ADVERTISEMENT

ADVERTISEMENT

ഡോക്ടേഴ്സ് ദിനം ആചരിച്ചു

മൂവാറ്റുപുഴ: ഇന്ത്യൻ മെഡിക്കൽ അസോസിയേഷൻ മൂവാറ്റുപുഴ ബ്രാഞ്ച് ഡോക്ടേഴ്സ് ദിനം ആചരിച്ചു. ബ്രാഞ്ച് പ്രസിഡന്‍റ് ഏബ്രഹാം മാത്യു അധ്യക്ഷത വഹിച്ചു.

ചടങ്ങിൽ ജിഎസ്ടി ആന്‍ഡ് കസ്റ്റംസ് മുൻ ചീഫ് കമ്മീഷണർ കെ.സി. ജോണി മുഖ്യാതിഥിയായിരുന്നു. മുതിർന്ന ഇഎൻടി സർജൻ എം.എസ്. മധുസൂദനനെ ചടങ്ങിൽ ആദരിച്ചു.

ഫെമിന അസീസ്, രമ ദേവി, അലക്സ് ഇട്ടിച്ചെറിയ, കെ.ഇ. പൗലോസ്, പോൾ കല്ലുങ്കൽ, അജി ബാലകൃഷ്ണൻ, നിഖിൽ ജോസഫ് മാർട്ടിൻ, മഞ്ജു രാജഗോപാൽ തുടങ്ങിയവർ പ്രസംഗിച്ചു.

നൂറോളം ഡോക്ടർമാർ പങ്കെടുത്ത ചടങ്ങിൽ കുടുംബാംഗങ്ങളുടെ കലാപരിപാടികളും സംഘടിപ്പിച്ചു.

ADVERTISEMENT

ഫ്ലാറ്റ് തട്ടിപ്പ്: പ്രതി പിടിയിൽ

കാക്കനാട്: കാക്കനാട് ഫ്ലാറ്റ് പണയത്തിന് നൽകാമെന്നു വാഗ്ദാനം നൽകി കോടികളുടെ തട്ടിപ്പ് നടത്തിയ സംഭവത്തിൽ ഒരാളെ തൃക്കാക്കര പോലീസ് അറസ്റ്റു ചെയ്തു. വാഴക്കാല മലബാർ അപ്പാർട്ടുമെന്‍റിൽ മിന്‍റു മാണി(39)യെയാണ് തൃക്കാക്കര എസ്ഐ വി.ബി. അനസിന്‍റെ നേതൃത്വത്തിൽ പിടികൂടിയത്. വാഴക്കാലയിലെ മലബാർ സർവീസ് അപ്പാർട്ട്മെന്‍റ്സ് എന്ന സ്ഥാപനത്തിന്‍റെ പേരിലായിരുന്നു തട്ടിപ്പ്.

തുരത്തുന്നതിനിടെ കാട്ടാനക്കൂട്ടം പാഞ്ഞടുത്തത് പരിഭ്രാന്തി പരത്തി

കോതമംഗലം: കോട്ടപ്പടി കൂവക്കണ്ടത്ത് നാട്ടിലിറങ്ങിയ കാട്ടാനകളെ തുരത്തുന്നതിനിടയിൽ ഫോറസ്റ്റ് ഉദ്യോഗസ്ഥർക്കും നാട്ടുകാർക്കും നേരെ കാട്ടാനക്കൂട്ടം പാഞ്ഞടുത്തു. ദിവസങ്ങളായി കുട്ടിയാനയുൾപ്പെടെ ആറ് ആനകൾ ഈ ഭാഗത്ത് എത്തുന്നുണ്ട്. കാർഷിക വിളകൾ നശിപ്പിക്കുന്നതും പതിവായിരിക്കുകയാണ്. കോട്ടപ്പാറ വനമേഖലയിൽനിന്നു ചൊവ്വാഴ്ച രാത്രിയിലെത്തിയ കാട്ടാനക്കൂട്ടം ഇന്നലെ പുലർന്നശേഷവും മടങ്ങിയിരുന്നില്ല. ആറ് ആനകളാണ് ഇന്നലെയും സംഘത്തിലുണ്ടായിരുന്നത്. നാട്ടുകാർ അറിയിച്ചതനുസരിച്ചാണ് ആനകളെ ഓടിക്കാൻ വനപാലകരെത്തിയത്. പ്ലാമുടിക്ക് സമീപമുള്ള കൂവക്കണ്ടം ഭാഗത്തുവച്ച് ആനകളിൽ രണ്ടെണ്ണം വനപാലകർക്കും നാട്ടുകാർക്കും നേരെ പാഞ്ഞടുത്തു. അൽപ്പം പകച്ചുപോയ എല്ലാവരും പിന്തിരിഞ്ഞോടിയാണ് ജീവൻ രക്ഷിച്ചത്. പിന്നീട് ധൈര്യം വീണ്ടെടുത്ത വനപാലകർ ആനകളെ വിരട്ടിയോടിക്കുകയായിരുന്നു. വനത്തിൽ നിന്നും മൂന്ന് കിലോമീറ്ററോളം മാറി ജനവാസ പ്രദേശത്ത് കല്ലുമല ഭാഗത്ത് ആനക്കൂട്ടം കൃഷി നശിപ്പിച്ചിട്ടുണ്ട്. ഇവിടെനിന്ന് ആനകൾ ജനവാസ മേഖലയിലൂടെയാണ് ഇന്നലെ രാവിലെ വനത്തിലേക്ക് നീങ്ങിയത്. പ്രദേശത്ത് ആനകളിറങ്ങുന്നത് നിത്യസംഭവമാണ്. ആനകൾ കടന്നുകയറാത്ത കൃഷിയിടങ്ങളും പുരയിടങ്ങളും വിരളമാണ്. ജീവിതം പൊറുതിമുട്ടിയെന്ന് നാട്ടുകാർ പറയുന്നു. കൃഷിയിടവും വീടുമെല്ലാം ഉപേക്ഷിച്ച് മറ്റിടങ്ങളിലേക്ക് ചേക്കേറിയവരും നിരവധിയാണ്. മാസങ്ങൾക്ക് മുന്പ് രാത്രിയിൽ കൃഷിയിടത്തിലിറങ്ങിയ ആനകളെ തുരത്തുന്നതിനിടെ ഒരു കർഷകൻ കുഴഞ്ഞുവീണ് മരിച്ചതും കൂവക്കണ്ടത്താണ്. ആനകൾ നാട്ടിലിറങ്ങുന്നത് തടയാൻ വനാതിർത്തിയിൽ ഫെൻസിംഗ് സ്ഥാപിക്കുന്നതിനുള്ള പ്രവർത്തനം നടന്നുവരികയാണ്. ഫെൻസിംഗ് ശാശ്വതമായ പ്രശ്നപരിഹാരത്തിന് പ്രാപ്തമല്ലെന്നാണ് പൊതുവേയുള്ള നാട്ടുകാരുടെ വിലയിരുത്തൽ.

മഹാരാജാസ് കോളജില്‍ തെരുവുനായ ആക്രമണം; മൂന്നുപേർക്ക് കടിയേറ്റു

നായയ്ക്ക് പേ വിഷബാധയുണ്ടെന്ന് സംശയം കൊച്ചി: മഹാരാജാസ് കോളജില്‍ ഇന്നലെ തെരുവ് നായ ആക്രമണത്തില്‍ മൂന്നു പേർക്ക് കടിയേറ്റു. ഇന്നലെ രാവിലെ കോളജിലെ ഓഫീസ് അസിസ്റ്റന്‍റ് നിത്യയ്ക്കും ഒന്നാം വര്‍ഷ ഡിഗ്രി ഹിന്ദി വിദ്യാര്‍ഥിക്കുമാണ് തെരുവുനായയുടെ കടിയേറ്റത്. ഉച്ചയ്ക്കുശേഷം അഡ്മിഷന്‍ നടപടികള്‍ക്കായെത്തിയ കുട്ടിയുടെ രക്ഷിതാവിനെയും ഈ നായ കടിച്ചു. ഏറെ നേരത്തെ ശ്രമത്തിനൊടുവില്‍ നായയെ പിടികൂടി. നായയ്ക്ക് പേ വിഷബാധയുള്ളതായി സംശയിക്കുന്നു. കോളജില്‍ നിന്ന് അറിയിച്ചതിനെത്തുടര്‍ന്ന് കൊച്ചി കോര്‍പറേഷനില്‍ നിന്നുള്ള ജീവനക്കാരെത്തി കാമ്പസിനുള്ളിലുണ്ടായിരുന്നു ഒന്നിലേറെ തെരുവുനായ്ക്കളെ പിടികൂടിയെങ്കിലും ആക്രമിച്ച നായ ആദ്യം പിടികൂടാനായില്ല. നായയുടെ വായില്‍ നുരയും പതയും കണ്ടതായി കടിയേറ്റവരും വിദ്യാര്‍ഥികളും പറഞ്ഞു. ഏറെ നേരത്തെ തെരച്ചിലിനൊടുവില്‍ വൈകിട്ടോടെയാണ് നായയെ പിടികൂടാനായ്ത്. ഇതേ നായയുടെ കടിയേറ്റ മറ്റൊരു നായയെയും പിടികൂടി.

യുവതിയെ കയറിപ്പിടിച്ച യുവാക്കൾ അറസ്റ്റിൽ

കളമശേരി: കളമശേരി സോഷ്യൽ പള്ളി സൗഹൃദ നഗർ റോഡിൽ വച്ച് കഴിഞ്ഞ ദിവസം 7.50ന് അതുവഴി നടന്നുപോയ യുവതിയെ ലൈംഗിക ഉദ്ദേശത്തോടെ കയറിപ്പിടിച്ച കേസിൽ രണ്ട് യുവാക്കളെ കളമശേരി പോലീസ് പിടികൂടി. പെരുമ്പാവൂർ അല്ലപ്ര മകപ്പിള്ളി വീട്ടിൽ മുഹമ്മദ് അക്ഷാദ് (18), കളമശേരി ചങ്ങമ്പുഴ നഗറർ പൊട്ടച്ചാൽ നഗറിൽ വാഴയിൽ വീട്ടിൽ അഹമ്മദ് ഹലീം (19) എന്നിവരെയാണ് കളമശേരി പോലീസ് അറസ്റ്റ് ചെയ്തത്. പോലീസ് ഇൻസ്പെക്ടർ എം.ബി. ലത്തീഫിന്‍റെ നേതൃത്വത്തിൽ എസ്ഐ രഞ്ജിത്ത്, സിപിഒമാരായ വിനു, ഷാജഹാൻ എന്നിവരുടെ നേതൃത്വത്തിലുള്ള സംഘമാണ് അറസ്റ്റ് ചെയ്തത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.

പെരുമ്പാവൂര്‍ താലൂക്ക് ആശുപത്രി കാഷ്വാലിറ്റി: റിപ്പോർട്ട് തേടി മനുഷ്യാവകാശ കമ്മീഷന്‍

കൊച്ചി: പെരുമ്പാവൂര്‍ താലൂക്ക് ആശുപത്രിയിലെ കാഷ്വാലിറ്റി വിഭാഗം പ്രവര്‍ത്തനക്ഷമമായോ എന്ന് മനുഷ്യാവകാശ കമ്മീഷന്‍. ഇതുസംബന്ധിച്ച് വിവരം അറിയിക്കാന്‍ ജില്ലാ മെഡിക്കല്‍ ഓഫീസര്‍ക്ക് ചെയര്‍പേഴ്‌സണ്‍ ജസ്റ്റിസ് അലക്‌സാണ്ടര്‍ തോമസ് നിര്‍ദേശം നല്‍കി. ഒരു മാസത്തിനകം നടപടിക്രമങ്ങളെല്ലാം പൂര്‍ത്തിയാക്കി കാഷ്വാലിറ്റി വിഭാഗം പഴയതുപോലെ പ്രവര്‍ത്തനസജ്ജമാകുമെന്ന് ജില്ലാ മെഡിക്കല്‍ ഓഫീസര്‍ കഴിഞ്ഞ മാസം കമ്മീഷനെ അറിയിച്ചിരുന്നു. കാഷ്വാലിറ്റി വിഭാഗത്തിലെ അറ്റകുറ്റപണികള്‍ പൂര്‍ത്തിയായോ, മെഡിക്കല്‍ വാര്‍ഡില്‍ താത്ക്കാലികമായി പ്രവേശിപ്പിച്ചിരിക്കുന്ന കാഷ്വാലിറ്റിയിലെ രോഗികളെ അവിടെനിന്നും കാഷ്വാലിറ്റി വാര്‍ഡിലേക്ക് തിരികെ പ്രവേശിപ്പിച്ചോ, ഒഴിവുവരുന്ന മെഡിക്കല്‍ വാര്‍ഡില്‍ കിടപ്പുരോഗികളെ പ്രവേശിപ്പിച്ചോ തുടങ്ങിയ വിവരങ്ങളെല്ലാം ഉള്‍പ്പെടുത്തിയുള്ള റിപ്പോര്‍ട്ട് ആറാഴ്ചയ്ക്കുള്ളില്‍ സമര്‍പ്പിക്കാനാണ് നിര്‍ദേശം. ലിഫ്റ്റ് സൗകര്യമില്ലാത്തതിനാല്‍ രോഗികളെ സ്ട്രെച്ചറില്‍ ചുമന്ന് രണ്ടാം നിലയിലെത്തിക്കുകയാണെന്ന പത്രവാര്‍ത്തയുടെ അടിസ്ഥാനത്തില്‍ കമ്മീഷന്‍ സ്വമേധയാ രജിസ്റ്റര്‍ ചെയ്ത കേസിലാണ് ഉത്തരവ്. കാഷ്വാലിറ്റി വിഭാഗം നേരത്തെ ഗ്രൗണ്ട് ഫ്‌ളോറിലാണ് പ്രവര്‍ത്തിച്ചിരുന്നതെന്നും അവിടെ അറ്റകുറ്റപ്പണികള്‍ നടത്തേണ്ടി വന്നതുകൊണ്ടാണ് കിടപ്പുരോഗികളെ ഒന്നാം നിലയിലേക്ക് മാറ്റിയതെന്നും ഡിഎംഒ കമ്മീഷനെ അറിയിച്ചു.

ഇ-സ്റ്റാമ്പ് വിതരണം മുടങ്ങി; രണ്ടാം ദിനവും ജനം നെട്ടോട്ടത്തിൽ

സൈറ്റിൽനിന്ന് പത്തോ പതിനഞ്ചോ പേർക്ക് മാത്രമാണ് പത്തരയ്ക്ക് മുമ്പ് ഇലക്ട്രോണിക് മുദ്രപ്പത്രം ലഭിക്കുന്നത് ആലുവ: ഇ-സ്റ്റാമ്പ് വിതരണം തുടർച്ചയായ രണ്ടാം ദിവസവും മുടങ്ങി. വെണ്ടർമാരുടെ ഓഫീസിനു മുന്നിൽ മണിക്കൂറുകളോളം ക്യൂ നിൽക്കുന്നവർക്ക് കാര്യം നടക്കാതെ മടങ്ങേണ്ടി വരികയാണ്. പോർട്ടലിന്‍റെ സെർവർ തകരാർ പതിവായിരിക്കുകയാണെന്ന് വെണ്ടർമാർ പറഞ്ഞു. അഞ്ചു ലക്ഷം രൂപയ്ക്ക് മുകളിലുള്ള മുദ്രപ്പത്രങ്ങൾ 2017 മുതൽ തന്നെ ഇ-സ്റ്റാമ്പിംഗിലേക്ക് മാറിയിരുന്നു. അതിനു താഴേക്കുള്ള മുദ്രപ്പത്രങ്ങൾക്കും ഏപ്രിൽ ഒന്നു മുതൽ ഇ-സ്റ്റാമ്പിംഗ് നടപ്പിലാക്കിയതോടെയാണ് സെർവർ തകരാർ സ്ഥിരമായിരിക്കുന്നത്. വെണ്ടർമാരുടെ ഓഫീസിൽ നേരിട്ടെത്തി സ്വന്തം ഫോൺ നമ്പറിൽ ഒടിപി ലഭിച്ചാൽ മാത്രമേ മുദ്രപ്പത്രം സ്വന്തം പേരിൽ ഡൗൺലോഡ് ചെയ്യാനാകൂ. ദിവസവും രാവിലെ പത്തരമുതലാണ് ജനങ്ങൾ ഈ ദുര്യോഗം അനുഭവിക്കുന്നത്. സൈറ്റിൽനിന്ന് പത്തോ പതിനഞ്ചോ പേർക്ക് മാത്രമാണ് പത്തരയ്ക്ക് മുമ്പ് ഇലക്ട്രോണിക് മുദ്രപ്പത്രം ലഭിക്കുന്നത്. സംസ്ഥാനത്തെ ആയിരത്തോളം വെണ്ടർമാരിൽ 700 ഓളം പേർ മാത്രമാണ് മുദ്രപ്പത്രങ്ങൾ ഡൗൺലോഡ് ചെയ്യാനായി സർക്കാർ രജിസ്ട്രേഷൻ വകുപ്പ് പോർട്ടലിൽ കയറുന്നത്. ഇതുപോലും താങ്ങാനുള്ള കരുത്ത് സെർവറിന് ഇല്ലെന്നാണ് ആധാര എഴുത്തുകാർ കുറ്റപ്പെടുത്തുന്നത്. പത്ത് രൂപയാണ് വെണ്ടർമാർക്ക് ലഭിക്കുന്ന കമ്മീഷൻ. അതിൽ പ്രിന്‍റിംഗ് ചെലവ് വെണ്ടർമാർ വഹിക്കണം. വാടകക്കരാർ, പണയകരാർ, വസ്തുവിൽപ്പന കരാർ, ലൈസൻസ് കരാറുകൾ, സത്യവാങ്മൂലം, , ജനന, മരണ സർട്ടിഫിക്കറ്റുകൾ തുടങ്ങിയവയ്ക്കാണു ചെറിയ തുകയ്ക്കുള്ള മുദ്രപ്പത്രങ്ങൾ വേണ്ടിവരുന്നത്.

കൊച്ചി മെട്രോയില്‍ പരിസ്ഥിതി പോസ്റ്റര്‍ പ്രദര്‍ശനം

കൊച്ചി: വനമഹോത്സവവുമായി ബന്ധപ്പെട്ട് സംസ്ഥാന വനംവകുപ്പ് സാമൂഹ്യ വനവത്കരണവിഭാഗത്തിന്‍റെ ആഭിമുഖ്യത്തില്‍ കൊച്ചി മെട്രോ ജെഎല്‍എന്‍ സ്‌റ്റേഷനില്‍ പരിസ്ഥിതി പോസ്റ്റര്‍ പ്രദര്‍ശനം സംഘടിപ്പിച്ചു. കെഎംആര്‍എല്‍ മാനേജിംഗ് ഡയറക്ടര്‍ ലോക്‌നാഥ് ബെഹ്‌റ ഉദ്ഘാടനം ചെയ്തു. തൃപ്പൂണിത്തുറ ആര്‍എല്‍വി കോളജിലെ വിദ്യാര്‍ഥികള്‍ തയാറാക്കിയതാണ് പോസ്റ്ററുകള്‍. നാളെ വരെ ജെഎല്‍എന്‍ മെട്രോ സ്‌റ്റേഷനിലും അഞ്ച് മുതല്‍ ഏഴ് വരെ ഇടപ്പള്ളി മെട്രോ സ്‌റ്റേഷനിലും എംജി റോഡ് മെട്രോ സ്‌റ്റേഷനിലുമാണ് പ്രദര്‍ശനം. മധ്യമേഖലാ കണ്‍സര്‍വേറ്റര്‍ ഓഫ് ഫോറസ്റ്റ് ഇന്ദു വിജയന്‍ അധ്യക്ഷത വഹിച്ചു. ഡെപ്യൂട്ടി കണ്‍സര്‍വേറ്റര്‍ ഫെന്‍ ആന്‍റണി, അസി. കണ്‍സര്‍വേറ്റര്‍മാരായ മനു സത്യന്‍, വീണ ദേവി, ആര്‍എല്‍വി കോളജ് അധ്യാപകരായ ധര്‍മതീര്‍ത്ഥന്‍, മനു മോഹന്‍ എന്നിവര്‍ ചടങ്ങില്‍ പങ്കെടുത്തു. പരിപാടിയുടെ ഭാഗമായി ആര്‍എല്‍വി കോളജിലെ വിദ്യാര്‍ഥികള്‍ നൃത്തശില്പവും അവതരിപ്പിച്ചു.

സംസ്‌കൃത സര്‍വകലാശാലയിലെ വിദ്യാര്‍ഥി സമരം അനാവശ്യമെന്ന്

22 വിദ്യാര്‍ഥികള്‍ക്ക് കാരണം കാണിക്കല്‍ നോട്ടീസ് കൊച്ചി: കാലടി സംസ്‌കൃത സര്‍വകലാശാല കാമ്പസിലും ഹോസ്റ്റലിലും ഏര്‍പ്പെടുത്തിയ നിയന്ത്രണങ്ങള്‍ക്കെതിരെ ഒരു വിഭാഗം വിദ്യാര്‍ഥികള്‍ നടത്തിയ സമരത്തെ തള്ളിക്കളണഞ്ഞ് സര്‍വകലാശാല. കാമ്പസ് ലഹരി വിമുക്തമാക്കാനും വിദ്യാര്‍ഥികളുടെ സുരക്ഷ ഉറപ്പാക്കാനും ലക്ഷ്യമിട്ട് പുറത്തിറക്കിയ ഉത്തരവിനെതിരെ ഒരു വിഭാഗം വിദ്യാര്‍ഥികള്‍ നടത്തിയത് അനാവശ്യ സമരമാണെന്നും ഉത്തരവ് നടപ്പാക്കുന്നതുമായി മുന്നോട്ട് പോകുമെന്നും സര്‍വകലാശാല പത്രക്കുറിപ്പിൽ അറിയിച്ചു. കാമ്പസിലേക്ക് രാത്രികാലങ്ങളില്‍ അപരിചിത വാഹനങ്ങളും ആളുകളും പ്രവേശിക്കുകയും ഹോസ്റ്റലില്‍ അനധികൃതമായി താമസിക്കുകയും ചെയ്യുന്നതായി പരാതി ലഭിച്ച സാഹചര്യത്തിലാണ് നിയന്ത്രണങ്ങള്‍ ഏര്‍പ്പെടുത്തിയത്. എന്നാല്‍ കാമ്പസില്‍ മികച്ച അക്കാദമിക അന്തരീക്ഷം ഉറപ്പുവരുത്താന്‍ ലക്ഷ്യമിട്ട് എടുത്ത തീരുമാനങ്ങള്‍ അട്ടിമറിക്കാനാണ് ഒരു വിഭാഗം വിദ്യാര്‍ഥികള്‍ ഇപ്പോള്‍ ശ്രമിക്കുന്നത്. ഹോസ്റ്റല്‍ ഫീസുമായി ബന്ധപ്പെട്ട് നവമാധ്യമങ്ങളില്‍ വ്യാജ പ്രചാരണങ്ങള്‍ നടത്തുന്നതിനെയും സര്‍വ്വകലാശാല അപലപിച്ചു. രാത്രിയില്‍ പെണ്‍കുട്ടികള്‍ ഉള്‍പ്പെടെയുള്ള ഹോസ്റ്റല്‍ വിദ്യാര്‍ഥികളെ നിര്‍ബന്ധപൂര്‍വം പുറത്തിറക്കിയതും സര്‍വകലാശാല അധികൃതരുടെ അനുവാദമില്ലാതെ അര്‍ധരാത്രി ക്യാമ്പസിനുളളില്‍ സിനിമാ പ്രദര്‍ശനം നടത്തിയതും അച്ചടക്ക ലംഘനമാണ്. അച്ചടക്ക ലംഘനം നടത്തിയ 22 വിദ്യാര്‍ഥികള്‍ക്കെതിരെ കാരണം കാണിക്കല്‍ നോട്ടീസ് നല്‍കിയതായും സര്‍വകലാശാല അറിയിച്ചു. സര്‍വകലാശാല ഏര്‍പ്പെടുത്തിയ നിയന്ത്രണങ്ങള്‍ക്കെതിരെ കഴിഞ്ഞദിവസം എസ്എഫ്‌ഐ പ്രവര്‍ത്തകര്‍ സമരം നടത്തിയിരുന്നു.

