കത്തീഡ്രൽ ഹോംസ് ഇരുപത്തിയഞ്ചാം ഭവന ആശീർവാദവും താക്കോൽ ദാനവും

കോതമംഗലം: സെന്‍റ് ജോർജ് കത്തീഡ്രൽ ഇടവകയുടെ കത്തീഡ്രൽ ഹോംസ് ഭവന പദ്ധതിയിലൂടെ നിർമിച്ച ഇരുപത്തിയഞ്ചാമത് വീടിന്‍റെ താക്കോൽ ദാനവും ആശീർവാദവും ബിഷപ് മാർ ജോർജ് മഠത്തിക്കണ്ടത്തിൽ നിർവഹിച്ചു.

കത്തീഡ്രൽ വികാരി റവ. ഡോ. മാത്യു കൊച്ചുപുരയ്ക്കൽ അധ്യക്ഷത വഹിച്ചു. മുൻ വികാരി റവ. ഡോ. തോമസ് ചെറുപറമ്പിൽ, ഇവിഎം ഗ്രൂപ്പ് ചെയർമാൻ ഇ.എം. ജോണി, കോതമംഗലം ലയൺസ് ക്ലബ് പ്രസിഡന്‍റ് ടി.ഡി. ശ്രീകുമാർ, കോതമംഗലം രൂപത സോഷ്യൽ സർവീസ് സൊസൈറ്റി ഡയറക്ടർ ഫാ. ജോസഫ് കൊച്ചുപറമ്പിൽ, സിഎംസി പാവനാത്മ പ്രൊവിൻഷ്യൽ സുപ്പീരിയർ സിസ്റ്റർ മെറീന, കത്തീഡ്രൽ ഹോംസ് പ്രസിഡന്‍റ് ഡേവിസ് നെല്ലിക്കാട്ടിൽ, കമ്മിറ്റി അംഗങ്ങളായ ജോൺസൺ പോത്താനിക്കാട്ട്, സോണി തകിടിയിൽ, ബിജു കുന്നുംപുറത്ത് എന്നിവർ പ്രസംഗിച്ചു.

ADVERTISEMENT

പറവൂർ ബിവ്റേജസിൽ മോഷണം: വില കൂടിയ മദ്യവും പണവും നഷ്ടപ്പെട്ടു

മോഷ്‌ടാക്കളുടെ സിസിടിവി ദൃശ്യങ്ങൾ പോലീസിന് ലഭിച്ചു. മൂന്നംഗ സംഘത്തിലെ രണ്ടുപേരാണ് അകത്തു കയറിയത്. വിരലടയാള വിദഗ്‌ധരും ഡോഗ് സ്‌ക്വാഡും സ്ഥലത്ത് പരിശോധന നടത്തി പറവൂർ: നഗരത്തിൽ പല്ലംതുരുത്ത് റോഡിൽ പ്രവർത്തിക്കുന്ന ബിവ്റേജസ് കോർപറേഷൻ ഔട്ട്‌ലെറ്റിൽ മോഷണം. വില കൂടിയ ബ്രാൻഡുകളുടെ 12 മദ്യക്കുപ്പികളും 2,000 രൂപയും നഷ്ടപ്പെട്ടു. അഞ്ചു കെയ്സ് മദ്യം നിലത്തു പൊട്ടിക്കിടക്കുന്ന നിലയിലുമായിരുന്നു. കെ ഒരു ലക്ഷത്തോളം രൂപയുടെ നഷ്ടമുണ്ടായി. ഔട്ട്‌ലെറ്റ് അവധിയായിരുന്ന ഒന്നിന് പുലർച്ചെ രണ്ടിനാണ് മോഷണം നടന്നത്. ഇന്നലെ രാവിലെ ജീവനക്കാർ എത്തിയപ്പോഴാണ് സംഭവമറിഞ്ഞത്. താഴെ സാധാരണ കൗണ്ടറും മുകളിൽ പ്രീമിയം കൗണ്ടറുമായാണ് ഔട്ട്‌ലെറ്റ് പ്രവർത്തിക്കുന്നത്. താഴത്തെ കൗണ്ടറിനു മുന്നിലെ ഷട്ടറിന്‍റെ താഴുകൾ തകർത്ത് അകത്തു കയറിയ മോഷ്ടാക്കൾ അകത്തുകൂടി തന്നെ മുകളിലെ പ്രീമിയം കൗണ്ടറിലെത്തുകയായിരുന്നു. വിലകൂടിയ മദ്യക്കുപ്പികൾ എടുത്ത ശേഷം ബേസ് ബോർഡ് പെട്ടിയിലാക്കിയാണ് കൊണ്ടുപോയിരിക്കുന്നത്. ഓണമായതിനാൽ സ്‌റ്റോക്ക് കൂടുതൽ ഉണ്ടായിരുന്നു. അഞ്ച് കെയ്സ് മദ്യം നിലത്തു വീണു പൊട്ടിയ നിലയിലായിരുന്നു. മോഷ്‌ടാക്കളുടെ സിസിടിവി ദൃശ്യങ്ങൾ പോലീസിന് ലഭിച്ചിട്ടുണ്ട്. സംഘത്തിൽ മൂന്നുപേർ ഉണ്ടായിരുന്നെങ്കിലും രണ്ടുപേരാണ് ഔട്ട്‌ലെറ്റിന്‍റെ അകത്തു കയറിയത്. പണമായി കൊണ്ടുപോയത് ഭൂരിഭാഗവും ചില്ലറ നൽകാനായി കരുതിയിരുന്ന നാണയങ്ങളായിരുന്നു. വിരലടയാള വിദഗ്‌ധരും ഡോഗ് സ്‌ക്വാഡുമെത്തി പരിശോധന നടത്തി. ഷട്ടറിന്‍റെ താഴുകൾ തകർക്കാൻ ഉപയോഗിച്ചെന്നു കരുതുന്ന ചുറ്റിക സമീപത്തു നിന്നു പോലീസ് കണ്ടെടുത്തു.പോലീസ് അന്വേഷണം ഊർജിതമാക്കി.

കരുമാലൂരിൽ മോഷണശ്രമം

കരുമാലൂർ: കരുമാലൂരിൽ ബാങ്കിന് സമീപമുള്ള വീട്ടിൽ മോഷണ ശ്രമം. തട്ടാംപടി കളപ്പറമ്പത്ത് ലിബിൻ ബേബിയുടെ വീട്ടിലാണ് കഴിഞ്ഞ രാത്രി 11 ഓ‌‌ടെ മോഷ്ടാവ് എത്തിയത്. യുവാവാ‌യ മോഷ്ടാവ് വീടിന്‍റെ മതിൽ ചാടി അകത്തേക്കു കയറുന്നതു സിസിടിവി ദൃശ്യങ്ങളിൽ കണ്ട ഉടനെ വീട്ടുകാർ പോലീസിൽ അറിയിച്ചു. ലൈറ്റിട്ടു ബഹളം വച്ചതോടെ മോഷ്ടാവ് ഓടി രക്ഷപ്പെട്ടു. ആലങ്ങാട് പോലീസ് സംഭവസ്ഥലത്തു പരിശോധന നടത്തി. വിലപിടിപ്പുള്ള ഒന്നും നഷ്ടപ്പെട്ടിട്ടില്ല. മോഷ്ടാവ് ബൈക്കിലാണ് എത്തിയതെന്നു സിസിടിവി ദൃശ്യങ്ങളിലുണ്ട്. ആദ്യം ബൈക്കിലെത്തി പരിശോധിച്ചു നോക്കിയശേഷം വാഹനം മറ്റൊരിടത്ത് പാർക്ക് ചെയ്തു വീണ്ടും വരികയായിരുന്നു. കരുമാലൂർ, ആലങ്ങാട് മേഖല കേന്ദ്രീകരിച്ച് തുടർച്ചയായി മോഷണങ്ങൾ നടക്കുന്നതോടെ നാട്ടുകാർ ഭീതിയിലാണ്.അതിനാൽ രാത്രികാലങ്ങളിൽ പോലീസ് പട്രോളിംഗ് ശക്തമാക്കണമെന്ന ആവശ്യം ഉയർന്നിട്ടുണ്ട്.

യാഥാര്‍ഥ്യമാകുമോ നോര്‍ത്ത്-സൗത്ത് ഇടനാഴി?

കൊച്ചി: കാരിക്കാമുറിയിലെ കെഎസ്ആര്‍ടിസി പാര്‍ക്കിംഗ് യാര്‍ഡില്‍ പുതിയ ബസ് സ്റ്റാന്‍ഡ് നിര്‍മിക്കാന്‍ സംസ്ഥാന ധന, ഗതാഗത വകുപ്പുകള്‍ തീരുമാനമെടുത്ത പശ്ചാത്തലത്തില്‍ അര പതിറ്റാണ്ട് മുന്‍പ് ഇവിടെ വിഭാവനം ചെയ്ത നോര്‍ത്ത്-സൗത്ത് ഹരിത ഇടനാഴി (ഗ്രീന്‍ കോറിഡോര്‍) വീണ്ടും സജീവ ചര്‍ച്ചയാകുന്നു. പുതിയ സ്റ്റാന്‍ഡിലേക്ക് റോഡ് ആവശ്യമായതിനാല്‍ ഗ്രീന്‍ കോറിഡോര്‍ നടപ്പാക്കുന്നതിന്‍റെ പ്രാധാന്യം വർധിക്കുകയാണ്. പദ്ധതി വൈകിയതിനാല്‍ കേന്ദ്ര ഫണ്ട് നഷ്ടമായ സാഹചര്യത്തില്‍ പദ്ധതി നടപ്പാക്കാന്‍ കൊച്ചി കോര്‍പറേഷന്‍ സ്വന്തം നിലയില്‍ പണം കണ്ടെത്തേണ്ടി വരും. സൗത്ത്-നോര്‍ത്ത് റെയില്‍വേ സ്റ്റേഷനുകളെ ബന്ധിപ്പിക്കുന്ന രണ്ടര കിലോമീറ്റര്‍ റോഡാണ് നോര്‍ത്ത്-സൗത്ത് ഇടനാഴി. കേന്ദ്രസര്‍ക്കാരിന്‍റെ മൊബിലൈസ് യുവര്‍ സിറ്റി പദ്ധതിയുടെ ഭാഗമായി ഫ്രഞ്ച് നധകാര്യ സ്ഥാപനമായ എഎഫ്‌ഡിയുടെ സാമ്പത്തിക സഹായത്തോടെ 2019ലാണ് പദ്ധതി നടപ്പാക്കുന്നതിനെ കുറിച്ച് ആലോചിച്ചത്. ഇതിനായി എഎഫ്‌ഡിയുടെ കണ്‍സള്‍ട്ടേഷന്‍ ഏജന്‍സി പഠനവും നടത്തി. റെയില്‍വേയുടെയും കോര്‍പറേഷന്‍റെയും സ്ഥലം പദ്ധതിക്കായി കണ്ടെത്തി. സ്വകാര്യ വ്യക്തികളില്‍നിന്ന് ഏതാനം മീറ്റര്‍ ഭൂമിയും ഏറ്റെടുക്കേണ്ടിവരും. ഗ്രീന്‍ കോറിഡോര്‍ ആശയത്തില്‍ നിര്‍മിച്ചാല്‍ സ്ഥലം വിട്ടുനല്‍കാന്‍ തയാറല്ലെന്ന് സ്ഥലം ഉടമകള്‍ നിലപാടെടുത്തതോടെ പദ്ധതി നിലയ്‌ക്കുകയായിരുന്നു. കാല്‍നടയാത്രക്കാര്‍ക്ക് അനുയോജ്യമായ ഒരു നടപ്പാതയായിട്ടാണ് പദ്ധതി വിഭാവനം ചെയ്തത്. ഇലക്ട്രിക് വാഹനങ്ങളും സൈക്കിളുകളും മാത്രമേ ഓടിക്കാന്‍ അനുവാദമുണ്ടായിരുന്നുള്ളു. ഈ നിബന്ധന ഒഴിവാക്കി എല്ലാത്തരം വാഹനങ്ങളും പ്രവേശിക്കാനായാല്‍ മാത്രമേ പ്രദേശ വാസികള്‍ക്ക് പദ്ധതിയുടെ പ്രയോജനം ലഭിക്കുകയുള്ളൂ എന്ന് കൗണ്‍സിലര്‍മാരടക്കം വാദിച്ചു. കേന്ദ്രപദ്ധതിയില്‍ പ്രാദേശികമായ നയമാറ്റം സാധ്യമല്ലാത്തതിനാല്‍ അതില്‍ തുടര്‍നടപടികള്‍ ഉണ്ടായില്ല. അങ്ങനെ പദ്ധതി സ്തംഭിച്ചു. രണ്ട് റെയില്‍വേ സ്‌റ്റേഷനുകളിലേക്ക് എംജി റോഡ് വഴി 4.8 കിലോമീറ്ററും ചിറ്റൂര്‍ റോഡ് വഴി 4.4 കിലോമീറ്ററും ദൂരമാണുള്ളത്. പദ്ധതി യാഥാര്‍ഥ്യമായാൽ യാത്രാ ദൂരം രണ്ടര കിലോമീറ്ററായി കുറയ്‌ക്കാം. റെയില്‍വേ ഇടനാഴി യാഥാര്‍ഥ്യമായാല്‍ ഈ പ്രദേശത്തിന്‍റെ മുഖച്ഛായ തന്നെ മാറും. പ്രദേശത്തെ സാമൂഹ്യവിരുദ്ധ പ്രവര്‍ത്തനങ്ങൾ ഇല്ലാതാകും. എംജി റോഡ്, ചിറ്റൂര്‍ റോഡ് എന്നിവിടങ്ങളിലെ തിരക്ക് കുറയ്ക്കാനുമാകും.

എത്ര ചവിട്ടിത്താഴ്ത്താന്‍ ശ്രമിച്ചാലും സമത്വം ഉയര്‍ന്നുവരും: മന്ത്രി രാജീവ്

കൊച്ചി: സമത്വത്തിന്‍റെ ദര്‍ശനമാണ് ഓണം മുന്നോട്ട് വയ്ക്കുന്നതെന്നും എത്ര ചവിട്ടി താഴ്ത്താന്‍ ശ്രമിച്ചാലും സമത്വം ഉയര്‍ന്നുവരുമെന്നും അതിന്‍റെ ഉദാഹരണമാണ് മഹാബലി ചക്രവര്‍ത്തിയെന്നും മന്ത്രി പി. രാജീവ്. ജില്ലാ ഭരണകൂടവും ജില്ലാ ടൂറിസം പ്രമോഷന്‍ കൗണ്‍സിലും (ഡിടിപിസി) വിനോദസഞ്ചാര വകുപ്പും സംയുക്തമായി സംഘടിപ്പിക്കുന്ന ലാവണ്യം 25 ഓണാഘോഷത്തിന്‍റെ ഉദ്ഘാടനം നിര്‍വഹിക്കുകയായിരുന്നു അദ്ദേഹം. സമൃദ്ധമായി ഓണം ആഘോഷിക്കുന്നതിനുള്ള എല്ലാ പ്രവര്‍ത്തനങ്ങളും സര്‍ക്കാര്‍ നടത്തിയിട്ടുണ്ടെന്നും മന്ത്രി പറഞ്ഞു. എറണാകുളം ദര്‍ബാര്‍ ഹാള്‍ മൈതാനിയില്‍ നടന്ന ചടങ്ങില്‍ ടി.ജെ. വിനോദ് എംഎല്‍എ അധ്യക്ഷനായി. മന്ത്രി പി. രാജീവ് ഇടയ്ക്ക കൊട്ടി ആഘോഷ പരിപാടികള്‍ക്ക് തുടക്കംകുറിച്ചു. സ്‌കൂബ ഡൈവിംഗ് സെന്‍ററായ അക്വാലിയോയുടെ ഡയറക്ടര്‍ ജോസഫ് ഡെലീഷിനെയും വെള്ളത്തിനടിയില്‍ ദേശീയ പതാക ഉയര്‍ത്തി ഇന്‍റര്‍നാഷണല്‍ ബുക്ക് ഓഫ് റിക്കാർഡ്‌സില്‍ ഇടം നേടിയ ഭിന്നശേഷി യുവാവ് പി.എന്‍. റമീസിനെയും ചടങ്ങിൽ ആദരിച്ചു. ഹൈബി ഈഡന്‍ എംപി, എംഎല്‍എമാരായ കെ.ജെ. മാക്‌സി, കെ.എന്‍. ഉണ്ണികൃഷ്ണന്‍, ജില്ലാ കളക്ടര്‍ ജി. പ്രിയങ്ക, കൊച്ചി മേയര്‍ എം. അനില്‍കുമാര്‍, കൗണ്‍സിലര്‍ പത്മജ മേനോന്‍, ഡിടിപിസി സെക്രട്ടറി ലിജോ ജോസഫ്, ജില്ലാ ഇന്‍ഫര്‍മേഷന്‍ ഓഫീസര്‍ എന്‍.ബി. ബിജു തുടങ്ങിയവര്‍ പങ്കെടുത്തു.

അപകടക്കേസിലെ വാഹനം വിട്ടുനൽകുന്നതിന് സ്റ്റേഷനിൽവച്ച് കൈക്കൂലി വാങ്ങുന്നതിനിടെ ഗ്രേഡ് എസ്ഐ വിജിലൻസ് പിടിയിൽ

അപകടം ഡ്രൈവർക്ക് ഹൃദയാഘാതം ഉണ്ടായതിനെ തുടർന്ന് മരട്: അപകടക്കേസിലെ വാഹനം വിട്ടുനൽകുന്നതിന് 10,000 രൂപ കൈക്കൂലി വാങ്ങിയ ഗ്രേഡ് എസ്ഐ വിജിലൻസ് പിടിയിലായി. മരട് സ്റ്റേഷനിലെ ഗ്രേഡ് എസ്ഐയും കാഞ്ഞിരമറ്റം സ്വദേശിയുമായ കെ. ഗോപകുമാറി(56)നെയാണ് സ്റ്റേഷനിൽ വച്ച് കൈക്കൂലി വാങ്ങുന്നതിനിടെ വിജിലൻസ് അറസ്റ്റ് ചെയ്തത്. എറണാകുളം വിജിലൻസ് ഡിവൈഎസ്‌പിക്ക് ലഭിച്ച പരാതിയുടെ അടിസ്ഥാനത്തിലായിരുന്നു നടപടി. പള്ളിക്കര സ്വദേശി ഷിബു വർഗീസിന്‍റെ ഉടമസ്ഥതയിലുള്ള ഗ്യാസ് സിലിണ്ടർ ലോറി കഴിഞ്ഞ 25ന് വൈകുന്നേരം വൈറ്റില ഹബ്ബിന് സമീപം അപകടത്തിൽപ്പെട്ടിരുന്നു. ഡ്രൈവർക്ക് ഹൃദയാഘാതം സംഭവിച്ചതിനെ തുടർന്നായിരുന്നു അപകടം. ഇതേത്തുടർന്ന് ലോറി വൈദ്യുത പോസ്റ്റിലും, കാറിലും, ബൈക്കിലും, മതിലിലും ഇടിച്ചു. സംഭവത്തിൽ മരട് പോലീസ് കേസ് എടുക്കുകയും ലോറി പിടിച്ചെടുക്കുകയും ചെയ്തിരുന്നു. ഇതിനു പിന്നാലെ ഗ്രേഡ് എസ്ഐ ഗോപകുമാർ ലോറി ഉടമയായ ഷിബു വർഗീസിനെ ഫോണിൽ വിളിച്ച് കേസിൽപ്പെട്ട ലോറി വിട്ടുനൽകുന്നതിന് സ്റ്റേഷനിൽ ഹാജരാകാൻ ആവശ്യപ്പെട്ടു. നേരിൽ കണ്ടപ്പോൾ 10,000 രൂപ കൈക്കൂലി വേണമെന്ന് ആവശ്യപ്പെടുകയുമായിരുന്നു. പരാതിക്കാരന്‍ ബുദ്ധിമുട്ടുകളും ആശുപത്രിയില്‍ കഴിയുന്ന ഡ്രൈവറുടെ ചികിത്സയുടെ കാര്യവും പറഞ്ഞെങ്കിലും അത് കേള്‍ക്കാന്‍ ഗോപകുമാര്‍ തയാറായില്ല. ഏറ്റവും കുറഞ്ഞ തുകയാണ് താൻ ആവശ്യപ്പെട്ടതെന്നും തുക കുറയ്ക്കാൻ കഴിയില്ലെന്നുമായിരുന്നു ഗോപകുമാറിന്‍റെ മറുപടി. ഇതോടെ ലോറി ഉടമ വിജിലൻസിനെ സമീപിച്ചു. വിജിലന്‍സ് മേധാവിയുടെ നിര്‍ദേശാനുസരണം വിജിലന്‍സ് സംഘം കെണിയൊരുക്കുകയായിരുന്നു. ഇന്നലെ വൈകുന്നേരം നാലോടെ മരട് സ്റ്റേഷനില്‍ വച്ച് പരാതിക്കാരനില്‍ നിന്നു 10,000 രൂപ കൈക്കൂലി വാങ്ങവെ ഗോപകുമാറിനെ വിജിലന്‍സ് സംഘം കൈയോടെ പിടികൂടുകയായിരുന്നു. അറസ്റ്റ് രേഖപ്പെടുത്തിയ പ്രതിയെ മൂവാറ്റുപുഴ വിജിലൻസ് കോടതിയിൽ ഹാജരാക്കും.

ഭിന്നശേഷി കുട്ടികള്‍ക്കൊപ്പം ഓണം ആഘോഷമാക്കി ലുലു ജീവനക്കാര്‍

കൊച്ചി: ഭിന്നശേഷിക്കുട്ടികള്‍ക്കൊപ്പം ഓണം ആഘോഷിച്ച് കൊച്ചി ലുലുമാള്‍ ജീവനക്കാര്‍. കുട്ടികൾക്കായി ഓണപ്പാട്ടും ഓണക്കളികളുമൊക്കെ ഒരുക്കിയായിരുന്നു ആഘോഷം. മുപ്പതോളെ ഭിന്നശേഷി കുട്ടികളും അവരുടെ രക്ഷിതാക്കളും ആഘോഷത്തിന്‍റെ ഭാഗമായി. രാവിലെ പൂക്കളമത്സരത്തോടെയായിരുന്നു ആഘോഷങ്ങളുടെ ആരംഭം. സ്‌പോട്‌സ് കമന്‍റേറ്ററും മാധ്യമപ്രവര്‍ത്തകനുമായ ഷൈജു ദാമോദരനും ഭാര്യ ആശാ ഷൈജുവുമായിരുന്നു വിധികര്‍ത്താക്കൾ. ലുലുവിലെ വിവിധ ഡിവിഷനുകള്‍ ചേര്‍ന്നൊരുക്കിയ മാവേലി വേഷവും ശ്രദ്ധേയമായി. 13 മാവേലികളാണ് മത്സരത്തില്‍ പങ്കെടുത്തത്. ഉച്ചയോടെ പ്രത്യേക വാഹനത്തില്‍ മാളിലേക്ക് എത്തിയ ഭിന്നശേഷി കുട്ടികളെ ലുലു പ്രതിനിധികള്‍ സ്വീകരിച്ചു. കുട്ടികള്‍ക്കുള്ള ഓണക്കിറ്റ് ഷൈജു ദാമോദരനും ലുലു ഇന്ത്യ ഡയറക്ടര്‍ ഫഹാസ് അഷറഫും ചേര്‍ന്ന് കൈമാറി. പഴയിടം മോഹനന്‍റെ നേതൃത്വത്തിൽ തയ‌ാറാക്കിയ ഓണസദ്യയില്‍ കുട്ടികള്‍ക്കൊപ്പം ലുലു മാനേജ്‌മെന്‍റ് പ്രതിനിധികളും പങ്കുചേര്‍ന്നു. ലുലു ഇന്ത്യ എച്ച്ആര്‍ ഹെഡ് അനൂപ് മജീദ്, ലുലു ഇന്ത്യ പ്രോജക്ട് ഡയറക്ടര്‍ ബാബു വര്‍ഗീസ്, മീഡിയ ഹെഡ് എന്‍.ബി സ്വരാജ്, കൊച്ചി ലുലു റീജണല്‍ മാനേജര്‍ സുധീഷ് നായര്‍, ലുലു മാള്‍സ് ഇന്ത്യ ഡയറക്ടര്‍ ഷിബു ഫിലിപ്പ്, കൊച്ചി ലുലുമാള്‍ ജനറല്‍ മാനേജര്‍ വിഷ്ണു രഘുനാഥ് തുടങ്ങിയവര്‍ ആശംസകൾ അർപ്പിച്ചു. ഇന്നും നാളെയും ലുലു സ്‌റ്റോറുകള്‍ പുലർച്ചെ ഒന്നുവരെ പ്രവര്‍ത്തിക്കും കൊച്ചി: ഉത്രാടപ്പാച്ചിലൊഴിവാക്കി ഓണം ഷോപ്പിംഗ് വേഗത്തിലാക്കാന്‍ അവസരമൊരുക്കി കൊച്ചി ലുലു ഹൈപ്പര്‍ മാര്‍ക്കറ്റ്. ഇന്നും ഉത്രാടദിനമായ നാളെയും ഹൈപ്പര്‍ മാര്‍ക്കറ്റ്, ഫാഷന്‍ സ്‌റ്റോര്‍, കണക്ട്, സെലിബ്രേറ്റ് ഉള്‍പ്പെടയുള്ള ലുലു സ്‌റ്റോറുകള്‍ പുലർച്ചെ ഒന്നു വരെ തുറന്ന് പ്രവര്‍ത്തിക്കും. ഓണം കിറ്റ്, ഉപ്പേരി, പായസം മിക്‌സ്, അരി, മറ്റ് ഗ്രോസറി ഉത്പ്പന്നങ്ങള്‍ എന്നിവ വിലക്കുറവില്‍ ലുലു ഹൈപ്പര്‍മാര്‍ക്കറ്റില്‍ നിന്ന് വാങ്ങാം. ഇതിന് പുറമേ 20ലധികം പായസങ്ങളുമായി പായസമേളയും ലുലു ഹൈപ്പര്‍മാര്‍ക്കറ്റില്‍ തുടരുകയാണ്. ഓണസദ്യയ്ക്കുള്ള പ്രീ ബുക്കിംഗ് സംവിധാനവും ഒരുങ്ങി. +917306112600, +917306112599 എന്ന നമ്പര്‍ വഴിയും വാട്‌സ് ആപ് ചെയ്തും ഉത്രാടം ദിനമായ നാളെ ഉച്ചകഴിഞ്ഞ് മൂന്നുവരെ ഓണസദ്യ ബുക്ക് ചെയ്യാം. ലുലു ഹൈപ്പര്‍മാര്‍ക്കറ്റിലൊരുക്കിയ ടേക്ക് എവേ സംവിധാനം വഴി തിരുവോണം ദിനത്തില്‍ മാളിലേക്ക് എത്തി രാവിലെ പത്ത് മുതല്‍ 12 വരെ ഓര്‍ഡര്‍ ചെയ്ത സദ്യ വാങ്ങിക്കാവുന്നതാണ്. കൂടാതെ www.luluhypermarket.in എന്ന വെബ്‌സൈറ്റ് വഴിയും സദ്യ പ്രീ ബുക്കിംഗിന് അവസരമുണ്ട്.

