ADVERTISEMENT

ADVERTISEMENT

യൂത്ത് കോണ്‍ഗ്രസ് ജന്മദിനം: വിവിധയിടങ്ങളിൽ പതാക ഉയര്‍ത്തി

വെള്ളറട: യൂത്ത് കോണ്‍ഗ്രസ് ജന്മദിനാഘോഷത്തിന്‍റെ ഭാഗമായി നിലമാമൂട് ജംഗ്ഷനില്‍ പതാക ഉയര്‍ത്തി. യൂത്ത് കോണ്‍ഗ്രസ് കുന്നത്തുകാല്‍ മണ്ഡലം പ്രസിഡന്‍റ് സതീഷ് കോട്ടുക്കോണത്തിന്‍റെ നേതൃത്വത്തില്‍ ജവഹര്‍ ബാല്‍ മഞ്ച് ജില്ലാ കോ-ഓര്‍ഡിനേറ്റര്‍ ഷാജി വിൻസന്‍റ് പതാക ഉയര്‍ത്തുകയും മുഖ്യസന്ദേശം നല്‍കുകയും ചെയ്തു.

ADVERTISEMENT

വെട്ടുകാട് പള്ളിയിലെത്തിയ യുവതിയുടെ മാലമോഷ്ടിച്ച രണ്ടുപേർ പിടിയിൽ

വലിയതുറ: വെട്ടുകാട് മാദ്രെ ദേവൂസ് ദേവാലയത്തിലെത്തിയ യുവതിയുടെ മാല മോഷ്ടിച്ച തമിഴ്‌നാട് സ്വദേശികളായ സഹോദരിമാരെ വലിയതുറ പോലീസ് അറസ്റ്റ് ചെയ്തു. തമിഴ്‌നാട് തൂത്തുക്കുടി മാരിയമ്മന്‍ തെരുവില്‍ ഡോര്‍ നമ്പര്‍ 23-ല്‍ പളനിയമ്മ (45), കൊടകാദി (48) എന്നിവരാണ് അറസ്റ്റിലായത്. ആനയറ സ്വദേശിയായ യുവതിയുടെ മാലയാണ് പ്രതികള്‍ കവര്‍ന്നത്. കഴിഞ്ഞ വെള്ളിയാഴ്ച രാവിലെ 11.15 ഓടുകൂടിയായിരുന്നു സംഭവം. പള്ളിയിലെ ക്രിസ്തുരാജ പ്രതിമയില്‍ ഹാരം ചാര്‍ത്തുകയായിരുന്ന യുവതിയുടെ 3.5 പവന്‍ തൂക്കം വരുന്ന സ്വര്‍ണ മാലയാണ് മോഷ്ടാക്കള്‍ പൊട്ടിച്ചെടുത്തു കടന്നത്. വീടുകളില്‍നിന്നു പഴയ വസ്ത്രങ്ങള്‍ വാങ്ങുന്ന സംഘത്തിലുള്ളവരാണ് മോഷ്ടാക്കളെന്ന് പോലീസ് പറഞ്ഞു. ഇവര്‍ വെട്ടുകാട് മേഖലയിലെ വീടുകളിലെത്തി പഴയ വസ്ത്രങ്ങള്‍ വാങ്ങി ശേഖരിച്ച ശേഷമാണ് പള്ളിവളപ്പിലെത്തിയത്. തുടര്‍ന്നു മാല പൊട്ടിച്ചെടുത്തശേഷം ഓട്ടോയില്‍ കയറി രക്ഷപ്പെടുകയായിരുന്നു. മാല നഷ്ടപ്പെട്ട യുവതി വലിയതുറ പോലീസ് സ്റ്റേഷനിലെത്തി പരാതി നല്‍കുകയായിരുന്നു. തുടര്‍ന്നു പോലീസ് നടത്തിയ അന്വേഷണത്തില്‍ സിസിടിവി ദൃശ്യങ്ങളില്‍നിന്നു മോഷ്ടാക്കള്‍ സഞ്ചരിച്ച ഓട്ടോ റിക്ഷ കണ്ടെത്തുകയായിരുന്നു. ഓട്ടോ ഡ്രൈവര്‍ നല്‍കിയ വിവരത്തിന്‍റെ അടിസ്ഥനത്തില്‍ വെട്ടുകാട് മുതല്‍ കഴക്കൂട്ടം വരെയുളള നിരവധി സി സിടിവി കാമറകള്‍ പരിശോധിച്ചതിന്‍റെ അടിസ്ഥാനത്തിൽ പ്രതികളെ കഴക്കൂട്ടം റെയില്‍വേ സ്റ്റേഷന്‍ ഭാഗത്ത് തമ്പടിച്ചിരുന്ന സ്ഥലത്തുനിന്നും കസ്റ്റഡിയിലെടുക്കുകയായിരുന്നു. ബസ് യാത്രികരായ സ് ത്രീകളുടെ മാലകള്‍ കവരുന്ന സംഘത്തില്‍പ്പെട്ടവരാണ് അറസ്റ്റിലായ പ്രതികളെന്നു പോലീസ് പറഞ്ഞു. വലിയതുറ പോലീസ് അറസ്റ്റുചെയ്ത പ്രതികളെ കഴിഞ്ഞ ദിവസം കോടതിയില്‍ ഹാജരാക്കി റിമാന്‍ഡ് ചെയ്തു.

ഫ്രീഡം മെലഡീസ് ഇന്‍റർ സ്കൂൾ ദേശഭക്തിഗാനാലാപന മത്സരത്തിൽ കാർമ്മലും സെന്‍റ് തോമസും ജേതാക്കൾ

തിരുവനന്തപുരം: നാലാഞ്ചിറ സെന്‍റ് ജോൺസ് മോഡൽ ഹയർ സെക്കൻഡറി സ്കൂളിന്‍റെ ആഭിമുഖ്യത്തിൽ നടത്തിയ പത്താമത് ഫ്രീഡം മെലഡീസ് ഇന്‍റർ സ്കൂൾ ദേശഭക്തിഗാനാലാപന മത്സരത്തിൽ സീനിയർ വിഭാഗത്തിൽ വഴുതക്കാട് കാർമ്മൽ സ്കൂളും യുപി വിഭാഗത്തിൽ മുക്കോല സെന്‍റ് തോമസ് സ്കൂളും ഒന്നാംസ്ഥാനം കരസ്ഥമാക്കി. സെന്‍റ് ജോൺസ് സ്കൂളിലെ പ്ലസ് ടു വിഭാഗത്തിന്‍റെ രജത ജൂബിലി ആഘോഷത്തിന്‍റെ ഭാഗമായാണ് ഈ വർഷം ഫ്രീഡം മെലഡീസ് 2025 സംഘടിപ്പിച്ചതെന്ന് പ്രിൻസിപ്പൽ ഫാ. ജോസ് ചരുവിൽ പറഞ്ഞു. കഴിഞ്ഞ 10 വർഷമായി നടന്നു വരുന്ന ഫ്രീഡം മെലഡീസ് ഇന്‍റർ സ്കൂൾ ദേശഭക്തി ഗാനാലാപന മൽസരം ഏറെ ശ്രദ്ധേയമായതാണ്. വിവിധ സ്കൂളുകളിൽ നിന്നായി 27 ടീമുകൾ മത്സരത്തിൽ പങ്കെടുത്തു. എച്ച്എസ് ആൻഡ് എച്ച്എസ്എസ് വിഭാഗത്തിൽ കാർമ്മൽ ഗേൾസ് എച്ച്എസ്എസ്, വഴുതക്കാട്- ഗവ. ഗേൾസ് എച്ച്എസ്എസ്, കോട്ടൺ ഹിൽ- ലയോള സ്കൂൾ, ശ്രീകാര്യം എന്നിവർ ഒന്നും രണ്ടും മൂന്നും സ്ഥാനങ്ങൾ നേടി. യുപി വിഭാഗത്തിൽ സെന്‍റ് തോമസ് റസിഡൻഷ്യൽ സ്കൂൾ, മുക്കോലയ്ക്കൽ സെന്‍റ്് മേരീസ് എച്ച്എസ്എസ്, പട്ടം -നസറത്ത് ഹോം സ്കൂൾ, ബാലരാമപുരം എന്നിവർ ഒന്നും രണ്ടും മൂന്നും സ്ഥാനങ്ങൾ നേടി. വിജയികൾക്കു വിവിധ വിഭാഗങ്ങളിലായി നാൽപതിനായിരത്തിലധികം രൂപ സമ്മാനതുകയായി നൽകി. പ്രിൻസിപ്പൽ ഫാ. ജോസ് ചരുവിലിന്‍റെ അധ്യക്ഷത വഹിച്ചു. തിരുവിതാംകൂർ രാജകുടുംബാംഗം അവിട്ടം തിരുനാൾ ആദിത്യ വർമ സമ്മാനദാനം നടത്തി. വൈസ് പ്രിൻസിപ്പൽ അജീഷ് കുമാർ, പിടിഎ പ്രസിഡന്‍റ് ആൻജലോ മാത്യു കൺവീനർ ബിജു കെ. ജോർജ് എന്നിവർ നേതൃത്വം നൽകി.

ടിപ്പർ പിന്നോട്ടെടുത്തപ്പോഴുണ്ടായ അപകടം: ജീവിതം കൈപിടിയിൽ എത്തും മുന്പെ ശരത് യാത്രയായി

വിഴിഞ്ഞം : കുടുംബം പോറ്റാൻ കഴിയുംവിധം പണമുണ്ടാക്കിയാൽ പ്രേമിച്ച പെണ്ണിനെ വിവാഹം കഴിച്ച് കൊടുക്കാമെന്നു വീട്ടുകാർ. കഷ്ടപ്പെട്ടു പഠിച്ചു തൊഴിൽ സമ്പാദിച്ചു. വാഗ്ദാനം സഫലമാകും മുൻപേ ടിപ്പറിന്‍റെ രൂപത്തിൽ വിധിയെത്തി. കെട്ടാൻ പോകുന്ന പെൺകുട്ടിയുടെ കുടുംബക്കാരുടെ കൺമുന്നിൽതന്നെ എല്ലാം അവസാനിച്ചു. വിവാഹ നിശ്ചയത്തിനുള്ള മോതിരവും വസ്ത്രങ്ങളും വാങ്ങിയുള്ള മടങ്ങിവരവ് കന്യാകുമാരി വിളവംകോട് അടക്കാക്കുഴി ഇരിത്തംകോട് മേലെ പുത്തൻവീട്ടിൽ ശരത്തിന്‍റെ അവസാന യാത്രയായി. ഞായറാഴ്ച വൈകുന്നേരം കോവളം - കാരോട് ബൈപ്പാസിൽ മണ്ണക്കല്ലിൽ നടന്ന അപകടമാണു നാട്ടുകാരെയും പോലീസിനെയും ഏറെ വിഷമത്തിലാക്കിയത്. ഒരു ടിപ്പർ ലോറി ഡ്രൈവറുടെ കുറച്ച് നേരത്തെ അശ്രദ്ധയാണു വിലപ്പെട്ട ജീവൻ നഷ്ടമാകാൻ വഴിയൊരുക്കിയത്. പഠിത്തത്തിൽ മിടുക്കനായ ശരത് സമീപവാസിയായ യുവതിയുമായി നേരത്തെ അടുപ്പത്തിലായിരുന്നു. ഒരു തൊഴിൽ സമ്പാദിച്ചാൽ വിവാഹം നടത്തിക്കൊടുക്കാമെന്നു യുവതിയുടെ വീട്ടുകാർ വാഗ്ദാനവും നൽകി. പഠനത്തിൽ പുറകിലാകാത്ത ശരത് ഹോട്ടൽ മാനേജ്മെന്‍റ് പഠനം പൂർത്തിയാക്കി തലസ്ഥാനത്തെ പ്രമുഖ ഹോട്ടലിൽ ജോലിയിൽ പ്രവേശിച്ചു. അങ്ങനെ വിവാഹ കാര്യത്തിൻ ഒരു തീരുമാനവുമുണ്ടായി. വിവാഹ നിശ്ചയത്തിനായി ദിവസംകുറിച്ച വീട്ടുകാർ കൈമാറാനുള്ള മോതിരവും വസ് ത്രങ്ങളും എടുക്കാൻ ഞായറാഴ്ച പെൺകുട്ടിയോടൊപ്പം തലസ്ഥാനത്ത് എത്തി. ശരത്തും സുഹൃത്തുക്കളും ഇവരോടൊപ്പം ചേർന്നു. ആഭരണവും വസ്ത്രങ്ങളും എടുത്തശേഷം ശരത്ത് ബൈക്കിലും യുവതിയുടെ വീട്ടുകാർ തൊട്ടുപുറകിൽ കാറിലുമായി വീട്ടിലേക്കു യാത്ര പുറപ്പെട്ടു. ബൈപാസിലൂടെ മണ്ണക്കല്ല് ഭാഗത്തു വരുന്നതിനിടയിൽ വിധി ടിപ്പറിന്‍റെ രൂപത്തിൽ എത്തി. സാധനങ്ങൾ ഇറക്കിയ ശേഷം പുറകോട്ടു ടിപ്പർ ലോറി എടുക്കുന്നതുകണ്ട നാട്ടുകാർ ഉറക്കെ വിളിച്ചു നിർത്താൻ ആവശ്യപ്പെട്ടെങ്കിലും ഫലമുണ്ടായില്ല. പുറകിൽ നിന്ന ശരത്തിന്‍റെ പുറത്തുകൂടി ടിപ്പറിന്‍റെ പിൻചക്രം കയറിയിറങ്ങി അരയ്ക്കു താഴെ ചതഞ്ഞരഞ്ഞു. വലതു കാൽ തുടയുടെ ഭാഗത്തു വച്ചു മുറിഞ്ഞുമാറി. ഇടതുകാലും രണ്ടു കിഡ്നികളും ചതഞ്ഞരഞ്ഞു. അപകടം കണ്ട യുവതിയുടെ കുടുംബക്കാർ വാഹനം നിർത്തി ഓടിയെത്തി. ഇതിനിടയിൽ നാട്ടുകാരും പൂവാർ പോലീസും രക്ഷക്കായി പാഞ്ഞടുത്തു. അപ്പോഴും ഓർമ്മ നഷ്ടപ്പെടാതെ ജീവനുണ്ടായിരുന്ന ശരത് താൻ രക്ഷപ്പെടുമേ എന്ന് ആശുപത്രിയിലേക്ക് ആംബുലൻസിൽ കയറ്റുന്നതിനിടയിൽ പോലീസിനോടും ബന്ധുക്കളോടും തിരക്കി. അവർ ൽകിയ ഉറപ്പുമായി നെയ്യാറ്റിൻകരയിലെ സ്വകാര്യ ആശുപത്രിയിലെക്കുള്ള യാത്രാമധ്യേ ഏറെ ക്ഷീണിതനുമായി. മുറിഞ്ഞ കാലുമായി ആശുപത്രിയിലെ തീവ്രപരിചരണ വിഭാഗത്തിൽ പ്രവേശിപ്പിച്ചെങ്കിലും ജീവിതത്തിലേക്കു തിരിച്ച് വരാനുള്ള ആഗ്രഹം സഫലമാക്കാനാകാതെ ഇന്നലെ യാത്രയായി. അപകടം നടന്നത് കണ്ട നാട്ടുകാർ ടിപ്പർ ഡ്രൈവറെയും കൈകാര്യം ചെയ്തു. പരിക്കേറ്റ ഡ്രൈവറെ മെഡിക്കൽ കോളജിൽ പ്രവേശിപ്പിച്ചു. എസ്. രാജേന്ദ്രകുമാർ

എംസിഎ അർധവാർഷിക അസംബ്ലി സമ്മേളനവും വൈദികരെ ആദരിക്കലും

പിരപ്പൻകോട്: മലങ്കര കാത്തലിക് അസോസിയേഷൻ (എംസിഎ) തിരുവനന്തപുരം മേജർ അതിരൂപത അർധവാർഷിക അസംബ്ലിയും ജോണ്‍ മരിയ വിയാനി ദിനാചരണവും പിരപ്പൻകോട് സെന്‍റ് ജോണ്‍സ് കമ്യൂണിറ്റി ഹാളിൽ നടത്തി. എംസിഎ മേജർ അതിരൂപത സമിതി പ്രസിഡന്‍റ് റെജിമോൻ വർഗീസ് അധ്യക്ഷത വഹിച്ച യോഗത്തിൽ എംസിഎ സഭാതല പ്രസിഡന്‍റ് ഡോ. എസ്.ആർ. ബൈജു ഉദ്ഘാടനം നിർവഹിച്ചു. മേജർ അതിരൂപത ഡയറക്ടർ ഫാ. ജോണ്‍സൻ പുതുവേലിൽ, മലങ്കര മെഡിക്കൽ വില്ലേജ് ഹോസ്പ്പിറ്റൽ ഡയറക്ടർ ഫാ. ജോസ് കിഴക്കേടത്ത്, ജനറൽ സെക്രട്ടറി രാജുമോൻ ഏഴംകുളം. ഫാ. ജയിംസ് ചരുവിൽ, ജോണ്‍ ആരുശുമൂട്, ബൈജു പാലോട, ബെറ്റ്സി എന്നിവർ പ്രസംഗിച്ചു. തുടർന്നു പിരപ്പൻകോട് ക്ലെർജി ഹോമിൽ വിശ്രമത്തിലായിരിക്കുന്ന മുൻ വൈദികരെ ആദരിച്ചു. അർധവാർഷിക അസംബ്ലിയിൽ ഒന്പതു വൈദികജില്ലയുടെ റിപ്പോർട്ട് അവതരിപ്പിച്ചു ചർച്ച നടത്തി.

