ADVERTISEMENT

ADVERTISEMENT

ഭാരത് സഹോദയ ഇന്‍റർ സ്കൂൾ ഖോ ഖോ ചാമ്പ്യൻഷിപ്പ്

വെമ്പായം : ഭാരത് സഹോദയ ഇന്‍റർ സ്കൂൾ ഖോ ഖോ ചാമ്പ്യൻഷിപ്പ് മത്സരങ്ങൾ വട്ടപ്പാറ ലൂർദ്മൗണ്ട് പബ്ലിക് സ്കൂളിൽ നടന്നു. ഖോ ഖോ ലോകകപ്പ് വിന്നർ വി. നിഖിൽ മത്സരങ്ങൾ ഉദ്ഘാടനം ചെയ്തു. വിവിധ സ്കൂളുകളുടെ 49 ടീമുകളിൽ നിന്നായി ആയിരത്തോളം കായിക താരങ്ങൾ മത്സരങ്ങളിൽ പങ്കെടുത്തു. സമാപന സമ്മേളനത്തിൽ സീനിയർ, ജൂണിയർ, സബ് ജൂണിയർ വിഭാഗങ്ങളിൽ ചാമ്പ്യൻഷിപ്പ് നേടിയ ടീമുകൾക്ക് ട്രോഫികൾ വിതരണം ചെയ്തു.

ഭാരത് സഹോദയ പ്രസിഡന്‍റ് എസ്. ഷിബു, ജനറൽ സെക്രട്ടറി എസ്. അരുൺ, സ്കൂൾ മാനേജർ ബ്രദർ പീറ്റർ വാഴേപറമ്പിൽ, സിബിഎസ്‌സി വിഭാഗം പ്രിൻസിപ്പൽ ഡോ. ഷാഫി തോംസൺ, ഹയർ സെക്കൻഡറി വിഭാഗം പ്രിൻസിപ്പൽ ഡോ. ജോസ് ഡി. സുജീവ്, പിടിഎ എക്സിക്യൂട്ടീവ് അംഗമായ ദിവ്യ എന്നിവർ പങ്കെടുത്തു.

ADVERTISEMENT

ലിഫ്റ്റില്‍ കുടുങ്ങിയവരെ രക്ഷപ്പെടുത്തി

പേരൂര്‍ക്കട: ലിഫ്റ്റിനുള്ളില്‍ കുടുങ്ങിയ 10 പേരെ തിരുവനന്തപുരം ഫയര്‍‌സ്റ്റേഷനില്‍നിന്ന് ഉദ്യോഗസ്ഥരെത്തി രക്ഷപ്പെടുത്തി. പുളിമൂട് എം.ജി റോഡില്‍ രാജധാനി ബില്‍ഡിംഗ്‌സിലെ ലിഫ്റ്റില്‍ കുടുങ്ങിയവരെയാണ് രക്ഷിച്ചത്. ഇതേ ബില്‍ഡിംഗ്‌സില്‍ പുതുതായി ആരംഭിച്ച ഒരു സ്ഥാപനത്തിന്‍റെ ഉദ്ഘാടനച്ചടങ്ങില്‍ പങ്കെടുക്കാനെത്തിയവരായിരുന്നു പുരുഷന്മാരും സ്ത്രീകളും ഉള്‍പ്പെട്ടെ 10 പേര്‍. ഒമ്പതാം നിലയിലായിരുന്നു ഉദ്ഘാടനപരിപാടി. ചടങ്ങിനായി മുകളിലേക്കു പോകാന്‍ ലിഫ്റ്റില്‍ കയറിയ ഉടനെ സെല്ലാറിനും ഗ്രൗണ്ട് ഫ്‌ളോറിനുമിടയില്‍ ലിഫ്റ്റ് നിന്നുപോകുകയായിരുന്നു. അമിതമായി വൈദ്യുത പ്രവഹിച്ച് ഫ്യൂസ് ഉരുകിപ്പോയതാണ് ലിഫ്റ്റിന്‍റെ പ്രവര്‍ത്തനം നിലയ്ക്കാന്‍ കാരണം. തിരുവനന്തപുരം സ്റ്റേഷനില്‍നിന്ന് സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ ശ്രീജിത്തിന്‍റെ നേതൃത്വത്തില്‍ ഫയര്‍ ആൻഡ് റസ്‌ക്യു ഓഫീസര്‍മാരായ സിജിന്‍, ഹരിലാല്‍, വിവേക്, സനിത്ത്, എഫ്ആര്‍ഒ ഡ്രൈവര്‍ സജി എന്നിവര്‍ ചേര്‍ന്ന് ലിഫ്റ്റിന്‍റെ ഡോറുകള്‍ പൊളിച്ചാണ് കുടുങ്ങിക്കിടന്നവരെ രക്ഷപ്പെടുത്തിയത്.

ജനാര്‍ദനപുരം ഹയര്‍ സെക്കൻഡറി സ്‌കൂളില്‍ സേവനവാരം ഉദ്ഘാടനം

വെള്ളറട: ഗാന്ധിജയന്തിയോടനുബന്ധിച്ച് ഒറ്റശേഖരമംഗലം ജനാര്‍ദനപുരം ഹയര്‍ സെക്കൻഡറി സ്‌കൂളില്‍ ഒരാഴ്ച നീണ്ടു നില്‍ക്കുന്ന ശുചീകരണ പ്രവര്‍ത്തനങ്ങളുടെ ഉദ്ഘാടനം ഗാന്ധിദര്‍ശന്‍ കാട്ടാക്കട സബ് ജില്ല കോ-ഓര്‍ഡിനേറ്റര്‍ മലയിന്‍കീഴ് ശശികുമാര്‍ നിർവഹിച്ചു. സ്‌കൂള്‍ ഹെഡ്മാസ്റ്റര്‍ എം. എസ്. ആദര്‍ശ് കുമാര്‍ അധ്യക്ഷത വഹിച്ചു. എന്‍. ഷീബ ജപമലര്‍, വട്ടപ്പാറ അനില്‍കുമാര്‍, അനികുമാര്‍, എസ്.എസ്. അഖിനേത്, ജെ. സീമ, അമ്പിളി എന്നിവർ സംസാരിച്ചു. ഗാന്ധിജിയുടെ ചിത്രത്തില്‍ എന്‍സിസി, എസ്പിസി, സ്കൗട്ട് ആൻഡ് ഗൈഡ്, റെഡ്‌ക്രോസ്, ലിറ്റില്‍ കൈറ്റ്‌സ്, നാച്ചുര്‍ ക്ലബ്,എക്കോ ക്ലബ് തുടങ്ങിയ വിവിധ ക്ലബുകളിലെ കുട്ടികള്‍ പുഷ്പാര്‍ച്ചന നടത്തി. വിവിധ കലാപരിപാടികളും മത്സരങ്ങളും സംഘടിപ്പിച്ചു.

ആത്മഹത്യാഭീഷണി മുഴക്കിയ അറുപതുകാരനെ ഫയര്‍ഫോഴ്‌സ് രക്ഷപ്പെടുത്തി

പേരൂര്‍ക്കട: കുളത്തിലിറങ്ങി ആത്മഹത്യാഭീഷണി മുഴക്കിയ ആളെ ഫയര്‍ഫോഴ്‌സ് എത്തി കരയ്ക്കു കയറ്റി. റാന്നി ലെയിന്‍ തുണ്ടുവിള വീട്ടില്‍ രാജേന്ദ്രന്‍ (60) ആത്മഹത്യചെയ്യുമെന്നു പറഞ്ഞ് വെള്ളത്തിലേക്ക് ഇറങ്ങിയത്. ബുധനാഴ്ച വൈകുന്നേരം നാലോടെ പേരൂര്‍ക്കട വഴയില റാന്നി ലെയിനിലെ റാന്നി കുളത്തിലിറങ്ങിയാണ് ഇയാള്‍ ഭീഷണി മുഴക്കിയത്. കുളത്തില്‍ പായലും അടിഭാഗത്ത് ചളിയും ഉണ്ടായിരുന്നതിനാല്‍ ഒരുമണിക്കൂറോളം വെള്ളത്തില്‍നിന്ന ഇയാള്‍ ഏറെക്കുറെ തളര്‍ച്ചയിലായിരുന്നു. സ്‌ക്യൂബ ഡൈവര്‍മാരായ രതീഷ്, പ്രദോഷ്, വിജിന്‍ എന്നിവര്‍ വെള്ളത്തിലിറങ്ങി രാജേന്ദ്രനെ അനുനയിപ്പിച്ച് കരയ്‌ക്കെത്തിക്കുകയായിരുന്നു. രാജേന്ദ്രനു മാനസികാസ്വാസ്ഥ്യമുണ്ടായിരുന്നുവെന്നും അതാണ് ആത്മഹത്യാഭീഷണി മുഴക്കാന്‍ കാരണമായതെന്നും പേരൂര്‍ക്കട പോലീസ് പറഞ്ഞു. രാജേന്ദ്രനെ പിന്നീട് ബന്ധുക്കള്‍ ചേര്‍ന്ന് ഊളമ്പാറ മാനസികാരോഗ്യ കേന്ദ്രത്തില്‍ പ്രവേശിപ്പിച്ചു.

അമ്മയെയും മകളെയും കൊലപ്പെടുത്താന്‍ ശ്രമിച്ച കേസിൽ 60കാരൻ അറസ്റ്റിൽ

പേരൂര്‍ക്കട: അമ്മയെയും മകളെയും വീട്ടിലിട്ടു വെട്ടിക്കൊലപ്പെടുത്താന്‍ ശ്രമിച്ചയാളെ കന്‍റോൺമെന്‍റ് പോലീസ് അറസ്റ്റുചെയ്തു. കുന്നുകുഴി വിവേകാനന്ദ നഗര്‍ ടിസി 27/325 എസ്ആര്‍എ 45-ല്‍ ജോണി (60) ആണ് അറസ്റ്റികുന്നുകുഴി എ.കെ.ജി സെന്‍റര്‍ വിവേകാനന്ദ നഗറിൽ താമസിക്കുന്ന സെറാഫിന്‍റെ മകള്‍ ഷെര്‍ളി (30) യുടെ പരാതിയിലാണ് അറസ്റ്റ്. സംഭവദിവസം സെറാഫിനും ഷെര്‍ളിയും വീട്ടിലിരിക്കുമ്പോള്‍ മീന്‍ വെട്ടുന്ന കത്തിയുമായി എത്തിയ ജോണി ഇരുവരെയും അസഭ്യം പറയുകയും മര്‍ദിക്കുകയുമായിരുന്നു. അതിനുശേഷം സെറാഫിനെ ആക്രമിക്കാനുള്ള ശ്രമവും ഷെര്‍ളി തടഞ്ഞു. ഇതിന്‍റെ വിരോധത്തില്‍ ജോണി കൈവശമിരുന്ന കത്തി ഉപയോഗിച്ച് ഷെര്‍ളിയുടെ തലയില്‍ വെട്ടി. വെട്ടുകൊണ്ട് നിലത്തുവീണ ഇവരെ വീണ്ടും അസഭ്യം പറയുകയും മർദിക്കുകയും ചെയ്തശേഷമാണ് ഇയാള്‍ തിരികെപ്പോയത്. ആക്രമണത്തിനിടെ സെറാഫിനും കത്തികൊണ്ടു മുറിവേറ്റു. ഇരുവരും തിരുവനന്തപുരം ജനറല്‍ ആശുപത്രിയില്‍ ചികിത്സ തേടി. സെറാഫിനുമായി പ്രതിക്ക് നേരത്തെയുണ്ടായിരുന്ന വ്യക്തിവിരോധമാണു ആക്രമണത്തിനു കാരണമായത്. കന്‍റോൺമെന്‍റ് സിഐ പ്രജീഷ് ശശി, എസ്ഐ എം. മധുമോഹന്‍ എന്നിവര്‍ ഉള്‍പ്പെട്ട സംഘമാണ് കേസന്വേഷണം പൂര്‍ത്തീകരിച്ചത്. അറസ്റ്റിലായ പ്രതിയെ കോടതിയില്‍ ഹാജരാക്കി.

നെടുമങ്ങാട് ജില്ലാ ആശുപത്രിയിൽ കോൺക്രീറ്റിൽനിന്നു പാളികൾ അടർന്നുവീണ് ഒരാൾക്ക് പരിക്ക്

നെടുമങ്ങാട്: ജില്ലാ ആശുപത്രിയുടെ കെട്ടിടത്തിന്‍റെ കോൺക്രീറ്റിൽനിന്ന് പാളികൾ വീണു രോഗിയുടെ ബന്ധുവിന് പരുക്കേറ്റു. നടുവേദനയ്ക്ക് ആശുപത്രിയിൽ ചികിത്സ തേടിയ ശാന്തിഗിരി ആനന്ദപുരം റിയാസ് മൻസിലിൽ ബി.ഫസിലുദീന് ഒപ്പം എത്തിയ ബന്ധു നൗഫിയ നൗഷാദി(21)നാണ് കൈയിൽ പരുക്കേറ്റത്. ഫസിലുദീനെ പിഎംആർ ഒപിയിൽ ഡോക്ടറെ കാണിക്കാൻ ഇരിക്കുന്നതിനിടെ ഇന്നലെ രാവിലെയായിരുന്നു സംഭവം. നൗഫിയയുടെ ഇടതു കൈയിൽ പാളികൾ അടർന്നു വീഴുകയായിരുന്നു. എക്സ്റേ എടുത്തു നടത്തിയ പരിശോധനയിൽ കൈയ്ക്കു മറ്റു പ്രശ്നങ്ങൾ ഇല്ലെങ്കിലും നൗഫിയയുടെ വേദന ഉണ്ട്. അപകടത്തിനു പിന്നാലെ പിഎംആർ ഒപി ഇവിടെനിന്ന് സ്കിൻ ഒപിയിലേക്ക് മാറ്റി.

അറിവിന്‍റെ ലോകത്തേക്ക്...

വിജയദശമി ദിനത്തിൽ അറിവിന്‍റെ ആദ്യാക്ഷരം കുറിച്ച് കുരുന്നുകൾ... നേമം: വിജയദശമി ദിനത്തിൽ ആയിരക്കണക്കിന് കുരുന്നുകൾ അറിവിന്‍റെ ആദ്യാക്ഷരം കുറിച്ചു. കരുമം പാപ്പനംകോട്, പുഴിക്കുന്ന്, വെള്ളായണി നേമം, തൃക്കണ്ണാപുരം, കല്ലിയുർ, വിഴവൂർ, പ്രാവച്ചമ്പലം, മൊട്ടമൂട്, നരുവാമൂട് തുടങ്ങിയ സ്ഥലങ്ങളിലെ ക്ഷേത്രങ്ങളിലും വിവിധ സാംസ്കാരി സംഘടനകളുടെ നേതൃത്വത്തിലും വിദ്യാരംഭ ചടങ്ങുകൾ നടന്നു. പ്രദേശത്തെ ക്ഷേത്രങ്ങളിലും വൻ തിരക്ക് അനുഭവപ്പെട്ടു. ആദ്യാക്ഷരം കുറിച്ച കുരുന്നുകൾ ഗുരുക്കന്മാർക്കു ദക്ഷിണ നൽകി പ്രസാദവും വാങ്ങിയാണ് മടങ്ങിയത്. വെള്ളായണി ദേവീക്ഷേത്രം, പാപ്പനംകോട് പട്ടാരത്ത് ചാമുണ്ഡി ദേവിക്ഷേത്രം, മടത്തിൽ ക്ഷേത്രം, തുമരിമുട്ടം മഹാവിഷ്ണക്ഷേത്രം, പൂഴിക്കുന്ന് തൃക്കണ്ണാപുരം ക്ഷേത്രം, നേമം മഹാഗണപതിക്ഷേത്രം എന്നിവിടങ്ങളിൽ വിദ്യാർഥികൾക്ക് ആദ്യാക്ഷരം കുറിച്ചു. ഇടഗ്രാമം അരകത്ത് ദേവിക്ഷേത്രത്തിൽ മേൽശാന്തി എ.എസ് കേശവൻ നന്പൂതിരി, പാപ്പനംകോട് അനന്തപുരി മോഡൽ സ്കൂളിൽ പ്രിൻസിപ്പൽ എസ്.കെ. ശ്രീന തുടങ്ങിയവർ ചടങ്ങുകൾക്ക് നേതൃത്വം നൽകി. വെള്ളായണി ദേവീ ക്ഷേത്രത്തിൽ രാവിലെ വിശേഷാൽ പൂജകൾ നടന്നു. ക്ഷേത്രം മേൽ ശാന്തി ചടങ്ങുകൾക്കു നേതൃത്വം ന ൽകി. ക്ഷേത്രം ഇളയവാത്തിയുടെ നേതൃത്വത്തിൽ വിദ്യാർഥികൾക്ക് ആദ്യാക്ഷരം കുറിച്ചു. പാറശാല: പാറശാല മുര്യങ്കര ഇലങ്കം ഭുവനേശ്വരി ദേവി ക്ഷേത്രം, പാറശാല ശ്രീ മഹാദേവര്‍ ക്ഷേത്രം, പരശുവയ്ക്കല്‍ പൊന്നംകുളം ദേവി ക്ഷേത്രം, ഉദിയന്‍കുളങ്ങര പലവകുളങ്ങര ശ്രീ മഹാദേവര്‍ ക്ഷേത്രം, പവതിയാന്‍വിള ശ്രീകൃഷ്ണ സ്വാമി ക്ഷേത്രം, അയ് ങ്കാമം ശ്രീകൃഷ്ണ സ്വാമി ക്ഷേത്രം എന്നിവിടങ്ങളില്‍ വിദ്യാരംഭം നടന്നു. മുര്യങ്കര ഇലങ്കം ഭുവനേശ്വരി ദേവിക്ഷേത്രത്തില്‍ മേല്‍ശാന്തി രമേശന്‍ പോറ്റിയു‌ടെ കാര്‍മികത്വത്തില്‍ വിദ്യാരംഭം കുറിച്ചു. പാലോട്: പച്ച നെടുംപറമ്പ് ശ്രീധർമശാസ്താ ക്ഷേത്രത്തിലെ വിദ്യാരംഭച്ചടങ്ങുകൾ വെമ്പായം വാദ്ധ്യാർമഠം ലക്ഷ്മീ നാരായണൻ പോറ്റിയുടെ നേതൃത്വത്തിൽ നടന്നു. ശ്രീസുബ്രഹ്മണ്യസ്വാമി ക്ഷേത്രത്തിലെ വിദ്യാരംഭച്ചടങ്ങുകൾക്ക് ക്ഷേത്രമേൽശാന്തി ചേന്നമന പ്രശാന്ത് കാർമ്മികത്വം വഹിച്ചു. നന്ദിയോട് വാഴപ്പാറ ശ്രീവനദുർഗ മഹാഗണപതി തമ്പുരാൻ ക്ഷേത്രത്തിലെ വിദ്യാരംഭച്ചടങ്ങുകൾ ക്ഷേത്രം തന്ത്രി നാരായണൻ രമേശൻ പോറ്റിയുടെ കാർമ്മികത്വത്തിലും ആലംപാറ ദേവീക്ഷേത്രത്തിൽ മേൽശാന്തി സുഭാഷ് ഭാർഗവൻ പോറ്റിയുടെ നേതൃത്വത്തിലും ചെല്ലഞ്ചി ഭഗവതി ക്ഷേത്രത്തിൽ മേൽശാന്തി രാമൻ പോറ്റിയുടെ നേതൃത്വത്തിലും വിദ്യാരംഭ ചടങ്ങുകൾ നടന്നു. വലിയ താന്നിമൂട് ശ്രീ ആയിരവില്ലി മഹാദേവർ ക്ഷേത്രത്തിൽ വൈക്കം ത്യാഗരാജൻ പോറ്റിയുടേയും ഡോ. എസ്. പ്രതാപന്‍റെയും നേതൃത്വത്തിൽ വിദ്യാരംംഭ ചടങ്ങുകൾ നടന്നു. കൂട്ടത്തികരിക്കകം ശ്രീ ദുർഗാഭഗവതി ക്ഷേത്രത്തിൽ ഡോ. പി.എൻ. ഷൈജുവിന്‍റെ നേതൃത്വത്തിലും നന്ദിയോട് പച്ച തേവരുകോണം സുബ്രഹ്മണ്യസ്വാമി ക്ഷേത്രത്തിൽ മേൽശാന്തി പേരില്ലം ഷിജുവിന്‍റെ നേതൃത്വത്തിലും കുഞ്ഞുങ്ങളെ എഴുത്തിനിരുത്തി. വെമ്പിൽ മണലയം ശിവക്ഷേത്രത്തിൽ ശശികുമാരൻ നായർ, രാധ എന്നിവരുടെ നേതൃത്വത്തിൽ വിദ്യാരംഭം നടന്നു. ചൂണ്ടാമല ശ്രീ ആയിരവില്ലി ക്ഷേത്രം, പെരിങ്ങമ്മല മഹാവിഷ്ണു ക്ഷേത്രം, പെരിങ്ങമ്മല കൊല്ലരുകോണം മേലാംകോട് ദേവീക്ഷേത്രം, ചെല്ലഞ്ചി ഭഗവതി ക്ഷേത്രം, പുലിയൂർ ശിവക്ഷേത്രം, പേരയം നീലിമല ക്ഷേത്രം കൂടാതെ വിവിധ ശ്രീനാരായണ ഗുരു മന്ദിരം എന്നിവിടങ്ങളിലും വിദ്യാരംഭച്ചടങ്ങുകൾ നടന്നു. വെള്ളറട: കുന്നത്തുകാല്‍ ശ്രീ ചിത്തിര തിരുനാള്‍ റസിഡന്‍ഷ്യല്‍ സെന്‍ട്രല്‍ സ്‌കൂളില്‍ വിജയദശമിയും, വിദ്യാരംഭവും സമുചിതമായി ആഘോഷിച്ചു. സ്‌കൂള്‍ പ്രിന്‍സിപ്പല്‍ എസ്. പുഷ്പവല്ലി കുരുന്നുകള്‍ക്ക് ആദ്യാക്ഷരം കുറിച്ചു. മണലൂര്‍ ജി.എസ്. അരുണും സംഘവും അവതരിപ്പിച്ച സംഗീത കച്ചേരി നടത്തി. തുടര്‍ന്നു വിദ്യാര്‍ഥികളുടെ സംഗീതാര്‍ച്ചനയും നടന്നു. ഇതിനോടനുബന്ധിച്ച് അടുത്ത അധ്യയന വര്‍ഷത്തേക്കുള്ള അഡ്മിഷനും ആരംഭിച്ചു.

