ADVERTISEMENT

ADVERTISEMENT

പുസ്തകങ്ങൾ കൈമാറി

കോഴിക്കോട്: ജില്ലയിലെ പട്ടികവർഗ ഉന്നതി പഠന കേന്ദ്രങ്ങളിലേക്ക് പുസ്തകങ്ങൾ ശേഖരിച്ചു ലൈബ്രറി സംവിധാനം ഒരുക്കുന്നതിൽ എൻഎസ്എസ് കോഴിക്കോട് സിറ്റി ക്ലസ്റ്ററും പങ്കാളികളായി.

യൂണിറ്റ് തലങ്ങളിൽ എൻഎസ്എസ് വോളന്‍റിയർമാർ ശേഖരിച്ച പുസ്തകങ്ങൾ പ്രസന്‍റേഷൻ ഹയർ സെക്കൻഡറി സ്കൂളിൽ നിന്ന് തദ്ദേശ സ്വയം ഭരണ ജീവനക്കാർക്ക് കൈമാറി. പ്രോഗ്രാം ഓഫീസർ സജിത, സ്റ്റാഫ്‌ സെക്രട്ടറി സീന, ഷിബു വർഗീസ് എന്നിവർ പരിപാടിയിൽ സംബന്ധിച്ചു.

ADVERTISEMENT

ചക്കിട്ടപാറയിൽ പൊതു ശൗചാലയ സൗകര്യം ഏർപ്പെടുത്തണമെന്ന്

ചക്കിട്ടപാറ: കേരള സ്റ്റേറ്റ് സർവീസ് പെൻഷനേഴ്സ് യൂണിയൻ ചക്കിട്ടപാറ യൂണിറ്റ് വനിതാ കൺവൻഷൻ നടത്തി. എൻ.വി. ഏലിക്കുട്ടി ഉദ്ഘാടനം ചെയ്‌തു. പി.എം. കോമളം അധ്യക്ഷയായി. മറിയാമ്മ മാത്യു, ജെസി ആൻഡ്രൂസ് എന്നിവർ പ്രമേയങ്ങൾ അവതരിപ്പിച്ചു. വാർധക്യകാല ആരോഗ്യസംരക്ഷണം എന്ന വിഷയത്തിൽ ജെഎച്ച്ഐ ജ്യോത്സ്ന ക്ലാസ് എടുത്തു. തോമസ് ഫിലിപ്പ്, പി.എ ജോർജ്, മാത്യു പേഴ്ത്തിങ്കൽ, പി. സന്തോഷ്‌, പി.എം. വേണുഗോപാലൻ, കെ.കെ. അശോകൻ, എം.ഡി. വത്സ, ശോഭന ഭാസ്കർ എന്നിവർ പ്രസംഗിച്ചു. മുതിർന്ന അംഗം സരസയെ ചടങ്ങിൽ ആദരിച്ചു. ചക്കിട്ടപാറ ടൗണിൽ പൊതു ശൗചാലയ സൗകര്യം ഏർപ്പെടുത്തണമെന്നും പകൽ വീട് കാര്യക്ഷമമാക്കി വയോജനങ്ങൾക്ക് നൽകണമെന്നും യോഗം ആവശ്യപ്പെട്ടു.

കല്ലാനോട് ഹൈസ്കൂളിൽ എസ്പിസി ദിനാചരണം നടത്തി

കൂരാച്ചുണ്ട്: കല്ലാനോട് സെന്‍റ് മേരീസ് ഹൈസ്കൂളിൽ എസ്പിസി ദിനാചരണം നടത്തി. ചടങ്ങിൽ "മനുഷ്യ ലൈബ്രറി'യുടെ ഉദ്ഘാടനം പ്രശസ്ത ചിത്രകാരനും എഴുത്തുകാരനുമായ പോൾ കല്ലാനോട് നിർവഹിച്ചു."നാടിന്‍റെ പ്രതിഭയോടൊപ്പം' എന്ന പ്രോഗ്രാമിൽ പോൾ കല്ലാനോടുമായി കുട്ടികൾ സംവാദത്തിൽ ഏർപ്പെട്ടു. എൻഎംഎംഎസ്, മദർ തെരേസ സേവന അവാർഡ് എന്നീ പുരസ്കാരങ്ങൾക്ക് അർഹരായ എയ്ഞ്ചൽ മരിയ തോമസ്, അൻവിത അജി, അലക്സി റോസ്, പി.ആർ. അനന്ദു, ആൻലിയ ഷിജു എന്നീ കേഡറ്റുകളെ ചടങ്ങിൽ ആദരിച്ചു. സ്കൂൾ മാനേജർ ഫാ. ജിനോ ചുണ്ടയിൽ അധ്യക്ഷത വഹിച്ചു. കൂരാച്ചുണ്ട് പോലീസ് ഇൻസ്പെക്ടർ കെ.പി സുനിൽകുമാർ മുഖ്യപ്രഭാഷണം നടത്തി. പ്രധാനാധ്യാപകൻ കെ.സി. ബിജു, നൈസിൽ തോമസ്, ഷിബി ജോസ്, സീനിയർ ക്യാഡറ്റുകളായ അലീന ബിജു, നിയോൺ ജോസഫ് എന്നിവർ പ്രസംഗിച്ചു.

ഉന്നത വിദ്യാഭ്യാസ രംഗത്ത് മാറ്റങ്ങൾ അനിവാര്യം: എം.കെ. രാഘവൻ എംപി

കോഴിക്കോട്: കേരളത്തിലെ ഉന്നത വിദ്യാഭ്യാസ രംഗത്ത് കാലത്തിനനുസൃതമായ മാറ്റങ്ങൾ കൊണ്ടുവരേണ്ടതുണ്ടെന്ന് എം.കെ. രാഘവൻ എംപി. കാലത്തിനനുസൃതമായ വിദ്യാഭ്യാസ മാർഗങ്ങൾ, കോഴ്സുകൾ കേരളത്തിൽ നടപ്പിലാക്കേണ്ടതുണ്ട്. കേരളത്തിൽ അത്തരമൊരു സാഹചര്യമില്ലാത്തതുകൊണ്ടാണ് ഉന്നതവിദ്യാഭ്യാസത്തിനായി വിദ്യാർഥികൾ മറ്റു സംസ്ഥാനങ്ങളെ ആശ്രയിക്കുന്നത്. പൊതുവിദ്യാഭ്യാസ മേഖലയിൽ ഗുണനിലവാരം ഉറപ്പ് വരുത്തേണ്ടതുണ്ട്. വിദ്യാർഥികൾക്കിടെയിലെ ലഹരി വ്യാപനംതടയാൻ രക്ഷിതാക്കളും അധ്യാപകരും പൊതുസമൂഹവും മുന്നിട്ടറങ്ങണമെന്നും എം.കെ. രാഘവൻ എംപി അഭിപ്രായപ്പെട്ടു. യുവസാഹിതീ സമാജം പ്രതിഭാദരം പരിപാടി ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ചടങ്ങിൽ പ്രസിഡന്‍റ് പ്രഫ. ഷഹദ് ബിൻ അലി അധ്യക്ഷത വഹിച്ചു. പിജി, ഡിഗ്രി, നീറ്റ്, എസ്എസ്എൽസി, പ്ലസ്ടു, യുഎസ്എസ്, എൽഎസ്എസ് പരീക്ഷയിൽ മികച്ച വിജയം കരസ്ഥമാക്കിയ വിദ്യാർഥികൾക്ക് എംപി ഉപഹാരം നൽകി. ജനറൽ സെക്രട്ടറി കെ.പി. സാജിദ്, പി. അബ്ദുൾ ഷുക്കൂർ, പി. നൗഷാദലി, കെ.വി. മുഹമ്മദ്‌ ഷുഹൈബ്, ഡി.വി. റഫീഖ് പ്രസംഗിച്ചു.

ജീവകാരുണ്യ പ്രവർത്തകനെ ആദരിച്ചു

പുല്ലുരാംപാറ: സെന്‍റ് ജോസഫ്സ് ഹൈസ്കൂൾ സുവർണ ജൂബിലി ആഘോഷത്തോടനുബന്ധിച്ച് ജീവകാരുണ്യ പ്രവർത്തകനെ ആദരിച്ചു. 33 വർഷത്തിനിടയിൽ തുടർച്ചയായി 119 പ്രാവശ്യം രക്തം ദാനം ചെയ്ത തിരുവമ്പാടി കന്നുകുഴി ജെയ്സനെയാണ് പുല്ലുരാംപാറ സെന്‍റ് ജോസഫ്സ് ഹൈ സ്കൂൾ പിടിഎ കൗൺസിൽ അനുമോദിച്ചത്. രക്തദാനം കൂടാതെ മറ്റു നിരവധി ജീവ കാരുണ്യപ്രവർത്തനങ്ങളിലും ജെയ്സൺ സജീവ പങ്കാളിയാണ്. പെയിൻ ആൻഡ് പാലിയേറ്റിവ്, പ്രൊ ലൈഫ്, വിൻസെന്‍റ് ഡി പോൾ സൊസൈറ്റി, മദ്യ -ലഹരി വിമുക്ത സമിതി, ഡിഎഫ്സി, എകെസിസി എന്നിങ്ങനെയുള്ള സേവനമേഖലകളിൽ നിറ സാന്നിധ്യമായുണ്ട്. സ്കൂൾ പ്രിൻസിപ്പൽ സുനിൽ ജോസഫ്, പ്രധാനാധ്യാപകൻ ജോളി ഉണ്ണിയേ പ്പിള്ളിൽ, പിടിഎ പ്രസിഡന്‍റ് വിൽ‌സൺ താഴത്തു പറമ്പിൽ, എംപിടിഎ പ്രസിഡന്‍റ് ജിൻസി തോമസ് തുടങ്ങിയവർ പ്രസംഗിച്ചു.

മിന്നല്‍ പണിമുടക്കിനെതിരെ പ്രതിഷേധം; ‌ ബസുകള്‍ തടഞ്ഞ് ഡിവൈഎഫ്‌ഐ പ്രവർത്തകർ

വടകര: സമരം അവസാനിപ്പിച്ച് ബസുകള്‍ ഓടിത്തുടങ്ങിയെങ്കിലും യാത്ര സുഗമമായില്ല. ശനിയാഴ്ച മിന്നല്‍പണിമുടക്ക് നടത്തിയതിന്‍റെ പേരില്‍ ഡിവൈഎഫ്‌ഐ പ്രവര്‍ത്തകര്‍ ഞായറാഴ്ച രാവിലെ വടകരയിലെ രണ്ട് ബസ് സ്റ്റാൻഡുകളിലും ബസുകള്‍ തടഞ്ഞിട്ടു. ഇത് ബസ് ജീവനക്കാരും ഡിവൈഎഫ്‌ഐ പ്രവര്‍ത്തകരും തമ്മില്‍ വാക്കേറ്റത്തിന് ഇടയാക്കി. ഇതോടെ ബസുകള്‍ ഓട്ടം അവസാനിപ്പിച്ചു. പല ബസുകളും പലയിടത്തായി നിര്‍ത്തിയിട്ടത് യാത്രക്കാരെ കഷ്ടത്തിലാക്കി. ദീര്‍ഘദൂര ബസുകളിലുള്ളവരും വലഞ്ഞു. പെരിങ്ങത്തൂരില്‍ കണ്ടക്ടറെ മര്‍ദിച്ചതിന്‍റെ പേരില്‍ നടന്ന ബസ് സമരം തലശേരിയിലെ ചര്‍ച്ചയെ തുടര്‍ന്ന് പിന്‍വലിച്ചെങ്കിലും ശനിയാഴ്ച മിന്നല്‍പണിമുടക്ക് നടത്തി യാത്രക്കാരെ വലച്ചതാണ് ഡിവൈഎഫ്‌ഐയെ പ്രകോപിപ്പിച്ചത്. വൈകീട്ട് റൂറല്‍ എസ്പിയുടെയും ആര്‍ടിഒയുടെയും സാന്നിധ്യത്തില്‍ നടന്ന ചര്‍ച്ചയില്‍ സമരം ഒത്തുതീര്‍ന്നതിനാല്‍ ബസുകള്‍ ഓടിത്തുടങ്ങുകയായിരുന്നു. ഇതിനു പിന്നാലെയാണ് ഡിവൈഎഫ്‌ഐ പ്രവര്‍ത്തകര്‍ പ്രതിഷേധവുമായി രംഗത്തെത്തിയതും ബസുകള്‍ തടഞ്ഞിട്ടതും. സമരം അവസാനിച്ച് ഓടിയ ബസുകള്‍ തടഞ്ഞത് ശരിയായില്ലെന്ന് ഇതോടെ അഭിപ്രായം ഉയര്‍ന്നു. പുതിയ ബസ് സ്റ്റാൻഡില്‍ ബസ് ജീവനക്കാരും ഡിവൈഎഫ്‌ഐക്കാരും തമ്മില്‍ വലിയതോതിലാണ് വാക്കേറ്റമുണ്ടായത്. യാത്രക്കാരും പ്രതിഷേധം അറിയിച്ചു. അന്തരീക്ഷം വഷളാവുമെന്ന സാഹചര്യത്തില്‍ പോലീസ് രംഗത്തെത്തി സ്ഥിതിഗതികള്‍ ശാന്തമാക്കുകയായിരുന്നു. ബസുകള്‍ക്ക് മതിയായ സംരക്ഷണം ഒരുക്കുമെന്ന് റൂറല്‍ എസ്പി വ്യക്തമാക്കിയിരുന്നെങ്കിലും അതല്ല ഉണ്ടായത്. പല പ്രദേശങ്ങളിലേക്കും എത്തേണ്ട യാത്രക്കാരാണ് ബസുകള്‍ തടഞ്ഞതിനാല്‍ കുടുങ്ങിയത്. ഇതിനെതിരേ യാത്രക്കാര്‍ രംഗത്തുവന്നു. ബസുകള്‍ തടഞ്ഞ രണ്ടു പേരെ പോലീസ് കസ്റ്റഡിയിലെടുത്തു. കൂടുതല്‍ പോലീസെത്തി പ്രതിഷേധക്കാരെ പിന്തരിപ്പിച്ചു. മണിക്കൂറുകള്‍ കഴിഞ്ഞ് പത്തരയോടെയാണ് ബസുകള്‍ സര്‍വീസ് പുനഃരാരംഭിച്ചത്. പിന്നീട് ഡിവൈഎഫ്‌ഐ പ്രവര്‍ത്തകര്‍ പ്രകടനവും പൊതുയോഗവും നടത്തി.

പീടികപ്പാറ തേനരുവിയിൽ കാട്ടാന വ്യാപകമായി കൃഷി നശിപ്പിച്ചു

കൂടരഞ്ഞി: പീടികപ്പാറ തേനരുവിയിൽ കാട്ടാന വ്യാപകമായി കൃഷി നശിപ്പിച്ചു. പീടികപ്പാറ ചേനാട്ട്കുഴിയിൽ സത്താറിന്‍റെ കൃഷിയാണ് കാട്ടാന വ്യാപകമായി നശിപ്പിച്ചത്. വീട്ടുമുറ്റത്ത് എത്തിയ മൂന്ന് ആനകളാണ് വാഴ, കമുങ്ങ്, കാപ്പി, കൊക്കോ എന്നിവ നശിപ്പിച്ചത്. വീട്ടുകാർ അറിഞ്ഞുവെങ്കിലും ഭയത്താൽ ആരും ആനയെ ഓടിച്ചില്ല. പ്രായമായ ഉമ്മയും കുടുംബാംഗങ്ങളും മാത്രമാണ് വീട്ടിൽ ഉണ്ടായിരുന്നത്. നിരന്തരം വന്യജീവി ആക്രമണം ഉണ്ടാകുന്ന കൂടരഞ്ഞി പഞ്ചായത്തിലെ പൂവാറംതോട്, പീടികപ്പാറ, തേനരുവി, കക്കാടംപൊയിൽ എന്നിവിടങ്ങളിലെ ജനങ്ങൾ ആശങ്കയിലാണ്. ആന, കടുവ, പുലി, പന്നി തുടങ്ങിയ വന്യമൃഗങ്ങൾ ജനവാസ മേഖലയിൽ ഇറങ്ങുന്നത് പതിവാകുകയാണ്. പകൽ സമയങ്ങളിൽ പോലും കാട്ടാനക്കൂട്ടം ജനവാസ മേഖലയിൽ തമ്പടിക്കുന്നു. വിവരം ഫോറസ്റ്റ് അധികൃതരെ അറിയിക്കുമ്പോൾ സ്റ്റാഫില്ല, എത്തിച്ചേരുവാൻ വാഹനമില്ല എന്നിങ്ങനെയുള്ള മറുപടികളാണ് ലഭിക്കുന്നതെന്നും നാട്ടുകാർ പരാതി പറയുന്നു. വന്യജീവി ആക്രമണം: സർക്കാർ നിസംഗത അവസാനിപ്പിക്കണം: മുസ്ലിംലീഗ് കൂടരഞ്ഞി: വർധിച്ചുവരുന്ന വന്യജീവി ആക്രമങ്ങളിൽ ധാരാളം കർഷകർ കൊല്ലപ്പെടുകയും വിളകൾക്ക് കനത്ത നാശങ്ങൾ സംഭവിക്കുകയും ചെയ്യുന്ന സാഹചര്യം കണ്ടില്ലെന്ന് നടിക്കുന്ന കേന്ദ്ര-സംസ്ഥാന സർക്കാരുകളുടെ നിലപാടുകൾ തിരുത്തണമെന്ന് മുസ്ലിം ലീഗ് തിരുവമ്പാടി നിയോജകമണ്ഡലം പ്രസിഡന്‍റ് സി.കെ. കാസിം അഭിപ്രായപ്പെട്ടു. കൂടരഞ്ഞി കൃഷിഭവന് മുന്നിൽ സ്വതന്ത്ര കർഷകസംഘം പഞ്ചായത്ത് കമ്മിറ്റിയുടെ ആഭിമുഖ്യത്തിൽ നടത്തിയ ധർണ ഉദ്ഘാടനം ചെയ്യുകയായിരുന്നു അദ്ദേഹം. പ്രകൃതിക്ഷോഭത്താലും കാലാവസ്ഥാ വ്യതിയാനത്തിനാലും കർഷകർക്ക് മതിയായ വിള ലഭിക്കാതിരിക്കുന്ന സാഹചര്യത്തിൽ അടിയന്തര സാമ്പത്തിക സഹായം അനുവദിക്കണമെന്നും അദ്ദേഹം ആവശ്യപ്പെട്ടു. മുസ്ലിം ലീഗ് പഞ്ചായത്ത് കമ്മിറ്റി പ്രസിഡന്‍റ് എൻ.ഐ. അബ്ദുൾ ജബ്ബാർ അധ്യക്ഷത വഹിച്ചു. കർഷകസംഘം കുടരഞ്ഞി പഞ്ചായത്ത് കമ്മിറ്റി പ്രസിഡന്‍റ് നൂറുദ്ദീൻ കളപ്പുരക്കൽ, നിയോജകമണ്ഡലം കമ്മിറ്റി പ്രസിഡന്‍റ് നടുക്കണ്ടി അബൂബക്കർ, ജനറൽ സെക്രട്ടറി ഷരീഫ് അമ്പലക്കണ്ടി, വൈസ് പ്രസിഡന്‍റ് ഇല്യാസ് മൗലവി പുത്തൻവീട്ടിൽ, സലിം പാലയാം പറമ്പിൽ, അബ്ദുൾ കരീം ഇല്ലിക്കൽ, അസീസ് നടക്കൽ, സുബൈർ പാലയാംപറമ്പിൽ, നൗഷാദ് ചേരാംപുറത്ത് തുടങ്ങിയവർ പ്രസംഗിച്ചു.