ഓട്ടോ ഡ്രൈവറെ മർദിച്ച പ്രതി പിടിയിൽ

വിളപ്പിൽശാല : ഓട്ടോ ഡ്രൈവറെ മർദിച്ച് അവശനാക്കിയ ശേഷം ഒളിവിൽ പോയ പ്രതി പിടിയിലായി. കുണ്ടമൺ കടവ് ഭാഗത്തുള്ള തട്ടുകടയിൽനിന്ന് ഭക്ഷണം കഴിക്കുകയായിരുന്ന ഓട്ടോ ഡ്രൈവറായ തച്ചോട്ടുകാവ് പിടാരം സ്വദേശി ഷാനവസുമായി വാക്കു തർക്കത്തിലായ പ്രതികൾ ഷാനവസിനെ മർദിക്കുകയായിരുന്നു. എതിർത്തു നിന്നെങ്കിലും തറയിൽ വീണുപോയ ഷാനവാസിനെ തറയിൽ കിടന്നിരുന്ന കല്ലുകൊണ്ട് മർദ്ദിക്കുകയായിരുന്നു. അവശനിലയിലായ ഷാനവാസിനെ ഓടിക്കൂടിയ നാട്ടുകാരാണ് ആശുപത്രിയിൽ എത്തിച്ചത്. തുടർന്നു വിളപ്പിൽശാല പോലീസ് നടത്തിയ അന്വേഷണത്തിൽ വിഷ്ണു, മഹാദേവൻ എന്നീ രണ്ട് പ്രതികളെ പിടികൂടിയിരുന്നു. തുടർന്നു നടത്തിയ അന്വേഷണത്തിൽ ഒളിവിൽ പോയ വിളപ്പിൽ വില്ലേജിൽ ചെറുപാറ മഹാവിഷ്ണു ക്ഷേത്രത്തിന് സമീപം വടക്കേക്കര വീട്ടിൽ നിന്നും വിളവൂർക്കൽ വില്ലേജിൽ കുണ്ടമൺകടവ് ബലിക്കിടവിനു സമീപം മിന്നു ഭവനിൽ താമസം അരുൺ എന്ന ജിത്തുവിനെ (31), വിളപ്പിൽശാല പോലീസ് സ്റ്റേഷൻ എസ്എച്ച്ഒ നിജാമിന്‍റെ നേതൃത്വത്തിൽ എസ്‌സിപിഒ അഖിൽ, സിപിഒ ജിജിൻ, വിഷ്ണു എന്നിവരടങ്ങിയ പോലീസ് സംഘം അറസ്റ്റ് ചെയ്യുകയായിരുന്നു. പ്രതിയെ കോടതിയിൽ ഹാജരാക്കി.

നെടുമങ്ങാട് ജില്ലാ ആശുപത്രിയിൽ മോർച്ചറിയിലെ ഫ്രീസർ തുറന്നു മൃതദേഹം കാണിച്ച സംഭവം: മൂന്നംഗ സമിതി അന്വേഷിക്കും

നെടുമങ്ങാട്: ജില്ലാ ആശുപത്രിയിലെ മോർച്ചറിയിൽ സൂക്ഷിച്ചിരുന്ന യുവതിയുടെ മൃതദേഹം സുരക്ഷ ജീവനക്കാരൻ ഫ്രീസർ തുറന്നു കാണിച്ച സംഭവത്തിൽ മൂന്നംഗ സമിതി അന്വേഷണം നട‌ത്തും. ഡെപ്യൂട്ടി സൂപ്രണ്ട്, നഴ്സിംഗ് സൂപ്രണ്ട്, ലേ സെക്രട്ടറി എന്നിവരുടെ സമിതിയാണ് അന്വേഷിക്കുന്നത്. 10 ദിവസത്തിനുള്ളിൽ റിപ്പോർട്ട് കൈമാറുമെന്നാണു വിവരം. സംഭവത്തിൽ സുരക്ഷ ജീവനക്കാരൻ സുരേഷ് കുമാറിനെ 15 ദിവസത്തേക്കു ജോലിയിൽനിന്നു മാറ്റിനിർത്തി. കരിപ്പൂര് സ്വദേശിനിയായ 28 കാരിയാണ് ശനിയാഴ്ച മരിച്ചത്. ശേഷം പോസ്റ്റുമോർട്ടത്തിനായി ജില്ലാ ആശുപത്രിയിലെ മോർച്ചറിയിലേക്കു മൃതദേഹം മാറ്റിയിരുന്നു. ഞായറാഴ്ച രാവിലെയാണ് സുരേഷ് കുമാർ കാന്‍റീൻ നടത്തുന്ന ആൾക്കും ബന്ധുക്കൾക്കും മോർച്ചറിയിൽ സൂക്ഷിച്ചിരിക്കുന്ന മൃതദേഹം കാണിച്ചത്.

നെയ്യാര്‍ മേള: പന്തലിനു കാൽനാട്ടി

നെയ്യാറ്റിന്‍കര: സംസ്ഥാന വിനോദ സഞ്ചാര വകുപ്പിന്‍റെയും തദ്ദേശസ്വയംഭരണ സ്ഥാപനങ്ങളുടെയും സഹകരണത്തോടെ കേരള സംസ്ഥാന വ്യാപാരി വ്യവസായി സമിതി നെയ്യാറ്റിൻകര ഏരിയാ കമ്മിറ്റി സംഘടിപ്പിക്കുന്ന നെയ്യാർ മേളയുടെ പന്തല്‍ കാല്‍നാട്ടു കര്‍മം കെ. ആന്‍സലന്‍ എംഎല്‍എ നിര്‍വഹിച്ചു. 29 മുതൽ സെപ്തംബർ 14 വരെ ആറാലുംമൂട് മാർക്കറ്റ് ഗ്രൗണ്ടിൽ അരങ്ങേറുന്ന മേളയില്‍ ഓണാഘോഷത്തിനു പുറമേ വ്യാപാരമേള, വിവിധ സാംസ്കാരിക സാഹിത്യ പരിപാടികൾ, കലാപരിപാടികൾ എന്നിവ ഉള്‍പ്പെടുന്നു. പന്തൽ കാൽനാട്ടു ചടങ്ങിൽ മേള വർക്കിംഗ് ചെയർമാൻ ടി. ശ്രീകുമാർ, നഗരസഭ വികസന സ്റ്റാന്‍ഡിംഗ് കമ്മിറ്റി ചെയർമാൻ കെ.കെ. ഷിബു, വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയർമാൻ ഡോ. എം.എ. സാദത്ത്, കൗൺസിലർമാരായ പ്രസന്നകുമാര്‍, ഷാമില, ഐശ്വര്യ, ദീപ, നെയ്യാർ മേള ജനറൽ കൺവീനർ എം. ഷാനവാസ്, കൺവീനർ പി. ബാലചന്ദ്രൻനായർ, സംഘാടക സമിതി അംഗങ്ങളായ പി. പ്രദീപ്, ബി. മണികണ്ഠൻ, ടി. തങ്കരാജ്, പുരുഷോത്തമൻനായർ, എ.എസ്. സജി പെരുങ്കടവിള, എൻ.എസ്. ദിലീപ്, നെയ്യാറ്റിൻകര ജയചന്ദ്രൻ, രചന വേലപ്പൻനായർ, ഡോ. സന്തോഷ് കുമാർ, അഡ്വ. തലയൽ പ്രകാശ്, എസ്.കെ. ജയ കുമാര്‍ എന്നിവർ സംബന്ധിച്ചു.

കോഴി കയറ്റിയ മിനി ലോറി വീട്ടിലേക്ക് ഇടിച്ചു കയറി

വെള്ളറട : രാത്രിയില്‍ ഡ്രൈവര്‍ ഉറങ്ങിയതിനെ തുടര്‍ന്നു കോഴി കയറ്റിയ മിനിലോറി വീട്ടിലേക്ക് ഇടിച്ചു കയറി മതില്‍ക്കെട്ടുകള്‍ തകര്‍ത്തു. കഴിഞ്ഞദിവസംരാത്രി പതിനൊന്നോടെ നിലമാമൂട് റോഡരികത്തു വീട്ടില്‍ അര്‍ജുനന്‍റെ വീട്ടിലേക്കാണ് മിനിലോറി പാഞ്ഞു കയറിയത്. നിറയെ കോഴികള്‍ ഉണ്ടായിരുന്ന ലോറിയില്‍നിന്നും കോഴികള്‍ അടക്കമുള്ള കൂടുകള്‍ പുറത്തേക്കു തെറിച്ചു വീണു നിരവധി കോഴികള്‍ ചത്തു. മിനിലോറിയുടെ മുന്‍ഭാഗം പൂർണമായും തകര്‍ന്നു. മിനിലോറി പോലീസ് കസ്റ്റഡിയില്‍ എടുത്തു. മതില്‍ക്കെട്ടുകള്‍ തകര്‍ന്ന അര്‍ജുനനു നഷ്ടപരിഹാരം ഉറപ്പാക്കിയ ശേഷം മിനി ലോറി വിട്ടയക്കാനുള്ള ശ്രമത്തിലാണ്. പരിധിയിലധികം കിലോമീറ്ററുകള്‍ ദൂരം കടന്നുവരുന്ന വാഹനങ്ങളുടെ ഡ്രൈവർമാർ ഉറങ്ങിപ്പോകുന്നതാണ് മേഖലയിലെ മിക്ക അപകടങ്ങൾക്കും കാരണം.

കുട്ടിപ്പോലീസ് അഡ്വഞ്ചർ സ്‌പോർട്സ് ഹബ് തുടങ്ങി

വിതുര: പരിശീലനം രസകരവും ആയാസ രഹിതവുമാക്കുന്നതിനായി വിതുര ഗവ. വിഎച്ച്എസ്എസിലെ, സ്റ്റുഡന്‍റ് പോലീസ് പദ്ധതി സജ്ജമാക്കിയ അഡ്വഞ്ചർ സ്പോർട്സ് ഹബിന്‍റെ ഉദ്ഘാടനം പഞ്ചായത്ത്‌ പ്രസിഡന്‍റ് മഞ്ജുഷ ജി.ആനന്ദ് നിർവഹിച്ചു. പഞ്ചായത്തിന്‍റെ സാമ്പത്തിക സഹായത്തോടെയാണ് ഹബ് തയാറാക്കിയത്. സംസ്ഥാനത്തെ എസ്പിസി യൂണിറ്റുകളിലെ ഇത്തരത്തിലുള്ള ആദ്യത്തെ സ്‌പോർട്സ് ഹബാണിത്. ഫുട് ബോൾ, ക്രിക്കറ്റ്, ഹോക്കി തുടങ്ങിയ മേജർ ഗയിമുകൾക്കൊപ്പം ഫ്രിസ്‌ബി, ടെന്നികോ തുടങ്ങി നിരവധി മൈനർ ഗയിമുകളും ആവശ്യാനുസരണം തിരഞ്ഞെടുക്കാം. കൂടാതെ കായിക ക്ഷമത പരിശീലനത്തിനായി ഒബ്‌സ്റ്റക്കിൾ ട്രെയിനിംഗും ലഭിക്കും. ഇതിനാവശ്യമായ ക്ലൈമ്പിംഗ് റോപ്പ്, ഹഡിൽസ്, ലാഡർ തുടങ്ങിയവയും അഡ്വഞ്ചർ സ്പോർട്സ് ഹബിൽ സജ്ജമാക്കിയിട്ടുണ്ട്. ഇതിനു പുറമെ യോഗ, സുംബ പരിശീലനവും നൽകും വൈസ് പ്രിൻസിപ്പൽ വി.എസ്. ഷീജ, എസ്എംസി ചെയർമാൻ എ. സുരേന്ദ്രൻ, പിടിഎ അംഗം നിജിലാൽ എസ്പിസി ഓഫീസർമാരായ പ്രിയ ഐ.വി. നായർ, കെ. അൻവർ, രാഹുൽ ദീപ്, അനീസ എന്നിവർ പങ്കെടുത്തു.

കാരേറ്റ് - പാലോട് റോഡ് നിർമാണം പുനഃരാരംഭിച്ചു

പാലോട്: റീ ടെണ്ടർ ചെയ്ത വാമനപുരം - ചിറ്റാർ റോഡിന്‍റെ നിർമാണ പ്രവൃത്തി ആരംഭിച്ചതായി ഡി.കെ. മുരളി എംഎൽ എ അറിയിച്ചു. നിലവിലുള്ള കരാറുകാരനെ റിസ്ക് ആൻഡ് കോസ്റ്റിൽ ഉൾപ്പെടുത്തി നീക്കം ചെയ്തതിനു ശേഷം ബാക്കിയുള്ള പ്രവൃത്തിക്ക് 14.80 കോടി രൂപയുടെ പുതിയ എസ്റ്റിമേറ്റ് തയാറാക്കി ടെണ്ടർ ചെയ്തിരുന്നു. ഇതിൻ പ്രകാരമുള്ള ഇ-ടെണ്ടറിൽ എസ്റ്റിമേറ്റ് തുകയെക്കാൾ 19 ശതമാനം അധികം തുക ക്വാട്ട് ചെയ്ത ശ്രീധന്യ കൺസ്ട്രക്ഷൻ കമ്പനിക്കാണ് പുതിയ കരാർ ലഭിച്ചത്. ടെണ്ടർ തുക പുതുക്കിയ ഡി.എസ്.ആറിനെ ക്കാൾ കൂടുതലാണെങ്കിലും റോഡ് നിർമാണത്തിന്‍റെ അനിവാര്യത സർക്കാരിനെ ബോധ്യപ്പെടുത്തിയതിന്‍റെ അടിസ്ഥാനത്തിലാണ് സർക്കാർ ടെണ്ടർ അംഗീകരിച്ചത്. മാസങ്ങൾക്കു മുമ്പ് 30 ലക്ഷം രൂപയുടെ മെയിന്‍റനൻസ് പ്രവർത്തികളും റോഡിൽ നടത്തിയിരുന്നു. ബിഎം, ഡാമേജ് പോർഷൻ, ബിസി സർഫസിംഗ്, ഡ്രയിൻ - കൽവർട്ട്, കാരിയേജ് വേ, ട്രാഫിക് സുരക്ഷാ പ്രവൃത്തികൾ, വാട്ടർ അതോറിറ്റി റെസ്റ്റോ റേഷൻ തുടങ്ങിയവ പുതിയ പ്രവൃത്തികളിൽ ഉൾപ്പെടുത്തി യിട്ടുണ്ട്. 12 മാസമാണ് പ്രവൃത്തിയുടെ കാലാവധി.

രാജീവ് ഗാന്ധി റസി. വെൽഫെയർ സഹകരണ സംഘം പ്രസിഡന്‍റ് രാജിവച്ചു

നെടുമങ്ങാട്: മുണ്ടേല രാജീവ് ഗാന്ധി റസിഡൻസ് വെൽഫെയർ സഹകരണ സംഘം പ്രസിഡന്‍റ് സ്ഥാനം എൻ. ഗംഗാധരൻ നായർ രാജിവച്ചു. വൈസ് പ്രസിഡന്റ് കെ.മോഹന കുമാറിനാണ് താൽക്കാലിക ചുമതല. ആരോഗ്യപരമായ കാരണങ്ങളെ തുടർന്ന് സ്ഥാനം രാജിവച്ചത്. സംഘത്തിൽ സഹകരണ വകുപ്പിന്‍റ് അന്വേഷണത്തിൽ കോടികളുടെ ക്രമക്കേട് കണ്ടെത്തിയിരുന്നു. പിന്നാലെ മുൻ പ്രസിഡന്‍റ് എം.മോഹന കുമാർ ആത്മഹത്യ ചെയ്തിരുന്നു. ശേഷം അഡ്മിനിസ്ട്രേറ്ററുടെ നിയന്ത്രണത്തിൽ ആയിരുന്നു. ഇതിനുശേഷമാണ് ഗംഗാധരൻ നായരുടെ നേതൃത്വത്തിലുള്ള ഭരണസമിതി അധികാരമേറ്റത്. സംഘം ക്രമക്കേടുമായി ബന്ധപ്പെട്ടു മൂന്നു ജീവനക്കാരെ ക്രൈംബ്രാഞ്ച് അറസ്റ്റ് ചെയ്തിരുന്നു.