ലോക പാലിയേറ്റീവ് കെയര്‍ ദിനം: വാക്കത്തണിന് ഇന്നു തുടക്കം

തിരുവനന്തപുരം: പതിനായിരക്കണക്കിന് യുവജനങ്ങളെ അണിനിരത്തിയുള്ള വാക്കത്തണുമായി പ്രമുഖ പാലിയേറ്റീവ് കെയര്‍ ശൃംഖലയായ ആല്‍ഫ പാലിയേറ്റീവ് കെയര്‍. ലോക പാലിയേറ്റീവ് കെയര്‍ ദിനാചരണത്തോടനുബന്ധിച്ച് ഒന്‍പതു ജില്ലകളിലായാണ് വാക്കത്തൺ‍ സംഘടിപ്പിക്കുന്നതെന്നു ആല്‍ഫ പാലിയേറ്റീവ് കെയര്‍ ചെയര്‍മാന്‍ കെ.എം. നൂര്‍ദീന്‍ പത്രസമ്മേളനത്തില്‍ അറിയിച്ചു. ഇന്നു രാവിലെ 9.30ന് കനകക്കുന്ന് കൊട്ടാരത്തിനു മുന്നില്‍നിന്നാണ് ആദ്യ വാക്കത്തൺ‍ ആരംഭിക്കുക. മന്ത്രി സജി ചെറിയാന്‍ വാക്കത്തണിന്‍റെ ഉദ്ഘാടനം നിര്‍വഹിക്കും. പത്രസമ്മേളനത്തില്‍ ആല്‍ഫ പാലിയേറ്റീവ് കെയര്‍ കമ്യൂണിറ്റി ഡയറക്ടര്‍ സുരേഷ് ശ്രീധരന്‍, പാലിയം ഇന്ത്യ എക്‌സിക്യുട്ടീവ് ഡയറക്ടര്‍ മനോജ് ജി.എസ് തുടങ്ങിയവര്‍ പങ്കെടുത്തു.

ഗാന്ധി ജയന്തി ദിനാഘോഷം

പൂവാർ: കാഞ്ഞിരംകുളം ബ്ലോക്ക്‌ കോൺഗ്രസ്‌ കമ്മിറ്റി സംഘടിപ്പിച്ച ഗാന്ധി ജയന്തി ആഘോഷം ബ്ലോക്ക്‌ പ്രസിഡന്‍റ് കരുംകുളം ജയകുമാർ ഉദ്ഘാടനം ചെയ്തു. പരണിയം ഫ്രാൻസിസ്, വിഴിഞ്ഞം ആംബ്രോസ്, ടി.കെ. അശോക കുമാർ, ജെ. ജോണി, സക്കീർ ഹുസൈൻ, സിദ്ധിക്ക് വിഴിഞ്ഞം, ബി. അനിൽകുമാർ, പാമ്പുകാല ജോസ്, വിഴിഞ്ഞം യേശുദാസ്, ടാൾ ബർട് മോറായിസ്, കാരുംകുളം ക്ലീറ്റസ്, രാജേന്ദ്രൻ പാമ്പുകാല, തോമസ് യേശുദാസ്, ആന്‍റണി, അഡ്വ. വെങ്കിദേഷ്, അഡ്വ. ആദർശ്, പ്രദീപ്‌ ശാന്തകുമാരൻ എന്നിവർ സംസാരിച്ചു. നെടുമങ്ങാട്: കോൺഗ്രസ് മൂഴി മണ്ഡലം കമ്മിറ്റിയുടെ നേതൃത്വത്തിൽ മണ്ഡലത്തിന്‍റെ വിവിധ ഭാഗങ്ങളിൽ ഗാന്ധിജയന്തി ആഘോഷം നടത്തി. മൂഴിയിൽ നടന്ന പുഷ്പാർച്ചനയിലും അനുസ്മരണത്തിനും മണ്ഡലം കോൺഗ്രസ് കമ്മിറ്റി പ്രസിഡന്‍റ് വേട്ടം പള്ളി സനൽ, ബ്ലോക്ക് കോൺഗ്രസ് കമ്മിറ്റി ഭാരവാഹികളായ കെ. ശേഖരൻ, കല്ലിയോട് ഭുവനേന്ദ്രൻ, വേങ്കവിള സുരേഷ്, മൂഴി സുനിൽ, ഷമി മൂഴി, ബിജു പന്നിയോട്ടുകോണം, പ്രദീപ് വേങ്കവിള തുടങ്ങിയവർ നേതൃത്വം നൽകി. പാറശാല: പാറശാല മണ്ഡലം കമ്മിറ്റിയുടെ നേതൃത്വത്തില്‍ പാറശാല ഗാന്ധി പാര്‍ക്കിലെ ഗാന്ധി പ്രതിമയില്‍ പുഷ്പാര്‍ച്ചനയും ജന്മദിന ആഘോഷവും നടത്തി. കെപിസിസി സെക്രട്ടറി അര്‍. വത്സലന്‍ ഉദ്ഘാടനം ചെയ്തു. മണ്ഡലം കോണ്‍ഗ്രസ് കമ്മിറ്റി പ്രസിഡന്‍റ് ജെ.കെ. ജസ്റ്റിന്‍ രാജ് അധ്യക്ഷനായിരുന്നു. ഡിസിസി ജനറല്‍ സെക്രട്ടറി പാറശാല സുധാകരന്‍, വേലപ്പന്‍ നായര്‍, വി.കെ. ജയറാം, വി. അരുണ്‍ വിന്‍സര്‍, രാജേന്ദ്രപ്രസാദ്, സുനില്‍കുമാര്‍, വിജയകുമാര്‍, രാമചന്ദ്രന്‍ തുടങ്ങിയവര്‍ പ്രസംഗിച്ചു. എൻസിപി പുഷ്പാർച്ചനയും സ്മൃതിസംഗമവും നടത്തി തിരുവനന്തപുരം: ഗാന്ധി ജയന്തി ദിനത്തിൽ എൻസിപി-എസ്പി സംസ്ഥാനതലത്തിൽ പുഷ്പാർച്ചനയും ഉപവാസവും സ്മൃതി സംഗമവും നടത്തി. തിരുവനന്തപുരത്തു ശ്രീകാര്യത്തു നടന്ന സംഗമം എൻസിപി-എസ് ദേശീയ സെക്രട്ടറി അഡ്വ. ആർ. സതീഷ് കുമാർ ഉദ്ഘാടനം ചെയ്തു. മതേതര ഇന്ത്യയെ സംരക്ഷിക്കുവാൻ വളർന്നു വരുന്ന യുവതലമുറ ഗാന്ധിമാർഗം സ്വീകരിച്ചു മുന്നോട്ട് വരണമെന്ന് അദ്ദേഹം പറഞ്ഞു. പാർട്ടി ബ്ലോക്ക് പ്രസിഡന്‍റ് ജി. സുപ്രദാസിന്‍റെ അധ്യക്ഷതയിൽ കൂടിയ സംഗമത്തിൽ സംസ്ഥാന സെക്രട്ടറി ഇടക്കുന്നിൽ മുരളി, ആലുവിള രാജേന്ദ്രൻ, ഗിരിജകുമാരി എന്നിവർ പ്രസംഗിച്ചു. അഡ്വ. ആർ. സതീഷ്കുമാർ പുഷ്പാർച്ചന നടത്തി. ജില്ലാ കമ്മിറ്റി അംഗങ്ങളായ അണിയൂർ സുരേന്ദ്രൻ, ജോയ്സണ്‍ ഡിസിൽവ, ബി. ചന്ദ്രൻ നായർ, ഭുവന സുധൻ, സുമി സപ്രദാസ് എന്നിവർ പങ്കെടുത്തു.

വയോജനങ്ങളുടെ കഴിവുകൾ വിനിയോഗിക്കപ്പെടണം: ഡോ. കായംകുളം യൂനുസ്

തിരുവനന്തപുരം: 800 കോടിക്കു മുകളിൽ വരുന്ന ലോക ജനസംഖ്യയിൽ നൂറു കോടിയോളം പേർ വയോജനങ്ങളാണ് എന്ന വസ്തുത പരിഗണിക്കുന്പോൾ, അവരുടെ കഴിവുകൾ തുടർന്നും ഉപയോഗിക്കുവാനുള്ള പദ്ധതികൾ ആവിഷ്കരിക്കേണ്ടിയിരിക്കുന്നു എന്ന് മുൻ ചീഫ് എൻജിനീയറും എഴുത്തു കാരനുമായ ഡോ. കായംകുളം യൂനുസ് അഭിപ്രായപ്പെട്ടു. പൂജപ്പുര പുര എൽഡേഴ്സ് ഫോറത്തിന്‍റെ ആഭിമുഖ്യത്തിൽ സംഘടിപ്പിച്ച അന്തർദേശീയ വയോജനദിന പരിപാടികൾ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. എസ്. വിശ്വംഭരൻ നായർ അധ്യക്ഷത വഹിച്ചു. ജി. രാധാകൃഷ്ണൻ, ജി. വിജയകുമാർ, പി.എസ്. മോഹനചന്ദ്രൻ, അഡ്വ. കെ. വിശ്വംഭരൻ, വി.എസ്. അനിൽ പ്രസാദ്, എസ്.വി. സുജ, അഡ്വ. കെ. രാജരാജൻ എന്നിവരും പ്രസംഗിച്ചു.

വീടിനുമുന്നിൽ നിർത്തിയിരുന്ന സ്കൂട്ടർ കത്തിനശിച്ചു

കാട്ടാക്കട: വീട്ടിൽ മുന്നിൽ നിർത്തിയിട്ടിരുന്ന സ്കൂട്ടർ കത്തിയമർന്നു. കാട്ടാക്കട പോലീസ് സ്റ്റേഷൻ പരിധിയിലെ അമ്പലത്തിൻകാല പാപ്പനം ശരത്തിന്‍റെ എടവിളാകത്ത് വീട്ടിൽ വ്യാഴാഴ്ച പുലർച്ചെയാണു സംഭവം. ബുധനാഴ്ച രാത്രി എട്ടുമണിയോടെ വീട്ടിലെത്തിയ ശരത് പതിവുപോലെ വാഹനം വീടിനു സമീപത്ത് നിർത്തിയശേഷം വീട്ടിലേക്ക് കയറി. തുടർന്ന് രാത്രി ഒരു മണിയോടെയാണ് വീടിന്‍റെ ജനൽചില്ല് വലിയ ശബ്ദത്തോടെ പൊട്ടിയതിനെത്തുടർന്നാണ് തീ കത്തുന്ന വിവരം വീട്ടുകാർ അറിയുന്നത്. പുറത്തേക്കിറങ്ങി നോക്കുമ്പോഴേക്കും വാഹനം കത്തിയമർന്നു. മൂന്നു ലിറ്ററോളം പെട്രോൾ നിറച്ചിരുന്നതു കാരണം പൊട്ടിത്തെറി പേടിച്ച് ശരത്തും വീട്ടുകാരും കത്തുന്ന വാഹനത്തിന് അടുത്തേക്ക് പോകാൻ ഭയപ്പെട്ടു. തുടർന്ന് ഇവർ പോലീസിൽ പരാതി നൽകി. പോലീസ് എത്തി പരിശോധന നടത്തി തുടർ നടപടികൾ ആരംഭിച്ചു. മൂന്നുമാസം മുൻപ് വാങ്ങിയ പുതിയ വാഹനമാണ് കത്തി അമർന്നത്. സംഭവത്തെ കുറിച്ച് കൂടുതൽ അന്വേഷണം നടത്തുമെന്ന് കാട്ടാക്കട പോലീസ് പറഞ്ഞു.

ഗാന്ധിജിയെ അനുസ്മരിച്ചു

തിരുവനന്തപുരം: ചരിത്രത്തെ വളച്ചൊടിക്കാനും മഹാത്മജിയെ തമസ്കരിക്കാനുമുള്ള മോദി സർക്കാരിന്‍റെ ശ്രമങ്ങളെ ചെറുത്തു തോല്പിക്കുമെന്ന് കെപിസിസി മുൻ പ്രസിഡന്‍റ് കെ.മുരളീധരൻ. കെപിസിസി ഗാന്ധിദർശൻ സമിതി കിഴക്കേക്കോട്ട ഗാന്ധി പാർക്കിൽ സംഘടിപ്പിച്ച "ഗാന്ധിപഥം"പരിപാടി ഉദ്ഘാടനം ചെയ്യുകയായിരുന്നു അദ്ദേഹം. ഗാന്ധി പ്രതിമയിൽ പുഷ്പാർച്ചന നടത്തിയശേഷം സംഘടിപ്പിച്ച അനുസ്മരണ യോഗത്തിൽ പ്രസിഡന്‍റ് വഞ്ചിയൂർ രാധാകൃഷ്ണൻ അധ്യക്ഷത വഹിച്ചു. സമിതി സംസ്ഥാന വർക്കിംഗ് പ്രസിഡന്‍റ് കമ്പറ നാരായണൻ പ്രതിജ്ഞ ചൊല്ലിക്കൊടുത്തു. ജനറൽ സെക്രട്ടറി പരശുവയ്ക്കൽ രാധാകൃഷ്ണൻ, ജില്ലാ സെക്രട്ടറി കോട്ടമുകൾ സുഭാഷ്, മണക്കാട് ചന്ദ്രൻകുട്ടി, കടകംപള്ളി ഹരിദാസ്, വിഴിഞ്ഞം ഹനീഫ, രവീന്ദ്രൻ നായർ, അഡ്വ. പി.റഹീം, അമൃത കൗർ, ജ്യോതിഷ് കുമാർ, പട്ടം മുരുകേശൻ, മസൂദ്, പാറ്റൂർ സുനിൽ എന്നിവർ പ്രസംഗിച്ചു.കാലടി വാസുദേവൻ നായർ, അബ്ദുൽസമദ്, പാടശ്ശേരി ഉണ്ണി, അരുൺകാലടി, കരകുളം ശുശീന്ദ്രൻ, ചാല സുലൈമാൻ, പട്ടം തുളസി, എസ്.ആർ. രവികുമാർ, ജി. ഹരികുമാർ, കുച്ചപ്പുറം തങ്കപ്പൻ, കെ. ഗോപാലകൃഷ്ണൻ നായർ, ചന്ദ്രശേഖരൻ നായർ, പി.എൻ. ഗോപാലകൃഷ്ണൻ, ഷാജി കുര്യൻ, പാളയം സുധി, ഗംഗാപ്രസാദ്, ഓമന അമ്മ, വേലായുധൻ പിള്ള, മഞ്ജുഷ, ഗോപകുമാർ ഉണ്ണിത്താൻ, ഗോപിനാഥൻ കൈതറത്തല, മുട്ടത്തറ മണികണ്ഠൻ, നൂഹുമാൻ, കാലടി സുരേഷ്, എം.ഇ. അനസ്, സജീവ്, ജയകുമാർ, വി. ഹരികുമാർ, കൃഷ്ണകുമാർ, ശ്രീവത്സൻ തമ്പി, നാരായണൻകുട്ടി, ദേവൻ നായർ, മെയ്തീൻ ഹാജി, വിനോദ് കൊഞ്ചിറവിള, പട്ടം അനിൽ, ജഹാംഗീർ, വെട്ടുകാട് ജോർജ്, ശിവകുമാർ കരിക്കകം തുടങ്ങിയവർ പങ്കെടുത്തു.

