ADVERTISEMENT

ADVERTISEMENT

ഉമ്മൻ ചാണ്ടി സ്മാരക ട്രസ്റ്റ് ഒന്നാംവാർഷിക പരിപാടികൾ

വടക്കഞ്ചേരി: പുതുക്കോട് തച്ചനടി ആസ്ഥാനമായുള്ള ഉമ്മൻ ചാണ്ടി സ്മാരക ചാരിറ്റബിൾ ട്രസ്റ്റിന്‍റെ ഒന്നാം വാർഷികം കെപിസിസി വർക്കിംഗ് പ്രസിഡന്‍റ് ഷാഫി പറമ്പിൽ എംപി ഉദ്ഘാടനം ചെയ്തു. ട്രസ്റ്റ് ചെയർമാൻ എൻ. സഹദേവൻ അധ്യക്ഷത വഹിച്ചു. ഡിസിസി ജനറൽ സെക്രട്ടറി കെ.ജി. എൽദോ, കെഡിപി സംസ്ഥാന ജനറൽ സെക്രട്ടറി സുരേഷ് വേലായുധൻ, യൂത്ത് കോൺഗ്രസ് ജില്ലാ പ്രസിഡന്‍റ് കെ.എസ്. ജയഘോഷ്, മുസ്ലീംലീഗ് നിയോജകമണ്ഡലം ജനറൽ സെക്രട്ടറി പി.സി. അബ്ദുള്ള, കോൺഗ്രസ് മണ്ഡലം പ്രസിഡന്‍റ് കെ. ഉദയൻ, ട്രസ്റ്റ് രക്ഷാധികാരി കെ.എസ്. മുഹമ്മദ് ഇസ്മയിൽ, യൂത്ത് കോൺഗ്രസ് ജില്ലാ സെക്രട്ടറി വിനീഷ് കരിമ്പാറ, ഐഎൻടിയുസി മണ്ഡലം പ്രസിഡന്‍റ് പി.പി. കൃഷ്ണൻ, വൈസ് പ്രസിഡന്‍റ് അബ്ദുൾ ഷക്കീർ, സി.എസ്. അബ്ദുൾ ഖാദർ, മഹിളാ കോൺഗ്രസ് മണ്ഡലം പ്രസിഡന്‍റ് ആർ. ഭാഗ്യലക്ഷ്മി, കെ.എ. മുഹമ്മദ്, എസ്.അമീൻ, ഹക്കീം പ്രസംഗിച്ചു.

ഒന്നാം വാർഷിക ചടങ്ങുകളുടെ ഭാഗമായി 275 ഭക്ഷ്യ ധാന്യകിറ്റുകളും 40 ഡയാലിസിസ് കിറ്റുകളും അഞ്ച് വീൽചെയറുകളും 50 വിദ്യാർഥികൾക്ക് പഠനോപകരണങ്ങളും ട്രസ്റ്റ് വിതരണം ചെയ്തു. മികച്ച വിജയം നേടിയ പ്ലസ് ടു, എസ്എസ്എൽസി വിദ്യാർഥികളെയും യോഗത്തിൽ അനുമോദിച്ചു.

ADVERTISEMENT

അട്ടപ്പാടിയിൽ എക്സൈസ് റെയ്ഡിൽ എട്ടു കിലോ കഞ്ചാവ് പിടിച്ചെടുത്തു

അഗളി: അട്ടപ്പാടി കോട്ടത്തറയിൽ ഗവ. യുപി സ്കൂളിനു സമീപം കുറ്റിക്കാട്ടിൽ ഒളിപ്പിച്ച 8.200 കിലോ കഞ്ചാവ് അഗളി എക്സൈസ് പാർട്ടി കണ്ടെടുത്തു. പ്ലാസ്റ്റിക് കവറുകളിലായാണ് ഉണക്കകഞ്ചാവ് സൂക്ഷിച്ചിരുന്നത്. എക്സൈസ് ഇൻസ്പെക്ടർ പി.എം. മുഹമ്മദ് ഇഹ്‌ലാസ്, അസിസ്റ്റന്‍റ് എക്സൈസ് ഇൻസ്പെക്ടർ ഗ്രേഡ് വി. മണി, പ്രിവന്‍റീവ് ഓഫീസർ ഗ്രേഡ് എൻ.ടി. ശ്രീധർ, സിഇഒമാരായ അജീഷ്, രജീഷ്, ഉഷ, ചിത്ര എന്നിവരടങ്ങിയ സംഘമാണ് റെയ്ഡ് നടത്തിയത്.

ഇടക്കുർശി- പാലക്കയം റോഡ് അപകടാവസ്ഥയിൽ

കല്ലടിക്കോട്‌: വിനോദ സഞ്ചാരികളടക്കം നൂറുകണക്കിനാളുകൾ സഞ്ചരിക്കുന്ന ഇടക്കുർശി- പാലക്കയം- ശിരുവാണി റോഡ്‌ അപകടാവസ്ഥയിൽ. സംരക്ഷണഭിത്തിയില്ലാതെ ഏതുസമയവും ഇടിഞ്ഞുവീഴാമെന്ന നിലയിലാണ്. ഇരുട്ടായാൽ തെരുവുവിളക്കുകളും ഇല്ല. 1975ൽ കോയമ്പത്തൂരിലേക്കു കുടിവെള്ളം എത്തിക്കാനുള്ള പദ്ധതിയുടെ ഭാഗമായി തമിഴ്‌നാട്‌ സർക്കാർ നിർമിച്ചതാണീ റോഡ്‌. പാലക്കാട്‌- കോഴിക്കോട്‌ ദേശീയപാതയിലെ ഇടക്കുർശിയിൽനിന്നും ശിരുവാണിഡാം വരെയുള്ള 22 കിലോമീറ്റർ റോഡാണ് അപകടാവസ്ഥയിലായിട്ടുള്ളത്‌. ഈ റോഡിന്‍റെ പരിചരണവും അറ്റകുറ്റപ്പണികളും സംരക്ഷണവും തമിഴ്‌നാട്‌ സർക്കാരാണ് ചെയ്യുന്നത്‌. എല്ലാവർഷവും റോഡ്‌ സംരക്ഷണപ്രവർത്തനങ്ങൾ നടത്താമെന്നും വശങ്ങൾകെട്ടി റോഡിന്‍റെ ഇടിച്ചിൽ തടയാമെന്നും ആവശ്യമായ അടിസ്ഥാന സൗകര്യങ്ങളൊരുക്കാമെന്നുമായിരുന്നു ഇരുസംസ്ഥാന സർക്കാരുകളും തമ്മിലുണ്ടാക്കിയ കരാറിലുണ്ടായിരുന്നത്‌. കുറച്ചു വർഷങ്ങളായി തമിഴ്‌നാട്‌ സർക്കാർ ഈ റോഡ്‌ സംരക്ഷിക്കുന്നില്ലെന്ന പരാതിയുണ്ട്‌. നിരവ്‌ മുതൽ ഇരുമ്പാമുട്ടി ക്ഷേത്രത്തിനു താഴെവരെ റോഡ്‌ പൂർണമായും തകർന്നു. ഇരുചക്രവാഹനങ്ങൾപോലും കടന്നുപോകാൻ പ്രയാസമാണ്. മരങ്ങൾ വളർന്നും വശങ്ങൾ തകർന്നും തെരുവുവിളക്കുകൾ ഇല്ലാതെയും യാത്രക്കാർ കഷ്ടപ്പെടുകയാണ്. കാട്ടാനകളും പുലി, കടുവ, മാൻ, കുരങ്ങുകൾ തുടങ്ങിയവ റോഡിലൂടെ ഇറങ്ങി കൃഷിയിടങ്ങളിലും വീടുകൾക്കു സമീപവും എത്താറുണ്ട്‌. പ്രദേശവാസികൾ കാട്ടുമൃഗങ്ങളെ പേടിച്ച്‌ രാത്രി പുറത്തിറങ്ങാറുപോലുമില്ല. തെരുവുവിളക്കുകൾ സ്ഥാപിക്കുകയും റോഡിന്‍റെ വശങ്ങൾകെട്ടി പൊട്ടിപ്പൊളിഞ്ഞ റോഡ്‌ ടാർചെയ്ത്‌ നന്നാക്കുകയും ചെയ്യണമെന്ന ആവശ്യം ശക്തമായിട്ടുണ്ട്‌.

കുറവമ്പാടിയിൽ കൃഷിനാശം വിതച്ച് കാട്ടാനക്കൂട്ടം

അഗളി: അട്ടപ്പാടി ഷോളയൂർ പഞ്ചായത്തിൽ കുറവൻപാടിയിൽ വൻകൃഷിനാശം വിതച്ച് കാട്ടാന വിളയാട്ടം. ശിർവാണിപ്പുഴയോരത്തുള്ള കൃഷിത്തോട്ടങ്ങളിലാണ് ആന നാശംവിതച്ചത്. കർഷകരായ പുതുവേലിൽ ഗോപി, പാലത്തിങ്കൽ മധു എന്നിവരുടെ തോട്ടങ്ങളിൽ തെങ്ങ്, കമുക്, ഏലം, വാഴ തുടങ്ങി കൃഷികൾ നശിപ്പിച്ചു. കായ്ഫലമുള്ള തെങ്ങുകളും കമുകുകളും ഏലകൃഷിയുമാണ് നശിപ്പിച്ചത്. ഏലക്കൃഷികൾ സംരക്ഷിക്കാനാകാത്തവണ്ണം ചവിട്ടി നശിപ്പിച്ചു. ഇന്നലെ പുലർച്ചയോടെയാണ് തോട്ടത്തിൽ ആനകള്‍ എത്തിയതെന്നാണ് കരുതുന്നത്. ലക്ഷക്കണക്കിനുരൂപയുടെ നഷ്ടമുണ്ടായതായി കർഷകർ പറഞ്ഞു. ഷോളയൂർ ഫോറസ്റ്റർ രതീഷ് സ്ഥലത്തെത്തി കൃഷിനാശം വിലയിരുത്തി. നടപടിക്രമങ്ങൾക്ക് വിധേയമായി കൃഷിനാശം സംഭവിച്ചവർക്ക് മതിയായ നഷ്ടപരിഹാരം നൽകുമെന്ന് ഫോറസ്റ്റർ പറഞ്ഞു. ഒരു മാസത്തിലധികമായി ഷോളയൂർ പഞ്ചായത്തിലെ കുറവൻപാടിയിലും, അഗളി പഞ്ചായത്തിലെ പുലിയറ, കുറവൻപാടി, ഉണ്ണിമല, കട്ടേക്കാട് പ്രദേശങ്ങളിലും കാട്ടാനശല്യം തുടരുകയാണ്. വൈകുന്നേരമായാൽ ആളുകൾക്കു പുറത്തിറങ്ങാൻ പറ്റാത്ത സ്ഥിതിയാണ്. തികച്ചും ഒറ്റപ്പെട്ട പ്രദേശമായ ഇവിടെ വന്യമൃഗങ്ങളെ ഭയന്ന് രാത്രിയിൽ അത്യാവശ്യഘട്ടത്തിൽ ടാക്സിപോലും കിട്ടാത്ത സ്ഥിതിയാണന്നു നാട്ടുകാർ ചൂണ്ടിക്കാട്ടി.

വിഎസിന്‍റെ ഓർമകളിൽ മുൻഡ്രൈവർ സുന്ദരൻ

ജോജി തോമസ് നെന്മാറ: അളുവശേരി സുന്ദരൻ എന്ന അന്പത്തിയഞ്ചുകാരന് വി.എസ്. അച്യുതാനന്ദനുമായുള്ളത് വളരെ വൈകാരികമായ ബന്ധം. 27 വർഷക്കാലം വിഎസിന്‍റെ സ്വകാര്യ ഡ്രൈവറായി സേവനം ചെയ്ത കാലം സുന്ദരൻ ഓർത്തെടുക്കുന്നു. കുടുംബത്തിലെ ഒരു അംഗത്തെപ്പോലെ സ്നേഹിച്ചുവന്ന വി.എസുമായുള്ള നാളുകൾ യാത്രയിൽ വിഎസിന്‍റെ ഇഷ്ടഗാനങ്ങൾ, വായിക്കാനുള്ള പത്രങ്ങൾ, അവശ്യവസ്തുക്കൾ, കുടിക്കാനുള്ള ചൂടുവെള്ളം എന്നിവ കരുതുന്നതും പാലക്കാട് മലമ്പുഴയിൽ വരുമ്പോഴുള്ള ചിട്ടവട്ടങ്ങളും സുന്ദരൻ ഓർത്തെടുത്തു. കർക്കശക്കാരനാണെങ്കിലും യാത്രയ്ക്കിടയിൽ കാറിലെ പാട്ടു കേൾക്കുന്നതു വിഎസിനു ഇഷ്ടമായിരുന്നു. എൽഡിഎഫ് കൺവീനറായതു മുതൽ മുഖ്യമന്ത്രിയായ കാലത്തും പ്രതിപക്ഷ നേതാവായ കാലത്തും ഭരണപരിഷ്‌കാര കമ്മീഷനായപ്പോഴും സുന്ദരനെ വിഎസ് മാറ്റിനിർത്തിയില്ല. ഭരണകാര്യങ്ങളിൽ വലിയ കർക്കശക്കാരനാണെങ്കിലും തന്നെപ്പോലുള്ള ജീവനക്കാരോടു സൗമ്യസ്വഭാവത്തോടെ മാത്രമേ പെരുമാറിയിരുന്നുള്ളൂവെന്നും സുന്ദരൻ ഓർത്തെടുക്കുന്നു. വലിയ തിരക്കുപിടിച്ച സമയത്തും തന്‍റെ വിവാഹചടങ്ങിൽ പങ്കെടുക്കാൻവേണ്ടി ഡൽഹിയിൽനിന്നു കുഴൽമന്ദത്തെ കല്യാണമണ്ഡപത്തിലെത്തിയത് താനുമായുള്ള ആത്മബന്ധം കൊണ്ടാണെന്നും സുന്ദരൻ പറഞ്ഞു. മരണവാർത്ത അറിഞ്ഞതോടെ വിഎസിനെ അവസാനമായി ഒരുനോക്കുകാണാൻ സുന്ദരൻ തിരുവനന്തപുരത്താണുള്ളത്.

വടക്കഞ്ചേരി ടൗൺറോഡുകളിൽ നായ്ക്കൂട്ടങ്ങൾ; കുട്ടികൾക്കു തനിച്ചു പുറത്തിറങ്ങാനാകില്ല

വടക്കഞ്ചേരി: വടക്കഞ്ചേരി ടൗണിലും സമീപപ്രദേശങ്ങളിലും ഭീഷണിയായി തെരുവുനായ്ക്കൂട്ടങ്ങൾ. ഗ്രാമം, കമ്മാന്തറ, ചന്തപ്പുര, ബസ് സ്റ്റാൻഡ്, മാംസവില്പന കടകളുള്ള മെയിൻറോഡ്, ചെറുപുഷ്പം ജംഗ്ഷൻ, കാരയങ്കാട് തുടങ്ങിയ സ്ഥലങ്ങളിലാണ് നായ്ക്കൂട്ടങ്ങൾ വിലസുന്നത്. നായ്ക്കൾ പെരുകിയതിനാൽ കുട്ടികൾക്ക് തനിച്ച് പുറത്തിറങ്ങാൻ കഴിയാത്ത സ്ഥിതിയായി. വീടുകളുടെ ഗേറ്റിനു മുന്നിൽ തമ്പടിക്കുന്ന നിലയിലാണ് നായ്ക്കൾ. ആളുകൾക്ക് വീടുകളിലേക്കു കടക്കാനോ വീട്ടിൽനിന്ന് പുറത്തിറങ്ങാനോ കഴിയില്ല. ഗേറ്റ് തുറന്നാൽ നായ്ക്കൾ കൂട്ടംകൂടി പാഞ്ഞെത്തും. കുട്ടികളെ സ്കൂളിലേക്കു തനിച്ചുവിടാൻ കഴിയാത്ത സ്ഥിതിയാണെന്നു രക്ഷിതാക്കൾ പറഞ്ഞു. നായശല്യത്തിന് പരിഹാരം കാണണമെന്നാവശ്യപ്പെട്ട് നാട്ടുകാർ പലതവണ പഞ്ചായത്തിൽ പരാതി നൽകിയിട്ടും നടപടിയില്ലെന്നാണ് ആക്ഷേപം. ജനങ്ങളുടെ ഭീതിയകറ്റാൻ പഞ്ചായത്ത് അധികൃതർ നടപടി സ്വീകരിച്ചില്ലെങ്കിൽ സമരവുമായി രംഗത്തുവരുമെന്നു ബിജെപി പഞ്ചായത്ത് പ്രസിഡന്‍റ് പി.കെ. ഗുരു പറഞ്ഞു.