അപൂര്‍വ ചിത്രകലാസൃഷ്ടി: ഓണവില്ല്

തിരുവനന്തപുരം പത്മനാഭസ്വാമി ക്ഷേത്രത്തില്‍ തിരുവോണ ദിവസം പുലര്‍ച്ചെ പത്മനാഭന് സമര്‍പ്പിക്കുന്ന അപൂര്‍വ ചിത്രകലാസൃഷ്ടിയാണ് ഓണവില്ല്. പുരാണകഥകള്‍ ആലേഖനം ചെയ്ത ഓണവില്ല് അഥവാ പള്ളിവില്ല് രൂപപ്പെടുത്തി ക്ഷേത്രത്തില്‍ സമര്‍പ്പിക്കാനുള്ള അവകാശം കരമന മേലാറന്നൂര്‍ വിളയില്‍ വീട് കുടുംബത്തിന് മാത്രമാണ്. ക്ഷേത്ര സ്ഥപതി സ്ഥാനീയരും ആസ്ഥാന വാസ്തു ശില്പികളുമായിരുന്നു ഈ കുടുംബക്കാര്‍. ഒരു പക്ഷെ, കേരളത്തിലെ ഏറ്റവും പഴക്കം ചെന്ന ക്ഷേത്ര ആചാരങ്ങളില്‍ ഒന്നാകാം ഓണവില്ല് സമര്‍പ്പണം. പത്മനാഭസ്വാമി ക്ഷേത്രത്തോളം പഴക്കമുണ്ട് ഈ ചടങ്ങിനെന്നാണ് കരുതുന്നത്. ഇടക്കാലത്ത് നിലച്ചുപോയ വില്ല് സമര്‍പ്പണം എ.ഡി. 1425ല്‍ വീര ഇരവിവര്‍മയുടെ ഭരണകാലത്ത് പുനരാരംഭിച്ചതായി മതിലകം രേഖകളില്‍ പരാമര്‍ശമുണ്ട്. പത്മനാഭസ്വാമിയുടെ വീരശയനവും ദശാവതാരങ്ങളും ശ്രീരാമപട്ടാഭിഷേകവും ശ്രീകൃഷ്ണലീലയും വിഘ്‌നേശ്വരനും ശാസ്താവും നിറയുന്നതാണ് ഓണവില്ലുകള്‍. ഓരോന്നും ഒരു ജോഡി വീതം ആകെ 12 വില്ലുകളാണ് (2009 മുതലാണ് വിഘ്‌നേശ്വരനെയും ശാസ്താവിനെയും ഉള്‍പ്പെടുത്തിയിട്ടുള്ളത്). വര്‍ഷത്തിലൊരിക്കല്‍ തിരുവോണനാളില്‍ നാടു കാണാനെത്തുന്ന മഹാബലിക്ക് ആത്മസായൂജ്യത്തിനായാണ് ഓണവില്ലില്‍ ഭഗവാന്‍റെ അവതാരങ്ങളും ചിത്രങ്ങളും വരച്ചുവയ്ക്കുന്നത്. കഠിനമായ വ്രതശുദ്ധിയോടെ, ആചാരങ്ങളോടെയാണ് ഓണവില്ല് ഓരോഘട്ടവും. ദേവഗണങ്ങള്‍ കടമ്പ്, മഹാഗണി എന്നീ വൃക്ഷങ്ങളുടെ തടിയിലാണു നിര്‍മാണം. ഓണവില്ലെന്ന പേരില്‍ പണ്ട് ഒരു വാദ്യവും ഉണ്ടായിരുന്നു.

മെഗാ മെഡിക്കൽ ക്യാമ്പ് സംഘടിപ്പിച്ചു

കോതമംഗലം: കുറുപ്പംപടി സെന്‍റ് പീറ്റർ ആൻഡ് പോൾസ് ഫൊറോന പള്ളിയിലെ ഇടവക അജപാലന സമിതിയുടെയും കെസിവൈഎമ്മിന്‍റെയും നേതൃത്വത്തിൽ കോതമംഗലം സെന്‍റ് ജോസഫ് ധർമഗിരി ആശുപത്രിയുടെ സഹകരണത്തോടെ മെഗാ മെഡിക്കൽ ക്യാമ്പ് സംഘടിപ്പിച്ചു. ഫൊറോനാ വികാരി ഫാ. ജെയിംസ് കക്കുഴിയിൽ ഉദ്ഘാടനം നിർവഹിച്ചു. ധർമ്മഗിരി ഹോസ്പിറ്റൽ അഡ്മിനിസ്ട്രേറ്റർ സിസ്റ്റർ ജോസ്മിൻ എംഎസ്ജെ, ഫാ. മാത്യു മുണ്ടക്കൽ, അജപാലന സമിതി പ്രസിഡന്‍റ് ഷൈജു ഇഞ്ചക്കൽ, കെസിവൈഎം യൂണിറ്റ് പ്രസിഡന്‍റ് അന്ന തോമസ് മാങ്കുഴ, പോൾ സേവ്യർ ആറ്റുപുറം, രാജു മാങ്കുഴ, ജോസ് നെടുമ്പുറം,ഡോ. എൻ റ്റി വർഗീസ്, പിആർഒ ജോർജുകുട്ടി എന്നിവർ പ്രസംഗിച്ചു. ക്യാമ്പിൽ പങ്കെടുത്തവർക്ക് സൗജന്യമായി മരുന്നുകളും വിതരണം ചെയ്തു. ധർമഗിരി ഹോസ്പിറ്റൽ ഫിനാൻസ് കോഡിനേറ്റർ നോയിസൺ ടി ജോസഫ്, ഡീക്കൻ ആൽബർട്ട് പീച്ചാട്ട് ഭാരവാഹികളായ അരുൺ പാറക്കൽ, മിനി ഡേവിസ്‌ മങ്ങാട്ടുമാങ്കുഴ, ആൽബി കാട്ടരു കുടി, ടീനാ സാജു, അലൻ തെക്കേ മാലിൽ, ആൽബർട്ട് വിൽസൺ കാളാം പറമ്പിൽ തോമസ് സന്തോഷ് എന്നിവർ നേതൃത്വം നൽകി.

നാടെങ്ങും ഓണാഘോഷം

അഗ്രികൾച്ചറൽ മാർക്കറ്റിംഗ് ആൻഡ് പ്രോസസിംഗ് സൊസൈറ്റി കൂത്താട്ടുകുളം: അഗ്രികൾച്ചറൽ മാർക്കറ്റിംഗ് ആൻഡ് പ്രോസസിംഗ് സൊസൈറ്റിയുടെ ഓണാഘോഷ പരിപാടികളുടെ ഭാഗമായി വിപണിയിലെത്തിയ കർഷകർക്ക് പായസ വിതരണം നടത്തി. അഗ്രികൾച്ചറൽ മാർക്കറ്റിംഗ് സൊസൈറ്റി പ്രസിഡന്‍റ് ജോയിക്കുട്ടി സി. ജോണിനു പായസം നൽകിക്കൊണ്ട് പരിപാടിയുടെ ഉദ്ഘാടനം നഗരസഭ ചെയർപേഴ്സൺ കലാ രാജു നിർവഹിച്ചു. നഗരസഭ വൈസ് ചെയർപേഴ്സൺ പി.ജി. സുനിൽകുമാർ അധ്യക്ഷത വഹിച്ചു. നഗരസഭ കൗൺസിലർമാരായ ബേബി കീരാന്തടം, ബോബിൻ വർഗീസ്, അഗ്രികൾച്ചറൽ മാർക്കറ്റിംഗ് സെക്രട്ടറി പോൾ മാത്യു, ഫാർമേഴ്സ് ബാങ്ക് പ്രസിഡന്‍റ് ജേക്കബ് രാജൻ തുടങ്ങിയവർ പങ്കെടുത്തു. എന്‍റെ നാട് ജനകീയ കൂട്ടായ്മ കോതമംഗലം: എന്‍റെ നാട് ജനകീയ കൂട്ടായ്മയിലെ സ്റ്റാഫംഗങ്ങളും വനിതാമിത്രയും സംയുക്തമായി ഓണാഘോഷം നടത്തി. ഹോളിഡേയ്‌സ് ക്ലബ്‌ ഓഡിറ്റോറിയത്തിൽ നടത്തിയ പരിപാടി എന്‍റെ നാട് ചെയർമാൻ ഷിബു തെക്കുംപുറം ഉദ്ഘാടനം ചെയ്തു. പ്രഫ. കെ.എം. കുര്യാക്കോസ് അധ്യക്ഷനായി. വിവിധ കലാകായിക മത്സരങ്ങളും ഓണസദ്യയും നടത്തി. ബിജി ഷിബു, സി.കെ. സത്യൻ, ജോഷി കുര്യാക്കോസ്, ജോഷി പൊട്ടക്കൽ, കെ.പി. കുര്യാക്കോസ്, ജോർജ് മാത്യു അമ്പാട്ട്, കെ.കെ. തങ്കപ്പൻ, സി.ജെ. എൽദോസ്, പി.എ. പാദുഷ എന്നിവർ പങ്കെടുത്തു. വൈഡബ്ല്യുസിഎ കോതമംഗലം: വൈഡബ്ല്യുസിഎ ഓണാഘോഷവും പുതിയ ഭാരവാഹികളുടെ സ്ഥാനാരോഹണവും നടത്തി. പ്രസിഡന്‍റ് ജെസിമോള്‍ ജോസ് അധ്യക്ഷത വഹിച്ചു. ഷാമി ചെറിയാന്‍, ഡോ. ഡെന്‍സിലി ജോസ്, ലിജി ഏലിയാസ്, ലത റെജി, ഡെയ്‌സി റോയ് എന്നിവര്‍ പ്രസംഗിച്ചു. പുതിയ ഭാരവാഹികളായി നിനു സജി (പ്രസിഡന്‍റ്), ലിജി ഏലിയാസ് (സെക്രട്ടറി), ഡോ. ഡെന്‍സിലി ജോസ് (ട്രഷറർ) എന്നിവര്‍ ചുമതലയേറ്റു. മർച്ചന്‍റ്സ് അസോ. കല്ലൂർക്കാട്: മർച്ചന്‍റ്സ് അസോസിയേഷന്‍റെ ആഭിമുഖ്യത്തിൽ ഓണാഘോഷം നടത്തി. ബ്ലോക്ക് പഞ്ചായത്ത് പ്രസിഡന്‍റ് കെ.ജി. രാധാകൃഷ്ണൻ ഉദ്ഘാടനം ചെയ്തു. യൂണിറ്റ് പ്രസിഡന്‍റ് ജോയി പെരുമ്പിള്ളിക്കുന്നേൽ അധ്യക്ഷത വഹിച്ചു. കല്ലൂർക്കാട് സർക്കിൾ ഇൻസ്പെക്ടർ ഉണ്ണികൃഷ്ണൻ മുഖ്യപ്രഭാഷണം നടത്തി. പഞ്ചായത്ത് പ്രസിഡന്‍റ് സുജിത്ത് ബേബി സമ്മാനദാനം നിർവഹിച്ചു.

കെസിവൈഎം നവീകരണ യാത്രയ്ക്ക് സ്വീകരണം

തൊടുപുഴ: യുവത്വത്തിന്‍റെ കണ്ണിലൂടെ കേരള സമൂഹത്തിന്‍റെ വികസനം എന്ന ആപ്തവാക്യവുമായി കെസിവൈഎം സംസ്ഥാന പ്രസിഡന്‍റ് എബിന്‍ കണിവയലില്‍ നയിക്കുന്ന കേരള നവീകരണ യാത്രയ്ക്ക് തൊടുപുഴ സെന്‍റ് സെബാസ്റ്റ്യന്‍സ് പള്ളിയില്‍ സ്വീകരണം നല്‍കി. സ്വീകരണ യോഗം തൊടുപുഴ ഫൊറോന അസിസ്റ്റന്‍റ് വികാരി ഫാ. ആന്‍ഡ്രൂസ് മൂലയില്‍ ഉദ്ഘാടനം ചെയ്തു. രൂപത പ്രസിഡന്‍റ് സാവിയോ തോട്ടുപുറം അധ്യക്ഷത വഹിച്ചു. സംസ്ഥാന ഡയറക്ടര്‍ ഫാ. ഡിറ്റോ, രൂപത ഡയറക്ടര്‍ ഫാ. സെബാസ്റ്റ്യന്‍ വള്ളോപ്പിള്ളില്‍എന്നിവര്‍ പ്രസംഗിച്ചു. സംസ്ഥാന വൈസ് പ്രസിഡന്‍റ് അനൂപ് പള്ളിയോട്, സംസ്ഥാന സെക്രട്ടറിമാരായ സനു സാജന്‍ പടിയറയില്‍, വിപിന്‍ ജോസഫ്, രൂപത അസിസ്റ്റന്‍റ് ഡയറക്ടര്‍ ഫാ. ആന്‍റണി വിളയപ്പിള്ളില്‍, രൂപത ആനിമേറ്റര്‍ സിസ്റ്റര്‍ റെറ്റി എഫ്സിസി, തൊടുപുഴ ഫൊറോന ഡയറക്ടര്‍ ഫാ. ജോര്‍ജ് പീച്ചാനിക്കുന്നേല്‍, രൂപത ജനറല്‍ സെക്രട്ടറി അനു മേക്കുഴിക്കാട്ട്, സംസ്ഥാന ജനറല്‍ സെക്രട്ടറി ജോബിന്‍ ജോസ് എന്നിവര്‍ നേതൃത്വം നല്‍കി.

കൂത്താട്ടുകുളത്തെ റോഡുകളുടെ ശോച്യാവസ്ഥ അടിയന്തരമായി പരിഹരിക്കണം: നഗരസഭ

കൂത്താട്ടുകുളം: നഗരസഭ പരിധിയിലെ റോഡുകളുടെ ശോച്യാവസ്ഥ അടിയന്തരമായി പരിഹരിക്കണമെന്ന് ആവശ്യപ്പെട്ടു നഗരസഭ ഭരണസമിതിയുടെ നേതൃത്വത്തിൽ പിഡബ്ല്യുഡി അധികൃതമായി കൂടിക്കാഴ്ച നടത്തി. നഗരസഭ ചെയർപേഴ്സൺ കലാ രാജു, വൈസ് ചെയർമാൻ പി.ജി.സുനിൽകുമാർ, കൗൺസിലർ ബോബൻ വർഗീസ് നേതൃത്വത്തിൽ കൂത്താട്ടുകുളം പിഡബ്ല്യുഡി അസിസ്റ്റന്‍റ് എൻജിനീയർ ടി. വിനീതുമായാണ് കൂടിക്കാഴ്ച നടത്തിയത്. കൂത്താട്ടുകുളം-പാലാ റോഡിൽ മംഗലത്ത് താഴത്ത് നിർമാണം പുരോഗമിക്കുന്ന കലുങ്കിന്‍റെ പണികൾ ധൃതഗതിയിൽ പൂർത്തിയാക്കണമെന്നും രാമപുരം കവല മുതൽ മംഗലത്തുതാഴം വരെ തകർന്നു കിടക്കുന്ന റോഡിന്‍റെയും മംഗലത്തുതാഴം മുതൽ അമ്പലക്കുളം വരെയുള്ള ഭാഗത്തെ റോഡിന്‍റെയും മെയിന്‍റനൻസ് വർക്കുകൾ അടിയന്തരമായി ചെയ്യണമെന്നും മാർക്കറ്റ് റോഡിലും നടപ്പുറം ബൈപ്പാസിന്‍റെ ആരംഭത്തിലും രൂപപ്പെട്ടിരിക്കുന്ന വലിയ കുഴികൾ അടക്കണമെന്നും ഭരണസമിതി ആവശ്യപ്പെട്ടു. മേഖലയിലെ പ്രധാന റോഡായ കൂത്താട്ടുകുളം പാലാ റോഡിൽ നിയന്ത്രണം ഏർപ്പെടുത്തിയതോടെ ടൗണിലും മറ്റ് സമാന്തര റോഡുകളിലും തിരക്ക് വർധിച്ചിരിക്കുകയാണ്. ഓണം എത്തിയതോടെ എം സി റോഡിലൂടെ എത്തുന്ന വാഹനങ്ങളുടെ തിരക്കും വർധിച്ചു. തകർന്ന റോഡുകളിലൂടെയുള്ള യാത്ര ദുഷ്കരമാവുകയും ടൗൺ പ്രദേശത്ത് പൊടി ശല്യം വർധിക്കുകയും ചെയ്തിരിക്കുകയാണ്. ഈ സാഹചര്യത്തിലാണ് ഭരണസമിതി പിഡബ്ല്യുഡി ഉദ്യോഗസ്ഥരുമായി കൂടിക്കാഴ്ച നടത്തിയത്. ഏറ്റവും അടുത്ത ദിവസം തന്നെ റോഡുകളുടെ മെയിന്‍റനൻസ് വർക്കുകൾ ആരംഭിക്കുമെന്നും ഇതിനാവശ്യമായി ടെൻഡർ നടപടികൾ പൂർത്തീകരിച്ചിട്ടുണ്ടെന്നും പിഡബ്ല്യുഡി അധികൃതർ അറിയിച്ചു.

ആശുപത്രിയില്‍ ഭക്ഷണം വിളന്പി വിവാഹ സന്തോഷം പങ്കുവച്ച് ഇരട്ട സഹോദരങ്ങള്‍

കോതമംഗലം: വിവാഹ സന്തോഷം പങ്കുവച്ച് താലൂക്ക് ആശുപത്രിയില്‍ ഭക്ഷണ വിതരണം നടത്തി ഇരട്ട സഹോദരങ്ങള്‍. വാരപ്പെട്ടി കണ്ണാപ്പിള്ളി ഹാരിസ്- റജീഫ ദമ്പതികളുടെ മക്കളായ അര്‍ഷകും ആദിലുമാണ് പുതുമണവാട്ടികള്‍ക്കൊപ്പമെത്തി കോതമംഗലം താലൂക്ക് ആശുപത്രിയില്‍ രോഗികള്‍ക്കും കൂട്ടിരിപ്പുകാര്‍ക്കും ഭക്ഷണം നല്‍കിയത്. ആശുപത്രിയിലെ ഹംഗര്‍ ഫ്രീ പദ്ധതിയില്‍ ഇവര്‍ ഭാഗമാകുകയായിരുന്നു. അര്‍ഷക് - സന, ആദില്‍ - ജിസ ദമ്പതികൾ കഴിഞ്ഞദിവസമാണ് വിവാഹിതരായത്. സന്നദ്ധ പ്രസ്ഥാനങ്ങളുടേയും വ്യക്തികളുടേയും സഹകരണത്തോടെ ആശുപത്രിയിലെ കിടപ്പുരോഗികള്‍ക്കും കൂട്ടിരിപ്പുകാര്‍ക്കും എല്ലാ ദിവസവും നാല് നേരം ഭക്ഷണം നല്‍കുന്നതാണ് ഹംഗര്‍ ഫ്രീ പദ്ധതി. ഈ പദ്ധതിയുമായി സഹകരിക്കുന്നതില്‍ മറ്റുള്ളവര്‍ക്ക് പ്രചോദനമാകുക എന്നതായിരുന്നു തങ്ങളുടെ ലക്ഷ്യമെന്ന് നവ ദമ്പതിമാർ പറഞ്ഞു.

ഓണ വിപണി സജീവമാകുമെന്ന പ്രതീക്ഷയിൽ വ്യാപാരികള്‍

മൂവാറ്റുപുഴ: നഗരത്തില്‍ ഗതാഗത നിയന്ത്രണങ്ങള്‍ക്ക് ഇളവുവരുത്തിയതോടെ ഓണ വിപണി സജീവമാകുമെന്ന പ്രതീക്ഷയോടെ വ്യാപാരികള്‍. തിരുവോണത്തിന് ദിവസങ്ങള്‍ മാത്രം ബാക്കി നില്‍ക്കേ വിപണി ഉണരാത്തത് വ്യാപാരികളില്‍ ആശങ്കപടര്‍ത്തിയിട്ടുണ്ട്. ഉയര്‍ന്ന വിപണി ലക്ഷ്യംവച്ച് മുഴുവന്‍ വ്യാപാര സ്ഥാപനങ്ങളിലും സാധനങ്ങള്‍ നേരത്തെ തന്നെ കരുതിയിരുന്നു. നഗരവികസനം മൂലം ഗതാഗത നിയന്ത്രണം ഏര്‍പ്പെടുത്തിയതോടെ വ്യാപാര മേഖല തകര്‍ന്നിരിക്കുകയായിരുന്നു. തിങ്കളാഴ്ച മുതലാണ് നിയന്ത്രണങ്ങള്‍ക്ക് ഇളവു വരുത്തി നഗരത്തില്‍ രണ്ട് വരിയായി വാഹനങ്ങള്‍ കടത്തി വിടുന്നത്. നിയന്ത്രണങ്ങളില്‍ ഇളവു വരുത്തിയെങ്കിലും ഇന്നലെയും ഗതാഗത കുരുക്ക് തുടരുന്ന കാഴ്ചയായിരുന്നു. ഇതോടെ മൂവാറ്റുപുഴയില്‍ ഗതാഗത നിയന്ത്രണത്തിനു കൂടുതല്‍ പോലീസ് എത്തിയിട്ടുണ്ട്. എആര്‍ ക്യാംപില്‍ നിന്നാണ് കൂടുതല്‍ പോലീസ് ഉദ്യോഗസ്ഥര്‍ എത്തിയിരിക്കുന്നത്. ഹോം ഗാര്‍ഡ്സ് ഉള്‍പ്പെടെ 48 ഉദ്യോഗസ്ഥരാണ് മൂവാറ്റുപുഴ നഗരത്തില്‍ ഗതാഗതം നിയന്ത്രിക്കാന്‍ നിലവിലുള്ളത്. മൂവാറ്റുപുഴ ട്രാഫിക് സ്റ്റേഷനില്‍ എസ്‌ഐ ഉള്‍പ്പെടെ 24 പോലീസുകാരാണുള്ളത്. 18 ഹോം ഗാര്‍ഡും ഉണ്ട്. ഇതിനു പുറമേയാണ് ആറ് പേരെക്കൂടി ക്യാമ്പില്‍നിന്ന് ഗതാഗത നിയന്ത്രണത്തിനായി നിയോഗിച്ചിരിക്കുന്നത്. ശക്തമായ മഴയെ തുടര്‍ന്നു നഗര വികസനം നിര്‍ത്തിവച്ച സാഹചര്യത്തില്‍ ഓണം ദിവസങ്ങളില്‍ ഗതാഗത നിയന്ത്രണത്തില്‍ ഇളവു വരുത്തിയിരിക്കുകയാണ്.

കല്ലൂർക്കാട് പഞ്ചായത്തിൽ ഓപ്പൺ ജിം

കല്ലൂർക്കാട്: കല്ലൂർക്കാട് പഞ്ചായത്തിൽ ജില്ലാ പഞ്ചായത്ത് സഹകരണത്തോടെയുള്ള ഓപ്പൺ ജിം പ്രവർത്തന സജ്ജമായി. അസിസ്റ്റന്‍റ് കളക്ടർ പാർവതി ഗോപകുമാർ ഉദ്ഘാടനം നിർവഹിച്ചു. ജില്ലാ പഞ്ചായത്തംഗം ഉല്ലാസ് തോമസ് അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് കെ.ജി. രാധാകൃഷ്ണൻ, പഞ്ചായത്ത് പ്രസിഡന്‍റ് സുജിത് ബേബി, തുടങ്ങിയവർ പ്രസംഗിച്ചു. പഞ്ചായത്തിലെ പതിമൂന്നാം വാർഡിൽ മണലിപ്പീടികയ്ക്ക് സമീപമാണ് ഓപ്പൺ ജിമ്മിന്‍റെ ഉപകരണങ്ങൾ സജീകരിച്ചിട്ടുള്ളത്.

ആള് മാറി പോലീസ് മർദനം; അന്വേഷണം ഇഴയുന്നു : പ്രതിഷേധിച്ച് കത്തോലിക്കാ കോൺഗ്രസ്

കോതമംഗലം: ബാറ്ററി മോഷണക്കുറ്റം ആരോപിച്ച് പെരിങ്ങഴ സ്വദേശി അമൽ ആന്‍റണിയെ കസ്റ്റഡിയിലെടുത്ത് ക്രൂരമായി മർദിച്ച മൂവാറ്റുപുഴ പോലീസിനെതിരെ അന്വേഷണം ഇഴയുന്നതിൽ പ്രതിഷേധം. മുഖ്യമന്ത്രി ഉൾപ്പെടെയുള്ളവർക്കും എസ്പിക്കും പരാതി നൽകിയിട്ടും അന്വേഷണം എങ്ങുമെത്താത്തതിൽ കത്തോലിക്കാ കോൺഗ്രസ് കോതമംഗലം രൂപത കമ്മിറ്റി പ്രതിഷേധിച്ചു. കുറ്റക്കാരായ പോലീസുകാർക്കെതിരെ കർശന നടപടി എടുക്കണമെന്നും, ക്രൂരമായ മർദനത്തിന് ഇരയായ അമലിന് മതിയായ നഷ്ടപരിഹാരം നൽകണമെന്നും കത്തോലിക്കാ കോൺഗ്രസ് ആവശ്യപ്പെട്ടു. മർദനമേറ്റതായുള്ള സാക്ഷിമൊഴികളും മെഡിക്കൽ റിപ്പോർട്ടുകളും എല്ലാം ഉണ്ടായിരിക്കെ, നടപടി വൈകുന്നത് അംഗീകരിക്കാനാവില്ല. കഠിനാധ്വാനം ചെയ്ത് കുടുംബം പുലർത്തിയിരുന്ന അമൽ ഇപ്പോഴും ചികിത്സയിലാണ്.കുറ്റക്കാർക്കെതിരെ കർശനനടപടിയും മതിയായ നഷ്ടപരിഹാരവും ഉടനെ ഉണ്ടായില്ലെങ്കിൽ സമരരംഗത്തിറങ്ങുമെന്ന് ഭാരവാഹികൾ മുന്നറിയിപ്പ് നൽകി. അമലിനെ വീട്ടിൽ സന്ദർശിച്ച കത്തോലിക്കാ കോൺഗ്രസ് രൂപത ഡയറക്ടർ ഫാ.മാനുവൽ പിച്ചളക്കാട്ട്, പ്രസിഡന്‍റ് സണ്ണി കടൂത്താഴെ, ജനറൽ സെക്രട്ടറി മത്തച്ചൻ കളപ്പുരക്കൽ എന്നിവരുടെ നേതൃത്വത്തിലുള്ള സംഘം എല്ലാവിധ പിന്തുണയും ഉറപ്പുനൽകി.

ലൈഫ് പദ്ധതി തരം മാറ്റം: അപേക്ഷ മാറ്റി നൽകണമെന്ന് മന്ത്രി

കളമശേരി: കളമശേരി നഗരസഭയുടെ ലൈഫ് ഭവന പദ്ധതിക്കായി കണ്ടെത്തിയ ഭൂമി തരം മാറ്റുന്നതിന് ഫോറം രണ്ടില്‍ അപേക്ഷ പുതുക്കി നല്‍കണമെന്ന് നഗരസഭയോട് വ്യവസായ മന്ത്രി പി.രാജീവ് നിര്‍ദേശിച്ചു. ഇതു സംബന്ധിച്ച് നിവേദനം നല്‍കാന്‍ നഗരസഭാ ചെയര്‍പേഴ്‌സന്‍ സീമാ കണ്ണന്‍ ഉള്‍പ്പെടെയുള്ള ഭരണ സമിതി അംഗങ്ങള്‍ മന്ത്രിയെ കണ്ടിരുന്നു. റവന്യു മന്ത്രി കെ. രാജനുമായി ചര്‍ച്ച നടത്തിയ ശേഷമാണ് അപേക്ഷയിലെ അപാകത പരിഹരിക്കാനുള്ള നിര്‍ദേശം മന്ത്രി പി. രാജീവ് നല്‍കിയത്. നിലവില്‍ നഗരസഭ നല്‍കിയ അപേക്ഷ പ്രകാരം ഭവന പദ്ധതിക്ക് വേണ്ടി തരം മാറ്റുന്നതിനുള്ള ഫീസിളവ് ലഭിക്കുമായിരുന്നില്ല. മെഡിക്കല്‍ കോളജിന് സമീപം ലൈഫ് ഭവന പദ്ധതിക്കായി നഗരസഭ കണ്ടെത്തിയ ഒന്നര ഏക്കര്‍ ഭൂമി തരംമാറ്റുന്നതിന് നേരത്തെ നല്‍കിയ അപേക്ഷയനുസരിച്ച് വാണിജ്യാവശ്യത്തിനുള്ള വിഭാഗത്തില്‍ പെടുത്തി ഒരു കോടി 28 ലക്ഷം രൂപ ഫീസടക്കേണ്ടി വരുമായിരുന്നു. 25 സെന്‍റിന് മുകളിലുള്ള ഭൂമിയുടെ തരംമാറ്റ അപേക്ഷകള്‍ക്ക് നിശ്ചയിച്ച ഫീസ് അടക്കാന്‍ നഗരസഭയോട് ആവശ്യപ്പെട്ടിരുന്നു. ഇതേത്തുടര്‍ന്നാണ് നഗരസഭ പുതിയ നിവേദനവുമായി മന്ത്രിയെ കണ്ടത്. കളമശേരി നഗരസഭ പ്രദേശത്ത് ലൈഫ് ഭവനപദ്ധതിക്ക് അപേക്ഷിച്ച 844 കുടുംബങ്ങളുണ്ട്. എച്ച്എംടി കോളനി പ്രദേശത്ത് നഗസഭയുടെ കൈവശമുള്ള ഭൂമിയിലാണ് പദ്ധതി നടപ്പാക്കാന്‍ ധാരണയായിട്ടുള്ളത്. ജൂലൈയിലാണ് നഗരസഭ അപേക്ഷ നല്‍കിയത്. ഇതനുസരിച്ച് അടക്കേണ്ട ഫീസ് ഇളവ് ചെയ്യണമെങ്കില്‍ പുതിയ അപേക്ഷ ഫോം രണ്ടില്‍ നല്‍കണം.

