ADVERTISEMENT

ADVERTISEMENT

സയണ്‍ സ്കൂൾ സെക്കൻഡ് റണ്ണറപ്പ്

കാഞ്ചിയാർ: ഇടുക്കി സഹോദയ ത്രോബോൾ ചാന്പ്യൻഷിപ്പിൽ സ്വരാജ് സയണ്‍ പബ്ലിക് സ്കൂൾ സെക്കൻഡ് റണ്ണറപ്പായി. രാജാക്കാട് ക്രിസ്തുജ്യോതി സ്കൂളിൽ നടന്ന മത്സരത്തിൽ ബോയ്സ്, ഗേൾസ് വിഭാഗങ്ങളിൽ രണ്ട് കാറ്റഗറിയിലായി 28 വിദ്യാർഥികളാണ് സയണിൽനിന്ന് പങ്കെടുത്തത്.

ബോയ്സ് കാറ്റഗറിയിലാണ് സ്കൂൾ സെക്കൻഡ് റണ്ണറപ്പായത്. ഗേൾസ് ടീം നാലാം സ്ഥാനത്തെത്തി.

പങ്കെടുത്ത എല്ലാ വിദ്യാർഥികളെയും പരിശീലനം നൽകിയ കായികാധ്യാപകരെയും സ്കൂൾ മാനേജർ റവ. ഡോ. ഇമ്മാനുവൽ കിഴക്കേത്തലയ്ക്കൽ, പ്രിൻസിപ്പൽ ഫാ. റോണി ജോസ് തുടങ്ങിയവർ അനുമോദിച്ചു.

ADVERTISEMENT

പ്രൂണിംഗ് യന്ത്രത്തിൽ കുടുങ്ങി തൊഴിലാളി മരിച്ചു

രാജാക്കാട്: തേയിലച്ചെടികൾ വെട്ടിയൊതുക്കുന്നതിനിടെ പ്രൂണിംഗ് യന്ത്രത്തിന്‍റെ ബ്ലേഡ് ഒടിഞ്ഞ് തുടയിടുക്കിൽ പതിച്ച് ഗുരുതരമായി പരിക്കേറ്റ തൊഴിലാളി മരിച്ചു. ചിന്നക്കനാൽ സൂര്യനിലയിലെ എച്ച്എംഎൽ ഗുണ്ടമല ഡിവിഷനിൽ വിജയ് ശേഖർ(59)ആണ് മരിച്ചത്. എച്ച്എംഎൽ ഗുണ്ടുമല ഡിവിഷനിലെ തൊഴിലാളിയാണ് വിജയ് ശേഖർ. സംസ്കാരം ഇന്നു രാവിലെ 11ന് സൂര്യനെല്ലിയിലെ പൊതുശ്മശാനത്തിൽ. വർഷങ്ങളായി ഇവിടത്തെ തൊഴിലാളികളാണ് വിജയ് ശേഖറും ഭാര്യ ഇസക്കി അമ്മാളും മക്കൾ: രാംകുമാർ, രാജലക്ഷ്മി.

തൊടുപുഴ മഹാറാണിയിൽ ഹൗസ് ഓഫ് സാരീസ് ഉദ്ഘാടനം ചെയ്തു

തൊടുപുഴ: മഹാറാണി വെഡ്ഡിംഗ് കളക്‌ഷൻസ് ഇന്ത്യയിലെ 28 സംസ്ഥാനങ്ങളിലെ തനതു സാരികളുമായി ഹൗസ് ഓഫ് സാരീസ് ഉദ്ഘാടനം ചെയ്തു. മധ്യകേരളത്തിലെ വലിയ വെഡ്ഡിംഗ് ഡെസ്റ്റിനേഷനായ മഹാറാണി വെഡ്ഡിംഗ് കളക്‌ഷൻസ് വസ്ത്രവ്യാപാര രംഗത്ത് എട്ടുവർഷം പിന്നിടുകയാണ്. കഴിഞ്ഞ വർഷം 65,000 ചതുരശ്രയടി വിസ്തീർണമുള്ള ഷോറൂമായി വിപുലീകരിച്ചിരുന്നു. സാരി ഉപയോക്താക്കളുടെ സൗകര്യാർഥം 10,000 ചതുരശ്രയടി വിസ്തീർണമുള്ള ഷോറും സാരികൾക്കു മാത്രമായി ഹൗസ് ഓഫ് സാരീസ് ആരംഭിച്ചു. രാജ്യത്തെവിവിധ സംസ്കാരങ്ങളെ പ്രതിഫലിപ്പിക്കുന്ന സാരികളുടെ മൂന്നു ലക്ഷത്തിലധികം ശേഖരം ഉൾപ്പെടുത്തി സാരീസ് ഫോർ സെലിബ്രേഷൻ, സാരീസ് ഫോർ സണ്‍ഡേസ്, സാരീസ് ഫോർ ടീച്ചേഴ്സ്, സാരീസ് ഫോർ എലഗൻസ്, സാരീസ് ഫോർ 365 ഡെയിസ് തുടങ്ങി എല്ലാ വിഭാഗങ്ങളിലുമുള്ള സാരികൾക്കായി പ്രത്യേക സെക്‌ഷനുകളായാണ് ഹൗസ് ഓഫ് സാരീസ് ആരംഭിച്ചിരിക്കുന്നത്. അറ്റ്‌ലസ് മഹാറാണി ഗ്രൂപ്പ് ചെയർമാൻ ആന്‍ഡ് മാനേജിംഗ് ഡയറക്ടർ വി.എ. റിയാസ്, പ്രമുഖ സിനിമാ താരങ്ങളായ മാളവിക മേനോൻ, സ്വാസിക, റിതു മന്ത്ര, സിജാ റോസ്, ലയ മാമ്മൻ, ശ്രീവിദ്യ മുല്ലശേരി, പാർവതി കൃഷ്ണ, മരിയ വിൻസന്‍റ് തുടങ്ങിയവർ ചേർന്ന് ഉദ്ഘാടനം ചെയ്തു. തുടർന്ന് മലയാളത്തിലെ എട്ടോളം പ്രമുഖ സിനിമ താരങ്ങളും എട്ടോളം പ്രമുഖ ഫാഷൻ മോഡലുകളും ചേർന്ന് പുതിയ കളക്‌ഷനുകൾ ഷോക്കേസ് ചെയ്ത ഫാഷൻ ഷോയും അവതരിപ്പിച്ചു. ഇഷ്ടപ്പെട്ട മോഡലുകളിലുള്ള സാരികൾ തെരഞ്ഞെടുക്കാൻ അവസരമൊരുക്കുന്ന ഹൗസ് ഓഫ് സാരീസ് വേറിട്ട അനുഭവമാണ് സമ്മാനിക്കുന്നതെന്നു വി.എ. റിയാസ് പറഞ്ഞു.

രാഹുൽ ഗാന്ധിയുടെ അറസ്റ്റ്: റോഡ് ഉപരോധിച്ചു

തൊടുപുഴ: തെരഞ്ഞെടുപ്പ് കമ്മീഷൻ ആസ്ഥാനത്തേക്ക് മാർച്ച് നടത്തിയ പ്രതിപക്ഷ നേതാവ് രാഹുൽ ഗാന്ധിയെയും എംപി മാരെയും അറസ്റ്റു ചെയ്തതതിൽ പ്രതിഷേധിച്ച് തൊടുപുഴയിൽ യൂത്ത് കോണ്‍ഗ്രസ് നിയോജക മണ്ഡലം കമ്മിറ്റിയുടെ നേതൃത്വത്തിൽ റോഡ് ഉപരോധിച്ച് നരേന്ദ്ര മോദിയുടെ കോലം കത്തിച്ചു. നിയോജക മണ്ഡലം പ്രസിഡന്‍റ് ബിലാൽ സമദ് ഉദ്ഘാടനം ചെയ്തു. നിയോജകമണ്ഡലം വൈസ് പ്രസിഡന്‍റ് എബി മുണ്ടയ്ക്കൻ അധ്യക്ഷത വഹിച്ചു. ഷാനു ഷാഹുൽ, ബിബിൻ അഗസ്റ്റിൻ, സി.എം.മുനീർ, ഫസൽ സുലൈമാൻ, നാസർ പാലമൂടൻ തുടങ്ങിയവർ പ്രസംഗിച്ചു.

അഭിഭാഷകൻ കേസ് നൽകാതെ വഞ്ചിച്ചെന്ന്

തൊടുപുഴ: ആനവിരട്ടി വളവിൽ 2019-ലുണ്ടായ വാഹനാപകടത്തിൽ പരിക്കേറ്റ കരിപ്പേതറയിൽ പ്രകാശ്, ഭാര്യ സുലോചന എന്നിവർക്ക് നഷ്ടപരിഹാരം ലഭിക്കുന്നതിനായി ട്രിബ്യൂണലിൽ കേസ് നൽകാമെന്നേറ്റ അഭിഭാഷകൻ വഞ്ചിച്ചതായി സുലോചന പത്രസമ്മേളനത്തിൽ ആരോപിച്ചു. അപകടത്തിൽ സുലോചനയുടെ മൂന്നുവാരിയെല്ലുകൾ ഒടിയുകയും ശ്വാസകോശത്തിൽ വാരിയെല്ല് കുത്തിക്കയറി പരിക്കേൽക്കുകയും ചെയ്തിരുന്നു. ഇതിനു പുറമേ മുഖത്ത് പരിക്കേറ്റ് പല്ല് കൊഴിഞ്ഞുപോകുകയും തല നിലത്തടിച്ച് തലച്ചോറിന് ക്ഷതമേൽക്കുകയുമുണ്ടായി. ചികിത്സയ്ക്കും മറ്റുമായി ലക്ഷങ്ങൾ ചെലവായി. ഇതു സംബന്ധിച്ച് കേസ് നടത്തിപ്പ് ഏറ്റെടുത്ത അഭിഭാഷകൻ രേഖകൾ വാങ്ങിക്കൊണ്ടു പോയെങ്കിലും കേസ് ഫയൽ ചെയ്തിരുന്നില്ല. പത്തുലക്ഷം രൂപയ്ക്കുമുകളിൽ നഷ്ടപരിഹാരം ലഭിക്കുമെന്നാണ് അറിയിച്ചിരുന്നത്. ഇതു ലഭിക്കാതെ വന്നതിനെത്തുടർന്നു അന്വേഷിച്ചപ്പോഴാണ് കേസ്ഫയൽ ചെയ്തിട്ടില്ലെന്ന് അറിയുന്നത്. അഭിഭാഷകന് നൽകിയ പണംമടക്കിനൽകുകയും നഷ്ടപരിഹാരത്തിന് നടപടി സ്വീകരിക്കുകയും ചെയ്തില്ലെങ്കിൽ അഭിഭാഷകന്‍റെ ഓഫീസിനു മുന്നിൽ നിരാഹാര സമരം നടത്തുമെന്ന് സുലോചന മുന്നറിയിപ്പ് നൽകി.

പട്ടയം കിട്ടാതെ 60 കുടുംബങ്ങൾ; സ്വയം കുടിയിറങ്ങാനും ഗതിയില്ല

കരിമണ്ണൂർ: പട്ടയം നൽകുന്ന നടപടിയിൽ കരിമണ്ണൂർ തേക്കിൻകൂപ്പിനുള്ളിലെ അഞ്ചു ഗ്രാമങ്ങളെ അവഗണിച്ച് അധികൃതർ. ഭൂമിക്കു പട്ടയം ഇല്ലാത്തതിന്‍റെ പേരിൽ ഇവിടത്തുകാർ കാലങ്ങളായി ദുരിതമനുഭവിക്കുകയാണ്. സർ സിപിയുടെ കാലത്ത് നെൽ കൃഷിപ്രോത്സാഹനത്തിനായി പതിച്ചുനൽകിയതിൽ ഉൾപ്പെട്ടതാണ് ഈ ഭൂമി. പിന്നീട് കൂടുതൽ കുടുംബങ്ങൾ ഈ ഭാഗത്തു കുടിയേറി താമസമാക്കി. കരിമണ്ണൂർ പഞ്ചായത്തിലെ കൊച്ചുകൂട്ടക്കല്ല്, കൂട്ടക്കല്ല്, മാങ്ങാത്തൊട്ടി, പഴുപ്ലാവ്, പനനിൽക്കുംതൊട്ടി എന്നീ ഗ്രാമങ്ങളിലെ അറുപതോളം കുടുംബങ്ങളാണ് അധികൃതരുടെ അവഗണനയിൽ കഴിയുന്നത്. ഭൂരിപക്ഷം കുടുംബങ്ങൾക്കും പട്ടയം ലഭിച്ചിട്ടില്ല. ചിലരുടെ പകുതി ഭൂമിക്കു മാത്രമാണ് പട്ടയമുള്ളത്. നെയ്യശേരി വില്ലേജിൽ ഉൾപ്പെട്ടതാണ് ഈ മേഖല. വന്യമൃഗശല്യവും യാത്രാസൗകര്യങ്ങളുടെ അഭാവവും മൂലം കൊച്ചു കൂട്ടക്കല്ലിൽനിന്നും മാങ്ങാത്തൊട്ടിയിൽനിന്നും കുടുംബങ്ങൾ പൂർണമായും ഒഴിഞ്ഞുപോയി. മറ്റു ഗ്രാമങ്ങളിലാണ് അറുപതോളം കുടുംബങ്ങൾ താമസിക്കുന്നത്. പട്ടയത്തിന് അപേക്ഷ നൽകുമെങ്കിലും റവന്യുവകുപ്പ് തിരിഞ്ഞു നോക്കാറില്ലെന്നാണ് ഇവരുടെ പരാതി. കയറിയിറങ്ങി മടുത്തു പല കുടുംബങ്ങളും പതിറ്റാണ്ടുകളായി അപേക്ഷ നൽകി കാത്തിരിക്കുന്നവരാണ്. അപേക്ഷയിൽ തീരുമാനം അറിയാൻ കരിമണ്ണൂർ ഭൂപതിവ് ഓഫീസിൽ എത്തുന്പോൾ പിന്നീട് അറിയിക്കാമെന്നാണ് പതിവായുള്ള മറുപടി. വനംവകുപ്പിന്‍റ റീബിൽഡ് കേരളാ പദ്ധതി പ്രകാരമുള്ള സ്വയം കുടിയിറങ്ങൽ പദ്ധതിയിൽ അപേക്ഷ നൽകി രണ്ടു കുടുംബങ്ങൾ ഇവിടെനിന്നു പോയി. മറ്റുള്ളവർ അപേക്ഷ നൽകിയിട്ടും ഇതുവരെ പരിഗണിച്ചിട്ടില്ല. വിടെ പട്ടയം ഇല്ലാത്ത കുടുംബങ്ങൾക്കു സ്വയം കുടിയിറങ്ങൽ പദ്ധതിക്ക് അപേക്ഷിക്കാൻ കഴിയില്ലെന്നും പട്ടയം ഇല്ലാത്ത ഭൂമി വനഭൂമിയാണെന്നുമാണ് വനംവകുപ്പിന്‍റെ ഭാഷ്യം. പട്ടയം നൽകാൻ റവന്യു വകുപ്പ് തയാറായാൽ മാത്രമേ ഇവർക്കും ഈ ആനുകൂല്യത്തിന് അപേക്ഷിക്കാൻ കഴിയൂ. പട്ടയമില്ലാത്തതിനാൽ സർക്കാരിൽനിന്നുള്ള ആനുകൂല്യങ്ങളും ഇവർക്ക് അന്യമാണ്.

ജില്ലാ കളക്ടറായി ഡോ. ദിനേശൻ ചെറുവാട്ട് ചുമതലയേറ്റു

ഇടുക്കി: ജില്ലയിൽ നടന്നുവരുന്ന വികസന പ്രവർത്തനങ്ങൾ പുർത്തിയാക്കുന്നതിന് പ്രഥമ പരിഗണന നൽകുമെന്ന് പുതുതായി ചുമതലയേറ്റ ജില്ലാ കളക്ടർ ഡോ. ദിനേശൻ ചെറുവാട്ട്. വിവിധ വകുപ്പുകളുടെ ഏകോപനത്തിലൂടെ ഇത് കാര്യക്ഷമമായി നിർവഹിക്കും. വികസന ക്ഷേമ പ്രവർത്തനങ്ങളുടെ തുടർച്ചയ്ക്ക് ഉദ്യോഗസ്ഥരുടെയും രാഷ‌്ട്രീയ കക്ഷികളുടെയും ജനങ്ങളുടെയും സഹകരണം കളക്ടർ അഭ്യർഥിച്ചു. കൃഷി വകുപ്പ് അഡീഷണൽ സെക്രട്ടറിയായി സ്ഥലം മാറുന്ന വി. വിഗ്നേശ്വരിയിൽനിന്നു ചുമതല ഏറ്റെടുത്ത ശേഷം ഉദ്യോഗസ്ഥരുമായി സംസാരിക്കുകയായിരുന്നു കളക്ടർ. ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ, എഡിഎം ഷൈജു പി. ജേക്കബ്, ഡെപ്യൂട്ടി കളക്ടർമാർ എന്നിവരുടെ നേതൃത്വത്തിൽ അദ്ദേഹത്തെ സ്വീകരിച്ചു. സബ് കളക്ടർമാരായ അനൂപ് ഗാർഗ്, വി.എം. ആര്യ, ജില്ലാ പോലീസ് മേധാവി കെ.എം.സാബു മാത്യു എന്നിവർ പങ്കെടുത്തു. ജില്ലയുടെ 42ാമത്തെ കളക്ടറാണ് ഡോ. ദിനേശൻ ചെറുവാട്ട്. ഹോമിയോപ്പതി വകുപ്പിൽ ചീഫ് മെഡിക്കൽ ഓഫീസറായ ഭാര്യ ഡോ. ശ്രീകല, മക്കളായ അഞ്ജലി, അരവിന്ദ് എന്നിവരും കളക്ടർക്കൊപ്പം എത്തിയിരുന്നു.

