ADVERTISEMENT

ADVERTISEMENT

കലോത്സവത്തിൽ അൻജിത്തിന് അതുല്യ നേട്ടം

മഞ്ചേരി: ജില്ലാ സെൻട്രൽ സഹോദയ സിബിഎസ്‌ഇ കലോത്സവിൽ മഞ്ചേരി ചിൻമയ വിദ്യാലയത്തിലെ പത്താം ക്ലാസ് വിദ്യാർഥി എം.ഡി. അൻജിത്തിന് അതുല്യ നേട്ടം. ശാസ്ത്രീയ സംഗീതത്തിനും ലളിത ഗാനത്തിനും കാറ്റഗറി -3 ൽ ഒന്നാം സ്ഥാനവും എഗ്രേഡും നേടിയ അൻജിത്ത് സമൂഹ ഗാനത്തിൽ എ ഗ്രേഡും ദേശഭക്തിഗാനത്തിൽ ബി ഗ്രേഡും കരസ്ഥമാക്കി. 2024 ലെ സംസ്ഥാനതല കലോത്സവത്തിൽ ലളിത ഗാനത്തിൽ എ ഗ്രേഡ് ലഭിച്ചിരുന്നു.

ADVERTISEMENT

മധ്യവയസ്കന്‍റെ കൊലപാതകം: രണ്ട് തേഞ്ഞിപ്പലം സ്വദേശികൾ അറസ്റ്റിൽ

തേഞ്ഞിപ്പലം: മദ്യലഹരിയിലുണ്ടായ തർക്കത്തിനിടെ മധ്യവയസ്കനെ കൊലപ്പെടുത്തിയ കേസിൽ തേഞ്ഞിപ്പലം സ്വദേശികളായ രണ്ടുപേർ അറസ്റ്റിൽ. തേഞ്ഞിപ്പലം അരീപ്പാറ സ്വദേശി കള്ളിയിൽ കീഴ് ക്കുത്ത് വീട്ടിൽ അബൂബക്കർ ( 78), തേഞ്ഞിപ്പലം കടക്കാട്ടുപാറ സ്വദേശി പള്ളിയാളി രാമകൃഷ്ണൻ ( 53) എന്നിവരെയാണ് തേഞ്ഞിപ്പലം പോലീസ് അറസ്റ്റ് ചെയ്തത്. ഇവരെ കോടതി റിമാൻഡ് ചെയ്തു. തേഞ്ഞിപ്പലം പഞ്ചായത്തിലെ 17-ാം വാർഡിൽപ്പെടുന്ന അരീപ്പാറ കീഴക്കുത്ത് കടവിന് സമീപം അരീപ്പാറക്കടുത്ത് മുല്ലശേരി മങ്ങാട്ടയിൽ പറമ്പിൽ താമസിക്കുന്ന കളത്തുംകണ്ടി നാരായണന്‍റെ മകൻ രജീഷ് എന്ന ചെറുട്ടി (48) കൊല്ലപ്പെട്ട കേസിലാണ് അറസ്റ്റ്. കോഴിക്കോട് മെഡിക്കൽ കോളജ് ആശുപത്രിയിൽ നടത്തിയ പോസ്റ്റ്മോർട്ടത്തിൽ രജീഷിന്‍റെ മരണം ശ്വാസം മുട്ടിയാണെന്ന് കണ്ടെത്തിയിരുന്നു. മുഖഭാഗത്ത് ശരീരത്തിനുള്ളിൽ പരിക്കുകളുള്ളതായും പോസ്റ്റ്മോർട്ടം റിപ്പോർട്ടിൽ വ്യക്തമായിരുന്നു. കഴിഞ്ഞ തിങ്കളാഴ്ച രാത്രിയിൽ അരീപ്പാറ കീഴ്കുത്ത് കടവിന് സമീപം കള്ളിയിൽ അബൂബക്കറിന്‍റെ വീട്ടിലാണ് കൊലപാതകം നടന്നത്. സംഭവ സമയത്ത് അബൂബക്കറും രാമകൃഷ്ണനും ഒന്നിച്ചുണ്ടായിരുന്നു. തിങ്കളാഴ്ച രാത്രിയിൽ അബൂബക്കറിന്‍റെ വീട്ടിൽ നിന്ന് ബഹളം ഉണ്ടായതായും ദുരൂഹമായ സാഹചര്യമായിരുന്നുവെന്നുമാണ് പരിസരവാസികൾ പോലീസിന് മൊഴി നൽകിയത്. സംശയത്തിന്‍റെ അടിസ്ഥാനത്തിൽ തിങ്കളാഴ്ച രാത്രി തന്നെ അബൂക്കറിനെയും രാമകൃഷ്ണനെയും തേഞ്ഞിപ്പലം പോലീസ് കസ്റ്റഡിയിലെടുത്തിരുന്നു. പ്രവാസിയായിരുന്ന അബൂബക്കർ കുടുംബ പ്രശ്നങ്ങളെ തുടർന്ന് ഏറെക്കാലമായി തനിച്ചായിരുന്നു താമസം. തനിച്ച് താമസിക്കുന്ന അബൂബക്കറിന്‍റെ വീട്ടിൽ രാമകൃഷ്ണനും രജീഷും നിത്യസന്ദർശകരായിരുന്നു. ഇവർ അധിക ദിവസങ്ങളിലും ഒരുമിച്ച് മദ്യപിക്കാറുമുണ്ടായിരുന്നു.

ബൈക്ക് ബസിനടിയിൽപ്പെട്ട് റിട്ട: വനപാലകന് ദാരുണാന്ത്യം

നിലമ്പൂർ: കരിമ്പുഴ പാലത്തിൽ ഉണ്ടായ അപകടത്തിൽ ബൈക്ക് ബസിനടിയിൽപ്പെട്ട് റിട്ട. വനപാലകൻ മരിച്ചു. നിലമ്പൂർ വീട്ടിക്കുത്ത് കല്ലേമ്പാടത്ത് വീട്ടിൽ ഹരിദാസൻ (65) ആണ് മരിച്ചത്. കെഎൻജി റോഡിലെ കരിമ്പുഴ പാലത്തിൽ ഇന്നലെ രാത്രി 7.15 ഓടെയോടെയാണ് അപകടം. നിലമ്പൂർ ഭാഗത്തേക്ക് വരികയായിരുന്ന ബൈക്കും ബസുമാണ് അപകടത്തിൽ പെട്ടത്. ബൈക്ക് എഡ്ജിൽ ഇറങ്ങിയതോടെ ഹരിദാസ് ബസിന് അടിയിലേക്ക് തെറിച്ച് വീഴുകയായിരുന്നു. ഉടൻ നിലമ്പൂർ ജില്ലാ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഭാര്യ: രതീദേവി. മക്കൾ: അഞ്ജു, അരുൺ. മൃതദേഹം നിലമ്പൂർ ജില്ലാ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. ഇന്ന് പോസ്റ്റ്മോട്ട ശേഷം സംസ്കാരം നടക്കും.

ഡോ. ഷെഫീഖ് ഷംസുദ്ദീന് ഫെലോഷിപ്പ്

പെരിന്തൽമണ്ണ: മൗലാന ആശുപത്രിയിലെ സർജിക്കൽ ഓണ്‍കോളജിസ്റ്റും സ്താനാർബുദ ചികിത്സയിലെ നൂതന ചികിത്സാരീതികളായ കാൻസർ ബ്രസ്റ്റ് ഒണ്‍കോപ്ലാസ്റ്റിയിൽ വിദഗ്ധനുമായ പ്രശസ്ത ബ്രസ്റ്റ് സ്പെഷലിസ്റ്റ് ഡോ. ഷെഫീഖ് ഷംസുദ്ദീൻ, ബ്രസ്റ്റ് സർജറിയിൽ യൂറോപ്യൻ ബോർഡ് ഓഫ് സർജറിയുടെ ഫെലോഷിപ്പ് കരസ്ഥമാക്കി. യൂറോപ്യൻ ബോർഡ് ഓഫ് സർജറിയിൽ നിന്ന് 2022-ൽ സർജിക്കൽ ഓങ്കോളജിയിലും ഇദ്ദേഹം ഫെല്ലോഷിപ്പ് നേടിയിരുന്നു. ഈ രണ്ട് ഫെല്ലോഷിപ്പും നേടുന്ന ഇന്ത്യയിലെ ആദ്യ ഓണ്‍കോ പ്ലാസ്റ്റിക് ബ്രസ്റ്റ് സർജനാണ് ഇദ്ദേഹം.

ഡയാലിസിസ് രോഗികൾക്ക് കൈത്താങ്ങുമായി ഏലംകുളം ബാങ്ക്

ഏലംകുളം: ഏലംകുളം പഞ്ചായത്തിൽ ഡയാലിസിസ് ചെയ്യുന്ന എ ക്ലാസ് അംഗങ്ങളായ രോഗികൾക്ക് ധനസഹായം നൽകുന്ന നൂതന പദ്ധതി നടപ്പാക്കുമെന്ന് ഏലംകുളം സർവീസ് സഹകരണ ബാങ്ക് അധികൃതർ വ്യക്തമാക്കി. ബാങ്കിന്‍റെ വാർഷിക ജനറൽ ബോഡി യോഗത്തിലാണ് ഇക്കാര്യം പ്രഖ്യാപിച്ചത്. 2024-25 വർഷത്തിൽ ബാങ്കിന് 82.11 ലക്ഷം രൂപ അറ്റാദായം ഉണ്ടായതായി വാർഷിക റിപ്പോർട്ട്. "എ’ ക്ലാസിഫിക്കേഷനുള്ള ബാങ്കിൽ 142.44 കോടിയുടെ നിക്ഷേപമാണുള്ളത്. ഓഹരി മൂലധനം 2.8 കോടിയാണ്. ബാങ്കിന്‍റെ ഉടമസ്ഥതയിൽ കർഷകർക്കായി വായ്പകളും രാസവള ഡിപ്പോയും പ്രവർത്തിക്കുന്നു. നിർധനരായ എ ക്ലാസ് അംഗങ്ങൾക്കായി ആരംഭിച്ച ഇഎംഎസ് ഭവനനിധിയിലൂടെ അഞ്ച് വീടുകളുടെ നിർമാണം പൂർത്തിയാക്കി ഗുണഭോക്താക്കൾക്ക് കൈമാറി. നിർധനരായ അംഗങ്ങൾക്ക് ചികിത്സ, മരണാനന്തര സഹായം എന്നീയിനത്തിൽ 5.14 ലക്ഷം രൂപയും റിസ്ക് ഫണ്ടിനത്തിൽ 1.5 ലക്ഷം രൂപയും നൽകി. ഉത്സവകാല ചന്തകൾ, അംഗങ്ങൾക്ക് ക്ഷേമനിധി, ചികിത്സാ സഹായം, വിദ്യാർഥികൾക്ക് അക്ഷര നിക്ഷേപം, ഉന്നത വിജയികൾക്ക് അവാർഡുകൾ എന്നിവ നൽകിവരുന്നു. നിക്ഷേപങ്ങൾക്ക് സർക്കാർ ഗ്യാരണ്ടിയുള്ള ബാങ്ക്, സാധാരണ വായ്പകൾക്ക് പുറമേ കുടുംബശ്രീ അയൽക്കൂട്ടങ്ങൾക്ക് "മുറ്റത്തെമുല്ല’, ഗ്രൂപ്പ് ലോണ്‍, ഇരുചക്ര വാഹനങ്ങൾക്കും ഗൃഹോപകരണങ്ങൾക്കും വായ്പ എന്നിവയും നടപ്പാക്കി വരുന്നു. വാർഷിക യോഗത്തിൽ ബാങ്ക് പ്രസിഡന്‍റ് പി.ഗോവിന്ദ പ്രസാദ് അധ്യക്ഷത വഹിച്ചു. സെക്രട്ടറി ഇ.വി. ഷൈല അവതരിപ്പിച്ച പ്രവർത്തന റിപ്പോർട്ടും 2025-26 വർഷത്തേക്കുള്ള ബജറ്റും യോഗം അംഗീകരിച്ചു. വൈസ് പ്രസിഡന്‍റ് എം. അബൂബക്കർ, ഡയറക്ടർ പി.അജിത് കുമാർ എന്നിവർ പ്രസംഗിച്ചു.

കായിക വികസനത്തിന് മലപ്പുറത്തിന് മൂന്ന് കോടി കൂടി

മലപ്പുറം: കായിക മേഖലയിലെ അടിസ്ഥാന സൗകര്യ വികസനത്തിന് മലപ്പുറം ജില്ലയ്ക്ക് കായിക വകുപ്പിന്‍റെ ഫണ്ടിൽ നിന്ന് മൂന്ന് കോടി രൂപ കൂടി അനുവദിച്ചു. തിരൂർ, താനൂർ, മഞ്ചേരി എന്നിവിടങ്ങളിലെ നാലു പ്രവൃത്തികൾക്കായാണ് തുക അനുവദിച്ചത്. തിരൂർ ഗവണ്‍മെന്‍റ് ബോയ്സ് എച്ച്എസ്എസിന് ഗ്രൗണ്ട് നിർമിക്കാൻ 87.55 ലക്ഷവും തിരൂർ മുൻസിപ്പാലിറ്റിയിലെ എഴൂർ ഗവണ്‍മെന്‍റ് എച്ച്എസ്എസിന് 93.75 ലക്ഷവും മഞ്ചേരി പയ്യനാട് ജില്ലാ സ്പോർട്സ് കൗണ്‍സിലിന്‍റെ കെട്ടിടത്തിന് ഒരു കോടി അറുപത്തയ്യായിരം രൂപയാണ് അനുവദിച്ചത്. താനൂർ നിയോജക മണ്ഡലത്തിലെ ഒഴൂർ ജിയുപി സ്കൂളിൽ കായിക വകുപ്പ് നിർമിച്ച സിന്തറ്റിക് ഫുട്ബോൾ ടർഫിന് അനുബന്ധ സൗകര്യങ്ങൾ ഏർപ്പെടുത്താൻ 23.35 ലക്ഷം രൂപയും നൽകി. കഴിഞ്ഞ ഒന്പത് വർഷത്തിനിടെ മലപ്പുറം ജില്ലയിൽ കായിക മേഖലയുടെ അടിസ്ഥാന സൗകര്യ വികസനത്തിനായി 250 കോടിയോളം രൂപ ചെലവഴിച്ചു. ഇതിൽ 100 കോടിയോളം രൂപയുടെ പ്രവൃത്തികൾ പൂർത്തിയാക്കി. 150 കോടിയോളം രൂപയുടെ പ്രവൃത്തികൾ പുരോഗമിക്കുകയാണ്. താനൂർ കാട്ടിലങ്ങാടിയിലും തവനൂർ മണ്ഡലത്തിലെ എടപ്പാളിലുമായി 30 കോടിയോളം രൂപ കിഫ്ബി ഫണ്ടുപയോഗിച്ച് ഉന്നത നിലവാരമുള്ള കായിക സമുച്ചയങ്ങൾ പൂർത്തിയാക്കി. കാട്ടിലങ്ങാടി സ്കൂളിൽ മൾട്ടി പർപ്പസ് ഗ്രൗണ്ട് നിർമിക്കുന്നതിന് 1.28 കോടി കൂടി അനുവദിച്ചു. നിറമരുതൂർ സ്കൂൾ, ദേവ്ധാർ സ്കൂൾ, താനൂർ റീജിയണൽ ഫിഷറീസ് സ്കൂൾ, പൊന്നാനിയിലെ മുക്കുതല സ്കൂൾ, വെളിയങ്കോട്, തവനൂർ എന്നിവിടങ്ങളിൽ മികച്ച സ്റ്റേഡിയങ്ങൾ ഒരുക്കി. പൊന്നാനി നിളാ തീരം സ്പോർട്സ് കോംപ്ലക്സ് നിർമാണം കഴിഞ്ഞ മാസം തുടങ്ങി. 18 കോടിയാണ് ചെലവ്. കാലിക്കട്ട് സർവകലാശാല കാന്പസിൽ ഫിഫ നിലവാരത്തിലുള്ള അന്താരാഷ്ട്ര ഫുട്ബോൾ സ്റ്റേഡിയം നിർമിക്കാൻ 35 ഏക്കറോളം ഭൂമി വിട്ടുനൽകാൻ ധാരണയായിട്ടുണ്ട്. സ്റ്റേഡിയത്തിന്‍റെ ആദ്യഘട്ട നിർമാണ പ്രവൃത്തികൾക്കായി കിഫ്ബി ഫണ്ട് 125 കോടി രൂപ വിനിയോഗിക്കും. താനൂർ ആർട്സ് ആൻഡ് സയൻസ് കോളജിൽ സ്റ്റേഡിയം നിർമാണം തുടങ്ങി. രണ്ടു കോടി രൂപയുടെ പ്രവൃത്തികളാണ് ആദ്യഘട്ടത്തിൽ നടപ്പാക്കുന്നത്.

ഭൂജല വകുപ്പ് ശില്പശാല സംഘടിപ്പിച്ചു

എരുമമുണ്ട: എന്‍റെ ഭൂമി എന്ന വിഷയത്തെ ആസ്പദമാക്കി ജില്ലാ ഭൂജല വകുപ്പ് ശില്പശാല നടത്തി. എരുമമുണ്ട നിർമല ഹയർ സെക്കൻഡറി സ്കൂൾ എൻഎസ്എസ് യൂണിറ്റിന്‍റെ ആഭിമുഖ്യത്തിൽ നടന്ന ശില്പശാല ആര്യാടൻ ഷൗക്കത്ത് എംഎൽഎ ഉദ്ഘാടനം ചെയ്തു. നിർമല ഹയർ സെക്കൻഡറി സ്കൂൾ പ്രിൻസിപ്പൽ എ.പി. ബിജുപോൾ അധ്യക്ഷത വഹിച്ചു. ജില്ലാ ഭൂജല വകുപ്പ് അസിസ്റ്റന്‍റ് എക്സിക്യൂട്ടീവ് എൻജിനിയർ മുഹമ്മദ് കബീർ തെക്കേടത്ത്, പിടിഎ പ്രസിഡന്‍റ് ഷംസുദ്ദീൻ, എൻഎസ്എസ് പ്രോഗ്രാം ഓഫീസറും സംസ്ഥാന ഗ്രൗണ്ട് വാട്ടർ അഥോറിറ്റി അംഗവുമായ ജെയിംസ് കോശി, എൻഎസ്എസ് ലീഡർ അഞ്ജലി മേരി വർഗീസ് എന്നിവർ പ്രസംഗിച്ചു. ജലസംരക്ഷണവും ഭൂജല സംപോഷണവും മലപ്പുറം ജില്ലയിൽ വിഷയത്തിൽ എ.പി. ശ്രീജിത്തും ഭൂജലവകുപ്പിന്‍റെ പ്രവർത്തനങ്ങളും കേരള ഭൂജല നിയന്ത്രണവും ക്രമീകരണവും വിഷയത്തിൽ ഗിരീഷ് കുമാറും ക്ലാസെടുത്തു.