ഒറ്റപ്പാലം- മണ്ണാർക്കാട് റോഡിൽ കുഴികൾ അടയ്ക്കൽ തുടങ്ങി

ഒറ്റപ്പാലം: ഒറ്റപ്പാലം- മണ്ണാർക്കാട് റോഡിൽ കുഴികളടയ്ക്കൽ തുടങ്ങി. മാസങ്ങളായി തകർന്നുകിടക്കുന്ന റോഡാണിത്. മഴ തുടരുന്ന സാഹചര്യത്തിൽ താത്കാലിക പരിഹാരം എന്നനിലയിൽ ക്വാറിവേസ്റ്റ് തള്ളിയാണ് കുഴിയടയ്ക്കൽ. മണ്ണാർക്കാട് റോഡിൽ ഈസ്റ്റ് ഒറ്റപ്പാലം പൂളക്കുണ്ടിനു സമീപത്തെ കുഴിയിൽവീണ് ബൈക്ക് യാത്രക്കാരന് കഴിഞ്ഞ ദിവസം പരിക്കേറ്റിരുന്നു. പാത തകർന്നുകിടക്കുന്ന ഈസ്റ്റ് ഒറ്റപ്പാലം മുതൽ മുരുക്കുംപറ്റ വരെയുള്ള ഭാഗത്തെ കുഴികളാണ് ആദ്യഘട്ടത്തിൽ അടച്ചത്. കഴിഞ്ഞ രാത്രിയാണ് റോഡിലെ കുഴിയിൽ ചാടിയ ബൈക്ക് നിയന്ത്രണം വിട്ടുമറിഞ്ഞ് ചുനങ്ങാട് പിലാത്തറ തോട്ടത്തൊടിയിൽ കബീറിനു (48) പരിക്കേറ്റത്. ഒറ്റപ്പാലം ടൗണിൽ നിന്നു വീട്ടിലേക്കു പോകുന്നതിനിടെ പൂളക്കുണ്ട് ഭാഗത്തായിരുന്നു അപകടം. മഴയത്തു വെള്ളം കെട്ടിനിൽക്കുന്ന കുഴികൾ വലിയ അപകടഭീഷണിയാണ് ഉയർത്തുന്നത്. വലിയ റോഡിലെ വലിയ കുഴികൾ എല്ലാം അടയ്ക്കാനാണ് പൊതുമരാമത്ത് വകുപ്പിന്‍റെ നിർദേശം. വരുംദിവസങ്ങളിൽ മറ്റു ഭാഗങ്ങളിലെയും കുഴികൾ അടയ്ക്കും. മഴ മാറിക്കഴിഞ്ഞാൽ ടാറിംഗ് നടത്തി നവീകരിക്കാനാണ് അധികൃതരുടെ തീരുമാനം.

പാലക്കാട്- കുളപ്പുള്ളി പ്രധാന പാതയിൽ വെള്ളക്കെട്ടും കുഴികളും അപകടഭീഷണി

ഷൊർണൂർ: പാലക്കാട്- കുളപ്പുള്ളി പാതയിൽ അപകടഭീഷണി ഉയർത്തി വെള്ളക്കെട്ടുകൾ. റോഡിലെ കുഴികളിൽ വെള്ളംനിറഞ്ഞ് കിടക്കുന്ന അവസ്ഥയ്ക്കു പുറമെയാണ് വെള്ളക്കെട്ടിന്‍റെകൂടി ഭീഷണി ഉയർന്നിരിക്കുന്നത്. നേരത്തെ പൊതുമരാമത്ത് റോഡ് വിഭാഗത്തിന്‍റെ നേതൃത്വത്തിൽ വെള്ളക്കെട്ടുകൾ ഒഴിവാക്കാൻ നടപടികൾ സ്വീകരിച്ചിരുന്നു. എന്നാൽ മഴ ശക്തമായതോടെ കുളപ്പുള്ളി മുതൽ പത്തിരിപ്പാല വരെയുള്ള ഭാഗങ്ങളിൽ അഴുക്കുചാൽനിറഞ്ഞ് പല ഭാഗങ്ങളിലും റോഡിലേക്കാണ് വെള്ളം ഒഴുകിവരുന്നത്. ചാലുകളിൽ അടിഞ്ഞുകൂടിയ മണ്ണ് നീക്കംചെയ്യാതിരുന്നതും തിരിച്ചടിയായി. റോഡിലെ വെള്ളം ഒഴുകിപ്പോകുന്നതിനുള്ള സാഹചര്യം പല ഭാഗങ്ങളിലും ഇല്ല. പാതയിൽ പലഭാഗത്തും റോഡിൽ മഴ പെയ്താൽ വെള്ളക്കെട്ട് പ്രശ്നമുണ്ട്. വെള്ളംകെട്ടിനിന്നാൽ ചരലുംമണ്ണും അടിഞ്ഞുകൂടുന്ന സ്ഥിതിയുമാണ്. ഇതിനു പുറമേ പാതയോരത്തെ അപകടഭീഷണിയായി മരങ്ങളും വളർന്നുനിൽക്കുന്നുണ്ട്. റോഡുകളിൽ രൂപപ്പെട്ട കുഴികളിൽ വെള്ളംനിറഞ്ഞ് ഇരുചക്രവാഹനങ്ങളും ഓട്ടോറിക്ഷകളും മറ്റു ചെറുവാഹനങ്ങളും അപകടത്തിൽപെടുന്നതും പതിവായിട്ടുണ്ട്. റോഡിന്‍റെ പല ഭാഗങ്ങളും തകർച്ച നേരിട്ടിരിക്കുകയാണ്. വാണിയംകുളം അജപ മഠത്തിനു സമീപമുള്ള റോഡിലെ കുഴികൾ വലിയ അപകടഭീക്ഷിയാണ് ഉയർത്തുന്നത്.

വാർഷിക ജനറൽ ബോഡിയോഗം

പാലക്കാട്: ടൗണ്‍ റീട്ടെയിൽ മർച്ചന്‍റ് അസോസിയേഷൻ വാർഷിക ജനറൽബോഡി യോഗം കേരള വ്യാപാരി വ്യവസായി ഏകോപന സമിതി ജില്ലാ പ്രസിഡന്‍റ് ബാബു കോട്ടയിൽ ഉദ്ഘാടനം ചെയ്തു. പ്രസിഡന്‍റ് ടി.പി. സക്കറിയ അധ്യക്ഷത വഹിച്ചു. ജനറൽ സെക്രട്ടറി കെ. അരവിന്ദാക്ഷൻ വാർഷിക റിപ്പോർട്ടും ട്രഷറർ ആർ. കൃഷ്ണൻ വരവ് ചെലവ് കണക്കും അവതരിപ്പിച്ചു. ജില്ലാ നേതാക്കളായ സി.വി. ജെയിംസ്, എം.എസ്. സിറാജ്, പി ടിആർഎംഎ ഭാരവാഹികളായ കാജാ സുലൈമാൻ, എസ്. കൃഷ്ണകുമാർ, ബി. രാജേന്ദ്രൻ, ആർ. കൃഷ്ണൻ, വി. ചന്ദ്രൻ, മുഹമ്മദ് ബഷീർ, എം.യു. അബുതാഹിർ, കെ.വി. കുഞ്ചപ്പൻ, കെ. അബ്ദുൾസലാം ഹാജി, നിഖിൽ കൊടിയത്തൂർ, എം. സുരേഷ് എന്നിവർ പ്രസംഗിച്ചു. തുടർന്ന് മെംബർമാരുടെ മക്കളിൽ എസ്എസ്എൽസി, പ്ലസ് ടു ഉന്നത വിജയം കരസ്ഥമാക്കിയവരെ പാരിതോഷികം നൽകി ആദരിച്ചു.

യുവക്ഷേത്ര കോളജിൽ സർട്ടിഫിക്കറ്റ് കോഴ്സ് ഉദ്ഘാടനം ചെയ്തു

മുണ്ടൂർ: യുവക്ഷേത്ര കോളജിലെ റിസർച്ച് കമ്മിറ്റിയുടെ നേതൃത്വത്തിൽ ബികോം സിഎ നടത്തുന്ന ഇന്ത്യൻ ഫിനാൻഷ്യൽ സിസ്റ്റം എന്ന സർട്ടിഫിക്കറ്റ് കോഴ്സ് ചേലക്കര ഗവ. ആർട്സ് ആൻഡ് സയൻസ് കോളജ് കൊമേഴ്സ് വിഭാഗം അസി.പ്രഫ. കെ. ആനന്ദ് ഉദ്ഘാടനം ചെയ്തു. പ്രിൻസിപ്പൽ ഡോ.ടോമി ആന്‍റണി അധ്യക്ഷനായിരുന്നു. ഡയറക്ടർ റവ. ഡോ. മാത്യു ജോർജ് വാഴയിൽ, ബികോം സിഎ മേധാവി രജിത രാജേന്ദ്രൻ എന്നിവർ ആശംസകൾ അർപ്പിച്ചു. അസി.പ്രഫ. കെ.ആർ. രാഹുൽ സ്വാഗതവും വിദ്യാർഥി മാധവ് ആർ. നായർ നന്ദിയും പറഞ്ഞു. തുടർന്ന് റിസർച്ച് മെത്തഡോളജി എന്ന വിഷയത്തിൽ നടന്ന സെമിനാറിൽ കെ. ആനന്ദ് ക്ലാസ് എടുത്തു.

തൃത്താല മണ്ഡലത്തിലെ ഗ്രാമീണ റോഡുകളുടെ നിർമാണം സെപ്റ്റംബറോടെ പൂർത്തിയാക്കും

പാലക്കാട്: തൃത്താല മണ്ഡലത്തിലെ റോഡ് നിർമാണ പ്രവൃത്തികളുടെ അവലോകന യോഗം മന്ത്രി എം.ബി. രാജേഷിന്‍റെ അധ്യക്ഷതയിൽ തൃത്താല ബ്ലോക്ക് പഞ്ചായത്ത് ഹാളിൽ ചേർന്നു. മണ്ഡലത്തിലെ 23 ഗ്രാമീണ റോഡുകളുടെ നിർമാണ പ്രവൃത്തികൾ സെപ്റ്റംബർ മാസത്തോടെ പൂർത്തീകരിക്കാൻ മന്ത്രി നിർദേശം നൽകി. മഴ മാറുന്ന മുറയ്ക്ക് നിർമാണ പ്രവർത്തനങ്ങൾ ആരംഭിച്ച് സമയബന്ധിതമായി പൂർത്തീകരിക്കാൻ ഉദ്യോഗസ്ഥരും കരാറുകാരും തയ്യാറാകണമെന്നും മന്ത്രി ആവശ്യപ്പെട്ടു. തൃത്താല പടിഞ്ഞാറങ്ങാടി റോഡ് നിർമാണത്തിൽ വീഴ്ച വരുത്തിയ കരാറുകാരനെ ഒഴിവാക്കാൻ മന്ത്രി നിർദേശിച്ചു. റീ ടെൻഡർ നടത്തി റോഡ് നിർമാണം എത്രയും പെട്ടെന്ന് പൂർത്തീകരിക്കാൻ ബന്ധപ്പെട്ട ഉദ്യോഗസ്ഥർക്ക് നിർദേശം നൽകി. ജൽജീവൻ പദ്ധതിക്ക് വേണ്ടി വാട്ടർ അഥോറിറ്റി പൊളിച്ച വളപ്പുള്ളിക്കാവ് ചാത്തന്നൂർ റോഡിലെ 600 മീറ്റർ ദൂരത്തെ റോഡ് നിർമാണം പുനരാരംഭിക്കാൻ യോഗത്തിൽ തീരുമാനമായി. പിഡബ്ല്യുഡിയുടെ രേഖാമൂലമുള്ള അനുമതി ലഭിക്കാതെ വാട്ടർ അഥോറിറ്റി റോഡ് പൊളിക്കരുതെന്നും മന്ത്രി നിർദേശിച്ചു. ബിഎം കഴിഞ്ഞ റോഡുകളുടെ ബിസി നിർമാണം എത്രയും പെട്ടെന്ന് പൂർത്തീകരിക്കാനും യോഗത്തിൽ നിർദേശിച്ചു. യോഗത്തിൽ പൊതുമരാമത്ത് റോഡ്സ് വിഭാഗം സൂപ്രണ്ടിംഗ് എൻജിനീയർ പി.കെ. മിനി, എൽഎസ്ജിഡി എക്സിക്യൂട്ടീവ് എൻജിനീയർ അഭിലാഷ് കൃഷ്ണൻ, വകുപ്പ് ഉദ്യോഗസ്ഥർ തുടങ്ങിയവർ പങ്കെടുത്തു.

കല്ലടിക്കോട് റോട്ടറി ക്ലബ് ഭാരവാഹികളുടെ സ്ഥാനാരോഹണം

കല്ലടിക്കോട്: സാമൂഹ്യ വിദ്യാഭ്യാസ സാമ്പത്തിക സ്വയം പര്യാപ്തമേഖലകളിൽ കല്ലടിക്കോട് റോട്ടറി ക്ലബിന്‍റേത് മഹത്തായ മാതൃകയെന്ന് സിനിമാനടൻ ജെയ്സ് ജോസ് പറഞ്ഞു. സമൂഹത്തിൽ വേർതിരിവുകളില്ലാതെ സഹായം എത്തിക്കുന്നതിൽ ക്ലബ് എന്നും മുൻപന്തിയിലാണെന്നും അദ്ദേഹം പറഞ്ഞു. കല്ലടിക്കോട് റോട്ടറി ക്ലബിന്‍റെ പുതിയ ഭാരവാഹികളുടെ സ്ഥാനാരോഹണം ഉദ്ഘാടനം ചെയ്ത് പ്രസംഗിക്കുകയയിരുന്നു അദേഹം. ക്ലബ് പ്രസിഡന്‍റ് ആദർശ് അബ്രഹാം അധ്യക്ഷത വഹിച്ചു. റോട്ടറി ക്ലബ് ഡിസ്ട്രിക്റ്റ് ഡയറക്ടർ മനോജ് മുടപ്പാല, അസിസ്റ്റന്‍റ് ഗവർണർ ആർ. സുധീർ, ഗവർണേഴ്സ് ഗ്രൂപ്പ് റപ്രസന്‍റേറ്റീവ് അഭിലാഷ് ജി. ആസാദ്, എം.ദേവദാസ്, ജെറിൻ ടോം, ഡോ. മാത്യു കല്ലടിക്കോട്, പി. അനിൽ, സി.കെ. ജയശ്രി, പി. രവി, അനൂപ് വർക്കി, ആദർശ് കുര്യൻ, ഷിജു ജോർജ് തുടങ്ങിയവർ പ്രസംഗിച്ചു.പുതിയ ഭാരവാഹികളായി ജെറിൻ ടോം-പ്രസിഡന്‍റ്), സി.കെ.ജയശ്രീ-വൈസ് പ്രസിഡന്‍റ്, ഡോ. മാത്യു കല്ലടിക്കോട്- സെക്രട്ടറി, ഷിജു ജോർജ്- ജോയിന്‍റ് സെക്രട്ടറി), എ. രാജേഷ് -ട്രഷറർ എന്നിവരെ തെരഞ്ഞെടുത്തു.

റോഡരികിൽ പ്ലാസ്റ്റിക് കവറുകൾ തള്ളുന്നവരെ പിടികൂടണം

പുതുനഗരം: കൊടുവായൂർ -തത്തമംഗലം പ്രധാനപാതയ്ക്കരികിൽ പ്ലാസ്റ്റിക് മാലിന്യം തള്ളുന്നത് വർധിച്ചുവരുന്നതിൽ ബന്ധപ്പെട്ട പഞ്ചായത്ത് അധികൃതർ നടപടി വേണമെന്നതാണ് സമീപവാസികളുടെ ആവശ്യം. റോഡിന്‍റെ വടക്കുഭാഗത്താണ് രാത്രിസമയങ്ങളിൽ ഇരുചക്രവാഹനങ്ങളിൽ മാലിന്യം കൊണ്ടുവന്നിടുന്നത്. തട്ടുകടകളിൽ ചെറിയ പ്ലാസ്റ്റിക് കവറുകൾ ഉപയോഗിച്ചാൽ പിടികൂടി പിഴയടപ്പിക്കുന്ന ഹെൽത്ത് ഇൻസ്പെക്ടർമാർ നിരത്തിൽ പ്ലാസ്റ്റിക് കവറുകൾ തള്ളുന്നത് കണ്ടില്ലെന്ന് നടിക്കുന്നതിൽ പ്രതിഷേധം നിലവിലുണ്ട്. റോഡ് വക്കത്ത് തീറ്റതേടുന്ന ആടും പശുക്കളും പ്ലാസ്റ്റിക് കവറുകളിലെ മാലിന്യം ഭക്ഷിക്കുകയാണ്. അബദ്ധത്തിൽ കവർ വയറ്റിലെത്തിയാൽ നാൽക്കാലികൾക്ക് മരണംവരെ സംഭവിക്കാനുളള സാധ്യതയുമുണ്ട്. സമാനമായ രീതിയിൽ ചിറ്റൂരിൽ ഒരു പശുക്കുട്ടി ചത്തസംഭവവും നടന്നിരുന്നു.

റേഷൻ ഡീലേഴ്സ് അസോസിയേഷൻ താലൂക്ക്സമ്മേളനവും കുടുംബസംഗമവും

വടക്കഞ്ചേരി: കേരള സ്റ്റേറ്റ് റീട്ടെയിൽ റേഷൻ ഡീലേഴ്സ് അസോസിയേഷൻ ആലത്തൂർ താലൂക്ക് സമ്മേളനവും കുടുംബസംഗമവും നടന്നു. വടക്കഞ്ചേരി വ്യാപാരഭവനിൽ നടന്ന പരിപാടികൾ ഭക്ഷ്യ സിവിൽ സപ്ലൈസ് മന്ത്രി ജി.ആർ. അനിൽ ഉദ്ഘാടനം ചെയ്തു. അസോസിയേഷൻ താലൂക്ക് പ്രസിഡന്‍റ് കെ. ശിവദാസ് അധ്യക്ഷത വഹിച്ചു. പി.പി.സുമോദ് എംഎൽഎ മുഖ്യാതിഥിയായി. സംസ്ഥാന ജനറൽ സെക്രട്ടറി കെ. ബി. ബിജു, സംസ്ഥാന ട്രഷറർ വി. അജിത്ത് കുമാർ, ജില്ലാ ജനറൽ സെക്രട്ടറി ശിവദാസ് വേലിക്കാട്, സി.എച്ച്. റഷീദ്, എം. രാധാകൃഷ്ണൻ, എം. ഉണ്ണികൃഷ്ണൻ, രാമചന്ദ്രൻ, സുന്ദരൻ, പി.പി. ദയാനന്ദൻ, ബാലകൃഷ്ണൻ, ശുഭരാജ്, ജയശ്രീ, എ.കെ. രാജൻ പ്രസംഗിച്ചു.

