ADVERTISEMENT

ADVERTISEMENT

പിഎംഡി യുപി സ്കൂളിന്‍റെ പുതിയ കെട്ടിടം തുറന്നു

ചേപ്പാട്: ചേപ്പാട് പിഎംഡി യുപി സ്കൂളിന്‍റെ പുതിയ കെട്ടിടത്തിന്‍റെ ഉദ്ഘാടനം കെ.സി. വേണുഗോപാൽ എംപി നിർവഹിച്ചു. സ്കൂൾ മാനേജർ ഫാ. ബിജി ജോൺ അധ്യക്ഷനായി. രമേശ് ചെന്നിത്തല എംഎൽഎ മുഖ്യപ്രഭാഷണവും പൂർവ വിദ്യാർഥി ഫാ. കെ.കെ. വർഗീസ് അനുഗ്രഹ പ്രഭാഷണവും നടത്തി. ജില്ലാ പഞ്ചായത്തംഗം ജോൺ തോമസ്, ചേപ്പാട് ഗ്രാമപഞ്ചായത്ത് പ്രസിഡന്‍റ് എം.കെ. വേണുകുമാർ, പഞ്ചായത്തംഗം ടി. തുളസി, ചേപ്പാട് വലിയപള്ളി അസി. വികാരി ഫാ. ലിനു തോമസ്, ചാണ്ടി കോശി, എസ്. ഗീവർഗീസ്, തോംസൺ, ഷൈനി എസ്. തമ്പി, ജേക്കബ് തറയിൽ എന്നിവർ പ്രസംഗിച്ചു.

ADVERTISEMENT

പഞ്ചായത്ത് അധികൃതർ തിരിഞ്ഞുനോക്കിയില്ല; പൊട്ടിയ ബണ്ടും റോഡും പുനർനിർമിച്ച് കർഷകർ

അമ്പലപ്പുഴ: പുന്നപ്ര തെക്ക് പഞ്ചായത്ത് അഞ്ചാം വാർഡിലെ പാരിയക്കര നൂറ്റന്പതിൽചിറ പാടശേഖരത്തിന്‍റെ ബണ്ട് കഴിഞ്ഞ ദിവസം തകർന്നു. മറ്റ് നിലങ്ങളും റോഡും വെള്ളക്കെട്ടായി മാറി. വിവരം കർഷകർ പഞ്ചായത്ത് അംഗത്തെയും ഭരണസമിതിയെയും ധരിപ്പിച്ചിട്ടും നടപടിയുണ്ടായില്ലെന്നാണ് കർഷകരുടെ പരാതി. തൊഴിലുറപ്പ് തൊഴിലാളികളെ നിർത്തി ബണ്ട് അടപ്പിച്ച് വെള്ളമൊഴുക്ക് തടയാനുള്ള നടപടി സ്വീകരിക്കാമായിരുന്നെന്നു കർഷകർ പറയുന്നു. തുടർന്ന് പ്രദേശവാസികളായ കർഷകരും നാട്ടുകാരും ചേർന്ന് പണപ്പിരിവ് നടത്തി പാറപ്പൊടിയും അവശിഷ്ടങ്ങളും ഉപയോഗിച്ചു ബണ്ടടച്ചു റോഡ് അറ്റകുറ്റപ്പണി നടത്തുകയായിരുന്നു. പാടശേഖര കമ്മിറ്റിയും പങ്കാളിയായി. നൂറുകണക്കിന് കുടുബങ്ങൾ ആശ്രയിക്കുന്ന റോഡാണിത്.

ജില്ലാ കോടതിപ്പാലം നിര്‍മാണം: നഗരത്തില്‍ ജാഥകള്‍ക്കും പ്രതിഷേധങ്ങള്‍ക്കും നിയന്ത്രണം

ആലപ്പുഴ: ജില്ലാ കോടതിപ്പാലം നിര്‍മാണവുമായി ബന്ധപ്പെട്ട ഗതാഗത നിയന്ത്രണങ്ങള്‍ ഫലപ്രദമായി നടപ്പിലാക്കുന്നതിന്‍റെ ഭാഗമായി നഗരത്തില്‍ ജാഥകള്‍ക്കും പ്രതിഷേധങ്ങള്‍ക്കും നിയന്ത്രണം ഏര്‍പ്പെടുത്തിയതായി ജില്ലാ കളക്ടര്‍ അലക്‌സ് വര്‍ഗീസ് അറിയിച്ചു. ഇത്തരം പരിപാടികള്‍ സക്കറിയാ ബസാര്‍ മുതല്‍ പടിഞ്ഞോട്ട് ബീച്ച് ഭാഗവും റിക്രിയേഷന്‍ ഗ്രൗണ്ടും കേന്ദ്രീകരിച്ച് നടത്തുന്നതിനും നിര്‍ദേശിച്ചിട്ടുണ്ട്. കോടതിപ്പാലത്തിന്‍റെ നിര്‍മാണവുമായി ബന്ധപ്പെട്ട് നഗരത്തില്‍ ഏര്‍പ്പെടുത്തിയിട്ടുള്ള ഗതാഗത നിയന്ത്രണങ്ങള്‍ ചര്‍ച്ച ചെയ്യുന്നതിന് കളക്ടറേറ്റില്‍ ചേര്‍ന്ന യോഗത്തില്‍ അധ്യക്ഷത വഹിച്ച് സംസാരിക്കുകയായിരുന്നു അദ്ദേഹം. കല്ലുപാലം-ഇരുമ്പുപാലം, പിച്ചുഅയ്യര്‍ ജംഗ്ഷന്‍, പഴവങ്ങാടി എന്നിവിടങ്ങളില്‍ പാര്‍ക്കിംഗ് അനുവദിച്ച സ്ഥലങ്ങളില്‍ മാത്രമേ വാഹനങ്ങള്‍ പാര്‍ക്ക് ചെയ്യാവു എന്നും നിര്‍ദേശിച്ചിട്ടുണ്ട്. റോഡിന്‍റെ വശങ്ങള്‍ കൈയേറി സ്ഥാപിച്ച കടകളുടെ ബോര്‍ഡുളും തട്ടുകടകളുടെ ഭാഗങ്ങളും നീക്കം ചെയ്ത് ഗതാഗതം സുഗമമാക്കുന്നതിനും യോഗത്തില്‍ തീരുമാനമായി. നഗരത്തില്‍ റോഡിന്‍റെ ഷോള്‍ഡര്‍ തറനിരപ്പില്‍നിന്ന് ഉയര്‍ന്നുനില്‍ക്കുന്നത് മൂലം ഉണ്ടാകുന്ന അപകടങ്ങള്‍ ഒഴിവാക്കാനായി ഈ ഭാഗങ്ങള്‍ നികത്തി നിരപ്പാക്കണമെന്നും പൊതുമരാമത്ത് വകുപ്പിന് നിര്‍ദേശം നല്‍കി. ആലപ്പുഴ-തണ്ണീര്‍മുക്കം റോഡില്‍നിന്ന് നഗരസഭയുടെ നഗരചത്വരം, മിനി സിവില്‍ സ്റ്റേഷന്‍ വഴി പോകുന്ന റോഡ് ടാര്‍ ചെയ്യുന്നതിനും യോഗത്തില്‍ തീരുമാനമായി. ഈ റോഡിലൂടെ സ്വകാര്യ ബസുകള്‍ക്ക് കടന്നുപോകാന്‍ സാധിക്കുമോ എന്ന് പരിശോധിക്കാനായി ആലപ്പുഴ ഡി വൈഎസ്പിയുടെ നേതൃത്വത്തില്‍ മോട്ടോര്‍ വാഹന വകുപ്പ്, പിഡബ്ല്യുഡി, കെആര്‍എഫ്ബി, കെഎസ്ഇബി എന്നീ വകുപ്പുകളിലെ ഉദ്യോഗസഥര്‍ അടങ്ങിയ സംഘത്തെയും യോഗം ചുമതലപ്പെടുത്തി. നഗരത്തിലെ ഇടറോഡുകളുടെ വീതി താത്കാലികമായി കൂട്ടി ഗതാഗതപ്രശ്‌നം പരിഹരിക്കാന്‍ സാധിക്കുമോ എന്നും ഈ സംഘം പരിശോധിക്കും. ജില്ലാ കോടതിപ്പാലത്തിന്‍റെ സമീപം ഗതാഗത നിയന്ത്രണം ഉണ്ടെങ്കിലും കണ്‍ട്രോള്‍ റൂം മുതല്‍ വൈ എംസിഎ വരെ കനാലിന്‍റെ തെക്കുവശത്തു കൂടി ചെറുവാഹനങ്ങള്‍ക്ക് പോകാനായി സൗകര്യം ഒരുക്കിയിട്ടുണ്ടെന്ന് കെആര്‍എഫ്ബി ഉദ്യോഗസ്ഥര്‍ അറിയിച്ചു. ആലപ്പുഴ ഡിവൈഎസ്പി മധു ബാബു, മോട്ടോര്‍ വാഹന വകുപ്പ്, പിഡബ്ല്യുഡി, കെആര്‍എഫ്ബി, കെഎസ്ഇബി, നഗരസഭ, പോലീസ്, വിദ്യാഭ്യാസം, റവന്യു എന്നീ വകുപ്പുകളിലെ ഉദ്യോഗസഥര്‍, വ്യാപാരികള്‍, സ്വകാര്യ ബസ് സംഘടനാ പ്രതിനിധികള്‍ എന്നിവര്‍ യോഗത്തില്‍ പങ്കെടുത്തു.

മാട്ടേൽത്തുരുത്തിലെ വിശുദ്ധ കുരിശും പള്ളിപ്പുറം പള്ളിയും

പള്ളിപ്പുറം: എഡി 52ൽ മാർ തോമാശ്ലീഹായാൽ കോക്കമംഗലത്തു സ്ഥാപിച്ച വിശുദ്ധ കുരിശ് പിന്നീട് മാട്ടേൽത്തുരുത്തിൽനിന്ന് കണ്ടെടുത്തു. അദ്ഭുതകരമായി രക്തംചിന്തിയ വിശുദ്ധ കുരിശ് വിശ്വാസികൾ തുരുത്തിൽനിന്നും പടിഞ്ഞാറുള്ള മറുകരയിലേക്കു കൊണ്ടുവരികയും അവിടെ ഒരു ആലയം പണിത് അവിടെ വണക്കത്തിനായി പ്രതിഷ്ഠിക്കുകയും ചെയ്തു. ആ ആലയം ഇന്നും കുരിശുപുരപ്പള്ളി എന്നറിയപ്പെടുന്നു. വിശ്വാസീ സമൂഹത്തിന്‍റെ വളർച്ചയെത്തുടർന്ന് കുരിശുപുരപ്പള്ളിയുടെ സ്ഥലപരിമിതി മൂലം വിസ്തൃതമായ ഒരു ദേവാലയം പരിശുദ്ധ ദൈവമാതാവിന്‍റെ നാമത്തിൽ പടിഞ്ഞാറോട്ടു മാറി പണികഴിപ്പിക്കുകയും വിശുദ്ധ കുരിശ് അവിടെ പുനഃപ്രതിഷ്ഠിക്കുകയും ചെയ്തു. മൂന്നാം നൂറ്റാണ്ടു വരെ ഇതു മധ്യതിരുവിതാംകൂറിലെ ഏക ദേവാലയം ആയിരുന്നു. പരിശുദ്ധ ദൈവമാതാവിന്‍റെ നാമധേയത്തിലുള്ള ഏഷ്യയിലെ ആദ്യ ദേവാലയമാണ് പള്ളിപ്പുറം പള്ളി. മൂന്നാം നൂറ്റാണ്ടിലും, ആറാം നൂറ്റാണ്ടിലും, എട്ടാം നൂറ്റാണ്ടിലും പള്ളി പുതുക്കിപ്പണിതു. പതിനാറാം നൂറ്റാണ്ടിൽ പോർച്ചുഗീസ് തച്ചുശാസ്ത്രജ്ഞന്മാരുടെ നേതൃത്വത്തിൽ മദ്ബഹ ഉൾപ്പെടെ പള്ളി പുതുക്കിപ്പണിതു. മരിയൻ ദൈവ ശാസ്ത്രത്തിന്‍റെ ഒരു കാവ്യശില്പമാണ് ഇപ്പോൾ കാണുന്ന മദ്ബഹ. കുറവിലങ്ങാടു മുതൽ ആലപ്പുഴ വരെയും ഇടപ്പള്ളിവരെയും ആയിരുന്നു പള്ളിപ്പുറം പള്ളിയുടെ അതിർത്തി. 1891ൽ പള്ളിപ്പുറം പള്ളി ഫൊറോന പള്ളിയായി ഉയർത്തപ്പെട്ടു. എറണാകുളം അതിരൂപതയുടെ ആദ്യകാലം മുതലുള്ള ഫൊറോന ദേവാലയം ആണ് പള്ളിപ്പുറം പള്ളി. ഔദ്യോഗികമായി 1998ൽ മരിയൻ തീർഥാടന കേന്ദ്രമായും 2016ൽ അതിരൂപതയിലെ വിശുദ്ധ ചാവറ കുര്യാക്കോസ് ഏലിയാസ് പിതാവിന്‍റെ തീർഥാടന കേന്ദ്രമായും പള്ളിപ്പുറം പള്ളി പ്രഖ്യാപിക്കപ്പെട്ടു. സ്ഥാനക്കാരുടെ തെരഞ്ഞെടുപ്പു ദിനം രാവിലെ ആറിന് വിശുദ്ധ കുർബാന. ഏഴിന് ലൈത്തോരന്മാരുടെ വാഴ്ച, ആഘോഷമായ പാട്ടുകുർബാന, പ്രസുദേന്തി മുതലായ സ്ഥാനക്കാരുടെ തെരഞ്ഞെടുപ്പിന് കപ്ലോൻ വികാരി കാർമികത്വം വഹിക്കും. വൈകുന്നേരം അബിന് ജപമാല. ആഘോഷമായ പാട്ടുകുർബാന- ഫാ. ഡേവിസ് മാടവന. തുടർന്ന് സാൽവേ ലദീഞ്ഞ്, നൊവേന, വാഴ്‌വ്.

കാണാതായ ഭാര്യയെ കണ്ടെത്തിയില്ല; ഭർത്താവ് ജീവനൊടുക്കി

കായംകുളം: കാണാതായ ഭാര്യയെ രണ്ടു മാസമായിട്ടും കണ്ടെത്താനാകാത്തതിൽ മനംനൊന്ത് ഭർത്താവ് ജീവനൊടുക്കി. കായംകുളം കണ്ണമ്പള്ളി ഭാഗം വിഷ്ണുഭവനിൽ താമസിക്കുന്ന വിനോദാണ് (49) മരിച്ചത്. വിനോദിന്‍റെ ഭാര്യ രഞ്ജിനി(45) കഴിഞ്ഞ ജൂൺ 11ന് രാവിലെ ബാങ്കിലേക്കു പോകുന്നുവെന്നു പറഞ്ഞ് വീട്ടിൽനിന്നു പുറപ്പെട്ടതിനു ശേഷം കാണാതായി. രണ്ടുമാസമായി കായംകുളം പോലീസിൽ പരാതി നൽകിയിട്ടും അന്വേഷണത്തിൽ പുരോഗതി ഉണ്ടായിരുന്നില്ല. സിസിടിവി ദൃശ്യങ്ങളിൽ, അവർ ബാങ്കിലെത്തിയിട്ടില്ലെന്നും അവസാനമായി കായംകുളം റെയിൽവേ സ്റ്റേഷൻ ഭാഗത്തേക്കു പോകുന്നതുമാണ് കണ്ടെത്തിയത്. യാത്രയ്ക്കിടെ മൊബൈൽ ഫോൺ കൈയിൽ ഇല്ലാതിരുന്നത് അന്വേഷണത്തിന് തടസമായി. ഭാര്യയെ കാണാതായതിനെത്തുടർന്ന് വിനോദ് കഴിഞ്ഞ ദിവസം സാമൂഹ്യമാധ്യമങ്ങളിലൂടെ സാമ്പത്തിക ബാധ്യതകൾ തീർക്കാമെന്നും, ഭാര്യ തിരികെ വരണമെന്നുമുള്ള അഭ്യർഥന പങ്കുവച്ചിരുന്നു. എന്നാൽ, പ്രതികരണങ്ങളൊന്നും ലഭിക്കാതെവന്നപ്പോൾ നിരാശയിലായിരുന്നു. സംസ്‌കാരം നടത്തി. മക്കൾ: വിഷ്ണു, ദേവിക.

നെഹ്റു ട്രോഫി വള്ളംകളി

റീല്‍സ് മത്സരം ആലപ്പുഴ: 30ന് പുന്നമടക്കായലില്‍ നടക്കുന്ന 71 ാമത് നെഹ്റുട്രോഫി വള്ളംകളിയുടെ പ്രചാരണാര്‍ഥം റീല്‍സ് മത്സരം സംഘടിപ്പിക്കുന്നു. നെഹ്റുട്രോഫി വള്ളംകളിയുടെ പ്രചാരണത്തിന് സഹായകരമായതും വള്ളംകളിയും പുന്നമടക്കായലുമായി ബന്ധപ്പെട്ട വിഷയങ്ങളിലുള്ളതുമായ റീലുകളാണ് തയാറാക്കേണ്ടത്. 60 സെക്കന്‍ഡോ അതില്‍ താഴെയോ ആയിരിക്കണം റീലുകളുടെ ദൈര്‍ഘ്യം. സൃഷ്ടികള്‍ മൗലികമായിരിക്കണം. തയാറാക്കിയ റീല്‍, തയാറാക്കിയ വ്യക്തിയുടെ പേര്, മേല്‍വിലാസം, ഫോണ്‍ നമ്പര്‍ എന്നിവ 9074594578 എന്ന വാട്സാപ്പ് നമ്പറിലേക്കാണ് അയയ്ക്കേണ്ടത്. വിജയികള്‍ക്ക് സര്‍ട്ടിഫിക്കറ്റും മെമന്‍റോയും സമ്മാനമായി ലഭിക്കും. സമ്മാനാര്‍ഹമായ റീലുകള്‍ നെഹ്റു ട്രോഫി ബോട്ട് റേസ് കമ്മിറ്റിയുടെ വെബ്സൈറ്റിലും സാമൂഹിക മാധ്യമ പേജുകളിലും പ്രസിദ്ധീകരിക്കും. എന്‍ട്രികള്‍ ലഭിക്കേണ്ട അവസാന തീയതി 18ന് വൈകുന്നേരം അഞ്ച്. ഫോണ്‍: 0477-2251349. ഭാഗ്യചിഹ്നത്തിന് പേര് നിര്‍ദേശിക്കാം ആലപ്പുഴ: നെഹ്‌റു ട്രോഫി ജലോത്സവത്തിന്‍റെ ഭാഗ്യചിഹ്നത്തിന് പേരുകള്‍ ക്ഷണിച്ചു. ഭാഗ്യചിഹ്നമായി തെരഞ്ഞെടുക്കപ്പെട്ടിട്ടുള്ള കളിവള്ളം തുഴഞ്ഞു നീങ്ങുന്ന കാക്കത്തമ്പുരാട്ടിക്കാണ് പേര് നിര്‍ദേശിക്കേണ്ടത്. പോസ്റ്റ് കാര്‍ഡില്‍ തപാലായാണ് എന്‍ട്രികള്‍ അയയ്ക്കേണ്ടത്. ഒരു വ്യക്തി ഒരു എന്‍ട്രി മാത്രമേ നല്‍കാന്‍ പാടുള്ളൂ. ഭാഗ്യചിഹ്നത്തിന് നിര്‍ദേശിക്കുന്ന പേര്, നിര്‍ദേശിക്കുന്നയാളുടെ പേര്, വിലാസം, ഫോണ്‍ നമ്പര്‍ എന്നിവ പോസ്റ്റ് കാര്‍ഡില്‍ എഴുതി കണ്‍വീനര്‍, നെഹ്റു ട്രോഫി പബ്ലിസിറ്റി കമ്മിറ്റി, ജില്ല ഇന്‍ഫര്‍മേഷന്‍ ഓഫീസ്, സിവില്‍ സ്റ്റേഷന്‍, ആലപ്പുഴ- 688001 എന്ന വിലാസത്തിലാണ് എന്‍ട്രികള്‍ അയക്കേണ്ടത്. എന്‍ട്രികള്‍ ലഭിക്കേണ്ട അവസാന തീയതി ഓഗസ്റ്റ് 18ന് വൈകുന്നേരം അഞ്ച്. വിജയിക്ക് മുല്ലക്കല്‍ നൂര്‍ ഗോള്‍ഡ് ആന്‍ഡ് ഡയമണ്ട്‌സ് നല്‍കുന്ന സ്വര്‍ണനാണയം സമ്മാനമായി ലഭിക്കും. ഫോണ്‍: 0477-2251349. ഫേസ് പെയിന്‍റിംഗ് മത്സരത്തിന് രജിസ്ട്രേഷന്‍ തുടങ്ങി ആലപ്പുഴ: നെഹ്റുട്രോഫി വള്ളംകളിയുടെ പ്രചാരണാര്‍ത്ഥം ഹയര്‍സെക്കന്‍ഡറി, കോളജ് വിദ്യാര്‍ഥികള്‍ക്കായി സംഘടിപ്പിക്കുന്ന ഫേസ് പെയിന്‍റിം മല്‍സരത്തിന്‍റെ രജിസ്ട്രേഷന്‍ ആരംഭിച്ചു. 21ന് വ്യാഴാഴ്ച്ച വൈകിട്ട് നാലിന് ആലപ്പുഴ ബീച്ചിലാണ് മത്സരം. ഹയര്‍ സെക്കന്‍ഡറി, കോളജ് വിദ്യാര്‍ഥികള്‍ക്ക് ഒരു കാറ്റഗറിയിലാണ് മത്സരം. രണ്ട് അംഗങ്ങളുള്ള ടീമുകള്‍ക്ക് പങ്കെടുക്കാം. ആലപ്പുഴയും നെഹ്റുട്രോഫി വള്ളംകളിയും തമ്മിലുള്ള ഫേസ് പെയിന്‍റിംഗാണ് തയാറാക്കേണ്ടത്. ഒരു സ്ഥാപനത്തില്‍നിന്ന് എത്ര ടീമുകള്‍ക്കും പങ്കെടുക്കും. ഫേസ് പെയിന്റിങ്ങിന് ആവശ്യമായ പെയിന്റ്, ബ്രഷ്, മറ്റുപകരണങ്ങള്‍ എന്നിവ മത്സരാര്‍ഥികള്‍ കൊണ്ടുവരണം. വിജയിക്ക് എരമല്ലൂര്‍ പുന്നയ്ക്കൽ ജ്വല്ലറി നല്‍കുന്ന സ്വര്‍ണനാണയം സമ്മാനമായി ലഭിക്കും. മത്സരാര്‍ഥികള്‍ക്ക് 9074594578 എന്ന വാട്സാപ്പ് നമ്പര്‍ വഴി രജിസ്റ്റര്‍ ചെയ്യാം. ഫോണ്‍: 0477 2251349.

