ADVERTISEMENT

ADVERTISEMENT

ആറ്റിങ്ങൽ ബാർ അസോസിയേഷൻ

ആറ്റിങ്ങൽ: ബാർ അസോസിയേഷൻ ഭാരവാഹികൾ: അഡ്വ. ആറ്റിങ്ങൽ എസ്. സുരേഷ് കുമാർ -പ്രസിഡന്‍റ്, അഡ്വ. ദീപ ആറ്റിങ്ങൽ - വൈസ് പ്രസിഡന്‍റ്, അഡ്വ. എ. റസൂൽ ഷാൻ - സെക്രട്ടറി, അഡ്വ. ഗ്രീഷ്മ - ജോയിന്‍റ് സെക്രട്ടറി, എസ്. നിതിൻ വക്കം - ട്രഷറർ. മാനേജിംഗ് കമ്മിറ്റി അംഗങ്ങൾ: അഭിഭാഷകരായ ദീപക്, ജിഫ്ന, നെജ്മ, ക്രോസ് ആന്‍റണി.

ADVERTISEMENT

ഓട്ടോഡ്രൈവർ ലോഡ്ജില്‍ മരിച്ചനിലയില്‍

മെഡിക്കല്‍കോളജ്: ഓട്ടോഡ്രൈവറെ ലോഡ്ജുമുറിയില്‍ മരിച്ചനിലയില്‍ കണ്ടെത്തി. തൈക്കാട് തട്ടംവിളാകം ടിസി 16/1177-ല്‍ വസന്തകുമാര്‍ (53) ആണ് മരിച്ചത്. ഇന്നലെ രാവിലെയാണ് തമ്പാനൂര്‍ സ്റ്റേഷന്‍ പരിധിയിലെ ഒരു ലോഡ്ജിനുള്ളില്‍ മൃതദേഹം കണ്ടെത്തിയത്. കുറച്ചുനാളായി ഇദ്ദേഹം ഒറ്റയ്ക്കു താമസിച്ചു വരികയായിരുന്നു. കഴിഞ്ഞദിവസം ഓട്ടോറിക്ഷ സവാരി കഴിഞ്ഞ് എത്തിയ വസന്തകുമാര്‍ മുറിയില്‍ വിശ്രമിക്കുന്നതിനായി കയറിയതാണ്. പിന്നീട് ഇയാളെ പുറത്തുകണ്ടിരുന്നില്ല. തുടർന്ന് സുഹൃത്തുക്കള്‍ എത്തി മുറി തുറന്നു നോക്കുമ്പോഴാണ് മൃതദേഹം കണ്ടെത്തിയത്. നിരവധി അസുഖങ്ങള്‍ ഉള്ളതായാളായിരുന്നു വസന്തകുമാറെന്നും ശാരീരിക അസ്വാസ്ഥ്യം മൂലമാണ് മരണമെന്നു കരുതുന്നതായും തമ്പാനൂര്‍ പോലീസ് അറിയിച്ചു. മൃതദേഹം തിരുവനന്തപുരം മെഡിക്കല്‍കോളജ് ആശുപത്രിയില്‍ പോസ്റ്റുമോര്‍ട്ടം നടത്തി.

നെയ്യാര്‍ മേള: സംഘാടക സമിതിയായി

നെയ്യാറ്റിൻകര : കേരള സംസ്ഥാന വിനോദസഞ്ചാര വകുപ്പിന്‍റെയും തദ്ദേശ സ്വയംഭരണ സ്ഥാപനങ്ങളുടെയും സഹകരണത്തോടെ കേരള സംസ്ഥാന വ്യാപാരി വ്യവസായി സമിതി നെയ്യാറ്റിൻകര ഏരിയാ കമ്മിറ്റി സംഘടിപ്പിക്കുന്ന നെയ്യാർ മേള- 2025 ന്‍റെ സംഘാടകസമിതി രൂപീകരണ യോഗം കെ. ആൻസലൻ എംഎൽഎ ഉദ്ഘാടനം ചെയ്തു. സ്വദേശാഭിമാനി ടൗൺ ഹാളിൽ ചേർന്ന യോഗത്തിൽ സമിതി ഏരിയാ പ്രസിഡന്‍റ് പി. ബാലചന്ദ്രൻനായർ അധ്യക്ഷനായി. സംസ്ഥാന വൈസ് പ്രസിഡന്‍റ് വി. പാപ്പച്ചൻ മുഖ്യപ്രഭാഷണം നടത്തി. ജില്ലാ സെക്രട്ടറി അഡ്വ. ആദർശ് ചന്ദ്രൻ മുഖ്യാതിഥിയായി. നഗരസഭ വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ ഡോ. എം.എ സാദത്ത്, കൗണ്‍സിലര്‍ കൂട്ടപ്പന മഹേഷ്, അതിയന്നൂര്‍ ആരോഗ്യ- വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ കൊടങ്ങാവിള വിജയകുമാര്‍, സമിതി ജില്ലാ കമ്മിറ്റി അംഗം കെ. ബിന്ദു, മുരുകേശൻ ആശാരി, ജി.എൻ. ശ്രീകുമാരന്‍, എന്‍.ആര്‍.സി നായര്‍, നാരായണറാവു, സമിതി ഏരിയാ സെക്രട്ടറി എം. ഷാനവാസ്, സജികുമാര്‍ പെരുങ്കടവിള എന്നിവർ സംബന്ധിച്ചു. സെപ്റ്റംബർ ഒന്നു മുതൽ 14 വരെ ആറാലുംമൂട് മാർക്കറ്റ് ഗ്രൗണ്ടിൽ നടക്കുന്ന പത്താമത് മേളയില്‍ ഇക്കുറി പുതുമകളേറെയുണ്ടെന്ന് സംഘാടകര്‍ അറിയിച്ചു. മേളയുടെ നടത്തിപ്പിനായി 21 സബ് കമ്മിറ്റികളും രൂപീകരിച്ചു.

നിറപുത്തരി ചടങ്ങ് നടത്തി

പാറശാല: ദക്ഷിണ കൈലാസം മഹേശ്വരം ശ്രീ ശിവ പാർവതി ക്ഷേത്രത്തില്‍ നിറപുത്തരി ചടങ്ങു നടത്തി. രാവിലെ നിർമാല്യം, ഗണപതി ഹോമം എന്നിവയ്ക്കുശേഷം മേല്‍ശാന്തി കുമാര്‍ മഹേശ്വരത്തിന്‍റെ കാര്‍മികത്വത്തില്‍ ഒരുക്കിവച്ച കതിര്‍ക്കറ്റകള്‍ കീഴ്ശാന്തിമാര്‍ തലയിലേറ്റി ക്ഷേത്ര വലംവച്ച് എഴുന്നള്ളിച്ചു. തലച്ചുമടായി ശ്രീകോവിലുനുള്ളില്‍ ഉമാ മഹേശ്വരനു സമര്‍പ്പിച്ചു. ഇതോടൊപ്പം തന്നെ നെല്ലു കുത്തി പുത്തരിയാക്കി പായസകൂട്ടുണ്ടാക്കി ഭഗവാനു നിവേദ്യമായി നൽകി. തുടര്‍ന്നു ദീപാരാധനയ്ക്കുശേഷം പൂജിച്ച കതിര്‍ക്കറ്റകളും നിവേദിച്ച പായസവും ക്ഷേത്രം മഠാധിപതി സ്വാമി മഹേശ്വരാനന്ദ സരസ്വതി ഭക്തജനങ്ങള്‍ക്ക് വിതരണം ചെയ്തു.

മുണ്ടേല രാജീവ്ഗാന്ധി സഹകരണ സംഘം : ക്രമക്കേട്; അറസ്റ്റിലായ രണ്ട് മുൻ ജീവനക്കാർക്ക് ജാമ്യം

നെടുമങ്ങാട്: മുണ്ടേല രാജീവ്ഗാന്ധി റെസിഡൻസ് വെൽഫെയർ സഹകരണ സംഘത്തിൽ നടന്ന കോടികളുടെ ക്രമക്കേടിൽ ക്രൈംബ്രാഞ്ച് അറസ്റ്റു ചെയ്ത രണ്ടു മുൻ ജീവനക്കാർക്ക് കോടതി ജാമ്യം അനുവദിച്ചു. സംഘത്തിലെ മുൻ അറ്റൻഡർ എ.എസ്. സുനിൽ കുമാർ, നൈറ്റ് വാച്ച്മാൻ എസ്. ബിജുകുമാർ എന്നിവർക്കാണ് നെടുമങ്ങാട് കോടതി ജാമ്യം നൽകിയത്. ക്രൈംബ്രാഞ്ച് അറസ്റ്റ് ചെയ്ത ഇരുവരെയും കഴിഞ്ഞ തിങ്കളാഴ്ച നെടുമങ്ങാട് കോടതിയിൽ ഹാജരാക്കിയിരുന്നു. അപ്പോൾ കോടതി ഇവരെ ക്രൈംബ്രാഞ്ചിന്‍റെ കസ്റ്റഡിയിൽ വിട്ടു. വീണ്ടും കോടതിയിൽ ഹാജരാക്കിയപ്പോഴാണ് ജാമ്യം അനുവദിച്ചത്. സംഘത്തിലെ മുൻ സെക്രട്ടറി രാഖിയെ ക്രൈംബ്രാഞ്ച് നേരത്തെ അറസ്റ്റ് ചെയ്തിരുന്നു. കേസിൽ പ്രതികളായവരുടെ വസ്തു വകകൾ കണ്ടുകെട്ടുന്നതിനായി വസ്തുക്കളുടെ സർവേ നമ്പർ ‍ഉൾപ്പെടെ കളക്ടർക്ക് നൽകിയിട്ടുണ്ടെന്നും കേസിൽ പ്രതികളായ രണ്ടുപേർ വിദേശത്തേക്ക് കടന്നിട്ടുണ്ടെന്നും ക്രൈംബ്രാഞ്ച് പറഞ്ഞു.

റോഡിലെ പൊടിശല്യം: ചൂണ്ടിക്കല്‍-ശൂരുവക്കാണി നിവാസികൾ വലയുന്നു

വെള്ളറട: റോഡിലെ പൊടികൊണ്ട് ജീവിക്കാന്‍ കഴിയാതെ ചൂണ്ടിക്കല്‍ മുതല്‍ ശൂരവക്കാണിവരെയുള്ള ജനങ്ങള്‍ വലയുകാണ്. ഈ ഭാഗത്ത് റോഡ് ജര്‍മ്മന്‍ ടെക്‌നോളജി ഉപയോഗിച്ച് പുനര്‍ നിര്‍മിക്കുന്നതിന്‍റെ ഭാഗമായി ഒന്നാം ഘട്ട പണികള്‍ പൂര്‍ത്തീകരിച്ച് മാസങ്ങള്‍ കഴിഞ്ഞുവെങ്കിലും റോഡിലെ ടാറിംഗ് ജോലികള്‍ തുടങ്ങാത്തതുകാരണം റോഡിലെ പൊടി വാഹനങ്ങള്‍ പോകുമ്പോള്‍ വീടുകളിലേക്കും കടകളിലേക്കും വ്യാപകമായി പറന്നെത്തുന്നു. റോഡു വക്കില്‍ താമസിക്കുന്ന ജനങ്ങള്‍ക്ക് ശുദ്ധവായു ശ്വസിക്കാന്‍ കഴിയാത്ത അവസ്ഥയിലാണ്. ശ്വാസ തടസവും പൊടികൊണ്ടുള്ള അലര്‍ജി കാരണം ശരീരം മുഴവന്‍ ചൊറിച്ചിലും കുട്ടികള്‍ക്ക് അനുഭവപ്പെട്ട് തുടങ്ങിയിരുക്കുകയാണ്. ആദ്യം നിര്‍മാണം കഴിഞ്ഞപ്പോള്‍ കരാര്‍ കമ്പനി റോഡില്‍ മൂന്നും നാലും പ്രാവശ്യം വെള്ളം ടാങ്കര്‍ ലോറിയില്‍ കൊണ്ടുവന്നു റോഡില്‍ നനക്കുമായിരുന്നു. എന്നാല്‍ ഇപ്പോള്‍ പേരിനുമാത്രം റോഡിനു നടുക്കു വെള്ളം നനക്കുന്നത്. അടിയന്തിരമായി റോഡ് ടാര്‍ചെയ്ത് പ്രശ്‌നത്തിന് പരിഹാരം കാണാന്‍ ബന്ധപ്പെട്ട അധികൃതര്‍ ശ്രമിച്ചില്ലെങ്കില്‍ ജനങ്ങളുടെ ദുരിതത്തിന് പരിഹാരമാകില്ല. ഇപ്പോള്‍ ഇടിഞ്ഞുപൊടിഞ്ഞുകിടന്ന പഴ റോഡായിരുന്നെങ്കില്‍ മതിയെന്നാണ് നാട്ടുകാര്‍ പറയുന്നത്. പൊടികൊണ്ടുള്ള രോഗങ്ങളില്‍ നിന്നും ജനങ്ങളെ രക്ഷിക്കാന്‍ അടിയന്തിര നടപടി സ്വീകരിക്കണമെന്നാണ് ആവശ്യം.

ഉമ്മൻചാണ്ടി അനുസ്മരണവും ഭക്ഷ്യക്കിറ്റ് വിതരണവും

പേരൂര്‍ക്കട: സാധാരണക്കാരായ ജനങ്ങളുടെ ഒപ്പം ജീവിച്ച മുഖ്യമന്ത്രിയായിരുന്നു ഉമ്മന്‍ചാണ്ടിയെന്നു കെ. മുരളീധരന്‍. കോണ്‍ഗ്രസ് വട്ടിയൂര്‍ക്കാവ് ബ്ലോക്ക് കമ്മിറ്റി സംഘടിപ്പിച്ച മുന്‍ മുഖ്യമന്ത്രി ഉമ്മന്‍ചാണ്ടി അനുസ്മരണവും ഭക്ഷ്യക്കിറ്റ് വിതരണവും ഉദ്ഘാടനം ചെയ്യുകയായിരുന്നു അദ്ദേഹം. ബ്ലോക്ക് പ്രസിഡന്‍റ് വെള്ളൈക്കടവ് വേണുകുമാര്‍ അധ്യക്ഷത വഹിച്ചു. ഡി. സുദര്‍ശനന്‍, ശാസ്തമംഗലം മോഹനന്‍, ആര്‍. രാജന്‍ കുരുക്കള്‍, മേലാത്തുമേലെ ജയചന്ദ്രന്‍, വി. മോഹനന്‍ തമ്പി തുടങ്ങിയവര്‍ പങ്കെടുത്തു.

സ്വദേശാഭിമാനി പാര്‍ക്ക് നവീകരിക്കണമെന്ന് ആവശ്യം

നെയ്യാറ്റിൻകര: നഗരസഭയുടെ നിയന്ത്രണത്തിലുള്ള സ്വദേശാഭിമാനി പാര്‍ക്ക് നവീകരിക്കണമെന്ന് കൗണ്‍സിലര്‍ മഞ്ചത്തല സുരേഷ്. ആസ്തി വികസന രേഖകളിൽ ഫോർട്ട് വാർഡിന്‍റേതായി പറയപ്പെടുന്ന ഈ പാർക്ക് ആലുംമൂടിന്‍റെയും ഫോർട്ടിന്‍റെയും മധ്യഭാഗത്തായാണ് സ്ഥിതി ചെയ്യുന്നത്. കരമന - കളിയിക്കാവിള പാതയില്‍ നെയ്യാറ്റിന്‍കര ശ്രീകൃഷ്ണസ്വാമി ക്ഷേത്രത്തിനു സമീപത്തായുള്ള ഈ പാര്‍ക്കില്‍ സ്വദേശാഭിമാനി കെ. രാമകൃഷ്ണപിള്ളയുടെ അര്‍ധകായ പ്രതിമ നിലവിലുണ്ട്. നെയ്യാറ്റിന്‍കരയുടെ ആജീവനാന്ത പത്രാധിപരായ സ്വദേശാഭിമാനിയുടെ പൂര്‍ണ വെങ്കല പ്രതിമ പാര്‍ക്കില്‍ സ്ഥാപിക്കണമെന്ന ആവശ്യവും കൗണ്‍സിലര്‍ ഉന്നയിച്ചു. സാംസ്കാരിക സമ്മേളനങ്ങൾ നടത്തുന്നതിനുള്ള വേദിയായി സ്വദേശാഭിമാനി പാര്‍ക്കിനെ മാറ്റുകയും വേണം. നിലവിലുള്ള നഗരസഭ ഭരണസമിതി സ്വദേശാഭിമാനി പാര്‍ക്കിനെ അവഗണിക്കുകയാണ് ചെയ്യുന്നത്. പാര്‍ക്ക് നവീകരിക്കണമെന്ന ആവശ്യം അംഗീകരിച്ചില്ലെങ്കില്‍ സമരപരിപാടികള്‍ സംഘടിപ്പിക്കുമെന്നും മഞ്ചത്തല സുരേഷ് അറിയിച്ചു.

