എടത്തിരുത്തി ഗ്രാമപഞ്ചായത്ത് "മികവ് 2025' അനുമോദന സദസ്

കയ്പമംഗലം: എടത്തിരുത്തി ഗ്രാമപഞ്ചായത്ത് "മികവ് 2025' അനുമോദന സദസ് സംഘടിപ്പിച്ചു.കാളിക്കുട്ടി സാംസ്കാരിക നിലയത്തിൽ നടന്ന അനുമോദനസദസ് ഇ.ടി. ടൈസൺ എംഎൽഎ ഉദ്ഘാടനം ചെയ്തു.

എസ്എസ്എൽസി, പ്ലസ്ടു പരീക്ഷകളിൽ ഉന്നത വിജയം നേടിയ വിദ്യാർഥികളെയും എൽഎസ്എസ്, യുഎസ്എസ്, എൻഎംഎംഎസ് വിജയിച്ച കുട്ടികളെയും മികച്ച വിജയം നേടിയ വിദ്യാ ലയങ്ങളെയും വിവിധ മേഖലകളിൽ മികവ് തെളിയിച്ചവരെയും വായനോത്സവ വിജയികളെയും അനുമോദിച്ചു. ഇയർ ബാലൻസ് ചികിത്സയിൽ വിദഗ്ധനായ ഡോ. രവിയെ ആദരിച്ചു. ഗ്രാമ‌പഞ്ചായത്ത് പ്രസിഡന്‍റ് ടി.കെ. ചന്ദ്രബാബു അധ്യക്ഷത വഹിച്ചു.

ജില്ലാ പഞ്ചായത്ത് അംഗം കെ. എസ്. ജയ, നാട്ടിക ഫർക്ക റൂറൽ ബാങ്ക് പ്രസിഡന്‍റ്് വി.കെ.ജ്യോതി‌പ്രകാശ്, പഞ്ചായത്ത് വൈസ് പ്രസിഡന്‍റ് ഷൈലജ രവീന്ദ്രൻ, സെക്രട്ടറി കെ.വി. സനീഷ്, പഞ്ചായത്തംഗങ്ങളായ പി.ആർ. നിഖിൽ, പി.എ. ഷെമീർ, പി.എച്ച്. ബാബു, സജീഷ് സത്യൻ, കെ.എസ്. അനിൽകുമാർ, ഹേന രമേഷ്, ഷിനി സതീഷ് എന്നിവർ പങ്കെടുത്തു.

ADVERTISEMENT

ഹരിത കേരള മിഷൻ ജില്ലയിലെ മികച്ച കാവിനുള്ള പുരസ്കാരം ശംഖുകുളങ്ങര കാവിന്

ശ്രീനാരായണപുരം: ഹരിത കേരള മിഷൻ പ്രഖ്യാപിച്ച ജില്ലയിലെ മികച്ച പച്ചത്തുരുത്ത് കാവിനുള്ള പുരസ്കാരം ശ്രീനാരായണപുരം ഗ്രാമപഞ്ചായത്തിലെ ശംഖുകുളങ്ങര കാവ് പച്ചത്തുരുത്തിനു ലഭിച്ചു. മികച്ച പച്ചത്തുരത്തുകൾക്കുള്ള മുഖ്യമന്ത്രിയുടെ പുരസ്കാരം നാളെ തിരുവനന്തപുരം ടാഗോർ ഹാളിൽ പ്രസിഡന്‍റ്് എം.എസ്. മോഹനൻ ഏറ്റുവാങ്ങും. കഴക്കൂട്ട് കുടുംബട്രസ്റ്റിന്‍റെ ഉടമസ്ഥതയിലുള്ള മൂന്നര ഏക്കർ ഭൂമിയിലാണ് കാവ് നിൽക്കുന്നത്. 2019-20 വർഷത്തിൽ കേരള സംസ്ഥാന ബയോ ഡൈവേഴ്‌സിറ്റി ബോർഡ് നടപ്പാക്കിയ കാവുകളുടെ പുനരുദ്ധാരണ പദ്ധതിയിൽ ഉൾപ്പെടുത്തി നൽകിയ ഒരു ലക്ഷത്തി അയ്യായിരം രൂപ ചെലവഴിച്ചാണ് ശംഖുകുളങ്ങര കാവിന്‍റെ പുനരുദ്ധാരണ പ്രവർത്തനങ്ങൾ ഗ്രാമ‌പഞ്ചായത്ത് നടത്തിയത്. പ്രാദേശിക ജൈവ വൈവിധ്യ പരിപാലന സമിതിയുടെ നേതൃത്വത്തിൽ വെമ്പല്ലൂർ എംഇഎസ് അസ്മാബി കോളജ് കേന്ദ്രമാക്കി പ്രവർത്തിക്കുന്ന പശ്ചിമഘട്ട വേഴാമ്പൽ ഫൗണ്ടേഷന്‍റെ സാങ്കേതിക സഹായത്തോ ടെയാണ് ശംഖുകുളങ്ങരകാവ് പച്ചത്തുരുത്തിന്‍റെ പഠനം ഡോ. അമിത ബച്ചന്‍റെ നേതൃത്വത്തിൽ നടത്തിയത്. 179 തരം പുഷ്പ സസ്യങ്ങൾ, 54 തരം ഔഷധസസ്യങ്ങൾ, 132 തരം പക്ഷികൾ,54 തരം ഔഷധസസ്യങ്ങൾ, 42 വിഭാഗം ചിത്രശലഭങ്ങൾ, 31 വിഭാഗം പൂമ്പാറ്റകൾ എന്നിവയും കരിമ്പൂതാൻ, കുളവ്, കമ്പകം, അശോകം തുടങ്ങിയ വംശനാശ ഭീഷണി നേരിടുന്ന അപൂർവയിനം സസ്യങ്ങളും ശംഖുകുളങ്ങര കാവ് പച്ചത്തുരുത്തിൽ നടത്തിയ പഠനത്തിൽ കണ്ടെത്തി. കാവിൽ നിന്നും ശേഖരിച്ച് വിത്തുകൾ നഴ്സറിയിൽ വച്ചുമുളപ്പിച്ച് കാവിനകത്ത് നട്ടുവളർത്തി. ദേശീയ ഗ്രാമീണ തൊഴിലുറപ്പ് തൊഴിലാളികളെ പ്രയോജനപ്പെടുത്തിയാണ് പച്ചത്തുരുത്തിലെ പുനരുദ്ധാരണ പ്രവർത്തനങ്ങൾ നടത്തിയത്.പഞ്ചായത്തിന്‍റെ വിവിധ പ്രദേശങ്ങളിലായി 33 കാവുകളെ കൂടി സർവേയിൽ കണ്ടെത്തിയിരുനു. കാവിലെ പ്ലാസ്റ്റിക് മലിനീകരണം തടയുന്നതിനും അടിക്കാടുകളിൽ ഇല്ലാതാകുന്ന അപൂർവയിനം സസ്യങ്ങളെ സംരക്ഷിക്കുന്നതിനും മണ്ണൊലിപ്പ് തടയുന്നതിനും കാലാവസ്ഥാവ്യതിയാനം കാരണം വൻമരങ്ങൾ കടപുഴകി വീഴുന്നതു തടയുന്നതിനും പുതിയ ചെടികൾ വച്ചുപിടിപ്പിക്കുന്നതിനും പച്ചത്തുരുത്ത് പുനസ്ഥാപനത്തിലൂടെ സാധിച്ചു. കേരള ബയോഡൈവേഴ്സിറ്റി ബോർഡ്, ഹരിത കേരള മിഷൻ, കേരള ഫോറസ്റ്റ് ഡിപ്പാർട്ട്മെന്‍റ്്, ദേശീയ ഗ്രാമീണ തൊഴിലുറപ്പ് പദ്ധതി, ഗ്രാമപഞ്ചായത്ത് തുടങ്ങിയ വിവിധ സ്ഥാപനങ്ങളുടെ സഹായസഹകരണത്തോടെയാ ണ് പച്ചത്തുരുത്ത് വ്യാപനം ജനകീയ സഹകരണത്തോടെ നടത്തിയത്.

ബസ് സ്റ്റാന്‍ഡ് - എകെപി ജംഗ്ഷന്‍ റോഡ് കട്ടവിരിച്ചു; നടുറോഡിൽ വൈദ്യുതി തൂണ്‍

ഇരിങ്ങാലക്കുട: ബസ് സ്റ്റാന്‍ഡ്- എകെപി ജംഗ്ഷന്‍ റോഡില്‍ തകര്‍ന്ന ഭാഗത്ത് കട്ട വിരിക്കുന്ന ജോലി പുരോഗമിക്കുമ്പോള്‍ റോഡിലേക്കുകയറി നില്‍ക്കുന്ന വൈദ്യുതി കാലുകള്‍ മാറ്റി സ്ഥാപിച്ചിട്ടില്ലെന്ന് ആക്ഷേപം. റോഡിന്‍റെ കിഴക്കെ അരികിലുള്ള മൂന്ന് വൈദ്യുതി കാലുകള്‍ റോഡിനകത്തായിട്ടാണ് നില്‍ക്കുന്നത്. ഇത് മാറ്റാതിരുന്നാല്‍ പിന്നീട് കാലുകള്‍ മാറ്റി സ്ഥാപിക്കേണ്ട സാഹചര്യത്തില്‍ വിരിച്ച കട്ടകള്‍ മാറ്റേണ്ടിവരുമെന്നും അത് റോഡിന്‍റെ ഉറപ്പിനെ ബാധിക്കുമെന്നും യാത്രക്കാര്‍ ചൂണ്ടിക്കാട്ടുന്നു. കട്ടവിരിക്കുന്നതിനായി 22.5 ലക്ഷം രൂപയാണ് നഗരസഭ വകയിരുത്തിയിരിക്കുന്നത്. വൈദ്യുതിക്കാലുകള്‍ മാറ്റിസ്ഥാപിക്കണമെന്നാവശ്യപ്പെട്ട് കെഎസ്ഇബിക്ക് ഓണ്‍ലൈനായി അപേക്ഷ നല്‍കിയിട്ടില്ല. എന്നാല്‍, നഗരസഭ ഇതിനായി കത്തു നല്‍കിയിട്ടുണ്ട്. ടൈലിടലിന്‍റെ ഭാഗമായി റോഡ് അടച്ചുകെട്ടിയതിനാല്‍ പുറ്റിങ്ങല്‍ റോഡിലൂടെയും എംഎല്‍എ റോഡ്, ബൈപാസ് റോഡ് എന്നിവയിലൂടെയുമാണ് വാഹനങ്ങള്‍ കടന്നുപോകുന്നത്. കാലങ്ങളായി തകര്‍ന്നു കുളമായ ബസ് സ്റ്റാന്‍ഡ്- എകെപി ജംഗ്ഷന്‍ റോഡ് ടൈലിടുന്നതിന്‍റെ ഭാഗമായി കഴിഞ്ഞ മാസം അവസാനത്തിലാണ് മെറ്റല്‍ വിരിച്ചത്.

എം.സി. ആഗസ്തി മോറേലി സ്മാരക അവാർഡ് സമ്മാനിച്ചു

ചാലക്കുടി: സോഷ്യലിസ്റ്റ് നേതാവും കർഷകനുമായിരുന്ന എം.സി. ആഗസ്തി മോറേലി ആറാമത് സ്മാരക അവാർഡ് ജയരാജ് വാര്യർക്ക് മുൻ മന്ത്രി പ്രഫ. സി. രവീന്ദ്രനാഥ് സമ്മാനിച്ചു. ആഗസ്തി മോറേലി കർഷകന്‍റെ ഉറച്ച ശബ്ദമായിരുന്ന പൊതുപ്രവർത്തകനും സാധാരണക്കാരന്‍റെ കൂടെ‌നിന്ന മനുഷ്യസ്നേഹിയുമായിരുന്നുവെന്ന് അനുസ്മരണ‌സമ്മേളനം ഉദ്ഘാടനം ചെയ്തുകൊണ്ട് രവീന്ദ്രൻ മാസ്റ്റർ പറഞ്ഞു.അനുസ്മരണ സമിതി ചെയർമാൻ പോൾ പുല്ലൻ അധ്യക്ഷത വഹിച്ചു. മുനിസിപ്പൽ ചെയർമാൻ ഷിബു വാലപ്പൻ, ആർജെഡി സംസ്ഥാന ജനറൽ സെക്രട്ടറി യൂജിൻ മോറേലി, ക്രൈസ്റ്റ് കോളജ് മാനേജർ ഫാ.ജോയ് പീണിക്കപറമ്പിൽ, ആർജെഡി ജില്ലാ പ്രസിഡന്‍റ് ജെയ്സൺ മാണി, സിഎഫ്‌ഐ ലോ കോളജ് ഡയറക്ടർ പി.ജെ. മാത്യു, കെ.എസ്. അശോകൻ, വി.ഒ. പൈലപ്പൻ, എസ്.പി. രവി, ജോർജ് വി. ഐനിക്കൽ, ഡോ. സി.സി. ബാബു, ഷാജു പുതൂർ, ആനി ജോയ്, കെ.സി. വർഗീസ്, അജി ഫ്രാൻസിസ്, ജോർജ് കെ. തോമസ്, കാവ്യ പ്രദീപ്, വിൻസന്‍റ് പുത്തൂർ, എൻ.സി. ബോബൻ, സി.എ. തോമസ് തുടങ്ങിയവർ പ്രസംഗിച്ചു.

സെന്‍റ് തോമസ് കത്തീഡ്രലില്‍ തിരുനാള്‍ ഭക്തിസാന്ദ്രം; കപ്പേളകൾ വെഞ്ചരിച്ചു

ഇരിങ്ങാലക്കുട: സെന്‍റ് തോമസ് കത്തീഡ്രലില്‍ വിശുദ്ധ കുരിശിന്‍റെ പുകഴ്ചയുടെ തിരുനാള്‍ ഭക്തിസാന്ദ്രമായി. തിരുനാളിനോടനുബന്ധിച്ച് പള്ളിയുടെ പ്രധാന കവാടത്തിലുള്ള കപ്പേളകളുടെ വെഞ്ചരിപ്പ് ബിഷപ് മാര്‍ പോളി കണ്ണൂക്കാടന്‍ നിര്‍വഹിച്ചു. കപ്പേളകളില്‍ പരിശുദ്ധ കന്യാമറിയത്തിന്‍റെയും വിശുദ്ധ ഗീവര്‍ഗീസിന്‍റെയും തിരുസ്വരൂപങ്ങള്‍ പ്രതിഷ്ഠിച്ചു. തിരുനാള്‍ ദിവ്യബലിക്ക് വികാരി ജനറാള്‍ മോണ്‍. ജോളി വടക്കന്‍ മുഖ്യകാര്‍മികനായിരുന്നു. തിരുനാള്‍ പ്രദക്ഷിണം, കുരിശുസമര്‍പ്പണ നേര്‍ച്ച, വിശുദ്ധ കുരിശിന്‍റെ തിരുശേഷിപ്പ് വന്ദനം, സ്നേഹവിരുന്ന് എന്നിവ ഉണ്ടായിരുന്നു. വികാരി ജനറാള്‍മാരായ മോണ്‍. ജോസ് മാളിയേക്കല്‍, മോണ്‍. വില്‍സണ്‍ ഈരത്തറ, കത്തീഡ്രല്‍ വികാരി റവ.ഡോ. ലാസര്‍ കുറ്റിക്കാടന്‍, അസി. വികാരിമാരായ ഫാ. ഓസ്റ്റിന്‍ പാറയ് ക്കല്‍, ഫാ. ആന്‍റണി നമ്പളം, ഫാ. ബെല്‍ഫിന്‍ കോപ്പുള്ളി, കൈക്കാരന്മാരായ പി.ടി. ജോര്‍ജ് പള്ളന്‍, തോമസ് തൊകലത്ത്, സാബു ജോര്‍ജ് ചെറിയാടന്‍, അഡ്വ.എം.എം. ഷാജന്‍ മാണിക്കത്തുപറമ്പില്‍, തിരുനാള്‍ പ്രസുദേന്തി ബിജോയ് പൗലോസ് ചക്കാലമറ്റത്ത്, കേന്ദ്രസമിതി പ്രസിഡന്‍റ്് ജോബി അക്കരക്കാരന്‍, ജോമി ചേറ്റുപുഴക്കാരന്‍ എന്നിവര്‍ സന്നിഹിതരായിരുന്നു.

മാപ്രാണം തീര്‍ഥാടന ദേവാലയത്തില്‍ കുരിശിന്‍റെ പുകഴ്ചയുടെ തിരുനാളിന് ആയിരങ്ങള്‍

മാപ്രാണം: ഹോളിക്രോസ് തീര്‍ഥാടന ദേവാലയത്തില്‍ വിശുദ്ധ കുരിശിന്‍റെ പുകഴ്ചയുടെ തിരുനാളിന് ആയിരക്കണക്കിന് വിശ്വാസികള്‍ പങ്കെടുത്തു. പള്ളിയുടെ സ്ഥാപിതകുരിശ് ഭക്തജനങ്ങളുടെ വണക്കത്തിനായി ഫാ. സിബു കള്ളാപറമ്പില്‍ രൂപക്കൂട്ടില്‍ നിന്നും എടുത്ത് പ്രത്യേകം സജ്ജമാക്കിയ പീഠത്തില്‍ സ്ഥാപിച്ചശേഷം ഫാ. ഡേവിസ് ചാലിശേരി വിശുദ്ധ കുരിശിന്‍റെ തിരുശേഷിപ്പ് ആശീര്‍വാദവും നല്‍കി. ഫാ. ലിജോ മണിമലക്കുന്നേല്‍ സന്ദേശം നല്‍കി. തുടര്‍ന്ന് സെന്‍റ് റോസ് കപ്പേള ചുറ്റിയുള്ള പ്രദക്ഷിണത്തിനുശേഷം തിരുസ്വരൂപങ്ങളും പ്രതിഷ്ഠാകുരിശും നേര്‍ച്ചപന്തലില്‍ എഴുന്നള്ളിച്ചുവച്ചു. വൈകീട്ട് സെന്‍റ്ജോണ്‍ കപ്പേളയില്‍ നടന്ന വിശുദ്ധ കുരിശിന്‍റെ നൊവേനയ്ക്കും തിരി തെളിയിക്കലിനും ബിഷപ് മാര്‍ പോളി കണ്ണൂക്കാടന്‍ നേതൃത്വം നല്‍കി. തിരിതെളിയിക്കലിനുശേഷം മാര്‍ പോളി കണ്ണൂക്കാടന്‍ എഴുന്നള്ളിപ്പിനുള്ള പുഷ്പകുരിശ് കമ്മിറ്റി ഭാരവാഹികള്‍ക്കു കൈമാറി. രാത്രി പുഷ്പകുരിശ് എഴുന്നള്ളിപ്പ് ഉണ്ണിമിശിഹാ കപ്പേളയില്‍ നിന്നും ആരംഭിച്ച് പള്ളിയില്‍ സമാപിച്ചു. ഇന്നലെ നടന്ന ആഘോഷമായ തിരുനാള്‍ ദിവ്യബലിക്ക് ഫാ. ഷാജി തെക്കേക്കര മുഖ്യകാര്‍മികത്വം വഹിച്ചു. ആലുവ ഡി പോള്‍ വിന്‍സന്‍ഷ്യന്‍ സെമിനാരി റെക്ടര്‍ ഫാ. ബിജു കൂനന്‍ വിസി തിരുനാള്‍ സന്ദേശം നല്‍കി. മാപ്രാണം പള്ളി അസി. വികാരി ഫാ. ഡിക്സന്‍ കാഞ്ഞൂക്കാരന്‍ സഹകാര്‍മികനായിരുന്നു. ഉച്ചകഴിഞ്ഞ് ദിവ്യബലി, തിരുനാള്‍ പ്രദക്ഷിണം, പ്രതിഷ്ഠാകുരിശ് നഗരി കാണിക്കല്‍, പ്രദക്ഷിണ സമാപനം, വിശുദ്ധ കുരിശിന്‍റെ ആശീര്‍വാദം, വിശുദ്ധ കുരിശിന്‍റെ തിരുശേഷിപ്പ് ചുംബിക്കല്‍, പ്രതിഷ്ഠാകുരിശ് പുനഃപ്രതിഷ്ഠിക്കല്‍, വര്‍ണമഴ എന്നിവയും ഉണ്ടായിരുന്നു. വികാരി ഫാ. ജോണി മേനാച്ചേരി, അസി. വികാരി ഫാ. ഡിക് സന്‍ കാഞ്ഞൂക്കാരന്‍, കൈക്കാരന്മാരായ ജോണ്‍ പള്ളിത്തറ, ആന്‍റണി കള്ളാപറമ്പില്‍, ബിജു തെക്കേത്തല, പോളി പള്ളായി, കമ്മിറ്റി കണ്‍വീനര്‍മാരായ സെബി കള്ളാപറമ്പില്‍, വിന്‍സന്‍റ് നെല്ലേപ്പിള്ളി, ഡേവിസ് കുറ്റിക്കാടന്‍, ജോണ്‍സണ്‍ തെക്കൂടന്‍, സിസ്റ്റര്‍ നിര്‍മല എഫ്സിസി, ജോ സ് മംഗലന്‍, സിജി ജോസ് ആലുക്കല്‍, ടോമി എടത്തിരുത്തിക്കാരന്‍ എന്നിവര്‍ തിരുനാളിനു നേതൃത്വം നല്‍കി. ഇന്നു മരിച്ചവരുടെ ഓര്‍മദിനത്തില്‍ രാവിലെ 6.15ന് സകല മരിച്ചര്‍ക്കും‌വേണ്ടി സമൂഹബലി, സെമിത്തേരിയില്‍ ഒപ്പീസ്. രാത്രി ഏഴിന് തൃശൂര്‍ കലസദന്‍റെ നാടകം "എന്‍റെ പിഴ'.

അമലയിൽ തിരുശേഷിപ്പ് പ്രയാണത്തിനു സ്വീകരണം

തൃശൂർ: അമല ആശുപത്രി ചാപ്പലിൽ വിശുദ്ധ തോമസ് ശ്ലീഹായുടെയും ഇന്ത്യയിൽനിന്നുള്ള വിശുദ്ധരായ ചാവറയച്ചൻ, മദർ തെരേസ, എവുപ്രാസ്യമ്മ, ദേവസഹായം, ഫ്രാൻസിസ് സേവ്യർ, അൽഫോൻസാമ്മ, മറിയംത്രേസ്യ എന്നിവരുടെയും തിരുശേഷിപ്പുപ്രയാണത്തിനു സ്വീകരണം നൽകി. ചടങ്ങിന് ദേവമാതാ വികാർ പ്രൊവിൻഷ്യാൾ ഫാ. ഡേവി കാവുങ്കൽ, അഴീക്കോട് പൊന്തിഫിക്കൽ തീർഥകേന്ദ്രം റെക്ടർ ഫാ. സണ്ണി പുന്നേലിപ്പറന്പിൽ, അമലനഗർ സെന്‍റ് ജോസഫ് പള്ളി വികാരി ഫാ. ഫിനോഷ്, ഡയറക്ടർ ഫാ. ജൂലിയസ് അറയ് ക്കൽ, ജോയിന്‍റ് ഡയറക്ടർമാരായ ഫാ. ആന്‍റണി പെരിഞ്ചേരി, ഫാ. ജെയ്സണ്‍ മുണ്ടൻമാണി, ഫാ. ഷിബു പുത്തൻപുരക്കൽ, ഫാ. ഡെൽജോ പുത്തൂർ, അസോസിയേറ്റ് ഡയറക്ടർ ഫാ. ആന്‍റണി മണ്ണുമ്മേൽ എന്നിവർ നേതൃത്വം നൽകി. ആയിരക്കണക്കിനു വിശ്വാസികൾ പങ്കെടുത്തു.

വടക്കാഞ്ചേരി എംപ്ലോയ്‌മെന്‍റ് എക്സ്ചേഞ്ചിൽ ഇനി മോഡൽ കരിയർ സെന്‍ററും

വടക്കാഞ്ചേരി: തലപ്പിള്ളി ടൗൺ എംപ്ലോയ്‌മെന്‍റ് എക്സ്ചേഞ്ചിനോടനുബന്ധിച്ച് മോഡൽ കരിയർ സെന്‍റർ സ്ഥാപിക്കുന്നതിനുള്ള 54.75 ലക്ഷം രൂപയുടെ പ്രവർത്തികൾ ആരംഭിച്ചതായി സേവ്യർ ചിറ്റിലപ്പിള്ളി എംഎൽഎ അറിയിച്ചു. പദ്ധതിയുടെ എസ്റ്റിമേറ്റ് അംഗീകരിച്ച് നിർമാണ പ്രവർത്തനങ്ങൾക്ക് അനുമതിനൽകി ഉത്തരവായി. തൃശൂർ നിർമിതികേന്ദ്രയാണ് പദ്ധതിയുടെ നിർവഹണ ഏജൻസി. ഇലക്ട്രിഫിക്കേഷൻ പ്രവർത്തികൾ ആരംഭിച്ചു. വടക്കാഞ്ചേരി പോലീസ് സ്റ്റേഷന് എതിർവശത്തെ പബ്ലിക് ഓഫീസ് കോംപ്ലക്സിൽ പ്രവർത്തിക്കുന്ന തലപ്പിള്ളി ടൗൺ എംപ്ലോയ്‌മെന്‍റ് എക്സ്ചേഞ്ചിനോടുചേർന്ന് മോഡൽ കരിയർ സെന്‍റർ യാഥാർഥ്യമാകുന്നതോടെ സൗജന്യ പ്ലേസ്മെന്‍റ് ഡ്രൈവുകൾ, ജോബ് ഫെയറുകൾ, ഇന്‍റർവ്യൂകൾ, ട്രെയിനിംഗുകൾ, പരിശീലന ക്ലാസുകൾ എന്നിവ സംഘടിപ്പിക്കാനുള്ള സൗകര്യംകൂടി സജ്ജമാകും. നിർമാണംപൂർത്തിയാകുന്നതോടെ തൊഴിൽ അന്വേഷകരായ യുവാക്കൾക്ക് മികച്ച പരിശീലനം നൽകാൻ ഉതകുന്ന ഒരു കേന്ദ്രമായി തലപ്പിള്ളി മോഡൽ കരിയർ സെന്‍ററിനെ വികസിപ്പിക്കാനാകുമെന്ന് സേവ്യർ ചിറ്റിലപ്പിള്ളി എംഎൽഎ പറഞ്ഞു. നേരത്തെ തലപ്പിള്ളി ടൗൺ എംപ്ലോയ്‌മെന്‍റ് എക്സ്ചേഞ്ചിന്‍റെ വികസനം മുന്നിൽക്കണ്ട് കരിയർ സെന്‍റർ സ്ഥാപിക്കുന്നതിന് കൂടുതൽ സ്ഥലം ലഭ്യമാക്കുന്നതിന് ആവശ്യമായ ഇടപെടൽ സേവ്യർ ചിറ്റിലപ്പിള്ളി എംഎൽഎ നടത്തിയിരുന്നു. പരിമിതികളോടെ പ്രവർത്തിച്ചിരുന്ന എംപ്ലോയ്മെന്‍റ് എക്സ്ചേഞ്ചിനെ സർക്കാർ കോംപ്ലക്സിലേക്ക് മാറ്റുകയും നഗരസഭ ഓഫീസ് ഈ കോംപ്ലക്സിൽനിന്നും ഒഴിവായതോടെ എംഎൽഎയുടെ നിർദേശപ്രകാരം കളക്ടറുടെ സാന്നിധ്യത്തിൽ പ്രത്യേക യോഗം ചേർന്നാണ് എംപ്ലോയ്‌മെന്‍റ് എക്സ്ചേഞ്ചിന്‍റെ പ്രവർത്തനങ്ങൾക്കായി 3525 സ്‌ക്വയർ ഫീറ്റ് സ്ഥലം അനുവദിച്ച് ഉത്തരവായത്.

കൃഷ്ണഭക്തിയിൽ ആറാടി ശോഭായാത്ര

തൃശൂർ: ശ്രീകൃഷ്ണ ജയന്തിയോടനുബന്ധിച്ച് ബാലഗോകുലത്തിന്‍റെ ആഭിമുഖ്യത്തിൽ തൃശൂർ സ്വരാജ് റൗണ്ടിൽ ശോഭായാത്രകൾ സംഘടിപ്പിച്ചു. വൈകിട്ട് അഞ്ചിനു പാറമേക്കാവ് ക്ഷേത്രത്തിനു മുൻപിൽനിന്ന് ആരംഭിച്ച ശോഭായാത്ര കോയന്പത്തൂർ ആര്യവൈദ്യ ഫാർമസി ചീഫ് ഫിസിഷ്യൻ ഡോ. സി. പത്മജൻ ഉദ്ഘാടനം ചെയ്തു. നഗരാതിർത്തിയിലുള്ള 25 ബാലഗോകുലങ്ങളിൽനിന്ന് 1500 രാധാകൃഷ്ണവേഷങ്ങളണിഞ്ഞ കുട്ടികളും ഭജനസംഘങ്ങൾ, നിശ്ചലദൃശ്യങ്ങൾ തുടങ്ങിയവയും അണിനിരന്നു. ഗോപികാനൃത്തങ്ങളുമുണ്ടായി. ബാലഗോകുലം ജില്ലാ കാര്യദർശി പി. ഷമ്മി, പ്രീത ചന്ദ്രൻ, വി.എൻ. ഹരി, സി.കെ. മധു എന്നിവർ നേതൃത്വം നൽകി. ഉച്ചകഴിഞ്ഞപ്പോൾ തന്നെ നഗരം കൃഷ്ണമയമായി. അരയിൽ കിങ്ങിണി കെട്ടിയ ബാല്യങ്ങൾ നഗരത്തിലേക്ക് ഒഴുകി. രാധാഗോപികമാർ, കുചേല·ാർ, വിവിധ ദേവസങ്കൽപങ്ങൾ തുടങ്ങിയ വേഷം ധരിച്ച ബാലികാബാല·ാരും നഗരത്തിന്‍റെ സൗന്ദര്യമായി. ഉറിയടി, രാധാകൃഷ്ണനൃത്തം, ഗോപികാനൃത്തം എന്നിവയും ശോഭായാത്രയ്ക്കൊപ്പമുണ്ടായി. ജില്ലയിൽ 1100 ശോഭായാത്രകളാണ് തൃശൂരിലെ വിവിധ മേഖലകളിൽ അണിനിരന്നത്.

