വിരമിച്ച അങ്കണവാടി ജീവനക്കാർ കളക്ടറേറ്റ് പടിക്കൽ അനിശ്ചിതകാല സമരം തുടങ്ങി

കൽപ്പറ്റ: വിരമിച്ച അങ്കണവാടി ജീവനക്കാർ അങ്കണവാടി എംപ്ലോയീസ് പെൻഷനേഴ്സ് ഫെഡറേഷന്‍റെ നേതൃത്വത്തിൽ കളക്ടറേറ്റ് പടിക്കൽ അനിശ്ചിതകാല സത്യഗ്രഹം തുടങ്ങി.

പ്രതിമാസ പെൻഷൻ ഏഴായിരവും ഫെസ്റ്റിവെൽ അലവൻസ് മൂവായിരവും രൂപയാക്കുക, 2023 മുതൽ വിരമിച്ച അങ്കണവാടി ജീവനക്കാർക്ക് പെൻഷനും ക്ഷേമനിധി ആനുകൂല്യങ്ങളും ഉടൻ അനുവദിക്കുക തുടങ്ങിയ ആവശ്യങ്ങൾ ഉന്നയിച്ചാണ് സമരം. ടി. സിദ്ദിഖ് എംഎൽഎ ഉദ്ഘാടനം ചെയ്തു.

ടി. ഉഷാകുമാരി അധ്യക്ഷത വഹിച്ചു. ഗ്രേസി ജോസഫ്, ടി.പി. മേരി ഫ്രാൻസിസ്, എൻ.സി. ശാന്ത, അന്നക്കുട്ടി വർഗീസ്, സാറാമ്മ മാത്യു, തുടങ്ങിയവർ പ്രസംഗിച്ചു.

ADVERTISEMENT

ഉറുകുന്ന് പള്ളിയിൽ വിശുദ്ധ കുരിശിന്‍റെ മഹത്വീകരണ തിരുന്നാൾ

ഉറുകുന്ന് : ഹോളിക്രോസ് പള്ളിയിൽ വിശുദ്ധ കുരിശിന്‍റെ മഹത്വീകരണ തിരുന്നാളിന്‍റെ ഭാഗമായിനാളെ ഉറുകുന്ന് കുരിശുമലയിൽ വൈകുന്നേരം അഞ്ചിനു ജപമാല, കുരിശിന്‍റെ നൊവേന, ദിവ്യബലി - ഫാ പ്രവീൺ ബെഞ്ചമിൻ. തുടർന്ന് ഭക്തി നിർഭരമായ ദിവ്യ കാരുണ്യ പ്രദക്ഷിണം ഉറുകുന്ന് കുരിശുമല അടിവാരത്തിൽ നിന്ന് ഉറുകുന്ന് ജംഗ്ഷൻ വഴി പള്ളിയിലേക്ക്. 14ന് രാവിലെ 10ന് ജപമാല, കുരിശിന്‍റെ നൊവേന, ദിവ്യബലി- ഫാ. ആന്‍റണി ഓരത്തേൽ കെഎഫ്. വചനപ്രഘോഷണം- ഫാ. ഹെൻസിലിൻ ഒ സിഡി. 21ന് രാവിലെ എട്ടിനു ദിവ്യബലി ഫാ. റോയ് ഓലിക്കൽ കെഎഫ്. തുടർന്നു സകല മരിച്ചവർക്കുവേണ്ടിയുള്ള പ്രാർഥനയും ഉണ്ടായിരിക്കുമെന്ന് വികാരി ഫാ.റോയ് ഓലിക്കൽ, സിസ്റ്റർ റെനി അലക്സ്‌ എച്ച്സി , സെക്രട്ടറി ജോസഫ് പാറവിള, കോർഡിനേറ്റർ ജെസ്ട്രസ്, ട്രസ്റ്റി മോസസ് സെബാസ്റ്റ്യൻ തുടങ്ങിയവർ അറിയിച്ചു.

പരാതി നൽകി പരിസരവാസി തളർന്നു : മാലിന്യ സംസ്കരണത്തിന് സംവിധാനമില്ലാതെ കന്നുകാലി വളർത്തൽ

