ADVERTISEMENT

ADVERTISEMENT

കുറ്റിവട്ടം ഗവ. ആയുർവേദ ആശുപത്രിയിൽ യോഗാ സെന്‍റർ അനുവദിച്ചു

ചവറ : നിയോജക മണ്ഡലത്തിലെ കിടത്തി ചികിത്സയുള്ള ഏക ഗവ. ആയുർവേദ ആശുപത്രിയായ കുറ്റിവട്ടം ഗവ. ആയുർവേദ ആശുപത്രിയിൽ യോഗ സെന്‍റർ അനുവദിച്ചു.

യോഗ പരിശീലനത്തിലൂടെ ജീവിതശൈലി രോഗങ്ങൾക്ക് ഒരു പരിധിവരെ പരിഹാരമാകും. സുജിത് വിജയൻപിള്ള എംഎൽഎയുടെ പ്രത്യേക ആവശ്യപ്രകാരമാണ് യോഗ സെന്‍റർ അനുവദിച്ചത്. നാഷണൽ ആയുഷ് മിഷനിലെ കെ.മനോജിനെ യോഗ ഇൻസ്ട്രക്‌ടറായി നിയമിച്ചു.

ADVERTISEMENT

വഴിമുടക്കികളായി കോൺക്രീറ്റ് മാലിന്യങ്ങൾ

കൊല്ലം: നാട് വികസിക്കണം. വികസനപ്രവർത്തനങ്ങൾ നടക്കുകയും വേണം. നാടിന്‍റെവികസനത്തിനു നിർമാണപ്രവർത്തനങ്ങളും ആവശ്യമാണ്. എന്നാൽ നാട് നശിക്കുന്ന രീതിയിൽ നിർമാണപ്രവർത്തനങ്ങൾ നടത്തുന്ന രീതിയാണ് തെറ്റ്. കൊല്ലം നഗരത്തിലൂടെ ഒന്നു സഞ്ചരിച്ചാൽ കെഎസ്ഇബിയുടെ കന്പികളും ഇലക്‌ട്രിക് പോസ്റ്റുകളും പൊതുമരാമത്ത് വകുപ്പിന്‍റെ കോൺക്രീറ്റ് അവശിഷ്‌ടങ്ങളും റോഡിലെ ടാറുകളും ജലസേചനവകുപ്പിന്‍റെ വാട്ടർ പന്പുകൾ വരെ കിടക്കുന്നതു കാണാം. മാലിന്യം തള്ളുന്നതുപോലെ പാറകളും മണ്ണുംകല്ലും കോൺക്രീറ്റ് അവശിഷ്ടങ്ങളും തള്ളിയിരിക്കുന്നു. കൊല്ലം കമ്മീഷണർഓഫീസിനു മുന്നിലുള്ള മേൽപ്പാലത്തിന് താഴെ കോൺക്രീറ്റ് അവശിഷ്ടങ്ങളും സ്ലാബുകളും പാറകളും കൊണ്ടുനിറഞ്ഞിരിക്കുകയാണ്. മേൽപ്പാലം നിർമിച്ചപ്പോൾ തള്ളിയ പാറകളുംമാലിന്യങ്ങളും ഇവിടെ കിടപ്പുണ്ട്. ഓവർ ബ്രിഡ്ജിന്‍റെ നിർമാണപ്രവർത്തനം പൂർത്തിയായി വാഹനം ഓടാൻ തു‌ടങ്ങിയിട്ടു നാലുവർഷം കഴിഞ്ഞിട്ടും ഇതൊന്നും എട‌ുത്തുമാറ്റാൻആരും വന്നില്ല. കമ്മീഷണർഓഫീസിനുസമീപമുള്ള ഓടനിർമാണത്തിലെ അവശിഷ്ടങ്ങളാണ് ഇവിടെ തള്ളിയത്. ഓട നിർമിച്ചാൽ പണം കിട്ടുമെന്നതുകൊണ്ട് ഒരു റോഡിൽതന്നെ രണ്ടുവശത്തും മനോഹരമായ ഓടനിർമിച്ചു. ഓട നിർമിക്കുന്നതും വെള്ളം ഒഴുകി പോകുന്നതും നല്ലതുതന്നെ. എന്നാൽ ഓടയ്ക്കുവേണ്ടി എടുത്ത മണ്ണും കല്ലും നിർമാണപ്രവർത്തനത്തിലെ കോൺക്രീറ്റ് അവശിഷ്ടങ്ങളും തള്ളാൻ നഗരത്തിനുള്ളിലെ സ്ഥലം മാത്രമേ കിട്ടിയുള്ളോ എന്നാണ് നാട്ടുകാർ ചോദിക്കുന്നത്. അസിസ്റ്റന്‍റ് കമ്മീഷണറുടെ ഓഫീസിനുമുന്നിൽ മരം മുറിച്ച അവശിഷ്ടങ്ങളും മരത്തടികളും കിടപ്പുണ്ട്. കെഎസ്ഇബി നിർമാണപ്രവർത്തനത്തിനിറങ്ങിയാൽ ഒടിഞ്ഞുകിടക്കുന്ന പോസ്റ്റുകളെല്ലാം എടുത്തുകൊണ്ടു പോകാറുള്ളതാണ്. എന്നാൽ ആശ്രാമം റോഡിലേക്കൊന്നും ഇറങ്ങി നോക്കിയാൽ കോൺക്രീറ്റ് പോസ്റ്റുകൾ കിടക്കുന്നതുകാണാം.ആരും എടുത്തുകൊണ്ടു പോയിട്ടില്ല. എവിടെയെങ്കിലും നിർമാണപ്രവർത്തനം നടത്തിയാൽ മിച്ചംവരുന്നതു തള്ളുന്നതു റോഡിലാകരുത്. വാഹനങ്ങൾ പാർക്ക് ചെയ്യാൻ സാധിക്കുന്ന മേഖലകളിൽ പോലും അവശിഷ്ടങ്ങൾ തള്ളിയിരിക്കുകയാണ്. ഇതൊന്നും ആരും എടുത്തുകൊണ്ടു പോകുന്നില്ല. ഇനി ഇതെല്ലാം എടുത്തുകൊണ്ടു പോകാൻ പുതിയകോൺട്രാക്ടർമാർ എത്തേണ്ടിവരും. അതുവരെ ഇതെല്ലാം ഇവിടെ തന്നെ കാണും. പാർക്കിംഗ് പ്രശ്നവും ട്രാഫിക് പ്രശ്നവും നിറഞ്ഞുനിൽക്കുന്ന കൊല്ലം നഗരത്തിൽ എന്തിനാണ് ഇത്തരം അവശിഷ്ടങ്ങൾ തള്ളുന്നതെന്നുമാത്രം മനസിലാകുന്നില്ല. വാഹനങ്ങൾക്കു പാർക്കിംഗ് ഏരിയ പോലും നിർമിച്ചു കൊടുക്കാവുന്ന സ്ഥലങ്ങളിൽ പോലും മാലിന്യങ്ങൾ നിക്ഷേപിക്കുകയാണ്. ഇതൊരു പരിഹാരം അധികാരികളാണ് സ്വീകരിക്കേണ്ടത്. വകുപ്പുകൾ കൂടുതൽ ജാഗ്രത പാലിക്കണം. അപ്പോഴത്തെ പണി പൂർത്തിയാക്കി കൈയും കഴുകി പോകാനുള്ളവരല്ല സർക്കാർ ഉദ്യോഗസ്ഥരെന്ന് മനസിലാക്കണം. ഇത്തരം പ്രവണതകൾ അവസാനിപ്പിക്കണമെന്നാണ് നാട്ടുകാരുടെ ആവശ്യം.

സൂര്യകാന്തി... നീയെത്ര സുന്ദരി...

പുനലൂർ: സഞ്ചാരികളുടെ മനസു കുളിർപ്പിച്ചു സൂര്യകാന്തിപ്പാടങ്ങൾ ശ്രദ്ധേയമാകുന്നു. തമിഴ്നാട്ടിലെ സുന്ദരപാണ്ഡ്യപുരത്തെ സൂര്യകാന്തിപ്പാടങ്ങളാണ് സഞ്ചാരികളുടെ കണ്ണിനു വിരുന്ന് ഒരുക്കുന്നത്. കാറ്റിൽ ആടിയുലഞ്ഞ് സഞ്ചാരികൾക്കു കുളിർമയേക്കുന്ന സുന്ദരപാണ്ഡ്യപുരത്തെ കാഴ്ചകൾ കാണാൻ ഓരോ സീസണിലും വലിയ തിരക്കാണ്. കേരളത്തിൽനിന്നു ലക്ഷക്കണക്കിന് സഞ്ചാരികളാണ് ഇവിടെ എത്താറുളളത്. സീസൺ ആരംഭിച്ചതോടെ ഇവിടേയ്ക്കു സഞ്ചാരികളുടെ പ്രവാഹമാണ്. ഇത്തവണ സൂര്യകാന്തിപ്പൂക്കളുടെ കൃഷി കുറവായിരുന്നു. കഴിഞ്ഞ തവണ സൂര്യകാന്തിപ്പൂക്കൾ പൂത്തു നിന്നിരുന്ന പാടങ്ങളിൽ ഇത്തവണ ചോളവും ചെറിയ ഉളളിയും പച്ചമുളകും തക്കാളിയുമെല്ലാം കൃഷി ചെയ്തിട്ടുണ്ട്. എന്നാലും ഇവിടെ സൂര്യകാന്തിപ്പാടം കാണാൻ കഴിഞ്ഞയാഴ്ച മുതൽ വലിയ തിരക്കാണ്. ഈ മാസം അവസാനത്തോടെ കൂടുതൽ സഞ്ചാരികൾ എത്തുമെന്നാണ് പ്രതീക്ഷിക്കുന്നത്. നിലവിൽ മൂന്നേക്കർ സ്ഥലത്താണ് ഇപ്പോൾ കൃഷി ചെയ്യുന്നത്. വിവിധ കർഷക കട്ടായ്മകളുടെ നേതൃത്വത്തിലാണ് കൃഷി നടത്തുന്നത്. സീസൺ കഴിയുന്നതോടെ ഇതിന്‍റെ വിത്തുകൾ കർഷകർ ശേഖരിക്കും. സൂര്യകാന്തി എണ്ണയ്ക്കുവേണ്ടിയും വിത്തുകൾ ശേഖരിക്കാറുണ്ട്. ഒപ്പം അടുത്ത സീസണിൽ കൃഷി ഇറക്കാൻ വേണ്ടിയും വിത്തുകൾ കർഷകർ സൂക്ഷിച്ചു വയ്ക്കുന്നുണ്ട്. വർഷങ്ങളായി സുന്ദരപാണ്ഡ്യപുരത്ത് സൂര്യകാന്തിപ്പൂക്കൾ വിസ്മയമാണ്. പ്രധാനമായും സഞ്ചാരികളെ ആകർഷിയ്ക്കുന്നതിനുവേണ്ടിയാണ് ഇവിടെ പാടങ്ങൾ ഒരുക്കി കൃഷി ചെയ്തു വരുന്നത്. പൂക്കൾ വാങ്ങാനും സഞ്ചാരികൾ എത്താറുണ്ട്. സുന്ദരപാണ്ഡ്യപുരത്തിനു പുറമെ ചുരണ്ട എന്ന ഗ്രാമത്തിലും കൃഷി നടന്നു വരുന്നു . തമിഴ്നാടിന്‍റെ പൂക്കളോടുള്ള സ്നേഹവും കരുതലും ഏറ്റവും കൂടുതൽ ആകർഷിക്കുന്നതു മലയാളികളെയാണ്. ഓണത്തിന് തമിഴ് നാട്ടിൽ നിന്നാണ് കോടിക്കണക്കിനു രൂപയുടെ പൂക്കൾ ഓണപ്പൂക്കളമിടാനായി കേരളത്തിലെത്താറുള്ളത്. അനിൽ പന്തപ്ലാവ്

തെരുവുനായ്ക്കളെ ഷെൽട്ടർ ഹോമിലേക്ക് മാറ്റണമെന്ന വിധി സ്വാഗതാർഹം: കേരള കർഷക ഫെഡറേഷൻ

അഞ്ചൽ: തെരുവിൽ അലയുന്ന മുഴുവൻ നായ്ക്കളെയും ആറ് ആഴ്ചയ്ക്കുള്ളിൽ ഷെൽട്ടർ ഹോമിലേയ്ക്കു മാറ്റണം എന്ന സുപ്രീം കോടതി ഉത്തരവ് സ്വാഗതർഹമാണെന്നും കേരളത്തിലും ഇത് നടപ്പാക്കണമെന്നും കേരള കർഷക ഫെഡറേഷൻ ആവശ്യപ്പെട്ടു. തെരുവുനായ്ക്കൾ കാരണം പൊതുവഴിയിൽ കൂടി നടക്കുവാൻ കഴിയാത്ത സാഹചര്യമാണ് കേരളത്തിലുള്ളത്. കുട്ടികളെ ഒറ്റയ്ക്കു പുറത്തേയ്ക്കു പോലും ഇറക്കാൻ കഴിയാത്ത സാഹചര്യമാണ് ഉള്ള തെന്നും കേരള കർഷക ഫെഡറേഷൻ സംസ്ഥാന പ്രസിഡന്‍റ് പി.സി. ശിവശങ്കരൻ, സെക്രട്ടറി കെ.എം. മത്തച്ഛൻ, ട്രഷറർ ജോർജ് മുരിക്കൻ എന്നിവർ പ്രസ്താവനയിൽ പറഞ്ഞു.

കളഞ്ഞുകിട്ടിയ പഴ്‌സ് ഉടമയ്ക്ക് തിരികെ നൽകി ലൈൻമാൻ മാതൃകയായി

കുണ്ടറ : കളഞ്ഞുകിട്ടിയ വിലപ്പെട്ട രേഖകളും രൂപയും അടങ്ങിയ പഴ്‌സ് ഉടമയ്ക്ക് തിരികെ നൽകി മാതൃകയായി പെരുമ്പുഴ കെഎസ്ഇബിയിലെ ലൈൻമാൻ ദിലീപ്കുമാർ. ഓട്ടോറിക്ഷ തൊഴിലാളിയായ ഉണ്ണികൃഷ്ണപിള്ളയുടെ രൂപയും വിലപ്പെട്ട രേഖകളും അടങ്ങിയ പേഴ്‌സ് കഴിഞ്ഞദിവസമാണ് നഷ്ടപ്പെട്ടത്. ഇത്പെ രുമ്പുഴ കെ എസ് ഇ ബി യിലെ ലൈൻമാൻ ദിലീപ്കുമാറിന് വഴിയിൽ നിന്നും കിട്ടി. രേഖകളിൽ ഉള്ള മേൽവിലാസത്തിൽ ബന്ധപ്പെട്ട് ഉടമസ്ഥനായ ഉണ്ണികൃഷ്ണപിള്ളയെ വിവരം അറിയിച്ചു. തുടർന്ന് പെരുമ്പുഴ ഓഫീസിലേക്ക് ഉടമസ്ഥനെ വിളിച്ചു ജീവനക്കാരുടെ സാന്നിധ്യത്തിൽ പേഴ്‌സ് തിരികെ നൽകി.

സ്നേഹ സാഹോദര്യ ജ്വാല; വിളംബര വാഹനറാലി നടത്തി

=കുണ്ടറ : കൊല്ലം മെത്രാസന രൂപീകരണത്തിന്‍റെ ശതോത്തര സുവർണജൂബിലി ആഘോഷഭാഗമായി മെത്രാസന യുവജനപ്രസ്ഥാനത്തിന്‍റെ നേതൃത്വത്തിൽ 15ന് നടത്തുന്ന സ്നേഹ സാഹോദര്യ ജ്വാലയ്ക്ക് മുന്നോടിയായി വിളംബര വാഹന റാലി നടത്തി. മുഖത്തല സെന്‍റ് ജോർജ് ഓർത്തഡോക്സ് പള്ളിയിൽ നിന്നാരംഭിച്ച റാലി, സെന്‍റ് ് ജൂഡ് ജംഗ്ഷൻ, പാലമുക്ക് ജംഗ്ഷൻ, മുഖത്തല സെന്‍റ് സ്റ്റീഫൻസ് പള്ളി, പെരുമ്പുഴ ജംഗ്ഷൻ, പെരുമ്പുഴ ജോൺ ദി ബാപ്റ്റിസ്റ്റ് പള്ളി, തുടങ്ങിയ സ്ഥലങ്ങളിലൂടെ നല്ലില സെന്‍റ് ഗബ്രിയേൽ സുബോറോ പള്ളിയിൽ സമാപിച്ചു. നൂറിലധികം പ്രവർത്തകർ അണിനിരന്ന വാഹന റാലിയിൽ ലഹരിവിരുദ്ധ ബോധവൽക്കരണവുമായി ബന്ധപ്പെട്ട് പ്രധാന ഇടങ്ങളിൽ ഫ്ലാഷ് മോബും ക്രമീകരിച്ചു. 15ന് നടക്കുന്ന യോഗത്തിൽ മെത്രാപ്പോലീത്തന്മാർ, മന്ത്രിമാർ, എംഎൽഎമാർ, സാമൂഹ്യ സാംസ്കാരിക രംഗത്തുള്ള പ്രമുഖരും പങ്കെടുക്കും.

ഫാത്തിമ കോളജിൽ ആഗോളപൂർവ വിദ്യാർഥി സമ്മേളനം

കൊല്ല: കൊല്ലം ഫാത്തിമ മാതാ നാഷണൽ കോളജ് 75-ാം ജൂബിലി വർഷാഘോഷ ഭാഗമായി ആഗോള പൂർവ വിദ്യാർഥി സമ്മേളനം സംഘടിപ്പിച്ചു. കോളജ് ഓഡിറ്റോറിയത്തിൽ നടന്ന സംഗമം കോളജിലെ മുൻ പ്രിൻസിപ്പലും മുൻ കൊല്ലം ബിഷപുമായ ഡോ.സ്റ്റാൻലി റോമൻ ഉദ്ഘാടനം ചെയ്തു. കോളജ് പ്രിൻസിപ്പൽ സിന്ധ്യ കാതറീൻ മൈക്കിൾ അധ്യക്ഷത വഹിച്ച യോഗത്തിൽ കോളജ് മാനേജർ ഡോ. അഭിലാഷ് ഗ്രിഗറി മുഖ്യപ്രഭാഷണം നടത്തി. പൂർവ വിദ്യാർഥി സംഘടന തയാറാക്കിയ ഫാത്തിമ ടെൽസ്റ്റാർ പ്രകാശനം ചെയ്തു. കോളജിലെ 75 പൂർവ വിദ്യാർഥികളുടെ നേട്ടങ്ങളും ഓർമക്കുറിപ്പുകളും ഉൾപ്പെടുത്തി പ്രസിദ്ധീകരിച്ച സ്മരണികയാണ് ഫാത്തിമ ടെൽസ്റ്റാർ. ജൂബിലി കൺവീനർ സ്റ്റാൻസിലസ് സ്വാഗതവും പൂർവവിദ്യാർഥി സംഘടന സെക്രട്ടറി മനോജ് കുമാർ നന്ദിയും പറഞ്ഞു. പൂർവവിദ്യാർഥികളും സിനിമാ പിന്നണി ഗായകരും അവതരിപ്പിച്ച ഗാനമേളയുമുണ്ടായിരുന്നു.ഗൃഹാതുരസ്മരണയുണർത്തിയ പൊതിച്ചോറ് എല്ലാവർക്കും നൽകി.

ആയൂര്‍ സെന്‍റ് മേരീസ് മലങ്കര പള്ളിയിൽ ഇടവക തിരുനാളിന് തുടക്കമായി

അഞ്ചല്‍ : ആയൂര്‍ സെന്‍റ് മേരീസ് മലങ്കര പള്ളിയിലെ ഇടവക തിരുനാളിനും പരിശുദ്ധ ദൈവമാതാവിന്‍റെ സ്വര്‍ഗാരോപണ തിരുനാളിനും തുടക്കമായി. ഞായറാഴ്ച പ്രഭാത പ്രാര്‍ഥനയ്ക്കും വിശുദ്ധ കുര്‍ബാനയ്ക്കും ശേഷം ഇടവക വികാരി ഫാ. ജോണ്‍ അരീക്കല്‍ കൊടിയേറ്റ് നടത്തിയതോടെയാണ് തിരുനാള്‍ ആഘോഷങ്ങള്‍ക്ക് തുടക്കമായത്. 15 വരെ നടക്കുന്ന തിരുനാള്‍ ആഘോഷങ്ങളുടെ ഭാഗമായി ജപമാല പ്രാര്‍ഥന, സന്ധ്യ നമസ്കാരം, വിശുദ്ധ കുര്‍ബാന എന്നിവ നടക്കും. 14ന് വൈകുന്നേരം ആറിന് ഭക്ത സംഘടനകളുടെ വാര്‍ഷികം നടക്കും. 15ന് രാവിലെ എട്ടിന് ചെമ്പ് വയ്ക്കലും ഉച്ചകഴിഞ്ഞ് മൂന്നിന് ചെമ്പ് എടുപ്പും നടക്കും. പിന്നീട് ജപമാല പ്രാര്‍ഥനയും സന്ധ്യ നംസ്കാരവും ഉണ്ടാകും. തുടര്‍ന്നു മാവേലിക്കര മുന്‍ ഭദ്രാസനാധ്യക്ഷന്‍ ഡോ. ജോഷ്വാ മാര്‍ ഇഗ്നാത്തിയോസ് മെത്രാപൊലീത്തയ്ക്ക് സ്വീകരണം. തുടര്‍ന്നു ഭക്തിനിര്‍ഭരമായ റാസയും നടക്കും. വാദ്യമേളങ്ങള്‍ക്കൊപ്പം കത്തിച്ച മെഴുകുതിരികളുമായി പ്രാര്‍ഥന മന്ത്രങ്ങള്‍ ചൊല്ലിയും നൂറുകണക്കിനു വിശ്വാസികള്‍ റാസയ്ക്ക് അകമ്പടിയാകും. കൊടിയിറക്കും തുടര്‍ന്നുള്ള സ്നേഹ ഭോജനത്തോടെയും തിരുനാള്‍ ആഘോഷങ്ങള്‍ക്ക് സമാപനമാകുമെന്ന് ഇടവക വികാരി ഫാ. ജോണ്‍ അരീക്കല്‍, ട്രസ്റ്റി സി.എം. ചാക്കോ ശങ്കരവേലില്‍, സെക്രട്ടറി രാജന്‍ ജേക്കബ് തട്ടാരഴികത്ത് എന്നിവര്‍ അറിയിച്ചു.