കന്യാസ്ത്രികളെ ജയിലിൽ അടച്ചതിൽ പ്രതിഷേധിച്ചു

ആനക്കാംപൊയിൽ: ഛത്തീസ്ഗഡിൽ കന്യാസ്ത്രീമാരായ സിസ്റ്റർ വന്ദന ഫ്രാൻസീസ്, സിസ്റ്റർ പ്രീതി മേരി എന്നിവരെ ജയിലിലടച്ചതിൽ പ്രതിഷേധിച്ച് ആനക്കാംപൊയിൽ സെന്‍റ് മേരീസ് ഇടവകാസമൂഹം റാലി സംഘടിപ്പിച്ചു. ഇടവക വികാരി ഫാ. അഗസ്റ്റ്യൻ പാറ്റാനി, തോമസ് ആനക്കല്ലേൽ, ജോൺ ഓത്തിക്കൽ, തോമസ് കരിക്കണ്ടം, ജൂബിൻ മണ്ണു കുശുമ്പിൽ, വർഗീസ് ചിരട്ടവേലിൽ, ഷിനോയി അടയ്ക്കാപാറ, ജോയി പുളിക്കൽ, പൗളിൻ ചേന്ദംപള്ളി എന്നിവർ റാലിക്ക് നേതൃത്വം നൽകി. ചാത്തമംഗലം: ഛത്തീസ്ഗഡിൽ കന്യാസ്ത്രീകളെ ജയിലിലടച്ചതിൽ പ്രതിഷേധിച്ച് ചാത്തമംഗലം മോർണിംഗ് സ്റ്റാർ ഇടവക മാർച്ച് നടത്തി. വായ മൂടി കെട്ടി നടത്തിയ പ്രതിഷേധം ഇടവക വികാരി ഫാ. ജോൺസൺ അവരവെ ഉദ്ഘാടനം ചെയ്തു. പാരിഷ് കൗൺസിൽ സെക്രട്ടറി സി.ഡി നെൽസൺ അധ്യക്ഷത വഹിച്ചു. കെഎൽസിഎ സംസ്ഥാന മാനേജിംഗ് കൗൺസിൽ അംഗം പ്രകാശ് പീറ്റർ മുഖ്യ പ്രഭാഷണം നടത്തി. സിസ്റ്റർ ദിവ്യ, സാന്ദിയാഗു, ഷാലി ജോസഫ്, ബോബി മൈക്കിൾ, ലിജു ആൽഫസ്, സിൽവൻ ലാസർ, സിജു ലാൻസി, സെബാസ്റ്റ്യൻ നോയൽ തുടങ്ങിയവർ നേതൃത്വം നൽകി.

കോടികൾ പാഴാവുന്നു: കൊയിലാണ്ടി -എടവണ്ണ സംസ്ഥാന പാത പൊളിഞ്ഞ് തുടങ്ങി

മുക്കം: കിലോമീറ്ററിന് നാല് കോടിയിലധികം രൂപ മുടക്കി നവീകരണ പ്രവൃത്തി പൂർത്തിയായ കൊയിലാണ്ടി-എടവണ്ണ സംസ്ഥാന പാതയിലെ അപാകതകൾക്കെതിരേ വ്യാപകമായി പരാതികൾ ഉയരുന്നതിനിടെ റോഡ് പൊളിഞ്ഞു തുടങ്ങി. ഓടത്തെരുവ് വളവിലാണ് രണ്ട് മുന്ന് സ്ഥലങ്ങളിലായി റോഡ് പൊളിഞ്ഞ് തുടങ്ങിയത്. നേരത്തെ ഈ ഭാഗത്ത് റോഡ് ടാർ ചെയ്തതിന് പിന്നാലെ താഴ്ന്ന് പോയിരുന്നു. അന്ന് താൽക്കാലിക പ്രവൃത്തി നടത്തി അധികൃതർ തടിതപ്പുകയായിരുന്നു. ഇതിന് പിന്നാലെയാണിപ്പോൾ ഉദ്ഘാടനം നടന്ന് ഒരു വർഷത്തിനുള്ളിൽ റോഡ് പൊളിയാനുമാരംഭിച്ചത്. നേരത്തെ റോഡ് നിർമാണത്തിലെ അപാകതയെ തുടർന്ന് വിജിലൻസ് പരിശോധന നടത്തുകയും മനുഷ്യാവകാശ കമ്മീഷൻ കേസെടുക്കുകയും ചെയ്തിരുന്നു. നവീകരണ ശേഷം സംസ്ഥാന പാതയിൽ അപകടങ്ങൾ തുടർക്കഥയാണ്. എരഞ്ഞിമാവിനും ഓമശേരിക്കുമിടയിൽ ഒരു വർഷത്തിനിടെ മാത്രം 400ൽ അധികം അപകടങ്ങൾ നടക്കുകയും നിരവധി പേർ മരിക്കുകയും ചെയ്തിരുന്നു. ഭാരം കൂടിയ വാഹനങ്ങൾ യാത്ര ചെയ്യുന്ന ഭാഗത്ത് നിരവധി സ്ഥലങ്ങളിലാണ് റോഡ് താഴ്ന്ന് പോയി ചാലുകൾ രൂപപ്പെട്ടത്. കാരശേരി പഞ്ചായത്തിലെ കറുത്ത പറമ്പിൽ ഉൾപ്പെടെ തട്ടിക്കൂട്ട് പ്രവൃത്തി നടത്തി അധികൃതർ തടിതപ്പുകയായിരുന്നു. കരാർ കമ്പനിയുടെ സൈറ്റ് ഓഫീസിന് സമീപം മുതൽ കറുത്ത പറമ്പ് അങ്ങാടി കഴിയുന്നത് വരെ റോഡിൽ യാത്രക്കാർക്ക് പെട്ടെന്ന് കാണാൻ കഴിയാത്ത വിധം റോഡ് താഴ്ന്ന് പോയിരുന്നു. ഇരു ചക്രവാഹനങ്ങളും ഓട്ടോറിക്ഷ പോലുള്ള വാഹനങ്ങളും ഇവിടെ എത്തിയാൽ ടയർ പഞ്ചറായ അനുഭവമാണന്ന് ഡ്രൈവർമാർ പറയുന്നു. താഴ്ന്ന ഭാഗം പൂർണമായും പൊളിച്ചുമാറ്റാതെ ഇതിന് മുകളിൽ ടാറൊഴിച്ച് പ്രവൃത്തി നടത്തുകയായിരുന്നു. ഇതോടെ ഈ ഭാഗത്തിപ്പോൾ അപകട ഭീഷണിയും നിലനിൽക്കുന്നു. സാധാരണ നിലയിൽ പഞ്ചായത്ത് റോഡുകളൊക്കെ ചെയ്യുന്നത് പോലെയുള്ള പ്രവൃത്തിയാണ് 200 കോടിയിലേറെ രൂപ മുടക്കി പ്രവൃത്തി നടക്കുന്ന റോഡിൽ ചെയ്തിരിക്കുന്നത്. അശാസ്ത്രീയമായ നിർമാണമാണ് റോഡിന്‍റെ ഈ അവസ്ഥക്ക് പ്രധാന കാരണം. ഓമശേരിക്കും എരഞ്ഞിമാവിനുമിടയിലുള്ള ഭാഗത്താണ് ഏറ്റവും കൂടുതൽ പരാതി ഉയർന്നിരിക്കുന്നത്. മുക്കം ടൗണിൽ സിഗ്നലിന് സമീപം, കറുത്ത പറമ്പ്, ഓമശേരി ടൗൺ, കാപ്പുമല വളവ്, മുക്കം പാലത്തിന്‍റെ ഇരുഭാഗത്തും തുടങ്ങിയ സ്ഥലങ്ങളിലെല്ലാം യാത്രക്കാർക്ക് വലിയ ദുരിതമാണ്. റീബിൽഡ് കേരള പദ്ധതിയിൽ ഉൾപ്പെടുത്തി 222 കോടി രൂപ ചെലവിലാണ് റോഡ് നവീകരണം നടന്നത്. കൊയിലാണ്ടി- പൂനൂർ, പൂനൂർ- ഓമശേരി, ഓമശേരി- എരഞ്ഞിമാവ് എന്നീ മൂന്ന് റീച്ചുകളുടെ നിർമാണത്തിനാണ് 222 കോടി രൂപയുടെ കരാർ നൽകിയത്. ആവശ്യമായ വീതി ലഭ്യമാകുന്ന ഇടങ്ങളിൽ 12 മീറ്റർ കാര്യേജ് വേ ആയി അത്യാധുനിക സൗകര്യങ്ങളോടെയാണ് റോഡിന്‍റെ പുനർനിർമാണം നടക്കുകയെന്നും വ്യക്തമാക്കിയിരുന്നു. കലുങ്കുകൾ, പാലങ്ങൾ എന്നിവയുടെ നിർമാണവും പരിപാലനവും, ഡ്രൈനേജുകൾ, ടൈൽ വിരിച്ച ഹാൻഡ് റെയിലോട് കൂടിയ നടപ്പാതകൾ, പ്രധാന ജംഗ്ഷനുകളുടെ സൗന്ദര്യവത്കരണം, തെരുവുവിളക്കുകൾ തുടങ്ങി അത്യാധുനിക സംവിധാനത്തോടെയാണ് റോഡ് നിർമാണമെന്നാണ് ആദ്യഘട്ടത്തിൽ അറിയിച്ചിരുന്നത്.

കരടി ആക്രമണത്തിൽ ആദിവാസിക്ക് പരിക്ക്

കാട്ടിക്കുളം: തേൻ ശേഖരിക്കാൻ വനത്തിൽ പോയ ആദിവാസിക്ക് കരടി ആക്രമണത്തിൽ പരിക്കേറ്റു. തിരുനെല്ലി ബേഗൂർ കാട്ടുനായ്ക്ക ഉന്നതിയിലെ കുമാരനെ(50)യാണ് കരടി ആക്രമിച്ചത്. വയനാട് വന്യജീവി സങ്കേതത്തിലെ തോൽപ്പെട്ടി ദാസൻഘട്ട ഫോറസ്റ്റ് സ്റ്റേഷൻ പരിധിയിലെ മുപ്പത്തിയാറ് കുളത്തിനടുത്ത് ഇന്നലെ ഉച്ചയോടെയാണ് സംഭവം. ഒപ്പമുണ്ടായിരുന്നവർ അറിയിച്ചതിനെത്തുടർന്ന് വനപാലകർ സ്ഥലത്തെത്തിയാണ് കുമാരനെ ഗവ. മെഡിക്കൽ കോളജ് ആശുപത്രിയിൽ പ്രവേശിപ്പിച്ചത്. വലതുകാലിന് പരിക്കേറ്റ കുമാരനെ പ്രാഥമിക ചികിത്സക്കുശേഷം കോഴിക്കോട് മെഡിക്കൽ കോളജ് ആശുപത്രിയിലേക്ക് മാറ്റി.

പോത്തിനെ മോഷ്ടിച്ച പ്രതികള്‍ പിടിയില്‍

കോഴിക്കോട്: ഭട്ട് റോഡില്‍ നിന്ന് പോത്തിനെയും എരുമയെയും മോഷ്ടിച്ച കേസിലെ പ്രതികള്‍ അറസ്റ്റിൽ. എലത്തൂര്‍ പുതിയനിരത്ത് അരുണാംകണ്ടി വീട്ടില്‍ വൈശാഖ് (28), തലക്കുളത്തൂര്‍ തയ്യില്‍ വീട്ടില്‍ മുഹമ്മദ് അജ്മല്‍ (23) എന്നിവരെയാണ് വെള്ളയില്‍ പോലീസ് പിടികൂടിയത്. കഴിഞ്ഞ മാസം19ന് രാത്രി പുതിയ കടവ് സ്വദേശി ഫിറോസിന്‍റെ ഉടമസ്ഥതയിലുള്ളതും ഏകദേശം ഒന്നരലക്ഷം രൂപ വില വരുന്നതുമായ പോത്തിനെയും എരുമയെയും ഭട്ട് റോഡില്‍ ഉദയം ഹോമിന് സമീപത്ത് വച്ച് പ്രതികള്‍ വാഹനത്തില്‍ കയറ്റി കടത്തികൊണ്ടുപോകുകയായിരുന്നു. തുടര്‍ന്ന് ഫിറോസിന്‍റെ പരാതിയില്‍ വെള്ളയില്‍ പോലീസ് കേസ് രജിസ്റ്റര്‍ ചെയ്ത് അന്വേഷണം നടത്തുകയും പ്രതികളെ വെള്ളയില്‍ പരിസരത്ത് വച്ച് കസ്റ്റഡിയിലെടുക്കുകയായിരുന്നു. അറസ്റ്റ് രേഖപ്പെടുത്തിയ ശേഷം പ്രതികളെ കോടതിയില്‍ ഹാജരാക്കി.

കണ്ണില്‍ തുളച്ചു കയറിയ ബ്ലേഡ് അടിയന്തര ശസ്ത്രക്രിയയിലൂടെ നീക്കം ചെയ്തു

ടൈല്‍ മുറിക്കുന്നതിനിടെ അപകടം കോഴിക്കോട്: ജോലിക്കിടെ ടൈല്‍ മുറിക്കുന്നതിനിടയില്‍ ബ്ലേഡ് പൊട്ടി യുവാവിന്‍റെ കണ്ണില്‍ തുളച്ചു കയറി. കണ്ണില്‍ നിന്നു രക്തം വാര്‍ന്നൊഴുകുന്ന നിലയില്‍ ഉടന്‍തന്നെ കോഴിക്കോട് കോംട്രസ്റ്റ് ചാരിറ്റബിള്‍ ട്രസ്റ്റ് കണ്ണാശുപത്രിയില്‍ എത്തിച്ച് അടിയന്തര ശസ്ത്രക്രിയ നടത്തി ബ്ലേഡിന്‍റെ കഷ്ണം പുറത്തെടുത്തു. കഴിഞ്ഞദിവസം കോഴിക്കോട് കാട്ടുകുളങ്ങര വച്ചാണ് കൊമ്മേരി സ്വദേശിയായ 42 വയസുകാരനായ യുവാവിന് പരിക്കേറ്റത്. 12 മില്ലിമീറ്റര്‍ വരുന്ന കൃഷ്ണമണിയേക്കാള്‍ വലുപ്പത്തില്‍ 15 മില്ലി മീറ്ററുള്ള ബ്ലേഡിന്‍റെ കഷ്ണം ശക്തിയില്‍ കണ്ണിനകത്തേക്ക് തുളച്ചു കയറി നേത്ര ഞരമ്പുകള്‍ അറ്റുപോയ നിലയിലായിരുന്നു. റെറ്റിനല്‍ സര്‍ജന്‍ ഡോ.ദിലീഷ് പി.ചന്ദ്രശേഖര്‍ , കോര്‍ണിയല്‍ സര്‍ജന്‍ ഡോ.വി.അര്‍ജുന്‍, അനസ്‌തേഷ്യ വിഭാഗം മേധാവി ഡോ. ദ്വിദീപ് ചന്ദ്ര, ഡോ.റൂബിയ സയ്ദ് എന്നിവരുടെ നേതൃത്വത്തില്‍ അഞ്ചുമണിക്കൂര്‍ നീണ്ട ശസ്ത്രക്രിയയിലൂടെയാണ് ബ്ലേഡ് പുറത്തെടുത്തത്.കാഴ്ച വീണ്ടെടുക്കാനാകുമോ എന്നുള്ള കാര്യം വരും ദിവസങ്ങളിലെ പരിശോധനകളിലൂടെയും തുടര്‍ ശസ്ത്രക്രിയയിലൂടെയും മാത്രമേ പറയാനാകൂ എന്ന് ഡോക്ടര്‍മാര്‍ പറഞ്ഞു. ഈയിടെയായി ഇത്തരത്തില്‍ ആശുപത്രിയിലെത്തുന്ന കേസുകളുടെ എണ്ണം വര്‍ധിച്ചുവരികയാണെന്നും അപകട സാധ്യതയുള്ള മേഖലകളില്‍ ജോലി ചെയ്യുന്ന തൊഴിലാളികള്‍ നേത്ര രക്ഷാ ഷീല്‍ഡുകളോ, സംരക്ഷണ കണ്ണടയോ നിര്‍ബന്ധമായും ഉപയോഗിക്കണമെന്നും സീനിയര്‍ റെറ്റിനല്‍ സര്‍ജനും കോംട്രസ്റ്റ് കണ്ണാശുപത്രി മെഡിക്കല്‍ ഡയറക്ടറുമായ ഡോ.വി.എസ് പ്രകാശ് പറഞ്ഞു.

മൂല്യാധിഷ്ഠിത വിദ്യാഭ്യാസത്തിന് മാതൃകയാണ് സ്റ്റാര്‍ട്ട്: ബിഷപ് മാര്‍ റെമീജിയോസ് ഇഞ്ചനാനിയില്‍

കോഴിക്കോട്: മൂല്യാധിഷ്ഠിത വിദ്യാഭ്യാസം പുതിയ തലമുറയെ ഉത്തരവാദിത്വബോധമുള്ള പൗരന്മാരായി രൂപപ്പെടുത്തുന്നുവെന്നും "സ്റ്റാര്‍ട്ട് അക്കാദമി' അതിന്‍റെ ഉജ്ജ്വല മാതൃകയാണെന്നും താമരശേരി ബിഷപ് മാര്‍ റെമീജിയോസ് ഇഞ്ചനാനിയില്‍. താമരശേരി രൂപതയുടെ ഉന്നത വിദ്യാഭ്യാസ സ്ഥാപനമായ സ്റ്റാര്‍ട്ട് (സെന്‍റ് തോമസ് അക്കാദമി ഫോര്‍ റിസര്‍ച്ച് ആന്‍ഡ് ട്രെയിനിംഗ്) അക്കാദമിയുടെ 2025-26 അധ്യായന വര്‍ഷത്തിന്‍റെ ഉദ്ഘാടനം നിര്‍വഹിച്ച് സംസാരിക്കുകയായിരുന്നു അദ്ദേഹം. ഇത് അക്കാദമിയുടെ 20-ാമത്തെ അധ്യായന വര്‍ഷമാണ്. സ്റ്റാര്‍ട്ടിന്‍റെ വിവിധ കോഴ്സുകളില്‍ പഠിക്കുന്ന വിദ്യാര്‍ഥികള്‍ ആത്മവിശ്വാസം, വ്യക്തിത്വവികാസം, ആത്മാന്വേഷണം, ഭാവിയിലേക്കുള്ള പദ്ധതികള്‍ തുടങ്ങിയ വിഷയങ്ങളില്‍ ചിന്തകള്‍ പങ്കുവച്ചു. പരീക്ഷകളില്‍ ഉന്നത വിജയം നേടിയ ക്രിസ്റ്റോ എം. ഷാജി, ഏഞ്ചല്‍ മരിയ അജു, ഐറിന്‍ മരിയ എലിസബത്ത്, വിഷ്ണുമായ, ജോയല്‍ മനോജ്,ജോസിന്‍ ജെയിംസ്, ആന്‍റോണിയോ ജോസഫ് എന്നീ വിദ്യാര്‍ഥികളെ ചടങ്ങില്‍ അനുമോദിച്ചു.എഐ ആന്‍ഡ് പൈതോണ്‍ കോഴ്‌സിന്‍റെ നാലാം പതിപ്പ് ബിഷപ്പിന്‍റെ സാന്നിധ്യത്തില്‍ ലോഞ്ച് ചെയ്തു. സ്റ്റാര്‍ട്ട് ഡയറക്ടര്‍ ഡോ. സുബിന്‍ കിഴക്കേവീട്ടില്‍ സ്വാഗതം പറഞ്ഞു. ദീപിക റസിഡന്‍റ് മാനേജര്‍ ഫാ.ഷെറിന്‍ പുത്തന്‍പുരയ്ക്കൽ, മീഡിയ ഡയറക്ടര്‍ ഫാ. സിബി കുഴിവേലില്‍ എന്നിവര്‍ പങ്കെടുത്തു.