ഓണപ്പൂരമൊരുക്കി കളമശേരി കാർഷികോത്സവം കൊടിയിറങ്ങി

കളമശേരി: കളമശേരിയുടെ ഓണാവേശം വാനോളമുയർത്തിയ കാർഷികോത്സവത്തിന് മത്സരാവേശത്തോടെ കൊട്ടിക്കലാശം. സമാപന ദിവസമായ ഇന്നലെ കാർഷികോത്സവ വേദിയിൽ നടന്ന വടംവലി, പൂക്കള, പാചക മത്സരങ്ങൾ കാണികളുടെ ആവേശം ഇരട്ടിപ്പിച്ചു. വടം വലി മത്സരത്തിൽ കടുങ്ങല്ലൂർ പഞ്ചായത്തും പൂക്കള മത്സരത്തിൽ ഏലൂർ യുവ കലാകേന്ദ്രയും പാചക മത്സരത്തിൽ റെജി സണ്ണിയും ഒന്നാമതെത്തി. ഓണം ഘോഷയാത്രയും കാർഷികോത്സവ നഗറിൽ നടന്നു. ഉച്ചയ്ക്ക് നടന്ന ഓണസദ്യയിൽ നൂറുകണക്കിന് പേർ പങ്കാളികളായി. വിവിധ മത്സരങ്ങളിലെ വിജയികൾക്ക് മന്ത്രി പി.രാജീവ് സമ്മാനങ്ങൾ വിതരണം ചെയ്തു.

ചൂർണിക്കര എസ്എൻ പുരത്ത് മാലിന്യം നിക്ഷേപിക്കുന്നതായി പരാതി

ആലുവ: ചൂർണിക്കര പഞ്ചായത്ത് മൂന്നാം വാർഡ് എസ്എൻ പുരത്ത് മാലിന്യങ്ങൾ നിക്ഷേപിക്കുന്നതായി പരാതി. ഗാർഹിക മാലിന്യങ്ങളും പ്ലാസ്റ്റിക് മാലിന്യങ്ങളുമാണ് രാത്രിയുടെ മറവിലും പുലർച്ചെയും ഇവിടെ തള്ളുന്നത്. ഗാർഹിക മാലിന്യങ്ങൾ ചീഞ്ഞ് ദുർഗന്ധം പരത്തുന്നത് ഇതുവഴിയുള്ള യാത്ര ദുഷ്ക്കരമാക്കിയിരിക്കുകയാണ്. നിർമല ഹൈസ്കൂൾ, വിദ്യാധിരാജ വിദ്യഭവൻ എന്നിവിടങ്ങളിലെ വിദ്യാർഥികളടക്കം നൂറ് കണക്കിന് യാത്രക്കാരാണ് ഇതുവഴി യാത്ര ചെയ്യുന്നത്. തെരുവുനായകൾ മാലിന്യാവശിഷ്ടങ്ങൾ വലിച്ച് റോഡിന്‍റെ പല ഭാഗങ്ങളിലേക്കും ഇടുന്നതിനാൽ പകർച്ചവ്യാധികൾ പടർന്ന് പിടിക്കുമോയെന്ന ആശങ്കയും പൊതുജനങ്ങൾക്കുണ്ട്. ഗ്രാമപഞ്ചായത്ത് ആരോഗ്യ വിഭാഗത്തെ വിവരം അറിയിച്ചെങ്കിലും ഇതിനെതിരെ യാതൊരു നടപടിയും ഉണ്ടായിട്ടില്ല. ഈ വിവരം വാർഡംഗത്തിന്‍റെ ശ്രദ്ധയിൽപ്പെടുത്തിയിട്ടും ഒരു പരിഹാരവുമുണ്ടാവുന്നില്ലെന്നാണ് നാട്ടുകാർ പരാതിപ്പെടുന്നത്.

തൃപ്പൂണിത്തുറ പേട്ടയിലും "ഐ ലവ് കൊച്ചി' സെൽഫി പോയിന്‍റ്

തൃപ്പൂണിത്തുറ: തൃപ്പൂണിത്തുറ റോട്ടറി ക്ലബ് , പേട്ട ജംഗ്ഷനിൽ സ്ഥാപിച്ച "ഐ ലവ് കൊച്ചി' സെൽഫി പോയിന്‍റിന്‍റെ ഉദ്ഘാടനം കൊച്ചി മേയർ അഡ്വ. എം. അനിൽകുമാർ നിർവഹിച്ചു. ചടങ്ങിൽ ക്ലബ് പ്രസിഡന്‍റ് രാധാകൃഷ്ണൻ നായർ അധ്യക്ഷത വഹിച്ചു. റോട്ടറി ഡിസ്ട്രിക്ട് ഗവർണർ ഡോ.ജി.എൻ. രമേഷ്, മുൻ ഡിസ്ട്രിക്ട് ഗവർണർ രാജ്മോഹൻ നായർ, അസി. ഗവർണർ സിജോ തോമസ്, വാർഡ് കൗൺസിലർ ഡോ.ടി. കെ. ഷൈലജ, ദിലീപ് നാരായണൻ, സുജേഷ് സത്യൻ, അഡ്വ. ബിന്ദു മോഹൻ തുടങ്ങിയവർ പ്രസംഗിച്ചു.

വൈപ്പിൻ വിഷമദ്യദുരന്തം: അനുസ്മരണം നടത്തി

വൈപ്പിൻ : കെസിബിസി മദ്യ-ലഹരി വിരുദ്ധസമിതി വരാപ്പുഴ അതിരൂപതയുടെയും വൈപ്പിൻ ഫെറോനയുടെയും സംയുക്താഭിമുഖ്യത്തിൽ 43-ാമത് വൈപ്പിൻ വിഷമദ്യദുരന്ത അനുസ്മരണവും പ്രാർഥനാ ധർണയും നടത്തി. പുതുവൈപ്പിൽ നടന്ന അനുസ്മരണം കെസിബിസി മദ്യവിരുദ്ധ സമിതി സംസ്ഥാന ജനറൽ സെക്രട്ടറി ഫാ. ഷൈജു തോമസ് ചിറയിൽ ഉദ്ഘാടനം ചെയ്തു.അലക്സ് മുല്ലാപ്പറമ്പൻ അധ്യക്ഷത വഹിച്ചു. ഫാ. ജോസഫ് ഷെറിൻ ചെമ്മായത്ത് മുഖ്യപ്രഭാഷണം നടത്തി. ഫാ. ജിപ്സൺ തോമസ്, ജൂഡ് തദ്ദേവൂസ്, റാഫേൽ മുക്കത്ത്, ജസ്റ്റിൻ മാളിയേക്കൽ, ഡിക്സൺ റോഡ്രിഗ്സ്, ജോസഫ് ചുള്ളിക്കൽ, നിക്സൺ പുതുക്കട, ജിബിൻ എടവനക്കാട്, ജോസഫ് കാട്ടുപറമ്പിൽ എന്നിവർ ,സാംസൺ കളത്തിപ്പറമ്പിൽ എന്നിവർ പ്രസംഗിച്ചു.

തീരദേശഹൈവേ നിർമാണം പൂർത്തിയാക്കണം: കെസിവൈഎം

കൊച്ചി: തീരദേശ ജനതയുടെ ജീവിതത്തിനു വലിയ മാറ്റം സൃഷ്ടിക്കേണ്ട തീരദേശ ഹൈവേ പദ്ധതിയുടെ നിർമാണം അഞ്ചുവർഷം കഴിഞ്ഞിട്ടും ഇഴഞ്ഞുനീങ്ങുന്നത് പ്രതിഷേധാർഹമെന്ന് കെസിവൈഎം സംസ്ഥാന പ്രസിഡന്‍റ് എബിൻ കണിവയലിൽ. അനധികൃത കൈയേറ്റം ഒഴിപ്പിക്കലും സ്ഥലം ഏറ്റെടുക്കൽ നടപടികൾ പൂർത്തീകരിക്കാൻ സർക്കാരിന് കഴിയാത്തതും ഖേദകരമാണെന്നു എബിൻ കണിവയലിൽ ചൂണ്ടിക്കാട്ടി. കേരള നവീകരണ യാത്രയ്ക്ക് കൊച്ചി രൂപത ഫോർട്ട് കൊച്ചിയിൽ സ്വീകരണം നൽകി. രൂപത ചാൻസിലർ ഫാ. ജോണി സേവ്യർ ഉദ്ഘാടനം ചെയ്തു. രൂപത വൈസ് പ്രസിഡന്‍റ് ക്ലിന്‍റൺ ഫ്രാൻസിസ് അധ്യക്ഷത വഹിച്ചു. ജോഷി ഏലശേരി,ക്രിസ്റ്റി ചക്കാലക്കൽ,ഹെസ്‌ലിൻ ഇമ്മാനുവൽ എന്നിവർ പ്രസംഗിച്ചു. വരാപ്പുഴ അതിരൂപതയുടെ നേതൃത്വത്തിൽ എറണകുളം ഹൈക്കോർട്ട് ജംഗ്ഷനിൽ ഒരുക്കിയ സ്വീകരണം ആർച്ച് ബിഷപ് ഡോ. ജോസഫ് കളത്തിപ്പറമ്പിൽ ഉദ്ഘാടനം ചെയ്തു. അതിരൂപത പ്രസിഡന്‍റ് രാജീവ് പാട്രിക് അധ്യക്ഷത വഹിച്ചു. വികാരി ജനറൽ മോൺ. മാത്യു കല്ലിക്കൽ, മോൺ. ജെയിൻ മെന്‍റസ്, ജോർജ് നാനാട്ട്, ഫെർഡിൻ ഫ്രാൻസിസ്, ഡെന്നീസ് ജോർജ് , ജെയ്മോൻ തോട്ടുമുഖം എന്നിവർ പ്രസംഗിച്ചു. കോതമംഗലം രൂപത തൊടുപുഴ ടൗണിൽ നൽകിയ സ്വീകരണത്തിൽ രൂപത പ്രസിഡന്‍റ് സാവിയോ തട്ടുപുറം അധ്യക്ഷത വഹിച്ചു. ഡയറക്ടർ ഫാ.സെബാസ്റ്റ്യൻ വള്ളോപ്പള്ളി, ഫാ.ആൻഡ്രൂസ് മൂലയിൽ, അനൂപ് മേക്കുഴിക്കാട്ട് എന്നിവർ പ്രസംഗിച്ചു.

മാർ കുര്യാക്കോസ് ഭരണികുളങ്ങരയ്ക്ക് മാതൃഇടവകയുടെ സ്വീകരണം

നെടുമ്പാശേരി : ഫരീദബാദ് അതിരൂപതയുടെ മെട്രോപോളിറ്റൻ ആർച്ച്ബിഷപ്പായി സ്ഥാനാരോഹണം ലഭിച്ച മാർ കുര്യാക്കോസ് ഭരണികുളങ്ങരയ്ക്ക് മാതൃ ഇടവക ആയ കരിപ്പാശേരി സെന്‍റ് അഗസ്റ്റിൻസ് പള്ളിയിൽ സ്വീകരണം നൽകി. വികാരി ഫാ.ജോർജ് മാണിക്യത്താൻ, ട്രസ്റ്റിമാരായ കെ.എ.ജോസ്, കെ.ജെ.ജോൺസൺ, വൈസ് ചെയർമാൻ നൈജോ ഏബ്രഹാം, ഹെഡ്മാസ്റ്റർ ബി.എ.ബാബു, മദർ സുപ്പീരിയർ സിസ്റ്റർ മരിയ ജോസഫ് എന്നിവർ പ്രസംഗിച്ചു.

മേരിമാതാ കപ്പേള രജതജൂബിലിയും തിരുനാളും

നെടുമ്പാശേരി: കുറ്റിപ്പുഴ ഇടവകയുടെ വടക്കേ അടുവാശേരി മേരിമാതാ കപ്പേള രജത ജൂബിലിക്കും പരിശുദ്ധ കന്യകാമറിയത്തിന്‍റെ ജനന തിരുനാളിനും തുടക്കംകുറിച്ച് മൂഴിക്കുളം ഫൊറോന വികാരി ഫാ. സേവ്യര്‍ തേലക്കാട്ട് കൊടികയറ്റി. വികാരി ഫാ. തോമസ് മഴുവഞ്ചേരി, സഹ വികാരി ഫാ.അതുല്‍ മാളിയേക്കല്‍, ഫാ.പോള്‍ വട്ടത്തറ എന്നിവര്‍ സംബന്ധിച്ചു. തിരുനാള്‍ ആഘോഷങ്ങളുടെ ഭാഗമായി ഏഴു വരെ ദിവസവും വൈകുന്നേരം 5.40 മുതല്‍ ജപമാല,കുര്‍ബാന, നൊവേന എന്നിവ ഉണ്ടായിരിക്കും. തിരുനാള്‍ ദിനമായ എട്ടിന് വൈകുന്നേരം 5.30 ന് കുര്‍ബാന, തുടര്‍ന്ന് പ്രദക്ഷിണം.

സ്‌കൂള്‍ പാചകത്തൊഴിലാളികള്‍ പ്രതിഷേധ സംഗമം നടത്തി

കൊച്ചി: സ്‌കൂള്‍ പാചകത്തൊഴിലാളികളുടെ കൂലിവര്‍ധനവും വിതരണവും മന്ത്രിതല ചര്‍ച്ചകളിലെ തീരുമാനങ്ങളും അട്ടിമറിച്ച സംസ്ഥാന സര്‍ക്കാരിന്‍റെ നടപടികളില്‍ പ്രതിഷേധിച്ച് എറണാകുളം ജില്ലയിലെ സ്‌കൂള്‍ പാചകത്തൊഴിലാളികള്‍ അങ്കമാലി ഉപജില്ല ഓഫീസില്‍ മുമ്പില്‍ പ്രതിഷേധ സംഗമം നടത്തി. സ്‌കൂള്‍ പാചകത്തൊഴിലാളി യൂണിയന്‍ (എഐടിയുസി) സംസ്ഥാന ജനറല്‍ സെക്രട്ടറി പി.ജി. മോഹനന്‍ പ്രതിഷേധ സംഗമം ഉദ്ഘാടനം ചെയ്തു. തൊഴിലാളികളുടെ ഓഗസ്റ്റ് മാസത്തെ ശബളം ഓണത്തിനു മുമ്പ് വിതരണം ചെയ്യണമെന്ന് അദ്ദേഹം ആവശ്യപ്പെട്ടു. അമ്പിളി അജയന്‍ അധ്യക്ഷത വഹിച്ചു. യൂണിയന്‍ ജില്ലാ സെക്രട്ടറി അനിത അപ്പുക്കുട്ടന്‍, സിപിഐ മണ്ഡലം സെക്രട്ടറി എം. മുകേഷ്, ലോക്കല്‍ സെക്രട്ടറി കിഷോര്‍, യൂണിയന്‍ പ്രസിഡന്‍റ് സീലിയ വിന്നി തുടങ്ങിയവര്‍ പ്രസംഗിച്ചു. പ്രതിഷേധസംഗമത്തിന് മുന്നോടിയായി പാചകത്തൊഴിലാളികള്‍ കറുത്ത വസ്ത്രങ്ങളും കറുത്തതൊപ്പിയും ധരിച്ച് നഗരത്തില്‍ പ്രതിഷേധറാലിയും നടത്തി. ബിന്ദു രാജന്‍, ലിജോമോള്‍, പത്മിനി സജീവന്‍, ജിജിജോയ്, ഷിജി സന്തോഷ് തുടങ്ങിയവര്‍ സമരത്തിന് നേതൃത്വം നല്‍കി.

മാലിന്യ സംസ്‌കരണ കേന്ദ്രത്തില്‍ ഓണസദ്യ വിളമ്പി ഹീല്‍ പൊന്നുരുന്നി

കൊച്ചി: മാലിന്യ സംസ്‌കരണ പ്ലാന്‍റില്‍ ഓണക്കളികളും ഓണസദ്യയുമായി ഒരു ഓണാഘോഷം. പൊന്നുരുന്നി ബൈപ്പാസിലെ ഹീല്‍ പൊന്നിരുന്നിയുടെ ജൈവമാലിന്യ സംസ്‌കരണ കേന്ദ്രത്തിലാണ് വേറിട്ട ഓണാഘോഷം നടന്നത്. പുഴുവും മണവുമില്ലാത്ത ശുചിയായി സൂക്ഷിക്കുന്ന സംസ്‌കരണ കേന്ദ്രത്തില്‍ ഇത് രണ്ടാം തവണയാണ് ഓണസദ്യവിളമ്പുന്നതെന്ന് കൗണ്‍സിലര്‍ ദിപിന്‍ ദിലീപ് പറഞ്ഞു. ഹെല്‍ത്ത് ഇന്‍സ്‌പെക്ടര്‍മാരായ കൃഷ്ണകുമാര്‍, ശ്യാം ലാല്‍, ഹീല്‍ പൊന്നിരുന്നി എക്‌സിക്യൂട്ടീവ് ഡയറക്ടര്‍ പി.കെ. ദിലീപ് കുമാര്‍, ഫിനാന്‍സ് ഡയറക്ടര്‍ പി.പി. മുരുകേഷ്, ഹരിതകര്‍മസേന പ്രവര്‍ത്തകര്‍ എന്നിവര്‍ പങ്കാളികളായി. സംസ്ഥാന സര്‍ക്കാര്‍ പ്രഖ്യാപിച്ച ഓണം അലവന്‍സ് കൂടാതെ ഹരിത കര്‍മ സേനാംഗങ്ങള്‍ക്ക് ഹീല്‍ പൊന്നിരുന്നി സൊസൈറ്റി 2,000 രൂപ അലവന്‍സ് നല്‍കി.

എസ്പി ഓഫീസിൽനിന്ന് മോശം സംസാരം : റിപ്പോർട്ട് ഇന്ന് കൈമാറും; രണ്ടു പേർക്കെതിരെ നടപടിക്ക് സാധ്യത

ആലുവ: റൂറൽ ജില്ലാ പോലീസ് മേധാവിയുടെ ഓഫീസിലേക്ക് റിഫ്ളക്ടർ ജാക്കറ്റ് ലഭിക്കാനായി വിളിച്ച പോലീസുകാരനോട് അപമര്യാദയായി സംസാരിച്ചത് എസ്പിയുടെ റൈറ്ററായി ജോലി ചെയ്യുന്ന ഗ്രേഡ് എസ്ഐ ആണെന്ന് സ്പെഷൽ ബ്രാഞ്ച് പോലീസ് കണ്ടെത്തിയതായി സൂചന. സോഷ്യൽ മീഡിയയിൽ വ്യാപകമായി പ്രചരിച്ച സംഭവത്തിൽ സ്പെഷൽ ബ്രാഞ്ച് ഡിവൈഎസ്പി ബിജോയി ചന്ദ്രനെയാണ് എസ്പി അന്വേഷണത്തിന് ചുമതലപ്പെടുത്തിയിരിക്കുന്നത്. ഇന്ന് റിപ്പോർട്ട് സമർപ്പിക്കും. ഫോൺ സംഭാഷണം റിക്കോർഡ് ചെയ്ത് പുറത്തുവിട്ടതിലും മോശമായി സംസാരിച്ചതിലും രണ്ട് പേർക്കുമെതിരെ നടപടിയുണ്ടാകും. കളമശേരി എആർ ക്യാമ്പിലെ പോലീസുകാരനായ വിശാഖാണ് രാത്രി ജോലിക്ക്‌ ട്രാഫിക് ജാക്കറ്റിനായി പെരുമ്പാവൂരിൽ നിന്ന് എസ്പി ഓഫീസിലേക്ക് വിളിച്ചത്. ഫോൺ എടുത്തത് നിഷാദ് എന്ന സീനിയർ സിവിൽ പോലീസ് ഉദ്യോഗസ്ഥനാണെങ്കിലും സമീപമുണ്ടായിരുന്ന ഗ്രേഡ് എസ്ഐ അസഭ്യപ്രയോഗം നടത്തിയതാണ് വിവാദമായത്. ഓണത്തിരക്കിന്‍റെ ഭാഗമായി എല്ലാ നഗരങ്ങളിലേക്കും ഗതാഗതനിയന്ത്രണത്തിനായി കളമശേരി ക്യാമ്പിൽ നിന്നും താത്കാലിക ഡ്യൂട്ടിക്കെത്തിയ വിശാഖ് അടങ്ങുന്ന മൂന്നംഗ സംഘത്തിലെ രണ്ടുപേർക്ക് മാത്രമാണ് രാത്രി ഡ്യൂട്ടിക്ക് ജാക്കറ്റ് ലഭിച്ചത്. ഇതേതുടർന്നാണ് വിശാഖ് എസ്പി ഓഫീസിലേക്ക് വിളിച്ചത്. ജാക്കറ്റ് ആവശ്യപ്പെട്ടപ്പോൾ ജാക്കറ്റ് എസ്പി കൊണ്ടുവന്നു തരണോ, അത് പെരുമ്പാവൂർ ട്രാഫിക് സ്റ്റേഷനിലാണ് ചോദിക്കേണ്ടതെന്ന് കോൾ അറ്റൻഡ് ചെയ്ത നിഷാദ് മറുപടി നൽകി. ഞങ്ങളുടെ അഥോറിട്ടി എസ്പിയാണല്ലോ, അതിനാലാണ് ഇങ്ങോട്ടു വിളിച്ചതെന്ന് വിശാഖ് പറയുന്നതിനിടെയാണ് നിഷാദിന്‍റെ സമീപത്തുണ്ടായിരുന്ന ഉദ്യോഗസ്ഥന്‍റെ ഉച്ചത്തിലുള്ള അസഭ്യവർഷം വിശാഖ് കേൾക്കാൻ ഇടയായത്.

ഏഴു വയസുകാരി ഓസ്‌ട്രേലിയയില്‍ മരിച്ചു

അങ്കമാലി: തലച്ചോറിലുണ്ടായ അസുഖത്തെ തുടര്‍ന്ന് നാലു മാസത്തോളമായി ചികിത്സയിലായിരുന്ന മലയാളി ബാലിക ഓസ്‌ട്രേലിയയില്‍ മരിച്ചു. ഓസ്‌ട്രേലിയയില്‍ കുടുംബസമ്മേതം കഴിയുന്ന അങ്കമാലി സ്വദേശി കുന്നപ്പിള്ളി ജോബിയുടെ മകള്‍ എലൈന്‍ മരിയ (7) ആണ് മരിച്ചത്. സംസ്‌കാരം പിന്നീട്. കോന്നി പുത്തന്‍പുരയ്ക്കല്‍ ജോണ്‍ മകള്‍ ലിന്‍റ മറിയമാണ് മാതാവ്. ഓസ്ട്രേലിയ അഡലൈഡ് സ്‌കൂള്‍ വിദ്യാര്‍ഥി ജുവാന്‍ ജോബി ജ്യേഷ്ഠ സഹോദരനാണ്. ഇതേ വിദ്യാലയത്തിലെ ഒന്നാം ക്ലാസുകാരിയാണ് എലൈന്‍ മരിയ.

ലോറി തട്ടി റെയിൽവേ ഗേറ്റ് തകരാറിലായി; ഗതാഗതം തടസപ്പെട്ടത് എട്ടര മണിക്കൂർ

നെടുമ്പാശേരി: മിനിലോറി തട്ടി റെയിൽവേ ഗേറ്റ് തകരാറിലായതിനെ തുടർന്ന് പുറയാറിൽ എട്ടര മണിക്കൂറോളം ഗതാഗതം തടസപ്പെട്ടു. ഇന്നലെ രാവിലെ 6.45 മുതൽ ഉച്ചകഴിഞ്ഞ് 3.15 വരെയാണ് ഗതാഗതം പൂർണമായി തടസപ്പെട്ടത്. ദേശത്ത് നിന്ന് കാലടി ഭാഗത്തേക്ക് ചരക്കുമായി പോയ മിനിലോറിയാണ് റെയിൽവേ ഗേറ്റിൽ തട്ടിയത്. മിനി ലോറി കടന്നുവരുമ്പോൾ ഹൈഡ്രോളിക് സിസ്റ്റത്തിൽ പ്രവർത്തിക്കുന്ന ഗേറ്റ് മുകളിൽ നിന്ന് താഴേക്ക് വന്ന് അടയുകയായിരുന്നു. വാഹനം മുന്നോട്ട് പോയപ്പോൾ ക്രോസ് ബാർ ലോറിയുടെ കാബിനേക്കാൾ ഉയരത്തിലായിരുന്ന ചരക്കിൽ ഗേറ്റ് തട്ടി. ഇതോടെ ഗേറ്റിന്‍റെ കേബിൾ സംവിധാനം പൊട്ടി പ്രവർത്തന രഹിതമായി. ആലുവയിൽ നിന്ന് എൻജിനീയറിംഗ് വിഭാഗം ഉദ്യോഗസ്ഥരെത്തി ഉച്ചകഴിഞ്ഞ് 3.15ഓടെയാണ് തകരാർ പരിഹരിച്ചത്. മിനിലോറി ഡ്രൈവർക്കെതിരെ റെയിൽവേ കേസ് എടുത്തു.

ഹരിത ഓണം പ്രചാരണ യാത്രയ്ക്ക് തുടക്കം

കൊച്ചി: പൊതുജനങ്ങളില്‍ ഹരിതചട്ടം പാലിച്ചുള്ള ഓണാഘോഷത്തിന്‍റെ അവബോധം സൃഷ്ടിക്കുന്നതിന് ജില്ലാ ശുചിത്വ മിഷന്‍റെ നേതൃത്വത്തില്‍ മാവേലി പര്യടനം ആരംഭിച്ചു. പ്രചാരണ യാത്ര ജില്ലാ കളക്ടര്‍ ജി. പ്രിയങ്ക ഫ്‌ളാഗ് ഓഫ് ചെയ്തു. ഹരിതചട്ടം പാലിച്ച് പരിപാടികള്‍ നടത്തുന്നതിന് അവബോധം സൃഷ്ടിക്കുക, ഓണക്കാലത്ത് നിരോധിത പ്ലാസ്റ്റിക് ഉത്പന്നങ്ങള്‍, പേപ്പര്‍ പ്ലേറ്റ്, പേപ്പര്‍ ഗ്ലാസ് തുടങ്ങിയവ ഒഴിവാക്കി പ്രകൃതി സൗഹൃദ ഉത്പന്നങ്ങള്‍ ഉപയോഗിക്കുക എന്നീ ലക്ഷ്യങ്ങളോടെയാണ് പരിപാടി സംഘടിപ്പിക്കുന്നത്. മാവേലി വൃത്തിയുടെ ചക്രവര്‍ത്തി, ഈ ഓണം ഹരിത ഓണം എന്ന സന്ദേശവുമുയര്‍ത്തി ശുചിത്വ മിഷന്‍ സംസ്ഥാന വ്യാപകമായി നടത്തുന്ന ഹരിത ഓണം പ്രചാരണ യാത്രയുടെ ഭാഗമായാണ് കാക്കനാട് സിവില്‍ സ്റ്റേഷനില്‍ നിന്ന് പര്യടനം ആരംഭിച്ചത്. ജില്ലയുടെ പ്രധാന കേന്ദ്രങ്ങളില്‍ പ്രചാരണ വാഹനം സന്ദര്‍ശിക്കുകയും വിവിധ പരിപാടികള്‍ അവതരിപ്പിക്കുകയും ചെയ്യും. ചടങ്ങില്‍ ശുചിത്വ മിഷന്‍ ഉദ്യോഗസ്ഥരും പ്രതിനിധികളും പങ്കെടുത്തു.