നെയ്യാറ്റിൻകര നഗരസഭയുടെ "ശാന്തിയിടം' സെപ്തംബറില്‍ പ്രവർത്തനം ആരംഭിക്കും

നെയ്യാറ്റിൻകര: നഗരസഭയുടെ പൊതുശ്മശാനമായ "ശാന്തിയിടം' സെപ്തംബറില്‍ പ്രവര്‍ത്തനം ആരംഭിക്കുമെന്ന് ചെയര്‍മാന്‍ പി.കെ. രാജമോഹനന്‍ അറിയിച്ചു. ശ്മശാന നിര്‍മാണ പ്രവര്‍ത്തനങ്ങള്‍ അദ്ദേഹം കഴിഞ്ഞ ദിവസം നേരില്‍ വിലയിരുത്തി. വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ ഡോ. എം.എ. സാദത്ത്, നഗരസഭ ഉദ്യോഗസ്ഥര്‍ എന്നിവരും അദ്ദേഹത്തോടൊപ്പം ഉണ്ടായിരുന്നു. എൽപിജിയിൽ പ്രവർത്തിക്കുന്ന പൊതുശ്മശാനത്തിന്‍റെ നിർമാണം അതിവേഗം പുരോഗമിക്കുകയാണ്. നഗരസഭയിലെ പ്ലാവിള വാർഡിലെ മലഞ്ചാണി കടുവാക്കുഴി മലയുടെ മുകളിലായി നഗരസഭ വാങ്ങിയ ഒരേക്കർ ഒന്നേകാൽ സെന്‍റ് സ്ഥലത്താണ് ശ്മശാനത്തിന്‍റെ നിർമാണം പുരോഗമിക്കുന്നത്. 2024 ഡിസംബർ 11-നാണു നിർമാണ പ്രവൃത്തികൾക്കു തുടക്കം കുറിച്ചത്. എൽപിജി ക്രിമറ്റോറിയം ചേംബർ സ്ഥാപിക്കാനുള്ള ടെൻഡർ നടപടികൾ പൂർത്തീകരിച്ച് മെഷീൻ സ്ഥാപിക്കുന്ന നടപടികളും നടന്നുവരുന്നു. `ശാന്തിയി`ടത്തിൽ ഒരേ സമയം രണ്ടു ചിതകൾ എൽപിജിയിൽ പ്രവർത്തിപ്പിക്കാനുള്ള സൗകര്യങ്ങളാണ് ഒരുക്കുന്നത്. മലഞ്ചാണി മലയുടെ ഭൂമിശാസ്ത്രം കണക്കിലെടുത്ത് ഒരേക്കർ സ്ഥലത്തെ മൂന്നു തട്ടുകളായി തിരിച്ചാണു നിർമാണം. ഏറ്റവും മുകളിലത്തെ തട്ടിലാണു ശ്മശാനം. രണ്ടും മൂന്നും തട്ടുകളിൽ പാർക്കിങ്ങും പാർക്കും ഇരിപ്പിടങ്ങളും അനുസ്മരണ യോഗങ്ങൾ നടത്താനുള്ള വേദിയും ഒരുക്കും. മലമുകളിൽ നിന്നുള്ള നഗരത്തിന്‍റെ വിദൂര കാഴ്ചയും സന്ധ്യാസമയത്തെ സൂര്യാസ്തമനവും കാണുന്നതിനായി വ്യൂ പോയിന്‍റും യാഥാര്‍ഥ്യമാക്കും. 4,100 ചതുരശ്ര അടി വിസ്തീർണത്തിലാണ് "ശാന്തിയിടം' ഉയരുന്നത്. നാലുകെട്ടുകളുടെ മേൽക്കൂര അനുസ്മരിപ്പിക്കുന്ന വിധത്തിലാണ് മേൽക്കൂര രൂപകല്‍പ്പന ചെയ്തിട്ടുള്ളത്. "ശാന്തിയിടം' സംസ്ഥാനത്തിനുതന്നെ മാതൃകയാകുമെന്ന് നഗരസഭ ചെയർമാൻ പറഞ്ഞു.

ഉണ്ടൻകോട് ഫൊറോനയിൽ അല്മായ ശുശ്രൂഷ സംഗമം

വെള്ളറട: ലത്തീന്‍ കത്തോലിക്കരുടെ സംവരണ അവകാശം നേടിയെടുക്കുന്നതിനു വേണ്ടി രൂപതയിലെ എല്ലാ ഇടവകകളില്‍ നിന്നുമായി ഒപ്പുശേഖരിക്കുകയും ആവശ്യങ്ങള്‍ ഉന്നയിച്ച നിവേദനം ഉണ്ടന്‍കോട് ഫെറോനയിലേക്കു കൈമാറുകയും ചെയ്തു. ഇന്നലെ നടന്ന അല്മായ ശുശ്രൂഷ സംഗമം ഉണ്ടന്‍കോട് രൂപത അല്മായ ശുശ്രൂഷ ഡയറക്ടര്‍ ഫാ. അനില്‍കുമാര്‍ ഉദ്ഘാടനം ചെയ്തു. ത്രേസിയാപുരം ഇടവികാരി ഫാ. സുജിൻ അധ്യക്ഷത വഹിച്ചു. ആനിമേറ്റര്‍ ജയന്തി സ്വാഗതം പറഞ്ഞു. സി.കെ. ഹരീന്ദ്രന്‍ എംഎല്‍എ മുഖ്യസന്ദേശം നല്‍കി. തുടര്‍ന്ന് ഉണ്ടന്‍കോട് ഫെറോനയുടെ നിവേദനം പനച്ചുമൂട് ഇടവക വികാരി ഫാ. സെബാസ്റ്റ്യന്‍ നല്‍കി. തുടര്‍ന്ന് ഓരോ ഇടവകകളില്‍ നിന്നും തയാറാക്കിയ നിവേദനം ഇടവക കോ-ഓർഡിനേറ്ററുടെ നേതൃത്വത്തില്‍ ഇടവക സമിതി അംഗങ്ങള്‍ ഒന്ന് ചേര്‍ന്ന് എംഎല്‍എക്ക് നല്‍കി. 27 ഇടവകകളിലെ നിവേദനം നല്‍കിയതിനു ശേഷം രൂപത കെഎല്‍സിഎ പ്രസിഡന്‍റ് അനില്‍ ജോസ്, കെഎല്‍സിഡബ്ലിയു ഫെറോന പ്രസന്‍ സജിത ജോണ്‍, ആനിമേറ്റര്‍ പുഷ്പലത തുടങ്ങിയവര്‍ പ്രസംഗിച്ചു. രാജേഷ് നന്ദി അര്‍പ്പിച്ചു.

കാട്ടാക്കട സാമൂഹികാരോഗ്യ കേന്ദ്രത്തിൽ മരുന്നുകളില്ല; സ്‌നേഹം മെഡിക്കൽ സ്റ്റോർ പ്രവർത്തനം നിർത്തി

കാട്ടാക്കട: മരുന്നുകളില്ല. കാട്ടാക്കട സാമൂഹികാരോഗ്യ കേന്ദ്രത്തിൽ പ്രവർത്തിച്ചിരുന്ന സ്‌നേഹം മെഡിക്കൽ സ്റ്റോർ പ്രവർത്തനം നിർത്തി. ജില്ലാപ്പഞ്ചായത്തിന്റെ നിയന്ത്രണത്തിലുള്ളതാണ് ഈ മെഡിക്കൽ സ്റ്റോർ. മാസങ്ങളായി മരുന്നുകളുടെ ലഭ്യത ഇല്ലാത്തതിനാൽ സ്റ്റോർ പ്രതിസന്ധിയിലായിരുന്നു. സ്റ്റോക്കുണ്ടായിരുന്ന മരുന്നുകൾ തീരുന്നതു വരെ പ്രവർത്തിച്ച ശേഷമാണ് പൂട്ടിയതെന്നറിയുന്നു.മരുന്നുകളില്ലെന്ന വിവരം ജില്ലാപ്പഞ്ചായത്തിനെ നിരവധിത്തവണ അറിയിച്ചിരുന്നെങ്കിലും തുക വകയിരുത്തി കാരുണ്യ വഴി മരുന്നുകളെത്തിക്കാൻ തയ്യാറാകാത്തതാണ് സ്റ്റോർ പൂട്ടാൻ കാരണമായത്. സ്പീക്കർ ജി.കാർത്തികേയൻ എംഎൽഎ ഫണ്ട് വിനിയോഗിച്ച് ഉദ്ഘാടനം ചെയ്ത നീതി മെഡിക്കൽ സ്റ്റോറാണ് പിന്നീട് സ്‌നേഹം മെഡിക്കൽസ് എന്ന പേരിൽ പ്രവർത്തിച്ചുവന്നത്. പാലിയേറ്റീവ് രോഗികൾക്കുള്ള സൗജന്യ മരുന്നും കൂടാതെ ആശുപത്രിയിലെത്തുന്ന രോഗികൾക്ക് 70 ശതമാനം വരെ കുറഞ്ഞ നിരക്കിലും മരുന്ന് ലഭിച്ചിരുന്നതിനാൽ സാധാരണക്കാർക്ക് വലിയ ആശ്വാസമായിരുന്നു ഈ സ്റ്റോർ. എന്നാൽ, അറ്റകുറ്റപ്പണി ചെയ്യാത്തത്തിനാൽ ഡ്രഗ് ലൈസൻസ് പുതുക്കിക്കിട്ടാത്തതാണ് സ്റ്റോർ പൂട്ടാൻ കാരണമെന്നും സൂചനയുണ്ട്. കാട്ടാക്കട സർക്കാർ ആശുപത്രിക്കു മുന്നിലെ സ്വകാര്യ മെഡിക്കൽ സ്റ്റോറുകളെ സഹായിക്കുന്നതാണ് ജില്ലാപ്പഞ്ചായത്തിന്റെ നടപടിയെന്ന് ആക്ഷേപമുണ്ട്.കാട്ടാക്കട സർക്കാർ ആശുപത്രിയോട് കാണിക്കുന്ന അവഗണയുടെ അവസാന ഉദാഹരണമാണിതെന്നും ആക്ഷേപമുയർന്നു.

സിപിഎം നേതാവ് കോൺഗ്രസിൽ

നേമം: പള്ളിച്ചലിൽ സിപിഎം നേതാവ് കോൺഗ്രസിൽ ചേർന്നു. കാട്ടാക്കട സിഐടിയു ഏരിയാ കമ്മിറ്റി അംഗവും ബ്രാഞ്ച് കമ്മിറ്റി അംഗവും ഡിവൈഎഫ്ഐ മുൻ ഏരിയാ ജോയിന്‍റ് സെക്രട്ടറിയുമായ താന്നിവിള ശിവപ്രസാദ് ആണ് കോൺഗ്രസിൽ ചേർന്നത്. ഡിസിസി പ്രസിഡന്‍റ് എൻ. ശക്തൻ കോൺഗ്രസ് അംഗത്വം നൽകി സ്വീകരിച്ചു. ചടങ്ങിൽ കോൺഗ്രസ് നേതാക്കളായ അഡ്വ. എം. മണികണ്ഠൻ, അഡ്വ. ആർ.ആർ. സഞ്ജയ് കുമാർ, വി. മുത്തുകൃഷ്ണൻ, പെരിങ്ങമ്മല വിജയൻ, പള്ളിച്ചൽ സതീഷ്, കെ. പ്രതീഷ്, വെമ്പന്നൂർ അജി, പൂക്കോട് സുനിൽ എന്നിവർ പങ്കെടുത്തു.

നഗ്നത പ്രദർശനം: 45 കാനെ ശിക്ഷിച്ചു

കാട്ടാക്കട: ബസിനുള്ളിൽ പ്രായപൂർത്തിയാകാത്ത പെൺകുട്ടിക്കു നേരെ നഗ്നത പ്രദർശനവും ലൈംഗിക ചേഷ്ടകളും കാണിച്ച 45 കാരനു രണ്ടുവർഷം കഠിനതടവും പതിനായിരം രൂപ പിഴയും ശിക്ഷ വിധിച്ചു കാട്ടാക്കട അതിവേഗ പോക്സോ കോടതി. നെടുമങ്ങാട് ആനാട് കല്ലിയോട് തീർഥക്കര കുന്നുംപുറത്തു വീട്ടിൽ അനിൽകുമാറി(45) നെയാണ് കാട്ടാക്കട അതിവേഗ പോക് സോ കോടതി ജഡ്ജി എസ്. രമേഷ് കുമാർ ശിക്ഷിച്ചത്.

യുവതികളുടെ ചിത്രങ്ങള്‍ മോര്‍ഫ്‌ചെയ്തു പ്രചരിപ്പിച്ചവര്‍ അറസ്റ്റില്‍

പേരൂര്‍ക്കട: യുവതികളുടെ ചിത്രങ്ങള്‍ മോര്‍ഫ്‌ചെയ്ത് അശ്ലീല ദൃശ്യങ്ങളായി പ്രചരിപ്പിച്ച സംഭവത്തില്‍ രണ്ടുപേരെ പേരൂര്‍ക്കട പോലീസ് അറസ്റ്റുചെയ്തു. ഒന്നാംപ്രതി തൈക്കാട് ജഗതി അനന്തപുരി ഓഡിറ്റോറിയത്തിനു സമീപം കാവടിവിളാകം വീട്ടില്‍ വിഘ്‌നേഷ് (23), രണ്ടാംപ്രതി പള്ളിപ്പുറം തോന്നയ്ക്കല്‍ വിളയില്‍ വീട്ടില്‍ വിഷ്ണു (19) എന്നിവരാണ് അറസ്റ്റിലായത്. ഈവര്‍ഷം ജൂണ്‍മാസത്തിലാണ് കേസിന്നാസ്പദമായ സംഭവം. പ്രതികള്‍ക്കൊപ്പം പേരൂര്‍ക്കടയിലെ ഒരു സ്വകാര്യസ്ഥാപനത്തില്‍ ജോലിചെയ്തു വന്നിരുന്ന ആറു യുവതികളുടെ ചിത്രങ്ങള്‍ ഇന്‍സ്റ്റാഗ്രാംവഴി ഡൗണ്‍ലോഡ് ചെയ്യുകയും ശേഷം മോര്‍ഫ്‌ചെയ്ത് അശ്ലീലചിത്രങ്ങള്‍ക്കൊപ്പം ചേര്‍ത്ത് സോഷ്യല്‍ മീഡിയകള്‍ വഴി പ്രചരിപ്പിക്കുകയുമായിരുന്നു. യുവതികളുടെ സുഹൃത്തുക്കള്‍ വഴിയാണു തങ്ങളുടെ ചിത്രങ്ങള്‍ അശ്ലീലഫോട്ടോകളായി പ്രചരിക്കുന്നതായി ഇവര്‍ അറിയുന്നത്. തുടര്‍ന്ന് പേരൂര്‍ക്കട സ്റ്റേഷനില്‍ പരാതി നല്‍കുകയായിരുന്നു.

ജവഹര്‍നഗര്‍ വസ്തു തട്ടിപ്പ്; ഒരാൾക്കൂടി അറസ്റ്റിലായി

പേരൂര്‍ക്കട: ജവഹര്‍ നഗറിലെ വസ്തുവും വീടും തട്ടിയെടുത്തതുമായി ബന്ധപ്പെട്ടു അനന്തപുരി മണികണ്ഠന്‍റെ സുഹൃത്തും അറസ്റ്റില്‍. കല്ലയം വെട്ടിക്കുഴി ചാലില്‍ വീട്ടില്‍ സുനില്‍ ബാബു തോമസ് (42) ആണ് അറസ്റ്റിലായത്. സുനിലാണ് മണികണ്ഠനു കരകുളം സ്വദേശിനി വസന്തയെ പരിചയപ്പെടുത്തിക്കൊടുത്തത്. വസ്തുവുടമയായ ഡോറ അസറിയ ക്രിപ്‌സുമായി ഏറെ രൂപസാദൃശ്യമുള്ളയാളാണ് വസന്ത. ഡോറ നിലവില്‍ അമേരിക്കയില്‍ താമസിച്ചു വരികയാണ്. വസന്തയെയാണ് ഡോറ എന്ന നിലയില്‍ വ്യാജമായി ഉണ്ടാക്കിയ തിരിച്ചറിയല്‍ രേഖകളില്‍ കാണിച്ചിരിക്കുന്നത്. റിയല്‍ എസ്റ്റേറ്റ് ബിസിനസുമായി ബന്ധപ്പെട്ടാണ് മണികണ്ഠനും സുനിലും പരിചയപ്പെടുന്നത്. വസ്തുതട്ടിയെടുപ്പുമായി ബന്ധപ്പെട്ട് ധനനിശ്ചയ പ്രമാണത്തില്‍ കള്ളസാക്ഷിയായി ഒപ്പിട്ടിരിക്കുന്നതും സുനിലാണ്. അതേസമയം വ്യാജ പ്രമാണം ചമയ്ക്കാന്‍ എല്ലാ ഒത്താശയും തനിക്കു ചെയ്തുതന്നത് ചന്ദ്രസേനന്‍റെ മരുമകനായ അനില്‍ തമ്പിയാണെന്നു ചോദ്യം ചെയ്യലില്‍ അനന്തപുരി മണികണ്ഠന്‍ പറഞ്ഞു. 2014 മുതല്‍ ഡോറയുടെ ജവഹര്‍ നഗറിലെ വസ്തുവിലും വീടിലും അനില്‍ തമ്പിക്ക് നോട്ടമുണ്ടായിരുന്നുവെന്നും എന്നാല്‍ സാങ്കേതിക കാരണങ്ങളാല്‍ അതു ലഭിക്കാതെ വന്നതോടെയാണ് ഇയാള്‍ വസ്തുതട്ടിയെടുക്കുന്നതിനു മണികണ്ഠനെ കരുവാക്കിയതെന്നുമാണ് പോലീസിനു ലഭിക്കുന്ന സൂചന. ബിസിനസ് മാഗ്നറ്റായി അറിയപ്പെടുന്ന അനില്‍ തമ്പിയില്‍ നിന്നു രണ്ടുകോടിയോളം രൂപ മണികണ്ഠന്‍റെ അക്കൗണ്ടിലേക്കു വന്നിട്ടുള്ളതായി മ്യൂസിയം പോലീസിന്‍റെ പ്രത്യേക അന്വേഷണസംഘം കണ്ടെത്തി. കഴിഞ്ഞദിവസം ബംഗളൂരുവിലെ ഒരു ഹോട്ടലില്‍ നിന്നു പിടിയിലായ അനന്തപുരി മണികണ്ഠന്‍ റിമാന്‍ഡിലാണ്. അതേസമയം അസല്‍ പ്രമാണം ഹാജരാക്കാന്‍ പോലീസ് ആവശ്യപ്പെട്ട അനില്‍ തമ്പി ഒളിവിലാണ്. പ്രമാണം ഹാജരാക്കാനുള്ള സമയപരിധി കഴിഞ്ഞതോടെ പോലീസ് നടത്തിയ അന്വേഷണത്തിലാണ് അനില്‍ തമ്പി മുങ്ങിയതായി മനസ്സിലായത്. ഇയാളെ കണ്ടെത്തുന്നതിനുള്ള ശ്രമങ്ങള്‍ ഊര്‍ജിതമാക്കിയിട്ടുണ്ട്.