ദേവാലയങ്ങളിൽ തിരുനാൾ

ആർത്താറ്റ്: ആർത്താറ്റ് ഹോളിക്രോസ് ദേവാലയത്തിൽ വിശുദ്ധ കുരിശിന്‍റെ പുകഴ്ചയുടെ തിരുനാളിന് കൊടികയറി. കൊടിയേറ്റുകർമത്തിന് വികാരി ഫാ. ഷിജോ മാപ്രാണത്തുകാരൻ നേതൃത്വംനൽകി. 20, 21 തീയതികളിലാണ് തിരുനാൾ. തിരുന്നാളിന് ഒരുക്കമായി. ഇന്നു മുതൽ 20 വരെ വൈകിട്ട് 5.30ന് കുർബാന, ലദീഞ്ഞ്, നൊവേന. തിരുനാൾ ദിനത്തിൽ രാവിലെ ആറിന് കുർബാന, 10ന് ആഘോഷമായ പാട്ടുകുർബാന, തിരുനാൾ സന്ദേശം. തുടർന്ന് തിരുനാൾ പ്രദക്ഷിണം. കുരിശിന്‍റെ തിരുശേഷിപ്പ് വണക്കം. തിരുനാൾ പരിപാടികൾക്ക് വികാരി ഫാ. ഷിജോ മാപ്രാണത്തുകാരൻ, കൈക്കാരൻമാരായ പി.എ. റാഫി, പീറ്റർ ചെമ്മണ്ണൂർ, വി.സി. വർഗീസ് എന്നിവർ നേതൃത്വംനൽകും. തൃപ്രയാർ: വലപ്പാട് സെന്‍റ് സെബാസ്റ്റ്യൻസ് ദേവാലയത്തിലെ പരിശുദ്ധ റൊസാരിയോ മാതാവിന്‍റെ 164-ാം ദർശനത്തിരുനാളിന് കൊടിയേറി. വികാരി ഫാ. ജെൻസ് തട്ടിൽ കൊടിയേറ്റം നിർവഹിച്ചു. കൈക്കാരന്മാരായ സണ്ണി ചിറയത്ത്, ലിജോ കരിയാറ്റിൽ, സിജോ ഡേവിസ്, തിരുനാൾ ജന.കൺവീനർ പോൾ ചാലിശേരി, ഭാരവാഹികളായ എ.എ. ആന്‍റണി, ബിജു എലുവത്തിങ്കൽ എന്നിവർ നേതൃത്വം നൽകി. 24,25 തീയതികളിലാണ് തിരുനാൾ.

വയോധികന്‍റെ നിവേദനം സ്വീകരിക്കാതെ സുരേഷ് ഗോപി ; വീട്ടിലെത്തി നിവേദനം സ്വീകരിച്ച് മുകുന്ദൻ എംഎൽഎ

തൃപ്രയാർ: വയോധികനിൽനിന്ന് നിവേദനം സ്വീകരിക്കാതിരുന്ന കേന്ദ്രസഹമന്ത്രിയും തൃശൂർ എംപിയുമായ സുരേഷ് ഗോപിയുടെ നടപടിയിൽ വ്യാപക വിമർശനം. പുള്ള് സ്വദേശി തായാട്ട് കൊച്ചുവേലായുധനെന്ന വയോധികനാണ് തെങ്ങുവീണു തകർന്ന വീടിന്‍റെ അറ്റകുറ്റപ്പണിക്കുള്ള സഹായംതേടി സുരേഷ് ഗോപിക്ക് അപേക്ഷ നൽകാനെത്തിയത്. കഴിഞ്ഞദിവസം ആലപ്പാട് പുള്ളിൽ സംഘടിപ്പിച്ച കലുങ്ക് വികസന സംവാദത്തിനിടെയായിരുന്നു വേലായുധൻ സുരേഷ് ഗോപിയെ കാണാനെത്തിയത്. നിവേദനം വാങ്ങാൻ വിസമ്മതിച്ച സുരേഷ് ഗോപി അതൊന്നും എംപിയുടെ ജോലിയല്ലെന്നും പോയി പഞ്ചായത്തിൽ പറയ് എന്നുമായിരുന്നു പ്രതികരിച്ചത്. സമൂഹമാധ്യമങ്ങളിൽ വയോധികനെ അപമാനിക്കുന്ന ദൃശ്യങ്ങൾ വ്യാപകമായി പ്രചരിച്ചതോടെ വിമർശനങ്ങളുയർന്നു. വേലായുധനു പിന്നാലെ വന്ന മറ്റൊരാൾ ഇതു കണ്ടതോടെ എംപിക്കു നൽകാനായി തയാറാക്കിയ നിവേദനം കൈയിൽ ചുരുട്ടുന്നതും വിഡിയോ ദൃശ്യങ്ങളിൽ കാണാം. സമൂഹ മാധ്യമങ്ങളിൽ കേന്ദ്രമന്ത്രിയുടെ ജനവിരുദ്ധ ചെയ്തി പലരും ഷെയർ ചെയ്തു. ബിജെപി ഭരിക്കുന്നയിടങ്ങളിൽ മാത്രമേ എംപി ഫണ്ട് നൽകുകയുള്ളോ എന്ന ഒരാളുടെ ചോദ്യത്തിനും ’അതെ പറ്റുള്ളൂവെന്ന’ പരിഹാസമായിരുന്നു മറുപടി. മൂന്നു എംപിമാർ നൽകിയതിൽ കൂടുതൽ തൃശൂരിനു താൻ നൽകിയെന്നും കോർപറേഷനിൽ ബിജെപിയെ കൊണ്ടുവന്നാലെ നഗരവികസനത്തിന് എംപി ഫണ്ടിൽനിന്നു പണം നൽകുവെന്നുമായിരുന്നു സുരേഷ് ഗോപിയുടെ മറുപടി. പിന്നീട് വേലായുധന്‍റെ വീട്ടിലെത്തിയ സി.സി. മുകുന്ദൻ എംഎൽഎ നിവേദനം ഏറ്റുവാങ്ങി. വീടിനു മുകളിൽ തെങ്ങ് വീണപ്പോൾ റവന്യൂ ദുരന്ത നിവാരണവകുപ്പിൽനിന്നും 1.20 ലക്ഷം ലഭ്യമാക്കിയിരുന്നതായും പുതിയ വീട് നിർമിക്കാൻ ലൈഫ് ഭവന പദ്ധതിയിൽ മുൻഗണന നൽകി തദ്ദേശ സ്വയംഭരണവകുപ്പ് മുഖേനെ ഇടപെടൽ നടത്തുമെന്നും സി.സി. മുകുന്ദൻ എംഎൽഎ വേലായുധന് ഉറപ്പുനൽകി.

അവകാശദിനാചരണവും ഒപ്പുശേഖരണം ഉദ്ഘാടനവും

കൊട്ടേക്കാട്: തൃശൂർ അതിരൂപത അടുത്ത ഞായറാഴ്ച സംഘടിപ്പിക്കുന്ന സമുദായ ജാഗ്രതാസദസിനു മുന്നോടിയായി കൊട്ടേക്കാട് സെന്‍റ് മേരീസ് അസംപ്ഷൻ ഫൊറോനാതലത്തിൽ അവകാശ സംരക്ഷണദിനമായി ആചരിച്ചു. മുഖ്യമന്ത്രിക്കു സമർപ്പിക്കാൻ തയാറാക്കിയ ഭീമഹർജിയിലേക്കുള്ള ഒപ്പുശേഖരണത്തിന്‍റെ ഫൊറോനാതല ഉദ്ഘാടനം തൃശൂർ അതിരൂപതാ സഹായമെത്രാൻ മാർ ടോണി നീലങ്കാവിൽ നിർവഹിച്ചു. സഹസ്രാബ്ദ ജൂബിലി പാരിഷ് ഹാളിൽ നടന്ന വനിതാസംഗമത്തിലാണ് ഒപ്പുശേഖരണം ഉദ്ഘാടനം ചെയ്തത്. വികാരി ഫാ. ഫ്രാങ്കോ കവലക്കാട്ട്, അസിസ്റ്റന്‍റ് വികാരി ഫാ. മിഥുൻ ചുങ്കത്ത്, ട്രസ്റ്റിമാരായ ഡേവിസ് കാഞ്ഞിരപറന്പിൽ, ജോണ്‍സണ്‍ മുരിയാടൻ, പാസ്റ്ററൽ കൗണ്‍സിൽ അംഗങ്ങളായ സി.എൽ. ഇഗ്നേഷ്യസ്, ഫ്രാങ്കോ ലൂയിസ്, സ്നേഹനിധി, മാതൃവേദി സാരഥികളായ റെജി ജോഷി, ജെസി പോൾ, എ.സി. കൊച്ചുമാത്യു തുടങ്ങിയവർ നേതൃത്വം നൽകി.

കയ്പമംഗലം സ്വദേശിക്ക് നോട്ടീസും 5000 രൂപ പിഴയും

ഇരിങ്ങാലക്കുട: ഇരിങ്ങാലക്കുട നഗരസഭ ഓഫീസ് പരിസരത്ത് ഭക്ഷണ അവശിഷ്ടങ്ങള്‍ നിക്ഷേപിച്ചതുമായി ബന്ധപ്പെട്ട് നഗരസഭ അധികൃതര്‍ക്ക് ലഭിച്ച പരാതിയില്‍ കയ്പമംഗലം സ്വദേശിക്ക് നോട്ടീസും 5000 രൂപ പിഴയും. ഇരിങ്ങാലക്കുട നഗരസഭ മുന്‍ കൗണ്‍സിലറും അഭിഭാഷകനുമായ പി.ജെ. തോമസ് നല്‍കിയ പരാതിയിലാണ് നഗരസഭ ആരോഗ്യ വിഭാഗത്തിന്‍റെ നടപടി. കഴിഞ്ഞ മാസം 28ന് രാത്രി ഒന്‍പതോടെ നഗരസഭ ഓഫീസിന്‍റെ പാര്‍ക്കിംഗ് ഷെഡിന് അടുത്ത് വച്ച് സ്‌കൂട്ടറില്‍ വന്ന് പ്ലാസ്റ്റിക് ബക്കറ്റില്‍ നിന്നും തെരുവുനായ്ക്കള്‍ക്ക് ഇരിങ്ങാലക്കുട സ്വദേശിയായ ശ്രീകുമാര്‍ എന്ന വ്യക്തി ഭക്ഷണ അവശിഷ്ടങ്ങള്‍ നല്‍കിയതായി കാണിച്ചാണ് പരാതി നല്‍കിയിരുന്നത്. ഇയാളുടെ പ്രവൃത്തി നിയമവിരുദ്ധമാണെന്ന് ചൂണ്ടിക്കാട്ടിയിട്ടും സിന്ധു കല്യാണമണ്ഡപം പരിസരത്തും പ്രവൃത്തി തുടരുകയായിരുന്നുവെന്നും ഏതാനും ദിവസങ്ങള്‍ക്ക് മുമ്പ് കനാല്‍ ബേസ് പരിസരത്ത് തെരുവുനായ മൂന്ന് പേരെ കടിച്ചതും മുനിസിപ്പല്‍ മൈതാനത്ത് നടക്കാനും കളിക്കാനും എത്തുന്ന സ്ത്രീകള്‍ക്കും കുട്ടികള്‍ക്കും തെരുവുനായ്ക്കള്‍ ഭീഷണി ആയി മാറിയിട്ടുണ്ടെന്നും പരാതിയില്‍ ചൂണ്ടിക്കാട്ടിയിട്ടുണ്ട്. ഇയാള്‍ ഭക്ഷണം തെരുവുനായ്ക്കള്‍ക്ക് നല്‍കുന്നതിന്‍റെ വീഡിയോ ദൃശ്യങ്ങളും നല്‍കാന്‍ തയ്യാറായാണെന്നും പരാതിയില്‍ അഡ്വ. പി.ജെ. തോമസ് വ്യക്തമാക്കിയിരുന്നു. പരാതിക്കാരന്‍ നല്‍കിയ വണ്ടി നമ്പര്‍ മോട്ടോര്‍ വാഹനവകുപ്പുമായി ബന്ധപ്പെട്ട് കണ്ടെത്തിയതിന്‍റെ അടിസ്ഥാനത്തില്‍ വണ്ടി ഉടമസ്ഥന്‍ കയ്പമംഗലം സ്വദേശി മനോഹരനാണ് പിഴ ചുമത്തി കൊണ്ട് നോട്ടീസ് നല്‍കിയിരിക്കുന്നത്. സ്‌കൂട്ടറിന് നിയമപരമായ രേഖകള്‍ ഒന്നും ഇല്ലെന്നും സൂചനയുണ്ട്. തെരുവുനായ്ക്കള്‍ക്ക് പൊതുസ്ഥലങ്ങളില്‍ ഭക്ഷണാ വിശഷ്ടങ്ങള്‍ നിക്ഷേപിക്കുന്നവര്‍ക്കെതിരെ കര്‍ശന നടപടികള്‍ സ്വീകരിക്കുമെന്ന് നഗരസഭ ആരോഗ്യവിഭാഗം അറിയിച്ചു.

തൃശൂർ പുത്തൻപള്ളിയിൽ ഉൗട്ടുതിരുനാൾ ഇന്ന്

തൃശൂർ: പരിശുദ്ധ വ്യാകുലമാതാവിന്‍റെ ബസിലിക്കയിൽ ഉൗട്ടുതിരുനാൾ ഇന്ന്. രാവിലെ പത്തിനു വയനാട് ദുരിതാശ്വാസനിധിയിലേക്കു ബസിലിക്കയുടെ 20,01,353 രൂപ അതിരൂപത മെത്രാപ്പോലീത്ത മാർ ആൻഡ്രൂസ് താഴത്ത് മാനന്തവാടി രൂപത സഹായമെത്രാൻ മാർ അലക്സ് താരാമംഗലത്തിനു നൽകും. രാവിലെ ഒൻപതുമുതൽ രാത്രി ഒൻപതുവരെയാണ് ഉൗട്ടുനേർച്ച. ഇന്നു പൂർണദണ്ഡവിമോചനദിനംകൂടിയാണ്. ഉൗട്ടുനേർച്ചയോട് അനുബന്ധിച്ച് ചാർട്ടേഡ് അക്കൗണ്ടന്‍റ് വർഗീസ് പോൾ ഗാനരചന നിർവഹിച്ച് ജെയ്സണ്‍ കലാസദൻ ഈണംനൽകി ബസിലിക്ക ഗായകസംഘമായ ഡോളേഴ്സ് ബസിലിക്ക കൊയർ പാടിയ ബസിലിക്കയുടെ ശതാബ്ദിവർഷത്തിൽ അവതരിപ്പിക്കുന്ന -മാതാപാത- എന്ന മ്യൂസിക്ക് ആൽബം ആർച്ച് ബിഷപ് മാർ ആഡ്രൂസ് താഴത്ത് റിലീസ് ചെയ്യും. ബസിലിക്ക റെക്ട്ടർ ഫാ. തോമസ് കാക്കശേരി, നടത്തുകൈക്കാരൻ ടി.ടി. ജോസഫ്, ശതാബ്ദി ആഘോഷകമ്മിറ്റി ജനറൽ കണ്‍വീനർ ടി.കെ. അന്തോണികുട്ടി, കൾച്ചറൽ കമ്മിറ്റി കണ്‍വീനർ പോൾസണ്‍ ആലപ്പാട്ട് എന്നിവർ ചടങ്ങിൽ പങ്കെടുക്കും. തുടർന്ന് ആഘോഷമായ പോന്തിഫിക്കൽ കുർബാന. 2000 സെപ്റ്റംബർ 15ന് ഉൗട്ടുതിരുനാൾ ആദ്യമായി ആരംഭിക്കുന്പോൾ ഇപ്പോഴത്തെ തൃശൂർ അതിരൂപതാ ആർച്ച്ബിഷപ് മാർ ആൻഡ്രൂസ് താഴത്ത് ആയിരുന്നു വികാരി.

പനിച്ചുവിറച്ച്...

തൃശൂർ: ജില്ലയിൽ പനിബാധിതരുടെ എണ്ണത്തിൽ വർധന. വൈറൽ പനിക്കെതിരേ ജാഗ്രത പാലിക്കണമെന്ന് ആരോഗ്യവകുപ്പിന്‍റെ മുന്നറിയിപ്പ്. കഴിഞ്ഞ ഒരാഴ്ചയായി പനിബാധിച്ച് ചികിത്സ തേടിയെത്തിയവരുടെ എണ്ണം ഓരോദിനവും വർധിക്കുകയാണ്. വൈറൽപനിക്കു പുറമേ ഡെങ്കിപ്പനി, മഞ്ഞപ്പിത്തം, എലിപ്പനി തുടങ്ങിയവയും ജില്ലയിൽ റിപ്പോർട്ട് ചെയ്തിട്ടുണ്ട്. സെപ്റ്റംബർ ഏഴിനു 433 പേരാണു പനി ബാധിച്ച് ചികിത്സ തേടിയത്. ഇതിൽ നാലുപേരെ കിടത്തിച്ചികിത്സയ്ക്കു വിധേയരാക്കി. ചാവക്കാട്, അന്തിക്കാട്, അടാട്ട് എന്നിവടങ്ങളിൽ ഓരോരുത്തർക്ക് ഡെങ്കിപ്പനി സ്ഥിരീകരിച്ചു. എട്ടിന് 596 പേർ പനി ബാധിച്ചു ചികിത്സതേടി. ഇതിൽ 13 പേരെ കിടത്തിച്ചികിത്സയ്ക്കു വിധേയരാക്കി. ഒൻപതിന് 775 പേർ ചികിത്സ തേടി. പൊയ്യ, തൃശൂർ കോർപറേഷൻ എന്നിവടങ്ങളിൽ ഓരോരുത്തർക്കു ഡെങ്കിപ്പനി സ്ഥിരീകരിച്ചു. 10ന് 797 പേർ ചികിത്സ തേടി. 12 പേരെ കിടത്തിച്ചികിത്സയ്ക്കു വിധേയരാക്കി. പടിയൂരിൽ ഒരാൾക്കു ഡെങ്കിപ്പനി സ്ഥിരീകരിച്ചു. 11ന് 887 പേർ ചികിത്സ തേടി. ഏഴുപേരെ കിടത്തിച്ചികിത്സയ്ക്കു വിധേയരാക്കി. തൃശൂർ കോർപറേഷൻ-2, പുത്തൂർ-2, കൈപ്പറന്പ്, പടിയൂർ എന്നിവിടങ്ങളിൽ ഓരോരുത്തർക്കും ഡെങ്കിപ്പനി സ്ഥിരീകരിച്ചു. 12ന് 640 പേരാണു പനിക്കു ചികിത്സ തേടിയത്.

അന്തിക്കാട് പോലീസ് മർദനം: അഖിലിനെ വി.എം. സുധീരൻ സന്ദർശിച്ചു

അരിമ്പൂർ: അന്തിക്കാട് പോലീസിന്‍റെ മർദനത്തിൽ ഗുരുതരമായി പരിക്കേറ്റ് തൃശൂർ ദയ ആശുപത്രിയിൽ ചികിത്സയിൽ കഴിയുന്ന അരിമ്പൂർ സ്വദേശി അഖിൽ യേശുദാസിനെ മുൻ കെപി സിസി പ്രസിഡന്‍റ് വി.എം. സുധീരൻ സന്ദർശിച്ചു. പോലീസിൽ നിന്നുണ്ടായ അനുഭവങ്ങൾ അഖിലിനോട് ചോദിച്ചറിഞ്ഞ സുധീരൻ നീതിയ്ക്കുവേണ്ടി അഖിൽ നടത്തുന്ന ശ്രമങ്ങൾക്ക് എല്ലാവിധ പിന്തുണയും ഉണ്ടാകുമെന്ന് അറിയിച്ചു. അഖിലിന്‍റെ അമ്മ റീനയുമായും ആശയവിനിമയം നടത്തിയാണ് മടങ്ങിയത്. ഡിസിസി ജന. സെക്രട്ടറി അഡ്വ. വി. സുരേഷ് കുമാർ ഒപ്പമുണ്ടായിരുന്നു. കഴിഞ്ഞ വർഷം സെപ്റ്റംബർ 30ന് കാഞ്ഞാണി പെരുമ്പുഴ പാതയിൽവച്ച് അഖിൽ ഓടിച്ച ഓട്ടോറിക്ഷ ഇടിച്ച് ബൈക്ക് യാത്രക്കാരന് പരിക്കേറ്റു എന്നു പറഞ്ഞ് സ്റ്റേഷനിൽ വിളിച്ചു വരുത്തിയായിരുന്നു അന്നത്തെ എസ്ഐ ആയിരുന്ന വി.പി. അരിസ്റ്റോട്ടിൽ മർദിച്ചത്.തന്‍റെ വാഹനമല്ല അതെന്ന് പറഞ്ഞിട്ടും എസ്ഐ മർദിക്കുകയായിരുന്നുവത്രെ. ഇതിനിടെ പിതാവിനെ തെറി പറഞ്ഞത് ചോദ്യം ചെയ്തപ്പോൾ എസ്ഐ മുഖത്തടിക്കുകയും ചെയ്തു. മുഖത്തടിച്ചത് പ്രതിരോധിക്കാൻ ശ്രമിച്ചപ്പോൾ കയ്യിലെ മോതിരംകൊണ്ട് എസ്ഐയുടെ മുഖത്തിന് പരിക്കേറ്റു. ഇതോടെ പ്രകോപിതനായ പോലീസുകാർ തന്നെ നാല് മണിക്കൂർ നേരം മർദിച്ചതായി അഖിൽ ആരോപിച്ചിരുന്നു.വിലങ്ങിട്ട് മുട്ടുകാല് കൊണ്ടായിരുന്നു മർദനം. ബൂട്ടിട്ട കാലുകൊണ്ട് ചവിട്ടി. സംഭവം പുറത്ത് പറഞ്ഞാൽ കഞ്ചാവ് കേസിൽ കുടുക്കുമെന്നും പോലീസുകാർ പറഞ്ഞതായി അഖിൽ പറഞ്ഞു. ശ്വാസകോശത്തിന് ഗുരുതര പരിക്കേറ്റ് ജീവിതം തള്ളി നീക്കുകയായിരുന്ന അഖിലിന് തൃശൂരിലെ സ്വകാര്യ ആശുപത്രിയിൽ കഴിഞ്ഞ ദിവസമാണ് ശസ്ത്രക്രിയക്ക് വിധേയമാക്കിയത്.

ജനപ്രതിനിധികളാകാൻ സ്ത്രീകൾ മുന്നോട്ടുവരണം: മാർ നീലങ്കാവിൽ

കൊട്ടേക്കാട്: നല്ല കുടുംബങ്ങളെയും നൻമയും കരുത്തുമുള്ള സമൂഹത്തെയും വാർത്തെടുക്കുന്നതിൽ വീട്ടമ്മമാർ വഹിക്കുന്ന പങ്കു വലുതാണെന്ന് തൃശൂർ അതിരൂപതാ സഹായമെത്രാൻ മാർ ടോണി നീലങ്കാവിൽ. ഇടവകയുടെ സഹസ്രാബ്ദ രജതജൂബിലി ആഘോഷത്തിന്‍റെ ഭാഗമായി നടത്തിയ വനിതാസംഗമം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സംരംഭകരും ജനപ്രതിനിധികളുമെല്ലാമായി കൂടുതൽ സ്ത്രീകൾ സമൂഹമധ്യത്തിലേക്കു കടന്നുവരേണ്ടതു കാലഘട്ടത്തിന്‍റെ ആവശ്യമാണ്. ഇടവക ട്രസ്റ്റിമാരായും സമൂഹനേതൃനിരയിലേക്കു വനിതകൾ കടന്നുവരേണ്ടതുണ്ടെന്നു മാർ ടോണി നീലങ്കാവിൽ ചൂണ്ടിക്കാട്ടി. വികാരി ഫാ. ഫ്രാങ്കോ കവലക്കാട്ട് അധ്യക്ഷത വഹിച്ചു. സഹസ്രാബ്ദ രജതജൂബിലിയുടെ സമാപനസമ്മേളനം ഡിസംബർ ഏഴിനു മേജർ ആർച്ച്ബിഷപ് മാർ റാഫേൽ തട്ടിൽ ഉദ്ഘാടനം ചെയ്യുമെന്ന് അദ്ദേഹം പറഞ്ഞു. സൈബർ ക്രൈം എഎസ്ഐ പി.കെ. പ്രതിഭ, എഡിസണ്‍ ഫ്രാൻസ്, അസിസ്റ്റന്‍റ് വികാരി ഫാ. മിഥുൻ ചുങ്കത്ത്, ജോയിന്‍റ് ജനറൽ കണ്‍വീനർ സി.എൽ. ഇഗ്നേഷ്യസ്, ട്രസ്റ്റി ഡേവിസ് കാഞ്ഞിരപറന്പിൽ, പ്രോഗ്രാം കണ്‍വീനർമാരും സ്നേഹനിധി, മാതൃവേദി സാരഥികളുമായ റെജി ജോഷി, ജെസി പോൾ എന്നിർ പ്രസംഗിച്ചു. ഏറ്റവും പ്രായമുള്ള വനിത റീത്ത ആന്‍റണിയെയും കൂടുതൽ മക്കളുള്ള വനിതകളായ സിൻജു വിനോദ്, റിനു സിന്‍റോ, റോസ്മിൻ ആന്‍റോ എന്നിവരെയും ആദരിച്ചു.

അവകാശദിനാചരണം: അതിരൂപതാതല ഉദ്ഘാടനം

തൃശൂർ: 21നു തൃശൂരിൽ നടത്തുന്ന സമുദായ ജാഗ്രതാസദസിനു മുന്നോടിയായി അതിരൂപതയിലെ ഇടവകകളിൽ സംഘടിപ്പിച്ച അവകാശദിനാചരണത്തിന്‍റെയും മുഖ്യമന്ത്രിക്കു നൽകുന്ന ഭീമഹർജിയുടെ ഒപ്പുശേഖരണത്തിന്‍റെയും അതിരൂപതാതല ഉദ്ഘാടനം ആർച്ച്ബിഷപ് മാർ ആൻഡ്രൂസ് താഴത്ത് നിർവഹിച്ചു. കോളങ്ങാട്ടുകര സെന്‍റ് മേരീസ് പള്ളിയിൽ നടന്ന ചടങ്ങിൽ വികാരി ഫാ. സിറിയക് ചാലിശേരി, പാസ്റ്ററൽ കൗണ്‍സിൽ സെക്രട്ടറി ജോഷി വടക്കൻ, കത്തോലിക്ക കോണ്‍ഗ്രസ് ഡയറക്ടർ ഫാ. ജീജോ വള്ളുപ്പാറ, പ്രസിഡന്‍റ് ഡോ. ജോബി കാക്കശേരി, ട്രഷറർ റോണി അഗസ്റ്റിൻ, ഫൊറോന പ്രസിഡന്‍റ് ബാബു നീലങ്കാവിൽ എന്നിവർ പങ്കെടുത്തു. അതിരൂപതയിലെ ഇരുന്നൂറിലേറെ ഇടവകകളിൽ അവകാശദിനാചരണവും ഒപ്പുശേഖരണവും സംഘടിപ്പിച്ചു. വിവിധ കേന്ദ്രങ്ങളിൽ ഇടവക വികാരിമാരും സമുദായനേതാക്കളും നേതൃത്വംനൽകി. രാജ്യത്തിന്‍റെ വിവിധ ഭാഗങ്ങളിൽ ക്രൈസ്തവർക്കു നേരെയുള്ള ആക്രമണങ്ങൾ അവസാനിപ്പിക്കുക, ജസ്റ്റിസ് ജെ.ബി. കോശി കമ്മീഷൻ റിപ്പോർട്ട് അടിയന്തരമായി നടപ്പാക്കുക, വിദ്യാഭ്യാസമേഖലയിലെ നീതിരഹിത വിവേചനങ്ങൾ അവസാനിപ്പിക്കുക, മലയോര - തീരദേശ - ചെറുകിട കച്ചവടമേഖലയിലെ പ്രതിസന്ധികൾക്കു പരിഹാരം കാണുക, സഭാസ്വത്തുവകകൾ കൈയടക്കാനുള്ള സർക്കാർ നീക്കം അവസാനിപ്പിക്കുക തുടങ്ങിയ വിഷയങ്ങളുന്നയിച്ചാണു സമുദായ ജാഗ്രതാസദസ് സംഘടിപ്പിക്കുന്നത്. 21ന് ഉച്ചകഴിഞ്ഞു മൂന്നിനു സെന്‍റ് തോമസ് കോളജിൽനിന്ന് ആരംഭിക്കുന്ന അവകാശ പ്രഖ്യാപനറാലിയും ഡോളേഴ്സ് ബസിലിക്ക അങ്കണത്തിൽ നടക്കുന്ന പൊതുസമ്മേളനത്തിലും അതിരൂപതയിലെ ഇടവകകളിൽനിന്ന് ആയിരക്കണക്കിനുപേർ പങ്കെടുക്കും.

കൃഷ്ണലീലകളിൽ ആറാടി...

ഗുരുവായൂർ: കണ്ണന്‍റെ പറന്നാൾസുദിനത്തിൽ ഗുരുപവനപുരിയെ അന്പാടിയാക്കി ക്ഷേത്രസന്നിധിയിലെങ്ങും ഉണ്ണക്കണ്ണൻമാരും ഗോപികമാരും നിറഞ്ഞു. കൃഷ്ണലീലകളിൽ നാട് ലയിച്ചു. ഗുരുവായൂർ നായർസമാജത്തിന്‍റെ ആഭിമുഖ്യത്തിലെ ആഘോഷപരിപാടികൾ മമ്മിയൂർ ക്ഷേത്രസന്നിധിയിൽ നിന്നാണു തുടങ്ങിയത്. ദേവീദേവന്മാരുടെ തിടന്പ് എഴുന്നള്ളിച്ച ജീവത എഴുന്നള്ളിപ്പ് മഹാദേവസന്നിധിയിൽ ഒരു മണിക്കൂറോളം നിറഞ്ഞാടി. ഗുരുവായൂരിൽ അഷ്ടമിരോഹിണി ദിവസം നായർസമാജത്തിന്‍റെ നേതൃത്വത്തിലെ ആഘോഷപരിപാടിയിലെ മുഖ്യ ഇനമാണ് ജീവത എഴുന്നള്ളത്ത്. തുടർന്ന് ഗോപികാനൃത്തത്തോട ഉറി അടിച്ചുടച്ചാണ് ഘോഷയാത്ര ആരംഭിച്ചത്. ദേവീദേവന്മാരുടെ തിടന്പ് എഴുന്നള്ളിച്ച ജീവത എഴുന്നള്ളിപ്പും, ശ്രീകൃഷ്ണരഥവും, മേളവും ഘോഷയാത്രയെ ഭക്തിസാന്ദ്രമാക്കി. നഗരവീഥികളിൽ അലങ്കരിച്ച് കെട്ടിതൂക്കിയ ഉറികൾ രാധാകൃഷ്ണ വേഷമണിഞ്ഞ കുട്ടികൾ അടിച്ചുടച്ചു. തുടർന്ന് വാശിയേറിയ ഉറിയടിയും ഉണ്ടായി. അപ്പം, അവിൽ തുടങ്ങിയവയാണ് ഉറികളിൽ നിറച്ചിരുന്നത്. ഘോഷയാത്രയിലുടനീളം ഭക്തർക്ക് അപ്പം വിതരണംചെയ്തു. ഘോഷയാത്ര ഗുരുവായൂരപ്പസന്നിധിയിൽ സമാപിച്ചു. പെരുന്തട്ട ശിവകൃഷ്ണ ഭക്തസേവാസംഘത്തിന്‍റെ ഘോഷയാത്ര പെരുന്തട്ട ക്ഷേത്രസന്നിധിയിയിൽനിന്നാണു തുടങ്ങിയത്. ഉറിയടി, താലം, മേളം, ഗോപികാനൃത്തം എന്നിവ അണിനിരന്ന ഘോഷയാത്ര പടിഞ്ഞാറെ നടവഴി പെരുന്തട്ടയിൽ സമാപിച്ചു. നെൻമിനി ബലരാമക്ഷേത്രത്തിൽ നിന്നുള്ള ഘോഷയാത്ര ഗുരുവായൂർ ക്ഷേത്രസന്നിധിയിൽ എത്തി. തുടർന്ന് ദേവസംഗമം ഉണ്ടായി. ബാലഗോകുലത്തിന്‍റെ ശോഭായാത്ര തിരുവെങ്കിടാചലപതി ക്ഷേത്രത്തിൽനിന്ന് ആരംഭിച്ച് ഗുരുവായൂരിലെത്തി വടക്കേനടയിൽ സമാപിച്ചു.