കലുങ്ക് അപകട ഭീഷണിയിൽ; അധികൃതർക്കു കുലുക്കമില്ല

കട്ടപ്പന: ഇരട്ടയാര്‍ നോര്‍ത്ത്- വെട്ടിക്കാമറ്റം പ്രകാശ് റോഡിലെ കലുങ്ക് അപകട ഭീഷണിയാകുന്നു. 2018ലെ പ്രളയത്തിൽ കലുങ്കിന്‍റെ കല്‍ക്കെട്ട് ഇളകിപ്പോയതോടെയാണ് അപകട സ്ഥിതിയിലായത്. ഇതോടെ കലുങ്കിന്‍റെ ഒരു ഭാഗം ഇടിഞ്ഞുതാഴ്ന്ന നിലയിലാണ്. സംഭവമുണ്ടായ അന്നുതന്നെ നാട്ടുകാരും പഞ്ചായത്ത് അധികൃതരും പൊതുമരാമത്ത് വിഭാഗത്തെ അറിയിച്ചിരുന്നെങ്കിലും റിബണ്‍ കെട്ടി മടങ്ങിയതല്ലാതെ തുടര്‍ നടപടിയുണ്ടായിട്ടില്ല. പിന്നീടുണ്ടായ എല്ലാ കാലവര്‍ഷത്തിലും അപകട സാധ്യത നാട്ടുകാർ ചൂണ്ടിക്കാണിക്കുമ്പോള്‍ ടാര്‍ വീപ്പ വച്ച് മുന്നറിയിപ്പ് നൽകുന്നതല്ലാതെ മറ്റൊന്നും ചെയ്തിട്ടില്ല. ബസുകളും ടോറസ് ലോറികളുമടക്കം ഇതുവഴി കടന്നുപോകുന്നുണ്ട്. അപകട ഭീഷണിയുള്ള ഭാഗത്തു ഭാരവാഹനങ്ങള്‍ ഒന്നു നിര്‍ത്തേണ്ട സാഹചര്യം ഉണ്ടായാല്‍ കലുങ്ക് ഇടിയുമെന്നാണ് നാട്ടുകാര്‍ പറയുന്നത്. നിലവില്‍ സമീപത്തെ വ്യാപാരികൾ ഇതുവഴി കടന്നുവരുന്ന ഡ്രൈവര്‍മാരോട് അപകട മുന്നറിയിപ്പ് കൊടുത്താണ് കടത്തിവിടുന്നത്.

പീരുമേട്ടിൽ മൂന്നു തോട്ടങ്ങൾകൂടി പൂട്ടി

പീരുമേട്: തേയില വ്യവസായ പ്രതിസന്ധി രൂക്ഷ മായതോടെ പീരുമേട്ടിൽ മൂന്ന് തേയിലത്തോട്ടങ്ങൾകൂടി അടച്ചുപൂട്ടി. ഇതോടെ അടഞ്ഞുകിടക്കുന്ന എസ്റ്റേറ്റുകളുടെ എണ്ണം ഏഴായി ഉയർന്നു. പ്രവർത്തിക്കുന്ന മറ്റു 13 തോട്ടങ്ങളും അടച്ചുപൂട്ടലിന്‍റെ വക്കിലാണ്. ഹെലിബറിയ, ചെമ്മണ്ണ്, ചിന്നാർ എസ്റ്റേറ്റുകളാണ് ലോക്കൗട്ട് ചെയ്തിരിക്കുന്നത്. തൊഴിലാളികളുടെ ശമ്പളവും ആനുകൂല്യങ്ങളും ഇവിടെ മുടങ്ങിയിരുന്നു. കൂടാതെ തൊഴിലാളികളുടെ പ്രൊവിഡന്‍റ് ഫണ്ട് അടയ്ക്കാതെയായിട്ട് 58 മാസങ്ങൾ കഴിഞ്ഞു. നിലനി ചീന്തലാർ, ലോൺട്രി, ബോണാമി, കോട്ടമല തോട്ടങ്ങൾ വർഷങ്ങളായി അടഞ്ഞുകിടക്കുകയാണ്. തേങ്ങാക്കൽ, മഞ്ചുമല, ഗ്രാമ്പി, പശുമല, നെല്ലിമല, ഇഞ്ചിക്കാട്, പാമ്പനാർ, ഗ്ലെൻമേരി, ലാഡ്രം, കോഴിക്കാനം, മൗണ്ട് , തങ്കമല എസ്റ്റേറ്റുകളും കടുത്ത പ്രതിന്ധിയിലാണ്. മൂന്ന് മുതൽ അഞ്ചു മാസങ്ങളുടെ വരെ ശമ്പള കുടിശിക നിലനിൽക്കുന്നതിനാൽ തൊഴിലാളി കുടുംബങ്ങൾ ദുരിതത്തിലാണ്. ഫാക്ടറികൾ പ്രവർത്തിക്കാത്തതിനാൽ ചായപ്പൊടി ഉത്പാദനം മുടങ്ങിയിരിക്കുകയാണ്. നുള്ളിയെടുക്കുന്ന പച്ചക്കൊളുന്ത് വിൽപ്പന നടത്തിയാണ് പല തോട്ടങ്ങളും മുന്നോട്ടു നീങ്ങുന്നത്. ചായപ്പൊടി ഉത്പാദനം നിലച്ചതാണ് എസ്റ്റേറ്റുകളെ പ്രധാനമായും സാമ്പത്തിക പ്രതിസന്ധിയിലാക്കിയിരിക്കുന്നത്. എസ്റ്റേറ്റുകളിൽനിന്നു ലഭിക്കുന്ന വരുമാനം കൊണ്ടു മുന്നോട്ടുപോകാൻ കഴിയുന്നില്ല. ഇതാണ് ശമ്പള കുടിശികയ്ക്കു ഇടയാക്കുന്നതെന്ന് മാനേജ്മെന്‍റുകൾ പറയുന്നു.

പ്ലാക്കത്തടത്ത് കാട്ടാന വീടുകളുടെ ജനാലകൾ തകർത്തു

പീരുമേട്: പ്ലാക്കത്തടത്ത് നാലു വീടുകൾക്ക് നേരേ കാട്ടാനയാക്രമണം. ജനൽച്ചില്ലുകൾ ഉൾപ്പെടെ അടിച്ചു തകർത്തു. ശനിയാഴ്ച രാത്രി ആണ് സംഭവം. പാലോലിയിൽ പി.കെ. കൃഷ്ണൻകുട്ടിയുടെ വീടിന്‍റെ ജനാലയാണ് ആന നശിപ്പിച്ചത്. പാലയ്ക്കത്തടത്തിൽ പി.ആർ. തങ്കച്ചന്‍റെ വീടിനോട് ചേർന്നു ബേക്കറിക്കായി പണികഴിപ്പിച്ച ഷെഡും ഇവിടെ സൂക്ഷിച്ചിരുന്ന പാത്രങ്ങൾ അടക്കമുള്ള സാധനസാമഗ്രികളും തല്ലിത്തകർത്തു. വാളാംതോട്ടിൽ ഷെറിന്‍റെ അടുക്കളവശത്ത് എത്തിയ ആന ഭിത്തികൾ ഇടിച്ചു നശിപ്പിച്ചു. പടിഞ്ഞാറെപ്പുരയ്ക്കൽ പി.കെ. സാബുവിന്‍റെ വീടിന്‍റെ സിറ്റൗട്ടിൽ കയറിയാണ് ആന നാശം വിതച്ചത്. പ്രദേശവാസികൾ ബഹളം കൂട്ടിയും പടക്കം പൊട്ടിച്ചുമാണ് മണിക്കൂറുകൾക്കു ശേഷം കാട്ടാനകളെ ഇവിടെനിന്നു മാറ്റിയത്. വീടുകളിലെത്തി ആനക്കൂട്ടം ആക്രമണം തുടങ്ങിയതോടെ പ്രദേശവാസികൾ പരിഭ്രാന്തിയിലായിട്ടുണ്ട്.പ്ലാക്കത്തടം മേഖലയിൽ നാളുകളായി തമ്പടിച്ചിരിക്കുന്ന കാട്ടാനക്കൂട്ടം കർഷകരുടെ പുരയിടങ്ങളിലെ വിളകൾ വ്യാപകമായി നശിപ്പിച്ചിരുന്നു. വലിയ സാമ്പത്തികനഷ്ടം സംഭവിച്ചതിനെത്തുടർന്ന് ഇവിടെ കർഷകർ കൃഷി ഉപേക്ഷിച്ചുതുടങ്ങി. പ്ലാക്കത്തടം, തോട്ടാപ്പുര മേഖലകളിലായി ഒരു ഡസൻ ആനകളാണ് തമ്പടിച്ചിരിക്കുന്നത്.

മദ്യനയം: സര്‍ക്കാര്‍ നീക്കങ്ങള്‍ ജനദ്രോഹമെന്ന് കെസിബിസി മദ്യവിരുദ്ധ സമിതി

നെടുങ്കണ്ടം: മദ്യവര്‍ജനമാണ് തങ്ങളുടെ നയം എന്ന് പറഞ്ഞ് അധികാരത്തിലെത്തിയ പിണറായി സര്‍ക്കാര്‍ അങ്ങേയറ്റം ജനദ്രോഹപരമായ മദ്യനയമാണ് സ്വീകരിക്കുന്നതെന്ന് കെസിബിസി മദ്യവിരുദ്ധ സമിതി ഇടുക്കി രൂപതാ കമ്മിറ്റി കുറ്റപ്പെടുത്തി. സര്‍ക്കാര്‍ അധികാരത്തില്‍ വരുമ്പോള്‍ 29 ബാറുകള്‍ മാത്രമാണ് ഉണ്ടായിരുന്നത്. ഇപ്പോള്‍ 700നു മുകളില്‍ ബാറുകള്‍, വിദേശ മദ്യശാലകള്‍ തുടങ്ങിയവ പ്രവര്‍ത്തിക്കുന്നു. ഇതിന് പുറമെയാണ് ഓണ്‍ലൈനില്‍ മദ്യവ്യാപാരത്തിനും പദ്ധതി ഇടുന്നത്. ഓരോ മദ്യപന്‍റെയും വീട്ടുപടിക്കല്‍ മദ്യം എത്തിച്ചുകൊണ്ട് മദ്യാസക്തരോടൊപ്പമാണ് സര്‍ക്കാരെന്ന് വ്യക്തമാക്കുകയാണ്. വിമുക്തി പോലുള്ള ലഹരിവിരുദ്ധ പരിപാടികള്‍ തട്ടിപ്പ് മാത്രമാണെന്ന് സംശയിക്കേണ്ടിയിരിക്കുന്നു. ഇടുക്കി രൂപതയില്‍ സര്‍ക്കാരിന്‍റെ മദ്യനയത്തില്‍ പ്രതിഷേധിച്ചുള്ള സമരങ്ങള്‍ ശക്തിപ്പെടുത്തുമെന്ന് സമിതി രൂപത ഡയറക്ടര്‍ ഫാ. തോമസ് വലിയമംഗലം, പ്രസിഡന്‍റ് സില്‍ബി ചുനയമ്മാക്കല്‍, ജനറല്‍ സെക്രട്ടറി റോജസ് എം. ജോര്‍ജ് തുടങ്ങിയവര്‍ പറഞ്ഞു.

പഞ്ചായത്തിന്‍റെ വാക്കു വിശ്വസിച്ച വനിതകൾ "എട്ട്' വരയ്ക്കുന്നു

ചെറുതോണി: സൗജന്യമായി ഡ്രൈവിംഗ് പരിശീലനം നൽകുമെന്ന പഞ്ചായത്തിന്‍റെ വാക്കു കേട്ട് അപേക്ഷിച്ചവരെ പഞ്ചായത്ത് വഞ്ചിച്ചതായി ആക്ഷേപം. വാഴത്തോപ്പ് പഞ്ചായത്തിനെതിരേയാണ് ആക്ഷേപം. നാലു ചക്രവാഹന ഡ്രൈവിംഗ് പരിശീലനമാണ് നൽകുമെന്നു പ്രഖ്യാപിച്ചിരുന്നത്. ഇതു കേട്ടു 250ഓളം വനിതകൾ അപേക്ഷ നൽകി. ഇതോടെ, ആളുകളുടെ എണ്ണം കുറയ്ക്കാനായി 40 വയസിൽ താഴെയുള്ളവർക്കാണ് പദ്ധതിയെന്നു തിരുത്തി. നിബന്ധന വച്ചതോടെ പട്ടിക 50 പേരിലേക്കു ചുരുങ്ങി. പരിശീലനം പൂർത്തിയാക്കി ഡ്രൈവിംഗ് ലൈസൻസുമായി വരുന്നവർക്ക് 10,000 രൂപ നൽകുമെന്നാണ് പഞ്ചായത്ത് വനിതകളെ അറിയിച്ചിരുന്നത്. ഡ്രൈവിംഗ് പരിശീലിപ്പിക്കാൻ ഒരു ഡ്രൈവിംഗ് സ്കൂളിനെയും പഞ്ചായത്ത് ചുമതലപ്പെടുത്തി. പത്തു ക്ലാസ് കഴിഞ്ഞപ്പോൾ ഇതിനിടെ പദ്ധതി വീണ്ടും പരിഷ്കരിച്ചു. ഗുണഭോക്തൃ വിഹിതമായി 5,000 രൂപ അടയ്ക്കുന്നവർക്കാണ് പരിശീലനമെന്നായിരുന്നു പുതിയ നിർദേശം. ഇതുപ്രകാരം 12 പേർ 5,000 രൂപ വീതം അടച്ചു പരിശീലനം തുടങ്ങി. ഇതിനിടെ, പദ്ധതിക്കു മേൽനോട്ടം നിർവഹിച്ചിരുന്ന ഗ്രാമസേവകൻ സ്ഥലം മാറിപ്പോയി. പുതിയ ഉദ്യോഗസ്ഥ ചുമതല ഏറ്റെടുത്തു. പരിശീലനം ആരംഭിച്ച് പത്ത് ക്ലാസുകൾ പൂർത്തിയായപ്പോഴാണ് ഇങ്ങനെ ഒരു പദ്ധതി നടപ്പിലാക്കാൻ സാധിക്കില്ലെന്നു പുതിയ ഗ്രാമസേവിക വനിതകളെ അറിയിച്ചത്. വഞ്ചിതരായ വനിതകൾ പഞ്ചായത്ത് പ്രസിഡന്‍റിനെയും അംഗങ്ങളെയും നേരിൽക്കണ്ട് പരാതി അറിയിച്ചു. സ്ഥലംമാറിപ്പോയ ഗ്രാമസേവകനാണ് പദ്ധതി തകരാൻ കാരണമെന്നു പറഞ്ഞ് കൈകഴുകുകയാണ് പ്രസിഡന്‍റ് എന്നു വനിതകൾ ആരോപിക്കുന്നു. പഞ്ചറായി പദ്ധതി പഞ്ചായത്ത് കമ്മിറ്റി കൂടി വ്യക്തിഗത ആനുകൂല്യമായി നടപ്പിലാക്കിയ പദ്ധതിയിലാണ് വനിതകൾ വഞ്ചിക്കപ്പെട്ടിരിക്കുന്നത്. പഞ്ചായത്തിന് ഈ പദ്ധതി നടപ്പിലാക്കാനാവില്ലെന്നും തിരുവനന്തപുരത്ത് കോ-ഒാർഡിനേഷൻ കമ്മിറ്റിക്ക് റിപ്പോർട്ട് നൽകിയിരിക്കുകയാണെന്നുമാണ് പഞ്ചായത്തിന്‍റെ വാദം. കോ-ഒാർഡിനേഷൻ കമ്മിറ്റിയുടെ നിർദേശമനുസരിച്ചു മാത്രമേ പദ്ധതി പൂർത്തീകരിക്കാനാവൂ എന്നും ഇവർ പറയുന്നു. 5,000 രൂപ നൽകി ഡ്രൈവിംഗ് പരീശീലനം ആരംഭിച്ച വനിതകളാണ് വെട്ടിലായിരിക്കുന്നത്. നിർധനരായ വനിതകളാണ് പഞ്ചായത്തിൽനിന്നു സൗജന്യ ഡ്രൈവിഗ് പരിശീലനം നൽകുന്നെന്ന് അറിഞ്ഞ് അപേക്ഷയും പണവും നൽകിയത്. ഒന്നുകിൽ പദ്ധതി പൂർത്തിയാക്കുകയോ അല്ലെങ്കിൽ പണം തിരികെ തരികയോ ചെയ്യണമെന്നാണ് വഞ്ചിതരായവർ പറയുന്നത്. അല്ലെങ്കിൽ പഞ്ചായത്തിനെതിരേ നിയമ നടപടി സ്വീകരിക്കുമെന്നും വനിതകൾ അറിയിച്ചു.

ഇലക്‌ഷൻ തിരിച്ചറിയല്‍ കാര്‍ഡുകള്‍ ആളുമാറി എത്തുന്നതായി ആക്ഷേപം

നെടുങ്കണ്ടം: ഇലക്‌ഷന്‍ കമ്മീഷന്‍റെ തിരിച്ചറിയല്‍ കാര്‍ഡ് വിതരണത്തിലും വ്യാപകമായ ക്രമക്കേടുകൾ. തപാലിലൂടെ ലഭിക്കുന്ന തിരിച്ചറിയല്‍ കാര്‍ഡുകള്‍ യഥാർഥ മേൽവിലാസക്കാരനല്ല ലഭിക്കുന്നത്. കവറിനു പുറത്തെ മേൽവിലാസവും ഉള്ളിൽ അടക്കംചെയ്തിരിക്കുന്ന കാർഡും രണ്ടും രണ്ടാണ്. കഴിഞ്ഞ ദിവസം നെടുങ്കണ്ടം മേഖലയില്‍ പലര്‍ക്കും തപാലിലൂടെ ലഭിച്ചത് മറ്റുള്ളവരുടെ സമ്മതിദായക തിരിച്ചറിയല്‍ കാര്‍ഡുകളാണ്. എഴുകുംവയല്‍, ചേമ്പളം എന്നിവിടങ്ങളില്‍ നിരവധി പേര്‍ക്ക് മറ്റുള്ളവരുടെ തിരിച്ചറിയല്‍ കാര്‍ഡുകളാണ് വിലാസം തെറ്റി ലഭിച്ചത്. തിരിച്ചറിയല്‍ കാര്‍ഡ് അയയ്ക്കുന്ന കവറില്‍ കിട്ടേണ്ട ആളുടെ വിലാസം കൃത്യമായി രേഖപ്പെടുത്തിയിട്ടുണ്ട്. എന്നാല്‍, കവറിനുള്ളില്‍ വേറെ ആളുടെ തിരിച്ചറിയല്‍ കാര്‍ഡാണ് ഉണ്ടാകുക. ചേമ്പളം സ്വദേശി കൃഷ്ണ ആര്‍. നായര്‍ക്ക് ലഭിച്ചത് അഞ്ജലി ബാബുവിന്‍റെ തിരിച്ചറിയല്‍ കാര്‍ഡാണ്. എഴുകുംവയല്‍ സ്വദേശി അബിന്‍ സെബാസ്റ്റ്യന് ലഭിച്ചത് ആദിത്യന്‍ ഗിരീഷിന്‍റെ തിരിച്ചറിയല്‍ കാര്‍ഡുമാണ്. ഇങ്ങനെ ഒരേ പോസ്റ്റ് ഓഫീസിന് കീഴിലുള്ള ആളുകളാണ് ഇവരെല്ലാമെങ്കിലും ഇവര്‍ പരസ്പരം അറിയാത്തവരാണ്. ഇടുക്കി കളക്ടറേറ്റില്‍ പ്രവര്‍ത്തിക്കുന്ന ഉടുമ്പന്‍ചോല ഡെപ്യൂട്ടി കളക്ടറുടെ (റവന്യു റിക്കവറി ആന്‍ഡ് ഇലക്ടറല്‍ രജിസ്‌ട്രേഷന്‍ ഓഫീസര്‍) കാര്യാലയത്തില്‍നിന്നാണ് തിരിച്ചറിയല്‍ കാര്‍ഡ് അയച്ചിരിക്കുന്നത്. എന്നാല്‍, തിരുവനന്തപുരത്തെ മുഖ്യ തെരഞ്ഞെടുപ്പ് ഉദ്യോഗസ്ഥന്‍റെ കാര്യാലയത്തില്‍നിന്ന് അയയ്ക്കുന്ന കവര്‍ അതേപടി അതാത് വിലാസങ്ങളിലേക്ക് അയച്ചുനല്‍കുക മാത്രമാണ് തങ്ങള്‍ ചെയ്യുന്നതെന്ന് ഈ ഓഫീസില്‍നിന്ന് അറിയിച്ചു. തെറ്റായി എത്തിയ തിരിച്ചറിയല്‍ കാര്‍ഡുകള്‍ എവിടെ നല്‍കണമെന്ന് അറിയാതെ ബുദ്ധിമുട്ടുകയാണ് സമ്മതിദായകര്‍.