ഓൺലൈൻ വ്യാപാരത്തെ നിയന്ത്രിച്ച് ചെറുകിടക്കാരെ സംരക്ഷിക്കണം: രാജു അപ്സര

മാങ്കാംകുഴി: ഓൺലൈൻ വ്യാപാരം വർധിച്ചതോടെ ചെറുകിട വ്യാപാര മേഖല വലിയ പ്രതിസന്ധിയിലാണെന്നും ഓൺലൈൻ വ്യാപാരത്തെ നിയന്ത്രിച്ച് ചെറുകിട വ്യാപാര മേഖലയെ സംരക്ഷിക്കാൻ കേന്ദ്ര സംസ്ഥാന സർക്കാരുകൾ തയാറാവണമെന്നും കേരള വ്യാപാരി വ്യവസായി ഏകോപന സമിതി സംസ്ഥാന പ്രസിഡന്‍റ് രാജു അപ്സര. വ്യാപാരി വ്യവസായി ഏകോപന സമിതി മാങ്കാംകുഴി യൂണിറ്റ് സംഘടിപ്പിച്ച മെറിറ്റ് അവാർഡ് വിതരണ സമ്മേളനം ഉദ്‌ഘാടനം ചെയ്യുകയായിരുന്നു അദ്ദേഹം. രാജ്യത്തെ വ്യാപാര മേഖലയെ സംരക്ഷിക്കുന്നതിന് പകരം കോർപറേറ്റുകളെ മാത്രം സഹായിക്കുന്ന നിലപാടാണ് കേന്ദ്ര സർക്കാരിനെന്നും ഈ നിലപാട് മാറ്റണമെന്നും അദ്ദേഹം ആവശ്യപ്പെട്ടു. വ്യാപാരികളുടെ മക്കൾക്കുള്ള മെറിറ്റ് അവാർഡ് വിതരണം എം.എസ്. അരുൺകുമാർ എംഎൽഎ നിർവഹിച്ചു. മുതിർന്ന വ്യാപാരികളെ തഴക്കര പഞ്ചായത്ത് പ്രസിഡന്‍റ് ഷീബ സതീഷ് ആദരിച്ചു. യൂണിറ്റ് പ്രസിഡന്‍റ് ടി.എൻ. ദേവരാജകുമാർ അധ്യക്ഷത വഹിച്ചു. കെവിവിഇഎസ് നിയോജക മണ്ഡലം സെക്രട്ടറി ആർ. സുരേഷ്‌കുമാർ, ഡോ.എ.വി. ആനന്ദരാജ്, നൗഷാദ് മാങ്കാംകുഴി, ശിവജി അറ്റ്‌ലസ്, കെ.ആർ. പ്രഭാകരകുറുപ്പ്, ബി. രാജശേഖരൻ പിള്ള, രാമൻ തമ്പി, ടി. ഷാനുൽ, വിനോദ് ഐപ്, രാജഗോപാൽ, പി. അനീഷ്, മധുസൂദനൻ പിള്ള എന്നിവർ പ്രസംഗിച്ചു.

ഉയരപ്പാത നിർമാണം തകൃതി; അറുതിയില്ലാതെ ബുദ്ധിമുട്ടുകൾ

ആലപ്പുഴ: മഴ മാറി കാലാവസ്ഥ അനുകൂലമായതോടെ ഉയരപ്പാത നിര്‍മാണം സജീവമായെങ്കിലും ഗതാഗതക്കുരുക്ക് രൂക്ഷം. അരൂര്‍ തുറവൂര്‍ ഉയരപ്പാത നിര്‍മാണം നടക്കുന്ന മേഖലയില്‍ ചരക്കുലോറിയടക്കം വലിയ വാഹനങ്ങള്‍ക്ക് ഏര്‍പ്പെടുത്തിയ ഗതാഗത നിയന്ത്രണം പാലിക്കാത്തത് പാതയില്‍ ഗതാഗതക്കുരുക്കിന് കാരണമാകുന്നു. ഒരാഴ്ചയായി അരൂര്‍ ക്ഷേത്രം കവല മുതല്‍ ബൈപാസ് കവല വരെയുള്ള ഭാഗത്ത് ഗര്‍ഡറുകള്‍ സ്ഥാപിക്കുന്നതിന്‍റെ ഭാഗമായി അരമണിക്കൂര്‍ ഇടവിട്ട് ഗതാഗത നിയന്ത്രണം ഏര്‍പ്പെടുത്തുന്നുണ്ട്. അവധി ദിവസമായ ഇന്നലെയും യാത്രക്കാര്‍ക്ക് അരൂരിൽനിന്ന് തുറവൂരിൽ എത്താന്‍ എടുത്തത് മണിക്കൂറുകളോളം. അരൂര്‍ -തുറവൂര്‍ ഉയരപ്പാത നിർമാണം നടക്കുന്ന 12.75 കിലോമീറ്ററില്‍ ഗതാഗതക്കുരുക്കൊഴിവാക്കാന്‍ വീതി കൂട്ടിയ ഭാഗങ്ങളില്‍ പെയ്ത്തുവെള്ളം കെട്ടിനില്‍ക്കുന്നതും കുഴികളും ഗതാഗതക്കുരുക്കിനു കാരണമാകുന്നു. ഉയരപ്പാത നിര്‍മാണത്തിന്‍റെ ഭാഗമായി വലിയ വാഹനങ്ങള്‍ അരൂര്‍ ക്ഷേത്രം കവലയില്‍നിന്ന് അരൂക്കുറ്റി റോഡ് വഴിതിരിഞ്ഞ് തുറവൂര്‍, ചേര്‍ത്തല എന്നിവിടങ്ങളിലൂടെയും വൈറ്റിലയില്‍നിന്നു കോട്ടയം വഴിയും ആലപ്പുഴയില്‍നിന്ന് എറണാകുളം ഭാഗത്തേക്കു പോകുന്ന വാഹനങ്ങള്‍ തുറവൂരില്‍നിന്നു ടിഡി റോഡ് വഴി തോപ്പുംപടിയിലേക്കു പോകണമെന്നുമായിരുന്നു നിര്‍ദേശം. എന്നാല്‍, ഗതാഗത നിയന്ത്രണം കര്‍ശനമായി നടപ്പാക്കാന്‍ ബന്ധപ്പെട്ട അധികൃതര്‍ വേണ്ട ഗൗരവം എടുക്കാത്തത് ഗതാഗതക്കുരുക്കിന് കാരണമാകുന്നെന്നാണ് ആക്ഷേപം. ദേശീയപാതയിലേക്കു കയറുന്ന പത്മാക്ഷിക്കവലയ്ക്കു കിഴക്കു ഭാഗത്തുള്ള റോഡിലെ കുഴിയില്‍ വീണ് വാഹനങ്ങള്‍ അപകടത്തിലാകുന്നത് പതിവാകുന്നു. ദേശീയപാത തുറവൂര്‍ -പറവൂര്‍ റീച്ചുമായി ബന്ധപ്പെട്ടുള്ള അടിപ്പാത നിര്‍മാണം നടക്കുന്ന ഭാഗമാണിത്. കയറ്റത്തില്‍ത്തന്നെ കുഴി രൂപപ്പെട്ടതിനാല്‍ ലോഡുമായി ദേശീയപാതയിലേക്കു കയറുന്ന വാഹനങ്ങള്‍ കുഴിയില്‍ വീണ് കയറ്റം കയറാതെ എന്‍ജിന്‍ നിലച്ചുപോകുമ്പോള്‍ പിന്നിലേക്കു നിരങ്ങി നീങ്ങുകയും പിന്നാലുള്ള വാഹനങ്ങള്‍ തമ്മില്‍ കൂട്ടിയിടിച്ച് അപകടവും സംഭവിക്കുന്നു. ദേശീയപാത നിര്‍മാണവുമായി ബന്ധപ്പെട്ട് പുതിയ റോഡ് ഉയര്‍ന്നതോടെ ഇവിടെ കുത്തനെയുള്ള കയറ്റമാണ്. ഇരുചക്രവാഹനങ്ങളും ഒട്ടോ, ടാക്‌സി വാഹനങ്ങളും കുഴിയില്‍ വീണ് അപകടത്തില്‍പ്പെടുന്നുണ്ട്. 2570 കോൺക്രീറ്റ് ഗര്‍ഡറുകൾ അരൂര്‍ -തുറവൂര്‍ ഉയരപ്പാത നിര്‍മാണം നടക്കുന്ന 2.75 കിലോമീറ്റര്‍ പാതയില്‍ തൂണിനു മുകളില്‍ സ്ഥാപിക്കുന്നത് 2570 കോൺക്രീറ്റ് ഗര്‍ഡറുകള്‍. ഇതുവരെ 1988 കോണ്‍ക്രീറ്റ് ഗര്‍ഡറുകള്‍ സ്ഥാപിച്ചു. ഇനി സ്ഥാപിക്കാനുള്ളത് 582 എണ്ണം മാത്രം. ചേര്‍ത്തല, മായിത്തറ, തുറവൂര്‍ എന്നിവിടങ്ങളിലാണ് ഗര്‍ഡറുകള്‍ കോണ്‍ക്രീറ്റ് ചെയ്ത് ഉണ്ടാക്കുന്നത്. ഉയരപ്പാത നിര്‍മാണവുമായി ബന്ധപ്പെട്ട് ഏറ്റവും വലിയ യാര്‍ഡാണു ചേര്‍ത്തല മായിത്തറയിലുള്ളത്. 25 ഏക്കറിലധികമുള്ള യാര്‍ഡിലാണ് നിര്‍മാണം. തൂണുകളില്‍ സ്ഥാപിക്കാന്‍ തയാറായ 35 മീറ്റര്‍ നീളവും 80 ടണ്‍ ഭാരവുമുള്ള കോണ്‍ക്രീറ്റ് ഗര്‍ഡറുകള്‍ നൂറിലധികം എണ്ണം തയാറായി യാര്‍ഡിലുണ്ട്. ഗര്‍ഡറുകള്‍ ഉയര്‍ത്തുന്നതിനായി റിമോട്ടില്‍ പ്രവര്‍ത്തിക്കുന്ന സഞ്ചരിക്കുന്ന 10 ലോഞ്ചിങ് ഗാന്‍ട്രിയുടെ സഹായത്തോടെയാണ് പുള്ളര്‍ ലോറികളില്‍ കയറ്റുന്നത്. തുടര്‍ന്നാണ് ഉയരപ്പാത നിര്‍മാണം നടക്കുന്ന ഭാഗത്തേക്ക് എത്തിക്കുന്നത്. ഇതിനായി അന്‍പതോളം പുള്ളര്‍ ലോറികളാണ് കരാര്‍ ഏറ്റെടുത്തിരിക്കുന്ന അശോക് ബില്‍ക്കോണ്‍ കമ്പനി അധികൃതര്‍ എത്തിച്ചിരിക്കുന്നത്. പരമാവധി 30 കിലോമീറ്ററോളം വേഗത്തില്‍ കോണ്‍ക്രീറ്റ് ഗര്‍ഡറുമായി എത്തുന്ന പുള്ളര്‍ ലോറിക്ക് അകമ്പടിയായി പൈലറ്റ് വാഹനം മുന്നിലും പിന്നിലും ഏര്‍പ്പെടുത്തിയിട്ടുണ്ട്. ചിറകുവിരിച്ചരിക്കുന്ന പിയറുകള്‍ക്കു മുകളില്‍ താത്കാലിക സ്റ്റീല്‍ ഗര്‍ഡര്‍ സ്ഥാപിച്ച് ഇതിനു മുകളിലാണ് കോണ്‍ക്രീറ്റ് ഗര്‍ഡറുകള്‍ സ്ഥാപിച്ച് പാത കോണ്‍ക്രീറ്റ് ചെയ്യുന്നത്. രണ്ടു തൂണുകള്‍ തമ്മില്‍ ബന്ധിപ്പിക്കുന്നത് ഏഴു കോണ്‍ക്രീറ്റ് ഗര്‍ഡറുകള്‍ വീതം ബന്ധിപ്പിച്ച് ഗര്‍ഡറുകള്‍ക്കു മുകളില്‍ കോണ്‍ക്രീറ്റ് ചെയ്താണ്. അരൂര്‍ മുതല്‍ തുറവൂര്‍ വരെ അഞ്ചു റീച്ചുകളിലായി ദിവസം 10 ഗര്‍ഡറുകള്‍ പിയറിനു മുകളില്‍ സ്ഥാപിക്കുന്നുണ്ട്.

വലയെടുത്തു ജില്ലാ പഞ്ചയത്ത്

ആലപ്പുഴ: രൂക്ഷമായ തെരുവുനായ ശല്യത്തിനു തടിയിടാൻ കർമപദ്ധതിയുമായി ജില്ലാ പഞ്ചായത്ത്. പഞ്ചായത്ത് അടിസ്ഥാനത്തിൽ നായപിടിത്തം, വന്ധ്യംകരണം എന്നിവയ്ക്കു പരിശീലനം നൽകി സംഘങ്ങളെ നിയോഗിക്കാൻ തീരുമാനം. ഒരു മാസം നീളുന്ന പ്രചാരണ പരിപാടി സംഘടിപ്പിക്കും. വളർത്തുമൃഗ വിഷയം ചർച്ച ചെയ്യാൻ മൃഗസ്നേഹികളെ ഉൾപ്പെടുത്തി ഈ ആഴ്ചതന്നെ യോഗം ചേരും. കൂടാതെ വെറ്ററിനറി ഡോക്ടര്‍മാരുടെ യോഗവും വിളിക്കും. ജില്ലാ പഞ്ചായത്തിന്‍റെ ആഭിമുഖ്യത്തില്‍ വളര്‍ത്തുനായ-തെരുവുനായ നിയന്ത്രണ പരിപാടി തയാറാക്കാൻ നടത്തിയ ശില്പശാലയിലാണ് തീരുമാനം. ജില്ലാ പഞ്ചായത്ത് കോണ്‍ഫറന്‍സ് ഹാളില്‍ സംഘടിപ്പിച്ച പരിപാടി ജില്ലാ പഞ്ചായത്ത് പ്രസിഡന്‍റ് കെ.ജി. രാജേശ്വരി ഉദ്ഘാടനം ചെയ്തു. 75 ശതമാനം വാക്സിനേഷൻ പേവിഷബാധക്കെതിരായ വാക്സിനേഷന്‍, തെരുവുനായ ശല്യം എന്നീ വിഷയങ്ങള്‍ ശില്പശാലയില്‍ ചര്‍ച്ച ചെയ്തു. കഴിഞ്ഞ വര്‍ഷം ജില്ലയില്‍ 13,571 തെരുവുനായ്ക്കളെ വാക്സിനേഷന് വിധേയമാക്കി. ആലപ്പുഴ നഗരസഭയില്‍ 77 ശതമാനം വാക്സിനേഷന്‍ പൂര്‍ത്തിയാക്കാനായി. മറ്റ് തദ്ദേശസ്ഥാപനങ്ങളിലും വേഗത്തില്‍ വാക്സിനേഷന്‍ നടത്തും. എബിസി സെന്‍ററുകളുടെ പ്രവർത്തനം സജീവമാക്കും. നിലവില്‍ കേന്ദ്ര മൃഗസംരക്ഷണ ബോര്‍ഡ് അംഗീകാരം നേടി പ്രവര്‍ത്തിച്ചുവരുന്ന കണിച്ചുകുളങ്ങരയിലെ എബിസി സെന്‍ററില്‍ ഡോക്ടര്‍മാര്‍, സര്‍ജിക്കല്‍ ഉപകരണങ്ങള്‍ എന്നിവ കൂട്ടും. സംസ്ഥാനത്ത് ആരംഭിക്കുന്ന ഏഴു പോര്‍ട്ടബിള്‍ എബിസി സെന്‍ററുകളില്‍ ഒന്ന് ജില്ലയില്‍ അനുവദിക്കാൻ സംസ്ഥന സര്‍ക്കാരിനോട് അഭ്യർഥിക്കും. ഹോട്ട് സ്പോട്ടുകൾ സ്‌കളുകള്‍, അങ്കണവാടികള്‍ എന്നിവയുടെ പരിസരങ്ങളില്‍ പ്രത്യേക ഹോട്ട് സ്പോട്ടുകള്‍ കണ്ടെത്തി വാക്സിനേഷന്‍, ക്യാച്ചര്‍ എന്നീ സേവനങ്ങള്‍ ഉറപ്പാക്കും. ജില്ലയില്‍ ഏറ്റവുമധികം തെരുവുനായ്കളുടെ കടിയേറ്റ കേസുകള്‍ റിപ്പോര്‍ട്ട് ചെയ്ത പഞ്ചായത്ത്, പ്രദേശം എന്നിവ കേന്ദ്രീകരിച്ച് പ്രവര്‍ത്തനങ്ങള്‍ മെച്ചപ്പെടുത്തും. ലൈസൻസ് നിർബന്ധം നായ, പൂച്ച എന്നിവയെ വളര്‍ത്താനുള്ള ലൈസന്‍സ് നിര്‍ബന്ധമാക്കും. വാക്സിനേഷനും കര്‍ശനമാക്കും. നായ വളര്‍ത്തുന്നയാള്‍ക്ക് അതിന്‍റെ പൂര്‍ണ ഉത്തരവാദിത്വം നൽകുന്ന നിയമവും കര്‍ശനമായി നടപ്പാക്കും. തെരുവുനായ്ക്കളുടെ ഫീഡ് ചെയ്യാൻ ലൈസന്‍സുള്ള അനിമല്‍ ഫീഡർമാരെ കണ്ടെത്തി ഏർപ്പെടുത്തും. തെരുവുനായ്ക്കള്‍ക്കായി ഷെല്‍ട്ടര്‍, ഫീഡിംഗ് സ്റ്റേഷനുകള്‍, പുനരധിവാസകേന്ദ്രങ്ങള്‍ തുടങ്ങിയ സംവിധാനങ്ങള്‍ ഒരുക്കും. ശില്പശാലയില്‍ വികസനകാര്യ സ്ഥിരംസമിതി അധ്യക്ഷ ബിനു ഐസക് രാജു അധ്യക്ഷയായി. മൃഗസംരക്ഷണ ബോര്‍ഡ് അംഗം ഡോ. വേണുഗോപാല്‍, എല്‍എസ്ജിഡി ജോയിന്‍റ് ഡയറക്ടര്‍ സി. അലക്സ്, ജില്ലാ പഞ്ചായത്ത് സെക്രട്ടറി വി. പ്രദീപ് കുമാര്‍, ജില്ലാ മൃഗസംരക്ഷണ ഓഫീസര്‍ ഡോ. പി.വി. അരുണോദയ, ഡെപ്യൂട്ടി ഡിഎംഒ ഡോ. ദിലീപ്കുമാര്‍, ഡിപിഎം ഡോ. കോശി സി. പണിക്കര്‍, ഡെപ്യൂട്ടി പ്ലാനിംഗ് ഓഫീസര്‍ സി.സി. നിത്യ, ജില്ലാ പഞ്ചായത്ത് സീനിയര്‍ സൂപ്രണ്ട് പി.വി. വിനോദ്, തദ്ദേശ സ്ഥാപന ഉദ്യോഗസ്ഥര്‍, മറ്റു വകുപ്പുതല ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

മുഹമ്മ കെഇ കാർമൽ സ്കൂളിന്‍റെ പ്രവർത്തനം മഹത്തരം: മന്ത്രി പി. പ്രസാദ്

മുഹമ്മ: മുഹമ്മ കെഇ കാർമൽ സിഎംഐ സ്കൂൾ നടത്തിയ കർഷകദിനാഘോഷം വേറിട്ട കാഴ്ചയൊരുക്കി. ആലപ്പി ഡേയോടനുബന്ധിച്ചാണ് മുഹമ്മയുടെ മനം കവർന്ന പരിപാടി സംഘടിപ്പിച്ചത്. ഓണനാളുകളുടെ മധുരം പകരാൻ മാവേലിയും ഓണത്തപ്പനും വാമനനും മലയാളി മങ്കമാരും വാദ്യമേളങ്ങളുടെ അകമ്പടിയോടെ എത്തിയത് ഇമ്പമൂറുന്ന കാഴ്ചയായി. സ്കൂൾ കവാടത്തിന് മുന്നിൽ സജ്ജമാക്കിയ തിരുവോണത്തോണിയാണ് കാണികളെ വരവേറ്റത്. തോണി നിറയെ പച്ചക്കറികളും ഒരുക്കിയിരുന്നു. കയർ ഉത്പന്നങ്ങൾ കൊണ്ട് അലങ്കരിച്ച ആകർഷണീയമായ വേദിയിലേക്ക് ചെണ്ടമേളത്തിന്‍റെ അകമ്പടിയോടെയാണ് വിശിഷ്ടാതിഥികളെ വരവേറ്റത്. മന്ത്രി പി. പ്രസാദ് കർഷക ദിനാഘോഷം ഉദ്ഘാടനം ചെയ്തു. കർഷകരെയും കൃഷിയെയും ചേർത്തുപിടിക്കാൻ കെഇ കാർമൽ സ്കൂൾ കാണിച്ച താത്പര്യം മഹത്വമേറിയതാണെന്ന് മന്ത്രി പറഞ്ഞു. ഒരു സ്കൂൾ കൃഷിയെ നെഞ്ചിലേറ്റുന്ന കാഴ്ച മനസിൽ തട്ടുന്നതാണ്. ഇതുപോലൊരു പരിപാടി അടുത്തെങ്ങും താൻ കണ്ടിട്ടില്ലെന്നും മന്ത്രി പറഞ്ഞു. കർഷകരോടുള്ള ആദരസൂചകമായി കുട്ടികൾ വീടുകളിൽനിന്നു കൊണ്ടുവന്ന നാടൻ പച്ചക്കറികൾ അനാഥാലയത്തിലേക്ക് നൽകുന്നതിനായി മന്ത്രി ഏറ്റുവാങ്ങി. മികച്ച പ്രവർത്തനം കാഴ്ചവയ്ക്കുന്ന സ്കൂൾ പ്രിൻസിപ്പൽ റവ.ഡോ. സാംജി വടക്കേടത്തിനെ മുഹമ്മ പഞ്ചായത്തിനുവേണ്ടി മന്ത്രി പൊന്നാട അണിയിച്ചു. പഞ്ചായത്ത് പ്രസിഡന്‍റ് സ്വപ്ന ഷാബു ഫലകം കൈമാറി. സ്കൂൾ മാനേജർ ഫാ. പോൾ തുണ്ടുപറമ്പിൽ മന്ത്രിയെ പൊന്നാട അണിയിച്ചു. ബ്ലോക്ക് പഞ്ചായത്തംഗം സിന്ധു രാജീവ്, പഞ്ചായത്തംഗം വി. വിഷ്ണു, ബർസാർ ഫാ. സനു വലിയവീട്, വൈസ് പ്രിൻസിപ്പൽ ഷൈനി ജോസ്, പിടിഎ പ്രസിഡന്‍റ് പി.പി. അഭിലാഷ്, സെക്രട്ടറി റോക്കി തോട്ടുങ്കൽ, സന്തോഷ് ഷൺമുഖൻ, കോ ഓർഡിനേറ്റർ സബിത, ജേക്കബ് ഐ. ചാക്കോ, ക്ലൗഡിയ ഏബ്രഹാം, നവ്യ ജോസ് എന്നിവർ പ്രസംഗിച്ചു.