പന്തൽ പണിക്കിടെ വീണ് പരിക്കേറ്റ യുവാവ് മരിച്ചു

തിരുവില്വാമല: പന്തൽ പണിക്കിടെ വീണ് ഗുരുതരമായി പരിക്കേറ്റ് ചികിത്സയിലായിരുന്ന യുവാവ് മരിച്ചു. എരവത്തൊടി കാഞ്ഞുള്ളി വീട്ടിൽ രാധാകൃഷ്ണൻ - രാജലക്ഷ്മി ദമ്പതികളുടെ മകൻ രാജീവാ(34)ണ് മരിച്ചത്. കഴിഞ്ഞ ഞായറാഴ്ചയാണ് അപകടം. നട്ടെല്ലിന് പരിക്കേറ്റ് തൃശൂർ മെഡിക്കൽ കോളജ് ആശുപത്രിയിൽ ചികിത്സയിലായിരുന്നു. അവിവാഹിതനാണ്.

മതപരിവർത്തന നിരോധന നിയമം ഗൂഢലക്ഷ്യത്തോടെ: അതിരൂപത പാസ്റ്ററൽ കൗണ്‍സിൽ

തൃശൂർ: രാജ്യത്ത് പന്ത്രണ്ടോളം സംസ്ഥാനങ്ങളിലും, അടുത്ത നാളുകളിൽ രാജസ്ഥാൻ, ഉത്തരാഖണ്ഡ് സംസ്ഥാനങ്ങളിലും നടപ്പിലാക്കിയ മതപരിവർത്തന നിരോധന നിയമം അത്യന്തം അപലപനീയവും പ്രതിഷേധാർഹവുമാണെന്ന് തൃശൂർ അതിരൂപത പാസ്റ്ററൽ കൗണ്‍സിൽ അഭിപ്രായപ്പെട്ടു. നിർബന്ധിത മതപരിവർത്തനം സഭ അംഗീകരിക്കുന്നില്ല. ജീവപര്യന്തം തടവും ഒരു കോടി രൂപ പിഴയും വ്യവസ്ഥ ചെയ്യുന്ന രാജസ്ഥാൻ നിയമവും, സമാനമായ ശിക്ഷാവിധികൾ വ്യവസ്ഥ ചെയ്യുന്ന ഉത്തരാഖണ്ഡ് നിയമവും പാക്കിസ്ഥാൻ പോലുള്ള മതാധിഷ്ഠിത രാജ്യങ്ങളിലെ മതനിന്ദ നിയമത്തെ ഓർമിപ്പിക്കുന്നതും ഇന്ത്യയുടെ ഭരണഘടനയുടെ മതേതരമൂല്യങ്ങൾക്ക് നിരക്കാത്തതുമാണ്. രാജ്യത്തെ ഫാസിസ്റ്റ് വഴികളിലൂടെ നയിക്കുന്ന മതപരിവർത്തന നിരോധന നിയമങ്ങൾ മതന്യൂനപക്ഷങ്ങൾക്ക് കടുത്ത വെല്ലുവിളി ഉയർത്തുന്നതും അരക്ഷിതബോധം സൃഷ്ടിക്കുന്നതും ആണെന്ന് അതിരൂപത പാസ്റ്ററൽ കൗണ്‍സിൽ അഭിപ്രായപ്പെട്ടു. ആർച്ച്ബിഷപ് മാർ ആൻഡ്രൂസ് താഴത്ത് അധ്യക്ഷത വഹിച്ചു. ആനുകാലിക സാമൂഹ്യ രാഷ്ട്രീയ സമ്മർദങ്ങളും, സുവിശേഷവത്ക്കരണവും എന്ന വിഷയം പാസ്റ്ററൽ കൗണ്‍സിൽ സെക്രട്ടറി ജോഷി വടക്കൻ അവതരിപ്പിച്ചു. തുടർന്നു നടന്ന ചർച്ചകളിൽ അതിരൂപത സഹായമെത്രാൻ മാർ ടോണി നീലങ്കാവിൽ മോഡറേറ്ററായി. 21ന് സംഘടിപ്പിക്കുന്ന സമുദായ ജാഗ്രതാ സദസ് വിജയിപ്പിക്കാൻ യോഗം പ്രതിജ്ഞയെടുത്തു. അതിരൂപത വികാരി ജനറാൾമാരായ മോണ്‍. ജെയ്സണ്‍ കൂനംപ്ലാക്കൽ, മോണ്‍. ജോസ് കോനിക്കര, അതിരൂപത ചാൻസലർ ഡോ. ഡൊമിനിക്ക് തലക്കോടൻ, പാസ്റ്ററൽ കൗണ്‍സിൽ ജോയിന്‍റ് സെക്രട്ടറി എൽസി വിൻസന്‍റ്, എൻ.പി. ജാക്സൻ എന്നിവർ പ്രസംഗിച്ചു. അധ്യാപകരുടെ നിയമനാംഗീകാര പ്രശ്നത്തിൽ സർക്കാർ നിലപാട് നീതിരഹിത വിവേചനമാണെന്ന് യോഗം വിലയിരുത്തി.

തൃശൂരിലെ റോഡ് പ്രവൃത്തികൾ സമയബന്ധിതമായി പൂർത്തിയാക്കണം

തൃശൂർ: റോഡ് പ്രവൃത്തികൾ സമയബന്ധിതമായി പൂർത്തിയാക്കണമെന്ന് മന്ത്രി പി.എ. മുഹമദ് റിയാസ് ഉദ്യോഗസ്ഥർക്ക് നിർദേശംനൽകി. തൃശൂർ- മാന്ദാമംഗലം റോഡ് നിർമാണ പ്രവൃത്തികളുടെ പുരോഗതി വിലയിരുത്തുന്നതിനായി സ്ഥലം സന്ദർശിക്കവേയാണ് മന്ത്രി നിർദേശംനൽകിയത്. അഞ്ചു കോടി രൂപ ചെലവിൽ നിർമാണ പ്രവർത്തനം നടത്തുന്ന തൃശൂർ-മാന്ദാമംഗലം റോഡിന്‍റെ ഡ്രെയിൻ പ്രവൃത്തി പൂർത്തിയായെന്നും ബിറ്റുമിൻ മെക്കാഡം സർഫസിംഗ് ജോലികൾ ആരംഭിച്ചുവെന്നും മന്ത്രി പറഞ്ഞു. ജില്ലയിലെ എല്ലാ സബ് റോഡുകളും ഗതാഗത യോഗ്യമാക്കണമെന്ന് നേരത്തെ നിർദേശം നൽകിയിരുന്നു. എന്നാൽ മഴ കാരണം ചിലയിടങ്ങളിൽ പ്രവൃത്തി പൂർണമായിരുന്നില്ല. മഴയ്ക്കുശേഷം നിർമാണ പ്രവൃത്തികൾ എത്രത്തോളം പുരോഗമിച്ചിട്ടുണ്ടെന്നു പരിശോധിക്കുന്നതിനാണ് മന്ത്രി നേരിട്ടെത്തിയത്. സൂപ്രണ്ടിംഗ് എൻജിനീയർ അടക്കമുള്ള ഉന്നത ഉദ്യോഗസ്ഥർ മന്ത്രിയോടൊപ്പം ഉണ്ടായിരുന്നു.

ഗുരുവായൂർ ക്ഷേത്രസന്നിധി ആഘോഷത്തിമർപ്പിൽ

ഗുരുവായൂര്‍: ഉണ്ണിക്കണ്ണന്‍റെ പിറന്നാൾദിനമായ ഇന്ന് ക്ഷേത്രസന്നിധി ആഘോഷത്തിമർപ്പിലാണ്. അഷ്ടമിരോഹിണിക്ക് ദർശനത്തിനും പിറന്നാൾസദ്യയ്ക്കുമുള്ള ഒരുക്കങ്ങൾ പൂർത്തിയായി. കണ്ണനെ ഒരുനോക്കുകണ്ട് അനുഗ്രഹംവാങ്ങാൻ പതിനായിരങ്ങളാണ് ക്ഷേത്രസന്നിധിയിലെത്തുക. വിവിധ സംഘടനകളുടെ നേതൃത്വത്തിലുള്ള ആഘോഷങ്ങളുമുണ്ടാകും. ക്ഷേത്രത്തില്‍ രാവിലേയും ഉച്ചതിരിഞ്ഞും കാഴ്ചശീവേലിയുണ്ട്. രാവിലെ കാഴ്ചശീവേലിക്ക് പെരുവനം കുട്ടന്‍മാരാരുടെ നേതൃത്വത്തില്‍ മേളവും ഉച്ചതിരിഞ്ഞ് വൈക്കം ചന്ദ്രൻമാരാരുട പഞ്ചവാദ്യവും അകമ്പടിയാവും. രാത്രി വിളക്കെഴുന്നള്ളിപ്പിനും പഞ്ചവാദ്യം അകമ്പടിയാവും. ക്ഷേത്രത്തിലെത്തുന്ന ഭക്തര്‍ക്ക് വിഭവസമൃദ്ധമായ പിറന്നാള്‍സദ്യയും നല്‍കും. 40,000 പേർക്കുള്ള സദ്യയാണ് ഒരുക്കുന്നത്. രാവിലെ ഒൻപതുമുതൽ ക്ഷേത്രത്തിന്‍റെ പടിഞ്ഞാറുഭാഗത്തെ അന്നലക്ഷമി ഹാളിലും തെക്കുഭാഗത്തെ ശ്രീഗുരുവായുരപ്പൻ ഓഡിറ്റോറിയത്തിലുമാണ് സദ്യ നല്‍കുക. ഉച്ചയ്ക്ക് രണ്ടുവരെ വരിയിൽ നിൽക്കുന്നവർക്ക് സദ്യ നൽകും. മേല്‍പ്പുത്തൂര്‍ ഓഡിറ്റോറിയത്തില്‍ രാവിലെ പ്രഭാഷണമുണ്ടാവും. വൈകിട്ട് അഞ്ചിന് സാംസ്‌കാരികസമ്മേളനത്തില്‍ ശ്രീഗുരുവായൂരപ്പന്‍ ക്ഷേത്രകലാ പുരസ്‌കാരം മന്ത്രി വി.എൻ. വാസവൻ സമ്മാനിക്കും. രാത്രി കൃഷ്ണനാട്ടത്തിലെ അവതാരം കളിയും അരങ്ങേറും. രാവിലെ ഒൻപതിന് നായർ സമാജത്തിന്‍റെ നേതൃത്വത്തിലുള്ള ആഘോഷ പരിപാടികൾ മമ്മിയൂർ ക്ഷേത്രത്തിൽനിന്നു ആരംഭിക്കും. ഘോഷയാത്ര ഉച്ചയ്ക്ക് 12ന് കിഴക്കേനടയിൽ സമാപിക്കും. പെരുന്തട്ട ശിവകൃഷ്ണ ഭക്തസേവാസംഘത്തിന്‍റെ ആഘോഷം രാവിലെ ഒമ്പതിന് പെരുന്തട്ട ക്ഷേത്രത്തിൽനിന്ന് ആരംഭിക്കും. തുടർന്ന് പിറന്നാൾ സദ്യയുമുണ്ട്. നെന്മിനി ബലരാമക്ഷേത്രത്തിന്‍റെ ഘോഷയാത്ര രാവിലെ ഒമ്പതിന് നെന്മിനിയിൽനിന്ന് ആരംഭിച്ച് 10.30ന് കിഴക്കേനടയിലെത്തും. ബാലഗോകുലത്തിന്‍റെ ഘോഷയാത്ര ഉച്ചകഴിഞ്ഞ് തിരുവെങ്കിടം ക്ഷേത്രസന്നിധിയിൽനിന്ന് ആരംഭിച്ച് ഗുരുവായൂർ ക്ഷേത്രത്തിലെത്തിച്ചേരും. സുരക്ഷാക്രമീകരണങ്ങൾക്കായി കൂടുതൽ പോലീസിനെയും നിയോഗിച്ചിട്ടുണ്ട്. ശ്രീലകം നെയ്യപ്പംകൊണ്ട് നിറയും ഗുരുവായൂര്‍: അഷ്ടമിരോഹിണിയുടെ പ്രധാനവഴിപാടായ നെയ്യപ്പം ഇന്ന് അത്താഴപ്പൂജയ്ക്ക് ഗുരുവായൂരപ്പന് നിവേദിക്കും. 7,25,760 രൂപക്കുള്ള അപ്പമാണ് തയ്യാറാക്കുന്നത്. 48,834 നെയ്യപ്പമാണ് അത്താഴപ്പൂജക്ക് ഗുരുവായൂരപ്പന് നിവേദിക്കുക.പുലര്‍ച്ചെ മുതല്‍ പത്തുകാര്‍ വാര്യന്മാര്‍ ഉരലില്‍ ഇടിച്ച്നല്‍കുന്ന അരിപ്പൊടി ഉപയോഗിച്ച് രാവിലെ ഏഴുമുതല്‍ അപ്പം തയ്യാറാക്കി തുടങ്ങും. അരിപ്പൊടിയും, നേന്ത്രപ്പഴവും, ശര്‍ക്കരയും, ചുക്കും, ജീരകവും ചേര്‍ത്താണ് കീഴ്ശാന്തി നമ്പൂതിരിമാര്‍ നറുനെയ്യുപയോഗിച്ച് അപ്പം തയ്യാറാക്കുന്നത്. രാത്രി അത്താഴപ്പൂജയ്ക്ക് ശേഷം അപ്പം ഭക്തജനങ്ങള്‍ക്ക് വിതരണം ചെയ്യും. 8,08000 രൂപയൂടെ പാല്‍പ്പായസവും നാളെ ഗുരുവായൂരപ്പന് നിവേദിക്കും. ഗതാഗത ക്രമീകരണങ്ങൾ ഗുരുവായൂര്‍: അഷ്ടമിരോഹിണിയുടെ തിരക്ക് കണക്കിലെടുത്ത് ഇന്നുരാവിലെ ഒമ്പതുമുതല്‍ ഗുരുവായൂരില്‍ ഗതാഗത ക്രമീകരണങ്ങൾ ഏര്‍പ്പെടുത്തുമെന്ന് പോലീസ് അറിയിച്ചു. ഔട്ടര്‍-ഇന്നര്‍ റോഡുകളില്‍ പൂര്‍ണമായും വണ്‍വേ ആയിരിക്കും.തൃശൂര്‍ ഭാഗത്തുനിന്നും വരുന്ന വാഹനങ്ങള്‍ മഞ്ജുളാല്‍ ജംഗ്ഷനില്‍ നിന്ന് ഇടത്തോട്ടു തിരിഞ്ഞു പോകണം. കുന്നംകുളം ഭാഗത്തുനിന്നുള്ള വാഹനങ്ങള്‍ ചൂല്‍പ്പുറത്തു നിന്ന് തിരിഞ്ഞ് പോലീസ് സ്‌റ്റേഷന്‍ റോഡ് വഴി മാവിന്‍ ചുവടിലെത്തി ഗുരുവായൂരിലേക്ക് പ്രവേശിക്കണം. പാവറട്ടി ഭാഗത്തുനിന്നുള്ള ഹെവി വാഹനങ്ങള്‍ക്ക് ഗുരുവായൂരിലേക്ക് പ്രവേശനമുണ്ടാകില്ല. പഞ്ചാരമുക്കില്‍ നിന്ന് ചാവക്കാട്ടേയ്ക്ക് പോകണം. ഗുരുവായൂരിലെത്തുന്ന വാഹനങ്ങള്‍ പരമാവധി ഔട്ടര്‍ റിംഗ് റോഡിലെ പാര്‍ക്കിംഗ് കേന്ദ്രങ്ങളിലെത്തണം. ഔട്ടര്‍-ഇന്നര്‍ റിംഗ് റോഡുകളിലായി 12 പാര്‍ക്കിംഗ് കേന്ദ്രങ്ങളാണുള്ളത്.

മഴവിൽ ആനന്ദ സംഗീതോത്സവം 17ന്

തൃശൂർ: ഗായകൻ യേശുദാസിന്‍റെ ശതാഭിഷേകത്തോടനുബന്ധിച്ച് ആചാര്യ വിഷ്വൽ മീഡിയയുടെ ആഭിമുഖ്യത്തിൽ മഴവിൽ ആനന്ദ സംഗീതോത്സവം 17ന് തെക്കേമഠം ചിറയ്ക്കു സമീപമുള്ള എൻഎസ്എസ് ഹാളിൽ നടക്കും. രാവിലെ എട്ടുമുതൽ മുപ്പതിൽപരം സംഗീതസംവിധായകരുടെ 101 ഗാനങ്ങൾ കോർത്തിണത്തിണക്കിയുള്ള സംഗീതാർച്ചന ഗായകൻ സോമസുന്ദരൻ ചെറുശേരി നിർവഹിക്കും. വൈകീട്ട് 6.30ന് കേരളം എന്‍റെ കേരളം, ഭാരതം എന്‍റെ ഭാരതം എന്നു തുടങ്ങുന്ന ദേശഭക്തിഗാന സംഗീതനൃത്താവിഷ്കാരത്തിനു പിന്നണി ഗായിക ഡോ. വൈക്കം വിജയലക്ഷ്മിയും സംഗീതസംവിധായകൻ ആചാര്യ ആനന്ദകൃഷ്ണനും നേതൃത്വം നല്കും. വയനാടൻ പ്രകൃതിവിഭവങ്ങളുടെ വിപണനമേളയും സംഘടിപ്പിക്കും. പത്രസമ്മേളനത്തിൽ സംഗീത സംവിധായകൻ ആചാര്യ ആനന്ദ് കൃഷ്ണൻ, രാജേശ്വരി ഗണേഷ് ആലപ്പുഴ, ദേവിമായ ആലപ്പുഴ, അനിൽ ആഗ്രഹ, ബാബു മാസ്റ്റർ എന്നിവർ പങ്കെടുത്തു.

ഒരുമ റോഡിന്‍റെ നിർമാണോദ്ഘാടനം

പെരിഞ്ഞനം: മതിലകം ബ്ലോക്ക് പഞ്ചായത്ത് ഡിവിഷൻ പതിനാലിൽ ഉൾപ്പെടുന്ന പെരിഞ്ഞനം രണ്ടാം വാർഡിലെ ഒരുമ റോഡിന്‍റെ നിർമാണോദ്ഘാടനം നടത്തി. ബ്ലോക്ക് പഞ്ചായത്ത് എസ്‌സി പദ്ധതിയിൽ ഉൾപ്പെടുത്തിയാണ് 20 ലക്ഷം രൂപ ചെലവഴിച്ച് ബ്ലോക്ക് പഞ്ചായത്ത് റോഡ് നിർമിച്ചുനൽകുന്നത്. മതിലകം ബ്ലോക്ക് പഞ്ചായത്ത് പ്രസിഡന്‍റ്് സി.കെ. ഗിരിജ നിർമാണോ ദ്ഘാ ടനം നിർവഹിച്ചു. ബ്ലോക്ക് ഡിവിഷൻ മെമ്പർ ആർ.കെ. ബേബി അധ്യക്ഷത വഹിച്ചു. പെരിഞ്ഞനം ഗ്രാമപഞ്ചായത്ത് പ്രസിഡന്‍റ് വിനീത മോഹൻദാസ് മുഖ്യാതിഥിയായി. വാർഡ് മെമ്പർ സായിദ മുത്തുക്കോയ തങ്ങൾ, സന്ധ്യ സുനിൽ, കെ.ജി. സജീവ് എന്നിവർ പ്രസംഗിച്ചു. റോഡിനോട് ചേർന്നുള്ള തോടിന്‍റെ ഭാഗം കെട്ടി ഒതുക്കി മുകളിൽ കൈവരി ഉൾപ്പടെ സ്ഥാപിച്ചാണ് സിമന്‍റ് കട്ടകൾ വിരിച്ച റോഡ് നിർമിച്ചു നൽകുന്നത്. ഒരുമാസത്തിനുള്ളിൽ നിർമാണം പൂർത്തീകരിച്ച് റോഡ് സഞ്ചാരയോഗ്യമാക്കി തുറന്നുകൊടുക്കാനാണു തീരുമാനിച്ചിട്ടുള്ളതെന്ന് അധികൃതർ പറഞ്ഞു.

ദേവാലയങ്ങളിൽ തിരുനാൾ

പുഷ്പഗിരി ഫാത്തിമ മാതാ മേലൂർ: മരിയൻ തീർഥാടന കേന്ദ്രമായ പുഷ്പഗിരി ഫാത്തിമ മാതാ പള്ളിയിൽ വിശുദ്ധ യൂദാ തദേവൂസിന്‍റെ ഊട്ടുതിരുനാളിനു കൊടിയേറി. കൊടിയേറ്റിനും വിശുദ്ധ കുർബാനയ്ക്കും നൊവേനക്കും ഫാ. ടോമി കണ്ടത്തിൽ കാർമികനായി. തുടർന്ന് പ്രദക്ഷിണവും ഉണ്ടായിരുന്നു. ഇന്നു രാവിലെ 6.30ന് വിശുദ്ധ കുർബാന. 9.30ന് നടക്കുന്ന ആഘോഷമായ തിരുനാൾ പാട്ടുകുർബാനയ്ക്ക് ഫാ. ജെസ്‌ലിൻ തെറ്റയിൽ മുഖ്യകാർമികനാകും. ഫാ. തോമസ് പടിഞ്ഞാറെക്കൂറ്റ് വചനസന്ദേശം നൽകും. തുടർന്ന് ആരാധനയും ഊട്ടുനേർച്ചവിതരണവും ഉണ്ടായിരിക്കും. പ്ലാവിൻമുറി ദയാനഗർ സെന്‍റ് മേരീസ് മാള: പ്ലാവിൻമുറി ദയാനഗർ സെന്‍റ് മേരീസ് പള്ളിയിൽ പരിശുദ്ധ കന്യകാമറിയത്തിന്‍റെ ജനനത്തിരുനാളിന് ഫാ. ബിനോയ്‌ കോഴിപ്പാട്ട് കൊടിയേറ്റി. പ്രധാന തിരുനാൾ ദിനമായ ഇന്നു രാവിലെ 10ന് ആഘോഷമായ തിരുനാൾ ദിവ്യബലി, ലദീഞ്ഞ്, നൊവേന എന്നിവ നടക്കും. ഫാ. സിബു കള്ളാപറമ്പിൽ മുഖ്യകാർമികനാകും. ഫാ. ജോർജ്് വേഴപ്പറമ്പിൽ സന്ദേശം നൽകും. തുടർന്ന് ഊട്ടുനേർച്ച വെഞ്ചിരിപ്പ്, വിതരണം.

കൊപ്രക്കളം സെന്‍ററിലെ ഗതാഗതക്കുരുക്ക് പരിഹരിക്കണമെന്നാവശ്യപ്പെട്ട് യുഡിഎഫ് സമരം

കയ്പമംഗലം: ദേശീയപാത കൊപ്രക്കളം സെന്‍ററിലെ ഗതാഗതക്കുരുക്ക് പരിഹരിക്കണമെന്നാവശ്യപ്പെട്ട് യുഡിഎഫ് സമരം. ദേശീയ പാത 66 നിർമാണ പ്രവർത്തനങ്ങളുടെ ഭാഗമായി കൊപ്രക്കളത്ത് നടത്തിയ ഗതാഗത‌ക്രമീകരണം അപകട സാധ്യത വർധിപ്പിക്കുന്നുവെന്നും ഹൈവേയുടെ സർവീസ് റോഡ് കഴിഞ്ഞഭാഗം കൃത്യമായി മൂടാത്തതുമൂലം വാഹനങ്ങൾ മുട്ടിയുരഞ്ഞാണ് പോകുന്നതെന്നും സമരക്കാർ ആരോപിച്ചു. കൂടാതെ കൊപ്രക്കളം പഞ്ഞംപള്ളി റോഡ് തുടങ്ങുന്ന ഭാഗത്ത് മാസങ്ങളായി തകർന്നുകിടക്കുന്ന ഭാഗം നിരന്തരമായി ആവശ്യപ്പെട്ടിട്ടും ഇതുവരെ ഗതാഗത യോഗ്യമാക്കാൻ നാഷണൽ ഹൈവേ അധികൃതരോ കൺസ്ട്രക്‌ഷൻ കമ്പനിയോ തയാറാവുന്നില്ലെന്നും യുഡിഎഫ് കുറ്റപ്പെടുത്തി. ഹൈവേ നിർമാണം ശാസ്ത്രീ യമായി നടത്തി ഗതാഗതക്കുരുക്കുകൾ ഒഴിവാക്കണമെന്ന് ആവശ്യപ്പെട്ടാണ് ജനപ്രതിനിധികളും യുഡിഎഫ് നേതാക്കളും സമരവുമായി രംഗത്തെത്തിയത്. കൊപ്രക്കളം സെന്‍ററിൽ നടന്ന പ്രതിഷേധ സമരം മുസ്ലിം ലീഗ് ജില്ലാ വൈസ് പ്രസിഡന്‍റ്് പി.കെ.മുഹമ്മദ് ഉദ്ഘാടനം ചെയ്തു. ഗ്രാമ‌പഞ്ചായത്തംഗം സി.ജെ. പോൾസൺ അധ്യക്ഷനായി. പഞ്ചായത്ത് വൈസ് പ്രസിഡന്‍റ്് മണി ഉല്ലാസ്, കോൺഗ്രസ് മണ്ഡലം പ്രസിഡന്‍റ്് സി.ജെ. പോൾസൺ, പഞ്ചായത്തംഗം ജിനൂബ് അബ്ദുൾ റഹ്മാൻ, നേതാക്കളായ സി.ജെ. ജോഷി, കെ.ബി. അനിൽകുമാർ, അഡ്വ. ഷാജു തലാ‌ശേരി, പി.എൻ. ദാസൻ എന്നിവർ പ്രസംഗിച്ചു.

മതിലകം പഞ്ചായത്തിൽ ദുർഭരണമെന്ന് കോൺഗ്രസിന്‍റെ കുറ്റവിചാരണസദസ്

പുതിയകാവ്: കോൺഗ്രസ് മതിലകം മണ്ഡലം കമ്മിറ്റിയുടെ ആഭിമുഖ്യത്തിൽ മതിലകം ഗ്രാമ പഞ്ചായത്തിൽ ദുർഭരണമെന്നാരോപിച്ച് സംഘടിപ്പിച്ച കുറ്റവിചാരണ സദസ് സമാപിച്ചു. മതിലകം സെന്‍ററിൽ നടന്ന കുറ്റവിചാരണ സദസിന്‍റെ സമാപനം ബെന്നി ബെഹനാൻ എംപി ഉദ് ഘാടനം ചെയ്തു. കോൺഗ്രസ് മണ്ഡലം പ്രസിഡന്‍റ് ടി.‌എസ്. ശശി അധ്യക്ഷത വഹിച്ചു. ഡിസിസി ജനറൽ സെക്രട്ടറി സി.എസ്. രവീന്ദ്രൻ, കയ്പമംഗലം ബ്ലോക്ക് പ്രസിഡന്‍റ് സുനിൽ.പി. മേനോൻ, നേതാക്കളായ ഇ.എസ്. സാബു, മണി കാവുങ്കൽ, ഒ.എ. ജെൻട്രിൻ, ഷിബു വർഗീസ്, കെ.എം. ജോസ്, അനസ് അബൂബക്കർ, കെ.വൈ. ഷക്കീർ, വി. കെ. ഷൺമുഖൻ, ഇ.എം. വിൻസെന്‍റ്, ടി.കെ. വിശ്വനാഥൻ, ടി.കെ. പ്രതാപൻ, സിന്ധു രവീന്ദ്രൻ തുടങ്ങിയവർ പ്രസംഗിച്ചു.

നഗരസഭയിലെ ഹില്‍പാര്‍ക്കില്‍ ബയോമൈനിംഗ് ആരംഭിച്ചു

ഇരിങ്ങാലക്കുട: നഗരസഭയിലെ 32-ാം വാര്‍ഡിലെ ഹില്‍പാര്‍ക്കില്‍ ബയോ മൈനിംഗ് ആരംഭിച്ചു. വര്‍ഷങ്ങളായി നിക്ഷേപിക്കപ്പെട്ടിട്ടുള്ള പ്ലാസ്റ്റിക് ഉള്‍പ്പടെയുള്ള ലെഗസി മാലിന്യങ്ങള്‍ സ്വച്ച് ഭാരത് മിഷന്‍ (അര്‍ബന്‍) 2.0യില്‍ ഉള്‍പ്പെടുത്തി ബയോമൈനിംഗ് എന്ന നൂതന സാങ്കേതിക വിദ്യ ഉപയോഗിച്ച് വിവിധതരത്തിലുള്ള അജൈവമാലിന്യങ്ങളെ വേര്‍തിരിച്ച് പുനഃചക്രമണത്തിന് വിധേയമാക്കുകയും 100ശതമാനം മാലിന്യമുക്തമാക്കി സ്ഥലം ഉപയോഗയോഗ്യമാക്കി തിരിച്ചെടുക്കുകയുമാണ് പ്രവൃത്തികൊണ്ട് ലക്ഷ്യം വക്കുന്നത്. ഒരുകോടി എട്ടുലക്ഷം രൂപയാണ് അടങ്കല്‍ തുകയായി കണക്കാക്കിയിട്ടുള്ളത്. പദ്ധതിയുടെ പ്രവര്‍ത്തനോദ്ഘാടനം ചെയര്‍പേഴ്‌സണ്‍ മേരിക്കുട്ടി ജോയ് നിര്‍വഹിച്ചു. നഗരസഭ വൈസ് ചെയര്‍മാന്‍ ബൈജു കുറ്റിക്കാടൻ അധ്യക്ഷത വഹിച്ചു. നഗരസഭാ വികസന സ്റ്റാന്‍ഡിംഗ് കമ്മിറ്റി ചെയര്‍പേഴ്സണ്‍ ഫെനി അബിന്‍ വെള്ളാനിക്കാരന്‍, ആരോഗ്യ സ്റ്റാന്‍ഡിംഗ് കമ്മിറ്റി ചെയര്‍ പേഴ്സണ്‍ അംബിക പള്ളിപ്പുറത്ത്, പൊതുമരാമത്ത് സ്റ്റാന്‍ഡിംഗ് കമ്മിറ്റി ചെയര്‍മാന്‍ ജെയ്സണ്‍ പാറേക്കാടന്‍, നഗരസഭയുടെ പ്രതിപക്ഷ നേതാവും കൗണ്‍സിലറുമായ കെ.ആര്‍. വിജയ, മുന്‍ നഗരസഭാ ചെയര്‍പേഴ്സണ്‍ സോണിയ ഗിരി, വാര്‍ഡ് കൗണ്‍സിലര്‍ അഡ്വ. ജിഷ ജോബി, നഗരസഭാ സെക്രട്ടറി എം. ഷാജിക്ക്, തൃശൂര്‍ ജില്ലാ ശുചിത്വ മിഷന്‍ പ്രോഗ്രാം ഓഫീസര്‍ രജനീഷ്, മുനിസിപ്പല്‍ എന്‍ജിനീയര്‍ സന്തോഷ്‌കുമാര്‍, നഗരസഭ ക്ലീന്‍ സിറ്റി മാനേജര്‍ ബേബി എന്നിവര്‍ പ്രസംഗിച്ചു.