കാറ്റിൽപ്പെട്ട് വയോധികയ്ക്ക് ഗുരുതരപരിക്ക്

നെടുമങ്ങാട്: ശക്തമായ കാറ്റിൽപ്പെട്ട് ബസ് സ്റ്റോപ്പിൽ നിന്ന വയോധികയ്ക്കു ഗുരുതരപരിക്ക്. ആര്യനാട് പറണ്ടോട് സ്വദേശിനി ചിപ്പമ്മ (77)യ്ക്കാണ് പരിക്കേറ്റത്. നട്ടെല്ലു തകർന്ന വയോധികയെ തിരുവനന്തപുരം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ഇന്നലെ വൈകുന്നേരം വഴയില ജംഗ്ഷനിലെ സ്റ്റോപ്പിൽ ബസ് കാത്തു നിൽക്കവെയാണ് അപകടം. ബസ് സ്റ്റോപ്പിനു സമീപത്തെ ഏഴടിയോളം താഴ്ചയുള്ള കുഴിയിലാണ് ചിപ്പമ്മ കാറ്റിൽ തെറിച്ചുവീണത്. വഴയില ആറാംകല്ലിലുള്ള മകളുടെ വീട് സന്ദർശിച്ചശേഷം പനിക്കു മരുന്നു വാങ്ങാൻ പേരൂർക്കട ജനറൽ ആശുപത്രിയിൽ പോകാനായി ബസ് കാത്തുനിൽക്കുകയായിരുന്നു. കാറ്റിൽ ചിപ്പമ്മ കുഴിയിൽ തെറിച്ചു വീഴുന്നത് ശ്രദ്ധയിൽപ്പെട്ട എതിർവശത്തെ ചായക്കടക്കാരൻ നാട്ടുകാരെ വിവരം അറിയിക്കുകയായിരുന്നു

മനുഷ്യക്കടത്ത്: സാൽവേഷൻ ആർമി ദിനാചരണം നടത്തി

തിരുവനന്തപുരം: മനുഷ്യക്കടത്തിനെതിരായ അന്താരാഷ്ടദിനാചരണം സാൽവേഷൻ ആർമി സംസ്ഥാന മുഖ്യസ്ഥാനത്തു നടന്നു. സാൽവേഷൻ ആർമി ടെറിട്ടോറിയൽ കമാൻഡർ കേണൽ പ്രകാശ് ചന്ദ്ര പ്രധാൻ ഉദ്ഘാടനം ചെയ്തു. കേണൽ പ്രകാശ് ചന്ദ്ര പ്രധാൻ, വനിതാ ശുശ്രൂഷകളുടെ സംസ്ഥാന പ്രസിഡന്‍റ് കേണൽ റാണി ഫൂലെ പ്രധാൻ എന്നിവർ ചേർന്ന് ബ്ലൂ ഹാർട്ട് കാംപയിനിന്‍റെ ഭാഗമായ ബ്ലൂ റിബണ്‍ പിന്നിംഗ് നിർവഹിച്ചു. വനിതാ ശുശ്രൂഷകളുടെ സംസ്ഥാന സെക്രട്ടറി ലെഫ്.കേണൽ സോണിയ ജേക്കബ് പ്രതിജ്ഞ ചൊല്ലി. മുഖ്യ കാര്യദർശി ലെഫ്.കേണൽ ജേക്കബ് ജെ. ജോസഫ്, ആന്‍റി ഹ്യൂമൻ ട്രാഫിക്കിംഗ് സംസ്ഥാന കോ-ഓഡിനേറ്റർ മേജർ ലീലാമ്മ സ്റ്റീഫൻസണ്‍ എന്നിവർ പ്രസംഗിച്ചു.

വിസിക്കെതിരേ സമരം ശക്തമാക്കി എസ്എഫ്ഐ

തിരുവനന്തപുരം: കേരളാ സർവകലാശാല വൈസ് ചാൻസലർ ഡോ. മോഹനൻ കുന്നുമ്മലിനെതിരേ എസ്എഫ്ഐയുടെ പ്രതിഷേധ സമരം ഇന്നലെ വീണ്ടും ശക്തമാക്കി.ഇന്നലെ സർവകലാശാല ആസ്ഥാനത്തെത്തിയ വിസിയെ എസ് എഫ്ഐയുടെ നേതൃത്വത്തിൽ തടഞ്ഞു. ശ്രീനാരായണ ഗുരു ഓപ്പണ്‍ സർവകലാശാല വൈസ് ചാൻസലറുമായി ഉള്ള ചർച്ചയ്ക്ക് ശേഷം സർവകലാശാലയിൽനിന്നു മടങ്ങിയ വിസിയുടെ വാഹനമാണ് എസ്എസ്ഐ തടഞ്ഞത്. ജില്ലാ പ്രസിഡന്‍റ് ആർ. അവിനാഷ്, സെക്രട്ടറി എം.എ. നന്ദൻ എന്നിവർ സമരത്തിനു നേതൃത്വം നല്കി. വരും ദിവസങ്ങളിലും സമരം കൂടുതൽ ശക്തമാക്കാനാണ് എസ്എഫ്ഐയുടെ തീരുമാനം.

സ്വകാര്യ കൺസൾട്ടിംഗ് സ്ഥാപനത്തിൽ തീപിടിത്തം

കാട്ടാക്കട: കാട്ടാക്കടയിൽ സ്വകാര്യ കൺസൾട്ടിംഗ് സ്ഥാപനത്തിൽ തീപിടിച്ചു. പഞ്ചായത്ത് ഓഫീസിനു സമീപം പ്രവർത്തിക്കുന്ന വാസ്തു കൺസൾട്ടന്‍റ് ശിവരാജന്‍റെ ഉടമസ്ഥതയിലുള്ള എസ്.ആർ. കൺസട്ടിംഗ് സ്ഥാപനത്തിനാണ് ഇന്നലെ രാവിലെ 10 മണിയോടെ തീപിടിച്ചത്. സ്ഥാപന ഉടമ രാവിലെ സ്ഥാപനം തുറന്നു വിളക്കു കത്തിച്ചശേഷം പുറത്തിറങ്ങിയപ്പോഴാണു തീപിടുത്തമുണ്ടായത്. ഉടൻ തന്നെ സമീപത്തെ കടക്കാരും പ്രദേശവാസികളും ചേർന്നു തീയണച്ചതിനാൽ വലിയ ദുരന്തം ഒഴിവായി.

ആഡംബര കാറിൽ കടത്തിയ 500 ഗ്രാം എംഡിഎംഎ പിടികൂടി

വിഴിഞ്ഞം: സ്ത്രീയെയും കുട്ടികളെയും മറയാക്കി ആഡംബര കാറിൽ മയക്കുമരുന്ന് കടത്ത്. 500 ഗ്രാം എംഡിഎംഎയും, ഒൻപത് ഗ്രാം ഹൈബ്രിഡ് കഞ്ചാവും പോലീസ് പിടികൂടി. യുവതിയും യുവാക്കളും അറസ്റ്റിൽ. കൈക്കുഞ്ഞ് ഉൾപ്പെടെ മൂന്നു കുട്ടികളും കാറിലുണ്ടായിരുന്നു.കടത്താനുപയോഗിച്ച കാറും കസ്റ്റഡിയിലായി. കരമന മേലാറന്നൂർ തരമായിൽ വീട്ടിൽനിന്നും വട്ടിയൂർക്കാവ് എ ജെ ബാറിനു പുറകുവശം ഐഎഎസ് കോളനിയിൽ താമസിക്കുന്ന ശ്യാം (35), ആര്യനാട് കടുവാക്കുഴി കുരിശടി പള്ളിവേട്ട നൗഫൻ മൻസിൽ മുഹമ്മദ് നൗഫൽ (24), തിരുവനന്തപുരം ജിപി ഒ ഫ്ലാറ്റ് നമ്പർ 219, രാജാജി നഗറിൽ സഞ്ജയ് (26), മലയിൻകീഴ് കുഴിതാലുംകോട് രാമചന്ദ്രസദനത്തിൽനിന്നു വട്ടിയൂർക്കാവ് ഐഎഎസ് കോളനിക്ക് സമീപം തൊഴുവൻകോട് ക്ഷേത്രത്തിനു പുറകുവശം താമസിക്കുന്ന രശ്മി (31), രശ്മിയുടെ പത്തും, നാലരയും ഒന്നരയും വയസുള്ള മൂന്നു കുട്ടികൾ എന്നിവ രാണ് കോവളം പോലീസിന്‍റെ കസ്റ്റഡിയിലായത്. ഇന്നലെ വൈകുന്നേരം മൂന്നരയോടെ കോവളം ജംഗഷനിലായിരുന്നു വൻ മയക്കുമരുന്നു വേട്ട. കാറിൽ മയക്കുമരുന്നു മായി ഒരു സംഘം ബാംഗ്ലൂരിൽനിന്നു തലസ്ഥാനത്തേക്കു വരുന്നതായ രഹസ്യവിവരത്തിന്‍റെ അടിസ്ഥാനത്തിൽ മയക്കുമരുന്നു വേട്ടയ്ക്കു നേതൃത്വം നൽകുന്ന ഡാൻസാഫ് സംഘം രാവിലെ മുതൽ കോവളത്ത് കാത്തിരുന്നു. ബംഗളൂരുവിൽനിന്നു കന്യാകുമാരി വഴി കോവളം ബൈപ്പാസിലൂടെ വരുന്ന സംഘം കാഞ്ഞിരംകുളത്ത് എത്തിയതായറിഞ്ഞ പോലീസ് ഇവരെ പിടികൂടാനുള്ള കരുക്കൾ നീക്കുകയായിരു ന്നു. കോവളം ജംഗ്ഷനിൽ ഗതാഗതം നിയന്ത്രിച്ചു വാഹന പരിശോധന നടത്തുന്നതിനിടയിൽ എത്തിയ കാർ ട്രാഫിക് കുരുക്കിൽപ്പെട്ടു. രക്ഷപ്പെടാനുള്ള ശ്രമത്തിനിടയിൽ കോവളം പോലീസിന്‍റെ സഹായത്തോടെ സംഘത്തെ വലയിലാക്കി. തുടർന്നു നടത്തിയ പരിശോധനയിൽ കാറിന്‍റെ ഡിക്കിയിൽ പൊതികളിലാക്കി ഒളിപ്പിച്ച നിലയിൽ മയക്കുമരുന്നു കണ്ടെത്തുകയായിരുന്നു. ചോദ്യം ചെയ്യലിൽ ബംഗളൂരു വിൽനിന്നു വാങ്ങിയതാണെന്ന് പ്രതികൾ മൊഴി നൽകി. ബംഗ ളൂരുവിൽനിന്നു കന്യാകുമാരിയിൽ തങ്ങിയ ശേഷമാണ് കേരളത്തിലേക്കുള്ള സംഘത്തിന്‍റെ വരവ്. വാങ്ങിയ വിലയേക്കാൾ മൂന്നിരട്ടി ലാഭമാണ് കേരളത്തിൽ വിൽക്കുന്നതു വഴി സംഘത്തിനുണ്ടാകുന്നതെന്നും അധികൃതർ അറിയിച്ചു. മൂന്നു വർഷം മുൻപ് ലഹരി ക്കടത്തുമായി ബന്ധപ്പെട്ടു ജയിലിലായിരുന്ന ശ്യാം അടുത്ത കാലത്താണ് പുറത്തിറങ്ങിയത്. പ്രധാന കണ്ണിയായ ചെങ്കൽച്ചൂള സ്വദേശിയെ പിടികൂടി നടത്തിയ ചോദ്യം ചെയ്യലിലാണു സംഘത്തെക്കുറിച്ചുള്ള വിവരം ലഭിച്ചതെന്നും അറിയുന്നു.

സമൂഹത്തെ ബാധിക്കുന്ന വിഷയങ്ങൾ കൈകാര്യം ചെയ്യുന്നതിലെ മികവ് മാനേജ്മെന്‍റിൽ പ്രധാനം: ഗവർണർ

തിരുവനന്തപുരം: സമൂഹത്തെ ബാധിക്കുന്ന വിഷയങ്ങൾ കൈകാര്യം ചെയ്യുന്നതിലെ മികവാണ് മാനേജ്മെന്‍റിൽ ഏറ്റവും പ്രധാനമെന്ന് ഗവർണർ രാജേന്ദ്ര വിശ്വനാഥ് അർലേക്കർ. ട്രിവാൻഡ്രം മാനേജ്മെന്‍റ് അസോസിയേഷന്‍റെ (ടിഎംഎ) ദ്വിദിന വാർഷിക മാനേജ്മെന്‍റ് കണ്‍വെൻഷൻ "ട്രിമ-2025’ ഉദ്ഘാടനം ചെയ്യുകയായിരുന്നു അദ്ദേഹം. കോർപ്പറേറ്റ് അഫയേഴ്സ് ഉൾപ്പെടെ ഏതു മേഖലയിലും മാനേജ്മെന്‍റ് മികവാണ് യഥാർഥത്തിൽ പരീക്ഷിക്കപ്പെടുന്നതെന്നും ഗവർണർ പറഞ്ഞു. ഒരു പ്രശ്നത്തെ നേരിടാനും മികച്ച രീതിയിൽ കൈകാര്യം ചെയ്യാനുമുള്ള നേതൃപാടവത്തിനും മാനേജ്മെന്‍റ് മികവിനുമുള്ള മികച്ച ഉദാഹരണമാണ് പഹൽഗാം ആക്രമണത്തെ തുടർന്നുണ്ടായ ഓപ്പറേഷൻ സിന്ദൂറെന്നും ഗവർണർ കൂട്ടിച്ചേർത്തു. ലോകത്തെ സാരമായി ബാധിക്കുന്ന പ്രശ്നങ്ങളിൽ ഇടപെടുന്പോഴാണ് നേതൃമികവ് പരീക്ഷിക്കപ്പെടുന്നതെന്നു മുഖ്യപ്രഭാഷണം നടത്തിയ ഇന്ത്യൻ വ്യോമസേനയുടെ സതേണ്‍ എയർ കമാൻഡിലെ എയർ ഓഫീസർ കമാൻഡിംഗ്-ഇൻ-ചീഫ് എയർ മാർഷൽ മനീഷ് ഖന്ന പറഞ്ഞു. ഭാവി നേതൃത്വത്തെ രൂപപ്പെടുത്തുന്നതിനായി മികവിന്‍റെ കേന്ദ്രം സ്ഥാപിക്കുന്നതിനുള്ള രൂപരേഖ കണ്‍വൻഷനിൽ അവതരിപ്പിക്കുമെന്ന് സ്വാഗതപ്രസംഗത്തിൽ ട്രിമ ചെയർമാനും എച്ച്എൽഎൽ ലൈഫ് കെയറിന്‍റെ സിഎംഡിയുമായ ഡോ. എം. അയ്യപ്പൻ പറഞ്ഞു.

തിരുവനന്തപുരം കോർപറേഷനിൽ പട്ടികജാതി-വർഗ ഫണ്ട് തട്ടിപ്പ്: ജീവനക്കാരടക്കം 14 പേർ അറസ്റ്റിൽ

തിരുവനന്തപുരം: കോർപറേഷനിലെ പട്ടിക ജാതി- വർഗ, ബിപിഎൽ വിഭാഗ ഫണ്ട് തട്ടിപ്പുമായി ബന്ധപ്പെട്ടു തിരുവനന്തപുരം കോർപറേഷൻ ജീവനക്കാർ അടക്കം 14 പേരെ വിജിലൻസ് അറസ്റ്റ് ചെയ്തു. തിരുവനന്തപുരം നഗരസഭയുടെ 2020-21 സാന്പത്തിക വർഷത്തിലെ എസ്‌സി-എസ്ടി വിഭാഗത്തിലെ വനിതകൾക്കും ബിപിഎൽ വിഭാഗത്തിലെ വനിതകൾക്കും സംരംഭകത്വം തുടങ്ങുന്നതിനായി വായ്പാ സബ്സിഡി വിതരണം ചെയ്തതുമായി ബന്ധപ്പെട്ട് വിജിലൻസ് രജിസ്റ്റർ ചെയ്ത രണ്ടു കേസുകളിലാണ് അറസ്റ്റ്. തിരുവനന്തപുരം കോർപ്പറേഷനിൽ ഇൻഡസ്ട്രിയൽ എക്സ്റ്റൻഷൻ ഓഫീസർമാരായി ജോലി നോക്കിയിരുന്ന തിരുവനന്തപുരം കാഞ്ഞിരംകുളം സ്വദേശി പ്രവീണ്‍രാജ്, ബാലരാമപുരം സ്വദേശി എം.ബി. ഷെഫിൻ, പട്ടം സർവീസ് സഹകരണ ബാങ്ക് മാനേജർ സോണി എന്നിവർ അടക്കമുള്ളവരാണ് അറസ്റ്റിലായത്. സംരംഭകത്വം തുടങ്ങാനായി വായ്പാ സബ്സിഡി വിതരണം ചെയ്തതുമായി ബന്ധപ്പെട്ടു നിരവധി അഴിമതി ആരോപണങ്ങൾ ഉയർന്നിരുന്നു. 2020-21 സാന്പത്തിക വർഷത്തിൽ തിരുവനന്തപുരം നഗരസഭാ പരിധിയിൽ താമസിക്കുന്ന എസ്‌സി-എസ്ടി വിഭാഗത്തിലെ വനിതകൾക്ക് സംരംഭകത്വം തുടങ്ങാൻ 1.26 കോടി രൂപയും ബിപിഎൽ വിഭാഗം വനിതകൾക്ക് സംരംഭകത്വം തുടങ്ങാൻ 1.14 കോടി രൂപയും സബ് സിഡി ലോണായി അനുവദിച്ചിരുന്നു. എന്നാൽ സബ്സിഡി മാനദണ്ഡങ്ങൾ പാലിക്കാതെ നഗരസഭ കൗണ്‍സിൽ അംഗീകരിച്ച ഗുണഭോക്തൃ ലിസ്റ്റിൽ ഉൾപ്പെടാത്ത വ്യക്തികൾക്ക് പദ്ധതി മാർഗരേഖകൾ ലംഘിച്ച് സബ്സിഡി അനുവദിച്ചും രേഖകൾ ഓഫീസിൽ നിന്നു മാറ്റി തെളിവുകൾ നശിപ്പിച്ചിരുന്നു. പട്ടം സർവീസ് സഹകരണ ബാങ്ക് വഴി ഇടനിലക്കാരിയായ സിന്ധു ആരംഭിച്ച അശ്വതി സപ്ലൈയേഴ്സ് എന്ന വ്യാജ സ്ഥാപനത്തിന്‍റെ ബാങ്ക് അക്കൗണ്ടിലേക്കും അവിടെ നിന്നു മറ്റ് ഇടനിലക്കാരുടെഅക്കൗണ്ടുകളിലേക്കും തുക മാറ്റി അഴിമതി നടത്തിയെന്നാണു കേസ്. ഇടനിലക്കാരായി പ്രവർത്തിച്ച മണക്കാട് സ്വദേശി ശ്രീകുമാർ, കഴക്കൂട്ടം സ്വദേശി സുരേഷ് ബാബു, കോവളം സ്വദേശി അനിരുദ്ധൻ, തിരുവല്ലം സ്വദേശി ബിന്ദു, ബാലരാമപുരം സ്വദേശി അശ്വതി, മുട്ടയ്ക്കാട് സ്വദേശി അശ്വതി, വഞ്ചിയൂർ സ്വദേശി മോനിശേഖർ, ബാലരാമപുരം സ്വദേശി ഷിബിൻ, കല്ലിയൂർ സ്വദേശി വിഷ്ണു എന്നിവരാണ് അറസ്റ്റിലായ മറ്റുള്ളവർ. ജീവനക്കാരെ കൂടാതെ ഇടനിലക്കാരായി പ്രവർത്തിച്ച മൂന്നാറ്റുമുക്ക് സ്വദേശി സിന്ധു, പൂങ്കുളം സ്വദേശി അജിത എന്നിവരെയും അറസ്റ്റ് ചെയ്തു.

