ADVERTISEMENT

ADVERTISEMENT

ബിജെപി അരുവിക്കര മണ്ഡലം കമ്മിറ്റി ഓഫീസ് ഉദ്ഘാടനം ചെയ്തു

നെടുമങ്ങാട്: ബിജെപി അരുവിക്കര നിയോജക മണ്ഡലം കമ്മിറ്റി ഓഫീസ് (സിന്ദൂർ നമോ ഭവൻ) വെള്ളനാട്ടിൽ സൗത്ത് ജില്ലാ പ്രസിഡന്‍റ് മുക്കംപാലമൂട് ബിജു ഉദ്ഘാടനം ചെയ്തു. മണ്ഡലം പ്രസിഡന്‍റ് വിജി ബൈജു അധ്യക്ഷയായി. സംസ്ഥാന സമിതി അംഗം മലയിൻകീഴ് രാധാകൃഷ്ണൻ, ജില്ലാ ജനറൽ സെക്രട്ടറിമാരായ ബിജു ബി. നായർ, എം.എസ്. ഷിബു,

ജില്ലാ ഭാരവാഹികളായ മുളയറ രതീഷ്, ജ്യോതികുമാർ സരസ്വതി, ശ്രീകല രാധാകൃഷ്ണൻ, പേയാട് കാർത്തികേയൻ, സ്റ്റെപിൻ സ്റ്റീഫൻ, മണ്ഡലം ജനറൽ സെക്രട്ടറിമാരായ കിടങ്ങുമ്മൽ മനോജ്, പൂവച്ചൽ അജി തുടങ്ങിയവർ സംസാരിച്ചു.

ADVERTISEMENT

പുരസ്കാര മികവില്‍ നെയ്യാറ്റിന്‍കര നഗരസഭ ഗവ. ആയുര്‍വേ ആശുപത്രി

നെയ്യാറ്റിൻകര: സംസ്ഥാന ആയുഷ് കായകല്‍പ്പയുടെ അഭിനന്ദന പുരസ്കാര മികവില്‍ ഭാരതീയ ചികിത്സാ വകുപ്പിന്‍റെ നെയ്യാറ്റിന്‍കര നഗരസഭ ഗവ. ആയുര്‍വേ ആശുപത്രി. മൂന്നുകല്ലിന്‍മൂട്ടില്‍ പ്രവര്‍ത്തിക്കുന്ന സര്‍ക്കാര്‍ ആയുര്‍വേദ ആശുപത്രി മികച്ച സ്കോറോടു കൂടിയാണ് ഒരു ലക്ഷം രൂപയുടെ അഭിനന്ദന പുരസ്ക്കാരത്തിന് തെരഞ്ഞെടുക്കപ്പെട്ടത്. ശുചിത്വം, മാലിന്യ പരിപാലനം, അണുബാധ നിയന്ത്രണം എന്നിവ വിലയിരുത്തിയായിരുന്നു പുരസ്കാര നിര്‍ണയം. 1939 -ല്‍ സ്ഥാപിച്ചതാണ് ആതുരാലയം. എട്ടു പതിറ്റാണ്ടിലേറെക്കാലത്തെ പ്രവര്‍ത്തന പാരന്പര്യമുള്ള ആയുര്‍വേദ ആശുപത്രി മുതിര്‍ന്ന തലമുറയെ സംബന്ധിച്ചിടത്തോളം പഴയ കഷായാശുപത്രിയാണ്. ഇന്ന് ദിനംപ്രതി 200- 250 രോഗികള്‍ ഒപിയിലെത്തുന്ന ആശുപത്രിയില്‍ യോഗ വെല്‍നസ് സെന്‍റര്‍, സിദ്ധ ഡിസ്പെന്‍സറി മുതലായവയിലേതു കൂടി ചേര്‍ത്ത് പതിനൊന്ന് ഡോക്ടര്‍മാരുടെ സേവനം ലഭിക്കുന്നു. ജനറല്‍ ഒ.പി ക്കു പുറമേ ആയുർവേദത്തിലെ വിഷചികിത്സാവിഭാഗമായ അഗദതന്ത്രം, നേത്രം, ഇഎന്‍ടി, ദൃഷ്ടി, മര്‍മ്മ, ശല്യതന്ത്രം, പ്രമേഹ രോഗികള്‍ക്കായുള്ള ജീവനി, അറുപത് വയസിനു മുകളില്‍ പ്രായമുള്ളവര്‍ക്കായി വൃദ്ധജന പരിപാലനം, അരികെ, സ്നേഹധാര ഉള്‍പ്പെടെയുള്ള പാലിയേറ്റീവ് പ്രോജക്ട് , വെരിക്കോസ് മുതലായവയില്‍ സ്പെഷല്‍ ഒപി പ്രവര്‍ത്തിക്കുന്നു.

പട്ടം ഗവ. ഗേള്‍സ് ഹയര്‍സെക്കന്‍ഡറി സ്‌കൂളില്‍ മുങ്ങിമരണ പ്രതിരോധ കാമ്പയിൻ

മെഡിക്കല്‍കോളജ്: ലോക മുങ്ങിമരണ ദിനത്തോടനുബന്ധിച്ച് ജില്ലാ ദുരന്തനിവാരണ അഥോറിറ്റിയുടെ ആഭിമുഖ്യത്തില്‍ ആരംഭിച്ച ജീവനം പ്രതിരോധ കാമ്പയിനിന്‍റെ ജില്ലാതല ഉദ്ഘാടനം ജില്ലാ കളക്ടര്‍ അനുകുമാരി നിര്‍വഹിച്ചു. പട്ടം ഗവ. മോഡല്‍ ഗേള്‍സ് ഹയര്‍സെക്കന്‍ഡറി സ്‌കൂളില്‍ നടത്തുന്ന ക്യാമ്പയിന്‍റെ ആപ്തവാക്യം ജീവനം- ജീവനോട് ജാഗ്രതയുടെ യുദ്ധം എന്നതാണ്. മുങ്ങിമരണ അപകടങ്ങളില്‍പ്പെടുന്നവരില്‍ ഭൂരിഭാഗവും ആണ്‍കുട്ടികളാണെന്നും നന്നായി നീന്തല്‍ അറിയാവുന്നവര്‍പോലും അപകടത്തില്‍പ്പെടുന്ന സ്ഥിതിയാണെന്നും ജില്ലാ കളക്ടര്‍ പറഞ്ഞു. എല്ലാ സ്‌കൂളുകളിലും മുങ്ങിമരണ പ്രതിരോധത്തെ സംബന്ധിച്ചുള്ള ബോധവത്കരണം നടത്തും. സോഷ്യല്‍ മീഡിയ പ്ലാറ്റ്‌ഫോമുകളില്‍ ജീവനം ക്യാമ്പയിനിന്‍റെ പ്രചാരണം ശക്തമാക്കുമെന്നും കളക്ടര്‍ പറഞ്ഞു. മുങ്ങിമരണ പ്രതിരോധത്തിന്‍റെ ഭാഗമായുള്ള പ്രതിജ്ഞ സബ് കളക്ടര്‍ ഒ.വി. ആല്‍ഫ്രഡ് ചൊല്ലികൊടുത്തു. മുങ്ങിമരണ പ്രതിരോധ ബോധവത്കരണ ക്ലാസും ഉണ്ടായിരുന്നു. ഡപ്യൂട്ടി മേയര്‍ പി.കെ. രാജു, എഡിഎം ടി.കെ. വിനീത്, ദുരന്ത നിവാരണം ഡെപ്യൂട്ടി കളക്ടര്‍ ജി. ശ്രീകുമാര്‍, സ്‌കൂള്‍ പ്രിന്‍സിപ്പല്‍ കെ. ലൈലാസ്, ഹെഡ്മാസ്റ്റര്‍ എസ്.എ സജീവ് കുമാര്‍, ജില്ലാ ഫയര്‍ ഓഫീസര്‍ എസ്. സൂരജ് എന്നിവര്‍ പങ്കെടുത്തു.

കിണറ്റിലകപ്പെട്ട പോത്തിനെ രക്ഷപ്പെടുത്തി

പേരൂര്‍ക്കട: കിണറ്റില്‍ അകപ്പെട്ട പോത്തിനെ തിരുവനന്തപുരം ഫയര്‍ഫോഴ്‌സ് സംഘം രക്ഷപ്പെടുത്തി. ചൂഴമ്പാല മഠത്തുനടയ്ക്കു സമീപം അമ്പലത്തുനടയില്‍ ഇന്നലെ രാവിലെ ഏഴോടുകൂടിയായിരുന്നു സംഭവം. കാടുപിടിച്ചുകിടന്ന ഭൂമിയില്‍ മേഞ്ഞുനടന്ന പോത്ത് അബദ്ധത്തില്‍ കിണറ്റിലേക്കു വീഴുകയായിരുന്നു. പോത്തിനെ അന്വേഷിച്ച് നടന്ന ഉടമയായ ബാബുവാണ് കിണറ്റില്‍ വീണുകിടക്കുന്ന പോത്തിനെ കണ്ടെത്തിയത്. തുടര്‍ന്ന് ഫയര്‍ഫോഴ്‌സില്‍ വിവരമറിയിച്ചു. സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ ശ്രീജിത്തിന്‍റെ നേതൃത്വത്തില്‍ ഷഹീര്‍, ഷിബിന്‍, ജസ്റ്റിന്‍, സവിന്‍, സനിത്ത്, ഡ്രൈവര്‍ ബൈജു, ഹോം ഗാര്‍ഡ് വിപിന്‍ എന്നിവര്‍ രക്ഷാപ്രവര്‍ത്തനത്തിന് നേതൃത്വം നല്‍കി. കിണറ്റില്‍ വെള്ളമുണ്ടായിരുന്നതുകൊണ്ട് പോത്തിന് കാര്യമായ പരിക്കുണ്ടായില്ല.

നാലാഞ്ചിറ അപകടം പരിക്കേറ്റ പെണ്‍കുട്ടികള്‍ ആശുപത്രിവിട്ടു

പേരൂര്‍ക്കട: നാലാഞ്ചിറ കുരിശടിയിലുണ്ടായ ബൈക്കപകടത്തില്‍ പരിക്കേറ്റ് ചികിത്സയിലായിരുന്ന പെണ്‍കുട്ടികള്‍ ആശുപത്രിവിട്ടു. തിരുവനന്തപുരം ജിജി ആശുപത്രിയില്‍ ചികിത്സയിലായിരുന്ന 15 വയസുവീതം പ്രായമുള്ള കുട്ടികളാണ് ഡിസ്ചാര്‍ജ്ജായത്. വ്യാഴാഴ്ച രാവിലെ 7.30നാണ് ഇന്‍ഫോസിസിലെ സെക്യൂരിറ്റി ജോലി കഴിഞ്ഞ് മടങ്ങുകയായിരുന്ന നെടുമങ്ങാട് വാളിക്കോട് സ്വദേശി സനല്‍ ഓടിച്ചിരുന്ന ബൈക്ക് നിയന്ത്രണംവിട്ട് ട്യൂഷന്‍ കഴിഞ്ഞ് ഫുട്പാത്തിലൂടെ നാലാഞ്ചിറയിലെ വീട്ടിലേക്കു നടന്നുപോകുകയായിരുന്ന പെണ്‍കുട്ടികള്‍ക്കുനേരേ പാഞ്ഞുകയറിയത്. ഇയാള്‍ ഉറങ്ങിപ്പോയതാണ് അപകടത്തിനിടയാക്കിയത്. പെണ്‍കുട്ടികളുടെ ഓരോ പല്ലുകള്‍ അപകടത്തില്‍ നഷ്ടപ്പെട്ടു. മുഖത്തുശരീരത്തിനും പരിക്കേറ്റു. ഒരാളുടെ തലയില്‍ രക്തം കട്ടപിടിച്ചു കിടന്നത് ചികിത്സയിലൂടെ നീക്കാനായി. അപകടനില തരണം ചെയ്തതോടെയാണ് ഇരുവരെയും ആശുപത്രിയില്‍ നിന്നു ഡിസ്ചാര്‍ജ് ചെയ്തത്. അതേസമയം ബൈക്കില്‍ നിന്നുവീണു വാരിയെല്ലുകള്‍ക്ക് ഒടിവുണ്ടായ സനല്‍ തിരുവനന്തപുരം മെഡിക്കല്‍കോളജ് ആശുപത്രിയില്‍ തുടര്‍ചികിത്സയിലാണ്.

കോൺഗ്രസ് പ്രവർത്തകർ ബിനുവിനെ സഹായിക്കുകയായിരുന്നുവെന്ന് പാലോട് രവി

വിതുര: മണലിസ്വദേശി ആദിവാസി യുവാവായ ബിനുവിനെ ആശുപത്രിയിൽ കൊണ്ടുപോകാൻ സഹായിച്ച കോൺഗ്രസ് പ്രവർത്തകർക്കു നേരേ കള്ളക്കഥ ഉണ്ടാക്കി ജാമ്യമില്ലാ വകുപ്പിട്ട് കള്ളക്കേസെടുത്ത് ജയിലിലടക്കാൻ ഗൂഢാലോചന നടത്തിയ സിപിഎം നേതാക്കൾ വിതുരയിലെ ജനങ്ങളോടും ആദിവാസി സമൂഹത്തോടും മാപ്പുപറയണമെന്ന് ഡിസിസി പ്രസിഡന്‍റ് പാലോട് രവി ആവശ്യപ്പെട്ടു. മരണപ്പെട്ട ബിനുവിന്‍റെ മണലിയിലുള്ള വസതിയിൽ സന്ദർശനം നടത്തുകയായിരുന്നു അദേഹം. ബിനുവിനോടൊപ്പമുണ്ടായിരുന്ന ബന്ധുക്കൾ നടന്ന സംഭവം സത്യസന്ധമായി പരസ്യമാക്കിയിട്ടും പോലീസിനെയും ആശുപത്രി അധികൃതരേയും കള്ളക്കേസെടുക്കാൻ പ്രേരിപ്പിക്കുകയാണുണ്ടായത്. മലയോര പ്രദേശമായ വിതുര ആശുപത്രിയിൽ ചികിത്സ സൗകര്യങ്ങൾ പരിമിതമാണ്. വിതുര ആശുപത്രിയിലെ ആംബുലൻസ് തകരാറിലായി കിടക്കുകയാണ്. ഉപയോഗിക്കുന്ന 108 ആംബുലൻസിലൂടെയുള്ള സുരക്ഷിതമായയാത്രയിൽ നാട്ടുകാർക്ക് വ്യാപകമായ പരാതി ഉണ്ട്. കള്ളക്കേസ് പോലീസ് പിൻവലിക്കണമെന്നും ഡിസിസി പ്രസിഡന്‍റ് ആവശ്യപ്പെട്ടു. മുൻ എംഎൽഎ കെ.എസ്. ശബരിനാഥൻ, ഡിസിസി ജന സെക്രട്ടറിമാരായ വിദ്യാസാഗർ, തേക്കട അനിൽകുമാർ എസ്.കൃഷ്ണകുമാർ, ഉവൈസ് ഖാൻ,മണ്ഡലം പ്രസിഡന്‍റ് വിഷ്ണു ആനപ്പാറ, മേമല വിജയൻ, മണ്ണറവിജയൻ, വിതുര തുളസി, മോഹനൻ തുടങ്ങിയവർ പാലോട് രവിയോടൊപ്പം ഉണ്ടായിരുന്നു.

സിവില്‍സ്റ്റേഷനില്‍ ഓപ്പണ്‍ ജിം

പേരൂര്‍ക്കട: കുടപ്പനക്കുന്ന് സിവില്‍സ്റ്റേഷനില്‍ റിക്രിയേഷന്‍ ക്ലബിന്‍റെ നേതൃത്വത്തില്‍ ഓപ്പണ്‍ ജിം തുറന്നു. കളക്ടറേറ്റിലെ ബി ബ്ലോക്കിന് എതിര്‍വശത്ത് സ്ഥിതിചെയ്യുന്ന പാര്‍ക്കിനുള്ളില്‍ സജീകരിച്ച ഓപ്പണ്‍ ജിമ്മിന്‍റെയും വെയ്റ്റ് ലോസ് ചലഞ്ചിന്‍റെയും ഉദ്ഘാടനം ജില്ലാ കളക്ടര്‍ അനുകുമാരി നിര്‍വഹിച്ചു. സ്വന്തം ആരോഗ്യത്തിന് പ്രാധാന്യം നല്‍കിയാല്‍ മാത്രമേ നമ്മുടെ കര്‍മപഥത്തില്‍ കൂടുതല്‍ കാര്യക്ഷമമായി കാര്യങ്ങള്‍ ചെയ്യാന്‍ നമുക്ക് സാധിക്കുകയുള്ളൂവെന്ന് കളക്ടര്‍ പറഞ്ഞു. കളക്ടറേറ്റില്‍ രാവിലെയും വൈകീട്ടും സവാരിക്ക് എത്തുന്നവര്‍ക്കും ഉപയോഗിക്കാവുന്ന വിധത്തിലാണ് ജിം ക്രമീകരിച്ചിരിക്കുന്നത്. എഡിഎം ടി.കെ. വിനീനും കളക്ടറേറ്റിലെ ജീവനക്കാരും പങ്കെടുത്തു.

പന്ത പ്ലാമൂട്; സഞ്ചാരികൾക്ക് സ്വർഗ ഭൂമി, പ്രദേശവാസികൾക്ക്് പേടി സ്വപ്‌നം

നെയ്യാർഡാം : നെയ്യാർ അണമുഖം പന്ത പ്ലാമൂട്, ജലസംഭരണി ഒരുക്കിയ മനോഹരമായ ദ്യശ്യ ഭംഗി തീർക്കുന്നയിടമാണ്. കാടും പിന്നെ പാറകെട്ടുകളും വെള്ളവും തീർത്ത ഭംഗിയായ സ്ഥലം. അതിനാലാണ് സഞ്ചാരികൾ ഇവിടെ കൂട്ടമായി എത്തുന്നത്. എന്നാൽ പ്രദേശവാസികൾക്ക് ഇവിടം നൽകുന്നത് പേടി സ്വപ്‌നവും അതിലുപരി ആശങ്കയും. പോലീസിന്‍റെ കൺവെട്ടത്തുനിന്നും മാറി കിടക്കുന്ന പ്രദേശത്താണ് ഇന്നലെ രണ്ടു ജീവനുകൾ പൊലിഞ്ഞത്. അതാണ് നാട്ടുകാർക്ക് ആശങ്ക പടർത്തുന്നത്. പന്ത പ്ലാമൂട് എന്നാൽ പണ്ട് ആനകുളമായിരുന്നു. നെയ്യാർഡാം വരുന്നതിന് മുൻപ് ഇവിടം നദിയായിരുന്നു. ഇവിടെയായിരുന്നു കാടിറങ്ങി വരുന്ന കാട്ടാനകൾ വെള്ളം കുടിക്കാൻ എത്തുന്നതും പിന്നെയത് ആനകുളമായി മാറിയതും. ഡാം വന്നപ്പോൾ കാട്ടാനകൾ ഇവിടെ എത്തി വെള്ളംകുടിക്കാനും എത്തുമായിരുന്നു. ഇവിടെയാണ് കഴിഞ്ഞ ദിവസം രണ്ടു ജീവനുകൾപൊലിഞ്ഞത്. നാല് യുവാക്കളായിരുന്നു ഇന്നലെ ഇവിടെ എത്തിയത്. ജലസംഭരണിക്ക് നടുക്കുള്ള പാറപ്പുറത്തിരുന്ന് ആഘേഷിച്ചത്. രണ്ടു പേർ രാത്രി തന്നെ സ്ഥലം വിട്ടു. ഇവർ തിരിച്ചെത്തി നോക്കുമ്പോഴാണ് രണ്ടു പേരെ കാണാതായ വിവരമറിയുന്നത്. തുടർന്ന് വിവരം നാട്ടുകാരെ അറിയിക്കുന്നതും ഇവർ പോലീസിനേയും ഫയർ ഫോഴ്സിനേയും വിവര മറിയിക്കുന്നതും പിന്നെ വെള്ളിയാഴ്ചയാണ് ജഡം പൊങ്ങിയത്. ഒഴിവ് ദിവസം കൂട്ടുകാരോടൊപ്പം ആസ്വദിക്കാൻ എത്തിയവരാണ് മരണത്തിൽപ്പെട്ടത്. കൂടെ വന്ന മറ്റ് രണ്ട് പേരും നടുക്കത്തിൽ നിന്ന് ഇപ്പോഴും വിട്ടുമാറിയിട്ടില്ല. പോലീസ് ഇവരുടെ മൊഴി എടുക്കുകയാണ്. സമയം തെറ്റി ഇവിടെ തങ്ങുന്നത് നാട്ടുകാർ ചോദ്യം ചെയ്തിരുന്നു. എന്നാൽ മരണപ്പെട്ട സ്ഥലവാസി നാട്ടുകാരെ അനുനയിപ്പിക്കുകയായിരുന്നു ഇവിടെ സുരക്ഷാ സംവിധാനം ഒരുക്കാനോ ബോർഡ് വയ്ക്കാനോ ബന്ധപ്പെട്ടവർ ഒരു നടപടിയും എടുത്തിട്ടില്ല.