വൈദിക - സന്യസ്തസംഗമം നടത്തി

മാള: മാളപള്ളിപ്പുറം സെന്‍റ്് ആന്‍റണീസ് തീർഥാടന കേന്ദ്രത്തിന്‍റെ ശതാബ്ദി ആഘോഷങ്ങളുടെ ഭാഗമായി ഇടവകയിൽ സേവനമനുഷ്ഠിച്ച വൈദികരുടെയും ഇടവകയിലെയും അയൽ ഇടവകയിലെയും വൈദികരുടെയും സന്യസ്തരുടെയും സംഗമം - "ഫിദേയി കമ്യൂണിത്താസ്' സംഘടിപ്പിച്ചു. വൈദികരുടെയും സന്യസ്തരുടെയും മാതാപിതാക്കളിൽ പലരും സംഗമത്തിന് സാക്ഷ്യം വഹിക്കാനെത്തി. സംഗമത്തോടനുബന്ധിച്ച് നടന്ന കൃതജ്ഞതാബലിയിൽ കോഴിക്കോട് ആർച്ച്‌ബിഷപ്പും ഇടവകാംഗവുമായ ഡോ. വർഗീസ് ചക്കാലക്കൽ മുഖ്യകാർമികത്വം വഹിച്ചു. പൊതുസമ്മേളനം ഡോ. വർഗീസ് ചക്കാലക്കൽ ഉദ്ഘാടനം ചെയ്തു. ഫാ. പോൾ തോമസ് കളത്തിൽ അധ്യക്ഷത വഹിച്ചു. കോട്ടപ്പുറം രൂപത വികാരി ജനറാൾ മോൺ. റോക്കി റോബി കളത്തിൽ ലെയോ മാർപാപ്പയിൽ നിന്നും പാലിയം സ്വീകരിച്ച ഡോ. വർഗീസ് ചക്കാലക്കലിനെ ആദരിച്ചു. മുൻ വികാരി ഫാ. ഫ്രാൻസിസ് കൊയ്ക്കാര‌പറമ്പിൽ, സിസ്റ്റർ ഡെയ്നി, സി.ഒ. ജോസ് എന്നിവർ ആശംസകൾ നേർന്നു. ഇൻഡ്യൻ നേവിയിൽ ചേർന്ന ഇടവകാംഗം ഏമിയബിളിനെ ആർച്ച്ബിഷപ് യോഗത്തിൽ ആദരിച്ചു. ശതാബ്ദിയുടെ ഭാഗമായി 100 രോഗികൾക്ക് ചികിത്സാസഹായം നൽകുന്ന പദ്ധതിയുടെ പ്രാരംഭമായി 20 പേർക്കുള്ള തുകയുടെ ചെക്ക് ഭാരവാഹികളിൽനിന്നും ആർച്ച്ബിഷപ് സ്വീകരിച്ചു. പാരമ്പര്യ കലകളായ മാർഗംകളി, ചവിട്ടുനാടകം എന്നിവയുടെ അവതരണം ഉണ്ടായി.

തൃശൂര്‍ ജില്ലാ ക്ഷീരസംഗമം

വെള്ളാങ്കല്ലൂർ: തൃശൂര്‍ ജില്ലാ ക്ഷീര സംഗമത്തോടനുബന്ധിച്ച് യു‌പി, ഹൈസ്കൂൾ, ഹയർസെക്കൻഡറി വിഭാഗങ്ങളിലെ വിദ്യാർഥികൾക്കായി നടത്തിയ ഡയറി ക്വിസ്, ചിത്രരചന മത്സരങ്ങളുടെ ഉദ്ഘാടനം അഡ്വ. വി.ആർ. സുനിൽകുമാർ എംഎൽഎ നിർവഹിച്ചു. വെള്ളാങ്കല്ലൂർ ബ്ലോക്ക് പഞ്ചായത്ത് പ്രസിഡന്‍റ് സുധാ ദിലീപ് അധ്യക്ഷത വഹിച്ചു. വെള്ളാങ്കല്ലൂർ ഗ്രാമപഞ്ചായത്ത് പ്രസിഡന്‍റ് നിഷ ഷാജി മുഖ്യപ്രഭാഷണം നടത്തി. ബ്ലോക്ക് പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ അസ്മാബി ലത്തീഫ്, ബ്ലോക്ക് പഞ്ചായത്ത് മെമ്പർ ബിനോയ്, കെസിഎംഎംഎഫ് ഭരണസമിതി അംഗം കോണത്തുകുന്ന് ക്ഷീരസംഘം പ്രസിഡന്‍റ് ടി.എൻ. സത്യൻ എന്നിവർ ആശംസകളർപ്പിച്ചു. വെള്ളാങ്കല്ലൂർ ക്ഷീരസംഘം പ്രസിഡന്‍റ് ടി.എ. ഹുസൈൻ സ്വാ ഗ തവും അന്തിക്കാട് ബ്ലോക്ക് ക്ഷീരവികസന ഓഫീസറും മീഡിയ പബ്ലിസിറ്റി കമ്മിറ്റി കൺവീനറുമായ എൻ.എസ്. അമ്പിളി നന്ദിയും പറഞ്ഞു. മത്സരങ്ങളിൽ വിജയികൾ ആ കുന്ന കുട്ടികൾക്കുള്ള സമ്മാനങ്ങൾ 26 ന് വെള്ളാങ്കല്ലൂർ പിസികെ ഓഡിറ്റോറിയത്തിൽ നടക്കുന്ന ക്ഷീരസംഗമം പൊതുസമ്മേളനത്തിൽവച്ച് നൽകും. ചിത്രരചനാ മത്സരത്തിൽ ഓരോ വിഭാഗത്തിലും ഒന്നാം സ്ഥാനം ലഭിച്ച കുട്ടികൾക്ക് സാഗ് ഡിജിറ്റൽ ആൻഡ് രാജു ജോസഫ് മരിയ ഫാം, കാഞ്ഞിരപ്പള്ളി സ് പോൺസർ ചെയ്ത സൈക്കിളുകൾ സമ്മാനമായി നൽകും. പങ്കെടുത്ത എല്ലാ വിദ്യാർഥികൾക്കും സർട്ടിഫിക്കറ്റുകൾ വിതരണം ചെയ്തു.

വില്വധ്വനി നാടകോത്സവം സമാപിച്ചു

തിരുവില്വാമല: ഗ്രാമീണ വായനശാല വാർഷികത്തോടനുബന്ധിച്ച് നാട്ടകം കലാ സാംസ്കാരികവേദിയുടെ ആഭിമുഖ്യത്തിൽനടന്ന വില്വധ്വനി നാടകോത്സവം സമാപിച്ചു. ജാനകി സന്തോഷ് സംവിധാനംചെയ്ത, കുട്ടികൾ കഥാപാത്രങ്ങളായ നൂറ്റാണ്ടുകൾക്കിപ്പുറം എന്ന നാടകമാണ് അവസാനമായി അരങ്ങിലെത്തിയത്. വായനശാല വൈസ് പ്രസിഡന്‍റ് എൻ. രാംകുമാറാണ് നാടകത്തിന്‍റെ രചന നിർവഹിച്ചത്. നാടകത്തിൽ പങ്കെടുത്ത കുട്ടികൾക്ക് ലയൺസ് ക്ലബ് ഓഫ് വില്വാദ്രി പാമ്പാടിയും നാടകങ്ങളിൽ പങ്കെടുത്ത എല്ലാവർക്കുമുള്ള സമ്മാനങ്ങൾ നാട്ടകം കലാ സാംസ്കാരികവേദിയും ഗ്രാമീണ വായനശാലയും ചേർന്നു നൽകി. സമാപന സമ്മേളനം പഞ്ചായത്ത് വൈസ് പ്രസിഡന്‍റ് എം. ഉദയൻ ഉദ്ഘാടനം നിർവഹിച്ചു. വായനശാല പ്രസിഡന്‍റ് കെ.പി. ഉമാശങ്കർ അധ്യക്ഷനായിരുന്നു.

ക്ഷേത്രങ്ങളിൽ ശ്രീകൃഷ്‌ണജയന്തി

തൃശൂർ: ശ്രീകൃഷ്‌ണജയന്തിയോടനുബന്ധിച്ച് തിരുവമ്പാടി ക്ഷേത്രത്തിൽ ഇന്നു രാവിലെ രാവിലെ 3.45നു നടതുറക്കും. നാലിന് വാകച്ചാർത്ത്. 4.30ന് ശിവൻ പെരിങ്ങോട്ടുകര അഷ്ടപദി ആലപിക്കും. അഞ്ചിനു നാദസ്വരം. ആറിനു സമൂഹ വിഷ്ണുസഹസ്രനാമ പാരായണം, ഏഴിനു പ്രത്യക്ഷ ഗോപൂജ ക്ഷേത്രം നടപ്പുരയിൽ. രാവിലെ 8.30 മുതൽ 11.30 വരെ അഞ്ചാനകൾ നിരക്കുന്ന ഉഷഃശീവേലിക്കു കക്കാട് രാജപ്പൻമാരാരുടെ നേതൃത്വത്തിൽ പഞ്ചാരിമേളം. ഉച്ചയ്ക്ക് 1.30ന് കലാമണ്ഡലം നന്ദകുമാർ ആൻഡ് പാർട്ടിയുടെ ഓട്ടൻതുള്ളൽ, ഉച്ചയ്ക്കുശേഷം മൂന്നിന് അക്ഷരശ്ലോകം, നാലിനു ഭക്തിഗാനമേള, 5.15ന് അഷ്ട‌പദി, ആറു മുതൽ രാത്രി ഏഴുവരെ അകതിയൂർ ഹരിഷ് നമ്പൂതിരിയും സംഘവും നയിക്കുന്ന പഞ്ചവാദ്യം, ദീപക്കാഴ്ച, പുഷ്പാലങ്കാരം, 7.15 മുതൽ ഭജനമഞ്ജരി, 8.15 മുതൽ അത്താലൂർ ശിവദാസ് അവതരിപ്പിക്കുന്ന തായമ്പക, കൊമ്പുപറ്റ്, കുഴൽപ്പറ്റ് എന്നിവയുണ്ടാവും. ഗുരുവായൂര്‍ ക്ഷേത്ര പ്രവൃത്തിക്ക് ഇന്ന് നൂറോളം കീഴ്ശാന്തിക്കാര്‍ ഗുരുവായൂര്‍: ഉണ്ണിക്കണ്ണന്‍റെ പിറന്നാള്‍ദിനമായ ഇന്ന് നൂറോളം കീഴ്ശാന്തിക്കാര്‍ ക്ഷേത്ര പ്രവൃത്തിക്കെത്തും.13 കീഴ്ശാന്തി ഇല്ലങ്ങളിലെ കീഴ്ശാന്തിക്കാരാണ് ഇന്നുപുലര്‍ച്ചെ മുതല്‍ കണ്ണന്‍റെ പിറന്നാള്‍ ഗംഭീരമാക്കാനുള്ള പരിശ്രമംനടത്തുക. പുലര്‍ച്ചെ രണ്ടു മുതല്‍ പ്രവൃത്തി തുടങ്ങും. എട്ടുലക്ഷത്തിലേറെ രൂപയുടെ പാല്‍പ്പായസം തയാറാക്കലും നെയ്പായസം തയാറാക്കലുമാണ് ആദ്യ പ്രവ ൃ ‍ത്തി. രാവിലെ ഏഴു മുതല്‍ അപ്പം തയാറാക്കി തുടങ്ങും. കാഴ്ചശീവേലിക്കും പ്രസാദ ഉട്ടിനും ക്ഷേത്രത്തിനുള്ളിലെ പ്രവൃത്തിയുമെല്ലാമായി പാതിരാത്രിവരെ ജോലി തുടരും. പാരമ്പര്യ പ്രവര്‍ത്തിക്കാരാണ് പുലര്‍ച്ചെ മുതല്‍ ഉരലില്‍ ഇടിച്ച് അരിപ്പൊടി തയാറാക്കുക. രാത്രി പത്തു മുതൽ കിഴക്കേടത്ത് മാധവൻ നമ്പൂതിരിയുടെ ഭാഗവതപാരായണം. രാത്രി 12.45 മുതൽ 1.45 വരെ അത്താഴപൂജ, തുടർന്ന് ശീവേലി, തൃപ്പുകയ്ക്കുശേഷം നട അടയ്ക്കും.

അന്തിക്കാട് കടവാരംറോഡിലെ പാലം പുനർനിർമിക്കും: സി.സി. മുകുന്ദൻ എംഎൽഎ

അന്തിക്കാട്: ഏഴുമാസംമുമ്പ് തകർന്ന, അന്തിക്കാട് കോൾ പാടശേഖരത്തെ കടവാരവുമായി ബന്ധിപ്പിക്കുന്ന പ്രധാനപാലം അടിയന്തിരമായി പുനർനിർമിക്കുമെന്നും ഇതിനാവശ്യമായ ഫണ്ട് അനുവദിക്കുമെന്നും സി.സി. മുകുന്ദൻ എംഎൽഎ അറിയിച്ചു. പാലം തകർന്ന് മാസങ്ങൾ കഴിഞ്ഞിട്ടും മന്ത്രിതല ഇടപെടലുകളുണ്ടായിട്ടും പാലം വിഷയം പരിഹരിക്കാത്തത് സംബന്ധിച്ച് മാധ്യമവാർത്ത ശ്രദ്ധയിൽപ്പെട്ടതിനെ തുടർന്ന് പാലം സന്ദർശിച്ചശേഷം മാധ്യമ സംസാരിക്കുകയായിരുന്നു എംഎൽഎ. വിത്തുൾപ്പടെയുള്ള സാധനസാമഗ്രികൾ കൊണ്ടുപോകേണ്ടത് ഈ പാലത്തിലൂടെയാണ്. ഈ പ്രശ്നം ചൂണ്ടികാട്ടി അന്തിക്കാട് പാടശേഖരസമിതി ഭാരവാഹികൾ നിരവധിതവണ കെഎൽഡിസിയെ സമീപിച്ചെങ്കിലും പാലം നിർമിക്കുന്നതിനാവശ്യമായ യാതൊരു നടപടിയും ഉണ്ടായിട്ടില്ലെന്ന് അന്തിക്കാട് പടവ് സെക്രട്ടറി കഴിഞ്ഞദിവസം മാധ്യമങ്ങളോട് പറഞ്ഞിരുന്നു. പാലവുമായി ബന്ധപ്പെട്ട എല്ലാ റിപ്പോർട്ടുകളും നൽകിയെന്നും ഇനി നടപടി സ്വീകരിക്കേണ്ടത് കെഡിഎ ആണെന്നുമാണ് കെഎൽഡിസി അധികൃതർ പറയുന്നത്. നാട്ടുകാരനായ റവന്യുമന്ത്രി കെ. രാജൻ ഉൾപ്പെടെയുള്ളവരെകണ്ട് ആവശ്യമുന്നയിച്ചെങ്കിലും ഫലമുണ്ടായില്ലെന്നും മാധ്യമങ്ങൾ റിപ്പോർട്ട് ചെയ്തിരുന്നു. തുടർന്നാണ് എംഎൽഎയുടെ ഇടപെടൽ. പാടശേഖരത്തിലേക്ക് കൃഷിയുമായി ബന്ധപ്പെട്ട എല്ലാ സാധനസാമഗ്രികളും കൊണ്ടുപോകേണ്ടത് ഈ പാലം വഴിയാണെന്നതിനാൽ കൃഷിപ്പണി തുടങ്ങിയാൽ ഓവുവച്ച് മുകളിൽ മണ്ണിട്ടുറപ്പിച്ച് ഗതാഗതം പുന:സ്ഥാപിക്കേണ്ടിവരുമെന്ന ആശങ്കയും കർഷകർക്കുണ്ട്. ഇങ്ങിനെചെയ്ത് താൽകാലികമായി ഗതാഗതം പുന:സ്ഥാപിച്ചാൽ മഴക്കാലത്ത് വെള്ളത്തിന്‍റെ ഒഴുക്കുനിലച്ച് പ്രദേശം വെള്ളക്കെട്ടിലാകുന്ന സ്ഥിതിയുണ്ടാകുമെന്ന ആശങ്ക പരിഹരിക്കുമെന്നും എംഎൽ എ പറഞ്ഞു.

പുത്തൂർ സുവോളജിക്കൽ പാർക്ക്: അവലോകനയോഗം ചേർന്നു

തൃശൂർ: പുത്തൂർ സുവോളജിക്കൽ പാർക്കിലെ നിർമാണപ്രവർത്തനങ്ങളുടെ അവലോകനയോഗം രാമനിലയത്തിൽ ചേർന്നു. മന്ത്രിമാരായ അഡ്വ. കെ. രാജൻ, എ.കെ. ശശീന്ദ്രൻ, പുത്തൂർ പഞ്ചായത്ത് പ്രസിഡന്‍റ് മിനി ഉണ്ണികൃഷ്ണൻ, സ്റ്റാൻഡിംഗ് കമ്മിറ്റി ചെയർപേഴ്സണ്‍ പി.എസ്. സജിത്ത്, ഗ്രാമപഞ്ചായത്തംഗം പി.ബി. സുരേന്ദ്രൻ, പുത്തൂർ സുവോളജിക്കൽ പാർക്ക് ഡയറക്ടർ ബി.എൻ. നാഗരാജ്, സ്പെഷൽ ഓഫീസർ കെ.ജെ. വർഗീസ്, ചീഫ് കണ്‍സർവേറ്റർ ഡോ. ആർ. ആടലരശൻ എന്നിവർ പങ്കെടുത്തു. സുവോളജിക്കൽ പാർക്കിന്‍റെ നിർമാണപ്രവൃത്തി വേഗത്തിലാക്കാൻ മന്ത്രിമാർ നിർദേശം നൽകി. പാർക്കിന്‍റെ പ്രധാന ആകർഷണങ്ങളായ പെറ്റ് സൂവിന്‍റെയും വർച്വൽ സൂവിന്‍റെയും നിർമാണം ഈ മാസംതന്നെ ആരംഭിക്കുമെന്നും മന്ത്രിമാർ അറിയിച്ചു.

കാട്ടാനകളെ തുരത്താൻ ‘എലിഫന്‍റ് അലാം’

ചേലക്കര: കാട്ടാനകളെ തുരത്താൻ എലിഫന്‍റ് അലാം സ്ഥാപിച്ചു. ചേലക്കര മണ്ഡലത്തിലെ വനമേഖലയുമായി അതിർത്തിപങ്കിടുന്ന പ്രദേശങ്ങളിൽ ആനയിറങ്ങി കൃഷി നശിപ്പിക്കുന്നത് തടയുന്നതിന്‍റെ ഭാഗമായാണ് എലിഫന്‍റ് അലാം സ്ഥാപിച്ചത്. ആനയിറങ്ങുന്ന ജനവാസ മേഖലകളായ മുള്ളൂർക്കര പഞ്ചായത്തിലെ ഇന്ദിരാജി നഗർ, മുക്കിലക്കാട്, നായാടി നഗർ, പാഞ്ഞാൾ പഞ്ചായത്തിലെ ചെറങ്കോണം, ഒലിപ്പാറ, ചേലക്കര പഞ്ചായത്തിലെ തോന്നൂർക്കര പടിഞ്ഞാറ്റുമുറി, മാട്ടുങ്ങൽ, തോട്ടേക്കോട് അങ്കണവാടിക്ക് സമീപം, പഴയന്നൂർ പഞ്ചായത്തിലെ തിരുമണി വെള്ളടി പ്രദേശം, മണ്ണാത്തിപ്പാറ താണിക്കുണ്ട് പ്രദേശം എന്നിവിടങ്ങളിലാണ് പരീക്ഷണാടിസ്ഥാനത്തിൽ അലാം സ്ഥാപിച്ചിട്ടുള്ളത്. അലാമിന് സമീപപ്രദേശത്ത് ആനയെത്തിയാൽ സെൻസറിന്‍റെ സഹായത്തോടെ പ്രത്യേകതരം ശബ്ദവും വെളിച്ചവുമുണ്ടാക്കും. സോളാർ സിസ്റ്റത്തിലാണ് അലാം പ്രവർത്തിക്കുക. ജനകീയ പങ്കാളിത്തത്തിലൂടെ സ്ഥാപിച്ച അലാമിന്‍റെ ഉദ്ഘാടനം ഇന്ദിരാജി നഗർ വനാതിർത്തിയിൽ യു.ആർ. പ്രദീപ് എംഎൽഎ നിർവഹിച്ചു. പഴയന്നൂർ ബ്ലോക്ക് പഞ്ചായത്ത് പ്രസിഡന്‍റ് കെ.എം. അഷറഫ്, ചേലക്കര പഞ്ചായത്ത് പ്രസിഡന്‍റ് പദ്മജ, പാഞ്ഞാൾ പഞ്ചായത്ത് പ്രസിഡന്‍റ് വി. തങ്കമ്മ, മുള്ളൂർക്കര പഞ്ചായത്ത് വൈസ് പ്രസിഡന്‍റ് തങ്കപ്പൻ, പഞ്ചായത്ത് മെമ്പർമാരായ ശശികല സുബ്രഹ്മണ്യൻ, വി.കെ. നമ്മല, സുജാത അജയൻ, ഷാബിയ അമീർ തുടങ്ങിയവർ പങ്കെടുത്തു.

മുഖ്യമന്ത്രി മൗനത്തിന്‍റെ മാളത്തിൽ: എം.എം. ഹസൻ

എരുമപ്പെട്ടി: കെഎസ്‌യു പ്രവർത്തകരെ കള്ളക്കേസിൽകുടുക്കി മുഖംമൂടി ധരിപ്പിച്ച്, കെെയാമംവച്ച്, കോടതിയിൽ ഹാജരാക്കിയ പോലീസ് ഉദ്യോഗസ്ഥനെ കാക്കി ഊരിവയ്പ്പിച്ച് കെെയാമംവച്ച് കോടതിയിൽ എത്തിക്കുംവരെ കോൺഗ്രസ് നിയമപോരാട്ടങ്ങൾ നടത്തുമെന്ന് മുൻ കെപിസിസി പ്രസിഡന്‍റ് എം.എം. ഹസൻ പറഞ്ഞു. പോലീസ് അറസ്റ്റുചെയ്ത കെഎസ്‌യു നേതാക്കളെ എരുമപ്പെട്ടി പോലീസ് സ്റ്റേഷനിലെത്തി സന്ദർശിച്ചതിനുശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. ക്രൂരവും മനുഷ്യത്വരഹിതവുമായ പോലീസ് അതിക്രമങ്ങൾ നടക്കുമ്പോൾ ആഭ്യന്തരമന്ത്രികൂടിയായ മുഖ്യമന്ത്രി പിണറായി വിജയൻ മൗനത്തിന്‍റെ മാളത്തിലൊളിച്ചിരിക്കുകയാണെന്നു അദ്ദേഹം കുറ്റപ്പെടുത്തി. കുറ്റക്കാരായ പോലീസ് ഉദ്യോഗസ്ഥർക്കെതിരേ നിയമനടപടി സ്വീകരിക്കുന്നതുവരെ കോൺഗ്രസ് സമരങ്ങളിൽനിന്ന് പിൻവാങ്ങുകയില്ലെന്നും എം.എം. ഹസൻ അറിയിച്ചു.

വിദ്യാഭ്യാസം ചിന്തിക്കാനും നിര്‍ഭയരാകാനും പ്രാപ്തരാക്കണം: ജസ്റ്റിസ് ദേവന്‍ രാമചന്ദ്രന്‍

തൃശൂര്‍: സ്വതന്ത്രമായി ചിന്തിക്കാനും നിര്‍ഭയരായി മുന്നോട്ടു പോകാനും വിദ്യാര്‍ഥികളെ പ്രാപ്തരാക്കുന്നതാകണം വിദ്യാഭ്യാസമെന്നു കേരള ഹൈക്കോടതി ജഡ്ജി ജസ്റ്റിസ് ദേവന്‍ രാമചന്ദ്രന്‍. മനഃപാഠം പഠിപ്പിക്കാനല്ല, ചിന്തിക്കാനും ഗ്രഹിക്കാനും പരിശീലിപ്പിക്കുന്നവരാണു നല്ല അധ്യാപകരെന്നും അദ്ദേഹം പറഞ്ഞു. മണ്ണുത്തി ഡോണ്‍ബോസ്‌കോ കോളജില്‍ അസോസിയേഷന്‍ ഓഫ് സലേഷ്യന്‍ കോ-ഓപ്പറേറ്റേഴ്‌സ് സംഘടിപ്പിച്ച ടീച്ചേഴ്‌സ് കോണ്‍ക്ലേവ് - 2025 ഉദ്ഘാടനം ചെയ്യുകയായിരുന്നു അദ്ദേഹം. കോ-ഓർഡിനേറ്റര്‍ ദേവസി കൊക്കന്‍ അധ്യക്ഷത വഹിച്ചു. കോളജ് മാനേജര്‍ ഫാ. സിറില്‍ ജോണ്‍ എടമന, എഎസ്‌സി സെക്രട്ടറി ജോസ് പുതുക്കാടന്‍ എന്നിവര്‍ പ്രസംഗിച്ചു. സമാപന സമ്മേളനം ബിഷപ് എമരിറ്റസ് മാര്‍ ബോസ്‌കോ പുത്തൂര്‍ ഉദ്ഘാടനം ചെയ്തു. ജനറല്‍ കണ്‍വീനര്‍ കെ.ടി. ഡേവിസ് അധ്യക്ഷതവഹിച്ചു. വിവിധ സെഷനുകളിലായി ഫാ. ഗില്‍ബര്‍ട്ട് ചൂണ്ടല്‍, സണ്ണി ചിറയത്ത്, ഫാ. ജോയ്‌സ് ഫ്രാന്‍സിസ് തോണിക്കുഴിയില്‍, സിസ്റ്റര്‍ ജാന്‍സി അഗസ്റ്റിന്‍, സിസ്റ്റര്‍ ജോസ്ഫിന്‍, കെ.പി. രാജലക്ഷ്മി, ഡോ. നസീമ റഹ്‌മാന്‍, പ്രഫ. പോള്‍സണ്‍ ചാലിശേരി, എ.കെ. ഡിക്‌സണ്‍ എന്നിവര്‍ പ്രസംഗിച്ചു.

സൗജന്യമായി വിഗ്ഗുകൾ നൽകി

തൃശൂർ: കാൻസർമൂലം മുടി നഷ്ടമായ 128 പേർക്കു സൗജന്യമായി വിഗ്ഗുകൾ നൽകി അമല മെഡിക്കൽ കോളജ് ആശുപത്രി. കേരള യൂണിവേഴ്സിറ്റി ഓഫ് ഹെൽത്ത് സയൻസസ് ഡീനും അമല കോളജ് ഓഫ് നഴ്സിംഗ് പ്രിൻസിപ്പലുമായ ഡോ. രാജി രഘുനാഥ് ഉദ്ഘാടനം ചെയ്തു. അമല ഓഡിറ്റോറിയത്തിൽ നടന്ന 38-ാമത് സൗജന്യ വിഗ്ഗ് വിതരണ ചടങ്ങിൽ അമല ഡയറക്ടർ ഫാ. ജൂലിയസ് അറയ്ക്കൽ അധ്യക്ഷത വഹിച്ചു. ജോയിന്‍റ് ഡയറക്ടർ ഫാ. ജെയ്സണ്‍ മുണ്ടൻമാണി, ആലുവ സ്നേഹതീരം ഡയറക്ടർ ഫാ. ജോബിൻ തെക്കേക്കര, ഹെയർ ഡോണേഴ്സ് പ്രതിനിധി കോയന്പത്തൂർ ഹെക്സ ക്ലിനിക്കിലെ ഡോ. സി.വി. അമൃത, തവനൂർ കെഎംജി യുപി സ്കൂൾ ഹെഡ്മിസ്ട്രസ് എസ്. ബിന്ദു, അമല വെൽനസ് വിഭാഗം മേധാവി സിസ്റ്റർ ഡോ. നാൻസി, പ്രോഗ്രാം കോഓർഡിനേറ്റർ പി.കെ. സെബാസ്റ്റ്യൻ തുടങ്ങിയവർ പ്രസംഗിച്ചു. സ്തനാർബുദം ബാധിച്ച 50 രോഗികൾക്കു കൃത്രിമസ്തനങ്ങളുടെ സൗജന്യവിതരണം, കേശദാനം സ്നേഹദാനം ക്യാന്പുകൾ സംഘടിപ്പിച്ച 28 സ്ഥാപനങ്ങളെയും അമല ആശുപത്രിയിൽവച്ച് മുടി മുറിച്ചുനൽകിയ15 വ്യക്തികൾക്കു മെമന്‍റോയും സർട്ടിഫിക്കറ്റും നൽകി ആദരിക്കൽ എന്നിവയും ഉണ്ടായിരുന്നു. ഇതിനോടകം 2200 കാൻസർ രോഗികൾക്ക് അമല മെഡിക്കൽ കോളജ് ആശുപത്രിയിൽനിന്നും സൗജന്യമായി വിഗ്ഗുകളും 700 സ്തനാർബുദ രോഗികൾക്കു സൗജന്യമായി നിറ്റഡ് നോക്കേഴ്സും നൽകാൻ കഴിഞ്ഞതായി ജോയിന്‍റ് ഡയറക്ടർ ഫാ. ജെയ്സണ്‍ മുണ്ടൻമാണി പറഞ്ഞു. 470 പുരുഷന്മാർ ഉൾപ്പെടെ മൂന്നുവയസ് മുതൽ 70 വയസുവരെയുള്ള സമൂഹത്തിന്‍റെ വിവിധ മേഖലകളിൽ പ്രവർത്തിക്കുന്ന 21,000 പേർ ഈ സ്നേഹകൂട്ടായ്മയിലേക്കു മുടി ദാനം ചെയ്തിട്ടുണ്ട്. അമല നഴ്സിംഗ് കോളജിലെ വിദ്യാർഥികളും അമല ആശുപത്രിയിലെ ജീവനക്കാരും കേരളത്തിന്‍റെ വിവിധ ഭാഗങ്ങളിൽനിന്നുള്ള 15 പേരും മുടി മുറിച്ചുനൽകി.