തീരജനതയുടെ പ്രതിഷേധം ഫലം കണ്ടു : ചെല്ലാനത്തു 3.6 കിലോമീറ്റർ കൂടി ടെട്രാപോഡ് കടൽഭിത്തി വരും

306 കോടിയുടെ രണ്ടാംഘട്ട പദ്ധതിക്ക് സർക്കാർ അംഗീകാരം കൊച്ചി: കടലാക്രമണം രൂക്ഷമായ ചെല്ലാനത്തെ തീരജനതയുടെ പ്രതിഷേധം ഫലം കണ്ടു; സർക്കാർ കണ്ണുതുറന്നു. ചെല്ലാനം തീരത്ത് ടെട്രാപോഡ് കടൽഭിത്തി നിർമിക്കാനുള്ള 306 കോടി രൂപയുടെ രണ്ടാംഘട്ട പദ്ധതിക്ക് സംസ്ഥാന സർക്കാരിന്‍റെ അംഗീകാരം. കണ്ണമാലി പുത്തൻതോട് മുതൽ ചെറിയകടവ് വരെ 3.6 കിലോമീറ്റർ നീളത്തിൽ കൂടി ടെട്രാപോഡ് കടൽഭിത്തി നിർമിക്കും. കിഫ്ബിയുടെ പദ്ധതിയായിത്തന്നെ കടൽഭിത്തി നിർമാണം പൂർത്തിയാക്കാൻ ഇന്നലെ ചേർന്ന മന്ത്രിതല യോഗം തീരുമാനിച്ചു. ചെല്ലാനം തീരത്ത് ടെട്രാപോഡ് കടൽഭിത്തിയില്ലാത്ത ഭാഗത്തെ തീരസംരക്ഷണം കൂടി ഉറപ്പുവരുത്താനാണ് പ്രത്യേക പരിഗണനയോടെ രണ്ടാംഘട്ടത്തിന് അനുമതി നൽകുന്നത്. 7.3 കിലോമീറ്റർ ദൈർഘ്യത്തിൽ ടെട്രാപോഡ് കടൽഭിത്തിയുടെ ആദ്യഘട്ട നിർമാണം 2023ൽ പൂർത്തിയാക്കിയിരുന്നു. 347 കോടി രൂപ ചെലവിലാണ് ആദ്യഘട്ടം പൂർത്തിയാക്കിയത്. നേരത്തെ പത്തു കിലോമീറ്റർ ദൂരം ടെട്രാപോഡും രണ്ടു ഭാഗങ്ങളിൽ പുലിമുട്ടും നിർമിക്കാനാണ് പദ്ധതി തയാറാക്കിയത്. പദ്ധതി മുന്നോട്ട് പോകവെ നിർമാണച്ചെലവിൽ വന്ന വ്യത്യാസവും ഐഐടി റിപ്പോർട്ടും അടിസ്ഥാനമാക്കി 7.3 കിലോമീറ്റർ ദൂരം കടൽഭിത്തി നിർമിച്ച് ഒന്നാംഘട്ടം പൂർത്തിയാക്കുകയായിരുന്നു. തിരുവനന്തപുരത്തു നടന്ന മന്ത്രിതല യോഗത്തിൽ മന്ത്രിമാരായ പി. രാജീവ്, റോഷി അഗസ്റ്റിൻ, സജി ചെറിയാൻ, കെ.ജെ. മാക്സി എംഎൽഎ, ജലവിഭവ വകുപ്പ് അഡീഷണൽ ചീഫ് സെക്രട്ടറി ബിശ്വനാഥ് സിൻഹ, കിഫ്ബി അഡീഷണൽ സിഇഒ മിനി ആന്‍റണി എന്നിവരും ഉന്നത ഉദ്യോഗസ്ഥരും പങ്കെടുത്തു. ജലസേചന വകുപ്പ് സംസ്ഥാനത്ത് കണ്ടെത്തിയ പത്ത് ഹോട്ട്സ്പോട്ടുകളിൽ ഏറ്റവും രൂക്ഷമായ കടലാക്രമണം നേരിടുന്ന പ്രദേശമാണ് ചെല്ലാനം. തീരം സംരക്ഷിക്കണമെന്നും കടൽഭിത്തി നിർമാണം പൂർത്തിയാക്കണമെന്നും ആവശ്യപ്പെട്ടു കെയർ ചെല്ലാനം- കൊച്ചിയുടെ നേതൃത്വത്തിൽ വലിയ ബഹുജന പ്രതിഷേധം സംഘടിപ്പിച്ചിരുന്നു. ഭരണാനുമതി ഈയാഴ്ച: പി.രാജീവ് കൊച്ചി: ചെല്ലാനത്തു 3.6 കിലോമീറ്റർ കൂടി ടെട്രാപോഡ് കടൽഭിത്തി നിർമിക്കുന്നതിന് പുതുക്കിയ ഭരണാനുമതി ഈയാഴ്ച തന്നെയുണ്ടാകുമെന്നു മന്ത്രി പി. രാജീവ്. കടൽഭിത്തി നിർമാണത്തിന് 306 കോടി രൂപയുടെ ഡിപിആർ നേരത്തെ തന്നെയുണ്ട്. ഈ വിശദ പദ്ധതി റിപ്പോർട്ട് ഉള്ളതിനാൽ ഭരണാനുമതി പുതുക്കി നൽകിയാൽ മതിയാകും. പുതുക്കിയ പദ്ധതിക്ക് കിഫ്ബിയുടെ സാമ്പത്തികാനുമതിയും ഉടൻ ലഭ്യമാക്കും. സർക്കാർ നടപടി സ്വാഗതാർഹം: കെയർ ചെല്ലാനം- കൊച്ചി കൊച്ചി: ചെല്ലാനം പഞ്ചായത്തിലെ കണ്ണമാലി പുത്തൻതോട് മുതലുള്ള കടൽഭിത്തി നിർമാണത്തിന് 306 കോടി രൂപ അനുവദിച്ച സർക്കാർ നടപടി സ്വാഗതാർഹമെന്നു കെയർ - ചെല്ലാനം കൊച്ചി. മഴക്കാലത്ത് കടലാക്രമണ ഭീതിയിൽ കഴിയുന്ന തീരദേശവാസികൾക്ക്ആശ്വാസമാണ് സർക്കാരിന്റെ പ്രഖ്യാപനം. നിർമാണ പ്രവർത്തികൾ പൂർത്തിയാക്കുന്നതിനുള്ള നടപടികൾ യുദ്ധകാലാടിസ്ഥാനത്തിൽ പൂർത്തിയാക്കണമെന്ന് യോഗം സർക്കാരിനോട് ആവശ്യപ്പെട്ടു . കടൽഭിത്തി നിർമാണം ആവശ്യപ്പെട്ടു കഴിഞ്ഞ ദിവസം മുഖ്യമന്ത്രിയെ സന്ദർശിച്ചപ്പോൾ, വിഷയം ഗൗരവമായി പരിഗണിക്കുമെന്നും നിർമാണ പ്രവർത്തികൾ ഉടൻ ആരംഭിക്കുമെന്നും അദ്ദേഹം ഉറപ്പ് നൽകിയിരുന്നതായും കെയർ ചെല്ലാനം - കൊച്ചി സെക്രട്ടറി ടി.എ. ഡാൽഫിൻ അറിയിച്ചു. നിർമാണ പ്രവർത്തനങ്ങളുമായി ബന്ധപ്പെട്ട് സർക്കാരിന് പൂർണപിന്തുണ നൽകാൻ കോ ഓർഡിനേറ്റർ ജോണി സേവ്യർ പുതുക്കാടിന്‍റെ അധ്യക്ഷതയിൽ ചെറിയകടവിൽ ചേർന്ന യോഗം തീരുമാനിച്ചു. കടൽഭിത്തി നിർമാണം പുനരാരംഭിക്കുന്നത് ആശ്വാസകരം: കെആർഎൽസിസി കൊച്ചി : ചെല്ലാനം പഞ്ചായത്തിലെ കണ്ണമാലി പുത്തന്‍തോട് മുതല്‍ കടല്‍ഭിത്തി നിര്‍മാണം പുനരാരംഭിക്കുന്നതിന് സര്‍ക്കാര്‍ തീരുമാനിച്ചത് ആശ്വാസകരമെന്ന് കെആര്‍എല്‍സിസി. മുഖ്യമന്ത്രിക്കും സര്‍ക്കാരിനും നന്ദി രേഖപ്പെടുത്തുന്നു. ഫോര്‍ട്ട് കൊച്ചി ഐഎന്‍എസ് ദ്രോണാചാര്യ വരെയുള്ള കടല്‍ഭിത്തിയുടെ നിര്‍മാണം യുദ്ധകാലാടിസ്ഥാനത്തില്‍ പൂര്‍ത്തിയാക്കുന്നതിന് ആവശ്യമായ അധികഫണ്ടും അനുവദിക്കണം. പുലിമുട്ടുകളുടെയും കടല്‍ഭിത്തിയുടെയും നിര്‍മാണം സമയബന്ധിതമായി പൂര്‍ത്തിയാക്കുകയും തീരം സമ്പുഷ്ടീകരിക്കുകയും ചെയ്യണം. ഇത് ചെയ്യാതിരിക്കുന്നത് നിര്‍മാണം പൂര്‍ത്തീകരിച്ചിട്ടുള്ള കടല്‍ഭിത്തി ദുര്‍ബലപ്പെടാന്‍ കാരണമാകും. തീരസമ്പുഷ്ടീകരണത്തിന് കൊച്ചി തുറമുഖത്തിന് പാരിസ്ഥിതിക അനുമതി ലഭ്യമാക്കണം. ഒന്നാംഘട്ട നിര്‍മാണത്തിന് ഒരു പ്രത്യേക സെല്‍ പ്രവര്‍ത്തിച്ചിരുന്നു. പുത്തന്‍തോട് മുതല്‍ ഫോര്‍ട്ട് കൊച്ചി ഐഎന്‍എസ് ദ്രോണാചാര്യ വരെയുള്ള കടല്‍ഭിത്തിയുടെ നിര്‍മാണം പൂര്‍ത്തിയാക്കുന്നതുവരെ പ്രത്യേക സെല്‍ നിലനിര്‍ത്തണമെന്നും കേരള ലത്തീൻ കത്തോലിക്ക സഭാ വക്താവ് ജോസഫ് ജൂഡ് ആവശ്യപ്പെട്ടു. കിലോമീറ്ററിന് നൂറു കോടി ! നിലവിലെ നിർമാണച്ചെലവ് കണക്കാക്കുമ്പോൾ ശരാശരി നൂറു കോടി രൂപയാണ് ഒരു കിലോമീറ്റർ ദൂരം തീരസംരക്ഷണത്തിനായി സംസ്ഥാന സർക്കാർ ചെലവഴിക്കുന്നതെന്ന് വ്യവസായ മന്ത്രി പി. രാജീവ് പറഞ്ഞു. തീര സംരക്ഷണത്തിനായി കേന്ദ്ര സർക്കാർ ഒന്നും ചെയ്യാത്ത സാഹചര്യത്തിലാണ് സംസ്ഥാന സർക്കാരിന്‍റെ ഇടപെടലെന്നും അദ്ദേഹം പറഞ്ഞു.

കെസിവൈഎം പ്രവർത്തന വർഷം ഉദ്ഘാടനം ചെയ്തു

തൊടുപുഴ: കോതമംഗലം രൂപത കെസിവൈഎമ്മിന്‍റെ 2025-26 പ്രവർത്തനവർഷ ഉദ്ഘാടനവും കർമപദ്ധതി പ്രകാശനവും ആലക്കോട് സെന്‍റ് തോമസ് മൂർ പള്ളിയിൽ നടന്നു. കോതമംഗലം രൂപത വികാരി ജനറാൾ മോണ്‍. വിൻസന്‍റ് നെടുങ്ങാട്ട് ഉദ്ഘാടനം ചെയ്തു. രൂപത പ്രസിഡന്‍റ് സാവിയോ തോട്ടുപുറം അധ്യക്ഷത വഹിച്ചു. സംഗീത സംവിധായകൻ ജേക്സ് ബിജോയ് മുഖ്യാതിഥിയായിരുന്നു. കെസിവൈഎം രൂപത ഡയറക്ടർ ഫാ. സെബാസ്റ്റ്യൻ വള്ളോപ്പിള്ളിൽ, അസിസ്റ്റന്‍റ് ഡയറക്ടർ ഫാ. ആന്‍റണി വിളയപ്പിള്ളിൽ, ആനിമേറ്റർ സിസ്റ്റർ റെറ്റി, രൂപത ജനറൽ സെക്രട്ടറി അനു മേക്കുഴിക്കാട്ട്, ഫൊറോന ഡയറക്ടർ ഫാ. ജോർജ് പീച്ചാനിക്കുന്നേൽ, യൂണിറ്റ് ഡയറക്ടർ ഫാ. ജോസ് അറയ്ക്കൽ, ഫൊറോന പ്രസിഡന്‍റ് അൽഫോൺസ് തങ്കച്ചൻ, യൂണിറ്റ് പ്രസിഡന്‍റ് അലൻ ജോസഫ് എന്നിവർ പ്രസംഗിച്ചു. വിവിധ ഇടവകകളിൽ നിന്നായി 500ഓളം യുവജനങ്ങൾ പങ്കെടുത്തു.

ചാവറ ഇന്‍റർനാഷണൽ അക്കാഡമിക്ക് അഭിമാന നിമിഷം

വാഴക്കുളം: ചാവറ ഇന്‍റർനാഷണൽ അക്കാഡമിക്കും ഇത് അഭിമാന നിമിഷം. കീം പ്രവേശന പരീക്ഷയിൽ എൻജിനീയറിംഗ് വിഭാഗത്തിൽ ഒന്നാം റാങ്ക് നേടിയ കല്ലൂർക്കാട് വട്ടക്കുഴിയിൽ ജോണ്‍ ഷിനോജ് വാഴക്കുളം ചാവറ ഇന്‍റർനാഷണൽ അക്കാദമിയിലെ പൂർവ വിദ്യാർഥിയാണ്. 2022-23 പത്താം ക്ലാസ് ബാച്ചിൽ ഐസിഎസ് ബോർഡ് പരീക്ഷയിൽ നാലു വിഷയങ്ങളിൽ നൂറിൽ നൂറും നേടി 98.2 ശതമാനം മാർക്കോടെ ഒന്നാം സ്ഥാനവും എല്ലാ വിഷയങ്ങൾക്കും എ വണ്‍ ഗ്രേഡും കരസ്ഥമാക്കിയിരുന്നു. സ്കൂൾ പ്രിൻസിപ്പൽ ഫാ. ഡിനോ കള്ളികാട്ട്, വൈസ് പ്രിൻസിപ്പൽ ഫാ. ജിത്തു തൊട്ടിയിൽ എന്നിവർ ജോണ്‍ ഷിനോജിന് അഭിനന്ദനമറിയിച്ചു.

പിണവൂർക്കുടി ആദിവാസി ഉന്നതിയിൽ ഒരു കോടിയുടെ വികസന പ്രവർത്തനങ്ങൾ

കോതമംഗലം: കുട്ടന്പുഴ പഞ്ചായത്തിലെ പിണവൂർക്കുടി ആദിവാസി ഉന്നതിയിൽ ഒരു കോടിയുടെ വിവിധ വികസന പ്രവർത്തനങ്ങൾ നടപ്പാക്കും. പഠന കേന്ദ്രം, കമ്യൂണിറ്റി ഹാൾ നവീകരണം, മിനി സ്റ്റേഡിയം നിർമാണം, ലൈബ്രറിക്ക് ഉപകരണം വാങ്ങൽ, പൊതു കിണറുകളുടെ നവീകരണം, സോളാർ ലൈറ്റുകൾ സ്ഥാപിക്കൽ എന്നിങ്ങനെ വിവിധ വികസന പ്രവർത്തനങ്ങളാണ് പദ്ധതിയുടെ ഭാഗമായി ഉൾപ്പെടുത്തിയിട്ടുള്ളത്. വികസന പ്രവർത്തനങ്ങൾ ആരംഭിക്കുന്നതിന് മുന്നോടിയായി പിണവൂർകുടിയിൽ ഊരുകൂട്ടം ചേർന്നു. പിണവൂർ നഗർ കമ്യൂണിറ്റി ഹാളിൽ ചേർന്ന ഊരുകൂട്ടം ആന്‍റണി ജോണ്‍ എംഎൽഎ ഉദ്ഘാടനം ചെയ്തു. യോഗത്തിൽ പഞ്ചായത്തംഗം ബിനീഷ് നാരായണൻ അധ്യക്ഷത വഹിച്ചു.

ടോറസ് ലോറിയും പിക്കപ്പും കൂട്ടിയിടിച്ചു

കല്ലൂർക്കാട്: ടോറസ് ലോറിയും പിക്കപ്പ് ജീപ്പും കൂട്ടിയിടിച്ചു. അപകടത്തിൽ ആർക്കും പരിക്കില്ല. ഇന്നലെ വൈകുന്നേരം അഞ്ചരയോടെ കല്ലൂർക്കാട് കോട്ട റോഡിലാണ് അപകടമുണ്ടായത്. മൂവാറ്റുപുഴ ഭാഗത്തുനിന്നു വരികയായിരുന്ന തിരൂർ സ്വദേശിയുടെ പിക്കപ്പ് വാഹനം നിയന്ത്രണം നഷ്ടപ്പെട്ട് കല്ലൂർക്കാടുനിന്നു കരിങ്കല്ലുമായി പോയ ടോറസുമായി കൂട്ടിയിടിക്കുകയായിരുന്നു.

ശ്മശാന അറ്റകുറ്റപ്പണിയിൽ അഴിമതിയെന്ന് : നഗരസഭാ സെക്രട്ടറിക്കെതിരേ പ്രതിഷേധം സംഘടിപ്പിച്ചു

മൂവാറ്റുപുഴ: മൂവാറ്റുപുഴയിലെ നഗരസഭ ശ്മശാന അറ്റകുറ്റപ്പണിയിൽ നടന്ന അഴിമതി അന്വേഷിക്കണമെന്നാവശ്യപ്പെട്ടും ശ്മശാനത്തിൽ സംസ്കരിച്ച മാറാടി സ്വദേശിയുടെ മൃതദേഹത്തോട് അനാദരവ് കാണിച്ച ഉദ്യോഗസ്ഥർക്കെതിരെ നിയമ നടപടി സ്വീകരിക്കണമെന്നാവശ്യപ്പെട്ടും ഡിവൈഎഫ്ഐയുടെ നേതൃത്വത്തിൽ നഗരസഭ സെക്രട്ടറിയുടെ ഓഫീസിന് മുന്പിൽ പ്രതിഷേധം സംഘടിപ്പിച്ചു. മൂന്നു മാസം ശ്മശാനം അടച്ചിട്ട് ലക്ഷങ്ങൾ ചെലവഴിച്ച് നടത്തിയ അറ്റകുറ്റപ്പണിയിൽ വലിയ അഴിമതിയാണ് നടന്നിട്ടുള്ളത്. കഴിഞ്ഞ ഒരു വർഷത്തിൽ ഏഴ് തവണയാണ് പൊതുശ്മശാനത്തിൽ അറ്റകുറ്റപ്പണികൾ നടത്തിയിട്ടുള്ളത്. ലക്ഷങ്ങളുടെ അഴിമതി ഈ പ്രവർത്തികളിൽ നടന്നിട്ടുണ്ട്. അറ്റകുറ്റപ്പണികൾക്ക് ശേഷം കഴിഞ്ഞ ദിവസം തുറന്ന പെതുശ്മശാനത്തിൽ മാറാടി സ്വദേശിയുടെ മൃതദേഹം സംസ്കരിക്കുന്നിടെ നാല് തവണയാണ് ബർണർ തകരാറിലായത്. ഒരു മൃതദേഹം രണ്ട് മണിക്കൂർകൊണ്ട് ദഹിപ്പിക്കുന്ന സ്ഥാനത്താണ് 10 മണിക്കൂർകൊണ്ട് മാറാടി സ്വദേശിയുടെ മൃതദേഹം സംസ്കരിച്ചത്. നാല് തവണയാണ് മൃതദേഹം പുറത്തെടുത്തതായി പറയുന്നു. ഇത് മൃതദേഹത്തോടുള്ള അനാദരവാണ്. മൃതദേഹത്തോട് അനാദരവ് കാണിച്ച നഗരസഭ അധികാരികൾക്കെതിരെ ശക്തമായ നിയമ നടപടി പോലീസ് സ്വീകരിക്കണമെന്നാവശ്യപ്പെട്ട് മൂവാറ്റുപുഴ ഡിവൈഎസ്പിക്കും ശ്മശാനത്തിന്‍റെ അറ്റകുറ്റ പ്രവർത്തിയിൽ യുഡിഎഫ് ഭരിക്കുന്ന മൂവാറ്റുപുഴ നഗരസഭയുടെ അഴിമതിക്കുമെതിരെ അന്വേഷണം ആവശ്യപ്പെട്ട് വിജിലൻസിലും ഡിവൈഎഫ്ഐ പരാതി നൽകി. പ്രതിഷേധ സമരത്തിന് ഡിവൈഎഫ്ഐ ബ്ലോക്ക് സെക്രട്ടറി ഫെബിൻ പി. മൂസ, പ്രസിഡന്‍റ് കെ.കെ. അനീഷ് കുമാർ, ഇ.ബി. രാഹുൽ, അഖിൽ പ്രകാശ് എന്നിവർ നേതൃത്വം നൽകി.

പ്രതിഷേധ മാർച്ചും യോഗവും നടത്തി

മൂവാറ്റുപുഴ: നഗര വികസനത്തിന്‍റെ ഭാഗമായ റോഡ് നവീകരണം അനന്തമായി നീണ്ടുപോകുന്നതിൽ പ്രതിഷേധിച്ചും എംസി റോഡിൽ വെള്ളൂർക്കുന്നം മുതൽ പോസ്റ്റ് ഓഫീസ് ജംഗ്ഷൻ വരെയുള്ള ഭാഗത്ത് തകർന്ന റോഡ് സഞ്ചാരയോഗ്യമാക്കണമെന്നും ആവശ്യപ്പെട്ട് സിപിഐ മൂവാറ്റുപുഴ ടൗണ്‍ ലോക്കൽ കമ്മിറ്റിയുടെ നേതൃത്വത്തിൽ പ്രതിഷേധ മാർച്ചും യോഗവും നടത്തി. സിപിഐ മൂവാറ്റുപുഴ മണ്ഡലം കമ്മിറ്റി ഓഫീസ് പരിസരത്തുനിന്ന് ആരംഭിച്ച പ്രതിഷേധ മാർച്ച് വെള്ളൂർക്കുന്നത്ത് സമാപിച്ചു. തുടർന്ന് നടന്ന പ്രതിഷേധ യോഗം സിപിഐ മണ്ഡലം സെക്രട്ടറി ജോളി പൊട്ടയ്‌ക്കൽ ഉദ്ഘാടനം ചെയ്തു. റോഡ് നവീകരണത്തിന്‍റെ പേരിലും കാലവർഷക്കെടുതിയാലും മൂവാറ്റുപുഴ നഗരം സഞ്ചാരയോഗ്യമല്ലാതായിട്ട് മാസങ്ങൾ പിന്നിട്ടു. രോഗികളുമായി നിരവധി ആംബുലൻസുകളും സ്കൂൾ വിദ്യാർഥികളുമായി നിരവധി വാഹനങ്ങളും മറ്റ് ആയിരക്കണക്കിന് യാത്ര-ചരക്ക് വാഹനങ്ങളും സഞ്ചരിക്കുന്ന മൂവാറ്റുപുഴ നഗരത്തിലെ റോഡുകൾ അപകടക്കുഴികളായി മാറിക്കഴിഞ്ഞു. റോഡിലെ ഗതാഗതക്കുരുക്കും റോഡിന്‍റെ ശോചനീയാവസ്ഥയും മൂലം നഗരത്തിലെ വ്യാപാരി - വ്യവസായികളും വലിയ ദുരിതം അനുഭവിച്ചുവരികയാണെന്നും യോഗം കുറ്റപ്പെടുത്തി. മണ്ഡലം കമ്മിറ്റിയംഗം സി.എം. ഇബ്രാഹിം കരീം അധ്യക്ഷത വഹിച്ചു. സമരത്തെ തുടർന്ന് സിപിഎം നേതാക്കളായ അനീഷ് എം. മാത്യു, സജി ജോർജ്, എം.എ. സഹീർ, കെ.ജി. അനിൽകുമാർ, പി.ബി. അജിത്ത് കുമാർ എന്നിവരുടെ നേതൃത്വത്തിൽ സെക്രട്ടറിയുമായി ചർച്ച നടത്തി. അറ്റകുറ്റപ്പണിയിലുണ്ടായ വീഴ്ച്ചയെ സംബന്ധിച്ച് അന്വേഷണം നടത്തുമെന്ന് ഉറപ്പ് നൽകി.

മൂവാറ്റുപുഴയിലെ വ്യാപാരികൾക്കു പ്രതീക്ഷ : കെട്ടിട വാടക കുറയ്ക്കാൻ നിയമോപദേശം തേടുന്നു

മൂവാറ്റുപുഴ: മൂവാറ്റുപുഴ നഗരത്തിലെ വ്യാപാര സമൂഹത്തിന് പ്രതീക്ഷ നൽകുന്ന തീരുമാനവുമായി എംഎൽഎയും ചെയർമാനും. മൂവാറ്റുപുഴ നഗരസഭയുടെ കീഴിലുള്ള കെട്ടിടങ്ങളിലെ വാടക കുറയ്ക്കുന്നതിനുള്ള നിയമ ഉപദേശംതേടി നഗരസഭാധ്യക്ഷൻ. നഗരവികസന പദ്ധതികളുമായി ബന്ധപ്പെട്ട് കഴിഞ്ഞ മൂന്ന് മാസത്തിലേറെയായി കടുത്ത സാന്പത്തിക പ്രതിസന്ധിയിലൂടെയാണ് മൂവാറ്റുപുഴയിലെ വ്യാപാര സമൂഹം കടന്നു പോകുന്നത്. അവരുടെ വേദന മനസിലാക്കി, അവർക്ക് ഒരു താങ്ങായി നഗരത്തിലെ കെട്ടിട ഉടമകളോട് കച്ചവടം ദുസഹമായിരിക്കുന്ന ഈ സാഹചര്യത്തിൽ തങ്ങളുടെ കട മുറികൾ എടുത്തിരിക്കുന്നവർക്ക് വാടകയിൽ ഇളവ് നൽകണമെന്ന് മാത്യു കുഴൽനാടൻ എംഎൽഎയും നഗരസഭാധ്യക്ഷൻ പി.പി. എൽദോസും ചേർന്ന് അഭ്യർഥിക്കാൻ തീരുമാനിച്ചു. നഗരസഭയുടെ കീഴിലുള്ള കെട്ടിടങ്ങളിൽ വാടക കുറയ്ക്കുന്നതുമായി ബന്ധപ്പെട്ട് നിയമവശങ്ങൾ പരിശോധിച്ച ശേഷം സാധ്യമായ നടപടികൾ കൈക്കൊള്ളുമെന്ന് നഗരസഭാധ്യക്ഷൻ അറിയിച്ചു. അതേസമയം നഗരത്തിലെ സ്വകാര്യ കെട്ടിട ഉടമകളും വാടകയിൽ കഴിയുന്ന ആശ്വാസം നൽകാൻ തയാറാകണമെന്ന് എംഎൽഎയും ചെയർമാനും തുടർ ദിവസങ്ങളിൽ ആവശ്യപ്പെടുന്നതിനും തീരുമാനിച്ചു. വ്യാപാരികളുടെ പ്രശ്നങ്ങൾ നേരിട്ട് കേൾക്കുന്നതിനായി കഴിഞ്ഞ ദിവസം എംഎൽഎ വ്യാപാരി അസോസിയേഷനും പ്രതിസന്ധി നേരിടുന്ന സ്ഥലങ്ങളിലെ വ്യാപാര പ്രതിനിധികളുമായും പ്രത്യേക ചർച്ചയും നടത്തി. വ്യാപാരികളുടെ ദുരിതത്തിൽ കെട്ടിട ഉടമകളും സാഹചര്യങ്ങൾ മനസിലാക്കി അവരോടൊപ്പം നിൽക്കണമെന്ന സന്ദേശമാണ് എംഎൽഎയും ചെയർമാനും ചേർന്ന് നൽകുന്നത്. കഴിഞ്ഞ ഒന്നര മാസമായി പെയ്യുന്ന മഴ വികസന പ്രവർത്തനങ്ങൾക്ക് വലിയ തടസമാണ് സൃഷ്ടിച്ചിരിക്കുന്നത്. കാലാവസ്ഥ അനുകൂലമായി തുടർന്നാൽ ആരും പ്രതീക്ഷിക്കാത്ത വേഗതയിൽ ജോലി മുന്നോട്ട് കൊണ്ടുപോകുമെന്നും എംഎൽഎ പറഞ്ഞു.