ഹരിശ്രീകുറിച്ച് കുരുന്നുകൾ

തിരുവനന്തപുരം : വിജയദശമിദിനത്തിൽ ആദ്യക്ഷരം കുറിച്ചു കുരുന്നുകൾ. ജില്ലയിലെ ക്ഷേത്രങ്ങളിലും സാംസ്കാരിക സ്ഥാപനങ്ങളിലും വിദ്യാരംഭത്തിനു വലിയ തിരക്ക് അനുഭവപ്പെട്ടു. ഇന്നലെ രാവിലെ പൂജയെടുപ്പിനു ശേഷമാണ് വിദ്യാരംഭ ചടങ്ങുകൾ തുടങ്ങിയത്. പൂജപ്പുര സരസ്വതീ മണ്ഡപത്തിൽ 1300 കുട്ടികൾ ആദ്യക്ഷരം കുറിച്ചു. ശ്രീപത്മനാഭസ്വാമി ക്ഷേത്രത്തിൽ വ്യാസ പ്രതിഷ്ഠയ്ക്കു മുന്നിലും കോട്ടയ്ക്കകം നവരാത്രി മണ്ഡപം, ആര്യശാല ഭഗവതിക്ഷേത്രം, ചെന്തിട്ട ഭഗവതീക്ഷേത്രം, ആറ്റുകാൽ ഭഗവതി ക്ഷേത്രം, കരിക്കകം ചാമുണ്ഡി ക്ഷേത്രം, നെയ്യാറ്റിൻകര ശ്രീകൃഷ്ണസ്വാമി ക്ഷേത്രം, വർക്കല ജനാർദനസ്വാമി ക്ഷേത്രം, പണിമൂല ദേവീക്ഷേത്രം, ശംഖുംമുഖം ദേവീക്ഷേത്രം, കഠിനംകുളം മഹാദേവക്ഷേത്രം, കൊഞ്ചിറവിള ഭഗവതീക്ഷേത്രം, ശിവഗിരി മഠം, അരുവിപ്പുറം മഠം, ചെന്പഴന്തി ശ്രീനാരായണ ഗുരുകുലം, ഭാരതീയ വിചാരകേന്ദ്രം, ഐരാണിമുട്ടം തുഞ്ചൻ സ്മാരകം, ശാന്തിഗിരി ആശ്രമം, രാജ്ഭവൻ, തോന്നയ്ക്കൽ ആശാൻ സ്മാരകം എന്നിവിടങ്ങളിലും പൂജവയ്പ്പും വിദ്യാരംഭവും നടന്നു. സംഗീത, നൃത്ത, ചിത്രകല അരങ്ങേറ്റവും വിവിധ കേന്ദ്രങ്ങളിൽ ഉണ്ടായിരുന്നു. ക്ഷേത്രങ്ങളിൽ മേൽശാന്തിമാരും ആചാര്യ·ാരും സംഗീതഞ്ജരും ചിത്രകാര·ാരും വിദ്യാരംഭത്തിനു നേതൃത്വം നൽകി. നെയ്യാറ്റിന്‍കര : താലൂക്കിലെ വിവിധ ക്ഷേത്രങ്ങളില്‍ നവരാത്രി ആഘോഷങ്ങളുടെ ഭാഗമായി ഇന്നലെ പൂജയെടുപ്പ് ചടങ്ങും വിദ്യാരംഭവും നടന്നു. മഹേശ്വരം ശ്രീ ശിവപാർവതി ക്ഷേത്രത്തിൽ ഇന്നലെ നടന്ന വിദ്യാരംഭ ചടങ്ങുകള്‍ക്ക് സ്വാമി മഹേശ്വരാനന്ദ സരസ്വതി നേതൃത്വം നല്‍കി. നെയ്യാറ്റിന്‍കര ശംഖൊലി മാടന്‍കോവില്‍, മാരായമുട്ടം ശ്രീനീലകേശി ക്ഷേത്രം, ഇറയംകോട് മഹാദേവര്‍ ക്ഷേത്രം, കുറ്റ്യാണിക്കാട് പൊഴിയല്ലൂര്‍ മഹാവിഷ്ണു ക്ഷേത്രം ചൂണ്ടിക്കല്‍ ശ്രീഭദ്രകാളി ദേവി ക്ഷേത്രം, ആയയിൽ കരിയിലക്കുളങ്ങര ശ്രീ ഭദ്രകാളി ക്ഷേത്രം മുതലായ പ്രമുഖ ക്ഷേത്രങ്ങളിലെല്ലാം നവരാത്രി മഹോത്സത്തോടനുബന്ധിച്ച് പൂജവയ്പും പൂജയെടുപ്പും വിദ്യാരംഭവും നടന്നു. പൗർണമിക്കാവിൽ വിഴിഞ്ഞം: വെങ്ങാനൂർ പൗർണമിക്കാവ് ശ്രീ ബാലാ ത്രിപുര സുന്ദരീ ദേവീ ക്ഷേത്രത്തിൽ പൗർണമി മഹോത്സവം ആരംഭിച്ചു. ഇന്നലെ വിജയദശമിയിൽ നൂറുകണക്കിനു കുരുന്നുകളെ എഴുത്തിനിരുത്തി. അക്ഷരദേവതമാരുടെ മുന്നിൽ ഇരുപതോളം വിദ്യാസമ്പന്നർ ആദ്യാക്ഷരം കുറിക്കാനിരുന്നു. ഡൽഹിയിൽ നിന്നെത്തിയ സ്വാമി മഹാമണ്ഡലേശ്വർ നാരായണാനന്ദ ഗിരി പുസ്തക പൂജ നടത്തി. പൗർണമി മഹോത്സവം പ്രമാണിച്ച് ഏഴുവരെ തുടർച്ചയായി നട തുറന്നിരിക്കും. നൃത്ത സംഗീത പരിപാടികൾ, ലളിതാ സഹസ്ര നാമ ജപം, ദേവീ മാഹാത്മ്യ പാരായണം, ആധ്യാത്മിക പ്രഭാഷണങ്ങൾ, ഭാഗവത ചൂഢാമണി പള്ളിക്കൽ സുനിലിന്‍റെ ദേവീ ഭാഗവത പാരായണം തുടങ്ങിയവ എല്ലാ ദിവസവും ഉണ്ടായിരിക്കും. ഇന്നു വൈകുന്നേരം അഞ്ചിനു കാവടി അഭിഷേകം, 6.30ന് കാപ്പുകെട്ട്. അഞ്ചിനു വൈകുന്നേരം അഞ്ചിനു കാവടി ഘോഷയാത്ര, വെങ്ങാനൂർ നെല്ലിവിള ക്ഷേത്രത്തിൽ നിന്ന് ആരംഭിച്ച് പൗർണ്ണമിക്കാവിൽ എത്തിച്ചേരും. ശേഷം അഗ്നിക്കാവടി. ഏഴിനു രാവിലെ പഞ്ചമുഖ ഗണപതി ഹോമം, നാഗർപൂജ. വൈകുന്നേരം ഏഴുമുതൽ വലിയ പൂപ്പട, പുഷ്പാഭിഷേകം, പൂമൂടൽ, തിളച്ച എണ്ണ നീരാട്ട്, മഞ്ഞപ്പാൽ നീരാട്ട്, മഹാഗുരുസി. പൗർണമി മഹോത്സവത്തിനു കെഎസ്ആർടിസി എല്ലാ ജില്ലയിൽനിന്നും ബഡ്ജറ്റ് ടൂറിസം സെൽ വഴി ബസ് സർവീസ് നടത്തുന്നുണ്ട്. പരിപാടികൾ പങ്കെടുക്കുന്നവർ 90378 50001 ബന്ധപ്പെടണമെന്ന് അറിയിച്ചു. ഡിജിറ്റൽ വിദ്യാരംഭം നെടുമങ്ങാട്: സൺ എഡ്യൂക്കേഷൻ 25 ഓളം ക്ഷേത്രങ്ങളിൽ ഡിജിറ്റൽ വിദ്യാരംഭം സംഘടിപ്പിച്ചു, ആദ്യാക്ഷരം എഴുതുന്ന നിരവധി കൊച്ചുകൂട്ടുകാർ ഡിജിറ്റൽ ഹരിശ്രീയും കുറിച്ചു. സൺ എഡ്യൂക്കേഷൻ എംഡി ഷമീർ എ. മുഹമ്മദ് ഉദ്ഘാടനം നിർവഹിച്ചു, റെജി സന്തോഷ്, ആസിഫ് ജാൻ, എം.എസ്. സുനിൽ, മിസി യാബ്, സൂര്യഗായത്രി, ഷിബിന രാജ്, നജ്ന ബീഗം, തുടങ്ങിയവർ നേതൃത്വം നൽകി.

കൂടുതൽ ബിഎംബിസി റോഡുകൾ നെടുമങ്ങാട്: പി.എ. മുഹമ്മദ് റിയാസ്

നെടുമങ്ങാട്: സംസ്ഥാനത്ത് ഏറ്റവും കൂടുതൽ റോഡുകൾ ബി എംബിസി നിലവാരത്തിൽ നിർമാണം പൂർത്തിയാക്കിയത് നെടുമങ്ങാട് നിയോജക മണ്ഡലത്തിലാണെന്നു മന്ത്രി പി.എ. മുഹമ്മദ് റിയാസ്. നെടുമങ്ങാട് നിയോജക മണ്ഡലത്തിലെ നവീകരിച്ച വേറ്റിനാട് - മത്തനാട് റോഡിന്‍റെ ഉദ്ഘാടനം നിർവഹിക്കുകയായിരുന്നു മന്ത്രി. നെടുമങ്ങാട്ട് ഇതുവരെ 41 റോഡുകളാണ് ഗുണമേന്മയുള്ള ബിഎംബിസി നിലവാരത്തിൽ നവീകരിച്ചത്. വേറ്റിനാട് - മത്തനാട് റോഡിന്‍റെ നവീകരണത്തിന് 7.33 കോടി രൂപ രണ്ടുഘട്ടമായാണ് അനുവദിച്ചതെന്നും മന്ത്രി വ്യക്തമാക്കി. മന്ത്രി ജി.ആർ. അനിൽ അധ്യക്ഷത വഹിച്ചു. ഈ സർക്കാർ അധികാരത്തിൽ എത്തുമ്പോൾ ഒരിക്കലും നടക്കില്ല എന്നു പറഞ്ഞ പല വികസനങ്ങളും നാലര വർഷംകൊണ്ടു പൂർത്തിയാക്കുവാൻ കഴിഞ്ഞു. ജനങ്ങളുടെ ആവശ്യങ്ങൾ മനസിലാക്കിയാണ് സർക്കാർ പ്രവർത്തിക്കുന്നതെന്നും വികസനത്തിന്‍റെ കാര്യത്തിൽ ഒരു വിട്ടുവീഴ്ചയ്ക്കും സർക്കാരില്ലെന്നും അദ്ദേഹം പറഞ്ഞു. 2023-24 ശബരിമല പദ്ധതിയിൽ ഉൾപെടുത്തി 7.33 കോടി രൂപ ചെലവഴിച്ചാണു നവീകരണം പൂർത്തിയാക്കിയത്. കോട്ടയം എംസി റോഡിനെയും തിരുവനന്തപുരം വെഞ്ഞാറമൂട് കെഎസ്ടിപി റോഡിനെയും ബന്ധിപ്പിക്കുന്ന പ്രധാന റോഡാണ് വേറ്റിനാട് - മത്തനാട് റോഡ്. നെടുമങ്ങാട് ബ്ലോക്ക് പഞ്ചായത്ത് പ്രസിഡന്‍റ് വി. അമ്പിളി, വെമ്പായം പഞ്ചായത്ത് പ്രസിഡന്‍റ് ബീനാ ജയൻ, വെമ്പായം പഞ്ചായത്ത് വൈസ് പ്രസിഡന്‍റ് ബിന്ദു ബാബുരാജ്, ത്രിതല പഞ്ചായത്ത് അംഗങ്ങൾ തുടങ്ങിയവർ പങ്കെടുത്തു.

രാജ്യത്ത് മാധ്യമപ്രവർത്തനം വെല്ലുവിളി നേരിടുന്നു: മുഖ്യമന്ത്രി

തിരുവനന്തപുരം: രാജ്യത്ത് മാധ്യമപ്രവർത്തനം വെല്ലുവിളിനേരിടുകയാണെന്നു മുഖ്യമന്ത്രി പിണറായി വിജയൻ. കേരള മീഡിയ അക്കാദമിയുടെ മാധ്യമോത്സവം ഉദ്ഘാടനം ചെയ്തു പ്രസംഗിക്കുകയായിരുന്നു മുഖ്യമന്ത്രി പിണറായി വിജ യൻ. തെറ്റായ ഭരണനയത്തെ വിമർശിച്ചാൽ രാജ്യദ്രോഹമാണെന്ന വ്യാഖ്യാനമാണ്. രാജ്യം അഭിമുഖീകരിക്കുന്ന കാതലായ പ്രശ്നങ്ങളിൽനിന്നും ജനശ്രദ്ധ തിരിച്ചുവിടാൻ വർഗീയ ധ്രുവീകരണത്തിന് കോപ്പുകൂട്ടുന്നു. ഭരണസംവിധാനത്തിനെതിരെ ഉയരുന്ന എതിർപ്പിന്‍റെയും വിമർശനങ്ങളുടെയും സ്വരങ്ങളെ കൈയൂക്കിന്‍റെ ഭാഷയിൽ കൈകാര്യം ചെയ്യുന്ന അവസ്ഥയാണെന്നും മുഖ്യമന്ത്രി പറഞ്ഞു. ചടങ്ങിൽ പലസ്തീനോടുള്ള കേരളത്തിന്‍റെ ഐക്യദാർഢ്യം പ്രകടിപ്പിച്ച് ഫെസ്റ്റിവലിലെ ഡെലിഗേറ്റുകൾ ഒപ്പിട്ട ഐക്യദാർഢ്യരേഖ മുഖ്യമന്ത്രി ഇന്ത്യയിലെ പലസ്തീൻ അംബാസഡർ അബ്ദുള്ള അബു ഷ്വേഷിന് കൈമാറി.

കാപ്പ ചുമത്തി നാടുകടത്തിയ പ്രതി അറസ്റ്റിൽ

വെഞ്ഞാറമൂട്: കാപ്പ ചുമത്തി നാടുകടത്തിയ പ്രതി അറസ്റ്റിൽ. വെഞ്ഞാറമൂട് പോലീസ് സ്റ്റേഷനിൽ റൗഡി ഹിസ്റ്ററി ഷീറ്റിൽ ഉൾപ്പെട്ട മുരൂർക്കോണം വരുൺ നിവാസിൽ തൈത എന്ന ബിജു(49)വാണ് അറസ്റ്റിലായത്. വെഞ്ഞാറമൂട് പോലീസ് സ്റ്റേഷനിലും വാമനപുരം എക്സൈസ് ഓഫീസിലുമായി ഒരു കൊലക്കേസ് ഉൾപ്പടെ ഒൻപത് കേസുകളിലെ പ്രതിയാണ് ഇയാൾ . 2012 ലെ കൊലപാതക കേസിലെ വിസ്താരവേളയിൽ 2025-ൽ സാക്ഷിയെ ഭീഷണിപ്പെടുത്തിയതിന് ഇയാൾക്കെതിരെ വെഞ്ഞാറമൂട് സ്റ്റേഷനിൽ കേസുണ്ട്. തുടർന്ന് തിരുവനന്തപുരം റെയിഞ്ച് ഡിഐജി അജിത ബീഗം 2007-ൽ കാപ്പാനിയമ പ്രകാരം ഇയാളെ നാടുകട ത്തിയിരുന്നു. എന്നാൽ ഉത്തരവ് നിലനിൽക്കെ വ്യവസ്ഥകൾ ലംഘിച്ച് മുരൂർക്കോണത്ത് എത്തിയതായി ആറ്റിങ്ങൽ ഡിവൈഎസ്പി മഞ്ജുലാലിന് ലഭിച്ച വിവരത്തെ തുടർന്ന് വെഞ്ഞാറമൂട് പോലീസ് ഇൻസ്പെക്ടർ ആസാദ് അബ്ദുൽകലാമിന്‍റെ നേതൃത്വത്തിലുള്ള പോലീസ് സംഘം ഇയാളെ പിടികൂടുകയായിരുന്നു. പ്രതിയെ നെടുമങ്ങാട് ജുഡീസൽ മജിസ്‌ട്രേറ്റ് കോടതി മുമ്പാകെ ഹാജരാക്കി റിമാൻഡ് ചെയ്തു.

