ADVERTISEMENT

ADVERTISEMENT

ജില്ലാ സിവിൽ സർവീസ് കായികമേളയ്ക്കു തുടക്കമായി

പത്തനംതിട്ട: ജില്ലാ സ്പോർട്സ് കൗൺസിലിന്‍റെ നേതൃത്വത്തിൽ ജില്ലയിലെ സർക്കാർ ജീവനക്കാരുടെ കായികമേള കാതോലിക്കറ്റ് കോളജ് ഗ്രൗണ്ടിലും സ്പോർട്സ് കൗൺസിൽ ഓഫീസിലുമായി നടത്തി.

കായികമേള ജില്ലാ സ്പോർട്സ് കൗൺസിൽ പ്രസിഡന്‍റ് കെ. അനിൽകുമാർ ഉദ്ഘാടനം ചെയ്തു. യോഗത്തിൽ ജില്ലാ സ്പോർട്സ് കൗൺസിൽ സെക്രട്ടറി കെ.എസ്. അമൽജിത്ത് അധ്യക്ഷത വഹിച്ചു.

ജില്ലാ സ്പോർട്സ് കൗൺസിൽ എക്സിക്യൂട്ടീവ് അംഗം ആർ. പ്രസന്നകുമാർ, എൻജിഒ യൂണിയൻ ഭാരവാഹി പി.ബി. മധു, എൻജിഒ അസോസിയേഷൻ സംസ്ഥാന സെക്രട്ടേറിയറ്റംഗം പി.എസ്. വിനോദ് കുമാർ, സ്പോർട്സ് കൗൺസിൽ ജീവനക്കാരായ റോബിൻ വിളവനാൽ, അക്ഷയ്, ബെൻലി എൽ എസ്, ഉമേഷ്, പരിശീലകർ എന്നിവർ പ്രസംഗിച്ചു.

ജില്ലയിലെ നൂറോളം വരുന്ന ജീവനക്കാർ കായികമേളയിൽ പങ്കെടുത്തു.

ADVERTISEMENT

നവോദയ വിദ്യാലയ മാഗസിൻ പ്രകാശനം ചെയ്തു

വെച്ചൂച്ചിറ: ജവഹർ നവോദയ വിദ്യാലയത്തിൽ വിദ്യാർഥി പ്രതിനിധികളുടെ സ്ഥാനമേൽക്കൽ ചടങ്ങിനോടനുബന്ധിച്ച യോഗം ജില്ലാ കളക്ടർ എസ്. പ്രേംകൃഷ്ണൻ ഉദ്ഘാടനം ചെയ്തു. വിദ്യാലയ മാസികയുടെ പ്രകാശനം കളക്ടർ നിർവഹിച്ചു. കുട്ടികളുമായി കളക്ടർ സംവദിച്ചു. നവോദയ പ്രിൻസിപ്പൽ വി. സുധീർ, വെച്ചൂച്ചിറ കോളനി ആശുപത്രി സീനിയർ മെഡിക്കൽ ഓഫീസർ ലേഖ തോബിയാസ്, കോളനി ജിഎച്ച്എസ് പ്രിൻസിപ്പൽ ജി. ബീന, അധ്യാപികമാരായ എം. തങ്കമണി, കെ.എൽ. രശ്മി, രക്ഷാകർതൃ പ്രതിനിധികളായ രമ്യ സന്തോഷ്, പ്രദീപ്കുമാർ തുടങ്ങിയവർ പ്രസംഗിച്ചു.

മോഷണക്കേസില്‍ യുവാവ് അറസ്റ്റില്‍

പത്തനംതിട്ട: മോഷണ വസ്തുക്കളുമായി നാട്ടുകാര്‍ തടഞ്ഞുവച്ച് പത്തനംതിട്ട പോലീസിന് കൈമാറിയയാളെ അറസ്റ്റ് ചെയ്തു. കോന്നി അതിരുങ്കല്‍ കളഗിരി കിഴക്കേതില്‍ വീട്ടില്‍ എസ്. രാഹുലാണ് (26) സഞ്ചരിച്ച മോട്ടോര്‍സൈക്കിള്‍ ഉള്‍പ്പെടെ പിടിയിലായത്. വാഴമുട്ടത്തു പ്രവര്‍ത്തിക്കുന്ന വൃന്ദ സ്റ്റോഴ്‌സില്‍നിന്ന് രണ്ട് ദിവസങ്ങളിലായി പ്ലംബിംഗ് ഇലക്‌ട്രിക് സാധനങ്ങള്‍ മോഷണം പോയിരുന്നു. വിവരമറിഞ്ഞ നാട്ടുകാര്‍ സംശയകരമായ സാഹചര്യത്തില്‍ കല്ലറക്കടവില്‍ യുവാവിനെ തടഞ്ഞുവച്ച് പോലീസിനു കൈമാറുകയായിരുന്നു. എസ്ഐ ഷിജു പി. സാമിന്‍റെ നേതൃത്വത്തിലാണ് അന്വേഷണം നടക്കുന്നത്.

മണിയാർ ടൂറിസം വികസന പദ്ധതികൾക്ക് അംഗീകാരം; നിർമാണോദ്ഘാടനം 11ന്

റാന്നി: പമ്പ റിവർ വാലി ടൂറിസം പദ്ധതിയുടെ ഭാഗമായി മണിയാറിൽ നടപ്പിലാക്കുന്ന ടൂറിസം പദ്ധതികളുടെ പ്രാരംഭ നിർമാണ പ്രവർത്തനങ്ങൾക്കു തുടക്കമായി. നിർമാണോദ്ഘാടനം 11ന് വൈകുന്നേരം അഞ്ചിന് മന്ത്രി പി.എ. മുഹമ്മദ് റിയാസ് നിർവഹിക്കും. വടശേരിക്കര മണിയാറിൽ ജലസേചനത്തിനായി പമ്പ ഇറിഗേഷൻ വകുപ്പ് നിർമിച്ചിട്ടുള്ള ഡാമിന്‍റെ പരിസരത്ത് 12 ഏക്കർ ഭൂമിയിലാണ് പദ്ധതി നടപ്പാക്കുന്നത്.15 കോടി രൂപയാണ് മൂന്നുഘട്ടമായി നടപ്പാക്കുന്ന പദ്ധതിക്ക് ചെലവഴിക്കുന്നത്. ആദ്യഘട്ടമായ അഞ്ചു കോടി രൂപയുടെ നിർമാണ പ്രവർത്തനങ്ങളാണ് ആരംഭിക്കുന്നത്. പമ്പ ഇറിഗേഷൻ വകുപ്പിന്‍റെ അധീനതയിലുള്ള ഡാമിനോടു ചേർന്നുള്ള ഭൂമിയിൽ നിർമാണ പ്രവർത്തനങ്ങൾക്ക് അനുമതി ലഭിക്കുന്നതിലുണ്ടായ കാലതാമസമാണ് നിർമാണം വൈകാൻ ഇടയാക്കിയതെന്ന് പ്രമോദ് നാരായൺ എംഎൽഎ പറഞ്ഞു. നേരത്തേ തയാറാക്കിയ ഡിപിആറിൽ മാറ്റം വരുത്തി നിർമാണ പ്രവർത്തനങ്ങൾക്കുള്ള എൻഒസി നേടുകയായിരുന്നു. ടൂറിസം വകുപ്പിന്‍റെ നേരിട്ടുള്ള നിയന്ത്രണത്തിൽ സർക്കാർ പൊതുമേഖലാ സ്ഥാപനമായ കെല്ലിനാണ് പദ്ധതിയുടെ നിർവഹണച്ചുമതല. ഉയർന്ന നടപ്പാത, പൂന്തോട്ടം, കുട്ടികൾക്കായുള്ള കളി സ്ഥലങ്ങൾ, ഫിറ്റ്നസ് സെന്‍റർ, സൈക്കിൾ ട്രാക്ക്, ഭക്ഷണ കുടിവെള്ള കിയോസ്ക്കുകൾ, ഇരിപ്പിടങ്ങൾ, ഇലക്‌ട്രിഫിക്കേഷൻ, പാർക്കിംഗ് ഏരിയ, ശുചിമുറി സൗകര്യങ്ങൾ എന്നിവയെല്ലാം ആദ്യഘട്ടത്തിൽ ഉൾപ്പെടുത്തിയിട്ടുണ്ട്. കിഴക്കൻ മലയോര പ്രദേശമായ മണിയാറിന്‍റെയും വടശേരിക്കരയുടെയും സമഗ്രവികസനത്തിന് ഉപകരിക്കുന്നതാണ് പദ്ധതി. ഗവിയിലേക്കുള്ള പാതയോരത്താണ് മണിയാർ ടൂറിസം പദ്ധതി യാഥാർഥ്യമാകുന്നത്. ഗവിയും സമീപ പ്രദേശമായ പെരുന്തേനരുവിയും കൂട്ടിയോജിപ്പിച്ച് ബൃഹത്തായ ഒരു ടൂറിസം പദ്ധതി തന്നെ ഭാവിയിൽ പ്രതീക്ഷിക്കാവുന്നതാണെന്ന് എംഎൽഎ ചൂണ്ടിക്കാട്ടി.

ഭാര്യയെയും മക്കളെയും ഉപദ്രവിച്ച കേസില്‍ യുവാവ് അറസ്റ്റിൽ

തിരുവല്ല: വീട്ടിലെത്തി ഭാര്യയെയും മക്കളെയും അമ്മയെയും ഉപദ്രവിക്കുന്ന യുവാവിനെ തിരുവല്ല പോലീസ് അറസ്റ്റ് ചെയ്തു. ചിറ്റാര്‍ സീതത്തോട് സ്വദേശി തുളസീരാജാണ് (38) പിടിയിലായത്. ഡ്രൈവര്‍ജോലി ചെയ്യുകയാണ് ഇയാള്‍. കഴിഞ്ഞ 30ന് രാത്രിയാണ് ഇയാള്‍ വാടകയ്ക്ക് താമസിക്കുന്ന ഇരവിപേരൂര്‍ വാരാമണ്ണില്‍ വീട്ടില്‍കുടുംബാംഗങ്ങളെ ദേഹോപദ്രവം ഏല്പിക്കുകയും കത്തി കൊണ്ട് ആക്രമിക്കുകയും ചെയ്തത്. കോടതിയില്‍ ഹാജരാക്കിയ തുളസീരാജിനെ റിമാന്‍ഡ് ചെയ്തു. എസ് ഐമാരായ കെ. രവിചന്ദ്രന്‍, ടി. ഉണ്ണികൃഷ്ണന്‍, എഎസ്ഐ രാജു എന്നിവരുടെ നേതൃത്വത്തിലായിരുന്നു അന്വേഷണം.

പുല്ലാട്ടെ ശാരിമോളുടെ കൊലപാതകം; ഒളിവിലായിരുന്ന ഭർത്താവ് അറസ്റ്റിൽ

കോഴഞ്ചേരി: ഭാര്യ കുത്തേറ്റു മരിച്ച കേസിൽ ഒളിവിലായിരുന്ന ഭര്‍ത്താവിനെ പോലീസ് അറസ്റ്റ് ചെയ്തു. പുല്ലാട് കാഞ്ഞിരപ്പാറ ആലുംതറ ആഞ്ഞാലിക്കല്‍ ശാരിമോളെ (ശ്യാമ - 38) കുത്തിക്കൊലപ്പെടുത്തിയ കേസിലാണ് ഭർത്താവ് കവിയൂര്‍ കോട്ടൂര്‍ മുട്ടത്തുപാറയില്‍ അജികുമാറിനെ (42) ഇന്നലെ ഉച്ചയ്ക്ക് 1.15ന് തിരുവല്ല വൈഎംസിഎ ജംഗ്ഷനുസമീപമുള്ള സ്വകാര്യബാറിനടുത്ത് മീന്‍ചന്തയില്‍നിന്ന് പോലീസ് നാടകീയമായി കസ്റ്റഡിയിലെടുത്തത്. മുഖത്ത് രൂപവ്യത്യാസം വരുത്തി ക്ലീന്‍ ഷേവ് ചെയ്ത് മീന്‍ വില്‍പ്പന നടത്തുന്ന സ്ഥലത്ത് കിടക്കുന്നത് അജികുമാറാണ് എന്ന് ആദ്യം കണ്ടെത്തിയത് സ്‌പെഷൽ ബ്രാഞ്ച് ഉദ്യോഗസ്ഥരാണ്. തുടര്‍ന്ന് ഇവരുടെ സന്ദര്‍ഭോചിതമായ ഇടപെടല്‍മൂലം തിരുവല്ല പോലീസ് എത്തി കസ്റ്റഡിയിലെത്ത് കോയിപ്രം പോലീസ് സ്‌റ്റേഷനില്‍ എത്തിക്കുകയായിരുന്നു. കഴിഞ്ഞ ശനിയാഴ്ചയാണ് ശാരിമോൾക്ക് കുത്തേറ്റത്. ഗുരുതരാവസ്ഥയിൽ കോട്ടയം മെഡിക്കൽ കോളജിലെത്തിച്ചെങ്കിലും ഞായറാഴ്ച പുലർച്ചെ മരിച്ചു. ശാരിമോളുടെ അച്ഛൻ ശശിക്കും സഹോദരി രാധാമണിക്കും കുത്തേറ്റിരുന്നു. ഇതിൽ ശശി ഗുരുതരാവസ്ഥയിൽ മെഡിക്കൽ കോളജിൽ കഴിയുകയാണ്. അറസ്റ്റിലായ അജികുമാറിനെ പോലീസ് സ്‌റ്റേഷനു സമീപമുള്ള ക്വാര്‍ട്ടേഴ്‌സില്‍ കൊണ്ടുവന്ന് മണിക്കൂറുകളോളം ചോദ്യം ചെയ്തു. മെഡിക്കല്‍ പരിശോധനയ്ക്കുവിധേയനാക്കിയതിനുശേഷം ഇന്ന് പത്തനംതിട്ട കോടതിയില്‍ ഹാജരാക്കും. തെളിവെടുപ്പുകൾക്കായി കസ്റ്റഡി അപേക്ഷ നൽകുമെന്നും പോലീസ് പറഞ്ഞു. സംഭവത്തേത്തുടർന്ന് ഒളിവിൽ പോയ ഇയാൾക്കായി കഴിഞ്ഞ മൂന്നു ദിവസങ്ങളിലായി പോലീസും നാട്ടുകാരും തെരച്ചില്‍ നടത്തുകയായിരുന്നു. ഡ്രോണിന്‍റെ സഹായവും തെരച്ചിലിനായി ഉപയോഗിച്ചിരുന്നു. അജികുമാറിനെ പിടികൂടാന്‍ ജില്ലാ പോലീസ് മേധാവിയുടെ നേതൃത്വത്തില്‍ തിരുവല്ല ഡിവൈഎസ്പി അടക്കമുള്ള പ്രത്യേക സംഘത്തെ നിയമിച്ചിരുന്നുവെങ്കിലും സ്‌പെഷല്‍ ബ്രാഞ്ചിലെ ഉദ്യോഗസ്ഥരുടെ ജാഗ്രത മൂലമാണ് അജികുമാറിനെ പിടികൂടാന്‍ കഴിഞ്ഞതെന്ന് പോലീസ് ഉദ്യോഗസ്ഥര്‍തന്നെ പറഞ്ഞു. ശാരിമോളുടെ സംസ്കാരം നടന്നു കൊല്ലപ്പെട്ട ശാരിമോളുടെ സംസ്‌കാരം ഇന്നലെ ഉച്ചകഴിഞ്ഞ് വീട്ടുവളപ്പില്‍ നടന്നു. ശാരിയുടെ സഹോദരന്‍ ശരത്താണ് ചിതയ്ക്ക് തീകൊളുത്തിയത്. സംസ്‌കാരം നടക്കുന്നതിന് നിമിഷങ്ങള്‍ക്കുമുന്‍പാണ് ഭര്‍ത്താവിനെ കസ്റ്റഡിയിലെടുത്തതായി പോലീസിന്‍റെ ഔദ്യോഗിക സ്ഥിരീകരണം ഉണ്ടായത്. കുടുംബശ്രീ എഡിഎസ് സെക്രട്ടറികൂടിയായിരുന്ന ശാരിമോളുടെ സംസ്‌കാരച്ചടങ്ങില്‍ ത്രിതല ജനപ്രതിനിധികളും വിവിധ രാഷ്‌ട്രീയ സംഘടനാ നേതാക്കളും കുടുംബശ്രീ മിഷനുമായി ബന്ധപ്പെട്ടവരും നാട്ടുകാരും പങ്കെടുത്തു. കാഞ്ഞിരപ്പാറ കമ്യൂണിറ്റി ഹാളിൽ മൃതദേഹം പൊതുദർശനത്തിനു വച്ചിരുന്നു. ശാരിമോളുടെ മരണവും അച്ഛൻ അജികുമാർ ജയിലിലുമായതോടെ മൂന്ന് പിഞ്ചു കുഞ്ഞുങ്ങൾ അനാഥരായി. പ്രൈമറി ക്ലാസുകളിൽ പഠിക്കുന്ന കുട്ടികൾ ഇപ്പോൾ ബന്ധുക്കളുടെ സംരക്ഷണയിലാണ്.

പുലിഭീതിയിൽ വിറച്ച് കലഞ്ഞൂർ : പാറമടകളും പൊന്തക്കാടുകളും വന്യമൃഗങ്ങളുടെ താവളം

കലഞ്ഞൂർ: പട്ടാപ്പകലും പുലിയുടെ സാന്നിധ്യം കണ്ടുതുടങ്ങിയ കലഞ്ഞൂർ പൂമരുതിക്കുഴി, പാക്കണ്ടം മേഖലകളിൽ ജനങ്ങളാകെ ഭീതിയിൽ. പുലിയെ പിടികൂടാൻ കൂട് സ്ഥാപിച്ച് റോന്ത് ചുറ്റുന്ന വനംവകുപ്പിനു കൂടുതൽ നടപടികളുമെടുക്കാനാകുന്നില്ല. പുലിയുടെ സാന്നിധ്യം കണ്ട പൂമരുതിക്കുഴിയിലാണ് വനംവകുപ്പ് കൂട് സ്ഥാപിച്ചത്. പാക്കണ്ടത്ത് അനുമതി തേടിയെങ്കിലും ലഭിച്ചില്ല. ഞായറാഴ്ച പട്ടാപ്പകൽ വളർത്തു നായയെ ഓടിച്ചുകൊണ്ട് പൂമരുതിക്കുഴിയിലെ ഒരു വീട്ടിൽ പുലി കയറിയത് പ്രദേശവാസികളിൽ ഭീതി വർധിപ്പിച്ചു. വീടിന്‍റെ അടുക്കള ഭാഗത്തുകൂടി പുലി അകത്തു കയറുന്പോൾ വീട്ടമ്മയും കുഞ്ഞും മാത്രമാണ് വീട്ടിലുണ്ടായിരുന്നത്. അപ്രതീക്ഷിതമായി വന്യമൃഗത്തെ കൺമുന്പിൽ കണ്ട ഞെട്ടൽ ഇപ്പോഴും ഇവർക്കു മാറിയിട്ടില്ല. പാക്കണ്ടത്ത് കോഴിക്കൂട്ടിൽ കയറിയ പുലി കോഴികളെ പിടിച്ചതും കഴിഞ്ഞ ദിവസമാണ്. മൂന്നാം ദിവസവും പുലി തുടർച്ചയായ മൂന്നു ദിവസവും കലഞ്ഞൂർ, കൂടൽ പ്രദേശത്തു പുലി ഇറങ്ങിയതോടെ പ്രദേശവാസികൾക്ക് ഉറക്കം നഷ്ടപ്പെട്ടിരിക്കുകയാണ്. പ്രദേശത്തു മുൻപ് മൂന്നുതവണ വനംവകുപ്പ് സ്ഥാപിച്ച കൂടുകളിൽ പുലി വീണിരുന്നു. പാക്കണ്ടം, ഇഞ്ചപ്പാറ മേഖലകളിലാണ് പുലി കുടുങ്ങിയത്.പുലികളുടെ സാന്നിധ്യം വർധിച്ചതോടെ മുൻപ് വനം വകുപ്പ് ഡ്രോൺ സഹായത്തോടെ തെരച്ചിലും ന‌ടത്തിയിരുന്നു. പൂമരുതിക്കുഴിയിലും പാക്കണ്ടത്തും കണ്ട പുലി ഒന്നുതന്നെയാണോയെന്നു സ്ഥിരീകരിക്കാൻ കഴിഞ്ഞിട്ടില്ല. മലയോരത്തെ റബർ തോട്ടങ്ങളുടെ പാറമടകളുടെയും സമീപത്തെ പൊന്തക്കാടുകൾ വന്യമൃഗങ്ങളുടെ താവളമാണ്. പാറക്കൂട്ടങ്ങളുടെ മുകളിൽ പുലി ഇരിക്കുന്ന ദൃശ്യങ്ങൾ കഴിഞ്ഞയിടെ പുറത്തുവന്നിരുന്നു. കാട്ടാനകളുടെയും കാട്ടുപന്നികളുടെയും ശല്യത്തിൽ പൊറുതിമുട്ടിയവരുടെ ഇടയിലേക്കാണ് പുലിയും ഇറങ്ങിയിരിക്കുന്നത്. വളർത്തു നായ്ക്കളെയും കോഴികളെയും കാണാനില്ല കലഞ്ഞൂർ: കലഞ്ഞൂരിലെ ഇഞ്ചപ്പാറ, പൂമരുതിക്കുഴി, പാക്കണ്ടം മേഖലകളിൽ വളർത്തു നായ്ക്കളെയും കോഴികളെയും കാണാതാകുന്നതു സ്ഥിരം സംഭവമായി മാറിയിരുന്നു. വന്യമൃഗ ഭീഷണിയുള്ള പ്രദേശങ്ങളാണെങ്കിലും പുലി ജനവാസ മേഖലയിൽ സ്ഥിരമായി എത്തുമെന്നു പ്രദേശവാസികൾ കരുതിയിരുന്നില്ല. പാക്കണ്ടം പാറമടയ്ക്കു സമീപം ആര്യഭവൻ ബാബുവിന്‍റെ വീട്ടിലെ കോഴിക്കൂട്ടിൽനിന്ന് ‌അഞ്ച് കോഴികളെയാണ് കഴിഞ്ഞ ദിവസം നഷ്ടപ്പെട്ടത്. പരിസരത്തെ സിസിടിവിയിൽ പുലിയുടെ ദൃശ്യം വ്യക്തമായിട്ടുണ്ട്. ബാബുവിന്‍റെ വീട്ടിലെ കോഴിക്കൂട്ടിൽനിന്ന് മുന്പും കോഴികളെ നഷ്ടപ്പെട്ടിരുന്നു. പ്രദേശത്തു 25ലധികം കോഴികളെയാണ് കഴിഞ്ഞയിടെ നഷ്ടപ്പെട്ടത്. ആട്ടിൻകുട്ടികളെയടക്കം പലർക്കും നഷ്ടമായിട്ടുണ്ട്. സൗരോർജവേലി എവിടെ? കലഞ്ഞൂർ പൂമരുതിക്കുഴിയിൽ വന്യമൃഗ ആക്രമണം പ്രതിരോധിക്കാൻ സൗരോർജവേലി സ്ഥാപിക്കുമെന്നു വനംമന്ത്രി എ.കെ. ശശീന്ദ്രൻ പ്രഖ്യാപനം നടത്തിയിട്ട് ഒരു വർഷമായി. നിർമാണോദ്ഘാടനവും മന്ത്രി നടത്തിയിരുന്നു. മൂന്നു മാസത്തിനകം വേലി സ്ഥാപിക്കാനാകുമെന്നായിരുന്നു പ്രഖ്യാപനം. എന്നാൽ, സൗരോർജ വേലിയുടെ പ്രവർത്തനം ഇതേവരെ പൂർത്തിയായിട്ടില്ല. പണികൾ പലയിടത്തും തുടങ്ങിവച്ചെങ്കിലും പൂർത്തീകരിച്ചിട്ടില്ല. വന്യമൃഗ ശല്യം രൂക്ഷമാകുന്ന പ്രദേശങ്ങളിലുള്ളവരുടെ ആവശ്യം പരിഗണിച്ച് അത്തരം സ്ഥലങ്ങളിലേക്കു നിർമാണം ദീർഘിപ്പിച്ചെങ്കിലും അതും പൂർത്തീകരിക്കാനായില്ല. തൊഴിൽ മേഖല സ്തംഭിച്ചു; സ്കൂൾ കുട്ടികളും ഭയപ്പാടിൽ പുലിയുടെ സാന്നിധ്യം കൂടുതൽ പ്രദേശങ്ങളിലുണ്ടെന്നതായതോടെ കലഞ്ഞൂർ, കൂടൽ മേഖലയിലെ തൊഴിൽമേഖലകൾ സ്തംഭനത്തിലാണ്. ആളുകൾ പുറത്തിറങ്ങാൻ മടിക്കുകയാണ്. പുലർച്ചെ റോഡുകളിലൂടെ സഞ്ചരിക്കേണ്ടിവരുന്ന ടാപ്പിംഗ് തൊഴിലാളികൾ, പത്രവിതരണക്കാർ, ക്ഷീരകർഷകർ തുടങ്ങിയവർ ഭയപ്പാടിലാണ്. റബർ‌ ടാപ്പിംഗ് നിലച്ച മട്ടാണ്. റബർ തോട്ടങ്ങളോടു ചേർന്നാണ് പുലിയെ പലേടത്തും കണ്ടിരുന്നതെന്നതിനാൽ ടാപ്പിംഗ് തൊഴിലാളികൾക്കിടയിൽ ഭീതി വർധിച്ചു. സ്കൂൾ കുട്ടികളും ഭയപ്പാടിലാണ്. വാഹനങ്ങളിൽ എത്തുന്ന കുട്ടികളെ മാതാപിതാക്കൾ സ്റ്റോപ്പുകളിലെത്തി കൂട്ടിക്കൊണ്ടുപോവുകയാണ്. നേരത്തേ കാട്ടാനയുടെ ശല്യം അതിരൂക്ഷമായിരുന്ന പ്രദേശങ്ങളാണിത്. ആനയെ ഭയന്ന് ആളുകൾ സന്ധ്യയ്ക്കു മുന്പു വീടുകളിൽ അഭയം തേടിവന്നിരുന്നു. പുലിക്കുപിന്നാലെ കാട്ടാനയും; വീടിനു നേരേ ആക്രമണം കലഞ്ഞൂർ: പൂമരുതിക്കുഴിയിൽ വീടിനു നേരേ കാട്ടാന ആക്രമണം. ഇന്നലെ പുലർച്ചെ മൂന്നോടെയാണ് പൂമരുതിക്കുഴി ഷൈജു ഭവനത്തിൽ പ്രഭുരാജിന്‍റെ വീടിനു നേരേ കാട്ടാനയുടെ ആക്രമണം ഉണ്ടായത്. വീടിന് അടുത്ത് എത്തിയ കാട്ടാന പറമ്പിൽനിന്നിരുന്ന തെങ്ങ് കുത്തി മറിച്ചിടാൻ ശ്രമിച്ചു. ഇതിനുശേഷം പ്രഭുരാജിന്‍റെ വീടിന്‍റെ ജനൽ കതകിൽ ഇടിക്കുകയും ഗ്ലാസ് തകർക്കുകയുമായിരുന്നു. ശബ്ദം കേട്ട് ഉണർന്ന വീട്ടുകാർ പാടം ഫോറസ്റ്റ് സ്റ്റേഷനിൽ വിവരം അറിയിച്ചു. ഇതോടെ വനപാലകരുടെ രാത്രികാല പട്രോളിംഗ് സംഘം സ്ഥലത്ത് എത്തി. വനപാലകർ എത്തിയപ്പോഴേക്കും കാട്ടാന കാട് കയറിയിരുന്നു. കെ.യു. ജനീഷ് കുമാർ എംഎൽഎ, കോന്നി ഡിഎഫ്ഒ ആയുഷ് കുമാർ കോറി എന്നിവരും വനം വകുപ്പ് മറ്റ് ഉദ്യോഗസ്ഥരും ഇന്നലെ സ്ഥലം സന്ദർശിച്ചു. പ്രദേശത്തു കാട്ടാന ശല്യം രൂക്ഷമാണെന്നും പ്രദേശവാസികൾ പറയുന്നു. തുടർച്ചയായ ദിവസങ്ങളിൽ പുലി ഇറങ്ങിയതോടെ ഭീതിയിലായ പ്രദേശത്താണ് കാട്ടാനയും വീണ്ടും എത്തിയിരിക്കുന്നത്.