കൽപ്പറ്റ: മാലിന്യ സംസ്കരണത്തിന് ശാസ്ത്രീയ സംവിധാനം ഒരുക്കാതെയുള്ള കന്നുകാലി വളർത്തൽ പരിസരവാസികൾക്ക് വിനയായി. വൈത്തിരി പഞ്ചായത്തിലെ ചുണ്ടവയലിൽ സ്വകാര്യ വ്യക്തി നടത്തുന്ന പോത്ത്-പശു വളർത്തലാണ് അയൽവാസികളെ പ്രയാസത്തിലാക്കുന്നത്. ആറ് സെന്‍റ് കൈവശഭൂമിയിൽ 900 ചതുരശ്ര അടി വിസ്തീർണമുള്ള വീട് കഴിച്ചുള്ള ഭാഗത്ത് നിർമിച്ച തൊഴുത്തിലാണ് സ്വകാര്യ വ്യക്തി 11 പോത്തിനെയും രണ്ട് പശുവിനെയും വളർത്തുന്നത്. തൊഴുത്തിൽനിന്നു അഴുക്കുവെള്ളം പുറത്തേക്കാണ് ഒഴുക്കുന്നത്. ഇതുമൂലം അയൽവാസികൾ വലിയ പ്രയാസമാണ് അനുഭവിക്കുന്നതെന്നു ചുണ്ടവയൽ അച്ചാണി റഫീഖ് പറഞ്ഞു. റഫീഖിന്‍റെ വീടിന്‍റെ അടുക്കളവശത്ത് മതിലിനോട് ചേർന്നാണ് തൊഴുത്ത്. ഇതിൽനിന്നു കടുത്ത ദുർഗന്ധമാണ് വമിക്കുന്നത്. തുടർച്ചയായി മഴ പെയ്താൽ വെള്ളക്കെട്ട് രൂപപ്പെടുന്ന പ്രദേശമാണ് ചുണ്ടവയൽ. ആറ് വർഷം മുന്പാണ് സ്വകാര്യവ്യക്തി പോത്ത്-പശു കൃഷി ആരംഭിച്ചത്. അശാസ്ത്രീയ കന്നുകാലി വളർത്തൽ മൂലം സമീപവാസികൾക്കുണ്ടാകുന്ന ബുദ്ധിമുട്ടുകൾ ചൂണ്ടിക്കാട്ടി പഞ്ചായത്തിലും പോലീസിലും ശുചിത്വമിഷനിലും മലിനീകരണ നിയന്ത്രണ ബോർഡിലും റഫീഖ് പരാതി നൽകിയിരുന്നു. പ്രശ്നപരിഹാരത്തിന് നടപടി ആവശ്യപ്പെട്ട് ജില്ലാ കളക്ടർ, ഹെൽത്ത് ഇൻസ്പെക്ടർ എന്നിവരെയും സമീപിച്ചു. എന്നാൽ ഉദ്യോഗസ്ഥരിൽ ചിലർ സ്ഥലപരിശോധന നടത്തിയതല്ലാതെ നടപടി ഉണ്ടാകുന്നില്ല. സ്വകാര്യവ്യക്തിയുടെ ഉപജീവനമാർഗം തടസപ്പെടുത്തുന്നതിനല്ല, നിവൃത്തികേടുമൂലമാണ് പരാതികൾ നൽകിയെന്ന് റഫീഖ് പറഞ്ഞു. ദുർഗന്ധം മൂലം ബന്ധുക്കൾ വീട്ടിൽ വരാൻ മടിക്കുകയാണ്. മാലിന്യ സംസ്കരണത്തിന് പ്ലാന്‍റ് നിർമിച്ചാൽ തീരുന്നതാണ് പ്രശ്നം. അതിന് അധികൃതരുടെ അടിയന്തര ഇടപെടൽ ഉണ്ടാകണം. നേരിട്ട് പരാതി പറയുന്പോൾ സ്ഥലംവിറ്റ് പൊയ്ക്കൊള്ളാനാണ് സ്വകാര്യ വ്യക്തി ധാർഷ്ട്യസ്വരത്തിൽ ഉപദേശിക്കുന്നതെന്നും റഫീഖ് പറഞ്ഞു.