പ്ലസ് വണ്‍ വിദ്യാര്‍ഥിനി തൂങ്ങിമരിച്ച നിലയില്‍

നെയ്യാറ്റിന്‍കര : പ്ലസ് വണ്‍ വിദ്യാര്‍ഥിനിയെ വീടിനുള്ളില്‍ തൂങ്ങിമരിച്ച നിലയില്‍ കണ്ടെത്തി. നെയ്യാറ്റിന്‍കര ഊരൂട്ടുകാലയില്‍ രാജേഷിന്‍റെയും പ്രീതയുടെയും മകള്‍ പി.ആര്‍. പ്രതിഭ (16) യെയാണ് കഴിഞ്ഞ ദിവസം വീടിനുള്ളിലെ മുറിയില്‍ തൂങ്ങിമരിച്ച നിലയില്‍ കണ്ടെത്തിയത്. നെയ്യാറ്റിന്‍കര ഗവ. ഗേള്‍സ് ഹയര്‍സെക്കന്‍ഡറി സ്കൂളിലെ പ്ലസ് വണ്‍ വിദ്യാര്‍ഥിനിയായിരുന്നു. നെയ്യാറ്റിന്‍കര പോലീസ് കേസെടുത്തു. പോസ്റ്റുമോര്‍ട്ടത്തിനു ശേഷം മൃതദേഹം ബന്ധുക്കള്‍ക്ക് വിട്ടു നല്‍കിയതായി പോലീസ് അറിയിച്ചു.

ദമ്പതികൾക്ക് ഡോക്ടറേറ്റ്

തിരുവനന്തപുരം: ബംഗളുരു ക്രൈസ്റ്റ് യൂണിവേഴ്സിറ്റിയിൽ നിന്നു ദമ്പതികൾക്ക് ഡോക്ടറേറ്റു ലഭിച്ചു. കണ്ണമ്മൂല ആട്ടറ ലെയിൻ കെആർഎ - ഡി 13-ൽ മനോജ് ആർ. നായരുടെയും കെ. ശോഭനയുടെയും മകൾ എം. ഗായത്രിക്ക് മാത്തമാറ്റിക്സിലും ഭർത്താവ് ഉജ്ജ്വൽ കൃഷ്ണന് ആസ്ട്രോ ഫിസിക്സിലുമാണ് ഡോക്ടറേറ്റു ലഭിച്ചത്. നൂറനാട് പടനിലം എള്ളുംവിളയിൽ വി. ഉണ്ണികൃഷ്ണന്‍റെയും പി. ലേഖയുടെയും മകനാണ് ഉജ്ജ്വൽ കൃഷ്ണൻ.

ഖാദി ബോര്‍ഡ് പ്രതിനിധി സംഘം പാംഗൂര്‍ ഫെഡറേഷന്‍ സന്ദര്‍ശിച്ചു

പാറശാല: ഖാദി ബോര്‍ഡ് വൈസ് ചെയര്‍മാന്‍ പി. ജയരാജനും സെക്രട്ടറി ഡോ. കെ.എ. രതീഷും ഉള്‍പ്പെടയുള്ള സംഘം തിരുവനന്തപുരം ജില്ലാ പനവിഭവ സഹകരണ ഫെഡറേഷന്‍ സന്ദര്‍ശിച്ചു. കഴിഞ്ഞ ദിവസം വൈകുന്നേരം മൂന്നിന് ഇഞ്ചിവിളയിലെ ഫെഡറേഷന്‍ ആസ്ഥാനത്തിലെ പനം കരിപ്പട്ടി നിര്‍മാണ യൂണിറ്റ് , പാംകോള നിര്‍മാണ യൂണിറ്റ്, പന ഉല്പന്ന കരകൗശല യൂണിറ്റ് എന്നിവ നേരിട്ട് കണ്ടു വിലയിരുത്തിയ സംഘം ഫെഡറേഷന്‍റെ പ്രവര്‍ത്തനങ്ങളെ അഭിനന്ദിച്ചു. ഫെഡറേഷന്‍ പ്രസിഡന്‍റ് എ. രാമനാഥന്‍ നാടാര്‍, സെക്രട്ടറി വിന്‍സന്‍റ്,് ബോര്‍ഡ് അംഗങ്ങളായ ശോഭനദാസ്, അനീഷ് ആന്‍റണി എന്നിവര്‍ ചേർന്നു സംഘത്തെ സ്വീകരിച്ചു.

ബിഎസ്എൻഎൽ ടവർ ജനറേറ്ററിനു തീപിടിച്ചു

നെയ്യാർഡാം : നെയ്യാർ ഡാമിനു സമീപം പള്ളിക്കു പുറകു വശം ബിഎസ്എൻഎൽ ടവറിന്‍റെ ജനറേറ്ററിനു തീപിടിച്ചു. നാലരയോടെയായിരുന്നു സംഭവം. കള്ളിക്കാട് നിന്നും അഗ്നി രക്ഷാസേനയെത്തി തീ നിയന്ത്രണവിധേയമാക്കി. അതേ സമയം ഇവിടെ എത്തിപ്പെടാനുള്ള പ്രയാസം സേനാംഗങ്ങൾ നേരിട്ടു. തുടർന്ന് ഫോഗ് ഉൾപ്പെടെയുള്ള അഗ്നിശമന ഉപകരണങ്ങൾവച്ചു തീ കെടുത്തി ഡീസൽ ചോർച്ചയാണ് തീപിടുത്തത്തിനു കാരണമെന്നു പ്രാഥമിക നിഗമനം ഈ ടവറിൽ ബിഎസ്എൻഎൽ കണക്ഷൻ ഉൾപ്പടെ അറ്റാച്ച് ചെയ്തിട്ടുണ്ട്. കമ്പനിയിൽനിന്നും ടെക്‌നീഷ്യൻവന്നു ശരിയാക്കിയാൽ മാത്രമേ സിഗ്നൽ പുനഃസ്ഥാപിക്കാൻ കഴിയൂ.

സംസ്‌കൃത കോളജ് വളപ്പിലെ മരം റോഡിലേക്കു വീണു

പേരൂര്‍ക്കട: പാളയം സംസ്‌കൃത കോളജ് വളപ്പില്‍ മതിലിനോടു ചേര്‍ന്നു നിന്നിരുന്ന കൂറ്റന്‍ തണല്‍മരം വേരോടെ പിഴുതു റോ ഡിലേക്കു വീണു. കോളജിലെത്തന്നെ രണ്ടു വിദ്യാര്‍ഥികള്‍ തലനാരിഴയ്ക്കു രക്ഷപ്പെട്ടു. ഇന്നലെ ഉച്ചതിരിഞ്ഞു 1.30നായിരു ന്നു സംഭവം. നഗരത്തില്‍ വീശിയടിച്ച അതിശക്തമായ കാറ്റിലാണു മരം പിഴുതു സമീപത്തെ റോഡിലേക്കു വീണത്. ഈ സമയത്ത് അതുവഴി നടന്നുപോകുകയായിരുന്ന രണ്ടുപേരാണ് ഓടിമാറി രക്ഷപ്പെട്ടത്. അതേസമയം മതിലിനോടു ചേര്‍ന്നു പാര്‍ക്ക് ചെയ്തിരുന്ന മാരുതി ഓള്‍ട്ടോ കാറിന്‍റെ മുന്‍വശത്തെ ഗ്ലാസുകള്‍ മരച്ചില്ലവീണു തകര്‍ന്നു. തിരുവനന്തപുരം ഫയര്‍‌സ്റ്റേഷനില്‍ നിന്ന് സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ സജികുമാറും സംഘവുമെത്തിയാണ് മരശിഖരങ്ങള്‍ മുറിച്ചുനീക്കി ഗതാഗതം പുനഃസ്ഥാപിച്ചത്.

കെഎസ്ഇബി പെൻഷണേഴ്‌സ് കൂട്ടായ്മ ഡിവിഷൻ സമ്മേളനം

നെടുമങ്ങാട്: ആനുകൂല്യനിഷേധത്തിനു പിന്നിൽ ഗൂഢാലോചന നടക്കുന്നതായി കെഎസ്ഇബി പെൻഷണേഴ്‌സ് കൂട്ടായ്മ നെടുമങ്ങാട് ഡിവിഷൻ സമ്മേളനം ആരോപിച്ചു. നെടുമങ്ങാട് ഉമ്മൻചാണ്ടി ഹൗസിൽ നടന്ന സമ്മേളനത്തിൽ ഡിവിഷൻ പ്രസിഡന്‍റ് ഷാജി പുന്നിലം അധ്യക്ഷത വഹിച്ചു. സംസ്ഥാന ജനറൽ സെക്രട്ടറി. എ.വി. വിമൽചന്ദ് ഉദ്ഘാടനം ചെയ്തു. സംസ്ഥാന സെക്രട്ടറി സി.എൻ. സനൽകുമാർ മുഖ്യ പ്രഭാഷണം നടത്തി. ജില്ലാ പ്രസിഡന്‍റ് കെ.ജി. സുരേഷ്‌കുമാർ, ജില്ലാ സെക്രട്ടറി എൻ. ബാലഗോപാൽ, എം. നസീർ, വിനോബ താഹ, വി.എൽ. ഇന്ദുലാൽ എന്നിവർ സംസാരിച്ചു. സകീർ ഹുസൈൻ നന്ദി പറഞ്ഞു. ഭാരവാഹികളായി ഷാജി പുന്നിലം -രക്ഷാധികാരി, വി.എൽ. ഇന്ദുലാൽ- പ്രസിഡന്‍റ്, എ. ബഷീർ സാഹീബ് - സെക്രട്ടറി, നജീബ് ബാബു - വൈസ് പ്രസിഡന്‍റ്, ടി. മുരളിധരൻ- ജോയിന്‍റ് സെക്രട്ടറി, എസ്. ജാഫർഖാൻ - ട്രഷറർ, എം. നസീർ - വെൽഫയർ സമിതി കൺവീനർ, ആനാട് ജയചന്ദ്രൻ, എം. ഗോപാലകൃഷ്ണൻ നായർ, കെ. അജയകുമാർ, ബി. എസ്. ഉദയകുമാർ, എ. ഷാഹുൽ - എക്സിക്യൂട്ടീവ് കമ്മിറ്റി അംഗങ്ങൾ എന്നിവരെ തിരഞ്ഞെടുത്തു.

മാതൃ-ശിശു ആരോഗ്യരംഗത്ത് കേരളം മുന്നില്‍: മന്ത്രി വീണാ ജോർജ്

മെഡിക്കല്‍കോളജ്: മാതൃ-ശിശു മരണ നിരക്ക് കേരളത്തില്‍ വളരെക്കുറവാണെന്നും ആരോഗ്യകാര്യത്തില്‍ കേരളം മുന്നില്‍നില്‍ക്കുന്നതിന്‍റെ തെളിവാണ് ഇതെന്നും ആരോഗ്യമന്ത്രി വീണ ജോര്‍ജ്. കമ്മ്യൂണിറ്റി മെഡിസിന്‍ വിഭാഗത്തിന്‍റെ ആഭിമുഖ്യത്തില്‍ 15-ാമത് സ്റ്റുഡന്‍റ്സ് മെഡിക്കല്‍ റിസര്‍ച്ച് ദ്വിദിന ദേശീയ കോണ്‍ഫറന്‍സ് ഉദ്ഘാടനം ചെയ്യുകയായിരുന്നു മന്ത്രി. മെഡിക്കല്‍ വിദ്യാഭ്യാസ ഡയറക്ടര്‍ ഡോ. കെ.വി വിശ്വനാഥന്‍ അധ്യക്ഷത വഹിച്ചു. സ്‌കൂള്‍ ഓഫ് പബ്ലിക് ഹെല്‍ത്ത് ഡയറക്ടര്‍ ഡോ. തോമസ് മാത്യു, മെഡിക്കല്‍ കോളജ് പ്രിന്‍സിപ്പല്‍ ഡോ. പി.കെ. ജബ്ബാര്‍, വൈസ് പ്രിന്‍സിപ്പല്‍ ഡോ. കെ.ബി. ഉഷാദേവി, ഇന്ത്യന്‍ അസോസിയേഷന്‍ ഫോര്‍ അഡോളസന്‍റ് ഹെല്‍ത്ത് സെക്രട്ടറി ജനറല്‍ ഡോ. ജുഗല്‍ കിഷോര്‍, കമ്യൂണിറ്റി മെഡിസിന്‍ വിഭാഗം മേധാവി ഡോ. യു. അനുജ, ഡോ. അനിത, ഡോ. ജോണ്‍ പണിക്കര്‍ എന്നിവര്‍ പ്രസംഗിച്ചു. വിവിധ സംസ്ഥാനങ്ങളില്‍ നിന്നായി 450 പ്രതിനിധികള്‍ സമ്മേളനത്തില്‍ പങ്കെടുക്കുന്നുണ്ട്. 90 പോസ്റ്റ് ഗ്രാജുവേറ്റ് വിദ്യാര്‍ഥികളുമുണ്ട്. ഉദ്ഘാടനശേഷം കൗമാര ആരോഗ്യവുമായി ബന്ധപ്പെട്ട് വിവിധ വിഷയങ്ങളില്‍ പ്രബന്ധാവതരണം ഉണ്ടായിരുന്നു.

നെയ്യാറ്റിന്‍കര നഗരസഭയുടെ ഓണസമ്മാനമായി ജെ.സി. ഡാനിയല്‍ ഓപ്പണ്‍ എയര്‍ ഓഡിറ്റോറിയം

നെയ്യാറ്റിൻകര: മലയാള സിനിമയുടെ പിതാവ് ജെ.സി. ഡാനിയലിന്‍റെ സ്മരണാര്‍ഥം നഗരസഭാ സ്റ്റേഡിയത്തിൽ യാഥാര്‍ഥ്യമാക്കുന്ന ഓപ്പൺ എയർ ഓഡിറ്റോറിയത്തിന്‍റെ നിര്‍മാണ പ്രവൃത്തികള്‍ ഏറെക്കുറെ പൂര്‍ത്തിയായി. വൈദ്യുതീകരണം, പ്രോജക്ടര്‍ സ്ഥാപിക്കല്‍ മുതലായ പ്രവൃത്തികള്‍ കൂടി പൂര്‍ണമാകുന്നതോടെ ഓഡിറ്റോറിയം ഈ വര്‍ഷം ഓണത്തിനു മുന്പുതന്നെ പൊതുജനങ്ങള്‍ക്കായി തുറന്നു കൊടുക്കാനാകുമെന്നാണ് പ്രതീക്ഷിക്കുന്നതെന്നു നഗരസഭ ചെയര്‍മാന്‍ പി.കെ രാജമോഹനന്‍ "ദീപിക'യോട് പറഞ്ഞു. 2023 -2024 സാമ്പത്തിക വർഷത്തിൽ നഗരസഭയുടെ പ്ലാൻ ഫണ്ടിൽ നിന്നും 25 ലക്ഷം രൂപ ഓപ്പൺ എയർ ഓഡിറ്റോറിയത്തിന്‍റെ നിർമാണ പൂർത്തീകരണത്തിനായി നേരത്തേ വകയിരുത്തിയിരുന്നു. നഗരസഭ ചെയർമാൻ സാംസ്കാരിക മന്ത്രിക്ക് നൽകിയ നിവേദനത്തിന്‍റെ ഭാഗമായി സാംസ്കാരിക വകുപ്പ് അനുവദിച്ച 25 ലക്ഷം രൂപയും ഓപ്പണ്‍ എയര്‍ ഓഡിറ്റോറിയം പദ്ധതിക്ക് മുതല്‍ക്കൂട്ടായി. ഒരേ സമയം 250 പേർക്ക് ഇരിക്കാവുന്ന ബാൽക്കണി സംവിധാനത്തോടുകൂടിയുള്ള ഓപ്പൺ ഓഡിറ്റോറിയമാണ് നിര്‍മിക്കുന്നത്. വിനോദത്തിനും വിജ്ഞാനത്തിനുമായി പൊതുഇടങ്ങൾ നിർമിക്കുന്നതിന്‍റെ ഭാഗമായൊരുങ്ങുന്ന ഓപ്പണ്‍ എയര്‍ ഓ‍ഡിറ്റോറിയം പകൽ സമയം സാംസ്കാരിക പരിപാടികൾക്കും രാത്രികാലങ്ങളിൽ സിനിമ പ്രദർശനത്തിനും ഉപയോഗിക്കാം. കേരളത്തില്‍ ജെ.സി. ഡാനിയലിന്‍റെ പൂര്‍ണകായ പ്രതിമയുള്ള ഏക സ്മാരകമാണ് നെയ്യാറ്റിന്‍കര നഗരസഭ സ്റ്റേഡിയത്തില്‍ സ്ഥിതി ചെയ്യുന്നത്. ഓപ്പണ്‍ എയര്‍ ഓഡിറ്റോറിയത്തിനു സമീപത്തു തന്നെയാണ് ഫിലിം റോള്‍ പരിശോധിക്കുന്ന ഡാനിയലിന്‍റെ പ്രതിമയുള്ളത്.