ഓണം ഖാദിമേള കളക്ടറേറ്റില്‍

പത്തനംതിട്ട: ജില്ലാ ഖാദി ഗ്രാമ വ്യവസായത്തിന്‍റെ ആഭിമുഖ്യത്തില്‍ കളക്ടറേറ്റില്‍ ഓണം ഖാദി മേള സംഘടിപ്പിച്ചു. ഖാദി ഉത്പന്നങ്ങളായ കോട്ടണ്‍, സില്‍ക്ക് സാരികള്‍, ഷര്‍ട്ടുകള്‍, കലങ്കാരി സാരികള്‍, ഷര്‍ട്ടിംഗ്, ഷാളുകള്‍, തോര്‍ത്തുകള്‍, കാവിമുണ്ട്, ടവ്വലുകള്‍, നറുതേന്‍, എള്ളെണ്ണ, ഖാദിര്‍ ബാര്‍ സോപ്പ് തുടങ്ങിയവ ഒരുക്കിയിരുന്നു. സംസ്ഥാന ഖാദി ഗ്രാമവ്യവസായ ബോര്‍ഡിന്‍റെ നേതൃത്വത്തില്‍ "എനിക്കും വേണം ഖാദി' സന്ദേശത്തിന്‍റെ ഭാഗമായാണ് മേള സംഘടിപ്പിച്ചത്. 30 ശതമാനം ഇളവിലാണ് ഖാദി വസ്ത്രങ്ങള്‍ വിറ്റത്. ഇലന്തൂര്‍, അടൂര്‍, പത്തനംതിട്ട, റാന്നി ചേത്തോങ്കര എന്നിവിടങ്ങളിലും ഓണം ഖാദി മേള നടക്കുന്നുണ്ട്. സര്‍ക്കാര്‍, അര്‍ധസര്‍ക്കാര്‍, ബാങ്ക്, പൊതുമേഖല സ്ഥാപനങ്ങളിലെ ജീവനക്കാര്‍ക്ക് ഒരു ലക്ഷം രൂപയുടെ വാങ്ങലിന് പലിശരഹിത ക്രെഡിറ്റ് സൗകര്യമുണ്ട്. 1,000 രൂപയ്ക്ക് സാധനം വാങ്ങിയാല്‍ സമ്മാന കൂപ്പണുണ്ട്. ആഴ്ചതോറും നറുക്കെടുപ്പിലൂടെ 3,000 രൂപയുടെ ഗിഫ്റ്റ് വൗച്ചറുകളും നല്‍കും. സെപറ്റംബര്‍ നാലിന് മേള അവസാനിക്കും.

അപകടഭീഷണിയുമായി മൂടിയില്ലാത്ത ഓടകൾ

അടൂർ: അടൂർ തിരക്കേറിയ വൺവേ റോഡിൽ ഓടകൾക്ക് മൂടിയില്ലാത്തത് അപകട ഭീഷണി ഉയർത്തുന്നു. നഗരസഭാ കാര്യാലയത്തിനു മുന്നിലായി പോലീസ് സ്റ്റേഷനിലേക്കുള്ള വഴിയിലേക്ക് തിരിയുന്ന ഭാഗത്തെ ഓടകളാണ് മൂടിയില്ലാതെയും ചെളി നിറഞ്ഞും കിടക്കുന്നത്. ഓടയ്ക്ക് ആറ് അടിയിലേറെ താഴ്ചയുണ്ട്. റോഡിലൂടെ പോകുന്ന വലിയവാഹനങ്ങൾക്ക് സൈഡ് കൊടുക്കുമ്പോൾ ഇരു ചക്രവാഹനങ്ങൾ തെന്നിമാറി ഓടയിൽ പതിച്ച് അപകടം സംഭവിക്കാനുള്ള സാധ്യതയും ഏറെയാണ്. കഴിഞ്ഞദിവസം ഓടയ്ക്ക് സമീപം സ്ഥാപിച്ചിരിക്കുന്ന നോ പാർക്കിംഗ് ബോർഡ് വാഹനം ഇടിച്ച് തകർത്തിരുന്നു. പോലീസ് സ്റ്റേഷൻ, നിരവധി സർക്കാർ സ്ഥാപനങ്ങൾ പ്രവർത്തിക്കുന്ന റവന്യു ടവർ, കോടതി, നഗരസഭാ കാര്യാലയം, ശ്രീമൂലം മാർക്കറ്റ് തുടങ്ങിയ സ്ഥാപനങ്ങളിലേക്കു പോകുന്ന കാൽനട യാത്രക്കാരും വാഹന യാത്രക്കാരും സഞ്ചരിക്കുന്ന നഗരത്തിലെ ഏറ്റവും തിരക്കുള്ള റോഡാണിത്. കൂടാതെ ധാരാളം സ്കൂൾ വിദ്യാർഥികളും കടന്നുപോകുന്ന ഈ റോഡിൽ കാൽവഴുതി ഓടയിൽ വീണ് അപകടം സംഭവിക്കാനുള്ള സാധ്യതയും കൂടുതലാണ്. മൂടിയില്ലാത്ത ഓടയ്ക്കു മുകളിൽ എത്രയും പെട്ടെന്ന് സ്ലാബിട്ട് അപകട ഭീഷണി ഒഴിവാക്കണമെന്ന് നാട്ടുകാരും വ്യാപാരികളും ആവശ്യപ്പെട്ടു.

കോലറയാർ നവീകരണം പുരോഗമിക്കുന്നു

തിരുവല്ല : ജനകീയ കൂട്ടായ്മയുടെ നേതൃത്വത്തിൽ കോലറയാർ നവീകരണം പുരോഗമിക്കുന്നു. മാലിന്യം മൂടി നീരൊഴുക്ക് നിലച്ചുനാശത്തിന്‍റെ വക്കിലായ കോലയാറിനെ വീണ്ടെടുക്കാനുള്ള നടപടിക്കു കോലറയാർ സംരക്ഷണസമിതിയാണ് തുടക്കം കുറിച്ചത്. പമ്പയുടെ കൈവഴിയായി കടപ്ര പഞ്ചായത്തിലെ അറയ്ക്കൽ മുയപ്പിൽ നിന്ന് ആരംഭിച്ച് 11.5 കിലോമീറ്റർ ദൂരത്തിൽ ഒഴുകുന്ന കോലറയാർ പമ്പയുടെതന്നെ കൈവഴിയായ നിരണം അരീത്തോട്ടിൽ പതിക്കും. വാഹന ഗതാഗത സൗകര്യം ഇല്ലാതിരുന്ന കാലത്ത് ജലഗതാഗത വകുപ്പിന്‍റെ ബോട്ട് സർവീസുകളും ചരക്ക് നീക്കത്തിനായി കെട്ടുവള്ളങ്ങളും കടന്നു പോയിരുന്ന തോടാണ് ഇത്. കാലം പുരോഗമിച്ചതോടെ ജലഗതാഗത്തിനു പ്രസക്തി കുറഞ്ഞു. ഇതിനുപിന്നാലെ നിരവധി ഭാഗങ്ങളിൽ സ്വകാര്യ വ്യക്തികൾ തോട് കൈയേറി. കാലക്രമേണ മണ്ണും മാലിന്യവും അടിഞ്ഞുകൂടി നീരൊഴുക്ക് നിലച്ചു. മാത്യു ടി. തോമസ് എംഎൽഎയുടെ ഇടപെടലിന്‍റെ ഫലമായി എട്ടുവർഷം മുമ്പ് ജലസേചന വകുപ്പിൽനിന്ന് അനുവദിച്ച നാലരക്കോടി രൂപ ചെലവഴിച്ച് തോട് ആഴംകൂട്ടി നവീകരിച്ചിരുന്നു. ആഴം കൂട്ടലടക്കമുള്ള പദ്ധതികൾ ഒന്നുംതന്നെ നടക്കാതെ വന്നതോടെ വീണ്ടും പോളയും പായലും മാലിന്യങ്ങളും അടിഞ്ഞു. മഴക്കാലം ആകുന്പോൾ വെള്ളക്കെട്ടു കാരണം പ്രളയദുരിതവും ഏറി. പത്തനംതിട്ട ജില്ലയിൽ ഏറ്റവും അധികം നെല്ല് ഉത്പാദനം നടക്കുന്ന പഞ്ചായത്തായ നിരണത്തെ പാടശേഖരങ്ങളിലേക്ക് കൃഷിക്ക് ആവശ്യമായ വെള്ളം എത്തിക്കുന്നതിനുള്ള മാർഗംകൂടിയാണ് കോലറയാർ. നവീകരണത്തിന്‍റെ ഭാഗമായി നിരണം പഞ്ചായത്തിലെ പൂവമ്മേലി മുതൽ ഇലഞ്ഞിക്കൽ പാലം വരെയുള്ള ഭാഗത്തെ പോളയും പായലും കഴിഞ്ഞ ദിവസങ്ങളിലായി നീക്കം ചെയ്തിട്ടുണ്ട്. വരും ദിവസങ്ങളിൽ നിരണം പഞ്ചായത്തിലൂടെ കടന്നുപോകുന്ന ഭാഗത്തെ നവീകരണം പൂർത്തിയാക്കുക എന്നതാണ് സമിതി ലക്ഷ്യമിടുന്നത്. രണ്ടാഴ്ചകൊണ്ട് കടപ്ര പഞ്ചായത്തിലെ ഭാഗങ്ങൾകൂടി വൃത്തിയാക്കി കോലറയാറിനെ വീണ്ടെടുക്കാനാണ് സംരക്ഷണസമിതിയുടെ ശ്രമം. ഏബ്രഹാം മത്തായി, റോബി തോമസ്, പി.ഒ. മാത്യു, വി.ടി. ബിനീഷ് കുമാർ, ദാനിയേൽ തോമസ്, രതീഷ് കുമാർ, റിജോ, റെന്നി തേവേരിൽ, അജിൽ പുരയ്ക്കൽ, മോനിച്ചൻ മാന്ത്രയിൽ, രതീഷ് തരിശിൽ, പ്രസാദ് പനയ്ക്കാമറ്റം തുടങ്ങിയവരുടെ നേതൃത്വത്തിലാണ് നവീകരണ പ്രവർത്തനങ്ങൾ പുരോഗമിക്കുന്നത്.

ഓണം ഖാദി മേളയ്ക്കു തുടക്കമായി

റാന്നി: ഓണം ഖാദിമേള പത്തനംതിട്ട ജില്ലാതല ഉദ്ഘാടനം റാന്നി ചെത്തോങ്കര ഖാദി ഗ്രാമസൗഭാഗ്യയില്‍ പ്രമോദ് നാരായണ്‍ എംഎല്‍എ നിര്‍വഹിച്ചു. ഖാദി ബോര്‍ഡിന്‍റെ ജില്ലയ്ക്കുള്ള ഓണസമ്മാനമാണ് മേളയെന്ന് എംഎല്‍എ പറഞ്ഞു. ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം അധ്യക്ഷത വഹിച്ചു. സംസ്ഥാന ഖാദി ഗ്രാമവ്യവസായ ബോര്‍ഡിന്‍റെ നേതൃത്വത്തില്‍ എനിക്കും വേണം ഖാദി സന്ദേശത്തോടെ സംഘടിപ്പിക്കുന്ന മേള സെപ്റ്റംബര്‍ നാലു വരെയാണ്. ജില്ലാ പഞ്ചായത്തംഗം ജെസി അലക്‌സ് വസ്ത്രത്തിന്‍റെയും പഴവങ്ങാടി ഗ്രാമപഞ്ചായത്ത് പ്രസിഡന്‍റ് റൂബി കോശി ഖാദി ഗ്രാമവ്യവസായ ഉത്പന്നത്തിന്‍റെയും ആദ്യ വില്‍പന നടത്തി. മുന്‍ എംഎല്‍എ രാജു ഏബ്രഹാം കൂപ്പണ്‍ പ്രകാശനം ചെയ്തു. ഖാദി ബോര്‍ഡ് അംഗം സാജന്‍ തൊടുക, റാന്നി ബ്ലോക്ക് പഞ്ചായത്തംഗം അന്നമ്മ തോമസ്, പഴവങ്ങാടി പഞ്ചായത്തംഗം വി. സി. ചാക്കോ, ജില്ലാ ഇന്‍ഫര്‍മേഷന്‍ ഓഫീസര്‍ സി. ടി. ജോണ്‍, ജില്ലാ ഖാദി ഗ്രാമവ്യവസായ പ്രോജക്ട് ഓഫീസര്‍ വി. ഹരികുമാര്‍, അജിന്‍ ഐപ്പ് ജോര്‍ജ് എന്നിവര്‍ പ്രസംഗിച്ചു.

കന്യാസ്ത്രീമാർക്കെതിരേയുള്ള കേസ് പിൻവലിക്കണം: ക്രിസ്ത്യൻ മൂവ്മെന്‍റ്

പത്തനംതിട്ട: ഛത്തീസ്ഗഡിൽ നിരപരാധികളായ കന്യാസ്ത്രീമാരെ ബജ്റംഗ്ദൾ പ്രവർത്തകർ അകാരണമായി തടഞ്ഞുവച്ച് ആൾക്കൂട്ട വിചാരണ ചെയ്തും മതപരിവർത്തനവും മനുഷ്യക്കടത്തും ആരോപിച്ച് എടുത്തിട്ടുള്ളതുമായ കേസുകൾ അടിയന്തരമായി പിൻവലിക്കണമെന്ന് ക്രിസ്ത്യൻ മൂവ്മെന്‍റ് ഓഫ് ഇന്ത്യ ജില്ലാ ഘടകം ആവശ്യപ്പെട്ടു. രാജ്യത്തു വർധിച്ചുവരുന്ന ഇത്തരം സംഭവങ്ങൾ ഇന്ത്യയുടെ മതേതരത്വത്തെയും സമൂഹ മന‌ഃസാക്ഷിയെയും ആഴത്തിൽ മുറിപ്പെടുത്തുന്നതും രാജ്യത്തെ ക്രൈസ്തവ സമൂഹത്തെ മുഴുവൻ ദുഃഖത്തിലാഴ്ത്തുന്നതാണെന്നും ക്രിസ്ത്യൻ മൂവ്മെന്‍റ് അഭിപ്രായപ്പെട്ടു. ജാതി-വർണ-വർഗ ശക്തികൾ ഇന്ത്യയിൽ ശക്തി പ്രാപിക്കുന്ന സ്ഥിതിവിശേഷം കേന്ദ്ര സംസ്ഥാന സർക്കാരുകളുടെ ശ്രദ്ധയിൽപ്പെടുത്തി ഇത്തരക്കാർക്കെതിരേശക്തമായ നടപടി കൈക്കൊളളണമെന്ന് യോഗം ആവശ്യപ്പെട്ടു. പ്രസിഡന്‍റ് അലക്സ് മാമ്മന്‍റെ അധ്യക്ഷതയിൽ ജേക്കബ് തോമസ് തെക്കേപ്പുരയ്ക്കൽ, ഫിലിപ്പോസ് വർഗീസ്, സി.എസ്. ചാക്കോ, പ്രഭാ ഐപ്പ് , ജാക്സൺ ജോസഫ്, ജെറി കുളക്കാടൻ, ജോർജ് ഉമ്മൻ, വിൻസി സഖറിയ എന്നിവർ പ്രസംഗിച്ചു.

വോട്ടര്‍ പട്ടികയിലെ ക്രമക്കേട് സര്‍ക്കാരിന്‍റെ ഒത്താശയോടെ: ഷാനിമോള്‍ ഉസ്മാന്‍

പത്തനംതിട്ട: തദ്ദേശ സ്ഥാപന തെരഞ്ഞെടുപ്പിൽ സിപിഎം നേതാക്കളുടെ ഇംഗിതമനുസരിച്ച് സര്‍ക്കാരിന്‍റെയും ഉദ്യോഗസ്ഥരുടെയും ഒത്താശയോടെ വ്യാപകമായ ക്രമക്കേടാണ് നടത്തിയിട്ടുള്ളതെന്ന് കെപിസിസി രാഷ്‌ട്രീയകാര്യസമിതി അംഗം ഷാനിമോള്‍ ഉസ്മാന്‍. ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ തദ്ദേശ സ്ഥാപന തെരഞ്ഞെടുപ്പ് മുന്നൊരുക്കങ്ങള്‍ വിലയിരുത്തുവാന്‍ നടത്തിയ ബ്ലോക്ക് കോണ്‍ഗ്രസ് പ്രസിഡന്‍റുമാര്‍, തെരഞ്ഞെടുപ്പ് കോ-ഓർ‌ഡിനേറ്റര്‍മാര്‍ എന്നിവരുടെ യോഗം ഉദ്ഘാടനം ചെയ്തു പ്രസംഗിക്കുകയായിരുന്നു ഷാനിമോൾ. വോട്ടര്‍പട്ടിക പ്രസിദ്ധീകരിക്കുന്നതിന് മുമ്പുതന്നെ സിപിഎം നേതാക്കള്‍ക്ക് പട്ടിക ചോര്‍ത്തി നല്‍കുകയും നിശ്ചയിച്ച തീയതിയില്‍ പട്ടിക പ്രസിദ്ധീകരിക്കാതിരിക്കുകയും സ്വാഭാവിക അതിര്‍ത്തികള്‍ മാറ്റിമറിച്ച് ഗ്രാമപഞ്ചായത്ത് മുതല്‍ ജില്ലാ പഞ്ചായത്ത് വരെയും മുനിസിപ്പാലിറ്റികളിലും വാര്‍ഡ് വിഭജനം ക്രമരഹിതമായാണ് നടത്തിയതെന്നും ഇതിനെതിരേ നിയമപരവും അല്ലാത്തതുമായ നടപടികള്‍ സ്വീകരിക്കുമെന്നും ഷാനിമോള്‍ ഉസ്മാന്‍ പറഞ്ഞു. ഡിസിസി പ്രസിഡന്‍റ് സതീഷ് കൊച്ചുപറമ്പില്‍ അധ്യക്ഷത വഹിച്ചു. ജനറല്‍ സെക്രട്ടറിമാരായ എം.എം. നസീര്‍, പഴകുളം മധു തുടങ്ങിയവർ പ്രസംഗിച്ചു.

റാന്നി ബിആർസിയിൽ ഹിരോഷിമ ദിനാചരണം

റാന്നി: കുട്ടികളിൽ യുദ്ധവിരുദ്ധ മനോഭാവം വളർത്തുക, യുദ്ധത്തിന്‍റെ ദുരന്തം അനുഭവിച്ചവരെ ഓർമപ്പെടുത്തുക തുടങ്ങിയ ലക്ഷ്യങ്ങളോടെ റാന്നി ബിആർസിയും വെച്ചൂച്ചിറ കോളനി ഗവൺമെന്‍റ് ഹയർ സെക്കൻഡറി സ്കൂളും സംയുക്തമായി ഹിരോഷിമ ദിനാചരണം നടത്തി. ഹിരോഷിമയിലെ യുദ്ധത്തെ ഓർമപ്പെടുത്തുക എന്ന നിലയിൽ വീഡിയോ പ്രദർശനം, പോസ്റ്റർ പ്രദർശനം, ഫോട്ടോ പ്രദർശനം, സഡാക്കോ കൊക്ക് നിർമാണം എന്നിവയാണ് പ്രധാനമായും നടന്നത്. ജൂണിയർ റെഡ് ക്രോസ് യുദ്ധത്തിൽ മരിച്ചവരുടെ ഓർമകൾക്കു മുമ്പിൽ മെഴുകുതിരി കത്തിച്ച് ആദരാഞ്ജലി അർപ്പിച്ചു. വിവിധ ക്ലാസുകൾ കേന്ദ്രീകരിച്ചുകൊണ്ട് സഡാക്കോ കൊക്ക് നിർമാണം അധ്യാപകരുടെ നേതൃത്വത്തൽ നടത്തി. ബിപിസി ഷാജി എ.സലാം യുദ്ധവിരുദ്ധ വിദ്യാർഥി സദസ് ഉദ്ഘാടനം ചെയ്തു. പ്രഥമാധ്യാപിക സുജ ജോർജ് അധ്യക്ഷത വഹിച്ചു. പ്രിൻസിപ്പൽ ജി. ബീന യുദ്ധവിരുദ്ധ സന്ദേശം നൽകി.ആൻസി തോമസ്,ആസീബ കരീം എന്നിവർ പ്രസംഗിച്ചു. ജസ്റ്റീന തോമസ്, എൻ. ശ്രീനാഥ്, സുലൈം ഷാജഹാൻ, എം.ആർ. അനിൽകുമാർ, അജേഷ് മണി എന്നിവർ പ്രവർത്തനങ്ങൾക്ക് നേതൃത്വം നൽകി. വിദ്യാർഥികളായ അനുഗ്രഹ ബൈജു, ബി. അദ്വിക, മറിയം തോമസ്, പി. ദർശന, ബി. അനുഗ്രഹ എന്നിവർ പ്രസംഗിച്ചു. ഗണിതം, സാമൂഹ്യശാസ്ത്ര വിഷയങ്ങളുമായി ബന്ധിപ്പിച്ചാണ് ദിനാചരണം നടത്തിയത്. വിദ്യാലയത്തിലെ മുഴുവൻ വിദ്യാർഥികളും കൊക്ക് നിർമിച്ചു. ഹിരോഷിമ ദിനം ആചരിച്ച് നാഷണൽ സ്കൂൾ വാഴമുട്ടം: ഹിരോഷിമ ദിനാചരണത്തിന്‍റെ ഭാഗമായി വാഴമുട്ടം നാഷണൽ സ്കൂളിൽ ശാസ്ത്ര ക്ലബിന്‍റെ നേതൃത്വത്തില്‍ ശാസ്ത്രം നാളെയുടെ നന്മയ്ക്ക് എന്ന പേരില്‍ വിവിധ പ്രവർത്തനങ്ങൾ സംഘടിപ്പിച്ചു. സ്കൂൾ അസംബ്ലിയിൽ ഹെഡ്മിസ്ട്രസ് ജോമി ജോഷ്വ, മാനേജർ രാജേഷ് ആക്ലേത്ത് എന്നിവർസമാധാന സന്ദേശം നൽകി. ദിയോന മറിയ റോയി യുദ്ധ വിരുദ്ധ പ്രതിജ്ഞ ചൊല്ലിക്കൊടുത്തു. ഹിരോഷിമ ദിനത്തിന്‍റെ രക്തസാക്ഷിയായ സഡാക്കോ സസാക്കിയുടെ ഓർമയ്ക്കായി കുട്ടികള്‍ സഡാക്കോ കൊക്കുകൾ നിർമിച്ചു. കുട്ടികൾ മെഴുകുതിരി ദീപം തെളിച്ചു. കുട്ടികൾക്കായി വിവിധ പരിപാടികളും ക്ലാസുകളും നടന്നു. ദീപ്തി വാസുദേവ്, ടി.ആർ. പാർവതി, സന്ധ്യ ജി. നായർ, പി. ആകാശ് എന്നിവർ നേതൃത്വം നൽകി.

വോട്ടിംഗ് മെഷീനുകളുടെ പ്രവര്‍ത്തനം ജില്ലാ കളക്ടര്‍ വിലയിരുത്തി

പത്തനംതിട്ട: തദ്ദേശ സ്ഥാപന തെരഞ്ഞെടുപ്പിനുള്ള ഇലക്‌ട്രോണിക് വോട്ടിംഗ് മെഷീനുകളുടെ ആദ്യഘട്ട പരിശോധന കളക്ടറേറ്റ് പരിസരത്തെ എഫ്എല്‍സി ഹാളില്‍ ജില്ലാ കളക്ടര്‍ എസ്. പ്രേം കൃഷ്ണന്‍ വിലയിരുത്തി. ജില്ലയില്‍ തദ്ദേശ തെരഞ്ഞെ‌ടുപ്പിനായി 2210 കണ്‍ട്രോള്‍ യൂണിറ്റ്, 6250 ബാലറ്റ് യൂണിറ്റ് എന്നിവയുടെ ആദ്യഘട്ട പരിശോധന ഓഗസ്റ്റ് ഒന്നിന് ആരംഭിച്ചു. പരിശീലനം ലഭിച്ച 50 ഓളം ഉദ്യോഗസ്ഥരോടൊപ്പം ഇലക്‌ട്രോണിക് കോര്‍പറേഷൻ ഓഫ് ഇന്ത്യ ലിമിറ്റഡിലെ എൻജിനിയര്‍മാരും പങ്കെടുക്കുന്നുണ്ട്. ഡെപ്യൂട്ടി കളക്ടര്‍ ബീന എസ്. ഹനീഫ്, ചാര്‍ജ് ഓഫീസര്‍ പി. സുദീപ്, മാസ്റ്റര്‍ ട്രെയിനര്‍ രജീഷ് ആര്‍ നാഥ് എന്നിവര്‍ നേതൃത്വം നല്‍കും.