ചൊക്രമുടിയിലെ കൈയേറ്റഭൂമിയും റിസോർട്ടും സർക്കാർ ഏറ്റെടുത്തു

രാജാക്കാട്: ചൊക്രമുടിയിൽ സർക്കാർ ഭൂമി കൈയേറി വ്യാജരേഖകളുടെ പിൻബലത്തിൽ പട്ടയം സമ്പാദിച്ചെന്ന് കണ്ടെത്തിയതിനെത്തുടർന്ന് റവന്യു വിഭാഗം പട്ടയം റദ്ദാക്കിയ ഒരേക്കർ അഞ്ചു സെന്‍റ് ഭൂമിയും ഇവിടെ നിർമിച്ചിരുന്ന റിസോർട്ടും സർക്കാർ ഏറ്റെടുത്ത് ബോർഡ് സ്ഥാപിച്ചു. ചൊക്രമുടിയുടെ കവാടത്തിലുള്ള വിന്‍റർ ഗാർഡൻ റിസോർട്ടാണ് റവന്യു വകുപ്പ് ഏറ്റെടുത്തത്. പട്ടയ ഫയലിലെ വിവരങ്ങളനുസരിച്ച് ചൊക്രമുടി, വാഴയിൽ മേരിക്കുട്ടി വർഗീസ് എന്നയാൾ കൈവശം വച്ചിരുന്ന ഭൂമിയാണിത്. എന്നാൽ, റവന്യു വകുപ്പ് നടത്തിയ അന്വേഷണത്തിൽ താലൂക്ക് ഓഫീസിലുള്ള പട്ടയഫയലിൽ 1969 ൽ ഭൂമി പതിച്ചുനൽകിയതായി രേഖകളുണ്ടെങ്കിലും പട്ടയ അപേക്ഷകൻ റവന്യു ഇൻസ്പെക്ടർക്ക് നൽകിയ മൊഴി, പട്ടയത്തിന്‍റെ ഓഫീസ് പകർപ്പ്, മഹസർ, സ്കെച്ച് എന്നിവ ഉണ്ടായിരുന്നില്ല. 274-1 എന്ന മറ്റൊരു സർവേ നമ്പറിന്‍റെ മറവിലാണ് ഭൂമി കൈവശം വച്ചിരുന്നതെന്നും കണ്ടെത്തി.1996ൽ രാജകുമാരി സബ് രജിസ്ട്രാർ ഓഫീസിൽ രജിസ്റ്റർ ചെയ്തിട്ടുള്ള തീറാധാര പ്രകാരം ടി.എം. ജോസഫ് എന്നയാൾക്ക് അവകാശം സിദ്ധിച്ച ഭൂമിയാണിതെന്ന് വ്യക്തമാക്കുന്നു. സർവേ നമ്പർ 27-1ൽ ഉൾപ്പെട്ട 354.5900 ഹെക്ടർ വിസ്തീർണമുള്ള സർക്കാർ പുറമ്പോക്ക് ഭൂമിയിലാണ് ഇതെന്ന് റവന്യു വിഭാഗം കണ്ടെത്തിയതോടെയാണ് പട്ടയം റദ്ദാക്കി ഭൂമിയേറ്റെടുത്തത്. പട്ടയം റദ്ദാക്കുന്നതിന് മുൻപ് രേഖകൾ ഹാജരാക്കി ഭൂമിയുടെ ഉടമസ്ഥാവകാശം തെളിയിക്കാൻ കൈവശക്കാർക്ക് ആറു തവണ റവന്യു വിഭാഗം അവസരം നൽകിയിരുന്നു.

ടെർമിനലിലേക്ക് സ്വകാര്യ ബസ് ഇടിച്ചുകയറി: മൂന്നുപേർക്ക് പരിക്ക്

കട്ടപ്പന: പുതിയ ബസ് സ്റ്റാൻഡിൽ നിയന്ത്രണം നഷ്ടപ്പെട്ട സ്വകാര്യ ബസ് ആളുകളുടെ ഇടയിലേക്ക് ഇടിച്ചു കയറി. മൂന്നുപേർക്ക് പരിക്കേറ്റു. തങ്കമണി-കട്ടപ്പന റൂട്ടിൽ ഓടുന്ന ബസാണ് ഇന്നലെ വൈകുന്നേരം 5.30ഓടെ അപകടം ഉണ്ടാക്കിയത്. നിയന്ത്രണം നഷ്ടമായ വാഹനം ടെർമിനലിനുള്ളിൽ കസേരയിൽ ഇരുന്നിരുന്ന ആളുകളുടെ ഇടയിലേക്ക് ഇടിച്ചു കയറുകയായിരുന്നു. പരിക്കേറ്റ കൊച്ചുതോവാള സ്വദേശികളായ ബ്രിയാന്‍റോ (17), അറക്കൽ അർനോൾഡ് (16) എന്നിവരെയും കണ്ടക്ടർ ഉദയഗിരി വാകവയലിൽ ജ്യോതിഷ്കുമാറി (23) നെയും കട്ടപ്പനയിലെ സ്വകാര്യ ആശുപത്രിയിൽ പ്രവേശിപ്പിച്ചു. ടെർമിനിനുള്ളിൽ യാത്രക്കാർക്കായി സ്ഥാപിച്ചിരിക്കുന്ന കസേരകളും തകർന്നു.

കോതമംഗലം രൂപത അധ്യാപക സംഗമം

വാഴക്കുളം: കോതമംഗലം കോർപറേറ്റ് എഡ്യുക്കേഷണൽ ഏജൻസിയുടെ കീഴിലുള്ള അധ്യാപകരുടെ സംഗമം വാഴക്കുളം വിശ്വജ്യോതി എൻജനിയറിംഗ് കോളജിൽ നടത്തി. രൂപത വികാരി ജനറൽ മോണ്‍. പയസ് മലേക്കണ്ടത്തിൽ ഉദ്ഘാടനം ചെയ്തു. രൂപത വിദ്യാഭ്യാസ സെക്രട്ടറി ഫാ. മാത്യു മുണ്ടയ്ക്കൽ അധ്യക്ഷത വഹിച്ചു. മുരിക്കാശേരി പാവനാത്മ കോളജ് മുൻ പ്രിൻസിപ്പൽ റവ. ഡോ. ബെന്നോ പുതിയാപറന്പിൽ സെമിനാർ നയിച്ചു. കാത്തലിക് ടീച്ചേഴ്സ് ഗിൽഡ് രൂപത പ്രസിഡന്‍റ് ജിബിൻ പുൽപ്പറന്പിൽ, ഫാ. ജോർജ് ഇടത്തല, സെബിൻ കെ. എഫ്രേം, എ. സുമി എന്നിവർ പ്രസംഗിച്ചു. ഭിന്നശേഷി സംവരണ നിയമത്തിന്‍റെ പേര് പറഞ്ഞ് അധ്യാപക നിയമനങ്ങൾ അന്യായമായി തടഞ്ഞുവച്ചിരിക്കുന്ന സർക്കാർ നടപടിക്കെതിരേ കാത്തലിക് ടീച്ചേഴ്സ് ഗിൽഡ് അവതരിപ്പിച്ച പ്രമേയം സമ്മേളനത്തിൽ ഐകകണ്ഠ്യേന പാസാക്കി.

കത്തോലിക്ക കോൺഗ്രസ് പഠന ശില്പശാലയിൽ പ്രതിഷേധമിരമ്പി

ചെറുതോണി: കത്തോലിക്ക കോൺഗ്രസ് ഇടുക്കി രൂപതാ സമിതിയുടെ നേതൃത്വത്തിൽ രാജമുടിൽ നടന്ന നേതൃത്വ പഠന ശില്പശാല രാജ്യത്ത് വർധിച്ചുവരുന്ന ക്രൈസ്തവ പീഡനങ്ങൾക്കെതിരേ പ്രതിഷേധിച്ചു. ഭരണഘടനയുടെ അന്തസത്ത തകർത്ത് മതേതരത്വ സങ്കൽപ്പങ്ങളെ അട്ടിമറിക്കാൻ ശ്രമിക്കുന്ന കേന്ദ്രസർക്കാരും സംസ്ഥാനങ്ങളിൽ ഭരണം നടത്തുന്ന ബിജെപി സർക്കാരുകളും ജനാധിപത്യം അട്ടിമറിച്ച ആൾക്കൂട്ട ആധിപത്യത്തിനും അരാജകത്വത്തിനും വഴിയൊരുക്കുകയാണെന്ന് കത്തോലിക്ക കോൺഗ്രസ് ഇടുക്കി രൂപത നേതൃത്വ സമ്മേളനം പ്രതിഷേധ പ്രമേയത്തിൽ ആരോപിച്ചു. പൊതുസമ്മേളനം കത്തോലിക്ക കോൺഗ്രസ് ഗ്ലോബൽ പ്രസിഡന്‍റ് പ്രഫ. രാജീവ് കൊച്ചുപറമ്പിൽ ഉദ്ഘാടനം ചെയ്തു. രാജ്യത്ത് വിവിധ മേഖലകളിൽ കേരള മോഡൽ സൃഷ്ടിക്കപ്പെടാൻ കഴിഞ്ഞതിന്‍റെ പിന്നിൽ ക്രൈസ്തവ സഭയ്ക്കും സമുദായ നേതാക്കൾക്കും വലിയ പങ്കുണ്ടെന്ന് അദ്ദേഹം അനുസ്മരിച്ചു. വിദ്യാഭ്യാസം, ആരോഗ്യം തുടങ്ങിയ മേഖലകളിൽ മാത്രമല്ല നവോത്ഥാന കേരളത്തിന്‍റെ സമസ്ത മേഖലകളിലും ക്രൈസ്തവ സമൂഹത്തിന്‍റെ കയ്യൊപ്പ് ഉണ്ടെന്ന് അദ്ദേഹം ചൂണ്ടിക്കാട്ടി. ഇടുക്കി രൂപത പ്രസിഡന്‍റ് ജോർജ് കോയിക്കൽ അധ്യക്ഷത വഹിച്ചു. രൂപത മുഖ്യ വികാരി ജനറാൾ മോൺ. ജോസ് കരിവേലിക്കൽ മുഖ്യപ്രഭാഷണം നടത്തി. കത്തോലിക്ക കോൺഗ്രസ് രൂപത ഡയറക്ടർ ഫാ. ഫ്രാൻസിസ് ഇടവകണ്ടം ആമുഖ പ്രഭാഷണം നടത്തി. ഡോ. കെ.എം ഫ്രാൻസിസ് തൃശൂർ, ഡോ. ജോസുകുട്ടി ജെ. ഒഴുകയിൽ, ഡോ . പീറ്റർ രാജ് എന്നിവർ ശില്പശാലയിൽ വിവിധ വിഷയങ്ങൾ അവതരിപ്പിച്ചു. സിജോ ഇലന്തൂർ, ജോസഫ് ചാണ്ടി തേവർപറമ്പിൽ, ജോർജുകുട്ടി പുന്നക്കുഴിയിൽ, ടോമി കണ്ടത്തിൽ, ജോസ് തോമസ് ഒഴുകയിൽ, റിൻസി സിബി, ജെറിൻ ജെ. പട്ടാങ്കുളം എന്നിവർ പ്രസംഗിച്ചു. സാബു കുന്നുംപുറം, കെ.യു. ബിനോയി, ജോളി ജോൺ തുടങ്ങിയവർ വിവിധ സെഷനുകൾക്ക് നേതൃത്വം നൽകി. രൂപതയിലെ വിവിധ ഇടവകകളിൽനിന്നായി 300 ലധികം പ്രതിനിധികൾ പങ്കെടുത്തു.

ഉപ്പുതറ വില്ലേജിൽ വെരിഫിക്കേഷൻ വൈകുന്നു ; കരം അടയ്ക്കാൻ കഴിയാതെ കർഷകർ

ഉപ്പുതറ: ഉപ്പുതറ വില്ലേജിൽ കരം അടയ്ക്കാൻ കഴിയാതെ കർഷകർ വലയുന്നു. രാജമാണിക്യം റിപ്പോർട്ടിൽ ഉൾപ്പെടാത്ത കർഷകർക്കാണ് കംപ്യൂട്ടർ വെരിഫിക്കേഷൻ നടക്കാത്തതിനാൽ കരം അടയ്ക്കാൻ കഴിയാതെ വന്നിരിക്കുന്നത്. കഴിഞ്ഞ രണ്ട് മാസമായി ഉപ്പുതറ വില്ലേജിൽ കരം അടയ്ക്കാൻ കഴിയുന്നില്ല. കഴിഞ്ഞ വർഷം കരം അടച്ച കർഷകരാണ് പുതിയ വർഷം കരം അടയ്ക്കാനാകാത്ത സാഹചര്യമുള്ളത്. ഇതിൽ കർഷകരുടെ ബാങ്ക് വായ്പ മുടങ്ങുകയും ധനസഹായം നഷ്ടപ്പെടുകയും ചെയ്തിരിക്കുകയാണ്. കഴിഞ്ഞ വർഷം കരം അടച്ച കർഷകർ ഈ വർഷം കരം അടയ്ക്കാൻ ചെന്നപ്പോഴാണ് തടസം പുറത്തായത്. ബാങ്ക് വായ്പക്കും പി എം കിസാൻ യോജനയുടെ ധനസഹായത്തിനുമായാണ് കർഷകർ കരം അടയ്ക്കാൻ വില്ലേജ് ഓഫീസിൽ എത്തിയത്. കംപ്യൂട്ടറിൽ തഹസിൽദാർ വെരിഫിക്കേഷൻ നടത്തിയാൽ മാത്രമേ കരം അടയ്ക്കാൻ കഴിയു. കരം അടയ്ക്കാൻ കഴിയാത്തതിനാൽ പുതിയ വായ്പ എടുക്കാനോ പഴയത് പുതുക്കാനോ കഴിയുന്നില്ല. പിഎം കിസാൻ യോജനയിൽനിന്നു 2,000 രൂപ വീതമുള്ള ധനസഹായവും കർഷകർക്ക് നഷ്ടപ്പെട്ടു. യഥാസമയം റവന്യു ഉദ്യോഗസ്ഥർ വെരിഫിക്കേഷൻ നടപടി പൂർത്തിയാക്കി നൽകാത്തതാണ് തിരിച്ചടിയായിരിക്കുന്നത്. കരം അടയ്ക്കാൻ കഴിയാത്തതിനാൽ കുട്ടികളുടെ വിദ്യാഭ്യാസം, വിവാഹം എന്നിവയ്ക്കെല്ലാം പ്രതിസന്ധിയിലായിരിക്കുകയാണ്.