കുഞ്ഞിന്‍റെ വിരല്‍ ഗ്ലാസില്‍ കുടുങ്ങി

പേരൂര്‍ക്കട: നാലുവയസുകാരിയുടെ വിരല്‍ ഗ്ലാസില്‍ കുടുങ്ങിയതു സമയോചിതമായ ഇടപെടലിലൂടെ ഫയര്‍ഫോഴ്‌സ് സംഘം പുറത്തെടുത്തു. നീറമണ്‍കര വിനായക നഗര്‍ സ്വദേശിനിയായ നാലുവയസുകാരിയുടെ വിരലാണ് കുടുങ്ങിയത്. കഴിഞ്ഞദിവസം വൈകുന്നേരം അഞ്ചിനായിരുന്നു സംഭവം. കരമന മാര്‍ക്കറ്റ് റോഡിലെ സേവന മെഡിക്കല്‍സില്‍ രക്ഷിതാവിനൊപ്പം എത്തിയതായിരുന്നു കുട്ടി. രക്ഷിതാവ് പുറത്തുനിന്നു മരുന്നു വാങ്ങുന്നതിനിടെ കുട്ടിയുടെ വിരല്‍ ഗ്ലൈഡിംഗ് ഗ്ലാസിനിടയില്‍പ്പെടുകയായിരുന്നു. കുട്ടിയുടെ നിലവിളി ഉയര്‍ന്നതോടെ മെഡിക്കല്‍സ്റ്റോറിലെ ജീവനക്കാര്‍ അമ്പരന്നുപോയി. സമീപത്തുണ്ടായിരുന്നവരാണ് തിരുവനന്തപുരം ഫയര്‍സ്റ്റേഷനില്‍ വിവരമറിയിച്ചത്. സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ സുധീറും സംഘവുമാണ് കട്ടര്‍ ഉപയോഗിച്ച് ഗ്ലാസ് നീക്കി കുട്ടിയെ രക്ഷിച്ചത്.

കഴക്കൂട്ടം ഔവർ പബ്ലിക് സ്കൂളിൽ "സക്സസ് 2025' അവാർഡ് ദാനം

കഴക്കൂട്ടം: ഔവർ പബ്ലിക് സ്കൂളിൽ നടത്തിയ "സക്സസ് 2025' അവാർഡ് ദാന ചടങ്ങ് കടകംപള്ളി സുരേന്ദ്രൻ എംഎൽഎ ഉദ്ഘാടനം ചെയ്തു. ഔവർ പബ്ലിക്‌ സ്കൂൾ ചെയർമാൻ കെ. വാസുദേവൻ അധ്യക്ഷത വഹിച്ചു. പ്രിൻസിപ്പൽ ശ്രീകലാ നായർ ആശംസയർപ്പിച്ചു. റോളുദോൻ വിൻസന്‍റ്, കാര്യവട്ടം ശ്രീകണ്ഠൻ നായർ, ഫാ. ബിനു ജോസഫ് അലക്സ്, ജി. ഇ ഏബ്രഹാം, അഡ്വ. ശ്രീകുമാർ, എം.എസ്. അനിൽകുമാർ, കൗൺസിലർ കവിത എസ്. നായർ, മാനേജർ കെ. കമലാക്ഷി എന്നിവർ പങ്കെടുത്തു. മുപ്പതഞ്ചോളം വിദ്യാലയങ്ങളിൽനിന്നും മുന്നൂറോളം വിദ്യാർഥികൾക്ക് മൊമെന്‍റോയും മെഡലും നൽകി ആദരിച്ചു.

ജവഹർനഗർ വസ്തു തട്ടിപ്പുകേസ്: അനന്തപുരി മണികണ്ഠന്‍ അറസ്റ്റില്‍

പിടിയിലായത് ബംഗലൂരുവിലെ ഹോട്ടലില്‍ നിന്ന് പേരൂര്‍ക്കട: വ്യാജരേഖ ചമച്ച് കവടിയാര്‍ ജവഹര്‍ നഗറിലെ വസ്തുവും വീടും തട്ടിയ കേസിലെ പ്രധാന പ്രതി അറസ്റ്റില്‍. ആറ്റുകാല്‍ പുത്തന്‍കോട്ട ശിവക്ഷേത്രത്തിനു സമീപം എം.ആര്‍. ഹില്‍സ് ഹൗസ് നമ്പര്‍ 17 ഗണപതിഭദ്ര വീട്ടില്‍ അനന്തപുരി മണികണ്ഠന്‍ എന്നറിയപ്പെടുന്ന സി.എ. മണികണ്ഠന്‍ (46) ആണ് അറസ്റ്റിലായത്. നിലവില്‍ ഇയാള്‍ മേലാംകോടിനു സമീപം മണ്ണടി ശിവക്ഷേത്രത്തിനടുത്തുള്ള ഒരു വീട്ടില്‍ വാടകയ്ക്കു താമസിച്ചു വരികയായിരുന്നു. മ്യൂസിയം സിഐ എസ്. വിമല്‍, എസ്ഐ ജി.സി. വിപിന്‍, സിപിഒമാരായ ഷൈന്‍, ഉദയകുമാര്‍, അനീഷ് ചന്ദ്രന്‍, മനോജ്, പത്മരാജ്, ഷിനി എന്നിവര്‍ അടങ്ങുന്ന പ്രത്യേക അന്വേഷണ സംഘം ബംഗളൂരു വിലെ ക്രസന്‍റ് റോഡിലുള്ള നാലപ്പാട് ഹോട്ടലില്‍ നിന്നാണ് മണികണ്ഠനെ കസ്റ്റഡിയിലെടുത്തത്. ഇയാള്‍ നിലവില്‍ ഡിസിസി അംഗവും ആധാരമെഴുത്ത് അസോസിയേഷന്‍ ചാല യൂണിറ്റ് പ്രസിഡന്‍റുമാണ്. ഡോറ അസറിയ ക്രിപ്‌സ് എന്നയാളുടെ ജവഹര്‍ നഗറിലെ വസ്തുവും വീടും അവരറിയാതെ തട്ടിയെടുക്കുന്നതില്‍ വ്യാജരേഖകള്‍ ചമച്ച് സങ്കീര്‍ണമായ പ്രക്രിയകള്‍ നടത്തിയത് മണികണ്ഠനായിരുന്നു. സംഭവത്തില്‍ കൊല്ലം പുനലൂര്‍ സ്വദേശിനി മെറിന്‍ ജേക്കബ്, കരകുളം സ്വദേശിനി വസന്ത എന്നിവര്‍ നേരത്തെ പിടിയിലായിരുന്നു. വസ്തു തട്ടിയെടുക്കുന്നതില്‍ എല്ലാ സഹായങ്ങളും ഇവര്‍ക്കായി ചെയ്തതു മണികണ്ഠനായിരുന്നു. വ്യാജ പ്രമാണം ഉണ്ടാക്കിയെടുക്കുന്നതിലും അതു സബ്‌രജിസ്ട്രാര്‍ ഓഫീസില്‍ നല്‍കി മെറിന്‍ ജേക്കബിന്‍റെ പേരിലാക്കുന്നതിനും ഇയാളുടെ കൈകയച്ച സഹായം ഉണ്ടായി. പിന്നീട് ഈ വസ്തു മെറിന്‍ ജേക്കബ് ശാസ്തമംഗലം സ്വദേശി ചന്ദ്രസേനനു വിലയാധാരമായി നല്‍കുകയായിരുന്നു. മണികണ്ഠനെ ചൊവ്വാഴ്ച രാത്രി എ‌ട്ടോടുകൂടിയാണ് അന്വേഷണസംഘം തിരുവനന്തപുരത്ത് എത്തിച്ചത്. വസ്തു ഇടപാടുമായി ബന്ധപ്പെട്ട് അനന്തപുരി മണികണ്ഠനു കോടിക്കണക്കിനു രൂപ ലഭിച്ചതായാണ് അന്വേഷണസംഘത്തിനു ലഭിക്കുന്ന സൂചന. നിലവില്‍ ഇയാളുടെ ബാങ്ക് അക്കൗണ്ടില്‍ ഏകദേശം ഒരുകോടി 10 ലക്ഷം രൂപ ബാലന്‍സ് ഉള്ളതായാണ് പ്രാഥമിക വിലയിരുത്തല്‍. ലോണ്‍ എടുത്തതു തിരിച്ചടയ്ക്കാത്തതുമായി ബന്ധപ്പെട്ട് അനന്തപുരി മണികണ്ഠന്‍റെ വീട്ടില്‍ സൗത്ത് ഇന്ത്യന്‍ ബാങ്ക് അധികൃതര്‍ കഴിഞ്ഞ വര്‍ഷം ഒക്ടോബര്‍ മാസത്തില്‍ ജപ്തിനോട്ടീസ് പതിക്കുകയുണ്ടായി. എന്നാല്‍ പിന്നീട് തുക ബാങ്കില്‍ ഒടുക്കിയ മണികണ്ഠന്‍ ജപ്തിനടപടികളില്‍ നിന്ന് ഒഴിവായി. ബാങ്കിന്‍റെ നടപടിയുണ്ടായി രണ്ടുമാസത്തിനുള്ളില്‍ പുതിയൊരു വീടു പണിതു. തിരുവനന്തപുരം നഗരത്തില്‍ രണ്ടു സ്ഥലങ്ങളില്‍ വസ്തു വാങ്ങി, പുതിയ ഒരു കാര്‍ വാങ്ങി. ഇതെല്ലാം വ്യാജരേഖ ചമയ് ക്കലുമായി ബന്ധപ്പെട്ട് ഇയാള്‍ക്കു പ്രതിഫലമായി ലഭിച്ച വന്‍തുക ഉപയോഗിച്ചാണെന്നു അന്വേഷണം സംഘം കണ്ടെത്തിയിട്ടുണ്ട്. ‌മണികണ്ഠനു പിന്നില്‍ വന്‍ സംഘങ്ങള്‍ ഉണ്ടോയെന്ന് പോലീസ് അന്വേഷിക്കുന്നുണ്ട്. ഇയാളുടെ ബാങ്ക് ഇടപാടുകളെക്കുറിച്ചും അന്വേഷണം വരും. പ്രതിയെ ഇന്നു കോടതിയില്‍ ഹാജരാക്കും.

നാവായിക്കുളം പഞ്ചായത്തിലെ വോട്ടർ പട്ടികയിൽ ക്രമക്കേടെന്ന് ആരോപണം

നാവായിക്കുളം: നാവായിക്കുളം പഞ്ചായത്തിലെ വോട്ടർ പട്ടികയിൽ ഗുരുതര ക്രമക്കേട്; യുഡിഎഫ് വാർഡ് പുനർവിഭജനാനന്തരം പുറത്തിറക്കിയിരിക്കുന്ന വോട്ടർ പട്ടികയിൽ വൻ ക്രമക്കേടാണ് നടന്നിരിക്കുന്നതെന്ന് നാവായിക്കുളം പഞ്ചായത്ത് യുഡിഎഫ് ചെയർമാൻ കുടവൂർ നിസാം പറഞ്ഞു. 22 വാർഡുകൾ ഉണ്ടായിരുന്ന നാവായിക്കുളം പഞ്ചായത്തിൽ ഇപ്പോൾ24 വാർഡുകളായാണ് പുനഃക്രമീകരിച്ചിരിക്കുന്നത്. വാർഡു പുനർ വിഭജവുമായി ബന്ധപ്പെട്ടു എല്ലാ മാനദണ്ഡങ്ങളും ലംഘിച്ചു കൊണ്ടുള്ള വോട്ടേഴ്സ് ലിസ്റ്റാണ് പുറത്തിറക്കിയിരിക്കുന്നത്. വാർഡു വിഭജന സമയത്തു തന്നെ നിരവധി പരാതികളും ആക്ഷേപങ്ങളും യുഡിഎഫ് നേതൃത്വം സമർപ്പിച്ചിരുന്നു. സിപിഎമ്മിലെ ചിലയാളുകൾക്കുള്ള പ്രസിഡന്‍റു സ്ഥാന മോഹമാണ് ഇത്തരത്തിലുള്ള അശാസ്ത്രീയ വാർഡു വിഭജനത്തിനു കാരണമെന്ന് അവർക്കിടയിൽ തന്നെ അഭിപ്രായമുണ്ട്. ഇതിൽ സിപിഎമ്മിലെ ഒരു വിഭാഗം കടുത്ത അമർഷത്തിലുമാണ്. വാർഡുവിഭജനത്തിനെതിരെ പലതവണ കോൺഗ്രസും യുഡിഎഫും പ്രതിഷേധ സമരങ്ങൾ നടത്തിയിരുന്നു. പുതുതായി രൂപീകരിക്കപ്പെട്ട വാർഡുകളിലെ സ്വാഭാവിക അതിർത്തികൾ പോലും കണക്കാക്കാതെ ഓരോ വാർഡുകളിലേയും വോട്ടർമാർ സമീപമുള്ള മറ്റു വാർഡുകളിലായി മാറ്റിയും തിരിച്ചും അനധികൃതമായാണ് ഉൾക്കൊള്ളിച്ചിരിക്കുന്നത്. ചില പ്രദേശങ്ങളിലെ വോട്ടർമാരെ കൂട്ടമായി ഒഴിവാക്കുകയും ചെയ്തിട്ടുണ്ട്. ഓരോ വാർഡുകളിലേയും വോട്ടർമാരുടെ എണ്ണം തമ്മിലുള്ള അന്തരവും ഇരട്ടിയിലധികമാണ്. വാർഡ് ഒൻപത് കരിമ്പുവിളയിൽ എണ്ണൂറ് വോട്ടർമാരാണുള്ളതെങ്കിൽ 21-ാം വാർഡായ ഇരുപത്തിഎട്ടാം മൈലിൽ രണ്ടായിരത്തിലധികം വോട്ടർമാരെയാണ് ഉൾക്കൊള്ളിച്ചിരിക്കുന്നത്. ഓരോ വാർഡുകളിലേയും വോട്ടർമാരുടെ എണ്ണം തമ്മിലുള്ള വ്യത്യാസം പത്തുശമതമാനത്തിൽ കൂടുവാനോ കുറയുവാനോ പാടില്ല എന്ന് പഞ്ചായത്തീ രാജ് നിയമം അട്ടിമറിച്ചാണ് ഈ നടപടി ചെയ്തിരിക്കുന്നത്. ഇതിനെതിരേ ശക്തമായ സമര പരിപാടികൾക്കു തുടക്കം കുറിക്കുമെന്നു നിയമപരമായ നടപടികൾ സ്വീകരിക്കുമെന്നും യുഡിഎഫ് നാവായിക്കുളം പഞ്ചായത്ത് കമ്മിറ്റി വ്യക്തമാക്കി.

മൂത്രസഞ്ചിയില്‍ കുടുങ്ങിയ മൂന്നുമീറ്ററോളം നീളമുള്ള ഇലക്ട്രിക് വയര്‍ പുറത്തെടുത്തു

മെഡിക്കല്‍കോളജ്: മൂത്രനാളിയിലൂടെ സ്വയം ഉള്ളിലേക്കു കടത്തിയ ഇലക്ട്രിക് വയര്‍ ശസ്ത്രക്രിയയിലൂടെ പുറത്തെടുത്തു. തിരുവനന്തപുരം സ്വദേശിയായ 25-കാരനാണ് മൂന്നുമീറ്ററോളം നീളമുള്ള ഇലക്ട്രിക് ഇന്‍സുലേഷന്‍ വയര്‍ മൂത്രനാളിയിലൂടെ ഉള്ളിലേക്കു കയറ്റിയത്. അസഹ്യമായ വേദനയെത്തുടര്‍ന്ന് ആശുപത്രിയിലെത്തുമ്പോള്‍ വയര്‍ മൂത്രസഞ്ചിയില്‍ കുരുങ്ങിക്കിടക്കുന്ന നിലയില്‍ കണ്ടെത്തി. മെഡിക്കല്‍ കോളജ് ആശുപത്രി യൂറോളജി വിഭാഗത്തില്‍ വയര്‍ തുറന്നു നടത്തിയ ശസ്ത്രക്രിയയിലൂടെ നിരവധി കഷണങ്ങളായി മുറിച്ച് ഇലക്ട്രിക് വയര്‍ പുറത്തെടുക്കുകയായിരുന്നു. ശസ്ത്രക്രിയ രണ്ടര മണിക്കൂറോളം നീണ്ടു. നിലവില്‍ തീവ്രപരിചരണ വിഭാഗത്തില്‍ ചികിത്സയില്‍ കഴിയുന്ന യുവാവ് സുഖം പ്രാപിച്ചു വരുന്നതായി ആശുപത്രി അധികൃതര്‍ അറിയിച്ചു. യൂറോളജി വിഭാഗം പ്രൊഫസര്‍ പി.ആര്‍. സാജു, അസിസ്റ്റന്‍റ് പ്രഫസർ. ഡോ. സുനില്‍ അശോക്, സീനിയര്‍ റസിഡന്‍റുമാരായ ഡോ. ജിനേഷ്, ഡോ. അബു അനില്‍ ജോണ്‍, ഡോ. ഹരികൃഷ് ണന്‍, ഡോ. ദേവിക, ഡോ. ശില്‍പ്പ, അനസ്‌തേഷ്യ വിഭാഗം അസി. പ്രഫ. ഡോ. അനീഷ്, സീനിയര്‍ റസിഡന്‍റ് ഡോ. ചിപ്പി എന്നിവര്‍ ശസ്ത്രക്രിയയ്ക്ക് നേതൃത്വം നല്‍കി. ഇലക്ട്രിക് വയര്‍ യുവാവ് സ്വയം ഉള്ളിലേക്കു കടത്തിയതിന്‍റെ കാരണം അജ്ഞാതമാണെന്നു അധികൃതര്‍ പറയുന്നു.