മണ്ണൂരിലെ സഹകരണ ആശുപത്രി അടച്ചുപൂട്ടിയിട്ടു ആറു വര്‍ഷം

അഞ്ചല്‍ : ഇട്ടിവ പഞ്ചായത്തിലെ മണ്ണൂര്‍ കേന്ദ്രീകരിച്ച് 1988 ലാണ് കൊട്ടാരക്കര താലൂക്ക് സഹകരണ ആശുപത്രി എന്ന പേരില്‍ സഹകരണ വകുപ്പിന് കീഴില്‍ ആശുപത്രി ആരംഭിക്കുന്നത്. വിദേശത്തും സ്വദേശത്തുമുള്ള പ്രദേശവാസികളില്‍ നിന്നും ചെറുതും വലുതമായി പിരിച്ച തുക ഉപയോഗിച്ച് 50 സെന്‍റ് വസ്തുവാങ്ങി. അന്നത്തെകാലത്ത് മികച്ച രീതിയില്‍ പ്രവര്‍ത്തിക്കാന്‍ കഴിയും വിധം കെട്ടിടവും അനുബന്ധ സൗകര്യങ്ങളും ഒരുക്കി. നിരവധി ഡോക്ടര്‍മാര്‍, ലാബ്, കിടത്തി ചികിത്സഅടക്കമുള്ള സംവിധാനങ്ങള്‍. എന്നാല്‍ കോണ്‍ഗ്രസ് നേതൃത്വം നല്‍കിവന്ന ഭരണ സമിതിയിലെ ചേരിപ്പോരും അധികാര വടംവലിയും മണ്ണൂര്‍ എന്ന ഗ്രാമം ഏറെ പ്രതീക്ഷയോടെ സ്വീകരിച്ച ആശുപത്രിയെ താഴിട്ട് പൂട്ടേണ്ട അവസ്ഥയില്‍ കാര്യങ്ങള്‍ എത്തിച്ചു. കഴിഞ്ഞ ആറുവര്‍ഷത്തിലധികമായി പൂട്ടികിടക്കുന്ന ആശുപത്രി കെട്ടിടം ഇന്ന് നാശത്തിന്‍റെ വക്കിലാണ്. ചുറ്റും കാടുകയറി സാമൂഹികവിരുദ്ധരും ഇഴ ജന്തുക്കളും തെരുവുനായ്ക്കളും സ്ഥലം കീഴടക്കി. ചില സ്വകാര്യ വ്യക്തികളും ആശുപത്രി ഭൂമി കൈയേറാനുള്ള നീക്കം നടത്തുന്നതായി ആരോപണം ഉയര്‍ന്നിട്ടുണ്ട്. കോണ്‍ഗ്രസ് പ്രവര്‍ത്തകനായിരുന്ന ചന്ദ്രമോഹനന്‍ പ്രസിഡന്‍റ് ആയിരിക്കേ ആശുപത്രിക്ക് സുവര്‍ണകാലമായിരുന്നു എന്നു നാട്ടുകാര്‍ പറയുന്നു. എന്നാല്‍ ചേരിപ്പോരും അധികാരത്തിന് വേണ്ടിയുള്ള മത്സരങ്ങള്‍ക്കും ഒടുവില്‍ ചന്ദ്രമോഹന്‍ താഴെവീണു. പിന്നീട് ഇങ്ങോട്ട് പല പ്രസിഡന്‍റ്മാര്‍ ആശുപത്രിയുടെ തലപ്പത്തെത്തി. പക്ഷേ ആശുപത്രി മാത്രം താഴേക്കു പോയി. സഹകരണ വകുപ്പില്‍ നിന്നും ഗ്രാന്‍ഡ് ഇനത്തിലും വായ്പ ഇനത്തിലും ലഭിച്ച ലക്ഷങ്ങള്‍ ആര ്ഉപയോഗിച്ചുവെന്നോ എന്തിനായി ചിലവഴിച്ചുവെന്നോ ആര്‍ക്കും അറിയില്ല. തുക തിരിച്ചടക്കാതായതോടെ സഹകരണ വകുപ്പ് ആര്‍ആര്‍ നടപടികള്‍ ആരംഭിച്ചിരിക്കുകയാണിപ്പോള്‍. സഹകരണ വകുപ്പില്‍ നിന്നും ലഭിച്ച തുക വിനിയോഗത്തില്‍ ഉള്‍പ്പടെ ഭരണസമിതിയുടെ പിടിപ്പുകേടും അഴിമതിയും വിജിലന്‍സ് അന്വേഷിക്കണം എന്ന് ആവശ്യപ്പെട്ടുകോടതിയെ സമീപിക്കാനൊരുങ്ങുകയാണ് ആശുപത്രിക്കായി ആയിരങ്ങള്‍ നല്കിയ ഒരു വിഭാഗം നാട്ടുകാര്‍. സര്‍വക്ഷിയോഗം ചേര്‍ന്ന് ജനങ്ങളെ വിശ്വാസത്തിലെടുത്തുകൊണ്ട് ആശുപത്രിയുടെ പ്രവര്‍ത്തനം പുനരാംഭിക്കണം എന്നും മികച്ച രീതിയില്‍ പ്രവര്‍ത്തിച്ചുവന്ന ആശുപത്രിയെ നാഥനില്ലാ കളരിയാക്കി മാറ്റിയവര്‍ക്കെതിരെ നടപടി വേണമെന്നും പ്രദേശവാസിയും ആദ്യകാല ഭരണസമിതി അംഗങ്ങളില്‍ ഒരാളുമായ സജി വര്‍ഗീസ് ആവശ്യപ്പെട്ടു. ആശുപത്രിയുടെ പ്രവര്‍ത്തനം നിലച്ചത് കാരണം സാധാരണ ജനങ്ങള്‍ ഏറെ ബുദ്ധിമുട്ടുകയാണെന്നും നാട്ടുകാരുടെ വികാരം മാനിച്ചുകൊണ്ടു ആശുപത്രി എത്രയും വേഗം തുറന്നു പ്രവര്‍ത്തിക്കാന്‍ ആവശ്യമായ നടപടി ബന്ധപ്പെട്ടവര്‍ സ്വീകരിക്കണം എന്നും വാര്‍ഡ് അംഗം ലില്ലിക്കുട്ടി പറയുന്നു. ആശുപത്രിയുടെ സംരക്ഷണവും പുനരാംഭിക്കണം എന്ന ആവശ്യവും ചൂണ്ടിക്കാട്ടി സോഷ്യല്‍ മീഡിയ കാമ്പയിന്‍ ആരംഭിക്കാനുള്ള തീരുമാനവും നാട്ടുകാര്‍ എടുത്തിട്ടുണ്ട്. അതേസമയം ആശുപത്രി പുനരാംഭിക്കാന്‍ എന്തു ചെയ്യാന്‍ കഴിയുമെന്ന് പരിശോധിച്ചുവരികയാണെന്ന് നിലവിലെ ഭരണസമിതി അംഗങ്ങളില്‍ ചിലര്‍ വ്യക്തമാക്കി. പി. സനില്‍കുമാര്‍

മുഖ്യമന്ത്രിക്ക് ഛായാചിത്രം സമ്മാനിച്ച് ശ്യാം കൃഷ്ണ‍

കുളത്തൂപ്പുഴ: മുഖ്യമന്ത്രി അടക്കമുള്ളവർക്ക് താൻ വരച്ച ചിത്രങ്ങൾ സമ്മാനിച്ചതിന്‍റെ സന്തോഷത്തിലാണ് കുളത്തൂപ്പുഴ എംആർഎസിലെ പ്ലസ് വൺ വിദ്യാർഥിയായ ശ്യാം കൃഷ്ണ. ചെറുപ്പം മുതലേ ചിത്രരചനയിൽ താത്പര്യമുണ്ടായിരുന്ന ശ്യാം കൃഷ്ണയ്ക്ക് ജില്ലാ സംസ്ഥാന മത്സരങ്ങളിലും പട്ടിക വർഗവികസന വകുപ്പ് സംസ്ഥാന തലത്തിൽ നടത്തുന്ന സർഗോത്സവത്തിലും എസ്‌സിഇആർടിയുടെ പാഠപുസ്തകത്തിലും ഉൾപ്പെടെ ചിത്രങ്ങൾ വരയ്ക്കാനുള്ള ഭാഗ്യം ലഭിച്ചു. ശ്യാമിന്‍റെ ആഗ്രഹമായിരുന്നു മുഖ്യമന്ത്രിയുടെ ഛായാചിത്രം വരച്ച് അദ്ദേഹത്തിന് സമ്മാനമായി നൽകണമെന്നുള്ളത്. അതോടൊപ്പം മന്ത്രി ഒ.ആർ. കേളുവിന്‍റെയും പട്ടിക വർഗ വികസന വകുപ്പ് ഡയറക്ടർ രേണു രാജിന്‍റെയും ഛായാചിത്രം വരച്ച് നേരിട്ട് നൽകാൻ കഴിഞ്ഞു.ശ്യാമിന്‍റെ ആഗ്രഹം നിറവേറ്റാൻ പട്ടിക വർഗവികസന വകുപ്പിന്‍റെ വിദ്യാഭ്യസ ഡെപ്യൂട്ടി ഡയറക്ടർ വൈ. ബിപിൻദാസ്,സ്കൂൾ സീനിയർ സൂപ്രണ്ട് വി.സുരേഷ് കുമാർ, പ്രഥമാധ്യാപിക സി.ഗിരിജ ഉൾപ്പെടെയുള്ളവർ സഹായിച്ചിരുന്നു. ഇടുക്കി ജില്ലയിലെ കൂവക്കണ്ടം സ്വദേശിയായ ശശി മാണിക്യത്തിന്‍റെയും കെ.വി വിലാസിനിയുടെ ഇളയ മകനാണ് ശ്യാം കൃഷ്ണ.

കുളത്തുപ്പുഴ ബിഎംജി ഹൈസ്കൂളിൽ ദീപിക നമ്മുടെ ഭാഷ പദ്ധതി

കുളത്തുപ്പുഴ: വിദ്യാർഥികളിൽ വയനശീലം വളർത്തുക എന്ന ലക്ഷ്യത്തോടെ ദീപിക നമ്മുടെ ഭാഷ പദ്ധതിക്ക് ബിഎംജി ഹൈസ്കൂളിൽ തുടക്കമായി.പൂർവ വിദ്യാർഥി ബിനു മാക്കുളത്ത്‌ വിദ്യാർഥി പ്രധിനിധി പ്രിസ്കില്ല എൽസ വർഗീസിന് ദീപിക ദിനപത്രം നൽകി ഉദ്ഘാടനം ചെയ്തു. സ്കൂൾ ഹെഡ്മാസ്റ്റർ കെ.ഷാജുമോൻ അധ്യക്ഷത വഹിച്ച ു.പിടിഎ പ്രസിഡന്‍റ് പി. ആർ. സന്തോഷ്‌കുമാർ, ലോക്കൽ മാനേജർ ഫാ. മാത്യു ചരിവുകാലായിൽ, വൈസ് പ്രസിഡന്‍റ് സാനു ജോർജ്, ഫാ. വിൽ‌സൺ ചരുവിള എന്നിവർ പ്രസംഗിച്ചു. ദീപിക പുനലൂർ ഏരിയ സർക്കുലേഷൻ മാനേജർ വർഗീസ് ജോസഫ്, അധ്യാപകരായ സുനിൽ കെ തോമസ്, ജോസ്മോൻ, അപർണ, എബിൻ ലൂക്കോസ്, ജൂലി വി സജി,ലിസി തോമസ് എന്നിവർ നേതൃത്വം നൽകി.

യൂത്ത് കോണ്‍ഗ്രസ് കമ്മിറ്റി രൂപീകരിച്ചു

ചവറ : ചവറ പഞ്ചായത്തില്‍ പുതിയതായി വന്ന ചോല വാര്‍ഡില്‍ യൂത്ത് കോണ്‍ഗ്രസ് കമ്മിറ്റി രൂപീകരിച്ചു. യൂത്ത് കോണ്‍ഗ്രസ് ജില്ലാ വൈസ് പ്രസിഡന്‍റ് ആദര്‍ശ് ഭാര്‍ഗവന്‍ ഉദ്ഘാടനം ചെയ്തു.മണ്ഡലം പ്രസിഡന്‍റ് അനില്‍ കുമാര്‍ അധ്യക്ഷനായി. യൂത്ത് കോണ്‍ഗ്രസ് സംസ്ഥാന സെക്രട്ടറി ശരത് പട്ടത്താനം, ജില്ലാ സെക്രട്ടറി മിത്രന്‍, നിയോജക മണ്ഡലം പ്രസിഡന്‍റ് അനന്തന്‍ പന്മന,റിനോഷ, കോലത്ത് അനന്തു,അജി, ശിവകുമാര്‍,കണ്ണന്‍ പുതുക്കാട്, ഇമ്മാനുവല്‍,കോണ്‍ഗ്രസ് നേതാക്കള്‍ തുടങ്ങിയവര്‍ പ്രസംഗിച്ചു.

ഓൺലൈൻ മദ്യവില്പന നീക്കം പിൻവലിക്കണം: കെസിബിസി മദ്യവിരുദ്ധ സമിതി

കൊല്ലം: ഓൺലൈൻ വില്പനയിലൂടെ മദ്യം വീട്ടിലെത്തിച്ച് കുടുംബങ്ങളുടെ സമാധാനം തകർക്കാനുള്ള നീക്കം ഉപേക്ഷിക്കണ മെന്നു കെസിബിസി മദ്യവിരുദ്ധ സമിതി കൊല്ലം രൂപതാ പ്രസിഡന്‍റ് യോഹന്നാൻ ആന്‍റണിയും ജനറൽ സെക്രട്ടറി എ.ജെ.ഡിക്രൂസും പ്രസ്താവനയിൽ ആവശ്യപ്പെട്ടു. മദ്യശാലകളിലെ തിരക്ക് കുറയ്ക്കാൻ എന്ന വ്യാജേന വീടുകളിൽ മദ്യമെത്തിച്ച് കുടുംബങ്ങളെകൂടി മദ്യത്തിൽ മുക്കിക്കൊല്ലാനുള്ള നീക്കത്തിൽ സമിതി പ്രതിഷേധിച്ചു. സർക്കാരിൻറെ മദ്യനയത്തിലെ ഏറ്റവും നിന്ദ്യവും മനുഷ്യത്വരഹിതവുമായ ഭീകരമുഖമാണ് ഈ നീക്കത്തിലൂടെ ഒരിക്കൽ കൂടി മറനീക്കി പുറത്തുവരുന്നതെന്ന് അവർ ചൂണ്ടിക്കാട്ടി. മദ്യത്തിന്‍റെ ഉപയോഗവും ലഭ്യതയും പടിപടിയായി കുറച്ചുകൊണ്ടുവരുമെന്ന തെരഞ്ഞെടുപ്പ് വാഗ്ദാനം നിരന്തരമായി ലംഘിച്ചുകൊണ്ട് മദ്യമുതലാളിത്ത താല്പര്യങ്ങളുടെ സംരക്ഷകരായി സർക്കാർ അധ:പതിച്ചിരി ക്കുകയാണ്. ഓൺലൈൻ മദ്യവില്പനക്കെതിരെ ജനകീയ പ്രതിരോധം സൃഷ്ടിക്കുമെന്നും ജനദ്രോഹ മദ്യനയത്തിനെതിരെ പോരാട്ടങ്ങൾ സംഘടിപ്പിക്കുമെന്നും യോഹന്നാൻ ആന്‍റണിയും എ.ജെ.ഡിക്രൂസും പ്രസ്താവനയിൽ മുന്നറിയിപ്പ് നൽകി.

ചാത്തന്നൂരിന്‍റെ ഹൃദയഭാഗത്ത് ആക്രിക്കൂമ്പാരം

ചാത്തന്നൂർ: നഗരത്തിന്‍റെ ഹൃദയഭാഗത്തു വാഹനങ്ങളുടെ ശവപ്പറമ്പ്. കോടികൾ വിലമതിക്കുന്ന വാഹനങ്ങളാണ് കാറ്റും മഴയും വെയിലുമേറ്റ് ഇവിടെ കിടന്നു നശിക്കുന്നത്. കാലപ്പഴക്കം കൊണ്ട് ചെറിയ മരങ്ങളും കാടും പടലവും വാഹനങ്ങളിലൂടെ പടർന്നു പന്തലിക്കുന്നു. ‘വിടർന്നു വിലസീടിന നിന്നെ നോക്കി ആരാകിലെന്ത് മിഴിയുള്ളവർ നിന്നിരിക്കാം...’ എന്ന കുമാരനാശാന്‍റെ വരികൾക്കു പാരടിയായി തകർന്നു തരിപ്പണമായ നിങ്ങളെ നോക്കി ആരാകിലെന്ത് മിഴികളിൽ നീരുറവ ചോരും എന്ന അവസ്ഥയാണ്. ചാത്തന്നൂർ നഗരത്തിന്‍റെ ഹൃദയഭാഗത്തു സ്ഥിതി ചെയ്യുന്ന ചാത്തന്നൂർ പോലീസ് സ്റ്റേഷന് ഏകദേശം ഒന്നേമുക്കാൽ ഏക്കറോളം വരുന്ന ഭൂസ്വത്ത് സ്വന്തമായിട്ടുണ്ട്. ഇതിൽ എസിപിയുടെ ഓഫീസും പോലീസ് സ്റ്റേഷനും ഫിംഗർപ്രിന്‍റ് ബ്യൂറോയും പോലീസ് ക്വാർട്ടേഴ്സുകളുമുണ്ട്. ഈ ഭാഗങ്ങളിലെല്ലാം വാഹനങ്ങൾ നിരന്നുകിടക്കുകയാണ്. നിലവിൽ പോലീസ് സ്റ്റേഷൻ പരിസരത്ത് വിവിധ കേസുകളിൽപ്പെട്ട 134 വാഹനങ്ങളും അവകാശികൾ ഇല്ലാത്ത 24 വാഹനങ്ങളും കിടപ്പുണ്ട്. കാലപ്പഴക്കം കൊണ്ടു നശിച്ചു പോയതും അവശിഷ്ടമായി പരിണമിച്ചു നീക്കം ചെയ്യാനാകാത്തതുമായ വാഹന ഭാഗങ്ങൾ മേലധികാരികളിൽനിന്നും കിട്ടുന്ന നിർദേശപ്രകാരം നീക്കം ചെയ്യുന്നതാണെന്നും വിവരാവകാശ നിയമപ്രകാരം പൊതു പ്രവർത്തകനായ ജി.ദിവാകരന് അടുത്ത കാലത്തായി സ്റ്റേഷൻ അധികൃതർ മറുപടി നല്കിയിരുന്നു. എങ്കിലും എന്തെങ്കിലും പുരോഗതി ഉള്ളതായി കാണുന്നില്ല.അബ്കാരി കേസുകൾ, മയക്കുമരുന്ന് കടത്ത്, മണൽ - കര മണ്ണ് കടത്ത്, അപകടത്തിൽപ്പെട്ടവ തുടങ്ങിയ കേസുകളിൽ കുടുങ്ങിയ വാഹനങ്ങളാണ് കിടന്നു നശിക്കുന്നത്. സ്കൂട്ടർ, ഓട്ടോ, ടെമ്പോ ടിപ്പർ തുടങ്ങി എല്ലാ വിഭാഗത്തിൽപ്പെട്ട വാഹനങ്ങളും ഇക്കൂട്ടത്തിലുണ്ട്. ശിക്ഷിക്കപ്പെട്ട വാഹനങ്ങളും രേഖകളില്ലാത്ത വാഹനങ്ങളും മോഷ്‌ടിക്കപ്പെട്ട വാഹനങ്ങളും നശിക്കുന്നവയിൽ ഉൾപ്പെടും. പോലീസ് സ്റ്റേഷന്‍റെ പിൻഭാഗത്ത് ചുറ്റുമതിലില്ലാത്തതും കാടുപിടിച്ചു കിടക്കുന്നതും മോഷ്‌ടാക്കൾക്കു സുവർണാവസരമാണ് നല്കുന്നത്. ഈ ഭാഗത്തു കൂട്ടിയിട്ടിരിക്കുന്ന വാഹനങ്ങളിൽ നിന്നും ഉപയോഗിക്കാൻ കൊള്ളാവുന്ന പാർട്സുകൾ മോഷണം പോകുന്നുണ്ട്. അതാരും ശ്രദ്ധിക്കാറുമില്ല. ഒരിക്കൽ സ്റ്റേഷനു മുൻവശം പഴയ ദേശീയപാതയിൽ കിടന്ന കേസിൽ ഉൾപ്പെട്ട വാഹനത്തിൽ നിന്നും ബാറ്ററി മോഷ്‌ടിച്ച സംഘത്തെ പിന്നീട് അറസ്റ്റ് ചെയ്തിരുന്നു. ദേശീയപാതയോരത്ത് കിടന്ന വണ്ടിയിൽ നിന്നും മോഷണം നടത്താമെങ്കിൽ ആരുടെയും ശ്രദ്ധ പതിയാത്ത ഭാഗത്ത് കിടക്കുന്ന വണ്ടികളുടെ അവസ്ഥ ഊഹിക്കാവുന്നതേയുള്ളൂ.ചാത്തന്നൂർ പോലീസ് സബ് ഡിവിഷ െ ന്‍റ പരിധിയിൽപ്പെട്ട പാരിപ്പള്ളി, പരവൂർ, കൊട്ടിയം, ചാത്തന്നൂർ പോലീസ് സ്റ്റേഷൻ പരിസരങ്ങളിലും നൂറുകണക്കിനു വാഹനങ്ങൾ ഉപയോഗശൂന്യമായി നശിക്കുന്നുണ്ട്. പരവൂർ പോലീസ് സ്റ്റേഷനിൽ കുറച്ചു കാലം മുമ്പ് കേസിൽപ്പെട്ട വാഹനങ്ങൾ ലേലം ചെയ്തുനല്കിയിരുന്നു. ചാത്തന്നൂർ എക്സൈസ് ഓഫീസിലും നിരവധി വാഹനങ്ങളാണ് നശിച്ചു കൊണ്ടിരിക്കുന്നത്.