വരുന്നു, കരിമ്പനക്കാലം

കുള്ളന്‍ പനകള്‍ കൃഷിയിറക്കാനൊരുങ്ങി ചെങ്കല്‍ സര്‍വീസ് സഹകരണ ബാങ്ക് പാറശാല: ചരിത്രവും സാഹിത്യവും ജാതകവും രചിക്കാന്‍ ഇല വിട്ടു നല്‍കിയ പ്രിയ വൃക്ഷം. താളിയോലകളായി തലമുറകളുടെ അക്ഷര ഖനിക്ക് കാവലാളായ കരിമ്പന ഇന്ന് അന്യം നിന്നുപോകുന്ന നിലയിലാണ്. എന്നാല്‍ കരിമ്പനകളുടെ നാട്ടില്‍ വീണ്ടും കരിമ്പന ക്കാലത്തിന് പുതിയ തുടക്കമാകുകയാണ്. ചെങ്കല്‍ പഞ്ചായത്തിലാണ് പരീക്ഷണാടിസ്ഥാനത്തില്‍ കുള്ളന്‍പന കൃഷി തുടങ്ങുന്നത്.ആദ്യഘട്ടത്തില്‍ കൃഷിയില്‍ താത്പര്യമുള്ളവര്‍ക്ക് പരിശീലനം നല്‍കി തൈകള്‍ വിതരണം ചെയ്യും. അഞ്ച് മുതല്‍ പത്ത് വഷംകൊണ്ട് കായ്ക്കുന്ന കുള്ളന്‍ പനകള്‍ കൃഷിക്കാ യി എത്തിക്കാനുള്ള പരിശ്രമത്തിലാണ് ചെങ്കല്‍ സര്‍വീസ് സഹകരണ ബാങ്ക്. ഒരു കാലത്ത് തെങ്ങ് പോലെ തന്നെ കരിമ്പനകളാല്‍ നിറഞ്ഞ പ്രദേശമായിരുന്നു തെക്കന്‍ തിരുവിതാംകൂര്‍. പന കയറ്റു തൊഴിലും കള്ളും അക്കാനിയും കരുപ്പട്ടിയും നൊങ്കും പനങ്കിഴങ്ങും ഉത്പന്നങ്ങളുമായി വിപുലമായ തൊഴില്‍ ശൃംഖലയാണ് പനയെ ചുറ്റിപ്പറ്റി നിലനിന്നിരുന്നത്. കാലക്രമത്തില്‍ പന കയറ്റിന് ആളില്ലാത്തതും പനകള്‍ മുറിച്ചു മാറ്റപ്പെടാന്‍ കാരണമായി. തൂത്തുക്കുടിയിലെ പനഗവേഷണ കേന്ദ്രത്തില്‍ നിന്നും ഉത്പാദിപ്പിക്കുന്ന പതിനായിരത്തോളം കുള്ളന്‍ പനയുടെ തൈകളാണ് കൃഷിക്കായി എത്തിക്കുക. തൂത്തുക്കുടി യിലെ കിള്ളികുളം കാര്‍ഷിക കോളജ് ആന്‍ഡ് റിസര്‍ച്ച് ഇന്‍സ്റ്റിറ്റിയൂട്ടിലെ (എസി & ആര്‍ഐ) പന ഗവേഷണ കേന്ദ്രമാണ് പുതിയ കുള്ളന്‍ പന ഇനങ്ങള്‍ വികസിപ്പി ച്ചത്. പനയുടെ ഉയരം പന കയറ്റക്കാര്‍ക്ക് അപകടകരമാണെന്നതും പന കയറ്റത്തിന് തൊഴിലാളികളെ ലഭ്യമാകാത്തതും അതുവഴി പനയുടെ പൂര്‍ണ്ണ ശേഷി പ്രയോജന പ്പെടുത്താന്‍ കഴിയുന്നില്ലെന്നുമുള്ള വിലയിരുത്ത ലിലാണ് കുള്ളന്‍പന വികസിപ്പിച്ചത്. നീര, പന ശര്‍ക്കര, പന മിഠായി തുടങ്ങിയ പനയുടെ മൂല്യവര്‍ധിത ഉത്പന്നങ്ങള് ക്കായുള്ള ഗുണനിലവാര പരിശോധനാ ലാബും ഇവിടെ സജ്ജീകരിച്ചിട്ടുണ്ട്.

നാഗർകോവിൽ വിശുദ്ധ അൽഫോൻസാമ്മ തിരുനാളിനു കൊടിയേറി

നാഗർകോവിൽ: തെക്കൻ ഭരണങ്ങാനം എന്നറിയപ്പെടുന്ന നാഗർകോവിൽ വിശുദ്ധ അൽഫോൻസാമ്മയുടെ തിരുനാളിനു തക്കല വികാരി ജനറാൽ ഫാ. തോമസ് പൗവ്വത്തുപറമ്പിൽ കൊടിയേറ്റി. അഞ്ചുഗ്രാമം ഇടവക വികാരി ഫാ.ടിനു കോട്ടക്കപ്പറമ്പിൽ സിഎംഐ വിശുദ്ധ കുർബാന അർപ്പിച്ചു. പുന്നയ്നഗർ വികാരി ഫാ.മൈക്കിൾ ജോർജ് ബ്രൈറ്റ് , കോട്ടാർ രൂപത ഫാ. സതീഷ് കുമാർ ജോയ്, മറവൻകുടിയിരുപ്പു വികാരി ഫാ.സഹായ ആനന്ദു മറ്റും , കാട്ടതുറൈ പള്ളി വികാരി ഫാ.അഭിലാഷ് സേവ്യർ ,തടിക്കാരൻകോണം പള്ളി വികാരി ഫാ.പ്രിൻസ് ചേരിപ്പനാട്ട് , കല്ലുവിള പള്ളി വികാരി ഫാ. ഫാ.ആന്‍റണി മഹേഷ് തുടങ്ങിയവർ സമൂഹ ബലിയിൽ പങ്കെടുത്തു. തക്കല രൂപത ചാൻസിലർ ഫാ.ജോഷി കുളത്തുങ്കൽ വിശുദ്ധ അൽഫോൻസാമ്മയോടുള്ള നവനാൾ നടത്തി. ഫാ. ആന്‍റണി ജോസ് തിരുനാൾ സന്ദേശം നൽകി. തിങ്കളാഴ്ച്ച അൽഫോൻസാ സ്കൂളിലെ വിദ്യാർഥികൾക്ക് വേണ്ടി വിശുദ്ധ കുർബാനയും നവനാളും നേർച്ച ഭക്ഷണവും ഒരുക്കും. വൈകുന്നേരം ആറിന് നവനാളും തുടർന്ന് ശിവഗംഗൈ ബിഷപ് ഡോ. ലൂർദ് ആനന്ദം വിശുദ്ധ കുർബാന അർപ്പിക്കും. ഓഗസ്റ്റ് മൂന്നിന് വികാരിജനറാൾ ഫാ. തോമസ് പൗവ്വത്തുപറമ്പിലിന്‍റെ നേതൃത്വത്തിൽ നവനാളും തക്കല ബിഷപ് മാർ ജോർജ് രാജേന്ദ്രന്‍റെ കാർമികത്വത്തിൽ ആഘോഷമായ സമൂഹബലി അർപ്പിക്കും. തിരുനാളിന് മുന്നോടിയായുള്ള ക്രമീകരണങ്ങളെല്ലാം പൂർത്തിയായെന്ന് തീർഥാടന കേന്ദ്ര റെക്ടർ ഫാ.സനിൽ പന്തിച്ചിറയ്ക്കൽ വാർത്താസമ്മേളനത്തിൽ അറിയിച്ചു.

തദ്ദേശ തെരഞ്ഞെടുപ്പ്: ഇടതുപക്ഷ ഉദ്യോഗസ്ഥർ വോട്ടർ പട്ടിക അട്ടിമറിക്കുന്നുവെന്ന് വി.വി. രാജേഷ്

തിരുവനന്തപുരം: വരുന്ന തദ്ദേശ തെരഞ്ഞെടുപ്പിൽ പരാജയ ഭീതിയിലാണ്ട സിപിഎം നേതൃത്വം ഇടത് യൂണിയൻ അനുഭാവികളെ ഉപയോഗിച്ച് വോട്ടർ പട്ടിക അട്ടിമറിച്ചുവെന്ന് ബിജെപി സംസ്ഥാന സെക്രട്ടറി വി.വി രാജേഷ്. പാർലമെന്‍റ് തെരഞ്ഞെടുപ്പിൽ ബിജെപി ലീഡ് ചെയ്ത പഞ്ചായത്തുകളിലും വാർഡുകളിലുമാണ് വ്യാപകമായി വോട്ടർ പട്ടികയിൽ ക്രമക്കേടു നടത്തിയിരിക്കുന്നത്. ആറ്റുകാൽ വാർഡ് ബിജെപി വിജയിക്കുമെന്ന അശങ്കയുള്ളതിനാൽ ആറ്റുകാൽ ക്ഷേത്രമുൾപ്പെടുന്ന ബൂത്തിനെ ഇപ്പോൾ മണക്കാട് വാർഡിലാണ് ഉൾപ്പെടുത്തിയിട്ടുള്ളത്. ആറ്റുകാൽ ക്ഷേത്രമില്ലാത്ത ആറ്റുകാൽ വാർഡാണ് നിലവിലുള്ളത്. ഓരോ വാർഡിലും 9000 മുതൽ 9500 വോട്ടർമാർ വരെയാണ് ഉണ്ടാകേണ്ട തെന്നിരിക്കെ സിപിഎമ്മിന്‍റെ സംഘടനാ സ്വാധീനവും ന്യൂനപക്ഷ വോട്ടർമാരുടെ എണ്ണവും മാത്രം മാനദണ്ഡമാക്കിയാണ് വാർഡ് വിഭജനം നടത്തിയിട്ടുള്ളത്. ശ്രീകാര്യം വാർഡ് വിഭജിച്ച് രൂപീകരിച്ച പാങ്ങപ്പാറ വാർഡിൽ 2800 വോട്ടർമാരും,മൂന്നു ബൂത്തും മാത്രമുള്ളപ്പോൾ ചുറ്റുമുള്ള വാർഡുകളിൽ പലതിലും 10000ന് മുകളിൽ വോട്ടർമാരുണ്ട്. സി പി എമ്മിന് ലഭിയ്ക്കാൻ സാധൃതയില്ലാത്ത നൂറുകണക്കിന് വോട്ടർമാരുടെ പേരുകൾ പല വാർഡുകളിലെയും വോട്ടർ പട്ടികയിൽ നിന്നുമൊഴിവാക്കിയിട്ടുമുണ്ട്. തെരഞ്ഞെടുപ്പ് കമ്മീഷനെ നോക്കുകുത്തിയാക്കി സിപിഎം നേതൃത്വം തെരഞ്ഞെടുപ്പ് രേഖകളിൽ കൃത്യമം കാട്ടുന്നത്. രാഷ്‌ട്രീയ ലക്ഷ്യം മാത്രം മുൻനിറുത്തി പ്രവർത്തിയ്ക്കുന്ന ഉദ്യോഗസ്ഥരെ മാറ്റിനിറുത്തി ക്രമക്കേടുകൾ പരിഹരിക്കാൻ തെരഞ്ഞെടുപ്പ് കമ്മീഷൻ ഇടപെടണമെന്നും വി.വി. രാജേഷ് പറഞ്ഞു.

വൈദ്യുത ലൈൻ പൊട്ടി റോഡിൽ വീണു

വിഴിഞ്ഞം: ശക്തമായ കാറ്റും മഴയും മരങ്ങൾ വീണ് വൈദ്യുത ലൈൻ പൊട്ടി റോഡിൽ വീണു. കാർ യാത്രികർ അപകടത്തിൽ നിന്ന് കഷ്ടിച്ച് രക്ഷപ്പെട്ടു. ഇന്നലെ വൈകുന്നേരം വീശിയടിച്ച കാറ്റിൽ കോവളം സമുദ്രയിലാണ് മരം വീണത്. സ്വകാര്യ വ്യക്തിയുടെ പുരയിടത്തിൽ നിന്ന കൂറ്റൻ പ്ലാവ് മരവും തെങ്ങും കട പുഴകി ഇലക്ട്രിക് ലൈനിന് മേൽ പതിച്ചു. നാല് പോസ്റ്റുകൾ തകർന്ന് ലൈൻ കമ്പികൾ പൊട്ടി റോഡിന് കുറുകെ പതിച്ചതോടെ ഇതുവഴിയുള്ള ഗതാഗതവും സ്തംഭിച്ചു. ഈസമയം സമീപത്തെ ഹോട്ടലിലേക്ക് പോകാനായി ഒരു കാർ എത്തിയെങ്കിലും കഷ്ടിച്ച് രക്ഷപ്പെട്ടു. വിവരമറിഞ്ഞ് വിഴിഞ്ഞത്ത് നിന്നെത്തിയ ഫയർഫോഴ്സ് സംഘം മരങ്ങൾ വെട്ടിമാറ്റി ഗതാഗത തടസം ഒഴിവാക്കി. വൈദ്യുത വകുപ്പ് അധികൃതർ എത്തി വൈദ്യുതബന്ധം വിഛേദിച്ച് കൂടുതൽ അപകടം ഒഴിവാക്കി .

മയക്കുമരുന്നു കേസിൽ തടവും പിഴയും

തിരുവനന്തപുരം: 1.850 കിലോ കഞ്ചാവ് വിൽപന നടത്താൻ ശ്രമിച്ച കേസിലെ ഒന്നാം പ്രതിക്ക് കൊല്ലം കുണ്ട റ പെരിനാട് വില്ലേജിൽ ചിട്ടുകുന്നു പുത്തൻവീട്ടിൽ അഞ്ചലോസ് വിൽസണ് (62) രണ്ടു വർഷം തടവും രണ്ടു ലക്ഷം രൂപ പിഴയും ശിക്ഷ. രണ്ടാം പ്രതി രാജേശ്വാരിയെ തെളിവിന്‍റെ അഭാവത്തിൽ വെറുതെ വിട്ടു. ഒന്നാം അഡീഷണൽ ഡിസ്ട്രിക്ട് ആൻഡ് സെഷൻസ് ജഡ്ജി കെ.പി. അനിൽകുമാറിന്‍റേതാണ് ഉത്തരവ്.

പോങ്ങുമ്മൂട് അൽഫോൻസാ ദേവാലയത്തിൽ നവീകരണ ധ്യാനം

പോങ്ങുമ്മൂട്: തലസ്ഥാന നഗരിയിലെ ഭരണങ്ങാനം എന്നറിയപ്പെടുന്ന പോങ്ങുമ്മൂട് വി. അൽഫോൻസാ ദേവാലയത്തിൽ 27 ന് തീർഥാടന പദയാത്രയോട് കൂടി ആരംഭിക്കുന്ന തിരുന്നാളിന് മുന്നൊരുക്കമായി ഫാ. ജിസൺ പോൾ വെങ്ങാശേരി നേതൃത്വം നൽകുന്ന കുടുംബ നവീകരണ ധ്യാനത്തിനു തുടക്കമായി. ഇന്ന് വൈകുന്നേരം നാലു മുതൽ ആറുവരെ കുമ്പസാരത്തിനുള്ള സൗകര്യങ്ങൾ ഒരുക്കിയതായി വികാരി ഫാ.തോമസ്കുട്ടി വാഴപ്പറമ്പിൽ അറിയിച്ചു.

സഹോദരങ്ങള്‍ തമ്മിൽ അടിപിടി അനുജൻ വെട്ടേറ്റു മരിച്ചു

തിരുവനന്തപുരം : ചിറയിന്‍കീഴ് പെരുങ്ങുഴിയിൽ സഹോദരങ്ങള്‍ തമ്മിലുണ്ടായ അടിപിടിയില്‍ അനുജൻ വെട്ടേറ്റു മരിച്ചു. ചേട്ടനെ പോലീസ് അറസ്റ്റ് ചെയ്തു. കുഴിയം കോളനി വയൽത്തിട്ട വീട്ടിൽ രതീഷ് (31)ആണ് മരിച്ചത്. പ്രതി മഹേഷിനെ ചിറയിൻകീഴ് പൊലീസ് പിടികൂടി. കഴിഞ്ഞ ദിവസം രാത്രിയിൽ ആയിരുന്നു സംഭവം. ഇരുവരും മദ്യലഹരിയിലായിരുന്നു. സഹോദരങ്ങള്‍ തമ്മില്‍ വാക്കുതര്‍ക്കമുണ്ടാവുകയും ഇത് പിന്നീട് അടിപിടിയായി മാറി. തുടര്‍ന്ന് മഹേഷ് രതീഷിന്‍റെ കഴുത്തില്‍ വെട്ടിപ്പരുക്കേല്‍പ്പിക്കുകയായിരുന്നു. ഗുരുതരമായി പരിക്കേറ്റ രതീഷിനെ ചിറയിൻകീഴ് താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ ആയില്ല. പോസ്റ്റ്‌ മോർട്ടത്തിന് ശേഷം മൃതദേഹം ബന്ധുക്കൾക്ക് വിട്ടു കൊടുത്തു. ഇരുവരും അവിവാഹിതർ ആണ്. മയക്കു മരുന്ന് ഉൾപ്പെടെയുള്ള ലഹരി വസ്തുക്കൾ ഉപയോഗിക്കുന്നവരാണ് ഇരുവരും. മഹേഷിനെ റിമാൻഡ് ചെയ്തു.

