ADVERTISEMENT

ADVERTISEMENT

വി.എസ്. അനുസ്മരണയോഗവും മൗനജാഥയും സംഘടിപ്പിച്ചു

വിഴിഞ്ഞം: സിപിഎം കോവളം ഏരിയാ കമ്മിറ്റി വി.എസ്. അനുസ്മരണ യോഗവും മൗനജാഥയും സംഘടിപ്പിച്ചു. വിഴിഞ്ഞം ജംഗ്ഷനിൽ ചേർന്ന യോഗത്തിൽ ഏരിയാ സെക്രട്ടറി എസ്. അജിത്ത് അധ്യക്ഷനായി. ജില്ലാ കമ്മിറ്റി അംഗം വണ്ടിത്തടം മധു അനുശോചന പ്രമേയം അവതരിപ്പിച്ചു.

സംസ്ഥാന കമ്മിറ്റി അംഗം ഡോ. ടി.എൻ. സീമ, മുൻ മന്ത്രി നീലലോഹിതദാസ്, ജില്ലാ സെക്രട്ടറിയേറ്റ് അംഗം പി.എസ്. ഹരികുമാർ, ജില്ലാ കമ്മിറ്റി അംഗങ്ങളായ പി. രാജേന്ദ്രകുമാർ, വി. അനൂപ്, കോൺഗ്രസ് മണ്ഡലം പ്രസിഡന്‍റ് ബിജു,

സിപിഐ മണ്ഡലം സെക്രട്ടറി സിന്ധുരാജൻ, മുസ്‌ലിം ലീഗ് നേതാവ് എച്ച്.എ. റഹ്മാൻ, ജനതാദൾ എസ് സംസ്ഥാന കമ്മിറ്റി അംഗം വിജയകുമാർ, ഐഎൻഎൽ നേതാവ് സഫറുള്ള ഖാൻ, കോളിയൂർ സുരേഷ്, തെന്നൂർക്കോണം ബാബു, പാച്ചല്ലൂർ ജയചന്ദ്രൻ തുടങ്ങിയവർ അനുസ്മരണ പ്രഭാഷണം നടത്തി.

ADVERTISEMENT

സോപാനത്തിന്‍റെ ജാളിയിൽ കുരുന്നിന്‍റെ കാൽ കുടുങ്ങി

പാലോട് : വീട്ടിലെ സിമന്‍റ് സോപാനത്തിന്‍റെ ജാളിയിൽ കാൽ കുടുങ്ങിയ കുരുന്നിനു ഫയർഫോഴ്സ് രക്ഷകരായി. കളിക്കുന്നതിനിടെ പാലോട് സത്രക്കുഴി ലേഖ ഭവനിൽ ഹരികുമാറിന്‍റെ മകൻ ഹർഷിദിന്‍റെ കാലാണ് സോപാനത്തിനിടയിൽ കുടുങ്ങിയത്. വീട്ടുകാർ പുറത്തെടുക്കാൻ നടത്തിയ ശ്രമം വിജയിക്കാത്തതിനെ തുടർന്ന് ഫയർഫോഴ്സിനെ അറിയിച്ചു. വിതുരയിൽനിന്നും ഫയർഫോഴ്സ് യൂണിറ്റെത്തി സോപനത്തിന്‍റെ ഒരു ഭാഗം അറുത്തുമാറ്റി കുട്ടിയുടെ കാൽ പുറത്തെടുത്തു.

ഉമ്മൻചാണ്ടി അനുസ്മരണം സംഘടിപ്പിച്ചു

നെടുമങ്ങാട്: തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിൽ യുഡിഎഫ് മികച്ച വിജയം നേടുമെന്നും അത് വരാനിരിക്കുന്ന നിയമസഭാ തെരഞ്ഞെടുപ്പിൽ യുഡിഎഫ് പ്രവർത്തകർക്ക് ആവേശം നൽകുന്ന ഒന്നായിരിക്കും എന്നും കോൺഗ്രസ് വർക്കിംഗ് കമ്മിറ്റി അംഗം രമേശ് ചെന്നിത്തല പറഞ്ഞു. നെടുമങ്ങാട് മണ്ഡലം കോൺഗ്രസ് കമ്മിറ്റി സംഘടിപ്പിച്ച ഉമ്മൻചാണ്ടി അനുസ്മരണം ഉദ്ഘാടനം ചെയ്യുകയായിരുന്നു അദ്ദേഹം. കോൺഗ്രസ് നെടുമങ്ങാട് മണ്ഡലം പ്രസിഡൻറ് അഡ്വ: മഹേഷ് ചന്ദ്രൻ അധ്യക്ഷത വഹിച്ച യോഗത്തിൽ മികച്ച സഹകരിക്കുള്ള എം.എൻ. ബാലകൃഷ്ണൻ നായർ പുരസ്കാരം നേടിയ അഡ്വ. കരകുളം കൃഷ്ണപിള്ളയെ രമേശ് ചെന്നിത്തല അനുമോദിക്കുകയുണ്ടായി. സമ്മേളനത്തിൽ അഡ്വ. കരകുളം കൃഷ്ണപിള്ള ചികിത്സാസഹായ വിതരണവും മറിയാമ്മ ഉമ്മൻ ഭക്ഷ്യധാന്യ കിറ്റ് വിതരണവും നടത്തി. അഡ്വ. എം. മുനീർ, നെട്ടച്ചിറ ജയൻ, കല്ലയം സുകു, ടി. അർജുനൻ, അഡ്വ. എസ്. അരുൺകുമാർ, എൻ.എസ്. നുസൂർ, മണ്ണൂർക്കോണം സജാദ്, ശരത് ശൈലേശ്വരൻ, നെട്ടയിൽ ഷിനു, അഫ്സൽ വാളിക്കോട്, ഷമീർ വാളിക്കോട് തുടങ്ങിയവർ സംസാരിച്ചു.

ചെരിഞ്ഞ പോസ്റ്റ് വീഴാതെ കെട്ടിവച്ചിരിക്കുന്നത് തെങ്ങില്‍

വെള്ളറട: ചെരിഞ്ഞ പോസ്റ്റ് വീഴാതെ കെട്ടിവച്ചിരിക്കുന്നത് തെങ്ങിനു മുകളില്‍. വെള്ളറട വൈദ്യുതി സെക്‌ഷന്‍ ഓഫീസിന്‍റെ പരിധിയിലുള ചിറത്തലയ്ക്കല്‍ ഭാഗത്ത്, ആറാട്ടുകുഴിയിലേക്ക്‌വരുന്ന റോഡ് സൈഡിലുള്ള ഒരു ഇലക്ട്രിക് പോസ്റ്റിനാണ് ഈ ദുര്‍ഗതി. റോഡുപണിക്കിടയില്‍ എങ്ങനെയോ പൊട്ടിവീണതാണ് പോസ്റ്റ്. ഉടന്‍ വൈദ്യുതി വകുപ്പിനെ വിവരമറിയിച്ചു. അവരെത്തിയാണു പോസ്റ്റിനെ സമീപത്തെ വീടിനോടു ചേര്‍ന്നുള തെങ്ങിലും വീടിന്‍റെ മതിലിലുമായി പ്ലാസ്റ്റിക് കയര്‍ ഉപയോഗിച്ച് കെട്ടിവച്ചിരിക്കുന്നത്. പിന്നീട് വീട്ടുടമ നിരവധി തവണ ഇതു മാറ്റി സ്ഥാപിക്കണമെന്നു വൈദ്യുതി വകുപ്പ് അധികൃതരോട് ആവശ്യപ്പെട്ടെങ്കിലും നടപടിയുണ്ടായില്ല. കെവി ലൈന്‍ കടന്നുപോകുന്ന പോസ്റ്റാണിത്. ഏകദേശം ഒരു മാസത്തോളമായി വീണിട്ട്. വൈദ്യുതി വകുപ്പുമായി ബന്ധപ്പെട്ടപ്പോള്‍ മറ്റ് ജോലികള്‍ക്ക് ജെസിബി കൊണ്ടുവരുമ്പോള്‍ മാറ്റാമെന്ന നിലപാടിലാണ്. ഈ ലൈനിലൂടെ കറണ്ട് കടത്തിവിടുന്നില്ലെന്നും ഇതുനേരത്തേ ഒഴിവാക്കിയതാണെന്നുമാണ് വെളറട വൈദ്യുതി സെക്‌ഷന്‍ ഓഫീസിലെ എക്‌സിക്യൂട്ടീവ് എന്‍ജിനീയര്‍ പറയുന്നത്. എന്നാലും ഭയത്തിലാണ് വീട്ടുടമ്മ. അടിയന്തരമായി ഇത് മാറ്റണമെന്നാണ് ഇവരുടെ ആവശ്യം. രണ്ടു ദിവസത്തിനുളില്‍ നടപടിയുണ്ടാകുമെന്നാണ് ഇപ്പോള്‍ എഇ പറയുന്നത്.

മതില്‍ ഇടത്തുവീണ് രണ്ടു കുഞ്ഞുങ്ങള്‍ക്ക് പരിക്ക്

വെള്ളറട: കുന്നത്തുകാല്‍ ചാവടിയില്‍ മതില്‍ ഇടത്തുവീണ് രണ്ടു കുഞ്ഞുങ്ങള്‍ക്ക് പരിക്കുപറ്റി. ചാവടി സ്വദേശികളായ ഭഗത് (എട്ട്), ഋതിക് (മൂന്ന്) എന്നിവര്‍ക്കാണു പരിക്കേറ്റത്. ഭഗത്തിന്‍റെ കാലിനും തലയ്ക്കും ഗുരുതരപരിക്കുണ്ട്. രണ്ടു പേരെയും കാരക്കോണം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഋതിക്കിനു തുടയെല്ലിനാണ് പരിക്കേറ്റത്. വീടിനു സമീപത്തു പ്രവര്‍ത്തിക്കുകയായിരുന്ന ഇന്റര്‍ലോക്ക് നിര്‍മാണ കമ്പനിയുടെ മതിലാണ് മഴയില്‍ കുതിര്‍ന്ന് കുട്ടികളുടെ ദേഹത്തേക്ക് പതിച്ചത്.

ഡാലുംമുഖം സബ് സെന്‍ററിനു പുറത്തുകൂടെ ഇലക്ട്രിക് പോസ്റ്റ് ചാഞ്ഞ് അപകടാവസ്ഥയില്‍

വെള്ളറട: വെള്ളറട ഇലക്ട്രിക് പരിധിയില്‍ ഡാലുംമുഖം വാര്‍ഡില്‍ ഡാലുമുഖം സബ് സെന്‍ററിനു സമീപത്തു നില്‍ക്കുന്ന ഇലക്ട്രിക് പോസ്റ്റ് ചാഞ്ഞു വൈദ്യുതി കമ്പി കൈയെത്തും ദൂരത്തുനില്‍ക്കുന്നു. ഒരാഴ്ചയായി വാര്‍ഡ് മെമ്പര്‍ കെഎസ്ഇബിയെ അറിയിച്ചിട്ടും അവര്‍ക്കു കണ്ട ഭാവവും കേട്ട ഭാവവും ഇല്ല. അപകടാവസ്ഥയില്‍ നില്‍ക്കുന്ന ഇലക്ട്രിക് പോസ്റ്റിനെ നിവര്‍ത്തി ബലപ്പെടുത്തി അപകടരഹിതമാക്കുന്നതിനു മുന്‍കൈ എടുക്കാത്തത് പ്രതിഷേധാര്‍ഹമാണ്. വാര്‍ഡ് മെമ്പര്‍ കെഎസ്ഇബിയെ അറിയിച്ചിട്ട് ഒരാഴ്ചയായി. സബ് സെന്‍ററില്‍ രോഗികളും പല ആവശ്യങ്ങള്‍ക്കുമായി നിരവധി പേരാണ് ദിനംപ്രതി എത്തുന്നത്. ഗ്രാമീണ മേഖലയില്‍ മഴ ശക്തമായി തുടരുകയുമാണ്. എന്തെങ്കിലും ഒരു ഇലക്ട്രിക് ഷോക്ക് ഉണ്ടായി അത്യഹിതം ഉണ്ടാകുന്നതിനു മുന്‍പേ അടിയന്തിരമായി കെഎസ്ഇബി ജീവനക്കാരെത്തി ഇലക്ട്രിക് പോസ്റ്റിനെ നിവര്‍ത്തി അപകടം ഒഴിവാക്കാന്‍ വേണ്ട നടപടി സ്വീകരിക്കണമെന്നുള്ള ആവശ്യം ശക്തമാണ്. എത്രയും വേഗം കെഎസ്ഇബി ഇലക്ട്രിക് പോസ്റ്റിനെ നിവര്‍ത്തി ഡാലുംമുഖം സബ് സെന്‍ററിനെ അപകടരഹിതമായി മാറ്റണമെന്ന് പ്രദേശവാസികള്‍ ആവശ്യപ്പെട്ടു.

നാട്ടുകാർ സമരത്തിലേക്ക് : പൂവച്ചലിലെ കെഎസ്ഇബി ഓഫീസിനെതിരേ വ്യാപക പരാതി

പൂവച്ചൽ: പൂവച്ചൽ പഞ്ചായത്തിലെ കെഎസ്ഇബി ഓഫീസിനെതിരെ വ്യാപക പരാതി ഉയരുന്നു. വൈദ്യത ലൈൻ കടന്നുപോകുന്നയിടത്തെ ലൈൻ ടച്ചിംഗ് വെട്ടുന്നില്ലെന്നും ട്രാൻസ്‌ഫോർമർ സ്ഥാപിച്ചിരിക്കുന്ന ഭാഗത്തെ കാടും പടർപ്പും മാറ്റുന്നില്ലെന്നും പരക്കെ പരാതി ഉയർന്നിരിക്കുകയാണ്. പഞ്ചായത്തിലെ കാട്ടാക്കട - പൂവച്ചൽ റോഡിലെ മുളമൂട് മുതൽ പിന്നാംകരിയ്ക്കകം വരെയുള്ള മെയിൻ റോഡ് സൈഡിലുള്ള വൈദ്യുതി ലൈൻ വൃക്ഷങ്ങളിൽ തട്ടിയാണു നിൽക്കുന്നത്. വൃക്ഷശിഖരങ്ങൾ ലൈനിൽ തട്ടുമ്പോൾ ലൈൻ കാട്ടാവുന്ന നില ഇവിടെയുണ്ട്. മാത്രമല്ല പല വൃക്ഷങ്ങളും നിലംപതിക്കാവുന്ന അവസ്ഥയിലുമാണ്. ഇതുമായി ബന്ധപ്പെട്ട് ഉപയോക്താക്കൾ നിരവധി തവണ പരാതി നൽകിയെങ്കിലും ഒരു ഫലവുമില്ല. ലൈൻ ടച്ചിംഗ് നടത്തുന്നതിനായി കരാർ ഏർപ്പാടാക്കിയെങ്കിലും അവരാരും തിരിഞ്ഞു നോക്കിയില്ലെന്നും നാട്ടുകാർ പറയുന്നു. പഞ്ചായത്തിലെ ആലമുക്ക്, കൊണ്ണിയൂർ, കരിയംകോട്, പൊന്നെടുത്തകുഴി, കാപ്പിക്കാട്, വീരണകാവ് തുടങ്ങി വിവിധയിടങ്ങളിലും ഈ പരാതിയുണ്ട്. അതിനിടെ ട്രാൻസ്‌ഫോർമർ അടക്കം ഇരിക്കുന്ന സ്ഥലങ്ങളിൽ കാട് വളർന്നു കിടപ്പാണ്. അതു വൃത്തിയാക്കാനും ഇവർക്കു നേരമില്ല. പലേടത്തും ഇഴജന്തുക്കളുടെ കേന്ദ്രവുമായി മാറിയിട്ടുണ്ട്. ആരെങ്കിലും പരാതിപ്പെട്ടാൽ അവരുടെ വീട്ടിലെ ഫ്യൂസ് ഊരുമെന്നു പറഞ്ഞു ഷണി ഉയർത്തുന്നതായും പരാതിയുണ്ട്. അടുത്തിടെയാണ് ഈ ഓഫീസ് വിവിധ രാഷ്ട്രീയ കക്ഷികൾ ഉപരോധിച്ചതും പ്രശ്‌നപരിഹാരമുണ്ടാക്കാമെന്ന് പറഞ്ഞ് അവരെ പറഞ്ഞയച്ചതും. എന്നാൽ അതിനൊന്നും പരിഹാരമില്ലാത്ത അവസ്ഥയാണ് ഉള്ളത്. മഴ കൂടിയായതോടെ ഇവിടെ കറന്‍റില്ലാതാകുന്നത് പതിവായിരിക്കുകയാണ്. ഇതിൽ പ്രതിഷേധിച്ച് സമരപരിപാടികൾക്ക് രൂപം നൽകിയിരിക്കുകയാണ് നാട്ടുകാർ.

ശ്രീ ചിത്തിര തിരുനാള്‍ റസിഡന്‍ഷ്യല്‍ സെന്‍ട്രല്‍ സ്‌കൂളില്‍ ആര്‍ട്‌സ് ഫെസ്റ്റ്

വെള്ളറട: കുന്നത്തുകാല്‍ ശ്രീ ചിത്തിര തിരുനാള്‍ റസിഡന്‍ഷ്യല്‍ സെന്‍ട്രല്‍ സ്‌കൂളില്‍ 33-ാമത് ആര്‍ട്‌സ് ഫെസ്റ്റിവല്‍ നടത്തി. യുവ പിന്നണി ഗായികയും, ഗവ ണ്മെന്‍റ് ഓഫ് ഇന്ത്യയുടെ സിസിആര്‍ടി സ്‌കോളര്‍ഷിപ്പ് ജേതാവുമായ എസ്.എസ്. ആവണി ആര്‍ട്‌സ് ഫെസ്റ്റിവല്‍ ഉദ്ഘാടനം ചെയ്തു. സ്‌കൂള്‍ മാനേജറും സെക്രട്ടറിയുമായ ടി. സതീഷ്‌കുമാർ അധ്യക്ഷത വഹിച്ചു. സ്‌കൂള്‍ പ്രിന്‍സിപ്പല്‍ എസ്. പുഷ്പവല്ലി സ്വാഗത പ്രസംഗം നടത്തി. തുടര്‍ന്ന് വിവിധ വേദികളിലായി വിദ്യാര്‍ഥികളുടെ വൈവിധ്യമാര്‍ന്ന കലാപരിപാടികള്‍ അരങ്ങേറി. വിജയികളായ വിദ്യാര്‍ഥികള്‍ക്കു സമ്മാനദാനം നിര്‍വഹിച്ചു.