ജിംനാസ്റ്റിക്‌സ്: തിരുവനന്തപുരം സെന്‍റ് ജോസഫ് സ്കൂൾ നാലാം തവണയും സംസ്ഥാന ചാമ്പ്യന്മാർ

തിരുവനന്തപുരം: 67- മത് സംസ്ഥാന സ്കൂൾ ഗെയിംസ് മത്സരങ്ങളുടെ ഗ്രൂപ്പ് വൺ മത്സരങ്ങളിൽ തിരുവനന്തപുരം സെന്‍റ് ജോസഫ് ഹയർ സെക്കൻഡറി സ്കൂൾ ജിംനാസ്റ്റിക്‌സ് ടീം തുടർച്ചയായി നാലാം വർഷവും സംസ്ഥാന ചാമ്പ്യന്മാരായി. സബ് ജൂണിയർ വിഭാഗത്തിൽ എട്ടാം സ്റ്റാൻഡേർഡ് വിദ്യാർഥികളായ ജി.ആർ. ഹരിഗോവിന്ദ് അഞ്ചു സ്വർണവും ഒരു വെള്ളിയും നേടി ഓവറോൾ ചാമ്പ്യനും ആർ.ജി. രോഹിത് ഒരു സ്വർണം, ഒരു വെള്ളി, രണ്ടു വെങ്കലം എന്നിവ നേടി രണ്ടാം ഓവറോൾ ചാമ്പ്യനുമായി. ഏഴാം ക്ലാസ് വിദ്യാർഥി സി. ഇഷാൻ രാജ് രണ്ടു വെള്ളിയും മൂന്നു വെങ്കലവും കരസ്ഥമാക്കി. ജൂണിയർ വിഭാഗത്തിൽ ശ്രീരാഗ് എസ് രാജേഷ് രണ്ടു സ്വർണം, മൂന്നു വെള്ളി, ഒരു വെങ്കലം എന്നിവ നേടി രണ്ടാം ഓവറോൾ ചാമ്പ്യനായി. ഒന്പതാം ക്ലാസ് വിദ്യാർഥികളായ ജെ. ശിവപാൽ, എസ്. ആദർശ്്, കെ.പി. റിയാൻ അലി എന്നിവരുടെയും എട്ടാം ക്ലാസ് വിദ്യാർഥി നിബിൻ സാമിന്‍റെയും പ്രകടനങ്ങൾ വിജയത്തിന് കരുനൽകി. സീനിയർ വിഭാഗത്തിൽ 12-ാം ക്ലാസിലെ മിൻഹാജ് എസ്. സാജ് അഞ്ചു സ്വർണവു, ഒരു വെള്ളിയും നേടി ഓവറോൾ ചാമ്പ്യനായപ്പോൾ പ്ലസ് വൺ വിദ്യാർഥി ബി.എസ്. ഡിബിൻ ഒരു വെള്ളിയും ഒരു വെങ്കലവും കരസ്ഥമാക്കി. സംസ്ഥാന മത്സരങ്ങളിൽ വിജയികളായവരെ സ്കൂൾ മാനേജർ ഫാ. ജെറോം അൽഫോൺസ്, സ്കൂൾ പ്രിൻസിപ്പൽ സുനിൽകുമാർ മൊറൈസ്, ഹെഡ്മാസ്റ്റർ ഷമ്മി ലോറൻസ്, ഫിസിക്കൽ എജുക്കേഷൻ അധ്യാപകരായ മനോജ് സേവ്യർ, ജോൺ ബോസ്കോ എന്നിവരുടെ നേതൃത്വത്തിൽ അഭിനന്ദിച്ചു.

നെയ്യാറ്റിന്‍കര നഗരസഭയിൽ "ശാന്തി ഇടം' സജ്ജമാകുന്നു

നെയ്യാറ്റിന്‍കര: നെയ്യാറ്റിന്‍കര നഗരസഭ നിവാസികളുടെ ഏറെ ക്കാലത്തെ ആവശ്യമായ പൊതുശ്മശാനം പ്രവര്‍ത്തന സജ്ജമാകുന്നു. നഗരസഭ പരിധിയിലെ മലഞ്ചാണി മലയിൽ ഉയരുന്ന "ശാന്തി ഇടം' എന്നു പേരായ വാതകശ്മശാനത്തിൽ ഒരേസമയം രണ്ടു മൃതദേഹങ്ങൾ സംസ്കരിക്കാനുള്ള സൗകര്യമുണ്ടാകും. 5,000 ചതുരശ്രയടി വിസ്തൃതിയിലെ കെട്ടിടത്തിന്‍റെ നിര്‍മാണ പ്രവര്‍ത്തനങ്ങള്‍ പൂർണമായും പൂര്‍ത്തീകരിച്ച് ഉടന്‍ തുറന്നുനല്‍കുമെന്ന് നഗരസഭ ചെയര്‍മാന്‍ പി. കെ. രാജമോഹനന്‍ അറിയിച്ചു. 2024 ഡിസംബർ 11-നാണ് നഗരസഭയിലെ പ്ലാവിള വാർഡിലെ മലഞ്ചാണിമലയിൽ നഗരസഭ വാങ്ങിയ ഒരേക്കറിലേറെ സ്ഥലത്ത് വാതകശ്മശാനത്തിന്‍റെ നിർമാണ പ്രവർത്തനങ്ങൾ ആരംഭിച്ചത്. 99 ലക്ഷം രൂപ നിർമാണപ്രവൃത്തികൾക്കായി ആദ്യം നീക്കിവച്ചു. പിന്നീട് ഈ തുക പര്യാപ്തമല്ലെന്നതിനാൽ ഇത്തവണത്തെ ബജറ്റിൽ 85 ലക്ഷം രൂപ അധികമായി അനുവദിച്ചു. മലഞ്ചാണി മലയുടെ ഭൂമിശാസ്ത്രം കണക്കിലെടുത്ത് മണ്ണിടിച്ചിൽ ഒഴിവാക്കിക്കൊണ്ടുള്ള നിർമാണ പ്രവർത്തനമാണ് നടത്തിയത്. തിരുവനന്തപുരം ആസ്ഥാനമായുള്ള ഹെർമിറ്റ് ഡിസൈൻ സ്റ്റുഡിയോ "ശാന്തി ഇടം' രൂപകല്പന ചെയ്തു. മലയെ മൂന്നു തട്ടുകളായി തിരിച്ചാണു നിർമാണം. "ശാന്തി ഇട'ത്തിന്‍റെ പ്രധാന കെട്ടിടം മുകളിലത്തെ തട്ടിലാണ്. നാലുകെട്ടിന്‍റെ രൂപത്തിലുള്ളതാണ് മേൽക്കൂര. രണ്ടും മൂന്നും തട്ടുകളിലായാണ് പാർക്കിംഗും പൂന്തോട്ടവും ഇരിപ്പിടങ്ങളും ഒരുക്കിയിരിക്കുന്നത്. കെട്ടിടനിർമാണം, വൈദ്യുതീകരണം, പ്ലംബിംഗ് എന്നിവയും പൂർത്തിയായി. ഒരേ സമയം രണ്ടു മൃതദേഹങ്ങളുടെ അന്ത്യകർമങ്ങൾ ചെയ്യാനുള്ള പ്രത്യേക ഹാളും ഒരുക്കിയിട്ടുണ്ട്. വാതക ചിതകളൊരുക്കുന്നതിനായി 56 ലക്ഷം രൂപയാണ് ചെലവിട്ടത്. ഇതിനായുള്ള യന്ത്രസാധനങ്ങളും വാതക പ്ലാന്‍റും ചെന്നൈയിൽനിന്നും എത്തിച്ചേർന്നു. ചുറ്റുമതിലിന്‍റെ യും പൂന്തോട്ടത്തിന്‍റെയും നിർമാണമാണു നിലവില്‍ പുരോഗമിക്കുന്നത്. മലഞ്ചാണിമലയുടെ ഒരുഭാഗത്തു നിന്നാല്‍ നെയ്യാറ്റിൻകര നഗരത്തിന്‍റെ ആകാശക്കാഴ്ച കാണാനാകും. ഇവിടെ വ്യൂ പോയിന്‍റ് നിർമിക്കാനും ഉദ്ദേശമുണ്ട്. പാർക്കിൽ നടപ്പാത നിർമിക്കും. പ്രഭാത, സായാഹ്ന നടത്തത്തിന് ഉപകരിക്കുന്ന തരത്തിലാണ് നടപ്പാത നിർമിക്കുന്നത്. ശ്മശാനത്തിലേക്കുള്ള റോഡു രണ്ടുഘട്ടമായി ടാര്‍ ചെയ്തു. എംഎൽഎ ഫണ്ട്, നഗരസഭാ ഫണ്ട് എന്നിവ ഉപയോഗിച്ചാണ് റോഡ് നവീകരിച്ചത്. ഇനി പെരുമ്പഴുതൂരിൽനിന്നു "ശാന്തി ഇട'ത്തിലേക്ക് എത്താനായി പുതിയ റോഡ് നിർമിക്കും. ഇതിനായി സ്ഥലമേറ്റെടുക്കാനുള്ള നടപടിയിലാണ് നഗരസഭ. ശ്മശാനത്തിലെ ഉപയോഗത്തിനാവശ്യമായ വെള്ളത്തിനായി കുഴൽക്കിണർ നിർമിച്ചു. ഈ കുഴൽക്കിണറിൽനിന്ന് മലഞ്ചാണി പ്രദേശത്തെ നാട്ടുകാർക്കായി ടാങ്ക് സ്ഥാപിച്ചു കുടിവെള്ള വിതരണം ചെയ്യുന്നതിനുള്ള നടപടിയും നഗരസഭ ആരംഭിച്ചുവെന്ന് ചെയർമാൻ പി.കെ. രാജമോഹനൻ അറിയിച്ചു.

നെയ്യാർ അരുവിക്കര കീഴാറൂർ നെട്ടണി റോഡ് നിർമാണം അവസാനഘട്ടത്തിൽ

മാറനല്ലൂർ: നെയ്യാർ അരുവിക്കര കീഴാറൂർ നെട്ടണി റോഡുപണി അവസാന ഘട്ടത്തിൽ. മലയോര മേഖലയിൽനിന്നു തലസ്ഥാനത്ത് എത്താൻ കഴിയുന്ന റോഡ് തകർന്നു കിടക്കുകയായിരുന്നു. ഡി.ആർ. സാങ്കേതിക വിദ്യ ഉപയോഗിച്ച് നവീകരിക്കുന്ന ടാറിംഗ് പുരോഗമിക്കുകയാണ്. ഫുൾ ഡെപ്ത് റിക്ലമേഷൻ (എഫ്ഡിആർ), ബൈ ആക്സിയല്‍ സിന്തറ്റിക്സ് ജിയോഗ്രിഡ്, കയർ ഭൂവസ്ത്രം എന്നിങ്ങനെ നൂതന സാങ്കേതിക വിദ്യകൾ ഉപയോഗപ്പെടുത്തി കാലാവസ്ഥയെ അതിജീവിക്കുന്ന റോഡാണിത്. കീഴാറൂർ നെട്ടണി അരുവിക്കര റോഡ് പുനരുദ്ധാരണം നൂതന സാങ്കേതികവിദ്യയായ എഫ്ഡിആർ, ഒപ്പം വെളുത്ത പെർമിയബിൾ ജിയോടെക് സ്റ്റൈൽ ഫാബ്രിക് ഉപയോഗിച്ചാണ് നടത്തുന്നത്. മഴയിൽനിന്നു റോഡിനെ സംരക്ഷിക്കുന്ന വലിയ ഷീറ്റുകളാണ് പെർമിയബിൾ ജിയോടെക്സ്റ്റൈൽ ഫാബ്രിക്. ഇവ മണ്ണൊലിപ്പ് തടയുകയും വെള്ളം ഒഴുകിപ്പോകാൻ സഹായിക്കുകയും ചെയ്യുന്നു. ഒരു റോഡിന് അടിയിലുള്ള മണ്ണു നിരന്തരം നനഞ്ഞിരിക്കുന്നതോ ചെളി നിറഞ്ഞതോ ആയ ഭൂപ്രകൃതിയിലാണെങ്കിൽ അതിന്‍റെ സ്വാഭാവിക ശക്തി വളരെ കുറവായിരിക്കും. ഇതു കാരണം ഇത്തരം സ്ഥലങ്ങളിലെ റോഡുകൾക്ക് പെട്ടെന്നു കേടുപാടുകൾ സംഭവിക്കുന്നു. ഇതിനു പരിഹാരമായി, അങ്ങനെയുള്ള സ്ഥലങ്ങളിൽ ജിയോ ടെക്‌സ്‌റ്റൈൽസ് കൂടുതൽ ഫലപ്രദമാണെന്നും കണ്ടെത്തിയിട്ടുണ്ട്. റെയിൽവേ, തീരദേശവുമായി ബന്ധപ്പെട്ട നിർമാണങ്ങൾ, ജലസ്രോതസുകളുമായി ബന്ധപ്പെട്ട നിർമാണങ്ങൾ എന്നിവയിൽ വ്യാപകമായി ഉപയോഗിക്കുന്ന ഈ സാങ്കേതികവിദ്യ ഫിൽട്ടറേഷൻ, മണ്ണൊലിപ്പ് നിയന്ത്രണം, മണ്ണ് ശക്തിപ്പെടുത്തൽ എന്നിവയ്ക്ക് കൂടുതൽ ഫലപ്രദമാണ്.

പ്രീപ്രൈമറി വിദ്യാഭ്യാസം അന്തരാഷ്ട്ര നിലവാരത്തിൽ ഉയർത്തും: വി.ശിവൻകുട്ടി

നേമം: പ്രീ പ്രൈമറി വിദ്യാഭ്യാസം അന്തരാഷ്ട്ര നിലവാരത്തിലേക്ക് ഉയർത്തുമെന്നു മന്ത്രി വി.ശിവൻകുട്ടി. നേമം നിയോജക മണ്ഡലത്തിലെ ആറാമട എൽപി സ്കൂളിലെ പുതിയ ബഹുനില മന്ദിരത്തിന്‍റെയും വർണക്കൂടാരത്തിന്‍റെയും ഉദ്ഘാടനം നിർവഹിച്ച് പ്രസം ഗിക്കുകയായിരുന്നു മന്ത്രി. പൊതുവിദ്യാഭ്യാസ വകുപ്പിന്‍റെ പദ്ധതി വിഹിതത്തിൽ നിന്നും ഒരുകോടി രൂപയും എംഎൽഎയുടെ ആസ്തി വികസന ഫണ്ടിൽനിന്നും 90 ലക്ഷം രൂപയും ചെലവഴിച്ചാണ് പുതിയ മന്ദിരം നിർമിച്ചത്. 6930 ചതുരശ്രയടി വിസ്തീർണത്തിൽ നിർമിച്ച കെട്ടിടത്തിൽ ഓരോ നിലകളിലായി മൂന്നു ക്ലാസ് മുറികൾ, ശുചി മുറികൾ, ഹെഡ്മിസ്ട്രസ് മുറി എന്നിങ്ങനെയാണ് ഉൾപ്പെടുത്തിയാണു നിർ മാണം നടത്തിയിരിക്കുന്നത്. സ്കൂൾ അങ്കണത്തിൽ നടന്ന പരിപാടിയിൽ എസ്എസ്കെ ഡിസ്ട്രിക്ട് പ്രോജക്ട് കോ-ഓർഡിനേറ്റർ നജീബ് അധ്യക്ഷത വഹിച്ചു. സ്കൂൾ ഹെഡ്മിസ്ട്രസ് മേരി പുഷ്പ.ആർ, പിഡബ്ല്യുഡി എക്സിക്യൂട്ടീവ് എൻജിനീയർ ബിജു, ജനപ്രതിനിധികൾ തുടങ്ങിയവർ പങ്കെടുത്തു.

കരിച്ചൽ കായൽ ശുചീകരിച്ച് ഇക്കോ ലവ് ഫൗണ്ടേഷൻ വിദ്യാർഥികൾ

പൂവാർ: ലോക നദി ദിനാചരണത്തോടനുബന്ധിച്ച് കോട്ടുകാൽ കരിച്ചൽ കായൽ വൃത്തിയാക്കി ഇക്കോ ലവ് ഫൗണ്ടേഷൻ. 150 ഓളം വിദ്യാർഥിളാണ് ശുചീകരണ യഞ്ജത്തിൽ പങ്കെടുത്തത്. കോസ്റ്റൽ സ്റ്റുഡന്‍റ്സ് കൾച്ചറൽ ഫോറം, ഗ്രീൻപീസ് ഇന്ത്യ, നിക്കി നെസ്റ്റ് ആയുർവേദ ഹോസ്പിറ്റൽ, കരുംകുളം പഞ്ചായത്ത്, ഗ്രീൻ വോംസ്‌, കോട്ടുകാൽ സ്കൂൾ എൻഎസ്എസ്, പുല്ലുവിള ലീയോ തേർടീന്ത്‌ സ്കൂൾ എൻഎസ്എസ് എന്നിവരുടെ സഹകരണത്തോടെ 250 കിലോയിൽ അധികം മാലിന്യമാണ് ശേഖരിച്ചത്. പ്ലാസ്റ്റിക് മാലിന്യങ്ങൾ തരംതിരിച്ച് ശാസ്ത്രീയമായി സംസ്കരിക്കുന്നതിനു കരുംകുളം പഞ്ചായത്ത് ഹരിതകർമസേനയ്ക്ക് കൈമാറി. ഇക്കോ ലവ് ഫൗണ്ടേഷൻ പ്രസിഡന്‍റ് തദയൂസ് ഉദ്ഘാടനം ചെയ്തു. കോസ്റ്റൽ സ്റ്റുഡന്‍റ്സ് കൾച്ചറൽ ഫോറം പ്രസിഡന്‍റും കരുംകുളം പഞ്ചായത്ത് മെമ്പറുമായ രതിൻ ആന്‍റണി, കോസ്റ്റൽ സ്റ്റുഡന്‍റ്സ് കൾച്ചറൽ ഫോറം കാഷ്യർ ജോബ്, ഗ്രീൻപീസ് വോളണ്ടീയർ അലീന എന്നിവർ സംസാരിച്ചു.

ലഹരി വിരുദ്ധ കാമ്പയിന്‍ സംഘടിപ്പിച്ചു

വെള്ളറട: ജനാര്‍ദനപുരം ഹയര്‍ സെക്കന്‍ഡറി സ്‌കൂളിലെ സ്‌കൗട്ട് ആന്‍ഡ് ഗൈഡ്‌സിലെ കുട്ടികളാണ് ലഹരി വിരുദ്ധ കാമ്പയിന്‍ സംഘടിപ്പിച്ചത്. ലഹരിക്കെതിരെയുള്ള പ്രതീകാത്മക കോലം കത്തിച്ചാണ് അവര്‍ ലഹരിക്കെതിരെയുള്ള കാമ്പയിന്‍ സംഘടിപ്പിച്ചത്. സ്‌കൂള്‍ ഹെഡ്മാസ്റ്റര്‍ എം.എസ്. ആദര്‍ശ് കുമാര്‍ ഉദ്ഘാടനം ചെയ്തു. കൂടാതെ സ്‌കൂള്‍ ഹെഡ്മാസ്റ്ററും സ്‌കൂള്‍ പ്രിന്‍സിപ്പാളും കുട്ടികള്‍ക്ക് ലഹരിക്കെതിരെ പ്രവര്‍ത്തിക്കാനുള്ള ബോധവത്കരണം നല്‍കി. കൂടാതെ ലഹരിക്കെതിരെയുള്ള സത്യപ്രതിജ്ഞ കുട്ടികള്‍ ഏറ്റുചൊല്ലി. കുട്ടികളോട് ലഹരിക്കെതിരെയുള്ള മാര്‍ഗനിര്‍ദേശം നല്‍കാനായി സ്‌കൂള്‍ സ്റ്റാഫ് സെക്രട്ടറി എസ്.എസ്. അഖിനേത്, സ്‌കൗട്ട് ആന്‍ഡ് ഗൈഡ്‌സ് സംഘടനയിലെ അധ്യാപകരുമായ രഞ്ജിത്ത്, പദ്‌മേഷ് അരവിന്ദ്, വിദ്യ ടീച്ചര്‍, ജ്യോതി ടീച്ചര്‍ എന്നിവരും ലഹരിക്കെതിരെയുള്ള ബോധവത്കരണം നടത്തി.