തിരുവാതിര സംഘത്തിൽ ജില്ലാ പോലീസ് മേധാവിയും

ആലുവ: തിരുവാതിരപ്പാട്ടിന്‍റെ ഈണത്തിൽ ജില്ലാ പോലീസ് മേധാവി എം. ഹേമലതയും ചുവടുവച്ചു. റൂറൽ ജില്ലാ പോലീസ് ആസ്ഥാനത്ത് നടന്ന ഓണാഘോഷ പരിപാടിയിലാണ് എസ്പിയുടെ നേതൃത്വത്തിൽ തിരുവാതിര അരങ്ങേറിയത്. ഭർത്താവ് പി. കാർത്തിക് തിരുവാതിര കാണാനെത്തിയിരുന്നു. ജില്ലാ പോലീസ് ആസ്ഥാനത്തെ ഭരണവിഭാഗം വനിതാ വിഭാഗം ജീവനക്കാർക്ക് ഒപ്പമാണ് എസ്പി ചുവടുവച്ചത്. പത്ത് പേരാണ് അരങ്ങിലെത്തിയത്. തമിഴ്നാട് ഈറോഡ് സ്വദേശിയായ ഹേമലത ഏപ്രിലിൽ ആണ് ജില്ലാ പോലീസ് മേധാവിയായി ചുമതലേയറ്റത്.

ഓണ്‍ലൈന്‍ നിക്ഷേപ തട്ടിപ്പ് : കൊച്ചി സ്വദേശിക്ക് നഷ്ടമായത് 24.76 കോടി

കൊച്ചി: കൊച്ചി സ്വദേശിയായ ഫാര്‍മസ്യൂട്ടിക്കല്‍ കമ്പനിയുടമയ്ക്ക് ഓണ്‍ലൈന്‍ നിക്ഷേപ തട്ടിപ്പിലൂടെ 24.76 കോടി രൂപ നഷ്ടമായെന്ന് പരാതി. സംഭവത്തില്‍ കൊച്ചി സൈബര്‍ പോലീസ് കേസെടുത്ത് അന്വേഷണം ആരംഭിച്ചു. എളംകുളം സ്വദേശി ഇ. നിമേഷാണ് തട്ടിപ്പിനിരയായത്. 2023 മുതല്‍ 2025 വരെയുള്ള കാലയളവില്‍ വിവിധ ഘട്ടങ്ങളായിട്ടായിരുന്നു തട്ടിപ്പ്. രാജ്യത്ത് ഇതുവരെ രജിസ്റ്റര്‍ ചെയ്ത ഏറ്റവും വലിയ ട്രേഡിംഗ് തട്ടിപ്പുകളിലൊന്നാണിത്. ഓഹരി വിപണിയില്‍ സജീവമായി ഇടപെടുന്ന വ്യവസായിയെയാണ് സൈബര്‍ തട്ടിപ്പ് സംഘം വലിയ ലാഭം വാഗ്ദാനം ചെയ്ത് കുടുക്കിയത്. 2023 മാര്‍ച്ച് മുതല്‍ കഴിഞ്ഞ മാസം 29 വരെയുള്ള കാലയളവില്‍ പരാതിക്കാരനില്‍നിന്ന് തട്ടിപ്പ് സംഘം 24,76,21,042 രൂപയാണ് തട്ടിയെടുത്തത്. ടെലഗ്രാം വഴി ബന്ധപ്പെട്ട പ്രതികള്‍ വിപണി മൂല്യമുള്ള കമ്പനികളുടെ ഓഹരി ചെറിയ തുകയ്ക്ക് വാങ്ങിനല്‍കാമെന്നും വന്‍തുക ലാഭമായി ലഭിക്കുമെന്നും പറഞ്ഞിരുന്നു. ആദ്യഘട്ടത്തില്‍ രണ്ടു കോടി നിക്ഷിപിച്ചപ്പോള്‍ നാലു കോടിയോളം രൂപ ലാഭമായി ലഭിച്ചതായും സംഘം വിശ്വസിപ്പിച്ചു. ഇതോടെയാണ് തട്ടിപ്പ് സംഘത്തിന്‍റെ നിര്‍ദേശ പ്രകാരം വിവിധ അക്കൗണ്ടുകളിലേക്ക് പണം അയച്ചു നല്‍കിയത്. ഓരോ തവണ നിക്ഷേപിക്കുമ്പോഴും ഇരട്ടി തുകയാണ് അക്കൗണ്ടില്‍ ലാഭമായി കാണിച്ചിരുന്നു. എന്നാല്‍ നിക്ഷേപം പിന്‍വലിക്കാന്‍ ശ്രമിച്ചപ്പോഴാണ് വ്യാജ ആപ്പാണെന്നു മനസിലായത്.

ഓണം വരവറിയിച്ചെത്തുന്ന ഓണപ്പൊട്ടന്‍

കോഴിക്കോട്, കണ്ണൂര്‍ ജില്ലകളിലെ ഉള്‍നാടന്‍ പ്രദേശങ്ങളില്‍ ഉത്രാടം, തിരുവോണം നാളുകളില്‍ വീടുകളിലെത്തുന്ന തെയ്യമാണ് ഓണേശ്വരന്‍ എന്ന് വിളിപ്പേരുള്ള ഓണപ്പൊട്ടന്‍. ഓണത്തിന്‍റെ വരവറിയിച്ചാണ് ഓണപ്പൊട്ടന്‍ എത്തുന്നത്. മഹാബലിയുടെ പ്രതിരൂപമാണ് ഓണപ്പൊട്ടനെന്നും വിശ്വാസമുണ്ട്. 41 ദിവസത്തെ ചിട്ടയായ വ്രതത്തിനു ശേഷം ഉത്രാടം നാളില്‍ പുലര്‍ച്ചെ കുളിച്ച്, പിതൃക്കള്‍ക്ക് കലശം സമര്‍പ്പിച്ച് പൂജ നടത്തിയാണ് വേഷം കെട്ടുക. രാവിലെ ആറു മുതല്‍ അനുഗ്രഹം നല്‍കി ഐശ്വര്യ പ്രാര്‍ഥനകളുമായി ഓണപ്പൊട്ടന്‍ വീടുവീടാന്തരം കയറിയിറങ്ങും. പരമാവധി വീടുകളിലെത്താനായി ഒരിടത്തും നില്‍ക്കാതെ ഗ്രാമീണ വഴികളിലൂടെ വേഗത്തിലുള്ള നടപ്പാണ് ഓണപ്പൊട്ടന്‍റേത്. ഓണപ്പൊട്ടന്‍ ഒരിക്കലും കാല്‍ നിലത്ത് ഉറപ്പിക്കാതെ താളം ചവിട്ടുകയും ഓടുകയും ചെയ്യും. മണികിലുക്കിയാണ് വരവ്. വാ തുറന്ന് ഒന്നും ഉരിയാടാത്തതുകൊണ്ടാണ് ഓണപ്പൊട്ടന്‍ എന്ന വിളിപ്പേര് ഉണ്ടായത്. വൈകുന്നേരം ഏഴിന് സ്വന്തം വീട്ടില്‍ തിരിച്ചെത്തും വരെ ആരോടും മിണ്ടാന്‍ പാടില്ലെന്നാണ് ചിട്ട. ഓണപ്പൊട്ടന്‍റെ വേഷവും മനോഹരമാണ്. മനയോലയും ചായില്യവും ചേര്‍ത്ത മുഖത്തെഴുത്ത്. ചൂഡകവും ഹസ്തകടവും ചേര്‍ന്ന ആടകള്‍. തെച്ചിപ്പൂവിനാല്‍ അലങ്കരിച്ച പൊക്കമുള്ള കിരീടം. ചിത്രത്തുന്നലുള്ള ചുവന്ന പട്ടും ഉടുക്കും. തോളില്‍ സഞ്ചിയും കൈയില്‍ ചെറിയ ഓലക്കുടയും ഉണ്ടാകും. ഒറ്റനോട്ടത്തില്‍ ഓണപ്പൊട്ടനെ വ്യത്യസ്തനാക്കുന്നത് താടിയാണ്. കമുകിന്‍ പൂക്കുല കൊണ്ടുള്ള നീണ്ട വെള്ളത്താടി ഓണപ്പൊട്ടന്‍ ചുണ്ടിന് മുകളിലാണ് കെട്ടുക. അതുകൊണ്ട് മൗനിയായ ഓണപ്പൊട്ടന്‍ ചുണ്ടനക്കിയാലും ആരും കാണില്ല. അരിയും ഓണക്കോടിയും ദക്ഷിണയും വീട്ടുകാര്‍ നല്കാറുണ്ട്. ചിലര്‍ ഭക്ഷണവും നല്കും. അരി നിറച്ച നാഴിയില്‍ നിന്ന് അല്പം അരിയെടുത്ത് പൂവും ചേര്‍ത്ത് ചൊരിഞ്ഞാണ് ഓണപ്പൊട്ടന്‍ അനുഗ്രഹം നല്കുന്നത്. ഉടൻ അടുത്ത വീട്ടിലേക്കും നീങ്ങും.

ഡ്യൂട്ടിക്ക് ജാക്കറ്റ് ചോദിച്ച പോലീസുകാരന് അസഭ്യവര്‍ഷം; അന്വേഷണം പ്രഖ്യാപിച്ചു

കൊച്ചി: ട്രാഫിക് ഡ്യൂട്ടിയില്‍ നില്‍ക്കാന്‍ റിഫ്ലക്ടര്‍ ജാക്കറ്റ് ആവശ്യപ്പെട്ട് എസ്‌പിയുടെ ക്യാമ്പ് ഓഫീസിലേക്ക് വിളിച്ച പോലീസുകാരന് നേരെ അസഭ്യവര്‍ഷം. പോലീസുകാര്‍ തമ്മിലുള്ള ഫോണ്‍ സംഭാഷണം പുറത്തായതോടെ സംഭവത്തില്‍ ആലുവ റൂറല്‍ എസ്‌പി അന്വേഷണം പ്രഖ്യാപിച്ചു. കളമശേരി എആർ ക്യാമ്പിലെ മൂന്ന് പോലീസുകാരെ പെരുമ്പാവൂരിൽ ഓണം സ്പെഷൽ ഡ്യൂട്ടിക്ക് നിയോഗിച്ചിരുന്നു. ട്രാഫിക് ഡ്യൂട്ടിയിലുള്ള ഇവരിൽ രണ്ട് പേർക്ക് റിഫ്ലക്ടർ ജാക്കറ്റ് ലഭിച്ചു. ജാക്കറ്റ് ലഭിക്കാതിരുന്ന പോലീസുകാരനാണ് എസ്‌പി‌ ഓഫീസിലേക്ക് നേരിട്ട് വിളിച്ച്‌ പരാതി പറഞ്ഞത്. പെരുമ്പാവൂർ പോലീസ് സ്റ്റേഷനിലോ ഡിവൈഎസ്‌പിയെയോ അറിയിക്കാതെ നേരിട്ട് വിളിച്ചതിൽ പോലീസുകാരന് കാരണം കാണിക്കൽ നോട്ടീസ് നൽകുമെന്ന് സൂചനയുണ്ട്. രാത്രി ജോലി ചെയ്യുന്നതിന് റിഫ്ലക്ടര്‍ ജാക്കറ്റ് വേണം. തനിക്കൊപ്പമുള്ള മറ്റ് രണ്ട് ഉദ്യോഗസ്ഥര്‍ക്ക് ജാക്കറ്റ് കിട്ടി. ട്രാഫിക് സ്റ്റേഷനില്‍ ചോദിച്ചപ്പോള്‍ നിലവിലുള്ള രണ്ടെണ്ണം വിതരണം ചെയ്‌തെന്നും സാധനം ഇല്ലെന്നും പറയുന്നതായും ജാക്കറ്റ് ആവശ്യപ്പെട്ട പോലീസുകാരന്‍ ഫോൺ സംഭാഷണത്തിൽ പറയുന്നു. ഇവിടെയല്ല ട്രാഫിക് സ്റ്റേഷനിലാണ് ചോദിക്കേണ്ടതെന്ന മറുപടി ആദ്യം എസ്‌പി ഓഫീസിലെ ഉദ്യോഗസ്ഥന്‍ നല്കുന്നുണ്ട്. എന്നാല്‍ ഇതിന്‍റെ അഥോരിറ്റി എസ്‌പി അല്ലേ എന്ന്, വിളിച്ച പോലീസുകാരന്‍ ചോദിക്കുമ്പോള്‍ എടോ പറയുന്നത് അങ്ങോട്ട് കേള്‍ക്കെന്നും എസ്‌പി തനിക്ക് അവിടെ ജാക്കറ്റ് കൊണ്ടുവന്ന് തരുമോ എന്നുമുള്ള മോശം മറുപടി ശബ്ദസന്ദേശത്തില്‍ വ്യക്തമാണ്. ഇതോടൊപ്പം എസ്‌പി‌‌ ഓഫീസിലെ മറ്റൊരു ഉദ്യോഗസ്ഥന്‍ അസഭ്യം പറയുന്നതും പുറത്തുവന്ന ശബ്ദരേഖയിലുണ്ട്. ഇത് ചോദ്യം ചെയ്തതോടെ എസ്‌പി ഓഫീസിലെ ഉദ്യോഗസ്ഥന്‍ ഫോണ്‍ വച്ചിട്ട് പോടാ എന്നും എന്തിനാ നീ ഇത് കേള്‍ക്കുന്നതെന്നുമുള്ള അസഭ്യം പറയുന്നതും വ്യക്തമാണ്.താന്‍ നേരിട്ട അപമാനം സംബന്ധിച്ച് ജാക്കറ്റ് ആവശ്യപ്പെട്ട പോലീസുകാരന്‍ വാട്‌സ്ആപ്പ് ഗ്രൂപ്പില്‍ ശബ്ദസന്ദേശം ഇട്ടതോടെയാണ് സംഭവം പുറത്തായത്.

കഞ്ചാവുമായി ഒഡീഷ സ്വദേശി അറസ്റ്റില്‍

കൊച്ചി: എളമക്കരയില്‍നിന്ന് 2.026 കിലോഗ്രാം കഞ്ചാവുമായി ഒഡീഷ സ്വദേശി ഹരേ കൃഷ്ണ നായകി(26)നെ കൊച്ചി സിറ്റി ഡാന്‍സാഫ് അറസ്റ്റ് ചെയ്തു. പോണേക്കര പള്ളിപ്പടി ചര്‍ച്ച് റോഡിനു സമീപത്തു നിന്നാണ് ഇയാളെ പിടികൂടിയത്. കഴിഞ്ഞ മേയില്‍ ഒരു കിലോ കഞ്ചാവുമായി തൃപ്പൂണിത്തുറ ഹില്‍പാലസ് പോലീസ് ഇയാളെ പിടികൂടിയിരുന്നു.

പാലിയേക്കര ടോൾ നിരക്ക് വർധിപ്പിക്കാനുള്ള നീക്കം പിൻവലിക്കണം: ബെന്നി ബഹനാൻ എംപി

ആലുവ: തൃശൂർ പാലിയേക്കര ടോൾ പ്ലാസയിലെ ടോൾ നിരക്ക് വർധിപ്പിക്കാനുള്ള നീക്കം പിൻവലിക്കണമെന്ന് കേന്ദ്രമന്ത്രി നിതിൻ ഗഡ്കരിയോട് ബെന്നി ബഹനാൻ എം പി ആവശ്യപെട്ടു.തൃശൂർ - അങ്കമാലി ദേശീയപാതയിലെ ടോൾ പിരിവ് പൂർണമായും പിൻവലിക്കണമെന്നും ബെന്നി ബഹനാൻ എംപി കേന്ദ്രമന്ത്രിക്ക് നൽകിയ കത്തിൽ ആവശ്യപ്പെട്ടു. ഇടപ്പള്ളി - തൃശൂർ ദേശീയപാതയിൽ സർവീസ് റോഡുകൾ നാളിതുവരെ പൂർത്തീകരിച്ചിട്ടില്. നിലവിലെ നിർമാണ പ്രവർത്തനങ്ങൾ കാരണം രൂക്ഷമായ ഗതാഗതക്കുരുക്കാണ്. ടോൾ പിരിവ് താത്കാലികമായി നിർത്തിവയ്പ്പിച്ച ഹൈക്കോടതി വിധി സുപ്രീംകോടതി ശരിവച്ചതുമാണ്. ഈ സാഹചര്യത്തിൽ ടോൾ നിരക്ക് വർധിപ്പിക്കാനുള്ള നീക്കം വളരെയധികം ജനാധിപത്യ വിരുദ്ധമാണ്. റോഡ് നിർമാണത്തിന് ചെലവഴിച്ചതിന്‍റെ അഞ്ചിരട്ടിയോളം തുക ടോൾപിരിവു മുഖേന ഈടാക്കി കഴിഞ്ഞതിനാൽ അത് നിർത്തുകയാണ് വേണ്ടതെന്നും എംപി പറഞ്ഞു.

ഫീസ് തർക്കം: ആശുപത്രിക്ക് കെട്ടിടം നിർമിച്ചത് ചട്ടം ലംഘിച്ചെന്ന് ലെൻസ്ഫെഡ്

വൈപ്പിൻ: ആശുപത്രി കെട്ടിടത്തിനു നമ്പർ ഇടുന്നതിനുള്ള നടപടികൾ പൂർത്തീകരിച്ച വ്യക്തിക്ക് ഫീസ് നൽകുന്നതുമായി ബന്ധപ്പെട്ട് വൈപ്പിൻ ബ്ലോക്ക് പഞ്ചായത്തും ഞാറക്കൽ ആശുപത്രി സൂപ്രണ്ടും തമ്മിൽ നിലനിൽക്കുന്ന തർക്കത്തിനിടെ ആശുപത്രി കെട്ടിടം നിർമിച്ചത് കെട്ടിട നിർമാണ ചട്ടം ലംഘിച്ചാണ് എന്ന ആരോപണവുമായി ലൈസൻസ്ഡ് എൻജിനീയേഴ്സ് ആൻഡ് സൂപ്പർവൈസേഴ്സ് ഫെഡറേഷൻ (ലെന്‍സ്‌ഫെഡ്) രംഗത്ത്. ഇത്തരത്തിൽ അനധികൃതമായി നിർമിച്ച പുതിയ ബ്ലോക്കിന് നിയമാനുസൃതമായി ക്രമവൽക്കരണത്തിലൂടെ ഞാറക്കൽ ഗ്രാമപഞ്ചായത്തിൽ നിന്നും കെട്ടിട നമ്പര്‍ ലഭ്യമാക്കി കൊടുത്ത ലെൻസ്ഫെഡ് അംഗം കൂടിയായ വനിതയ്ക്കാണ് ജോലിചെയ്തിട്ടും വേതനം നൽകാതെ ആശുപത്രി സൂപ്രണ്ട് ഒഴിഞ്ഞുമാറുന്നതെന്നും ലെൻസ്ഫെഡ് ഭാരവാഹികൾ ചൂണ്ടിക്കാട്ടി. ഈ സാഹചര്യത്തിൽ ചെയ്ത ജോലിയുടെ വേതനം ലഭ്യമാക്കാൻ വേണ്ടിവന്നാൽ സമരപരിപാടികൾ ആരംഭിക്കുമെന്നും മുന്നറിയിപ്പ് നൽകി. ലെൻസ്ഫെഡ് വൈപ്പിൻ യൂണിറ്റ് പ്രസിഡന്‍റ് ജെയിംസ് കളരിക്കലിന്‍റെ അധ്യക്ഷതയില്‍ ചേര്‍ന്ന യോഗത്തിൽ റോക്കി, സിദ്ധിഖ്, രാധാകൃഷ്ണൻ, ഹരികൃഷ്ണ, ഫിലോമിന എന്നിവർ പ്രസംഗിച്ചു.

മാധ്യമങ്ങള്‍ ജനങ്ങളുടെ ശബ്ദം: ശ്രേഷ്ഠ കാതോലിക്ക

കൊച്ചി: മാധ്യമങ്ങള്‍ ജനങ്ങളുടെ ശബ്ദമാണെന്നും യഥാര്‍ഥ വാര്‍ത്തകള്‍ ജനങ്ങളിലെത്തിക്കുന്നതില്‍ മാധ്യമ പ്രവര്‍ത്തകരുടെ സംഭാവനകള്‍ എക്കാലത്തും വിലമതിക്കാനാകാത്തതെന്നും ശ്രേഷ്ഠ കാതോലിക്ക ബസേലിയോസ് ജോസഫ് ബാവ പറഞ്ഞു. കടവന്ത്ര രാജീവ് ഗാന്ധി ഇന്‍ഡോര്‍ സ്റ്റേഡിയത്തില്‍ എറണാകുളം പ്രസ് ക്ലബ് ഓണോഘോഷം ഉദ്ഘാടനം ചെയ്യുകയായിരുന്നു അദ്ദേഹം. മതമോ ജാതിയോ രാഷ്ട്രീയമോ നോക്കാതെ മനുഷ്യര്‍ക്ക് പ്രാധാന്യം നല്‍കുന്ന ഒത്തുചേരലുകള്‍ സമൂഹത്തില്‍ അനിവാര്യമാണെന്നും ഓണം നല്‍കുന്ന ഏറ്റവും വലിയ സന്ദേശവും ഇതാണെന്നും അദ്ദേഹം കൂട്ടിച്ചേർത്തു. ഡോ. കുര്യാക്കോസ് മാര്‍ തെയോഫിലോസ് മെത്രാപ്പോലീത്ത, എംപിമാരായ ബെന്നി ബഹനാന്‍, ഹൈബി ഈഡന്‍, ഹംദുള്ള സെയ്ദ്, ഫാ.അനില്‍ ഫിലിപ്പ്, പ്രഫ. കെ.വി. തോമസ് തുടങ്ങിയവര്‍ പങ്കെടുത്തു.

നാടെങ്ങും ഓണാഘോഷം

കൊച്ചി: ലയണ്‍സ് ക്ലബ് ഇന്‍റര്‍നാഷണല്‍ 318 സിയുടെയും വേള്‍ഡ് മലയാളി കൗണ്‍സില്‍ തിരുകൊച്ചി പ്രൊവിന്‍സിന്‍റെയും കൊച്ചി ചാവറ കള്‍ച്ചറല്‍ സെന്‍ററിന്‍റെയും സംയുക്താഭിമുഖ്യത്തില്‍ ബാല്യകാല കാന്‍സര്‍ ബാധിതരായ 25ഓളം കുട്ടികളും അവരുടെ കുടുംബാംഗങ്ങളോടുമൊപ്പം ഓണം ആഘോഷിച്ചു. ലയണ്‍സ് ഡിസ്ട്രിക്ട് 318സി ഗവര്‍ണര്‍ കെ.ബി. ഷൈന്‍കുമാര്‍ ഉദ്ഘാടനം ചെയ്തു. വേള്‍ഡ് മലയാളി കൗണ്‍സില്‍ ഗ്ലോബല്‍ വൈസ് ചെയര്‍മാന്‍ കണ്ണാട്ട് സുരേന്ദ്രന്‍ മുഖ്യാതിഥിയായിരുന്നു. വേള്‍ഡ് മലയാളി കൗണ്‍സില്‍ ഇന്ത്യ റീജിയന്‍ പ്രസിഡന്‍റ് പദ്മകുമാര്‍, സിഎംഐ സഭാ ജനറല്‍ കൗണ്‍സിലര്‍ ഫാ. ബിജു വടക്കേല്‍, ചാവറ കല്‍ച്ചറല്‍ സെന്‍റര്‍ ഡയറക്റ്റര്‍ ഫാ. അനില്‍ ഫിലിപ്പ്, വി.എസ്. ജയേഷ്, വര്‍ഗീസ് ജോസഫ്, ലയണ്‍ ജോര്‍ജ് സാജു, അഡ്വ. ആന്‍റണി കുര്യന്‍, വി.ടി. പൈലി, വിനീത നിബു, വര്‍ഗീസ് ജോസഫ്, ജോണ്‍സന്‍ സി. ഏബ്രഹാം, ജോസഫ് മാത്യു, അഡ്വ. പ്രവീണ്‍ എം. ജോയ്, സാജു കുര്യന്‍, വേള്‍ഡ് മലയാളി കൗണ്‍സില്‍ ഗ്ലോബല്‍ ബിസിനസ് ഫോറം ചെയര്‍മാന്‍ രാജേഷ് കുമാര്‍ എന്നിവര്‍ പങ്കെടുത്തു. എഡ്രാക് ആഘോഷം പാലാരിവട്ടം: എഡ്രാക് പാലാരിവട്ടം മേഖലാ കമ്മിറ്റിയുടെ ആഭിമുഖ്യത്തില്‍ പാലാരിവട്ടം പള്ളിനട സെന്‍റ് റാഫേല്‍ സ്‌കൂള്‍ ഹാളില്‍ ഓണാഘോഷം നടത്തി. പാലാരിവട്ടം പോലീസ് സ്റ്റേഷന്‍ എസ്എച്ച്ഒ രൂപേഷ് ഉദ്ഘാടനം ചെയ്തു. എഡ്രാക് ജില്ലാ വൈസ് പ്രസിഡന്‍റ് ഡി.ജി. സുരേഷ് അധ്യക്ഷത വഹിച്ചു. ഇടപ്പള്ളി അഞ്ചുമന റസിഡന്‍റ്സ് അസോസിയേഷന്‍റെ ആഭിമുഖ്യത്തിൽ നടത്തിയ ഓണാഘോഷവും വിദ്യാഭാസ അവാര്‍ഡ് വിതരണവും കൊച്ചി മേയര്‍ എം. അനില്‍കുമാര്‍ ഉദ്ഘാടനം ചെയ്തു.

കർഷകച്ചന്ത തുടങ്ങി

കാലടി: കാലടി ഗ്രാമപഞ്ചായത്ത് കൃഷിഭവന്‍റെ ആഭിമുഖ്യത്തില്‍ കര്‍ഷകചന്ത ആരംഭിച്ചു. കൃഷിഭവന്‍ അങ്കണത്തില്‍ നടന്ന ചടങ്ങില്‍ റോജി എം. ജോണ്‍ എംഎല്‍എ നിര്‍വഹിച്ചു. ഗ്രാമപഞ്ചായത്ത് പ്രസിഡന്‍റ് ഷൈജന്‍ തോട്ടപ്പിള്ളി അധ്യക്ഷത വഹിച്ചു. അങ്കമാലി: മൂക്കന്നൂർ പഞ്ചായത്തിന്‍റെയും കൃഷിഭവന്‍റെയും നേതൃത്വത്തിൽ ആരംഭിച്ച ഓണച്ചന്ത പഞ്ചായത്ത് പ്രസിഡന്‍റ് കെ.വി. ബിബിഷ് ഉദ്ഘാടനം ചെയ് തു. ആലുവ: എടത്തല ഗ്രാമ പഞ്ചായത്തിലെ ഓണം വിപണന മേള കുഞ്ചാട്ടുകര ദേവി ഓഡിറ്റോറിയത്തിൽ ആരംഭിച്ചു. നടൻ പ്രശാന്ത് മുരളി ഉദ്ഘാടനം ചെയ്തു. നാളെ അവസാനിക്കും. പെരുമ്പാവൂർ: കൂവപ്പടി ഗ്രാമപഞ്ചായത്ത് കര്‍ഷകച്ചന്ത പഞ്ചായത്ത് പ്രസിഡന്‍റ് മായ കൃഷ്ണകുമാര്‍ ഉദ്ഘാടനം ചെയ്തു. വൈസ് പ്രസിഡന്റ് എം.ഒ. ജോസ് അധ്യക്ഷത വഹിച്ചു. ബ്ലോക്ക് അംഗം മോളി തോമസ്, തോമസ് പൊട്ടോളി തുടങ്ങിയവർ പങ്കെടുത്തു. നെടുമ്പാശേരി: സർവീസ് സഹ. ബാങ്കിന്‍റെ നേതൃത്വത്തിലുള്ള ഓണച്ചന്ത അൻവർ സാദത്ത് എംഎൽഎ ഉദ്ഘാടനം ചെയ്തു. പ്രസിഡന്‍റ് പി.ജെ. ജോണി അധ്യക്ഷത വഹിച്ചു. മരട്: കാർഷിക വികസന വകുപ്പിന്‍റെ സഹകരണത്തോടെ മരട് നഗരസഭയും കൃഷിഭവനും സംയുക്തമായി മരട് കൃഷിഭവനിൽ ആരംഭിച്ച ഓണച്ചന്ത നഗരസഭാ ചെയർപേഴ്സൺ ആന്‍റണി ആശാംപറമ്പിൽ ഉദ്ഘാടനം ചെയ്തു.