വള്ളക്കടവ് പുത്തന്‍ റോഡ് ഭാഗത്ത് മലിനജലം പരന്നൊഴുകുന്നു: ദുസ്സഹമായി ജനജീവിതം

വലിയതുറ: തിരുവനന്തപുരം നഗരസഭയുടെ പരിധിയില്‍ വരുന്ന വള്ളക്കടവിനു സമീപം പുത്തന്‍ റോഡ് ഭാഗത്തുള്ള പിആര്‍ആര്‍എ തെരുവില്‍ പതിറ്റാണ്ടുകളായി ഓടയില്‍നിന്നു മലിനജലം ഒഴുകുന്നതുകാരണം ജീവിക്കാന്‍ കഴിയുന്നില്ലെന്നു പരാതി. കാല്‍നട പോലും ദുസഹമായി മാറിയിരിക്കുന്നതായി പ്രദേശവാസികള്‍. ദുര്‍ഗന്ധം വമിക്കുന്നതുകാരണം മൂക്കുപൊത്താതെ നടക്കാന്‍ കഴിയാത്ത സാഹചര്യമാണു നിലവിലുള്ളത്. അശാസ്ത്രീയമായ ഓട നിര്‍മാണവും മാന്‍ഹോള്‍ നിര്‍മാണവുമാണ് പ്രശ്‌നത്തിനു പ്രധാന കാരണം. അന്‍പതോളം കുടുംബങ്ങള്‍ താമസിക്കുന്ന ഭാഗത്താണ് ജനം ദുരിതം അനുഭവിക്കുന്നത്. ഓടയില്‍ മാലിന്യം കുന്നുകൂടുന്നതുകാരണം മലിനജലം പലപ്പോഴും പൊതു വഴികളിലൂടെയും റോഡിലൂടെയും ഒഴുകുന്നു. ഇതുകാരണം പ്രദേശം കൊതുകിന്‍റെ ഈറ്റില്ലമായി മാറിയിരിക്കുകയാണ്. കൂടാതെ പ്രദേശത്ത് പലപ്പോഴും കുട്ടികളിലും മുതിര്‍ന്നവരിലും പകര്‍ച്ചവ്യാധികള്‍ പിടിപെടുന്നതായും പറയുന്നു. മലിന ജലവും ദുര്‍ഗന്ധവും ഈ പ്രദേശത്തിന്‍റെ ശാപമായി മാറിയിട്ട് പതിറ്റാണ്ടുകള്‍ പിന്നിടുന്നു. നാട്ടുകാരുടെ നേതൃത്വത്തില്‍ ബന്ധപ്പെട്ട അധികൃതര്‍ക്കും വാര്‍ഡ് കൗണ്‍സിലര്‍ക്കും നിരവധി തവണ പരാതി നല്‍കിയെങ്കിലും യാതൊരുവിധ നടപടികളും കൈകൊണ്ടിട്ടില്ല എന്നാണ് പ്രദേശവാസികള്‍ പറയുന്നത്. ഓടയില്‍ മലിനം ജലം കെട്ടി നില്‍ക്കുന്നതിനാല്‍ ദുര്‍ഗന്ധം കാരണം വീടിനുള്ളിലിരുന്നുപോലും ആഹാരം കഴിക്കാന്‍ കഴിയുന്നില്ല. ബന്ധപ്പെട്ട അധികൃതരുടെ ഭാഗത്തുനിന്നും ഉടന്‍ നടപടിയുണ്ടാകാത്ത പക്ഷം പ്രദേശത്ത് മാരകമായ ആരോഗ്യപ്രശ്‌നം ഉണ്ടാകുമെന്നും നാട്ടുകാര്‍ മുന്നറിയിപ്പ് നല്‍കുന്നു. പ്രശ്‌നത്തില്‍ ബന്ധപ്പെട്ട അധികൃതര്‍ നപപടി സ്വീകരിക്കാതെവന്നാല്‍ ആസന്നമായി വരുന്ന തെരഞ്ഞെടുപ്പു തങ്ങള്‍ ആയുധമാക്കി മാറ്റുമെന്നും പ്രദേശവാസികള്‍ മുന്നറിയിപ്പ് നല്‍കുന്നുണ്ട്.

റെയില്‍വേ ജോലി തട്ടിപ്പ്; സ്ത്രീ പിടിയില്‍

മെഡിക്കല്‍കോളജ്: റെയില്‍വേയില്‍ ജോലി വാഗ്ദാനം നല്‍കി പണം തട്ടിയ സംഭവത്തില്‍ സ് ത്രീ പിടയില്‍. കൊല്ലം മുഖത്തല സ്വദേശിനി രേഷ്മ (32) ആണ് പിടിയിലായത്. മണക്കാട് സ്വദേശികളായ രണ്ടുപേരില്‍ നിന്ന് വിവിധ സമയങ്ങളിലായി അഞ്ചുലക്ഷം രൂപയാണ് ഇവര്‍ തട്ടിയെടുത്തത്. വ്യാജമായി നിര്‍മിച്ച നിയമന ഉത്തരവ് നല്‍കുകയും പണം നല്‍കിയവര്‍ ഇതുമായി എത്തിയപ്പോള്‍ വ്യാജമാണെന്ന് തിരിച്ചറിയുകയുമായിരുന്നു.

കോട്ടുകാൽ എ. പ്രഭാകരൻ നായർ സ്മാരകം അനാച്ഛാദനം ചെയ്തു

വിഴിഞ്ഞം: സ്വതന്ത്ര്യ സമര സേനാനി കോട്ടുകാൽ എ. പ്രഭാകരൻ നായരുടെ സ്മാരകം പുന്നക്കുളം ജംങ്ഷനില്‍ അനാച്ഛാദനം ചെയ്തു. അദ്ദേഹത്തിന്‍റെ അനുജന്‍ എ. ഗോപിനാഥന്‍ നായര്‍ വിളക്ക് തെളിയിച്ചാണ് അനാച്ഛാദനം നടത്തിയത്. സിപിഎം ജില്ലാ സെക്രട്ടറിയേറ്റ് അംഗം പി.എസ്. ഹരികുമാര്‍, അതിയന്നൂര്‍ ബ്ലോക്ക് മെമ്പര്‍ എം.വി. മന്‍മോഹന്‍, കോണ്‍ഗ്രസ് ചപ്പാത്ത് മണ്ഡലം പ്രസിഡന്‍റ് പുന്നക്കുളം ബിനു , സ്മാരക നിര്‍മാാണത്തിനു നേതൃത്വം വഹിച്ച ശ്രീകണ്ഠന്‍ നായര്‍ , കോട്ടുകാല്‍ പ്രഭാകരന്‍ നായരുടെ കുടുംബാംഗങ്ങള്‍എന്നിവര്‍ ഉള്‍പ്പെടെ നാട്ടിലെ രാഷ്ട്രീയ പൗര പ്രമുഖരും നാട്ടുകാരും പങ്കെടുത്തു. കോടുകാല്‍ പ്രഭാകരന്‍ നായര്‍ പ്രജാ സോഷ്യലിസ്റ്റ്‌ പാർട്ടിയുടെ നെയ്യാറ്റിൻകര താലൂക്കിലെ യുവജന വിഭാഗം മുതൽ സംസ്ഥാന സെക്രട്ടറി വരെ പല പദവികളും അലങ്കരിച്ചിട്ടുണ്ട്. കോട്ടുകാൽ പഞ്ചായത്തിൽ നിന്നു 40 വർഷത്തോളം ജന പ്രതിനിധി ആയിരുന്നു. കുടുംബ വക മൂന്നേക്കര്‍ ഭൂമി സൗജന്യമായി നൽകിയാണ് ഇപ്പോൾ ഹയർ സെക്കൻഡറി വരെയായ കോട്ടുകാൽ ഗവ. ഹൈസ്കൂൾ സ്ഥാപിച്ചത്. കോട്ടുകാൽ സർക്കാർ ആശുപത്രി സഥിതി ചെയ്യുന്ന 50 സെന്‍റ് സ്ഥലം, നെയ്ത്ത് തൊഴിലാളികള്‍ക്കു വീടു നിര്‍മിക്കുന്നതിനായി 65 സെന്‍റ് കുടുംബവസ്തു എന്നിവ യും സൗജന്യമായി നൽകിയിട്ടു ണ്ട്.

മനുഷ്യ-വന്യജീവി സംഘര്‍ഷം : സുഗന്ധവ്യഞ്ജനകൃഷി പ്രോത്സാഹിപ്പിക്കും

പേരൂര്‍ക്കട: മനുഷ്യ-വന്യജീവി സംഘര്‍ഷം ലഘൂകരിക്കുന്നതിന്‍റെ ഭാഗമായി വനാതിര്‍ത്തി പ്രദേശങ്ങളില്‍ സുഗന്ധവ്യഞ്ജന വിളകളും സിട്രസ് പഴങ്ങളും കൃഷിചെയ്യുന്നതു പ്രോത്സാഹിപ്പിക്കാന്‍ തീരുമാനം. ജില്ലാ കളക്ടര്‍ അനുകുമാരിയുടെ അധ്യക്ഷതയില്‍ കുടപ്പനക്കുന്ന് കളക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന ജില്ലാതല നിയന്ത്രണ സമിതി യോഗത്തിലാണ് ഈ തീരുമാനം. പരുത്തുപ്പിള്ളി, പാലോട്, കുളത്തൂപ്പുഴ ഫോറസ്റ്റ് റേഞ്ചുകളിലായി ഒമ്പത് ആനക്കിടങ്ങുകള്‍ സ്ഥാപിക്കുന്നുണ്ട്. ഇതില്‍ നാലെണ്ണം പൂര്‍ത്തിയാകുകയും ബാക്കിയുള്ളവയുടെ പണി പുരോഗമിക്കുകയുമാണ്. കാര്‍ഷിക വിളകളുടെ സംരക്ഷണം ഉറപ്പുവരുത്താനും വന്യജീവി സംഘര്‍ഷം കുറയ്ക്കുന്നതിനുമായി രാഷ്ട്രീയ കൃഷി വികാസ് യോജന്‍ സ്‌കീം പ്രകാരം 11.8 കിലോമീറ്ററില്‍ ആനക്കിടങ്ങുകള്‍ നിര്‍മിക്കാനും കല്ലാറില്‍ ഒരു ചെക്ക് ഡാമിന്‍റെ നിര്‍മാണത്തിനും പ്രവര്‍ത്തനാനുമതി ആയിട്ടുണ്ട്. സോളാര്‍ ഫെന്‍സിംഗിന്‍റെ അറ്റക്കുറ്റ പണികള്‍ വേഗത്തില്‍ തീര്‍ക്കാനും യോഗത്തില്‍ തീരുമാനമായി. ഡിഎഫ്ഒ ഷാനവാസ്, വിവിധ വകുപ്പുകളില്‍ നിന്നുള്ള പ്രതിനിധികള്‍ തുടങ്ങിയവര്‍ പങ്കെടുത്തു.

കെഎൽസിഎ സമുദായ സമ്പർക്ക പരിപാടി : നെയ്യാറ്റിൻകര രൂപതയിൽ മുന്നൊരുക്കങ്ങൾ ആരംഭിച്ചു

നെയ്യാറ്റിൻകര: കേരളത്തിലെ 12 ലത്തീൻ രൂപതകളിൽ കേരള ലാറ്റിൻ കാത്തലിക്ക് അസോസിയേഷൻ കെഎൽസി എ സംഘടിപ്പിക്കുന്ന "സമുദായ സമ്പർക്ക പരിപാടി 2025' യുടെ നെയ്യാറ്റിൻകര രൂപതാ തല ആലോചന യോഗം സംസ്ഥാന പ്രസിഡന്‍റ് അഡ്വ. ഷെറി ജെ തോമസിന്‍റെ അധ്യക്ഷതയിൽ ചേർന്നു. കെഎൽസിഎ നെയ്യാറ്റിൻകര രൂപത പ്രസിഡന്‍റ് അനിൽ ജോസ് മുഖ്യപ്രഭാഷണംനടത്തി. സമുദായ അംഗങ്ങൾ നേരിടുന്ന പ്രധാന പ്രശ്നമായ സർട്ടിഫിക്കറ്റ് വിഷയം അംഗങ്ങളു ടെ ശ്രദ്ധയിൽ കൊണ്ടുവരാൻ യോഗം തീരുമാനിച്ചു. വന്യമൃഗശല്യം മൂലമുണ്ടാകുന്ന കൃഷി നാശം ഉൾപ്പെടുന്ന കാർഷിക വിഷയങ്ങളും സമുദായ സമ്പർക്ക പരിപാടിയിൽ ഉയർത്തി കൊണ്ടുവരും. സെപ്റ്റംബർ 14ന് ഉച്ചകഴിഞ്ഞു രണ്ടിനു നെയ്യാറ്റിൻകരയിൽ "കെഎൽസിഎ സമുദായ സമ്പർക്ക പരിപാടി 2025' സംഘടിപ്പിക്കും. സംസ്ഥാന ജനറൽ സെക്രട്ടറി ബിജു ജോസ്, ട്രഷറർ രതീഷ് ആന്‍റണി, നെയ്യാറ്റിൻകര രൂപത കെഎൽസിെ മുൻ പ്രസിഡന്‍റു‌മാരായ ആൽഫർഡ് വിൽ‌സൺ, അഡ്വ. ഡി രാജു, രൂപത ഡയറക്ടർ ഫാ. എസ്.എം. അനിൽകുമാർ, ജനറൽ സെക്രട്ടറി ജോൺ സുന്ദർരാജ്, ട്രഷറർ എസ്. രാജേന്ദ്രൻ, ഫാ. റോബർട്ട്‌ വിൻസന്‍റ്, ഫാ. ആന്‍റണി സോണി, കോ-ഓർഡിനേറ്റർ സി. സുരേന്ദ്രൻ എന്നിവർ പ്രസംഗിച്ചു.

വാർഡ് വിഭജനവും പേരു വെട്ടലും കൂട്ടിച്ചേർക്കലും കഴിഞ്ഞു : കരടിൽ കണ്ണുതള്ളി വോട്ടർമാർ

വിഴിഞ്ഞം: തദ്ദേശ വാർഡ് വിഭജനവും കൂട്ടിച്ചേർക്കലും വെട്ടിക്കുറക്കലും കഴിഞ്ഞു, വോട്ടർ പട്ടികയുടെ കരട് ലിസ്റ്റ് വന്നതോടെ ജനപ്രതിനിധികളും രാഷ്ട്രീയക്കാരും ഞെട്ടി. വോട്ടർമാർ പല വാർഡുകളിലായി ചിന്നിച്ചിതറി. ഇവരെ യഥാർഥ വാർഡുകളിൽ എത്തിക്കുന്നതിനുള്ള കഠിനപ്രയത്നവും രാഷ്ട്രീയ പാർട്ടികൾ തുടങ്ങി. ഒരു വീട്ടിലുള്ളവർ തന്നെ പല വാർഡുകളിലെ വോട്ടേഴ്സ് ലിസ്റ്റിൽ കടന്നു കൂടിയതും തെരഞ്ഞെടുപ്പ് കമ്മിഷൻ നിഷ്കർഷിക്കുന്നതിനേക്കാൾ കൂടുതൽ വോട്ടർമാർ ചില വാർഡുകളിൽ വന്നതും അധികൃതർക്ക് തലവേദന സൃഷ്ടിക്കുന്നുണ്ട്. വാർഡുവിഭജനവും കരട് വോട്ടർ പട്ടികയിലെ അപാകതയും ഏറ്റവും കൂടുതൽ ബാധിച്ചത് തീരദേശ മേഖലയിലാണെന്ന് പരാതിയുണ്ട്. കരിംകുളം പഞ്ചായത്തിലെ ഒന്നാം വാർഡായ പിഎച്ച്സിയിൽ ആയിരത്തതിനു താഴെ വോട്ടർമാർ ലിസ്റ്റിലുള്ളപ്പോൾ തൊട്ടടുത്ത കൊച്ചുപള്ളി വാർഡിൽ എണ്ണം രണ്ടായിരത്തോളമായി. പഞ്ചായത്തിലെ വോട്ടർമാർ പല വാർഡുകളിലുമായി ചിന്നിച്ചിതറിക്കിടക്കുന്നതായും പ്രസിഡന്‍റ് പറയുന്നു. ഇവിടെയും ലിസ്റ്റ് നേരെയാക്കുന്നതിനുള്ള കഠിനപ്രയത്നത്തിലാണ് അധികൃതർ. തിരുവനന്തപുരം നഗരസഭ വിഴിഞ്ഞത്തു കാരോട് കാണിച്ചതും ചതിയാണ്. കോൺഗ്രസിന്‍റെയും മറ്റു പാർട്ടിക്കാരുടെയും ആധിപത്യം ഇല്ലാതാക്കാൻ കാണിച്ച വെട്ടിമുറിക്കലിൽ വിഴിഞ്ഞത്തുനിന്ന് ഒരു ഡിവിഷൻവരെ അപ്രത്യക്ഷമായി. നഗരസഭയോട് കൂട്ടിച്ചേർക്കപ്പെട്ട പഴയ വിഴിഞ്ഞം പഞ്ചായത്ത് ഇനി വെറും നാല് അംഗങ്ങളുടെ ചുമതലയിലാകും. കോട്ടപ്പുറം, മുല്ലൂർ എന്നീ രണ്ടു ഡിവിഷനുകളിലായിരുന്നു വിഴിഞ്ഞം അന്താരാഷ്ട്ര തുറമുഖം സ്ഥിതി ചെയ്തിരുന്നത്. ഇതു രണ്ടും ഇല്ലാതാക്കി. രണ്ടു വാർഡുകളെയും വെട്ടിമുറിച്ച് തുറമുഖ ഡിവിഷൻ എന്ന പുതിയ വാർഡ് രൂപികരിച്ചു. ഇതോടെ മുല്ലൂർ ഡിവിഷനിലെ തുടർച്ചയായ കോൺഗ്രസ് ആധിപത്യവും കോട്ടപ്പുറം വാർഡിലെ ഇടതുപക്ഷക്കാരല്ലാത്തവരുടെ ആധിപത്യവും ഇല്ലാതാക്കാമെന്ന കണക്ക് കൂട്ടലിലാണ് ഒരു വിഭാഗം. പുതിയ വാർഡ് വിഭജനത്തിൽ ജനസംഖ്യ കൂടുതലുള്ള വിഴിഞ്ഞം, തുറമുഖ ഡിവിഷനുകളിലെ വോട്ടർമാരുടെ എണ്ണം പന്ത്രണ്ടായിരത്തിനടുത്ത് എത്തിയതായി അംഗങ്ങൾ പറയുന്നു. കൗൺസിലർമാരെ വിളിച്ച് ചർച്ചകൾ പോലും നടത്താതെ അധികൃതർ തന്നിഷ്ടപ്രകാരമായി നടത്തിയ പരിഷ് കാരം പൊതുജനങ്ങളുടെ ആനുകൂല്യത്തെ ഗുരുതരമായി ബാധിക്കുന്നതിനുപരി കൗൺസിലർമാരുടെ ജോലിഭാരവും വർധി ക്കും. വാർഡ് വെട്ടിക്കുറച്ചതിനു പരി വെള്ളാർ ഡിവിഷനിലെ മൂന്നോളം ബൂത്തുകൾ വിഴിഞ്ഞത്തോട് കൂട്ടിച്ചേർത്തു വസ്തൃതിയും വർധിപ്പിച്ചു. പഞ്ചായത്തായാൽ ഇരുപതിൽ കൂടുതൽ അംഗങ്ങൾ ഉണ്ടാകുമായിരുന്ന സ്ഥാനത്താണ് നഗരസഭയിൽ നാല് പേരിൽ ഒതുങ്ങിയത്. ഇവിടെയും വോട്ടർമാർ പലയിടത്തായി ചിന്നിച്ചിതറിക്കിടക്കുന്നത് ഏറെ തലവേദനയായതായി കൗൺസിലർമാർ പറയുന്നു. അടുത്ത മാസം ഏഴിനു മുൻപ് തെറ്റുകൾ പരിഹരിക്കുന്നതിനുള്ള നെട്ടൊട്ടത്തിലാണ് രാഷ്ട്രീയ പാർട്ടിക്കാർ. വാർഡ്‌വിഭജനം നടക്കാത്ത പൂവാർ പഞ്ചായത്ത് ഒഴികെ കാഞ്ഞിരംകുളം, കോട്ടുകാൽ, തിരുപുറം, കുളത്തൂർ ഉൾപ്പെടെയുള്ള എല്ലായിടത്തും കരട് ലിസ്റ്റിൽ അപാകതകൾ കടന്നു കൂടിയതായും ബന്ധപ്പെട്ടവർ പറയുന്നു.