യുവജനവാരം: യുവജന മഹാറാലി സംഘടിപ്പിച്ചു

വെള്ളറട: യുവജനവാരവുമായി ബന്ധപ്പെട്ട് വെള്ളറട ഡിസ്ട്രിക്ട് യുവജന സംഘടന യുവജന മഹാറാലി സംഘടിപ്പിച്ചു. വെള്ളറട ജെ.എം. ഹാളില്‍ നിന്നാരംഭിച്ച് വെള്ളറട ജംഗ്ഷന്‍ വഴി ഡിസ്ടിക്ട് സെന്‍ററായ ഫോസ്റ്റര്‍ മെമ്മോറിയല്‍ സിഎസ്ഐ സഭയില്‍ സമാപിച്ചു. നാം ക്രിസ്തുവിന്‍റെ കരം എന്ന ചിന്താവിഷയത്തെ അടിസ്ഥാനമാക്കി ലഹരിക്കെതിരെയും -പരിസ്ഥിതി ചൂഷണത്തിനെതിരെയും -സമകാലിക വിഷയങ്ങളെയും ഉള്‍ക്കൊള്ളിച്ച് -അണിചേരാം നല്ലൊരു നാളേക്കായി- എന്ന ആപ്തവാക്യത്തോടെയുള്ള ബോധവല്‍ക്കരണ റാലിയില്‍ വെള്ളറട ഡിസ്ട്രിക്ടിലെ പണ്ട്രണ്ട് സഭകള്‍ പങ്കെടുത്തു. മഹായിടവക സെക്രട്ടറി ഡോ. ടി.ചി. പ്രവീണ്‍ വെള്ളറട ഡിസ്ട്രിക്ട് യുവജനവാരം ഉദ്ഘാടനം ചെയ്തു. വെള്ളറട ഡിസ്ട്രിക്ട് ചെയര്‍മാന്‍ റവ. ഡി.ആര്‍. ധര്‍മരാജ് പതാക ഉയര്‍ത്തി. വൈസ് പ്രസിഡന്‍റ് റവ. ഷിന്‍റോ സ്റ്റാന്‍ലി, ഡിസ്ട്രിക്ട് കൗണ്‍സില്‍ സെക്രട്ടറി എസ്. ജസ്റ്റിന്‍ ജയകുമാര്‍, ഡിസ്ട്രിക്ട് യൂത്ത് സെക്രട്ടറി അതുല്‍ എസ്. ഷൈന്‍, ഡിസ്ട്രിക്ട് സണ്‍ഡേ സ്‌കൂള്‍ സെക്രട്ടറി വിദ്യാപ്രസാദ്, ഡിസ്ട്രിക്ട് സ്ത്രീജന സംഘടന സെക്രട്ടറി ജയാജസ്റ്റിന്‍ റവ. അനു, റവ. ബ്രൈറ്റ് സിംഗ് ഡേവിഡ്, വിജു കുമാര്‍, റവ. അഖില്‍, കെ. ജോണി, വിത്സകുമാര്‍, റോബര്‍ട്ട്, വിനോദ് ദീപാലയ, റൂഫസ്, റവ. സജിന്‍ ദാസ്, റവ. കനകരാജ് എന്നിവര്‍ റാലിയില്‍ പങ്കെടുത്തു. റാലി ഡിസ്ട്രിക്ട് സെന്‍ററില്‍ എത്തിയതിനുശേഷം മഹായിടവക സെക്രട്ടറി ടി.ടി. പ്രവീണിന്‍റെ സാന്നിധ്യത്തില്‍ വെള്ളറട ഡിസ്ട്രിക്ട് ചെയര്‍മാന്‍ റവ. ഡി.ആര്‍. ധര്‍മരാജ് പതാക ഉയര്‍ത്തി. തുടർന്നു നടന്ന യുവജന സമ്മേളനത്തിൽ വെള്ളറട ഡിസ്ട്രിക്ട് യൂത്ത് സെക്രട്ടറി അതുല്‍ എസ്. ഷൈന്‍ സ്വാഗതം പറഞ്ഞു. മഹായിടവക സെക്രട്ടറി പ്രവീണ്‍ മുഖ്യസന്ദേശം നല്‍കുകയും ചെയ്തു. ജസ്റ്റിന്‍ ജയകുമാര്‍, വിദ്യ പ്രസാദ്, ജയ ജസ്റ്റിന്‍ എന്നിവര്‍ ആശംസാ പ്രസംഗം നടത്തി. തുടര്‍ന്നു നടന്ന അനുമോദന ചടങ്ങോടു കൂടി യുവജനവാര സമ്മേളം അവസാനിച്ചു.

വട്ടപ്പാറ ലൂർദ് മൗണ്ട് സ്കൂളിലെ 53-ാമത് സ്കൂൾ കലോത്സവം

വെമ്പായം: വട്ടപ്പാറ ലൂർദ് മൗണ്ട് സ്കൂളിലെ 53-ാമത് സ്കൂൾ കലോത്സവം "കലാകൃതി" യുടെ ഉദ്ഘാടനം ഗാനരചയിതാവും കവിയുമായ വിഭു പിരപ്പൻകോട് നിർവഹിച്ചു. സ്കൂൾ അഡ്മിനിസ്ട്രേറ്ററും മാനേജരുമായ റവ. ബ്രദർ പീറ്റർ വാഴപ്പറമ്പിൽ അധ്യക്ഷനായിരുന്നു. പ്രൊവിൻഷ്യൽ സുപ്പീരിയർ ബ്രദർ ഡെന്നിസ് തെക്കേപ്പറമ്പിൽ അനുഗ്രഹപ്രഭാഷണം നടത്തി. സുപ്പീരിയർ ബ്രദർ കെ ടി മാത്യു, സ്റ്റേറ്റ്, സിബിഎസ്ഇ വിഭാഗങ്ങളിലെ പ്രിൻസിപ്പൽമാർ, പിടിഎ ഭാരവാഹികൾ, ആൽമോസ് പ്രതിനിധികൾ തുടങ്ങിയവർ ആശംസകൾ അർപ്പിച്ചു. കലാമേളയിൽ സിബിഎസ്ഇ, സ്റ്റേറ്റ് വിഭാഗങ്ങളിലെ വിദ്യാർഥികളുടെ കലാപരമായ കഴിവുകൾ മാറ്റുരയ്ക്കും. സിബിഎസ്ഇ വിഭാഗത്തിൽ 24 മത്സര ഇനങ്ങളും സ്റ്റേറ്റ് വിഭാഗത്തിൽ 16 മത്സരഇനങ്ങളുമാണ് നടക്കുന്നത്.

ക്ലാസ് റൂം അസ് ലാബ് പദ്ധതി

കല്ലറ: ശിക്ഷ കേരള സ്റ്റാര്‍സ് പദ്ധതിയുടെ ഭാഗമായി ഭരതന്നൂര്‍ ഗവ. എല്‍പിഎസില്‍ നിടപ്പിലാക്കുന്ന ക്ലാസ്‌റൂം അസ് ലാബ് പദ്ധതി പാങ്ങോട് പഞ്ചായത്ത് പ്രസിഡന്‍റ് എം.എം. ഷാഫി ഉദ്ഘാടനം ചെയ്തു. മാതൃഭാഷ, ഇംഗ്ലീഷ്, പരിസര പഠനം, ഗണിതം എന്നീ വിഷയങ്ങളില്‍ പ്രക്രിയാധിഷ്ടിത പഠനം സാധ്യമാക്കുക എന്ന ലക്ഷ്യം വച്ചാണ് പദ്ധതി നടപ്പിലാക്കുന്നത്. മൂന്ന്, നാല് സ്റ്റാന്‍റേഡുകളിലാണ് ലാബുകള്‍ സജ്ജീകരിച്ചിട്ടുള്ളത്. പാലോട് ബിപിസി ആര്‍.എസ്. ബൈജു കുമാര്‍ പദ്ധതി വിശദീകരണം നടത്തി. പഞ്ചായത്തംഗം കെ. മോളി, വിദ്യാഭ്യാസ സ്റ്റാൻഡിംഗ് കമ്മിറ്റി ചെയര്‍മാന്‍ അന്‍വര്‍ പഴവിള, പ്രഥമാധ്യാപിക എ.എസ്. സാജിദ, സ്റ്റാഫ് സെക്രട്ടറി എം.പി. ആദര്‍ശ്, സീനിയര്‍ അസിസ്റ്റന്‍റ് എസ്. നസീറാ ബീഗം എന്നിവര്‍ സംസാരിച്ചു. പിടിഎ അംഗങ്ങള്‍, ജനപ്രതിനിധികള്‍, രക്ഷിതാക്കള്‍ എന്നിവര്‍ പങ്കെടുത്തു.

ഇംഗ്ലീഷ് എൻട്രിച്ച്മെന്‍റ് പ്രോഗ്രാം

നെടുമങ്ങാട്: പൊതു വിദ്യാഭ്യാസ വകുപ്പ് ആവിഷ്കരിച്ചു നടപ്പിലാക്കുന്ന ഇംഗ്ലീഷ് ലാംഗ്വേജ് എൻട്രിച്ച്മെന്‍റ് പ്രോഗ്രാമിന്‍റെ നെടുമങ്ങാട് ഉപജില്ലാതല ഉദ്ഘാടനം വേങ്കവിള രാമപുരം ഗവ. യുപിഎസിൽ ആനാട് പഞ്ചായത്ത് പ്രസിഡന്‍റ് എൻ. ശ്രീകല നിർവഹിച്ചു. വാർഡ് മെമ്പർ എ.എസ്. ശ്രീജ അധ്യക്ഷയായി. ഇംഗ്ലീഷിലുള്ള വിവിധ കലാപരിപാടികൾ കുട്ടികൾ അവതരിപ്പിച്ചു. പ്രൈമറി ക്ലാസുകളിലെ കുട്ടികൾക്ക് ഇംഗ്ലീഷ് ഭാഷാ പ്രാവീണ്യം വർധിപ്പിക്കുന്നതിനും ഇംഗ്ലീഷിലുള്ള ആശയവിനിശേഷി അനായാസകരമാക്കുന്നതിനും വേണ്ടി നടത്തപ്പെടുന്ന ഈ പദ്ധതിയിൽ കമ്മ്യൂണിക്കേറ്റീവ് ഇംഗ്ലീഷിന് പ്രാധാന്യം നൽകി എല്ലാ പ്രവൃത്തി ദിനങ്ങളിലും ക്ലാസ് സമയത്തിനുംമുമ്പും ശേഷവുമാണ് അധ്യാപകർ ക്ലാസുകൾ എടുക്കുന്നത്. പ്രഥമാധ്യാപിക എൻ.ആർ. റാണിചിത്ര, റിസോഴ്സ് അധ്യാപിക സുമിത, വിദ്യാർഥികളായ വേദപ്രമോദ്, ശിവനന്ദ, ഹാൽവിൻസുജിത്ത് എന്നിവർ പങ്കെടുത്തു.

സമീക്ഷ ഓറിയന്‍റേഷൻ പരിപാടി

നെടുമങ്ങാട് : കുട്ടികളുടെ വ്യക്തിത്വ വളർച്ചക്കും പ്രചോദനത്തിനുമായി "സമീക്ഷ' എന്ന പേരിൽ ഏകദിന ഓറിയന്‍റേഷൻ പരിപാടി സംഘടിപ്പിച്ചു. നമസ്തേ വിംഗ്സ് ടു ഫ്ലൈയുടെ ആഭിമുഖ്യത്തിൽ ശ്രീ സത്യസായി സേവാ ഓർഗനൈസേഷനും വശിഗ്ര ഹെൽത്ത് കമ്മ്യൂണിറ്റിയും സഹകരിച്ചായിരുന്നു പരിപാടി. എൻ. അജയകുമാരൻ നായർ, ജില്ലാ കോൺടാക്റ്റ് പേഴ്സൺ പ്രചോദനവും വ്യക്തിത്വ വികസനവും എന്ന വിഷയത്തിൽ ക്ലാസെടുത്തു. ആർ. ഗിരീഷ് കുമാർ, അഡ്വ. ഉഷ, എസ്. സാംഗേത് കമൽ എന്നിവർ പ്രസംഗിച്ചു.

മരിയൻ എൻജിനീയറിംഗ് കോളജിൽ പ്രവേശനോദ്ഘാടനം

തിരുവനന്തപുരം: കഴക്കൂട്ടം മരിയൻ എൻജിനീയറിംഗ് കോളജിലെ പുതിയ ബിടെക് ബാച്ചിന്‍റെ പ്രവേശനോദ്ഘാടനം തിരുവനന്തപുരം കളക്ടർ അനുകുമാരി നിർവഹിച്ചു. തിരുവനന്തപുരം മെട്രോപൊളിറ്റൻ ആർച്ച്ബിഷപ് ഡോ. തോമസ് ജെ. നെറ്റോ അധ്യക്ഷത വഹിച്ച ചടങ്ങിൽ കോളജ് മാനേജൻ ഫാ. എ.ആർ. ജോണ്‍ സ്വാഗതം ആശംസിച്ചു. കോളേജ് പ്രിൻസിപ്പൽ ഡോ. എം. അബ്ദുൾ നിസാർ, ഡീൻ ഡോ. എ. സാംസണ്‍ എന്നിവർ അറുനൂറോളം കുട്ടികളെയും അവരുടെ രക്ഷകർത്താക്കളെയും അഭിസംബോധന ചെയ്തു. കോളജ് ബർസാർ ഫാ. ജിം കാർവിൻ റോച്ച് നന്ദി പ്രകാശിപ്പിച്ചു. കഴിഞ്ഞ വർഷം മികവ് തെളിയിച്ച വിദ്യാർഥികളെ ചടങ്ങിൽ ആദരിച്ചു.

കേരള സ്റ്റാർട്ടപ്പ് മിഷൻ ശില്പശാല 19ന്

തിരുവനന്തപുരം: കേരള സ്റ്റാർട്ടപ്പ് മിഷന്‍റെ ആഭിമുഖ്യത്തിൽ കേരള സ്റ്റേറ്റ് കൗണ്‍സിൽ ഫോർ സയൻസ്, ടെക്നോളജി ആൻഡ് എൻവയോണ്‍മെൻറുമായി (കെഎസ്‌സിഎസ് ടിഇ) സഹകരിച്ച് സ്റ്റാർട്ടപ്പുകൾക്കും എംഎസ്എംഇകൾക്കുമായി ബൗദ്ധിക സ്വത്തവകാശം (ഐപി) സംബന്ധിച്ച ഏകദിന ശില്പശാല സംഘടിപ്പിക്കുന്നു. 19 ന് പട്ടം കെഎസ്‌സിഎസ്ടിഇയിലാണ് ശില്പശാല നടത്തുന്നത്. "ബൗദ്ധിക സ്വത്തവകാശത്തിലൂടെ ബിസിനസ് സുരക്ഷ’ എന്ന വിഷയത്തിൽ കെഎസ്‌സിഎസ്ടിഇയുടെ പേറ്റന്‍റ് ഇൻഫർമേഷൻ സെന്‍റർ കേരള ശില്പശാലയ്ക്ക് നേതൃത്വം നല്കും. ആശയങ്ങൾക്കും ഉത്പന്നങ്ങൾക്കും ബൗദ്ധിക സ്വത്തവകാശം നേടുന്നതിന് വിവിധ ഘട്ടങ്ങളിലായി നടത്തേണ്ട ഫയലിംഗ് മാർഗനിർദേശവും ഐപി വിദഗ്ധരുമായി സംവദിക്കാനുള്ള അവസരവും ശില് പശാലയിൽ ലഭ്യമാകും. താല്പര്യമുള്ളവർക്ക് ksum.in/ ipr എന്ന ലിങ്ക് വഴി രജിസ്റ്റർ ചെയ്യാനാകും. കൂടുതൽ വിവരങ്ങൾക്ക്: 0471 2548312.

തട്ടുകടയിലെ ഗ്യാസ് സിലിണ്ടർ ചോർന്നത് പരിഭ്രാന്തി പരത്തി

വിഴിഞ്ഞം: തട്ടു കടയിൽ ഗ്യാസ് സിലിണ്ടർ ചോർന്നതു ജനങ്ങളെ പരിഭ്രാന്തിയിലാക്കി. ഫയർഫോഴ്സെത്തി പരിഹരിച്ചു. ഉച്ചക്കട ജംഗ്ഷനിലെ അശോകന്‍റെ ശ്രീഭദ്ര തട്ടുകടയിലാണ് ഇന്നലെ വൈകുന്നേരം ഏഴിന് ഗ്യാസ് സിലിണ്ടറർ ചേർന്നത്. വിഴിഞ്ഞം ഫയർ ആൻഡ് റെസ്ക്യൂ സേനയെത്തി അപകട സ്ഥിതി ഒഴിവാക്കി. ഉച്ചക്കട - ചപ്പാത്ത് റോഡിനോടു ചേർന്നു വാഹനങ്ങൾ നിരന്തരം കടന്നു പോകുന്ന സ്ഥലവും ഇലട്രിക്സിറ്റി ഓഫീസ്, ധാരാളം കടമുറികൾ, സ്ഥാപനങ്ങൾ എന്നിവ സ്ഥിതി ചെയ്യുന്നിടത്താണ് അപകടം ഉണ്ടായത്. സേന എത്തുമ്പോൾ ഗ്യാസ് ലീക്കായി പരിസരം അപകടസ്ഥിതിയിലായിരുന്നു. ആൾക്കാരെ ഒഴിപ്പിച്ച ശേഷം സേനാംഗങ്ങൾ കടയിലേക്കു കയറി സിലിണ്ടർ ലീക്ക് അടച്ചശേഷം തുറസായ സ്ഥലത്തേക്കു മാറ്റി അപകടം ഒഴിവാക്കി. സീനിയർ ഫയർ ആൻഡ് റെസ്ക്യൂ ഓഫീസർ രഞ്ചു കൃഷ്ണയുടെ നേതൃത്വത്തിൽ എത്തിയ സംഘം രക്ഷാ പ്രവർത്തനം നടത്തി.