വയോജനങ്ങൾക്ക് "സർഗാലയ’ സന്ദർശനമൊരുക്കി വൈഎംഎസിഎ

തേഞ്ഞിപ്പലം: അന്താരാഷ്ട്ര വിനോദ സഞ്ചാരദിനത്തിൽ തേഞ്ഞിപ്പലം വൈഎംസിഎ വയോജനങ്ങൾക്കായി വടകരയ്ക്കടുത്തുള്ള ഇരിങ്ങൽ സർഗാലയയിലേക്ക് വിനോദയാത്ര സംഘടിപ്പിച്ചു. യാത്രയുടെ ഉദ്ഘാടനം പ്രസിഡന്‍റ് കെ.സി.ജോസഫ് നിർവഹിച്ചു. ഇരിങ്ങൽ സർഗാലയ കൂടാതെ കാപ്പാട്, പയ്യോളിക്കടുത്തുള്ള മിനി ഗോവാ ബീച്ച്, മലബാറിലെ പ്രഥമ ബസിലിക്കയായ മാഹി സെന്‍റ് തെരേസ തീർഥാടന കേന്ദ്രം എന്നിവയും സന്ദർശിച്ചു. സർഗാലയയിലെ ബോട്ട് യാത്ര വയോജനങ്ങൾ ആസ്വദിച്ചു. സെക്രട്ടറി കെ.വി. അഗസ്റ്റിൻ, പി.ജെ. സണ്ണിച്ചൻ, ഒ.എക്സ്. ബീന, ടി.പി. വർഗീസ്, സി.ജെ. ആന്‍റോ എന്നിവർ നേതൃത്വം നൽകി. 75 വയസ് പൂർത്തിയാക്കിയ കെ.എൽ.ആന്‍റണി, ഒ.മത്തായി എന്നിവരെയും 65 വയസ് പൂർത്തിയാക്കിയ ഇ.എസ്. മാർഗരേത്ത്, സെലീന ഡിക്രൂസ് എന്നിവരെയും ചടങ്ങിൽ പൊന്നാട അണിയിച്ച് ആദരിച്ചു. ഇതോടൊപ്പം വിവിധ മത്സരങ്ങളും സംഘടിപ്പിച്ചു. വിജയികൾക്ക് സമ്മാനവും വിതരണം ചെയ്തു.

ആര്യാടൻ മുഹമ്മദ് അനുസ്മരണം

മഞ്ചേരി: മുൻ മന്ത്രി ആര്യാടൻ മുഹമ്മദിന്‍റെ മൂന്നാം ചരമവാർഷികത്തോടനുബന്ധിച്ച് ചെരണി ശാലോംമാതാ ഭവനിൽ അന്തേവാസികൾക്കൊപ്പം അനുസ്മരണം സംഘടിപ്പിച്ചു. ആര്യാടൻ ഫൗണ്ടേഷന്‍റെ ആഭിമുഖ്യത്തിലാണ് പരിപാടി സംഘടിപ്പിച്ചത്. കെപിസിസി മെന്പർ റിയാസ് മുക്കോളി ഉദ്ഘാടനം ചെയ്തു. നിയോജക മണ്ഡലം ചെയർമാൻ ബാപ്പു മുട്ടിപ്പാലം അധ്യക്ഷത വഹിച്ചു. സത്യൻ മരത്താണി, അബ്ദുള്ള പുല്ലഞ്ചേരി, പൂഴിക്കുത്ത് അവറു, ഷബീബ് പുല്ലഞ്ചേരി, മണി പയ്യനാട്, ഹംസക്കുട്ടി പുല്ലഞ്ചേരി എന്നിവർ പ്രസംഗിച്ചു. എ. ചെറിയാപ്പു, മാട്ട ബാബു, അസീസ് വീന്പൂർ, സായി വേണു, സുലൈമാൻ പുല്ലൂർ, സൈയ്ദ് മുട്ടിപ്പാലം, ഹനീഫ ചാടിക്കല്ല് തുടങ്ങിയവർ പങ്കെടുത്തു. ശാലോം മാതാ ഭവനിലെ അന്തേവാസികൾക്ക് ഭക്ഷണ വിതരണവും നടന്നു.

പ്രസന്നക്ക് കണ്ണീരോടെ വിട നൽകി സഹപ്രവർത്തകർ

മഞ്ചേരി: കോളജ് ബസിന് പിറകിൽ സ്കൂട്ടറിടിച്ച് മരിച്ച മഞ്ചേരി നഗരസഭ ജീവനക്കാരിക്ക് കണ്ണീരോടെ വിട നൽകി സഹപ്രവർത്തകർ. അപ്രതീക്ഷിത വിയോഗം ജീവനക്കാരെ തളർത്തി. നഗരസഭയിലെ ശുചീകരണ വിഭാഗം ജീവനക്കാരിയും രാമനാട്ടുകര സ്വദേശി സജീവന്‍റെ ഭാര്യയുമായ കൊച്ചിലത്ത് വീട്ടിൽ പ്രസന്ന(53) യാണ് മരിച്ചത്. മഞ്ചേരി ഗവണ്‍മെന്‍റ് മെഡിക്കൽ കോളജ് ആശുപത്രിയിൽ പോസ്റ്റ്മോർട്ടത്തിനുശേഷം മൃതദേഹം ഇന്നലെ രാവിലെ പതിനൊന്നരയോടെ നഗരസഭയിൽ പൊതുദർശനത്തിന് വച്ചു. കൗണ്‍സിലർമാരും ജീവനക്കാരും അന്തിമോപചാരം അർപ്പിച്ചു. ചെയർപേഴ്സണ്‍ വി.എം. സുബൈദ, വൈസ് ചെയർമാൻ വി.പി. ഫിറോസ്, ആരോഗ്യ സ്ഥിരംസമിതി ചെയർമാൻ റഹീം പുതുക്കൊള്ളി, മുനിസിപ്പൽ സെക്രട്ടറി വൈ.പി. മുഹമ്മദ് അഷ്റഫ്, സ്ഥിരംസമിതി അധ്യക്ഷർ, കൗണ്‍സിലർമാർ, ജീവനക്കാർ എന്നിവർ അന്തിമോപചാരം അർപ്പിച്ചു. തിങ്കളാഴ്ച വൈകുന്നേരം മൂന്നോടെയാണ് നഗരസഭയിൽ നിന്ന് ജോലി കഴിഞ്ഞ് മടങ്ങുന്നതിനിടെ ആലുക്കലിൽ യൂണിറ്റി കോളജിലേക്ക് പ്രവേശിക്കുന്ന റോഡിനടുത്ത് അപകടമുണ്ടായത്. കോഴിക്കോട് ഭാഗത്തേക്ക് പോവുകയായിരുന്ന സ്കൂട്ടർ മുന്നിലുണ്ടായിരുന്ന കോളജ് ബസിന് പിറകിലിടിച്ചാണ് അപകടം. മൃതദേഹം വൈദ്യരങ്ങാടിയിലെ തറവാട്ടുവളപ്പിൽ സംസ്കരിച്ചു.

സി.എച്ച്. അനുസ്മരണം

മങ്കട: മങ്കട പഞ്ചായത്ത് മുസ്‌ലിം ലീഗ് കമ്മിറ്റി സി.എച്ച്. മുഹമ്മദ്കോയ അനുസ്മരണ സംഗമം നടത്തി. കൂട്ടിൽ എഎംയുപി സ്കൂൾ ഓഡിറ്റോറിയത്തിൽ നടന്ന സംഗമം അഡ്വ. ടി. കുഞ്ഞാലി ഉദ്ഘാടനം ചെയ്തു. പി.കെ. കുഞ്ഞാലിക്കുട്ടി അധ്യക്ഷത വഹിച്ചു. എൻ.കെ. ഹഫ്സൽ റഹ്മാൻ പ്രമേയ പ്രഭാഷണം നടത്തി. വി.കെ. മൻസൂർ, പ്രഫ.അബ്ദുള്ള സുല്ലമി, ജമാലുദീൻ പടുപ്പിങ്ങൽ, ഡോ. മുഹമ്മദാലി കൂട്ടിൽ, ഡോ.യു.പി. യഹ്യാഖാൻ, ഹംസ ഫൈസി എന്നിവർ പ്രസംഗിച്ചു. പി.ടി. ഖാലിദ്, സി. ഹംസ, മുഹമ്മദാലി, വി.ടി. അസീസ്, പി.പി. മർക്കാർ, കെ. വീരാൻകുട്ടി, ഇബ്രാഹിം, ടി. അബ്ദുൾ കരീം, അഡ്വ. കെ. അസ്ഗറലി, പി.കെ. മുഹമ്മദ്, പി.പി. അനീസ്, ഷരീഫ് ചുണ്ടയിൽ, ഷഫീഖ് കുന്നത്തൊട്ടി തുടങ്ങിയവർ സംബന്ധിച്ചു.

കോണ്‍ഗ്രസ് പ്രതിഷേധ പ്രകടനം നടത്തി

വണ്ടൂർ: രാഹുൽഗാന്ധിയെ വധിക്കുമെന്ന് ഭീഷണിപ്പെടുത്തിയ ബിജെപി നേതാവിനെ സംരക്ഷിക്കുന്ന സിപിഎം-ബിജെപി കൂട്ടുക്കെട്ടിനെതിരേ വണ്ടൂർ ബ്ലോക്ക് കോണ്‍ഗ്രസ് കമ്മിറ്റിയുടെ നേതൃത്വത്തിൽ വണ്ടൂരിൽ പ്രതിഷേധ പ്രകടനം നടത്തി. ബ്ലോക്ക് പ്രസിഡന്‍റ് ടി.പി. ഗോപാലകൃഷ്ണൻ, കെപിസിസി മെന്പർ സി. വാസുദേവൻ, ഡിസിസി വൈസ് പ്രസിഡന്‍റ് കെ.സി. കുഞ്ഞിമുഹമ്മദ്, മണ്ഡലം പ്രസിന്‍റുമാരായ പി.ടി. ജബീബ് സുക്കീർ, കെ. അഷ്റഫ്, വി.എ. ഇബ്നുകദീർ, ടി. വിനയദാസ്, എം. ബാബുമണി, കെ.കെ. വിജയരാജൻ, സി. രാവിദാസ്, സിദീഖ് പട്ടിക്കാടൻ, നൗഫൽ പാറക്കുളം, ജൈസൽ എടപ്പറ്റ, ശിഹാബ് മുക്കണ്ണൻ, മൻസൂർ കാപ്പിൽ തുടങ്ങിയവർ പങ്കെടുത്തു.

ബോധവത്കരണം നടത്തി

മലപ്പുറം: ലോക ഹൃദയദിനത്തോടനുബന്ധിച്ച് ഹൃദയാരോഗ്യം പരിരക്ഷിക്കുന്നതിന്‍റെ ആവശ്യകതയെ കുറിച്ച് മലപ്പുറം അപ്ഹിൽ ലയണ്‍സ് ക്ലബ് സിവിൽ സ്റ്റേഷൻ കവാടം മുതൽ കാവുങ്ങൽ ബൈപാസ് ജംഗ്ഷൻ വരെ വാക്കത്തോണ്‍ സംഘടിപ്പിച്ചു. മലപ്പുറം സ്റ്റേഷനിലെ അസിസ്റ്റന്‍റ് സബ് ഇൻസ്പെക്ടർ സുഷമ ഫ്ളാഗ് ഓഫ് ചെയ്തു. ലയണ്‍സ് ക്ലബ് അംഗങ്ങളും മുണ്ടുപറന്പിലെ മോർണിംഗ് സ്റ്റാർ ക്ലബ് അംഗങ്ങളും മലപ്പുറത്തെ ഐസ് ബർഗ് കാറ്ററിംഗ് ടീമും പങ്കെടുത്തു. സമാപനത്തോടനുബന്ധിച്ച് കാവുങ്ങലിലെ സിംസ് ഓഡിറ്റോറിയത്തിൽ നടന്ന ചടങ്ങിൽ മലപ്പുറം കോഓപറേറ്റീവ് ഹോസ്പിറ്റലിലെ കാർഡിയോളജിസ്റ്റ് ഗഗൻ വേലായുധൻ ഹൃദയാരോഗ്യ സംരക്ഷണത്തെക്കുറിച്ച് ബോധവത്കരണം നടത്തി. ക്ലബ് പ്രസിഡന്‍റ് അഡ്വ. പ്രസാദ് അധ്യക്ഷത വഹിച്ചു. സെക്രട്ടറി കെ.എസ്. രഞ്ജിത്, ട്രഷറർ ശിവശങ്കരൻ, റീജണൽ ചെയർപേഴ്സണ്‍ അഡ്വ. സുരേഷ് തുടങ്ങിയവർ പ്രസംഗിച്ചു.

പോലീസ് കായിക മേള; ഫുട്ബോളിൽ ഡിഎച്ച്ക്യു ചാന്പ്യൻമാർ

മലപ്പുറം: മലപ്പുറം കോട്ടപ്പടി മുനിസിപ്പൽ സ്റ്റേഡിയത്തിൽ നടന്ന ജില്ലാ പോലീസ് ഫുട്ബോൾ മത്സരത്തിൽ മലപ്പുറം ഡിഎച്ച്ക്യു ചാന്പ്യൻമാരായി. കൊണ്ടോട്ടി സബ് ഡിവിഷനെ മറുപടിയില്ലാത്ത രണ്ട് ഗോളുകൾക്ക് തകർത്താണ് ഡിഎച്ച്ക്യു ജേതാക്കളായത്. ഉമേഷ്, ഫർസീൻ ബക്കർ എന്നിവരാണ് ഗോളുകൾ നേടിയത്. മലപ്പുറം അഡീഷണൽ പോലീസ് സൂപ്രണ്ട് വി.എ. കൃഷ്ണദാസ്, കൊണ്ടോട്ടി അസിസ്റ്റന്‍റ് പോലീസ് സൂപ്രണ്ട് കാർത്തിക് ബാലകുമാർ, മലപ്പുറം ഡിവൈഎസ്പി കെ.എം. ബിജു എന്നിവർ ഫൈനൽ മത്സരം വീക്ഷിക്കാൻ സ്റ്റേഡിയത്തിലെത്തിയിരുന്നു.

തദ്ദേശ തെരഞ്ഞെടുപ്പ്: നിലന്പൂരിൽ മുന്നൊരുക്കവുമായി മുന്നണികളും തൃണമൂൽ കോണ്‍ഗ്രസും

നിലന്പൂർ: നഗരസഭ തെരഞ്ഞെടുപ്പിന് മുന്നൊരുക്കവുമായി മുന്നണികൾ. നിലന്പൂർ നഗരസഭ നിലനിർത്താൻ എൽഡിഎഫും തിരിച്ചുപിടിക്കാൻ യുഡിഎഫും നിലവിലെ സീറ്റ് നിലനിർത്താൻ ബിജെപിയും ശക്തി തെളിയിക്കാൻ തൃണമൂൽ കോണ്‍ഗ്രസും രംഗത്തിറങ്ങുന്നതോടെ ഇക്കുറി നിലന്പൂർ നഗരസഭ തെരഞ്ഞെടുപ്പിന് വീറും വാശിയുമേറും. നിലന്പൂർ ബൈപാസ്, ചന്തക്കുന്ന് ബസ് സ്റ്റാൻഡ്, വന്യമൃഗശല്യം, അഴിമതി എന്നിവ പ്രധാന പ്രചാരണ വിഷയങ്ങളാകും. നിലവിൽ എൽഡിഎഫ് 21, കോണ്‍ഗ്രസ് 9, ബിജെപി ഒന്ന്, സ്വതന്ത്രൻ ഒന്ന്, തൃണമൂൽ കോണ്‍ഗ്രസ് ഒന്ന് എന്നിങ്ങനെയാണ് കക്ഷി നില. ഇക്കുറി നിലന്പൂർ നഗരസഭ തെരഞ്ഞെടുപ്പ് മുന്നണികൾക്കും തൃണമൂൽ കോണ്‍ഗ്രസിനും നിർണായകമാകും. 2020-ലെ കനത്ത തോൽവിക്ക് മറുപടി നൽകാൻ ലീഗും പോരാട്ടത്തിൽ സജീവമാകും. 33 അംഗ ഭരണസമിതിയാണ് നിലവിലുള്ളതെങ്കിൽ വരുന്ന തെരഞ്ഞെടുപ്പിൽ 36 ഡിവിഷനുകളിലേക്കാണ് തെരഞ്ഞെടുപ്പ് നടക്കുക. 13 ന് നടക്കുന്ന നറുക്കെടുപ്പിന് ശേഷമായിരിക്കും സീറ്റ് ചർച്ചകളും സ്ഥാനാർഥി നിർണയവും. 2020-ൽ മൂന്നിൽ രണ്ട് ഭൂരിപക്ഷത്തിൽ നഗരസഭ ഭരണം പിടിച്ച എൽഡിഎഫിന്‍റെ നിലയിപ്പോൾ അത്ര സുരക്ഷിതമല്ല. പി.വി. അൻവറിനെ മുന്നിൽ നിർത്തിയാണ് 20 വർഷത്തെ യുഡിഎഫ് ഭരണത്തെ അന്ന് താഴെയിറക്കിയത്. അൻവർ എൽഡിഎഫ് വിട്ടതും തൃണമൂൽ കോണ്‍ഗ്രസ് നഗരസഭയിലെ മുഴുവൻ ഡിവിഷനുകളിലും മത്സരിക്കാൻ സാധ്യത നിലനിൽക്കുന്നതും എൽഡിഎഫിന് തലവേദനയാകും. യുഡിഎഫിന് നിലന്പൂർ ഉപതെരഞ്ഞെടുപ്പിൽ നഗരസഭയിൽ 3967 വോട്ടിന്‍റെ ലീഡ് ലഭിച്ചെങ്കിലും അത് എത്രകണ്ട് നഗരസഭ തെരഞ്ഞെടുപ്പിൽ പ്രതിഫലിക്കുമെന്നത് നിർണായകമാകും. സ്ഥാനാർഥി നിർണയമാകും കോണ്‍ഗ്രസിന് തലവേദനയാവുക. സ്ഥിരമായി മത്സരിക്കുന്നവരെ വീണ്ടും കളത്തിലിറക്കിയാൽ യുവജന വിഭാഗത്തിന് വേണ്ട പരിഗണന ലഭിക്കില്ലെന്ന ആശങ്ക യൂത്ത് കോണ്‍ഗ്രസിനുണ്ട്. ഇക്കുറി യൂത്ത് കോണ്‍ഗ്രസിന് വലിയ പരിഗണന ലഭിക്കുമെന്ന പ്രതീക്ഷയും യുവനേതാക്കൾ പങ്കിടുന്നു. കഴിഞ്ഞ തവണ ഒന്പത് ഡിവിഷനിൽ മത്സരിച്ച് ഒന്പതിലും പരാജയപ്പെട്ട മുസ്‌ലിം ലീഗിന് ഇക്കുറി മികച്ച വിജയം നേടാനായില്ലെങ്കിൽ അത് കനത്ത തിരിച്ചടിയാകും. ബിജെപി 2020-ൽ സിപിഎം കോട്ടയായ കോവിലകത്തുമുറി ഡിവിഷനിൽ അട്ടിമറി വിജയം നേടിയിരുന്നു. ഇക്കുറി ഒന്നിൽ കൂടുതൽ സീറ്റുകളിൽ വിജയിക്കാനാകുമെന്ന പ്രതീക്ഷയിലാണ്. നിലന്പൂർ നഗരസഭ ഭരണം നേടുന്ന മുന്നണിക്ക് 2026 ലെ നിയമസഭാ തെരഞ്ഞെടുപ്പിലും പ്രതീക്ഷ വർധിക്കും.