കളക്ടറേറ്റില്‍ ജില്ലാ വികസന സമിതി യോഗം ചേര്‍ന്നു

പേരൂര്‍ക്കട: ജില്ലാ വികസന സമിതി യോഗം കളക്ടറേറ്റ് കോണ്‍ഫറന്‍സ് ഹാളില്‍ ജില്ലാ കളക്ടര്‍ അനുകുമാരിയുടെ അധ്യക്ഷതയില്‍ ചേര്‍ന്നു. തിരുവനന്തപുരം ലോ ക്‌സഭാ മണ്ഡലത്തിലെയും നെയ്യാറ്റിന്‍കര, വട്ടിയൂര്‍ക്കാവ്, വര്‍ക്കല, ആറ്റിങ്ങല്‍, എന്നീ മണ്ഡലങ്ങളിലെയും വികസന പ്രവര്‍ത്തനങ്ങളുടെ നിലവിലെ പുരോഗതി യോഗത്തില്‍ വിലയിരുത്തി. നെയ്യാറ്റിന്‍കര മണ്ഡലത്തിലെ പലയിടങ്ങളിലും സാമൂഹ്യവിരുദ്ധരുടെ ശല്യം രൂക്ഷമാണെന്നും ഇത് പരിഹരിക്കുന്നതിനായി പോലീസ് കര്‍ശന നടപടി സ്വീകരിക്കണമെന്നും കെ. ആന്‍സലന്‍ എംഎല്‍എ ആവശ്യപ്പെട്ടു. കവടിയാര്‍ അക്കാമ്മ ചെറിയാന്‍ പാര്‍ക്കിന്‍റെ ഭാഗത്ത് കച്ചവടം ചെയ്യുന്നവരെ ഒഴിപ്പിക്കുന്നതിനും അവര്‍ക്ക് മറ്റൊരു സ്ഥലം കണ്ടെത്തി നല്‍കുന്നതിനുമുള്ള ആവശ്യം വി.കെ. പ്രശാന്ത് എംഎല്‍എ യോഗത്തില്‍ ഉന്നയിച്ചു. ലഹരി പദാര്‍ഥങ്ങള്‍ വില്‍ക്കുന്ന കടകളുടെ ലൈസന്‍സ് റദ്ദാക്കുന്ന നടപടി തുടരണമെന്നും നഗരത്തിലെ സ്ട്രീറ്റ് ലൈറ്റുകളുടെ അറ്റകുറ്റപ്പണി നടത്തണമെന്നും ഉദ്യോഗസ്ഥര്‍ക്ക് നിർദേശം നല്‍കി. മേലേക്കടവ് ടൂറിസം പദ്ധതി, വട്ടിയൂര്‍ക്കാവ് മാര്‍ക്കറ്റ് നവീകരണം, പേരൂര്‍ക്കട ആശുപത്രി വികസനം, വട്ടിയൂര്‍ക്കാവ് ജംഗ്ഷന്‍ വികസനം, വട്ടിയൂര്‍ക്കാവ് മണ്ഡലത്തിലെ എംഎല്‍എ റോഡ്, ഉദിയന്നൂര്‍ റോഡ് എന്നിവിടങ്ങളിലെ കെഎസ്ആര്‍ടിസി ബസ് സര്‍വീസ് പുനഃസ്ഥാപിക്കല്‍, തിരുവനന്തപുരം മുനിസിപ്പല്‍ കോര്‍പറേഷനുമായി ബന്ധപ്പെട്ട മെട്രോപൊളിറ്റന്‍ പ്ലാനിംഗ് കമ്മിറ്റി രൂപീകരണം തുടങ്ങിയ പദ്ധതികളും ചര്‍ച്ച ചെയ്തു. വര്‍ക്കല മണ്ഡലത്തില്‍ കുടിവെള്ളം ലഭ്യമാക്കാന്‍ മണമ്പൂര്‍ ഭാഗത്തെ ദേശീയപാതയില്‍ പൈപ്പിടുന്നത് നടപ്പിലാക്കിയെന്ന് ബന്ധപ്പെട്ട ഉദ്യോഗസ്ഥര്‍ യോഗത്തെ അറിയിച്ചു. ആറ്റിങ്ങല്‍ മണ്ഡലത്തില്‍ അപകടാവസ്ഥയിലായ അഞ്ച് സ്‌കൂളുകളുടെ അറ്റകുറ്റപ്പണി എത്രയും വേഗത്തില്‍ പൂര്‍ത്തിയാക്കാന്‍ ജില്ലാ കളക്ടര്‍ നിര്‍ദേശം നല്‍കി. യോഗത്തില്‍ എംഡിഎം ടി.കെ. വിനീത്, ജില്ലാ ഡെപ്യൂട്ടി പ്ലാനിംഗ് ഓഫീസര്‍ എം. കലാമുദീൻ പങ്കെടുത്തു.

നഗരസഭ ജനങ്ങളിലേക്ക്: ഫയല്‍ അദാലത്ത് നാളെ മുതൽ

തിരുവനന്തപുരം: നഗരസഭ ജനങ്ങളിലേക്കു പരിപാടിയുടെ ഭാഗായുള്ള ഫയല്‍ അദാലത്ത് നാളെ ആരംഭിക്കും. നഗരസഭയുടെ സോണല്‍ ഓഫീസുകളിലും നഗരസഭ മെയിന്‍ ഓഫീസും കേന്ദ്രീകരിച്ചാണ് ഫയല്‍ അദാലത്ത് സംഘടിപ്പിക്കുന്നത്. അപേക്ഷ സമര്‍പ്പിച്ചിരിക്കുന്നവര്‍ ഡോക്കറ്റ് നമ്പര്‍ ഉള്‍പ്പെടെ നിശ്ചയിക്കപ്പെട്ട തീയതികളില്‍ അതാത് ഓഫീസുകളില്‍ കൃത്യസമയത്ത് തന്നെ ഹാജരാകണമെന്ന് നഗരസഭ അറിയിച്ചു. പുനഃക്രമീകരിച്ച അദാലത്ത് തീയതികള്‍ ചുവടെ ചേര്‍ക്കുന്നു: ഉള്ളൂര്‍ സോണല്‍ ഓഫീസില്‍: 28ന് രാവിലെ 10 മണി മുതല്‍ (വാര്‍ഡുകള്‍: മണ്ണന്തല, നാലാഞ്ചിറ, ആക്കുളം, ഇടവക്കോട്, ചെറുവയ്ക്കല്‍, ഉള്ളൂര്‍). ശ്രീകാര്യം സോണല്‍ ഓഫീസില്‍: 28ന് ഉച്ചക്ക് രണ്ടു മുതല്‍ (വാര്‍ഡുകള്‍: ശ്രീകാര്യം, ചെല്ലമംഗലം, പൗഡിക്കോണം, ചെമ്പഴന്തി, ഞാണ്ടൂര്‍കോണം) നേമം സോണല്‍ ഓഫീസില്‍: 29നു രാവിലെ 10 മുതല്‍ (വാര്‍ഡുകള്‍: പൊന്നുമംഗലം, എസ്റ്റേറ്റ്, നേമം, മേലാംകോട്, പാപ്പനംകോട്) വിഴിഞ്ഞം സോണല്‍ ഓഫീസില്‍: 29ന് ഉച്ചക്ക് രണ്ടു മുതല്‍ (വാര്‍ഡുകള്‍: വെങ്ങാനൂര്‍, മുല്ലൂര്‍, കോട്ടപ്പുറം, വിഴിഞ്ഞം, ഹാര്‍ബര്‍) കടകംപള്ളി സോണല്‍ ഓഫീസില്‍: 30ന് രാവിലെ 10 മുതല്‍ (വാര്‍ഡുകള്‍: കരിക്കകം, കടകപള്ളി, അണമുഖം) കഴക്കൂട്ടം സോണല്‍ ഓഫീസില്‍: 30ന് രാവിലെ 11:30 മുതല്‍ (വാര്‍ഡുകള്‍: കഴക്കൂട്ടം, ചന്തവിള, കാട്ടായിക്കോണം) ആറ്റിപ്ര സോണല്‍ ഓഫീസില്‍: 30ന് ഉച്ചക്ക് മൂന്നു മുതല്‍ (വാര്‍ഡുകള്‍: കുളത്തൂര്‍, പൗണ്ടുകടവ്, പള്ളിത്തുറ, ആറ്റിപ്ര) തിരുവല്ലം സോണല്‍ ഓഫീസില്‍: 31ന് രാവിലെ 10 മുതല്‍ (വാര്‍ഡുകള്‍: പുഞ്ചക്കരി, തിരുവല്ലം, പൂങ്കുളം, വെള്ളാര്‍) ഫോര്‍ട്ട് സോണല്‍ ഓഫീസില്‍: 31ന് രാവിലെ 11:30 മുതല്‍ (വാര്‍ഡുകള്‍: പൂന്തുറ, കാലടി, മാണിക്യവിളാകം, ബീമാപള്ളി, ബീമാപള്ളി ഈസ്റ്റ്, പുത്തന്‍പള്ളി, വലിയതുറ, വള്ളക്കടവ്, കമലേശ്വരം, അമ്പലത്തറ, ചാല, ആറ്റുകാല്‍, മണക്കാട്, കുര്യാത്തി, ഫോര്‍ട്ട്, ശ്രീവരാഹം, കളിപ്പാന്‍കുളം, മുട്ടത്തറ, എഞ്ചിനീറിങ് സെക്‌ഷന്‍: ശ്രീകണ്ഠേശ്വരം, പാല്‍കുളങ്ങര, പെരുന്താന്നി, ശംഖുമുഖം, വെട്ടുകാട്) കുടപ്പനക്കുന്ന് സോണല്‍ ഓഫീസില്‍: ഓഗസ്റ്റ് ഒന്നിനു രാവിലെ 10:30 മുതല്‍ (വാര്‍ഡുകള്‍: കിണവൂര്‍, പാതിരാപ്പള്ളി, കുടപ്പനക്കുന്ന്, ചെട്ടിവിളാകാം) വട്ടിയൂര്‍ക്കാവ് സോണല്‍ ഓഫീസില്‍: ഓഗസ്റ്റ് ഒന്നിന് ഉച്ചക്ക് രണ്ടുമുതല്‍ (വാര്‍ഡുകള്‍: തുരുത്തുംമൂല, നെട്ടയം, കാച്ചാണി, വാഴോട്ടുകോണം, കൊടുങ്ങാനൂര്‍). നഗരസഭ മെയിന്‍ ഓഫീസില്‍: ഓഗസ്റ്റ് രണ്ടിനു രാവിലെ 10 മണി മുതല്‍ (വാര്‍ഡുകള്‍: പാളയം, നന്തന്‍കോട്, കുന്നുകുഴി, തൈക്കാട്, കാഞ്ഞിരംപാറ, വട്ടിയൂര്‍ക്കാവ്, പിടിപി നഗര്‍, വഴുതക്കാട്, വഞ്ചിയൂര്‍) നഗരസഭ മെയിന്‍ ഓഫീസില്‍: ഓഗസ്റ്റ് രണ്ടിന് ഉച്ചക്ക് രണ്ടു മുതല്‍ (വാര്‍ഡുകള്‍: പാങ്ങോട്, വലിയവിള, ജഗതി, തമ്പാനൂര്‍, കണ്ണമൂല, തിരുമല, പുന്നായ്ക്കാമുകള്‍, തൃക്കണ്ണാപുരം) നഗരസഭ മെയിന്‍ ഓഫീസില്‍: ഓഗസ്റ്റ് നാലിനു രാവിലെ 10 മുതല്‍ (വാര്‍ഡുകള്‍: മെഡിക്കല്‍ കോളജ്, കേശവദാസപുരം, പട്ടം, മുട്ടട, ശാസ്തമംഗലം, കവടിയാര്‍, കുറവന്‍കോണം, പേരൂര്‍ക്കട) നഗരസഭ മെയിന്‍ ഓഫീസില്‍: ഓഗസ്റ്റ് നാലിന് ഉച്ചക്ക് രണ്ടു മുതല്‍ (വാര്‍ഡുകള്‍: പൂജപ്പുര, വലിയശാല, കരമന, ആറന്നൂര്‍, മുടവന്മുകള്‍, ചാക്ക, പേട്ട)

റോഡരികിലെ കുഴിയിൽ മരിച്ച നിലയില്‍

വെള്ളറട: ആര്യങ്കോട് 47 വയസുകാരനെ കുഴിയില്‍ വീണ് മരിച്ച നിലയില്‍ കണ്ടെത്തി. മണ്ഡപത്തിന്‍കടവില്‍ ശ്രീകാന്തിനെയാണ് മരിച്ച നിലയില്‍ കണ്ടെത്തിയത്. വാഴിച്ചില്‍ റോഡില്‍ ആറടിയോളം താഴ്ചയുള്ള കുഴിയിലാണ് ഇയാളെ കണ്ടെത്തിയത്. ഇന്നലെ രാത്രി എട്ടോടെ വീട്ടില്‍ നിന്നും പുറത്തേക്ക് പോയതായിരുന്നു ശ്രീകാന്തെന്ന് ബന്ധുക്കള്‍ പറഞ്ഞു. രാവിലെ വഴിയാത്രക്കാരാണ് വാഴിച്ചില്‍ റോഡിലെ കുഴിയില്‍ മൃതദേഹം കണ്ടെത്. തുടര്‍ന്ന് പോലീസില്‍ വിവരം അറിയിക്കുകയായിരുന്നു. സംഭവത്തില്‍ ആര്യങ്കോട് പൊലീസ് തുടര്‍ നടപടികള്‍ സ്വീകരിച്ചു.

പുരസ്കാര മികവില്‍ നെയ്യാറ്റിന്‍കര നഗരസഭ ഗവ. ആയുര്‍വേ ആശുപത്രി

നെയ്യാറ്റിൻകര: സംസ്ഥാന ആയുഷ് കായകല്‍പ്പയുടെ അഭിനന്ദന പുരസ്കാര മികവില്‍ ഭാരതീയ ചികിത്സാ വകുപ്പിന്‍റെ നെയ്യാറ്റിന്‍കര നഗരസഭ ഗവ. ആയുര്‍വേ ആശുപത്രി. മൂന്നുകല്ലിന്‍മൂട്ടില്‍ പ്രവര്‍ത്തിക്കുന്ന സര്‍ക്കാര്‍ ആയുര്‍വേദ ആശുപത്രി മികച്ച സ്കോറോടു കൂടിയാണ് ഒരു ലക്ഷം രൂപയുടെ അഭിനന്ദന പുരസ്ക്കാരത്തിന് തെരഞ്ഞെടുക്കപ്പെട്ടത്. ശുചിത്വം, മാലിന്യ പരിപാലനം, അണുബാധ നിയന്ത്രണം എന്നിവ വിലയിരുത്തിയായിരുന്നു പുരസ്കാര നിര്‍ണയം. 1939 -ല്‍ സ്ഥാപിച്ചതാണ് ആതുരാലയം. എട്ടു പതിറ്റാണ്ടിലേറെക്കാലത്തെ പ്രവര്‍ത്തന പാരന്പര്യമുള്ള ആയുര്‍വേദ ആശുപത്രി മുതിര്‍ന്ന തലമുറയെ സംബന്ധിച്ചിടത്തോളം പഴയ കഷായാശുപത്രിയാണ്. ഇന്ന് ദിനംപ്രതി 200- 250 രോഗികള്‍ ഒപിയിലെത്തുന്ന ആശുപത്രിയില്‍ യോഗ വെല്‍നസ് സെന്‍റര്‍, സിദ്ധ ഡിസ്പെന്‍സറി മുതലായവയിലേതു കൂടി ചേര്‍ത്ത് പതിനൊന്ന് ഡോക്ടര്‍മാരുടെ സേവനം ലഭിക്കുന്നു. ജനറല്‍ ഒ.പി ക്കു പുറമേ ആയുർവേദത്തിലെ വിഷചികിത്സാവിഭാഗമായ അഗദതന്ത്രം, നേത്രം, ഇഎന്‍ടി, ദൃഷ്ടി, മര്‍മ്മ, ശല്യതന്ത്രം, പ്രമേഹ രോഗികള്‍ക്കായുള്ള ജീവനി, അറുപത് വയസിനു മുകളില്‍ പ്രായമുള്ളവര്‍ക്കായി വൃദ്ധജന പരിപാലനം, അരികെ, സ്നേഹധാര ഉള്‍പ്പെടെയുള്ള പാലിയേറ്റീവ് പ്രോജക്ട് , വെരിക്കോസ് മുതലായവയില്‍ സ്പെഷല്‍ ഒപി പ്രവര്‍ത്തിക്കുന്നു.

പട്ടം ഗവ. ഗേള്‍സ് ഹയര്‍സെക്കന്‍ഡറി സ്‌കൂളില്‍ മുങ്ങിമരണ പ്രതിരോധ കാമ്പയിൻ

മെഡിക്കല്‍കോളജ്: ലോക മുങ്ങിമരണ ദിനത്തോടനുബന്ധിച്ച് ജില്ലാ ദുരന്തനിവാരണ അഥോറിറ്റിയുടെ ആഭിമുഖ്യത്തില്‍ ആരംഭിച്ച ജീവനം പ്രതിരോധ കാമ്പയിനിന്‍റെ ജില്ലാതല ഉദ്ഘാടനം ജില്ലാ കളക്ടര്‍ അനുകുമാരി നിര്‍വഹിച്ചു. പട്ടം ഗവ. മോഡല്‍ ഗേള്‍സ് ഹയര്‍സെക്കന്‍ഡറി സ്‌കൂളില്‍ നടത്തുന്ന ക്യാമ്പയിന്‍റെ ആപ്തവാക്യം ജീവനം- ജീവനോട് ജാഗ്രതയുടെ യുദ്ധം എന്നതാണ്. മുങ്ങിമരണ അപകടങ്ങളില്‍പ്പെടുന്നവരില്‍ ഭൂരിഭാഗവും ആണ്‍കുട്ടികളാണെന്നും നന്നായി നീന്തല്‍ അറിയാവുന്നവര്‍പോലും അപകടത്തില്‍പ്പെടുന്ന സ്ഥിതിയാണെന്നും ജില്ലാ കളക്ടര്‍ പറഞ്ഞു. എല്ലാ സ്‌കൂളുകളിലും മുങ്ങിമരണ പ്രതിരോധത്തെ സംബന്ധിച്ചുള്ള ബോധവത്കരണം നടത്തും. സോഷ്യല്‍ മീഡിയ പ്ലാറ്റ്‌ഫോമുകളില്‍ ജീവനം ക്യാമ്പയിനിന്‍റെ പ്രചാരണം ശക്തമാക്കുമെന്നും കളക്ടര്‍ പറഞ്ഞു. മുങ്ങിമരണ പ്രതിരോധത്തിന്‍റെ ഭാഗമായുള്ള പ്രതിജ്ഞ സബ് കളക്ടര്‍ ഒ.വി. ആല്‍ഫ്രഡ് ചൊല്ലികൊടുത്തു. മുങ്ങിമരണ പ്രതിരോധ ബോധവത്കരണ ക്ലാസും ഉണ്ടായിരുന്നു. ഡപ്യൂട്ടി മേയര്‍ പി.കെ. രാജു, എഡിഎം ടി.കെ. വിനീത്, ദുരന്ത നിവാരണം ഡെപ്യൂട്ടി കളക്ടര്‍ ജി. ശ്രീകുമാര്‍, സ്‌കൂള്‍ പ്രിന്‍സിപ്പല്‍ കെ. ലൈലാസ്, ഹെഡ്മാസ്റ്റര്‍ എസ്.എ സജീവ് കുമാര്‍, ജില്ലാ ഫയര്‍ ഓഫീസര്‍ എസ്. സൂരജ് എന്നിവര്‍ പങ്കെടുത്തു.

