എച്ച്ആര്‍, സിഎല്‍ആര്‍ തൊഴിലാളികളെ സ്ഥിരപ്പെടുത്തണം: ഇറിഗേഷന്‍ വര്‍ക്കേഴ്‌സ് യൂണിയന്‍
1373961
Monday, November 27, 2023 11:53 PM IST
കോട്ടയം: കഴിഞ്ഞ 20 വര്‍ഷക്കാലമായി ജലസേചന വകുപ്പില്‍ ജോലി ചെയ്യുന്ന എച്ച്ആര്‍, സിഎല്‍ആര്‍ തൊഴിലാളികളെ ഉടന്‍ സ്ഥിരപ്പെടുത്തണമെന്ന് കേരള ഇറിഗേഷന്‍ വര്‍ക്കേഴ്‌സ് യൂണിയന്‍ കെടിയുസി -എം സംസ്ഥാന സമ്മേളനം സര്‍ക്കാരിനോട് ആവശ്യപ്പെട്ടു.
834 തൊഴിലാളികളെ 2013ല്‍ സ്ഥിരപ്പെടുത്തിയിരുന്നു. ഇവര്‍ക്കൊപ്പമുണ്ടായിരുന്ന 400 ഓളം തൊഴിലാളികളെയാണ് ഇനിയും സ്ഥിരപ്പെടുത്താനുള്ളത്. എച്ച്ആര്‍ തൊഴിലാളികള്‍ക്ക് 12 മാസവും ജോലി നല്‍കുകയും എട്ടു വര്‍ഷമായി ലഭിക്കാത്ത ശമ്പള വര്‍ധനവ് അനുവദിക്കുകയും വേണമെന്നും സംസ്ഥാന സമ്മേളനം പ്രമേയത്തിലൂടെ സര്‍ക്കാരിനോട് ആവശ്യപ്പെട്ടു.
യൂണിയന്‍ പ്രസിഡന്‍റ് ബാബു ജോസഫിന്‍റെ അധ്യക്ഷതയില്‍ ജോബ് മൈക്കിള്‍ എംഎല്‍എ സംസ്ഥാന സമ്മേളനം ഉദ്ഘാടനം ചെയ്തു. സ്റ്റീഫന്‍ ജോര്‍ജ്, കെടിയുസി -എം സംസ്ഥാന പ്രസിഡന്‍റ് ജോസ് പുത്തന്‍കാല, അസി ജോസ്, വി.കെ. ശ്രീനിവാസന്‍, രാധാകൃഷ്ണന്‍, പി.എസ്. രതീഷ്, പി.എ. എല്‍ദോസ്, എം.എം. നൗഷാദ് എന്നിവര്‍ പ്രസംഗിച്ചു.