എടിഎമ്മിൽനിന്നും ലഭിച്ച 69,500 രൂപ തിരിച്ചേൽപ്പിച്ച് മാതൃകയായി

വെഞ്ഞാറമൂട്. എടിഎം മെഷ്യനില്‍ നിന്നും ലഭിച്ച 69,500 രൂപ ബാങ്കിലേല്‍്പിച്ച് റസിഡന്‍റ്സ് അസോസിയേഷന്‍ ഭാരവാഹി മാതൃകയായി. വട്ടപ്പാറ കെകെ നഗര്‍ റസിഡന്‍റ്സ് അസോസിയേഷന്‍ സെക്രട്ടറി ജെ.വി. വിനോദാണ് പണം ബാങ്കിന് കൈമാറിയത്. ഇക്കഴിഞ്ഞ ഞായറാഴ്ചയാണ് യൂണിയന്‍ ബാങ്ക് വട്ടപ്പാറ ശാഖയോടനുബന്ധിച്ച് പ്രവര്‍ത്തിക്കുന്ന എടിഎം കൗണ്ടറില്‍ നിന്നും പണം ലഭിക്കുന്നത്. അന്ന് അവധിയായിരുന്നതിനാല്‍ ബാങ്കിലേല്‍പ്പിക്കാനും കഴിഞ്ഞില്ല. തുടര്‍ന്ന് തൊട്ടടുത്തുള്ള വട്ടപ്പാറ പോലീസ് സറ്റേഷനിലെത്തി സര്‍ക്കിള്‍ ഇന്‍സ്‌പെക്ടറോട് വിവരം പറയുകയും അദ്ദേഹത്തിന്‍റെ സാന്നിദ്ധ്യത്തില്‍ പണം എണ്ണിയപ്പോള്‍ 69,500 രൂപയുണ്ടന്ന് കണ്ടെത്തുകയും ചെയ്തു. ഇതോടെ സര്‍ക്കിള്‍ ഇന്‍സ്‌പെക്ടര്‍ ബാങ്ക് മാനേജരുമായി ബന്ധപ്പെട്ടു. ബാങ്ക് മാനേജരെത്തി സിസിടിവി ദൃശ്യങ്ങള്‍ പരിശോധിച്ചതില്‍ നിന്നും ഒരു ഇടപാടുകാരന്‍ എടിഎം മെഷ്യനിലൂടെ നിക്ഷേപിക്കാന്‍ കൊണ്ടു വന്ന പണം സാങ്കേതിക പ്രശ്‌നങ്ങള്‍ കാരണം നടക്കാതെ പോയെന്നും അതാരാണന്ന് തിരിച്ചറിയുകയും ചെയ്ത് അയാളെ വിവരമറിയിക്കുകയും ചെയ്തു. തുടർന്ന് കഴിഞ്ഞ ദിവസം ബാങ്ക് മാനേജര്‍ക്ക് സ്റ്റേഷനില്‍ എത്തി സര്‍ക്കിള്‍ ഇന്‍സ്‌പെക്ടര്‍ ശ്രീജിത്ത്, എസ്ഐ ബിനിമോള് എന്നിവരുടെ സാന്നിദ്ധ്യത്തില്‍ പണം കൈമാറുകയായിരുന്നു.

കെഎസ്ആർടിസി ബസും വാനും കൂട്ടിയിടിച്ച് 14 പേർക്ക് പരിക്ക്

നെടുമങ്ങാട്: കെഎസ്ആർടിസി ബസും സ്കൂൾ വാനും കൂട്ടിയിടിച്ച് 14 പേർക്ക് പരിക്കേറ്റു. നെടുമങ്ങാട് ഗവ.ഗേൾസ് ഹയർ സെക്കൻഡറി സ്കൂളാണ് അപകടത്തിൽപ്പെട്ടത്. ഇന്നലെ വൈകുന്നേരം അഞ്ചോടെ ഇരിഞ്ചയം ഉണ്ടപ്പാറയ്ക്ക് സമീപത്തായിരുന്നു അപകടം. വാൻ ഡ്രൈവർ ശരത് ചന്ദ്ര പ്രസാദ് (31), പാചക തൊഴിലാളി താന്നിമൂട് സ്വദേശിനി ബിനു (40) എന്നിവർ മെഡിക്കൽ കോളജ് ആശുപത്രിയിൽ ചികിത്സ തേടി. പരിക്കേറ്റ വാനിലെ സഹായി നഗരിക്കുന്ന് സ്വദേശിനി കവിത (45 മറ്റു പരിക്കേറ്റ 11 വിദ്യാർഥികളും നെടുമങ്ങാട് ജില്ലാ ആശുപത്രിയിൽ ചികിത്സ തേടി. ഉണ്ടപ്പാറയിൽ കുട്ടികളെ ഇറക്കി ഇരിഞ്ചയത്ത് പോകാനായി താന്നിമൂട്ടിലേക്ക് പോകുകയായിരുന്ന സ്കൂൾ വാനും എതിർദിശയിൽ എത്തിയ കെഎസ്ആർടിസി ബസും ആണ് അപകടത്തിൽപ്പെട്ടത്. സ്കൂൾ വാനിൽ ഉണ്ടായിരുന്ന നാലു കുട്ടികളും കെഎസ്ആർടിസി ബസിൽ ഉണ്ടായിരുന്ന ഏഴ് വിദ്യാർഥികൾക്കുമാണ് പരിക്കേറ്റത്. കെഎസ്ആർടിസി ബസിലെ മൂന്ന് കുട്ടികൾ ഗേൾസ് ഹയർ സെക്കൻഡറി സ്കൂളിലെയും നാലു പേർ മറ്റ് സ്കൂളിലെയും കുട്ടികളാണ്.

യുവാവ് തൂങ്ങിമരിച്ച നിലയില്‍

മെഡിക്കല്‍കോളജ്: യുവാവിനെ മുറിക്കുള്ളില്‍ തൂങ്ങിമരിച്ച നിലയില്‍ കണ്ടെത്തി. പാലക്കാട് സ്വദേശി ഷാജി (42) ആണ് മരിച്ചത്. 24ന് രാത്രി എട്ടോടെ തമ്പാനൂര്‍ അരിസ്റ്റോ ജംഗ്ഷനു സമീപത്തെ രാമകൃഷ്ണ ബില്‍ഡിംഗിനുള്ളിലാണ് മൃതദേഹം കണ്ടെത്തിയത്. എ1 പ്രൈവറ്റ് ബസിലെ ക്ലീനറായി ജോലിനോക്കി വരികയായിരുന്നു ഷാജി. മരണകാരണം വ്യക്തമല്ല. മൃതദേഹം തിരുവനന്തപുരം മെഡിക്കല്‍കോളജില്‍ പോസ്റ്റുമോര്‍ട്ടം നടത്തി. തമ്പാനൂര്‍ പോലീസ് കേസെടുത്തു.

നെയ്യാർ ഡാമിൽ രണ്ടുയുവാക്കൾ മുങ്ങി മരിച്ചു

നെയ്യാർഡാം : നെയ്യാർ ഡാമിൽ യുവാക്കൾ മുങ്ങി മരിച്ചു. നെയ്യാർ ഡാമിലെ പന്തപ്ലാമൂട്, ആനക്കുളം സംഭരണിയിലാണ് വ്യാഴാഴ്ച രാത്രി 10 മണിയോടെ കുളിക്കാൻ എത്തിയ അമ്പൂരി പൂച്ചമുക്ക് കല്ലുമാക്കൽ വീട്ടിൽ അർജുൻ (20), കാട്ടാക്കട അഞ്ചുതെങ്ങ് മൂട് മണ്ണാങ്കോണം, മുല്ലശേരി വീട്ടിൽ ദുർഗാ പ്രസാദ് (28) എന്നിവരാണ് മരിച്ചത്. കുളിക്കാൻ എത്തിയ ഇവർ ജലാശയത്തിൽ അകപ്പെടുകയായിരുന്നു. തുടർന്ന് ഇന്നലെ രാവിലെ 7. 15 ആണ് യുവാക്കളുടെ മൃതദേഹം പുറത്തെടുത്തത്. നാലംഗ സംഘമാണ് വ്യാഴാഴ്ച രാത്രി 10 മണിയോടെ ആനക്കുളത്തിനു സമീപം എത്തിയത്. കരയിൽ ഇരുന്നു മദ്യപിച്ചശേഷം ദുർഗാദാസിന്‍റെയും അർജുനന്‍റെയും സുഹൃത്തുക്കളായ അമ്പൂരി സ്വദേശി അഭിരാം, കാട്ടാക്കട സ്വദേശി ബിനീഷ് എന്നിവർ അമ്പൂരിലേക്ക് ബൈക്കിൽ പോകുകയും അഭിരാമിനെ അമ്പൂരിയിൽ ഇറക്കിയശേഷം ബിനീഷ് തിരികെ എത്തുകയും ചെയ്തു. അപ്പോഴേക്കും ദുർഗാദാസ്, അർജുൻ എന്നിവരെ കാണാതായിരുന്നു. തുടർന്ന് നടന്ന തെരച്ചിലിൽ ഇവരുടെ ചെരുപ്പ് കണ്ടെത്തുകയും ചെയ്തു. ഇതോടെ പോലീസിനെ വിവരം അറിയിച്ച് പോലീസ് രാത്രിയോടെ സ്ഥലത്തെത്തിയെങ്കിലും പ്രതികൂല കാലാവസ്ഥയിൽ തെരച്ചിൽ നടന്നില്ല. തുടർന്ന് രാവിലെ ഏഴോടെ ഇരുവരുടെയും മൃതദേഹം ജലാശയത്തിൽ പൊങ്ങുകയായിരുന്നു. നെയ്യാർ ഡാമിൽ നിന്നും അഗ്നി രക്ഷാസേന എത്തി മൃതദേഹങ്ങൾ കരയ്ക്ക് എത്തിച്ചു. പോലീസ് തുടർനടപടികൾ സ്വീകരിച്ചു .

വാവുബലി ദിവസം കെഎസ്ആര്‍ടിസി സര്‍വീസുകള്‍ കുറച്ചതായി പരാതി

വെള്ളറട: വാവുബലി ദിവസം കെഎസ്ആര്‍ടിസി സര്‍വീസുകള്‍ വെട്ടിക്കുറച്ചതായി പരാതി. വെള്ളറടയില്‍നിന്നും നെയ്യാറ്റിന്‍കരയിലേക്കുള്ള സർവീസാണ് അകാരണമായി വെട്ടിക്കുറച്ചത്. ഇന്നലെ ഉച്ചയ്ക്കു 12 നുശേഷം ഉച്ചതിരിഞ്ഞു രണ്ടിനാണ് അടുത്ത സര്‍വീസ് നടന്നത്. യാത്രക്കാരിൽ പലരും കെഎസ്ആര്‍ടിസി വെള്ളറട ഡിപ്പോയില്‍ വിളിച്ചെങ്കിലും പ്രധാനപ്പെട്ട കളക്‌ഷന്‍ ലഭിക്കുന്ന റൂട്ടുകളിലേക്കു ബസിനെ മാറ്റിയെന്നാണ് അറിയാൻ സാധിച്ചത്. ഇതിനെതിരെ നാട്ടുകാര്‍ ബന്ധപ്പെട്ട അധികൃതര്‍ക്ക് പരാതി നല്‍കാനുള്ള തയാറെടുപ്പിലാണ്.

ഉമ്മന്‍ചാണ്ടി സ്മൃതിയും പഠനോപകരണ വിതരണവും

വെള്ളറട: ഇന്ത്യന്‍ നാഷണല്‍ കോണ്‍ഗ്രസ് ചികിത്സാധന സഹായം, പഠനോപകരണ വിതരണം, ഭക്ഷ്യക്കിറ്റ് വിതരണവും സംഘടിപ്പിച്ചു. കാലാട്ടുകാവ് വാർഡിൽ നടന്ന ഉമ്മന്‍ചാണ്ടി അനുസ്മരണം കെപിസിസി എക്‌സിക്യൂട്ടീവ് മെമ്പര്‍ എ.കെ. ശശി ഉദ്ഘാടനം ചെയ്തു. ബ്ലോക്ക് കോണ്‍ഗ്രസ് ജനറല്‍ സെക്രട്ടറി അലക്‌സ് ജെയിംസ് അധ്യക്ഷത വഹിച്ചു. പത്താം ക്ലാസ്, പ്ലസ് ടു വിജയികളെ ആദരിക്കല്‍ തുടങ്ങിയവ ഉള്‍പ്പെടുത്തി വര്‍ണ്ണം 2025 എന്ന പേരിലാണ് പരിപാടികള്‍ സംഘടിപ്പിച്ചത്. ബ്ലോക്ക് കോണ്‍ഗ്രസ് പ്രസിഡന്‍റ് അഡ്വ. ഗിരീഷ് കുമാര്‍, മണ്ഡലം പ്രസിഡന്‍റ് ലത, അമ്പൂരി മണ്ഡലം പ്രസിഡന്‍റ് അഡ്വ. ശരീഫ്, അമ്പൂരി യുഡിഎഫ് ചെയര്‍മാന്‍ റോയ് തടി കാട്ടില്‍, എസ്. വിജയചന്ദ്രന്‍, മാത്തുക്കുട്ടി, ജോസ് മാത്യു പോളയ്ക്കന്‍, മുണ്ടവന്‍ കുന്ന് ശശി, തുളസീധരന്‍, ഐഎന്‍ടിയുസി കള്ളിക്കാട് മണ്ഡലം പ്രസിഡന്‍റ് ജെയിംസ്, എല്‍.കെ. കുമാരി, ബ്ലോക്ക് കോണ്‍ഗ്രസ് വൈസ് പ്രസിഡന്‍റ് ഗോപാലകൃഷ്ണന്‍ തുടങ്ങിയവര്‍ പങ്കെടുത്തു. വാര്‍ഡ് കമ്മിറ്റിയുടെ സെക്രട്ടറി ശാലിനി സ്വാഗതവും മണ്ഡലം ഭാരവാഹി ജയന്‍ നിരപ്പുകാല നന്ദിയും പറഞ്ഞു.

നെയ്യാർ അണക്കെട്ടിൽ ജലനിരപ്പ് ഉയരുന്നു

നെയ്യാർ ഡാം: നെയ്യാർ അണക്കെട്ടിൽ ജലനിരപ്പ് ഉയരുന്നു. ഇന്നലെ വൈകുന്നേരം മുതൽ മഴ തോരാതെ പെയ്യുന്നതും അണക്കെട്ടിലേക്കു വൃഷ്ടി പ്രദേശത്തു നിന്നുള്ള നീരൊഴുക്കുമാണു ജലനിരപ്പ് ഉയരാൻ കാരണമാകുന്നത്. അണക്കെട്ടിലെ പരമാവധി ജലനിരപ്പ് 84.750 മീറ്റർ ആണ്. ഇപ്പോൾ ജലനിരപ്പ് 83.86 മീറ്ററായി ഉയർന്നിട്ടുണ്ട്. അണക്കെട്ടിലെ രണ്ടാമത് മുന്നറിയിപ്പ് അളവ് 83.75 മീറ്റർ ആണ്. ഇപ്പോൾ ഇതു കടന്നിരിക്കുകയാണ്. നിലവിൽ അണക്കെട്ടിന്‍റെ നാലു ഷട്ടറുകളും 10 സെന്‍റീമീറ്റർ വീതം ഉയർത്തിയിട്ടുണ്ട്. അതേസമയം ഈ നിലയ്ക്ക് മഴ തുടർന്നാൽ ഇനിയും ഷട്ടറുകൾ ഉയർത്തേണ്ട സാഹചര്യമാണ് ഉള്ളത്. നെയ്യാറിന്‍റെ ഇരു കരകളിലുമുള്ളവർ ജാഗ്രത പാലിക്കാൻ നിർദേശമുണ്ട്.

വിദ്യാർഥിനിയുടെ ആത്മഹത്യ: അയൽവാസിയായ വീട്ടമ്മ അറസ്റ്റിൽ

വിഴിഞ്ഞം: അസഭ്യവർഷത്തിൽ മനംനൊന്ത് വിദ്യാർഥിനി തൂങ്ങി മരിച്ച സംഭവത്തിൽ, അയൽവാസിയായ വീട്ടമ്മയെ പ്രേരണാകുറ്റം ചുമത്തി വിഴിഞ്ഞം പോലീസ് അറസ്റ്റ് ചെയ്തു. വെങ്ങാനൂർ അമരിവിള ഞെടിഞ്ഞിൽ കണ്ണേറിൽ എ. ആർ. ഭവനിൽ അശോകന്‍റെ ഭാര്യ രാജം (54) ആണ് അറസ്റ്റിലായത്. വെങ്ങാനൂർ വെണ്ണിയൂർ അമരിവിള ഞെടിഞ്ഞിൽ വീട്ടിൽ അജുവിന്‍റെയും സുനിതയുടെയും മകൾ അനീഷ (18) യുടെ മരണവുമായി ബന്ധപ്പെട്ടാണു വിഴിഞ്ഞം സിഐ പ്രകാശ്, എസ്ഐ ദിനേശ്, പോലീസുകാരായ രജിത, മിനി, സുനിത, ദിനേശ്, പ്രസന്നൻ എന്നിവർ ചേർന്നു പിടികൂടിയത്. അയൽവാസിയുടെ മാനസിക പീഡനമാണ് മകളുടെ മരണത്തിലേക്കു വഴിതെളിച്ചതെന്നു കാണിച്ചു പിതാവ് വിഴിഞ്ഞം പോലീസിൽ പരാതി നൽകിയിരുന്നു. കേസെടുത്ത് അന്വേഷണം തുടങ്ങിയതോടെ രാജം ഒളിവിൽ പോയി. ബന്ധുവീടുകളിൽ മാറി മാറി ഒളിവിൽ കഴിഞ്ഞ രാജത്തെ ഇന്നലെ ചെങ്കലിൽനിന്ന് അറസ്റ്റ് ചെയ്യുകയായിരുന്നു. ധനുവച്ച പുരം ഐടിഐ യിൽ പഠിക്കാൻ അഡ്മിഷൻ കഴിഞ്ഞു ക്ലാസ് തുടങ്ങുന്നതും കാത്തിരിക്കുകയായിരുന്നു അനീഷ. പ്രതിയെ കോടതിയിൽ ഹാജരാക്കി റിമാൻഡു ചെയ്തു.