കൊടികുത്തിമല ടൂറിസം കേന്ദ്രത്തിലെ ടിക്കറ്റ് നിരക്കുകളിൽ ഇന്ന് മുതൽ വർധന

പെരിന്തൽമണ്ണ: പെരിന്തൽമണ്ണയിലെ കൊടികുത്തിമല ഇക്കോ ടൂറിസം കേന്ദ്രത്തിലെ ടിക്കറ്റ് നിരക്കുകളിൽ ഇന്ന് മുതൽ വർധന. പുതിയ നിരക്കുകൾ പ്രകാരം മുതിർന്നവർക്ക് 50 രൂപയും അഞ്ച് മുതൽ 12 വയസ് വരെയുള്ള കുട്ടികൾക്ക് 25 രൂപയുമാണ് ടിക്കറ്റ് നിരക്ക്. വിദ്യാർഥികൾക്ക് 25 രൂപയും വിദേശികൾക്ക് 300 രൂപയും നൽകണം. കാമറ, വീഡിയോ കാമറ, ഡ്രോണ്‍ എന്നിവയ്ക്കും ചാർജ് ബാധകമാണ്. സ്റ്റിൽ കാമറയ്ക്ക് 200 രൂപ, വീഡിയോ കാമറയ്ക്ക് 300 രൂപ, ഡ്രോണ്‍ കാമറയ്ക്ക് 2000 രൂപയാണ് നിരക്ക്. പ്രവേശന കവാടത്തിനോട് ചേർന്നുള്ള ടിക്കറ്റ് കൗണ്ടറിൽ നിന്ന് ഒന്നര കിലോമീറ്റർ കാൽനടയായി വേണം മുകളിലെത്താൻ. തിങ്കളാഴ്ച ഒഴികെയുള്ള ദിവസങ്ങളിൽ പ്രവേശനമുണ്ട്. വാച്ച് ടവറിൽ കയറിയാൽ 360 ഡിഗ്രിയിലുള്ള കാഴ്ച കാണാൻ കഴിയുന്നത് സഞ്ചാരികളെ ഏറെ ആകർഷിക്കുന്നു. സൂര്യോദയവും സൂര്യാസ്തമയവും കാണാൻ കഴിയുന്ന രീതിയിൽ സമയക്രമം വർധിപ്പിക്കാനുള്ള ഒരുക്കത്തിലാണ് അധികൃതർ. വെളിച്ച സംവിധാനം സജ്ജമാക്കുന്നതിനും നടപടികളായി.

വണ്ടൂർ ഉപജില്ല കലോത്സവം 22 മുതൽ

കരുവാരകുണ്ട്: ഒക്ടോബർ 22 മുതൽ 25 വരെ കരുവാരകുണ്ട് ഗവണ്‍മെന്‍റ് ഹയർ സെക്കൻഡറി സ്കൂളിൽ നടക്കുന്ന വണ്ടൂർ ഉപജില്ലാ സ്കൂൾ കലോത്സവത്തിന് സ്വാഗതസംഘം രൂപീകരിച്ചു. സ്കൂളിൽ നടന്ന ചടങ്ങ് കാളികാവ് ബ്ലോക്ക് പഞ്ചായത്ത് പ്രസിഡന്‍റ് കെ. തങ്കമ്മു ഉദ്ഘാടനം ചെയ്തു. ജില്ലാ പഞ്ചായത്ത് അംഗം വി.പി. ജസീറ അധ്യക്ഷത വഹിച്ചു. കരുവാരകുണ്ട് പഞ്ചായത്ത് പ്രസിഡന്‍റ് വി.എസ്. പൊന്നമ്മ, വൈസ് പ്രസിഡന്‍റ് മഠത്തിൽ ലത്തീഫ്, എഇഒ പ്രേമാനന്ദ്, ബിപിസി ഷൈജി ടി.മാത്യു, പ്രധാനാധ്യാപക ഫോറം കണ്‍വീനർ ജയരാജ്, സ്കൂൾ പ്രിൻസിപ്പൽ കെ.സിദ്ദീഖ്, പ്രധാനാധ്യാപിക കെ.രാധിക, എസ്എംസി ചെയർമാൻ പി.സജ്നു തഅലീം, എ.ഷാജഹാൻ, വി. ആബിദലി, എ.കെ. ഹംസക്കുട്ടി, ഇ.ബി. ഗോപാലകൃഷ്ണൻ എന്നിവർ പ്രസംഗിച്ചു. എ.പി. അനിൽകുമാർ എംഎൽഎ രക്ഷാധികാരിയും ഗ്രാമപഞ്ചായത്ത് പ്രസിഡന്‍റ് വി.എസ്. പൊന്നമ്മ ചെയർപേഴ്സണും പ്രിൻസിപ്പൽ കെ.സിദ്ദീഖ് ജനറൽ കണ്‍വീനറുമാണ്. വിവിധ ഉപസമിതികളും രൂപീകരിച്ചു.

ജില്ലാ ഇൻക്ലൂസീവ് സെലക്‌ഷൻ ട്രയൽ

പെരിന്തൽമണ്ണ: ഭിന്നശേഷിക്കാരായ കുട്ടികളുടെ ജില്ലാ ഇൻക്ലൂസീവ് സ്പോർട്സ് സെലക്‌ഷൻ മീറ്റ് പെരിന്തൽമണ്ണ നെഹ്റു സ്റ്റേഡിയത്തിൽ നടത്തി. അടുത്തമാസം തിരുവനന്തപുരത്ത് നടക്കുന്ന സംസ്ഥാനതല കായികമേളയുടെ മുന്നോടിയായാണ് ഭിന്നശേഷിക്കാരായ കുട്ടികളുടെ ജില്ലാതല സെലക്‌ഷൻ മീറ്റ് സംഘടിപ്പിച്ചത്. ജില്ലയിലെ 15 ബിആർസികളിൽ നിന്നായി മുന്നൂറിലധികം കുട്ടികൾ പങ്കെടുത്തു. ജൂണിയർ, സീനിയർ വിഭാഗങ്ങളിലായി ഓട്ടം, റിലേ, ലോംഗ് ജംപ്, സ്റ്റാൻഡിംഗ് ത്രോ എന്നി മത്സരങ്ങളാണ് പെരിന്തൽമണ്ണയിൽ നടന്നത്. നഗരസഭ ചെയർപേഴ്സണ്‍ പി.ഷാജി മീറ്റ് ഉദ്ഘാടനം ചെയ്തു. ഡിപിസി ടി. അബ്ദുൾ സലീം അധ്യക്ഷതവഹിച്ചു. പെരിന്തൽമണ്ണ ഉപജില്ലാ വിദ്യാഭ്യാസ ഓഫീസർ കെ.ടി. കുഞ്ഞുമൊയ്തു, എസ്എസ്കെ ജില്ലാ പ്രോഗ്രാം ഓഫീസർ മനോജ് കുമാർ, പെരിന്തൽമണ്ണ ബ്ലോക്ക് പ്രോജക്ട് കോ ഓർഡിനേറ്റർ സി.സന്തോഷ് കുമാർ, മങ്കട ബിപിസി എ.പി. ബിജു, ബോയ്സ് ഹയർ സെക്കൻഡറി സ്കൂൾ വൈസ് പ്രിൻസിപ്പൽ അനിൽകുമാർ, കുൽസു, ശ്രീദേവി പങ്കെടുത്തു.

15 പേർക്ക് വീട് നിർമിക്കാൻ മഞ്ചേരി നഗരസഭ ഫണ്ട് അനുവദിക്കും

മഞ്ചേരി: അതിദരിദ്ര പട്ടികയിൽ ഉൾപ്പെട്ട റവന്യുഭൂമി ലഭ്യമായ 15 പേർക്ക് വീട് നിർമിക്കാൻ നഗരസഭ ഫണ്ട് അനുവദിക്കും. ഇതിന് മുന്നോടിയായി ലിസ്റ്റിൽ ഉൾപ്പെട്ട ഗുണഭോക്താക്കൾ നഗരസഭയുമായി കരാർ വച്ചു. അതിദരിദ്ര പട്ടികയിൽ ഉൾപ്പെട്ട ഭൂരഹിത ഭവനരഹിതർക്ക് പുൽപ്പറ്റ വില്ലേജിൽ റവന്യുവകുപ്പ് ഭൂമി പതിച്ച് നൽകിയിരുന്നു. ഇവർക്ക് ലൈഫ് പദ്ധതി പ്രകാരം മറ്റുതദ്ദേശ സ്ഥാപനങ്ങളിൽ ഭൂമിയുള്ള ഗുണഭോക്താക്കൾക്ക് ഭവന നിർമാണ ആനുകൂല്യം നൽകൽ പദ്ധതിയിൽ ഉൾപ്പെടുത്തിയാണ് മൂന്ന് ലക്ഷം രൂപം വീതം നൽകുക. ഒരു ലക്ഷം രൂപ ലൈഫ് മിഷനും നൽകും. പുൽപ്പറ്റ വില്ലേജിലെ സർവേ നന്പർ 366 ലെ 1.80 ഏക്കർ ഭൂമിയാണ് ജില്ലയിലെ വിവിധ തദ്ദേശ സ്ഥാപനങ്ങളിലെ അതിദരിദ്ര വിഭാഗത്തിൽ ഉൾപ്പെട്ട 33 കുടുംബങ്ങൾക്ക് പതിച്ചു നൽകി പട്ടയം കൊടുത്തത്. നാല് സെന്‍റാണ് ഒരു ഗുണഭോക്താവിന് ലഭിക്കുക. റവന്യൂ ഉടമസ്ഥതയിലുള്ള 60 സെന്‍റ് ഭൂമി പുൽപ്പറ്റ ഗ്രാമപഞ്ചായത്തിന് വിട്ടു നൽകി പകരം പഞ്ചായത്തിന്‍റെ അധീനതയിലുള്ള 1.80 ഏക്കർ ഭൂമി ഇതിനായി അനുവദിക്കുകയായിരുന്നു. മഞ്ചേരി നഗരസഭയിൽ നിന്ന് 15 പേരാണ് പട്ടികയിലുണ്ടായിരുന്നത്. വീട് നിർമാണത്തിനായി വാർഷിക പദ്ധതിയിൽ ഫണ്ട് വകയിരുത്തിയിട്ടുണ്ടെന്ന് ചെയർപേഴ്സണ്‍ വി.എം. സുബൈദ പറഞ്ഞു.

പെരിന്തൽമണ്ണ ഉപജില്ല കലോത്സവത്തിന് സംഘാടക സമിതിയായി

പെരിന്തൽമണ്ണ: നവംബർ മൂന്ന് മുതൽ അഞ്ച് വരെ ആനമങ്ങാട് ഗവണ്‍മെന്‍റ് ഹയർ സെക്കൻഡറി സ്കൂളിൽ നടക്കുന്ന പെരിന്തൽമണ്ണ ഉപജില്ലാ സ്കൂൾ കലോത്സവത്തിന് സംഘാടക സമിതി രൂപീകരിച്ചു. ഉപജില്ലാ വിദ്യാഭ്യാസ ഓഫീസർ കെ.ടി കുഞ്ഞുമൊയ്തു യോഗം ഉദ്ഘാടനം ചെയ്തു. ബ്ലോക്ക് പഞ്ചായത്തംഗം ഗിരിജ ബാലകൃഷ്ണൻ, ആലിപ്പറന്പ് ഗ്രാമപഞ്ചാത്ത് വൈസ് പ്രസിഡന്‍റ് കെ.ഷീജമോൾ, ഗ്രാമപഞ്ചായത്തംഗം എം.പി. മജീദ്, സ്കൂൾ പ്രിൻസിപ്പൽ വീണാചന്ദ്രൻ,എസ്എംസി ചെയർമാൻ സക്കീർ ഹുസൈൻ, പിടിഎ പ്രസിഡന്‍റ് സൈദ് ആലിക്കൽ,പ്രധാനാധ്യാപിക പി.എസ്. ബിന്ദു, എച്ച്എം ഫോറം സെക്രട്ടറി അബ്ദുൾ അസീസ് തുടങ്ങിയവർ പ്രസംഗിച്ചു. ആലിപ്പറന്പ് ഗ്രാമപഞ്ചായത്ത് പ്രസിഡന്‍റ് കെ.ടി. അഫ്സൽ ചെയർമാനും സ്കൂൾ പ്രിൻസിപ്പൽ വീണാ ചന്ദ്രൻ ജനറൽ കണ്‍വീനറും ഉപജില്ലാ വിദ്യാഭ്യാസ ഓഫീസർ കെ.ടി. കുഞ്ഞുമൊയ്തു ട്രഷററുമായ 101 അംഗ സംഘാടകസമിതിയെ തെരഞ്ഞെടുത്തു.

കാത്തിരിപ്പിന് വിരാമം; നിലന്പൂർ റെയിൽവേ അടിപ്പാത തുറന്നു

നിലന്പൂർ: കാത്തിരിപ്പിനൊടുവിൽ നിലന്പൂർ റെയിൽവേ അടിപ്പാത ഗതാഗതത്തിനായി തുറന്നു. പതിറ്റാണ്ടുകൾ നീണ്ട നിലന്പൂരിന്‍റെ സ്വപ്നം ഇതോടെ സഫലമായി. അടിപ്പാതയുടെ അറ്റകുറ്റപ്പണികൾ ബാക്കി നിൽക്കെ യാത്രക്കാരുടെ ദുരിതം അവസാനിപ്പിക്കാൻ റെയിൽവേ എഡിആർഎമ്മിന്‍റെ നേതൃത്വത്തിൽ അടിപ്പാത തുറന്ന് കൊടുക്കുകയായിരുന്നു. ഒരു നൂറ്റാണ്ടിന്‍റെ ചരിത്രമുള്ള നിലന്പൂർ റെയിൽവേ, വികസന വഴിയിൽ കുതിക്കുകയാണ്. ഏറെക്കാലം നാല് സർവീസുകൾ മാത്രമുണ്ടായിരുന്ന നിലന്പൂർ പാതയിൽ ഇപ്പോൾ മെമു ഉൾപ്പെടെ 16 സർവീസുകളുണ്ട്. റെയിൽവേ സ്റ്റേഷന് സമീപം നിലന്പൂർ-പൂക്കോട്ടുംപാടം മലയോര ഹൈവേ മുറിച്ച് കടന്നാണ് ഇത്രയുംകാലം ട്രെയിൻ സർവീസ് നടത്തിയിരുന്നത്. മാത്രമല്ല, റെയിൽവേ സ്റ്റേഷനിൽ എൻജിൻ മാറ്റുന്പോൾ ആളുകൾ റോഡ് മുറിച്ച് കടക്കുന്നത് നിലന്പൂർ-പൂക്കോട്ടുംപാടം പാതയിലെ നിരവധി യാത്രക്കാരെയാണ് ബുദ്ധിമുട്ടിലാക്കിയിരുന്നത്. ആംബുലൻസുകൾ, സ്കൂൾ വാഹനങ്ങൾ, ബസുകൾ ഉൾപ്പെടെ റെയിൽവേ ഗേറ്റിൽ ഇരുഭാഗത്തും കുടുങ്ങിക്കിടക്കുന്നത് പലപ്പോഴും ദുരിതത്തിനിടയാക്കാറുണ്ട്. ഇതിന് പരിഹാരമായാണ് റെയിൽവേ ട്രാക്കിന് താഴെ റോഡ് നിർമിച്ചത്. 12 കോടി രൂപ ചെലവിലാണ് അടിപ്പാത നിർമാണം പൂർത്തീകരിച്ചത്. പകുതി വീതം തുക റെയിൽവേയും സംസ്ഥാന സർക്കാരുമാണ് പദ്ധതിക്ക് അനുവദിച്ചത്. എട്ട് മീറ്റർ വീതിയിൽ റോഡും ഒരു മീറ്റർ വീതിയിൽ നടപ്പാതയും അടിപ്പാതയിലുണ്ട്. ഏറെക്കാലത്തെ അനിശ്ചിതത്വത്തിനൊടുവിൽ കഴിഞ്ഞ വർഷം ഏപ്രിലിൽ നിലന്പൂർ - പൂക്കോട്ടുംപാടം റോഡ് അടച്ച് പ്രവൃത്തി തുടങ്ങി. ആറ് മാസം കൊണ്ട് പൂർത്തീകരിക്കുമെന്ന് പ്രഖ്യാപിച്ച നിർമാണം ഒന്നര വർഷത്തോളം നീണ്ടത് യാത്രക്കാരെ വലച്ചിരുന്നു. ഇടുങ്ങിയ ഗ്രാമീണ പാതയിലൂടെയാണ് ബസുകളും ലോറികളും ഉൾപ്പെടെ സഞ്ചരിച്ചിരുന്നത്. കെഎസ്ആർടിസി ഉൾപ്പെടെയുള്ളവ കരുളായി വഴി ഏറെ ചുറ്റിക്കറങ്ങിയാണ് സർവീസ് നടത്തിയിരുന്നത്. ഇപ്പോൾ അടിപ്പാത ഗതാഗതത്തിനായി തുറന്നതോടെ നാട്ടുകാർക്കും യാത്രക്കാർക്കും ആശ്വാസമായി. അതേസമയം അടിപ്പാതയുടെ അറ്റകുറ്റപ്പണികൾ തുടരുകയാണ്. ഇരുഭാഗത്തും പ്രധാന റോഡിലേക്ക് പ്രവേശിക്കുന്ന ഭാഗത്ത് ഉൾപ്പെടെ പ്രവൃത്തി അന്തിമഘട്ടത്തിലാണ്.