പൂര്‍വ വിദ്യാര്‍ഥിനിയുടെ പീഡന പരാതിയില്‍ കോളജ് അധ്യാപകനെതിരേ കേസെടുത്തു

വടകര: പൂര്‍വ വിദ്യാര്‍ഥിനിയുടെ പീഡന പരാതിയില്‍ കോളജ് അധ്യാപകനെതിരേ പോലീസ് കേസെടുത്തു. മടപ്പള്ളി കോളജ് അധ്യാപകനായിരുന്ന ഡോ. പി.എസ്. ജിനീഷിനെതിരേയാണ് ചോമ്പാല പോലീസ് ജാമ്യമില്ലാ വകുപ്പുകള്‍ ചുമത്തി കേസെടുത്തിരിക്കുന്നത്. നിലവില്‍ എറണാകുളം മഹാരാജാസ് കോളജിലെ ചരിത്ര വിഭാഗം അസോസിയേറ്റ് പ്രഫസറാണ് ഡോ. ജിനീഷ്. ഇദ്ദേഹം മടപ്പള്ളി കോളജില്‍ പഠിപ്പിച്ചിരുന്ന കാലത്താണ് പരാതിക്കിടയാക്കിയ സംഭവം നടന്നത്. സോഷ്യല്‍ മീഡിയയിലൂടെയാണ് യുവതി ആദ്യം അധ്യാപകനെതിരേ ഗുരുതര ആരോപണങ്ങള്‍ ഉന്നയിച്ചത്. മടപ്പള്ളി കോളജില്‍ പഠിച്ച അവസരത്തില്‍ ലൈംഗികാതിക്രമങ്ങള്‍ നേരിട്ടുവെന്നായിരുന്നു വെളിപ്പെടുത്തൽ. ഇത് പൊതുസമൂഹത്തില്‍ വലിയ ചര്‍ച്ചകള്‍ക്ക് വഴിവച്ചിരുന്നു. കഴിഞ്ഞ ദിവസമാണ് യുവതി ചോമ്പാല പോലീസിനെ സമീപിച്ചത്. യുവതിയുടെ പരാതിയുടെ അടിസ്ഥാനത്തില്‍ ജിനീഷിനെതിരേ പോലീസ് കേസെടുത്തെങ്കിലും ഇതുവരെ കസ്റ്റഡിയിലെടുത്തിട്ടില്ല. ഇതു സംബന്ധിച്ച് അന്വേഷണം നടക്കുകയാണെന്ന് പോലീസ് അറിയിച്ചു.

പതങ്കയത്ത് വിദ്യാർഥിയെ ഒഴുക്കിൽപ്പെട്ട് കാണാതായി

കോടഞ്ചേരി: നാരങ്ങാത്തോട് പതങ്കയത്ത് വിദ്യാർഥിയെ ഒഴുക്കിൽപ്പെട്ട് കാണാതായി. മഞ്ചേരിയിൽ നിന്നും വന്ന ആറംഗ സംഘത്തിൽപ്പെട്ട കച്ചേരിപ്പടി സ്വദേശി അഷറഫ് വളശേരിയുടെ മകൻ അല(16) നെയാണ് ഇന്നലെ ഉച്ചയോടെ ഒഴുക്കിൽപ്പെട്ട് കാണാതായത്. എസ്എംഎസ്എച്ച്എസ്എസ് തുറക്കൽ മഞ്ചേരി സ്കൂളിൽ പ്ലസ്‌വൺ വിദ്യാർഥിയാണ് അലൻ. സഹപാഠികളായ ആറുപേർ അടങ്ങുന്ന സംഘം ഏകദേശം പതിനൊന്നരയോടെയാണ് പതങ്കയത്ത് എത്തിച്ചേർന്നത്. തുടർന്ന് വെള്ളത്തിലിറങ്ങിയ അലനെ കാണാതാവുകയായിരുന്നു. കൂടെ വന്ന സഹപാഠി അലനെ രക്ഷിക്കാൻ ശ്രമിച്ചെങ്കിലും ഒഴുക്കിൽപ്പെട്ട് പോവുകയായിരുന്നു. കോടഞ്ചേരി പോലീസ്, മുക്കം ഫയർഫോഴ്സ്, ടാസ്ക് ഫോഴ്സ് തുടങ്ങിയവർ തെരച്ചിൽ നടത്തിയെങ്കിലും അലനെ കണ്ടെത്താനായില്ല. തെരച്ചിൽ ഇന്ന് രാവിലെ പുനരാരംഭിക്കുമെന്ന് പഞ്ചായത്ത് പ്രസിഡന്‍റ് അലക്സ് തോമസ് ചെമ്പകശേരി അറിയിച്ചു. കൂടുതൽ സന്നദ്ധ സേനാംഗങ്ങൾ തെരച്ചിലിന് എത്തിച്ചേരണമെന്ന് പ്രസിഡന്‍റ് അറിയിച്ചു.

ന്യൂനപക്ഷ സമുദായങ്ങള്‍ക്കു വേണ്ടത് ജാഗ്രത: മോൺ. ജന്‍സന്‍ പുത്തന്‍വീട്ടില്‍

കോഴിക്കോട്: ക്രൈസ്തവ ന്യൂനപക്ഷങ്ങളെ ഭീഷണിപ്പെടുത്തിയും അറസ്റ്റ് ചെയ്തും ദൈവിക ശുശ്രൂഷ തടയാന്‍ കഴിയില്ലെന്ന് പ്രഖ്യാപിച്ച് കോഴിക്കോട്ട് ക്രൈസ്തവ വിശ്വാസികളുടെ റാലി. അറസ്റ്റ്‌കൊണ്ട് ഭയക്കില്ലെന്ന് റാലിയില്‍ പങ്കെടുത്ത നൂറുകണക്കിനാളുകള്‍ പ്രഖ്യാപിച്ചു. ഛത്തീസ്ഗഡില്‍ വ്യാജകുറ്റം ചുമത്തി രണ്ടു കന്യാസ്ത്രീകളെ ജയലിലടച്ചില്‍ പ്രതിഷേധിച്ച് കോഴിക്കോട് അതിരൂപത, താമരശേരി രൂപതയുടെ പാറോപ്പടി ഫൊറോന, കോഴിക്കോട് എക്യുമെനിക്കല്‍ ഫോറം, കേരള കൗണ്‍സില്‍ ഓഫ് ചര്‍ച്ചസ്, കേരള ലാറ്റിന്‍ കാത്തലിക് അസോസിയേഷന്‍ എന്നിവയുടെ സംയുക്താഭിമുഖ്യത്തിലാണ് റാലി സംഘടിപ്പിച്ചത്. വൈദികരും സന്യസ്തരും അല്‍മായരുമുള്‍പ്പെടെയുള്ളവര്‍ പ്രതിഷേധത്തിന്‍റെ ഭാഗമായി. അറസ്റ്റിനെതിരായ ബാനറുകളും പ്ലക്കാര്‍ഡുകളുമേന്തിയാണ് വിശ്വാസികള്‍ റാലിയില്‍ അണിചേര്‍ന്നത്. നിരപരാധികളായ കന്യാസ്ത്രീകളെ ജയിലില്‍ അടച്ച ഛത്തീസ്ഗഡ് സര്‍ക്കാരിനെതിരായ രോഷം റാലിയില്‍ അണപൊട്ടി. മതേതര ഇന്ത്യയെ കീറിമുറിക്കാനുള്ള ഒരു വിഭാഗത്തിന്‍റെ നീക്കം അനുവദിക്കില്ലെന്ന് അവര്‍ ഉറക്കെ വിളിച്ചുപറഞ്ഞു. നാടിനുവേണ്ടി ജീവിതം സമര്‍പ്പിച്ച സന്യസ്തരുടെ കൈകള്‍ വിലങ്ങുവയ്ക്കാന്‍ വിട്ടുകൊടുക്കില്ലെന്ന് വിശ്വാസികള്‍ പ്രഖ്യാപിച്ചു. സിറ്റി സെന്‍റ് ജോസഫ്‌സ് ദേവാലയത്തില്‍നിന്നാണ് റാലി ആരംഭിച്ചത്. ഇടവക വികാരി ഫാ. റെനി ഫ്രാന്‍സിസ് റോഡ്രിഗ്‌സ് ഫ്‌ളാഗ് ഓഫ്‌ ചെയ്തു. കണ്ണൂര്‍ റോഡ് ജംഗ്ഷൻ, ക്രിസ്ത്യന്‍ കോളജ് ക്രോസ് റോഡ് വഴി പള്ളിയങ്കണത്തില്‍ റാലി സമാപിച്ചു. കോഴിക്കോട് അതിരൂപത വികാരി ജനറാൾ മോൺ. ജന്‍സന്‍ പുത്തന്‍വീട്ടില്‍ പൊതുസമ്മേളനം ഉദ്ഘാടനം ചെയ്തു. രാജ്യത്ത് ന്യൂനപക്ഷ സമുദായങ്ങള്‍ക്കുവേണ്ടത് അതീവ ജാഗ്രതയാണെന്നാണ് ഛത്തീസ്ഗഡ് സംഭവം കാണിക്കുന്നതെന്ന് അദ്ദേഹം പറഞ്ഞു. കന്യാസ്ത്രീകള്‍ക്കു ജാമ്യം ലഭിച്ചതില്‍ സന്തോഷമുണ്ടെങ്കിലും പല സഹോദരങ്ങളും ഇപ്പോഴും പീഡനങ്ങള്‍ അനുഭവിക്കുകയാണ്. ന്യൂനപക്ഷങ്ങള്‍ക്കെതിരേ ചില കേന്ദ്രങ്ങളില്‍ നിന്നുള്ള നീതിരഹിതമായ ആക്രമണങ്ങള്‍ ആവര്‍ത്തിക്കെപ്പെടാതിരിക്കാന്‍ ഭരണകൂടങ്ങള്‍ നടപടി സ്വീകരിക്കണം. അറസ്റ്റ് ചെയ്യപ്പെട്ട സിസ്‌റ്റേഴ്‌സിന്‍റെ ഹൃദയത്തിലുണ്ടായ മുറിവ് ക്രൈസ്തവ വിശ്വാസികളുടെ ഹൃദയത്തിലുണ്ടായ മുറിവാണ്. പത്തു ദിവസം കന്യാസ്ത്രീകള്‍ ജയിലില്‍ കിടക്കേണ്ടിവന്നത് ലോക മനഃസാക്ഷിക്കേറ്റ മുറിവാണ്. ദൈവത്തിന്‍റെ ശുശ്രൂഷയാണ് അവര്‍ നിര്‍വഹിക്കുന്നത്. അതു തടയാന്‍ ഒരു ശക്തിക്കും സാധിക്കില്ലെന്ന് അദ്ദേഹം പറഞ്ഞു. കേരള ലാറ്റിന്‍ കാത്തലിക് അസോസിയേഷന്‍ സംസ്ഥാന പ്രസിഡന്‍റ് അഡ്വ. ഷെറി ജെ. തോമസ് മുഖ്യപ്രഭാഷണം നടത്തി. ഇഷ്ടമുള്ള മതത്തില്‍ വിശ്വാസിക്കാനും പ്രചരിപ്പിക്കാനുമുള്ള അവകാശം എല്ലാവര്‍ക്കുമുണ്ടെന്ന് അദ്ദേഹം പറഞ്ഞു.ആഭ്യന്തരമന്ത്രി വിചാരിച്ചാല്‍ കന്യാസ്ത്രീകളുടെ പ്രവര്‍ത്തനം അവസാനിപ്പിക്കില്ല. മുംബൈയില്‍ ആക്രമണം നടത്തിയ ഭീകരര്‍ക്കെതിരായ നിയമത്തിന്‍റെ പരിധിയിലാണ് കന്യാസ്ത്രീകളെയും കൊണ്ടുവന്നിട്ടുള്ളതെന്ന് അദ്ദേഹം അഭിപ്രായപ്പെട്ടു. ഫൊറോന വികാരി ഫാ. ജെറോം ചിങ്ങന്തറ, കേരള കൗണ്‍സില്‍ ഓഫ് ചര്‍ച്ചസിനുവേണ്ടി ഫാ. ജെയിംസ് സിഎസ്‌ഐ, സന്യാസിനികളുടെ പ്രതിനിധിയായി അപ്പസ്‌തോലിക് കാര്‍മല്‍ സഭയിലെ സിസ്റ്റര്‍ മരിയ ആല്‍മ എസി, മലങ്കര ഓര്‍ത്തഡോക്ടസ് സഭ സെക്രട്ടറി ഫാ. ബോബി പീറ്റർ, എഇഎ സംസ്ഥാന ജനറല്‍ സെക്രട്ടറി ബിജു ജോസി, അതിരൂപത പ്രസിഡന്‍റ് ബിനു എഡ്വേര്‍ഡ് എന്നിവര്‍ പ്രസംഗിച്ചു.

ജീവിതം തിരികെ നല്‍കി ഷോര്‍ട്ട് സ്റ്റേ ഹോം : മകളുടെ കൈപിടിച്ച് ധനസെല്‍വി മടങ്ങി

കോഴിക്കോട്: ഒരു മാസത്തോളമായി വെള്ളിമാട്കുന്ന് ഷോര്‍ട്ട് സ്റ്റേ ഹോമില്‍ അന്തേവാസിയായിരുന്ന തമിഴ്നാട് തിരുവാരൂര്‍ സ്വദേശി ധനസെല്‍വി മകളുടെ കൈപിടിച്ച് യാത്രതിരിച്ചു. ഉദ്യോഗസ്ഥരുടെയും സാമൂഹിക പ്രവര്‍ത്തകരുടെയും അന്തേവാസികളുടെയും സാന്നിധ്യത്തില്‍ നിറഞ്ഞ സന്തോഷത്തോടെയായിരുന്നു നാല്‍പ്പത്തിയൊന്നുകാരിയുടെ മടക്കം. നഗരത്തില്‍ അലഞ്ഞുനടന്ന ഇവരെ പോലീസ് കുതിരവട്ടം മാനസികാരോഗ്യ കേന്ദ്രത്തില്‍ ചികിത്സ നല്‍കിയ ശേഷം ജൂലൈ ഒമ്പതിന് വനിതാ-ശിശു വികസന വകുപ്പിന് കീഴിലെ ഷോര്‍ട്ട് സ്റ്റേ ഹോമിലെത്തിക്കുകയായിരുന്നു. താന്‍ അനാഥയാണെന്നും ഒന്നും ഓര്‍മയില്ലെന്നുമാണ് ആദ്യമൊക്കെ പറഞ്ഞത്. പിന്നീട് കേന്ദ്ര ആഭ്യന്തര മന്ത്രാലയത്തിലെ റിട്ട. ഉദ്യോഗസ്ഥനും സാമൂഹിക പ്രവര്‍ത്തകനുമായ എം.ശിവനോട് സംസാരിച്ചതില്‍നിന്നാണ് ഉറ്റവരെ കുറിച്ചുള്ള വിവരം ലഭിച്ചത്. ചെന്നൈ സെന്‍റ് മൈക്കിള്‍സ് പള്ളിയുമായി ബന്ധപ്പെട്ട് അവ്യക്തമായ കാര്യങ്ങള്‍ പറഞ്ഞതോടെ അവിടെയുള്ളവരുമായി ബന്ധപ്പെടുകയും ബന്ധുക്കളിലേക്കെത്തുകയുമായിരുന്നു. പള്ളിയുടെ ഭാഗമായ ഹോസ്റ്റലില്‍ ഇവര്‍ മുമ്പ് ജോലി ചെയ്തിരുന്നു.ചോദ്യങ്ങള്‍ക്ക് മറുപടി നല്‍കാത്തതിനാലും അനാഥയാണെന്ന് പറഞ്ഞതിനാലും ബന്ധുക്കളെ കണ്ടെത്താന്‍ സാധിക്കുമെന്ന് കരുതിയതല്ലെന്ന് ഉദ്യോഗസ്ഥര്‍ പറയുന്നു. ഷോര്‍ട്ട് സ്റ്റേ ഹോമില്‍നിന്ന് ലഭിച്ച ചികിത്സയും പരിചരണവും ഇടപെടലും ബന്ധുക്കളെ കണ്ടെത്താന്‍ സഹായകമായി. മകള്‍ ജാസ്മിന്‍ ജോലി ചെയ്യുന്ന തൃശൂരിലെ ഹോം നഴ്സിംഗ് സെന്‍ററിലേക്കാണ് സെല്‍വി യാത്രതിരിച്ചത്. നാട്ടില്‍ ഭര്‍ത്താവും മകനും മറ്റു കുടുംബാംഗങ്ങളും ഉണ്ട്. ഗാര്‍ഹിക പീഡനവും മറ്റ് പ്രയാസങ്ങള്‍ കാരണവും എത്തുന്നവരാണ് ഷോര്‍ട്ട് സ്റ്റേ ഹോമിലെ താമസക്കാര്‍. നിലവില്‍ അഞ്ച് സ്ത്രീകളും മൂന്ന് കുട്ടികളും ഇവിടെയുണ്ട്. പ്രയാസങ്ങള്‍ നേരിടുന്നവര്‍ക്ക് രണ്ട് വര്‍ഷം വരെ താമസ സൗകര്യവും ഭക്ഷണവും വസ്ത്രങ്ങളും ചികിത്സ സൗകര്യങ്ങളും ഇവിടെ ലഭ്യമാക്കുന്നുണ്ട്. ആവശ്യമായവര്‍ക്ക് നിയമ സഹായവും നല്‍കും.