മുട്ടം ഹോളിഫാമിലി സ്കൂള്‍ രജതജൂബിലി: നിരവധി പദ്ധതികള്‍ നടപ്പിലാക്കി

ചേർത്തല: മുട്ടം ഹോളി ഫാമിലി ഹയർ സെക്കൻഡറി സ്കൂളിലെ എച്ച് എസ്എസ് വിഭാഗത്തിന്‍റെ രജത ജൂബിലി ആഘോഷങ്ങളുടെ സമാപനം 12, 13, 14 തീയതികളിൽ നടക്കും. മുട്ടം സെന്‍റ് മേരീസ് ഫൊറോന ദേവാലയത്തിന്‍റെ കീഴിലുള്ള സ്കൂളിന്‍റെ ഒരു വർഷം നീണ്ട ജൂബിലി ആഘോഷങ്ങളുടെ ഭാഗമായി സഹപാഠിക്ക് ഒരു കൈത്താങ്ങ് എന്ന പേരിൽ ഭവന നിർമാണം അടക്കമുള്ള ഒട്ടേറെ സാമൂഹ്യസേവന പ്രവർത്തനങ്ങൾ നടത്തിയതായി സ്കൂൾ മാനേജർ ഫാ. ജോഷി വേഴപ്പറമ്പിൽ, പ്രിൻസിപ്പൽ ലിസാ കുര്യൻ, ഡീന ജോസഫ്, ടെസി ജോസഫ്, ബൈജു ജോസഫ് എന്നിവർ പറഞ്ഞു. സെവൻസ് ഫുട്ബോൾ ടൂർണമെന്‍റ്, മെഡിക്കൽ ക്യാമ്പ്, പെൺകുട്ടികൾക്കായി ആർച്ച പദ്ധതി എന്നിവ നടപ്പാക്കി. പാഥേയം എന്ന പേരിൽ ഗവൺമെന്‍റ് താലൂക്ക് ആശുപത്രിയിൽ ഉച്ചഭക്ഷണപ്പൊതികൾ എത്തിക്കുന്നുണ്ട്. ജൂബിലി സ്മാരകമായ റീഡിംഗ് റൂം സജ്ജമാക്കി. പരിപാടിയുടെ ഭാഗമായി ഇന്നു കൃതജ്ഞാതാ ബലി നടക്കും. നാളെ ഉച്ചയ്ക്കു രണ്ടിന് ലഹരിവിരുദ്ധ സൈക്കിൾ റാലി നടത്തും. 14ന് ഉച്ചയ്ക്ക് രണ്ടിന് ജൂബിലി സ്മാരക റീഡിംഗ് റൂം എറണാകുളം-അങ്കമാലി അതിരൂപത‌ വികാരി ജനറാൾ റവ.ഡോ. ആന്‍റോ ചേരാംതുരുത്തി ഉദ്ഘാടനം ചെയ്യും. 2.30ന് ചേരുന്ന സമാപനസമ്മേളനം കെ.സി. വേണുഗോപാൽ എംപി ഉദ്ഘാടനം ചെയ്യും. ഫൊറോന വികാരി ഫാ. ജോഷി വേഴപ്പറമ്പിൽ അധ്യക്ഷത വഹിക്കും. നഗരസഭാ ചെയർപേഴ്സൺ ഭാർഗവൻ സുവനീർ പ്രകാശനം നിര്‍വഹിക്കും.

ചെമ്മീൻ പീലിംഗ് തൊഴിലാളി മരിച്ച നിലയിൽ

‌പറവൂർ: ചെമ്മീൻ പീലിംഗ് ഷെഡിൽ ഇതര സംസ്ഥാ ന തൊഴിലാളി മരിച്ച നിലയിൽ. ഝാർഖണ്ഡ് സ്വദേശി കൻഹായി മഹാട്ടോ (29) ആണ് മരിച്ചത്. തുറവൂർ - പള്ളിത്തോട് റോഡിൽ ചാവടി ജംഗ്ഷന് പടിഞ്ഞാറു ഭാഗത്തുള്ള പീലിംഗ് ഷെഡിലാണ് സംഭവം. പീലിംഗ് ഷെഡിനോടു ചേർന്നുള്ള കെട്ടിടത്തിലെ മുകളിലത്തെ നിലയിലാണ് തൊഴിലാളികൾ താമസിച്ചിരുന്നത്. സംഭവദിവസം രാത്രി ഉമേഷ് കുമാറും സുഹൃത്തുക്കളായ ഝാർഖണ്ഡ് സ്വദേശികളായ സഞ്ജയ്, ഭൈരവൻ, സുഹാബ്, മരിച്ച കൻഹായി മഹാട്ടോ എന്നിവർ ചേർന്ന് മദ്യപിച്ചിരുന്നു. കുത്തനെയുള്ള പടിയിറങ്ങുമ്പോൾ കാൽ തെറ്റി താഴെ വീണതാകാം മരണത്തിന് കാരണമെന്നാണ് പോലീസിന്‍റെ നിഗമനം. പോസ്റ്റ് മോർട്ടത്തിൽ വീഴ്‌ചയിൽ തലയ്ക്കു ഉണ്ടായ ഗുരുതര പരുക്കാണ് അപകടകാരണമെന്ന് പോലീസ് പറഞ്ഞു. കൂത്തിയതോട് സ്റ്റേഷൻ ഓഫിസർ എം. അജയ്മോഹന്‍റെ നേതൃത്വത്തിലുള്ള പോലീസ് സംഘം കൻഹായി മഹാട്ടോക്കൊപ്പം ഉണ്ടായിരുന്ന തൊഴിലാളികളെ ചോദ്യം ചെയ്‌തു. മുറിയിൽനിന്നു മദ്യപിച്ചതിന്‍റെ കുപ്പിയും ഭക്ഷണത്തിന്‍റെ അവശിഷ്ട‌വും കണ്ടെടുത്തു. സമീപവീടുകളിലും അന്വേഷണം നടത്തി. കുത്തിയതോട് പോലീസ് നടപടികൾക്ക് ശേഷം മൃതദേഹം ആലപ്പുഴ മെഡിക്കൽ കോളജിൽ പോസ്റ്റ്മോർട്ടം നടത്തി. മൃതദേഹം ഇന്നു നാട്ടിലേക്കു കൊണ്ടുപോകും.

കുട്ടനാട് വാസയോഗ്യമാക്കാന്‍ സമഗ്ര പദ്ധതി വേണം: ഡോ. കെ.സി. ജോസഫ്

രാമങ്കരി: വേനല്‍മഴക്കാലം മുതല്‍ ആറുമാസക്കാലത്തിലധികം വെള്ളക്കെട്ടിലാകുന്ന ദുരവസ്ഥയില്‍നിന്നു കുട്ടനാടിനെ മോചിപ്പിക്കുന്നതിനായി വേമ്പനാട്ട് കായലും നദികളും ആഴം കൂട്ടുകയും തോട്ടപ്പള്ളി സ്പില്‍വേ അഴിമുഖം വേനല്‍ക്കാലത്തുതന്നെ വീതിയും ആഴവും വര്‍ധിപ്പിക്കുകയും ചെയ്യുന്നതിന് സമഗ്ര പദ്ധതി ആവിഷ്‌ക്കരിച്ചു നടപ്പാക്കണമെന്ന് ജനാധിപത്യ കേരളാകോണ്‍ഗ്രസ് ചെയര്‍മാന്‍ ഡോ. കെ.സി. ജോസഫ് ആവശ്യപ്പെട്ടു. മുന്‍കാലങ്ങളില്‍നിന്ന് വ്യത്യസ്തമായി സ്ഥിരം വെള്ളക്കെട്ട് രൂപപ്പെടുന്ന സാഹചര്യത്തില്‍ കുട്ടനാട്ടിലെ റോഡുകള്‍, ഇടവഴികള്‍ പൂര്‍ണമായും തകര്‍ന്നു കിടക്കുന്നത് സ്ഥിതിഗതികള്‍ കൂടുതല്‍ ദുരിത പൂര്‍ണമാകുന്നു. കുട്ടനാടിന്‍റെ സമഗ്ര വിമോചനമെന്ന ലക്ഷ്യം മുന്‍നിര്‍ത്തി സെപ്റ്റംബര്‍ മദ്ധ്യത്തില്‍ വിപുലമായ സെമിനാര്‍ സംഘടിപ്പിക്കും എന്നും അദ്ദേഹം അറിയിച്ചു. ഇവിടെ ജനാധിപത്യ കേരളാകോണ്‍ഗ്രസ് സംഘടിപ്പിച്ച നിയോജക മണ്ഡലം കണ്‍വന്‍ഷന്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. കാര്‍ഷിക മേഖല അഭിമുഖീകരിക്കുന്ന പ്രശ്‌നങ്ങള്‍ മുഖ്യമന്ത്രിയുടെ ശ്രദ്ധയില്‍പ്പെടുത്തി പരിഹാരം കാണുമെന്നും അദ്ദേഹം പറഞ്ഞു. നിയോജക മണ്ഡലം പ്രസിഡന്‍റ് ജേക്കബ് സാണ്ടര്‍ അധ്യക്ഷത വഹിച്ചു. സംസ്ഥാന ട്രഷറര്‍ കെ.സി. ജോസഫ്, ജില്ലാ വൈസ് പ്രസിഡന്‍റ് തോമസ് ജോസഫ് ഇല്ലിക്കല്‍, ജില്ലാ സെക്രട്ടറി സാജന്‍ സെബാസ്റ്റ്യന്‍, തോമസ് കോര, ഷിബു മണല, ലിസമ്മ ജോണ്‍സണ്‍, ബേബി ചെറിയാന്‍, ജയിംസ് കല്ലുപാത്ര, ജോജി വെമ്പാടന്തറ തുടങ്ങിയവർ പ്രസംഗിച്ചു.

അമിതവേഗത്തിലെത്തിയ ലോറി കാറിലിടിച്ച് കാർയാത്രികർക്ക് ഗുരുതര പരിക്ക്

ചെങ്ങന്നൂർ: കച്ചവട സ്ഥാപനം അടച്ച ശേഷം കാറിൽ വീട്ടിലേക്കു പോയ ഉടമയെയും ബന്ധുവിനെയും ജോലിക്കാരനെയും നിയന്ത്രണം തെറ്റി വന്ന ലോറി ഇടിച്ചു തകർത്തു. ഒരാളുടെ പരിക്ക് ഗുരുതരം. തിരുവൻവണ്ടൂർ നടുവിലേത്ത് സുരേഷ് കുമാർ (54), ബന്ധുവായ വനവാതുക്കര ശ്രീപദത്തിൽ നിഷാദ് കുമാർ (46), ജോലിക്കാരനായ ആസാം സ്വദേശി ത്രിലോചനൻ ബാരിക് (38) എന്നിവർക്കാണ് പരിക്കേറ്റത്. കഴിഞ്ഞ രാത്രി 9.30 നായിരുന്നു സംഭവം. എംസി റോഡിൽ കല്ലിശേരി ടിബി ജംഗ്ഷനിൽ പ്രവർത്തിക്കുന്ന സുരേഷ് കുമാറിന്‍റെ ഉടമസ്ഥതയിലുള്ള ബ്യൂട്ടി പാർലർ അടച്ചതിനു ശേഷം സുരേഷും ജോലിക്കാരനായ ത്രിലോചനനും ബന്ധുവായ നിഷാദ്കുമാർ എന്നിവർ കാറിൽ തിരുവൻവണ്ടൂരിലേക്കു വരുമ്പോൾ കല്ലിശേരി പറയനക്കുഴിപ്പാലത്തിനു സമീപമാണ് അപകടം. തിരുവല്ല ഭാഗത്തുനിന്നു അമിത വേഗത്തിലെത്തിയ ലോറി ദിശമാറി ഇവരുടെ കാറിൽ ഇടിക്കുകയായിരുന്നു. ശക്തമായ ഇടിയിൽ കാർ കറങ്ങി നിൽക്കുകയായിരുന്നു. മുൻവശം നിശേഷം തകർന്നു. കാറിൽ ഇടിച്ച ശേഷം സമീപത്തു സ്ഥാപിച്ചിരുന്ന എബി സ്വിച്ച് ഘടിപ്പിച്ച വൈദ്യുതി പോസ്റ്റുകളും തകർത്താണ് ലോറി നിന്നത്. ലോ വോൾട്ട് വൈദ്യുത കമ്പിയും പൊട്ടിവീണു. ഇടിയുടെ ആഘാതത്തിൽ കാറിലുണ്ടായിരുന്ന മൂന്നു പേർക്കും പരിക്കേറ്റു. കാർ ഓടിച്ചിരുന്ന നിഷാദ് കുമാറിന്‍റെ പരിക്കാണ് ഗുരുതരം. ഇദ്ദേഹത്തെ ഡോർ പൊളിച്ചാണ് പുറത്തെടുത്തത്. കൈക്കും കാലിനും വാരിയെല്ലിനും ഗുരുതര പരിക്കുപറ്റി. ശബ്ദം കേട്ട് ഓടിക്കൂടിയ നാട്ടുകാരാണ് മൂവരെയും സമീപത്തെ സ്വകാര്യ ആശുപത്രിയിൽ അത്യാഹിത വിഭാഗത്തിൽ പ്രവേശിപ്പിച്ചത്. നിഷാദിനെ ഇന്നലെ രാവിലെ അടിയന്തിര ശസ്ത്രക്രിയയ്ക്ക് വിധേയനാക്കി. അപകടത്തെത്തുടർന്ന് കല്ലിശേരി എംസി റോഡിൽ അരമണിക്കൂറോളം ഗതാഗതം തടസപ്പെട്ടു. ഫയർഫോഴ്സും പോലീസും നാട്ടുകാരും ചേർന്നാണ് ലോറി റോഡിൽ നിന്നു മാറ്റിയത്. ഡ്രൈവറായ ആര്യൻകാവ് , അച്ചൻകോവിൽ ശ്രീ നന്ദനം വീട്ടിൽ രാജീവി (49) നെ പിന്നീട് നാട്ടുകാർ പിടികൂടി പോലീസിൽ ഏൽപ്പിച്ചു. ചെങ്ങന്നൂർ പോലീസ് മേൽടപടികൾ സ്വീകരിച്ചു.

എക്‌സൈസ് ഓഫീസ് കെട്ടിടസമുച്ചയം ഇന്ന് ഉദ്ഘാടനം ചെയ്യും

മാവേലിക്കര: 2.47 കോടി ചെലവിട്ട് മാവേലിക്കര എക്സൈസ് റേഞ്ച് സര്‍ക്കിള്‍ ഓഫീസുകള്‍ക്കായി തഴക്കര പഞ്ചായത്തിലെ വഴുവാടിയില്‍ ഒന്നാംഘട്ടം നിര്‍മാണം പൂര്‍ത്തീകരിച്ച പുതിയ മന്ദിരം ഇന്ന് വൈകുന്നേരം മൂന്നിന് തദ്ദേശ സ്വയംഭരണ എക്‌സൈസ് വകുപ്പ് മന്ത്രി എം.ബി. രാജേഷ് ഉദ്ഘാടനം ചെയ്യും. എം.എസ്. അരുണ്‍കുമാര്‍ എംഎല്‍എ അധ്യക്ഷനാകും. സ്വന്തമായി കെട്ടിടമില്ലാതിരുന്ന മാവേലിക്കര എക്സൈസിന് വഴുവാടിയില്‍, മാവേലിക്കര-കരയംവട്ടം-പുലിയൂര്‍ റോഡരികില്‍ മൂന്നു പതിറ്റാണ്ട് മുമ്പ് അടച്ചുപൂട്ടിയ വഴുവാടി ബോയ്‌സ് എല്‍പി സ്‌കൂള്‍ നിന്നിരുന്ന 30 സെന്‍റ് ഭൂമിയിലാണ് ഇരുനില മന്ദിരം ഉയരുന്നത്. എക്സൈസ് സിഐ ഓഫീസും റേഞ്ച് ഓഫീസും ഉള്‍പ്പെടുന്ന കെട്ടിടസമുച്ചയമാണ് നിര്‍മിക്കുന്നത്. മാവേലിക്കര ബോയ്സ് ഹൈസ്‌കൂളിന്‍റെ തെക്കുഭാഗത്തായിരുന്ന എക്സൈസ് ഓഫീസ് കാലപ്പഴക്കം ചെന്നപ്പോള്‍ 27 വര്‍ഷങ്ങള്‍ക്കു മുമ്പ് ബുദ്ധ ജംഗ്ഷനു കിഴക്കുഭാഗത്തെ 78-ാം നമ്പര്‍ എന്‍എസ്എസ് കരയോഗം വക കെട്ടിടത്തിലേക്കു മാറ്റിയിരുന്നു. നിലവില്‍ എക്സൈസ് റേഞ്ച് ഓഫീസ് പ്രവര്‍ത്തിക്കുന്ന ഈ കെട്ടിടത്തിന് 152 വര്‍ഷത്തിലേറെ പഴക്കമുണ്ട്. തട്ടാരമ്പലത്തില്‍ സ്വകാര്യ കെട്ടിടത്തിലാണ് സിഐ ഓഫീസ് പ്രവര്‍ത്തിച്ചുവരുന്നത്. രണ്ടു നിലകളുള്ള കെട്ടിടത്തിന്‍റെ താഴത്തെ നിലയില്‍ പാര്‍ക്കിംഗ് ഏരിയ, തൊണ്ടിമുറി, കാത്തിരിപ്പു കേന്ദ്രം, ബാത്റൂം സൗകര്യമുള്ള ഡ്യൂട്ടി‌റൂം, സ്വീകരണ മുറി, ബാത്ത്റൂം സൗകര്യമുള്ള എക്‌സൈസ് ഇന്‍സ്‌പെക്ടര്‍ ഓഫീസും വിശ്രമമുറിയും സജ്ജീകരിക്കും. ഒന്നാം നിലയില്‍ ഓഫീസ് ഏരിയ, സ്റ്റോര്‍, സെല്‍, ബാത്റൂം സൗകര്യമുള്ള പുരുഷ വനിത വിശ്രമമുറികള്‍, ബാത്ത്റൂം സൗകര്യമുള്ള അസി. എക്‌സൈസ് ഇന്‍സ്‌പെക്ടര്‍ ഓഫീസും വിശ്രമമമുറിയും ഉണ്ടാവും.

