൂൾ വളപ്പിലെ കിണർ അധികൃതരുടെ ശ്രദ്ധയിൽപെട്ടത്. കഴിഞ്ഞ ജനുവരിയിൽ നിർമിച്ച കിണറാണ്. ചുറ്റുമതിൽ നിർമിക്കാനും അന്നേ ഓമല്ലൂർ ഗ്രാമപഞ്ചായത്തിൽ നിന്നു പണം അനുവദിച്ചതാണ്. ഏപ്രിലിൽ ടെൻഡറായി. കരറെടുത്തയാൾ പണികൾ വൈകിപ്പിച്ചു. സംഭവം വിവാദമായതോടെ ഇന്നലെ സാധന സാമഗ്രികൾ ഇറക്കിയിട്ടുണ്ട്. സ്കൂളിനു സമീപം പ്രവർത്തിക്കുന്ന അങ്കണവാടിക്കും കുട്ടികളുടെ കളിക്കളത്തിനും മധ്യത്തിലാണ് കിണർ. കിണറിനു മുകളിലേക്ക് കെട്ട് ഇല്ലാത്തതിനാൽ വല കെട്ടിയാണ് അപകടം ഒഴിവാക്കിയിരിക്കുന്നത്. കുട്ടികളാരും അങ്ങോട്ട് പോകുന്നില്ലെന്ന് ഉറപ്പാക്കേണ്ട ചുമതല അധ്യാപകർക്കാണ്. തടിവിരിച്ച് സുരക്ഷ ഒരുക്കിയശേഷമാണ് കിണറിനു ചുറ്റും വലകൊണ്ട് സംരക്ഷണം ഒരുക്കിയിരുന്നത്. പിഎം റോഡ് ഫുട്പാത്തിൽ കാലിടറിയാൽ സ്കൂൾ മുറ്റത്തേക്ക് വീഴും റാന്നി: പുനർനിർമിച്ച പിഎം റോഡിൽ റാന്നി - വൈക്കം ഗവൺമെന്‍റ് യുപി സ്കൂളിന്‍റെ മുന്നിലെ ഫുട്പാത്തിൽ കാലിടറിയാൽ വീഴുന്നത് സ്കൂൾ മുറ്റത്തേക്കായിരിക്കും. റോഡ് നവീകരിച്ചപ്പോൾ സ്കൂളും റോഡും തമ്മിലുള്ള ഉയരം വർധിച്ചു. ഇതോടെ സംരക്ഷണ ഭിത്തി ഉയർത്തിക്കെട്ടിയെങ്കിലും ഫുട്പാത്തിനു കൈവരി പൂർണമായി നിർമിക്കാൻ മറന്നുപോയി. സംസ്ഥാന പാതയോടു ചേർന്ന് വൈക്കം യുപി സ്കൂളിന്‍റെ പ്രൈമറി വിഭാഗം സ്ഥിതി ചെയ്യുന്ന ഭാഗത്ത് കൈവരിയില്ല. റോഡിനോടു ചേർന്ന ഭാഗത്ത് കൈവരി പൂർണമായി സ്ഥാപിച്ചിട്ടുണ്ട്. എന്നാൽമറുവശത്തും കൈവരി വേണമെന്ന കാര്യം കരാറുകാർ മറന്നതു പോലെയായി. ഇതോടെ കോണുകൾ വച്ച് മുന്നറിയിപ്പ് നൽകിയിരിക്കുകയാണ്. കോടിക്കണക്കിനു രൂപ ചെലവഴിച്ചു പുനർനിർമിച്ച പാതയോരത്താണ് ഇതേപോലെയുള്ള അപകട സാധ്യത നിലനിൽക്കുന്നത്. കുട്ടികൾ അധികംപേരും റോഡിലൂടെ നടന്നുവരുന്നില്ലെന്നതാണ് ഏക ആശ്വാസം. എന്നാൽ നടപ്പാത ഉപയോഗിച്ച് ധാരാളം ആളുകൾ യാത്ര ചെയ്യുന്നുണ്ട്. കൈവരികൾ ഇല്ലാത്തതിനാൽ ഫുട്പാത്തിലൂടെ നടന്നുവരുന്നവർക്ക് കാല് തെറ്റിയാൽ അപകടത്തിൽപ്പെടുമെന്നുറപ്പാണ്.

എൻജിഒ അസോസിയേഷൻ സ്നേഹസംഗമം

പത്തനംതിട്ട: എൻജിഒ അസോസിയേഷൻ ജില്ലാ കമ്മിറ്റിയുടെ സാമൂഹ്യ സേവന പദ്ധതിയുടെ ഭാഗമായി സ്നേഹ സംഗമവും സഹായ പദ്ധതികളുടെ വിതരണവും നടത്തി. പത്തനംതിട്ട മാർ ഗ്രിഗോറിയോസ് ശാന്തി സദനത്തിൽ മുൻ മുഖ്യമന്ത്രി ഉമ്മൻചാണ്ടിയുടെ രണ്ടാം ചരമ വാർഷികവുമായി ബന്ധപ്പെട്ട് നടത്തിയ സ്നേഹ സംഗമം കെപിസിസി ജനറൽ സെക്രട്ടറി പഴകുളം മധു ഉദ്ഘാടനം ചെയ്തു. ജില്ലാ പ്രസിഡന്‍റ് അജിൻ ഐപ്പ് ജോർജ് അധ്യക്ഷത വഹിച്ചു. ജില്ലാ സെക്രട്ടറി ഷിബു മണ്ണടി, ജില്ലാ ട്രഷറർ ജി. ജയകുമാർ, ഐഎൻടിയു സി അടൂർ നിയോജക മണ്ഡലം പ്രിസിഡന്‍റ് സുരേഷ് കുഴുവേലിൽ, ശാന്തി സദനം ഡയറക്ടർ ബർസ്കീപ്പ റമ്പാൻ, ഡിസിസി മെംബർ ഏബൽ മാത്യു, ജില്ലാ വൈസ് പ്രസിഡന്‍റ് വിഷ്ണു സലിംകുമാർ, ഡി. ഗീത , ജോയിന്‍റ് സെക്രട്ടറി ദിലിപ് ഖാൻ, പിക്കു വി. സൈമൺ, എം.വി. തുളസീരാധ, സോഫി കെ. തമ്പാൻ, കെ ഷാജൻ, ബി. അനിൽകുമാർ തുടങ്ങിയവർ പ്രസംഗിച്ചു.

പി. രവിവർമ പുരസ്കാരം എം.എൻ. സുഹൈബിന്

പന്തളം: സാഹിത്യകാരനും യാത്രികനും പബ്ലിക് റിലേഷൻസ് വകുപ്പ് ഡെപ്യൂട്ടി ഡയറക്ടറുമായിരുന്ന പി. രവിവർമയുടെ സ്മരണാർഥം പന്തളം പാലസ് വെൽഫെയർ സൊസൈറ്റി ഏർപ്പെടുത്തിയ പുരസ്‌കാരത്തിന് എം.എൻ. സുഹൈബ് അർഹനായി. യാത്രാവിവരണ ഗ്രന്ഥത്തിനാണ് പുരസ്‌കാരം ഏർപ്പെടുത്തിയിട്ടുള്ളത്. സുഹൈബിന്‍റെ അറേബ്യയും തുർക്കിയും-ഒരു യാത്ര എന്ന പുസ്തകമാണ് പുരസ്‌കാരത്തിനായി തെരഞ്ഞെടുത്ത്. 25,000 രൂപയും ഫലകവും പ്രശസ്തിപത്രവും അടങ്ങുന്നതാണ് പുരസ്‌കാരം. ഒ.കെ. ജോണി, കെ.ബി. പ്രസന്നകുമാർ, സുഭാഷ് വലവൂർ എന്നിവർ ഉൾപ്പെട്ട സമിതിയാണ് പുരസ്‌കാര നിർണയം നടത്തിയത്. പത്രപ്രവർത്തകനും തിരുവനന്തപുരം സ്വദേശിയുമാണ് എം.എൻ. സുഹൈബ്. പുരസ്‌ക്കാര ദാനം 25-ന് വൈകുന്നേരം അഞ്ചിന് പന്തളം വലിയകോയിക്കൽ ധർമശാസ്താ ക്ഷേത്രത്തിന് സമീപമുള്ള പാലസ് വെൽഫെയർ സൊസൈറ്റി ഹാളിൽ മന്ത്രി പി. പ്രസാദ് നിർവഹിക്കുമെന്ന് ഭാരവാഹികൾ അറിയിച്ചു.

വിഎസ് ജനവികാരം അറിഞ്ഞു പ്രവർത്തിച്ച നേതാവ്: മാർത്തോമ്മ മെത്രാപ്പോലീത്ത

തിരുവല്ല:സമരങ്ങളിലൂടെ നടന്നു നീങ്ങിയ ജനവികാരത്തിന്‍റെ നേതാവായിരുന്നു മുൻ മുഖ്യമന്ത്രി വി.എസ്. അച്യുതാനന്ദനെന്ന് ഡോ. തിയഡോഷ്യസ് മാർത്തോമ്മ മെത്രാപ്പോലീത്ത. സാമൂഹിക പ്രതിബദ്ധതയുള്ള നിരവധി വിഷയങ്ങളിൽ അദ്ദേഹം ഇടപെട്ടിരുന്നു. പ്രതിപക്ഷ നേതാവായും മുഖ്യമന്ത്രിയായും പ്രവർത്തിച്ച അദ്ദേഹം എല്ലാ അവസരങ്ങളിലും ജനത്തോടൊപ്പം നിന്നു. കുട്ടനാട്ടിലെ കർഷക തൊഴിലാളി സമരങ്ങളിലൂടെ വളർന്ന വിഎസ്, എല്ലാ തൊഴിലാളികളുടെയും ഉന്നമനത്തിനായി പ്രവർത്തിച്ചു. ജീവിതാനുഭവങ്ങളെ പാഠപുസ്തകമാക്കി പരിസ്ഥിതി, ഭൂസംരക്ഷണവുമൊക്കെ പ്രധാന വിഷയമാക്കി. വി.എസ്.അച്യുതാനന്ദന്‍റെ വിയോഗത്തോടെ കേരളത്തിന് നഷ്ടമായത് പാവപ്പെട്ടവന്‍റെയും സാധാരണക്കാരന്‍റെയും ശബ്ദമാണെന്ന് മെത്രാപ്പോലീത്ത അനുസ്മരിച്ചു.

ദൃഢത നഷ്ടമാകാതെ വിഎസ് -കെസിആർ ബന്ധം

കോഴഞ്ചേരി: പത്തനംതിട്ട ജില്ലയിൽ താൻ വിശ്വസ്തരായ കണ്ട നേതാക്കളിൽ പ്രഥമസ്ഥാനം കെസിആറെന്ന കെ.സി. രാജഗോപാലന് വി.എസ്. അച്യുതാനന്ദൻ നൽകിയിരുന്നു. പാർട്ടിയിലെ ചേരിതിരിവിൽ പത്തനംതിട്ട ജില്ല ഏറെക്കാലവും വിഎസ് പക്ഷത്തു നിലനിന്നതിൽ കെസിആറിനുള്ള പങ്ക് വിഎസിനു നന്നായി അറിയാമായിരുന്നു. പഴയ ആലപ്പുഴ ജില്ലയിൽ നിന്നു തുടങ്ങിയതാണ് ബന്ധം. മെഴുവേലിയിലെ പാർട്ടി പ്രവർത്തനത്തിൽ താഴെത്തട്ടിൽ നിന്നായിരുന്നു കെസിആറിന്‍റെ വളർച്ച. കൈപിടിച്ചത് സാക്ഷാൽ വിഎസും. സിഐടിയു നേതാവായിരുന്നപ്പോഴും പാർട്ടിയിലെ വിഎസ് പക്ഷക്കാരനായി അദ്ദേഹം വളർന്നു. അച്യുതാനന്ദന്‍റെ മനഃസാക്ഷി സൂക്ഷിപ്പുകാരനായി കെസിആറിനെ മറുചേരി കണ്ടു. ജില്ലയിലെ പല നേതാക്കളും മാറിയും തിരിഞ്ഞും വിഎസ് പക്ഷത്തും അല്ലാതെയുമൊക്കെ നിലനിന്നപ്പോഴും കെ.സി. രാജഗോപാൽ ഉറച്ചു നിന്നു. സിപിഎമ്മിൽ ജില്ലാ കമ്മിറ്റിയിലും സെക്രട്ടേറിയറ്റിൽ രണ്ടാം സ്ഥാനത്തുമൊക്കെ അദ്ദേഹം എത്തി. 2006ലെ നിയമസഭ തെരഞ്ഞെടുപ്പിൽ ആറന്മുള മണ്ഡലത്തിൽ സിപിഎം സ്ഥാനാർഥിയുമായി. താൻ ആറന്മുള എംഎൽഎ ആയപ്പോൾ വി.എസ്. അച്യുതാനന്ദൻ കേരളത്തിന്‍റെ മുഖ്യമന്ത്രി പദവിയിലുമെത്തിയപ്പോൾ കെ.സി. രാജഗോപാലിന് ഏറെ അഭിമാനം പകരുന്നതായി. സ്വന്തം മണ്ഡലത്തിലെ വികസന ആവശ്യങ്ങളെ മുഖ്യമന്ത്രി ഏറെ പിന്തുണച്ചത് കെസിആർ ഓർക്കുന്നു. ആറന്മുള സഹകരണഎൻജിനിയറിംഗ് കോളജ്, സഹകരണ കോളജ് എന്നിവ ഇക്കാലയളവിൽ തുടങ്ങിയ സ്ഥാപനങ്ങളാണ്. ഇലവുംതിട്ട പോലീസ് സ്റ്റേഷൻ, വനിത ഐടിഐ എന്നിവയും മണ്ഡലത്തിനു ലഭിച്ചു. ആറന്മുള വിമാനത്താവളത്തിന്‍റെ പ്രാഥമികാനുമതി 2010ൽ വി.എസ്. അച്യുതാനന്ദൻ നൽകിയെന്നതു വിവാദമായപ്പോഴേക്കും പാർട്ടിയിൽ കെ.സി. രാജഗോപാലിനു കുറ്റപ്പെടുത്തലുകൾ നേരിടേണ്ടിവന്നു. 2011ലെ നിയമസഭ തെരഞ്ഞെടുപ്പിൽ എൽഡിഎഫ് വിമാനത്താവളം പ്രചാരണ ആയുധവുമാക്കിയിരുന്നു. എന്നാൽ പരിസ്ഥിതി പ്രത്യാഘാതങ്ങൾ ഏറെയുള്ള വൻ പദ്ധതിയാണ് ആറന്മുളയിൽ സ്വകാര്യ കന്പനി വിഭാവനം ചെയ്യുന്നതറിഞ്ഞപ്പോൾ പാർട്ടി നിലപാട് മാറ്റി. പരിസ്ഥിതിയെ തകർത്തുള്ള വികസനത്തോടു പാർട്ടിക്കുള്ള എതിർപ്പ് പ്രകടമാക്കി വി.എസ്. അച്യുതാനന്ദൻ തന്നെ ആറന്മുള വിമാനത്താവള വിരുദ്ധ സമരത്തിൽ അണിചേർന്നു.

ആത്മഹത്യാ പ്രേരണക്കുറ്റം ചുമത്തി കേസെടുക്കണം: ഡിസിസി

പത്തനംതിട്ട: കൊടുമൺ രണ്ടാംകുറ്റി സ്വദേശിനിയായ വീട്ടമ്മ ജീവനൊടുക്കുകയും ഭർത്താവും മകനും ആത്മഹത്യയ്ക്കു ശ്രമിക്കുകയും ചെയ്ത സംഭവത്തിനുത്തരവാദികളായ ഇസാഫ് ബാങ്ക് അധികൃതർക്കെതിരേ കൊലക്കുറ്റത്തിനു കേസെടുക്കണമെന്ന് ഡിസിസി പ്രസിഡന്‍റ് പ്രഫ.സതീഷ് കൊച്ചുപറന്പിൽ ആവശ്യപ്പെട്ടു. 70,000 രൂപ വായ്പയെടുത്തു കുടിശിക ആയതിന്‍റെ പേരിലാണ് ഒരു കുടുംബം ജീവനൊടുക്കാൻ ശ്രമിച്ചതും വീട്ടമ്മ മരിച്ചതും. സ്വകാര്യ ബാങ്കുകളും സഹകരണ സ്ഥാപനങ്ങളും കൊള്ളപ്പലിശക്കാരും ബ്ലേഡ് മാഫിയകളുമായിട്ടാണ് പ്രവർത്തിക്കുന്നതെന്ന് ഡിസിസി പ്രസിഡന്‍റ് കുറ്റപ്പെടുത്തി. കൊടുമണ്ണിലെ ആത്മഹത്യാ സംഭവത്തിൽ കുറ്റക്കാർക്കെതിരേനടപടിയും കുടുംബത്തിന് ധനസഹായവും ഉണ്ടായില്ലെങ്കിൽ ജില്ലയിലെ ഇസാഫ് ബാങ്ക് ശാഖകൾ ഉപരോധിക്കുന്നത് ഉൾപ്പെടെ ശക്തമായ സമര പരിപാടികൾ കോൺഗ്രസ് സംഘടിപ്പിക്കുമെന്ന് ജനറൽ സെക്രട്ടറി സാമുവേൽ കിഴക്കപുറം അറിയിച്ചു.

ബാങ്ക് വായ്പയിലെ ഭീഷണി; ജീവനൊടുക്കാൻ ശ്രമിച്ചവരുടെ ആരോഗ്യനില മെച്ചപ്പെട്ടു

മരിച്ച ലീലയുടെ സംസ്കാരം ഇന്ന് കൊടുമൺ: സ്വകാര്യ ബാങ്ക് ജീവനക്കാരുടെ ഭീഷണിയേ തുടർന്ന് ആത്മഹത്യയ്ക്കു ശ്രമിച്ച് ഗുരുതരാവസ്ഥയിൽ കോട്ടയം മെഡിക്കൽ കോളജ് ആശുപത്രിയിൽ പ്രവേശിപ്പിച്ച അച്ഛന്‍റെയും മകന്‍റെയും ആരോഗ്യനിലയിൽ പുരോഗതി. കൊടുമൺ രണ്ടാം കുറ്റി വേട്ടക്കോട്ട് കിഴക്കേതിൽ നീലാംബരൻ (57), മകൻ ദിപിൻ കുമാർ (27) എന്നിവരാണ് ആശുപത്രിയിൽ ചികിൽസയിൽ കഴിയുന്നത്. നീലാംബരന്‍റെ ഭാര്യ ലീലയെ ( 48) വീടിനുള്ളിൽ തൂങ്ങി മരിച്ച നിലയിലും അച്ഛനെയും മകനെയും ഗുളിക കഴിച്ച് അബോധാവസ്ഥയിലും തിങ്കളാഴ്ച രാവിലെയാണ് കണ്ടെത്തിയത്. നീലാംബരനെയും മകനെയും മെഡിക്കൽ കോളജിലെത്തിക്കുകയായിരുന്നു. ഇസാഫ് ബാങ്ക് കൈപ്പട്ടൂർ ശാഖയിൽ നിന്നും എടുത്ത വായ്പയിൽ തിരിച്ചടവ് മുടങ്ങിയതിനേ തുടർന്നുള്ള ഭീഷണിയിൽ കുടുംബം മാനസിക സംഘർഷത്തിലായിരുന്നുവെന്ന് പറയുന്നു. ഇതേത്തുടർന്ന് ജീവനൊടുക്കാൻ തീരുമാനിച്ചുവെന്നാണ് മൊഴി. 70,000 രൂപ അടയ്ക്കാനുള്ള തായാണ് പറയുന്നത്. ഇതിനിടെ ഇന്നലെ മട്ടാഞ്ചേരിയിലുള്ള ജെയിൻ ഫൗണ്ടേഷൻ എന്ന ചാരിറ്റബിൾ സംഘടന 80,000 രൂപ നീരാലംബരനു കൈമാറി. ഇതുപയോഗിച്ച് ബാങ്ക് വായ്പ അടയ്ക്കാനാണ് തീരുമാനം. മരിച്ച ലീലയുടെ സംസ്കാരം ഇന്ന് മൂന്നിന് നടക്കും. നീരാലംബരനെയും ദിപിൻ കുമാറിനെയും സംസ്കാര ചടങ്ങുകൾക്കായി ഇന്ന് വീട്ടിലെത്തിക്കും.