ബേബി പെരുമാലി അനുസ്മരണം

തിരുവമ്പാടി: കർഷക നേതാവും കത്തോലിക്കാ കോൺഗ്രസ് ഗ്ലോബൽ സെക്രട്ടറിയുമായിരുന്ന ബേബി പെരുമാലിയുടെ മൂന്നാം ചരമ വാർഷികത്തിൽ അനുസ്മരണം നടത്തി. കത്തോലിക്കാ കോൺഗ്രസ് താമരശേരി രൂപതാ പ്രസിഡന്‍റ് ഡോ. ചാക്കോ കാളംപറമ്പിൽ ഉദ്ഘാടനം ചെയ്തു. അനുസ്മരണ സമിതി ചെയർമാൻ ഷിനോയ് അടയ്ക്കാപ്പാറ അധ്യക്ഷത വഹിച്ചു. തിരുവമ്പാടി പഞ്ചായത്ത് പ്രസിഡന്‍റ് ബിന്ദു ജോൺസൺ, വൈസ് പ്രസിഡന്‍റ് കെ.എ. അബ്ദുറഹിമാൻ, ജില്ലാ പഞ്ചായത്ത് അംഗം ബോസ് ജേക്കബ്, ടൗൺ വാർഡ് മെമ്പർ ലിസി മാളിയേക്കൽ, കോഴിക്കോട് ഡിസിസി ജനറൽ സെക്രട്ടറി ബാബു പൈക്കാട്ടിൽ, തിരുവമ്പാടി സഹകരണ ബാങ്ക് പ്രസിഡന്‍റ് ജോസ് മാത്യു, കേരളാ കോൺഗ്രസ് നിയോജക മണ്ഡലം പ്രസിഡന്‍റ് ജോണി പ്ലാക്കാട്ട് തുടങ്ങിയവർ പ്രസംഗിച്ചു. ഈ വർഷത്തെ ബേബി പെരുമാലി കർഷക അവാർഡ് ജേതാവ് സിജോ ജോസഫ് കണ്ടത്തുംതൊടുകയിലിനെ ഡോ. ചാക്കോ കാളംപറമ്പിൽ പൊന്നാട അണിയിച്ച് ആദരിച്ചു. 119 തവണ രക്തം ദാനം ചെയ്ത് സമൂഹത്തിന് മാതൃകയായ ജെയ്സൺ കന്നുകുഴിക്ക് മൊമെന്‍റോ നൽകി പഞ്ചായത്ത് പ്രസിഡന്‍റ് ബിന്ദു ജോൺസൺ ആദരിച്ചു. അനുസമരണ സമിതി കൺവീനർ കെ.എൻ. ചന്ദ്രൻ, ജോയിന്‍റ് കൺവീനർ ടോമിച്ചൻ ചക്കിട്ടമുറി എന്നിവർ നേതൃത്വം നൽകി.

അക്ഷരോന്നതി പദ്ധതിയിലേക്ക് 7,235 പുസ്തകങ്ങള്‍ കൈമാറി

കോഴിക്കോട്: ജില്ലയിലെ പട്ടികവര്‍ഗ ഉന്നതികളില്‍ വായന സംസ്‌കാരം വളര്‍ത്തുകയെന്ന ലക്ഷ്യത്തോടെ തദ്ദേശ സ്വയംഭരണ വകുപ്പും പട്ടികവര്‍ഗ വികസന വകുപ്പും ജില്ലാ ഭരണകൂടവും ചേര്‍ന്ന് ആവിഷ്‌കരിച്ച അക്ഷരോന്നതി പദ്ധതിയിലേക്ക് ഹയര്‍ സെക്കന്‍ഡറി വിഭാഗം നാഷണല്‍ സര്‍വീസ് സ്‌കീം സമാഹരിച്ച 7,235 പുസ്തകങ്ങള്‍ ജില്ലാ കളക്ടര്‍ സ്‌നേഹില്‍ കുമാര്‍ സിംഗിന് കൈമാറി. വിദ്യാര്‍ഥികള്‍ സ്വന്തമായും വീടുകള്‍ കയറിയിറങ്ങിയുമാണ് പുസ്തകങ്ങള്‍ സമാഹരിച്ചത്. ജില്ലയിലെ 162 എന്‍എസ്എസ് യൂണിറ്റുകളില്‍ നിന്നായി 16,200 വളണ്ടിയര്‍മാര്‍, പ്രോഗ്രാം ഓഫീസര്‍മാര്‍, ക്ലസ്റ്റര്‍ കണ്‍വീനര്‍മാര്‍, ജില്ലാ റീജിയണല്‍ പ്രോഗ്രാം കോര്‍ഡിനേറ്റര്‍മാര്‍ തുടങ്ങിയവര്‍ പദ്ധതിയില്‍ പങ്കാളികളായി. ചടങ്ങില്‍ തദ്ദേശ സ്വയംഭരണ വകുപ്പ് ഡെപ്യൂട്ടി ഡയറക്ടര്‍ ബൈജു ജോസ്, ട്രൈബല്‍ ഡെവലപ്‌മെന്‍റ് ഓഫീസര്‍ സിന്ധു, എന്‍എസ്എസ് റീജ്യണല്‍ കണ്‍വീനര്‍ എസ്. ശ്രീജിത്ത്, ജില്ലാ കണ്‍വീനര്‍ എം.കെ. ഫൈസല്‍ എന്നിവര്‍ പങ്കെടുത്തു.

തദ്ദേശ സ്വയംഭരണ സ്ഥാപനങ്ങളിലെ വാര്‍ഷികപദ്ധതികള്‍ക്ക് അംഗീകാരം

കോഴിക്കോട്: 12 തദ്ദേശ സ്വയംഭരണ സ്ഥാപനങ്ങളുടെ വാര്‍ഷിക പദ്ധതികള്‍ക്ക് കൂടി അംഗീകാരം നല്‍കിയതോടെ ജില്ലയിലെ മുഴുവന്‍ തദ്ദേശ സ്ഥാപനങ്ങളുടെയും പദ്ധതികള്‍ക്ക് അംഗീകാരം നല്‍കി ജില്ല ആസൂത്രണ സമിതി. വാര്‍ഷിക പദ്ധതി അവലോകനവുമായി ബന്ധപ്പെട്ട് ജില്ലാ പഞ്ചായത്ത് കൗണ്‍സില്‍ ഹാളില്‍ ചേര്‍ന്ന യോഗത്തിലാണ് ശേഷിച്ച പദ്ധതികള്‍ക്ക് അംഗീകാരം നല്‍കിയത്. തെരഞ്ഞെടുപ്പ് പെരുമാറ്റച്ചട്ടം നിലവില്‍ വരുന്നതിന് മുമ്പ് എല്ലാ പ്രവൃത്തികളും ആരംഭിക്കണമെന്നും വ്യക്തിഗത ആനുകൂല്യങ്ങള്‍ നല്‍കുന്നതിനുള്ള ജില്ലയിലെ ഗുണഭോക്തൃ പട്ടിക15ന് മുമ്പ് നിര്‍വഹണ ഉദ്യോഗസ്ഥര്‍ക്കും മേല്‍ത്തട്ട് തദ്ദേശ സ്ഥാപനങ്ങള്‍ക്കും കൈമാറണമെന്നും യോഗം നിര്‍ദേശിച്ചു. വാര്‍ഷിക പദ്ധതിയില്‍ അംഗീകാരം നല്‍കിയ മുഴുവന്‍ പദ്ധതികളും സ്പില്‍ ഓവറില്ലാതെ പൂര്‍ത്തിയാക്കുന്ന ജില്ലയായി മാറുകയെന്ന ലക്ഷ്യം നേടാന്‍ തദ്ദേശ സ്ഥാപനങ്ങളും ഉദ്യോഗസ്ഥരും ശ്രമിക്കണമെന്ന് യോഗത്തില്‍ അധ്യക്ഷത വഹിച്ച ജില്ല പഞ്ചായത്ത് പ്രസിഡന്‍റും സമിതി ചെയര്‍പേഴ്‌സണുമായ ഷീജ ശശി ആവശ്യപ്പെട്ടു. മൂന്ന് ഹെല്‍ത്ത് ഗ്രാന്‍ഡ് പ്രോജക്റ്റുകള്‍ക്കും ഒരു വേസ്റ്റ് മാനേജ്‌മെന്‍റ് പ്രോജക്റ്റിനും സമിതിയില്‍ അംഗീകാരം നല്‍കി. യോഗത്തില്‍ ആസൂത്രണ സമിതി സര്‍ക്കാര്‍ നോമിനി എ. സുധാകരന്‍, ജില്ലാ പ്ലാനിംഗ് ഓഫീസര്‍ ഇന്‍-ചാര്‍ജ് സി.പി. സുധീഷ്, ആസൂത്രണ സമിതി അംഗങ്ങള്‍, ജില്ലാതല ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

ബസുകള്‍ ഓടും; മിന്നല്‍ പണിമുടക്കിന് ആഹ്വാനം ചെയ്താല്‍ കര്‍ശന നടപടി

വടകര: പെരിങ്ങത്തൂരില്‍ കണ്ടക്ടറെ മര്‍ദിച്ചവരെ പിടികൂടണമെന്ന് ആവശ്യപ്പെട്ട് ദിവസങ്ങളായി തുടരുന്ന സ്വകാര്യ ബസ് സമരം പിന്‍വലിച്ചതായി പ്രഖ്യാപനം. റൂറല്‍ എസ്പി കെ.ഇ. ബൈജുവും ആര്‍ടിഒ രാജേഷും വിളച്ചു ചേര്‍ത്ത യോഗത്തിലാണ് പ്രഖ്യാപനമുണ്ടായത്. ഞായറാഴ്ച മുതല്‍ സര്‍വീസ് നടത്താന്‍ തീരുമാനമായി. ബസ് ഓപ്പറേറ്റേഴ്‌സ് അസോസിയേഷന്‍ പ്രതിനിധികളും സിഐടിയു, ഐഎന്‍ടിയുസി, ബിഎംഎസ്, എച്ച്എംഎസ്, എഐടിയുസി തുടങ്ങിയ തൊഴിലാളി സംഘടനാ പ്രതിനിധികളും ചര്‍ച്ചയില്‍ പങ്കെടുത്തു. ബസ് കണ്ടക്ടറെ മര്‍ദിച്ചതിനെ യോഗം അപലപിച്ചു. പണിമുടക്കിന് ആഹ്വാനം ചെയ്തത് യൂണിയന്‍ ഭാരവാഹികളുടെയോ ഓണേഴ്‌സ് അസോസിയേഷന്‍റെയോ അറിവോടെയല്ലെന്നും ഏതോ വാട്‌സാപ്പ് കൂട്ടായ്മയുടെ ആഹ്വാന പ്രകാരമാണ് നടന്നതെന്നും യോഗത്തില്‍ ബന്ധപ്പെട്ടവര്‍ അറിയിച്ചു. തൊട്ടില്‍പാലം-തലശേരി റൂട്ടിലെ ജഗന്നാഥ് ബസിലെ കണ്ടക്ടറെ ഒരു സംഘമാളുകള്‍ ബസില്‍ കയറി ക്രൂരമായി ആക്രമിച്ചതിന്‍റെ പേരിലായിരുന്നു ബസുകള്‍ ഓടാതിരുന്നത്. മുഴുവന്‍ പ്രതികളെയും പിടികൂടണമെന്ന് ആവശ്യപ്പെട്ട് വാട്‌സാപ്പ് കൂട്ടായ്മയിലൂടെ ചിലര്‍ നല്‍കിയ പണിമുടക്ക് സന്ദേശം മൂലം ബസുകള്‍ സര്‍വീസ് നടത്തിയില്ല. ഇതേ തുടര്‍ന്നാണ് വടകര താലൂക്കിലും മൂന്ന് ദിവസമായി ബസ് സര്‍വീസ് നിലച്ചത്. വാട്‌സാപ്പിലുടെ മിന്നല്‍ പണിമുടക്കിന് ആഹ്വാനം നല്‍കുന്നവര്‍ക്കെതിരെ സൈബര്‍ നിയമപ്രകാരം നടപടി സ്വീകരിക്കുമെന്ന് എസ്പി മുന്നറിയിപ്പു നല്‍കി.

10 ലക്ഷം വൃക്ഷത്തൈ കൈമാറ്റവുമായി ഹരിതകേരളം മിഷന്‍

കോഴിക്കോട്: "സൗഹൃദം മഹാവൃക്ഷമായി വളരട്ടെ' സന്ദേശത്തില്‍ സുഹൃത്തുക്കള്‍ക്ക് നട്ടുവളര്‍ത്താന്‍ വൃക്ഷത്തൈ കൈമാറ്റവുമായി ഹരിതകേരളം മിഷന്‍. ലോക സൗഹൃദ ദിനമായ ഇന്നും തുടര്‍ന്നുള്ള ദിവസങ്ങളിലുമാണ് തൈകള്‍ കൈമാറുക. ഹരിതകേരളം മിഷന്‍റെ ആഭിമുഖ്യത്തില്‍ ഒരുകോടി വൃക്ഷത്തൈകള്‍ നടാന്‍ ലക്ഷ്യമിട്ടുള്ള "ഒരു തൈ നടാം' ജനകീയ വൃക്ഷവത്കരണ ക്യാമ്പയിന്‍റെ ഭാഗമായാണ് "ചങ്ങാതിക്കൊരു തൈ' എന്ന പേരില്‍ പരിപാടി സംഘടിപ്പിക്കുന്നത്. സൗഹൃദ ദിനത്തോടനുബന്ധിച്ച് സംഘടിപ്പിക്കുന്ന പരിപാടിയിലൂടെ പത്തു ലക്ഷത്തിലധികം വൃക്ഷത്തൈകളുടെ കൈമാറ്റം നടക്കുമെന്ന് ഹരിതകേരളം മിഷന്‍ വൈസ് ചെയര്‍പേഴ്സണ്‍ ഡോ. ടി.എന്‍. സീമ അറിയിച്ചു.ഒരു തൈ നടാം കാമ്പയിനില്‍ ഇതുവരെ 29 ലക്ഷത്തോളം തൈകള്‍ നട്ടുകഴിഞ്ഞു. ഇതിനുപുറമെയാണ് ചങ്ങാതിക്കൊരു തൈ പരിപാടിയിലൂടെ പത്ത് ലക്ഷം തൈകള്‍ കൂടി നടുന്നത്. സംസ്ഥാനത്തെ സ്‌കൂളുകള്‍, കലാലയങ്ങള്‍, ഓഫീസുകള്‍, സ്ഥാപനങ്ങള്‍, വായനശാലകള്‍, ക്ലബുകള്‍, കുടുംബശ്രീ അയല്‍ക്കൂട്ടങ്ങള്‍, മാധ്യമ സ്ഥാപനങ്ങള്‍ തുടങ്ങിയ ഇടങ്ങളിലാണ് സുഹൃത്തുക്കള്‍ തമ്മില്‍ വൃക്ഷത്തൈകള്‍ കൈമാറുക. കുട്ടികളില്‍ പരിസ്ഥിതി സ്നേഹം വളര്‍ത്തുക, നെറ്റ് സീറോ കാര്‍ബണ്‍ കേരളം, പരിസ്ഥിതി പുനഃസ്ഥാപനം എന്നിവയും ഇതിലൂടെ ലക്ഷ്യമിടുന്നു.

കന്യാസ്ത്രീകളെ തുറുങ്കിലടച്ചതിനെതിരെ പ്രതിഷേധ സന്ധ്യ

കോഴിക്കോട് : നിരപരാധികളായ മലയാളി കന്യാസ്ത്രീകള്‍ക്കെതിരെ കള്ളക്കേസ് രജിസ്റ്റര്‍ ചെയ്തു തുറുങ്കിലടച്ചതിനെതിരെ കെപിസിസി വിചാര്‍ വിഭാഗ് ജില്ലാ കമ്മിറ്റിയുടെ ആഭിമുഖ്യത്തില്‍ മാനാഞ്ചിറ ടെലിഫോണ്‍ എക്‌സ്‌ചേഞ്ചിന് മുന്നില്‍ പ്രതിഷേധ സന്ധ്യ നടത്തി. ഐഎന്‍ടിയുസി സാലറീഡ് ഫെഡറേഷന്‍ അഖിലേന്ത്യാ വൈസ് പ്രസിഡന്‍റ് എം.കെ ബീരാന്‍ ഉദ്ഘാടനം ചെയ്തു.ജില്ലാ പ്രസിഡന്‍റ് കെ.പദ്മകുമാര്‍ അധ്യക്ഷത വഹിച്ചു. ജില്ലാ സെക്രട്ടറി ശ്രീവത്സന്‍ പടാറ്റ, എം.സതീഷ് കുമാര്‍, യു.ബാബു, എ.കെ മനോജ്, വി.പി കൃഷ്ണനുണ്ണി, ഉമേഷ് മണ്ണില്‍, ശശിധരന്‍ ചേലാട്ട്, പി.കെ ശ്രീനിവാസന്‍, ടി.ശ്രീജിത്ത് തുടങ്ങിയവര്‍ പ്രസംഗിച്ചു.

എസ്പിസി അനുഭവങ്ങളും പ്രതീക്ഷകളും കളക്ടറുമായി പങ്കുവെച്ച് വിദ്യാര്‍ഥികള്‍

കോഴിക്കോട്: എസ്പിസി പരിശീലനത്തിലെ അനുഭവങ്ങളും ഭാവിയെ കുറിച്ചുള്ള പ്രതീക്ഷകളും ജില്ലാ കളക്ടര്‍ സ്നേഹില്‍ കുമാര്‍ സിംഗുമായി പങ്കുവെച്ച് വിദ്യാര്‍ഥിനികള്‍. പതിനഞ്ചാമത് എസ്പിസി ദിനത്തിന്‍റെ ഭാഗമായി കളക്ടറേറ്റില്‍ ഗാര്‍ഡ് ഓഫ് ഓണറിനെത്തിയ കുന്നമംഗലം ഹയര്‍ സെക്കന്‍ഡറി സ്‌കൂളിലെ എസ്പിസി കേഡറ്റുകളാണ് കളക്ടറുമായി സംവദിച്ചത്. രണ്ട് വര്‍ഷത്തെ പരിശീലനം പൂര്‍ത്തിയാക്കിയ 22 വിദ്യാര്‍ഥിനികളാണ് പങ്കെടുത്തത്. സ്റ്റുഡന്‍റ് പോലീസ് കേഡറ്റ് പരിശീലനം വിദ്യാര്‍ഥികളില്‍ അച്ചടക്കവും ശാരീരികക്ഷമതയും ആത്മവിശ്വാസവും വളര്‍ത്തുമെന്ന് പറഞ്ഞ കളക്ടര്‍, കായികക്ഷമത നിലനിര്‍ത്താനുള്ള പരിശീലനം തുടരണമെന്നും ആത്മവിശ്വാസത്തോടെ സ്വപ്നങ്ങളിലേക്ക് എത്തണമെന്നും ഓര്‍മിപ്പിച്ചു. ലഹരി, പൊതുഗതാഗത സംവിധാനത്തിലെ പ്രയാസങ്ങള്‍, യുപിഎസ്‌സി പരീക്ഷ തുടങ്ങിയ വിഷയങ്ങളിലെ വിദ്യാര്‍ഥികളുടെ സംശയങ്ങള്‍ക്കും കളക്ടര്‍ മറുപടി നല്‍കി. പരിപാടിയില്‍ പരിശീലകനായ എസ്‌ഐ ബാബുരാജ്, കമ്യൂണിറ്റി പോലീസ് ഓഫീസര്‍മാരായ ആര്‍.കെ. ഹരീഷ് കുമാര്‍, കെ. നീത, അധ്യാപകര്‍ തുടങ്ങിയവര്‍ പങ്കെടുത്തു.

