ADVERTISEMENT

ADVERTISEMENT

അടൂർ എൻജിനിയറിംഗ് കോളജിൽ എൻആർപിഎഫ്‌ റീജണൽ മീറ്റ്

അടൂർ: എപിജെ അബ്ദുൾ കലാം ടെക്നോളജിക്കൽ യൂണിവേഴ്സിറ്റിയുടെ നാച്ചുറൽ റിസോഴ്‌സ് പ്രൊട്ടക്ഷൻ ഫോഴ്‌സ് (എൻആർപിഎഫ്) റീജണൽ മീറ്റ് ജീവനം 25 കോളജ് ഓഫ് എൻജിനിയറിംഗ് അടൂരിൽ നടന്നു.

യൂണിവേഴ്സിറ്റിയുടെ നാഷണൽ സർവീസ് സ്കീം മുഖ്യധാര പ്രവർത്തനങ്ങളിൽ ഒന്നാണ് എൻആർപിഎഫ് മീറ്റ്. കൊല്ലം, പത്തനംതിട്ട ജില്ലകളുടെ റീജണൽ മീറ്റാണ് അടൂരിൽ നടന്നത്. വടശ്ശേരിക്കര റേഞ്ച് ഫോറസ്റ്റ് ഓഫീസർ രഞ്ജിത് ജി.എസ്.രഞ്ജിത് ഉദ്ഘാടനം ചെയ്തു.

മെക്കാനിക്കൽ എഞ്ചിനീയറിങ് വിഭാഗം പ്രൊഫ. മനു എം. ജോൺ അധ്യക്ഷത വഹിച്ചു. എൻഎസ്എസ് റീജണൽ കോഓർഡിനേറ്റർ പ്രഫ. എച്ച്.ഷാരോസ്, എൻഎസ്എസ് പ്രോഗ്രാം ഓഫീസർ എച്ച്.എസ്.ശ്രീദീപ, വോളണ്ടിയർ സെക്രട്ടറി ആലൻ സഖറിയ എന്നിവർ പ്രസംഗിച്ചു.

ADVERTISEMENT

കോന്നി ഇക്കോ ടൂറിസം സെന്‍ററിൽ ഗജദിനാചരണം

കോന്നി: ലോക ഗജദിനം കോന്നി ഇക്കോ ടൂറിസം സെന്‍ററിൽ വനം വന്യജീവി വകുപ്പിന്‍റെ നേതൃത്വത്തിൽ നടന്നു. ഡിഎഫ്ഒ ഇൻ ചാർജ് ബി. രാഹുൽ ഉദ്ഘാടനം ചെയ്തു. ആനയൂട്ടും ആനയെ സംബന്ധിച്ച പഠന ക്ലാസും നടന്നു. കോന്നി റിപ്പബ്ലിക്കൻ ലൊക്കേഷനിൽ ഹയർ സെക്കൻഡറി സ്കൂൾ, വെട്ടൂർ വി.എസ്. ശ്രീധരൻപിള്ള മെമ്മോറിയൽ എൽപി സ്കൂൾ എന്നിവിടങ്ങളിലെ വിദ്യാർഥികൾ പങ്കെടുത്തു. ആനയൂട്ടിൽ കോന്നി ഇക്കോ ടൂറിസം സെന്‍ററിലെ ഈവ, പ്രിയദർശിനി, മീന എന്നീ ആനകൾ പങ്കെടുത്തു. ആനകൾക്ക് വിദ്യാർഥികളും വിനോദസഞ്ചാരികളും നാട്ടുകാരും വനപാലകരും ചേർന്ന് കൈതച്ചക്ക, കരിമ്പ്, തണ്ണിമത്തൻ, വെള്ളരിക്ക, ശർക്കര, കാരറ്റ്, വാഴപ്പഴം എന്നിവ നൽകി. ആനകളുമായി അടുത്തിടപഴകാൻ കഴിഞ്ഞതും ഭക്ഷണം നൽകാൻ കഴിഞ്ഞതും വിദ്യാർഥികൾക്കും പുതിയ അനുഭവമായി.

മേലുകര പള്ളിയോടം നാളെ നീരണിയും

പത്തനംതിട്ട: പുതുക്കിപ്പണിത മേലുകര പള്ളിയോടം നാളെ രാവിലെ 9.30 ന് നീറ്റിലിറക്കും. മേലുകര പള്ളിയോട് സംരക്ഷണ സമിതിയുടെ ഉടമസ്ഥതയിലുള്ള എ ബാച്ച് പള്ളിയോടം 2011 ലാണ് പണിതിറക്കിയത്. ചോർച്ച ഉൾപ്പെടെ വള്ളത്തിന് കേടുപാടുകൾ കണ്ടതിനേ തുടർന്ന് പൂർണമായി പുതുക്കിപ്പണിതു നീറ്റിലിറക്കുന്നത്. ചങ്ങംകരി വേണു ആചാരിയുടെ നേതൃത്വത്തിലാണ് പണികൾ. അഞ്ചുമാസം കൊണ്ടാണ് നിർമാണം പൂർത്തിയാക്കിയത്. മൂന്ന് വലിയ ആഞ്ഞിലിത്തടികൾ ഇതിനായി ഉപയോഗിച്ചു. അമരം വെള്ളക്കുമ്പിൾ തടി ഉപയോഗിച്ചാണ് പണിതിരിക്കുന്നത്. എലിമുള്ളുംപ്ലാക്കലിൽ നിന്നാണ് വെള്ള കുമ്പിൾ തടി ലഭിച്ചത്. തിരുവോണത്തോണി കടന്നുപോകുന്ന വഴിത്താരയിലാണ് കര സ്ഥിതി ചെയ്യുന്നത്. പ്രാചീന കാലം മുതൽ പള്ളിയോടം നിലവിലുണ്ടായിരുന്നു. 52 കോൽ നീളമാണ് പള്ളിയോടത്തിനുള്ളത്. ഇതോടെ ആറന്മുളയിലെ ഏറ്റവും നീളമുള്ള പള്ളിയോടമായി മേലുകര മാറും. 64 അംഗുലം ഉടമയും 16 അടി അമരപ്പൊക്കവുമുള്ള പള്ളിയോടം വേഗംകൂടി ലക്ഷ്യമാക്കിയാണ് പുതുക്കിയിരിക്കുന്നത്. പടയണിയെ അടിസ്ഥാനമാക്കിയാണ് കൊത്തുപണികൾ ചെയ്‌തിരിക്കുന്നത്. 1971, 1972, 2000, 2004, 2006, 2007, 2019 വർഷങ്ങളിൽ മന്നം ട്രോഫി നേടിയ കരയാണ് മേലുകര. ധാരാളം രണ്ടാം സ്ഥാനങ്ങളും ലഭിച്ചിട്ടുണ്ട്. ഏറ്റവും നല്ല ചമയത്തിനുള്ള ആർ. ശങ്കർ ട്രോഫിയും നേടിയിട്ടുണ്ട്. എറണാകുളം, ആലപ്പുഴ ജലമേളകളിലും നിരവധി തവണ പങ്കെടുത്തിട്ടുണ്ട്. 40 ലക്ഷം രൂപ ചെലവായി. മുഖ്യ തച്ചനും കരക്കാരും ചേർന്ന് പള്ളിയോടം നീറ്റിലിറക്കും. ജനറൽ കൺവീനർ അനൂപ് ഉണ്ണികൃഷ്‌ണൻ, സെക്രട്ടറി രാജേഷ്കുമാർ, ട്രഷറർ ഷാജി ആർ. നായർ, മനു വി. പിള്ള, ജ്യോതിഷ് എന്നിവർ പങ്കെടുത്തു.

നൂറനാട് അമ്പിളി കൊലക്കേസ് : ഭർത്താവിനും കാമുകിക്കും ജീവപര്യന്തം

ചാരുംമൂട്: ഭാര്യയെ മർദിച്ച് ബോധം കെടുത്തിയശേഷം കെട്ടിത്തൂക്കികൊലപ്പെടുത്തിയ കേസിൽ ഭർത്താവിനും കാമുകിക്കും ജീവപര്യന്തം തടവും പിഴയും ശിക്ഷ വിധിച്ചു. പത്തനംതിട്ട ചിറ്റാർ സീതത്തോട് പുത്തൻവിളയിൽ പരേതരായ കരുണാകരന്‍റെയും തങ്കമ്മയുടെയും മകൾ അമ്പിളി(38)യെ കൊലപ്പെടുത്തിയ കേസിലാണ് ഒന്നാം പ്രതിയായ ഭർത്താവ് പാലമേൽ മറ്റപ്പള്ളി ഉളവുക്കാട്ട് ആദർശ് ഭവനിൽ സുനിൽകുമാർ (44), ഇയാളുടെ കാമുകിയും രണ്ടാം പ്രതിയുമായ പാലമേൽ മറ്റപ്പള്ളി ഉളവുക്കാട്ട് ശ്രീരാഗ് ഭവനം വീട്ടിൽ ശ്രീലത (53) എന്നിവർക്ക് ജീവപര്യന്തം തടവും അമ്പതിനായിരം രൂപ പിഴയും ശിക്ഷ വിധിച്ചത്. മാവേലിക്കര അഡീഷണൽ സെഷൻസ് കോടതി ഒന്ന് ജഡ്ജി പി. ശ്രീദേവിയാണ് വിധി പ്രസ്താവിച്ചത്. 2018 മേയ് 27 നായിരുന്നു സംഭവം. സുനിൽ കുമാറിന് ശ്രീലതയ്‌ക്കൊപ്പം ജീവിക്കാൻ വേണ്ടിയായിരുന്നു കൊലപാതകം ആസൂത്രണം ചെയ്തത്. അമ്പിളിയെ മർദിച്ച് ബോധം കെടുത്തി വീടിനുള്ളിൽ പ്ലാസ്റ്റിക് കയറിൽ കഴുത്തിൽ കുരുക്കിട്ട് കെട്ടിത്തൂക്കി കൊലപ്പെടുത്തുകയായിരുന്നു. കാമുകിയായ ശ്രീലതയുടെ പ്രേരണയിലാണ് കൃത്യം നടത്തിയതെന്നും അതിനാൽ ഒന്നും രണ്ടും പ്രതികൾ കുറ്റക്കാരാണെന്ന് കോടതി കണ്ടെത്തി. പ്രതികളെ ജുഡീഷ്യൽ കസ്റ്റഡിയിൽ വിട്ടു. നൂറനാട് പോലീസ് സ്റ്റേഷൻ സബ് ഇൻസ്‌പെക്ടർ വി. ബിജു രജിസ്റ്റർ ചെയ്ത കേസിൽ മാവേലിക്കര സർക്കിൾ ഇൻസ്‌പെക്ടർ പി. ശ്രീകുമാറാണ് അന്വേഷണം നടത്തി കുറ്റപത്രം സമർപ്പിച്ചത്. സുനിൽ കുമാറിനെതിരേ കൊലപാതകം, മാരകമായി ദേഹോപദ്രവം ഏൽപ്പിക്കൽ തുടങ്ങിയ വകുപ്പുകളും ശ്രീലതയ്‌ക്കെതിരേ കൊലപാതകം, പ്രേരണ കുറ്റം തുടങ്ങിയ വകുപ്പുകളുമാണ് ചുമത്തിയത്. പ്രതികൾ കുറ്റക്കാരാണെന്ന് കഴിഞ്ഞ ദിവസം കോടതി കണ്ടെത്തിയിരുന്നു പ്രോസിക്യൂഷനുവേണ്ടി അഡീഷണൽ പബ്ലിക് പ്രോസിക്യൂട്ടർ സന്തോഷ് കുമാർ ഹാജരായി.

സ്വാതന്ത്ര്യദിനാഘോഷം: പരേഡ് റിഹേഴ്സല്‍ നടത്തി

പത്തനംതിട്ട: കാതോലിക്കേറ്റ് കോളജ് മൈതാനത്ത് സംഘടിപ്പിക്കുന്ന 79-ാമത് സ്വാതന്ത്ര്യദിനാഘോഷത്തിന്‍റെ പരേഡ് റിഹേഴ്സല്‍ നടത്തി. പത്തനംതിട്ട നര്‍കോട്ടിക് സെല്‍ ഡിവൈഎസ്പി ബി. അനിലിന്‍റെ നേതൃത്വത്തിലാണ് റിഹേഴ്സൽ. 22 പ്ലറ്റൂണുകള്‍ സ്വാതന്ത്ര്യദിന പരേഡില്‍ പങ്കെടുക്കും. പോലീസ് മൂന്ന്, ഫോറസ്റ്റ് ഒന്ന്, ഫയര്‍ഫോഴ്സ് രണ്ട്, എക്സൈസ് ഒന്ന്, എസ്പിസി ആറ്, സ്‌കൗട്ട് ആന്‍ഡ് ഗൈഡ്സ് നാല്, ജൂണിയര്‍ റെഡ് ക്രോസ് മൂന്ന്, ഡിസ്പ്ലേ ബാന്‍ഡ് സെറ്റ് രണ്ട് എന്നിങ്ങനെയാണ് പ്ലറ്റൂണുകളുടെ എണ്ണം. ഇന്നു രാവിലെ എട്ടുമുതല്‍ 9.30 വരെ ഡ്രസ് റിഹേഴ്സല്‍ സംഘടിപ്പിക്കും.കലാ - സാംസ്‌കാരിക പരിപാടികള്‍ക്ക് വിദ്യാഭ്യാസ ഉപഡയറക്ടര്‍ ബി. ആർ. അനില നേതൃത്വം നല്‍കും. ദേശഭക്തിഗാനം, സുംബാ ഡാന്‍സ്, വഞ്ചിപ്പാട്ട്, നാഷണല്‍ ഇന്‍റഗ്രേഷന്‍ ഡാന്‍സ് എന്നിവ അവതരിപ്പിക്കും. സ്വാതന്ത്ര്യദിനത്തില്‍ മന്ത്രി വീണാ ജോര്‍ജ് പരേഡില്‍ അഭിവാദ്യം സ്വീകരിച്ച് സന്ദേശം നല്‍കും. പരേഡ് റിഹേഴ്സലിന് പത്തനംതിട്ട നഗരസഭയും ജില്ലാ പഞ്ചായത്തുമാണ് ലഘുഭക്ഷണം തയ്യാറാക്കിയത്. സ്വാതന്ത്ര്യ ദിനത്തില്‍ ജില്ലാ സപ്ലൈ ഓഫീസ്, കുടുംബശ്രീ മുഖേനെ ലഘുഭക്ഷണമൊരുക്കും.

കോഴഞ്ചേരി പുതിയ പാലം അപ്രോച്ച് റോഡ് സ്ഥലത്തിന് ഉടമസ്ഥാവകാശം സ്ഥാപിച്ച് ബോർഡ്

കോഴഞ്ചേരി: കോഴഞ്ചേരി ടൗണിന്‍റെ ഹൃദയഭാഗത്ത് നിയമയുദ്ധത്തിനൊടുവിൽ ഹൈക്കോടതിമുഖേന പുനഃസ്ഥാപിച്ചെടുത്ത ഭൂമിയുടെ ഉടമസ്ഥാവകാശം ഉറപ്പിച്ച് സ്വകാര്യവ്യക്തി ബോർഡ് സ്ഥാപിച്ചു. തങ്ങളുടേതെന്ന് ഗ്രാമപഞ്ചായത്തും റവന്യു വകുപ്പും അവകാശപ്പെട്ടിരുന്ന വണ്ടിപ്പേട്ടയിലെ 3.75 സെന്‍റ് സ്ഥലമാണ് കുപ്പയ്ക്കൽ തോമസ് മാത്യുവിന് ഉടമസ്ഥാവകാശം പുനഃസ്ഥാപിച്ച് കോടതി ഉത്തരവുണ്ടെന്ന പേരിൽ ബോർഡ് സ്ഥാപിച്ചത്. അനധികൃത പാർക്കിംഗ് നിരോധിച്ചുകൊണ്ടുള്ള ബോർഡാണ് സ്ഥാപിച്ചത്. പരസ്പരം പഴിചാരി നിന്ന രാഷ്‌ട്രീയകക്ഷികളെ ഇളിഭ്യരാക്കി സ്വകാര്യ വ്യക്തി നഗരമധ്യത്തിൽ സ്വന്തം സ്ഥലം തീർപ്പാക്കി ബോർഡ് വച്ചതോടെ പഞ്ചായത്ത് ഭരണസമിതിയും വെട്ടിലായി. കോഴഞ്ചേരിയിലെ നിർദിഷ്‌ട പാലത്തിന്‍റെ അപ്രോച്ച് റോഡിനോടു ചേർന്നതാണ് ഭൂമി. പാലം പണിയുമായി ബന്ധപ്പെട്ട് വണ്ടിപ്പേട്ടയില്‍ അപ്രോച്ച് റോഡ് വരുന്നതിനാല്‍ വ്യക്തിയുടെ വസ്തുവും നഷ്ടപ്പെടുന്നുവെന്ന പേരിലാണ് ഉടമ ഹൈക്കോടതിയെ സമീപിക്കുകയും പാലം അപ്രോച്ച് റോഡ് പണിക്ക് സ്‌റ്റേ വാങ്ങുകയും ചെയ്തത്. എന്നാല്‍ കമ്മീഷൻ സ്ഥലം സന്ദർശിച്ചപ്പോൾ പാലം നിർമാണം തടസപ്പെടാതിരിക്കാന്‍ വണ്ടിപ്പേട്ടയില്‍ അളന്ന് തിരിച്ചു കൊടുക്കാമെന്ന് റവന്യു അധികൃതർ കോടതിയെ അറിയിക്കുകയായിരുന്നുവെന്ന് പറയുന്നു. ഇതോടെ നിർമാണത്തിനു സ്റ്റേ അനുവദിച്ചില്ല. കഴിഞ്ഞദിവസം വ്യക്തിക്ക് വസ്തു അളന്നു കൊടുത്തു. 30 വര്‍ഷത്തിലധികമായി തുടർന്ന കേസിൽ അനുകൂല ഉത്തരവ് വാങ്ങി അളന്നു തിരിച്ചതോടെ വാഹനങ്ങള്‍ പ്രവേശിക്കരുതെന്ന ബോര്‍ഡും സ്ഥാപിച്ചു. പഞ്ചായത്ത് ഭരണ സമിതിയുടെ ഒത്തുകളിയെന്ന് കേരള കോണ്‍ഗ്രസ് -എം കോഴഞ്ചേരിയുടെ ഹൃദയ ഭാഗമായ വണ്ടിപ്പേട്ടയില്‍ കോടിക്കണക്കിന് വിലവരുന്ന ഭൂമി അന്നത്തെ റവന്യു മന്ത്രി ആയിരുന്ന കെ.എം.മാണി പാര്‍ട്ടിയുടെ നിരന്തരമായ ആവശ്യ പ്രകാരം വ്യക്തികളൂടെ കുത്തകപാട്ടം റദു ചെയ്ത് ഏറ്റെടുത്തതാണെന്നും ഇതിൽ വീണ്ടും സ്വകാര്യവ്യക്തിക്ക് ഉടമസ്ഥാവകാശം സ്ഥാപിച്ചു നൽകുന്നത് പഞ്ചായത്ത് ഭരണസമിതിയുടെ ഒത്തുകളിയുടെ ഫലമെന്നും കേരള കോൺഗ്രസ് -എം മണ്ഡലം യോഗം കുറ്റപ്പെടുത്തി. മണ്ഡലം പ്രസിഡന്‍റ് റെജി വാലേപറന്പിൽ അധ്യക്ഷത വഹിച്ചു. സിപിഎമ്മിന്‍റേത് ഇരട്ടത്താപ്പെന്ന് കോണ്‍ഗ്രസ് ഗ്രാമപഞ്ചായത്തിന്‍റെ ഉപയോഗത്തില്‍ ഇരുന്ന വണ്ടിപ്പേട്ട കഴിഞ്ഞദിവസം തഹസീല്‍ദാര്‍ ഉള്‍പ്പെടെ സര്‍ക്കാര്‍ സംവിധാനങ്ങള്‍ ചേര്‍ന്ന് കോഴഞ്ചേരി പഞ്ചായത്തിനെ അറിയിക്കാതെ അളന്നു തിരിച്ച് വ്യക്തിക്ക് നല്‍കിയതില്‍ ദുരൂഹത ഉണ്ടെന്ന് കോണ്‍ഗ്രസ്. വര്‍ഷങ്ങള്‍ക്കു മുമ്പ് പഞ്ചായത്ത് കുപ്പക്കല്‍ തോമസ് മാത്യുവുമായി ചര്‍ച്ച നടത്തിയിരുന്നു. ഈ സ്ഥലത്തിന് നഷ്ടപരിഹാരമോ പകരം മറ്റു വസ്തുവോ കണ്ടെത്തി കൊടുക്കാന്‍ തീരുമാനമായിട്ടും റവന്യൂ അധികൃതരോ ഭരണസംവിധാനമോ ഒരു നടപടിയും നടത്തിയില്ല. ഇതാണ് ഇപ്പോഴത്തെ അവസ്ഥയ്ക്കു കാരണമെന്നാണ് കോൺഗ്രസ് ആരോപണം. ഗ്രാമപഞ്ചായത്ത് ഭരണസമിതി റവന്യു വകുപ്പുമായി ചേര്‍ന്ന് പകരം വസ്തു കണ്ടെത്തി സ്വകാര്യ വ്യക്തിയെ അനുനയിപ്പിക്കാൻ ശ്രമിച്ചെങ്കിലും സർക്കാർ സംവിധാനങ്ങൾ സഹകരിച്ചില്ലെന്നും കോൺഗ്രസ് മണ്ഡലം കമ്മിറ്റി കുറ്റപ്പെടുത്തി. എല്‍ഡിഎഫ് കാട്ടുന്ന ഇരട്ടത്താപ്പില്‍ പ്രതിഷേധിച്ച് ഇന്ന് മണ്ഡലം കോണ്‍ഗ്രസ് കമ്മിറ്റിയുടെ നേതൃത്വത്തില്‍ വില്ലേജ് ഓഫീസ് പടിക്കലേക്ക് പ്രകടനവും ധര്‍ണയും നടത്തും. ബോര്‍ഡ് സ്ഥാപിച്ചത് ഗ്രാമപഞ്ചായത്തിനെ അറിയിച്ചിട്ടില്ലെന്ന് പ്രസിഡന്‍റ് കോഴഞ്ചേരി ഗ്രാമപഞ്ചായത്തിന്‍റെ ഉപയോഗത്തിലിരുന്ന വണ്ടിപ്പേട്ട പഞ്ചായത്തിനെ അറിയിക്കാത റവന്യു അധികൃതരും പോലീസും എല്‍ഡിഎഫിലെ ചില മെംബർമാരും ചേര്‍ന്ന് കുപ്പക്കല്‍ തോമസ് മാത്യുവിനു വേണ്ടി അളന്നു തിരിച്ച് നല്‍കുകയായിരുന്നുവെന്ന് ഗ്രാമപഞ്ചായത്ത് പ്രസിഡന്‍റ് സാലി ഫിലിപ്പ് കുറ്റപ്പെടുത്തി. പഞ്ചായത്ത് കക്ഷി ചേര്‍ന്ന് ഹൈക്കോടതിയില്‍ കേസ് നിലനില്‍ക്കുന്നുണ്ട്. മുന്‍പഞ്ചായത്ത് കമ്മറ്റിയില്‍ വ്യക്തിയുടെ 3.75 സെന്‍റ് സ്ഥലത്തിന് സമാനമായ വസ്തു റവന്യുവുമായി ചേര്‍ന്ന് കൊടുക്കണമെന്ന് ഐകകണ്‌ഠ്യേന തീരുമാനമെടുത്തിരുന്നു. തീരുമാനം കളക്ടര്‍ക്കും റവന്യുമന്ത്രിക്കും കൈമാറിയിരുന്നു. പഞ്ചായത്തിന്‍റെ സമഗ്ര വികസനത്തിന് സ്ഥലമില്ലാത്ത അവസ്ഥയാണ്. ആയതിനാല്‍ പഞ്ചായത്ത് അറിയാത്ത ഈ നടപടിക്കെതിരേ അടിയന്തര കമ്മറ്റി ചേരാനും കളക്ടർക്കും റവന്യുമന്ത്രിക്കും പരാതി നല്‍കുന്നതിനും ആലോചിക്കുകയാണ്. കോടതി വിധി മാനിച്ച് സര്‍ക്കാരുമായി ചേര്‍ന്ന് മറ്റു വസ്തു കണ്ടെത്തി കൊടുക്കേണ്ട എൽഡിഎഫ് അംഗങ്ങള്‍ രാഷ്‌ട്രീയം കളിക്കുകയാണെന്നും പ്രസിഡന്‍റ് സാലി ഫിലിപ്പ്, വൈസ് പ്രസിഡന്‍റ് സി.എം.മേരിക്കുട്ടി, മെംബർമാരായ സുനിത ഫിലിപ്പ്, ജിജി വര്‍ഗീസ് ജോൺ, റാണി കോശി എന്നിവര്‍ ആരോപിച്ചു. വികസന പ്രവര്‍ത്തനങ്ങളെ തുരങ്കം വയ്ക്കുന്നു: എൽഡിഎഫ് എല്‍ഡിഎഫ് സര്‍ക്കാര്‍ നടത്തുന്ന വികസന പ്രവര്‍ത്തനങ്ങള്‍ക്ക് തുരങ്കം വയ്ക്കുവന്‍ കോഴഞ്ചേരിയിൽ‌ യുഡിഎഫിന്‍റെ നേതൃത്വത്തിലുള്ള പഞ്ചായത്ത് ഭരണസമിതി ബോധപൂര്‍വം ശ്രമങ്ങള്‍ നടത്തുകയാണെന്ന് എല്‍ഡിഎഫ് ആരോപിച്ചു. ഇതിന്‍റെ ഭാഗമായാണ് കഴിഞ്ഞദിവസം വ്യക്തി പുതിയ പാലത്തിന്‍റെ അപ്രോച്ച് റോഡിന്‍റെ പണിയുമായി ബന്ധപ്പെട്ട് കോടതിയെ സമീപിച്ചതും പാലംപണി നിര്‍ത്തിവയ്പിക്കാൻ ശ്രമിച്ചതും. കോടതി നിയമിച്ച കമ്മീഷന്‍ സ്ഥലം പരിശോധിക്കുകയും വ്യക്തി നല്‍കിയ പരാതി അടിസ്ഥാനരഹിതമാണെന്ന് വിലയിരുത്തുകയും ചെയ്തു. ഇതിന്‍റെ ഫലമായി കോടതി സ്‌റ്റേ പിന്‍വലിക്കുകയും ചെയ്തു. തുടര്‍ന്ന് വ്യക്തി വണ്ടിപ്പേട്ടയില്‍ കമ്മീഷന്‍ രേഖപ്പെടുത്തിയ സ്ഥലം കൈയേറി വേലികെട്ടുകയും കോടതി വിധി ഉണ്ടെന്ന് പറഞ്ഞു കൊണ്ട് ബോര്‍ഡ് സ്ഥാപിക്കുകയുമായിരുന്നുവെന്നാണ് സിപിഎം ആരോപണം. കോടതിയുടെ അന്തിമ വിധിഎത്തിയിട്ടില്ലെന്നും വിഷയത്തിൽ നിയമ നടപടി സ്വീകരിക്കുവാന്‍ പഞ്ചായത്ത് ഭരണസമിതി തയാറാകുകയാണ് വേണ്ടതെന്ന് എൽഡിഎഫ് ആവശ്യപ്പെട്ടു. ഭൂമി കൈയേറി ബോർഡ് സ്ഥാപിക്കാൻ പഞ്ചായത്ത് ഭരണസമിതി കൂട്ടുനിന്നുവെന്നാരോപിച്ച് എൽഡിഎഫ് പഞ്ചായത്ത് കമ്മിറ്റിയുടെ നേതൃത്വത്തില്‍ നടന്ന പ്രതിഷേധ ജാഥ വണ്ടിപ്പേട്ടയില്‍ മുന്‍ എംഎൽഎ എ. പത്മകുമാർ ഉദ്ഘാടനം ചെയ്തു. എല്‍ഡിഎഫ് ണ്‍വീനര്‍ ചെറിയാന്‍ ജോര്‍ജ് തമ്പു അധ്യക്ഷത വഹിച്ചു.