എൻഎഫ്പിഒ ഓണാഘോഷവും കുടുംബസംഗമവും നാളെ

കൽപ്പറ്റ: നാഷണൽ ഫാർമേഴ്സ് പ്രൊഡ്യുസേഴ്സ് ഓർഗനൈസേഷൻ(എൻഎഫ്പിഒ) മൂന്നാമത് കുടുംബ സംഗമവും ഓണാഘോഷവും നാളെ രാവിലെ എട്ട് മുതൽ വൈകുന്നേരം 5.30 വരെ മീനങ്ങാടി സെന്‍റ് പീറ്റേഴ്സ് ആൻഡ് സെന്‍റ് പോൾസ് ഹൈസ്കൂളിൽ നടത്തും. ഓർഗനൈസേഷൻ ചെയർമാൻ ഫിലിപ്പ് ജോർജ്, ചീഫ് ഓർഗനൈസർ തോമസ് മിറർ, ആഘോഷ കമ്മിറ്റി ചെയർമാൻ ഷിബു കാര്യന്പാടി, കണ്‍വീനർ ബിജു പൗലോസ്, ട്രഷറർ സിന്േ‍റാ ജോർജ്, മറ്റു ഭാരവാഹികളായ സജി ചാക്കോ, പി.കെ. ഷൈജു, വി.എസ്. സന്തോഷ് എന്നിവർ വാർത്താസമ്മേളനത്തിൽ അറിയിച്ചതാണ് വിവരം. രാവിലെ എട്ടിന് പൂക്കളം നടക്കും. 10ന് സോഷ്യൽ മീഡിയ താരങ്ങളായ ജാനു എടത്തിയും കേളപ്പേട്ടനും ഓണാഘോഷം ഉദ്ഘാടനം ചെയ്യും. മീനങ്ങാടി ടൗണിൽ പുലികളി, കൈകൊട്ടിക്കളി, ശിങ്കാരിമേളം എന്നിവയുടെ അകന്പടിയോടെ നടത്തുന്ന ഘോഷയാത്ര, കലാകായിക മത്സരങ്ങൾ, കലാപരിപാടികൾ, വിവിധ മേഖലകളിൽ മികവ് തെളിയിച്ച എൻഎഫ്പിഒ കുടുംബാംഗങ്ങളെ ആദരിക്കൽ, ഓണസദ്യ തുടങ്ങിയ ആഘോഷത്തിന്‍റെ ഭാഗമാണ്. ഓണസമ്മാന കൂപ്പണ്‍ നറുക്കെടുപ്പിൽ ഒന്നു മുതൽ മൂന്നു വരെ സ്ഥാനം നേടുന്നവർക്ക് യഥാക്രമം 30,000 ഉം 15,000 ഉം 10,000 ഉം രൂപ സമ്മാനം നൽകും. ആഘോഷത്തിൽ ആദ്യവസാനം പങ്കെടുക്കുന്നതിൽനിന്നു തെരഞ്ഞെടുക്കുന്ന മൂന്നു ദന്പതികൾക്ക് 5,000 രൂപ വീതം ഗിഫ്റ്റ് വൗച്ചർ നൽകും. തെരഞ്ഞെടുക്കുന്ന 10 കർഷകർക്ക് യുണൈറ്റഡ് ഇന്ത്യ ഇൻഷ്വറൻസ് കന്പനിയുടെ പോളിസി നൽകും. ഓരോ കർഷകനും 10 ലക്ഷം രൂപയുടെ കവറേജ് ലഭിക്കും. കേരളം, കർണാടക, ഗോവ, തമിഴ്നാട്, ഛത്തീസ്ഗഡ് സംസ്ഥാനങ്ങളിൽ ഭൂമി പാട്ടത്തിനെടുത്തും അല്ലാതെയും കൃഷി നടത്തുന്ന മലയാളി കർഷകരുടെ കൂട്ടായ്മയാണ് എൻഎഫ്പിഒ. 1,200 കർഷകർ സംഘടനയിൽ അംഗങ്ങളാണ്. കൃഷിക്കാരെ ചൂഷണങ്ങളിൽനിന്നു രക്ഷിക്കുകയെന്ന ലക്ഷ്യത്തോടെ രൂപീകരിച്ചതാണ് ഓർഗനൈസേഷൻ. ഇതിനു കീഴിൽ കർണാടകയിലെ നഞ്ചൻഗോഡിൽ ജൈവവള ഉത്പാദന ഫാക്ടറി പ്രവർത്തിക്കുന്നുണ്ട്. കൃഷിക്കാവശ്യമായ സാമഗ്രികൾ കർഷകർക്ക് ന്യായവിലയ്ക്ക് ലഭ്യമാക്കുന്നതിന് നഞ്ചൻഗോഡിലും ഹാൻഡ് പോസ്റ്റിലും ഒൗട്ട്ലെറ്റുകൾ തുറന്നിട്ടുണ്ട്. മരണപ്പെടുന്ന അംഗത്തിന്‍റെ കുടുംബത്തിന് അഞ്ച് ലക്ഷം രൂപ സഹായം ലഭ്യമാക്കുന്ന കിസാൻരത്ന ഉൾപ്പെടെ ക്ഷേമ പദ്ധതികൾ സംഘടന നടപ്പാക്കിയിട്ടുണ്ട്.

ഗ്രന്ഥാലോകം കാന്പയിൻ

വാഴവറ്റ: പാക്കം വീനസ് ഗ്രന്ഥശാലയുടെ ഗ്രന്ഥാലോകം കാന്പയിൻ കാരാപ്പുഴയിൽ വൈത്തിരി താലൂക്ക് ലൈബ്രറി കൗണ്‍സിൽ സെക്രട്ടറി സി.എം. സുമേഷ് ഉദ്ഘാടനം ചെയ്തു. മുട്ടിൽ പഞ്ചായത്ത് സമിതി ചെയർമാൻ എസ്.എസ്. സജീഷ്കുമാർ അധ്യക്ഷത വഹിച്ചു. വീനസ് ഗ്രന്ഥശാല സെക്രട്ടറി റോയി ചാക്കോ, ലൈബ്രേറിയൻ കെ.വൈ. ത്രേസ്യ, കെ.വി. വിജു, പി.എം. സെബാസ്റ്റ്യൻ, വി.വി. രാഘവൻ, എസ്. നന്പി, ഷീബ സജീവ്, ഷീജ സിബി, സബീന എന്നിവർ പ്രസംഗിച്ചു. കേരള സ്റ്റേറ്റ് ലൈബ്രറി കൗണ്‍സിലിന്‍റെ മുഖമാസികയാണ് ഗ്രന്ഥാലോകം.