കാഞ്ഞിരപ്പള്ളി സെന്‍റ് ഡൊമിനിക്‌സ് കത്തീഡ്രൽ ദ്വിശതാബ്ദി ജൂബിലി ആഘോഷങ്ങള്‍ സമാപിച്ചു

കാഞ്ഞിരപ്പള്ളി: മാര്‍ത്തോമ്മ ക്രിസ്ത്യാനികളുടെ അപ്പസ്‌തോലികവും സാംസ്‌കാരികവുമായ പൈതൃകമുള്ള ഇടമാണ് കാഞ്ഞിരപ്പള്ളിയെന്ന് സീറോ മലബാര്‍ സഭ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍. കാഞ്ഞിരപ്പള്ളി സെന്‍റ് ഡൊമിനിക്സ് കത്തീഡ്രല്‍ ദ്വിശതാബ്ദി ജൂബിലി ആഘോഷ സമാപന സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു മാര്‍ റാഫേല്‍ തട്ടില്‍. കാഞ്ഞിരപ്പളളി രൂപതയുടെ വളര്‍ച്ച കൂട്ടായ്മയുടെയും കൂട്ടുത്തരവാദിത്വത്തിന്‍റെയും ശ്രമഫലമായാണ്. രൂപതയുടെ ജൂബിലി ആഘോഷത്തിന്‍റെ കൊടിയേറ്റമാണ് കത്തീഡ്രലിന്‍റെ ദ്വിശതാബ്ദി ആഘോഷം. മിഷനറിമാരെ സഭയ്ക്ക് സംഭാവന ചെയ്തവരാണ് ക്രിസ്ത്യാനികള്‍. ദൈവവിളിയിലും കുടുംബ പ്രാര്‍ഥനയിലും കുറവുവരാതെ ക്രിസ്ത്യാനികള്‍ ശ്രദ്ധിക്കണം. സഭയുടെ മിഷന്‍ പ്രവര്‍ത്തനങ്ങള്‍ക്കു ശക്തി പകരാന്‍ കാഞ്ഞിരപ്പള്ളി കത്തീഡ്രല്‍ ഇടവകയ്ക്കു കഴിഞ്ഞിട്ടുണ്ടെന്നും മാര്‍ റാഫേല്‍ തട്ടില്‍ പറഞ്ഞു. കാഞ്ഞിരപ്പള്ളി ബിഷപ് മാര്‍ ജോസ് പുളിക്കല്‍ അധ്യക്ഷത വഹിച്ചു. കത്തീഡ്രല്‍ ഇടവക കാഞ്ഞിരപ്പള്ളി രൂപതയുടെ ശക്തികേന്ദ്രമാണെന്നും ഇടവകയുടെ വളര്‍ച്ച രൂപതയുടെ വളര്‍ച്ചയ്ക്ക് ആധാരമായെന്നും മാര്‍ ജോസ് പുളിക്കല്‍ പറഞ്ഞു. ബിഷപ് മാര്‍ മാത്യു അറയ്ക്കല്‍ അനുഗ്രഹപ്രഭാഷണം നടത്തി. ടീം കത്തീഡ്രലിന്‍റെ ജൂബിലി ഗാന ആലാപനത്തോടെ ആരംഭിച്ച സമ്മേളനത്തില്‍ ആര്‍ച്ച്പ്രീസ്റ്റ് റവ.ഡോ. കുര്യന്‍ താമരശേരി, മുന്‍ വികാരി ഫാ. വര്‍ഗീസ് പരിന്തിരിക്കല്‍, സിസ്റ്റര്‍ മെര്‍ലി സിഎംസി, ഫാ. ബേബി മുല്ലൂര്‍പറമ്പില്‍ എസ്ജെ, ടി.സി ചാക്കോ വാവലുമാക്കല്‍, മെറീനാ റ്റോമി കാവുങ്കല്‍, ജോസഫ് മാത്യു പതിപ്പള്ളില്‍, ഷോണ്‍ മുണ്ടാട്ടുചുണ്ടയില്‍, സെബാസ്റ്റ്യന്‍ ജോസ് എള്ളൂക്കുന്നേല്‍ എന്നിവര്‍ പ്രസംഗിച്ചു. സമ്മേളനത്തിനു മുന്നോടിയായി കത്തീഡ്രലില്‍ നടന്ന സമൂഹബലിയില്‍ ചങ്ങനാശേരി ആര്‍ച്ച്ബിഷപ് മാര്‍ തോമസ് തറയില്‍ മുഖ്യകാര്‍മികത്വം വഹിച്ചു സന്ദേശം നല്കി. മതത്തിന്‍റെ വേലിക്കെട്ടുകള്‍ക്കപ്പുറത്ത് മാനവികതയ്ക്ക് പ്രാധാന്യം കൊടുത്ത് ചിന്തിക്കുന്ന ഒരു സമൂഹവും സംസ്‌കാരവും ഇവിടെ ഉണ്ടായിരുന്നുവെന്നും അത് നമുക്ക് അഭിമാനം നല്‍കുന്നതാണെന്നും ബിഷപ് പറഞ്ഞു. കഴിഞ്ഞ രണ്ടിനാണ് ജൂബിലി സമാപന ആഘോഷങ്ങള്‍ക്കു തിരി തെളിഞ്ഞത് തുടര്‍ന്ന് വിവിധ ദിവസങ്ങളിലായി ഇടവകകളുടെ സംഗമവും കൂട്ടായ്മകളുടെ സംഗമവും കാരുണ്യ ഭവനങ്ങളുടെ സംഗമവും കുടുംബ സംഗമവും വൈദിക സന്യസ്ത സംഗമവും നടന്നിരുന്നു. ഇന്നലെ നടന്ന സമൂഹബലിയിലും സമ്മേളനത്തിലും നൂറുകണക്കിനു വിശ്വാസികള്‍ പങ്കെടുത്തു.

കെപിഎസ്ടിഎ സദ്ഭാവന പദയാത്ര

മൂന്നാർ: രാജ്യം നേരിടുന്ന ജനാധിപത്യ മതേതരവിരുദ്ധ വെല്ലുവിളികൾക്കെതിരേ പൊതുസമൂഹത്തിൽ അവബോധം സൃഷ്ടിക്കുക എന്ന ലക്ഷ്യത്തോടെ കെപിഎസ്ടിഎ സംസ്ഥാന കമ്മറ്റിയുടെ ആഭിമുഖ്യത്തിൽ മൂന്നാറിൽ സദ്ഭാവന പദയാത്രയും പൊതുസമ്മേളനവും സംഘടിപ്പിച്ചു. സമ്മേളനം കെപിസിസി സെക്രട്ടറി പി. ഹരിഗോവിന്ദൻ ഉദ്ഘാടനം ചെയ്തു. സംസ്ഥാന പ്രസിഡന്‍റ് കെ. അബ്ദുൽ മജീദ് അധ്യക്ഷത വഹിച്ചു. ജനറൽ സെക്രട്ടറി പി.കെ. അരവിന്ദൻ, ട്രഷറർ വടപ്പാറ അനിൽകുമാർ, ഭാരവാഹികളായ ബി. സുനിൽകുമാർ, ടി.യു. സാദത്ത്, സാജു ജോർജ്, എം.കെ. അരുണ, പി.എം. നാസർ, പി.പി. ഹരിലാൽ, ടി. ആബിദ്, ആർ. തനൂജ, എസ്. വിജയകുമാർ, പഞ്ചായത്ത് വൈസ് പ്രസിഡന്‍റ് മാർഷ്സ് പീറ്റർ, ജെ. ബാൽ മണി, ജോബിൻ കളത്തിക്കാട്ടിൽ, സുനിൽ ടി. തോമസ് എന്നിവർ പ്രസംഗിച്ചു.

കനാൽ റോഡിൽ കാടുകയറി; പാന്പുശല്യം രൂക്ഷം

തൊടുപുഴ: ഇടവെട്ടി കനാൽ റോഡിന്‍റെ ഇരുവശവും കാടു വളർന്നു നിൽക്കുന്നതിനാൽ ഇഴജന്തുക്കളുടെ ശല്യം രൂക്ഷമെന്ന് പരാതി. തെക്കുംഭാഗം മുതൽ ഇടവെട്ടി വരെയുള്ള കനാൽ റോഡരികിലാണ് വലിയ പൊക്കത്തിൽ കാടു വളർന്നുനിൽക്കുന്നത്. നൂറു കണക്കിന് വിദ്യാർഥികളും കാൽനടക്കാരും സഞ്ചരിക്കുന്ന പാതയാണ് കനാൽ റോഡ്. എന്നാൽ ഇരുവശവും കാടുപിടിച്ചു കിടക്കുന്നതിനാൽ മാരക വിഷമുള്ള ഇഴജന്തുകളുടെ ശല്യം മൂലം ഇതുവഴി സഞ്ചരിക്കാൻ കഴിയാത്ത അവസ്ഥയാണെന്ന് നാട്ടുകാർ പറഞ്ഞു. കഴിഞ്ഞ ദിവസം പ്രഭാതസവാരിക്ക് ഇറങ്ങിയവർ കഷ്ടിച്ചാണ് പാന്പുകടി ഏൽക്കാതെ രക്ഷപ്പെട്ടത്. എംവിഐപിയും പഞ്ചായത്ത് അധികൃതരും അടിയന്തരമായി ഇടപെട്ട് കനാൽ റോഡ് സഞ്ചാരയോഗ്യമാക്കണമെന്ന് നാട്ടുകാർ ആവശ്യപ്പെട്ടു.

ഓണത്തിന് ഗിഫ്റ്റ് കാർഡ് പദ്ധതിയുമായി സപ്ലൈകോ

ഇടുക്കി: വിവിധ സ്ഥാപനങ്ങൾക്കും വ്യക്തികൾക്കും ഓണസമ്മാനമായി നൽകാൻ സപ്ലൈകോ ഗിഫ്റ്റ് കാർഡുകളും വിവിധ കിറ്റുകളും പുറത്തിറക്കി. 18 ഇനങ്ങൾ അടങ്ങിയ സമൃദ്ധി കിറ്റ്, 10 ഇനങ്ങൾ അടങ്ങിയ സമൃദ്ധി മിനി കിറ്റ്, ഒൻപത് ഉത്പന്നങ്ങൾ അടങ്ങിയ ശബരി സിഗ്നേച്ചർ കിറ്റ് എന്നിവയാണ് സപ്ലൈകോ നൽകുന്ന കിറ്റുകൾ. കൂടാതെ 500 രൂപയുടെയും 1000 രൂപയുടെയും ഗിഫ്റ്റ് കാർഡുകളും വിതരണം ചെയ്യും. ഇവ ഉപയോഗിച്ച് സപ്ലൈകോയുടെ വില്പനശാലകളിൽനിന്ന് ഉപഭോക്താവിന് ആവശ്യമുള്ള നിത്യോപയോഗ സാധനങ്ങൾ ഒക്ടോബർ 31വരെ വാങ്ങാം. ഓണത്തോടനുബന്ധിച്ച് 1225 രൂപ വിലയുള്ള സമൃദ്ധി കിറ്റ് ആയിരം രൂപയ്ക്കും 625 രൂപ വിലയുള്ള സമൃദ്ധി മിനി കിറ്റ് 500 രൂപയ്ക്കും 305 രൂപ വിലയുള്ള ശബരി സിഗ്നേച്ചർ കിറ്റ് 229 രൂപയ്ക്കും സപ്ലൈകോ നൽകും. ഓണക്കാലത്ത് ജീവനക്കാർക്ക് സമ്മാനങ്ങൾ നൽകുന്ന സ്വകാര്യ സ്ഥാപനങ്ങൾക്കും റെസിഡന്‍റ്സ് അസോസിയേഷനുകൾക്കും ദുർബല വിഭാഗങ്ങൾക്ക് കിറ്റുകൾ വിതരണം ചെയ്യുന്ന വെൽഫെയർ സ്ഥാപനങ്ങൾക്കും സപ്ലൈകോയുടെ പുതിയ സംവിധാനം ഉപയോഗിക്കാവുന്നതാണ്. സംസ്ഥാനത്തെ വിവിധ സ്ഥാപനങ്ങളും റെസിഡന്‍റ്സ് അസോസിയേഷനുകളും ക്ലബ്ബുകളും പദ്ധതിയിൽ സപ്ലൈകോയുമായി കൈകോർത്തിട്ടുണ്ട് . ഓണത്തോടനുബന്ധിച്ച് സപ്ലൈകോ വില്പന ശാലകളിൽ 32 പ്രമുഖ ബ്രാൻഡുകളുടെ 288 നിത്യോപയോഗ ഉത്പന്നങ്ങൾക്ക് പ്രത്യേക ഓഫറുകളോ 10 മുതൽ 50 ശതമാനം വരെ വിലക്കുറവോ നൽകും. സോപ്പ്, ഡിറ്റർജന്‍റുകൾ, ബ്രാൻഡഡ് ഭക്ഷ്യ ഭക്ഷ്യേതര ഉത്പന്നങ്ങൾ എന്നിവയ്ക്ക് ഓഫറുകൾ നൽകും. സപ്ലൈകോയിൽനിന്ന് ആയിരം രൂപയിലധികം സാധനങ്ങൾ വാങ്ങുന്നവർക്കായി ലക്കി ഡ്രോ നടത്തി ഒരു പവൻ സ്വർണനാണയമടക്കം വിവിധ സമ്മാനങ്ങൾ വിജയികൾക്ക് നൽകും.

ഡോ. ദിനേശൻ ചെറുവാട്ട് ജില്ലയുടെ പുതിയ കളക്ടർ

തൊടുപുഴ: ജില്ലയുടെ പുതിയ കളക്ടറായി ഡോ. ദിനേശൻ ചെറുവാട്ട് ഇന്ന് രാവിലെ ചുമതലയേൽക്കും. പഞ്ചായത്ത് വകുപ്പ് ഡയറക്ടറായിരുന്ന ദിനേശൻ ചെറുവാട്ട് കണ്ണൂർ സ്വദേശിയാണ്. കൃഷി വകുപ്പ് അഡീഷണൽ സെക്രട്ടറിയായി വി. വിഗ്നേശ്വരി മാറുന്ന ഒഴിവിലാണ് പുതിയ കളക്ടർ എത്തുന്നത്. സുവോളജിയിൽ പിഎച്ച്ഡി ബിരുദധാരിയാണ് ഡോ. ദിനേശൻ ചെറുവാട്ട്. ഫിഷറീസ് വകുപ്പിൽ കാൽ നൂറ്റാണ്ടോളം പ്രവർത്തിച്ച ഇദ്ദേഹം അസിസ്റ്റന്‍റ് ഡയറക്ടർ, ഡെപ്യൂട്ടി ഡയറക്ടർ, ജോയിന്‍റ് ഡയറക്ടർ, അഡീഷണൽ ഡയറക്ടർ എന്നീ ചുമതലകൾ വഹിച്ചിട്ടുണ്ട്. മത്സ്യഫെഡ് എംഡിയായും സേവനമനുഷ്ഠിച്ചിട്ടുണ്ട്. കേരള ബയോഡൈവേഴ്സിറ്റി ബോർഡ് മെംബർ സെക്രട്ടറി, അഡാക് എക്സിക്യൂട്ടീവ് ഡയറക്ടർ, വാട്ടർ അഥോറിറ്റി ജോയിന്‍റ് മാനേജിംഗ് ഡയറക്ടർ, കേരള കോസ്റ്റൽ സോണ്‍ മാനേജ്മെന്‍റ് അഥോറിറ്റി അംഗം എന്നീ നിലകളിലും പ്രവർത്തിച്ചു. സംസ്ഥാന തണ്ണീർത്തട അഥോറിറ്റി അംഗമാണ്. അഞ്ച് പുസ്തകങ്ങളുടെ രചയിതാവുമാണ് ഡോ. ദിനേശൻ.

ഐക്യവേദി അംഗങ്ങൾ രംഗത്ത്; ജനകീയൻ ബസ് ഓട്ടം തുടരും

തൊടുപുഴ: നൂറുകണക്കിന് ജനങ്ങളുടെ മനസിനെ കീഴടക്കി 17 വർഷത്തോളം സർവീസ് നടത്തിയിരുന്ന ജനകീയൻ ബസ് വീണ്ടും നിരത്തിലെത്തും. ഇതിനായുള്ള പരിശ്രമത്തിലാണ് ജനകീയ ബസ് ഐക്യവേദി അംഗങ്ങളും നാട്ടുകാരും. കരിങ്കുന്നത്തിനും നീലൂരിനുമിടയിലുള്ള 10 കിലോമീറ്റർ ദൂരത്തിനിടയിൽ താമസിക്കുന്ന നൂറുകണക്കിന് ജനങ്ങളുടെ നിത്യജീവിതത്തിന്‍റെ ഭാഗമായിരുന്ന ബസ് അടുത്ത നാളിലാണ് സർവീസ് നിർത്തിയത്. ബസ് ഇനി നിരത്തിലിറക്കണമെങ്കിൽ ഫിറ്റ്നസ് സർട്ടിഫിക്കറ്റ് നേടാനായി പുതുക്കി നിർമിക്കണം. എന്നാൽ ഇതിനായുള്ള പണം കടനാട് സഹകരണബാങ്കിൽ ഉണ്ടെങ്കിലും ബാങ്ക് പ്രതിസന്ധിയിലായതോടെ ഇത് പിൻവലിക്കാനാവാത്തതാണ് പ്രശ്നം സൃഷ്ടിച്ചത്. എങ്കിലും നിലവിലുള്ള ബസ് അറ്റകുറ്റപ്പണി തീർത്ത് ഇറക്കാനായില്ലെങ്കിൽ പുതിയ ബസ് ഈ റൂട്ടിൽ ഓടിക്കാനാണ് ഇതിന്‍റെ സംഘാടകരായ ബസ് ഐക്യവേദി അംഗങ്ങൾ പറയുന്നത്. ഇതിനിടെ ബസ് വീണ്ടും നിരത്തിലിറക്കാനായി ജനകീയ കാന്പയിനും നടക്കുന്നുണ്ട്. ഇക്കാര്യത്തിൽ ഇടപെടണമെന്നാവശ്യപ്പെട്ട് മന്ത്രി വി.എൻ. വാസവനും നാട്ടുകാർ കത്തയച്ചു കഴിഞ്ഞു. കരിങ്കുന്നം-നീലൂർ റൂട്ടിലെ യാത്രാ ക്ലേശത്തിനു പരിഹാരം കാണാനാണ് വർഷങ്ങൾക്കു മുൻപ് മറ്റത്തിപ്പാറ ഹോളി ക്രോസ് പള്ളി അങ്കണത്തിൽ നാട്ടുകാർ ഒത്തു ചേർന്നത്. എന്തുകൊണ്ട് സ്വന്തമായി ഒരു ബസ് വാങ്ങിക്കൂടാ എന്ന് യോഗത്തിൽ പങ്കെടുത്തവർ ഒന്നടങ്കം ചിന്തിച്ചതോടെ ജനകീയബസ് ഐക്യവേദി രൂപവത്കരിച്ചു. നാട്ടുകാരായ 76 പേർ 10,000 രൂപ വീതം നൽകി ഒരു സെക്കൻഡ് ഹാൻഡ് ബസ് വാങ്ങി. ജനങ്ങളുടെ വാഹനമായതിനാൽ ജനകീയൻ എന്ന് പേരുമിട്ടു. 2008 മാർച്ച് 17ന് ബസ് കരിങ്കുന്നത്തുനിന്നു നീലൂരിലേക്ക് ഓടിത്തുടങ്ങി. 18 ട്രിപ്പുകളാണ് ബസ് ഒരുദിവസം ഓടിയത്. കരിങ്കുന്നം-നീലൂർ റൂട്ടിലെ ഏക ബസായിരുന്നു ജനകീയൻ. ഒരുഗ്രാമം ഒത്തുചേർന്ന് വാങ്ങി ഓടിച്ച ബസ്. മൂന്നു വർഷം സർവീസ് നടത്തിയപ്പോൾ പഴയ ബസ് വിറ്റ് പുതിയത് വാങ്ങി. മറ്റത്തിപ്പാറ ഗ്രാമത്തിലെ 76 പേർ ചേർന്നു വാങ്ങിയ ജനകീയനാണ് ഓട്ടം ഇപ്പോൾ നിർത്തി ഷെഡിൽ വിശ്രമിക്കുന്നത്. ലാഭകരമായി ഓടിയിരുന്ന സമയത്ത് ബസിന്‍റെ ചെലവ് കഴിഞ്ഞുള്ള തുക കടനാട് സഹകരണ ബാങ്കിന്‍റെ മറ്റത്തിപ്പാറ ബ്രാഞ്ചിൽ നിക്ഷേപിച്ചിരുന്നു. മൂന്നു ലക്ഷം രൂപയോളം നിക്ഷേപമുണ്ടായിരുന്നു. ബാങ്ക് പ്രതിസന്ധിയിലായതിനാൽ ഈ തുക തിരികെ കിട്ടിയില്ല. ഇതോടെ ജനകീയൻ ഓട്ടം നിർത്തേണ്ട അവസ്ഥ വന്നു. ഓഗസ്റ്റ് രണ്ടിനായിരുന്നു അവസാനം സർവീസ് നടത്തിയത്. ജനകീയൻ ഓട്ടം നിർത്തുന്പോൾ വലയുന്നത് വിദ്യാർഥികൾ ഉൾപ്പെടെയുള്ള യാത്രക്കാരാണ്. ജനകീയൻ ബസ് നിരത്തിലിറങ്ങുന്നതിനു മുന്പ് ജീപ്പിലും ഓട്ടോയിലും നടന്നും യാത്ര ചെയ്തു തളർന്ന നാട്ടുകാർ ചേർന്നു മുന്നോട്ടു നയിച്ചിരുന്ന ബസാണ് സർവീസ് നിർത്തിയത്. കോവിഡ് കാലത്ത് മാത്രമാണ് ഇതിനു മുന്പ് ഏതാനും മാസം സർവീസ് നിർത്തി വയ്ക്കേണ്ടി വന്നത്. നാട്ടുകാർ കൈ കോർത്ത് നിരത്തിലിറക്കിയ ബസ് വീണ്ടും ഓടിത്തുടങ്ങേണ്ടത് അവരുടെ മുഖ്യവിഷയമായി മാറിയിരിക്കുകയാണ്. ബാങ്കിൽ നിക്ഷേപിച്ചിരിക്കുന്ന പണം തിരികെ കിട്ടാനാണ് നാട്ടുകാരിൽ ചിലർ മന്ത്രി വി.എൻ. വാസവന് നിവേദനം നൽകിയത്. തുക തിരികേ കിട്ടിയാൽ ബസ് പുറത്തിറക്കാനാണ് തീരുമാനമെന്ന് ജനകീയ ബസ് ഐക്യവേദി സെക്രട്ടറി ബെന്നി അഗസ്റ്റിൻ പറഞ്ഞു. കാരണം ഇത് ജനകീയനാണ്, ജനങ്ങളുടെ കൂട്ടായ്മയുടെ പ്രതീകമാണ്.