കിണറ്റിലകപ്പെട്ട പോത്തിനെ രക്ഷപ്പെടുത്തി

പേരൂര്‍ക്കട: കിണറ്റില്‍ അകപ്പെട്ട പോത്തിനെ തിരുവനന്തപുരം ഫയര്‍ഫോഴ്‌സ് സംഘം രക്ഷപ്പെടുത്തി. ചൂഴമ്പാല മഠത്തുനടയ്ക്കു സമീപം അമ്പലത്തുനടയില്‍ ഇന്നലെ രാവിലെ ഏഴോടുകൂടിയായിരുന്നു സംഭവം. കാടുപിടിച്ചുകിടന്ന ഭൂമിയില്‍ മേഞ്ഞുനടന്ന പോത്ത് അബദ്ധത്തില്‍ കിണറ്റിലേക്കു വീഴുകയായിരുന്നു. പോത്തിനെ അന്വേഷിച്ച് നടന്ന ഉടമയായ ബാബുവാണ് കിണറ്റില്‍ വീണുകിടക്കുന്ന പോത്തിനെ കണ്ടെത്തിയത്. തുടര്‍ന്ന് ഫയര്‍ഫോഴ്‌സില്‍ വിവരമറിയിച്ചു. സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ ശ്രീജിത്തിന്‍റെ നേതൃത്വത്തില്‍ ഷഹീര്‍, ഷിബിന്‍, ജസ്റ്റിന്‍, സവിന്‍, സനിത്ത്, ഡ്രൈവര്‍ ബൈജു, ഹോം ഗാര്‍ഡ് വിപിന്‍ എന്നിവര്‍ രക്ഷാപ്രവര്‍ത്തനത്തിന് നേതൃത്വം നല്‍കി. കിണറ്റില്‍ വെള്ളമുണ്ടായിരുന്നതുകൊണ്ട് പോത്തിന് കാര്യമായ പരിക്കുണ്ടായില്ല.

നാലാഞ്ചിറ അപകടം പരിക്കേറ്റ പെണ്‍കുട്ടികള്‍ ആശുപത്രിവിട്ടു

പേരൂര്‍ക്കട: നാലാഞ്ചിറ കുരിശടിയിലുണ്ടായ ബൈക്കപകടത്തില്‍ പരിക്കേറ്റ് ചികിത്സയിലായിരുന്ന പെണ്‍കുട്ടികള്‍ ആശുപത്രിവിട്ടു. തിരുവനന്തപുരം ജിജി ആശുപത്രിയില്‍ ചികിത്സയിലായിരുന്ന 15 വയസുവീതം പ്രായമുള്ള കുട്ടികളാണ് ഡിസ്ചാര്‍ജ്ജായത്. വ്യാഴാഴ്ച രാവിലെ 7.30നാണ് ഇന്‍ഫോസിസിലെ സെക്യൂരിറ്റി ജോലി കഴിഞ്ഞ് മടങ്ങുകയായിരുന്ന നെടുമങ്ങാട് വാളിക്കോട് സ്വദേശി സനല്‍ ഓടിച്ചിരുന്ന ബൈക്ക് നിയന്ത്രണംവിട്ട് ട്യൂഷന്‍ കഴിഞ്ഞ് ഫുട്പാത്തിലൂടെ നാലാഞ്ചിറയിലെ വീട്ടിലേക്കു നടന്നുപോകുകയായിരുന്ന പെണ്‍കുട്ടികള്‍ക്കുനേരേ പാഞ്ഞുകയറിയത്. ഇയാള്‍ ഉറങ്ങിപ്പോയതാണ് അപകടത്തിനിടയാക്കിയത്. പെണ്‍കുട്ടികളുടെ ഓരോ പല്ലുകള്‍ അപകടത്തില്‍ നഷ്ടപ്പെട്ടു. മുഖത്തുശരീരത്തിനും പരിക്കേറ്റു. ഒരാളുടെ തലയില്‍ രക്തം കട്ടപിടിച്ചു കിടന്നത് ചികിത്സയിലൂടെ നീക്കാനായി. അപകടനില തരണം ചെയ്തതോടെയാണ് ഇരുവരെയും ആശുപത്രിയില്‍ നിന്നു ഡിസ്ചാര്‍ജ് ചെയ്തത്. അതേസമയം ബൈക്കില്‍ നിന്നുവീണു വാരിയെല്ലുകള്‍ക്ക് ഒടിവുണ്ടായ സനല്‍ തിരുവനന്തപുരം മെഡിക്കല്‍കോളജ് ആശുപത്രിയില്‍ തുടര്‍ചികിത്സയിലാണ്.

കോൺഗ്രസ് പ്രവർത്തകർ ബിനുവിനെ സഹായിക്കുകയായിരുന്നുവെന്ന് പാലോട് രവി

വിതുര: മണലിസ്വദേശി ആദിവാസി യുവാവായ ബിനുവിനെ ആശുപത്രിയിൽ കൊണ്ടുപോകാൻ സഹായിച്ച കോൺഗ്രസ് പ്രവർത്തകർക്കു നേരേ കള്ളക്കഥ ഉണ്ടാക്കി ജാമ്യമില്ലാ വകുപ്പിട്ട് കള്ളക്കേസെടുത്ത് ജയിലിലടക്കാൻ ഗൂഢാലോചന നടത്തിയ സിപിഎം നേതാക്കൾ വിതുരയിലെ ജനങ്ങളോടും ആദിവാസി സമൂഹത്തോടും മാപ്പുപറയണമെന്ന് ഡിസിസി പ്രസിഡന്‍റ് പാലോട് രവി ആവശ്യപ്പെട്ടു. മരണപ്പെട്ട ബിനുവിന്‍റെ മണലിയിലുള്ള വസതിയിൽ സന്ദർശനം നടത്തുകയായിരുന്നു അദേഹം. ബിനുവിനോടൊപ്പമുണ്ടായിരുന്ന ബന്ധുക്കൾ നടന്ന സംഭവം സത്യസന്ധമായി പരസ്യമാക്കിയിട്ടും പോലീസിനെയും ആശുപത്രി അധികൃതരേയും കള്ളക്കേസെടുക്കാൻ പ്രേരിപ്പിക്കുകയാണുണ്ടായത്. മലയോര പ്രദേശമായ വിതുര ആശുപത്രിയിൽ ചികിത്സ സൗകര്യങ്ങൾ പരിമിതമാണ്. വിതുര ആശുപത്രിയിലെ ആംബുലൻസ് തകരാറിലായി കിടക്കുകയാണ്. ഉപയോഗിക്കുന്ന 108 ആംബുലൻസിലൂടെയുള്ള സുരക്ഷിതമായയാത്രയിൽ നാട്ടുകാർക്ക് വ്യാപകമായ പരാതി ഉണ്ട്. കള്ളക്കേസ് പോലീസ് പിൻവലിക്കണമെന്നും ഡിസിസി പ്രസിഡന്‍റ് ആവശ്യപ്പെട്ടു. മുൻ എംഎൽഎ കെ.എസ്. ശബരിനാഥൻ, ഡിസിസി ജന സെക്രട്ടറിമാരായ വിദ്യാസാഗർ, തേക്കട അനിൽകുമാർ എസ്.കൃഷ്ണകുമാർ, ഉവൈസ് ഖാൻ,മണ്ഡലം പ്രസിഡന്‍റ് വിഷ്ണു ആനപ്പാറ, മേമല വിജയൻ, മണ്ണറവിജയൻ, വിതുര തുളസി, മോഹനൻ തുടങ്ങിയവർ പാലോട് രവിയോടൊപ്പം ഉണ്ടായിരുന്നു.

സിവില്‍സ്റ്റേഷനില്‍ ഓപ്പണ്‍ ജിം

പേരൂര്‍ക്കട: കുടപ്പനക്കുന്ന് സിവില്‍സ്റ്റേഷനില്‍ റിക്രിയേഷന്‍ ക്ലബിന്‍റെ നേതൃത്വത്തില്‍ ഓപ്പണ്‍ ജിം തുറന്നു. കളക്ടറേറ്റിലെ ബി ബ്ലോക്കിന് എതിര്‍വശത്ത് സ്ഥിതിചെയ്യുന്ന പാര്‍ക്കിനുള്ളില്‍ സജീകരിച്ച ഓപ്പണ്‍ ജിമ്മിന്‍റെയും വെയ്റ്റ് ലോസ് ചലഞ്ചിന്‍റെയും ഉദ്ഘാടനം ജില്ലാ കളക്ടര്‍ അനുകുമാരി നിര്‍വഹിച്ചു. സ്വന്തം ആരോഗ്യത്തിന് പ്രാധാന്യം നല്‍കിയാല്‍ മാത്രമേ നമ്മുടെ കര്‍മപഥത്തില്‍ കൂടുതല്‍ കാര്യക്ഷമമായി കാര്യങ്ങള്‍ ചെയ്യാന്‍ നമുക്ക് സാധിക്കുകയുള്ളൂവെന്ന് കളക്ടര്‍ പറഞ്ഞു. കളക്ടറേറ്റില്‍ രാവിലെയും വൈകീട്ടും സവാരിക്ക് എത്തുന്നവര്‍ക്കും ഉപയോഗിക്കാവുന്ന വിധത്തിലാണ് ജിം ക്രമീകരിച്ചിരിക്കുന്നത്. എഡിഎം ടി.കെ. വിനീനും കളക്ടറേറ്റിലെ ജീവനക്കാരും പങ്കെടുത്തു.

പന്ത പ്ലാമൂട്; സഞ്ചാരികൾക്ക് സ്വർഗ ഭൂമി, പ്രദേശവാസികൾക്ക്് പേടി സ്വപ്‌നം

നെയ്യാർഡാം : നെയ്യാർ അണമുഖം പന്ത പ്ലാമൂട്, ജലസംഭരണി ഒരുക്കിയ മനോഹരമായ ദ്യശ്യ ഭംഗി തീർക്കുന്നയിടമാണ്. കാടും പിന്നെ പാറകെട്ടുകളും വെള്ളവും തീർത്ത ഭംഗിയായ സ്ഥലം. അതിനാലാണ് സഞ്ചാരികൾ ഇവിടെ കൂട്ടമായി എത്തുന്നത്. എന്നാൽ പ്രദേശവാസികൾക്ക് ഇവിടം നൽകുന്നത് പേടി സ്വപ്‌നവും അതിലുപരി ആശങ്കയും. പോലീസിന്‍റെ കൺവെട്ടത്തുനിന്നും മാറി കിടക്കുന്ന പ്രദേശത്താണ് ഇന്നലെ രണ്ടു ജീവനുകൾ പൊലിഞ്ഞത്. അതാണ് നാട്ടുകാർക്ക് ആശങ്ക പടർത്തുന്നത്. പന്ത പ്ലാമൂട് എന്നാൽ പണ്ട് ആനകുളമായിരുന്നു. നെയ്യാർഡാം വരുന്നതിന് മുൻപ് ഇവിടം നദിയായിരുന്നു. ഇവിടെയായിരുന്നു കാടിറങ്ങി വരുന്ന കാട്ടാനകൾ വെള്ളം കുടിക്കാൻ എത്തുന്നതും പിന്നെയത് ആനകുളമായി മാറിയതും. ഡാം വന്നപ്പോൾ കാട്ടാനകൾ ഇവിടെ എത്തി വെള്ളംകുടിക്കാനും എത്തുമായിരുന്നു. ഇവിടെയാണ് കഴിഞ്ഞ ദിവസം രണ്ടു ജീവനുകൾപൊലിഞ്ഞത്. നാല് യുവാക്കളായിരുന്നു ഇന്നലെ ഇവിടെ എത്തിയത്. ജലസംഭരണിക്ക് നടുക്കുള്ള പാറപ്പുറത്തിരുന്ന് ആഘേഷിച്ചത്. രണ്ടു പേർ രാത്രി തന്നെ സ്ഥലം വിട്ടു. ഇവർ തിരിച്ചെത്തി നോക്കുമ്പോഴാണ് രണ്ടു പേരെ കാണാതായ വിവരമറിയുന്നത്. തുടർന്ന് വിവരം നാട്ടുകാരെ അറിയിക്കുന്നതും ഇവർ പോലീസിനേയും ഫയർ ഫോഴ്സിനേയും വിവര മറിയിക്കുന്നതും പിന്നെ വെള്ളിയാഴ്ചയാണ് ജഡം പൊങ്ങിയത്. ഒഴിവ് ദിവസം കൂട്ടുകാരോടൊപ്പം ആസ്വദിക്കാൻ എത്തിയവരാണ് മരണത്തിൽപ്പെട്ടത്. കൂടെ വന്ന മറ്റ് രണ്ട് പേരും നടുക്കത്തിൽ നിന്ന് ഇപ്പോഴും വിട്ടുമാറിയിട്ടില്ല. പോലീസ് ഇവരുടെ മൊഴി എടുക്കുകയാണ്. സമയം തെറ്റി ഇവിടെ തങ്ങുന്നത് നാട്ടുകാർ ചോദ്യം ചെയ്തിരുന്നു. എന്നാൽ മരണപ്പെട്ട സ്ഥലവാസി നാട്ടുകാരെ അനുനയിപ്പിക്കുകയായിരുന്നു ഇവിടെ സുരക്ഷാ സംവിധാനം ഒരുക്കാനോ ബോർഡ് വയ്ക്കാനോ ബന്ധപ്പെട്ടവർ ഒരു നടപടിയും എടുത്തിട്ടില്ല.

വരുന്നു, കരിമ്പനക്കാലം

കുള്ളന്‍ പനകള്‍ കൃഷിയിറക്കാനൊരുങ്ങി ചെങ്കല്‍ സര്‍വീസ് സഹകരണ ബാങ്ക് പാറശാല: ചരിത്രവും സാഹിത്യവും ജാതകവും രചിക്കാന്‍ ഇല വിട്ടു നല്‍കിയ പ്രിയ വൃക്ഷം. താളിയോലകളായി തലമുറകളുടെ അക്ഷര ഖനിക്ക് കാവലാളായ കരിമ്പന ഇന്ന് അന്യം നിന്നുപോകുന്ന നിലയിലാണ്. എന്നാല്‍ കരിമ്പനകളുടെ നാട്ടില്‍ വീണ്ടും കരിമ്പന ക്കാലത്തിന് പുതിയ തുടക്കമാകുകയാണ്. ചെങ്കല്‍ പഞ്ചായത്തിലാണ് പരീക്ഷണാടിസ്ഥാനത്തില്‍ കുള്ളന്‍പന കൃഷി തുടങ്ങുന്നത്.ആദ്യഘട്ടത്തില്‍ കൃഷിയില്‍ താത്പര്യമുള്ളവര്‍ക്ക് പരിശീലനം നല്‍കി തൈകള്‍ വിതരണം ചെയ്യും. അഞ്ച് മുതല്‍ പത്ത് വഷംകൊണ്ട് കായ്ക്കുന്ന കുള്ളന്‍ പനകള്‍ കൃഷിക്കാ യി എത്തിക്കാനുള്ള പരിശ്രമത്തിലാണ് ചെങ്കല്‍ സര്‍വീസ് സഹകരണ ബാങ്ക്. ഒരു കാലത്ത് തെങ്ങ് പോലെ തന്നെ കരിമ്പനകളാല്‍ നിറഞ്ഞ പ്രദേശമായിരുന്നു തെക്കന്‍ തിരുവിതാംകൂര്‍. പന കയറ്റു തൊഴിലും കള്ളും അക്കാനിയും കരുപ്പട്ടിയും നൊങ്കും പനങ്കിഴങ്ങും ഉത്പന്നങ്ങളുമായി വിപുലമായ തൊഴില്‍ ശൃംഖലയാണ് പനയെ ചുറ്റിപ്പറ്റി നിലനിന്നിരുന്നത്. കാലക്രമത്തില്‍ പന കയറ്റിന് ആളില്ലാത്തതും പനകള്‍ മുറിച്ചു മാറ്റപ്പെടാന്‍ കാരണമായി. തൂത്തുക്കുടിയിലെ പനഗവേഷണ കേന്ദ്രത്തില്‍ നിന്നും ഉത്പാദിപ്പിക്കുന്ന പതിനായിരത്തോളം കുള്ളന്‍ പനയുടെ തൈകളാണ് കൃഷിക്കായി എത്തിക്കുക. തൂത്തുക്കുടി യിലെ കിള്ളികുളം കാര്‍ഷിക കോളജ് ആന്‍ഡ് റിസര്‍ച്ച് ഇന്‍സ്റ്റിറ്റിയൂട്ടിലെ (എസി & ആര്‍ഐ) പന ഗവേഷണ കേന്ദ്രമാണ് പുതിയ കുള്ളന്‍ പന ഇനങ്ങള്‍ വികസിപ്പി ച്ചത്. പനയുടെ ഉയരം പന കയറ്റക്കാര്‍ക്ക് അപകടകരമാണെന്നതും പന കയറ്റത്തിന് തൊഴിലാളികളെ ലഭ്യമാകാത്തതും അതുവഴി പനയുടെ പൂര്‍ണ്ണ ശേഷി പ്രയോജന പ്പെടുത്താന്‍ കഴിയുന്നില്ലെന്നുമുള്ള വിലയിരുത്ത ലിലാണ് കുള്ളന്‍പന വികസിപ്പിച്ചത്. നീര, പന ശര്‍ക്കര, പന മിഠായി തുടങ്ങിയ പനയുടെ മൂല്യവര്‍ധിത ഉത്പന്നങ്ങള് ക്കായുള്ള ഗുണനിലവാര പരിശോധനാ ലാബും ഇവിടെ സജ്ജീകരിച്ചിട്ടുണ്ട്.

നാഗർകോവിൽ വിശുദ്ധ അൽഫോൻസാമ്മ തിരുനാളിനു കൊടിയേറി

നാഗർകോവിൽ: തെക്കൻ ഭരണങ്ങാനം എന്നറിയപ്പെടുന്ന നാഗർകോവിൽ വിശുദ്ധ അൽഫോൻസാമ്മയുടെ തിരുനാളിനു തക്കല വികാരി ജനറാൽ ഫാ. തോമസ് പൗവ്വത്തുപറമ്പിൽ കൊടിയേറ്റി. അഞ്ചുഗ്രാമം ഇടവക വികാരി ഫാ.ടിനു കോട്ടക്കപ്പറമ്പിൽ സിഎംഐ വിശുദ്ധ കുർബാന അർപ്പിച്ചു. പുന്നയ്നഗർ വികാരി ഫാ.മൈക്കിൾ ജോർജ് ബ്രൈറ്റ് , കോട്ടാർ രൂപത ഫാ. സതീഷ് കുമാർ ജോയ്, മറവൻകുടിയിരുപ്പു വികാരി ഫാ.സഹായ ആനന്ദു മറ്റും , കാട്ടതുറൈ പള്ളി വികാരി ഫാ.അഭിലാഷ് സേവ്യർ ,തടിക്കാരൻകോണം പള്ളി വികാരി ഫാ.പ്രിൻസ് ചേരിപ്പനാട്ട് , കല്ലുവിള പള്ളി വികാരി ഫാ. ഫാ.ആന്‍റണി മഹേഷ് തുടങ്ങിയവർ സമൂഹ ബലിയിൽ പങ്കെടുത്തു. തക്കല രൂപത ചാൻസിലർ ഫാ.ജോഷി കുളത്തുങ്കൽ വിശുദ്ധ അൽഫോൻസാമ്മയോടുള്ള നവനാൾ നടത്തി. ഫാ. ആന്‍റണി ജോസ് തിരുനാൾ സന്ദേശം നൽകി. തിങ്കളാഴ്ച്ച അൽഫോൻസാ സ്കൂളിലെ വിദ്യാർഥികൾക്ക് വേണ്ടി വിശുദ്ധ കുർബാനയും നവനാളും നേർച്ച ഭക്ഷണവും ഒരുക്കും. വൈകുന്നേരം ആറിന് നവനാളും തുടർന്ന് ശിവഗംഗൈ ബിഷപ് ഡോ. ലൂർദ് ആനന്ദം വിശുദ്ധ കുർബാന അർപ്പിക്കും. ഓഗസ്റ്റ് മൂന്നിന് വികാരിജനറാൾ ഫാ. തോമസ് പൗവ്വത്തുപറമ്പിലിന്‍റെ നേതൃത്വത്തിൽ നവനാളും തക്കല ബിഷപ് മാർ ജോർജ് രാജേന്ദ്രന്‍റെ കാർമികത്വത്തിൽ ആഘോഷമായ സമൂഹബലി അർപ്പിക്കും. തിരുനാളിന് മുന്നോടിയായുള്ള ക്രമീകരണങ്ങളെല്ലാം പൂർത്തിയായെന്ന് തീർഥാടന കേന്ദ്ര റെക്ടർ ഫാ.സനിൽ പന്തിച്ചിറയ്ക്കൽ വാർത്താസമ്മേളനത്തിൽ അറിയിച്ചു.