അല്‍ഫോന്‍സാമ്മ വചനാധിഷ്ഠിത ജീവിതം നയിച്ചവൾ: ബിഷപ് സാമുവൽ മാർ ഐറേനിയസ്

ഭരണങ്ങാനം: ദൈവത്തിന്‍റെ വചനം പരിപൂര്‍ണമായി അനുസരിക്കുകയും ആഘോഷിക്കുകയും ജീവിക്കുകയും ചെയ്ത പരിശുദ്ധ അമ്മയുടെ മാതൃകയില്‍ തന്‍റെ ജീവിതത്തെ ചിട്ടപ്പെടുത്തിയ മകളാണ് വിശുദ്ധ അല്‍ഫോന്‍സാമ്മയെന്ന് പത്തനംതിട്ട രൂപത ബിഷപ് സാമുവല്‍ മാര്‍ ഐറേനിയസ്. വിശുദ്ധ അല്‍ഫോന്‍സാമ്മയുടെ തിരുനാളിന്‍റെ നാലാം ദിനമായ ഇന്നലെ തീര്‍ഥാടന ദേവാലയത്തില്‍ വിശുദ്ധ കുര്‍ബാന അര്‍പ്പിച്ച് സന്ദേശം നല്‍കുകയായിരുന്നു ബിഷപ്. പ്രത്യാശയില്ലാത്ത ഒരു സമൂഹത്തില്‍ പ്രത്യാശയുടെ പ്രവാചകയാണ് അല്‍ഫോന്‍സാമ്മയെന്ന് താമരശേരി രൂപത ബിഷപ് മാര്‍ റെമീജിയോസ് ഇഞ്ചനാനിയില്‍ വിശുദ്ധ കുര്‍ബാന മധ്യേ നല്‍കിയ സന്ദേശത്തില്‍ പറഞ്ഞു. ഇന്നലെ ഫാ. അലക്‌സ് മൂലക്കുന്നേല്‍, ഫാ. ജോസഫ് കീരഞ്ചിറ, ഫാ. അഗസ്റ്റിന്‍ കൂട്ടിയാനി, ഫാ. മാത്യു കോലത്ത്, ഫാ. സിറിയക് പുത്തേട്ട്, ഫാ. വിന്‍സെന്‍റ് കദളിക്കാട്ടില്‍ പുത്തന്‍പുര, ഫാ. ജോസഫ് വടക്കേക്കുറ്റ് എന്നിവര്‍ വിശുദ്ധ കുര്‍ബാന അര്‍പ്പിച്ചു. ഫാ. കുര്യാക്കോസ് വട്ടമുകളേല്‍ റംശാ പ്രാര്‍ഥനയ്ക്കും ഫാ. ജോസഫ് അട്ടാങ്ങാട്ടില്‍ ജപമാല പ്രദക്ഷിണത്തിനും കാര്‍മികത്വം വഹിച്ചു. ഇന്നത്തെ തിരുക്കർമങ്ങൾ രാവിലെ 5.30, 6.45, 8.30, 10.00, ഉച്ചകഴിഞ്ഞ് 2.30, 3.30, 5.00, രാത്രി 7.00 - വിശുദ്ധ കുര്‍ബാന. രാവിലെ 11.30ന് ഷംഷാബാദ് രൂപത സഹായ മെ ത്രാന്‍ മാര്‍ ജോസഫ് കൊല്ലംപറമ്പില്‍ വിശുദ്ധ കുര്‍ബാന അര്‍പ്പിച്ച് സന്ദേശം നല്‍കും. വൈകുന്നേരം 4.30ന് റംശാ. 6.15ന് ജപമാല പ്രദക്ഷിണം.

കോന്നി ആനത്താവളത്തിൽ ആന ഇടഞ്ഞു

പത്തനംതിട്ട: കോന്നി ആനത്താവളത്തിൽ പ്രഭാത നടത്തത്തിനിടെ ആന ഇടഞ്ഞു. ആനത്താവളത്തിലെ കൃഷ്ണയെന്ന ആനയാണ് ഇടഞ്ഞത്. ഇന്നലെ രാവിലെ പത്തോടെ ആയിരുന്നു സംഭവം. രാവിലെ പ്രഭാത നടത്തത്തിനിടെ ആറു തവണ നടത്തിച്ച ശേഷം ഏഴാം തവണ നടക്കുന്നതിനിടെ ആന പാപ്പാൻമാരുടെ കണ്ണ് വെട്ടിച്ച് വിരണ്ട് ഓടുകയായിരുന്നു. ആനത്താവളത്തിലെ പാർക്കിംഗ് ഗ്രൗണ്ടിൽ എത്തിയ കൃഷ്ണയെ പാപ്പാൻമാർ പിന്തുടർന്ന് എത്തി തളയ്ക്കുകയായിരുന്നു. തുടർന്ന് ആനയെ കാലുകൾ കയർ കൊണ്ട് ബന്ധിച്ച് പാർക്കിംഗ് ഗ്രൗണ്ടിലെ മരത്തിൽ തളച്ചതിനു ശേഷം ശാന്തമായപ്പോൾ തറിയിലേക്ക് മാറ്റിത്തളച്ചു. കോന്നി ആനത്താവളത്തിന് അവധി ആയിരുന്നതിനാൽ സഞ്ചാരികൾ ഉണ്ടായിരുന്നില്ല.

മരമടി ആവേശം കൈവിടാതെ ആനന്ദപ്പള്ളി; അനുമതി വേണമെന്ന ആവശ്യവുമായി കർഷക സമിതി

പത്തനംതിട്ട: സംസ്ഥാനത്തെ ഏറ്റവും പ്രധാനപ്പെട്ട കാർഷിക ഉൽസവമായിരുന്ന ആനന്ദപ്പള്ളി മരമടി മുടങ്ങിയിട്ട് 17 വർഷമായെങ്കിലും പ്രദേശവാസികളുടെ ആവേശം കെട്ടടങ്ങിയിട്ടില്ല. മരമടി വീണ്ടുമെത്തുമെന്ന പ്രതീക്ഷയിലാണ് ആനന്ദപ്പള്ളി ഗ്രാമവാസികൾ. ചേറ്റുകണ്ടത്തിൽ കാളക്കൂറ്റൻമാർ നുകം കെട്ടി പായുന്ന കാഴ്ച കാണാൻ കർഷകരും വിദേശ ടൂറിസ്റ്റുകളും ഉൾപ്പെടെ നൂറുകണക്കിന് ആളുകളാണ് എത്തിയിരുന്നത്. മൃഗങ്ങളോടുള്ള ക്രൂരത അവസാനിപ്പിക്കണമെന്നും അവയെ ഉപയോഗിച്ചുള്ള ഓട്ടമത്സരങ്ങൾ പാടില്ലെന്നുമുള്ള നിർദേശങ്ങളുണ്ടായതിനു പിന്നാലെ തമിഴ്നാട്ടിലെ ജെല്ലിക്കെട്ട് നിരോധിച്ചപ്പോഴാണ് 60 വർഷമായി നടന്നു വന്ന പരമ്പരാഗത കാർഷിക ഉത്സവമായ ആനന്ദപ്പള്ളി മരമടി ഉത്സവത്തിനും തിരശീല വീണത്. ചിങ്ങക്കൊയ്ത്ത് കഴിഞ്ഞ് ഓഗസ്റ്റ് 15 നാണ് മരമടി നടത്തിയിരുന്നത്. അടൂർ പുതുവീട്ടിൽ പടി ഏലാ കേന്ദ്രീകരിച്ച് 1950 ലാണ് മരമടി ഉത്സവം ആരംഭിച്ചത്. പിന്നീട് അമ്പിയിൽ ഏലായിലേക്ക് എത്തി. അവിടത്തെ സ്ഥലപരിമിതി കാരണം ആനന്ദപ്പള്ളിയിൽ കർഷക സമിതി രൂപീകരിച്ച് മരമടി ഏറ്റെടുത്തു. 1986ലാണ് ആനന്ദപ്പള്ളി പാലശേരി ഏലായിൽ മരമടി ഉത്സവം ആരംഭിച്ചത്. കാർഷിക സംസ്കാരത്തിന്‍റെ പുനർജ്ജനി കൃഷിയിലുള്ള ആവേശം കെട്ടടങ്ങരുതെന്ന സന്ദേശമാണ് മരമടിയിലൂടെ കർഷകർ മുന്നോട്ടുവച്ചിരുന്നതെന്ന് കർഷക സമിതി ഭാരവാഹികൾ ചൂണ്ടിക്കാട്ടി. ആനന്ദപ്പള്ളിയിലെ കർഷകരുടെ ആവേശമായിരുന്നു ഉത്സവം. ഏലാകളെ സജീവമാക്കുന്നതിനും ഉഴവുകാളകളെ സംരക്ഷിക്കുന്നതിനും മരമടി വഴിതെളിച്ചിരുന്നു. മരമടിയിൽ പങ്കെടുക്കുന്ന ഉരുക്കളുടെ വിജയം തങ്ങളുടെ വിജയമായി കർഷകർ കണക്കാക്കുന്നു. 2008 ലാണ് ആനന്ദപ്പള്ളി മരമടി നിലച്ചത്. മരമടിയെ സ്നേഹിക്കുന്ന ആയിരങ്ങളെ ഇതു നിരാശയിലാക്കി . നിയമങ്ങളിൽ ഇളവ് പ്രഖ്യാപിച്ച 2017 മുതൽ ഉത്സവം പുനരാരംഭിക്കണമെന്ന് ആവശ്യപ്പെട്ട് ആനന്ദപ്പള്ളി കർഷക സമിതിയും രംഗത്തുണ്ട്. ആരും അറിയാത്ത പ്രയത്നങ്ങളും കഷ്ടപ്പാടുകളുമാണ് ഈ ഉത്സവത്തിന്‍റെ പിന്നിലുള്ളത്. അനേകം മനുഷ്യരുടെ കഠിനാധ്വാനവും അതിലേറെ സാമ്പത്തിക പ്രശ്നങ്ങളും ഇതിലുണ്ട്. മരമടിക്ക് മുന്നോടിയായി പാടം ഉഴുതുമറിച്ച് വൃത്തിയാക്കണം. ഉരുക്കളെ പോഷകാഹാരം നൽകി വളർത്തിക്കൊണ്ടുവരണം. ലക്ഷണമൊത്ത ഒരു ജോടി ഉരുക്കൾക്കു ലക്ഷങ്ങളാണ് ഇപ്പോൾ വില. ഇവയെ വാങ്ങാൻ കേരളം വിട്ട് പോക്ടിയും വരുന്നു. ഉരുക്കൾക്ക് ചിട്ടയായ ആഹാര രീതിയും തരപ്പെടുത്തേണ്ടതുണ്ട്. ഒരു മാസം മുൻപ് പ്രത്യേക പരിശീലനവും ആഹാരവും നൽകിത്തുടങ്ങണം. ഉരുക്കൾക്ക് ഒപ്പം ഓടുന്നവരെ പണം കൊടുത്ത് ബുക്ക് ചെയ്യണം. ഇങ്ങനെ വൻ സാമ്പത്തിക ബാധ്യതയാണ് ഉണ്ടാകുന്നതെങ്കിലും കർഷകർക്ക് ഇത് ഒരു ആവേശമായിരുന്നു. മൃഗ പീഡനം മരമടിയിൽ ഇല്ല മൃഗപീഡനമാണ് ഇവിടെ നടക്കുന്നതെന്നുള്ള വാദം കർഷകർ നിഷേധിക്കുന്നു. ഉരുക്കളുടെ. ആരോഗ്യ സംരക്ഷണത്തിനും ഊർജ്ജത്തിനും അങ്ങാടി മരുന്ന്, പാൽ, മുതിര, മുട്ട, അരിക്കഞ്ഞി, കരിക്ക്, ബാർലി, കടല, പരുത്തിപ്പിണ്ണാക്ക് തുടങ്ങിയവയാണ് നൽകുന്നത്. ശരീര നൊമ്പരമുണ്ടാകാതിരിക്കാൻ ഉലുവ വേവിച്ച് കരിപ്പെട്ടിയിൽ കലർത്തിയും നൽകും. സുഖ ചികിത്സയുടെ ഭാഗമായി ശരീരശുദ്ധി വരുത്താൻ രാവിലെയും വൈകുന്നേരവും ആദ്യം വൈക്കോലും പിന്നീട് സോപ്പും തേച്ച് കുളിയുണ്ട്. മത്സര ദിവസത്തിന്‍റെ തലേന്ന് ക്ഷീണം ഉണ്ടാകാതിരിക്കാൻ ദശമൂലാരിഷ്ടവും നൽകും. നിയമസഭയിൽ ബില്ല് പാസാക്കണം ജെല്ലിക്കെട്ടിനു വേണ്ടി തമിഴ്നാട് യുവജനങ്ങൾ ശക്തമായി സമരം നടത്തിയതിന്‍റെ ഫലമായി കേന്ദ്ര സർക്കാർ 2017 ൽ കൊണ്ടുവന്ന നിയമത്തിൽ ഇളവ് വരുത്തുകയും അതത് സംസ്ഥാനങ്ങൾ ബില്ല് പാസക്കി ഇപ്രകാരമുള്ള കാർഷിക ഉത്സവങ്ങൾ നടത്തുന്നതിന് അനുമതി കൊടുക്കുകയുമാണ് ഇപ്പോൾ ചെയ്യുന്നത്. കേന്ദ്രം ഇളവു നൽകിയപ്പോൾ തന്നെ തമിഴ്‌നാട്, കർണാടക, മഹാരാഷ്ട്ര തുടങ്ങിയ സംസ്ഥാനങ്ങൾ അവരുടെ നിയമസഭകളിൽ ബില്ല് പാസാക്കി ഉത്സവം ആരംഭിച്ചു . 2017 മുതൽ എല്ലാവർഷവും അതു നടന്നു വരുന്നു. എന്നാൽ ബില്ല് പാസാക്കുന്നതിനായി സംസ്ഥാന സർക്കാരിനു കർഷക സമിതി അപേക്ഷ നൽകി. ഡെപ്യൂട്ടി സ്പീക്കർ ചിറ്റയം ഗോപകുമാർ മൂന്നു തവണ വിഷയം നിയമസഭയിൽ അവതരിപ്പിച്ചിരുന്നു. എന്നാൽ കേരള നിയമസഭ ബില്ല് പാസാക്കാൻ തയാറായില്ല. ബില്ല് പാസാക്കാൻ സംസ്ഥാനങ്ങൾക്ക് കേന്ദ്രസർക്കാർ നൽകിയ അവകാശത്തെ ചോദ്യം ചെയ്‌തു മൃഗ സ്നേഹികളുടെ സംഘടനകൾ സുപ്രീംകോടതിയെ സമീപിച്ചിരുന്നു. എന്നാൽ സുപ്രീംകോടതി അതു തള്ളുകയും സംസ്ഥാനങ്ങൾ ബില്ല് പാസാക്കുന്നതിനുള്ള അവകാശത്തെ ഉറപ്പിക്കുകയും ചെയ്‌തതാണ്. എന്നാൽ ചില ഉദ്യോഗസ്ഥർ തടസമായി നിൽക്കുകയാണെന്ന് ആനന്ദപ്പള്ളി കർഷക സമിതി ഭാരവാഹികൾ പറഞ്ഞു. അടുത്ത നിയമസഭാ സമ്മേളനത്തിൽ ബില്ല് പാസാക്കണമെന്ന് അവർ ആവശ്യപ്പെട്ടു. ഗ്രാമീണ ടൂറിസത്തിന്‍റെ സാധ്യത മുന്നിൽ കണ്ട് ഈ കാർഷിക ഉത്സവം തിരികെ കൊണ്ടുവരണമെന്നും ആനന്ദനപ്പള്ളി കർഷകസമതി പ്രസിഡന്‍റ് വർഗീസ് ദാനിയേൽ, സെക്രട്ടറി വി.കെ. സ്റ്റാൻലി, ഡോ. പി.സി. യോഹന്നാൻ, നിഖിൽ ഫ്രാൻസിസ്, വി.എസ്. ദാനിയേൽ എന്നിവർ പത്രസമ്മേളനത്തിൽ ആവശ്യപ്പെട്ടു.