പെൻഷൻ ആനുകൂല്യങ്ങൾ തടഞ്ഞുവയ്ക്കുന്നത് അനീതി: സതീഷ് കൊച്ചുപറമ്പിൽ

പത്തനംതിട്ട : പെൻഷൻകാരുടെ ആനുകുല്യങ്ങൾ എൽഡിഎഫ് സർക്കാർ നിഷേധിക്കുന്നതിനെതിരേ കേരള സ്റ്റേറ്റ് സർവീസ് പെൻഷനേഴ്സ് അസോസിയേഷൻ നടത്തുന്ന ദ്വിദിന സത്യഗ്രഹം പത്തനംതിട്ട മിനി സിവിൽ സ്റ്റേഷനു മുൻപിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. പെൻഷൻകാരുടെ അവകാശങ്ങൾ ആരുടെയും ഔദാര്യമല്ല. നിത്യോപയോഗ സാധനങ്ങളുടെയും മരുന്നിന്‍റെയും വില താങ്ങാവുന്നതിലും അധികമായിരിക്കുകയാണെന്ന് സതീഷ് കൊച്ചുപറന്പിൽ പറഞ്ഞു. ജില്ലാ പ്രസിഡന്‍റ് എം.എ. ജോൺ അധ്യക്ഷത വഹിച്ചു. ജില്ലാ സെക്രട്ടറി വിൽസൺ തുണ്ടിയത്ത്, സംസ്ഥാന ഭാരവാഹികൾ എന്നിവർ പ്രസംഗിച്ചു.

സ്വാതന്ത്ര്യദിനാഘോഷം കാതോലിക്കേറ്റ് കോളജ് ഗ്രൗണ്ടിൽ

പത്തനംതിട്ട: പത്തനംതിട്ട കാതോലിക്കേറ്റ് കോളജ് മൈതാനത്ത് നടക്കുന്ന 79-ാമത് സ്വാതന്ത്ര്യദിനാഘോഷത്തില്‍ മന്ത്രി വീണാ ജോര്‍ജ് പരേഡില്‍ അഭിവാദ്യം സ്വീകരിച്ച് സ്വാതന്ത്ര്യദിന സന്ദേശം നല്‍കും. സ്വാതന്ത്ര്യദിനം വിപുലമായി ആഘോഷിക്കാന്‍ ജില്ലാ കളര്‍ എസ്. പ്രേംകൃഷ്ണന്‍റെ അധ്യക്ഷതയില്‍ ചേര്‍ന്ന യോഗം തീരുമാനിച്ചു. 11, 12 തീയതികളില്‍ പരേഡ് റിഹേഴ്സലും 13ന് ഡ്രസ് റിഹേഴ്സലും സംഘടിപ്പിക്കും. സെറിമോണിയല്‍ പരേഡിന്‍റെ പൂര്‍ണ ചുമതല പത്തനംതിട്ട എആര്‍ ക്യാമ്പ് അസിസ്റ്റന്‍റ് കമാന്‍ഡന്‍റിനാണ്. ആഘോഷ പരിപാടികളുടെ ഏകോപനം കോഴഞ്ചേരി തഹസില്‍ദാര്‍ നിര്‍വഹിക്കും. 29 പ്ലറ്റൂണുകള്‍ പരേഡില്‍ പങ്കെടുക്കും. പോലീസ് മൂന്ന്, ഫോറസ്റ്റ് ഒന്ന്, ഫയര്‍ഫോഴ്സ് രണ്ട്, എക്സൈസ് ഒന്ന്, എസ്പിസി ആറ്, സ്‌കൗട്ട് ആന്‍ഡ് ഗൈഡ്സ് ഏഴ്, ജൂണിയര്‍ റെഡ് ക്രോസ് നാല്, എന്‍സിസി ഒന്ന്, ബാന്‍ഡ് സെറ്റ് നാല് എന്നിങ്ങനെയാണ് പ്ലറ്റൂണുകളുടെ എണ്ണം. പരേഡ് റിഹേഴ്സലിനെത്തുന്നവര്‍ക്ക് പത്തനംതിട്ട നഗരസഭയും ജില്ലാ പഞ്ചായത്തും ലഘുഭക്ഷണം നല്‍കും. സ്വാതന്ത്ര്യ ദിനത്തില്‍ ജില്ലാ സപ്ലൈ ഓഫീസ്, കുടുംബശ്രീ മുഖേന ലഘുഭക്ഷണമൊരുക്കും. സുരക്ഷയും ഗതാഗത നിയന്ത്രണവും ജില്ലാ പോലീസും ആതുര സേവനം ജില്ലാ മെഡിക്കല്‍ ഓഫീസറുടെ നേതൃത്വത്തിലും നിർവഹിക്കും. കലാ - സാംസ്‌കാരിക പരിപാടികളുടെ ക്രമീകരണച്ചുമതല വിദ്യാഭ്യാസ ഉപഡയറക്ടര്‍ക്കാണ്. എഡിഎം ബി. ജ്യോതി, വിവിധ വകുപ്പ് ഉദ്യോഗസ്ഥര്‍ തുടങ്ങിയവര്‍ യോഗത്തില്‍ പങ്കെടുത്തു.

വിദ്യാഭ്യാസ ഓഫീസ് ജീവനക്കാരെ സംരക്ഷിക്കാൻ ഡിഡിഇയുടെ ശ്രമം

പത്തനംതിട്ട: അധ്യാപികയായ ഭാര്യയുടെ ശമ്പളകുടിശിക അനശ്ചിതമായി തടഞ്ഞുവച്ചതിൽ മനംനൊന്ത് ഭർത്താവ് ജീവനൊടുക്കിയ സംഭവത്തിൽ പത്തനംതിട്ട വിദ്യാഭ്യാസ ജില്ലാ ഓഫീസിനു വീഴ്ചയില്ലെന്ന തരത്തിൽ ഡിഡിഇ നൽകിയ പ്രാഥമിക റിപ്പോർട്ട് വിവാദമാകുന്നു. സംഭവത്തിനു പിന്നാലെ ഉദ്യോഗസ്ഥർക്കു വീഴ്ചയില്ലെന്നായിരുന്നു പത്തനംതിട്ട വിദ്യാഭ്യാസ ഉപഡയറക്ടറുടെ റിപ്പോർട്ട്. ശമ്പള കുടിശികയും മറ്റ് ആനുകൂല്യങ്ങളും നൽകാനുള്ള രേഖകൾ തയാറാക്കേണ്ടത് സ്കൂൾ പ്രധാനാധ്യാപികയുടെ ചുമതലയാണെന്നും പത്തനംതിട്ട ജില്ലാ വിദ്യാഭ്യാസ ഓഫീസിനു വീഴ്ചയുണ്ടായിട്ടില്ലെന്നുമാണ് സർക്കാരിനു നൽകിയ റിപ്പാർട്ടിൽ പറഞ്ഞിരുന്നത്. എന്നാൽ, ഇതു തള്ളിയായിരുന്നു പൊതുവിദ്യാഭ്യാസ ഡയറക്ടർ പത്തനംതിട്ട ജില്ലാ വിദ്യാഭ്യാസ ഓഫീസിലെ മൂന്നു ജീവനക്കാരെ സസ്പെൻഡ് ചെയ്തത്. വിദ്യാഭ്യാസമന്ത്രിയടക്കം ബന്ധപ്പെട്ടിട്ടും നടപടിയുണ്ടായില്ലെന്ന് ബന്ധുക്കൾ ആരോപിക്കുന്നതിനിടെയായിരുന്നു ഉദ്യോഗസ്ഥർക്ക് ക്ലീൻചിറ്റ് നൽകിയുള്ള റിപ്പോർട്ട്. വിഷയത്തിൽ ഉടൻ നടപടി സ്വീകരിക്കാൻ നിർദേശിച്ചിരുന്നതായി മന്ത്രിയും സ്ഥിരീകരിച്ചിരുന്നു. എന്നാൽ, ഇതിനുപിന്നാലെയായിരുന്നു വീഴ്ചയില്ലെന്ന് റിപ്പോർട്ട് നൽകിയത്. ഹൈക്കോടതി ഉത്തരവിന്‍റെയും സർക്കാർ നിർദേശത്തിന്‍റെയും ഭാഗമായി നാറാണംമൂഴി സെന്‍റ് ജോസഫ് ഹൈസ്കൂളിലെ യുപിഎസ്ടി ലേഖാ രവീന്ദ്രനു കഴിഞ്ഞ ഫെബ്രുവരി മുതൽ ശമ്പളവും മറ്റ് ആനുകൂല്യങ്ങളും നൽകിവരുന്നുണ്ടെന്നാണ് ഡിഡിഇയുടെ റിപ്പോർട്ട്. യാഥാർഥ്യങ്ങൾ മറച്ചുവച്ചു എന്നാൽ, നിയമനം കോടതി അംഗീകരിച്ച തീയതിയായ 2019 മുതൽ 2025 വരെയുള്ള ശമ്പള കുടിശിക പണമായി നൽകിയിട്ടില്ലെന്നും റിപ്പോർട്ടിൽ ചൂണ്ടിക്കാട്ടുന്നു. 2012 മുതൽ 2019 വരെയുള്ള ശമ്പള കുടിശിക പിഎഫിൽ ലയിപ്പിക്കേണ്ടതായിട്ടുണ്ടെന്നും ഇതിനു കാലതാമസമുണ്ടെന്നുമാണ് മറ്റൊരു പരാമർശം. എന്നാൽ, ലേഖയ്ക്ക് അനുവദിച്ചിട്ടുള്ളത് 2012ൽ ജോലിക്കു കയറിയ കാലയളവിലെ അടിസ്ഥാന ശന്പളം മാത്രമാണെന്നും ആനുകൂല്യങ്ങൾ നൽകിയിട്ടില്ലെന്നുമുള്ളത് ഡിഡിഇ മറച്ചുവച്ചു. ശമ്പള കുടിശിക ലഭിക്കാനായി സ്പാർക്കിൽ ഓഥന്‍റിക്കേഷനുവേണ്ടി പ്രധാനാധ്യാപിക രേഖാമൂലം അപേക്ഷിച്ചത് 2025 ജൂലൈ 30നാണെന്നും ഓഗസ്റ്റ് രണ്ടിനുതന്നെ ഇതു പത്തനംതിട്ട ജില്ലാ വിദ്യാഭ്യാസ ഓഫീസിൽ അംഗീകരിച്ചിട്ടുണ്ടെന്നും റിപ്പോർട്ടിൽ പറയുന്നു. കൂടാതെ പത്തനംതിട്ട വിദ്യാഭ്യാസ ജില്ലാ ഓഫീസർ മൂന്നു മാസത്തിനുള്ളിൽ അടിയന്തരമായി ശമ്പളവും മറ്റ് ആനുകൂല്യങ്ങളും മാറി നൽകണമെന്നു പ്രധാനാധ്യാപികയ്ക്ക് ഉത്തരവ് നൽകിയിട്ടുള്ളതാണെന്നും ഇതിൽ ചൂണ്ടിക്കാട്ടിയിരുന്നു. വെള്ളപൂശൽ ഡിഡിഇ നൽകിയ റിപ്പോർട്ട്, ഉദ്യോഗസ്ഥരെ വെള്ളപൂശാനുള്ള ശ്രമമാണെന്ന ആക്ഷേപവുമായി വിവിധ അധ്യാപകസംഘടനകളും രംഗത്തെത്തി. വിദ്യാഭ്യാസമന്ത്രിതന്നെ നേരത്തേ ഇടപെട്ട വിഷയമായിരുന്നതിനാലാണ് പൊതുവിദ്യാഭ്യാസ ഡയറക്ടർ ഉദ്യോഗസ്ഥരുടെ വീഴ്ച അക്കമിട്ടു നിരത്തി നടപടിയെടുത്തത്. ഇതാകട്ടെ ഡിഡിഇയുടെ വെള്ളപൂശൽ റിപ്പോർട്ടിനെ തള്ളിക്കൊണ്ടായിരുന്നു. നിലവിലെ പ്രധാനാധ്യാപിക മേയ് 31നാണ് ചുമതലയേറ്റതെന്ന് ഇവർ ചൂണ്ടിക്കാട്ടുന്നു. സ്പാർക്കിൽ ഓഥന്‍റിക്കേഷനുവേണ്ടി ജൂണിൽത്തന്നെ അപേക്ഷ നൽകിയിരുന്നുവെന്നും ഇവർ പറയുന്നു. എന്നാൽ, പല വാദങ്ങൾ പറഞ്ഞു വൈകിപ്പിക്കുകയായിരുന്നു. പ്രധാന അധ്യാപികയ്ക്കാണ് ചുമതലയെങ്കിൽ ചൊവ്വാഴ്ച തിടുക്കപ്പെട്ട് സ്കൂളിൽനിന്നു രേഖകൾ വാങ്ങി ഒപ്പിട്ടുനൽകിയത് എന്തിന്‍റെ അടിസ്ഥാനത്തിലാണെന്നും സ്കൂൾ അധികൃതരും അധ്യാപകസംഘടനകളും ചോദിക്കുന്നു. ഷിജോയ്ക്ക് നാടിന്‍റെ അന്ത്യാഞ്ജലി; രണ്ട് കുടുംബങ്ങളുടെ അത്താണി അത്തിക്കയം: ഭാര്യയുടെ ശമ്പള കുടിശിക ലഭിക്കാന്‍വേണ്ടി ഓഫീസുകള്‍ കയറിയിറങ്ങിയിട്ടും ഫലമുണ്ടാകാതെ വിടവാങ്ങിയ ഷിജോയ്ക്ക് നാടിന്‍റെ അന്ത്യാഞ്ജലി. ഇന്നലെ ഉച്ചകഴിഞ്ഞ് ഷിജോ അത്തിക്കയം വടക്കേച്ചരുവിലെ വീട്ടുമുറ്റത്ത് എരിഞ്ഞടങ്ങി. വീടിന് ഒന്നര കിലോമീറ്റര്‍ അകലെയുള്ള വനമേഖലയില്‍ കഴിഞ്ഞ ഞായറാഴ്ച വൈകുന്നേരമാണ് വി.ടി. ഷിജോയെ (46) തൂങ്ങിമരിച്ച നിലയില്‍ കണ്ടെത്തിയത്. ഷിജോയുടെ ഭാര്യ ലേഖ രവീന്ദ്രന്‍ നാറാണംമൂഴി സെന്‍റ് ജോസഫ് സ്‌കൂളിലെ അധ്യാപികയാണ്. ഭാര്യയുടെ ശമ്പളത്തിനുവേണ്ടി ഏറെ നിയമയുദ്ധം നടത്തിയ ഷിജോ ഒടുവില്‍ ഹൈക്കോടതിയില്‍നിന്ന് അനുകൂല ഉത്തരവും സമ്പാദിച്ചിരുന്നു. എന്നാല്‍, പത്തനംതിട്ട വിദ്യാഭ്യാസ ജില്ലാ ഓഫീസില്‍നിന്ന് തുടര്‍ നടപടികളുണ്ടായില്ല. 13 വര്‍ഷമായി ലഭിക്കേണ്ട ശമ്പളത്തിന്‍റെ ബില്ല് സമര്‍പ്പിച്ചിട്ട് ഏഴു മാസം പിന്നിട്ടെങ്കിലും ഇതു പാസാക്കാന്‍ ജില്ലാ വിദ്യാഭ്യാസ ഓഫീസ് തയാറായില്ല. ഇതോടെ കുടുംബം സാമ്പത്തികമായി തകര്‍ന്നു. കൃഷിവകുപ്പിനു കീഴിലുള്ള വിഎഫ്പിസികെയില്‍ ഡ്രൈവറായി ജോലി നോക്കിയിരുന്ന ഷിജോയുടെ ശമ്പളവും മുടങ്ങിയതോടെ പ്രതിസന്ധി രൂക്ഷമായി. ഏക മകൻ വൈഷ്ണവിന്‍റെ എന്‍ജിനിയറിംഗ് പഠനവുമായി ബന്ധപ്പെട്ട് പണം ലഭ്യമാകാതെ വന്നതോടെയാണ് ഷിജോ മാനസികബുദ്ധിമുട്ടിലായതെന്നു പറയുന്നു. ആശ്വസിപ്പിക്കാനാകാതെ സ്വന്തം വീട്ടിലെയും ഭാര്യയുടെ മാതാപിതാക്കളുടെയും കാര്യങ്ങള്‍ നടത്തിയിരുന്നത് ഷിജോയാണ്. ചാരുംമൂട്ടില്‍ ജോലി നോക്കുന്ന ഷിജോ എല്ലാ ദിവസവും വല്ലനയിലെ ഭാര്യാവീട്ടിലെത്തി കാര്യങ്ങള്‍ അന്വേഷിച്ചാണ് വന്നിരുന്നത്. ഭാര്യ ലേഖയുടെ മാതാപിതാക്കൾ മാത്രമാണ് വല്ലനയിലെ വീട്ടിലുള്ളത്. ഷിജോയുടെ വേർപാട് കുടുംബാംഗങ്ങൾക്ക് താങ്ങാവുന്നതിലപ്പുറമായി. ഭാര്യ ലേഖയെയും അമ്മ കോമളത്തെയും ആശ്വസിപ്പിക്കാൻ ബന്ധുക്കൾ നന്നേപാടുപെട്ടു. ജീവിതത്തിന്‍റെ നാനാതുറകളിൽപ്പെട്ടവർ ആദരാഞ്ജലി അർപ്പിക്കാൻ വീട്ടിലേക്ക് എത്തിയിരുന്നു.

വാറണ്ട് കേസ് പ്രതി പിടിയിൽ

മല്ലപ്പള്ളി: വാറണ്ടു കേസിലെ പ്രതിയെ പെരുമ്പെട്ടി പോലീസ് അറസ്റ്റ് ചെയ്തു. കോട്ടാങ്ങല്‍ വായ്പൂര് കണ്ണങ്കര പുള്ളോലിത്തടത്തില്‍ വീട്ടില്‍ നിഷാദിനെയാണ് (അൻസാരി, 50)പിടികൂടിയത്. 2010, 2015 വര്‍ഷങ്ങളില്‍ രജിസ്റ്റര്‍ ചെയ്ത രണ്ട് ദേഹോപദ്രവകേസുകളില്‍ നിലവില്‍ ഇയാള്‍ക്കെതിരേ വാറണ്ട് നിലവിലുണ്ട്. തിരുവല്ല കോടതിയില്‍ ഹാജരാക്കിയ നിഷാദിനെ റിമാന്‍ഡ് ചെയ്തു.

കുട്ടനാട് പൂരം 28 മുതൽ തിരുവല്ലയിൽ

പത്തനംതിട്ട : ഉത്രാടം തിരുനാൾ പമ്പ ബോട്ട് റേസ് ക്ലബിന്‍റെ നേതൃത്വത്തിൽ കുട്ടനാട് പൂരം അറ്റ് തിരുവല്ല കാർണിവൽ 28 മുതൽ സെപ്റ്റംബർ 14 വരെ തിരുവല്ല മുനിസിപ്പൽ സ്റ്റേഡിയത്തിൽ നടത്തും. സെപ്റ്റംബർ നാലിന് ഉച്ചകഴിഞ്ഞ് രണ്ടിന് നീരേറ്റുപുറം പന്പ വാട്ടർ സ്റ്റേഡിയത്തിൽ നടക്കുന്ന 67-ാംമത് കെ. സി. മാമ്മൻ മാപ്പിള ട്രോഫിക്കു വേണ്ടിയുള്ള ഉത്രാടം തിരുനാൾ പമ്പ ബോട്ട് റേസ് വള്ളംകളിയുടെ ഭാഗമായാണ് ഇത്തവണ വിപുലമായ കാർണിവൽ തിരുവല്ലയിൽ സംഘടിപ്പിക്കുന്നതെന്ന് ഭാരവാഹികൾ പത്രസമ്മേളനത്തിൽ പറഞ്ഞു. കുട്ടനാടിന്‍റെ സമൃദ്ധമായ പാരമ്പര്യവും സാംസ്കാരികതയുടെ അടയാളങ്ങളുമായി പുതിയ തലമുറയെ ചേർത്തുപിടിക്കാനും കേരളത്തിനകത്തും പുറത്തുമുള്ള കലയും കൈത്തറിയും പ്രോത്സാഹിപ്പിക്കാനുമുള്ള ശ്രമത്തിന്‍റെ ഭാഗമാണ് കുട്ടനാട് പൂരം. സർക്കാർ, അർധ സർക്കാർ സ്ഥാപനങ്ങൾ മറ്റു പ്രമുഖ സ്ഥാപനങ്ങൾ എന്നിവ അണിനിരക്കും. വൈകുന്നേരം കലാപരിപാടികളും ഉണ്ടാകും. കാർഷിക മേഖലയുമായി ബന്ധപ്പെട്ട പ്രദർശനങ്ങൾ, എംഎസ്എംഇ സംരംഭങ്ങളുമായി ബന്ധപ്പെട്ട സ്റ്റാളുകൾ, നാടൻ ഉത്പന്നങ്ങൾ, ഭക്ഷണശാലകൾ, കേരളീയ, അന്തർ സംസ്ഥാന വിഭവങ്ങൾ അടങ്ങിയ വിപുലമായ മാർക്കറ്റ് സ്റ്റാളുകൾ, മത്സ്യം, കൃഷി തുടങ്ങിയ കാർഷിക മേഖലയിലെ പുതിയ സാങ്കേതികവിദ്യകളുടെ ലൈവ് ഡെമോകളും അരങ്ങേറും. ലോഗോ പ്രകാശനം ഗവർണർ രാജേന്ദ്ര വിശ്വനാഥ് ആർലേക്കർ സംഘാടക സമിതി വൈസ് ചെയർമാൻ തോമസ് ഫിലിപ്പ് ഡെൽറ്റയ്ക്ക് നൽകി പ്രകാശനം ചെയ്തു. സെപ്റ്റംബർ നാലിനു നടക്കുന്ന വള്ളംകളിയുടെ പതാക ഉയർത്തൽ 26ന് പമ്പാവാട്ടർ സ്റ്റേഡിയത്തിൽ നടത്തും. 30 ൽപരം കളി വള്ളങ്ങളെ പങ്കെടുപ്പിക്കുന്നതിനു വേണ്ട ക്രമീകരണങ്ങളാണ് നടന്നുവരുന്നതെന്ന് സംഘാടക സമിതി അറിയിച്ചു. പമ്പ ബോട്ട് റേസ് ക്ലബ് വർക്കിംഗ് പ്രസിഡന്‍റ് വിക്ടർ ടി. തോമസ്, ചീഫ് കോഓർഡിനേറ്റർ ഡോ. സജി പോത്തൻ തോമസ്, ഭാരവാഹികളായ തോമസ് വർഗീസ്, അനിൽ സി. ഉഷസ് എന്നിവർ പത്രസമ്മേളനത്തിൽ പങ്കെടുത്തു.