യുബിഐ തിരുവനന്തപുരം റീജണിന് ഔദ്യോഗിക ഭാഷ നിർവഹണ പുരസ്കാരം

തിരുവനന്തപുരം: 2024-25 വർഷത്തെ മികച്ച ഔദ്യോഗിക ഭാഷാ നിർവഹണത്തിനുള്ള ഒന്നാം സമ്മാനം തിരുവനന്തപുരത്തെ യൂണിയൻ ബാങ്ക് ഓഫ് ഇന്ത്യ റീജണൽ ഓഫീസിന് ലഭിച്ചു. ഡെപ്യൂട്ടി റീജണൽ ഹെഡ് ദീപക് ചാർലി, ടുലിക് ജനറൽ മാനേജരും ചെയർമാനുമായ എസ്. സുനിൽ കുമാർ, ഔദ്യോഗിക ഭാഷാ സീനിയർ മാനേജർ കെ. രാജേഷ്, ഇന്ത്യാ ഗവൺന്‍റിന്‍റെ ആർഐഒ ഡെപ്യൂട്ടി ഡയറക്ടർ നിർമൽ കുമാർ ദുബെ എന്നിവർ ചേർന്നു പുരസ്കാരം സമ്മാനിച്ചു. ആർ‌ബി‌ഐ റീജിയണൽ ഡയറക്ടർ തോമസ് മാത്യു, നബാർഡ് സി‌ജി‌എം നാഗേഷ് കുമാർ അനുമല, ടോളിക് മെമ്പർ സെക്രട്ടറി ഷോജോ ലോബോ, മറ്റ് ഓഫീസ് മേധാവികൾ, ഒ‌എൽ ഓഫീസർമാർ എന്നിവർ യോഗത്തിൽ പങ്കെടുത്തു.

ചായം പൊറ്റ ട്രാന്‍സ്‌ഫോര്‍മറിലെ കാട്ടുവള്ളികളെ വെട്ടിമാറ്റി

വെള്ളറട: ചായം പൊറ്റയിലെ ട്രാന്‍സ്‌ഫോമറിനെ അപകടാവസ്ഥയിലാക്കി വള്ളിപ്പടർപ്പുകൾ മൂടിയത് കെഎസ്ഇബി അധികൃതർ വെട്ടിമാറ്റി. ട്രാൻസ്ഫോർമറിന്‍റെ അപകടാവസ്ഥയെക്കുറിച്ചു ദീപിക കഴിഞ്ഞദിവസം വാര്‍ത്ത നൽകിയിരുന്നു. ഇതേ തുടർന്നാണ് കെഎസ്ഇബി ജീവനക്കാർ അടിയന്തരമായി ഇടപെട്ട് ട്രാൻസ്ഫോർമറിലെ വള്ളിപ്പടർപ്പുകൾ വെ‌ട്ടിമാറ്റി പരിസരം ഉൾപ്പെടെ ശുചീകരിച്ചത്.

വാർഡ് മെമ്പർക്ക് മൂന്നു വർഷത്തെ കഠിനതടവും ഒരു ലക്ഷം രൂപ പിഴയും

കല്ലറ പഞ്ചായത്ത്‌ ഭവന നിർമാണ പദ്ധതി ക്രമക്കേട് കല്ലറ: ഭവന നിർമാണ പദ്ധതിയിൽ ക്രമക്കേടു നടത്തിയ കേസിൽ കല്ലറ പഞ്ചായത്ത് മെമ്പർക്കു മൂന്നുവർഷം കഠിന തടവും ഒരു ലക്ഷം പിഴയും വിധിച്ച് കോടതി. കല്ലറ പഞ്ചായത്തിലെ വെള്ളംകുടി വാർഡ് മെമ്പറും സിപിഎം കല്ലറ ലോക്കൽ കമ്മിറ്റി അംഗവുമായ കെ. ഷീലയെയാണു മൂന്നു വർഷം കഠിന തടവും ഒരു ലക്ഷം പിഴ ഈടാക്കാനും തിരുവനന്തപുരം വിജിലൻസ് കോടതി ജഡ്ജി എ. മനോജ് വിധിച്ചത്. 2011-2012 കാലഘട്ടത്തിൽ കല്ലറ പഞ്ചായത്ത് വാർഷിക പദ്ധതിയിൽ ഉൾപ്പെടുത്തി ഭവന നിർമാണ പദ്ധതി നടപ്പിലാക്കിയിരുന്നു. 2011 ആഗസ്റ്റ് മൂന്നിനു വെള്ളം കുടി വാർഡിലേക്കുള്ള ഗുണഭോക്താക്കളെ ഗ്രാമസഭ തീരുമാനി ക്കുകയും മിനിട്‌സ് ബുക്കിൽ രേഖപ്പെടുത്തുകയും ചെയ്തു. ആ കാലയളവിൽ വെള്ളംകുടി വാർഡ് മെമ്പർ ആയിരുന്ന ഷീല, ഗ്രാമസഭ തീരുമാനിച്ച ഗുണഭോക്താക്കളുടെ ലിസ്റ്റിൽ അഴിമതിയും തിരിമറിയും നടത്തി ലിസ്റ്റിൽ ഇല്ലാത്തവരെ കൃത്രിമമായി ഉൾപ്പെടുത്തി ആനുകൂല്യം വാങ്ങി നൽകുകയായിരുന്നു. ഇതിനെതിരെ കോൺഗ്രസ്‌ കല്ലറ മണ്ഡലം കമ്മിറ്റി സെക്രട്ടറി പി. അനികുട്ടൻ ഫയൽ ചെയ്ത ഹർജിയുടെ അടിസ്ഥാനത്തിലാണു വിജിലൻസ് കോടതി കേസെടുക്കാൻ ഉത്തരവിട്ടത്. വിജിലൻസിനുവേണ്ടി പബ്ലിക് പ്രോസിക്യൂട്ടർ വീണാ സതീഷ് ഹാജരായി.

യുവതിയുടെ വയറ്റിൽ 41 റബര്‍ ബാൻഡുകള്‍..!

പാറശാല: വയറു വേദനവുമായി ചികിത്സതേടിയയെത്തിയ യുവതിയുടെ വയറിനുള്ളില്‍ നിന്നും റബര്‍ ബാൻഡുള്‍ കണ്ടെത്തി. പാറശാല സരസ്വതി ആശുപത്രിയിലാണ് സംഭവം. ശസ്ത്രക്രിയയയ്ക്കു വിധേയയായ 40 വയസുകാരിയായ യുവതിയുടെ വയറ്റില്‍ നിന്നാണ് റബര്‍ ബാൻഡുകള്‍ കണ്ടെത്തിയത്. നാലു ദിവസമായി വയറുവേദനയും വയറു വീര്‍പ്പുമുണ്ടായിരുന്നു. ഇതേ തുടർന്നാണ് ഇവർ ആശുപത്രിയിലെത്തിയത്. സ്‌കാനിംഗ് പരിശോധനയില്‍ ചെറുകുടലില്‍ തടസമാണെന്നു കണ്ടതി യതിനെ തുടര്‍ന്നു രോഗിയെ അടിയന്തിര ശസ്ത്രക്രിയയ്ക്ക് വിധേയമാക്കുകയായിരുന്നു. ശസ്ത്രക്രിയ സമയത്തു ചെറുകുടലിനുള്ളില്‍ കാണപ്പെട്ട മുഴ, തുറന്നു നീക്കാന്‍ ശ്രമിച്ചപ്പോഴാണ് ഒട്ടേറെ റബർ ബാന്‍ഡുകള്‍ ഒന്നിനോടൊന്നു കൂടിച്ചേര്‍ന്ന് ഒരു പന്തുപോലെയായി ഇരിക്കുന്ന നിലയിൽ കണ്ടെത്തിയത്. തുടർന്നു 41 റബർ ബാൻഡുകളാണ് നീക്കം ചെയ്തത്. ഇവ പൂര്‍ണമായും പെറുക്കി മാറ്റി കുടലില്‍ തുന്നലിട്ട് ശസ്ത്രക്രിയ പൂര്‍ത്തിയാക്കി. ഇപ്പോള്‍ രോഗി സുഖം പ്രാപിച്ചു വരുന്നു. ഒരു സ്വകാര്യ സ്ഥാപനത്തില്‍ ജോലിചെയ്യുന്ന യുവതിക്ക് ഇടയ്ക്കിടെ റബര്‍ബാന്‍ഡ് വായിലിട്ടു ചവയ്ക്കുന്ന ശീലം ഉണ്ടായിരുന്നതായി വീട്ടുകാര്‍ പറഞ്ഞു. സ്വന്തം തലയിലെ മുടി, ഭക്ഷ്യയോഗ്യമല്ലാത്ത ചിലസാധനങ്ങള്‍ തുടങ്ങിയ കഴിക്കുന്നതു മാനസിക വൈകല്യമുള്ളവരില്‍ കണ്ടുവരാറുണ്ടെങ്കിലും സാധാരണക്കാരിൽ ഇത് അപൂർവമാണെന്ന് ആശുപത്രി മേധാവി ഡോ. എസ്.കെ. അജയ്യകുമാര്‍ പറഞ്ഞു.

ഓണ്‍ലൈന്‍ വ്യാപര തട്ടിപ്പ്: ഡല്‍ഹി സ്വദേശി പിടിയില്‍

പേരൂര്‍ക്കട: ഓൺലൈൻ വ്യാപാര തട്ടിപ്പിലൂടെ ലക്ഷങ്ങള്‍ കൈക്കലാക്കിയ ഡല്‍ഹി സ്വദേശിയെ തിരുവനന്തപുരം സിറ്റി സൈബര്‍ ക്രൈം പോലീസ് അറസ്റ്റുചെയ്തു. പീതംപുര സ്വദേശി ഇന്ദര്‍ പ്രീത് സിംഗ് (42) ആണ് അറസ്റ്റിലായത്. കേന്ദ്രസര്‍ക്കാര്‍ അംഗീകാരമുള്ള വ്യാപാര സ്ഥാപനമാണെന്നു യൂട്യൂബിലൂടെ പരസ്യം നല്‍കുകയും മികച്ച ലാഭം ലഭിക്കുമെന്നു പറഞ്ഞുവിശ്വസിപ്പിക്കുകയും ചെയ്തു തിരുവനന്തപുരം സ്വദേശിയായ യുവാവില്‍നിന്ന് 81 ലക്ഷം രൂപയാണ് പ്രതി തട്ടിയെടുത്തത്. ആറു വ്യത്യസ്ത ബാങ്ക് അക്കൗണ്ടുകളിലേക്കാണ് യുവാവ് ട്രാന്‍സ്ഫര്‍ ചെയ്തു നല്‍കിയത്. ലഭിക്കുമെന്നു പറഞ്ഞ പണം എടിഎമ്മില്‍ നിന്നു ലഭിക്കാതെ വന്നതോടെയാണ് തട്ടിപ്പ് മനസിലായത്. തുടര്‍ന്ന് ജൂണ്‍ 18ന് സൈബര്‍ ക്രൈമില്‍ പരാതി നല്‍കുകയും ചെയ്തത്. ചാരിറ്റി പ്രവര്‍ത്തനം നടത്തുന്നതായി കാണിച്ചു തരപ്പെടുത്തിയ ഒരു സ്ഥാപനത്തിന്‍റെ പേരിലെ അക്കൗണ്ടിലേക്കാണ് തട്ടിപ്പു തുക എത്തിയതെന്നു പോലീസ് അന്വേഷണത്തില്‍ കണ്ടെത്തി. പ്രതിക്കു പിന്നില്‍ വേറെയും സംഘങ്ങള്‍ ഉണ്ടോയെന്ന് അന്വേഷിച്ചുവരുന്നുണ്ട്. സൈബര്‍ ക്രൈം സിഐ എസ്. നിയാസ്, സിപിഒമാരായ സമീര്‍ഖാന്‍, ശ്രീജിത്ത് റോയി, ഗോവിന്ദ് മോഹന്‍ എന്നിവര്‍ ഉള്‍പ്പെട്ട സംഘം ഡല്‍ഹിയില്‍ മൂന്നുദിവസം നടത്തിയ അന്വേഷണത്തിനൊടുവിലാണ് പ്രതിയെ കണ്ടെത്തിയത്. അറസ്റ്റിലായ പ്രതിയെ കോടതി റിമാന്‍ഡ് ചെയ്തു.

സുരക്ഷാജീവനക്കാരന്‍ ഓടിച്ച ബൈക്ക് പാഞ്ഞുകയറി രണ്ടുപേർക്കു പരിക്ക്

പേരൂര്‍ക്കട: ഇന്‍ഫോസിസിലെ സുരക്ഷാജീവനക്കാരന്‍ ഓടിച്ച ബൈക്ക് പാഞ്ഞുകയറി 15 വയസുവീതം പ്രായമുള്ള രണ്ടുപെണ്‍കുട്ടികള്‍ക്കു പരിക്കേറ്റു. ഇരുവരെയും തിരുവനന്തപുരം ജി.ജി ആശുപത്രിയില്‍ പ്രവേശിപ്പിച്ചു. ഇന്നലെ രാവിലെ 7.30നു നാലാഞ്ചിറ കുരിശടിയിലായിരുന്നു അപകടം. ട്യൂഷന്‍ കഴിഞ്ഞു വീട്ടിലേക്കു വരികയായിരുന്ന നാലാഞ്ചിറ സ്വദേശിനികളായ വിദ്യാര്‍ഥിനികള്‍ക്കാണു പരിക്കേറ്റത്. നെടുമങ്ങാട് വാളിക്കോട് സ്വദേശി സനല്‍ (40) ഓടിച്ചിരുന്ന ബൈക്കാണ് ഫുട്പാത്തിലൂടെ നടന്നുപോകുകയായിരുന്ന പെണ്‍കുട്ടികള്‍ക്ക ുനേരേ പാഞ്ഞുകയറിയത്. ബൈക്ക് ഇടിച്ചയുടന്‍ തന്നെ ഇരുവരും പിറകിലേക്കു മറിഞ്ഞുവീഴുകയായിരുന്നു. പെണ്‍കുട്ടികളുടെ താടിയെല്ലിനും കൈകാലുകള്‍ക്കും പരിക്കേറ്റു. ബൈക്കു വന്നിടിച്ചതോടെ ഇരുവരുടെയും പല്ലുകള്‍ ഇളകിപ്പോയിട്ടുണ്ട്. ഇവരില്‍ ഒരാളുടെ തലയില്‍ രക്തം കട്ടപിടിച്ചതിനാല്‍ വിദഗ്ധ ചികിത്സ വേണ്ടിവരുമെന്നു ഡോക്ടർമാർ വ്യ ക്തമാക്കി. കുട്ടി ആശുപത്രിയില്‍ കഴിഞ്ഞുവരികയാണ്. നാലാഞ്ചിറയിലെ വിദ്യാലയത്തില്‍ പഠിക്കുന്നവരാണ് ഇരുവരും. ജോലികഴിഞ്ഞു നാലാഞ്ചിറയില്‍ നിന്ന് എംസി റോഡുവഴി വീട്ടിലേക്കു മടങ്ങുകയായിരുന്നു സനല്‍. ഇയാള്‍ ഉറങ്ങിപ്പോയതാണ് വാഹനം റോഡില്‍നിന്നു നിയന്ത്രണംതെറ്റി ഫുട്പാത്തിലേക്കു കയറാന്‍ കാരണമെന്നു മണ്ണന്തല പോലീസ് അറിയിച്ചു. ബൈക്കില്‍നിന്നുള്ള വീഴ്ചയില്‍ സനലിന്‍റെ വാരിയെല്ലുകള്‍ ഒടിഞ്ഞിട്ടുണ്ട്. സനല്‍ തിരുവനന്തപുരം മെഡിക്കല്‍ കോളജ് ആശുപത്രിയില്‍ ചികിത്സയിലാണ്. മണ്ണന്തല പോലീസ് കേസെടുത്തു.

നെയ്യാറ്റിന്‍കരയില്‍ വാഹനപാര്‍ക്കിംഗ് സംവിധാനമില്ല; യാത്രക്കാര്‍ വലയുന്നു

നെയ്യാറ്റിന്‍കര : നഗരസഭാ പ്രദേശത്ത് വാഹന പാര്‍ക്കിംഗ് സംവിധാനങ്ങളുടെ അഭാവം യാത്രക്കാരെ വലയ്ക്കുന്നു. എന്നാൽ നെയ്യാറ്റിന്‍കര താലൂക്ക് ഹെഡ് ക്വാര്‍ട്ടേഴ്സായി കണക്കാക്കപ്പെടുന്ന നെയ്യാറ്റിന്‍കര നഗരപരിസരം അനധികൃത വാഹന പാര്‍ക്കിംഗുകളാല്‍ നിറഞ്ഞിരിക്കുന്നതായും കാണാം. നഗരത്തില്‍ പാര്‍ക്കിംഗ് ഏരിയ ഒരുക്കുമെന്നും വിവിധ പ്രദേശങ്ങളിൽ പെയിഡ് പാർക്കിംഗ് സംവിധാനം ഏർപ്പെടുത്തുമെന്നും മള്‍ട്ടി ലെവല്‍ പാര്‍ക്കിംഗ് സംവിധാനം നടപ്പിലാക്കുമെന്നുമൊക്കെയുള്ള വാഗ്ദാനങ്ങള്‍ പലപ്പോഴായി നെയ്യാറ്റിന്‍കര നിവാസികള്‍ കേള്‍ക്കുന്നുണ്ട്. പ്രധാന വ്യാപാര കേന്ദ്രമായി അറിയപ്പെടുന്ന ആലുംമൂട് ജംഗ്ഷനില്‍ റോഡിനിരുവശവും വാഹനങ്ങള്‍ പാര്‍ക്കു ചെയ്യുന്നതു പതിവാണ്. പൊതുവേ വീതി കുറഞ്ഞ പൊതുനിരത്തിലെ ഗതാഗതക്കുരുക്കിന് ഈ അനധികൃത പാര്‍ക്കിംഗും ഒരു ഘടകമാണെന്ന് പരാതിയുണ്ട്. ആലുംമൂട് ജംഗ്ഷനു സമീപത്തെ കോണ്‍വന്‍റ് റോഡാണ് അനധികൃത പാര്‍ക്കിംഗിന്‍റെ മറ്റൊരിടം. ഈ റോഡില്‍ പ്രവര്‍ത്തിക്കുന്ന വിവിധ വിദ്യാലയങ്ങളിലെ വിദ്യാര്‍ഥികളെ കൊണ്ടുവരാനും തിരികെ കൊണ്ടുപോകാനുമായി നിയോഗിക്കപ്പെട്ട സ്വകാര്യ വാഹനങ്ങളാണ് ഇക്കൂട്ടത്തിലേറെയും. സ്കൂള്‍ സമയം അവസാനിക്കുന്നതിനും മണിക്കൂറുകള്‍ മുന്പോ ചിലപ്പോള്‍ രാവിലെ മുതലോ ഇവ പാര്‍ക്ക് ചെയ്യുന്പോള്‍ ഇതുവഴി വരുന്ന മറ്റു വാഹനങ്ങള്‍ക്ക് സുഗമമായി പോകാനുള്ള സൗകര്യം നഷ്ടമാകുന്നു. സ്വാഭാവികമായും അത്തരം സന്ദര്‍ഭങ്ങളില്‍ വിദ്യാര്‍ഥികള്‍ അടക്കമുള്ള കാല്‍നടയാത്രക്കാര്‍ക്കും ഈ തടസം തലവേദനയാണ്. നെയ്യാറ്റിന്‍കര മിനി സിവില്‍ സ്റ്റേഷന്‍ പരിസരം വാഹനങ്ങളുടെ സാന്നിധ്യത്താല്‍ സന്പന്നമാണ് മിക്കവാറും. നിരവധി സര്‍ക്കാര്‍ ഓഫീസുകള്‍ പ്രവര്‍ത്തിക്കുന്ന സിവില്‍ സ്റ്റേഷനിലെ ജീവനക്കാര്‍ സ്വന്തം വാഹനങ്ങള്‍ കെട്ടിടത്തിന്‍റെ ഇടനാഴിയിലും മറ്റും പാര്‍ക്ക് ചെയ്യാറുണ്ടെന്നും ആക്ഷേപമുയരുന്നു. ആശുപത്രി കോന്പൗണ്ടില്‍ പാര്‍ക്കിംഗ് ഫീസ് ഈട‌ാക്കുന്നതിനാല്‍ പലരും ആശുപത്രിക്ക് പുറത്തെ പാതയോരത്തായി വാഹനങ്ങള്‍ പാര്‍ക്ക് ചെയ്തിട്ട് മറ്റാവശ്യങ്ങള്‍ക്കായി പോകുന്നതായും പരാതിയുണ്ട്. ആശുപത്രി ജംഗ്ഷനില്‍നിന്നും റെയില്‍വേ സ്റ്റേഷനിലേയ്ക്കുള്ള വീതി കുറഞ്ഞ പാത വൈകുന്നേരങ്ങളില്‍ രോഗികളുമായി വരുന്ന വാഹനങ്ങളുടെ പാര്‍ക്കിംഗ് കൊണ്ട് നിറയുകയാണ് പതിവ്. ഡോക്ടര്‍മാര്‍ സ്വകാര്യ പ്രാക്ടീസ് നടത്തുന്നയിടങ്ങള്‍ ഈ റോഡിനിരുവശത്തുമാണുള്ളത്. അക്ഷയ ഷോപ്പിംഗ് കോപ്ലക്സില്‍ നിരവധി വ്യാപാര സ്ഥാപനങ്ങള്‍ പ്രവര്‍ത്തിക്കുന്നു. അവിടേക്കു വരുന്നവരുടെയും ആ സ്ഥാപനങ്ങളിലെ അംഗങ്ങളുടെയും വാഹനങ്ങള്‍ കൂടാതെ, മറ്റു വാഹനങ്ങളും അക്ഷയ ഷോപ്പിംഗ് കോംപ്ലക്സ് വളപ്പില്‍ പാര്‍ക്ക് ചെയ്യുന്നതായും നഗരസഭ അധികൃതര്‍ ഇക്കാര്യം ശ്രദ്ധിക്കുന്നില്ലെന്നും ആരോപണമുണ്ട്. നെയ്യാറ്റിന്‍കര കെഎസ്ആര്‍ടിസി ബസ് സ്റ്റാന്‍ഡിലെ പുതിയ കെട്ടിടത്തില്‍ വാഹന പാര്‍ക്കിംഗിനായി പ്രത്യേക ക്രമീകരണം ഒരുക്കിയിട്ടുണ്ടെങ്കിലും ഈ സൗകര്യം പ്രയോജനപ്പെടുത്തുന്നവര്‍ കുറവാണ്. നെയ്യാറ്റിന്‍കരയെ സംബന്ധിച്ചിടത്തോളം നിരത്തുകള്‍ പഴയതുപോലെ തുടരുകയും വാഹനങ്ങളുടെ എണ്ണം വര്‍ധിക്കുകയും ചെയ്തു. കരമന- കളിയിക്കാവിള പാത വികസനത്തിന്‍റെ ഭാഗമായി മാത്രമേ നെയ്യാറ്റിന്‍കര ഗതാഗത സംവിധാന സംബന്ധിയായ ക്രമീകരണങ്ങള്‍ നടപ്പിലാക്കുകയുള്ളൂ എന്നാണെങ്കില്‍ നിലവിലുള്ള അസൗകര്യം എത്രകാലം തുടരേണ്ടിവരുമെന്ന ആശങ്കയിലാണ് തദ്ദേശവാസികളും യാത്രക്കാരും.