സെന്‍റ് മേരീസ് കോളജിൽ ദേശീയ സെമിനാർ

തൃശൂർ: കേരള സ്റ്റേറ്റ് ഹയർ എഡ്യുക്കേഷൻ കൗണ്‍സിലുമായി സഹകരിച്ച് ഐക്യുഎസി, റിസർച്ച് കമ്മിറ്റി എന്നിവയുടെ നേതൃത്വത്തിൽ സെന്‍റ് മേരീസ് ഓട്ടോണമസ് കോളജിൽ ദേശീയ സെമിനാർ സംഘടിപ്പിച്ചു. റിസർച്ച് പ്രപ്പോസൽ റൈറ്റിംഗ് ആൻഡ് ഗ്രാന്‍റ് അക്വിസിഷൻ എന്ന വിഷയത്തിലാണ് സെമിനാർ നടന്നത്. കേരള സ്റ്റേറ്റ് ഹയർ എഡ്യുക്കേഷൻ റീഫോംസ് ഇംപ്ലിമെന്‍റേഷൻ സെൽ റിസർച്ച് ഓഫീസർ ഡോ. വി. ഷഫീഖ് സെമിനാർ ഉദ്ഘാടനം ചെയ്തു. പ്രിൻസിപ്പൽ സിസ്റ്റർ ഡോ. മീന കെ. ചെറുവത്തൂർ അധ്യക്ഷത വഹിച്ചു. വൈസ് പ്രിൻസിപ്പൽമാരായ ഡോ. എ. ഡാലി ഡൊമിനിക്, സിസ്റ്റർ ടെസീന പി. ഇമ്മട്ടി, അക്കാദമിക് ഡീൻ ഡോ. ജൂലി പി. ലാസർ, കോഓർഡിനേറ്റർ ഡോ. അഞ്ജലി കിഷോർ എന്നിവർ പ്രസംഗിച്ചു. സാങ്കേതിക സെഷനുകളിൽ പാലക്കാട് മേഴ്സി കോളജ് അസി. പ്രഫസർ ഡോ. രേഷ്മ ഐശ്വര്യ, കോയന്പത്തൂർ പിഎസ്ജിആർ കൃഷ്ണമ്മാൾ കോളജ് ഫോർ വിമൻ റിസർച്ച് ഡീൻ ഡോ. രമേഷ് സുബ്രഹ്മണി, എൻ.ബി. ലേഖ, ഡോ. ആന്‍റണി പാലയ്ക്കൽ എന്നിവർ വിവിധ വിഷയങ്ങൾ അവതരിപ്പിച്ചു.

ഊണിലും ഉറക്കത്തിലും തൃശൂരിന്‍റെ വികസനം മനസിൽ: സുരേഷ് ഗോപി

തൃശൂർ: ലോകത്തിന്‍റെ ഏതു കോണിലായാലും ഊണിലും ഉറക്കത്തിലും തൃശൂരിന്‍റെ വികസനം മാത്രമാണ് മനസിലെന്നു കേന്ദ്രമന്ത്രി സുരേഷ് ഗോപി. എലൈറ്റ് ഹോട്ടലിൽ സുരേഷ് ഗോപിയുടെ നേതൃത്വത്തിൽ സംഘടിപ്പിച്ച ഓണാഘോഷപരിപാടിയിൽ പ്രസംഗിക്കുകയായിരുന്നു അദ്ദേഹം. ബിജെപി സിറ്റി ജില്ലാ പ്രസിഡന്‍റ് ജസ്റ്റിൻ ജേക്കബ്, പൂർണിമ സുരേഷ്, അഡ്വ. കെ.ആർ. ഹരി, പി.കെ. ബാബു, പെരുവനം കുട്ടൻമാരാർ, സംഗീതസംവിധായകൻ ഔസേപ്പച്ചൻ, ഗായകൻ അനൂപ് ശങ്കർ, സ്വാമി നന്ദാത്മജാനന്ദ, ഡി. മൂർത്തി, ഇബ്രാഹിം ലാഹി, ഡെപ്യൂട്ടി കളക്ടർ ജ്യോതി, എഡിഎം മുരളി, തഹസിൽദാർ ജയശ്രീ, വിനോദ് പൊള്ളാഞ്ചേരി എന്നിവർ പങ്കെടുത്തു. കേന്ദ്ര ധനസഹായം അനുവദിച്ചതിൽ പുലിക്കളിസംഘങ്ങൾ സുരേഷ് ഗോപിയെ ആദരിച്ചു. കേരള ബുക്ക് ഓഫ് റിക്കാർഡ് ജേതാവ് തീർഥലക്ഷ്മി, എഴുത്തുകാരി അതുല്യ വിജയ്, പ്രായംകുറഞ്ഞ പുലിക്കളി കലാകാരികളായ ദക്ഷ പ്രസാദ്, രുദ്ര പ്രയാഗ്, സിനി ആർട്ടിസ്റ്റ് യാമിനി സോന എന്നിവരെ ആദരിച്ചു.

തൃശൂർ റൂറൽ പോലീസിന് 6.16 കോടിയുടെ ഭരണാനുമതി

തൃശൂർ: റൂറൽ പോലീസിന്‍റെ അടിസ്ഥാനസൗകര്യങ്ങൾ മെച്ചപ്പെടുത്താൻ 6.16 കോടിയുടെ ഭരണാനുമതി. ഠാണാ ജംഗ്ഷനിൽ പുതിയ കെട്ടിടം നിർമിച്ചു സൈബർ സ്റ്റേഷൻ, അടിയന്തര പ്രതികരണസംവിധാനത്തിനുള്ള(ഇആർഎസ്എസ്) കണ്‍ട്രോൾ റൂം എന്നിവ മാറ്റിസ്ഥാപിക്കാൻ 5.68 കോടിയും റൂറൽ ജില്ലാ പോലീസ് മേധാവിയുടെ ക്യാന്പ് ഓഫീസ് നിർമാണം പൂർത്തിയാക്കാൻ 48 ലക്ഷം രൂപയുമാണ് അനുവദിച്ചത്. 112 ഹെൽപ്പ്‌ലൈൻ നന്പർ മുഖേന പോലീസ്, ഫയർഫോഴ്സ്, ആംബുലൻസ് എന്നീ സേവനങ്ങൾ വേഗത്തിൽ ലഭ്യമാക്കുന്നതിനാണ് ഇആർഎസ്എസ് രൂപീകരിച്ചത്. കാട്ടുങ്ങച്ചിറയിൽ റൂറൽ ജില്ലാ പോലീസ് മേധാവിയുടെ ഓഫീസിലാണ് കണ്‍ട്രോൾ റൂം പ്രവർത്തിക്കുന്നത്. ഓണ്‍ലൈൻ തട്ടിപ്പുകൾ, ഫിഷിംഗ്, ഹാക്കിംഗ് തുടങ്ങിയ കേസുകൾ നിരീക്ഷിച്ചു തടയുന്നതിനുള്ള ഡിജിറ്റൽ ട്രാക്കിംഗ് സംവിധാനങ്ങളും 24 മണിക്കൂറും പ്രവർത്തിക്കുന്ന ഹെൽപ്പ് ഡെസ്കും വിദഗ്ധരുടെ നേതൃത്വത്തിലുള്ള സാങ്കേതികസഹായ സംവിധാനങ്ങളും സൈബർ സ്റ്റേഷന്‍റെ ഭാഗമായി ഒരുക്കും.

കാട്ടൂരിലെ കുടിവെള്ളമലിനീകരണം: മണ്ണുപരിശോധനാഫലം രണ്ടു ദിവസത്തിനകം

കാട്ടൂര്‍: കാട്ടൂര്‍ മിനി ഇന്‍ഡസ്ട്രിയല്‍ എസ്റ്റേറ്റ് പരിസരത്തെ കിണറുകളില്‍ രാസമാലിന്യം കലര്‍ന്ന സംഭവത്തില്‍ ശാസ്ത്രീയപരിശോധനയ്ക്കായി ശേഖരിച്ച മണ്ണിന്‍റെ പരിശോധനാഫലം രണ്ടു ദിവസത്തിനകം ലഭിക്കും. തൃശൂര്‍ ഗവ. എന്‍ജിനീയറിംഗ് കോളജിലെ വിദഗ്ധരാണ് മണ്ണുപരിശോധന നടത്തിയത്. ചെന്നൈയിലെ ലാബിലാണ് മണ്ണിന്‍റെ ഫോറന്‍സിക് പരിശോധന. ജൂലൈ ആദ്യവാരത്തില്‍ മന്ത്രി ഡോ. ആര്‍. ബിന്ദുവിന്‍റെ നേതൃത്വത്തില്‍ ചേര്‍ന്ന അവലോകനയോഗത്തിലെ തീരുമാനപ്രകാരമാണ് ഇന്‍ഡസ്ട്രിയല്‍ എസ്റ്റേറ്റിനു സമീപത്തെ കുടിവെള്ളസ്രോതസുകളില്‍ രാസമാലിന്യസാന്നിധ്യത്തെക്കുറിച്ച് പഠിക്കാനും മണ്ണ് പരിശോധിക്കാനും തൃശൂര്‍ ഗവ. എന്‍ജിനീയറിംഗ് കോളജിനെ ചുമതലപ്പെടുത്തിയത്. ഇതിന്‍റെ അടിസ്ഥാനത്തില്‍ ഗവ. എന്‍ജിനീയറിംഗ് കോളജിലെ സിവില്‍ എന്‍ജിനീയറിംഗ് വിഭാഗം അസോസിയേറ്റ് പ്രഫസര്‍ എ.ജി. ബിന്ദു, ടെക്‌നിക്കല്‍ സ്റ്റാഫ് കെ.കെ. ഉമ്മര്‍, കെമിക്കല്‍ എന്‍ജിനീയറിംഗ് വിഭാഗത്തിലെ അസോസിയേറ്റ് പ്രഫസര്‍ എ.എം. മണിലാല്‍ എന്നിവരുടെ നേതൃത്വത്തിലുള്ള സംഘമാണ് മണ്ണ് ശേഖരിച്ചത്. കാട്ടൂര്‍ മിനി ഇന്‍ഡസ്ട്രിയല്‍ എസ്റ്റേറ്റ് വളപ്പിനുള്ളില്‍നിന്നും ഒരു സാമ്പിളും സമീപത്തെ കിണറുകളുടെ പരിസരത്തുനിന്നും മൂന്നു സാമ്പിളുകളും ശേഖരിച്ചു. ഒരു മീറ്റര്‍ ആഴത്തില്‍ കുഴിച്ചാണ് മണ്ണ് പരിശോധനയ്ക്കെടുത്തിരിക്കുന്നത്. കിണറുകളിലെ രാസമാലിന്യത്തിന്‍റെ ഉറവിടം കണ്ടെത്തുക എന്നുള്ളതാണ് മണ്ണുപരിശോധനയുടെ ലക്ഷ്യം. കോഴിക്കോട്ടുള്ള സിഡബ്ല്യുആര്‍ഡിഎമ്മിലേക്കും ജലസാമ്പിളുകള്‍ പരിശോധനയ്ക്കയച്ചിരുന്നു. പരിശോധനാഫലം ലഭിക്കുന്നതിനായി കഴിഞ്ഞ ദിവസം പണമടയ്ക്കാന്‍ പഞ്ചായത്തിനു കത്ത് ലഭിച്ചിരുന്നു. മണ്ണുപരിശോധനാഫലം കിട്ടിയശേഷം പരിഹാരം മണ്ണുപരിശോധനാഫലം കിട്ടിയശേഷമായിരിക്കും തുടര്‍നടപടികള്‍ ഉണ്ടാകുക. ഏതെല്ലാം രാസവസ്തുക്കളുടെ സാന്നിധ്യമാണ് മണ്ണില്‍ കൂടുതലായി അടങ്ങിയിരിക്കുന്നതെന്നു പരിശോധനാഫലം വരുന്നതോടെ വ്യക്തമാകും. അതിനുശേഷം ഈ രാസവസ്തുക്കള്‍ എങ്ങനെ മണ്ണിലും കുടിവെള്ളത്തിലും കലര്‍ന്നുവെന്നതാണ് ആദ്യം പരിശോധിക്കുക. ഇത്തരം രാസവസ്തുക്കളുടെ സാന്നിധ്യം ഇന്‍ഡസ്ട്രിയല്‍ എസ്റ്റേറ്റില്‍നിന്നുതന്നെയാണോ അതോ മറ്റു കാരണങ്ങള്‍മൂലമാണോ എന്നും പരിശോധിക്കും.

കുന്നംകുളത്ത് ഓടിക്കൊണ്ടിരുന്ന ബസിൽ നിന്ന് പുക

കുന്നംകുളം: ഓടിക്കൊണ്ടിരുന്ന സ്വകാര്യബസിൽ നിന്ന് പെട്ടെന്ന് പുക ഉയർന്നു. പരിഭ്രാന്തരായ യാത്രക്കാരിൽ ഒരാൾ ബസിന്‍റെ ചില്ല് പൊളിച്ച് പുറത്തേയ്ക്ക് ചാടി. ഇയാൾക്ക് ചെറിയ പരിക്കേറ്റു. ഇന്നലെ രാവിലെ 8.30ന് കുന്നംകുളം പാറേമ്പാടത്ത് വച്ചായിരുന്നു സംഭവം. കോഴിക്കോട് നിന്നും തൃശൂരിലേയ്ക്ക് പോവുകയായിരുന്ന ബ്ലൂ ഡയമണ്ട് എന്ന സ്വകാര്യബസിലാണ് സംഭവം ഉണ്ടായത്. പാറേമ്പാടത്ത് എത്തുമ്പോൾ ബസിന്‍റെ അടിഭാഗത്തുനിന്നും പെട്ടെന്ന് പുക ഉയരുകയായിരുന്നു. ഇതോടെ ഡ്രൈവർ ബസ് നിർത്തുകയും പരിഭ്രാന്തരായി യാത്രക്കാർ പുറത്തേക്ക് ഇറങ്ങുകയും ചെയ്തു. ബസിന്‍റെ ഡീസൽടാങ്ക് പൈപ്പ് പൊട്ടിയാണ് അപകടമുണ്ടായത്. വിവരമറിഞ്ഞ ഉടൻ കുന്നംകുളം ഫയർ ആൻഡ് റെസ്ക്യൂ ടീം സ്ഥലത്തെത്തി സ്ഥിതിഗതികൾ നിയന്ത്രിച്ചു. കുന്നംകുളം പോലീസും സ്ഥലത്തെത്തി. അപകടത്തിൽ മറ്റാർക്കും പരിക്കില്ല.

അരിപ്പാലം പള്ളിയില്‍ തിരുനാള്‍ നാളെ

അരിപ്പാലം: സെന്‍റ് മേരീസ് ദേവാലയത്തില്‍ പരിശുദ്ധ വേളാങ്കണ്ണി മാതാവിന്‍റെ തിരുനാളിനു കൊടിയേറി. ഫാ. സെബാസ്റ്റ്യന്‍ മാളിയേക്കല്‍ തിരുനാളിന്‍റെ കൊടിയേറ്റം നിര്‍വഹിച്ചു. ഇന്നു വൈകീട്ട് 5.30ന് ദിവ്യബലി, ലദീഞ്ഞ്, നൊവേന, രൂപം എഴുന്നള്ളിച്ചുവയ്ക്കല്‍, നേര്‍ച്ചപ്പായസം വെഞ്ചരിപ്പ്. റവ.ഡോ. വര്‍ഗീസ് പാലത്തിങ്കല്‍ മുഖ്യകാര്‍മികനായിരിക്കും. തിരുനാള്‍ദിനമായ നാളെ രാവിലെ 6.30ന് ദിവ്യബലി, 10ന് നടക്കുന്ന ആഘോഷമായ തിരുനാള്‍ദിവ്യബലിക്ക് രൂപത ചാന്‍സലര്‍ റവ.ഡോ. കിരണ്‍ തട്ട്ള മുഖ്യകാര്‍മികത്വം വഹിക്കും. രൂപത വികാരി ജനറാള്‍ മോണ്‍. ജോളി വടക്കന്‍ സന്ദേശംനല്‍കും. തുടര്‍ന്ന് തിരുനാള്‍ പ്രദക്ഷിണം നടക്കും. തിരുനാളിന്‍റെ വിജയത്തിനായി വികാരി ഫാ. ലിജു മഞ്ഞപ്രക്കാരന്‍, കൈക്കാരന്‍മാരായ വി.കെ. പോള്‍സന്‍ വാറോക്കി, റോയ് പോള്‍ കണ്ണൂക്കാടന്‍ എന്നിവരുടെ നേതൃത്വത്തില്‍ വിപുലമായ കമ്മിറ്റി പ്രവര്‍ത്തിച്ചുവരുന്നു.

കുഴിയിൽ വീണ് ബൈക്ക് യാത്രികനു പരിക്ക്

കൊരട്ടി: മേൽപ്പാലത്തിന്‍റെ അപ്രോച്ച് റോഡ് നിർമിക്കുന്നതിനുള്ള റീറ്റെയിനിംഗ് വാളിനായി കൊരട്ടി പോലീസ് സ്റ്റേഷനുസമീപം കുഴിച്ച കുഴിയിൽ ബെെക്ക് യാത്രികൻ വീണു. കെെകാലുകൾക്ക് സാരമായി പരിക്കേറ്റ യുവാവ് കോൺക്രീറ്റിംഗിനായി കെട്ടിയ കമ്പിയിൽ അകപ്പെടാതെ രക്ഷപ്പെട്ടത് ഭാഗ്യം തുണച്ചതുകൊണ്ടു മാത്രമാണ്. ബൈക്കിന്‍റെ മുൻഭാഗം പൂർണമായി തകർന്നു. ചാലക്കുടിയിലേക്കുള്ള ദിശയിൽ ഇന്നലെ രാവിലെ ഒമ്പതരയോടെയായിരുന്നു സംഭവം. ശബ്ദംകേട്ട് സമീപത്തെ സ്ഥാപനങ്ങളിലെ ജീവനക്കാരെത്തിയാണ് യുവാവിനെ പുറത്തേക്കെടുത്തത്. യാതൊരു സുരക്ഷാ മാനദണ്ഡങ്ങളും പാലിക്കാതെയും ലൈറ്റുകളോ അപകടസൂചന നൽകുന്ന ബ്ലിങ്കിംഗ് ലൈറ്റുകളോ സ്ഥാപിക്കാതെ റീറ്റെയിനിംഗ് വാളിനായി കുഴിയെടുക്കുന്നത്. എൻഎച്ച്എഐ അധികൃതരുടെയും കരാർകമ്പനിയുടെയും ശ്രദ്ധയിൽപ്പെടുത്തിയിട്ടും കണ്ണടയ്ക്കുകയായിരുന്നു. ഡൈവേർഷൻ ബോർഡ് വച്ചിരിക്കുന്നത് കുഴിയോടുചേർന്നാണ്. ഇതുമൂലം അകലെനിന്നുവരുന്ന വാഹനങ്ങളിലെ ഡ്രൈവർമാർ പൊടുന്നനെയാണ് കുഴികൾ കാണുന്നത്. രാത്രികാലങ്ങളിൽ വാഹനങ്ങളുടെ വെളിച്ചത്തിൽ മാത്രമാണ് കുഴികൾ കാണുന്നത്.

നവീകരിച്ച എംസിഎഫ് കെട്ടിടം ഉദ്ഘാടനം

കാളമുറി: കയ്പമംഗലം ഗ്രാമപഞ്ചായത്തിൽ മാലിന്യ സംസ്കരണത്തിന്‍റെ ഭാഗമായി നവീകരിച്ച എംസിഎഫ് കെട്ടിടത്തിന്‍റെ ഉദ്ഘാടനംനടത്തി. 400 സ്‌ക്വയർഫീറ്റ് വലിപ്പത്തിൽനിന്നു 2566 സ്‌ക്വയർഫീറ്റ് ആക്കി ഉയർത്തിയാണ് എംസിഎഫ് നവീകരിച്ചത്. ശീതീകരിച്ച ഹരിതകർമസേന ഓഫീസ്, അപ്സ്റ്റയർ സ്റ്റോറേജ്, ആറുമീറ്റർ ഉയരമുള്ള ഇലക്ട്രിക് റോളർ ഷട്ടർ, ബൈലിംഗ് മെഷീൻ, കൺവെയർ ബെൽറ്റ്‌, സോർട്ടിംഗ് ടേബിൾ തുടങ്ങിയ സംവിധാനങ്ങൾ സ്വച്ഛ്ഭാരത് മിഷൻ ഫണ്ട്, പ്ലാൻ ഫണ്ട്‌, പഞ്ചായത്ത് തനത് ഫണ്ട്‌ എന്നിവ വകയിരുത്തി 44.72 ലക്ഷം രൂപ ചെലവഴിച്ചാണ് നവീകരണം നടത്തിയത്.ബെന്നി ബഹനാൻ എംപി ഉദ്ഘാടനംചെയ്തു. കയ്പമംഗലം ഗ്രാമപഞ്ചായത്ത് പ്രസിഡന്‍റ് ശോഭന രവി അധ്യക്ഷതവഹിച്ചു. വൈസ് പ്രസിഡന്‍റ് മണി ഉല്ലാസ്, വികസനകാര്യ സ്റ്റാൻഡിംഗ് കമ്മിറ്റി ചെയർമാൻ പി.എ. ഇസ്ഹാഖ്, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ പി.എ. ഷാജഹാൻ, കോ-ഓർഡിനേറ്റർ കെ.കെ സക്കരിയ തുടങ്ങിയവർ സംബന്ധിച്ചു.

നഗരസഭ കുടുംബശ്രീ സിഡിഎസ് വാർഷികം

ചാലക്കുടി: നഗരസഭ കുടുംബശ്രീ സിഡിഎസ് വാർഷികാഘോഷം വർണശബളമായി. 36 എഡിഎസുകളുടെ 400 ഓളം അയൽക്കൂട്ടങ്ങളിൽനിന്നുള്ള കുടുംബശ്രീ അംഗങ്ങൾ അണിനിരന്ന മത്സരാടിസ്ഥാനത്തിലുള്ള ഘോഷയാത്രയോടെയാണ് ആരംഭിച്ചത്. നോർത്ത് ബസ് സ്റ്റാൻഡിൽനിന്നു വാദ്യമേളങ്ങളുടെയും കാവടി, വിവിധ ഫ്ലോട്ടുകൾ എന്നിവയുടെ അകമ്പടിയോടെനടന്ന ഘോഷയാത്ര ടൗൺഹാൾ മൈതാനിയിൽ സ്ഥാപിച്ചു. മെഗാ തിരുവാതിരക്കളി നടന്നു. തുടർന്നുനടന്ന സാംസ്കാരികസമ്മേളനം സനീഷ്കുമാർ ജോസഫ് എംഎൽഎ ഉദ്ഘാടനംചെയ്തു. നഗരസഭ ചെയർപേഴ്സൺ ഷിബു വാലപ്പൻ അധ്യക്ഷത വഹിച്ചു. കഴിഞ്ഞകാല പ്രവർത്തനങ്ങളെ വിലയിരുത്തിഎഡിഎസ് 33 ഒന്നാംസ്ഥാനവും എഡിഎസ് 32 രണ്ടാംസ്ഥാനവും എഡിഎസ് 35 മൂന്നാംസ്ഥാനവും നേടി. മികച്ച അയൽക്കൂട്ടങ്ങളായി സാരഥി വാർഡ് 35, ഗ്രെയ്സ് വാർഡ് 30, ശിവദ വാർഡ് 22 എന്നിവരേയും തെരഞ്ഞെടുത്തു. ഘോഷയാത്രയിൽ ഒന്നാംസ്ഥാനം എഡിഎസ് 33, രണ്ടാംസ്ഥാനം എഡിഎസ് 32 , മൂന്നാംസ്ഥാനം വാർഡ് 12, 34 എന്നിവരും നേടി. നഗരസഭ വൈസ് ചെയർപേഴ്സൺ സി. ശ്രീദേവി, കുടുംബശ്രീ ജില്ലാ മിഷൻ കോ-ഓർഡിനേറ്റർ ഇൻ ചാർജ് കെ. രാധാകൃഷ്ണൻ, ക്ഷേമകാര്യ ചെയർപേഴ്സൺ പ്രീതി ബാബു, സിഡിഎസ് ചെയർപേഴ്സൺ സുബി ഷാജി, സ്റ്റാൻഡിംഗ് കമ്മിറ്റി ചെയർപേഴ്സൻമാരായ കെ.വി. പോൾ, ആനി പോൾ, ദിപു ദിനേശ്, എം.എം. അനിൽകുമാർ, ബിജു എസ്.ചിറയത്ത്, സി.എസ്. സുരേഷ്, വി.ഒ. പൈലപ്പൻ, എബി ജോർജ്, ആലീസ് ഷിബു, വാർഡ് കൗൺസിലർ നിത പോൾ എന്നിവർ പ്രസംഗിച്ചു.

അന്നമനടയിൽ 121 കോടി വികസനം: പ്രചാരണം അഴിമതി വെള്ളപൂശാൻ

അന്നമനട: ഗ്രാമപഞ്ചായത്ത് ഭരണകക്ഷിയായ എൽഡിഎഫിന്‍റെ 121 കോടി വികസനം എന്ന പ്രചാരണത്തിനുപിന്നിൽ വൻ അഴിമതിയെന്ന് പഞ്ചായത്ത് കോൺഗ്രസ് പാർലമെന്‍ററി പാർട്ടി ലീഡർ കെ.കെ. രവി നമ്പൂതിരി ആരോപിച്ചു. രണ്ടുഘട്ടങ്ങളിലായി നടത്തിയ മൂന്നുകോടിയുടെ ചിറയൻ ചാൽ സംരക്ഷണ പദ്ധതിയിൽ അഴിമതിയുണ്ടെന്നും പദ്ധതി സിപിഎം നേതാക്കൾക്ക് പണം സ്വരൂപിക്കാനുള്ള മാർഗമായിരുന്നുവെന്നും അദ്ദേഹം പറഞ്ഞു. കുടിവെള്ളത്തിനും ജലസേചനത്തിനും പ്രയോജനപ്രദമാകുംവിധം വെണ്ണൂർതുറ മുതൽ കുണ്ടൂർക്കടവുവരെയുള്ള മൂന്നു പഞ്ചായത്തുകൾ ഉൾപ്പെടുന്ന ഭാഗത്തെ തോടുകൾ, ഉപതോടുകൾ, കരിക്കാട്ട് ചാൽ എന്നിവ വൃത്തിയാക്കുന്ന പദ്ധതി ഉദ്ഘാടനം നടത്തിയെങ്കിലും 50 ലക്ഷം രൂപ ചെലവാക്കി ഒരു സ്വകാര്യ വ്യക്തിയുടെ പറമ്പിന്‍റെ വശങ്ങൾ കെട്ടിക്കൊടുത്തു എന്നല്ലാതെ മറ്റു യാതൊരു പ്രവർത്തനവും നടന്നിട്ടില്ലെന്നും ഇതിന്‍റെ പിന്നിൽ വൻ അഴിമതിയുണ്ടന്നും യുഡിഎഫ് അംഗങ്ങൾ ചൂണ്ടിക്കാട്ടി. അച്യുതമാരാർ വാദ്യകലാക്ഷേത്രത്തിൽ ഓപ്പൺ സ്റ്റേജ് നിർമാണത്തിലും അഴിമതിയാണ്. പഞ്ചായത്തിന്‍റെ പ്ലാസ്റ്റിക് മാലിന്യം കുന്നുകൂടികിടക്കുന്ന ഇടത്താണ് സ്റ്റേജ് നിർമിച്ചിരിക്കുന്നതെന്നും യുഡിഎഫ് അംഗങ്ങളായ കെ.എ. ഇക്ബാൽ, ടെസി ടൈറ്റസ്, ഡേവിസ് കുര്യൻ, സുനിത സജീവൻ, ആനി ആന്‍റോ, ലളിത ദിവാകരൻ, സി.കെ. ഷിജു എന്നിവർ വിമർശിച്ചു.

ഠാണ - ചന്തക്കുന്ന് റോഡ് വികസനം ; നാലുവരിയാക്കാൻ അനുമതി

ഇരിങ്ങാലക്കുട: ഠാണ - ചന്തക്കുന്ന് വികസനത്തിന്‍റെ ഭാഗമായി ഇരിങ്ങാലക്കുട - കല്ലേറ്റുംകര റോഡില്‍ ജനറല്‍ ആശുപത്രിവരെയും ചന്തക്കുന്ന് ജംഗ്ഷന്‍ മുതല്‍ പടിഞ്ഞാറ് മൂന്നുപീടിക ഭാഗത്തേക്കുള്ള ഭാഗവും പൊതുമരാമത്തുവകുപ്പ് ടാറിടും. ഠാണാ - ആശുപത്രി വരെയുള്ള ഭാഗത്ത് ഇരുവശത്തും കാനനിര്‍മാണവും ആശുപത്രിഭാഗം മെറ്റല്‍വിരിക്കലും പൂര്‍ത്തിയായി. എതിര്‍വശത്ത് കാന പണിതഭാഗത്ത് മണ്ണിട്ടശേഷം മെറ്റല്‍വിരിച്ചു. ടാറിടലിനു മുന്‍പ് വൈദ്യുതിലൈനുകള്‍ മാറ്റിസ്ഥാപിക്കുന്ന നടപടികള്‍ നടക്കുകയാണ്. ചന്തക്കുന്ന് - മൂന്നുപീടിക റോഡിലെ കാനനിര്‍മാണത്തിനുശേഷം ടാറിടുമെന്ന് പിഡബ്ല്യുഡി അറിയിച്ചു. അതേസമയം പ്രധാനപ്പെട്ട തൃശൂര്‍ - കൊടുങ്ങല്ലൂര്‍ സംസ്ഥാനപാതയിലെ നിര്‍മാണം കെഎസ്ടിപിയുടെ നേതൃത്വത്തിലാണ്. ഠാണ ജംഗ്ഷന്‍ മുതല്‍ പൂതംകുളം വരെ കെഎസ്ടിപി കാന നിര്‍മിക്കും. അതിനുശേഷം മാത്രമേ സംസ്ഥാനപാതയില്‍ പൂതംകുളം മുതല്‍ ചന്തക്കുന്ന്, സെന്‍റ് ജോസഫ്സ് കോളജ് ഇറക്കംവരെയുള്ള ഭാഗത്ത് വൈദ്യുതിക്കാലുകള്‍ നീക്കാനാകൂവെന്ന് കെഎസ്ടിപി അറിയിച്ചു. അതിനുള്ള വൈദ്യുതിക്കാലുകള്‍ എത്തി. കൊടുങ്ങല്ലൂര്‍ - ഷൊര്‍ണൂര്‍ സംസ്ഥാനപാത രണ്ടുവരിയിലാണ് കോണ്‍ക്രീറ്റിടുന്നത്. ഇതില്‍ പൂതംകുളം തൊട്ട് ചന്തക്കുന്ന്, സെന്‍റ് ജോസഫ്സ് കോളജ് ഇറക്കംവരെ 17 മീറ്റര്‍ വീതിയില്‍ നാലുവരിയായിട്ടാണ് നിര്‍മാണം. ഇതിന് 11 കോടി രൂപ ചെലവുവരും. ഇതുമായി ബന്ധപ്പെട്ട് കെഎസ്ടിപി സര്‍ക്കാരിന് സമര്‍പ്പിച്ച പുതുക്കിയ എസ്റ്റിമേറ്റ് അംഗീകരിച്ച് അനുമതിയായി.