തങ്കമണി, വാഗമണ്‍ പോലീസ് സ്റ്റേഷനുകൾക്ക് പുതിയ മന്ദിരം

ഇടുക്കി: നിർമാണം പൂർത്തീകരിച്ച തങ്കമണി, വാഗമണ്‍ പോലീസ് സ്റ്റേഷനുകളുടെയും ജില്ലാ കണ്‍ട്രോൾ റൂമിന്‍റെയും ഉദ്ഘാടനം നാളെ ഉച്ച കഴിഞ്ഞ് 3.30ന് മുഖ്യമന്ത്രി പിണറായി വിജയൻ ഓണ്‍ലൈനായി നിർവഹിക്കും. തങ്കമണി ബസ് സ്റ്റാൻഡ് മൈതാനിയിൽ നടക്കുന്ന സമ്മേളനത്തിൽ മന്ത്രി റോഷി അഗസ്റ്റിൻ അധ്യക്ഷത വഹിക്കും. വാഗമണ്‍ പോലീസ് സ്റ്റേഷൻ കെട്ടിട ഉദ്ഘാടന സമ്മേളനത്തിൽ വാഴൂർ സോമൻ എംഎൽഎയും, ജില്ലാ കണ്‍ട്രോൾ റൂമിന്‍റെ ഉദ്ഘാടനത്തിൽ ഡിസിആർബി ഡിവൈഎസ്പി കെ.ആർ. ബിജുവും അധ്യക്ഷത വഹിക്കും. മൂന്ന് നിലകളിലായാണ് തങ്കമണി, വാഗമണ്‍ പോലീസ് സ്റ്റേഷൻ മന്ദിരങ്ങൾ നിർമിച്ചിരിക്കുന്നത്. ഉദ്യോഗസ്ഥർക്കുള്ള മുറികൾ, തൊണ്ടിസാധനങ്ങൾ സൂക്ഷിക്കുന്നതിനുള്ള മുറി, റിക്കാർഡ് റൂം, മൂന്ന് ലോക്കപ്പുകൾ, വികലാംഗ സൗഹൃദ ടോയ്‌ലറ്റ് ഉൾപ്പെടെ 23 മുറികളും വാഹനങ്ങൾ പാർക്ക് ചെയ്യുന്നതിനുള്ള സൗകര്യവും ഒരുക്കിയിട്ടുണ്ട്. തങ്കമണി പോലീസ് സ്റ്റേഷന്‍റെ നിർമാണത്തിനായി 2.04 കോടിയും വാഗമണ്‍ പോലീസ് സ്റ്റേഷനു വേണ്ടി 1.99 കോടിയുമാണ് ചെലവഴിച്ചത്. ഇടുക്കി പോലീസ് ക്യാന്പിൽ നിർമിച്ചിരിക്കുന്ന ജില്ലാ കണ്‍ട്രോൾ റൂമിന്‍റെ നിർമാണത്തിനായി 98,16,000 രൂപയാണ് വിനിയോഗിച്ചിരിക്കുന്നത്. ഇരുനിലകളിയായി നിർമ്മിച്ചിരിക്കുന്ന കണ്‍ട്രോൾ റൂമിൽ എമർജൻസി റെസ്പോണ്‍സ് സിസ്റ്റം, എഎൻപിആർ തുടങ്ങി ആധുനിക സാങ്കേതികവിദ്യകളെ പ്രയോജനപ്പെടുത്തിയുള്ള പ്രവർത്തനങ്ങൾക്കായുള്ള ക്രമീകരണങ്ങൾ ഒരുക്കിയിട്ടുണ്ട്.

നഗരസഭാ പാർക്കിന്‍റെ മുഖം മിനുക്കുന്നു

തൊടുപുഴ: നഗരസഭാ പാർക്കിന്‍റെ മുഖം മിനുക്കുന്നു. ഇതിനായി 24 ലക്ഷം രൂപ നേരത്തേ വകയിരുത്തിയിരുന്നു. പുതിയ കളി ഉപകരണങ്ങൾ സ്ഥാപിക്കുന്നതിനു 12 ലക്ഷം രൂപയും മെയിന്‍റനൻസിന് 12 ലക്ഷവും ഉൾപ്പെടെയാണ് 24 ലക്ഷം രൂപ നീക്കിവച്ചിരിക്കുന്നത്. കളി ഉപകരണങ്ങൾക്കുള്ള ഓർഡർ നൽകി. അടുത്ത ദിവസം തന്നെ ഇവ സ്ഥാപിക്കുന്ന ജോലികൾ ആരംഭിക്കും. പാർക്കിന്‍റെ മെയിന്‍റനൻസിനുള്ള എസ്റ്റിമേറ്റും തയാറാക്കിയിട്ടുണ്ട്. ടെൻഡർ നടപടി പൂർത്തീകരിച്ച് ഈ ജോലിയും വേഗത്തിൽ തീർക്കാനാണ് ശ്രമമെന്നു നഗരസഭാ ചെയർമാൻ കെ. ദീപക് പറഞ്ഞു. പുതിയ ഉപകരണങ്ങൾ സ്ഥാപിക്കുന്നതിനു തടസമായി നിന്നതും അപകടഭീഷണിയായതുമായ മരങ്ങളുടെ ചില്ലകൾ ഇന്നലെ വെട്ടിനീക്കി. വിനോദത്തിനായി നഗരസഭ പ്രദേശത്തെയും സമീപ പഞ്ചായത്തുകളിലേയും നിരവധിരക്ഷിതാക്കളാണ് കുട്ടികളെയുമായി പാർക്കിൽ എത്തുന്നത്. മഴക്കാലമായതിനാൽ പാർക്ക് അടച്ചിട്ടിരിക്കുകയാണ്. അടുത്തദിവസം തന്നെ പാർക്ക് തുറക്കാനുള്ള നടപടികളാണ് നടന്നുവരുന്നത്.

പച്ചക്കറിവില ഉയർന്നുതുടങ്ങി; ഓണത്തിന് കൈ പൊള്ളുമോ?

തൊടുപുഴ: ഓണമെത്തുന്നതിനു മുന്പു തന്നെ പച്ചക്കറിവില കുതിച്ചു തുടങ്ങി. കാരറ്റ്, തക്കാളി, ബീൻസ്, വള്ളിപ്പയർ, കോവയ്ക്ക തുടങ്ങി പല ഇനങ്ങളുടെയും വില ഉയർന്നു. ഈ രീതിയിൽ പോയാൽ ഓണസദ്യ ഒരുക്കാൻ ഇത്തവണ കൂടുതൽ പണം മുടക്കേണ്ടിവരുമെന്ന സൂചനയാണ് വിപണി നൽകുന്നത്. കാലാവസ്ഥാ വ്യതിയാനം മൂലം ഉത്പാദനം കുറഞ്ഞതാണ് പച്ചക്കറി വില ഉയരാനിടയാക്കിയത്. പല വില ഒരു സ്ഥലത്തുതന്നെ പല കടകളിലും വ്യത്യസ്ത നിരക്കുകളിലാണ് പച്ചക്കറി വിൽപ്പന നടക്കുന്നത്. തമിഴ്നാട്ടിലും കർണാടകയിലും കനത്ത മഴ മൂലമുണ്ടായ വിളനാശമാണ് വിലക്കയറ്റത്തിനു കാരണമായി വിൽപ്പനക്കാർ പറയുന്നത്. സംസ്ഥാനത്ത് പച്ചക്കറി ഉത്പാദനം നടക്കുന്നുണ്ടെങ്കിലും അയൽ സംസ്ഥാനങ്ങളെയാണ് പ്രധാനമായി ആശ്രയിക്കുന്നത്. ആശങ്കയിൽ ജനങ്ങൾ ഓണം, വിവാഹസീസണ്‍ എന്നിവ എത്തുന്നതിനു മുൻപേ വിപണിയിൽ വില ഉയർന്നത് ആശങ്കയ്ക്ക് ഇടയാക്കുന്നുണ്ട്. ഈ നില തുടർന്നാൽ ഓണമെത്തുന്പോൾ അടുക്കള ബജറ്റ് പൂർണമായും താളം തെറ്റുമെന്ന് വീട്ടമ്മമാർ പറയുന്നു. അതേസമയം, വിലക്കയറ്റത്തിൽ റിക്കാർഡിട്ട വെളിച്ചെണ്ണയുടെയും തേങ്ങയുടെയും വില അൽപം കുറഞ്ഞത് ആശ്വാസമായിട്ടുണ്ട്. ഇതിനിടെ ഓണത്തിന് കുറഞ്ഞ വിലയ്ക്ക് പച്ചക്കറി ലഭ്യമാക്കാനുള്ള നടപടികൾ കൃഷിവകുപ്പും ഹോർട്ടികോർപ്പും വിഎഫ്സികെയും ആരംഭിച്ചിട്ടുണ്ട്. ഓണത്തിന് ഒരു മുറം പച്ചക്കറി പദ്ധതിയുടെ ഭാഗമായി സംസ്ഥാനത്തിന്‍റെ വിവിധ മേഖലകളിൽ പച്ചക്കറി ഉത്പാദനം നടന്നു വരുന്നുണ്ട്. വില ഇങ്ങനെ ഒരു കിലോ കാരറ്റ് 80 രൂപ വരെയാണ് ചില്ലറ വില. ബീൻസിന് 60-80 രൂപയും. തക്കാളി - 60, കോവയ്ക്ക - 60-70, വള്ളിപ്പയർ -70, സവാള -30, ഇഞ്ചി - 120, ചുവന്നുള്ളി - 60, വെളുത്തുള്ളി - 160, പാവയ്ക്ക - 60, ചേന- 70, വെള്ളരി- 50- 60, വെണ്ടയ്ക്ക- 60, കിഴങ്ങ് -30 എന്നിങ്ങനെയാണ് ചില്ലറ വിൽപ്പന. അതേസമയം മുരിങ്ങക്കായ, പച്ചമുളക് തുടങ്ങി ചില ഇനങ്ങളുടെ വില കുറഞ്ഞിട്ടുണ്ട്. മുരിങ്ങക്കായ കിലോയ്ക്ക് 40 രൂപയാണ് വില.

മങ്ങാട്ടുകവലയിൽ റോഡിലെ കുഴി അപകടം വിതയ്ക്കുന്നു

തൊടുപുഴ: തിരക്കേറിയ റോഡിൽ രൂപപ്പെട്ട വൻഗർത്തം അപകടം വിതയ്ക്കുന്നു. എന്നാൽ അധികൃതർ കണ്ടമട്ടില്ല. മങ്ങാട്ടുകവല-മുതലക്കോടം റോഡിൽ മഹിമമാർട്ടിനു സമീപമാണ് കുഴി രൂപപ്പെട്ടിരിക്കുന്നത്. വെള്ളം കെട്ടിക്കിടക്കുന്നതിനാൽ ആഴമുള്ള കുഴിയാണെന്ന് വാഹനയാത്രക്കാർക്ക് തിരിച്ചറിയാനാകാത്ത സാഹചര്യമാണ്. ഇരുചക്രവാഹനങ്ങളിൽ സഞ്ചരിക്കുന്ന സ്ത്രീകളാണ് ഇവിടെ പലപ്പോഴും അപകടത്തിൽപ്പെടുന്നതെന്നു വ്യാപാരികൾ പറഞ്ഞു. ചെറിയ വളവുള്ള ഭാഗമായതിനാൽ എതിർദിശയിൽനിന്നു വരുന്ന വാഹനങ്ങൾക്ക് സൈഡ് കൊടുക്കുന്പോൾ വാഹനങ്ങൾ കുഴിയിൽ വീഴുന്നതും പതിവാണ്. അപകടം പതിവായതോടെ സമീപത്തെ വ്യാപാരികൾ ചേർന്ന് കുഴിയിൽ ബക്കറ്റിറക്കി വച്ച് മുന്നറിയിപ്പ് നൽകുകയാണ്. രാത്രി സമയങ്ങളിലാണ് കൂടുതൽ അപകടം ഉണ്ടാകുന്നത്. അതേ സമയം കുഴിയിൽ വീണ് അപകടം പതിവായിട്ടും ആവശ്യമായ നടപടി സ്വീകരിക്കാൻ പൊതുമരാമത്ത് വകുപ്പധികൃതർ തയാറാകാത്തതിൽ ശക്തമായ പ്രതിഷേധമാണുയരുന്നത്. കുഴിയടയ്ക്കാൻ നിരത്തിൽ ജീവൻ പൊലിയുന്നതുവരെ കാത്തിരിക്കണോ എന്നാണ് നാട്ടുകാർ ചോദിക്കുന്നത്. അടിയന്തരമായി അപകടം ഒഴിവാക്കുന്നതിന് നടപടി സ്വീകരിക്കണമെന്നും ഇവർ ആവശ്യപ്പെട്ടു.

തെരുവുനായ ശല്യം: പൊറുതിമുട്ടി വ്യാപാരികൾ

തൊടുപുഴ: നഗരസഭയിലെ വെങ്ങല്ലൂരിൽ തെരുവുനായ ശല്യം വ്യാപകം. രാപകൽ ഭേദമില്ലാതെ ഇവിടെ തെരുവുനായ്ക്കൾ വിഹരിക്കുകയാണ്. യാത്രക്കാർക്കും വ്യാപാരികൾക്കും ഭീഷണിയായി ഇവിടെ തെരുവു നായ്ക്കൾ തന്പടിച്ചിരിക്കുകയാണ്. തൊടുപുഴ മേഖലയിലെ പ്രധാന മത്സ്യ മൊത്തവിപണനകേന്ദ്രത്തിനു സമീപത്തായാണ് തെരുവുനായ്ക്കളുടെ ശല്യം വ്യാപകമായിരിക്കുന്നത്. നായ്ക്കളെ ഓടിക്കാൻ ശ്രമിച്ചാൽ ഇവ വ്യാപാരികൾക്കു നേരേ പാഞ്ഞടുക്കുമെന്നും ഇവർ പറയുന്നു. നായ്ക്കളുടെ സംഘങ്ങളായതിനാൽ ജനങ്ങൾ അതീവ ഭീതിയോടെയാണ് ഇവയെ കാണുന്നത്. ഇക്കാര്യത്തിൽ അടിയന്തര നടപടി സ്വീകരിക്കണമെന്നാണ് വ്യാപാരികളുടെയും മറ്റും ആവശ്യം. ഇതിനിടെ എബിസി പദ്ധതി പ്രകാരം നഗരസഭാ പരിധിയിൽ അലഞ്ഞുതിരിയുന്ന തെരുവു നായ്ക്കളെ പിടി കൂടി വന്ധ്യംകരിക്കാൻ നഗരസഭ 10 ലക്ഷം രൂപ അനുവദിച്ചിട്ടുണ്ട്. എന്നാൽ എബിസി സെന്‍റർ സ്ഥാപിക്കാനുള്ള സ്ഥലം ലഭിക്കാത്തത് പ്രതിസന്ധിയായി. മലങ്കരയിൽ സ്ഥലം കണ്ടെത്തിയെന്നും ഇവിടെ സെന്‍റർ സ്ഥാപിക്കാനുള്ള നടപടി പുരോഗമിക്കുകയാണെന്നും നഗരസഭാ ചെയർമാൻ കെ. ദീപക് പറഞ്ഞു.