കറുകുറ്റി സ്റ്റാർ ജീസസ് എച്ച്എസിൽ ‘മാങ്ങയേറ് ’കൗതുകമായി

അങ്കമാലി : കറുകുറ്റി സ്റ്റാർ ജീസസ് ഹൈസ്കൂളിൽ മാങ്ങയേറുമായി നടന്ന ഓണാഘോഷ പരിപാടി ‘ആരവം @ 25’ ദൃശ്യവിസ്മയമായി. കറുകുറ്റി ഗ്രാമ പഞ്ചായത്ത് പ്രസിഡന്‍റ് ലതിക ശശികുമാർ ഉദ്ഘാടനം ചെയ്തു. ചടങ്ങിൽ പഞ്ചായത്ത് വൈസ് പ്രസിഡന്‍റും പൂർവ്വ വിദ്യാർഥിയുമായ ഷൈജോ പറമ്പി, വാർഡംഗം മെമ്പർ മിനി ഡേവിസ്, പഞ്ചായത്തംഗങ്ങൾ തുടങ്ങിയവർ പങ്കെടുത്തു. പിടിഎ സഹകരണത്തോടെ തയാറാക്കിയ ഓണസദ്യയിൽ മാതാപിതാക്കളും അധ്യാപകരും വിദ്യാർഥികളും പങ്കുചേർന്നു. കുട്ടികൾക്കായി വടംവലി, അപ്പംകടി, ബോംബിംഗ് ദ സിറ്റി തുടങ്ങിയ മൽസരങ്ങൾക്ക് പുറമെയാണ് മാങ്ങയേറ് മൽസരവും അരങ്ങേറിയത്. കുട്ടികൾ ഏറെ ആവേശത്തോടെ ഈ മത്സരങ്ങളിൽ പങ്കുചേർന്നു. പ്രധാനാധ്യാപകൻ ഫാ. ജോണി ചിറയ്ക്കൽ സ്വാഗതവും പിടിഎ പ്രസിഡന്‍റ് എം.ജെ. ഏല്യാസ് നന്ദിയും പറഞ്ഞു.

ആലങ്ങാട് സ്കൂട്ടറിൽ മരക്കൊമ്പു വീണ് ദന്പതികൾക്ക് പരിക്ക്

ആലങ്ങാട്: ആലങ്ങാട് കൃഷിഭവനു മുന്നിൽ നിൽക്കുന്ന മരത്തിന്‍റെ കൊന്പുകൾ റോഡിലേക്ക് ഒടിഞ്ഞുവീണു സ്കൂട്ടർ യാത്രികരായ ദന്പതികൾക്ക് പരിക്കേറ്റു. ആലങ്ങാട് പാനായിക്കുളം മില്ലുപടി പിച്ചിക്കുഴി വീട്ടിൽ നിധിൻ-മനില ദമ്പതികൾക്കാണു പരിക്കേറ്റത്. ഇന്നലെ രാവിലെ ആലങ്ങാട് കൃഷിഭവനു മുന്നിൽവച്ചാണ് അപകടം സംഭവിച്ചത്. സ്കൂട്ടറിൽ പോകുന്നതിനിടെ മരത്തിന്‍റെ ഉണങ്ങിയ കൊമ്പ് വാഹനത്തിലേക്ക് ഒടിഞ്ഞുവീഴുകയും ഇവർ സഞ്ചരിച്ച സ്കൂട്ടർ നിയന്ത്രണം വിട്ടു സമീപത്തെ മതിലിൽ ഇടിക്കുകയുമായിരുന്നു. തലയ്ക്കും കൈക്കും കാലിനും പരുക്കേറ്റ ഇരുവരെയും ആലുവയിലെ സ്വകാര്യ ആശുപത്രിയിൽ പ്രവേശിപ്പിച്ചു. കഴിഞ്ഞ ദിവസം കൃഷിഭവനിലെത്തിയവരുടെ കാറിനു മുകളിൽ മരക്കൊമ്പുകൾ ഒടിഞ്ഞു വീണ് കാറിന്‍റെ ചില്ല് പൂർണമായും തകർന്നിരുന്നു. പഞ്ചായത്ത് പരിധിയിൽ പലയിടത്തും അപകടകരമായ തരത്തിൽ മരങ്ങൾ റോഡിലേക്കു ചാഞ്ഞു നിൽക്കുന്നുണ്ടെന്ന പരാതി വ്യാപകമാണ്. എന്നിട്ടും പഞ്ചായത്തോ, പൊതുമരാമത്തു വിഭാഗമോ കാര്യമായി ഇടപെടുന്നില്ലെന്നും മരച്ചില്ലകൾ വീണ് അപകടം സംഭവിക്കുമ്പോൾ മാത്രമാണു നടപടി സ്വീകരിക്കുന്നുള്ളുവെന്ന പരാതിയും ഉണ്ട്.

ഇഇസി മാര്‍ക്കറ്റ്-കീച്ചേരിപ്പടി ബൈപാസ് റോഡിന്‍റെ ശോച്യാവസ്ഥ: പൊതുമരാമത്ത് എന്‍ജിനീയറുടെ ഓഫീസിലേക്ക് മാർച്ച് നടത്തി

മൂവാറ്റുപുഴ: ഇഇസി മാര്‍ക്കറ്റ്-കീച്ചേരിപ്പടി ബൈപാസ് റോഡിന്‍റെ ശോചനീയാവസ്ഥ പരിഹരിക്കുന്നതിനായി കാവുങ്കര വികസന സമിതിയുടെ നേതൃത്വത്തില്‍ പൊതുമരാമത്ത് എന്‍ജിനീയറുടെ ഓഫീസിലേക്ക് ജനകീയ മാര്‍ച്ചും, ഉപരോധവും സംഘടിപ്പിച്ചു. റോഡില്‍ കുഴി രൂപപ്പെട്ടതിനെ തുടര്‍ന്ന് നിരവധി വാഹനങ്ങള്‍ അപകടത്തില്‍പ്പെടുകയും, യാത്രക്കാര്‍ക്ക് പരിക്കേല്‍ക്കുകയും ചെയ്തിരുന്നു. തിരക്കേറിയ പ്രദേശത്ത് റോഡില്‍ കുഴി രൂപപ്പെടുകയും കൂടി ചെയ്തതോടെ യാത്രക്കാര്‍ കൂടുതല്‍ ദുരിതത്തിലായിരിക്കുകയാണ്. വിഷയത്തില്‍ പരിഹാരം കാണാതെ പൊതുമരാമത്ത് അധികൃതരും, നഗരസഭയും പരസ്പരം പഴിചാരുന്ന പ്രവണതയാണുള്ളതെന്ന് നാട്ടുകാര്‍ കുറ്റപ്പെടുത്തി. ഉപരോധത്തെ തുടര്‍ന്ന് ഉടന്‍നടപടി നടപടിയെടുക്കാമെന്ന് പൊതുമരാമത്ത് എന്‍ജിനീയര്‍ ഉറപ്പു നല്‍കി. പരിഹാരം ഉണ്ടായില്ലങ്കില്‍ ശക്തമായ സമര പരിപാടികളുമായി മുന്നോട്ട് പോകുമെന്ന് സമരസമിതി അംഗങ്ങള്‍ അറിയിച്ചു. കോണ്‍ഗ്രസ് മണ്ഡലം വൈസ് പ്രസിഡന്‍റ് സി.പി. ഫൈസല്‍, പൊതുപ്രവര്‍ത്തകരായ സാഹില്‍ മക്കാര്‍, ഷാജി തുണ്ടന്‍, എം.കെ. അബ്ദുൾ അസീസ്, സലാം എവറസ്റ്റ് എന്നിവര്‍ നേതൃത്വം നല്‍കി.

ഓണം അലവൻസ് നൽകിയില്ല; കൂത്താട്ടുകുളത്ത് എൽഡിഎഫ് പ്രതിഷേധം

കൂത്താട്ടുകുളം: നഗരസഭയിലെ തൊഴിലുറപ്പു തൊഴിലാളികൾക്കും ഹരിത കർമ്മ സേന അംഗങ്ങൾക്കും സർക്കാർ പ്രഖ്യാപിച്ച ഓണം ബോണസ് നൽകാത്തതിൽ എൽഡിഎഫ് കൗൺസിലർമാരുടെ പ്രതിഷേധം. 1,250 രൂപ വീതമാണ് സർക്കാർ അനുവദിച്ചത്. മറ്റിടങ്ങളിൽ തുക ലഭിച്ചു തുടങ്ങി. തൊഴിലാളികളും ഹരിത കർമ്മ സേനാഗങ്ങളും തുക ലഭിച്ചില്ലെന്ന പരാതി ഉയത്തിയതോടെയാണ് എൽഡിഎഫ് അംഗങ്ങൾ പ്രതിഷേധം നടത്തിയത്. ഓഫീസിനു മുന്നിൽ നടന്ന സമരം സണ്ണി കുര്യാക്കോസ് ഉദ്ഘാടനം ചെയ്തു. അംബിക രാജേന്ദ്രൻ അധ്യക്ഷത വഹിച്ചു. മറ്റ് കൗൺസിലർമാരായ വിജയ ശിവൻ, ജിജി ഷാനവാസ്, സുമ വിശ്വംഭരൻ തുടങ്ങിയവർ പ്രസംഗിച്ചു.

ഓണാവേശത്തിൽ വിപണികൾ

കോതമംഗലം കോതമംഗലം: സംസ്ഥാന സർക്കാർ നടപ്പിലാക്കിയിട്ടുള്ള സപ്ലൈകോ ഓണം ഫെയർ കോതമംഗലം സപ്ലൈകോ സൂപ്പർമാർക്കറ്റിൽ സംഘടിപ്പിച്ചു. താലൂക്ക്തല ഉദ്ഘാടനം ആന്‍റണി ജോൺ എംഎൽഎ നിർവഹിച്ചു. മുനിസിപ്പൽ വൈസ് ചെയർപേഴ്സൺ സിന്ധു ഗണേശൻ അധ്യക്ഷത വഹിച്ചു. വാർഡ് കൗൺസിലർ കെ.എ. നൗഷാദ്, സപ്ലൈകോ മാനേജർ കെ. സനീഷ് കുമാർ , താലൂക്ക് സപ്ലൈ ഓഫീസർ ടി.എസ്. മിനി മോൾ എന്നിവർ പങ്കെടുത്തു. ഉൽപ്പന്നങ്ങൾ 25 രൂപ നിരക്കിൽ 20 കിലോ ഓണം സ്പെഷൽ അരി ഉൾപ്പെടെ 13 ഇനങ്ങളാണ് സബ്സിഡി നിരക്കിൽ ലഭ്യമാകുന്നത്. പല നിരക്കിലുള്ള സബ്സിഡി കിറ്റുകളും ഗിഫ്റ്റ് കൂപ്പണുകളും ഒരുക്കിയിട്ടുണ്ട്. രാവിലെ 10 മുതൽ രാത്രി എട്ടുവരെയാണ് വില്പന. നാലുവരെയാണ് സപ്ലൈകോ ഓണം ഫെയറുകള്‍ സംഘടിപ്പിച്ചിട്ടുള്ളത്. കോതമംഗലം: കോതമംഗലത്ത് ഓണസമൃദ്ധി ഓണവിപണി ആരംഭിച്ചു. കോതമംഗലം മുനിസിപ്പാലിറ്റി കൃഷിഭവന്‍റെ ആഭിമുഖ്യത്തിൽ ചെറിയ പള്ളിതാഴത്തു നടത്തുന്ന വിപണി ആന്‍റണി ജോൺ എംഎൽഎ ഉദ്ഘാടനം ചെയ്തു. മുനിസിപ്പൽ ചെയർപേഴ്സൺ സിന്ധു ഗണേശൻ അധ്യക്ഷത വഹിച്ചു. സ്ഥിരം സമിതി ചെയർമാൻ മാരായ കെ.എ. നൗഷാദ്, ബിൻസി തങ്കച്ചൻ, മുനിസിപ്പൽ കൗൺസിലർമാരായ പി.ആർ. ഉണ്ണികൃഷ്ണൻ, റിൻസ് റോയ്, കോതമംഗലം ബ്ലോക്ക് കൃഷി അസിസ്റ്റന്‍റ് ഡയറക്ടർ പ്രിയമോൾ തോമസ്, മുനിസിപ്പൽ കൃഷി ഫീൽഡ് ഓഫീസർ പി.ഐ. സതി , കൃഷി അസിസ്റ്റന്‍റുമാരായ എൽദോ ഏബ്രഹാം, രമ്യ സുധീന്ദ്രൻ, കാർഷിക വികസന സമിതി അംഗങ്ങൾ, കൃഷിക്കൂട്ടം ഫെഡറേഷൻ പ്രതിനിധികൾ, കർഷകർ എന്നിവർ പങ്കെടുത്തു. കോതമംഗലം: വാരപ്പട്ടി പഞ്ചായത്ത് ഓണ സമൃദ്ധി കർഷക ചന്ത ആരംഭിച്ചു. പഞ്ചായത്ത് പ്രിസിഡന്‍റ് പി.കെ. ചന്ദ്രശേഖരൻ നായർ ഉദ്ഘാടനം നിർവഹിച്ചു. വികസന കാര്യ സ്ഥിരം സമിതി അധ്യക്ഷൻ എം.എസ്. ബെന്നി അധ്യക്ഷവഹിച്ചു. വാരപ്പെട്ടി പോസ്റ്റ് ഓഫീസിന് സമീപം പ്രവർത്തിക്കുന്ന ചന്തയിൽ കർഷകർ ഉൽപാദിപ്പിച്ച ഏത്തക്കായ, പയർ, വെണ്ട, മുളക്, ഇഞ്ചി, പടവലം, പാവക്ക, മാങ്ങാ, തേങ്ങ, മത്തൻ, കുമ്പളം, വെള്ളരി, എന്നിവ പൊതുവിപണയിലെ വിലയേക്കാൾ കുറഞ്ഞ വിലയ്ക്ക് വില്പന നടത്തും. 4 വരെയാണ് ചന്ത പ്രവർത്തിക്കുക. പോത്താനിക്കാട് പോത്താനിക്കാട്: കാര്‍ഷിക വികസന കര്‍ഷകക്ഷേമ വകുപ്പ് നടപ്പിലാക്കുന്ന ഓണസമൃദ്ധി കര്‍ഷക ചന്ത പോത്താനിക്കാട് കൃഷിഭവന്‍റെ നേതൃത്വത്തില്‍ ആരംഭിച്ചു. ഇതോടനുബന്ധിച്ചു പോത്താനിക്കാട് ബസ് സ്റ്റാന്‍ഡ് അങ്കണത്തില്‍ തുറന്ന കര്‍ഷക ചന്തയുടെ ഉദ്ഘാടനം പഞ്ചായത്ത് പ്രസിഡന്‍റ് സജി കെ. വര്‍ഗീസ് നിര്‍വഹിച്ചു. പഞ്ചായത്ത് വൈസ് പ്രസിഡന്‍റ് ആശ ജിമ്മി അധ്യക്ഷത വഹിച്ചു. കൂത്താട്ടുകുളം കൂത്താട്ടുകുളം: നഗരസഭയിൽ കൃഷിഭവന്‍റെ ആഭിമുഖ്യത്തിൽ ഓണച്ചന്ത ആരംഭിച്ചു. നഗരസഭ ചെയർപേഴ്സൺ കലാ രാജു ഓണച്ചന്തയുടെ ഉദ്ഘാടനം നിർവഹിച്ചു. വൈസ് ചെയർമാൻ പി.ജി. സുനിൽകുമാർ അധ്യക്ഷത വഹിച്ചു. സെപ്റ്റംബർ 1,2,3,4 ദിവസങ്ങളിലായി കൂത്താട്ടുകുളം കൃഷിഭവന് സമീപം ഇക്കോഷോപ്പിനോട് ചേർന്നാണ് ഓണച്ചന്ത പ്രവർത്തിക്കുന്നത്. കൃഷി ഓഫീസർ അമിത കെ. ജോർജ്, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ പ്രിൻസ് പോൾ ജോൺ, വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ മരിയ ഗൊരോത്തി തുടങ്ങിയവർ പ്രസംഗിച്ചു. ഇലഞ്ഞി ഇലഞ്ഞി: പഞ്ചായത്ത് കൃഷിഭവന്‍റെ ആഭിമുഖ്യത്തിലുള്ള ഓണസമൃദ്ധി കർഷക ചന്തയുടെ ബ്ലോക്ക് തല ഉദ്ഘാടനം അനൂപ് ജേക്കബ് എംഎൽഎ നിർവഹിച്ചു. പഞ്ചായത്ത് പ്രസിഡന്‍റ് പ്രീതി അനിൽ അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് ഷേർലി ജോയി ആദ്യ വില്പന നിർവഹിച്ചു. സർക്കാരിന്‍റെ 2024-25 ലെ മികച്ച യുവ കർഷകനുള്ള അവാർഡ് നേടിയ മോനു വർഗീസ് മാമ്മനെ അനൂപ് ജേക്കബ് എംഎൽഎ പുരസ്കാരം നൽകി ആദരിച്ചു. കൃഷിക്കാരിൽനിന്നും നേരിട്ട് ശേഖരിച്ച വിവിധയിനം പച്ചക്കറികളും കാർഷിക ഉത്പന്നങ്ങളും മൂല്യവർദ്ധിത ഉത്പന്നങ്ങളും ഇവിടെ മിതമായ നിരക്കിൽ ലഭ്യമാണ്. നാല് വരെ മിതമായ നിരക്കിൽ ഇവിടെനിന്നും പച്ചക്കറികൾ ലഭ്യമാകുമെന്ന് കൃഷി ഓഫീസർ അറിയിച്ചു.

അരീക്കൽ ഫെസ്റ്റിന് നാളെ തുടക്കം

പിറവം: വിനോദ സഞ്ചാര കേന്ദ്രമായ അരീക്കൽ വെള്ളച്ചാട്ടത്തിന്‍റെ സാധ്യതകൾ പ്രയോജനപ്പെടുത്തി പാമ്പാക്കുട പഞ്ചായത്ത് സംഘടിപ്പിക്കുന്ന അരീക്കൽ ഫെസ്റ്റ് നാളെ ആരംഭിക്കും. അരീക്കൽ വർണ്ണച്ചാട്ടം എന്നപേരിലുള്ള വൈദ്യുതി ദീപാലങ്കാരമാണ് ഫെസ്റ്റിന്‍റെ പ്രധാന ആകർഷണമാകുന്നത്. കൂടാതെ മെഗാ തിരുവാതിര, ഗാനസന്ധ്യ, നാടൻപാട്ട്, ഗാനമേള, പഞ്ചവാദ്യം തുടങ്ങിയ വിവിധ കലാപരിപാടികളും ഫെസ്റ്റിന് തിളക്കമേകും. നാളെ 2.30 ന് പ്രതിപക്ഷ നേതാവ് വി.ഡി. സതീശൻ ഫെസ്റ്റ് ഉദ്‌ഘാടനം ചെയ്യും. .അനൂപ് ജേക്കബ് എംഎൽഎ അധ്യക്ഷത വഹിക്കും. അരീക്കൽ ഫെസ്റ്റിനുള്ള ഒരുക്കങ്ങൾ പൂർത്തിയായതായി പഞ്ചായത്ത് പ്രസിഡന്‍റ് ശ്രീകാന്ത് നന്ദനൻ, കൺവീനർ പി.എസ്. മധുസൂദനൻ നായർ എന്നിവർ വാർത്താസമ്മേളനത്തിൽ അറിയിച്ചു. ഏഴിന് വൈകുന്നേരം നാലിന് നടക്കുന്ന സമാപന സമ്മേളനം ജില്ലാ പഞ്ചായത്ത് പ്രസിഡന്റ് മനോജ് മൂത്തേടൻ ഉദ്‌ഘാടനം ചെയ്യും.

പിറവത്ത് ഫുഡ് ഫെസ്റ്റ് ആരംഭിച്ചു

പിറവം: നഗരസഭ ഓണാോത്സവത്തിന്‍റെ ഭാഗമായി ഫുഡ് ഫെസ്റ്റ് പോസ്റ്റോഫീസിൽ ജംഗ്ഷന് സമീപം ബസ് ബേയിൽ ആരംഭിച്ചു. അനൂപ് ജേക്കബ് എംഎൽഎ ഉദ്ഘാടനം നിർവഹിച്ചു. നഗരസഭ ചെയർപേഴ്സൺ ജൂലി സാബു അധ്യക്ഷത വഹിച്ച ചടങ്ങിൽ ഡെപ്യൂട്ടി ചെയർപേഴ്സൺ കെ.പി. സലിം, സ്റ്റാൻഡിംഗ് കമ്മിറ്റി ചെയർമാൻമാരായ ബിമൽ ചന്ദ്രൻ, ജിൽസ് പെരിയപ്പുറം തുടങ്ങിയവർ പ്രസംഗിച്ചു. ഇന്ന് രാത്രിയിൽ ഫുഡ് ഫെസ്റ്റ് സമാപിക്കും. പിറവം മേഖലയിലെ പ്രമുഖ ഹോട്ടൽ, കാറ്ററിംഗ് യൂണിറ്റുകാരാണ് ഫുഡ് ഫെസ്റ്റിവലിൽ പങ്കെടുക്കുന്നത്.

മൂവാറ്റുപുഴ-എറണാകുളം റൂട്ടിലെ യാത്രാ ക്ലേശം പരിഹരിക്കണമെന്ന്

മൂവാറ്റുപുഴ: മൂവാറ്റുപുഴ-എറണാകുളം ദേശസാത്കൃത റൂട്ടില്‍ യാത്രാ ക്ലേശം അതിരൂക്ഷം. കെഎസ്ആര്‍ടിസി സര്‍വീസുകളെ മാത്രം ആശ്രയിക്കുന്ന ഈ റൂട്ടില്‍ ആവശ്യത്തിന് ബസ് സര്‍വീസില്ലാതെ ജനങ്ങള്‍ വലയുകയാണ്. പകല്‍ രാത്രി സര്‍വീസുകള്‍ പലതും വെട്ടിക്കുറച്ചു. വെട്ടിക്കുറച്ച സര്‍വീസുകള്‍ പുനരാരംഭിക്കണമെന്നും പുതിയ സര്‍വീസുകള്‍ തുടങ്ങുവാന്‍ ആവശ്യമായ നടപടികള്‍ സ്വീകരിക്കുമെന്നും പുതിയതായി ഇറങ്ങിയ എസി, നോണ്‍ എസി ബസുകള്‍ മുവാറ്റുപുഴ ഡിപ്പോയില്‍ അനുവദിക്കണമെന്നും ആവശ്യപ്പെട്ട് മന്ത്രി കെ.ബി. ഗണേഷ്‌കുമാറിന് നിവേദനം നല്‍കാന്‍ കേരള കോണ്‍ഗ്രസ്-ബി നിയോജക മണ്ഡലം സമ്മേളനം തീരുമാനിച്ചു. സമ്മേളനത്തില്‍ പുതിയ മണ്ഡലം ഭാരവാഹികളെ തെരഞ്ഞെടുത്തു. ഭാരവാഹികള്‍ : അനില്‍ വാളകം - പ്രസിഡന്‍റ്, കെ.കെ. അരുണ്‍ - വൈസ് പ്രസിഡന്‍റ്, ജിജി ജോര്‍ജ് - ജനറല്‍ സെക്രട്ടറി, പി.എ. സന്തോഷ് - സെക്രട്ടറി, റിയ സുനില്‍ - ട്രഷറര്‍.

ഓണക്കിറ്റ് വിതരണം

കല്ലൂര്‍ക്കാട്: സമഗ്ര ശിക്ഷാ കേരളം ബിആര്‍സി കല്ലൂര്‍ക്കാടിന്‍റെ നേതൃത്വത്തില്‍ ഓണക്കിറ്റ് വിതരണം നടത്തി. 17 കുട്ടികള്‍ക്ക് 1,000 രൂപ വീതം വിലവരുന്ന ഓണക്കിറ്റ് നല്‍കി. മഞ്ഞള്ളൂര്‍ പഞ്ചായത്ത് പ്രസിഡന്‍റ് ആന്‍സി ജോസ് ഓണക്കിറ്റ് വിതരണോദ്ഘാടനം നിര്‍വഹിച്ചു. പിടിഎ പ്രസിഡന്‍റ് ബിജു ജോണി അധ്യക്ഷത വഹിച്ചു. യോഗത്തില്‍ റിജോയ് എ. സഖറിയാസ് - ബിപിസി, ബിആര്‍സി കല്ലൂര്‍ക്കാട്, എംപിറ്റിഎ ധന്യ തങ്കച്ചന്‍, ബിആര്‍സി ട്രെയ്‌നര്‍ ടി.ബി. മിനി എന്നിവര്‍ പ്രസംഗിച്ചു. സ്‌പെഷല്‍ എഡ്യൂക്കേറ്റേഴ്സിന്‍റെ നേതൃത്വത്തില്‍ കണ്ടെത്തിയ സ്‌പോണ്‍സര്‍ഷിപ്പിലൂടെയാണ് ഓണക്കിറ്റ് വിതരണം നടത്തിയത്. മൂവാറ്റുപുഴ: ഭാരതീയ ദളിത് കോണ്‍ഗ്രസ് പായിപ്ര മണ്ഡലം കമ്മിറ്റിയുടെ ആഭിമുഖ്യത്തില്‍ ഓണക്കിറ്റ് വിതരണം ചെയ്തു. ബ്ലോക്ക് കോണ്‍ഗ്രസ് പ്രസിഡന്‍റ് സാബു ജോണ്‍ ഉദ്ഘാടനം ചെയ്തു. ഭാരതീയ ദളിത് കോണ്‍ഗ്രസ് പായിപ്ര മണ്ഡലം പ്രസിഡന്‍റ് അരുണ്‍ കെ. മോഹന്‍ അധ്യക്ഷത വഹിച്ചു. ഭക്ഷ്യ കിറ്റിന്‍റെ വിതരണോദ്ഘാടനം കെപിസിസി സെക്രട്ടറി കെ.എം. സലിം നിര്‍വഹിച്ചു. കോതമംഗലം: ഉമ്മൻ ചാണ്ടി പാലിയേറ്റീവ് ഫൗണ്ടേഷൻ മേഖല സമ്മേളനവും ഓണക്കിറ്റ് വിതരണവും, വിദ്യാഭ്യാസ അവാർഡ് വിതരണവും ആദരിക്കലും നടത്തി. പൊയ്കയിൽ മിനി സ്റ്റേഡിയത്തിൽ നടത്തിയ സമ്മേളനം കെപിസിസി അംഗം എ.ജി. ജോർജ് ഉദ്ഘാടനം ചെയ്തു. 130 നിർധന കുടുംബങ്ങൾക്ക് ഓണക്കിറ്റ് വിതരണം കവളങ്ങാട് പഞ്ചായത്ത് മുൻ പ്രസിഡന്‍റ് ഷൈജന്‍റ് ചാക്കോ നിർവഹിച്ചു. പ്ലസ്ടു, എസ്എസ്എൽസി പരീക്ഷയിൽ ഉന്നത വിജയം നേടിയ 15 വിദ്യാർഥികൾക്ക് കോതമംഗലം ബ്ലോക്ക് പഞ്ചായത്ത് സ്ഥിരം സമിതി ചെയർമാൻ ജെയിംസ് കോറമ്പേൽ അവാർഡു നൽകി ആദരിച്ചു. മുതിർന്ന പൊതുപ്രവർത്തകരെയും ചടങ്ങിൽ ആദരിച്ചു. ഫൗണ്ടേഷൻ മേഖല ചെയർമാൻ ജോബി കാരാംഞ്ചേരി അധ്യക്ഷത വഹിച്ചു. പോത്താനിക്കാട്: പൈങ്ങോട്ടൂർ ക്ഷീരോത്പാദക സഹകരണ സംഘാംഗങ്ങൾക്കു നൽകുന്ന ഓണക്കിറ്റിന്‍റെ വിതരണോദ്ഘാടനം പൈങ്ങോട്ടൂർ പഞ്ചായത്ത് പ്രസിഡന്‍റ് ജിജി ഷിജു നിർവഹിച്ചു. സംഘം പ്രസിഡന്‍റ് സണ്ണി കാത്തിരത്തിങ്കൽ അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് സാബു മത്തായി, ഫ്രാൻസീസ് ജോർജ്, തങ്ക ഉലഹന്നാൻ, ഷിജി ഷാന്‍റി, ഷീല ചാക്കോ, മേരി സജി തുടങ്ങിയവർ പ്രസംഗിച്ചു.