ഹൃദയരക്ഷക്കായി ചുവപ്പണിഞ്ഞ് വാക്കത്തോണ്‍

മലപ്പുറം: ലോക ഹൃദയദിനത്തോടനുബന്ധിച്ച് സീനിയർ ചേംബർ ഇന്‍റർനാഷണൽ മലപ്പുറവും യുബി ഇന്‍റർനാഷണലും സംയുക്തമായി ജില്ലാ ആരോഗ്യവകുപ്പിന്‍റെ സഹകരണത്തോടെ സംഘടിപ്പിച്ച വാക്ക്-എ-തോണ്‍ നൂറിലധികം പേരുടെ പങ്കാളിത്തത്തോടെ വൻ വിജയമായി. ഹൃദയാരോഗ്യ സന്ദേശം ജനങ്ങളിലേക്ക് എത്തിച്ച് പങ്കെടുത്തവരെല്ലാം ചുവന്ന നിറത്തിലുള്ള വസ്ത്രങ്ങൾ ധരിച്ചാണ് പരേഡിൽ അണിനിരന്നത്. ഇന്നലെ രാവിലെ ഏഴിന് മലപ്പുറം എംഎസ്പി പരേഡ് ഗ്രൗണ്ടിൽ നിന്ന് ആരംഭിച്ച വാക്കത്തോണ്‍ കുന്നുമ്മൽ ട്രാഫിക് ഐലൻഡ് ചുറ്റി ടൗണ്‍ഹാളിൽ സമാപിച്ചു. എംഎസ്പി അസിസ്റ്റന്‍റ് കമാൻഡന്‍റ് പി. ബാബു പരേഡ് ഫ്ളാഗ് ഓഫ് ചെയ്തു. സമാപന സമ്മേളനത്തിൽ ഹൃദയരോഗ വിദഗ്ധൻ ഡോ. ഗഗൻ വേലായുധൻ ക്ലാസെടുത്തു. ഡെപ്യൂട്ടി ഡിഎംഒ ഡോ. ഷിബുലാൽ, സീനിയർ ചേംബർ ഭാരവാഹികളായ അനിൽ പത്മനാഭ, നൗഷാദ് മാന്പ്ര, ഡോട്ട് അക്കാഡമി ഡയറകടർ ബിജു വില്ലോടി, വ്യാപാരി വ്യവസായി ഏകോപന സമിതി വനിതാ വിംഗ് സെക്രട്ടറി നജ്ല താജുദ്ദീൻ, യൂത്ത് വിംഗ് പ്രസിഡന്‍റ് സിദ്ദീഖ്, യു.ബി. സെക്രട്ടറി സുരേഷ് എന്നിവർ പ്രസംഗിച്ചു.

ഹൃദയദിനത്തിൽ മൗലാനയിൽ ബോധവത്കരണം നടത്തി

പെരിന്തൽമണ്ണ: ലോക ഹൃദയദിനത്തിൽ പെരിന്തൽമണ്ണ മൗലാന ഹാർട്ട് ഫൗണ്ടേഷന്‍റെ നേതൃത്വത്തിൽ ആശുപത്രിയിൽ വിവിധ ജനോപകാരപ്രദമായ പരിപാടികൾ സംഘടിപ്പിച്ചു. ആരോഗ്യ ബോധവത്കരണ ക്ലാസ് മെഡിക്കൽ സൂപ്രണ്ട് ഡോ.കെ.എ. സീതി ഉദ്ഘാടനം ചെയ്തു. ചീഫ് കാർഡിയോളജിസ്റ്റ് ഡോ. കെ.പി. മാർക്കോസ് അധ്യക്ഷത വഹിച്ചു. സീനിയർ കണ്‍സൾട്ടന്‍റ് കാർഡിയോളജിസ്റ്റുമാരായ ഡോ. മാത്യൂസ് പോൾ, ഡോ. അജയ് നായർ എന്നിവർ പ്രസംഗിച്ചു.മൗലാന ആശുപത്രി പരിസരത്ത് പൊതുജനങ്ങൾക്കായി നടത്തിയ സൗജന്യ സിപിആർ പരിശീലനത്തിന് എമർജൻസി വിഭാഗം കണ്‍സൾട്ടന്‍റ് ഡോ. അഷർ, ഡോ. ഐശ്വര്യ എന്നിവർ നേതൃത്വം നൽകി. ഇതിന്‍റെ ഭാഗമായുള്ള ഹൃദ്രോഗ നിർണയ ക്യാന്പിൽ ഇരുനൂറിലധികം രോഗികൾക്ക് സൗജന്യ രക്തപരിശോധന നടത്തി. കെഎസ്ഇബി ജീവനക്കാർക്കായി സംഘടിപ്പിച്ച ആരോഗ്യ ബോധവത്കരണ ക്ലാസിന് എമർജൻസി വിഭാഗം കണ്‍സൾട്ടന്‍റുമാരായ ഡോ. ഐശ്വര്യ, ഡോ. യാഷിഫ് എന്നിവരും എഎം മോട്ടോഴ്സ് ജീവനക്കാർക്കായി സംഘടിപ്പിച്ച ക്ലാസിന് കണ്‍സൾട്ടന്‍റ് കാർഡിയോളജിസ്റ്റ് ഡോ.അജയ് നായരും നേതൃത്വം നൽകി. ഡോ.അഷറിന്‍റെ നേതൃത്വത്തിൽ സിപിആർ പരിശീലനം നേടിയ സ്ക്വാഡ് വിവിധ കോളജുകളിൽ സിപിആർ പരിശീലനവും ബോധവത്കരണ ക്ലാസുകളും നടത്തി. പരിപാടികൾക്ക് ആശുപത്രി അഡ്മിനിസ്ട്രേറ്റർ വി.എം. സെയ്തുമുഹമ്മദ്, ചീഫ് ഓപറേഷൻസ് ഓഫീസർ രാംദാസ്, മൗലാന ഗ്രൂപ്പ് ഓഫ് കന്പനീസ് മാനേജർ കെ. വിനു, സീനിയർ മാർക്കറ്റിംഗ് ഓഫീസർമാരായ പ്രകാശ് വറ്റല്ലൂർ, ഫൈസൽ, സന്തോഷ്, നൗഫൽ തുടങ്ങിയവർ നേതൃത്വം നൽകി.

സിബിഎസ്ഇ കലോത്സവം: ലോഗോ പ്രകാശനം ചെയ്തു

പെരിന്തൽമണ്ണ: ഒക്ടോബർ നാല്, അഞ്ച് തിയതികളിൽ പൂക്കാട്ടിരി സഫ ഇംഗ്ലീഷ് സ്കൂളിലും (സർഗോത്സവം, ഐടി ഫെസ്റ്റ്) 11, 12 തിയതികളിൽ പുത്തനങ്ങാടി സെന്‍റ് ജോസഫ്സ് ഇംഗ്ലീഷ് മീഡിയം സ്കൂളിലും (സ്റ്റേജ് മത്സരങ്ങൾ) നടക്കുന്ന മലപ്പുറം സഹോദയ സിബിഎസ്ഇ ജില്ലാ കലോത്സവത്തിന്‍റെ ലോഗോ പ്രകാശനം ചെയ്തു. ആബിദ് ഹുസൈൻ തങ്ങൾ എംഎൽഎ സർഗോത്സവ ജനറൽ കണ്‍വീനറും സഫ സ്കൂൾ പ്രിൻസിപ്പലുമായ എ. മുഹമ്മദ് മുസ്തഫക്ക് ലോഗോ നൽകിയാണ് പ്രകാശനം നിർവഹിച്ചത്. വളാഞ്ചേരി ഡൽഹി ഇന്‍റർനാഷണൽ സ്കൂളിൽ നടന്ന ചടങ്ങിൽ സഹോദയ സ്കൂൾ കോംപ്ലക്സ് മലപ്പുറം മേഖല പ്രസിഡന്‍റ് എം. അബ്ദുൾ നാസർ അധ്യക്ഷത വഹിച്ചു. മഞ്ചേരി ബെഞ്ച് മാർക്സ് സ്കൂളിലെ സായ് കൃഷ്ണ അജിത് ആണ് ലോഗോ രൂപകൽപ്പന ചെയ്തത്. ലോഗോ മത്സരത്തിൽ പൂക്കോട്ടുംപാടം ഗുഡ്‌വിൽ സ്കൂളിലെ അർഫിൻ ഷാൻ രണ്ടാം സ്ഥാനവും പൊന്നാനി ഹിലാൽ പബ്ലിക് സ്കൂളിലെ മുഹമ്മദ് സിനാൻ മൂന്നാം സ്ഥാനവും നേടി. വിജയികളെ കലോത്സവ ഉദ്ഘാടന വേദിയിൽ അനുമോദിക്കും. ജനറൽ സെക്രട്ടറി എം.ജൗഹർ, സിബിഎസ്ഇ സിറ്റി കോ ഓർഡിനേറ്റർ പി. ഹരിദാസ്, ജില്ലാ ട്രെയിനിംഗ് കോ ഓർഡിനേറ്റർ ജോബിൻ സെബാസ്റ്റ്യൻ, സഹോദയ വൈസ് പ്രസിഡന്‍റുമാരായ ഫാ. നന്നം പ്രേംകുമാർ, ഡോ. സി.കെ.എം. ഷിബിലി, സഫ ട്രസ്റ്റ് സെക്രട്ടറി യു.എ. ഷമീർ, ഡൽഹി ഇന്‍റർനാഷണൽ സ്കൂൾ ചെയർമാൻ സി.കെ.എം. മുഹമ്മദലി തുടങ്ങിയവർ സംബന്ധിച്ചു. നാല് ദിവസങ്ങളിലായി നടക്കുന്ന കലോത്സവത്തിൽ ജില്ലയിലെ സഹോദയ അംഗങ്ങളായ 62 വിദ്യാലയങ്ങളിൽ നിന്ന് 5000 ൽ പരം പ്രതിഭകൾ മാറ്റുരയ്ക്കും.

പതിമൂന്നുകാരന് പീഡനം; മധ്യവയസ്കന് 41 വർഷം കഠിന തടവ്

നിലന്പൂർ: പതിമൂന്നുകാരനെ പ്രകൃതിവിരുദ്ധ പീഡനത്തിനിരയാക്കിയ മധ്യവയസ്കന് 41 വർഷം കഠിന തടവും 49000 രൂപ പിഴയും ശിക്ഷ. നിലന്പൂർ ഫാസ്റ്റ് ട്രാക്ക് സ്പെഷൽ കോടതി ജഡ്ജ് കെ.പി. ജോയ് ആണ് പുള്ളിപ്പാടം കൊളപ്പാടൻ അക്ബറി (55) നെതിരേ ശിക്ഷ വിധിച്ചത്. 2023 ഡിസംബർ 23, 2024 ജനുവരി 14 എന്നി ദിവസങ്ങളിലാണ് കേസിനാസ്പദമായ സംഭവം. നിലന്പൂർ പോലീസ് സ്റ്റേഷൻ ഇൻസ്പെക്ടർ സുനിൽ പുളിക്കൽ രജിസ്റ്റർ ചെയ്ത് അന്വേഷണം നടത്തി പ്രതിയെ അറസ്റ്റ് ചെയ്ത കേസിൽ ഇൻസ്പെക്ടർ എൻ. ഷാജു തുടരന്വേഷണം നടത്തി കുറ്റപത്രം സമർപ്പിച്ചു. സീനിയർ സിവിൽ പോലീസ് സുമിത്ര കേസന്വേഷണത്തിൽ സഹായിച്ചു. പ്രോസിക്യൂഷന് വേണ്ടി സ്പെഷൽ പബ്ലിക് പ്രോസിക്യൂട്ടർ അഡ്വ. സാം. കെ. ഫ്രാൻസിസ് ഹാജരായി. പ്രോസിക്യൂഷൻ ലൈസണ്‍ വിംഗില സീനിയർ സിവിൽ പോലീസ് ഓഫീസർ പി.സി. ഷീബ പ്രോസിക്യൂഷനെ സഹായിച്ചു. പ്രതിയെ ശിക്ഷ അനുഭവിക്കുന്നതിനായി തവനൂർ ജയിലിലേക്ക് അയച്ചു.

ആരോഗ്യസംരക്ഷണ ക്ലാസ് നടത്തി

മേലാറ്റൂർ: പെരിന്തൽമണ്ണ മണ്ഡലത്തിൽ നജീബ് കാന്തപുരം എംഎൽഎ നടപ്പാക്കുന്ന സദ്ഗ്രാമം പ്രോജക്ടിന്‍റെ ഭാഗമായി ഹൃദയദിനത്തോടനുബന്ധിച്ച് പൂളക്കുഴി സദ്ഗ്രാമത്തിൽ ഹൃദയാരോഗ്യത്തെക്കുറിച്ച് ആരോഗ്യസംരക്ഷണ ക്ലാസ് സംഘടിപ്പിച്ചു. മേലാറ്റൂർ പഞ്ചായത്ത് വൈസ് പ്രസിഡന്‍റ് ബീനഅജിത് ഉദ്ഘാടനം ചെയ്തു. ബ്ലോക്ക് പഞ്ചായത്ത് മെന്പർ മുൻഷിർ അധ്യക്ഷത വഹിച്ചു. പെരിന്തൽമണ്ണ ഗവണ്‍മെന്‍റ് ജില്ലാ ആശുപത്രി ആർഎംഒ ഡോ. ദീപക് കെ.വ്യാസ് ഹൃദയാരോഗ്യ സംരക്ഷണത്തെക്കുറിച്ച് മുഖ്യപ്രഭാഷണം നടത്തി. ഷബീർ കോഴിക്കോട്, രാമൻ മേലാറ്റൂർ, അജിത് പ്രസാദ്, മുസ്തഫ, സതീഷ് പൂളക്കുഴി, പ്രമോട്ടർ രേഷ്മ, പ്രസീത, സ്നിത വെട്ടത്തൂർ, റീന പെട്ടമണ്ണ, സദ്ഗ്രാമം ഫെല്ലോ അംഗം ഹർഷ എന്നിവർ പ്രസംഗിച്ചു.

എല്ല് സംസ്കരണ യൂണിറ്റിനെതിരേ നാട്ടുകാർ

മഞ്ചേരി: വർഷങ്ങളായി പ്രവർത്തിക്കുന്ന എല്ല് സംസ്കരണ യൂണിറ്റ് ആരോഗ്യ പ്രശ്നങ്ങളുണ്ടാക്കുന്നുവെന്ന് ചൂണ്ടിക്കാട്ടി നാട്ടുകാർ പ്രക്ഷോഭത്തിനൊരുങ്ങുന്നു. തൃക്കലങ്ങോട് പഞ്ചായത്തിൽ മരത്താണി കയറ്റിക്കുന്നിൽ പ്രവർത്തിക്കുന്ന സ്ഥാപനത്തിനെതിരേയാണ് നാട്ടുകാരുടെ സമരം. 35 വർഷം മുന്പ് കന്പനി ആരംഭിക്കുന്പോൾ പ്രദേശത്ത് വിരലിലെണ്ണാവുന്ന വീടുകൾ മാത്രമാണ് ഉണ്ടായിരുന്നത്. എന്നാൽ ഇപ്പോൾ അറൂനൂറ് മീറ്റർ ചുറ്റളവിലായി നൂറോളം വീടുകളുണ്ട്. ജില്ലക്ക് പുറത്തു നിന്നും ടണ്‍കണക്കിന് എല്ല് ആണ് ഇവിടേക്ക് എത്തുന്നത്. ഇവിടെ താമസിക്കുന്നവർക്ക് തലവേദനയും അലർജിയും വിട്ടുമാറുന്നില്ല. കന്പനി അധികൃതരോട് പരാതി പറഞ്ഞാൽ അവർ കള്ളക്കേസുകളിൽ കുടുക്കുകയാണെന്ന് പ്രദേശവാസികൾ വാർത്താസമ്മേളനത്തിൽ ആരോപിച്ചു. പഞ്ചായത്ത് അധികൃതർക്ക് പരാതി നൽകിയെങ്കിലും കന്പനിക്ക് അനുകൂലമായ നിലപാടാണ് കൈക്കൊള്ളുന്നത്. ജില്ലാ കളക്ടർക്കും മലിനീകരണ നിയന്ത്രണ ബോർഡിനും ആരോഗ്യ വകുപ്പിനും ഇവർ പരാതി നൽകിയിട്ടുണ്ട്. അധികൃതരുടെ ഭാഗത്ത് നിന്ന് നടപടിയുണ്ടാകാത്ത പക്ഷം ശക്തമായ പ്രക്ഷോഭത്തിന് മുന്നിട്ടിറങ്ങുമെന്ന് നാട്ടുകാരായ ഷഫീഖലി പാലാന്തൊടി, സിറാജുദ്ദീൻ കൈനിക്കര, നജീബ് പുവളപ്പിൽ എന്നിവർ വാർത്താ സമ്മേളനത്തിൽ അറിയിച്ചു.