ടെക്നോപാർക്കിലെ കെട്ടിട നിർമാണം: താൽപര്യപത്രം ക്ഷണിച്ചു

തിരുവനന്തപുരം: ഇന്‍റഗ്രേറ്റഡ് ഐടി മൈക്രോ ടൗണ്‍ഷിപ്പ് പദ്ധതിയായ ക്വാഡിൽ ഉൾപ്പെടുത്തി ടെക്നോപാർക്ക് ഫേസ്-4 (ടെക്നോസിറ്റി, പള്ളിപ്പുറം) കാന്പസിൽ നിർമിക്കുന്ന രണ്ടാമത്തെ ഐടി ഓഫീസ് കെട്ടിടത്തിനായി സഹനിർമാതാക്കളിൽ നിന്ന് ടെക്നോപാർക്ക് താൽപര്യപത്രം (ഇഒഐ) ക്ഷണിച്ചു. ഐടി പ്രഫഷണലുകൾക്ക് റസിഡൻഷ്യൽ ക്വാർട്ടേഴ്സുകളും ഷോപ്പിംഗും ഉൾപ്പെടെയുള്ള സൗകര്യങ്ങൾ ലഭിക്കുന്ന ലൈവ് വർക്ക്പ്ലേ കാന്പസായിട്ടാണു കെട്ടിടം വിഭാവനം ചെയ്തിരിക്കുന്നത്. എട്ടുലക്ഷം ചതുരശ്ര അടി വിസ്തൃതിയുള്ളതും ഏകദേശം 4.50 ഏക്കർ ഭൂമിയിൽ ദീർഘ കാലത്തേക്ക് പാട്ടത്തിനെടുക്കുന്നതുമാണ് (കേസ് ടു കേസ് അടിസ്ഥാനത്തിൽ 90 വർഷം) രണ്ടാമത്തെ ഐടി കെട്ടിടം. ലേലത്തിൽ പങ്കെടുക്കുന്നവർ കന്പനി നിയമപ്രകാരം രജിസ്റ്റർ ചെയ്തിട്ടുള്ള സ്വകാര്യ, പബ്ലിക് ലിമിറ്റഡ് കന്പനിയായിരിക്കണം. കുറഞ്ഞത് അഞ്ചു വർഷത്തേക്ക് ഇന്ത്യയിൽ പ്രവർത്തിച്ചിരിക്കണം. സംയുക്ത സംരംഭം / സംയുക്ത അപേക്ഷ / കണ്‍സോർഷ്യം എന്നിവ സ്വീകരിക്കില്ല. കഴിഞ്ഞ മൂന്നുസാന്പത്തിക വർഷങ്ങളിൽ ഓരോന്നിലും 35 കോടി രൂപയുടെ വാർഷിക വിറ്റുവരവ് നേടിയിരിക്കണം. ബിഡ്ഡർക്ക് കുറഞ്ഞതു നാലു ലക്ഷം ചതുരശ്ര അടി വിസ്തീർണ്ണമുള്ള സമാനമായ പദ്ധതി വിജയകരമായി പൂർത്തിയാക്കിയ പരിചയം ഉണ്ടായിരിക്കണം. അല്ലെങ്കിൽ കുറഞ്ഞതു മൂന്നു ലക്ഷം ചതുരശ്ര അടി വിസ്തീർണ്ണമുള്ള ഐടി കെട്ടിടങ്ങൾ/വാണിജ്യ/ഓഫീസ് കെട്ടിടങ്ങൾ എന്നിവയുടെ രണ്ട് പ്രോജക്ടുകളോ രണ്ട് ലക്ഷം ചതുരശ്ര അടി വിസ്തീർണ്ണമുള്ള ഐടി കെട്ടിടങ്ങൾ/വാണിജ്യ/ഓഫീസ് കെട്ടിടങ്ങൾ എന്നിവയുടെ മൂന്ന് പ്രോജക്ടുകളോ പൂർത്തിയാക്കിയിരിക്കണം. ഇവ ഉൾപ്പെടെ കഴിഞ്ഞ ഏഴ് വർഷത്തെ നിർമാണ പ്രവർത്തനങ്ങൾ ബിഡിനായുള്ള അപേക്ഷയിൽ ഉൾപ്പെടുത്തണം. കൂടുതൽ വിവരങ്ങൾക്ക്: ht tp://www.technopark.in/Tenders. സെപ്റ്റംബർ 18ന് വൈകുന്നേരം അഞ്ചു വരെ താൽപര്യപത്രം സമർപ്പിക്കാം. ഇതു സംബന്ധിച്ച വ്യക്തതകൾക്കായി ഓഗസ്റ്റ് 28 ന് വൈകുന്നേരം നാലിന് ഓണ്‍ലൈനായും ഓഫ്ലൈനായും മീറ്റിംഗ് നടത്തും. ഇതു സം ബന്ധിച്ച സംശയങ്ങൾക്കും വിവരങ്ങൾക്കും: rahul@techno park.in / madhavan_praveen @technopark.in.

മുന്നാക്കത്തിലെ പിന്നാക്കം: സർട്ടിഫിക്കറ്റ് നൽകുന്നതിൽ വ്യക്തതയില്ലെന്നു പരാതി

നെടുമങ്ങാട്: കേന്ദ്രസർക്കാർ നിയമനങ്ങളിൽ മുന്നാക്കത്തിൽ പിന്നാക്കം നിൽക്കുന്നവരുടെ 10 ശതമാനം സംവരണത്തിൽ സർട്ടിഫിക്കറ്റ് അനുവദിക്കുന്നതിൽ ഉദ്യോഗസ്ഥർക്ക് വ്യക്തത ഇല്ലെന്ന് ആക്ഷേപം.നിലവിൽ കേന്ദ്രസർക്കാർ വിജ്ഞാപനത്തിൽ പറയുന്നത് ആയിരം സ്ക്വയർ ഫീറ്റ് വീടുള്ളവർക്ക് സംവരണത്തിന് അർഹതയുണ്ടെന്നാണ്. വീടിരിക്കുന്ന സ്ഥലം നാല് സെന്‍റിനു മുകളിൽ ആകരുതെന്നും ബാക്കി നാലേക്കർ വരെ കൃഷിഭൂമിയായി കണക്കാക്കി സർട്ടിഫിക്കറ്റ് നൽകാമെന്നും കേന്ദ്രസർക്കാരിന്‍റെ ഉത്തരവുണ്ട്. എന്നാൽ, താലൂക്ക് ഓഫീസുകളിൽ നാല് സെന്‍റിൽ കൂടുതൽ ഭൂമിയുള്ളവർ അപേക്ഷ നൽകിയാൽ നിരസിക്കുന്ന അവസ്ഥയാണെന്നാണു പരാതി ഉയർന്നിരിക്കുന്നത്. നെടുമങ്ങാട് താലൂക്ക് ഓഫീസിൽ രാഹുൽ കൃഷ്ണ എന്ന അപേക്ഷകനു 10 സെന്‍റ് വസ്തു ഉണ്ടെന്ന വാദംനിരത്തി അധികൃതർ സർട്ടിഫിക്ക റ്റ് നിരസിച്ചെങ്കിലും ജില്ലാ കളക്ടറേറ്റിൽ അപ്പിലിനു പോയപ്പോൾ സർട്ടിഫിക്കറ്റ് അനുവദിക്കുകയുമായിരുന്നു. സമാനമായ നിരവധി പരാതികളാണ് നെടുമങ്ങാട് മേഖലയിൽ ഉയരുന്നത്.

പൈലറ്റ് ഗൗതം സന്തോഷിന്‍റെ മൃതദേഹം സംസ്‌കരിച്ചു

പേരൂര്‍ക്കട: വിമാനാപകടത്തില്‍ മരിച്ച മലയാളി പൈലറ്റിന്‍റെ മൃതദേഹം നാട്ടിലെത്തിച്ചു. തിങ്കളാഴ്ച പുലര്‍ച്ചെ 3.30നാണ് എയര്‍ഇന്ത്യ വിമാനത്തില്‍ മൃതദേഹഭാഗങ്ങള്‍ എത്തിച്ചത്. പൂജപ്പുര ശ്രീ ചട്ടമ്പിസ്വാമി റോഡ് വിദ്യാധിരാജ നഗര്‍ ശ്രീശൈലത്തില്‍ അഡ്വ. കെ.എസ്. സന്തോഷ്‌കുമാര്‍-എല്‍.കെ. ശ്രീകല ദമ്പതികളുടെ മകന്‍ ഗൗതം സന്തോഷ് (27) ആണ് ജൂലൈ 26നു ന്യൂ ഫൗണ്ട്‌ലാന്‍ഡിലെ ഡീര്‍ തടാകത്തിനു സമീപം വിമാനം തകര്‍ന്നു വീണു മരിച്ചത്. സഹപൈലറ്റും അപകടത്തില്‍ മരണപ്പെട്ടിരുന്നു. ഗൗതം സന്തോഷിന്‍റെ മൃതദേഹത്തിന്‍റെ കുറച്ചുഭാഗങ്ങള്‍ മാത്രമാണ് ലഭിച്ചത്. ഗൗതമിന്‍റെ മൃതശരീരം കാനഡയില്‍ത്തന്നെ സംസ്‌കരിക്കാമെന്ന നിലപാടിലായിരുന്നു കനേഡിയല്‍ അധികൃതര്‍. എന്നാല്‍ ഗൗതമിന്‍റെ ബന്ധുകൂടിയ എന്‍. ശക്തന്‍റെ ഇടപെടലാണ് മൃതദേഹം നാട്ടിലെത്തിക്കുന്നതിനു വഴിതെളിച്ചത്. ശശി തരൂര്‍ എംപി ഇക്കാര്യത്തില്‍ ശക്തമായ ഇടപെടല്‍ നടത്തുകയുണ്ടായി. ഇന്ത്യന്‍ എംബസിയും നോര്‍ക്കയും നടത്തിയ ഇടപെടലുകളും മൃതദേഹം നാട്ടിലേക്കു കൊണ്ടുവരുന്നതിനുള്ള തടസങ്ങള്‍ മാറ്റാന്‍ സഹായകമായി. കാനഡയിലെ സെന്‍റ് ജോണ്‍സ് ഹെല്‍ത്ത് സയന്‍സ് സെന്‍ററില്‍ സൂക്ഷിച്ചിരുന്ന മൃതദേഹഭാഗങ്ങള്‍ നാട്ടിലെത്തിക്കുകയായിരുന്നു. വന്‍ ജനാവലിയാണ് പൂജപ്പുരയിലെ വസതിക്കുമുന്നില്‍ ഗൗതമിന്‍റെ മൃതദേഹ ഭാഗങ്ങള്‍ കാണാന്‍ തടിച്ചുകൂടിയത്. ഉച്ചയ്ക്ക് 1.30വരെ വീട്ടില്‍ പൊതുദര്‍ശനത്തിനുവച്ചശേഷം രണ്ടുമണിക്കായിരുന്നു സംസ്‌കാരച്ചടങ്ങുകള്‍. മൃതദേഹം തൈക്കാട് ശാന്തി കവാടത്തിൽ സംസ്കരിച്ചു.

ടിപ്പർ ലോറി കയറി യുവാവിന് ദാരുണാന്ത്യം

പൂവാർ: പിറകോട്ടെടുത്ത ടിപ്പർ ലോറി കയറിയിറങ്ങി യുവാവിന് ദാരുണാന്ത്യം. ടിപ്പറിനു പിറകിൽ ബൈക്കുമായി നിൽക്കുകയായിരുന്ന യുവാവാണ് മരിച്ചത്. ബൈപാസിൽ നിർമാണ പ്രവർത്തനത്തിനുള്ള സാധനങ്ങൾ ഇറക്കിയശേഷം മുന്നറിയിപ്പില്ലാതെ ടിപ്പർ ലോറി പുറകിലേക്കെടുക്കുകയായിരുന്നു. തമിഴ്നാട് കന്യാകുമാരി വിളവംകോട് അടക്കാക്കുഴി ഇരിത്തം കോട് മേക്കെ പുത്തൻവീട്ടിൽ അപ്പിക്കുഞ്ഞന്‍റെയും വത്സലയുടെയും മകൻ ശരത് (24) ആണ് മരിച്ചത്. ഞായറാഴ്ച വൈകുന്നേരം ആറരയോടെ കോവളം-കാരോട് ബൈപാസിൽ മണ്ണക്കല്ലിന് സമീപമായിരുന്നു സംഭവം. ബൈപാസിന് മുകളിൽ കൂടി പാലം പണി നടക്കുന്നതിനാൽ വാഹനങ്ങൾക്ക് കടന്നുപോകാൻ ഇടുങ്ങിയ റോഡ് മാത്രമാണുള്ളത്. ഇവിടെ നിന്ന് പുറകോട്ടെടുത്ത ലോറിയാണ് അപകടം വരുത്തിയത്. ഗുരുതരമായി പരിക്കേറ്റ ശരത്തിനെ നെയ്യാറ്റിൻകരയിലെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ഇന്നലെ ഉച്ചയോടെ മരിച്ചു. തിരുവനന്തപുരത്തെ ഒരു പ്രമുഖ ഹോട്ടലിലെ ജീവനക്കാരനായിരുന്നു. പൂവാർ പോലീസ് കേസെടുത്തു. മൃതദേഹം പോസ്റ്റ്മോർട്ടത്തിനായി മെഡിക്കൽ കോളജ് മോർച്ചറിയിലേക്ക് മാറ്റി. ഏകസഹോദരൻ സന്തോഷ് .

റോഡ് മുറിച്ചു കടക്കവെ ബൈക്കിടിച്ച് പരിക്കേറ്റയാൾ മരിച്ചു

വെഞ്ഞാറമൂട്: റോഡ് മുറിച്ചു കടക്കുന്നതിനിടെ ബൈക്കിടിച്ച് ചികിത്സയിലായിരുന്നയാൾ മരിച്ചു. വെഞ്ഞാറമൂട് നെല്ലി വിള സരസിൻ ദിനേശ് (52) ആണ് മരിച്ചത്. സംസ്കാരം ഇന്ന് 2.30 ന് വീട്ടുവളപ്പിൽ. വെള്ളിയായ്ച്ചയായിരുന്നു അപകടം. സെക്രട്ടേറിയറ്റിൽ പിഡബ്ല്യുഡി ഇലക്ട്രിക്കൽ ഓവർസിയറായ ദിനേശ് ജോലി കഴിഞ്ഞ് വീട്ടിലേക്കു വരുന്നതിനായി റോഡ് മുറിച്ചുകടക്കവെ ബൈക്കിടിക്കുകയായിരുന്നു. ഉടൻ തന്നെ ആശുപത്രിയിലെത്തിച്ചെങ്കിലും ചികിത്സയിലിരിക്കെ ഇന്നലെ വൈകിട്ടോടെ മരിച്ചി. ഭാര്യ: സരസ്വതി. മക്കൾ: അനന്ദു (പ്രിസൺ ഓഫീസർ കണ്ണൂർ), അശ്വന്ത് (ബംഗളൂരു).

സ്മൃതി മണ്ഡപം ഉദ്ഘാടനം ചെയ്തു

വെള്ളറട : ഇന്ത്യന്‍ നാഷണല്‍ കോണ്‍ഗ്രസ് മാരായമുട്ടം മണ്ഡലം കമ്മറ്റിയുടെ നേതൃത്വത്തില്‍ കോണ്‍ഗ്രസ് മുന്‍ മണ്ഡലം ഭാരവഹികളായ എന്‍. സത്യനേശന്‍, ആര്‍. ദാമോദരന്‍ എന്നിവരുടെ ഒന്നാം ചരമദിനത്തില്‍ വടകര തെങ്ങുവിളക്കുഴിയില്‍ സ്മൃതി മണ്ഡപം സ്ഥാപിച്ചു. പ്രവാസി കോണ്‍ഗ്രസ് സംസ്ഥാന വൈസ് പ്രസിഡന്‍റ് എല്‍.വി. അജയകുമാര്‍ ഉദ്ഘാടനം ചെയ്തു. മണ്ഡലം പ്രസിഡന്‍റ് ബിനില്‍ മണലുവിള അധ്യക്ഷത വഹിച്ചു. കര്‍ഷക കോണ്‍ഗ്രസ് സംസ്ഥാന വൈസ് പ്രസിഡന്‍റ് എം.എസ്. അനില്‍ മുഖ്യപ്രഭാഷണം നടത്തി. പഞ്ചായത്ത് മുന്‍ പ്രസിഡന്‍റ് അമ്പലത്തറ ഗോപകുമാര്‍, വടകര ജയന്‍, വാര്‍ഡ് മെമ്പര്‍മാരായ മഞ്ജുഷാ ജയന്‍, കാക്കണം മധു, ബ്ലോക്ക് സെക്രട്ടറിമാരായ അഡ്വ . മാരായമുട്ടം ജോണി, മണ്ണൂര്‍ ശ്രീകുമാര്‍, അയിരൂര്‍ ബാബു, ഗോപകുമാര്‍ , വടകര ജോസ്, ശ്രീരാഗം ശ്രീകുമാര്‍, അനന്തന്‍ മാരായമുട്ടം, ഷീജ ഇടവഴിക്കര, മിനിമോള്‍ വടകര, കോട്ടയ്ക്കല്‍ വിനോദ്, കുട്ടപ്പന്‍, സുരേന്ദ്രന്‍ ഇടഞ്ഞി, സുരേഷ് ഇടഞ്ഞി എന്നിവര്‍ പ്രസംഗിച്ചു.