വോട്ടർ പട്ടിക കുറ്റമറ്റതാക്കണം: എൻ.ഡി. അപ്പച്ചൻ

കൽപ്പറ്റ: തദ്ദേശ തെരഞ്ഞെടുപ്പിനുള്ള വോട്ടർ പട്ടിക കുറ്റമറ്റതാക്കണമെന്ന് ഡിസിസി പ്രസിഡന്‍റ് എൻ.ഡി. അപ്പച്ചൻ ആവശ്യപ്പെട്ടു. സ്ഥലത്തില്ലാത്തവരെയും മരിച്ചവരെയും പട്ടികയിൽനിന്നു നീക്കുന്നതിന് അതതു സ്ഥലങ്ങളിലെ കോണ്‍ഗ്രസ് പ്രവർത്തകർ പഞ്ചായത്ത് സെക്രട്ടറിമാർക്ക് യഥാസമയം അപേക്ഷ നൽകിയിരുന്നു. എന്നാൽ ഇവരെ നീക്കം ചെയ്യാതെയാണ് അന്തിമ പട്ടിക പ്രസിദ്ധപ്പെടുത്തിയത്. ഇത് കള്ളവോട്ടിനു സാഹചര്യം സൃഷ്ടിക്കും. പട്ടിക കുറ്റമറ്റതാക്കുന്നതിന് നടപടി തേടി ജില്ലാ കളക്ടർക്ക് അപേക്ഷ നൽകിയതായി അപ്പച്ചൻ പറഞ്ഞു.

കുറ്റക്കാർക്കെതിരെ നടപടി വേണം: കത്തോലിക്കാ കോണ്‍ഗ്രസ്

പുൽപ്പള്ളി: പെരിക്കല്ലൂർ കാനാട്ടുമലയിൽ തങ്കച്ചന്‍റെ വീടിനോട് ചേർന്ന പോർച്ചിൽ കാറിനടിയിൽ നിന്നും കർണാടക നിർമിത മദ്യവും സ്ഫോടകവസ്തുക്കളും കണ്ടെടുത്തത് കേവലം ഫോണ്‍ കോളിന്‍റെ അടിസ്ഥാനത്തിൽ മാത്രമാണ്. പുൽപ്പള്ളി പോലീസ് അറസ്റ്റ് ചെയ്ത തങ്കച്ചനെ വൈത്തിരി സബ് ജയിലിൽ റിമാൻഡ് ചെയ്യുകയും ചെയ്യാത്ത കുറ്റത്തിന് 17 ദിവസം ജയിൽവാസം അനുഭവിക്കേണ്ടി വന്നതും പോലീസിന്‍റെ ഗൗരവതരമായ അനാസ്ഥയുടെ ഫലമാണന്ന് കത്തോലിക്കാ കോണ്‍ഗ്രസ് മുള്ളൻകൊല്ലി ഫൊറോന കമ്മിറ്റി കുറ്റപ്പെടുത്തി. പ്രദേശവാസികളുടെയും നാട്ടുകാരുടെയും മൊഴികൾ വിശ്വസ്തതയിൽ എടുക്കാതെ യഥാർത്ഥ പ്രതിയെ കണ്ടെത്തുന്നതിനു പകരം കിട്ടിയ പ്രതിയെ പിടിക്കുന്ന പോലീസിന്‍റെ നയം ആ കുടുംബത്തിനുണ്ടാക്കിയ മാനഹാനിയും വേദനയും വലുതാണ്. തുടരന്വേഷണത്തിൽ പുത്തൻവീട്ടിൽ പ്രസാദിനെ അറസ്റ്റ് ചെയ്തതിലൂടെ തൽക്കാലം പോലീസിന് ആശ്വസിക്കാം. ഇതിനു പിറകിൽ പ്രവർത്തിച്ച മുഴുവൻ കുറ്റക്കാരെയും എത്രയും പെട്ടെന്ന് പോലീസ് കണ്ടെത്തി ശിക്ഷ ഉറപ്പാക്കണമെന്നും രാഷ്ട്രീയ പകപോക്കലുകളിൽ കേട്ട് കേൾവിയില്ലാത്ത ഇത്തരം പ്രവർത്തികൾ രാഷ്ട്രീയ നേതൃത്വം കർശനമായി ഇടപ്പെട്ട് ഇല്ലായ്മ ചെയ്യണം. കാനാട്ടുമല തങ്കച്ചനും കുടുംബത്തിനും കത്തോലിക്കാ കോണ്‍ഗ്രസ് മുള്ളൻകൊല്ലി ഫൊറോനയുടെ പിന്തുണയുണ്ടാകുമെന്നും എകെസിസി ഫൊറോനകമ്മിറ്റി അറിയിച്ചു. ജോണ്‍സണ്‍ തൊഴുത്തിങ്കൽ യോഗം ഉദ്ഘാടനം ചെയ്തു. സുനിൽ പാലമറ്റം അധ്യക്ഷത വഹിച്ചു. ബീന ജോസ് കരുമാംക്കുന്നേൽ, ജോർജ് കൊല്ലിയിൽ, ജോസ് പള്ളത്ത്, കെ.എൽ. ജോണി, ജോർജ് കച്ചിറമറ്റം, ഷിനോയി, ടോമി, ജിനു, സവിജു തുടങ്ങിയവർ പ്രസംഗിച്ചു.