ഫാ. തുന്പയിൽ ചിറയിൽ ജീവകാരുണ്യ അവാർഡ് ചുങ്കത്തറ സ്വദേശിക്ക്

എടക്കര: ഫാ. തുന്പയിൽചിറയിലിന്‍റെ നാമത്തിൽ നൽകിവരുന്ന ജീവകാരുണ്യ അവാർഡ് ചുങ്കത്തറ സ്വദേശിക്ക്. ചരുവിളപുത്തൻവീട് മാത്യുവിനാണ് അവാർഡ് ലഭിച്ചത്. ജീവകാരുണ്യ പ്രവർത്തനങ്ങളിൽ സജീവ സാന്നിധയമായ വ്യക്തികൾക്കായി നൽകുന്നതാണ് അവാർഡ്. ഫാ. ഷാജി തുന്പയിൽ ചിറയിൽ മാത്യുവിന് അവാർഡ് സമ്മാനിച്ചു. മലപ്പുറം ജില്ലാ എപ്പിസ്കോപ്പൽ വികാരി ഫാ. തോമസ് കല്ലൂർ, നിറവ് ചെയർമാൻ ഫാ.റോയി വലിയപറന്പിൽ, സെക്രട്ടറി സാബു പൊൻമേലിൽ, വി.പി. മത്തായി, ഫാ.പോൾസൻ ആറ്റുപുറം, ബാബു തയ്യൽ പീടിക എന്നിവർ പ്രസംഗിച്ചു.

ഭിന്നശേഷി കുട്ടികൾക്കായി സെലക്‌ഷൻ ട്രയൽ നടത്തി

മഞ്ചേരി: സംസ്ഥാനതല കായിക മേളയിലേക്ക് തെരഞ്ഞെടുക്കുന്നതിനായി ഭിന്നശേഷി കുട്ടികൾക്കായി ജില്ലാതല ഇൻക്ലൂസീവ് സെലക്‌ഷൻ ട്രയൽ മഞ്ചേരിയിൽ നടന്നു. കഴിഞ്ഞ വർഷമാണ് സർക്കാർ ഭിന്നശേഷി കുട്ടികൾക്കായി കായികമേള ആരംഭിച്ചത്. രണ്ടു തവണയും ജില്ലാതല സെലക്‌ഷൻ ട്രയലിന് മഞ്ചേരിയാണ് ആതിഥേയത്വം വഹിച്ചത്. മഞ്ചേരി ബിആർസിയുടെ നേതൃത്വത്തിൽ ബോയ്സ് ഹയർസെക്കൻഡറി സ്കൂൾ മൈതാനത്ത് നടന്ന സെലക്‌ഷൻ ട്രയലിൽ ജില്ലയിലെ 15 ബിആർസികളിൽ നിന്നായി ഇരുനൂറിലധികം വിദ്യാർഥികൾ മാറ്റുരച്ചു. ഫുട്ബോൾ, ക്രിക്കറ്റ്, ബാഡ്മിന്‍റൻ, ഹാന്‍റ്ബോൾ തുടങ്ങി അഞ്ചിനങ്ങളിലാണ് സെലക്‌ഷൻ ട്രയൽ നടന്നത്. രാവിലെ ഒന്പത് മണിയോടെ ദീപശിഖാ പ്രയാണം നടന്നു. എംഎസ്പി കമാൻഡന്‍റ് കെ. സലീം ഉദ്ഘാടനം ചെയ്തു. ജില്ലാ പ്രോഗ്രാം ഓഫീസർ എം.ഡി. മഹേഷ് അധ്യക്ഷത വഹിച്ചു. ബിപിസി കെ. ബിന്ദു, ഉപജില്ല വിദ്യാഭ്യാസ ഓഫീസർ ബീന മാണിക്കോത്ത്, കൊണ്ടോട്ടി ബിപിസി അനീഷ് കുമാർ, മലപ്പുറം ബിപിസി മുഹമ്മദാലി, മഞ്ചേരി ബിആർസി ട്രെയിനർ സി. നിഖിൽ എന്നിവർ പ്രസംഗിച്ചു. പങ്കെടുത്ത വിദ്യാർഥികൾക്ക് സമാപന സമ്മേളനത്തിൽ ഉപഹാരം നൽകി.

ഹജ്ജ്: തെരഞ്ഞെടുക്കപ്പെട്ടത് ക്രമനന്പർ 3791 വരെയുള്ളവർ

മലപ്പുറം: അടുത്ത വർഷത്തെ (2026) ഹജ്ജ് കർമത്തിന് സംസ്ഥാന ഹജ്ജ് കമ്മിറ്റി മുഖേന അപേക്ഷിച്ച് നറുക്കെടുപ്പിലൂടെ വെയ്റ്റിംഗ് ലിസ്റ്റിൽ ഉൾപ്പെട്ട ക്രമനന്പർ ഒന്ന് മുതൽ 3791 വരെയുള്ള വർക്ക് ഹജ്ജിന് അവസരം ലഭിച്ചു. പുതുതായി വെയ്റ്റിംഗ് ലിസ്റ്റിൽ നിന്ന് തെരഞ്ഞെടുക്കപ്പെട്ടവർ ഒക്ടോബർ 11നകം ആദ്യഗഡു ഒരാൾക്ക് 1,52,300 രൂപ അടവാക്കണം. ഓരോ കവർ നന്പറിനും പ്രത്യേകം ലഭിക്കുന്ന ബാങ്ക് റഫറൻസ് നന്പർ രേഖപ്പെടുത്തിയ പേ-ഇൻ സ്ലിപ്പ് ഉപയോഗിച്ച് സ്റ്റേറ്റ് ബാങ്ക് ഓഫ് ഇന്ത്യ അല്ലെങ്കിൽ യൂണിയൻ ബാങ്ക് ഓഫ് ഇന്ത്യ എന്നിവയുടെ ഏതെങ്കിലും ബ്രാഞ്ചിലോ ഓണ്‍ലൈൻ ആയോ പണമടയ്ക്കാം. പുതുതായി തെരഞ്ഞെടുക്കപ്പെട്ടവർ ഹജ്ജ് അപേക്ഷാ ഫോമും അനുബന്ധ രേഖകളും (അപേക്ഷയിൽ അപേക്ഷകനും നോമിനിയും ഒപ്പിടണം), പണമടച്ച പേ-ഇൻ സ്ലിപ്പ്, നിശ്ചിത മാതൃകയിലുള്ള ഫോട്ടോ പതിച്ച മെഡിക്കൽ സ്ക്രീനിംഗ് ആൻഡ് ഫിറ്റ്നസ് സർട്ടിഫിക്കറ്റ് (സർട്ടിഫിക്കറ്റ് ഗവണ്‍മെന്‍റ് അലോപ്പതി ഡോക്ടർ പരിശോധിച്ചതാകണം) ഒക്ടോബർ 18 നകം ഓണ്‍ലൈനായി അപ്‌ലോഡ് ചെയ്യുകയോ സംസ്ഥാന ഹജ്ജ് കമ്മിറ്റി ഓഫീസിൽ സമർപ്പിക്കുകയോ ചെയ്യണം. വിവരങ്ങൾക്ക് 2026-ലെ സർക്കുലർ നന്പർ 11 കാണുക. വിവരങ്ങൾക്കായി സംസ്ഥാന ഹജ്ജ് കമ്മിറ്റി ഓഫീസുമായോ, സംസ്ഥാന ഹജ്ജ് കമ്മിറ്റിയുടെ ട്രെയിനിംഗ് ഓർഗനൈസർമാരുമായോ ബന്ധപ്പെടണം. ഫോണ്‍: 04832710717. Website: tthsp://hajcommtitee.gov.in, kerlahajcommtitee.org

വായനോത്സവം സംഘടിപ്പിച്ചു

എടക്കര: സംസ്ഥാന ലൈബ്രറി കൗണ്‍സിലിന്‍റെ നിർദേശ പ്രകാരം വിദ്യാർഥികൾക്കിടയിൽ വായന സംസ്കാരം വളർത്തുന്നതിനായി ചുങ്കത്തറയിൽ വായനോത്സവം സംഘടിപ്പിച്ചു. പഞ്ചായത്ത് തല മത്സരത്തിൽ നിന്ന് ആദ്യ മൂന്ന് സ്ഥാനങ്ങൾ നേടിയ വിദ്യാർഥികൾ അടുത്ത മാസം നടക്കുന്ന താലൂക്ക് തല മത്സരത്തിൽ പങ്കെടുക്കാൻ യോഗ്യത നേടി. ചുങ്കത്തറ പഞ്ചായത്തിലെ മുഴുവൻ സ്കൂളുകളിലെ എൽപി, യുപി വിഭാഗത്തിൽ നടത്തിയ മത്സരങ്ങളിൽ ഒന്നും രണ്ടും മൂന്നും സ്ഥാനങ്ങൾ നേടിയ വിദ്യാർഥികളാണ് പഞ്ചായത്ത് തലത്തിൽ മത്സരിച്ചത്. യുപി വിഭാഗത്തിൽ നിന്ന് ആദ്യമൂന്ന് സ്ഥാനങ്ങൾ നേടിയ കുറുന്പലങ്ങോട് ജിയുപിഎസിലെ പാർവതി, കൊന്നമണ്ണ ജിയുപിഎസിലെ എയ്ഞ്ചൽ ഏബ്രഹാം, പള്ളിക്കുത്ത് ജിയുപിഎസിലെ വി.ടി. മിഥില, എൽപി വിഭാഗത്തിൽ ഒന്നും രണ്ടും മൂന്നും സ്ഥാനക്കാരായ പള്ളിക്കുത്ത് ജിയുപിഎസിലെ വി. അഫ്ല, ചുങ്കത്തറ ജിഎൽപിഎസിലെ റിതിൻ ബിജു ജോസഫ്, ചുങ്കത്തറ എംടിഎച്ച്എസ്എസിലെ എം.ടി. മുഹമ്മദ് അഫ്നാൻ എന്നിവരാണ് അടുത്ത മാസം വണ്ടൂരിൽ നടക്കുന്ന താലൂക്ക് തല മത്സരങ്ങളിലേക്ക് യോഗ്യത നേടിയത്. വായനോത്സവ ചടങ്ങ് നിലന്പൂർ താലൂക്ക് ലൈബ്രറി കൗണ്‍സിൽ വൈസ് പ്രസിഡന്‍റ് ഇ.എ. മാർക്കോസ് ഉദ്ഘാടനം ചെയ്തു. കെ. വേദവ്യാസൻ അധ്യക്ഷത വഹിച്ചു. ലൈബ്രറി കൗണ്‍സിൽ സെക്രട്ടറി മൈലാടി റഹ്മത്തുള്ള മുഖ്യപ്രഭാഷണം നടത്തി. പഞ്ചായത്ത് അംഗം കെ.പി. മൈമൂന സർട്ടിഫിക്കറ്റുകളും മെമന്‍റോയും വിതരണം ചെയ്തു. സുരേന്ദ്രൻ, സജി, വി.പി. ബാലൻ എന്നിവർ പ്രസംഗിച്ചു.

നഗരസഭാ സെക്രട്ടറിയെ സ്ഥലംമാറ്റിയതിൽ കൗണ്‍സിൽ യോഗത്തിൽ പ്രമേയം

മഞ്ചേരി: ചുമതലയേറ്റ് 15 ദിവസത്തിനകം മഞ്ചേരി നഗരസഭാ സെക്രട്ടറിയെ സ്ഥലം മാറ്റിയ നടപടിക്കെതിരേ കൗണ്‍സിൽ യോഗത്തിൽ പ്രമേയം. വികസന പദ്ധതികൾ അട്ടിമറിക്കാനുള്ള രാഷ്ട്രീയ നീക്കമാണ് സെക്രട്ടറിയെ മാറ്റുന്നതിലൂടെ നടപ്പാക്കുന്നതെന്നും സ്ഥലംമാറ്റ ഉത്തരവ് പിൻവലിക്കണമെന്നും പ്രമേയം ആവശ്യപ്പെട്ടു. വൈസ് ചെയർമാൻ വി.പി. ഫിറോസ് ആണ് പ്രമേയം അവതരിപ്പിച്ചത്. കൗണ്‍സിലർ കണ്ണിയൻ അബൂബക്കർ പിന്തുണച്ചു. സെക്രട്ടറിയെ നിരന്തരം സ്ഥലംമാറ്റി നഗരസഭയെ ദ്രോഹിക്കുന്ന നടപടിക്കെതിരേ പ്രമേയത്തിലൂടെ കൗണ്‍സിൽ പ്രതിഷേധം അറിയിച്ചു. കഴിഞ്ഞ വർഷം പദ്ധതി നടത്തിപ്പിൽ മുന്നിലെത്തുകയും കഴിഞ്ഞ ദിവസം ഐഎസ്ഒ അംഗീകാരം നേടുകയും ചെയ്തിട്ടും ജനദ്രോഹ നിലപാടിൽ നിന്ന് പിൻമാറാൻ സർക്കാർ തയാറായിട്ടില്ല. കഴിഞ്ഞ അഞ്ച് വർഷത്തിനിടെ രണ്ട് വർഷത്തോളം സെക്രട്ടറിയുടെ ചുമതല മറ്റുള്ളവർക്കായിരുന്നു. ഒരു സെക്രട്ടറി ചുമതല എടുത്ത് ഡിജിറ്റൽ സൈനും മറ്റു ലോഗിനുകളും ശരിയാക്കി വരാൻ മിനിമം ഒരാഴ്ച സമയം എടുക്കും. ഇതെല്ലാം ശരിയാക്കുന്പോഴേക്കും ഇവരെ സ്ഥലം മാറ്റുകയാണ്. ഈ ഭരണ സമിതിയുടെ കാലയളവിൽ 12 പേരാണ് സെക്രട്ടറിയുടെ ചുമതല വഹിച്ചത്. പലപ്പോഴും മുനിസിപ്പൽ എൻജിനിയർ സെക്രട്ടറിയുടെ കൂടി ചുമതല വഹിക്കുകയായിരുന്നു. സെക്രട്ടറിയെ മാറ്റിയെങ്കിലും പകരം പുതിയ സെക്രട്ടറിയെ നിയമിച്ചിട്ടില്ല. പ്രതിപക്ഷം വിയോജനം രേഖപ്പെടുത്തിയതോടെ വോട്ടിനിട്ട് പാസാക്കി. ചെയർപേഴ്സണ്‍ വി.എം. സുബൈദ അധ്യക്ഷയായിരുന്നു. വൈസ് ചെയർമാൻ വി.പി. ഫിറോസ്, സ്ഥിരംസമിതി അധ്യക്ഷരായ യാഷിക് മേച്ചരി, റഹീം പുതുക്കൊള്ളി, എൻ.കെ. ഖൈറുന്നീസ, എൻ.എം. എൽസി, കൗണ്‍സിലർമാരായ കണ്ണിയൻ അബൂബക്കർ, മരുന്നൻ മുഹമ്മദ്, ഹുസൈൻ മേച്ചേരി, അഷ്റഫ് കാക്കേങ്ങൽ, എൻ.കെ. ഉമ്മർ ഹാജി, മരുന്നൻ സാജിദ് ബാബു, എ.വി. സുലൈമാൻ തുടങ്ങിയവർ സംസാരിച്ചു.

ജില്ലാ പോലീസ് കായികമേള: ഫുട്ബോളിൽ സെമി ഫൈനൽ ഇന്ന്

മലപ്പുറം: ജില്ലാ പോലീസ് കായികമേളയോടനുബന്ധിച്ച് നടക്കുന്ന ഫുട്ബോൾ മത്സരങ്ങൾക്ക് തുടക്കമായി. ജില്ലാ പോലീസ് മേധാവി ആർ. വിശ്വനാഥ് കിക്കെടുത്ത് മത്സരങ്ങളുടെ ഉദ്ഘാടനം നിർവഹിച്ചു. തുടർന്ന് കളിക്കാരുമായി പരിചയപ്പെട്ടു. ഡിവൈഎസ്പി കെ.എം. ബിജു, മലപ്പുറം പോലീസ് ഇൻസ്പെക്ടർ പി. വിഷ്ണു എന്നിവർ സന്നിഹിതരായിരുന്നു. കോട്ടപ്പടി മുനിസിപ്പൽ സ്റ്റേഡിയത്തിൽ നടന്ന ആദ്യമത്സരത്തിൽ താനൂർ സബ് ഡിവിഷനെ (4-0) ഗോളുകൾക്ക് തകർത്ത് ജില്ലാ പോലീസ് ഓഫീസ് സെമിയിലെത്തി. പെരിന്തൽമണ്ണ, കൊണ്ടോട്ടി സബ് ഡിവിഷനുകൾ മാറ്റുരച്ച രണ്ടാം ക്വാർട്ടറിൽ നിശ്ചിത സമയത്ത് ഓരോ ഗോളടിച്ച് സമനില നേടിയതോടെ ഷൂട്ടൗട്ടിലാണ് വിജയികളെ തീരുമാനിച്ചത്. (7-6) സ്കോറിന് കൊണ്ടോട്ടി സബ് ഡിവിഷൻ സെമിയിൽ പ്രവേശിച്ചു. ഉച്ചക്ക് ശേഷം നടന്ന രണ്ട് ക്വാർട്ടർ ഫൈനൽ മത്സരങ്ങളിൽ ഡിഎച്ച്ക്യു, മലപ്പുറം സബ് ഡിവിഷനെയും നിലന്പൂർ സബ് ഡിവിഷൻ തിരൂർ സബ് ഡിവിഷനെയും തോൽപ്പിച്ചതോടെ സെമി ഫൈനൽ ടീമുകളായി. ഇന്ന് രാവിലെ നടക്കുന്ന സെമിയിൽ ജില്ലാ പോലീസ് ഓഫീസ്, കൊണ്ടോട്ടി സബ് ഡിവിഷനെയും ഡിഎച്ച്ക്യു, നിലന്പൂർ സബ് ഡിവിഷനെയും നേരിടും. തുടർന്ന് ഫൈനൽ നടക്കും. ജില്ലാ പോലീസ് കായികമേളയോടനുബന്ധിച്ചുള്ള ഗെയിംസ് ഇനങ്ങളായ ബാഡ്മിന്‍റണ്‍ മത്സരങ്ങൾ ഒക്ടോബർ മൂന്നിനും ബാസ്ക്കറ്റ്ബോൾ മത്സരങ്ങൾ നാലിനും അഞ്ച്, ആറ് തിയതികളിൽ ക്രിക്കറ്റും ഏഴിന് വോളിബോളും അരങ്ങേറും. 11, 12 തിയതികളിൽ കാലിക്കട്ട്‌ യൂണിവേഴ്സിറ്റി ഗ്രൗണ്ടിൽഅത്‌ലറ്റിക് മത്സരങ്ങളും നടക്കും. ഇതോടെ കായിക മേള സമാപിക്കും.