"നാടറിയാൻ ചങ്ങാത്തം കൂടാൻ' വിദേശത്തുനിന്നുമെത്തി കുട്ടികൂട്ടം

കാട്ടാക്കട: നാടറിയാൻ ചങ്ങാത്തം കൂടാൻ വിദേശത്തുനിന്നുമെത്തി കുട്ടികൂട്ടം. വിദേശത്തെ സ്‌കൂളുകളിൽ പഠിക്കുന്ന 25 കുട്ടികൾ കാട്ടാക്കട പ്രദേശത്തു എത്തുകയും കാഴ്ചകൾ കണ്ട് തങ്ങാത്തം കൂടാനുമാണ് നാട്ടിലെത്തിയത്. കടലു കടന്നെത്തിയ അവർക്ക് നാട്ടിലെ കുട്ടികൾ നിമിഷങ്ങൾക്കകം ചങ്ങാതിമാരുമായി. കാട്ടാക്കട നിയോജകമണ്ഡലവും മലയാളം മിഷനും സംയുക്തമായി സംഘടിപ്പിക്കുന്ന സാംസ്‌കാരിക വിനിമയ പരിപാടി 'വേരുകൾ ചിറകുകൾ' അകം - പുറം മലയാളി ത്രിദിന സഹവാസക്യാമ്പ് കുട്ടിക്കൂട്ടം പാട്ടും കളിചിരികളുമായി ആവേശത്തിലായി. ഉദ്ഘാടകയായെത്തിയ സാംസ്‌കാരിക വകുപ്പ് ഡയറക്ടർ ദിവ്യ എസ്. അയ്യർ കുഞ്ഞുണ്ണി മാഷിന്‍റെകവിത ചൊല്ലി കുട്ടികളുടെ മനം കവർന്നു. പുളിയറക്കോണം മിയാവാക്കി വനം ചുറ്റിനടന്നു കാണുകയും മിയാവാക്കിയുടെ കഥയറിയുകയും ചെയ്തതോടെ കുട്ടിക്കൂട്ടം ഉഷാറിലായി. മന്ത്രി വി. ശിവൻകുട്ടി പരിപാടികൾക്ക് ആശംസകൾ നേർന്നു. മലയാളം മിഷൻ ഡയറക്ടർ മുരുകൻ കാട്ടാക്കടയുടെ നാടൻപാട്ട് കുട്ടിക്കൂട്ടം ഏറ്റുപാടി, താളമിട്ടു. മിയാവാക്കി ഫോറസ്റ്റ് ലാബിന്‍റെ ഡയറക്ടർ എം.ആർ. ഹരി കുട്ടികൾക്ക് മിയവാക്കി വനത്തിന്‍റെ പ്രത്യേകതകൾ വിശദീകരിച്ചു. ഉദ്ഘാടന ചടങ്ങിനു ശേഷം ക്യാമ്പ് ഡയറക്ടർ വിനോദ് വൈശാഖിയുടെ നേതൃത്വത്തിൽ കുട്ടികൾ കോട്ടൂർ ആനപരിപാലന കേന്ദ്രം സന്ദർശിച്ചു.

വീടുകയറി ആക്രമണം; യുവാവ് പിടിയില്‍

പേരൂര്‍ക്കട: വീടുകയറി ആക്രമണം നടത്തിയ കേ സിൽ ഒളിവിലായിരുന്നയാളെ കരമന പിടികൂടി. നേമം മായംകോട് വെള്ളംകെട്ടു വിള വീട്ടില്‍ വിഷ്ണുപ്രസാദ് (29) ആണ് പിടിയിലായത്. കരമന സ്റ്റേഷന്‍ പരിധിയില്‍ മണക്കാട് എസ്എന്‍ആര്‍എ 134-ല്‍ ശ്രീകുമാറിന്റെ മേലേകുളച്ചിവിള വീട്ടിലായിരുന്നു ആക്രമണം. ശ്രീകുമാറും വിഷ്ണുപ്രസാദും തമ്മില്‍ നേരത്തെ നിലനിന്നിരുന്ന തര്‍ക്കമാണ് ആക്രമണത്തിനു കാരണം. സംഭവദിവസം രണ്ടുബൈക്കുകളിലായി എത്തിയ നാലംഗസംഘം ആയുധങ്ങള്‍ ഉപയോഗിച്ച് വീട്ടുപകരണങ്ങള്‍ തകര്‍ക്കുകയും വീടിന്‍റെ ഗ്ലാസുകള്‍ അടിച്ചു തകര്‍ക്കുകയുമായിരുന്നു. അക്രമിസംഘം എത്തിയതറിഞ്ഞ് ഇരുനിലവീടിന്‍റെ മുകള്‍നിലയിലെത്തിയ ശ്രീകുമാറും കുടുംബവും വീടു പൂട്ടി ഒളിക്കുകയായിരുന്നു. സംഭവത്തില്‍ ഉള്‍പ്പെട്ട മൂന്നുപേരെ നേരത്തെ പോലീസ് പിടികൂടിയിരുന്നു.

ക്ഷേത്രക്കവര്‍ച്ച: അന്തര്‍സംസ്ഥാന മോഷ്ടാവ് പോലീസിന്‍റെ പിടിയില്‍

പേരൂര്‍ക്കട: വട്ടിയൂര്‍ക്കാവിലെ ക്ഷേത്രക്കവര്‍ച്ചയുമായി ബന്ധപ്പെട്ട് അന്തര്‍സംസ്ഥാന മോഷ്ടാവ് വട്ടിയൂര്‍ക്കാവ് പോലീസിന്‍റെ പിടിയിലായി. കൊടുങ്ങാനൂര്‍ കടയില്‍മുടുമ്പ് പഴവിളാകത്ത് വീട്ടില്‍ കൊപ്ര ബിജു എന്ന രാജേഷ് (41) ആണ് കടയില്‍മുടുമ്പ് ദേവീക്ഷേത്രം കുത്തിത്തുറന്ന് മോഷണം നടത്തിയ സംഭവത്തില്‍ പിടിയിലായത്. കഴിഞ്ഞമാസം 13നായിരുന്നു സംഭവം. കാണിക്കവഞ്ചി കുത്തിത്തുറന്ന് 5000 രൂപ കവരുകയും ക്ഷേത്ര ഓഫീസിലെ അലമാര പൊളിച്ച് സ്വർണപ്പൊട്ടുകള്‍ കവരുകയും ചെയ്ത ഇയാള്‍ അമ്പലത്തിലെ മൂന്ന് ഉരുളികളും മോഷ്ടിച്ചുകൊണ്ടുപോയി. വട്ടിയൂര്‍ക്കാവ് സ്റ്റേഷന്‍ പരിധിയിലെ ഒരു വീട്ടില്‍ കവര്‍ച്ചാശ്രമം നടത്തിയ ഇയാള്‍ മറ്റൊരു വീട്ടില്‍ നിന്ന് സ്വര്‍ണവും പണവും മോഷ്ടിക്കുകയും ചെയ്തു. ഒരു വീടിന്‍റെ വാതില്‍ പൊളിച്ച് മൊബൈല്‍ഫോണ്‍ മോഷ്ടിച്ച് ബീമാപ്പള്ളിയില്‍ വില്‍പ്പന നടത്തിയതുമായി ബന്ധപ്പെട്ട് ഇയാള്‍ക്കെതിരേ വട്ടപ്പാറ സ്റ്റേഷനില്‍ കേസുണ്ട്. പ്രതി പിടിയിലായതോടെ കോഴിക്കോട്, മലപ്പുറം ജില്ലകളിലെ മോഷണങ്ങളുമായി ഇയാള്‍ക്ക് ബന്ധമുള്ളതായി പോലീസ് സംശയിക്കുന്നുണ്ട്. ഈ ഭാഗത്തുനിന്നു ലഭിച്ച സിസിടിവി ദൃശ്യങ്ങളില്‍ രാജേഷിന്‍റെ രൂപത്തിനു സമാനമായ ദൃശ്യമാണ് ലഭിച്ചതെന്നു വട്ടിയൂര്‍ക്കാവ് പോലീസ് പറഞ്ഞു. തെക്കന്‍ ജില്ലകളിലും പ്രതി മോഷണം നടത്തിയതായാണു സൂചന. ഇതിനെക്കുറിച്ച് കൂടുതല്‍ അന്വേഷണം നടത്തിവരുന്നുണ്ട്. ഇയാളുടെ കൂട്ടുപ്രതികളില്‍ ഉള്‍പ്പെട്ട ഒരു പുരുഷനെയും സ്ത്രീയെയും ഈമാസം ആറിന് ബീമാപ്പള്ളി ഭാഗത്തുനിന്നു പോലീസ് പിടികൂടിയിരുന്നു. കന്‍റോണ്‍മെന്‍റ് എസി സ്റ്റ്യുവര്‍ട്ട് കീലറിന്‍റെ നേതൃത്വത്തില്‍ സിഐ വി. അജേഷ്, എസ്ഐ തോമസ് ഹീറ്റസ്, ജിഎസ്ഐ വിജയകുമാര്‍, സിപിഒമാരായ അനൂപ്, രാജേഷ് എന്നിവര്‍ ഉള്‍പ്പെട്ട സംഘം കല്ലമ്പലത്തെ ഒളിസങ്കേതത്തില്‍ നിന്നാണ് രാജേഷിനെ പിടികൂടിയത്. പ്രതിയെ കോടതിയില്‍ ഹാജരാക്കി.

കാര്‍ മതിലിലേക്ക് ഇടിച്ചുകയറി അഞ്ചു പേര്‍ക്കു പരിക്ക്

വെഞ്ഞാറമൂട്: നിയന്ത്രണംവിട്ട കാര്‍ മതിലിലേക്ക് ഇടിച്ചു കയറി ഒരു കുടുംബത്തിലെ അഞ്ചു പേര്‍ക്ക് പരിക്ക്. മൂകാംബിക ക്ഷേത്ര ദര്‍ശനം കഴിഞ്ഞ് മടങ്ങുകയായിരുന്നു കാറിലെ യാത്രക്കാർ. കഴക്കൂട്ടം അമ്പലത്തിന്‍കര സൗഹൃദ നഗര്‍ സിന്ധു ഭവനില്‍ സരസ്വതി അമ്മ (70), ഇവരുടെ മകളും തിരുവനന്തപുരം മെഡിക്കല്‍ കോളജാശുപത്രിയിലെ ഹെഡ് നഴ്‌സുമായ സിന്ധു (52), ഇവരുടെ മകനും എക്‌സൈസ് നാര്‍ക്കോട്ടിക് വിഭാഗത്തിലെ ഉദ്യോഗസ്ഥനുമായ അക്ഷയ് സുരേഷ് (29), ഇദ്ദേഹത്തിന്‍റെ ഭാര്യ ഭവ്യ (26), സിന്ധുവിന്‍റെ സഹോദരന്‍റെ മകള്‍ ആരാധ്യ(12) എന്നിവര്‍ക്കാണ് പരിക്കേറ്റത്. ഞായറാഴ്ച രാവിലെ 6.30ന് എം.സി. റോഡില്‍ വെഞ്ഞാറമൂട് ജംഗ്ഷനിൽ വച്ചായിരുന്നു അപകടം. കിളിമാനൂര്‍ ഭാഗത്തുനിന്നും വെഞ്ഞാറമൂട് ഭാഗത്തേക്കു വരുന്നതിനിടെ നിയന്ത്രണംവിട്ട കാര്‍ നടപ്പാതയും കടന്നു വെഞ്ഞാറമൂട് ജിഎച്ച്എസ്എസിന്‍റെ മതിലിലേക്ക് ഇടിച്ചു കയറുകയായിരുന്നു. ഇടിയുടെ ആഘാതത്തില്‍ കാറിന്‍റെ മുന്‍വശം പൂര്‍ണമായും തകര്‍ന്നു യാത്രക്കാര്‍ ഉള്ളില്‍ കുടുങ്ങി. വെഞ്ഞാറമൂട് അഗ്നിരക്ഷാസേനയും വെഞ്ഞാറമൂട് പോലീസും നാട്ടുകാരും ചേര്‍ന്നാണ് രക്ഷാ പ്രവര്‍ത്തനം നടത്തി പരിക്കേറ്റവരെ വെഞ്ഞാറമൂട്ടിലെ സ്വകാര്യ മെഡിക്കല്‍ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചത്. അക്ഷയ് ആയിരുന്നു കാര്‍ ഓടിച്ചിരുന്നത്. ഇദ്ദേഹം ഉറങ്ങിപ്പോയതാണ് അപകടകാരണമെന്നാണു നിഗമനം.

105 ലിറ്റർ കോട നശിപ്പിച്ചു

പാലോട്: പാലോട് വനം റേഞ്ച് ഉദ്യോഗസ്ഥരും എക്സൈസ് ഉദ്യോഗസ്ഥരും സംയുക്തമായി പാലോട് റെയിഞ്ച് പരിധിയിൽ നടത്തിയ വ്യാജ ചാരായ റൈഡിൽ 105 ലിറ്റർ കോട നശിപ്പിച്ചു. കൊച്ചാലുംമൂട് വനഭാഗത്തു തോട്ടംപുറം ഏരിയയിലാണ് കോട കണ്ടെത്തി നശിപ്പിച്ചത്. ഓണം അടുത്തതോടെ പാലോട് റേഞ്ചിനു കീഴിലെ വനമേഖലകളിൽ വ്യാജ ചാരായ നിർമാണത്തിനു സാധ്യതയുണ്ട് എന്ന വിവരത്തെ തുടർന്നാണ് വനം-എക്സൈസ് സ്റ്റാഫുകളുടെ സംയുക്ത റെയ്ഡ് നടത്തിയത്. പാലോട് റെയിഞ്ച് ഓഫീസറുടെ നേതൃത്വത്തിൽ നടന്ന റൈഡിൽ അസിസ്റ്റന്‍റ് എക്സൈസ് ഇൻസ്പെക്ടർ സതീഷ് കുമാർ, പ്രിവന്‍റീവ് ഓഫീസർമാരായ മഹേഷ്, നജിമുദ്ദീൻ, ദിനേശ് കുമാർ, സെക്ഷൻ ഫോറസ്റ്റ് ഓഫീസർ സന്തോഷ്, ബീറ്റ് ഫോറസ്റ്റ് ഓഫീസർ വിഘ്നേഷ്, ഫോറസ്റ്റ് വാച്ചർമാർ എന്നിവർ പങ്കെടുത്തു. വ്യാജ ചാരായ റെയ്ഡ് കാര്യക്ഷമമായി നടത്തുമെന്ന് പാലോട് റെയിഞ്ച് ഓഫീസർ വിപിൻ ചന്ദ്രൻ അറിയിച്ചു

സമൂഹം നിലനില്‍ക്കുന്നതു നല്ല അമ്മമാരുടെ നേതൃത്വംകൊണ്ട്: അടൂർ

നേമം: സമൂഹം നിലനില്‍ക്കുന്നതു നല്ല അമ്മമാരുടെ നേതൃത്വം കൊണ്ടാണെന്നും സ്ത്രീകൾ പുരുഷന്മാരെക്കാൾ ശക്തരായി കാര്യങ്ങൾ നോക്കുന്നവരാണെന്നും അടൂർ ഗോപാലകൃഷ്ണൻ. ഡോ. സുകുമാര്‍ അഴീക്കോട് സ്മാരക ദേശീയ ട്രസ്റ്റിന്‍റെ അഴീക്കോട് സ്മാരക അവാര്‍ഡ് വിതരണത്തിന്‍റെ ഉദ്ഘാടനം നിര്‍വഹിച്ചു പ്രസംഗിക്കുകയായിരുന്നു അടൂര്‍ ഗോപാലകൃഷ്ണന്‍.ആരുടെയും മുഖം നോക്കാതെ സത്യം തന്‍റേടത്തോടെ വിളിച്ചു പറയാൻ ധൈര്യംകാണിച്ച വ്യക്തിയായിരുന്നു സുകുമാര്‍ അഴീക്കോടെന്ന് അടൂര്‍ ഗോപാലകൃഷ്ണന്‍ പറഞ്ഞു. ചലച്ചിത്ര അക്കാദമിയുടെ ചെയര്‍മാനായിരുന്ന സമയത്ത് ഒരു വിവാദമുണ്ടായപ്പോള്‍ ഒപ്പം നിന്ന വ്യക്തിയായിരുന്നു സുകുമാര്‍ അഴീക്കോട്. അന്ന് കോണ്‍ഗ്രസ് മന്ത്രിസഭയായിരുന്നു. ഒരു മന്ത്രി തന്നെ വിമര്‍ശിച്ചപ്പോള്‍ അഴീക്കോട് ഇടപ്പെട്ടിരുന്നു-അടൂർ ഗോപാലകൃഷ്ണൻ ഓർമകൾ പങ്കുവച്ചു. ട്രസ്റ്റ് പ്രസിഡന്‍റ് ശാസ്താന്തല സഹദേവന്‍ അധ്യക്ഷനായി. ഡോ.ഇന്ദ്രബാബു, ഡോ. കെ. സുധാകരന്‍, ഡോ. വി.ആര്‍. ജയറാം, പനവിള രാജശേഖരന്‍, ദിനേശ് നായര്‍, തുടങ്ങിയവര്‍ പങ്കെടുത്തു. അഴീക്കോട് സ്മാരക അവാര്‍ഡ് ഡോ. ഷാജി പ്രഭാകരന് അടൂര്‍ ഗോപാലകൃഷ്ണന്‍ സമ്മാനിച്ചു. പരിപാടിയിൽ ചിത്രരചന മത്സര വിജയികള്‍ക്കുള്ള അവാർഡുകളും ചികിത്സസഹായങ്ങളും വിതരണം ചെയ്തു.