കരിങ്കല്ലു തോൽക്കുമീ കരം തൊട്ടാൽ ഓടക്കുഴലിൽ നാദവിസ്മയം

തൊടുപുഴ: കരിങ്കല്ല് അടിച്ചുപൊട്ടിച്ച് മുഖം മിനുക്കി മനോഹരമായ വീടുകൾക്ക് അടിത്തറയിടുന്ന അറക്കുളം പന്ത്രണ്ടാംമൈൽ സ്വദേശി വടക്കേടത്ത് ചെല്ലപ്പൻ മേസ്തിരിയുടെ കരം തൊട്ടാൽ പാടാത്ത ഓടക്കുഴലില്ല. ഒരു ഗുരുവിന്‍റെയും അടുത്ത് ദക്ഷിണ വയ്ക്കാതെ, ആരുടെയും പരിശീലനം ഇല്ലാതെ ശ്രുതിമധുരമായി ഓടക്കുഴൽ വായിച്ച് നാദവിസ്മയം തീർക്കുന്നത് കേട്ടാൽ ആരും പറഞ്ഞുപോകും ഈ മേസ്തിരി ചില്ലറക്കാരനല്ലെന്ന്. ഇതിനു പിന്നിൽ കഠിനാധ്വാനത്തിൽ ചാലിച്ചെടുത്ത ജീവിതമുണ്ട്. ഉള്ളിൽ കെടാതെ നിൽക്കുന്ന ആഗ്രഹമുണ്ട്. നിരന്തരമായ തപസ്യയുണ്ട്. കണ്ടും കേട്ടും പഠിച്ചു പതിനാറാമത്തെ വയസിലാണ് ചെല്ലപ്പൻ മേസ്തിരിപ്പണി ആരംഭിച്ചത്. അച്ഛൻ വേലായുധന് ഒപ്പമായിരുന്നു ജോലി. ഇലവീഴാപൂഞ്ചിറ ടൂറിസ്റ്റ് കേന്ദ്രത്തിന് സമീപമുള്ള ചക്കിക്കാവ് സെന്‍റ് മേരീസ് പള്ളിയുടെ നിർമാണമായിരുന്നു ആദ്യം ചെയ്ത ജോലി. ജോലി ആരംഭിച്ച അതേവർഷം തന്നെ ഓടക്കുഴൽ വായനയും ആരംഭിച്ചു. അച്ഛൻ ഓടക്കുഴൽ വായിക്കുന്നത് കണ്ടും കേട്ടുമാണ് വായിക്കാൻ പഠിച്ചത്. ഇതിനായി സ്വന്തമായി ഓടക്കുഴൽ വാങ്ങി. ഏഴ് സ്വരങ്ങളുടെയും നോട്ടുകൾ സ്വയം തയാറാക്കിയായിരുന്നു പരിശീലനം. അതിരാവിലെ എഴുന്നേറ്റ് പരിശീലനം നടത്തും. പിന്നീട് ജോലിക്ക് പോകും. ജോലി കഴിഞ്ഞ് വീട്ടിലെത്തിയ ശേഷം രാത്രിയിൽ വീണ്ടും പരിശീലനം നടത്തും. മതമൈത്രിയുടെ നാദം വീടിനു സമീപമുള്ള അറക്കുളം ശ്രീധർമശാസ്താ ക്ഷേത്രത്തിലായിരുന്നു ഓടക്കുഴൽ വായിച്ച് അരങ്ങേറ്റം നടത്തിയത്. ഹൈന്ദവ, ക്രിസ്ത്യൻ കീർത്തനങ്ങളാണ് ഓടക്കുഴൽ കൈയിലെടുത്താൽ ഇദ്ദേഹത്തിന്‍റെ മനസിൽ ഓടിയെത്തിയിരുന്നത്. മതമൈത്രിയുടെ സന്ദേശമാണ് ചെല്ലപ്പൻ മേസ്തിരിയുടെ ഓടക്കുഴലിലൂടെ പുറത്തുവന്നവയിൽ ഏറെയും . ചെത്തിമന്ദാരം തുളസി ... എന്ന ഹൈന്ദവ ഭക്തിഗാനവും നിത്യവിശുദ്ധയാം കന്യാമറിയമേ ... എന്ന ക്രിസ്ത്യൻ ഭക്തിഗാനവും നിരവധി ക്ഷേത്രങ്ങളിലും ദേവാലയങ്ങളിലും ഗാനമേള ടീമിനൊപ്പവും ചെല്ലപ്പൻ പാടിയിട്ടുണ്ട് . തീർഥാടന കേന്ദ്രമായ തുന്പച്ചി കുരിശുമലയിൽ വർഷങ്ങൾക്കു മുന്പ് ഫാ. തോമസ് ഓലിക്കൽ ഇടവക വികാരിയായിരിക്കുന്പോൾ പരിശുദ്ധാത്മാവേ നീ എഴുന്നള്ളി വരണമേ ... എന്ന ഗാനം ഓടക്കുഴലിൽ വായിച്ചത് മനസിൽനിന്ന് ഇന്നും മാഞ്ഞിട്ടില്ലെന്ന് ഇദ്ദേഹം പറയുന്നു. ഗുരുവായൂർ, തൊടുപുഴ ശ്രീകൃഷ്ണസ്വാമി, കാഞ്ഞിരമറ്റം മഹാദേവ ക്ഷേത്രം എന്നിവിടങ്ങളിൽ കീർത്തനങ്ങൾ വായിച്ചിട്ടുണ്ട്. ഓരോ കീർത്തനവും ഈശ്വരാർച്ചനയായി അർപ്പിക്കുന്പോൾ ഉള്ളിൽ ആനന്ദം നിറയും. ഇതാണ് ചെല്ലപ്പൻ മേസ്തിരിയുടെ നാദോപാസനയുടെ പിന്നിൽ മറഞ്ഞിരിക്കുന്ന മർമം . മേൽശാന്തി നൽകിയ ഓടക്കുഴൽ കുടയത്തൂർ ശരംകുത്തി ക്ഷേത്രത്തിലെ മേൽശാന്തി 15 വർഷം മുന്പ് നല്ല വിലയുള്ള ഓടക്കുഴൽ സമ്മാനമായി നൽകി. ഈ ഓടക്കുഴൽ ഉപയോഗിച്ചാണ് ഇപ്പോൾ വായിക്കുന്നത്. മർച്ചന്‍റ്സ് അസോസിയേഷൻ, റെസിഡന്‍റ്സ് അസോസിയേഷൻ, കുടുംബ സമ്മേളനങ്ങൾ എന്നിങ്ങനെ വിവിധ സംഘടനകളുടെ പരിപാടികളിൽ ഓടക്കുഴൽ വായനയിലൂടെ അനേകരെ ആവേശഭരിതരാക്കാനും അസ്വസ്ഥമായ മനസുമായി കടന്നുവരുന്നവരെ പ്രശാന്തതയിലേക്ക് നയിക്കാനും ഇദ്ദേഹത്തിന് കഴിഞ്ഞിട്ടുണ്ട്. നിരവധി സിനിമാഗാനങ്ങളും വായിച്ചിട്ടുണ്ട്. അവ ഓരോന്നും ഈണത്തിൽ വായിക്കുന്നത് കേട്ടാൽ ആരും ഒരു നിമിഷം നിന്നുപോകും. 15 വർഷമായി യോഗ അഭ്യസിക്കുന്നുണ്ട്. പ്രായം 78 ആയെങ്കിലും മേസ്തിരി ജോലിയും ഓടക്കുഴൽ വായനയും ഇദ്ദേഹത്തിന് ഇന്നും ഹരമാണ്. ആരോഗ്യം ദൈവത്തിന്‍റെ ദാനമായതിനാൽ അധ്വാനത്തെ ഈശ്വരാർച്ചനയായാണ് ഇദ്ദേഹം കാണുന്നത്. കാഞ്ഞിരമറ്റം സൂര്യൻകുന്നേൽ രത്നമ്മയാണ് ഭാര്യ. മക്കൾ: നിർമല, രാജേഷ്, സത്യൻ. ആണ്‍മക്കൾ രണ്ടുപേരും മേസ്തിരിമാരാണ്. ഇതിനുപുറമേ അച്ഛൻ ചെല്ലപ്പനും രാജേഷും ശില്പങ്ങളുടെ നിർമാണത്തിലും പ്രാഗത്ഭ്യം തെളിയിച്ചിട്ടുണ്ട്. ജോയി കിഴക്കേൽ

മോദി തെറ്റു തിരുത്തണം: സി.പി. മാത്യു

ചെറുതോണി: ഭാരതീയരുടെ ആത്മാഭിമാനം അമേരിക്കയുടെ മുന്നിൽ അടിയറവച്ച പ്രധാനമന്ത്രി നരേന്ദ്ര മോദി തെറ്റു തിരുത്താൻ തയാറാകണമെന്നു ഡിസിസി പ്രസിഡന്‍റ് സി.പി. മാത്യു. അമേരിക്കയുടെ ഇന്ത്യാവിരുദ്ധ നിലപാടുകൾക്കെതിരേയും മോദി ഭരണകൂടത്തിന്‍റെ നയപരാജയങ്ങൾക്കെതിരേയും എഐസിസി ആഹ്വാനപ്രകാരം ഡിസിസിയുടെ നേതൃത്വത്തിൽ ചെറുതോണിയിൽ നടത്തിയ പ്രതിഷേധ പ്രകടനവും യോഗവും ഉദ്ഘാടനം ചെയ്യുകയായിരുന്നു അദ്ദേഹം. യുഎസ് പ്രസിഡന്‍റ് ഡൊണാൾഡ് ട്രംപിനു മുന്നിൽ കീഴടങ്ങുന്ന ദുർബലനായ ഭരണാധികാരിയായി മോദി അധഃപതിച്ചിരിക്കയാണെന്ന് അദ്ദേഹം ആരോപിച്ചു. യോഗത്തിൽ ഡിസിസി ജന. സെക്രട്ടറി എം.ഡി. അർജുനൻ അധ്യക്ഷത വഹിച്ചു. കെപിസിസി ജന. സെക്രട്ടറി അഡ്വ. എസ്. അശോകൻ, ഇ.എം. ആഗസ്തി, ഇബ്രാഹിംകുട്ടി കല്ലാർ, ജോയി വെട്ടിക്കുഴി, എ.പി. ഉസ്മാൻ, സിറിയക് തോമസ്, ഡി. കുമാർ, ആഗസ്തി അഴകത്ത് തുടങ്ങിയവർ പ്രസംഗിച്ചു.

മുള്ളരിങ്ങാട് വീണ്ടും കാട്ടാന

വണ്ണപ്പുറം: മുള്ളരിങ്ങാട് മേഖലയിൽ ഭീതി വിതച്ച് വീണ്ടും കാട്ടാനയെത്തി. മുള്ളരിങ്ങാട്-തലക്കോട് റോഡരികിലാണ് പകൽസമയത്ത് കാട്ടാന എത്തിയത്. വെള്ളിയാഴ്ച ഉച്ചയോടെയാണ് ആനയെ പനങ്കുഴി ഭാഗത്ത് നിൽക്കുന്നതായി നാട്ടുകാർ കണ്ടത്. ഏറെ നേരം റോഡരികിൽ നിന്നതിന് ശേഷമാണ് ആന തിരികേ കാട്ടിലേക്ക് മടങ്ങിയത്. മുള്ളരിങ്ങാട് മേഖലയിൽ രാപകൽ വ്യത്യാസമില്ലാതെ കാട്ടാന ശല്യം രൂക്ഷമാണെന്ന് നാട്ടുകാർ പറഞ്ഞു.

കാറിടിച്ച് രണ്ട് വാഹനങ്ങൾ തകർന്നു; ഒരാൾക്ക് പരിക്ക്

കുമളി: അമരാവതി ഗവ. ഹയർസെക്കൻഡറി സ്കൂളിന് സമീപം നിയന്ത്രണം വിട്ട കാറിടിച്ച് ബൈക്ക് യാത്രികന് പരിക്ക്. കുമളി സ്വദേശി സാമി ( 35 ) നാണ് പരിക്കേറ്റത്. ഇന്നലെ വൈകുന്നേരം നാലരയോടെയാണ് അപകടം. മൂന്നാർ ഭാഗത്തുനിന്നു കുമളിക്ക് വരികയായിരുന്ന കാർ നിർത്തിയിട്ടിരുന്ന ബൈക്കിലും ഓട്ടോറിക്ഷയിലും ഇടിക്കുകയായിരുന്നു. പരിക്കേറ്റ സാം ബൈക്കിന് സമീപം നിൽക്കുന്പോഴാണ് അപകടം ഉണ്ടാത്. ഇടിയുടെ ആഘാതത്തിൽ പിന്നിൽ കിടന്നിരുന്ന ടിപ്പറിൽ ഇടിച്ചുനിന്ന ഓട്ടോക്കും കാറിനും ഇടയിൽപ്പെട്ട ബൈക്കും തകർന്നു. കാർ ഡ്രൈവർ ഉറങ്ങിപ്പോയതാണ് അപകടത്തിന് കാരണമെന്ന് പറയപ്പെടുന്നു.

വ്യാപാരി ദിനാചരണം

തൊടുപുഴ: മർച്ചന്‍റ്സ് അസോസിയേഷൻ, യൂത്ത് വിംഗ്, വനിതാ വിംഗ് എന്നിവയുടെ ആഭിമുഖ്യത്തിൽ വ്യാപാരി ദിനം ആഘോഷിച്ചു. അസോസിയേഷൻ പ്രസിഡന്‍റ് രാജു തരണിയിൽ അധ്യക്ഷത വഹിച്ചു. രക്ഷാധികാരി ടി.എൻ. പ്രസന്നകുമാർ സന്ദേശം നൽകി. മുതിർന്ന വ്യാപാരികളായ ടി.പി. ജോർജ്, രാധാകൃഷ്ണ പിള്ള, വി. എ. അബ്ദുൾ അസീസ് എന്നിവരെ പൊന്നാടയണിയിച്ച് ആദരിച്ചു. നിയോജക മണ്ഡലം പ്രസിഡന്‍റ് എൻ.പി. ചാക്കോ, സുബൈർ എസ്. മുഹമ്മദ്, സി.കെ. നവാസ് ആർ. രമേശ്, നാസർ സൈര, സാലി എസ്. മുഹമ്മദ്, അനിൽ കുമാർ, കെ.പി. ശിവദാസ്, ജോസ് കളരിയ്ക്കൽ, പ്രശാന്ത് കുട്ടപ്പാസ്, എം.എച്ച്. ഷിയാസ്, ലിജോണ്‍സ് ഹിന്ദുസ്ഥാൻ, പി. അജീവ്, സി.കെ. അബ്ദുൾ ഷെരീഫ്, ഗോപു ഗോപൻ, അനസ് പെരുനിലം എന്നിവർ പ്രസംഗിച്ചു. മുതലക്കോടത്തു പ്രവർത്തിക്കുന്ന തൊടുപുഴ മുനിസിപ്പാലിറ്റിയുടെ കീഴിലുള്ള വൃദ്ധ സദനത്തിലെ അന്തേവാസികൾക്ക് ഭക്ഷണ വിതരണവും നടത്തി. രാജാക്കാട്: ദേശീയ വ്യാപാരി ദിനത്തിൽ യൂണിറ്റ് ജനറൽ സെക്രട്ടറി ഒ.ആർ. രവിയുടെ നേതൃത്വത്തിൽ രാവിലെ പതാക ഉയർത്തിയ ശേഷം മധുര പലഹാര വിതരണം നടത്തി. വ്യാപാര ദിന സന്ദേശവും നൽകി. വൈസ് പ്രസിഡന്‍റ് വി.എസ്. ബിനുമോൻ, ട്രഷറർ ഇ.കെ. ശശികുമാർ, സെക്രട്ടറി വി.എൻ. അനിൽകുമാർ, ജില്ലാകൗൺസിലംഗം ഡി.എ. തോമസ്, വനിതാ വിംഗ് പ്രസിഡന്‍റ് മഞ്ജു അനിൽകുമാർ, ജന. സെക്രട്ടറി അഹിത സജീന്ദ്രൻ, ട്രഷറർ ജോബിന വർഗീസ് തുടങ്ങിയവർ നേതൃത്വം നൽകി.

ബൈക്കിൽ ഇടിച്ച വാഹനം നിർത്താതെ പോയി

വണ്ടിപ്പെരിയാർ: ഇരുചക്ര വാഹനത്തിൽ സഞ്ചരിച്ച വയോധികനെ ഇടിച്ചിട്ട വാഹനം നിർത്താതെ പോയി. എച്ച്.പി. സി. പുത്തൻപുരയ്ക്കൽ ജോസഫി (70) നെയാണ് പിന്നിൽനിന്നു വന്ന വാഹനം ഇടിച്ചിട്ടത്. തെറിച്ചു വീണ ജോസഫിനെ നാട്ടുകാരും മറ്റും ചേർന്ന് വണ്ടിപ്പെരിയാർ ആരോഗ്യകേന്ദ്രത്തിൽ എത്തിച്ചു. കൈക്കും തോളിനും നടുവിനും കാര്യമായ പരിക്കുള്ളതിനാൽ പ്രഥമ ശുശ്രൂഷക്ക് ശേഷം കുമളി സ്വകാര്യ ആശുപത്രിയിലേക്കു മാറ്റി. വണ്ടിപ്പെരിയാറിർ പോലീസ് സ്ഥലത്തെത്തി മേൽനടപടികൾ സ്വീകരിച്ചു.

സിഎംപി ഏരിയാ സമ്മേളനം

തൊടുപുഴ: സിഎംപി തൊടുപുഴ ഏരിയാ സമ്മേളനം സംസ്ഥാന സെക്രട്ടറി സുരേഷ് ബാബു ഉദ്ഘാടനം ചെയ്തു. കൃഷ്ണൻ, ജില്ലാ സെക്രട്ടറി കുര്യൻ, അനിൽകുമാർ, ബിജു, ശ്രീജ മധു, രാജൻ, ബക്കർ ജോസഫ്, അനീഷ് ചേനക്കര, താരാട്ട് അപ്പച്ചൻ, അരുണ്‍ മോഹൻ എന്നിവർ പ്രസംഗിച്ചു. വി.ആർ. അനിൽകുമാറിനെ സെക്രട്ടറിയായി തെരഞ്ഞെടുത്തു.

വൈദ്യുതി ബോർഡിന്‍റെ പിഴവിന് ബലിയാടായി ജനങ്ങൾ

തൊടുപുഴ: ഉദ്യോഗസ്ഥ പിഴവു മൂലം ഉപയോക്താവിന് കെഎസ്ഇബി നൽകിയ അമിത വൈദ്യുതി ബിൽ ഉപഭോക്തൃ പരാതി പരിഹാര ഫോറം റദ്ദാക്കി. തൊടുപുഴ മുണ്ടയ്ക്കാട്ട് പരേതനായ അഡ്വ. എം.എം. തോമസിന്‍റെ ഭാര്യ കൊച്ചുത്രേസ്യക്കാണ് വൈദ്യുതി ബോർഡ് അമിതമായ വൈദ്യുതി ബിൽ നൽകിയത്. കഴിഞ്ഞ മേയ് 15ന് 4,089 രൂപ വൈദ്യുതി ബിൽ ഇവർ അടച്ചിരുന്നു. എന്നാൽ ഇതിനു ശേഷം 51,768 രൂപ അടച്ചില്ലെങ്കിൽ വൈദ്യുതി വിച്ഛേദിക്കുമെന്നുള്ള നോട്ടീസ് ലഭിച്ചു. ഇതേത്തുടർന്നാണ് ഇവർ എറണാകുളത്തെ ഉപഭോക്തൃ പരാതി പരിഹാര ഫോറത്തെ സമീപിച്ചത്. എന്നാൽ കെഎസ്ഇബിയുടെ അവകാശ വാദം ഉപഭോക്തൃ കോടതി തള്ളിക്കളഞ്ഞു. തുടർന്ന് അമിത ബിൽ റദ്ദാക്കുകയും ബാധ്യതയിൽനിന്ന് ഒഴിവാക്കുകയും ചെയ്തു. ബിൽ തയാറാക്കുന്നതിലും രേഖകൾ കൈകാര്യം ചെയ്യുന്നതിൽ കെഎസ്ഇബി ഉദ്യോഗസ്ഥർ ജാഗ്രത പുലർത്തണമെന്നും കോടതി നിർദേശിച്ചു. തൊടുപുഴ നഗരസഭയിൽ ഒട്ടേറെ പേർക്ക് ഉദ്യോഗസ്ഥരുടെ പിഴവു മൂലം ഇത്തരത്തിൽ അമിത വൈദ്യുതിബിൽ ലഭിച്ചിരുന്നു. താത്കാലിക ജീവനക്കാരൻ വരുത്തിയ പിഴവാണ് അമിത ബിൽ വരാൻ ഇടയാക്കിയത്. അന്വേഷണത്തിന്‍റെ ഭാഗമായി ഇയാളെ സസ്പെൻഡ് ചെയ്യുകയും ചെയ്തിരുന്നു. പതിനായിരം മുതൽ അറുപതിനായിരം വരെ ബിൽ ലഭിച്ചവരുമുണ്ട്. തുക അടയ്ക്കാത്തതിനെത്തുടർന്ന് കണക്‌ഷൻ വിച്ഛേദിക്കാൻ വൈദ്യുതി ബോർഡ് നീക്കം ആരംഭിച്ചതിനെത്തുടർന്ന് നഗരസഭ അധികൃതർ ഇവരുമായി ചർച്ച നടത്തിയിരുന്നു. തുടർന്ന് തവണകളായി പണം അടയ്ക്കാൻ കെഎസ്ഇബി സാവകാശം നൽകിയതോടെയാണ് ഇവർക്ക് താത്കാലിക ആശ്വാസം ലഭിച്ചത്. പലരും രണ്ടു വർഷത്തോളമായി വൈദ്യുതി ബില്ലിനൊപ്പം ഈ തുക അടച്ചു വരികയാണ്. തുകയ്ക്ക് അമിത പലിശയും പിഴ പലിശയും ഈടാക്കുന്നുണ്ട്. ഉപയോക്താക്കൾ ആദ്യഘട്ടത്തിൽ കോടതിയെ സമീപിച്ചെങ്കിലും തുക കോടതിയിൽ കെട്ടി വയ്ക്കണമെന്ന നിബന്ധനയെ തുടർന്ന് കേസിൽ നിന്നും പിൻമാറുകയായിരുന്നു. ഫലത്തിൽ വൈദ്യുതി ബോർഡ് വരുത്തിയ പിഴവിന് ബലിയാടായത് സാധാരണക്കാരായ ഉപയോക്താക്കളാണ്.