അശ്ലീല പരാമര്‍ശം: പോലീസ് സ്റ്റേഷനില്‍ നേരിട്ടെത്തി ജി. സുധാകരന്‍റെ പരാതി

ആലപ്പുഴ: മുന്‍ മന്ത്രിയും സിപിഎം നേതാവുമായ ജി. സുധാകരനെതിരേ സമൂഹമാധ്യമത്തില്‍ അശ്ലീല പരാമര്‍ശം നടത്തിയ സിപിഎം ലോക്കല്‍ കമ്മിറ്റി അംഗത്തിനെതിരേ പോലീസ് കേസെടുത്തു. ജി. സുധാകരന്‍ അമ്പലപ്പുഴ പോലീസ് സ്റ്റേഷനില്‍ നേരിട്ടെത്തി നല്‍കിയ പരാതിയുടെ അടിസ്ഥാനത്തില്‍ സിപിഎം അമ്പലപ്പുഴ കിഴക്ക് ലോക്കല്‍ കമ്മിറ്റി അംഗം യു. മിഥുനെതിരേയാണ് കേസെടുത്തത്. രമേശ് ചെന്നിത്തലയുടെ നേതൃത്വത്തില്‍ നടത്തിയ ലഹരിവിരുദ്ധ കൂട്ടനടത്തത്തെ അഭിനന്ദിച്ച് സുധാകരന്‍ സമൂഹമാധ്യമത്തില്‍ എഴുതിയ കുറിപ്പിനു താഴെ എഴുതിയ കമന്‍റിലാണ് മിഥുന്‍ അശ്ലീലപരാമര്‍ശം നടത്തിയത്. അമ്പലപ്പുഴ ശ്രീകൃഷ്ണസ്വാമി ക്ഷേത്രത്തിലെ താത്കാലിക ജീവനക്കാരനായ മിഥുന്‍ ക്ഷേത്ര ഭരണചട്ടങ്ങളുടെ ലംഘനം നടത്തിയതായും പോലീസിനു നല്‍കിയ പരാതിയില്‍ സുധാകരന്‍ പറഞ്ഞു. അശ്ലീല കമന്‍റുകളുടെ സ്‌ക്രീന്‍ഷോട്ടുകളടക്കമാണ് ജി. സുധാകരന്‍ പരാതി നല്‍കിയത്. തനിക്കെതിരേ സംഘടിത ആക്രമണമാണ് നടക്കുന്നതെന്നും മുഖ്യമന്ത്രി പിണറായി വിജയനും വിദ്യാഭ്യാസ മന്ത്രി വി. ശിവന്‍കുട്ടിയും ഇതേ പരിപാടിയെ അഭിനന്ദിക്കുകയും പി.പി. ചിത്തരഞ്ജന്‍ പരിപാടിയില്‍ പങ്കെടുക്കുകയും ചെയ്തു. പക്ഷേ, തനിക്കെതിരേ മാത്രമാണ് സൈബര്‍ ആക്രമണം ഉണ്ടായതെന്നും പരാതിയില്‍ സുധാകരന്‍ ചൂണ്ടിക്കാട്ടിയിട്ടുണ്ട്. ജാഥയ്ക്ക് അഭിനന്ദനം അറിയിച്ച ജി. സുധാകരന്‍, ഈ കാലഘട്ടത്തിന് ഏറ്റവും അനുയോജ്യമായ പ്രചാരണ പരിപാടിയാണിതെന്നും അഭിപ്രായപ്പെട്ടിരുന്നു. ജാഥയെ പിന്തുണച്ച് വിദ്യാഭ്യാസ മന്ത്രി വി. ശിവന്‍കുട്ടിയും രംഗത്തെത്തിയിരുന്നു. പ്രൗഡ് കേരള എന്ന സംഘടനയുടെ ആഭിമുഖ്യത്തിലായിരുന്നു ജാഥ നടന്നത്. കെ.സി. വേണുഗോപാല്‍ എംപി, ഷാനിമോള്‍ ഉസ്മാന്‍, പി. ചിത്തരഞ്ജന്‍ എംഎല്‍എ തുടങ്ങി നിരവധി രാഷ്ട്രീയ നേതാക്കളും ജാഥയില്‍ പങ്കെടുത്തിരുന്നു. സ്‌കൂള്‍, കോളജ് വിദ്യാര്‍ഥികള്‍, കലാകാരന്‍മാര്‍ തുടങ്ങി നിരവധി പേരാണ് പങ്കെടുത്തത്.

കാലഘട്ടത്തിന്‍റെ വെല്ലുവിളികളെ അതിജീവിക്കാൻ വിദ്യാർഥികളെ പ്രാപ്തരാക്കണം: മാർ തിമോത്തിയോസ്

ചെങ്ങന്നൂർ: കാലഘട്ടത്തിന്‍റെ വെല്ലുവിളികളെ തിരിച്ചറിയാൻ വിദ്യാർഥികളെ പ്രാപ്തരാക്കുന്നതിന് അധ്യാപക സമൂഹത്തിനു കഴിയണമെന്നും കാലാനുസൃതമായ മാറ്റങ്ങൾ പഠന രീതികളിൽ നടപ്പാക്കണമെന്നും മലങ്കര ഓർത്തഡോക്സ് സഭ ചെങ്ങന്നൂർ ഭദ്രാസന മെത്രാപ്പോലീത്താ ഡോ.മാത്യൂസ് മാർ തീമോത്തിയോസ് പറഞ്ഞു. മെഴുവേലി ഹോളി ഇന്നസെന്‍റ്സ് ഓർത്തഡോക്സ് തീർഥാടക ദേവാലയത്തിൽ നടന്ന പുത്തൻകാവ് ഡിസ്ട്രിക്ട് സൺഡേ സ്കൂൾ അധ്യാപക വാർഷിക സമ്മേളനവും അനുമോദനവും ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ഡിസ്ട്രിക്ട് പ്രസിഡന്‍റ് ഫാ. തോമസ് ശാമുവൽ അധ്യക്ഷത വഹിച്ചു. ഭദ്രാസന സെക്രട്ടറി ഫാ. പി.കെ. കോശി, ഒഎസ്എസ്എഇ ഭദ്രാസന വൈസ് പ്രസിഡന്‍റ് ഫാ. ടിജു ഏബ്രഹാം, ഇടവക വികാരി ഫാ. ബിനു ജോയി, ഭദ്രാസന ഡയറക്ടർ സജി പട്ടരുമഠം, സെക്രട്ടറി കെ.വി. വർഗീസ്, ഡിസ്ട്രിക്ട് ഇൻസ്പെക്ടർ ജോർജ് വർഗീസ് എന്നിവർ പ്രസംഗിച്ചു. വൈദിക ട്രസ്റ്റി ഫാ.ഡോ. തോമസ് വർഗീസ് അമയിൽ, ഫാ. ജിജോ കെ. ജോയി, ഫാ. സോനു സോളമൻ, മുൻ ഭദ്രാസന ഡയറക്ടർ ഡോ. ജേക്കബ് ഉമ്മൻ എന്നിവർ സന്നിഹിതരായിരുന്നു. യോഗത്തിൽ ഹെഡ്മിസ്ട്രസ് മോളി റോയി അനുശോചന പ്രമേയം അവതരിപ്പിച്ചു. സമ്മേളനത്തോടനുബന്ധിച്ച്‌ രാവിലെ ഭദ്രാസന മെത്രാപ്പോലീത്താ ഡോ. മാത്യൂസ് മാർ തീമോത്തിയോസ് വിശുദ്ധ കുർബാന അർപ്പിച്ചു. തുടർന്ന് പത്തനംതിട്ട കാതോലിക്കേറ്റ് കോളജ് അധ്യാപകൻ റിജോ ജോൺ ശങ്കരത്തിൽ ക്ലാസെടുത്തു. സമ്മേളനത്തിന് ഡിസ്ട്രിക്ട് ഇൻസ്പെക്ടർമാരായ ജിജി പണിക്കർ, കെ.എ. ഏബ്രഹാം , റെയ്ചൽ രാജൻ, വി.ബി. വിജു, ഇ. സുനിമോൾ, ബിൻസി ജേക്കബ് , തോമസ് ശമുവൽ, ഇടവക ട്രസ്റ്റിമാരായ ഏബ്രഹാം തോമസ് , സി.എ. ഏബ്രഹാം , സെക്രട്ടറി കെ.കെ. ജയിംസ് എന്നിവർ നേതൃത്വം നല്കി.

ജോലിക്കിടെ ലൈന്‍മാന്‍ കുഴഞ്ഞുവീണു മരിച്ചു

പന്തളം: വൈദ്യുതതടസം മാറ്റാന്‍ പോസ്റ്റില്‍ കയറിയ ലൈന്‍മാന്‍ ജോലിക്കിടെ കുഴഞ്ഞുവീണു മരിച്ചു. നൂറനാട് വൈദ്യുത സെക്‌ഷനിലെ ലൈന്‍മാന്‍ ചേര്‍ത്തല മുഹമ്മ മുല്ലശേരി വെളിയില്‍ സബി രാജാ (53)ണ് മരിച്ചത്. ഇന്നലെ ഉച്ചകഴിഞ്ഞ് 3.30ന് കുടശനാട് തോണ്ടുകണ്ടം ഭാഗത്ത് വൈദ്യുത പോസ്റ്റില്‍ കയറി ജോലി ചെയ്യുന്നതിനിടെയാണ് ദേഹാസ്വാസ്ഥ്യം അനുഭവപ്പെട്ടത്. കൂടെയുണ്ടായിരുന്നവര്‍ ഉടന്‍ന്നെ താഴെയിറക്കി പന്തളത്തെ സ്വകാര്യ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. ഭാര്യ: റീജ. മക്കള്‍: ആദിത്യന്‍, അരുണിമ.

ഓട്ടോറിക്ഷ മറിഞ്ഞ് ഡ്രൈവര്‍ മരിച്ചു

ചേർത്തല: ‍ഡിവൈ‍ഡറില്‍ തട്ടി നിയന്ത്രണം വിട്ട് ഓട്ടോറിക്ഷ മറിഞ്ഞ് ഡ്രൈവര്‍ മരിച്ചു. പട്ടണക്കാട് പഞ്ചായത്ത് 15-ാം വാർഡ് കോനാട്ടുശേരി തെക്കേത്താന്നിക്കൽ കൂന്താനിശേരി വീട്ടിൽ തങ്കച്ചൻ (59) ആണ് മരിച്ചത്. ശനിയാഴ്ച്ച വൈകുന്നേരം നാലോടെയാണ് അപകടം. വണ്ടാനം മെഡിക്കൽ കോളജിൽ ചികിത്സയിലുള്ള അമ്മയെ കണ്ട് തിരിച്ച് മടങ്ങുന്ന വഴി ചേർത്തല സെന്‍റ് മൈക്കിൾ കോളജിനു സമീപം ഫൈബർ ഡിവൈഡറിൽ തട്ടി ഓട്ടോ മറിയുകയായിരുന്നു. ഗുരുതരമായി പരിക്കേറ്റ തങ്കച്ചനെ ഉടന്‍ തന്നെ വണ്ടാനം മെഡിക്കൽ കോളജില്‍ എത്തിച്ചെങ്കിലും മരിച്ചു. സംസ്കാരം നടത്തി. ഭാര്യ: റാണി മക്കൾ: ആൽബിൻ, ജോയൽ.

മത്സ്യമേഖല ഉണർന്നു, ഇറച്ചിക്കോഴി വില താഴോട്ട്‌

അമ്പലപ്പുഴ: മത്സ്യമേഖല ഉണർന്നപ്പോൾ ഇറച്ചി ക്കോഴി വില താഴോട്ട്‌. ഒരാഴ്ച മുമ്പ് വരെ കാലവർഷം ശക്തിപ്രാവിക്കുകയും വള്ളങ്ങൾ കടലിൽ പോകാതിരിക്കുകയും ചെയ്തതോടെ വിപണിയിൽ മൽസ്യക്ഷാമം രൂക്ഷമായിരുന്നു. മത്തി അടക്കമുള്ളവയ്ക്ക് കിലോ 450 രൂപ വരെയെത്തി. മീൻ മേടിച്ചാൽ കൈ പൊള്ളുന്നത് കൊണ്ട് പലരും കോഴിഇറച്ചിയെ ആശ്രയിച്ചു. എന്നാൽ, ഈ സമയം മുതലാക്കി കോഴികചവടക്കാർ വില വർധിപ്പിച്ചു. ഇറച്ചി കിലോക്കു 270 രൂപ വരെയെത്തി. പക്ഷേ മഴ മാറി കഴിഞ്ഞ ദിവസം മുതൽ മൽസ്യവിപണി സജീവമായതോടെ കോഴി ഇറച്ചി വില ഇടിഞ്ഞു. കിലോക്ക് 250 രുപായായിരുന്ന ഇറച്ചി ഇന്നലെ 170 രൂപക്കാണ് വിറ്റത്. എന്നാൽ, പല ഇറച്ചി വിൽപ്പന ശാലകളിലും തോന്നിയ വിലയിട്ടു വിൽക്കുന്നതായും ആക്ഷേപമുണ്ട്. എന്തായാലും നാടൻ മത്തി അടക്കം സുലഭമായി മീനിന്റെ വരവ് വിപണിയിൽ കൂടുന്നതോടെ കോഴി ഇറച്ചിവില ഇനിയും താഴാനാണ് സാധ്യത.

പരുമല ദേവസ്വം ബോർഡ് കോളജിൽ ഗവേഷണ കേന്ദ്രം

മാന്നാര്‍: പരുമല ദേവസ്വം ബോര്‍ഡ് പമ്പ കോളജിലെ ഇഗ്നോ സ്റ്റഡി സെന്‍ററില്‍ പുതുതായി എംബിഎ, എംഎസ്‌സി സുവോളജി എന്നീ കോഴ്‌സുകള്‍ പുതിയതായി അനുവദിച്ചു. പുതിയ കോഴ്‌സുകള്‍ പരുമലയിലും പരിസരപ്രദേശങ്ങളിലുമുള്ള വിദ്യാര്‍ഥികളുടെ വിദ്യാഭ്യാസ സ്വപ്നങ്ങള്‍ക്ക് ഉണര്‍വേകുമെന്നും കോളജിലെ റെഗുലര്‍ ബിരുദാനന്തര വിദ്യാര്‍ഥികള്‍ക്ക് തങ്ങളുടെ പഠനത്തോടൊപ്പം മറ്റൊരു ബിരുദാനന്തര ബിരുദം കൂടി നേടിയെടുക്കാനുള്ള സുവര്‍ണാവസരമാണ് കൈവന്നിരിക്കുന്നതെന്നും കോളജ് പ്രിന്‍സിപല്‍ ഡോ.എസ്. സുരേഷ് അറിയിച്ചു. വര്‍ഷങ്ങളായുള്ള കുട്ടികളുടെ കാത്തിരിപ്പാണ് ഇതോടെ അവസാനിച്ചിരിക്കുന്നത്. പ്രസ്തുത കോഴ്‌സുകളിലേക്ക് അപേക്ഷിക്കേണ്ട അവസാന തീയതി ഓഗസ്റ്റ് 15ആണ്. വിശദ വിവരങ്ങള്‍ക്ക് 9847660687എന്ന നമ്പരില്‍ ബന്ധപ്പെടുക. പത്രസമ്മേളനത്തില്‍ പ്രിന്‍സിപ്പല്‍ ഡോ. എസ്. സുരേഷ്, കോ-ഓര്‍ഡിനേറ്റര്‍ ഡോ. സത്യജിത്, എം.ജി. യൂണിവേഴ്‌സിറ്റി സെനറ്റ് മെംബർ ഡോ.എം.എസ്. ഉണ്ണി, ഇഗ്‌നോ കോ ഓര്‍ഡിനേറ്റര്‍ ഡോ. രതീഷ് കുമാര്‍, ഓഫീസ് സൂപ്രണ്ട് സന്തോഷ് കുമാര്‍ എന്നിവര്‍ പങ്കെടുത്തു.

മിനി മാരത്തൺ മത്സരം

ചേർത്തല: ടീം ചേർത്തലയുടെ നേതൃത്വത്തിൽ ലഹരിക്കെതിരേ മിനിമാരത്തൺ മത്സരം സംഘടിപ്പിച്ചു. 10 കിലോമീറ്റർ മിനിമാരത്തൺ മത്സരം ചേർത്തല എക്സൈസ് സർക്കിൾ ഇൻസ്പെകടർ സുനിൽകുമാർ ഫ്ലാഗ് ഓഫ് ചെയ്തു. 50ഓളം കായികതാരങ്ങൾ പങ്കെടുത്തു. ചേർത്തല ദേവീക്ഷേത്രത്തിനു സമീപം നടന്ന സമാപനസമ്മേളനവും സമ്മാനദാനവും കൃഷിമന്ത്രി പി. പ്രസാദ് ഉദ്ഘാടനം ചെയ്തു. പുരുഷവിഭാഗം മത്സരത്തിൽ ഒന്നാം സ്ഥാനം എം.ഡി. നബീൽസലിം, രണ്ടാം സ്ഥാനം ബെഞ്ചബിൻ ബാബു, മൂന്നാം സ്ഥാനം ഷിബിൻ ആന്‍റോ എന്നിവർ കരസ്ഥമാക്കി. വനിതാ വിഭാഗത്തിൽ ഒന്നാം സ്ഥാനം നേടി റീബാ അന്നാ ജോർജ് ഒന്നാംസ്ഥാനവും അഞ്ജു മുരുകൻ രണ്ടാം സ്ഥാനവും വി. രജിത മൂന്നാം സ്ഥാനവും കരസ്ഥമാക്കി. ചേർത്തല നഗരസഭാ ചെയർപേഴ്സൺ ഷേർളി ഭാർഗവൻ അധ്യക്ഷത വഹിച്ചു. നഗരസഭാ കൗൺസിലർമാരായ ജി. രഞ്ജിത്ത്, പി. ഉണ്ണികൃഷ്ണൻ, എ. അജിത്ത്, ആശാ മുകേഷ്, ക്ലബ് പ്രസിഡന്‍റ് ആർ.എസ്. ശശികുമാർ, ട്രഷറർ മഹേശ്വരൻ പിള്ള എന്നിവർ പ്രസംഗിച്ചു.

മോദി പ്രധാനമന്ത്രിയായത് ജനവിധി അനുസരിച്ചല്ല: കെ.സി.വേണുഗോപാല്‍

അന്പലപ്പുഴ: ജനവിധി അനുസരിച്ചല്ല നരേന്ദ്രമോദി പ്രധാനമന്ത്രിയായതെന്ന് വോട്ടര്‍പ്പട്ടികയിലെ കൃത്രിമം രാഹുല്‍ ഗാന്ധി തെളിവ് സഹിതം പുറത്തുവിട്ടതോടെ വ്യക്തമായെന്ന് എഐസിസി ജനറല്‍ സെക്രട്ടറി കെ.സി. വേണുഗോപാല്‍ എംപി പറഞ്ഞു. കഴിഞ്ഞ ലോക്‌സഭാ തെരഞ്ഞെടുപ്പിലെ വോട്ടര്‍പ്പട്ടികയിലെ ക്രമക്കേട് കണ്ടെത്താന്‍ വ്യാപകമായ ഓഡിറ്റിംഗ് നടത്തും. ഇന്ത്യാ മുന്നണി സ്ഥാനാര്‍ഥികള്‍ 50,000 വോട്ടുകള്‍ക്ക് പരാജയപ്പെട്ട 48 മണ്ഡലങ്ങളാണുള്ളത്. ഇവിടെയെല്ലാം വ്യാപകമായ പരിശോധന കോണ്‍ഗ്രസ് നടത്തും. വോട്ടര്‍പ്പട്ടികയില്‍ ക്രമക്കേട് കാണിച്ചാണ് ബിജെപി ഭരണം പിടിച്ചെടുത്തത്. അത് സംബന്ധിച്ച് രാഹുല്‍ ഗാന്ധി പുറത്തുവിട്ട തെളിവുകള്‍ ശരിവയ്ക്കുകയാണ് മാധ്യമങ്ങളുടെ അന്വേഷണം. എന്നിട്ടും രാഹുല്‍ ഗാന്ധി രാജിവയ്ക്കണമെന്നാണ് ബിജെപി പറയുന്നത്. ശരിയായ അന്വേഷണം നടത്തിയാല്‍ നരേന്ദ്ര മോദിയാണ് രാജിവയ്‌ക്കേണ്ടത്. അതിന് തയാറാകാതെ ആക്ഷേപം ഉന്നയിച്ച രാഹുല്‍ ഗാന്ധിയേയും കോണ്‍ഗ്രസിനെയും തെരഞ്ഞെടുപ്പ് കമ്മീഷന്‍ ഭീഷണിപ്പെടുത്തുകയാണ്. ക്രമക്കേട് സംബന്ധിച്ച് മറുപടി നല്‍കുന്നില്ല. തെരഞ്ഞെടുപ്പ് കമ്മീഷന്‍ പേടിപ്പിക്കാന്‍ നോക്കണ്ട. ശക്തമായ പോരാട്ടം കോണ്‍ഗ്രസ് തുടരും. ഇന്ന് ഡല്‍ഹിയില്‍ എംപിമാരുടെ നേതൃത്വത്തില്‍ തെരഞ്ഞെടുപ്പ് കമ്മീഷന്‍റെ ഓഫീസിലേക്ക് പ്രതിഷേധ മാര്‍ച്ച് നടത്തും. നീതിപൂര്‍വവും നിഷ്പക്ഷവുമല്ല തെരഞ്ഞെടുപ്പ് കമ്മീഷന്‍റെ നടപടികളെന്ന് തെളിയിക്കപ്പെട്ടെന്നും കെ.സി. വേണുഗോപാല്‍ പറഞ്ഞു. കേരളത്തിലും വോട്ടര്‍പ്പട്ടികയില്‍ വ്യാജവോട്ടര്‍മാരെ ചേര്‍ക്കുന്ന പ്രകിയ നടന്നിരുന്നു. തൃശൂരിലേത് ഗൗരവമേറിയ സംഭവമാണ്. അവിടെ ബിജെപി സ്ഥാനാര്‍ഥി ജയിക്കാനുണ്ടായ സാഹചര്യം നമുക്കറിയാം. താന്‍ മത്സരിച്ച ആലപ്പുഴ മണ്ഡലത്തിലും 35,000 ഇരട്ടവോട്ടുകള്‍ കണ്ടെത്തിയിരുന്നു. അത് ഹൈക്കോടതിക്ക് ബോധ്യപ്പെട്ടതാണെന്നും കേരളത്തില്‍ ഉള്‍പ്പെടെ എല്ലായിടത്തും കോണ്‍ഗ്രസ് വോട്ടര്‍പ്പട്ടികയിലെ കൃത്രിമം കണ്ടുപിടിക്കാന്‍ പരിശോധനകള്‍ നടത്തുമെന്നും വേണുഗോപാല്‍ കൂട്ടിച്ചേര്‍ത്തു.