ലാഭവിഹിതം സാമൂഹികപ്രവര്‍ത്തനങ്ങള്‍ക്കു ചെലവഴിച്ച് കുടുംബശ്രീ

ഇരിങ്ങാലക്കുട: കഴിഞ്ഞ പത്തുവര്‍ഷത്തെ ലാഭവിഹിതം ഉപയോഗിച്ച്, നടത്താനിരുന്ന വാര്‍ഷികാഘോഷങ്ങള്‍ ഒഴിവാക്കി ആ വിഹിതം സമൂഹനന്മയ്ക്കായി ചെലവഴിച്ച് ഇരിങ്ങാലക്കുടയിലെ കുടുംബശ്രീ. സിഡിഎസ് രണ്ടിന്‍റെ കീഴിലുള്ള പൊറത്തിശേരി വാര്‍ഡ് 34ലെ പ്രവര്‍ത്തനമാരംഭിച്ച ഭദ്രദീപം കുടുംബശ്രീ യൂണിറ്റാണ് പത്താംവാര്‍ഷികാഘോഷങ്ങളുടെ ഭാഗമായി വിവിധ സാമൂഹികപ്രവര്‍ത്തനങ്ങള്‍ നടത്തി മാതൃകയായത്. 62,191 രൂപയാണ് സേവന പ്രവര്‍ത്തനങ്ങള്‍ക്കായി ചെലവഴിച്ചത്. ഇരിങ്ങാലക്കുടയിലെ പ്രതീക്ഷാഭവന്‍ സ്‌പെഷല്‍ സ്‌കൂളില്‍ ഭക്ഷ്യക്കിറ്റ് വിതരണവും മുളങ്കുന്നത്തുകാവിനുസമീപം മുണ്ടത്തിക്കോട് താമസിക്കുന്ന, കാന്‍സര്‍ രോഗം ബാധിച്ച് ദുരിതമനുഭവിക്കുന്ന മാതാപിതാക്കളുടെ വിദ്യാര്‍ഥികളായ രണ്ടുമക്കള്‍ക്ക് വിദ്യാഭ്യാസസഹായവും നല്‍കി. കൂടാതെ അതിരപ്പിള്ളി വനമേഖലയിലെ ഉന്നതി ട്രൈബല്‍ സെറ്റില്‍മെന്‍റിലെ 40ൽ അധികം കുടുംബങ്ങള്‍ക്ക് ഭക്ഷ്യസാധന കിറ്റും ഓണക്കോടി കിറ്റും കൈമാറി.

സമ്മാനത്തുക പുവര്‍ഫണ്ടിലേക്കു നല്‍കി വിദ്യാര്‍ഥി മാതൃകയായി

കൊടകര: ഗവ. നാഷണല്‍ ബോയ്‌സ് ഹൈസ്‌കൂളില്‍ നടത്തിയ മത്സരത്തില്‍ സമ്മാനമായി ലഭിച്ച തുക കാരുണ്യനിധിയിലേക്കുനല്‍കി വിദ്യാര്‍ഥി മാതൃകയായി. കുട്ടികളിലെ വായന പ്രോത്സാഹിപ്പിക്കുന്നതിന് സ്‌കൂളില്‍ സംഘടിപ്പിച്ച ഇന്‍റര്‍ സ്‌കൂള്‍ ഹ്രസ്വചിത്ര മത്സരത്തില്‍ ഒന്നാംസ്ഥാനം നേടിയ അര്‍ജുന്‍ സജു എന്ന പത്താംക്ലാസുകാരനാണ് നിര്‍ധനരെ സഹായിക്കാനുള്ള പുവര്‍ഫണ്ടിലേക്ക് സമ്മാനത്തുക സംഭാവനചെയ്തത്. മത്സരത്തില്‍ അര്‍ജുന്‍ സജുവിന്‍റെ 'അതിജീവിച്ച കുട്ടി'എന്ന ഹ്രസ്വചിത്രം ഒന്നാംസ്ഥാനവും ആദിത്യ സുരേഷിന്‍റെ 'അറിവാണ് വെളിച്ചം' രണ്ടാംസ്ഥാനവും ക്രിസ് ഏഞ്ചല്‍ തയാറാക്കിയ 'ബാക്ക് ടു റീഡിംഗ്' മൂന്നാംസ്ഥാനവും നേടി.

ബോധവത്കരണ കാമ്പയിനു തുടക്കം

പാലപ്പെട്ടി: വിദ്യാർഥികൾക്കിടയിൽ വർധിക്കുന്ന ലഹരി ഉപയോഗത്തിനെതിരേ ബോധവത്കരണ കാമ്പയിന് ചെന്ത്രാപ്പിന്നി ഹയർസെക്കൻഡറി സ്കൂൾ അൺ എയ്ഡഡ് വിഭാഗം തുടക്കംകുറിച്ചു. ഇതിന്‍റെ ഭാഗമായി ഹയർസെക്കൻഡറി വിദ്യാർഥികൾക്ക് ബോധവത്കരണ ക്ലാസ് സംഘടിപ്പിച്ചു. പ്രിൻസിപ്പൽ വി.ബി. സജിത്ത് ഉദ്ഘാടനം നിർവഹിച്ചു. വൈസ് പ്രിൻസിപ്പൽ എം.എസ്. വിനോഷ് അധ്യക്ഷതവഹിച്ചു. വിമുക്തി കോ-ഓർഡിനേറ്ററും ഇരിങ്ങാലക്കുട എക്സൈസ് റേഞ്ച് ഓഫീസിലെ സിവിൽ എക്സൈസ് ഓഫീസറുമായ പി.എം. ജദീർ ക്ലാസ് നയിച്ചു.

കോടന്നൂരിൽ മുൻവികാരിമാരുടെ സംഗമം നടത്തി

തൃശൂർ: കോടന്നൂർ സെന്‍റ് ആന്‍റണിസ് പള്ളിയിൽ മുൻവികാരിമാരുടെ സംഗമം നടന്നു. തൃശൂർ അതിരൂപത വികാരി ജനറാൾ മോണ്‍. ജോസ് കോനിക്കര ഉദ്ഘാടനം ചെയ്തു. തുടർന്നു സമൂഹബലിയും ഉണ്ടായിരുന്നു. മുൻവികാരിമാരായ ഫാ. ഫ്രാങ്കോ കവലക്കാട്ട്, ഫാ. തോമസ് ചൂണ്ടൽ, ഫാ. പോൾ പേരാമംഗലത്ത്, ഫാ. ജോണ്‍ മൂലൻ, ഫാ. ദേവസി പന്തല്ലൂക്കാരൻ, ഫാ. പോൾ ആലപ്പാട്ട്, ഫാ. ഷാജു ഊക്കൻ, ഫാ. ജേക്കബ് തച്ചറാട്ടിൽ, ഇപ്പോഴത്തെ വികാരി ഫാ. ആന്‍റണി ആലുക്ക എന്നിവർ സംഗമത്തിൽ പങ്കെടുത്തു. ജൂബിലി കണ്‍വീനർ സിജോ, കൈക്കാരൻമാരായ ആന്‍റണി തറയിൽ, ലാസർ കള്ളിക്കാടൻ, തോമസ് ചാഴൂർ, സന്തോഷ് മാടവന, പ്രതിനിധിയോഗം സെക്രട്ടറി സ്റ്റെയ്നി തുടങ്ങിയവർ നേതൃത്വം നൽകി. മുൻ വികാരിമാരെ ആദരിക്കൽ, ഓർമകൾ പങ്കുവയ്ക്കൽ എന്നിവയും ഉണ്ടായിരുന്നു.

സ്‌കൂൾ വാന്‍ ഇടിച്ച് ഓട്ടോ മറിഞ്ഞു; മൂന്നുപേര്‍ക്ക് പരിക്ക്

കല്ലൂര്‍: പള്ളിക്കുന്നില്‍ ബഡ്‌സ് സ്‌കൂളിന്‍റെ വാന്‍ ഇടിച്ച് ഓട്ടോറിക്ഷ മറിഞ്ഞു. അപകടത്തില്‍ ഓട്ടോ ഡ്രൈവര്‍ക്കും യാത്രക്കാരായ അമ്മയ്ക്കും മകനും പരിക്കേറ്റു. പരിക്കേറ്റ കല്ലൂര്‍ സ്വദേശികളായ യാത്രക്കാരെയും ഓട്ടോ ഡ്രൈവറെയും തൃശൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു. ഇന്നലെ രാവിലെയാണ് അപകടം. തൃക്കൂര്‍ പഞ്ചായത്തിന്‍റെ ബഡ്‌സ് സ്‌കൂളിന്‍റെ വാഹനമാണ് അപകടത്തില്‍പ്പെട്ടത്. കുട്ടികളെ കൊണ്ടുവരാന്‍ പോയ വാനാണ് ഓട്ടോറിക്ഷയില്‍ ഇടിച്ചത്. മുന്പില്‍ പോയിരുന്ന ഓട്ടോറിക്ഷ പെട്ടെന്ന് ഇടവഴിയിലേക്ക് തിരിയാന്‍ ശ്രമിച്ചതോടെ പുറകില്‍ വന്നിരുന്ന വാന്‍ ഓട്ടോയില്‍ ഇടിക്കുകയായിരുന്നു. നാട്ടുകാര്‍ ചേര്‍ന്നാണ് പരിക്കേറ്റവരെ ആശുപത്രിയില്‍ എത്തിച്ചത്. ആരുടെയും പരിക്ക് സാരമുള്ളതല്ല.

പച്ചത്തുരുത്ത് പുരസ്കാരം ശ്രീകൃഷ്ണ കോളജിനും എളവള്ളി കുളവെട്ടിക്കും

ഗുരുവായൂർ: കാലാവസ്ഥാ വ്യതിയാനത്തെ ചെറുക്കുന്നതിനും പരിസ്ഥിതി പുനസ്ഥാപന പ്രവർത്തനങ്ങളുടെ ഭാഗമായി സംസ്ഥാനത്ത് ഹരിതകേരളം മിഷന്‍റെ നേതൃത്വത്തിൽ ആവിഷ്കരിച്ച പച്ചത്തുരുത്ത് പുരസ്കാരത്തിന് ഗുരുവായൂർ ശ്രീകൃഷ്ണ കോളജ് ഒന്നാം സ്ഥാനവും, രണ്ടാം സ്ഥാനം എളവള്ളി കുളവെട്ടി പച്ചത്തുരുത്തിനും. എളവള്ളി വാതക ക്രിമറ്റോറിയത്തിനോടു ചേർന്നാണ് നാൽപ്പത്തിയൊന്ന് കുളവെട്ടി മരങ്ങളും ഇരുപത് ഫലവൃക്ഷങ്ങളുമുള്ള കുളവെട്ടി പച്ചത്തുരുത്ത് സ്ഥിതി ചെയ്യുന്നത്. മികച്ച മൂന്ന് പച്ചത്തുരുത്തുകളെ തെരഞ്ഞെടുത്തതിലാണ് എളവള്ളി കുളവെട്ടി പച്ചത്തുരുത്ത് രണ്ടാംസ്ഥാനം നേടിയതെന്ന് ഗ്രാമപഞ്ചായത്ത് പ്രസിഡന്‍റ് ജിയോ ഫോക്സ് പറഞ്ഞു. തൈകളുടെ പ്രൂണിംഗ് ഉൾപ്പെടെ ചെയ്യുന്നത് തൃശൂർ സെന്‍റ് തോമസ് കോളജ് ബോട്ടണി വിഭാഗം അസോ. പ്രഫ. പി.വി. ആന്‍റോയുടെ നേതൃത്വത്തിലാണ്.

ചിമ്മിനി ഇക്കോ ടൂറിസം പദ്ധതിക്ക് മൂന്നുകോടി രൂപയുടെ ഭരണാനുമതി

പാലപ്പിള്ളി: ചിമ്മിനി ഇക്കോടൂറിസം പദ്ധതിക്ക് മൂന്നു കോടിരൂപയുടെ ഭരണാനുമതിയായതായി കെ.കെ. രാമചന്ദ്രന്‍ എംഎല്‍എ അറിയിച്ചു. വനംവകുപ്പ് മുഖേന സമര്‍പ്പിച്ച അഞ്ചു കോടി രൂപയുടെ പദ്ധതിയിലാണ് തുക അനുവദിച്ചത്. ചിമ്മിനിയില്‍ നടന്ന പുതുക്കാട് മണ്ഡലം ടൂറിസം പദ്ധതികളുടെ അവലോകന യോഗത്തിലാണ് ഇക്കാര്യം അറിയിച്ചത്. എംഎല്‍എയുടെ ആസ്തി വികസന ഫണ്ടില്‍ നിന്നും 50 ലക്ഷം രൂപകൊണ്ട് പണിയുന്ന ടോയ്‌ലറ്റ് ബ്ലോക്ക് പദ്ധതിയുടെ നിര്‍മാണ പുരോഗതിയും യോഗത്തില്‍ വിലയിരുത്തി. പ്രസ്തുത പദ്ധതിയില്‍ ഉള്‍പ്പെട്ടിട്ടുള്ള കുടിവെള്ള പദ്ധതി ഉടനെ ആരംഭിക്കും. വരന്തരപ്പിള്ളി ഗ്രാമപഞ്ചായത്തിന്‍റെ ടൂറിസം ഡെസ്റ്റിനേഷന്‍ ചലഞ്ച് പദ്ധതിയില്‍ അനുവദിച്ച 50 ലക്ഷം രൂപയ്ക്ക് സോളാര്‍ ബോട്ട്, ബഗ്ഗി, ചില്‍ഡ്രന്‍സ് പാര്‍ക്ക് തുടങ്ങിയവ ഒക്ടോബറില്‍ പ്രവര്‍ത്തനം ആരംഭിക്കും. നവ കേരളനിര്‍മിതിയുടെ ഭാഗമായി അനുവദിച്ച ഒരുകോടി രൂപയില്‍ ബോട്ട് ലാന്‍ഡിംഗ്, കഫ്തീരിയ തുടങ്ങിയവ പണിയുന്നതിനുള്ള എസ്റ്റിമേറ്റ് സാങ്കേതിക അനുമതിക്കായി സമര്‍പ്പിച്ചു. വരന്തരപ്പിള്ളി ഗ്രാമപഞ്ചായത്തിലെ മുനിയാട്ടുകുന്ന്, മറ്റത്തൂര്‍ ഗ്രാമപഞ്ചായത്തിലെ കുഞ്ഞാലിപ്പാറ എന്നീ ടൂറിസം പദ്ധതികള്‍ക്കായി സ്ഥലം ലഭ്യമാക്കുന്ന നടപടികള്‍ സ്വീകരിച്ചു വരുന്നതായി ജില്ലാ കളക്ടര്‍ യോഗത്തില്‍ അറിയിച്ചു. ചിമ്മിനി ഇക്കോ ടൂറിസം പദ്ധതിയുടെ ഭാഗമായുള്ള കുട്ടവഞ്ചി സവാരി, മൂന്ന് ട്രക്കിംഗ് പാക്കേജുകള്‍ എന്നിവ വിജയകരമായി നടത്തിവരുന്നുണ്ട്. സംസ്ഥാന ബജറ്റില്‍ അനുവദിച്ച ഒരുകോടി രൂപ ഉപയോഗപ്പെടുത്തി വ്യൂ പോയിന്‍റ്, ഗാര്‍ഡന്‍, പാര്‍ക്കിംഗ് ഗ്രൗണ്ട്, സെല്‍ഫി പോയിന്‍റ് നവീകരണം എന്നിവയുടെ അനുമതിക്കായി എസ്റ്റിമേറ്റ് ഉടന്‍ സമര്‍പ്പിക്കാനും തീരുമാനിച്ചു. കെ.കെ. രാമചന്ദ്രന്‍ എംഎല്‍എ അധ്യക്ഷത വഹിച്ച യോഗത്തില്‍ കളക്ടര്‍ അര്‍ജുന്‍ പാണ്ഡ്യന്‍, വരന്തരപ്പിള്ളി ഗ്രാമപഞ്ചായത്ത് പ്രസിഡന്‍റ് കലാപ്രിയ സുരേഷ്, വൈസ് പ്രസിഡന്‍റ് ടി.ജി. അശോകന്‍, ചിമ്മിനി അസിസ്റ്റന്‍റ് വൈല്‍ഡ് ലൈഫ് വാര്‍ഡന്‍ കെ.എം. മുഹമ്മദ് റാഫി, ടൂറിസം പ്രൊജക്റ്റ് എൻജിനീയര്‍ കെ.വി. വിദ്യ, ടൂറിസ്റ്റ് ഇന്‍ഫര്‍മേഷന്‍ ഓഫീസര്‍ ശാരിക വി. നായര്‍, മറ്റത്തൂര്‍ ഗ്രാമപഞ്ചായത്ത് സെക്രട്ടറി പി.എസ്. പ്രദീപ് കുമാര്‍, എം.എസ്. സുമേഷ്, റോസിലി തോമസ്, അഷറഫ് ചാലിയത്തോടി തുടങ്ങിയവര്‍ സംസാരിച്ചു.

തമ്പുരാട്ടിപ്പടിയിൽ ഗതാഗതനിയന്ത്രണം ഒരുവർഷം പിന്നിട്ടു; യാത്ര ദുഷ്കരം

പട്ടിക്കാട്: ദേശീയപാതയിൽ തമ്പുരാട്ടിപ്പടിയിൽ ഗതാഗതനിയന്ത്രണം ഏർപ്പെടുത്തിയിട്ട് ഒരുവർഷം പിന്നിട്ടു. കഴിഞ്ഞ പതിനാല് മാസമായി മൂന്നുവരി പാതയിലൂടെ രണ്ടുവരിയായാണ് തൃശൂർ ഭാഗത്തേക്ക് വാഹനങ്ങളെ കടത്തിവിടുന്നത്. ഇതിനെതിരെ നിരവധി പരാതികൾ ഉയർന്നുവന്നെങ്കിലും വേണ്ട നടപടികൾ സ്വീകരിക്കാൻ ദേശീയപാത അധികൃതർ തയാറായില്ല. 2024 ജൂലൈയിലാണ് തമ്പുരാട്ടിപ്പടിയിലെ സർവീസ് റോഡിലേയ്ക്ക് വനഭൂമിയിൽ നിന്ന് മരങ്ങൾ കടപുഴകി വീണത്. വൻതോതിൽ മണ്ണിടിച്ചിലും ഉണ്ടായി. പ്രദേശത്തെ അപകടഭീഷണി മുന്നിൽക്കണ്ട് പ്രധാനപാതയുടെ ഒരുവരി അടച്ച് രണ്ടുവരിയായി ഗതാഗതനിയന്ത്രണം ഏർപ്പെടുത്തുകയായിരുന്നു. എന്നാൽ മണ്ണും മരങ്ങളും നീക്കം ചെയ്ത് സർവീസ് റോഡ് സഞ്ചാരയോഗ്യമാക്കാൻ പിന്നീട് അധികൃതർ തയാറായില്ല. മറിച്ച് മൂന്നുവരിപ്പാതയുടെ ഒരുവരി സർവീസ് റോഡിന് പകരമായി ഉപയോഗിക്കാൻ ടാർ വീപ്പകൾ വെച്ച് തിരിക്കുകയായിരുന്നു. തമ്പുരാട്ടിപ്പടിയിലെ അശാസ്ത്രീയ ഗതാഗതനിയന്ത്രണത്തെക്കുറിച്ച് നിരവധി പരാതികൾ ഉയർന്നുവന്നെങ്കിലും വേണ്ട പരിഹാരം കാണാൻ ആരും തയാറായില്ല. മണ്ണുത്തി വടക്കഞ്ചേരി ദേശീയപാതയിൽ ടോൾ പിരിവ് തുടരുമ്പോഴും റോഡുകൾ സഞ്ചാരയോഗ്യമാക്കി യാത്രക്കാരുടെ സുരക്ഷ ഉറപ്പുവരുത്താൻ അധികൃതർ തയാറാകണമെന്ന് നാട്ടുകാർ ആവശ്യപ്പെട്ടു.

വടക്കാഞ്ചേരി റെയിൽവേ സ്റ്റേഷൻ അണിഞ്ഞൊരുങ്ങുന്നു

വടക്കാഞ്ചേരി: കേന്ദ്രസർക്കാർ അമൃത് ഭാരത് പദ്ധതിൽ ഉൾപ്പെടുത്തി 10 കോടി രൂപ ചിലവിൽ നിർമിക്കുന്ന വടക്കാഞ്ചേരി റെയിൽവേ സ്റ്റേഷൻ തിരുവനന്തപുരം ഡിആർഎം ദിവ്യകാന്ത് ചന്ദ്രകാറും സംഘവും സന്ദർശനം നടത്തി. യുദ്ധകാലടിസ്ഥാനത്തിൽ നടത്തുന്ന നിർമാണം പൂർത്തിയായാൽ ഒക്ടോബറിൽ പ്രധാനമന്ത്രി സമർപ്പണം നടത്തും. സന്ദർശനത്തിനിടെ കെ.രാധാകൃഷ്ണൻ എംപി മണ്ഡലത്തിലെ റെയിൽവേ സ്റ്റേഷനുകളുടെ വികസനം, ട്രെയിൻ സ്റ്റോപ്പുകൾ ഉൾപ്പെടെ വിവിധ വിഷയങ്ങൾ അവതരിപ്പിച്ചു. സ്റ്റേഷനിൽ സിസിടിവി നിരീക്ഷണ സംവിധാനവും മതിയായ ലൈറ്റിംഗ് സൗകര്യവും ഇല്ലാത്തത് യാത്രക്കാരുടെ സുരക്ഷയ്ക്ക് ഗുരുതര ഭീഷണിയാണെന്ന് എംപി ചൂണ്ടിക്കാട്ടി. ഇതുമൂലം സ്ത്രീകൾ, മുതിർന്നവർ, രാത്രി യാത്രക്കാർ എന്നിവർക്ക് ബുദ്ധിമുട്ട് നേരിടുന്നതായും അദ്ദേഹം വ്യക്തമാക്കി. അടുത്തിടെ സ്റ്റേഷൻ പരിസരത്ത് നടന്ന മോഷണവും എംപി സൂചിപ്പിച്ചു. കൂടാതെ, സ്റ്റേഷന്‍റെ പടിഞ്ഞാറു വശത്ത് റെയിൽവേ കുന്ന് ചരൽപറമ്പ് പ്രദേശങ്ങളിൽ താമസിക്കുന്ന 400-ഓളം കുടുംബങ്ങൾക്കു റെയിൽവേ പാളം മുറിച്ചുകടന്നുവേണം നഗരത്തിലേക്കെത്താൻ. ഇതിനായി ഫുട് ഓവർ ബ്രിഡ്ജ് നിർമിക്കേണ്ടതുണ്ടെന്നും ആവശ്യപ്പെട്ടു. വടക്കാഞ്ചേരിയിൽ കൂടുതൽ എക്സ്പ്രസ് ട്രെയിൻ സ്റ്റോപ്പേജുകൾ അനുവദിക്കണമെന്നും, കോവിഡ് കാലത്ത് ഒഴിവാക്കിയ രാത്രികാല ട്രെയിൻ സ്റ്റോപ്പുകൾ പുനഃസ്ഥാപിക്കണമെന്നും എംപി ആവശ്യപ്പെട്ടു. വള്ളത്തോൾ നഗർ റെയിൽവേ സ്റ്റേഷനിലെ പരിതാപകരമായ അവസ്ഥയും എംപി ഡിആർഎമ്മിന്‍റെ ശ്രദ്ധയിൽപ്പെടുത്തി. ഹൈലെവൽ പ്ലാറ്റ്‌ഫോമുകൾ, റാമ്പുകൾ, വൈകല്യമുള്ളവർക്കായുള്ള പ്രത്യേക ടിക്കറ്റ് കൗണ്ടർ, ഫുട് ഓവർ ബ്രിഡ്ജ്, പുതിയ സ്റ്റേഷൻ കെട്ടിടം എന്നിവ അടിയന്തിരമായി ഒരുക്കണമെന്ന് എംപി ആവശ്യപ്പെട്ടു. മുള്ളൂർക്കര റെയിൽവേ സ്റ്റേഷന്‍റെ അടിസ്ഥാന സൗകര്യങ്ങൾ വർധിപ്പിക്കണമെന്നും പാസഞ്ചർ ട്രെയിനുകൾക്ക് സ്റ്റോപ്പ് അനുവദിക്കണമെന്നും എംപി ആവശ്യപ്പെട്ടു. ചേലക്കര, വടക്കാഞ്ചേരി നിയോജക മണ്ഡലങ്ങളിൽ സ്ഥലം ഏറ്റെടുക്കൽ ഉൾപ്പെടെ വിവിധ ഘട്ടങ്ങളിൽ എത്തി നിൽക്കുന്ന ആട്ടോർ, പോട്ടോർ, മാരാത്തുകുന്ന്, അമല, അകമല കാട്ടിലെ പാലം, മുള്ളൂർക്കര, പൈങ്കുളം എന്നീ റെയിൽവേ മേൽപ്പാലങ്ങളുടെ പുരോഗതി വിലയിരുത്താൻ ഒക്ടോബർ ആദ്യവാരം തിരുവനന്തപുരത്ത് ഡിആർഎം ഓഫീസിൽ വെച്ച് യോഗം ചേരും. മുളങ്കുന്നത്തുകാവ് റെയിൽവേ സ്റ്റേഷനിൽ ഫുട് ഓവർബ്രിഡ്ജ് നിർമിക്കുന്നതിനുള്ള പ്രൊപ്പോസൽ തയാറാക്കുമെന്നും വടക്കാഞ്ചേരി സ്റ്റേഷനിൽ സിസിടിവി സംവിധാനവും ആവശ്യമായ ലൈറ്റിംഗ് സൗകര്യവും ഏർപ്പെടുത്തുമെന്നും ഡിആർഎം ഉറപ്പു നൽകി. സേവ്യർ ചിറ്റിലപ്പള്ളി എംഎൽഎ, റെയിൽവേ ഉദ്യോഗസ്ഥരായ ഡെപ്യൂട്ടി സി.ഇ. മാരിമുത്തു, ഡിഎം ഇ. പ്രവീൺകുമാർ, ഡി എസ് ടി.ഇ. അജയകുമാർ എന്നിവർ കൂടെയുണ്ടായിരുന്നു.

കെഎസ്ആർടിസി ബസ് ഇടിച്ച് വയോധിക മരിച്ചു

മായന്നൂർ: തൃശൂർ-ഒറ്റപ്പാലം റൂട്ടിലോടുന്ന കെഎസ്ആർടിസി ബസിടിച്ച് വയോധിക മരിച്ചു. മായന്നൂർ കൂട്ടിൽമുക്ക് പ്ലായ്ക്കൽ വീട്ടിൽ രുക്മണി(74)യാണ് മരിച്ചത്. ഇന്നലെ രാവിലെ എട്ടരയോടെ മായന്നൂർ കാവുവട്ടം ബസ്സ്റ്റോപ്പിൽ നിന്ന് ബസ് മുന്നോട്ടെടുക്കുന്നതിനിടെയാണ് അപകടം. ഒറ്റപ്പാലത്തേക്കു പോകാനായി ഓട്ടോയിൽ വന്നിറങ്ങിയ രുക്മിണി ഉടൻ ബസിൽ കയറാനായി ബസിന്‍റെ മുന്നിലൂടെ കടന്നത് ഡ്രൈവർ കാണാത്തതാണ് അപകടകാരണമെന്ന് പറയുന്നു. നാട്ടുകാർ ചേർന്ന് ഉടൻ രുക്മണിയെ ഒറ്റപ്പാലത്തെ സ്വകാര്യ ആശുപത്രിയിൽ എത്തിച്ചെങ്കിലും മരിച്ചു. പഴയന്നൂർ പോലീസെത്തി മേൽനടപടികൾ സ്വീകരിച്ചു. സംസ്കാരം ഇന്നു രാവിലെ 11ന് പാമ്പാടി ഐവർമഠം പൊതുശ്മശാനത്തിൽ.

ഒമാനിൽ അന്തരിച്ചു

പുന്നയൂർക്കുളം: ഒമാനിൽ ജോലിക്ക് പോകുന്നതിനിടയിൽ പുന്നയൂർക്കുളം സ്വദേശി കുഴഞ്ഞുവീണു മരിച്ചു. ഒമാനിൽ പ്ലംബിംഗ് വർക്ക് കോണ്‍ട്രാക്ടറായ പരൂർ കുപ്രവള്ളി ജിഎംഎൽ.പി. സ്കൂളിനു സമീപം പരേതനായ എ ളയമാറ്റിൽ മൊയ്തുട്ടിയുടെ മകൻ ഊട്ടുമഠത്തിൽ അബൂബക്കർ (ബക്കർ- 69) ആണ് മരിച്ചത്. കുഴഞ്ഞു വീണ ബക്കറിനെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. കബറടക്കം പിന്നീട് നാട്ടിൽ നടത്തും. ഭാര്യ: ആരീഫ. മക്കൾ: മുസ്തഫ, മുർഷാദ്(ഇരുവരും ദുബായി), മിസിരിയ. മരുമക്കൾ: ഹസീന, ജിസ്മി, ബഷീർ (യുഎഇ).

ക്രൈസ്റ്റ് എന്‍ജിനീയറിംഗ് കോളജ് എന്‍എസ്എസ് ക്യാമ്പ് നടത്തി

ഇരിങ്ങാലക്കുട: ക്രൈസ്റ്റ് എന്‍ജിനീയറിംഗ് കോളജ് എന്‍എസ്എസ് യൂണിറ്റ് പെരിഞ്ഞനം ഗവ. യു പി സ്‌കൂളില്‍ സപ്തദിന ക്യാമ്പ് സംഘടിപ്പിച്ചു. സാമൂഹ്യസേവനവും വ്യക്തിത്വ വികസനവും ലക്ഷ്യമാക്കി സംഘടിപ്പിച്ച ക്യാമ്പില്‍ അറുപതോളം വോളന്‍റിയര്‍മാര്‍ പങ്കെടുത്തു. ക്യാമ്പിന്‍റെ ഭാഗമായി പെരിഞ്ഞനം ബീച്ച് വൃത്തിയാക്കല്‍, വോളിബോള്‍ കോര്‍ട്ട് ശുചീകരണം, സ്‌കൂളിനായി പച്ചക്കറി ത്തോട്ടം നിര്‍മാണം, ചുമര്‍ചിത്ര രചന എന്നിവ നടന്നു. പെരിഞ്ഞനം പഞ്ചായത്ത് പ്രസിഡന്‍റ് വിനീത മോഹന്‍ദാസ്, വാര്‍ഡ് മെമ്പര്‍ ഹേമലത, സിവില്‍ എക് സൈസ് ഓഫീസര്‍ പി.എം. ജയദേവ്, മോട്ടോര്‍ വെഹിക്കിള്‍ ഇന്‍സ്പെക്ടര്‍ മനു വിശ്വനാഥ്, ഫയര്‍ ആന്‍ഡ് റസ്‌ക്യൂ ഓഫീസര്‍ കെ.എസ്. സജിത് എന്നിവര്‍ ക്യാമ്പ് സന്ദര്‍ശിച്ച് വോളന്‍റിയര്‍മാര്‍ക്ക് സന്ദേശം നല്‍കി. ക്യാമ്പിന് എന്‍എസ്എസ് പ്രോഗ്രാം ഓഫീസര്‍മാരായ ഒ.എസ്. അഭിലാഷ്, ടി.ഐ. പ്രീതി എന്നിവര്‍ വോളന്‍റിയര്‍ സെക്രട്ടറിമാരായ ആള്‍ഡോ, പാര്‍വതി എന്നിവര്‍ നേതൃത്വം നല്‍കി.