മെത്രാഭിഷേകത്തിന്‍റെ മൂന്നാംവാർഷികം ആഘോഷിച്ചു

കോറോം: മലബാർ ഭദ്രാസനാധിപൻ ഡോ. ഗീവർഗീസ് മാർ സ്തേഫാനോസ് മെത്രാപ്പോലീത്തയുടെ മെത്രാഭിഷേകത്തിന്‍റെ മൂന്നാംവാർഷികം ആഘോഷിച്ചു. കോറോം സെന്‍റ് മേരീസ് യാക്കോബായ സുറിയാനി സൂനോറോ പള്ളിയുടെ പ്ലാറ്റിനം ജൂബിലിയുടെ സമാപനസമ്മേളന ചടങ്ങിൽ ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ജുനൈദ് കൈപ്പാണി മെത്രാപ്പോലീത്തയ്ക്ക് കേക്ക് നൽകി. ജില്ലാ പഞ്ചായത്ത് അംഗം കെ. വിജയൻ, മലബാർ ഭദ്രാസന വൈദിക സെക്രട്ടറി ഫാ. മത്തായിക്കുഞ്ഞ് ചാത്തനാട്ടുകുടി, തൊണ്ടർനാട് പഞ്ചായത്ത് അംഗം കെ.ജെ. ഏലിയാമ്മ, വികാരി ഫാ. എൽദോ കൂരൻതാഴത്തുപറന്പിൽ, ട്രസ്റ്റി ബൈജു തൊണ്ടുങ്ങൽ സഭാമാനേജിംഗ് കമ്മിറ്റി അംഗം കെ.എം. ഷിനോജ്, പള്ളി സെക്രട്ടറി അഖിൽ ഏലിയാസ്, പെരുന്നാൾ ജനറൽ കണ്‍വീനർ ജിജോ വള്ളിക്കാട്ടിൽ, ഫാ. സിനു ചാക്കോ തുടങ്ങിയവർ സന്നിഹിതരായിരുന്നു.

കള്ളക്കേസ്; പോലീസിനെതിരെ നടപടി സ്വീകരിക്കണമെന്ന് കോണ്‍ഗ്രസ് നേതാക്കൾ

പുൽപ്പള്ളി: നിരപരാധിയെന്ന് പോലീസ് സമ്മതിച്ച കാനാട്ടുമല തങ്കച്ചനെ കേസിൽപ്പെടുത്തി ജയിലിലടച്ച് ഗുരുതരമായ മനുഷ്യാവകാശ ലംഘനം നടത്തിയ പോലീസ് ഉദ്യോഗസ്ഥരെ സേനയിൽ നിന്ന് പിരിച്ചുവിടണമെന്ന് കോണ്‍ഗ്രസ് നേതാക്കൾ വാർത്താസമ്മേളനത്തിൽ ആവശ്യപ്പെട്ടു. തങ്കച്ചനെ കള്ളക്കേസിൽ കുടുക്കിയ പോലീസ് ഉദ്യോഗസ്ഥരെ സംരക്ഷിക്കുന്ന നിലപാടിൽനിന്നും സിപിഎം പിൻമാറണം. പോലീസിന് പറ്റിയ ഗുരുതരമായ പിഴവിന്‍റെ ജാള്യതമറയ്ക്കാൻ കോണ്‍ഗ്രസിനെ അപമാനിച്ച് രക്ഷപെടാനുള്ള ഹീനശ്രമമാണ് സിപിഎം നടത്തുന്നത്. രാഷ്ട്രീയ എതിരാളികളെ കള്ളക്കേസിൽകുടുക്കി ജയിലിലടയ്ക്കുന്നത് സിപിഎം പിന്തുടരുന്ന നയത്തിന്‍റെ ഭാഗമാണ്. സമാനമായ സംഭവങ്ങൾ മേഖലയിൽ ഇതിന് മുൻപും ഉണ്ടായിട്ടുണ്ട്. ഒരേസമയം വേട്ടക്കാരോടൊപ്പം വേട്ടയാടുകയും ഇരയോടൊപ്പം ഓടുകയും ചെയ്യുന്നത് അപഹാസ്യമാണ്. സിപിഎമ്മിന് അൽപമെങ്കിലും ആത്മാർഥതയുണ്ടെങ്കിൽ നിരപരാധിയെ ജയിലിലടച്ച ഗുരുതര മനുഷ്യാവകാശ ലംഘനം നടത്തിയ മുഴുവൻ പോലീസ് ഉദ്യോഗസ്ഥരേയും സേനയിൽനിന്ന് പിരിച്ചുവിടാൻ ആഭ്യന്തര വകുപ്പ് കൈയ്യാളുന്ന മുഖ്യമന്ത്രിയോട് ആവശ്യപ്പെടാൻ സിപിഎം തയാറാകണം. പോലീസിന് സംഭവിച്ച നാണക്കേടിൽനിന്നും മുഖംരക്ഷിക്കാൻ ഭരണകക്ഷിയും പോലീസും ചേർന്ന് തിരക്കഥ മെനയുകയാണ്. കോണ്‍ഗ്രസിൽ അഭിപ്രായവ്യത്യാസങ്ങളുണ്ടെന്ന് വരുത്തിതീർക്കാൻ ഗൂഡാലോചന നടത്തുകയാണെന്നും സിപിഎമ്മിന്‍റെ അജണ്ഡ നടപ്പാക്കുന്നതിന് വേണ്ടി കോണ്‍ഗ്രസ് നേതാക്കളേയും പ്രവർത്തകരേയും സംശയത്തിന്‍റെ നിഴലിൽനിർത്താനാണ് പോലീസ് ശ്രമിക്കുന്നത്. ഇത്തരം നടപടികൾ തുടർന്നാൽ ശക്തമായ പ്രക്ഷഭങ്ങൾ പോലീസ് നേരിടേണ്ടിവരുമെന്നും നേതാക്കൾ പറഞ്ഞു. പാർട്ടി വിരുദ്ധർക്കൊപ്പം ചേർന്ന് കോണ്‍ഗ്രസിനെ തകർക്കാൻ ശ്രമിക്കുന്ന നിലപാടുമായി മുന്നോട്ടുപോയാൽ തങ്കച്ചനെ പാർട്ടിയിൽനിന്ന് പുറത്താക്കാൻ ആവശ്യപ്പെടുമെന്നും നേതാക്കൾ പറഞ്ഞു. കർഷക കോണ്‍ഗ്രസ് സംസ്ഥാന ജനറൽ സെക്രട്ടറി വി.ടി. തോമസ്, മണ്ഡലം വൈസ് പ്രസിഡന്‍റ് ജോസ് കണ്ടംതുരുത്തി, മണ്ഡലം ട്രഷറർ മനോജ് കടുപ്പിൽ, സുനിൽ പഴപ്ലാത്ത് തുടങ്ങിയവർ വാർത്താസമ്മേളനത്തിൽ പങ്കെടുത്തു.