ഷൊർണൂർ -കുളപ്പുള്ളി റോഡിന്‍റെ ശനിദശയ്ക്കു പരിഹാരമായില്ല

ഷൊർണൂർ: ഷൊർണൂർ-കുളപ്പുള്ളി റോഡിന്‍റെ ശനിദശക്ക് പരിഹാരമാകാതെ ദുരിതയാത്ര തുടരുന്നു. റോഡ് തകർന്ന് നാമാവശേഷമായിട്ടും അധികൃതർ അനങ്ങാത്ത സ്ഥിതിയാണ്. ഓരോ മഴക്കാലത്തും റോഡ് ചെളിക്കുളമാണ്. ഒട്ടേറെപേർ പരാതി നൽകിയിട്ടും പൊതുമരാമത്ത് വകുപ്പ് മെല്ലെപ്പോക്കു നയം തുടരുകയാണ്. കുളപ്പുള്ളി - തൃശൂർ സംസ്ഥാനപാതയിൽ കുളപ്പുള്ളി മുതൽ പൊതുവാൾ ജംഗ്ഷൻ വരെയുള്ള തകർന്ന റോഡുകൾ ഗതാഗതയോഗ്യമാക്കണമെന്ന ജനകീയാവശ്യം അധികൃതർ കണ്ടില്ലെന്ന് നടിക്കുകയാണ്. മാസങ്ങൾക്കു മുമ്പാണ് കൊച്ചിപ്പാലം മുതൽ എസ്എംപി വരെയുള്ള റോഡ് നവീകരണം പൂർത്തിയാക്കിയത്. ഇതിനിടയിൽ തകർന്ന ഭാഗങ്ങളിൽ പല തവണകളായി താത്കാലികമായി കുഴിയടയ്ക്കുക മാത്രമാണു ചെയ്തത്. മഴയുള്ളതു കൊണ്ടാണ് നവീകരണം വൈകുന്നത് എന്നായിരുന്നു പൊതുമരാമത്ത് വകുപ്പിന്‍റെ പതിവായുള്ള മറുപടി. ഷൊർണൂരിലെ പ്രധാന റോഡുകൾ ഗതാഗതയോഗ്യമാക്കണമെന്ന് ആവശ്യപ്പെട്ട് പ്രതിപക്ഷപാർട്ടികളും ഭരണപക്ഷവും വരെ മുൻകാലങ്ങളിൽ സമരരംഗത്ത് ഇറങ്ങിയിരുന്നു. എന്നിട്ടും ഫലം ഒന്നും ഉണ്ടായില്ല. പാലക്കാട് – കുളപ്പുള്ളി പാതയിൽ അപകടങ്ങൾ വർധിക്കുന്നതിന്‍റെ പ്രധാനകാരണം തകർന്ന റോഡുകളാണെന്നാണു ബസുടമകൾ പറയുന്നത്. കൃത്യമായ സമയത്തിന് ഓടിയെത്താൻ കഴിയാതെ സ്വകാര്യബസുകൾ പ്രതിസന്ധിയിലാവുകയാണ്. ഒറ്റപ്പാലം -തൃശൂർ റൂട്ടിലോടുന്ന സ്വകാര്യ ബസുകൾക്കു കൊച്ചിപ്പാലം മുതൽ കുളപ്പുള്ളി വരെ 10 മിനിറ്റോളം സമയനഷ്ടം ഉണ്ടാകുന്നുണ്ട്. ഈ ബസുകൾ കുളപ്പുള്ളിയിൽനിന്ന് ഒറ്റപ്പാലത്തേക്കു പോകുമ്പോൾ ഈ സമയനഷ്ടം നികത്താൻ ശ്രമിക്കുമ്പോഴാണ് അപകടങ്ങളുണ്ടാകുന്നത്. പാലക്കാട്-ഗുരുവായൂർ റൂട്ടിലോടുന്ന ബസുകൾക്കും പട്ടാമ്പി മുതൽ കുളപ്പുള്ളി വരെയുള്ള ഭാഗങ്ങളിൽ തകർന്ന റോഡിൽ സമയനഷ്ടമുണ്ടാകുന്നുണ്ട്. പൊട്ടിത്തകർന്ന് കിടക്കുന്ന റോഡിൽ അപകടങ്ങൾ സംഭവിക്കുന്നത് പതിവായി തീർന്നിട്ടുണ്ട്. ഇത് ഏറ്റവും അധികം നടക്കുന്നത് ഷൊർണൂർ-കുളപ്പുള്ളി പാതയിലാണ്.

ലയൺസ് ക്ലബ് ഓഫ് വടക്കഞ്ചേരി മലബാറിന്‍റെ പുതിയ കെട്ടിടം ഉദ്ഘാടനവും ഭാരവാഹികളുടെ സ്ഥാനാരോഹണവും

വടക്കഞ്ചേരി: അണക്കപ്പാറയിൽ ഫോറസ്റ്റ് ഓഫീസിനു സമീപം നിർമാണം പൂർത്തിയായ ലയൺസ് ക്ലബ് ഓഫ് വടക്കഞ്ചേരി മലബാറിനായുള്ള പുതിയ ഓഫീസ് കെട്ടിടസമുച്ചയത്തിന്‍റെ ഉദ്ഘാടനവും പുതിയ ഭാരവാഹികളുടെ സ്ഥാനാരോഹണവും നടന്നു. കെട്ടിട സമുച്ചയത്തിന്‍റെ ഉദ്ഘാടനം ലയൺസ് ഡിസ്ട്രിക്ട് ഗവർണർ ടി. ജയകൃഷ്ണൻ നിർവഹിച്ചു. സെക്കന്‍റ് വൈസ് ഡിസ്ട്രിക്ട് ഗവർണർ കെ.എം. അഷറഫ് ഓഫീസ് ഉദ്ഘാടനം ചെയ്തു. ഫസ്റ്റ് വൈസ് ഡിസ്ട്രിക്ട് ഗവർണർ സുരേഷ് കെ.വാര്യർ ഭാരവാഹികളുടെ സ്ഥാനാരോഹണം നടത്തി. ക്ലബ് പ്രസിഡന്‍റ് എബി കെ. സേവ്യർ അധ്യക്ഷത വഹിച്ചു. ബേബി വർഗീസ് റിപ്പോർട്ട് അവതരിപ്പിച്ചു. ഡോ. കുട്ടമണി, ചാർട്ടർ മെംബർ എം. വി. തോമസ്, റീജനൽ ചെയർമാൻ സ്വാമിനാഥൻ, സോൺ ചെയർമാൻ സദാനന്ദൻ, ലേഡി റീജിയൻ ചെയർപേഴ്സൺ സരസ്വതി സ്വാമിനാഥൻ, ആനിയമ്മ ജോസഫ്, ബാബു പീറ്റർ, സീൻ ജോസഫ് ചെറുനിലം, രാജൻ മാത്യു പ്രസംഗിച്ചു. കെ.പി. രാജേന്ദ്രൻ - പ്രസിഡന്‍റ്, സജോ ജോർജ് തേവർകാട് - സെക്രട്ടറി, സി.എൻ.ഷിനു - ട്രഷറർ എന്നിവരാണ് പുതിയ ഭാരവാഹികൾ.

മന്ത്രി ശിവൻകുട്ടിയെ കരിങ്കൊടി കാണിച്ച യൂത്ത് കോൺഗ്രസ് പ്രവർത്തകർ അറസ്റ്റിൽ

നെന്മാറ: വിദ്യാഭ്യാസ മന്ത്രി വി. ശിവൻകുട്ടിക്കെതിരേ കരിങ്കൊടി പ്രതിഷേധം കാണിച്ച കോൺഗ്രസ് പ്രവർത്തകരെ നെന്മാറ പോലീസ് അറസ്റ്റ് ചെയ്തു. കോൺഗ്രസ് ജില്ലാ ജനറൽ സെക്രട്ടറി വിനീഷ് കരിമ്പാറ, നിയോജകമണ്ഡലം ജനറൽ സെക്രട്ടറി കെ.ജി. രാഹുൽ എന്നിവരെ പുലർച്ചെ വീടുകളിൽ എത്തി അറസ്റ്റ് ചെയ്ത് കരുതൽ തടങ്കലിൽ ആക്കിയിരുന്നു. തുടർന്ന് കൂടല്ലൂരിൽ വെച്ച് യൂത്ത് കോൺഗ്രസ് നിയോജക മണ്ഡലം പ്രസിഡന്‍റ് മനു പല്ലാവൂർ, കോൺഗ്രസ് മണ്ഡലം പ്രസിഡന്‍റ് പി.എസ്. രാമനാഥൻ, കുമാരൻ പല്ലാവൂർ എന്നിവരുടെ നേതൃത്വത്തിലാണ് മന്ത്രിയെ കരിങ്കൊടി കാണിച്ചത്. വിത്തനശേരി ബ്ലോക്ക് ഓഫീസ് ജംഗ്ഷനിൽ ജില്ലാ ജനറൽ സെക്രട്ടറി ശ്യാം ദേവദാസ്, ബ്ലോക്ക് കോൺഗ്രസ് വൈസ് പ്രസിഡന്‍റ് സുധീർ പാറക്കളം, പി. സുജിത് എന്നിവരുടെ നേതൃത്വത്തിൽ മന്ത്രിയെ കരിങ്കൊടി കാണിച്ചു പ്രതിഷേധം അറിയിച്ചു. തുടർന്ന് മന്ത്രി പരിപാടി കഴിഞ്ഞ് തിരികെപോകുമ്പോൾ നെന്മാറ അയിനംപാടം ഡിഎഫ്ഒ ഓഫീസിനു മുന്നിൽ യൂത്ത് കോൺഗ്രസ് നേതാക്കളായ പ്രമോദ് തണ്ടലോട്, പപ്പൻ ചിറ്റിലഞ്ചേരി, യൂത്ത് കോൺഗ്രസ് മണ്ഡലം പ്രസിഡന്‍റ് ഷാജാസ് കടമ്പടി എന്നിവരുടെ നേതൃത്വത്തിൽ മന്ത്രിക്കെതിരേ കരിങ്കൊടിപ്രതിഷേധം അറിയിച്ചു. കരിങ്കൊടിപ്രതിഷേധം അറിയിച്ചവരായ പ്രവർത്തകരെയും, കരുതൽതടവിലാക്കിയ നേതാക്കളെയും നെന്മാറ പോലീസ് സ്റ്റേഷനിൽനിന്ന് ജാമ്യത്തിൽ ഇറക്കി നിയോജകമണ്ഡലം യൂത്ത് കോൺഗ്രസ് കമ്മിറ്റിയുടെ നേതൃത്വത്തിൽ ടൗണിൽ പ്രതിഷേധ പ്രകടനം നടത്തി. ഡിസിസി ജനറൽ സെക്രട്ടറി കെ.ജി. എൽദോ ഉദ്ഘാടനം ചെയ്തു. യൂത്ത് കോൺഗ്രസ് നിയോജകമണ്ഡലം ജനറൽ സെക്രട്ടറി ആർ. അനൂപ് അധ്യക്ഷത വഹിച്ചു. നേതാക്കളായ കെ. വി. ഗോപാലകൃഷ്ണൻ, പ്രദീപ് നെന്മാറ, എസ്.എം. ഷാജഹാൻ, എ. മോഹനൻ. എ. രാധാകൃഷ്ണൻ, ആർ. വേലായുധൻ, എൻ. ഗോകുൽദാസ്, ബാബു വക്കാവ്, വൈ. അക്ബർ, ഡാനിഷ് മാത്യു, ഷനൂപ് പൂഞ്ചേരി, എസ്. പ്രശാന്ത്, എം.എം. മനോജ് എന്നിവർ നേതൃത്വം നൽകി.

രാഷ്ട്രീയം മറന്ന് വിഎസിനെ നെഞ്ചിലേറ്റി നാട്

വടക്കഞ്ചേരി: മുൻമുഖ്യമന്ത്രി വി.എസ്. അച്യുതാനന്ദന്‍റെ വിയോഗവാർത്ത രാഷ്ട്രീയ നിറങ്ങൾക്കപ്പുറം നാടിന്‍റെ മുഴുവൻ വേദനയായി മാറി. വിഎസിന്‍റെ ഓർമകളിലൂടെയായിരുന്നു ഇന്നലെ വൈകുന്നേരം പരസ്പരം കണ്ടുമുട്ടുന്നവരെല്ലാം സംസാരിച്ചത്. ഉമ്മൻ ചാണ്ടിക്ക് പിന്നാലെ മറ്റൊരു ജനകീയനേതാവ് നമ്മെ വിട്ടുപോകുന്നു എന്ന സങ്കടത്തോടെയുള്ള അഭിപ്രായപ്രകടനങ്ങളായിരുന്നു. എന്തോ ഒരു ശൂന്യത നിഴലിക്കുന്നപോലെ, വിപ്ലവനായകന്‍റെ വിയോഗത്തെ അങ്ങനെയാണ് പലരും വിലയിരുത്തിയത്. മുഖ്യമന്ത്രിയായും പ്രതിപക്ഷ നേതാവായും പാർട്ടി നേതാവായും പലതവണ അച്യുതാനന്ദൻ വടക്കഞ്ചേരിയിൽ എത്തിയിട്ടുണ്ട്. ജാഥകളുടെയും യാത്രകളുടെയും ജില്ലാതല സമാപനം പലപ്പോഴും വടക്കഞ്ചേരിയിൽ നടക്കുന്നതിനാൽ സംസ്ഥാന, ദേശീയ നേതാക്കൾക്കൊപ്പം വിഎസും വടക്കഞ്ചേരിയിൽ എത്തുമായിരുന്നു. പ്രസംഗത്തിലെ വാക്കുകളുടെ ആവർത്തനവും ചുരുക്കലുകളും മുതൽ അഴിമതിക്കാർക്കും വമ്പന്മാർക്കുമെതിരെയുള്ള ആക്രോശങ്ങളും കേട്ട് ജനം കൈയടിച്ച് വിഎസിന് പിന്തുണ നൽകും. 2009 ഒക്ടോബർ 31ന് ആലത്തൂർ നിയോജക മണ്ഡലം സമ്പൂർണ വൈദ്യുതീകരണ മണ്ഡലമായി പ്രഖ്യാപിക്കാൻ മംഗലംഡാമിൽ എത്തിയത് അന്ന് മുഖ്യമന്ത്രിയായിരുന്ന വിഎസായിരുന്നു. ഡാം സ്കൂൾ ജംഗ്ഷനിൽ നിന്നും സ്വീകരിച്ചാണ് അന്ന് ഉദ്ഘാടന വേദിയിലേക്ക് അദ്ദേഹത്തെ ആനയിച്ചത്. വിഎസ് എവിടെ വരുമ്പോഴും അവിടെ സിപിഎംകാർ മാത്രമല്ല പരിപാടികൾക്കെത്തുക. കൊടികളുടെ നിറം മാറ്റിവച്ച് നാട് മുഴുവൻ യോഗസ്ഥലത്തേക്ക് പ്രവഹിക്കും. വിഎസ് ജനങ്ങൾക്കെല്ലാം ഒരു ഹരമായിരുന്നു. തങ്ങളുടെ ഇല്ലായ്മകൾ, ആവശ്യങ്ങൾ കേൾക്കാനും അത് പരിഹരിക്കാനും ഒരാളുണ്ട് എന്ന തോന്നൽ എല്ലാ വിഭാഗം ജനങ്ങൾക്കും ഉണ്ടായിരുന്നു. ആ നല്ലകാലവും ഇനി ഓർമയാകും.

ദേശീയപാതയിൽ സ്കൂളിനു മുമ്പിൽ വെള്ളക്കെട്ട്: അധികൃതർക്കു നിസംഗത

കല്ലടിക്കോട്: പാലക്കാട്-കോഴിക്കോട് ദേശീയപാതയുടെ സമീപം കല്ലടിക്കോട് ടിബി എയുപി സ്കൂളിനു സമീപം വെള്ളക്കെട്ട്. അധികൃതർ നടപടിയെടുക്കാത്തതിൽ നാട്ടുകാർ പ്രതിഷേധത്തിൽ. കല്ലടിക്കോട് ടിബി യിൽ ഗവ.എൽപി സ്കൂളും എയുപി സ്കൂളും സ്ഥിതി ചെയ്യുന്നിടത്ത് ദേശീയപാതയോട് ചേർന്നുള്ള രൂക്ഷമായ വെള്ളക്കെട്ടും ചെളിയും രണ്ടു വിദ്യാലയത്തിലേക്കും വരുന്ന കുട്ടികളുടെ സഞ്ചാരത്തെ പ്രതിസന്ധിയിലാക്കുകയാണ്. വെള്ളക്കെട്ടും ചെളിയും അപകടം ക്ഷണിച്ചുവരുത്തുന്നതിനാൽ അധ്യാപകർക്കും രക്ഷിതാക്കൾക്കുമുള്ള ആശങ്ക പഞ്ചായത്ത് ഭരണസമിതിയെ അറിയിച്ചെങ്കിലും പൊതുമരാമത്ത് വകുപ്പിന്‍റെ ചുമതലയാണെന്ന് പറഞ്ഞ് പരിഹരിക്കാനാവശ്യമായ ഒരുനടപടിയും അധികൃതരുടെ ഭാഗത്തുനിന്ന് ഉണ്ടായില്ലെന്ന് രക്ഷിതാക്കൾ പരാതിപ്പെടുന്നു. ചെറിയകുട്ടികൾ പഠിക്കുന്ന വിദ്യാലയമാണ്. മഴയുള്ളപ്പോൾ റോഡിന്‍റെ ഒരു വശത്ത് പൂർണമായും സ്കൂൾമതിലിനു ചുറ്റും മഴവെള്ളവും ചെളിയും കെട്ടിനിൽക്കുന്ന കാഴ്ചയാണ്. പൊതുവെ അപകടകേന്ദ്രമാണ്.