പച്ചക്കറി തൈകൾ വിതരണം ചെയ്തു

നെടുമ്പാശേരി : "വിഷ രഹിത പച്ചക്കറിക്ക് നമുക്കും ഒരു തൈ നടാം' കുട്ടികളിൽ കാർഷിക അവബോധം വളർത്താൻ ചെങ്ങമനാട് കൃഷി ഭവന്‍റെയും നെടുവന്നൂർ സെന്‍റ് മേരീസ് സൺഡേ സ്കൂളിന്‍റെയും അഭിമുഖ്യത്തിൽ സൺഡേ സ്കൂൾ വിദ്യാർഥികൾക്കായി വിവിധ ഇനം പച്ചക്കറികൾ വിതരണം ചെയ്തു. വിതരണോദ്ഘാടനം കൃഷി ഓഫീസർ സ്വപ്ന തോമസ് സ്കൂൾ ലീഡർ ഐറിൻ വിജോക്ക് തൈകൾ നൽകി നിർവഹിച്ചു. പള്ളി വികാരി ഫാ. ലിന്‍റോ കാട്ടുപറമ്പിൽ അധ്യക്ഷത വഹിച്ചു. പഞ്ചായത്ത് അംഗങ്ങളായ അനിൽകുമാർ, ഷാജൻ അബ്രാഹം , ഹെഡ്മാസ്റ്റർ ജിനോ കൂട്ടാല എന്നിവർ പ്രസംഗിച്ചു. വൈസ് ചെയർമാൻ ഫ്രാൻസിസ് പുതുവ, കൈക്കാരന്മാരായ മാർട്ടിൻ തേയ്ക്കാനത്ത്, ജോബി സെബാസ്റ്റ്യൻ, അധ്യാപകരായ കെ.വി. ജോസ്, ഹണി സിബി, റോസിലി ജോസ്, ഷേർളി ജെയിംസ്, റൂബി ജോയ്, ഡീക്കൻ ബിജു പുല്ലുകാലയിൽ, പിസിസി അംഗം ബിജു കെ. മുണ്ടാടൻ, എറണാകുളം ജില്ലയിലെ മികച്ച കർഷകൻ ബേബി തച്ചപ്പിള്ളി, സ്റ്റുഡന്‍റ്സ് ലീഡർ അമിത് ജോർജ്, കപ്യാർ ബിജു തേയ്ക്കാനത്ത് എന്നിവർ നേതൃത്വം നൽകി.

കൂവപ്പടി ബ്ലോക്കിൽ തിരുവാതിര ഞാറ്റുവേല ഫലവൃക്ഷ പ്രദര്‍ശനവും വിപണനവും

പെരുമ്പാവൂര്‍: കൂവപ്പടി ബ്ലോക്ക് പഞ്ചായത്ത്, ഫലവൃക്ഷ പ്രചാരക സമിതി, ഹരിതകേന്ദ്രം എന്നിവ സംയുക്തമായി സംഘടിപ്പിക്കുന്ന തിരുവാതിര ഞാറ്റുവേല ഇന്നു മുതല്‍ 12 വരെ ബ്ലോക്ക് പഞ്ചായത്ത് ഓഫീസ് കോമ്പൗണ്ടില്‍ നടക്കുമെന്ന് സംഘാടകര്‍ വാർത്താ സമ്മേളനത്തില്‍ അറിയിച്ചു. ഇന്നു രാവിലെ 10ന് ബ്ലോക്ക് പഞ്ചായത്ത് പ്രസിഡന്‍റ് എന്‍.എം. സലിം ഉദ്ഘാടനം ചെയ്യും. അലങ്കാര -പുഷ്പ ഫലവൃക്ഷ പ്രദര്‍ശനവും വിപണനവും ഉണ്ടാകും. മാത്യു പനയ്ക്കല്‍, പി.വി. സതീഷ്‌കുമാര്‍ എന്നിവര്‍ അറിയിച്ചു. സ്വദേശിയും വിദേശിയുമായ ഫലവൃക്ഷത്തൈ, പൂച്ചെടികള്‍, പച്ചക്കറി തൈ, അത്യുല്‍പാദന ശേഷിയുള്ള പച്ചക്കറി വിത്തുകള്‍, വളങ്ങള്‍ കൃഷിക്കാവശ്യമായ ഉപകരണങ്ങള്‍ കൂടാതെ കാര്‍ഷിക മൂല്യ വര്‍ധിത ഉല്‍പ്പന്നങ്ങള്‍, ചെറുതേന്‍, വന്‍തേന്‍, കാന്താരി തേന്‍, മഞ്ഞള്‍ തേന്‍, നെല്ലിക്കാ തേന്‍, ജൈവകീടനാശിനികള്‍, ഉറുമ്പ്, പാറ്റ, പല്ലി, ഒച്ച്, ഈച്ച എന്നിവയ്ക്കുള്ള ഹോം പെസ്റ്റിസൈഡ് എന്നിവയുടെ പ്രദര്‍ശനവും വിപണനവും നടക്കും. സൗജന്യ കാര്‍ഷിക തൊഴില്‍ പരിശീലനത്തിന്‍റെ ഭാഗമായി അടുക്കളത്തോട്ടം, തേനീച്ച പരിപാലനം, കോഴി വളര്‍ത്തല്‍, ഊര്‍ജ സംരക്ഷണം, (എല്‍.ഇ.ഡി. ബള്‍ബ് നിര്‍മാണം, പഴയ ബള്‍ബുകളുടെ പുനരുപയോഗം), തുണി കൊണ്ടുള്ള വിവിധ ബാഗുകളുടെ നിര്‍മാണം, തുണികളുടെ പുനരുപയോഗം എന്നീ വിഷയങ്ങളില്‍ ക്ലാസുകള്‍ നടക്കും. വ്യാഴാഴ്ച ഉദ്ഘാടനത്തിനോട് അനുബന്ധിച്ച് അടുക്കള തോട്ടം നിര്‍മാണം പരിശീലനം നടക്കും. പങ്കെടുക്കുന്നവര്‍ മുന്‍കൂട്ടി പേര് രജിസ്റ്റര്‍ ചെയ്യണം. ഫോണ്‍: 9562369001

രാജഗിരി ആർഎസ്എപി: പുതിയ ബാച്ച് ആരംഭിച്ചു

കളമശേരി: രാജഗിരി കോളജ് ഓഫ് സോഷ്യൽ സയൻസസിൽ ഓഫീസ് ഓഫ് ഇന്‍റർനാഷണൽ റിലേഷൻസിന്‍റെ ആഭിമുഖ്യത്തിൽ രാജഗിരി ആക്സിലറേറ്റഡ് സ്റ്റഡി അബ്രോഡ് പ്രോഗ്രാമിൽ (ആർഎസ്എപി) പുതിയ ബാച്ചുകൾ ആരംഭിച്ചു. ആർസിഎസ്എസ് പ്രിൻസിപ്പൽ റവ.ഡോ. എം.ഡി. സാജു, അഡ്മിനിസ്ട്രേറ്റർ ഫാ. റിന്‍റിൽ മാത്യു, അസോ. ഡയറക്ടർ ഡോ. ബിനോയ് ജോസഫ്, ഇസിയു സൗത്ത് ഇന്ത്യ റീജണൽ മാനേജർ നിലം ജെയിൻ, റവ. ഡോ. ഷിന്‍റോ ജോസഫ്, ഡോ. കിരൺ തമ്പി, സർട്ടിഫൈഡ് ഇമേജ് കൺസൾട്ടന്‍റ് വീണ എന്നിവർ പ്രസംഗിച്ചു.

രാജഗിരി വിശ്വജ്യോതി കോളജിൽ "ദീക്ഷാരംഭം' സംഘടിപ്പിച്ചു

പെരുമ്പാവൂർ: വേങ്ങൂർ രാജഗിരി വിശ്വജ്യോതി കോളജ് ഓഫ് ആർട്സ് ആൻഡ് അപ്ലൈഡ് സയൻസിൽ വിവിധ പ്രോഗ്രാമുകളിലേക്കുള്ള ഒന്നാംവർഷ ബിരുദ വിദ്യാർഥികൾക്കുള്ള പ്രവേശനോത്സവം സംഘടിപ്പിച്ചു. പുതിയ അധ്യയന വർഷത്തിലേക്ക് കടന്ന വിദ്യാർഥികൾക്ക് പ്രിൻസിപ്പാളും വിശിഷ്ട വ്യക്തികളും ചേർന്ന് തിരി തെളിയിച്ചു നൽകിയാണ് സ്വാഗതം ചെയ്തത്. കോളജ് പ്രിൻസിപ്പൽ പ്രഫ. ജിംസൺ ഡി. പറമ്പിൽ അധ്യക്ഷത വഹിച്ച ചടങ്ങിൽ കൊച്ചി എസ്എച്ച് പ്രൊവിൻഷ്യൽ ഫാ. ബെന്നി നൽക്കര ഉദ്ഘാടന കർമം നിർവഹിച്ചു. ഇടുക്കി മോട്ടിവേഷൻ സെൽ, പോലീസ് സബ് ഇൻസ്പെക്ടർ അജി അരവിന്ദ് മുഖ്യപ്രഭാഷകനായിരുന്നു. കോളജ് അസോസിയേറ്റ് ഡയറക്ടർ ഫാ. ഡിബിൻ കരിങ്ങേൻ , സ്റ്റാഫ് സെക്രട്ടറി അസി. പ്രഫ. സുസ്മിൻ രെജു, അസി. പ്രഫ. ഡി. രഞ്ജിനി തുടങ്ങിയവർ സംസാരിച്ചു.

ഹോമിയോ ഡിസ്പെൻസറിയിൽ യോഗ ഹാൾ തുറന്നു

കാലടി: ശ്രീമൂലനഗരം ഗ്രാമപഞ്ചായത്തിലെ ഹോമിയോ ഡിസ്പെൻസറി യോഗ ഹാൾ അൻവർ സാദത്ത് എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് വി.എം. ഷംസുദ്ദീൻ അധ്യക്ഷത വഹിച്ചു. പഞ്ചായത്തിന്‍റെ തനത് ഫണ്ടിൽ നിന്നും ഏഴു ലക്ഷം രൂപയും ആയുഷ് മിഷന്‍റെ അഞ്ചു ലക്ഷം രൂപയും ഉൾപ്പെടെ 12 ലക്ഷത്തോളം രൂപമുടക്കിയാണ് പുതിയ ഹാൾ നിർമിച്ചിരിക്കുന്നത്. വൈസ് പ്രസിഡന്‍റ് സിന്ധു പാറപ്പുറം, ജില്ലാ പഞ്ചായത്ത് മെമ്പർ എം.ജെ. ജോമി, മെമ്പർമാരായ കെ.സി. മാർട്ടിൻ, എൻ.സി. ഉഷാകുമാരി, സിൽവി ബിജു, സിമി ജിജോ, ആന്‍റണി വടക്കഞ്ചേരി, കെ പി അനൂപ്, ഡാർലി ജീമോൻ, ഡേവിസ്കൂട്ടുങ്ങൽ, ഷിജിത സന്തോഷ് , കെ.പി. സുകുമാരൻ, മെഡിക്കൽ ഓഫീസർമാരായ ഡോ. അഭിജിത്ത്, ഡോ. ഗ്ലെൻസൺ തുടങ്ങിയവർ ചടങ്ങിൽ പങ്കെടുത്തു.

കറുകുറ്റി ക്രിസ്തുരാജാശ്രമ പള്ളിയിൽ പൈതൃകം 2കെ25

അങ്കമാലി: കറുകുറ്റി ക്രിസ്തുരാജാശ്രമ പള്ളിയിൽ മാർ തോമാശ്ലീഹായുടെ തിരുനാൾ അനുസ്മരണവും മതബോധന വാർഷികാഘോഷവും പൈതൃകം എന്ന പേരിൽ ആഘോഷിച്ചു. ഇടവക മതബോധന ഹെഡ്മിസ്ട്രസ് പൗളി ജോൺസൻ സ്വാഗതം ആശംസിച്ചു. വികാരി ഫാ. ജെയ്സൻ ചിറേപ്പടിയ്ക്കൽ അധ്യക്ഷനായി. തുടർന്ന് മുൻ വികാരി ഫാ. ജോണി ചിറയ്ക്കൽ ഉദ്ഘാടനം നിർവഹിച്ചു. 2024-25 വർഷത്തിൽ മതപഠന വിജയികൾക്ക് സമ്മാനങ്ങളും ട്രോഫിയും നല്കുകയുണ്ടായി കെസിവെഎം വിവിധ കലാപരിപാടികൾക്ക് നേതൃത്വം നല്കി. വൈസ് ചെയർമാൻ ദേവസി ചന്ദനത്തിൽ, കൈക്കാരന്മാരായ ജോൺസൻ കുടിയിരിക്കൽ, ഷിബു ചക്കാലയ്ക്കൽ അസി. വികാരി ഫാ. ഷിമോജ് മാണിക്കത്തുപറമ്പിൽ തുടങ്ങിയവർ നേതൃത്വംനല്കി.

സെന്‍റ് ആൻസ് കോളജിൽ വിജ്ഞാനോത്സവം

അങ്കമാലി: സെന്‍റ് ആൻസ് കോളേജിലെ നാലു വർഷ ഓണേഴ്സ് ഡിഗ്രി ക്ലാസുകളുടെ പ്രവേശനോത്സവം അങ്കമാലി സെന്‍റ് ആൻസ് എഡ്യുക്കേഷണൽ ആൻഡ് ചാരിറ്റി ഫൗണ്ടേഷൻ ചെയർമാൻ സി.എ. ജോർജ് കുര്യൻ പാറയ്ക്കൽ ഉദ്ഘാടനം ചെയ്തു. കോളജ് പ്രിൻസിപ്പൽ ക്യാപ്റ്റൻ ഡോ. എം.കെ. രാമചന്ദ്രന്‍റെ അധ്യക്ഷതയിൽ നടന്ന ചടങ്ങിൽ കോളജ് നോഡൽ ഓഫീസർ ലഫ്റ്റനന്‍റ് ആഷ്ന ഗോപാൽ സ്വാഗതം പറഞ്ഞു. ചെയർമാൻ സി.എ. ജോർജ് കുര്യൻ വിദ്യാർഥികളും രക്ഷിതക്കളുമൊത്ത് ദീപം തെളിച്ചു. എൻഎസ്എസ് പ്രോഗ്രാം ഓഫീസർ അസി. പ്രഫ. അരവിന്ദാക്ഷൻ കുഞ്ഞി , പ്രോഗ്രാം കോ ഓർഡിനേറ്റർ അസി. പ്രഫ. കെ.കെ. ഹരീഷ് തുടങ്ങിയവർ പരിപാടിക്ക് നേതൃത്വം നൽകി.

അറ്റകുറ്റപ്പണി ഒച്ചിഴയും വേഗത്തിൽ; ഗോശ്രീ പാലത്തിൽ കുരുക്ക്

വൈപ്പിൻ : എളുപ്പം നോക്കി ഗോശ്രീ വഴി ആരും വരരുതെന്ന് നാട്ടുകാരുടെ മുന്നറിയിപ്പ്. ഗോശ്രീ റോഡിലും പാലത്തിലും നിത്യേനയുള്ള ഗതാഗതക്കുരുക്കാണ് നാട്ടുകാരുടെ മുന്നറിയിപ്പിനു കാരണം. രണ്ടാം പാലത്തിൻ സമാന്തരമായ പാലം അടച്ച് അറ്റകുറ്റപ്പണി ആരംഭിച്ചതോടെയാണ് ഗതാഗതക്കുരുക്ക് രൂക്ഷമായത്. സമാന്തരപാലം അടച്ചതോടെ ഗോശ്രീ രണ്ടാം പാലത്തിലൂടെയാണ് ഇരു വശങ്ങളിലേക്കും കണ്ടെയ്നർ ഉൾപ്പെടെയുള്ളവ പോകുന്നത്. ഇതാണ് ഗതാഗതക്കുരുക്കി നു പ്രധാന കാരണമത്രേ. ഒരു മാസമായി തുടരുന്ന അറ്റകുറ്റപ്പണികൾ ഒച്ചിഴയും വേഗത്തിലാണ് നടക്കുന്നത്. പാലത്തിലെ ഗതാഗതക്കുരുക്കു കാരണം സ്വകാര്യ ബസുകൾ വൈപ്പിൻ സ്റ്റാൻഡിൽ കയറുന്നില്ല. ഇതുമൂലം ഫോർട്ടുകൊച്ചി, മട്ടാഞ്ചേരി, ഐലൻഡ് ഭാഗത്തേക്ക്പോകുന്നവർക്കും തിരിച്ചു വരുന്നവർക്കും യാത്ര ഏറെ ക്ലേശകരമാണ്. ഈ സാഹചര്യത്തിൽ ഗതാഗത കുരുക്കിന് പരിഹാരമുണ്ടാക്കണമെന്നാവശ്യപ്പെട്ട് വൈപ്പിൻ-ഫോർട്ടുകൊച്ചി പാസഞ്ചേഴ്സ് അസോസിയേഷൻ ജില്ലാ കളക്ടർക്ക് നിവേദനം നൽകിയതായി പ്രസിഡന്‍റ് ഫ്രാൻസിസ് ചമ്മിണി അറിയിച്ചു.

തോമാശ്ലീഹായുടെ തിരുനാള്‍ കൊടിയേറി

കൊച്ചി: എറണാകുളം സെന്‍റ് തോമസ് മലങ്കര സുറിയാനി കത്തോലിക്കാ പള്ളിയില്‍ വിശുദ്ധ തോമാശ്ലീഹയുടെ തിരുനാള്‍ അഞ്ച്, ആറ് തീയതികളില്‍ നടക്കും. വികാരി ഫാ.ജോമോന്‍ കട്ടര്‍മൂലയില്‍ കൊടിയേറ്റി. ആറിന് രാവിലെ 8.30ന് പൂന കട്കി രൂപതാധ്യക്ഷന്‍ മാത്യൂസ് മാര്‍ പക്കോമിയോസ് മെത്രാപ്പോലീത്തയ്ക്ക് സ്വീകരണം നല്‍കും. തിരുനാള്‍ ദിവ്യബലിക്ക് അദ്ദേഹം മുഖ്യംകാര്‍മികത്വം വഹിക്കും. തുടര്‍ന്ന് മരിയനഗര്‍ കുരിശടിയിലേക്ക് പ്രദക്ഷിണം .

വേങ്ങൂരിൽ ലയൺസ് ക്ലബ്ബിന്‍റെ നേതൃത്വത്തിൽ നിർമിച്ച വീടിന്‍റെ താക്കോൽ കൈമാറി

നെടുമ്പാശേരി: കൊച്ചി എയർപോർട്ട് ലയൺസ് ക്ലബ്ബിന്‍റെയും ലയൺസ് ഡിസ്ട്രിക്ടിന്‍റെയും കൊച്ചൗസേഫ് ചിറ്റിലപ്പിള്ളി ഫൗണ്ടേഷന്‍റെയും സഹകരണത്തോടെ വേങ്ങൂരിൽ നിർമാണം പൂർത്തീകരിച്ച വീടിന്‍റെ താക്കോൽ കൈമാറി. വേങ്ങൂർ സ്വദേശിനി പൂവ്വത്തും പള്ളയിൽ പരേതനായ പ്രഭാകരന്‍റെ ഭാര്യ എം.കെ. രാധയ്ക്കാണ് വീട് നിർമിച്ച് നൽകിയത്. ലയൺസ് ക്ലബ്ബ് പ്രസിഡന്‍റ് ജസ്റ്റിൻ ജോസഫ്, പാസ്റ്റ് ഡിസ്ട്രിക്റ്റ് ഗവർണർ ഡോ. ജോസഫ് കെ . മനോജ്, ഹൗസിംഗ് പ്രൊജക്ട് സെക്രട്ടറി ജോസ് മംഗലി, റീജിയൻ ചെയർമാൻ സി.എ. ജോളി സ്റ്റീഫൻ, ഡിസ്ടിക്റ്റ് പ്രോജക്ട് ചെയർമാൻ ടി.കെ. രാജീവ്, കൗൺസിലർ ലേഖ മധു, ലേഡീസ് ഫോറം പ്രസിഡന്‍റ് റൂബി ജസ്റ്റിൻ, ലയൺസ് ക്ലബ് സെക്രട്ടറി പി.ഐ. ബോസ്, ട്രഷറർ ടി.പി. ചാക്കോച്ചൻ, വൈസ് പ്രസിഡന്‍റുമാരായ ടോമി മാത്യു, സോജൻ ജോസഫ്, മറ്റ് ഭാരവാഹികളായ ഷൈൻ പോൾ, പി.ഡി. ഏല്യാസ്, മധുസുധൻ നായർ, സുജാത ബോസ്, ജെസി ചാക്കോച്ചൻ, വി.കെ. ജോഷി, എം.എം. പാപ്പച്ചൻ തുടങ്ങിയവർ പങ്കെടുത്തു.

പുതിയകാവ് സ്കൂളിൽ ജല ഗുണനിലവാര പരിശോധനാ ലാബ് തുറന്നു

പറവൂർ: ചിറ്റാറ്റുകര പഞ്ചായത്തിലെ പുതിയകാവ് ഹയർ സെക്കൻഡറി സ്കൂളിൽ ജല ഗുണനിലവാര പരിശോധന ലാബ് തുടങ്ങി. ഹരിത കേരള മിഷനും വിദ്യാഭ്യാസ വകുപ്പും സംയുക്തമായി സ്കൂളുകളിലെ കെമിസ്ട്രി ലാബ് പ്രയോജനപ്പെടുത്തിയാണ് ലാബ് തുടങ്ങുന്നത്. പഞ്ചായത്ത് പ്രസിഡന്‍റ് ശാന്തിനി ഗോപകുമാർ ഉദ്ഘാടനം ചെയ്തു. വൈസ് പ്രസിഡന്‍റ് പി.പി. ആരുഷ് അധ്യക്ഷനായി. ഹരിത മിഷൻ റിസോഴ്സ് പേഴ്സൺ ജെഫിൻ പദ്ധതിയെപ്പറ്റി വിശദീകരിച്ചു. പൊതുജനങ്ങള്‍ക്ക് തങ്ങളുടെ കിണര്‍ വെള്ളത്തിന്‍റെ സാമ്പിള്‍ സ്‌കൂളുകളിലെ ലാബുകളില്‍ നേരിട്ടെത്തിച്ച് ഗുണനിലവാര പരിശോധന നടത്താം. ഇതോടെ ജലത്തിന്‍റെ ഗുണനിലവാരം ഉറപ്പാക്കാനാകും. വി.എ. താജുദീൻ, ലൈബി സാജു, ഷെറീന ബഷീർ, എസ്. സരിത, അജയ് ജോർജ് എന്നിവർ സംസാരിച്ചു.1000 ടെസ്റ്റിംഗ് കിറ്റുകളാണ് ആദ്യഘട്ടത്തിൽ ലാബുകൾക്ക് നൽകിയിരിക്കുന്നത്.

പറവൂർ കോട്ടയ്ക്കാവ് സെന്‍റ് തോമസ് പള്ളിയിൽ ദുക്റാന തിരുനാൾ ഇന്ന്

പറവൂർ : പറവൂർ കോട്ടയ്ക്കാവ് സെന്‍റ് തോമസ് ഫോറോന പള്ളിയിൽ മാർത്തോമാശ്ലീഹായുടെ ദുക്റാന തിരുനാൾ ഇന്ന്. രാവിലെ 9. 30ന് ആഘോഷമായ തിരുനാൾ കുർബാന. ‌ഫാ. വിപിൻ കുരിശുതറ മുഖ്യകാർമികത്വം വഹിക്കും. ഫാ. സെബിൻ മരിക്കാശേരി, ഫാ. അഖിൽ വയ്പ്പു കാട്ടിൽ എന്നിവർ സഹ കാർമികരാകും. പ്രസംഗം ഫാ. ജോഷി പുതുശേരി. തുടർന്ന് പള്ളി ചുറ്റി പ്രദക്ഷിണം, നേർച്ചസദ്യ. ഉച്ചയ്ക്ക് ഒന്നിന് വിശുദ്ധ കുർബാന ലത്തീൻ റീത്തിൽ ഫാ. പ്രിൻസ് പടമാട്ടുമ്മൽ കാർമികനാകും. വൈകീട്ട് 3 നും 5 30നും വിശുദ്ധ കുർബാന ലദീഞ്ഞ് ഉണ്ടായിരിക്കും.

താക്കോൽദാനം ഞായറാഴ്ച

കാലടി : അങ്കമാലി എൻആർഐ അസോസിയേഷൻ അബുദാബി (ആൻറിയ) നിർമിച്ചു നൽകുന്ന വീടിന്‍റെ താക്കോൽദാനം ഞായറാഴ്ച നടക്കുമെന്ന് ആൻറിയ ഭാരവാഹികൾ വാർത്താ സമ്മേളനത്തിൽ പറഞ്ഞു. അങ്കമാലി നഗരസഭയിലേയും സമീപപ്രദേശങ്ങളിലെ 12 പഞ്ചായത്തുകലേയും യുഎഇ പ്രവാസികളെ ഉൾക്കൊള്ളുന്ന സംഘടനയാണ് ആൻറിയ. ആൻറിയ ഈ വർഷം കാലടി മാണിക്യമംഗലത്തുള്ള നിർധന കുടുംബത്തിന് "ആൻറിയ സ്നേഹവീട് " എന്ന പേരിൽ വീട് നിർമിച്ചു നൽകുകയാണ്. ആൻറിയ പണി പൂർത്തിയാകരിക്കുന്ന അഞ്ചാമത്തെ വീടാണ് ഇത്. ഞായറാഴ്ച വൈകിട്ട് നാലിന് റോജി എം. ജോൺ എംഎൽഎ താക്കോൽ ദാനം നിർവഹിക്കും. മാണിക്യമംഗലം പള്ളി വികാരി ഫാ. ജോസ് ചാത്തേലി, ഗ്രാമപഞ്ചായത്ത് പ്രസിഡന്‍റ് ഷൈജൻ തോട്ടപ്പിള്ളി, വാർഡ് മെമ്പർ സ്മിതാ ബിജു എന്നിവർ ചടങ്ങിൽ പങ്കെടുക്കും. വാർത്താ സമ്മേളനത്തിൽ ആൻറിയ ജനറൽ സെക്രട്ടറി ആൻസൺ ആന്‍റണി, കൺവീനർ സാജു ജോസഫ്, ജോയിന്‍റ് സെക്രട്ടറി സ്വരാജ്, എക്സിക്യൂട്ടീവ് കമ്മിറ്റി അംഗങ്ങളായ റോബിൻ തോമസ്, ജോർജ് പടയാട്ടിൽ, മാർട്ടിൻ ഔസേപ്പ് എന്നിവർ പങ്കെടുത്തു.