ദുര്‍ഗാഷ്ടമി ആഘോഷത്തിന്‍റെ ഭാഗമായി പൊതിച്ചോറ് നല്‍കി

വെള്ളറട: കോണ്‍ഗ്രസ് മാരായമുട്ടം മണ്ഡലം കമ്മിറ്റിയുടെ നേതൃത്വത്തില്‍ ദുര്‍ഗാഷ്ടമി ആഘോഷങ്ങളുടെ ഭാഗമായി നെയ്യാറ്റിന്‍കര ജനറല്‍ ആശുപത്രിയിലെ രോഗികള്‍ക്കും അവരുടെ കൂട്ടിരിപ്പുകാര്‍ക്കും പൊതിച്ചോറ് വിതരണം ചെയ്തു. കോണ്‍ഗ്രസ് മാരായമുട്ടം മണ്ഡലം കമ്മിറ്റിയുടെ കീഴില്‍ വരുന്ന തൃപ്പലവൂര്‍, അരുവിക്കര, തത്തിയൂര്‍, വടകര, ചുള്ളിയൂര്‍, മാരായമുട്ടം, അണമുഖം, അരുവിപുറം വാര്‍ഡുകളില്‍നിന്നുള്ള വീടുകളില്‍നിന്നും നേരിട്ടു പൊതിച്ചോറു ശേഖരിച്ച് നെയ്യാറ്റിന്‍കര ജനറല്‍ ആശുപത്രിയില്‍ എത്തിച്ചു രോഗികള്‍ക്കും അവരുടെ കുട്ടിരിപ്പുകാര്‍ക്കും നല്‍കി. പൊതിച്ചോറ് വിതരണം മാരായമുട്ടം മണ്ഡലം പ്രസിഡന്‍റ് ബിനില്‍ മണലുവിള പൊതിച്ചോറ് നല്‍കി ഉദ്ഘാടനം ചെയ്തു. മണ്ഡലം കമ്മറ്റി വൈസ് പ്രസിഡന്‍റ് ശ്രീരാഗം ശ്രീകുമാര്‍, തുളസീധരന്‍ ആശാരി, നെയ്യാറ്റിന്‍കര ജയചന്ദ്രന്‍ ചായ്‌ക്കോട്ടുകോണം കൗണ്‍സിലര്‍ സജു, വഴുതൂര്‍ ഷിനോജ്, എന്നിവര്‍ നേതൃത്വം നല്‍കി.

സ്കൂൾ കലോത്സവം സംഘടിപ്പിച്ചു

നെടുമങ്ങാട്: കരകുളം വിദ്യാധിരാജ എൽപിഎസിൽ സ്കൂൾ കലോത്സവം സംഘടിപ്പിച്ചു. ഹെഡ്മാസ്റ്റർ ജെ.പി. അനീഷ് അധ്യക്ഷനായിരുന്നു. പിടിഎ പ്രസിഡന്‍റ് അഭിലാഷ് ഉദ്ഘാടനം നിർവഹിച്ചു. സീനിയർ അസിസ്റ്റന്‍റ് ബി.ജി. സിനി ആശംസകൾ അർപ്പിച്ചു. ആർട്സ് ക്ലബ് കൺവീനർ എസ്.ആർ. ദിവ്യ സ്വാഗതവും എസ്.ആർ.ജി. കൺവീനർ അൽത്താഫ് നന്ദിയും പറഞ്ഞു. പിടിഎ വൈസ് പ്രസിഡന്‍റ് സതീശൻ, എം പിടിഎ പ്രസിഡന്‍റ് മോളി, പിടിഎ എക്സിക്യൂട്ടീവ് അംഗങ്ങൾ എന്നിവർ പങ്കെടുത്തു.

ക്ഷേത്രഗോപുരങ്ങൾ സമർപ്പിച്ചു

നെടുമങ്ങാട്: വെള്ളനാട് ഭഗവതി ക്ഷേത്രത്തിൽ നിർമിച്ച തെക്ക്, പടിഞ്ഞാറ് ഗോപുരങ്ങളുടെ സമർപ്പണം തിരുവിതാംകൂർ രാജകുടുംബാംഗം പൂയം തിരുനാൾ ഗൗരി പാർവതീ ബായി നിർവഹിച്ചു. ക്ഷേത്ര പ്രസിഡന്‍റ് വെള്ളനാട് ശ്രീകണ്ഠൻ, വൈസ് പ്രസിഡന്‍റ് ഡി. ബ്രഹ്മദേവൻ നായർ, സെക്രട്ടറി എം. സുകുമാരൻ നായർ, ജോയിന്‍റ് സെക്രട്ടറി ആർ. പത്മകുമാർ, ട്രഷറർ ടി. ശ്രീകുമാരൻ നായർ, കെ.ജി. രവീന്ദ്രൻ നായർ, ജനാർദനൻ നായർ എന്നിവർ സംസാരിച്ചു.

വയോജന ദിനാഘോഷം നടത്തി

പാറശാല: ലോക വയോജന ദിനത്തോടനുബന്ധിച്ച് കൊറ്റാമം സാഫല്യം വയോജന ഭിന്ന ശേഷി പരിപാലന കേന്ദ്രത്തില്‍ വയോജന ദിനാഘോഷവും സൗജന്യ മെഡിക്കല്‍ ക്യാമ്പും സംഘടിപ്പിച്ചു. കൊല്ലയില്‍ പഞ്ചായത്ത് വികസനകാര്യ സ്ഥിരംസമിതി അധ്യക്ഷന്‍ ജി. ബൈജു ഉദ്ഘാടനം നിര്‍വഹിച്ചു. കൊല്ലയില്‍ എഫ്എച്ച്സി മെഡിക്കല്‍ ഓഫീസര്‍ ഡോ. ശ്രീജിത്ത് അധ്യക്ഷത വഹിച്ചു. കൊല്ലയില്‍ എഫ്എച്ച്സി ഹെല്‍ത്ത് ഇന്‍സ്‌പെക്ടര്‍ തമ്പി സുരേഷ്, സാഫല്യം വയോജന ഭിന്ന ശേഷി പരിപാലന കേന്ദ്രം പ്രോജക്ട് മാനേജര്‍ സജിത് കുമാര്‍ തുടങ്ങിയവര്‍ പ്രസംഗിച്ചു. പരിപാടിയുടെ ഭാഗമായി തിരുവനന്തപുരം ജില്ലാ മാനസികാരോഗ്യ കേന്ദ്രം ബോധവത്കരണ ക്ലാസ് നടത്തി.

ഓർമ്മച്ചെപ്പ് ഓണാഘോഷം

നെടുമങ്ങാട് : അരുവിക്കര ഗവ. ഹൈസ്‌കൂൾ 1982 എസ്എസ്എൽസി ബാച്ച് കൂട്ടായ്മയായ ഓർമ്മച്ചെപ്പിന്‍റെ വാർഷിക പൊതുയോഗവും ഓണാഘോഷവും മൈലം സത്യാനന്ദൻ ഉദ്‌ഘാടനം ചെയ്തു. രമേശ് ചന്ദ്രൻ, ഉഷാകുമാരി, സുധാകരൻ, ജയകുമാരി,കെ.എസ്. മധു, സംറത്ത്, അജിത്കുമാർ, സിന്ധുഷാജഹാൻ, ഫാത്തിമറംല, ഗീതാകുമാരി, ഫിലോമിന എന്നിവർ പ്രസംഗിച്ചു. ഷാജഹാൻ റിപ്പോർട്ടും സീനത്ത് വരവുചെലവ് കണക്കും അവതരിപ്പിച്ചു. ഭാരവാഹികൾ: മൈലം സത്യാനന്ദൻ-പ്രസിഡന്‍റ്, ഉഷാകുമാരി-വൈസ് പ്രസിഡന്‍റ്, ഷാജഹാൻ -സെക്രട്ടറി, സീനത്ത് -ട്രഷറർ, ഫിലോമിന - ജോയിന്‍റ് സെക്രട്ടറി, രമേഷ് ചന്ദ്രൻ, അജിത്ത് കുമാർ, സിന്ധു കെ.ആർ, ഫാത്തിമ റംല, സംവൃത്ത്, സുധാകരൻ നായർ, കെ.എസ്. മധു, ഗീത കടമ്പനാട് -എക്സി. അംഗങ്ങൾ.

വിവിധ ക്ഷേത്രങ്ങളിൽ വിദ്യാരംഭ ചടങ്ങുകൾ

നെടുമങ്ങാട്: കരുപ്പൂര് ശ്രീഭദ്രകാളി ക്ഷേത്രത്തിൽ നവരാത്രി മഹോത്സവത്തോടനുബന്ധിച്ച് നാളെ രാവിലെ ഏഴു മുതൽ വിദ്യാരംഭം നടക്കും. പ്രഫ.ദേശികം രഘുനാഥൻ, നെടുമങ്ങാട് വിഎച്ച്എസ്എസ് മുൻ പ്രിൻസിപ്പൽ ലക്ഷ്മി എസ്. നായർ എന്നിവർ ആദ്യാക്ഷരം എഴുതിക്കും. നെടുമങ്ങാട്: ആനാട് പാറയ്ക്കൽ മണ്ഡപം ദേവീക്ഷേത്രത്തിൽ മഹാനവമി ആഘോഷങ്ങളുടെ ഭാഗമായി ഇന്നു രാവിലെ എട്ടിനു മഹാമൃത്യുഞ്ജയ ഹോമം, വൈകുന്നേരം 5.30ന് മഞ്ഞൾ അഭിഷേകം, ആറിനു വാഹനപൂജ, ആയുധപൂജ, ഏഴിനു ഭഗവതിസേവ എന്നിവ നടക്കും. നാളെ രാവിലെ 7.30ന് വിദ്യാരംഭം. ആനാട് ഗവ.എൽപിഎസിലെ റിട്ട. ഹെഡ്മാസ്റ്റർ വിജയൻ നായർ കുഞ്ഞുങ്ങളെ ആദ്യാക്ഷരം എഴുതിക്കും. നെടുമങ്ങാട്: ആനാട് ശ്രീദുർഗാദേവി ക്ഷേത്രത്തിൽ നവരാത്രി മഹോത്സവത്തോടനുബന്ധിച്ച് ഇന്നു പുസ്തകപൂജയും വാഹനപൂജയും നടക്കും. നാളെ രാവിലെ ഏഴിനു വിദ്യാരംഭം. ഭദ്രാപീഠം സ്വാമിയും ക്ഷേത്രം രക്ഷാധികാരി സന്തോഷ്കുമാറും നേതൃത്വം നൽകും. കുട്ടികൾക്ക് തേനുംവയമ്പും വിതരണവുമുണ്ട്. നെടുമങ്ങാട്: ചെല്ലംകോട് പുതുമംഗലം ദേവിക്ഷേത്രത്തിൽ നവരാത്രി മഹോത്സവം ആരംഭിച്ചു. ഇന്നു വിശേഷാൽ നെയ്‌വിളക്ക് ആയുധപൂജ, വാഹന പൂജ. നാളെ രാവിലെ ഏഴിനു വിദ്യാരംഭം. ഫ്രണ്ട്സ് സ്റ്റഡി സെന്‍റർ ഡയറക്ടർ ബി. ചക്രപാണി നേതൃത്വം നൽകും. തുടർന്ന് വിദ്യാസരസ്വതി പൂജ നടക്കും.

മാതൃകാ സായംപ്രഭ പകല്‍വീട്ടില്‍ സൗഹൃദാന്തരീക്ഷത്തില്‍ വയോജനങ്ങള്‍

നെയ്യാറ്റിന്‍കര : നെയ്യാറ്റിന്‍കര നഗരസഭയിലെ പുത്തനന്പലം വാര്‍ഡിലെ മാതൃകാ സായംപ്രഭ പകല്‍വീട്ടില്‍ 22 വയോജനങ്ങളുണ്ട്. ആയുസിന്‍റെ പുസ്തകത്തില്‍ അറുപതിനു മേലെ പ്രായമുള്ളവര്‍. രാവിലെ പത്തു മുതല്‍ വൈകുന്നേരം നാലു വരെ അവര്‍ പരസ്പരം മിണ്ടിയും വിശേഷങ്ങള്‍ പങ്കിട്ടും സ്വന്തം അഭിരുചികളില്‍ മുഴുകിയും സന്തോഷത്തോടെ കഴിയുന്നു. 2018 ല്‍ ആരംഭിച്ച പകല്‍വീട് പേര് സൂചിപ്പിക്കുന്നതുപോലെ പകല്‍ മാത്രമേ പ്രവര്‍ത്തിക്കാറുള്ളൂ. ഞായറാഴ്ചകളിലും പൊതുഅവധി ദിവസങ്ങളിലും പകല്‍വീടിനും അവധിയാണ്. രാവിലെ അമ്മമാരെ വിളിച്ചുകൊണ്ടുവരാനും തിരികെ വൈകുന്നേരം വീടുകളിലെത്തിക്കാനും വാഹനസൗകര്യം ക്രമീകരിച്ചിട്ടുണ്ട്. നഗരസഭയുടെ ഉടമസ്ഥാവകാശത്തിലുള്ള പകല്‍വീട്ടിലെ സാന്പത്തിക സഹായം സാമൂഹ്യനീതി വകുപ്പും നഗരസഭയും നല്‍കുന്നു. നടത്തിപ്പ് ചുമതല ഹെല്‍പ്പേജ് ഇന്‍ഡ്യയ് ക്കാണ്. മാനേജര്‍ അനീഷിനെ കൂടാതെ ഫിസിയോ തെറാപ്പിസ്റ്റ്, അറ്റന്‍ഡര്‍ കം കുക്ക്, ക്ലീനിംഗ് സ്റ്റാഫ് എന്നിവരുടെ സേവനവും പകല്‍വീട്ടില്‍ ലഭ്യമാണ്. 21 വനിതകളും ഒരു പുരുഷനുമാണ് നിലവിലുള്ളത്. ഇവര്‍ക്കുള്ള ആഹാരം പകല്‍വീട്ടില്‍ പാചകം ചെയ്യുന്നു. മാസത്തില്‍ രണ്ടു തവണ വീതം അലോപ്പതിയുടെയും ഹോമിയോപ്പൊതിയുടെയും സൗജന്യ മെഡിക്കല്‍ ക്യാന്പും ആഴ്ചയിലൊരു ദിവസം യോഗ പരിശീലനവും നല്‍കുന്നുണ്ട്. സാംസ്കാരിക അരങ്ങുകളിൽ വയോജനങ്ങള്‍ വിവിധ പരിപാടികള്‍ അവതരിപ്പിക്കാറുമുണ്ട്. സ്വന്തം ലേഖകന്‍

സീനിയർ റെസ്‌ലിംഗ് ടീം സെലക്‌ഷൻ ട്രയൽസ്

നെടുമങ്ങാട്: ജില്ലാ റെസ്‌ലിംഗ് അസോസിയേഷന്‍റെ നേതൃത്വത്തിൽ ജില്ലാതല സീനിയർ റെസ്‌ലിംഗ് സെലക്‌ഷൻ ട്രയൽ സംഘടിപ്പിക്കും. വെള്ളായണി അയ്യങ്കാളി സ്പോർട്സ് സ്കൂളിൽ നാളെ നടക്കുന്ന ട്രെയൽസിൽ 20 വയസ് പൂർത്തിയായ റെസ്‌ലിംഗ് താരങ്ങൾക്ക് പങ്കെടുക്കാം. 2006, 2007 വർഷങ്ങളിൽ ജനിച്ചവർ മത്സരത്തിൽ പങ്കെടുക്കുന്നുവെങ്കിൽ രക്ഷകർത്താവിന്‍റെ സമ്മതപത്രവും മെഡിക്കൽ സർട്ടിഫിക്കറ്റും സമർപ്പിക്കണം. ശരീരഭാരനിർണയം രാവിലെ ഒന്പതു മുതൽ 10 വരെ അയ്യങ്കാളി സ്‌പോർട് സ്കൂളിലെ റെസ്‌ലിംഗ് പരിശീലന കേന്ദ്രത്തിൽ നടത്തും. 11ന് മത്സരങ്ങൾ ആരംഭിക്കും. പുരുഷൻമാർക്ക് ഫ്രീസ്റ്റൈൽ, ഗ്രീക്കോ റോമൻ സ്റ്റൈൽ വിഭാഗത്തിലും വനിതകൾക്ക് ഫ്രീസ്റ്റൈൽ വിഭാഗത്തിലും പങ്കെടുക്കാം. ബർത്ത് സർട്ടിഫിക്കറ്റ്, ആധാർ കാർഡ് എന്നിവയുടെ കോപ്പി, രണ്ടു പാസ്പോർട് സൈസ് ഫോട്ടോ എന്നിവ ഹാജരാക്കണം. സെലക്‌ഷൻ ലഭിക്കുന്ന കുട്ടികൾക്ക് കോഴിക്കോട് നടക്കുന്ന സംസ്ഥാന റെസ്‌ലിംഗ് മത്സരത്തിൽ അവസരം ലഭിക്കും.

തോട്ടില്‍വീണ വയോധികനെ രക്ഷപ്പെടുത്തി

പേരൂര്‍ക്കട: മദ്യലഹരിയില്‍ തോട്ടില്‍വീണ വയോധികനെ ഫയര്‍ഫോഴ്‌സ് സംഘം രക്ഷപ്പെടുത്തി. 65 വയസു പ്രായം തോന്നിക്കുന്നയാളാണ് ആമയിഴഞ്ചാന്‍ തോട് ഒഴുകുന്ന പവര്‍ഹൗസ് റോഡ് ഭാഗത്ത് വീണത്. ചൊവ്വാഴ്ച ഉച്ചയ്ക്ക് രണ്ടരയോടെയാണ് ഇതുവഴി കടന്നുപോകുന്ന പൈപ്പിന്‍റെ ഇടയിലൂടെ ഇയാൾ താഴേക്കു വീണത്. തോട്ടിലെ വെള്ളത്തില്‍ ഒരാള്‍ കിടക്കുന്നതുകണ്ട ഓട്ടോറിക്ഷാ തൊഴിലാളികളാണ് വിവരം ഫയര്‍ഫോഴ്‌സില്‍ അറിയിച്ചത്. തിരുവനന്തപുരം നിലയത്തില്‍നിന്ന് ഫയര്‍ ആൻഡ് റസ്‌ക്യു ഓഫീസര്‍മാരായ പ്രദോഷ്, ഫിറോസ്, ജസ്റ്റിന്‍, പ്രവീണ്‍, എഫ്ആര്‍ഒ ഡ്രൈവര്‍ സുമേഷ് എന്നിവര്‍ രക്ഷാപ്രവര്‍ത്തനങ്ങള്‍ക്കു നേതൃത്വം നല്‍കി. പുറത്തെത്തിച്ച വയോധികനു പരിക്കില്ലാത്തതിനാല്‍ പ്രാഥമിക ചികിത്സയുടെ ആവശ്യമുണ്ടായില്ല. ബോധം വീണ്ടെടുത്ത ഇയാള്‍ പിന്നീട് ഇവിടെനിന്നു മടങ്ങിപ്പോയി.