ട്രിവാൻഡ്രം ക്ലർജി ഫെലോഷിപ്പ് വാർഷിക സമ്മേളനം നടത്തി

തിരുവനന്തപുരം: ജില്ലയിലെ വിവിധ സഭകളിലെ വൈദീകരുടെ ഐക്യ കൂട്ടായ്മയായ ട്രിവാൻഡ്രം ക്ലർജി ഫെലോഷിപ്പിന്‍റെ (ടിസിഎഫ്) വാർഷിക സമ്മേളനം മാർത്തോമ്മാസഭ തിരുവനന്തപുരം - കൊല്ലം ഭദ്രാസനാധിപൻ ഡോ. ഐസക് മാർ ഫിലക്സിനോസ് എപ്പിസ്കോപ്പ ഉദ്ഘാടനം ചെയ്തു. വ്യത്യസ്തതകൾ യാഥാർഥ്യമാണെങ്കിലും പരസ്പരബന്ധം കാത്തുസൂക്ഷിക്കാനും ഒരുമിച്ചു പ്രവർത്തിക്കാനുമുള്ള അനേകം മേഖലകൾ നമുക്കു മുന്നിലുണ്ടെന്ന് ഉദ്ഘാടന സന്ദേശത്തിൽ ബിഷപ് പറഞ്ഞു. ഛത്തീസ്ഗഢിൽ കന്യാസ്ത്രീകൾക്കുനേരെ നടന്ന അക്രമങ്ങളിൽ സമ്മേളനം ശക്തിയായി പ്രതിഷേധിച്ചു. ടിസിഎഫ്. പ്രസിഡന്‍റ് റവ. തോമസ് ജോണ്‍ റന്പാൻ അധ്യക്ഷത വഹിച്ചു. കണ്ണമ്മൂല ഐക്യ വൈദിക സെമിനാരി പ്രിൻസിപ്പൽ റവ. ഡോ. സി.ഐ. ഡേവിഡ് ജോയ് മുഖ്യപ്രഭാഷണം നടത്തി. റവ. ഡോ. ജെ. ജയരാജ്, റവ. ടി. വിനീഷ് രാജ്, ഫാ. ജോണ്‍ അരീക്കൽ, ഫാ. പോപ്സണ്‍ വർഗീസ്, റവ. ജോണ്‍സണ്‍ മാത്യു കോറെപ്പിസ്കോപ്പ, അഡ്വ. ഇടിക്കുള സക്കറിയ, പ്രോഗ്രാം കോ-ഓർഡിനേറ്റർ ഷെവ. ഡോ. കോശി എം. ജോർജ് എന്നിവർ പ്രസംഗിച്ചു.

ഭാര്യയുടെ കാൽ തല്ലിയൊടിച്ച ഭർത്താവ് അറസ്റ്റിൽ

വിഴിഞ്ഞം: മദ്യപിച്ചെത്തി നിരന്തരം മർദിക്കുന്നതിനെതിരെ വനിതാ കമ്മീഷനിൽ പരാതി നൽകിയ വിരോധത്തിനു ഭാര്യയുടെ കാൽ തല്ലിയൊടിച്ച ഭർത്താവിനെ പോലീസ് അറസ്റ്റു ചെയ്തു. വെണ്ണിയൂർ വവ്വാമൂല ചരുവിള വീട്ടിൽ രാജേഷ് തമ്പി ( 41 ) യാണ് അറസ്റ്റിലായത്. കഴിഞ്ഞ ദിവസം വീട്ടിൽ പ്രശ്നമുണ്ടാക്കിയ രാജേഷ് ചുറ്റിക കൊണ്ട് ഭാര്യയുടെ മുതുകിൽ അടിക്കുകയായിരുന്നു. കാലിൽ മൂന്നു പൊട്ടൽ ഉണ്ടായി. മർദനവിവരം ആശുപത്രിയിൽ അറിയിച്ചാൽ കൊല്ലുമെന്ന് ഭീഷണിപ്പെടുത്തുകയുമായിരുന്നു.

പോലീസ് ഉദ്യോഗസ്ഥനെ ആക്രമിച്ച നാലംഗ മദ്യപസംഘം അറസ്റ്റില്‍

പേരൂര്‍ക്കട: പോലീസ് ഉദ്യോഗസ്ഥനെ ആക്രമിച്ചു പരിക്കേല്‍പ്പിച്ച മദ്യപാനിസംഘത്തെ തമ്പാനൂര്‍ പോലീസ് അറസ്റ്റുചെയ്തു. വഴയില മണികണേ്ഠശ്വരം കാവടിത്തലയ്ക്കല്‍ മേലേ കട്ടയ് ക്കാല്‍ വീട്ടില്‍ മജു (43), കരമന നീറമണ്‍കര ഗൗരി നഗര്‍ സ്വദേശി സജു എന്ന വിവേക് (35), നീറമണ്‍കര ഗൗരിനഗര്‍ സ്വദേശി വെട്ടോത്തി വിഷ്ണു എന്നുവിളിക്കുന്ന വിഷ്ണു (32), ബാലരാമപുരം അന്തിയൂര്‍ സിന്ധു നിവാസില്‍ ഹരിശങ്കര്‍ (22) എന്നിവരാണ് അറസ്റ്റിലായത്. ഇതില്‍ വിഷ്ണു മുമ്പ് തൈക്കാട് ശാന്തികവാടത്തില്‍ യുവാവിനെ ആളുമാറി ആക്രമിച്ച സംഘത്തിലെ പ്രതിയാണ്. ജൂലൈ 28ന് രാത്രിയിലായിരു ന്നു കേസിനാസ്പദമായ സംഭവം. തിരുവനന്തപുരം സംഗീതകോളജിനു സമീപത്തെ കെ.കെ. എം. ബാറിലെത്തിയ പ്രതികള്‍ മദ്യപിച്ചശേഷം ബഹളമുണ്ടാക്കി. ബാര്‍ ജീവനക്കാര്‍ അറിയിച്ചതനുസരിച്ചു പോലീസ് എത്തി ഇവരെ കസ്റ്റഡിയിലെടുക്കാന്‍ ശ്രമിച്ചപ്പോള്‍ നാലംഗസംഘം പോലീസിനെ ആക്രമിക്കുകയായിരുന്നു. സിവില്‍ പോലീസ് ഉദ്യോഗസ്ഥനായ സുധീപ്ത് ലാലിനാണു സാരമായി പരിക്കേറ്റത്. ഇദ്ദേഹം ഫോര്‍ട്ട് ആശുപത്രിയില്‍ ചികിത്സ തേടി. പ്രതികള്‍ ചേര്‍ന്ന് അസഭ്യം പറയുകയും ഇദ്ദേഹത്തിന്‍റെ ഷര്‍ട്ടില്‍ പിടിച്ചു വലിക്കുകയും മര്‍ദിക്കുകയുമായിരുന്നു. ഔദ്യോഗിക കൃത്യനിര്‍വഹണത്തിന് തടസം നിന്നതിനും ആക്രമിച്ചതിനുമാണ് കേസ്. തമ്പാനൂര്‍ സിഐ ജിജുകുമാറിന്റെ നേതൃത്വത്തില്‍ എസ്ഐ ബിനു മോഹന്‍, ജിഎസ് ഐ ശ്രീകുമാര്‍, എസ്‌സിപിഒമാരായ സുധീപ്ത് ലാല്‍, നൂറുല്‍ അമീന്‍, സിപിഒ അനു കൃഷ്ണന്‍, ഹോം ഗാര്‍ഡ് യശോധരന്‍ എന്നിവരാണ് പ്രതികളെ കസ്റ്റഡിയിലെടുത്ത്. കോടതി പ്രതി കളെ റിമാന്‍ഡ് ചെയ്തു.

ലഹരിക്കെതിരേ ഗാന്ധിദർശൻ ക്ലബ്

നെയ്യാറ്റിൻകര: വിരാലി വിമല ഹൃദയ ഹൈസ്കൂളിലെ ഗാന്ധിദർശൻ ക്ലബിന്‍റെ പ്രവർത്തനോദ്ഘാടനം ഗാന്ധിദർശൻ ജില്ലാ കോ- ഓർഡിനേറ്റർ ജോസ് വിക്ടർ ഞാറക്കാല നിർവഹിച്ചു. ഹെഡ്മിസ്ട്രസ് സിസ്റ്റർ ലിനി മേരി അധ്യക്ഷത വഹിച്ചു. സ്കൂൾ കൺവീനർ അക്വിനോ സാബു, സീനിയർ അസിസ്റ്റന്‍റ് ജോളിക്കുട്ടി, സ്റ്റാഫ് സെക്രട്ടറി ഫിലോമിന, സ്കൂൾ കോ-ഓർഡിനേറ്റർ സി.ഡബ്ള്യൂ. ഷൈനി, വിദ്യാർഥി പ്രതിനിധി ജോഷ്നി എന്നിവർ പ്രസംഗിച്ചു. "പദാർഥ ലഹരിക്കെതിരെ സൗഹൃദ ലഹരി' എന്ന വിഷയം മുൻനിർത്തിയായിരിക്കും സ്കൂളിന്‍റെ ഈ വർഷത്തെ ഗാന്ധിദർശൻ പ്രവർത്തനമെന്നു ഹെഡ്മിസ്ട്രസ് സിസ്റ്റർ ലിനി മേരി പറഞ്ഞു. പിടിഎ യുടെ സഹകരണത്തോടെ കുട്ടികളെ ഗ്രൂപ്പുകളായി തിരിച്ചു ലഹരിക്കെതിരേ പോരാടാനുള്ള കർമസേനയെ സജ്ജമാക്കിയിട്ടു ണ്ടെന്നും സ്കൂള്‍ അധികൃതര്‍ അറിയിച്ചു.

മറവു ചെയ്യേണ്ട മാലിന്യം ഫാമിൽ എത്തിച്ച സംഭവം: ബിഎഫ്ഒയ്ക്ക് സസ്പെൻഷൻ

പാലോട്: മറവു ചെയ്യേണ്ട മാലിന്യം പന്നിഫാമിൽ എത്തിച്ച സംഭവത്തിൽ ബീറ്റ് ഫോറസ്റ്റ് ഓഫീസർക്കു സസ്പെൻഷൻ. വനം വകുപ്പു പിടിച്ചെടുത്ത മാലിന്യം കോടതി ഉത്തരവിനെ തുടർന്നു മറവ ചെയ്യാൻ കൊണ്ടുപോവുകയും എന്നാൽ പാങ്ങോട് ചെമ്പൻകോട് പന്നി ഫാമിലേക്കു എത്തിച്ചതുമായ വിഷയത്തിലാണ് പാലോട് ഫോറസ്റ്റ് റേഞ്ചിലെ ഭരതന്നൂർ സെക്‌ഷൻ ബീറ്റ് ഫോറസ്റ്റ് ഓഫീസർ ഷാനവാസിനെ ഡിഎഫ്ഒ സസ് പെൻഡ് ചെയ്തത്. ‌ സംഭവത്തിൽ കൂടുതൽ അന്വേഷണവും പ്രഖ്യാപിച്ചിട്ടുണ്ട്. കഴിഞ്ഞ 14 നാണു വനത്തിൽ മാലിന്യം നിക്ഷേപിക്കാൻ ശ്രമിച്ച കേസിൽ പനവൂർ എസ്എൻ പുരം ശോഭനം വീട്ടിൽ സജീവ് കുമാർ (45), നേപ്പാൾ സ്വദേശിയായ കാലി ബഹദൂർ പരിയാർ (24) എന്നിവർ വനം വകുപ്പിന്‍റെ പിടിയിലായത്. രാത്രിയിൽ പാലോട് ചെമ്പൻകോട് ഭാഗത്തു കണ്ടെയ്നർ ലോറിയിൽ 18 ബാരൽ മാലിന്യങ്ങളുമായെത്തി വനത്തിൽ നിക്ഷേപിക്കാൻ ശ്രമിക്കുന്നതിനിടയിലാണ് ഇവർ പിടിയിലായത്. മാലിന്യം കൊണ്ടുവന്ന കെ എൽ 10 എ ജി 200 എന്ന ലോറിയും കസ്റ്റഡിയിലെത്തിരുന്നു. കോടതി ഉത്തരവിനെ തുടർന്ന് 18 ബാരൽ മാലിന്യവും ലോറിയും ആയിട്ടാണു വനത്തിലേക്കു ഷാനവാസും വാച്ചർ ബൈജുവും പോയത്. എന്നാൽ വാഹനം പന്നിഫാമിൽ കിടക്കുന്ന സിസിടിവി ദൃശ്യം പുറത്തുവന്നതോ ടെയാണ് വിവാദമായത്. പ്രാഥമിക അന്വേഷണ റിപ്പോർട്ടിൽ ബി എഫ് ഒ കൃത്യനിർവഹണത്തിൽ വീഴ്ച വരുത്തിയതായി പറയുന്നു. കൂടുതൽ അന്വേഷണത്തിനുശേഷം നടപടി സ്വീകരിക്കും.

യൂത്ത് കോണ്‍ഗ്രസ് രാജ്ഭവൻ മാർച്ചിൽ സംഘർഷം

തിരുവനന്തപുരം: ഛത്തീസ്ഗഡിൽ കന്യാസ്ത്രീകളെ അന്യായമായി അറസ്റ്റ് ചെയ്തതിൽ പ്രതിഷേധിച്ച് യൂത്ത് കോണ്‍ഗ്രസ് ജില്ലാ കമ്മിറ്റിയുടെ നേതൃത്വത്തിൽ രാജ്ഭവനിലേക്കു നടത്തിയ മാർച്ചിൽ സംഘർഷം. പ്രവർത്തകർക്കു നേരെ പോലീസ് മൂന്നു തവണ ജലപീരങ്കി പ്രയോഗിച്ചു. വൈകുന്നേരം അഞ്ചോടെ രാജ്ഭവനിലേക്ക് പ്രകടനമായെത്തിയ പ്രവർത്തകരെ പോലീസ് ബാരിക്കേഡ് തീർത്ത് തടഞ്ഞു. പ്രവർത്തകരിൽ ചിലർ ബാരിക്കേഡ് മറികടക്കാൻ ശ്രമിക്കുന്നതിനിടെ പോലീസ് ജലപീരങ്കി പ്രയോഗിച്ചു. തുടർന്ന് പോലീസും പ്രവർത്തകരും തമ്മിൽ വാക്കേറ്റവും ഉന്തും തള്ളുമുണ്ടായി. പ്രവർത്തകർ പിരിഞ്ഞു പോകാൻ തയാറാകാത്തതിനെ തുടർന്ന് പോലീസ് വീണ്ടും ജലപീരങ്കി പ്രയോഗിക്കുകയായിരുന്നു. നേതാക്കൾ ഇടപെട്ടാണ് ഒടുവിൽ പ്രവർത്തകരെ ശാന്തരാക്കിയത്.

നേമം സഹകരണ ബാങ്ക് തട്ടിപ്പ് : സഹകരണ രജിസ്ട്രാർ അന്വേഷണം മനഃപൂർവം നീട്ടുന്നു

നേമം: സഹകരണ ബാങ്കിലെ കോടികളുടെ ക്രമകേടുകൾ പുറത്ത് വന്നതോടെ 447 പേർ കേസ് കൊടുക്കുകയും, പോലിസ് എഫ്ഐആർ ഇടുകയും ഇപ്പോൾ ക്രൈം ബ്രാഞ്ച് അന്വേഷിച്ചു വരുകയും ചെയുന്ന നേമം സഹകരണ ബാങ്കിലെ വകുപ്പുതല അന്വേഷണം ചില ഉന്നത രാഷ്ട്രിയ ഇടപെടൽ കാരണം സഹകരണ രജിസ്ട്രാർ നീട്ടിക്കൊണ്ടു പോകുന്നെന്ന് ആക്ഷേപം. ഓഗസ്റ്റ്‌ 15 കഴിഞ്ഞാൽ ഈ റിപ്പോർട്ട് റദ്ധുചെയ്യപ്പെടാനും, തന്മൂലം പ്രതികൾക്ക് സഹായമാക്കുവാനുമാണു നീട്ടിക്കൊണ്ടു പോകുന്നത്. വിവരാവകാശ നിയമ പ്രകാരം നിക്ഷേപ കൂട്ടായ്മ രക്ഷാധികാരി ശാന്തിവിള മുജീബ് റഹ്‌മാൻ അന്വേഷണ റിപ്പോർട്ടിനു രേഖമൂലം അപേക്ഷ നൽകിയിട്ടും വിവരാവകാശം നൽകാതെ "ആയിട്ടില്ല' എന്ന മറുപടിയാണ് ലഭിക്കുന്നത്. ഒരു വർഷം തികയുന്ന വകുപ്പുതല അന്വേഷണം ഓഗസ്റ്റ്‌ 15നു മുമ്പു പൂർത്തീകരിച്ചില്ലെങ്കിൽ അന്വേഷണ റിപ്പോർട്ട് ലാപ്സാകും. ഇത്തരത്തിൽ നിക്ഷേപകരെ ദ്രോഹിച്ചു നേമം സഹകരണ ബാങ്കിനെ തകർത്ത മാഫിയകളെയും, ചില ഉന്നത രാഷ്ട്രീയ നേതാക്കളെയും സഹായിക്കുന്ന സഹകരണ രജിസ്ട്രാറുടെ വഞ്ചനക്കെതിരെ ശക്തമായ പ്രക്ഷോഭ സമരം സഹകരണ ആസ്ഥാന മന്ദിരത്തിനു മുന്നിൽ ആരംഭിക്കുമെന്നു നിക്ഷേപ കൂട്ടായ്മ രക്ഷാധികാരി ശാന്തിവിള മുജീബ് റഹ്‌മാനും, കൺവീനർ കൈമനം സുരേഷും പറഞ്ഞു.

ബൈക്കപകടത്തില്‍ പരിക്കേറ്റ യുവാവ് മരിച്ചു

മെഡിക്കല്‍കോളജ്: ബൈക്കപകടത്തില്‍ ഗുരുതരമായി പരിക്കേറ്റ യുവാവ് മരിച്ചു. ആറ്റുകാല്‍ ഐരാണിമുട്ടം ടിസി 22/999-ല്‍ ഡി. ദീപക് (21) ആണ് മരിച്ചത്. ഇന്നലെ പുലര്‍ച്ചെ 2.30ന് ചാക്ക ഫയര്‍ഫോഴ്‌സ് ഓഫീസിനു സമീപം എയര്‍പോര്‍ട്ട് റോഡിൽവച്ചായിരുന്നു അപകടം. ദീപക് സഞ്ചരിച്ചിരുന്ന ബൈക്ക് എതിരേവന്ന കാറുമായി കൂട്ടിയിടിക്കുകയായിരുന്നു. ഉടന്‍തന്നെ സമീപത്തെ സ്വകാര്യാശുപത്രിയിലെത്തിച്ചുവെങ്കിലും രക്ഷിക്കാനായില്ല. മൃതദേഹം തിരുവനന്തപുരം മെഡിക്കല്‍കോളജ് ആശുപത്രിയില്‍ പോസ്റ്റുമോര്‍ട്ടത്തിനുശേഷം ബന്ധുക്കള്‍ക്കു വിട്ടുനല്‍കി. ദിലീപ്-സ്വപ്‌ന ദമ്പതികളുടെ മകനാണ്. സഹോദി: ദീപിക.