ജവഹർനഗർ വസ്തു തട്ടിപ്പ്; അനന്തപുരി മണികണ്ഠന്‍റെ ഫോണ്‍ സ്വിച്ച്ഓഫ്

പേരൂര്‍ക്കട: ജവഹര്‍നഗര്‍ ഭൂമി തട്ടിപ്പുമായി ബന്ധപ്പെട്ട് ഹൈടെക് അന്വേഷണം വഴിമുട്ടിയ നിലയില്‍. കേസിലെ പ്രധാന പ്രതിയായ അനന്തപുരി മണികണ്ഠന്‍റെ മൊബൈല്‍ഫോണ്‍ സ്വിച്ച് ഓഫ് ആയതാണ് അന്വേഷണ സംഘത്തെ കുഴക്കുന്നത്. കഴിഞ്ഞദിവസം സാധ്യമായ വീടുകളില്‍ പോലീസ് പരിശോധന നടത്തിയെങ്കിലും തുമ്പൊന്നും ലഭിച്ചില്ല. മാതാപിതാക്കള്‍ പറയുന്നതു മണികണ്ഠന്‍ കുറ്റം ചെയ്തിട്ടില്ല എന്നാണ്. അതേസമയം ജൂലൈ ആറാം തീയതി മുതല്‍ അനന്തപുരി മണികണ്ഠന്‍റെ മൊബൈല്‍ഫോണ്‍ സ്വിച്ച് ഓഫ് ആയ നിലയിലാണ്. ഏറ്റവും ഒടുവില്‍ മണികണ്ഠന്‍റെ ഫോണ്‍ ലൊക്കേഷന്‍ കാണിക്കുന്നത് തിരുവനന്തപുരം നഗരപ്രാന്തമാണ്. അതിനുശേഷം ഇയാള്‍ എവിടെപ്പോയി എന്നു അന്വേഷണസംഘത്തിന് കണ്ടെത്താനായിട്ടില്ല. അതിനിടെ മണികണ്ഠന്‍, താന്‍ മുമ്പ് ഉപയോഗിച്ചുവന്നിരുന്ന മൊബൈല്‍ നമ്പര്‍ മാറ്റിയെന്നും പുതിയ കണക്ഷനാണ് ഉപയോഗിക്കുന്നതെന്നും പോലീസ് സംശയിക്കുന്നുണ്ട്. അതുകൊണ്ടുതന്നെ പ്രമുഖ സെല്ലുലാര്‍ ദാതാക്കളുടെ സഹായം ക്രൈം വിഭാഗം തേടിയേക്കും. അനന്തപുരി മണികണ്ഠന് ഒരു മുന്‍ മന്ത്രിയുടെ സഹായമുണ്ടെന്നും അതുകൊണ്ടാണ് ഇയാളെ പിടികൂടാന്‍ വൈകുന്നതെന്നും ആരോപണം നിലനില്‍ക്കെ തന്നെ ഇയാളെ കണ്ടെത്താന്‍ മ്യൂസിയം പോലീസ് ഊർജിതമായ അന്വേഷണമാണ് നടത്തിവരുന്നത്.

അമ്പൂരി പറത്തി സെന്‍റ് അൽഫോൻസാ തീർഥാടന പള്ളിയിലെ തിരുനാളിനു നാളെ കൊടിയേറും

അമ്പൂരി: പറത്തി സെന്‍റ് അൽഫോൻസാ തീർഥാടന പള്ളിയിലെ വിശുദ്ധ അൽഫോൻസാമ്മയുടെ തിരുനാൾ 26 മുതൽ ഓഗസ്റ്റ് മൂന്നുവരെ നടക്കും. ഈ വർഷത്തെ തിരുനാളിന്‍റെ പ്രത്യേകതകൾ അൽഫോൻസാമ്മയുടെ തിരുശേഷിപ്പ് തീർഥാടനമായി കൊണ്ടുവരുന്നതും അമ്പൂരിയെ പറത്തിയുമായി ബന്ധിപ്പിക്കുന്ന കുമ്പിച്ചൽപാലം സാക്ഷാത്്കരിക്കപ്പെട്ടു എന്നതുമാണ്. കഴിഞ്ഞവർഷം വരെ തീർഥാടനം നടത്തിയിരുന്നതു കടത്തുവള്ളങ്ങളിലും ബോട്ടുകളിലുമായിട്ടായിരുന്നുവെങ്കിൽ ഇനി മുതൽ പാലത്തിൽ കൂടി അക്കരെ ഇക്കരെ യാത്ര ചെയ്യാമെന്നുള്ളതും വലിയ ഒരു അനുഗ്രഹമായിട്ടാണ് ഇവിടെയുള്ള നാട്ടുകാർ കരുതുന്നത്. 26 നു വൈകുന്നേരം നാലിനു വിശുദ്ധ അൽഫോൻസാമ്മയുടെ തിരുശേഷിപ്പു പ്രയാണവും തീർഥാടനവും അമ്പൂരി ഫൊറോന മാതൃ-പിതൃവേദിയുടെ ആഭിമുഖ്യത്തിൽ മായത്തുനിന്നും ആരംഭിക്കും. 4.30ന് തട്ടാമുക്ക് കുരിശടിയിൽ സ്വീകരണം. വൈകുന്നേരം 5.30നു വികാരി ഫാ. മാത്തുക്കുട്ടി മൂന്നാറ്റിൻമുഖം കൊടിയേറ്റം നിർവഹിക്കും. തുടർന്നു നടക്കുന്ന നൊവേനയ്ക്കും വിശുദ്ധ കുർബാനയ് ക്കും ഫാ. സോണി കരുവേലിൽ, ഫാ. സെബാസ്റ്റ്യൻ ചാമക്കാല, ഫാ. ജോണിക്കുട്ടി തറക്കുന്നേൽ എന്നിവർ കാർമികന്മാരാകും. 27നു വൈകുന്നേരം നാലിന് ആയൂർ ഫൊറോന മിഷൻ ലീഗിന്‍റെ നേതൃത്വത്തിൽ തീർഥാടനം. തുടർന്നു നടക്കുന്ന നൊവേനയ്ക്കും വിശുദ്ധ കുർബാനയ്ക്കും ഫാ. സൈജു അയ്യങ്കരി കാർമികനാകും. വൈകുന്നേരം 6.30ന് സണ്ടേസ്കൂൾ കുട്ടികളുടെ കലാപരിപാടികൾ നടക്കും. 28നു വൈകുന്നേരം 4.30നു ജപമാലയ്ക്കും നൊവേനയ്ക്കും വിശുദ്ധ കുർബാനയ്ക്കും ഫാ. ആന്‍റണി തറക്കുന്നേൽ കാർമികനാകും. 29 നു വൈകുന്നേരം 4.30 നു ജപമാലയ്ക്കും, നൊവേനയ്ക്കും വിശുദ്ധ കുർബാനയ് ക്കും ചങ്ങനാശേരി അതിരൂപതാ വികാരി ജനറാൾ ഫാ. സോണി തെക്കേക്കര കാർമികനാകും. 30നു വൈകുന്നേരം 4.30ന് ജപമാല, നൊവേന, വിശുദ്ധ കുർബാന. ഫാ. സെബാസ്റ്റ്യൻ ചാലയ്ക്കൽ കാർമികനാകും. 31നു വൈകുന്നേരം 4.30 ന് ജപമാല, നൊവേന, വിശുദ്ധ കുർബാന എന്നിവയ്ക്കു ഫാ.ലിബിൻ മണക്കളം നേതൃത്വം നൽകും. ഓഗസ്റ്റ് ഒന്നിനു വൈകുന്നേരം 4.30നു ജപമാല, നൊവേന, വിശുദ്ധ കുർബാന. ഫാ. മാത്യു കണ്ണമ്പള്ളി സിഎഐ മുഖ്യകാർ മികനാകും. ഓഗസ്റ്റ് രണ്ടിനു വൈകുന്നേരം 4.30ന് നൊവേന, വിശുദ്ധ കുർബാന എന്നിവയ്ക്കു ഫാ. ജെയിംസ് കലയംകണ്ടം കാർമികനാകും. തുടർന്നു കുമ്പിച്ചൽ കുരിശടിയിലേക്ക് തിരുനാൾ പ്രദക്ഷിണം. ഫാ. സച്ചിൻ കുന്നത്ത് കാർമികനാകും. ഓഗസ്റ്റ് മൂന്നിനു ഞായറാഴ്ച രാവിലെ ഒന്പതിന് അമ്പൂരി ഫൊറോന പള്ളിയിൽ നിന്നും ഫൊറോന മിഷൻ ലീഗിന്‍റെ നേതൃത്വത്തിൽ സൺഡേ സ്കൂൾ തീർഥാടനം. തുടർന്ു നടക്കുന്ന ആഘോഷമായ തിരുനാൾ കുർബാനയ്ക്കും, വചനപ്രഘോഷണത്തിനും ഫാ. സ്കറിയ ശ്രാമ്പിക്കൽ കാർമികത്വം വഹിക്കും. തുടർന്നുള്ള പ്രദക്ഷിണത്തിനു ഫാ. ജെയിംസ് കലയംകണ്ടം കാർമികനാകും. തുടർന്ന് ഊട്ടുനേർച്ച, കൊടിയിറക്ക്. വികാരി ഫാ. മാത്തുക്കുട്ടി മൂന്നാറ്റിൻ മുഖം, കൺവീനർ ജോസ് മൂന്നാനാൽ, സെക്രട്ടറി മാത്യൂസ് എം. പുത്തൂർ, കൈക്കാരന്മാരായ ലിജോ കെ. ജോർജ് കോലത്ത്, തോമസ് ജോർജ് കാലായിൽ, കണക്കൻ തോമസ് കൂലിപ്പറമ്പിൽ എന്നിവർ നേതൃത്വം നല്കും.

പിതൃക്കൾക്ക് ശ്രാദ്ധമൂട്ടി ആയിരങ്ങൾ...

തിരുവനന്തപുരം: കർക്കിടക വാവായ ഇന്നലെ ആയിരക്കണക്കിനാളുകൾ പിതൃതർപ്പണം നടത്തി. ക്ഷേത്രങ്ങളിൽ ഇന്നലെ പുലർച്ച മുതൽ ബലിയിടുന്നതിനായി വലിയ തിരക്കാണ് അനുഭവപ്പെട്ടത്. വിവിധ ഹിന്ദുസംഘടനകളുടെ നേതൃത്വത്തിലും പിതൃതർപ്പണത്തിനായി സംവിധാനങ്ങൾ ഒരുക്കിയിരുന്നു. ജില്ലയിലെ പ്രധാന ബലിതർപ്പണ കേന്ദ്രങ്ങളായ തിരുവല്ലം, ശംഖുമുഖം, വർക്കല, അരുവിപ്പുറം തുടങ്ങി പ്രധാന ബലിതർപ്പണ കേന്ദ്രങ്ങളിലും ബലിതർപ്പണത്തിനെത്തിയവരുടെ വലിയ തിരക്കാണ് അനുഭവപ്പെട്ടത്. തിരുവല്ലം ശ്രീപരശുരാമസ്വാമി ക്ഷേത്രത്തിൽ പുലർച്ചെ 3.30 മുതൽ ബലിതർപ്പണം ആരംഭിച്ചു. പതിനായിരങ്ങൾ തിരുവല്ലത്തു തർപ്പണം നടത്തി. ഒരു സമയം 3500 പേർക്കു ബലിയിടാനുള്ള സൗകര്യങ്ങൾ ഒരുക്കിയിരുന്നു. വർക്കല പാപനാശം തീരത്ത് പതിനായിരങ്ങളാണ് ബലിയർപ്പിച്ചത്. അരുവിപ്പുറം ശിവക്ഷേത്രം, മാറനല്ലൂർ അരുവിക്കര ശാസ്താക്ഷേത്രം ശിവഗിരി മഠം, കൈമനം ചിറക്കര മഹാവിഷ്ണു ക്ഷേത്രം, തൃക്കണ്ണാപുരം ശ്രീകൃഷ്ണ സ്വാമി ക്ഷേത്രം, വെള്ളായണി ശിവോദയം ശിവക്ഷേത്രം, തൃക്കണ്ണാപുരം എൻഎസ്എസ് കരയോഗത്തിന്‍റെ കീഴിലുള്ള അയ്യപ്പതാവളം ക്ഷേത്രം, വെള്ളായണി ഊക്കോട് ചെറുബാലമന്ദം ശിവക്ഷേത്രം, വെള്ളായണി കായൽക്കരയിൽ തൃക്കുളങ്ങളര മഹാവിഷ്ണു ക്ഷേത്രം എന്നീവിടങ്ങളിലും ബലിതർപ്പണം നടന്നു. മാറനല്ലൂർ: നെയ്യാർ അരുവിക്കരയിലെ പൂർണാ-പുഷ്‌ക്കലാ സമേത ധർമശാസ്താ ക്ഷേത്രത്തിലുൾപ്പെടെ നിരവധി ഇടങ്ങളിൽ പതിനായിരങ്ങൾ ബലിതർപ്പണം നടത്തി. പുലർച്ചെ നാലു മണി മുതലാണ് ചടങ്ങുകൾ ആരംഭിച്ചത്. ക്ഷേത്രം ഓഡിറ്റോറിയത്തിലും നെയ്യാറിനു തീരത്ത് ഒരുക്കിയ പന്തലിലുമാണ് ചടങ്ങുകൾ നടന്നത്. കാട്ടാക്കട ഡിവൈഎസ്പിയുടെ നേതൃത്വത്തിൽ മറനല്ലൂർ, ആര്യങ്കോട് പോലീസ് സ്റ്റേനുകളിൽ നിന്നും ഉദ്യോഗസ്ഥർ ചടങ്ങുകൾ അവസാനിക്കും വരെ പ്രദേശത്ത് നിലയുറപ്പിച്ചിരുന്നു. ബലി തർപ്പണത്തിനുശേഷം സ്നാഘട്ടത്തിലേയ്ക്കു പോകുന്ന ഭക്തർക്ക് കയർകെട്ടിയുള്ള സുരക്ഷയാണ് നെയ്യാറിൽ ഒരുക്കിയിരുന്നത്. അഗ്നിശമനസേനയുടേയും, പോലീസിന്‍റേയും ഇടപെടൽ അരുവിക്കരയിൽ എത്തിയ ഭക്തർക്ക് ബുദ്ധിമുട്ടുകൾ ഒഴിവാക്കുന്നതിന് ഏറെ ആശ്വസകരമായി. കാട്ടാക്കട ചെമ്പനാകോട് ഹനുമാർ സ്വാമി ക്ഷേത്രത്തിൽ ബലി തർപ്പണം നടന്നു. കുരുതംകോട് ഭദ്രകാളി ക്ഷേത്രത്തിലും ആനന്ദേശ്വരം ശിവക്ഷേത്രക്കടവിലും, അണിയിലക്കടവ് പാലത്തിനു സമീപത്തുമായി രണ്ടിടങ്ങളിലാണ് ബലിതർപ്പണം നടന്നത്. കോട്ടയ്ക്കകം തേക്കിൻകാല മഹാവിഷ്ണുക്ഷേത്രത്തിൽ ക്ഷേത്ര ഗ്രൗണ്ടിലും ആറാട്ടുകടവിലും ബലിതർപ്പണം നടന്നു. കൊക്കോട്ടേല കുത്തുകുഴി ശിവതമ്പുരാൻ ക്ഷേത്രം, വെളിയന്നൂർ മഹാവിഷ്ണുക്ഷേത്രം, കാട്ടാക്കട കൊല്ലോട് തമ്പുരാൻ ക്ഷേത്രം, വലിയകളം തമ്പുരാൻ ദുർഗാദേവീ ക്ഷേത്രം, ചേരപ്പള്ളി ശിവശക്തി ക്ഷേത്രം എന്നിവിടങ്ങളിലും ബലിതർപ്പണം നടന്നു. മലയിൻകീഴ്, ഒറ്റശേഖരമംഗലം, ആര്യനാട്, നെയ്യാർഡാം, കള്ളിക്കാട്, മൈലക്കര, കീഴാറൂർ, മലയം, മച്ചേൽ, പൂവച്ചൽ, വിളപ്പിൽ കുണ്ടമൺകടവ്, ചെറുതേരി, അരുവിപ്പാറ തുടങ്ങിടങ്ങളിലും തർപ്പണം നടത്തി. പാറശാല: ചെങ്കൽ മഹേശ്വരം ശ്രീ ശിവ പാര്‍വതി ക്ഷേത്രത്തിന്‍റെ ആഭിമുഖ്യത്തിൽ നടന്ന കർക്കടക വാവുബലി തർപ്പണ ചടങ്ങുകൾ കാഞ്ഞിരമൂട്ടു കടവില്‍ നടത്തി. ക്ഷേത്രം മഠാധിപതി സ്വാമി മഹേശ്വരാനന്ദ സരസ്വതി ചടങ്ങുകൾക്കു നേതൃത്വം നൽകി. നെയ്യാറ്റിന്‍കര തഹസില്‍ദാര്‍ നന്ദകുമാരന്‍റെ ഏകോപനത്തിൽ ഫയര്‍ ആന്‍ഡ് റെസ്‌ക്യൂ, പോലീസ്, എക്‌സൈസ് ആരോഗ്യവകുപ്പുകളുടെ സേവനം ബലിയിടാനെത്തിയവർക്ക് ആശ്വാസമായി. വിവിധ ഡിപ്പോകളില്‍നിന്നു കെഎസ്ആര്‍ടിസിയുടെ സ്‌പെഷല്‍ ബസ് സർവീസുകളും ഉണ്ടായിരുന്നു. നെയ്യാറ്റിന്‍കര: താലൂക്കിലെ പല ക്ഷേത്രങ്ങളിലും സ്നാനഘട്ടങ്ങളിലും ബലിതര്‍പ്പണ ചടങ്ങുകള്‍ നടന്നു. അരുവിപ്പുറത്ത് പുലർച്ചെ മുതൽ ചടങ്ങുകൾ ആരംഭിച്ചു. രാമേശ്വരം മഹാദേവ ക്ഷേത്രത്തിൽ നടന്ന ചടങ്ങുകൾക്ക് കവിയും സംസ്കൃത അധ്യാപകനുമായ ഉദയൻ കൊക്കോട് നേതൃത്വം നൽകി. തത്തിയൂർ അരുവിക്കര ശിവ ഭഗവതി ക്ഷേത്രത്തിൽ മണ്ഡപത്തിൻ കടവ് മണികണ്ഠൻ ബലികർമങ്ങൾക്ക് നേതൃത്വം നൽകി. പാലയ്ക്കാപറമ്പ് ശ്രീബാലസുബ്രഹ്മണ്യ സ്വാമി ക്ഷേത്രം, പുതിച്ചല്‍ ശ്രീ അയണിയൂട്ടു തന്പുരാന്‍ ക്ഷേത്രം, ഓലത്താന്നി തണ്ടളം നാഗരാജാ ക്ഷേത്രം, മാരായമുട്ടം അണമുഖം ഭഗവതി ക്ഷേത്രം എന്നിവിടങ്ങളിലും ബലിതർപ്പണം നടന്നു. സേവാഭാരതി മാരായമുട്ടം ഉപസമിതിയുടെ നേതൃത്വത്തിൽ മാരായമുട്ടം നീലകേശി ക്ഷേത്രത്തിനു സമീപം നടന്ന ചടങ്ങുകൾക്ക് പെരുവൻമൂല കേശവൻനായർ മുഖ്യകാർമികത്വം വഹിച്ചു. കണ്ണംകുഴി കാശിലിംഗം ഗുരുസ്വാമി സമാധി ധർമ്മമഠത്തിൽ നടന്ന ചടങ്ങുകൾക്ക് വിഷ്ണു പോറ്റി, ശങ്കർ റാം എന്നിവർ നേതൃത്വം നൽകി. നേമം: േഖലയിലെ വിവിധ ക്ഷേത്രങ്ങളില്‍ വന്‍ തിരക്ക് അനുഭവപ്പെട്ടു. അതിരാവിലെ മുതല്‍ വിവിധ ക്ഷേത്രങ്ങളിൾ ബലിതര്‍പ്പണ ചടങ്ങുകള്‍ തുടങ്ങി. കൈമനം ചിറക്കര മഹാവിഷ്ണു ക്ഷേത്രം, തൃക്കണ്ണാപുരം ശ്രീകൃഷ്ണ സ്വാമി ക്ഷേത്രം, കരമന കാഞ്ചിമാടന്‍ ക്ഷേത്രം, കരമന ഗണപതി ക്ഷേത്രം, തൃക്കണ്ണാപുരം ശ്രീചക്രത്തില്‍ ശിവക്ഷേത്രം, കൈമനം അമൃതാനന്ദമയി മഠം, വെള്ളായണി ശിവോദയം ക്ഷേത്രം, ഇടഗ്രാമം ബാലഗണപതി ക്ഷേത്രം, നടുവത്ത് മഹാവിഷ്ണു ക്ഷേത്രം, മലയം ശിവക്ഷേത്രം, വെള്ളായണി തൃക്കുളങ്ങളര മഹാവിഷ്ണു ക്ഷേത്രം, വേവിള മഹാവിഷ്ണുക്ഷേത്രം എന്നിവിടങ്ങളിലും തർപ്പണച്ചടങ്ങുകൾ നടന്നു.