യുഡിഎഫ് ജാഥ നടത്തി

മക്കിയാട്: തൊണ്ടർനാട് പഞ്ചായത്ത് യുഡിഎഫ് കമ്മിറ്റിയുടെ നേതൃത്വത്തിൽ കുറ്റവിചാരണ വാഹന പ്രചാരണ ജാഥ നടത്തി. കൊള്ളയടിച്ച തുക തിരിച്ച് അടപ്പിക്കുക, തട്ടിപ്പിൽ പങ്കാളികളായ പ്രസിഡന്‍റ്, വൈസ് പ്രസിഡന്‍റ്, അഴിമതി കാലയളവിലെ ഉദ്യോഗസ്ഥർ എന്നിവരെ പ്രതി ചേർത്ത് കേസ് എടുക്കുക, അഴിമതി കാലയളവിലെ ഉദ്യോഗസ്ഥരെ സസ്പെൻഡ് ചെയ്തു അന്വേഷണം നടത്തുക, അഴിമതി നടത്തിയ സിപിഎം ഭരണസമിതി രാജിവെക്കുക തുടങ്ങിയ ആവശ്യങ്ങളാണ് കുറ്റവിചാരണ വാഹനജാഥയിൽ ഉന്നയിച്ചത്. കുഞ്ഞോത്ത് നിന്നും ആരംഭിച്ച കുറ്റവിചാരണ വാഹനജാഥ ഡിസിസി ജനറൽ സെക്രട്ടറി എം.ജി. ബിജു ഉദ്ഘാടനം ചെയ്തു. ജാഥാ ക്യാപ്റ്റൻ എസ്.എം. പ്രമോദ് അധ്യക്ഷത വഹിച്ചു. വൈസ് ക്യാപ്റ്റൻ കേളോത്ത് അബ്ദുള്ള, ചീഫ് കോഓർഡിനേറ്റർ ടി. മൊയ്തു, ജാഥ ഡയറക്ടർമാരായ ഡോ.പി.കെ. സുനിൽ, ആറങ്ങാടൻ ആലിക്കുട്ടി, പഞ്ചായത്തംഗം പ്രീത രാമൻ, ടോമി മക്കിയാട്, ജിജി ജോണി എന്നിവർ പ്രസംഗിച്ചു. കുറ്റ വിചാരണ ജാഥ പൊറോളം, കരിന്പിൽ, പാലേരി, നീലോം, ഞാറലോട്, വഞ്ഞോട്, വളവിൽ, പുതുശേരി, ഇണ്ടിയേരിക്കുന്ന്, തേറ്റമല, വെള്ളിലാടി, പൂവരിഞ്ഞി, കാഞ്ഞിരങ്ങാട്, മക്കിയാട്, ചീപ്പാട്, കോറോം എന്നിവിടങ്ങളിലെ പര്യടനത്തിനു ശേഷം നിരവിൽ പുഴയിൽ സമാപിച്ചു. സമാപനയോഗം നാസർ തരുവണ ഉദ്ഘാടനം ചെയ്തു.