മംഗലം -ഗോവിന്ദാപുരം സംസ്ഥാനപാതയിലെ കുഴികൾ താത്കാലികമായി അടച്ചു

വടക്കഞ്ചേരി: മംഗലം - ഗോവിന്ദാപുരം സംസ്ഥാനപാതയിൽ വാഹനയാത്രികരെ പേടിപ്പെടുത്തിയിരുന്ന കുഴികൾ വീണ്ടും മെറ്റലിട്ട് താത്കാലികമായി അടച്ചു. ഇന്നലെ ഉച്ചയോടെയാണ് കുഴിയടയ്ക്കൽ ചടങ്ങ് നടത്തിയത്. പാത തുടങ്ങുന്ന മംഗലംപാലം മുതൽ വള്ളിയോട് വരെ വരുന്ന ഒന്നര കിലോമീറ്ററിലെ ഏതാനും കുഴികളാണ് അടച്ചിട്ടുള്ളത്. മഴതുടങ്ങി ഒന്നര മാസത്തിനുള്ളിൽ ഇത് നാലാംതവണയാണ് കുഴിയടയ്ക്കൽ നടക്കുന്നത്. ഇതിന് എത്രദിവസം ആയുസുണ്ടാകും എന്നൊക്കെ കണ്ടറിയണം. എന്തായാലും രണ്ടുമൂന്നുദിവസമെങ്കിലും കുഴിയിൽ ചാടി വാഹനത്തിന്‍റെ അടിഭാഗം തട്ടുന്നത് തത്കാലത്തേക്ക് ഒഴിവാകും എന്ന സമാധാനത്തിലാണ് വാഹനയാത്രികർ. സംസ്ഥാനപാതയിലെ കുഴികൾ മൂടി വാഹനങ്ങൾക്ക് കടന്നുപോകാൻ സൗകര്യമൊരുക്കണമെന്നും പാത നാലുവരിയാക്കി വികസിപ്പിക്കണമെന്നും കഴിഞ്ഞദിവസം വടക്കഞ്ചേരിയിൽ സമാപിച്ച സിപിഐ ജില്ലാ സമ്മേളനത്തിൽ പ്രമേയം പാസാക്കിയിരുന്നു. സമ്മേളനത്തെ വരവേൽക്കുന്നത് തകർന്ന് തരിപ്പണമായി കിടക്കുന്ന റോഡുകളാണെന്ന് ചൂണ്ടിക്കാട്ടി സമ്മേളനദിവസം ദീപികയിലും കുഴികളുടെ പടങ്ങൾ സഹിതം വാർത്ത നൽകുകയുണ്ടായി. ഇതെ തുടർന്നാണ് പൊതുമരാമത്ത് വകുപ്പ് കുഴിയടയ്ക്കൽ നടത്തിയിട്ടുള്ളത്.

വിദ്യാഭ്യാസരംഗത്ത് കേരളം രാജ്യത്തിനു മാതൃക: മന്ത്രി വി.ശിവൻകുട്ടി

കൊടുവായൂർ: വിദ്യാഭ്യാസരംഗത്ത് കേരളം രാജ്യത്തിന് മാതൃകയെന്ന് പൊതുവിദ്യാഭ്യാസവകുപ്പ്മന്ത്രി വി.ശിവൻകുട്ടി. കൊടുവായൂർ ഗവ. ഹയർ സെക്കൻഡറി സ്കൂൾ കെട്ടിടം ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. വിദ്യാർഥികളുടെ നേട്ടങ്ങളെ സംബന്ധിച്ച കേന്ദ്രസർക്കാരിന്‍റെ സർവെയിൽ 16 ാം സ്ഥാനത്തായിരുന്ന കേരളം രണ്ടാം സ്ഥാനത്തേക്ക് ഉയർന്നു. രാജ്യത്തെ ജില്ലകളിലെ വിദ്യാഭ്യാസ നിലവാരം പരിശോധിച്ചപ്പോൾ കേരളം പ്രഥമശ്രേണിയിൽ ഉണ്ടെന്നും മന്ത്രി പറഞ്ഞു. പാഠപുസ്തകത്തിൽ മാത്രം ഒതുങ്ങാതെ കുട്ടികളുടെ സമഗ്രവളർച്ച ഉറപ്പാക്കലാണ് വിദ്യാഭ്യാസത്തിന്‍റെ ലക്ഷ്യം. അറിവിനോടൊപ്പം സാമൂഹിക പ്രതിബദ്ധതയുള്ളവരായി വളരാൻ കുട്ടികൾക്കാവണം. ഇതിനായി പഠനത്തോടൊപ്പം കായികവും കലാപരവുമായ കഴിവുകളെയും പ്രോത്സാഹിപ്പിക്കണമെന്നും മന്ത്രി കൂട്ടിച്ചേർത്തു. സംസ്ഥാനത്തെ സ്കൂളുകൾ മികച്ച പ്രതിഭകളെ സംഭാവന ചെയ്തിട്ടുണ്ട്. കുട്ടികൾക്ക് മികച്ച പഠനാന്തരീക്ഷം ഒരുക്കാനുള്ള പ്രവർത്തനങ്ങൾ തുടരുമെന്നും മന്ത്രി വ്യക്തമാക്കി. സംസ്ഥാനത്തെ 14,000ത്തോളം വരുന്ന സ്കൂളുകളിലെ പരമാവധി പ്രശ്നങ്ങൾ പരിഹരിച്ചാണ് സർക്കാർ മുന്നോട്ട് പോവുന്നത്. സംസ്ഥാനത്തെ നല്ലൊരു ശതമാനം സ്കൂളുകൾ അടച്ചുപൂട്ടാനുള്ള ശ്രമങ്ങൾ നടക്കുന്ന സമയത്താണ് ഈ സർക്കാർ അധികാരത്തിലെത്തിയത്. കഴിഞ്ഞ ഒൻപത് വർഷം പൊതുവിദ്യാഭ്യാസ രംഗം മാതൃകാപരമായ പ്രവർത്തനങ്ങൾകൊണ്ട് മുന്നോട്ട് പോവുകയാണെന്നും മന്ത്രി പറഞ്ഞു. പരിപാടിയിൽ കെ. ബാബു എംഎൽഎ അധ്യക്ഷനായി. ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ മുഖ്യാതിഥിയായി. പ്ലാൻ ഫണ്ട് മൂന്ന് കോടി രൂപ ചെലവഴിച്ചാണ് 670 ചതുരശ്ര മീറ്റർ വിസ്തീർണത്തിൽ കൊടുവായൂർ ഗവ.ഹയർ സെക്കൻഡറി സ്കൂൾ പുതിയ കെട്ടിടം നിർമിച്ചിട്ടുള്ളത്. ജില്ലാ പഞ്ചായത്ത് അംഗം എം. രാജൻ, കൊല്ലങ്കോട് ബ്ലോക്ക് പഞ്ചായത്ത് പ്രസിഡന്‍റ് ആർ. ചിന്നക്കുട്ടൻ, കൊടുവായൂർ ഗ്രാമപഞ്ചായത്ത് പ്രസിഡന്‍റ് വി.പ്രേമ സുകുമാരൻ, കൊടുവായൂർ ഗ്രാമപഞ്ചായത്ത് അംഗം കെ.ഷീല, ജില്ലാ വിദ്യാഭ്യാസ ഉപ ഡയറക്ടർ ടി.എ. സലീനബീവി, പ്രിൻസിപ്പൽ ടി. ശോഭ തുടങ്ങിയവർ പങ്കെടുത്തു.

‘കാട്ടുപന്നിശല്യം: പഞ്ചായത്തുകൾക്ക് കൂടുതൽ അധികാരം നൽകണം’

ചിറ്റൂർ: കാട്ടുപന്നിശല്യം അവസാനിപ്പിക്കാൻ ഗ്രാമപഞ്ചായത്തുകൾക്ക് കൂടുതൽ അധികാരവും ഫണ്ടും നൽകണമെന്ന് കേരള കർഷകസംഘം നല്ലേപ്പിളളി വില്ലേജ് സമ്മേളനം ആവശ്യ പ്പെട്ടു. രാസവളം വിലക്കുറയ്ക്കുക, കാലിത്തീറ്റ സബ്സിഡി 50 ശതമാനമാക്കുക, സംഭരിച്ച നെല്ലുവില ലഭിക്കാനുള്ളവർക്ക് ഉടൻ വിതരണം നടത്തുക എന്നീ ആവശ്യങ്ങൾ ഉന്നയിച്ച് പ്രമേയം അവതരിപ്പിച്ചു. ചിറ്റൂർ ഏരിയാ സെക്രട്ടറി ഇ.എൻ. രവീന്ദ്രൻ സമ്മേളനം ഉദ്ഘാടനം ചെയ്തു. പി. കൃഷ്ണൻ അധ്യക്ഷത വഹിച്ചു. മണി എസ്. മുത്തലിഫ്, സുരേഷ്, ശിവകുമാർ, കെ. മോഹനൻ, ശശിധരൻ, രാധാകൃഷ്ണൻ എന്നിവർ പ്രസംഗിച്ചു.

പള്ളിയിലേക്കുള്ള വഴി അടച്ചു; പ്രതിഷേധിച്ച് കുർബാന അർപ്പിച്ചു

വാളയാർ: ഉടമസ്ഥാവകാശതർക്കത്തെതുടർന്ന് പള്ളിയിലേക്കുള്ള വഴി സ്വകാര്യവ്യക്തി ട്രാക്ടർ ഉപയോഗിച്ച് യാത്രായോഗ്യമല്ലാതാക്കിയതിനെ തുടർന്ന് കനാൽ പിരിവ് സെന്‍റ് ആന്‍റണീസ് പള്ളിയിലെ വിശ്വാസികൾ റോഡരികിൽ കുർബാന അർപ്പിച്ചു പ്രതിഷേധിച്ചു. രാവിലെ നടന്ന കുർബാനയിൽ 400 പേർ പങ്കെടുത്തു. 40 വർഷമായി സെന്‍റ് ആന്‍റണീസ് പള്ളിയിലേക്കു പോവുന്ന വഴിയാണിത്. അതേസമയം പള്ളിയിലേക്കുള്ള വഴി തന്‍റെ ഉടമസ്ഥതയിലുള്ളതാണെന്നും രേഖകൾ കയ്യിലുണ്ടെന്നും സ്വകാര്യ വ്യക്തി പറയുന്നു. കുർബാനക്ക് പള്ളി വികാരി ഫാ. വിജയ്, കഞ്ചിക്കോട് പള്ളി കമ്മിറ്റി പ്രസിഡന്‍റ് ജോസഫ് അമൽരാജ്, സെക്രട്ടറി ദ്രവ്യയോശു, ഭാരവാഹികളായ ജോൺ പോൾ, ആന്‍റണി പോൾ രാജ് തുടങ്ങിയവർ നേതൃത്വം നൽകി. സംഭവത്തിൽ മുഖ്യമന്ത്രിക്കും ന്യൂനപക്ഷ വകുപ്പുമന്ത്രിക്കും ജില്ലാ പോലിസ് മേധാവിക്കും പരാതി നൽകിയിട്ടുണ്ടെന്നു കമ്മിറ്റി ഭാരവാഹികൾ അറിയിച്ചു.

അനധികൃതമായി കടത്തിയ ഡ്രോണുകളടക്കം വിമാനത്താവളത്തിൽ പിടികൂടി

കോയമ്പത്തൂർ: അബുദാബിയിൽ നിന്ന് കോയമ്പത്തൂർ വിമാനത്താവളത്തിലെത്തിയ 5 യാത്രക്കാരിൽനിന്ന് ഡ്രോണുകൾ, ഐഫോണുകൾ, മൈക്രോഫോണുകൾ, ഇ-സിഗരറ്റുകൾ എന്നിവ പിടിച്ചെടുത്തു. യാത്രക്കാരുടെ ലഗേജുകൾ സ്കാനർ ഉപയോഗിച്ച് പരിശോധിച്ച കസ്റ്റംസ് ഉദ്യോഗസ്ഥരാണ് 5 യാത്രക്കാരുടെ ബാഗുകളിൽ ഒളിപ്പിച്ച നിലയിൽ ഇവ കണ്ടെത്തിയത്. ഹൈടെക് ഡ്രോണുകൾ, ഐഫോണുകൾ ഉൾപ്പെടെയുള്ള വിലകൂടിയ സെൽ ഫോണുകൾ, ഇ-സിഗരറ്റുകൾ, ബാറ്ററികൾ, സ്മാർട്ട് വാച്ചുകൾ, മൈക്രോഫോണുകൾ എന്നിവ കണ്ടെത്തി. ചെന്നൈ സ്വദേശി തമീം അൻസാരി, മുഹമ്മദ് അബുബക്കർ സാദിഖ്, കന്യാകുമാരി സ്വദേശി ബെനീഷ് ജെസുദാസൻ, കടലൂരിൽ നിന്നുള്ള മുത്തുരാജ, തഞ്ചാവൂരിൽ നിന്നുള്ള കമൽപാഷ എന്നിവരെ അറസ്റ്റ് ചെയ്തു. പിടിച്ചെടുത്ത ഡ്രോണുകളുടെ മൂല്യം 15 ലക്ഷം രൂപയാണ്. സിഗരറ്റുകളുടെയും ഇ-സിഗരറ്റുകളുടെയും മൂല്യം 16 ലക്ഷം, ഐഫോണുകളും മൈക്രോഫോണുകളും ഉൾപ്പെടെയുള്ള മറ്റ് വസ്തുക്കളുടെ മൂല്യം 60 ലക്ഷം എന്നിങ്ങനെ ആകെ മൂല്യം 90 ലക്ഷം രൂപയാണ്.

കർക്കടകത്തെ വരവേൽക്കാൻ ഷെഫ് പാലാട്ടിന്‍റെ നാടൻകോഴി ഫെസ്റ്റ്

മണ്ണാർക്കാട്: മണ്ണാർക്കാടിന് ഇതുവരെ ആസ്വദിക്കാനാവാത്ത രുചിക്കൂട്ടുകളുമായി ഷെഫ് പാലാട്ട് റസ്റ്റോറന്‍റ് ഇന്നുമുതൽ ഓഗസ്റ്റ് 15 വരെ നാടൻ കോഴി ഫെസ്റ്റ് സംഘടിപ്പിക്കുന്നു. കർക്കടകമാസത്തിൽ ഒട്ടേറെ ഔഷധഗുണങ്ങൾ ഉള്ള നാടൻ കോഴിയുടെയും കരിങ്കോഴിയുടെയും വൈവിധ്യമാർന്ന വിഭവങ്ങളും ഒപ്പം ഔഷധക്കൂട്ടുകൾ അടങ്ങിയ കർക്കടകകഞ്ഞിയും നാടൻകോഴി ഫെസ്റ്റിന്‍റെ ഭാഗമായി ഇന്നുമുതൽ ഷെഫ് പാലാട്ട് റസ്റ്റോറന്‍റിൽ ലഭ്യമാകും. ഔഷധക്കഞ്ഞിക്കു പുറമെ കരിങ്കോഴി പൊള്ളിച്ചത്, കരിങ്കോഴിയും കപ്പയും, കരിങ്കോഴി ചട്ടിക്കറി, കരിങ്കോഴിസൂപ്പ് തുടങ്ങി ഒട്ടനവധി വിഭവങ്ങളാണ് ഒരുക്കിയിട്ടുള്ളത്. തിരക്കുപിടിച്ച ജീവിത സാഹചര്യങ്ങളിലൂടെ മുന്നേറുന്ന മലയാളിക്ക് ശാരീരിക വിഷമതകൾ പരിഹരിക്കുന്നതിനും ശരീരത്തിന് കൂടുതൽ ഉന്മേഷം പകരുന്നതിനും ആവശ്യമായ വിവിധ നാടൻ ചികിത്സകൾ നടത്തുന്നതിനും കർക്കിടക മാസത്തിൽ ഇത്തരത്തിൽ ഒരു നാടൻ കോഴി ഫെസ്റ്റ് സംഘടിപ്പിക്കുന്നത് എല്ലാവർക്കും വിവിധ നാടൻ വിഭവങ്ങൾ ലഭ്യമാകുന്നതിന് സഹായകമാകുമെന്ന് മാനേജിംഗ് ഡയറക്ടർ അജിത്ത് പാലാട്ട് പത്രസമ്മേളനത്തിൽ അറിയിച്ചു. ഡയറക്ടർ അഭിലാഷ് പാലാട്ട്, പിആർഒ ശ്യാംകുമാർ, ഓപ്പറേഷൻ മാനേജർ രാജീവ്, ഷെഫ് ഹരീഷ് തുടങ്ങിയവർ പത്രസമ്മേളനത്തിൽ പങ്കെടുത്തു.

മുണ്ടൂർ സെന്‍റ് അൽഫോൻസ പള്ളിയിൽ വിശുദ്ധ അൽഫോൻസാമ്മയുടെ തിരുനാൾ

മുണ്ടൂർ: സെന്‍റ് അൽഫോൻസാ പള്ളിയിൽ വിശുദ്ധ അൽഫോൻസാമ്മയുടെ തിരുനാളിന് തുടക്കമായി. 19 ന് ബിഷപ് എമരിറ്റസ് മാർ ജേക്കബ് മനത്തോടത്ത് തിരുനാൾ കൊടിയേറ്റ് നിർവഹിച്ചു. 26 വരെ വൈകുന്നേരം അഞ്ചിന് വിശുദ്ധ കുർബാനയും നൊവേനയുമുണ്ടാകും. 27 ന് വൈകുന്നേരം നാലരയ്ക്ക് വിശുദ്ധ കുർബാന, നൊവേന എന്നിവയുണ്ടാകും. തുടർന്ന് തിരുനാൾ പ്രദക്ഷിണം നടക്കും. 28 ന് പ്രധാന തിരുനാൾ ദിനത്തിൽ രാവിലെ പത്തരയ്ക്ക് ആഘോഷമായ തിരുനാൾ കുർബാനയ്ക്ക് ബിഷപ് മാർ പീറ്റർ കൊച്ചുപുരയ്ക്കൽ കാർമികത്വം വഹിക്കും. ഫാ. റിജോ മേടയ്ക്കൽ, ഫാ. ടോണി ചേക്കയിൽ എന്നിവർ സഹകാർമികരാകും. തുടർന്ന് ഉൗട്ടുനേർച്ച നടക്കും. 29 ന് രാവിലെ ആറരയ്ക്ക് വിശുദ്ധ കുർബാന, ഒപ്പീസ് എന്നിവ നടക്കും. തിരുനാൾ ആഘോഷപരിപാടികൾക്ക് വികാരി ഫാ. അജി ഐക്കര, കണ്‍വീനർമാരായ തോമസ് പ്ലാത്തോട്ടം, റോജൻ മാണിക്കനാംപറന്പിൽ, രാജി പീറ്റർ വാഴപ്പിള്ളി, കൈക്കാരന്മാരായ സാബു കോണോത്ത്തറ, റാഫി ചിരിയങ്കണ്ടത്ത് തുടങ്ങിയവർ നേതൃത്വം നൽകും.