പോലീസ് സ്റ്റേഷൻ അഥവാ വാഹനങ്ങളുടെ ശവപ്പറന്പ്

നടപ്പിലും ഇരിപ്പിലും വേഷത്തിലും പ്രവൃത്തിയിലും പോലീസ് മാറി. നല്ല ചമയത്തോടെ പോലീസ് സ്റ്റേഷനുകൾ മാറിയിരിക്കുന്നു. ജനകീയ പോലീസുകാരായി, മാതൃക പോലീസ് സ്റ്റേഷനുകളുണ്ടായി. സ്ത്രീകൾക്കുവേണ്ടി വാദിക്കാനും പറയാനും കേൾക്കാനും വനിത സെല്ലുകളും വനിത പോലീസ് ഉദ്യോഗസ്ഥരും വന്നു. കേസ് അന്വേഷണത്തിൽ കേരള പോലീസിനെ വെല്ലാൻ ആരുമില്ലാത്ത അവസ്ഥയായി. വീട് മനോഹരം വീടിനു ചുറ്റും കാടും ഇഴജന്തുക്കളും നിറഞ്ഞിരിക്കുകയാണെങ്കിൽ എന്താണ് അവസ്ഥ. ഈ അവസ്ഥയാണ് കേരളത്തിലെ ഭൂരിപക്ഷം പോലീസ് സ്റ്റേഷനുകളിലും. കേസിൽപ്പെട്ടു പിടിച്ചെടുത്ത് കൊണ്ടുവന്നിട്ടിരിക്കുന്ന വാഹനങ്ങളുടെ അവസ്ഥ മിക്ക പോലീസ് സ്റ്റേഷനുകളിലും കാണേണ്ടതു തന്നെയാണ്. വിവിധ കേസുകളിൽ ജില്ലയിലെ പോലീസ് സ്റ്റേഷൻ പരിസരങ്ങളിൽ കിടക്കുന്ന തൊണ്ടി വാഹനങ്ങൾ ഉണ്ടാക്കുന്ന തലവേദനകൾ ചെറുതല്ല. ലക്ഷങ്ങൾ വിലമതിക്കുന്ന വാഹനങ്ങൾ വെയിലും മഴയും കൊണ്ട് തുരുന്പെടുക്കുകയാണ്. ഒരു വശത്ത് വാഹനങ്ങൾ നാശമാകുന്നു എന്നതും മറുവശത്ത് ഈ വാഹനങ്ങൾമൂലം ഉണ്ടാകുന്ന ദുരിതങ്ങളും പ്രശ്നങ്ങൾ ഉണ്ടാക്കുന്നുണ്ട്. കൊല്ലത്ത് വെസ്റ്റ് പോലീസ് സ്റ്റേഷനിലും ഈസ്റ്റ് പോലീസ് സ്റ്റേഷന്‍റെ മുന്നിലും ഇരവിപുരം - വളത്തുംഗൽ റോഡിൽ ഇരവിപുരം സ്റ്റേഷന് മുന്നിലും തുരുമ്പ് കേറി നശിക്കുന്നത് പോലീസ് പിടിച്ചെടുത്ത വാഹനങ്ങളാണ്. ലക്ഷങ്ങൾ വിലമതിക്കുന്ന തൊണ്ടി വാഹനങ്ങളാണ് മഴയും വെയിലുമേറ്റ് തുരുമ്പെടുത്ത് നശിക്കുന്നത്. പ്രധാന പാതയോരങ്ങളോട് ചേർന്ന പല പോലീസ് സ്റ്റേഷനുകളും അനുഭവിക്കുന്ന ഏറ്റവും പ്രധാന പ്രശ്നങ്ങളിൽ ഒന്ന് സ്ഥലപരിമിതിയാണ്. അതിനൊപ്പം തൊണ്ടി വാഹനങ്ങൾകൂടി സൂക്ഷിക്കാൻ സ്ഥലം കണ്ടെത്തേണ്ടി വരുന്നതോടെ ബുദ്ധിമുട്ടുന്നത് പോലീസുകാർ തന്നെയാണ്. നിയമ നടപടികൾ വേഗത്തിൽ പൂർത്തിയാക്കുന്നതിലും തൊണ്ടി വാഹനങ്ങൾ ഉടമകൾക്ക് വിട്ടുനൽകുകയോ ലേലം ചെയ്തു നൽകുകയോ ചെയ്യുന്നതിലും ഉണ്ടാകുന്ന കാലതാമസമാണ് ഇക്കാര്യത്തിൽ പ്രശ്നങ്ങൾ സൃഷ്ടിക്കുന്നത്. കേസായി പോയാൽ വാഹനത്തിന്‍റെ അവസ്ഥ എന്തായിരിക്കുമെന്ന് പോലീസ് സ്റ്റേഷൻ പരിസരത്തു പോയി നോക്കിയാൽ മനസിലാകും. വാഹനമെല്ലാം മഴയും വെയിലും മഞ്ഞും കൊണ്ടു കാട്ടുവള്ളികൾചുറ്റി പഴകിദ്രവിച്ചു കിടക്കുന്നത് കാണാം. പുതിയ വാഹനങ്ങൾ പോലും ഇവിടെ കിട‌പ്പുണ്ട്. വർഷങ്ങളായി കിടക്കുന്ന വാഹനങ്ങളുണ്ട്. കേസെല്ലാം കഴിഞ്ഞു ഇതെല്ലാം എടുക്കാൻ പറ്റുമോ. തുരുന്പിച്ച പാർട്സ് വല്ലതും കിട്ടിയാൽ ഭാഗ്യം. കേസ് തീരുന്നതുവരെ സൂക്ഷിക്കുന്ന പോലീസ് സ്റ്റേഷനുകളിൽ കിടക്കുന്ന വാഹനങ്ങളുടെ അവസ്ഥയാണിത്.ആർക്കും പ്രയോജനമില്ല. സർക്കാരും പോലീസുകാർക്കും വാഹനമുടമയ്ക്കും പ്രയോജനമില്ലാതെ കിടന്നു നശിക്കുന്നു. ഇതിനൊരു മാറ്റം അനിവാര്യമാണ്. ജില്ലയിലെ ഭൂരിപക്ഷം. ആർക്കും വേണ്ടാത്ത വാഹനങ്ങൾ കുണ്ടറ : ക്രമസമാധാനപാലനത്തിൽ ഒന്നാം സ്ഥാനത്ത് നിൽക്കുന്ന കുണ്ടറപോലീസ് സ്റ്റേഷൻ സ്ഥല പരിമിതിയിൽ വീർപ്പുമുട്ടുമ്പോഴും സ്റ്റേഷൻ പരിസരം ആക്രി കൂമ്പാരമായി മാറി കഴി ഞ്ഞു. സ്റ്റേഷൻ റോഡിന്‍റെ ഇരുവശങ്ങളിലും ഒഴിഞ്ഞു കിടക്കുന്ന പറമ്പുകളിലും എല്ലാം തന്നെ വർഷങ്ങളായി പിടിച്ചെ ടുത്ത വണ്ടികളുടെ നീണ്ട നിര തന്നെ കാണാം. കുണ്ടറ അഞ്ചാലുംമൂട് ഭാഗത്ത് നിന്നും കല്ലട ഭാഗത്തുനിന്നും വാഹനത്തിൽ സഞ്ചരിക്കുമ്പോൾ മാന്യമായി കാൽനട പാത പോലും ഇല്ലാത്ത റോഡിന്‍റെ ഇരുവശവും രണ്ട് കിലോമീറ്റർ ദൂരെ നിന്നേ 15 വർഷമായി പിടിച്ചെടുത്ത വാഹനങ്ങൾ കാണാം. മണൽ നിറച്ച ലോറികൾ പുല്ലും കാടും മൂടിയിരിക്കുന്നു. കത്തിക്കരിഞ്ഞ കാറുകൾ ചാര നിറത്തിൽ കിടക്കുന്നു. എസ്‌യുവികളും ഇക്കൂട്ടത്തിലുണ്ട്. മഞ്ഞയും കറുപ്പും കലർന്ന കവിൾ ഒട്ടിയ മുച്ചക്ര വാഹനങ്ങൾ, നിരത്തിലിറങ്ങിയപ്പോൾ ഇരുചക്രമായിരുന്നെങ്കിലും കാണുമ്പോൾ ഒരു ചക്രം മാത്രം കാണുന്ന ഭൂഗോളത്തി െന്‍റ ആകൃതിയിലായ മുന്തിയ ബൈക്കുകൾ, സ്ത്രീ പുരുഷ ഭേദമന്യേ കരയിലെ വിമാനം എന്ന് വിശേഷിപ്പിക്കാവുന്ന ഗിയർലെസ് സ്കൂട്ടറുകൾ തുടങ്ങി അന്യം നിന്നുപോയ മോപ്പടുകൾ വരെ നിരനിരയായി കിടക്കുകയാണ് ഇവിടെ. റോഡുകളുടെ ഇരുഭാഗങ്ങളിൽ മാത്രമല്ല ഈ പറഞ്ഞ വർഗ ഗണത്തിൽ പെട്ട പിടിച്ചെടുത്തതും അപകടത്തിൽ പെട്ടതുമായ വാഹനങ്ങൾ കൊണ്ട് പോലീസ് സ്റ്റേഷ െ ന്‍റ നാല് ചുറ്റും അലങ്കരിക്കുന്നു എന്നും പറയാം. നാശത്തിന്‍റെ വക്കിൽ അഞ്ചല്‍ : വിവിധ കേസുകളില്‍പ്പെട്ട് മലയോര മേഖലയിലെ വിവിധ പോലീസ് സ്റ്റേഷനുകളിലായി ആയിരത്തോളം വാഹനങ്ങളാണ് നശിച്ചും നാശത്തിന്‍റെ വക്കിലുമായി കിടക്കുന്നത്. മയക്കുമരുന്ന്, അബ്കാരി, മദ്യപിച്ചു ഓടിച്ചു അപകടത്തിനിടയാക്കിയത്, വിവിധ കേസുകളിലെ തൊണ്ടിമുതലായി കണ്ടുകെട്ടിയതടക്കമുള്ള വാഹനങ്ങളാണ് പോലീസ് സ്റ്റേഷന്‍ പരിസരങ്ങളില്‍ കിടന്ന് നശിക്കുന്നത്. ഇതുകൂടാതെ പാതയിലൂടെ മനുഷ്യ ജീവന് ഭീഷണിയാകും വിധം ചീറിപ്പായുന്ന ബൈക്കുകളും നിരവധിയുണ്ട്. റൂറല്‍ ജില്ലയുടെ കിഴക്കന്‍ മേഖലയില്‍ അഞ്ചല്‍ ഏരൂര്‍ പോലീസ് സ്റ്റേഷനുകളില്‍ ധാരാളം പിടിച്ചെ‌ടുത്ത വാഹനങ്ങൾ കിടപ്പുണ്ട്. ഇതുമൂലം വിവിധ ആവശ്യങ്ങള്‍ക്കായി എത്തുന്നവര്‍ എവിടെയെങ്കിലും വാഹനങ്ങള്‍ പാര്‍ക്ക് ചെയ്തു എത്തേണ്ട അവസ്ഥയാണ്. പിടികൂടുന്ന വാഹനങ്ങള്‍ പോലീസ് സ്റ്റേഷനു പുറത്തേക്ക് ഇടണ്ട അവസ്ഥയുമുണ്ട്. ഇത്തരം വാഹനങ്ങളില്‍ നിന്നും ബാറ്ററി, ഹോണ്‍ ഉള്‍പ്പെടെ അഴിച്ചുകൊണ്ടുപോകുന്ന സ്ഥിതിവരെ ഉണ്ടായിട്ടുണ്ട്. ഇതിനും ഉത്തരം പറയേണ്ടതും നിയമ നടപടി നേരിടേണ്ടതും പോലീസുകാര്‍ തന്നെയാണ്. അവകാശികള്‍ ഇല്ലാത്ത വാഹനങ്ങള്‍ പോലീസിന് ഉപയോഗിക്കുകയോ ലേലത്തില്‍ വില്‍ക്കുകയോ ചെയ്യാം എന്ന് പോലീസ് ചട്ടത്തില്‍ പറയുന്നുണ്ടെങ്കിലും ഇതിനുള്ള അനുമതി ഉന്നതങ്ങളില്‍ നിന്നും ലഭിക്കാനുള്ള കാലതാമസവും മറ്റു നിയമ നടപടികളും മൂലം ആരും ഇതിന് തയാറാകുകയില്ല. ‘ബണ്ടി ചോറിന്‍റെ’ആഡംബര എസ്‌യുവി എഴുകോൺ: പിടിച്ചിട്ടിരിക്കുന്ന വണ്ടികളുടെ എണ്ണത്തിൽ ഒട്ടും പിന്നിലല്ല എഴുകോൺ സ്റ്റേഷനും. പ്രാരംഭ കാലഘട്ടത്തിൽ കസ്റ്റഡിയിലെടുത്ത ടാറ്റ 1210 ലോറികൾ വരെ പൂർണമായും ദ്രവിച്ച നിലയിൽ ഇപ്പോഴും ഇവിടെയുണ്ട്. മുമ്പ് ആക്രി കൂട്ടങ്ങൾക്കിടയിൽ തീപിടിത്തം ഉണ്ടായിട്ടുണ്ട്. അന്താരാഷ്‌ട്ര ക്രിമിനലായ ബണ്ടി ചോറി െ ന്‍റ ആഡംബര എസ് യുവിയും ഇവിടെയുണ്ട്. പാർക്കിംഗും പിടിച്ചെടുക്കുന്ന വണ്ടികൾ നിർത്തിയിടാനുള്ള സ്ഥല ലഭ്യതയും കണക്കാക്കി കനാൽ ഗ്രൗണ്ടിൽ പുതിയ സ്റ്റേഷൻ പൂർത്തീകരണത്തിലേക്ക് എത്തുകയാണ്. നിരനിരയായി നിറയെ... ചവറ: വിവിധ കേസുകളിൽപെട്ടതും അപകടങ്ങളിൽപ്പെട്ടതുമായ വാഹനങ്ങൾ ചവറ പോലീസ് സ്റ്റേഷൻ കോമ്പൗണ്ടിലും സമീപ സ്ഥലത്തും തുരുമ്പെടുത്തും കാടുകയറിയും നശിക്കുകയാണ്. കേസുകളിൽ പെട്ട അൻപതോളം വാഹനങ്ങളും കേസിൽ പെടാത്ത 52 വാഹനങ്ങളുമാണ് നിലവിൽ ചവറ പോലീസ് സ്റ്റേഷ െ ന്‍റ കസ്റ്റഡിയിൽ കാടുകയറി കിടക്കുന്നത്. പലപ്പോഴും പല വാഹനങ്ങളും ബന്ധപ്പെട്ട ഉടമസ്ഥർ തിരിഞ്ഞു നോക്കാത്തതിനാലാണ് വാഹനങ്ങൾ സ്റ്റേഷൻ പരിധിയിൽ കെട്ടിക്കിടക്കുന്നത്. തകർന്ന വാഹനങ്ങളും കേടുപാടുകൾ സംഭവിച്ച വാഹനങ്ങളും ഇതിൽ ഉൾപ്പെടും. ഇരുചക്രവാഹനങ്ങൾ, കാർ, ലോറി തുടങ്ങിയവ നിലവിൽ സ്റ്റേഷൻ കോമ്പൗണ്ടിലും പോലീസ് ക്വാർട്ടേഴ്സിന് സമീപവും കിടപ്പുണ്ട്. കേസിൽ പെടാത്ത ചില വാഹനങ്ങൾക്ക് പോലീസ് ബന്ധപ്പെട്ട് വ്യക്തികൾക്ക് നോട്ടീസ് അയച്ചിട്ടും വാഹനങ്ങൾ കൊണ്ട് പോകാൻ എത്തിയിട്ടില്ലെന്നും പോലീസ് പറയുന്നു.

ഡോ. ബ്രൂണോ ഡോമിനിക് നസ്രത്തിന് മുക്കാട് ഇടവകയുടെ ആദരം

കൊല്ലം: വിദ്യാഭാസ വിചക്ഷണനും ദൈനിക് ജാഗരൺ എക്സലൻസ് അവാർഡ്, അമർ ഉജാല ഭവിഷ്യ ജ്യോതി അവാർഡ്, ഹിന്ദി ഒളിമ്പ്യാഡ് ഫൗണ്ടേഷൻ പ്രിൻസിപ്പൽ അവാർഡ് എന്നീ പുരസ്കാരങ്ങൾ നേടിയ ഡോ. ബ്രൂണോ ഡോമിനിക് നസ്രത്തിനെ മുക്കാട് ഹോളി ഫാമിലി ഇടവക ആദരിച്ചു. മുക്കാട് ഇടവക വികാരി ഫാ. ജോൺ പോൾ ബ്രൂണോയ്ക്ക് ഇടവകയുടെ ഉപഹാരം സമ്മാനിച്ചു. ഇടവക അംഗങ്ങളും ഭരണസമിതി അംഗങ്ങളും സെന്‍റ് വിൻസന്‍റ് ഡി പോൾ സംഘടനയിലെ അംഗങ്ങളും ചടങ്ങിൽ പങ്കെടുത്തു. വിദ്യാഭ്യാസ മേഖലയിലെ ഡോ. ബ്രൂണോയുടെ പ്രവർത്തനങ്ങൾ സമൂഹത്തിന് മാതൃകയാണെന്ന് ഫാ. ജോൺ പോൾ പറഞ്ഞു.

സിഡിഎസ് വാർഷികം

പുത്തൂർ : കുളക്കട പഞ്ചായത്തിലെ കുടുംബശ്രീ സിഡി എസിന്‍റെ 27-ാം വാർഷികം മന്ത്രി കെ.എൻ. ബാലഗോപാൽ ഉദ്ഘാടനം ചെയ്തു. വനിതകളുടെ സാമ്പത്തിക- സാമൂഹിക ശാക്തീകരണം ലക്ഷ്യമിട്ട് പ്രവർത്തിക്കുന്ന കുടുംബശ്രീയുടെ പ്രവർത്തനങ്ങൾ മാതൃകാപരമാണെന്ന് യോഗം ഉദ്ഘാടനം ചെയ്ത് മന്ത്രി കെ.എൻ. ബാലഗോപാൽ പറഞ്ഞു. വിജ്ഞാനകേരളവുമായി ബന്ധപെട്ട തൊഴിൽ പദ്ധതികളിൽ കുടുംബശ്രീയും പങ്കാളികളാണ്. കുളക്കട പഞ്ചായത്തിൽ കുടുംബശ്രീ മുഖേന കൂടുതൽ തൊഴിൽ അവസരങ്ങൾ ഒരുക്കുമെന്നും മന്ത്രി പറഞ്ഞു. കുളക്കട പഞ്ചായത്ത് പ്രസിഡന്‍റ് സജി കടൂക്കാല അധ്യക്ഷതവഹിച്ചു. ബ്ലോക്ക് -പഞ്ചായത്ത് മെമ്പർമാർ, കുടുംബശ്രീ പ്രവർത്തകർ തുടങ്ങിയവർ പങ്കെടുത്തു.