ക്രൈസ്റ്റ് കോം ക്വിസ് - 2025: ഹൈദരാബാദ് ഉസ്മാനിയ മെഡിക്കല്‍ കോളജിന് ഒന്നാംസ്ഥാനം

ഇരിങ്ങാലക്കുട: ക്രൈസ്റ്റ് കോളജിലെ സ്വാശ്രയ കോമേഴ്‌സ് ഫിനാന്‍സ് വിഭാഗത്തിന്‍റെ ആഭിമുഖ്യത്തില്‍ നടത്തിയ ക്രൈസ്റ്റ് കോം ക്വിസ് മത്സരത്തില്‍ ഹൈദരാബാദ് ഉസ്മാനിയ മെഡിക്കല്‍ കോളജ് ഒന്നാം സ്ഥാനം കരസ്ഥമാക്കി. ഐഐടി ചെന്നൈ, ഐഐഎം ലക്‌നൗ, അഹമ്മദാബാദ് യൂണിവേഴ്സിറ്റി, ഇഗ്‌നോ കൊച്ചി, കുസാറ്റ് കൊച്ചി യഥാക്രമം രണ്ട്, മൂന്ന്്, നാല്, അഞ്ച്, ആറ് സ്ഥാനങ്ങള്‍ കരസ്ഥമാക്കി. ഒന്നാം സമ്മാനം 60,000 രൂപ, രണ്ടാം സമ്മാനം 30,000 രൂപ, മൂന്നാം സമ്മാനം 15,000 രൂപ, നാലാം സമ്മാനം 10, 000 രൂപ, അഞ്ചാം സമ്മാനം 5,000 രൂപ, ആറാം സമ്മാനം 2,500 രൂപയും നല്കി. മണപ്പുറം ഫിനാന്‍സ് എംഡി വി.പി. നന്ദകുമാര്‍ മത്സരം ഉദ്ഘാടനം ചെയ്തു. പ്രിന്‍സിപ്പല്‍ റവ.ഡോ. ജോളി ആന്‍ഡ്രൂസ് അധ്യക്ഷത വഹിച്ചു. കോളജ് മാനേജര്‍ ഫാ. ജോയ് പീണിക്കപ്പറമ്പില്‍ അനുഗ്രഹ‌പ്രഭാഷണം നടത്തി. ഇരിങ്ങാലക്കുട കെഎസ്ഇ ലിമിറ്റഡ് എംഡി എം.പി. ജാക്‌സണ്‍ മുഖ്യാതിഥിയായിരുന്നു. ഡോ. മേജര്‍ ചന്ദ്രകാന്ത് ക്വിസ് മാസ്റ്ററായിരുന്നു. സ്വാശ്രയവിഭാഗം കോ- ഓര്‍ഡിനേറ്റര്‍ ഡോ. വില്‍സണ്‍ തറയില്‍ സിഎംഐ, ഈവന്‍റ് കോ- ഓര്‍ഡിനേറ്റര്‍ ഡോ. ലിന്‍റാ മേരി സൈമണ്‍, പ്രഫ. കെ.ജെ. ജോസഫ്, അസോ. പ്രഫസര്‍ അന്ന മേരി ജോഷി തുടങ്ങിയവര്‍ പ്രസംഗിച്ചു.

ഒാണാഘോഷങ്ങൾ തുടരുന്നു...

ഓണം ഫെസ്റ്റ് സമാപിച്ചു ചാലക്കുടി: കലാഭവൻ മണി പാർക്കിൽ നടന്ന ചാലക്കുടിയുടെ നന്മോണം, ഓണം ഫെസ്റ്റ് 2025 സമാപിച്ചു. നഗരസഭയുടെ നേതൃത്വത്തിൽ കലാ-സാംസ്കാരിക-സാമൂഹ്യ സംഘടനകളുടെ സഹകരണത്തോടെയാണ് ഓണം ഫെസ്റ്റ് സംഘടിപ്പിച്ചത്. ഓണം ഫെസ്റ്റിന്‍റെ സമാപനം സനീഷ് കുമാർ ജോസഫ് എംഎൽഎ ഉദ്ഘാടനം ചെയ്തു. നഗരസഭ ചെയർപേഴ്സൻ ഷിബു വാലപ്പൻ അധ്യക്ഷതവഹിച്ചു. ഫൊറോന വികാരി ഫാ. വർഗീസ് പാത്താടൻ, ടൗൺ ചീഫ് ഇമാം ഹസനി ഹുസൈൻ, എസ്‌എൻഡിപി യൂണിയൻ സെക്രട്ടറി കെ.എ. ഉണ്ണികൃഷ്ണൻ, വൈസ്ചെയർപേഴ്സൺ സി. ശ്രീദേവി, പ്രതിപക്ഷ നേതാവ് സി.എസ്. സുരേഷ്, പാർലമെന്‍ററി പാർട്ടി ലീഡർ ബിജു ചിറയത്ത്, കലാഭവൻ ജയൻ, തുമ്പൂർ സുബ്രഹ്മണ്യൻ, സുരേഷ് മുട്ടത്തി, സാജു പാത്താടൻ, ഷൈന ജോർജ്, ജോബി മേലേടത്ത്, എക്സൈസ് അസി. ഇൻസ്പെക്ടർ കെ.കെ. രാജു, എം.ജി. ബാബു, ഭരിത പ്രതാപ്, നഗരസഭ സ്ഥിരം‌സമിതി അധ്യക്ഷരായ കെ.വി. പോൾ, പ്രീതി ബാബു, ദിപു ദിനേശ്, എം.എം. അനിൽകുമാർ, ആനി പോൾ, മുൻ ചെയർമാൻമാരായ വി.ഒ. പൈലപ്പൻ, എബി ജോർജ്, ആലീസ് ഷിബു എന്നിവർ പ്രസംഗിച്ചു. മർച്ചന്‍റ്സ്് അസോസിയേഷൻ ഓണാഘോഷം ചാലക്കുടി: മർച്ചന്‍റ്സ്് അസോസിയേഷനും മർച്ചന്‍റ്സ്് യൂത്ത് വിംഗും വനിതാ വിംഗും സംയുക്തമായി ഓണാഘോഷം നടത്തി. കേരള വ്യാപാരി വ്യവസായി ഏകോപന‌സമിതി ജില്ലാ ട്രഷററും മർച്ചന്‍റ്സ്് അസോസിയേഷൻ പ്രസിഡന്‍റുമായ ജോയ് മൂത്തേടൻ അധ്യക്ഷത വഹിച്ചു. സനീഷ്‌കുമാർ ജോസഫ് എംഎൽഎ ഉദ്ഘാടനം ചെയ്തു. മുനിസിപ്പൽ ചെയർമാൻ ഷിബു വാലപ്പൻ, പ്രതിപക്ഷ നേതാവ് സി. എസ്. സുരേഷ്, ചാലക്കുടി ഡിവൈഎസ്പി പി.സി. ബിജുകുമാർ, മുനിസിപ്പൽ സെക്രട്ടറി കെ. പ്രമോദ്, ഫോറോന പള്ളി വികാരി ഫാ. വർഗീസ് പാത്താടൻ, ടൗൺ ജുമാ മസ്ജിദ് ഇമാം കെ. ഹുസൈൻ ഭാഗവി, ഗായത്രി ആശ്രമം ഗുരു ദർശന രഹന, മുനിസിപ്പൽ കൗൺസിലർമാർ തുടങ്ങിയവർ പങ്കെടുത്തു. തിരുവോണം പുരുഷ സ്വയംസഹായ സംഘം വെള്ളാഞ്ചിറ: പൊരുന്നുംകുന്ന് തിരുവോണം പുരുഷസ്വയംസഹായ സംഘത്തിന്‍റെ നേതൃത്വത്തിൽ ഓണാഘോഷ പരിപാടി സംഘടിപ്പിച്ചു. മുതിർന്ന കുടുംബാംഗമായ ശാന്ത ശങ്കരൻ ഉദ്ഘാടനം ചെയ്തു. പ്രസിഡന്‍റ്‌ ആൽബർട്ട് അരിക്കാട്ട് അധ്യക്ഷത വഹിച്ചു. ഓണാഘോഷത്തോടനുബന്ധിച്ച് റാലി സംഘടിപ്പിച്ചു. കുട്ടികൾക്കായി വിവിധ കലാപരിപാടികളും ഓണ‌മത്സരങ്ങളും നടത്തി. യോഗത്തിൽ സെക്രട്ടറി ഹരീഷ്, ട്രഷറർ ലെനിഷ് ഭരതൻ എന്നിവർ പ്രസംഗിച്ചു. സ്മാർട്ട് ക്ലബ് ഓണാഘോഷം ചാലക്കുടി: കാരക്കുളത്ത് നാട് സ്മാർട്ട് ക്ലബ് ഓണവിരുന്ന് ഓണാഘോഷം മുനിസിപ്പൽ കൗൺസിലർ കെ.പി. ബാലൻ ഉദ്ഘാടനം ചെയ്തു. സ്മാർട്ട് ക്ലബ് പ്രസിഡന്‍റ്് അർഹിൻ വി. ബിജു അധ്യക്ഷത വഹിച്ചു. ഓണാഘോഷത്തോടനുബന്ധിച്ച് വിവിധ കലാകായിക മത്സരങ്ങൾ സംഘടിപ്പിച്ചു. സെക്രട്ടറി ആരോമൽ കൃഷ് ണൻ, കാരക്കുളത്തുനാട് റെസിഡൻസ് അസോസിയേഷൻ പ്രസിഡന്‍റ് സുമി സുധീഷ്, ദേവലക്ഷ്മി വി. ഷിജു, പി.യു. അനുശ്രീ, എം.ബി. പ്രണവ്, വിബിൻ ഉണ്ണികൃഷ്ണൻ എന്നിവർ പ്രസംഗിച്ചു. തുടർന്ന് ക്ലബ് അംഗങ്ങളുടെ വിവിധ കലാപരിപാടികൾ അരങ്ങേറി. മംഗലശേരി വായനശാല കൊരട്ടി: നാട്ടിലെ വയോധികരും രോഗികളുമായ 25 പേരെ ചേർത്തുപിടിച്ച് മംഗലശേരി ഗ്രാമീണവായനശാല സംഘടിപ്പിച്ച ഓണാഘോഷം ശ്രദ്ധേയമായി. വീടുകളിൽ നിന്നും വാഹനങ്ങളിൽ സുരക്ഷിതമായാണ് ഇവരെ വായനശാലയിലേക്കും തിരിച്ചുവീടുകളിലേക്കും കൊണ്ടുപോയത്. ഊഞ്ഞാലാട്ടിയും ഓണസദ്യ ഊട്ടിയും സമ്മാനങ്ങൾ നൽകിയുമാണ് വായനാശാല അങ്കണത്തിൽ ഓണാഘോഷപരിപാടികൾ സംഘടിപ്പിച്ചത്. ജില്ലാ പഞ്ചായത്ത് അംഗം ലീല സുബ്രഹ്മണ്യൻ ഉദ്ഘാടനം ചെയ്തു. വായനശാല പ്രസിഡന്‍റ് ഡോ. ബിജു ലോന അധ്യക്ഷത വഹിച്ചു. താലൂക്ക് ലൈബ്രറി കൗൺസിൽ പ്രസിഡന്‍റ് സി.ഡി. പോൾസൺ മുഖ്യാതിഥിയായി. ഇടവക വികാരി ഫാ. ജോസ് മൈപ്പാൻ അനുഗ്രഹപ്രഭാഷണം നടത്തി. വാർഡ് മെമ്പർ വർഗീസ് പയ്യപ്പിള്ളി, വായനശാല ഭാരവാഹികളായ പി.എ. ബാബു, ജോസഫ് ശങ്കുരിക്കൽ, വയോജന ക്ലബ് പ്രസിഡന്‍റ് അലോഷ്യസ്, വനിതാവേദി പ്രസിഡന്‍റ്് മേരി ജോയ് എന്നിവർ പ്രസംഗിച്ചു.

കത്തീഡ്രലില്‍ വിശുദ്ധ കുരിശിന്‍റെ പുകഴ്ചയുടെ തിരുനാളും കപ്പേളകളുടെ വെഞ്ചരിപ്പും 14ന്

ഇരിങ്ങാലക്കുട: സെന്‍റ് തോമസ് കത്തീഡ്രല്‍ ഇടവകയില്‍ വിശുദ്ധ കുരിശിന്‍റെ പുകഴ്ചയുടെ തിരുനാളിനു കൊടിയേറി. കത്തീഡ്രല്‍ വികാരി റവ.ഡോ. ലാസര്‍ കുറ്റിക്കാടന്‍ കൊടിയേറ്റുകര്‍മം നിര്‍വഹിച്ചു. അസിസ്റ്റന്‍റ്് വികാരിമാരായ ഫാ. ഓസ്റ്റിന്‍ പാറയ്ക്കല്‍, ഫാ. ആന്‍റണി നമ്പളം, ഫാ. ബെല്‍ഫിന്‍ കോപ്പുള്ളി, കൈക്കാരന്മാരായ പി.ടി. ജോര്‍ജ് പള്ളന്‍, തോമസ് തൊകലത്ത്, സാബു ജോര്‍ജ് ചെറിയാടന്‍, അഡ്വ.എം.എം. ഷാജന്‍ മാണിക്കത്തു പറമ്പില്‍, തിരുനാള്‍ പ്രസുദേന്തി ബിജോയ് പൗലോസ് ചക്കാലമറ്റത്ത്, കേന്ദ്രസമിതി പ്രസി ഡന്‍റ്് ജോബി അക്കരക്കാരന്‍, ജോമി ചേറ്റുപുഴക്കാരന്‍ എന്നിവര്‍ സന്നിഹിതരായിരുന്നു. രണ്ടാംദിനമായ ഇന്നു വൈകീട്ട് അഞ്ചിന് ലദീഞ്ഞ്, ദിവ്യബലി, കുരിശിന്‍റെ വഴി, നേര്‍ച്ചക്ക ഞ്ഞി. രൂപത വികാരി ജനറാള്‍ മോണ്‍. ജോസ് മാളിയേക്കല്‍ മുഖ്യകാര്‍മികത്വം വഹിക്കും. മൂന്നാംദിനമായ നാളെ കിഴക്കേ പള്ളിയില്‍ വൈകീട്ട് അഞ്ചിന് ലദീഞ്ഞ്, ദിവ്യബലി, കുരി ശിന്‍റെ വഴി, നേര്‍ച്ചക്കഞ്ഞി. വികാരി ജനറാള്‍ മോണ്‍. വില്‍സന്‍ ഈരത്തറ മുഖ്യകാര്‍മികത്വം വഹിക്കും. തിരുനാള്‍ദിനമായ 14ന് രാവിലെ ആറിനും 7.30നും 10.30നും ദിവ്യബലി. വൈകീട്ട് അഞ്ചിന് ലദീഞ്ഞ്, ആഘോഷമായ തിരുനാള്‍ ദിവ്യബലി, പ്രദക്ഷിണം. വികാരി ജനറാള്‍ മോണ്‍. ജോളി വടക്കന്‍ മുഖ്യകാര്‍മികനായിരിക്കും. 6.30ന് കപ്പേളകളുടെ വെഞ്ചരിപ്പുകര്‍മം ബിഷപ് മാര്‍ പോളി കണ്ണൂക്കാടന്‍ നിര്‍വഹിക്കും. തുടര്‍ന്ന് വിശുദ്ധ കുരിശിന്‍റെ തിരുശേഷിപ്പുവന്ദനം ഉണ്ടായിരിക്കും.

സഞ്ചാരികളേ, കാനനപാതയിൽ വാഹനം നിർത്തരുത്; അപകടമാണ്

അതിരപ്പിള്ളി: കാനനപാതയിലൂടെ സഞ്ചരിക്കുന്ന വിനോദസഞ്ചാരികൾ വന്യമൃഗങ്ങളെ പ്രകോപിപ്പിക്കുന്നതും വാഹനങ്ങൾക്കുനേരെ വന്യമൃഗങ്ങൾ പാഞ്ഞടുക്കുന്നതും ആക്രമിക്കുന്നതും പതിവാകുന്നു. അതിരപ്പിള്ളി -മലക്കപ്പാറ- വാൽപ്പാറ അന്തർസംസ്ഥാന കാനനപാതയിൽ വന്യമൃഗആക്രമണം വർധിച്ചിരിക്കുകയാണ്. വന്യമൃഗങ്ങളെ സഞ്ചാരികൾ പ്രകോപിപ്പിക്കുന്നതാണ് ഇതിനു പ്രധാന കാരണമെന്നു വനംവകുപ്പ് അധികൃതർ പറയുന്നു. അതിരപ്പിള്ളിമുതൽ വാഴച്ചാൽവരെ റോഡിൽ വിവിധയിടങ്ങളിൽ വനസംരക്ഷണസമിതി പ്രവർത്തകരുള്ളതിനാൽ വിനോദസഞ്ചാരികളെ ഈ പ്രദേശങ്ങളിൽ വാഹനം നിർത്താൻ അനുവദിക്കാറില്ല. എന്നാൽ, വിജനപ്രദേശങ്ങളിൽ വന്യമൃഗങ്ങളെ കണ്ടാൽ സഞ്ചാരികൾ വാഹനംനിർത്തി ഫോട്ടോയെടുക്കുന്നതും പ്രകോപിപ്പിക്കുന്നതുമാണു പ്രശ്നമാകുന്നത്. മനുഷ്യസാന്നിധ്യം അസ്വസ്ഥപ്പെടുത്തുന്നതിനാലും വഴി തടസപ്പെടുന്നതിനാലും ബഹളം കാരണവും മറ്റും ആനകൾ അക്രമകാരികളാകുന്നു. വഴിതടഞ്ഞവർ കടന്നുപോയാലും പിന്നാലെയെത്തുന്ന വാഹനങ്ങൾ ആക്രമിക്കപ്പെടുന്നതാണു പതിവ്. കാനനപാതയിലൂടെ സഞ്ചരിക്കുന്ന യാത്രക്കാരും വിനോദസഞ്ചാരികളും നിരവധി കാര്യങ്ങൾ ശ്രദ്ധിക്കണമെന്നു വനംവകുപ്പ് നിർദേശങ്ങൾ നൽകുന്നുണ്ട്. കാനനപാതയിൽ വാഹനങ്ങൾ നിർത്തി പുറത്തിറങ്ങാതിരിക്കുക, വന്യമൃഗങ്ങളെ കാണുന്പോൾ വാഹനങ്ങൾ നിർത്താതിരിക്കുക, ഹോണ്‍ അടിക്കാതിരിക്കുക, അവയ്ക്കു ഭക്ഷണസാധനങ്ങൾ കൊടുക്കാതിരിക്കുക, സഞ്ചാരപഥം തടയാതിരിക്കുക തുടങ്ങിയവയാണ് അതിൽ പ്രധാനം. ഈ നിർദേശങ്ങൾ പാലിക്കാതിരിക്കുന്നതാണ് പലപ്പോഴും പ്രശ്നങ്ങൾ സൃഷ്ടിക്കുന്നതെന്ന് വനം ഉദ്യോഗസ്ഥർ പറയുന്നു.

വിലയില്ല, കണ്ണീരിലായി പച്ചക്കറി കര്‍ഷകര്‍

വെള്ളിക്കുളങ്ങര: ഓണം സീസണില്‍ നല്ല വില പ്രതീക്ഷിച്ച് പച്ചക്കറി കൃഷി ചെയ്ത കര്‍ഷകര്‍ ഉത്പന്നത്തിന് വിലയില്ലാതായതോടെ കണ്ണീരിലായി. പച്ചക്കറിയിനങ്ങള്‍ക്ക് വിലയും ഡിമാൻഡും കുറഞ്ഞതോടെയാണ് കര്‍ഷകര്‍ ദുരിതത്തിലായത്. സമൃദ്ധമായ വിളവ് ലഭിച്ചിട്ടും കൃഷിച്ചെലവുപോലും കിട്ടാത്ത സാഹചര്യമാണുള്ളതെന്ന് കര്‍ഷകര്‍ പറയുന്നു. ഓണക്കാലത്ത് ടണ്‍കണക്കിന് പച്ചക്കറി വിളയുന്ന മറ്റത്തൂര്‍ അടക്കമുള്ള കിഴക്കന്‍ മലയോര മേഖലയില്‍ ഇക്കുറി വളരെ കുറച്ചു കര്‍ഷകര്‍ മാത്രമാണ് പച്ചക്കറി കൃഷിയിറക്കിയത്. മഴ നീണ്ടുനിന്നതിനാല്‍ ഓണക്കാലത്ത് വിളവെടുപ്പിന് പാകമാകാതെ വന്നതാണ് പച്ചക്കറി കര്‍ഷകര്‍ക്ക് തിരിച്ചടിയായതെന്ന് മറ്റത്തൂരിലെ പച്ചക്കറി കര്‍ഷകനായ ലോനായി കോപ്ലി പറഞ്ഞു. കടമ്പോട് പുളിന്തറയ്ക്കു സമീപം പാട്ടത്തിനെടുത്ത അരയേക്കര്‍ സ്ഥലത്ത് ഇത്തവണ പയര്‍, കുക്കുമ്പര്‍, വെണ്ട തുടങ്ങിയ പച്ചക്കറിയിനങ്ങളാണ് ലോനായി കൃഷിചെയ്തത്. ഓണത്തിനു വിളവെടുക്കാന്‍ പാകത്തില്‍ രണ്ടുമാസം‌മുമ്പേ കൃഷിയിറക്കിയെങ്കിലും പതിവില്ലാത്തവിധം മഴ നീണ്ടുനിന്നത് ഈ കര്‍ഷകന്‍റെ പ്രതീക്ഷകള്‍ തകിടം മറിച്ചു. ചെടികള്‍ പൂവിടാന്‍ വൈകിയതിനാല്‍ ഓണത്തിനുമുമ്പ് വിളവെടുപ്പിനു പാകമായില്ല. ഓണം കഴിഞ്ഞപ്പോള്‍ പയറും കുക്കുമ്പറും ധാരാളമായി വിളഞ്ഞെങ്കിലും വാങ്ങാനാളില്ലാത്ത അവസ്ഥയായി. ഇതുമൂലം വിലയും മൂന്നിലൊന്നായി കുറഞ്ഞു. ഓണവിപണിയില്‍ കിലോയ്ക്ക് നൂറുരൂപവരെ വിലയുണ്ടായിരുന്ന പയറിന് ഓണം കഴിഞ്ഞതോടെ 30 രൂപയായി താഴ്ന്നു. കുക്കുമ്പറിന്‍റെ വില മുപ്പതില്‍നിന്ന് പകുതിയായി കുറഞ്ഞു. കുറഞ്ഞ വിലയ്ക്ക് വിറ്റഴിക്കാ മെന്നുവച്ചാല്‍ വാങ്ങാനും ആളില്ലാത്ത അവസ്ഥയാണെന്നു ലോനായി പറയുന്നു. കിട്ടിയ വിലയ്ക്ക് വിറ്റഴിക്കേണ്ട ഗതികേടിലാണ്. കൃഷയിറക്കാനായി ചെലവഴിച്ച ഒന്നരലക്ഷത്തോ ളം രൂപയില്‍ പകുതിപോലും തിരിച്ചുകിട്ടില്ലെന്നാണു ലോനായിയുടെ സങ്കടം.

ഠാണാ - ചന്തക്കുന്ന് ജംഗ്ഷൻ വികസനം; കെഎസ്ടിപിയുടെ മേൽനോട്ടം വേണമെന്നു മന്ത്രി ബിന്ദു

തൃശൂർ: ഠാണാ - ചന്തക്കുന്ന് ജംഗ്ഷൻ വികസനത്തിന്‍റെ ഭാഗമായുള്ള റോഡ് നിർമാണത്തിൽ കെഎസ്ടിപിയുടെ നിരന്തര മേൽനോട്ടം ഉറപ്പാക്കണമെന്നു മന്ത്രി ഡോ. ആർ. ബിന്ദു നിർദേശിച്ചു. കെഎസ്ടിപി റോഡ് നിർമാണത്തിലെ പുരോഗതി വിലയിരുത്താനായി രാമനിലയത്തിൽ ചേർന്ന യോഗത്തിലാണു മന്ത്രി ഉദ്യോഗസ്ഥർക്കു നിർദേശം നൽകിയത്. ഠാണാ - ചന്തക്കുന്ന് റോഡ് വികസനമടക്കം തൃശൂർ-കൊടുങ്ങല്ലൂർ റോഡിൽ നടക്കുന്ന മുഴുവൻ നിർമാണപ്രവൃത്തിയും 2026 ഫെബ്രുവരി 28നകം പൂർത്തിയാക്കുമെന്നു പൊതുമരാമത്ത് വകുപ്പ് ഉദ്യോഗസ്ഥർ അറിയിച്ചു. ഠാണാ - ചന്തക്കുന്ന് റോഡിൽ ചാലക്കുടി ഭാഗത്തേക്കും മൂന്നുപീടിക ഭാഗത്തേക്കുമുള്ള നിർമാണപ്രവൃത്തികളുടെ പുരോഗതി യോഗം വിലയിരുത്തി. ഈ ഭാഗങ്ങളിലെ ഡ്രെയ്നേജ് ജോലികൾ അതിവേഗം പുരോഗമിക്കുകയാണെന്നും പത്തുദിവസംകൊണ്ട് നിർമാണം പൂർത്തിയാകുമെന്നും പിഡബ്ല്യുഡി ഉദ്യോഗസ്ഥർ അറിയിച്ചു. യോഗത്തിൽ സബ് കളക്ടർ അഖിൽ വി. മേനോൻ, കെഎസ്ടിപി എക്സിക്യുട്ടീവ് എൻജിനീയർ റിജോ റിന്ന, പോലീസ്, ഗതാഗതവകുപ്പ്, പൊതുമരാമത്ത് ഉദ്യോഗസ്ഥർ, നിർമാണക്കന്പനി പ്രതിനിധികൾ, ബസുടമകൾ തുടങ്ങിയവർ പങ്കെടുത്തു.

സെന്‍റ് അലോഷ്യസ് കോളജിൽ ദേശീയ സെമിനാർ

എൽത്തുരുത്ത്: സെന്‍റ് അലോഷ്യസ് കോളജ് ലൈബ്രറി വിഭാഗം റീ ഇമാജിനിംഗ് ലൈബ്രറി വിസിബിലിറ്റി: കണക്റ്റിംഗ് പീപ്പിൾ ആൻഡ് പോസിബിലിറ്റീസ് എന്ന വിഷയത്തിൽ ദേശീയസെമിനാർ സംഘടിപ്പിച്ചു. മാനേജർ ഫാ. തോമസ് ചക്രമാക്കിൽ സിഎംഐ ഉദ്ഘാടനം നിർവഹിച്ചു. പ്രിൻസിപ്പൽ ഡോ. ഇ.ഡി. ഡയസ് അധ്യക്ഷത നിർവഹിച്ചു. റവ.ഡോ. ജോൺ നീലങ്കാവിൽ മുഖ്യപ്രഭാഷണം നടത്തി. ലൈബ്രറികളുടെ പരിവർത്തനശേഷി ശാസ്ത്രം, വിദ്യാഭ്യാസം, സാങ്കേതികവിദ്യ എന്നിവയുമായി ബന്ധിപ്പിക്കുന്നതിന്‍റെ ആവശ്യകത വിശദീകരിച്ചു. സെമിനാറിൽ കോളജ് അഡ് മിനിസ്ട്രേറ്റർ ഫാ. അരുൺ ജോസ്, ഡോ. കെ.ബി. ലിബിസൺ, ഡോ. റോണി സെബാസ്റ്റ്യൻ, സി. അബ്ദുൽ റസാഖ്, കെ.യു. മുജീബ് റഹിമാൻ, സാൻജോ ജോസ്, വി. വിനീത ഡേവിസ്, എം.ജെ. ജൂലിറ്റ് എന്നിവർ പ്രസംഗിച്ചു.

പുലിയെ കണ്ടതായി നാട്ടുകാര്‍; സ്ഥിരീകരിക്കാതെ വനംവകുപ്പ്

വരന്തരപ്പിള്ളി: കവരംപിള്ളിയില്‍ പുലിയെന്നു സംശയിക്കുന്ന ജീവിയെ കണ്ടതായി പ്രദേശവാസികള്‍. ബുധനാഴ്ച രാത്രി ഒമ്പതോടെ കവരംപിള്ളി മുളന്തറ ബിനോജാണ് വീടിനുസമീപത്തെ റബര്‍തോട്ടത്തില്‍ പുലിയെന്നു സംശയിക്കുന്ന ജീവിയെ കണ്ടതായി പറയുന്നത്. രാത്രി അലര്‍ച്ചപോലുള്ള ശബ്ദംകേട്ടാണ് ബിനോജ് വീടിനു പുറത്തിറങ്ങി നോക്കിയത്. ടോര്‍ച്ച് വെളിച്ചത്തിലാണ് ഒരു ജീവി ഇരിക്കുന്നതു കണ്ടത്. തുടര്‍ന്നു മൊബൈലില്‍ ജീവിയുടെ വീഡിയോ പകര്‍ത്തുകയും ചെയ്തു. ടോര്‍ച്ച് തെളിച്ചപ്പോള്‍ എഴുന്നേല്‍ക്കുകയും വളരെ സാവകാശം ഇരുളിലേക്കു മറയുകയുമായിരുന്നു. ഈ സമയം വീട്ടിലെ നായകള്‍ പേടിച്ചു പതുങ്ങിയിരിക്കുകയായിരുന്നെന്നും ബിനോജ് പറഞ്ഞു. തുടര്‍ന്നു വനപാലകരെ വിവരമറിയിച്ചു. ഉദ്യോഗസ്ഥരെത്തി സ്ഥലത്തു പരിശോധന നടത്തിയെങ്കിലും ഒന്നും കണ്ടെത്താനായില്ല. അതേസമയം, പാലപ്പിള്ളി കാരികുളം പാഡിക്കു സമീപം പുലിയുടെ ആക്രമണത്തില്‍ ചത്തതെന്നു സംശയിക്കുന്ന നിലയില്‍ പശുക്കുട്ടിയുടെ ജഡം കണ്ടെത്തി. തിങ്കളാഴ്ച രാവിലെയാണ് തോട്ടത്തില്‍ ജഡം കണ്ടത്. വനപാലകര്‍ സ്ഥലത്തെത്തി പരിശോധന നടത്തി. നിരന്തരം പുലിയുടെ ആക്രമണത്തില്‍ പശുക്കുട്ടികള്‍ കൊല്ലപ്പെടുകയും ജനങ്ങള്‍ പുലിഭീതിയില്‍ കഴിയുകയും ചെയ്യുന്ന സാഹചര്യത്തില്‍ അടിയന്തരമായി വനംവകുപ്പ് പുലിയെ പിടികൂടുന്നതിനു കൂട് സ്ഥാപിക്കണമെന്നു നാട്ടുകാര്‍ ആവശ്യപ്പെട്ടു. ഇക്കാര്യത്തില്‍ എത്രയും പെട്ടെന്നു നടപടി ഉണ്ടായില്ലെങ്കില്‍ ശക്തമായ സമരപരിപാടികള്‍ക്കു നേതൃത്വം നല്‍കുമെന്നു മലയോര കര്‍ഷകസംരക്ഷണസമിതി അറിയിച്ചു.