ശ്രീ ചിത്തിര തിരുനാള്‍ സ്‌കൂളില്‍ നവരാത്രി സംഗീത കച്ചേരി

വെള്ളറട: കുന്നത്തുകള്‍ ശ്രീ ചിത്തിര തിരുനാള്‍ റസിഡന്‍ഷ്യല്‍ സെന്‍ട്രല്‍ സ്‌കൂളില്‍ നവരാത്രിയോടനുബന്ധിച്ച് പൂജവയ്പ്പു നടത്തി. തുടര്‍ന്ന് സംഗീതജ്ഞന്‍ രാജീവ് ആദികേശവും സംഘവും സംഗീത കച്ചേരി അവതരിപ്പിച്ചു. നാളെ രാവിലെ ഒന്‍പത് മുതല്‍ വിദ്യാരംഭം നടക്കും. പൂജയെടുപ്പ് ചടങ്ങില്‍ പ്രിന്‍സിപ്പൽ എസ്. പുഷ്പവല്ലി കുട്ടികള്‍ക്ക് ആദ്യാക്ഷരം കുറിക്കും. തുടര്‍ന്ന് മണലൂര്‍ ജി.എസ്. അരുണും സംഘവും അവതരിപ്പിക്കുന്ന സംഗീത കച്ചേരി. 2026, 2027 അധ്യയന വര്‍ഷങ്ങളിലേയ്ക്കുള്ള രജിസ്‌ട്രേഷനും അഡ്മിഷനും ആരംഭിക്കും.

റോഡ് കൈയേറി ലോറികൾ: അപകടം പതിവ് സംഭവം

മലയിൻകീഴ് : എംഎൽഎ റോഡ് കൈയേറി ലോറികളും ടിപ്പർ ലോറികളും യാത്രക്കാരേയും നിവാസികളേയും ഭീതിയാലാക്കുന്നു. അപകടം പതിവ്. മലയിൻകീഴ് -മലയം - മൊട്ടമൂട് എംഎൽഎ റോഡിലാണ് വാഹനങ്ങളുടെ അനധികൃ പാർക്കിംഗ്. മൂക്കുന്നിമലയുടെ അടിവാരത്തുകൂടിയാണ് ഈ റോഡ് കടന്നുപോകുന്നത്. മൂക്കുന്നിമലയിൽ രണ്ടു വർഷം മുൻപാണു ഖനനം നിരോധിച്ചത്. എന്നാൽ അവിടെ വീണ്ടും ഖനനം തുടങ്ങിയതായി സൂചനയുണ്ട്. വിജിലൻസ് കേസിൽപ്പെട്ട് കുറ്റംപത്രം നൽകിയ ഒരാളുടെ ക്രഷർ യൂണിറ്റ് കേന്ദ്രീകരിച്ച് പാറപ്പൊടി നിർമിച്ചു വിതരണം ചെയ്യുന്നുണ്ട്. ഈ പാറപ്പൊടിയ്ക്കാണ് ടിപ്പർ ലോറികൾ അടക്കം ഇവിടെ എത്തുന്നത്. ഏതാണ്ടു നാലു കിലോമീറ്റർ ദൂരം വരുന്ന റോഡിൽ രണ്ട് കിലോമീറ്ററും വാഹനങ്ങളുടെ നീണ്ട നിരയാണ്. റോഡിന്‍റെ ഇരുവശങ്ങളിലും വാഹനങ്ങൾ പാർക്ക് ചെയ്തിരിക്കുന്നു. ഈ ലോറികളെ കടന്ന് ഇരുചക്രവാഹനം പോലും പോകാൻ കഴിയാത്ത നിലയാണ് ഇപ്പോഴുള്ളത്. വാഹനങ്ങൾ മൂന്ന് ദിവസം മുൻപേ പാർക്ക് ചെയ്യും. എംസാൻഡ് എടുത്ത് കഴിഞ്ഞാൽ അതേ സ്ഥാനത്ത് അടുത്ത ലോറിവരും. ഒരിക്കൽ ജനജീവിതം തന്നെ ദുസഹമായി മാറിയ മൂക്കുന്നിമലയിൽ ജീവിതം ഒന്നു മെച്ചപ്പെട്ട് തുടങ്ങിയ സാഹചര്യത്തിലാണ് വാഹനങ്ങളുടെ പാർക്കിംഗ് ദുരിതം വിതയ്ക്കുന്നത്. അടുത്തിടെ 14 ൽ അധികം അപകടങ്ങളാണ് ഇവിടെ നടന്നത്. ഈ പാർക്കിംഗ് നിയന്ത്രിക്കാനോ അതു ക്രമീക്കരിക്കനോ ഉടമ തയാറാകുന്നില്ല. പോലീസും ഇക്കാര്യത്തിൽ ഒന്നും ചെയ്യുന്നില്ലെന്നും പരാതിയുണ്ട്. പൂർണമായും ഖനനവും ക്രഷറിംഗും നിരോധിച്ച ഇവിടെ എം സാൻഡ് നിർമിക്കുന്നത് നിയമ ലംഘനമാണെന്നും ചൂണ്ടികാട്ടപ്പെടുന്നു. അതിനിടെ ഈ യൂണിറ്റിൽ പാറപ്പൊട്ടിക്കൽ നടക്കുന്നതായും നാട്ടുകാർ പറയുന്നു. ക്രഷറിംഗ് നടക്കുന്ന വിവരം ജിയോളജി വകുപ്പിനെ നാട്ടുകാർ അറിയിച്ചിരുന്നു. എന്നാൽ അവരും നടപടികൾ എടുക്കുന്നില്ല. അടുത്തിടെയാണ് എംഎൽഎ ഫണ്ടിൽപ്പെടുത്തി റോഡ് നവീകരിച്ചത്. എന്നാൽ വാഹനങ്ങളുടെ അമിതമായ സഞ്ചാരം മൂലം റോഡ് പാടെ തകർന്നു. ഖനന യൂണിറ്റ് പ്രവർത്തിച്ചു തുടങ്ങിയതോടെ മൂക്കുന്നിമലയിലെ വാനരന്മാർ കൂട്ടത്തോടെ മലയിറങ്ങി തുടങ്ങി. ഇവർ സമീപത്തെ വീടുകളിലെത്തി അതിക്രമങ്ങൾ കാട്ടുന്നുണ്ട്. ഖനനം നിറുത്തി വച്ചിരുന്ന സാഹചര്യത്തിൽ വാനരന്മാർ വീടുകളിൽ എത്താറില്ലായിരുന്നു. കടുത്ത മനുഷ്യാവകാശ ലംഘനമായി വിജിലൻസ് ചൂണ്ടിക്കാട്ടിയത് ഖനനം നടക്കുന്നതിലൂടെ വരുന്ന വാനരശല്യത്ത കുറിച്ചാണ്.

പോക്‌സോ കേസില്‍ യുവാവ് അറസ്റ്റില്‍

പേരൂര്‍ക്കട: പോക്‌സോ കേസുമായി ബന്ധപ്പെട്ട് യുവാവിനെ മണ്ണന്തല പോലീസ് അറസ്റ്റുചെയ്തു. ശ്രീകാര്യം വികാസ് നഗര്‍ വി.എന്‍.ആര്‍.എ 335 മന്ന കോട്ടേജില്‍ ആല്‍ഫിന്‍ (19) ആണ് അറസ്റ്റിലായത്. മണ്ണന്തല സ്റ്റേഷന്‍ പരിധിയില്‍ അരുവിയോട് സ്വദേശിനിയായ 17-കാരിയാണ് പീഡനത്തിന് ഇരയായത്. ജൂണ്‍മാസത്തിലാണ് കേസിന്നാസ്പദമായ സംഭവം. ഇന്‍സ്റ്റാഗ്രാം വഴിയാണ് ആല്‍ഫിന്‍ പെണ്‍കുട്ടിയുമായി പരിചയപ്പെടുന്നത്. തുടര്‍ന്ന് ഇവരെ പ്രതി തന്റെ വീട്ടിലെത്തിച്ച് പീഡിപ്പിക്കുകയായിരുന്നുവെന്നാണ് പരാതി. മണ്ണന്തല സി.ഐ കണ്ണന്‍, എസ്.ഐമാരായ അനൂപ്, മുജീബ് എന്നിവരാണ് അന്വേഷണ സംഘത്തില്‍ ഉണ്ടായിരുന്നത്. പ്രതിയെ ബുധനാഴ്ച കോടതിയില്‍ ഹാജരാക്കും.

35 കാരിയെ പീഡിപ്പിക്കാന്‍ ശ്രമിച്ച യുവാവ് പോലീസ് പിടികൂടി

വെള്ളറട: 35 കാരിയെ പീഡിപ്പിക്കാന്‍ ശ്രമിച്ച യുവാവിനെ വെള്ളറട പോലീസ് പിടികൂടി. യുവതിയുടെ വീടിനു സമീപത്തു പതിയിരുന്നു പീഡിപ്പിക്കാന്‍ ശ്രമിച്ച കള്ളിമൂട് തെക്കേക്കര തോട്ടരികത്തു വീട്ടില്‍ അനു (31) ആണ് പോലീസ് പിടിയിലായത്. ദേഹോപദ്രവം ചെയ്യുന്നതിനിടെ കുതറി മാറിയ വീട്ടമ്മ പോലീസിനെ വിവരം അറിയിക്കുകയായിരുന്നു. തമിഴ് നാട്ടിലേക്കു കടക്കാന്‍ ശ്രമിച്ച പ്രതിയെ സര്‍ക്കില്‍ ഇന്‍സ്‌പെക്ടര്‍ പ്രസാദ് ഇന്‍സ്‌പെക്ടര്‍മാരായ ശശികുമാരന്‍ നായര്‍, പ്രമോദ കുമാർ, അനില്‍, ശശി കുമാര്‍, സിവില്‍ പോലീസ്‌കാരായ ദീബു, പ്രണവ് എന്നിവര്‍ അടങ്ങുന്ന സംഘമാണ് പിടികൂടിയത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

എൻജിഒ അസോസിയേഷൻ പ്രസിഡന്‍റായി എ.എം. ജാഫർഖാൻ

തിരുവനന്തപുരം: കോണ്‍ഗ്രസ് അനുകൂല സർക്കാർ ജീവനക്കാരുടെ സംഘടനായ എൻജിഒ അസോസിയേഷനിൽ ഉടലെടുത്ത ഭിന്നതകൾക്ക് പരിഹാരം. കോണ്‍ഗ്രസ് നേതൃത്വം മുൻകൈ എടുത്തു നടത്തിയ ചർച്ചകളെ തുടർന്നാണ് ഈ തീരുമാനം. നേരത്തെ സംസ്ഥാന കൗണ്‍സിൽ യോഗങ്ങളോടനുബന്ധിച്ച് നടന്ന അനിഷ്ട സംഭവങ്ങളിൽ മുൻ എൻജിഒ അസോസിയേഷൻ സംസ്ഥാന ജനറൽ സെക്രട്ടറി എ.എം. ജാഫർ ഖാൻ നേതൃത്വത്തോട് ഖേദം പ്രകടിപ്പിച്ചു. ഇതേ തുടർന്നാണ് ഭിന്നതകൾക്ക് വിരാമമായത്. കഴിഞ്ഞ ദിവസം ചേർന്ന എൻജിഒ അസോസിയേഷൻ സംസ്ഥാന ഭാരവാഹികളുടെ യോഗതീരുമാനത്തിന്‍റെ അടിസ്ഥാനത്തിൽ പ്രസിഡന്‍റ് എ.എം. ജാഫർ ഖാനെയും ജനറൽ സെക്രട്ടറിയായി എ.പി. സുനിലിനേയും തെരഞ്ഞെടുത്തു.ബി. പ്രദീപ്കുമാർ- വൈസ് പ്രസിഡന്‍റ്, വി.പി ബോബിൻ -ട്രഷറർ) എന്നിവരാണ് മറ്റു ഭാരവാഹികൾ. സെറ്റോ ചെയർമാനായി ചവറ ജയകുമാർ തുടരുന്നതാണ്.

എസ്. മഹാദേവൻ തന്പിയുടെ മൃത്യുസൂത്രം ഹിന്ദിയിൽ

തിരുവനന്തപുരം: എസ്. മഹാദേവൻ തന്പി എഴുതിയ മൃത്യു സൂത്രം എന്ന നോവലിന്‍റെ ഹിന്ദി പരിഭാഷ പ്രകാശനം ചെയ്തു. കേരള ഹിന്ദി പ്രചാര സഭ സംഘടിപ്പിച്ച ഹിന്ദി പക്ഷാചരണവേദിയിൽ മുൻ ഡിജിപി അലക്സാണ്ടർ ജേക്കബാണ് പ്രകാശനം നിർവഹിച്ചത്. കേരള സർവകലാശാല ഹിന്ദി വിഭാഗം മുൻ അധ്യക്ഷ ഡോ. തങ്കമണിയമ്മ പുസ്തകം ഏറ്റുവാങ്ങി. മലയാളത്തിൽ ശ്രദ്ധേയമായ ഈ നോവലിന്‍റെ പരിഭാഷ നിർവഹിച്ചത് പ്രൊഫ. പി.ജെ.ശിവകുമാറാണ്. ഹിന്ദി പ്രചാര സഭാ സെക്രട്ടറി ഡോ. ബി മധു തുടങ്ങിയവർ പ്രകാശന ചടങ്ങിൽ പങ്കെടുത്തു.

കവടിയാർ ഗോൾഫ് ക്ലബിൽ ഓണാഘോഷം നടത്തി

തിരുവനന്തപുരം : കവടിയാർ ഗോൾഫ് ക്ലബ്ലിൽ ഓണാഘോഷം സംഘടിപ്പിച്ചു.സതേണ്‍ എയർ കമാൻഡിലെ എയർ ഓഫീസർ എയർ മാർഷൽ മനീഷ് ഖന്ന, പാങ്ങോട് ആർമി ക്യാന്പിലെ ബ്രിഗേഡ് കമാൻഡർ ബ്രിഗേഡിയർ അനുരാഗ് ഉപാദ്ധ്യായ എന്നിവർ മുഖ്യാതിഥികളായി.ഓണസദ്യയും ക്ഷേത്ര കലാ അക്കാഡമിയുടെ നൃത്ത പ്രകടനങ്ങളും അഗസ്ത്യ കളരിയുടെ കളരിപ്പയറ്റും നടന്നു. മുന്നൂറിലധികം അംഗങ്ങളും കുടുംബങ്ങളും പങ്കെടുത്തു. ആദ്യമായാണ് ഗോൾഫ് ക്ലബിൽ ഓണാഘോഷം നടത്തുന്നതെന്ന് സംഘാടകർ അറിയിച്ചു.

പൂട്ടിക്കിടക്കുന്ന ബേക്കറിയിൽ തീപിടുത്തം

തിരുവല്ലം: പാച്ചല്ലൂർ ഗവ. എൽപി സ്കൂളിനു സമീപം പൂട്ടിക്കിടന്ന കടയിൽ തീപിടിത്തം ഉണ്ടായി. മാഹീന്‍റെ ഉടമസ്ഥതയിലുള്ള മൻഷാദ് ബേക്കറി ആൻഡ് സ്റ്റോറിൽ ചൊവ്വാഴ്ച വൈകുന്നേരം നാലരയോടെയാണ് തീപിടിത്തം ഉണ്ടായത്. തൊട്ടടുത്തുള്ള ഓട്ടോ സ്റ്റാൻഡിലെ ഓട്ടോ ഡ്രൈവർമാരാണ് തീപിടിക്കുന്നത് ആദ്യം കണ്ടത്. അവർ ഫയർ ഫോഴ്‌സിനെ വിവരം അറിയിക്കുകയായിരുന്നു. വിഴിഞ്ഞം ഫയർ ഫോഴ്‌സ് സ്റ്റേഷനിലെ ഒരു യൂണിറ്റ് എത്തി തീ അണച്ചു. ഷോർട്ട് സർക്യൂട്ടാണ് അപകട കാരണം എന്നു കരുതപ്പെടുന്നു. കടയ്ക്കകത്തുള്ള മിക്ക സാധനങ്ങളും കത്തി നശിച്ചു.

കെജിഒയു ഏകദിന ഉപവാസം

തിരുവനന്തപുരം: കേരള ഗസറ്റഡ് ഓഫീസേഴ്സ് യൂണിയൻ നെയ്യാറ്റിൻകര ബ്രാഞ്ച് കമ്മിറ്റിയുടെ നേതൃത്വത്തിൽ മൂന്നിനു ഏകദിന ഉപവാസം സംഘടിപ്പിക്കും. രാവിലെ പത്തിന് അഡ്വ. എം. വിൻസന്‍റ് എംഎൽഎ ഉദ്ഘാടനം ചെയ്യും. ബ്രാഞ്ച് പ്രസിഡന്‍റ് പി.എസ്. അനിൽകുമാർ അധ്യക്ഷത വഹിക്കും. എഐസിസി അംഗം നെയ്യാറ്റിൻകര സനൽ, കെജിഒയു സംസ്ഥാന പ്രസിഡന്‍റ് കെ.സി. സുബ്രഹ്മണ്യൻ എന്നിവർ മുഖ്യപ്രഭാഷണം നടത്തും. ജനറൽ സെക്രട്ടറി ബി. ഗോപകുമാർ, ട്രഷറർ ഡോ. ആർ. രാജേഷ്, ഡിസിസി ജനറൽ സെക്രട്ടറിമാരായ അഡ്വ. വിനോദ്സെൻ, ആർ. സുമകുമാരി, ബ്ലോക്ക് കോൺഗ്രസ്‌ പ്രസിഡന്‍റ് എം.സി. സെൽവരാജ്, കെജിഒയു സംസ്ഥാന നേതാക്കളായ എസ്. നൗഷാദ്, ഡോ. ജി.പി. പദ്മകുമാർ, എ. നിസാമുദ്ദിൻ, എസ്.ഒ. ഷാജികുമാർ തിരുപുറം, വി. സി. ഷിബു ഷൈൻ, ഐ.എൽ. ഷെറിൻ എന്നിവർ പ്രസംഗിക്കും. വൈകുന്നേരം 4.30ന് സമാപന സമ്മേളനം കെപിസിസി ജനറൽ സെക്രട്ടറി അഡ്വ. ജി. സുബോധൻ ഉദ്ഘാടനം ചെയ്യും. നെയ്യാറ്റിൻകര നഗരസഭ പ്രതിപക്ഷ നേതാവ് ജോസ് ഫ്രാങ്ക്‌ളിൻ മുഖ്യപ്രഭാഷണം നടത്തും. സെക്രട്ടറിയേറ്റ് അസോസിയേഷൻ ട്രഷറർ അനിൽകുമാർ, കെപിഎസ്ടിഎ ജനറൽ സെക്രട്ടറി എൻ. രാജ്മോഹൻ, എൻജിഒ അസോസിയേഷൻ നേതാക്കളായ വി.എസ്. രാകേഷ്, എസ്. ഷാജി, പി.എസ്. അജയാക്ഷൻ, പെൻഷനേഴ്സ് അസോസിയേഷൻ നേതാക്കളായ ബി. ബാബുരാജ്, കെ. സുനിൽകുമാർ, ആർ.ടി. നോബിൾ സിംഗ്, കെജിഒയു നേതാക്കളായ ജയൻ. സി, അക്ബർ അലി എന്നിവർ പ്രസംഗിക്കും.