വെല്‍നെസ് സെന്‍ററുകളിലെ ജീവനക്കാരെ അനുമോദിച്ചു

മെഡിക്കല്‍കോളജ്: തിരുവനന്തപുരം ജില്ലയില്‍ എന്‍എബിഎച്ച് എന്‍ട്രി ലെവല്‍ സര്‍ട്ടിഫിക്കേഷന്‍ അംഗീകാരം നേടിയ ആയുഷ് ഹെല്‍ത്ത് ആൻഡ് വെല്‍നെസ് സെന്‍ററുകളിലെ ജീവനക്കാരെ അനുമോദിച്ചു. പട്ടം ജില്ലാ പഞ്ചായത്ത് ഇഎംഎസ് ഹാളില്‍ നടന്ന ചടങ്ങ് എ.എ. റഹിം എംപി ഉദ്ഘാടനം ചെയ്തു. ഭാരതീയ ചികിത്സാ വകുപ്പ് ജില്ലാ മെഡിക്കല്‍ ഓഫീസര്‍ ഡോ. മിനി എസ്. പൈ അധ്യക്ഷത വഹിച്ചു. ഡോ. ഗായത്രി, ഡോ. പി.ആര്‍. സജി, ഡോ. ജയനാരായണന്‍, ഡോ. മഞ്ജുളശ്രീ തങ്കച്ചി തുടങ്ങിയവര്‍ പങ്കെടുത്തു.

സിഎസ്ഐ വെള്ളറട ഇടവകയില്‍ യുവജന വാരം

വെള്ളറട: ദക്ഷിണ കേരള മഹയിടവക വെള്ളറട ഫോസ്റ്റര്‍ മെമ്മോറിയല്‍ സിഎസ്ഐ ഇടവകയില്‍ ഇന്നലെ യുവജനവാരത്തിനു കൊടിയേറി. ഇടവക അധ്യക്ഷനും ഡിസ്ട്രിക്ട് ചെയര്‍മാനുമായ റവ. ഡി. ആര്‍. ധര്‍മരാജ് പതാക ഉയര്‍ത്തി ഉദ്ഘാടനം ചെയ്തു. ദക്ഷിണകേരള മഹായിടവക യുവജന പ്രസ്ഥാനത്തിന്‍റെ സെക്രട്ടറി വിജീഷ് കുറുവാട് മുഖ്യാതിഥിയായിരുന്നു. റവ. ഡോ. ബര്‍ബനബാസ്, സഹശുശ്രുഷകനും വെള്ളറട ഏരിയ യുവജന പ്രസ്ഥാനം കോ-ഓര്‍ഡിനേറ്ററുമായ റവ. ഷിന്‍റോ സ്റ്റാന്‍ലി എന്നിവര്‍ യോഗത്തില്‍ പ്രസംഗിച്ചു. യുവജന സംഘടന ശാഖ സെക്രട്ടറി പ്രിയ വി. എസ്. സ്വാഗതം ആശംസിച്ചു. ഇടവകയിലെ ബാലജന അംഗങ്ങള്‍ ആരാധനകള്‍ക്ക് നേതൃത്വം നല്‍കി. ബാലജന സംഘടനയുടെ നേതൃത്വത്തില്‍ തയാറാക്കിയ 'വചനസ്മൃതി ' കൈ എഴുത്ത് പ്രതിയും പ്രകാശനം ചെയ്തു. ഇടവക സെക്രട്ടറി ടി. ഫ്രാന്‍സിസ്, അക്കൗണ്ടന്‍റ് ജസ്റ്റിന്‍ ജയകുമാര്‍, ഡിസ്ട്രിക്റ്റ് യുവജന പ്രസ്ഥാനം സെക്രട്ടറി അതുല്‍ ഷൈന്‍, ശാഖ വൈസ് പ്രസിഡന്‍റ് ‌ടി.എസ്. അനീഷ്, ഇടവക കമ്മിറ്റി അംഗങ്ങള്‍ എന്നിവര്‍ പങ്കെടുത്തു. വിശുദ്ധ തിരുവത്താഴ ശുശ്രുഷയോടെ ആരാധന അവസാനിച്ചു. ഒരാഴ്ച നീണ്ടു നില്‍ക്കുന്ന പരിപാടികള്‍ വരുന്ന ഞായര്‍ ആരാധനയോടെ കൊടിയിറങ്ങും.

പൊന്മുടി ഹൈവേ : പുനർ നിർമാണത്തിന് 172.22 കോടിയുടെ ഭരണാനുമതി

വിതുര: പൊന്മുടി സംസ്ഥാന ഹൈവേ പുനർ നിർമാണ പദ്ധതി പൂർത്തീകരിക്കാനായി 172.22 കോടി രൂപയുടെ ഭരണാനുമതി ലഭിച്ചതായി ജി. സ്റ്റീഫൻ എംഎൽഎ അറിയിച്ചു. ടെൻഡർ നടപടികൾ പൂർത്താക്കി അടിയന്തിരമായി പണി തുടങ്ങുന്നതിനുള്ള നടപടി സ്വീകരിക്കുമെന്നും എംഎൽഎ പറഞ്ഞു. 167 കോടി രൂപയ്ക്കാണു പദ്ധതിക്ക് ആദ്യം ഭരണാനുമതി ലഭിച്ചത്. 2022 ജനുവരിയിൽ പദ്ധതി തുടങ്ങി. മൂന്നര വർഷത്തോളം കരാർ കമ്പനി പണി ചെയ്തിട്ടും പകുതി പോലും എത്തിയില്ല. പിന്നീട് ഏപ്രിലിൽ കരാർ കമ്പനിയെ ടെർമിനേറ്റ് ചെയ്തു. തുടർന്നാണു പുതുക്കിയ എസ്റ്റിമേറ്റ് സമർപ്പിച്ചതും ഭരണാനുമതി വാങ്ങിയതും. ആദ്യ കരാർ കമ്പനിയുടെ നിർമാണ പ്രവർത്തനങ്ങളുടെ ഭാഗമായി മുക്കാൽ മീറ്ററോളം റോഡിന്‍റെ ഉയരം കൂട്ടിയിരുന്നു. ഇക്കാരണത്താൽ പല ചെറു റോഡുകളിൽ നിന്നും വീടുകളിൽ നിന്നും റോഡിലേക്ക് ഇറങ്ങുക ദുഷ്കരമായി. പണി നിലച്ചതോടെ പലയിടത്തും ഇത് പരിഹരിക്കപ്പെട്ടിട്ടില്ല. തൊളിക്കോട് ജംഗ്ഷനിൽ വെള്ളക്കെട്ട് പതിവായതും റോഡ് നിർമാണം തുടങ്ങിയ ശേഷമാണ്. ഇവിടത്തെ പ്രശ്നം ഇതുവരെ പരിഹരിക്കപ്പെട്ടിട്ടില്ല. ഹൈവേയിലെ തൊളിക്കോട് ഇരപ്പിൽ, മന്നൂർക്കോണം, മുള്ളുവേങ്ങാമൂട് ജംഗ്ഷനുകളിൽ നൂറു മീറ്ററോളം മെറ്റലുകൾ ഇളകിയ നിലയിലാണ്. ഇരപ്പിലിൽ കലുങ്ക് നിർമാണം പൂർത്തിയായിട്ടില്ല. കളീയ്ക്കൽ പാലവും കല്ലാർ നെല്ലിക്കുന്ന് പാലവും പൊളിച്ചു പണിഞ്ഞിട്ടില്ല. ഹൈവേയിൽ പലയിടത്തും വെള്ളക്കെട്ട് പതിവാണ്. മഴ പതിവായതോടെ സ്ഥിതി കൂടുതൽ വഷളായി. ഈ പ്രശ്നങ്ങളെല്ലാം പരിഹരിച്ചു വേണം പണി പൂർത്തിയാക്കാൻ.

പട്ടം സെന്‍റ് മേരീസ്‌ കത്തീഡ്രൽ തിരുനാളിനു കൊടിയേറി

തിരുവനന്തപുരം: പട്ടം സെന്‍റ് മേരീസ്‌ മേജർ ആർക്കി എപ്പാർക്കിയൽ കത്തീഡ്രൽ ദൈവാലയത്തിലെ ദൈവമാതാവിന്‍റെ സ്വർഗാരോപണ തിരുനാളിനു കൊടിയേറി. 13 വൈകുന്നേരം 6.30ന് വികാരി ജനറാൾ ഫാ. തോമസ് കയ്യാലക്കൽ നയിക്കുന്ന ധ്യാനം, 14 വൈകുന്നേരം ഏഴിനു തിരുന്നാൾ റാസ, 15നു രാവിലെ ഏഴിനു മേജർ ആർച്ച്ബിഷപ് കർദിനാൾ ബസേലിയോസ് ക്ലീമ്മിസ് കാതോലിക്ക ബാവയുടെ മുഖ്യകാർമികത്വത്തിൽ അർപ്പിക്കുന്ന സമൂഹബലി, ആദ്യകുർബാന സ്വീകരണം, കാതോലിക്കാബാവയുടെ മെത്രാഭിഷേക രജതജൂബിലി ഉദ്ഘാടനം, നേർച്ച എന്നിവ ഉണ്ടായിരിക്കും.

സീസണെത്തി; നെയ്യാർ വിനോദ സഞ്ചാരകേന്ദ്രത്തിന് അവഗണന

പാർക്കിലെ ഉപകരണങ്ങൾ തുരുന്പെടുത്തു നശിച്ചു ; ഇഴജന്തുക്കളുടെ ശല്യവും രൂക്ഷം നെയ്യാർഡാം : ചന്തമേറിയ ജീവൻ തുടിക്കുന്ന പ്രതിമകൾക്ക് തിളക്കമറ്റു. പരിസരമാകെ വൃത്തിഹീനം. ഉദ്യാനവും കുട്ടികളുടെ പാർക്കുമൊക്കെ കാടുമൂടി. ഓണം പടിവാതിക്കലെത്തിയിട്ടും തലസ്ഥാന ജില്ലയിലെ പ്രധാന വിനോദ സഞ്ചാരകേന്ദ്രമായ നെയ്യാർഡാം വിനോദസഞ്ചാരകേന്ദ്രത്തിന് അവഗണന. ഒരുകാലത്ത് സഞ്ചാരികളുടെ ഇഷ്ടകേന്ദ്രമായിരുന്നു നെയ്യാർഡാം. ഇന്നു വലിയ പ്രതീക്ഷകളോടെ നെയ്യാർഡാമിലെത്തുന്ന സഞ്ചാരികൾ നിരാശരായി മടങ്ങുന്നു. ഏറെ ആകർഷകമായിരുന്ന കുട്ടികളുടെ പാർക്ക് കാടുകയറിയ നിലയിലാണ്. പരിചരണമില്ലാതെ കളിക്കോപ്പുകളൊക്കെ നശിച്ചു. പ്രതീക്ഷയോടെ എത്തുന്ന കുട്ടികൾക്ക് പാർക്ക് പുറത്തുനിന്നു നോക്കി നെടുവീർപ്പിടാനേ കഴിയൂ. ടൈൽസ് പാകിയ ഇരിപ്പിടങ്ങളും നശിച്ചു. ഇഴജന്തുക്കളുടെ സാന്നിധ്യവുമുണ്ട്. അതിനാൽ ഭീതിയോടെ മാത്രമേ പാർക്കിൽ ഇറങ്ങാനാകൂ. അണക്കെട്ടിനു സമീപം വിദൂരകാഴ്ചകൾ ആസ്വദിക്കാനായി പണിത പവലിയൻ സമൂഹവിരുദ്ധരുടെ താവളമാണ്. ദുർഗന്ധം കാരണം അടുക്കാനാകില്ല. സിനിമാപ്രവർത്തകരുടെ ഇഷ്ട ലൊക്കേഷനായിരുന്ന വലിയ ഉദ്യാനം ഇന്നില്ല. റോപ്പ് വേ, സൗരോർജ വൈദ്യുതീകരണം, മൈസൂർ വൃന്ദാവൻ മാതൃകയിൽ പൂന്തോട്ടനവീകരണം എന്നിങ്ങനെ നെയ്യാർഡാമിന്‍റെ മുഖച്ഛായ മാറ്റി വിനോദസഞ്ചാര വികസനം യാഥാർഥ്യമാക്കാൻ 2018-19-ൽ കിഫ്ബിയിൽനിന്ന് 100 കോടി രൂപ വകയിരുത്തി തുടങ്ങിയ പദ്ധതികളും എങ്ങുമെത്തിയിട്ടില്ല. ഘട്ടംഘട്ടമായി പദ്ധതി നടപ്പാക്കി നെയ്യാർഡാമിനെ 'അഡ്വഞ്ചറസ് ഇക്കോ ടൂറിസം സെന്‍റർ ആക്കുമെന്ന വാഗ്ദാനമാണ് എവിടെയുമെത്താതെ നീളുന്നത്. കൂടാതെ ഇക്കോ ടൂറിസം ലക്ഷ്യമിട്ടുള്ള പദ്ധതികളും പ്രഖ്യാപിച്ചിരുന്നു. കാപ്പുകാട്-നെയ്യാർഡാം-കുമ്പിച്ചൽ കടവ് ടൂറിസം ഡെസ്റ്റിനേഷൻ പദ്ധതിയാണിതിൽ പ്രധാനം. എന്നാൽ, അധികൃതരുടെ അനാസ്ഥ നെയ്യാർഡാമിനെ സഞ്ചാരികളിൽനിന്ന് അകറ്റുകയാണ്. നെയ്യാർഡാമിലേക്കു പ്രവേശിക്കാൻ പാസ് എടുക്കണം. മുതിർന്നവർക്ക് 10 രൂപയും കുട്ടികൾക്ക് സൗജന്യവുമാണ്. വികസനപ്രവർത്തനങ്ങൾക്ക് ഈ തുക ഉൾപ്പെടെ വിനിയോഗിക്കാം എന്നുള്ളപ്പോഴാണ് അവഗണന തുടരുന്നത്. ഓണക്കാലത്ത് ഒരു തട്ടിക്കൂട്ട് പരിപാടിയുമായി അധികൃതരെത്തും. മിനുക്കുപണികൾ മാത്രം നടത്തി മടങ്ങുന്നവർ ഇനി ഓർക്കുന്നത് അടുത്ത ഓണത്തിനും. വികസനം അന്യമായി സഞ്ചാരികളിൽനിന്നും അകന്നുകൊണ്ടിരിക്കുകയാണ് ഈ ജലസംഭരണിയും പരിസരവും. ടൂറിസം വകുപ്പിന്‍റെയും വനം വകുപ്പിന്‍റെയും ബോട്ട് സവാരി സഞ്ചാരികൾക്ക് ഏറെ പ്രിയപ്പെട്ടതാണ്. പലപ്പോഴും സഞ്ചാരികൾ എത്തുമ്പോൾ ബോട്ടുകൾ കട്ടപ്പുറത്താകും. ഓണത്തിനും ബോട്ടുകൾ കട്ടപ്പുറത്തു തന്നെ. സഞ്ചാരികൾക്ക് ഏറെ ആകർഷകമായ മ്യൂസിക് ഫൗണ്ടൻ കേടായിട്ട് വർഷങ്ങളായി. ഇതു നവീകരിക്കാൻ പോലും ബന്ധപ്പെട്ടവർ തയാറായിട്ടില്ല. ഇൻഫർമേഷൻ സെന്‍റർ അടച്ചുപൂട്ടി. ഡാമിന്‍റെ വികസനത്തിന് ഇറിഗേഷൻ വനം ടൂറിസം വകുപ്പുകളുടെ ഏകോപനം ഇല്ലാത്തതാണ് പദ്ധതികൾ യാഥാർഥ്യമാകാതെ പോകുന്നത്.