ദർശന സമൂഹവും കൊംബ്രേരിയ തിരുനാളും

വിശ്വാസീസമൂഹത്തിന്‍റെ ആത്മീയ ആഘോഷവും പള്ളിപ്പുറം ദേശത്തിന്‍റെ ഉത്സവമാണ് പള്ളിപ്പുറത്തമ്മയുടെ തിരുനാൾ. വിശ്വാസസമൂഹത്തിന്‍റെ വളർച്ചയിൽ അതിർത്തികൾ പുനർനിർണയിക്കപ്പെട്ടുവെങ്കിലും തങ്ങളുടെ മാതൃദേവാലയത്തിൽ തിരുനാൾ ആഘോഷത്തിന് എത്തുന്ന പതിവ് ഇന്നും വിശ്വാസികൾ തുടരുന്നു. കേരള സഭയിൽ ഇന്നു കാണുന്ന പല ആചാരാ നുഷ്ഠാനങ്ങൾക്കും സംവിധാനങ്ങൾക്കും തുടക്കം കുറിച്ചത് പള്ളിപ്പുറത്തമ്മയുടെ മണ്ണിലാണ്. വരാപ്പുഴ മെത്രാന്‍റെ സെക്രട്ടറിയും ആലോചനക്കാരനും ആയിരുന്ന പള്ളിപ്പുറം പാലയ്ക്കൽ തോമാ മൽപ്പാന്‍റെ കൽപ്പനയാലാണ് ദേവാലയങ്ങളിൽ ദർശനസമൂഹം സ്ഥാപിക്കപ്പെട്ടത്. അന്നു മുതൽ തിരുനാളിന് നേതൃത്വം നൽകുന്നത് മാതാവിന്‍റെ നാമധേയത്തിലുള്ള ദർശനസമൂഹമാണ്. അതിനാൽ ഇവിടുത്തെ തിരുനാൾ കൊംബ്രേരിയ തിരുനാൾ എന്നാണ് അറിയപ്പെടുന്നത്. കൊംബ്രേരിയയുടെ തനിമയും ആചാരാനുഷ്ഠാനങ്ങളും നിലനിർത്തിക്കൊണ്ട് തെരഞ്ഞെടുക്കപ്പെടുന്ന അംഗമാണ് പ്രസുദേന്തിയായി തിരുനാൾ ഏറ്റെടുത്തു നടത്തുന്നത്. കൊംബ്രേരിയയുടെ പുരാതന ആചാരാനുഷ്ഠനങ്ങളായ സാന്താമേശ, സാൽവേ ലദീഞ്ഞ്, പ്രസുദേന്തി വാഴ്ച, കപ്ലോൻ വികാരി വാഴ്ച മുതലായ അനുഷ്ഠാനങ്ങൾ ഒട്ടും കലർപ്പില്ലാതെ തനിമയോടെ നിലനിർത്തിയാണ് തിരുനാൾ ആഘോഷങ്ങൾ നടത്തിവരുന്നത്. തിരുനാൾ ദിവസങ്ങളിലെ തിരുക്കർമങ്ങളിൽ ദർശന സമൂഹാംഗങ്ങൾ സ്ഥാനവസ്ത്രങ്ങളണിഞ്ഞ് പങ്കെടുക്കുന്നു. പരിശുദ്ധ ദൈവമാതാവിന്‍റെ സ്വർഗാരോപണം വിശ്വാസസത്യമായി പ്രഖ്യാപിച്ചതിന്‍റെ പ്ലാറ്റിനം ജൂബിലിയും പ്രത്യാശയുടെ തീർഥാടകരാകാൻ ആഹ്വാനം ചെയ്യുന്ന മഹാജൂബിലിയും ആഘോഷിക്കുന്ന ഈ വർഷം ഇടവക ജനങ്ങൾ ഒന്നായി ഏറ്റെടുത്ത് നടത്തുന്ന ജൂബിലിത്തിരുനാൾ ആണെന്നുള്ളതാണ് ഈ വർഷത്തെ പ്രത്യേകത. ഉദ്ദിഷ്ടകാര്യത്തിന് ഉപകാരസ്മരണയായി തിരുനാൾ പ്രദക്ഷിണത്തിനിടയിൽ കുരിശ്, കുട എന്നിവയെടുക്കുന്നത് വർഷങ്ങളായുള്ള പാരമ്പര്യമാണ്. അതുപോലെതന്നെ പള്ളിപ്പുറത്തമ്മയുടെ പ്രധാന നേർച്ചയായി കിരീടം എടുത്തു വയ്ക്കുന്നതിനും ധാരാളം വിശ്വാസികൾ പള്ളിപ്പുറത്തമ്മയുടെ സന്നിധിയിൽ എത്തിച്ചേരാറുണ്ട്. ഇന്ന് കൊടിയേറ്റ് ദിനം കൊടിയേറ്റ് ദിനമായ ഇന്നു രാവിലെ ആറിന് വിശുദ്ധ കുർബാന, ഏഴിന് വിശുദ്ധ ഡൊമിനിക്കിന്‍റെ തിരുനാൾ. പാട്ടുകുർബാന- റവ.ഡോ. പീറ്റർ കണ്ണമ്പുഴ. വചന സന്ദേശം-ഡീക്കൻ ജോൺ കരോൾ പെനുവേൽ സിഎംഐ. വൈകുന്നേരം നാലിന് യൂണിറ്റിൽനിന്നുള്ള പ്രസുദേന്തിമാരുടെ കാഴ്ചവയ്പ്, 4.30ന് ജപമാല. തുടർന്ന് പാട്ടുകുർബാന. കാർമികൻ-ഫാ. ജോസ് ഒഴലക്കാട്ട്. തുടർന്ന് തിരുനാൾ കൊടി ഉയർത്തൽ ഫൊറോന വികാരി റവ.ഡോ. പീറ്റർ കണ്ണമ്പുഴ നിർവഹിക്കും. തുടർന്ന് സൽവ ലദീഞ്ഞ്, നൊവേന, വാഴ്‌വ്, ലൈത്തോരൻമാരുടെ തെരഞ്ഞെടുപ്പ്.

ചെങ്ങന്നൂരിന് പുതിയ റവന്യു ടവർ: നിർമാണോദ്ഘാടനം 14ന്

ചെങ്ങന്നൂര്‍: കാലങ്ങളായി ചെങ്ങന്നൂരിലെ റവന്യു ഓഫീസുകള്‍ നേരിട്ടിരുന്ന സ്ഥലപരിമിതിക്ക് ഉടന്‍ പരിഹാരമാകും. പഴയ താലൂക്ക് ഓഫീസ് സ്ഥിതി ചെയ്തിരുന്ന സ്ഥലത്ത് നിര്‍മിക്കുന്ന പുതിയ റവന്യു ടവറിന്‍റെ നിര്‍മാണോദ്ഘാടനം 14ന് നടക്കും. ആധുനിക സൗകര്യങ്ങളോടെ 22.12 കോടി രൂപ ചെലവില്‍ 57,000 ചതുരശ്ര അടി വിസ്തീര്‍ണത്തില്‍ അഞ്ചു നിലകളുള്ള മിനി സിവില്‍ സ്റ്റേഷനാണ് നിര്‍മിക്കുന്നത്. നിര്‍മാണോദ്ഘാടനം മന്ത്രി കെ. രാജന്‍ നിര്‍വഹിക്കും. മന്ത്രി സജി ചെറിയാന്‍ അധ്യക്ഷനാകുന്ന ചടങ്ങില്‍ രാഷ്ട്രീയ-സാമൂഹിക രംഗങ്ങളിലെ പ്രമുഖരും ഉദ്യോഗസ്ഥരും പങ്കെടുക്കും. ഓഫീസുകളും സൗകര്യങ്ങളും താഴത്തെ നിലയില്‍ വാഹന പാര്‍ക്കിംഗ്, കാന്‍റീന്‍, താലൂക്ക് ഇലക്ഷന്‍ ഗോഡൗണ്‍, പൊതു ആവശ്യങ്ങള്‍ക്കുള്ള സ്ഥലം. ഒന്നാം നിലയില്‍ സബ് രജിസ്ട്രാര്‍ ഓഫീസ്, വില്ലേജ് ഓഫീസ്. രണ്ടാം നിലയില്‍ താലൂക്ക് ഓഫീസ്. മൂന്നാം നിലയില്‍ ആര്‍ഡിഒ ഓഫീസ്. നാലാം നിലയില്‍ ഡിസാസ്റ്റര്‍ മാനേജ്മെന്‍റ് റൂം, പൊതുവായ കോണ്‍ഫറന്‍സ് ഹാള്‍. ഇതുകൂടാതെ, എല്ലാ നിലകളിലും പൊതുജനങ്ങള്‍ക്കും ജീവനക്കാര്‍ക്കുമുള്ള ശുചിമുറികള്‍, പൊതുജനങ്ങള്‍ക്ക് ഇരിക്കാനുള്ള സൗകര്യം എന്നിവയും ഒരുക്കുന്നുണ്ട്. പ്രകൃതിദുരന്തങ്ങള്‍ നേരിടാനുള്ള ഉപകരണങ്ങള്‍ സൂക്ഷിക്കാനുള്ള കെട്ടിടങ്ങള്‍, ഇലക്ഷന്‍ പ്രവര്‍ത്തനങ്ങള്‍ക്കുള്ള കെട്ടിടങ്ങള്‍, സ്‌ട്രോംഗ് റൂം എന്നിവയും കെട്ടിടസമുച്ചയത്തില്‍ ഉണ്ടാകും. 200-ാം പിറന്നാള്‍ വേളയില്‍ പുതിയ കെട്ടിടം ചെങ്ങന്നൂര്‍ താലൂക്കിന്‍റെ 200-ാം പിറന്നാള്‍ വേളയിലാണ് ഈ പുതിയ ആസ്ഥാനം യാഥാര്‍ഥ്യമാകുന്നത് എന്നത് ശ്രദ്ധേയമാണ്. 1824 മാര്‍ച്ച് 11നാണ് തിരുവിതാംകൂര്‍ ഭരണാധികാരികളുടെ ഉത്തരവിലൂടെ ചെങ്ങന്നൂര്‍ താലൂക്ക് രൂപീകൃതമായത്. 1922ല്‍ ചെലവ് ചുരുക്കലിന്‍റെ ഭാഗമായി താലൂക്ക് നിര്‍ത്തലാക്കി തിരുവല്ലയോട് കൂട്ടിച്ചേര്‍ത്തെങ്കിലും കേരളപ്പിറവിക്കുശേഷം ഇത് വീണ്ടും പുനഃസ്ഥാപിക്കുകയായിരുന്നു. നിലവില്‍ വാടകക്കെട്ടിടത്തിലാണ് താലൂക്ക് ഓഫീസ് പ്രവര്‍ത്തിക്കുന്നത്. പുതിയ റവന്യു ടവര്‍ വരുന്നതോടെ ചെങ്ങന്നൂരിലെ റവന്യു ഓഫീസുകള്‍ക്കു പുതിയൊരധ്യായം കുറിക്കാന്‍ സാധിക്കും. ചെങ്ങന്നൂരില്‍ ഒരു പദ്ധതി കൂടി യാഥാര്‍ഥ്യമാകുന്നു.14ന് ഇതിന്‍റെ ഉദ്ഘാടനം നടക്കും. നിലവില്‍ ചെങ്ങന്നൂരിന്‍റെ വിവിധ ഭാഗങ്ങളല്‍ പ്രവര്‍ത്തിക്കുന്ന റവന്യു ഓഫീസുകള്‍ ഇനി ഒരു കെട്ടിടത്തിനു കീഴിലാകും. ഇത് യാഥാര്‍ഥ്യമാകുന്നതോടെ, റവന്യു കാര്യങ്ങള്‍ക്കായി പല സ്ഥലങ്ങളില്‍ പോകേണ്ട ബുദ്ധിമുട്ട് ജനങ്ങള്‍ക്ക് ഒഴിവാകും. മന്ത്രി സജി ചെറിയാന്‍

മാനം തെളിഞ്ഞു; ഹാർബർ ഉണർന്നു

അമ്പലപ്പുഴ: കാലാവസ്ഥാ വ്യതിയാനത്തെത്തുടർന്നുണ്ടായ ഒരാഴ്ചത്തെ നീണ്ട ഇടവേളയ്ക്കു ശേഷം തോട്ടപ്പള്ളി ഹാർബർ ഇന്നലെ ഉണർന്നു. മത്തി, കണവ, കൊഴുവ തുടങ്ങിയവയുമായാണ് പരമ്പരാഗത വള്ളങ്ങളും ബോട്ടുകളും കരയിലെത്തിയത്. ട്രോളിംഗ് നിരോധനത്തിനു ശേഷം പുറംകടലാലിയായിരുന്ന പല ബോട്ടുകളും ഒരാഴ്ച ത്തെ അധ്വാനത്തിനു ശേഷമാണ് തോട്ടപ്പള്ളി ഹാർബറിൽ തീരമണഞ്ഞത്. നാളുകളായി അന്യംനിന്ന കൂറ്റൻ കണവയാണ് ഇവർക്ക് ലഭിച്ചത്. ഏകദേശം രണ്ടെണ്ണം ഒരു കിലോ തൂക്കം വരും. കിലോയ്ക്ക് 550 രൂപ വച്ചാണ് തൂക്കിയത്. കേരള തീരത്തുനിന്ന് പിടിക്കുന്ന കണവയ്ക്കു വിദേശ വിപണയിൽ ആവശ്യക്കാർ ഏറെയാണ്. ഇന്നലെ തോട്ടപ്പള്ളിയിൽ അടുത്ത ബോട്ടുകാർക്ക് കണവയും വള്ളക്കാർക്ക് മത്തിയും ലഭിച്ചു. നാളുക ളായി ചാകരയിലെ വില്ലനായിരുന്ന വലിയ മത്തി ലഭിച്ചതിന്‍റെ സന്തോഷത്തിലാണ് തോട്ടപ്പള്ളി ഹാർബർ. ആരും കൊതിക്കുന്ന മുട്ടവച്ച മത്തി 240 രൂപയ്ക്കാണ് മൊത്തക്കച്ചവടക്കാർ എടുത്തത്. എന്തായാലും നീണ്ട ഇടവേളയ്ക്കുശേഷം തോട്ടപ്പള്ളി ഹാർബറിൽ ആളും അനക്കവും വച്ചു.

രാസലഹരിയുമായി യുവാക്കൾ പിടിയിൽ

അമ്പലപ്പുഴ: പുന്നപ്രയിൽ രാസലഹരിയുമായി രണ്ട് യുവാക്കൾ പിടിയിൽ. ജില്ലാ ലഹരിവിരുദ്ധ സ്ക്വാഡും പുന്നപ്ര പോലീസും ചേർന്ന് വിൽപ്പനയ്ക്കായി കൊണ്ടുവന്ന 5 ഗ്രാം എംഡിഎംഎയുമായി പുന്നപ്ര പുത്തൻചിറ വീട്ടിൽ അഖിൽ , പുന്നപ്ര പുത്തൻചിറയിൽ വീട്ടിൽ വൈശാഖ് എന്നിവരെയാണ് പിടികുടിയത്. ലോ ആൻഡ് ഓർഡർ എഡിജിപിയുടെ ഓപ്പറേഷൻ ഡി. ഹണ്ടിന്‍റെ ഭാഗമായി ഓണവിപണി ലക്ഷ്യമിട്ട് ഗ്രാമപ്രദേശങ്ങളിൽ വൻതോതിൽ മയക്കുമരുന്നുകൾ കൊണ്ടുവന്ന് സ്റ്റോക്ക് ചെയ്‌ത് അസമയങ്ങളിൽ വിൽപ്പന നടത്തുന്നുണ്ടെന്ന് മനസിലാക്കി ജില്ലാ ലഹരിവിരുദ്ധ സ്ക്വാഡും പുന്നപ്ര പോലീസും ചേർന്ന് പഴയ നടക്കാവ് റോഡിൽ പത്തിൽ പാലത്തിന് സമീപം നടത്തിയ പരിശോധനയിലാണ് അതിമാരക മയക്കുമരുന്നായ 5 ഗ്രാം എം ഡി എം എയുമായി പ്രതികൾ പിടിയിലായത്. വൈശാഖിന്‍റെ പേരിൽ നിരവധി കേസ് നിലവിലുണ്ട്. അഖിലും മറ്റൊരാളും ചേർന്ന് കേരളത്തിനു പുറത്തുപോയി എംഡി എംഎ വാങ്ങി നാട്ടിൽ എത്തിച്ചുകൊടുക്കുകയും അത് വൈശാഖ് നാട്ടിൽ വിതരണം ചെയ്യുകയുമാണ് ചെയ്‌തുവന്നത്. മാസത്തിൽ പല പ്രാവശ്യം ലഹരിവസ്തുക്കൾ വാങ്ങി നാട്ടിലെത്തിച്ച് അമിത ലാഭമുണ്ടാക്കി ആഡംബരജീവിതം നയിക്കുകയായിരുന്നു ഇവർ. നർക്കോട്ടിക് സെൽ ഡിവൈഎസ്‌പി ബി. പങ്കജാക്ഷന്‍റെ നേതൃത്വത്തിലുള്ള ജില്ലാ ലഹരിവിരുദ്ധ സ്ക്വാഡും അമ്പലപ്പുഴ ഡിവൈ എസ്പി കെ.എൻ. രാജേഷിന്‍റെ നേതൃത്വത്തിൽ പുന്നപ്ര സി ഐ മഞ്ജുദാസ്, സിപിഒ ജോജോ, അലക്‌സ് വർക്കി സുഭാഷ് എന്നിവരും ചേർന്നാണ് പ്രതികളെ പിടികുടിയത്.

തെരഞ്ഞെടുപ്പുകമ്മീഷന് നിഷ്പക്ഷതയില്ലെന്ന് തെളിഞ്ഞു: വി.എം. സുധീരൻ

കായംകുളം: ജനാധിപത്യ ഭരണസംവിധാനത്തിൽ തെരഞ്ഞെടുപ്പ് കമ്മീഷനെപ്പോലുള്ള ഭരണഘടനാ സ്ഥാപനങ്ങൾ നിഷ്പക്ഷത പുലർത്താത്തതിന്‍റെ പ്രകടമായ ഉദാഹരണമാണ് രാജ്യത്താകമാനം വോട്ടർ പട്ടികയിൽനടന്ന ക്രമക്കേടുകളെന്നും ഇതോടെ തെരഞ്ഞെടുപ്പ് കമ്മീഷന് നിക്ഷപക്ഷതയില്ലെന്ന് തെളിഞ്ഞെന്നും കെപിസിസി മുൻ പ്രസിഡന്‍റ് വി.എം. സുധീരൻ. കായംകുളത്ത് കോൺഗ്രസ് നേതാവ് അഡ്വ. പി.എസ്. ബാബുരാജിന്‍റെ ഒന്നാം ചരമവാർഷിക ദിനത്തിൽ സംഘടിപ്പിച്ച അനുസ്മരണ യോഗം ഉദ്‌ഘാടനം ചെയ്യുകയായിരുന്നു അദ്ദേഹം. തെരഞ്ഞെടുപ്പ് പ്രവർത്തനങ്ങളിൽ ഉൾപ്പെടെ വിശ്രമമില്ലാതെ പ്രവർത്തിച്ച ആത്മാർഥതയുള്ള നേതാവായിരുന്നു ബാബുരാജെന്ന് അനുസ്മരണ പ്രഭാഷണത്തിൽ മുൻ യുഡിഎഫ് കൺവീനർ എം.എം. ഹസൻ അനുസ്മരിച്ചു. സൗത്ത് ബ്ലോക്ക് പ്രസിഡന്‍റ് ചിറപ്പുറത്ത് മുരളി അധ്യക്ഷത വഹിച്ചു. ടി. സൈനുലാബ്‌ദീൻ, അഡ്വ. ജോൺസൺ ഏബ്രഹാം, കെപിസിസി ജനറൽ സെക്രട്ടറി ടി. ശരത്ചന്ദ്ര പ്രസാദ് തുടങ്ങിയവർ പ്രസംഗിച്ചു.

പള്ളിപ്പുറംപള്ളി തിരുനാളിന് നാളെ കൊടിയേറും

ചേര്‍ത്തല: ചരിത്രപ്രസിദ്ധ മരിയൻ-ചാവറ തീർഥാടന കേന്ദ്രമായ പള്ളിപ്പുറം സെന്‍റ് മേരീസ് ഫൊറോന പള്ളിയില്‍ പരിശുദ്ധ ദൈവമാതാവിന്‍റെ സ്വർഗാരോപണ കൊംബ്രേരിയ ജൂബിലി തിരുനാളിന്‍റെ ഭാഗമായി ഇന്ന് വിശുദ്ധ ചാവറ കുര്യാക്കോസ് ഏലിയാസ് അനുസ്മരണം നടക്കും. ഇന്നു രാവിലെ 5.45 നും ഏഴിനും 9.30 നും വിശുദ്ധ കുർബാന. വൈകുന്നേരം അഞ്ചിന് ജപമാല, ആഘോഷമായ പാട്ടുകുർബാന, ലദീഞ്ഞ്, നൊവേന, വാഴ്‌വ്- ഫാ. ജയിംസ് കുന്തറ സിഎംഐ, ഫാ. ജയിംസ് പുതുശേരി സിഎംഐ, ഫാ.ആന്‍റോ മംഗലശേരി സിഎംഐ. വിശുദ്ധ ചാവറ കുര്യാക്കോസ് ഏലിയാസച്ചന്‍റെ പാദമുദ്ര പതിഞ്ഞതും വിശുദ്ധന്‍റെ പുണ്യസ്മരണകളാൽ ദീപ്തവുമാണ് പള്ളിപ്പുറം പള്ളിയും പരിസരവും. വിശുദ്ധ കുര്യാക്കോസ് ഏലിയാസച്ചന്‍ വൈദിക വിദ്യാർഥിയായിരുന്നതും വികാരിയായിരുന്നതും പള്ളിപ്പുറം പള്ളിയിൽ മാത്രമാണ്. അദ്ദേഹത്തിന്‍റെ പൗരോഹിത്യ രൂപീകരണത്തിലേക്കും വിശുദ്ധ പദവിയിലേക്കുള്ള ഉയർത്തപ്പെടലിനും പള്ളിപ്പുറത്തിന്‍റെ സംഭാവന വളരെ വലുതാണ്. ആത്മീയ ഗുരുവായ പാലയ്ക്കൽ തോമ്മാ മൽപ്പാനും വിശുദ്ധനും ചേർന്ന് ആഗോള സഭയ്ക്ക് അഭിമാനമായിട്ടുള്ള സിഎംഐ സഭയുടെ സ്ഥാപനത്തിലേക്കുള്ള വഴിതെളിച്ചതും സിഎംഐ സഭയുടെ മാന്നാനം ആശ്രമം സ്ഥാപിക്കുന്നതിനുവേണ്ടി നിയമിതനായതും പള്ളിപ്പുറത്ത് വികാരിയായിരുന്ന കാലയളവിലാണ്. റോക്കോസ് ശീശ്മയെന്ന തെറ്റായ പഠിപ്പിക്കലിനെ സത്യവിശ്വാസ പ്രബോധനങ്ങളാൽ എതിരിടാൻ മധ്യതിരുവിതാംകൂറിൽ മഹായോഗം വിളിച്ചുകൂട്ടിയ പ്രദേശം പള്ളിപ്പുറം ആയിരുന്നു. വിശുദ്ധൻ വികാരിയായിരുന്ന കാലയളവിൽ ഉണ്ടായിരുന്ന പള്ളിമേടയും പരിസരവും ഇന്നും അങ്ങനെതന്നെ കാത്തുസൂക്ഷിച്ചുപോരുന്നു. വിശുദ്ധ കുര്യാക്കോസ് ഏലിയാസ് അച്ചന്‍റെ തിരുശേഷിപ്പ് സൂക്ഷിച്ചിരിക്കുന്ന അൾത്താര, അദ്ദേഹം ദിവ്യബലി അർപ്പിച്ചിരുന്ന അൾ‍ത്താര എന്നിവ അതിവിശുദ്ധമായി ഇപ്പോഴും കാത്തുസൂക്ഷിച്ചുപോരുന്നു. വിശുദ്ധൻ പള്ളിപ്പുറത്ത് ഉണ്ടായിരുന്ന കാലയളവിൽ ഉപയോഗിച്ചിരുന്ന ഒറ്റക്കല്ലിൽ തീർത്ത മാമോദീസാത്തൊട്ടി, കിണർ എന്നിവ ഇവിടെ ഇന്നും കാണാം. എല്ലാ വർഷവും ജനുവരിയിലെ ആദ്യ ഞായറാഴ്ച വിശുദ്ധ ചാവറ കുര്യാക്കോസ് ഏലിയാസ് പിതാവിന്‍റെ തിരുനാളും, ജനുവരി 16ന് വിശുദ്ധന്‍റെ ആത്മീയ ഗുരുവായിരുന്ന പാലയ്ക്കൽ തോമ്മാ മൽപാന്‍റെ അനുസ്മരണവും ആഘോഷമായ വിശുദ്ധ കുർബാനയും നടത്തുന്നു.