വള്ളം മറിഞ്ഞ് കാണാതായ മത്സ്യത്തൊഴിലാളിയുടെ മൃതദേഹം കണ്ടെത്തി

വലിയതുറ: വെട്ടുകാട് പള്ളിക്കു സമീപം മത്സ്യബന്ധനത്തിനിടെ വള്ളം മറിഞ്ഞ് കാണാതായ മത്സ്യത്തൊഴിലാളിയുടെ മൃതദേഹം കണ്ടെത്തി. വെട്ടുകാട് വലിയവേളി തൈവിളാകം ടിസി 80 /816 -ല്‍ പരേതനായ ആന്‍ഡ്രുവിന്‍റെയും ആനിയുടെയും മകന്‍ അനില്‍ ആന്‍ഡ്രൂ (32)വിന്‍റെ മൃതദേഹമാണ് ഇന്നലെ ഉച്ചയ്ക്ക് 12 ഓടെ വിഴിഞ്ഞം മുല്ലൂര്‍ അദാനി പോര്‍ട്ടിനു സമീപം കടലില്‍ അടുക്കിയിരിക്കുന്ന പാറകള്‍ക്കിടയില്‍ നിന്നും കണ്ടെത്തിയത്. കഴിഞ്ഞ വെളളിയാഴ്ച രാവിലെ 6.30 ഓടുകൂടി മത്സ്യബന്ധനത്തിനായി വളളം ഇറക്കി പോകുകയായിരുന്ന അഞ്ചംഗ സംഘം സഞ്ചരിച്ചിരുന്ന വളളം കരയില്‍ നിന്നും 25 മീറ്റര്‍ അകലെ തിരയില്‍പ്പെട്ട് മറിയുകയായിരുന്നു. നാലുപേര്‍ നീന്തി രക്ഷപ്പെട്ടെഹ്കിലും അനിലിനെ കാണാതായി. ഇയാള്‍ക്കായി തെരച്ചില്‍ നടത്തിയെങ്കിലും കണ്ടെത്തിയിരുന്നില്ല. ഏഴ് ദിവസങ്ങള്‍ക്ക് ശേഷമാണ് മൃതദേഹം കണ്ടെത്തിയത്. മറൈന്‍ എന്‍ഫോഴ്‌സ്‌മെന്‍റ് വിവരം അറിയിച്ചതിനെത്തുടര്‍ന്ന് വിഴിഞ്ഞം കോസ്റ്റല്‍ പോലീസ് സ്ഥലത്തെത്തി മൃതദേഹം പുറത്തെടുത്തു. വെട്ടുകാട് സ്വദേശികളായ വര്‍ഗീസ് , ജോണ്‍സണ്‍ , ജോബി , ടെലിക്‌സ് എന്നിവര്‍ക്കൊപ്പമായിരുന്നു അനില്‍ മത്സ്യബന്ധനത്തിനുപോയത്. അനില്‍ അവിവാഹിതനാണ്.

കാര്‍ഷിക കോളജ് സന്ദര്‍ശിച്ച് യുപി സ്കൂള്‍ വിദ്യാര്‍ഥികള്‍

നെയ്യാറ്റിന്‍കര : മണ്ണിനോടും കൃഷിയോടും ആഭിമുഖ്യമുള്ള വിദ്യാര്‍ഥിസംഘത്തിനു ശാസ്ത്രീയ സംവിധാനങ്ങള്‍ നേരില്‍ കണ്ട് മനസിലാക്കാന്‍ കഴിഞ്ഞതിലുള്ള സന്തോഷം. തലയല്‍ ദേവിവിലാസം യുപി സ്കൂളിലെ സയൻസ് ക്ലബിന്‍റെ ആഭിമുഖ്യത്തിലാണ് വിദ്യാര്‍ഥികള്‍ വെള്ളായണി കാർഷിക കോളജ് സന്ദർശിച്ചത്. ബഡ്‌ഡിംഗ്, ലെയറിംഗ്, ഗ്രാഫ്റ്റിംഗ് എന്നിവയെക്കുറിച്ച് കൂടുതല്‍ മനസിലാക്കാന്‍ അവസരം ലഭിച്ചതായി വിദ്യാര്‍ഥികള്‍ പറഞ്ഞു. കാര്‍ഷിക സര്‍വകലാശാലയുടെ ഇന്‍സ്ട്രക്ഷണല്‍ ഫാം, അഗ്രോണമി ഡിപ്പാര്‍ട്ട്മെന്‍റിന്‍റെ ക്രോപ് മ്യൂസിയം എന്നിവയും വിദ്യാര്‍ഥികള്‍ സന്ദര്‍ശിച്ചു.

സ്കൂളിനോടു ചേർന്ന് ഇലക്ട്രിക് പോസ്റ്റുകൾ കെണിയൊരുക്കുന്നു

വിഴിഞ്ഞം: അപകടക്കെണിയായി സ്കൂളിനോട് ചേർന്ന് ഇലക്ട്രിക് പോസ്റ്റുകൾ. മാറ്റിയിടണമെങ്കിൽ പണമടക്കണമെന്ന് അധികൃതർ. പ്രതിഷേധവുമായി നാട്ടുകാർ രംഗത്ത്. വെങ്ങാനൂർ ചാവടിനട ഗവ. മോഡൽ സ്കൂളിനു മുന്നിലാണ് ഏതു നിമിഷവും നിലം പൊത്താറായ നിലയിലെ ഇലക്ട്രിക്പോസ്റ്റുകളുള്ളത്. രണ്ടായിരത്തോളം കുരുന്നുകൾ പഠനത്തിനായി സ്കൂൾ അങ്കണത്തിൽ പ്രവേശിക്കണമെങ്കിൽ വൻ അപകടം പതിയിരിക്കുന്ന ഇലക്ട്രിക് ലൈനുകളെയും പോസ്റ്റുകളെയും താണ്ടണം. വിദ്യാർഥികളുടെ ജീവനും സുരക്ഷയ്ക്കും ഭീഷണിയായി നിൽക്കുന്ന ഇലക്ടിക് പോസ്റ്റ് മാറ്റിയിടണമെന്ന സ്കൂൾ അധികൃതരുടെ അപേക്ഷ പരിശോധിക്കാൻ എത്തിയ ഉദ്യോഗസ്ഥർ നടപടിയെടുക്കാൻ പണമില്ലെന്ന് അറിയിച്ചശേഷം മടങ്ങി. ഏതു സമയത്തും ഒടിഞ്ഞു വീഴാൻ പാകത്തിൽ ചരിഞ്ഞു നിൽക്കുന്ന പോസ്റ്റിൽ സ്റ്റേ കമ്പി വലിക്കാമെന്ന വിചിത്ര വാഗ്ദാനവും സ്കൂൾ അധികൃതർക്ക് ബോർഡ് ഉദ്യോഗസ്ഥർ നൽകി. വിഴിഞ്ഞം മേഖലയിൽ ഏറ്റവും കൂടുതൽ കുട്ടികൾ പഠിക്കുന്ന സർക്കാർ സ്കൂളാണിത്. മതിലിനോടും ക്ലാസ് മുറികളുള്ള കെട്ടിടത്തോടും ചേർന്നു കാലപ്പഴക്കം കാരണം പൊട്ടിപ്പൊളിഞ്ഞ് തരാറിലായപോസ്റ്റുകൾക്ക് ലൈൻ കമ്പികളെയും സ്വകാര്യ കേബിളുകളെയും താങ്ങാനുള്ള ശേഷിയില്ലെന്ന പരാതി നേരത്തെ ഉയർന്നിരുന്നു. സ്കൂൾ ഗേറ്റിനു തൊട്ടു ചേർന്നു നിൽക്കുന്ന ഒരെണ്ണത്തിന്‍റെ കാര്യം ഏറെ പരിതാപകരമാണ്. ഒരു വശം ചരിഞ്ഞു നിൽക്കുന്നപോസ്റ്റ് ഏത് ദിശയിലേക്കു മറിഞ്ഞാലും വൻ അപകടമുണ്ടാകും. അധ്യായന വർഷം ആരംഭിക്കുന്നതിനുമുന്പുതന്നെ പരിഹാരം കാണണമെന്നാവശ്യപ്പെട്ട് വെങ്ങാനൂർ പഞ്ചായത്തിനും വിഴിഞ്ഞം ഇലക്ട്രിസിറ്റി ബോർഡി നും സ്കൂൾ പിടിഎ കത്ത് നൽകിയിരുന്നു. എന്നാൽ പണമില്ലെന്ന കാരണം പറഞ്ഞു പരാതി മ‌ടക്കി. വീശിയടിക്കുന്ന കാറ്റിൽ ഒരു പോസ്റ്റിനു തകർച്ചയുണ്ടായാൽ നിലംപൊത്തുന്നത് എഴോളം എണ്ണം എന്നതാണ് അധികൃതരുടെ ചങ്കിടിപ്പു കൂട്ടുന്നത്. നിരവധി വാഹനങ്ങളും കാൽനടയാത്രക്കാരും കടന്നുപോകുന്ന റോഡു കൂടിയാണിത്.

കർക്കടക വാവുബലി തർപ്പണം : അടിസ്ഥാന സൗകര്യമൊരുക്കി നെയ്യാറ്റിൻകര നഗരസഭ

നെയ്യാറ്റിന്‍കര : കര്‍ക്കടക വാവുബലി നാളില്‍ നെയ്യാറ്റിന്‍കര നഗരസഭ പരിധിയില്‍ പിതൃതര്‍പ്പണം നടക്കാറുള്ള കടവുകളില്‍ ശുചീകരണ പ്രവൃത്തികള്‍ പൂര്‍ത്തിയാക്കിയതായി ആരോഗ്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ ജെ. ജോസ് ഫ്രാങ്ക്ളിന്‍ അറിയിച്ചു. ബലിക്കടവുകളില്‍നിന്നും പായലും മറ്റു മാലിന്യങ്ങളും നീക്കം ചെയ്തു. കടവുകള്‍ക്കു സമീപത്തെ പാതയോരങ്ങളിലെ പുല്ലുകളും മറ്റും ചെത്തിമിനുക്കല്‍ ഉള്‍പ്പെടെയുള്ള പ്രവൃത്തികള്‍ക്ക് ആരോഗ്യവിഭാഗം നേതൃത്വം നല്‍കി. കൃഷ്ണപുരം ഗ്രാമത്തിലെ ആറാട്ടുകടവ്, ഫോര്‍ട്ട് വാര്‍ഡിലെ കരവണി കടവ്, പാലക്കടവിനു സമീപത്തെ കടവ്, ഗുരുസ്വാമി ക്ഷേത്രത്തിനു സമീപത്തെ കടവ്, രാമേശ്വരം ക്ഷേത്രത്തിനു സമീപത്തെ കടവ് എന്നീ നഗരസഭ പരിധിയിലെ കടവുകളില്‍ ബലിതര്‍പ്പണത്തിന് ആളുകള്‍ എത്താറുണ്ട്. ഈ കടവുകള്‍ ശുചീകരിച്ചതോടൊപ്പം അവയ്ക്കു അനുബന്ധമായ പാതയോരങ്ങള്‍ കൂടാതെ കൊല്ലവംവിള വാര്‍ഡില്‍ അരുവിപ്പുറം ക്ഷേത്രത്തിലേയ്ക്ക് പോകുന്ന നഗരസഭ പരിധിയിലെ റോഡിലെ പുല്ലും മറ്റും വെട്ടി വൃത്തിയാക്കല്‍ നടപടികള്‍ കണ്ടിന്‍ജന്‍റ് ജീവനക്കാരുടെ സഹായത്തോടെ ചെയ്തു. നഗരസഭ ഹെൽത്ത് ഇൻസ്പെക്ടർ ഷീല ഫ്ലവർ, പിഎച്ച്ഐ മാരായ വിഷ്ണ, ലക്ഷ്മി എന്നിവർ ശുചീകരണ പ്രവർത്തനങ്ങൾക്ക് നേതൃത്വം നൽകി.

സ്കൂളിൽ അടുക്കളത്തോട്ടം ഒരുക്കി കുട്ടിപ്പോലീസ്

വിതുര : വിതുര ഗവ. വൊക്കേഷണൽ ആൻഡ് ഹയർ സെക്കൻഡറി സ്‌കൂളിലെ സ്റ്റുഡന്‍റ് പോലീസ് കേഡറ്റുകളുടെ നേതൃത്വത്തിൽ അടുക്കളത്തോട്ടം തയാറാക്കി. സ്കൂളുകളിലെ പുതുക്കിയ ഭക്ഷണ മെനുവിൽ ഉൾപ്പെടുത്തിയിരിക്കുന്ന ഇലവർഗങ്ങളും മറ്റു പച്ചക്കറികളും പരമാവധി സ്കൂളിൽ തന്നെ കൃഷി ചെയ്യുക എന്ന ആശയം മുൻ നിർത്തിയാണ് അടുക്കളത്തോട്ടം തയാറാക്കിയത്. ഓണത്തോടനുബന്ധിച്ച് ആദ്യ വിളവെടുപ്പുകൂടി മുന്നിൽക്കണ്ടാണ് അടുക്കളത്തോട്ടം സജ്ജമാക്കിയത്. വിതുര പഞ്ചായത്ത്‌ പ്രസിഡന്‍റ് മഞ്ജുഷ ആനന്ദ് ഉദ്ഘാടനം ചെയ്തു. സ്കൂൾ വൈസ് പ്രിൻസിപ്പൽ ഷീജ വി. എസ്, പിടിഎ പ്രസിഡന്‍റ് ആർ. രവിബാലൻ, സീനിയർ അസിസ്റ്റന്‍റ് ഷീജ കുമാരി, സ്റ്റാഫ്‌ സെക്രട്ടറി എം.എൻ. ഷാഫി, എസ്ആർജി കൺവീനർ ഷിബു, എസ്പിസി ഓഫീസർമാരായ കെ. അൻവർ, പ്രിയ ഐ.വി. നായർ, മാതൃകാ കർഷകനും എസ്പിസിയുടെ കൃഷി കോ-ഓർഡിനേറ്ററുമായ തച്ചൻകോട് മനോഹരൻ നായർ, പിടിഎ അംഗങ്ങൾ എന്നിവർ പങ്കെടുത്തു.