ചങ്ങാതിക്ക് ഒരു തൈ പദ്ധതി

നെടുമങ്ങാട്: ഹരിതകേരളാ മിഷന്‍ സംഘടിപ്പിക്കുന്ന ചങ്ങാതിക്കൊരു തൈ പദ്ധതിക്ക് കരകുളം പഞ്ചായത്തിലെ വേങ്കോട് ഗവ.യുപി സ്‌കൂളില്‍ പഞ്ചായത്ത് പ്രസിഡന്‍റ് യു. ലേഖാ റാണി ഉദ്ഘാടനം ചെയ്തു. കുട്ടികള്‍ ശേഖരിച്ച സൗഹൃദത്തൈകള്‍ പരസ്പരം കൈമാറി. സ്‌കൂളുകള്‍, കലാലയങ്ങള്‍, ഓഫീസുകള്‍, സ്ഥാപനങ്ങള്‍, വായനശാലകള്‍, ക്ലബുകള്‍, കുടുംബശ്രീ അയല്‍ക്കൂട്ടങ്ങള്‍, എന്നിവിടങ്ങളിലാണ് പ്രധാനമായും സുഹൃത്തുക്കള്‍ തമ്മില്‍ വൃക്ഷത്തൈകള്‍ കൈമാറുന്നത്. സൗഹൃദ ദിനത്തോടനുബന്ധിച്ചു സംഘടിപ്പിക്കുന്ന പരിപാടിയിലൂടെ 10-ലക്ഷത്തിലധികം വൃക്ഷത്തൈകള്‍ കൈമാറുകയാണ് ലക്ഷ്യം. പിടിഎ പ്രസിഡന്‍റ് വിജുകുമാര്‍ അധ്യക്ഷനായ ചടങ്ങില്‍ വിദ്യാഭ്യാസ സ്ഥിരംസമിതി ചെയര്‍മാന്‍ രാജീവ് സൗഹൃദസസ്യം ഏറ്റുവാങ്ങി. ഹരിതകേരളം മിഷന്‍ റിസോഴ്‌സ് പേഴ്‌സണ്‍ ആതിര ജോണ്‍ പദ്ധതി വിശദീകരിച്ചു. പഞ്ചായത്ത് അംഗം വി. ആശ, എസ്. ശ്രീകല, പ്രഥമാധ്യാപിക ബിന്ദുകുമാരി, അനന്തകൃഷ്ണന്‍ എന്നിവര്‍ സംസാരിച്ചു.

വനിത ജംഗ്ഷന്‍ സംഘടിപ്പിച്ചു

നെടുമങ്ങാട് : ആനാട് പഞ്ചായത്തിന്‍റെ നേതൃത്വത്തില്‍ വനിതാ ശാക്തീകരണത്തിന്‍റെ ഭാഗമായി രണ്ടാംഘട്ട വനിതാ ജംഗ്ഷന്‍ സംഘടിപ്പിച്ചു. ജില്ലയില്‍ ആദ്യവനിതാ ജംഗ്ഷന്‍ നടക്കുന്ന പഞ്ചായത്താണ് ആനാട്. നെടുമങ്ങാട് ബ്ലോക്ക് പ്രസിഡന്‍റ് വി. അമ്പിളി ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് എന്‍. ശ്രീകല അധ്യക്ഷയായി. ജില്ലാപഞ്ചായത്ത് പ്രസിഡന്‍റ് സുനിത, ജനപ്രതിനിധികളായ ടി.ആര്‍.ചിത്രലേഖ, ലീലാമ്മ, ഷൈലജ തസ്‌നീം, സൗമ്യമോള്‍, കവിതാറാണി എന്നിവർ സംസാരിച്ചു. പരിപാടിയുടെ ഭാഗമായി പഞ്ചായത്തില്‍ നിന്നും തെരഞ്ഞെടുത്ത 20 കലാകാരികള്‍ അവതരിപ്പിച്ച കനല്‍ എന്ന നാടകം നടന്നു.

സെക്യൂരിറ്റിക്കാരനെതിരെ നടപടി : നെടുമങ്ങാട് ജില്ലാ ആശുപത്രിയിൽ മോർച്ചറിയിലെ മൃതദേഹം ബന്ധുക്കൾക്ക് കാട്ടിക്കൊടുത്തു

നെടുമങ്ങാട്: ജില്ലാ ആശുപത്രി മോർച്ചറിയിലെ ഫ്രീസറിൽ സൂക്ഷിച്ചിരുന്ന നാലു മാസം ഗർഭിണിയായ യുവതിയുടെ മൃതദേഹം അധികൃതരുടെ അനുവാദമില്ലാതെ ബന്ധുക്കൾക്ക് കാണിച്ചു കൊടുത്തതിനു സെക്യൂരിറ്റി ജീവനക്കാരനു കാരണം കാണിക്കൽ നോട്ടീസ് നൽകി. താത്കാലിക ജീവനക്കാരൻ സുരേഷ്കുമാറിനെ 15 ദിവസം ജോലിയിൽനിന്നു മാറിനിൽക്കാൻ ആശുപത്രി സൂപ്രണ്ട് നിർദേശം നൽകി. സിപിഎം പറണ്ടോട് ബ്രാഞ്ച് സെക്രട്ടറിയാണു സുരേഷ് കുമാർ. കഴിഞ്ഞ മൂന്നിനു നെടുമങ്ങാട് ജില്ലാ ആശുപത്രിയിലായിരുന്നു സംഭവം. ഭർതൃഗൃഹത്തിൽ മരിച്ച ഗർഭിണിയായ യുവതിയുടെ മൃതദേഹം ആർഡിഒയുടെ സാന്നിധ്യത്തിൽ ഇൻക്വസ്റ്റിനു നിശ്ചയിച്ചിരുന്നു. ഇതിനിടെ, ആശുപത്രിയിൽ കാന്‍റീൻ നടത്തുന്ന ആൾക്കും ബന്ധുകൾക്കുമാണ് ഫ്രീസർ തുറന്നു മൃതദേഹം കാണിച്ചു കൊടുത്തത്. മോർച്ചറിയുടെ താക്കോൽ സൂക്ഷിക്കേണ്ടത് നഴ് സിംഗ് സ്റ്റാഫാണ്. ഇവർ അറിയാ തെയാണു സുരേഷ്‌കുമാർ താക്കോൽ എടുത്തു കൊണ്ടുപോയി മോർച്ചറി തുറന്നത്. സംഭവം ഒതുക്കി തീർക്കാൻ ശ്രമം നടക്കുന്നതായും ആരോപണം ഉണ്ട്.

എക്സൈസ് റെയ്ഡ്: 105 ലിറ്റർ കോട പിടികൂടി

നെടുമങ്ങാട്: എക്സൈസ് റെയ്ഡിൽ ചാരായം വാറ്റുന്നതിനായി സൂക്ഷിച്ചിരുന്ന 105 ലിറ്റർ കോട കണ്ടെടുത്ത് നശിപ്പിച്ചു. മൈലമൂട് കാഞ്ചിനട മീൻചാടി ഭാഗത്തുനിന്നാണ് കോട പിടികൂടിയത്. രഹസ്യ വിവരത്തിന്‍റെ അടിസ്ഥാനത്തിൽ അസിസ്റ്റന്‍റ് എക്സൈസ് ഇൻസ്പെക്ടർ സതീഷ് കുമാറിന്‍റെ നേതൃത്വത്തിൽ നടന്ന റെയ്ഡിൽ പ്രിവന്‍റീവ് ഓഫീസർ മഹേഷ്, ഓഫീസർ ഗ്രേഡുമാരായ നജിമുദ്ദീൻ, ദിലീപ് കുമാർ, സിവിൽ എക്സൈസ് ഓഫീസർ ഡ്രൈവർ ശ്രീജിത്ത് എന്നിവർ പങ്കെടുത്തു.

സാൽവേഷൻ ആർമി സ്റ്റുഡൻസ് ഫെലോഷിപ്പ്

തിരുവനന്തപുരം: സാൽവേഷൻ ആർമി പാപ്പാട് ഗ്രൂപ്പ് സ്റ്റുഡൻസ് ഫെലോഷിപ്പ് യോഗം കൊടുങ്ങാനൂർ സാൽവേഷൻ ആർമി പള്ളിയിൽ നടന്നു. ഡിവിഷണൽ യൂത്ത് ഓഫീസർ മേജർ ജോസ് മാനുവേൽ ഉദ്ഘാടനം ചെയ്തു. ഗ്രൂപ്പ് ലീഡർ മേജർ ടി.ഇ. സ്റ്റീഫൻസണ്‍ അധ്യക്ഷത വഹിച്ചു. മേജർ സി. ലീലാമ്മ, അലക്സ് പത്രോസ്, നീനു ജെ. ജോണി, ഐശ്വര്യ സജി, ആൽബിൻ ജി. ആനന്ദ്, ആഫാ വർഗീസ്, എ. അഭിഷേക് ,അക്ഷയ് ഉണ്ണി, ജെ. നിജിൻ എന്നിവർ പ്രസംഗിച്ചു. ഭാരവാഹികൾ : നീനു ജെ. ജോണി -സെക്രട്ടറി, ഐശ്വര്യ സജി -ജോയിന്‍റ് സെക്രട്ടറി, ആൽബിൻ ജെ. ആനന്ദ് - ട്രഷറർ.

മേല്‍പ്പാല നിര്‍മാണം : ഈഞ്ചക്കല്‍ ഭാഗത്ത് രാത്രികാല ഗതാഗത ക്രമീകരണം ഏർപ്പെടുത്തി

വലിയതുറ: മേല്‍പ്പാല നിര്‍മാണവുമായി ബന്ധപ്പെട്ട് ഈഞ്ചക്കല്‍ ഭാഗത്ത് ഇന്നു മുതല്‍ 17 വരെ രാത്രി 11 മുതല്‍ രാവിലെ അഞ്ചു മണി വരെ പണി നടക്കുന്നതിനാല്‍ ഗതാഗത ക്രമീകരണങ്ങള്‍ ഏര്‍പ്പെടുത്തിയിരിക്കുന്നു. കോവളം ഭാഗത്തുനിന്നും കഴക്കൂട്ടം ഭാഗത്തേയ്ക്കു പോകുന്ന വാഹനങ്ങള്‍ തിരുവല്ലം-അമ്പലത്തറ-അട്ടക്കുളങ്ങര-സ്റ്റാച്യൂ-വിജെടി-പാറ്റൂര്‍-ചാക്ക വഴി ബൈപ്പാസ് റോഡിലെത്തി പോകേണ്ടതാണ്. കഴക്കൂട്ടം ഭാഗത്തുനിന്നും കോവളം ഭാഗത്തേക്കു പോകുന്ന വാഹനങ്ങള്‍ ചാക്ക സര്‍വീസ് റോഡു വഴി പേട്ട-പാറ്റൂര്‍-ആശാന്‍ സ്‌ക്വയര്‍-പാളയം- സ്റ്റാച്യൂ-അട്ടക്കുളങ്ങര-മണക്കാട്-തിരുവല്ലം വഴി പോകേണ്ടതാണ്. കിള്ളിപ്പാലം-പവര്‍ഹൗസ് റോഡ് ഭാഗത്തുനിന്നും ഈഞ്ചക്കല്‍ വഴി കഴക്കൂട്ടം ഭാഗത്തേക്ക് പോകുന്ന വാഹനങ്ങള്‍ ചൂരക്കാട്ടുപാളയം-തമ്പാനൂര്‍-പനവിള-ആശാന്‍ സ്‌ക്വയര്‍-പാറ്റൂര്‍-ചാക്ക വഴിയോ ശ്രീകണ്‌ഠേശ്വരം-ഉപ്പിടാമൂട്-പേട്ട-ചാക്ക വഴിയോ ബൈപ്പാസ് റോഡിലെത്തി പോകേണ്ടതാണ്. കോവളം ഭാഗത്തുനിന്നും എയര്‍പോര്‍ട്ടിലേക്കു വരുന്ന ചെറിയ വാഹനങ്ങള്‍ കുമരിച്ചന്ത-പരുത്തിക്കുഴി സര്‍വീസ് റോഡ് വഴി കല്ലുമൂട്-വലിയതുറ-ശംഖുംമുഖം റോഡിലേയ് ക്ക് തിരിഞ്ഞു പോകേണ്ടതാണ്. അട്ടക്കുളങ്ങര ഭാഗത്തുനിന്നും ചാക്ക ഭാഗത്തേക്കു പോകുന്ന കാര്‍ ഉള്‍പ്പെടെയുളള ചെറിയ വാഹനങ്ങള്‍ വാഴപ്പളളി-ശ്രീകണ്‌ഠേശ്വരം-ഉപ്പിടാമൂട്-നാലുമുക്ക്-പേട്ട-ചാക്ക വഴിയും പോകേണ്ടതാണെന്ന് തിരുവനന്തപുരം സിറ്റി പോലീസ് അറിയിച്ചു. ഗതാഗത ക്രമീകരണങ്ങളുടെ വിവരങ്ങള്‍ അറിയുന്നതിലേയ്ക്ക് 0471-2558731, 94979 90005 എന്നീ നമ്പരുകളില്‍ ബന്ധപ്പെടാവുന്നതാണ്.

പട്ടാപകൽ പെട്രോൾ പമ്പിൽനിന്നും യുവാവിനെ തട്ടികൊണ്ടു പോയി

തട്ടികൊണ്ടു പോയവർ രക്ഷപ്പെട്ടു; സാമ്പത്തിക പ്രശ്‌നമെന്നു സൂചന കള്ളിക്കാട് : പട്ടാപകൽ പെട്രോൾ പമ്പിൽനിന്നും യുവാവിനെ തട്ടികൊണ്ടു പോയി. മണിക്കൂറുകൾക്കു ശേഷം ഉപേക്ഷിച്ചു. ഇന്നലെ വൈകുന്നേരം അ ഞ്ചോയോടെ കള്ളിക്കാട് പെട്രോൾ പമ്പിലാണ് സംഭവം. വെള്ളറട പനച്ചമൂട് സ്വദേശിയും ഇപ്പോൾ കാട്ടാക്കട മൈലോട്ടുമൂഴിയിൽ വാടകയ്ക്ക് താമസിക്കുന്നവനുമായ ബിജു തങ്കച്ചനെയാണ് (36) ഒരു സംഘം ആളുകൾ തട്ടിക്കൊണ്ടുപോയത്. പിന്നീടു മണിക്കൂറുകൾക്കുശേഷം ബിജുവിനെ നെടുമങ്ങാട് ഭാഗത്ത് ഉപേക്ഷിച്ചു. തട്ടികൊണ്ടു പോയവർ രക്ഷപ്പെടുകയും ചെയ്തു. സംഭവം ഇങ്ങിനെ: കള്ളിക്കാടുള്ള പമ്പിൽനിന്നു വാഹനത്തിനു പെട്രോൾ അടിക്കാനായി എത്തിയതായിരുന്നു ബിജു. പെട്രോൾ അടിച്ചുകൊണ്ടിരിക്കുന്നതിനിടെ 15 ഓളംപേർ സ്ഥലത്തെത്തി കാർ വളയുകയായിരുന്നു. പിന്നാലെ ബിജുവിനെ വാഹനത്തിൽനിന്നു വലിച്ചിറക്കി മർദി ച്ചു. കാറിനു പിന്നിലുള്ള സീറ്റിലേക്ക് ഇയാളെ വലിച്ചിടുകയും ചെയ്തു. കുറച്ചുപേർ വാഹനത്തിൽ കയറി ബിജുവിനെയും കൊണ്ടു കള്ളിക്കാട് ഭാഗത്തേക്ക് പോയി. കാട്ടാക്കട പോലീസ് സംഭവസ്ഥലത്തെത്തി സിസിടിവി ദൃശ്യങ്ങൾ പരിശോധിച്ചു. അന്വേഷണം പുരോഗമിക്കുന്നതിനിടെയാണ് ബിജുവിനെ നെടുമങ്ങാട് ഭാഗത്ത് ഉപേക്ഷിക്കപ്പെട്ട നിലയിൽ കണ്ടെത്തിയതായി വിവരം ലഭിക്കുന്നത്. പനച്ചമൂട് സ്വദേശിയായ ബിജുവും കുടുംബവും മൈലോട്ടുമൂഴിയിലെ വാടക വീട്ടിൽ ഒമ്പത് മാസത്തോളമായി താമസിച്ചു വരികയാണ്. ഇയാൾ നെയ്യാറ്റിൻകര അമരവിളയിൽ റാബിയ ഇന്ത്യ പ്രൈവറ്റ് ലിമിറ്റഡ് എന്ന സ്ഥാപനം നടത്തിവരുകയാണ്. ബിജുവിന്‍റെ ഭാര്യ ഷിജിമോൾ ഇതു സംബന്ധിച്ച് കാട്ടാക്കട പോലീസിൽ പരാതി നൽകിയിരുന്നു.റാബിയ ഇന്ത്യ പ്രൈവറ്റ് ലിമിറ്റഡ് എന്ന പേരിലെ സ്ഥാപനത്തിൽ ഓൺലൈൻ ട്രേഡിംഗ്, എയർടിക്കറ്റ് എന്നിവ എടുത്തുകൊടുക്കുന്ന ജോലി ചെയ്തു വരികയായിരുന്നു. നിരവധി പേരിൽനിന്നും വിസയ്ക്ക് പണം വാങ്ങിയതായും അവർക്ക് വിസ നൽകിയില്ലെന്നും അത്തരത്തിലെ സാമ്പത്തിക ഇടപാടുകളാകാം തട്ടികൊണ്ടു പോകലിനു പിറകിലെന്നും പോലീസ് പ്രാഥമികമായി പറയുന്നു. ഇതു സംബന്ധിച്ച് അന്വേഷണം നടത്തി വരികയാണ്. ആളെ കാട്ടാക്കട സ്റ്റേഷനിൽ എത്തിച്ചു. ഇയാളെ ചോദ്യം ചെയ്തു വരികയാണ്.