ദുരൂഹതകള്‍ നിറഞ്ഞൊരു വീട്, ജീവിതം അതിലേറെ വിചിത്രം

സെബാസ്റ്റ്യൻ കൊടും ക്രിമിനലോ...? കോട്ടയം: നാലു സ്ത്രീകളുടെ തിരോധാനത്തില്‍ പ്രതിയെന്ന സംശയിക്കുന്ന ചേര്‍ത്തല പള്ളിപ്പുറം പഞ്ചായത്ത് ഒന്‍പതാം വാര്‍ഡ് ചെങ്ങുംതറ സെബാസ്റ്റ്യന് നിലവില്‍ 68 വയസ്. ഇയാള്‍ ഏറ്റുമാനൂര്‍ വെട്ടിമുകള്‍ സ്വദേശിനിയെ വിവാഹം ചെയ്തത് 55-ാം വയസിലാണ്. ഭാര്യയും പതിനൊന്ന് വയസുള്ള മകളും വെട്ടിമുകളിലുണ്ട്. സെബാസ്റ്റ്യന്‍ അടുത്ത കാലത്തും വെട്ടിമുകളില്‍ ഭാര്യാവീട്ടിലുണ്ടായിരുന്നതായി പ്രദേശവാസികള്‍ പറയുന്നു. കൊലപാതകം, തട്ടിപ്പ്, വഞ്ചന തുടങ്ങിയ വിവിധ കേസുകളില്‍ അറസ്റ്റ് ഒഴിവാക്കാനാണു വെട്ടിമുകളിലെത്തിയിരുന്നതെന്ന് സംശയിക്കുന്നു. ഇവിടെയും സെബാസ്റ്റ്യന്‍ പലരില്‍നിന്നു പണവും കടകളില്‍നിന്ന് സാധനങ്ങള്‍ കടവും വാങ്ങിയിട്ടുള്ളതായി പറയുന്നു. ബ്രോക്കര്‍ ജോലിയും സ്ഥിരം യാത്രകളും ലോഡ്ജുകളില്‍ താമസവും പതിവാക്കിയ സെബാസ്റ്റ്യന്‍ ദിവസങ്ങള്‍ കൂടുമ്പോഴാണു ചേര്‍ത്തലയിലെ വീട്ടില്‍ എത്തിയിരുന്നത്. വീടിനോടു ചേര്‍ന്ന രണ്ടരയേക്കര്‍ സ്ഥലത്ത് ഇയാള്‍ കൃഷി ചെയ്തിരുന്നില്ല. വനംപോലെ കാടുകയറിയ സ്ഥലത്തിനു നടുക്കുള്ള വീടും എന്നും ദുരൂഹതകള്‍ നിറഞ്ഞതാണ്. കുളങ്ങളില്‍ മാംസം തിന്നുന്ന പിരാന, ആഫ്രിക്കന്‍ മുഷി തുടങ്ങിയ മീനുകളെ ഇയാള്‍ വളര്‍ത്തിയിരുന്നു. നാട്ടില്‍ അമ്മാവന്‍ എന്നാണ് ഇയാള്‍ അറിയപ്പെടുന്നത്. അതിക്രൂരവും പൈശാചികവുമായ മനസിന്‍റെ ഉടമയാണ് ഇയാളെന്ന് നാട്ടുകാര്‍ക്ക് വിശ്വസിക്കാനാകുന്നില്ല. അതിരമ്പുഴ സ്വദേശിനി ജെയ്‌നമ്മയുടെ കൊലപാതകത്തില്‍ തെളിവുകള്‍ നിരത്തി ഏഴു ദിവസം ചോദ്യം ചെയ്തിട്ടും പ്രതി വ്യക്തമായ മറുപടി നല്‍കുന്നില്ല. ജെയ്‌നമ്മയെ പരിചയമുണ്ടായിരുന്നു എന്നതല്ലാതെ എന്തിനു കൊന്നു, എങ്ങനെ കൊന്നു, ആരുടെ സഹായം കിട്ടി എന്നിവയ്ക്ക് മറുപടിയില്ല. പ്രമേഹബാധിതനായ സെബാസ്റ്റ്യന്‍ ശാരീരിക അസ്വസ്ഥതകള്‍ നിരത്തി ചോദ്യങ്ങളോടു സഹകരിക്കുന്നില്ല. നാലുനേരം മരുന്നും ഭക്ഷണവും കൃത്യസമയത്ത് ഇയാള്‍ക്ക് നിര്‍ബന്ധമാണ്. കാലില്‍ ചെറിയ മുറിവുള്ളതിനാല്‍ രാവിലെ ആശുപത്രിയിലെത്തിച്ച് ഡ്രസിംഗ് നടത്തേണ്ടതും പോലീസ്തന്നെ. കാണാതായ നാലു സ്ത്രീകളെയും അറിയാമെന്നല്ലാതെ കൊലപ്പെടുത്തിയതായി സമ്മതിക്കുന്നുമില്ല. സ്ത്രീകളുടെ തിരോധാനം സംബന്ധിച്ച കേസുകളില്‍ ചോദ്യം ചെയ്തിട്ടും തന്ത്രപരമായി അന്വേഷണം വഴിതെറ്റിക്കുകയായിരുന്നു. സെബാസ്റ്റ്യന്‍, ആര്‍ക്കും പിടികൊടുക്കാത്ത ക്രിമിനല്‍ സ്ത്രീകളെ വശീകരിച്ചു വലയില്‍ വീഴ്ത്തുന്നതില്‍ അതിവിദഗ്ധനായിരുന്നു സീരിയല്‍ കില്ലറെന്നു പോലീസ് വിശേഷിപ്പിക്കുന്ന സെബാസ്റ്റ്യന്‍. കുടുംബപ്രശ്‌നങ്ങള്‍, സ്വത്തുതര്‍ക്കം തുടങ്ങിയവയില്‍ ബുദ്ധിമുട്ടുന്ന തനിച്ചു കഴിയുന്ന സ്ത്രീകളെ കണ്ടെത്തി ചങ്ങാത്തം കൂടുന്നതാണ് ഇയാളുടെ രീതി. 2024ല്‍ കാണാതായ അതിരമ്പുഴ സ്വദേശി ജെയ്‌നമ്മ, ചേര്‍ത്തല കടക്കരപ്പള്ളി സ്വദേശി ബിന്ദു പദ്മനാഭന്‍ (2002), ചേര്‍ത്തല വാരനാട് സ്വദേശി ഐഷ (2012), ചേര്‍ത്തല വള്ളാകുന്നം സ്വദേശി സിന്ധു (2020)എന്നിവരുടെ തിരോധാനക്കേസുകളാണ് സെബാസ്റ്റ്യനെ പിന്തുടരുന്നത്. ഇതുകൂടാതെയും സമാനമായ കൃത്യങ്ങള്‍ ഇയാള്‍ നടത്തിയിരുന്നോ എന്നും പോലീസ് തെരയുന്നു. വ്യക്തിപരമായ പ്രശ്‌നപരിഹാരങ്ങള്‍ക്ക് ധ്യാനകേന്ദ്രങ്ങളിലും പ്രാര്‍ഥനാകേന്ദ്രങ്ങളിലും സന്ദര്‍ശനം പതിവാക്കുന്ന സ്ത്രീകളുമായി സൗഹൃദം കൂടും. കുടുംബവിഹിതത്തിന് വ്യവഹാരം നടത്തുന്ന സ്ത്രീകളും വലയില്‍പ്പെട്ടു. അതിരമ്പുഴ സ്വദേശിനി ജെയ്‌നമ്മയെ സെബാസ്റ്റ്യന്‍ പരിചയപ്പെട്ടത് എന്ന്, എവിടെവച്ച് എന്നതില്‍ വ്യക്തതയില്ല. ആലപ്പുഴയിലെ ഒരു പ്രാർഥനാലയത്തില്‍ ജെയ്‌നമ്മ പതിവായി പോയിരുന്നുവെന്നും അവിടെ വച്ചാണ് സെബാസ്റ്റ്യനെ പരിചയപ്പെട്ടതെന്നും പറയപ്പെടുന്നു. എന്നാല്‍ ഏറ്റുമാനൂരില്‍ ഭാര്യയുടെ വീട്ടിലെത്തിയ വേളയിലാണ് ജെയ്‌നമ്മയെ പരിചയപ്പെട്ടതെന്നും സംശയമുണ്ട്. എവിടെ യാത്രപോയാലും ആറു പവനോളം ആഭരണങ്ങള്‍ ജെയ്‌നമ്മ ധരിച്ചിരുന്നു. ഒരു ആത്മീയ പ്രസിദ്ധീകരണം വിതരണം ചെയ്യാന്‍ സെബാസ്റ്റ്യനും ജെയ്നമ്മയും ഒരുമിച്ചു യാത്ര ചെയ്തിരുന്നതായി സൂചനയുണ്ട്. ജെയ്‌നമ്മയുടെ മൊബൈല്‍ ഫോണ്‍ ലൊക്കേഷന്‍ മുന്‍പ് പലപ്പോഴും ചേര്‍ത്തല പള്ളിപ്പുറത്ത് പോലീസ് സ്ഥിരീകരിച്ചിട്ടുണ്ട്. 2024 ഡിസംബര്‍ 21 മുതല്‍ 23 വരെ പാലായില്‍ നടന്ന ബൈബിൾ കണ്‍വന്‍ഷനില്‍ ജെയ്‌നമ്മ പങ്കെടുത്തിരുന്നതായി സഹോദരന്‍ സാവിയോ പറഞ്ഞു. ധ്യാനത്തിനുശേഷം 24ന് കുറിച്ചിത്താനത്തുള്ള സാവിയോയുടെ വീട്ടിലെത്തുമെന്നും പറഞ്ഞിരുന്നു. 24ന് വരാതായശേഷം നടത്തിയ അന്വേഷണങ്ങളില്‍ ജെയ്‌നമ്മയെ കണ്ടെത്താനായില്ല. മൊബൈല്‍ ഫോണില്‍ വിളിച്ചാല്‍ ബെല്ലുണ്ടെങ്കിലും ഫോണ്‍ എടുക്കാറില്ലായിരുന്നു. പാലായില്‍നിന്ന് ധ്യാനത്തിനുശേഷം ജെയ്‌നമ്മ ചേര്‍ത്തലയില്‍ എത്തിയിരുന്നതായാണ് മൊബൈല്‍ ലൊക്കേഷന്‍. അങ്ങനെയെങ്കില്‍ 23നോ പിറ്റേന്നോ സെബാസ്റ്റ്യന്‍ ഇവരെ കൊലപ്പെടുത്തി ആഭരണങ്ങള്‍ കൈവശപ്പെടുത്തിയിട്ടുണ്ടാകും. പണയംവച്ച ആഭരണങ്ങള്‍ ചേര്‍ത്തലയിലെ സ്വകാര്യ ധനകാര്യസ്ഥാപനത്തില്‍നിന്നു പോലീസ് കണ്ടെടുത്തിട്ടുണ്ട്. ഏഴു വര്‍ഷമായി സംശയനിഴലില്‍; ഒരു കേസിലും പിടികൊടുത്തില്ല കോടികളുടെ സ്വത്തിനുടമ ചേര്‍ത്തല കടക്കരപ്പള്ളി സ്വദേശിനി ബിന്ദു പത്മനാഭന്‍റെ തിരോധാനവുമായി ബന്ധപ്പെട്ട് 2018ലാണ് സെബാസ്റ്റ്യന്‍ പോലീസിന്‍റെ സംശയനിഴലില്‍ വരുന്നത്. ബിന്ദു മൊബൈല്‍ ഫോണ്‍ ഉപയോഗിക്കാതിരുന്നതും സെബാസ്റ്റ്യന്‍ നുണപരിശോധനയ്ക്ക് വിസമ്മതിച്ചതും കാരണം തെളിവ് ലഭിക്കാതെ അന്വേഷണം പ്രതിസന്ധിയിലായി. പിന്നീടാണ് ഏറ്റുമാനൂര്‍ സ്വദേശിനി ജെയ്നമ്മയുടെ തിരോധാനവും അന്വേഷണവുമുണ്ടായത്. ജെയ്നമ്മ മൊബൈല്‍ ഉപയോഗിച്ചിരുന്നത് കാരണമാണ് സെബാസ്റ്റ്യനിലേക്ക് സംശയം നീണ്ടത്. ജെയ്‌നമ്മയെ അപായപ്പെടുത്തിയശേഷം ഫോണ്‍ കൈവശപ്പെടുത്തിയ സെബാസ്റ്റ്യന്‍ പലപ്പോഴും ബന്ധുക്കള്‍ക്ക് മിസ്ഡ് കോള്‍ ചെയ്തിരുന്നു. ജെയ്‌നമ്മയുടെ സഹോദരനും സഹോദരിക്കും മിസ്ഡ് കോളുകള്‍ ലഭിച്ചപ്പോഴൊക്കെ പോലീസിനെ സമീപിച്ചെങ്കിലും ലൊക്കേഷന്‍ ചേര്‍ത്തലയാണെന്നും അവിടെ പരാതിപ്പെടാനും ആവര്‍ത്തിച്ചുകൊണ്ടിരുന്നു. അവസാനം മേലുകാവിലും ഈരാറ്റുപേട്ടയിലും ലൊക്കേഷന്‍ കണ്ടതോടെയാണ് അന്വേഷണം മുന്നോട്ടുപോയതും വ്യക്തമായ തെളിവുകള്‍ ലഭിച്ചതും. ജെയ്‌നമ്മ ജീവിച്ചിരിപ്പുണ്ടെന്ന് ബന്ധുക്കളെ തെറ്റിദ്ധരിപ്പിക്കുകയായിരുന്നു പ്രതിയുടെ ലക്ഷ്യം. വാരനാട് സ്വദേശിനി ഐഷയുടെ തിരോധാനത്തിലും സെബാസ്റ്റ്യനു പങ്കുള്ളതായി കരുതുന്നു. ആലപ്പുഴ ജില്ലാ ക്രൈംബ്രാഞ്ചാണ് ഐഷ തിരോധാനം അന്വേഷിക്കുന്നത്. ബിന്ദു പത്മനാഭന്‍റെ തിരോധാനം അന്വേഷിക്കുന്നത് ക്രൈംബ്രാഞ്ചാണ്. ബിന്ദുവിന്‍റെ കുടുംബവീടിനോടു ചേര്‍ന്ന് സര്‍ക്കാരിന്‍റെ ലൈഫ് ഭവനപദ്ധതിക്കായി നീക്കിവച്ച 30 സെന്‍റ് സ്ഥലം വ്യാജ പ്രമാണം ചമച്ചു സെബാസ്റ്റ്യന്‍ കൈമാറ്റം ചെയ്തിരുന്നു. ബിന്ദുവിന്‍റെ പിതാവ് പത്മനാഭന്‍ വരുത്തിയ അബ്കാരി കുടിശികയിലേക്കു കണ്ടുകെട്ടിയ വസ്തുവാണു വ്യാജ പ്രമാണം ചമച്ചു പോക്കുവരവ് ചെയ്തു ബാങ്കില്‍നിന്നു വായ്പയെടുത്തത്. 20 വര്‍ഷം മുന്‍പു ജപ്തി ചെയ്ത വസ്തു ലേലത്തിനു വച്ചെങ്കിലും ആരും ഏറ്റെടുക്കാതെ വന്നതോടെ സര്‍ക്കാരിലേക്കു കണ്ടുകെട്ടി. ഈ വസ്തുവിന്‍റെ അതിരുകള്‍ കാണിച്ച് ചേര്‍ത്തല സ്വദേശിയായ ആധാരമെഴുത്തുകാരനെക്കൊണ്ട് പ്രമാണം രജിസ്റ്റര്‍ ചെയ്തു. ഇതു വില്ലേജ് ഓഫീസില്‍ പോക്കുവരവ് ചെയ്യാതെ വസ്തു വിറ്റതായി മറ്റൊരു പ്രമാണമുണ്ടാക്കി പോക്കുവരവു നടത്തി സഹകരണ ബാങ്കില്‍നിന്നു വായ്പയെടുത്തു. വായ്പ കുടിശികയായതോടെ ബാങ്ക് ജപ്തിക്കെത്തിയപ്പോഴാണ് സര്‍ക്കാര്‍ ഏറ്റെടുത്ത സ്ഥലമാണെന്നു കണ്ടെത്തിയത്. ബിന്ദു പത്മനാഭന്‍റെ തിരോധാനവുമായി ബന്ധപ്പെട്ട കേസിലെ മുഖ്യപ്രതിയാണ് സെബാസ്റ്റ്യനെന്ന് അന്നുതന്നെ പോലീസ് സംശയിച്ചിരുന്നു. സെബാസ്റ്റ്യന്‍റെ എല്ലാ ഇടപാടുകള്‍ക്കും സഹായിയായിരുന്ന ചെങ്ങണ്ട സ്വദേശി ഓട്ടോഡ്രൈവര്‍ മനോജിന്‍റെ ആത്മഹത്യയിലും ദുരൂഹതയുണ്ട്. സെബാസ്റ്റ്യന്‍റെ എല്ലാ ചെയ്തികളും അറിയാമായിരുന്ന മനോജിനെ ഇയാള്‍ വകവരുത്തിയതാണെന്നാണ് സംശയം. ബിന്ദു പദ്മനാഭനെക്കുറിച്ച് സെബാസ്റ്റ്യന്‍ പറഞ്ഞിട്ടുണ്ടെന്നു ഭാര്യ ആലപ്പുഴ: ചേര്‍ത്തല തിരോധാന കേസില്‍ ബിന്ദു പദ്മനാഭനെക്കുറിച്ച് സെബാസ്റ്റ്യന്‍ പറഞ്ഞിട്ടുണ്ടെന്നു സെബാസ്റ്റ്യന്‍റെ ഭാര്യയുടെ വെളിപ്പെടുത്തല്‍. കേസില്‍ ആദ്യം കാണാതായ ബിന്ദു പദ്മനാഭന്‍റെ പേര് അറിയാമെന്ന് സെബാസ്റ്റ്യന്‍റെ ഭാര്യ മാധ്യമങ്ങളോടു പറഞ്ഞു. ബിന്ദുവിന്‍റെ ഒഴികെയുള്ള പേരുകള്‍ സെബാസ്റ്റ്യന്‍ പറഞ്ഞുകേട്ടിട്ടില്ലെന്നും അവര്‍ പറഞ്ഞു. ബിന്ദുവിന്‍റെ പേര് എറണാകുളത്തെ സ്ഥലവുമായി ബന്ധപ്പെട്ട് കേട്ടതാണ്. ഈ സ്ത്രീകള്‍ ആരുമായും സാമ്പത്തിക ഇടപാടുകള്‍ ഉള്ളതായി പറഞ്ഞിട്ടില്ല. സെബാസ്റ്റ്യന്‍റെ ഭാഗത്തുനിന്ന് ഇതുവരെ മോശം പെരുമാറ്റം ഉണ്ടായിട്ടില്ലെന്നും ഭാര്യ പറഞ്ഞു. 2008ലായിരുന്നു സെബാസ്റ്റ്യനുമായുള്ള വിവാഹം. 17 വര്‍ഷം ഒരുമിച്ച് ജീവിച്ചു. തന്നോടും കുഞ്ഞിനോടും എല്ലാവരോടും വളരെ സ്നേഹമുള്ള വ്യക്തിയായിരുന്നുവെന്നും കൂള്‍ ആയിട്ടാണ് എപ്പോഴും നടക്കുന്നതെന്നും അവര്‍ പറഞ്ഞു. ഇത്തരമൊരു കാര്യം ചെയ്യുമെന്ന് തോന്നിയിട്ടില്ലെന്നും ഭാര്യ പറഞ്ഞു. സെബാസ്റ്റ്യന്‍ സാധു ആണെന്നാണ് തനിക്ക് തോന്നുന്നത്. തന്നോട് അങ്ങനെയായിരുന്നു ഇത്രയും കാലം. പിന്നീടുള്ള കാര്യങ്ങളൊന്നും അറിയില്ലന്നും അവര്‍ വ്യക്തമാക്കി. സെബാസ്റ്റ്യന് സാമ്പത്തിക ബുദ്ധിമുട്ട് ഉണ്ടായിരുന്നു. ഇതുവരെ മോശം പെരുമാറ്റം ഉണ്ടായിട്ടില്ല. കുടുംബത്തിനകത്തും പുറത്തും സൗമ്യന്‍. ആരോടും മറ്റ് പ്രശ്നങ്ങള്‍ ഉള്ളതായി പറഞ്ഞിട്ടില്ല. സെബാസ്റ്റ്യനെക്കുറിച്ച് കേള്‍ക്കുന്ന വിവരങ്ങള്‍ വിശ്വസിക്കാന്‍ കഴിയുന്നില്ല. സെബാസ്റ്റ്യന് ആരോഗ്യ പ്രശ്നങ്ങളുണ്ട്. പ്രമേഹ രോഗിയാണ്. കാലിനും പ്രശ്നങ്ങളുണ്ട്. അങ്ങനെയുള്ള ഒരാള്‍ ഇങ്ങനെ ഒരു കാര്യം ചെയ്യുമെന്ന് വിശ്വസിക്കാന്‍ പറ്റുന്നില്ലെന്നും അവര്‍ പറഞ്ഞു.

ആറന്മുള വിഎച്ച്എസ്എസ് കെട്ടിടത്തിന്‍റെ ഫിറ്റ്നസ് റദ്ദാക്കി

ആറന്മുള: ആറന്മുള വൊക്കേഷണൽ ഹയർ സെക്കൻഡറി സ്കൂൾ കെട്ടിടത്തിന്‍റെ ഫിറ്റ്നസ് റദ്ദാക്കി. കഴിഞ്ഞ മേയിൽ മല്ലപ്പുഴശേരി ഗ്രാമപഞ്ചായത്ത് എൻജിനിയറിംഗ് വിഭാഗം ഫിറ്റ്നസ് സർട്ടിഫിക്കറ്റ് നൽകിയ കെട്ടിടമാണ് ഇപ്പോൾ അൺഫിറ്റ് ആയി കണ്ടെത്തിയത്. ഇതോടെ ഈ കെട്ടിടത്തിലെ ഏഴു ക്ലാസുകൾ ഓഡിറ്റോറിയത്തിലേക്കു മാറ്റിയിരിക്കുകയാണ്. ഇന്നലെ രാവിലെ കുട്ടികൾ എത്തിയപ്പോഴാണ് കെട്ടിടത്തിൽ ക്ലാസുകൾ നടക്കില്ലെന്ന വിവരം അറിഞ്ഞത്. ഇതോടെ മഴയിൽ കുട്ടികൾ കാത്തുനിന്നു. എട്ട്, ഒമ്പത്, പത്ത് ഹൈസ്കൂൾ ഡിവിഷനുകളും വിഎച്ച്എസ്എസ് ക്ലാസ് മുറികളും ഇതിൽ ഉൾപ്പെടുന്നു. ഒപ്പം ഫിസിക്സ്, കെമിസ്ട്രി, ഐടി ലാബുകൾ, ഹൈസ്കൂൾ സ്റ്റാഫ് റൂം, പ്രിൻസിപ്പൽ, ഹെഡ്മാസ്റ്റർ മുറികൾ, ഓഫീസ് എന്നിവയും മാറ്റി. അൺഫിറ്റായ കെട്ടിടത്തിലേക്കു കുട്ടികളടക്കം ആരും പ്രവേശിക്കരുതെന്നു കർശന നിർദേശവും നൽകി. 1972ലെ കെട്ടിടം 1972 ഒക്ടോബർ 14ന് അന്നത്തെ പൊതുമരാമത്ത് മന്ത്രി പി.കെ. ദിവാകരൻ ഉദ്ഘാടനം ചെയ്ത പ്രധാന ഇരു നില കെട്ടിടത്തിനാണ് ഫിറ്റ്നസ് നഷ്ടമായത്. അന്നു മികച്ച നിലവാരത്തോടെയായിരുന്നു നിർമാണം. 52 വർഷം കഴിഞ്ഞിട്ടും കാര്യമായ യാതൊരു തകരാറും കെട്ടിടത്തിന് ഉണ്ടായില്ല. അറ്റകുറ്റപ്പണികൾ അടിയന്തരമായി നടത്തണമെന്ന് ആവശ്യപ്പെട്ടു കഴിഞ്ഞ വർഷം ജില്ലാ പഞ്ചായത്തിൽ സ്കൂൾ മാനേജ്മെന്‍റ് കമ്മിറ്റിയും പിറ്റിഎയും ചേർന്നു പരാതി നൽകിയിരുന്നു. തെളിവിനായി ഫോട്ടോകളും അപേക്ഷയ്ക്കൊപ്പം ചേർത്തിരുന്നു. പക്ഷേ, നടപടി ഉണ്ടായില്ല. കഴിഞ്ഞ മധ്യവേനൽ അവധിക്കാലത്ത് അറ്റകുറ്റപ്പണികൾ നടത്തിയിരുന്നെങ്കിൽ ഈ വർഷം സുഗമമായ രീതിയിൽ പഠനം നടക്കുമായിരുന്നുവെന്നു സ്കൂൾ മാനേജ്മെന്‍റ് കമ്മിറ്റി ചൂണ്ടിക്കാട്ടി. പകരം ഫിറ്റ്നസ് സർട്ടിഫിക്കറ്റ് നൽകി പിറ്റിഎയെയും അധ്യാപകരെയും വിദ്യാർഥികളെയും തെറ്റിദ്ധരിപ്പിക്കുകയാണ് അധികൃതർ ചെയ്തത്. ക്ലാസ്മുറികളുടെ അപര്യാപ്തത പ്രധാന കെട്ടിടം അടച്ചതോടെ ഇനിയുള്ള ദിവസങ്ങളിൽ ക്ലാസ്മുറികളുടെ അപര്യാപ്തത പഠനത്തെ ബാധിക്കും. ഓഡിറ്റോറിയത്തിൽ ക്ലാസ് തിരിച്ചാണ് വിദ്യാർഥികളെ ഇരുത്തിയിട്ടുള്ളതെങ്കിലും മറയ്ക്കാൻ സ്ക്രീൻ ലഭ്യമായിട്ടില്ല. ഇതുമൂലം സമീപ ക്ലാസുകളിലെ അധ്യാപനം പരസ്പരം ബുദ്ധിമുട്ടാകുന്നു. സ്കൂളിനുവേണ്ടി ഏറ്റവും ഒടുവിൽ നിർമിച്ച കെട്ടിടത്തിൽ നാലു ക്ലാസ് മുറികൾ മാത്രമാണുള്ളത്. ഏഴ് ക്ലാസ് റൂമുകൾ ഉണ്ടെങ്കിൽ മാത്രമേ എല്ലാ ബാച്ചുകൾക്കും സൗകര്യമായി പഠനം നടത്താൻ കഴിയൂ. പത്തു വർഷം മുമ്പ് കേവലം 67 വിദ്യാർഥികൾ മാത്രമായി ഹൈസ്കൂൾ ശോചനീയമായ അവസ്ഥയിലേക്കു നീങ്ങിയിരുന്നു. എന്നാൽ, പിടിഎയുടെ ശ്രമഫലമായി ഇപ്പോൾ ഹൈസ്കൂൾ വിഭാഗത്തിൽ മാത്രം 300ൽപരം വിദ്യാർഥികൾ പഠിക്കുന്നു. വിഎച്ച്എസ്എസ് ഇയിൽ രണ്ടു ബാച്ചുകളായി 110 വിദ്യാർഥികളുമുണ്ട്.

സിസ്റ്റം ഉണരുന്നു; സ്കൂൾ കെട്ടിടങ്ങൾക്കു വീണ്ടും പരിശോധന : രണ്ടു മാസം മുന്പ് ഫിറ്റ്, ഇപ്പോൾ അൺഫിറ്റ്

പത്തനംതിട്ട: തേവലക്കര സ്കൂൾ വളപ്പിൽ വിദ്യാർഥി ഷോക്കേറ്റു മരിച്ച സംഭവത്തെത്തുടർന്ന് വിദ്യാഭ്യാസ സ്ഥാപനങ്ങളിൽ സുരക്ഷ പരിശോധന ഊർ‌ജിതം. രണ്ടുമാസം മുന്പ് ഫിറ്റ്നസ് നൽകിയ കെട്ടിടങ്ങൾ പലതും അൺഫിറ്റ് എന്നു ഇപ്പോൾ വിലയിരുത്തൽ. സർ‌ക്കാർ നിർദേശപ്രകാരം തദ്ദേശ സ്ഥാപന എൻജിനിയർമാർ തന്നെയാണ് വീണ്ടും പരിശോധനയ്ക്കെത്തുന്നത്. മേയ് അവസാനം ഇവർതന്നെ പരിശോധനകൾ നടത്തി ഫിറ്റ്നസ് നൽകിയ കെട്ടിടങ്ങളാണ് വീണ്ടും പരിശോധിക്കുന്നത്. വിദ്യാഭ്യാസ വകുപ്പിലെ ഉദ്യോഗസ്ഥരും സ്കൂൾ കെട്ടിടങ്ങളും പരിസരങ്ങളും പരിശോധിച്ചു സുരക്ഷ വിലയിരുത്തിയതിനു പിന്നാലെയാണ് തദ്ദേശവകുപ്പിന്‍റെ രണ്ടാമത്തെ പരിശോധന. സുരക്ഷ ഓഡിറ്റെന്ന പേരിലാണ് ഇപ്പോഴത്തെ നടപടി. അൺഫിറ്റ് എന്നു വിധിയെഴുതുന്ന കെട്ടിടത്തിലെ ക്ലാസുകൾ മാറ്റാനാണ് നിർദേശിക്കുന്നത്. സർക്കാർ, എയ്ഡഡ് സ്കൂളുകളിൽ ഒരേപോലെ പരിശോധനയുണ്ട്. സുരക്ഷാ സർട്ടിഫിക്കറ്റ് ഇല്ലെങ്കിൽ ഇത്തരം സ്കൂളുകളിൽ അധ്യാപകരുടെ ശന്പളം പോലും തടയുന്ന സാഹചര്യമുണ്ടാകും. ഉത്തരവാദിത്വം ഏൽക്കില്ലെന്ന് പ്രഥമാധ്യാപകർ സ്കൂളുകളിൽ പ്രഥമാധ്യാപകർക്ക് 50 ഇനങ്ങളുടെ ചോദ്യാവലി നൽകി പൂരിപ്പിച്ചു വാങ്ങിയ ശേഷമാണ് ഇപ്പോഴത്തെ പരിശോധന. സ്കൂൾ കെട്ടിടങ്ങളുടെ സുരക്ഷിതത്വം, അപകട ഭീഷണി, വൈദ്യുതി ലൈനുകളുമായി ബന്ധപ്പെട്ട അകലം, സംരക്ഷണ ഭിത്തികൾ, പരിസരങ്ങളിലെ കാടുകൾ, കെട്ടിടങ്ങൾക്കു സമീപത്തെ വിടവുകൾ തുടങ്ങിയ ചോദ്യങ്ങൾക്കു മറുപടി എഴുതി നൽകിയിരുന്നു. ഇതിനു പിന്നാലെ വിദ്യാഭ്യാസ ഓഫീസർമാർ സ്കൂൾ പരിശോധിച്ചു. ഇതിനു ശേഷമുള്ള പരിശോധനയിൽ ഉദ്യോഗസ്ഥർ അൺഫിറ്റ് എന്നു കണ്ടെത്തുന്ന കെട്ടിടങ്ങളുടെ ഉത്തരവാദിത്വം തങ്ങൾ ഏൽക്കില്ലെന്നു പ്രഥമാധ്യാപകർ പറയുന്നു. സർക്കാർ സ്കൂളുകളിൽ ബന്ധപ്പെട്ട തദ്ദേശ സ്ഥാപനങ്ങൾക്കാണ് കെട്ടിടങ്ങളുടെ ചുമതല. എയ്ഡഡ് സ്കൂളുകളിൽ ഭൗതിക സാഹചര്യം മാനേജർമാരാണ് ഉറപ്പാക്കേണ്ടത്. ഇത്തരം വിഷയങ്ങൾ പ്രഥമാധ്യാപകരുടെ ഉത്തരവാദിത്വത്തിൽ ഉൾപ്പെടുത്താനാകില്ലെന്നു സംഘടനകളും പ്രതികരിച്ചിട്ടുണ്ട്.