കുടിവെള്ള പൈപ്പ് സ്ഥാപിക്കാൻ വെട്ടിപ്പൊളിച്ച റോഡിലെ കുഴിയിൽ വീണ് യുവതിക്ക് പരിക്ക്

പള്ളുരുത്തി: കുടിവെള്ള പൈപ്പ് സ്ഥാപിക്കാൻ വെട്ടിപ്പൊളിച്ച റോഡിലെ കുഴിയിൽ വീണ് യുവതിക്ക് പരിക്ക്. പെരുമ്പടപ്പ് സനാതന റോഡിൽ താമസിക്കുന്ന അനുമോളാണ് അപകടത്തിൽ പെട്ടത്. ഇന്നലെ രാവിലെയാണ് സംഭവം. റോഡിലൂടെ ഇരുചക്രവാഹനത്തിൽ യാത്ര ചെയ്യുകയായിരുന്ന യുവതി കുഴിയിൽ വീഴാതിരിക്കാൻ വാഹനം വെട്ടിച്ചതിനെ തുടർന്ന് നിലത്തേക്ക് വീഴുകയായിരുന്നു. പിന്നാലെ വലിയ വാഹനങ്ങൾ ഉണ്ടായിരുന്നെങ്കിലും പരിസരത്തുണ്ടായിരുന്ന ആളുകൾ ഒച്ചവച്ചതോടെയാണ് കൂടുതൽ അപകടം ഒഴിവായത്. കുടിവെള്ള പൈപ്പ് സ്ഥാപിക്കാൻ പെരുമ്പടപ്പ് - കുമ്പളങ്ങി റോഡ് പൊളിച്ചിട്ടിട്ട് മാസങ്ങളായി. നിരവധി പേരാണ് റോഡിലെ കുഴിയിൽ വീണ് അപകടത്തിൽ പെടുന്നത്. റോഡ് നന്നാക്കണമെന്നാവശ്യപ്പെട്ട് നിരവധി സംഘടനകൾ സമരം നടത്തിയെങ്കിലും ഫലം കണ്ടില്ല. മഴ പെയ്യുന്നതിനാൽ ഇപ്പോൾ റോഡ് നന്നാക്കാനാവില്ലെന്നാണ് പൊതുമരാമത്ത് അധികൃതർ പറയുന്നത്.

പുഴയിൽ കാണാതായ ആളുടെ മൃതദേഹം കണ്ടെത്തി

പിറവം: പാഴൂർ ക്ഷേത്രത്തിന് സമീപം പുഴയിൽ വള്ളം മറിഞ്ഞ് കാണാതായ പാഴൂർ കല്ലുമാരി കൊണാട്ടുകുഴിയിൽ കുഞ്ഞുമോന്‍റെ (കുട്ടായി- 52) മൃതദേഹം കണ്ടെത്തി. പുഴയിലൂടെ ചെറുവള്ളത്തിൽ പോകുന്നതിനിടയിൽ പാഴൂർ മഴവിൽപ്പാലത്തിനു സമീപം വള്ളം മറിഞ്ഞ് ഒഴുക്കിൽപ്പെടുകയായിരുന്നു. തിങ്കളാഴ്ച വൈകുന്നേരം ആറോടെയിരുന്നു സംഭവം. പോലീസും അഗ്നിരക്ഷാ സേനയും സ്ഥലത്തെത്തി നാട്ടുകാരുടെ സഹായത്തോടെ തെരച്ചിൽ നടത്തിയിരുന്നു. എറണാകുളത്തുനിന്ന് സ്കൂബാ ടീമും എത്തിയിരുന്നു. പുഴയിൽ നല്ല ഒഴുക്കുള്ള ഭാഗമാണ്. അതിനാൽ തെരച്ചിൽ എളുപ്പമല്ലായിരുന്നു. ഇന്നലെ രാവിലെ പത്തോടെ പാഴൂർ മഴവിൽ പാലത്തിൽനിന്ന് 50 മീറ്റർ മാറി പിറവം മുല്ലൂർപ്പടിയിൽ തച്ചാമറ്റം കടവിന് സമീപത്ത് മൃതദേഹം കണ്ടെത്തുകയായിരുന്നു. പോലീസ് നടപടികൾക്കുശേഷം മൃതദേഹം പോസ്റ്റുമോർട്ടത്തിനായി കളമശേരി മെഡിക്കൽ കോളജിലേക്ക് കൊണ്ടുപോയി. ഭാര്യ: സുനിത. മക്കൾ: അയന (ആന്ധ്ര), ആദർശ്.

പനി ബാധിച്ച് മരിച്ചു

ആലുവ: പനി ബാധിച്ച് ചികിത്സയിലായിരുന്ന ചൂർണിക്കര മുട്ടം ചേന്നാന്പിള്ളി, കോട്ടേപ്പിള്ളി പറന്പിൽ (കാട്ടിൽ) സുബൈറിന്‍റെ മകൻ മുഹമ്മദ് സഫ്വാൻ (15) മരിച്ചു. പാതാളം ഗവ. ഹൈസ്കൂളിൽ പത്താം ക്ളാസ് വിദ്യാർഥിയായിരുന്നു. മാതാവ്: ഷാജിത വെങ്ങോല പള്ളിക്കൽ കുടുംബാംഗം. സഹോദരങ്ങൾ: അമീറ (ഡിഗ്രി വിദ്യാർഥിനി), മുഹമ്മദ് സമീൽ (പ്ലസ് ടു വിദ്യാർഥി).

യമൻ വിദ്യാർഥികൾ കടൽ തിരകളിൽ മറഞ്ഞിട്ട് ഇന്നേക്ക് ഒരു മാസം

വൈപ്പിൻ: എളങ്കുന്നപ്പുഴ വളപ്പ് ബീച്ചിൽ കുളിക്കാനിറങ്ങിയ യമനിൽനിന്നുള്ള രണ്ട് വിദ്യാർഥികൾ കടലിന്‍റെ കാണാക്കയങ്ങളിലേക്ക് മറഞ്ഞിട്ട് ഇന്നേക്ക് ഒരു മാസം. തെരച്ചിലുകൾ ഏറെ നടത്തിയെങ്കിലും ഇരുവരെയും ഇതുവരെ കണ്ടെത്താനായില്ല. കഴിഞ്ഞ മാസം രണ്ടിനാണ് കോയമ്പത്തൂർ രത്തിനം കോളജിലെ ഐടി വിദ്യാർഥികളായ ജുബ്രാൻ ഖലീൽ (21), അബ്ദുൾ സലാം അവാദ് (22) എന്നിവർ സുഹൃത്തുക്കൾക്കൊപ്പം കടലിൽ കുളിക്കാൻ ഇറങ്ങി കാണാതായത്. ഒമ്പതംഗ വിദേശ വിദ്യാർഥി സംഘം കോയമ്പത്തൂരിൽ നിന്ന് കാർ വാടകയ്ക്കെടുത്ത് എറണാകുളത്ത് വിനോദയാത്ര വന്നതാണ്. കടലിൽ കുളിക്കാൻ ഇറങ്ങിയ സംഘത്തെ മത്സ്യത്തൊഴിലാളികൾ വിലക്കിയെങ്കിലും ഭാഷ ഇവർക്ക് മനസിലായില്ല. ഇതാണ് വിനയായത്. വിവരമറിഞ്ഞ് കാണാതായവരുടെ ബന്ധുക്കൾ സ്ഥലത്ത് എത്തിയിരുന്നു. കോസ്റ്റ് ഗാർഡും നേവിയും കോസ്റ്റൽ പോലീസും ഒക്കെ ഒരാഴ്ചയോളം നടത്തിയ തെരച്ചിൽ വിഫലമായതിനെ തുടർന്ന് പ്രതീക്ഷയറ്റ ബന്ധുക്കൾ ഒടുവിൽ നിരാശയോടെ നാട്ടിലേക്ക് വിമാനം കയറി.

ആരോഗ്യ കേരളം തകര്‍ത്തു, ഉത്തരവാദി ആരോഗ്യ മന്ത്രി: വി.ഡി. സതീശന്‍

കൊച്ചി: ആരോഗ്യ കേരളത്തെ തകര്‍ത്ത ആരോഗ്യമന്ത്രിയാണ് ഇന്നുള്ളതെന്ന് പ്രതിപക്ഷനേതാവ് വി.ഡി.സതീശന്‍. സര്‍ക്കാര്‍ ആശുപത്രികളോട് സര്‍ക്കാര്‍ കാണിക്കുന്ന അവഗണനയ്ക്കും അനാസ്ഥയ്ക്കുമെതിരെ എറണാകുളം ഡിസിസിയുടെ നേതൃത്വത്തില്‍ കളമശേരി മെഡിക്കല്‍ കോളേജിന് മുന്നില്‍ സംഘടിപ്പിച്ച ധര്‍ണ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സംസ്ഥാനത്തെ മെഡിക്കല്‍ കോളജുകളിലും സര്‍ക്കാര്‍ ആശുപത്രികളിലും മരുന്നു ക്ഷാമം രൂക്ഷമായിട്ട് മാസങ്ങളായി. മെഡിക്കല്‍ സര്‍വീസസ് കോര്‍പറേഷന്‍ മരുന്ന് വിതരണക്കാര്‍ക്ക് കോടികള്‍ കുടിശിക വരുത്തിയതാണ് സര്‍ക്കാര്‍ ആശുപത്രികളിലെ മരുന്ന് ക്ഷാമത്തിന് കാരണം. 2024-25ല്‍ മരുന്നു വാങ്ങാന്‍ 934 കോടി രൂപ വേണ്ടിടത്താണ് 356 കോടി രൂപ മാത്രം ബജറ്റില്‍ വകയിരുത്തിയത്. ഇതിനു പുറമെ 150 കോടി കൂടി നല്‍കി. കഴിഞ്ഞ സാമ്പത്തിക വര്‍ഷം മാത്രം മരുന്ന് വിതരണത്തിന് 427 കോടി രൂപ നല്‍കാനുണ്ട്. ഈ സര്‍ക്കാരിന്‍റെ മുന്‍ഗണനകള്‍ എന്തൊക്കെയാണെന്ന് മുഖ്യമന്ത്രി പിണറായി വിജയന്‍ വ്യക്തമാക്കണമെന്നും സതീശന്‍ പറഞ്ഞു. ഡിസിസി പ്രസിഡന്‍റ് മുഹമ്മദ് ഷിയാസ് യോഗത്തില്‍ അധ്യക്ഷനായിരുന്നു. എംഎല്‍എമാരായ അന്‍വര്‍ സാദത്ത്, ടി.ജെ. വിനോദ്, എല്‍ദോസ് കുന്നപ്പള്ളി, കെപിസിസി വൈസ് പ്രസിഡന്‍റ് വി.പി. സജീന്ദ്രന്‍, നേതാക്കളായ ജോസഫ് വാഴയ്ക്കന്‍, എന്‍. വേണുഗോപാല്‍, കെ.പി. ധനപാലന്‍, ഡൊമിനിക് പ്രസന്‍റേഷന്‍, ജയ്‌സണ്‍ ജോസഫ്, കെ.ബി. മുഹമ്മദ് കുട്ടി, ഐ.കെ. രാജു, ടോണി ചമ്മണി തുടങ്ങിയവര്‍ സംസാരിച്ചു.

ആയുർവേദ ഡോക്ടർക്കും സഹായിക്കുമെതിരെ പോക്‌സോ കേസ്

പെരുമ്പാവൂർ: ആയുർവേദ ഡോക്ടർക്കും സഹായിക്കുമെതിരെ പോക്‌സോ കേസ്. അതിജീവിതയും മാതാവും നൽകിയ പരാതിയുടെ അടിസ്ഥാനത്തിലാണ് പെരുമ്പാവൂർ പോലീസ് കേസ് രജിസ്റ്റർ ചെയ്തത്. പെരുമ്പാവൂരിലെ പ്രമുഖ സ്വകാര്യ ആയുർവേദ ചികിത്സ കേന്ദ്രത്തിലെ ഡോക്ടർ അഭിലാഷ്, ഇയാളുടെ സഹായി ഹരീന്ദ്രനാഥ് എന്നിവർക്കെതിരെയാണ് കേസ് രജിസ്റ്റർ ചെയ്തിട്ടുള്ളത്. പ്രായപൂർത്തിയാകാത്ത പെൺകുട്ടിയെ ഡാൻസിനുള്ള വസ്ത്രം വാങ്ങി നൽകാമെന്ന് പറഞ്ഞ് വിളിച്ചുവരുത്തി ഇരുവരും ചേർന്ന് സ്വകാര്യഭാഗങ്ങളിൽ കടന്നു പിടിച്ചെന്നാണ് പരാതി. നാലാഴ്ച മുമ്പാണ് ഇരുവർക്കുമെതിരെ കേസ് നൽകിയത്. എന്നാൽ ഇതുവരെയും പ്രതികളെ പിടികൂടാൻ പോലീസിന് സാധിക്കാതിരുന്നത് കേസ് അട്ടിമറിക്കാനുള്ള ശ്രമമാണെന്നും ആരോപണമുണ്ട്. ഇരുവരും ഒളിവിലാണെന്ന് പോലീസ് പറഞ്ഞു.

വിദേശ ജോലി വാഗ്ദാനം : ലക്ഷങ്ങൾ തട്ടിയ പ്രതി അറസ്റ്റിൽ

കോലഞ്ചേരി: വിദേശ രാജ്യങ്ങളിൽ ജോലി വാഗ്ദാനം ചെയ്ത് ലക്ഷങ്ങൾ തട്ടിയ കേസിലെ പ്രതി അറസ്റ്റിൽ. ഓടക്കാലി മറ്റപ്പിള്ളി വീട്ടിൽ സുഭാഷ് എം. വർഗീസ് (48) ആണ് പുത്തൻകുരിശ് പോലീസിന്‍റെ പിടിയിലായത്. 2024 ഓഗസ്റ്റ് മുതൽ 2025 ഏപ്രിൽ വരെ കോലഞ്ചേരി കടമറ്റത്തു ലാംബ്രോമെലൻ എന്ന സ്ഥാപനം നടത്തിയായിരുന്നു തട്ടിപ്പ്. കോഴിക്കോട് സ്വദേശിയായ പ്രവീൺ വിശ്വനാഥന്‍റെ ആധാർ കാർഡ് അഡ്രസും ഉപയോഗിച്ച് ആൾമാറാട്ടം നടത്തിയാണ് ലക്ഷങ്ങൾ തട്ടിയത്. ജോലി അന്വേഷിച്ചെത്തിയ ഒരാളുടെ പേരിൽ ട്രാൻസാക്ഷൻ കാണിക്കുന്നതിനായി എന്ന പേരിൽ ബാങ്ക് അക്കൗണ്ട് എടുത്തു. അതിലൂടെയാണ് ഇടപാടുകൾ നടത്തിയത്. ജോലി തേടിയെത്തിയ എല്ലാവരോടും 2025 ഏപ്രിലിൽ വിസ റെഡിയാക്കി തരാമെന്ന് പറഞ്ഞു വ്യാജ എഗ്രിമെന്‍റുകൾ തയാറാക്കി പണം വാങ്ങിയ ശേഷം സ്ഥാപനം പൂട്ടി മുങ്ങുകയായിരുന്നു. പ്രതിയുടെ പേരും അഡ്രസും വ്യാജമായിരിന്നിടത്തുനിന്നാണ് പുത്തൻകുരിശ് പോലീസ് അന്വേഷിച്ച് കണ്ടെത്തിയത്. തിരിച്ചറിയാതിരിക്കാൻ ബസിലായിരുന്നു യാത്രകൾ. പോലീസ് അന്വേഷണം തുടങ്ങിയതറിഞ്ഞ ഇയാൾ വെങ്ങോല ഭാഗത്തെ വാടക വീട്ടിൽനിന്നു രാത്രിയിൽ മുങ്ങുകയായിരുന്നു. പാലക്കാട് തിരുവില്വാമലയിൽ കുടുംബമായി വാടകയ്ക്ക് താമസിച്ചു വരികയായിരുന്ന ഇയാളെ സാഹസികമായിയാണ് പോലീസ് പിടികൂടിയത്. 2009ൽ കോതമംഗലം അജാസ് വധക്കേസിൽ ഒന്നാംപ്രതിയായി 2018 വരെ ജയിൽ ശിക്ഷ അനുഭവിച്ചിട്ടുണ്ട്. റൂറൽ ജില്ലാ പോലീസ് മേധാവി എം. ഹേമലതയുടെ മേൽനോട്ടത്തിൽ പുത്തൻകുരിശ് ഡിവൈഎസ്പി വി.ടി. ഷാജൻ, ഇൻസ്പെക്ടർ എൻ. ഗിരീഷ്, കെ.ജി. ബിനോയി, ജി. ശശിധരൻ, ബിജു ജോൺ, കെ.കെ. സുരേഷ്കുമാർ, വിഷ്ണു പ്രസാദ്, രാജൻ കാമലാസനൻ, പി.ആർ. അഖിൽ, പി.എം. റിതേഷ് എന്നിവരാണ് അന്വേഷണ സംഘത്തിലുണ്ടായിരുന്നത്. കൂടുതൽ പേർ കബളിപ്പിക്കപ്പെട്ടിട്ടുണ്ടെന്നാണ് സൂചന.

ആലുവ നഗരസഭയുടെ സൈറണ് ജില്ലാ കളക്ടറുടെ പൂട്ട്

ആലുവ: അപകട മുന്നറിയിപ്പിനായി ഇന്ത്യാ- പാക്ക് യുദ്ധകാലത്ത് സ്ഥാപിച്ച ആലുവ നഗരസഭ കാര്യാലയത്തിലെ സൈറൺ അരനൂറ്റാണ്ടിലെ സേവനത്തിനു ശേഷം പിൻവാങ്ങുന്നു. ശബ്ദമലിനീകരണമെന്ന പരാതിയിൽ എറണാകുളം ജില്ലാ ദുരന്ത നിവാരണ അഥോറിറ്റി ചെയർമാൻ കൂടിയായ ജില്ല കളക്ടറുടെ ഉത്തരവ് പ്രകാരമാണ് ഇന്നലെ ഉച്ചകഴിഞ്ഞ് ഒന്നുമുതൽ സൈറണിന്‍റെ പ്രവർത്തനം നിർത്തിയത്. സൈറൺ മുഴക്കുമ്പോൾ അനുവദനീയ ശബ്ദ തോതായ 65 ഡെസിബലിനേക്കാൾ 30.5 ഡെസിബൽ സമീപ പ്രദേശങ്ങളിൽ ഉണ്ടെന്ന കണ്ടെത്തലിന്‍റെ അടിസ്ഥാനത്തിലാണ് നിരോധനം. ആലുവ നഗരത്തിൽ സാധാരണ 77.4 ഡെസിബൽ ആണുള്ളത്. വ്യവസായ മേഖലകളിൽ 65 ഡെസിബലാണ് അനുവദനീയം. സൈറൺ അടിക്കുമ്പോൾ 95 .5 ആയി ഉയരുന്നതായാണ് പരാതിയിൽ. ശബ്ദമലിനീകരണ നിയമം 2000 പ്രകാരം എറണാകുളം വടകോട് കങ്ങരപ്പടി സ്വദേശി അഡ്വ. ജേക്കബ് മാത്യു വടക്കേലാണ് ഉയർന്ന ശബ്ദം എന്ന പേരിൽ ജില്ലാ കളക്ടറെ സമീപിച്ചത്. ആലുവ നിവാസികളുടെ ദൈനംദിന ജീവിതവുമായി ഇഴുകിച്ചേർന്ന സൈറൺ സംവിധാനം മുന്നറിയിപ്പില്ലാതെ നിർത്തിയതിൽ ജനപ്രതിനിധികളടക്കം ആലുവക്കാർ പ്രതിഷേധത്തിലാണ്. ഒരു ദിവസം അഞ്ച് തവണയായി പുലർച്ചെ അഞ്ച്, രാവിലെ എട്ട്, ഉച്ചയ്ക്ക് ഒന്ന്, വൈകീട്ട് അഞ്ച്, രാത്രി എട്ട് എന്നീ നേരങ്ങളിലാണ് സൈറൺ മുഴങ്ങുന്നത്. ഇത് പാൽ, പത്രവിതരണക്കാർക്കും ഓഫീസ് ജീവനക്കാർക്കും ഉപകാരപ്രദമായിരുന്നു. ഇതു കൂടാതെ ഗാന്ധി രക്തസാക്ഷി ദിനത്തിലും സൈറൺ മുഴക്കാറുണ്ട്. സൈറൻ സംവിധാനത്തിന് അര നൂറ്റാണ്ട് പഴക്കം ഇന്ത്യ-പാക്ക് യുദ്ധസമയത്ത് പ്രധാന നഗരങ്ങളിൽ സൈറൺ സംവിധാനം വേണമെന്ന സർക്കാർ നിർദേശത്തെ തുടർന്നാണ് ആലുവയിലും സ്ഥാഥാപിച്ചത്. അന്ന് കൊച്ചി വെല്ലിംഗ്ട്ടൺ ഐലൻഡിൽ ബോംബ് വന്നു വീണതാണ് ആലുവയ്ക്കും മുന്നറിയിപ്പ് നൽകാൻ കാരണം. 50 വർഷം മുമ്പ് ആലുവ നഗരസഭ ഓഫീസ് ആലുവ കൊട്ടാരത്തിന് സമീപം ആയിരുന്നു. ഓഫീസ് ഇപ്പോഴത്തെ കെട്ടിടത്തിലേക്ക് മാറിയപ്പോൾ സൈറൺ സമയം അറിയിക്കാൻ ഉപയോഗിക്കാമെന്ന് കൗൺസിൽ തീരുമാനിക്കുകയായിരുന്നെന്ന് മുൻ നഗരസഭ സെക്രട്ടറി എം.എൻ. സത്യദേവൻ ' ദീപിക' യോട് പറഞ്ഞു. അപ്പീൽ പോകും ജില്ലാ കളക്ടറുടെ ഉത്തരവിനെതിരെ അപ്പീൽ നൽകുമെന്ന് നഗരസഭ ചെയർമാൻ എം.ഒ. ജോൺ അറിയിച്ചു. അപകട മുന്നറിയിപ്പുകൾ നൽകാൻ ആവശ്യമുള്ളതിനാൽ സൈറൺ മുഴുവനായി അഴിച്ചു മാറ്റില്ല.

എംഡിഎംഎയുമായി രണ്ടു പേർ പിടിയിൽ

മരട്: കൊച്ചി നഗരമധ്യത്തിൽനിന്ന് എംഡിഎംഎയുമായി രണ്ടു പേരെ പോലീസ് പിടികൂടി. കാസർഗോഡ് തളങ്കര മൂസഹാജി അക്ബർ അലി(40)യെ മരട് എസ്ഐ ടി.കെ.സുധീറിന്‍റെ നേതൃത്വത്തിലുള്ള സംഘം വൈറ്റില ഭാഗത്ത് നിന്നാണ് അറസ്റ്റ് ചെയ്തത്. ഇയാളുടെ പക്കൽനിന്ന് 4.74 ഗ്രാം എംഡിഎംഎ പിടിച്ചെടുത്തു. എടത്തല നോർത്ത് കുഞ്ചാട്ടുക്കര മാടപ്പിള്ളി മുഹമ്മദ് അഷ്കറി(24)നെ കൊച്ചി സിറ്റി ഡാൻസാഫ് സംഘം തമ്മനം നളന്ദ റോഡിലെ റിയാൻ സ്യൂട്ട് ഹോട്ടലിൽ നിന്നാണ് അറസ്റ്റ് ചെയ്തത്. 1.120 ഗ്രാം എംഡിഎംഎ ഇയാളുടെ പക്കൽനിന്ന് കണ്ടെടുത്തു.

വാഹന പരിശോധനയ്ക്കിടെ എസ്‌ഐയെ കൈയേറ്റം ചെയ്യാന്‍ ശ്രമം; യുവാവ് അറസ്റ്റില്‍

കൊച്ചി: വാഹന പരിശോധനയ്ക്കിടെ എസ്‌ഐയെ കൈയേറ്റം ചെയ്യാന്‍ ശ്രമിച്ച സംഭവത്തില്‍ യുവാവ് അറസ്റ്റില്‍. എറണാകുളം മരട് സ്വദേശി മിഥുനെ(34)യാണ് പാലാരിവട്ടം പോലീസ് അറസ്റ്റ് ചെയ്തത്. പാലാരിവട്ടം എസ്‌ഐ മിഥുന്‍ മോഹനെയും സംഘത്തെയുമാണ് ഇയാള്‍ കൈയേറ്റം ചെയ്യാന്‍ ശ്രമിച്ചത്. തിങ്കളാഴ്ച രാത്രി 8.30 ന് ചളിക്കവട്ടത്തായിരുന്നു സംഭവം. പോലീസ് വാഹന പരിശോധന നടത്തവേ പോലീസ് പ്രതി മിഥുന്‍റെ മേല്‍വിലാസം ചോദിക്കുകയുണ്ടായി. ഇതില്‍ പ്രകോപിതനായ പ്രതി എസ്‌ഐയുമായി വാക്കേറ്റത്തില്‍ ഏര്‍പ്പെടുകയും അസഭ്യം പറഞ്ഞ് പോലീസ് സംഘത്തെ കൈയേറ്റം ചെയ്യാന്‍ ശ്രമിക്കുകയുമായിരുന്നു. മദ്യലഹരിയിലായിരുന്ന ഇയാളെ തൊട്ടടുത്തുണ്ടായിരുന്ന പോലീസ് കണ്‍ട്രോള്‍ റൂമിലെ ഉദ്യോഗസ്ഥരടക്കം എത്തിയാണ് കീഴ്‌പ്പെടുത്തിയത്. ഔദ്യോഗിക കൃത്യ നിര്‍വഹണം തടസപ്പെടുത്തല്‍, പോലീസ് ഉദ്യോഗസ്ഥരെ ആക്രമിക്കല്‍, മദ്യപിച്ച് വാഹനം ഓടിക്കല്‍ എന്നീ വകുപ്പുകള്‍ ചുമത്തിയാണ് ഇയാള്‍ക്കെതിരെ കേസ് എടുത്തിരിക്കുന്നത്.