പാറേക്കാട് പള്ളിയിൽ ലഹരി വിരുദ്ധ ബോധവത്കരണം

തിരുവല്ല: കുറ്റപ്പുഴ യെരുശലേം മാർത്തോമ്മ ഇടവകയുടെ ജൂബിലിയാഘോഷങ്ങളുടെ ഭാഗമായി ലഹരി വിരുദ്ധ സമിതിയുടെയും അനാംസിന്‍റെയും ആഭിമുഖ്യത്തിൽ പാറേക്കാട് താബോർ പള്ളിയിൽ ലഹരി വിരുദ്ധ ബോധവത്കരണ പരിപാടികൾ നടത്തി . വികാരി റവ.അനി അലക്സ് കുര്യന്‍റെ അധ്യക്ഷതയിൽ നഗരസഭ ചെയർപേഴ്സൺ അനു ജോർജ് ഉദ്ഘാടനം ചെയ്തു. സെക്രട്ടറിമാരായ പ്രസാദ് ചെറിയാൻ, സണ്ണി തോമസ്, കൺവീനർ എ.വി. ജോർജ് , അനാംസ് ഡയറക്ടർ ജോർജി ഏബ്രഹാം, ജയിംസ് ജോർജ് എന്നിവർ പ്രസംഗിച്ചു. നയന മനോജ് ലഹരി വിരുദ്ധ പ്രതിജ്ഞയ്ക്ക് നേതൃത്വം നൽകി. അനാംസിന്‍റെ തെരുവു നാടകം, പോസ്റ്റർ പ്രദർശനം, സണ്ണി കീരുത്തോടിന്‍റെ മാജിക് ഷോ എന്നിവയും നടത്തി.

ആഞ്ഞിലികുന്ന് പള്ളിയിൽ തിരുനാളിനു കൊടിയേറി

കോന്നി: ആഞ്ഞിലികുന്ന് സെന്‍റ് മേരീസ് മലങ്കര കത്തോലിക്കാ ദേവാലയത്തിന്‍റെ തിരുനാളിന് ഫാ. ജോർജ് കണ്ടത്തിപ്പറമ്പിൽ കൊടിയേറ്റി. ഇന്നു മുതൽ 15 വരെയാണ് തിരുനാൾ. കോന്നി വൈദിക ജില്ല സൺഡേസ്കൂൾ ഡയറക്ടർ ഫാ. ഫെലിക്സ് പത്യാലിൽ സംഘടനാ വാർഷിക സമ്മേളനം ഉദ്ഘാടനം ചെയ്തു. ഫാ. ജസ്റ്റിൻ പരുവപ്ലാക്കൽ അധ്യക്ഷത വഹിച്ചു. ഇടവക വികാരി ഫാ. ജോർജ് കണ്ടത്തിപ്പറമ്പിൽ മുഖ്യസന്ദേശം നൽകി. വാർഡ് മെംബർ തോമസ് കാലായിൽ, ട്രസ്റ്റി സജി പീടികയിൽ, സെക്രട്ടറി ലാലു അലക്സ്, എംസിഎംഎഫ് രൂപതാ പ്രസിഡന്‍റ് ഷീജ ഏബ്രഹാം, ഷാന്‍റി സാബു, ദീനാമ്മ റോയ്, രാജി സന്തോഷ് എന്നിവർ പ്രസംഗിച്ചു. ചടങ്ങിൽ എംസിഎ, എംസിഎംഎഫ്, എംസിസിഎൽ, വിൻസെന്‍റ് ഡി പോൾ എന്നീ സംഘടനകളുടെ റിപ്പോർട്ട് അവതരണവും നടന്നു. ഇന്നു മുതൽ വിശുദ്ധ കുർബാനയ്ക്കും വചനപ്രഘോഷണത്തിനും ദിവ്യകാരുണ്യപ്രദക്ഷിണത്തിനും ജോസ് ചാമക്കാലായിൽ റമ്പാൻ, കോന്നി വൈദിക ജില്ലാ വികാരി ഫാ. വർഗീസ് കൈതോൺ, ഫാ. ജോർജ് വർഗീസ് പുതുപ്പറമ്പിൽ, ഫാ. ജസ്റ്റിൻ പരുവപ്ലാക്കൽ എന്നിവർ കാർമികത്വം വഹിക്കും.

സബ് ജൂണിയർ ബാസ്കറ്റ്ബോളിൽ അടൂർ കേന്ദ്രീയ വിദ്യാലയത്തിന് കിരീടം

തിരുവല്ല: കുറിയന്നൂർ മാർത്തോമ്മ ഹൈസ്കൂളിൽ നടന്ന പത്തനംതിട്ട ജില്ലാ സബ് ജൂണിയർ ബാസ്കറ്റ്ബോൾ ചാമ്പ്യൻഷിപ്പ് ആൺകുട്ടികളുടെയും പെൺകുട്ടികളുടെയും വിഭാഗത്തിൽ അടൂർ കേന്ദ്രീയ വിദ്യാലയം ജേതാക്കളായി. ആൺകുട്ടികളുടെ ഫൈനലിൽ കേന്ദ്രിയ വിദ്യാലയം തിരുവല്ല ബാസ്കറ്റ്ബോൾ ക്ലബിനെ (23 -7 )പരാജയപ്പെടുത്തി ജേതാക്കളായപ്പോൾ പെൺകുട്ടികളുടെ ഫൈനലിൽ ചെറുകുളഞ്ഞി ബഥനി ആശ്രമം സ്‌കൂളിനെ ( (12 -2 ) പരാജയപ്പെടുത്തി ഇരട്ട വിജയം ആഘോഷിച്ചു. ആൺകുട്ടികളുടെ സെമി ഫൈനൽ മത്സരങ്ങളിൽ തിരുവല്ല ബാസ്കറ്റ്ബാൾ ക്ലബ് (10 -8 ) നു അടൂർ കേന്ദ്രീയ വിദ്യാലയം ഷിഫ്റ്റ് 1നെ തോല്പിച്ചപ്പോൾ അടൂർ കേന്ദ്രീയ വിദ്യാലയം ഷിഫ്റ്റ് 2 മാർത്തോമ്മ സ്കൂൾ കുറിയന്നൂരിനെ (11 -2 ) പരാജയപ്പെടുത്തി ഫൈനലിൽ പ്രവേശിക്കുകയായിരുന്നു. പെൺകുട്ടികളുടെ സെമി ഫൈനലിൽ കേന്ദ്ര‌ീയ വിദ്യാലയം(16 -6 ) തിരുവല്ല ബാസ്കറ്റ്ബാൾ ക്ലബിനെ പരാജയപ്പെടുത്തിയാണ് ഫൈനലിൽ കടന്നത്. ആലപ്പുഴ ജ്യോതിനികേതൻ സ്കൂളിൽ 30 മുതൽ നടക്കുന്ന 50-ാമത് സംസ്ഥാന സബ് ജൂണിയർ ആൺ‌ട്ടികളുടെയും പെൺകുട്ടികളുടെയും ബാസ്കറ്റ്ബോൾ ചാമ്പ്യൻഷിപ്പിൽ പങ്കെടുക്കുന്ന പത്തനംതിട്ട ജില്ലാ ടീമിനെ തെരഞ്ഞടുക്കാൻ ഒരു ഓപ്പൺ സെലക്‌ഷൻ ട്രയൽസ് 15നു രാവിലെ കുറിയന്നൂർ സ്കൂൾ ഗ്രൗണ്ടിൽ നടക്കും.

ഗജദിനത്തിൽ ആന വാർത്തകളുടെ പ്രദർശനമൊരുക്കി

ഏഴംകുളം: ലോക ഗജദിനമായ ഇന്നലെ ഏഴംകുളം ഗവ. എൽപി സ്കൂളിൽ കഴിഞ്ഞകാല ദിനപ്പത്രങ്ങളിലെ ആനവാർത്തകളുടെ പ്രദർശനമൊരുക്കിയത് കൗതുകകരമായി. പാവനാടക കലാകാരനും ഗ്രന്ഥകാരനുമായ എം.എം ജോസഫ് മേക്കൊഴൂരിന്‍റെ ശേഖരത്തിൽ നിന്നാണ് പ്രദർശനം ഒരുക്കിയത്. ഫോൾഡിംഗ് ആൽബത്തിൽ പ്രത്യേക രീതിയിൽ തയാറാക്കിയിട്ടുള്ളതിനാൽ കുട്ടികൾക്ക് അനായാസം വായിച്ചും കണ്ടും മനസിലാക്കാമെന്ന പ്രത്യേകതയുണ്ടായിരുന്നു. പിടിഎ പ്രസിഡന്‍റ് ദിലീപ് കുമാറിന്‍റെ അധ്യക്ഷതയിൽ ചേർന്ന യോഗം പുരാവസ്തു സംരക്ഷകൻ കെ.കെ.മാത്യു ഉദ്ഘാടനം ചെയ്തു. പ്രഥമാധ്യാപകൻ ഡി.അശോകൻ, എൻ.അനിൽകുമാർ, സന്തോഷ്, പ്രിയ ബിജു, ഹരികുമാർ, സതീഷ് കുമാർ എന്നിവർ പ്രസംഗിച്ചു. ആന ക്വിസിൽ വിജയികളായ വൈഗാ ലക്ഷ്മി, ആഫിയാ സജാദ്, ഗൗരി കൃഷ്ണ, ധൻ പി. ഉണ്ണിത്താൻ എന്നിവർക്ക് ദിനവിജ്ഞാനകോശം സമ്മാനമായി നൽകി.ഗജദിനത്തിൽ ആന വാർത്തകളുടെ പ്രദർശനമൊരുക്കി

മാർച്ചും ധർണയും നടത്തി

മല്ലപ്പള്ളി: സർവീസ് പെൻഷൻകാരുടെ പെൻഷൻ പരിഷ്കരണ കുടിശ്ശിക അനുവദിക്കുക, പങ്കാളിത്ത പെൻഷൻ പദ്ധതി ഉപേക്ഷിക്കുക, ശമ്പളപരിഷ്കരണ കമ്മീഷൻ, പെൻഷൻ പരിഷ്കരണ കമ്മീഷൻ ഉടൻ പ്രഖ്യാപിക്കുക തുടങ്ങിയ ആവശ്യങ്ങൾ ഉന്നയിച്ചുകൊണ്ട് സർവീസ് പെൻഷനേഴ്സ് യൂണിയൻ മല്ലപ്പള്ളി ബ്ലോക്ക് കമ്മിറ്റിയുടെ നേതൃത്വത്തിൽ മല്ലപ്പള്ളി പെൻഷൻ ഭവനിൽ നിന്നും സബ് ട്രഷറിയിലേക്ക് മാർച്ചും ധർണയും നടത്തി. ധർണയ്ക്ക് ബ്ലോക്ക് പ്രസിഡന്‍റ് വി. എസ്. ശശിധരൻ നായർ നേതൃത്വം നൽകി. തുടർന്ന് മല്ലപ്പള്ളി ബ്ലോക്ക് പഞ്ചായത്ത് പ്രസിഡന്‍റ് ബാബു കൂടത്തിൽ യോഗം ഉദ്ഘാടനം ചെയ്തു. ബ്ലോക്ക് സെക്രട്ടറി സി.കെ. രാജശേഖരക്കുറുപ്പ്, ജില്ലാ വൈസ് പ്രസിഡന്‍റ് ജോർജ് തോമസ്, പി. കെ. ശിവൻകുട്ടി, കെ. ഐ. മത്തായി, ചന്ദ്രശേഖരൻ നായർ, ഐ. എം. ലക്ഷ്മിയമ്മ, വിജയകുമാർ എന്നിവർ പ്രസംഗിച്ചു.

വീട്ടമ്മയുടെ പണവും സ്വര്‍ണവും കവര്‍ന്ന സ്ത്രീ അറസ്റ്റിൽ

അടൂർ: ആഭിചാര ക്രീയക്കായി വീട്ടമ്മയുടെ കൈയില്‍ നിന്നും പണവും മൂന്ന് പവന്‍ സ്വര്‍ണവും തട്ടിയ സ്ത്രീ അറസ്റ്റിൽ. പള്ളിക്കല്‍ ആനയടി തെങ്ങമം തോട്ടുവാ തുളസി ഭവനം വീട്ടില്‍ തുളസി ( 57)യെയാണ് ഏനാത്ത് പോലീസ് അറസ്റ്റ് ചെയ്തത്. ഏനാത്തു കടമ്പനാട് വടക്ക് ചുമട്താങ്ങി ഒറ്റത്തെങ്ങ് പുത്തന്‍ വീട്ടില്‍ ലീലാമ്മ (74)യാണ് കബളിപ്പിക്കപ്പെട്ടത്. 10ന് രാവിലെയായിരുന്നു കേസിനാസ്പദമായ സംഭവം. ലീലാമ്മയുടെ വയോധികയായ ഭര്‍ത്താവ് തങ്കച്ചനും മരുമക്കള്‍ക്കും അപകടം സംഭവിക്കാന്‍ പോകുന്നുവെന്നും അതൊഴിവാക്കാന്‍ ആഭിചാര്യ ക്രീയകള്‍ നടത്തണമെന്നും തുളസി വീട്ടുകാരെ പറഞ്ഞു വിശ്വാസിപ്പിച്ചാണ് പണവും സ്വർണവും അപഹരിച്ചതെന്ന് പറയുന്നു. മൂന്ന് പവന്‍ സ്വര്‍ണാഭരണങ്ങള്‍ നഷ്ടപ്പെട്ടു. പോലീസിൽ പരാതി നൽകിയതിനേ തുടർന്ന് പരിസരപ്രദേശങ്ങളിലെ സിസിടിവി ദൃശ്യങ്ങള്‍ പരിശോധിച്ചതില്‍ നിന്നും പ്രതിയെ തിരിച്ചറിയുകയായിരുന്നു.കോടതിയില്‍ ഹാജരാക്കി റിമാന്‍ഡ് ചെയ്തു. പോലീസ് ഇന്‍സ്പെക്ടര്‍ എ. അനൂപിന്‍റെ നേതൃത്വത്തിലാണ് അന്വേഷണം നടന്നത്.

പ്ലാറ്റിനം ജൂബിലി ഓഡിറ്റോറിയം ഉദ്ഘാടനം

തിരുവല്ല: തിരുമൂലപുരം ഇരുവള്ളിപ്ര സെന്‍റ് തോമസ് ഹയർ സെക്കൻഡറി സ്കൂളിന്‍റെ പ്ലാറ്റിനം ജൂബിലിയോടനുബന്ധിച്ചുള്ള ഓഡിറ്റോറിയത്തിന്‍റെ ഉദ്ഘാടനവും പ്രതിഭാ സംഗമവും മന്ത്രി സജി ചെറിയാൻ നിർവഹിച്ചു. തിരുവല്ല അതിരൂപതാധ്യക്ഷൻ ഡോ. തോമസ് മാർ കൂറിലോസ് മെത്രാപ്പോലീത്ത അധ്യക്ഷത വഹിച്ച സമ്മേളനത്തിൽ എസ്പിസി യൂണിറ്റിന്‍റെ ഉദ്ഘാടനം ചാണ്ടി ഉമ്മൻ എംഎൽഎ നിർവഹിച്ചു. സ്കൂൾ കോർപറേറ്റ് മാനേജർ ഫാ. മാത്യു പുനക്കുളം മുഖ്യപ്രഭാഷണം നടത്തി. തിരുവല്ല എഇഒ മിനി കുമാരി, തിരുവല്ല ബിപിസി റോയി റ്റി. മാത്യു, സ്കൂൾ മാനേജർ ഫാ. വർഗീസ് ചാമക്കാലയിൽ, ഹെഡ്മാസ്റ്റർ ഷാജി മാത്യു, പ്രിൻസിപ്പൽ ജയ മാത്യൂസ്, പിടിഎ പ്രസിഡന്‍റ് സജി ഏബ്രഹാം, മുനിസിപ്പൽ കൗൺസിലർ ലെജു എം. സക്കറിയ, സ്റ്റാഫ്സെക്രട്ടറി സുജ ജോർജ്, സിബി സ്റ്റീഫൻ ജേക്കബ്, ആഷ് ലി മേരി ഷിബു, ഫെബിയ എൽസ ജോൺ തുടങ്ങിയവർ പ്രസംഗിച്ചു. വിവിധ സേവന മേഖലയിലെ പ്രഗൽഭ വ്യക്തികളെയും സ്ഥാപനങ്ങളെയും ആദരിച്ചു. തുടർന്ന് എസ്എസ്എൽസി, പ്ലസ് ടു പരീക്ഷയിൽ ഉന്നത വിജയം കരസ്ഥമാക്കിയ വിദ്യാർഥികളെ ആദരിച്ചു.