ജില്ലയില്‍ 268 കുടുംബങ്ങള്‍ക്ക് പട്ടയം വിതരണം ചെയ്തു

പത്തനംതിട്ട: ജില്ലയില്‍ 268 കുടുംബങ്ങള്‍ക്ക് പട്ടയം വിതരണം ചെയ്തു. 'എല്ലാവര്‍ക്കും ഭൂമി, എല്ലാ ഭൂമിക്കും രേഖ, എല്ലാ സേവനങ്ങളും സ്മാര്‍ട്ട്' മുദ്രാവാക്യവുമായി റവന്യു വകുപ്പ് പത്തനംതിട്ട റോയല്‍ ഓഡിറ്റോറിയത്തില്‍ സംഘടിപ്പിച്ച മേളയില്‍ മന്ത്രി വീണാ ജോര്‍ജ്, എംഎല്‍എമാരായ കെ. യു. ജനീഷ് കുമാർ, പ്രമോദ് നാരായണ്‍ എന്നിവരില്‍ നിന്ന് പട്ടയം ഏറ്റുവാങ്ങി. അര്‍ഹരായ എല്ലാവര്‍ക്കും ഭൂമി ഉറപ്പാക്കുകയാണ് ലക്ഷ്യമെന്ന് ഓണ്‍ലൈനായി പട്ടയമേള ഉദ്ഘാടനം ചെയ്ത റവന്യുമന്ത്രി കെ. രാജന്‍ പറഞ്ഞു. ഒമ്പതു വര്‍ഷത്തിനിടെ 4.09 ലക്ഷം പട്ടയം വിതരണം ചെയ്തു. ഇതില്‍ 2.23 ലക്ഷവും കഴിഞ്ഞ നാലു വര്‍ഷത്തിനിടെ നല്‍കിയതാണെന്ന് മന്ത്രി ചൂണ്ടിക്കാട്ടി. പട്ടയം അസംബ്ലി സംഘടിപ്പിച്ച് ഭൂരഹിതരെ കണ്ടെത്തി അര്‍ഹരായവര്‍ക്ക് രേഖ നല്‍കി. ജില്ലകളില്‍ പരിഹാരമാകാത്ത വിഷയത്തിന് സംസ്ഥാനതലത്തില്‍ തീരുമാനമാക്കി. പട്ടയഡാഷ് ബോര്‍ഡില്‍ ആവശ്യക്കാരെ ഉള്‍പ്പെടുത്തി ഭൂമി ഉറപ്പാക്കി. പട്ടയവിഷയത്തില്‍ സംസ്ഥാന സര്‍ക്കാര്‍ നേരിട്ട് നടപടി എടുക്കേണ്ടവയാണ് പട്ടയഡാഷ് ബോര്‍ഡില്‍ ഉള്‍പ്പെടുത്തിയത്. വില്ലേജ്, താലൂക്ക്, ജില്ല, സംസ്ഥാന തലങ്ങളിലൂടെ വിവിധ ഘട്ടങ്ങളിലായി നിയമവശം പരിശോധിച്ച് നൂലാമാലകള്‍ പരിഹരിച്ചതായും മന്ത്രി പറഞ്ഞു. ബോധപൂര്‍വമായി ഭൂമി കൈയേറ്റം നടത്തുന്നവര്‍ക്കെതിരേ സര്‍ക്കാര്‍ നടപടിയെടുത്തു. കൈയേറ്റം ഒഴിപ്പിച്ച് സാധാരണക്കാര്‍ക്ക് ഭൂമി നല്‍കും. പട്ടയ അര്‍ഹതയുടെ വരുമാന പരിധി 2.5 ലക്ഷമാക്കി ഉയര്‍ത്തും. ഡിജിറ്റല്‍ റീസര്‍വേ സംസ്ഥാനത്ത് പുരോഗമിക്കുന്നു. ഭൂമിയുടെ ഉടമസ്ഥത പരിശോധിച്ച് അര്‍ഹരായവര്‍ക്ക് നല്‍കുകയാണ് ലക്ഷ്യം. ഓരോ കുടംബത്തിനും ഡിജിറ്റല്‍ റവന്യു കാര്‍ഡ് നല്‍കും. ഒരു വ്യക്തിയുടെ പേരില്‍ ഭൂമി, നികുതി, കെട്ടിട വിവരം, ഭൂമിയുടെ തരം തുടങ്ങിയ എല്ലാ വിവരവും ചിപ്പ് ഘടിപ്പിച്ച കാര്‍ഡ് രൂപത്തില്‍ ലഭ്യമാക്കും. ഓരോ കുടുംബവുമായി ബന്ധപ്പെട്ട വിവരം ഉള്‍പ്പെടുത്തി ഡിജി ലോക്കര്‍ സംവിധാനവും ഏര്‍പ്പെടുത്തും. പട്ടയ മിഷന്‍ പ്രവര്‍ത്തനവുമായി സര്‍ക്കാര്‍ അതിവേഗം മുന്നോട്ട് പോകുകയാണെന്നും മന്ത്രി അറിയിച്ചു. മന്ത്രി വീണാ ജോർജ് അധ്യക്ഷത വഹിച്ചു. എംഎൽഎമാരായ കെ.യു. ജനീഷ് കുമാർ, പ്രമോദ് നാരായൺ, ജില്ലാ കളക്ടർ എസ്. പ്രേംകൃഷ്ണൻ, ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം, സബ് കളക്ടർ സുമിത് കുമാർ ഠാക്കൂർ, എഡിഎം ബി. ജ്യോതി, ആർഡിഒ എം. ബിപിൻകുമാർ, ട്രൈബൽ ഡെവലപ്മെന്‍റ് ഓഫീസർ എസ്.എ. നജീം തുടങ്ങിയവർ പ്രസംഗിച്ചു. 49 വനാവകാശരേഖ ഉള്‍പ്പെടെ 268 പട്ടയമാണ് വിതരണം ചെയ്തത്. കോന്നി (36), റാന്നി (79), ആറന്മുള (80), തിരുവല്ല (24) എന്നിങ്ങനെയാണ് നിയോജക മണ്ഡലം തിരിച്ചുള്ള കണക്ക്. പട്ടയഡാഷ്‌ബോര്‍ഡില്‍ ഉള്‍പ്പെട്ട തിരുവല്ല കോയിപ്രം വില്ലേജിലെ തെറ്റുപാറ കോളനിയിലെ 10 കൈവശക്കാര്‍ക്ക് പട്ടയം ലഭിച്ചു. മലമ്പണ്ടാര വിഭാഗത്തിലെ 49 കുടുംബങ്ങള്‍ പട്ടയം ഏറ്റുവാങ്ങി. വനാവകാശ നിയമപ്രകാരം ഒരേക്കര്‍ ഭൂമി ഇവര്‍ക്ക് ലഭിക്കും. കൈതക്കര ഉന്നതിക്കു പട്ടയം പത്തനംതിട്ട: നീണ്ട 40 വര്‍ഷത്തെ കാത്തിരിപ്പിനൊടുവില്‍ അന്തിയുറങ്ങുന്ന കിടപ്പാടത്തിന് പട്ടയം ലഭിച്ച സന്തോഷത്തിലാണ് കൈതക്കര ഉന്നതി നിവാസികൾ. 10 കുടുംബങ്ങള്‍ക്കാണ് പത്തനംതിട്ട റോയല്‍ ഓഡിറ്റോറിയത്തില്‍ സംഘടിപ്പിച്ച പട്ടയമേളയില്‍ ഭൂമിയുടെ അവകാശ രേഖ ലഭിച്ചത്. കോന്നി താലൂക്കിലെ പ്രമാടം ഗ്രാമപഞ്ചായത്തില്‍ താമസിക്കുന്ന ശിവന്‍കുട്ടി, കൃഷ്ണന്‍കുട്ടി, രഘുരാമൻ, എം.എന്‍. ബിന്ദു, കെ.ആർ. അനിൽ, പി.കെ. രാജമ്മ, പി.പി. ബാലന്‍, രമ കൃഷണന്‍കുട്ടി, ഓമന, ദേവകി കൃഷണന്‍കുട്ടി എന്നിവര്‍ക്കാണ് നാല് സെന്‍റ് ഭൂമിയുടെ അവകാശ രേഖ ലഭിച്ചത്. സാങ്കേതിക തടസം നീക്കി അവകാശി ഇല്ലാത്ത ഭൂമി ലാന്‍ഡ് ട്രൈബ്യൂണല്‍ പട്ടയമാക്കിയാണ് വിതരണം ചെയ്തത്.

സ്വകാര്യ ബാങ്ക്ശാഖ അധികൃതരുടെ ഭീഷണി; വീട്ടമ്മ ജീവനൊടുക്കിയ സംഭവത്തിൽ പ്രതിഷേധം, സംഘർഷം

പത്തനംതിട്ട: സ്വകാര്യ ബാങ്ക് അധികൃതരുടെ ഭീഷണിയേ തുടർന്ന് മൂന്നംഗ കുടുംബം ആത്മഹത്യ ചെയ്യാൻ ശ്രമിക്കുകയും വീട്ടമ്മ മരിക്കുകയും ചെയ്ത സംഭവത്തിൽ പ്രതിഷേധിച്ച് യുവജന സംഘടനകൾ ഇസാഫ് ബാങ്കിന്‍റെ പത്തനംതിട്ട ശാഖ ഉപരോധിച്ചു. ബാങ്ക് ജീവനക്കാരെ പുറത്തെത്തിക്കാൻ ഉള്ള ശ്രമത്തിനിടെ പോലീസും യുവജന സംഘടനാ പ്രവർത്തകരും തമ്മിൽ സംഘർഷം നടന്നു. ബല പ്രയോഗത്തേ തുടർന്ന് യൂത്ത് കോൺഗ്രസ് പ്രവർത്തകർ പത്തനംതിട്ട മാർക്കറ്റ് റോഡ് ഉപരോധിച്ചു. ഇതേസമയം അതുവഴി വന്ന ജില്ലാ കളക്ടറുടെ കാർ തടയാൻ ശ്രമിച്ചത് വീണ്ടും സംഘർഷത്തിന് ഇടയാക്കി. പോലീസ് യൂത്ത് കോൺഗ്രസ് പ്രവർത്തകരെ അറസ്റ്റ് ചെയ്ത് നീക്കിയതോടെയാണ് സംഘർഷത്തിന് അയവു വന്നത്. കൊടുമൺ രണ്ടാംകുറ്റിയിലാണ് ഇന്നലെ രാവിലെ മൂന്നംഗ കുടുംബം ആത്മഹത്യയ്ക്കു ശ്രമിച്ചത്. ഇവരിൽ വീട്ടമ്മ രണ്ടാംകുറ്റി വേട്ടക്കോട്ട് കിഴക്കേതിൽ ലീലയാണ് (48) മരിച്ചത്. വീടിനുള്ളിൽ തൂങ്ങി മരിച്ച നിലയിലാണ് ലീലയെ കണ്ടെത്തിയത്. അമിതമായി ഗുളികകൾ കഴിച്ച ഭർത്താവ് നീലാംബരൻ (57) , മകൻ ദിപിൻ കുമാർ (27) എന്നിവരെ ഗുരുതരാവസ്ഥയിൽ കോട്ടയം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ബാങ്കിന്‍റെ ഭീഷണിയേ തുടർന്ന് ലീലയും ഭർത്താവും മകനും ജീവനൊടുക്കാൻ ശ്രമിക്കുകയായിരുന്നുവെന്നാണ് നിഗമനം. ഇസാഫ് ബാങ്കിൽ നിന്നും ഇവർ 70000 രൂപ വായ്പയെടുത്തിരുന്നുവെന്നും ഗഡുക്കൾ മുടങ്ങിയതോടെ ജീവനക്കാരെത്തി ഭീഷണിപ്പെടുത്തിയെന്നും പറയുന്നു. പ്രതിഷേധ സമരത്തിന് കെപിസിസി ജനറൽ സെക്രട്ടറി പഴകുളം മധു , മുനിസിപ്പൽ കൗൺസിലർ കെ. ജാസിംകുട്ടി, യൂത്ത് കോൺഗ്രസ് ജില്ലാ പ്രസിഡന്‍റ് വിജയ് ഇന്ദുചൂഡൻ തുടങ്ങിയവർ നേതൃത്വം നൽകി. സംസ്ഥാനത്ത് ക്രമസമാധാനം തകർന്ന അവസ്ഥയിലാണെന്നും പലിശക്കാരും കള്ളപ്പണക്കാരും പൊതുജനങ്ങളെ കൊള്ളയടിക്കുന്നതിന് സർക്കാർ ഒത്താശ ചെയ്യുകയാണെന്നും പഴകുളം മധു പറഞ്ഞു. യുഡിഎഫ് സർക്കാർ പലിശക്കാരെ നിയന്ത്രിക്കാൻ നടപ്പാക്കിയ ഓപ്പറേഷൻ കുബേര പോലെയുള്ള നടപടികൾ പിന്നീടു വന്ന എൽഡിഎഫ് സർക്കാർ അട്ടിമറിച്ചതായും പഴകുളം മധു ആരോപിച്ചു. ബാങ്ക് നടപടി ക്രൂരം: സതീഷ് കൊച്ചുപറന്പിൽ പത്തനംതിട്ട: ഇസാഫ് ബാങ്ക് കൈപ്പട്ടൂർ ശാഖയിൽ നിന്നും മുക്കാൽ ലക്ഷത്തിൽ താഴെ രൂപ വായ്പയെടുത്ത് കുടിശിക ആയതിനേ തുടന്നുള്ള ജപ്തി ഭീഷണിയും പീഡനവും മൂലം കൊടുമൺ രണ്ടാംകുറ്റി സ്വദേശിനിയായ വേട്ടക്കാട്ട് വീട്ടിൽ ലീല നീലാംബരൻ ആത്മഹത്യ ചെയ്തതും ഗൃഹനാഥനായ നീലാംബരനും മകൻ വിപിനും ആത്മഹത്യക്ക് ശ്രമിച്ച് കോട്ടയം മെഡിക്കൽ കോളജിൽ ചികിത്സയിലായ സംഭത്തെക്കുറിച്ചും അന്വേഷണം നടത്തി ഉത്തരവാദികളായവർക്കെതിരേ ആത്മഹത്യാ പ്രേരണാക്കുറ്റം ചുമത്തണമെന്ന് ഡിസിസി പ്രസിഡന്റ് പ്രഫ.സതീഷ് കൊച്ചുപറമ്പിൽ ആവശ്യപ്പെട്ടു. കോടീശരന്മാരായ കോർപറേറ്റുകൾക്ക് വൻ വായ്പ നല്കി അത് ഈടാക്കാതെ അവരെ വിദേശ രാജ്യങ്ങളിലേക്ക് കടക്കുവാൻ അവസരം ഒരുക്കുകയും കോടിക്കണക്കിന് വായ്പ തുക എഴുതിത്തള്ളുകയും ചെയ്യുന്ന സർക്കാരുകൾ പാവപ്പെട്ടവരുടെ ചെറിയ വായ്പകളുടെ തിരിച്ചടവിനു വേണ്ടി അവരെ ക്രൂരമായി ദ്രോഹിക്കുകയും ആത്മഹത്യയിലേക്ക് തള്ളി വിടുകയുമാണെന്ന് ഡിസിസി പ്രസിഡന്‍റ് പറഞ്ഞു. വിദ്യാഭ്യാസ വായ്പ നല്കുന്നതിൽ ഉൾപ്പെടെ ജില്ലയിലെ ദേശസാൽകൃത ബാങ്കുകൾ ഇരട്ടത്താപ്പ് സമീപനമാണ് സ്വീകരിക്കുന്നത്. സ്വകാര്യ ബാങ്കുകളും സഹകരണ സ്ഥാപനങ്ങളും കൊള്ളപ്പലിശക്കാരും ബ്ലേഡ് മാഫിയകളുമായിട്ടാണ് പ്രവർത്തിക്കുന്നതെന്നും സർഫാസി നിയമം ദുരുപയോഗം ചെയ്യുകയാണെന്നും ഡിസിസി പ്രസിഡന്‍റ് അഭിപ്രായപ്പെട്ടു.

കേബിളില്‍ ലോറി കുരുങ്ങി; ട്രാഫിക് ലൈറ്റ് ഒടിഞ്ഞുവീണു

കോഴഞ്ചേരി: തെക്കേമലയില്‍ സ്ഥാപിച്ചിരുന്ന ട്രാഫിക് സിഗ്‌നല്‍ ലൈറ്റുകള്‍ ഒടിഞ്ഞ് റോഡില്‍ വീണു. ഇന്നലെ പുലര്‍ച്ചെയോടെയാണ് സംഭവം. ടികെ റോഡിലൂടെ എത്തിയ ലോറി ട്രാഫിക് സിഗ്‌നല്‍ ലൈറ്റിന്‍റെ തൂണില്‍ കുടുങ്ങിക്കിടന്ന കേബിളില്‍ കുരുങ്ങിയതോടെയാണ് ഒടിഞ്ഞു വീണതെന്ന് പറയുന്നു. ലോറി കേബിളില്‍ കുരുങ്ങിയത് സമീപത്തെ സിസിടിവി ദൃശ്യങ്ങളിലുണ്ട്. ലൈറ്റിന്‍റെ തൂണും സോളാര്‍ പാനലും ഉള്‍പ്പെടെ റോഡിലേക്ക് മറിയുകയായിരുന്നു. സിഗ്‌നല്‍ ലൈറ്റുകള്‍ തമ്മില്‍ ബന്ധിച്ചിരുന്ന ഇലക്ട്രിക് കേബിളില്‍ പൊക്കമുള്ള വാഹനം തട്ടിയതാണ് കാരണം എന്ന് സംശയിക്കുന്നു. മറ്റു കേബിളുകളും പോസ്റ്റിലൂടെ വലിച്ചിട്ടുണ്ടായിരുന്നു. പുലര്‍ച്ചെ ആയിരുന്നതിനാല്‍ മറ്റ് അപകടങ്ങള്‍ ഒന്നും ഉണ്ടായില്ല. അഗ്‌നിരക്ഷാ സേന എത്തി ലൈറ്റും സോളാര്‍ പാനലും ഉള്‍ക്കൊള്ളുന്ന ഒടിഞ്ഞ പൈപ്പുകള്‍ റോഡില്‍ നിന്ന് മുറിച്ചു നിക്കി. ടികെ റോഡും മാവേലിക്കര - കോഴഞ്ചേരി റോഡും സന്ധിക്കുന്ന തെക്കേമല ജംഗ്ഷനില്‍ മന്ത്രി വീണാ ജോര്‍ജ് പ്രാദേശിക വികസന ഫണ്ടില്‍ നിന്ന 12.5 ലക്ഷം രൂപ വിനിയോഗിച്ചാണ് ലൈറ്റ് സ്ഥാപിച്ചിരുന്നത്. ട്രാഫിക് സിഗ്‌നല്‍ പൂര്‍ണക്ഷമവുമല്ലായിരുന്നു.

നേത്രരോഗ വിഭാഗം സംസ്ഥാനതല സെമിനാർ ബിലീവേഴ്സ് ആശുപത്രിയിൽ നടന്നു

തിരുവല്ല : ബിലീവേഴ്സ് ചർച്ച് മെഡിക്കൽ കോളജ് ആശുപത്രി നേത്രരോഗ വിഭാഗത്തിന്‍റെയും കേരളാ സൊസൈറ്റി ഓഫ് ഒഫ്താൽമിക് സർജൻസിന്‍റെയും സംയുക്താഭിമുഖ്യത്തിൽ സംസ്ഥാനതല ഏകദിന സെമിനാർ നടന്നു. ഗ്ലൂക്കോമ എന്ന നേത്രരോഗത്തെ അധികരിച്ച് മെഡിക്കൽ പിജി ഡോക്ടർമാർക്കായി നടന്ന സെമിനാർ ബിലീവേഴ്സ് ആശുപത്രി അസോസിയേറ്റ് ഡയറക്ടർ ഡോ. ജോൺ വല്യത്ത് ഉദ്ഘാടനം ചെയ്തു. നേത്രരോഗ വിഭാഗം മേധാവി ഡോ. സതീഷ് തോമസ് അധ്യക്ഷത വഹിച്ചു. കേരളാ സൊസൈറ്റി ഓഫ് ഒഫ്ത്താൽമിക്ക് സർജൻസിന്‍റെ ചെയർമാൻ ഡോ. വി.എ. ബാസ്റ്റിൻ, ബിലീവേഴ്സ് ആശുപത്രി നേത്രരോഗ വിഭാഗം അസോസിയേറ്റ് പ്രഫസറും സെമിനാർ ഓർഗനൈസിംഗ് സെക്രട്ടറിയുമായ ഡോ ലീന മറിയം, ഒഫ്ത്താൽമിക്ക് സൊസൈറ്റി പത്തനംതിട്ട ഘടകം അധ്യക്ഷൻ ഡോ. ഷെയ്ൻ മാത്യു ചെറിയാൻ, മധുര അരവിന്ദ് നേത്രാശുപത്രി ഗ്ലൂക്കോമ വിഭാഗം മേധാവി ഡോ. ജോർജ് പുത്തൂരാൻ, ട്രിച്ചി മഹാത്മാ നേത്രാശുപത്രി ഗ്ലൂക്കോമ വിഭാഗം മേധാവി ഡോ. പ്രസന്ന രമേശ് എന്നിവർ പ്രസംഗിച്ചു. ഇന്ത്യയിലെ പ്രശസ്തരായ ഇരുപതോളം ഗ്ലൂക്കോമ സ്പെഷലിസ്റ്റുകൾ പ്രഭാഷകരായ ഏകദിന സെമിനാറിൽ കേരളത്തിനകത്തും പുറത്തുനിന്നുമായി മെഡിക്കൽ പിജി ഡോക്ടർമാരും ഒഫ്ത്താൽമോളജിസ്റ്റുകളും അടക്കം നൂറോളം പേർ പങ്കെടുത്തു.

മറക്കില്ല പത്തനംതിട്ട...