ഏച്ചോം സർവോദയ ഹയർ സെക്കൻഡറി സ്കൂൾ പ്ലാറ്റിനം ജൂബിലി

കൽപ്പറ്റ: ഏച്ചോം ഹയർ സെക്കൻഡറി സ്കൂളിന്‍റെ ഒരു വർഷം നീളുന്ന പ്ലാറ്റിനം ജൂബിലി ആഘോഷത്തിന് 15ന് തുടക്കമാകും. രാവിലെ 10.30ന് പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു ഉദ്ഘാടനം ചെയ്യും. സ്കൂൾ മാനേജർ ഫാ.ജേക്കബ് കുമ്മിണിയിൽ അധ്യക്ഷത വഹിക്കും. ജെസ്യൂട്ട് പ്രൊവിൻഷ്യൽ ഫാ.ഹെൻട്രി പട്ടരുമഠത്തിൽ മുഖ്യപ്രഭാഷണം നടത്തും. ലോഗോ പ്രകാശനം പനമരം പഞ്ചായത്ത് പ്രസിഡൻ് ലക്ഷ്മി ആലക്കമിറ്റം നിർവഹിക്കും. സ്കൂൾ പാലിയേറ്റീവ് ഗ്രൂപ്പ് പ്രവർത്തനോദ്ഘാടനം, പിന്നാക്ക വിഭാഗങ്ങളിലെ എൽപി വിദ്യാർഥികൾക്ക് പഠന പിന്തുണയ്ക്ക് ’ചിറക്’ എന്ന പേരിൽ തയാറാക്കിയ കൈപ്പുസ്തകം പ്രകാശനം എന്നിവ നടത്തും. ജില്ലാ പഞ്ചായത്ത് ഡിവിഷൻ അംഗം കെ.ബി. നസീമ, പനമരം ബ്ലോക്ക് പഞ്ചായത്ത് വൈസ് പ്രസിഡന്‍റ് അബ്ദുൾ ഗഫൂർ കാട്ടി, വാർഡ് മെംബർ എം.കെ. രാമചന്ദ്രൻ, ജില്ലാ വിദ്യാഭ്യാസ ഉപ ഡയറക്ടർ വി.എ. ശശീന്ദ്രവ്യാസ്, ജില്ലാ വിദ്യാഭ്യാസ ഓഫീസർ സി.വി. മൻമോഹൻ, സ്കൂൾ ഡയറക്ടർ ഫാ.ബിജു ജോർജ്, പ്രിൻസിപ്പൽ സിസ്റ്റർ ബീന ഒ തുടങ്ങിയവർ പ്രസംഗിക്കും. അക്കാദമിക, നിർമാണ, സമൂഹികക്ഷേമ പ്രവർത്തനങ്ങൾ, ഗോത്രവിദ്യാർഥികളുടെ മികവ് പരിപോഷണം, ഭവന നിർമാണം, സാന്ത്വന പരിചരണം, സാഹിത്യ സംഗമങ്ങൾ, പൂർവ അധ്യാപക-വിദ്യാർഥി സംഗമം, ഇന്‍റർ സ്കൂൾ പരിപാടികൾ, കായിക മത്സരങ്ങൾ എന്നിവ ആഘോഷത്തിന്‍റെ ഭാഗമായി നടത്തുമെന്ന് മാനേജർ ഫാ.ജേക്കബ് കുമ്മിണിയിൽ, ഹെഡ്മിസ്ട്രസ് സിസ്റ്റർ ജസി പോൾ, പിടിഎ പ്രസിഡന്‍റ് എ.ഇ. ഗിരീഷ്, എസ്എംസി ചെയർമാൻ ഷിജു മരുതനാനിയിൽ, ആഘോഷ കമ്മിറ്റി ചെയർമാൻ വി.ഡി. തോമസ് എന്നിവർ വാർത്താസമ്മേളനത്തിൽ അറിയിച്ചു. ഗാന്ധിയൻ എൻ.കെ. കുഞ്ഞിക്കൃഷ്ണൻ നായരുടെ നേതൃത്വത്തിൽ 1951ൽ പ്രവർത്തനം തുടങ്ങിയതാണ് വിദ്യാലയം. സർവോദയ പ്രസ്ഥാനം നേതാവ് എം.പി. മൻമഥനാണ് സർവോദയ എന്ന പേര് നിർദേശിച്ചത്. 1960ൽ യുപിയായും 1982ൽ എച്ച്എസ് ആയും 2010ൽ ഹയർ സെക്കൻഡറിയായും ഉയർത്തി. നിലവിൽ 12 വരെ ക്ലാസുകളിൽ 1,500 ഓളം പഠിതാക്കളുണ്ട്. 1990ലാണ് ജെസ്യൂട്ട് എഡ്യുക്കേഷണൽ ആൻഡ് ചാരിറ്റബിൾ സൊസൈറ്റി ഓഫ് വയനാട് വിദ്യാലയം ഏറ്റെടുത്തത്. ഗോത്രവിഭാഗക്കാരുടെ വിദ്യാഭ്യാസ-സാമൂഹിക പുരോഗതി വിദ്യാലയത്തിന്‍റെ മുഖ്യലക്ഷ്യമാണെന്നും മാനേജർ പറഞ്ഞു.