കുഴിയിൽ വീണ് ഓട്ടോ ഡ്രൈവർക്ക് പരിക്ക്; മനുഷ്യാവകാശ കമ്മീഷൻ കേസെടുത്തു

കോഴിക്കോട്: മഴയത്ത് റോഡിലുണ്ടായിരുന്ന കുഴി കാണാതെ ഓട്ടോ കുഴിയിൽ വീണ് മറിഞ്ഞ് ഓട്ടോ ഡ്രൈവർക്ക് പരിക്കേറ്റ സംഭവത്തിൽ അന്വേഷണം നടത്തി 15 ദിവസത്തിനകം റിപ്പോർട്ട് സമർപ്പിക്കണമെന്ന് മനുഷ്യാവകാശ കമ്മീഷൻ ജുഡീഷ്യൽ അംഗം കെ. ബൈജുനാഥ് പൊതുമരാമത്ത് വകുപ്പ് അസി. എക്സിക്യൂട്ടീവ് എൻജിനീയർക്ക് നിർദ്ദേശം നൽകി. സ്വമേധയാ രജിസ്റ്റർ ചെയ്ത കേസിലാണ് നടപടി.റോഡിലെ കുഴി മൂടാത്തതിനെതിരേ പരാതി നൽകിയിട്ടും കസബ പോലീസ് കേസെടുത്തില്ലെന്നും ഡ്രൈവർ സുഭിരാജ് പറഞ്ഞു. പോലീസ് നടപടിക്കെതിരേ കോടതിയെ സമീപിക്കാൻ ഒരുങ്ങുകയാണ് സുഭിരാജ്. കല്ലൂത്താംകടവ് - പുതിയ പാലം റോഡിലൂടെ സഞ്ചരിക്കുമ്പോഴാണ് അപകടമുണ്ടായത്.26 ന് കോഴിക്കോട് റസ്റ്റ് ഹൗസിൽ നടക്കുന്ന സിറ്റിംഗിൽ കേസ് പരിഗണിക്കും.

മീൻമുട്ടിയിൽ കാട്ടാനകളെ തുരത്താൻ ആർആർടി സംഘം പരിശോധന തുടങ്ങി

കൂരാച്ചുണ്ട്: കൂരാച്ചുണ്ട് പഞ്ചായത്തിലെ അഞ്ചാം വാർഡ് കരിയാത്തുംപാറ മീൻമുട്ടി മേഖലയിലെ കൃഷിയിടത്തിൽ കാട്ടാനകൾ ഇറങ്ങി പ്രദേശവാസികളിൽ ഭീതി പരത്തിയതിനെ തുടർന്ന് വനംവകുപ്പിന്‍റെ ആർആർടി സംഘം ഇന്നലെ പരിശോധന ആരംഭിച്ചു. കാട്ടാനകളെ തുരത്തുന്നതിന് കഴിഞ്ഞദിവസം പഞ്ചായത്തിന്‍റെ നേതൃത്വത്തിൽ ചേർന്ന ജാഗ്രത സമിതിയുടെ യോഗ തീരുമാനപ്രകാരമാണ് വനമേഖലയിൽ പരിശോധന ആരംഭിച്ചത്. കാട്ടാനകൾ പതിവായി ഇറങ്ങുന്ന മീൻമുട്ടി പാപ്പൻചാടി കയത്തിനു മുകളിലുള്ള ചുരത്തോട് ഭാഗത്താണ് സംഘം പരിശോധന നടത്തിയത്. എന്നാൽ കാട്ടാനകളെ കണ്ടെത്താനായിട്ടില്ല. ഈ മേഖലകളിലുള്ള മൂന്നു വഴികളിലൂടെയാണ് കാട്ടാനകൾ ജനവാസ കേന്ദ്രത്തിലേക്ക് ഇറങ്ങുന്നതെന്നാണ് നാട്ടുകാർ പറയുന്നത്. ഈ ഭാഗങ്ങളിൽ കാട്ടാനകളുണ്ടെങ്കിൽ തുരത്താനായി സംഘം പടക്കം പൊട്ടിക്കുകയും ചെയ്തു. എന്നാൽ ഇന്നലെ ഇതിനു മുകളിലെ പേരിയ ഭാഗത്ത് കാട്ടാനകൾ ഇറങ്ങിയതായും പറയുന്നുണ്ട്. കാട്ടാന സ്ഥിരമായി ഇറങ്ങുന്ന വഴികളിൽ ആനകളെ തടയാനുള്ള സംവിധാനങ്ങൾ ഒരുക്കാൻ അളവെടുക്കുകയും തുടർനടപടികൾ സ്വീകരിക്കുകയും ചെയ്യുമെന്ന് അധികൃതർ അറിയിച്ചു. കക്കയം ഫോറസ്റ്റ് ഉദ്യോഗസ്ഥരായ രതീഷ്, രഞ്ജിത്ത്, പ്രജേഷ് എന്നിവരുടെ നേതൃത്വത്തിൽ പ്രദേശവാസികളായ ജോസ് വെളിയത്ത്, ടിൽസ് പടലോടി, വിൽസൺ പുതുപ്പറമ്പിൽ, തോമസ് പാണ്ടമ്മാന, മോഹനൻ അലയമ്പ്ര എന്നിവരും വാച്ചർമാരും ആർആർടി സംഘത്തോടൊപ്പം ഉണ്ടായിരുന്നു. നാളെ വീണ്ടും മേഖലയിൽ പരിശോധനടത്തുമെന്നും അറിയിച്ചു.

വിവിധ പാര്‍ട്ടികളില്‍നിന്ന് രാജിവച്ചവര്‍ കേരളാ കോണ്‍ഗ്രസിലേക്ക്

കോഴിക്കോട്: ജില്ലയില്‍ വിവിധ പാര്‍ട്ടികളില്‍ നിന്ന് രാജിവച്ചവര്‍ പി.ജെ ജോസഫ് എംഎല്‍എ നേതൃത്വം നല്‍കുന്ന യുഡിഎഫിന്‍റെ ഭാഗമായ കേരളാ കോണ്‍ഗ്രസില്‍ ചേരുന്നു. സിപിഐ, കോണ്‍ഗ്രസ്-എസ് തുടങ്ങിയ സംഘടനകളില്‍ നിന്ന് രാജിവച്ചവരാണ് കേരളാ കോണ്‍ഗ്രസില്‍ ചേരുന്നത്. അഞ്ചിനു രാവിലെ 11.30ന് കോഴിക്കോട് ശിക്ഷക് സദനില്‍ നടക്കുന്ന ചടങ്ങില്‍ മോന്‍സ് ജോസഫ് എംഎല്‍എ ഇവരെ പാര്‍ട്ടിയിലേക്ക് വരവേല്‍ക്കും. പാര്‍ട്ടിയുടെ ആശയങ്ങളുമായി യോജിച്ചുപോകുന്ന പരമാവധി പേരെ നിയമസഭാ തെരഞ്ഞെടുപ്പിനു മുന്നോടിയായി പാര്‍ട്ടി അംഗത്വമെടുപ്പിക്കുന്നതിനും പാര്‍ട്ടിയെ സെമി കേഡര്‍ സംവിധാനത്തിലേക്ക് മാറ്റുന്നതിനുമുള്ള തീരുമാനത്തിന്‍റെ ഭാഗമായാണ് മറ്റു പാര്‍ട്ടികളില്‍ നിന്ന് രാജിവച്ചുവന്നവര്‍ക്ക് അംഗതം നല്‍കുന്നതെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. മുന്‍കാലങ്ങളില്‍ വിവിധ കാരണങ്ങളാല്‍ പാര്‍ട്ടി വിട്ടു പോയവരെയും രാഷ്ട്രീയ പ്രവര്‍ത്തനത്തില്‍ നിന്ന് മാറി നിന്നവരെയും തിരികെ കൊണ്ടുവരികയാണ് ലക്ഷ്യം. വന്യമൃഗശല്യം, കസ്തൂരിരംഗന്‍ റിപ്പോര്‍ട്ട്, കാര്‍ഷികോല്‍പ്പന്ന വിലത്തകര്‍ച്ച തുടങ്ങിയ വിഷയങ്ങളില്‍ ദുരിതമനുഭവിക്കുന്ന മലയോര കര്‍ഷകര്‍ ക്കിടയില്‍ പാര്‍ട്ടിക്കു സ്വാധീനം വര്‍ധിച്ചുവരികയാണെന്ന് നേതാക്കള്‍ പറഞ്ഞു.ജില്ലാ പ്രസിഡന്‍റ് പി.എം ജോര്‍ജ്, ടി.ജെ റോയി, രാജീവ് തോമസ്, ജോണി പ്ലാക്കാട്ടില്‍ എന്നിവര്‍ വാര്‍ത്താസമ്മേളനത്തില്‍ സംബന്ധിച്ചു.

വളര്‍ത്തു പശുവിനോടൊപ്പം മരിച്ചനിലയില്‍ വീട്ടമ്മയുടെ മൃതദേഹം

മരണകാരണം ഷോക്കേറ്റെന്ന് പ്രാഥമിക നിഗമനം കുറ്റ്യാടി (കോഴിക്കോട്): കാണാതായ വീട്ടമ്മയെയും വളര്‍ത്തു പശുവിനെയും മരിച്ച നിലയില്‍ കണ്ടെത്തി. കോങ്ങോട് ചൂളപറമ്പില്‍ ഷിജുവിന്‍റെ ഭാര്യ ബോബി (40) ആണ് മരിച്ചത്. മരണകാരണം ഷോക്കേറ്റാണെന്നാണ് പ്രാഥമിക നിഗമനം. പോസ്റ്റ്‌മോര്‍ട്ടം റിപ്പോര്‍ട്ടിലാണ് വൈദ്യുതാഘാതം സ്ഥിരീകരിച്ചതെന്ന് പോലീസ് അറിയിച്ചു. പരിസരത്ത് വൈദ്യുതി കെണിയുടേതെന്ന് സംശയിക്കുന്ന ഭാഗങ്ങള്‍ കണ്ടെത്തിയിട്ടുണ്ട്. മൃതദേഹം കണ്ടെത്തിയ കൊക്കോ തോട്ടത്തിലാണ് പിവിസി പൈപ്പിന്‍റെ ഭാഗങ്ങള്‍ കണ്ടെത്തിയത്.കെക്കോ മരത്തില്‍ വൈദ്യുതി കമ്പി കുടുക്കാന്‍ ശ്രമിച്ചതിന്‍റെ സൂചന പോലീസിനു ലഭിച്ചിട്ടുണ്ട്. മൃതദേഹം കടന്നുപോകുന്നതിനു 15 മീറ്റര്‍ അകലെകൂടി വൈദ്യുതി ലൈന്‍ കടന്നുപോകുന്നുണ്ട്. വെള്ളിയാഴ്ച ഉച്ചയ്ക്കുശേഷമാണ് ബോബിയെ കാണാതായിരുന്നത്. കോങ്ങോട് മലയിലെ വനാതിര്‍ത്തിയിലെ പറമ്പുകളില്‍ മേയാന്‍വിട്ട പശുവിനെ തേടി പോയതായിരുന്നു അവര്‍. തിരിച്ചെത്താത്തതിനെത്തുടര്‍ന്നാണ് തെരച്ചില്‍ തുടങ്ങിയത്. അമ്മയെ കാണാനില്ലെന്ന് സ്‌കൂള്‍ വിദ്യാര്‍ഥികളായ മക്കളാണ് പിതാവ് ഷിജുവിനെ അറിയിച്ചത്. തുടര്‍ന്ന് പോലീസും വനംവകുപ്പും ഫയര്‍ഫോഴ്‌സും നാട്ടുകാരും കുറ്റ്യാടി ജനകീയ ദുരന്ത നിവാരണ സേനയും രാത്രി പന്ത്രണ്ട് മണി വരെ തിരച്ചില്‍ നടത്തി. മണിക്കൂറുകള്‍ നീണ്ട തെരച്ചിലിന് ഒടുവിലാണ് വനാതിര്‍ത്തിയോടു ചേര്‍ന്ന വനത്തില്‍ മൃതദേഹം കണ്ടെത്തിയത്. തൊട്ടടുത്ത് പശുവിന്‍റെ ജഡവും കണ്ടെത്തി. വന്യമൃഗങ്ങള്‍ പിടിച്ചതാണോ എന്ന സംശയമാണ് ആദ്യം ഉയര്‍ന്നത്. എന്നാല്‍ ബോബിയുടെയും പശുവിന്‍റെയും ശരീരത്തില്‍ വന്യമൃഗങ്ങളുടെ ആക്രമണത്തിന്‍റെ യാതൊരു പാടും കണ്ടെത്താന്‍ കഴിഞ്ഞിരുന്നില്ല. പോസ്റ്റ്മോര്‍ട്ടത്തിലാണ് ഷോക്കേറ്റ് മരിച്ചതാണെന്ന സൂചന ലഭിച്ചത്. ചത്തനിലയില്‍ കണ്ടെത്തിയ പശുവിന്‍റെ പോസ്റ്റ് മോര്‍ട്ട നടപടികളും പുരോഗമിക്കുന്നുണ്ട്. ബോബിയുടെ മൃതദേഹം പശുക്കടവ് പാരിഷ് ഹാളില്‍ പൊതുദര്‍ശനത്തിന് വെച്ചു. മക്കള്‍: ഷിജിന, ഷിബിന്‍, എയ്ജല്‍.

ഖാദി മേഖലയെ കൂടുതല്‍ ജനകീയമാക്കും: മന്ത്രി

കോഴിക്കോട്: ഖാദി മേഖലയെ കൂടുതല്‍ ജനകീയമാക്കാനുള്ള പ്രവര്‍ത്തനങ്ങള്‍ നടത്തുമെന്ന് മന്ത്രി എ.കെ ശശീന്ദ്രന്‍. സര്‍ക്കാരിന്‍റെയും കോഴിക്കോട് സര്‍വോദയ സംഘത്തിന്‍റെയും നേതൃത്വത്തില്‍ സംഘടിപ്പിക്കുന്ന ഓണം ഖാദി മേളയുടെ ഉദ്ഘാടനം കോഴിക്കോട്ട് നിര്‍വഹിക്കുകയായിരുന്നു മന്ത്രി. കോര്‍പറേഷന്‍ കൗണ്‍സിലര്‍ എസ്.കെ അബൂബക്കര്‍ അധ്യക്ഷത വഹിച്ചു. തോട്ടത്തില്‍ രവീന്ദ്രന്‍ എംഎല്‍എ ആദ്യവില്പന നിര്‍വഹിച്ചു. സുബിന്‍ സ്വാസ് ഏറ്റുവാങ്ങി. സര്‍വോദയ സംഘത്തിന്‍റെ പുതിയ ഉല്‍പ്പന്നമായ ഖാദി നയന ചുരിദാര്‍ ബ്രാന്‍ഡിന്‍റെ ഉദ്ഘാടനം ചലച്ചിത്ര താരം വി.പി അനുപമയും സ്വദേശി സ്വാദ് ഓണക്കിറ്റ് ആദ്യവില്‍പന കോര്‍പറേഷന്‍ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ ഡോ.എസ്. ജയശ്രീയും നിര്‍വഹിച്ചു. എം.എം. സൈനുദ്ദീന്‍ ഓണക്കിറ്റ് ഏറ്റുവാങ്ങി. ഇന്‍റീരിയര്‍ ഡിസൈനര്‍ ടി.പി. ഷാജിയെ ചടങ്ങില്‍ ആദരിച്ചു. ആമിര്‍ സുഹൈല്‍, പി. നൂര്‍ജഹാന്‍, സര്‍വോദയ സംഘം പ്രസിഡന്‍റ് കെ.കെ മുരളീധരന്‍,സെക്രട്ടറി എം.കെ ശ്യാം പ്രസാദ്, ഖാദി ഗ്രാമോദ്യോഗ് എംബോറിയം മാനേജര്‍ ടി. ഷൈജു എന്നിവര്‍ പ്രസംഗിച്ചു. മിഠായി തെരുവിലെ ഖാദി ഗ്രമോദ്യോഗ് എംബോറിയത്തില്‍ ആഗസ്റ്റ് രണ്ട് മുതല്‍ സെപ്റ്റംബര്‍ നാല് വരെയാണ് ഓണം ഖാദി മേള. ഇന്ത്യയിലെ വിവിധ സംസ്ഥാനങ്ങളില്‍ നിന്നുള്ള ഖാദി തുണിത്തരങ്ങളും ഗ്രാമ വ്യവസായ ഉത്പന്നങ്ങളും ഇളവുകളോടെയും ക്രെഡിറ്റ് കാര്‍ഡ് സൗകര്യത്തിലും മേളയില്‍ ലഭിക്കും. സര്‍ക്കാര്‍, അര്‍ധസര്‍ക്കാര്‍, ബാങ്ക്, പൊതുമേഖല സ്ഥാപനങ്ങളിലെ ജീവനക്കാര്‍ക്ക് പലിശരഹിത ക്രെഡിറ്റ് കാര്‍ഡ് സൗകര്യവും ഖാദി ഉത്പന്നങ്ങള്‍ക്ക് 30 ശതമാനം റിബേറ്റും മേളയില്‍ ലഭ്യമാണ്. 16 ഇനങ്ങള്‍ അടങ്ങിയ ‘സ്വദേശി സ്വാദ്' ഓണക്കിറ്റ് ഇവിടെ ലഭ്യമാണ്. 567 രൂപയാണ് വില.