പത്തനംതിട്ട: പത്തനംതിട്ട ജില്ലയുടെ രൂപീകരണ കാലഘട്ടം തൊട്ട് ഈ നാടിന്‍റെ അവിഭാജ്യ ഘടകമായി നിലനിന്ന നേതാവാണ് വി.എസ്. അച്യുതാനന്ദൻ. പാർ‌ട്ടി സെക്രട്ടറിയും പ്രതിപക്ഷ നേതാവുമെന്ന നിലയിൽ ജില്ലയുടെ ജനകീയ പ്രശ്നങ്ങൾ ഏറ്റെടുക്കുന്നതിലും മുഖ്യമന്ത്രിയായിരുന്നപ്പോൾ വികസന പ്രവർത്തനങ്ങൾക്ക് കൈയൊപ്പു ചാർത്തുന്നതിലും വി.എസ്. അച്യുതാനന്ദൻ മുൻപന്തിയിലുണ്ടായിരുന്നു. പത്തനംതിട്ട ജില്ല രൂപീകരിച്ചതിനു പിന്നാലെ പാർട്ടിയെ ശക്തമാക്കാൻ സംസ്ഥാന ഘടകത്തിൽ നിന്നും നിയോഗം ലഭിച്ചത് വി.എസ്. അച്യുതാനന്ദനാണ്. പഴയ ആലപ്പുഴ ജില്ലയുടെ ഭാഗം കൂടി ഉൾപ്പെട്ടിരുന്ന പത്തനംതിട്ടയിൽ പാർട്ടി അണികളെ ഏകോപിപ്പിച്ച് ഘടകങ്ങൾ രൂപീകരിക്കുന്നതിൽ വിഎസ് അനായാസം വിജയിച്ചു. സിപിഎം സംസ്ഥാന സെക്രട്ടറി എന്ന നിലയിൽ മാത്രമല്ല പ്രതിപക്ഷ നേതാവായിരുന്നപ്പോഴും മുഖ്യമന്ത്രിയായിരുന്നപ്പോഴും ജില്ലയിലെ എല്ലാ പ്രദേശങ്ങളിലും നിറസാന്നിധ്യമായിരുന്നു അദ്ദേഹം. ശബരിമലയിലേക്ക് നടന്നുകയറിയ വിഎസ് 2007ലെ മണ്ഡല മകര വിളക്കുകാലത്ത് മുഖ്യമന്ത്രിയായിരുന്ന വി.എസ്. അച്യുതാനന്ദൻ ഡിസംബർ 30നു നടത്തിയ ശബരിമല യാത്ര ഏവരെയും അത്ഭുതപ്പെടുത്തുന്നതായിരുന്നു. തീർഥാടനകാല ക്രമീകരണങ്ങൾ അവലോകനം ചെയ്തു പന്പയിലെത്തിയ വിഎസ് ഡോളിയിലായിരിക്കും സന്നിധാത്തു കയറുകയെന്ന് എല്ലാവരും കരുതി. എന്നാൽ ഏവരെയും അന്പരിപ്പിച്ച് അദ്ദേഹം സന്നിധാനത്തേക്കുള്ള അഞ്ച് കിലോമീറ്ററും നടന്നു കയറി. മതികെട്ടാൻ കയറിയിട്ടുള്ള തനിക്ക് ശബരിമല കയറ്റം അത്ര ആയാസമായി തോന്നിയില്ലെന്നായിരുന്നു പ്രതികരണം. വഴി മധ്യേ കാര്യമായി വിശ്രമിച്ചതുമില്ല. മന്ത്രി പി.കെ. ശ്രീമതി, രാജു ഏബ്രഹാം എംഎൽഎ, സിപിഎം ജില്ലാ സെക്രട്ടറിയായിരുന്ന കെ. അനന്തഗോപൻ എന്നിവരൊക്കെ മുഖ്യമന്ത്രിയെ അനുഗമിച്ചു. വൈകുന്നേരം ആറോടെ പന്പയിൽ നിന്നാരംഭിച്ച മലകയറ്റം എട്ടോടെ സന്നിധാനത്തെത്തി. സന്നിധാനത്തു തങ്ങിയ അദ്ദേഹം പിറ്റേന്ന് അവലോകന യോഗം നടത്തിയ ശേഷമാണ് മലയിറങ്ങിയത്. ശബരിമലയിലെത്തിയ ആദ്യ കമ്യൂണിസ്റ്റ് മുഖ്യമന്ത്രിയാണ് വി.എസ്. അച്യുതാനന്ദൻ. ശബരിമല മാസ്റ്റർ പ്ലാനിന്‌ തുടക്കമിട്ടതും അക്കാലത്താണ്. നിലയ്‌ക്കലിൽ ഇപ്പോൾ പ്രവർത്തിക്കുന്ന ഇടത്താവളം ദേവസ്വം ബോർഡിനു ലഭ്യമാക്കാൻ പകരം ഭൂമി വനംവകുപ്പിനു നൽകാനും അദ്ദേഹം നേതൃത്വം നൽകി. മേക്കര യാത്ര അച്ചൻകോവിൽ നദിയിൽനിന്ന്‌ തമിഴ്‌നാട്‌ അനധികൃതമായി വെള്ളം കടത്തിക്കൊണ്ടുപോകുന്നു എന്ന ആരോപണം ഉയർന്നപ്പോൾ കേരളത്തിന്‍റെ താത്പര്യം ഉയർത്തിപ്പിടിച്ച്‌ പത്തനംതിട്ടയിൽ നിന്ന്‌ തമിഴ്‌നാട്ടിലെ മേക്കര ഡാം പരിസരത്തേക്ക്‌ വി.എസ്.അച്യുതാനന്ദന്‍റെ നേതൃത്വത്തിൽ നടത്തിയ മാർച്ച് ആവേശ ഭരിതമായിരുന്നു. കേരളത്തിന്‍റെ വെള്ളം കടത്തിക്കൊണ്ടുപോകാൻ ആരെയും അനുവദിക്കരുതെന്നത് അദ്ദേഹത്തിന്‍റെ ഉറച്ച തീരുമാനമായിരുന്നു. സർക്കാരിനെക്കൊണ്ട് ഇക്കാര്യത്തിൽ നിയമസഭയിൽ ഉറപ്പു വാങ്ങുന്നതിൽ അന്ന് പ്രതിപക്ഷത്തായിരുന്ന വിഎസിനു കഴിഞ്ഞു. ജനകീയ സമരങ്ങൾക്കൊപ്പം പത്തനംതിട്ട ജില്ലയിലെ നിരവധി ജനകീയ സമരങ്ങളിൽ നേതൃനിരയിൽ വി.എസ്.അച്യുതാനന്ദനുണ്ടായിരുന്നു. റാന്നി ചെന്പൻമുടിയിൽ പാറമടയ്ക്കെതിരേ ജനങ്ങൾ നടത്തിയ ദീർഘമായ പോരാട്ടത്തിന് ഐക്യദാർഢ്യവുമായി വിഎസ് എത്തി. 2013ലായിരുന്നു അത്. 2014ലെ ആറന്മുള വിമാനത്താവള വിരുദ്ധ സമരത്തിൽ മുൻനിരയിൽ അദ്ദേഹം ഉണ്ടായിരുന്നു. ആറന്മുളയിലെ സമരപ്പന്തലിലും തിരുവനന്തപുരത്തു നടന്ന സമരത്തിലുമൊക്കെ അദ്ദേഹം പങ്കെടുത്തു. ആറന്മുള വിമാനത്താവളം സംബന്ധിച്ചു പ്രാഥമിക അംഗീകാരം വി.എസ് മുഖ്യമന്ത്രിയായിരുന്ന അവസാന കാലഘട്ടത്തിലാണ് നൽകിയതെങ്കിലം പിന്നീട് ജനകീയാഭിപ്രായവും പദ്ധതി ഉ‍യർത്തുന്ന പാരിസ്ഥിതിക വെല്ലുവിളികളും മനസിലാക്കി സിപിഎം സ്വീകരിച്ച നിലപാടിനു പിന്തുണയുമായി വിഎസും എത്തി. സമരനേതാവായിരുന്ന സുഗതകുമാരി പ്രത്യേകം ക്ഷണിച്ചാണ് 2014 ഫെബ്രുവരി 27നു വിഎസിനെ സമരപ്പന്തലിലെത്തിച്ചത്. മുഖ്യമന്ത്രിയായിരുന്ന കാലയളവിൽ ചിക്കുൻഗുനിയ പൊട്ടിപ്പുറപ്പെട്ടപ്പോൾ പ്രതിരോധ പ്രവർത്തനങ്ങൾക്കു നേതൃത്വംകൊടുത്ത് ആരോഗ്യമന്ത്രി പി.കെ. ശ്രീമതിക്കൊപ്പം അച്യുതാനന്ദൻ പത്തനംതിട്ടയിലെത്തി. ചിറ്റാറാണ് ചിക്കുൻഗുനിയയുടെ പ്രഭവ കേന്ദ്രമെന്നു മനസിലാക്കിയപ്പോൾ കൊതുക് നിർമാർജനം തുടങ്ങിയ പ്രവർത്തനങ്ങളും പത്തനംതിട്ട ജനറൽ ആശുപത്രിയിലേതടക്കമുള്ള സജ്ജീകരണങ്ങളും നേരിട്ടു മനസിലാക്കാനാണ് അദ്ദേഹം വന്നത്. പാർട്ടിയിലും സ്വന്തം പക്ഷം സിപിഎമ്മിൽ പിണറായി, വിഎസ് പക്ഷങ്ങൾ ശക്തമായിരുന്ന ഘട്ടത്തിൽ പത്തനംതിട്ട ജില്ല അച്യുതാനന്ദന് ഒപ്പമായിരുന്നു. രണ്ട് ജില്ലാ സമ്മേളനങ്ങളിൽ അദ്ദേഹം വ്യക്തമായ മേൽക്കോയ്മ നേടി. തനിക്കൊപ്പം നിൽക്കുന്നവരെ അദ്ദേഹം സംരക്ഷിച്ചു നിർത്തി. പിന്നീട് പാർട്ടിയിൽ അദ്ദേഹത്തിന്‍റെ ശക്തി കുറഞ്ഞതോടെ ഒപ്പമുണ്ടായിരുന്നവരും ഔദ്യോഗിക പക്ഷത്തേക്കു മാറി. ജില്ലയുടെ വികസന പ്രവർത്തനങ്ങളിൽ ഒപ്പം നിന്നു: രാജു ഏബ്രഹാം പത്തനംതിട്ട ജില്ലയുടെ വികസന പ്രവർത്തനങ്ങളിൽ മുഖ്യമന്ത്രിയായിരുന്ന കാലഘട്ടത്തിൽ പ്രത്യേക താത്പര്യത്തോടെ വി.എസ്. അച്യുതാനന്ദൻ ഇടപെട്ടിരുന്നതായി മുൻ എംഎൽഎയും സിപിഎം ജില്ലാ സെക്രട്ടറിയുമായ രാജു ഏബ്രഹാം അനുസ്മരിച്ചു.

ശബരിമല സന്നിധാനത്തെത്തിയ മുഖ്യമന്ത്രി തീർഥാടകരുമായി ബന്ധപ്പെട്ട വിഷയങ്ങളിൽ വേഗത്തിൽ തീരുമാനങ്ങളെടുത്തു. നിലയ്ക്കൽ ഇടത്താവളം പദ്ധതിയും കുടിവെള്ള പദ്ധതിയുമൊക്കെ ഇക്കാലയളവിലാണ് തയാറായത്. റാന്നി താലൂക്ക്‌ ആശുപത്രി പുതിയ ബ്ലോക്കിന്‍റെ നിർമാണം, റാന്നി സിവിൽ സ്‌റ്റേഷൻ നിർമാണം, ചിറ്റാർ - അച്ചൻകോവിൽ റോഡ്‌ നിർമാണം, റാന്നി ട്രഷറി പുതിയ മന്ദിരം, ഇലവുംതിട്ട, മലയാലപ്പുഴ പോലീസ് സ്റ്റേഷനുകൾ, മെഴുവേലി ഐടിഐ, റാന്നി മേജർ കുടിവെള്ള പദ്ധതിക്കു ഫണ്ട്‌ അനുവദിക്കൽ, പത്തനംതിട്ട ജനറൽ ആശുപത്രി പുതിയ ബ്ലോക്ക്‌ ഉദ്‌ഘാടനം തുടങ്ങിയവ ഇക്കാല‍യളവിൽ നടന്ന പ്രവർത്തനങ്ങളാണ്. ജില്ലയിലെ ജനകീയ സമരമുഖങ്ങളിലും സിപിഎം സമ്മേളന വേദികളിലുമെല്ലാം നിറ സാന്നിധ്യമായിരുന്നു വി.എസ്. അച്യുതാനന്ദനെന്നു രാജു ഏബ്രഹാം അനുസ്മരിച്ചു. ആറന്മുള വള്ളംകളി, മൂലൂർ സ്മാരകം ഉൾപ്പെടെ സാംസ്കാരിക മേഖലകൾക്ക് വേണ്ട പിന്തുണ നൽകി. ആറന്മുള സമരത്തിന് വി.എസ് ആവേശം പകർന്നു: പി. പ്രസാദ് പത്തനംതിട്ട: ആറന്മുളയിലെ നെൽപാടങ്ങളും തണ്ണീർത്തടങ്ങളും നികത്തി , പരിസ്ഥിതിയെ തകിടം മറിച്ചു കൊണ്ട് വിഭാവനം ചെയ്ത വിമാനത്താവള പദ്ധതിക്കെതിരേ നടന്ന സമരത്തിന്, പിന്തുണയുമായി വി.എസ്. അച്യുതാനന്ദൻ എത്തിയപ്പോൾ ഒരു നാടും ജനതയും ആവേശത്തിന്‍റെ കൊടുമുടിയിലാകുകയായിരുന്നുവെന്ന് മന്ത്രി പി. പ്രസാദ് അനുസ്മരിച്ചു. ആ സമരത്തിന്‍റെ ഭാഗമായി ഹരിത ട്രിബ്യൂണലിൽ നടന്ന നിയമപോരാട്ടങ്ങളെപ്പറ്റിയെല്ലാം അദ്ദേഹം അന്വേഷിക്കുകയും എല്ലാ പിന്തുണയും അറിയിക്കുകയും ചെയ്തത് സമര നേതൃത്വത്തിനു കരുത്തായി. പത്തനംതിട്ട ജില്ലയിലെ ചെമ്പൻമുടിയിൽ അനധികൃത പാറഖനനത്തിനെതിരേ ജനങ്ങൾ അണി നിരന്നപ്പോൾ റാന്നിയിൽ നടന്ന സമരത്തിന്‍റെ ഭാഗമായി സിപിഐ മാറിയപ്പോൾ ചെമ്പൻമുടിയിലെ സമരത്തെ സൂചിപ്പിച്ച് വിഎസിന് താൻ നൽകിയ കത്തു പരിഗണിച്ചാണ് വിഎസ്. എത്തിയതെന്ന് പ്രസാദ് പറഞ്ഞു. പ്രായത്തിന്‍റെ എല്ലാ പരിമിതികളും മറന്നാണ് വിഎസ് ചെമ്പൻമുടിയിലെത്തിയത്. സമരപ്പന്തൽ വരെ എത്തിയ അദ്ദേഹം ജനങ്ങളുമായി സംസാരിച്ചു. ചെമ്പൻമുടി പ്രദേശം അന്നു കണ്ട ജനസാഗരം ആരുടെയുംമനസിൽ നിന്ന് മാഞ്ഞു പോകില്ലെന്ന് പ്രസാദ് അനുസ്മരിച്ചു. വി.എസ് എന്ന രണ്ടക്ഷരം ജനകീയ പോരാട്ടങ്ങളുടെ പര്യായമായി മാറിയത് കേരളത്തിന്‍റെ അനുഭവപാഠമാണെന്നും മന്ത്രി അഭിപ്രായപ്പെട്ടു.

അനുശോചിച്ചു

പത്തനംതിട്ട: മുൻ മുഖ്യമന്ത്രിയും സമുന്നത കമ്യൂണിസ്റ്റ് നേതാവുമായിരുന്ന അച്ച്യുതാനന്ദന്‍റെ നിര്യാണത്തിൽ ജില്ലാ കോൺഗ്രസ് കമ്മിറ്റി അനുശോചിച്ചു. അനധികൃത ഭൂമി കൈയേറ്റങ്ങൾ ഒഴിപ്പിക്കുന്നതിലും പരിസ്ഥിതി പ്രാധാന്യപരമായ പ്രശ്നങ്ങളിലും ഉൾപ്പെടെ മുഖ്യമന്ത്രി എന്ന നിലയിൽ ശക്തമായ നടപടികൾ കൈക്കൊള്ളുന്നതിൽ അദ്ദേഹം കാട്ടിയ നിശ്ചയം ദാർഢ്യം പ്രശംസനീയമായിരുന്നുവെന്ന് ഡിസിസി പ്രസിഡന്‍റ് പ്രഫ.സതീഷ് കൊച്ചുപറമ്പിൽ, സംഘടനാകാര്യ ജനറൽ സെക്രട്ടറി സാമുവൽ കിഴക്കുപുറം എന്നിവർ പറഞ്ഞു. പത്തനംതിട്ട: നൂറ്റാണ്ടുകളുടെ അനുഭവ സമ്പത്തിന്‍റെ രാഷ്‌ട്രീയ പ്രതിരൂപമായിരുന്നു വി.എസ്. അച്യുതാനന്ദനെന്ന് സിഐടിയു ജില്ലാ കമ്മിറ്റി. ആദർശ രാഷ്ട്രീയത്തിന്റെ കേരളം ലോകത്തിന് കാട്ടിക്കൊടുത്ത ഉജ്ജ്വലനായ സമര പോരാളിയായിരുന്നു അദ്ദേഹമെന്നും ജില്ലാ സെക്രട്ടറി പി.ബി. ഹർഷകുമാർ അഭിപ്രായപ്പെട്ടു. മുൻ മുഖ്യമന്ത്രി വി.എസ്. അച്യുതാനന്ദന്‍റെ നിര്യാണത്തിൽ കേരള കോൺഗ്രസ് -എം സംസ്കാരവേദി സംസ്ഥാന പ്രസിഡന്‍റ് ഡോ. വർഗീസ് പേരയിൽ അനുശോചിച്ചു. അടൂർ: മുൻമുഖ്യമന്ത്രിയും കമ്യൂണിസ്റ്റ് നേതാവുമായിരുന്ന വി.എസ്. അച്യുതാനന്ദന്‍റെ ഡെപ്യൂട്ടി സ്പീക്കർ ചിറ്റയം ഗോപകുമാർ അനുശോചിച്ചു. വിഎസ് പ്രതിപക്ഷനേതാവായിരുന്ന അഞ്ചു വർഷം നിയമസഭയിൽ അംഗമായിരിക്കാനും ഒരുമിച്ച് പ്രവർത്തിക്കാനും കഴിഞ്ഞത് പ്രത്യേക അനുഭവമായിരുന്നുവെന്നും ചിറ്റയം അനുസ്മരിച്ചു. തിരുവല്ല : കേരളത്തിന്‍റെ മുൻമുഖ്യമന്ത്രിയും ആദർശ രാഷ്ട്രീയത്തിന്‍റെ സമകാലിക മുഖവുമായിരുന്ന വി.എസ്. അച്യുതാനന്ദന്‍റെ ദേഹവിയോഗത്തിൽ കേരളത്തിലെ ക്രൈസ്തവ സഭകളുടെയും സംഘടനകളുടെയും ഔദ്യോഗിക ഐക്യവേദിയായ കേരള കൗൺസിൽ ഓഫ് ചർച്ചസ് അനുശോചിച്ചു. നിലപാടുകളുടെയും ലാളിത്യത്തിന്‍റെയും സാധാരണക്കാരന്‍റെ വേദന മനസിലാക്കി അതിനോടു ക്രിയാത്മകമായി പ്രതികരിക്കുന്ന മനുഷ്യത്വത്തിന്‍റെയും ആൾരൂപം ആയിരുന്നു വിഎസെന്ന് കെസിസി അഭിപ്രായപ്പെട്ടു. ഇത്തരം വ്യക്തിത്വങ്ങൾ സമൂഹത്തിൽ കുറഞ്ഞു വരുന്നത് പൊതുസമൂഹത്തിന്‍റെ മൂല്യബോധം വളർത്തിയെടുക്കുന്നതിൽ വലിയ കുറവ് സൃഷ്ടിക്കുമെന്ന് കെസിസി പ്രസിഡന്‍റ് അലക്സിയോസ് മാർ യൗസേബിയോസ് മെത്രാപ്പോലീത്ത, ജനറൽ സെക്രട്ടറി ഡോ. പ്രകാശ് പി തോമസ് എന്നിവർ പറഞ്ഞു.