തദ്ദേശ തെരഞ്ഞെടുപ്പ്: ഇടതുപക്ഷ ഉദ്യോഗസ്ഥർ വോട്ടർ പട്ടിക അട്ടിമറിക്കുന്നുവെന്ന് വി.വി. രാജേഷ്

തിരുവനന്തപുരം: വരുന്ന തദ്ദേശ തെരഞ്ഞെടുപ്പിൽ പരാജയ ഭീതിയിലാണ്ട സിപിഎം നേതൃത്വം ഇടത് യൂണിയൻ അനുഭാവികളെ ഉപയോഗിച്ച് വോട്ടർ പട്ടിക അട്ടിമറിച്ചുവെന്ന് ബിജെപി സംസ്ഥാന സെക്രട്ടറി വി.വി രാജേഷ്. പാർലമെന്‍റ് തെരഞ്ഞെടുപ്പിൽ ബിജെപി ലീഡ് ചെയ്ത പഞ്ചായത്തുകളിലും വാർഡുകളിലുമാണ് വ്യാപകമായി വോട്ടർ പട്ടികയിൽ ക്രമക്കേടു നടത്തിയിരിക്കുന്നത്. ആറ്റുകാൽ വാർഡ് ബിജെപി വിജയിക്കുമെന്ന അശങ്കയുള്ളതിനാൽ ആറ്റുകാൽ ക്ഷേത്രമുൾപ്പെടുന്ന ബൂത്തിനെ ഇപ്പോൾ മണക്കാട് വാർഡിലാണ് ഉൾപ്പെടുത്തിയിട്ടുള്ളത്. ആറ്റുകാൽ ക്ഷേത്രമില്ലാത്ത ആറ്റുകാൽ വാർഡാണ് നിലവിലുള്ളത്. ഓരോ വാർഡിലും 9000 മുതൽ 9500 വോട്ടർമാർ വരെയാണ് ഉണ്ടാകേണ്ട തെന്നിരിക്കെ സിപിഎമ്മിന്‍റെ സംഘടനാ സ്വാധീനവും ന്യൂനപക്ഷ വോട്ടർമാരുടെ എണ്ണവും മാത്രം മാനദണ്ഡമാക്കിയാണ് വാർഡ് വിഭജനം നടത്തിയിട്ടുള്ളത്. ശ്രീകാര്യം വാർഡ് വിഭജിച്ച് രൂപീകരിച്ച പാങ്ങപ്പാറ വാർഡിൽ 2800 വോട്ടർമാരും,മൂന്നു ബൂത്തും മാത്രമുള്ളപ്പോൾ ചുറ്റുമുള്ള വാർഡുകളിൽ പലതിലും 10000ന് മുകളിൽ വോട്ടർമാരുണ്ട്. സി പി എമ്മിന് ലഭിയ്ക്കാൻ സാധൃതയില്ലാത്ത നൂറുകണക്കിന് വോട്ടർമാരുടെ പേരുകൾ പല വാർഡുകളിലെയും വോട്ടർ പട്ടികയിൽ നിന്നുമൊഴിവാക്കിയിട്ടുമുണ്ട്. തെരഞ്ഞെടുപ്പ് കമ്മീഷനെ നോക്കുകുത്തിയാക്കി സിപിഎം നേതൃത്വം തെരഞ്ഞെടുപ്പ് രേഖകളിൽ കൃത്യമം കാട്ടുന്നത്. രാഷ്‌ട്രീയ ലക്ഷ്യം മാത്രം മുൻനിറുത്തി പ്രവർത്തിയ്ക്കുന്ന ഉദ്യോഗസ്ഥരെ മാറ്റിനിറുത്തി ക്രമക്കേടുകൾ പരിഹരിക്കാൻ തെരഞ്ഞെടുപ്പ് കമ്മീഷൻ ഇടപെടണമെന്നും വി.വി. രാജേഷ് പറഞ്ഞു.

വൈദ്യുത ലൈൻ പൊട്ടി റോഡിൽ വീണു

വിഴിഞ്ഞം: ശക്തമായ കാറ്റും മഴയും മരങ്ങൾ വീണ് വൈദ്യുത ലൈൻ പൊട്ടി റോഡിൽ വീണു. കാർ യാത്രികർ അപകടത്തിൽ നിന്ന് കഷ്ടിച്ച് രക്ഷപ്പെട്ടു. ഇന്നലെ വൈകുന്നേരം വീശിയടിച്ച കാറ്റിൽ കോവളം സമുദ്രയിലാണ് മരം വീണത്. സ്വകാര്യ വ്യക്തിയുടെ പുരയിടത്തിൽ നിന്ന കൂറ്റൻ പ്ലാവ് മരവും തെങ്ങും കട പുഴകി ഇലക്ട്രിക് ലൈനിന് മേൽ പതിച്ചു. നാല് പോസ്റ്റുകൾ തകർന്ന് ലൈൻ കമ്പികൾ പൊട്ടി റോഡിന് കുറുകെ പതിച്ചതോടെ ഇതുവഴിയുള്ള ഗതാഗതവും സ്തംഭിച്ചു. ഈസമയം സമീപത്തെ ഹോട്ടലിലേക്ക് പോകാനായി ഒരു കാർ എത്തിയെങ്കിലും കഷ്ടിച്ച് രക്ഷപ്പെട്ടു. വിവരമറിഞ്ഞ് വിഴിഞ്ഞത്ത് നിന്നെത്തിയ ഫയർഫോഴ്സ് സംഘം മരങ്ങൾ വെട്ടിമാറ്റി ഗതാഗത തടസം ഒഴിവാക്കി. വൈദ്യുത വകുപ്പ് അധികൃതർ എത്തി വൈദ്യുതബന്ധം വിഛേദിച്ച് കൂടുതൽ അപകടം ഒഴിവാക്കി .

മയക്കുമരുന്നു കേസിൽ തടവും പിഴയും

തിരുവനന്തപുരം: 1.850 കിലോ കഞ്ചാവ് വിൽപന നടത്താൻ ശ്രമിച്ച കേസിലെ ഒന്നാം പ്രതിക്ക് കൊല്ലം കുണ്ട റ പെരിനാട് വില്ലേജിൽ ചിട്ടുകുന്നു പുത്തൻവീട്ടിൽ അഞ്ചലോസ് വിൽസണ് (62) രണ്ടു വർഷം തടവും രണ്ടു ലക്ഷം രൂപ പിഴയും ശിക്ഷ. രണ്ടാം പ്രതി രാജേശ്വാരിയെ തെളിവിന്‍റെ അഭാവത്തിൽ വെറുതെ വിട്ടു. ഒന്നാം അഡീഷണൽ ഡിസ്ട്രിക്ട് ആൻഡ് സെഷൻസ് ജഡ്ജി കെ.പി. അനിൽകുമാറിന്‍റേതാണ് ഉത്തരവ്.

പോങ്ങുമ്മൂട് അൽഫോൻസാ ദേവാലയത്തിൽ നവീകരണ ധ്യാനം

പോങ്ങുമ്മൂട്: തലസ്ഥാന നഗരിയിലെ ഭരണങ്ങാനം എന്നറിയപ്പെടുന്ന പോങ്ങുമ്മൂട് വി. അൽഫോൻസാ ദേവാലയത്തിൽ 27 ന് തീർഥാടന പദയാത്രയോട് കൂടി ആരംഭിക്കുന്ന തിരുന്നാളിന് മുന്നൊരുക്കമായി ഫാ. ജിസൺ പോൾ വെങ്ങാശേരി നേതൃത്വം നൽകുന്ന കുടുംബ നവീകരണ ധ്യാനത്തിനു തുടക്കമായി. ഇന്ന് വൈകുന്നേരം നാലു മുതൽ ആറുവരെ കുമ്പസാരത്തിനുള്ള സൗകര്യങ്ങൾ ഒരുക്കിയതായി വികാരി ഫാ.തോമസ്കുട്ടി വാഴപ്പറമ്പിൽ അറിയിച്ചു.

സഹോദരങ്ങള്‍ തമ്മിൽ അടിപിടി അനുജൻ വെട്ടേറ്റു മരിച്ചു

തിരുവനന്തപുരം : ചിറയിന്‍കീഴ് പെരുങ്ങുഴിയിൽ സഹോദരങ്ങള്‍ തമ്മിലുണ്ടായ അടിപിടിയില്‍ അനുജൻ വെട്ടേറ്റു മരിച്ചു. ചേട്ടനെ പോലീസ് അറസ്റ്റ് ചെയ്തു. കുഴിയം കോളനി വയൽത്തിട്ട വീട്ടിൽ രതീഷ് (31)ആണ് മരിച്ചത്. പ്രതി മഹേഷിനെ ചിറയിൻകീഴ് പൊലീസ് പിടികൂടി. കഴിഞ്ഞ ദിവസം രാത്രിയിൽ ആയിരുന്നു സംഭവം. ഇരുവരും മദ്യലഹരിയിലായിരുന്നു. സഹോദരങ്ങള്‍ തമ്മില്‍ വാക്കുതര്‍ക്കമുണ്ടാവുകയും ഇത് പിന്നീട് അടിപിടിയായി മാറി. തുടര്‍ന്ന് മഹേഷ് രതീഷിന്‍റെ കഴുത്തില്‍ വെട്ടിപ്പരുക്കേല്‍പ്പിക്കുകയായിരുന്നു. ഗുരുതരമായി പരിക്കേറ്റ രതീഷിനെ ചിറയിൻകീഴ് താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ ആയില്ല. പോസ്റ്റ്‌ മോർട്ടത്തിന് ശേഷം മൃതദേഹം ബന്ധുക്കൾക്ക് വിട്ടു കൊടുത്തു. ഇരുവരും അവിവാഹിതർ ആണ്. മയക്കു മരുന്ന് ഉൾപ്പെടെയുള്ള ലഹരി വസ്തുക്കൾ ഉപയോഗിക്കുന്നവരാണ് ഇരുവരും. മഹേഷിനെ റിമാൻഡ് ചെയ്തു.

എടിഎമ്മിൽനിന്നും ലഭിച്ച 69,500 രൂപ തിരിച്ചേൽപ്പിച്ച് മാതൃകയായി

വെഞ്ഞാറമൂട്. എടിഎം മെഷ്യനില്‍ നിന്നും ലഭിച്ച 69,500 രൂപ ബാങ്കിലേല്‍്പിച്ച് റസിഡന്‍റ്സ് അസോസിയേഷന്‍ ഭാരവാഹി മാതൃകയായി. വട്ടപ്പാറ കെകെ നഗര്‍ റസിഡന്‍റ്സ് അസോസിയേഷന്‍ സെക്രട്ടറി ജെ.വി. വിനോദാണ് പണം ബാങ്കിന് കൈമാറിയത്. ഇക്കഴിഞ്ഞ ഞായറാഴ്ചയാണ് യൂണിയന്‍ ബാങ്ക് വട്ടപ്പാറ ശാഖയോടനുബന്ധിച്ച് പ്രവര്‍ത്തിക്കുന്ന എടിഎം കൗണ്ടറില്‍ നിന്നും പണം ലഭിക്കുന്നത്. അന്ന് അവധിയായിരുന്നതിനാല്‍ ബാങ്കിലേല്‍പ്പിക്കാനും കഴിഞ്ഞില്ല. തുടര്‍ന്ന് തൊട്ടടുത്തുള്ള വട്ടപ്പാറ പോലീസ് സറ്റേഷനിലെത്തി സര്‍ക്കിള്‍ ഇന്‍സ്‌പെക്ടറോട് വിവരം പറയുകയും അദ്ദേഹത്തിന്‍റെ സാന്നിദ്ധ്യത്തില്‍ പണം എണ്ണിയപ്പോള്‍ 69,500 രൂപയുണ്ടന്ന് കണ്ടെത്തുകയും ചെയ്തു. ഇതോടെ സര്‍ക്കിള്‍ ഇന്‍സ്‌പെക്ടര്‍ ബാങ്ക് മാനേജരുമായി ബന്ധപ്പെട്ടു. ബാങ്ക് മാനേജരെത്തി സിസിടിവി ദൃശ്യങ്ങള്‍ പരിശോധിച്ചതില്‍ നിന്നും ഒരു ഇടപാടുകാരന്‍ എടിഎം മെഷ്യനിലൂടെ നിക്ഷേപിക്കാന്‍ കൊണ്ടു വന്ന പണം സാങ്കേതിക പ്രശ്‌നങ്ങള്‍ കാരണം നടക്കാതെ പോയെന്നും അതാരാണന്ന് തിരിച്ചറിയുകയും ചെയ്ത് അയാളെ വിവരമറിയിക്കുകയും ചെയ്തു. തുടർന്ന് കഴിഞ്ഞ ദിവസം ബാങ്ക് മാനേജര്‍ക്ക് സ്റ്റേഷനില്‍ എത്തി സര്‍ക്കിള്‍ ഇന്‍സ്‌പെക്ടര്‍ ശ്രീജിത്ത്, എസ്ഐ ബിനിമോള് എന്നിവരുടെ സാന്നിദ്ധ്യത്തില്‍ പണം കൈമാറുകയായിരുന്നു.

കെഎസ്ആർടിസി ബസും വാനും കൂട്ടിയിടിച്ച് 14 പേർക്ക് പരിക്ക്

നെടുമങ്ങാട്: കെഎസ്ആർടിസി ബസും സ്കൂൾ വാനും കൂട്ടിയിടിച്ച് 14 പേർക്ക് പരിക്കേറ്റു. നെടുമങ്ങാട് ഗവ.ഗേൾസ് ഹയർ സെക്കൻഡറി സ്കൂളാണ് അപകടത്തിൽപ്പെട്ടത്. ഇന്നലെ വൈകുന്നേരം അഞ്ചോടെ ഇരിഞ്ചയം ഉണ്ടപ്പാറയ്ക്ക് സമീപത്തായിരുന്നു അപകടം. വാൻ ഡ്രൈവർ ശരത് ചന്ദ്ര പ്രസാദ് (31), പാചക തൊഴിലാളി താന്നിമൂട് സ്വദേശിനി ബിനു (40) എന്നിവർ മെഡിക്കൽ കോളജ് ആശുപത്രിയിൽ ചികിത്സ തേടി. പരിക്കേറ്റ വാനിലെ സഹായി നഗരിക്കുന്ന് സ്വദേശിനി കവിത (45 മറ്റു പരിക്കേറ്റ 11 വിദ്യാർഥികളും നെടുമങ്ങാട് ജില്ലാ ആശുപത്രിയിൽ ചികിത്സ തേടി. ഉണ്ടപ്പാറയിൽ കുട്ടികളെ ഇറക്കി ഇരിഞ്ചയത്ത് പോകാനായി താന്നിമൂട്ടിലേക്ക് പോകുകയായിരുന്ന സ്കൂൾ വാനും എതിർദിശയിൽ എത്തിയ കെഎസ്ആർടിസി ബസും ആണ് അപകടത്തിൽപ്പെട്ടത്. സ്കൂൾ വാനിൽ ഉണ്ടായിരുന്ന നാലു കുട്ടികളും കെഎസ്ആർടിസി ബസിൽ ഉണ്ടായിരുന്ന ഏഴ് വിദ്യാർഥികൾക്കുമാണ് പരിക്കേറ്റത്. കെഎസ്ആർടിസി ബസിലെ മൂന്ന് കുട്ടികൾ ഗേൾസ് ഹയർ സെക്കൻഡറി സ്കൂളിലെയും നാലു പേർ മറ്റ് സ്കൂളിലെയും കുട്ടികളാണ്.

യുവാവ് തൂങ്ങിമരിച്ച നിലയില്‍

മെഡിക്കല്‍കോളജ്: യുവാവിനെ മുറിക്കുള്ളില്‍ തൂങ്ങിമരിച്ച നിലയില്‍ കണ്ടെത്തി. പാലക്കാട് സ്വദേശി ഷാജി (42) ആണ് മരിച്ചത്. 24ന് രാത്രി എട്ടോടെ തമ്പാനൂര്‍ അരിസ്റ്റോ ജംഗ്ഷനു സമീപത്തെ രാമകൃഷ്ണ ബില്‍ഡിംഗിനുള്ളിലാണ് മൃതദേഹം കണ്ടെത്തിയത്. എ1 പ്രൈവറ്റ് ബസിലെ ക്ലീനറായി ജോലിനോക്കി വരികയായിരുന്നു ഷാജി. മരണകാരണം വ്യക്തമല്ല. മൃതദേഹം തിരുവനന്തപുരം മെഡിക്കല്‍കോളജില്‍ പോസ്റ്റുമോര്‍ട്ടം നടത്തി. തമ്പാനൂര്‍ പോലീസ് കേസെടുത്തു.

നെയ്യാർ ഡാമിൽ രണ്ടുയുവാക്കൾ മുങ്ങി മരിച്ചു

നെയ്യാർഡാം : നെയ്യാർ ഡാമിൽ യുവാക്കൾ മുങ്ങി മരിച്ചു. നെയ്യാർ ഡാമിലെ പന്തപ്ലാമൂട്, ആനക്കുളം സംഭരണിയിലാണ് വ്യാഴാഴ്ച രാത്രി 10 മണിയോടെ കുളിക്കാൻ എത്തിയ അമ്പൂരി പൂച്ചമുക്ക് കല്ലുമാക്കൽ വീട്ടിൽ അർജുൻ (20), കാട്ടാക്കട അഞ്ചുതെങ്ങ് മൂട് മണ്ണാങ്കോണം, മുല്ലശേരി വീട്ടിൽ ദുർഗാ പ്രസാദ് (28) എന്നിവരാണ് മരിച്ചത്. കുളിക്കാൻ എത്തിയ ഇവർ ജലാശയത്തിൽ അകപ്പെടുകയായിരുന്നു. തുടർന്ന് ഇന്നലെ രാവിലെ 7. 15 ആണ് യുവാക്കളുടെ മൃതദേഹം പുറത്തെടുത്തത്. നാലംഗ സംഘമാണ് വ്യാഴാഴ്ച രാത്രി 10 മണിയോടെ ആനക്കുളത്തിനു സമീപം എത്തിയത്. കരയിൽ ഇരുന്നു മദ്യപിച്ചശേഷം ദുർഗാദാസിന്‍റെയും അർജുനന്‍റെയും സുഹൃത്തുക്കളായ അമ്പൂരി സ്വദേശി അഭിരാം, കാട്ടാക്കട സ്വദേശി ബിനീഷ് എന്നിവർ അമ്പൂരിലേക്ക് ബൈക്കിൽ പോകുകയും അഭിരാമിനെ അമ്പൂരിയിൽ ഇറക്കിയശേഷം ബിനീഷ് തിരികെ എത്തുകയും ചെയ്തു. അപ്പോഴേക്കും ദുർഗാദാസ്, അർജുൻ എന്നിവരെ കാണാതായിരുന്നു. തുടർന്ന് നടന്ന തെരച്ചിലിൽ ഇവരുടെ ചെരുപ്പ് കണ്ടെത്തുകയും ചെയ്തു. ഇതോടെ പോലീസിനെ വിവരം അറിയിച്ച് പോലീസ് രാത്രിയോടെ സ്ഥലത്തെത്തിയെങ്കിലും പ്രതികൂല കാലാവസ്ഥയിൽ തെരച്ചിൽ നടന്നില്ല. തുടർന്ന് രാവിലെ ഏഴോടെ ഇരുവരുടെയും മൃതദേഹം ജലാശയത്തിൽ പൊങ്ങുകയായിരുന്നു. നെയ്യാർ ഡാമിൽ നിന്നും അഗ്നി രക്ഷാസേന എത്തി മൃതദേഹങ്ങൾ കരയ്ക്ക് എത്തിച്ചു. പോലീസ് തുടർനടപടികൾ സ്വീകരിച്ചു .