ടിപ്പർ ലോറി വഴിയിൽ കിടന്നു, കോഴഞ്ചേരി ടൗൺ കുരുങ്ങി

കോഴഞ്ചേരി: ജില്ലാ ആശുപത്രി റോഡിൽ ടിപ്പർ ലോറി കേടായി കിടന്നത് നഗരത്തിൽ വൻ ഗതാഗത കുരുക്കിന് ഇടയാക്കി. ഇന്നലെ ഉച്ചയോടെയാണ് വൺവേ റോഡായ ആശുപത്രി റോഡിൽ പാറ ഉത്പന്നങ്ങളും കയറ്റി വന്ന ടിപ്പർ ലോറി കേടായത്. രണ്ടു വലിയ വാഹനങ്ങൾക്ക് കടന്നു പോകാൻ കഴിയാത്ത റോഡിൽ ഇതോടെ ഗതാഗതകുരുക്കായി. വാഹനനിര ടിബി ജംഗ്ഷൻ വരെ നീണ്ടു. അതോടെ രംഗത്തെത്തിയ പോലീസ് സംഘം പൊയ്യാനിൽ ജംഗ്ഷനിലൂടെ വാഹനങ്ങൾ തിരിച്ചുവിട്ടു. വൺവേ റോഡുകൾ തടസപ്പെട്ടതോടെ ടൗണിൽ ഇതോടെ കുരുക്ക് രൂക്ഷമായി. റാന്നി, പത്തനംതിട്ട, ചെങ്ങന്നൂർ, പന്തളം മേഖലകളിലേക്കു പോകുന്ന എല്ലാ വാഹനങ്ങളും ഈ ഭാഗങ്ങളിൽ നിന്ന് നഗരത്തിലേക്ക് എത്തുന്ന വാഹനങ്ങളും പൂർണമായും കുരുക്കിൽപെട്ടു. ജില്ലാ ആശുപത്രിയിൽ നിന്നും സ്വകാര്യ ആശുപത്രിയിൽ നിന്നും പുറത്തേക്കു പോയ ആംബുലൻസുകളും ഗതാഗതകുരുക്കിലായി. റാന്നി റോഡിൽ വൺവേ നേരത്തെ തന്നെ തടസപ്പെട്ടു കിടക്കുന്നതിനാൽ ഇതുവഴിയുള്ള വാഹനങ്ങളും നേരിട്ടു തന്നെ ടൗണിലേക്കെത്തിയതോടെ പ്രശ്നം രൂക്ഷമായി. ഗതാഗതം നിയന്ത്രിക്കുന്തനിനു മതിയായ പോലീസും ഉണ്ടായില്ല. അനധികൃത പാർക്കിംഗും റോഡുകളുടെ വീതിക്കുറവുമാണ് കോഴഞ്ചേരിയിൽ സ്ഥിരമായ ഗതാഗത പ്രശ്നങ്ങളുണ്ടാക്കുന്നത്.

പത്തനംതിട്ട കളക്ടറേറ്റ് മതിലിൽ ഭൈരവി കോലത്തിന്‍റെ ചിത്രം തെളിഞ്ഞു

പത്തനംതിട്ട: ജില്ലയുടെ പ്രാചീന സംസ്‌കാരത്തിന്‍റെ പ്രതീകമായ പടയണി ഇനി കളക്ടറേറ്റ് മതിലിലും. പത്തനംതിട്ട നഗരസഭയും ജില്ലാ ഭരണകൂടവും സംയുക്തമായാണ് കളക്ടറേറ്റ് ചുറ്റുമതിലില്‍ ഭൈരവി കോലം ഒരുക്കിയത്. പൊതു ഇടങ്ങള്‍ ശുചിയായും ആകര്‍ഷകമായും സൂക്ഷിക്കുക, ജില്ലയുടെ സാംസ്‌കാരിക പൈതൃകം ഉയര്‍ത്തിക്കാട്ടുക എന്നതാണ് ചിത്രത്തിനു പിന്നിലെ ലക്ഷ്യം. ചായക്കൂട്ടുകളാല്‍ ചുമരില്‍ തീര്‍ത്ത പടയണി പാളക്കോലം കാഴ്ചക്കാര്‍ക്ക് കൗതുകമുണര്‍ത്തുന്നു. പടയണിയിലെ ഏറ്റവും വലിയ കോലമായ ഭൈരവി സുസ്ഥിരത, സ്ത്രീശക്തീകരണം, നിര്‍ഭയത്വം എന്നിവ പ്രതിഫലിപ്പിക്കുന്നു. കാതോലിക്കേറ്റ് കോളജിലെ വിദ്യാര്‍ഥികളും പൂര്‍വവിദ്യാര്‍ഥികളുമായ കെ.എ. അഖില്‍ കുമാർ‌, ആര്‍. അജേഷ് ലാൽ, അഖില്‍ ഗിരീഷ് എന്നിവരാണ് ചിത്രരചനയ്ക്ക് ചുക്കാന്‍ പിടിച്ചത്. മാതൃകാ രൂപം തയാറാക്കിയത് റംസി ഫാത്തിമ, ടി. എ. നന്ദിനി എന്നിവരാണ്. പ്രകൃതിദത്ത നിറങ്ങളും വസ്തുക്കളുമുപയോഗിച്ചാണ് വര പൂർത്തീകരിച്ചത്.

കൂടലിലെ കൊലപാതകം: പ്രതി റിമാന്‍ഡില്‍

കൂടൽ: അയൽവാസിയായ സുഹൃത്തിനെ കുത്തിക്കൊലപ്പെടുത്തിയ കേസിൽ പോലീസ് പിടിയിലായയാൾ റിമാൻഡിൽ. കൂടല്‍ പുന്നമൂട് പയറ്റുകാല വീട്ടില്‍ രാജന്‍(40) കുത്തേറ്റ് മരിച്ച കേസിലാണ് ആറ്റഴിക്കോട് പടിഞ്ഞാറ്റേതില്‍ അനി (45) യാണ് റിമാന്‍ഡിലായത്. വിവാഹിതനും രണ്ട് മക്കളുടെ പിതാവുമായ അനി ഭാര്യയുമായി പിണങ്ങി കഴിയുകയാണ്. ഇതിനിടയില്‍ പരിചയപ്പെട്ട പെണ്‍സുഹൃത്തിന് അനി വീട്ടില്‍ കൊണ്ടുവന്നു താമസിപ്പിച്ചിരുന്നു. അവിവാഹിതനായ രാജനുമായി യുവതിക്ക് സൗഹൃദമുണ്ടെന്ന സംശയമാണ് കൊലപാതകത്തിന് കാരണമായതെന്ന് പോലീസ് പറയുന്നു. ഇതേത്തുടർന്ന് ഇരുവരും തമ്മില്‍ വഴക്കുണ്ടാകുകയും യുവതി അനിയെ വിട്ടുപോയതും വിരോധത്തിനു കാരണമായി. കോന്നി ഡിവൈഎസ്പി എസ്. അജയ്‌നാഥിന്‍റെ നേതൃത്വത്തില്‍ പോലീസ് ഇന്‍സ്‌പെക്ടര്‍മാരായ സി. എല്‍. സുധീർ, ആര്‍. രാജഗോപാല്‍, എസ്ഐ ആർ. അനില്‍ കുമാര്‍ അന്വേഷണ സംഘത്തിലുണ്ടായിരുന്നു.

നിർമാണത്തിലിരുന്ന വീട്ടിലെ സാമൂഹ്യവിരുദ്ധ പ്രവർത്തനം; പിടിയിലായത് ആറുപേർ

പത്തനംതിട്ട: നിർമാണത്തിലുള്ള സ്വകാര്യ ആയുർവേദ റിസോർട്ടിനുള്ളിൽ അനധികൃതമായി താമസിച്ചു നാശനഷ്ടങ്ങൾ വരുത്തുകയും മോഷണം ഉൾപ്പെടെ സാമൂഹ്യവിരുദ്ധപ്രവർത്തനം നടത്തുകയും ചെയ്ത സംഘത്തിൽ കൗമാരക്കാർ ഉൾപ്പെടെ ആറുപേർ പിടിയിൽ. പത്തനംതിട്ട, വലഞ്ചൂഴി കിഴക്കേടത്ത് ലക്ഷംവീട്ടിൽ അനു (20), ആദിത്യൻ(20), വലഞ്ചുഴി കാരുവേലിൽ സൂര്യദേവ് (18) പ്രായപൂർത്തിയാകാത്ത മൂന്നുപേർ എന്നിവരാണ് പിടിയിലായത്. കുമ്പഴ പുതുപ്പറമ്പിൽ അവിജിത്ത് ജെ പിള്ളയുടെ വലഞ്ചുഴി കാവ് ജംഗ്ഷനിൽ നിർമാണത്തിലിരിക്കുന്ന വീട്ടിലാണ് കഴിഞ്ഞ ഒന്നിനും 10 നുമിടയിൽ സംഘത്തിന്‍റെ സാമൂഹികവിരുദ്ധ അഴിഞ്ഞാട്ടം ഉണ്ടായത്. ഫ്രിഡ്ജ്,മൈക്രോവേവ് ഓവൻ, മൂന്ന് എസികൾ, വാക്വം ക്‌ളീനർ, പ്രഷർ വാട്ടർ പമ്പ് തുടങ്ങിയവ നശിപ്പിച്ചു. ഇവയുടെ ഇലക്ട്രിക് വയറുകൾ വീടിനകത്ത് കൂട്ടിയിട്ട് കത്തിച്ചു. ശുചിമുറിയിലെ ഫിറ്റിംഗുകളും തകർത്തു. നിരവധി സാധനങ്ങൾ അടിച്ചു നശിപ്പിച്ച ശേഷം കൂട്ടിയിട്ട് കത്തിച്ച്, ആയതിന്‍റെയെ ല്ലാം ചെമ്പ് കമ്പികൾ എടുക്കുകയും അടുക്കള ഉപകരണങ്ങൾ, വാക്വംക്ലീനർ ഉൾപ്പെടെയുള്ള സാധനങ്ങൾ തകർത്ത് അവയുടെ ഇലക്ട്രിക് ഭാഗങ്ങൾ മോഷ്ടിക്കുകയും ചെയ്തു. അഞ്ചു ലക്ഷം രൂപയുടെ നഷ്ടം കണക്കാക്കുന്നു. ഒന്പതിനു രാവിലെ 10 ന് വലഞ്ചുഴിയിലുള്ള സുഹൃത്ത് അറിയിച്ചപ്പോഴാണ് അവിജിത്ത് വിവരം അറിയുന്നത്. പരാതിയിൽ കേസെടുത്ത പത്തനംതിട്ട പോലീസ്, ഫോറെൻസിക് സംഘത്തെയും ഡോഗ് സ്‌ക്വാഡിനെയും സ്ഥലത്ത് എത്തിച്ച് പരിശോധന നടത്തി തെളിവുകൾ ശേഖരിച്ചു. വീടിന്‍റെ ചുറ്റുമതിലിലെ ഇരുമ്പ് ഗ്രില്ലും നഷ്ടമായിട്ടുണ്ട്. ഇതിൽ രണ്ടു ലക്ഷം രൂപയുടെ നഷ്ടം സംഭവിച്ചു. കുറ്റാരോപിതരെ കണ്ടെത്തിയ പോലീസ് സംഘം പതിനേഴുകാരായ മൂന്നുപേരെ രക്ഷാകർത്താക്കളുടെ സാന്നിധ്യത്തിൽ കുറ്റങ്ങൾ പറഞ്ഞു ബോധ്യപ്പെടുത്തിയശേഷം റിപ്പോർട്ട്‌ സഹിതം ജുവനൈൽ ജസ്റ്റിസ് ബോർഡ് മുമ്പാകെ ഹാജരാക്കി.പിന്നീട് കൊല്ലത്തെ ജുവനൈൽ ഹോമിലേക്ക് മാറ്റി. ഒന്നുമുതൽ മൂന്നുവരെ പ്രതികളെ കോടതിയിൽ ഹാജരാക്കി റിമാൻഡ് ചെയ്തു. പത്തനംതിട്ട ഡിവൈഎസ്പി എസ്. ന്യൂമാന്‍റെ മേൽനോട്ടത്തിലായിരുന്നു സംഘാംഗങ്ങളെ പിടികൂടിയത്. പോലീസ് ഇൻസ്‌പെക്ടർ കെ. സുനുമോന്‍റെ നേതൃത്വത്തിലാണ് അന്വേഷണം നടക്കുന്നത്.

ഫ്രീഡം ലൈറ്റ് നൈറ്റ് മാർച്ച് നാളെ

പത്തനംതിട്ട: നരേന്ദ്രമോദി സര്‍ക്കാരിന്‍റെ വോട്ട് കൊള്ളയ്ക്കെതിരേ രാഹുല്‍ ഗാന്ധിക്ക് പിന്തുണയുമായി ഡിസിസി നേതൃത്വത്തില്‍ നാളെ രാത്രിയില്‍ പത്തനംതിട്ടയില്‍ ഫ്രീഡം നൈറ്റ് മാര്‍ച്ച് സംഘടിപ്പിക്കും. രാത്രി ഏഴിന് ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പിലിന്‍റെ നേതൃത്വത്തില്‍ സെന്‍റ് പീറ്റേഴ്സ് ജംഗ്ഷനില്‍ നിന്നും ആരംഭിക്കുന്ന മാര്‍ച്ച് ഗാന്ധി സ്ക്വയറില്‍ സമാപിക്കും. തുടര്‍ന്ന് പൊതുയോഗവും നടത്തുമെന്ന് ജനറൽ സെക്രട്ടറി സാമുവേൽ കിഴക്കുപുറം അറിയിച്ചു.

പുനര്‍വിഭജനം പൂർത്തിയായി: ജില്ലയില്‍ ഇനി 1099 തദ്ദേശ വാര്‍ഡുകള്‍

പത്തനംതിട്ട: തദ്ദേശസ്ഥാപന വാര്‍ഡ് പുനര്‍വിഭജന പ്രക്രിയ പൂര്‍ത്തിയായപ്പോള്‍ പത്തനംതിട്ട ജില്ലയിലെ വാര്‍ഡുകളുടെ എണ്ണം 1099 ആയി. 2020ൽ 1042 വാർഡുകളായിരുന്നു ഉണ്ടായിരുന്നത്. 53 ഗ്രാമപഞ്ചായത്തുകളിലായി ഇനി 833 വാർഡുകളുണ്ടാകും. നേരത്തേ ഇത് 788 വാർഡുകളായിരുന്നു. എട്ട് ബ്ലോക്ക് പഞ്ചായത്തുകൾക്ക് 114 വാർഡുകളുണ്ടാകും. നേരത്തേ 106 ആയിരുന്നു. ജില്ലാ പഞ്ചായത്തിന് 17 ഡിവിഷനുകളുണ്ടാകും. നേരത്തേ 16 ആയിരുന്നു. നാല് നഗരസഭകളിലും കൂടി 135 വാർഡുകളുണ്ടാകും. നേരത്തേ 132 വാർഡുകളായിരുന്നു. സംസ്ഥാന തെരഞ്ഞെടുപ്പ് കമ്മീഷണര്‍ എ. ഷാജഹാന്‍ ചെയര്‍മാനും വിവിധ സര്‍ക്കാര്‍ വകുപ്പ് സെക്രട്ടറിമാരായ ഡോ. രത്തന്‍ യു. ഖേല്‍ക്കര്‍, കെ.ബിജു, എസ്. ഹരികിഷോര്‍, ഡോ. കെ.വാസുകി എന്നിവര്‍ അംഗങ്ങളും തദ്ദേശവകുപ്പ് ജോയിന്‍റ് ഡയറക്ടര്‍ എസ്. ജോസ്‌നമോള്‍ സെക്രട്ടറിയുമായ ഡീലിമിറ്റേഷന്‍ കമ്മീഷനാണ് വാര്‍ഡ് വിഭജനപ്രക്രിയ പൂര്‍ത്തിയാക്കിയത്. മൂന്ന് ഘട്ടമായിട്ടായിരുന്നു വാര്‍ഡ് പുനര്‍വിഭജനപ്രക്രിയ. ആദ്യഘട്ടത്തില്‍ ഗ്രാമപഞ്ചായത്ത്, നഗരസഭ, കോര്‍പറേഷന്‍ എന്നിവിടങ്ങളിലും രണ്ടാം ഘട്ടത്തില്‍ ബ്ലോക്ക് പഞ്ചായത്തിലും മൂന്നാം ഘട്ടത്തില്‍ ജില്ലാ പഞ്ചായത്തിലുമാണ് പുനര്‍വിഭജനം നടത്തിയത്. 2011 ലെ സെന്‍സസ് പ്രകാരമുള്ള ജനസംഖ്യയുടെയും തദ്ദേശസ്ഥാപനങ്ങളിലെ വാര്‍ഡുകളുടെ എണ്ണം പുതുക്കി നിശ്ചയിച്ച 2024 സര്‍ക്കാര്‍ ഉത്തരവിന്‍റെയും അടിസ്ഥാനത്തിലായിരുന്നു പുനര്‍വിഭജനം. വാര്‍ഡ് വിഭജനത്തിന്‍റെ ഭാഗമായി തദ്ദേശവാര്‍ഡുകളുടെ ഡിജിറ്റല്‍ ഭൂപടം തയാറാക്കിയത് ഇന്‍ഫര്‍മേഷന്‍ കേരള മിഷനാണ്. വാര്‍ഡ് പുനര്‍വിഭജനത്തിന്‍റെ അന്തിമവിജ്ഞാപനം സംസ്ഥാന അച്ചടിവകുപ്പിന്‍റെ ഇ ഗസറ്റ് വെബ് സൈറ്റില്‍ (www. compose.kerala.gov.in) ലഭിക്കും. വാര്‍ഡ് വിഭജനവുമായി ബന്ധപ്പെട്ട് ഹീയറിംഗിന് ഹാജരായവരുടെ പരാതി പരിശോധിച്ചാണ് അന്തിമ വിജ്ഞാപനം പുറപ്പെടുവിച്ചതെന്ന് ഡീലിമിറ്റേഷന്‍ കമ്മീഷന്‍ ചെയര്‍മാന്‍ എ.ഷാജഹാന്‍ പറഞ്ഞു. ജില്ലാ പഞ്ചായത്ത് മണ്ഡലങ്ങളുടെ അതിര്‍ത്തി നിര്‍ണയം പൂര്‍ത്തിയായി പത്തനംതിട്ട: ജില്ലാ പഞ്ചായത്ത് മണ്ഡലങ്ങളുടെ (ഡിവിഷനുകള്‍) അതിര്‍ത്തികള്‍ നിശ്ചയിച്ച് അന്തിമ പട്ടിക പുറത്തിറക്കി. നേരത്തേ പുറത്തിറക്കിയ കരട് പട്ടികയെ സംബന്ധിച്ച് പരാതികളും ആക്ഷേപങ്ങളും സ്വീകരിച്ച് തെളിവെടുപ്പ് നടന്നെങ്കിലും അന്തിമപട്ടികയില്‍ മണ്ഡലങ്ങളെ സംബന്ധിച്ച് കാര്യമായ വ്യത്യാസമുണ്ടായിട്ടില്ല. 2020ലെെരഞ്ഞെടുപ്പില്‍ ഉണ്ടായിരുന്ന 16 ഡിവിഷനുകളും അതേ പേരില്‍ നിലനിര്‍ത്തിയിരിക്കുകയാണ്. എന്നാല്‍ കഴിഞ്ഞ തെരഞ്ഞെടുപ്പുകളില്‍ നിന്നും മണ്ഡലങ്ങളുടെ അതിര്‍ത്തികള്‍ വ്യത്യാസപ്പെട്ടിട്ടുണ്ട്. കലഞ്ഞൂര്‍ കേന്ദ്രമാക്കിയാണ് പുതിയ മണ്ഡലം നിലവില്‍ വരുന്നത്. ജില്ലാ പഞ്ചായത്ത് മണ്ഡലങ്ങള്‍, ഉള്‍പ്പെടുന്ന ബ്ലോക്ക് ഡിവിഷനുകള്‍, കണക്കാക്കിയിരിക്കുന്ന ജനസംഖ്യ കണക്കില്‍. 1. പുളിക്കീഴ് - പുളിക്കീഴ് ബ്ലോക്ക് പഞ്ചായത്തിനു കീഴിലെ ആലംതുരുത്തി, കാരയ്ക്കല്‍, പെരിങ്ങര, പൊടിയാടി, പരുമല, കടപ്ര, നിരണം, കൊമ്പന്‍കേരി, കണ്ണശ, പുളിക്കീഴ്, നെടുമ്പ്രം മണ്ഡലങ്ങള്‍ (ജനസംഖ്യ 67978). 2. കോയിപ്രം - പുളിക്കീഴ് ബ്ലോക്ക് പഞ്ചായത്തിലെ കുറ്റൂര്‍, തൈമറവുംകര, ഓതറ മണ്ഡലങ്ങള്‍, കോയിപ്രം ബ്ലോക്ക് പഞ്ചായത്തിലെ ഇരവിപേരൂര്‍, പുറമറ്റം, വെണ്ണിക്കുളം, കുമ്പനാട്, ഓതറ, നന്നൂര്‍ മണ്ഡലങ്ങള്‍. (ജനസംഖ്യ - 69752). 3. മല്ലപ്പള്ളി - മല്ലപ്പള്ളി ബ്ലോക്ക് പഞ്ചായത്തിലെ മുക്കൂര്‍, മല്ലപ്പള്ളി, മടുക്കോലി, കല്ലൂപ്പാറ, കവിയൂര്‍, കോട്ടൂര്‍, ആഞ്ഞിലിത്താനം, കുന്നന്താനം മണ്ഡലങ്ങള്‍ (ജനസംഖ്യ 63759). 4. ആനിക്കാട് - മല്ലപ്പള്ളി ബ്ലോക്ക് പഞ്ചായത്തിലെ ആനിക്കാട,പുന്നവേലി, കോട്ടാങ്ങല്‍, കൊറ്റനാട്, ചാലാപ്പള്ളി, കീഴ് വായ്പൂര്, കോയിപ്രം ബ്ലോക്കിലെ തെള്ളിയൂര്‍, എഴുമറ്റൂര്‍ മണ്ഡലങ്ങള്‍ (ജനസംഖ്യ (72347). 5. അങ്ങാടി - റാന്നി ബ്ലോക്ക് പഞ്ചായത്തിലെ മക്കപ്പുഴ, പഴവങ്ങാടി, നാറാണംമൂഴി, വെച്ചൂച്ചിറ, അങ്ങാടി മണ്ഡലങ്ങള്‍ (ജനസംഖ്യ 60144). 6. റാന്നി - റാന്നി ബ്ലോക്ക് പഞ്ചായത്തിലെ മാമ്പാറ, വടശേരിക്കര, വലിയകുളം, റാന്നി, ചെറുകോല്‍, കീക്കൊഴൂര്‍, കടമ്മനിട്ട മണ്ഡലങ്ങള്‍ (ജനസംഖ്യ 60779). 7. ചിറ്റാര്‍ - റാന്നി ബ്ലോക്ക് പഞ്ചായത്തിലെ കൊല്ലമുള, പെരുനാട്, ആങ്ങമൂഴി, സീതത്തോട്, ചിറ്റാര്‍ മണ്ഡലങ്ങള്‍ (ജനസംഖ്യ 57944). 8. മലയാലപ്പുഴ - കോന്നി ബ്ലോക്ക് പഞ്ചായത്തിലെ മൈലപ്ര, മലയാലപ്പുഴ, കോന്നി താഴം, തണ്ണിത്തോട്, അതുമ്പുംകുളം മണ്ഡലങ്ങള്‍ (ജനസംഖ്യ 51251). 9. കോന്നി - കോന്നി ബ്ലോക്ക് പഞ്ചായത്തിലെ മെഡിക്കല്‍ കോളജ്, അരുവാപ്പുലം, വകയാര്‍, കോന്നി ടൗണ്‍, ഇളകൊള്ളൂര്‍ മണ്ഡലങ്ങള്‍ (ജനസംഖ്യ 52720). 10. പ്രമാടം - കോന്നി ബ്ലോക്കിലെ വി. കോട്ടയം, വള്ളിക്കോട്, പ്രമാടം മണ്ഡലങ്ങള്‍, ഇലന്തൂര്‍ ബ്ലോക്കിലെ പുത്തന്‍പീടിക, ഓമല്ലൂര്‍, ചെന്നീര്‍ക്കര മണ്ഡലങ്ങള്‍.(ജനസംഖ്യ 50922). 11. കടുമണ്‍ - പറക്കോട്ബ്ലോക്കിലെ ഏഴംകുളം, ഐക്കാട്, അങ്ങാടിക്കല്‍ ഹൈസ്‌കൂള്‍, നെടുമണ്‍കാവ്, പന്തളം ബ്ലോക്കിലെ തട്ടയില്‍, കോന്നി ബ്ലോക്കിലെ കൈപ്പട്ടൂര്‍ മണ്ഡലങ്ങള്‍. (ജനസംഖ്യ 66857). 12. കലഞ്ഞൂര്‍ - പറക്കോട് ബ്ലോക്കിലെ കൂടല്‍, കലഞ്ഞൂര്‍, ഇളമണ്ണൂര്‍, കുന്നിട, കൈതപ്പറമ്പ് മണ്ഡലങ്ങള്‍. (ജനസംഖ്യ 58486). 13. ഏനാത്ത് - പറക്കോട് ബ്ലോക്കിലെ വടക്കടത്തുകാവ്, ഏനാത്ത്, വേലുത്തമ്പി ദളവ, കടമ്പനാട് മണ്ഡലങ്ങള്‍. 14. പള്ളിക്കല്‍ - പറക്കോട് ബ്ലോക്കിലെ തെങ്ങമം, പഴകുളം, പെരിങ്ങനാട്, പന്തളം ബ്ലോക്കിലെ തുമ്പമണ്‍, പൊങ്ങലടി, വിജയപുരം മണ്ഡലങ്ങള്‍. (ജനസംഖ്യ 61989). 15. കുളനട - പന്തളം ബ്ലോക്കിലെ ആറാട്ടുപുഴ, ആറന്മുള, ഇലവുംതിട്ട, തുമ്പമണ്‍ താഴം, കുളനട, മെഴുവേലി, ഉള്ളന്നൂര്‍, മാന്തുക, വല്ലന, നീര്‍വിളാകം മണ്ഡലങ്ങള്‍ (ജനസംഖ്യ 66778). 16. ഇലന്തൂര്‍ - ഇലന്തൂര്‍ ബ്ലോക്കിലെ നാരങ്ങാനം, പരിയാരം, പ്രക്കാനം, മുട്ടത്തുകോണം, ഇലന്തൂര്‍, കുഴിക്കാല, മല്ലപ്പുഴശേരി മണ്ഡലങ്ങള്‍ (ജനസംഖ്യ 51507). 17. കോഴഞ്ചേരി - കോയിപ്രം ബ്ലോക്കിലെ കോഴഞ്ചേരി, ചെറുകോല്‍, പ്ലാങ്കമണ്‍, അയിരൂര്‍, ചരല്‍ക്കുന്ന്, മാരാമണ്‍, പുല്ലാട്, തട്ടക്കാട്മണ്ഡലങ്ങള്‍. (ജനസംഖ്യ 67758).