പ്ലാറ്റിനം ജൂബിലി ആഘോഷം

മൂവാറ്റുപുഴ: മീങ്കുന്നം പബ്ലിക് ലൈബ്രറി പ്ലാറ്റിനം ജൂബിലി ആഘോഷ ഉദ്ഘാടനം മീങ്കുന്നം സെന്‍റ് ജോസഫ് പള്ളി വികാരി ഫാ. ജേക്കബ് തലാപ്പിള്ളില്‍ നിര്‍വഹിച്ചു. ലൈബ്രറി പ്രസിഡന്‍റ് എം.ടി. എമ്മാനുവേല്‍ അധ്യക്ഷത വഹിച്ചു. ബ്ലോക്ക് പഞ്ചായത്തംഗം ബെസ്റ്റിന്‍ ചേറ്റൂര്‍ മുഖ്യപ്രഭാഷണം നടത്തി. ആരക്കുഴ പഞ്ചായത്തംഗം ജാന്‍സി മാത്യു ഓണ സന്ദേശം നല്‍കി. താലൂക്ക് ലൈബ്രറി ജോയിന്‍റ് സെക്രട്ടറി പി.കെ. വിജയന്‍ സമ്മാനദാനം നിര്‍വഹിച്ചു. ലൈബ്രറി സെക്രട്ടറി ജോഷി പോള്‍, വൈസ് പ്രസിഡന്‍റ് ഡേവിസ് പാലാട്ടി തുടങ്ങിയവർ പ്രസംഗിച്ചു. തുടര്‍ന്നു വിവിധ കലാപരിപാടികളും നടന്നു.

ചില്‍ഡ്രന്‍സ് പാര്‍ക്കിന്‍റെ പ്രവര്‍ത്തന സമയം നീട്ടി

കൊച്ചി: ഓണാഘോഷത്തോടനുബന്ധിച്ച് ഇന്ദിര പ്രിയദര്‍ശനി ചില്‍ഡ്രന്‍സ് പാര്‍ക്കിന്‍റെ പ്രവര്‍ത്തന സമയം ഉച്ചയ്ക്ക് 12 മുതല്‍ രാത്രി 9.30 വരെ ദീർഘിപ്പിച്ചതായി ജില്ലാ ശിശുക്ഷേമ സമിതി അറിയിച്ചു. ഇതോടൊപ്പം ജില്ലാ ശിശുക്ഷേമ സമിതിയുടെയും ജില്ലാ ടൂറിസം പ്രമോഷന്‍ കൗണ്‍സിലിന്‍റെയും സംയുക്താഭിമുഖ്യത്തില്‍ നവീകരിച്ച മ്യൂസിക്കല്‍ ഫൗണ്ടന്‍റെ ഉദ്ഘാടനം നാളെ നടക്കുമെന്നും ശിശുക്ഷേമ സമിതി വൈസ് പ്രസിഡന്‍റ് അഡ്വ. കെ.എസ്. അരുണ്‍കുമാര്‍ പറഞ്ഞു. ഇന്ദിര പ്രിയദര്‍ശനി ചില്‍ഡ്രന്‍സ് പാര്‍ക്കില്‍ വൈകുന്നേരം ഏഴിന് മേയര്‍ എം. അനില്‍കുമാര്‍ ഉദ്ഘാടനം ചെയ്യും. ജില്ലാ ശിശുക്ഷേമ സമിതി അധ്യക്ഷന്‍ ജില്ലാ കളക്ടര്‍ ജി. പ്രിയങ്ക അധ്യക്ഷത വഹിക്കും. ഹൈബി ഈഡന്‍ എംപി, ടി.ജെ. വിനോദ് എംഎല്‍എ, ഡിടിപിസി സെക്രട്ടറി ലിജോ ജോസഫ് എന്നിവര്‍ പങ്കെടുക്കും. മറൈന്‍ ഡ്രൈവില്‍ നിന്ന് പാര്‍ക്കിലേക്കുള്ള പ്രവേശന കവാടം കുട്ടികള്‍ക്കായി തുറന്നു കൊടുക്കാനും തീരുമാനിച്ചതായും അദ്ദേഹം പറഞ്ഞു.

കടുങ്ങല്ലൂർ സ്‌കൂൾ മൈതാനം വെള്ളക്കെട്ടിൽ തന്നെ

ആലുവ: പത്തുലക്ഷം രൂപ അനുവദിച്ചിട്ടും പടിഞ്ഞാറേ കടുങ്ങല്ലൂർ സർക്കാർ ഹൈസ്കൂൾ ഗ്രൗണ്ട് വെള്ളക്കെട്ടിൽത്തന്നെ. മണ്ണിട്ട് കുഴികൾ അടയ്ക്കാനും ചുറ്റുമതിൽ കെട്ടാനുമായി അനുവദിച്ച ജില്ലാ പഞ്ചായത്തിന്‍റെ ഫണ്ട് വകമാറ്റിയതോടെയാണ് കുട്ടികൾ ഓടിക്കളിക്കേണ്ട മൈതാനം ചെളിക്കുഴിയായി ഓണക്കാലത്തും കിടക്കുന്നത്. ഇതിനെതിരെ നാട്ടുകാർ വിജിലൻസിൽ പരാതി നൽകിയിട്ടുണ്ട്. പടിഞ്ഞാറേ കടുങ്ങല്ലൂർ സർക്കാർ ഹൈസ്കൂളിൽ പുതിയ കെട്ടിടങ്ങൾ ഉയർന്നപ്പോൾ ഒരു കിലോമീറ്റർ അകലെയായി മൈതാനം വാങ്ങുകയായിരുന്നു. വൃന്ദാവൻ മൈതാനം എന്നാണ് ഈ സ്ഥലം അറിയപ്പെടുന്നത്. വൈകുന്നേരങ്ങളിൽ നാട്ടുകാരുടെയും കളിസ്ഥലമായിരുന്നു ഇത്. തുടർച്ചയായി മഴ പെയ്യുന്നതിനാൽ വൃന്ദാവൻ മൈതാനത്ത് മഴവെള്ളം കെട്ടിക്കിടക്കുകയാണ്. എന്നാൽ കടുങ്ങല്ലൂർ പഞ്ചായത്ത് ഫണ്ട് അനുവദിപ്പിച്ചെടുക്കാൻ മൈതാനത്തെ കറവപ്പശു ആക്കിയെന്നാണ് നാട്ടുകാർ ആരോപിക്കുന്നത്. എല്ലാ സർക്കാരുകളും മൈതാനം നവീകരിക്കാനായി തുക പ്രഖ്യാപിക്കാറുണ്ട്. അനുവദിച്ച 1.40 കോടിയിൽ നിന്ന് ആദ്യഗഡുവായാണ് ജില്ലാ പഞ്ചായത്ത് 10 ലക്ഷം നൽകിയത്ത്. കാന പണിയാനും കമാനം കെട്ടാനും അനുവദിച്ച തുക വകമാറ്റിയെന്നാണ് പരാതി. തുക പിൻവലിച്ചത് ഹൈസ്‌കൂൾ പ്രധാനാധ്യാപിക അറിഞ്ഞതുമില്ല. കഴിഞ്ഞ ദിവസം വിജിലൻസ് സ്ഥലത്തെത്തി പരിശോധന നടത്തിയിരുന്നു. അനുവദിച്ച തുക തീർന്നെന്നുപറഞ്ഞ് കാനയുടെയും കമാനത്തിന്‍റെയും നിർമാണം കരാറുകാരൻ നിർത്തിവച്ചിരിക്കുകയാണ്. കാന നിർമിച്ചാൽ അഴുക്കു വെള്ളമെല്ലാം ജലസേചന കനാലിലേക്കും സമീപത്തെ വീടുകളിലേക്കു ഒഴുകുമെന്നാണ് നാട്ടുകാരുടെ മുന്നറിയിപ്പ്. വീതിയില്ലാതെ കവാടവും, ചെരിവ് നോക്കാതെ കാനയും നിർമിച്ചതാണ് പാതിവഴിയിൽ ആയിരിക്കുന്നത്. പൊതുഫണ്ട് തട്ടിയെടുത്ത ഉദ്യോഗസ്ഥരിൽനിന്ന് തുക തിരിച്ചുപിടിക്കണം എന്നാണ് നാട്ടുകാരുടെ ആവശ്യം. ഗ്രൗണ്ട് സംരക്ഷണസമിതിയുടെ നേതൃത്വത്തിൽ ഇനിയും സമരത്തിന് ഇറങ്ങാനുള്ള നീക്കത്തിലാണ്.

റെസ്റ്റ് ഹൗസ് ബ്ലോക്കിനു ശിലയിട്ടു

വൈപ്പിന്‍: ഒന്നരക്കോടി രൂപ ചെലവില്‍ നിര്‍മിക്കുന്ന ഞാറക്കല്‍ റെസ്റ്റ്ഹൗസിലെ പുതിയ ബ്ലോക്കിന്‍റെ നിര്‍മാണോദ്ഘാടനം കെ.എന്‍. ഉണ്ണിക്കൃഷ്ണന്‍ എംഎല്‍എ നിര്‍വഹിച്ചു. 1.31 കോടി ചെലവഴിച്ചാണ് നിര്‍മാണം. നിലവില്‍ ഒരു വിഐപി റൂം, പിഡബ്ല്യുഡി റൂം, രണ്ട് പബ്ലിക് റൂം, ചെറിയ ഹാള്‍ എന്നിവ മാത്രമാണ് ഇവിടെയുള്ളത്. ചടങ്ങില്‍ ഞാറക്കല്‍ പഞ്ചായത്ത് പ്രസിഡന്‍റ് മിനി രാജു അധ്യക്ഷത വഹിച്ചു.

മാലിന്യം തള്ളുന്നത് കണ്ടെത്താന്‍ എല്ലാ ഡിവിഷനിലും കാമറകള്‍

കൊച്ചി: പൊതുയിടങ്ങളില്‍ മാലിന്യം തള്ളുന്നത് തടയാന്‍ എല്ലാ ഡിവിഷനുകളിലും കാമറകള്‍ സ്ഥാപിക്കുന്ന പദ്ധതി വേഗത്തില്‍ പൂര്‍ത്തിയാക്കാന്‍ കൊച്ചി മേയര്‍ എം. അനില്‍കുമാര്‍ സെക്രട്ടറിക്ക് നിര്‍ദേശം നല്‍കി. നിലവില്‍ 130 ഇടങ്ങളിലാണ് കാമറകളുള്ളത്. 300 എണ്ണമാണ് ആകെ സ്ഥാപിക്കേണ്ടത്. ശേഷിക്കുന്ന കാമറകള്‍ കൂടി കൗണ്‍സിലര്‍മാര്‍ നിര്‍ദേശിച്ച ഇടങ്ങളില്‍ സ്ഥാപിക്കണമെന്ന് മേയര്‍ നിര്‍ദേശം നല്‍കി. നിലവില്‍ സ്ഥാപിച്ചിട്ടുള്ള കാമറകളില്‍ അധികവും പ്രവര്‍ത്തിക്കുന്നത് സ്വകാര്യ വ്യക്തികളുടെ വീടുകളില്‍ നിന്നും കടകളില്‍ നിന്നും വൈദ്യുതി ഉപയോഗിച്ചാണെന്ന് പ്രതിപക്ഷം ചൂണ്ടിക്കാട്ടി. കാമറകള്‍ സ്ഥിരമായി പ്രവര്‍ത്തിക്കുന്നതിന് ഇതു തടസമാകുന്നുണ്ടെന്നും നേരിട്ട് വൈദ്യുതി ലഭ്യമാക്കണമെന്നും പ്രതിപക്ഷം ആവശ്യപ്പെട്ടു. ഇക്കാര്യത്തില്‍ കെഎസ്ഇബിയുമായി ചര്‍ച്ച നടത്താനും സെക്രട്ടറിയോട് മേയര്‍ പറഞ്ഞു. മാലിന്യം വലിച്ചെറിയുന്നത് തടയാന്‍ പോലീസുമായി സഹകരിച്ച് സ്‌ക്വാഡ് പ്രവര്‍ത്തനം ശക്തമാക്കാനും മേയര്‍ നിര്‍ദേശം നല്‍കി.

ബൈക്ക് പോസ്റ്റിലിടിച്ച് യാത്രക്കാർക്ക് പരിക്കേറ്റു

വൈപ്പിൻ: സ്കൂട്ടറിന്‍റെ ഹാൻഡിലിൽ തട്ടി നിയന്ത്രണം വിട്ട് ബൈക്ക് വൈദ്യുത പോസ്റ്റിലിടിച്ച് ബൈക്ക് യാത്രക്കാർക്ക് പരിക്കേറ്റു. എളങ്ങുന്ന പുഴ കച്ചാപറമ്പിൽ സുരേഷിന്‍റെ മകൻ സൂര്യരാമൻ (23), സുഹൃത്ത് എടത്തല പാലാഞ്ചേരി രാജൻ മകൻ അശ്വിൻരാജ് (19) എന്നിവർക്കാണ് പരിക്കേറ്റത്. കഴിഞ്ഞദിവസം ചാപ്പക്കടപ്പുറം ബീച്ച് റോഡിലായിരുന്നു അപകടം. ഇരുവരും എറണാകുളം മെഡിക്കൽ ട്രസ്റ്റ് ഹോസ്പിറ്റലിൽ ചികിത്സയിലായിരുന്നു.

കപ്പക്കൃഷിക്ക് തുടക്കമായി

മൂവാറ്റുപുഴ: മണ്ണിനൊപ്പം നാടിനൊപ്പം പദ്ധതിയുടെ ഭാഗമായി കെസിവൈഎം വാഴക്കുളം ഫൊറോനയുടെ ആഭിമുഖ്യത്തില്‍ കപ്പക്കൃഷിക്കു തുടക്കമായി. ഡയാലിസിസ് രോഗികളെ സാമ്പത്തികമായി സഹിക്കാനും യുവാക്കളെ കൃഷിയില്ലേക്ക് കൊണ്ടുവരാനുമാണ് പദ്ധതി ലക്ഷ്യമിടുന്നത്. കപ്പക്കോല്‍ നട്ടുകൊണ്ട് വാഴക്കുളം സെന്‍റ് ജോർജ് ഫൊറോനാ പള്ളി വികാരി ഫാ. ജോര്‍ജ് പൊട്ടക്കല്‍ ഉദ്ഘാടനം നിര്‍വഹിച്ചു. കെസിവൈഎം ഫൊറോന പ്രസിഡന്‍റ് ഷോണ്‍ ജോഷി, രൂപത ഡയറക്ടര്‍ ഫാ. സെബാസ്റ്റ്യന്‍ വള്ളോപ്പിള്ളില്‍, അസി. ഡയറക്ടര്‍ ഫാ. ആന്‍റണി വിളയപ്പിള്ളില്‍, വാഴക്കുളം ഫൊറോനാ ഡയറക്ടര്‍ ഫാ. ജോസഫ് കൊച്ചുപുത്തന്‍പുരയില്‍, അസി. ഡയറക്ടര്‍ ഫാ. കുര്യന്‍ കുരീക്കാട്ടില്‍, രൂപത ജനറല്‍ സെക്രട്ടറി അനു ബേബി എന്നിവര്‍ പങ്കെടുത്തു.

ഭിന്നശേഷി കലാമേള സംഘടിപ്പിച്ചു

കോതമംഗലം: ബ്ലോക്ക് പഞ്ചായത്ത് ഭിന്നശേഷി കലാമേള ദീപ്തം - 2025 വർണാഭമായി. ബ്ലോക്ക് പഞ്ചായത്തിന്‍റെയും ഐസിഡി എസ് അഡീഷണലിന്‍റെയും നേതൃത്വത്തിലാണ് ഭിന്നശേഷി കുട്ടികൾക്കായി കലാമേള സംഘടിപ്പിച്ചത്. ബ്ലോക്ക് പഞ്ചായത്ത് പരിധിയിലെ 10 പഞ്ചായത്തുകളിൽ നിന്നും 350 ഭിന്നശേഷി കലാകാരന്മാർ പങ്കെടുത്ത കലാമേള കോതമംഗലം മാർ ബേസിൽ കൺവെൻഷൻ സെന്‍ററിലാണ് അരങ്ങേറിയത്. മഹാബലിയുടെയും,വാമനന്‍റെയും പുരാണ കഥാപാത്രങ്ങളുടെയും വേഷത്തിൽ കുട്ടികൾ വിശിഷ്ടാതിഥികളെ ആനയിച്ചു. ബ്ലോക്ക് പഞ്ചായത്ത് വൈസ് പ്രസിഡന്‍റ് ഡയാന നോബി അധ്യക്ഷത വഹിച്ചു. പ്രസിഡന്‍റ് പി.എ.എം. ബഷീർ ഉദ്ഘാടനം ചെയ്തു. പഞ്ചായത്ത് പ്രസിഡന്‍റുമാരായ പി.കെ. ചന്ദ്രശേഖരൻ നായർ, സജി കെ. വർഗീസ്, ജെസി സാജു, ഗോപി മുട്ടത്ത്, ജിജി ഷിജു, ബ്ലോക്ക് പഞ്ചായത്ത് സ്ഥിരം സമിതി ചെയർമാൻമാരായ ജോമി തെക്കേക്കര, സാലി ഐപ്പ്, ജെയിംസ്കോറമ്പേൽ , ബ്ലോക്ക് പഞ്ചായത്ത് അംഗങ്ങളായ നിസാമോൾ ഇസ്മായിൽ, ആനിസ് ഫ്രാൻസിസ്, ടി.കെ. കുഞ്ഞുമോൻ, ലിസി ജോസഫ്, ആഷ ജെയിംസ്, ബിഡിഒ സി.ഒ. അമിത, സിഡിപിഒമാരായ ജിഷ ജോസഫ്, പിങ്കി കെ. അഗസ്റ്റിൻ എന്നിവർ പ്രസംഗിച്ചു. കലാമേളയിൽ ഭിന്നശേഷി കുട്ടികൾ വരച്ച ചിത്രങ്ങൾ ഫ്രെയിമിൽ ബ്ലോക്ക് പഞ്ചായത്ത് ഹാളിൽ സ്ഥാപിക്കുന്നതിനായി കൈമാറി.

കോതമംഗലം ബ്ലോക്കിലെ ഓണച്ചന്തകൾ ഇന്നാരംഭിക്കും

കോതമംഗലം: കൃഷിവകുപ്പിന്‍റെ നേതൃത്വത്തിൽ ഇന്ന് എല്ലാ കൃഷിഭവനുകളിലും ആരംഭിക്കുന്ന ഓണച്ചന്തകൾക്ക് ആവശ്യമായ പച്ചക്കറികളും കാർഷിക ഉത്പന്നങ്ങളും ബ്ലോക്ക് പഞ്ചായത്ത് അങ്കണത്തിൽ വിതരണം ചെയ്തു. ബ്ലോക്കുതല വിതരണോദ്ഘാടനം ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീർ നിർവഹിച്ചു. ബ്ലോക്ക് പരിധിയിലെ 10 പഞ്ചായത്തുകളിലെയും, മുനിസിപ്പാലിറ്റിയിലെയും 11 കൃഷി ഭവനുകൾക്കാണ് ഹോർട്ടികോർപ്പിൽ നിന്നും, പഞ്ചായത്തുകളിലെ കർഷകരിൽ നിന്നും സംഭരിച്ച 20 ടണ്ണോളം കാർഷിക ഉത്പന്നങ്ങൾ കൈമാറിയത്. ഇന്നു മുതൽ നാലുവരെ ഓണച്ചന്തകൾ പ്രവർത്തിക്കും. വിപണിവിലയിൽ നിന്നും 30 ശതമാനം കുറച്ചാണ് ഓണച്ചന്തകളിൽ വിൽക്കുന്നത്. പ്രാദേശികമായി കർഷകരുടെ ഉത്പന്നങ്ങൾ വിപണി വിലയിൽ നിന്നും 10 ശതമാനം വില കൂടുതൽ നൽകി സംഭരിക്കും. ഓണംവിപണിയിൽ വില നിയന്ത്രിക്കാനും,നല്ല നാടൻ ഉത്പന്നങ്ങൾ ആളുകൾക്ക് ലഭ്യമാക്കുകയാണ് സംസ്ഥാന സർക്കാർ ഓണസമൃദ്ധി ഓണച്ചന്ത കൊണ്ട് ലക്ഷ്യമിടുന്നത്. കർഷകരും, കർഷക ഗ്രൂപ്പുകളും നിർമിക്കുന്ന മൂല്യവർധിത ഉത്പന്നങ്ങൾ കേരള-അഗ്രോ ബ്രാൻഡിൽ ഓണച്ചന്തകൾ വഴി വില്പനയ്ക്ക് എത്തിച്ചിട്ടുണ്ട്. ബ്ലോക്ക് പഞ്ചായത്ത് വൈസ് പ്രസിഡന്‍റ് ഡയാന നോബി അധ്യക്ഷത വഹിച്ചു. കൃഷി അസിസ്റ്റന്‍റ് ഡയറക്ടർ പ്രിയമോൾ തോമസ്, ബ്ലോക്ക് പഞ്ചായത്ത് സ്ഥിരം സമിതി ചെയർമാൻമാരായ ജോമി തെക്കേക്കര, ജെയിംസ് കോറന്പേൽ, കൃഷി ഓഫീസർമാരായ ബോസ് മത്തായി, ജിജി ജോബ്, കെ.എ. സജി, കെ.എസ്. സണ്ണി, ആരിഫ മക്കാർ, കെ.എച്ച്. ജെസീന, എസ്. ഗ്രീഷ്മ, സൗമ്യ സണ്ണി, പി.കെ. സാജു, എൽദോ ഏബ്രഹാം, കെ.സി. സാജു, ബേസിൽ വി. ജോസഫ്, വിജയകുമാർ എന്നിവർ നേതൃത്വം നൽകി.

മൂവാറ്റുപു‌ഴയിൽ ട്രാഫിക് നിയന്ത്രണങ്ങൾക്ക് ഇളവ്

മൂവാറ്റുപുഴ : ഓണം പ്രമാണിച്ച് നഗരത്തിലെ ട്രാഫിക് നിയന്ത്രണങ്ങൾ പുനക്രമീകരിക്കാൻ തീരുമാനിച്ചതായി മാത്യു കുഴൽനാടൻ എംഎൽഎ അറിയിച്ചു.ഓണത്തിനു മുൻപായി നഗരത്തിലെ റോഡ് ടാറിംഗ് പൂർത്തിയാക്കി വ്യാപാരികൾക്കും പൊതുസമൂഹത്തിനും ആശ്വാസകരമായ സാഹചര്യം ഒരുക്കാമെന്നായിരുന്നു പ്രതീക്ഷയെന്നും എന്നാൽ കാലം തെറ്റിയ മഴ, ടാറിംഗ് ജോലികൾക്ക് പ്രതിസന്ധി സൃഷ്ടിച്ചുവെന്നും എംഎൽഎ പറഞ്ഞു. മഴ തുടരുന്ന സാഹചര്യമായതിനാൽ ചെറുകിട വാഹനങ്ങളുടെ ട്രാഫിക് പുനഃക്രമീകരിച്ച്, അതുവഴി നഗരത്തിലെ വ്യാപാരികൾക്കും പൊതുസമൂഹത്തിനും അല്പം ആശ്വാസം ഉണ്ടാകുമെന്ന പ്രതീക്ഷയിലാണെന്നും അദ്ദേഹം വ്യക്തമാക്കി. മഴ മാറുന്നതോടെ ടാറിംഗ് പ്രവർത്തനങ്ങൾ ഉടൻ പുനരാരംഭിക്കും. ആ സമയം ട്രാഫിക് വീണ്ടും ഇപ്പോഴത്തെ സാഹചര്യത്തിലേക്ക് മാറ്റും.

റോഡിന്‍റെ അറ്റകുറ്റപ്പണി ഉടനടി നടത്തണമെന്ന ആവശ്യം ശക്തം

കൂത്താട്ടുകുളം: മംഗലത്തുതാഴം-അമ്പലക്കുളം റോഡ് മെയിന്‍റനൻസ് ഉടനടി നടത്തണമെന്ന് ആവശ്യപ്പെട്ട് വാർഡ് കൗൺസിലർ എംഎൽഎക്ക് കത്ത് നൽകി. പാലാ-കൂത്താട്ടുകുളം റോഡിലെ കലുങ്കിന്‍റെ പുനർനിർമാണ പ്രവർത്തനങ്ങൾ നടക്കുന്നതിനാൽ ഇതുവഴിയുള്ള വാഹനങ്ങൾ മങ്കരത്തുതാഴം - അമ്പലക്കുളം വഴിയാണ് പോകുന്നത്. വാഹനത്തിരക്ക് വർധിച്ചതോടെ റോഡിന്‍റെ പല ഭാഗങ്ങളും ഇടിഞ്ഞു താഴ്ന്ന നിലയിലാണ്. റോഡ് ഗതാഗതം ദുഷ്കരമായ സാഹചര്യത്തിലാണ് വാർഡ് കൗൺസിലർ പ്രിൻസ് പോൾ ജോൺ സംഭവം അനൂപ് ജേക്കബ് എംഎൽഎയുടെ ശ്രദ്ധയിൽപ്പെടുത്തിയത്. ഇതേത്തുടർന്ന് എക്സിക്യൂട്ടീവ് എൻജിനീയറുമായി എംഎൽഎ സംസാരിക്കുകയും മെയിന്‍റനൻസിന് അനുവദിച്ചിട്ടുള്ള തുക ചെലവഴിച്ച് മംഗലത്ത് താഴം-കൂത്താട്ടുകുളം റോഡിൽ ഗതാഗതം പുനരാരംഭിക്കുന്ന മുറയ്ക്ക് അമ്പലക്കുളം-മംഗലത്ത് താഴം റോഡിന്‍റെ റീടാറിംഗ് നടത്തുന്നമെന്ന് അറിയിക്കുകയും ചെയ്തു.