മഞ്ചേരിയിൽ കെഎസ്ആർടിസിയുടെ പാഴ്സൽ സർവീസ് പുനരാരംഭിച്ചു

മഞ്ചേരി: മഞ്ചേരി കച്ചേരിപ്പടി ഇന്ദിരാഗാന്ധി ബസ് ടെർമിനലിൽ കെഎസ്ആർടിസിയുടെ കൊറിയർ ആൻഡ് ലോജിസ്റ്റിക്സ് കേന്ദ്രം പുനരാരംഭിച്ചു. 2024 ജൂലൈ 17ന് ഉദ്ഘാടനം ചെയ്യപ്പെട്ട കേന്ദ്രം കഴിഞ്ഞ ഒരു മാസത്തോളമായി പ്രവർത്തനരഹിതമായിരുന്നു. ലാഭകരമല്ലെന്ന കാരണം പറഞ്ഞാണ് കേന്ദ്രം പൂട്ടിയത്. വിഷയം ഇക്കഴിഞ്ഞ ജില്ലാ വികസന സമിതി ചർച്ച ചെയ്തിരുന്നു. കേന്ദ്രം പുനരാരംഭിക്കണമെന്നും സ്റ്റേഷൻ മാസ്റ്റർ ഓഫീസിലേക്ക് ഉദ്യോഗസ്ഥരെ നിയമിക്കണമെന്നും ആവശ്യപ്പെട്ട് ഇക്കഴിഞ്ഞ 18ന് അഡ്വ. യു.എ. ലത്തീഫ് എംഎൽഎ ഗതാഗത മന്ത്രി കെ.ബി. ഗണേഷ് കുമാറിന് നിവേദനം നൽകി. നിവേദനത്തിന്‍റെ അടിസ്ഥാനത്തിൽ 29ന് പാഴ്സൽ സർവീസ് പുനരാരംഭിക്കുമെന്നും ദിവസങ്ങൾക്കകം സ്റ്റേഷൻമാസ്റ്റർ ഓഫീസിൽ നിയമനം നടത്തുമെന്നും മന്ത്രി ഉറപ്പു നൽകിയിരുന്നു. ജില്ലയിലെ അഞ്ചാമത്തെ പാഴ്സൽ സർവീസ് കേന്ദ്രമാണ് മഞ്ചേരിയിലേത്. നിലന്പൂർ, മലപ്പുറം, തിരൂർ, പെരിന്തൽമണ്ണ ഡിപ്പോകളിൽ നിലവിൽ കൊറിയർ സർവീസുണ്ട്. ടിക്കറ്റിതര വരുമാനം വർധിപ്പിക്കുന്നതിന്‍റെ ഭാഗമായാണ് കെഎസ്ആർടിസി മഞ്ചേരിയിലും കൊറിയർ സർവിസ് ആരംഭിച്ചത്. സാധാരണ സ്വകാര്യ കൊറിയർ സ്ഥാപനങ്ങൾ ഈടാക്കുന്ന ഫീസിനേക്കാൾ 30 ശതമാനം വരെ കുറവിലാണ് കെഎസ്ആർടിസി പാഴ്സൽ എത്തിക്കുക. രാവിലെ എട്ടുമുതൽ രാത്രി എട്ടുവരെ കൊറിയർ കൗണ്ടർ പ്രവർത്തിക്കും. 16 മണിക്കൂറിനുള്ളിൽ കേരളത്തിലെവിടെയും കൊറിയർ/പാഴ്സൽ കൈമാറാം. പാഴ്സൽ ട്രാക്കിംഗ് സംവിധാനവുമുണ്ട്. ബസുകളിലാണ് ഉരുപ്പടി ലക്ഷ്യസ്ഥാനത്തെത്തിക്കുന്നത്.

ബസിന് പിറകിൽ സ്കൂട്ടറിടിച്ച് യാത്രക്കാരി മരിച്ചു

മഞ്ചേരി: മഞ്ചേരിയ്ക്കടുത്ത് നറുകര ആലുക്കലിൽ കോളജ് ബസിന് പിറകിൽ സ്കൂട്ടർ ഇടിച്ച് യാത്രക്കാരി മരിച്ചു. മഞ്ചേരി നഗരസഭയിലെ ശുചീകരണ വിഭാഗം ജീവനക്കാരിയും രാമനാട്ടുകര സ്വദേശി സജീവന്‍റെ ഭാര്യയുമായ കൊച്ചിലത്ത് വീട്ടിൽ പ്രസന്ന (53) യാണ് മരിച്ചത്. തിങ്കളാഴ്ച വൈകിട്ട് മൂന്നോടെയാണ് അപകടം. നഗരസഭയിൽ നിന്ന് ജോലി കഴിഞ്ഞ് മടങ്ങുന്നതിനിടെ ആലുക്കലിൽ യൂണിറ്റി കോളജിലേക്ക് പ്രവേശിക്കുന്ന റോഡിനടുത്താണ് അപകടം. കോഴിക്കോട് ഭാഗത്തേക്ക് പോവുകയായിരുന്ന സ്കൂട്ടർ മുന്നിലുണ്ടായിരുന്ന കോളജ് ബസിന് പിറകിലിടിച്ചാണ് അപകടമെന്ന് പോലീസ് പറഞ്ഞു. ഉടനെ മഞ്ചേരി ഗവണ്‍മെന്‍റ് മെഡിക്കൽ കോളജ് ആശുപത്രിയിലെത്തിച്ചെങ്കിലും രക്ഷിക്കാനായില്ല. മൃതദേഹം മെഡിക്കൽ കോളജ് ആശുപത്രി മോർച്ചറിയിൽ. പോസ്റ്റ്മോർട്ടത്തിന് ശേഷം ഇന്ന് രാവിലെ 11ന് നഗരസഭയിൽ പൊതുദർശനത്തിന് ശേഷം മൃതദേഹം നാട്ടിലേക്ക് കൊണ്ടുപോകും.

യുഡിഎഫ് വനിതാ സംഗമം സംഘടിപ്പിച്ചു

നിലന്പൂർ: നിലന്പൂരിൽ യുഡിഎഫ് വനിതാ സംഗമം നടത്തി. ആര്യാടൻ ഷൗക്കത്ത് എംഎൽഎ ഉദ്ഘാടനം ചെയ്യതു. ആശാ വർക്കർമാരുടെയും അങ്കണവാടി വർക്കർമാരുടെയും ശാപം പേറുന്ന ഗവണ്‍മെന്‍റാണ് കേരളത്തിലേതെന്ന് അദ്ദേഹം പറഞ്ഞു. പാചക തൊഴിലാളികൾക്ക് പോലും പണം കൊടുക്കാത്തവരാണ് സ്ത്രീ സംരക്ഷണത്തിന്‍റെ വക്താക്കളായി ചമയുന്നത്. ഇക്കാര്യങ്ങൾ ചൂണ്ടിക്കാട്ടി സ്ത്രീകൾ നടത്തിയ ഗൃഹസന്ദർശനമാണ് കഴിഞ്ഞ തെരഞ്ഞടുപ്പുകളിലൊക്കെ വൻവിജയമുണ്ടാക്കാൻ കഴിഞ്ഞതെന്നും ആര്യാടൻ ഷൗക്കത്ത് പറഞ്ഞു. സറീനാ മുഹമ്മദാലി അധ്യക്ഷത വഹിച്ചു. ലുഖ്മാൻ അരീക്കോട്, സി.എച്ച് ഇക്ബാൽ, പാലൊളി മെഹബൂബ്, റീന പോത്ത്കല്ല്, ഇൽ മുന്നിസ, ഹഫ്സത്ത് മൂത്തേടം, ഷീബ പൂഴിക്കുത്ത് എന്നിവർ പ്രസംഗിച്ചു.

കാദറലി സെവൻസ് ഡിസംബറിൽ; സംഘാടക സമിതിയായി

പെരിന്തൽമണ്ണ: 53-ാമത് അഖിലേന്ത്യാ കാദറലി സെവൻസ് ഫുട്ബോൾ ടൂർണമെന്‍റ് ഡിസംബർ 20ന് പെരിന്തൽമണ്ണ നെഹ്റു സ്റ്റേഡിയത്തിൽ ആരംഭിക്കും. 20 പ്രമുഖ ടീമുകൾ പങ്കെടുക്കുന്ന ടൂർണമെന്‍റ് ഇക്കുറി ആധുനിക സംവിധാനങ്ങളോടെയാണ് സംഘടിപ്പിക്കുന്നത്. ടൂർണമെന്‍റിന്‍റെ വിജയത്തിനായി സംഘാടകസമിതി രൂപീകരിച്ചു. ക്ലബ് ഹാളിൽ നടന്ന യോഗം ബ്ലോക്ക് പഞ്ചായത്ത് പ്രസിഡന്‍റ് അഡ്വ. എ.കെ. മുസ്തഫ ഉദ്ഘാടനം ചെയ്തു. ക്ലബ് പ്രസിഡന്‍റ് മണ്ണിൽ ഹസൻ അധ്യക്ഷത വഹിച്ചു. എഡിഎം എം.എൻ. മെഹറലി, എൻ.പി. ഉണ്ണികൃഷ്ണൻ, എം.എം. മുസ്തഫ, അറഞ്ഞിക്കൽ ആനന്ദൻ, സി.വി. സദാശിവൻ, നാലകത്ത് ബഷീർ, സി.പി. ഇക്ബാൽ, സുബ്രഹ്മണ്യൻ, മങ്കട സുരേന്ദ്രൻ, യൂസഫ് രാമപുരം, മണ്ണേങ്ങൽ അസീസ്, സി.എച്ച്. മുസ്തഫ, സി.എച്ച്. നാസർ, ഉണ്ണീൻ പുലാക്കൽ, ഡോ. നിലാർ മുഹമ്മദ്, ജോളി ജെയിംസ്, മാങ്ങോട്ടിൽ ബാലകൃഷ്ണൻ, ജനറൽ സെക്രട്ടറി പച്ചീരി ഫാറൂഖ്, സെക്രട്ടറി എച്ച്. മുഹമ്മദ് ഖാൻ എന്നിവർ പ്രസംഗിച്ചു. സ്വാഗതസംഘം ഭാരവാഹികളായി ഇ.ടി. മുഹമ്മദ് ബഷീർ എംപി, നജീബ് കാന്തപുരം എംഎൽഎ (രക്ഷാധികാരികൾ), ടൂർണമെന്‍റ് കമ്മിറ്റി ചെയർമാൻ നഗരസഭ അധ്യക്ഷൻ പി. ഷാജി, ജനറൽ കണ്‍വീനർ പച്ചീരി ഫാറൂഖ്, ട്രഷറർ മണ്ണിൽ ഹസൻ, വർക്കിംഗ് പ്രസിഡന്‍റ് സി.എച്ച്. മുസ്തഫ എന്നിവരടങ്ങുന്ന 201 അംഗ സംഘാടക സമിതി രൂപീകരിച്ചു.

ഡയാലിസിസ് രോഗികൾക്ക് ധനസഹായം നൽകി

കരുവാരകുണ്ട്: കേരളാ സ്റ്റേറ്റ് യൂസ്ഡ് വെഹിക്കിൾസ് ഡീലേഴ്സ് ആൻഡ് ബ്രോക്കേഴ്സ് അസോസിയേഷൻ കാളികാവ് ഏരിയ കമ്മിറ്റി ഡയാലിസിസ് രോഗികൾക്ക് ധനസഹായം വിതരണം ചെയ്തു. കരുവാരകുണ്ട് സർവീസ് ബാങ്ക് ഓഡിറ്റോറിയത്തിൽ നടന്ന പരിപാടി എ.പി. അനിൽകുമാർ എംഎൽഎ ഉദ്ഘാടനം ചെയ്തു. വിവിധ പഞ്ചായത്തുകളിലെ തെരഞ്ഞെടുക്കപ്പെട്ട ഡയാലിസിസ് ചെയ്യുന്ന രോഗികൾക്കാണ് ചികിത്സാ സഹായം വിതരണം ചെയ്തത്. ഏരിയാ കമ്മിറ്റിയുടെ മെന്പർഷിപ് കാന്പയിനിനും ചടങ്ങിൽ തുടക്കം കുറിച്ചു. ഏരിയാ പ്രസിഡന്‍റ് മോയിക്കൽ ബാപ്പുട്ടി അധ്യക്ഷത വഹിച്ചു. സംസ്ഥാന പ്രസിഡന്‍റ് സിദീഖ് മാളിയേക്കൽ മുഖ്യപ്രഭാഷണം നടത്തി. ജില്ലാ പ്രസിഡന്‍റ് മുജീബ് മൊറയൂർ, ജനറൽ സെക്രട്ടറി ആർ.ടി.സി. മജീദ്, അൻഫാൽ സഫാരി, കേരള വ്യാപാരി വ്യവസായി ഏകോപന സമിതി യൂണിറ്റ് പ്രസിഡന്‍റ് ഹംസ സുബ്ഹാൻ, സലാം വണ്ടൂർ, ഓ.കെ. മുസ്തഫ, ബാബു വണ്ടൂർ, റൗഫ് കരുവാരകുണ്ട്, നിസാം തുടങ്ങിയവർ പ്രസംഗിച്ചു.

ഐഎസ്ഒ തിളക്കത്തിൽ മഞ്ചേരി നഗരസഭ

മഞ്ചേരി: സന്പൂർണ ഗുണമേൻമ സംവിധാനം നടപ്പാക്കിയതിന്‍റെ അടിസ്ഥാനത്തിൽ മഞ്ചേരി നഗരസഭക്ക് ഐഎസ്ഒ സർട്ടിഫിക്കേഷൻ. പൊതുജനങ്ങൾക്കുള്ള ഭൗതിക സൗകര്യങ്ങൾ, റിക്കാർഡ് റൂം, ഐഎസ്ഒ ഡോക്യുമെന്‍റേഷൻ, ഓഫീസ് ശുചിത്വം, വിവിധ മീറ്റിംഗ് മിനിട്ട്സുകൾ, നഗരസഭ നൽകുന്ന സേവനങ്ങൾ, വിവിധ പ്രവർത്തനങ്ങൾ എന്നിവ പരിഗണിച്ചാണ് സർട്ടിഫിക്കേഷന് ശിപാർശ ചെയ്തത്. എൻഎബിസിബി അംഗീകാരമുള്ള ടാറ്റ ക്വാളിറ്റി സർവീസസാണ് പരിശോധന നടത്തിയത്. കിലയാണ് കണ്‍സൾട്ടൻസി സേവനം ലഭ്യമാക്കിയത്. മലപ്പുറം മുൻ ഡിഡിപി വി.പി. സുകുമാരൻ, തൃശൂരിലെ പഞ്ചായത്ത് സെക്രട്ടറി ആയിരുന്ന പ്രേമാനന്ദൻ എന്നിവർ പരിശോധനക്ക് നേതൃത്വം നൽകി. നഗരസഭ കൗണ്‍സിൽ ഹാളിൽ നടന്ന എക്സിറ്റ് യോഗം ചെയർപേഴ്സണ്‍ വി.എം. സുബൈദ ഉദ്ഘാടനം ചെയ്തു. സ്ഥിരസമിതി അധ്യക്ഷരായ യാഷിക് മേച്ചേരി, എൻ.എം. എൽസി, എൻ.കെ. ഖൈറുന്നീസ, കൗണ്‍സിലർമാരായ എൻ.കെ. ഉമ്മർ ഹാജി, ഹുസൈൻ മേച്ചേരി, ടി.എം. നാസർ തുടങ്ങിയവർ പ്രസംഗിച്ചു.

മലങ്കര സുറിയാനി കത്തോലിക്ക സഭ ആരാധനക്രമ വർഷമായി ആചരിക്കുന്നു

കരുവാരകുണ്ട്: മലങ്കര സുറിയാനി കത്തോലിക്കസഭ 2030ൽ പുനരൈക്യ ശതാബ്ദി ആഘോഷിക്കുന്നതിന്‍റെ ഭാഗമായി 20 മുതൽ 2026 സെപ്റ്റംബർ 19 വരെ ആരാധനക്രമ വർഷമായി ആചരിക്കുന്നു. ഇതിന്‍റെ സഭാതല ഉദ്ഘാടനം പത്തനംതിട്ട രൂപതയിൽ അടൂരിൽ തൊണ്ണൂറ്റി അഞ്ചാം പുനരൈക്യ വാർഷിക ആഘോഷ വേദിയിൽ നടത്തപ്പെട്ടു. അതിന്‍റെ തുടർച്ചയായി കരുവാരകുണ്ട് സെന്‍റ് ജോർജ് മലങ്കര സുറിയാനി കത്തോലിക്ക പള്ളിയിൽ ഫാ. ജോബ് ജോർജ് പുതുപറന്പിലിന്‍റെ നേതൃത്വത്തിൽ ആരാധനക്രമ വർഷത്തിന്‍റെ ഭാഗമായി വിശുദ്ധ കുരിശ് പ്രതിഷ്ഠയും കൂദാശകളെ പ്രതിനിധീകരിച്ച് ഇടവകയിലെ ഭക്തസംഘടനകളുടെ യൂണിറ്റ് രൂപത ഭാരവാഹികൾ, പള്ളികമ്മിറ്റി അംഗങ്ങൾ എന്നിവർ തിരിതെളിയിക്കുകയും ചെയ്തു. തുടർന്ന് വചനപ്രഘോഷണവും ആരാധനക്രമ വർഷ പ്രാർഥനയും ആഘോഷമായ വിശുദ്ധ കുർബാനയും അർപ്പിച്ചു. ഇന്നലെ വൈകുന്നേരം ഏഴിന് ഇടവകയിലെ ഭവനങ്ങളിൽ സന്ധ്യാപ്രാർഥനയോടൊപ്പം ആരാധനക്രമ വർഷ പ്രാർഥനയും നടന്നു.