ടൂറിസ്റ്റ് ബസ് സ്‌കൂട്ടറിലിടിച്ച് മരിച്ചു

പൂന്തുറ: അമ്പലത്തറ പരുത്തിക്കുഴിയല്‍ തമിഴ്‌നാട്ടില്‍ നിന്നുളള ടൂറിസ്റ്റ് ബസ് ആക്ടീവ സ്‌കൂട്ടറിലിടിച്ച് സൂട്ടര്‍ യാത്രികരില്‍ ഒരാളായ ശ്രീകാര്യം സ്വദേശി ഗംഗാധരന്‍ നായര്‍ (82) മരിച്ചു. സ്‌കൂട്ടര്‍ ഓടിച്ചിരുന്ന പാങ്ങപ്പാറ സ്വദേശി ശശിധരന്‍ നായരെ (68) ഗുരുതര പരിക്കുകളോടെ തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. സിഇടി എന്‍ജിനീയറിംഗ് കോളജിലെ മുന്‍ ജീവനക്കാരും സുഹൃത്തുക്കളുമായിരുന്ന ഇരുവരും തിരുവനന്തപുരം ഭാഗത്തുളള വിവിധ ക്ഷേത്രങ്ങളില്‍ ദര്‍ശനം നടത്തി മടങ്ങിവരികയായിരുന്നു. ഇന്നലെ വൈകുന്നേരം 6.15 ഓടുകൂടി പുരുത്തിക്കുഴി ജംഗ്ഷനു സമീപത്തായിരുന്നു അപകടം. അമിത വേഗത്തിലെത്തിയ ബസ് സ്‌കൂട്ടര്‍ യാത്രികരെ ഇടിച്ചിടുകയായിരുന്നതായി ദൃക്‌സാക്ഷികള്‍ പറഞ്ഞു. സംഭവത്തില്‍ പൂന്തുറ പോലീസ് കേസെടുത്തു.

അന്ന് നെല്ല്, ഇന്ന് വാഴയും പച്ചക്കറികളും; ഭുവനേന്ദ്രന്‍നായര്‍ക്ക് കൃഷി തന്നെ പ്രധാനം

നെയ്യാറ്റിന്‍കര : വീടിനടുത്തുള്ള വിശാലമായ പാടവും പാടശേഖരത്തില്‍ നിറഞ്ഞു നില്‍ക്കുന്ന നെല്‍ക്കതിര്‍മണികളും വെണ്‍പകല്‍ മഞ്ഞക്കോട് ലക്ഷ്മീനിവാസില്‍ ഭുവനേന്ദ്രന്‍നായരുടെ മനസില്‍നിന്നും ഇന്നും മാഞ്ഞിട്ടില്ല. നാടിന്‍റെ കാര്‍ഷിക ബോധത്തിന്‍റെയും സംസ്കാരത്തിന്‍റെയുമൊക്കെ നന്മ കുറയുന്നു എന്നതിനു തെളിവാണ് നെല്‍കൃഷി അപ്രത്യക്ഷമായതെന്നും അദ്ദേഹം ചൂണ്ടിക്കാട്ടുന്നു. ഔദ്യോഗിക പദവിയില്‍ നിന്നും വിരമിച്ചിട്ടും വിശ്രമത്തിനിട നല്‍കാതെ വയലില്‍ പണി ചെയ്യുന്നതിനും പണിക്കാരോടൊപ്പം അധ്വാനിക്കുന്നതിനും സാധിക്കുന്നതു കൃഷിയോടുള്ള നേരടുപ്പത്തിന്‍റെ വിത്തുകള്‍ കരള്‍പ്പത്തായത്തില്‍ അദ്ദേഹം പൊന്നുപോലെ കാക്കുന്നതുകൊണ്ടാണ്. കുട്ടിക്കാലത്തേ ഭുവനേന്ദ്രന്‍നായര്‍ക്കു വയലും കൃഷിയുമെല്ലാം ഏറെ പരിചിതം. പിതാവ് ഗംഗാധരന്‍നായര്‍ നെല്‍കൃഷി ചെയ്തിരുന്ന പാടശേഖരത്തില്‍ ഭുവനേന്ദ്രന്‍നായര്‍ പഠനത്തിന്‍റെ ഒഴിവുവേളകളില്‍ സഹായിക്കാന്‍ ചെല്ലാറുണ്ടായിരുന്നു. പിന്നീട് അദ്ദേഹം വെണ്‍പകല്‍ സഹകരണ ബാങ്കില്‍ അപ്രൈസറായി ജോലിയില്‍ പ്രവേശിച്ചു. 33 വര്‍ഷത്തെ സര്‍വീസ് പൂര്‍ത്തിയാക്കി വിരമിക്കുന്നതിനു മുന്പേ സമയം കിട്ടുന്പോഴൊക്കെ കാര്‍ഷിക വൃത്തിയിലും ഏര്‍പ്പെട്ടു. പിതാവ് കൃഷി ചെയ്തിരുന്ന പാടശേഖരത്തില്‍ ക്രമേണ നെല്‍കൃഷിയുടെ തോതു കുറഞ്ഞു. വാഴയും പച്ചക്കറികളും ഇടം പിടിച്ചു. ഭുവനേന്ദ്രന്‍നായരും ഇപ്പോള്‍ മുഴുവന്‍ സമയ കര്‍ഷകനാണ്. ഭാര്യ ശ്രീകലയും മക്കളായ വിഷ്ണുവും ലക്ഷ്മിയും മരുമക്കളായ ഗായത്രിയും ദീപുവും ഇദ്ദേഹത്തിനു പിന്തുണ നല്‍കുന്നുമുണ്ട്. മകളുടെ ഉടമസ്ഥതയിലുള്ള വയലിലാണ് ഭുവനേന്ദ്രന്‍നായര്‍ നിലവില്‍ വാഴയും സലാഡ് വെള്ളരിയും വെണ്ടയുമൊക്കെ കൃഷി ചെയ്തിരിക്കുന്നത്. കൃഷിയിടവും വിളവുമെല്ലാം മനസില്‍ സമ്മാനിക്കുന്നത് സംതൃപ്തിയുടെ നിമിഷങ്ങളാണെന്നാണ് ഭുവനേന്ദ്രന്‍നായരുടെ പക്ഷം. ഗിരീഷ് പരുത്തിമഠം

കോവളത്തെ വയോധികന്‍റെ മരണം കൊലപാതകം

കോവളം: അസ്വാഭാവിക മരണമെന്നു കരുതിയ വയോധികന്‍റെ മരണം കൊലപാതകം. പ്രതി പിടിയിൽ. കോവളത്ത് വീടിന്‍റെ ടെറസിൽ മരിച്ചു കിടന്നയാളുടെ മരണമാണ് കൊലപാതകമെന്നു തെളിഞ്ഞത്. സംഭവത്തിൽ കോവളം നെടുമം മുക്കോണംവിള വീട്ടിൽ രാജീവി(42)നെ കോവളം പോലീസ് അറസ്റ്റു ചെയ്തു. വർഷങ്ങൾക്കു മുൻപേയുള്ള പ്രതിയുടെ മനസിലെ പകയാണ് കൊലപാതകത്തിൽ കലാശിച്ചതെന്നു പോലീസ് പറയുന്നു. 17നു രാവിലെയാണ് കോവളം മുസ്ലീം പള്ളിക്കു സമീപം പറമ്പിൽവീട്ടിൽ രാജേന്ദ്ര (62) നെ സഹോദരി ലേഖയുടെ വീടിന്‍റെ ടെറസിനു മുകളിൽ മരിച്ച നിലയിൽ കണ്ടെത്തിയത്. ബന്ധുക്കൾ വിവരം അറിയിച്ചതനുസരിച്ചു പോലീസ് സ്ഥലത്ത് എത്തുമ്പോൾ മൃതദേഹത്തിനു മൂന്നു ദിവസത്തോളം പഴക്കം ഉള്ളതായി കണ്ടെത്തിയിരുന്നു. രാജേന്ദ്രൻ മദ്യപാന ശീലമുള്ള ആളായയതിനാലും പരാതിക്കാർ ഇല്ലാത്തതിനാലും പോലീസ് മരണത്തിൽ സംശയം പ്രകടിപ്പിച്ചില്ല. എന്നാൽ പോസ്റ്റുമോർട്ടത്തിൽ കഴുത്തിൽ ഗുരുതരമായ ക്ഷതമുണ്ടെന്ന കണ്ടെത്തലിനെ തുടർന്നാണു പുനരന്വേഷണം നടത്തിയത്. ഉന്നത പോലീസ് ഉദ്യോഗസ്ഥരുടെ നേതൃത്വത്തിൽ ബന്ധുക്കളുൾപ്പെടെയുള്ളവരെ ചോദ്യം ചെയ്തെങ്കിലും ആദ്യം ഒരു തുമ്പും കിട്ടിയില്ല. എന്നാൽ പ്രദേശത്തെ ഏതാനും പേരെ ചോദ്യം ചെയ്യാൻ വിളിച്ചതിൽ പ്രതിയും ഉണ്ടായിരുന്നു. പല ഘട്ടങ്ങളിലായി പോലീസ് ചോദ്യം ചെയ്തെങ്കിലും പരസ്പര വിരുദ്ധമായ മറുപടികളാണ് ലഭിച്ചത്. പ്രതിയുടെ ശരീരത്തിലെ നഖങ്ങളുടെ പാടുകളും കൈയിലെ ക്ഷതവും സംബന്ധിച്ചു പോലീസിനോട് ആദ്യം കള്ളം പറഞ്ഞെങ്കിലും കൂടുതൽ ചോദ്യം ചെയ്യലിൽ പ്രതി കുറ്റം സമ്മതിക്കുകയായിരുന്നു. കേസ് സംബന്ധിച്ച് പോലീസ് പറയുന്നതിങ്ങനെ: മരണപ്പെട്ട രാജേന്ദ്രനും പ്രതിയും സമീപവാസികളാണ്. ഇരുവരും മദ്യപാനികളാണ്. നഗരത്തിലെ ഒരു ഹോട്ടലിലെ ഷെഫ് ആയിരുന്നു കൊല്ലപ്പെട്ട രാജേന്ദ്രൻ. ഭാര്യയുമായി വർഷങ്ങളായി അകന്നു താമസിക്കുകയായിരുന്ന ഇയാൾ സഹോദരിയുടെ വീട്ടിലെ ടെറസിലാണ് പലപ്പോഴും കിടന്നിരുന്നത്. ഇക്കഴിഞ്ഞ 14നു വൈകുന്നേരം ഏഴോടെ രാജേന്ദ്രൻ പ്രതിയുടെ വീട്ടിൽ പോകുകയും അമ്മയായ ഓമനയോട് അപമര്യാദയായി പെരുമാറുകയും ചെയ്തു. ഈ സമയം പ്രതി വീടിനകത്തു കിടക്കുകയായിരുന്നു. കാര്യം തിരക്കിയിട്ടും അമ്മ മറുപടി നൽകാൻ കൂട്ടാക്കിയില്ല. ഇതോടെ പ്രതിക്ക് വൈരാഗ്യമായി. അന്നുതന്നെ രാത്രി 10 മണിയോടെ രാജീവ്, രാജേന്ദ്രനെ അന്വേഷിച്ച് ടെറസിന്‍റെ മുകളിൽ കയറുകയും വാക്കേറ്റമുണ്ടാവുക യുമായിരുന്നു. ശ്രീകൃഷ്ണ ജയന്തി ദിനമായതിനാൽ സമീപവാസികൾ ആരും തന്നെ ഇല്ലാത്തതിനാൽ മറ്റാരും ബഹളം കേട്ടതുമില്ല. വാക്കേറ്റത്തിനിടയിൽ പ്രതി രാജേന്ദ്രന്‍റെ കഴുത്തിനു കുത്തിപ്പിടിച്ച് ഇരുകൈകൾ കൊണ്ടും കഴുത്തിൽ ശക്തിയോടെ അമർത്തിപ്പിടിച്ചു. ശ്വാസംമുട്ടി അനക്കമില്ലാതായതോടെ പ്രതി അവിടെ നിന്നും കടന്നു കളയുകയായിരുന്നു. പ്രതിയെ കോടതിയിൽ ഹാജരാക്കി റിമാൻഡു ചെയ്തു.

പട്ടം എസ്‌യുടി ആശുപത്രിയിൽ ലോക ഹൃദയദിനം ആചരിച്ചു

തിരുവനന്തപുരം: ലോക ഹൃദയ ദിനത്തോടനുബന്ധിച്ച് പട്ടം എസ്‌യുടി ആശുപത്രിയുടെ ആഭിമുഖ്യത്തില്‍ മ്യൂസിയം കോമ്പൗണ്ടില്‍ "ഹാര്‍ട്ട് സ്മാര്‍ട്ട് @ എസ്‌യുടി' എന്ന പരിപാടി സംഘടിപ്പിച്ചു. ആശുപത്രി എംഡിയും സിഇഒയുമായ കേണല്‍ രാജീവ് മണ്ണാളി ഉദ്ഘാടനം ചെയ്തു. പ്രശസ്ത റേഡിയോ ജോക്കി സുമി പരിപാടിയുടെ മുഖ്യ അവതാരികയായിരുന്നു. പരിപാടിയുടെ ഭാഗമായി ഹൃദയാരോഗ്യം നിലനിര്‍ത്തുന്നതിന് സഹായിക്കുന്ന "സാലഡ് മത്സരവും' സംഘടിപ്പിച്ചു. ആശുപത്രി എമര്‍ജന്‍സി വിഭാഗത്തിന്‍റെ നേതൃത്വത്തില്‍ "ബേസിക് ലൈഫ് സപ്പോര്‍ട്ട്' ട്രെയിനിംഗും ഉള്‍പ്പെട്ടിരുന്നു. എസ്‌യുടി നഴ്‌സിംഗ് സ്‌കൂള്‍ വിദ്യാര്‍ഥികളുടെ സുംബ സെഷനോടുകൂടിയാണ് പരിപാടി ആരംഭിച്ചത്. ഹൃദയാരോഗ്യത്തെപ്പറ്റി അവബോധം സൃഷ്ടിക്കുകയെന്ന ലക്ഷ്യത്തോടെയാണ് പരിപാടി സംഘടിപ്പിച്ചത്.

ബഹുതല വികസന മുന്നേറ്റങ്ങൾ മത്സ്യമേഖലയിൽ അനിവാര്യം: ഡോ. എസ്. സൂര്യ

തിരുവനന്തപുരം: സമഗ്ര വികസനത്തിനു മത്സ്യമേഖല ഒരുമിച്ചു മുന്നേറണമെന്ന് ശാസ് ത്രജ്ഞ ഡോ. എസ്. സൂര്യ. സ്വതന്ത്ര മത്സ്യത്തൊഴിലാളി സ്വതന്ത്ര ഫെഡറേഷന്‍റെ നേതൃത്വത്തിൽ വേളി ടൂറിസ്റ്റ് വില്ലേജിലെ യൂത്ത് ഹോസ്റ്റലിൽ സംഘടിപ്പിച്ച ഓണാഘോഷ പരിപാടിയിൽ മത്സ്യ അനുബന്ധ മേഖലയിലെ പ്രഗൽഭരായ വ്യക്തികളെ ആദരിക്കുന്ന ചടങ്ങിൽ പങ്കെടുക്കുയായിരുന്നു അവർ. മത്സ്യത്തൊഴിലാളി സ്ത്രീകളുടെ വികസനത്തിന് പറ്റിയ പദ്ധതികളുമായി വരുന്പോൾ അതിൽ സംഘടന സജീവമായി സഹകരിക്കണം. ഇക്കാര്യത്തിൽ സിഎംഎഫ്ആർഐയുടെയും ശാസ്ത്ര സമൂഹത്തിന്‍റെയും പിന്തുണ ഉണ്ടാകുമെന്നും അവർ കൂട്ടിച്ചേർത്തു. എസ്എംടിഎഫ് സംസ്ഥാന പ്രസിഡന്‍റ് പി. സ്റ്റെല്ലസ് അധ്യക്ഷത വഹിച്ചു. നടി സോണിയ മൽഹാർ മുഖ്യപ്രഭാഷണം നടത്തി, ചീഫ് കോ-ഓർഡിനേറ്റർ ഡോ. എഫ്.എം ലാസർ ആമുഖ പ്രഭാഷണം നടത്തി, എസ്എംടി എഫിന്‍റെ തമിഴ്നാട് ഘടകം മുഖ്യരക്ഷാധികാരി റവ ഫാ. ചർച്ചിൽ ബാസ് ഐവിഡി അനുഗ്രഹപ്രഭാഷണം നടത്തി. മരിയ കുട്ടി ജസ്റ്റിൻ, വിഴിഞ്ഞം അരുൾദാസ്, റോബർട്ട് പാനി പിള്ള, മാഗ്ലിൻ പീറ്റർ, വർക്കല സബേശൻ, റെജിനഗ്നേഷ്യസ്, പയ്യന്നൂർ രാജേഷ്, അഡ്വ. എൻ. കെ ഗോപകുമാരൻ, സോണി ജോണ്‍, കെ.സി. ബൈജു, റംല ബീവി, മഞ്ജു സന്തോഷ് തുടങ്ങിയവർ പ്രസംഗിച്ചു.