കണ്ടെയ്നറിൽ ഉടക്കി വല നശിച്ചു

അമ്പലപ്പുഴ: കണ്ടെയ്നറിൽ ഉടക്കി വീണ്ടും മത്സ്യബന്ധന വല നശിച്ചു. ലക്ഷങ്ങളുടെ നഷ്ടം. മുപ്പതോളം തൊഴിലാളികളുടെ ഉപജീവന മാർഗം ഇല്ലാതായി. അമ്പലപ്പുഴ കോമന പുതുവൽ സുബിൻ ഷാജിയുടെ അനുഗ്രഹ എന്ന ഓടുവള്ളത്തിന്‍റെ വലയും വെയിറ്റുമാണ് കണ്ടെയ്നറിൽ ഉടക്കി നശിച്ചത്. മത്സ്യബന്ധനത്തിനിടെ തോട്ടപ്പള്ളി തീരക്കടലിൽ കണ്ടെയ്നറിന്‍റെ ഡോറിലുടക്കിയാണ് വല നശിച്ചതെന്ന് തൊഴിലാളികൾ പറയുന്നു. തങ്ങളുടെ ശ്രമഫലമായാണ് വള്ളം മറിയാതിരുന്നതെന്ന് തൊഴിലാളികൾ പറഞ്ഞു. വലയും വെയിറ്റും തകർന്നയിനത്തിൽ ഏകദേശം ഒരു ലക്ഷം രൂപയുടെ നഷ്ടം കണക്കാക്കുന്നു. ഇനി ഒരാഴ്ചയോളം ജോലി ചെയ്താൽ മാത്രമേ വല പൂർവസ്ഥിതിയിലാക്കാൻ കഴിയൂ. ഇതോടെ തൊഴിലാളികളുടെ ഉപജീവനമാർഗവും നിലച്ചു. ഏതാനും ദിവസം മുൻപ് ഇതേ സ്ഥലത്തു തന്നെ മറ്റൊരു വള്ളത്തിന്‍റെ മത്സ്യബന്ധന വല തകർന്നിരുന്നു. കപ്പലപകടത്തിനു ശേഷം കടലിൽ കിടക്കുന്ന കണ്ടെയ്നറിൽ ഉടക്കി മത്സ്യ ബന്ധനവല നശിക്കുന്നത് പതിവായിരിക്കുകയാണ്.

കഞ്ചാവുമായി യുവാവ് പിടിയിൽ

തുറവൂർ: ഓണം സ്പെഷൽ ഡ്രൈവിനോടനുബന്ധിച്ച് എക്‌സൈസ് നടത്തിയ പരിശോധനയിൽ ഒരാൾ പിടിയിൽ. ആലുവ സ്വദേശിയായ ഗോവർധൻ കെ. ഗോപി(46)യാണ് പിടിയിലായത്. ഇന്നലെ തുറവൂർ ഭാഗത്ത് നടത്തിയ പരിശോധനയിലാണ് 3.2 കിലോഗ്രാം കഞ്ചാവുമായി ഇയാൾ പിടിയിലായത്. ചേർത്തല എക്സൈസ് സർക്കിൾ ഓഫീസിലെ സർക്കിൾ ഇൻസ്പെക്ടർ സി.എസ്.സുനിൽകുമാറിന്‍റെ നേതൃത്വത്തിൽ നടന്ന പരിശോധനയിൽ എക്സൈസ് സർക്കിൾ ഓഫീസിലെ ഇൻസ്പെക്ടർ എൻ. ബാബു, അസിസ്റ്റന്‍റ് എക്സൈസ് ഇൻസ്പെക്ടർമാരായ ജി. ജയകുമാർ, എൻ. പ്രസന്നൻ, സജിമോൻ കെ പി, വിജയകുമാർ.പി, പ്രിവന്‍റ് ഓഫീസർ എച്ച്. മുസ്തഫ, സിവിൽ എക്സൈസ് ഓഫീസർ ജിനു. എസ്, വികാസ്. വി. ആർ, വനിതാ സിവിൽ എക്സൈസ് ഓഫീസർ അശ്വതി പരമേശ്വരൻ, ഡ്രൈവർ ബെൻസി വി.എസ് എന്നിവർ പങ്കെടുത്തു.

നീരേറ്റുപുറം തിരുവോണ ജലമേളയുടെ പാരമ്പര്യം നിലനിര്‍ത്തണം: സജി ചെറിയാന്‍

എടത്വ: ജനകീയ ട്രോഫിക്കു വേണ്ടി നീരേറ്റുപുറം പമ്പാ വാട്ടര്‍ സ്റ്റേഡിയത്തില്‍ നടത്തുന്ന തിരുവോണ ജലോത്സവം അതിന്‍റെ തനിമയും പാരമ്പര്യവും നിലനിര്‍ത്തണമെന്ന് മന്ത്രി സജി ചെറിയാന്‍. സെപ്റ്റംബര്‍ അഞ്ചിനു നടക്കുന്ന ജലോത്സവത്തിന്‍റെ ലോഗോ പ്രകാശനം ചെയ്തു പ്രസംഗിക്കുകയായിരുന്നു അദ്ദേഹം. ചെയര്‍മാന്‍ റെജി ഏബ്രഹാം അധ്യക്ഷത വഹിച്ചു. വൈസ് ചെയര്‍മാന്‍മാരായ സഖറിയാ കരുവേലി, സജി അലക്‌സ്, എ.വി. കുര്യന്‍, ജനറല്‍ സെക്രട്ടറി പ്രകാശ് പനവേലി തുടങ്ങിയവർ പ്രസംഗിച്ചു.

ഭിന്നശേഷിക്കാരിയെ പീഡിപ്പിച്ച യുവാവ് അറസ്റ്റില്‍

ഹരിപ്പാട്: ഭിന്നശേഷിക്കാരിയായ പെൺകുട്ടിയെ പീഡിപ്പിച്ച പ്രതി പോക്സോ കേസിൽ അറസ്റ്റിൽ.കുമാരപുരം എരിക്കാവ് കവണാട്ടുശേരി വീട്ടിൽ വിനോദി (43)നെയാ ണ് തൃക്കുന്നപ്പുഴ പോലീസ് പിടികൂടിയത്. പ്ലസ് വണ്ണിനു പഠിക്കുന്ന ഭിന്നശേഷിക്കാരിയായ പെൺകുട്ടിയെ ആണ് ഇയാൾ പീഡിപ്പിച്ചത്. മാവേലിക്കര കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

വളര്‍ത്തുനായ്ക്കളെ വിഷം നല്‍കി കൊന്നതായി പരാതി

ചേര്‍ത്തല: നാലു വളര്‍ത്തുനായ്ക്കളെ അയല്‍വാസി വിഷം നല്‍കി കൊന്നതായി പരാതി. കളവംകോടം കൊല്ലപ്പളളി പുതുമനച്ചിറ വിജയമ്മയുടെ നായ്ക്ക ളാണ് കഴിഞ്ഞ ദിവസം രാത്രി ചത്തത്. വീട്ടുവളപ്പില്‍നിന്നു പുറത്തുവിടാതെ വളര്‍ത്തിയ പട്ടികളെയാണ് കൊന്നതെന്നു കാട്ടി വിജയമ്മ ചേര്‍ത്തല പോലീസിലും ജില്ലാ പോലീസ് മേധാവിക്കും പരാതി നല്‍കി.

നേത്രചികിത്സാ ക്യാമ്പും സൈനികരെ ആദരിക്കലും

തുറവൂർ: സ്വാതന്ത്ര്യദിന ആഘോഷങ്ങളോടനുബന്ധിച്ച് പള്ളിത്തോട് മഴവിൽ എസ്എച്ച്ജി, അർത്തുങ്കൽ കോസ്റ്റൽ പോലീസ്, ചൈതന്യ ഐ ഹോസ്പറ്റൽ എന്നിവയുടെ ആഭിമുഖ്യത്തിൽ സൗജന്യ നേത്രചികിത്സാ ക്യാമ്പും വിരമിച്ച സൈനികരെ ആദരിക്കലും ഇന്നു നടക്കും. പള്ളിത്തോട് വാലയിൽ ഹാളിൽ നടക്കുന്ന ആദരിക്കലും ക്യാമ്പും പട്ടണക്കാട് ബ്ലോക്ക് പഞ്ചായത്ത് പ്രസിഡന്‍റ് മേരി ടെൽഷ്യ ഉദ്ഘാടനം ചെയ്യും. തുറവൂർ പഞ്ചായത്ത് പ്രസിഡന്‍റ് മോളി രാജേന്ദ്രൻ സൈനികരെ ആദരിക്കും. രാവിലെ 9 മുതൽ ഉച്ചയ്ക്ക് ഒന്നര വരെയാണ് സൗജന്യ നേത്രചികിത്സാ ക്യാമ്പ്.

ഹാര്‍ബറില്‍ കയറണമെങ്കില്‍ പത്തു രൂപ അടയ്ക്കണം

അമ്പലപ്പുഴ: ഹാര്‍ബറില്‍ കയറണമെങ്കില്‍ പത്തു രൂപ അടയ്ക്കണം. തോട്ടപ്പള്ളി ഹാര്‍ബറിലാണ് നാട്ടുകാര്‍ക്കുപോലും അകത്ത് കയറണമെങ്കില്‍ പാസ് എടുക്കേണ്ടിവരുന്നത്. തുറമുഖവകുപ്പാണ് ഹാര്‍ബറിന്‍റെ നിയന്ത്രണത്തിനായി കരാര്‍ നല്‍കിയിട്ടുള്ളത്. ചില വ്യക്തികളാണ് ഹാര്‍ബറിന്‍റെ കരാര്‍ ഏറ്റെടുത്തിരിക്കുന്നത്. ഇവരാണ് നടന്ന് ഹാര്‍ബറില്‍ കയറാന്‍ 10 രൂപ ഈടാക്കുന്നത്. ഒരു തവണ അകത്ത് കയറി പുറത്തിറങ്ങിയശേഷം രണ്ടാമത് കയറിയാലും 10 രൂപ നല്‍കേണ്ട അവസ്ഥയാണ്. മറ്റൊരു ഹാര്‍ബറിലും ഇല്ലാത്ത നിയമമാണ് തോട്ടപ്പള്ളിയിലേതെന്ന ആരോപണമുണ്ട്.

പൂങ്കാവ് പള്ളിയിൽ തിരുനാളും ഇടവകദിനവും

ആലപ്പുഴ: സുപ്രസിദ്ധ തീർഥാടന കേന്ദ്രമായ പൂങ്കാവ് പള്ളിയിൽ സ്വർഗ്ഗാരോപിത മാതാവിന്‍റെ തിരുനാളും ഇടവക ദിനവും നാളെ മുതൽ 15 വരെ ആഘോഷിക്കും. നാളെ രാവിലെ 6 നും 7നും ദിവ്യബലി. വൈകുന്നേരം 6ന് പ്രസുദേന്തി സ്വീകരണം. തുടർന്ന് വികാരി ഫാ. സേവ്യർ ചിറമേൽ കൊടിയേറ്റും. ഫാ. അലൻ അഗസ്റ്റിൻ പുന്നയ്ക്കൽ ദിവ്യബലിയർപ്പിക്കും. വചനപ്രഘോഷണം അലക്സാണ്ടർ കൊച്ചീക്കാരൻവീട്. 12നു രാവിലെ 6 നും 7 നും ദിവ്യബലി. വൈകുന്നേരം 6 ന് ജപമാല, ദിവ്യബലി: ഫാ. നിക്സൺ തോലാട്ട് . വചനപ്രഘോഷണം: ഫാ. ലോബോ ലോറൻസ്. വാഴ്്ച ദിനമായ ബുധനാഴ്ച വൈകുന്നേരം 6.30ന് വരും വർഷത്തിലേക്കുള്ള പ്രസുദേന്തിമാരുടെ സ്വീകരണം സെന്‍റ് ആന്‍റണീസ് കപ്പോളയിൽ . തുടർന്ന് ദിവ്യബലി: ഫാ. ജോഷി തളിയശേരി. വചനപ്രഘോഷണം: ഫാ.പോൾ.ജെ. അറയ്ക്കൽ. വേസ്പര ദിനത്തിൽ രാവിലെ 6 നും 7 നും ദിവ്യബലി വൈകുന്നേരം 6ന് ജപമാല, ദിവ്യബലി: ഫാ. പ്രിൻസ് പുത്തൻ ചക്കാലയ്ക്കൽ. വചനപ്രഘോഷണം: ഫാ.സെബാസ്റ്റ്യൻ ശാസ്താംപറമ്പിൽ. തിരുനാൾ ദിനമായ വെള്ളിയാഴ്ച രാവിലെ 5.30 തിനും 7നും ദിവ്യബലി. വൈകുന്നേരം 4.30ന് ആഘോഷമായ തിരുനാൾ ദിവ്യബലി: ഫാ.ജോബിൻ മാത്യു വലിയവീട്. സന്ദേശം: ഫാ.സെബാസ്‌റ്റ്യൻ കുറ്റിവീട്ടിൽ. തുടർന്ന് പ്രദക്ഷിണം, സ്നേഹവിരുന്ന്, കലാപരിപാടികൾ.

ബൈക്കപകടത്തില്‍ യുവാവ് മരിച്ചു

എടത്വ: ബൈക്കപകടത്തില്‍ ചികിത്സയിലിരുന്ന യുവാവ് മരിച്ചു. എടത്വ പാണ്ടങ്കരി വടക്കേപ്പറമ്പില്‍ ശങ്കരമംഗലത്ത് രമേശ് എം. നായര്‍ (47) ആണ് മരിച്ചത്. തിരുവല്ല മുത്തൂറ്റ് പെട്രോള്‍ പമ്പ് ജീവനക്കാരനായ രമേശന്‍ വീട്ടിലേയ്ക്ക് മടങ്ങുന്നവഴി വ്യാഴാഴ്ച വൈകിട്ട് 6.30ന് എടത്വ-തിരുവല്ല സംസ്ഥാന പാതയില്‍ പൊടിയാടി ഉണ്ടപ്ലാവിന് സമീപത്താണ് അപകടം. അപകടത്തില്‍ ഗുരുതരമായി പരിക്കേറ്റ രമേശിനെ കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചെങ്കിലും ഇന്നലെ രാവിലെ മരണം സംഭവിക്കുകയായിരുന്നു. പോലീസ് മേല്‍നടപടി സ്വീകരിച്ചു. സംസ്‌കാരം നാളെ കുടുംബവീടായ തലവടി വെള്ളക്കിണര്‍ ശിവപ്രിയയില്‍ നടക്കും. ഭാര്യ: രശ്മി. മക്കള്‍: അഖിലേഷ് (എടത്വ സെന്‍റ് അലോഷ്യസ് കോളജ് വിദ്യാര്‍ഥി), അഭിഷേക് (എടത്വ സെന്‍റ് അലോഷ്യസ് ഹൈസ്‌കൂള്‍ വിദ്യാര്‍ഥി), ആതിര (എടത്വ സെന്‍റ് മേരീസ് എല്‍പി സ്‌കൂള്‍ വിദ്യാര്‍ഥി).

ദ്വിദിന അന്താരാഷ്‌ട്ര സെമിനാര്‍

ആലപ്പുഴ: ആധുനിക മനുഷ്യന്‍റെ മാനസികാരോഗ്യനിലയെക്കുറിച്ചും അതിന്‍റെ പ്രാധാന്യത്തെക്കുറിച്ചും ആലപ്പുഴ സെന്‍റ് ജോസഫ്‌സ് കോളജ് ഫോര്‍ വിമന്‍ ഇംഗ്ലീഷ് വിഭാഗം ദ്വിദിന അന്താരാഷ്‌ട്ര സെമിനാറിന് തുടക്കം കുറിച്ചു. യുകെയിലെ ഡി മോണ്‍ഫോര്‍ട്ട് യൂണിവേഴ്‌സിറ്റിയിലെ പ്രഫ. രഘു രാഘവന്‍ യുവജനങ്ങളുടെ മാനസികാരോഗ്യ പരിപാലനത്തെക്കുറിച്ച് മുഖ്യപ്രഭാഷണം നടത്തി. കോളജ് മാനേജര്‍ സിസ്റ്റര്‍ ഗെര്‍ട്രൂഡ് മൈക്കല്‍, പ്രിന്‍സിപ്പല്‍ ഡോ. സിസ്റ്റര്‍ എ.എ. ഉഷ എന്നിവര്‍ മുഖ്യപ്രഭാഷകനോടൊപ്പം സെമിനാര്‍ ഉദ്ഘാടനം ചെയ്തു. 70 പ്രബന്ധാവതരണങ്ങള്‍ ഓണ്‍ലൈനായും ഓഫ് ലൈനായും നടത്തി.

വിദ്യാരംഗം കലാസാഹിത്യവേദി പ്രവര്‍ത്തനോദ്ഘാടനം

എടത്വ: തലവടി ഉപജില്ലാ വിദ്യാരംഗം കലാസാഹിത്യവേദിയുടെ പ്രവര്‍ത്തനോദ്ഘാടനവും നാടന്‍പാട്ട് ശില്പശാലയും, ഭാഷാ സാഹിത്യ സെമിനാറും നടന്നു. വീയപുരം ഗവ. എച്ച്എസ്എസ് പ്രിന്‍സിപ്പൽ ഗോപകുമാര്‍ പാര്‍ഥസാരഥി ഉദ്ഘാടനം ചെയ്തു. തകഴി പഞ്ചായത്ത് പ്രസിഡന്‍റ് എസ്. അജയകുമാര്‍ അധ്യക്ഷത വഹിച്ചു. മുന്‍ തലവടി എഇഒ കെ. സന്തോഷ് മുഖ്യപ്രഭാഷണം നടത്തി. വാര്‍ഡ് മെംബര്‍ മിനി സുരേഷ്, തലവടി എഇഒ അശോകന്‍, എസ്‌ടിഎസ്എസ് ഗവ. യുപി സ്‌കൂള്‍ പ്രധാനാധ്യാപിക ഗീതാകുമാരി, എസ്എംസി ചെയര്‍പേഴ്‌സണ്‍ രശ്മി, പി. പ്രസീത, എസ്.ആര്‍. ശരണ്‍ എന്നിവര്‍ പ്രസംഗിച്ചു.

വൈഎംസിഎയില്‍ ബാസ്‌കറ്റ്‌ ബോള്‍ ടൂര്‍ണമെന്‍റ് ആരംഭിച്ചു

ആലപ്പുഴ: രണ്ടാമത് സ്റ്റാഗ് ഗ്ലോബല്‍ - കരിക്കംപള്ളില്‍ അഡ്വ. കെ.ടി. മത്തായി മെമ്മോറിയല്‍ ഓള്‍ കേരള ഇന്‍വിറ്റേഷന്‍ ഇന്‍റര്‍ സ്‌കൂള്‍ ബാസ്‌കറ്റ്‌ ബോള്‍ ടൂര്‍ണമെന്‍റ് ആരംഭിച്ചു. ആലപ്പുഴ വൈഎംസിഎ ഇന്‍ഡോര്‍ ഫ്ലഡ്‌ലിറ്റ് ബാസ്‌കറ്റ്‌ ബോള്‍ കോംപ്ലക്‌സില്‍ കേരള ബാസ്‌കറ്റ്‌ബോള്‍ അസോസിയേഷന്‍ (കെബിഎ) പ്രസിഡന്‍റ് ജേക്കബ് ജോസഫ് ഉദ്ഘാടനം നിര്‍വഹിച്ചു. ആദ്യമത്സരത്തില്‍ മുനിസിപ്പല്‍ ചെയര്‍പേഴ്‌സണ്‍ കെ.കെ. ജയമ്മ മുഖ്യാതിഥിയായിരുന്നു. പ്രസിഡന്‍റ് മൈക്കിള്‍ മത്തായി അധ്യക്ഷത വഹിച്ചു. വൈഎംസിഎ സ്‌പോര്‍ട്‌സ് ഡയറക്ടര്‍മാരായ ജോണ്‍ ജോര്‍ജ്, സുനില്‍ മാത്യു ഏബ്രഹാം, ഡയറക്ടര്‍ ബൈജു ജേക്കബ്, മുന്‍ പ്രസിഡന്‍റ് ഡോ. പി. കുരിയപ്പന്‍ വര്‍ഗീസ്, ജനറല്‍ സെക്രട്ടറി ഏബ്രഹാം കുരുവിള, എഡിബിഎ പ്രസിഡന്‍റ് റോണി മാത്യു, പിആര്‍ഒ തോമസ് മത്തായി കരിക്കംപള്ളില്‍, എക്‌സിക്യൂട്ടീവ് മെംബര്‍ ജോസ് സേവ്യര്‍ തുടങ്ങിയവര്‍ പങ്കെടുത്തു. ഫൈനല്‍ മത്സരങ്ങള്‍ നാളെ നടത്തും. ലഹരിമരുന്നിനെതിരേ കായികലഹരിയെ പ്രോത്സാഹിപ്പിക്കാന്‍ കൂടിയാണു "പഠിക്കാം, കളിക്കാം, സൗഹൃദം പങ്കിടാം' എന്ന ലക്ഷ്യത്തോടെ ടൂര്‍ണമെന്‍റ് സംഘടിപ്പിക്കുന്നത്. മത്സരഫലങ്ങള്‍: രണ്ടാമത് സ്റ്റാഗ് ഗ്ലോബല്‍ - കരിക്കംപള്ളില്‍ അഡ്വ. കെ.ടി. മത്തായി മെമ്മോറിയല്‍ ഓള്‍ കേരള ഇന്‍വിറ്റേഷന്‍ ഇന്‍റര്‍ സ്‌കൂള്‍ ബാസ്‌കറ്റ്‌ബോള്‍ ടൂര്‍ണമെന്‍റ് ആദ്യദിനത്തില്‍ ആണ്‍കുട്ടികളുടെ വിഭാഗത്തില്‍ കോട്ടയം ഗിരിദീപം ബഥനി, കൊരട്ടി ലിറ്റില്‍ ഫ്ളവര്‍ കോണ്‍വെന്‍റിനെ തോല്‍പ്പിച്ചു (സ്‌കോര്‍ 72-65). പെണ്‍കുട്ടികളില്‍ എറണാകുളം സെന്‍റ് തെരേസാസ് പത്തനാപുരം മൗണ്ട് താബോറിനെ പരാജയപ്പെടുത്തി (35-24).

