കെഎൽഎം മേയ്ദിന റാലിയും മഹാസമ്മേളനവും ഇന്ന്
1547317
Thursday, May 1, 2025 7:35 AM IST
ചങ്ങനാശേരി: ചങ്ങനാശേരി അതിരൂപതയുടെ തൊഴിലാളി പ്രസ്ഥാനം കേരള ലേബര്‍ മൂവ്‌മെന്‍റിന്‍റെ നേതൃത്വത്തില്‍ ഇന്ന് മേയ്ദിന റാലിയും തൊഴിലാളി മഹാസംഗമവും നടത്തും. 3.30ന് ചങ്ങനാശേരി അരമന പടിക്കല്‍നിന്നും അതിരൂപത വികാരി ജനറാള്‍ മോണ്‍. സ്‌കറിയാ കന്യാകോണില്‍ ഫ്ളാഗ് ഓഫ് ചെയ്യുന്ന മെയ്ദിന റാലി കവലയിലൂടെ എസ്ബി കോളജിലെ ആര്‍ച്ച്ബിഷപ് കാവുകാട്ട് ഹാളില്‍ എത്തിച്ചേരും. വാദ്യമേളങ്ങളും വേഷവിധാനങ്ങളും നിശ്ചലദൃശ്യങ്ങളും റാലിയെ വര്‍ണാഭമാക്കും.
നാലിന് എസ്ബി കോളജ് കാവുകാട്ട് ഹാളില്‍ ചേരുന്ന തൊഴിലാളി മഹാസംഗമത്തില്‍ അതിരൂപത വികാരിജനറാള്‍ മോണ്‍. ആന്‍റണി എത്തയ്ക്കാട്ട് അധ്യക്ഷത വഹിക്കും. ആര്‍ച്ച്ബിഷപ് മാര്‍ തോമസ് തറയില്‍ സമ്മേളനം ഉദ്ഘാടനം ചെയ്യും. ആര്‍ച്ച്ബിഷപ് എമിരറ്റസ് മാര്‍ ജോസഫ് പെരുന്തോട്ടം അനുഗ്രഹ പ്രഭാഷണം നടത്തും.
ലുവെല്ലാ വെഞ്ചേഴ്‌സ് എംഡി ജോയിസ് മേരി ആന്‍റണി മുഖ്യപ്രഭാഷണം നടത്തും. അതിരൂപത ഡയറക്ടര്‍ ഫാ. ജോണ്‍ വടക്കേക്കളം, ജനറല്‍ സെക്രട്ടറി പി.ജെ. സെബാസ്റ്റ്യന്‍, ജോയിന്‍റ് സെക്രട്ടറിമാരായ ഷാജി കോര, ലാലി ബോബന്‍, ജോമോന്‍ ഇരുപ്പക്കാട്ട് എന്നിവര്‍ പ്രസംഗിക്കും. കെഎല്‍എം ലേബര്‍ അവാര്‍ഡ് ജേതാക്കള്‍, ഈ വര്‍ഷം മികച്ച പ്രവര്‍ത്തനം കാഴ്ചവച്ച യൂണിറ്റുകള്‍, സംഘങ്ങള്‍ എന്നിവരെ ആദരിക്കും. അതിരൂപതയുടെ വിവിധ മേഖലകളില്‍നിന്നും എത്തിച്ചേരുന്ന ആയിരങ്ങള്‍ റാലിയിലും സമ്മേളനത്തിലും പങ്കെടുക്കും.