കെസിബിസി മദ്യവിരുദ്ധ സമിതി രൂപത കുടുംബസംഗമം നടത്തി

കോതമംഗലം: കെസിബിസി മദ്യവിരുദ്ധ സമിതി കോതമംഗലം രൂപത കുടുംബസംഗമവും ആദരവും രാമല്ലൂര്‍ സേക്രഡ് ഹാര്‍ട്ട് എല്‍പി സ്കൂളില്‍ രൂപത വികാരി ജനറാള്‍ മോണ്‍. വിന്‍സന്‍റ് നെടുങ്ങാട്ട് ഉദ്ഘാടനം ചെയ്തു. രൂപത പ്രസിഡന്‍റ് ജെയിംസ് കോറമ്പേല്‍ അദ്ധ്യക്ഷത വഹിച്ചു. ബ്ലോക്ക് പഞ്ചായത്ത് സ്ഥിരം സമിതി ചെയര്‍മാന്‍മാരായ ജോമി തെക്കേക്കര, സാലി ഐപ്പ്,ആനീസ് ഫ്രാന്‍സിസ്, ലിസി ജോസഫ്, മാമച്ചന്‍ ജോസഫ്, ബീന റോജോ, രൂപത സെക്രട്ടറി ജോണി കണ്ണാടന്‍, ജോയി പടയാട്ടില്‍, ജോണ്‍സണ്‍ കറുകപ്പിള്ളി, ബിജു വെട്ടിക്കുഴ, മാത്യൂസ് നിരവത്ത്, സജി തെക്കേക്കര, മാര്‍ട്ടിന്‍ കീഴേമാടന്‍, എ.സി. രാജശേഖരന്‍, പോള്‍ കൊങ്ങാടന്‍, സിജോ കൊട്ടാരത്തില്‍, കെ.വി. ഏണസ്റ്റ്, ജോബി ജോസഫ്, പി.സി. ജോര്‍ജ്, കുര്യന്‍ കോതമംഗലം, ബൈജു ജേക്കബ്, ജിജു വറുഗീസ്, ഷൈനി കച്ചിറ, സുനില്‍ സോമന്‍, പി.വി. വറുഗീസ് എന്നിവര്‍ പ്രസംഗിച്ചു. ചടങ്ങിൽ ജെയിംസ് കോറമ്പേല്‍, ജോയ്സ് മുക്കുടം, ജോസ് കൈതമന, ജോയി പനയ്ക്കല്‍, ജീവകാരുണ്യപ്രസ്ഥാനമായ മന്നയുടെ ഭാരവാഹികള്‍ എന്നിവരെ ആദരിച്ചു.

കിഫ്ബി ധനസഹായത്തോടെ പൈങ്ങോട്ടൂരിൽ 8.82 കോടിയുടെ ശുദ്ധജല പദ്ധതി

പോത്താനിക്കാട്: കിഫ്ബി ധനസഹായത്തോടെ പൈങ്ങോട്ടൂര്‍ പഞ്ചായത്തില്‍ നടപ്പിലാക്കുന്ന സമഗ്ര ശുദ്ധജല വിതരണ പദ്ധതിയുടെ നിര്‍മാണ ഉദ്ഘാടനം നാളെ ഉച്ചയ്ക്ക് 12 ന് മന്ത്രി റോഷി അഗസ്റ്റിന്‍ നിര്‍വഹിക്കും. 28.82 കോടിയാണ് പദ്ധതിക്കായി കിഫ്ബി വഴി അനുവദിച്ചിട്ടുള്ളത്. 2016-2017 ലെ സംസ്ഥാന ബജറ്റില്‍ 23 കോടി രൂപ അനുവദിച്ച് പ്രഖ്യാപിച്ച പദ്ധതി വിശദ പദ്ധതി രേഖ തയാറാക്കിയപ്പോള്‍ ചെലവ് 28.82 കോടി രൂപയായി ഉയരുകയും 2019 ല്‍ കിഫ്ബിയില്‍ ഭരണാനുമതി ലഭിക്കുകയും ചെയ്തിരുന്നു. എന്നാല്‍ സ്ഥലമേറ്റെടുക്കല്‍, വനഭൂമി വിട്ടുകിട്ടല്‍ തുടങ്ങിയ നൂലാമാലകളില്‍ പെട്ട് പദ്ധതി ഇഴയുകയായിരുന്നു. രണ്ടുവട്ടം കരാര്‍ ക്ഷണിക്കുകയും ചെയ്തു. കരാര്‍ ഏറ്റെടുക്കാന്‍ കരാറുകാര്‍ ആരും മുന്നോട്ട് വരാതിരുന്നതും പദ്ധതി വൈകാന്‍ കാരണമായി. ഇപ്പോള്‍ സാങ്കേതിക പ്രശ്‌നങ്ങള്‍ എല്ലാം പരിഹരിച്ച് പുതിയ കരാര്‍ നല്‍കി നിര്‍മ്മാണം ആരംഭിക്കുന്നതോടെ പൈങ്ങോട്ടൂര്‍ പഞ്ചായത്തിലെ ജനങ്ങളുടെ പതിറ്റാണ്ടുകളായ കുടിവെള്ള പ്രശ്‌നത്തിനുള്ള ശാശ്വത പരിഹാരമാവുകയാണ്. കാളിയാര്‍ പുഴയുടെ തീരത്ത് പനങ്കര കാവുംകഴത്തില്‍ ആറ് മീറ്റര്‍ വ്യാസമുള്ള കിണറും പമ്പുഹൗസും 50 എച്ച്പി മോട്ടോറും സ്ഥാപിച്ച് പൊതകുളത്തെ പതിരിപ്പാറയിലെ 50 സെന്‍റ് സ്ഥലത്ത് സ്ഥാപിക്കുന്ന 40 ലക്ഷം ലിറ്റര്‍ സംഭരണശേഷിയുള്ള ശുചീകരണ പ്ലാന്റിലേയ്ക്ക് വെള്ളം പമ്പു ചെയ്ത് ശുചീകരിച്ചശേഷം പഞ്ചായത്തിന്‍റെ വിവിധ ഭാഗങ്ങളില്‍ നിര്‍മിക്കുന്ന നാല് സംഭരണികളില്‍ വെള്ളം എത്തിച്ച് വിതരണം ചെയ്യുന്ന രീതിയിലാണ് പദ്ധതി വിഭാവനം ചെയ്തതിട്ടുള്ളത്. കൂടാതെ 15 കിലോമീറ്റര്‍ നീളത്തില്‍ പമ്പിംഗ് ലൈനിനുള്ള പൈപ്പുകളും 47 കിലോമീറ്റര്‍ നീളത്തില്‍ വിതരണ പൈപ്പ് ലൈനുകളും സ്ഥാപിക്കും. കടവൂര്‍ ഗവ. വൊക്കേഷണല്‍ ഹയര്‍ സെക്കന്‍ഡറി സ്‌കൂള്‍ ഓഡിറ്റോറിയത്തില്‍ നടക്കുന്ന ഉദ്ഘാടന ചടങ്ങില്‍ മാത്യു കുഴല്‍നാടന്‍ എംഎല്‍എ അധ്യക്ഷത വഹിക്കും. ഡീന്‍ കുര്യാക്കോസ് എംപി മുഖ്യാതിഥിയാകും.

എസ്എൻഡിപി ശാഖ യോഗത്തിന്‍റെ ഓഫീസ് മന്ദിരോദ്ഘാടനം

പറവൂര്‍: കരിമ്പാടം എസ്എന്‍ഡിപി ശാഖാ യോഗത്തിന്‍റെ ഓഫീസ് മന്ദിര ഉദ്ഘാടനവും ഗുരുമന്ദിര സമര്‍പ്പണവും യോഗം ജനറല്‍ സെക്രട്ടറി വെള്ളാപ്പള്ളി നടേശന്‍ നിര്‍വഹിച്ചു. താലൂക്ക് യൂണിയന്‍ അഡ്മിനിസ്‌ട്രേറ്റീവ് കമ്മിറ്റി ചെയര്‍മാന്‍ സി.എന്‍. രാധാകൃഷ്ണന്‍ അധ്യക്ഷത വഹിച്ചു. ആലുവ അദ്വൈതാശ്രമ മഠാധിപതി ധര്‍മ്മചൈതന്യ, ജയന്തന്‍ ശാന്തി, യൂണിയന്‍ കണ്‍വീനര്‍ ഷൈജു മനയ്ക്കപ്പടി, യോഗം ഡയറക്ടര്‍മാരായ ഇ.എസ്. ഷീബ, പി.എസ്. ജയരാജ്, എം.ആര്‍. സുദര്‍ശനന്‍, ബി.സുധ, എം.പി. ബിനു, ഡി.ബാബു, കണ്ണന്‍ കൂട്ടുകാട്, ഡി.പ്രസന്നകുമാര്‍, ഇ.സി. ശശി എന്നിവര്‍ സംസാരിച്ചു.

അമൃതയില്‍ ബിരുദ സമര്‍പ്പണം നടന്നു

കൊച്ചി: അമൃത വിശ്വവിദ്യാപീഠം കൊച്ചി ഹെല്‍ത്ത് സയന്‍സസ് കാമ്പസില്‍ ബിരുദ സമര്‍പ്പണം നടന്നു. അമൃത കോളജ് ഓഫ് നഴ്‌സിംഗ്, അമൃത സ്‌കൂള്‍ ഓഫ് നാനോ സയന്‍സസ് ആന്‍ഡ് മോളിക്യുലാര്‍ മെഡിസിന്‍, അമൃത സ്‌കൂള്‍ ഓഫ് ഫാര്‍മസി, സ്‌കൂള്‍ ഓഫ് ബിസിനസ് എന്നിവിടങ്ങളിലെ 416 വിദ്യാര്‍ഥികളാണ് രണ്ട് ദിവസങ്ങളിലായി നടന്ന ചടങ്ങില്‍ ബിരുദങ്ങള്‍ ഏറ്റുവാങ്ങിയത്. വിവിധ കോഴ്‌സുകളിലായി മികവ് തെളിയിച്ച 34 പേര്‍ക്ക് മെഡലുകള്‍ സമ്മാനിച്ചു. കോളജ് ഓഫ് നഴ്‌സിംഗ് ബിരുദ സമര്‍പ്പണ ചടങ്ങ് കേരള നഴ്‌സസ് ആന്‍ഡ് മിഡ്‌വൈവ്‌സ് കൗണ്‍സില്‍ രജിസ്ട്രാര്‍ ഡോ. പി.എസ്. സോന ഉദ്ഘാടനം ചെയ്തു. മാതാ അമൃതാനന്ദമയി മഠം ജനറല്‍ സെക്രട്ടറി സ്വാമി പൂര്‍ണാമൃതാനന്ദപുരി, കാലടി സംസ്‌കൃത സര്‍വകലാശാല മുന്‍ വിസി ഡോ. കെ.എസ്. രാധാകൃഷ്ണന്‍, ചെന്നൈ എസ്ആര്‍എം ഇന്‍സ്റ്റിറ്റ്യൂട്ട് ഓഫ് സയന്‍സ് ആന്‍ഡ് ടെക്‌നോളജിയിലെ പ്രഫ. ഡോ. എ. അജയഘോഷ്, സിഫൈ ടെക്‌നോളജീസ് ലിമിറ്റഡ് വൈസ് പ്രസിഡന്‍റ് ഗണേഷ് ശങ്കരരാമന്‍, അമൃത വിശ്വവിദ്യാപീഠം രജിസ്ട്രാര്‍ ഡോ.പി. അജിത് കുമാര്‍, ഡോ. ശാന്തി കുമാര്‍ വി. നായര്‍, ഡോ.യു. കൃഷ്ണകുമാര്‍, ഡോ. കെ.ടി. മോളി, ഡോ. രാജീവ് പ്രസാദ്, ഡോ.എം. സബിത എന്നിവര്‍ ചടങ്ങില്‍ പങ്കെടുത്തു.

ഭക്ഷ്യക്കിറ്റുകളും വിദ്യാഭ്യാസ പുരസ്കാരങ്ങളും സമ്മാനിച്ച് ഓണാഘോഷം

ഫോർട്ടുകൊച്ചി: നവജീവൻ പ്രേക്ഷിത സംഘത്തിന്‍റെ നേതൃത്വത്തിൽ രോഗികൾക്കും വിവിധ മേഖലകളിൽ വിജയം കൈവരിച്ചവർക്കും പുരസ്കാരങ്ങൾ നല്കി ഓണം ആഘോഷിച്ചു. കുമ്പളങ്ങി സെന്‍റ് പീറ്റേഴ്സ് പാരീഷ് ഹാളിൽ നടന്ന ആഘോഷ പരിപാടികൾ സിനിമാതാരം പൗളി വത്സൻ ഉദ്ഘാടനം ചെയ്തു. പ്രസിഡന്‍റ് മേരി റെയ്ചൽ അധ്യക്ഷത വഹിച്ചു. കിൻഫ്ര ചെയർമാൻ സാബു ജോർജ് മുഖ്യാതിഥിയായി പങ്കെടുത്തു. ഫാ. ആന്‍റണി കാനപ്പിള്ളി ഓണസന്ദേശം നല്കി. ഫാ. ആന്‍റണി തളുതറ ജേതാക്കൾക്ക് പുരസ്കാരങ്ങൾ നല്കി ആദരിച്ചു. കൗൺസിലർ ഷീബാലാൽ ഭക്ഷ്യക്കിറ്റുകളുടെ വിതരണം നടത്തി. പഞ്ചായത്തംഗം അഡ്വ. മേരി ഹർഷ, മുൻ ഗ്രാമ പഞ്ചായത്ത് പ്രസിഡന്‍റ് മാർട്ടിൻ ആന്‍റണി, കോ-ഓർഡിനേറ്റർ ജോൺസൻ വള്ളനാട്ട് എന്നിവർ പ്രസംഗിച്ചു. 500 ലേറെ രോഗികൾക്ക് ഭക്ഷ്യക്കിറ്റുകളും ഓണ സദ്യയും നല്കിക്കൊണ്ടാണ് കാരുണ്യ പ്രവർത്തന മേഖലയിൽ മികച്ച സേവനം നടത്തിവരുന്ന നവജീവൻ പ്രേക്ഷിത സംഘത്തിന്‍റെ ഈ വർഷത്തെ ഓണാഘോഷം നടത്തിയത്.

അങ്കമാലി ഉപജില്ലാ കലാമേള : മൂക്കന്നൂർ എസ്എച്ച്ഒഎസിൽ; സംഘാടക സമിതി രൂപീകരിച്ചു

അങ്കമാലി : അങ്കമാലി ഉപജില്ല കലാമേള മൂക്കന്നൂർ സേക്രഡ് ഹാർട്ട് ഓർഫനേജ് ഹൈസ്കൂളിൽ ഒക്ടോബർ 15 മുതൽ 18 വരെ നടക്കും. കലാമേളയുടെ സംഘാടകസമിതി രൂപീകരണ യോഗം ഇതേ വിദ്യാലയത്തിൽ സംഘടിപ്പിച്ചു. റോജി എം. ജോൺ എംഎൽഎ ഉദ്ഘാടനം നിർവഹിച്ചു. യോഗത്തിൽ മൂക്കന്നൂർ പഞ്ചായത്ത് പ്രസിഡന്‍റ് കെ.വി. ബിബീഷ് അധ്യക്ഷത വഹിച്ചു. 12 വേദികളിലായി സംഘടിപ്പിക്കുന്ന കലാമേളയിൽ 125 ഓളം സ്കൂളുകളിൽ നിന്നും 5,000ഓളം കുട്ടികൾ പങ്കെടുക്കും. മേളയിൽ പങ്കെടുക്കുന്ന എല്ലാ കുട്ടികൾക്കും എസ്കോർട്ട് അധ്യാപകർക്കും ഭക്ഷണം ഏർപ്പെടുത്തിയിട്ടുണ്ട്. കലാമേളയുടെ നടത്തിപ്പിനായി രാഷ്ട്രീയ, സാമൂഹിക, സാമ്പത്തിക, ആത്മീയ മേഖലകളിലെ 101 അംഗങ്ങളെ ഉൾപ്പെടുത്തി11 കമ്മിറ്റികൾ രൂപീകരിച്ചു. അങ്കമാലി നഗരസഭാധ്യക്ഷൻ അഡ്വ. ഷിയോ പോൾ, ബ്ലോക്ക് പഞ്ചായത്ത് പ്രസിഡന്‍റ് കൊച്ചുത്രേസ്യ തങ്കച്ചൻ, മൂക്കന്നൂർ പഞ്ചായത്ത് വൈസ് പ്രസിഡന്‍റ് ഗ്രേസി ചാക്കോ, ജില്ലാ- ബ്ലോക്ക്- ഗ്രാമപഞ്ചായത്ത് മെമ്പർമാർ, എഇഒ സീന പോൾ, സ്കൂൾ മാനേജർ ബ്രദർ വർഗീസ് മഞ്ഞളി, മൂക്കന്നൂർ സെന്‍റ് മേരീസ് ഫൊറോന പള്ളി വികാരി ഫാ. ജോസ് പൊള്ളയിൽ, സ്കൂൾ പ്രധാനാധ്യാപിക സോണിയ വർഗീസ്, പിടിഎ പ്രസിഡന്‍റ് നൈജോ ആന്‍റണി, സ്റ്റാഫ് സെക്രട്ടറി ഡോ. നിജോ ജോസഫ് എന്നിവർ പ്രസംഗിച്ചു.

ഗോശ്രീ സമാന്തരപാലം തുറന്നു

വൈപ്പിന്‍: രണ്ടര മാസമായി അറ്റകുറ്റപ്പണികള്‍ക്കായി അടച്ചിട്ട ഗോശ്രീ വല്ലാര്‍പാടം മുളവുകാട് സമാന്തര പാലം തുറന്നു. പാലം തുറന്നതോടെ വൈപ്പിന്‍ ദ്വീപിലേക്കുള്ള യാത്രക്കാര്‍ അനുഭവിച്ച ഗതാഗത പ്രശ്‌നത്തിനാണ് പരിഹാരമായത്. ഓണക്കാലമായതിനാല്‍ മാവേലിയെ മുന്‍നിര്‍ത്തി റസിഡന്‍സ് അസോസിയേഷന്‍ അപ്പക്‌സ് സംഘടനയായ ഫ്രാഗിന്‍റെ പ്രസിഡന്‍റ് വി.പി. സാബു, ജനറല്‍ സെക്രട്ടറി അനില്‍ പ്ലാവിന്‍സ് എന്നിവരുടെ നേതൃത്വത്തില്‍ ജനകീയ ഉദ്ഘാടന ചടങ്ങോടെയാണ് പാലം വീണ്ടും തുറന്നുകൊടുത്തത്.

ഓണം വിപണന പ്രദർശനമേള

നെടുമ്പാശേരി: പാറക്കടവ് ബ്ലോക്ക് പഞ്ചായത്തിന്‍റെ ഓണം വിപണന പ്രദര്‍ശനമേള തുടങ്ങി. ബ്ലോക്ക് പഞ്ചായത്ത് പ്രസിഡന്‍റ് ടി.വി. പ്രദീഷ് അധ്യക്ഷത വഹിച്ച ചടങ്ങില്‍ ചെറുവയല്‍ രാമന്‍ ഉദ്ഘാടനം ചെയ്തു. അന്‍വര്‍ സാദത്ത് എംഎല്‍എ മുഖ്യാതിഥിയായിരുന്നു. പഞ്ചായത്ത് പ്രസിഡന്‍റുമാരായ എസ്.വി. ജയദേവന്‍, റോസി ജോഷി, ജില്ലാ പഞ്ചായത്ത് സ്റ്റാന്‍ഡിംഗ് കമ്മിറ്റി ചെയര്‍മാന്‍ എം.ജെ. ജോമി, ബ്ലോക്ക് പഞ്ചായത്ത് വൈസ് പ്രസിഡന്‍റ് താരാ സജീവ്, സ്ഥിരം സമിതി അധ്യക്ഷന്മാരായ സി.എം. വര്‍ഗീസ്, അഡ്വ. ടി.എ. ഷബീറലി, ആനി കുഞ്ഞുമോന്‍ എന്നിവര്‍ പങ്കെടുത്തു.

കിഴക്കുംവേലി തോട് കനാല്‍പാലത്തിന്‍റെ നിര്‍മാണം തുടങ്ങി

പെരുമ്പാവൂര്‍: കൂവപ്പടി പഞ്ചായത്തിലെ മാവേലിപ്പടി കിഴക്കുംവേലി തോട് കനാല്‍പാലത്തിന്‍റെ നിര്‍മാണം ആരംഭിച്ചു. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍ നിര്‍മാണോദ്ഘാടനം നിർവഹിച്ചു. പഞ്ചായത്ത് പ്രസിഡന്‍റ് മായ കൃഷ്ണകുമാര്‍ അധ്യക്ഷത വഹിച്ചു. വൈസ് പ്രസിഡന്‍റ് എം.ഒ. ജോസ്, വാര്‍ഡ് വികസന സമിതിയംഗങ്ങളായ ജോഷി സി. പോള്‍, അനില്‍ ജോസ്, പി.എ. ജോസ്, ഷിജോ പൗലോസ്, ഷാജി മുഹമ്മദ്, പി.ആര്‍. ജോണി, അഖില്‍ റാഫേല്‍, തോമസ് മാവേലി എന്നിവര്‍ പ്രസംഗിച്ചു. മനോജ് മൂത്തേടന്‍റെ വികസന ഫണ്ട് 11 ലക്ഷം രൂപ ഉപയോഗിച്ചാണ് പാലം നിര്‍മിക്കുന്നത്.

അതിനൂതന ചികിത്സാരീതികള്‍ സാധാരണക്കാര്‍ക്കും പ്രാപ്യമാകണം: കാതോലിക്കാ ബാവ

കൊച്ചി: ആരോഗ്യ മേഖലയിലെ അതിനൂതന സൗകര്യങ്ങള്‍ സാധാരണക്കാര്‍ക്കും പ്രാപ്യമാകണമെന്ന് മലങ്കര ഓര്‍ത്തഡോക്‌സ് സുറിയാനി സഭാധ്യക്ഷന്‍ ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാ ബാവാ. ആരോഗ്യമേഖലയില്‍ പ്രവര്‍ത്തിക്കുന്ന സഭാംഗങ്ങള്‍ക്കായി എറണാകുളം സെന്‍റ് മേരീസ് കത്തീഡ്രലില്‍ സംഘടിപ്പിച്ച മെഡിക്കോണ്‍ കോണ്‍ഫറന്‍സ് ഉദ്ഘാടനം ചെയ്യുകയായിരുന്നു അദ്ദേഹം. യൂഹാനോന്‍ മാര്‍ പോളിക്കാര്‍പ്പോസ് മെത്രാപ്പോലീത്ത അധ്യക്ഷത വഹിച്ചു.

പെരുമ്പാവൂരിൽ വെട്ടം പദ്ധതിക്കു നാളെ തുടക്കം

പെരുമ്പാവൂര്‍: പെരുമ്പാവൂര്‍ നഗരസഭാ പരിധിയില്‍ പഴയ ലൈറ്റുകള്‍ മാറ്റി എല്‍ഇഡി ലൈറ്റുകള്‍ സ്ഥാപിക്കുന്ന വെട്ടം പദ്ധതിക്കു നാളെ തുടക്കമാകും. പഴയ സോഡിയം വേപ്പര്‍ ലാമ്പുകള്‍, ബള്‍ബുകള്‍, ട്യൂബ് ലൈറ്റുകള്‍ എന്നിവ മുഴുവനായി മാറ്റി പകരം 36 വാട്ട് ശേഷിയുള്ള 5,000 പുതിയ എല്‍ഇഡി ലൈറ്റുകള്‍ സ്ഥാപിക്കുന്നതാണ് പദ്ധതി. കാലടി ജംഗ്ഷന്‍, മഹാത്മാഗാന്ധി പ്രതിമ മുതല്‍ പെരുമ്പാവൂര്‍ ഗേള്‍സ് ഹയര്‍ സെക്കന്‍ഡറി സ്‌കൂള്‍ വരെയുള്ള മീഡിയനുകളില്‍, അങ്കമാലി-മൂവാറ്റുപുഴ റോഡിലെ കെഎസ്ടിപി സ്ഥാപിച്ച ഇലക്ട്രിക് പോസ്റ്റുകള്‍ എന്നിവിടങ്ങളില്‍ 90 വാട്ട് എല്‍ഇഡി ലൈറ്റുകള്‍ സ്ഥാപിച്ചു. നഗരസഭ നേരിട്ടാണ് ലൈറ്റുകളുടെ പരിപാലനവും മെയിന്‍റനന്‍സും. പുതിയ ലൈറ്റുകള്‍ക്ക് മൂന്നു വര്‍ഷത്തെ വാറന്‍റിയുണ്ട്. മാത്രമല്ല വൈദ്യുതി ചാര്‍ജിലും ഗണ്യമായ കുറവുണ്ടാകും. അതോടൊപ്പം നഗരത്തിലെ നാല് ഹൈമാക്‌സ് ലൈറ്റുകള്‍ പുതുക്കി സ്ഥാപിക്കുകയും 30 മിനി മാക്‌സ് ലൈറ്റുകള്‍ പൂര്‍ണമായും അറ്റകുറ്റപ്പണി നടത്തി വരുകയും ചെയ്യുന്നു. ഇതോടെ നഗരത്തിലെ മുഴുവന്‍ പ്രധാന റോഡുകളും,ജംഗ്ഷനുകളും,പൊതുസ്ഥലങ്ങളും കൂടുതല്‍ പ്രകാശിതമാകും. 1.30 കോടി രൂപ ചെലവഴിച്ചാണ് പദ്ധതി പൂര്‍ത്തിയാക്കിയത്. വെട്ടം പദ്ധതിയുടെ സ്വിച്ച് ഓണ്‍ കര്‍മം ബെന്നി ബഹനാന്‍ എംപി രണ്ടിന് വൈകിട്ട് ഏഴിന് നിര്‍വഹിക്കും.

ചെറായി ബീച്ചിൽ സന്ദർശകരുടെ വാഹനപാർക്കിംഗ് വെള്ളക്കെട്ടിൽ

ചെറായി: ലോകോത്തര ബീച്ച് ടൂറിസം കേന്ദ്രം എന്ന് ഊറ്റം കൊള്ളുന്ന ചെറായി ബീച്ചിൽ സന്ദർശകരുടെ വാഹനങ്ങൾ പാർക്കു ചെയ്യേണ്ടത് വെള്ളക്കെട്ടിൽ. വാഹനം പാർക്കു ചെയ്ത് വെള്ളക്കെട്ടിലൂടെ നടന്നുവേണം സന്ദർശകർക്ക് ബീച്ചിലെത്താൻ. മഴ പെയ്താൽ ഒരു തുള്ളി വെള്ളം പോലും ഒഴുകിപ്പോകാതെ പാർക്കിംഗ് ഏരിയയിൽ തന്നെ കെട്ടി നിൽക്കുന്നതാണ് ഇവിടുത്തെ പ്രതിസന്ധിക്ക് കാരണം. ബീച്ചിന്‍റെ പാർക്കിംഗ് ഏരിയയോട് ചേർന്ന തീരദേശ റോഡ് ഉയരം കൂട്ടി പുനർനിർമിച്ചപ്പോൾ വെള്ളം ഒഴുകിപ്പോകുവാനുള്ള സംവിധാനം ഉണ്ടാക്കിയില്ല. ഇനി റോഡ് കുത്തിപ്പൊളിച്ച് അടിയിലൂടെ കിഴക്കുവശത്തേക്ക് കുഴലുകൾ സ്ഥാപിച്ചാൽ മാത്രമേ വെള്ളം ഒഴിഞ്ഞുപോകൂ. ഇതിനായി ഉത്തരവാദിത്തപ്പെട്ട ജില്ലാ ടൂറിസം പ്രമോഷൻ കൗൺസിൽ യാതൊരു നടപടിയും എടുക്കുന്നില്ലെന്ന ആക്ഷേപം വ്യാപകമാണ്. അതേസമയം പാർക്കിംഗിൽ വണ്ടിപ്പേട്ട പിരിവ് തകൃതിയായി നടക്കുന്നുമുണ്ടെന്ന് സന്ദർശകർ പറയുന്നു .