സോളാര്‍ വേലിയില്ലെങ്കില്‍ സാരി വേലി : വനം വകുപ്പിനു താക്കീതായി പെരുവണ്ണാമൂഴിയില്‍ ആയിരങ്ങള്‍ അണിനിരന്ന റാലി

രാജന്‍ വര്‍ക്കി പേരാമ്പ്ര: വര്‍ധിച്ചു വരുന്ന വന്യമൃഗ ശല്യത്തിനറുതി വരുത്താത്ത സര്‍ക്കാര്‍ നിലപാടിനെതിരെ താമരശേരി രൂപത കത്തോലിക്ക കോണ്‍ഗ്രസിന്‍റെ നേതൃത്വത്തില്‍ പെരുവണ്ണാമൂഴി ഫോറസ്റ്റ് ഓഫീസിലേക്ക് ആയിരക്കണക്കിനു കര്‍ഷകര്‍ അണിനിരന്ന സാരി വേലി റാലി നടത്തി. കൂരാച്ചുണ്ട്, മരുതോങ്കര ഫൊറോനകളുടെ പരിധിയില്‍ വരുന്ന 25 ഇടവകകളില്‍ നിന്നുള്ള കര്‍ഷകര്‍ സമ്മേളിച്ച റാലി വനം വകുപ്പിനു താക്കീതായി. ഇടതടവില്ലാതെ മഴയുണ്ടായിരുന്നെങ്കിലും ആവേശം തെല്ലും ചോരാതെയാണ് കര്‍ഷക ജനത പെരുവണ്ണാമൂഴിയിലേക്ക് ഒഴുകിയെത്തിയത്. റാലിയും ധര്‍ണയും താമരശേരി രൂപത വികാരി ജനറാള്‍ മോണ്‍. ഏബ്രഹാം വയലില്‍ ഉദ്ഘാടനം ചെയ്തു. മലയോര ജനതയ്ക്ക് ഇവിടെ മാന്യമായി ജീവിക്കണമെന്നും ജീവനും സ്വത്തും സംരക്ഷിക്കപ്പെടണമെന്നും അദ്ദേഹം പറഞ്ഞു. ഞങ്ങള്‍ കയ്യേറ്റക്കാരല്ല. കഠിനാധ്വാനത്തിലൂടെ മണ്ണില്‍ പൊന്നുവിളയിച്ച് മലബാറിന്‍റെ വികസന കുതിപ്പിനു വഴി ഒരുക്കിയ പൂര്‍വ പിതാക്കളുടെ പിന്‍തലമുറയ്ക്കും ഇവിടെ ഭയവും ആശങ്കയും കൂടാതെ ജീവിക്കണം. വന്യമൃഗങ്ങള്‍ കാട്ടില്‍ പെരുകിയപ്പോള്‍ നാട്ടിലിറങ്ങി കര്‍ഷകരെ ദ്രോഹിക്കുകയാണ്. പെരുവണ്ണാമൂഴി വനാതിര്‍ത്തി മേഖലയില്‍ സോളാര്‍ വേലി സ്ഥാപിക്കുമെന്ന് ഏഴുമാസം മുമ്പ് പ്രഖ്യാപിച്ച മന്ത്രിയെ ഇപ്പോള്‍ നാട്ടില്‍ കാണാനില്ല.ഇതിനെതിരെയാണ് ഫോറസ്റ്റ് ഓഫീസുകളുടെ പരിസരത്ത് കര്‍ഷകര്‍ സാരി വേലി നിര്‍മിച്ച് പ്രതിഷേധിക്കുന്നത്. മണിമന്ദിരത്തിലിരിക്കുന്ന മന്ത്രിക്ക് പരിഹാസ ചിരിയുണ്ടാകാം. തൂമ്പാ പിടിച്ച് തഴമ്പിച്ച കൈകളാണ് കര്‍ഷകരുടേത്. ആവശ്യം വന്നാല്‍ മനസില്‍ ഇരുമ്പ് വേലിയും നിര്‍മിക്കും. കര്‍ഷകര്‍ക്ക് വേണ്ടി ഒന്നും ചെയ്യാത്തവരെ ഇരുമ്പു വേലി മനസിനകത്തിട്ട് പൂട്ടും. കര്‍ഷക ദ്രോഹികള്‍ക്ക് സ്ഥാനം പുറത്തായിരിക്കുമെന്നും അദ്ദേഹം കൂട്ടിച്ചേര്‍ത്തു. കൂരാച്ചുണ്ട് ഫൊറോനാ വികാരി ഫാ. വിന്‍സെന്‍റ് കണ്ടത്തില്‍ അധ്യക്ഷത വഹിച്ചു. നിലനില്‍പ്പിന്‍റെ സമര മുഖത്താണ് മലയോര ജനതയെന്ന് അദ്ദേഹം പറഞ്ഞു. മൃഗസംരക്ഷണത്തിനു പ്രാധാന്യം കല്‍പ്പിക്കുന്നവര്‍ കര്‍ഷക രക്ഷ മറക്കുകയാണ്. കര്‍ഷകന്‍റെ ഭൂമിയില്‍ അഴിച്ചു വിട്ട് കൃഷിയുടെ കാടിയും തീറ്റയും നല്‍കി വന്യ മൃഗങ്ങളെ പോറ്റാമെന്ന് ഇനിയും അധികാരികള്‍ വിചാരിക്കരുത്. കൃഷി ഭൂമിയിലിറങ്ങിയാല്‍ ഇനി അവയൊന്നും തിരിച്ച് കാട് കാണില്ല. അതിന്‍റെ മുന്നറിയിപ്പാണ് ഈ സമരം. ജനങ്ങളുടെ ജീവനും സ്വത്തിനും ഭീഷണി ഉയര്‍ത്തി നാട്ടിലിറങ്ങുന്ന വന്യമൃഗങ്ങളെ വെടിവെച്ചു കൊല്ലുമെന്ന് മലയോരത്തെ ഒരു പഞ്ചായത്ത് പ്രസിഡന്‍റ് പ്രഖ്യാപിച്ചപ്പോള്‍ രോമാഞ്ചമുണര്‍ന്ന് മലയോര ജനത കയ്യടിച്ചു. പലതും ഉണ്ടാകുമെന്നു കരുതിയെങ്കിലും വെടി തീര്‍ന്ന തുരുമ്പിച്ച തുപ്പാക്കിയാണ് സഖാവിന്‍റെ പക്കലുണ്ടായിരുന്നതെന്ന് കാലം തെളിയിക്കുന്നതും നാം കണ്ടുവെന്ന് അദ്ദേഹം പറഞ്ഞു. കത്തോലിക്ക കോണ്‍ഗ്രസ് രൂപതാ പ്രസിഡന്‍റ് ഡോ. ചാക്കോ കാളാംപറമ്പില്‍ മുഖ്യ പ്രഭാഷണം നടത്തി. വ്യക്തികളുടെ ജീവനും സ്വത്തിനും സംരക്ഷണം നല്‍കണമെന്ന് ഭരണഘടന അനുശാസിക്കുന്നുണ്ടെങ്കിലും പലപ്പോഴും അത് നടപ്പിലാവുന്നില്ലെന്ന് അദ്ദേഹം പറഞ്ഞു. കര്‍ഷകരടക്കമുള്ള സാധാരണ ജനങ്ങള്‍ക്കു കൂടി മാന്യമായി ജീവിക്കാനാണ് നിയമങ്ങള്‍ അനുശാസിക്കുന്നത്. സംരക്ഷണം നല്‍കാതെ കര്‍ഷകരെ ഇനിയും വോട്ടു ബാങ്കായി കാണാമെന്ന് ആരും കരുതേണ്ട. നാട് ഭരിക്കുന്നവര്‍ നിര്‍ഗുണര്‍ ആയിരിക്കരുത്. കര്‍ഷകരടക്കമുള്ള ജനങ്ങള്‍ നേരിടുന്ന ദുരിതങ്ങള്‍ക്ക് അറുതി വരുത്താന്‍ ഇവര്‍ക്ക് കടമയുണ്ട്. വന്യമൃഗാക്രമണത്തില്‍ വലയുന്ന കര്‍ഷകരുടെ രക്ഷകരായി ഭരണാധികാരികള്‍ മാറണം. പൂര്‍വ പിതാക്കള്‍ ഉപദ്രവകാരികളായ വന്യമൃഗങ്ങളെ എങ്ങനെ കൈകാര്യം ചെയ്‌തെന്ന് പുതിയ തലമുറ മറന്നിട്ടില്ല. ആയുധങ്ങളും ഓര്‍മ്മയുണ്ട്. അതു പ്രയോഗിക്കാന്‍ ഇട വരുത്തരുതെന്ന് അദ്ദേഹം മുന്നറിയിപ്പുനല്‍കി. കത്തോലിക്ക കോണ്‍ഗ്രസ് രൂപതാ ഡയറക്ടര്‍ ഫാ. സബിന്‍ തൂമുള്ളില്‍ വിഷയാവതരണം നടത്തി.വന്യമൃഗങ്ങളുടെ അധിനിവേശത്തിനെതിരെയുള്ള പ്രമേയം ഫാ.റെജി വള്ളോപ്പള്ളി അവതരിപ്പിച്ചു. ഫാ.റോയി കൂനാനിക്കല്‍ കര്‍ഷക അതിജീവന പ്രതിജ്ഞയും ഫാ. പ്രിയേഷ് തേവടിയില്‍ ക്രൈസ്തവ ഐക്യ പ്രഖ്യാപന പ്രതിജ്ഞയും ചൊല്ലിക്കൊടുത്തു. മാത്യു പേഴ്ത്തിങ്കല്‍ ക്രൈസ്തവ പീഡനത്തിനെതിരേ പ്രമേയം അവതരിപ്പിച്ചു. കത്തോലിക്ക കോണ്‍ഗ്രസ് രൂപത ജനറല്‍ സെക്രട്ടറി ഷാജി കണ്ടത്തില്‍ ചൂരണിയില്‍ കാട്ടാനയുടെ പിടിയില്‍ നിന്നു രക്ഷപ്പെട്ട മനോജ് മറ്റപ്പള്ളിക്ക് ആദര അഭിവാദ്യങ്ങള്‍ നല്‍കി. ഫാ.ആന്‍റോ മൂലയില്‍, ജോസ് ചെറുവള്ളില്‍, ഫാ.ഡൊമിനിക് മുട്ടത്തു കുടിയില്‍, ഫാ.ജിനോ ചുണ്ടയില്‍, ഫാ.ജോസഫ് പാലക്കാട്ട്, ഫാ.ജിത്ത് കൊച്ചുകയ്‌പേല്‍, റിച്ചാര്‍ഡ് ജോണ്‍, നിര്‍മ്മല, സണ്ണി എംബ്രയില്‍, തോമസ് ചിറക്കടവില്‍, സംഘാടക സമിതി ചെയര്‍മാന്‍ ജോഷി കറുകമാലില്‍, ജന.കണ്‍വീനര്‍ ജോണ്‍സണ്‍ കക്കയം എന്നിവര്‍ പ്രസംഗിച്ചു.

സെക്യൂരിറ്റി ജീവനക്കാരനെ മരിച്ച നിലയിൽ കണ്ടെത്തി

കോടഞ്ചേരി: സെക്യൂരിറ്റി ജീവനക്കാരനെ ജോലിസ്ഥലത്ത് മരിച്ച നിലയിൽ കണ്ടെത്തി. കൂടത്തായി വെളിമണ്ണ ചെർപ്പുള്യേരി മലയിൽ ഗിരീഷി(48) നെയാണ് മർക്കസ് നോളജ് സിറ്റിക്കുള്ളിലെ കാപ്കോൺ ബിൽഡേഴ്‌സിന്‍റെ സെക്യൂരിറ്റി കാബിനകത്ത് മരിച്ച നിലയിൽ കണ്ടെത്തിയത്. ഇന്നലെ ജോലിക്ക് പോയതായിരുന്നു. മറ്റു ജീവനക്കാരാണ് മൃതദേഹം കണ്ടെത്തിയത്. താമരശേരി താലൂക്ക് ആശുപത്രിയിൽ ഇൻക്വസ്റ്റ് പൂർത്തിയാക്കിയതിനുശേഷം മൃതദേഹം മെഡിക്കൽ കോളജ് മോർച്ചറിയിലേക്ക് മാറ്റി. ഭാര്യ: ഷീബ. മക്കൾ: ആവണി, അവന്തിക. പരേതരായ ചന്തുക്കുട്ടി, കല്ല്യണി ദമ്പതികളുടെ മകനാണ്.

ക്വാറികളിലെ അനാവശ്യ പരിശോധന അവസാനിപ്പിക്കണമെന്ന്

കോഴിക്കോട്: ക്വാറികളിൽ നടത്തുന്ന നിയമവിരുദ്ധ പരിശോധന അവസാനിപ്പിക്കണമെന്ന് മൈനിംഗ് ആൻഡ് ക്രഷിംഗ് ഓണേഴ്സ് അസോസിയേഷൻ സംസ്ഥാന പ്രസിഡന്‍റ് എം.കെ. ബാബു പ്രസ്താവനയിലൂടെ ആവശ്യപ്പെട്ടു. നിയമാനുസൃതമായി കോടികൾ മുതൽമുടക്കി നടത്തുന്ന സ്ഥാപനങ്ങളുടെ പേരിൽ സാമ്പത്തിക താൽപര്യം മുൻനിർത്തി ഒരു വിഭാഗം കപട പരിസ്ഥിതിവാദികൾ നടത്തുന്ന പരാതികൾക്കും സമരങ്ങൾക്കും പ്രചോദനം നൽകുന്ന നടപടിയാണ് സർക്കാർ സ്വീകരിക്കുന്നത്. വ്യവസായ വകുപ്പ് നിരന്തരമായി വ്യവസായികളെ പീഡിപ്പിക്കുകയാണ്. വിഷയത്തിൽ മുഖ്യമന്ത്രി ഇടപെട്ട് പരിഹാരം കാണണമെന്ന് അസോസിയേഷൻ ഭാരവാഹികൾ പ്രസ്താവനയിൽ പറഞ്ഞു.

പഞ്ചായത്ത് തെരഞ്ഞെടുപ്പിൽ യുഡിഎഫ് വിജയം ഉറപ്പ്: കെ.എ. ജോസ്കുട്ടി

പേരാമ്പ്ര: അധികാരമുപയോഗിച്ച് വാർഡ്‌ വിഭജനത്തിൽ ഇടതു പക്ഷം എന്ത് കളികൾ നടത്തിയാലും യുഡിഎഫ് പേരാമ്പ്ര നിയോജക മണ്ഡലത്തിൽ ശക്തമായ തിരിച്ചു വരവ് നടത്തുമെന്ന് യുഡിഎഫ് പേരാമ്പ്ര നിയോജക മണ്ഡലം കമ്മിറ്റി കൺവീനർ കെ.എ. ജോസ് കുട്ടി പറഞ്ഞു. കൂത്താളി പഞ്ചായത്തിലെ 14 വാർഡുകളിലെ വോട്ടർ പട്ടിക പരിശോധന മണ്ഡലം ശിൽപശാല ഉദ്ഘാടനം ചെയ്യുകയായിരുന്നു അദ്ദേഹം. പഞ്ചായത്ത് യുഡിഎഫ് ചെയർമാൻ ഇ.ടി. സത്യൻ അധ്യക്ഷത വഹിച്ചു. കൺവീനർ ബർക്ക, രാജൻ കെ. പുതിയേടത്ത്, കെ.ടി. മുഹമ്മദ്, ടി.പി. ചന്ദ്രൻ, മോഹൻ ദാസ് ഓണിയിൽ, പി.സി. രാധാകൃഷ്ണൻ, തണ്ടോറ ഉമ്മർ, സി.കെ. ബാലൻ, സി.പ്രേമൻ, ജമാൽ എന്നിവർ സംബന്ധിച്ചു.

വിദേശ മദ്യവുമായി പശ്ചിമ ബംഗാൾ സ്വദേശി അറസ്റ്റിൽ

നാദാപുരം: കെഎസ്ആർടിസി ബസിൽ കടത്തിക്കൊണ്ട് പോവുകയായിരുന്ന 33 കുപ്പി മാഹി വിദേശ മദ്യവുമായി പശ്ചിമ ബംഗാൾ സ്വദേശി നാദാപുരം എക്സൈസിന്‍റെ പിടിയിലായി. പശ്ചിമ ബംഗാൾ നദിയാ ജില്ലയിൽ കൃഷ്നഗർ താലൂക്ക് ഭീംപുർ വില്ലേജ് പഗുർഗച്ചിയിലെ ആദിർഘോഷ് (54) ആണ് അറസ്റ്റിലായത്. പെരിങ്ങത്തൂർ നാദാപുരം സംസ്ഥാന പാതയിലെ കായപനച്ചിയിൽ നാദാപുരം എക്സൈസ് നടത്തിയ വാഹന പരിശോധനക്കിടെ തലശേരി- മൈസൂർ കെഎസ്ആർടിസി ബസിൽ നിന്നാണ് ഇയാളെ പിടികൂടിയത്.

കാട്ടുപന്നികൾ വാഴകൃഷി നശിപ്പിച്ചു

കൂരാച്ചുണ്ട്: പഞ്ചായത്ത് നാലാം വാർഡ് കക്കയം മുപ്പതാം മൈലിലെ വാഴകൃഷി കാട്ടുപന്നികൾ പാടെ തകർത്തു. കർഷകൻ ചീടിക്കുഴി രാഘവന്‍റെ കൃഷിയിടത്തിലെ 400 ഓളം വാഴകളാണ് കാട്ടുപന്നികൾ നശിപ്പിച്ചത്. വൻ തുക ചെലവഴിച്ച് പരിപാലിച്ചുവന്ന വാഴ കൃഷിയാണ് നശിച്ചത്. കക്കയം മേഖലയിൽ കാട്ടുപന്നികളുടെ ശല്യം രൂക്ഷമാണ്. കാട്ടുപന്നികളെ നശിപ്പിക്കാനുള്ള അടിയന്തര നടപടി സ്വീകരിക്കണമെന്നാണ് ആവശ്യം ഉയരുന്നത്.

സൗത്ത് സിറ്റി റേഷനിംഗ് പരിധിയിലെ റേഷന്‍ കടകള്‍ നാലിനു അടച്ചിടും

കോഴിക്കോട്: സൗത്ത് സിറ്റി റേഷനിംഗ് ഓഫീസറുടെ പരിധിയില്‍പെട്ട പ്രദേശത്ത് റേഷന്‍ വിതരണം താറുമാറായിട്ട് അഞ്ചുമാസം. പ്രശ്‌നം പരിഹരിക്കണമെന്നാവശ്യപ്പെട്ട് ആള്‍ കേരള റീട്ടെയില്‍ റേഷന്‍ ഡീലേഴ്‌സ് അസോസിയേഷന്‍ നാലിന് സൗത്ത് സിറ്റി റേഷനിംഗ് പരിധയിലെ റേഷന്‍ കടകളടച്ച് കളക്ടറ്റേിനുമുന്നില്‍ ധര്‍ണ നടത്തും. ബേപ്പൂര്‍ എന്‍എഫ്എസ്എ ഡിപ്പോയിലെ തൊഴിലാളികളുടെ സമരമാണ് റേഷന്‍ വിതരണം തകരാറാകാന്‍ കാരണം. ഇവിടെ വരുന്ന റേഷന്‍ സാധനങ്ങളില്‍ 25 ശതമാനമാണ് ബേപ്പൂരിലെ തൊഴിലാളികള്‍ ഇറക്കുന്നത്. ബാക്കി 75 ശതമാനം എന്‍എഫ്എസ്എ തൊഴിലാളികളും. ഇതുകാരണം ബേപ്പൂരിലെ തൊഴിലാളികള്‍ക്ക് തൊഴില്‍ കുറഞ്ഞ അവസ്ഥയാണ്. അര്‍ധരാത്രിയിലുംചരക്കിറക്കാന്‍ ഇവര്‍ ബാധ്യസ്ഥരാവുന്നു. രണ്ടു വിഭാഗം തൊഴിലാളികള്‍ തമ്മിലുള്ള തര്‍ക്കം കാരണം റേഷന്‍സാധനങ്ങളുടെ വിതരണം മുടങ്ങുന്ന അവസ്ഥയില്‍ എത്തി. കൃത്യസമയത്ത് റേഷന്‍ കടകളില്‍ സാധനങ്ങള്‍ എത്താതായി. കോഴിക്കോട് സൗത്ത് മണ്ഡലത്തില്‍പെടുന്ന പ്രദേത്തെയും ബേപ്പൂര്‍ മണ്ഡലത്തിലെ ചില ഭാഗങ്ങളിലെയും 82 റേഷന്‍ കടകളിലേക്കാണ് ഇവിടെ നിന്ന് സാധനങ്ങള്‍ എത്തിക്കുന്നത്.