വള്ളം മറിഞ്ഞു കാണാതായ മത്സ്യത്തൊഴിലാളിയുടെ മൃതദേഹം കണ്ടെത്തി

തിരുവനന്തപുരം: മത്സ്യബന്ധനത്തിനിടെ വള്ളം തിരയിൽ പെട്ടു മറിഞ്ഞു കാണാതായ മത്സ്യത്തൊഴിലാളിയുടെ മൃതദേഹം നാലാം ദിനം കരയ്ക്കടിഞ്ഞു. കഴിഞ്ഞ ബുധനാഴ്ച രാവിലെ വള്ളം മറിഞ്ഞു കാണാതായ വെട്ടുകാട് തൈവിളകം വീട്ടിൽ ടിസി 90/1358 അലക്സ് പെരേര (60)യുടെ മൃതദേഹമാണ് ഇന്നലെ രാവിലെ ആറിന് കണ്ണാന്തുറ ചെറുവെട്ടുകാടിനു സമീപം കടൽതീരത്ത് അടിഞ്ഞത്. സെന്‍റ് ആൻഡ്രൂസിൽ (പുത്തൻതോപ്പ് മത്സ്യഗ്രാമം) നിന്ന് ഏഴു മത്സ്യത്തൊഴിലാളികളുമായി മീൻ പിടിക്കാൻ പോയ വള്ളമാണ് തിരയിൽ പെട്ടു മറിഞ്ഞത്. വള്ളത്തിലുണ്ടായിരുന്ന മറ്റാറുപേർ നീന്തി രക്ഷപെട്ടെങ്കിലും അലക്സ് പെരേരയെ കണ്ടെത്താനായില്ല. തീരത്ത് നിന്ന് അര കിലോമീറ്റർ ദൂരത്തെത്തിയപ്പോൾ ഉണ്ടായ ശക്തമായ തിരയിൽപ്പെട്ടു വള്ളംമറിയുകയായിരുന്നുവെന്ന് രക്ഷപെട്ടെത്തിയവർ പറഞ്ഞു. വള്ളത്തിലുണ്ടായിരുന്ന മേരി ജോണ്‍, ജയിംസ്, ആന്‍റണി, ജോയി, തദയൂസ്, ജയിംസ് ആന്‍റണി എന്നിവരാണ് നീന്തി രക്ഷപെട്ടത്. കോസ്റ്റൽ പോലീസും മറൈൻ എൻഫോഴ്സ്മെന്‍റും മത്സ്യത്തൊഴിലാളികളും വ്യാപക തെരച്ചിൽ നടത്തിയെങ്കിലും അലക്സ് പെരേരയെ കണ്ടെത്താൻ കഴിഞ്ഞില്ല. ഭാര്യ: ഷൈനി അലക്സ്. മക്കൾ: സിനി അലക്സ്, നവ്യ അലക്സ്.

മരശിഖരങ്ങള്‍ നീക്കുന്നില്ല; വാഹന പാർക്കിംഗ് റോഡില്‍

പേരൂര്‍ക്കട: മുറിച്ചിട്ട തണല്‍മര ശിഖരങ്ങളും തടികളും കുന്നുകൂടി കിടക്കുന്നതിനാല്‍ പേരൂര്‍ക്കട ഗവ. ജില്ലാ ആശുപത്രിയിലെത്തുന്ന ഇരുചക്ര വാഹനങ്ങള്‍ പാര്‍ക്ക് ചെയ്യുന്നത് കവാടത്തിനു പുറത്തുള്ള റോഡുവശത്ത്. ആഴ്ചകളായി ഈ സ്ഥിതിയാണ്. സമീപത്തെ കെഎച്ച്ആര്‍ഡബ്ല്യു പേവാര്‍ഡ് കെട്ടിടത്തിനു സമീപം സ്ഥിതിചെയ്തിരുന്ന തണല്‍മരങ്ങളാണ് മുറിച്ചുനീക്കിയത്. കെട്ടിടത്തിനു മുകളില്‍ മരംവീണ് കുറച്ചുഭാഗം തകര്‍ന്നതോടെയായിരുന്നു ഇത്. ഇവിടെയെത്തുന്ന രോഗികളുടെ കൂട്ടിരിപ്പുകാര്‍ വാഹനങ്ങള്‍ പാര്‍ക്ക് ചെയ്തിരുന്നത് ഇവിടെയാണ്. അതിനു നിശ്ചിത പാര്‍ക്കിംഗ് ഫീസും ഈടാക്കിയിരുന്നു. ഏകദേശം 100 വാഹനങ്ങള്‍ ഈ ഭാഗത്ത് പാര്‍ക്ക് ചെയ്യാമായിരുന്നു. ആശുപത്രി കവാടത്തിനെതിര്‍വശത്ത് കെഎസ് ആര്‍ടിസി പേരൂര്‍ക്കട ഡിപ്പോയാണ്. ഈ ഭാഗത്തു ബസുകള്‍ വന്നു തിരിയുന്നതിനാല്‍ ഇഎസ് ഐ ആശുപത്രിക്കു സമീപമാണ് ഇരുചക്ര വാഹനങ്ങള്‍ പാര്‍ക്ക് ചെയ്യുന്നത്. ചെറിയ രീതിയിലുള്ള പരിക്കുകളുമായി എത്തുന്ന രോഗികളെ ആശുപത്രിക്കു സമീപം ഇറക്കി വാഹനങ്ങള്‍ ദൂരെ പാര്‍ക്ക് ചെയ്യേണ്ടതായ ഗതികേടാണ് ഇപ്പോഴുള്ളത്.

നിയന്ത്രണംവിട്ട ടിപ്പർ മറിഞ്ഞു

വെഞ്ഞാറമൂട്: വെഞ്ഞാറമൂട് മുക്കുന്നൂരിൽ വാഹനാപകടം. നിയന്ത്രണംവിട്ട ടിപ്പർ ലോറി ലോഡുമായി മറിഞ്ഞു. വെഞ്ഞാറമൂട്ടിൽനിന്നും വലിയകട്ടയ്ക്കാലിലേക്കു വരുന്ന വഴി മുക്കുന്നൂർ ജംഗ്ഷനു സമീപം ഇന്നലെ വൈകുന്നേരം 2.30 നായിരുന്നു അപകടം. എതിരെ വരുന്ന വാഹനത്തിനു സൈഡ് നൽകുന്നതിനിടെ നിയന്ത്രണംവിട്ട ലോറി മറിയുകയായിരുന്നു. വെഞ്ഞാറമൂട് പോ ലീസ് നടപടി സ്വീകരിച്ചു.

മുട്ടടയിലെ എസ്ബിഐ എടിഎം പ്രവര്‍ത്തനം അവസാനിപ്പിച്ചു

പേരൂര്‍ക്കട: മുട്ടട ജംഗ്ഷനില്‍ വര്‍ഷങ്ങളായി പ്രവര്‍ത്തിച്ചുവന്ന സ്റ്റേറ്റ് ബാങ്ക് ഓഫ് ഇന്ത്യ എടിഎം കൗണ്ടര്‍ പ്രവര്‍ത്തനം അവസാനിപ്പിച്ചു. ഒരാഴ്ച മുമ്പാണ് കൗണ്ടറിനുള്ളിലെ മെഷീന്‍ ഇളക്കിക്കൊണ്ടുപോയത്. കരാര്‍ പുതുക്കാത്തതാണ് കൗണ്ടറിന്‍റെ പ്രവര്‍ത്തനം അവസാനിക്കാന്‍ കാരണമായതെന്നാണു സൂചന. ബാങ്കുകള്‍ക്കുവേണ്ടി എടിഎം കൗണ്ടറുകള്‍ സ്ഥാപിച്ചുവരുന്നത് സ്വകാര്യ ഏജന്‍സികളാണ്. മുട്ടടയിലെ എടിഎം കൗണ്ടറിനോടു കുറച്ചുനാളായി അധികൃതര്‍ക്ക് നിസ്സഹകരണ മാനോഭാവമായിരുന്നുവെന്നാണ് പ്രദേശവാസികള്‍ പറയുന്നത്. കൗണ്ടര്‍ വൃത്തിയാക്കുന്നതിനോ കൃത്യമായി പണം മെഷീനുള്ളില്‍ നിറയ്ക്കുന്നതിനോ അധികൃതര്‍ താല്‍പ്പര്യം കാണിക്കാറില്ലായിരുന്നു. പൊടിയും വലയും കെട്ടിയ നിലയിലായിരുന്നു കുറച്ചുനാളായി എടിഎമ്മും പരിസരവും. മുട്ടടയിലെ എടിഎം കൗണ്ടര്‍ മാത്രമാണ് ഇപ്പോഴുള്ളത്. പലപ്പോഴും കൗണ്ടറിനടുത്ത് എത്തുമ്പോഴാണ് ഇവിടെ പ്രവര്‍ത്തനമില്ലെന്നു പൊതുജനങ്ങള്‍ അറിയുന്നത്. കൗണ്ടറിനു സമീപം ഇപ്പോള്‍ രണ്ടുമൂന്നു കസേരകള്‍ നിരത്തിയിട്ടിരിക്കുകയാണ്- ജനങ്ങള്‍ക്കു വിശ്രമിക്കാന്‍. എടിഎമ്മിന്‍റെ സേവനം ലഭിക്കുന്നതിന് പരുത്തിപ്പാറ ജംഗ്ഷനിലോ പേരൂര്‍ക്കട ജംഗ്ഷനിലോ എത്തണം.

കെഎസ്ആര്‍ടിസി ബസ് തടിലോറിയില്‍ ഇടിച്ച് അപകടം

നെയ്യാറ്റിന്‍കര: തടി ലോറിയില്‍ കെഎസ്ആര്‍ടിസി ബസിടിച്ച് പത്തോളം യാത്രക്കാര്‍ക്ക് പരിക്ക്. ഇന്നലെ ഉച്ചയ്ക്ക് രണ്ടരയോടെയായിരുന്നു അപകടം. നെയ്യാറ്റിന്‍കര കെഎസ്ആര്‍ടിസി ഡിപ്പോയില്‍നിന്നും മാന്പഴക്കര വഴി കാരക്കോണത്തേയ്ക്ക് പോയ ബസ് മാന്പഴക്കര കല്ലുപാലത്തിനു സമീപം തടി ലോറിയില്‍ ഇടിക്കുകയായിരുന്നു. ഇടിയുടെ ആഘാതത്തില്‍ ബസിലെ യാത്രക്കാര്‍ക്ക് പരിക്കേറ്റു. അപ്രതീക്ഷിതമായ ഇടിയില്‍ മുന്‍വശത്തെ സീറ്റുകളിലും കന്പിയിലും ചെന്നിടിച്ചാണ് വിദ്യാര്‍ഥികള്‍ ഉള്‍പ്പെടെയുള്ള യാത്രക്കാര്‍ക്ക് പരിക്കേറ്റത്. ബസിന്‍റെ മുന്‍വശത്തെ ചില്ലു മുഴുവനും തകര്‍ന്നു. പരിക്കേറ്റവരെ നെയ്യാറ്റിന്‍കര ജനറല്‍ ആശുപത്രിയില്‍ പ്രവേശിപ്പിച്ചു.

പോക്‌സോ കേസില്‍ യുവാവ് അറസ്റ്റില്‍

പേരൂര്‍ക്കട: പോക്‌സോ കേസില്‍ യുവാവിനെ മ്യൂസിയം പോലീസ് അറസ്റ്റുചെയ്തു. കവടിയാര്‍ ഭഗവതി നഗര്‍ സ്ട്രീറ്റ് സി-ലെയിന്‍ ബിഎന്‍ആര്‍എ - 35ല്‍ വാടകയ്ക്കു താമസിക്കുന്ന പ്രവീണ്‍കുമാര്‍ (42) ആണ് അറസ്റ്റിലായത്. വെള്ളിയാഴ്ചയായിരുന്നു കേസിനാസ്പദമായ സംഭവം. സ്റ്റേഷന്‍ പരിധിയില്‍ താമസിക്കുന്ന 16 വയസുകാരിയെയാണ് പ്രതി വീട്ടിലെത്തി അപമാനിക്കാന്‍ ശ്രമിച്ചത്. പെണ്‍കുട്ടി വിവരം രക്ഷിതാക്കളെ അറിയിക്കുകയും അവര്‍ സ്റ്റേഷനില്‍ പരാതി നല്‍കുകയുമായിരുന്നു. എ സി സ്റ്റ്യുവര്‍ട്ട് കീലറിന്‍റെ നിര്‍ദ്ദേശപ്രകാരം സിഐ വിമല്‍, എസ്ഐമാരായ വിപിന്‍, സൂരജ്, സിപിഒമാരായ ഷൈന്‍, ദീപു, ഷീല, ഉദയന്‍, അനൂപ്, സാജന്‍, മനോജ്, അരുണ്‍, ഡിക്‌സണ്‍, വൈശാഖ് എന്നിവര്‍ അന്വേഷണ സംഘത്തില്‍ ഉണ്ടായിരുന്നു. അറസ്റ്റിലായ പ്രതിയെ കോടതി റിമാന്‍ഡ് ചെയ്തു.

ഡോക്ടറില്ല; കോൺഗ്രസ് ജനപ്രതിനിധികൾ ആലമുക്ക് മൃഗാശുപത്രി ഉപരോധിച്ചു

പൂവച്ചൽ: വാർഡുകൾ ഏറെയുള്ള പൂവച്ചൽ പഞ്ചായത്തിലെ ഏക മൃഗാശുപത്രിയിൽ ഏകദേശം ഒരു മാസത്തോളമായി ഡോക്ടർ ഇല്ലെന്നു പരാതി. ഈ മേഖലയിൽ ഏറ്റവും കൂടുതൽ പാൽ ഉൽപാദനം ഉണ്ടായിരുന്ന പൂവച്ചൽ പഞ്ചായത്തിൽ ഇപ്പോൾ ക്ഷീരകർഷകരുടെ എണ്ണം വളരെ കുറഞ്ഞു. അതിനു പ്രധാന കാരണം പശുക്കൾക്ക് എന്തെങ്കിലും ഒരു രോഗം വന്നാൽ ചികിത്സിപ്പിക്കാൻ ഡോക്ടർ ഇല്ലാത്തതും വിളിച്ചാൽ വരാത്തതുമാണ്. കഴിഞ്ഞ ദിവസം പന്തടിക്കളം വിപി ഭവനിൽ അമലോൽഭവത്തിന്‍റെ കന്നുക്കുട്ടി യഥാസമയം ചികിത്സ കിട്ടാതെ മരണപ്പെട്ടിരുന്നു. മാത്രവുമല്ല പൂവച്ചൽ പഞ്ചായത്തിലെ നിരവധി പദ്ധതികൾ മുടങ്ങിക്കിടക്കുകയുമാണ്. 2024 25 സാമ്പത്തിക വർഷത്തെ കന്നുക്കുട്ടി വാങ്ങി നൽകൽ പദ്ധതി ഇതുവരെയും നടപ്പിലാക്കിയിട്ടില്ല. 2025-26 സാന്പത്തിക വർഷത്തെ പോത്തുക്കുട്ടി വാങ്ങി നൽകൽ ഉൾപ്പെടെയുള്ള നിരവധി പ്രോജക്ടുകളും അനിശ്ചിതത്വത്തിലാണ്. ഇതേത്തുടർന്നാണ് പൂവച്ചൽ പഞ്ചായത്തിലെ കോൺഗ്രസ് ജനപ്രതിനിധികൾ ആലമുക്ക് മൃഗാശുപത്രി ഉപരോധിച്ച് സമരം സംഘടിപ്പിച്ചത്. ഉച്ചയോടെ അസിസ്റ്റന്‍റ് പ്രോജക്ട് ഓഫീസർ ഡോ. ശാന്തിനി സമരക്കാരുമായി നടത്തിയ ചർച്ചയിൽ നാളെ രാവിലെ പത്തുമുതൽ ഡോക്ടറെ എത്തിക്കാമെന്ന ഉറപ്പിനെ തുടർന്ന് സമരം അവസാനിപ്പിച്ചു. കട്ടയ്ക്കോട് തങ്കച്ചൻ, ആർ. അനൂപ് കുമാർ, ലിജു സാമുവൽ, സൗമ്യ ജോസ്, ബോബി അലോഷ്യസ്, ഐ. വത്സല തുടങ്ങിയവർ നേതൃത്വം നൽകി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]