ആര്യങ്കാവ് സെന്‍റ്മേരീസ് ഹൈസ്കൂളിൽ ദീപിക നമ്മുടെ ഭാഷ പദ്ധതി

ആര്യങ്കാവ്: ആര്യങ്കാവ് സെന്‍റ് മേരീസ് ഹൈസ്കൂളിൽ 'ദീപിക നമ്മുടെ ഭാഷ പദ്ധതി' സ്കൂൾ മാനേജർ ഫാ. ഫിലിപ്പ് തയ്യിൽ ഉദ്ഘാടനം ചെയ്തു. ദീപിക ദിനപത്രത്തിന്‍റെ പ്രാധാന്യം വ്യക്തമാക്കി എല്ലാ വിദ്യാർഥികൾക്കും പത്രത്തിന്‍റെ കോപ്പികൾ വിതരണം ചെയ്തു. ഹെഡ്മാസ്റ്റർ ഷാനിൽ ജോസഫ്, ദീപിക പുനലൂർ ഏരിയ സർക്കുലേഷൻ മാനേജർ വർഗീസ് ജോസഫ്, അധ്യാപകരായ ജോസഫ് തോമസ്, സ്റ്റാഫ് സെക്രട്ടറി കസാൻഡ്ര നെറ്റോ, സോഫിയ മരിയ, സിസ്റ്റർ റീബ സിഎംസി, ജിഷ ജോർജ്, ജിൽസ് അഗസ്റ്റിൻ എന്നിവർ പരിപാടികൾക്ക് നേതൃത്വം നൽകി.

മീൻകുളം ഇടവക തിരുനാളിന് കൊടിയേറി

മീൻകുളം: സെന്‍റ് മേരിസ് മലങ്കര സുറിയാനി കത്തോലിക്കാ പള്ളിയിലെ തിരുനാൾ ആരംഭിച്ചു.17ന് സമാപിക്കും. നാളെ വൈകുന്നേരം 6.30 നു വിശുദ്ധ കുമ്പസാരം, വിശുദ്ധ കുർബാന, സെമിത്തേരിയിൽ ധൂപ പ്രാർഥന എന്നിവ നടക്കും. 12 നും 13 നും വൈകുന്നേരം 6.30ന് കുടുംബ നവീകരണ ധ്യാനം. 14ന് വൈകുന്നേരം അഞ്ചിന് ജപമാല, സന്ധ്യാനമസ്കാരം വിശുദ്ധ കുർബാന. 15ന് വൈകുന്നേരം 6.30ന് ഭക്തസംഘടനകളുടെ വാർഷികം. 16ന് വൈകുന്നേരം അഞ്ചിന് നവ വൈദികരുടെ കാർമികത്വത്തിൽ വിശുദ്ധ കുർബാന, കുട്ടികളുടെ ആഘോഷമായ വിശുദ്ധ കുർബാന സ്വീകരണം, മെഴുകുതിരി പ്രദക്ഷിണം, നേർച്ച വിളമ്പ്. 17ന് വൈകുന്നേരം കൊടിയിറക്ക്. എല്ലാദിവസവും വൈകുന്നേരം അഞ്ചിന് സന്ധ്യാനമസ്കാരം, വിശുദ്ധ കുർബാന എന്നിവയ്ക്ക് ഫാ. ജോസഫ് പൂവത്തുംതറയിൽ, ഫാ. മാത്യു വലിയപറമ്പിൽ, ഫാ. ജോർജ് മേച്ചേരിമുകളിൽ, ഫാ. അജോ കളപ്പുരയിൽ, ഫാ. ഗീവർഗീസ് ചരുവിളയിൽ എന്നിവർ നേതൃത്വം നൽകുമെന്ന് ഇടവക വികാരി ഫാ. ക്രിസ്റ്റി ചരുവിള, ട്രസ്റ്റി സാം പുളിഞ്ചാമ്മൂട്ടിൽ, സെക്രട്ടറി തോമസ് വയലിറക്കത്ത് എന്നിവർ അറിയിച്ചു.

ഭാരത സംസ്കാരത്തിന് മൂല്യച്യുതി സംഭവിച്ചു: ബിഷപ് പോൾ ആന്‍റണി മുല്ലശേരി

കൊല്ലം : ഭാരത സംസ്കാരത്തിന് മൂല്യച്യുതി സംഭവിച്ചെന്നും അത് എല്ലാ മതങ്ങളെയും ഏകോപിപ്പിച്ചു കൊണ്ടുപോകുന്ന സംസ്കാരമാണെന്നും കൊല്ലം ബിഷപ് ഡോ. പോൾ ആന്‍റണി മുല്ലശേരി. കൊല്ലം സ്വദേശിയും കർണാടക മുൻ ചീഫ് സെക്രട്ടറിയും മുൻമന്ത്രിയും കോൺഗ്രസ് നേതാവുമായിരുന്ന ഡോ. ജെ. അലക്സാണ്ടറിന്‍റെ പേരിലുള്ള ഡോ. ജെ.അലക്സാണ്ടർ സെന്‍റർ ഫോർ സ്റ്റഡീസിന്‍റെ രാഷ്ട്രീയ പ്രതിഭാ അവാർഡ് കെ പി സി സി വർക്കിംഗ് പ്രസിഡന്‍റ് പി.സി. വിഷ്ണുനാഥ് എം എൽ എയ്ക്ക് സമ്മാനിച്ച് പ്രസംഗിക്കുകയായിരുന്നു ബിഷപ് . ഡോ.ജെ.അലക്സാണ്ടർ കൊല്ലക്കാരൻ മാത്രമല്ല ഭാരതീയനായിരുന്നുവെന്നും ബിഷപ് ഓർമിപ്പിച്ചു. രാജ്യവും രാഷ്‌ട്രീയവും സാംസ്കാരികവും പൊതുപ്രവർത്തനവും നാടിന്‍റെ നന്മയ്ക്കുവേണ്ടി ഏറ്റെടുക്കണമെന്ന് ബിഷപ് ആഹ്വാനം ചെയ്തു. അഖിലേന്ത്യാ കോൺഗ്രസ് കമ്മിറ്റി കർണാടകയിലെ ചുമതല എന്നിൽ ഏൽപ്പിച്ചപ്പോൾ കർണാടകത്തിൽ വേണ്ടുന്ന സൗകര്യങ്ങളും നൽകി ഒരു കുടുംബാംഗത്തെ പോലെ എന്നെ ചേർത്തുനിർത്തിയ മഹത് വ്യക്തിയായിരുന്നു ജെ. അലക്സാണ്ടറെന്ന് പി. സി. വിഷ്ണുനാഥ് എംഎൽഎ അവാർഡ് സ്വീകരിച്ചുകൊണ്ട് പറഞ്ഞു. ഭാരതത്തിലെ ആദ്യ രൂപതയായ കൊല്ലം രൂപതയുടെ അധ്യക്ഷനിൽ നിന്നും രാഷ്ട്രീയ പ്രതിഭാ പുരസ്കാരം സ്വീകരിച്ചതിൽ അഭിമാനം ഉണ്ടെന്നും പി.സി. വിഷ്ണുനാഥ് എംഎൽഎ പറഞ്ഞു. സംസ്ഥാന ചെയർമാൻ എസ്.പ്രദീപ് കുമാർ അധ്യക്ഷത വഹിച്ചു. കെ പി സി സി സെക്രട്ടറിമാരായ ആർ.രാജശേഖരൻ, പി. ജർമിയാസ്, നന്മ മരം ഗ്ലോബൽ ഫൗണ്ടേഷൻ ചീഫ് കോഡിനേറ്റർ ജേക്കബ്.എസ്. മുണ്ടപ്പുളം, സജീവ് പരിശവിള, സാബു ബെനഡിക്ട് എന്നവർ പ്രസംഗിച്ചു.

മോഷ്‌ടാവിനെ പിടിച്ച പോലീസിന് അനുമോദനം

അഞ്ചല്‍ : നാടിനെ ഭീതിയിലാക്കി മോഷണ പരമ്പര സൃഷ്ടിച്ച മോഷ്‌ടാവിനെ പിടിച്ച പോലീസിന് നാടിന്‍റെ അനുമോദനം. ഏരൂര്‍ പത്തടിയിലെ നാലോളം വ്യാപാര സ്ഥാപനങ്ങളില്‍ നിന്നായി രൂപയും സാധനവുമുള്‍പ്പെടെ ലക്ഷങ്ങളുടെ കവര്‍ച്ച നടത്തിയ മോഷ്‌ടാവ് തിരുവല്ലം ഉണ്ണിയെ പിടികൂടിയ ഏരൂര്‍ പോലീസിനെയാണ് പത്തടിയിലെ പൗരപ്രമുഖരുടെ നേതൃത്വത്തില്‍ അനുമോദിച്ചത്. വാര്‍ഡ് അംഗം എം.പി. നസീര്‍, ഈസ്റ്റ് ഹയര്‍ സെക്കണ്ടറി സ്കൂള്‍ പ്രിന്‍സിപ്പല്‍ അനസ് ബാബു, പൊതുപ്രവര്‍ത്തകരും വ്യാപരികളുമായ പത്തടി സുലൈമാന്‍, നൗഷാദ്, നസീര്‍, ഷറഫുദീന്‍ എന്നിവരുടെ നേതൃത്വത്തില്‍ പോലീസ് സ്റ്റേഷനില്‍ എത്തിയാണ് അനുമോദനം നല്‍കിയത്. നാട്ടുകാരുടെ വലിയ സഹായവും സഹകരണവും ലഭിച്ചതിനാലാണ് വേഗത്തില്‍ പ്രതിയിലേക്ക് എത്താന്‍ കഴിഞ്ഞതെന്ന് നന്ദി പ്രസംഗത്തില്‍ ഏരൂര്‍ എസ്ഐ ശ്രീകുമാര്‍ പറഞ്ഞു. എസ്എച്ച്ഒ പുഷ്പകുമാര്‍, എസ്ഐ ശ്രീകുമാര്‍, പോലീസ് ഓഫീസര്‍മാരായ അനീഷ് കുമാര്‍, രാഹുല്‍, മുഹമദ് അസര്‍, അജീഷ്, അമല്‍ രാജ്, അന്‍സിലാല്‍ എന്നിവരടങ്ങുന്ന സംഘമാണ് പ്രതിയെ കുടുക്കിയത്. പത്തടി മുതല്‍ കിളിമാനൂര്‍ വരെയുള്ള നൂറിലധികം വീടുകള്‍ സ്ഥാപനങ്ങള്‍ എന്നിവയിലെ സിസിടിവി ദൃശ്യങ്ങള്‍ ശേഖരിച്ചുകൊണ്ടാണ് പോലീസ് പ്രതിയിലേക്ക് എത്തിയത്. കൂട്ടുപ്രതി ഉടന്‍ പിടിയിലാകുമെന്ന് പോലീസ് അറിയിച്ചു

ചവറ വികാസിന്‍റെ പുതിയ കെട്ടിടം ഉദ്ഘാടനം ചെയ്തു

ചവറ : സാമൂഹ്യ സാംസ്കാരിക രംഗത്ത് പ്രവർത്തിച്ചുവരുന്ന ചവറ വികാസിന്‍റെ പുതിയ കെട്ടിടം ഉദ്ഘാടനം സുജിത്ത് വിജയൻ പിള്ള എംഎൽഎ നിർവഹിച്ചു. 1600 സ്ക്വയർ ഫീറ്റിൽ നിർമിച്ച കെട്ടിടത്തിൽ ഹാൾ പൂർണമായും ശീതീകരിച്ചു. ആധുനിക ശബ്‌ദ സംവിധാനങ്ങൾ കെട്ടിടത്തിൽ ഒരുക്കിയിട്ടുണ്ട്. ദേശീയ നിലവാരത്തിലുളള സെമിനാറുകൾക്ക് ഇവിടെ വേദിയൊരുക്കാം. ഉദ്ഘാടന സമ്മേളനത്തിൽ വികാസ് മുൻ പ്രസിഡന്‍റ് ജി ബിജു കുമാർ അധ്യക്ഷനായി. ജില്ലാ പഞ്ചായത്ത് പ്രസിഡന്‍റ് ഡോ. പി.കെ. ഗോപൻ വിവിധ രംഗങ്ങളിൽ വിജയം നേടിയവരെ അനുമോദിച്ചു. കെഎസ്എഫ്ഇ ചെയർമാൻ കെ. വരദരാജൻ, ജില്ലാ പഞ്ചായത്ത് അംഗം സി.പി. സുധീഷ് കുമാർ, ബ്ലോക്ക് പഞ്ചായത്ത് പ്രസിഡന്‍റ് സന്തോഷ് തുപ്പാശേരി, പഞ്ചായത്ത് പ്രസിഡന്‍റ് ജെ.ആർ. സുരേഷ് കുമാർ, കവി ചവറ കെ.എസ്. പിള്ള, കരുനാഗപ്പള്ളി താലൂക്ക് ലൈബ്രറി കൗൺസിൽ സെക്രട്ടറി വി. വിജയകുമാർ, ഹാർബർ എൻജിനിയറിംഗ് വകുപ്പ് എക്സിക്യൂട്ടീവ് എൻജിനിയർ ബീഗം അബീന, ബ്ലോക്ക് പഞ്ചായത്ത് അംഗം സി. രതീഷ്, പഞ്ചായത്ത് അംഗം സി. വസന്തകുമാർ, സി .സുധീഷ്, അശ്വിൻ ബാബു, ശ്രീഹരി രാജ് എന്നിവർ പ്രസംഗിച്ചു .

രണ്ടാനച്ഛൻ പൊള്ളലേൽപ്പിച്ച മൂന്നാം ക്ലാസ് വിദ്യാർഥിയെ മന്ത്രി വി. ശിവൻകുട്ടി സന്ദർശിച്ചു

ചവറ: രണ്ടാനച്ഛൻ പൊള്ളലേൽപ്പിച്ച മൂന്നാം ക്ലാസ് വിദ്യാർഥിയെ മന്ത്രി വി. ശിവൻകുട്ടി കൊല്ലത്തെ ബന്ധുവീട്ടിലെത്തി നേരിൽ കണ്ടു. കുട്ടിയെ പൊള്ളൽ ഏൽപ്പിച്ച സംഭവത്തിൽ പോലീസ് കേസെടുത്ത് കുട്ടിയുടെ രണ്ടാനച്ഛനെ അറസ്റ്റ് ചെയ്തിരുന്നു. വിദ്യാഭ്യാസ വകുപ്പിലെ ഉദ്യോഗസ്ഥർ കുട്ടിയുടെ വീട്ടിലെത്തി എല്ലാ സഹായങ്ങളും ഉറപ്പുവരുത്തിയിട്ടുണ്ട്. കുട്ടികളെ ഉപദ്രവിക്കുന്ന ആർക്കെതിരെയും ശക്തമായ നടപടികൾ സ്വീകരിക്കുമെന്ന് മന്ത്രി വി. ശിവൻകുട്ടി പറഞ്ഞു. ഇത്തരം ക്രൂരമായ സംഭവങ്ങൾ ആവർത്തിക്കാതിരിക്കാൻ കർശന നടപടികൾ സ്വീകരിക്കുമെന്നും കുട്ടിയ്ക്ക് ആവശ്യമായ എല്ലാ സഹായങ്ങളും സർക്കാർ നൽകുമെന്നും വി. ശിവൻകുട്ടി അറിയിച്ചു. വിദ്യാഭ്യാസ വകുപ്പ് ഉദ്യോഗസ്ഥർ സ്ഥിരമായി കുട്ടിയുടെ കാര്യങ്ങൾ അന്വേഷിക്കുകയും ആവശ്യമായ പിന്തുണ നൽകുകയും ചെയ്യും. കുട്ടികൾക്ക് നേരെ നടക്കുന്ന അതിക്രമങ്ങൾ ഒരു കാരണവശാലും വെച്ചുപൊറുപ്പിക്കില്ലെന്ന് മന്ത്രി കൂട്ടിച്ചേർത്തു.

ഷോക്കേറ്റ് മരിച്ച മിഥുന്‍റെ കുടുംബത്തിന് പുതിയ വീട്; മന്ത്രി വി. ശിവൻകുട്ടി തറക്കല്ലിട്ടു

കൊല്ലം: തേവലക്കര സ്കൂളിൽ ഷോക്കേറ്റ് മരിച്ച വിദ്യാർഥി മിഥുന്‍റെ കുടുംബത്തിന് കേരള സ്കൗട്ട്സ് ആൻഡ് ഗൈഡ്‌സിന്‍റെ നേതൃത്വത്തിൽ പൊതുവിദ്യാഭ്യാസ വകുപ്പിന്‍റെ സഹായത്തോടെ നിർമിച്ച് നൽകുന്ന വീടിന് മന്ത്രി വി. ശിവൻകുട്ടി തറക്കല്ലിട്ടു. നിലവിൽ കുടുംബം താമസിക്കുന്ന സ്ഥലത്ത് തന്നെയാണ് പുതിയ വീട് നിർമിക്കുന്നത്. 20 ലക്ഷം രൂപ ചെലവിൽ 1000 ചതുരശ്ര അടി വിസ്തീർണത്തിലാണ് വീട് നിർമിക്കുന്നത്. മൂന്ന് കിടപ്പുമുറികൾ, രണ്ട് ശുചിമുറികൾ, ലിവിംഗ് റൂം, അടുക്കള, ഡൈനിംഗ് ഏരിയ, സിറ്റ് ഔട്ട്, സ്റ്റെയർകെയ്സ് എന്നിവ വീടിന്‍റെ ഭാഗമായി ഉണ്ടാകും. നാല് മാസത്തിനകം നിർമാണം പൂർത്തിയാക്കി താക്കോൽ കൈമാറാനാണ് ലക്ഷ്യമിടുന്നത്. വീടിനു പുറമെ, മിഥുന്‍റെ കുടുംബത്തിന് സർക്കാർ വിവിധ ധനസഹായങ്ങളും പ്രഖ്യാപിച്ചിട്ടുണ്ട്. സംസ്ഥാന സർക്കാർ സഹായമായി 10 ലക്ഷം രൂപയും, പൊതുവിദ്യാഭ്യാസ വകുപ്പ് മൂന്ന് ലക്ഷം രൂപയും കെഎസ്ഇബി 10 ലക്ഷം രൂപയും അധ്യാപക സംഘടനയായ കെ എസ് ടി എ 11 ലക്ഷം രൂപയും ആണ് നൽകുന്നത്. മിഥുന്‍റെ അനുജന്‍റെ വിദ്യാഭ്യാസ ചെലവുകൾ പൊതുവിദ്യാഭ്യാസ വകുപ്പ് പൂർണമായും വഹിക്കുമെന്ന് മന്ത്രി വി. ശിവൻകുട്ടി അറിയിച്ചിട്ടുണ്ട്. ചടങ്ങിൽ എംഎൽഎമാരായ കോവൂർ കുഞ്ഞുമോൻ, ഡോ. സുജിത്ത് വിജയൻ പിള്ള, കേരള സ്കൗട്ട്സ് ആൻഡ് ഗൈഡ്‌സ്‌ സംസ്ഥാന സെക്രട്ടറി എൻ. കെ. പ്രഭാകരൻ, പൊതുവിദ്യാഭ്യാസ ഡയറക്ടർ ഷാനവാസ് തുടങ്ങിയവർ പങ്കെടുത്തു.

വായന വസന്തം സംഘടിപ്പിച്ചു

കുളത്തൂപ്പുഴ: ഗവ. മോഡൽ റസിഡൻഷ്യൽ സ്കൂളിൽ ആധുനിക ഹിന്ദി, ഉർദു സാഹിത്യത്തിലെ പ്രസിദ്ധ നോവലിസ്റ്റും കഥാകൃത്തുമായ പ്രേം ചന്ദിന്‍റെ ജയന്തി ആഘോഷവും വായന വസന്തവും സ്കൂൾ ഓഡിറ്റോറിയത്തിൽ നടത്തി. സ്കൂൾ സീനിയർ സൂപ്രണ്ട് വി.സുരേഷ് കുമാര്‌ അധ്യക്ഷതവഹിച്ചു. യോഗത്തിൽ കുളത്തൂപ്പുഴ ജി എച്ച്എസ് എസ് ഹയർസെക്കൻഡറി അധ്യാപകൻ കെ. സുനിൽകുമാർ സന്തോഷ് എച്ചിക്കാനത്തിന്‍റെ ബിരിയാണി കഥ അവതരിപ്പിച്ചു ഉദ്ഘാടനം ചെയ്തു. സ്കൂൾ പ്രഥമാധ്യാപിക സി.ഗിരിജ ,ഹിന്ദി അധ്യാപകൻ എഫ്.എൽ. ബിനിൽ കുമാർ ഇവരുടെ നേതൃത്വത്തിൽ വിവിധ പരിപാടികൾ വിദ്യാർഥികൾ അവതരിപ്പിച്ചു. വിദ്യാർഥികളായ വിഷ്ണുശ്രീ, അമൽ, ശിവദേവ് എന്നിവർ പരിപാടിയ്ക്ക് നേതൃത്വം നൽകി. തുടർന്ന് പുസ്തക പ്രദർശനം, പോസ്റ്റർ പ്രദർശനം എന്നിവയും സംഘടിപ്പിച്ചു.