അടൂര്‍ പട്ടയമേള നാളെ

അടൂർ: നിയോജക മണ്ഡലത്തിലെ പട്ടയമേളയും കടമ്പനാട് സ്മാര്‍ട്ട് വില്ലേജ് ഓഫീസ് കെട്ടിടം ഉദ്ഘാടനവും നാളെ കടമ്പനാട് കെആര്‍കെപിഎം ബിഎച്ച്എസ് ഓഡിറ്റോറിയത്തില്‍ 3.30 ന് മന്ത്രി കെ.രാജന്‍ നിര്‍വഹിക്കും. നിയമസഭ ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍ അധ്യക്ഷത വഹിക്കും. സര്‍ക്കാരിന്‍റെ എല്ലാവര്‍ക്കും ഭൂമി, എല്ലാ ഭൂമിക്കും രേഖ എന്ന പ്രഖ്യാപിത നയത്തിന്‍റെ അടിസ്ഥാനത്തില്‍ അടൂര്‍ നിയോജക മണ്ഡലങ്ങളിലെ 39 കുടുംബങ്ങള്‍ക്ക് പട്ടയം വിതരണം ചെയ്യും. 34 എല്‍എ പട്ടയവും അഞ്ച് മുനിസിപ്പല്‍ പട്ടയവുമാണ്. അടൂര്‍ താലൂക്കിലെ പെരിങ്ങനാട് വില്ലേജിലെ പള്ളിക്കല്‍ പഞ്ചായത്തിലെ എട്ടാം വാര്‍ഡ് കോളനിയിലെ 16 കൈവശക്കാര്‍ക്ക് പട്ടയം നല്‍കും. 2020-21 പദ്ധതി വിഹിതത്തില്‍ നിന്നു 44 ലക്ഷം രൂപയും ചിറ്റയം ഗോപകുമാർ എംഎല്‍എ ആസ്തി വികസന ഫണ്ടില്‍ നിന്നു 5.5 ലക്ഷം രൂപയും ചെലവഴിച്ചാണ് കടമ്പനാട് സ്മാര്‍ട്ട് വില്ലേജ് നിര്‍മിച്ചത്. ചടങ്ങിൽ ആന്‍റോ ആന്‍റണി എംപി മുഖ്യാതിഥിയാകും. ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം, ജില്ലാ കളക്ടര്‍ എസ്. പ്രേം കൃഷ്ണൻ, പറക്കോട് ബ്ലോക്ക് പഞ്ചായത്ത് പ്രസിഡന്‍റ് എം. പി. മണിയമ്മ, എഡിഎം ബി. ജ്യോതി, അടൂര്‍ ആര്‍ഡിഒ എം. ബിപിന്‍കുമാര്‍ തുടങ്ങിയവർ പ്രസംഗിക്കും.

പ്രതിഷേധ പ്രകടനം നടത്തി

കോഴഞ്ചേരി: ഛത്തീസ്ഗഡില്‍ കന്യാസ്ത്രീമാർക്കെതിരേയുണ്ടായ അതിക്രമത്തില്‍ പ്രതിഷേധിച്ച് എല്‍ഡിഎഫ് ആറന്മുള മണ്ഡലം കമ്മിറ്റിയുടെ നേതൃത്വത്തില്‍ പ്രതിഷേധപ്രകടനവും ധർണയും നടന്നു. ജില്ലാ പഞ്ചായത്ത് മുൻ പ്രസിഡന്‍റ് ഓമല്ലൂര്‍ ശങ്കരന്‍ ധര്‍ണ ഉദ്ഘാടനം ചെയ്തു. കുര്യന്‍ മടയ്ക്കല്‍ അധ്യക്ഷത വഹിച്ചു. മുന്‍ എംഎല്‍എ എ.പത്മകുമാർ, റവ. രാജു അഞ്ചേരി, എം.വി.സിന്ധു, മാത്യൂസ് ജോര്‍ജ്, ചെറിയാന്‍ ജോര്‍ജ് തമ്പു, ബിജിലി പി.ഈശോ, പി.വി.സതീഷ്‌കുമാർ, സുനിതാ കുര്യന്‍, നൈജില്‍കെ.ജോണ്‍ എന്നിവര്‍ പ്രസംഗിച്ചു.

വിഎസിന് ഗ്രൂപ്പ് ഉണ്ടായിരുന്നില്ലെന്ന് കെ.സി. രാജഗോപാൽ

പത്തനംതിട്ട: വി.എസ്.അച്യുതാനന്ദന് ഗ്രൂപ്പ് ഉണ്ടായിരുന്നില്ലെന്ന് മുൻ എംഎൽഎ കെ.സി. രാജഗോപാൽ. പത്തനംതിട്ട പ്രസ്ക്ലബിൽ കേരള പത്രപ്രവർത്തക യൂണിയൻ ജില്ലാ കമ്മിറ്റി സംഘടിപ്പിച്ച വി.എസ്. അച്യുതാനന്ദൻ, പ്രഫ.എം.കെ. സാനു അനുസ്മരണ യോഗത്തിൽ പ്രസംഗിക്കുയായിരുന്നു അദ്ദേഹം. അനീതികൾക്കും അഴിമതിക്കുമെതിരേയുള്ളതായിരുന്നു വിഎസിന്‍റെ പക്ഷം. തെറ്റു ചെയ്തവരോട് അദ്ദേഹത്തിനു യാതൊരു ഒത്തുതീർപ്പുമില്ലായിരുന്നു. അവരിൽ നിന്ന് അകന്നു നിൽക്കാൻ വിഎസ് എപ്പോഴും ശ്രദ്ധിച്ചിരുന്നുവെന്നും രാജഗോപാൽ ചൂണ്ടിക്കാട്ടി. തന്‍റെ നിലപാടുകൾക്കായി ശക്തിയുക്തം പോരാടിയ വ്യക്തിത്വമായിരുന്നു പ്രഫ.എം.കെ. സാനുവിന്‍റേതെന്ന് മുൻ എംഎൽഎ ജോസഫ് എം. പുതുശേരി പറഞ്ഞു. ചരിത്രത്തിൽ അദ്ദേഹത്തിനുള്ള സ്ഥാനം ഒരിക്കലും നഷ്ടമാകില്ല. കേരളീയ സമൂഹത്തിൽ അത്രമാത്രം സ്വാധീനം ചെലുത്താൻ എം.കെ. സാനുവിനു കഴിഞ്ഞിരുന്നുവെന്നും പുതുശേരി അഭിപ്രായപ്പെട്ടു. പ്രസ്ക്ലബ് പ്രസിഡന്‍റ് ബിജു കുര്യന്‍റെ അധ്യക്ഷതയിൽ സെക്രട്ടറി ജി. വിശാഖൻ സ്വാഗതവും ജോയിന്‍റ് സെക്രട്ടറി ബിനിയ ബാബു നന്ദിയും പറഞ്ഞു.

ആത്മഹത്യാസംഭവം അന്വേഷിക്കണം: എകെഎസ്ടിയു

കോഴഞ്ചേരി: നാറാണംമൂഴി സെന്‍റ് ജോസഫ് യുപി സ്‌കൂളിലെ അധ്യാപികയുടെ ഭര്‍ത്താവിന്‍റെ ആത്മഹത്യയുമായി ബന്ധപ്പെട്ട സംഭവത്തില്‍ യഥാര്‍ഥ അന്വേഷണം നടത്തി വസ്തുതകള്‍ പുറത്തു കൊണ്ടുവരണമെന്ന് ആള്‍ കേരള സ്‌കൂള്‍ ടീച്ചേഴ്‌സ് യൂണിയന്‍ ജില്ലാ കമ്മിറ്റി ആവശ്യപ്പെട്ടു. പ്രസിഡന്‍റ് അരുണ്‍ മോഹന്‍ അധ്യക്ഷത വഹിച്ചു. സംസ്ഥാന വൈസ് പ്രെഡിഡന്‍റ് പി. കെ. സുശീല്‍ കുമാര്‍, സംസ്ഥാനകമ്മിറ്റി അംഗം കെ. എ. തന്‍സീർ, ജില്ലാ സെക്രട്ടറി റെജി മലയാലപ്പുഴ, ജില്ലാ വൈസ് പ്രസിഡന്‍റ് എസ്. ഷൈന്‍ ലാൽ, ജില്ലാ ട്രഷറാര്‍ പി. ടി. മാത്യു എന്നിവര്‍ പ്രസംഗിച്ചു.

ഭാര്യയെ കുത്തിക്കൊലപ്പെടുത്തിയ കേസിൽ ഭർത്താവിനെ കണ്ടെത്താനായില്ല

കോഴഞ്ചേരി: കുടുംബവഴക്കിനേ തുടര്‍ന്ന് യുവതി കുത്തേറ്റ് മരിച്ച സംഭവത്തില്‍ ഭര്‍ത്താവിനായുള്ള അന്വേഷണം പോലീസ് ഊര്‍ജ്ജിതപ്പെടുത്തി. പോലീസിനെ സഹായിക്കാന്‍ വാര്‍ഡ് മെമ്പര്‍ ജോണ്‍സണ്‍ തോമസിന്‍റെ നേതൃത്വത്തില്‍ ഇരുപതിലധികം യുവാക്കളും തെരച്ചില്‍ പ്രവര്‍ത്തനത്തില്‍ ഏര്‍പ്പെട്ടിട്ടുണ്ട്. പുറമറ്റം, കല്ലൂപ്പാറ എൻജിനിയറിംഗ് കോളജിന്‍റെ സമീപപ്രദേശം എന്നിവിടങ്ങളില്‍ പോലീസ് പരിശോധന നടത്തി. പുല്ലാട് കാഞ്ഞിരപ്പാറ ആലുംതറ-ആഞ്ഞാലിക്കല്‍ ശാരിമോളാണ് (ശ്യാമ-38) കുത്തേറ്റ് മരിച്ചത്. കുത്തികൊലപ്പെടുത്തിയ ഭര്‍ത്താവ് അജികുമാര്‍ ഒളിവിലാണ്. മദ്യലഹരിയിലായിരുന്ന ഭര്‍ത്താവ് അജികുമാര്‍ ശനിയാഴ്ച രാത്രിയില്‍ ശാരിമോളെ കുത്തികൊലപ്പെടുത്തിയശേഷം കടന്നുകളയുകയായിരുന്നു. ശാരിമോള്‍ ഞായറാഴ്ച പുലര്‍ച്ചെ കോട്ടയം മെഡിക്കല്‍ കോളജില്‍ മരിച്ചു. ആക്രമണത്തിനിടെ തടസം പിടിക്കാനെത്തിയ ശാരിമോളുടെ അച്ഛന്‍ ശശി, ശശിയുടെ സഹോദരി രാധാമണി എന്നിവര്‍ക്കും കുത്തേറ്റിരുന്നു. ഇരുവരും ഗുരുതരമായ അവസ്ഥയില്‍ കോട്ടയം മെഡിക്കല്‍ കോളജ് ആശുപത്രിയിലാണ്. ശാരിമോളുടെ സംസ്‌കാരം ഇന്ന് രണ്ടിന് വീട്ടുവളപ്പില്‍ നടക്കും. കുടുംബശ്രീ എഡിഎസ് സെക്രട്ടറികൂടിയായ ഇവരുടെ മൃതദേഹം രാവിലെ 10.30ന് വീട്ടിലെത്തിക്കും. 11 മുതല്‍ 12.30 വരെ കാഞ്ഞിരപ്പാറ-ആലുംതറ കമ്യൂണിറ്റിഹാളില്‍ പൊതുദര്‍ശനത്തിന് വച്ചശേഷമാണ് സംസ്കാരം. ജില്ലാ പോലീസ് മേധാവി ആർ. ആനന്ദിന്‍റെ മേല്‍നോട്ടിത്തിലും തിരുവല്ല ഡിവൈഎസ്പി എസ്. നന്ദകുമാറിന്‍റെ നേതൃത്വത്തിലുള്ള പ്രത്യേകസംഘമാണ് കേസ് അന്വേഷിക്കുന്നത്. അജികുമാറിനെ സംബന്ധിച്ച വിവരങ്ങള്‍ ലഭ്യമാകുന്നവർ അറിയിക്കണമെന്ന് പോലീസ് അറിയിച്ചു. ഡിവൈഎസ്പി തിരുവല്ല 9497990035, എസ്എച്ച്ഒ കോയിപ്രം 9497947146, 8547429572, എസ് ഐ കോയിപ്രം 9497980232, കോയിപ്രം പോലീസ് സ്റ്റേഷന്‍ 04692660246.

പ്രഥമാധ്യാപികയ്ക്കെതിരേയുള്ള നടപടി നിർദേശം അപലപനീയം: കെപിഎസ്ടിഎ

പത്തനംതിട്ട: നാറാണംമൂഴി സ്കൂളിലെ പ്രഥമാധ്യാപികയ്ക്കെതിരേയുള്ള നടപടി നിർദേശം അപലപനീയമെന്നു കേരള പ്രദേശ് സ്കൂൾ ടീച്ചേഴ്സ് അസോസിയേഷൻ. മാനേജ്മെന്‍റ് സ്കൂളിൽ അധ്യാപക നിയമനത്തിൽ പ്രഥമാധ്യാപകർക്ക് പങ്കില്ലാതിരിക്കേ സ്വന്തം യൂണിയനിലെ അംഗങ്ങളായ ഡിഇഒയിലെ ജീവനക്കാരുടെ വേലവിലക്കിന്‍റെ ആഘാതം കുറയ്ക്കാനായി പ്രഥമാധ്യപികയെ ബലിയാടാക്കുന്ന നടപടി അത്യന്തം പ്രതിഷേധാർഹമാണ്. ഇക്കഴിഞ്ഞ ജൂണിൽ മാത്രം സ്ഥാനക്കയറ്റം ലഭിച്ച ഇപ്പോഴത്തെ പ്രഥമാധ്യാപിക സംഭവത്തിൽ യാതൊരു പങ്കുമില്ലാത്ത വ്യക്തിയാണ്. കൊല്ലം തേവലക്കര സ്കൂൾ സംഭവം പോലെ സിസ്റ്റം തകരാറിലായ സർക്കാരിന്‍റെയും വിദ്യാഭ്യാസ വകുപ്പിന്‍റെയും മുഖം രക്ഷിക്കാനായുള്ള പ്രഥമാധ്യാപികയുടെ സസ്പെൻഷൻ നിർദേശം ഉടൻ പിൻവലിച്ചില്ലെങ്കിൽ കോടതിയെ സമീപിക്കുമെന്നും പ്രത്യക്ഷ സമരപരിപാടി കളുമായി മുന്നോട്ടു പോകുമെന്നും ജില്ലാ ഭാരവാഹികൾ അറിയിച്ചു. പ്രസിഡന്‍റ് ഫിലിപ്പ് ജോർജ് അധ്യക്ഷത വഹിച്ചു. സെക്രട്ടറി വി.ജി. കി ഷോർ, ട്രഷറർ അജിത്ത് ഏബ്രഹാം, സംസ്ഥാന ഭാരവാഹികളായ എസ്. പ്രേം, വർഗീസ് ജോസഫ്, ബിറ്റി അന്നമ്മ തോമസ്, സി. കെ. ചന്ദ്രൻ, എസ്. ദിലീപ് കുമാർ, വി. ലിബികുമാർ എന്നിവർ പ്രസംഗിച്ചു.

കക്കി - ആനത്തോട് ഡാമിൽ റെഡ് അലർട്ട്; ഷട്ടറുകൾ ഇന്നലെ തുറന്നില്ല

പത്തനംതിട്ട: ശബരിഗിരി ജലവൈദ്യുതി പദ്ധതിയുടെ കക്കി - ആനത്തോട് സംഭരണിയിൽ റെഡ് അലർട്ട്. ജലനിരപ്പ് ക്രമീകരിക്കുന്നതിന്‍റെ ഭാഗമായി ഇന്നലെ ഡാമിന്‍റെ ഷട്ടറുകൾ തുറക്കുമെന്ന് അറിയിച്ചിരുന്നെങ്കിലും വിദഗ്ധ പരിശോധനയുടെ അടിസ്ഥാനത്തിൽ വേണ്ടെന്നുവച്ചു. റിസര്‍വോയറിന്‍റെ നാല് ഷട്ടറുകള്‍ 30 മുതല്‍ 60 സെന്റി മീറ്റര്‍ വരെ ഉയര്‍ത്തി 50 മുതല്‍ പരമാവധി 100 ക്യൂമെക്സ് വരെ എന്ന തോതില്‍ അധികജലം പമ്പാ നദിയിലേക്ക് ഒഴുക്കാനായിരുന്നു തീരുമാനം. സംഭരണിയിലെ ജലനിരപ്പ് റൂള്‍ ലെവലില്‍ ക്രമപ്പെടുത്തുനായിരുന്നു ഇത്. കക്കി - ആനത്തോട് റിസര്‍വോയറിന്‍റെ പരമാവധി ജലസംഭരണശേഷി സമുദ്ര നിരപ്പില്‍ നിന്നും 981.46 മീറ്ററാണ്. കെഎസ്ഇബി, ജില്ലാ ദുരന്ത നിവാരണ അഥോറ്റി അംഗീകാരപ്രകാരം 2025 ജൂലൈ 31 മുതല്‍ ഓഗസ്റ്റ് 10 വരെയുള്ള കാലയളവില്‍ റിസര്‍വോയറില്‍ സംഭരിക്കാന്‍ അനുവദിക്കപ്പെട്ട പരമാവധി ജലനിരപ്പ് (അപ്പര്‍ റൂള്‍ ലെവല്‍) 975.75 മീറ്ററാണ്. കക്കി - ആനത്തോട് റിസര്‍വോയറില്‍ നീല, ഓറഞ്ച്, ചുവപ്പ് മുന്നറിയിപ്പുകള്‍ പ്രഖ്യാപിക്കുന്നത് ജലനിരപ്പ് യഥാക്രമം 973.75 മീറ്റര്‍, 974.75 മീറ്റര്‍, 975.25 മീറ്ററിലെത്തുമ്പോഴാണ്. ജലസംഭരണിയിലെ ഇപ്പോഴെത്തെ നീരൊഴുക്ക് 63 ക്യൂമെക്സ് ആണ്. നിലവില്‍ 975.71 മീറ്റര്‍ ജലനിരപ്പായതിനാല്‍ ചുവപ്പ് മുന്നറിയിപ്പ് പ്രഖ്യാപിച്ചിട്ടുണ്ട്.

എൻസിഎംജെ പ്രതിഷേധ കൂട്ടായ്മ സംഘടിപ്പിച്ചു

കോന്നി: നാഷണൽ ക്രിസ്ത്യൻ മൂവ്മെന്‍റ് ഫോർ ജസ്റ്റീസ് പത്തനംതിട്ട ജില്ല കമ്മിറ്റിയുടെ അഭിമുഖ്യത്തിൽ കന്യാസ്ത്രീമാരെ അകാരണമായി ജയിലിൽ അടച്ചതിലും നീതിനിഷേധത്തിനെതിരേയും കോന്നി ഗാന്ധി സ്ക്വയറിൽ പ്രതിഷേധ കൂട്ടായ്മ സംഘടിപ്പിച്ചു. കോന്നി അസംബ്ലി പ്രസിഡന്‍റ് റവ. സജു തോമസിന്‍റെ അധ്യക്ഷതയിൽ നടന്നയോഗം എൻസിഎംജെ പത്തനംതിട്ട ജില്ലാ പ്രസിഡന്‍റ് ഫാ. ബെന്യാമിൻ ശങ്കരത്തിൽ ഉദ്ഘാടനം ചെയ്തു. സിസ്റ്റർ ആൻ എസ്ഐസി മുഖ്യപ്രഭാക്ഷണം നടത്തി. ഫാ.ജോർജ് ഡേവിഡ്, റവ. ഷാജി കെ. ജോർജ്, ഫാ. ബിജോയ് തുണ്ടിയത്ത്, സിസ്റ്റർ ടെസ, സിസ്റ്റർ സരല്യ, പാസ്റ്റർ ഏബ്രഹാം വർഗീസ്, അനീഷ് തോമസ്, മാത്യൂസൺ പി. തോമസ്, ബാബു വെൻമേലി, ജിജോ പി. ജോൺ, സജി വർഗീസ് എന്നിവർ പ്രസംഗിച്ചു.

ഭീതി ഒഴിയാതെ പൂമരുതിക്കുഴി, പാക്കണ്ടം നിവാസികൾ

കലഞ്ഞൂർ: പൂമരുതികുഴി, ഇഞ്ചപ്പാറ പ്രദേശങ്ങൾ പുലി ഭീതിയിൽ. ഇഞ്ചപ്പാറയിൽ കൂട്ടിൽ കയറി കോഴിയെ പുലി പിടിക്കുകയും പൂമരുതികുഴിയിൽ വളർത്തു നായയെ പിന്തുടർന്ന് എത്തിയ പുലി വീടിനുള്ളിലേക്ക് ഓടിക്കയറുകയുമായിരുന്നു. കൂടൽ ഇഞ്ചപ്പാറയിൽ നേരത്തെ വനം വകുപ്പ് സ്ഥാപിച്ച കെണിയിൽ രണ്ട് തവണ പുലി കുടുങ്ങിയിരുന്നു. പുലി ശല്യം രൂക്ഷമായതോടെ കൂടൽ ഇഞ്ചപ്പാറയിൽ 2023 സെപ്റ്റംബർ 21 ന് വനം വകുപ്പ് സ്ഥാപിച്ച കെണിയിലാണ് പുലി ആദ്യം കുടുങ്ങിയത്. ഇതോടെ ശല്യം ഒഴിഞ്ഞെന്ന പ്രതീക്ഷയിലായിരുന്നു നാട്ടുകാരെങ്കിലും പിന്നീടും പല തവണ പുലിയെ കണ്ടു. കഴിഞ്ഞ മാസം ഇഞ്ചപ്പാറയിൽ പാറപ്പുറത്ത് കയറി നിൽക്കുന്ന പുലിയുടെ ദൃശ്യങ്ങൾ നാട്ടുകാർ മൊബൈൽ കാമറയിൽ പകർത്തിയിരുന്നു. ഇതിന് മുന്പു സംസ്ഥാന പാത മുറിച്ചു കടക്കുന്ന പുലിയെ കണ്ടതായും ജനങ്ങൾ പറയുന്നു. രണ്ട് പഞ്ചായത്തുകളിലുമായി ഏകദേശം ഇരുപതിലധികം ആടുകളെയാണ് പുലി ഭക്ഷിച്ചത്. തണ്ണിത്തോട് പൂച്ചക്കുളത്തും വളർത്തു മൃഗങ്ങളെ പുലി പിടിച്ച സംഭവങ്ങളുണ്ട്.