സംസ്ഥാനത്ത് പത്ത് ഐടിഐകൾ അന്താരാഷ്ട്ര നിലവാരത്തിലേക്ക് ഉയർത്തി: മന്ത്രി ശിവൻകുട്ടി

നെന്മാറ: സംസ്ഥാനത്തെ 108 സർക്കാർ ഐടിഐകളിൽ 10 ഐടിഐകൾ അന്താരാഷ്ട്ര നിലവാരത്തിലേക്ക് ഉയർത്തിയെന്ന് പൊതുവിദ്യാഭ്യാസവകുപ്പ് മന്ത്രി വി.ശിവൻകുട്ടി. നെന്മാറ ഐടിഐ പുതിയ കെട്ടിടം ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. സംസ്ഥാനത്ത് 55,000 ത്തോളം വിദ്യാർഥികൾ ഒരോ വർഷവും ഐടിഐകളിൽ നിന്ന് പരിശീലനം പൂർത്തിയാക്കുന്നുണ്ട്. ജില്ലകളിൽ നടത്തുന്ന തൊഴിൽമേളകളിലൂടെ നിരവധിപേർക്ക് തൊഴിൽ ലഭ്യമാക്കുന്നു. പ്രൊഡക്ഷൻ സെന്‍ററുകൾ, ഗ്രീൻ കാന്പസ് പദ്ധതി എന്നിവയുൾപ്പെടെ നിരവധി നൂതന പദ്ധതികളും ഈ സർക്കാരിന്‍റെ കാലത്ത് നടപ്പാക്കിയിട്ടുണ്ടെന്നും മന്ത്രി പറഞ്ഞു. സർക്കാരിന്‍റെ പോഷകാഹാരപദ്ധതിയുടെ ഭാഗമായി ഐടിഐയിലെ മുഴുവൻ ട്രെയിനികൾക്കും പാൽ, മുട്ട, പഴം, ബ്രെഡ് എന്നിവ സമീപത്തെ കുടുംബശ്രീ യൂണിറ്റുകൾ വഴി ലഭ്യമാക്കുന്നുണ്ട്. ഇത് വിദ്യാർത്ഥികളുടെ ആരോഗ്യത്തിനും പഠന നിലവാരം മെച്ചപ്പെടുത്തുന്നതിനും ഏറെ സഹായകമാണ്. കൂടാതെ പരിശീലന കാലയളവിൽ ഉണ്ടാകാനിടയുള്ള അപകടങ്ങൾക്ക് മൂന്ന് ലക്ഷം രൂപ വരെയുള്ള അപകട ഇൻഷ്വറൻസ് ഏർപ്പെടുത്താനും അതിന്‍റെ പ്രീമിയം യഥാസമയം അടയ്ക്കാനും സർക്കാരിന് കഴിഞ്ഞു. ജില്ലയിൽ പുതുതായി നാല് ഐടിഐകൾ ആരംഭിക്കാൻ കഴിഞ്ഞത് സർക്കാറിന്‍റെ വലിയ നേട്ടമാണ്. നെന്മാറ ഗവ. ഐടിഐക്കുള്ള ചുറ്റുമതിലിനായി 80 ലക്ഷം അനുവദിച്ചിട്ടുണ്ട്. കൂടാതെ ഇലക്ട്രിക്കൽ ആൻഡ് പവർ ഡിസ്ട്രിബ്യൂഷൻ, ത്രീഡി ആനിമേഷൻ എഐ പ്രിന്‍റിംഗ് എന്നീ രണ്ട് കോഴ്സുകളും കൊണ്ടുവരുമെന്നും മന്ത്രി അറിയിച്ചു. നമ്മുടെ യുവാക്കൾക്ക് മികച്ച തൊഴിൽ സാധ്യതകൾ നൽകുന്നത് സംസ്ഥാനത്തിന്‍റെ സാമൂഹിക സാന്പത്തിക വികസനത്തിന് കൂടുതൽ സംഭാവന ചെയ്യാനാകുമെന്നും മന്ത്രി കൂട്ടിചേർത്തു. പരിപാടിയിൽ ഗംഗോത്രി ചാരിറ്റബിൾ ട്രസ്റ്റ് പ്രസിഡന്‍റ് എൻ.എം. വിജയഗോപാലനെ മന്ത്രി ആദരിച്ചു. കെ. ബാബു എംഎൽഎ അധ്യക്ഷനായി. ജില്ലാ പഞ്ചായത്ത് അംഗം ആർ. ചന്ദ്രൻ, വ്യാവസായിക പരിശീലന വകുപ്പ് ഡയറക്ടർ സുഫിയാൻ അഹമ്മദ്, നെന്മാറ ബ്ലോക്ക് പഞ്ചായത്ത് പ്രസിഡന്‍റ് സി. ലീലാമണി, വൈസ് പ്രസിഡന്‍റ് ശ്രീജ രാജീവ്, ഗ്രാമപഞ്ചായത്ത് വൈസ് പ്രസിഡന്‍റ് സി. പ്രകാശൻ, ബ്ലോക്ക് പഞ്ചായത്ത് അംഗം സി. സുധാകരൻ, ഗ്രാമപഞ്ചായത്ത് അംഗം പി.ജി. ജയൻ, ഗവ. ഐടിഐ പ്രിൻസിപ്പൽ ആർ. ജയകൃഷ്ണൻ, എന്നിവർ പങ്കെടുത്തു.

എയർ കണ്ടീഷണർ സർവീസ് ചെയ്യുന്നതിനിടെ കാൽവഴുതിവീണ് യുവാവ് മരിച്ചു

ആലത്തൂർ: എയർ കണ്ടീഷണർ സർവീസ് ചെയ്യുന്നതിനിടെ ടെറസിൽനിന്നു കാൽവഴുതി നിലത്തുവീണ് യുവാവ് മരിച്ചു. കാട്ടുശേരി കാക്കമൂച്ചിക്കാട്ടിൽ ഹക്കീമിന്‍റെ മകൻ അനസ്(18) ആണ് മരിച്ചത്. ഇന്നലെ ഉച്ചയ്ക്കു രണ്ടുമണിയോടെ പെരുങ്കുളം കൊല്ലപ്പാതയിലെ വീട്ടിൽവച്ചാണ് അപകടം ഉണ്ടായത്. ഉടൻതന്നെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം ആലത്തൂർ ക്രസന്‍റ് ആശുപത്രി മോർച്ചറിയിൽ.ഇന്നു രാവിലെ താലൂക്ക് ആശുപത്രിയിൽ പോസ്റ്റ്മോർട്ടത്തിനുശേഷം ആലത്തൂർ ജുമാമസ്ജിദ് കബർസ്ഥാനിൽ കബറടക്കും. മാതാവ്: ഹസീന. സഹോദരൻ: ഹസീബ്.

ബൈക്ക് ലോറിയിൽ തട്ടി യുവാവ് മരിച്ചു

നെന്മാറ: ബൈക്ക് ലോറിയിൽ തട്ടി യുവാവ് മരിച്ചു. നെന്മാറ പോത്തുണ്ടി കൊടുവാൾപാറയിൽ മണികണ്ഠന്‍റെ മകൻ ബിനീഷ്(24) ആണു മരിച്ചത്. ഞായറാഴ്ച രാത്രി ഒന്പതിനു നെന്മാറ അയിനംപാടം വളവിലായിരുന്നു അപകടം. ബിനീഷിന്‍റെ കൂടെ ബൈക്കിൽ യാത്രചെയ്തിരുന്ന സുശാന്തിനു ഗുരുതരപരിക്കേറ്റു. വടക്കഞ്ചേരിയിലേക്കു പോകുകയായിരുന്ന ബൈക്ക് എതിരേവന്ന ലോറിയുടെ ഒരുവശത്തു തട്ടിയാണ് അപകടം ഉണ്ടായത്. ഉടൻ സമീപത്തെ സ്വകാര്യ ആശുപത്രിയിൽ എത്തിച്ചെങ്കിലും ബിനീഷിനെ രക്ഷിക്കാനായില്ല. സ്വകാര്യ ധനകാര്യസ്‌ഥാപനത്തിലെ ജീവനക്കാരനാണ് ബിനീഷ്. അമ്മ: ബിന്ദു. സഹോദരൻ: മനീഷ്.

ഓട്ടോയിടിച്ച് പരിക്കേറ്റ ഗൃഹനാഥൻ മരിച്ചു

വടക്കഞ്ചേരി: ഓട്ടോറിക്ഷയിടിച്ചു പരിക്കേറ്റു ചികിത്സയിലായിരുന്ന ഗൃഹനാഥൻ മരിച്ചു. കിഴക്കഞ്ചേരി തെക്കിൻകല്ല വാസു(62)വാണ് മരിച്ചത്. ഞായറാഴ്ച രാത്രി 12 മണിയോടെ ഒലവക്കോടുവച്ചാണ് അപകടമുണ്ടായത്. ലോറി ഡ്രൈവറായ വാസു ഒലവക്കോട് ജംഗ്ഷനിൽ ലോറിനിർത്തി ഭക്ഷണംകഴിക്കാൻ ഇറങ്ങിയപ്പോൾ ഓട്ടോറിക്ഷ ഇടിക്കുകയായിരുന്നു. ഉടൻ പാലക്കാട് ജില്ലാ ആശുപത്രിയിലും പിന്നീട് ത്യശൂരിലെ സ്വകാര്യ ആശുപത്രിയിലും പ്രവേശിപ്പിച്ചെങ്കിലും ഇന്നലെ ഉച്ചയ്ക്ക് മരിച്ചു.പാലക്കാട് നോർത്ത് പോലീസ് കേസെടുത്തു. ജില്ലാ ആശുപത്രി മോർച്ചറിയിൽ സൂക്ഷിച്ചിട്ടുള്ള മൃതദേഹം പോസ്റ്റ്മോർട്ടത്തിനുശേഷം ഇന്ന് ഉച്ചയ്ക്ക് ഒന്നിന് മമ്പാട് പൊതുശ്മശാനത്തിൽ സംസ്കരിക്കും. ഭാര്യ: ഷീജ. മക്കൾ: സജി, സിജി, സിനിമോൾ. മരുമകൻ: ശരത്ത്.

കുളത്തിൽ കാൽ കഴുകുന്നതിനിടെ തെന്നിവീണ് മരിച്ചു

കല്ലടിക്കോട്: കടയിലേക്ക് പോകുന്ന വഴി കുളത്തിൽ കാൽ കഴുകാൻ ഇറങ്ങിയ ആൾ തലയടിച്ചുവീണ് മരിച്ചു. ഒടുവക്കാട് ആലിങ്കൽ കുളത്തിങ്കൽ ജോസഫ് (ജോർജ്-75) ആണ് മരിച്ചത്. ഇന്നലെ വൈകുന്നേരം വീട്ടിൽ നിന്ന് കടയിലേക്ക് പോകുന്നതിനു വേണ്ടി ഇറങ്ങിയതായിരുന്നു. പാടത്തോട് നടന്നുവന്നപ്പോൾ കാലിൽ പറ്റിയ ചെളി കഴുകി കളയുന്നതിന് സമീപത്തെ കുളത്തിൽ ഇറങ്ങിയപ്പോൾ കാൽ തെന്നി വീഴുകയായിരുന്നു. മൃതദേഹം പാലക്കാട് ജില്ല ആശുപത്രിയിൽ. ഭാര്യ: പരേതയായ മറിയക്കുട്ടി. മക്കൾ: മിനി, സിനി, ഷിജു. മരുമക്കൾ: കൊച്ചുമോൻ, റോയ്, മെർലിൻ.

കാഞ്ഞിരപ്പുഴ ജലസേചന ടൂറിസം പദ്ധതിക്ക് സർക്കാർ അനുമതി

പാലക്കയം: കാഞ്ഞിരപ്പുഴ ജലസേചന വിനോദസഞ്ചാര പദ്ധതിക്കു സർക്കാർ അനുമതി നൽകി. ഇതോടെ ദക്ഷിണേന്ത്യയിലെതന്നെ ഏറ്റവും വലിയ വിനോദസഞ്ചാരകേന്ദ്രത്തെ വരവേൽക്കാനൊരുങ്ങുകയാണ് കാഞ്ഞിരപ്പുഴ പ്രദേശം. പ്രവൃത്തി ഏറ്റെടുത്ത കോഴിക്കോട് എഫ്എസ്ഐടി റെഡിഫൈൻ ഡെസ്റ്റിനേഷൻ പ്രൈവറ്റ് ലിമിറ്റഡ് കമ്പനിയുമായുള്ള കരാർ ഒപ്പിടൽ മാത്രാണ് ഇനി പൂർത്തിയാകാനുള്ളത്. ഇതിന്‍റെ നടപടിക്രമങ്ങൾ രണ്ടുദിവസത്തിനകം പൂർത്തിയാകുമെന്നും നിർമാണോദ്ഘാടനം ഈ മാസം നടക്കുമെന്നും കെ. ശാന്തകുമാരി എംഎൽഎ പറഞ്ഞു. കാഞ്ഞിരപ്പുഴഡാം ഹോർട്ടികൾച്ചർ ഗാർഡൻ ആൻഡ് വാട്ടർ തീംപാർക്ക് പദ്ധതിയാണ് കാഞ്ഞിരപ്പുഴയിൽ യാഥാർഥ്യമാക്കുക. 167 കോടി രൂപ ചെലവിലാണ് പദ്ധതി നടപ്പാക്കുക. 30 വർഷമാണ് പദ്ധതിയുടെ പ്രവർത്തന കാലാവധി. സർക്കാരിന്‍റെ വരുമാനവിഹിതം മൊത്തം വരുമാനത്തിന്‍റെ മൂന്നു ശതമാനമായിരിക്കും. കുട്ടികളുടെ പാർക്ക്, മ്യൂസിക്കൽ ഫൗണ്ടൻ, മൃഗശാല, പക്ഷി- ചിത്രശലഭ പാർക്ക്, മറൈൻ അക്വേറിയം, സ്നോപാർക്ക്, വാട്ടർതീം പാർക്ക്, കണ്ണാടി തൂക്കുപാലം, സീപ്ലെയിൻ ഉൾപ്പെടെയാണ് വിഭാവനം ചെയ്യുന്നത്. അമ്പതേക്കർ ഭൂമിയാണ് പദ്ധതിക്കായി വിനിയോഗിക്കുക. ഇത്രയുംസ്ഥലം ഉദ്യാനത്തിന് ഇരുവശത്തും ജലസേചനവകുപ്പ് ഓഫീസിന് പരിസരത്തുമായി വെറുതെ കിടക്കുന്നുണ്ട്. ഡാം സൈറ്റ് ഒഴികെ ബാക്കിയുള്ള ഭൂമിയാണ് ജലസേചന വിനോദസഞ്ചാര നയത്തിന്‍റെ ഭാഗമായുള്ള പദ്ധതിക്കായി പ്രയോജനപ്പെടുത്തുക. കേരള ഇറിഗേഷൻ ഇൻഫ്രാസ്ട്രക്ചർ ഡെവലപ്മെന്‍റ് കോർപ്പറേഷൻ (കെഐഐഡിസി) താത്പര്യപത്രം ക്ഷണിച്ചതിൽ ലഭിച്ച നാലു സ്വകാര്യ സംരംഭകരിൽ നിന്നാണ് കോഴിക്കോട് ആസ്ഥാനമായ കമ്പനിയെ തെരഞ്ഞെടുത്തത്. പദ്ധതി നടപ്പാക്കുന്നതിനു മാസങ്ങൾക്ക് മുൻപ് സർക്കാർ ഉത്തരവായിരുന്നു. എന്നാൽ, കരാർ ഒപ്പിടുന്നതിനു മുൻപായി നിയമവകുപ്പിന്‍റെ പരിശോധനകൾ പൂർത്തിയാക്കേണ്ടതിനാലാണ് കമ്പനിയുടെ കരാർ അംഗീകരിക്കുന്നതിന് കാലതാമസം നേരിട്ടത്. കാഞ്ഞിരപ്പുഴ വിനോദസഞ്ചാര പദ്ധതി ആവിഷ്കരിക്കുന്നതിന് നടപടി സ്വീകരിക്കണമെന്നാവശ്യപ്പെട്ട് കെ. ശാന്തകുമാരി എംഎൽഎ നേരത്തെ വകുപ്പുമന്ത്രിയെ നേരിൽ കാണുകയും ചർച്ച നടത്തുകയും ചെയ്തിരുന്നു. പദ്ധതി യാഥാർഥ്യമാകുന്നതോടെ കാഞ്ഞിരപ്പുഴ, തച്ചമ്പാറ പഞ്ചായത്തുകളുടെ സമഗ്രവികസനവും നിരവധി തൊഴിലവസരങ്ങളും സാധ്യമാകുമെന്നു കെ. ശാന്തകുമാരി എംഎൽഎ പറഞ്ഞു.