വൈദ്യുതി ലൈനുകൾ കൈയെത്തും ഉയരത്തിൽ

പത്തനംതിട്ട: ജില്ലയിലെ ഗ്രാമീണ പാതകളിൽ പലയിടത്തും വൈദ്യതി ലൈനുകൾ വലിച്ചിട്ടുള്ളത് ചട്ടങ്ങൾ മറന്ന്. പ്രധാന നിരത്തുകളിലെ വൈദ്യുതിലൈനുകൾ ഏറെക്കുറെ സുരക്ഷയെ കരുതിയാണ് വലിച്ചിട്ടുള്ളതെങ്കിലും ഉൾപ്രദേശങ്ങളിൽ പലയിടത്തും വൈദ്യുതി കന്പികൾ കൈയെത്തും ഉയരത്തിലാണ്. ഇടവഴികളിലാണ് വൈദ്യുതി കമ്പികൾ ഏറെയും അപകടകരമാംവിധം താഴ്ന്നു കിടക്കുന്നത്. ഇത് സംബന്ധിച്ച് ആരും പരാതിപ്പെടാൻ തയാറാകുന്നില്ലെന്ന് വൈദ്യുതി ബോർഡ് അധികൃതരും വ്യക്തമാക്കുന്നു. എല്ലാ കുറ്റവും വൈദ്യുതി ബോർഡിനു മേൽ കെട്ടിവയ്ക്കാനാണ് പൊതുജനത്തിന് താത്പര്യമെന്നാണ് അധികൃതരുടെ പരാതി. നാട്ടുകാരും സ്ഥാപന അധികാരികളും മോട്ടോർ വാഹന വകുപ്പും ഇതിൽ ഒരേപോലെ കുറ്റക്കാരാണ്. 1956- ലെ ഇലക്ട്രിസിറ്റി റൂൾ ആണ് വൈദ്യുതി സുരക്ഷയെ സംബന്ധിച്ച് പ്രാഥമിക നിർദ്ദേശങ്ങൾ അടങ്ങുന്ന പ്രധാനപ്പെട്ട നിയമം. വൈദ്യുതി ഉപകരങ്ങൾക്കും പ്രസരണ വിതരണ ലൈനുകൾക്കും ബ്യൂറോ ഓഫ് ഇന്ത്യൻ സ്റ്റാൻഡാർഡ് ഗുണനിലവാരം ഉണ്ടായിരിക്കണമെന്ന് ചട്ടം അനുശാസിക്കുന്നു. അനുമതിയില്ലാതെ ആരും വൈദ്യുതിലൈനിലോ, ഉപകരണങ്ങളിലോ പണിയെടുക്കരുതെന്നും നിയമം ചൂണ്ടിക്കാട്ടുന്നു. സുരക്ഷാ അകലങ്ങൾ തലയ്ക്കുമുകളിലൂടെ വലിച്ചിരിക്കുന്ന വൈദ്യുതക്കമ്പികളും സമീപത്തുള്ള നിർമിതികളും തമ്മിൽ പാലിക്കേണ്ട ചുരുങ്ങിയ അകലങ്ങൾ സംബന്ധിച്ചു കൃത്യമായ നിർദേശം വൈദ്യുതി വിതരണ ചട്ടത്തിലുണ്ട്. 11000 വോൾട്ട് വരെയുള്ള ലൈനുകൾ കുറഞ്ഞത് 4.2 മീറ്റർ ഉയരത്തിലും 11000 വോൾട്ടിനുമുകളിലേക്കുള്ളത് 5.2 മീറ്റർ ഉയരത്തിലുമാണ് വലിക്കേണ്ടത്. റോഡുകൾക്ക് മുകളിലൂടെയുള്ള വൈദ്യുതി ലൈൻ 6.1 മീറ്റർ ഉയരത്തിലായിരിക്കണം. കെട്ടിടങ്ങളുടെ മുകളിലൂടെ കമ്പികൾ പോകുമ്പോൾ ഏറ്റവും ഉയർന്ന ഭാഗത്തുനിന്നും ലംബമായി 2.5 മീറ്റർ ഉയരം ഉണ്ടാകണം എന്നാണ് നിയമം.കെട്ടിടങ്ങളുടെ അരികിലൂടെ കമ്പികൾ പോകുമ്പോൾ ഏറ്റവും അടുത്തുള്ള ഭാഗത്തുനിന്നും 1.2 മീറ്റർ അകലം പാലിച്ചിരിക്കണം. പക്ഷേ പല സ്ഥലങ്ങളിലും കൈയെത്തി പടിക്കാൻ പാകത്തിന് ദൂരം മാത്രമേ ഉണ്ടാകൂ . ഹൈടെൻഷൻ ലൈനുകൾ സംസ്ഥാനത്തെ രണ്ടാമത്തെ വലിയ വൈദ്യുതി ഉത്പാദന ജില്ലയാണ് പത്തനംതിട്ട. മൂഴിയാർ പവർ ഹൗസിൽ നിന്നു പുറപ്പെടുന്ന 220 കെവി ലൈനുകൾ കിഴക്കൻ മേഖലയിൽ താഴുന്നത് പതിവാണ്. ഒരു മലയിൽ നിന്നു മറ്റൊരു മലയിലേക്ക് 200 മീറ്ററിൽ അധികം ഉയരത്തിലാണ് ഹൈടെൻഷൻ കമ്പികൾ പോകുന്നത്. എന്നാൽ കുന്നുകൾക്ക് മുകളിൽ സ്ഥാപിച്ചിട്ടുള്ള ടവറുകളിൽ ഘടിപ്പിച്ചിട്ടുള്ള കമ്പികൾ പലപ്പോഴും തുടിഞ്ഞു കിടക്കുന്നത് പതിവാണ്. ഇത്തരം കമ്പികളിലേക്ക് അടിക്കാടുകൾ പടർന്നു കയറുന്നത് ദുരന്തങ്ങൾക്ക് കാരണമാകുന്നു. പലപ്പോഴും മൃഗങ്ങളാണ് ഇത്തരത്തിലുള്ള വൈദ്യുതി വലയത്തിൽ അകപ്പെടുന്നത്. 1997-ൽ ചോരകക്കി വനത്തിൽ നാല് ആനകളാണ് വൈദ്യുതാഘാതമേറ്റ് ചരിഞ്ഞത്. തുടർന്നും ഇത്തരത്തിലുള്ള നിരവധി ദുരന്തങ്ങൾക്ക് പത്തനംതിട്ട ജില്ല സാക്ഷിയായി. കൂടംകുളം -മാടക്കത്തറ 400 കെവി ലൈനുകൾ മലയാലപ്പുഴ, റാന്നി വഴി ജില്ലയുടെ ഏതാണ്ട് മധ്യ ഭാഗത്തു കൂടിയാണ് കടന്നു പോകുന്നത്. സമീപകാലത്ത് വലിച്ച ലൈനായതിനാൽ ജനവാസ മേഖലയിൽ സുരക്ഷാ സംവിധാനങ്ങൾ ഉറപ്പാക്കിയാണ് വലിച്ചിരിക്കുന്നത്. കുന്നുകൾക്ക് മുകളിൽ ഈ ലൈനുകൾക്കും ഉയരം കുറവായിരിക്കും. ഇതിന് കീഴിലൂടെയുള്ള യാത്രപോലും അപായം നിറഞ്ഞതാണെന്ന് വിദഗ്ധർ ചൂണ്ടിക്കിട്ടുന്നു. അപകടസാധ്യതകൾ അമിത ഭാരം കയറ്റി പോകുന്ന വാഹനങ്ങൾ പലപ്പോഴും അപകടം ക്ഷണിച്ചുവരുത്തുന്നു. പത്തനംതിട്ടയുടെ വിവിധ ഭാഗങ്ങളിൽനിന്നും റബർത്തടികൾ കയറ്റി ദിവസവും നിരവധി ലോറികളാണ് പെരുമ്പാവൂരിലേക്ക് പോകുന്നത്. ലോറിയുടെ മുകളിൽ പത്തടിയിലേറെ ഉയരത്തിലാണ് റബർ ത്തടികൾ കയറ്റുന്നത്. മോട്ടോർ വാഹന വകുപ്പിന്‍റെയും പോലീസിന്‍റെയും മൗനാനുവാദത്തോടെയാണിത്. റോഡിന് കുറുകെയുള്ള കമ്പികളിൽ തട്ടിയാൽ അപകട സാധ്യത ഏറെയാണ്. പണ്ട് ലോറികളുടെ ഇരട്ടി വലിപ്പത്തിൽ കച്ചി കൊണ്ടുപോകുന്ന പതിവുണ്ടായിരുന്നു. വൈദ്യുതി ക്കമ്പികളിൽ കച്ചി തട്ടി ലോറി അടക്കം കത്തിപ്പോയ നിരവധി സംഭവങ്ങൾ ജില്ലയിലുണ്ട്.

"ഇലന്തൂരിലെ മരം മല്ലപ്പുഴശേരിയിൽ വീണു' വെള്ളം കെട്ടിക്കിടന്ന് കൃഷി നശിക്കുന്നു

ഇലന്തൂർ: തോട്ടിൽ വീണ മരങ്ങൾ നീക്കാത്തതിനാൽ വെള്ളം കെട്ടിക്കിടന്ന് 25 ഏക്കർ പാടത്തെ കൃഷി നശിക്കുന്നു. ഇലന്തൂർ, മല്ലപ്പുഴശേരി പഞ്ചായത്ത് അതിർത്തിയിൽ പുളിന്തിട്ട ചിപ്പിനടുത്താണ് അധികൃതരുടെ അനാസ്ഥയിൽ ഏക്കറു കണക്കിന് സ്ഥലം കൃഷി ചെയ്യാനാകാതെ തരിശായി കിടക്കുന്നത്. പമ്പയുടെ പ്രധാന കൈവഴിയായ വലിയതോട്ടിലേക്ക് വീണു കിടക്കുന്ന ആഞ്ഞിലി, കാഞ്ഞിരം മരങ്ങളാണ് വെള്ളമൊഴുക്കിന് തടസമായത്. രണ്ടു വർഷം മുൻപ് പെരുമഴയിൽ തോട്ടിലേക്കു വീണ മരങ്ങളാണ് മാറ്റാതെ കിടക്കുന്നത്. മരങ്ങൾ നിന്നത് ഇലന്തൂർ പഞ്ചായത്തിലും വീണു കിടക്കുന്നത് മല്ലപ്പുഴശേരി പഞ്ചായത്തിലുമാണ്. പല തവണ പഞ്ചായത്തിൽ പരാതി നൽകിയെങ്കിലും നടപടി ഉണ്ടാകുന്നില്ലെന്ന് കർഷകർ പറയുന്നു. തോട്ടിൽ രൂപപ്പെട്ട വെള്ളക്കെട്ട് സമീപ പാടങ്ങളെയും ബാധിച്ചു. ഇതോടെ കൃഷി ഉപേക്ഷിക്കാൻ കർഷകർ നിർബന്ധിതരായി.ഇലന്തൂർ വലിയതോട്ടിൽ ചീപ്പിനു താഴേക്ക് വെള്ളംഒഴുക്ക് നിലച്ചു. ഇതോടെ ഏക്കർ കണക്കിനു കൃഷി നശിച്ചു.രണ്ടു വർഷം അധികാരികളോട് മരങ്ങൾ നീക്കിത്തരണമെന്ന് ആവശ്യപ്പെട്ടിട്ടും ഒരു നടപടിയും സ്വീകരിച്ചില്ല. മുട്ടാർ പാടശേഖര സമിതിയുടെ കീഴിൽ കൃഷി പൂർണമായി ഉപേക്ഷിക്കാൻ കർഷകർ നിർബന്ധിതരായിരിക്കുകയാണെന്ന് കർഷകനായ ചൂരത്തലയ്ക്കൽ സാംസൺ മാത്യു പറഞ്ഞു.

വിലക്കുറവില്‍ വെളിച്ചെണ്ണ ലഭ്യമാക്കാന്‍ നടപടി: മന്ത്രി ജി. ആർ. അനില്‍

കോന്നി: വിലക്കുറവില്‍ വെളിച്ചെണ്ണ ലഭ്യമാക്കാന്‍ സര്‍ക്കാര്‍ നടപടി സ്വീകരിക്കുമെന്ന് മന്ത്രി ജി. ആർ. അനില്‍. നവീകരിച്ച കോന്നി സപ്ലൈകോ സൂപ്പര്‍മാര്‍ക്കറ്റ് ഉദ്ഘാടനം നിര്‍വഹിച്ചു പ്രസംഗിക്കുകയായിരുന്നു മന്ത്രി. അതിര്‍ത്തി സംസ്ഥാനങ്ങളില്‍ നിന്ന് ഗുണമേന്മയുള്ള വെളിച്ചെണ്ണ സപ്ലൈകോ വഴി ആവശ്യമെങ്കില്‍ ലഭ്യമാക്കും. ഓണ വിപണിയിലെ വില നിയന്ത്രിക്കാന്‍ അരിയും മറ്റു ഉത്പന്നങ്ങളും സപ്ലൈകോ, റേഷന്‍ കടകളിലൂടെ കൂടുതല്‍ ലഭ്യമാക്കും. ഗ്രാമങ്ങളില്‍ സപ്ലൈകോയുടെ സഞ്ചരിക്കുന്ന വാഹനങ്ങളുടെ എണ്ണം വര്‍ധിപ്പിക്കും. വിപണിയില്‍ ഇടപെടുന്ന പ്രസ്ഥാനമാണ് സപ്ലൈകോ. നാലു വര്‍ഷത്തിനിടെ 109 പുതിയ സപ്ലൈകോ ഔട്ട്‌ലെറ്റുകള്‍ തുറന്നു. 1700 ഓളം സൂപ്പര്‍മാര്‍ക്കറ്റുകള്‍ പ്രവര്‍ത്തിക്കുന്നുണ്ട്. 13 സബ്‌സിഡി ഉത്പന്നങ്ങള്‍ വിലമാറ്റമില്ലാതെ എട്ടുവര്‍ഷം വിതരണം ചെയ്യാന്‍ സാധിച്ചതും നേട്ടമാണെന്നും മന്ത്രി പറഞ്ഞു. കെ. യു. ജനീഷ് കുമാര്‍ എംഎല്‍എ അധ്യക്ഷത വഹിച്ചു. ജില്ലാ പഞ്ചായത്ത് അംഗം റോബിന്‍ പീറ്റര്‍ ആദ്യ വില്‍പന നടത്തി. ജില്ലാ സപ്ലൈ ഓഫീസര്‍ കെ. ആർ. ജയശ്രീ, സപ്ലൈകോ റീജിയണല്‍ മാനേജര്‍ ബോബന്‍ കോട്ടയം എന്നിവര്‍ പ്രസംഗിച്ചു.

ബനഡിക്ട് മാർ ഗ്രിഗോറിയോസ് സാംസ്കാരിക തലങ്ങളെയും സ്വാധീനിച്ചു: ആർച്ച്ബിഷപ് മാർ തോമസ് തറയിൽ

തിരുവല്ല: സമൂഹത്തിൽ വ്യത്യസ്തമായ കാഴ്ചപ്പാട് കൊണ്ടുവന്ന ആർച്ച്ബിഷപ് ബനഡിക്ട് മാർ ഗ്രിഗോറിയോസ്, കേരളത്തിന്‍റെ സാംസ്കാരിക മണ്ഡലങ്ങളെയും സ്വാധീനിച്ചിരുന്നുവെന്ന് ചങ്ങനാശേരി ആർച്ച് ബിഷപ് മാർ തോമസ് തറയിൽ. ആർച്ച് ബിഷപ് ബനഡിക്ട് മാർ ഗ്രിഗോറിയോസ് ഫൗണ്ടേഷന്‍റെ കീഴിൽ, ബഥനി സന്യാസസമൂഹത്തിന്‍റെ ചുമതലയിൽ, മാർ ഗ്രിഗോറിയോസിന്‍റെ ജന്മനാടായ കല്ലൂപ്പാറ കോട്ടൂരിൽ പ്രവർത്തിച്ചിരുന്ന മാർ ഗ്രിഗോറിയോസ് ബഥനി ദിവ്യകാരുണ്യാലയം, ചങ്ങനാശേരി അതിരൂപതയിൽ ആരംഭിച്ച മിഷണറീസ് ഓഫ് സെന്‍റ് ജോൺ ദി ബാപ്റ്റിസ്റ്റ് കോൺഗ്രിഗേഷന്‍റെ ചുമതലയിലേയ്ക്കു മാറുന്നതിന്‍റെ ഉദ്ഘാടനം നിർവഹിച്ചു പ്രസംഗിക്കുകയായിരുന്നു മാർ തോമസ് തറയിൽ. ആത്മീയാചാര്യൻ, മതമേലധ്യക്ഷൻ എന്നതിലുപരി വൃക്ഷങ്ങളെയും പ്രകൃതിയെയും സ്നേഹിച്ച് തലസ്ഥാനനഗരിയിൽ നിറഞ്ഞുനിന്ന വ്യക്തിത്വത്തിന്‍റെ ഉടമയായിരുന്നു മാർ ഗ്രിഗോറിയെന്നും ആർച്ച് ബിഷപ് ചൂണ്ടിക്കാട്ടി. ഫൗണ്ടേഷൻ പ്രസിഡന്‍റ് അലക്സ് കുര്യാക്കോസ് അധ്യക്ഷത വഹിച്ചു. തിരുവല്ല അതിരൂപത വികാരി ജനറാൾ ഫാ. ഡോ. ഐസക് പറപ്പള്ളിൽ അനുസ്മരണ പ്രഭാഷണവും, എംഎസ്ജെ സുപ്പീരിയർ ജനറൽ ഫാ. മാത്യു കുരീക്കാട്ടിൽ മുഖ്യപ്രഭാഷണവും നടത്തി. ഫൗണ്ടേഷൻ സ്ഥാപക പ്രസിഡന്‍റ് ഫാ. ഡോ. ഇഗ്നേഷ്യസ് തങ്ങളത്തിൽ ഒഐസി, കവിയൂർ ഗ്രാമ പഞ്ചായത്ത് പ്രസിഡന്‍റ് എം.ഡി. ദിനേശ് കുമാർ, തൃശൂർ സ്നേഹാശ്രമം ഡയറക്ടർ ഫാ. അലക്സാണ്ടർ കുരീക്കാട്ടിൽ സിഎംഎഫ് , കടമാൻകുളം തിരുഹൃദയ മലങ്കര കത്തോലിക്കാ പള്ളി വികാരി ഫാ. മാത്യു കാമുണ്ടകത്തിൽ, എംഎസ്ജെ. കോൺഗ്രിഗേഷൻ ഇന്ത്യൻ സുപ്പീരിയർ ഫാ.സജിൻ തളിയൻ, മരിയസദൻ ഡയറക്ടർ ബ്രദർ സന്തോഷ് ജോസഫ്, ദിവ്യകാരുണ്യാലയം ഡയറക്ടർ ഫാ. സുബിൻ കൂവക്കാട്ട് എംഎസ്ജെ, മാർ ഗ്രിഗോറിയോസ് ഫൗണ്ടേഷൻ ജനറൽ സെക്രട്ടറി പ്രഫ. ജേക്കബ് എം. ഏബ്രഹാം എന്നിവർ പ്രസംഗിച്ചു. 93ാം ജന്മവാർഷികം ആഘോഷിക്കുന്ന ഫാ. ഇഗ്നേഷ്യസ് തങ്ങളത്തിലിന് സമ്മേളനം ആശംസകൾ നേർന്നു. മാർ ഗ്രിഗോറിയോസ് ദിവ്യകാരുണ്യാലയത്തിന്‍റെ ആശീർവാദം ആർച്ച് ബിഷപ് മാർ തോമസ് തറയിൽ നിർവഹിച്ചു.