വാവുബലി ദിവസം കെഎസ്ആര്‍ടിസി സര്‍വീസുകള്‍ കുറച്ചതായി പരാതി

വെള്ളറട: വാവുബലി ദിവസം കെഎസ്ആര്‍ടിസി സര്‍വീസുകള്‍ വെട്ടിക്കുറച്ചതായി പരാതി. വെള്ളറടയില്‍നിന്നും നെയ്യാറ്റിന്‍കരയിലേക്കുള്ള സർവീസാണ് അകാരണമായി വെട്ടിക്കുറച്ചത്. ഇന്നലെ ഉച്ചയ്ക്കു 12 നുശേഷം ഉച്ചതിരിഞ്ഞു രണ്ടിനാണ് അടുത്ത സര്‍വീസ് നടന്നത്. യാത്രക്കാരിൽ പലരും കെഎസ്ആര്‍ടിസി വെള്ളറട ഡിപ്പോയില്‍ വിളിച്ചെങ്കിലും പ്രധാനപ്പെട്ട കളക്‌ഷന്‍ ലഭിക്കുന്ന റൂട്ടുകളിലേക്കു ബസിനെ മാറ്റിയെന്നാണ് അറിയാൻ സാധിച്ചത്. ഇതിനെതിരെ നാട്ടുകാര്‍ ബന്ധപ്പെട്ട അധികൃതര്‍ക്ക് പരാതി നല്‍കാനുള്ള തയാറെടുപ്പിലാണ്.

ഉമ്മന്‍ചാണ്ടി സ്മൃതിയും പഠനോപകരണ വിതരണവും

വെള്ളറട: ഇന്ത്യന്‍ നാഷണല്‍ കോണ്‍ഗ്രസ് ചികിത്സാധന സഹായം, പഠനോപകരണ വിതരണം, ഭക്ഷ്യക്കിറ്റ് വിതരണവും സംഘടിപ്പിച്ചു. കാലാട്ടുകാവ് വാർഡിൽ നടന്ന ഉമ്മന്‍ചാണ്ടി അനുസ്മരണം കെപിസിസി എക്‌സിക്യൂട്ടീവ് മെമ്പര്‍ എ.കെ. ശശി ഉദ്ഘാടനം ചെയ്തു. ബ്ലോക്ക് കോണ്‍ഗ്രസ് ജനറല്‍ സെക്രട്ടറി അലക്‌സ് ജെയിംസ് അധ്യക്ഷത വഹിച്ചു. പത്താം ക്ലാസ്, പ്ലസ് ടു വിജയികളെ ആദരിക്കല്‍ തുടങ്ങിയവ ഉള്‍പ്പെടുത്തി വര്‍ണ്ണം 2025 എന്ന പേരിലാണ് പരിപാടികള്‍ സംഘടിപ്പിച്ചത്. ബ്ലോക്ക് കോണ്‍ഗ്രസ് പ്രസിഡന്‍റ് അഡ്വ. ഗിരീഷ് കുമാര്‍, മണ്ഡലം പ്രസിഡന്‍റ് ലത, അമ്പൂരി മണ്ഡലം പ്രസിഡന്‍റ് അഡ്വ. ശരീഫ്, അമ്പൂരി യുഡിഎഫ് ചെയര്‍മാന്‍ റോയ് തടി കാട്ടില്‍, എസ്. വിജയചന്ദ്രന്‍, മാത്തുക്കുട്ടി, ജോസ് മാത്യു പോളയ്ക്കന്‍, മുണ്ടവന്‍ കുന്ന് ശശി, തുളസീധരന്‍, ഐഎന്‍ടിയുസി കള്ളിക്കാട് മണ്ഡലം പ്രസിഡന്‍റ് ജെയിംസ്, എല്‍.കെ. കുമാരി, ബ്ലോക്ക് കോണ്‍ഗ്രസ് വൈസ് പ്രസിഡന്‍റ് ഗോപാലകൃഷ്ണന്‍ തുടങ്ങിയവര്‍ പങ്കെടുത്തു. വാര്‍ഡ് കമ്മിറ്റിയുടെ സെക്രട്ടറി ശാലിനി സ്വാഗതവും മണ്ഡലം ഭാരവാഹി ജയന്‍ നിരപ്പുകാല നന്ദിയും പറഞ്ഞു.

നെയ്യാർ അണക്കെട്ടിൽ ജലനിരപ്പ് ഉയരുന്നു

നെയ്യാർ ഡാം: നെയ്യാർ അണക്കെട്ടിൽ ജലനിരപ്പ് ഉയരുന്നു. ഇന്നലെ വൈകുന്നേരം മുതൽ മഴ തോരാതെ പെയ്യുന്നതും അണക്കെട്ടിലേക്കു വൃഷ്ടി പ്രദേശത്തു നിന്നുള്ള നീരൊഴുക്കുമാണു ജലനിരപ്പ് ഉയരാൻ കാരണമാകുന്നത്. അണക്കെട്ടിലെ പരമാവധി ജലനിരപ്പ് 84.750 മീറ്റർ ആണ്. ഇപ്പോൾ ജലനിരപ്പ് 83.86 മീറ്ററായി ഉയർന്നിട്ടുണ്ട്. അണക്കെട്ടിലെ രണ്ടാമത് മുന്നറിയിപ്പ് അളവ് 83.75 മീറ്റർ ആണ്. ഇപ്പോൾ ഇതു കടന്നിരിക്കുകയാണ്. നിലവിൽ അണക്കെട്ടിന്‍റെ നാലു ഷട്ടറുകളും 10 സെന്‍റീമീറ്റർ വീതം ഉയർത്തിയിട്ടുണ്ട്. അതേസമയം ഈ നിലയ്ക്ക് മഴ തുടർന്നാൽ ഇനിയും ഷട്ടറുകൾ ഉയർത്തേണ്ട സാഹചര്യമാണ് ഉള്ളത്. നെയ്യാറിന്‍റെ ഇരു കരകളിലുമുള്ളവർ ജാഗ്രത പാലിക്കാൻ നിർദേശമുണ്ട്.

വിദ്യാർഥിനിയുടെ ആത്മഹത്യ: അയൽവാസിയായ വീട്ടമ്മ അറസ്റ്റിൽ

വിഴിഞ്ഞം: അസഭ്യവർഷത്തിൽ മനംനൊന്ത് വിദ്യാർഥിനി തൂങ്ങി മരിച്ച സംഭവത്തിൽ, അയൽവാസിയായ വീട്ടമ്മയെ പ്രേരണാകുറ്റം ചുമത്തി വിഴിഞ്ഞം പോലീസ് അറസ്റ്റ് ചെയ്തു. വെങ്ങാനൂർ അമരിവിള ഞെടിഞ്ഞിൽ കണ്ണേറിൽ എ. ആർ. ഭവനിൽ അശോകന്‍റെ ഭാര്യ രാജം (54) ആണ് അറസ്റ്റിലായത്. വെങ്ങാനൂർ വെണ്ണിയൂർ അമരിവിള ഞെടിഞ്ഞിൽ വീട്ടിൽ അജുവിന്‍റെയും സുനിതയുടെയും മകൾ അനീഷ (18) യുടെ മരണവുമായി ബന്ധപ്പെട്ടാണു വിഴിഞ്ഞം സിഐ പ്രകാശ്, എസ്ഐ ദിനേശ്, പോലീസുകാരായ രജിത, മിനി, സുനിത, ദിനേശ്, പ്രസന്നൻ എന്നിവർ ചേർന്നു പിടികൂടിയത്. അയൽവാസിയുടെ മാനസിക പീഡനമാണ് മകളുടെ മരണത്തിലേക്കു വഴിതെളിച്ചതെന്നു കാണിച്ചു പിതാവ് വിഴിഞ്ഞം പോലീസിൽ പരാതി നൽകിയിരുന്നു. കേസെടുത്ത് അന്വേഷണം തുടങ്ങിയതോടെ രാജം ഒളിവിൽ പോയി. ബന്ധുവീടുകളിൽ മാറി മാറി ഒളിവിൽ കഴിഞ്ഞ രാജത്തെ ഇന്നലെ ചെങ്കലിൽനിന്ന് അറസ്റ്റ് ചെയ്യുകയായിരുന്നു. ധനുവച്ച പുരം ഐടിഐ യിൽ പഠിക്കാൻ അഡ്മിഷൻ കഴിഞ്ഞു ക്ലാസ് തുടങ്ങുന്നതും കാത്തിരിക്കുകയായിരുന്നു അനീഷ. പ്രതിയെ കോടതിയിൽ ഹാജരാക്കി റിമാൻഡു ചെയ്തു.

യുബിഐ തിരുവനന്തപുരം റീജണിന് ഔദ്യോഗിക ഭാഷ നിർവഹണ പുരസ്കാരം

തിരുവനന്തപുരം: 2024-25 വർഷത്തെ മികച്ച ഔദ്യോഗിക ഭാഷാ നിർവഹണത്തിനുള്ള ഒന്നാം സമ്മാനം തിരുവനന്തപുരത്തെ യൂണിയൻ ബാങ്ക് ഓഫ് ഇന്ത്യ റീജണൽ ഓഫീസിന് ലഭിച്ചു. ഡെപ്യൂട്ടി റീജണൽ ഹെഡ് ദീപക് ചാർലി, ടുലിക് ജനറൽ മാനേജരും ചെയർമാനുമായ എസ്. സുനിൽ കുമാർ, ഔദ്യോഗിക ഭാഷാ സീനിയർ മാനേജർ കെ. രാജേഷ്, ഇന്ത്യാ ഗവൺന്‍റിന്‍റെ ആർഐഒ ഡെപ്യൂട്ടി ഡയറക്ടർ നിർമൽ കുമാർ ദുബെ എന്നിവർ ചേർന്നു പുരസ്കാരം സമ്മാനിച്ചു. ആർ‌ബി‌ഐ റീജിയണൽ ഡയറക്ടർ തോമസ് മാത്യു, നബാർഡ് സി‌ജി‌എം നാഗേഷ് കുമാർ അനുമല, ടോളിക് മെമ്പർ സെക്രട്ടറി ഷോജോ ലോബോ, മറ്റ് ഓഫീസ് മേധാവികൾ, ഒ‌എൽ ഓഫീസർമാർ എന്നിവർ യോഗത്തിൽ പങ്കെടുത്തു.

ചായം പൊറ്റ ട്രാന്‍സ്‌ഫോര്‍മറിലെ കാട്ടുവള്ളികളെ വെട്ടിമാറ്റി

വെള്ളറട: ചായം പൊറ്റയിലെ ട്രാന്‍സ്‌ഫോമറിനെ അപകടാവസ്ഥയിലാക്കി വള്ളിപ്പടർപ്പുകൾ മൂടിയത് കെഎസ്ഇബി അധികൃതർ വെട്ടിമാറ്റി. ട്രാൻസ്ഫോർമറിന്‍റെ അപകടാവസ്ഥയെക്കുറിച്ചു ദീപിക കഴിഞ്ഞദിവസം വാര്‍ത്ത നൽകിയിരുന്നു. ഇതേ തുടർന്നാണ് കെഎസ്ഇബി ജീവനക്കാർ അടിയന്തരമായി ഇടപെട്ട് ട്രാൻസ്ഫോർമറിലെ വള്ളിപ്പടർപ്പുകൾ വെ‌ട്ടിമാറ്റി പരിസരം ഉൾപ്പെടെ ശുചീകരിച്ചത്.

വാർഡ് മെമ്പർക്ക് മൂന്നു വർഷത്തെ കഠിനതടവും ഒരു ലക്ഷം രൂപ പിഴയും

കല്ലറ പഞ്ചായത്ത്‌ ഭവന നിർമാണ പദ്ധതി ക്രമക്കേട് കല്ലറ: ഭവന നിർമാണ പദ്ധതിയിൽ ക്രമക്കേടു നടത്തിയ കേസിൽ കല്ലറ പഞ്ചായത്ത് മെമ്പർക്കു മൂന്നുവർഷം കഠിന തടവും ഒരു ലക്ഷം പിഴയും വിധിച്ച് കോടതി. കല്ലറ പഞ്ചായത്തിലെ വെള്ളംകുടി വാർഡ് മെമ്പറും സിപിഎം കല്ലറ ലോക്കൽ കമ്മിറ്റി അംഗവുമായ കെ. ഷീലയെയാണു മൂന്നു വർഷം കഠിന തടവും ഒരു ലക്ഷം പിഴ ഈടാക്കാനും തിരുവനന്തപുരം വിജിലൻസ് കോടതി ജഡ്ജി എ. മനോജ് വിധിച്ചത്. 2011-2012 കാലഘട്ടത്തിൽ കല്ലറ പഞ്ചായത്ത് വാർഷിക പദ്ധതിയിൽ ഉൾപ്പെടുത്തി ഭവന നിർമാണ പദ്ധതി നടപ്പിലാക്കിയിരുന്നു. 2011 ആഗസ്റ്റ് മൂന്നിനു വെള്ളം കുടി വാർഡിലേക്കുള്ള ഗുണഭോക്താക്കളെ ഗ്രാമസഭ തീരുമാനി ക്കുകയും മിനിട്‌സ് ബുക്കിൽ രേഖപ്പെടുത്തുകയും ചെയ്തു. ആ കാലയളവിൽ വെള്ളംകുടി വാർഡ് മെമ്പർ ആയിരുന്ന ഷീല, ഗ്രാമസഭ തീരുമാനിച്ച ഗുണഭോക്താക്കളുടെ ലിസ്റ്റിൽ അഴിമതിയും തിരിമറിയും നടത്തി ലിസ്റ്റിൽ ഇല്ലാത്തവരെ കൃത്രിമമായി ഉൾപ്പെടുത്തി ആനുകൂല്യം വാങ്ങി നൽകുകയായിരുന്നു. ഇതിനെതിരെ കോൺഗ്രസ്‌ കല്ലറ മണ്ഡലം കമ്മിറ്റി സെക്രട്ടറി പി. അനികുട്ടൻ ഫയൽ ചെയ്ത ഹർജിയുടെ അടിസ്ഥാനത്തിലാണു വിജിലൻസ് കോടതി കേസെടുക്കാൻ ഉത്തരവിട്ടത്. വിജിലൻസിനുവേണ്ടി പബ്ലിക് പ്രോസിക്യൂട്ടർ വീണാ സതീഷ് ഹാജരായി.

യുവതിയുടെ വയറ്റിൽ 41 റബര്‍ ബാൻഡുകള്‍..!

പാറശാല: വയറു വേദനവുമായി ചികിത്സതേടിയയെത്തിയ യുവതിയുടെ വയറിനുള്ളില്‍ നിന്നും റബര്‍ ബാൻഡുള്‍ കണ്ടെത്തി. പാറശാല സരസ്വതി ആശുപത്രിയിലാണ് സംഭവം. ശസ്ത്രക്രിയയയ്ക്കു വിധേയയായ 40 വയസുകാരിയായ യുവതിയുടെ വയറ്റില്‍ നിന്നാണ് റബര്‍ ബാൻഡുകള്‍ കണ്ടെത്തിയത്. നാലു ദിവസമായി വയറുവേദനയും വയറു വീര്‍പ്പുമുണ്ടായിരുന്നു. ഇതേ തുടർന്നാണ് ഇവർ ആശുപത്രിയിലെത്തിയത്. സ്‌കാനിംഗ് പരിശോധനയില്‍ ചെറുകുടലില്‍ തടസമാണെന്നു കണ്ടതി യതിനെ തുടര്‍ന്നു രോഗിയെ അടിയന്തിര ശസ്ത്രക്രിയയ്ക്ക് വിധേയമാക്കുകയായിരുന്നു. ശസ്ത്രക്രിയ സമയത്തു ചെറുകുടലിനുള്ളില്‍ കാണപ്പെട്ട മുഴ, തുറന്നു നീക്കാന്‍ ശ്രമിച്ചപ്പോഴാണ് ഒട്ടേറെ റബർ ബാന്‍ഡുകള്‍ ഒന്നിനോടൊന്നു കൂടിച്ചേര്‍ന്ന് ഒരു പന്തുപോലെയായി ഇരിക്കുന്ന നിലയിൽ കണ്ടെത്തിയത്. തുടർന്നു 41 റബർ ബാൻഡുകളാണ് നീക്കം ചെയ്തത്. ഇവ പൂര്‍ണമായും പെറുക്കി മാറ്റി കുടലില്‍ തുന്നലിട്ട് ശസ്ത്രക്രിയ പൂര്‍ത്തിയാക്കി. ഇപ്പോള്‍ രോഗി സുഖം പ്രാപിച്ചു വരുന്നു. ഒരു സ്വകാര്യ സ്ഥാപനത്തില്‍ ജോലിചെയ്യുന്ന യുവതിക്ക് ഇടയ്ക്കിടെ റബര്‍ബാന്‍ഡ് വായിലിട്ടു ചവയ്ക്കുന്ന ശീലം ഉണ്ടായിരുന്നതായി വീട്ടുകാര്‍ പറഞ്ഞു. സ്വന്തം തലയിലെ മുടി, ഭക്ഷ്യയോഗ്യമല്ലാത്ത ചിലസാധനങ്ങള്‍ തുടങ്ങിയ കഴിക്കുന്നതു മാനസിക വൈകല്യമുള്ളവരില്‍ കണ്ടുവരാറുണ്ടെങ്കിലും സാധാരണക്കാരിൽ ഇത് അപൂർവമാണെന്ന് ആശുപത്രി മേധാവി ഡോ. എസ്.കെ. അജയ്യകുമാര്‍ പറഞ്ഞു.