റബർതോട്ടങ്ങളിൽ അകാല ഇലകൊഴിച്ചിൽ വ്യാപകം; കർഷകർക്ക് വൻ സാമ്പത്തികനഷ്ടം

ജോജി തോമസ് നെന്മാറ: മഴക്കാലത്ത് റബർമരങ്ങളിലുണ്ടാകാറുള്ള അകാല ഇലപൊഴിച്ചിൽ വ്യാപകമായി. തോട്ടങ്ങളിൽ അതിവർഷംമൂലം തുടർച്ചയായി മഴലഭിക്കുന്നതിനാൽ അന്തരീക്ഷ ആർദ്രത കൂടിയതിനാലാണ് ഇലപൊഴിയുന്ന രോഗം വ്യാപിക്കാനിടയായത്. മരങ്ങളിലെ പച്ച ഇലകൾ ചെറിയ പുള്ളികളുടെ വട്ടത്തിൽ ഉണങ്ങിയ രൂപത്തിൽ ആവുകയും ഞെട്ടോടെ ഇലകൾ കൊഴിഞ്ഞു വീഴുകയുമാണ് ചെയ്യുന്നത്. ഇതോടെ റബർഉത്പാദനം നേർപകുതിയായി കുറഞ്ഞു. ഡിസംബർ ജനുവരി മാസങ്ങളിലുണ്ടാകുന്ന സ്വാഭാവിക ഇലപൊഴിച്ചലിനു സമാനമായാണ് ഇലകൾ കൊഴിഞ്ഞുവീണ് അഴുകിക്കിടക്കുന്നത്. പ്രധാന റബർ ഉത്പാദകമേഖലകളായ കരിമ്പാറ, പോത്തുണ്ടി, ഒലിപ്പാറ, മാങ്കുറിശ്ശി, നേർച്ചപ്പാറ എന്നിവിടങ്ങളിലെല്ലാം രോഗബാധ വ്യാപകമാണ്. ബഹുഭൂരിപക്ഷം തോട്ടങ്ങളിലും മരങ്ങളിലെ 75 ശതമാനം ഇലകളും പത്തു ദിവസത്തിനകം കൊഴിഞ്ഞു. കാറ്റോട്ടം കുറഞ്ഞ തോട്ടങ്ങളിലാണ് രോഗവ്യാപനം വ്യാപകമായത്. മഴക്കാല ടാപ്പിംഗിനായി മഴമറ സ്ഥാപിച്ച് ടാപ്പിംഗ് ആരംഭിച്ച ഘട്ടത്തിലാണ് അമിത മഴമൂലം രോഗ വ്യാപനം വ്യാപകമായത്. ഇതോടെ പത്തുമരങ്ങളിൽനിന്ന് ഒരുഷീറ്റ് എന്ന ശരാശരി ഉത്പാദനം നേർ പകുതിയായി കുറഞ്ഞു. ഇലകൾ കൂട്ടത്തോടെ കൊഴിഞ്ഞു പോകുന്നതിനാൽ മഴക്കാലത്തുണ്ടാവാറുള്ള റബർമരങ്ങളുടെ വളർച്ചയ്ക്കും തടസമാകുന്നതായി കർഷകർ പറഞ്ഞു. ഈ വർഷം മേയ് മാസം മുതൽ തന്നെ കനത്ത മഴയായതിനാൽ ബഹുഭൂരിപക്ഷം കർഷകർക്കും പ്രതിരോധ നടപടിയായി കോപ്പർ ഓക്സി ക്ലോറൈഡ് പൊടി സ്പ്രേ ഓയിലിൽ കലർത്തി തളിക്കാൻ കഴിഞ്ഞില്ല. ഇത് രോഗവ്യാപനം വർധിക്കാനിടയാക്കി. മഴക്കാലത്ത് നിയന്ത്രണ മാർഗങ്ങൾ ഫലപ്രദമാകില്ല. രോഗം പടരുന്നതിനാൽ പ്രതിരോധനടപടികൾ സ്വീകരിക്കാൻ കഴിയാത്ത സ്ഥിതിയാണെന്നു റബർ ബോർഡ് അധികൃതരും പറയുന്നു.

കോട്ടത്തറ സെന്‍റ് അൽഫോൻസ പള്ളിയിൽ തിരുനാളിനു കൊടിയേറി

അഗളി: കോട്ടത്തറ സെന്‍റ് അൽഫോൻസ ദേവാലയത്തിൽ വിശുദ്ധ അൽഫോൻസമ്മയുടെയും പരിശുദ്ധ കന്യകാമറിയത്തിന്‍റെയും വിശുദ്ധ സെബാസ്ത്യാനോസിന്‍റെയും തിരുനാൾ ആഘോഷങ്ങൾ തുടങ്ങി. ഇന്നലെ രാവിലെ ഏഴിനു ഇടവകവികാരി ഫാ. മാർട്ടിൻ ഏറ്റുമാനൂക്കാരൻ തിരുനാൾ കൊടിയുയർത്തി. ഒരാഴ്ച നീണ്ടുനിൽക്കുന്ന ആഘോഷങ്ങൾ 28ന് സമാപിക്കും. 26ന് ഉച്ചകഴിഞ്ഞു മൂന്നിനു രൂപം എഴുന്നള്ളിക്കൽ തുടർന്ന് തിരുനാൾ കുർബാന. പുലിയറ, ഉണ്ണിമല, കുറവൻപാടി ഇടവക വികാരി ഫാ. ഡെബിൻ ആക്കാട്ട് മുഖ്യകാർമികത്വം വഹിക്കും. തുടർന്ന് കപ്പേളയിലേക്ക് പ്രദക്ഷിണവും ഇടവക ദിനാഘോഷവും നടക്കും. ഞായറാഴ്ച വൈകുന്നേരം നാലിനു ആഘോഷമായ തിരുനാൾ കുർബാന. നരസിമുക്ക് കപ്പൂച്ചിൻ ആശ്രമത്തിലെ ഫാ. നിർമൽ സന്ദേശം നൽകും. തുടർന്ന് കോട്ടത്തറ ജംഗ്ഷനിലേക്ക് വാദ്യമേള അകമ്പടിയോടെ പ്രദക്ഷിണം, സ്നേഹവിരുന്ന്, ആകാശ വിസ്മയം. തിങ്കൾ രാവിലെ 6.30ന് പരേത സ്മരണയോടെ തിരുനാൾ കൊടിയിറങ്ങും. ഇടവക വികാരി ഫാ. മാർട്ടിൻ ഏറ്റുമാനൂകാരൻ, അസിസ്റ്റന്‍റ് വികാരി ഫാ. സാൻജോ ചിറയത്ത്, കൺവീനർ ജിനോ ചങ്ങരംപള്ളിൽ. കക്കാരൻമാരായ സന്തോഷ് വടക്കേടത്, ജോർജ് വാകയിൽ എന്നിവർ നേതൃത്വം നൽകും.

ഉന്നതവിജയം നേടിയ വിദ്യാർഥികൾക്കു ബസിനുള്ളിൽ അനുമോദനം

കല്ലടിക്കോട്: കല്ലടിക്കോട്- മൂന്നേക്കർ റൂട്ടിൽ ബസ് സർവീസ് നടത്തുന്ന മഞ്ചാടിക്കൽ ട്രാൻസ്പോർട്ട്സിന്‍റെ ആഭിമുഖ്യത്തിൽ ബസ്‌ യാത്രക്കാരായ വിദ്യാർഥികളിൽ കഴിഞ്ഞ അധ്യയനവർഷം ഉന്നത വിജയം നേടിയ വിദ്യാർഥികളെ അനുമോദിച്ചു. മൂന്നേക്കറിലേയ്ക്കുള്ള പ്രതിദിന സർവീസ് അവസാനിക്കുന്ന സ്ഥലത്ത് ബസിനുള്ളിൽ തന്നെയാണ് അനുമോദന സദസ് ക്രമീകരിച്ചത്. കരിമ്പ ഗ്രാമപഞ്ചായത്ത് അംഗം അനിത സന്തോഷിന്‍റെ അധ്യക്ഷതയിൽ ചേർന്ന അനുമോദന യോഗത്തിൽ ചുള്ളിയാംകുളം ഹോളിഫാമിലി കോൺവന്‍റ് മദർ സുപ്പീരിയർ സിറ്റർ തെരേസ് , മൂന്നേക്കർ നിസ്ക്കാരപ്പള്ളി ഉസ്താദ് ഷംസുദീൻ എന്നിവർ വിജയികൾക്ക് ഉപഹാരങ്ങൾ വിതരണം ചെയ്തു. തോമസ് മാത്യു സ്വാഗതവും ലിജോ തോമസ് നന്ദിയും പറഞ്ഞു. എസ്എസ്എൽസി പരീക്ഷകളിൽ മുഴുവൻ വിഷയങ്ങളിലും എപ്ലസ് നേടിയ ആൽബിൻ കെ. ജോഷി, അഭിയ തോമസ്, എൽഎസ്എസ് വിജയികളായ അദ്യൈത് മഹേഷ്, ജോഷ്വാ പ്രവീൺ, യുഎസ്എസ് വിജയികളായ സംഗീത സന്തോഷ്, നാജിയ നൈസൽ എന്നീ ഏഴ് വിദ്യാർഥിളെയാണ് അനുമോദിച്ചത്. മഞ്ചാടിക്കൽ ബസ് നടത്തിപ്പുകാർ തുടർച്ചയായി എല്ലാ വർഷവും ഇത്തരത്തിൽ ഉന്നത വിജയികളെ ആദരിക്കാറുണ്ട്.

കരിങ്കയത്ത് പാതയോരത്തെ സോളാർ ഫെൻസിംഗിൽ എപ്പോഴും വൈദ്യുതി പ്രവാഹം; നാട്ടുകാർ ഭീതിയിൽ

മംഗലംഡാം:‌ വഴിയോരത്തെ തോട്ടത്തിൽ സോളാർ ഫെൻസിംഗ് പകൽസമയവും ഓൺ ചെയ്തിടുന്നതു അപകടസാധ്യത ഉണ്ടാക്കുന്നതായി പരാതി. മംഗലംഡാം കരിങ്കയത്താണ് കുട്ടികൾ ഉൾപ്പെടെ ആളുകൾ നടന്നുപോകുന്ന വഴിയോരത്തെ തോട്ടത്തിലെ ഫെൻസിംഗ് പകലും ഓഫാക്കാതെ അപകട ഭീഷണിയാകുന്നത്. കഴിഞ്ഞ ദിവസമുണ്ടായ കാറ്റിൽ ഫെൻസിംഗിലേക്ക് മരം വീണതിനെ തുടർന്ന് വഴി നടക്കുന്നവർക്ക് ഷോക്കേൽക്കുന്ന സ്ഥിതിയാണെന്നു പ്രദേശവാസിയായ സോണി പറഞ്ഞു. വൈദ്യുതി പ്രവഹിക്കുന്ന ഫെൻസിംഗിൽ തട്ടിയാണ് മരം വഴിയിലേക്കു വീണിട്ടുള്ളത്. തോട്ടംഉടമ പ്രദേശത്തുകാരനല്ലാത്തതിനാൽ വല്ലപ്പോഴും തോട്ടത്തിലേക്കു വരുമ്പോൾ മാത്രമാണ് ലൈൻ ഓഫാക്കുക. അതല്ലെങ്കിൽ പകലും വേലിയിൽ കറന്‍റുണ്ടാകും. കുട്ടികൾ ഉൾപ്പെടെ നടന്നുപോകുന്ന വഴിയാണിത്. കുട്ടികൾ കളിച്ച് കമ്പിയിൽ പിടിച്ചാൽ അപകടമുണ്ടാകും. കെഎസ്ഇബി അധികൃതരോടു വിവരം പറഞ്ഞപ്പോൾ പോലീസിൽ പരാതി നൽകാൻപറഞ്ഞ് കൈയൊഴിയുകയായിരുന്നെന്ന് നാട്ടുകാർ പറയുന്നു. സോളാർ ഫെൻസിംഗ് സ്ഥാപിക്കാൻ ഇലക്ട്രിക്കൽ ഇൻസ്പെക്ടറുടെ അനുമതി വേണമെന്നു നിർദ്ദേശമുണ്ടെങ്കിലും ഫെൻസിംഗ്‌ അപകടാവസ്ഥയിലാകുമ്പോൾ സ്ഥലത്ത് വന്നു പരിശോധിച്ച് വേണ്ട നടപടി സ്വീകരിക്കാൻ തയാറാകുന്നില്ലെന്ന ആക്ഷേപമുണ്ട്. മേഖലയിൽ പല തോട്ടങ്ങളിലും പകൽ സമയം വേലികളിൽ വൈദ്യുതി പ്രവാഹമുണ്ട്.പ്രദേശത്തെ കുറിച്ച് അറിയാത്തവർ പ്രാഥമികാവശ്യങ്ങൾക്കൊ മറ്റോ തോട്ടങ്ങളിലേക്കു പ്രവേശിക്കുമ്പോൾ ശ്രദ്ധിക്കണം.

മുടപ്പല്ലൂരിലെ വാട്ടർടാങ്ക് ഏതുനിമിഷവും നിലംപൊത്തുമെന്നു നാട്ടുകാർ

വടക്കഞ്ചേരി: മുടപ്പല്ലൂർ ടൗണിൽ മംഗലംഡാം റോഡിൽ പെട്രോൾ പമ്പിനും വീടുകൾക്കും സമീപം ഏതുനിമിഷവും തകർന്നുവീഴാമെന്ന നിലയിൽ കൂറ്റൻ വാട്ടർടാങ്ക്. മുപ്പതടിയോളം ഉയരമുള്ള ടാങ്കിന്‍റെ ഒരുഭാഗത്തെ രണ്ടു പില്ലറുകളുടെയും കമ്പികൾ തുരുമ്പിച്ച് ദ്രവിച്ച് തകർന്ന നിലയിലാണ്. മറ്റൊരു പില്ലറിൽ വലിയ വിള്ളലുകളുമുണ്ട്. ഉപയോഗശൂന്യമായ വാട്ടർ ടാങ്കാണിത്. എന്നാൽ ഇപ്പോൾ മഴ പെയ്ത് ടാങ്കിൽ നിറയെ വെള്ളമുള്ള സ്ഥിതിയാണ്. മഴ മാറിനിൽക്കുമ്പോൾ വെള്ളം ചോർന്നൊലിക്കുന്നതും വ്യക്തമായി കാണാം. മഴക്കാലമായതോടെയാണ് ടാങ്കിൽ വെള്ളംനിറഞ്ഞ് ഭാരം താങ്ങാനാകാതെ പില്ലറുകൾ തകരാൻ തുടങ്ങിയിട്ടുള്ളത്. ഏതുനിമിഷവും ഇവിടെ വലിയ ദുരന്തം സംഭവിക്കാമെന്ന സ്ഥിതിയാണെന്നു സമീപവാസികൾ പറയുന്നു. ടാങ്കിന്‍റെ ഒരുഭാഗം നിരയായി വീടുകളാണ്. മറ്റൊരുവശത്ത് മംഗലംഡാം റോഡും വേറൊരുവശത്ത് പെട്രോൾ പമ്പുമാണ്. ഇതുകൂടാതെ സമീപത്തു തന്നെ ട്രാൻസ്ഫോർമറുമുണ്ട്. ടാങ്ക് ഏതുഭാഗത്തേക്കു തകർന്നു വീണാലും അപകടം ഒഴിവാകില്ലെന്ന സ്ഥിതിയാണ്. ടാങ്ക് പൊളിച്ചു നീക്കണമെന്നാവശ്യപ്പെട്ട് പലതവണ പഞ്ചായത്തിലും പൊതുമരാമത്ത് വകുപ്പിനും മന്ത്രിമാർക്കും വാട്ടർ അഥോറിറ്റിക്കും പരാതി നൽകിയിരുന്നെങ്കിലും നടപടി സ്വീകരിക്കുന്നില്ലെന്നാണ് ആക്ഷേപം. പഞ്ചായത്താണ് നടപടിയെടുക്കേണ്ടത് എന്നുപറഞ്ഞ് എല്ലാവരും കൈയൊഴിയുകയാണ്. ഗഫൂർ മുടപ്പല്ലൂരിന്‍റെ നേതൃത്വത്തിൽ കഴിഞ്ഞദിവസം വീണ്ടും നാട്ടുകാർ പഞ്ചായത്തിൽ പരാതി നൽകിയിട്ടുണ്ട്. ഇനിയും നടപടി വൈകിയാൽ ജീവൻ രക്ഷക്കായി സമരത്തിനിറങ്ങാനുള്ള തീരുമാനത്തിലാണ് നാട്ടുകാർ.

എം.കെ. സ്റ്റാലിൻ കോയമ്പത്തൂർ, തിരുപ്പൂർ ജില്ലകൾ സന്ദർശിക്കും

കോയന്പത്തൂർ: കോയമ്പത്തൂർ, തിരുപ്പൂർ ജില്ലകളിലെ വിവിധ പരിപാടികളിൽ പങ്കെടുക്കുന്നതിനായി മുഖ്യമന്ത്രി എം.കെ. സ്റ്റാലിൻ 22 ന് കോയന്പത്തൂരിലെത്തും. കോയമ്പത്തൂർ വിമാനത്താവളത്തിൽ ഡിഎംകെ എക്സിക്യൂട്ടീവുകളും വോളന്‍റിയർമാരും മുഖ്യമന്ത്രിയെ സ്വീകരിക്കും. അവിടെനിന്ന് കാറിൽ പുറപ്പെട്ട് തിരുപ്പൂർ ജില്ലയിലെ പല്ലടം, ഉടുമല എന്നിവിടങ്ങളിലെ വിവിധ പരിപാടികളിൽ പങ്കെടുക്കും. തിരുപ്പൂർ കോർപ്പറേഷൻ പൊതുജനങ്ങൾക്കായി നിർമ്മിച്ച കോവിൽവഴി ബസ് സ്റ്റാൻഡ് ഉദ്ഘാടനം ചെയ്യും. വേലംപാളയത്ത് പുതിയ സർക്കാർ ആശുപത്രിയും ബസ്സ്റ്റാൻഡും ഉദ്ഘാടനം ചെയ്യും. 23 ന് പൊള്ളാച്ചിയിലേക്ക് പോകും. ഉടുമലയിലെ നേതാജി മൈതാനത്ത് സർക്കാർ ചടങ്ങിൽ അദ്ദേഹം പങ്കെടുക്കുകയും വിവിധ സർക്കാർ വകുപ്പുകൾക്കുവേണ്ടി ഗുണഭോക്താക്കൾക്ക് ക്ഷേമസഹായം വിതരണവും നിർവഹിക്കും. പൊള്ളാച്ചി- ഉടുമല റോഡ് ജലവിഭവ വകുപ്പ് സൂപ്രണ്ടിംഗ് എൻജിനീയർ ഓഫീസ് പരിസരത്ത് നേതാക്കളായ പെരുന്തലൈവർ കാമരാജ്, സുബ്രഹ്മണ്യം, മഹാലിംഗം എന്നിവരുടെ പ്രതിമകൾ മുഖ്യമന്ത്രി അനാച്ഛാദനം ചെയ്യും. തുടർന്ന് കോയമ്പത്തൂരിലെത്തി കോയമ്പത്തൂർ മാസ്റ്റർ പ്ലാൻ പദ്ധതിയെക്കുറിച്ചുള്ള സ്വകാര്യ ഹോട്ടലിൽ നടക്കുന്ന കൂടിയാലോചനാ യോഗത്തിൽ പങ്കെടുക്കും. തിരുപ്പൂർ, ഉദുമലൈപേട്ട്, മടത്തുകുളം എന്നിവിടങ്ങളിൽ മുഖ്യമന്ത്രി റോഡ് ഷോകൾ നടത്തും.