യുവതിയോട് ലൈംഗികാതിക്രമം കാട്ടിയ സഹോദരങ്ങൾ പിടിയിൽ

പത്തനംതിട്ട: യുവതിക്കു നേരേ ലൈംഗികാതിക്രമം കാട്ടുകയും മര്‍ദ്ദിക്കുകയും ചെയ്ത സഹോദരങ്ങളെ മലയാലപ്പുഴ പോലീസ് അറസ്റ്റ് ചെയ്തു. ചെങ്ങറ സമരഭൂമി ശാഖ 49 ല്‍ ആറ്റരികത്ത് വീട്ടില്‍ ആർ. ജയരാജ്(30), സഹോദരൻ ജിതിന്‍ രാജ് (26) എന്നിവരാണ് അറസ്റ്റിലായത്. കഴിഞ്ഞ 19നു വൈകുന്നേരം യുവതിയുടെ വീടിന് മുന്നില്‍ റോഡില്‍ വച്ച് മകനുമൊത്ത് കടയില്‍ പോയി വരുമ്പോഴാണ് സംഭവം ഉണ്ടായത്. പോലീസ് ഇന്‍സ്‌പെക്ടര്‍ ബി. എസ്. ശ്രീജിത്താണ് കേസ് അന്വേഷിക്കുന്നത്.

പോക്സോ കേസിൽ യുവാവ് അറസ്റ്റിൽ

കോഴഞ്ചേരി: പത്താം ക്ലാസ് വിദ്യാർഥിനിയെ പ്രണയം നടിച്ചു പീഡിപ്പിച്ച യുവാവിനെ അറസ്റ്റു ചെയ്തു. കോഴിക്കോട് സ്വദേശി സനോജിനെയാണ് (27) പോക്‌സോ കുറ്റം ചുമത്തി കോയിപ്രം പോലീസ് അറസ്റ്റ് ചെയ്തത്. സമൂഹമാധ്യമത്തിലൂടെ പരിചയപ്പെട്ട സനോജ് പെണ്‍കുട്ടിയുടെ വീട്ടിലെത്തുകയും മൂന്നു ദിവസം താമസിക്കുകയും ചെയ്തിരുന്നതായും പറയുന്നു. കുട്ടിയിലുണ്ടായ ഭാവ മാറ്റങ്ങള്‍ അധ്യാപികമാര്‍ ശ്രദ്ധിക്കുകയും തുടര്‍ന്ന് ഇവര്‍ കുട്ടിയോട് അന്വേഷിച്ചപ്പോഴാണ് വിവരങ്ങള്‍ അറിവായത്. സ്‌കൂള്‍ അധികൃതര്‍ ചൈല്‍ഡ് ലൈനില്‍ വിവരം അറിയിച്ചതിനേ തുടർന്നാണ് കോയിപ്രം പോലീസ് കേസെടുത്ത് സനോജിനെ കോഴിക്കോട്ടു നിന്ന് അറസ്റ്റ് ചെയ്തത്.

ധന്യൻ മാർ ഈവാനിയോസ് അനുസ്മരണം

ചന്ദനപ്പള്ളി: മലങ്കര കാത്തലിക് അസോസിയേഷൻ പത്തനംതിട്ട ഭദ്രാസനതല സമിതിയുടെ നേതൃത്വത്തിൽ ധന്യൻ മാർ ഈവാനിയോസ് അനുസ്മരണം ചന്ദനപ്പള്ളി മലങ്കര കത്തോലിക്കാ ദേവാലയത്തിൽ നടന്നു. ഫാ.ബെന്നി നാരകത്തിനാൽ അനുസ്മരണ പ്രഭാഷണം നടത്തി. ഭദ്രാസന പ്രസിഡന്‍റ് ജോസ് മാത്യു അധ്യക്ഷത വഹിച്ചു. ഫാ.കുര്യാക്കോസ് കൂത്തിനേത്ത്, ജനറൽ സെക്രട്ടറി എം.എം. തോമസ്, ട്രഷറാർ ജോർജ് യോഹന്നാൻ, വിൽസൺ പാലവിള, ശമുവേൽ മണ്ണിൽ, ആശാ ഷാജി, സജി കല്ലോടിക്കുഴി, ഏബ്രഹാം പുറത്തൂട്ട്, സജി പീടികയിൽ, ബിനോയ് ജോയ്, വർഗീസ് ഉള്ളന്നൂർ എന്നിവർ പ്രസംഗിച്ചു. പന്തളം വൈദിക ജില്ലയിൽ നിന്നും എസ്എസ്എൽസി, പ്ലസ്ടു പരീക്ഷകളിൽ എല്ലാ വിഷയങ്ങൾക്കും എ പ്ലസ് നേടിയവർക്ക് ഉപഹാരങ്ങൾ നൽകി.

20 പള്ളിയോടങ്ങൾകൂടി നീരണിഞ്ഞു

ആറന്മുള: പാർ‌ഥസാരഥി ക്ഷേത്രത്തില്‍ നടക്കുന്ന വള്ളസദ്യയില്‍ പങ്കെടുക്കുന്നതിനായി 20 പള്ളിയോടങ്ങള്‍കൂടി നീരണിഞ്ഞു. 445 വള്ളസദ്യകള്‍ ഇതേവരെ ബുക്കു ചെയ്തു കഴിഞ്ഞതായി പള്ളിയോട സേവാസംഘം ഭാരവാഹികൾ അറിയിച്ചു. മല്ലപ്പുഴശേരി, കോയിപ്രം, കോഴഞ്ചേരി പള്ളിയോടങ്ങള്‍ക്ക് ഇന്ന് സദ്യ ക്രമീകരിച്ചിട്ടുണ്ട്. പമ്പാനദിയിലെ ജലനിരപ്പ് ഉയര്‍ന്നതിനാല്‍ ആഞ്ഞിലിമൂട്ടില്‍ കടവില്‍ നിന്നും പള്ളിയോടങ്ങള്‍ക്ക് ആറന്മുളയിലെത്താന്‍ ബുദ്ധിമുട്ടുണ്ടാകുന്നുണ്ട്. പടിഞ്ഞാറന്‍ മേഖലയിലെ പള്ളിയോടങ്ങള്‍ ക്ഷേത്രത്തിന് സമീപമുളള സത്ര കടവ്, തോട്ടപ്പുഴശേരി, ഇടശേരിമല മാലേത്ത് എന്നീ കടവുകളില്‍ കെട്ടിയിരിക്കുകയാണ്. ചിങ്ങം ആദ്യവാരത്തില്‍ മുഴുവന്‍ പള്ളിയോടങ്ങളും നീരണിയും. കെഎസ്ആര്‍ടിസിയുടെ ബജറ്റ് ടൂറിസം സെല്‍ നടത്തുന്ന പഞ്ചപാണ്ഡവ ക്ഷേത്ര ദര്‍ശനവും, ആറന്മള വളളസദ്യയില്‍ പങ്കെടുക്കുന്നതിന്‍റെ ഭാഗമായി വിവിധ ഡിപ്പോകളില്‍ നിന്നും ബസുകള്‍ ആറന്മുളയിലെത്തുന്നുണ്ട്. 25,26,27 തീയതികളിലാണ് ഏറ്റവും കൂടുതല്‍ കെഎസ്ആര്‍ടിസിയുടെ ടൂറിസം സെല്‍ ബസുകളെത്തുന്നുമെന്ന് അറിയിച്ചിട്ടുള്ളതെന്ന് പള്ളിയോട സേവാസംഘം പ്രസിഡന്‍റ് കെ.വി. സാംബദേവനും സെക്രട്ടറി പ്രസാദ് ആനന്ദ ഭവനും അറിയിച്ചു .

വെച്ചൂച്ചിറ നവോദയയിൽ ഫീൽഡ് ഗെയിംസ് മീറ്റ്

വെച്ചൂച്ചിറ: തിരുവനന്തപുരം മുതൽ തൃശൂർ വരെയുള്ള എട്ട് ജില്ലകളിലെ നവോദയ വിദ്യാലയങ്ങളിലെ തെരഞ്ഞെടുക്കപ്പെട്ട വിദ്യാർഥികൾ മത്സരിക്കുന്ന,യോഗ, ചെസ്, ബാഡ്മിന്‍റൺ, ടേബിൾ ടെന്നീസ് മീറ്റ് 23, 24 തീയതികളിൽ വെച്ചൂച്ചിറ ജവഹർ നവോദയ വിദ്യാലയത്തിൽ നടക്കും. നാളെ രാവിലെ ഒന്പതിനു നടക്കുന്ന ഉദ്ഘാടനച്ചടങ്ങിൽ കാലിക്കറ്റ് ഹീറോസ് വോളിബോൾ കോച്ച് അഹമ്മദ് ഫൈസ്, വെച്ചൂച്ചിറ പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ടി. കെ. ജയിംസ്, ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ രമാദേവി, വാർഡ് മെംബർ പ്രസന്നകുമാരി, ജിഎച്ച്എസ്എസ് വെച്ചൂച്ചിറ കോളനി പ്രിൻസിപ്പൽ ബീന, നവോദയ പ്രിൻസിപ്പൽ, വൈസ് പ്രിൻസിപ്പൽ, അധ്യാപകർ വിദ്യാർഥികൾ രക്ഷിതാക്കൾ തുടങ്ങിയവർ പങ്കെടുക്കും. 24 നു രാവിലെ 11.30 ന് സമാപനയോഗത്തിൽ വെച്ചൂച്ചിറ ഗ്രാമപഞ്ചായത്ത് പ്രസിഡന്‍റ് ഇ. വി. വർക്കി വിജയികൾക്ക് സർട്ടിഫിക്കറ്റുകളും ട്രോഫികളും വിതരണം ചെയ്യും.

നേത്രചികിത്സാ ക്യാന്പ് നടത്തി

പത്തനംതിട്ട: മാക്കാംകുന്ന് റെസിഡന്‍റ്സ് അസോസിയേഷന്‍റെയും പുഷ്പഗിരി മെഡിക്കൽ കോളജ്, റെഡ്ക്രോസ് സൊസൈറ്റി എന്നിവയുടെയും ആഭിമുഖ്യത്തിൽ സംഘടിപ്പിച്ച സൗജന്യ നേത്രചികിത്സാ ക്യാന്പ് ഫാ. ബിജു മാത്യു ഉദ്ഘാടനം ചെയ്തു. പ്രസിഡന്‍റ് ഡോ. കെ. മാത്യു അധ്യക്ഷത വഹിച്ചു. സീനിയർ റെസിഡന്‍റ് ഓഫ്താൽമോളജിസ്റ്റ് ഡോ. സിനു എൽസ ജയിംസ് ക്ലാസിന് നേതൃത്വം നൽകി. അസോസിയേഷൻ സെക്രട്ടറി ഏബൽ മാത്യു, ട്രഷറാർ കെ.എസ്. അനിത എന്നിവർ പ്രസംഗിച്ചു. ഡോ. അനു, തിരുവല്ല റെഡ് ക്രോസ് സെക്രട്ടറി ബാബു കല്ലിങ്കൽ, ട്രഷറർ സാമുവൽ ചെറിയാൻ, പുഷ്പഗിരി പിആർഒ രഞ്ജിത്, അനീഷ്‌ തോമസ് ഐസക്, അലക്സാണ്ടർ ജോർജ്, അശ്വതി രാജ്, സുമേഷ്കുമാർ, സി.പി. ഷിജിത് എന്നിവർ നേതൃത്വം നൽകി.

അവശനിലയിലായ വയോധികനെ മെഡിക്കല്‍ കോളജിലെത്തിച്ചു

പത്തനംതിട്ട: ബന്ധുക്കള്‍ ഉപേക്ഷിച്ചതിനെ തുടര്‍ന്ന് ചോര്‍ന്നൊലിക്കുന്ന ഷെഡില്‍ അവശനിലയില്‍ കണ്ട വയോധികനെ ഡിവൈഎഫ്‌ഐ പ്രവര്‍ത്തകര്‍ കോന്നി മെഡിക്കല്‍ കോളജില്‍ പ്രവേശിപ്പിച്ചു. ആങ്ങമൂഴി സദേശിയായ മേലേത്തറയില്‍ വീട്ടില്‍ സോമനെയാണ് (62) ആങ്ങമൂഴി കൊച്ചിണ്ടിയില്‍ ദേഹമാസകലം വ്രണമായി പുഴുവരിക്കുന്ന നിലയില്‍ കണ്ടത്. നാട്ടുകാര്‍ വിവരമറിയിച്ചതിനേ തുടര്‍ന്നാണ് ആങ്ങമൂഴിയിലെ ഡിവൈഎഫഐ പ്രവര്‍ത്തകര്‍ സീതത്തോട് പഞ്ചായത്ത് പ്രസിഡന്‍റ് പി.ആര്‍. പ്രമോദിനൊപ്പം സ്ഥലത്ത് എത്തിയത്. പ്രസിഡന്‍റ് വിവരം അറിയിച്ചതിനെ തുടര്‍ന്ന് മൂഴിയാര്‍ സ്റ്റേഷനിലെ പോലീസും സ്ഥലത്ത് എത്തി. ദിവസങ്ങളായി ആഹാരവും വെള്ളവും കഴിക്കാതെ അവശനിലയിലായിരുന്ന സോമന്‍ വേദനകൊണ്ട് കരയുകയായിരുന്നു. ഏക്കറ്കണക്കിന് ഭൂമി ഉണ്ടായിരുന്ന സോമന് ഇപ്പോള്‍ സ്വന്തം പേരില്‍ സ്വത്ത് ഒന്നും തന്നെയില്ലെന്ന് നാട്ടുകാര്‍ പറയുന്നു. സോമനെ ബന്ധുക്കള്‍ സ്വത്ത് തട്ടിയെടുത്ത് ഉപേക്ഷിച്ചതാണെന്നും അന്വേഷണം നടത്തണമെന്നും ഡിവൈഎഫ്‌ഐ ആവശ്യപ്പെട്ടു.

ഷോപ്സ് എംപ്ലോയീസ് യൂണിയന്‍ ഏരിയ സമ്മേളനം നടത്തി

പത്തനംതിട്ട: ഷോപ്സ് ആന്‍ഡ് കൊമേഴ്സ്യല്‍ എസ്റ്റാബ്ലിഷ്മെന്‍റ് എംപ്ലോയീസ് യൂണിയന്‍ (സിഐടിയു) പത്തനംതിട്ട ഏരിയ സമ്മേളനം ഫെഡറേഷന്‍ സംസ്ഥാന കമ്മിറ്റിയംഗം എസ് കൃഷ്ണകുമാര്‍ ഉദ്ഘാടനം ചെയ്തു. റെജി ഏബ്രഹാം അധ്യക്ഷത വഹിച്ചു. പി. സി. ഹരി പ്രവര്‍ത്തന റിപ്പോര്‍ട്ട് അവതരിപ്പിച്ചു. സിഐടിയു ജില്ലാ ജോയിന്‍റ് സെക്രട്ടറി കെ. അനില്‍കുമാര്‍, വൈസ് പ്രസിഡന്‌റ് ശ്യാമ ശിവന്‍, യൂണിയന്‍ ജില്ലാ സെക്രട്ടറി ആർ. രവിപ്രസാദ്, അബ്ദുള്‍ മനാഫ്, ആര്‍. ഹരീഷ്, സുധീര്‍ താഴെവെട്ടിപ്രം എന്നിവര്‍ പ്രസംഗിച്ചു. ഭാരവാഹികളായി ഷാജി പി. മാത്യു - പ്രസിഡന്‍റ്, റോയി വര്‍ഗീസ് -സെക്രട്ടറി, റെജി ഏബ്രഹാം, രാജി അനിൽ, കോയമോന്‍ - വൈസ് പ്രസിഡന്‍റുമാര്‍, ആര്‍. ഹരീഷ്, സന്തോഷ് നന്ദിലേത്ത്, പി കെ സുനില്‍കുമാര്‍ -ജോയിന്‍റ് സെക്രട്ടറിമാർ, വിഷ്ണു ജയന്‍ - ട്രഷറാര്‍ എന്നിവരെ തെരഞ്ഞെടുത്തു.

പോക്‌സോ കേസില്‍ അറസ്റ്റ് ചെയ്തു

പത്തനംതിട്ട: പ്രായപൂര്‍ത്തിയാകാത്ത പെണ്‍കുട്ടിയെ കാറിനുള്ളില്‍ കയറ്റി അതിക്രമം കാട്ടുകയും അപമാനിക്കുകയും ചെയ്ത യുവാവിനെ ഇലവുംതിട്ട പേലീസ് പിടികൂടി. അയിരൂര്‍ നോര്‍ത്ത് ചെറുകോല്‍പ്പുഴ ഇടത്രാമണ്‍ മുണ്ടപ്ളാക്കല്‍ എം. പ.ി അജിത്താണ് (31) അറസ്റ്റിലായത്. കഴിഞ്ഞ ദിവസം രാവിലെ സ്‌കൂളില്‍ പോകുന്ന വഴി പുതിയത്തു പടിക്കല്‍ ബസ് സ്റ്റോപ്പിന് സമീപത്ത് വച്ച് ബലമായി കാറില്‍ പിടിച്ചുകയറ്റിയശേഷം അതിക്രമം കാട്ടിയെന്നാണ് പരാതി. കാര്‍ പോലീസ് പിടിച്ചെടുത്തു. തുടര്‍ നടപടികക്കൊടുവില്‍ കുറ്റാരോപിതനെ കോടതിയില്‍ ഹാജരാക്കി. എസ്‌ഐ കെ.എൻ. അനില്‍ കുമാര്‍, സിപിഒ നീനു എം. വര്‍ഗീസ് എന്നിവർ അന്വേഷണ സംഘത്തിലുണ്ട്.

ലഹരിവിരുദ്ധ ബോധവത്കരണം നടത്തി

കോഴഞ്ചേരി: കേന്ദ്ര സാമൂഹികനീതി ശക്തീകരണ മന്ത്രാലയം നടപ്പാക്കുന്ന നഷാ മുക്ത് ഭാരത് അഭിയാന്‍ പദ്ധതിയുടെ ജില്ലാതല കാമ്പയിന്‍റെ ഭാഗമായി കോഴഞ്ചേരി മുത്തൂറ്റ് നഴ്സിംഗ് കോളജില്‍ ലഹരിവിരുദ്ധ ബോധവത്കരണം സംഘടിപ്പിച്ചു. സാമൂഹികനീതി വകുപ്പും ജില്ലാ എക്സൈസ് വിമുക്തി മിഷനും സംയുക്തമായി സംഘടിപ്പിച്ച പരിപാടി കോളജ് പ്രിന്‍സിപ്പല്‍ ഡോ. സിസി ജോസഫ് ഉദ്ഘാടനം ചെയ്തു. വൈസ് പ്രിന്‍സിപ്പല്‍ പ്രഫ. സിന്ധു ഏബ്രഹാം അധ്യക്ഷത വഹിച്ചു. അസിസ്റ്റന്‍റ് പ്രഫ. അബി മേരി സ്‌കറിയാ ലഹരിവിരുദ്ധ പ്രതിജ്ഞ ചൊല്ലി. എക്സൈസ് പ്രിവന്‍റീവ് ഓഫീസർ ബിനു വി. വര്‍ഗീസ് ബോധവത്കരണ ക്ലാസെടുത്തു. ജില്ലാ സാമൂഹികനീതി ഓഫീസര്‍ ജെ. ഷംലാ ബീഗം, ലക്ചറര്‍ അനു സാറാ ജോസഫ്, അധ്യാപകര്‍, ജീവനക്കാര്‍, വിദ്യാര്‍ഥികള്‍ തുടങ്ങിയവര്‍ പങ്കെടുത്തു. അടൂർ: കേന്ദ്ര സാമൂഹികനീതി ശക്തീകരണ മന്ത്രാലയം നടപ്പാക്കുന്ന നഷാ മുക്ത് ഭാരത് അഭിയാന്‍ പദ്ധതിയുടെ ജില്ലാതല കാമ്പയിന്‍റെ ഭാഗമായി അടൂര്‍ കോളജ് ഓഫ് അപ്ലൈഡ് സയന്‍സില്‍ ലഹരിവിരുദ്ധ ബോധവത്കരണം സംഘടിപ്പിച്ചു. സാമൂഹികനീതി വകുപ്പും ജില്ലാ എക്സൈസ് വിമുക്തി മിഷനും സംയുക്തമായി സംഘടിപ്പിച്ച പരിപാടി അടൂര്‍ നഗരസഭാ ചെയര്‍പേഴ്സൺ കെ. മഹേഷ് കുമാര്‍ ഉദ്ഘാടനം ചെയ്തു. കോളജ് പ്രിന്‍സിപ്പല്‍ ഡോ. കെ. സന്തോഷ് ബാബു അധ്യക്ഷത വഹിച്ചു. എക്സൈസ് വിമുക്തി മിഷന്‍ ജില്ലാ കോ-ഓര്‍ഡിനേറ്റര്‍ ജോസ് കളീക്കല്‍ ബോധവത്കരണ ക്ലാസ് നയിച്ചു. ജില്ലാ പ്രൊബേഷന്‍ ഓഫീസര്‍ സിജു ബെന്‍, എന്‍എസ്എസ് പ്രോഗ്രാം ഓഫീസര്‍ രഞ്ജു കൃഷ്ണന്‍ തുടങ്ങിയവര്‍ പ്രസംഗിച്ചു.