പെർഫോമൻസ് ഓഡിറ്റ് നിർത്തിയാൽ അഴിമതിയും കൊള്ളയും വർധിക്കുമെന്നു രമേശ് ചെന്നിത്തല

തിരുവനന്തപുരം: പെർഫോമൻസ് ഓഡിറ്റ് നിർത്തലാക്കിയാൽ അഴിമതിയും കൊള്ളയും വർധിക്കുമെന്നു കോണ്‍ഗ്രസ് പ്രവർത്തക സമിതിയംഗം രമേശ് ചെന്നിത്തല. തദ്ദേശ സ്ഥാപനങ്ങളിൽ പെർഫോമൻസ് ഓഡിറ്റ് നിർത്തലാക്കുന്നതിനെതിരെയും ഇതിന്‍റെ മറവിൽ സെക്രട്ടേറിയറ്റിലെ 45 തസ്തികകൾ വെട്ടിക്കുന്നതിനെതിരെയും കേരള സെക്രട്ടേറിയറ്റ് അസോസിയേഷൻ തദ്ദേശ വകുപ്പ് മന്ത്രിയുടെ ഓഫീസിലേക്ക് നടത്തിയ മാർച്ച് ഉദ്ഘാടനം ചെയ്യുകയായിരുന്നു രമേശ് ചെന്നിത്തല. പഞ്ചായത്ത് ‌രാജ് സംവിധാനം നിലവിൽ വന്നതോടെ ജനപ്രതിനിധികൾക്കു കൂടുതൽ അധികാരമായി. ജനങ്ങളാൽ തെരഞ്ഞെടുക്കപ്പെടുന്ന ഭരണാധികാരികൾ ജനങ്ങളുടെ താല്പര്യമനുസരിച്ച് വേണം പ്രവർത്തിക്കേണ്ടത്. അതിൽ ശ്രദ്ധിക്കേണ്ട ഒരു പ്രധാന ഘടകമാണ് ധനവിനിയോഗം. കൂടുതൽ സാന്പത്തിക സ്വാതന്ത്ര്യം കിട്ടിയതു ദുരുപയോഗം ചെയ്യാതിരിക്കാനാണ് പെർഫോമൻസ് ഓഡിറ്റ് നടപ്പാക്കിയത്. അതില്ലാതായാൽ പഞ്ചായത്തിരാജ് സംവിധാനത്തിന്‍റെ അന്തസത്തയെ തന്നെ തകർക്കുമെന്നും രമേശ് ചെന്നിത്തല പറഞ്ഞു. തിരുവനന്തപുരം കോർപറേഷനിൽ പട്ടികജാതിക്കാരുടെ ഫണ്ട് വകമാറ്റി ചെലവഴിക്കുകയും അതിൽ അഴിമതി നടത്തുകയും ചെയ്തു. പല തദ്ദേശ സ്ഥാപനങ്ങളിലും സർക്കാർ കൊടുക്കുന്ന ഗ്രാന്‍റും പണവും വേണ്ട രീതിയിൽ വിനിയോഗിക്കാതെ കട്ടുമുടിക്കുന്നതു തടയുന്നതിലാണ് പെർഫോമൻസ് ഓഡിറ്റെന്നും അദ്ദേഹം പറഞ്ഞു. അസോസിയേഷൻ പ്രസിഡന്‍റ് എം. എസ്.ഇർഷാദ് അധ്യക്ഷനായിരുന്നു. ജനറൽ സെക്രട്ടറി കെ.പി പുരുഷോത്തമൻ, എസ്.പ്രദീപ് കുമാർ, സി.ഡി ശ്രീനിവാസ്, കെ.എം അനിൽകുമാർ, ബി.നൗഷാദ്, എ.സുധീർ, ജി.ആർ ഗോവിന്ദ്, ആർ.രാമചന്ദ്രൻ നായർ, സുരേഷ് കുമാർ, തുടങ്ങിയവർ പ്രസംഗിച്ചു.

സ്മാര്‍ട്ട് കൃഷി ഭവന്‍ നിര്‍മാണം : തുകയും സ്ഥലവും അനുവദിച്ചു; നടപടികളില്‍ അനിശ്ചിതത്വം ബാക്കി

നെയ്യാറ്റിന്‍കര: നെയ്യാറ്റിന്‍കര നഗരസഭ കൃഷിഭവന് പുതിയ കെട്ടിടത്തിന് സ്ഥലം അനുവദിച്ചിട്ടും നിര്‍മാണ പ്രവര്‍ത്തനങ്ങള്‍ അനിശ്ചിതമായി നീളുന്നു. നിലവിലെ കൃഷി ഭവന്‍ പ്രവര്‍ത്തിക്കുന്ന പൊളിഞ്ഞ കെട്ടിടത്തില്‍ പ്രതികൂല കാലാവസ്ഥകളില്‍ ആശങ്കയോടെയാണു ജീവനക്കാര്‍ കഴിയുന്നത്. ഇനിയും എത്രകാലം ഈ അവഗണന തുടരുമെന്നാണു കര്‍ഷകരുടെ ചോദ്യം. ഒരു കോടിയിലധികം രൂപ ചെലവഴിച്ചു പുതിയ കൃഷി ഭവനും അനുബന്ധ സംവിധാനങ്ങളും സാക്ഷാത്കരിക്കാന്‍ പ്രാഥമിക തീരുമാനമായപ്പോള്‍ കര്‍ഷകരും ജീവനക്കാരുമെല്ലാം ഏറെ ആശ്വസിച്ചു. നെയ്യാറ്റിന്‍കര നഗരസഭയുടെ പരിധിയില്‍ പവിത്രാനന്ദപുരം പ്രീ- മെട്രിക് ഹോസ്റ്റലിനു സമീപത്തെ പത്തു സെന്‍റ് വസ്തുവിലാണ് പുതിയ സ്മാര്‍ട്ട് കൃഷി ഭവന്‍ കെട്ടിടം നിര്‍മിക്കാന്‍ അനുമതി ലഭിച്ചത്. കേരള ലാന്‍ഡ് ഡവലപ്പമെന്‍റ് ആന്‍ഡ് കണ്‍സ്ട്രക്‌ഷന്‍ ബോര്‍ഡിനാണ് നിര്‍മാണ ചുമതല. ബന്ധപ്പെട്ട ഉദ്യോഗസ്ഥര്‍ സ്ഥലം സന്ദര്‍ശിക്കുകയും ചെയ്തു. കഴിഞ്ഞ ദിവസങ്ങളില്‍ പെയ്ത മഴയത്തും നിലവിലെ കൃഷി ഭവന്‍ ചോര്‍ന്നൊലിച്ചതായി കര്‍ഷകര്‍ ചൂണ്ടിക്കാട്ടി. മൃഗസംരക്ഷണ വകുപ്പിന്‍റെ കെട്ടിടത്തിലാണ് കൃഷി ഭവന്‍ പ്രവര്‍ത്തിക്കുന്നത്. കൃഷി ഭവന്‍റെ ദയനീയാവസ്ഥ നേരത്തെയും "ദീപിക' റിപ്പോര്‍ട്ട് ചെയ്തിട്ടുണ്ട്.

കുമ്മിയിൽ മാലിന്യം തള്ളൽ വ്യാപകം

നെടുമങ്ങാട്: അരുവിക്കര പഞ്ചായത്തിലെ കുമ്മിയില്‍ മാലിന്യം തള്ളൽ വ്യാപകം. ഇരുമ്പയിൽ നിന്നും അരുവിക്കരയിലേക്ക് പോകുന്ന റോഡിൽ കുമ്മി പ്രദേശത്തെ ആളൊഴിഞ്ഞ വളവുകളിലാണ് മാംസാവശിഷ്ടങ്ങൾ ഉൾപ്പെടെയുള്ള പ്ലാസ്റ്റിക് മാലിന്യങ്ങൾ തള്ളുന്നത്. ഇവിടങ്ങളിൽ വലിച്ചെറിയുന്ന മാലിന്യങ്ങൾ നാട്ടുകാർക്ക് ഏറെ ബുദ്ധിമുട്ടുണ്ടാക്കുന്നുണ്ട്. പ്ലാസ്റ്റിക് ചാക്കുകളിലും കവറുകളിലും നിറച്ചു കൊണ്ടുവരുന്ന മാംസാവശിഷ്ടങ്ങളടങ്ങുന്ന മാലിന്യങ്ങൾ രാത്രി കാലങ്ങളിൽ വാഹനങ്ങളിലെത്തിച്ചാണ് പ്രദേശത്ത് തള്ളുന്നത്‌. കോഴിവേസ്റ്റ് ഉൾപ്പെടെയുള്ള ഇറച്ചിമാലിന്യങ്ങൾ പരസ്യമായി വലിച്ചെറിയുകയാണ്. കാടുപിടിച്ചു കിടക്കുന്ന കുമ്മി പ്രദേശം പകൽ സമയത്ത് പോലും വിജനമാണ്. മാലിന്യങ്ങളിൽ നിന്നുള്ള ദുർഗന്ധം യാത്രക്കാർക്ക് അസഹനീയമായി. മാലിന്യങ്ങൾ തിന്നാനെത്തുന്ന തെരുവുനായ്ക്കൾ കാൽനട യാത്രക്കാർക്കും ഇരുചക്ര വാഹനയാത്രക്കാർക്കും ഭീഷണിയായിരിക്കുകയാണ്. അരുവിക്കര പഞ്ചായത്ത് അധികൃതർ ഈ മേഖലയില്‍ പലപ്രാവശ്യം ശുചീകരണ പ്രവര്‍ത്തനങ്ങൾ നടത്തിയെങ്കിലും വീണ്ടും മാലിന്യങ്ങൾ വലിച്ചെറിയുകയാണ്. പ്രദേശം കാടുപിടിച്ചു കിടക്കുന്നതു കാരണം വിജനമായ ഇവിടെ മാലിന്യങ്ങൾ തള്ളാൻ എത്തുന്ന അന്യദേശവാസികളുടെ എണ്ണം ദിനംപ്രതി കൂടുകയാണ്. നഗരപ്രദേശങ്ങളിലെ ഹോട്ടലുകൾ, ഇറച്ചിക്കടകൾ, വീടുകൾ എന്നിവിടങ്ങളിൽ നിന്നുള്ള മാലന്യങ്ങൾ വാഹനങ്ങളിൽ കൊണ്ടുവന്ന് അരുവിക്കര, കരകുളം പഞ്ചായത്തുകളിലെ ഗ്രാമീണ മേഖലകളിൽ തള്ളുന്നതും പതിവായി. മഴപെയ്യുമ്പോൾ കെട്ടിക്കിടക്കുന്ന മാലിന്യങ്ങളിൽ നിന്നും മലിനജലം സമീപത്തെ കരമന ആറ്റിലേക്ക് ഒലിച്ചിറങ്ങുകയാണ്. മാംസാവശിഷ്ടങ്ങളടങ്ങുന്ന മാലിന്യങ്ങൾ തെരുവുനായ്ക്കളും കടിച്ചുവലിച്ച് ആറ്റിലേക്കിടുന്നുണ്ട്. ഇതുകാരണം ജലം മലിനമാവുകയാണ്.

അഴിമതി വിരുദ്ധ മാര്‍ച്ച് സംഘടിപ്പിച്ചു

നെയ്യാറ്റിന്‍കര: പെരുങ്കടവിള പഞ്ചായത്തില്‍ അഴിമതിയും കെടുകാര്യസ്ഥതയും ആരോപിച്ച് യൂത്ത് കോൺഗ്രസ് പെരുങ്കടവിള മണ്ഡലം കമ്മിറ്റിയുടെ ആഭിമുഖ്യത്തില്‍ പ്രതിഷേധ മാർച്ച് സംഘടിപ്പിച്ചു. പഞ്ചായത്ത് ഓഫീസിനു മുൻപില്‍ മാര്‍ച്ച് പോലീസ് തടഞ്ഞു. യൂത്ത് കോൺഗ്രസ് മണ്ഡലം പ്രസിഡന്‍റ് അനന്തൻ മാരായമുട്ടത്തിന്‍റെ നേതൃത്വത്തിൽ നടത്തിയ അഴിമതി വിരുദ്ധ സമരപരിപാടി നെയ്യാറ്റിൻകര നഗരസഭ പ്രതിപക്ഷ നേതാവ് ജെ. ജോസ് ഫ്രാങ്ക്ളിൻ ഉദ്ഘാടനം ചെയ്തു. ബ്ലോക്ക് കോൺഗ്രസ് വൈസ് പ്രസിഡന്‍റ് വടകര ജയൻ മുഖ്യപ്രഭാഷണം നടത്തി. കോൺഗ്രസ് മാരായമുട്ടം മണ്ഡലം പ്രസിഡന്‍റ് ബിനിൽ മണലുവിള, ബ്ലോക്ക് സെക്രട്ടറിമാരായ മണ്ണൂർ ശ്രീകുമാർ, മണ്ണൂർ ഗോപൻ, സേവാദൾ ബ്ലോക്ക് പ്രസിഡന്‍റ് തത്തിയൂർ സുരേന്ദ്രൻ എന്നിവര്‍ പങ്കെടുത്തു.

പിഎസ്എന്‍എം സ്‌കൂളില്‍ അടിസ്ഥാന സൗകര്യങ്ങളില്ല; രക്ഷിതാക്കള്‍ പ്രതിഷേധിച്ചു

പേരൂര്‍ക്കട: പി.എസ്. നടരാജപിള്ള മെമ്മോറിയല്‍ സര്‍ക്കാര്‍ സ്‌കൂളില്‍ വിദ്യാര്‍ഥികള്‍ക്ക് അടിസ്ഥാന സൗകര്യങ്ങള്‍ ലഭ്യമാക്കാത്തതിനെതിരേ രക്ഷിതാക്കളുടെ പ്രതിഷേധം. ഇന്നലെ രാവിലെയാണു രക്ഷിതാക്കള്‍ പ്രതിഷേധവുമായി എത്തിയത്. സ്‌കൂളിലെ പ്ലസ് വണ്‍, പ്ലസ് ടു വിദ്യാര്‍ഥികള്‍ക്കാണ് അടിസ്ഥാനസൗകര്യങ്ങള്‍ അധികൃതര്‍ ഏര്‍പ്പെടുത്താത്തതെന്നാണ് രക്ഷിതാക്കളുടെ പരാതി. ക്ലാസ് റൂമില്‍ നല്ല ബോര്‍ഡുകളോ ലാബില്‍ അടിസ്ഥാന സൗകര്യങ്ങളോ ഇല്ലെന്നും വൃത്തിഹീനമായ അവസ്ഥയിലാണ് ലാബ് പ്രവർത്തിക്കുന്നതെ ന്നും പൊതുടാപ്പുകള്‍ സ്ഥാപിച്ചിട്ടുള്ള സ്ഥലങ്ങള്‍പോലും വൃത്തിഹീനമായ നിലയിലാണെന്നും നെടുമങ്ങാട് സ്വദേശിയും രക്ഷിതാവുമായ ബിസ്മിത പറഞ്ഞു. സ്‌കൂളിലെ വിഷയങ്ങള്‍ സംബന്ധിച്ചു സംസാരിക്കുന്നതിനിടെ പിടിഎ പ്രസിഡന്‍റ്് മോശമായി പെരുമാറിയെന്നു കാണിച്ച് ഒരു രക്ഷിതാവ് പേരൂര്‍ക്കട സ്റ്റേഷനില്‍ പരാതി നല്‍കി. അതേസമയം വിദ്യാര്‍ഥികള്‍ക്ക് ആവശ്യമായ ഭൗതിക സാഹചര്യങ്ങള്‍ മൂന്നുമാസത്തിനുള്ളില്‍ ഒരുക്കാമെന്നാണ് അധികൃതരുടെ നിലപാട്. നഗരസഭ ആവശ്യമായ ഫണ്ട് അനുവദിക്കാത്തതാണ് പ്രശ്‌നങ്ങള്‍ക്കു കാരണമെന്നാണ് സ്‌കൂള്‍ അധികൃതർ‍ പറയുന്നത്. തര്‍ക്കവും വാക്കേറ്റവും രൂക്ഷമായതോടെ പേരൂര്‍ക്കട പോലീസ് സ്ഥലത്തെത്തുകയും രക്ഷിതാക്കളുമായി സംസാരിച്ചു. വകുപ്പു മന്ത്രി, എംഎല്‍എ തുടങ്ങിയവര്‍ക്ക് ഇന്നു പരാതി നല്‍കുമെന്നു രക്ഷിതാക്കള്‍ അറിയിച്ചു.

ടേക്ക് എ ബ്രേക്ക് വഴിയോര വിശ്രമ കേന്ദ്രം

നെടുമങ്ങാട്: കേരള സർക്കാരിന്‍റെ നൂറു ദിന കർമപരിപാടിയുടെ ഭാഗമായുള്ള ടേക്ക് എ ബ്രേക്ക് - വഴിയോര വിശ്രമ കേന്ദ്രം അരുവിക്കര പഞ്ചായത്തിലും യാഥാർഥ്യമായി. ശുചിത്വ മിഷന്‍റെ ധനസഹായത്തോടുകൂടി 6,35,000 രൂപ ചെലവാക്കിയാണു പദ്ധതി നടപ്പിലാക്കിയത്. പേ ആൻഡ് യൂസ് മാതൃകയിലാണ് ഇതിന്‍റെ പരിപാലനം നടത്തുന്നത്. അരുവിക്കര പഞ്ചായത്ത് പ്രസിഡന്‍റ് ആർ. കല ഉദ്ഘാടനം നിർവഹിച്ചു. ജില്ല മെമ്പർ വെള്ളനാട് ശശി, പഞ്ചായത്ത് വൈസ് പ്രസിഡന്‍റ് രേണുക, സ്റ്റാൻഡിംഗ് കമ്മിറ്റി ചെയർപേഴ്സൺ അലിഫിയ, മറിയകുട്ടി, ബ്ലോക്ക് മെമ്പർ വിജയൻ നായർ, ജനപ്രതിനിധികളായ കളത്തറ മധു, ഇല്ല്യാസ്, ഷജിത, ലേഖ, അർച്ചന, രമേശ് ചന്ദ്രൻ, അജേഷ്, സജ്ജാദ്, സിഡിഎസ് ചെയർപേഴ്സൺ പ്രീത, രാഷ്ട്രീയ പാർട്ടി പ്രതിനിധികൾ, ബാങ്ക് പ്രസിഡന്‍റ് സജീവ്കുമാർ എന്നിവർ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]