സിസ്റ്റം ഫെയിലറാണ് സാർ, ഫയൽ നീങ്ങില്ല! തൊടുന്യായങ്ങളുയർത്തി വിദ്യാഭ്യാസ ഓഫീസ്

പത്തനംതിട്ട: റാന്നി നാറാണംമൂഴി സെന്‍റ് ജോസഫ്‌ ഹൈസ്‌കൂളിലെ അധ്യാപിക ലേഖ രവീന്ദ്രന്‍റെ ഭര്‍ത്താവ് വി.ടി. ഷിജോ (47) ജീവനൊടുക്കിയ വിവാദത്തില്‍ തൊടുന്യായങ്ങളുയർത്തി വിദ്യാഭ്യാസ ജില്ലാ ഓഫീസിന്‍റെ വീഴ്ച മറയ്ക്കാന്‍ ശ്രമം. കേസും വ്യവഹാരങ്ങളും മറ്റുമായി വര്‍ഷങ്ങള്‍ നീണ്ട വിഷയത്തില്‍ ഡിഇ ഓഫീസില്‍നിന്നു കൃത്യമായ നടപടി സ്വീകരിച്ചിരുന്നുവെന്നാണ് ഉദ്യോഗസ്ഥരുടെ വാദം. ജനുവരി മുതല്‍ ഇക്കഴിഞ്ഞ ജൂലൈ രണ്ട് വരെ ലേഖ രവീന്ദ്രന്‍ ശമ്പളം കൈപ്പറ്റിയിരുന്നു. കിട്ടാനുള്ളത് 2012 മുതല്‍ കഴിഞ്ഞ വര്‍ഷം വരെയുള്ള ശമ്പള കുടിശികയാണ്. ഇതു സ്‌കൂളില്‍നിന്നു സ്പാര്‍ക്കില്‍ അപ്‌ലോഡ് ചെയ്യുന്നത് അനുസരിച്ച് ഘട്ടംഘട്ടമായി ലഭിക്കുന്നതാണെന്നാണ് വാദം. എന്നാൽ, സ്പാർക്കിൽ അപ് ലോഡ് ചെയ്യുന്നതിനു മുന്പായുള്ള ഓഥന്‍റിക്കേഷനു പ്രഥമാധ്യാപിക നൽകിയ അപേക്ഷ ഉൾപ്പെടെ വൈകിപ്പിച്ചതിൽ ഉത്തരമില്ല. ഏഴു മാസം അടയിരുന്നു ലേഖയുടെ ശന്പളം നൽകിയെന്നു പറയുന്നതാകട്ടെ ജോലിക്കു കയറിയ കാലഘട്ടത്തിലെ അടിസ്ഥാന ശന്പളമാണെന്നതും മറ്റ് ആനുകൂല്യങ്ങൾ ഉൾപ്പെടെയുള്ള ബിൽ പാസാക്കുന്നതിലാണ് കാലതാമസമുണ്ടായതെന്നതും വിഷയത്തിന്‍റെ ഗൗരവം വർധിപ്പിക്കുന്നു. 2024 നവംബറിലെ കോടതി ഉത്തരവും പിന്നീട് വിദ്യാഭ്യാസ വകുപ്പിൽനിന്നു ലഭിച്ച ഉത്തരവും നടപ്പാക്കുന്നതിൽ ഏഴ് മാസത്തിലേറെ കാലതാമസം ഉണ്ടായെന്നതാണ് വിദ്യാഭ്യാസ ജില്ലാ ഓഫീസിനെതിരേ ഉയരുന്ന ആരോപണം. 13 വർഷം ശന്പളം ലഭിക്കാതെ ജോലി ചെയ്ത ഒരു അധ്യാപികയ്ക്കു നീതിപീഠം നീതി ഉറപ്പാക്കിയപ്പോൾ അതംഗീകരിച്ച് തുടർ നടപടി സ്വീകരിക്കുന്നതിലുണ്ടായ വീഴ്ചയാണ് പൊതുവിദ്യാഭ്യാസ ഡയറക്ടറുടെ പ്രാഥമികാന്വേഷണത്തിലും കണ്ടെത്തിയത്. സസ്‌പെന്‍ഷന്‍ ഉത്തരവ് ഇങ്ങനെ കഴിഞ്ഞ വര്‍ഷം നവംബര്‍ 26നാണ് ലേഖയുടെ നിയമനം ഉപാധികളോടെ അംഗീകരിച്ചുകൊണ്ട് ഹൈക്കോടതി വിധി പുറപ്പെടുവിച്ചത്. അധ്യാപികയുടെ ശമ്പളവും മറ്റ് ആനുകൂല്യങ്ങളും മൂന്നു മാസത്തിനുള്ളില്‍ വിതരണം ചെയ്യുന്നതിനു പത്തനംതിട്ട ജില്ലാ വിദ്യാഭ്യാസ ഓഫീസര്‍ക്കു നിര്‍ദേശം നല്‍കിയിരുന്നു. കോടതിവിധി പരിശോധിച്ച് ചട്ടപ്രകാരം നടപടി സ്വീകരിക്കാൻ കഴിഞ്ഞ ജനുവരി 17 സര്‍ക്കാര്‍ ജില്ലാ വിദ്യാഭ്യാസ ഓഫീസറോട് ആവശ്യപ്പെട്ടു ജനുവരി 31ന് ഇതു സംബന്ധിച്ചു സ്‌കൂള്‍ പ്രധാനാധ്യാപികയ്ക്കു നിര്‍ദേശം നല്‍കിയതിനു ശേഷം ശമ്പള കുടിശിക അനുവദിക്കുന്ന കാര്യത്തില്‍ മറ്റ് തുടര്‍ നടപടികള്‍ ഒന്നും സ്വീകരിക്കാതെ വിഷയവുമായി ബന്ധപ്പെട്ട ഫയല്‍ ഉദ്യോഗസ്ഥര്‍ തീര്‍പ്പാക്കി, സ്പാര്‍ക്ക് ഓഥന്‍റിക്കേഷന് സ്‌കൂള്‍ പ്രധാനാധ്യാപിക നല്‍കിയ അപേക്ഷയില്‍ തീരുമാനമെടുക്കാതെ വച്ചു താമസിപ്പിച്ചു എന്നിവയാണ് ഉദ്യോഗസ്ഥരുടെ വീഴ്ചയായി സസ്‌പെന്‍ഷന്‍ ഉത്തരവില്‍ ചൂണ്ടിക്കാണിച്ചിരിക്കുന്നത്. തർക്കം ഉടലെടുത്തത് 2012ൽ നാറാണംമൂഴി സെന്‍റ് ജോസഫ് ഹൈസ്കൂളിലെ രണ്ട് അധ്യാപികമാര്‍ തമ്മിലുളള കേസും കോടതി വ്യവഹാരവും 2012ലാണ് ആരംഭിക്കുന്നത്. നാറാണംമൂഴി സെന്‍റ് ജോസഫ് ഹൈസ്‌കൂളില്‍ 2004ല്‍ എച്ച്എസ്എ നാച്വറല്‍ സയന്‍സ് അധ്യാപികയായി സൈജു സഖറിയ എന്ന അധ്യാപിക ജോലിക്കു കയറിയിരുന്നു. 2008-09 കാലഘട്ടത്തില്‍ ഡിവിഷന്‍ ഫാളിനെത്തുടര്‍ന്ന് സൈജുവിനു ജോലി നഷ്ടമായി. തുടര്‍ന്ന് ഇവര്‍ ജോലി രാജിവച്ച് മാനേജ്മെന്‍റിന് കത്തു നൽകിയതായി പറയുന്നു. എന്നാൽ, ഈ രാജി മാനേജ്മെന്‍റ് ഡിഇഒ‍യ്ക്കു സമർപ്പിച്ച് അംഗീകാരം വാങ്ങിയില്ല. തുടര്‍ന്ന് 2011-12 കാലത്ത് യുഡിഎഫ് സര്‍ക്കാരിന്‍റെ കാലത്തു നിലവില്‍ വന്ന അധ്യാപക പാക്കേജില്‍ സൈജുവും ഉള്‍പ്പെട്ടു. ഹൈക്കോടതിയിലേക്ക് 2012ല്‍ സ്‌കൂളില്‍ ഒഴിവുവന്ന അധ്യാപക തസ്തികയില്‍ യുപിഎസ്എ ആയി ലേഖ രവീന്ദ്രനെ മാനേജ്മെന്‍റ് നിയമിച്ചു. മുന്‍പ് ജോലി ചെയ്തിരുന്ന ആളെന്ന നിലയില്‍ സൈജു ഈ തസ്തികയിലേക്ക് അവകാശവാദം ഉന്നയിച്ച് ഹൈക്കോടതിയെ സമീപിച്ചു. ചട്ടപ്രകാരം തനിക്കാണ് ജോലിക്ക് അവകാശം എന്നു ചൂണ്ടിക്കാട്ടിയാണ് സൈജു കോടതിയെ സമീപിച്ചത്. സ്‌കൂള്‍ മാനേജരെയും ലേഖ രവീന്ദ്രനെയും എതിര്‍കക്ഷികളാക്കിയായിരുന്നു ഹര്‍ജി. സൈജുവിന്‍റെ രാജി സംബന്ധിച്ച് മാനേജ്മെന്‍റ് ഉന്നയിച്ച വാദം കോടതി അംഗീകരിച്ചെങ്കിലും തീരുമാനം സർക്കാരിനു വിട്ടു. രാജി വിദ്യാഭ്യാസ വകുപ്പ് അംഗീകരിച്ചിരുന്നില്ലെങ്കിലും പിഎഫ് അവസാനിപ്പിച്ചതു ചൂണ്ടിക്കാട്ടിയാണ് സൈജുവിന്‍റെ വാദത്തെ മാനേജ്മെന്‍റ് നേരിട്ടത്. തുടർന്നു ലേഖയുടെ നിയമനം സര്‍ക്കാര്‍ അംഗീകരിച്ചു. പുതിയ നിയമനം ലേഖയ്ക്കു ശമ്പളം കൊടുക്കുന്ന ഘട്ടമായപ്പോള്‍ സൈജു ഹൈക്കോടതിയെ വീണ്ടും സമീപിച്ച് സര്‍ക്കാര്‍ തീരുമാനത്തിനു സ്റ്റേ വാങ്ങി. സര്‍ക്കാരിന്‍റെ ഉത്തരവ് റദ്ദാക്കുകയും ചെയ്തു. ഇതോടെ ലേഖയ്ക്കു ശമ്പളം നല്‍കാനുള്ള നടപടി സര്‍ക്കാര്‍ ഉത്തരവ് പ്രകാരം നിര്‍ത്തിവച്ചു. കേസില്‍ അന്തിമ വിധി 2024 സെപ്റ്റംബറിലാണ് വന്നത്. ലേഖയുടെ നിയമനം അംഗീകരിക്കാനുളള വിധിക്കെതിരേ സൈജു അപ്പീല്‍ പോയി. തത്സ്ഥിതി നിലനിര്‍ത്താന്‍ നവംബറില്‍ കോടതി ഉത്തരവിട്ടു. തുടര്‍ന്ന് ഇരുകൂട്ടര്‍ക്കും പ്രയോജനപ്പെടുന്ന രീതിയില്‍ അന്തിമവിധി വന്നു. ഇതു പ്രകാരം ലേഖയുടെ ശമ്പളം നല്‍കണം. ഇനി വരുന്ന ഒഴിവില്‍ സൈജുവിനു നിയമനം നല്‍കാമെന്നു മാനേജ്‌മെന്‍റ് സത്യവാങ്മൂലം നല്‍കണം എന്നിവയായിരുന്നു നിര്‍ദേശങ്ങൾ. നിലവില്‍ സൈജു ബിആര്‍സി കോ ഓര്‍ഡിനേറ്ററാണ്. പുതിയ നിയമനം വരുന്നതു വരെ സൈജുവിനെ ആ തസ്തികയില്‍ നിലനിര്‍ത്തും.

പെരുമ്പെട്ടി പട്ടയം അട്ടിമറിനീക്കം; സര്‍വേ ഓഫീസില്‍ പ്രതിഷേധം

പെരുമ്പെട്ടി: ഡിജിറ്റല്‍ സര്‍വേ നടപടി പൂര്‍ത്തീകരിച്ചു വിജ്ഞാപനം ചെയ്യണമെന്ന സര്‍ക്കാര്‍ ഉത്തരവ് നിലനില്‍ക്കേ കര്‍ഷകര്‍ക്കു പട്ടയം ലഭിക്കുന്നതു തടയാനുള്ള നീക്കത്തിനെതിരേ താക്കീതുമായി നാട്ടുകാർ രംഗത്ത്. പെരുമ്പെട്ടി പൊന്തന്‍പുഴ സമരസമിതിയുടെ നേതൃത്വത്തില്‍ ഇന്നലെ പെരുമ്പെട്ടി ഡിജിറ്റല്‍ സര്‍വേ ഓഫീസിലേക്കു മാര്‍ച്ച് നടത്തി. പൊന്തന്‍പുഴ, വലിയകാവ് വനത്തിന്‍റെയും പെരുമ്പെട്ടി വില്ലേജില്‍പെട്ടു റവന്യൂ ഭൂമിയുടെയും റീ സര്‍വേ നടപടി ഏറെക്കുറെ പൂര്‍ത്തീകരിച്ചിരിക്കേ സ്വകാര്യ വ്യക്തി വനഭൂമിയില്‍ അവകാശം സ്ഥാപിച്ചു കിട്ടാന്‍ നല്‍കിയ പരാതിയുടെ പേരില്‍ വീണ്ടും സര്‍വേ നടത്താന്‍ ഒരു വിഭാഗം ഉദ്യോഗസ്ഥര്‍ ശ്രമം തുടങ്ങിയതിനെ അപലപിച്ചാണ് കര്‍ഷകര്‍ രംഗത്തിറങ്ങിയത്. പുതിയ അവകാശവാദം പതിറ്റാണ്ടുകളായി പട്ടയത്തിനു വേണ്ടി കാത്തിരിക്കുന്ന പെരുമ്പെട്ടി കര്‍ഷകരുടെ പ്രശ്‌നം ഡിജിറ്റല്‍ സര്‍വേ നടത്തി പരിഹരിക്കാന്‍ റവന്യൂമന്ത്രിതന്നെ നേരിട്ട് ഇടപെട്ടിരുന്നു. പെരുമ്പെട്ടി വില്ലേജിലെ റീസര്‍വേ നടപടി വേഗത്തിൽ പൂര്‍ത്തീകരിക്കുകയും ചെയ്തു. അന്തിമ വിജ്ഞാപനം ഇറക്കാന്‍ നിര്‍ദേശമുണ്ടായതിനു പിന്നാലെയാണ് തര്‍ക്കങ്ങളുയര്‍ത്തി ചിലര്‍ രംഗത്തുവന്നത്. മുമ്പ് വലിയകാവ് വനഭൂമിയുമായി ബന്ധപ്പെട്ട് അവകാശവാദം ഉന്നയിച്ച വ്യക്തികള്‍ തന്നെയാണ് കോടതി ഉത്തരവിന്‍റെ പിന്‍ബലത്തില്‍ തങ്ങളുടെ സ്ഥലം അളന്നു തിരിക്കണമെന്ന ആവശ്യവുമായി റവന്യൂ വകുപ്പിനെ സമീപിച്ചത്. സര്‍ക്കാര്‍ ഉത്തരവ് നടപ്പാക്കണം: രാജു ഏബ്രഹാം പെരുമ്പെട്ടി: പെരുമ്പെട്ടി പട്ടയവിഷയത്തിനു ശാശ്വത പരിഹാരം കാണാന്‍ സര്‍ക്കാര്‍ ശ്രമിച്ചുകൊണ്ടിരിക്കേ അതിനെ തടയാനുള്ള എല്ലാ നീക്കങ്ങളും ചെറുക്കപ്പെടേണ്ടതുണ്ടെന്നു സിപിഎം ജില്ലാ സെക്രട്ടറി രാജു ഏബ്രഹാം. പെരുമ്പെട്ടി ഡിജിറ്റല്‍ സര്‍വേ ഓഫീസിലേക്കു നടന്ന കര്‍ഷക മാര്‍ച്ച് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സര്‍ക്കാര്‍ ഉത്തരവ് അവഗണിക്കുകയും കര്‍ഷകരുടെ അവകാശം നിഷേധിക്കുകയും ചെയ്തുകൊണ്ട് വനത്തിനുമേല്‍ വ്യാജ അവകാശവാദം ഉന്നയിക്കുന്ന വ്യക്തികളെ സഹായിക്കാന്‍ ചില ഉന്നതോദ്യോഗസ്ഥര്‍ ഗൂഢശ്രമ നടത്തുന്നതായ ആക്ഷേപം പ്രദേശവാസികള്‍ക്കുണ്ട്. ഇതു പരിശോധിക്കപ്പെടുക തന്നെ ചെയ്യുമെന്ന് രാജു ഏബ്രഹാം പറഞ്ഞു. പട്ടയം വേഗത്തില്‍ ലഭ്യമാക്കാന്‍ റവന്യൂ വകുപ്പ് നല്‍കിയിട്ടുള്ള ഉത്തരവുകള്‍ നടപ്പാക്കുകയാണ് വേണ്ടതെന്ന് അദ്ദേഹം അഭിപ്രായപ്പെട്ടു. സിപിഎം പ്രാദേശിക നേതാക്കളായ ഇ. കെ. അജി, പ്രിന്‍സ് കെ. രാജൻ, കേരള കോണ്‍ഗ്രസ്- എം കൊറ്റനാട് മണ്ഡലം പ്രസിഡന്‍റ് കോശി ഏബ്രഹാം, ഗ്രാമപഞ്ചായത്തംഗം സന്തോഷ് പെരുമ്പെട്ടി, ജെയിംസ് കണ്ണിമല എന്നിവര്‍ പ്രസംഗിച്ചു. ഉദ്യോഗസ്ഥരുടെ മൗനം ദുരൂഹം വനഭൂമിയും കര്‍ഷക ഭൂമിയും തമ്മില്‍ വ്യക്തമായി ഡിജിറ്റല്‍ സര്‍വേയില്‍ വേര്‍തിരിക്കപ്പെട്ടെങ്കിലും റവന്യൂവകുപ്പിലെ ചില ഉദ്യോഗസ്ഥര്‍ പുലര്‍ത്തുന്ന മൗനം ദുരൂഹമാണെന്നു കര്‍ഷകര്‍ പറയുന്നു. പെരുമ്പെട്ടി വില്ലേജില്‍ തനിക്ക് 432.5 ഏക്കര്‍ ഭൂമി ഉണ്ടെന്ന് അവകാശപ്പെട്ടുകൊണ്ട് ഹരിപ്പാട് സ്വദേശിനി രാജമ്മ നല്‍കിയ കേസിന്‍റെ വിധി നടപ്പിലാക്കാനാണ് വീണ്ടും സര്‍വേ നടത്താന്‍ ഉദ്യോഗസ്ഥര്‍ ശ്രമിക്കുന്നത്. ഡിജിറ്റല്‍ റീ സര്‍വേയുടെ അന്തിമ വിജ്ഞാപനം ഇറങ്ങുന്നതിനു മുമ്പ് ഇത്തരം ഒരു ഭൂമി പരിശോധന നടന്നാല്‍ 1994ലെ തെറ്റായ രേഖകള്‍ പ്രകാരമുള്ള റിപ്പോര്‍ട്ട് ആയിരിക്കും കോടതിയില്‍ എത്തുക. നേരത്തേ ഈ കേസ് കോടതി പരിഗണിച്ചപ്പോഴും ഉദ്യോഗസ്ഥര്‍ മൗനം പാലിക്കുകയാണ്. അതുകൊണ്ട് ആദ്യം ഡിജിറ്റല്‍ സര്‍വേ നടപടി പൂര്‍ത്തിയാക്കിയ ശേഷം വേണം കോടതിവിധി നടപ്പിലാക്കാനെന്നാണ് നാട്ടുകാരുടെ ആവശ്യം. പെരുമ്പെട്ടിയിലെ കര്‍ഷകര്‍ക്കുള്ള പട്ടയും ഈ തിരുവോണത്തിന് മുന്‍പ് വിതരണം ചെയ്യുമെന്നാണ് സര്‍ക്കാര്‍ വാഗ്ദാനം. അതിനുള്ള വേഗത്തിൽ നടപടി പുരോഗമിക്കുന്നില്ല എന്ന പരാതിയും കർഷകർക്കുണ്ട്.

പുല്ലാട്ട് ഭാര്യ കുത്തേറ്റു മരിച്ച കേസില്‍ ഭര്‍ത്താവ് ഒളിവിൽ

കോഴഞ്ചേരി: വീട്ടുവഴക്കിനിടെ യുവതി കുത്തേറ്റു മരിച്ച കേസില്‍ ഭര്‍ത്താവിനായി അന്വേഷണം വിപുലപ്പെടുത്തി. സംഭവത്തിനിടെ കുത്തേറ്റ ഭാര്യാപിതാവിന്‍റെ നില ഗുരുതരം. പുല്ലാട് കാഞ്ഞിരപ്പാറ ആലുംതറ ആഞ്ഞാലിക്കല്‍ ശാരിമോളാണ് (ശ്യാമ - 35) കുത്തേറ്റു മരിച്ചത്. സംഭവത്തില്‍ ഇവരുടെ ഭര്‍ത്താവ് അജികുമാര്‍ ഒളിവിലാണ്. വീട്ടുവഴക്കിനിടെ മദ്യലഹരിയിലായിരുന്ന ഭര്‍ത്താവ് അജികുമാര്‍ ശനിയാഴ്ച രാത്രി ശാരിമോളെ കുത്തി വീഴ്ത്തിയശേഷം ഓടി രക്ഷപ്പെടുകയായിരുന്നുവെന്ന് പോലീസ് പറഞ്ഞു. ഗുരുതരാവസ്ഥയില്‍ കഴിയവേ ഞായറാഴ്ച രാവിലെ ശാരിമോള്‍ മരിച്ചു. തടസംപിടിക്കാനെത്തിയ ശാരിമോളുടെ അച്ഛന്‍ ശശി, ശശിയുടെ സഹോദരി രാധാമണി എന്നിവര്‍ക്കും കുത്തേറ്റു. ഗുരുതരാവസ്ഥയില്‍ ഇരുവരും കോട്ടയം മെഡിക്കല്‍ കോളജിലാണ്. ഇവരില്‍ ശശി വെന്‍റിലേറ്ററിന്‍റെ സഹായത്താലാണ് ജീവന്‍ നിലനിര്‍ത്തുന്നത്. രാധാമണിയും മെഡിക്കല്‍ കോളജ് ആശുപത്രിയിലെ തീവ്രപരിചരണ വിഭാഗത്തിലാണ്. രാധാമണി സംഭവം നടന്ന വീടിന്‍റെ എതിര്‍ഭാഗത്താണ് താമസിക്കുന്നത്. ശാരിമോളുടെ വീട്ടിലെ കരച്ചിലും മറ്റും കേട്ട് ഓടിയെത്തുകയായിരുന്നു ഇവർ‌. അജികുമാറിനെതിരേ മുമ്പും പരാതികള്‍ ഭര്‍ത്താവ് അജികുമാറില്‍ നിന്നും ശാരിമോള്‍ക്ക് മര്‍ദനമേല്‍ക്കുന്നത് പതിവായിരുന്നുവെന്ന് നാട്ടുകാര്‍ പറഞ്ഞു. ആറുതവണ ഇവര്‍ തമ്മിലുള്ള പ്രശ്‌നങ്ങളുടെ പേരില്‍ കോയിപ്രം പോലീസില്‍ പരാതി നല്‍കിയിരുന്നു. വീട്ടിലെത്തി ശല്യം ചെയ്യരുതെന്ന് പോലീസ് താക്കീത് ചെയ്തിരുന്നു. ഇതനുസരിച്ച് ആറുമാസം ഇയാള്‍ മാറിനില്‍ക്കുകയും ചെയ്തു. വെല്‍ഡറായി ജോലി ചെയ്യുന്ന അജി കുമാര്‍ (38) കവിയൂര്‍ സ്വദേശിയാണ്. ലഹരിക്കടിമയായ ഇയാളുമായി ബന്ധപ്പെട്ട് കോയിപ്രം സ്റ്റേഷേനില്‍ മറ്റു നിരവധി കേസുകളുണ്ടെന്ന് പോലീസ് പറഞ്ഞു. സംഭവത്തേതുടര്‍ന്ന് ഓടിരക്ഷപ്പെട്ട ഇയാള്‍ക്കായി നാട്ടുകാരും പോലീസും സംയുക്തമായി തെരച്ചില്‍ നടത്തിയെങ്കിലും പിടികൂടാനായില്ല. ഇയാളുടെ മൊബൈല്‍ ഫോണ്‍ ഉപേക്ഷിച്ചാണ് ഓടി രക്ഷപ്പെട്ടതെന്ന് പോലീസ് പറഞ്ഞു. പത്തനംതിട്ട ജില്ലാ പോലീസ് മേധാവി ആർ. ആനന്ദ് അന്വേഷണച്ചുമതല ഏറ്റെടുത്തു. ഞായറാഴ്ച അദ്ദേഹം സംഭവസ്ഥലം സന്ദര്‍ശിച്ചിരുന്നു. തിരുവല്ല ഡിവൈഎസ്പി എസ്. നന്ദകുമാറിന്‍റെ നേതൃത്വത്തില്‍ പ്രത്യേക സംഘത്തെ അന്വേഷണത്തിനായി നിയോഗിച്ചു. ശാസ്ത്രീയ അന്വേഷണ സംഘവും വിരലടയാള വിദഗ്ധരും സ്ഥലത്തെത്തി തെളിവുകളെടുത്തു. അനാഥമായത് മൂന്ന് ബാല്യങ്ങള്‍ അച്ഛന്‍ അമ്മയെ കുത്തിക്കൊന്നതോടെ അനാഥമായത് മൂന്ന് പിഞ്ചു ബാല്യങ്ങളാണ്. അജികുമാര്‍ - ശാരിമോള്‍ ദമ്പതികളുടെ മൂത്തമകള്‍ ആവണി ആറാം ക്ലാസിലും രണ്ടാമത്തെ കുട്ടി വേണി മൂന്നിലും ഇളയകുട്ടി ശ്രാവണി എല്‍കെജിയിലുമാണ് പഠിക്കുന്നത്. ഇളയ രണ്ട് കുട്ടികളും പുല്ലാട് എംടിഎല്‍പി സ്‌കൂളിലെ വിദ്യാര്‍ഥിനികളാണ്. ഇതേ സ്‌കൂളിലെ പിടിഎ പ്രസിഡന്‍റുകൂടിയായിരുന്നു മരിച്ച ശാരിമോൾ. സ്‌കൂളിലെ എല്ലാ കാര്യങ്ങളിലും സജീവമായി ഇടപ്പെടുകയും ചെയ്തിരുന്നു. കുഞ്ഞുങ്ങളുടെ കണ്‍മുമ്പിലാണ് ശാരിമോള്‍ക്ക് മര്‍ദനവും കുത്തുമേറ്റത്. കുട്ടികളുടെ കരച്ചില്‍ കേട്ടാണ് സമീപവാസിയായ രാധാമണിയും ശശിയും ഓടിയെത്തിയത്.

ആരോഗ്യമേഖലയിൽ സമാനതകളില്ലാത്ത മുന്നേറ്റം: മന്ത്രി

പത്തനംതിട്ട: സംസ്ഥാനത്ത് ആരോഗ്യമേഖലയിൽ സമാനതകളില്ലാത്ത മുന്നേറ്റമാണ് നടന്നു കൊണ്ടിരിക്കുന്നതെന്ന് മന്ത്രി വീണാ ജോർജ്. നാരങ്ങാനം കടമ്മനിട്ട കുടുംബാരോഗ്യ കേന്ദ്രത്തിന്‍റെ പുതിയ കെട്ടിടത്തിന്‍റെ നിർമാണോദ്ഘാടനം നിർവഹിച്ചു പ്രസംഗിക്കുകയായിരുന്നു മന്ത്രി. പത്തനംതിട്ട ജില്ലാ ആശുപത്രിയിൽ രണ്ട് ബ്ലോക്കുകളുടെ നിർമാണം പുരോഗമിക്കുകയാണ്. കോഴഞ്ചേരി താലൂക്ക് ആശുപത്രിയിൽ പുതിയ കെട്ടിടം പൂർത്തിയാകുന്നു. റാന്നി താലൂക്ക് ആശുപത്രിയിൽ കെട്ടിട നിർമാണം പുരോഗമിക്കുകയാണ്. അടൂർ ജനറൽ ആശുപത്രിയിലും കോന്നി, മല്ലപ്പള്ളി, തിരുവല്ല താലൂക്ക് ആശുപത്രികളിലും സമാനരീതിയിൽ നിർമാണം നടന്നു വരികയാണെന്നും മന്ത്രി പറഞ്ഞു. ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം അധ്യക്ഷത വഹിച്ചു. ഇലന്തൂർ ബ്ലോക്ക് പഞ്ചായത്ത് പ്രസിഡന്‍റ് ജെ. ഇന്ദിരാദേവി, വൈസ് പ്രസിഡന്‍റ് കെ. ആർ. അനീഷ, നാരങ്ങാനം ഗ്രാമപഞ്ചായത്ത് പ്രസിഡന്‍റ് മിനി സോമരാജൻ, വൈസ് പ്രസിഡന്‍റ് കടമ്മനിട്ട കരുണാകരൻ, ബ്ലോക്ക് പഞ്ചായത്ത് അംഗം വി. പി. ഏബ്രഹാം, ഗ്രാമപഞ്ചായത്ത് സ്ഥിരം സമിതി ചെയർപേഴ്സൺമാരായ റെജി തോമസ്, റസിയ സണ്ണി, ബെന്നി ദേവസ്യ, ജില്ലാ മെഡിക്കൽ ഓഫീസർ ഡോ. എൽ. അനിതകുമാരി, കുടുംബാരോഗ്യ കേന്ദ്രം മെഡിക്കൽ ഓഫീസർ ഡോയ മഞ്ജു എം. ഹനീഫ തുടങ്ങിയവർ പ്രസംഗിച്ചു.