നായ കുറുകെ ചാടി; നിയന്ത്രണംവിട്ട ഓട്ടോറിക്ഷ ഇലക്‌ട്രിക് പോസ്റ്റിലേക്ക് ഇടിച്ചുകയറി

മടത്തറ : തെരുവുനായ കുറുകെ ചാടിയതിനെ തുടര്‍ന്നു നിയന്ത്രണംവിട്ട വാഹനം ഇലക്‌ട്രിക് പോസ്റ്റിലേക്ക് ഇടിച്ചുകയറി. മടത്തറ മേലേമുക്കിലാണ് അപകടം. കൊച്ചുകലിംഗ് ഭാഗത്ത് നിന്നും മടത്തറയിലെ സൊസൈറ്റിയിലേക്ക് പാലുമായി വരികയായിരുന്ന വാഹനത്തിന് കുറുകെ തെരുവുനായ ചാടുകയായിരുന്നു. നായയെ ഇടിക്കാതിരിക്കാന്‍ വെട്ടിച്ചതോടെ നിയന്ത്രണംവിട്ട ഓട്ടോറിക്ഷ (ടാറ്റാ ഐറിസ് ) പോസ്റ്റിലേക്ക് ഇടിച്ചുകയറി. വാഹനത്തില്‍ രണ്ടു യാത്രക്കാര്‍ ഉണ്ടായിരുന്നുവെങ്കിലും ആര്‍ക്കും പരിക്കില്ല. വൈദ്യുതി പോസ്റ്റ് തകര്‍ന്നു. സ്ഥലത്തെത്തിയ കെഎസ്ഇബി അധികൃതര്‍ വൈദ്യുതി ബന്ധം വിച്ഛേദിച്ച ശേഷം പോസ്റ്റ് മാറ്റാനുള്ള നടപടികള്‍ ആരംഭിച്ചിട്ടുണ്ട്.

മൂന്നാം ക്ലാസുകാരനെ പൊള്ളലേൽപ്പിച്ച സംഭവം: രണ്ടാനച്ഛൻ റിമാന്‍ഡിൽ

ചവറ : മൂന്നാം ക്ലാസുകാരന്‍റെ കാൽ ഇസ്തിരിപ്പെട്ടി ഉപയോഗിച്ച് പൊള്ളിച്ച സംഭവത്തില്‍ അറസ്റ്റിലായ രണ്ടാനച്ഛനെ കോടതി റിമാന്‍ഡ്‌ചെയ്തു. മൈനാഗപ്പള്ളി സ്വദേശി കൊച്ചനിയനെയാണ് ചവറ കോടതി റിമാന്‍ഡ് ചെയ്തത്. അമ്മ വിദേശത്തായതിനാല്‍ അമ്മുമ്മയുടെയും രണ്ടാനച്ഛനും ഒപ്പമായിരുന്നു കുട്ടി കഴിഞ്ഞ് വന്നത്. അമ്മുമ്മയോട് വികൃതി കാണിച്ചതിനെ തുടര്‍ന്ന് രണ്ടാനച്ഛന്‍ ഇസ്തിരിപ്പെട്ടി ഉപയോഗിച്ച് പൊള്ളിക്കുകയായിരുന്നു. അധ്യാപകരുടെ നിര്‍ദേശ പ്രകാരം അങ്കണവാടി അധികൃതര്‍ കാര്യം തിരക്കിയപ്പോഴാണ് രണ്ടാനച്ഛന്‍ ഇസ്തിരിപ്പെട്ടി ഉപയോഗിച്ച കാല് പൊള്ളിച്ച വിവരം കുട്ടി പറഞ്ഞത്. തുടര്‍ന്ന് കുട്ടിയുടെ കാല് പരിശോധിച്ചപ്പോള്‍ പൊള്ളലേറ്റിരിക്കുന്നത് ശ്രദ്ധയില്‍പ്പെടുകയും ചെയ്തു. ഉടന്‍ തന്നെ വിവരം ചവറ തെക്കുംഭാഗം പോലിസിനെ അറിയിപ്പിക്കുകയും കുട്ടിയുടെ മൊഴിയെടുത്തപ്പോള്‍ താന്‍ അമ്മുമ്മയോട് വികൃതി കാണിച്ചപ്പോള്‍ അച്ഛന്‍ ഇങ്ങനെ ചെയ്തതെന്നും പറഞ്ഞു. തുടര്‍ന്ന് കൊച്ചനിയനെ അറസ്റ്റ് ചെയ്യുകയായിരുന്നു. തുടര്‍ന്ന് നടപടികള്‍ പൂര്‍ത്തിയാക്കി കോടതിയില്‍ ഹാജരാക്കുകയായിരുന്നു.കുട്ടിയുടെ സംരക്ഷണം ചൈല്‍ഡ് വെല്‍ഫെയര്‍ കമ്മിറ്റി ഏറ്റെടുത്തു. എസ്എച്ച്ഒ ശ്രീകുമാര്‍,എസ്‌ഐമാരായ എല്‍.നിയാസ്, എ. റഹിം,എഎസ്‌ഐ സുരേഷ്,സിവില്‍ പോലിസ് ഓഫീസര്‍ ലതിക എന്നിവരടങ്ങുന്ന സംഘമാണ് അന്വേഷണം നടത്തിയത്.

വിദ്യാർഥികളുടെ സാമൂഹിക, മാനസിക വികാസം വിദ്യാഭ്യാസ ലക്ഷ്യമാകണം: ഡോ.വി. സുനിൽ രാജ്

ശാസ്താംകോട്ട : വിദ്യാർഥികളുടെ വൈജ്ഞാനിക വികാസം മാത്രമല്ല സാമൂഹിക വികാസവും മാനസിക വികാസവും വിദ്യാഭ്യാസത്തിന്‍റെ ലക്ഷ്യമാകണമെന്ന് ക്ലിനിക്കൽ സൈക്കോളജിസ്റ്റും തിരുവനന്തപുരം ജി മൈന്‍റ് ഡയറക്ടറുമായ ഡോ. വി. സുനിൽ രാജ്. രാജഗിരി ബ്രൂക്ക് ഇന്‍റർനാഷണൽ സ്കൂളിൽ നടന്ന പേരന്‍റിംഗ് സെക്ഷനിൽ പ്രസംഗിക്കുകയായിരുന്നു അദ്ദേഹം. വിദ്യാർഥികളുടെ പ്രായവും പക്വതയും മനസിലാക്കി പ്രതികരിക്കാൻ രക്ഷാകർത്താക്കൾക്ക് കഴിയേണ്ടതിന്‍റെ ആവശ്യകതയും സുനിൽ രാജ് ചൂണ്ടിക്കാട്ടി. ബ്രൂക്കിലെ രക്ഷാകർത്താക്കൾക്കായി സംഘടിപ്പിച്ച പേരന്‍റിംഗ് സെക്ഷൻ പങ്കാളിത്തം കൊണ്ട്ശ്രദ്ധേയമായിരുന്നു.തുറന്ന ചർച്ചയിലൂടെ അധ്യാപകരെയും രക്ഷാകർത്താക്കളെയും ഒരു പോലെ ചർച്ചയിൽ പങ്കാളികളാക്കി. സ്കൂൾ ഓഡിറ്റോറിയത്തിൽ നടന്ന ചടങ്ങുകൾക്ക് ബ്രൂക്ക് ഡയറക്ടർ റവ.ഡോ.ജി. ഏബ്രഹാം തലോത്തിൽ നേതൃത്വം നൽകി.

കൊല്ലം രൂപത ഇന്ത്യയിലെ രൂപതകളുടെ മാതാവ്: ബിഷപ് ഡോ.ജോസ് ജോർജ്

കൊല്ലം: ഇന്ത്യയിലെ രുപതകളുടെ മാതാവാണ് കൊല്ലം രൂപതയെന്ന് സിഎസ്ഐ സഭ കൊല്ലം - കൊട്ടാരക്കര രുപതാധ്യക്ഷൻ ബിഷപ്. ഡോ. ജോസ് ജോർജ്. കൊല്ലം രൂപതയുടെ 696-ാം സ്ഥാപിത ദിനാചരണം ഭദ്ര ദീപം കൊളുത്തി ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഭാരത ക്രൈസ്തവസഭകളുടെ ചരിത്രത്തിലെ സുപ്രധാനമായ ദിനമാണ് ഓഗസ്റ്റ് ഒൻപതെന്നും ഭാരതത്തെ രൂപപ്പെടുത്തിയതിൽ ക്രൈസ്തവ സഭകൾ നടത്തിയ പ്രവർത്തനങ്ങൾക്ക് സവിശേഷമായ സ്ഥാനം ഉണ്ടെന്നും ബിഷപ് പറഞ്ഞു. യേശു ക്രിസ്തുവിന്‍റെ സ്നേഹ സന്ദേശവുമായി എത്തിയ കത്തോലിക്ക, എൽ എം എസ്, സി എം എസ്, ബാസൽ മിഷൻ മിഷണറിമാർ ഭാരതത്തിന്‍റെ സാമൂഹിക, സാമ്പത്തിക, സാംസ്കാരിക, രാഷ്ട്രീയ മേഖലയിൽ ചെലുത്തിയ സ്വാധീനം വളര വലുതാണ്. കത്തലാനിയയുടെ ചരിത്രം കേൾക്കാനുള്ള ഭാഗ്യം സിദ്ധിച്ച നമ്മൾക്ക് കത്തലാനിയയുടെ സഞ്ചാര കൃതിയായ മിറാബിലിയ ഡിസ്ക്രിപ്തയിൽ ഭാരതത്തിന്‍റെ അന്നത്തെ സാമൂഹിക അവസ്ഥ പ്രതിപാദിച്ചിട്ടുണ്ടെന്നും സിഎസ്ഐ ബിഷപ് പറഞ്ഞു. ഹെറിറ്റേജ് കമ്മീഷൻ ഡയറക്ടർ റവ.ഡോ. ജോർജ് റോബിൻസൺ അധ്യക്ഷത വഹിച്ച യോഗത്തിൽ വികാരി ജനറാൾ മോൺ. ബൈജു ജൂലിയാൻ, റവ.മോൺ.ഫ്രെഡിനാന്‍റ് കായാവിൽ,ഫാ. ലാസർ എസ്. പട്ടകടവ്, അഡ്വ. ഇ.എമേഴ്സൺ, സജീവ് പരിശ വിള, എ.ജെ.ഡിക്രൂസ്, സാജു കുരിശിങ്കൽ എന്നിവർ പ്രസംഗിച്ചു. ഹെറിറ്റേജ് കമ്മീഷന്‍റെ അഭിമുഖ്യത്തിൽ കത്തലാനിയയുടെ യാത്രകൾ എന്ന വിഷയത്തിൽ നടന്ന ചരിത്ര സെമിനാറിൽ റവ. ഡോ. ജോസ് പുത്തൻവീട്, പ്രഫ. ഡോ. എസ്. റെയ്മൻ എന്നിവർ കത്തലാനി സ്മാരക പ്രഭാഷണം നടത്തി. ഹെറിറ്റേജ് കമ്മീഷൻ നടത്തിയ ക്വിസ് ,കവിതാരചന മത്സര വിജയികൾക്കുള്ള പുരസ്ക്കാരങ്ങൾ കൊല്ലം രൂപത ബിഷപ് ഡോ. പോൾ ആന്‍റണി മുല്ലശേരി സമ്മാനിച്ചു. ഭക്തിസാന്ദ്രമായി രൂപതയുടെ വാർഷിക ദിനാഘോഷം കൊല്ലം : മഹത്തായ 696 വർഷങ്ങളുടെ ആത്മീയ പാരമ്പര്യ നിർവൃതിയിൽ ഭക്തി സാന്ദ്രമായി കൊല്ലം രൂപതയുടെ വാർഷിക ദിനാഘോഷം. കൊല്ലം രൂപതയുടെ സ്ഥാപക വാർഷിക ദിനാഘോഷ സംഗമത്തിൽ വിവിധ ഇടവകകളിൽ നിന്നായി 700 ലധികം കൊമ്പിരിയ സഭാംഗങ്ങൾ പങ്കെടുത്തു. കൊബ്രിയ സഭ രൂപത ഡയറക്ടർ ഫാ. ജോളി ഏബ്രഹാം പരിപാടിക്ക് ആമുഖ പ്രസംഗം നടത്തി. ഫാ. സേവിയർ ലാസർ ആത്മീയ ക്ലാസ് നയിച്ചു. ഫാ. ജോസഫ് കൊമ്പിരിയ സഭാംഗങ്ങൾക്ക് ആശംസകൾ നേർന്നു. തങ്കശേരി ഹോളി ക്രോസ് പള്ളിയിൽ നിന്നും ആരംഭിച്ച ഭക്തിനിർഭരമായ പ്രദക്ഷിണം, ഭക്തിഗാനങ്ങളും ജപമാല പ്രാർഥനകളും നിറഞ്ഞ അന്തരീക്ഷത്തിൽ തങ്കശേരി കത്തീഡ്രൽ പള്ളിയിൽ എത്തിച്ചേർന്നു. തുടർന്ന് നടന്ന വിശുദ്ധ ബലിക്ക് ബിഷപ് പോൾ ആന്‍റണി മുല്ലശേരി മുഖ്യകാർമികത്വം വഹിച്ചു. പിന്നീട് ആരാധനാഭരിതമായ വിശുദ്ധ ബലിയോടെ വാർഷിക ദിനാഘോഷം സമാപിച്ചു.

സ്‌കൂൾ പാചക തൊഴിലാളികളുടെ വേതന വർധനവ് നടപ്പിലാക്കണം: ബിന്ദുകൃഷ്ണ

കൊല്ലം: സ്‌കൂൾ പാചക തൊഴിലാളികളുടെ വേതന വർധനവ് നടപ്പിലാക്കണമെന്ന് കെപിസിസി രാഷ്ട്രീയകാര്യസമിതി അംഗം അഡ്വ.ബിന്ദുകൃഷ്ണ ആവശ്യപ്പെട്ടു. സ്‌കൂൾ പാചക തൊഴിലാളി കോൺഗ്രസ് -ഐ എൻ ടി യു സി സമര പ്രഖ്യാപന സംഗമം ഉദ്ഘാടനം ചെയ്ത് പ്രസംഗിക്കുകയായിരുന്നു ബിന്ദുകൃഷ്ണ . ശമ്പളം എല്ലാ മാസവുംഅഞ്ചിന് നൽകണം എന്നുള്ള നിയമം പോലും കാറ്റിൽ പറത്തിയാണ് സർക്കാർ മുന്നോട്ട് പോകുന്നത്. ഈ മേഖലയിൽ പണിയെടുക്കുന്ന തൊഴിലാളികൾക്ക് പുതിയ ശമ്പള സ്‌കെയിൽ കൊണ്ട് വരണമെന്നും തൊഴിലാളി വിരുദ്ധ നടപടികൾ തുടർന്നാൽ സർക്കാരിനെതിരെ സമര പരിപാടികൾ ആരംഭിക്കുമെന്നും ബിന്ദുകൃഷ്ണ പറഞ്ഞു. ജോലി സ്ഥിരത ഉറപ്പ് വരുത്തുക, ജോലി ഭാരം കുറയ്ക്കുക, ദിവസ വേതനം ആയിരം രൂപയാക്കി വർധിപ്പിക്കുക, തൊഴിലാളികൾക്ക് വിരമിക്കൽ ആനുകൂല്യം നൽകുക എന്നീ ആവശ്യങ്ങളും ബിന്ദുകൃഷ്ണ ഉന്നയിച്ചു. സംസ്ഥാന ജനറൽസെക്രട്ടറി എ. ഹബീബ്‌സേട്ട് അധ്യക്ഷത വഹിച്ചു. യോഗത്തിൽ കെ പി സി സി സെക്രട്ടറി പി. ജർമിയാസ്, ഡി സി സി ഭാരവാഹികളായ എസ്. വിപിനചന്ദ്രൻ, എൻ. ഉണ്ണികൃഷ്ണൻ, ആദിക്കാട് മധു, വടക്കേവിള ശശി, കുരീപ്പുഴ യഹിയ, ജോസ് വിമൽരാജ്, കെ. ബി. ഷഹാൽ, സജീവ് പരിശവിള, ഓമന തുടങ്ങിയവർ പ്രസംഗിച്ചു.

കുണ്ടറയിൽ മാർക്കറ്റുകൾ മൂന്ന് : പക്ഷേ, മത്സ്യം വാങ്ങാൻ പെരുവഴി തന്നെ ശരണം

ജിജുമോൻ മത്തായി കുണ്ടറ: മത്സ്യസമ്പത്തിനു പേരുകേട്ട നാടാണ് കുണ്ടറ. ഇവിടെ മൂന്നു മാർക്കറ്റുകൾ നിലവിലുണ്ട്. ഈ മൂന്നു മാർക്കറ്റുകളിലും ആരും എത്താറില്ല. എന്തിനു മാർക്കറ്റിൽ പോകണം. ജനത്തിന്‍റെ സൗകര്യാർഥം പെരുവഴിയിലും ഫുട്പാത്തിലും മത്സ്യക്കച്ചടവടക്കാരുണ്ട്. കുണ്ടറയിലെ മൂന്നു ജംഗ്ഷനുകളിലായി 15ലേറെ മീൻ വിൽക്കുന്ന പെട്ടിക്കടകൾ ഉണ്ട്. ഇരുപതിലേറെ വഴിയോര കച്ചവടക്കാരുമുണ്ട്. പിന്നെ എന്തിനാണ് മാർക്കറ്റിൽ പോകുന്നതെന്നാണ് ജനം ചോദിക്കുന്നത്. കുറച്ചു നാളുകളായി ഒരു നിയന്ത്രണവുമില്ലാതെ തോന്നിയ രീതിയിലാണ് മീൻ കച്ചവടം നടക്കുന്നതെന്നു പരാതിക്കാർക്കു പറയാം. പക്ഷേ, കടമുറിയെടുക്കാതെ, നികുതി അടയ്ക്കാതെ കുണ്ടറക്കാർക്കും പുറത്തുനിന്നും വന്നവർക്കും വഴിയോരത്ത് കച്ചവടം നടത്താൻ സാധിക്കുന്നുണ്ടെങ്കിൽഅതല്ലേ നല്ലതെന്നു ചോദിക്കുന്നവരുമുണ്ട്. ജനത്തിന്‍റെ ആവശ്യം പരിഗണിച്ചു പഞ്ചായത്തുകൾ മൗനം പാലിക്കുന്നുണ്ട്. ആർക്കും എവിടെയും ഏതു റോഡിന്‍റെ സൈഡിലും ഏതു ഭാഗത്തും ഇരുന്നു കച്ചവടം ചെയ്യാനുള്ള അവകാശം നൽകുന്ന ഉദ്യോഗസ്ഥരെ സ്തുതിക്കണം. ശ്രീനാരായണ ഗുരു മന്ദിരത്തിനു സമീപമായി ഷീറ്റ് അടിച്ച താൽക്കാലിക കടകൾ നിരനിരയായി നിർമിച്ച്‌ വൻതോതിൽ മത്സ്യ വ്യാപാരം നടത്തിവരുന്നുണ്ട്. സമീപത്തുള്ള കടകളിൽ കോഴി, ആട്, മാട് ഇറച്ചി വ്യാപാരം, പച്ചക്കറി, ബേക്കറി, ലോട്ടറി കടകൾ എന്നിവ ധാരാളമായി തുടങ്ങിയതിന്‍റെ കാരണവും ഇവിടെ മത്സ്യം മേടിക്കാൻ വരുന്ന ജനബാഹുല്യമാണ്. റോഡിൽ വെള്ളം കെട്ടിക്കിടക്കുന്ന ഈ പ്രദേശത്ത് അതിരാവിലെ മുതൽ രാത്രി വരെ ഗതാഗതകുരുക്കും കൂടെ ദുർഗന്ധവുമുണ്ട്. കച്ചവടം നടക്കുന്ന സ്ഥലമായതിനാൽ ആളുകൾ വരും. മൂന്നു വലിയ ഫിഷ് മാർക്കറ്റുകളാണ് അനാഥമായി കിടക്കുന്നത്. മുമ്പ് ഈ ചന്തകളിൽ നിന്നും നല്ല ഒരു തുക പഞ്ചായത്തിനു നികുതി പിരിവായി ലഭിച്ചുകൊണ്ടിരുന്നതാണ്.എന്നാൽ അതെല്ലാം വേണ്ടെന്ന നിലപാടാണ് ഉദ്യോഗസ്ഥർ സ്വീകരിച്ചത്. ഇതുനിർത്തിയതോടെ ഉദ്യോഗസ്ഥർ നല്ലൊരു കാര്യം കൂടി ചെയ്തു. അസഹനീയമായ ദുർഗന്ധം, ജലജന്യ രോഗങ്ങൾ, ഗതാഗത തടസങ്ങൾ, ചെറുതും വലുതുമായ അപകടങ്ങൾ എന്നിവ സൗജന്യമായി നാട്ടിൽ ഉണ്ടാക്കി. അതിനിടയിൽ വീതിയില്ലാത്ത റോഡിന്‍റെ സൈഡിൽ വലിയ വണ്ടി നിർത്തിയിട്ട് അതിനു സമീപം നീണ്ട ഒരു ക്യൂവുമുണ്ടാക്കി വണ്ടിക്കച്ചവടം വേറെയും നടന്നു വരുന്നു. കുണ്ടറ മുക്കടയുടെ ഹൃദയ ഭാഗത്ത് കുരിശടിക്കു പിന്നിലായി സ്ഥിതി ചെയ്യുന്ന ഫിഷ് മാർക്കറ്റിനു 50 വർഷത്തി ലേറെ പഴക്കമുണ്ട്. എന്നാൽ പുതിയ ബഹുനില കെട്ടിടവും അനുബന്ധ സൗകര്യങ്ങളും ഒരുക്കിയിട്ടു 25 വർഷം കഴിഞ്ഞതേയുള്ളു. ആദ്യമൊക്കെ നല്ല സുഗമമായി നടന്നുവന്ന മാർക്കറ്റ് ഇപ്പോൾ വഴികച്ചവടക്കാരുടെ അതിപ്രസരം മൂലം ആളൊഴിഞ്ഞ അവസ്ഥയിലാണ്. കഴിഞ്ഞ 20 വർഷത്തിലേറെയായി കച്ചവടം ചെയ്യുന്ന രണ്ടുമൂന്നു പേർ മാത്രമേ ഇപ്പോൾ വല്ലപ്പോഴും വരുന്നുള്ളു അവർക്കുള്ള പരാതി വഴിക്കച്ചവടക്കാർ മുഖാന്തിരം കൊണ്ടുവരുന്ന കുറച്ചു മീൻ പോലും രണ്ടു മൂന്ന് ദിവസമായിട്ടാണ് വിൽക്കുന്നതെന്നാണ്. കുണ്ടറ പള്ളിമുക്കിന്‍റെ മധ്യഭാഗത്ത് റെയിൽവേ ക്രോസിനോട് ചേർന്നാണ് മാർക്കറ്റ് സ്ഥിതി ചെയ്യുന്നത്, വിശാലമായ പ്ലേ ഗ്രൗണ്ട്, പാർക്കിംഗ് അന്തരീക്ഷം എല്ലാം ഇവിടെ സുലഭമാണ്. എന്നിട്ടും തെരുവുനായ്ക്കളും സാമൂഹ്യവിരുദ്ധരും മാത്രമാണ് ഇതിൽ ഇപ്പോൾ അധിവസിക്കുന്നത്, ആട്, കോഴി, തേങ്ങ തുടങ്ങിയവയു‌ടെ വിപണന കേന്ദ്രമായിരുന്നു പള്ളിമുക്ക് ചന്ത. പതിനാ യിരക്കണക്കിന് രൂപയുടെ ബിസിനസ് നടത്തിയിരുന്നു. കുണ്ടറ പള്ളിമുക്ക് ഈസ്റ്റിലാണ് അടുത്ത മാർക്കറ്റുള്ളത്. ഇത് കാളച്ചന്ത എന്നായിരുന്നു പറഞ്ഞിരുന്നത്. എന്നാൽ ഉദ്ഘാടനം കഴിഞ്ഞു കാള പോയിട്ട് ഒരു കോഴിയെ പോലും വിൽക്കാൻ ഉള്ള പ്രവർത്തനങ്ങൾ ഇവിടെ നടന്നിട്ടില്ല. ഇപ്പോൾ ഈ കെട്ടിടവും മാലിന്യ കൂമ്പാരമായി കാടുപിടിച്ചു കിടക്കുന്ന അവസ്ഥയിലാണ്.