വെച്ചൂച്ചിറയിൽ തെരുവുനായ്ക്കൾക്ക് വാക്സിനേഷൻ നൽകും

റാന്നി: വെച്ചൂച്ചിറയിൽ അലഞ്ഞുതിരിയുന്ന തെരുവുനായ്ക്കളെ പിടികൂടി വാക്സീനേഷൻ നൽകാൻ തീരുമാനം. ഗ്രാമപഞ്ചായത്ത് പ്രസിഡന്‍റ് ഇ.വി. വർക്കിയുടെ അധ്യക്ഷതയിൽ ചേർന്ന അടിയന്തര ഗ്രാമ പഞ്ചായത്ത് കമ്മിറ്റിയാണ് തീരുമാനം കൈക്കൊണ്ടത്. തെരുവു നായ്ക്കളെ പിടികൂടുന്നതിന് പരിശീലനം ലഭിച്ചവരെ കണ്ടെത്തുന്നതിന് വെറ്ററിനറി സർജനെ യോഗം ചുമതലപ്പെടുത്തി. ഇതിനായി വരുന്ന ചെലവുകൾ ഗ്രാമ പഞ്ചായത്തിൻ്റെ തനതു വരുമാനത്തിൽ നിന്നും ചെലവഴിക്കും. അടുത്ത ജില്ലാ പ്ലാനിംഗ് കമ്മിറ്റിയിൽ പ്രോജക്ട് സമർപ്പിച്ച് അംഗീകാരം വാങ്ങാനും തീരുമാനിച്ചു. നായ പിടിത്തത്തിൽ പരിശീലനം ലഭ്യമായവരെ ലഭിക്കുന്ന മുറയ്ക്ക് നായ്ക്കളുടെ ശല്യം കൂടുതലായുള്ള കുന്നം വെച്ചൂച്ചിറ, നവോദയ എന്നിവിടങ്ങളിലും സ്കൂളുകൾ, ബസ് സ്റ്റാൻഡ്, റോഡുഭാഗങ്ങൾ , മറ്റു സ്ഥലങ്ങൾ എന്നിവിടങ്ങളിൽ അലഞ്ഞുതിരിയുന്ന നായ്ക്കളെ കണ്ടെത്തി വാക്സീനേഷൻ നൽകാനാണ് തീരുമാനം. ഇതിനാവശ്യമായ മരുന്ന് മൃഗസംരക്ഷണ വകുപ്പ് എത്തിക്കും. തികയാത്ത പക്ഷം ഗവൺമെന്‍റ് അംഗീകൃത സ്ഥാപനങ്ങളിൽ നിന്നും വാങ്ങുന്നതിനാണ് തീരുമാനം. വൈസ് പ്രസിഡന്‍റ് പൊന്നമ്മ ചാക്കോ, സ്റ്റാൻഡിംഗ് കമ്മിറ്റി ചെയർമാൻ ടി.കെ. ജയിംസ്, നിഷ അലക്സ്, എസ്. രമാദേവി, ഗ്രാമപഞ്ചായത്ത് സെക്രട്ടറി, വെറ്ററിനറി സർജൻ തുടങ്ങിയവർ പങ്കെടുത്തു.

വോട്ടര്‍ പട്ടിക പുതുക്കൽ: പേര് ചേര്‍ക്കാന്‍ ലഭിച്ചത് 76,734 അപേക്ഷകള്‍

പത്തനംതിട്ട: തദ്ദേശ തെരഞ്ഞെടുപ്പ് കരട് വോട്ടര്‍ പട്ടിക പ്രസിദ്ധീകരിച്ചതിനു ശേഷം പത്തനംതിട്ട ജില്ലയില്‍ പുതിയതായി വോട്ടര്‍ പട്ടികയില്‍ പേരു ചേര്‍ക്കാന്‍ 76,734 പേര്‍ ഓണ്‍ലൈനായി അപേക്ഷ സമര്‍പ്പിച്ചു. നിലവിലുള്ള പട്ടികയിലെ വിവരങ്ങള്‍ തിരുത്തുന്നതിന് 714 അപേക്ഷകളും ഒരിടത്തു നിന്ന് മറ്റൊരിടത്തേക്ക് പേരുമാറ്റത്തിന് 5572 അപേക്ഷകളുമാണ് ഇന്നലെ വൈകുന്നേരംവരെ ലഭിച്ചത്. പട്ടികയിൽ പേരു ചേർക്കാൻ അപേക്ഷ നൽകാനുള്ള സമയപരിധി ഇന്നലെ അവസാനിച്ചു.

കോഴഞ്ചേരി മുത്തൂറ്റ് കാൻസർ സെന്‍ററിൽ മൂത്രാശയ അർബുദത്തിന് നവീന ചികിത്സ

കോഴഞ്ചേരി: അർബുദത്തിന് ഏറ്റവും പുതിയ ചികിത്സാരീതികൾ അവലംബിച്ച് കോഴഞ്ചേരി എം.ജി. ജോർജ് മുത്തൂറ്റ് കാൻസർ സെന്റർ. മൂത്രാശയ അർബുദ ചികിത്സയിലാണ് നവീന ചികിത്സാരീതി ഉപയോഗിച്ചത്. എൻഫോർട്ടുമാബ് വെഡോട്ടിൻ, പെംബ്രോലിസുമാബ് എന്നിവയുടെ സംയോജിത ചികിത്സയിലൂടെയാണ് ഇതു സാധ്യമാക്കിയത്. ഈ രണ്ട് ചികിത്സാ രീതികളും സംയോജിപ്പിച്ച് നൽകുമ്പോൾ വളരെ മികച്ച ഫലങ്ങളാണ് ക്ലിനിക്കൽ പഠനങ്ങളിൽ കാണിക്കുന്നത്. അർബുദ ചികിത്സാ രംഗത്ത് ഇതൊരു സുപ്രധാന മുന്നേറ്റവുമാണിത്. പരമ്പരാഗത കീമോതെറാപ്പിയേക്കാൾ രോഗികളുടെ അതിജീവന സാധ്യതയും ക്ലിനിക്കൽ ഫലങ്ങളും മെച്ചപ്പെടുത്തുന്നതായി വിദഗ്ധർ ചൂണ്ടിക്കാട്ടി. ‌ കീമോതെറാപ്പി മരുന്ന് നേരിട്ട് അർബുദ കോശങ്ങളിൽ എത്തിക്കുന്ന ഈ പുതിയ രീതി ആരോഗ്യകരമായ കോശങ്ങൾക്ക് കേടുപാടുകൾ വരുത്തുന്നത് കുറയ്ക്കാൻ സഹായിക്കും. കേരളത്തിലെ അർബുദ ചികിത്സാ രംഗത്ത് ഈ നൂതന ചികിത്സയുടെ ലഭ്യത രോഗികൾക്കും അവരുടെ കുടുംബങ്ങൾക്കും പുതിയ പ്രതീക്ഷ നൽകുന്നതായി എം.ജി. ജോർജ് മുത്തൂറ്റ് കാൻസർ സെന്‍ററിലെ ചീഫ് ഡോ. ഭവ്യ എസ്. കുമാർ പറഞ്ഞു.

ധനലക്ഷ്മി ഗ്രൂപ്പ് ഇതര സംസ്ഥാനങ്ങളിലേക്ക്

പത്തനംതിട്ട: ധനലക്ഷ്മി ഗ്രൂപ്പിന്‍റെ അഞ്ചാം വാർഷികാഘോഷങ്ങളുടെ ഭാഗമായി 24ന് ഇന്ത്യയിലെ നാല് സംസ്ഥാനങ്ങളിൽ കൂടി ശാഖകൾ ആരംഭിക്കുമെന്ന് അധികൃതർ പത്രസമ്മേളനത്തിൽ പറഞ്ഞു. ന്യൂഡൽഹി, ഹരിയാന, ഉത്തർപ്രദേശ്, ഗുജറാത്ത് സംസ്ഥാനങ്ങളിലാണ് പുതിയ ശാഖകൾ തുറക്കുന്നത്. ഇതോടനുബന്ധിച്ച് നിക്ഷേപ സംഗമവും വിവിധ സേവന പദ്ധതികളുടെ തുടക്കവും കുറിക്കും. അംഗപരിമിതരായ നൂറുപേർക്ക് കൃത്രിമ കാലുകൾ സൗജന്യമായി നൽകുന്നതിനും വയനാട ചൂരൽമലയിൽ വീട് നഷ്ടപ്പെട്ട ഒരു കുടുംബത്തിനായി നിർമിച്ച വീടിന്‍റെ താക്കോൽദാനം നിർവഹിക്കുന്നതിനും പദ്ധതിയണ്ട്. അന്ന സാരഥി എന്ന പേരിൽ തൃശൂർ നഗരത്തിൽ സൗജന്യ ഉച്ചഭക്ഷണ പദ്ധതിക്കും തുടക്കം കുറിക്കും. കേരളത്തിലെ 14 ജില്ലകളിലും തമിഴ്നാട്, കർണാടക, മഹാരാഷ്ട്ര സംസ്ഥാനങ്ങളിലും നിക്ഷേപസംഗമം സംഘടിപ്പിക്കും. ധനലക്ഷ്മി ഗ്രൂപ്പ് ചുമതലക്കാരായ ടിന്‍റോ ബേബി, മോഹൻ പി. നാഥ്, വിനു സഖറിയ, തുളസീധരൻ നായർ, ഡി. അന്പിളി എന്നിവർ പത്രസമ്മേളനത്തിൽ പങ്കെടുത്തു.

കലഞ്ഞൂർ ജിഎൽപിഎസിൽ ശ്രുതിതരംഗം പദ്ധതി ഉദ്ഘാടനം ചെയ്തു

കലഞ്ഞൂർ: സ്കൂൾ വിശ്രമ വേളകൾ ആസ്വാദ്യകരമാക്കാൻ ശ്രുതിതരംഗവുമായി കലഞ്ഞൂർ ഗവൺമെന്‍റ് എൽപി സ്കൂൾ. ഇനി മുതൽ ഇടവേളകളിൽ മലയാളം കവിതകളും ഇംഗ്ലീഷ് റൈമുകളും കേട്ടായിരിക്കും ഇവിടത്തെ വിദ്യാർഥികൾ ഭക്ഷണം കഴിക്കുകയും വിശ്രമിക്കുകയും ചെയ്യുക. സംസ്ഥാനത്തു തന്നെ ആദ്യമായി ഒരു വിദ്യാലയത്തിൽ നടപ്പിലാക്കിയ ഈ സംഗീത ആസ്വാദന പരിപാടി ഏറെ മാതൃകാപരമെന്ന് ഉദ്ഘാടനം നിർവഹിച്ച് കെ. യു. ജനീഷ്കുമാർ എംഎൽഎ പറഞ്ഞു. ഭക്ഷണത്തിനൊപ്പം കേൾക്കുന്ന വരികൾ വിദ്യാർഥികൾ അറിയാതെ തന്നെ മനസിൽ പതിയും എന്നതാണ് ശ്രുതിതരംഗം പരിപാടിയുടെ പ്രത്യേകത. സംസ്ഥാന ബാലവാകാശ കമ്മീഷനും വിദ്യാഭ്യാസ വകുപ്പും ചേർന്നു നടപ്പിലാക്കുന്ന റേഡിയോ നെല്ലിക്ക അടക്കം പരിപാടികൾ വിദ്യാർഥികൾക്കും അധ്യാപകർക്കും കേൾക്കാനും ആസ്വദിക്കാനും പദ്ധതി വേദിയാകുമെന്നും പ്രഥമാധ്യാപകൻ ഫിലിപ്പ് ജോർജ് പറഞ്ഞു. എസ്എസ്കെ പദ്ധതി പ്രകാരം സ്കൂളിൽ ആരംഭിച്ച ക്ലാസ് റൂം ആസ് ലാബിന്‍റെ ഉദ്ഘാടനവും എംഎൽഎ നിർവഹിച്ചു. എസ്എംസി ചെയർപേഴ്സൺ ആര്യ ഷിജു അധ്യക്ഷത വഹിച്ചു. ആര്യോഗ്യ വിദ്യാഭ്യാസ സ്ഥിരം സമിതി അധ്യക്ഷ ആശ സജി, ബിപിസി വി. ഷബ്നം, മുൻ വാർഡംഗം എസ്.രഘു ഓലിക്കൽ, റോബി സി. പാപ്പൻ, കെ.ഷാജഹാൻ, കെ.പി. ബിനിത എന്നിവർ പ്രസംഗിച്ചു.

മദ്യപാനത്തിനിടെ വാക്കുതർക്കം; യുവാവ് കൊല്ലപ്പെട്ട നിലയിൽ

കൂടൽ: യുവാവിനെ വീടിനുള്ളിൽ മരിച്ചനിലയിൽ കണ്ടെത്തിയ സംഭവത്തിൽ അയൽവാസി പിടിയിൽ. കൂടൽ പുന്നമൂട്‌ പയറ്റുകാലായിൽ രാജനാ(40)ണ് മരിച്ചത്. ഇന്നലെ രാവിലെ ബന്ധു കാപ്പിയുമായി എത്തിയപ്പോൾ രാജനെ താത്കാലിക ഷെഡിൽ മരിച്ച നിലയിൽ കണ്ടെത്തുകയായിരുന്നു. തുടർന്ന് പോലീസ് നടത്തിയ പരിശോധനയിൽ കൊലപാതകമാണെന്ന് സ്ഥിരീകരിക്കുകയും വൈകുന്നേരത്തോടെ കലഞ്ഞൂരിൽനിന്ന് രാജന്‍റെ സുഹൃത്തും അയൽവാസിയുമായ അനിലിനെ (44) കസ്റ്റഡിയിലെടുക്കുകയുമായിരുന്നു. രാജൻ ഒറ്റയ്ക്കായിരുന്നു താമസം. ഇവിടെയിരുന്ന് രാജനും അനിലും മദ്യപിക്കുന്നത് പതിവായിരുന്നുവെന്ന് പോലീസ് പറയുന്നു. ഞായറാഴ്ച രാത്രിയിൽ മദ്യലഹരിയിൽ ഇരുവരും തമ്മിൽ വാക്കുതർക്കം നടന്നു. ഇതിനിടെ രാജനെ അനിൽ കുത്തുകയായിരുന്നുവെന്ന് പറയുന്നു. നെഞ്ചിന് താഴെയായിരുന്നു കുത്തേറ്റത്. സംഭവം ആരും അറിഞ്ഞില്ല. മണിക്കൂറുകളോളം ചോര വാർന്ന കിടന്ന രാജൻ പിന്നീട് മരണപ്പെടുകയായിരുന്നു. കാപ്പിയുമായെത്തിയ ബന്ധു അറിയിച്ചതനുസരിച്ചെത്തിയ നാട്ടുകാർ കൂടൽ പോലീസ് സ്റ്റേഷനിൽ വിവരം അറിയിക്കുകയായിരുന്നു. പിന്നാലെ അനിൽ ഒളിവിൽ പോയി. ഇയാളെ കണ്ടെത്താൻ പോലീസ് നാല് സംഘങ്ങളായി നടത്തിയ തെരച്ചിലിനൊടുവിൽ കലഞ്ഞൂരിൽനിന്ന് കസ്റ്റഡിയിലെടുക്കുകയായിരുന്നു. പത്താപുരത്തു നിന്ന് സ്വകാര്യ ബസിൽ കോന്നിയിലേക്ക് വരുന്നതിനിടെയായിരുന്നു അറസ്റ്റ്. പത്തനംതിട്ട ജില്ല പോലീസ് മേധാവി ആർ. ആനന്ദ്, ഡിവൈഎസ്പി അജയ്നാഥ് എന്നിവരുടെ നേതൃത്വത്തിൽ പോലീസ് സംഘവും വിരലടയാള വിദഗ്ധർ, ഡോഗ് സ്ക്വാഡ്, ഫോറെൻസിക് വിഭാഗവും സ്ഥലത്ത് എത്തിയിരുന്നു. മൃതദേഹം പോസ്റ്റ്‌മോർട്ടത്തിനായി കോന്നി ആശുപത്രിയിലേക്ക് മാറ്റി. രാജൻ അവിവാഹിതനാണ്.