വിദ്യാഭ്യാസത്തില്‍ ധാര്‍മികതയ്ക്ക് പ്രാധാന്യം നല്‍കണം: ഗബ്രിയേല്‍ മാര്‍ ഗ്രിഗോറിയോസ്

പത്തനംതിട്ട: മദ്യത്തിന്‍റെയും മയക്കുമരുന്നിന്‍റെയും ഉപയോഗവും വില്പനയും വര്‍ധിച്ചുവരുന്ന സാഹചര്യത്തില്‍ ധാര്‍മികതയ്ക്ക് ഏറെ പ്രാധാന്യം നല്‍കുന്ന വിദ്യാഭ്യാസ രീതിയാണ് വര്‍ത്തമാനകാലത്തിന്‍റെ ആവശ്യമെന്നും മാഫിയാ സംസ്‌കാരത്തിലേക്ക് പോകാതിരിക്കാന്‍ വിദ്യാര്‍ഥികള്‍ സാമൂഹികവബോധമുള്ളവായി മാറണമെന്നും കാതോലിക്കേറ്റ് ആന്‍ഡ് എംഡി സ്‌കൂള്‍സ് മാനേജര്‍ ഡോ. ഗബ്രിയേല്‍ മാര്‍ ഗ്രിഗോറിയോസ് മെത്രാപ്പോലീത്ത. കാതോലിക്കേറ്റ് ആന്‍ഡ് എംഡി സ്‌കൂള്‍സ് കോര്‍പറേറ്റ് മാനേജ്‌മെന്‍റിന്‍റെ പത്തനംതിട്ട ക്ലസ്റ്ററില്‍പെട്ട 15 സ്‌കൂളുകളിലെ ഹയര്‍സെക്കന്‍ഡറി, എസ്എസ്എല്‍സി, ഉന്നത വിജയം നേടിയ വിദ്യാര്‍ഥിികളെയും എല്‍എസ്എസ്, യുഎസ്എസ്, എന്‍എംഎംഎസ് സ്‌കോളര്‍ഷിപ്പ് പരീക്ഷകളില്‍ വിജയിച്ച വിദ്യാര്‍ഥികളയും ആദരിക്കുന്നതിന് സംഘടിപ്പിച്ച പ്രശസ്തം - 2025 ഉദ്ഘാടനം ചെയ്തു പ്രസംഗിക്കുയായിരുന്നു അദ്ദേഹം . ക്ലസ്റ്റര്‍ കോഓര്‍ഡിനേറ്റര്‍ ഫാ. ബിജു മാത്യു പ്രക്കാനം അധ്യക്ഷത വഹിച്ചു. ഗവേണിംഗ് ബോര്‍ഡ് അംഗം ഫാ. ഫിലിപ്പോസ് ദാനിയേല്‍ മുഖ്യസന്ദേശം നല്‍കി. മര്‍ത്തമറിയം ഭദ്രാസന ദേവാലയ വികാരി ഫാ. ജിജി സാമുവേൽ, തുമ്പമണ്‍ എംജി ഹയര്‍ സെക്കന്‍ഡറി സ്‌കൂള്‍ പിടിഎ പ്രസിഡന്‍റ് ഷിബു കെ. ഏബ്രഹാം, പ്രിന്‍സിപ്പല്‍ ഡോ. മാത്യു പി. ജോര്‍ജ് , പത്തനംതിട്ട കാതോലിക്കേറ്റ് ഹൈസ്‌കൂള്‍ ഹെഡ്മിസ്ട്രസ് പി.എം. ജയമോള്‍, തുമ്പമണ്‍ എംജി എച്ച്എസ്‌ ഹെഡ്മാസ്റ്റര്‍ റോയി ജോണ്‍, വിദ്യാര്‍ഥി പ്രതിനിധി സേറാ സജി എന്നിവര്‍ പ്രസംഗിച്ചു.

വല്യയന്തി പള്ളിയില്‍ തിരുനാള്‍

മൈലപ്ര: വല്യയന്തി സെന്‍റ് തോമസ് മലങ്കര കത്തോലിക്കാ പള്ളിയില്‍ 75 ാമത് തിരുനാളിനു കൊടിയേറി. പത്തനംതിട്ട വൈദികജില്ലാ വികാരി ഫാ. ജോണ്‍സണ്‍ പാറയ്ക്കല്‍ കൊടിയേറ്റിനു കാര്‍മികത്വം വഹിച്ചു. വികാരി ഫാ. വര്‍ഗീസ് വിളയില്‍ സന്നിഹിതനായിരുന്നു. 23 മുതല്‍ 25 വരെ വൈകുന്നേരം 5.30ന് വിശുദ്ധ കുര്‍ബാനയും ഇടവക വിശുദ്ധീകരണ ധ്യാനവും ഉണ്ടാകും. ധ്യാനത്തിന് ഫാ. ടോണി കട്ടക്കയം നേതൃത്വം നല്‍കും. 26നു വൈകുന്നേരം 5.30ന് റാസ പ്ലാക്കല്‍ ജംഗ്ഷനില്‍ നിന്നാരംഭിച്ച് പള്ളിയിലേക്ക്. 27ന് എട്ടിന് ആഘോഷമായ തിരുനാള്‍ കുര്‍ബാനയ്ക്ക് ബിഷപ് ഡോ.ജോഷ്വാ മാര്‍ ഇഗ്നാത്തിയോസ് കാര്‍മികത്വം വഹിക്കും. തുടര്‍ന്ന് ഇടവക പ്ലാറ്റിനം ജൂബിലി ഉദ്ഘാടനം, കൊടിയിറക്ക്്, നേര്‍ച്ചവിളമ്പ്.

ജനകീയ ശുചീകരണ പരിപാടി ആരംഭിച്ചു

തട്ടയിൽ: പൊതു ഇടങ്ങൾ ജനപങ്കാളിത്തത്തോടെ ശുചിയാക്കുന്ന ജനകീയശുചീകരണ പരിപാടിയുടെ പന്തളം തെക്കേക്കര ഗ്രാമപഞ്ചായത്തുതല ഉദ്ഘാടനം മങ്കുഴി ജംഗ്ഷനില്‍ ഗ്രാമപഞ്ചായത്ത് പ്രസിഡന്‍റ് എസ്. രാജേന്ദ്രപ്രസാദ് നിര്‍വഹിച്ചു. എല്ലാ മാസവും മൂന്നാമത്തെ ശനി പൊതുസ്ഥലങ്ങളും മൂന്നാമത്തെ വെളളി സ്‌കൂളുകളും സര്‍ക്കാര്‍ സ്ഥാപനങ്ങളും വൃത്തിയാക്കും. സ്ഥിരംസമിതി ചെയര്‍പേഴ്സണ്‍ വി.പി. വിദ്യാധര പണിക്കര്‍, അംഗം അംബിക ദേവരാജന്‍, സെക്രട്ടറി സി.എസ്. കൃഷ്ണകുമാര്‍, സിഡിഎസ് അംഗം സരസ്വതിയമ്മ, കുടുംബശ്രീ അംഗങ്ങള്‍ തുടങ്ങിയവര്‍ പങ്കെടുത്തു. പരിപാടിയുടെ ഭാഗമായി തട്ട മങ്കുഴി ജംഗ്ഷന്‍ പൊതുജനപങ്കാളിത്തത്തോടെ ശുചിയാക്കി.

അർഥ വിഷൻ 2025: റാങ്ക് ജേതാക്കളെ അനുമോദിച്ചു

പത്തനംതിട്ട: കാതോലിക്കേറ്റ് കോള‌ജ് സാമ്പത്തിക ശാസ്ത്ര ബിരുദാനന്തര ബിരുദ ഗവേഷണ വിഭാഗത്തിന്‍റെ ആഭിമുഖ്യത്തിൽ നടന്ന അർഥ വിഷൻ - 2025ൽ എംജി യൂണിവേഴ്സിറ്റി ബിഎ എക്കണോമിക്സിന് ഒന്ന്, ആറ്, ഒന്പത് റാങ്കുകൾ നേടിയ വിദ്യാർഥികളെ ജില്ലാ കളക്ടർ എസ്. പ്രേംകൃഷ്ണൻ ആദരിച്ചു. യുജിസി, നെറ്റ് മത്സര പരീക്ഷാ പരിശീലന ക്ലാസുകളുടെ ഉദ്ഘാടനം ഡോ. ഏബ്രഹാം മാർ സെറാഫിം മെത്രാപ്പോലീത്ത നിർവഹിച്ചു. വകുപ്പ് മേധാവി ഡോ. ഷൈനി ടി. അലക്സാണ്ടർ അധ്യക്ഷത വഹിച്ചു. കാതോലിക്കേറ്റ് കോളജിന്‍റെ ഇ-ഡയറക്ടറി ലോഗോ പ്രകാശനം അലുമ്നി അസോസിയേഷൻ വൈസ് പ്രസിഡന്‍റ് ഡോ. വി.എൻ.എസ്. പിള്ള നിർവഹിച്ചു. കോളജ് പ്രിൻസിപ്പൽ ഡോ. സിന്ധു ജോൺസ്, ബിജോയ് ഡി. ഏബ്രഹാം, സോണി ജേക്കബ്, ബിജി കുഞ്ചാക്കോ, കരുണാകരൻ പരുത്ത്യാനിക്കൽ, ചിന്താമണി ഹരികൃഷ്ണൻ എന്നിവർ പ്രസംഗിച്ചു.

പിന്തള്ളപ്പെടുന്നവരായി ആരുമുണ്ടാകരുത്: ഡോണി തോമസ് വര്‍ഗീസ്

വടശേരിക്കര: സ്‌കൂൾ, കോളജ് പരീക്ഷകളില്‍ മാര്‍ക്ക് കുറഞ്ഞവരെയും പരാജയപ്പെട്ടവരെയും ചേര്‍ത്തുനിര്‍ത്തിയെങ്കില്‍ മാത്രമേ യഥാര്‍ഥ വിജയാഘോഷമാകുകയുള്ളൂവെന്ന് ജില്ലാ ജഡ്ജി ഡോണി തോമസ് വര്‍ഗീസ്. വടശേരിക്കര ഐക്യ ക്രൈസ്തവ സംഘടനയുടെ നേതൃത്വത്തില്‍ നടത്തിയ വിദ്യാഭ്യാസ പ്രോല്‍സാഹന സമ്മേളനവും അവാര്‍ഡുദാന ചടങ്ങും വടശേരിക്കര സെന്‍റ് ആന്‍റണീസ് ദേവാലയത്തില്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ജീവിത പരീക്ഷകളിൽ വീണുപോയവരെ ചേര്‍ത്തുപിടിച്ച് അവരെയും മുഖ്യധാരയിലെത്തിക്കുമ്പോഴാണ് ആത്മീയജീവിതം പോലും അര്‍ഥപൂര്‍ണമാകുന്നതെന്നും വിജയികളായ കുട്ടികളുടെ എണ്ണം കൂടുമ്പോള്‍തന്നെ ഇരകളായ കുട്ടികളുടെയും കുറ്റകൃത്യങ്ങളിലേര്‍പ്പെടുന്ന കുട്ടികളുടെയും എണ്ണം കൂടിവരുന്നുണ്ടെന്നും അതിസൂക്ഷ്മമായ പഠനത്തിനും അതിഗൗരവമായ പരിഹാരത്തിനും എല്ലാ വിഭാഗങ്ങളില്‍ പെട്ടവരും തയാറാകണമെന്നും ഡോണി തോമസ് വര്‍ഗീസ് പറഞ്ഞു. പ്രസിഡന്‍റ് ഫാ. ജോബ് പതാലില്‍ അധ്യക്ഷത വഹിച്ചു. ഓര്‍ത്തഡോക്‌സ് സഭാ കൗണ്‍സില്‍ അംഗം മനോജ് മാത്യു മുഖ്യപ്രഭാഷണം നടത്തി. ഫാ. സിജോ പന്നലക്കുന്നേല്‍ അനുഗ്രഹ പ്രഭാഷണവും ഫാ. പീറ്റര്‍ കുത്തുകല്ലുങ്കല്‍ ധ്യാന പ്രസംഗവും നടത്തി. സെക്രട്ടറി ബെന്നി പുത്തന്‍പറമ്പിൽ, ട്രഷറാര്‍ സന്തോഷ് കെ. ചാണ്ടി, റവ.ഫിലിപ്പ് ബേബി, ഫാ. എബി വര്‍ഗീസ്, റവ. മാത്യു ജോണ്‍ മുളമൂട്ടില്‍, റവ. സന്തോഷ് മാത്യു, ഫാ. ജോജി ജോര്‍ജ് ഫിലിപ്പ്, റവ. സന്തോഷ് ജോസഫ്, തോമസ് ചാക്കോ, മാത്യൂസ് ഏബ്രഹാം, ഷാജി മാത്യു, സ്വപ്ന സൂസന്‍ ജേക്കബ്, ഡോ. മാത്യു ജോസഫ് എന്നിവര്‍ പ്രസംഗിച്ചു.

കൂട് സ്ഥാപിച്ചിട്ടും പുലി വന്നില്ല; വന്യമൃഗഭീതി ഒഴിയാതെ താന്നിക്കപ്പുഴ

റാന്നി: പുലിയെ പിടികൂടാന്‍ കൂട് സ്ഥാപിക്കുകയും നിരീക്ഷണം ശക്തമാക്കുകയും ചെയ്തുവെങ്കിലും ഭീതി മാറാതെ പ്രദേശവാസികൾ. ഒരാഴ്ച മുമ്പ് പുലിയെ കണ്ടതായി ലഭിച്ച വിവരത്തിന്‍റെ അടിസ്ഥാനത്തില്‍ വെച്ചൂച്ചിറ പെരുന്തേനരുവിക്ക് സമീപം താന്നിക്കപ്പുഴയില്‍ കൂടു സ്ഥാപിക്കുകയും വലിയകാവിലെ ജനവാസ മേഖലയിലും വനത്തിലും വനം വകുപ്പ് നിരീക്ഷണം ശക്തമാക്കുകയും ചെയ്തിരുന്നു. പിന്നീട് പുലിയെ സംബന്ധിച്ചു വിവരങ്ങള്‍ ഒന്നും ഇല്ലെന്നാണ് വനപാലകര്‍ പറയുന്നത്. എന്നാലും നിരീക്ഷണം ശക്തമാക്കാന്‍ നിര്‍ദേശമുണ്ട്. പുലിയെ ടാപ്പിംഗ് തൊഴിലാളി കണ്ടതായി പറയുന്ന വെച്ചൂച്ചിറ താന്നിക്കപ്പുഴയിലെ പൊന്തക്കാടുകള്‍ കേന്ദ്രീകരിച്ച് വനപാലകര്‍ നിരീക്ഷണ കാമറകളും സ്ഥാപിച്ചിരുന്നു. ഇതിലും പുലിയുടെ സാന്നിധ്യം പിന്നീട് ലഭിച്ചിരുന്നില്ല. പുലിഭീതിയില്‍ കഴിയുന്ന താന്നിക്കാപ്പുഴയില്‍ ടാപ്പിംഗ് ജോലികള്‍ അപ്പാടെ നിലച്ച മട്ടാണ്. പുലര്‍ച്ചെയും രാവിലെയുമാണ് തോട്ടങ്ങളില്‍ തൊഴിലാളികള്‍ എത്തി ടാപ്പിംഗ് നടത്തേണ്ടത്. എന്നാല്‍ പുലിഭീതി മൂലം ഈ സമയത്ത് ഇതുവഴി ആരും നടന്നുപോകുന്നില്ല. വാഹനങ്ങളിലല്ലാതെ നടന്നുപോകാന്‍ ആളുകള്‍ക്ക് ഭയമാണ്. കുട്ടികളെ ഒറ്റയ്ക്കു സ്‌കൂളുകളിലേക്ക് അയയ്ക്കുന്നുമില്ല. ഇതിനു സമീപമുണ്ടായിരുന്ന ചില താമസക്കാരും തത്ക്കാലത്തേക്കെങ്കിലും വീടൊഴിഞ്ഞിരിക്കുകയാണ്. താന്നിക്കപ്പുഴ, പെരുന്തേനരുവി, കുരുമ്പന്‍മൂഴി, അഴുത കോളനി, നൂറോക്കാട് എന്‍എസ്എസ് എസ്റ്റേറ്റ് പ്രദേശങ്ങള്‍ എന്നിവിടങ്ങളിലെല്ലാം പുലിഭീതി നിലനില്‍ക്കുകയാണ്. കാട്ടാന, കാട്ടുപോത്ത്, കാട്ടുപന്നി എന്നിവ കൃഷിയിടങ്ങളില്‍ എത്തുകയും ഇവയെക്കുറിച്ചുള്ള ഭയം നിലനില്‍ക്കുകയും ചെയ്യുന്നതിനിടയിലാണ് വില്ലനായി പുലിഭീതി കൂടി ആളുകളിലേക്കെത്തിക്കഴിഞ്ഞിരിക്കുന്നത്. വനാതിര്‍ത്തി പ്രദേശങ്ങളില്‍ ഇപ്പോള്‍ കാര്‍ഷിക വൃത്തിയും ജനജീവിതവും ദുഃസഹമായിരിക്കുകയാണ്. ആനയും കാട്ടുപന്നിയും കാര്‍ഷികവിളകള്‍ അപ്പാടെ നശിപ്പിക്കുകയാണ്. ആനയുടെ ശല്യം രൂക്ഷമായതോടെ വിളകള്‍ അപ്പാടെ നശിപ്പിക്കുകയാണ്. തെങ്ങ്, കമുക് തുടങ്ങിയവയ്ക്കും ഫലവര്‍ഗങ്ങള്‍ക്കും നാശനഷ്ടം വരുത്തുന്നു. കിഴക്കന്‍ മേഖലയിലെ പല പഞ്ചായത്തുകളില്‍നിന്നും അതിര്‍ത്തി പ്രദേശങ്ങളിലെ കര്‍ഷക കുടുംബങ്ങള്‍ വ്യാപകമായി വീടുപേക്ഷിച്ചു പോകുകയാണ്. കര്‍ഷകര്‍ സ്വയം ഒഴഞ്ഞുപോകുന്നതിനു സാഹചര്യമൊരുക്കുകയാണ് വനപാലകരും ചെയ്യുന്നത്. രൂക്ഷമായ വന്യമൃഗശല്യം നേരിടാനും ജനങ്ങളുടെ സൈ്വര ജീവിതം ഉറപ്പാക്കാനും ഒരു പദ്ധതിയുമില്ലെന്ന് കര്‍ഷക സംഘടനകള്‍ ചൂണ്ടിക്കാട്ടുന്നു.