പകർച്ചപ്പനി പ്രതിരോധം ശക്തമാക്കണമെന്ന്

കൊല്ലം : പനി പടർന്നുപിടിക്കുന്ന സാഹചര്യത്തിൽ പ്രതിരോധ പ്രവർത്തനങ്ങൾ ശക്തമാക്കണമെന്ന് മുണ്ടയ്ക്കൽ ഉദയമാർത്താണ്ഡപുരം റസിഡന്‍റ്സ് വെൽഫെയർ അസോസിയേഷൻ ആവശ്യപ്പെട്ടു. ജനം പനിയിൽ പകച്ചുനിൽക്കുന്ന അവസ്ഥയാണ്. ഡെങ്കിപ്പനി ബാധിതരുടെ എണ്ണവും വർധിക്കുകയാണ്. കൊതുകു പെരുകുന്നത് ഒഴുവാക്കാൻ ശക്തമായ നടപടി വേണം. പ്രതിരോധ പ്രവർത്തനങ്ങൾ ഏകോപിപ്പിക്കുവാൻ മോണിറ്ററിംഗ് സെൽ ആരംഭിക്കണം. മരുന്നുകളും ടെസ്റ്റ് കിറ്റുകളും സുരക്ഷാസാമഗ്രികളും ഉറപ്പുവരുത്തണമെന്ന് അസോസിയേഷൻ പ്രസിഡന്‍റ് എ. ജെ. ഡിക്രൂസ്, ജനറൽ സെക്രട്ടറി എൽ. ബാബു എന്നിവർ ആവശ്യപ്പെട്ടു.

മോക് ഡ്രിൽ നടത്തി

കുണ്ടറ : ഫയർ ആൻഡ് റെസ്ക്യൂ വിഭാഗത്തിന്‍റെ ആഭിമുഖ്യത്തിൽ ഇളമ്പള്ളൂർ എസ്എൻ എസ് എം എച്ച്എസ്എസിൽ ബോധവത്കരണ ക്ലാസും മോക്ഡ്രില്ലും നടന്നു. സ്റ്റേഷൻ ഓഫീസർ പി.ജി. ദിലീപ് കുമാറിന്‍റെ നേതൃത്വത്തിലാണ് പരിപാടികൾ നടന്നത്. ഫയർ ആൻഡ് റെസ്ക്യൂ ഓഫീസർമാരായ എസ്. അനിൽദേവ് , എസ്. അനൂപ് എന്നിവർ സന്നിഹിതരായിരുന്നു. വിവിധ അപായ സാഹചര്യങ്ങളിലെ സുരക്ഷാ ക്രമീകരണങ്ങളെപ്പറ്റി വ്യക്തമായ അവബോധം കുട്ടികൾക്ക് പകർന്നു നൽകി.

ഇരട്ട വോട്ടുകൾ വ്യാപകം: പി. രാജേന്ദ്രപ്രസാദ്

കൊല്ലം :വോട്ടേഴ്‌സ് ലിസ്റ്റിൽ പേര് ചേർക്കലിൽ വ്യാപകമായ തിരിമറി നടക്കുന്നതായി ജില്ലാ കോൺഗ്രസ് കമ്മിറ്റി പ്രസിഡന്‍റ് പി.രാജേന്ദ്രപ്രസാദ് പ്രസ്താവനയിൽ ആരോപിച്ചു. കൊല്ലം കോർപറേഷനിലാണ് ഇത് കൂടുതൽ വ്യാപകമായി നടക്കുന്നത്. മാർക്‌സിസ്റ്റ് ഉദ്യോഗസ്ഥൻമാർ തികച്ചും നീതിപൂർവമല്ലാത്ത നിലപാടുകൾ സ്വീകരിക്കുന്നു. ഇരട്ട വോട്ടുകൾ വ്യാപകമാണ്. വർഷങ്ങളായി താമസമില്ലാത്തവരുടെ വോട്ടുകൾ നീക്കം ചെയ്യുന്നില്ല. ഹിയറിംഗിന് ഓരോരുത്തരും എത്തിയെ മതിയാകൂ എന്ന് കോൺഗ്രസ് വോട്ടർമാരെ നിർബന്ധിക്കുമ്പോൾ നേരിട്ട് ഹാജരാകാതെ തന്നെ 100കണക്കിന് സിപിഎമ്മുകാരെ വോട്ടേഴ്‌സ് ലിസ്റ്റിൽ കൂട്ടി ചേർക്കുകയാണ് അദ്ദേഹം അറിയിച്ചു.

ദേവസ്വം മന്ത്രിയുടെ നടപടി പ്രതിഷേധാർഹം: അയ്യപ്പ ധർമ പരിഷത്ത്

കൊല്ലം: പരമ്പരാഗതമായി ശബരിമലയിൽ സന്നദ്ധ പ്രവർത്തനം നടത്തുന്ന സംഘടനകളെയും ഹിന്ദു സംഘടനകളെയും ഒഴിവാക്കി ശബരിമലയിൽ ആഗോള അയ്യപ്പ സംഗമം നടത്താനുള്ള ദേവസ്വം മന്ത്രിയുടെ നടപടി പ്രതിഷേധാർഹമാണെന്നു ശബരിമല ശ്രീ അയ്യപ്പ ധർമ പരിഷത്ത് ദേശീയ ജനറൽ സെക്രട്ടറി അയർക്കുന്നം രാമൻനായരും കോർഡിനേറ്റർ ചവറ സുരേന്ദ്രൻപിള്ളയും പ്രസ്താവിച്ചു. ശബരിമലയിൽ ദീർഘകാല പ്രവർത്തനം നടത്തി പാരമ്പര്യമുള്ള സന്നദ്ധ സംഘടനകൾ തട്ടിപ്പു പ്രവർത്തനമാണ് നടത്തുന്നതെന്ന രീതിയിലുള്ള മന്ത്രിയുടെ പ്രസ്താവന പിൻവലിക്കണം. ശബരിമലയിലെ വരുമാനം വിവിധ ഏജൻസികൾ മുഖേന വഴി തിരിച്ചു വിടാനുള്ള സർക്കാരിന്‍റെയും ദേവസ്വം മന്ത്രിയുടെയും നടപടി ശബരിമലയെ രക്ഷിക്കാനുള്ള നടപടിയായി കാണാൻ കഴിയില്ലെന്നും അവർ ആരോപിച്ചു.

‘പഠനമിത്രം’പരിപാടിക്ക് തുടക്കമായി

കൊല്ലം: ജില്ലാ ശിശുക്ഷേമ സമിതി കഴിഞ്ഞ വർഷം മുതൽ സാമ്പത്തിക പിന്നാക്കാവസ്ഥയിൽ സ്കൂൾ പഠനത്തിനായി പോകുന്ന കുട്ടികളെ സഹായിക്കുന്നതിനായി "പഠനമിത്രം" പരിപാടി ആവിഷ്കരിച്ചു. ജില്ലയിലെ സ്കൂളുകളിലെ വിദ്യാർഥികളിൽ നിന്നും സ്ഥാപനങ്ങളിൽ നിന്നും സുമനസുകളിൽ നിന്നും നോട്ട് ബുക്ക്, ബാഗ്, കുട, പേന, പെൻസിൽ, ടിഫിൻ ബോക്സ്, ഇൻസ്ട്രമെന്‍റ്ബോക്സ്, പൗച്ച്, തുടങ്ങി കുട്ടികളുടെ പഠനോപകരണങ്ങൾ ഒരു അധ്യയന വർഷത്തേക്ക് സമാഹരിച്ച് ഏറ്റവും അർഹമായവർക്ക് എത്തിച്ച് കൊടുക്കുകയാണ് പഠനമിത്രം പരിപാടി. കുട്ടിക്കാലം മുതൽ സഹജീവി സ്നേഹവും, ജീവകാരുണ്യ പ്രവർത്തനങ്ങളും കുട്ടികളിൽ വളർത്തിയെടുക്കുന്നതിനാണ് ശിശുക്ഷേമ സമിതിയുടെ ലക്ഷ്യം. കഴിഞ്ഞ വർഷം പിറവന്തൂർ പഞ്ചായത്തിലെ മഹാദേവർ മൺഗവ. ഹൈസ്കൂളിൽ വച്ചാണ് പഠനമിത്രം പരിപാടിനടത്തിയത്.ആ പ്രദേശങ്ങളിലെ കുട്ടികൾക്ക് പ്രത്യേകിച്ചും മുള്ളുമല, കുര്യോട്ട്മല, വെള്ളം തെറ്റി ഉന്നതികളിലെ താമസക്കാരായ കുട്ടികൾക്കും മറ്റ് സ്കുളുകളിലെ കുട്ടികൾക്കും വളരെ സഹായകരമായി പരിപാടി സംഘടിപ്പിച്ചു. പരിപാടി വനിതാ കമ്മീഷൻ അധ്യക്ഷ സതി ദേവി ഉദ്ഘാടനം ചെയ്തിരുന്നു.2025 ലെ പഠനമിത്രം പരിപാടിയിലേക്ക് ഏല്ലാവരുടെയും സഹകരണം ഉണ്ടാകണമെന്ന് ജില്ലാ ശിശുക്ഷേമ സമിതി സെക്രട്ടറി അഡ്വ. ഡി .ഷൈൻ ദേവ് അഭ്യർഥിച്ചു.ഫോണ്‌ : 9447571111, 9447719520.

ആരോഗ്യപരിപാലനത്തിന് പ്രകൃതി സൗഹൃദ വഴികളിലേക്ക്

കൊട്ടിയം: പ്രകൃതിദത്തമായ ആരോഗ്യജീവിതം ഉറപ്പാക്കാന്‍ മാതൃകാപദ്ധതിയുമായി മുഖത്തല ബ്ലോക്ക്പഞ്ചായത്ത്. വൃക്ഷലതാദികളുടെ സമൃദ്ധിയും ഫലവൃക്ഷവൈവിധ്യവും ഒരുക്കിയാണ് പ്രാഥമികഘട്ടത്തില്‍ ഒരു ലക്ഷം രൂപ ചിലവഴിച്ച് പ്ലാന്‍റേഷന്‍ പദ്ധതി നടപ്പിലാക്കുക. 2025 -2026 ജനകീയ ആസൂത്രണ പദ്ധതിയില്‍ ഉള്‍പ്പെടുത്തിയാണ് പദ്ധതിയുടെ തുടക്കം. വിദേശത്തുനിന്നുള്ളവ ഉള്‍പ്പെടുന്ന വൃക്ഷവൈവിധ്യമാണ് പ്രദേശത്ത് വരുംനാളുകളില്‍ കാണാനാകുക. ബ്ലോക്ക് പരിധിയിലുള്ള പൊതുജനാരോഗ്യകേന്ദ്രമാണ് പദ്ധതിനിര്‍വഹണത്തിനായി തെരഞ്ഞെടുത്തത്. ഇവിടെയുള്ള ഒരു ഏക്കര്‍ ഭൂമിയില്‍ 40 തരം ഫലവൃക്ഷത്തൈകളാണ് കഴിഞ്ഞ പരിസ്ഥിതിദിനത്തില്‍ നട്ടത്. മരങ്ങളുടെ സാന്നിധ്യത്തിലൂടെ ശുദ്ധവായു ഉറപ്പാക്കാനാകും. പേരയ്ക്ക, സീതപ്പഴം, സപ്പോട്ടയുടെ ഇനങ്ങളായ കലപട്ടി, തായ് ലന്‍ഡ് ബനാന ഗ്രാഫ്റ്റ്, ചാമ്പ ഇനമായ ഡല്‍ഹരി, മാവിനങ്ങളായ കോട്ടൂര്‍ കോണം, മല്ലിക, കൊലമ്പ് എച്ച് ജി ഗ്രാഫ്റ്റ്, സീഡ്‌ലെസ് ലെമണ്‍, ബാര്‍ബദോസ് ചെറി, റംബൂട്ടാന്‍ എന്‍ 18, പ്ലാവിനമായ ജാക്ക് ജെ 33, ജാക്ക് വിയറ്റ്‌നാം സൂപ്പര്‍ ഏര്‍ലി, അവാകാഡോ, അമ്പഴം എന്നിവയോടൊപ്പം വിദേശരാജ്യങ്ങളില്‍മാത്രംകണ്ടുവരുന്ന റോളീനിയ, അബിയു, തുടങ്ങിയ ഫല വൃക്ഷങ്ങളുമുണ്ട്. അത്യുത്പാദനശേഷിയുള്ളവ നട്ടതുവഴി മൂന്നുവര്‍ഷത്തിനുള്ളില്‍ വിളവെടുക്കാം. 100 രൂപ മുതല്‍ 550 രൂപ വരെയാണ് ഓരോ തൈകളുടെയും വിപണി വില. ഡോളോ മൈറ്റ്, വെര്‍മി കമ്പോസ്റ്റ്, അബ്ടക് സൂപ്പര്‍ മീല്‍ എന്നീ വളങ്ങളാണ് പഞ്ചായത്ത് നല്‍കി വരുന്നത്. വളര്‍ന്നുവരുന്ന 40 ഫലവൃക്ഷത്തൈകളുടെ സംരക്ഷണത്തിന് 6,000 രൂപ ചെലവില്‍ 0.5 മീറ്റര്‍ നീളത്തിലുള്ള ട്രീ ഗാര്‍ഡ് വയ്ക്കുകയാണ്. വളവും വെള്ളവും നല്‍കിയുള്ള പരിപാലനം നെടുമ്പന ഹോസ്പിറ്റല്‍ മാനേജ്‌മെന്‍റ് കമ്മിറ്റിയുടെ നേതൃത്വത്തിലാണ് നടത്തുന്നത്. തൈകള്‍ എല്ലാം കൃഷിവകുപ്പിന്‍റെ അഗ്രോ സര്‍വീസ് സെന്‍ററില്‍ നിന്നാണ് വാങ്ങിയത്. സുഭിക്ഷകേരളം ഉറപ്പാക്കുക, അന്തരീക്ഷത്തില്‍ കാര്‍ബണ്‍തോത്കുറയ്ക്കുക,പരിസ്ഥിതിസംരക്ഷണം, തണലിനൊപ്പം ആദായം എന്നിവയാണ് പദ്ധതിയുടെ ലക്ഷ്യങ്ങള്‍. മറ്റു പഞ്ചായത്തുകളിലേക്കുംപദ്ധതി വ്യാപിപ്പിക്കാനാണ് ശ്രമം. തൃക്കോവില്‍വട്ടം പഞ്ചായത്തില്‍ പ്രവര്‍ത്തിക്കുന്ന പകല്‍വീട്ടില്‍പദ്ധതിയ്ക്കായുള്ള സ്ഥലപരിശോധന നടത്തി എന്ന് പഞ്ചായത്ത് പ്രസിഡന്‍റ് ബി .യശോദ പറഞ്ഞു.

‘വാ പിളർന്ന് ’ഓടകള്‌; യാത്രക്കാർ സൂക്ഷിക്കുക

കൊല്ലം: കാൽനട യാത്രക്കാരെ വാരിക്കുഴിയിൽ വീഴ്ത്താൻ വാ പിളർന്നു നഗരത്തിലെ ഓടകൾ. കണ്ണൊന്നു തെറ്റിയാൽ ഓടയിൽ വീണ് അപകടം സംഭവിക്കാം. നഗരത്തിന്‍റെ വിവിധ ഭാഗങ്ങളിൽ സ്ലാബ് തകർന്നും മൂടിയില്ലാതെയും അപകടത്തിലേക്കു തുറന്നിരിക്കുകയാണ് ഓടകൾ.നഗരത്തിലെ ഏറ്റവും തിരക്കേറിയ റോഡുകളിലാണ് ഓടകൾ അപകടക്കെണിയാകുന്നത്. കൊല്ലം വാട്ടർ അഥോറിറ്റി ഓഫീസിനു സമീപത്തും ചിന്നക്കടയിൽനിന്ന് ആശ്രാമത്ത് പോകുന്ന ഭാഗത്തും ജില്ലാ ജയിലിനു സമീപത്തുമെല്ലാം ഓടകളുടെ സ്ലാബുകൾ ക്രമം തെറ്റിയും തകർന്നും കിടക്കുകയാണ്. ചില സ്ലാബുകളുടെ ഒരുവശം ഉയർന്നു നിൽക്കുന്നതും ചിലയിടത്ത് സ്ലാബുകൾക്കിടയിൽ വിടവുള്ളതും അപകടസാധ്യത വർധിപ്പിക്കുന്നു. പൊങ്ങി നിൽക്കുന്ന സ്ലാബുകളിൽ തട്ടി വീഴാനുള്ള സാധ്യതയും കൂടുതലാണ്. രാത്രികാലങ്ങളിലാണ് അപകട സാധ്യത വർധിപ്പിക്കുന്നത്. ചില ഭാഗങ്ങളിൽ വെളിച്ചക്കുറവുമൂലം സ്ലാബ് തകർന്നുകിടക്കുന്നതു ശ്രദ്ധയിൽപ്പെടില്ല.നടപ്പാതയിൽ പലഭാഗത്തും പുല്ല് മൂടിയ നിലയിലാണ്. ഇവിടങ്ങളിൽ ഇഴജന്തുക്കളുടെ ശല്യവുമുണ്ട്. നടപ്പാതയിൽ കുപ്പിച്ചില്ലുകളും മദ്യക്കുപ്പികളും കേബിളും മറ്റും കിടക്കുന്നതും യാത്രക്കാരെ ബുദ്ധിമുട്ടിക്കുന്നുണ്ട്. ഇതുകൂടാതെ കൊള്ളാവുന്ന സ്ലാബുകളുള്ള സ്ഥലങ്ങളിൽ കൈയേറി തട്ടുകടകളും വാഹനപാർക്കിംഗും കാണാം. ഏതായാലും കാൽനടയാത്രക്കാരെ വഴി നടത്തില്ല.ഓടകൾക്കു മൂടി ഇല്ലാത്തതിനാൽ ചെറിയ മഴ പെയ്താൽ പോലും മാലിന്യം വിണ്ടും ഓടയിലേക്ക് നിറയുന്ന അവസ്ഥയാണ് . മഴയൊന്നു പെയ്തുപോയാൽ ഓടകൾ നിറഞ്ഞു വെള്ളം റോഡിലേക്ക് ഒഴുകും. ഓടകളിലെ മാലിന്യമെല്ലാം റോഡിലേക്കും യാത്രക്കാരിലേക്കും നിറയുന്ന രീതിയിലാണ് കാര്യങ്ങൾനീങ്ങുന്നത്. ഓടകൾക്ക് സ്ലാബില്ല. സ്ലാബുകളുള്ള ഓടകൾ തകർന്നും കിടക്കുന്നു. ഓടകളിലെ മാലിന്യമെല്ലാം സമയത്തിനു കോരിമാറ്റിയാൽ പോലും കുറച്ചു പ്രശ്നങ്ങൾ തീരും.ഇത് കൊല്ലം നഗരത്തിന്‍റെ സ്ഥിതിമാത്രമല്ല. ജില്ലയിലെ എല്ലാ നഗരത്തിലും ഇതാണ് അവസ്ഥ. പല വാഹനങ്ങളും ഓടകളിലേക്ക് ഇറങ്ങി അപകടപ്പെടുന്നു. യാത്രക്കാർ സ്ലാബില്ലാത്ത ഓടകളിൽ വീഴുന്നു. അങ്ങനെ നഗരത്തിലെങ്ങും കാൽനടക്കാർക്ക് അപകടക്കെണിയൊരുക്കി സ്ലാബ് തകർന്ന ഓടകൾ. പലരും രക്ഷപ്പെടുന്നത് ആയുസിന്‍റെ ബലത്തിലാണ്. രാത്രികാലങ്ങളിൽ നഗരത്തിലെങ്ങും ഞാണിന്മേൽക്കളിയാണ് കാൽനടയാത്ര. മിക്കയിടത്തും തെരുവുവിളക്കുകൾ കത്താത്തതാണ് അപകടമുണ്ടാക്കുന്നത്. കോൺക്രീറ്റ് സ്ലാബുകൾനഗരവഴികളിൽ ഏറെ ശ്രദ്ധിക്കേണ്ട മറ്റൊരു പ്രശ്നം നടപ്പാതകളിലെ കോൺക്രീറ്റ് സ്ലാബുകളിലെ വിടവുകളും അശാസ്ത്രീയമായ രീതികളുമാണ്. പലയിടത്തും കോൺക്രീറ്റ് സ്ലാബുകൾക്കു മുകളിൽ പഴയ സ്ലാബുകൾ കിടക്കുന്നതും അപകട ഭീഷണി ഉയർത്തുന്നു. രാവിലെയും വൈകുന്നേരവും നടപ്പാതയിലും റോഡുകളിലും വൻതിരക്കാണ് അനുഭവപ്പെടുന്നത്. ഈ സമയങ്ങളിൽ കോൺക്രീറ്റ് സ്ലാബുകൾ തെറ്റായി കിടക്കുന്നത് അപകടം ക്ഷണിച്ചു വരുത്തും. അപകടം വരുത്തുന്ന കോൺക്രീറ്റ് സ്ലാബുകൾ മാറ്റി വിടവുകൾ നികത്തിയും ശരിയാക്കാൻ കഴിഞ്ഞാൽ വഴികളിലെ അപകടഭീഷണി ഒരു പരിധി വരെ ഒഴിവാക്കാൻ കഴിയും. നോക്കിനടന്നാൽ പ്രശ്നം തീരുമോ .നോക്കി നടന്നാലും പ്രശ്നം അവസാനിക്കുന്നില്ല. പ്രശ്നം അവസാനിക്കണമെങ്കിൽ ഓടകൾ വൃത്തിയാക്കി, സ്ലാബുകൾ പാകുക മാത്രമാണ്. കാൽന‌ടയാത്രക്കാർക്ക് ഈ നിരത്തിലൂടെയെല്ലാം നടക്കാനുള്ള അവസരം നല്കുക. ഫുട്പാത്തുകൾ കവർന്നു കച്ചവടം നടത്തുന്നവരെയും വാഹനം പാർക്ക് ചെയ്യുന്നവരെയും അത് ഏതു മോട്ടോർ വെഹിക്കിൾ ഉദ്യോഗസ്ഥരായാലും നടപടി വേണമെന്നു സാരം. ഇനിയെങ്കിലും ഉണർന്നു പ്രവർത്തിക്കാൻ ഉദ്യോഗസ്ഥർക്കും വകുപ്പുകൾക്കും സാധിക്കണം.