ഓണത്തിനു മുന്പെങ്കിലും ശന്പളം കിട്ടുമോ?

പത്തനംതിട്ട: പുതിയ അധ്യയന വർഷം ആരംഭിച്ച് ഒരു ടേം പിന്നിടുന്പോഴും ദിവസ വേതനത്തിനു പണിയെടുക്കുന്ന ഭൂരിപക്ഷം താത്കാലിക അധ്യാപകർക്കും ശന്പളമായില്ല. സർക്കാർ സ്കൂളുകളിലെ അധ്യാപകർക്കു ശന്പളം നൽകാൻ വഴി ഒരുങ്ങിയിട്ടുണ്ടെങ്കിലും എയ്ഡഡ് മേഖലയിലെ നിയമനം അംഗീകരിച്ച് ശന്പളം ലഭിക്കണമെങ്കിൽ ഇനിയും കാത്തിരിപ്പ് വേണ്ടിവരും. ഓണത്തിനു മുന്പെങ്കിലും ശന്പളം ലഭിക്കുമോയെന്ന് ആരായുകയാണ് അധ്യാപകർ. കഴിഞ്ഞ വർഷം ജില്ലയിൽ ഒട്ടുമിക്ക ഉപജില്ലകളിലും ഏറെ വൈകിയാണ് ശന്പളം നൽകിയത്. ഡിസംബറിനു ശേഷമാണ് പലർക്കും ശന്പളം ലഭിച്ചു തുടങ്ങിയത്. സ്കൂൾ അടയ്ക്കുന്ന മാർച്ചിൽ ശന്പളം ഒന്നിച്ചു വാങ്ങിയവരുമുണ്ട്. നടപടിക്രമം പൂർത്തീകരിച്ചാൽ മാനേജർമാർ നൽകുന്ന നിയമന ഉത്തരവ് അംഗീകരിച്ച് ശന്പള ബിൽ പാസാക്കാൻ പല വിദ്യാഭ്യാസ ജില്ലാ, ഉപജില്ലാ ഓഫീസുകളിലും കാലതാമസം ഉണ്ടാകുന്നുണ്ട്. എന്നാൽ, തസ്തിക അംഗീകരിച്ചു നൽകിയ സ്കൂളുകളിൽ നിയമിച്ചിട്ടുള്ളവരുടെ ബിൽ സമർപ്പിക്കാൻ പ്രഥമാധ്യാപകരോടു നിർദേശിച്ചിട്ടുണ്ടെന്നാണ് വിദ്യാഭ്യാസ ഓഫീസർമാർ പറയുന്നത്. ഉത്തരവ് ക്ലിയർ ദിവസ വേതനക്കാർക്കു ശന്പളം അനുവദിക്കണമെങ്കിൽ അലോട്ട്മെന്‍റ് ഉണ്ടാകണമെന്ന ഒരു ഉത്തരവ് ഇതിനിടെ ധനവകുപ്പ് പുറത്തിറക്കി. അധ്യാപകരുടെ പ്രതിഷേധത്തിനെൊടുവിൽ ഇതു പിൻവലിച്ചു. കഴിഞ്ഞ ജൂലൈ 29നു പുറത്തിറക്കിയ പുതിയ ഉത്തരവു പ്രകാരം സ്കൂളുകളിൽനിന്നു പ്രധാന അധ്യാപകർ സ്പാർക്ക് മുഖേന അപ് ലോഡ് ചെയ്യുന്ന ബിൽ ഒക്ടോബർ മാസംവരെ അലോട്ട്മെന്‍റില്ലാതെ തന്നെ കൈമാറാമെന്നു പറയുന്നു. ഉത്തരവ് ലഭിച്ചെങ്കിലും വെബ്സൈറ്റിൽ വിവരങ്ങൾ നൽകുന്നതിൽ കാലതാമസമുണ്ടായി. ഇതു പരിഹരിച്ചതോടെ സർക്കാർ സ്കൂളുകളിലെ അധ്യാപകർക്കാണ് ഗുണകരമായത്. അവർക്കു ശന്പളം ലഭിച്ചു തുടങ്ങി. രണ്ടുമാസത്തെ ശന്പളം പലർക്കും കഴിഞ്ഞ ദിവസങ്ങളിൽ ഒന്നിച്ചു ലഭിച്ചു. നിയമനങ്ങളെല്ലാം താത്കാലികം സംസ്ഥാനത്തുതന്നെ താത്കാലികാടിസ്ഥാനത്തിൽ ഏറ്റവുമധികം അധ്യാപകരെ നിയമിച്ചിട്ടുള്ള ജില്ലകളിലൊന്നാണ് പത്തനംതിട്ട. പതിറ്റാണ്ടുകളായി പത്തനംതിട്ട ജില്ലയിലെ എയ്ഡഡ് സ്കൂളുകളിൽ ഓരോ കാരണങ്ങളുടെ പേരിൽ നിയമനം തടയപ്പെടുകയാണ്. പ്രൈമറി സ്കൂളുകളിൽ കുട്ടികളുടെ കുറവു കാരണം പലേടത്തും സ്ഥിരം തസ്തിക നഷ്ടപ്പെട്ടു. ഇത്തരം നിയമനങ്ങൾ താത്കാലികാടിസ്ഥാനത്തിലായി. തസ്തിക നിലവിലുണ്ടെങ്കിലും സ്ഥിരം നിയമനം തടഞ്ഞിട്ടുള്ള വിദ്യാലയങ്ങളുമുണ്ട്. ഭിന്നശേഷി പ്രശ്നം പരിഹരിക്കപ്പെടാതെ കിടക്കുന്നതാണ് നിലവിൽ നിയമന തടസത്തിനു പ്രധാന കാരണം. യോഗ്യതയുള്ളവരെ താത്കാലികാടിസ്ഥാനത്തിൽ ഓരോ അധ്യയന വർഷവും നിയമിച്ചാണ് സ്കൂളുകൾ മുന്നോട്ടു പോകുന്നത്. സ്ഥിര നിയമനമല്ലാത്തതിനാൽ ദിവസവേതനം നൽകിയാൽ മതിയാകുമെന്നതു സർക്കാരിനും സാന്പത്തിക നേട്ടമാണ്

വിദ്യാര്‍ഥികള്‍ക്ക് എന്‍ഡിആര്‍എഫ് പരിശീലനം നല്‍കി

പത്തനംതിട്ട: ദുരന്തങ്ങളെ നേരിടാനും പ്രതിരോധിക്കാനും പത്തനംതിട്ട ജില്ലയിലെ സ്‌കൂള്‍ വിദ്യാര്‍ഥികള്‍ക്ക് ദേശീയ ദുരന്ത പ്രതികരണ സേനാ സംഘം പരിശീലനം നൽകി. അപകടങ്ങളില്‍പെട്ടവര്‍ക്ക് പ്രഥമശുശ്രൂഷ നല്‍കല്‍, സിപിആര്‍, ഭൂകമ്പ സമയത്ത് രക്ഷാപ്രവര്‍ത്തനം നടത്തേണ്ട രീതി, തടി കഷ്ണങ്ങളും തുണിയുമുപയോഗിച്ച് താത്കാലിക സ്‌ട്രെക്ചര്‍ നിര്‍മിക്കുന്നവിധം, നടക്കാന്‍ കഴിയാത്തവരെ സുരക്ഷിതസ്ഥാനങ്ങളിലേക്ക് മാറ്റുന്ന രീതി, കയര്‍ ഉപയോഗിച്ചുള്ള രക്ഷാപ്രവര്‍ത്തനം, രക്ഷാപ്രവര്‍ത്തകര്‍ സ്വീകരിക്കേണ്ട മുന്‍കരുതലുകള്‍ തുടങ്ങിയവയില്‍ പ്രായോഗിക പരിശീലനം നല്‍കി. ദേശീയ ദുരന്ത പ്രതികരണ സേന നാലാം ബറ്റാലിയന്‍ ടീം കമാന്‍ഡര്‍ സഞ്ജയ് സിംഗ് മല്‍സുനിയുടെ നേതൃത്വത്തിലുള്ള സംഘമാണ് പരിശീലനം നല്‍കിയത്. ആദ്യഘട്ടത്തില്‍ പെരിങ്ങര ജിഎച്ച്എസ്, നെടുമ്പ്രം ജിഎച്ച്എസ്, കടപ്ര കെഎസ്ജിഎച്ച്എസ്, പെരിങ്ങര പിഎംവിഎച്ച്എസ്, ചാത്തങ്കേരി എസ്എന്‍ഡിപിഎച്ച്എസ്, നിരണം സെന്റ് മേരീസ് എച്ച്എസ്എസ്, കോന്നി ജിഎച്ച്എസ്എസ്, കലഞ്ഞൂര്‍ ജിഎച്ച്എസ്എസ്, ചിറ്റാര്‍ ജിഎച്ച്എസ്എസ്, പത്തനംതിട്ട കാതോലിക്കേറ്റ് എച്ച്എസ്എസ് എന്നീ സ്‌കൂളുകളിലായിരുന്നു പരിശീലനം.

യുവതിയെ വീടുകയറി ആക്രമിച്ചു; ഭർത്താവ് അറസ്റ്റിൽ

തിരുവല്ല: മദ്യലഹരിയിൽ നിരന്തരം ദേഹോപദ്രവം തുടർന്നപ്പോൾ പിണങ്ങിമാറി, അമ്മയ്‌ക്കൊപ്പം വാടകവീട്ടിൽ താമസിക്കുന്ന യുവതിയെ വീടുകയറി ആക്രമിച്ചു. ബിയർ കുപ്പികൊണ്ടുള്ള ഭർത്താവിന്‍റെ ആക്രമണത്തിൽ 30 കാരിക്ക് ഗുരുതര പരിക്ക്. വധശ്രമത്തിനു കേസെടുത്ത തിരുവല്ല പോലീസ് യുവതിയുടെ ഭർത്താവ് തിരുവല്ല കുറ്റപ്പുഴ മഞ്ഞാടി തൈമല മൈലമ്മൂട്ടിൽ വീട്ടിൽ എം. കെ. രാജേഷി (39)നെ അറസ്റ്റ് ചെയ്തു.പോലീസ് ഇൻസ്പെക്ടർ എസ്. സന്തോഷിന്‍റെ നേതൃത്വത്തിലാണ് അന്വേഷണം നടക്കുന്നത്. ഏഴുവർഷം മുമ്പ് വിവാഹിതരായവരാണ് ഇരുവരും. മദ്യലഹരിയിൽ ഭർത്താവ് നിരന്തരം മർദിക്കുമെന്ന് യുവതി പോലീസിനു മൊഴി നൽകി. തുടർന്ന് അമ്മയ്ക്കും സഹോദരിക്കുമൊപ്പം താമസം മാറിയ യുവതിയെ കഴിഞ്ഞ പത്തിനു രാവിലെ 9.30 ന് അതിക്രമിച്ചു കയറി ഉപദ്രവിക്കുകയായിരുന്നു. യുവതിയെ തള്ളിത്താഴെയിട്ടശേഷം ബിയർ കുപ്പി കൊണ്ട് ആക്രമിക്കുകയായിരുന്നു. കുപ്പികൊണ്ട് കൊണ്ട് കഴുത്തിലും താടിയിലും നെഞ്ചിലും കുത്തി മുറിവേല്പിച്ചു കൊല്ലാൻ ശ്രമിക്കുകയായിരുന്നുവെന്നാണ് മൊഴി. കഴുത്തിൽ ആഴത്തിൽ മുറിവേറ്റു. രക്ഷപ്പെട്ട് ഓടിയ യുവതിയെ സഹോദരി ഓട്ടോറിക്ഷയിൽ അടൂർ താലൂക്ക് ആശുപത്രിയിലെത്തിച്ചു. എഎസ്ഐ മിത്ര വി. മുരളി ആശുപത്രിയിലെത്തി മൊഴി രേഖപ്പെടുത്തി. അറസ്റ്റിലായ രാജേഷിനെ കോടതി റിമാൻഡ് ചെയ്തു.

മരക്കൂട്ടം മുതല്‍ ശരംകുത്തി വരെ താത്കാലിക പന്തല്‍ നിര്‍മിക്കും

പത്തനംതിട്ട: ശബരിമല മണ്ഡല മകരവിളക്ക് മഹോത്സവത്തോടനുബന്ധിച്ച് മരക്കൂട്ടം മുതല്‍ ശരംകുത്തി നെക്ക് പോയിന്‍റ് വരെ താത്കാലിക പന്തല്‍ നിർമിക്കും. ശരംകുത്തി ആല്‍മരം മുതല്‍ താഴോട്ട് യു ടേണ്‍ വരെയാണ് പന്തൽ. രണ്ടു സ്ഥലത്തായി ഏകദേശം ഒന്നേകാല്‍ കിലോമീറ്ററായിരിക്കും നീളം. തീർഥാടകര്‍ക്ക് കൂടുതല്‍ സൗകര്യം ഏര്‍പ്പെടുത്തുന്നതിന്‍റെ ഭാഗമായാണ് ദേവസ്വം ബോര്‍ഡിന്‍റെ പന്തല്‍ നിര്‍മാണം. കഴിഞ്ഞ വര്‍ഷങ്ങളില്‍ താത്കാലിക പച്ച നിറത്തിലുള്ള വലയായിരുന്നു സ്ഥാപിച്ചിരുന്നത്. മണ്ഡല മകരവിളക്ക് മഹോത്സവവുമായി ബന്ധപ്പെട്ട് ജില്ലാ കളക്ടര്‍ എസ്. പ്രേം കൃഷ്ണന്‍റെ അധ്യക്ഷതയില്‍ ചേര്‍ന്ന യോഗത്തിലാണ് തീരുമാനം. എരുമേലി - മുക്കുഴി - പമ്പ പാതയിലെ ഉള്‍വനത്തിലെ വിരികളില്‍ ഫയര്‍ ഓഡിറ്റ് നടത്തി മാത്രം നിര്‍മാണ അനുമതി നല്‍കാന്‍ ജില്ലാ കളക്ടര്‍ ആവശ്യപ്പെട്ടു. വനപാതകളില്‍ വേസ്റ്റ് ബിന്‍ സ്ഥാപിക്കും. ളാഹ മുതല്‍ പമ്പ വരെ അപകടകരമായി നില്‍ക്കുന്ന മരങ്ങളും മരച്ചില്ലകളും മുറിച്ചു മാറ്റും. കാട്ടുമൃഗങ്ങളുമായി ബന്ധപ്പെട്ട ശല്യം തടയുന്നതിലേക്ക് പ്രത്യേക സംഘങ്ങളെ നിയോഗിക്കും. കഴിഞ്ഞ തീർഥാടനകാലത്ത് 104 പന്നികളെയാണ് പിടികൂടി ഉൾവനത്തിലാക്കിയത്. 24 മണിക്കൂറും എലിഫന്‍റ് സ്ക്വാഡ് പ്രവർത്തിക്കും. പമ്പ മുതല്‍ സന്നിധാനം വരെയുള്ള തീര്‍ത്ഥാടന പാതയില്‍ അടിയന്തരഘട്ട വൈദ്യസഹായ കേന്ദ്രങ്ങള്‍ സ്ഥാപിക്കും. ഹൃദ്‌രോഗ വിദഗ്ധരുടെയടക്കം സേവനം ഉണ്ടാകും. സന്നിധാനം, പമ്പ, നിലയ്ക്കല്‍ ബേസ് ക്യാമ്പ് തുടങ്ങിയ ആശുപത്രികളില്‍ ആന്‍റി വെനമടക്കം ലഭ്യമാക്കും. മൈലപ്ര - മണ്ണാറക്കുളഞ്ഞി, മണ്ണാറക്കുളഞ്ഞി - ചാലക്കയം - പമ്പ റോഡിന്‍റെ പുനരുദ്ധാരണ പ്രവൃത്തികള്‍ പുരോഗമിക്കുകയാണെന്ന് യോഗം വിലയിരുത്തി. ഹമ്പുകൾ, വളവുകള്‍ എന്നിവ സൂചിപ്പിക്കുന്ന ബോര്‍ഡുകള്‍ അഞ്ച് ഭാഷകളിലായി സ്ഥാപിക്കും. നിലയ്ക്കല്‍ ബേസ് ക്യാമ്പ്, പമ്പ, സന്നിധാനം എന്നിവിടങ്ങളിലെ കിയോസ്‌കുകളില്‍ കുടിവെള്ളം ഉറപ്പാക്കും. പമ്പയിലെ ജലനിരപ്പ് ക്രമീകരിക്കുന്നതിനായി തത്സമയ ജലനിരപ്പ് കാണിക്കുന്ന ഇലക്‌ട്രോണിക് ഡിസ്‌പ്ലേ സ്ഥാപിക്കുന്നത് പരിഗണനയിലാണ്. പമ്പയില്‍ സ്‌കൂബാ ഡൈവിംഗ് സേവനം ഉറപ്പാക്കും. നിലയ്ക്കല്‍ മുതല്‍ പമ്പ വരെ വൈദ്യുതി ലൈനുകള്‍ എത്താത്ത സ്ഥലങ്ങളില്‍ താല്‍ക്കാലിക സോളാര്‍ ലൈറ്റുകള്‍ സ്ഥാപിക്കുന്നത് പരിഗണിക്കും. കെഎസ്ആര്‍ടിസി ബസുകളില്‍ കയറാന്‍ തീർ‌ഥാടകര്‍ക്ക് ക്യൂ സംവിധാനമുണ്ടാകും. പമ്പ ഹില്‍ടോപ്പില്‍ 20 കെഎസ്ആര്‍ടിസി ബസുകള്‍ പാര്‍ക്ക് ചെയ്യാനുള്ള സൗകര്യം പരിശോധിക്കും. റാന്നിയില്‍ 24 മണിക്കൂറും പ്രവര്‍ത്തിക്കുന്ന എക്‌സൈസ് കണ്‍ട്രോള്‍ റൂം ആരംഭിക്കും. ലഹരിക്കെതിരേ വിവിധ ഭാഷകളില്‍ സൂചനാ ബോര്‍ഡുകള്‍ സ്ഥാപിക്കും. തീർഥാടന കാലയളവിലെ ഭക്ഷണ സാധനങ്ങളുടെ വിലവിവര പട്ടിക കടകളില്‍ പ്രദര്‍ശിപ്പിക്കും. ഭക്ഷണ സാധനങ്ങളുടെ ഗുണമേന്‍മയും വൃത്തിയും ഉറപ്പാക്കും. ദേവസ്വം ബോര്‍ഡുമായുള്ള ആശയവിനിമയത്തിന് പ്രധാനവകുപ്പുകള്‍ ലെയ്‌സണ്‍ ഓഫീസര്‍മാരെ നിയമിക്കാന്‍ ജില്ലാ കളക്ടര്‍ നിര്‍ദേശിച്ചു. ജില്ലാ പോലീസ് മേധാവി ആര്‍. ആനന്ദ്, ഡെപ്യൂട്ടി കളക്ടര്‍ ആർ. രാജലക്ഷ്മി, വകുപ്പ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

ചികിത്സയിലിരിക്കേ അജ്ഞാതൻ മരിച്ചു

പത്തനംതിട്ട: കോന്നി മെഡിക്കല്‍ കോളജില്‍ ചികില്‍സയിലിരിക്കേ മരിച്ച വയോധികനെ കുറിച്ച് വിവരങ്ങള്‍ തേടി പോലീസ്. കൂടല്‍ ചന്തയിലെ കടത്തിണ്ണയില്‍ അവശനിലയില്‍ കണ്ട വയോധികനെ നാട്ടുകാരാണ് കഴിഞ്ഞ് ഒമ്പതിന് വൈകുന്നേരം കോന്നി മെഡിക്കല്‍ കോളജ് ആശുപത്രിയിലെത്തിക്കുന്നത്. കടത്തിണ്ണകളില്‍ അന്തിയുറങ്ങുന്ന ഇയാളെ വിറയലോടെ കാണപ്പെടുകയും പിന്നീട് കുഴഞ്ഞുവീഴുകയായിരുന്നു. 20 വർഷം മുന്പ് പത്തനംതിട്ടയില്‍ നിന്നും കൂടലിലെത്തിയതാണ് ഇയാളെന്ന് പറയുന്നു. ഏകദേശം 68 വയസ് തോന്നിക്കും. വീടുകളില്‍ കൂലിപണിക്കൊക്കെ പോയിരുന്ന ഇയാളെപ്പറ്റി ആളുകള്‍ക്ക് കൂടുതല്‍ വിവരങ്ങള്‍ അറിയില്ല. പോസ്റ്റ്‌മോര്‍ട്ടത്തിന് ശേഷം കോന്നി മെഡിക്കല്‍ കോളേജ് ആശുപത്രി മോര്‍ച്ചറിയില്‍ മൃതദേഹം സൂക്ഷിക്കുകയാണ്. കൂടല്‍ പോലീസ് - 04734 270100, എസ്ഐ - 9961385569.