ഉദ്ഘാടന മാമാങ്കം കഴിഞ്ഞിട്ട് 26 മാസം : പുനര്‍നിര്‍മാണം ആരംഭിക്കാതെ കലൂര്‍-കതൃക്കടവ് റോഡ്

കൊച്ചി: നിര്‍മാണ പ്രവര്‍ത്തനങ്ങളുടെ ഉദ്ഘാടനം കെങ്കേമമായി നടത്തി 26 മാസം പിന്നിട്ടിട്ടും കലൂര്‍- കതൃക്കടവ് റോഡിന്‍റെ നവീകരണം ആരംഭിക്കാനാകാതെ ജിസിഡിഎ. 2023 മേയ് 19ന് നിര്‍മാണോദ്ഘാടനം നടത്തിയിട്ട് ഇതുവരെ ഒരു കല്ല്‌പോലും ഇടാന്‍ കഴിഞ്ഞിട്ടില്ല. മുന്‍പ് നടപ്പാതയുടെ നിര്‍മാണം വൈകുന്നതായിരുന്നു കുറ്റമായി പറഞ്ഞിരുന്നതെങ്കിലും ഇപ്പോള്‍ മഴയാണ് തടസമെന്നാണ് ജിസിഡിഎയുടെ വിശദീകരണം. കാലവര്‍ഷം ആരംഭിച്ചതോടെ റോഡിലെ കുഴികളുടെ എണ്ണവും കൂടിവരികയാണ്. കതൃക്കടവ് മുതല്‍ കടവന്ത്ര വരെയുള്ള ഭാഗത്ത് ചെറുതും വലുതുമായി ഒട്ടേറെ കുഴികള്‍ രൂപപ്പെട്ടിട്ടുണ്ട്. ഇതില്‍ പല കുഴികളും ഇരുചക്ര വാഹനയാത്രക്കാര്‍ക്ക് അപകട ഭീഷണിയുണ്ടാക്കുന്ന വിധം ആഴവും വലിപ്പവുമേറിയതാണ്. മെറ്റല്‍ചിപ്പ്‌സ് നിറച്ച് താല്‍കാലിക പരിഹാരം കാണുന്നുണ്ടെങ്കിലും മഴയില്‍ വീണ്ടും പഴയപടിയാകും. നഗര ഹൃദയത്തിലെ പ്രധാന റോഡുകളിലൊന്നായ ഇവിടെ സമഗ്രമായ പുനരുദ്ധാരണം നടന്നിട്ട് ഒരു പതിറ്റാണ്ട് എങ്കിലും ആയിട്ടുണ്ടാകും. വര്‍ഷാവര്‍ഷം അറ്റകുറ്റപ്പണികള്‍ നടത്തി താല്‍കാലിക പരിഹാരം കാണും. പിന്നീടത് വീണ്ടും കുണ്ടും കുഴിയുമായി വാഹനയാത്രക്കാര്‍ക്ക് അപകട ഭീഷണിയാകും. ഇതിനൊരു പരിഹാരം എന്ന നിലയ്ക്കാണ് റോഡ് അന്താരാഷ്ട്ര നിലവാരത്തില്‍ പുതുക്കി പണിയാനുള്ള ശ്രമം ജിസിഡിഎ ആരംഭിച്ചത്. 22 മീറ്റര്‍ വീതിയും 3.2 കിലോമീറ്റര്‍ നീളവുമുള്ള റോഡ് രണ്ട് കോടി ചെലവഴിച്ച് ടാര്‍ ചെയ്യുന്നതാണ് വര്‍ക്ക്. 30 കോടി മുടക്കി റോഡ് പുനര്‍നിര്‍മിക്കുന്ന പദ്ധതിയായിരുന്നു ആദ്യം ആലോചിച്ചതെങ്കിലും സാമ്പത്തിക പ്രതിസന്ധിമൂലം ടാറിംഗ് മാത്രമായി ചുരുക്കുകയായിരുന്നു. പണം കണ്ടെത്താന്‍ കാത്ത് നിന്നാല്‍ റോഡ് നിര്‍മാണം വൈകുമെന്നതിനാലാണ് ഇപ്പോള്‍ ടാറിംഗ് മാത്രം ചെയ്യുന്നത്. റോഡിന്‍റെ ഇരുവശങ്ങളിലുള്ള നടപ്പാതകള്‍ കെഎംആര്‍എല്‍ പുതുക്കി പണിതിട്ടുണ്ട്. മഴ മാറിയാല്‍ ഉടന്‍ പണി: ജിസിഡിഎ കൊച്ചി: മഴ മാറിയാല്‍ ഉടന്‍ റോഡ് ടാര്‍ ചെയ്യുന്ന പണികള്‍ ആരംഭിക്കുമെന്ന് ജിസിഡിഎ അറിയിച്ചു. ടെൻഡര്‍ നടപടികള്‍ പൂര്‍ത്തീകരിച്ചിട്ടുണ്ട്. പണികള്‍ ആരംഭിക്കാനിരിക്കെ കാലവര്‍ഷം തുടങ്ങി. ഒരാഴ്ചയെങ്കിലും മഴ മാറി നില്‍ക്കുന്ന സാഹചര്യമുണ്ടായാല്‍ പണികള്‍ ആരംഭിക്കാനാകുമെന്നാണ് പ്രതീക്ഷയെന്നും ജിസിഡിഎ അധികൃതർ പറഞ്ഞു.

വിദേശ വനിതയില്‍നിന്ന് ഡോളര്‍ മോഷ്ടിച്ച നേപ്പാള്‍ സ്വദേശി പിടിയില്‍

കൊച്ചി: മാലിദ്വീപ് സ്വദേശിനിയായ വിദേശ വനിതയില്‍നിന്ന് ഡോളര്‍ മോഷ്ടിച്ച നേപ്പാള്‍ സ്വദേശി പിടിയില്‍. നേപ്പാള്‍ സ്വദേശിയായ അഞ്ജാന്‍ (23) ആണ് മഹാരാഷ്ടയിലെ താനെയില്‍നിന്ന് ചേരാനെല്ലൂര്‍ പോലീസിന്‍റെ പിടിയിലായത്. കൊച്ചിയിലെ സ്വകാര്യ ആശുപത്രിയില്‍ ചികിത്സയ്ക്കായി എത്തിയ വിദേശ വനിതയുടെ പിതാവിനെ ശുശ്രൂഷിക്കുന്നതിനായി കെയര്‍ ടേക്കറായാണ് അഞ്ജാനെ ജോലിക്ക് നിര്‍ത്തിയിരുന്നത്. ഇവര്‍ ഇടപ്പള്ളി കുന്നുംപുറം ഭാഗത്ത് വാടക വീട്ടില്‍ താമസിക്കുകയായിരുന്നു. കഴിഞ്ഞ മാസം 13ന് പിതാവിനെ ചികിത്സയ്ക്കായി ആശുപത്രിയില്‍ കൊണ്ടുപോയ സമയത്ത് പ്രതി മുറിയില്‍ സൂക്ഷിച്ചിരുന്ന 1500 യുഎസ് ഡോളര്‍ മോഷ്ടിച്ച് കടന്നുകളയുകയായിരുന്നു. പരാതിയുടെ അടിസ്ഥാനത്തില്‍ പ്രതിയുടെ മൊബൈല്‍ നമ്പര്‍ കേന്ദ്രീകരിച്ച് നടത്തിയ അന്വേഷണത്തില്‍ ഇയാള്‍ മഹാരാഷ്ട്രയിലെ താനെയില്‍ ഉണ്ടെന്ന് കണ്ടെത്തി. രണ്ട് ദിവസത്തോളം ഈ പ്രദേശങ്ങളില്‍ നടത്തിയ അന്വേഷണത്തില്‍ പ്രതി ഒരു റിസോര്‍ട്ടില്‍ പാചകക്കാരനായി ജോലിക്ക് കയറിയതായി വ്യക്തമായി. തുടര്‍ന്ന് പ്രതിയെ കൊച്ചി സിറ്റി ചേരാനെല്ലൂര്‍ എസ്എച്ച്ഒ ആര്‍. വിനോദിന്‍റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്യുകയായിരുന്നു. മോഷ്ടിച്ച യുഎസ് ഡോളറുകള്‍ നേപ്പാളിലേക്ക് അയക്കുകയും ആര്‍ഭാട ജീവിതത്തിനായി ചെലവാക്കുകയും ചെയ്തതായി ചോദ്യം ചെയ്യലില്‍ പ്രതി സമ്മതിച്ചു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

മുങ്ങിയ കപ്പലിന്‍റെ അവശിഷ്ടം : 10 ഇൻബോർഡ് വള്ളങ്ങളുടെ വലകൾ കീറി

വൈപ്പിൻ: കൊച്ചിയിൽ നിന്നും കഴിഞ്ഞ ദിവസം കടലിൽ മത്സ്യബന്ധനത്തിന്നു പോയ 10 ഇൻബോർഡ് വള്ളങ്ങളിലെ വലകൾ കീറിനശിച്ചു. അഴിമുഖത്തിന് തെക്ക് പടിഞ്ഞാറു ഭാഗത്ത് മത്സ്യബന്ധനത്തിനിടെയാണ് സംഭവം. പരീക്ഷണം, ആദിത്യൻ, അയ്യപ്പ ജ്യോതി, ജലനിധി, പ്രത്യാശ, ഉന്നതൻ, പ്രവാചകൻ, അക്വിനാസ് ,അൽ റഹ്മാൻ, ആണ്ടവൻ എന്നീ വള്ളങ്ങളുടെ വലകളാണ് നശിച്ചത്. ഈ അടുത്ത് ഈ ഭാഗത്തു മുങ്ങിയ എൽസ - 2 എന്ന കപ്പലിന്‍റെ അവശിഷ്ടങ്ങളിലോ ഇതിൽ നിന്ന് കടലിൽ വീണ് മുങ്ങി കിടക്കുന്ന കണ്ടെയ്നറുകളിലോ തട്ടിയാണ് വലകൾ കീറിയതെന്നാണ് മത്സ്യത്തൊഴിലാളികളുടെ ആരോപണം. ഇതുമൂലം ഓരോ വള്ളത്തിനും ആറു ലക്ഷത്തിനു മേൽ നഷ്ടമുണ്ടായി. മാത്രമല്ല റിപ്പയറിംഗിനായി ഒരാഴ്ചയോളം കരയിൽ കെട്ടിയിടേണ്ടി വരും. മത്സ്യത്തൊഴിലാളികൾ ഫോർട്ട്കൊച്ചി കോസ്റ്റൽ പോലീസിലും ഫിഷറീസ് അസിസ്റ്റന്‍റ് ഡയറക്ടർക്കും നിവേദനവും നൽകിയിട്ടുണ്ട്. കഴിഞ്ഞയാഴ്ച തോട്ടപ്പള്ളിക്ക് പടിഞ്ഞാറ് ഒമ്പതു വള്ളങ്ങളുടെ വലകൾ ഇതുപോലെ കീറിനശിച്ചിരുന്നു. തുടർന്ന് തൊഴിലാളികൾ ഫോർട്ടുകൊച്ചിയിൽ എത്തി കോസ്റ്റൽ പോലീസിൽ പരാതിയും നൽകിയിരുന്നു. നഷ്ടപരിഹാരത്തിനു ഹൈക്കോടതിയെ സമീപിക്കാനാണ് ഇവരുടെ നീക്കം. അതേ സമയം രണ്ട് കപ്പൽ അപകടങ്ങൾക്കും ശേഷം കപ്പൽ കമ്പനിയും സർക്കാരും നിരുത്തരവാദിത്തപരമായ നടപടികളാണ് സ്വീകരിക്കുന്നതെന്ന് കേരള മത്സ്യത്തൊഴിലാളി ഐക്യവേദി (ടിയുസിഐ) സംസ്ഥാന പ്രസിഡന്‍റ് ചാൾസ് ജോർജ് , സെക്രട്ടറി എൻ.എ. ജെയിൻ എന്നിവർ ആരോപിച്ചു. ആയിരക്കണക്കിന് മത്സ്യത്തൊഴിലാളികൾ തൊഴിലെടുക്കുന്ന ഈ മേഖലയിൽ ശുചീകരണ - രക്ഷാപ്രവർത്തനങ്ങൾ കാര്യക്ഷമമാക്കാൻ സർക്കാർ ശ്രമിക്കുന്നില്ലത്രേ. അടിയന്തരമായി കപ്പലിന്‍റെ അവശിഷ്ടങ്ങളും കണ്ടെയ്നറുകളും മാറ്റേണ്ടതുണ്ട്. കപ്പലിലെ എണ്ണയും, കണ്ടെയ്നറുകളിലെ മാലിന്യവും ആശങ്കയുളവാക്കുന്നതാണ് ഇക്കാര്യങ്ങൾ ഉന്നയിച്ചുകൊണ്ട് കേരള മത്സ്യത്തൊഴിലാളി ഐക്യവേദി ഹൈക്കോടതിയിൽ ഹർജി നൽകിയിട്ടുളളതായും നേതാക്കൾ അറിയിച്ചു.

ഒന്നാം വർഷ വിദ്യാർഥികൾക്കായി വിജ്ഞാനോത്സവം നടത്തി

ഇലഞ്ഞി: വിസാറ്റ് ആർട്സ് ആൻഡ് സയൻസ് കോളജിൽ ഒന്നാം വർഷ വിദ്യാർഥികൾക്കായി വിജ്ഞാനോത്സവം സംഘടിപ്പിച്ചു. എക്സൈസ് ജോയിന്‍റ് കമ്മീഷണർ ടി.എം. മജു ഉദ്ഘാടനം നിർവഹിച്ചു. ആർട്സ് കോളജ് പ്രിൻസിപ്പൽ രാജു മാവുങ്കൽ അധ്യക്ഷത വഹിച്ചു. പിറവം ലിറ്റിൽ ഫ്ളവർ പള്ളി വികാരിയും പാലാ സെന്‍റ് തോമസ് കോളജ് അധ്യാപകനുമായ ഫാ. മാത്യു കോരംകുഴ അനുഗ്രഹ പ്രഭാഷണം നടത്തി. കഴിഞ്ഞവർഷം പഠനത്തിൽ ഒന്നാമതെത്തിയ വിദ്യാർഥികൾക്കും യൂണിവേഴ്സിറ്റി കലോത്സവ വിജയികൾക്കും ട്രോഫികൾ നൽകി ആദരിച്ചു. ഡയറക്ടർ കെ. ദിലീപ്, എൻജിനീയറിംഗ് കോളജ് പ്രിൻസിപ്പൽ കെ.ജെ. അനൂപ്, പബ്ലിക് റിലേഷൻ ഓഫീസർ ഷാജി അഗസ്റ്റിൻ, പ്രഫ. വി.ജെ. ജോസഫ്, അസിസ്റ്റന്‍റ് പ്രഫ. ഇ.വി. മനോജ്, പിടിഎ പ്രതിനിധി ഗീതാ ബേബി, യൂണിയൻ ചെയർമാൻ അതുൽ അനിൽ തുടങ്ങിയവർ പ്രസംഗിച്ചു. ‘ഡ്രഗ് അബ്യുസ്’ എന്ന വിഷയത്തെക്കുറിച്ച് ടി.എം. മജു ക്ലാസ് നയിച്ചു. പുതുതായി അഡ്മിഷൻ നേടിയ വിദ്യാർഥികളും അവരുടെ രക്ഷിതാക്കളും പങ്കെടുത്തു.

കാവുംപടി റോഡിൽ പൈപ്പ്പൊട്ടൽ തുടർക്കഥ

മൂവാറ്റുപുഴ: നഗരത്തിലെ കാവുംപടി റോഡിൽ പൈപ്പ് പൊട്ടൽ പതിവാകുന്നു. ഭാരവാഹനം കടന്നുപോയതിനെ തുടർന്ന് മൂവാറ്റുപുഴ - കാവുംപടി റോഡിൽ പോലീസ് സ്റ്റേഷനു സമീപത്തായാണ് തിങ്കളാഴ്ച ജല അഥോറിറ്റിയുടെ കുടിവെള്ള പൈപ്പ് തകർന്ന് റോഡിൽ കുഴി രൂപപ്പെട്ടത്. ദിനംപ്രതി നൂറു കണക്കിന് വാഹനങ്ങൾ കടന്നുപോകുന്ന കാവുംപടിയിൽ ദിവസങ്ങളായി പൈപ്പ് പൊട്ടൽ പതിവാണ്. പൈപ്പ് തകർന്നതിനെ തുടർന്ന് റോഡിൽ വിള്ളലും വലിയ കുഴിയും രൂപപ്പെട്ടു. നഗരവികസന പ്രവർത്തനങ്ങൾ നടക്കുന്നതിനാൽ ദിനംപ്രതി നിരവധി വാഹനങ്ങളാണ് ഇതുവഴി കടന്നുപോകുന്നത്. പൈപ്പ് തകർന്നതിനെ തുടർന്ന് ലക്ഷക്കണക്കിന് ലിറ്റർ വെള്ളമാണ് പാഴായത്. സമാനമായ രീതിയിൽ കാവുംപടി റോഡിൽ ഞായറാഴ്ചയും കുടിവെള്ള പൈപ്പ് തകർന്ന് റോഡിൽ കുഴി രൂപപ്പെട്ടിരുന്നു.

നവാഗതർക്ക് സ്വീകരണമൊരുക്കി മൂവാറ്റുപുഴ നിർമല കോളജ്

മൂവാറ്റുപുഴ: നവാഗതരായ വിദ്യാർഥികൾക്ക് സ്വീകരണം ഒരുക്കി മൂവാറ്റുപുഴ നിർമല കോളജ്. അധ്യയന വർഷത്തിൽ വിവിധ യുജി കോഴ്സുകളിലേക്ക് അഡ്മിഷനെടുത്ത വിദ്യാർഥികളുടെ പ്രവേശനോത്സവം വിവിധ പരിപാടികളോടെ നടത്തി. ദീക്ഷാരംഭ് എന്ന പേരിൽ കോളജ് ഓഡിറ്റോറിയത്തിൽ നടത്തിയ പരിപാടി എറണാകുളം അസിസ്റ്റന്‍റ് കളക്ടർ പാർവതി ഗോപകുമാർ ഉദ്ഘാടനം ചെയ്തു. ചെറിയ കാര്യങ്ങൾ ചെയ്ത് വലിയ വിജയങ്ങൾ നേടാൻ വിദ്യാർഥികൾ ശ്രദ്ധിക്കണമെന്നും സിലബസിലുള്ളത് മാത്രം ഉൾക്കൊള്ളാതെ നമുക്ക് ചുറ്റുമുള്ള കാര്യങ്ങൾ ഉൾക്കൊള്ളണമെന്നും ജീവിതത്തിൽ സന്തോഷത്തിന് പ്രാധാന്യം നൽകണമെന്നും അവർ പറഞ്ഞു. വിവിധ യുജി പ്രോഗ്രാമുകളിലായി 1000 വിദ്യാർഥികളാണ് കോളജിൽ പ്രവേശനം നേടിയത്. കോതമംഗലം രൂപതാധ്യക്ഷൻ മാർ ജോർജ് മഠത്തിക്കണ്ടത്തിൽ അനുഗ്രഹ പ്രഭാഷണം നടത്തി. കോതമംഗലം രൂപതാ വികാരി ജനറാളും കോളജ് മാനേജറുമായ മോണ്‍. പയസ് മലേക്കണ്ടത്തിൽ അധ്യക്ഷത വഹിച്ചു. കോളജ് പ്രിൻസിപ്പൽ റവ. ഡോ. ജസ്റ്റിൻ കെ. കുര്യാക്കോസ്, നഗരസഭാധ്യക്ഷൻ പി.പി. എൽദോസ്, കോളജ് ബർസാർ ഫാ. പോൾ കളത്തൂർ, വൈസ് പ്രിൻസിപ്പൽമാരായ ഡോ. സോണി കുര്യാക്കോസ്, ഡോ. ജിജി കെ. ജോസഫ്, കോളജ് ഓട്ടോണോമസ് ഡയറക്ടർ കെ.വി. തോമസ്, അഡ്മിഷൻ നോഡൽ ഓഫീസർ മാത്യൂസ് കെ. മനയാനി എന്നിവർ പ്രസംഗിച്ചു.

കാപ്പ ചുമത്തി ജയിലിലടച്ചു

കോതമംഗലം: നിരന്തര കുറ്റവാളിയെ കാപ്പ ചുമത്തി ജയിലിലടച്ചു. ഇരമല്ലൂർ കുറ്റിലഞ്ഞി പുതുപാലം കാഞ്ഞിരക്കുഴി ഷിഹാബിനെ (37) യാണ് കാപ്പ ചുമത്തി വിയ്യൂർ സെൻട്രൽ ജയിലിലടച്ചത്. റൂറൽ ജില്ല പോലീസ് മേധാവി എം. ഹേമലതയുടെ റിപ്പോർട്ടിന്‍റെ അടിസ്ഥാനത്തിൽ ജില്ലാ കളക്ടർ എൻ.എസ്.കെ. ഉമേഷാണ് ഉത്തരവിട്ടത്. കോതമംഗലം, കുറുപ്പംപടി, മൂവാറ്റുപുഴ, കോട്ടപ്പടി പോലീസ് സ്റ്റേഷൻ പരിധികളിൽ നരഹത്യാശ്രമം, കവർച്ച, തട്ടിക്കൊണ്ടുപോകൽ, സ്ത്രീകൾക്കെതിരെ അതിക്രമം, ദേഹോപദ്രവം, ഭീഷണിപ്പെടുത്തൽ തുടങ്ങി നിരവധി കേസുകളിലെ പ്രതിയാണ്. കഴിഞ്ഞ മെയിൽ കോതമംഗലം പോലീസ് സ്റ്റേഷനിൽ രജിസ്റ്റർ ചെയ്ത കവർച്ച കേസിൽ പ്രതിയായതിനെ തുടർന്നാണ് നടപടി. കോതമംഗലം സിഐ പി.ടി. ബിജോയിയുടെ നേതൃത്വത്തിൽ എഎസ്ഐമാരായ ടി.എൻ. സിനി, എം. നവാസ്, സീനിയർ സിവിൽ പോലീസ് ഓഫീസർ എ.ആർ. അനൂപ്, സിവിൽ പോലീസ് ഓഫീസർമാരായ എം.പി. പ്രജേഷ്, സുബിൻ കുമാർ എന്നിവരടങ്ങുന്ന സംഘമാണ് അറസ്റ്റ് ചെയ്തത്.

തൃക്കളത്തൂർ ഗവ. എൽപിജി സ്കൂളിന് സ്വന്തമായി ബസ്

മൂവാറ്റുപുഴ: തൃക്കളത്തൂർ ഗവ. എൽപിജി സ്കൂളിന് സ്വന്തമായി ബസ് ലഭിച്ചു. മാത്യു കുഴൽനാടൻ എംഎൽഎ ഫ്ളാഗ് ഓഫ് ചെയ്തു. പായിപ്ര പഞ്ചായത്ത് പ്രസിഡന്‍റ് എം.എസ്. അലിയാർ അധ്യക്ഷത വഹിച്ചു. ചടങ്ങിൽ പഞ്ചായത്ത് സ്ഥിരംസമിതി അധ്യക്ഷൻ മുഹമ്മദ് ഷാഫി, മുൻ പഞ്ചായത്ത് പ്രസിഡന്‍റ് മാത്യൂസ് വർക്കി, പഞ്ചായത്തംഗം എം.സി. വിനയൻ, സ്കൂൾ പ്രധാനാധ്യാപിക ജി. ജഗനി, പിടിഎ പ്രസിഡന്‍റ് സി.കെ. ബിജു തുടങ്ങിയവർ പ്രസംഗിച്ചു. എംഎൽഎ ഫണ്ടിൽനിന്ന് അനുവദിച്ച തുകകൊണ്ടാണ് ബസ് വാങ്ങിയത്.

കെഎസ്ആർടിസി ബസ് സർവീസ് ആരംഭിക്കണമെന്ന്

മൂവാറ്റുപുഴ: മൂവാറ്റുപുഴയിൽനിന്ന് കക്കടാശേരി - കാളിയാർ വഴി കട്ടപ്പനക്കും കട്ടപ്പനയിൽനിന്ന് മൂവാറ്റുപുഴ വഴി എറണാകുളത്തേക്കും, മൂവാറ്റുപുഴ - തേനി റോഡ് വഴി കല്ലൂർക്കാടിനും കെഎസ്ആർടിസി ബസ് സർവീസ് ആരംഭിക്കണമെന്ന് മുൻ എംഎൽഎ എൽദോ ഏബ്രഹാം സർക്കാരിനോട് ആവശ്യപ്പെട്ടു. നിരവധി യാത്രക്കാരുണ്ടായിരുന്ന കക്കടാശേരി - കാളിയാർ റോഡ് വഴി ചേലച്ചുവട് കെഎസ്ആർടിസി ബസ് സർവീസ് നിലച്ചിട്ട് നാലുവർഷം പിന്നിട്ടു. സ്വകാര്യ ബസ് സർവീസ് മാത്രമാണ് ഇപ്പോളുള്ളത്. ആദ്യ എൽഡിഎഫ് സർക്കാരിന്‍റെ ഭരണ കാലയളവിൽ റീബിൽഡ് കേരളയിൽ ഉൾപ്പെടുത്തി 68 കോടി ചെലവിൽ കക്കടാശേരി - കാളിയാർ റോഡും മൂവാറ്റുപുഴ - തേനി റോഡിന് 87 കോടിയും ചെലവഴിച്ച് ഉന്നത നിലവാരത്തിലെത്തിച്ചത് മികച്ച യാത്രാസൗകര്യം ലക്ഷ്യമിട്ടായിരുന്നു. ഈ റൂട്ടിൽ കെഎസ്ആർടിസി ബസ് ആരംഭിച്ചാൽ ആയിരങ്ങൾക്ക് പ്രയോജനം ലഭിക്കും. മൂവാറ്റുപുഴ - കിഴക്കേക്കര വഴി കല്ലൂർക്കാട് - പെരുമാംകണ്ടം റോഡിൽ നാളിതു വരെ ബസ് സർവീസ് ഇല്ല. കക്കടാശേരി - അഞ്ചൽപ്പെട്ടി - കാലാന്പുർ - പോത്താനിക്കാട് - പൈങ്ങോട്ടുർ വഴി 2007 മുതൽ ആരംഭിച്ച കെഎസ്ആർടിസി സർവീസ് സമീപകാലത്ത് നിലച്ചു. ഇതു വിദ്യാർഥികൾക്കും തൊഴിലാളികൾക്കും വലിയ പ്രതിസന്ധിയാണ് സൃഷ്ടിച്ചിട്ടുള്ളത്. ഇക്കാര്യത്തിൽ ഗതാഗത വകുപ്പ് പുതിയ സർവീസ് ആരംഭിക്കണമെന്നാവശ്യപ്പെട്ട് എൽദോ ഏബ്രഹാം മന്ത്രി കെ.ബി. ഗണേഷ് കുമാറിന് കത്ത് നൽകി.