ചെമ്പക കുട്ടിയ്ക്ക് ‘സ്നേഹവീട്’ നിർമിച്ച് നൽകി യുവം ക്ലബ്

ജിജുമോൻ മത്തായി പുത്തൂർ : ചോർന്ന് ഒലിക്കുന്ന പ്ലാസ്റ്റിക്ക് വിരിച്ച കൂരയിൽ ഇന്നലെ വരെ അന്തിയുറങ്ങിയ ചെമ്പകകുട്ടി അമ്മയ്ക്ക് പുത്തൂരിലെ ഒരുകൂട്ടം നന്മ മനസുള്ള യുവാക്കൾ വീടൊരുക്കി നൽകി. ആരും തുണയില്ലാതെ ചോർന്ന് ഒലിക്കുന്ന പ്ലാസ്റ്റിക്ക് കൂരയിൽ ജീവിതം തള്ളി നീക്കിയ പുത്തൂർ ചെറുപൊയ്ക പനാറുവിള വടക്കേതിൽ ചെമ്പകകുട്ടിയ്ക്ക് ഇനി മുതൽ സുരക്ഷിതമായി സ്വന്തം വീട്ടിൽ അന്തിയുറങ്ങാം. ചെറുപൊയ്ക യുവം ആർട്സ് ആൻഡ് സ്പോർട്സ് ക്ലബിന്‍റെനേതൃത്വത്തിൽ ആണ് ചെമ്പകക്കുട്ടിക്ക് വേണ്ടി സ്നേഹവീട് നിർമിച്ച് നൽകിയത്. സ്നേഹ വീടിന്‍റെ താക്കോൽ പുത്തൂർ എസ്‌ഐ ടി.ജെ. ജയേഷ് ചെമ്പക കുട്ടിയ്ക്ക് കൈമാറി. യുവം ക്ലബ് പ്രസിഡന്‍റ് ശിഖിൽ എസ്.ദാസ് ചടങ്ങിൽ അധ്യക്ഷത വഹിച്ചു. ഏക മകനും ഒപ്പമുണ്ടായിരുന്ന സഹോദരങ്ങളും മരിച്ചതോടെയാണ് ചെമ്പക കുട്ടി ഒരാശ്രയവും ഇല്ലാതെ തനിച്ചാവുന്നത്. നല്ലൊരു കാറ്റ് വീശിയാൽ തകർന്നു വീഴാവുന്ന കൂരയിൽ ജീവൻ എപ്പോൾ വേണമെങ്കിലും അപകടത്തിലായേക്കുമെന്ന ഭയത്തോടെയായിരുന്നു ചെമ്പകക്കുട്ടിയുടെ ഇന്നലെ വരെയുള്ള ജീവിതം. സമയാസമയങ്ങളിൽ അറ്റകുറ്റപ്പണി ചെയ്യാഞ്ഞതിനാൽ പ്ലാസ്റ്റിക് ഷീറ്റ് മേഞ്ഞ കൂര തകർച്ചയുടെ വക്കിലായിരുന്നു.മഴക്കാലത്ത് കസേരയിൽ ഇരുന്ന് നേരം വെളുപ്പിച്ച ദിവസങ്ങളും അവർക്ക് ഉണ്ടായിട്ടുണ്ട്. ചെമ്പക കുട്ടിയുടെ ദുരവസ്ഥ നാട്ടിലെ യുവാക്കളുടെ ശ്രദ്ധയിൽപ്പെട്ടതോടെയാണ് യുവം ക്ലബ് വീട് നിർമിച്ച് നൽകാൻ തീരുമാനിക്കുന്നത്. കാരുണ്യ മനസുകളുടെ സഹായത്തോടെയാണ് വീടിന്‍റെ പണി പൂർത്തിയാക്കുന്നത്.

ഡോ.ജെ. അലക്സാണ്ടർ പ്രതിഭ പുരസ്കാരം പി.സി. വിഷ്ണുനാഥിന്

കുണ്ടറ :മുൻകർണാടക ചീഫ് സെക്രട്ടറിയും മുൻ മന്ത്രിയും കൊല്ലം ജില്ലക്കാരനുമായിരുന്ന ഡോ.ജെ. അലക്സാണ്ടറിന്‍റെ നാമധേയത്തിലുളള മൂന്നാമത് "രാഷ്്‌ട്രീയ പ്രതിഭ അവാർഡ് "പി.സി. വിഷ്ണുനാഥ് എംഎൽഎയ്ക്ക് .ഡോ.ജെ. അലക്സാണ്ടറിന്‍റെ മുഖചിത്രം ആലേഖനം ചെയ്ത ശില്പവും 15,000 രൂപയും പ്രശംസി പത്രവും അടങ്ങുന്നതാണ് അവാർഡ്. നാളെ രാവിലെ 10ന് കൊല്ലം ബിഷപ് ഡോ. പോൾ ആന്‍റണി മുല്ലശേരി അവാർഡ് സമ്മാനിയ്ക്കുമെന്ന് ഡോ.ജെ. അലക്സാണ്ടർ ഐ എ എസ് സംസ്ഥാന ഭാരവാഹികളായ ചെയർമാൻ എസ്.പ്രദീപ് കുമാർ,രക്ഷാധികാരി സിനു പി. ജോൺസൺ, കൺവീനർ സാബു ബെനഡിക്ട്, സെക്രട്ടറിമാരായ മാതാലയം ജോസ്, സജീവ് പരിശവിള, ജുവാൻ ഷിബു, റോണ റിബൈറോ എന്നിവർ അറിയിച്ചു.

തെന്മലയില്‍ പുലിയെത്തിയ ഭാഗത്ത് വനംവകുപ്പ് കാമറ സ്ഥാപിച്ചു

തെന്മല : തെന്മലയില്‍ പുലിയിറങ്ങി വളര്‍ത്തുനായയെ പിടിച്ച സംഭവത്തില്‍ പ്രദേശത്ത് വനം വകുപ്പിന്‍റെ നിരീക്ഷണം ശക്തമാക്കി. തെന്മല റേഞ്ചില്‍ തെന്മല സെക്ഷനില്‍ ഉള്‍പ്പെടുന്ന നാലപ്പതാംമൈല്‍ ഭാഗത്താണ് കഴിഞ്ഞ ദിവസം പുലിയിറങ്ങുകയും പ്രേംജിത്ത് എന്നയാളുടെ വളര്‍ത്ത് നായയെ വീട്ടിനുള്ളില്‍ കയറി കടിച്ചെടുത്ത് പോവുകയും ചെയ്തത്. പുലിയെത്തിയതും നായയെ ആക്രമിച്ചു കൊണ്ടുപോകുന്നതിന്‍റെയും സിസിടിവി ദൃശ്യങ്ങള്‍ പുറത്തുവന്നതോടെ ജനങ്ങള്‍ക്കിടയില്‍ വലിയ തരത്തില്‍ ആശങ്ക ഉയര്‍ന്നിരിക്കുകയാണ്. ഇതോടെയാണ് തെന്മല റേഞ്ച് ഫോറസ്റ്റ് ഓഫീസര്‍ ശെല്‍വരാജിന്‍റെ നേതൃത്വത്തില്‍ വനപാലകരും ആര്‍ആര്‍ടി സംഘവും വനമേഖലയില്‍ തെരച്ചില്‍ നടത്തിയത്. പുലിയുടെ സാന്നിധ്യം കണ്ടെത്തിയ സ്ഥലത്തു കാമറ ട്രാപ് സ്ഥാപിച്ചിട്ടുണ്ട്. നിരീക്ഷണം തുടരുമെന്നും കൃത്യമായി തിരിച്ചറിയാന്‍ കഴിഞ്ഞാല്‍ പ്രദേശത്ത് കൂട് സ്ഥാപിക്കുമെന്നും വനപാലകര്‍ അറിയിച്ചു. രാത്രിയില്‍ അസ്ക ലൈറ്റ് സ്ഥാപിക്കാനും തീരുമാനിച്ചിട്ടുണ്ട്. അതേസമയം ജനങ്ങള്‍ ആശങ്കയിലും പ്രതിഷേധത്തിലുമാണ്. പുലിയെ കണ്ടെത്തിയ സ്ഥലത്ത് നിന്നും ഏകദേശം രണ്ടു കിലോമീറ്റര്‍ അകലെയാണ് വനാതിര്‍ത്തി. പുലിയിറങ്ങിയതു അങ്കണവാടി, ലക്ഷം വീട് കോളനി ഉള്‍പ്പെടെ വലിയ ജനസാന്ദ്രതയേറിയ സ്ഥലത്താണ്. ഒരുതവണ വരികയും നായയെ ആക്രമിച്ചു കൊണ്ടുപോവുകയും ചെയ്ത സാഹചര്യത്തില്‍ വീണ്ടും പുലി ഇറങ്ങാന്‍ സാധ്യത കൂടുതലാണെന്ന് നാട്ടുകാര്‍ പറയുന്നു. വനം വകുപ്പ് നടപടി ഊര്‍ജിതമാക്കിയില്ലെങ്കില്‍ ജനകീയ പ്രതിഷേധം ഉയര്‍ത്തനാണ് നാട്ടുകാരുടെ തീരുമാനം.

കൊല്ലം രൂപത സ്ഥാപിതദിനാചരണ ചടങ്ങുകൾക്ക് തുടക്കമായി

കൊല്ലം: കൊല്ലം രൂപതയുടെ 696-ാമത് സ്ഥാപിതദിനാചരണ ചടങ്ങുകൾക്കു രൂപത പ്രൊക്യുറേറ്റർ ഫാ. ജോളി ഏബ്രഹാം രൂപത അസ്ഥാനത്ത് പതാക ഉയർത്തിയതോടെ തുടക്കമായി. ബിഷപ് ഹൗസ് ചാപ്പലിൽ നടന്ന ദിവ്യബലിയ്ക്കു രൂപത ചാൻസലർ റവ. ഡോ. ജെറി മുഖ്യകാർമികനായിരുന്നു. തോപ്പ് ഇടവക വികാരി ഫാ. വർഗീസ് പെനാടത്ത് സ്ഥാപിതദിന സന്ദേശം നൽകി. തുടർന്നു നടന്ന യോഗത്തിൽ നാമൊരു കുടുംബം എന്ന ബോധ്യത്തിൽ ആഴപ്പെട്ടു വേദനിക്കുന്നവരെ, മുറിപ്പെട്ടവരെ, സഹായം ആവശ്യമുള്ളവരെ സ്നേഹത്തോടെ ശുശ്രൂഷിക്കുന്ന നല്ല അയൽക്കാരാകാനാണു നാമെല്ലാം വിളിക്കപ്പെട്ടിരിക്കുന്നതെന്നു ഫാ. ജോളി ഏബ്രഹാം പറഞ്ഞു, അൽമായ നേതാക്കളായ ജെയിൻ ആൻസിൽ, ജോസ് വിമൽ രാജ്, മിൽട്ടൺ,യോഹന്നാൻ ആന്‍റണി , സജീവ് പരിശവിള, ലെസ്റ്റർ കാർഡോസ്, ജാക്സൺ നീണ്ടകര, വിൻസി ,സന്തോഷ് മുക്കാട്, എ.ജെ.ഡിക്രൂസ്, റോണാ റെബേറോ, യേശുദാസൻ പാവുമ്പ , അഡ്വ. ഇ.എമേഴ്സൺ, ആഗ്നി സ്റ്റാൻസി ലാവോസ് എന്നിവർ പ്രസംഗിച്ചു. നാളെ രാവിലെ 10ന് നടക്കുന്ന ചരിത്രസെമിനാർ സിഎസ്ഐ കൊല്ലം കൊട്ടാരക്കര രുപതാധ്യക്ഷൻ റവ. ജോസ് ജോർജ് ഉദ്ഘാടനം ചെയ്യും. കൊല്ലം രൂപത ബിഷപ് ഡോ. പോൾ ആന്‍റണി മുല്ലശേരി അധ്യക്ഷത വഹിക്കും.തുടർന്നു ഉച്ചകഴിഞ്ഞ് മൂന്നിനു കൊമ്പ്രിയ സഭാ സംഘമം. വൈകുന്നേരം നാലിനു പ്രദക്ഷിണം. തുടർന്നു ബിഷപ് ഡോ. പോൾ ആന്‍റണി മുല്ലശേരിയുടെ മുഖ്യകാർമികത്വത്തിൽ കൃതജ്ഞതാ ദിവ്യബലി അർപ്പിക്കും.

മലയോര ഹൈവേയിൽ അപകടങ്ങൾ പതിവ്

കുളത്തുപ്പുഴ : മലയോര ഹൈവേയിൽ അപകടങ്ങൾക്ക് അറുതിയില്ല. മലയോര ഹൈവേയിൽ ഓന്ത്പച്ചയ്ക്ക് സമീപം കഴിഞ്ഞദിവസം രാവിലെ തമിഴ്നാട്ടിൽ നിന്നും പാറയുമായി വന്ന ടോറസ് ലോറി വളവു തിരിയവേ നിയന്ത്രണംവിട്ട് തൊട്ടടുത്ത സ്വകാര്യ വ്യക്തിയുടെ പുരയിടത്തിന്‍റെ മൺത്തിട്ടയിലേക്ക് ഇടിച്ചു കയറി. അപകടത്തിൽ ഡ്രൈവർ ക്യാബിനിൽ കുടുങ്ങി. ഇദ്ദേഹത്തെ പുറത്തെടുക്കുവാൻ നാട്ടുകാരും കുളത്തൂപ്പുഴ പോലീസും നടത്തിയ ശ്രമങ്ങൾ പരാജയപ്പെട്ടതിനെ തുടർന്ന് കടയ്ക്കൽ നിന്നും ഫയർഫോഴ്‌സ് എത്തിയാണ് ക്യാബിനുള്ളിൽ കാലു കുടുങ്ങിയ നിലയിൽ ആയിരുന്ന ഡ്രൈവറെ പുറത്ത് എടുത്തത്. മലയോര ഹൈവേയിൽ അടിക്കടി അപകടങ്ങൾ ഉണ്ടാകുന്നു. ഒരു ഫയർ സ്റ്റേഷൻ ഇല്ലാത്തതിന്‍റെ ബുദ്ധിമുട്ടുകളാണ് നാട്ടുകാർ പറയുന്നത്. അപകടങ്ങൾ ഉണ്ടായാൽ മണിക്കൂറുകൾ കഴിഞ്ഞാണ് പുനലൂരിൽ നിന്നോ കടയ്ക്കൽ നിന്നോ ഫയർഫോഴ്സ് എത്തുന്നത്. ഇതിനൊരു ശാശ്വത പരിഹാരം കാണണമെന്നാണ് പ്രദേശവാസികളുടെയും കുളത്തൂപ്പുഴയിലെ വ്യാപാരി വ്യവസായികളുടെയും ആവശ്യം . അപകടത്തിൽ പരിക്കേറ്റ ഡ്രൈവറായ തമിഴ്നാട് സേലം സ്വദേശി രാജവേലിനെ കടയ്ക്കൽ താലൂക്ക് ഹോസ്പിറ്റലിൽ പ്രവേശിപ്പിച്ചു.

വിശക്കുന്ന വയറിന് ‘ഒരു പൊതി ചോറ് ’ നൽകി വിദ്യാർഥികൾ

കൊല്ലം: വിശക്കുന്ന വയറിന് ഒരു പൊതി ചോറ് നല്‍കുക എന്ന നന്മയുള്ള ആശയവുമായി മുന്നിട്ടിറങ്ങിയിരിക്കുകയാണ് കൊല്ലം ക്രിസ്തുരാജ് ഹയർ സെക്കൻഡറി സ്കൂളിലെ കുട്ടികള്‍. സ്കൂളിലെ നാഷണൽ സർവീസ് സ്കീമിന്‍റെ നേതൃത്വത്തിൽ എല്ലാ വെള്ളിയാഴ്ചയുമാണ് പൊതിച്ചോറു വിതരണം. ജില്ലാ ആശുപത്രിയിലെ രോഗികൾക്കും കൂട്ടിയിരിപ്പുകാർക്കുമാണ് പൊതിച്ചോറ് വിതരണം ചെയ്യുന്നത്. ജില്ലയിലെ ഏറ്റവും പഴക്കമുള്ള സ്കൂളുകളിൽഒന്നായ ഈ സ്കൂളിന്‍റെ ആപ്തവാക്യം പോലെ ദൈവത്തെ സേവിക്കുകയാണ് ഇവർ ഈ അന്നദാനത്തിലൂടെ. പൊതിച്ചോറ് കുട്ടികള്‍ വീടുകളില്‍ നിന്നു കൊണ്ടു വരും. അധ്യാപകരുമൊത്ത് ജില്ലാ ആശുപത്രിയിലെത്തി കൊടുക്കും. എല്ലാ വെള്ളിയാഴ്ചയും ഒന്നോ രണ്ടോ വാഹനങ്ങൾ അധ്യാപകരുടെയും വിദ്യാർഥികളുടെയും നേതൃത്വത്തിൽ ആശുപത്രിയിലേക്ക് പോകുന്നുണ്ട്. എല്ലാ വരും ഒരു പൊതിച്ചോറുമായി സ്കൂളിലെത്തും. വളരെ സ്നേഹത്തോടെ താത്പര്യത്തോടെ അവർ അത് വിദ്യാർഥി പ്രതിനിധികളെ ഏൽപിക്കും. ഈ സ്കൂളിന്‍റെ മുൻ പ്രിൻസിപ്പൽ ജി. ഫ്രാൻസീസിന്‍റെ കാലത്താണ് പൊതിച്ചോറ് വിതരണം ആരംഭിച്ചത്. അന്നും ഇന്നും എൻഎസ്എസ് വോളണ്ടിയർമാരാണ് ഇതിന്‍റെ പ്രവർത്തനവുമായി മുന്നോട്ടു പോകുന്നത്. ഇപ്പോഴത്തെ പ്രിൻസിപ്പൽ എ. റോയ്‌സ്റ്റന്‍റെ നിർദേശവും പിന്തുണയും ഏറ്റുവാങ്ങി എൻഎസ്എസ് പ്രോഗ്രാം ഓഫീസറും പൊളിറ്റിക്കൽ സയൻസ് അധ്യാപികയുമായ എ. മഡോണയും ലീഡർമാരായ അതുൽ കൃഷ്ണ, ജെഫ്രീൻ, മുബീന മുനീർ എന്നിവരുടെ നേതൃത്വത്തിലാണ് പൊതിച്ചോറിന്‍റെ പ്രവർത്തനം മുന്നോട്ടു പോകുന്നത്. ഇവരെ സഹായിക്കാൻ പത്തോളം വോളണ്ടിയർമാർ സദാസന്നിഹിതരായിട്ടുണ്ട്. സ്കൂൾ മാനേജ്മെന്‍റിന്‍റെയും അധ്യാപകരുടെയും വിദ്യാർഥികളുടെയും സ്നേഹവുംസഹകരണവുമാണ് ഈ പദ്ധതിയുടെ വിജയമെന്ന് കുട്ടികൾ പറയുന്നു.