വൈദികരെയും കന്യാസ്ത്രീകളെയും ആക്രമിച്ചതില്‍ പ്രതിഷേധിച്ചു

ആലപ്പുഴ: വൈദികരെയും കന്യാസ്ത്രികളെയും ആക്രമിച്ചതില്‍ ആലപ്പുഴ രൂപതാധ്യക്ഷന്‍ പ്രതിഷേധിച്ചു. ഒഡീഷയിലെ ജലേശ്വര്‍ സെന്‍റ് തോമസ് ഇടവക വികാരി ഫാ. ലിജോ ജോര്‍ജ് നിരപ്പേലിനെയും ജോഡ ഇടവക വികാരി ഫാ. ജോജോയെയും സിസ്റ്റര്‍ എലേസാ, സിസ്റ്റര്‍ മോളി എന്നിവരെയും ഹിന്ദു തീവ്രവാദ പ്രവര്‍ത്തകര്‍ വഴിയില്‍ തടഞ്ഞ് ഉപദ്രവിച്ചത് നിയമവിരുദ്ധവും ഭരണഘനാ വിരുദ്ധവും ക്രിമിനല്‍ കുറ്റവുമാണെന്ന് ബിഷപ് പറഞ്ഞു. സിസ്റ്റേഴ്‌സ് രണ്ടുപേരും ആലപ്പുഴ രൂപതയിലെ വിസിറ്റേഷന്‍ സഭാംഗങ്ങളാണ്. ഗ്രാമത്തില്‍ ക്രൈസ്തവരായ പരേതരുടെ ആത്മശാന്തിക്കായി കുര്‍ബാനയ്‌ക്കെത്തിയവരാണ് വൈദികരും സിസ്റ്റേഴ്‌സും. തിരുക്കര്‍മങ്ങള്‍ക്കുശേഷം തിരിച്ചുപോകുംവഴി എഴുപതോളംപേര്‍ കൂട്ടമായി വഴി തടയുകയും അസഭ്യം പറയുകയും മര്‍ദിക്കുകയും ചെയ്തു. അച്ചന്മാരുടെയും കന്യാസ്ത്രികളുടെയും കൈയിലുണ്ടായിരുന്ന വിശുദ്ധഗ്രന്ഥങ്ങള്‍ വാങ്ങി പുഴയിലെറിഞ്ഞത് ഹൃദയവേദനയോടെയാണു കേട്ടത്. ഇപ്പോള്‍ ഇവിടെ ഞങ്ങളാണു ഭരിക്കുന്നതെന്നും ക്രിസ്ത്യാനികള്‍ രാജ്യം വിടണമെന്നും ആക്രോശിക്കുന്നുണ്ടായിരുന്നു. ഛത്തീസ്ഗഡിലെ ദുര്‍ഗില്‍ കഴിഞ്ഞ മാസം 25-ന് ബജ്‌രംഗ്ദള്‍ പ്രവര്‍ത്തകര്‍ രണ്ടു മലയാളി കന്യാസത്രികളെ തടഞ്ഞുവച്ചതും അധിക്ഷേപിച്ചതും 9 ദിവസത്തോളം ജയിലിലടച്ചതും ഇതോടു ചേര്‍ത്തു വായിക്കേണ്ടതാണ്. ഭാരതത്തിന്‍റെ സാംസ്‌കാരിക പാരമ്പര്യത്തിനും മഹോന്നതമായ ദാര്‍ശനിക പൈതൃകത്തിനും കളങ്കം ചാര്‍ത്തുന്നതാണ് ഇത്തരം നടപടികള്‍. ഭരണഘടനയിലെ 25-ാം വകുപ്പു പ്രകാരം നല്‍കപ്പെട്ടിരിക്കുന്ന മതസ്വാന്ത്യത്തിന്മേലുള്ള കടന്നുകയറ്റമാണ്. കുറ്റക്കാര്‍ക്കെതിരേ കേസെടുക്കുകയും മേലില്‍ ഇത്തരം പ്രവര്‍ത്തനങ്ങള്‍ ഉണ്ടാകാതിരിക്കാന്‍ നടപടി എടുക്കുകയും ചെയ്യണമെന്ന് ബിഷപ് ആവശ്യപ്പെട്ടതായി രൂപത പിആര്‍ഒ ഫാ. സേവ്യര്‍ കുടിയാംശേരി പറഞ്ഞു.

വഞ്ചിപ്പാട്ട് മത്സരം രജിസ്റ്റര്‍ ചെയ്യാം

ആലപ്പുഴ: 30 ന് പുന്നമടക്കായലില്‍ നടക്കുന്ന 71-ാമത് നെഹ്‌റു ട്രോഫി വള്ളംകളിക്ക് മുന്നോടിയായുള്ള വഞ്ചിപ്പാട്ട് മത്സരത്തില്‍ പങ്കെടുക്കാന്‍ താത്പര്യമുള്ള മത്സരാര്‍ഥികള്‍ക്കുള്ള രജിസ്‌ട്രേഷന്‍ ആരംഭിക്കുന്നു. 12 മുതല്‍ 22 വരെ പേര് രജിസ്റ്റര്‍ ചെയ്യാം. വിദ്യാര്‍ഥി/വിദ്യാര്‍ഥിനി വിഭാഗത്തില്‍ ജൂണിയര്‍, സീനിയര്‍ വിഭാഗങ്ങളായി കുട്ടനാട് ശൈലിയിലും പുരുഷ - സ്ത്രീ വിഭാഗങ്ങളില്‍ കുട്ടനാട് ശൈലി, വെച്ചുപാട്ട് എന്നീ ഇനങ്ങളിലും ആറന്മുള ശൈലിയില്‍ പുരുഷന്മാര്‍ക്ക് മാത്രമായിട്ടുമാണ് മത്സരം. ആദ്യമെത്തുന്ന 50 ടീമംഗങ്ങളെ മാത്രമേ മത്സരത്തില്‍ പങ്കെടുപ്പിക്കുകയുള്ളൂ. മത്സരാര്‍ഥികള്‍ക്ക് ആലപ്പുഴ ബോട്ടുജെട്ടിക്ക് എതിര്‍വശമുള്ള മിനി സിവില്‍സ്റ്റേഷന്‍ അനക്സ് രണ്ടാം നിലയിലെ ഇറിഗേഷന്‍ ഡിവിഷന്‍ എക്സിക്യൂട്ടീവ് എന്‍ജിനിയറുടെ കാര്യാലത്തില്‍ രജിസ്റ്റര്‍ ചെയ്യാം. ഫോണ്‍: 0477 2252212. വിധികര്‍ത്താക്കളെ ക്ഷണിച്ചു ആലപ്പുഴ: പുന്നമടക്കായലില്‍ 30നു നടക്കുന്ന 71-ാമത് നെഹ്‌റു ട്രോഫി വള്ളംകളിക്ക് മുന്നോടിയായുള്ള വഞ്ചിപ്പാട്ട് മത്സരത്തില്‍ വിധികര്‍ത്താവാകാന്‍ താത്പര്യമുള്ളവരില്‍നിന്ന് ബയോഡേറ്റ സഹിതം അപേക്ഷ ക്ഷണിച്ചു. അപേക്ഷകര്‍ യൂണിവേഴ്സിറ്റി തലത്തിലും സ്‌കൂള്‍ തലത്തിലും വഞ്ചിപ്പാട്ട് വിധികര്‍ത്താവായി പ്രവര്‍ത്തിച്ച് പരിചയമുള്ളവരായിരിക്കണം. താത്പര്യമുള്ളവര്‍ 22ന് മുന്‍പ് ആലപ്പുഴ ബോട്ടുജെട്ടിക്ക് എതിര്‍ വശത്തുള്ള മിനി സിവില്‍സ്റ്റേഷന്‍ അനക്സ് രണ്ടാം നിലയിലെ ഇറിഗേഷന്‍ ഡിവിഷന്‍ എക്സിക്യൂട്ടീവ് എന്‍ജിനിയറുടെ കാര്യാലയത്തില്‍ തപാല്‍ മുഖേനയോ, ഇ -മെയില്‍ മുഖേനെയോ, നേരിട്ടോ എത്തിക്കണമെന്ന് ഇറിഗേഷന്‍ ഡിവിഷന്‍ എക്സിക്യൂട്ടീവ് എൻജിനിയറും എന്‍ടിബിആര്‍ ഇന്‍ഫ്രാസ്‌ട്രക്ചര്‍ കമ്മിറ്റി കണ്‍വീനറുമായ പി.എസ്. വിനോദ് അറിയിച്ചു. ഫോണ്‍: 0477 2252212. ഓഫീസ് തുറന്നു ആലപ്പുഴ: ഓഗസ്റ്റ് 30ന് പുന്നമടക്കായലില്‍ നടക്കുന്ന 71-ാമത് നെഹ്‌റു ട്രോഫി വള്ളംകളിയുടെ ഓഫീസ് ആലപ്പുഴ റവന്യു ഡിവിഷണല്‍ ഓഫീസില്‍ പി.പി. ചിത്തരഞ്ജന്‍ എംഎല്‍എ ഉദ്ഘാടനം ചെയ്തു. ചടങ്ങില്‍ നെഹ്‌റു ട്രോഫി ബോട്ട് റേസ് സൊസൈറ്റി സെക്രട്ടറിയായ സബ് കളക്ടര്‍ സമീര്‍ കിഷന്‍ അധ്യക്ഷനായി. നഗരസഭാ സ്ഥിരംസമിതി അധ്യക്ഷന്‍ എം.ആര്‍. പ്രേം, എന്‍ടിബിആര്‍ എക്സിക്യൂട്ടീവ് കമ്മിറ്റി അംഗങ്ങളായ എസ്.എം. ഇക്ബാല്‍, എ.എന്‍. പുരം ശിവകുമാര്‍, എം.വി. ഹല്‍ത്താഫ്, ജേക്കബ് ജോണ്‍, റോയി പി. തീയോച്ചന്‍, ബേബി കുമാരന്‍, ആലപ്പുഴ രൂപത പിആര്‍ഒ ഫാ. സേവ്യര്‍ കുടിയാംശേരി എന്നിവര്‍ പങ്കെടുത്തു. ഭാഗ്യചിഹ്നം പ്രകാശനം ഇന്ന് ആലപ്പുഴ: പുന്നമടയില്‍ 30ന് നടക്കുന്ന 71-ാമത് നെഹ്‌റുട്രോഫി വള്ളംകളിയുടെ ഭാഗ്യചിഹ്നം പ്രകാശനം ഇന്നു രാവിലെ 11-ന് ആരോഗ്യ വകുപ്പ് മന്ത്രി വീണാ ജോര്‍ജ്, ചലച്ചിത്ര താരം കാളിദാസ് ജയറാം എന്നിവര്‍ ചേര്‍ന്ന് നിര്‍വഹിക്കും. ആലപ്പുഴ പ്രൊവിഡന്‍സ് ഹോസ്പിറ്റല്‍ ഓഡിറ്റോറിയത്തില്‍ രാവിലെ 11 നാണ് പ്രകാശനച്ചടങ്ങ്. ചടങ്ങില്‍ കെ.സി. വേണുഗോപാല്‍ എംപി, പി.പി. ചിത്തരഞ്ജന്‍ എംഎല്‍എ, എച്ച്. സലാം എംഎല്‍എ, തോമസ് കെ. തോമസ് എംഎല്‍എ, ജില്ല പഞ്ചായത്ത് പ്രസിഡന്‍റ് കെ.ജി. രാജേശ്വരി, ജില്ലാ കളക്ടര്‍ അലക്സ് വര്‍ഗീസ്, നഗരസഭാധ്യക്ഷ കെ.കെ. ജയമ്മ, അഡീഷണല്‍ ജില്ലാ മജിസ്ട്രേറ്റ് ആശാ സി. ഏബ്രഹാം, സബ് കളക്ടര്‍ സമീര്‍ കിഷന്‍, പബ്ലിസിറ്റി കമ്മിറ്റി അംഗങ്ങള്‍ എന്നിവര്‍ പങ്കെടുക്കും. സ്മരണികയിലേക്ക് രചനകള്‍ അയയ്ക്കാം ആലപ്പുഴ: നെഹ്‌റുട്രോഫി വള്ളംകളിയുടെ സ്മരണികയില്‍ പ്രസിദ്ധീകരിക്കുന്നതിനായി കഥ, കവിത, ലേഖനം എന്നിവ ക്ഷണിച്ചു. രചനകള്‍ സെപ്റ്റംബര്‍ 10-നകം കണ്‍വീനര്‍, എന്‍ടിബിആര്‍ സുവനിയര്‍ കമ്മിറ്റി ആന്‍ഡ് എഡിഎം, കളക്‌ടറേറ്റ്, ആലപ്പുഴ എന്ന മേല്‍വിലാസത്തിലോ [email protected] എന്ന ഇ-മെയില്‍ വിലാസത്തിലോ അയയ്ക്കണം. മികവുറ്റ രചനകള്‍ സ്മരണികയില്‍ പ്രസിദ്ധീകരിക്കും. ഫോണ്‍: 0477 2251676, 2252580, 9061481390.

അമ്പിളിയെ തൂക്കാൻ കെട്ടിയ കെട്ട് സുനിലിനു കുരുക്കായി

മാവേലിക്കര: നൂറനാട് അന്പിളി വധക്കേസിൽ പ്രതികൾ കുറ്റക്കാരാണെന്നു കണ്ടെത്തിയത് പോലീസ് ഹാജരാക്കിയ കൃത്യമായ തെളിവുകളുടെ അടിസ്ഥാനത്തിൽ. അമ്പിളിയെ കെട്ടിത്തൂക്കാൻ കഴുത്തിൽ കെട്ടിയ കെട്ട് സുനിലിനു കുരുക്കായെന്ന് അന്വേഷണോദ്യോഗസ്ഥനായിരുന്ന സിഐ ബിജു. ദൃക്സാക്ഷികളോ തെളിവുകളോ ഇല്ലാതിരുന്ന കേസിൽ സൂക്ഷ്മമായ അന്വേഷണത്തിലാണ് പ്രതികളെ കുടുക്കിയത്. അമ്പിളിയുമായി തർക്കമുണ്ടായ സുനിൽ അമ്പിളിയെ മർദിച്ചു ബോധംകെടുത്തിയ ശേഷം വീടിനുള്ളിലെ സ്റ്റെയർകേസിനു കീഴിൽ കെട്ടിത്തൂക്കുകയായിരുന്നു. കെട്ടിത്തൂക്കിയ ശേഷം വീടിനു സമീപത്തുള്ള കടയിൽ പോയി തിരികെയെത്തി മരണം ഉറപ്പിച്ചു. തുടർന്ന് സമീപവാസിയായ സ്ത്രീയോട് അമ്പിളി തൂങ്ങിയതായി പറഞ്ഞു. തടി കെട്ടുന്ന രീതി പ്രതി സമീപത്തുള്ളവരുടെ സഹായത്തോടെ അമ്പിളിയെ കെട്ടഴിച്ചിറക്കി അടൂർ താലൂക്ക് ആശുപത്രിയിൽ എത്തിച്ചു. അയൽവാസികൾ പറഞ്ഞതനുസരിച്ചു സ്ഥലത്തെത്തിയ പോലീസിനു പ്രത്യക്ഷത്തിൽ തെളിവുകൾ ഒന്നും ലഭിച്ചില്ല. പോസ്റ്റ്മോർട്ടം നടത്തിയ ഡോക്ടർ സംശയം പ്രകടിപ്പിച്ചതോടെ അന്വേഷണം ഊർജിതമാക്കി. ഡോക്ടർ നേരിട്ട് സംഭവസ്ഥലം പരിശോധിച്ചു. തുടർന്നുള്ള പരിശോധനയിൽ അമ്പിളിയുടെ കഴുത്തിൽ കെട്ടിയ കെട്ട് സംശയം ജനിപ്പിച്ചു. തടി വലിക്കാൻ ഉപയോഗിക്കുന്ന വടം കെട്ടിവയ്ക്കുന്ന കയറായിരുന്നു കഴുത്തിൽ കെട്ടിയത്. സാധാരണ ആത്മഹത്യ ചെയ്യാൻ ആളുകൾ ചെയ്യുന്ന രീതിയിൽ ആയിരുന്നില്ല കെട്ട്. മരം മുറിക്കാരനായ സുനിൽ തടി കെട്ടുന്ന രീതിയിലായിരുന്നു അമ്പിളിയുടെ കഴുത്തിൽ കയർ കെട്ടിയത്. ഈ കെട്ടാണ് പ്രതിയിലേക്കു നയിച്ച പ്രധാന തെളിവ്. മൊഴിയിലുറച്ച് പ്രധാന സാക്ഷികൾ സുനിൽ വീടിനുള്ളിലേക്കു കയറി കതകടയ്ക്കുന്നത് അയൽവാസി കണ്ടിരുന്നു. ഇയാൾ ആ സമയം ചാണകം വാരുകയായിരുന്നു. ഇയാളും പ്രധാന സാക്ഷികളിൽ ഒരാളായി. ഒളിവിൽപോയ രണ്ടാം പ്രതി ശ്രീലതയെ ഏതാനും ദിവസങ്ങൾക്കുശേഷം തെക്കേക്കര പഞ്ചായത്തിലെ പല്ലാരിമംഗലത്തെ ബന്ധുവീട്ടിൽനിന്നു പിടികൂടി. സാക്ഷികളിൽ പലരും കൂറുമാറിയെങ്കിലും പ്രധാന സാക്ഷികളുടെ ശക്തമായ മൊഴി പ്രതികൾ കുറ്റക്കാരാണെനനു കണ്ടെത്തുന്നതിലേക്കു നയിച്ചെന്നും ബിജു പറഞ്ഞു. നിലവിൽ കരുനാഗപ്പള്ളി സിഐയായ ബിജു സംഭവം നടക്കുമ്പോൾ നൂറനാട് എസ്ഐ ആയിരുന്നു. അന്നു മാവേലിക്കര സിഐ ആയിരുന്ന പി. ശ്രീകുമാറിനായിരുന്നു അന്വേഷണച്ചുമതല. പിന്നീട് ബിജു അന്വേഷണച്ചുമതല ഏറ്റടുത്തു.

രാജ്യത്തിന്‍റെ ഭാവിക്കും വികസനത്തിനുമാവശ്യം ദേശസ്‌നേഹമുള്ള കുട്ടികള്‍: ആശ സി. ഏബ്രഹാം

ആലപ്പുഴ: ദേശസ്‌നേഹമുള്ള കുട്ടികളെ വാര്‍ത്തെടുക്കേണ്ടത് നമ്മുടെ രാജ്യത്തിന്‍റെ ശോഭനമായ ഭാവിക്കും വികാസത്തിനും ആവശ്യമാണെന്ന് ആലപ്പുഴ ജില്ലാ അഡീഷണല്‍ ഡിസ്ട്രിക്‌ട് മജിസ്‌ട്രേറ്റ് ആശ സി. ഏബ്രഹാം. പുതുതലമുറയില്‍ ദേശഭക്തിയും സാഹോദര്യവും ഊട്ടിയുറപ്പിക്കുന്ന ദേശീയോദ്ഗ്രഥന മുന്നേറ്റം ലക്ഷ്യമിട്ട് സ്‌കൂള്‍ കുട്ടികള്‍ക്കായി ദീപിക സംഘടിപ്പിക്കുന്ന പെയിന്‍റിംഗ് മത്സരമായ കളര്‍ ഇന്ത്യ സീസണ്‍ നാല് ആലപ്പുഴ തത്തംപള്ളി സെന്‍റ് മൈക്കിള്‍സ് ഹൈസ്‌കൂളില്‍ ഉദ്ഘാടനം ചെയ്യുകയായിരുന്നു എഡിഎം. ഉദ്ഘാടന യോഗത്തില്‍ ഡിഎഫ്‌സി ഫൊറോന ഡയറക്ടര്‍ ഫാ. ലിബിന്‍ ജേക്കബ് പുത്തന്‍പറമ്പില്‍ അധ്യക്ഷനായിരുന്നു. അധ്യാപകന്‍ ഫാ. ബിനു കൂട്ടുമ്മേല്‍, ഡിഎഫ്സി സംസ്ഥാന വൈസ് പ്രസിഡന്‍റ് റോയി പി. വേലിക്കെട്ടിൽ, സ്‌കൂള്‍ ഹെഡ്മിസ്ട്രസ് മെര്‍ലിന്‍ ഫിലിപ്പ്, ദീപിക സര്‍ക്കുലേഷന്‍ വിഭാഗം ഏരിയാ മാനേജര്‍ എ.പി. ശ്രീകുമാര്‍ എന്നിവർ പ്രസംഗിച്ചു.