മൈലക്കൊന്പ് പള്ളിയിൽ ദുക്റാന തിരുനാൾ നാളെ

മൈലക്കൊന്പ്: കിഴക്കിന്‍റെ തീർഥാടന കേന്ദ്രമായ മൈലക്കൊന്പ് സെന്‍റ് തോമസ് ഫൊറോന പള്ളിയിൽ ദുക്റാന തിരുനാൾ നാളെ ആഘോഷിക്കും. ഇന്നു രാവിലെ ആറിന് കുർബാന, നൊവേന, ദിവ്യകാരുണ്യ ആശിർവാദം. ഏഴിന് കുർബാന, വൈകുന്നേരം അഞ്ചിന് നൊവേന, 5.15നു തിരുനാൾ കുർബാന - ഫാ.ജോസ് കൂനാനിക്കൽ. സന്ദേശം - ഫാ.ജെയിൻ കോക്കാപ്പിള്ളിൽ, ഏഴിന് തിരിപ്രദക്ഷിണം. ദുക്റാന തിരുനാൾ ദിനമായ നാളെ രാവിലെ ആറിനും 7.15നും 8.30നും കുർബാന, പത്തിന് തിരുനാൾ കുർബാന - ഫാ.ജെയിംസ് പറയ്ക്കനാൽ. സന്ദേശം - ഫാ.മാത്യു പുത്തൻകുളം. 12നു പ്രദക്ഷിണം. ഒന്നിന് ഊട്ടുനേർച്ച വെഞ്ചിരിപ്പ് എന്നിവയാണ് പരിപാടികളെന്നു വികാരി ഫാ. മാത്യൂസ് മാളിയേക്കൽ, അസിസ്റ്റന്‍റ് വികാരി ഫാ. ജോസഫ് കുന്നുംപുറത്ത് എന്നിവർ അറിയിച്ചു.

എട്ട് പട്ടയ അപേക്ഷകൾക്ക് അംഗീകാരം

കോതമംഗലം: കോതമംഗലം താലൂക്കിലെ എട്ട് പട്ടയ അപേക്ഷകൾക്ക് ലാൻഡ് അസൈൻമെന്‍റ് കമ്മിറ്റിയുടെ അംഗീകാരം. താലൂക്ക് ഓഫീസിൽ ചേർന്ന ലാൻഡ് അസൈൻമെന്‍റ് കമ്മിറ്റി യോഗമാണ് അംഗീകാരം നൽകിയത്. ഇരമല്ലൂർ - ഒന്ന്, കുട്ടന്പുഴ - മൂന്ന്, കീരന്പാറ - ഒന്ന്, പോത്താനിക്കാട് - ഒന്ന്, കുട്ടമംഗലം - ഒന്ന്, നേര്യമംഗലം - ഒന്ന് എന്നിങ്ങനെ എട്ട് പട്ടയ അപേക്ഷകൾക്കാണ് ലാൻഡ് അസൈമെന്‍റ് കമ്മിറ്റിയുടെ അംഗീകാരം ലഭ്യമായത്. യോഗത്തിൽ ആന്‍റണി ജോണ്‍ എംഎൽഎ അധ്യക്ഷത വഹിച്ചു. തഹസിൽദാർ എം. അനിൽകുമാർ, ജില്ലാ പഞ്ചായത്തംഗം റഷീദ സലിം, കവളങ്ങാട് പഞ്ചായത്ത് പ്രസിഡന്‍റ് സിബി മാത്യു, എം.എസ്. എൽദോസ്, മനോജ് ഗോപി, പി.പി. ജോയ്, പി.എം. സക്കറിയ എന്നിവർ പങ്കെടുത്തു.

നഗരവികസനം ഇഴയുന്നു; മൂവാറ്റുപുഴയില്‌ വ്യാപാരികൾക്ക് ദുരിതം

മൂവാറ്റുപുഴ: നഗരവികസന പ്രവർത്തനങ്ങൾ കാലവർഷം മൂലം പ്രതിസന്ധിയിലായതോടെ മൂവാറ്റുപുഴയിലെ വ്യാപാരികൾ ദുരിതത്തിൽ. ഇതോടെ കച്ചേരിത്താഴം മുതൽ പി.ഒ ജംഗ്ഷൻ വരെയുള്ള ഭാഗങ്ങളിലെ വ്യാപാരികൾ വലിയ മാനസികവും സാന്പത്തികവുമായ നഷ്ടം നേരിടുകയാണ്. ഇതേതുടർന്ന് വ്യാപാരി പ്രതിനിധികളുമായി ഇന്നലെ മാത്യു കുഴൽനാടൻ എംഎൽഎ ചർച്ച നടത്തിയിരുന്നു. കഴിഞ്ഞ ഒന്നര മാസമായി പെയ്യുന്ന മഴ വികസന പ്രവർത്തനങ്ങൾക്ക് വലിയ തടസമാണ് സൃഷ്ടിച്ചിരിക്കുന്നത്. വ്യാപാരികളുടെ അഭ്യർഥനയെതുടർന്ന് വലിയ ഭാരവാഹനങ്ങൾ രാത്രി എട്ടിന് മുന്പ് നഗരത്തിൽ പ്രവേശിക്കുന്നത് നിയന്ത്രിക്കാൻ ട്രാഫിക് പോലീസിന് നിർദേശം നൽകി. പി.ഒ ജംഗ്ഷൻ മുതൽ കച്ചേരിത്താഴം വരെയുള്ള ഭാഗത്തെ ഓട നിർമാണങ്ങൾ പുരോഗമിക്കുന്ന ടി.ബി റോഡിന്‍റെ ഭാഗത്തൊഴികെയുള്ള മുഴുവൻ സ്ഥലങ്ങളിലെയും ഫുട്പാത്തുകൾ വഴിയാത്രക്കാർക്ക് സുഗമമായി നടക്കുന്നതിനുള്ള രീതിയിൽ ഒരുക്കാൻ കരാറുകാരന് നിർദേശം നൽകി. മൂവാറ്റുപുഴയിലെ നഗര വികസനം മൂലം വ്യാപാര സമൂഹത്തിന് ഉണ്ടായിരിക്കുന്ന ബുദ്ധിമുട്ടുകൾ ഒട്ടും ലാഘവത്തോടെ കാണുന്നില്ലെന്നും കാലാവസ്ഥ അനുകൂലമായാൽ എത്രയും പെട്ടെന്ന് നിർമാണ പ്രവർത്തികൾ പൂർത്തീകരിക്കാൻ ശ്രമിക്കുമെന്നും എംഎൽഎ പറഞ്ഞു.

ഘർ ഘർ ശൗര്യ മഹോത്സവം : ലാൻസ് നായിക് സന്തോഷ് കുമാറിന്‍റെ ഭവനം സന്ദർശിച്ചു

വാഴക്കുളം: ഘർ ഘർ ശൗര്യ മഹോത്സവത്തിന്‍റെ ഭാഗമായി ഇന്ത്യൻ ആർമി ലാൻസ് നായിക് സന്തോഷ് കുമാറിന്‍റെ ഭവനം സന്ദർശിച്ചു. കാർഗിൽ യുദ്ധത്തിൽ വീരമൃത്യു വരിച്ച ജവാന്മാരുടെ വീടുകളിലെത്തി കുടുംബാംഗങ്ങളെ ബഹുമാനാദരവുകൾ അറിയിക്കുന്നതിന്‍റെ ഭാഗമായാണ് വാഴക്കുളത്ത് സന്തോഷ് കുമാറിന്‍റെ ഭവനത്തിലെത്തിയത്. നായിബ്‌ സുബേദാർ കിംഗ്‌‌സിലിൻ, മേജർ അമ്പിളി ലാൽകൃഷ്ണ, സോമരാജൻ തുടങ്ങിയവരാണ് സന്ദർശന സംഘത്തിലുണ്ടായിരുന്നത്. എൻസിസി കേഡറ്റ്സ്, മേജർ രവി അക്കാദമി കേഡറ്റ്സ് തുടങ്ങിയവരും ഇവർക്കൊപ്പം ഭവന സന്ദർശനത്തിനെത്തിയിരുന്നു.

വെറ്റിലപ്പാറ ദശലക്ഷം നഗറിൽ വാസയോഗ്യമല്ലാത്ത മൂന്നു വീടുകൾ പൊളിച്ചുനീക്കി

കോതമംഗലം: വെറ്റിലപ്പാറ ദശലക്ഷം നഗറിൽ വാസയോഗ്യമല്ലാതെ അപകടഭീഷണിയിലായ മൂന്നു വീടുകൾ പൊളിച്ചുനീക്കി. കഴിഞ്ഞ വെള്ളിയാഴ്ച പുലർച്ചെ നഗറിലെ പുത്തൻപുരയ്ക്കൽ കൃഷ്ണൻകുട്ടി-അമ്മിണി ദന്പതികളുടെ വീട് തകർന്നിരുന്നു. വീട്ടിലുണ്ടായിരുന്നവർ പരിക്കുകളോടെ രക്ഷപ്പടുകയായിരുന്നു. ഞായറാഴ്ച വെട്ടുകാട്ടിൽ ശോശാക്കുട്ടി ഡാനിയേലിന്‍റെ വീടിന്‍റെ പിൻഭിത്തിയും തകർന്നുവീണിരുന്നു. നഗറിലെ പത്തു വീടുകൾ അപകടാവസ്ഥയിലായെന്ന് വ്യക്തമായതിനെ തുടർന്നാണ് പഞ്ചായത്ത് അടിയന്തര ഇടപെടൽ നടത്തിയത്. പഞ്ചായത്ത് അധികാരികൾ ഉടമസ്ഥരുടെ സമ്മതത്തോടെയാണ് അപകടാവസ്ഥിയിലായ മൂന്നു വീടുകൾ ഇന്നലെ പൊളിച്ചുനീക്കിയത്. പുന്നയ്ക്കൽ ശാന്ത, വെട്ടുകാട്ടിൽ ശോശാക്കുട്ടി, മനയത്തുകുടി രമണി വിജയൻ എന്നിവരുടെ വീടുകളാണ് പൊളിച്ചത്. നനഞ്ഞു കുതിർന്ന വെട്ടുകല്ല് ഭിത്തിയും ചോർന്നൊലിക്കുന്ന കോണ്‍ക്രീറ്റ് മേൽക്കൂരയും അടക്കം ഈ വീടുകളെല്ലാം ഏതു നിമിഷവും നിലംപതിക്കാവുന്ന അവസ്ഥയിലായിരുന്നു. വീടു തകർന്നു വീണ കൃഷ്ണൻകുട്ടിയുടെ അടക്കം നാലു കുടുംബങ്ങൾക്കാണ് പുതിയ ഭവനം ഒരുക്കേണ്ടത്. വീട് വാസയോഗ്യമല്ലാതായതോടെ പലരും നഗറിലെ താമസം മാറ്റിയിരുന്നു. രണ്ടും മൂന്നും സെന്‍റിൽ 450 ചതുരശ്രയടി വിസ്തീർണത്തിലുള്ള വീട്ടിൽ ഒരു മുറിയും അടുക്കളയും ശൗചാലയവും മാത്രമാണുള്ളത്. ചരിവ് ഭൂമിയിൽ വേണ്ടവിധത്തിൽ അടിത്തറ പോലുമില്ലാതെ 30 വർഷം മുന്പ് കെട്ടിപ്പൊക്കിയ 30 വീടുകളാണ് ഇവിടെയുള്ളത്. താമസയോഗ്യമല്ലാത്ത അഞ്ചു വീടുകളിലെ കുടുംബങ്ങൾ നഗറിലെ എസ്‌സി കമ്യൂണിറ്റി ഹാളിലേക്ക് താമസം മാറ്റിയിരുന്നു.

ഡിസ്റ്റിൽ പ്രവേശനോത്സവം

അങ്കമാലി: അങ്കമാലി ഡി പോൾ ഇൻസ്റ്റിറ്റ്യൂട്ട് ഓഫ് സയൻസ് ആൻഡ് ടെക്നോളജി (ഡിസ്റ്റ്)യിൽ പുതിയ അധ്യയന വർഷത്തിന് തുടക്കം. പുതുതായി ആരംഭിച്ച നാലുവർഷ ബിരുദ കോഴ്സുകളുടെ പ്രവേശനോത്സവം എറണാകുളം അഡീഷണൽ ജില്ലാ മജിസ്ട്രേറ്റും ഡെപ്യൂട്ടി കളക്ടറുമായ വിനോദ് രാജ് ഉദ്ഘാടനം ചെയ്തു. മേരി മാതാ പ്രൊവിൻസ് പ്രൊവിൻഷ്യൽ സുപ്പീരിയർ റവ. ഡോ. അലക്സ് ചാലങ്ങാടി അധ്യക്ഷനായി. ഡിസ്റ്റ് വൈസ് പ്രിൻസിപ്പൽ ഫാ. ജോസഫ് തടത്തിൽ സ്വാഗത ആശംസിച്ചു. പ്രിൻസിപ്പൽ ഫാ. ജോണി ചാക്കോ മംഗലത്ത് , ഫാ. മാത്യു മാളിയേക്കൽ അസിസ്റ്റന്‍റ് പ്രഫ. സനിൽകുമാർ എന്നിവർ സംസാരിച്ചു.

വാർഡ് മെമ്പറെ ലഹരിമാഫിയ സംഘത്തിൽപ്പെട്ടവർ മർദിച്ചതായി പരാതി

ആലങ്ങാട്: ആലങ്ങാട് ഗ്രാമപഞ്ചായത്ത് ഒമ്പതാം വാർഡ് മെമ്പറെയും പാർട്ടി പ്രവർത്തകനേയും മയക്കുമരുന്ന് മാഫിയ സംഘങ്ങൾ മർദിച്ചതായി പരാതി. ആലങ്ങാട് പഞ്ചായത്തിലെ ഒൻപതാം വാർഡ് മെമ്പർ വിജി സുരേഷിനെയും ബിജെപി ആലങ്ങാട് ഈസ്റ്റ്‌ ഏരിയ ജനറൽ സെക്രട്ടറി കിരൺകുമാറിനെയും മയക്കു മരുന്നു മാഫിയ സംഘത്തിൽപ്പെട്ട മൂവർ സംഘം മർദിച്ചെന്നാണ് പരാതി. പാർട്ടി പ്രവർത്തനവുമായി ബന്ധപ്പെട്ടുള്ള വീട് സന്ദർശനം കഴിഞ്ഞ് തിരികെ പോകുവാൻ റോഡരികിൽ നിൽക്കുകയായിരുന്ന മെമ്പറെയും പാർട്ടി പ്രവർത്തകരെയും മൂവർ സംഘം മർദിക്കുകയായിരുന്നു. ഇവർക്കെതിരെ ആലങ്ങാട് പോലീസിൽ പരാതി നൽകി. ആക്രമണത്തിൽ പ്രതിഷേധിച്ചു പന്തം കൊളുത്തി പ്രകടനവും പ്രതിഷേധ യോഗവും നടത്തി. ബിജെപി ജില്ലാ സെക്രട്ടറി എ. സെന്തിൽകുമാർപ്രതിഷേധ യോഗം ഉദ്ഘാടനം ചെയ്തു. ബിജെപി ആലങ്ങാട് ഈസ്റ്റ് ഏരിയ പ്രസിഡന്‍റ് എം.ജി. ഹരീഷ്കുമാർ അധ്യക്ഷത വഹിച്ചു. ബിജെപി കരുമാല്ലൂർ മണ്ഡലം പ്രസിഡന്‍റ് പി.ആർ. രഞ്ജിത്, ബിജെപി സംസ്ഥാന കൗൺസിൽ അംഗം കെ.എസ്. ഉദയകുമാർ, ബിജെപി കരുമാല്ലൂർ മണ്ഡലം ജനറൽ സെക്രട്ടറിമാരായ ബൈജു ശിവൻ, സി.ജി. സന്തോഷ്‌, വൈസ് പ്രസിഡന്‍റ് മായാദേവി പ്രകാശൻ, സെക്രട്ടറി ലാജുലാൽ, ബിജെപി മുൻ മണ്ഡലം പ്രസിഡന്‍റ് സുനിൽ ജോസഫ്, മണ്ഡലം ട്രഷറർ സീന സുഭാഷ്, വി.എം. ഗോപി, ഏരിയ വൈസ് പ്രസിഡന്‍റുമാരായ സിനി ഗിരീഷ്, എ.എൻ. ഉണ്ണികൃഷ്ണൻ ഏരിയ സെക്രട്ടറി സുരേഷ് കഴമത്തിൽ, മിനി മോഹൻ എന്നിവർ പ്രസംഗിച്ചു.

യുവാവിനെ ദേഹോപദ്രവം ഏൽപ്പിച്ചതായി പരാതി

തൃപ്പൂണിത്തുറ: ലഹരിയുപയോഗവും വിൽപ്പനയും ചോദ്യം ചെയ്തതിന്‍റെ വിരോധത്തിൽ യുവാവിനെ ദേഹോപദ്രവമേൽപ്പിച്ചതായി പരാതി. എരൂർ വെണ്ട്രപ്പിള്ളിൽ സനൂപ് (33)നാണ് ചാക്കിൽ ഗ്രിപ്പിനായി കൊളുത്തുന്ന ഹുക്ക് ഉപയോഗിച്ച് മുഖത്ത് കുത്തി വലിച്ചതിനെ തുടർന്ന് പുരികത്തിനും കണ്ണിനും പരിക്കേറ്റത്. കഴിഞ്ഞ 30ന് രാവിലെ 8.45ഓടെ എരൂർ കുട്ടാത്ത് റോഡിലുള്ള ആസ് ജംഗ്ഷനിലായിരുന്നു സംഭവം സനൂപിന്‍റെ പരാതിയിൽ വെണ്ട്രപ്പിള്ളിൽ സിജിത്തിനെതിരെ ഹിൽപാലസ് പോലീസ് കേസെടുത്തു.

സ്മാർട്ട് വില്ലേജ് ഓഫീസ് ഉദ്ഘാടനം

ഫോർട്ടുകൊച്ചി‌\പറവൂർ : പുതുതായി നിർമിച്ച തോപ്പുംപടി, പവൂർ സ്മാർട്ട് വില്ലേജ് ഓഫീസുകളുടെ ഉദ്ഘാടനം മന്ത്രി കെ. രാജൻ ഓൺലൈനായി നിർവഹിച്ചു. കൊച്ചി എംഎൽഎ കെ.ജെ. മാക്സി അധ്യക്ഷത വഹിച്ചു. ഡെപ്യൂട്ടി മേയർ കെ.എ. അൻസിയ, കൗൺസിലർമാരായ എം. ഹബീബുള്ള, ഷീബ ഡോറം, ഷൈല തദേവൂസ്, ഷീബ ലാൽ, സബ്കളക്ടർ കെ. മീര തുടങ്ങിയവർ സംസാരിച്ചു. പറവൂർ വടക്കേക്കര സ്മാർട്ട് വില്ലേജ് ആഫീസിന്‍റെ പ്രവർത്തനവും മന്ത്രി ഓൺലൈനായി ഉദ്ഘാടനം ചെയ്തു. പ്രതിപക്ഷ നേതാവ് വി.ഡി. സതീശൻ അധ്യക്ഷനായി. ചിറ്റാറ്റുകര പഞ്ചായത്ത് പ്രസിഡന്‍റ് ശാന്തിനി ഗോപകുമാർ, വടക്കേക്കര പഞ്ചായത്ത് പ്രസിഡന്‍റ് രശ്മി അനിൽകുമാർ തുടങ്ങിയവ രും പങ്കെടുത്തു.

ബ്രാഹ്മണ സഭ ഡോ. ജോർജ് ജോസഫിനെ ആദരിച്ചു

പെരുമ്പാവൂർ: പെരുമ്പാവൂരിലെ മുതിർന്ന ഡോക്ടറും എംവിജെഎം ആശുപത്രിയുടെ ഉടമയുമായ ഡോ. ജോർജ് ജോസഫിനെ കേരള ബ്രാഹ്മണ സഭ പെരുമ്പാവൂർ ഉപസഭ യുവജന വിഭാഗത്തിന്‍റെ നേതൃത്വത്തിൽ ആദരിച്ചു. എൺപത്തി ഏഴാം വയസിലും രാവിലെയും വൈകിട്ടും ആശുപത്രിയിൽ വന്ന് രോഗികളെ പരിശോധിക്കുന്ന പ്രശസ്ത ഫിസിഷ്യനും കാർഡിയോളജിസ്റ്റുമായ ഡോക്ടർ ജോർജ് ജോസഫ് മൂന്നു തലമുറകളായി അനേകം കുടുംബങ്ങളുടെ രോഗികൾക്ക് ആശ്വാസവും പരിചരണവും നൽകി സേവനം നടത്തുന്നത് പെരുമ്പാവൂരിന് അഭിമാനകരമാണന്ന് ഡോക്ടറെ പൊന്നാടയണിച്ച് ആദരിച്ച കേരള ബ്രാഹ്മണ സഭ സംസ്ഥാന മീഡിയ സെൽ ചെയർമാൻ എൻ. രാമചന്ദ്രൻ പറഞ്ഞു. യുവജന വിഭാഗം പെരുമ്പാവൂർ ഉപസഭ സെക്രട്ടറി സി.വൈ. ഗംഗാധരൻ ഉപഹാരം നൽകി ആദരിച്ചു.

ചൂണ്ടി ഭാരതമാതാ വിദ്യാർഥികൾ ഡോക്ടർമാരെ ആദരിച്ചു

ആലുവ: ചൂണ്ടി, ഭാരതമാത സ്കൂൾ ഓഫ് ലീഗൽ സ്റ്റഡീസ് എൻസിസി യൂണിറ്റ് ഡോക്ടേഴ്സ് ദിനത്തിൽ, എടത്തല പ്രാഥമികാരോഗ്യകേന്ദ്രത്തിൽ എത്തി ഡോക്ടർമാരെ ആദരിച്ചു. കോളജ് ഡയറക്ടർ റവ. ഡോ. ബിജു ആന്‍റണി തേയ്ക്കാനത്ത് ഉദ്ഘാടനം ചെയ്തു. ആലുവ നജാത്ത് ആശുപത്രിയിലെ ഡോക്ടർമാരെ അഡ്മിനിസ്ട്രേറ്റർ മുഹമ്മദ് നസീർ ആദരിച്ചു.

നൂതന ചികിത്സയുമായി കിൻഡർ ആശുപത്രി

കളമശേരി: ഡോക്ടേഴ്‌സ് ഡേയോട് അനുബന്ധിച്ച് കിൻഡർ ഹോസ്പിറ്റൽ പുതുതായി ആരംഭിക്കുന്ന പീഡിയാട്രിക് ഓർത്തോപീടിക്സ് ഡിപ്പാർട്ട്മെന്‍റിന്‍റെയും, ഗർഭിണികൾക്കായുള്ള വേദന രഹിത പ്രസവത്തിനായുള്ള സാങ്കേതികവിദ്യ വാക്കിംഗ് എപിഡ്യൂറലിന്‍റെ പ്രവർത്തനവും സ്ത്രീകൾക്കായി ചെറുതും ഫ്ലെക്സിബിളുമായ ഗർഭനിരോധന മാർഗമായ ഇംപ്ലാനോണിന്‍റെയും ഉദ്ഘാടനവും കിൻഡർ ആശുപത്രിയിൽ നടന്നു. ചടങ്ങുകളുടെ ഉദ്ഘാടനം ഡോ. എ.കെ. റഫീഖ് (മധ്യകേരള പ്രസിഡന്‍റ് ഇന്ത്യൻ അക്കാദമിക്സ് ഓഫ് പീഡിയാട്രിക്സ്), സോഷ്യൽ മീഡിയ ഇൻഫ്ലുൻസേഴ്സ് ആയ ദമ്പതികൾ അമീറ ഷെറിൻ, മുഹമ്മദ് ഷാരിക്ക് എന്നിവർ ചേർന്ന് നിർവഹിച്ചു. ചടങ്ങിൽ കിൻഡർ ഹോസ്പിറ്റൽ കൊച്ചി പീഡിയാട്രിക് ഓർത്തോപീഡിക്സ് വിഭാഗം ഡോ. കെ. അശ്വിൻ കുമാർ, ഒബ്സ്റ്റേറ്ററിക്സ് ആൻഡ് ഗൈനക്കോളജി വിഭാഗം ഡോ. സ്മിത സുരേന്ദ്രൻ, ഡോ. നൂർജഹാൻ, ഡോ. സ്മിത പ്രതീഷ്, അനസ്തേഷ്യോളജി ആൻഡ് ക്രിട്ടിക്കൽ കെയർ വിഭാഗം ഡോ. ഷെഡിൻ ഭരതൻ, ഡോ. ആലിഫ് മുഹമ്മദ് , രഞ്ജിത്ത് കൃഷ്ണൻ(കിൻഡർ ഹോസ്പിറ്റൽസ് സി ഇഒ), സൗമ്യ വിജയൻ(ഓപ്പറേഷൻസ് സീനിയർ മാനേജർ കിൻഡർ ഹോസ്പിറ്റൽ) കൊച്ചി എന്നിവർ പങ്കെടുത്തു.

ആശുപത്രി മാതൃകയൊരുക്കി താമരച്ചാൽ സെന്‍റ് മേരീസിലെ കുട്ടികൾ

കിഴക്കമ്പലം: ഡോക്ടേഴ്സ് ഡേയിൽ ആശുപത്രി മാതൃകയൊരുക്കി താമരച്ചാൽ സെന്‍റ് മേരീസിലെ കുട്ടികൾ. കെജിയിലെയും ഒന്ന് രണ്ടു ക്ലാസുകളിലെയും കുട്ടികൾ ഡോക്ടർമാരായും നേഴ്സ്മാരായും ടെക്നീഷ്യന്മാരായും രോഗികളായും മാറി. ക്ലാസ് മുറികൾ ഒപി, ഇഎൻടി, നഴ്സിംഗ്, സ്റ്റേഷൻ ഓപ്പറേഷൻ തിയറ്റർ, ഐസിയു, ബ്ലഡ് ഡൊണേഷൻ യൂണിറ്റ്, ഡയാലിസിസ് സെന്‍റർ, ജനറൽ വാർഡ്, ഓർത്തോ ഗൈനക്കോളജി പീഡിയാട്രിക്, എക്സറേ തുടങ്ങിയ വിഭാഗങ്ങൾ ഒരുക്കിയ മുറികളായി. എറണാകുളം ലിസി ഹോസ്പിറ്റൽ, കളമശേരി മെഡിക്കൽ കോളജ് , പഴങ്ങനാട് സമരിറ്റൻ ഹോസ്പിറ്റൽ , താഖ്ദീസ് ഹോസ്പിറ്റൽ പൂക്കാട്ടുപടി എന്നീ ആശുപത്രികളുടെ നിർദേശങ്ങളും മറ്റും സ്വീകരിച്ച് കുട്ടികൾ ഒരുക്കിയ മിനി ആശുപത്രി കൗതുകമായി. പഴങ്ങാനാട് ആശുപത്രിയിലെ കാർഡിയോളജി വിഭാഗം ചീഫ് ഡോ. സജി സുബ്രഹ്മണ്യൻ കുട്ടികളുടെ ആശുപത്രി ഉദ്ഘാടനം ചെയ്തു. സ്കൂൾ മാനേജർ ജേക്കബ് സി. മാത്യു, ജനറൽ സെക്രട്ടറി പി. എം സ്ലീബ, സ്കൂൾ പ്രിൻസിപ്പൽ രാഖി വിജയൻ എന്നിവർ സംസാരിച്ചു.