അപകടകാരികളായി തെരുവുനായ്ക്കൾ : സൂക്ഷിച്ചില്ലേൽ കടി കിട്ടും

കൊല്ലം: ജില്ലയിൽ തെരുവുനായ അക്രമം അടിക്കടി കൂടി വരികയാണ്. ബീച്ച്, പൊതുനിരത്തുകള്‍, ഗ്രാമീണ റോഡുകള്‍, ഇടവഴികള്‍, ബസ് സ്റ്റാന്‍ഡ്, സ്‌കൂളുകള്‍, ആശുപത്രികള്‍ തുടങ്ങി എല്ലായിടങ്ങളിലും തെരുവുനായ്ക്കളുടെ വിഹാരമാണ്. മനുഷ്യൻ വലിച്ചെറിയുന്ന മാലിന്യകൂന്പാരങ്ങളിലും ഇവയെ കാണാം. വഴിയിലിറങ്ങി നടക്കാൻ സാധിക്കാത്തഅവസ്ഥ. എപ്പോഴാണ് കടിക്കുന്നതെന്നു മാത്രം പറയാൻ സാധിക്കില്ല. മനുഷ്യൻതന്നെ സ്നേഹത്തോടെ ഭക്ഷണം നൽകി വളർത്തുന്ന തെരുവുനായ്ക്കളും തെരുവ് കീഴടക്കുകയാണ്. ആരും നിയന്ത്രിക്കാനില്ലാത്ത അവസ്ഥ. വാഹനങ്ങളുടെ ഇടയിലൂടെ പായുന്ന ഇവ അപകടം വിളിച്ചുവരുത്തുകയാണ്. എത്രയെത്ര സംഭവങ്ങളാണ് നമുക്കുചുറ്റും നടക്കുന്നത്. തെരുവുകൾ കീഴടക്കി നായകൾ പായുന്പോൾ പേടിച്ചുമാറിനിൽക്കുകയാണ് പൊതുജനം. ആര് ആരോട് പറയാൻ എന്നതുപോലെ ആരോടും പറഞ്ഞിട്ടുകാര്യമില്ല. ബസ് സ്റ്റാൻഡിലും കടയിലും വഴിയിലും ഇവയുടെ സാന്നിധ്യമുണ്ട്. മാലിന്യം വലിച്ചെറിഞ്ഞുകൊടുത്താണ് നമ്മൾ ഇവയെ ഇത്രയേറെ വളർത്തിയത്. കുട്ടികൾക്കും വഴിയാത്രക്കാർക്കുപോലും പുറത്തിറങ്ങാൻ സാധിക്കുന്നില്ല. ഏപ്രിൽ-മേയ് മാസങ്ങളിൽ മാത്രം എത്രയേറെ ആക്രമണങ്ങളാണ് തെരുവുനായകളുടെ ഭാഗത്തുനിന്നുമുണ്ടായത്. കൊല്ലം കുരീപ്പള്ളിയില്‍ ഏപ്രിലാണ് തെരുവുനായകളുടെ കടിയേറ്റ് എട്ടുവയസുകാരന്‍ ഉള്‍പ്പെടെ അഞ്ചുപേർക്കു പരിക്കേറ്റത്. തൃക്കോവില്‍വട്ടം പഞ്ചായത്തിലെ പാലമുക്ക് വയലില്‍ കുരിശടിക്കു സമീപമാണ് പ്രദേശത്ത് പതിവായി കണ്ടിരുന്ന നായ ആക്രമണകാരിയായത്. കൃഷിയിടത്തില്‍ നിന്നവരെ പോലും കടിച്ചു. മേയ്മാസത്തിൽ കൊല്ലത്ത് തെരുവുനായയുടെ ആക്രമണത്തില്‍ 11 പേര്‍ക്ക് പരിക്കേറ്റു. കൊല്ലം അലയമണ്‍ കരുകോണിലാണ് സംഭവം. പരിക്കേറ്റവരില്‍ ഒരു കുട്ടിയും ഉള്‍പ്പെടുന്നു. ഓച്ചിറ ക്ലാപ്പനയില്‍ തെരുവുനായ്ക്കള്‍ കൂടുപൊളിച്ച് 30 കോഴികളെ കൊന്നു. 2019ലെ ലൈവ്സ്റ്റോക്ക് സെന്‍സസ് പ്രകാരം 2,89,986 ആയിരുന്നു തെരുവുനായകളുടെ എണ്ണമെങ്കില്‍ ഇപ്പോഴതു നാലുലക്ഷത്തിലേറെയായി. തെരുവുനായ ശല്യം രൂക്ഷമാകുമ്പോള്‍ തദ്ദേശ സ്ഥാപനങ്ങളുടെ നേതൃത്വത്തില്‍ കൊന്നൊടുക്കുകയായിരുന്നു പതിവ്. 1994ലെ പഞ്ചായത്ത് ആക്ടും മുനിസിപാലിറ്റി ആക്ടും പ്രകാരം മനുഷ്യർക്കു ഭീഷണി ഉയര്‍ത്തുന്ന അക്രമാസക്തരായ തെരുവുനായകളെയും പന്നികളെയും കൊല്ലാന്‍ തദ്ദേശ സ്ഥാപനങ്ങള്‍ക്ക് അധികാരവുമുണ്ടായിരുന്നു. മൃഗസ്നേഹികള്‍ അതിനെതിരെ രംഗത്തു വരികയും തെരുവുനായകളെ കൊല്ലുന്നതിനു കേന്ദ്ര സര്‍ക്കാറും ജുഡീഷ്യറിയും വിലക്കേര്‍പ്പെടുത്തുകയും ചെയ്തതോടെയാണ് നായകളുടെ എണ്ണവും അക്രമവും വന്‍തോതില്‍ വര്‍ധിച്ചത്. നായകളെ വന്ധ്യംകരിക്കലും (എബിസി) ആനിമല്‍ ഷെല്‍ട്ടര്‍ നിര്‍മാണവുമാണ് പകരം നിര്‍ദേശിക്കപ്പെട്ട മാര്‍ഗങ്ങള്‍. എന്നാല്‍ കേന്ദ്ര ആനിമല്‍ വെല്‍ഫെയര്‍ ബോര്‍ഡ് ചട്ടം കര്‍ശനമാക്കിയതോടെ വന്ധ്യംകരണം പ്രതിസന്ധിയിലായി. പക്ഷിപ്പനി ബാധിച്ച കോഴികളെ വന്‍തോതില്‍ കൊന്നൊടുക്കുന്നുണ്ട് രാജ്യത്ത്. നായകളുടെ കാര്യത്തില്‍ മാത്രം ഇതായിക്കൂടാ എന്നു പറയുന്നതിലെ യുക്തി മനസിലാക്കാന്‍ പ്രയാസമുണ്ട്. ജില്ലാ പഞ്ചായത്തിന്‍റെ പോര്‍ട്ടബിള്‍ എബിസി സെന്‍ററുകള്‍ കൊല്ലം: തെരുവുനായപ്രശ്നപരിഹാരത്തിനു ജില്ലാ പഞ്ചായത്തിന്‍റെ പോര്‍ട്ടബിള്‍ എബിസി സെന്‍ററുകള്‍ ജില്ലയിലെ തെരുവുനായ പ്രശ്നത്തിനു പരിഹാരമായി. ജില്ലാ പഞ്ചായത്തിന്‍റെ നേതൃത്വത്തില്‍ പോര്‍ട്ടബിള്‍ എബിസി സെന്‍റര്‍ നടപ്പിലാക്കുന്നു. കുര്യോട്ട്മലയില്‍ നിര്‍മിച്ചുവരുന്ന എബിസി സെന്‍ററിന് പുറമേയാണ് പുതിയവ. കാരവന്‍ മാതൃകയിലുള്ള കാബിനാണ് ഏര്‍പ്പെടുത്തുന്നത്. മൂന്ന് ഓപ്പറേഷന്‍ ടേബിളുകളാണുള്ളത്. വന്ധ്യംകരണത്തിനു ശേഷം പാര്‍പ്പിക്കുന്ന കൂടുകളും പോര്‍ട്ടബിള്‍ സെന്‍ററിന്‍റെ ഭാഗമാണ്. തുക ജില്ലാ പഞ്ചായത്താണ് വഹിക്കുന്നത്. ജനസാന്ദ്രതകുറഞ്ഞ മേഖലയിലാകും സെന്‍റര്‍ ക്യാമ്പ് ചെയ്യുക. ഏഴു ദിവസം തദ്ദേശസ്വയംഭരണസ്ഥാപനപരിധിയിലെ പരമാവധി തെരുവുനായകളെ വന്ധ്യംകരിക്കും. ശേഷം നാലുദിവസം സംരക്ഷണം നല്‍കിയശേഷം തുറന്നുവിടും.

കലാപങ്ങൾ നേരിടാന്‍ മോക്ഡ്രില്‍ നടത്തി പോലീസ്

കൊല്ലം: ആള്‍ക്കൂട്ടം പാഞ്ഞടുത്താലും കോലം കത്തിച്ച് തീപടര്‍ത്തിയാലും വടിയെടുത്താലും കല്ലെടുത്താലും നേരിടാന്‍ സുസജ്ജമാണ് എപ്പോഴും കേരള പോലിസ്. സേനയുടെ കാര്യക്ഷമതയുടെ മാറ്റുരച്ചുനോക്കുന്നതിനായി ആശ്രാമം മൈതാനത്ത് സിറ്റി പോലിസ് കമ്മിഷണര്‍ കിരണ്‍നാരായണന്‍റെ നേതൃത്വത്തിൽ ഇതിന്‍റെ ഭാഗമായി മോക്ഡ്രില്‍ (തയാറെടുപ്പ് പരിശീലനം) നടത്തി. ചാത്തന്നൂര്‍, കരുനാഗപ്പള്ളി, എഴുകോണ്‍ സബ് ഡിവിഷനുകളിലെയും എആര്‍ ക്യാമ്പിലെയും 46 ഉദ്യോഗസ്ഥരാണ് പരിപാടിയിൽ പങ്കെടുത്തത്. നാഷണല്‍ പോലീസ് അക്കാദമിയില്‍നിന്ന് വിരമിച്ച ഡ്രില്‍ ഇന്‍സ്ട്രക്‌ടര്‍ കെ.എന്‍. സോമനും കേരള പോലീസ് അക്കാദമിയില്‍ നിന്നുള്ള വിദഗ്ധ പരിശീലകരുമാണ് മോക്ക് ഡ്രില്‍ നയിച്ചത്.8.30ന് ആരംഭിച്ച മോക്ക് ഡ്രില്‍ ഒരുമണിക്കൂറിലാണ് പൂര്‍ത്തിയായത്. ആദ്യം ലാത്തിചാര്‍ജ്, ജനക്കൂട്ടം കൂടുതല്‍ അക്രമത്തിലേക്ക് നീങ്ങുമ്പോള്‍ ഗ്രനേഡ് പ്രയോഗം. കോലം കത്തിക്കുമ്പോള്‍ ഫയര്‍ഫോഴ്‌സ് തീ അണയ്ക്കുന്നതും പരിക്കേല്‍ക്കുന്നവരെ ആംബുലന്‍സിലെത്തിച്ചുള്ള രക്ഷാപ്രവര്‍ത്തനവും പോലീസ്‌ വാഹനആക്രമണപ്രതിരോധവും ഒക്കെ മോക്ക് ഡ്രില്ലിൽ അവതരിപ്പിച്ചു.

ഹിരോഷിമ ദിനാചരണം സംഘടിപ്പിച്ചു

ചാത്തന്നൂർ: സമാധാന സന്ദേശവുമായി ചാത്തന്നുർ ഗവ. എൽപി സ്കൂളിൽ ഹിരോഷിമാ ദിനം ആചരിച്ചു. പ്രത്യേക അസംബ്ലി , സമാധാന സന്ദേശം നൽകൽ, സഡാക്കോ കൊക്ക് നിർമാണം, പോസ്റ്റർ നിർമാണം, യുദ്ധവിരുദ്ധ റാലി, ഡോക്യുമെന്‍ററി പ്രദർശനം, ക്വിസ് മത്സരം , എന്നിവ നടത്തി. പ്രധാനാധ്യാപിക ജ്യോതി ,പി റ്റി എ പ്രസിഡന്‍റ് ആരതി , പിടിഎ അംഗം എസ്. ജയകുമാർ, അധ്യാപകരായ ബിന്ദു,സ്നേഹ ,അനിത ,ശാലിനി, ലിഷ. എസ് ധരൻ, മായ ,അധ്യാപക വിദ്യാർഥികൾ എന്നിവർ നേതൃത്വം നൽകി. ചാത്തന്നൂർ : ചാത്തന്നൂർ ഗവ. വൊക്കേഷണൽ ആന്‍ഡ് ഹയർ സെക്കൻഡറി സ്കൂളിൽ ജൂനിയർ റെഡ് ക്രോസിന്‍റെ ആഭിമുഖ്യത്തിൽ ഹിരോഷിമ ദിനം ആചരിച്ചു.ഹെഡ്മിസ്ട്രസ് സി. എസ്. സബീല ബീവി ഉദ്ഘാടനം ചെയ്തു. ജെആർസി ചാത്തന്നൂർ സബ്ജില്ലാ മുൻ സെക്രട്ടറി പി. പ്രദീപ് അധ്യക്ഷനായിരുന്നു. കൗൺസിലർ എ. അശ്വതി പ്രതിജ്ഞ ചൊല്ലിക്കൊടുത്തു. റാലി സ്കൂളിൽ നിന്നും ആരംഭിച്ച് മംഗളം ജംഗ്ഷൻ, ഗവ. എൽ പി എസ് ജംഗ്ഷൻ വഴി സ്കൂളിൽ എത്തി. അശ്വതി അജയൻ, പി. മോഹനൻ, എസ്.ബിജിലി തുടങ്ങിയവർ നേതൃത്വം നൽകി.

ഭിന്നശേഷിക്കാർക്ക് മെഡിക്കൽ ഉപകരണങ്ങൾ വിതരണം ചെയ്തു

കൊട്ടാരക്കര : ഗാന്ധിഭവനിലെ ഭിന്നശേഷിയുള്ളവർക്ക് സാമൂഹ്യനീതി, ശാക്തീകരണ വകുപ്പ് നൽകിയ മെഡിക്കൽ ഉപകരണങ്ങൾ മന്ത്രി കെ.എൻ. ബാലഗോപാൽ കൈമാറി. കൊട്ടാരക്കരയിൽ നടന്ന ചടങ്ങിൽ കെഎസ്എഫ്ഇ ചെയർമാൻ കെ .വരദരാജൻ അധ്യക്ഷനായി. ഗാന്ധി ഭവൻ സെക്രട്ടറി പുനലൂർ സോമരാജൻ, ചെയർപേഴ്സൺ ഷാഹിദകമാൽ, മാനേജിംഗ് ഡയറക്ടർ ബി .ശശികുമാർ, അഡ്മിനിസ്ട്രേറ്റീവ് ഓഫീസർ ബി. മോഹനൻ, അസി. സെക്രട്ടറി ജി. ഭുവനചന്ദ്രൻ, ഗാന്ധിഭവൻ സ്നേഹാശ്രമം വികസന സമിതി ചെയർമാൻ ബി. പ്രേമാനന്ദന്ദ് എന്നിവർ പങ്കെടുത്തു. വാക്കിംഗ് സ്റ്റിക്കുകൾ, ട്രൈപോഡുകൾ, എൽബോ ക്രച്ചസുകൾ, ഫൈനൽ സപ്പോർട്ടുകൾ, വീൽചെയറുകൾ തുടങ്ങിയ ഉപകരണങ്ങളാണ് ലഭിച്ചത്.

തൊഴിലുറപ്പ് തൊഴിലാളികൾക്ക് ശില്പശാല സംഘടിപ്പിച്ചു

കൊട്ടിയം:ദേശീയ ഗ്രാമീണ തൊഴിലുറപ്പ് പദ്ധതിയിലെ പ്രവർത്തനങ്ങളെ സംബന്ധിച്ചും ഏറ്റെടുക്കേണ്ട തൊഴിൽ സംരംഭങ്ങളെ ക്കുറിച്ചും എൻആർഇജി വർക്കേഴ്സ് യൂണിയൻ ശില്പശാല സംഘടിപ്പിച്ചു.ജില്ലാ കമ്മറ്റിയുടെ നേതൃത്വത്തിൽ കൊട്ടിയം ആനിമേഷൻ സെന്‍ററിൽ നടത്തിയ ജില്ലാ ശില്പശാലയിൽ യൂണിയൻ ജില്ലാ പ്രസിഡന്‍റ് സി. രാധാമണി അധ്യക്ഷയായിരുന്നു. സംസ്ഥാന ട്രഷർ സി.കെ. ഹരീന്ദ്രൻ എംഎൽഎ ഉദ്ഘാടനം ചെയ്തു. എസ്. രാജേന്ദ്രൻ വിഷയം അവതരിപ്പിച്ചു. സംസ്ഥാന എക്സിക്യൂട്ടീവ് അംഗം സൂസൻ കോടി, യൂണിയൻ ജില്ലാ സെക്രട്ടറി വി. ജയപ്രകാശ് ,സംസ്ഥാന കമ്മിറ്റി അംഗങ്ങളായ ഡി. രാധാകൃഷ്ണൻ, യാസ്ഫാൽ എന്നിവർ പ്രസംഗിച്ചു. വിവിധ വിഷയങ്ങളെ സംബന്ധിച്ച് ക്ലാസുകൾ സംഘടിപ്പിച്ചു. 27ന് തൊഴിലുറപ്പ് പദ്ധതിയെ തകർക്കുന്ന കേന്ദ്ര സർക്കാരിന്‍റെ തെറ്റായ നയങ്ങൾക്കെതിരെ കേന്ദ്ര സർക്കാർ ഓഫീസുകളിലേക്ക് ഏരിയ കമ്മറ്റികളുടെ നേതൃത്വത്തിൽ മാർച്ചും ധർണയും നടത്താൻ തീരുമാനിച്ചു.

അധ്യാപികയുടെ ഭർത്താവിന്‍റെ മരണം; കരിദിനം ആചരിച്ചു

കൊല്ലം: പത്തനംതിട്ടയിലെ അധ്യാപികയുടെ ഭർത്താവിന്‍റെ മരണത്തിൽ അനുശോചനം അറിയിച്ചുകൊണ്ടും വിദ്യാഭ്യാസ ഓഫീസർമാർ നിയമാനുസൃതമായ നിയമനങ്ങൾ അംഗീകരിച്ചു നൽകാത്തതിൽ പ്രതിഷേധിച്ചു രൂപത കാത്തലിക് സ്കൂൾസ് സ്റ്റാഫ് അസോസിയേഷൻ രൂപതയിലെ എല്ലാ സ്കൂളുകളിലും കരിദിനം ആചരിച്ചു. ഇരവിപുരം സെന്‍റ് ജോൺ ഹൈസ്കൂളിൽ നടന്ന രൂപത തല പ്രതിഷേധ സംഗമം രൂപത വിദ്യാഭ്യാസ സെക്രട്ടറി ഫാ. ബിനു തോമസ് ഉദ്ഘാടനം ചെയ്തു. ഇന്ത്യൻ ഭരണഘടന വിഭാവനം ചെയ്യുന്ന ന്യൂനപക്ഷ അവകാശങ്ങൾ തുടർച്ചയായി ലംഘിക്കുംവിധമാണ് സർക്കാർ ന്യൂനപക്ഷ വിദ്യാഭ്യാസ സ്ഥാപനങ്ങളോട് പ്രവർത്തിക്കുന്നതെന്ന് അദ്ദേഹം പറഞ്ഞു. കൊല്ലം രൂപതയിലെ കോർപറേറ്റീവ് മാനേജ്മെന്‍റിന്‍റെ കീഴിലുള്ള മുഴുവൻ സ്കൂളുകളും കരിദിനമായി ആചരിക്കുകയും ചെയ്തു. സി എസ് എസ് എ പ്രസിഡന്‍റ് ആർ.ബർണാഡ്, സെക്രട്ടറി സുമേഷ് ദാസ്, കിരൺ ക്രിസ്റ്റഫർ, ഷൈൻ കൊടുവിള, അജിത്ത് ജോസ്, സിന്ധ്യ,സിസ്റ്റർ റെയ, റെയ്നി റൈമണ്ട്, ജോസ് കാർലോസ്, ഡേവിഡ് ജോൺ, സൂസി മെവിൻ, ആഷ്‌ലി, അനു സേവ്യർ, സുമ തുടങ്ങിയവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]