മത്സ്യക്കുഞ്ഞുങ്ങളെ വിതരണംചെയ്തു

വടക്കഞ്ചേരി: ഫിഷറീസ് വകുപ്പിന്‍റെയും പുതുക്കോട് ഗ്രാമപഞ്ചായത്തിന്‍റെയും നേതൃത്വത്തില്‍ മത്സ്യക്കുഞ്ഞുങ്ങളുടെ വിതരണോദ്ഘാടനം ഗ്രാമപഞ്ചായത്ത് വൈസ് പ്രസിഡന്‍റ് കെ.കെ. രാജേന്ദ്രന്‍ മാസ്റ്റര്‍ നിര്‍വഹിച്ചു. ഗ്രാമപഞ്ചായത്തിലെ പൊതുകുളങ്ങള്‍,സ്വകാര്യ കുളങ്ങള്‍ എന്നിവിടങ്ങളിലേക്കാണ് മത്സ്യക്കുഞ്ഞുങ്ങളെ വിതരണം ചെയ്തത്. പദ്ധതിയുടെ ഭാഗമായി 38 മത്സ്യകര്‍ഷകര്‍ക്കായി 24,840 മത്സ്യക്കുഞ്ഞുങ്ങളും ആറ് പൊതുകുളങ്ങളിലേക്ക് 22,350 മത്സ്യക്കുഞ്ഞുങ്ങളെയുമാണ് നല്‍കിയത്. ആരോഗ്യ, വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍പേഴ്സണ്‍ കെ.കെ. സുനിതകുമാരി അധ്യക്ഷനായി. ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ എം.എന്‍. റഫീഖ്, വാര്‍ഡ് അംഗങ്ങളായ പുഷ്പ, സുമ, പ്രസന്ന ദാസന്‍, പി.എം. ദിവ്യ, കെ. സുകന്യ, ഷാനി മോള്‍, അക്വാകള്‍ച്ചര്‍ പ്രൊമോട്ടര്‍ ശ്രുതി മോള്‍ എന്നിവര്‍ പങ്കെടുത്തു.

സെപക്‌താക്രോ അസോസിയേഷൻ ജില്ലാ ജനറൽബോഡി യോഗം

വടക്കഞ്ചേരി: സെപക്‌താക്രോ അസോസിയേഷൻ ജില്ലാ ജനറൽ ബോഡി യോഗം വള്ളിയോട് ശ്രീനാരായണ പബ്ലിക് സ്കൂളിൽ നടന്നു. പഞ്ചായത്ത് പ്രസിഡന്‍റ് ലിസി സുരേഷ് ഉദ്ഘാടനം ചെയ്തു. അസോസിയേഷൻ ജില്ലാ പ്രസിഡന്‍റ് കെ. ഗോവിന്ദൻ അധ്യക്ഷത വഹിച്ചു. അസോസിയേഷൻ സംസ്ഥാന സെക്രട്ടറി കെ.വി. ബാബു മുഖ്യാതിഥിയായി. ജില്ലാ സ്പോർട്സ് കൗൺസിൽ മെംബർ അഡ്വ.വി.വി. വിജയൻ, കേരള സ്പോർട്സ് കൗൺസിൽ മെംബർ വി. മധുസൂദനൻ, സെപക്‌താക്രോ ഫെഡറേഷൻ ഓഫ് ഇന്ത്യ ജോയിന്‍റ് സെക്രട്ടറി എം.കെ. പ്രേംകൃഷ്ണൻ, അസോസിയേഷൻ ജില്ലാ വൈസ് പ്രസിഡന്‍റുമാരായ സണ്ണി നടയത്ത്, ഡോ.സി. രാജേഷ്, ജില്ലാ സെക്രട്ടറി കെ. രതീഷ് കുമാർ, പി. സി. ഏലിയാമ്മ, സി. ജഗനാഥൻ പ്രസംഗിച്ചു. ഭാരവാഹികളായി ഡോ.സി. രാജേഷ്- പ്രസിഡന്‍റ്, ജെ. ജിൻസ- സെക്രട്ടറി, വി. സൂര്യ കിരൺ- ട്രഷറർ എന്നിവരെ തെരഞ്ഞെടുത്തു.

കരിമണ്ണ് ദേവാലയത്തിൽ തിരുനാൾ ആഘോഷിച്ചു

കൊഴിഞ്ഞാമ്പാറ: എരുത്തേന്പതി കരിമണ്ണ് വിശുദ്ധ മഹതല മറിയം ദേവാലയത്തിലെ തിരുനാൾ ആഘോഷിച്ചു. രാവിലെ പത്തിനു സേലം മുൻ ബിഷപ് സിംഗരായർക്ക് സ്വീകരണം നൽകി. തുടർന്ന് ബിഷപിന്‍റെ മുഖ്യകാർമികത്വത്തിൽ ആഘോഷമായ തിരുനാൾ ദിവ്യബലി അർപ്പിച്ചു. ആരാധന, സൗഖ്യപ്രാർഥന എന്നിവയും നടന്നു. നേർച്ചഭക്ഷണ വിതരണത്തിൽ 15000 പേർ പങ്കെടുത്തു. രാവിലെ ആറിനു ദിവ്യബലി, വൈകുന്നേരം 5.30 ന് ദിവ്യബലി, പ്രദക്ഷിണം എന്നിവ നടന്നു. ഇടവക വികാരി ഫാ. ആൽബർട്ട് ആനന്ദരാജ് സഹകർമികനായി. ഫാ. സഹായ വെന്തൻ, ഫാ. ചിന്നപ്പരാജ്, ഫാ. പ്രവീൺ, ഫാ. ആരോഗ്യ രാജ്, ഫാ. ആന്‍റണി എന്നിവരും പങ്കെടുത്തു.

ചിറ്റൂർ- തത്തമംഗലം നഗരസഭയിൽ ഇ- മാലിന്യ ശേഖരണത്തിനു തുടക്കം

ചിറ്റൂർ: മാലിന്യമുക്തം നവകേരളം കാമ്പയിനിന്‍റെ ഭാഗമായി ഈമാസം 30 വരെ നീണ്ടുനിൽക്കുന്ന ഹരിതകർമസേനയുടെ ഇ- വേസ്റ്റ് ശേഖരണ യജ്ഞത്തിനു ചിറ്റൂർ - തത്തമംഗലം നഗരസഭയിൽ തുടക്കമായി. ശേഖരണ യജ്ഞത്തിന്‍റെ ഭാഗമായി കിഴക്കത്തറ വാർഡിലെ കണ്ണിയാർപാടത്ത് വീടുകളിൽ നിന്നുള്ള ഇ- മാലിന്യം സ്വീകരിച്ച് ചെയർപേർസൺ കെ.എൽ. കവിത ഉദ്ഘാടനം ചെയ്തു. ആദ്യഘട്ടത്തിൽ നഗരസഭകളിലാണ് ഇ- മാലിന്യ ശേഖരണം നടക്കുന്നത്. ക്ലീൻകേരള കമ്പനി പുറത്തിറക്കിയ വിലവിവരപട്ടിക പ്രകരമുള്ള തുക വീട്ടുകാർക്കുനൽകും. ചടങ്ങിൽ ആരോഗ്യ സ്റ്റാൻഡിംഗ് കമ്മിറ്റി ഓമന കണ്ണൻകുട്ടി അധ്യക്ഷത വഹിച്ചു. കൗൺസിലർമാരായ അച്യുതാനന്ദ മേനോൻ, മുകേഷ്, നഗരസഭാ സെക്രട്ടറി എ.നൗഷാദ്, ക്ലീൻ കേരള കമ്പനി ജില്ലാ മാനേജർ ആദർഷ് ആർ. നായർ, ശുചിത്വ മിഷൻ പ്രോഗ്രാം ഓഫീസർ എ. ഷരീഫ്, ക്ലീൻ സിറ്റി മനേജർ ഇൻചാർജ് സി. രാധാകൃഷ്ണൻ പ്രസംഗിച്ചു.

പൈപ്പുപൊട്ടി കുടിവെള്ളം പാഴാകുന്നു; നടപടിയെടുക്കാതെ ജല അഥോറിറ്റി

നെന്മാറ: കുടിവെള്ള വിതരണ പൈപ്പുപൊട്ടി വെള്ളം പാഴാകുന്നു. അധികൃതരെ അറിയിച്ചിട്ടും നടപടി സ്വീകരിക്കുന്നില്ല. ആഴ്ചകളായി പൈപ്പുപൊട്ടി വെള്ളം റോഡിനുനടുവിലൂടെ ഒഴുകാൻ തുടങ്ങിയതോടെ കരിങ്കുളം അയിലൂർ പൊതുമരാമത്ത് റോഡിൽ കുഴികളും രൂപപ്പെട്ടു. പ്രദേശവാസികൾ കല്ലും ചാക്കുകളുമിട്ട് താത്കാലിക പരിഹാരം കണ്ടെത്തിയിരിക്കുകയാണ്. വെള്ളം വിതരണം ചെയ്യുന്ന സമയത്ത് ശക്തമായി റോഡിനടിയിൽ നിന്നും വെള്ളം പുറത്തൊഴുകുന്നുണ്ട്. വെള്ളം വിതരണം നിലയ്ക്കുന്നതോടെ പൊട്ടലുണ്ടായതിനുശേഷം ഉള്ള കുറുമ്പൂർ മേഖലയിലുള്ള വീടുകളിലെ ടാപ്പിലൂടെ ചെളിവെള്ളം വരുന്നതായും പരാതി പറയുന്നു. സമഗ്ര കുടിവെള്ള പദ്ധതി പ്രകാരം ജലജീവൻ മിഷൻ നടപ്പിലാക്കിയ പോത്തുണ്ടിയിൽ നിന്നുള്ള കുടിവെള്ള പദ്ധതിയുടെ വിതരണ പൈപ്പാണിത്. നിരവധി തവണ പ്രദേശവാസികൾ നെന്മാറ വാട്ടർ അഥോറിറ്റിയിൽ വിവരമറിയിച്ചിട്ടും നടപടി സ്വീകരിച്ചിട്ടില്ല.

വിളയൂര്‍ ബഡ്സ് സ്‌കൂള്‍ നിര്‍മാണം അന്തിമഘട്ടത്തില്‍

പട്ടാന്പി: വിളയൂര്‍ ഗ്രാമപഞ്ചായത്തില്‍ ബഡ്സ് സ്‌കൂളിന്‍റെ നിര്‍മാണ പ്രവൃത്തികള്‍ അന്തിമഘട്ടത്തില്‍. ഭിന്നശേഷി കുട്ടികള്‍ക്കായി സ്‌കൂള്‍ വേണമെന്ന നാട്ടുകാരുടെ ആവശ്യത്തിലാണ് ബഡ്സ് സ്‌കൂള്‍ നിര്‍മിക്കുന്നത്. മുഹമ്മദ് മുഹസിന്‍ എംഎല്‍എയുടെ ആസ്തി വികസന ഫണ്ടില്‍നിന്നും രണ്ടുഘട്ടങ്ങളായി 1.50 കോടി രൂപയാണ് ബഡ്സ് സ്‌കൂളിന്‍റെ നിര്‍മാണത്തിനായി അനുവദിച്ചത്. വിളയൂര്‍ ഗ്രാമപഞ്ചായത്തും കുടുംബശ്രീയും ചേര്‍ന്നാണ് സ്‌കൂളിന്‍റെ പ്രവര്‍ത്തനങ്ങള്‍ നടത്തുന്നത്. മൂന്ന് ക്ലാസ്മുറികള്‍, കൗണ്‍സലിംഗ് റൂം, സെന്‍സറിംഗ് റൂം, ഓഫീസ് റൂം, പാചകപ്പുര, ഭിന്നശേഷി സൗഹൃദ ശുചിമുറികള്‍, കലാപരിപാടികളും പരിശീലനപരിപാടികളും നടത്തുന്നതിനായി ഹാള്‍ എന്നിവ സ്‌കൂളില്‍ ഒരുക്കുന്നുണ്ട്. 3000ത്തോളം സ്‌ക്വയര്‍ ഫീറ്റില്‍ നാലുകെട്ട് മാതൃകയിലാണ് സ്‌കൂളിന്‍റെ നിര്‍മാണം. നിലവില്‍ വിളയൂര്‍ ഗ്രാമപഞ്ചായത്തിന്‍റെ കെട്ടിടത്തിലാണ് സ്‌കൂള്‍ പ്രവര്‍ത്തിക്കുന്നത്. സംസ്ഥാനത്തെ ഏറ്റവും വലിയ ബഡ്സ് സ്‌കൂള്‍ വല്ലപ്പുഴ പഞ്ചായത്തില്‍ പ്രവര്‍ത്തനമാരംഭിച്ചതിന് പിന്നാലെയാണ് അതേ നിലവാരത്തില്‍ വിളയൂരിലും ബഡ്സ് സ്‌കൂള്‍ നിര്‍മിക്കുന്നത്.

ശബരിമല ദർശനത്തിനെത്തിയ വയോധികൻ മരിച്ചു

വണ്ടിത്താവളം: ശബരിമല ക്ഷേത്രദർശനത്തിനുപോയ വണ്ടിത്താവളം സ്വദേശി മലകയറുന്നതിനിടെ കുഴഞ്ഞുവീണു മരിച്ചു. വിളയോടി റേഷൻ ഷോപ്പ് ഉടമ നാരായണൻ(68) ആണ് മരിച്ചത്. ഇന്നലെ രാവിലെ ഒന്പതോടെയായിരുന്നു സംഭവം. ഇന്നലെ വൈകുന്നേരം വീട്ടിലെത്തിച്ച മൃതദേഹം സംസ്കരിച്ചു. ഭാര്യ: രത്നാമണി. മക്കൾ: ഗീതു, വൈശാഖ്.

ജലസംരക്ഷണത്തില്‍ സുസ്ഥിര തൃത്താല പദ്ധതി മാതൃകയെന്നു മന്ത്രി എം.ബി. രാജേഷ്

തൃത്താല: ജലസംരക്ഷണത്തില്‍ കേരളത്തിനുപുറത്തും സുസ്ഥിര തൃത്താല മികച്ച മാതൃകയെന്നു മന്ത്രി എം.ബി. രാജേഷ്. തൃത്താല ബ്ലോക്ക് പഞ്ചായത്ത് ഹാളില്‍ കിഴങ്ങുവിള വിത്തുഗ്രാമങ്ങളും വികേന്ദ്രീകൃത വിത്തുത്പാദകരും പദ്ധതി -സീഡ് ഗ്രാം 2025-30 ന്‍റെ ജില്ലാതല ഉദ്ഘാടനം നിര്‍വഹിക്കുകയായിരുന്നു മന്ത്രി. ജലദൗര്‍ലഭ്യതയില്‍ പരിഹാരം കാണാനായത് സുസ്ഥിര തൃത്താലയുടെ നേട്ടമാണെന്നും മന്ത്രി പറഞ്ഞു. ജലസംരക്ഷണത്തിലൂടെ കാര്‍ഷിക മേഖലയിലും അഭിവൃദ്ധി കൈവരിക്കാനായി. കിഴങ്ങ് കൃഷിയുടെ സാധ്യതകള്‍ ഉപയോഗപ്പെടുത്തി പദ്ധതി കൂടുതല്‍ ജനകീയമാക്കുന്നതിലൂടെ അത്ഭുതകരമായ മാറ്റംവരുത്താന്‍ സാധിക്കുമെന്നും മന്ത്രി കൂട്ടിചേര്‍ത്തു. സംസ്ഥാനത്തെ മാതൃകാപദ്ധതികളിലൊന്നായി സുസ്ഥിര തൃത്താല മാറി. സുസ്ഥിര തൃത്താലയുടെ വിജയം മുന്‍നിര്‍ത്തി കുടുംബശ്രീ ഓണത്തോടനുബന്ധിച്ച് 25000 ഏക്കറില്‍ കൃഷി ചെയ്യാനൊരുങ്ങുകയാണെന്നു മന്ത്രി പറഞ്ഞു. പരിപാടിയുടെ ഭാഗമായി കിഴങ്ങുവിളകളുടെ പുതിയ ഇനങ്ങളെയും പുതിയ സാങ്കേതിക വിദ്യകളെയും മൂല്യവര്‍ധിത ഉത്പന്നങ്ങളേയും പരിചയപ്പെടുത്താനായി കാര്‍ഷിക പ്രദര്‍ശനവും സംഘടിപ്പിച്ചു. കേന്ദ്ര കിഴങ്ങുവിള ഗവേഷണകേന്ദ്രം, സുസ്ഥിര തൃത്താല പദ്ധതി, കാര്‍ഷിക വികസന കര്‍ഷക ക്ഷേമ വകുപ്പ്, തദ്ദേശ സ്വയംഭരണ വകുപ്പ് എന്നിവ സംയുക്തമായാണ് സീഡ് ഗ്രാം പദ്ധതി നടപ്പാക്കുന്നത്. മുന്തിയ കിഴങ്ങു വിളഇനങ്ങളുടെ വിത്തിന്‍റെ ലഭ്യത ഉറപ്പാക്കുകയാണ് പദ്ധതിയുടെ ലക്ഷ്യം. തൃത്താലയിലെ തെഞ്ഞെടുക്കപ്പെട്ട 50 പട്ടികജാതി വിഭാഗം കര്‍ഷകരാണ് പദ്ധതിക്കു നേതൃത്വം നല്‍കുന്നത്. ബ്ലോക്ക് പഞ്ചായത്ത് വൈസ് പ്രസിഡന്‍റ് പി.ആര്‍. കുഞ്ഞുണ്ണി അധ്യക്ഷനായി. ജില്ലാ പഞ്ചായത്ത് അംഗം ഷാനിബ ടീച്ചര്‍, പട്ടാമ്പി കൃഷി വിജ്ഞാന കേന്ദ്രം മേധാവി സുമിയ, നവകേരളം കോ- ഓര്‍ഡിനേറ്റര്‍ പി. സെയ്തലവി, സിടിസിആര്‍ഐ പ്രിന്‍സിപ്പല്‍ സയന്‍റിസ്റ്റ് കെ. സുനില്‍ കുമാര്‍, കൃഷി അസിസ്റ്റന്‍റ് ഡയറക്ടര്‍ മാരിയത്ത് കിബിത്തിയ, കൃഷി വകുപ്പുദ്യോഗസ്ഥര്‍, കര്‍ഷകര്‍ തുടങ്ങിയവര്‍ പങ്കെടുത്തു.