പൂയംകുട്ടി പുഴയിലും പെരിയാറിലുമായി രണ്ട് കാട്ടാനകളുടെ ജഡം കൂടി

കോതമംഗലം: പൂയംകുട്ടിപുഴയിലും പെരിയാറിലുമായി രണ്ട് പിടിയാനകളുടെ ജഡം കൂടി കണ്ടെത്തി. രണ്ടും കുട്ടമ്പുഴ ഫോറസ്റ്റ് റേഞ്ച് പരിധിയില്‍ ഒന്പത് ആനകളുടെ ജഡമാണ് 16 ദിവസത്തിനിടെ പുഴയില്‍ ചെരിഞ്ഞ നിലയില്‍ കണ്ടെത്തിയത്. ഇന്നലെ ഉച്ചയോടെ പെരിയാറില്‍ പിണ്ടിമന പഞ്ചായത്തിലെ വേട്ടാമ്പാറക്കും വേങ്ങൂര്‍ പഞ്ചായത്തിലെ തൊടാക്കയത്തിനും മധ്യേ പാറക്കെട്ടില്‍ തങ്ങിനില്‍ക്കുന്ന നിലയിലായിരുന്നു ജഡം കണ്ടത്. ഈ ജഡം ശനിയാഴ്ച പൂയംകുട്ടിപുഴയിലൂടെ ഒഴുകി തട്ടേക്കാട് ഭാഗത്ത് കണ്ടിരുന്നു. പൂയംകുട്ടിയില്‍ മണികണ്ഠന്‍ചാല്‍ ചപ്പാത്തിന്‍റെ തൂണില്‍ തങ്ങിനില്‍ക്കുന്ന നിലയില്‍ രാവിലെ എട്ടിനാണ് മറ്റൊരു പിടിയാനയുടെ ജഡം കണ്ടത്. 20 വയസ് പ്രായം കണക്കാക്കുന്നു. രണ്ടിനും രണ്ടാഴ്ചയിലേറെ പഴക്കവുമുണ്ട്. വേട്ടാമ്പാറ ഭാഗത്ത് പെരിയാറില്‍ കണ്ടെത്തിയ ആനയുടെ ജഡാവശിഷ്ടം മാത്രമാണ് ഉള്ളതെന്ന് വനം അധികൃതര്‍ പറഞ്ഞു.

പോക്സോ നിയമം: സെമിനാർ സംഘടിപ്പിച്ചു

ആലുവ: ഇന്ത്യൻ അക്കാദമി ഓഫ് പീഡിയാട്രിക്സ് മധ്യകേരള ശാഖ, ഇന്ത്യൻ മെഡിക്കൽ അസോസിയേഷൻ മധ്യകേരള എന്നിവയുടെ ആഭിമുഖ്യത്തിൽ പോക്സോ നിയമം – മെഡിക്കൽ പ്രഫഷണലുകളുടെ പങ്ക് എന്ന വിഷയത്തിൽ സെമിനാർ നടന്നു. കേരള അഡ്മിനിസ്ട്രേറ്റീവ് ട്രൈബ്യൂണൽ ജസ്റ്റീസ് സി .കെ. അബ്ദുൽ റഹീം ഉദ്ഘാടനം ചെയ്തു. ഡോ. അശോക് കുമാർ, ഡോ. എം.എൻ. വെങ്കിടേശ്വരൻ, ഡോ. എ.കെ. റഫീഖ്, ഡോ. ശോഭന, ഡോ. എലിസബത്ത്, ഡോ. ഷിമ്മി പോൾസ് , അഡ്വ. മിന്‍റു ചെറിയാൻ തുടങ്ങിയവർ പ്രസംഗിച്ചു.

സഹോദരനെ വെട്ടിക്കൊലപ്പെടുത്താൻ ശ്രമിച്ച കേസിൽ പ്രതി അറസ്റ്റിൽ

കാലടി: സഹോദരനെ വെട്ടിക്കൊലപ്പെടുത്താൻ ശ്രമിച്ച കേസിൽ പ്രതി അറസ്റ്റിൽ. മഞ്ഞപ്ര വടക്കുംഭാഗം നടമുറിഭാഗത്ത് പൈനാടത്ത് വീട്ടിൽ ഷിജു(46)വിനെയാണ് കാലടി പോലീസ് അറസ്റ്റ് ചെയ്തത്. മുൻ വൈരാഗ്യം നിമിത്തം ശനിയാഴ്ച വൈകിട്ട് നടമുറി ഭാഗത്ത് വച്ച് വാക്കത്തി ഉപയോഗിച്ച് വെട്ടുകയായിരുന്നു. ഇൻസ്പെക്ടർ അനിൽ കുമാർ ടി. മേപ്പിള്ളി, എസ്ഐമാരായ ജോസി എം. ജോൺസൻ, ടി.വി. സുധീർ, റെജിമോൻ, ഷിജു, എഎസ്ഐ സെബാസ്റ്റ്യൻ, സീനിയർ സിപിഒമാരായ മനോജ്, സുമേഷ് എന്നിവരാണ് അന്വേഷണ സംഘത്തിലുണ്ടായിരുന്നത്.

ഓണവിപണിയിൽ ഓളമായി ഉയരക്കാരൻ ഓണത്തപ്പൻ

തൃപ്പൂണിത്തുറ: തിരുവോണത്തെ വരവേൽക്കാനെത്തിയ ചിത്രപ്പണികൾ ചെയ്ത ഉയരക്കാരൻ ഓണത്തപ്പൻ ഓണ വിപണിയിലെ താരമായി. മൂവാറ്റുപുഴ വാളകം കുണ്ടുവേലിൽ രാജപ്പനാണ് നാലരയടിയിലേറെ ഉയരത്തിൽ കഥകളിയും നെറ്റിപ്പട്ടവും ആലേഖനം ചെയ്ത ഡിസൈനർ ഓണത്തപ്പനെ വിപണിയിലെത്തിച്ചിരിക്കുന്നത്. മനോഹരമായ വർണങ്ങളിൽ നിറഞ്ഞുനിൽക്കുന്ന ഓണത്തപ്പൻ തൃപ്പൂണിത്തുറ സ്റ്റാച്ച്യൂ ജംഗ്ഷനിലെ വിപണിയിൽ മിന്നും താരമാണ്. 1000 രൂപയാണ് അഴകൊത്ത ഓണത്തപ്പന്‍റെ വില.കൂടാതെ 200 രൂപ മുതൽ 1200 രൂപ വരെ വിലയിൽ ഓണത്തപ്പന്മാരുടെ സെറ്റുകളും വിപണിയിലുണ്ട്. മുത്തിയമ്മ, അരകല്ല്, ആട്ടുകല്ല്, ചിരവ തുടങ്ങി പത്ത് ഇനങ്ങളാണ് ഒരു സെറ്റിലുള്ളത്. സ്റ്റാച്ച്യൂ ജംഗ്ഷനിലും പരിസരങ്ങളിലുമായി വാളകത്തെ വില്പനക്കാർ തന്നെ പത്തോളം പേരുണ്ട്. പാടത്തുനിന്ന് മണ്ണെടുക്കാൻ സാധ്യമല്ലാത്തതിനാൽ മൺപാത്രങ്ങൾ നിർമാണം നടത്തുന്ന കമ്പനിയിയിൽ നിന്നും അരച്ച മണ്ണ് വാങ്ങിയാണ് ഓണത്തപ്പനെ നിർമിക്കുന്നത്. അരച്ച മണ്ണിന് ഇത്തവണ കിലോയ്ക്ക് 40 രൂപയോളം വിലയുയർന്നെങ്കിലും ഓണത്തപ്പന്മാരെ കഴിഞ്ഞ വർഷങ്ങളിലെ വിലയ്ക്ക് തന്നെയാണ് വില്പനയ്ക്കെത്തിച്ചിരിക്കുന്നത്. കൂടാതെ ഓണം കളറക്കാൻ ഓലക്കുട ചൂടിയ മാവേലിമാരും ഓണവഞ്ചിയും വിപണിയിലുണ്ട്. ഓണത്തിന് പൂക്കച്ചവടം എല്ലായിടത്തുമുണ്ടെങ്കിലും ഓണത്തപ്പന്മാരുടെ മാത്രം വില്പനയ്ക്കായി സ്റ്റാച്ച്യൂ ജംഗ്ഷനിൽ കച്ചവടക്കാർ കേന്ദ്രീകരിക്കുന്നത് തൃപ്പൂണിത്തുറയുടെ ഒരു പ്രത്യേകതയാണ്. അതുകൊണ്ടുതന്നെ ഓണത്തപ്പനെ വാങ്ങണമെന്നതിനാൽ ഓണവിപണയിലെത്തുന്നവർ സ്റ്റാച്ച്യൂവിലെത്താതെ മടങ്ങുന്നതും വിരളമാണ്. തൊട്ടാൽ 'പൊള്ളും' ചിപ്സ് കൊച്ചി: തൂശനിലയിൽ വിളമ്പിയ ഓണസദ്യ പൂർണമാകണമെങ്കിൽ ചിപ്സിന്‍റെയും ശർക്കര വരട്ടിയുടെയും മധുരം കൂടി നുണയണം. അതേ, ചിപ്സും ശർക്കരവരട്ടിയുമില്ലാതെ എന്ത് ഓണസദ്യ. എന്നാൽ ഇത്തവണ ഇവ വാങ്ങണമെങ്കിൽ കൈപൊള്ളും. വെളിച്ചെണ്ണയുടെ വിലവർധന മൂലം ചിപ്സിനും ശർക്കരവരട്ടിക്കും തീവിലയാണ് ഇക്കുറി. വെളിച്ചെണ്ണയിൽ ഉണ്ടാക്കിയ നേന്ത്രക്കായ ചിപ്സിന് ഒരു കിലോയ്ക്ക് 560 രൂപയാണ് വിപണി വില. ഇതിൽ തന്നെ വെറൈറ്റി ചിപ്പ്സുണ്ട്. പെരിബെറി ബനാന ചിപ്സ്, മസാല ചിപ്സ്, നോർമൽ ബനാന ചിപ്സ്, കട്ട് ചിപ്സ് എന്നിവയെല്ലാം നേന്ത്രക്കായ ചിപ്സിലുണ്ട്. എല്ലാറ്റിനും കിലോയ്ക്ക് 560 രൂപ തന്നെ. ശർക്കര വരട്ടിക്ക് 520 രൂപ ചേമ്പു കൊണ്ടുണ്ടാക്കിയ ചിപ്സിന് കിലോയ്ക്ക് 600 രൂപ വരും. മധുരക്കിഴങ്ങ് ചിപ്പ്സ് വാങ്ങണമെങ്കിൽ 400 രൂപ മുടക്കണം. ബീറ്റ്റൂട്ട് ചിപ്സിന് 450 രൂപ. കടച്ചക്ക ചിപ്സും വിപണിയിലുണ്ട്. കടച്ചക്ക സീസണൽ ആയതുകൊണ്ട് അതനുസരിച്ചാണ് വില. ഓണ പലഹാരങ്ങളിൽ മറ്റൊന്ന് കളിയടയ്ക്കയാണ്. ഇത് 200 ഗ്രാം വാങ്ങണമെങ്കിൽ 40 രൂപ മുടക്കണം. വെളിച്ചെണ്ണ വില കൂടിയതുകൊണ്ട് മുൻ വർഷങ്ങളേക്കാൾ വിൽപന അൽപം കുറവാന്നെന്ന് എറണാകുളം വൈറ്റിലയിലെ വറവുകട ഹോട്ട് ചിപ്സ് ആൻഡ് കേക്ക് ഷോപ്പ് ജീവനക്കാരൻ ജുനൈദ് പറഞ്ഞു. ഓണം അടുക്കുമ്പോൾ വിപണി സജീവമാകുമെന്നാണ് വില്പനക്കാരുടെ പ്രതീക്ഷ. ലാവണ്യം 2025: കലാസന്ധ്യ നാളെ മുതല്‍ കൊച്ചി: ജില്ലാ ഭരണകൂടവും ജില്ലാ ടൂറിസം പ്രമോഷന്‍ കൗണ്‍സിലും ചേര്‍ന്നൊരുക്കുന്ന ഓണാഘോഷ പരിപാടിയായ ലാവണ്യം 2025ന് നാളെ വൈകുന്നേരം ആറിന് ദര്‍ബാര്‍ ഹാളില്‍ തുടക്കമാകും. 16 വേദികളിലായി നടക്കുന്ന ഓണാഘോഷം നഗരത്തിലെ പ്രധാന വേദികളോടൊപ്പം ടൂറിസം കേന്ദ്രങ്ങളായ കളമശേരി, ഫോര്‍ട്ടുകൊച്ചി വെളി ഗ്രൗണ്ട്, കുമ്പളങ്ങി, ഫോര്‍ട്ടുകൊച്ചി വാസ്‌കോ ഡ ഗാമ സ്‌ക്വയര്‍, പള്ളുരുത്തി, ഭൂതത്താന്‍കെട്ട്, തേവര, വൈലോപ്പിള്ളി പാര്‍ക്ക്, പിറവം, പാമ്പാക്കുട അരീക്കല്‍ വെള്ളച്ചാട്ടം, ചെമ്പറക്കി ജാമിയ ഹസ്‌നിയ ഗ്രൗണ്ട്, ചെറായി ബീച്ച്, പനമ്പിള്ളി നഗര്‍ എന്നിവിടങ്ങളിലും നടക്കും. 33 കലാപരിപാടികള്‍ അരങ്ങേറും.

2.988 കിലോ കഞ്ചാവുമായി ഒഡീഷ സ്വദേശി പിടിയില്‍

കൊച്ചി: വില്പനയ്ക്കെത്തിച്ച 2.988 കിലോഗ്രാം കഞ്ചാവുമായി ഒഡീഷ സ്വദേശിയെ ഇടപ്പള്ളി ടോള്‍ ജംഗ്ഷന് സമീപത്തുനിന്ന് കൊച്ചി സിറ്റി ഡാന്‍സാഫ് പിടികൂടി. ബാപ്പിറാജ് നായിക്(31) ആണ് അറസ്റ്റിലായത്. ട്രെയിന്‍ മാര്‍ഗം ഒഡീഷയില്‍നിന്നു കഞ്ചാവ് കടത്തിക്കൊണ്ടുവന്ന് ജില്ലയില്‍ ചില്ലറ വില്പനക്കാർക്ക് കൈമാറുകയാണ് ഇയാൾ ചെയ്തിരുന്നതെന്ന് പോലീസ് പറഞ്ഞു. രഹസ്യ വിവരത്തിന്‍റെ അടിസ്ഥാനത്തിലായിരുന്നു പരിശോധന

ജില്ലയിൽ മൂന്ന് വ്യത്യസ്ത വാഹനാപകടങ്ങൾ : വീട്ടമ്മയടക്കം മൂന്നുപേർ മരിച്ചു

കോതമംഗലം/കളമശേരി: ജില്ലയിൽ മൂന്ന് വ്യത്യസ്ത ഇടങ്ങളിലുണ്ടായ വാഹനാപകടങ്ങളിൽ മൂന്നുപേർ മരിച്ചു. കോതമംഗലം നേര്യമംഗലത്ത് പിക്കപ്പ് വാൻ മരത്തിലിടിഞ്ഞ് മറിഞ്ഞ് തമിഴ്നാട് സ്വദേശിയും നെല്ലിക്കുഴിയിൽ ബൈക്കിടിച്ച് പരിക്കേറ്റ് ചികിത്സയിലായിരുന്ന വീട്ടമ്മയും കളമശേരിയിൽ ടാങ്കർലോറിയുടെ പിന്നിലിടിച്ച് റോഡിൽ വീണ് മറ്റൊരു ലോറിക്കടിയിൽ പെട്ട് ബിടെക് വിദ്യാർഥിയുമാണ് മരിച്ചത്. തമിഴ്നാട് വിരുതനഗർ സ്വദേശി വിഘ്നേഷ് പ്രഭു (30), നെല്ലിക്കുഴി ഇന്ദിരാഗാന്ധി കോളജിന് സമീപം പുളിമൂട്ടിൽ ഇബ്രാഹിമിന്‍റെ ഭാര്യ കദീജ (65), നോർത്ത് കളമശേരി ഏലൂർ റോഡിൽ സുമാ നിവാസിൽ (ഗോൾഡൻ ഹോട്ടൽ) സുരേഷിന്‍റെ മകൻ സിദ്ധാർഥൻ (19) എന്നിവരാണ് മരിച്ചത്. നേര്യമംഗലത്ത് ഇന്നലെ രാവിലെ 11.45ന് ചെമ്പൻകുഴി ഷാപ്പുംപടിക്ക് സമീപത്തെ വളവിലായിരുന്നു അപകടം. വിഘ്നേഷ് വാഹനത്തിനുള്ളിൽ കുടുങ്ങിയ നിലയിലായിരുന്നു. ഊന്നുകൽ പോലീസും അഗ്നിരക്ഷാ സേനയും ചേർന്ന് വാഹനം വെട്ടിപ്പൊളിച്ചാണ് പുറത്തെടുത്തത്. സംഭവ സ്ഥലത്ത് വച്ച് തന്നെ മരണം സംഭവിച്ചിരുന്നു. ഉറങ്ങിപ്പോയതാകാം അപകടത്തിന് കാരണമെന്നാണ് പ്രാഥമികനിഗമനം. കൊച്ചിയിൽ നിന്ന് പടക്കവും കമ്പിത്തിരിയുമായി ഇടുക്കി ഭാഗത്തേക്ക് പോവുകയായിരുന്നു പിക്കപ്പ്. വാഹനത്തിൽ മറ്റാരും ഉണ്ടായിരുന്നില്ല. മൃതദേഹം കോതമംഗലം താലൂക്ക് ആശുപത്രി മോർച്ചറിയിൽ. നെല്ലിക്കുഴിയിൽ ശനിയാഴ്ച രാവിലെ ആറിന് കനാൽ പാലത്തിന് സമീപമായിരുന്നു ബൈ ക്കിടിച്ച് വീട്ടമ്മയ്ക്ക് ഗുരുതര പരിക്കേറ്റ അപകടം. ഗുരുതരമായി പരിക്കേറ്റ കദീജ കോലഞ്ചേരി മെഡിക്കൽ കോളജിൽ ചികിത്സയിലിരിക്കെ ഇന്നലെ പുലർച്ചെയാണ് മരിച്ചത്. കബറടക്കം നടത്തി. മക്കൾ: സുബൈദ, സുബൈർ. മരുമക്കൾ: സലീം മിസ്ബാഹി, റഷിദ. കളമശേരി സീപോർട്ട്-എയർപോർട്ട് റോഡിൽ ടാങ്കർ ലോറിയുടെ പിന്നിൽ ബൈക്കിടിച്ച് റോഡിൽ വീണ ബിടെക് വിദ്യാർഥി മറ്റൊരു ലോറിക്കടിയിൽപ്പെട്ടാ ണ് മരിച്ചത്. ഇന്നലെ രാവിലെ എട്ടോടെ പൂജാരി വളവിന് സമീപമായിരുന്നു അപകടം. കളമശേരിയിൽ നിന്നു കാക്കനാട് ഭാഗത്തേക്ക് പോകുകയായിരുന്ന ടാങ്കർ ലോറിയുടെ പിന്നിലാണ് ബൈക്ക് ഇടിച്ചത്. തുടർന്ന് റോഡിൽ വീണ സിദ്ധാർഥന്‍റെ ശരീരത്തിലൂടെ പിന്നാലെ വന്ന ലോറി കയറിയിറങ്ങുകയായിരുന്നു. ഉടൻ മെഡിക്കൽ കോളജ് ആശുപത്രി യിൽ എത്തിച്ചെങ്കിലും ജീവൻ രക്ഷിക്കാനായില്ല. സംസ്കാരം നടത്തി. അമ്മ: വിനീത, സഹോദരൻ: ആദിത്യ.

കിണറ്റില്‍ വീണ്ടും കാട്ടുകൊന്പൻ; 12 മണിക്കൂറിനു ശേഷം രക്ഷപ്പെടുത്തി

കോട്ടപ്പടി വടക്കുംഭാഗത്ത് ജനവാസമേഖലയിൽ കോതമംഗലം: കോട്ടപ്പടി വടക്കുംഭാഗത്ത് ജനവാസ മേഖലയിലെ കിണറ്റില്‍ വീണ കാട്ടുകൊമ്പനെ രക്ഷപ്പെടുത്തി. വനം വകുപ്പിനെതിരെ നാട്ടുകാരുടെ പ്രതിഷേധം കണക്കിലെടുത്തു സ്ഥലത്ത് നിരോധനാജ്ഞ പ്രഖ്യാപിച്ചു. ഇതിനിടെ സ്ഥലത്തെത്തിയ എംഎൽഎ നിർത്തിവയ്ക്കാൻ ആവശ്യപ്പെട്ടതോടെ രക്ഷാദൗത്യം ഒരു മണിക്കൂറോളം വീണ്ടും വൈകി. കോട്ടപ്പാറ പ്ലാന്‍റേഷനില്‍ നിന്നു ഒരു കിലോമീറ്ററോളം അകലെയുള്ള വിച്ചാട്ട് വര്‍ഗീസിന്‍റെ പുരയിടത്തിലെ കിണറില്‍ ഇന്നലെ പുലര്‍ച്ചെ രണ്ടോടെയാണ് കാട്ടുകൊമ്പന്‍ വീണത്. രാവിലെ ഏഴോടെയാണ് ആന കിണറ്റിലുള്ള വിവരം വീട്ടുകാര്‍ അറിഞ്ഞത്. തുടര്‍ന്നു വനപാലകാരെയും നാട്ടുകാരെയും വിവരം അറിയിക്കുകയായിരുന്നു. നാല് ആനകളാണ് വനത്തിൽ നിന്നു ജനവാസ മേഖലയിൽ രാത്രിയിൽ ഇറങ്ങിയത്. കൊമ്പനാന ഒറ്റതിരിഞ്ഞ് കിണറിന്‍റെ ഭാഗത്ത് എത്തുകയായിരുന്നു. പത്തടിയോളം താഴ്ചയുള്ളതായിരുന്നു കിണര്‍. ആനയെ കരയ്ക്കു കയറ്റാൻ വനംവകുപ്പ് നീക്കം ആരംഭിച്ചതോടെ നാട്ടുകാര്‍ പ്രതിഷേധവുമായി രംഗത്തിറങ്ങി. കാട്ടാനശല്യം അവസാനിപ്പിക്കാന്‍ നടപടി വേണമെന്നും ആനയെ കരയ്ക്കു കയറ്റാന്‍ തകര്‍ക്കുന്ന കിണര്‍ കാലതാമസമില്ലാതെ പുനര്‍നിര്‍മിച്ചു നല്‍കണമെന്നും വീട്ടുടമയ്ക്കു നഷ്ടപരിഹാരം നല്‍കണമെന്നും ആവശ്യം ഉയർന്നു. ഡിഎഫ്ഒ പി. കാര്‍ത്തിക് സ്ഥലത്തെത്തി ചര്‍ച്ച നടത്തി നാട്ടുകാരെ അനുനയിപ്പിച്ചു. നിർമാണം നടന്നുകൊണ്ടിരിക്കുന്ന ഫെന്‍സിംഗ് ജോലി വേഗത്തില്‍ പൂർത്തിയാക്കാമെന്നും സ്ഥലമുടമയ്ക്കു ഒരു ലക്ഷം രൂപ കൈമാറാമെന്നുമുള്ള ഉറപ്പിലാണു നാട്ടുകാര്‍ വഴങ്ങിയത്. ഇതിനിടെ ഒരു മണിക്കൂറോളം കഴിഞ്ഞു സ്ഥലത്തെത്തിയ ആന്‍റണി ജോണ്‍ എംഎല്‍എ രക്ഷാപ്രവർത്തനം നിർത്തിവയ്ക്കാൻ ആവശ്യപ്പെട്ടു. ഫെന്‍സിംഗ് നിര്‍മാണത്തിലെ മെല്ലെപ്പോക്ക് അവസാനിപ്പിക്കുന്നതിലും സ്ഥലം ഉടമയ്ക്കു നഷ്ടപരിഹാരം നല്‍കുന്നതിലും ജില്ലാ കളക്ടര്‍ നേരിട്ടെത്തി ഉറപ്പു നല്‍കണമെന്നായിരുന്നു ആവശ്യം. ഇതോടെ രക്ഷാദൗത്യം നിർത്തിവച്ചു. ഒരു മണിക്കൂർ പിന്നിട്ട ശേഷം ജില്ലാ കളക്ടര്‍ ജി. പ്രിയങ്ക സ്ഥലത്തെത്തി എംഎല്‍എയുമായി ചര്‍ച്ച നടത്തി. ഏതാനും മിനിട്ടുകള്‍ക്കുശേഷം കളക്ടര്‍ നല്‍കിയ ഉറപ്പിന്‍റെ അടിസ്ഥാനത്തിലാണു പിന്നീട് ദൗത്യം പുനരാരംഭിച്ചത്. മഴ ഫെൻസിംഗ് നിർമാണത്തെ തടസപ്പെടുത്തിയിരിക്കാമെന്നും പ്രവർത്തനങ്ങളുടെ മേൽനോട്ടം കളക്ടർ, എംഎൽഎ, ഡിഎഫ്ഒ എന്നിവർ വിലയിരുത്തി മുന്നോട്ടു കൊണ്ടുപോകുമെന്നും കളക്ടർ പറഞ്ഞു. കിണര്‍ മണ്ണുമാന്തി യന്ത്രം ഉപയോഗിച്ച് ഇടിച്ച് ആനയ്ക്ക് സ്വയം കയറാന്‍ കഴിയുന്ന വിധത്തില്‍ വഴിയുണ്ടാക്കിയാണു ആനയെ കരയ്ക്കെത്തിച്ചത്. കരയ്ക്ക് കയറിയ ആന റബ്ബര്‍ തോട്ടത്തിലൂടെ പ്ലാന്‍റേഷന്‍ ലക്ഷ്യമാക്കി ഓടി. വനംപാലകര്‍ പടക്കം പൊട്ടിച്ച് ആനയെ ഭയപ്പെടുത്തി ഓടിക്കുകയും ചെയ്തു. രാവിലെ പതിനൊന്നോടെ ആരംഭിച്ച ദൗത്യം ഉച്ചകഴിഞ്ഞ് രണ്ടിനാണ് വിജയകരമായി അവസാനിച്ചത്. 12 മണിക്കൂറോളം ആനയ്ക്ക് കിണറ്റില്‍ കിടക്കേണ്ടിവന്നു. എംഎൽഎയുടെ ശ്രമം സ്വന്തം തടി രക്ഷിക്കാനെന്ന് ഷിബു തെക്കുംപുറം കോതമംഗലം: കോട്ടപ്പടിയിലെ വന്യമൃഗശല്യത്തിൽ വനം വകുപ്പ് ഉദ്യോഗസ്ഥരെ പഴിചാരി സ്വന്തം തടി രക്ഷിക്കാൻ ശ്രമിക്കുകയാണ് എംഎൽഎയെന്ന് യുഡിഎഫ് ജില്ലാ പ്രസിഡന്‍റ് ഷിബു തെക്കുംപുറം. കാട്ടാന കിണറ്റിൽ വീണ സംഭവത്തിൽ തീരുമാനമെടുക്കാൻ ജില്ലാ കളക്ടറെ വിളിച്ചു വരുത്തുന്നതും ജനപ്രതിനിധിയായ അദ്ദേഹം പരാജയപ്പെട്ടതിന്‍റെ തെളിവാണ്. കോട്ടപ്പടി, പിണ്ടിമന പഞ്ചായത്തുകളിലെ വനാതിർത്തി സംരക്ഷിക്കാൻ മൂന്നേമുക്കാൽ കോടി രൂപ മുടക്കി ഫെൻസിംഗ് പദ്ധത നടപ്പാക്കുമെന്ന് വനം മന്ത്രി പ്രഖ്യാപിച്ചിട്ട് എട്ടു മാസമായി. ആർഭാടമായ ഉദ്ഘാടനമല്ലാതെ മറ്റൊന്നും സംഭവിച്ചില്ല. കാട്ടാന ഉൾപ്പെടെയുള്ള വന്യമൃഗങ്ങളുടെ ആക്രമണങ്ങൾക്ക് നടുവിൽ ഓരോ നിമിഷവും ഭയപ്പെട്ട് ജീവിക്കുന്ന കോട്ടപ്പടിയിലെ മനുഷ്യരെ ഇനിയും കബളിപ്പിക്കുമാനുള്ള ശ്രമം അനുവദിക്കില്ലെന്നും സർക്കാരിനും എംഎൽഎയ്ക്കുമെതിരെ യുഡിഎഫ് ശക്തമായ സമരം സംഘടിപ്പിക്കുമെന്നും ഷിബു തെക്കുംപുറം പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]