യുഡിഎഫ് നേതൃസംഗമവും പി.ജെ. ജോസഫിനെ ആദരിക്കലും

തൊടുപുഴ: യുഡിഎഫ് നേതൃസംഗമം 16ന് രാവിലെ 10ന് മുട്ടം റൈഫിൾ ക്ലബ് ഓഡിറ്റോറിയത്തിൽ നടക്കുമെന്ന് ജില്ലാ ചെയർമാൻ ജോയി വെട്ടിക്കുഴി, കണ്‍വീനർ പ്രഫ. എം.ജെ. ജേക്കബ് എന്നിവർ അറിയിച്ചു. ശതാഭിഷിക്തനായ മുതിർന്ന നേതാവ് പി.ജെ. ജോസഫ് എംഎൽഎയെ യോഗത്തിൽ പ്രതിപക്ഷ നേതാവ് വി.ഡി. സതീശൻ ആദരിക്കും. ഡീൻ കുര്യാക്കോസ് എംപി, യുഡിഎഫ് നേതാക്കളായ സി.പി. മാത്യു, എസ്. അശോകൻ, ഇ.എം.ആഗസ്തി, കെ.എം.എ. ഷുക്കൂർ, റോയി കെ. പൗലോസ്, ടി.എം.സലിം, തോമസ് പെരുമന, ജോയി തോമസ്, ഇബ്രാഹിംകുട്ടി കല്ലാർ, സുരേഷ് ബാബു, ജി. വർഗീസ്, കെ.എ. കുര്യൻ എന്നിവർ പ്രസംഗിക്കും.

ബേബി മെമ്മോറിയലിൽ കാർഡിയോളജി ക്യാന്പ്

തൊടുപുഴ: സ്വാതന്ത്ര്യ ദിനാഘോഷങ്ങളുടെ ഭാഗമായി ബേബി മെമ്മോറിയൽ ആശുപത്രിയിൽ നാളെ മുതൽ 16 വരെ സഹൃദയ കാർഡിയോളജി ക്യാന്പ് സംഘടിപ്പിക്കും. കാർഡിയോളജി കണ്‍സൾട്ടേഷൻ, ജനറൽ കണ്‍സൾട്ടേഷൻ, ഇസിജി പരിശോധന, അഞ്ചു കിലോമീറ്റർ ചുറ്റളവിൽ യാത്രാസൗകര്യം എന്നിവ സൗജന്യമായിരിക്കും. കുറഞ്ഞ നിരക്കിൽ ട്രഡ്മിൽ ടെസ്റ്റ്, ആൻജിയോഗ്രാം എന്നിവ നടത്തും. കാർഡിയോളജി വിദഗ്ധരായ ഡോ. എസ്. അബ്ദുൾ ഖാദർ, ഡോ. രാജീവ് വർഗീസ് എന്നിവർ നേതൃത്വം നൽകും. ഫോണ്‍. 8589945888, 8589091888.

വോട്ടർ പട്ടിക: 64,151 പേർ അപേക്ഷ നൽകി

ഇടുക്കി: തദ്ദേശസ്ഥാപനങ്ങളിലേക്കുള്ള തെരഞ്ഞെടുപ്പിന് മുന്നോടിയായി വോട്ടർ പട്ടികയിൽ പുതുതായി പേരു ചേർക്കാൻ ജില്ലയിൽ ഇതുവരെ അപേക്ഷ നൽകിയത് 64,151 പേർ. കരട് പട്ടികയിലെ വിവരങ്ങൾ തിരുത്തുന്നതിന് 391 അപേക്ഷകൾ ലഭിച്ചു. ഒരു വാർഡിൽനിന്നു മറ്റൊരു വാർഡിലേക്ക് മാറ്റുന്നതിന് 7059 പേർ അപേക്ഷ നൽകിയിട്ടുണ്ട്. കൂടാതെ വോട്ടർ പട്ടികയിൽനിന്നു പേര് ഒഴിവാക്കാനും ഇതു സംബന്ധിച്ച ആക്ഷേപങ്ങളുമായി 8862 അപേക്ഷകരുണ്ട്. ഇന്നലെ ഉച്ച വരെയുള്ള കണക്കുകൾ പ്രകാരമാണിത്. പേരു ചേർക്കുന്നതിനുള്ള തീയതി 12 വരെ നീട്ടിയിട്ടുണ്ട്. ഇതുമായി ബന്ധപ്പെട്ട് തദ്ദേശസ്വയംഭരണ സ്ഥാപനങ്ങൾ ഇന്നും നാളെയും തുറന്നു പ്രവർത്തിക്കും. പേര് ചേർക്കുന്നതിനും പട്ടികയിലെ വിലാസം ഉൾപ്പെടെയുള്ള കാര്യങ്ങളിൽ തിരുത്തൽ വരുത്തുന്നതിനും ഒരു വാർഡിൽനിന്നു മറ്റൊരു വാർഡിലേക്കാ പോളിംഗ് സ്റ്റേഷനിലേക്കോ സ്ഥാനമാറ്റം വരുത്തുന്നതിനും പേര് ഒഴിവാക്കുന്നതിനുമുള്ള അപേക്ഷകൾ 12 വരെ നൽകാം. കമ്മീഷന്‍റെ sec.kerala. gov.in വെബ്സൈറ്റിലാണ് ഓണ്‍ലൈൻ അപേക്ഷകൾ സമർപ്പിക്കേണ്ടത്. 2025 ജനുവരി ഒന്നിനോ അതിന് മുന്പോ 18 വയസ് പൂർത്തിയായവർക്ക് പേര് ചേർക്കാം.

കെ.സി. ജോർജ് ചരമവാർഷിക ആചരണം

കട്ടപ്പന: മികച്ച നാടക കൃത്തിനുള്ള സംസ്ഥാന അവാർഡ് രണ്ടു തവണ കരസ്ഥമാക്കിയ കെ.സി. ജോർജിന്‍റെ ഒന്നാം ചരമവാർഷികാചരണം സെപ്റ്റംബർ 23ന് കട്ടപ്പനയിൽ നടത്തും. കെസി സൗഹൃദക്കൂട്ടായ്മയുടെ നേതൃത്വത്തിലാണ് പരിപാടി സംഘടിപ്പിക്കുന്നത്. അനുസ്മരണ യോഗവും നാടക അവതരണവും നടക്കും. സ്വാഗത സംഘം ചെയർപേഴ്സണായി നഗരസഭാ ചെയർ പേഴ്സണ്‍ ബീന ടോമിയെയും കണ്‍വീനറായി എം.സി. ബോബെനയും തെരഞ്ഞെടുത്തു. ജോയി വെട്ടിക്കുഴി, സാജൻ ജോർജ്, ഇ.ജെ. ജോസഫ്, സുഗതൻ കരുവാറ്റ എന്നിവരാണ് രക്ഷാധികാരികൾ.

എം.ഡി. തോമസ് അനുസ്മരണം

പീരുമേട്: ദീർഘകാലം ഡിസിസി പ്രസിഡന്‍റും ജില്ലാ പഞ്ചായത്ത് പ്രസിഡന്‍റും കൺസ്യൂമർ ഫെഡ് ചെയർമാനുമായിരുന്ന എം.ഡി. തോമസ് അനുസ്മരണ സമ്മേളനം പീരുമേട്ടിൽ നടന്നു. എം.ഡി. തോമസ് ഫൗണ്ടേഷന്‍റെ ആഭിമുഖ്യത്തിൽ ഗ്രീൻവാലി ഹാളിൽ ചേർന്ന സമ്മേളനം വാഴുർ സോമൻ എംഎൽഎ ഉദ്ഘാടനം ചെയ്തു. എഐസിസി അംഗം ഇ.എം. ആഗസ്തി അധ്യക്ഷത വഹിച്ചു. കെപിസിസി ജനറൽ സെക്രട്ടറി എസ്. അശോകൻ, കേരള കോൺഗ്രസ്-എം സംസ്ഥാന സെക്രട്ടറി അലക്സ് കോഴിമല, സഹകരണ പെൻഷൻ ബോർഡ് ചെയർമാൻ ആർ. തിലകൻ, മുൻ ഡിസിസി പ്രസിഡന്‍റ് റോയി കെ. പൗലോസ്, ഇബാഹിം കുട്ടി കല്ലാർ, സിപിഐ സംസ്ഥാന കമ്മിറ്റി അംഗം ജോസ് ഫിലിപ്പ്, പീരുമേട് പഞ്ചായത്ത് പ്രസിഡൻ്റ് ആർ. ദിനേശൻ, ഡിസിസി സെക്രട്ടറിമാരായ സിറിയക് തോമസ്, ഷാജി പൈനാടത്ത്, കോൺഗ്രസ് ബ്ലോക്ക് പ്രസിഡന്‍റ് ജോർജ് ജോസഫ്, ഡോ. സജി പോത്തൻ തോമസ്, അഡ്വ. സാബു തോമസ് എന്നിവർ പ്രസംഗിച്ചു. മുതിർന്ന കോൺഗ്രസ് പ്രവർത്തകരായ പി.കെ. ചന്ദ്രശേഖരൻ, വി.സി. ജോസഫ് എന്നിവരെ സമ്മേളനത്തിൽ ആദരിച്ചു. എസ്എസ്എൽസി, പ്ലസ് ടു പരീക്ഷകളിൽ മികച്ച വിജയം നേടിയ വിദ്യാർഥികളെ സമ്മേളനത്തിൽ അനുമോദിച്ചു.

റവന്യു ഓഫീസുകൾക്ക് തുടർച്ചാനുമതി നൽകണം: എൻജിഒ അസോ.

തൊടുപുഴ: കർഷകരുടെ കൈവശഭൂമിക്ക് പട്ടയം നൽകുന്നതിനായി ആരംഭിച്ച ഭൂ പതിവ് ഓഫിസുകളുടെയും ദേശീയ പാത വികസനത്തിന് സ്ഥലം ഏറ്റെടുക്കുന്നതിനായി ആരംഭിച്ച ലാൻഡ് അക്വിസിഷൻ ഓഫീസിന്‍റെയും തുടർച്ചാനുമതി അടിയന്തരമായി നൽകണമെന്ന് എൻജിഒ അസോസിയേഷൻ ജില്ലാ കമ്മിറ്റി ആവശ്യപ്പെട്ടു. പട്ടയ നടപടികൾ വേഗത്തിൽ പൂർത്തിയാക്കാൻ ആരംഭിച്ച ഇടുക്കി, കരിമണ്ണൂർ, നെടുങ്കണ്ടം, കട്ടപ്പന, രാജകുമാരി, മുരിക്കാശേരി, പീരുമേട് ഭൂപതിവ് ഓഫീസുകൾ വഴി ഇതുവരെ അൻപതിനായിത്തിലധികം പട്ടയങ്ങളാണ് വിതരണം നടത്തിയത്. പട്ടയ മിഷന്‍റെ ഭാഗമായി അടുത്ത മാസങ്ങളിൽ ഇരുപതിനായിരത്തോളം പട്ടയങ്ങൾ വിതരണത്തിന് തയാറെടുക്കുന്ന ഓഫീസുകളുടെ തുടച്ചാനുമതിയാണ് സർക്കാർ വൈകിപ്പിക്കുന്നത്. ജില്ലയിലൂടെ കടന്നുപോകുന്ന ദേശീയപാതകളുടെ വികസനത്തിനായി സ്ഥലം ഏറ്റെടുക്കുന്നതിന് കഞ്ഞിക്കുഴിയിൽ ആരംഭിച്ച ലാൻഡ് അക്വിസിഷൻ ഓഫീസിനും തുടർച്ചാനുമതി ലഭിച്ചിട്ടില്ല. കഴിഞ്ഞ മാർച്ച് 31 വരെയാണ് ഈ ഓഫീസുകൾക്ക് പ്രവർത്തനാനുമതി ഉണ്ടായിരുന്നത്. പ്രവർത്തനാനുമതി ഇല്ലാത്തതിനാൽ ജീവനക്കാരുടെ ശന്പളം പോലും മുടങ്ങിയ സാഹചര്യമാണ്. ജില്ലയിലെ പ്രവർത്തനാനുമതി അവസാനിച്ച ഓഫീസുകൾക്ക് അവ ദീർഘിപ്പിച്ചു നൽകുന്നതിന് ധനവകുപ്പ് അനുകൂലമായി റിപ്പോർട്ട് നൽകിയിട്ടും തുടർച്ചാനുമതി ഉത്തരവ് ഇറക്കാത്ത സർക്കാർ നടപടിയിൽ എൻജിഒ അസോസിയേഷൻ ജില്ലാ കമ്മിറ്റി പ്രതിഷേധിച്ചു.

വിശ്വജ്യോതിയിൽ എംബിഎ ബാച്ച് ഉദ്ഘാടനം

വാഴക്കുളം: വിശ്വജ്യോതി സ്കൂൾ ഓഫ് മാനേജ്മെന്‍റ് സ്റ്റഡീസിലെ എംബിഎ പുതിയ ബാച്ചിന്‍റെ ഉദ്ഘാടനം ജിയോജിത്ത് ഫിനാൻഷ്യൽ സർവീസസ് സിഇഒ സി.ജെ. ജോർജ് നിർവഹിച്ചു. കോളജ് മാനേജർ മോണ്‍. പയസ് മലേക്കണ്ടത്തിൽ, ഡയറക്ടർ റവ. ഡോ. പോൾ പാറത്താഴം, പ്രിൻസിപ്പൽ ഡോ. കെ.കെ. രാജൻ, വൈസ് പ്രിൻസിപ്പൽ പ്രഫ. സോമി പി. മാത്യു, ഡിപ്പാർട്ട്മെന്‍റ് കണ്‍സൾട്ടന്‍റ് ഫാ. ജിനോ പുന്നമറ്റത്തിൽ, എംബിഎ വിഭാഗം മേധാവി ഡോ. ഷെല്ലി ജോസ്, ട്രഷറർ കെ.വി. തോമസ് തുടങ്ങിയവർ പ്രസംഗിച്ചു.

തൊമ്മൻകുത്തിൽ അവകാശവുമായി വനംവകുപ്പ്

തൊമ്മൻകുത്ത്: ഇല്ലാത്ത ജണ്ടകൾ ഉണ്ടെന്ന് സ്ഥാപിച്ച് കൈവശഭൂമി വനഭൂമിയെന്ന് വരുത്തിത്തീർക്കാൻ വനം വകുപ്പ് ഗൂഢനീക്കം ആരംഭിച്ചതായി തൊമ്മൻകുത്ത് നാരങ്ങാനം ജാഗ്രതാ സമിതി ആരോപിച്ചു. വിവരാവകാശ പ്രകാരം പുറത്തു വന്ന രേഖയിൽ പുതിയ രണ്ട് ജണ്ടകൾ കാണിച്ചിട്ടുണ്ട്. ഇവ എവിടെയെന്ന് ഇതുവരെ വനം വകുപ്പ് വ്യക്തമാക്കുന്നില്ല. ജിയോ മാപ്പിംഗ് പ്രകാരം ഒരു കയ്യാലയുടെയും നാരങ്ങാനത്ത് കുടിയേറ്റം നടക്കുന്നതിന് മുന്പ് എവിടെയോ ഉണ്ടായിരുന്ന കൽക്കൂട്ടത്തിന്‍റയും അടുത്തുനിന്നാണ് ലൊക്കേഷൻ ഉൾപ്പെടെ കാണിച്ചിട്ടുള്ള ഫോട്ടോ പുറത്തു വിട്ടിരിക്കുന്നത്. ഇത് എന്ന് സ്ഥാപിച്ചതാണെന്ന് വ്യക്തല്ല. വ്യാജ ജണ്ടകൾ ഉണ്ടാക്കി കുരിശ് നിൽക്കുന്ന സ്ഥലം ജണ്ടയ്ക്കുള്ളിലാണെന്ന് വരുത്തി തീർക്കാനുള്ള ശ്രമമാണ് നടക്കുന്നത്. യഥാർഥ ജണ്ടകൾക്ക് പുറത്തുള്ള സ്ഥലത്ത് ഇനിയും അധികാരം സ്ഥാപിക്കാനുള്ള വനം വകുപ്പിന്‍റെ ഒരു നീക്കവും അനുവദിക്കില്ലെന്നും ഇവർ പറഞ്ഞു. നാരങ്ങാനത്ത് തൊമ്മൻകുത്ത് സെന്‍റ് തോമസ് പള്ളി കൈവശഭൂമിയിൽ സ്ഥാപിച്ച കുരിശ് നിൽക്കുന്നതുൾപ്പെടെ കർഷകന്‍റെ ഭൂമി വനഭൂമിയാണെന്ന് വരുത്തി തീർക്കാനുളള ശ്രമമാണ് ഇപ്പോൾ നടത്തുന്നതെന്നും ആക്ഷേപമുയരുന്നുണ്ട്. കൂടാതെ ആനയാടിക്കുത്ത് വിനോദ സഞ്ചാര കേന്ദ്രത്തിന് അടുത്തു വരെയുള്ള ഭാഗം കുടിയൊഴിപ്പിച്ച് ഇവിടം പിടിച്ചടക്കാനും വേണ്ടിയാണ് വനം വകുപ്പിന്‍റെ നീക്കമെന്നും നേതാക്കളായ ഫാ. ജയിംസ് ഐക്കമറ്റം, ഇമാം അബ്ദുൾ സമദ് സഖാഫി, പ്രകാശൻ വടുതലയിൽ, മനോജ് മാമല, സോജൻ കുന്നുംപുറം, ഫ്രാങ്ക്ളിൻ പാലക്കാട്ട് എന്നിവർ ആരോപിച്ചു.