സഹകരണ ബാങ്കിൽ പണയംവച്ച സ്വർണം തിരിമറി നടത്തിയതായി പരാതി

മാന്നാർ: ബുധനൂർ സർവീസ് സഹകരണ ബാങ്കിൽ പണയംവച്ച സ്വർണം തിരിമറി നടത്തിയതായി പരാതി. എണ്ണയ്ക്കാട് നിടിയത്ത് കിഴക്കേതിൽ ഭാരതി (75) യാണ് മാന്നാർ പോലിസിൽ പരാതി നൽകിയത്. 2022 മേയ് 19ന് ഇളയ മകളുടെ വീട് പണിയുമായി ബന്ധപ്പെട്ടാണ് ഭാരതി സഹകരണ ബാങ്കിൽ 29 ഗ്രാം സ്വർണം പണയംവച്ച് ഒരുലക്ഷം രൂപയെടുത്തത്. ശുചീകരണ ജോലി ചെയ്തു കുടുംബം പുലർത്തുന്ന ഭാരതി കൃത്യമായി പലിശ അടച്ചിരുന്നു. രണ്ടു വർഷത്തിനുശേഷം സ്വർണം തിരികെയെടുക്കാൻ എത്തിയപ്പോഴാണ് തട്ടിപ്പ് വെളിച്ചത്ത് വന്നത്. പണയം എടുക്കാൻ എത്തിയപ്പോൾ സ്വർണം ഇവിടെ ഇല്ലെന്നും മറ്റൊരിടത്ത് വച്ചിരിക്കുകയാണെന്നും ഉടൻ എടുത്ത് തരാമെന്നും ബാങ്ക് ഉദ്യോഗസ്ഥർ അറിയിച്ചതായി ഭാരതി പറഞ്ഞു. പല അവധികൾ പിന്നിട്ട് മാസങ്ങൾ കഴിഞ്ഞിട്ടും സ്വർണം തിരികെ ലഭിക്കാതെ വന്നതോടെയാണ് ഭാരതി പോലിസിൽ പരാതി നൽകിയത്. ‌ ബാങ്കിന്‍റെ സെക്രട്ടറിയും മറ്റുള്ളവരും ചേർന്ന് തന്‍റെ കള്ള ഒപ്പിട്ട് സ്വർണം കൈക്കലാക്കുകയായിരുന്നുവെന്ന് ഭാരതി നൽകിയ പരാതിയിൽ പറയുന്നു. സിപിഎം ഭരണ നേതൃത്വം നിർവഹിക്കുന്ന ബാങ്കിലെ ഉദ്യോഗസ്ഥരായ അനീഷ, വിമല, ഓമന, അശോകൻ എന്നിവരെ പ്രതി ചേർത്ത് മാന്നാർ പോലിസ് കേസെടുത്തു. ഇപ്പോൾ പോലീസ് എടുത്തിരിക്കുന്ന കേസിൽ പ്രതിയാക്കപ്പെട്ടിട്ടുള്ള അനീഷ ബാങ്ക് സെക്രട്ടറി സ്ഥാനത്ത്നിന്ന് ഇപ്പോൾ സസ്പെൻഷനിലാണ്. സംസ്ഥാനത്ത് സഹകരണ ബാങ്കുകൾ കേന്ദ്രീകരിച്ച് നടക്കുന്ന തട്ടിപ്പുകളുടെ തുടർച്ചയാണ് ബുധനൂർ സർവീസ് സഹകരണ ബാങ്കിൽനിന്ന് ഉയരുന്നതെന്ന് ഇടപാടുകാർ പറയുന്നു. ബുധനൂർ സർവീസ് സഹകരണ ബാങ്കിൽ സമാനമായ നിരവധി ക്രമക്കേടുകൾ നടന്നിട്ടുണ്ടെന്നാണ് വിവരം. പണയംവച്ച സ്വർണാഭരണങ്ങളുടെ തിരിമറി കൂടാതെ സ്ഥിരനിക്ഷേപമായി ലക്ഷങ്ങൾ നൽകിയ ആളുകളും പണം തിരികെ എടുക്കുന്നതിനായി ഇപ്പോൾ ബാങ്കിൽ കയറിയിറങ്ങുന്നുണ്ടെങ്കിലും പണം ലഭിക്കുന്നില്ലെന്ന പരാതിയും ഉയരുന്നുണ്ട്. ബാങ്കിലെ തിരിമറികളുമായി ബന്ധപ്പെട്ടുള്ള പരാതിയിൽ കേസെടുത്ത് പോലീസ് അന്വേഷണം ആരംഭിച്ചു. കൂടുതൽ ഇടപാടുകാർ സ്റ്റേഷനിലെത്തി പരാതി നൽകുമെന്നാണ് അറിയാൻ കഴിയുന്നത്.

ദേവാലയങ്ങൾക്കെതിരേയുള്ള നീക്കത്തില്‍നിന്ന് പിന്തിരിയണം: അല്മായ മുന്നേറ്റം

ചേർത്തല: മുട്ടം സെന്‍റ് മേരീസ് ഫൊറോനാ ദേവാലയത്തിൽ ജനാഭിമുഖ കുർബാന ഒഴിവാക്കി ഏകീകൃത കുർബാന അർപ്പിക്കണമെന്നാവശ്യപ്പെട്ടുളള ഹർജി ചേർത്തല മുൻസിഫ് കോടതി തള്ളിയ സാഹചര്യത്തിൽ താലൂക്കിലെ മറ്റു ക്രൈസ്തവ ദേവാലയങ്ങൾക്കെതിരേ ഇതേ ആവശ്യമുന്നയിച്ച് നടത്തുന്ന ഗൂഢനീക്കത്തിൽനിന്ന് ബന്ധപ്പെട്ടവർ പിന്തിരിയണമെന്ന് അല്മായ മുന്നേറ്റം ചേർത്തല ഫൊറോനാ ഭാരവാഹികൾ ആവശ്യപ്പെട്ടു. എംടിഎൻഎസ് സംഘടന ബോധപൂർവം രംഗത്തിറക്കിയിട്ടുള്ളവരാണ് സിവിൽ കേസുകളിലുടെ ദേവാലയങ്ങളിലെ സമാധാനാന്തരീക്ഷം തകർക്കുന്നതെന്ന് ഫൊറോനാ സെക്രട്ടറി ജോസഫ് ആന്‍റണി, മറ്റു ഭാരവാഹികളായ ടി.കെ. തോമസ്, ടി.ജെ. വർഗീസ്, സേവ്യർ പഞ്ഞിക്കാരൻ, ജിജോ തോമസ് എന്നിവർ പറഞ്ഞു. തർക്കപരിഹാരത്തിനായി എറണാകുളം-അങ്കമാലി അതിരൂപത നേതൃത്വം ഉണ്ടാക്കിയ സമാധാന ഉടമ്പടിയുടെ ഭാഗമായി ദേവാലയങ്ങളിൽ ജനാഭിമുഖ കുർബാനയ്ക്കൊപ്പം ഏകീകൃത കുർബാനയും അർപ്പിച്ച് തുടങ്ങിയിട്ടും നിയമനടപടികളുമായി നീങ്ങുന്നത് അപലപനീയമാണെന്നും നെടുമ്പ്രക്കാട് സെന്‍റ് തോമസ് ദേവാലയം അടഞ്ഞു കിടക്കുന്നത് ചിലരുടെ പിടിവാശി മൂലമാണെന്നും വിശ്വാസികൾക്ക് ബുദ്ധിമുട്ടുണ്ടാക്കുന്ന നടപടികൾ തിരുത്താൻ ബന്ധപ്പെട്ടവർ തയാറാകണമെന്നും അവർ പറഞ്ഞു. സിനഡ് കുർബാന: ഹർജി കോടതി തള്ളി ചേർത്തല: മുട്ടം സെന്‍റ് മേരീസ് ഫൊറോനാ ദേവാലയത്തിൽ സിനഡ് കുർബാന മാത്രം അർപ്പിക്കണമെന്നാവശ്യപ്പെട്ട് ഇടവകാംഗം നല്കിയ ഹർജി കോടതി തള്ളി. ചേർത്തല പ്രിൻസിപ്പൽ മുൻസിഫ് റോവിൻ റോഡ്രിഗ്‌സാണ് ഹർജി തള്ളി ഉത്തരവിട്ടത്. ജനാഭിമുഖ കുർബാന അർപ്പിക്കുന്നതിന് നിയമപരമായ പരിരക്ഷ വിധിയിലൂടെ ലഭിച്ചു. വികാരി, ഇടവക, സംഘടനകൾ എന്നിവർക്കുവേണ്ടി അഭിഭാഷകരായ എം.എം. സാലിച്ചൻ, എൻ.എ. ഷെഫീക്, തോമസ് പാണാട്ട്, ജേക്കബ് ടോംലിൻ എന്നിവർ ഹാജരായി.

അനുസ്മരണ സമ്മേളനവും സുവർണ മുദ്രാ സമർപ്പണവും

അമ്പലപ്പുഴ: കലാരത്നം അമ്പലപ്പുഴ പരമേശ്വരക്കുറുപ്പ് 11-ാമത് അനുസ്മരണ സമ്മേളനവും ഏഴാമത് സുവർണ മുദ്രാ സമർപ്പണവും നാളെ നടക്കും. പ്രശസ്ത പഞ്ചവാദ്യ കലാകാരൻ മായന്നൂർ രാജുവിന് ഈ വർഷത്തെ ക്ഷേത്രവാദ്യ കലാരത്ന പുരസ്കാരം നൽകുമെന്ന് വാദ്യകലാസമിതി പ്രസിഡന്‍റ് പി. ഗോപാലകൃഷ്ണൻ, പി. ഗോപകുമാർ, പി. വിജയകുമാർ, സെക്രട്ടറി എസ്. മനോജ് എന്നിവർ പറഞ്ഞു. നാളെ ഉച്ചകഴിഞ്ഞ് രണ്ടു മുതൽ അമ്പലപ്പുഴ കുഞ്ചൻ നമ്പ്യാർ സ്മാരക ഹാളിൽ കേളി എന്ന പേരിൽ കലാവിരുന്ന് നടക്കും. മൂന്നിന് നടക്കുന്ന പരിപാടിയുടെ ഉദ്ഘാടനവും പുരസ്കാരദാന സമർപ്പണവും കെ.സി. വേണുഗോപാൽ എംപി നിർവഹിക്കും. പി. ഗോപാലകൃഷ്ണൻ അധ്യക്ഷത വഹിക്കും. എച്ച്. സലാം എംഎൽഎ കീർത്തിപത്ര സമർപ്പണവും തൃശൂർ പൂരത്തിൽ തിരുവമ്പാടി മഠത്തിൽ വരവ് പഞ്ചവാദ്യ അമരക്കാരൻ കോങ്ങാട് മധു സുവർണമുദ്ര സമർപ്പണവും നിർവഹിക്കും. ബ്രഹ്മശ്രീ കടിയക്കോൽ വാസുദേവൻ നമ്പൂതിരി അനുഗ്രഹ പ്രഭാഷണം നടത്തും. പുരസ്കാര ജേതാവിനെ അമ്പലപ്പുഴ തെക്ക് പഞ്ചായത്ത് പ്രസിഡന്‍റ് ശോഭാ ബാലൻ പൊന്നാടയും അമ്പലപ്പുഴ ക്ഷേത്രം അഡ്മിനിസ്ട്രേറ്റീവ് ഓഫീസർ എൻ. അജിത് കുമാർ പുഷ്പഹാരവും അണിയിക്കും. അഷ്ടപദി ആചാര്യൻ രതീഷ് ബാബുജി, സംഗീതാധ്യാപകൻ തകഴി വിജയൻ, നാടകാചാര്യൻ അയോധ്യാ ശിവൻ, കൊമ്പ് കലാകരൻ രാജേഷ് പാതിരപ്പള്ളി, താളം കലാകാരൻ അനിൽകുമാർ തിരുവമ്പാടി എന്നിവരെ ചടങ്ങിൽ ആദരിക്കും. എസ്എസ്എൽസി, പ്ലസ്ടു പരീക്ഷകളിൽ ഉന്നത വിജയം നേടിയ കലാകാരന്മാരെയും സംസ്ഥാന കലോത്സവത്തിൽ പഞ്ചവാദ്യം എ ഗ്രേഡ് നേടിയ കലാകാരന്മാരെയും ചടങ്ങിൽ അനുമോദിക്കുമെന്നും ഭാരവാഹികൾ പറഞ്ഞു.

ചാർട്ടർ ദിനം ആഘോഷിച്ചു

ആലപ്പുഴ: റോട്ടറി ക്ലബ് ഓഫ് ആലപ്പി ഈസ്റ്റിന്‍റെ ആഭിമുഖ്യത്തിൽ 52-ാമത് ചാർട്ടർ ദിനം ആഘോഷിച്ചു. റോട്ടറി ഡിസ്ട്രിക്ട് 3200 മുൻ ഗവർണർ ഡോ. കെ.എ. കുര്യാച്ചൻ വാർഷികാഘോഷ പരിപാടികൾ ഉദ്ഘാടനം ചെയ്തു. റോട്ടറി ക്ലബ് ഓഫ് ആലപ്പി ഈസ്റ്റ് പ്രസിഡന്‍റ് ചാർട്ടേഡ് അക്കൗണ്ടന്‍റ് ജെ. വെങ്കിടാചലം അധ്യക്ഷത വഹിച്ചു. റോട്ടറി ക്ലബ് മുൻ പ്രസിഡന്‍റുമാരെ ചടങ്ങിൽ പൊന്നാടയണിയിച്ച് ആദരിച്ചു. റോട്ടറി ഡിസ്ട്രിക്ട് ചെയർമാൻ ജി. അനിൽകുമാർ, റോട്ടറി ഡിസ്ട്രിക്ട് അഡ്വൈസർ ബേബി കുമാരൻ, അസിസ്റ്റന്‍റ് ഗവർണർ ജോസ് ആറത്തുംപള്ളി, സെക്രട്ടറി അനിൽ എസ്.പൈ., ഇന്നർ വീൽ ക്ലബ് പ്രസിഡന്‍റ് ഡോ. സിന്ധു ആസാദ് ബാബു, റോട്ടറി ക്ലബ് ഡയറക്ടർമാരായ ടി.ടി. കുരുവിള, ഡോ. പ്രശാന്ത് ജേക്കബ്, അഡ്വ. സുജിനി, എസ്. അനിൽകുമാർ, ഡോ. വിധു, അഡ്വ. പൂജ വെങ്കിട് തുടങ്ങിയവർ പ്രസംഗിച്ചു.

ബിജെപി സർക്കാർ ചരിത്രത്തെ തമസ്കരിക്കുന്നു: എ.എ. ഷുക്കൂർ

അമ്പലപ്പുഴ: ബിജെപി സർക്കാർ ചരിത്രത്തെ തമസ്കരിക്കുന്നുവെന്ന് എ.എ. ഷുക്കൂർ. ജനങ്ങൾ അറിയേണ്ടതും അറിഞ്ഞിരിക്കേണ്ടതുമായ സ്വാതന്ത്ര്യസമര ചരിത്രം ഉൾപ്പെടെയുള്ള ഭാരത ചരിത്രത്തെ മനപ്പൂർവം തമസ്കരിക്കുകയാണെന്നും തങ്ങൾക്ക് അനുകൂലമായ ചരിത്രം രൂപപ്പെടുത്താനുള്ള ശ്രമത്തിലാണ് ബിജെപിയെന്നും കെപിസിസി ജനറൽ സെക്രട്ടറി എ.എ. ഷുക്കൂർ പറഞ്ഞു. സർവോദയ ഗാന്ധി മാർഗ പ്രവർത്തകരുടെ ആഭിമുഖ്യത്തിൽ ക്വിറ്റിന്ത്യാ സമര ഓർമയാചരണ സംഗമം ആലപ്പുഴ തൊണ്ടംകുളങ്ങര ഗാന്ധിയൻ ദർശനവേദി ഹാളിൽ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ക്വിറ്റിന്ത്യാദിന ഓർമ സംഗമത്തിൽ ഗാന്ധിയൻ ദർശനവേദി ചെയർമാൻ ബേബി പാറക്കാടൻ അധ്യക്ഷത വഹിച്ചു. സബർമതി ട്രസ്റ്റ് ചെയർമാൻ ജോസഫ് മാരാരിക്കുളം മുഖ്യപ്രഭാഷണം നടത്തി. കേരള കോൺഗ്രസ് സംസ്ഥാന ജനറൽ സെക്രട്ടറി തോട്ടുങ്കൽ ജോർജ് ജോസഫ്, സർവോദയ മണ്ഡലം ജില്ലാ പ്രസിഡന്‍റ് എം.ഇ. ഉത്തമക്കുറുപ്പ്, ജില്ലാ സെക്രട്ടറി രാജു പള്ളിപ്പറമ്പിൽ, സംസ്ഥാന സമിതി അംഗം എം.ഡി. സലീം, ചലച്ചിത്ര നടൻ പുന്നപ്ര അപ്പച്ചൻ, കെ. ലാൽജി, കേരള വനിതാ കോൺഗ്രസ് ജില്ലാ പ്രസിഡന്‍റ് ബീന റസാക്ക്, സെക്രട്ടറി ലൈസമ്മാ ബേബി, എൻ. സദാശിവൻ നായർ, ഇ. ഖാലിദ്, തോമസ് കുര്യൻ, എ. ഷൗക്കത്ത്, തോമസ് വാഴപ്പള്ളികളം, എം.പി. പ്രസന്നൻ എന്നിവർ പ്രസംഗിച്ചു.

വിദ്യാർഥികൾ സംരംഭകരായി, അധ്യാപകർ കസ്റ്റമറും

മാന്നാർ: വിദ്യാർഥികളിൽ സംരംഭകത്വശീലം വളർത്തിയെടുത്ത് "ഉത്തമ സംരംഭകൻ എങ്ങനെയാകാം' എന്ന ബാലപാഠമായിരുന്നു പരുമല ദേവസ്വം ബോർഡ് പമ്പ കോളജിൽ ഒരുക്കിയ പമ്പ ബിസ് ജംഗ്ഷൻ. പമ്പാ കോളജിലെ പിജി ഡിപ്പാർട്ട്മെന്‍റ് ഓഫ് കൊമേഴ്‌സിന്‍റെ നേതൃത്വത്തിലാണ് കോളജ് ഓഡിറ്റോറിയത്തിൽ പമ്പ ബിസ് ജംഗ്ഷൻ സംഘടിപ്പിച്ചത്. ഓരോ വിദ്യാർഥിയും ഓരോ സംരംഭകരായി മാറുന്ന തരത്തിലാണ് പരിപാടി സംഘടിപ്പിച്ചത്. മാന്നാറിലെ പ്രമുഖ സംരംഭകനും മാജാ സൂപ്പർ മാർക്കറ്റ് ഉടമയുമായ ഹാജി പി.എ. ഷാജഹാൻ ഉദ്ഘാടനം നിർവഹിച്ചു. കോളജ് പ്രിൻസിപ്പൽ പ്രഫ. ഡോ. എസ്. സുരേഷ് അധ്യക്ഷത വഹിച്ചു. കുട്ടികൾ നിർമിച്ച ഭക്ഷ്യ, കാർഷിക, കര-കൗശല വസ്തുക്കളുടെ പ്രദർശനം, വിപണനം എന്നിവ പരിപാടിയുടെ ഭാഗമായി നടന്നു. പമ്പ ബിസ് ജംഗ്ഷനിൽ വിദ്യാർഥികൾ നിർമിച്ച വിവിധയിനം അച്ചാറുകൾ, നാടൻ വിഭവങ്ങൾ, കര-കൗശല വസ്തുക്കൾ തുടങ്ങിയവ ഉപഭോക്താക്കളുടെ ശ്രദ്ധ പിടിച്ചുപറ്റി. കുട്ടികൾ നിർമിച്ച ഉത്പന്നങ്ങൾ പൊതു ബ്രാൻഡിന്‍റെ കിഴീൽ കൊണ്ടുവന്നാൽ പുത്തൻ വിപണി കണ്ടെത്താൻ കഴിയുമെന്നും കുട്ടികളുടെ വിപണിയിലെ ഉത്പന്നങ്ങൾ ഗുണമേന്മയിലും രുചിയിലും മുന്നിട്ട് നിൽക്കുന്നതായും പ്രിൻസിപ്പൽ ഡോ. സുരേഷ് പറഞ്ഞു. വകുപ്പ് മേധാവി ഡോ. പ്രീത എസ്. പിള്ള, കോ-ഓർഡിനേറ്റർമാരായ ഡോ. പി.എം. വിഷ്ണു, അശ്വിനി ജോൺ എന്നിവർ പ്രസംഗിച്ചു. കുട്ടികളുടെ മാർക്കറ്റ് എല്ലാ മാസവും രണ്ടാമത്തെ എല്ലാ വെള്ളിയാഴ്ചകളിലും ഇനിയും പമ്പാ കോളജിൽ ഉണ്ടാകുമെന്ന് കോ-ഓർഡിനേറ്റേഴ്സ് പറഞ്ഞു. പരിപാടിക്കു കോമേഴ്‌സ് വിഭാഗം അധ്യാപകരായ കെ.എസ്. സിന്ധു, ഡോ. വി.എൻ. ഷൈനി, ഡോ. എസ്.പി. അശ്വിനി, ഡി.വി. വിജയലക്ഷ്മി എന്നിവർ നേതൃത്വം നൽകി. മറ്റു ഡിപ്പാർട്ട്മെന്‍റിലെ അധ്യാപകരും വിദ്യാർ ഥികളും പരുപാടിക്കു വലിയ പിന്തുണ നൽകിയതോടെ പുതിയ സംരംഭകർ പമ്പാ കോളജിൽ പിറവിയെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]