യഥാർഥ പ്രശ്നങ്ങളിൽ ഇടപെടുമ്പോൾ പാർട്ടി ശക്തമാകും: പി. സന്തോഷ് കുമാർ എംപി

വടക്കഞ്ചേരി: കാലത്തിന്‍റെ യഥാർഥ പ്രശ്നങ്ങളിൽ ഇടപെടുമ്പോൾ പാർട്ടി ശക്തിപ്പെടുമെന്നു സിപിഐ ദേശീയ എക്സിക്യൂട്ടീവ് അംഗവും രാജ്യസഭാംഗവുമായ പി. സന്തോഷ് കുമാർ. സിപിഐ ജില്ലാ സമ്മേളനത്തോടനുബന്ധിച്ച് നടന്ന പ്രതിനിധി സമ്മേളനം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. നിസംഗത വെടിഞ്ഞ് ആശയ പൊരാട്ടങ്ങൾക്കായി രംഗത്തിറങ്ങണം. മനുഷ്യന്‍റെ പ്രശ്നങ്ങളിൽ ഇടപെട്ടാൽ പാർട്ടിക്ക് അതിശയകരമായ വളർച്ച ഉണ്ടാക്കാൻ കഴിയുമെന്നു അദ്ദേഹം പറഞ്ഞു. സംസ്ഥാനത്ത് മെച്ചപ്പെട്ട എൽഡിഎഫ് കെട്ടിപ്പടുക്കണം. വകുപ്പുകളെകുറിച്ച് പരാതികളും നിരാശയുമുണ്ടാകാം. പാർട്ടിയിൽ വിഭാഗീയതയുണ്ടെന്നു വരുത്തിത്തീർക്കാൻ ശ്രമം നടക്കും. അതെല്ലാം തിരിച്ചറിഞ്ഞ് പ്രവർത്തിക്കണം അദേഹം കൂട്ടിച്ചേർത്തു. മന്ത്രി ജെ. ചിഞ്ചുറാണി, മുൻമന്ത്രി മുല്ലക്കര രത്നാകരൻ, ജില്ലാ സെക്രട്ടറി കെ.പി. സുരേഷ് രാജ്, വാസുദേവൻ തെന്നിലാപുരം, മുൻമന്ത്രി ഇ. ചന്ദ്രശേഖരൻ, വി. ചാമുണ്ണി, മുൻ എംഎൽഎമാരായ എൻ. രാജൻ, രാജാജി മാത്യു ടി. തോമസ്, മുൻ എംപി സി.എൻ. ജയദേവൻ, വിജയൻ കുനിശേരി, സ്വാഗതസംഘം കൺവീനർ കെ. രാമചന്ദ്രൻ , പൊറ്റശേരി മണികണ്ഠൻ, സുമലത മോഹൻദാസ്, കെ.ഇ. ഹനീഫ പ്രസംഗിച്ചു. ഇന്നു രാവിലെ റിപ്പോർട്ട്, പ്രമേയങ്ങൾ, തെരഞ്ഞെടുപ്പ് തുടങ്ങിയവയോടെ വൈകീട്ട് സമ്മേളനം സമാപിക്കും.

നിപ്പ: പ്രതിരോധ പ്രവർത്തനങ്ങൾ ഊർജിതം

പാലക്കാട്: ജില്ലയിൽ നിപ്പ വൈറസ് രോഗപ്രതിരോധപ്രവർത്തനങ്ങൾ ഊർജിതം. നിലവിൽ നിപ്പ സ്ഥിരീകരിച്ചവരുടെ എണ്ണം രണ്ടാണ്. അതിൽ തച്ചനാട്ടുകര സ്വദേശിനി കോഴിക്കോട് മെഡിക്കൽ കോളജിൽ ചികിത്സയിൽ തുടരുന്നു. നിലവിൽ പാലക്കാട് ഗവൺമെന്‍റ് മെഡിക്കൽ കോളജിൽ 13 പേർ ഐസൊലേഷനിൽ കഴിയുന്നുണ്ട്. ജില്ലയിലാകെ 435 പേരാണ് സമ്പർക്ക പട്ടികയിലുള്ളത്. നിപ്പ പ്രതിരോധ പ്രവർത്തനങ്ങളുടെ ഭാഗമായി ആരോഗ്യ പ്രവർത്തകരുടെ നേതൃത്വത്തിൽ ഇന്ന് 93 വീടുകളിൽ സന്ദർശനം നടത്തി പനിസർവ്വേ പൂർത്തീകരിച്ചു. ജില്ലാ മാനസികാരോഗ്യ വിഭാഗം ഇന്നലെ 45 പേർക്ക് ടെലഫോണിലൂടെ കൗൺസലിംഗ് സേവനം നൽകിയിട്ടുണ്ട്. കൺട്രോൾ സെല്ലിലേക്ക് ഇന്നലെ നിപ്പരോഗ വ്യാപനവുമായി ബന്ധപ്പെട്ട് 33 കോളുകളെത്തി. നിപ്പ രോഗബാധ പ്രദേശത്ത് ഇന്നലെ മൃഗങ്ങൾക്കിടയിൽ അസ്വാഭാവിക മരണമൊന്നും റിപ്പോർട്ട് ചെയ്തിട്ടില്ലെന്നും കുമരംപുത്തൂർ ഭാഗത്തുനിന്ന് 10 നായ്ക്കളുടെ രക്തസാമ്പിളുകൾ ശേഖരിച്ചിട്ടുണ്ടെന്നും മൃഗസംരക്ഷണ വകുപ്പ് അറിയിച്ചു. കണ്ടൈൻമെന്‍റ് സോൺ പ്രഖ്യാപിച്ചതിനുശേഷം ആകെ 2081 കുടുംബങ്ങൾക്ക് റേഷൻ വിതരണം നേരിട്ടു നൽകിയിട്ടുണ്ടെന്ന് ജില്ലാ സപ്ലൈ ഓഫീസർ അറിയിച്ചു. കുമരംപുത്തൂർ, കാരക്കുറുശ്ശി, കരിമ്പുഴ പഞ്ചായത്തുകളിലേയും മണ്ണാർക്കാട് മുൻസിപ്പാലിറ്റിയിലേയും കണ്ടൈൻമെന്‍റ് സോണിലെ വാർഡുകളിലുള്ളവർ നിർബന്ധമായും മാസ്ക് ധരിക്കണം. അനാവശ്യമായി കൂട്ടംകൂടി നിൽക്കരുത്. ഈ വാർഡുകളിലേക്കുള്ള അനാവശ്യമായ പ്രവേശനവും പുറത്തു കടക്കലും ഒഴിവാക്കാൻ ഡ്രോൺ ഉപയോഗിച്ചുകൊണ്ട് കർശനമായി നിരീക്ഷിക്കുകയും പരിശോധന തുടരുകയും ചെയ്യുന്നുണ്ടെന്നും പോലീസ് അറിയിച്ചു. കണ്ടെയ്ൻമെന്‍റ് സോണിൽ ജനജീവിതം പ്രതിസന്ധിയിൽ മണ്ണാർക്കാട്: നിപ്പ രോഗം റിപ്പോർട്ട് ചെയ്ത സാഹചര്യത്തിൽ മണ്ണാർക്കാട്ടെ വിവിധ പ്രദേശങ്ങൾ നിയന്ത്രണ മേഖലകളായതോടെ സാധാരണക്കാരുടെ ജീവിതം പ്രതിസന്ധിയിൽ. കൂലിപണിക്കാർ ഉൾപ്പെടെ ദിവസ വരുമാനത്തെ ആശ്രയിക്കുന്ന കുടുംബങ്ങളാണ് ഏറെ പ്രതിസന്ധിയിലായിരിക്കുന്നത്. ആവശ്യമായ ഭക്ഷണം, വിദ്യാർഥികളുടെ പഠനം, രോഗികളുടെ ചികിത്സ, മരുന്ന്, വ്യാപാരികളുടെ ഉപജീവനം, ഗതാഗത സൗകര്യങ്ങളുടെ അപര്യാപ്തത, അവശ്യവസ്തുക്കളുടെ ലഭ്യതക്കുറവ് തുടങ്ങി ഒട്ടേറെ പ്രശ്നങ്ങളാണ് ചൂണ്ടികാണിക്കുന്നത്. പ്രശ്നങ്ങളുടെ സങ്കീർണത കുറക്കാൻ സർക്കാർ സംവിധാനങ്ങൾ അടിയന്തര സഹായങ്ങൾ എത്തിക്കണമെന്ന് സോണിൽ കഴിയുന്നവർ ആവശ്യപ്പെട്ടു.

നെല്ലിയാന്പതിയിൽ മരംവീണു വൈദ്യുതി മുടങ്ങി; ഗതാഗതം തടസപ്പെട്ടു

നെല്ലിയാമ്പതി: നെല്ലിയാമ്പതി കൈകാട്ടിയിൽ മരം കടപുഴകി റോഡിലേക്കു വീണു. ഒരുമണിക്കൂർ ഗതാഗത തടസമുണ്ടായി. വൈദ്യുതി ലൈനിനു മുകളിലൂടെ വീണതിനെത്തുടർന്ന് കമ്പികൾപൊട്ടി വൈദ്യുതി വിതരണവും തടസപ്പെട്ടു. കൈകാട്ടി സഹകരണബാങ്കിനു സമീപമുള്ള സിൽവർ ഓക്ക് മരമാണ് കടപുഴകി വീണത്. നിരവധി വിനോദസഞ്ചാരികളും യാത്രക്കാരും വഴിയിൽ കുടുങ്ങി. പൊതുപ്രവർത്തകനായ പി.ഒ. ജോസഫിന്‍റെ നേതൃത്വത്തിൽ പ്രദേശവാസികളുടെ സഹായത്തോടെ മരം മുറിച്ചുമാറ്റി ഗതാഗതം പുനഃസ്ഥാപിച്ചു. വിവരമറിഞ്ഞ് നെല്ലിയാമ്പതി വില്ലേജ് ഓഫീസർ സതീശൻ, ഡെപ്യൂട്ടി റേഞ്ച് ഫോറസ്റ്റ് ഓഫീസർ ജയചന്ദ്രൻ, ജീവനക്കാരായ അഭിലാഷ്, പ്രമോദ്, ശ്രീജിത്ത് ഗതാഗതം പുനഃസ്ഥാപിക്കാൻ നേതൃത്വം നൽകി. കെഎസ്ഇബി ജീവനക്കാർ സ്ഥലത്തെത്തി വൈദ്യുതി ലൈൻ പുനഃസ്ഥാപിച്ചു.

ടോൾ നിർത്തിവയ്ക്കാൻ ഹൈക്കോടതിയിൽ ഹർജി നൽകി വോയ്സ് ഓഫ് വടക്കഞ്ചേരി

വടക്കഞ്ചേരി: വടക്കഞ്ചേരി- മണ്ണുത്തി ആറുവരി ദേശീയപാതയിൽ തുടരുന്ന രൂക്ഷമായ ഗതാഗതകുരുക്കും റോഡിന്‍റെ ശോച്യാവസ്ഥയും മൂലം പന്നിയങ്കര ടോൾ പ്ലാസയിലെ ടോൾ പിരിവ് നിർത്തിവയ്പിക്കണമെന്നാവശ്യപ്പെട്ട് വടക്കഞ്ചേരിയിലെ വോയ്സ് ഓഫ് വടക്കഞ്ചേരി കൂട്ടായ്മ ഹൈക്കോടതിയിൽ പൊതുതാൽപര്യ ഹർജി നൽകി. അഡ്വ.പി.ആർ. വെങ്കിടേഷ് മുഖേന സംഘടനയുടെ പ്രസിഡന്‍റ് നൽകിയ ഹർജി ഹൈക്കോടതി ഫയലിൽ സ്വീകരിച്ചതായി ഭാരവാഹികൾ പത്രസമ്മേളനത്തിൽ അറിയിച്ചു. ദേശീയപാതയിൽ നടക്കുന്ന മേൽപ്പാലങ്ങളുടെ നിർമാണ പ്രവർത്തനങ്ങളാണ് നിലവിലെ ഗതാഗതകുരുക്കിനു കാരണം. ഇത് വാഹനങ്ങൾക്ക് കേടുപാടുകളും യാത്രക്കാർക്ക് ദുരിതങ്ങളും ഉണ്ടാക്കുന്നു. അടിസ്ഥാന സൗകര്യങ്ങളായ മേൽപ്പാലങ്ങൾ, സർവീസ് റോഡുകൾ, ബസ് ബേകൾ, അഴുക്കുചാലുകൾ, വഴിവിളക്കുകൾ എന്നിവ പൂർത്തിയാക്കാതെയാണ് 2022 മാർച്ചിൽ ടോൾ പിരിവ് ആരംഭിച്ചത്. റോഡ് നിർമാണം പൂർത്തിയാകാതെ ടോൾ പിരിവ് തുടങ്ങിയതിൽ നേരത്തെയും വ്യാപക പ്രതിഷേധമുയർന്നിരുന്നു. പദ്ധതിയുടെ ആസൂത്രണത്തിലെ പാളിച്ചകളും കെടുകാര്യസ്ഥതയും അഴിമതിയുമാണ് യാത്രക്കാരെ ദുരിതത്തിലാക്കുന്നതെന്ന് സംഘടന ചൂണ്ടിക്കാട്ടുന്നു. തുടർച്ചയായി തകരാറിലാകുന്ന വടക്കഞ്ചേരി മേൽപ്പാലം ഇതിനുദാഹരണമാണ്. റോഡിലെ കുഴികളും ഗതാഗതകുരുക്കും താണ്ടിയെത്തുന്ന യാത്രക്കാർ ടോൾ പ്ലാസ ജീവനക്കാരുമായി വാക്കുതർക്കവും സംഘർഷങ്ങളും പതിവാണ്. സുരക്ഷിതവും സുഖകരവുമായ യാത്രയ്ക്കാണ് ടോൾ ഈടാക്കുന്നതെങ്കിലും നിലവിലെ അവസ്ഥയിൽ ടോൾ ഈടാക്കുന്നത് അന്യായവും ജനദ്രോഹവുമാണെന്ന് സംഘടന പറയുന്നു. റോഡുപണി പൂർത്തിയാകുന്നതു വരെ പന്നിയങ്കരയിലെ ടോൾ പിരിവ് നിർത്തിവയ്ക്കണമെന്നാണ് സംഘടനയുടെ പ്രധാന ആവശ്യം. പത്രസമ്മേളനത്തിൽ സംഘടന പ്രസിഡന്‍റും വടക്കഞ്ചേരി പഞ്ചായത്ത് മുൻ പ്രസിഡന്‍റുമായ പി. ഗംഗാധരൻ, കെ.പി. സണ്ണി, കിഴക്കഞ്ചേരി പഞ്ചായത്ത് മുൻ പ്രസിഡന്‍റ് കെ.ബാലൻ, സുരേഷ് വേലായുധൻ എന്നിവർ പങ്കെടുത്തു.

ലയൺസ് ക്ലബ് ഓഫ് വടക്കഞ്ചേരി മലബാർ പുതിയ കെട്ടിട ഉദ്ഘാടനം ഇന്ന്

വടക്കഞ്ചേരി: അണക്കപ്പാറയിൽ ഫോറസ്റ്റ് ഓഫീസിനു സമീപം നിർമാണം പൂർത്തിയായ ലയൺസ് ക്ലബ് ഓഫ് വടക്കഞ്ചേരി മലബാറിനായുള്ള പുതിയ ഓഫീസ് കെട്ടിട സമുച്ചയത്തിന്‍റെ ഉദ്ഘാടനം ഇന്നു നടക്കും. വൈകീട്ട് നാലിന് നടക്കുന്ന പരിപാടികൾ ലയൺസ് ഡിസ്ട്രിക്ട് ഗവർണർ ടി. ജയകൃഷ്ണൻ ഉദ്ഘാടനം ചെയ്യും. സെക്കന്‍റ് വൈസ് ഡിസ്ട്രിക്ട് ഗവർണർ കെ.എം. അഷറഫ് ഓഫീസ് ഉദ്ഘാടനം നിർവഹിക്കും. പ്രസിഡന്‍റ് എബി കെ. സേവ്യർ അധ്യക്ഷത വഹിക്കും. ബേബി വർഗീസ് റിപ്പോർട്ട് അവതരിപ്പിക്കും. ഡോ. കുട്ടമണി, ചാർട്ടർ മെംബർ എം.വി. തോമസ്, റീജണൽ ചെയർമാൻ സ്വാമിനാഥൻ, സോൺ ചെയർമാൻ സദാനന്ദൻ, ലേഡി റീജിയൻ ചെയർപേഴ്സൺ സരസ്വതി സ്വാമിനാഥൻ, ആനിയമ്മ ജോസഫ്, ബാബു പീറ്റർ, സീൻ ജോസഫ് ചെറുനിലം, രാജൻ മാത്യു തുടങ്ങിയവർ പ്രസംഗിക്കും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]