ബസു കാറും കൂട്ടിയിടിച്ച് ഒരാള്‍ക്കു പരിക്ക്

ഏനാത്ത്: എംസി റോഡില്‍ കെഎസ്ആര്‍ടിസി ബസിടിച്ച് കാര്‍ യാത്രികനു പരിക്കേറ്റു. കൊല്ലം കടവൂര്‍ സ്വദേശി മഹാദേവനാണ് പരിക്ക്. ശനിയാഴ്ച വൈകുന്നേരമാണ് അപകടമുണ്ടായത്. കൊട്ടാരക്കര പിഡബ്ലുഡി ഗസ്റ്റ്ഹൗസിലെ ഭക്ഷണശാല നടത്തുകയാണ് ഇദ്ദേഹം. ഏനാത്ത് എംജി ജംഗ്ഷനു സമീപംമുണ്ടായ അപകടത്തില്‍ പരിക്കേറ്റു കിടന്ന മഹാദേവനെ ആശുപത്രിയില്‍ എത്തിക്കാന്‍ വാഹനങ്ങള്‍ കൈകാണിച്ചിട്ടും ലഭിക്കാത്തതിനാല്‍ ബസ് ഡ്രൈവര്‍ മണിലാൽ, കൊട്ടാരക്കര സ്വകാര്യ കോളജിലെ അധ്യാപകന്‍ എസ്.സുനീഷ് എന്നിവര്‍ ചേര്‍ന്ന് ഒരു മിനിലോറിയിലാണ് അടൂര്‍ ജനറല്‍ ആശുപത്രിയില്‍ എത്തിച്ചത്.

റോഡ് ഉദ്ഘാടനം ചെയ്തു

ചുങ്കപ്പാറ: കോട്ടാങ്ങന്‍ പഞ്ചായത്ത് ഒമ്പതാം വാര്‍ഡില്‍ നിര്‍മലപുരം - മേപ്രത്ത്പടി - മുഴയമുട്ടം കാനനപാതയില്‍ പ്രമോദ് നാരയണന്‍ എംഎല്‍എ യുടെ പ്രാദേശിക വികസന ഫണ്ടില്‍ നിന്ന് അഞ്ച് ലക്ഷം രൂപ വിനിയോഗിച്ച് പൂട്ടുകട്ട പാകി നവീകരിച്ചു. പൂര്‍ത്തിയാക്കിയ റോഡിന്‍റെ ഉദ്ഘാടനം നിര്‍മലപുരത്ത് പ്രമോദ് നാരായണ്‍ എംഎല്‍എ നിര്‍വഹിച്ചു. വാര്‍ഡ് മെംബര്‍ ജോളി ജോസഫിന്‍റെ അധ്യക്ഷതയില്‍ ചേര്‍ന്ന യോഗത്തില്‍ പഞ്ചായത്ത് പ്രസിഡന്‍റ് ബിനു ജോസഫ്, മുന്‍ പഞ്ചായത്ത് അംഗങ്ങളായ ജോസി ഇലഞ്ഞിപ്പുറം, സി. ജെ. ജോസഫ് ചേബ്ലാനിക്കൽ, കൊച്ചുമോന്‍ വടക്കയിൽ, അജിമോള്‍ നെല്ലുവേലില്‍, ബിറ്റോ മാപ്പൂർ, ജോസഫ് ജോസഫ് പുത്തന്‍ പുരയ്ക്കല്‍, ജോയി പീടികയില്‍, ബേബിച്ചന്‍ മോടിയില്‍, റിന്‍സി മോടിയിൽ, ബാബു പുലിത്തിട്ട സോണി മോടിയില്‍ തുടങ്ങിയവര്‍ പ്രസംഗിച്ചു.

കേബിളില്‍ കുരുങ്ങി സ്‌കൂട്ടര്‍ യാത്രികർക്കു പരിക്ക്

മല്ലപ്പള്ളി : കേബിള്‍ വയറില്‍ കുരുങ്ങി ഇരുചക്ര യാത്രികര്‍ക്ക് പരിക്ക്. മല്ലപ്പള്ളി - കോഴഞ്ചേരി റോഡില്‍ കീഴ്‌വായ്പൂര് സമരമുക്കിന് സമീപം ഇന്നലെ വൈകുന്നേരം 4.30നായിരുന്നു അപകടം. വൈദ്യുത പോസ്റ്റില്‍ ചുറ്റി വെച്ചിരുന്ന കേബിളുകള്‍ താഴേക്ക് പതിച്ചാണ് സ്‌കൂട്ടര്‍ യാത്രക്കാരായ അമ്മയ്ക്കും മകള്‍ക്കും പരിക്കേറ്റത്. പത്തനാട് സ്വദേശി പുതിയവീട്ടില്‍ ശ്രീലേഖ (48) മകള്‍ അഖില (24) എന്നിവര്‍ക്കാണ് പരിക്കേറ്റത്. സ്‌കൂട്ടര്‍ ഓടിച്ചിരുന്ന അഖിലയുടെ കഴുത്തിലേക്ക് കേബിളുകള്‍ വീണതിനേ തുടര്‍ന്ന് സ്‌കൂട്ടറിന്റെ നിയന്ത്രണം നഷ്ടപ്പെട്ട് റോഡിലേക്ക് ഇരുവരും വീഴുകയായിരുന്നുവെന്ന് ദൃക്‌സാക്ഷികള്‍ പറഞ്ഞു. ഉടന്‍തന്നെ മല്ലപ്പള്ളി ജോര്‍ജ് മാത്തന്‍ ആശുപത്രിയില്‍ പ്രാഥമ ശുശ്രൂഷ നല്‍കി. ഇന്ന് കൂടുതല്‍ ചികിത്സ തേടുമെന്ന് ബന്ധുക്കള്‍ അറിയിച്ചു. ശ്രീലേഖ ചെങ്ങന്നൂരിലേ സ്വന്തം വീട്ടിലെത്തിയശേഷം പത്തനാട്ടിലെ വീട്ടിലേക്ക് മടങ്ങുമ്പോഴാണ് അപകടം.

തീര്‍ഥാടകര്‍ തെന്നിവീണു; ശബരിമല നീലിമല പാത അടച്ചു

പത്തനംതിട്ട: പമ്പ - സന്നിധാനം പരമ്പരാഗത പാതയില്‍ നീലിമലയില്‍ നിരവധി തീര്‍ഥാടകര്‍ തെന്നിവീണു പരിക്കേറ്റതോടെ പാത അടച്ചു. ഇതോടെ സ്വാമി അയ്യപ്പന്‍ റോഡിലൂടെയാണ് തീര്‍ഥാടകര്‍ മലകയറുകയും ഇറങ്ങുകയും ചെയ്യുന്നത്. തുടര്‍ച്ചയായി മഴ പെയ്തതോടെയാണ് അപകടം ഉണ്ടായത്. കഴിഞ്ഞ ദിവസം ദര്‍ശനം കഴിഞ്ഞ് നിലിമലയിറങ്ങിയ ഇതര സംസ്ഥാനക്കാരായ 15 തീര്‍ഥാടകര്‍ക്ക് വീണു പരിക്കേറ്റിരുന്നു. കൂടുതല്‍ പേര്‍ക്കും കൈകാലുകള്‍ക്കും തലയ്ക്കുമാണ് പരിക്കേറ്റത്. ഇവര്‍ പമ്പ, പത്തനംതിട്ട ഗവണ്‍മെന്‍റ് ആശുപത്രികളില്‍ പ്രഥമ ശുശ്രൂഷകള്‍ക്കു ശേഷം അവരവരുടെ നാടുകളിലക്ക് പോയി. കര്‍ക്കടക മാസ പൂജയ്ക്ക് നട തുറന്നതു മുതല്‍ തീര്‍ഥാടകരെ നീലിമല പാതയിലൂടെയാണ് കടത്തിവിട്ടത്. എന്നാല്‍ മഴ ശക്തമായതിനു പിന്നാലെ പാതയില്‍ വഴുക്കല്‍ രൂക്ഷമാകുകയും ആളുകള്‍ അപകടത്തില്‍പെടാനും തുടങ്ങി. വിവരം അറിയിച്ചതിനെ തുടര്‍ന്ന് പമ്പ പോലീസ് എത്തിയാണ് നീലിമല പാത അടച്ചത്. മിഥുനമാസ പൂജയ്ക്ക് നടതുറന്നപ്പോളും തീര്‍ഥാടകര്‍ക്ക് തെന്നിവീണു പരിക്കേറ്റിരുന്നു. തെന്നിവീഴുന്നത് ഒഴിവാക്കാന്‍ പാതയില്‍ പാകിയിരിക്കുന്ന കരിങ്കല്ല് പരുക്കന്‍ ആക്കുന്ന പണി അടിയന്തരമായി നടത്തിയ ശേഷമേ പാത തുറന്നു കൊടുക്കുകയുള്ളൂവെന്ന് കഴിഞ്ഞമാസം ദേവസ്വം ബോര്‍ഡ് പറഞ്ഞിരുന്നതാണ്. പണി നടത്താതെ പാത തുറന്നതാണ് വീണ്ടും അപകടത്തിന് ഇടയാക്കിയത്.

നിരോധിത പുകയില ഉത്പന്നങ്ങള്‍ പിടികൂടി; ആസാം സ്വദേശി അറസ്റ്റില്‍

പത്തനംതിട്ട: നിരോധിത പുകയില ഉത്പന്നങ്ങളുമായി ആസാം സ്വദേശി അടൂരില്‍ അറസ്റ്റിൽ. ആസാം ബാര്‍പെട്ട ചേട്ടമിരി ബീല്‍ നാഗോണ്‍ ആഷിഖുല്‍ ഇസ്ലാമാണ് (19) അടൂര്‍ കെഎസ്ആര്‍ടിസി സ്റ്റാന്‍ഡില്‍ നിന്നു പിടിയിലായത്. ഇളമണ്ണൂര്‍ പൂതംകര പ്ലൈവുഡ് സ്ഥാപത്തിലെ തൊഴിലാളിയാണ്. പെരുമ്പാവൂരില്‍ നിന്നും കെഎസ്ആര്‍ടിസി ബസില്‍ കടത്തിക്കൊണ്ട് വന്നതാണ് നിരോധിക പുകയില ഉത്പന്നങ്ങളെന്ന് ചോദ്യം ചെയ്യലില്‍ വ്യക്തമായി. എസ്‌ഐ ഡി. സുനില്‍ കുമാറിന്‍റെ നേതൃത്വത്തിലാണ് പിടികൂടിയത്. പട്രോളിംഗ് ഡ്യൂട്ടിക്കിടെ സംശയം തോന്നി തടഞ്ഞു നിര്‍ത്തി പിടികൂടുകയുമായിരുന്നു. ബാഗ് പരിശോധിച്ചു നോക്കിയതില്‍ ശിഖാര്‍ പാന്മസാല എന്നയിനം നിരോധിത പുകയില ഉത്പന്നങ്ങള്‍ കണ്ടെടുത്തു. വില്പനയ്ക്കായി കൈവശം സൂക്ഷിച്ചതാണെന്ന് ചോദ്യം ചെയ്യലില്‍ ബോധ്യപ്പെട്ടതിനേതുടര്‍ന്നാണ് അറസ്റ്റ്. എസ്എച്ച്ഒ ശ്യാം മുരളി, സിപിഒ ബൈജു എന്നിവരും പോലീസ് സംഘത്തില്‍ ഉണ്ടായിരുന്നു.

വൈദ്യുതിപോസ്റ്റ് അപകടാവസ്ഥയിൽ; കയര്‍ കെട്ടി സംരക്ഷണം

കോന്നി: ചിറ്റൂര്‍മുക്ക് - കോട്ടപ്പാറ റോഡരികില്‍ അപകടാവസ്ഥയിലായ വൈദ്യുതിപോസ്റ്റ് കഴിഞ്ഞ ഒരുമാസമായി കയറില്‍ താങ്ങിനിര്‍ത്തിയിരിക്കുന്നു. ചിറ്റൂര്‍മുക്ക് അങ്കണവാടിക്കു സമീപമാണ് പോസ്റ്റ് സ്ഥിതി ചെയ്യുന്നത്. നിരവധി വീടുകളും സമീപത്തുണ്ട്. ചുവട്ടിലെ കോണ്‍ക്രീറ്റ് പൊട്ടിമാറി പോസ്റ്റ് ചാഞ്ഞുനില്‍ക്കുകയാണ്. പോസ്റ്റിന്‍റെ അപകടാവസ്ഥ കെഎസ്ഇബിയെ അറിയിച്ചിരുന്നതായി കോന്നി ഗ്രാമപഞ്ചായത്ത് പ്രസിഡന്‍റ് അനി സാബു പറഞ്ഞു. എന്നാല്‍ യാതൊരു നടപടികളും ഉണ്ടായിട്ടില്ല. കഴിഞ്ഞദിവസങ്ങളില്‍ മഴയ്‌ക്കൊപ്പം കാറ്റും ശക്തമായിരുന്നതോടെ പോസ്റ്റ് കൂടുതല്‍ അപകടാവസ്ഥയിലായി. കുട്ടികള്‍ അടക്കം യാത്ര ചെയ്യുന്ന പാതയിലാണ് അപകടാവസ്ഥയില്‍ പോസ്റ്റ് നില്‍ക്കുന്നത്.

മത്സ്യവ്യാപാരത്തിലൂടെ ലാഭം വാഗ്ദാനം ചെയ്ത് 1.5 കോടിയും സ്വര്‍ണവും പണവും തട്ടിയെടുത്തു

‌പണം നഷ്ടപ്പെട്ടയാള്‍ ജീവനൊടുക്കിയ കേസില്‍ വിശദമായ അന്വേഷണം പത്തനംതിട്ട: മത്സ്യവ്യാപാരത്തിലൂടെ ലാഭമുണ്ടാക്കാമെന്ന് വിശ്വസിപ്പിച്ച് ഒന്നരക്കോടിയിലധികം രൂപയും 166 ഗ്രാം സ്വര്‍ണവും കബളിപ്പിച്ചെടുത്ത കേസില്‍ ഒരാളെ ഇലവുംതിട്ട പോലീസ് പിടികൂടി. കേസിലെ ഒന്നാം പ്രതി മല്ലപ്പള്ളി പെരുമ്പെട്ടി ചാമക്കാലയില്‍ റമീസ് റഹ്‌മാനാണ് (30 )അറസ്റ്റിലായത്. മെഴുവേലി തുമ്പമണ്‍ നോര്‍ത്ത് ഞാവാലിക്കോട് ചക്കാലമണ്ണില്‍ ബിന്നി മാത്യുവിന്‍റെ ഭാര്യ ലീന വര്‍ഗീസിന്‍റെ (54) മൊഴിപ്രകാരം രജിസ്റ്റര്‍ ചെയ്ത കേസിലാണ് ഉടനടി ഒന്നാം പ്രതിയെ കസ്റ്റഡിയിലെടുത്തത്. 2023 ജനുവരി ഒന്നുമുതല്‍ 2025 ജൂണ്‍ വരെയുള്ള കാലയളവിലാണ് തട്ടിപ്പ് നടന്നത്. പോലീസ് ഇന്‍സ്പെക്ടര്‍ ടി. കെ. വിനോദ് കൃഷ്ണന്‍റെ നേതൃത്വത്തിലാണ് അന്വേഷണം നടക്കുന്നത്. കേസില്‍ രണ്ടാം പ്രതി ഇയാളുടെ ഭാര്യ ഷാനിമോളും മൂന്നാം പ്രതി ഇയാളുടെ പിതാവ് അബ്ദുറഹ്‌മാന്‍ കുട്ടിയുമാണ്. പെരുമ്പെട്ടി സ്വദേശി ദിലീപ് ലാലാണ് നാലാം പ്രതിയെന്നു പോലീസ് പറഞ്ഞു. 2023മുതലുള്ള കാലയളവില്‍ പണവും സ്വര്‍ണവും അടക്കം 1,68,59,581 രൂപ തട്ടിയെടുത്ത സംഘം, പണം തിരികെ നല്‍കാതെ വന്നപ്പോള്‍ സാമ്പത്തിക പ്രശ്‌നങ്ങള്‍ മൂലമുണ്ടായ മാനസിക സമ്മര്‍ദ്ദത്താല്‍ സഹിക്കവയ്യാതെ ബിന്നി ജൂണ്‍ 30 ന് രാവിലെ ജീവനൊടുക്കിയിരുന്നു. ബിസിനസിന്‍റെ പേരില്‍ 2023 ജനുവരി ഒന്ന് മുതലുള്ള കാലയളവില്‍ ഇലവുംതിട്ടയിലെ എസ്ബിഐ, കനറ എന്നീ ബാങ്കുകളിലെ ഇദ്ദേഹത്തിന്‍റെ അക്കൗണ്ടുകളില്‍ നിന്നും പത്തനംതിട്ട ഇസാഫ് ബാങ്കിലെ അക്കൗണ്ടിലൂടെയും 1,54,59,581 രൂപ പ്രതികള്‍ കബളിപ്പിച്ച് കൈക്കലാക്കി. കൂടാതെ, 166 ഗ്രാം സ്വര്‍ണവും തട്ടിയെടുത്തു. അന്വേഷണത്തിന്‍റെ ഭാഗമായി ബിന്നിയുടെ ബാങ്ക് ഇടപാടുകള്‍ സംബന്ധിച്ച രേഖകള്‍ പോലീസ് ലഭ്യമാക്കിയിരുന്നു. ഇസാഫ് ബാങ്കിലെ ബിന്നിയുടെ ഇടപാടുകള്‍ പരിശോധിച്ചപ്പോള്‍ 2023 ഫെബ്രുവരി 18 നും 2025 മാര്‍ച്ച് 22 നുമിടയില്‍ ഒന്നാംപ്രതിയുടെ ബാങ്ക് അക്കൗണ്ടിലേക്ക് 52, 18,700 രൂപ കൈമാറ്റപ്പെട്ടതായി കണ്ടെത്തി. എസ് ബിഐ അക്കൗണ്ട് വിവരങ്ങള്‍ പരിശോധിച്ചപ്പോള്‍ 99,72,211 രൂപയും ഇയാളുടെ അക്കൗണ്ടില്‍ എത്തിയതായി വ്യക്തമായി. അതേസമയം രണ്ടും മൂന്നും പ്രതികളുടെ അക്കൗണ്ടുകളിലേക്കായി എസ്ബിഐ, ഇസാഫ് എന്നീ ബാങ്ക് അക്കൗണ്ടുകളില്‍ നിന്നും 30,19,990 രൂപയും കൈമാറ്റം ചെയ്യപ്പെട്ടതായി പോലീസിന്‍റെ അന്വേഷണത്തില്‍ കണ്ടെത്തി. തുടര്‍ന്ന് ഒന്നാംപ്രതി റമീസ് റഹ്‌മാനെ കഴിഞ്ഞ രാത്രി ് കസ്റ്റഡിയിലെടുത്ത് വിശദമായി ചോദ്യം ചെയ്തു. ഇയാളുടെ കുറ്റസമ്മതമൊഴി രേഖപ്പെടുത്തിയ ശേഷം 10ന് അറസ്റ്റ് ചെയ്തു. ബിസിനസ് നഷ്ടവും സാമ്പത്തിക പ്രശ്‌നവും മൂലം മനോവിഷമത്താല്‍ ജൂണ്‍ 30 ന് രാവിലെ വീടിനു പിന്നിലെ സ്റ്റെയര്‍ കേസില്‍ പ്ലാസ്റ്റിക് കയറില്‍ ബിന്നി തൂങ്ങി മരിക്കുകയായിരുന്നു. ഇതിന് ഇലവുംതിട്ട പോലീസ് കേസ് രജിസ്റ്റര്‍ ചെയ്ത് അന്വേഷണം നടത്തിവരികയാണ്. വിശ്വാസവഞ്ചന നടത്തി തട്ടിപ്പ് നടത്തിയ കേസില്‍ മറ്റു പ്രതികള്‍ക്കായുള്ള അന്വേഷണം പോലീസ് ഊര്‍ജിതമാക്കി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]