ത്രിദിന ഓറിയന്‍റേഷന്‍ പരിപാടി സംഘടിപ്പിച്ചു

കൊച്ചി : നാലുവര്‍ഷ ബിരുദ പ്രോഗ്രാമിലേക്ക് പ്രവേശനം നേടിയ വിദ്യാര്‍ഥികള്‍ക്കും രക്ഷിതാക്കള്‍ക്കുമായി എറണാകുളം സെന്‍റ് തെരേസാസ് കോളജ് ത്രിദിന ഓറിയന്‍റേഷന്‍ പരിപാടി സംഘടിപ്പിച്ചു. പരിപാടിയുടെ ഉദ്ഘാടനം കോളജ് പ്രിന്‍സിപ്പല്‍ ഡോ. അനു ജോസഫ്, കോളജ് ഡയറക്ടര്‍മാരായ സിസ്റ്റര്‍ ടെസ, സിസ്റ്റര്‍ ഫ്രാന്‍സിസ്, വൈസ് പ്രിന്‍സിപ്പൽ സിസ്റ്റര്‍ ഡോ. സുചിത, കോളജ് യൂണിയന്‍, രക്ഷിതാക്കളുടെ പ്രതിനിധികൾ എന്നിവര്‍ ചേര്‍ന്ന് നിര്‍വഹിച്ചു. കോളജ് സ്പിരിച്ച്വല്‍ ആന്‍ഡ് റിലീജിയസ് ലൈഫ് ഡീന്‍ ഡോ. ബീന ജോബിന്‍റെ നേതൃത്വത്തില്‍ വിദ്യാര്‍ഥികള്‍ക്ക് വേണ്ട മാര്‍ഗനിര്‍ദേശങ്ങൾ നല്കിയതിനു പുറമേ സാമൂഹിക സാംസ്‌കാരിക വ്യക്തിത്വവികസന വിഷയങ്ങളില്‍ മൂന്നു ദിനങ്ങളിലായി വിദഗ്ധര്‍ ക്ലാസെടുത്തു. ജൂണ്‍ 30ന് ബിരുദാനന്തര ബിരുദ വിദ്യാര്‍ഥികള്‍ക്കായുള്ള ഏകദിന ഓറിയന്‍റേഷനും സംഘടിപ്പിച്ചു.

ഫാം ടു കിച്ചൺ പദ്ധതി ഈ മാസം മുതൽ

കരുമാലൂർ: കർഷകരുടെ ഉത്പന്നങ്ങൾ സംഭരിച്ച് ശീതീകരിച്ച വാഹനത്തിലൂടെ വീടുകളിലേക്ക് നേരിട്ട് എത്തിക്കുന്ന പദ്ധതിയായ ഫാം ടു കിച്ചൻ ഈ മാസം ആരംഭിക്കുമെന്ന് മന്ത്രി പി. രാജീവ്. കരുമാല്ലൂർ പഞ്ചായത്ത് പ്രസിഡന്‍റ് സബിത നാസർ അധ്യക്ഷയായി. കൃഷിക്ക് ഒപ്പം കളമശേരി പദ്ധതിയുടെ ഭാഗമായി സംഘടിപ്പിച്ച ഓണക്കാല പച്ചക്കറി കൃഷിയുടെ മണ്ഡലം തല നടീൽ ഉദ്ഘാടനം കരുമാല്ലൂർ സഹകരണ ബാങ്കിലെ മാസ്റ്റർ കർഷകനായ തട്ടാംപടിയിലെ സി.എ. ഡേവിസിന്‍റെ കൃഷിയിടത്തിൽ നിർവഹിച്ച് സംസാരിക്കുകയായിരുന്നു മന്ത്രി. എല്ലാ വകുപ്പുകളെയും ഏകോപിപ്പിച്ചുള്ള പ്രവർത്തനങ്ങളാണ് ഈ പദ്ധതിയുടെ ഭാഗമായി നടത്തിവരുന്നത്. സഹകരണ പ്രസ്ഥാനങ്ങൾ നല്ല രീതിയിൽ പ്രവർത്തിച്ചു വരുന്നതിന്‍റെ അടിസ്ഥാനത്തിൽ മൂല്യ വർദ്ധിത ഉത്പന്നങ്ങൾ വലിയ രീതിയിൽ വിപണിയിൽ ഇറക്കുന്നുണ്ട്. കുന്നുകര പഞ്ചായത്തിൽ 30 ഏക്കറിൽ കിൻഫ്രയുടെ നേതൃത്വത്തിൽ ഫുഡ് പ്രോസസിംഗ് പാർക്കും കളമശേരി എച്ച്എംടിയിൽ ലുലു ഗ്രൂപ്പിന്‍റെ 500 കോടി മുതൽ മുടക്കുള്ള ഫുഡ് പ്രോസസിംഗ്പാർക്കും വരുന്നതോടെ കർഷകരുടെ ജീവിത നിലവാരം ഉയർത്താൻ സാധിക്കുമെന്നും മന്ത്രി കൂട്ടിച്ചേർത്തു. ആലങ്ങാട് ബ്ലോക്ക് പഞ്ചായത്ത് പ്രസിഡന്‍റ് രമ്യ തോമസ്, ആലങ്ങാട് പഞ്ചായത്ത് പ്രസിഡന്‍റ് പി.എം. മനാഫ്, കൃഷിക്ക് ഒപ്പം കളമശേരി കോ ഓർഡിനേറ്റർ വിജയൻ പള്ളിയാക്കൽ, പ്രിൻസിപ്പൽ കൃഷി ഓഫീസർ ഇന്ദു പി. നായർ, രേഷ്മ ഫ്രാൻസിസ്, അഞ്ചു മറിയം ഏബ്രഹാം, നീരജ, എം.കെ. ബാബു, ജയ രാധാകൃഷ്ണൻ, വി.എം. ശശി, ടി.കെ. ഷാജഹാൻ, എം.വി. ശ്രീകുമാർ എന്നിവർ സംസാരിച്ചു.

മലയാറ്റൂര്‍ പള്ളിയിൽ ദുക്‌റാന തിരുനാള്‍

മലയാറ്റൂര്‍: അന്തര്‍ദേശീയ തീര്‍ഥാടനകേന്ദ്രമായ മലയാറ്റൂര്‍ കുരിശുമുടിയില്‍ ദുക്‌റാന തിരുനാള്‍ ആഘോഷം നാളെ. രാവിലെ 6.30നും 7.30നും ദിവ്യബലി. 9.30ന് ആഘോഷമായ തിരുനാള്‍ പാട്ടുകുര്‍ബാനയ്ക്കു ഫാ. സ്റ്റാനി ഓടനാടന്‍ കാര്‍മികത്വം വഹിക്കും. തുടര്‍ന്ന് പാച്ചോര്‍ നേര്‍ച്ച. താഴത്തെ പള്ളിയില്‍ രാവിലെ 5.30ന് ദിവ്യബലി. 9.30ന് ആഘോഷമായ പാട്ടുകുര്‍ബാനയ്ക്കു ഫാ. ആന്‍റണി കാട്ടുപറമ്പില്‍ കാര്‍മികത്വം വഹിക്കും. പ്രസംഗം-ഫാ. ബിബിന്‍ മുളവരിക്കല്‍. തുടര്‍ന്ന് നേര്‍ച്ചസദ്യ, കുട്ടികളുടെ ആദ്യ ചോറൂട്ട്. വൈകുന്നേരം 5.15ന് ദിവ്യബലി. ആറിന് അടിവാരത്ത് ലദീഞ്ഞ്, നൊവേന എന്നിവയുണ്ടാകുമെന്നു വികാരി ഫാ. ജോസ് ഒഴലക്കാട്ട് അറിയിച്ചു.

ചക്കരപ്പറമ്പ്-കാളച്ചാല്‍- സീപോര്‍ട്ട് എയര്‍പോര്‍ട്ട് റോഡ് : അടിയന്തര നടപടികള്‍ വേണമെന്ന് ഉമ തോമസ് എംഎല്‍എ

കൊച്ചി: ചക്കരപ്പറമ്പ്-കാളച്ചാല്‍ വഴി സീപോര്‍ട്ട് എയര്‍പോര്‍ട്ട് റോഡ് വരെ ഉള്‍പ്പെടുന്ന 4.06 കിലോമീറ്റര്‍ ദൈര്‍ഘ്യമുള്ള സമാന്തരപാത പുനരുജ്ജീവിപ്പിക്കാന്‍ നടപടികള്‍ കൈക്കൊള്ളണമെന്ന് ഉമാ തോമസ് എംഎല്‍എ ആവശ്യപ്പെട്ടു. പദ്ധതിയെ സംബന്ധിച്ചുള്ള പുരോഗതി വിലയിരുത്തുന്നതിനായി ചേര്‍ന്ന കെഎഎസ്എസ്, ആര്‍ബിഡിസികെ, കിറ്റ്‌കോ, കെആര്‍എഫ്ബി, എന്‍എച്ച്എഐ, പഡബ്ല്യുഡി ഉദ്യോഗസ്ഥരുടെ യോഗത്തിലാണ് ഉമ തോമസ് ഇക്കാര്യം ആവശ്യപ്പെട്ടത്. ഇക്കഴിഞ്ഞ ഫെബ്രുവരിയില്‍ മുഖ്യമന്ത്രി പിണറായി വിജയന് ഉമ തോമസ് നല്‍കിയ കത്തിന്‍റെ അടിസ്ഥാനത്തില്‍ നാഷണല്‍ ഹൈവേ അഥോറിറ്റിയെ ഈ റോഡിന്‍റെ സാധ്യതാ പഠനം നടത്തി വിശദമായ റിപ്പോര്‍ട്ട് സമര്‍പ്പിക്കാന്‍ ആവശ്യപ്പെട്ടിരുന്നു. റോഡുമായി ബന്ധപ്പെട്ട മുഴുവന്‍ രേഖകള്‍ എന്‍എച്ച്എഐക്ക് കൈമാറിയിട്ടുമുണ്ട്. 2014ല്‍ ഉമ്മന്‍ ചാണ്ടി സര്‍ക്കാര്‍ അടിയന്തര ആവശ്യകതയെ മുന്‍നിര്‍ത്തി സ്പീഡ് കേരള പദ്ധതിയില്‍ ഉള്‍പ്പെടുത്തി 417 കോടി രൂപയുടെ ഭരണാനുമതിയോടെയാണ് ഈ പദ്ധതി ആരംഭിച്ചത്. റോഡിന്‍റെ വീതി 45 മീറ്ററും, രണ്ട് വലിയ പാലങ്ങളും ഒരു ചെറിയ പാലവും ഉള്‍പ്പെടുന്നതാണ്. 270 കോടി രൂപ ഭൂമിയേറ്റെടുക്കലിനായി മാത്രം നീക്കി വച്ചിരുന്നു. പദ്ധതി നടപ്പാക്കുന്നതിനായി ആര്‍ബിഡിസികെ യെ ചുമതലപ്പെടുത്തുകയും ചെയ്തിരുന്നു.എന്നാല്‍, സാമ്പത്തിക പ്രതിസന്ധി മൂലം പദ്ധതിക്ക് ഇതുവരെയും സര്‍ക്കാര്‍ അനുമതി ലഭിച്ചിട്ടില്ല. കൊച്ചി മെട്രോയുടെ രണ്ടാംഘട്ട പ്രവര്‍ത്തനങ്ങള്‍ കാക്കനാട് മേഖലയില്‍ പുരോഗമിക്കുന്നതിനാല്‍ ശക്തമായ ഗതാഗതക്കുരുക്കാണ് നിലവില്‍ അനുഭവപ്പെടുന്നത്. സമാന്തര പാതയുടെ നിര്‍മാണം യാഥാര്‍ഥ്യമാവുകയാണെങ്കില്‍ ഈ പ്രദേശത്തെ ഗതാഗത പ്രശ്‌നത്തിന് ഒരു ശാശ്വത പരിഹാരമാകുമെന്ന് യോഗത്തില്‍ അഭിപ്രായമുയര്‍ന്നു.

ഡോക്ടേഴ്സ് ദിനാചരണം

ലൂര്‍ദ് ആശുപത്രിയില്‍ കൊച്ചി: എറണാകുളം ലൂര്‍ദ് ആശുപത്രിയില്‍ ഡോക്ടേഴ്‌സ് ദിനം വിവിധ പരിപാടികളോടെ ആഘോഷിച്ചു. ആശുപത്രിയിലെ ഡോക്ടര്‍മാരുടെ ചിത്രങ്ങള്‍കൊണ്ട് രോഗികളും ആശുപത്രി ജീവനക്കാരും ചേർന്ന് ആശുപത്രിയിൽ ആദരവിന്‍റെ മതില്‍ ഒരുക്കി. തുടര്‍ന്ന് നടന്ന അനുമോദന സമ്മേളനത്തില്‍ ലൂര്‍ദ് ഗ്രൂപ്പ് ഓഫ് ഇന്‍സ്റ്റിറ്റ്യൂഷന്‍സ് ഡയറക്ടര്‍ ഫാ. ജോര്‍ജ് സെക്വീര ഡോക്ടേഴ്‌സ്ദിന സന്ദേശം നല്‍കി. ആശുപത്രി നഴ്‌സിംഗ് സൂപ്രണ്ട് സിസ്റ്റര്‍ ഗോള്‍ഡിന്‍ പീറ്റര്‍, അസോസിയേറ്റ് ഡയറക്ടര്‍ ഫാ. വിമല്‍ ഫ്രാന്‍സിസ് എന്നിവര്‍ പ്രസംഗിച്ചു. മെഡിക്കല്‍ സൂപ്രണ്ട് ഡോ. സന്തോഷ് ജോണ്‍ ഏബ്രഹാം, അസിസ്റ്റന്‍റ് മെഡിക്കല്‍ സൂപ്രണ്ട് ഡോ. അനൂഷ വര്‍ഗീസ്, വിവിധ സ്‌പെഷാലിറ്റി വിഭാഗങ്ങളുടെ മേധാവിമാര്‍ എന്നിവര്‍ സംയുക്തമായി ഡോക്ടേഴ്സ് ദിന കേക്ക് മുറിച്ചു. തുടര്‍ന്ന് ഡോക്ടര്‍മാര്‍ക്കായി വിവിധ മത്സരങ്ങളും സംഘടിപ്പിച്ചു.

ഇടക്കൊച്ചിയിൽ വാഹനത്തിൽ നിന്നും ഡീസൽ റോഡിലേക്ക് ഒഴുകിപ്പരന്നു

പള്ളുരുത്തി: ഇടക്കൊച്ചിയിൽ വാഹനത്തിന്‍റെ ഇന്ധന ടാങ്കിൽ നിന്ന് ഡീസൽ റോഡിൽ ഒഴുകി ആറോളം ഇരുചക്രവാഹന യാത്രികർ റോഡിൽ തെന്നി വീണു.ഇടക്കൊച്ചി ഹൈവേയിൽ കുമ്പളം ഫെറി മുതൽ അക്വിനാസ് കോളജ് വരെ രണ്ട് കിലോമീറ്ററോളമാണ് റോഡിലേക്ക് ഡീസൽ ചോർന്നൊഴുകിയത്. ഇതിന് പിന്നാലെ ഇരുചക്രവാഹനങ്ങൾ ഓരോന്നായി തെന്നിവീണു. ഇതോടെ ഇവിടെ വാഹന ഗതാഗതം തടസപ്പെട്ടു. ഡീസൽ പരന്നതിനെ തുടർന്ന് പ്രദേശവാസികൾ ആദ്യം മെറ്റൽ പൊടി വിതറിയിരുന്നു. സമീപത്തെ വ്യാപാരികൾ കൗൺസിലർ അഭിലാഷ് തോപ്പിലിനെ അറിയിച്ചതിനെ തുടർന്ന് അദ്ദേഹം അരൂർ ഫയർ ആൻഡ് റസ്ക്യൂ ടീമിനെ വിളിച്ചുവ രുത്തി റോഡിൽ പരന്ന ഡീസൽ കഴുകി വൃത്തിയാക്കിയതോടെയാണ് ഗതാഗതം കാര്യക്ഷമമായത്. കൗൺസിലറും സമീപത്തെ വ്യാപാരികളും വാഹനങ്ങൾക്ക് മുന്നറിയിപ്പ് നൽകിയതിനാൽ കൂടുതൽ അപകടം ഉണ്ടായില്ല. തെന്നി വീണ വാഹന യാത്രികർകർക്ക് കാര്യമായ പരിക്കില്ല. ഇന്ധന ടാങ്ക് ചോർന്ന വാഹനം കണ്ടെത്താനായില്ല. ഫയർഫോഴ്സ് ഉദ്യോഗസ്ഥരായ എം.വി. ഹർഷകുമാർ, ടിജോ ജോസഫ്, പി.പി. മഹേഷ്, അഖിലേഷ്, ജോസഫ് കനേഷ്യസ് പ്രദേശവാസികളായ ബിജിൽ പോൾ, ഫ്രെഡി ജോർജ്, ലാക്സി എന്നിവരും ശുചീകരണത്തിന് നേതൃത്വം നൽകി.

വായനയുടെ വിസ്മയ ലോകം പദ്ധതി; 51 ലൈബ്രറികൾക്ക് പുസ്തകങ്ങൾ കൈമാറി

അങ്കമാലി: റോജി എം. ജോണ്‍ എംഎല്‍എ നടപ്പാക്കുന്ന വായനയുടെ വിസ്മയ ലോകം പദ്ധതിയുടെ ഭാഗമായി അങ്കമാലി നിയോജകണ്ഡലത്തിലെ 51 അംഗീകൃത ഗ്രന്ഥശാലകള്‍ക്ക് പുസ്തകങ്ങള്‍ വിതരണം ചെയ്തു. വിതരണോദ്ഘാടനം അങ്കമാലി ബ്ലോക്ക് പഞ്ചായത്ത് ഹാളില്‍ നടന്ന ചടങ്ങില്‍ സിഎസ്എ ലൈബ്രറിക്ക് നല്‍കി ഡോ. സുനില്‍ പി. ഇളയിടം നിര്‍വഹിച്ചു. ചടങ്ങില്‍ റോജി എം. ജോണ്‍ എംഎല്‍എ അധ്യക്ഷത വഹിച്ചു. സിഎസ്എ ലൈബ്രറി സെക്രട്ടറി ഷാജി യോഹന്നാന്‍, താലൂക്ക് കൗണ്‍സില്‍ അംഗം കെ.പി. ഗോവിന്ദന്‍, ട്രഷറര്‍ കെ.എന്‍. വിഷ്ണു എന്നിവര്‍ പുസ്തകങ്ങള്‍ ഏറ്റുവാങ്ങി. നഗരസഭാ ചെയര്‍മാന്‍ അഡ്വ. ഷിയോ പോള്‍, ബ്ലോക്ക് പഞ്ചായത്ത് പ്രസിഡന്‍റ് കൊച്ചുത്രേസ്യ തങ്കച്ചന്‍, പഞ്ചായത്ത് പ്രസിഡന്‍റുമാരായ ഷൈജന്‍ തോട്ടപ്പിള്ളി, കെ.വി. ബിബീഷ്, ജോയ് അവോക്കാരന്‍, ജെസി ജോയി, ബ്ലോക്ക് പഞ്ചായത്ത് വൈസ് പ്രസിഡന്‍റ് ബിജു കാവുങ്ങ, ജില്ലാപഞ്ചായത്തംഗം അനിമോള്‍ ബേബി, താലൂക്ക് ലൈബ്രറി കൗണ്‍സില്‍ സെക്രട്ടറി വി.കെ. ഷാജി, കറുകുറ്റി പഞ്ചായത്ത് വൈസ് പ്രസിഡന്‍റ് ഷൈജോ പറമ്പി, ബ്ലോക്ക് പഞ്ചായത്തംഗങ്ങളായ സരിത സുനില്‍ ചാലാക്ക, ഷിജി ജോയ്, നഗരസഭാ കൗണ്‍സിലര്‍മാരായ റീത്താ പോള്‍, ജാന്‍സി അരീയ്ക്കല്‍, ജിത ഷിജോയ്, പഞ്ചായത്തംഗങ്ങളായ കെ.പി.അയ്യപ്പന്‍, സെബി കിടങ്ങേന്‍, എം.പി. മാര്‍ട്ടിന്‍, ഷാനിത നൗഷാദ്, ശാന്ത ചാക്കോ, ഷിജ സെബാസ്റ്റ്യന്‍, ശാന്ത ബിനു എന്നിവര്‍ സന്നിഹിതരായിരുന്നു. എംഎല്‍എ ഫണ്ട് ഉപയോഗിച്ച് 2023 യില്‍ നിയോജകമണ്ഡലത്തിലെ ലൈബ്രറികള്‍ക്കും 2024 യില്‍ സ്കൂള്‍ ലൈബ്രറികള്‍ക്കും പുസ്തകം നല്‍കിയിരുന്നു.

"കടല്‍ഭിത്തി നിര്‍മാണം ഒറ്റത്തവണയായി പൂര്‍ത്തിയാക്കണം'

കൊച്ചി: പുത്തന്‍തോട് മുതല്‍ ബീച്ച് റോഡ് വരെയുള്ള ടെട്രാപ്പോഡ് കടല്‍ഭിത്തി നിര്‍മാണം യുദ്ധകാലാടിസ്ഥാനത്തില്‍ പൂര്‍ത്തിയാക്കണമെന്ന് ആവശ്യപ്പെട്ട് ചെല്ലാനം-കൊച്ചി ജനകീയവേദി നിരാഹാര സമരം നടത്തി. പദ്ധതി മുറിച്ചു നടപ്പിലാക്കിയാല്‍ ചെറിയകടവിനു വടക്കോട്ടുള്ള പ്രദേശങ്ങളില്‍ അതിശക്തമായ കടല്‍ കയറ്റം ഉണ്ടാകുമെന്ന് നിരാഹാര സമരം ഉദ്ഘാടനം ചെയ്തു പ്രദേശവാസി അനസ്താസ്യ അത്തിപ്പൊഴി പറഞ്ഞു. ചെല്ലാനം-കൊച്ചി ജനകീയവേദി ജനറല്‍ കണ്‍വീനര്‍ വി.ടി. സെബാസ്റ്റ്യന്‍ അധ്യക്ഷത വഹിച്ചു. എ.എല്‍. കുര്യന്‍, ജോസി ചെറിയകടവ്, ജയന്‍ കുന്നേല്‍, റീന സാബു, മെറ്റില്‍ഡ ക്ലീറ്റസ്, പുഷ്പി ജോസഫ്, ജെസി ജോണി, അഡ്വ. തുഷാര്‍ നിര്‍മല്‍ തുടങ്ങിയവര്‍ പ്രസംഗിച്ചു.

ചെറുകിട വ്യാപാരികൾക്ക് സഹായം നല്കണമെന്ന്

അങ്കമാലി : ജിഎസ്ടി വരുമാനം കുതിച്ചുയർന്ന സാഹചര്യത്തിലും വ്യാപാര മാന്ദ്യം നേരിടേണ്ടിവന്ന ചെറുകിട വ്യാപാരികൾക്ക് സഹായം നല്കണമെന്ന് ടാക്സ് പ്രഫഷണൽസ് അസോസിയേഷൻ ആവശ്യപെട്ടു. ജിഎസ്ടി ദിനാചരണത്തിന്‍റെ ഭാഗമായി സംഘടിപ്പിച്ച ടാക്സ് സെമിനാർ ബിജെപി ജില്ല ഉപാധ്യക്ഷൻ അഡ്വ. തങ്കച്ചൻ വർഗീസ് ഉദ്ഘാടനം ചെയ്തു. പ്രസിഡന്‍റ് സാൻജോ ജോസഫ് അധ്യക്ഷത വഹിച്ചു. ടാക്സ് വിദഗ്ദൻ എബി കുര്യക്കോസ് മുഖ്യപ്രഭാഷണം നടത്തി.