സുതാര്യതയും കണിശതയും സി.എച്ചിന്‍റെ മുഖമുദ്ര: പി.കെ. കുഞ്ഞാലിക്കുട്ടി

തേഞ്ഞിപ്പലം: സി.എച്ചിന്‍റെ പാതയിൽ സഞ്ചരിച്ചത് കൊണ്ടാണ് ഭരണഘടന പ്രതിസന്ധി നേരിടുന്ന ഇക്കാലത്തും കേരളത്തിലെ മുസ്‌ലിങ്ങൾക്ക് അഭിമാനകരമായി ജീവിക്കാൻ കഴിയുന്നതെന്ന് പ്രതിപക്ഷ ഉപനേതാവ് പി.കെ. കുഞ്ഞാലിക്കുട്ടി. കാലിക്കട്ട് യൂണിവേഴ്സിറ്റിയിലെ സി.എച്ച്. മുഹമ്മദ് കോയ ചെയർ ഫോർ സ്റ്റഡീസ് ഓണ്‍ ഡെവലപിംഗ് സൊസൈറ്റീസ് സംഘടിപ്പിച്ച സി.എച്ച്. മുഹമ്മദ് കോയ ദേശീയ സെമിനാറിൽ ഉദ്ഘാടനം നിർവഹിച്ച് സംസാരിക്കുകയായിരുന്നു അദ്ദേഹം. സുതാര്യതയും കണിശതയുമായിരുന്നു സി.എച്ചിന്‍റെ മുഖമുദ്രയെന്നും അത് വഴിയാണ് പൊതുസമൂഹത്തിന് മുന്നിൽ തലയുയർത്തി നിൽക്കാൻ മുസ്‌ലിം സമുദായത്തിന് പ്രാപ്തിയുണ്ടായതെന്നും അദ്ദേഹം പറഞ്ഞു. സി.എച്ച് ഒരു നവോഥാന പുരുഷനായിരുന്നുവെന്ന് ഡോ.എം.പി. അബ്ദുസമദ് സമദാനി എംപി മുഖ്യപ്രഭാഷണം നിർവഹിച്ച് പറഞ്ഞു. ലോകത്തെ പ്രശ്നങ്ങൾക്കുള്ള പരിഹാരം മാനവികതയാണെന്ന് അദ്ദേഹം ഓർമിപ്പിച്ചു. ചർച്ചയിൽ സംസാരിച്ച ആംനസ്റ്റി ഇന്‍റർനാഷണൽ ഇന്ത്യയിലെ മുൻ എക്സിക്യൂട്ടീവ് ഡയറക്ടർ ആകാർ പട്ടേലൽ ഇന്ത്യയിലെ ഭരണകൂട ഭീകരതയുടെ ആഴം തുറന്നു കാട്ടി. സി.എച്ച് തുടങ്ങിവച്ച വിദ്യാഭ്യാസ വിപ്ലവത്തിന്‍റെ ഫലമാണ് ഇന്ന് മുസ്‌ലിം സമുദായത്തിനുണ്ടായ പുരോഗതിയെന്ന് സമാപന സമ്മേളനത്തിൽ സംസാരിച്ച മുൻ എംഎൽഎ കെ.എസ്. ശബരീനാഥ് പറഞ്ഞു. മതേതരത്വത്തിനെതിരേയും ഫെഡറലിസത്തിനെതിരേയുമുള്ള ആക്രമമാണ് മോദി സർക്കാർ നടത്തുന്നത്. ദക്ഷിണേന്ത്യക്കാരെ ഭൂമിശാസ്ത്ര ന്യൂനപക്ഷങ്ങളാക്കാനാണ് മോദി ശ്രമിക്കുന്നതെന്നും പോക്കർ സാഹിബിനെ പോലുള്ള ധിഷണാശാലികളായ നേതാക്കൾ ഭരണഘടന അസംബ്ലിയിൽ ഇക്കാര്യം നേരത്തെ ഉന്നയിച്ചിട്ടുണ്ടെന്നും അദ്ദേഹം പറഞ്ഞു. സംഘാടക സമിതി ജനറൽ കണ്‍വീനർ സി.കെ. സുബൈർ അധ്യക്ഷത വഹിച്ചു. മലപ്പുറം ജില്ലാപഞ്ചായത്ത് മെന്പർ ടി.പി.എം. ബഷീർ സ്വാഗതവും ഡോ.മുജീബ് റഹ്മാൻ നന്ദയും പറഞ്ഞു.

പരിയാപുരം സെന്‍റ് മേരീസ് സ്കൂളിന് ഇരട്ടക്കിരീടം

അങ്ങാടിപ്പുറം: വടക്കാങ്ങര ടിഎസ്എസ് സ്കൂളിൽ സംഘടിപ്പിച്ച മങ്കട ഉപജില്ലാ ത്രോബോൾ ചാന്പ്യൻഷിപ്പിൽ പരിയാപുരം സെന്‍റ് മേരീസ് ഹയർ സെക്കൻഡറി സ്കൂളിന് ഇരട്ടക്കിരീടം. ആണ്‍കുട്ടികളുടെയും പെണ്‍കുട്ടികളുടെയും ഫൈനലിൽ വടക്കാങ്ങര തങ്ങൾസ് ഹയർ സെക്കൻഡറി സ്കൂളിനെ പരാജയപ്പെടുത്തിയാണ് പരിയാപുരം സെന്‍റ് മേരീസ്ജേതാക്കളായത്. സ്കോർ (ആണ്‍): 15 - 2. സ്കോർ (പെണ്‍): 15 - 3. റീന ജോസഫ് കോച്ചും കെ.എസ്.സിബി ടീം മാനേജരുമാണ്. ആണ്‍കുട്ടികളുടെ വിഭാഗത്തിൽ കെ.പി.അഭിഷേക് (ക്യാപ്റ്റൻ), ലിയോണ്‍ വിനോജ്, കെ.അസീം മുഹമ്മദ്, ആൽഡ്രി ബെന്നി, കെ.അർജുൻ, എം.മുഹമ്മദ് അദ്നാൻ അഷ്റഫ്, വി.മുഹമ്മദ് ജാസിം, മുഹമ്മദ് ഷിജാസ്, സി.മുഹമ്മദ് ഹാഷിർ, കെ.വി.അർജുൻ, മുഹമ്മദ് സിനാൻ, എം.മുഹമ്മദ് നിയാസ് എന്നിവരും പെണ്‍കുട്ടികളുടെ വിഭാഗത്തിൽ കെ.ടി.ജന്ന നൗറിൻ (ക്യാപ്റ്റൻ), അന്ന ഫ്രാൻസിസ്, എ.പി.അയന ഉണ്ണി, അന്ന ആന്‍റണി, പി.ആർദ്ര, എൽസിറ്റ ജോസ്, മൈഥിലി, പി.ഫാത്തിമ ഫിദ, പി.അവിഷ്ണ ദീപു, എൻ.സൂര്യ, പി.സഫ ഷിറിൻ, മെൽന ഷാജി എന്നിവരും പരിയാപുരത്തിനായി ജഴ്സിയണിഞ്ഞു.

എസ്പിസി പാസിംഗ് ഔട്ട് പരേഡ് നടത്തി

കരുവാരകുണ്ട്: കരുവാരകുണ്ട്, പാണ്ടിക്കാട്, തുവൂർ ഗവണ്‍മെന്‍റ് ഹയർ സെക്കൻഡറി സ്കൂളുകളിലെ സ്റ്റുഡന്‍റ് പോലീസ് കേഡറ്റ് (എസ്പിസി) യൂണിറ്റുകളുടെ സംയുക്ത പാസിംഗ് ഔട്ട് പരേഡ് കരുവാരകുണ്ടിൽ നടത്തി. അഡീഷണൽ എസ്പി വി.എ. കൃഷ്ണദാസ് സല്യൂട്ട് സ്വീകരിച്ചു. ആറ് പ്ലാറ്റൂണുകളിലായി മുന്നൂറോളം കേഡറ്റുകളാണ് പരേഡിൽ പങ്കെടുത്തത്. നിരവധി പേരാണ് പരേഡ് കാണാൻ ക്യാന്പിൻകുന്ന് മൈതാനത്തെത്തിയത്. കരുവാരകുണ്ട് പഞ്ചായത്ത് പ്രസിഡന്‍റ് വി.എസ്. പൊന്നമ്മ, പോലീസ് സ്റ്റേഷൻ ഹൗസ് ഓഫീസർ വി.എൻ.ജയൻ, പാണ്ടിക്കാട് എസ്ഐ രമേഷ് ബാബു, പിടിഎ പ്രസിഡന്‍റുമാരായ അബ്ദുൾ അലി ശിഹാബ്, ടി.പി. ഫസലുറഹ്മാൻ, എം.കെ. കുഞ്ഞിമുഹമ്മദ്, പ്രധാനാധ്യാപകരായ രാധിക, മനോജ് ജോസഫ്, അനീസ, വി.പി. ഇസ്ഹാഖ്, പി. സജ്നു, അഷ്റഫ് പിലാക്കൽ, മനോജ്, ജമീല, കെ.എ. ഷെയ്ഖ് മുഹമ്മദ്, ആർ. സിന്ധു തുടങ്ങിയവർ പങ്കെടുത്തു.

ഫുട്ബോളിൽ കൊളത്തൂർ സ്കൂൾ ചാന്പ്യൻമാർ

മങ്കട: മങ്കട ഉപജില്ല അണ്ടർ 14 സബ് ജൂണിയർ ബോയ്സ് ഫുട്ബോൾ ടൂർണമെന്‍റിൽ കൊളത്തൂർ നാഷണൽ ഹയർ സെക്കൻഡറി സ്കൂൾ ടീം ജേതാക്കളായി. ഗ്രൂപ്പ് റൗണ്ടിൽ സെന്‍റ് മേരീസ് പരിയാപുരത്തെ (2-0), ക്വാർട്ടറിൽ പാങ്ങ് ഗവണ്‍മെന്‍റ് സ്കൂളിനെ (2-0) ഗോളുകൾക്കും പരാജയപ്പെടുത്തി. സെമിയിൽ മങ്കട ചേരിയം ഗവണ്‍മെന്‍റ് ഹയയർസെക്കൻഡറി സ്കൂളിനെയും ഫൈനലിൽ വടക്കാങ്ങര ടിഎസ്എസിനെ പെനാൽറ്റി ഷൂട്ടൗട്ടിലൂടെയും പരാജയപ്പെടുത്തിയാണ് കൊളത്തൂർ സ്കൂൾ ചാന്പ്യൻമാരായത്. 22 ടീമുകളാണ് പങ്കെടുത്തത്. ടീം അംഗങ്ങൾ :അദ്നാൻ അബ്ദുള്ള (ക്യാപ്റ്റൻ), ഷെമിൻ, ഫഹദ് മിർസാൻ, ആദിൽ, അൻഷിദ്, ശ്രീരാം, അഭിനവ്, വിനായക്, സാദിൽ, ജസീം, ഷെഫിൻ, തമീം, ഹരീഷ്, അഫ്‌ലാഹ്, നസീം, ഷാനിദ്, റിസ്വാൻ, ഋതുൽ. പരിശീലകർ: ശ്രീരാഗ്, മുസ്തഫ.

കുട്ടികൾക്കായി ചലച്ചിത്രമേള നടത്തി

എടക്കര: പാലേമാട് വിവേകാനന്ദ പഠന കേന്ദ്രവും കേരള സംസ്ഥാന ചലച്ചിത്ര അക്കാഡമിയും ചേർന്ന് കുട്ടികൾക്കായി ചലച്ചിത്രമേള സംഘടിപ്പിച്ചു. വിവേകാനന്ദ ഗോൾഡൻ ജൂബിലി ഹാളിൽ രണ്ട് ദിവസങ്ങളിലായി നടന്ന മേള ചലച്ചിത്രതാരം മായ വിശ്വനാഥ് ഉദ്ഘാടനം ചെയ്തു. സ്കൂൾ മാനേജർ അനിൽ ബി. കുമാർ അധ്യക്ഷത വഹിച്ചു. ചലച്ചിത്ര അക്കാഡമി കോ ഓർഡിനേറ്റർ വിനീത വിജയൻ മുഖ്യാതിഥിയായിരുന്നു. സ്കൂൾ ചലച്ചിത്ര ക്ലബ് കോ ഓർഡിനേറ്റർ എം.ടി. മനേഷ്, സ്കൂൾ പ്രിൻസിപ്പൽ സാന്‍റോ ജോസ്, പ്രധാനാധ്യാപകരായ അനിൽ സാം മാത്യു, ബിനു വി. ബേബി എന്നിവർ പ്രസംഗിച്ചു. നന്ദുകൃഷ്ണ, അനിൽ ജയകൃഷ്ണൻ അന്പാടി, പി.എസ്. വിജയൻ, എം.പി. അരവിന്ദ്, എൻ.കെ. ശ്രീശൻ, അരുണ്‍ ബാബു, എം.ഐ. മിഗ്ദാദ് എന്നിവർ നേതൃത്വം നൽകി. ലോക നിലവാരമുള്ള, വിവിധ ഭാഷയിലെ ചിത്രങ്ങൾ മേളയിൽ പ്രദർശിപ്പിച്ചു.

വാക്കത്തോണ്‍ സംഘടിപ്പിച്ചു

പെരിന്തൽമണ്ണ: ലോക ഹൃദയദിനത്തോടനുബന്ധിച്ച് എംഇഎസ് മെഡിക്കൽ കോളജ് ഹോസ്പിറ്റലും ട്രോൾ പെരിന്തൽമണ്ണയും സംയുക്തമായി നാല് കിലോമീറ്റർ വാക്കത്തോണ്‍ സംഘടിപ്പിച്ചു. ഹൃദയാഘാത പ്രതിരോധത്തെയും ചികിത്സയെയും കുറിച്ച് ജനങ്ങളെ ബോധവാൻമാരാക്കുകയാണ് ലക്ഷ്യം. മുഖ്യാതിഥി മലപ്പുറം എംഎസ്പി അസിസ്റ്റന്‍റ് കമാൻഡന്‍റ് ബിജു ചാക്കോ ഫ്ളാഗ് ഓഫ് ചെയ്തു. ഇരുനൂറിലധികം പേർ പങ്കെടുത്ത പരിപാടി രാവിലെ 6.30ന് അങ്ങാടിപ്പുറം ജംഗ്ഷനിൽ നിന്ന് ആരംഭിച്ചു. എംഇഎസ് മെഡിക്കൽ കോളജ് ഹോസ്പിറ്റൽ വരെയായിരുന്നു വാക്കത്തോണ്‍ സംഘടിപ്പിച്ചത്. പങ്കെടുത്തവർക്കെല്ലാം മെഡിക്കൽ ചെക്കപ്പും സർട്ടിഫിക്കറ്റ് വിതരണവും ബോധവത്ക്കരണത്തിന്‍റെ ഭാഗമായി കാർഡിയോളജി വിഭാഗം ഡോക്ടർമാരായ ഷരീഫ്, ജാൻഷർ എന്നിവർ ഹൃദയാഘാത പ്രതിരോധത്തെയും ചികിത്സയെയും കുറിച്ച് ക്ലാസും നടത്തി. ജീവിതശൈലിയുടെ പ്രാധാന്യത്തെക്കുറിച്ച് അവബോധം വളർത്തുന്നതിന് മെഡിക്കൽ സമൂഹം നടത്തുന്ന ഇത്തരം ശ്രമങ്ങൾ സ്വാഗതാർഹമാണെന്ന് തുടർന്ന് പ്രസംഗിച്ച അങ്ങാടിപ്പുറം പഞ്ചായത്ത് പ്രസിഡന്‍റ് സഈദ അഭിപ്രായപ്പെട്ടു. ഹോസ്പിറ്റൽ അഡ്മിനിസ്ട്രേറ്റീവ് ഓഫീസർ പോൾസണ്‍ ജോസ്, മാനേജർ ഓപറേഷൻസ് ആർ. രാഹുൽ, ഡെപ്യൂട്ടി മാനേജർ ഓപറേഷൻസ് എം.വൈ. അസർ എന്നിവർ പ്രസംഗിച്ചു.