ഉപാസന സാംസ്കാരിക കേന്ദ്രം റൂബി ജൂബിലി നിറവിൽ

തൊടുപുഴ: നാലു പതിറ്റാണ്ടുകളായി തൊടുപുഴയുടെ സാംസ്കാരികമുഖമായി നിലകൊള്ളുന്ന ഉപാസന സാംസ്കാരിക കേന്ദ്രത്തിന്‍റെ റൂബി ജൂബിലി ആഘോഷങ്ങൾക്ക് നാളെ തുടക്കമാകുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. റവ. ഡോ. ആൽബർട്ട് നന്പ്യാപറന്പിൽ സിഎംഐയുടെ നേതൃത്വത്തിൽ ആരംഭിച്ച എറണാകുളം ചാവറ കൾച്ചറൽ സെന്‍ററിനു ശേഷമാണ് 1985 ജനുവരി 28 ന് സിഎംഐ സഭയുടെ കീഴിൽ ഉപാസന സാംസ്കാരിക കേന്ദ്രത്തിനു തുടക്കം കുറിച്ചത്. മുൻ കേരള ഗവർണർ പി. രാമചന്ദ്രനാണ് സാംസ്കാരിക കേന്ദ്രത്തിന്‍റെ ഉദ്ഘാടനം നിർവഹിച്ചത്. പി.ജെ. ജോസഫ് എംഎൽഎ, പി.കെ. കൃഷ്ണൻനായർ, കുട്ടിസാഹിബ് എന്നിവരായിരുന്നു രക്ഷാധികാരികൾ. തുടർന്ന് എല്ലാ ഞായറാഴ്ചകളിലും വിവിധ വിഷയങ്ങളിൽ സെമിനാറുകളും പ്രഭാഷണങ്ങളും സംഘടിപ്പിച്ചു വരികയാണ്. എം.വി. ദേവൻ, ഒ.എൻ.വി. കുറുപ്പ്, സുകുമാർ അഴീക്കോട്, ബാലചന്ദ്രൻ ചുള്ളിക്കാട്, ജെറി അമൽദേവ്, സിപ്പി പള്ളിപ്പുറം, ഡി. വിനയചന്ദ്രൻ, എം. തോമസ് മാത്യു, എം. ലീലാവതി, സ്വാമി സന്ദീപനാനന്ദഗിരി, പെരുന്പടവം ശ്രീധരൻ, ഡോ. ഡി. ബാബുപോൾ, സ്വാമി നിത്യചൈതന്യയതി, ജോ പോൾ, ഏഴാച്ചേരി രാമചന്ദ്രൻ, ജസ്റ്റീസ് വി.കെ. ഷംസുദ്ദീൻ, കുഞ്ഞുണ്ണി മാഷ്, കടമ്മനിട്ട രാമകൃഷ്ണൻ, പി. വത്സല, പി. ഗോവിന്ദപിള്ള, ജോർജ് ഓണക്കൂർ, പി.ജെ. ജോസഫ്, കെ.എം. മാണി, പന്ന്യൻ രവീന്ദ്രൻ, പി.ടി. തോമസ്, എം.കെ. സാനു, ചെമ്മനം ചാക്കോ, അയ്യപ്പണിക്കർ, കെ.എൽ. മോഹനവർമ്മ, ഫാ. വടക്കൻ തുടങ്ങി വിവിധ സാംസ്കാരിക, രാഷ‌്ട്രീയ നായകർ ഇവിടെ നടത്തിയ സെമിനാറുകളിൽ പങ്കെടുത്തിട്ടുണ്ട്. ഇതിനു പുറമേ റിട്ടയർ ചെയ്തവർക്കായി സൗഹൃദ സദസ്, കാവ്യ കഥാവേദി, സംഗീതസന്ധ്യ, ബാലോപാസന, വനിതാ വേദി, യുവവേദി എന്നിവയും ഉപാസനയിൽ സംഘടിപ്പിച്ചു വരുന്നുണ്ട്. ഇതിനു പുറമെ രാവിലെ 9.30 മുതൽ 1.30 വരെയും ഉച്ചകഴിഞ്ഞ് 2.30 മുതൽ 5.30 വരെയും ലൈബ്രറിയും റീഡിംഗ് റൂമും പ്രവർത്തിച്ചുവരുന്നുണ്ട്. ഉപാസന ഓഡിറ്റോറിയത്തിൽ നടക്കുന്ന ആഘോഷപരിപാടികളുടെ ഉദ്ഘാടനം പി.ജെ. ജോസഫ് എംഎൽഎ നിർവഹിക്കും. മൂവാറ്റുപുഴ കാർമൽ പ്രൊവിൻഷ്യൽ ഫാ. മാത്യു മഞ്ഞക്കുന്നേൽ സിഎംഐ അധ്യക്ഷത വഹിക്കും. എംജി യൂണിവഴ്സിറ്റി മുൻ വൈസ് ചാൻസലർ ഡോ. സിറിയക് തോമസ് "ഭാരതം ഇന്നലെ, ഇന്ന്, നാളെ' എന്ന വിഷയത്തിൽ മുഖ്യപ്രഭാഷണം നടത്തും. റൂബി ജൂബിലിയുടെ സമാപന സമ്മേളനം ഡിസംബർ 14ന് വിപുലമായ രീതിയിൽ സംഘടിപ്പിക്കും. പത്രസമ്മേളനത്തിൽ ഡയറക്ടർ ഫാ. പ്രിൻസ് പരത്തനാൽ സിഎംഐ, സെക്രട്ടറി ഡോ. ജോണ്‍ മുഴുത്തേറ്റ്, ജോയിന്‍റ് സെക്രട്ടറിമാരായ തോമസ് കുണിഞ്ഞി, സുകുമാർ അരിക്കുഴ, ലൈബ്രറേറിയൻ ഷാജി മുതുകുളം എന്നിവർ പങ്കെടുത്തു.

കോണ്‍ഗ്രസ് ഗ്രൂപ്പ് പോര്: അശ്ലീല പ്രചാരണത്തിന് കേസ്

ഇടുക്കി: ജില്ലയിലെ പ്രമുഖ കോണ്‍ഗ്രസ് നേതാവിന്‍റെ കുടുംബാംഗങ്ങളെ അപമാനിക്കുന്ന തരത്തിൽ ഉൗമക്കത്തുകൾ പ്രചരിപ്പിച്ചതായി പരാതി. ഇവരുടെ പരാതിയുടെ അടിസ്ഥാനത്തിൽ തൊടുപുഴ പോലീസ് കേസെടുത്തു. സ്ത്രീത്വത്തെ അപമാനിക്കൽ വകുപ്പ് പ്രകാരമാണ് കേസെടുത്തിരിക്കുന്നത്. 15 ലേറെ കത്തുകൾ ഇത്തരത്തിൽ പ്രചരിക്കുന്നുണ്ടെന്ന് പോലീസ് പറഞ്ഞു. തിരുവനന്തപുരം, കട്ടപ്പന എന്നിവിടങ്ങളിൽനിന്നാണ് കത്തുകൾ അയച്ചിരിക്കുന്നത്. ജില്ലയിലെ കോണ്‍ഗ്രസ് നേതാക്കൾക്കാണ് കത്ത് കിട്ടിയത്. ഇവരാണ് വിവരം പരാതിക്കാരിയുടെ ശ്രദ്ധയിൽപെടുത്തിയത്. രാഷ്ട്രീയ, അശ്ലീല പരാമർശങ്ങൾ കത്തിലുണ്ടെന്നാണ് വിവരം. പാർട്ടിയ്ക്കുള്ളിലെ ഗ്രൂപ്പ് പോരിന്‍റെ ഭാഗമായാണ് കത്തുകൾ പ്രചരിപ്പിച്ചതെന്നാണ് സൂചന.

വയോധികൻ ബസിൽനിന്നു വീണു മരിച്ചു

ശാന്തമ്പാറ: സ്വകാര്യ ബസിൽനിന്നു വീണ് വയോധികൻ മരിച്ചു. ശാന്തൻപാറ ചൂണ്ടൽ സ്വദേശി സെൽവരാജ് (64)ആണ് മരിച്ചത്. ഇന്നലെ രാവിലെ 11.30 നാണ് അപകടം ഉണ്ടായത്. പൂപ്പാറയിൽനിന്നു സ്വകാര്യ ബസിൽ കയറിയ സെൽവരാജ് ചൂണ്ടലിൽ എത്തിയപ്പോൾ ബസിൽനിന്ന് ഇറങ്ങുന്നതിനിടെ റോഡിലേക്ക് വീഴുകയായിരുന്നു. വീഴ്ച്ചയിൽ തലക്ക് ഗുരുതരമായി പരിക്കേറ്റ ഇയാളെ രാജകുമാരിയിലെ സ്വകാര്യ ആശുപത്രിയിൽ എത്തിച്ചെങ്കിലും മരിച്ചു. മൃതദേഹം പോസ്റ്റ്മാർട്ടത്തിനായി മൃതദേഹം അടിമാലി താലൂക്ക് ആശുപത്രിയിലേക്ക് മാറ്റി. ഭാര്യ: ശങ്കരമ്മ. മക്കൾ: ഉമാ മഹേശ്വരി (ശാന്തൻപാറ പഞ്ചായത്തംഗം), ശരണ്യ, ഭാനുപ്രിയ. മരുമക്കൾ: ശ്രീകുമാർ, അൻപഴകൻ, ജിതിൻ.

കൊന്നത്തടി കുടിവെള്ള പദ്ധതി അന്തിമ ഘട്ടത്തിൽ: മന്ത്രി റോഷി അഗസ്റ്റിൻ

ചെറുതോണി: ജൽജീവൻ മിഷൻ പദ്ധതിയുടെ ഭാഗമായി കൊന്നത്തടി പഞ്ചായത്തിലെ മുഴുവൻ വീടുകളിലും കുടിവെള്ളം എത്തിക്കുന്ന പ്രവൃത്തികൾക്ക് 146.8 കോടി അനുവദിച്ചതായി മന്ത്രി റോഷി അഗസ്റ്റിൻ അറിയിച്ചു. പൊന്മുടി ഡാമിൽ സ്ഥാപിക്കുന്ന ഫ്ളോട്ടിംഗ് പന്പിൽനിന്നു പ്രതിദിനം 22 ദശലക്ഷം ലിറ്റർ ഉത്പാദനശേഷിയുള്ള ശുദ്ധീകരണശാലയിലേക്ക് ജലമെത്തിച്ച് വിതരണം ചെയ്യുന്നതാണ് പദ്ധതി. ശുദ്ധീകരിച്ച ജലം പ്ലാന്‍റിനോടനുബന്ധിച്ചുള്ള പന്പ്ഹൗസിൽനിന്നു പൂതാളി, നാടുകാണി, ആൽപ്പാറ, പന്നിയാർകുട്ടി എന്നിവിടങ്ങളിലെ ടാങ്കിലേക്കെത്തിക്കും. തുടർന്ന് ആൽപാറ ടാങ്കിൽനിന്ന് ഇഞ്ചപതാൽ ടാങ്കിലേക്കും പൂതാളി ടാങ്കിൽനിന്നു കണ്ണാടിപ്പാറ, കുരുവിളാസിറ്റി ടാങ്കുകളിലേക്കും പന്പിംഗ് മെയിനായി പണിക്കൻകുടി ടോപ് ടാങ്കിലേക്കും വെള്ളം എത്തിക്കും. കുരുവിളാസിറ്റി ടാങ്കിൽനിന്നു മെയിൻ പന്പിംഗ് ടാങ്കായ കുരിശുകുത്തി ടാങ്കിലേക്കും ഗ്രാവിറ്റി വഴി നിലവിലെ ചിന്നാർ, ഇഞ്ചത്തൊട്ടി ടാങ്കുകളിലേക്കും പണിക്കൻകുടി ടോപ് ടാങ്കിൽനിന്നു പണിക്കൻകുടി, പറുസിറ്റി എന്നീ ടാങ്കുകളിലേക്കും വെള്ളം എത്തിക്കും. പൂതാളി ടാങ്കിൽനിന്നു മെയിൻ പന്പിംഗ് ടാങ്കായ തിങ്കൾകാട് ടാങ്കിലേക്ക് വെള്ളമെത്തിച്ച് അവിടെനിന്നു പന്പ് ചെയ്ത് കരിമലയിലെ ടാങ്കിലേക്ക് എത്തിക്കും. കൊന്നത്തടി പഞ്ചായത്തിൽ 7863 കണക്‌ഷൻ നൽകാനാണ് ലക്ഷ്യമിടുന്നത്. ശുദ്ധീകരണശാല നിർമിക്കുന്ന സ്ഥലത്തെ മരങ്ങൾ നീക്കം ചെയ്യുന്നതിന് ഇതിനോടകം അനുമതി ലഭിച്ചിട്ടുണ്ടെന്നും മന്ത്രി പറഞ്ഞു.

ഇരട്ടയാർ സെന്‍റ് തോമസിൽ എസ്പിസി യൂണിറ്റ് ഉദ്ഘാടനം

ഇരട്ടയാർ: ഇരട്ടയാർ സെന്‍റ് തോമസ് ഹയർ സെക്കൻഡറി സ്കൂളിൽ പുതിയതായി അനുവദിച്ച സ്റ്റുഡന്‍റ് പോലീസ് കേഡറ്റ് യൂണിറ്റിന്‍റെ ഉദ്ഘാടനം മന്ത്രി റോഷി അഗസ്റ്റിൻ നിർവഹിച്ചു. ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാംകുന്നേൽ അധ്യക്ഷത വഹിച്ച യോഗത്തിൽ ഇടുക്കി രൂപത വികാരി ജനറാൾ മോണ്‍. ജോസ് കരിവേലിക്കൽ അനുഗ്രഹ പ്രഭാഷണം നടത്തി. ഇടുക്കി എഎസ്പി ഇമ്മാനുവൽ പോൾ പദ്ധതി വിശദീകരണവും ഗ്രാമപഞ്ചായത്ത് പ്രസിഡന്‍റ് ആനന്ദ് സുനിൽകുമാർ സിപിഒ സർട്ടിഫിക്കറ്റ് വിതരണവും നടത്തി. കട്ടപ്പന എസ്എച്ച്ഒ ടി.സി. മുരുകൻ എസ്പിസി യൂണിഫോം വിതരണവും അസിസ്റ്റന്‍റ് നോഡൽ ഓഫീസർ എസ്.ആർ. സുരേഷ് ബാബു എസ്പിസി ഓഫീസ് ഉദ്ഘാടനവും നിർവഹിച്ചു. ലഹരിവിരുദ്ധ മത്സരങ്ങളിൽ വിജയിച്ച വിദ്യാർഥികളെ സ്കൂൾ മാനേജർ ഫാ. സഖറിയാസ് കുമ്മണ്ണൂപ്പറന്പിൽ ആദരിച്ചു. ചടങ്ങിൽ വാർഡ് മെന്പർ ജിൻസണ്‍ വർക്കി, ഹെഡ്മാസ്റ്റർ എം. വി. ജോർജുകുട്ടി, പിടിഎ പ്രസിഡന്‍റ് സിജോ ഇലന്തൂർ, എംപിടിഎ പ്രസിഡന്‍റ് ബിനു ജസ്റ്റിൻ, ജിറ്റോ മാത്യു, ലിജോ ജോയി, എ‌ഡ‌‌്‌വിൻ ജോസഫ് എന്നിവർ പ്രസംഗിച്ചു.

നായ്ക്കൾക്ക് അടി(മാലി)പൊളി!

സ്വന്തം ലേഖകർ അടിമാലിക്കാരുടെ കാര്യം കഷ്ടം തന്നെ. നഗരത്തിൽ ഇറങ്ങിയാൽ നായകടി ഏല്ക്കാതെ തിരിച്ചുപോകാൻ പറ്റിയാൽ ഭാഗ്യം. രാത്രിയാണ് ആക്രമണം കൂടുതൽ. ദീര്‍ഘദൂര ബസ് കാത്തു നില്‍ക്കുന്നവരും ഭക്ഷണം കഴിക്കാന്‍ എത്തുന്നവരും താലൂക്കാശുപത്രിയിലെ രോഗികള്‍ക്കു കൂട്ടിരിപ്പുകാരായി എത്തുന്നവരുമൊക്കെയാണ് തെരുവു നായകളുടെ ഭീഷണി നേരിടുന്നത്. ടൗണില്‍ രാത്രികാലത്തു കൂട്ടമായി നടക്കുന്ന തെരുവ് നായ്ക്കള്‍ വാഹനങ്ങള്‍ക്കു കുറുകെ ചാടുന്നതും കാല്‍നടയാത്രികര്‍ക്കു നേരെ കുരച്ചു ചാടുന്നതുമൊക്കെ പതിവാകുകയാണ്. മാര്‍ക്കറ്റ് ജംഗ്ഷനിലും ബസ് സ്റ്റാന്‍ഡ് പരിസരത്തുമെല്ലാം തെരുവ് നായ്ക്കളുടെ കൂട്ടമാണ്. കൂട്ടമായി നടക്കുന്ന നായ്ക്കളെ തുരത്തിയോടിക്കാന്‍ ശ്രമിച്ചാല്‍ കൂട്ടത്തോടെ ആക്രമിക്കും. അതുകൊണ്ടു പലരും കണ്ടില്ലെന്നു നടിക്കും. നായ്ക്കള്‍ പെറ്റുപെരുകിയതോടെ രാത്രികാലത്തും പുലര്‍ച്ചെയും അടിമാലി ടൗണിലെത്തുന്നവര്‍ വലിയ ബുദ്ധിമുട്ടാണ് നേരിടുന്നത്. ടൗണിലെ തെരുവ് നായ ശല്യത്തിനു പരിഹാരം കാണാന്‍ ഇടപെടല്‍ വേണമെന്നു വ്യാപാരി വ്യവസായി ഏകോപന സമിതി അടിമാലി യൂണിറ്റ് പ്രസിഡന്‍റ് പി.എം. ബേബി ആവശ്യപ്പെട്ടു. (അവസാനിച്ചു.)

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]