ചായംപൊറ്റയില്‍ ട്രാന്‍സ്‌ഫോര്‍മർ കാടുമൂടി

വെള്ളറട : കെഎസ്ഇബി പരിധിയില്‍ കള്ളിമൂട് വാര്‍ഡില്‍ ചായം പൊറ്റയില്‍ സ്ഥാപിച്ചിട്ടുള്ള ട്രാന്‍സ്‌ഫോര്‍മാറിനെ കാടു വിഴുങ്ങി. പ്രദേശത്ത് വൈദ്യുതി പ്രതിസന്ധി രൂക്ഷമാണ്. എന്നിരുന്നാലും കെഎസ്ഇബി ജീവനക്കാര്‍ ഇതൊന്നും കണ്ടഭാവം കാണിക്കുന്നില്ല. ദിവസങ്ങളായി ഈ പ്രദേശത്ത് വൈദ്യുതി വോള്‍ട്ടേജ് ക്ഷാമവും വൈദ്യുതി പ്രതിസന്ധിയും രൂക്ഷമാണ്. ആയിരുന്നാലും മേഖലയിലെ ട്രാന്‍സ്‌ഫോര്‍മറുകള്‍ പോലും കെഎസ്ഇബി ജീവനക്കാര്‍ സംരക്ഷിക്കുന്നില്ലായെന്നുള്ളതിന്‍റെ ഉത്തമ ഉദാഹരണമാണു ചായം പൊറ്റയിലെ ട്രാന്‍സ്‌ഫോര്‍മറിനെ കാട്ടുവള്ളികള്‍ മൂടിയിരിക്കുന്നത്. അടിയന്തിരമായി അപകടാവസ്ഥയിലുള്ള കാട്ടുവള്ളികളെ വെട്ടിമാറ്റി ട്രാന്‍സ്‌ഫോര്‍മറിനെ മോചനപ്പെടുത്തണമെന്നുള്ളതാണ് പ്രദേശവാസികള്‍ ആവശ്യപ്പെടുന്നത്. എന്നാല്‍ സമീപവാസികള്‍ക്ക് ഈ കാടിനെ വെട്ടി മാറ്റി ട്രാന്‍സ്‌ഫോര്‍മറിനെ മോചിപ്പിക്കണം എന്നുള്ള താല്പര്യം ഉണ്ടെങ്കിലും പരിചയമില്ലാതെ ട്രാന്‍സ്‌ഫോര്‍മറിലുള്ള വള്ളിയെ തൊട്ടാല്‍ ഇലക്ട്രിക് ഷോക്ക് ഉണ്ടാകുമെന്ന് ഭയമാണ്. ഇനിയൊരു ദുരന്തം വരാതിരിക്കാന്‍ അടിയന്തരമായി കെഎസ്ഇബി ജീവനക്കാര്‍ ഉണര്‍ന്ന് പ്രവര്‍ത്തിക്കണം എന്നുള്ളതാണ് നാട്ടുകാരുടെ ആവശ്യം.

പ്രതിഭാ പുരസ്‌കാരം വിതരണം ചെയ്തു

വെള്ളറട: കോണ്‍ഗ്രസ് തൃപ്പലവൂര്‍ വാര്‍ഡ് കമ്മിറ്റിയുടെ ആഭിമുഖ്യത്തില്‍ 2024-2025 അധ്യയന വര്‍ഷത്തില്‍ എസ്എസ്എല്‍സി, പ്ലസ് ടു പരീക്ഷയിൽ ഉന്നത വിജയം നേടിയ വിദ്യാര്‍ഥികളെ പുരസ്‌കാരം 2025 നല്‍കി ആദരിച്ചു. തൃപ്പലവൂര്‍ വാര്‍ഡ് പ്രസിഡന്‍റ് അഖില്‍ തൃപ്പലവൂര്‍ അധ്യക്ഷത വഹിച്ചു. കെപിസി സി ജനറല്‍ സെക്രട്ടറി ശരത് ചന്ദ്രപ്രസാദ് ഉദ്ഘാടനം ചെയ്തു. കര്‍ഷക കോണ്‍ഗ്രസ് സംസ്ഥാന വൈസ് പ്രസിഡന്‍റ് എം.എസ്. അനില്‍ മുഖ്യ പ്രഭാഷണം നടത്തി , ബ്ലോക്ക് പ്രസിഡന്‍റ് അഡ്വ. എസ്. ജോണ്‍ മുഖ്യസന്ദേശം നൽകി. മണ്ഡലം പ്രസിഡന്‍റ് ബിനില്‍ മണലുവിള, ബ്ലോക്ക് വൈസ് പ്രസിഡന്‍റ് കുസുമകുമാരി, മണ്ണൂര്‍ ശ്രീകുമാര്‍, ഗോപകുമാര്‍, മണ്ഡലം കമ്മറ്റി വൈസ് പ്രസിഡന്‍റ് ശശീന്ദ്രന്‍ നായര്‍ പാട്ടവിള, മണ്ഡലം ഭാരവാഹികളായായ കോട്ടയ്ക്കല്‍ മധു, ക്രിസ്തുദാസ്, അരുവിക്കര മണികണ്ഠന്‍, ശ്രീരാഗം ശ്രീകുമാര്‍, അനന്തന്‍ മാരായമുട്ടം , വിഷ്ണു തൃപ്പലവൂര്‍, സുരെരാജ്, സിബി, അനിഷ് , ബാബു ഹരിപ്രസാദ്, രാജേഷ് വിനോദ് കോട്ടയ്ക്കല്‍, ഇരുമ്പകക്കോണം ശ്രീകുമാര്‍ എന്നിവര്‍ നേതൃത്വം നല്‍കി. എം. ബോസ് സിപിഎം ബന്ധം ഉപക്ഷേപിച്ച് കോണ്‍ഗ്രസില്‍ ചേര്‍ന്നു.

ടൂറിസം പദ്ധതി പ്രഖ്യാപിച്ചിട്ട് അഞ്ചുവർഷം : ആകെ നിർമിച്ചത് തടയണ മാത്രം..!

മാറനല്ലൂർ : സഞ്ചാരികളെ ഏറെ ആകർഷിക്കുന്ന നെയ്യാറിലെ മാറനല്ലൂർ അരുവിക്കരയോട് അധികൃതർക്ക് അവഗണന. അരുവിക്കരയെ ടൂറിസം പദ്ധതിയിലുൾപ്പെടുത്തണമെന്ന പ്രദേശത്തെ വിവിധ സംഘടനകളുടേയും, നാട്ടുകാരുടേയും ആവശ്യത്തെ തുടർന്നു ജനപ്രതിനിധികൾ സ്ഥലം സന്ദർശിക്കുകയും വിവിധ പദ്ധതികളെക്കുറിച്ച് ആലോചനായോഗം നടത്തുകയും ചെയ്തിട്ട് വർഷം അഞ്ചു പിന്നിട്ടെങ്കിലും ഇതുമായി ബന്ധപ്പെട്ട് ഒരു പുരോഗതിയും ഇതുവരെയുണ്ടായിട്ടില്ല. അരുവിക്കരയ്ക്ക് സമീപ പ്രദേശമായ നെയ്യാറ്റിൻകര നഗരസഭാ പരിധിയിൽപ്പെടുന്ന ഈരാറ്റിൻപുറത്തു ടൂറിസം പദ്ധതി യാഥാർഥ്യമായപ്പോൾ അരുവിക്കരയ്ക്കും പ്രാധാന്യമേറിയിരുന്നു. ഇതു കണക്കിലെടുത്താണു തൊട്ടടുത്ത പ്രദേശമായ മാറനല്ലൂർ പഞ്ചായത്തിലുൾപ്പെടുന്ന പ്രദേശമായ അരുവിക്കരയും പരിഗണിക്കുമെന്നും ടൂറിസം പദ്ധതിയിൽ ഉൾപ്പെടുത്തുമെന്നും ജനപ്രതിനിധികൾ നാട്ടുകാർക്ക് ഉറപ്പു കൊടുത്തിരുന്നത്. മുന്പൊരിക്കൽ മാറനല്ലൂർ പഞ്ചായത്തിലെ ഓണാഘോഷ പരിപാടികൾ സംഘടിപ്പിച്ചത് അരുവിക്കരയിലാണ്. ആയിരക്കണക്കിന് പേരാണ് ഓണാഘോഷപരിപാടികളിൽ പങ്കെടുക്കാൻ എത്തിയത്. എത്തിയവരിൽ ഭൂരിഭാഗം പേരും ഏറെ സമയം ചെലവഴിച്ചതു നെയ്യാറിന് തീരത്തെ പാറക്കെട്ടുകളിലാണ്. നെയ്യാറിന്‍റെ സൗന്ദര്യം മൊബൈലിൽ പകർത്താനും ചിലർ മറന്നില്ല. ഓണാഘോഷത്തോടനുബന്ധിച്ചു നെയ്യാറിൽ ബോട്ട് സർവീസും നടത്തിയരുന്നു. ഇതിൽ കുട്ടവഞ്ചിയിലുള്ള യാത്രയാണ് ഇവിടെയെത്തിവരെ ഏറ്റവുമധികം ആകർഷിച്ചതും. നെയ്യാറിൽ സഞ്ചാരികളെ ആകർഷിക്കുന്നതിനുവേണ്ടി ബോട്ട് സർവീസ് ഉൾപ്പടെ നടത്തുന്നതിനുള്ള പദ്ധതികളാണ് ഇവിടെ നടപ്പിലാക്കാൻ ഉദ്ദേശിച്ചരുന്നത്.

മകന്‍റെ വിവാഹം ലളിതമാക്കി നിർധനരെ സഹായിച്ചു ദന്പതികൾ

വെഞ്ഞാറമൂട് : മകന്‍റെ വിവാഹം ലളിതമാക്കി നിർധനരോഗികൾക്ക് ചികിത്സാ സഹായം നൽകി ദമ്പതികൾ മാതൃകയായി. വെഞ്ഞാറമൂട് വാവുക്കോണത്ത് രാകേഷ് ഭവനിൽ രാജേന്ദ്രൻ-ബിന്ദു ദമ്പതികളാണ് തങ്ങളുടെ മകൻ രാകേഷിന്‍റെ വിവാഹ ചടങ്ങുകൾ ലളിതമായി നടത്തി, നിർധനരായ മുന്നൂറോളം രോഗികൾക്ക് ധനസഹായം നൽകി മാതൃകയായത്. മകന്‍റെ തീരുമാനം മാതൃകാപരമെന്നു കണ്ട രാജേന്ദ്രന്‍റെ മാതാവ് പി. ലക്ഷ്മി നൽകിയ ഒരു ലക്ഷം രൂപ ഉൾപ്പെടെ പതിനൊന്നു ലക്ഷം രൂപയുടെ ധനസഹായമാണ് വെഞ്ഞാറമൂട് ആസ്ഥാനമായി പ്രവർത്തിച്ചു വരുന്ന യുവാക്കളുടെ സംഘടനയായ സ്നേഹക്കൂടിന്‍റെ ആഭിമുഖ്യത്തിൽ സംഘടിപ്പിച്ചിരിക്കുന്ന "ജീവകാരുണ്യ മഹാ സംഗമ-ത്തിലൂടെ വിതരണം ചെയ്തത്. വെഞ്ഞാറമൂട് റാസ് ഓഡിറ്റോറിയത്തിൽ നടന്ന പരിപാടി അഡ്വ. അടൂർ പ്രകാശ് എംപി ഉദ്ഘാടനം ചെയ്തു. അഡ്വ. ഡി.കെ. മുരളി എംഎൽഎ അധ്യക്ഷനായിരുന്നു. സ്നേഹക്കൂട് ഓർഗനൈസിംഗ് സെക്രട്ടറി എസ് ഗോപകുമാർ സ്വാഗതം ആശംസിച്ചു. ചടങ്ങിൽ 37 പഞ്ചായത്തുകളിൽനിന്നും മൂന്നു മുനിസിപ്പാലിറ്റികളിൽ നിന്നും എത്തിച്ചേർന്ന 100 കണക്കിന് നിർധന രോഗബാധിതർക്ക് ആശ്വാസ ധനസഹായമായി 4000 രൂപ വീതവും, തുടർന്ന് ഭക്ഷ്യധാന്യ കിറ്റുകളും വിദ്യാർഥികൾക്ക് ബാഗ് ഉൾപ്പെടെയുള്ള പഠനോപകരണ കിറ്റുകളും വിതരണം ചെയ്തു. സ്റ്റേറ്റ് ഇന്‍റലിജൻസ് എസ്പിഎ ഷാനവാസ്, കെവിവിഎസ് ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് സെക്രട്ടറി എസ്. കുട്ടപ്പൻ ചെട്ടിയാർ, പഞ്ചായത്ത് പ്രസിഡന്‍റുമാരായ ബീന രാജേന്ദ്രൻ, പി.വി. രാജേഷ്, കുതിരകുളം ജയൻ, ജില്ലാ പഞ്ചായത്ത് മെമ്പർ ഷീലാ കുമാരി, ബിജെപി തിരുവനന്തപുരം നോർത്ത് ജില്ലാ പ്രസിഡന്‍റ് എസ്.ആർ, റജികുമാർ, കോൺഗ്രസ് വാമനപുരം മണ്ഡലം പ്രസിഡന്‍റ് ബിനു എസ്. നായർ, എഎസ്ആർഎ ജില്ലാ പ്രസിഡന്‍റ് പി. ഗോപകുമാർ, ബാബു കെ. സിതാര, വി.എസ്. ബിജുകുമാർ, ഷെരീർ വെഞ്ഞാറമൂട് തുടങ്ങിയവർ സംസാരിച്ചു. കൃഷ്ണനുണ്ണി നന്ദി രേഖപ്പെടുത്തി. പി ലക്ഷ്മി അമ്മയെ മാതൃകാ മാതാവായും, വി. രാജേന്ദ്രനെ മികച്ച ജീവകാരുണ്യ പ്രവർത്തകനായും പുരസ്കാരം നൽകി ആദരിച്ചു. ഡോക്ടർമാരും ആംബുലൻസും ചേർന്ന മെഡിക്കൽ സംഘം സ്ഥലത്ത് ക്യാമ്പ് ചെയ്തിരുന്നു. നറുക്കെടുപ്പിലൂടെ വൈവിധ്യമാർന്ന സമ്മാനങ്ങൾ വിതരണം ചെയ്തു. സമ്പൂർണ സദ്യ ഒരുക്കിയിരുന്നു.

ശ്രീവരാഹത്ത് സിഎന്‍ജി ലൈന്‍ ചോര്‍ന്നതു നാ‌ട്ടുകാരെ പരിഭ്രാന്തിയിലാഴ്ത്തി

പേരൂര്‍ക്കട: ശ്രീവരാഹം കേപ്പിള്‍ ലെയിനില്‍ സിഎന്‍ജി ലൈന്‍ ചോര്‍ന്നതു പരിഭ്രാന്തി പരത്തി. ഇന്നലെ ഉച്ചയോടെയായിരുന്നു സംഭവം. കേപ്പിള്‍ ലെയിനില്‍ പിങ്ക് ഗ്യാസ് കമ്പനിയുടെ ഗ്യാസ് ലൈന്‍ ഭൂമിക്കടിയിലൂടെ കടന്നുപോകുന്നുണ്ട്. ഈ ഭാഗത്ത് വാട്ടര്‍അഥോറിറ്റിയുടെ പണിക്കിടെയാണ് ഗ്യാസ് ചോര്‍ച്ചയുണ്ടായത്. പൈപ്പ് മുറിഞ്ഞതിനെത്തുടര്‍ന്നാണ് സി.എന്‍.ജി ചോര്‍ച്ചയുണ്ടായത്. തിരുവനന്തപുരം നിലയത്തില്‍നിന്നു ഫയര്‍ഫോഴ്‌സ് എത്തിയെങ്കിലും കമ്പനി അധികൃതര്‍ തന്നെ സ്ഥലത്തെത്തി ചോര്‍ച്ച പരിഹരിച്ചു.

വസ്തു തട്ടിയ കേസ്; മണികണ്ഠന്‍റെ ബന്ധു വീടുകളില്‍ പരിശോധന

പേരൂര്‍ക്കട: ജവഹര്‍നഗര്‍ വസ്തുതട്ടിപ്പു കേസുമായി ബന്ധപ്പെട്ട് അനന്തപുരി മണികണ്ഠന്‍റെ ബന്ധുവീടുകളില്‍ പോലീസ് പരിശോധന നടത്തി. കേസിലെ പ്രധാന പ്രതിയായ മണികണ്ഠനെ കണ്ടെത്തുന്നതിനാണ് ഇത്. പുത്തന്‍കോട്ടയിലെ വീട് വില്‍പ്പന നടത്തിയ മണികണ്ഠന്‍ കാലടി ഭാഗത്ത് പുതുതായി വീടുവച്ചുകൊണ്ടിരിക്കുകയാണ്. ഇദ്ദേഹം ഇപ്പോള്‍ കുടുംബസമേതം നെടുങ്കാട് വാടകയ്ക്കു താമസിച്ചുവരുന്നതായാണ് വിവരം. അതേസമയം സെഷന്‍സ് കോടതി ജാമ്യം തള്ളിയതോടെ ഒളിവില്‍പ്പോയ മണികണ്ഠനെ കണ്ടെത്താന്‍ ഇതുവരെയും കഴിഞ്ഞിട്ടില്ല. നാലഞ്ചു ബന്ധുക്കളുടെ വീടുകളില്‍ പോലീസ് ഇന്നലെ പരിശോധന നടത്തിയിരുന്നു. മണികണ്ഠന്‍റെ ഭാര്യവീടായ പേരൂര്‍ക്കടയിലും പോലീസ് മണികണ്ഠനെ അന്വേഷിച്ചു ചെന്നിരുന്നുവെങ്കിലും കണ്ടെത്താനായിട്ടില്ല. അതേസമയം അനന്തപുരി മണികണ്ഠനു ശക്തമായ പിന്തുണ നല്‍കുന്നത് ഒരു മുന്‍മന്ത്രിയാണെന്നുള്ള ആരോപണം ഉയര്‍ന്നിട്ടുണ്ട്. ഡോറ അസറിയ ക്രിപ്‌സിന്‍റെ ജവഹര്‍ നഗറിലെ വീടും വസ്തുവും തട്ടിയെടുക്കുന്നതില്‍ പ്രധാന പങ്കുവഹിച്ച ആധാരമെഴുത്തുകാരനാണ് അനന്തപുരി മണികണ്ഠന്‍.