തമ്മനം-പുല്ലേപ്പടി റോഡ് വികസനം : ഭൂമി ഏറ്റെടുക്കൽ വേഗത്തിൽ പൂർത്തിയാക്കാൻ നിർദേശം

കൊച്ചി: തമ്മനം-പുല്ലേപ്പടി റോഡ് വികസനവുമായി ബന്ധപ്പെട്ട ഭൂമി ഏറ്റെടുത്ത് നടപടിക്രമങ്ങള്‍ വേഗത്തിലാക്കി നിര്‍മാണ പ്രവര്‍ത്തനങ്ങള്‍ ആരംഭിക്കാന്‍ ഉദ്യോഗസ്ഥര്‍ക്ക് നിര്‍ദേശം. ഈ വര്‍ഷം അവസാനത്തോടെ നിര്‍മാണ പ്രവര്‍ത്തനങ്ങള്‍ ആരംഭിക്കാന്‍ കഴിയുന്ന രീതിയില്‍ നടപടികള്‍ പൂര്‍ത്തിയാക്കാനാണ് ഉദ്യോഗസ്ഥര്‍ക്ക് നിര്‍ദേശം നല്‍കിയിരിക്കുന്നത്. തമ്മനം-പുല്ലേപ്പടി റോഡ് വികസനവുമായി ബന്ധപ്പെട്ട് മേയര്‍ എം. അനില്‍ കുമാറിന്‍റെയും ജില്ലാ കളക്ടര്‍ എന്‍.എസ്.കെ. ഉമേഷിന്‍റെയും നേതൃത്വത്തില്‍ നടന്ന യോഗത്തിലാണ് ഈ തീരുമാനം. തമ്മനം-പുല്ലേപ്പടി റോഡിന്‍റെ 4(1) നോട്ടിഫിക്കേഷന്‍ ഏപ്രില്‍ 10ന് പുറത്തിറക്കിയിരുന്നു. ഏറ്റെടുക്കാനുള്ള മുഴുവന്‍ ഭൂമിയും നടപടികള്‍ പൂര്‍ത്തിയാകുന്ന മുറയ്ക്ക് കെആര്‍എഫ്ബിക്ക് കൈമാറുമെന്ന് റവന്യൂ വകുപ്പ് ഉദ്യോഗസ്ഥര്‍ അറിയിച്ചു. സാമൂഹികാഘാത പഠനത്തിനായുള്ള ഡേറ്റ കളക്ഷന്‍ ആരംഭിച്ചു. സാമൂഹികാഘാത പഠനം പൂര്‍ത്തിയാക്കിയതിനു ശേഷം 11(1) നോട്ടിഫിക്കേഷന്‍ പുറത്തിറക്കും.19(1) നോട്ടിഫിക്കേഷന്‍ പുറത്തിറക്കും മുമ്പ് തന്നെ വിട്ടുകിട്ടിയ സ്ഥലത്ത് പോസ്റ്റ് തുടങ്ങിയ തടസങ്ങള്‍ നീക്കം ചെയ്ത് താല്‍ക്കാലിക റോഡ് മെറ്റല്‍ ചെയ്യാനുള്ള നടപടികള്‍ ആരംഭിക്കാന്‍ മേയര്‍ ആവശ്യപ്പെട്ടു. ഭൂമിക്ക് പണം ലഭിച്ചാല്‍ മുഴുവന്‍ ആളുകളും ഭൂമി വിട്ടുനല്‍കാന്‍ തയാറാണ്. ഭൂമി ഏറ്റെടുക്കല്‍ പൂര്‍ത്തീകരിക്കുന്ന മുറയ്ക്ക് ഏറ്റെടുത്ത സ്ഥലത്ത് വീതി കൂട്ടാനുള്ള നടപടികള്‍ ആരംഭിക്കണമെന്നും മേയര്‍ പറഞ്ഞു. റോഡിലെ കുഴികള്‍ അടക്കമുള്ള തടസങ്ങള്‍ നീക്കുന്നതിനുള്ള എസ്റ്റിമേറ്റ് തയാറാക്കാന്‍ കിഫ്ബിക്ക് നിര്‍ദേശം നല്‍കി.

ബൈക്കുകൾ കൂട്ടിയിടിച്ച് യുവാവ് മരിച്ചു

കോലഞ്ചേരി: കരിമുകൾ പീച്ചിങ്ങച്ചിറയ്ക്ക് സമീപം ബൈക്കുകൾ കൂട്ടിയിടിച്ച് യുവാവ് മരിച്ചു. ചൂണ്ടി പരിയാരം പുതുപ്പറന്പിൽ പരേതനായ ബേബി ഗോമസിന്‍റെ മകൻ ബോണി ഗോമസ് (43) ആണ് മരിച്ചത്. തിങ്കളാഴ്ച രാത്രി എട്ടിനായിരുന്നു അപകടം. കോലഞ്ചേരി മെഡിക്കൽ കോളജാശുപത്രിയിലെത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല. സ്വകാര്യ സ്ഥാപനത്തിലെ ഡ്രൈവറായിരുന്നു. സംസ്കാരം നടത്തി. ഭാര്യ: ഷീജ. ഏകമകൾ: പ്രസിൽദ. സഹോദരൻ: സോണി ഗോമസ്.

ഇരുന്പനത്ത് കുരിശുപള്ളിയിലും ക്ഷേത്രത്തിലും അതിക്രമം; തമിഴ്നാട് സ്വദേശി പിടിയിൽ

ഇരുമ്പനം: കുരിശുപള്ളിയിലും ക്ഷേത്രത്തിലും അതിക്രമം നടത്തിയ ഇതരസംസ്ഥാനക്കാരനെ നാട്ടുകാർ പിടികൂടി പോലീസിലേൽപ്പിച്ചു. തമിഴ്നാട് സ്വദേശി വിജയ് (30) ആണ് പിടിയിലായത്. പുതിയറോഡ് വിളക്ക് ജംഗ്ഷനിലെ കുരിശുപള്ളിയിലും വെട്ടിക്കാവ് അമ്പലത്തിലുമാണ് ഇയാൾ അതിക്രമം നടത്തിയത്. കരിങ്ങാച്ചിറ സെന്‍റ് ജോർജ് യാക്കോബായ കത്തീഡ്രലിന്‍റെ കീഴിൽ ഇരുമ്പനം പുതിയറോഡ് വിളക്ക് ജംഗ്ഷനിലുള്ള കുരിശുപള്ളിയുടെ ഗ്ലാസ്‌ ഡോറുകളും നിലവിളക്കുകളുമാണ് അടിച്ചു തകർത്ത നിലയിൽ ഇന്നലെ രാവിലെ കാണപ്പെട്ടത്. കുരിശുപള്ളിയുടെ ഇരുവശത്തുമുള്ള ഗ്ലാസ് ഡോറുകളും തകർത്തിരുന്നു. നിലവിളക്കുകളും മറ്റും മറിച്ചിട്ട നിലയിലായിരുന്നു. ഞായറാഴ്ച അർധരാത്രിക്കു ശേഷമാണ് ഇവിടെ ആക്രമണം നടന്നതെന്നു കരുതുന്നു. കുരിശുപള്ളിയുടെ സമീപത്ത് പ്രവർത്തിക്കുന്ന തട്ടുകടയിലെ കസേരയെടുത്തു കൊണ്ടുവന്നാണ് ഗ്ലാസ് ഡോറുകൾ അടിച്ചുപൊട്ടിച്ചത്. പള്ളി അധികാരികൾ നല്കിയ പരാതിയിൽ ഹിൽപാലസ് പോലീസ് അന്വേഷണം നടത്തിവരികയാണ്. ഇന്നലെ ഉച്ചയ്ക്ക് 2.30ഓടെ ഇരുമ്പനം വെട്ടിക്കാവ് അമ്പലത്തിൽ കയറി വഴിപാട് കൗണ്ടർ അടിച്ചുപൊളിക്കുകയും കെടാവിളക്ക് മറിച്ചിടുകയും കസേരകൾ നശിപ്പിക്കുകയും ചെയ്യുന്നതു കണ്ട നാട്ടുകാർ ഇയാളെ പിടികൂടി പോലീസിൽ ഏൽപ്പിക്കുകയായിരുന്നു. കുരിശുപള്ളിയിൽ ആക്രമണമുണ്ടായതറിഞ്ഞ് തൃക്കാക്കര അസി.പോലീസ് കമ്മീഷണർ പി.എസ്.ഷിജു സ്ഥലത്തെത്തിയിരുന്നു. വിവിധ കക്ഷി രാഷ്ട്രീയ നേതാക്കളും കുരിശു പള്ളിയിലെത്തി വിവരങ്ങൾ അന്വേഷിച്ചതിന് പിന്നാലെയാണ് പ്രതിയെ ക്ഷേത്രവളപ്പിൽ നിന്ന് നാട്ടുകാർ പിടികൂടിയത്. പരസ്പരവിരുദ്ധമായാണ് ഇയാൾ സംസാരിക്കുന്നതെന്നും മാനസിക വിഭ്രാന്തിയുള്ളതായി സംശയിക്കുന്നതായും പോലീസ് പറഞ്ഞു.

കൊച്ചിയുടെ സംഗീത മനസ് കീഴടക്കി പ്രദ്യുമ്‌ന

കൊച്ചി: ഖായ്ദയും റേലയും ഇടമുറിയാതെ പ്രേക്ഷക ഹൃദയങ്ങളില്‍ വാദ്യസംഗീതത്തിന്‍റെ അലകള്‍ തീര്‍ത്ത് പ്രദ്യുമ്‌ന ഉദയരാജ് കര്‍പൂരിന്‍റെ തബല സോളോ വിസ്മയമായി. അന്തരിച്ച തബല ആചാര്യന്‍ പണ്ഡിറ്റ് എന്‍. വെങ്കടേഷ് നായകിന്‍റെ 108-ാം ജന്മവാര്‍ഷികത്തിന്‍റെ ഭാഗമായി അമരാവതി ഗോപാലകൃഷ്ണ മണ്ഡപത്തില്‍ സംഘടിപ്പിച്ച സംഗീത പരിപാടിയിലാണ് 15കാരനായ ബംഗളൂരു സ്വദേശി പ്രദ്യുമ്‌ന കൊച്ചിയുടെ സംഗീത മനസുകളെ കീഴടക്കിയത്. "വാദ്യസംഗീതത്തിലെ അദ്്ഭുതക്കുട്ടി' എന്ന വിശേഷണമുള്ള പ്രദ്യുമ്‌നയുടെ കൊച്ചിയിലെ ആദ്യ അവതരണം കൂടിയായിരുന്നു ഇത്. വെങ്കടേഷ് നായകിന്‍റെ ശിഷ്യനും പ്രശസ്ത തബലിസ്റ്റുമായ ഡീന്‍ മോഹനാണ് പരിപാടി സംഘടിപ്പിച്ചത്. വിഗ്നേശ് ഭഗവത് (ഹാര്‍മോണിയം), രഘുരാജ് ശേട്ട് (മറാട്ടി സംഗീതം), ശ്രുതി ചന്ദ്രമോഹന്‍ (വോക്കല്‍), ബാലകൃഷ്ണ കമ്മത്ത് (മൃദംഗം), ശിവരാജ് എസ്. ഭട്ട് (ഹാര്‍മോണിയം), അഭിലാഷ് രാമ (വോക്കല്‍) സന്ദീപ് (റിഥം), വില്‍സണ്‍ (കീബോര്‍ഡ്) എന്നിവരും സംഗീതാവതരണം നടത്തി. പ്രശസ്ത തബലിസ്റ്റ് ഡോ. ഉദയരാജ് കര്‍പൂരിന്‍റെ മകനാണ് ഒന്പതാം ക്ലാസ് വിദ്യാര്‍ഥിയായ പ്രദ്യുമ്‌ന.

അരുമ മൃഗങ്ങളുമായി ബാങ്കോക്കിൽനിന്ന് എത്തി; യാത്രക്കാരൻ കസ്റ്റംസിന്‍റെ പിടിയിൽ

നെടുമ്പാശേരി: അനധികൃതമായി കടത്താൻ ശ്രമിച്ച അരുമ മൃഗങ്ങളുമായി ബാങ്കോക്കിൽനിന്ന് എത്തിയ യാത്രക്കാരൻ കസ്റ്റംസിന്‍റെ പിടിയിലായി. പോക്കറ്റ് മങ്കികൾ എന്നറിയപ്പെടുന്ന മൂന്ന് മാർമോ സെറ്റുകൾ, രണ്ട് വൈറ്റ് ലിപ്ഡ് ടാമറിന്‍, ഒരു മക്കാവു തത്ത എന്നിവയാണ് പിടിയിലായത്. കൈക്കുള്ളിൽ ഒതുങ്ങുന്ന കുഞ്ഞൻ കുരങ്ങാണ് മാർമോ സെറ്റ് മങ്കി. വാലിന് രണ്ടിരട്ടിയോളം നീളമുള്ള ഇതിന്‍റെ ചെവികൾ വെളുത്തതായിരിക്കും. ഓമന മൃഗമായിട്ടാണ് പലരും ഇതിനെ വളർത്തുന്നത്. മൂന്നു ലക്ഷം രൂപ മുതലാണ് ഇതിന്‍റെ വില. ആമസോൺ കാടുകളിലാണ് ഈ കുരങ്ങുകളുടെ ജനനം. അതുകൊണ്ട് ഇതിനെ ആമസോൺ മാർമോ സെറ്റ് മങ്കികൾ എന്നും അറിയപ്പെടുന്നു. കുരങ്ങ് വർഗത്തിൽ തന്നെ പെട്ടതാണ് വൈറ്റ് ലിപ്ഡ് ടാമറിൻ. ഒരടിയോളമാണ് ഇതിന്‍റെ വലിപ്പം. വെള്ള മീശ ഉള്ളത് പോലെയാണ് മുഖം. അര കിലോഗ്രാമിൽ താഴെ മാത്രം ഭാരമുള്ള ഇതിന്‍റെ ജനനം ആമസോണ്‍ കാടുകളില്‍ ബ്രസീലിലും ബൊളീവിയയിലുമാണ്. ഉയർന്ന വിലയുള്ളതും ആവശ്യക്കാർ ഏറെ ഉള്ളതുമാണ് ഇവയോടൊപ്പം പിടികൂടിയ മക്കാവു തത്ത. വളർത്തു മൃഗങ്ങളെ ചെറിയ കൂട്ടിലാക്കി ലഗേജിൽ ഒളിപ്പിച്ചിരിക്കുകയായിരുന്നു. കഴിഞ്ഞ ഡിസംബറിൽ ഇത്തരത്തിൽ ബാങ്കോക്കിൽ നിന്നു കടത്താൻ ശ്രമിച്ച 14 അപൂർവയിനം പക്ഷികളെ കസ്റ്റംസ് പിടികൂടിയിരുന്നു. എന്നാൽ പോക്കറ്റ് മങ്കികളും വൈറ്റ് ലിപ്ഡ് ടാമറിനും പിടിയിലാകുന്നത് ഇതാദ്യമാണ്. പിടികൂടിയ മൃഗങ്ങളെയും പക്ഷിയെയും വനംവകുപ്പിന് കൈമാറി. എന്തിനു വേണ്ടിയാണ് ഇവയെ കൊണ്ടുവന്നത് എന്നത് സംബന്ധിച്ച് വനംവകുപ്പും അന്വേഷണം ആരംഭിച്ചിട്ടുണ്ട്.

ഡിജെ പാര്‍ട്ടിക്കിടെ സംഘര്‍ഷം: ചികിത്സയിലുള്ള യുവാവ് പോലീസ് നിരീക്ഷണത്തില്‍

കൊച്ചി: ഡിജെ പാര്‍ട്ടിക്കിടെ സംഘര്‍ഷമുണ്ടായ സംഭവത്തില്‍ യുവതിയെ ദുരുദ്ദേശത്തോടെ കടന്നു പിടിച്ച യുവാവ് ആശുപത്രിയില്‍ പോലീസ് നിരീക്ഷണത്തില്‍ തുടരുന്നു. ശനിയാഴ്ച രാത്രി 10.30 ഓടെ കതൃക്കടവിലെ മില്ലേനിയല്‍സ് (ഇടശേരി) ബാറിലാണ് സംഘര്‍ഷം ഉണ്ടായത്. ലൈംഗിക ഉദ്ദേശത്തോടെ യുവതിയെ കടന്നുപിടിച്ച സംഭവത്തില്‍ ഇടുക്കി തൊടുപുഴ സ്വദേശി ബഷീറിനെ വൈന്‍ ഗ്ലാസ് കൊണ്ട് യുവതി അടിച്ചു പരിക്കേല്‍പ്പിച്ചിരുന്നു. പരിക്കേറ്റ ഇയാള്‍ നിലവില്‍ ആശുപത്രിയില്‍ ചികിത്സയിലാണ്. ഇയാള്‍ നിരീക്ഷണത്തിലാണെന്നും ആരോഗ്യസ്ഥിതി മെച്ചപ്പെട്ടാല്‍ ഉടന്‍ അറസ്റ്റ് രേഖപ്പെടുത്തുമെന്നും എറണാകുളം സെന്‍ട്രല്‍ എസിപി സിബി ടോം പറഞ്ഞു. യുവാവിന് ചെവിക്ക് പിന്നിലാണ് അടിയേറ്റത്. നാല് തുന്നിക്കെട്ടുണ്ട്. വൈന്‍ ഗ്ലാസ് പൊട്ടിച്ച് യുവാവിനെ അടിച്ച സംഭവത്തില്‍ എറണാകുളത്ത് ജോലി ചെയ്യുന്ന ഉദയംപേരൂര്‍ സ്വദേശിനിയായ യുവതിക്ക് എതിരെ പോലീസ് കേസ് എടുത്തിരുന്നു. യുവതിയുടെ അറസ്റ്റ് രേഖപ്പെടുത്തി കഴിഞ്ഞ ദിവസം ജാമ്യത്തില്‍ വിട്ടയച്ചു. ഉദയംപേരൂര്‍ സ്വദേശിനിയും സുഹൃത്തുക്കളും തൊടുപുഴ സ്വദേശിയായ യുവാവിന്‍റെ സുഹൃത്തക്കളുടെ സംഘവുമാണ് ഡിജെ പാര്‍ട്ടിക്ക് എത്തിയത്. പരിപാടിക്കിടെ യുവാവ് യുവതിയെ കടന്നുപിടിച്ചു. ഒരുതവണ താക്കീത് ചെയ്‌തെങ്കിലും ദുരുദ്ദേശത്തോടെ വീണ്ടും കടന്നുപിടിച്ചതോടെ യുവതി വൈന്‍ ഗ്ലാസ് കൊണ്ട് അടിക്കുകയായിരുന്നു. ഇതോടെ ഡിജെ നിർത്തിവച്ചു. പരിക്കേറ്റ യുവാവിനെ ഉടന്‍ ആശുപത്രിയിലേക്ക് മാറ്റി. വിവരമറിഞ്ഞ് പോലീസ് സ്ഥലത്തെത്തി യുവതിയെ കസ്റ്റഡിയിലെടുക്കുകയായിരുന്നു. ഇതിനിടെ സിസിടിവി ദൃശ്യം പരിശോധിച്ച പോലീസ് യുവതിയുടെ മൊഴിയില്‍ കഴമ്പുണ്ടെന്ന് കണ്ടെത്തുകയും ചെയ്തിരുന്നു.

ആഡംബര കാര്‍ ഇറക്കുന്നതിനിടെ അപകടം : കൃത്യമായ അന്വേഷണം വേണമെന്ന് കുടുംബം

കൊച്ചി: എറണാകുളത്ത് ആഡംബര കാര്‍ ഇറക്കുന്നതിനിടെ അപകടത്തില്‍പ്പെട്ട് യുവാവ് മരിച്ച സംഭവത്തില്‍ കൃത്യമായ അന്വേഷണം വേണമെന്ന് കുടുംബം. കഴിഞ്ഞ 22ന് രാത്രി ട്രെയ്‌ലര്‍ ലോറിയില്‍നിന്ന് ഇറക്കുന്നതിനിടെ നിയന്ത്രണം നഷ്ടപ്പെട്ട കാര്‍ ഇടിച്ചാണ് കൊച്ചി സ്വദേശി റോഷന്‍ ആന്‍റണി മരിച്ചത്. ട്രേഡ് യൂണിയനിലെ ആളുകള്‍ രാത്രി വിളിച്ചത് കൊണ്ടാണ് കാര്‍ ഇറക്കാന്‍ റോഷന്‍ പോയതെന്ന് റോഷന്‍ ആന്‍റണിയുടെ ഭാര്യ ഷെല്‍മ പറഞ്ഞു. മുന്പും കാറിറക്കാന്‍ യൂണിയന്‍ അംഗങ്ങള്‍ വിളിച്ചിട്ട് റോഷന്‍ പോയിട്ടുണ്ട്. പരിശീലനം ലഭിച്ചവരാണ് ജോലി ചെയ്തിരുന്നെങ്കില്‍ അപകടം ഒഴിവായേനെയെന്നും കൃത്യമായ അന്വേഷണം വേണമെന്നും ഷെല്‍മ പറഞ്ഞു. മൂന്നും ആറും വയസുള്ള കുഞ്ഞുങ്ങളടങ്ങുന്ന കുടുംബത്തിന്‍റെ ഏക വരുമാനം റോഷന്‍റെ ജോലിയായിരുന്നു. രാത്രി പത്തേകാലോടെയാണ് ഫോണ്‍ വന്നത്. ട്രക്ക് വരുമ്പോള്‍ പോവാറുള്ളതാണ്. കാര്‍ ഇറക്കുന്നത് യൂണിയന്‍കാരാണെന്ന് റോഷന്‍ പറഞ്ഞിട്ടുണ്ട്. പരിശീലനം ലഭിച്ചവരാണ് ജോലി ചെയ്തിരുന്നെങ്കില്‍ അപകടം ഉണ്ടാകില്ലായിരുന്നു. രണ്ടു കുഞ്ഞുങ്ങളാണ്. എനിക്ക് ജോലിയില്ല. ഷോറൂമില്‍ നിന്ന് ആളുകള്‍ വന്നിരുന്നു. ബോര്‍ഡ് മീറ്റിംഗ് കൂടുന്നുണ്ടെന്നും അതിന് ശേഷം വിളിക്കാമെന്നും അറിയിച്ചു'- ഷെല്‍മ പറഞ്ഞു. അതേസമയം, സംഭവത്തില്‍ മോട്ടോര്‍ വാഹന വകുപ്പിന്‍റെ അന്വേഷണ റിപ്പോര്‍ട്ട് രേഖാമൂലം ഇതുവരെ പോലീസിന് ലഭിച്ചിട്ടില്ല. മാനുഷിക പിഴവെന്നാണ് എംവിഡിയുടെ റിപ്പോര്‍ട്ടിലുള്ളത്. സംഭവത്തില്‍ പാലാരിവട്ടം പോലീസും അന്വേഷണം നടത്തുന്നുണ്ട്. ഡ്രൈവറായ അന്‍ഷാദിനെതിരെ മനപൂര്‍വമല്ലാത്ത നരഹത്യ അടക്കം വകുപ്പുകള്‍ ചുമത്തിയാണ് പാലാരിവട്ടം പോലീസിന്‍റെ നടപടി. സംഭവത്തില്‍ ഇതുവരെ കേസ് എടുത്തിട്ടില്ല. എംവിഡി റിപ്പോര്‍ട്ട് കിട്ടിയ ശേഷമായിരിക്കും തുടര്‍നടപടികള്‍. എന്നാല്‍ സാക്ഷികളുടെ ഉള്‍പ്പെടെ മൊഴികള്‍ രേഖപ്പെടുത്തിയ പോലീസ് അപകടം വരുത്തിയതില്‍ കൂടുതല്‍ പേര്‍ക്ക് പങ്കുണ്ടോ എന്നും അന്വേഷിക്കുന്നുണ്ട്.

കാപ്പ പ്രതി അറസ്റ്റിൽ

കാക്കനാട് : പ്രവേശന വിലക്ക് നിലനിൽക്കേ ഉത്തരവ് ലംഘിച്ച് തൃക്കാക്കര സ്റ്റേഷൻ പരിധിക്കുള്ളിൽ പ്രവേശിച്ച വാഴക്കാല തീവണ്ടി കോളനിയിൽ ചാത്തൻ വേലി മുകൾ വീട്ടിൽ ഷാജി(27)യെ തൃക്കാക്കര പോലീസ് പിടികൂടി. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. മോഷണം, ആക്രമണം, സ്ത്രീകളോട് മോശം പെരുമാറ്റം, ആയുധങ്ങൾ കാട്ടി ഭീഷണിപ്പെടുത്തൽ തുടങ്ങിയ കുറ്റകൃത്യങ്ങളിൽ സ്ഥിരമായി പ്രതി ചേർക്കപ്പെട്ട ഇയാളെ കൊച്ചി സിറ്റി പോലീസ് കമ്മീഷണർ പുട്ട വിമലാദിത്യയാണ് കാപ്പ ചുമത്തി വിലക്ക് എർപ്പെടുത്തിയത്. 2025 ജൂൺ 29ന് പ്രതി തൃക്കാക്കര സ്റ്റേഷൻ പരിധിയിൽ പ്രവേശിച്ചതോടെ കാപ്പ ഉത്തരവു ലംഘിക്കുകയായിരുന്നു. എസ്ഐ എ. ഷാജിയുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.

മോട്ടോർ സൈക്കിൾ മോഷണം: ഒരാൾ അറസ്റ്റിൽ

പെരുമ്പാവൂർ: മോട്ടോർ സൈക്കിൾ മോഷ്ടിച്ച കേസിൽ ചൂർണിക്കര കുന്നത്തേരി കാളിയാടൻ വീട്ടിൽ റിഫാസി(24)നെ കുറുപ്പംപടി പോലീസ് അറസ്റ്റ് ചെയ്തു. കഴിഞ്ഞ വ്യാഴാഴ്ചയായിരുന്നു സംഭവം. വാങ്ങാനെന്ന വ്യാജേന ബീഹാർ സ്വദേശിയായ വിജയകുമാറിന്‍റെ വട്ടക്കാട്ടുപടിയിലുള്ള വീട്ടിൽനിന്ന് മോട്ടോർ സൈക്കിൾ ഓടിച്ചു നോക്കുന്നതിനായി പുറത്തേക്ക് കൊണ്ടുപോയതിനു ശേഷം തിരികെ വരാതിരിക്കുകയായിരുന്നു. ഇൻസ്പെക്ടർ വി.എം. കേഴ്സൺ, എസ്ഐ പി.വി. ജോർജ്, എസ്‌സിപിഒമാരായ കെ.എം. നൗഷാദ്, കെ.എ. നൗഫൽ, രഞ്ജു വി. തങ്കപ്പൻ, സിപിഒമാരായ ജി. രാമനാഥ്, അരുൺ കെ. കരുണൻ എന്നിവരാണ് അന്വേഷണ സംഘത്തിൽ ഉണ്ടായിരുന്നത്.

വള്ളം മറിഞ്ഞ് ഒഴുക്കിൽപ്പെട്ട ആളെ കാണാതായി

പിറവം: പിറവം പാഴൂരിൽ പുഴയിൽ വള്ളം മറിഞ്ഞ് ഒഴുക്കിൽപ്പെട്ട് ഒരാളെ കാണാതായി. പാഴൂർ കല്ലുമാരി കൊണത്താട്ടുകുഴിയിൽ കുഞ്ഞുമോനെ(കുട്ടായി-52)യാണ് കാണാതായത്. പുഴയിലൂടെ ചെറുവള്ളത്തിൽ പോകുന്പോൾ പാഴൂർ മഴവിൽപ്പാലത്തിന് സമീപം വള്ളം മറിഞ്ഞ് ഒഴുക്കിൽപ്പെടുകയായിരുന്നു. ഇന്നലെ വൈകുന്നേരം ആറിനായിരുന്നു സംഭവം. പോലീസും അഗ്നിരക്ഷാസേനയും സ്ഥലത്തെത്തി നാട്ടുകാരുടെ സഹായത്തോടെ രാത്രി വൈകിയും തെരച്ചിൽ നടത്തി യെങ്കിലും ഫലമുണ്ടായില്ല. പുഴയിൽ നല്ല ഒഴുക്കുള്ള ഭാഗമാണിത്. എറണാകുളത്ത് നിന്ന് സ്‌കൂബ ടീം എത്തിയിട്ടുണ്ട്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]