ട്രഞ്ചിംഗ് ഗ്രൗണ്ട് പഴങ്കഥയായി : മാലിന്യക്കൂനയില്ലാത്ത മലപ്പുറം യാഥാർഥ്യമാകുന്നു

മലപ്പുറം: മലപ്പുറം പുളിയേറ്റുമ്മൽ പ്രദേശത്തുകാർക്ക് തീരാദുരിതം സമ്മാനിച്ച ട്രഞ്ചിംഗ് ഗ്രൗണ്ട് പൂവാടിയാകാനൊരുങ്ങുന്നു. കേരള ഖരമാലിന്യ പരിപാലന പദ്ധതി പ്രകാരമാണ് മലപ്പുറം നഗരസഭയിലെ അഞ്ചേക്കർ വരുന്ന പുളിയേറ്റുമ്മൽ ട്രഞ്ചിംഗ് ഗ്രൗണ്ട് ആധുനിക യന്ത്രസംവിധാനങ്ങളുപയോഗിച്ച് മാലിന്യമുക്തമാക്കിയത്. ലോക ബാങ്കിന്‍റെയും ഏഷ്യൻ ഡെവലപ്മെന്‍റ് ബാങ്കിന്‍റെയും സാന്പത്തിക സഹായത്തോടെ സംസ്ഥാന സർക്കാർ ഇരുപത് നഗരഭരണ പ്രദേശങ്ങളിലാണ് മാലിന്യ കൂനകൾ നീക്കം ചെയ്ത് ഭൂമി തിരിച്ചെടുക്കുന്ന പദ്ധതി നടപ്പാക്കുന്നത്. ഇത്തരത്തിൽ ആദ്യമായി പദ്ധതി പൂർത്തിയാക്കാൻ കഴിഞ്ഞുവെന്നത് മലപ്പുറം നഗരസഭയ്ക്ക് അഭിമാനകരമായ നേട്ടമാണ്. ആധുനിക സൗകര്യങ്ങളോടു കൂടിയ കണ്‍വൻഷൻ സെന്‍റർ, കോർട്ട്, ടർഫ് ഗ്രൗണ്ട്, പാർക്ക്, ഓപ്പണ്‍ ജിം ഉൾപ്പെടെ സജ്ജമാക്കാനാണ് നഗരസഭയുടെ പദ്ധതി. അതോടെ പ്രദേശത്തിന്‍റെ മുഖച്ഛായ തന്നെ മാറുമെന്ന് നഗരസഭാ ചെയർമാൻ മുജീബ് കാടേരി പറഞ്ഞു. മലപ്പുറം നഗരസഭാ പ്രദേശത്ത് നിന്ന് ശേഖരിച്ച മാലിന്യങ്ങൾ പുളിയേറ്റുമ്മൽ ട്രഞ്ചിംഗ് ഗ്രൗണ്ടിലാണ് നിക്ഷേപിച്ചിരുന്നത്. മാലിന്യനിക്ഷേപം നിർത്തിവച്ചിട്ടും സമീപവാസികൾക്കിത് ദുരിതമായി തുടർന്നു. ഈ സാഹചര്യത്തിലാണ് മാലിന്യം നീക്കം ചെയ്യാനുള്ള നടപടികൾ തുടങ്ങിയത്. നാലടി താഴ്ചയിൽ മാലിന്യങ്ങൾ കുഴിച്ചെടുക്കുക എന്ന ജോലി ഏറെ ശ്രമകരമായിരുന്നു. 10800 മെട്രിക് ക്യൂബ് മാലിന്യമാണ് പുറത്തെടുത്ത് വേർതിരിച്ചത്. കന്പി, മണൽ, കല്ല് തുടങ്ങി വിവിധ വസ്തുക്കൾ യന്ത്രസാമഗ്രികൾ ഉപയോഗിച്ച് വേർതിരിച്ചു. വേർതിരിച്ച വസ്തുക്കൾ ഫാക്ടറികളിലേക്കും നിർമാണ മേഖലയിലേക്കും സുരക്ഷിതമായി എത്തിക്കുകയാണ് ചെയ്യുന്നത്. പ്ലാസ്റ്റിക് മാലിന്യം സിമന്‍റ് ഫാക്ടറികളിലെ ഫർണസുകളിൽ ഇന്ധനമായി ഉപയോഗിക്കുന്നു. ഇത്തരത്തിലാണ് ശാസ്ത്രീയമായ മാലിന്യസംസ്കരണ പ്രക്രിയ പൂർത്തീകരിക്കുന്നത്. മാലിന്യമുക്തമാക്കി തിരിച്ചുപിടിച്ച ഭൂമി നിരപ്പാക്കുക കൂടി ചെയ്തതോടെ ഏത് തരം വികസന പ്രവർത്തനങ്ങൾക്കും പ്രയോജനപ്പെടുത്താവുന്ന വിധത്തിൽ പഴയ ട്രഞ്ചിംഗ് ഗ്രൗണ്ട് മാറിക്കഴിഞ്ഞു. പ്രദേശത്തെ കിണറുകളിലെല്ലാം ഇപ്പോൾ ശുദ്ധജലമാണെന്ന് പരിസരവാസികൾ പറയുന്നു. ഇരുപത് സ്ഥലങ്ങളിലും പദ്ധതി പൂർത്തിയാകുന്നതോടെ രാജ്യത്ത് ആദ്യമായി ഡംപ് സൈറ്റുകൾ ഇല്ലാത്ത സംസ്ഥാനമായി കേരളം മാറും. സംസ്ഥാനത്ത് ആദ്യമായി പദ്ധതി പൂർത്തിയാക്കിയ മലപ്പുറം നഗരസഭയിലെ പുളിയേറ്റുമ്മൽ ട്രഞ്ചിംഗ് ഗ്രൗണ്ടാണ് സംസ്ഥാനതല പ്രഖ്യാപനത്തിന് വേദിയാകുന്നത്. പദ്ധതിയുടെ ഉദ്ഘാടനം ഒക്ടോബർ പതിനൊന്നിന് രാവിലെ പത്തിന് മന്ത്രി എം.ബി. രാജേഷ് നിർവഹിക്കും. ഇ.ടി. മുഹമ്മദ് ബഷീർ എംപി, എംഎൽമാരായ പി.കെ. കുഞ്ഞാലിക്കുട്ടി, പി. ഉബൈദുള്ള, കെഎസ്ഡബ്ല്യുഎംപി സംസ്ഥാന ഡയറക്ടർ ദിവ്യ.എസ്. അയ്യർ തുടങ്ങിയവർ പങ്കെടുക്കും. മാലിന്യമുക്തം നവകേരളം ജില്ലാ കോ-ഓർഡിനേറ്റർ ബീന സണ്ണി ഉൾപ്പെടെ കാന്പയിൻ സെക്രട്ടറിയേറ്റ് അംഗങ്ങൾ കഴിഞ്ഞ ദിവസം പുളിയേറ്റുമ്മൽ പ്രദേശം സന്ദർശിച്ചു.

അർബുദരോഗ ചികിത്സയിൽ ആസ്റ്റർ മദറിന്‍റെ കാരുണ്യ സ്പർശം

മഞ്ചേരി: അർബുദ ബാധിതരായ നിർധനർക്ക് അരീക്കോട് ആസ്റ്റർ മദർ ഓങ്കോളജി സെന്‍ററിന്‍റെ കാരുണ്യ സ്പർശം. പാവപ്പെട്ട രോഗികൾക്ക് കീമോതെറാപ്പിക്ക് അന്പത് ശതമാനവും കീമോ മരുന്നുകൾക്ക് എണ്‍പത് ശതമാനവും ഇളവ് നൽകുമെന്ന് ഭാരവാഹികൾ വാർത്താ സമ്മേളനത്തിൽ അറിയിച്ചു. കാൻസർ ശസ്ത്രക്രിയയ്ക്കും കാരുണ്യ സ്പർശം പദ്ധതിയിലൂടെ അന്പതു ശതമാനം ഇളവ് പ്രഖ്യാപിച്ചിട്ടുണ്ട്. പ്രദേശത്തെ രോഗികളിൽ ഭൂരിഭാഗവും ആശ്രയിക്കുന്ന കേന്ദ്രമെന്ന നിലയിൽ മികച്ച ചികിത്സ ഉറപ്പു വരുത്തുകയെന്ന ലക്ഷ്യം വച്ചാണ് ഓങ്കോളജി സെന്‍റർ ആധുനിക സൗകര്യങ്ങളോടെ നവീകരിച്ചത്. മെഡിക്കൽ ഓങ്കോളജി വിഭാഗം കണ്‍സൾട്ടന്‍റ് ഡോ. മുഹമ്മദ് അബ്ദുൾ മാലിക് മൻസാർ, ഡോ. കെ. മുഹമ്മദ് ഷാഫി എന്നിവരുടെ നേതൃത്വത്തിലാണ് നവീകരിച്ച ഓങ്കോളജി വിഭാഗം പ്രവർത്തിക്കുന്നത്. കീമോ, മെഡിക്കൽ ആൻഡ് സർജിക്കൽ ഓങ്കോളജി തുടങ്ങി കാൻസർ രോഗം സംബന്ധിച്ചുള്ള എല്ലാ ചികിത്സകളും വിദഗ്ധ ഡോക്ടർമാരുടെ നേതൃത്വത്തിൽ ഇനി അരീക്കോട് ആസ്റ്റർ മദർ ഹോസ്പിറ്റലിൽ ലഭ്യമായിരിക്കും.12 കട്ടിലുകളോട് കൂടിയ ഡേ കെയർ കീമോതെറാപ്പി സൗകര്യ ഉൾപ്പെടെയുള്ള കീമോതെറാപ്പി യൂണിറ്റും ഇമ്യൂണോതെറാപ്പി, ടാർജെറ്റെഡ് തെറാപ്പി സൗകര്യങ്ങളും ആസ്റ്റർ മദർ ഓങ്കോളജി വിഭാഗത്തിൽ ലഭ്യമാണ്. ഇതിനുപുറമെ കാൻസർ ബാധിതരെ കിടത്തി ചികിത്സിക്കുവാനുള്ള ഐപി സംവിധാനവും ഒരുക്കിയിട്ടുണ്ട്. ഡിജിറ്റൽ മാമ്മോഗ്രാഫി ഉൾപ്പെടെ കൂടുതൽ രോഗനിർണയ സൗകര്യങ്ങളും ഇവിടെ സജ്ജീകരിച്ചിട്ടുണ്ട്. ഏഷ്യയിലെ തന്നെ ആതുര ശുശ്രൂഷ രംഗത്ത് സ്തുത്യർഹമായ സേവന പാരന്പര്യമുള്ള ആസ്റ്റർ ഗ്രൂപ്പിന്‍റെ കേരളത്തിലെ അഞ്ചാമത്തെയും മലപ്പുറം ജില്ലയിലെ രണ്ടാമത്തെയും മൾട്ടി സ്പെഷാലിറ്റി ഹോസ്പിറ്റലായ ആസ്റ്റർ മദർ ഹോസ്പിറ്റൽ, ലോകോത്തര നിലവാരമുള്ള ഏറ്റവും നൂതനമായ സംവിധാനങ്ങൾ, മികച്ച ചികിത്സാ രീതികൾ എന്നിവ ഉറപ്പു വരുത്തിയിട്ടുണ്ടെന്ന് ആസ്റ്റർ മദർ ഹോസ്പിറ്റൽ ഡെപ്യൂട്ടി ചീഫ് മെഡിക്കൽ ഓഫീസർ ഡോ. സാഹിർ കൊയപ്പത്തൊടിക, ഓങ്കോളജി വിഭാഗം മേധാവി ഡോ. കെ.വി. ഗംഗാധരൻ, ഡോ. മുഹമ്മദ് അബ്ദുൾ മാലിക് മൻസാർ, ഡോ. കെ. മുഹമ്മദ് ഷാഫി, ചീഫ് ഓപ്പറേറ്റിംഗ് ഓഫീസർ സി.വി. റോബിൻ എന്നിവർ വാർത്താ സമ്മേളനത്തിൽ അറിയിച്ചു. ഫോണ്‍ : 6235 000 410.

ഭാര്യാപിതാവിനെ കാറിടിച്ച് കൊലപ്പെടുത്താൻ ശ്രമിച്ച യുവാവ് അറസ്റ്റിൽ

പൂക്കോട്ടുംപാടം: ഭാര്യാപിതാവിനെ കാറിടിച്ച് കൊലപ്പെടുത്താൻ ശ്രമിച്ച കേസിൽ യുവാവിനെ പൂക്കോട്ടുംപാടം പോലീസ് അറസ്റ്റ് ചെയ്തു. ഉൗർങ്ങാട്ടിരി മൈത്ര സ്വദേശി ചീരാൻതൊടിക അബ്ദുൾ സമദ് (38)നെയാണ് അറസ്റ്റ് ചെയ്തത്. ശനിയാഴ്ച വൈകുന്നേരം 3.45ഓടെ കൂറ്റന്പാറ രാമംകുത്ത് റോഡിൽ ചേനാംപാടത്താണ് സംഭവം. കല്ലിങ്ങൽപൊയിൽ റോഡിലൂടെ ബൈക്കിൽ വരികയായിരുന്ന ഭാര്യാപിതാവിനെ മുൻ വിരോധത്താൽ അബ്ദുൾസമദ് ഓടിച്ച കാർ ഇടിക്കുകയായിരുന്നു. ഇതേത്തുടർന്ന് ഇയാൾ ബൈക്കിൽനിന്ന് തെറിച്ച് വീഴുകയും ഉടനെ റോഡരികിലെ മതിലിനിടയിലാക്കി കാർ ഉപയോഗിച്ച് ജാമാക്കുകയും ചെയ്തു. അബ്ദുസമദ് വീണ്ടും കാറടിപ്പിക്കാൻ ശ്രമിക്കുന്നത് കണ്ട് നാട്ടുകാർ തടയുകയായിരുന്നു. ഭാര്യാപിതാവിന് കാലുകൾക്ക് ചതവും മുറിവുകളുമടക്കം പരിക്കേറ്റിട്ടുണ്ട്. ഭാര്യ തന്‍റെ വീട്ടിൽ നിൽക്കാത്തത് ഭാര്യാപിതാവ് പറഞ്ഞിട്ടാണെന്ന വിരോധത്തിലാണ് ഇയാൾ കൊലപ്പെടുത്താൻ ശ്രമിച്ചതെന്നാണ് കേസ്. പൂക്കോട്ടുംപാടം എസ്ഐമാരായ ദിനേശ്കുമാർ, അബ്ദുൾ നാസർ, എഎസ്ഐ അനൂപ് മാത്യു, സിപിഒമാരായ സനൂപ്, സ്വരൂപ് എന്നിവർ അന്വേഷണം നടത്തി പ്രതിയെ അറസ്റ്റ് ചെയ്തത്.

ദേശീയപാതയിൽ ലോറിക്ക് പിറകിൽ കാറിടിച്ച് 12 കാരന് ദാരുണാന്ത്യം

തേഞ്ഞിപ്പലം: കോഹിനൂരിൽ ആറുവരി ദേശീയപാതയിലെ അരികിൽ നിർത്തിയിട്ട ലോറിക്ക് പിറകിൽ കാറിടിച്ച് 12 വയസുകാരന് ദാരുണാന്ത്യം. ഫറോക്ക് പെരുമുഖം സ്വദേശി കളത്തിങ്ങൽ വീട്ടിൽ ഇർഷാന്‍റെ മകൻ അഹമ്മദ് ഇഹ്സാൻ ആണ് മരിച്ചത്. കോഹിനൂർ ലോറി താവളത്തിന് സമീപം ഇന്നലെ ഉച്ചക്ക് 1.30നായിരുന്നു അപകടം. പെരുമുഖത്ത് നിന്ന് പാലക്കലിലേക്ക് പോകുന്ന മാരുതി എർട്ടിഗ കാർ, നിർത്തിയിട്ട ലോറിക്ക് പിറകിൽ ഇടിക്കുകയായിരുന്നു. കാർ ഓടിച്ചിരുന്ന ബന്ധു മുഹമ്മദ് അഹ്ദഫ് ഉറങ്ങി പോയതോ വാഹനം ഡിവൈഡറിൽ നിയന്ത്രണം വിട്ടതോ ആകാം അപകട കാരണമെന്നാണ് പ്രാഥമിക നിഗമനം. അഹമ്മദ് ഇഹ്സാന്‍റെ മാതാവ് അടക്കം എട്ടു പേരാണ് കാറിലുണ്ടായിരുന്നത്. ഇതിൽ രണ്ട് പേർ ഒഴികെ ബാക്കിയെല്ലാവരും കുട്ടികളായിരുന്നു. പരിക്കേറ്റ മുഹമ്മദ് അഹ്ദഫ്, നുസ്റത്ത്, അഹമ്മദ് അമാൻ, ആയിഷ ഹാനിയ, മുഹമ്മദ് ഹായ്സണ്‍ ബിൻ വാഹിദ്, മുഹമ്മദ് ഹംദാൻ, ഹംദ ഫാത്തിമ എന്നിവരെ കോഴിക്കോട് മിംസ് ആശുപത്രിയിൽ പ്രവേശിപ്പിച്ചു. മരിച്ച അഹമ്മദ് ഇഹ്സാന്‍റെ മൃതദേഹം തിരൂരങ്ങാടി താലൂക്ക് ആശുപത്രി മോർച്ചറിയിൽ.

തറമുറ്റം നിവാസികൾ കാട്ടാന ഭീതിയിൽ

നിലന്പൂർ: കാട്ടാന ഭീതിയിൽ തറമുറ്റം നിവാസികൾ. വനംവകുപ്പ് അടിയന്തരമായി സോളാർ വൈദ്യുത തൂക്കുവേലി നിർമിക്കണമെന്നാവശ്യം ശക്തമാകുന്നു. ചാലിയാർ പഞ്ചായത്തിലെ തറമുറ്റം നിവാസികളായ അന്പതിലേറെ മലയോര കർഷക കുടുംബങ്ങളാണ് കാട്ടാന ഭീതിയിൽ കഴിയുന്നത്. മൂലേപ്പാടം സെന്‍റ് ജോസഫ് പള്ളിയ്ക്ക് സമീപം വരെ കാട്ടാനകൾ എത്തുന്ന സാഹചര്യമാണുള്ളത്. വനംവകുപ്പ് എച്ച് ബ്ലോക്ക് മുതൽ പന്നിക്കുഴി ഭാഗംവരെയുള്ള രണ്ടര കിലോമീറ്റർ ഭാഗം വരെ സോളാർ വൈദ്യുത വേലി പുനഃസ്ഥാപിച്ചിട്ടുണ്ട്. എന്നാൽ തറമുറ്റം മുതൽ എച്ച് ബ്ലോക്ക് വരെയുള്ള ഒരു കിലോമീറ്റർ ഭാഗത്ത് വൈദ്യുത വേലി ഇല്ലാത്തതിനാൽ രാത്രിയാകുന്നതോടെ പന്തിരായിരം വനമേഖലയിൽ നിന്ന് തറമുറ്റം ഭാഗത്തേക്ക് കാട്ടാനകൾ എത്തുകയാണ്. ഈ മേഖലയിൽ വലിയ തോതിലാണ് കാട്ടാനകൾ കൃഷി നശിപ്പിക്കുന്നത്. 1970 കളിൽ മലയോര കർഷകർ കുടിയേറിയ മേഖലയാണ് ഇന്ന് കാട്ടാനകളുടെ കേന്ദ്രമായി മാറി കഴിഞ്ഞിരിക്കുന്നത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]