സിപിഎമ്മിനെ വെട്ടിലാക്കി ഡിവൈഎഫ്ഐ നേതാവിന്‍റെ വെളിപ്പെടുത്തൽ

ഒല്ലൂർ: സിപിഎം മണ്ണുത്തി ഏരിയ കമ്മിറ്റിയുടെ കീഴിലുള്ള സഹകരണ ബാങ്കുകളിൽ വൻക്രമക്കേടെന്ന പരാതിയുമായി ഡിവൈഎഫ്ഐ നേതാവ്. സിപിഎമ്മിന്‍റെ കീഴിലുള്ള ആറു സഹകരണസംഘങ്ങളിൽ വൻ അഴിമതിയാണെന്നു ഡിവൈഎഫ് ഐ നേതാവും സിപിഎം നടത്തറ ഈസ്റ്റ് ലോക്കൽ കമ്മിറ്റി അംഗവുമായ നിബിൻ ശ്രീനിവാസൻ ആരോപിച്ചു. സഹകരണസംഘങ്ങളിലെ സാമ്പത്തികക്രമക്കേട് മണ്ണുത്തി ഏരിയ സെക്രട്ടറിയുടെ അറിവോടെയെന്നും നിബിൻ ആരോപിച്ചു. ഇതുസംബന്ധിച്ച് സിപിഎം സംസ്ഥാനസെക്രട്ടറി എം.വി. ഗോവിന്ദനു മാസങ്ങൾക്കുമുന്പ് അയച്ച പരാതിയിൽ യാതൊരു നടപടിയും ഉണ്ടായില്ല. വൻ അഴിമതിയും ക്രമക്കേടും നടന്നതായാണ് പരാതി. ഭൂമി വാങ്ങിയതിലും വൻ ക്രമക്കേട് നടന്നു. സ്വർണപ്പണയ പണമിടപാടിലും ക്രമക്കേടു നടന്നതായി നിബിൻ ശ്രീനിവാസൻ ആരോപിച്ചു. പാർട്ടി ഓഫീസിനായി മൂർക്കനിക്കരയിൽ 200 ചതുരശ്രഅടിയുള്ള മുറി ഒരു പാർട്ടി അംഗത്തിന്‍റെ പേരിൽ പണയംവച്ച് ഒന്പതുലക്ഷം തട്ടിയതായി ആരോപണമുണ്ട്. തട്ടിപ്പുകൾക്കു പാർട്ടി ഏരിയ സെക്രട്ടറി കൂട്ടുനിൽക്കുന്നതായും ആരോപിച്ചു. പരാതി വ്യക്തമായി എഴുതിനൽകിയ തന്നെ തരംതാഴ്ത്തിയെന്നും നിബിൻ മാധ്യമങ്ങളോടു പറഞ്ഞു. ഏരിയ കമ്മിറ്റി അംഗമായ തന്നെ ലോക്കൽ കമ്മിറ്റിഅംഗമായി തരംതാഴ്ത്തുകയായിരുന്നു. അതേസമയം, പരാതിയുടെ പേരിൽ നിബിനെ തരംതാഴ്ത്തിയിട്ടില്ലെന്നു സിപിഎം മണ്ണുത്തി ഏരിയ സെക്രട്ടറി എം.എസ്. പ്രദീപ് പറഞ്ഞു. തൃശൂരിൽ അഴിമതിയുടെ പകൽപ്പൂരം: ജോണ്‍ ഡാനിയൽ തൃശൂർ: സിപിഎം നിയന്ത്രണത്തിലുള്ള സഹകരണസംഘങ്ങളിൽ വ്യാപകമായി വായ്പത്തട്ടിപ്പും പണയത്തട്ടിപ്പും നടക്കുന്നുവെന്നു സിപിഎം ഏരിയാ നേതാവ് തന്നെ വെളിപ്പെടുത്തിയതോടെ, കരുവന്നൂർ ബാങ്ക് തട്ടിപ്പ് ഒരു ഒറ്റപ്പെട്ട സംഭവമല്ലെന്നു തെളിഞ്ഞിരിക്കുകയാണെന്ന് കെപിസിസി സെക്രട്ടറി ജോണ്‍ ഡാനിയൽ പറഞ്ഞു. മണ്ണുത്തി ഏരിയാ കമ്മിറ്റിക്കു കീഴിലെ ഒരു ലോക്കൽ കമ്മിറ്റിയുടെ പരിധിയിൽമാത്രം സിപിഎം ഭരിക്കുന്ന എട്ടിൽ ഏഴ് സംഘങ്ങളിലും പാർട്ടി ഏരിയാ നേതാവിന്‍റെ നേതൃത്വത്തിൽ വൻതോതിൽ തട്ടിപ്പും അഴിമതിയും നടക്കുന്നുവെന്നാണ് സിപിഎം മണ്ണുത്തി ഏരിയ കമ്മിറ്റി മുൻ അംഗം വെളിപ്പെടുത്തിയിരിക്കുന്നത്. അങ്ങനെയെങ്കിൽ, ജില്ലയിലെ മറ്റ് ഏരിയ കമ്മിറ്റികളുടെ പരിധിയിൽ എത്ര ആയിരം കോടികളുടെ വെട്ടിപ്പായിരിക്കും നടന്നിരിക്കുകയെന്നും അദ്ദേഹം ചോദിച്ചു. ഏതാനും പ്രാദേശികനേതാക്കളുടെ മാത്രം അറിവോടെ ഇത്ര വിപുലമായ പകൽക്കൊള്ള നടത്താൻ കഴിയുകയില്ല. മാത്രമല്ല, തട്ടിപ്പു സംബന്ധിച്ചു നൽകിയ വ്യക്തമായ പരാതികൾ സംസ്ഥാനസെക്രട്ടറി അവഗണിച്ചു എന്നതും പാർട്ടി നേതൃത്വത്തിന്‍റെ ഒത്താശയ്ക്കു തെളിവാണ്. കരുവന്നൂർ സഹകരണ ബാങ്കിൽ കണ്ടത് അഴിമതിയുടെ സാന്പിൾ വെടിക്കെട്ട് മാത്രമാണെന്നും, തട്ടിപ്പിന്‍റെ പകൽപ്പൂരങ്ങൾതന്നെ ഇനിയും പുറത്തുവരാനുണ്ടെന്നുമാണ് ഇതിൽനിന്നു തെളിയുന്നത്. ലോക്കൽ സെക്രട്ടറിമാർമുതൽ സംസ്ഥാന ഭാരവാഹികൾവരെയുള്ള അഴിമതിയുടെ ഉത്സാഹക്കമ്മിറ്റിക്കാരെ ഉടൻ പൊതുസമൂഹത്തിനു മുന്പിൽ വെളിപ്പെടുത്തി ജനകീയവിചാരണ നടത്താൻ കോണ്‍ഗ്രസ് തയാറാകുമെന്നും ജോൺ ഡാനിയൽ പറഞ്ഞു.

കാഷ്മീരിലെ കുങ്കുമപ്പൂ ഇനി പുത്തൂരിലും പൂക്കും

സ്വന്തം ലേഖകൻ തൃശൂർ: കാഷ്മീരിലെ കുങ്കുമപ്പൂ ഇനി പുത്തൂരിലും പൂക്കും. പുത്തൂർ സ്വദേശി ജെയിംസ് കാപ്പാനിയാണ് കുങ്കുമപ്പൂകൃഷിയിൽ വിജയം കൊയ്യാനൊരുങ്ങുന്നത്. പുത്തൂരിലെ വീട്ടിൽ പ്രത്യേകം ക്രമീകരിച്ച മുറിയിലാണ് കുങ്കുമപ്പൂ കൃഷിചെയ്യുന്നത്. അൾട്രാവയലറ്റ് ലൈറ്റുകൾ, താപനില നിയന്ത്രിക്കുന്നതിനായി എയർ കണ്ടീഷണർ, അന്തരീക്ഷ ഊഷ്മാവിനെ ക്രമപ്പെടുത്താൻ ഹ്യുമിഡിഫയർ എന്നീ ഉപകരണങ്ങളുടെ സഹായത്തോടെയാണ് കുങ്കുമപ്പൂകൃഷി. എയറോപോണിക്സ് സംവിധാനത്തിലാണ് കൃഷി. ടിഷ്യുകൾച്ചർ ചെയ്യാൻ ഉപയോഗിക്കുന്ന ട്രേകളിലാണ് കുങ്കുമപ്പൂവിന്‍റെ വിത്ത് പാകിയിരിക്കുന്നത്. ലൈറ്റിന്‍റെയും വെള്ളത്തിന്‍റെയും താപനിലയുടെയും കാര്യങ്ങളെല്ലാം മൊബൈൽ ഫോണിൽ ഓട്ടോമേഷൻ ചെയ്ത് നിയന്ത്രിക്കുന്നതിനാൽ വീട്ടിലില്ലെങ്കിലും കൃഷിപരിപാലനം സാധ്യമാണെന്നു ജെയിംസ് പറഞ്ഞു. കേരളത്തിൽ വയനാട്ടിലും കാന്തല്ലൂരിലും കുങ്കുമപ്പൂ കൃഷിചെയ്യുന്നുണ്ടെങ്കിലും തൃശൂരിൽ ഇതാദ്യമാണ്. വൻകിട ഹോട്ടലുകൾ, ആയുർവേദ മരുന്നുനിർമാണ സ്ഥാപനങ്ങൾ എന്നിവിടങ്ങളിലേക്കെല്ലാം ധാരാളം കുങ്കുമപ്പൂ ആവശ്യമായി വരുന്നുണ്ടെങ്കിലും കിട്ടാൻ ബുദ്ധിമുട്ടുണ്ടെന്നും അതുകൊണ്ടുതന്നെ കേരളത്തിൽ കുങ്കുമപ്പൂവിനു വിപണിയുണ്ടെന്നും ജെയിംസ് പറഞ്ഞു. ഒരു കിലോ കുങ്കുമപ്പൂവിന് മൂന്നു ലക്ഷംമുതൽ ആറുലക്ഷം രൂപവരെ വിലയുണ്ടിപ്പോൾ. പത്തുമുതൽ പതിനഞ്ചു മെട്രിക് ടണ്‍വരെ മാത്രമാണ് ഇന്ത്യയിലെ ഉത്പാദനം. ഇറാനിൽനിന്നും മറ്റുമാണ് ഇപ്പോൾ ഇന്ത്യയിലേക്കു കുങ്കുമപ്പൂ ഇറക്കുമതി ചെയ്യുന്നത്. തുടക്കത്തിൽ പത്തു കിലോ കുങ്കുമപ്പൂവിത്താണ് കാഷ്മീരിൽനിന്നു വിമാനമാർഗം ജെയിംസ് കൊണ്ടുവന്നത്. ഇതു പാകി പതിനഞ്ചു ദിവസത്തിനുള്ളിൽ വിത്ത് മുളപൊട്ടിയതോടെ കുങ്കുമപ്പൂകൃഷിയുടെ ട്രയൽ വിജയകരമായി. തുടർന്നു നൂറു കിലോ കുങ്കുമപ്പൂവിത്തിനു കാഷ്മീരിലേക്ക് ഓർഡർ നൽകിക്കഴിഞ്ഞു. കാഷ്മീരിൽ കുങ്കുമപ്പൂ കൈകാര്യംചെയ്യുന്ന ഒരു കന്പനിയുമായും ജെയിംസ് സഹകരിക്കുന്നുണ്ട്. അവരുടെയും, കേരളത്തിൽ വയനാട്ടിൽ കുങ്കുമപ്പൂ കൃഷിചെയ്ത് വിജയം കണ്ട ശേഷാദ്രി ശിവകുമാറിന്‍റെയും മാർഗനിർദേശങ്ങളും ഉപദേശങ്ങളും ജെയിംസിനു തുണയായുണ്ട്. 500 കിലോ വിത്തിൽനിന്ന് ഒറ്റത്തവണ വിളവെടുപ്പിൽ 750 ഗ്രാം കുങ്കുമപ്പൂവാണത്രെ ലഭിക്കുക. വർഷത്തിൽ മൂന്നുതവണ വരെ വിളവെടുക്കാനാകും. 500 കിലോ വിത്തിൽനിന്ന് 1500 കിലോ വിത്തുത്പാദിപ്പിക്കാമെന്നും ജെയിംസ് പറയുന്നു. നല്ല വിത്തുകൾ കിട്ടാനില്ലാത്തതുകൊണ്ട് വിത്തിനും വിലയേറെയാണ്. കിലോയ്ക്ക് 3500 രൂപമുതൽ വിത്തിനുണ്ട്. പുത്തൂർ സെന്‍റ് ജോസഫ് കോണ്‍വെന്‍റിനു സമീപം നന്പ്യാർ റോഡിലെ വീടിന്‍റെ മുകളിലെ നിലയിലാണ് ജെയിംസ് തന്‍റെ കുങ്കുമപ്പൂ കൃഷിയിടത്തിന്‍റെ മുറി ഒരുക്കിയിരിക്കുന്നത്. ഭാര്യ ഷീജ തൃശൂർ മെട്രോ ആശുപത്രിയിൽ നഴ്സാണ്. മക്കൾ: അക്കിലാസ്, ഫെലിക്സ്. സൗദിയിൽ ഡിഫൻസിൽ ജോലിചെയ്തിരുന്ന ജെയിംസ് വിരമിച്ചു നാട്ടിലെത്തിയശേഷമാണ് അന്പതാംവയസിൽ കുങ്കുമപ്പൂകൃഷിക്കു തുടക്കമിടുന്നത്. വ്യത്യസ്തമായി എന്തെങ്കിലും ചെയ്യണമെന്ന ആഗ്രഹത്തിൽനിന്നാണ് ഇത്തരമൊരു കൃഷിയിലേക്കു ജെയിംസ് എത്തിയത്.

പോപ്പ് പോൾ മേഴ്സി ഹോമിൽ വാഴകൃഷി വിളവെടുപ്പ്

തൃശൂർ: പെരിങ്ങണ്ടൂർ പോപ്പ് പോൾ മേഴ്സി ഹോം ആശാനിലയത്തിൽ നടന്ന നേന്ത്രവാഴകൃഷി വിളവെടുപ്പ് കുന്നംകുളം അസിസ്റ്റന്‍റ് കമ്മീഷണർ സി.ആർ. സന്തോഷ് ഉദ്ഘാടനം ചെയ്തു. വൊക്കേഷണൽ പരിശീലനത്തിന്‍റെ ഭാഗമായി മേഴ്സി ഹോം ഡയറക്ടർ ഫാ. ജോണ്‍സണ്‍ അന്തിക്കാട്ടിന്‍റെ നേതൃത്വത്തിൽ പോൾമാസ്റ്ററും കുട്ടികളും ഒരുക്കിയ കൃഷിയിടത്തിൽ ഇരുനൂറിലധികം വാഴക്കുലകളാണ് തയാറായിരിക്കുന്നത്. അസിസ്റ്റന്‍റ് ഡയറക്ടർ ഫാ. അനീഷ് ചിറ്റിലപ്പിള്ളി, കൗണ്‍സിലർ മധു അന്പലപുരം, തോമസ്, സിസ്റ്റർ ലില്ലി തുടങ്ങിയവർ പങ്കെടുത്തു.

വടക്കാഞ്ചേരിയിൽ നിർത്തിയിട്ട ട്രെയിനിൽ കവർച്ചാശ്രമം

വടക്കാഞ്ചേരി: റെയിൽവേ സ്റ്റേഷനിൽ നിർത്തിയിട്ട ട്രെയിനിൽ നിന്നു സ്വർണാഭരണങ്ങൾ കവരാൻ ശ്രമം. മംഗലാപുരത്തുനിന്നു തിരുവനന്തപുരത്തേക്ക് പോകുകയായിരുന്ന ട്രെയിനിലെ രണ്ടു റിസർവേഷൻ കമ്പാർട്ടുമെനന്‍റിലെ യാത്രക്കാർക്കാണ് അനുഭവമുണ്ടായത്. ട്രെയിൻ സ്റ്റേഷനിൽ നിർത്തിയിട്ട സമയത്ത് എമർജൻസി വിന്‍റോയുടെ സമീപം ഇരുന്നിരുന്ന രണ്ടു സ്ത്രീകളുടെ ആഭരണങ്ങളാണ് പുറത്തുനിന്നു മോഷ്ടിക്കാൻ ശ്രമിച്ചത്. എന്നാൽ മറ്റു യാത്രക്കാർ ബഹളം വെച്ചതോടെ മോഷ്ടാക്കൾ ഓടി രക്ഷപ്പെടുകയായിരുന്നു. ആർപിഎഫും വടക്കാഞ്ചേരി പോലീസും സംയുക്തമായി അന്വേഷണം ആരംഭിച്ചിട്ടുണ്ട്. റെയിൽവേ സ്റ്റേഷനിൽ സിസിടിവി കാമറകൾ ഇല്ലാത്തതിനാൽ സമീപത്തെ സ്വകാര്യ സ്ഥാപനങ്ങളിലെ സിസിടിവി ദൃശ്യങ്ങൾ ശേഖരിച്ച് പരിശോധിച്ചു വരികയാണ്. രാത്രി സമയങ്ങളിൽ സ്റ്റേഷനുകളിൽ നിർത്തിയിടുന്ന സ്ലീപ്പർ കോച്ചുകളാണ് മോഷ്ടാക്കളുടെ പ്രധാന ലക്ഷ്യം. ഇതിനുപിന്നിൽ വൻ സംഘം പ്രവർത്തിക്കുന്നുണ്ടെന്നാണ് അന്വേഷണ സംഘത്തിന്‍റെ നിഗമനം.

ചാവക്കാട് നഗര സൗന്ദര്യം: നഗരസഭയോടൊപ്പം വ്യാപാരികളും

ചാവക്കാട്: നഗരസഭ നഗര സൗന്ദര്യവൽക്കരണ പദ്ധതിക്ക് തുടക്കമിട്ടു. ഇതിന്‍റെ ഭാഗമായി ടൗണിന്‍റെ നടപ്പാതയിൽ ചെടിച്ചട്ടികൾ സ്ഥാപിച്ചു. രണ്ടു ലക്ഷം രൂപ ചെലവഴിച്ചാണ് പദ്ധതി നടപ്പിലാക്കുന്നത്. നഗരസഭ വൈസ് ചെയർമാൻ കെ.കെ. മുബാറക് ഉദ്ഘാടനം ചെയ്തു. ആരോഗ്യകാര്യ കമ്മിറ്റി ചെയർ പേഴ്സൺ ബുഷറ ലത്തീഫ് അധ്യക്ഷയായിരുന്നു പ്രസന്ന രണദിവേ, ഫൈസൽ കാനാമ്പുള്ളി, ക്ലീൻ സിറ്റി മാനേജർ ബി. ദിലീപ്, അസിസ്റ്റന്‍റ് എൻജിനീയർ സി.എൽ. ടോണി എന്നിവർ പ്രസംഗിച്ചു. ടൗണിലെ നടപ്പാതയോടു ചേർന്ന് സ്ഥാപിച്ച കൈവരിയിൽ ഉറപ്പിച്ച സ്റ്റാൻഡിലാണ് ചെടിച്ചട്ടി വയ്ക്കുന്നത്. സമീപത്തെ വ്യാപാരികൾ വെള്ളമൊഴിച്ച് ചെടിയെ സംരക്ഷിച്ച് നഗര സൗന്ദര്യവൽക്കരണം നടപ്പാക്കുന്നതാണ് പദ്ധതി.

ഉദ്ഘാടനം കഴിഞ്ഞിട്ട് അഞ്ചുമാസമായി ; ബഡ്സ് സ്കൂൾ തുറന്നില്ല

പുന്നയൂർക്കുളം: പഞ്ചായത്തിൽ ഭിന്നശേഷിക്കാരായ കുട്ടികൾക്കായി ഉദ്ഘാടനം ചെയ്ത ബഡ്സ് സ്കൂൾ അടഞ്ഞു കിടക്കുന്നു. ചമ്മന്നൂരിൽ നിർമിച്ച ബഡ്സ് സ്കൂൾ കെട്ടിടംകാടുകയറി കിടക്കുകയാണ്. ഭിന്നശേഷി മേഖലയിലെ പ്രവർത്തനത്തിന് സംസ്ഥാനത്തെ മികച്ച പഞ്ചായത്തായി തെരഞ്ഞെടുത്ത പുന്നയൂർക്കുളം പഞ്ചായത്തിലെ ബഡ്സ് സ്കൂൾ ഉദ്ഘാടനം കഴിഞ്ഞ് അഞ്ചു മാസമായിട്ടും തുറന്നില്ല. ഏപ്രിലിൽ മന്ത്രി ആർ. ബിന്ദു ഉദ്ഘാടനം ചെയ്യുമ്പോൾ മേയ് മാസത്തിൽ തുറക്കുമെന്നാണ് പറഞ്ഞിരുന്നത്. ജനലുകൾ തുറന്നു കിടക്കുന്നതിനാൽ മരപ്പെട്ടി, വവ്വാൽ തുടങ്ങിയവ കുടിയേറിയിട്ടുണ്ട്. നാഷണൽ റർബൻ മിഷൻ പദ്ധതിൽ ഉൾപ്പെടുത്തി 54.96 ലക്ഷം രൂപ ചെലവഴിച്ചാണ് ബഡ്സ് സ്കൂളിന്‍റെ നിർമാണം പൂർത്തീകരിച്ചത്. സ്വകാര്യവ്യക്തി പഞ്ചായത്തിന് സൗജന്യമായി നൽകിയ 26 സെന്‍റ് സ്ഥലത്താണ് 3660 സ്ക്വയർ ഫീറ്റ് വിസ്തീർണത്തിൽ മനോഹരവും വിശാലവുമായ ആധുനിക ബഡ്സ് സ്കൂൾ തയാറാക്കിയത്. പ്രവേശന കവാടത്തിൽ മനോഹരമായ പടിപ്പുരയും ഒരുക്കിയിട്ടുണ്ട്. നാലു വർഷം മുൻപാണ് സ്കൂൾ കെട്ടിടത്തിന്‍റെ നിർമാണം ആരംഭിക്കുന്നത്. പല തവണ നിർമാണം മുടങ്ങി. സ്കൂളിന്‍റെ നിർമാണം കൂടി പരിഗണിച്ചാണ് 2023 ൽ ഭിന്നശേഷി പ്രവർത്തനത്തിന് അവാർഡ് ലഭിക്കുന്നത്. അവിടം ഇപ്പോൾ നാട്ടുജീവി സൗഹൃദമാണ്.

സി.വി. ശ്രീരാമൻ സാംസ്കാരികനിലയം യാഥാർഥ്യമാകുന്നു

കുന്നംകുളം: കുന്നംകുളത്തുകാരനായിരുന്ന പ്രശസ്തസാഹിത്യകാരൻ സി.വി. ശ്രീരാമന്‍റെ സ്മരണാർഥം സാംസ്കാരികനിലയം യാഥാർഥ്യമാകുന്നു. സി.വി. ശ്രീരാമന്‍ കള്‍ച്ചറല്‍ സെന്‍റര്‍ നിര്‍മാണത്തിന് എ.സി.മൊയ്തീന്‍ എംഎല്‍എയുടെ പ്രാദേശികവികസന നിധിയില്‍ നിന്ന് 80 ലക്ഷം രൂപ അനുവദിച്ച് ഭരണാനുമതിയായി. കുന്നംകുളം നഗരസഭയുടെ ഉടമസ്ഥതയിലുള്ള മധുരക്കുളത്തിനോട് ചേര്‍ന്ന സ്ഥലത്താണ് സ്മാരകം നിര്‍മിക്കുക. തദ്ദേശവകുപ്പിന്‍റെ എൻജിനീയറിംഗ് വിഭാഗത്തിന്‍റെ മേല്‍നോട്ടത്തില്‍ രണ്ടു നിലകളിലായി നിര്‍മിക്കുന്ന കെട്ടിടത്തിന് 5000 ചതുരശ്ര അടി വിസ്തീർണമുണ്ടാകും. ഓഫീസ്, മീറ്റിംഗ് ഹാള്‍, വായനാമുറികള്‍ തുടങ്ങിയവ ഉള്‍പ്പെടുത്തിയാണ് സാംസ്കാരിക നിലയം സ്ഥാപിക്കുന്നത്. സാങ്കേതികാനുമതി കൂടി ലഭ്യമാകുന്നതോടെ നിര്‍മാണപ്രവൃത്തികള്‍ ആരംഭിക്കുമെന്ന് എംഎല്‍എ അറിയിച്ചു.

കാഞ്ഞാണിയിൽ കാറും ടൂറിസ്റ്റ് ബസും കൂട്ടിയിടിച്ച് രണ്ടുപേർക്കു പരിക്ക്

കാഞ്ഞാണി: കാറും ടൂറിസ്റ്റ് ബസും കൂട്ടി ഇടിച്ച് കാർ യാത്രക്കാരായ യുവാക്കൾക്ക് പരിക്കേറ്റു. കാഞ്ഞാണി സെന്‍ററിൽ ഇന്നലെ പുലർച്ച 1.45 നാണ് അപകടം നടന്നത്. വാടാനപ്പള്ളി ഭാഗത്തു നിന്ന് തൃശൂരിലേക്ക് പോകുന്ന ടൂറിസ്റ്റ് ബസിലേക്ക് വെങ്കിടങ്ങ് ഭാഗത്തു നിന്ന് വരികയായിരുന്ന കാർ ഇടിച്ചാണ് അപകടം സംഭവിച്ചത്. അന്തിക്കാട് പോലീസ് സ്ഥലത്ത് എത്തി. പരിക്കേറ്റ പട്ടാമ്പി സ്വദേശികളായ രണ്ടു പേരെ ആശുപത്രിയിൽ പ്രവേശിപ്പിച്ചു. കാഞ്ഞാണി ജംഗ്ഷനിൽ രാത്രി സമയത്ത് സിഗ്നൽ ലൈറ്റ് പ്രകാശിക്കാത്തതാണ് പലപ്പോഴും അപകടങ്ങൾക്ക ് കാരണമാകുന്നതെന്ന് നാട്ടുകാർ പറയുന്നു.

വിദ്യാർഥിയെ വീടിനുള്ളിൽ മരിച്ചനിലയിൽ

ചൂണ്ടൽ: വിദ്യാർഥിയെ വീടിനുള്ളിൽ മരിച്ചനിലയിൽ കണ്ടെത്തി. പയ്യൂർ ആശാരി മുതുവട്ടൂർ മണികണ്ഠന്‍റെ മകൻ കൃഷ്‌ണേന്ദി(18)നെയാണ് ഇന്നലെ രാവിലെ വീടിനുള്ളിൽ തൂങ്ങിമരിച്ച നിലയിൽ കണ്ടെത്തിയത്. കുന്നംകുളം പോലീസിന്‍റെ നേതൃത്വത്തിൽ ഇൻക്വസ്റ്റ് നടപടികൾ പൂർത്തിയാക്കി പോസ്റ്റ്മോർട്ടത്തിനു ശേഷം സംസ്കാരം നടത്തി. തൃശൂർ വിക്‌ടറി ഐടിസിയിലെ വിദ്യാർഥിയാണ്. അമ്മ: ധന്യ. സഹോദരങ്ങൾ: രാഗന്ദ്, അനുവിന്ദ്.

കാരുണ്യഭവനത്തിന്‍റെ താക്കോൽദാനം നിർവഹിച്ചു

എലിഞ്ഞിപ്ര: ചൗക്ക സെന്‍റ്് മേരീസ് ലൂർദ് പള്ളിയിൽ മതബോധന‌വാർഷികവും കാരുണ്യഭവനത്തിന്‍റെ താക്കോൽദാനവും നടന്നു. പൊതുസമ്മേളനം ഇരിങ്ങാലക്കുട രൂപത മതബോധന ഡയറക്ടർ റവ. ഡോ. റിജോയ് പഴയാറ്റിൽ ഉദ്ഘാടനം ചെയ്തു. വികാരി റവ. ഡോ. ആന്‍റോ കരിപ്പായി അധ്യക്ഷനായിരുന്നു. കാരുണ്യഭവനത്തിന്‍റെ താക്കോൽദാനം ചാലക്കുടി എസ് എച്ച്ഒ എം.കെ. സജീവ് നിർവഹിച്ചു. ഫാ. ക്ലിന്‍റൻ പെരിഞ്ചേരി, നിർമാണ കമ്മിറ്റി കൺവീനർ സിബു ചേലക്കാട്ട്, ഹെഡ്മാസ്റ്റർ ജോബി കാഴ്ചപ്പള്ളി, സെക്രട്ടറി ദീപ ജോയ്, കൈക്കാരൻ ജോയ് ഉദനിപറമ്പൻ, കേന്ദ്ര‌സമിതി പ്രസിഡന്‍റ് ജോസ് മണവാളൻ, പ്രോഗ്രാം കൺവീനർ ഫെമി ഡയസ് എന്നിവർ പ്രസംഗിച്ചു. ഭിന്നശേഷിക്കാർക്കായി ഛത്തീസ്ഗഡിൽ നടന്ന സ്പെഷൽ ഒളിമ്പിക്സിൽ ബോച്ചേ വിഭാഗത്തിൽ നാഷണൽ ചാമ്പ്യൻഷിപ്പ് നേടിയ സിന്‍റോ മേലേടനെ ആദരിച്ചു.

ജീവിതം പ്രതിസന്ധിയിലായ യുവക്ഷീരകര്‍ഷകന് തുണയായി കേരള ഫീഡ്‌സ്

ഇരിങ്ങാലക്കുട: യുവ ക്ഷീരകര്‍ഷകനു തുണയായി കേരള ഫീഡ്‌സ് കമ്പനി ലിമിറ്റഡ്. ക്ഷീര കര്‍ഷ കന്‍റെ ഉപജീവന മാര്‍ഗമായ കറവപ്പശുക്കളില്‍ ഒരെണ്ണവും രണ്ടു കിടാക്കളും പ്രസവത്തെ തുടര്‍ന്ന് മരണപ്പെട്ടിരുന്നു. ജീവിതം പ്രതിസന്ധിയിലായ കാറളം കൊ ല്ലാറ വീട്ടില്‍ രാജേഷിന് കമ്പനിയുടെ ഡൊണേറ്റ് എ കൗ പദ്ധതിയില്‍ ഉള്‍പ്പെടുത്തി 70,000 രൂപ വിലമതിക്കുന്ന ഫ്രീസ് വാള്‍ ഇനത്തില്‍പ്പെട്ട പശുവിനെ കേരള ഫീഡ്‌സ് ലിമിറ്റഡ് ചെയര്‍മാന്‍ കെ. ശ്രീകുമാര്‍ കൈമാറി. കേരള വെറ്ററിനറി ആന്‍ഡ് അനിമല്‍ സയന്‍സ് സര്‍വകലാശാലയില്‍ നിന്നുമാണ് കമ്പനി അധികൃതര്‍ പശുവിനെ വാങ്ങിയത്. കാറളം വിഎച്ച്എസ്ഇ സ്‌കൂള്‍ മൈതാനിയില്‍ നടന്ന ചടങ്ങില്‍ പഞ്ചായത്ത് പ്രസിഡന്‍റ് ബിന്ദു പ്രദീപ് അധ്യക്ഷത വഹിച്ചു. വൈസ് പ്രസിഡന്‍റ്് സുനില്‍ മാലാന്ത്ര, ബ്ലോക്ക് മെമ്പര്‍ മോഹ നന്‍ വലിയാട്ടില്‍, പഞ്ചായത്ത് മെമ്പര്‍ ടി.എസ്. ശശികുമാര്‍, ജില്ലാ മൃഗ‌സംരക്ഷണ ഓഫീസര്‍ ഡോ. കെ.ബി. ജിതേന്ദ്രകുമാര്‍, ക്ഷീര വികസനവകുപ്പ് അസി. ഡയറക്ടര്‍ സി. ശാലിനി, കമ്പനി മാനേജര്‍- പ്രൊജക്ട്‌സ് എന്‍.ജി. സുധീര്‍ എന്നിവര്‍ ആശംസകള്‍ നേര്‍ന്നു. കമ്പനി എജിഎം ഉഷ പത്മനാഭന്‍ സ്വാഗതവും ഡെപ്യൂട്ടി മാനേജര്‍ - മാര്‍ക്കറ്റിംഗ് പി.പി. ഫ്രാന്‍സിസ് നന്ദിയും പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]