ഓണ്‍ലൈന്‍ വ്യാപര തട്ടിപ്പ്: ഡല്‍ഹി സ്വദേശി പിടിയില്‍

പേരൂര്‍ക്കട: ഓൺലൈൻ വ്യാപാര തട്ടിപ്പിലൂടെ ലക്ഷങ്ങള്‍ കൈക്കലാക്കിയ ഡല്‍ഹി സ്വദേശിയെ തിരുവനന്തപുരം സിറ്റി സൈബര്‍ ക്രൈം പോലീസ് അറസ്റ്റുചെയ്തു. പീതംപുര സ്വദേശി ഇന്ദര്‍ പ്രീത് സിംഗ് (42) ആണ് അറസ്റ്റിലായത്. കേന്ദ്രസര്‍ക്കാര്‍ അംഗീകാരമുള്ള വ്യാപാര സ്ഥാപനമാണെന്നു യൂട്യൂബിലൂടെ പരസ്യം നല്‍കുകയും മികച്ച ലാഭം ലഭിക്കുമെന്നു പറഞ്ഞുവിശ്വസിപ്പിക്കുകയും ചെയ്തു തിരുവനന്തപുരം സ്വദേശിയായ യുവാവില്‍നിന്ന് 81 ലക്ഷം രൂപയാണ് പ്രതി തട്ടിയെടുത്തത്. ആറു വ്യത്യസ്ത ബാങ്ക് അക്കൗണ്ടുകളിലേക്കാണ് യുവാവ് ട്രാന്‍സ്ഫര്‍ ചെയ്തു നല്‍കിയത്. ലഭിക്കുമെന്നു പറഞ്ഞ പണം എടിഎമ്മില്‍ നിന്നു ലഭിക്കാതെ വന്നതോടെയാണ് തട്ടിപ്പ് മനസിലായത്. തുടര്‍ന്ന് ജൂണ്‍ 18ന് സൈബര്‍ ക്രൈമില്‍ പരാതി നല്‍കുകയും ചെയ്തത്. ചാരിറ്റി പ്രവര്‍ത്തനം നടത്തുന്നതായി കാണിച്ചു തരപ്പെടുത്തിയ ഒരു സ്ഥാപനത്തിന്‍റെ പേരിലെ അക്കൗണ്ടിലേക്കാണ് തട്ടിപ്പു തുക എത്തിയതെന്നു പോലീസ് അന്വേഷണത്തില്‍ കണ്ടെത്തി. പ്രതിക്കു പിന്നില്‍ വേറെയും സംഘങ്ങള്‍ ഉണ്ടോയെന്ന് അന്വേഷിച്ചുവരുന്നുണ്ട്. സൈബര്‍ ക്രൈം സിഐ എസ്. നിയാസ്, സിപിഒമാരായ സമീര്‍ഖാന്‍, ശ്രീജിത്ത് റോയി, ഗോവിന്ദ് മോഹന്‍ എന്നിവര്‍ ഉള്‍പ്പെട്ട സംഘം ഡല്‍ഹിയില്‍ മൂന്നുദിവസം നടത്തിയ അന്വേഷണത്തിനൊടുവിലാണ് പ്രതിയെ കണ്ടെത്തിയത്. അറസ്റ്റിലായ പ്രതിയെ കോടതി റിമാന്‍ഡ് ചെയ്തു.

സുരക്ഷാജീവനക്കാരന്‍ ഓടിച്ച ബൈക്ക് പാഞ്ഞുകയറി രണ്ടുപേർക്കു പരിക്ക്

പേരൂര്‍ക്കട: ഇന്‍ഫോസിസിലെ സുരക്ഷാജീവനക്കാരന്‍ ഓടിച്ച ബൈക്ക് പാഞ്ഞുകയറി 15 വയസുവീതം പ്രായമുള്ള രണ്ടുപെണ്‍കുട്ടികള്‍ക്കു പരിക്കേറ്റു. ഇരുവരെയും തിരുവനന്തപുരം ജി.ജി ആശുപത്രിയില്‍ പ്രവേശിപ്പിച്ചു. ഇന്നലെ രാവിലെ 7.30നു നാലാഞ്ചിറ കുരിശടിയിലായിരുന്നു അപകടം. ട്യൂഷന്‍ കഴിഞ്ഞു വീട്ടിലേക്കു വരികയായിരുന്ന നാലാഞ്ചിറ സ്വദേശിനികളായ വിദ്യാര്‍ഥിനികള്‍ക്കാണു പരിക്കേറ്റത്. നെടുമങ്ങാട് വാളിക്കോട് സ്വദേശി സനല്‍ (40) ഓടിച്ചിരുന്ന ബൈക്കാണ് ഫുട്പാത്തിലൂടെ നടന്നുപോകുകയായിരുന്ന പെണ്‍കുട്ടികള്‍ക്ക ുനേരേ പാഞ്ഞുകയറിയത്. ബൈക്ക് ഇടിച്ചയുടന്‍ തന്നെ ഇരുവരും പിറകിലേക്കു മറിഞ്ഞുവീഴുകയായിരുന്നു. പെണ്‍കുട്ടികളുടെ താടിയെല്ലിനും കൈകാലുകള്‍ക്കും പരിക്കേറ്റു. ബൈക്കു വന്നിടിച്ചതോടെ ഇരുവരുടെയും പല്ലുകള്‍ ഇളകിപ്പോയിട്ടുണ്ട്. ഇവരില്‍ ഒരാളുടെ തലയില്‍ രക്തം കട്ടപിടിച്ചതിനാല്‍ വിദഗ്ധ ചികിത്സ വേണ്ടിവരുമെന്നു ഡോക്ടർമാർ വ്യ ക്തമാക്കി. കുട്ടി ആശുപത്രിയില്‍ കഴിഞ്ഞുവരികയാണ്. നാലാഞ്ചിറയിലെ വിദ്യാലയത്തില്‍ പഠിക്കുന്നവരാണ് ഇരുവരും. ജോലികഴിഞ്ഞു നാലാഞ്ചിറയില്‍ നിന്ന് എംസി റോഡുവഴി വീട്ടിലേക്കു മടങ്ങുകയായിരുന്നു സനല്‍. ഇയാള്‍ ഉറങ്ങിപ്പോയതാണ് വാഹനം റോഡില്‍നിന്നു നിയന്ത്രണംതെറ്റി ഫുട്പാത്തിലേക്കു കയറാന്‍ കാരണമെന്നു മണ്ണന്തല പോലീസ് അറിയിച്ചു. ബൈക്കില്‍നിന്നുള്ള വീഴ്ചയില്‍ സനലിന്‍റെ വാരിയെല്ലുകള്‍ ഒടിഞ്ഞിട്ടുണ്ട്. സനല്‍ തിരുവനന്തപുരം മെഡിക്കല്‍ കോളജ് ആശുപത്രിയില്‍ ചികിത്സയിലാണ്. മണ്ണന്തല പോലീസ് കേസെടുത്തു.

നെയ്യാറ്റിന്‍കരയില്‍ വാഹനപാര്‍ക്കിംഗ് സംവിധാനമില്ല; യാത്രക്കാര്‍ വലയുന്നു

നെയ്യാറ്റിന്‍കര : നഗരസഭാ പ്രദേശത്ത് വാഹന പാര്‍ക്കിംഗ് സംവിധാനങ്ങളുടെ അഭാവം യാത്രക്കാരെ വലയ്ക്കുന്നു. എന്നാൽ നെയ്യാറ്റിന്‍കര താലൂക്ക് ഹെഡ് ക്വാര്‍ട്ടേഴ്സായി കണക്കാക്കപ്പെടുന്ന നെയ്യാറ്റിന്‍കര നഗരപരിസരം അനധികൃത വാഹന പാര്‍ക്കിംഗുകളാല്‍ നിറഞ്ഞിരിക്കുന്നതായും കാണാം. നഗരത്തില്‍ പാര്‍ക്കിംഗ് ഏരിയ ഒരുക്കുമെന്നും വിവിധ പ്രദേശങ്ങളിൽ പെയിഡ് പാർക്കിംഗ് സംവിധാനം ഏർപ്പെടുത്തുമെന്നും മള്‍ട്ടി ലെവല്‍ പാര്‍ക്കിംഗ് സംവിധാനം നടപ്പിലാക്കുമെന്നുമൊക്കെയുള്ള വാഗ്ദാനങ്ങള്‍ പലപ്പോഴായി നെയ്യാറ്റിന്‍കര നിവാസികള്‍ കേള്‍ക്കുന്നുണ്ട്. പ്രധാന വ്യാപാര കേന്ദ്രമായി അറിയപ്പെടുന്ന ആലുംമൂട് ജംഗ്ഷനില്‍ റോഡിനിരുവശവും വാഹനങ്ങള്‍ പാര്‍ക്കു ചെയ്യുന്നതു പതിവാണ്. പൊതുവേ വീതി കുറഞ്ഞ പൊതുനിരത്തിലെ ഗതാഗതക്കുരുക്കിന് ഈ അനധികൃത പാര്‍ക്കിംഗും ഒരു ഘടകമാണെന്ന് പരാതിയുണ്ട്. ആലുംമൂട് ജംഗ്ഷനു സമീപത്തെ കോണ്‍വന്‍റ് റോഡാണ് അനധികൃത പാര്‍ക്കിംഗിന്‍റെ മറ്റൊരിടം. ഈ റോഡില്‍ പ്രവര്‍ത്തിക്കുന്ന വിവിധ വിദ്യാലയങ്ങളിലെ വിദ്യാര്‍ഥികളെ കൊണ്ടുവരാനും തിരികെ കൊണ്ടുപോകാനുമായി നിയോഗിക്കപ്പെട്ട സ്വകാര്യ വാഹനങ്ങളാണ് ഇക്കൂട്ടത്തിലേറെയും. സ്കൂള്‍ സമയം അവസാനിക്കുന്നതിനും മണിക്കൂറുകള്‍ മുന്പോ ചിലപ്പോള്‍ രാവിലെ മുതലോ ഇവ പാര്‍ക്ക് ചെയ്യുന്പോള്‍ ഇതുവഴി വരുന്ന മറ്റു വാഹനങ്ങള്‍ക്ക് സുഗമമായി പോകാനുള്ള സൗകര്യം നഷ്ടമാകുന്നു. സ്വാഭാവികമായും അത്തരം സന്ദര്‍ഭങ്ങളില്‍ വിദ്യാര്‍ഥികള്‍ അടക്കമുള്ള കാല്‍നടയാത്രക്കാര്‍ക്കും ഈ തടസം തലവേദനയാണ്. നെയ്യാറ്റിന്‍കര മിനി സിവില്‍ സ്റ്റേഷന്‍ പരിസരം വാഹനങ്ങളുടെ സാന്നിധ്യത്താല്‍ സന്പന്നമാണ് മിക്കവാറും. നിരവധി സര്‍ക്കാര്‍ ഓഫീസുകള്‍ പ്രവര്‍ത്തിക്കുന്ന സിവില്‍ സ്റ്റേഷനിലെ ജീവനക്കാര്‍ സ്വന്തം വാഹനങ്ങള്‍ കെട്ടിടത്തിന്‍റെ ഇടനാഴിയിലും മറ്റും പാര്‍ക്ക് ചെയ്യാറുണ്ടെന്നും ആക്ഷേപമുയരുന്നു. ആശുപത്രി കോന്പൗണ്ടില്‍ പാര്‍ക്കിംഗ് ഫീസ് ഈട‌ാക്കുന്നതിനാല്‍ പലരും ആശുപത്രിക്ക് പുറത്തെ പാതയോരത്തായി വാഹനങ്ങള്‍ പാര്‍ക്ക് ചെയ്തിട്ട് മറ്റാവശ്യങ്ങള്‍ക്കായി പോകുന്നതായും പരാതിയുണ്ട്. ആശുപത്രി ജംഗ്ഷനില്‍നിന്നും റെയില്‍വേ സ്റ്റേഷനിലേയ്ക്കുള്ള വീതി കുറഞ്ഞ പാത വൈകുന്നേരങ്ങളില്‍ രോഗികളുമായി വരുന്ന വാഹനങ്ങളുടെ പാര്‍ക്കിംഗ് കൊണ്ട് നിറയുകയാണ് പതിവ്. ഡോക്ടര്‍മാര്‍ സ്വകാര്യ പ്രാക്ടീസ് നടത്തുന്നയിടങ്ങള്‍ ഈ റോഡിനിരുവശത്തുമാണുള്ളത്. അക്ഷയ ഷോപ്പിംഗ് കോപ്ലക്സില്‍ നിരവധി വ്യാപാര സ്ഥാപനങ്ങള്‍ പ്രവര്‍ത്തിക്കുന്നു. അവിടേക്കു വരുന്നവരുടെയും ആ സ്ഥാപനങ്ങളിലെ അംഗങ്ങളുടെയും വാഹനങ്ങള്‍ കൂടാതെ, മറ്റു വാഹനങ്ങളും അക്ഷയ ഷോപ്പിംഗ് കോംപ്ലക്സ് വളപ്പില്‍ പാര്‍ക്ക് ചെയ്യുന്നതായും നഗരസഭ അധികൃതര്‍ ഇക്കാര്യം ശ്രദ്ധിക്കുന്നില്ലെന്നും ആരോപണമുണ്ട്. നെയ്യാറ്റിന്‍കര കെഎസ്ആര്‍ടിസി ബസ് സ്റ്റാന്‍ഡിലെ പുതിയ കെട്ടിടത്തില്‍ വാഹന പാര്‍ക്കിംഗിനായി പ്രത്യേക ക്രമീകരണം ഒരുക്കിയിട്ടുണ്ടെങ്കിലും ഈ സൗകര്യം പ്രയോജനപ്പെടുത്തുന്നവര്‍ കുറവാണ്. നെയ്യാറ്റിന്‍കരയെ സംബന്ധിച്ചിടത്തോളം നിരത്തുകള്‍ പഴയതുപോലെ തുടരുകയും വാഹനങ്ങളുടെ എണ്ണം വര്‍ധിക്കുകയും ചെയ്തു. കരമന- കളിയിക്കാവിള പാത വികസനത്തിന്‍റെ ഭാഗമായി മാത്രമേ നെയ്യാറ്റിന്‍കര ഗതാഗത സംവിധാന സംബന്ധിയായ ക്രമീകരണങ്ങള്‍ നടപ്പിലാക്കുകയുള്ളൂ എന്നാണെങ്കില്‍ നിലവിലുള്ള അസൗകര്യം എത്രകാലം തുടരേണ്ടിവരുമെന്ന ആശങ്കയിലാണ് തദ്ദേശവാസികളും യാത്രക്കാരും.

ജവഹർനഗർ വസ്തു തട്ടിപ്പ്; അനന്തപുരി മണികണ്ഠന്‍റെ ഫോണ്‍ സ്വിച്ച്ഓഫ്

പേരൂര്‍ക്കട: ജവഹര്‍നഗര്‍ ഭൂമി തട്ടിപ്പുമായി ബന്ധപ്പെട്ട് ഹൈടെക് അന്വേഷണം വഴിമുട്ടിയ നിലയില്‍. കേസിലെ പ്രധാന പ്രതിയായ അനന്തപുരി മണികണ്ഠന്‍റെ മൊബൈല്‍ഫോണ്‍ സ്വിച്ച് ഓഫ് ആയതാണ് അന്വേഷണ സംഘത്തെ കുഴക്കുന്നത്. കഴിഞ്ഞദിവസം സാധ്യമായ വീടുകളില്‍ പോലീസ് പരിശോധന നടത്തിയെങ്കിലും തുമ്പൊന്നും ലഭിച്ചില്ല. മാതാപിതാക്കള്‍ പറയുന്നതു മണികണ്ഠന്‍ കുറ്റം ചെയ്തിട്ടില്ല എന്നാണ്. അതേസമയം ജൂലൈ ആറാം തീയതി മുതല്‍ അനന്തപുരി മണികണ്ഠന്‍റെ മൊബൈല്‍ഫോണ്‍ സ്വിച്ച് ഓഫ് ആയ നിലയിലാണ്. ഏറ്റവും ഒടുവില്‍ മണികണ്ഠന്‍റെ ഫോണ്‍ ലൊക്കേഷന്‍ കാണിക്കുന്നത് തിരുവനന്തപുരം നഗരപ്രാന്തമാണ്. അതിനുശേഷം ഇയാള്‍ എവിടെപ്പോയി എന്നു അന്വേഷണസംഘത്തിന് കണ്ടെത്താനായിട്ടില്ല. അതിനിടെ മണികണ്ഠന്‍, താന്‍ മുമ്പ് ഉപയോഗിച്ചുവന്നിരുന്ന മൊബൈല്‍ നമ്പര്‍ മാറ്റിയെന്നും പുതിയ കണക്ഷനാണ് ഉപയോഗിക്കുന്നതെന്നും പോലീസ് സംശയിക്കുന്നുണ്ട്. അതുകൊണ്ടുതന്നെ പ്രമുഖ സെല്ലുലാര്‍ ദാതാക്കളുടെ സഹായം ക്രൈം വിഭാഗം തേടിയേക്കും. അനന്തപുരി മണികണ്ഠന് ഒരു മുന്‍ മന്ത്രിയുടെ സഹായമുണ്ടെന്നും അതുകൊണ്ടാണ് ഇയാളെ പിടികൂടാന്‍ വൈകുന്നതെന്നും ആരോപണം നിലനില്‍ക്കെ തന്നെ ഇയാളെ കണ്ടെത്താന്‍ മ്യൂസിയം പോലീസ് ഊർജിതമായ അന്വേഷണമാണ് നടത്തിവരുന്നത്.