വിനോദസഞ്ചാര കേന്ദ്രങ്ങളിലെ പ്രവർത്തനങ്ങൾ വിലയിരുത്താൻ യോഗം ചേർന്നു

കോഴിക്കോട്: തോണിക്കടവ്- കരിയാത്തുംപാറ വിനോദസഞ്ചാര കേന്ദ്രങ്ങളിലെ പ്രവർത്തനങ്ങൾ വിലയിരുത്തുന്നതിനായി ടൂറിസം നിർവഹണ സമിതി യോഗം ചേർന്നു. സച്ചിൻ ദേവ് എംഎൽഎ, ജില്ലാ കളക്ടർ സ്നേഹിൽ കുമാർ സിംഗ് എന്നിവരുടെ നേതൃത്വത്തിൽ ചേർന്ന യോഗത്തിൽ തോണിക്കടവ്- കരിയാത്തുംപാറ വിനോദസഞ്ചാര മേഖലകളിലെ അടിസ്ഥാന സൗകര്യ വികസനം, കേന്ദ്രങ്ങളുടെ നടത്തിപ്പ് എന്നിവ സംബന്ധിച്ച വിഷയങ്ങൾ ചർച്ച ചെയ്തു. ഈ മേഖലയിൽ ആവർത്തിച്ചുകൊണ്ടിരിക്കുന്ന അപകടങ്ങൾ തടയാനായി കക്കയം മുതൽ തോണിക്കടവ്, കരിയാത്തുംപാറ വിനോദസഞ്ചാര കേന്ദ്രങ്ങൾ വരെ പ്രത്യേക അപകട മുന്നറിയിപ്പ് ബോർഡുകൾ സ്ഥാപിക്കാൻ സച്ചിൻ ദേവ് എംഎൽഎ നിർദ്ദേശിച്ചു. കാരിയാത്തുംപാറ വിനോദസഞ്ചാര കേന്ദ്രത്തിലെ പ്രവേശന കവാടം, വിശ്രമകേന്ദ്രം, പൂന്തോട്ടം എന്നിവയുടെ നിർമാണം, സെപ്റ്റിക്ക് ടാങ്ക് നിർമാണം തുടങ്ങിയ വിഷയങ്ങൾ ചർച്ച ചെയ്തു. തോണിക്കടവിലും കരിയാത്തുംപാറയിലും നടത്തേണ്ട പ്രവർത്തനങ്ങൾ ഉൾപ്പെടുത്തിയ വിശദമായ റിപ്പോർട്ട് ബന്ധപ്പെട്ട വകുപ്പുകൾ സമർപ്പിക്കണമെന്ന് ജില്ല കളക്ടർ നിർദ്ദേശിച്ചു. ജില്ല കളക്ടറുടെ ചേമ്പറിൽ ചേർന്ന യോഗത്തിൽ പെരുവണ്ണാമൂഴി അസിസ്റ്റന്‍റ് എക്സക്യൂട്ടീവ് എൻജിനീയർ പി.കെ. ബിജു, അരുൺ ജോസ്, തോണിക്കടവ് ഡെസ്റ്റിനേഷൻ മാനേജർമാരായ അമൽ ജോസഫ്, ജോസഫ് ജോൺ, കൂരാച്ചുണ്ട് പഞ്ചായത്ത് പ്രസിഡന്‍റ് ഒ.കെ. അഹമ്മദ്, പോർട്ട് ഓഫീസ് സൂപ്പർവൈസർ ആർ. സക്കീർ ഹുസൈൻ തുടങ്ങിയവർ പങ്കെടുത്തു.

കന്യാസ്ത്രീകളുടെ അറസ്റ്റ് ; നാടാകെ പ്രതിഷേധം

കോഴിക്കോട്: ഛത്തീസ്ഗഡില്‍ കള്ള കേസ് എടുത്ത് അന്യായമായി തടങ്കലില്‍ വച്ച കന്യാ സ്ത്രീകളെ മോചിപ്പിക്കണമെന്നാവശ്യപ്പെട്ട് വെള്ളയില്‍, ചേവായൂര്‍ ബ്ലോക്ക് കോണ്‍ഗ്രസ് കമ്മിറ്റികളുടെ നേതൃത്വത്തില്‍ ഡിസിസി ഓഫീസിനു സമീപം പ്രതിഷേധ കൂട്ടായ്മ സംഘടിപ്പിച്ചു. പ്രതിഷേധ കൂട്ടായ്മ കെപിസിസി ജനറല്‍ സെക്രട്ടറി അഡ്വ. കെ. ജയന്ത് ഉദ്ഘാടനം ചെയ്തു.കെപിസിസി മെമ്പര്‍ കെ.പി. ബാബു മുഖ്യ പ്രഭാഷണം നടത്തി. വെള്ളയില്‍ ബ്ലോക്ക് കോണ്‍ഗ്രസ് പ്രസിഡന്‍റ് പി. കൃഷ്ണകുമാര്‍ അധ്യക്ഷത വഹിച്ചു. ഡിസിസി ജനറല്‍ സെക്രട്ടറിമാരായ എന്‍. ഷെറില്‍ ബാബു, എന്‍.വി. ബാബുരാജ്, അഡ്വ. ഒ. ശരണ്യ, ഡിസിസി മെമ്പര്‍ സി.പി. സലീം, ചേവായൂര്‍ ബ്ലോക്ക് പ്രസിഡന്‍റ് പി.വി ബിനീഷ് കുമാര്‍, യൂത്ത് കോണ്‍ഗ്രസ് ജനറല്‍ സെക്രട്ടറി എം. ഷിബു എന്നിവര്‍ പ്രസംഗിച്ചു. കണ്ണപ്പന്‍കുണ്ട്: കന്യാസ്ത്രീകളെ ജയിലില്‍ അടച്ചതില്‍ പ്രതിഷേധിച്ച് കണ്ണപ്പന്‍കുണ്ട് ടൗണ്‍ കോണ്‍ഗ്രസ് കമ്മിറ്റിയുടെ നേതൃത്വത്തില്‍ പ്രകടനം നടത്തി. കോണ്‍ഗ്രസ് കമ്മിറ്റി പ്രസിഡന്‍റ് ഐ.പി. രാജന്‍, ഷിജു ഐസക്ക്, ജോഷി ചന്ദ്രന്‍ കുന്നേല്‍, മൊയ്തീന്‍, അസീസ്, സജോ വര്‍ഗീസ്, ജോര്‍ജ് തോമസ്, റോയി അരിപ്ലാക്കല്‍, ജോസ് ആലിയാട്ടുകുടിയില്‍ എന്നിവര്‍ നേതൃത്വം നല്‍കി. പൂഴിത്തോട്: പൂഴിത്തോട് അമലോത്ഭവ മാതാ ഇടവകയിൽ എകെസിസി, കെസിവൈഎം സംഘടനകളുടെ നേതൃത്വത്തിൽ പ്രതിഷേധ പരിപാടി സംഘടിപ്പിച്ചു. വികാരി ഫാ. മാത്യു ചെറുവേലിൽ ഉദ്‌ഘാടനം ചെയ്‌തു. സിസ്റ്റർ ക്ലാരീസ്, കെ.കെ. ജോൺ, ലിറ്റോ തോമസ് എന്നിവർ പ്രസംഗിച്ചു. പേരാമ്പ്ര: ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ പ്രതിഷേധ സംഗമം നടത്തി സത്യൻ കടിയങ്ങാട് ഉദ്ഘാടനം ചെയ്തു.കെ.മധു കൃഷ്ണൻ അധ്യക്ഷത വഹിച്ചു. രാജൻ മരുതേരി, മുനീർ എരവത്ത്, പി.കെ രാഗേഷ്, ഇ. രാമചന്ദ്രൻ, ബാബു തത്തക്കാടൻ, പി.എം. പ്രകാശൻ, പി.എസ്. സുനിൽകുമാർ, വി.വി. ദിനേശൻ, വി.പി. സുരേഷ്, ഇ.ടി ഹമീദ്, വമ്പൻ വിജയൻ, വാസു വേങ്ങേരി ,മായൻകുട്ടി, പുതുക്കോട്ട് രവീന്ദ്രൻ, രാജീവൻ പാറാട്ടുപറ, പൊയിൽ സുര, മിനി വട്ടക്കണ്ടി, എം. സൈറാബാനു, ഷൈലജ ചെറുവോട്ട് തുടങ്ങിയവർ സംബന്ധിച്ചു. മുക്കം: ആർജെഡി തിരുവമ്പാടി നിയോജകമണ്ഡലം കമ്മിറ്റി മുക്കം ടൗണിൽ പ്രകടനവും പൊതുയോഗംവും സംഘടിപ്പിച്ചു. ആർജെഡി സീനിയർ നേതാവ് ഏബ്രഹാം മാനുവൽ ഉദ്ഘാടനം ചെയ്തു. മണ്ഡലം പ്രസിഡന്‍റ് ടാർസൻ ജോസ് കോക്കാപ്പിള്ളി അധ്യക്ഷനായി. പി.എം. തോമസ്, ജിമ്മി ജോസ്, ജോൺസൺ കുളത്തുങ്കൽ, വിൽ‌സൺ പുല്ലുവേലി, ഗോൾഡൻ ബഷീർ, അബ്ദുൽ സത്താർ, ഷെറീന സുബൈർ, മനോജ് മൂത്തേടത്ത്, രാജേഷ് പൊട്ടിയിൽ, ജോസ് കുട്ടി തുടങ്ങിയവർ പ്രസംഗിച്ചു. മുക്കം ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ പ്രതിഷേധ കൂട്ടായ്മ നടത്തി. ബി.പി. റഷീദ് മുഖ്യ പ്രഭാഷണം നടത്തി. ബ്ലോക്ക് കോൺഗ്രസ് പ്രസിഡന്‍റ് എം. സിറാജുദ്ദീൻ അധ്യക്ഷത വഹിച്ചു. യോഗത്തിൽ ചന്ദ്രൻ കപ്പിയേടത്ത്, എം. മധു, എം.ടി. അഷ്റഫ്, ജുനൈദ് പാണ്ഡികശാല, കെ. മാധവൻ, റീന പ്രകാശ്, ആലിചേന്ദമംഗല്ലൂർ, എം.കെ. മമ്മദ്, ഹരിദാസൻ പരപ്പിൽ, നഫീസ പാലാട്ട് തുടങ്ങിയവർ സംസാരിച്ചു.

കരിയാത്തുംപാറയിൽ അടിയന്തര യോഗം ചേർന്നു

കൂരാച്ചുണ്ട്: കരിയാത്തുംപാറ മീൻമുട്ടി മേഖലയിൽ കാട്ടാനകൾ ഭീതി പടർത്തിയതിനെ തുടർന്ന് പഞ്ചായത്തും വനം വകുപ്പ് ഉദ്യോഗസ്ഥരും സംയുക്തമായി കരിയാത്തുംപാറയിൽ പഞ്ചായത്ത് പ്രസിഡന്‍റ് ഒ.കെ. അമ്മദിന്‍റെ അധ്യക്ഷതയിൽ യോഗം ചേർന്നു. ജനവാസ കേന്ദ്രത്തിലെത്തുന്ന കാട്ടാനകളെ വനംവകുപ്പിന്‍റെ ആർആർടി സംഘമെത്തി കാട്ടിലേക്ക് തുരത്തുന്നതിനും കാട്ടാനകൾ ഇറങ്ങുന്ന വഴി അടയ്ക്കുവാനുള്ള സംവിധാനം ഏർപ്പെടുത്തുന്നതിനും തീരുമാനമായി. പഞ്ചായത്ത് വൈസ് പ്രസിഡന്‍റ് വിൻസി തോമസ്, പഞ്ചായത്ത് അംഗങ്ങളായ ജെസി ജോസഫ്, അരുൺ ജോസ്, ഡാർലി ഏബ്രഹാം, കരിയാത്തുംപാറ പള്ളി വികാരി ഫാ. രാജേഷ് കുറ്റിക്കാട്ട്, കക്കയം ഫോറസ്റ്റ് സ്റ്റേഷൻ ഡെപ്യൂട്ടി റെയിഞ്ചർ സി. വിജിത്ത്, വില്ലേജ് അസിസ്റ്റന്‍റ് ജോബി, മൃഗസംരക്ഷണ വകുപ്പ് ഉദ്യോഗസ്ഥൻ സിദ്ധിഖ്, മുൻ പഞ്ചായത്തംഗം ജോസ് വെളിയത്ത് എന്നിവർ പങ്കെടുത്തു.

നാദാപുരത്തും തൂണേരിയിലും തെരുവുനായയുടെ ആക്രമണം

നാദാപുരം: തൂണേരിയിലും, നാദാപുരത്തും തെരുവുനായയുടെ പരാക്രമത്തിൽ ഏഴ് പേർക്ക് പരിക്ക്. സ്കൂൾ വിദ്യാർഥിയും, ഭിന്നശേഷിക്കാരനടക്കമുള്ള ഏഴ് പേർക്കാണ് രാവിലെയും വൈകുന്നേരവുമായി കടിയേറ്റത്.രാവിലെ സ്കൂളിലേക്ക് പോകാൻ തൂണേരിയിൽ ബസ് കാത്ത് നിൽക്കുന്നതിനിടെയാണ് പേരോട് എംഐഎം ഹൈസ്കൂൾ എട്ടാം ക്ലാസ് വിദ്യാർഥി മുഹമ്മദ് റിയാൻ (14) ന് തെരുവുനായയുടെ കടിയേറ്റത്. പരിക്കേറ്റ റിയാനെ നാദാപുരം ഗവ. താലൂക് ആശുപത്രിയിൽ പ്രാഥമിക ചികിത്സ നൽകിയ ശേഷം കോഴിക്കോട് മെഡിക്കൽ കോളജിലേക്ക് മാറ്റി. വലത് കൈക്കും, കഴുത്തിനുമാണ് പരിക്കേറ്റത് . വൈകുന്നേരം മൂന്നരയോടെയാണ് സംസ്ഥാന പാതയിൽ നാദാപുരം ഗവ. ആശുപത്രിക്ക് സമീപത്ത് കഴുത്തിന് മാരകമായി മുറിവേറ്റ് പുഴുവരിച്ച നിലയിൽ ടൗണിലൂടെ പരക്കം പാഞ്ഞ തെരുവ് നായ ഭിന്നശേഷി കാരനടക്കം ആറ് പേരെ കടിച്ചത്. ഭിന്നശേഷിക്കാരനായ നാദാപുരം സ്വദേശി ചേനത്ത് താഴ കുനി ഷമീം (35), മെഡിക്കൽ ഷോപ്പ് ജീവനക്കാരി തളീക്കര സ്വദേശിനി പുളിയുള്ള പറമ്പത്ത് ഉനൈസ (22), സേലം സ്വദേശി ധൻപാൽ (59), കക്കട്ട് കുന്നുമ്മൽ സ്വദേശി കൊരട്ടോടി വീട്ടിൽ റിയാസ് (38), ഉമ്മത്തൂർ സ്വദേശി ചേടിയാലയിൽ വീട്ടിൽ അദ്നാൻ (19), നെന്മാറ അയിലൂർ സ്വദേശി സജീഷ് (33) എന്നിവർക്കാണ് കാലുകളിലും, കൈകളിലും നായയുടെ കടിയേറ്റത്.നായയുടെ ആക്രമത്തിനിടെ വീണ് സജീഷിന്‍റെ തോൾ എല്ല് പൊട്ടി. പരിക്കേറ്റ ആറ് പേരും നാദാപുരം ഗവ. ആശുപത്രിയിൽ ചികിത്സ തേടി.പരാക്രമം കാട്ടിയ നായയെ നാട്ടുകാർ തല്ലി കൊന്നു.

കരിയാത്തുംപാറ മീൻമുട്ടിയിൽ കാട്ടാനകൾ തമ്പടിക്കുന്നു

ഭീതിയോടെ പ്രദേശവാസികൾ കൂരാച്ചുണ്ട് : പഞ്ചായത്ത് അഞ്ചാം വാർഡിൽ ഉൾപ്പെട്ട കരിയാത്തുംപാറ മീൻമുട്ടി ജനവാസ മേഖലയിലെ കൃഷിയിടത്തിൽ ഒരാഴ്ചയായി കാട്ടാനകൾ ഇറങ്ങിയതിനെ തുടർന്ന് പ്രദേശവാസികൾ ഭീതിയിൽ. മീൻമുട്ടി മേഖലയിലെ കർഷകരായ പാണ്ടംമാന തോമസ്, പാണ്ടംമാന മത്തായി, പുതുപ്പറമ്പിൽ ജോസഫ്, നെടിയപാല ദേവസ്യ തുടങ്ങിയ കർഷകരുടെ റബർ തോട്ടങ്ങളിലാണ് ഒരാഴ്ചയായി തുടർച്ചയായി കാട്ടാനകൾ തമ്പടിക്കുന്നത്. കാട്ടാനകൾ റബർ മരങ്ങളുടെ തൊലി നശിപ്പിക്കുന്നതായും കർഷകർ പറയുന്നു. ടാപ്പിംഗ് നടത്തുന്ന തോട്ടമാണിത്. എന്നാൽ കാട്ടാനയെ പേടിച്ച് കർഷകർ ടാപ്പിംഗ് പോലും നിർത്തിവച്ചിരിക്കുകയാണ്. വനമേഖലയായ പേരിയ മലയുടെ ഭാഗത്തുനിന്നാണ് കാട്ടാനകൾ കൃഷിയിടത്തിൽ എത്തുന്നതെന്നാണ് നാട്ടുകാർ പറയുന്നത്. ഇന്നലെയോടെ ഉരക്കുഴിയുടെ മേഖലയിലേക്ക് കാട്ടാനകൾ നീങ്ങിയതായും പറയുന്നു. മീൻമുട്ടി മേഖലയിൽ നിരവധി കുടുംബങ്ങൾ താമസിക്കുന്നുണ്ട്. ഇവർ കാട്ടാന പേടിയിലാണ് കഴിയുന്നത്. വനം വകുപ്പ് കാട്ടാനകളെ പ്രതിരോധിക്കാൻ അടിയന്തര നടപടി സ്വീകരിക്കണമെന്നാണ് ഇവർ ആവശ്യപ്പെടുന്നത്.