1599 എക്‌സൈസ് പരിശോധനകള്‍; 1121 പേര്‍ അറസ്റ്റില്‍

പത്തനംതിട്ട: ജൂണ്‍, ജൂലൈ മാസങ്ങളില്‍ പത്തനംതിട്ട ജില്ലയില്‍ മയക്കുമരുന്ന്, അബ്കാരി, കോട്പ കേസുകളിലായി 1121 പേരെ അറസ്റ്റ് ചെയ്തു. ഇതില്‍ മയക്ക് മരുന്നു കേസുകളില്‍ 102 പേരും അബ്കാരി കേസുകളില്‍ 349 പേരും കോട്പ കേസുകളില്‍ 670 പേരും ഉള്‍പ്പെടുമെന്ന് ഡെപ്യൂട്ടി എക്‌സൈസ് കമ്മീഷണര്‍ എം. സൂരജ് പറഞ്ഞു. 17.688 കിലോ ഗ്രാം കഞ്ചാവ്, എട്ട് കഞ്ചാവ് ചെടി, ഒരു ഗ്രാം ഹാഷിഷ് ഓയില്‍, 383.68 ലിറ്റര്‍ ഇന്ത്യന്‍ നിർമിത വിദേശ മദ്യം, 987 ലിറ്റര്‍ കോട, 30.40 ലിറ്റര്‍ ചാരായം, 20.910 കിലോ ഗ്രാം പുകയില ഉത്പന്നങ്ങളും 7970 രൂപയും പിടിച്ചെടുത്തു. 41 വിദേശമദ്യ ഷോപ്പുകളും 434 കള്ള് ഷാപ്പുകളും പരിശോധന നടത്തി.വിദേശമദ്യ ഷാപ്പുകളില്‍ നിന്നും ഒമ്പതും കള്ള് ഷാപ്പുകളില്‍ നിന്ന് 79 ഉം സാമ്പിളുകള്‍ രാസപരിശോധനയ്ക്ക് അയച്ചു. ഇതുമായി ബന്ധപ്പെട്ട് 3571 വാഹനങ്ങള്‍ പരിശോധിച്ചു. രണ്ടു വാഹനങ്ങള്‍ പിടിച്ചെടുത്തു. 1599 പരിശോധനകളാണ് നടത്തിയതെന്നും കോട്പ കേസുകളില്‍ 1.34 ലക്ഷം രൂപ പിഴ ഈടാക്കിയതായും ഡപ്യൂട്ടി കമ്മീഷണര്‍ പറഞ്ഞു. ഓണാഘോഷം മുന്നില്‍ കണ്ട് സ്ഥിരം കുറ്റവാളികളുടെ ലിസ്റ്റ് തയാറാക്കിഎന്‍ഡിപിഎസ് ആക്ട് പ്രകാരം കരുതല്‍ തടങ്കലിലാക്കും. അയല്‍ സംസ്ഥാനങ്ങളില്‍ നിന്നു കേരളത്തിലെത്തുന്ന വോള്‍വോ ബസുകള്‍, ചരക്കു വാഹനങ്ങള്‍ എന്നിവയിലും ജില്ലാ അതിര്‍ത്തികളില്‍ എക്‌സൈസ് ഇന്‍റലിജന്‍സിന്‍റെ സഹായത്തോടുകൂടി കൂടുതല്‍ പരിശോധനകള്‍ നടത്തും. വനിതാ കുറ്റവാളികളെ വനിതാ സിവില്‍ എക്‌സൈസ് ഓഫീസര്‍മാരുടെ സഹായത്തോടുകൂടി നിരീക്ഷണം നടത്തും. പൊതുജനങ്ങള്‍ക്ക് ഡെപ്യൂട്ടി എക്‌സൈസ് കമ്മീഷണര്‍ പത്തനംതിട്ട- 9447178055, അസിസ്റ്റന്‍റ് എക്‌സൈസ് കമ്മീഷണര്‍ പത്തനംതിട്ട- 9496002863, കണ്‍ട്രോള്‍ റൂം നമ്പര്‍-0468 2222873, ജില്ലാ നാര്‍കോട്ടിക് സ്‌പെഷല്‍ സ്‌ക്വാഡ് ഓഫീസ്-04682351000, 9400069473എന്ന നമ്പരുകളിലേക്കോ, 155358 എന്ന ടോള്‍ ഫ്രീ നമ്പറിലോ ബന്ധപ്പെടണം.

അടുക്കളത്തോട്ടം പദ്ധതിയുമായി സീനിയര്‍ ചേംബര്‍

മല്ലപ്പള്ളി: വിഷരഹിത പച്ചക്കറി ഉത്പാദനത്തിന്‍റെ ഭാഗമായി ജൈവ അടുക്കളത്തോട്ടം നിര്‍മാണ പദ്ധതിയുമായി സീനിയര്‍ ചേംബര്‍ ഇന്‍റര്‍ നാഷണല്‍ മല്ലപ്പള്ളി ലീജിയൻ. ‘എന്‍റെ കൃഷി എന്‍റെ ജീവന്‍’ എന്ന പദ്ധതിയുടെ ഉദ്ഘാടനം ഗ്രാമപഞ്ചായത്ത് പ്രസിഡന്‍റ് എസ്. വിദ്യാമോള്‍ നിര്‍വഹിച്ചു. പ്രസിഡന്‍റ് സെബാന്‍ കെ. ജോര്‍ജ് അധ്യക്ഷത വഹിച്ചു. ജില്ലാ പഞ്ചായത്ത് മുന്‍ പ്രസിഡന്‍റ് ഡോ. സജി ചാക്കോ, ഗ്രാമപഞ്ചായത്ത് മുന്‍ പ്രസിഡന്‍റുമാരായ കുഞ്ഞുകോശി പോൾ, റെജി ശമുവേല്‍, സുജ ഷാജി, മല്ലപ്പള്ളി സോഷ്യല്‍ ആന്‍ഡ് കള്‍ച്ചറല്‍ ട്രസ്റ്റ് ചെയര്‍മാന്‍ പ്രഫ.ജേക്കബ് എം ഏബ്രഹാം, എബി കോശി ഉമ്മന്‍, ഷാജി ജോര്‍ജ്, ഷാജി പാറേൽ, ഐ. ഫിലിപ്പ്, ജോണ്‍സണ്‍ ജേക്കബ് എന്നിവര്‍ പ്രസംഗിച്ചു. കൃഷിവകുപ്പ് മുന്‍ അസി. ഡയറക്ടര്‍ ജോസഫ് ജോര്‍ജ് പരിശീലന ക്ലാസിനു നേതൃത്വം നല്‍കി.

വൈഎംസിഎ പ്രവര്‍ത്തന പദ്ധതികള്‍ ഉദ്ഘാടനം ചെയ്തു

പന്തളം: വൈഎംസിഎ പത്തനംതിട്ട സബ് റീജിയന്‍ പ്രവര്‍ത്തന പദ്ധതികള്‍ സംസ്ഥാന ചെയര്‍മാന്‍ പ്രഫ. അലക്‌സ് തോമസ് തുമ്പമണ്‍ വൈഎംസിഎയില്‍ ഉദ്ഘാടനം ചെയ്തു. സബ് റീജൺ ചെയര്‍മാന്‍ ലെബി ഫിലിപ്പ് മാത്യുവിന്‍റെ അധ്യക്ഷതയില്‍ റീജണ്‌ സെക്രട്ടറി ഡോ. റെജി വറുഗീസ് മുഖ്യ പ്രഭാഷണം നടത്തി. ചെങ്ങന്നൂര്‍ സബ് റീജിയന്‍ ചെയര്‍മാന്‍ ജോസഫ് ജോണ്‍ അനുഗ്രഹ സന്ദേശം നല്‍കി. ഷിബു കെ. ഏബ്രഹാം, വി.ടി. ഡേവിഡ്, ടി. എസ്. തോമസ്, ആരോണ്‍ ജി. പ്രീത്, ഫാ. ഷൈജു കുര്യൻ, തോമസ് മാത്യു, ഇ.കെ. രാജൻ, പ്രഫ. തോമസ് അലക്‌സ്. ജെ.കെ.ടി. ജോര്‍ജ് എന്നിവര്‍ പ്രസംഗിച്ചു. പ്രതിനിധി സമ്മേളനത്തില്‍ ഏബ്രഹാം ജി. കുരുവിള, എം മാത്യു, മാത്യൂ ചെറിയാന്‍ ഇഞ്ചപ്പാറ, ഏബ്രഹാം വറുഗീസ്, റോയ് സാമുവേൽ, സാമുവേല്‍ പ്രക്കാനം, , ബെന്നി ടി. ഫിലിപ്പ്, യോഹന്നാന്‍ കൊന്നയിൽ, രാജു തോമസ്, പി. വി. തോമസ്, സാബു നന്നുവക്കാട്, ഇടിക്കുള ബാബു, ജോസ് മാടപ്പള്ളിൽ, ഗീവര്‍ഗീസ് ഉമ്മൻ, എം. ജി. റോയ് മണ്ണില്‍ എന്നിവര്‍ പ്രവര്‍ത്തന രേഖകള്‍ അവതരിപ്പിച്ചു.

വന്യമൃഗ, തെരുവുനായ ശല്യം പരിഹരിക്കാന്‍ നടപടി വേണം: കേരള കോണ്‍ഗ്രസ്-എം

കോന്നി: വന്യമൃഗ, തെരുവുനായ ശല്യം കാരണം സംസ്ഥാനത്തു ജനങ്ങള്‍ക്ക് ജീവിക്കാന്‍ കഴിയാത്ത സാഹചര്യമാണുള്ളതെന്ന് കേരള കോണ്‍ഗ്രസ് - എം കോന്നി നിയോജക മണ്ഡലം പ്രവര്‍ത്തക സമ്മേളനം അഭിപ്രായപ്പെട്ടു. ജനങ്ങള്‍ക്ക് സംരക്ഷണം നല്കാന്‍ ഉത്തരവാദിത്വപ്പെട്ട സംസ്ഥാന സര്‍ക്കാര്‍, അതില്‍ പരാജയപ്പെട്ടുവെന്ന് യോഗം വിലയിരുത്തി. സംഘടനാ കാര്യ ജില്ലാ ജനറല്‍ സെക്രട്ടറി ഏബ്രഹാം വാഴയില്‍ യോഗം ഉദ്ഘാടനം ചെയ്തു. നിയോജക മണ്ഡലം പ്രസിഡന്‍റ് ക്യാപ്റ്റന്‍ സി. വി. വര്‍ഗീസ് അധ്യക്ഷത വഹിച്ചു. ജില്ലാ സെക്രട്ടറി റഷീദ് മുളന്തറ, സംസ്ഥാന കമ്മിറ്റി അംഗം ചെറിയാന്‍ കോശി, നിയോജക മണ്ഡലം ജനറല്‍ സെക്രട്ടറി വി.കെ. സന്തോഷ് കുമാർ, ഇ. എം. ജോൺ, രാജന്‍ ഉതുപ്പാന്‍, റെജി തോമസ്, രാജീസ് കൊട്ടാരം, പി.എസ്. സാംകുട്ടി, ജോണ്‍സണ്‍ മൈലപ്ര, ബാബു കാവടശേരിൽ, രാജു ഫിലിപ്പ്, അശോകന്‍ കൊടുമുടി, പി.സി. രാജു, ലിനു വി. ഡേവിഡ്, വിത്സണ്‍ പുതുപ്പറമ്പില്‍ എന്നിവര്‍ പ്രസംഗിച്ചു.

മതന്യൂനപക്ഷങ്ങള്‍ക്കെതിരേയുള്ള പീഡനങ്ങള്‍ അവസാനിപ്പിക്കണം: കേരള കോൺ.

കോന്നി: ഛത്തീസ്ഗഡില്‍ രണ്ട് കന്യാസ്ത്രീമാര്‍ക്കെതിരേയുള്ള കള്ളക്കേസുകള്‍ റദ്ദാക്കണമെന്ന് കേരള കോണ്‍ഗ്രസ് സംസ്ഥാന ഉന്നതാധികാര സമതിയംഗം അഡ്വ എന്‍. ബാബു വര്‍ഗീസ് ആവശ്യപ്പെട്ടു. കേരള കോണ്‍ഗ്രസ് കോന്നി നിയോജക മണ്ഡലം പ്രവര്‍ത്തക സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കോന്നി താലൂക്കിലെ വിവിധ പഞ്ചായത്തുകളില്‍ മുടങ്ങിക്കിടക്കുന്ന വികസന പ്രവര്‍ത്തനങ്ങള്‍ ഉടനെ നടപ്പിലാക്കണമെന്ന് സമ്മേളനം ആവശ്യപ്പെട്ടു. ഉമ്മന്‍ മാത്യു വടക്കേടം അധ്യക്ഷത വഹിച്ച യോഗത്തില്‍ ജോസ് കൊന്നപ്പാറ, വര്‍ഗീസ് പള്ളയ്ക്കൽ, തോമസകുട്ടി കുമ്മണ്ണുര്‍, കെ.പി. തോമസ്, അനില്‍ ശാസ്ത്രമണ്ണിൽ, സജി കളയ്ക്കാട് രാജൻ. പി. ഡാനിയല്‍,സജേഷ് കെ. സാം, കെ.സി. നായര്‍, രാജന്‍ പതുവേലില്‍, ഏബ്രഹാം ചെങ്ങറ, ഷിജു ടി.ദാനിയേല്‍ എന്നിവര്‍ പ്രസംഗിച്ചു.

ഷിജു സ്‌കറിയ സംസ്കാരസാഹിതി ജനറൽ സെക്രട്ടറി

പത്തനംതിട്ട: കെപിസിസി സാംസ്‌കാരിക വിഭാഗമായ സംസ്‌കാര സാഹിതിയുടെ സംസ്ഥാന ജനറല്‍ സെക്രട്ടറിയായും മീഡിയ ഇന്‍ചാര്‍ജായും ഷിജു സ്‌കറിയയെ (തിരുവല്ല) സംസ്ഥാന ചെയര്‍മാന്‍ സി.ആര്‍. മഹേഷ് എംഎല്‍എ നിയമിച്ചു. സീനിയര്‍ ജേര്‍ണലിസ്റ്റ് ഫെഡറേഷന്‍ ഓഫ് കേരളയുടെ പത്തനംതിട്ട ജില്ലാ വൈസ് പ്രസിഡന്‍റാണ്. കെയുഡബ്ല്യുജെ ബംഗളൂരു, ചെന്നൈ ഘടകങ്ങളുടെ ഭാരവാഹിത്വം മുന്പ് ഷിജു വഹിച്ചിട്ടുണ്ട്. കെ. ആർ. ജി. ഉണ്ണിത്താൻ - വൈസ് ചെയർമാൻ, മനോജ് സി. ശേഖർ ആലപ്പുഴ - ജനറൽ സെക്രട്ടറി, സി.വി. ജയകൃഷ്ണ കാരണവർ , എൽദോപൂക്കുന്നേൽ , അരുൺ വർഗീസ്, അഴിക്കോട് ഹുസൈൻ, , ഷാനവാസ് ബാബു|, രാജേഷ് താനൂർ, ടി.എ. കൃഷ്ണൻ കുട്ടി - സെക്രട്ടറിമാർഎന്നിവരെയും നിയമിച്ചതായി സംഘടനാ ചുമതലയുള്ള സംസ്‌ഥാന ജനറൽ സെക്രട്ടറി അനി വർഗിസ് അറിയിച്ചു

വയോധികന്‍ ബൈക്കിടിച്ച് മരിച്ച കേസില്‍ യുവാവ് അറസ്റ്റില്‍

ആറന്മുള: കാല്‍നടയാത്രക്കാരനായ വയോധികന്‍ ബൈക്കിടിച്ചു മരിച്ച കേസില്‍ യുവാവിനെ പോലീസ് അറസ്റ്റ് ചെയ്തു. ആറന്മുള കിഴക്കില്ലത്തു വീട്ടില്‍ അശ്വിന്‍ വിജയ(29)നാണ് അറസ്റ്റിലായത്. ആറന്മുള ചവിട്ടുകുളം അമ്പലത്തിന് സമീപം മണ്ണില്‍ എബി വില്ലയില്‍ ടി.പി. ബേബി(72) മരിച്ച കേസിലാണ് അറസ്റ്റ്. കഴിഞ്ഞ രാത്രി 8.30ഓടെ തെക്കേമലയില്‍ നിന്നു വീട്ടിലേക്ക് നടന്നുപോകുന്നതിനിടയില്‍ പിന്നാലെ വന്ന മോട്ടോര്‍ സൈക്കിള്‍ ഇടിച്ച് തെറിപ്പിക്കുകയായിരുന്നു. മെഡിക്കല്‍ പരിശോധനയില്‍ അശ്വിന്‍ മദ്യപിച്ചാണ് ബൈക്ക് ഓടിച്ചതെന്ന് വ്യക്തമായി. റോഡില്‍ തെറിച്ചുവീണ ബേബിക്ക് തലക്കും ദേഹത്തും പരിക്കേറ്റിരുന്നു. ആദ്യം കോഴഞ്ചേരി ജില്ലാ ആശുപത്രിയിലും പിന്നീട് സ്വകാര്യ ആശുപത്രിയിലും എത്തിച്ചു. അബോധാവസ്ഥയില്‍ ചികിത്സയിലിരുന്ന ബേബി പിന്നീട് മരിച്ചു.

പ്രവാസി സംഘം ഏരിയാ സമ്മേളനം

മല്ലപ്പള്ളി: സംസ്ഥാന സര്‍ക്കാര്‍ നടപ്പിലാക്കിയ പ്രവാസി പെന്‍ഷനും തിരികെയെത്തിയ പ്രവാസികളുടെ പുനരധിവാസ പദ്ധതികള്‍ക്കും കേന്ദ്രസര്‍ക്കാര്‍ സാമ്പത്തിക സഹായം നല്‍കണമെന്ന് കേരള പ്രവാസി സംഘം മല്ലപ്പള്ളി ഏരിയ സമ്മേളനം ആവശ്യപ്പെട്ടു. സംസ്ഥാന സെക്രട്ടറി ആർ. ശ്രീകൃഷ്ണപിള്ള സമ്മേളനം ഉദ്ഘാടനം ചെയ്തു. കേരളത്തിലേക്ക് കഴിഞ്ഞ വര്‍ഷം മാത്രം 2.24 ലക്ഷം കോടി രൂപയാണ് പ്രവാസി പണമായി എത്തിയത്. ഇത് രാജ്യത്തെ മൊത്തം പ്രവാസി വരുമാനത്തിന്‍റെ 19.7 ശതമാനമാണ്. കോവിഡ് കാരണവും, ജോലി നഷ്ടപ്പെട്ടും നാട്ടിലേക്ക് മടങ്ങിയെത്തിയ പ്രവാസികളില്‍ ഭൂരിഭാഗത്തിനും കാര്യമായ സമ്പാദ്യമില്ല. ഇത്തരം മനുഷ്യരുടെ പ്രശ്‌നങ്ങള്‍ ഏറ്റെടുത്തുകൊണ്ട് കേരള പ്രവാസി സംഘം മുന്നോട്ടു പോകുകയാണെന്ന് ആര്‍. ശ്രീകൃഷ്ണപിള്ള പറഞ്ഞു. ഏരിയ പ്രസിഡന്‍റ് സ്‌കറിയ ജോണ്‍ അധ്യക്ഷത വഹിച്ചു. ജില്ലാ സെക്രട്ടറി രഘുനാഥ് ഇടത്തിട്ട സംഘടനാ റിപ്പോര്‍ട്ടും ഏരിയ സെക്രട്ടറി നജീബ് കോട്ടാങ്ങല്‍ പ്രവര്‍ത്തന റിപ്പോര്‍ട്ടും അവതരിപ്പിച്ചു. സംസ്ഥാന വൈസ് പ്രസിഡന്‍റ് പീറ്റര്‍ മാത്യു, ജില്ലാ പ്രസിഡന്‍റ് ജേക്കബ് മാത്യു, ജില്ലാ ട്രഷറര്‍ സുരേഷ് പരുമല, വനിതാ വിംഗ്് ജില്ലാ സെക്രട്ടറി സജിത സ്‌കറിയ, വര്‍ഗീസ് കുഴിവേലിൽ, മനീഷ് കുഴിവേലില്‍, ബിനു കുറിച്ചിയില്‍ എന്നിവര്‍ പ്രസംഗിച്ചു. ഏരിയ ഭാരവാഹികളായി സ്‌കറിയ ജോണ്‍ - പ്രസിഡന്‍റ്, വര്‍ഗീസ് കുഴിവേലില്‍ - സെക്രട്ടറി, ബിനോജ് ഏബ്രഹാം - ട്രഷറര്‍ എന്നിവരുള്‍പ്പെടെ 21 അംഗ ഏരിയ കമ്മിറ്റിയെ തെരഞ്ഞെടുത്തു.

എന്‍ജിഒ സംഘ് സംസ്ഥാന സമ്മേളനം

പത്തനംതിട്ട: കേരള എന്‍ജിഒ സംഘ് 46-ാം സംസ്ഥാന സമ്മേളനം 7, 8, 9 തീയതികളില്‍ പത്തനംതിട്ട സെന്‍റ് സ്റ്റീഫന്‍സ് ഓഡിറ്റോറിയത്തില്‍ നടക്കുമെന്ന് ഭാരവാഹികള്‍ പത്രസമ്മേളനത്തില്‍ പറഞ്ഞു. ഏഴിന് ഉച്ചകഴിഞ്ഞ് രണ്ടിന് സംസ്ഥാന ഭാരവാഹി യോഗം ബിഎംഎസ് സംസ്ഥാന സെക്രട്ടറി സിബി വര്‍ഗീസ് ഉദഘാടനം ചെയ്യും. എട്ടിനു രാവിലെ 10 ന് മഹാരാഷ്‌ട്ര ഗവര്‍ണര്‍ സി.പി. രാധാകൃഷ്ണന്‍ സമ്മേളനം ഉദ്ഘാടനം ചെയ്യും. സംസ്ഥാന പ്രസിഡന്‍റ് ടി.ദേവാനന്ദന്‍ അധ്യക്ഷത വഹിക്കും സ്വാഗത സംഘം ചെയര്‍മാനും പത്തനംതിട്ട മുന്‍ കളക്ടറുമായ ടി.ടി. ആന്‍റണി മുഖ്യപ്രഭാഷണം നടത്തും. ഉച്ചക്ക് 12 ന് സാംസ്‌കാരിക സമ്മേളനം മിസോറം മുന്‍ ഗവര്‍ണര്‍ കുമ്മനം രാജശേഖരന്‍ ഉദ്ഘാടനം ചെയ്യും. ഉച്ചകഴിഞ്ഞ് രണ്ടിന് അടിയന്തരാവസ്ഥയുടെ അന്‍പതാണ്ടുകള്‍ എന്ന വിഷയത്തില്‍ നടക്കുന്ന സെമിനാര്‍ ബിജെപി മുന്‍ സംസ്ഥാന പ്രസിഡന്‍റ് കെ.രാമന്‍ പിള്ള ഉദ്ഘാടനം ചെയ്യും. വൈകുന്നേരം നാലിന് ആരംഭിക്കുന്ന പ്രകടനം പത്തനംതിട്ട ടൗണ്‍ സ്‌ക്വയറില്‍ സമാപിക്കും. തുടര്‍ന്ന് നടക്കുന്ന പൊതു സമ്മേളനം ബിഎംഎസ് ദേശീയ സമിതി അംഗം സി. ഉണ്ണികൃഷ്ണന്‍ ഉണ്ണിത്താന്‍ ഉദ്ഘാടനം ചെയ്യും. ഒമ്പതിനു രാവിലെ 8.30ന് സംസ്ഥാന കൗണ്‍സില്‍. ഉച്ചയ്ക്ക് 12 ന് സുഹൃദ് സമ്മേളനം. 3.30 ന് സമാപന സമ്മേളനത്തില്‍ ബിഎംഎസ് സംസ്ഥാന ജനറല്‍ സെക്രട്ടറി ജി.കെ. അജിത്ത് പ്രഭാഷണം നടത്തും. സംസ്ഥാന പ്രസിഡന്‍റ് ടി. ദേവാനന്ദന്‍, ജനറല്‍ സെക്രട്ടറി എസ്. രാജേഷ്, ട്രഷറര്‍ സജീവന്‍ ചാത്തോത്ത്, സംസ്ഥാന വനിതാവിഭാഗം കണ്‍വീനര്‍ പി. സി. സിന്ധുമോള്‍ , ജില്ലാ പ്രസിഡന്‍റ് എന്‍. ജി. ഹരീന്ദ്രൻ, സെക്രട്ടറി എം. രാജേഷ് എന്നിവര്‍ പത്രസമ്മേളനത്തില്‍ പങ്കെടുത്തു.