അമ്പൂരി പറത്തി സെന്‍റ് അൽഫോൻസാ തീർഥാടന പള്ളിയിലെ തിരുനാളിനു നാളെ കൊടിയേറും

അമ്പൂരി: പറത്തി സെന്‍റ് അൽഫോൻസാ തീർഥാടന പള്ളിയിലെ വിശുദ്ധ അൽഫോൻസാമ്മയുടെ തിരുനാൾ 26 മുതൽ ഓഗസ്റ്റ് മൂന്നുവരെ നടക്കും. ഈ വർഷത്തെ തിരുനാളിന്‍റെ പ്രത്യേകതകൾ അൽഫോൻസാമ്മയുടെ തിരുശേഷിപ്പ് തീർഥാടനമായി കൊണ്ടുവരുന്നതും അമ്പൂരിയെ പറത്തിയുമായി ബന്ധിപ്പിക്കുന്ന കുമ്പിച്ചൽപാലം സാക്ഷാത്്കരിക്കപ്പെട്ടു എന്നതുമാണ്. കഴിഞ്ഞവർഷം വരെ തീർഥാടനം നടത്തിയിരുന്നതു കടത്തുവള്ളങ്ങളിലും ബോട്ടുകളിലുമായിട്ടായിരുന്നുവെങ്കിൽ ഇനി മുതൽ പാലത്തിൽ കൂടി അക്കരെ ഇക്കരെ യാത്ര ചെയ്യാമെന്നുള്ളതും വലിയ ഒരു അനുഗ്രഹമായിട്ടാണ് ഇവിടെയുള്ള നാട്ടുകാർ കരുതുന്നത്. 26 നു വൈകുന്നേരം നാലിനു വിശുദ്ധ അൽഫോൻസാമ്മയുടെ തിരുശേഷിപ്പു പ്രയാണവും തീർഥാടനവും അമ്പൂരി ഫൊറോന മാതൃ-പിതൃവേദിയുടെ ആഭിമുഖ്യത്തിൽ മായത്തുനിന്നും ആരംഭിക്കും. 4.30ന് തട്ടാമുക്ക് കുരിശടിയിൽ സ്വീകരണം. വൈകുന്നേരം 5.30നു വികാരി ഫാ. മാത്തുക്കുട്ടി മൂന്നാറ്റിൻമുഖം കൊടിയേറ്റം നിർവഹിക്കും. തുടർന്നു നടക്കുന്ന നൊവേനയ്ക്കും വിശുദ്ധ കുർബാനയ് ക്കും ഫാ. സോണി കരുവേലിൽ, ഫാ. സെബാസ്റ്റ്യൻ ചാമക്കാല, ഫാ. ജോണിക്കുട്ടി തറക്കുന്നേൽ എന്നിവർ കാർമികന്മാരാകും. 27നു വൈകുന്നേരം നാലിന് ആയൂർ ഫൊറോന മിഷൻ ലീഗിന്‍റെ നേതൃത്വത്തിൽ തീർഥാടനം. തുടർന്നു നടക്കുന്ന നൊവേനയ്ക്കും വിശുദ്ധ കുർബാനയ്ക്കും ഫാ. സൈജു അയ്യങ്കരി കാർമികനാകും. വൈകുന്നേരം 6.30ന് സണ്ടേസ്കൂൾ കുട്ടികളുടെ കലാപരിപാടികൾ നടക്കും. 28നു വൈകുന്നേരം 4.30നു ജപമാലയ്ക്കും നൊവേനയ്ക്കും വിശുദ്ധ കുർബാനയ്ക്കും ഫാ. ആന്‍റണി തറക്കുന്നേൽ കാർമികനാകും. 29 നു വൈകുന്നേരം 4.30 നു ജപമാലയ്ക്കും, നൊവേനയ്ക്കും വിശുദ്ധ കുർബാനയ് ക്കും ചങ്ങനാശേരി അതിരൂപതാ വികാരി ജനറാൾ ഫാ. സോണി തെക്കേക്കര കാർമികനാകും. 30നു വൈകുന്നേരം 4.30ന് ജപമാല, നൊവേന, വിശുദ്ധ കുർബാന. ഫാ. സെബാസ്റ്റ്യൻ ചാലയ്ക്കൽ കാർമികനാകും. 31നു വൈകുന്നേരം 4.30 ന് ജപമാല, നൊവേന, വിശുദ്ധ കുർബാന എന്നിവയ്ക്കു ഫാ.ലിബിൻ മണക്കളം നേതൃത്വം നൽകും. ഓഗസ്റ്റ് ഒന്നിനു വൈകുന്നേരം 4.30നു ജപമാല, നൊവേന, വിശുദ്ധ കുർബാന. ഫാ. മാത്യു കണ്ണമ്പള്ളി സിഎഐ മുഖ്യകാർ മികനാകും. ഓഗസ്റ്റ് രണ്ടിനു വൈകുന്നേരം 4.30ന് നൊവേന, വിശുദ്ധ കുർബാന എന്നിവയ്ക്കു ഫാ. ജെയിംസ് കലയംകണ്ടം കാർമികനാകും. തുടർന്നു കുമ്പിച്ചൽ കുരിശടിയിലേക്ക് തിരുനാൾ പ്രദക്ഷിണം. ഫാ. സച്ചിൻ കുന്നത്ത് കാർമികനാകും. ഓഗസ്റ്റ് മൂന്നിനു ഞായറാഴ്ച രാവിലെ ഒന്പതിന് അമ്പൂരി ഫൊറോന പള്ളിയിൽ നിന്നും ഫൊറോന മിഷൻ ലീഗിന്‍റെ നേതൃത്വത്തിൽ സൺഡേ സ്കൂൾ തീർഥാടനം. തുടർന്ു നടക്കുന്ന ആഘോഷമായ തിരുനാൾ കുർബാനയ്ക്കും, വചനപ്രഘോഷണത്തിനും ഫാ. സ്കറിയ ശ്രാമ്പിക്കൽ കാർമികത്വം വഹിക്കും. തുടർന്നുള്ള പ്രദക്ഷിണത്തിനു ഫാ. ജെയിംസ് കലയംകണ്ടം കാർമികനാകും. തുടർന്ന് ഊട്ടുനേർച്ച, കൊടിയിറക്ക്. വികാരി ഫാ. മാത്തുക്കുട്ടി മൂന്നാറ്റിൻ മുഖം, കൺവീനർ ജോസ് മൂന്നാനാൽ, സെക്രട്ടറി മാത്യൂസ് എം. പുത്തൂർ, കൈക്കാരന്മാരായ ലിജോ കെ. ജോർജ് കോലത്ത്, തോമസ് ജോർജ് കാലായിൽ, കണക്കൻ തോമസ് കൂലിപ്പറമ്പിൽ എന്നിവർ നേതൃത്വം നല്കും.

പിതൃക്കൾക്ക് ശ്രാദ്ധമൂട്ടി ആയിരങ്ങൾ...

തിരുവനന്തപുരം: കർക്കിടക വാവായ ഇന്നലെ ആയിരക്കണക്കിനാളുകൾ പിതൃതർപ്പണം നടത്തി. ക്ഷേത്രങ്ങളിൽ ഇന്നലെ പുലർച്ച മുതൽ ബലിയിടുന്നതിനായി വലിയ തിരക്കാണ് അനുഭവപ്പെട്ടത്. വിവിധ ഹിന്ദുസംഘടനകളുടെ നേതൃത്വത്തിലും പിതൃതർപ്പണത്തിനായി സംവിധാനങ്ങൾ ഒരുക്കിയിരുന്നു. ജില്ലയിലെ പ്രധാന ബലിതർപ്പണ കേന്ദ്രങ്ങളായ തിരുവല്ലം, ശംഖുമുഖം, വർക്കല, അരുവിപ്പുറം തുടങ്ങി പ്രധാന ബലിതർപ്പണ കേന്ദ്രങ്ങളിലും ബലിതർപ്പണത്തിനെത്തിയവരുടെ വലിയ തിരക്കാണ് അനുഭവപ്പെട്ടത്. തിരുവല്ലം ശ്രീപരശുരാമസ്വാമി ക്ഷേത്രത്തിൽ പുലർച്ചെ 3.30 മുതൽ ബലിതർപ്പണം ആരംഭിച്ചു. പതിനായിരങ്ങൾ തിരുവല്ലത്തു തർപ്പണം നടത്തി. ഒരു സമയം 3500 പേർക്കു ബലിയിടാനുള്ള സൗകര്യങ്ങൾ ഒരുക്കിയിരുന്നു. വർക്കല പാപനാശം തീരത്ത് പതിനായിരങ്ങളാണ് ബലിയർപ്പിച്ചത്. അരുവിപ്പുറം ശിവക്ഷേത്രം, മാറനല്ലൂർ അരുവിക്കര ശാസ്താക്ഷേത്രം ശിവഗിരി മഠം, കൈമനം ചിറക്കര മഹാവിഷ്ണു ക്ഷേത്രം, തൃക്കണ്ണാപുരം ശ്രീകൃഷ്ണ സ്വാമി ക്ഷേത്രം, വെള്ളായണി ശിവോദയം ശിവക്ഷേത്രം, തൃക്കണ്ണാപുരം എൻഎസ്എസ് കരയോഗത്തിന്‍റെ കീഴിലുള്ള അയ്യപ്പതാവളം ക്ഷേത്രം, വെള്ളായണി ഊക്കോട് ചെറുബാലമന്ദം ശിവക്ഷേത്രം, വെള്ളായണി കായൽക്കരയിൽ തൃക്കുളങ്ങളര മഹാവിഷ്ണു ക്ഷേത്രം എന്നീവിടങ്ങളിലും ബലിതർപ്പണം നടന്നു. മാറനല്ലൂർ: നെയ്യാർ അരുവിക്കരയിലെ പൂർണാ-പുഷ്‌ക്കലാ സമേത ധർമശാസ്താ ക്ഷേത്രത്തിലുൾപ്പെടെ നിരവധി ഇടങ്ങളിൽ പതിനായിരങ്ങൾ ബലിതർപ്പണം നടത്തി. പുലർച്ചെ നാലു മണി മുതലാണ് ചടങ്ങുകൾ ആരംഭിച്ചത്. ക്ഷേത്രം ഓഡിറ്റോറിയത്തിലും നെയ്യാറിനു തീരത്ത് ഒരുക്കിയ പന്തലിലുമാണ് ചടങ്ങുകൾ നടന്നത്. കാട്ടാക്കട ഡിവൈഎസ്പിയുടെ നേതൃത്വത്തിൽ മറനല്ലൂർ, ആര്യങ്കോട് പോലീസ് സ്റ്റേനുകളിൽ നിന്നും ഉദ്യോഗസ്ഥർ ചടങ്ങുകൾ അവസാനിക്കും വരെ പ്രദേശത്ത് നിലയുറപ്പിച്ചിരുന്നു. ബലി തർപ്പണത്തിനുശേഷം സ്നാഘട്ടത്തിലേയ്ക്കു പോകുന്ന ഭക്തർക്ക് കയർകെട്ടിയുള്ള സുരക്ഷയാണ് നെയ്യാറിൽ ഒരുക്കിയിരുന്നത്. അഗ്നിശമനസേനയുടേയും, പോലീസിന്‍റേയും ഇടപെടൽ അരുവിക്കരയിൽ എത്തിയ ഭക്തർക്ക് ബുദ്ധിമുട്ടുകൾ ഒഴിവാക്കുന്നതിന് ഏറെ ആശ്വസകരമായി. കാട്ടാക്കട ചെമ്പനാകോട് ഹനുമാർ സ്വാമി ക്ഷേത്രത്തിൽ ബലി തർപ്പണം നടന്നു. കുരുതംകോട് ഭദ്രകാളി ക്ഷേത്രത്തിലും ആനന്ദേശ്വരം ശിവക്ഷേത്രക്കടവിലും, അണിയിലക്കടവ് പാലത്തിനു സമീപത്തുമായി രണ്ടിടങ്ങളിലാണ് ബലിതർപ്പണം നടന്നത്. കോട്ടയ്ക്കകം തേക്കിൻകാല മഹാവിഷ്ണുക്ഷേത്രത്തിൽ ക്ഷേത്ര ഗ്രൗണ്ടിലും ആറാട്ടുകടവിലും ബലിതർപ്പണം നടന്നു. കൊക്കോട്ടേല കുത്തുകുഴി ശിവതമ്പുരാൻ ക്ഷേത്രം, വെളിയന്നൂർ മഹാവിഷ്ണുക്ഷേത്രം, കാട്ടാക്കട കൊല്ലോട് തമ്പുരാൻ ക്ഷേത്രം, വലിയകളം തമ്പുരാൻ ദുർഗാദേവീ ക്ഷേത്രം, ചേരപ്പള്ളി ശിവശക്തി ക്ഷേത്രം എന്നിവിടങ്ങളിലും ബലിതർപ്പണം നടന്നു. മലയിൻകീഴ്, ഒറ്റശേഖരമംഗലം, ആര്യനാട്, നെയ്യാർഡാം, കള്ളിക്കാട്, മൈലക്കര, കീഴാറൂർ, മലയം, മച്ചേൽ, പൂവച്ചൽ, വിളപ്പിൽ കുണ്ടമൺകടവ്, ചെറുതേരി, അരുവിപ്പാറ തുടങ്ങിടങ്ങളിലും തർപ്പണം നടത്തി. പാറശാല: ചെങ്കൽ മഹേശ്വരം ശ്രീ ശിവ പാര്‍വതി ക്ഷേത്രത്തിന്‍റെ ആഭിമുഖ്യത്തിൽ നടന്ന കർക്കടക വാവുബലി തർപ്പണ ചടങ്ങുകൾ കാഞ്ഞിരമൂട്ടു കടവില്‍ നടത്തി. ക്ഷേത്രം മഠാധിപതി സ്വാമി മഹേശ്വരാനന്ദ സരസ്വതി ചടങ്ങുകൾക്കു നേതൃത്വം നൽകി. നെയ്യാറ്റിന്‍കര തഹസില്‍ദാര്‍ നന്ദകുമാരന്‍റെ ഏകോപനത്തിൽ ഫയര്‍ ആന്‍ഡ് റെസ്‌ക്യൂ, പോലീസ്, എക്‌സൈസ് ആരോഗ്യവകുപ്പുകളുടെ സേവനം ബലിയിടാനെത്തിയവർക്ക് ആശ്വാസമായി. വിവിധ ഡിപ്പോകളില്‍നിന്നു കെഎസ്ആര്‍ടിസിയുടെ സ്‌പെഷല്‍ ബസ് സർവീസുകളും ഉണ്ടായിരുന്നു. നെയ്യാറ്റിന്‍കര: താലൂക്കിലെ പല ക്ഷേത്രങ്ങളിലും സ്നാനഘട്ടങ്ങളിലും ബലിതര്‍പ്പണ ചടങ്ങുകള്‍ നടന്നു. അരുവിപ്പുറത്ത് പുലർച്ചെ മുതൽ ചടങ്ങുകൾ ആരംഭിച്ചു. രാമേശ്വരം മഹാദേവ ക്ഷേത്രത്തിൽ നടന്ന ചടങ്ങുകൾക്ക് കവിയും സംസ്കൃത അധ്യാപകനുമായ ഉദയൻ കൊക്കോട് നേതൃത്വം നൽകി. തത്തിയൂർ അരുവിക്കര ശിവ ഭഗവതി ക്ഷേത്രത്തിൽ മണ്ഡപത്തിൻ കടവ് മണികണ്ഠൻ ബലികർമങ്ങൾക്ക് നേതൃത്വം നൽകി. പാലയ്ക്കാപറമ്പ് ശ്രീബാലസുബ്രഹ്മണ്യ സ്വാമി ക്ഷേത്രം, പുതിച്ചല്‍ ശ്രീ അയണിയൂട്ടു തന്പുരാന്‍ ക്ഷേത്രം, ഓലത്താന്നി തണ്ടളം നാഗരാജാ ക്ഷേത്രം, മാരായമുട്ടം അണമുഖം ഭഗവതി ക്ഷേത്രം എന്നിവിടങ്ങളിലും ബലിതർപ്പണം നടന്നു. സേവാഭാരതി മാരായമുട്ടം ഉപസമിതിയുടെ നേതൃത്വത്തിൽ മാരായമുട്ടം നീലകേശി ക്ഷേത്രത്തിനു സമീപം നടന്ന ചടങ്ങുകൾക്ക് പെരുവൻമൂല കേശവൻനായർ മുഖ്യകാർമികത്വം വഹിച്ചു. കണ്ണംകുഴി കാശിലിംഗം ഗുരുസ്വാമി സമാധി ധർമ്മമഠത്തിൽ നടന്ന ചടങ്ങുകൾക്ക് വിഷ്ണു പോറ്റി, ശങ്കർ റാം എന്നിവർ നേതൃത്വം നൽകി. നേമം: േഖലയിലെ വിവിധ ക്ഷേത്രങ്ങളില്‍ വന്‍ തിരക്ക് അനുഭവപ്പെട്ടു. അതിരാവിലെ മുതല്‍ വിവിധ ക്ഷേത്രങ്ങളിൾ ബലിതര്‍പ്പണ ചടങ്ങുകള്‍ തുടങ്ങി. കൈമനം ചിറക്കര മഹാവിഷ്ണു ക്ഷേത്രം, തൃക്കണ്ണാപുരം ശ്രീകൃഷ്ണ സ്വാമി ക്ഷേത്രം, കരമന കാഞ്ചിമാടന്‍ ക്ഷേത്രം, കരമന ഗണപതി ക്ഷേത്രം, തൃക്കണ്ണാപുരം ശ്രീചക്രത്തില്‍ ശിവക്ഷേത്രം, കൈമനം അമൃതാനന്ദമയി മഠം, വെള്ളായണി ശിവോദയം ക്ഷേത്രം, ഇടഗ്രാമം ബാലഗണപതി ക്ഷേത്രം, നടുവത്ത് മഹാവിഷ്ണു ക്ഷേത്രം, മലയം ശിവക്ഷേത്രം, വെള്ളായണി തൃക്കുളങ്ങളര മഹാവിഷ്ണു ക്ഷേത്രം, വേവിള മഹാവിഷ്ണുക്ഷേത്രം എന്നിവിടങ്ങളിലും തർപ്പണച്ചടങ്ങുകൾ നടന്നു.

വള്ളം മറിഞ്ഞ് കാണാതായ മത്സ്യത്തൊഴിലാളിയുടെ മൃതദേഹം കണ്ടെത്തി

വലിയതുറ: വെട്ടുകാട് പള്ളിക്കു സമീപം മത്സ്യബന്ധനത്തിനിടെ വള്ളം മറിഞ്ഞ് കാണാതായ മത്സ്യത്തൊഴിലാളിയുടെ മൃതദേഹം കണ്ടെത്തി. വെട്ടുകാട് വലിയവേളി തൈവിളാകം ടിസി 80 /816 -ല്‍ പരേതനായ ആന്‍ഡ്രുവിന്‍റെയും ആനിയുടെയും മകന്‍ അനില്‍ ആന്‍ഡ്രൂ (32)വിന്‍റെ മൃതദേഹമാണ് ഇന്നലെ ഉച്ചയ്ക്ക് 12 ഓടെ വിഴിഞ്ഞം മുല്ലൂര്‍ അദാനി പോര്‍ട്ടിനു സമീപം കടലില്‍ അടുക്കിയിരിക്കുന്ന പാറകള്‍ക്കിടയില്‍ നിന്നും കണ്ടെത്തിയത്. കഴിഞ്ഞ വെളളിയാഴ്ച രാവിലെ 6.30 ഓടുകൂടി മത്സ്യബന്ധനത്തിനായി വളളം ഇറക്കി പോകുകയായിരുന്ന അഞ്ചംഗ സംഘം സഞ്ചരിച്ചിരുന്ന വളളം കരയില്‍ നിന്നും 25 മീറ്റര്‍ അകലെ തിരയില്‍പ്പെട്ട് മറിയുകയായിരുന്നു. നാലുപേര്‍ നീന്തി രക്ഷപ്പെട്ടെഹ്കിലും അനിലിനെ കാണാതായി. ഇയാള്‍ക്കായി തെരച്ചില്‍ നടത്തിയെങ്കിലും കണ്ടെത്തിയിരുന്നില്ല. ഏഴ് ദിവസങ്ങള്‍ക്ക് ശേഷമാണ് മൃതദേഹം കണ്ടെത്തിയത്. മറൈന്‍ എന്‍ഫോഴ്‌സ്‌മെന്‍റ് വിവരം അറിയിച്ചതിനെത്തുടര്‍ന്ന് വിഴിഞ്ഞം കോസ്റ്റല്‍ പോലീസ് സ്ഥലത്തെത്തി മൃതദേഹം പുറത്തെടുത്തു. വെട്ടുകാട് സ്വദേശികളായ വര്‍ഗീസ് , ജോണ്‍സണ്‍ , ജോബി , ടെലിക്‌സ് എന്നിവര്‍ക്കൊപ്പമായിരുന്നു അനില്‍ മത്സ്യബന്ധനത്തിനുപോയത്. അനില്‍ അവിവാഹിതനാണ്.

കാര്‍ഷിക കോളജ് സന്ദര്‍ശിച്ച് യുപി സ്കൂള്‍ വിദ്യാര്‍ഥികള്‍

നെയ്യാറ്റിന്‍കര : മണ്ണിനോടും കൃഷിയോടും ആഭിമുഖ്യമുള്ള വിദ്യാര്‍ഥിസംഘത്തിനു ശാസ്ത്രീയ സംവിധാനങ്ങള്‍ നേരില്‍ കണ്ട് മനസിലാക്കാന്‍ കഴിഞ്ഞതിലുള്ള സന്തോഷം. തലയല്‍ ദേവിവിലാസം യുപി സ്കൂളിലെ സയൻസ് ക്ലബിന്‍റെ ആഭിമുഖ്യത്തിലാണ് വിദ്യാര്‍ഥികള്‍ വെള്ളായണി കാർഷിക കോളജ് സന്ദർശിച്ചത്. ബഡ്‌ഡിംഗ്, ലെയറിംഗ്, ഗ്രാഫ്റ്റിംഗ് എന്നിവയെക്കുറിച്ച് കൂടുതല്‍ മനസിലാക്കാന്‍ അവസരം ലഭിച്ചതായി വിദ്യാര്‍ഥികള്‍ പറഞ്ഞു. കാര്‍ഷിക സര്‍വകലാശാലയുടെ ഇന്‍സ്ട്രക്ഷണല്‍ ഫാം, അഗ്രോണമി ഡിപ്പാര്‍ട്ട്മെന്‍റിന്‍റെ ക്രോപ് മ്യൂസിയം എന്നിവയും വിദ്യാര്‍ഥികള്‍ സന്ദര്‍ശിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]