ചുമട്ടു തൊഴിലാളി കുഴഞ്ഞുവീണു മരിച്ചു

നെടുമങ്ങാട്: ലോറിയിൽ തടി കയറ്റുന്നനിടെ തൊഴിലാളി കുഴഞ്ഞുവീണു മരിച്ചു. നെടുമങ്ങാട് നെട്ടിറച്ചിറ പുളിയറത്തല അഞ്ജു ഭവനിൽ ടി.അനിൽകുമാറാ (62) ണ് മരിച്ചത്. ഇന്നലെ ഉച്ചയോടെ സ്വകാര്യ വ്യക്തിയുടെ പുരയിടത്തിലെ മുറിച്ചു നീക്കിയ റബർ മരങ്ങൾ ലോറിയിൽ കയറ്റുന്നതിനിടയിലാണ് അനിൽകുമാർ കുഴഞ്ഞുവീണത്. ഉടനെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല.സംസ്‌കാരം ഇന്ന് ഒൻപതിന് നെടുമങ്ങാട് ശാന്തിതീരത്ത്. ഭാര്യ : വിജയലക്ഷ്മി. മക്കൾ: അഞ്ജിത,അഞ്ജന. മരുമക്കൾ : വിശാഖ്, വിനീത്.

ബൈക്ക് ഇടിച്ചു പരിക്കേറ്റയാൾ മരിച്ചു

നെടുമങ്ങാട് : ബൈക്ക് ഇടിച്ചു പരിക്കേറ്റ് ചികിത്സയിലായിരുന്ന നെടുമങ്ങാട് മുക്കോലയ്ക്കൽ പറണ്ടോട് കോണത്തുവീട്ടിൽ ബാബു (73) മരിച്ചു. കഴിഞ്ഞ 11ന് രാത്രി 8.30-ഓടെ കുറിഞ്ചിലം കോടിനുസമീപത്ത് വച്ച് റോഡരികിൽ നിൽക്കുകയായിരുന്ന ബാബുവിനെ ബൈക്ക് ഇടിച്ചുതെറിപ്പിക്കുകയായിരുന്നു. മെഡിക്കൽ കോളേജ് ആശുപത്രിയിൽ ചികിത്സയിലിരിക്കെ മരിച്ചു. ഭാര്യ: പരേതയായ അംബികാമ്മ. മക്കൾ: ആശ,ആനന്ദ്. മരുമക്കൾ : കെ.എസ്.സജികുമാർ, പി.ദിവ്യാമോഹൻ. സഞ്ചയനം ശനി ഒൻപത്.

മലയോര ഗ്രാമങ്ങളില്‍ വന്യമൃഗ ശല്യം രൂക്ഷം

വെള്ളറട: അതിര്‍ത്തി മലയോരഗ്രാമങ്ങളില്‍ വന്യമൃഗശല്യം കാരണം കര്‍ഷകരും നാട്ടുകാരും വലയുന്നു. അമ്പൂരി, വെള്ളറട, കള്ളിക്കാട് പഞ്ചായത്ത് പ്രദേശങ്ങളെയാണ് കൂടുതലായി ബുദ്ധിമുട്ടിക്കുന്നത്. പതിറ്റാണ്ട് മുമ്പ് തമിഴ്‌നാടിലെ സര്‍ക്കാര്‍, നാഗര്‍കോവില്‍, കന്യാകുമാരി എന്നിവിടങ്ങളിലെ ചേരികളിലും, ചാലുകളിലും വളര്‍ത്തുന്ന പന്നികളെയും അമ്പലങ്ങളില്‍ തമ്പടിച്ചിരുന്ന കുരങ്ങുകളെയും പിടികൂടി അതിര്‍ത്തി വനത്തില്‍കൊണ്ട് വിട്ടതാണു പിന്നീട് മലയോര ഗ്രാമീണര്‍ക്ക് വിനയായത്. നാട്ടില്‍ കഴിഞ്ഞിരുന്ന പന്നികള്‍ക്കും, കുരങ്ങന്മാര്‍ക്കും കാട്ടില്‍ തീറ്റ തേടി പരിചയമില്ല, വിശക്കുമ്പോള്‍ ഇവ കൂട്ടത്തോടെ ജനവാസ മേഖലയിലേക്ക് എത്തുകയാണ്. മനുഷ്യരെ ഭയമില്ലാത്തതു കാരണം വിരട്ടി ഓടിച്ചാലും കുരങ്ങന്മാര്‍ പോകാറില്ല. അംഗബലം കൂട്ടി എത്തി അക്രമാസക്തരാവുകയാണ് പതിവ്. സഹ്യപര്‍വ്വത നിരകളില്‍ ഉള്‍പ്പെട്ട കൂനിച്ചി, കൊണ്ടകെട്ടി, കുരിശുമലകളുടെ അടിവാരങ്ങളിലെ കൃഷിത്തോട്ടങ്ങളിലാണ് ഇവയുടെ വാസം. പെറ്റു പെരുകുന്നതുമൂലം മാസങ്ങള്‍ പിന്നിടും തോറും അംഗസംഖ്യ ഇരട്ടിയാവുകയാണ്. ഉണങ്ങാന്‍ ഇട്ടിരിക്കുന്ന വസ്ത്രങ്ങളും, വീട്ടുപകരണങ്ങളും എടുത്തുകൊണ്ടു പോവുക, കാര്‍ഷിക വിളകള്‍ നശിപ്പിക്കുക, സ്ത്രീകളെയും കുട്ടികളെയും ആക്രമിക്കുക, റബര്‍ തോട്ടങ്ങളില്‍ പാല്‍ നിറഞ്ഞിരിക്കുന്ന ചിരട്ടകള്‍ തട്ടി കമഴ്ത്തുക, വീട്ടിനുള്ളില്‍ കയറി ആഹാരസാധനങ്ങള്‍ മോഷ്ടിക്കുക, മേല്‍ക്കൂരയിലെ ഓടുകളും ഷീറ്റുകളും നശിപ്പിക്കുക എന്നിവയാണ് വാനരന്മാരുടെ വിനോദങ്ങള്‍. വിരട്ടി ഓടിക്കാന്‍ ശ്രമിച്ചാല്‍ കൂടുതല്‍ അംഗബലത്തോടെ തിരിച്ചെത്തും. രാത്രികളിലാണ് പന്നിക്കൂട്ടങ്ങള്‍ എത്തുന്നത്. മുന്നില്‍ കാണുന്നതെല്ലാം നശിപ്പിച്ചശേഷമാണ് ഇവയുടെ മടക്കം. പുലര്‍ച്ചെ ടാപ്പിങ്ങിനു പോകുന്ന തൊഴിലാളികളെ ആക്രമിച്ച സംഭവങ്ങളും ഏറെയുണ്ട്. വാഴ, മരിച്ചീനി, ചേമ്പ്, ചേനകൃഷികളെല്ലാം പന്നികള്‍ കാരണം നശിച്ചു. പ്രകൃതിക്ഷോഭത്തിലും വന്യമൃഗശല്യത്തിലും നശിക്കുന്ന കര്‍ഷക വിളകള്‍ക്ക് നഷ്ടപരിഹാരം യഥാസമയം ലഭിക്കുന്നില്ലെന്ന കര്‍ഷകരുടെ പരാതിയും വന്‍തോതില്‍ കൃഷികള്‍ നശിച്ചു കര്‍ഷകര്‍ കടക്കെ ണിയിലായി ബാങ്ക് വായ്പകളുടെ അടവുകള്‍ മുടങ്ങി നല്ലൊരു ശതമാനം കര്‍ഷകരും കടക്കെണിയിലാണ്. ഗ്രാമങ്ങളില്‍ മഴക്കെടുതിയില്‍ കൃഷിനശിച്ചവര്‍ക്കും ധനസഹായം യഥാസമയം കിട്ടുന്നില്ല. കാട്ടിനുള്ളില്‍ ആഹാരവും വെള്ളവും കിട്ടാത്തതു കൊണ്ടാണ് വന്യമൃഗങ്ങള്‍ എല്ലാം നാട്ടിലേക്കിറങ്ങുന്നത്. ആയിരക്കണക്കിനു കുരങ്ങന്മാര്‍ ഗ്രാമീണ മേഖലകളില്‍ വിഹരിക്കുന്നു. പ്രദേശത്തു നിന്നു കുറച്ചു പിടികൂടി മാറ്റിയാലും പ്രശ്‌നം തീരില്ല. ഈ ശ്രമം പലവട്ടം പരാജയപ്പെട്ടതാണ്. കുരങ്ങന്മാരുടെയും പന്നികളുടെയും ശല്യം കാരണം ഒരു കൃഷിയും ചെയ്യാനാകാത്ത സ്ഥിതിയാണ്. പ്രമുഖ രാഷ്ട്രീയ പാര്‍ട്ടികള്‍ക്കെല്ലാം കര്‍ഷക സംഘടനകള്‍ ഉണ്ടെങ്കിലും മലയോര പ്രദേശത്തെ കര്‍ഷകര്‍ നേരിടുന്ന ഈ ക്രൂരമായ പ്രശ്‌നത്തിന് ആരും കൃത്യമായി പ്രതികരിക്കുകയോ, സമരം നടത്തുകയോ ചെയ്യുന്നില്ല . വന്യമൃഗങ്ങള്‍ ഗ്രാമീണ മേഖലയില്‍ കാട്ടിക്കൂട്ടുന്ന വിക്രിയകള്‍ കാരണം കര്‍ഷകര്‍ പലരും ആത്മഹത്യയുടെ വക്കിലാണ്. ഫല വൃക്ഷങ്ങള്‍ വച്ചു പിടിപ്പിക്കാനും തടയണകള്‍ നിര്‍മിച്ചും വെള്ളം തടഞ്ഞ് നിര്‍ത്താനും കെ. ബി. ഗണേഷ് കുമാര്‍ മന്ത്രിയായിരുന്നപ്പോള്‍ പദ്ധതി ഇട്ടെങ്കിലും നടന്നില്ല. ഇപ്പോഴെങ്കിലും കാട്ടിനുള്ളില്‍ ആവാസ വ്യവസ്ഥ ഒരുക്കി വന്യമൃഗങ്ങള്‍ നാട്ടിലേക്കെത്തുന്നത തടയുന്നത് വരെ മലയോര നിവാസികള്‍ ദുരിതത്തിലാവും. കൃഷി നശിപ്പിക്കുന്ന വന്യമൃഗങ്ങള്‍ കൂട്ടംചേര്‍ന്നാണ് എത്തുന്നത്. പക്ഷേ കാലങ്ങളായി കൃഷിനാശം സംഭവിക്കുന്ന കര്‍ഷകര്‍ സംഘടിക്കുന്നുമില്ല. കര്‍ഷകര്‍ പലരും ആത്മഹത്യയുടെ വക്കിലുമാണ്.

മേല്‍പാലത്തിന്‍റെ ഒന്നാം ഘട്ട നിര്‍മാണ ജോലികള്‍ പൂര്‍ത്തിയാകുന്നു.

നേമം: കാക്കാമൂലയെയും കാര്‍ഷിക കോളജിനെയും ബന്ധിപ്പിച്ചു വെള്ളായണി കായലിന്‍റെ കുറുകെ നിര്‍മിക്കുന്ന മേല്‍പാലത്തിന്‍റെ ഒന്നാം ഘട്ട നിര്‍മാണ ജോലികള്‍ പൂര്‍ത്തിയാകുന്നു. നിലവില്‍ കായലിനെയും റോഡിനെയും രണ്ടായി തിരിക്കുന്ന ബണ്ടു റോഡിനു പകരമാണ് 30.25 കോടിരൂപ മുടക്കി മേല്‍പാലത്തിന്‍റെ പണി നടക്കുന്നത്. എം. വിന്‍സന്‍റ് എംഎല്‍എയുടെ കോവളം നിയോജകമണ്ഡലത്തിലെ കല്ലിയൂര്‍ പഞ്ചായത്തിലാണു പാലം വരുന്നത്. അടുത്ത ആറു മാസത്തിനുള്ളില്‍ പണികള്‍ പൂര്‍ത്തിയാക്കി ഗതാഗതത്തിനു തുറന്നു കൊടുക്കാന്‍ കഴിയുമെന്ന പ്രതീക്ഷയിലാണ് അധികൃതര്‍. 173.2 മീറ്റര്‍ നീളമുള്ള പാലത്തിന് അഞ്ചു സ്പാനുകളാണ് ഉണ്ടായിരിക്കുക. 7.5 മീറ്റര്‍ നടപ്പാതയും ഉണ്ടാകും. ഇതിനു പുറമേ കേബിള്‍ ഡക്ട് എന്നിവയും നിര്‍മിക്കുന്നുണ്ട്. കാക്കാമൂല ഭാഗത്ത് 228 മീറ്ററും കാര്‍ഷികകോളജിന്‍റെ ഭാഗത്ത് 213 മീറ്ററും നീളത്തിലാണ് അപ്രോച്ച് റോഡിന്‍റെ നിര്‍മാണം പുരോഗമിക്കുന്നത്. ഈ റോഡിനു പത്തു മീറ്റര്‍ വീതിയുണ്ടാകും. ഇതിനു സമീപത്തായി വാട്ടര്‍ അഥോറിറ്റിയുടെ കുടിവെള്ള പമ്പ് ഹൗസ് സ്ഥിതി ചെയ്യുന്നതുകൊണ്ടാണു സര്‍വീസ് റോഡ് നിര്‍മിക്കുന്നത്. ടൂറിസം സാധ്യതകള്‍കൂടി പരിഗണിച്ചു പാലത്തിന്‍റെ രൂപകല്പനയില്‍ മാറ്റങ്ങള്‍ വരുത്തിയിട്ടുണ്ട്. പാലത്തിന്‍റെ നിര്‍മാണത്തിനൊപ്പം ആര്‍ച്ചുകളും ലൈറ്റുകളും സ്ഥാപിക്കും. മഴക്കാലങ്ങളില്‍ ബണ്ടു റോഡില്‍ വെള്ളം കയറി ഗതാഗതം തടസപെടാതിരിക്കാനും കായലിന്‍റെ ആവാസ വ്യവസ്ഥയില്‍ തടസം നേരിടുന്ന രീതിയില്‍ വരാതിരിക്കാനും കായലിലെ മത്സ്യസമ്പത്തിനു കോട്ടം തട്ടാതിരിക്കാനും വേണ്ട മുന്‍ കൈരുതലുകളാണ് ഈ നിര്‍മാണത്തിലൂടെ നടപ്പിലാക്കുന്നത്. മഴ പെയ്തു കഴിഞ്ഞാല്‍ കാക്കാമൂല - കാര്‍ഷിക കോളജ് റോഡില്‍ രൂക്ഷമായി കായല്‍ വെള്ളം കയറുകയും റോഡേത് കായലേതെന്ന സ്ഥിതിയില്‍ തിരിച്ചറിയാന്‍ പറ്റാത്ത അവസ്ഥയുണ്ടായിരുന്നു. മന്ത്രി മുഹമദ് റിയാസാണ് നിര്‍മാണ ഉദ്ഘാടനം നിര്‍വഹിച്ചത്. രണ്ടു വര്‍ഷംകൊണ്ടു പണി പൂര്‍ത്തിയാക്കാനാണ് കരാര്‍. കിഫ്ബി വഴിയാണ് പാലം നിര്‍മാണത്തിനു ഫണ്ട് അനുവദിച്ചത്. 2018-ല്‍ ഭരണാനുമതി ലഭിച്ചെങ്കിലും ടെണ്ടര്‍ നടപടികള്‍ നീണ്ടുപോയതിനാല്‍ കഴിഞ്ഞ വര്‍ഷമാണു പണി തുടങ്ങാന്‍ കഴിഞ്ഞത്.

നെടുമങ്ങാട് സർക്കാർ കോളജിൽ അലുമിനി കൂട്ടായ്മ

നെടുമങ്ങാട്: സർക്കാർ കോളജിൽ നിന്നും നാല്പത്തിനാല് വർഷമായി പുറത്തിറങ്ങിയ എല്ലാ ബാച്ചുകളുടെയും വിപുലമായ ഒത്തുകൂടലിനു പൂർവ വിദ്യാർഥി സംഘടന നെഡ്കോസ വേദിയൊരുക്കി. മന്ത്രി ജി.ആർ. അനിൽ സംഗമം ഉദ്ഘാടനം ചെയ്തു. അലുമിനി പ്രസിഡന്‍റ് അഡ്വ. കെ വിനോദ് അധ്യക്ഷത വഹിച്ചു. പൂർവ വിദ്യാർഥികളായ എഴുത്തുകാരൻ വി. ഷിനിലാൽ, കേരള സർവകലാശാല സിൻഡിക്കറ്റംഗം ജെ.എസ്. ഷിജുഖാൻ, എച്ച്.ആർ. സന്ധ്യ, കെഎഎസ് കോളജ് പ്രിൻസിപ്പൽ ഡോ. എൽ. ഷീലാകുമാരി എന്നിവർ പ്രസംഗിച്ചു. പൂർവ അധ്യാപകരായിരുന്നവരെ ച‌ടങ്ങിൽ ആദിരച്ചു. അലുമിനി സെക്രട്ടറി കെ.സി. സാനുമോഹൻ സ്വാഗതവും ജോയിന്‍റ് സെക്രട്ടറി ഹരികൃഷ്ണൻ നന്ദിയും പറഞ്ഞു. കോളജ് ദിനങ്ങളുടെ ഓർമകൾ നല്കുന്ന മാതൃകയിലാണ് കാര്യപരിപാടികൾ സംഘടിപ്പിച്ചത്. അസംബ്ലി, ക്ലാസ്റൂം, ആർട്സ് ക്ലബ്, വർത്തമാനം, പാഥേയം, ബെല്ലടിക്കുമ്പോൾ എന്നിങ്ങനെയാണ് പരിപാടികൾ ക്രമീകരിച്ചിരുന്നത്. ആർട്സ് ക്ലബിന്‍റെ ഭാഗമായി ഗായകൻ രാജേഷ് വിജയ് നയിക്കുന്ന സംഗീത പരിപാടിയും ഉണ്ടായിരുന്നു.