നിയന്ത്രണംവിട്ട കെഎസ്ആർടിസി ബസ് ആക്കുളം പാലത്തിൽ ഇടിച്ചു കയറി

പോത്തൻകോട്: നിയന്ത്രണം തെറ്റിയ കെഎസ്ആർടിസി ബസ് ആക്കുളം പാലത്തിൽ ഇടിച്ചു കയറി ഡ്രൈവർ ഉൾപ്പെടെ നാലു പേർക്കു പരിക്ക്. യാത്രക്കാരായ ആറ്റിങ്ങൽ സ്വദേശി ഷിജി (41), അഞ്ചുതെങ്ങ് സ്വദേശിനി ഗ്രീഷ്മ (30), ചിറയിൻകീഴ് സ്വദേശിനി രമ്യ (33) എന്നിവർ ക്കാണു പരിക്കേറ്റത്. ഇവരെ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. പരിക്ക് ഗുരുതരമല്ല. ഇന്നലെ വൈകുന്നേരം 6.40നായിരുന്നു അപകടം. ബസിനു മുന്നിൽ പോയിരുന്ന ബൈക്ക് ട്രാഫിക് ലംഘിച്ചു പെട്ടെന്നു വെട്ടിച്ചുകയറ്റിയതോടെ ഇടിക്കാതിരിക്കാൻ ബസ് പെട്ടെന്നു വെട്ടിത്തിരിച്ചതാണു നിയന്ത്രണം തെറ്റാൻ കാരണമായത്.

മാറനല്ലൂർ ക്രൈസ്റ്റ് നഗർ കോളജിൽ സിഎംഎ ക്ലാസുകൾ ആരംഭിച്ചു

മാറനല്ലൂർ: ക്രൈസ്റ്റ് നഗർ കോളജിലെ കോമേഴ്സ് വിഭാഗത്തി ന്‍റെ നേതൃത്വത്തിൽ സിഎംഎ ക്ലാസുകൾ ആരംഭിച്ചു. ബ്രഹ്മോസ് എയ്റോസ്പേസ് ചീഫ് ഫിനാൻഷ്യൽ ഓഫീസർ സിഎംഎ ഡോ. ‌ടി.ജി. സുഗുണൻ ആദ്യ ബാച്ചിന്‍റെ ഉദ്ഘാടനം നിർവഹിച്ചു. കോസ്റ്റ് ആൻഡ് മാനേജ് മെന്‍റ് അക്കൗണ്ടിംഗ് രംഗത്ത് വളരെയേറെ സാധ്യതകളുള്ള സിഎംഎ കോഴ്സ് ഐസിഎംഎഐ തിരുവനന്തപുരം ചാപ്റ്ററുമായി സഹകരിച്ചാണു കോളജിൽ ആരംഭിച്ചിരിക്കുന്നത്. ഐസിഎംഎഐ തിരുവനന്തപുരം ചാപ്റ്റർ വൈസ് ചെയർമാൻ സിഎംഎ. വി.എസ്. രജീഷ്, പ്രഫഷണൽ ഡെവലപ്മെന്‍റ് കമ്മിറ്റി ചെയർമാൻ സിഎംഎ യു. ശരത് നായർ, കോളജ് മാനേജർ ഫാ. സിറിയക് മഠത്തിൽ സിഎംഐ, പ്രിൻസിപ്പൽ ഡോ. ജോളി ജേക്കബ്, കൊമേഴ്സ് വിഭാഗം മേധാവി പ്രഫ. ഡോ. പി.എസ്. ദേവ കുമാർ, കോ-ഓർഡിനേറ്റർ എം. പി. നിമ്യ എന്നിവർ പ്രസംഗിച്ചു.

വെള്ളായണി കായലിൽ യുവാവ് ചെളിയിൽ പുതഞ്ഞു

നേമം: വെള്ളായണി കായലിന്‍റെ കാക്കാമൂല ഭാഗത്തു കായലിൽ ചെളിയിൽ പുതഞ്ഞ യുവാവിനെ നാട്ടുകാർ രക്ഷപ്പെടുത്തി. കാക്കാമൂല - കാർഷിക കോളജ് ബണ്ട് റോഡിൽ പാലം നിർമിക്കുന്നതിനു സമീപം യുവാവ് ചെളിയിൽ പുതഞ്ഞു താഴ്ന്നു നിലവിളിച്ചതു അതിഥി തൊഴിലാളികളുടെ ശ്രദ്ധയിൽപ്പെടുകയായിരുന്നു. ഇവർ അറിയിച്ചതനുസരിച്ച് പൊതുപ്രവർത്തകനായ കാക്കാമൂല ബിജുവിന്‍റെ നേതൃത്വത്തിലെത്തിയ നാട്ടുകാർ കയർ എറിഞ്ഞു നൽകി രക്ഷപ്പെടുത്തി. കരയിലെത്തിയുടൻ അബോധാവസ്ഥയിലായ യുവാവിനെ ഉടൻ തന്നെ 108 ആംബുലൻസിൽ മെഡിക്കൽ കോളേജ് ആശുപത്രിയിലെത്തിച്ചു. വലതു കൈ ഒടിഞ്ഞ് പ്ലാസ്റ്റർ ഇട്ടിട്ടുണ്ട്. യുവാവിന്‍റെ പോക്കറ്റിൽ നിന്നും വെഞ്ഞാറമൂടിലെ ഒരു മൊബൈൽ സർവീസ് സെന്‍ററിന്‍റെ രസീത് ലഭിച്ചിട്ടുണ്ട്. അനന്തു എന്നാണ് പേര് രേഖപ്പെടുത്തിയിരിക്കുന്നത്. മൊബൈൽ ഷോപ്പ് ഉടമകൾക്കും ആളെ തിരിച്ചറിയാൻ കഴിഞ്ഞിട്ടില്ല. കാക്കാമൂല ബിജുവിനോടൊപ്പം പാലം പണിയുടെ ഓവർസിയർ റാസിക്ക്, എൻ ജിനീയർ സനോജ്, നാട്ടുകാരായ ദീലിപ്, മുരുകൻ, വിനോദ് എന്നിവർ രക്ഷാപ്രവർത്തനം നടത്തി .

അപകടഭീഷണിയായി മരം

നേമം: നേമത്ത് പണി പുരോഗമിക്കുന്ന രജിസ്‌ട്രേഷന്‍ കോംപ്ലക്‌സ് പരിസരത്ത് ഏതു സമയവും വീഴാവുന്ന നിലയില്‍ നില്‍ക്കുന്ന മരം മുറിച്ചു മാറ്റാന്‍ നടപടി സ്വീകരിക്കണമെന്ന ആവശ്യം ശക്തമാകുന്നു. മാസങ്ങളായി ഉണങ്ങി അപകടാവസ്ഥയില്‍ നില്‍ക്കുന്ന മരം മുറിച്ചുമാറ്റണമെങ്കില്‍ വനം വകുപ്പിന്‍റെ അനുമതി വേണമെന്നാണ് പറയുന്നത്. നേമം ദേശീയപാതയോടു ചേര്‍ന്നു നില്‍ക്കുന്ന മരം റോഡിലേയ്ക്കു വീണാല്‍ അപകടസാധ്യതകളുണ്ട്. ഈ കെട്ടിടത്തിനു സമീപമാണു നേമം യുപി സ്‌കൂള്‍ പ്രവര്‍ത്തിക്കുന്നത്. സ്‌കൂള്‍ വിട്ടു നിരവധി വിദ്യാര്‍ഥികളാണ് ഈ റോഡിലൂടെ കാല്‍നടയായി യാത്ര ചെയ്യുന്നത്.

അയല്‍വാസിയുടെ വീട്ടിൽ കയറി ആഭരണം കവര്‍ന്ന യുവാവ് പിടിയില്‍

പേരൂര്‍ക്കട: അയല്‍വാസിയുടെ വീട്ടില്‍നിന്നു സ്വർണാഭരണം കവര്‍ന്നയാളെ പേരൂര്‍ക്കട പോലീസ് പിടികൂടി. കരകുളം ചെക്കക്കോണം ഇടത്തറ വീട്ടില്‍ അരുണ്‍ (36) ആണ് പിടിയിലായത്. ജൂലൈ 14നു രാവിലെയായിരുന്നു കേസിനാസ്പദമായ സംഭവം. മണ്ണാമ്മൂല ഇടക്കുളം സൂര്യനഗര്‍ ഹൗസ് നമ്പര്‍ 201-ല്‍ വാടകയ്ക്കു താമസിക്കുന്ന രാഹുലിന്‍റെ നാലുഗ്രാം വരുന്ന സ്വർണാഭരണമാണ് കവര്‍ച്ച ചെയ്തത്. അരുണ്‍ മുമ്പ് രാഹുല്‍ താമസിക്കുന്ന വീടിനു സമീപത്തു താമസിച്ചിരുന്നയാളാണ്. സംഭവദിവസം ബസില്‍ക്കയറി ഇടക്കുളത്ത് ഇറങ്ങിയശേഷം രാഹുല്‍ താമസിക്കുന്ന വീട്ടിലെത്തി കവര്‍ച്ച നടത്തുകയായിരുന്നു. ഗേറ്റ് ചാടിക്കടന്ന് വീടിനുമുന്നിലെത്തിയ ഇയാള്‍ വാതിലിന്‍റെ പൂട്ടുപൊളിച്ചശേഷം ഉള്ളില്‍ സൂക്ഷിച്ചിരുന്ന സ്വർണാഭരണവുമായി രക്ഷപ്പെടുകയായിരുന്നു. നിരവധി സിസിടിവി ദൃശ്യങ്ങള്‍ പരിശോധിച്ചതില്‍ നിന്നാണ് പ്രതിയെക്കുറിച്ച് സൂചന ലഭിച്ചത്. നരുവാമൂട് ഭാഗത്തുനിന്നാണ് പേരൂര്‍ക്കട എസ്ഐമാരായ ജയേഷ്, അനില്‍കുമാര്‍, ഗ്രേഡ് എസ്ഐ മനോജ്, സിപിഒ രഞ്ജിത്ത് എന്നിവര്‍ ഉള്‍പ്പെട്ട സംഘം അരുണിനെ പിടികൂടിയത്. മോഷ്ടിച്ച സ്വര്‍ണാഭരണം പോലീസ് ഒരു ജ്വല്ലറിയില്‍ നിന്നു കണ്ടെത്തി. അറസ്റ്റിലായ പ്രതിയെ കോടതി റിമാന്‍ഡ് ചെയ്തു.

വിദ്യാഭ്യാസ വകുപ്പ് അറിഞ്ഞമട്ടില്ല..! കഴിവൂർ മൂലക്കര ഗവ. എൽപി സ്കൂൾ തകർച്ചയുടെ വക്കിൽ

വിഴിഞ്ഞം: വിദ്യാഭ്യാസ വകുപ്പും മന്ത്രിയും അറിഞ്ഞില്ല; കാലപഴക്കംചെന്നു തകർച്ചയുടെ വക്കിലായ കോട്ടുകാൽ കഴിവൂർ മൂലക്കര ഗവ: എൽ.പി സ് കൂളിന്‍റെ അവസ്ഥ. തകർന്നു വീഴാറായകെട്ടിടത്തിൽവച്ച് ക്ലാസ് നടത്തുന്നതിനെതിരെ ജനരോഷം ശക്തമാകു ്പോഴാണ് പുറംലോകം കാര്യമറിയുന്നത്. പിഞ്ചുകുട്ടികൾ പഠിക്കുന്ന ഈ സ്കൂളിന്‍റെ മേൽക്കൂര കഴിഞ്ഞ ദിവസങ്ങളിൽ വീശിയടിച്ച ശക്തമായ കാറ്റിൽ ഇളകിതെറിച്ചു പോയി. തകർന്നമേൽക്കൂര കയർ കൊണ്ട് കെട്ടിയുറപ്പിച്ചായിരു കഴിഞ്ഞ ദിവസങ്ങളിൽ ക്ലാസ് നടത്തിയിരുന്നത്. 140 വർഷം പഴക്കമുള്ള ഈ സർക്കാർ സ്കൂൾ ഇപ്പോഴും ഒറ്റമുറി കെട്ടിടത്തിലാണ് പ്രവർത്തിച്ച് വരുന്നത്.1883-ൽ 20 സെന്‍റ് വസ്തുവിൽ സ്ഥാപിതമായ സ്കൂളാണ് ഏതു നിമിഷവും തകർന്ന് വീഴാവുന്ന സ്ഥിതിയിലായത്. പ്രീ-പ്രൈമറി കുട്ടികളും ഒന്നുമുതൽ അഞ്ചുവരെ ക്ലാസുകളിലായി 50-ഓളം വിദ്യാർഥികളുമാണ് ഇവിടത്തെപഠിതാക്കൾ. പിണറായി സർക്കാർ അധികാരത്തിൽ വന്നശേഷം സ്കൂളുകളിൽ മെച്ചപ്പെട്ട സൗകര്യങ്ങൾ ഒരുക്കി ഹൈടെക് ആക്കുന്നതായി മന്ത്രി ഉൾപ്പെടെ വിദ്യാഭ്യാസവകുപ്പ് അവകാശപ്പെടുന്നുണ്ട്. എന്നാൽ കുട്ടികൾ കുറവുള്ള സാധാരണക്കാരന്‍റെ മക്കൾ പഠിക്കുന്ന സർക്കാർ സ്കൂളുകളെ അധികൃതർ തിരിഞ്ഞു നോക്കുന്നില്ല എന്നതിനുദാഹരണമാണ് മൂലക്കര സ്കൂൾ. കുട്ടികൾക്ക് ആവശ്യമുള്ള ഒരു സൗകര്യവും ഈ സ്കൂളിൽ സജ്ജമാക്കിയിട്ടില്ല. ഒറ്റമുറികെട്ടിടത്തിൽ തടിയിൽ മറയുണ്ടാക്കിയാണ് ക്ലാസ് റൂം തിരിച്ചിട്ടുള്ളത്. ഓടുകൾ പൊട്ടിത്തകർന്നതോടെ തകരഷീറ്റ് സ്ഥാപിച്ചാണ് മേൽക്കൂര. പഴക്കമുള്ള കഴുക്കോലുകളിൽ ഉറപ്പിച്ച ഷീറ്റുകൾ കാറ്റിൽ ഇളകിതെറിച്ചതോടെ കയറുകൊണ്ട് കെട്ടിയാണ് നിലനിറുത്തിയിട്ടുള്ളത്.കാലപ്പഴക്കംകൊണ്ട് കെട്ടിടത്തിന്‍റെ ചുമരുകൾക്ക് വിള്ളലുണ്ടായിട്ടുണ്ട്. അവശ്യം വേണ്ട ഫിറ്റ്നസ് സർട്ടിഫിക്കറ്റില്ലാതെയാണ് സ്കൂൾ പ്രവർത്തിച്ച് വന്നത്. ഇതിനെതിരെ യുവജനസംഘടനകളും നാട്ടുക്കാരും കഴിഞ്ഞ ദിവസം പ്രതിഷേധവുമായി രംഗത്തെത്തി. തുടർന്നു കാഞ്ഞിരംകുളം പോലീസ് സ്ഥലത്തെത്തി സ് കൂൾ അധികൃതരുമായി സംസാരിച്ചു കുട്ടികളുടെ സുരക്ഷിതത്വം മുൻ നിറുത്തി തൊട്ടടുത്ത മറ്റൊരു ചെറിയ കെട്ടിടത്തിലേക്ക് മാറ്റുകയാണ് ഉണ്ടായത്. സ്കൂൾ കവാടത്തിനു മുന്നിൽ നിർമിച്ചിട്ടുള്ള ശൗചാലയങ്ങളും ശോച്യാവസ്ഥയിലാണ്. അടിസ്ഥാന സൗകര്യങ്ങളുള്ള കെട്ടിടം നിർമിച്ചു നൽകണമെന്നാവശ്യപ്പെട്ടു നാട്ടുകാര്യം കോട്ടുകാൽ പഞ്ചായത്തധികൃതർക്കും എംഎൽ എയോടും വിദ്യാഭ്യാസമന്ത്രിക്കും നിരവധി തവണ നിവേദനങ്ങൾ നൽകിയിരുന്നു. എന്നാൽ ഇതുവരെയും നടപടികൾ കൈക്കൊണ്ടിട്ടില്ല.

ഹോട്ടല്‍ജീവനക്കാരനെ കൊലപ്പെടുത്താന്‍ ശ്രമം; രണ്ടുപേര്‍ പിടിയില്‍

പേരൂര്‍ക്കട: ഹോട്ടല്‍ ജീവനക്കാരനെ കൊലപ്പെടുത്താന്‍ ശ്രമിച്ച സംഭവത്തില്‍ രണ്ടുപേരെ കരമന പോലീസ് പിടികൂടി. കുഞ്ചാലുമ്മൂട് ടി.സി 20/19 പള്ളിവിളാകം വീട്ടില്‍ അന്‍സാരി (49), കുഞ്ചാലുമ്മൂട് ടി.സി 20/1425 പള്ളിവിളാകം വീട്ടില്‍ ബാദുഷ (52) എന്നിവരാണ് പിടിയിലായത്. ജൂലൈ 20ന് രാത്രി 12.30നായിരുന്നു കേസിനാസ്പദമായ സംഭവം. പൂജപ്പുരയിലെ ഇറാനി ഹോട്ടലിലെ ജോലിക്കാരന്‍ ബാദുഷ (25) ആണ് ആക്രമണത്തിന് ഇരയായത്. സംഭവത്തെക്കുറിച്ചു പോലീസ് പറയുന്നത്: നാലംഗസംഘം സംഭവദിവസം മദ്യപിച്ചശേഷം ഹോട്ടലിനു സമീപത്തിരുന്നത് ഇറാനി ഹോട്ടലിലെ മൂന്നുതൊഴിലാളികള്‍ ചേര്‍ന്നു ചോദ്യംചെയ്തു. ഇതിന്‍റെ വിരോധത്തില്‍ സംഘം തൊഴിലാളികളെ വാള്‍കൊണ്ട് ആക്രമിച്ചു പരിക്കേല്‍പ്പിച്ചു. ഇതു ചോദ്യം ചെയ്തതിനാണ് കാസര്‍കോഡ് പാടി ഇടനീര്‍ ചുരിഹൗസില്‍ ബാദുഷയെ ആക്രമിച്ചു പരിക്കേല്‍പ്പിച്ചത്. ഹോട്ടല്‍ജോലി കഴിഞ്ഞ് കുഞ്ചാലുമ്മൂട്ടിലെത്തിയ ബാദുഷയെ ബസ്റ്റോപ്പില്‍വച്ചു സംഘം തടഞ്ഞുനിര്‍ത്തി മാരകായുധങ്ങള്‍ ഉപയോഗിച്ച് ആക്രമിക്കുകയായിരുന്നു. സാരമായി പരിക്കേറ്റ ബാദുഷ ആശുപത്രിയില്‍ ചികിത്സ തേടി. സിസിടിവി ദൃശ്യങ്ങള്‍ പ്രതികളെ തിരിച്ചറിയാന്‍ സഹായകമായി. ഫോര്‍ട്ട് സിഐ എന്‍. ഷിബുവിന്‍റെ നേതൃത്വത്തില്‍ കരമന സിഐ അനൂപ്, എസ്ഐ ജയപ്രകാശ്, സിപിഒമാരായ ജയചന്ദ്രന്‍, ഹിരണ്‍, കൃഷ്ണകുമാര്‍, ശരത്ചന്ദ്രന്‍ എന്നിവര്‍ അന്വേഷണസംഘത്തില്‍ ഉണ്ടായിരുന്നു. അറസ്റ്റിലായ പ്രതികളെ കോടതി റിമാന്‍ഡ് ചെയ്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]