മോട്ടോര്‍ സൈക്കിള്‍ മോഷ്ടിച്ചുകടത്തുന്നതിനിടയിൽ യുവാക്കള്‍ അറസ്റ്റില്‍

പന്തളം: മോട്ടോര്‍ സൈക്കിള്‍ മോഷ്ടിച്ചു കടത്താന്‍ ശ്രമിച്ച യുവാക്കളെ പോലീസ് അറസ്റ്റ് ചെയ്തു. തിരുവനന്തപുരം വട്ടപ്പാറ കുന്നപ്പാറ അര്‍ച്ചന ഭവനില്‍ ആരോമല്‍ (അഖിൽ, 20), വട്ടപ്പാറ വെങ്കോട് ചെന്തുപ്പൂര്‍ ചരുവിളാകത്തു പുത്തന്‍വീട്ടില്‍ വിപിന്‍ വിനോദ് (19) എന്നിവരാണ് പന്തളം പോലീസിന്‍റെ പിടിയിലായത്. എം സി റോഡില്‍ പന്തളം കുരമ്പാല ഇടയാടി പെട്രോള്‍ പമ്പിനു സമീപത്ത് നിന്നുമാണ് വാഹനം മോഷ്ടിക്കാന്‍ ശ്രമിച്ചത്. പുലര്‍ച്ചെ 4.30 ഓടെ സമീപത്തെ റോഡിലൂടെ രണ്ട് പേര്‍ ബൈക്ക് തള്ളിക്കൊണ്ട് പോകുന്നത് എസ്ഐ സി. വി. വിനോദ് കുമാറിന്‍റെ നേതൃത്വത്തിലുള്ള രാത്രികാല പട്രോളിംഗ് സംഘത്തിന്‍റെ ശ്രദ്ധയില്‍പ്പെട്ടു. ചോദ്യം ചെയ്തപ്പോള്‍ പരിഭ്രമിച്ച യുവാക്കൾ, പെട്രോള്‍ തീര്‍ന്നതിനാല്‍ തള്ളിക്കൊണ്ടുപോകുകയാണെന്ന് മറുപടി പറഞ്ഞു. പരിശോധനയില്‍ താക്കോല്‍ ഇവരുടെ കൈയിലില്ലെന്ന് പോലീസിനു ബോധ്യപ്പെട്ടു. തുടര്‍ന്ന്, കൈവശമുണ്ടായിരുന്ന ബാഗ് പരിശോധിച്ചപ്പോള്‍ മുക്കാല്‍ ഭാഗത്തോളം പെട്രോള്‍ നിറച്ച കുപ്പി, സ്പാനറുകൾ, സ്‌ക്രൂ ഡ്രൈവര്‍, ചുറ്റിക, മൊബൈല്‍ ഫോണ്‍ തുടങ്ങിയവ കണ്ടു. ബൈക്ക് കുരമ്പാല പടിഞ്ഞാറേ പുല്ലം പ്ലാവില്‍ സനലിന്‍റേതാണെന്ന് വ്യക്തമായതോടെ പോലീസ് അന്വേഷണം തുടങ്ങി. ഒന്പതിനു രാവിലെ പമ്പിനു സമീപം റോഡ് വക്കില്‍ ബൈക്ക് വച്ചിട്ട് ജോലിക്ക് പോയെന്നും പോലീസ് വിളിച്ചപ്പോഴാണ് ബൈക്ക് മോഷ്ടിക്കപ്പെട്ടതായി അറിഞ്ഞതെന്നും സനല്‍ പോലീസിനു മൊഴി നല്‍കി. കേസില്‍ വിശദമായ അന്വേഷണം നടക്കുകയാണ്. കോടതിയില്‍ ഹാജരാക്കിയ രണ്ടുപേരെയും റിമാന്‍ഡ് ചെയ്തു.

വയോധികയ്ക്കു മാനസികപീഡനം: ഡിവൈഎസ്പി അന്വേഷിക്കണമെന്ന് മനുഷ്യാവകാശ കമ്മീഷൻ

പത്തനംതിട്ട: 86 വയസുള്ള അമ്മയെയും മകനെയും മാനസികമായി പീഡിപ്പിക്കുകയാണെന്ന പരാതിയിൽ എതിർ കക്ഷി സ്ഥലത്തില്ല എന്ന കാരണം പറഞ്ഞ് എഫ്ഐആർ, രജിസ്റ്റർ ചെയ്യാത്ത പോലീസിന്‍റെ നടപടി ശരിയല്ലെന്ന് മനുഷ്യാവകാശ കമ്മീഷൻ ചെയർപേഴ്സൺ ജസ്റ്റീസ് അലക്സാണ്ടർ തോമസ്. പരാതിയിൽ കുറ്റകൃത്യം നടന്നതായി മനസിലാക്കുന്നപക്ഷം കേസ് രജിസ്റ്റർ ചെയ്യാനുള്ള ബാധ്യത ബന്ധപ്പെട്ട സ്റ്റേഷൻ ഹൗസ് ഓഫീസർക്കുണ്ടെന്നും ഉത്തരവിൽ പറഞ്ഞു. പരാതിക്കാരോട് ജില്ലാ പോലീസ് മേധാവിക്ക് പരാതി നൽകാൻ കമ്മീഷൻ നിർദേശിച്ചു. ജില്ലാ പോലീസ് മേധാവി, തിരുവല്ല ഡിവൈഎസ്പിയെ ചുമതലപ്പെടുത്തി പ്രാഥമികാന്വേഷണം നടത്തണമെന്നും കമ്മീഷൻ നിർദേശിച്ചു. പരാതിക്കാരനും എതിർ കക്ഷിയും ബന്ധുക്കളാണെന്നും എതിർ കക്ഷി ഇപ്പോൾ എവിടെയാണെന്ന് അറിയില്ലെന്നും പത്തനംതിട്ട ജില്ലാ പോലീസ് മേധാവി കമ്മീഷനെ അറിയിച്ചു. എതിർകക്ഷി ലഹരി വിമോചന കേന്ദ്രത്തിൽ ചികിത്സയിലായിരുന്നുവെന്നും പിന്നീട് ബംഗളുരുവിലേക്ക് കടന്നതായും ബന്ധുക്കൾ പറഞ്ഞതായി റിപ്പോർട്ടിലുണ്ട്. എന്നാൽ എതിർ കക്ഷി നാട്ടിൽ തന്നെയുണ്ടെന്നും എഫ്ഐആർ രജിസ്റ്റർ ചെയ്യാൻ പോലും പോലീസ് തയാറായിട്ടില്ലെന്നും പരാതിക്കാരനായ ചാക്കോ ജേക്കബ് അറിയിച്ചു.

പോക്സോ കേസിൽ യുവാവ് അറസ്റ്റിൽ

അടൂർ: പ്രായപൂർത്തിയാകാത്ത പെൺകുട്ടിയെ നിർബന്ധിച്ച് നഗ്നചിത്രം പകർത്തി വാങ്ങിയ സംഭവത്തിൽ യുവാവ് അറസ്റ്റിൽ. അടൂർ പഴകുളം പുന്നലത്ത് കിഴക്കേക്കര വീട്ടിൽ സനു(19)വിനെയാണ് അടൂർ പോലീസ് അറസ്റ്റ് ചെയ്തത്. പെൺകുട്ടിയുമായി അടുപ്പത്തിലായിരുന്ന യുവാവ് ഫോണിലൂടെ ചിത്രം അയച്ചുതരുവാൻ ആവശ്യപ്പെടുകയിരുന്നു. ശിശുക്ഷേമ സമിതി നൽകിയ പരാതിയുടെ അടിസ്ഥാനത്തിലാണ് അടൂർ പോലീസ് കേസെടുത്തത്. അടൂർ ഡിവൈഎസ്പി ജി.സന്തോഷ് കുമാർ, എസ്എച്ച്ഒ ശ്യാം മുരളി, എസ്ഐ രാധാകൃഷ്ണൻ, എഎസ്ഐ മഞ്ജുമോൾ ത‌ുടങ്ങിയവരുടെ നേതൃത്വത്തിലാണ് അന്വേഷണം.

വലഞ്ചുഴിയില്‍ നിര്‍മാണം നിര്‍ത്തിവച്ച കെട്ടിടത്തിൽ വിളയാടിയ സംഘം പിടിയിൽ

പത്തനംതിട്ട: വലഞ്ചുഴി കാവ് ജംഗ്ഷന് സമീപം നിര്‍മാണം താത്കാലികമായി നിര്‍ത്തിവച്ചിരുന്ന സ്വകാര്യ ആയുര്‍വേദ റിസോര്‍ട്ട് കെട്ടിടത്തില്‍ സാമൂഹ്യ വിരുദ്ധര്‍ ദിവസങ്ങളോളം അഴിഞ്ഞാടി. കെട്ടിടത്തില്‍ ആഴ്ചകളോളം താമസിച്ചാണ് പെണ്‍കുട്ടികളടങ്ങുന്ന സംഘം സാമൂഹ്യവിരുദ്ധ പ്രവര്‍ത്തനങ്ങളും കെട്ടിടത്തിനു നാശനഷ്ടങ്ങളും വരുത്തിയത്. പ്രദേശവാസികളാരും തന്നെ സംഭവം ആദ്യം അറിഞ്ഞതുമില്ല. അന്വേഷണങ്ങള്‍ക്കൊടുവില്‍ സംഘാംഗങ്ങളില്‍ ചിലരെ പത്തനംതിട്ട പോലീസ് പിടികൂടി. ഇവരിൽ നല്ലൊരു പങ്കും പ്രായപൂർത്തിയാകാത്തവരാണ്. മുറികളില്‍ സ്ഥാപിച്ചിരുന്ന എയര്‍കണ്ടിഷനുകള്‍ വലിച്ചെറിഞ്ഞത് പുറത്തെ കുഴിയില്‍ കണ്ട പരിസരവാസി പറഞ്ഞാണ് കെട്ടിടം ഉടമസ്ഥന്‍ തോളൂര്‍ ഇന്ദീവരത്തില്‍ അവിജിത്ത് വിവരം അറിഞ്ഞത്. കുമ്പഴയിലാണ് അവിജിത്ത് താമസിക്കുന്നത്. കെട്ടിടത്തില്‍ ഘടിപ്പിച്ചിരുന്ന വിലപിടിപ്പുള്ള ഉപകരണങ്ങളെല്ലാം നശിപ്പിച്ചു. ഏകദേശം 10 ലക്ഷം രൂപയുടെ നഷ്ടമുണ്ടായെന്ന് അവിജിത്ത് പറഞ്ഞു.പുതിയ റഫ്രിജറേറ്ററും മൈക്രോവേവ് ഓവനും തകര്‍ത്ത് നടുമുറ്റത്ത് എറിഞ്ഞിട്ടുണ്ട്. കെട്ടിടത്തില്‍ സൂക്ഷിച്ചിരുന്ന പെയിന്‍റ് ചുമരില്‍ വികൃതമായി പൂശി. 70 സെന്‍റ് സ്ഥലത്ത് 8000 ചതുരശ്രഅടിയിലുള്ള കെട്ടിടമാണിത്. 10 വര്‍ഷം മുന്‍പ് നിര്‍മാണം തുടങ്ങിയ കെട്ടിടം മൂന്ന് നിലയിലാണ്. രണ്ടാം നിലയിലെ മൂന്ന് മുറികളില്‍ സ്ഥാപിച്ച എസിയാണ് പറമ്പിലെ കുഴിയില്‍ കണ്ടെത്തിയത്. ഉടമസ്ഥരോ പണിക്കാരോ സ്ഥലത്തു വരില്ലെന്നുറപ്പിച്ചശേഷം സംഘാംഗങ്ങള്‍ കെട്ടിടത്തിനുള്ളില്‍ ദിവസങ്ങളോളം ആര്‍ത്തുല്ലസിച്ചുവെന്ന വിവരമാണ് പുറത്തുവരുന്നത്. കെട്ടിടത്തിലെ നടുമുറ്റത്ത് ഗോവണി ചാരിവച്ച നിലയിലാണ്. മുന്‍വശത്തെ വാതില്‍ തകര്‍ത്ത നിലയിലും കണ്ടെത്തി. വൈദ്യുതീകരണത്തിന് സൂക്ഷിച്ചിരുന്ന വയറുകളുടെ കോപ്പര്‍ മാറ്റിയെടുത്ത ശേഷം ബാക്കി ഭാഗം കത്തിച്ച നിലയിലാണ്. ചില ഉപകരണങ്ങള്‍ കടത്തിക്കൊണ്ടു പോകാനായി പാക്ക് ചെയ്ത നിലയില്‍ കണ്ടെത്തി. പരാതിയേ തുടര്‍ന്ന് പോലീസും ഫോറൻസിക് വിഭാഗവും ഡോഗ് സ്‌ക്വാഡും സ്ഥലത്തെത്തി പരിശോധന നടത്തി. സംഭവത്തില്‍ ഉള്‍പ്പെട്ട പെണ്‍കുട്ടികള്‍ ഉള്‍പ്പെടെ ഏതാനുംപേരെയാണ് കണ്ടെത്തിയത്. ഇവരെ ചോദ്യം ചെയ്തു വരികയാണെന്ന് പോലീസ് പറഞ്ഞു.

ഒന്നാം ക്ലാസ് വിദ്യാർഥിയുടെ മരണം; പത്തുലക്ഷം ധനസഹായം നൽകാൻ ബാലാവകാശ കമ്മീഷൻ ഉത്തരവ്

പത്തനംതിട്ട: ചികിത്സയ്ക്കിടെ ഒന്നാം ക്ലാസ് വിദ്യാർഥി മരിച്ച സംഭവത്തിൽ ആശുപത്രിക്കെതിരേ ഗുരുതര കണ്ടെത്തലുകളുമായി ബാലാവകാശ കമ്മീഷൻ. ചികിത്സാ പിഴവിനേതുടർന്നാണ് കുട്ടിയുടെ മരണമെന്ന് കണ്ടെത്തിയ കമ്മീഷൻ, റാന്നിയിലെ സ്വകാര്യ ആശുപത്രിക്കും ഡോക്ടര്‍ക്കുമെതിരേ മന:പൂര്‍വമല്ലാത്ത നരഹത്യക്ക് കേസെടുക്കാനും ഉത്തരവിട്ടു. വെള്ളിയറ ഗവൺമെന്‍റ് എൽപി സ്കൂളിലെ ഒന്നാം ക്ലാസ് വിദ്യാർഥിയായിരുന്ന ആരോൺ വി. വർഗീസ് 2024 ഫെബ്രുവരി ഒന്നിനാണ് മരിച്ചത്. സ്കൂളിൽ വീണു കൈയ്ക്കു പരിക്കേറ്റ കുട്ടിയെ റാന്നി മാർത്തോമ്മ ആശുപത്രിയിലെത്തിച്ചു. കുട്ടിയെ ഉടൻ തന്നെ ശസ്ത്രക്രിയയ്ക്കു വിധേയനാക്കി. എന്നാൽ നില വഷളായതോടെ കോഴഞ്ചേരിയിലെ സ്വകാര്യ ആശുപത്രിയിലെത്തിച്ചെങ്കിലും കുട്ടി മരിച്ചു. ശസ്ത്രക്രിയയ്ക്കായി അനസ്തേഷ്യ നൽകിയതാണ് മരണകാരണമായതെന്നും കണ്ടെത്തി. അന്വേഷണം നടത്തിയ ബാലാവകാശ കമ്മീഷൻ കർശന നടപടി സ്വീകരിക്കുകയായിരുന്നു. ആരോൺ വി. വർഗീസിന്‍റ മാതാപിതാക്കൾക്ക് പത്ത് ലക്ഷം രൂപ ധനസഹായം നൽകാനും ബാലാവകാശ കമ്മീഷൻ ഉത്തരവായി. ഹർജിയും റിപ്പോർട്ടുകളും സമഗ്രമായി പരിശോധിച്ചതിൽ കുട്ടിയുടെ ചികിത്സയിൽ പിഴവ് വന്നിട്ടുള്ളതായി ബോധ്യപ്പെട്ടതായി ഉത്തരവിൽ പറയുന്നു. സ്വകാര്യ ആശുപത്രിക്ക് സഹായമേകാൻ പോസ്റ്റ്മോർട്ടത്തിൽ അട്ടിമറി നടത്തിയെന്നും കമ്മീഷൻ കണ്ടെത്തി. വലതുകൈക്ക് ഒടിവുമായെത്തിയ വിദ്യാർഥിക്കു ശരിയായി പരിശോധിക്കാതെ അനസ്തേഷ്യ നൽകിയതാണ് മരണകാരണം. രാസപരിശോധന വൈകിപ്പിച്ചത് മനഃപൂർവമാണ്. അഞ്ചു വയസുകാരന് അടിയന്തരമായി രാത്രി തന്നെ അനസ്തേഷ്യ നൽകേണ്ട ആവശ്യകത സംബന്ധിച്ച് വ്യക്തതയില്ല. കുട്ടിക്ക് വിദഗ്ധ ചികിത്സ നേടുവാനുള്ള അവസരം നിഷേധിക്കപ്പെട്ടതായും ഉത്തരവിൽ പറയുന്നു. കുട്ടിയെ ചികിത്സിച്ച ഓർത്തോപിഡിക്, അനസ്തേഷ്യ ഡോക്ടർമാർ മറ്റ് സംസ്ഥാനങ്ങളിൽ നിന്നുള്ളവരാണെന്നും ഇവരിൽ ഓർത്തോപീഡിക് ഡോക്ടർക്ക് ട്രാവൻകൂർ - കൊച്ചിൻ രജിസ്ട്രേഷൻ ഇല്ലെന്നും റിപ്പോർട്ടിൽ ചൂണ്ടിക്കാട്ടിയിട്ടുണ്ട്. കമ്മീഷൻ ശുപാർശയിൻമേൽ സ്വീകരിച്ച നടപടികൾ മാർത്തോമ്മ മെഡിക്കൽ മിഷൻ ഡയറക്ടറും പത്തനംതിട്ട ജില്ലാ കളക്ടറും ജില്ലാ പോലീസ് മേധാവിയും 30 ദിവസത്തിനകം കമ്മീഷനെ അറിയിക്കണമെന്നും അംഗം എൻ. സുനന്ദ ഉത്തരവിൽ നിർദേശിച്ചിട്ടുമുണ്ട്.

മല്ലപ്പള്ളിയിലും പന്തളത്തും കെഎസ്ആർടിസി ഡ്രൈവിംഗ് സ്കൂളുകൾ വരുന്നു

കോഴഞ്ചേരി: കെഎസ്ആര്‍ടിസിയുടെ ഉടമസ്ഥതയിൽ ജില്ലയിൽ രണ്ട് ഡ്രൈവിംഗ് സ്‌കൂളുകള്‍ ആരംഭിച്ചേക്കും. മല്ലപ്പള്ളിയിലും പന്തളത്തുമാണ് രണ്ട് ഡ്രൈവിംഗ് സ്കൂളുകൾക്കുള്ള സാധ്യത തേടുന്നത്. ആദ്യഘട്ടത്തില്‍ മല്ലപ്പള്ളിക്കാണ് മുന്തിയ പരിഗണന. ആവശ്യമായ സ്ഥലം മല്ലപ്പള്ളിയില്‍ ഉണ്ടെങ്കിലും കുറച്ചു ഭാഗം മണ്ണിട്ടു നികത്തണം. ഒന്നരയേക്കര്‍ ഗ്രൗണ്ടാണ് ഡ്രൈവിംഗ് സ്‌കൂളിനായി വേണ്ടത്. പരിശീലന സ്ഥലവും പ്രത്യേകമായി തയാറാക്കണം. ബസുകൾക്കും നാല് ചക്രവാഹനങ്ങൾക്കും ഇരുചക്രവാഹനങ്ങൾക്കുമായി പ്രത്യേക പ്ലാറ്റ്ഫോമുകളും ഉണ്ടാകണം. മല്ലപ്പള്ളിയിലെ സ്ഥലം കെഎസ്ആര്‍ടിസിയുടെ ഡ്രൈവിംഗ് സ്‌കൂള്‍ ഗവേണിംഗ് ബോര്‍ഡ് അംഗങ്ങള്‍ പരിശോധിച്ചു. മന്ത്രി കെ.ബി. ഗണേഷ് കുമാറും കോര്‍പറേഷൻ എംഡിയും ഉള്‍പ്പെടെയുള്ള ഗവേണിംഗ് ബോഡിയാണ് അന്തിമ തീരുമാനം എടുക്കുന്നത്. സ്ഥലം യോജിച്ചതാണെന്നു കണ്ടെത്തിയാല്‍ മറ്റു നടപടി വേഗത്തിലാകും. രണ്ടാംഘട്ടമെന്ന നിലയിലായിരിക്കും പന്തളത്ത് സ്കൂളുകൾ ആരംഭിക്കുന്നത്. നിലവിൽ കെഎസ്ആർടിസിയുടെ രണ്ട് സബ് ഡിപ്പോകളാണ് പന്തളത്തുള്ളത്. രണ്ടിടത്തും കെഎസ്ആർടിസിക്കു സ്വന്തമായി സ്ഥലമുണ്ട്. മല്ലപ്പള്ളി ഡിപ്പോയിൽ ബസുകൾക്കു പകൽ സമയത്തു പാർക്കിംഗ് ആവശ്യമില്ല. പഞ്ചായത്ത് ബസ് സ്റ്റാൻഡിലാണ് പാർക്കിംഗ്. ഫീസിലും ഇളവുകൾ ജനറല്‍ വിഭാഗത്തില്‍ ലൈറ്റ് മോട്ടോര്‍ വെഹിക്കിള്‍ പരിശീലനത്തിന് 9,000 രൂപ ഫീസ് ഈടാക്കുമ്പോള്‍ എസ് സി, എസ്ടി വിഭാഗത്തില്‍പെട്ടവര്‍ക്ക് 7,200 രൂപ മാത്രമാണ് ഫീസ്. ഈ രീതിയിലാണ് മറ്റ് വാഹനങ്ങള്‍ക്കുള്ള പരിശീലനത്തിനും ഫീസ് ഈടാക്കുന്നത്. കെഎസ്ആര്‍ടിസി ഡ്രൈവിംഗ് സ്‌കൂളില്‍നിന്നു പരിശീലനം പൂര്‍ത്തിയാക്കി പുറത്തിറങ്ങുന്നവര്‍ക്ക് സര്‍ട്ടിഫിക്കറ്റ് കോഴ്‌സ് നല്‍കണമെന്ന് ആദ്യബാച്ചിലെ വിദ്യാർഥികൾ ആവശ്യപ്പെട്ടിരുന്നതായും ഇതു വേഗത്തില്‍ പരിഗണിക്കുമെന്ന് ഉറപ്പ് നല്‍കിയിട്ടുണ്ടെന്നും മാവേലിക്കര ഡ്രൈവിംഗ് സ്‌കൂളില്‍ നിന്ന് ആദ്യബാച്ചില്‍ പാസായി പുറത്തുവന്ന പത്തനംതിട്ട ഡിപ്പോയിലെ കണ്ടക്ടര്‍ വി. എസ്. സിന്ധു പറഞ്ഞു. ഒരു മാസത്തെ പരിശീലനം കെഎസ്ആര്‍ടിസി ഡ്രൈവിംഗ് സ്‌കൂളുകള്‍ ജനകീയമായതോടെയാണ് എല്ലാ ജില്ലകളിലും സ്‌കൂളുകള്‍ തുടങ്ങണമെന്ന ആവശ്യം ഉയർന്നത്. മറ്റ് സ്വകാര്യ ഡ്രൈവിംഗ് സ്‌കൂളില്‍നിന്നു വ്യത്യസ്തമായി ഒരു മാസത്തെ പരിശീലനമാണ് പഠിതാക്കള്‍ക്കു ലഭിക്കുന്നത്. കൂടാതെ കെഎസ്ആര്‍ടിസിയുടെ തന്നെ മികച്ച ട്രെയിനര്‍മാരാണ് പരിശീലകരർ. പരിശീലനത്തോടൊപ്പം തിയറി ക്ലാസുകൾക്കു ഡോക്ടര്‍മാരും പോലീസ് ഉദ്യോഗസ്ഥരും അടക്കം നേതൃത്വം നൽകുന്നുവെന്നതും പ്രത്യേകതയാണ്. വാഹനം ഓടിക്കുമ്പോള്‍ ഡ്രൈവര്‍ക്കോ വാഹനത്തില്‍ സഞ്ചരിക്കുന്നവര്‍ക്കോ രോഗങ്ങളോ ദേഹാസ്വാസ്ഥ്യമോ ഉണ്ടാകുകയാണെങ്കില്‍ സിപിആര്‍ ഉള്‍പ്പെടെയുളള പ്രാഥമിക ശുശ്രൂഷകള്‍ നല്‍കുന്നതും ക്ലാസുകളില്‍ ഡോക്ടര്‍മാര്‍ പഠിപ്പിക്കും. വാഹനം ഓടിക്കുമ്പോള്‍ ശ്രദ്ധിക്കേണ്ട ട്രാഫിക് നിയമങ്ങളെ സംബന്ധിച്ചാണ് പോലീസ് ഉദ്യോഗസ്ഥര്‍ ക്ലാസെടുക്കുന്നത്. കെഎസ്ആര്‍ടിസി ഡ്രൈവിംഗ് സ്‌കൂളില്‍ പഠിക്കുന്ന പഠിതാക്കള്‍ക്കു ടെസ്റ്റുകളും മറ്റും മോട്ടോര്‍ വാഹന വകുപ്പ് ഉദ്യോഗസ്ഥര്‍തന്നെ പരിശീലന കേന്ദ്രങ്ങളില്‍ നേരിട്ടുവന്നാണ് നടത്തുന്നത്.