ഓണം ഖാദിമേള ജില്ലാതല ഉദ്ഘാടനം ഇന്ന്

റാന്നി: ഓണം ഖാദിമേള ജില്ലാതല ഉദ്ഘാടനം ഇന്ന് രാവിലെ 10.30 ന് റാന്നി ചെത്തോങ്കര ഖാദി ഗ്രാമസൗഭാഗ്യ അങ്കണത്തില്‍ പ്രമോദ് നാരായണ്‍ എംഎല്‍എ നിര്‍ഹിക്കും. ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം അധ്യക്ഷത വഹിക്കും. പഴവങ്ങാടി ഗ്രാമപഞ്ചായത്ത് പ്രസിഡന്‍റ് റൂബി കോശി ആദ്യ വില്‍പന നിര്‍വഹിക്കും. മുന്‍ എംഎല്‍എ രാജു ഏബ്രഹാം കൂപ്പണ്‍ പ്രകാശനം ചെയ്യും. ഖാദി ബോര്‍ഡ് അംഗം സാജന്‍ തൊടുക, റാന്നി ബ്ലോക്ക് പഞ്ചായത്തംഗം അന്നമ്മ തോമസ്, പഴവങ്ങാടി വാര്‍ഡ് അംഗം വി സി ചാക്കോ, ജില്ലാ ഇന്‍ഫര്‍മേഷന്‍ ഓഫീസര്‍ സി ടി ജോണ്‍, ജില്ലാ ഖാദി ഗ്രാമവ്യവസായ പ്രോജക്ട് ഓഫീസര്‍ വി ഹരികുമാര്‍, സര്‍വീസ് സംഘടന പ്രതിനിധികള്‍ തുടങ്ങിയവര്‍ പ്രസംഗിക്കും. ജില്ലാ ഖാദി ഗ്രാമവ്യവസായ ഓഫീസിന് കീഴില്‍ ഇലന്തൂർ, അടൂര്‍, പത്തനംതിട്ട, റാന്നി ചേത്തോങ്കര എന്നിവിടങ്ങളില്‍ നടക്കുന്ന മേളയില്‍ ഖാദി വസ്ത്രങ്ങള്‍ക്ക് 30 ശതമാനം ഇളവ് ലഭിക്കും. സെപ്റ്റംബര്‍ നാല് വരെയാണ് മേള. വിവരങ്ങള്‍ക്ക് ഇലന്തൂര്‍ 8113870434, പത്തനംതിട്ട 9744259922, റാന്നി 7907368514, അടൂര്‍ 9061210135.

ഫയലുകള്‍ നീങ്ങില്ല സാറേ; ഇതാണ് നമ്മുടെ സിസ്റ്റം

പൊതുവിദ്യാഭ്യാസ വകുപ്പിനു മാനക്കേടായി ആത്മഹത്യ പത്തനംതിട്ട: 13 വര്‍ഷമായി ജോലി ചെയ്ത ഒരു അധ്യാപികയുടെ ശമ്പളബിൽ പാസാക്കി നല്‍കാന്‍ മടിച്ച വിദ്യാഭ്യാസ വകുപ്പിന്‍റെ മുഖത്തേറ്റ അടി പോലെ ഒരു ആത്മഹത്യ. റാന്നി ഉപജില്ലയിലെ നാറാണംമൂഴി സെന്‍റ് ജോസഫ് ഹൈസ്‌കൂളിലെ യുപിഎസ്ടി ലേഖയുടെ ഭര്‍ത്താവ് ഷിജോയുടെ മരണത്തോടെ തങ്ങളുടെ ഉദ്യോഗസ്ഥര്‍ക്കെതിരേ അക്കമിട്ടു നിരത്തിയ ആരോപണങ്ങളുമായി വിദ്യാഭ്യാസ വകുപ്പ് രംഗത്തിറങ്ങി. സ്വന്തം വകുപ്പിനു കീഴിലുള്ള ഉദ്യോഗസ്ഥര്‍ക്ക് ഇതുമായി ബന്ധപ്പെട്ട് മുമ്പു നല്‍കിയ നിര്‍ദേശങ്ങള്‍ പാലിക്കപ്പെടാതെ വന്നതാണ് ഷിജോയുടെ ആത്മഹത്യയ്ക്കു കാരണമെന്നു വിലയിരുത്തിയ വിദ്യാഭ്യാസവകുപ്പ് തെറ്റ് സമ്മതിച്ചു കൊണ്ടാണ് പത്തനംതിട്ട ഡിഇഒയിലെ മൂന്ന് ഉദ്യോഗസ്ഥരെ സസ്‌പെന്‍ഡ് ചെയ്തത്. സ്‌കൂള്‍ പ്രഥമാധ്യാപികയെ സസ്‌പെന്‍ഡ് ചെയ്യാന്‍ മാനേജ്‌മെന്‍റിനും നിര്‍ദേശം നല്‍കി. തേവലക്കരയില്‍ സ്‌കൂള്‍ വളപ്പില്‍ വിദ്യാര്‍ഥി ഷോക്കേറ്റു മരിച്ച മാനക്കേട് മായുംമുമ്പാണ് നാറാണംമൂഴിയില്‍ സിപിഎം അനുഭാവികള്‍ കൂടിയായ ഒരു കുടുംബത്തിന്‍റെ തീരാവേദനയ്ക്കു വിദ്യാഭ്യാസ മന്ത്രിക്കും ഉത്തരം പറയേണ്ടിവരുന്നത്. ലേഖയുടെ നിയമന വഴിയിലെ കുരുക്കുകൾ 2012ല്‍ നാറാണംമൂഴി സെന്‍റ് ‌ജോസഫ് സ്‌കൂളില്‍ ഉണ്ടായ ഒരു ഒഴിവിലാണ് ലേഖ രവീന്ദ്രന്‍റെ നിയമനം. നേരത്തേ ഈ സ്‌കൂളില്‍ ജോലിയില്‍ പ്രവേശിച്ച അധ്യാപകന്‍ ഡിവിഷന്‍ ഫോള്‍ ഭയന്ന് ജോലി രാജിവയ്ക്കാന്‍ സന്നദ്ധനാകുകയും രാജിക്കത്ത് മാനേജ്‌മെന്‍റിനു നല്‍കുകയും ചെയ്തു. ഈ ഒഴിവില്‍ യുപി വിഭാഗം അധ്യാപികയായി ലേഖ ജോലിയില്‍ പ്രവേശിച്ചു. ലേഖയുടെ നിയമനാംഗീകാരം ലഭിക്കുന്നതിനായി നടപടി നടന്നുവരവേയാണ് നേരത്തേ രാജിക്കത്ത് നല്‍കിയ അധ്യാപകന്‍ തിരികെ തടസവാദം ഉന്നയിച്ചത്. തന്‍റെ രാജി വിദ്യാഭ്യാസ വകുപ്പ് അംഗീകരിച്ചിട്ടില്ലെന്നു മനസിലാക്കിയ ഇദ്ദേഹം തിരികെ നിയമനം നല്‍കണമെന്ന് മാനേജ്‌മെന്‍റിനോട് ആവശ്യപ്പെട്ടു. പ്രതിസന്ധിയുടെ രൂക്ഷത പങ്കുവച്ച് ഷിജോ റാന്നി: താന്‍ അനുഭവിക്കുന്ന സാമ്പത്തിക പ്രതിസന്ധിയുടെ രൂക്ഷത ഷിജോ പലരോടും പങ്കുവച്ചിരുന്നു. ബന്ധുക്കള്‍ക്കും ഇത് അറിയാമായിരുന്നു. മകന് ഈറോഡിലെ എന്‍ജിനിയറിംഗ് കോളജില്‍ അഡ്മിഷന്‍ ലഭിച്ചിരുന്നു. പണം ഇല്ലാത്തതു കാരണം മകന്‍റെ പഠനം മുടങ്ങുമോയെന്ന ആശങ്ക അദ്ദേഹത്തിനുണ്ടായിരുന്നു. ഭാര്യയുടെ ശമ്പളത്തിന്‍റെ പേരില്‍ കഴിഞ്ഞയാഴ്ചയും അദേഹം പത്തനംതിട്ട ഡിഇ ഓഫീസില്‍ പോയിരുന്നു. രാഷ്‌ട്രീയ സ്വാധീനം അടക്കം ഉപയോഗപ്പെടുത്താന്‍ ശ്രമിച്ചു. സ്‌കൂള്‍ മാനേജരെയും കൂട്ടി പലതവണ ഓഫീസില്‍ പോയി. എന്നാല്‍, ശമ്പള ബിൽ പാസാക്കാന്‍ ഉദ്യോഗസ്ഥര്‍ തയാറായില്ല. എന്നാല്‍, ഷിജോ ജീവനൊടുക്കുമെന്നു ബന്ധുക്കളും കരുതിയില്ല. ഞായറാഴ്ച വൈകുന്നേരം ആറോടെയാണ് കാണാതായത്. പിന്നീടു നടന്ന അന്വേഷണത്തിലാണ് വനമേഖലയില്‍ തൂങ്ങിമരിച്ച നിലയില്‍ കണ്ടെത്തിയത്. കൃഷിവകുപ്പിനു കീഴിലുള്ള വിഎഫപിസികെയില്‍ ഫീല്‍ഡ് അസിസ്റ്റന്‍റായി പ്രവര്‍ത്തിച്ചിരുന്ന ഷിജോയ്ക്കും മാസങ്ങളായി ശമ്പളം കുടിശികയാണ്. രണ്ടു മാസത്തെ കുടിശിക നിലനില്‍ക്കേ ഇന്നലെ 15 ദിവസത്തെ ശമ്പളം ഷിജോയുടെ അക്കൗണ്ടിലെത്തിയതായി ബന്ധുക്കള്‍ പറയുന്നു. രണ്ടു മാസമായി ഡിഇഒ ഇല്ല; കെടുകാര്യസ്ഥതയില്‍ ഓഫീസ് പത്തനംതിട്ട: വിദ്യാഭ്യാസ ജില്ലാ ഓഫീസില്‍ രണ്ടുമാസമായി ഓഫീസര്‍ തസ്തികയില്‍ ആളില്ല. മേയ് 31ന് ഡിഇഒ വിരമിച്ചതിനു ശേഷം പകരം ആളെ നിയമിച്ചിട്ടില്ല. പത്തനംതിട്ട എഇഒയ്ക്കാണ് ചുമതല. ഭരണനിര്‍വഹണം പിഎയാണ് നിര്‍വഹിച്ചു വന്നത്. നൂറിലധികം സ്‌കൂളുകള്‍ പത്തനംതിട്ട ഡിഇഒയുടെ കീഴിലുണ്ട്. ഗവി വരെയുള്ള സ്‌കൂളുകള്‍ പത്തനംതിട്ടയുടെ കീഴിലാണ്. അധികാരപരിധി വിപുലമാണെങ്കിലും കെടുകാര്യസ്ഥതയ്ക്കു പേരുകേട്ട ഓഫീസാണിതെന്ന് അധ്യാപക സംഘടനാ നേതാക്കള്‍ കുറ്റപ്പെടുത്തി. ഓഫീസുമായി ബന്ധപ്പെട്ട അധ്യാപകരുടെ പ്രമോഷന്‍ ഗ്രേഡ്, നിയമനാംഗീകാരം തുടങ്ങിയ ഫയലുകള്‍ നീങ്ങാറില്ലെന്നാണ് പരാതി. നിരവധി പരാതികളാണ് ഓഫീസിനെതിരേ ഇതിനോടകം വിജിലന്‍സിനു ലഭിച്ചിട്ടുള്ളത്. നാറാണംമൂഴി സെന്‍റ് ജോസഫ് സ്‌കൂളിലെ യുപിഎസ്ടി ലേഖ രവീന്ദ്രന്‍റെ ശമ്പളം പാസാക്കി നല്‍കുന്നതുമായി ബന്ധപ്പെട്ട് ഓഫീസിന്‍റെ കെടുകാര്യസ്ഥത പ്രാഥമികാന്വേഷഷണത്തില്‍ തന്നെ വിദ്യാഭ്യാസ വകുപ്പിനു ബോധ്യപ്പെട്ടു. ഫയൽ നീങ്ങാതെ യുപിഎസ്ടി തസ്തികയിലേക്ക് നാറാണംമൂഴി സ്‌കൂള്‍ മാനേജ്‌മെന്‍റ് 2014ല്‍ ലേഖ രവീന്ദ്രനെ നിയമിച്ചത് ഹൈക്കോടതി 2024 നവംബര്‍ 26ന് അംഗീകരിച്ച് ഉത്തരവിടുകയും ശമ്പളവും മറ്റ് ആനുകൂല്യങ്ങളും മൂന്ന് മാസത്തിനുള്ളില്‍ വിതരണം ചെയ്യാന്‍ പത്തനംതിട്ട ഡിഇഒയ്ക്ക് നിര്‍ദേശവും നല്‍കിയിരുന്നു. 2025 ജനുവരി 17ന് സര്‍ക്കാര്‍ ഇതിനായി നിര്‍ദേശവും നല്‍കി. എന്നാല്‍, ശമ്പള കുടിശിക അനുവദിക്കുന്ന കാര്യത്തില്‍ മറ്റു തുടര്‍ നടപടികള്‍ ഒന്നും സ്വീകരിക്കാതെ വിഷയവുമായി ബന്ധപ്പെട്ട ഫയൽ തീര്‍പ്പാക്കുകയും സ്പാര്‍ക്ക് ഓഥന്‍റിക്കേഷന് സ്‌കൂള്‍ പ്രഥമാധ്യാപിക നല്‍കിയ അപേക്ഷയില്‍ തീരുമാനമെടുക്കാതെ വച്ചു താമസിപ്പിച്ചതിലും ഡിഇഒ ഉദ്യോഗസ്ഥര്‍ക്കു വീഴ്ച സംഭവിച്ചുവെന്നാണ് പൊതുവിദ്യാഭ്യാസ ഡയറക്ടറുടെ ഉത്തരവിലുള്ളത്. രാജി, പിൻവലിക്കൽ അധ്യാപകന്‍റെ രാജി വിദ്യാഭ്യാസ വകുപ്പിനു നല്‍കി അംഗീകാരം വാങ്ങുന്നതില്‍ മാനേജ്‌മെന്‍റിനുണ്ടായ വീഴ്ചയാണ് തര്‍ക്കത്തിനു കാരണമായത്. എന്നാല്‍, പിഎഫ് നടപടികള്‍ അധ്യാപകന്‍ അവസാനിപ്പിച്ചത് മാനേജ്‌മെന്‍റ് ചൂണ്ടിക്കാട്ടുകയും രാജി കാരണമാണ് ഇതെന്നു സമര്‍ഥിക്കുകയും ചെയ്തു. വിഷയം വിവാദമായതോടെ അധ്യാപകനു സംരക്ഷണം നല്‍കി ബിആര്‍സിയിലേക്കു സര്‍ക്കാര്‍ നിയമനവും നല്‍കി. ശമ്പളം ലഭിക്കാതെ ഇക്കാലയളവിൽ ലേഖ സ്‌കൂളില്‍ ജോലി ചെയ്തുവന്നു. വിഷയം നിയമകുരുക്കിലായതോടെ മാനേജ്‌മെന്‍റിന്‍റെ പിന്തുണയില്‍ ലേഖയും ഭര്‍ത്താവ് ഷിജോയും കോടതിയെ സമീപിച്ചു. വിധി വന്നിട്ടും 2024 നവംബര്‍ 26ന് കേരള ഹൈക്കോടതി അന്തിമ ഉത്തരവ് നല്‍കി. ലേഖയുടെ നിയമനം അംഗീകരിച്ച് മൂന്നു മാസത്തിനുള്ളില്‍ ഇതേവരെയുള്ള ശമ്പളവും മറ്റ് ആനുകൂല്യങ്ങളും നല്‍കാനായിരുന്നു വിധി. ശമ്പള ബില്ലുകള്‍ സമര്‍പ്പിച്ചപ്പോള്‍ ജനുവരി മുതലുള്ള രണ്ടു മാസത്തേത് പാസാക്കി നല്‍കി. 2012ല്‍ ജോലിയില്‍ പ്രവേശിച്ച സമയത്തെ അടിസ്ഥാന ശമ്പളം കണക്കാക്കിയാണ് ഇതു പാസാക്കിയത്. 12 വര്‍ഷത്തെ കുടിശിക തുക പ്രത്യേകമായി ഒരാളെ നിയമിച്ച് കഴിഞ്ഞ ജനുവരിയില്‍ എഴുതി നല്‍കി. പിന്നീട് ഇക്കാര്യം ഉന്നയിച്ച് പലതവണ ഓഫീസുകള്‍ കയറിയിറങ്ങിയെങ്കിലും ഫലമുണ്ടായില്ല.

കക്കി ആനത്തോട് ഡാമിന്‍റെ ഷട്ടറുകള്‍ ഇന്ന് തുറക്കും

പത്തനംതിട്ട: ജലനിരപ്പ് ക്രമീകരിക്കുന്നതിന്‍റെ ഭാഗമായി ശബരിഗിരി ജലവൈദ്യുത പദ്ധതിയുടെ കക്കി-ആനത്തോട് സംഭരണിയുടെ നാല് ഷട്ടറുകള്‍ ഇന്നു രാവിലെ 11 മുതല്‍ തുറക്കും. ഷട്ടറുകള്‍ ഘട്ടം ഘട്ടമായി 30 മുതല്‍ 60 സെന്‍റിമീറ്റര്‍ വരെ ഉയര്‍ത്തി 50 മുതല്‍ പരമാവധി 100 ക്യുമെക്‌സ് തോതില്‍ അധികജലം പമ്പാ നദിയിലേക്കു ഒഴുക്കും. പുറത്തേക്ക് ഒഴുകുന്ന ജലം പമ്പാനദിയിലൂടെ ഏകദേശം രണ്ടു മണിക്കൂറിനു ശേഷം പമ്പ ത്രിവേണിയിലും ആറ് മണിക്കൂറിനു ശേഷം റാന്നിയിലും എത്തും. ഡാം തുറക്കുന്ന സാഹചര്യത്തില്‍ പമ്പാ നദിയുടെയും കക്കാട്ടാറിന്‍റെയും ഇരുകരകളില്‍ താമസിക്കുന്നവരും പൊതുജനങ്ങളും സുരക്ഷ ഉറപ്പുവരുത്തണമെന്ന് ജില്ല ദുരന്തനിവാരണ അഥോറിറ്റി ചെയര്‍മാന്‍ കൂടിയായ ജില്ലാ കളക്ടര്‍ എസ് പ്രേം കൃഷ്ണന്‍ അറിയിച്ചു. നദികളുടെ തീരത്ത് താമസിക്കുന്ന ആളുകളും പൊതുജനങ്ങളും സുരക്ഷ ഉറപ്പുവരുത്തണം. നദികളില്‍ ഇറങ്ങുന്നത് ഏതു സാഹചര്യത്തിലും ഒഴിവാക്കണമെന്നും ജില്ലാ കളക്ടര്‍ നിര്‍ദേശിച്ചു. ഇതുമായി ബന്ധപ്പെട്ട് ദുരന്ത നിവാരണ അഥോറിറ്റിയുടെ നിര്‍ദേശങ്ങള്‍ പാലിക്കണം.

എംസിവൈഎം അര്‍ധവാര്‍ഷിക സെനറ്റ് നടത്തി

പത്തനംതിട്ട: മലങ്കര കാത്തലിക് യൂത്ത് മൂവ്‌മെന്‍റ് പത്തനംതിട്ട ഭദ്രാസനം അര്‍ധവാര്‍ഷിക സെനറ്റ് സമ്മേളനം കടമ്മനിട്ട, സെന്‍റ് ജോണ്‍സ് മലങ്കര സുറിയാനി കത്തോലിക്കാ ദേവാലയത്തില്‍ നടന്നു. ഭദ്രാസന അനിമേറ്റര്‍ സിസ്റ്റർ.ജൊവാന്‍ എസഐ സി പതാക ഉയര്‍ത്തി. സമ്മേളനം മിജാര്‍ക്ക് ഏഷ്യ പ്രതിനിധിയും കെസിവൈഎം മുന്‍ സംസ്ഥാന അധ്യക്ഷനുമായ ബിജോ പി. ബാബു ഉദ്ഘാടനം ചെയ്തു. ഭദ്രാസന പ്രസിഡന്‍റ് ബിബിന്‍ ഏബ്രഹാം അധ്യക്ഷത വഹിച്ചു. ഭദ്രാസന ഡയറക്ടര്‍ ഫാ.ജോബ് പതാലില്‍ ആമുഖ സന്ദേശം നല്‍കി. ടമ്മനിട്ട യൂണിറ്റ് ഡയറക്ടര്‍ ഫാ. വര്‍ഗീസ് വിളയിൽ, ഭദ്രാസന ജനറല്‍ സെക്രട്ടറി സുബിന്‍ തോമസ്, ട്രഷറര്‍ വി.എല്‍. വിശാഖ് എന്നിവര്‍ പ്രസംഗിച്ചു. ഛത്തീസ്ഗഡില്‍ കന്യാസ്ത്രീകമാര്‍ക്കെതിരേ നടന്ന അതിക്രമങ്ങൾ, അന്യായമായ തുറിങ്കിലടയ്ക്കല്‍ എന്നിവയ്‌ക്കെതിരേ, ഭദ്രാസന ജനറല്‍ സെക്രട്ടറി പ്രമേയം അവതരിപ്പിച്ചു.

മൗനജാഥയും പ്രതിഷേധയോഗവും നടത്തി

അടൂർ: ഭാരതത്തിന്‍റെ ഭരണഘടന മതന്യൂന പക്ഷങ്ങള്‍ക്കു നല്‍കിയിട്ടുള്ള അവകാശങ്ങളെ ലംഘിച്ചു കൊണ്ടാണ് ഛത്തിസ്ഘട്ടില്‍ കന്യാസ്ത്രീമാരെ ജയിലില്‍ അടച്ചതെന്ന് മാത്യൂസ് മാര്‍ തേവോദോസിയോസ മെത്രാപ്പോലീത്ത. യുണൈറ്റഡ് ക്രിസ്ത്യന്‍ ഫെലോഷിപ്പിന്‍റെ ആഭിമുഖ്യത്തില്‍ കന്യാസ്ത്രീമാര്‍ക്ക് ഐക്യദാര്‍ഢ്യം പ്രകടിപ്പിച്ചും കള്ളക്കേസുകള്‍ പിന്‍വലിക്കണമെന്നാവശ്യപ്പെട്ടും നടത്തിയ മൗനജാഥയേ തുടര്‍ന്നുള്ള യോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഫാ.ഫിലിപ്പോസ് ഡാനിയേലിന്‍റെ അധ്യക്ഷതയില്‍ ഫാ. ഡോ. ശാന്തന്‍ ചരുവിൽ, ഫാ. ജോസ് വെച്ചുവെട്ടിക്കലൽ, പി. ജി. കുര്യന്‍ കോര്‍ എപ്പിസ്‌കോപ്പ, ഫാ. ജോര്‍ജ് വര്‍ഗീസ് ചിറക്കരോട്ട്, അനിയന്‍ ചെപ്പള്ളിൽ, സിസ്റ്റര്‍ സിസിലി, സിസ്റ്റര്‍ സജിന്മേരി, സിസ്റ്റര്‍ ജ്യോതിസി, ജനറല്‍ സെക്രട്ടറി തോമസ് മാത്യു, വിബി വര്‍ഗീസ്, ഡോ.വര്‍ഗീസ് പേരയിൽ, ജോസ വി. കോശി, ജോണ്‍സണ്‍ കുളത്തുംകരോട്ട്, ബേബി ജോൺ, ജേക്കബ് ജോര്‍ജ്,. കെ. കെ. ജയിംസ്, റെജി ചാക്കോ, ജെന്‍സി കടുവങ്കൽ, സഖറിയ വര്‍ഗീസ്, കെ. എം. വര്‍ഗീസ്, വി.കെ. സ്റ്റാന്‍ലി, മാത്യു തോണ്ടലിൽ, സി. ഫിലിപ്പോസ്, സുനില്‍ എന്നിവര്‍ പ്രസംഗിച്ചു.

കലഞ്ഞൂര്‍ പൂമരുതിക്കുഴിയില്‍ വീട്ടിലേക്ക് പുലി ഓടിക്കയറി

കലഞ്ഞൂർ: പുമരുതിക്കുഴിയില്‍ പട്ടാപ്പകല്‍ പുലി വീട്ടിലേക്ക് ഓടിക്കയറി. വളര്‍ത്തുനായയെ പിന്തുടര്‍ന്നാണ് പൊന്മേലില്‍ രേഷ്മയുടെ വീട്ടിലേക്ക് പുലി ഓടിക്കയറിയത്. രേഷ്മയും പിഞ്ചുകുഞ്ഞും മാത്രമാണ് വീട്ടിലുണ്ടായിരുന്നത്. തുറന്നു കിടന്ന വാതിലിലൂടെ നായയെ പിന്തുടര്‍ന്ന് അകത്തേക്ക് ഓടിക്കയറിയ പുലിയെ കണ്ട് രേഷ്മ ഞെട്ടിവിളിച്ചു. പിന്നീട് നായയുടെ പിന്നാലെ പുലി തിരികെ ഓടിയതായി രേഷ്മ പറഞ്ഞു. വനംവകുപ്പ് ഉദ്യോഗസ്ഥര്‍ സ്ഥലത്തെത്തി പരിശോധന നടത്തി. ഇന്നലെ ഉച്ചകഴിഞ്ഞ് മൂന്നോടെയായിരുന്നു സംഭവം. കാല്‍പ്പാടുകള്‍ പുലിയുടേതെന്ന് വനംവകുപ്പ് ഉദ്യോഗസ്ഥര്‍ സ്ഥിരീകരിച്ചു. കോന്നി പാടം വനമേഖലയില്‍ നിന്നാണ് പുലി എത്തിയതെന്ന് കരുതുന്നു. സംഭവം അറിഞ്ഞതോടെ നാട്ടുകാര്‍ പരിഭ്രാന്തിയിലായി. കലഞ്ഞൂര്‍ പാക്കണ്ടത്ത് പുലി വളര്‍ത്തു നായയെ പിടിക്കുന്ന ദൃശ്യങ്ങളും ഇതിനിടെ പുറത്തുവന്നു. കലഞ്ഞൂരില്‍ കൂട് സ്ഥാപിച്ചു പുലിയെ പിടികൂടുമെന്ന് വനപാലകര്‍ അറിയിച്ചു. നേരത്തേ കലഞ്ഞൂര്‍ പാടം മേഖലയില്‍ ആന ഇറങ്ങുക പതിവായിരുന്നു. എന്നാല്‍ നാട്ടുകാര്‍ക്ക് നേരേ വലിയ ശല്യം ഉണ്ടായിട്ടില്ല. പന്നി, മുള്ളന്‍ പന്നി തുടങ്ങിയവയുടെ ശല്യം എല്ലായിടത്തേതും പോലെ ഇവിടെയുമുണ്ട്. പക്ഷേ വന്യമൃഗമായ പുലിയുടെ സാന്നിധ്യം സമീപ കാലത്താണ് ഉണ്ടായത്. ഇപ്പോള്‍ വീടിനുള്ളിലേക്കു പോലും പുലി എത്തിയ സ്ഥിതിക്ക് ഇത്തരത്തിലുള്ള സംഭവം ഇനി ആവര്‍ത്തിക്കാനാണ് സാധ്യത.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]