ബൈക്കപകടത്തില്‍ യുവാവും യുവതിയും മരണമടഞ്ഞു

കോഴിക്കോട്: ബൈക്ക് നിയന്ത്രണം വിട്ടു മറിഞ്ഞ് രണ്ടു മരണം. ബൈക്ക് യാത്രികരായ കോഴിക്കോട് മാങ്കാവ് കാളൂര്‍ റോഡ് ശ്രീഹരിയില്‍ പരേതനായ ദിനേശന്‍റെ മകന്‍ മഹല്‍ (22), കോഴിക്കോട് കല്ലായിയില്‍ വാടകയ്ക്ക് താമസിച്ചിരുന്ന അഫ്‌ന (20) എന്നിവരാണ് മരിച്ചത്. വ്യാഴാഴ്ച അര്‍ധരാത്രിക്ക് കോഴിക്കോട് ഫ്രാന്‍സീസ് റോഡിലാണ് അപകടമുണ്ടായത്. അപകടത്തില്‍ അഫ്‌ന തല്‍ക്ഷണം മരണമടഞ്ഞിരുന്നു. ഗുരുതര പരിക്കേറ്റ ആശുപത്രിയില്‍ പ്രവേശിപ്പിച്ച മഹല്‍ ഇന്നലെ രാവിലെയാണ് മരിച്ചത്. ബൈക്കില്‍ മറ്റൊരാളും കൂടിയുണ്ടായിരുന്നു. ഇയാള്‍ പരിക്കുകളോടെ ചികിത്സയിലാണ്. ബീച്ചിലേക്കു പോകുന്ന വഴിക്ക് ബൈക്ക് നിയന്ത്രണം വിട്ടു മറിയുകയായിരുന്നു. അപകടകാരണത്തെക്കുറിച്ച് പോലീസ് അന്വേഷണം ആരംഭിച്ചു.

പലക മുറിക്കുന്നതിനിടെ ഷോക്കേറ്റ് മരിച്ചു

കോഴിക്കോട്: വാര്‍പ്പ് പണിക്കായി പലക മുറിക്കുന്നതിനിടെ മോട്ടറില്‍ നിന്ന് വൈദ്യുതാഘാതമേറ്റ് നരിക്കാട്ടേരി കുറ്റിപ്രം വീട്ടില്‍ രാജന്‍ (55) മരിച്ചു. നരിക്കാട്ടേരി പൊയില്‍ കണ്ണന്‍റെയും പരേതയായ മാതുവിന്‍റെയും മകനാണ്. ഭാര്യ: ശോഭ. മക്കള്‍: ശില്പ, ഷിബിന്‍ രാജ് (ഗള്‍ഫ്). മരുമകന്‍: രജീഷ് (തിരുവള്ളൂര്‍) സഹോദരങ്ങള്‍: അശോകന്‍, വിനോദന്‍, ബിജു(ഗള്‍ഫ്). പലക മുറിക്കുന്നതിനിടെ ഷോക്കേറ്റ് മരിച്ചു.

കാലം പറക്ക്ണ് നാടകം നാളെ അരങ്ങില്‍

കോഴിക്കോട്: കോഴിക്കോട് സങ്കീര്‍ത്തനയുടെ കാലം പറക്ക്ണ് എന്ന നാടകം നാളെ വൈകിട്ട് ഏഴിന് ടൗണ്‍ഹാളില്‍ അരങ്ങേറുമെന്ന് ഭാരവാഹികള്‍ അറിയിച്ചു. പി.വി. ചന്ദ്രന്‍ ഉദ്ഘാടനം ചെയ്യും. പുതിയ കുട്ടികള്‍ക്ക് എന്താണ് സംഭവിക്കുന്നതെന്ന് പറഞ്ഞ് അവരെ മാത്രം കുറ്റപ്പെടുത്താതെ, സിലബസിന് പുറത്തുള്ള പാഠങ്ങള്‍ കുട്ടികള്‍ക്ക് പകര്‍ന്നു കൊടുത്തോയെന്ന് മുതിര്‍ന്നവരും ആത്മ പരിശോധന നടത്തണമെന്ന ഗൗരവകരമായ വിഷയമാണ് നാടകത്തിലൂടെ ചര്‍ച്ചചെയ്യുന്നത്. പ്രദീപ് കുമാര്‍ കാവുംന്തറയാണ് നാടക രചന നിര്‍വഹിച്ചിട്ടുള്ളത്. രമേശ് കാവില്‍ ഗാനങ്ങളും ഉദയകുമാര്‍ അഞ്ചല്‍ സംഗീതവും നിര്‍വഹിക്കുന്നു.രാജീവ് മമ്മിളിയാണ് സംവിധാനം. വാര്‍ത്താസമ്മേളനത്തില്‍ സജി മൂരാട്, പ്രകാശ് നന്തി, ചന്ദ്രന്‍ എന്നിവര്‍ പങ്കെടുത്തു.

ബഡീസ് മീറ്റ് രണ്ടിന്

കോഴിക്കോട് : അന്താരാഷ്ട്ര സൗഹൃദ ദിനത്തിന്‍റെ ഭാഗമായി സാമൂഹിക സേവന സംഘടനയായ തണല്‍ ബഡീസ് മീറ്റ് ഭിന്നശേഷി ബോധവത്കരണ പരിപാടി സംഘടിപ്പിക്കുന്നു. രണ്ടിന് രാവിലെ 10:30 ന് പന്തീരങ്കാവ് ഓക്‌സ്ഫോഡ് സ്‌കൂളില്‍ നടക്കുന്ന പരിപാടി എം.കെ രാഘവന്‍ എം.പി ഉദ്ഘാടനം നിര്‍വഹിക്കും. കോഴിക്കോട് ജില്ലാ കലക്ടര്‍ സ്‌നേഹില്‍ കുമാര്‍ സിങ് പങ്കെടുക്കുമെന്ന് സംഘാടകര്‍ വാര്‍ത്താസമ്മേളനത്തില്‍ അറിയിച്ചു. മലാപറമ്പ് തണല്‍ സ്‌കൂള്‍ ഫോര്‍ ഡിഫറെന്റലി ഏബിള്‍ഡിലെ കുട്ടികളും പന്തീരങ്കാവ് ഓക്‌സ്‌ഫോര്‍ഡ് സ്‌കൂളിലെ കുട്ടികളും തമ്മില്‍ സൗഹൃദവും ഉള്‍ച്ചേരലും വികസിപ്പിക്കുക എന്നതാണ് പരിപാടിയുടെ ലക്ഷ്യം. തണലിലെ വിദ്യാര്‍ഥികള്‍ സംഘടിപ്പിക്കുന്ന 'ചാമ്പക്ക' എന്ന നാടകവും അരങ്ങേറും. ബൈജു ആയടത്തില്‍, സുബൈര്‍ മണലൊടി, അലീന വര്‍ഗീസ്,എന്നിവര്‍ വര്‍ത്താസമ്മേളനത്തില്‍ സംബന്ധിച്ചു.

ലിസ കോളജില്‍ സെമിനാര്‍ നടത്തി

ഈങ്ങാപുഴ: വനിതാകമ്മീഷന്‍ ലിസ കോളജിലെ വിമണ്‍സെല്ലുമായി സഹകരിച്ചുകൊണ്ട് സൈബര്‍ലോകവും യുവതലമുറയും എന്ന വിഷയത്തില്‍ ജില്ലാ സെമിനാര്‍ നടത്തി. വനിതാകമ്മീഷന്‍ അധ്യക്ഷ അഡ്വ. പി. സതീദേവി ഉദ്ഘാടനം ചെയ്തു. കോളജ് പ്രിന്‍സിപ്പല്‍ ഡോ. ബെന്നി ജോസഫ് അധ്യക്ഷനായിരുന്നു. കോളജ് വിമണ്‍സെല്‍ കോ ഓര്‍ഡിനേറ്റര്‍ എന്‍.അശ്വതി, സ്റ്റുഡന്‍റ് പ്രതിനിധി അബിയാ ബിജോയ്, വൈസ് പ്രിന്‍സിപ്പല്‍ ഡോ. കെ.ജോബി എന്നിവര്‍ പ്രസംഗിച്ചു. സൈബര്‍ലോകവും യുവതലമുറയും എന്ന വിഷയത്തില്‍ റിട്ട. പോലീസ് ഓഫീസര്‍ സത്യന്‍ കാരയാട് ക്ലാസെടുത്തു.

കെഎസ്ടിഎ മാര്‍ച്ചും ധര്‍ണയും നാളെ

കോഴിക്കോട് : കേന്ദ്ര സര്‍ക്കാരിന്‍റെ ജനവിരുദ്ധ നയങ്ങള്‍ തിരുത്തുക, കേരളത്തോടുള്ള അവഗണന അവസാനിപ്പിക്കുക, ദേശീയ വിദ്യാഭ്യാസ നയം 2020 തള്ളിക്കളയുക തുടങ്ങി മുദ്രാവാക്യങ്ങള്‍ ഉയര്‍ത്തി കേരള സ്‌കൂള്‍ ടീച്ചേഴ്സ് അസോസിയേഷന്‍റെ നേതൃത്വത്തില്‍ നാളെ ജില്ലാ മാര്‍ച്ചും ധര്‍ണയും സംഘടിപ്പിക്കുന്നു. ഡിഡിഇ ഓഫീസിനുമുന്നില്‍ അഡ്വ.കെ.പ്രേംകുമാര്‍ എംഎല്‍എ സമരം ഉദ്ഘാടനം ചെയ്യുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. മുതലക്കുളം മൈതാനിയില്‍ നിന്ന് രാവിലെ 10.30 ന് മാര്‍ച്ച് ആരംഭിക്കും. 17 സബ്ജില്ലുകളില്‍ നിന്നായി 5000അധ്യാപകര്‍ റാലിയില്‍ അണിനിരക്കും. ജില്ലാ സെക്രട്ടറി ആര്‍. എം. രാജന്‍, സംസ്ഥാന വൈസ് പ്രസിഡന്‍റ് പി.എസ്. സ്മിജ, വി. പി രാജീവന്‍, കെ. എം സജീഷ് നാരായണന്‍ എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.

കനത്ത മഴയിൽ കിണർ ഇടിഞ്ഞു

നാദാപുരം: കനത്ത മഴയിൽ കിണർ താഴുകയും കിണറിനോട് ചേർന്ന വീടിന്‍റെ ഭാഗങ്ങൾ പൂർണമായും കിണറ്റിൽ പതിക്കുകയും ചെയ്തു. നരിക്കാട്ടേരിയിലെ മലയിൽ പ്രമോദിന്‍റെ വീടിനോടു ചേർന്ന കിണറും, കുളിമുറി അടുക്കള ഭാഗം എന്നിവയാണ് തകർന്നത്. കല്ലാച്ചിയിൽ ചെറുകിട കച്ചവടം ചെയ്യുന്ന പ്രമോദിന് വൻ സാമ്പത്തിക നഷ്ടമാണ് ഉണ്ടായത്. കിണർ പൂർണമായും മണ്ണിനിടയിലേക്ക് താഴ്ന്ന നിലയിലായതിനാൽ പൂർണ്ണമായും ഉപയോഗശൂന്യമായി.

കർഷക അതിജീവന റാലിയുടെ പ്രചാരണ ജാഥയ്ക്ക് ഇന്നു തുടക്കം

കൂരാച്ചുണ്ട്: വന്യമൃഗ ആക്രമണങ്ങൾക്കെതിരേ നാളെ പെരുവണ്ണാമൂഴി ഫോറസ്റ്റ് റെയിഞ്ച് ഓഫീസ് പരിസരത്തേക്ക് നടത്തുന്ന മലയോര കർഷക അതിജീവന റാലിയുടെ വാഹന പ്രചാരണ ജാഥക്ക് ഇന്ന് രാവിലെ എട്ടിന് കക്കയത്ത് തുടക്കം കുറിക്കും. ജാഥാ ക്യാപ്റ്റൻ ജോസ് ചെറുവള്ളിൽ, വൈസ് ക്യാപ്റ്റൻ നിമ്മി പൊതിയട്ടേൽ എന്നിവർ നയിക്കുന്ന പ്രചാരണ ജാഥ കക്കയം പള്ളി വികാരി ഫാ.റോയി കൂനാനിക്കൽ ഉദ്ഘാടനം ചെയ്യും. നാളെ നടക്കുന്ന റാലിയും ധർണയും താമരശേരി ബിഷപ മാർ റെമീജിയോസ് ഇഞ്ചനാനിയിൽ ഉദ്ഘാടനം ചെയ്യും. പകൽ സമയങ്ങളിൽ പോലും പുറത്തിറങ്ങാനോ ജോലി ചെയ്യുവാനോ കഴിയാതെ മലയോര മേഖലകളിലെ ജനങ്ങൾ കാലങ്ങളായി കഴിയുകയാണ്. ഇതിനെ തടയാൻ സൗരവേലി, കിടങ്ങ് നിർമാണം, ആർആർടി സാന്നിധ്യം തുടങ്ങിയ വാഗ്ദാനങ്ങൾ വനം വകുപ്പ് നടപ്പാക്കാത്തതിനെതിരേ കർഷകർ സാരിവേലി കെട്ടി പ്രതിഷേധിക്കും.

കൊടിയത്തൂരിൽ പഞ്ചായത്ത് ഓഫീസ് മാർച്ച് രാഷ്ട്രീയ പ്രേരിതമെന്ന്

മുക്കം: കൊടിയത്തൂർ പഞ്ചായത്ത് ഭരണസമിതിക്കെതിരേ ഇല്ലാക്കഥകൾ പ്രചരിപ്പിച്ച് സിപിഎമ്മിന്‍റെ നേതൃത്വത്തിൽ പഞ്ചായത്തോഫീസിലേക്ക് ഇന്ന് നടക്കുന്ന മാർച്ച് രാഷ്ട്രീയ പ്രേരിതമാണന്ന് പഞ്ചായത്ത് പ്രസിഡന്‍റ് ദിവ്യ ഷിബു, വൈസ് പ്രസിഡന്‍റ് ഫസൽ കൊടിയത്തൂർ എന്നിവർ പറഞ്ഞു. കഴിഞ്ഞ നാലര വർഷമായി ജില്ലയിൽ തന്നെ ഏറ്റവും മാതൃകപരമായ വികസന പ്രവർത്തനങ്ങളാണ് കൊടിയത്തൂരിൽ നടന്ന് വരുന്നത്. ഇത്തരം പ്രവർത്തനങ്ങൾക്ക് രാഷ്ട്രീയ വ്യത്യാസമില്ലാതെ വലിയ പിന്തുണയാണ് ലഭിച്ചുകൊണ്ടിരിക്കുന്നത്. ഇടത് അനുഭാവികൾ പോലും ഭരണസമിതിയെ പിന്തുണച്ച് രംഗത്ത് വരുമ്പോൾ തങ്ങളുടെ വോട്ട് ബാങ്ക് നഷ്ടപ്പെടുമെന്ന ഭീതിയാണ് സിപിഎമ്മിനെ ഇത്തരം സമരങ്ങളിലേക്ക് നയിക്കുന്നത്. ലൈഫ് ഭവനപദ്ധതിയിൽ 120 ഓളം പേർക്ക് വീട് നൽകി. കൂടാതെ അർഹതപ്പെട്ട എല്ലാവർക്കും പട്ടയം ലഭ്യമാക്കുകയുമുൾപ്പെടെ പഞ്ചായത്തിന്‍റെയും ബ്ലോക്ക്, ജില്ല പഞ്ചായത്തുകളുടേയും സഹായത്തോടെ കോടിക്കണക്കിന് വികസന പ്രവർത്തനങ്ങളാണ് നടന്നത്. ലൈഫ് പദ്ധതി പ്രകാരം ജനറൽ വിഭാഗത്തിന് അനുവദിച്ച 98 വീടുകളിൽ 85 ഉം പട്ടികജാതി വിഭാഗത്തിന് അനുവദിച്ച 19ൽ 15 ഉം പട്ടികവർഗ വിഭാഗത്തിനനുവദിച്ച രണ്ടിൽ ഒരു വീടിന്‍റെയും നിർമാണം പൂർത്തിയാവുകയും ചെയ്തിട്ടുണ്ട്. ഇതിൽ വിളറി പൂണ്ട ഇടതുപക്ഷം സംസ്ഥാന ഭരണത്തിനെതിരെയുള്ള ജനവികാരം മറക്കാൻ മനപൂർവം ആരോപണങ്ങൾ ഉന്നയിക്കുകയാണെന്ന് പ്രസിഡന്‍റും വൈസ് പ്രസിഡന്‍റും പറഞ്ഞു.

തോക്ക് ലൈസൻസ് : വന്യജീവി സങ്കേതത്തിൽ നിന്നുള്ള ദൂരപരിധി ഒഴിവാക്കണമെന്ന്

കുരച്ചുണ്ട്: കർഷകർക്ക് തോക്കിന് ലൈസൻസ് ലഭിക്കുന്നതിനുള്ള അപേക്ഷകളിൽ വന്യജീവി സങ്കേത കേന്ദ്രങ്ങളിൽ നിന്നുള്ള ദൂരപരിധി ഒഴിവാക്കാൻ സർക്കാർ നടപടി സ്വീകരിക്കണമെന്ന് കൂരാച്ചുണ്ട് പഞ്ചായത്തിന്‍റെയും വനംവകുപ്പിന്‍റെയും നേതൃത്വത്തിൽ പഞ്ചായത്ത് ഹാളിൽ ചേർന്ന ജന ജാഗ്രത സമിതി യോഗം സർക്കാരിനോട് ആവശ്യപ്പെട്ടു. കക്കയം മേഖലയിലെ ഫെൻസിംഗ് പദ്ധതി നടപ്പിലാക്കാനുള്ള നടപടി സ്വീകരിക്കുക, കുരങ്ങുശല്യത്തിനുള്ള പരിഹാര നടപടികൾ സ്വീകരിക്കുക, വനം വകുപ്പിന്‍റെ ആർആർടി പ്രവർത്തനം കാര്യക്ഷമമാക്കുക, കാട്ടുപന്നികളുടെ പെരുപ്പം ലഘൂകരിക്കാനുള്ള നടപടി സ്വീകരിക്കുക, കൃഷിനാശത്തിനുള്ള നഷ്ടപരിഹാര തുക വർധിപ്പിക്കുക തുടങ്ങിയ ആവശ്യങ്ങൾ സമിതി സർക്കാരിനോട് ആവശ്യപ്പെട്ടു. പഞ്ചായത്ത് പ്രസിഡന്‍റ് ഒ.കെ. അമ്മദ് അധ്യക്ഷത വഹിച്ചു. വൈസ് പ്രസിഡന്‍റ് വിൻസി തോമസ്, റെയിഞ്ച് ഫോറസ്റ്റ് ഓഫീസർ എ.സി. സുധീന്ദ്രൻ, പഞ്ചായത്ത് അംഗങ്ങളായ ഡാർലി ഏബ്രഹാം, ജെസി ജോസഫ്, ബ്ലോക്ക് പഞ്ചായത്ത് അംഗം വി.കെ. ഹസീന, എ.എസ്.ഐ. രാജേഷ് കുമാർ, പഞ്ചായത്ത് അസിസ്റ്റന്‍റ് സെക്രട്ടറി മനിൽകുമാർ, രാഷ്ട്രീയ പാർട്ടി പ്രതിനിധികളായ ജോസ് വെളിയത്ത്, എ.സി. രാമകൃഷ്ണൻ, ഹെൽത്ത് ഇൻസ്പെക്ടർ എ.സി അരവിന്ദൻ, എൻ.കെ കുഞ്ഞമ്മദ്, സെക്ഷൻ ഫോറസ്റ്റ് ഓഫീസർ ബഷീർ എന്നിവർ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]