ഹരിതകര്‍മ സേനാംഗങ്ങളില്‍നിന്ന് അറിവുകള്‍ തേടി വിദ്യാര്‍ഥി കൂട്ടായ്മ

പത്തനംതിട്ട: പരിസ്ഥിതിയുടെ കാവല്‍ക്കാരായ ഹരിത കര്‍മസേനാംഗങ്ങളെ അവധി ദിനത്തില്‍ ആദരിച്ചും അവരില്‍ നിന്ന് പരിസ്ഥിതി സംരക്ഷണത്തിന്‍റെയും മാലിന്യ സംസ്‌കരണത്തിന്‍റെയും ശാസ്ത്രീയ വശങ്ങള്‍ പഠിച്ചെടുത്തും കലഞ്ഞൂര്‍ ഗവ ഹയര്‍ സെക്കന്‍ഡറി സ്‌കൂള്‍ നാഷണല്‍ സര്‍വീസ് സ്‌കീമിലെ കുട്ടികൾ. തങ്ങളുടെ വീട്ടില്‍ എത്തുന്ന ഹരിത കര്‍മ സേനാംഗത്തിന് എന്‍എസ്എസ് യൂണിറ്റിന്‍റെ ആദരം നല്‍കുന്നതോടൊപ്പം അവധി ദിനങ്ങളില്‍ രക്ഷിതാവുമൊത്ത് തങ്ങളുടെ പരിസരത്തെ കുറച്ചു വീടുകളില്‍ ശുചിത്വ ബോധവത്കരണവും പരിസ്ഥിതി സംരക്ഷണ സന്ദേശവും നല്‍കുക എന്ന ലക്ഷ്യത്തോടെയാണ് എന്‍എസ്എസ് വോളണ്ടിയേഴ്‌സ് അവധി ദിനം മാറ്റിവച്ചത്. കരിയിലയും പ്ലാസ്റ്റിക്കും മറ്റും കൂട്ടിയിട്ട് കത്തിക്കുന്നതിന്‍റെ ദൂഷ്യഫലങ്ങള്‍ സന്ദര്‍ശിച്ച വീടുകളില്‍ പങ്ക് വച്ചതോടൊപ്പം ഇനി തങ്ങളുടെ വീട്ടിലോ പരിസരത്തോ ഇങ്ങനെ ചെയ്യില്ല എന്ന് ഉറപ്പിക്കാനും കഴിഞ്ഞതായി ലീഡർമാരായ ദിയ, അതുല്‍ എന്നിവര്‍ പറഞ്ഞു. ഹരിത കര്‍മസേന ചെയ്യുന്ന പ്രവര്‍ത്തനങ്ങളെ പൂര്‍ണമായും അംഗീകരിക്കേണ്ടതിന്‍റെ ആവശ്യകത സന്ദര്‍ശിച്ച വീടുകളില്‍ പകര്‍ന്നു നല്‍കിയതിന്‍റെ ആഹ്ലാദത്തിലാണ് കുട്ടികള്‍. പ്രിന്‍സിപ്പല്‍ എം. സക്കീന പിടിഎ പ്രസിഡന്‍റ് രാജേഷ് കലഞ്ഞൂര്‍, പ്രോഗ്രാം ഓഫീസര്‍ സജയന്‍ ഓമല്ലൂർ, പി.വി. മനീഷ, വിദ്യാര്‍ഥി നേതാക്കളായ തേജ, ശ്രീനന്ദു, വിവിധ വാര്‍ഡുകളിലെ ഹരിത കര്‍മ സേനാംഗങ്ങള്‍ എന്നിവര്‍ പരിപാടികളില്‍ പങ്കെടുത്തു.

പോളയും പായലും പെരിങ്ങര തോട്ടിൽ നീരൊഴുക്ക് നിലച്ചു

തിരുവല്ല: പോളയും പായലും നിറഞ്ഞ് എക്കൽ അടിഞ്ഞുകൂടി നീരൊഴുക്ക് നിലച്ച് നാശത്തിന്‍റെ പാതയിലാണ് പെരിങ്ങര തോട്. മണിമലയാറിന്‍റെ കൈവഴിയായി മണിപ്പുഴയിൽ നിന്നും ആരംഭിച്ച് ചാത്തങ്കരി ആറ്റിലേക്ക് ഒഴുകിയെത്തുന്ന തോടിനാണ് ഈ ദുർഗതി. വെള്ളപ്പൊക്കങ്ങളിൽ ഒഴുകിയെത്തുന്ന മണ്ണ് അടിഞ്ഞു കൂടിയതോടെ തോടിന്‍റെ ആഴം കുറഞ്ഞു. പിന്നാലെ പോളയും പായലും കയറി തോട് മൂടി. വശങ്ങളിൽ നിന്നും തോട്ടിലേക്ക് വീണു കിടക്കുന്ന മുളംകൂട്ടവും മരങ്ങളും നീരൊഴുക്കിനു തടസമായി. ഇതോടെ മഴക്കാലത്തും തോട്ടിലെ നീരൊഴുക്ക് നിലച്ച നിലയിലായി. ഒഴുക്ക് നിലച്ചു കിടക്കുന്ന വെള്ളം മലിനപ്പെട്ടു തുടങ്ങി. പ്രദേശത്തെ കിണറുകളിലെ ജലനിരപ്പ് താഴാനും വെള്ളം മലിനമാകാനും ഇതുകാരണമാകുന്നുണ്ട്. കെട്ടിക്കിടക്കുന്ന വെള്ളത്തിൽ കൂത്താടികൾ പെരുകുന്നത് തദ്ദേശവാസികൾക്ക് കൊതുക് ശല്യത്തിനും ഇടയാക്കുന്നുണ്ട്. തോടി ഇരു കരകളിലുമായി താമസിക്കുന്നവർ ഏതാണ്ട് 15 വർഷങ്ങൾക്കു മുമ്പ് വരെ ഗാർഹിക - കാർഷിക ആവശ്യങ്ങൾക്ക് ആശ്രയിച്ചിരുന്ന തോടാണിത്. അഞ്ചുവർഷം മുമ്പാണ് അവസാനമായി തോട് തെളിച്ചത്. അപ്പർ കുട്ടനാടൻ മേഖലയിൽ ഉൾപ്പെട്ട പെരിങ്ങര, ചാത്തങ്കരി പ്രദേശങ്ങളിലെ വരാൽ പാടം, മാണിക്കത്തടി, കൂരച്ചാൽ, ചാത്തങ്കരി , മനകേരി തുടങ്ങിയ പാടശേഖരങ്ങളിലെ നെൽകൃഷിക്ക് ആവശ്യമായ വെള്ളം എത്തിക്കുന്ന പ്രധാന ജലസ്രോതസു കൂടിയാണ് നീരൊഴുക്കു നിലച്ചു കിടക്കുന്നത്. തോട്ടിലെ നീരൊഴുക്ക് നിലയ്ക്കുന്നത് നെൽക്കർഷകരെയാണ് ഏറെ പ്രതിസന്ധിയിലാക്കുന്നത്. സെപ്റ്റംബർ. ഒക്‌ടോബർ മാസത്തോടെ മേഖലയിലെ പാടങ്ങളിൽ കൃഷി ഒരുക്കങ്ങൾ ആരംഭിക്കും. തോട്ടിലെ നീരൊഴുക്ക് നിലയ്ക്കുന്നതോടെ പാടശേഖരങ്ങളോടു ചേർന്നുള്ള തോടുകളും വറ്റും. ഇതോടെ കൃഷി ആവശ്യത്തിനുള്ള വെള്ളം വൻ തുക ചെലവഴിച്ച് മോട്ടോർ ഉപയോഗിച്ച് പമ്പ് ചെയ്യേണ്ട അവസ്ഥയിലാണെന്ന് കർഷകർ പറയുന്നു. വേനൽ ആരംഭിക്കുന്നതോടെ തോട് പൂർണമായും വറ്റി വരളുന്ന സ്ഥിതിയുമാണ്.

ക്വിറ്റ് ഇന്ത്യാ ദിനാചരണം നടത്തി

പ്രമാടം: മണ്ഡലം കോണ്‍ഗ്രസ് കമ്മിറ്റിയുടെ ആഭിമുഖ്യത്തില്‍ തെങ്ങുംകാവില്‍ സംഘടിപ്പിച്ച ക്വിറ്റിന്ത്യാ ദിനാചരണം ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് ദീനാമ്മ റോയി ഉദ്ഘാടനം ചെയ്തു. മണ്ഡലം കോണ്‍ഗ്രസ് കമ്മിറ്റി പ്രസിഡന്‍റ് റോബിന്‍ മോന്‍സി അധ്യക്ഷത വഹിച്ചു. ഡിസിസി വൈസ് പ്രസിഡന്‍റ് റോബിന്‍ പീറ്റര്‍, മഹിളാ കോണ്‍ഗ്രസ് ജില്ലാ വൈസ് പ്രസിഡന്‍റ് ലീലാ രാജന്‍, ബ്ലോക്ക് പഞ്ചായത്ത് അംഗം ജോളി ഡാനിയേല്‍, ഗ്രാമപഞ്ചായത്ത് അംഗങ്ങളായ എം.കെ. മനോജ, രാഗി സനൂപ്, മുന്‍ ഗ്രാമപഞ്ചായത്തംഗം ടി.ജി. മാത്യു, എന്‍. ഗോപിനാഥന്‍ നായര്‍, രാധാകൃഷ്ണന്‍ ഇളകൊള്ളൂര്‍, അരുണ്‍കുമാര്‍ , ഗീവര്‍ഗീസ്, സാമുവല്‍ പാപ്പച്ചന്‍, പ്രകാശ് പന്നിക്കണ്ടം, അഭിലാഷ് പുന്നമൂട്ടില്‍ തുടങ്ങിയവര്‍ പ്രസംഗിച്ചു. കോന്നി: സേവാദള്‍ കോന്നി നിയോജക മണ്ഡലം കമ്മിറ്റിയുടെ നേതൃത്വത്തില്‍ ക്വിറ്റ് ഇന്ത്യാദിന സമ്മേളനവും രുധിരം എന്ന പേരില്‍ കോന്നി മെഡിക്കല്‍ കോളജില്‍ രക്തദാന ക്യാമ്പും സംഘടിപ്പിച്ചു. ക്യാമ്പും സമ്മേളനവും കെപിസിസി അംഗം മാത്യു കുളത്തുങ്കല്‍ ഉദ്ഘാടനം ചെയ്തു. അസംബ്ലി പ്രസിഡന്‍റ് ജോയി തോമസ് അധ്യക്ഷത വഹിച്ചു. ശ്യാം എസ്. കോന്നി, ആര്‍. ദേവകുമാര്‍, ഷിജു അറപ്പുരയില്‍, ജോസഫ് വര്‍ഗീസ്, സന്തോഷ് കുമാര്‍, പി.വി. പ്രവീണ്‍, സി.വി. ശാന്തകുമാര്‍, സണ്ണി തോമസ്, ജോളി തോമസ്, റോയി ഡാനിയല്‍, ജോഷ്വാ കുര്യന്‍, ഡെയ്‌സി, മനു വര്‍ഗീസ്, സുലേഖ വി. നായര്‍, പ്രിയ എസ്. തമ്പി, റോസമ്മ ജയിംസ്, മോഹനന്‍ മുല്ലപ്പറമ്പില്‍, സി.കെ. ലാലു, അബ്ദുള്‍ മുത്തലീഫ്, എം.എം. മാത്യു തുടങ്ങിയവര്‍ പ്രസംഗിച്ചു.പരിപാടിയുടെ ഭാഗമായി കോന്നി ഗവണ്‍മെന്‍റ് മെഡിക്കല്‍ കോളജിലെ കിടപ്പുരോഗികള്‍ക്ക് സൗജന്യ ഭക്ഷണ വിതരണവും സേവാദള്‍ സംഘടിപ്പിച്ചു.

പുതുക്കട -മണക്കയം റോഡ് നിർമാണം; ബ്ലോക്ക് എൻജിനിയറിംഗ് വിഭാഗത്തിനെതിരേ എംഎൽഎയുടെ പരാതി

റാന്നി: പുതക്കട - മണക്കയം റോഡ്നിർമാണത്തിലെ കാലതാമസവുമായി ബന്ധപ്പെട്ട് റാന്നി ബ്ലോക്കിലെ എൻജിനിയറിംഗ് വിഭാഗത്തിന്‍റെ അലംഭാവത്തിനെതിരേ എംഎൽഎയുടെ പരാതി. പുതുക്കട - മണക്കയം - ചിറ്റാർ റോഡ് പുനരുദ്ധരിക്കുന്നതിന് ബജറ്റിൽ മൂന്നു കോടി രൂപ അനുവദിച്ചിട്ടും നിർമാണപ്രവൃത്തികൾ ആരംഭിക്കുന്നതിൽ തദ്ദേശ സ്ഥാപന എൻജിനിയറിംഗ് വിഭാഗം വരുത്തുന്ന കാലതാമസവും അനാസ്ഥയും പരിഹരിക്കുന്നതിന് ഇടപെടണമെന്നാവശ്യപ്പെട്ടാണ് പ്രമോദ് നാരായൺ എംഎൽഎ, മന്ത്രി എം.ബി. രാജേഷിനു പരാതി നൽകിയത്. റാന്നി, കോന്നി നിയോജകമണ്ഡലങ്ങളെ ബന്ധിപ്പിക്കുന്നതും ജില്ലാ പഞ്ചായത്തിന്‍റെ ഉടമസ്ഥതയിലുമുള്ളതുമായ പുതുക്കട - മണക്കയം - ചിറ്റാർ റോഡിന്‍റെ ശോചനീയാവസ്ഥ പരിഹരിക്കാൻ എംഎൽഎ എന്ന നിലയിൽ പ്രത്യേകം മുൻകൈയെടുത്താണ് സംസ്ഥാന ബജറ്റിൽ മൂന്നു കോടി രൂപയും പൊതുമരാമത്ത് വകുപ്പിൽ നിന്ന് 1.2 കോടി രൂപയും അനുവദിപ്പിച്ചത്. ഇതുൾപ്പെടെ ഏഴു കോടി രൂപയുടെ പദ്ധതികൾ പിഡബ്ല്യുഡി റോഡ്സ് വിഭാഗം ഭരണാനുമതിയും സാങ്കേതിക അനുമതിയും ലഭ്യമാക്കി പ്രവൃത്തികൾ ടെൻഡർ നടപടികളിലേക്ക് കടന്നിരുന്നു. സംസ്ഥാന സർക്കാർ ബജറ്റിൽ റാന്നി ബ്ളോക്ക് പഞ്ചായത്തിൽ പ്രഖ്യാപിച്ചിട്ടുള്ള 21 ഗ്രാമീണ റോഡുകൾ, അഞ്ച് അങ്കണവാടി കെട്ടിടങ്ങൾ എന്നീ പദ്ധതികൾക്കും എസ്റ്റിമേറ്റ് അടക്കമുള്ള അനുബന്ധ രേഖകൾ സമർപ്പിച്ച് ഭരണാനുമതി നേടുന്നതിൽ റാന്നി ബ്ലോക്ക് പഞ്ചായത്ത് അസിസ്റ്റന്‍റ് എൻജിനിയറുടെ ഓഫീസിൽ നിന്നും അനാവശ്യമായ കാലതാമസമാണ് ഉണ്ടായിക്കൊണ്ടിരിക്കുന്നത്. എംഎൽഎ യുടെ നിർദേശ പ്രകാരം ജൂൺ ആദ്യവാരം പെരുനാട് ഗ്രാമപഞ്ചായത്ത് പ്രസിഡന്‍റ് പി.എസ്. മോഹനൻ, ജില്ലാ പഞ്ചായത്തംഗം ലേഖ സുരേഷ്, എക്സിക്യൂട്ടീവ് എൻജിനിയർ ഉൾപ്പെടെയുള്ളവർ മണക്കയ പാലം മുതലുള്ള ഭാഗങ്ങൾ നേരിട്ടുസന്ദർശിച്ച് റോഡ് നിർമാണത്തിൽ ഉൾപ്പെടുത്തേണ്ട കര്യങ്ങൾ നേരിട്ട് മനസിലാക്കിയിരുന്നു. എന്നാൽ പദ്ധതി രേഖ എസ്റ്റിമേറ്റ് എന്നിവ ഇതേവരെ സമർപ്പിച്ചിട്ടില്ല. മല്ലപ്പള്ളി,കോയിപ്രം, ഇലന്തൂർ ബ്ലോക്കുകളിൽ നിന്നുള്ള എസ്റ്റിമേറ്റുകൾ സമർപ്പിച്ചിട്ടുണ്ടെങ്കിലും റാന്നി ബ്ലോക്ക് എൻജിനിയറിംഗ് വിഭാഗം തികഞ്ഞ അനാസ്ഥയാണ് കാട്ടുന്നതെന്ന് എംഎൽഎ കുറ്റപ്പെടുത്തി. ഇക്കാരണത്താൽ ബജറ്റ് പദ്ധതികൾ നീണ്ടുപോകുകയാണെന്നും അദ്ദേഹം ചൂണ്ടിക്കാട്ടി. തദ്ദേശവകുപ്പ് ചീഫ് എൻജിനിയറുടെ ശ്രദ്ധയിൽ വിഷയം കൊണ്ടുവരികയും കാലതാമസം പരിഹരിക്കുന്നതിന് ഉദ്യോഗസ്ഥരുടെ യോഗങ്ങൾ വിളിച്ചുചേർക്കുകയും ചെയ്തിരുന്നു. എന്നിട്ടും നടപടികൾ ഉണ്ടാകാത്ത സാഹചര്യത്തിലാണ് മന്ത്രിക്കു പരാതി നല്കിയതെന്ന് പ്രമോദ് നാരായൺ എംഎൽഎ പറഞ്ഞു.