മാലിന്യം വാരി വലഞ്ഞ് തൊഴിലാളികൾ; കുലുക്കമില്ലാതെ അധികൃതർ

വിഴിഞ്ഞം: തീരത്ത് അടിച്ച് കയറുന്ന പ്ലാസ്റ്റിക് മാലിന്യങ്ങൾ ശേഖരിക്കാൻ ദിനംപ്രതി ആയിരത്തോളം തൊഴിലാളികൾ, ശമ്പളം 900 രൂപയും ചെലവും. അവസാനമില്ലാതെ മാലിന്യ വരവ്. ഇൻഷ്വറൻസ് ഉള്ളതിനാൽ കപ്പൽ കമ്പനിക്കും മാലീന്യനീക്കത്തിനു ചുമതലയുള്ള ഏജൻസിക്കും ചാകരയെന്ന് ആക്ഷേപം. മത്സ്യത്തൊഴിലാളികളും, പൊതുജനവും ആശങ്കയുടെ പടുകുഴിയിലായെങ്കിലും തിരിഞ്ഞു നോക്കാൻ ആരുമില്ലാതായി. അറബിക്കടലിന്‍റെ ആഴങ്ങളിൽ മുങ്ങിത്താണ കണ്ടെയ്നർ കപ്പൽ എംഎസ്‌സിയുടെ എൽസ-3 യെ പൊതുസമൂഹം മറന്നെങ്കിലും തീരദേശ വാസികൾക്ക് ഇനിയും മറക്കാനാകില്ല. കണ്ടെയ്നറുകളിൽനിന്ന് കടലിൽ കലർന്നു തീരത്തേക്ക് അടിച്ചു കയറുന്ന പ്ലാസ്റ്റിക് തരികൾ നീക്കുന്ന ജോലികൾ തുടങ്ങിയിട്ട് രണ്ടു മാസം കഴിഞ്ഞു. ദിനംപ്രതിനൂറു കണക്കിനു കുടുംബശ്രീ പ്രവർത്തകരും ഫയർ ഫോഴ്സ്, സിവിൽ ഡിഫൻസ് പ്രവർത്തകരും നടത്തുന്ന മാലിന്യനീക്കവും എങ്ങുമെത്താതെ തുടരുകയാണ്. കണ്ടെയ്നർ ആഴങ്ങളിൽ കിടക്കുന്ന കാലമത്രയും കടൽ മലിനമാകുമെന്നാണു മത്സ്യത്തൊഴിലാളികളുടെ വാദം. വിഴിഞ്ഞം തുറമുഖത്തുനിന്ന് 643 കണ്ടെയ്നറുകളുമായി കൊച്ചിയിലേക്കുള്ള യാത്രാമധ്യേ ലൈബീരിയൻ രജിസ്ട്രേഷനുള്ള എംഎസ്‌സിയുടെ എൽസാ - 3 ആലപ്പുഴ തോട്ടപ്പള്ളിക്കും പതിനഞ്ച് നോട്ടിക്കൽഉൾക്കടലിൽ അപകടത്തിൽപ്പെട്ട് താഴ്ന്നിട്ട് ഇന്ന് 67 ദിവസം പിന്നിടുകയാണ്. മേയ് 24 നു നടന്ന അപകടത്തെക്കുറിച്ചുള്ള കോലാഹലങ്ങൾ കെട്ടടങ്ങിയതോടെ അധികൃതർ എല്ലാം മറന്നു. എന്നാൽ അപകടം നടന്നു ദിവസങ്ങൾ കഴിയുമ്പോഴും കരയിലേക്ക് ഒഴുകി വരുന്ന പ്ലാസ്റ്റിക് തരികൾക്ക് കുറവ് വന്നില്ല. തീരത്തെ മണലിൽ അടിഞ്ഞു കൂടിയ മാലിന്യങ്ങളെ നീക്കാൻ തുടക്കത്തിൽ പോലീസും, ഫയർ ഫോഴ്സും, സന്നദ്ധ സംഘടനാ പ്രവർത്തകരും ഹരിതകർമസേനയും രംഗത്തിറങ്ങിയെങ്കിലും ഒന്നിനും അവസാനമുണ്ടായില്ല. ഒടുവിൽ അഞ്ചുതെങ്ങ് മുതൽ പൊഴിയൂർ വരെയുള്ള കടൽക്കര ശുദ്ധമാക്കാൻ കുടുംബശ്രീ പ്രവർത്തകരെയും കളത്തിലിറക്കി. ഒരു പഞ്ചായത്തിൽനിന്ന് 30 കുടുംബശ്രീ അംഗങ്ങളെ വീതം തെരഞ്ഞെടുത്തു. ഇതിനുപരി സിവിൽ ഡിഫൻസ് പ്രവർത്തകരും ഉൾപ്പെടെ എംഎസ്‌സി കമ്പനി വകയായി ദിനംപ്രതി 900 ത്തോളം പേർക്കു തൊഴിൽ ലഭിക്കുന്നുണ്ടെങ്കിലും കടലിൽ വരാനിരിക്കുന്ന ഗുരുതര പാരിസ്ഥിതിക പ്രശ്നത്തെക്കുറിച്ച് ആർക്കും മിണ്ടാട്ടമില്ല. 643 കണ്ടെയ്നറുകളിൽ പതിനഞ്ചോളം എണ്ണം വെള്ളം നിഞ്ഞാൽ രാസപ്രവർത്തനം നടക്കുന്ന രാസപദാർഥങ്ങൾ നിറച്ചവയാണെന്ന് അധികൃതർ സമ്മതിക്കുമ്പോഴും അവ എങ്ങനെ നീക്കം ചെയ്യുന്നതിനെക്കുറിച്ചും തീരുമാനമായില്ല. പൊട്ടിത്തകർന്ന കണ്ടെയ്നറുകളിൽനിന്ന് പുറത്തായ പ്ലാസ്റ്റിക് തരികൾ നിറച്ച ചാക്കുകെട്ടുകൾ ഇപ്പോഴും ഉൾക്കടലിലൂടെ ഒഴുകി നടക്കുന്നതായി മത്സ്യത്തൊഴിലാളികൾ പറയുന്നു. ഇവ പാറക്കെട്ടുകളിൽ ഇടിച്ച് തകർന്ന് ഒഴുക്കിന്‍റെ ദിശയനുസരിച്ച് കേരള -തമിഴ്നാട് തീരങ്ങളിൽ അടിച്ചു കയറുകയാണ്. മണൽപ്പരപ്പിൽ അടിയുന്ന മാലിന്യങ്ങൾ നീക്കാൻ ശ്രമിക്കുന്ന ബന്ധപ്പെട്ട ഏജൻസികൾ കടലിനെ തിരിഞ്ഞു നോക്കാത്തതിലും ദുരൂഹതയുള്ളതായി മത്സ്യത്തൊഴിലാളികൾ പറയുന്നു. നിലവിൽ അരിച്ചു വാരുന്ന പ്ലാസ്റ്റിക് മാലിന്യങ്ങൾ ദിവസവും ശേഖരിക്കുന്ന സ്വകാര്യ ഏജൻസി അധികൃതർ വിഴിഞ്ഞം മാരിടൈം ബോർഡ് തുറമുഖത്തിന്‍റെ ഗോഡൗണിൽ സൂക്ഷിക്കുകയാണ്. ഉറവിടം കണ്ടെത്തി പരിഹാരം കാണാത്ത അധികൃതരുടെ ഇപ്പോഴത്തെ നടപടി എത്ര കാലമുണ്ടാകുമെന്ന ചോദ്യത്തിനും ആർക്കും മറുപടിയില്ല.

വീട്ടമ്മയില്‍നിന്നും ആറുലക്ഷം രൂപ തട്ടിയെടുത്ത കേസില്‍ വ്യാജ ജഡ്ജിയും സഹായിയും അറസ്റ്റില്‍

വെഞ്ഞാറമൂട്: വീട്ടമ്മയില്‍ നിന്നും ആറു ലക്ഷം രൂപ തട്ടിയെടുത്ത കേസിലും മറ്റു നിരവധി തട്ടിപ്പു കേസുകളിലും പ്രതികളായ രണ്ടു പേര്‍ അറസ്റ്റില്‍. വായ്പാ കുടിശിക എഴിത്തള്ളാന്‍ സഹായിക്കാമെന്നു പറഞ്ഞായിരുന്നു വീട്ടമ്മയില്‍ നിന്നും പണം തട്ടിയത്. കണ്ണൂര്‍ ചിറയ്ക്കല്‍ കവിതാലയത്തില്‍ കെ.എം. ജിഗേഷ് (40), മാന്നാര്‍ ഇരുമന്തൂര്‍ അച്ചത്തറ വടക്കതില്‍ വീട്ടില്‍ സുമേഷ് (36) എന്നിവരാണ് അറസ്റ്റിലായത്. ഒരു ആഡംബര കാര്‍, 91,000 രൂപ, ലാപ്‌ടോപ്, പ്രിന്‍റർ, ഏഴ് മൊബൈല്‍ ഫോണുകള്‍, യുപിഎസ്സിയുടേതു ഉൾപ്പെടെ വിവിധ സ്ഥാപനങ്ങളിലേക്കു പലര്‍ക്കായി തയാറാക്കി വച്ചിരുന്നു വ്യാജ നിയമന ഉത്തരവുകള്‍ എന്നിവയും പോലീസ് പിടിച്ചെടുത്തിട്ടുണ്ട്. വെഞ്ഞാറമൂട് സ്വദേശിയായ വീട്ടമ്മയുടെ പരാതിയിലാണ് നടപടി. 2022 ജൂണിലാണ് കേസിനാസ്പദമായ സംഭവങ്ങള്‍ക്കു തുടക്കം. പരാതിക്കാരി കേരളാ ബാങ്കില്‍ നിന്നും 10 ലക്ഷം രൂപ വായ്പയെടുത്തിരുന്നു. ഇതു തിരിച്ചടവു മുടങ്ങുകയും ബാങ്ക് ജപ്തി നടപടികളിലേക്കു കടക്കുകയും ചെയ്തു. വീട്ടമ്മയുടെ ഒമാനില്‍ ജോലിചെയ്യുന്ന ഭര്‍ത്താവ് ഇക്കാര്യം കൂടെ നോലിചെയ്യുന്ന മൂവാറ്റുപുഴ പൈങ്ങോട്ടുകര സ്വദേശിയായ ഷിജുവിനോടും പറഞ്ഞിരുന്നു. പ്രശ്‌ന പരിഹാരമെന്ന നിലയില്‍ തന്‍റെ പരിചയത്തില്‍ കേരളാ ബാങ്കിന്‍റെ കാര്യങ്ങള്‍ നോക്കുന്ന ജഡ്ജിയുണ്ടന്നും താല്പര്യമുണ്ടങ്കില്‍ അയാളെ ഏര്‍പ്പാടാക്കാമെന്നും ഷിജു പറയുകയുണ്ടായി. ഇതിന്‍ പ്രകാരം വീട്ടമ്മയെ ഭര്‍ത്താവു വിളിച്ച് കാര്യങ്ങള്‍ ഏര്‍പ്പാടാക്കുകയും 2022ല്‍ വെമ്പായത്തെ ആഡംബര ഹോട്ടലിനു മുന്നില്‍വച്ച് വീട്ടമ്മ അന്നേ ദിവസം ഒന്നര ലക്ഷം രൂപയും അടുത്ത മാസത്തില്‍ മൂന്നു തവണകളായി നാലര ലക്ഷം രൂപയും കൂടി കൊടുക്കുകയുമുണ്ടായി. ഇതൊക്കെയായിട്ടും ബാങ്ക് ജപ്തി നടപടികളുമായി മുന്നോട്ട് പോയതോടെ സംശയം തോന്നിയ വീട്ടമ്മ പ്രതികളെ ബന്ധപ്പെടാന്‍ ശ്രമിച്ചെങ്കിലും നടില്ല. തുടര്‍ന്നാണ് പോലീസില്‍ പരാതി നല്കിയത്. പോലീസും പ്രതികളെ ബന്ധപ്പെടാന്‍ ശ്രമിച്ചങ്കിലും ഫോണുകള്‍ മാറിമാറി ഉപയോഗിക്കുതിനാല്‍ വിജയിച്ചില്ല. ഒടുവില്‍ നിരന്തര ശ്രമത്തിനൊടുവില്‍ ഫോണില്‍ കിട്ടിയെങ്കിലും പോലീസാണെന്നു മനസിലാക്കി പ്രതികള്‍ ഫോണ്‍കട്ട് ചെയ്തു. ഇതോടെ പോലീസ് മൊബൈല്‍ ടവര്‍ ലൊക്കേഷന്‍ കേന്ദ്രീകരിച്ചു നടത്തിയ പരിശോധനയിൽ പ്രതികൾ ആലപ്പുഴ ഭാഗത്തുണ്ടെന്നു മനസിലാക്കി നടത്തിയ അന്വേഷണത്തില്‍ ആലപ്പുഴ മണ്ണഞ്ചേരിയില്‍ നിന്നും പ്രതികളെ പിടികൂടുകയായിരുന്നു. തുടര്‍ന്നുള്ള ചോദ്യം ചെയ്യലില്‍ വ്യാജ ജഡ്ജി എസ്എസ്എല്‍സി തോറ്റയാളാണെന്നു കണ്ടെത്തി. പല സ്ഥലങ്ങളില്‍ മാറിമാറി താമസിച്ച് ഫോണ്‍ നമ്പരുകള്‍ മാറ്റി പത്രങ്ങളില്‍ പരസ്യം നല്കിയാണ് ആളുകളെ വീഴ്ത്തുന്നത്. പിടികൂടിയ 91,000 രൂപ ദേവസ്വം ബോര്‍ഡില്‍ വ്യാജ നിയമന ഉത്തരവ് നല്കി തട്ടിയെടുത്തതാണെന്നും കണ്ടെത്തി. പ്രതികള്‍ക്കെതിരെ 2014 ല്‍ കണ്ണൂരിലും 2018 ല്‍ പെരുമ്പാവൂരിലും, വയനാട്, ആലപ്പുഴ എന്നിവിടങ്ങളിലും സമാനമായ രീതിയുള്ള തട്ടിപ്പുകള്‍കള്‍ക്കു കേസുകളുണ്ടന്നും മനസിലാക്കാനായെന്നും പോലീസ് പറഞ്ഞു. വെഞ്ഞാറമൂട് എസ്എച്ച്ഒ ആ സാദ് അബ്ദുല്‍ കലാമിന്‍റെ നേതൃത്വത്തില്‍ എസ്ഐ സജിത്ത്, എം.എ. ഷാജി, വി. ഷാജി, സിപിഒമാരായ സന്തോഷ്, ഷാനവാസ്, എന്നിവടങ്ങിയ സംഘമാണ് പ്രതികളെ പിടികൂടിയത്. പ്രതികളെ കോടതിയില്‍ ഹാജരാക്കി.

മൂന്നുനില കെട്ടിടത്തിൽനിന്നും പരസ്യബോർഡ് നിലംപതിച്ച് അപകടം

കാട്ടാക്കട: മൂന്നുനില കെട്ടിടത്തിനു മുകളിൽനിന്നും കൂറ്റൻ പരസ്യബോർഡ് നിലത്തേക്ക് പതിച്ച് അപകടം. എസ്ബിഐ ബാങ്ക് പ്രവർത്തിക്കുന്ന കെട്ടിടത്തിലെ തന്നെ പരിശീലന കേന്ദ്രത്തിലെ ബോർഡ് ആണ് നിലത്തേക്കു പതിച്ചത്. വഴിയാത്രക്കാർ ഉൾപ്പെടെയുള്ളവർ രക്ഷപ്പെട്ടതു തലനാരിഴയ്ക്ക്. ശബ്ദംകേട്ട് ഇവർ ഓടി മാറുകയായിരുന്നു. സ്കൂൾ കുട്ടികൾ ഇതുവഴി വരുന്നതിനു മിനിറ്റുകൾക്ക് മുൻപാണ് പരസ്യ ബോർഡ് താഴേക്കു പതിച്ചത്. ഇന്നലെ ഉച്ചകഴിഞ്ഞു 3.15 ഓടെയായിരുന്നു സംഭവം. കെട്ടിടത്തിന് സമീപത്തുകൂടി കെഎസ്ഇബി വയറുകൾ പോയതിൽ തടഞ്ഞു നിന്നാണ് അപകടം ഒഴിവായത്. അതേസമയം ബാങ്കിനു താഴെയായി പാർക്ക് ചെയ്തിരുന്ന ട്രഷറി വകുപ്പിന്‍റെ വാഹനത്തിനു മുകളിലാണ് ഫ്ലക്സ് വീണത്. ഇതിന്‍റെ പൈപ്പുകൾ വീണു വാഹനത്തിന്‍റെ ഡ്രൈവർക്കു പരിക്കുള്ളതായും വിവരമുണ്ട്. പരസ്യബോർഡിന്‍റെ ഇരുമ്പ് പൈപ്പുകളുടെ ബല ക്കുറവാണ് നിലത്തേക്ക് പതിക്കാൻ കാരണം എന്നാണ് നിഗമനം. കാട്ടാക്കട അഗ്നിഷ സേന സ്ഥലത്തെത്തിയാണ് ബോർഡ് നീക്കം ചെയ്തത്. കാട്ടാക്കട നെയ്യാർ ഡാം റോഡിൽ പോലീസ് സ്റ്റേഷനും കെഎസ്ഇബി ഓഫീസിനും സമീപം എസ്ബിഐ ബാങ്കിന് മുകളിൽനിന്ന കൂറ്റൻ പരസ്യ ബോർഡ് ആണ് അപകടമുണ്ടാക്കിയത്. കാട്ടാക്കട പട്ടണത്തിൽ പ്രധാന റോഡിന്‍റെ ഇരുവശത്തും നിരവധി കെട്ടിടങ്ങൾക്കു മുകളിൽ ഇത്തരത്തിൽ പരസ്യബോർഡുകളുണ്ട്. കാറ്റിൽ ഇവ നിലംപതിക്കുമോ എന്നുള്ള ആശങ്കയിലാണ് പലപ്പോഴും ആളുകൾ സഞ്ചരിക്കുന്നത്. നിരവധി പേർ ഇതു സംബന്ധിച്ച് പഞ്ചായത്തിൽ ഉൾപ്പെടെ പരാതി പറഞ്ഞെങ്കിലും ഫലമുണ്ടായില്ല. ‌ലീഡിംഗ് ഫയർമാൻ ക്ലമെന്‍റ, ഫയർ ആൻഡ് റെസ്ക്യൂ ഓഫീസർ അനീഷ്, ഹോം ഗാർഡ് വിനോദ്, ഡ്രൈവർ രതീഷ് കുമാർ എന്നിവരാണു സ്ഥലത്തെത്തി അപകടകരമായ ബോർഡ് നീക്കം ചെയ്തത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]