ശബരിമല റോഡുകൾക്ക് മുന്തിയ പരിഗണന: മന്ത്രി മുഹമ്മദ് റിയാസ്

റാന്നി: ശബരിമല തീർഥാടന കേന്ദ്രങ്ങളിലേക്കുള്ള റോഡുകൾക്ക് ഏറ്റവും വലിയ പ്രാധാന്യമാണ് സംസ്ഥാന സർക്കാർ നൽകുന്നതെന്ന് മന്ത്രി പി. എ. മുഹമ്മദ് റിയാസ്. വലിയകാവ് റിസർവ് റോഡിന്‍റെ നിർമാണോദ്ഘാടനം ഓൺലൈനായി നിർവഹിച്ചു പ്രസംഗിക്കുകയായിരുന്നു മന്ത്രി. സംസ്ഥാനത്താകെ 30,000 കിലോമീറ്റർ പൊതുമരാമത്ത് റോഡുകൾ ഉള്ളതിൽ 60 ശതമാനവും ബിഎംബിസി നിലവാരത്തിലേക്ക് ഉയർത്താനായെന്ന് മന്ത്രി ചൂണ്ടിക്കാട്ടി. പ്രമോദ് നാരായൺ എംഎൽഎ അധ്യക്ഷത വഹിച്ചു. മടത്തുംചാൽ - മുക്കൂട്ടുതറ റോഡിലെ അങ്ങാടി കരിങ്കുറ്റിയിൽ നിന്നും ആരംഭിച്ച വലിയകാവ് വഴി പൊന്തൻപുഴയ്ക്കുള്ള 8.3 കിലോമീറ്റർ റോഡ് ബിഎംബിസി നിലവാരത്തിൽ പുനരുദ്ധരിക്കുന്നതിന് 10 കോടി രൂപയാണ് അനുവദിച്ചിരിക്കുന്നത്. റോഡിന്‍റെ ആവശ്യമുള്ള ഭാഗങ്ങളിൽ ഓട, സംരക്ഷണഭിത്തി, കലുങ്കുകൾ ഐറിഷ് ഡ്രയിനുകൾ എന്നിവയും പദ്ധതിയിൽ ഉൾപ്പെടുത്തിയിട്ടുണ്ട്. വലിയകാവ് മുതൽ പൊന്തൻപുഴ വരെയുള്ള ഭാഗം വനമേഖലയിൽ കൂടി കടന്നു പോകുന്നതിനാൽ മറ്റു ഭാഗങ്ങളെ അപേക്ഷിച്ച് റോഡിനു നിലവിലുള്ള വീതി മാത്രം ഉപയോഗിച്ച് ടാറിംഗ് നടത്താനാണ് ഉദ്ദേശിച്ചിരിക്കുന്നത്. ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം, ബ്ലോക്ക് പഞ്ചായത്ത് പ്രസിഡന്‍റ് കെ. എസ്. ഗോപി, ഗ്രാമ പഞ്ചായത്ത് പ്രസിഡന്‍റ് ബിന്ദു റെജി, ജില്ലാ പഞ്ചായത്തംഗം ജെസി അലക്സ്, പഞ്ചായത്ത് വൈസ് പ്രസിഡന്‍റ് എം. കെ. ആൻഡ്രൂസ്, ബ്ലോക്ക് പഞ്ചായത്തംഗം എം. എസ് സുജ, പൊതുമരാമത്ത് വകുപ്പ് റോഡ് വിഭാഗം എൻജിനിയർ ബി. ബാബുരാജ്, ബി. സുരേഷ്, എം. എം. മുഹമ്മദ് ഖാൻ, നിസാംകുട്ടി, ജോർജ് മാത്യു, സനോജ് മേമന, സജി നെല്ലുവേലി, ഓമന രാജൻ പറമ്പിൽ എന്നിവർ പ്രസംഗിച്ചു.

കൊമേഴ്സ് ക്ലബ്

പ്രമാടം: നേതാജി ഹയർ സെക്കൻഡറി സ്കൂളിന്‍റെ നേതൃത്വത്തിൽ കൊമേഴ്സ് ക്ലബിന്‍റെ ദേശീയ സമ്പാദ്യ പദ്ധതി ഡെപ്യൂട്ടി ഡയറക്ടർ അജിത്ത് ഗണേഷ് നിർവഹിച്ചു. സമ്പാദ്യ ശീലം കുട്ടികളുടെ സ്വഭാവരൂപീകരണത്തിൽ നവീന മാറ്റം ഉണ്ടാക്കുമെന്നും ആധുനികകാലത്ത് കൊമേഴ്സ് എന്ന വിഷയത്തിന് അനന്ത സാധ്യതകളുണ്ടെന്നും അദ്ദേഹം ചൂണ്ടിക്കാട്ടി. കൊമേഴ്സ് ക്ലബിന്‍റെ നേതൃത്വത്തിൽ നൽകുന്ന പ്രഥമ ഹരിതസ്മിതം അവാർഡ് വിതരണം ചെയ്തു. സ്കൂൾ പ്രിൻസിപ്പൽ ബി. ആശ അധ്യക്ഷത വഹിച്ചു. സെന്‍റ് തോമസ് കോളജ് അധ്യാപകനും മോട്ടിവേഷൻ സ്പീക്കറുമായ ഡോ. വി.വി. ജിഷ്ണു ക്ലാസ് നയിച്ചു. അധ്യാപകൻ അരുൺ മോഹൻ സ്വാഗതവും രണ്ടാംവർഷ കൊമേഴ്സ് വിദ്യാർഥി അഞ്ജലി നന്ദിയും പറഞ്ഞു.

യുഡിടിഎഫ് പ്രതിഷേധം നാളെ

പത്തനംതിട്ട: അമേരിക്കൻ പ്രസിഡന്‍റ് ട്രംപിന്‍റെ താരിഫ് ഭീഷണിക്കും പ്രധാനമന്ത്രി നരേന്ദ്രമോദിയുടെ ദാസ്യവേലയ്ക്കുമെതിരേ യുണൈറ്റഡ് ഡെമോക്രാറ്റിക് ട്രേഡ് യൂണിയൻ ഫ്രണ്ട് (യുഡിടിഎഫ്) മുനിസിപ്പൽ, പഞ്ചായത്ത് തലങ്ങളിൽ പ്രതിഷേധം സംഘടിപ്പിക്കും. നാളെ പന്തം കൊളുത്തി പ്രകടനങ്ങളും പ്രതിഷേധ സംഗമങ്ങളുമാണ് സംഘടിപ്പിക്കുക. അധിക തീരുവ രാജ്യത്തിന്‍റെ സമ്പദ് വ്യവസ്ഥയെ തകർക്കുമെന്നും നടപടി പിൻവലിക്കാൻ കേന്ദ്ര സർക്കാർ സമ്മർദം ചെലുത്തണമെന്നും യുഡിടിഎഫ് യോഗം ആവശ്യപ്പെട്ടു. ജില്ലാ ചെയർമാൻ ജ്യോതിഷ് കുമാർ മലയാലപ്പുഴ ഉദ്‌ഘാടനം ചെയ്തു. തോമസ് ജോസഫ് അധ്യക്ഷത വഹിച്ചു. പി. കെ. ഗോപി, ഹരികുമാർ പൂതങ്കര, മധുസൂദനൻ നായർ, തോമസ് കുട്ടി, ഹസൻ കുട്ടി പാറയടിയിൽ, വി. എൻ. ജയകുമാർ, പി. കെ. ഇഖ്ബാൽ, സുരേഷ് കുഴുവേലി, അജിത് മണ്ണിൽ എന്നിവർ പ്രസംഗിച്ചു.

വോട്ടര്‍ പട്ടിക: 68,538 അപേക്ഷ

പത്തനംതിട്ട: തദ്ദേശ തെരഞ്ഞെടുപ്പ് കരട് വോട്ടര്‍ പട്ടിക പ്രസിദ്ധീകരിച്ചതിനു ശേഷം പത്തനംതിട്ട ജില്ലയില്‍ പുതിയതായി പേരു ചേര്‍ക്കാന്‍ 68,538 പേര്‍ ഓണ്‍ലൈനയി അപേക്ഷ സമര്‍പ്പിച്ചു. നിലവിലുള്ള പട്ടികയിലെ വിവരങ്ങള്‍ തിരുത്തുന്നതിന് 652 അപേക്ഷയും ഒരിടത്തു നിന്ന് മറ്റൊരിടത്തേക്ക് പേരുമാറ്റത്തിന് 4837 അപേക്ഷകളുമാണ് ഇന്നലെ വൈകുന്നേരം വരെ ലഭിച്ചത്. പേര് ചേർക്കുന്നതിന് അപേക്ഷ നൽകാനുള്ള സമയപരിധി ഇന്ന് അവസാനിക്കുകയാണ്.

വെച്ചൂച്ചിറയിലെ തെരുവുനായ ശല്യം; അടിയന്തരയോഗം ഇന്ന്

റാന്നി: വെച്ചൂച്ചിറയിലെ തെരുവുനായ ശല്യം നേരിടുന്നതുമായി ബന്ധപ്പെട്ട് അടിയന്തര യോഗം പ്രമോദ് നാരായൺ എംഎൽഎയുടെ അധ്യക്ഷതയിൽ ഇന്ന് 12ന് വെച്ചൂച്ചിറ പഞ്ചായത്ത് കമ്യൂണിറ്റി ഹാളിൽ ചേരും. വെച്ചൂച്ചിറ ടൗൺ മേഖലയിൽ നായയുടെ ശല്യം നിരന്തരമായുണ്ടായതു കൊണ്ടാണ് യോഗം വിളിച്ചിരിക്കുന്നത്. ഒരാഴ്ച മുമ്പ് ടൗണിൽ ഇറങ്ങിയ നായ അഞ്ചുപേരെ കടിച്ചിരുന്നു. അതിൽ ഒരാളുടെ പരിക്ക് ഗുരുതരമായിരുന്നു . അന്ന് ആക്രമണം കാട്ടിയ നായയെ പിന്നീടു ചത്ത നിലയിൽ കണ്ടു. കഴിഞ്ഞദിവസം തെരുവുനായ വാഹനങ്ങൾക്കു നേരേ ആക്രമണം നടത്തി. എംഎൽഎയുടെ നിർദേശപ്രകാരം നടക്കുന്ന യോഗത്തിൽ മൃഗസംരക്ഷണ വകുപ്പിന്‍റെ ജില്ലാതല ഉദ്യോഗസ്ഥരും പങ്കെടുക്കും.

പ്രവാസി സംഗമം

മൈലപ്ര: ശാലേം മാർത്തോമ്മ ഇടവകയുടെ ശതാബ്ദിയുടെ ഭാഗമായി നടന്ന പ്രവാസി സംഗമം മുംബൈ, യുകെ - യൂറോപ്പ് ഭദ്രാസനാധിപൻ ഡോ. ജോസഫ് മാർ ഇവാനിയോസ് എപ്പിസ്‌കോപ്പ ഉദ്ഘാടനം ചെയ്തു. ഇടവക വികാരി റവ.അജിത്ത് ഈപ്പൻ തോമസ് അധ്യക്ഷത വഹിച്ചു. ന്യൂയോർക്ക് സ്റ്റേറ്റ് ഗവണ്‍മെന്‍റ് ഓഡിറ്റർ ഷൈമി ജേക്കബ് മുഖ്യ പ്രഭാഷണം നടത്തി. പ്രമോദ് നാരായൺ എംഎൽഎ, റവ.ടി.ടി. തോമസ് മെറി ജേക്കബ്, ജോൺ മാത്യു, വിൽസൺ പുളിമൂട്ടിൽ, അജി തോമസ്, ബോബൻ ജോസഫ്, ജസൺ പുന്നമൂട്ടിൽ, ബിന്ദു ഷിജു, ജയൻ എബ്രഹാം, ടോണി വി രാജു, റോബിൻ വലിയകാലായിൽ, ജിഷ ജോജോ, പ്രിൻസ് കെ തര്യൻ, തോമസ് ജോൺ, ബിജി കെ. ബേബി എന്നിവർ പ്രസംഗിച്ചു.

‌മാക്ഫാസ്റ്റിൽ എംസിഎ ക്ലാസുകൾ ആരംഭിച്ചു

തിരുവല്ല: മാക്ഫാസ്റ്റിൽ ഡിപ്പാർട്ട്മെന്‍റ് ഓഫ് കംപ്യൂട്ടർ ആപ്ലിക്കേഷൻ നടത്തുന്ന എംസിഎ കോഴ്സിന്‍റെ 25 ാമത് ബാച്ച് ഉദ്ഘാടനം 6 ഡി ടെക്നോളജീസ് എച്ച്ആർ സീനിയർ മാനേജർ ദീപാ നായർ നിർവഹിച്ചു. ഡോ. വർഗീസ് കെ. ചെറിയാൻ അധ്യക്ഷത വഹിച്ചു. മാക്ഫാസ്റ്റ് മാനേജർ ഫാ. ഈപ്പൻ പുത്തൻപറന്പിൽ, പൊന്നു പി. തോമസ്, റ്റിജി തോമസ്, വിദ്യ വി. കുമാർ എന്നിവർ പ്രസംഗിച്ചു.

ആദിവാസി സമൂഹത്തിന്‍റെ പിന്നാക്കാവസ്ഥ പരിഹരിക്കും: ഡെപ്യൂട്ടി സ്പീക്കര്‍

പത്തനംതിട്ട: ആദിവാസി ജനസമൂഹത്തിന്‍റെ പിന്നാക്കാവസ്ഥ പരിഹരിക്കുമെന്ന് ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍. ആദിവാസി ഐക്യവേദി പത്തനംതിട്ട ജില്ലാ കമ്മിറ്റി മുനിസിപ്പല്‍ ഹാളില്‍ സംഘടിപ്പിച്ച ആദിവാസി ദിനാഘോഷം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. പത്തനംതിട്ട ജില്ലയിലെ മലമ്പണ്ടാരം, ഉള്ളാടൻ, മലവേടന്‍, മലയരയന്‍ എന്നീ വിഭാഗങ്ങളുടെ ഭൂമിയുടെയും വീടിന്‍റെയും പ്രശ്‌നങ്ങള്‍ക്കു പരിഹാരം കണ്ടെത്തുമെന്നും വിദ്യാഭ്യാസം, തൊഴില്‍ എന്നിവയില്‍ ഗോത്രസമൂഹത്തിന് പ്രത്യേക പരിഗണന ലഭിക്കുന്നതിനുളള ശ്രമം നടത്തുമെന്നും ചിറ്റയം പറഞ്ഞു. ആദിവാസി ഐക്യവേദി സെക്രട്ടറി പി.എസ്. ഉത്തമന്‍ അധ്യക്ഷത വഹിച്ചു. യൂത്ത് മൂവ്‌മെന്‍റ് പ്രസിഡന്‍റ് എ.ജി. അനീഷ്, കെ.എസ്. ഗോപി, പി.എസ്. മോഹനന്‍, രാജന്‍ ജേക്കബ്, ഷിജിന്‍ കൈപ്പട്ടൂര്‍ എന്നിവര്‍ പ്രസംഗിച്ചു.

ഭിന്നശേഷി കലാമേള

തിരുവല്ല: കുറ്റൂര്‍ ഗ്രാമപഞ്ചായത്ത് ഭിന്നശേഷി കലാമേള "ശലഭം 2025' തെങ്ങേലി മാര്‍ത്തോമ്മ ഡയനീഷ്യസ് സ്മാരക സ്‌കൂളില്‍ നടന്നു. പുളിക്കീഴ് ബ്ലോക്ക് പഞ്ചായത്ത് പ്രസിഡന്‍റ് സി.കെ. അനു ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്‍റ് അനുരാധ സുരേഷ് അധ്യക്ഷത വഹിച്ചു. ജില്ലാ ജുവനൈല്‍ ജസ്റ്റീസ് ബോര്‍ഡ് അംഗം ഡോ. ആര്‍. വിജയമോഹന്‍, ഡെഫ് ആന്‍ഡ് ഡംബ് സ്‌കൂള്‍ അധ്യാപിക ഫെബിന്‍സ് എന്നിവര്‍ മുഖ്യസന്ദേശം നല്‍കി. വൈസ് പ്രസിഡന്‍റ് സാലി ജോണ്‍, സ്ഥിരം സമിതി അധ്യക്ഷന്‍ എന്‍.ടി. ഏബ്രഹാം, അംഗങ്ങളായ ജോ ഇലഞ്ഞിമൂട്ടില്‍, ശ്രീവല്ലഭന്‍ നായര്‍, ഐസിഡിഎസ് സൂപ്പര്‍വൈസര്‍ ബേനസീര്‍ മീരാന്‍ എന്നിവര്‍ പ്രസംഗിച്ചു.

ബസ് സ്റ്റാന്‍ഡിലെ അടിപിടി; മൂന്നുപേര്‍ പിടിയില്‍

റാന്നി: ഇട്ടിയപ്പാറ സ്വകാര്യ ബസ് സ്റ്റാന്‍ഡില്‍ മദ്യപിച്ച് പരസ്പരം അടി കലശല്‍ കൂടുകയും യാത്രക്കാരുമായി സംഘര്‍ഷമുണ്ടാക്കുകയും ചെയ്ത മൂന്നു യുവാക്കളെ റാന്നി പോലീസ് അറസ്റ്റ് ചെയ്തു. ചിറ്റാര്‍ നീലിപിലാവ് കട്ടച്ചിറ സ്വദേശികളായ പുത്തന്‍പുരയ്ക്കല്‍ പി.എസ്. ശിവലാല്‍ (26), ഇലവുങ്കല്‍ കെ.ആര്‍. ഉണ്ണിക്കൃഷ്ണന്‍ (21), പുത്തന്‍വീട്ടില്‍ രജുമോന്‍ (26) എന്നിവരാണ് കസ്റ്റഡിയിലായത്. കഴിഞ്ഞ ദിവസം വൈകുന്നേരമാണ് യുവാക്കള്‍ മദ്യപിച്ച് ലക്കുകെട്ട നിലയില്‍ സ്റ്റാന്‍ഡില്‍ ബഹളമുണ്ടാക്കുകയും തുടര്‍ന്ന് പരസ്പരം തല്ലുകൂടുകയും ചെയ്തത്. തുടര്‍ന്ന് യാത്രക്കാര്‍ക്കു നേരേയും തട്ടിക്കയറി, ആക്രമണത്തിന് മുതിര്‍ന്നു. വിവരം പോലീസ് സ്റ്റേഷനില്‍ അറിയിച്ചതുപ്രകാരം റാന്നി എസ്‌ഐ റെജി തോമസിന്‍റെ നേതൃത്വത്തില്‍ ഉടനടി സ്ഥലത്തെത്തിയ പോലീസ് സംഘം മൂവരെയും പിടികൂടുകയായിരുന്നു.

വേദിയില്‍ തിരക്ക് ഒഴിവാക്കി, മാതൃകാപരമായ സംഘാടനവുമായി സംസ്‌കാര സാഹിതി ക്യാമ്പ്

ചരല്‍ക്കുന്ന്: നിരവധി ക്യാമ്പുകള്‍ക്ക് വേദിയൊരുങ്ങിയിട്ടുള്ള ചരല്‍ക്കുന്നില്‍ കെപിസിസി സംസ്‌കാര സാഹിത നടത്തിയ സംസ്ഥാന ക്യാമ്പ് ശ്രദ്ധേയമായി. നേതാക്കളുടെ തിക്കുംതിരക്കും കാരണം ഉദ്ഘാടകനുപോലും ഇടമില്ലാതെ പാര്‍ട്ടിവേദികള്‍ അപഹാസ്യമാകുമ്പോള്‍ അത് ഒഴിവാക്കി സ്റ്റേജില്‍ തടിബെഞ്ചും അധ്യക്ഷനും ഉദ്ഘാടകനും മാത്രം. ഒരാളും സ്റ്റേജില്‍ കയറിയില്ല, ഭാരവാഹികളടക്കം സദസിനൊപ്പം ഇരുന്നു. നേതാക്കന്മാരുടെ പ്രസംഗങ്ങളാണ് ക്യാമ്പിലും സമ്മേളനങ്ങളിലും പതിവ് രീതിയെങ്കില്‍ കോണ്‍ഗ്രസ് നേതാക്കന്മാരില്‍ ക്യാമ്പ് ഉദ്ഘാടനത്തിന് രമേശ് ചെന്നിത്തലയും സമാപനത്തില്‍ അടൂര്‍ പ്രകാശും മുഖ്യപ്രസംഗകരായെത്തി. കെപിസിസിയെ പ്രതിനിധീകരിച്ച് വര്‍ക്കിംഗ് പ്രസിഡന്‍റ് പി.സി. വിഷ്ണുനാഥ് എംഎല്‍എയും പ്രസംഗിച്ചു. പ്രതിനിധികളില്‍ എല്ലാവര്‍ക്കും അവസരം നല്കിയായിരുന്നു സംഘാടനം. എഴുത്തുകാരും സാംസ്‌കാരിക പ്രവര്‍ത്തകരും പങ്കെടുത്ത രണ്ടുദിവസ ക്യാമ്പ് പ്രത്യേകതകള്‍കൊണ്ട് നിറഞ്ഞു. പങ്കെടുക്കാത്ത നേതാക്കളെ പുറത്താക്കിയും അതിഥികളായി പങ്കെടുത്തവരെ പുതിയ ഭാരവാഹികളായും നോമിനേറ്റ് ചെയ്തു. സ്ഥിര മുദ്രാവാക്യം വിളി, ഷാള്‍ ഇടീല്‍, പുകഴ്ത്തലുകള്‍ തുടങ്ങിയ പതിവ് വഴിപാടുകള്‍ ഒഴിവാക്കി. ഹരിത ചട്ടപ്രകാരമാണ് ക്യാമ്പ് സംഘടിപ്പിച്ചത്. പട്ടികയും തഴപ്പായും ചേര്‍ത്ത് കമാനങ്ങള്‍ ഒരുക്കി. അതിഥികള്‍ക്ക് തഴപ്പായിലും പനമ്പിലും ചിത്രം വരച്ച് ഉപഹാരം നല്‍കി. എല്ലാ സെഷനുകള്‍ക്കും ചെയര്‍മാന്‍ ആര്‍. മഹേഷ് എംഎല്‍എ ഹാജര്‍ രേഖപ്പെടുത്തി. ഇത് കോണ്‍ഗ്രസ് നേതൃത്വം മാതൃകയാക്കണമെന്ന് ക്യാമ്പ് ആവശ്യപ്പെട്ടു. ഒരു വര്‍ഷത്തേക്കുള്ള കര്‍മപരിപാടികള്‍ സി.ആര്‍. മഹേഷ് എംഎല്‍എ അവതരിപ്പിച്ചു. സെപ്റ്റംബറില്‍ മൂന്നു മേഖലാ ക്യാമ്പുകള്‍ സംഘടിപ്പിക്കാനും തീരുമാനിച്ചു. വടക്കന്‍ മേഖലാ ക്യാമ്പ് കോഴിക്കോട്ടും മധ്യമേഖലാ ക്യാമ്പ് തൃശൂരും തെക്കന്‍ മേഖലാ ക്യാമ്പ് ആലപ്പുഴയില്‍ നടത്തും. എല്ലാ നിയോജക മണ്ഡലങ്ങളിലും സാഹിതിയുടെ പേരില്‍ ലൈബ്രറികള്‍ ആരംഭിക്കും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]