ശുചീകരണത്തൊഴിലാളികൾക്കു കൂട്ടായി തെരുവുനായകൾ

സുൽത്താൻ ബത്തേരി: നഗരത്തിലെ ശുചീകരണത്തൊഴിലാളികളുടെ സംരക്ഷകരായി തെരുവുനായകൾ. സംസ്ഥാനത്തിന്‍റെ വിവിധ ഭാഗങ്ങളിൽ തെരുവുനായ ശല്യം കാരണം ജനം പൊറുതിമുട്ടുന്പോഴാണ് ശുചിത്വത്തിനു പേരുകേട്ട ബത്തേരിയിൽ ഈ വേറിട്ട കാഴ്ച. ദിവസവും പുലർച്ചെ രണ്ട് മുതലാണ് ടൗണിൽ ശൂചീകരണം. സംഘങ്ങളായാണ് തൊഴിലാളികൾ നഗരശുചീകരണത്തിന് ഇറങ്ങുന്നത്. ഓരോ തൊഴിലാളി സംഘത്തിനുമൊപ്പം ജോലി കഴിയുന്നതുവരെ തെരുവുനായകളുടെ കൂട്ടം ഉണ്ടാകും. ശുചീകരണം നടത്തുന്ന തൊഴിലാളികൾക്ക് അരികിലേക്കു ആരെങ്കിലും എത്തിയാൽ നായകൾ കുരച്ചുചാടി വിരട്ടി പായിക്കും. തെരുവുനായകൾ ഒപ്പമുള്ളതിനാൽ ഭയമില്ലാതെ ജോലി ചെയ്യാൻ കഴിയുന്നുണ്ടെന്ന് ശുചീകരണത്തൊഴിലാളികൾ പറയുന്നു. ചില രാത്രികളിൽ ആനയും പുലിയും പന്നിയും ഉൾപ്പെടെ വന്യമൃഗങ്ങൾ ഇറങ്ങുന്ന നഗരമാണ് ബത്തേരി. വന്യമൃഗങ്ങളുടെ സാന്നിധ്യം മനസിലാക്കിയാലുടൻ നായകൾ കുരച്ച് മുന്നറിയിപ്പ് നൽകുന്നത് തൊഴിലാളികൾക്ക് സഹായകമാകുന്നുണ്ട്. ശുചീകരണത്തിന്‍റെ ഭാഗമായി തൊഴിലാളികൾ അടിച്ചുകൂട്ടൂന്ന മാലിന്യത്തിൽ ബിസ്കറ്റ് കഷണങ്ങളടക്കം ഭക്ഷ്യയോഗ്യമായ സാധനങ്ങളും കാണും. ഇത് ആഹരിക്കുന്നതിനാണ് നായകൾ ഒപ്പം കൂടുന്നതെന്ന് തൊഴിലാളികൾ പറയുന്നു.

ജില്ലയിലെ പട്ടികവർഗ വിദ്യാർഥികളുടെ കൊഴിഞ്ഞുപോക്ക് തടയാൻ പദ്ധതി

വിദ്യാഭ്യാസ വകുപ്പ് പരിശീലന ശിൽപശാല സംഘടിപ്പിച്ചു കൽപ്പറ്റ: ജില്ലയിൽ ഹയർസെക്കൻഡറി വൊക്കേഷണൽ ഹയർസെക്കൻഡി വിഭാഗങ്ങളിലെ പട്ടികവർഗ വിദ്യാർഥികളുടെ കൊഴിഞ്ഞുപോക്ക് തടഞ്ഞ് സമഗ്ര പുരോഗതി ലക്ഷ്യമിടാൻ ടാലന്‍റ് നർച്ചർ (ട്രാൻസ്ഫോമിംഗ് പൊട്ടെൻഷ്യൽ ഇൻടു എക്സലൻസ്) പദ്ധതിയുമായി വിദ്യാഭ്യാസ വകുപ്പ്. വിദ്യാർഥികൾക്ക് പാഠ്യവിഷയങ്ങളിൽ ആത്മവിശ്വാസത്തോടെ പഠനം നടത്താൻ പിന്തുണ, കഴിവുകൾ പരിപോഷിപ്പിക്കാൻ അവസരം ഒരുക്കൽ, ജീവിത നൈപുണികളിൽ പരിശീലനം ഉറപ്പാക്കൽ ലക്ഷ്യമാക്കി ഹയർസെക്കൻഡറി വിഭാഗത്തിലെ പട്ടികവർഗ വിദ്യാർഥികളുടെ കൊഴിഞ്ഞുപോക്ക് തടയുകയാണ് ടാലന്‍റ് നർച്ചർ പദ്ധതിയിലൂടെ. പൊതുവിദ്യാഭ്യാസ വകുപ്പിന്‍റെ ഹയർസെക്കൻഡറി വിഭാഗം പട്ടികവർഗ വകുപ്പിന്‍റെ സഹകരണത്തോടെയാണ് പ്രവർത്തനങ്ങൾക്ക് നേതൃത്വം നൽകുന്നത്. അക്കാദമിക പ്രവർത്തനങ്ങളുടെ ചുമതല ഹയർസെക്കൻഡറി കരിയർ ഗൈഡൻസ് ആൻഡ് അഡോളസെന്‍റ് കൗണ്‍സലിംഗ് സെൽ നിർവഹിക്കും. പദ്ധതിയുടെ ഭാഗമായി ഹയർസെക്കൻഡറി, വൊക്കേഷണൽ ഹയർസെക്കൻഡറി പ്രിൻസിപ്പൽമാർക്കും ടാലന്‍റ് നർച്ചർ ടീച്ചർ കോഓർഡിനേറ്റർമാർക്കുമായി പരിശീലന ശിൽപശാല സംഘടിപ്പിച്ചു. കളക്ടറേറ്റ് ആസൂത്രണഭവൻ എ.പി.ജെ ഹാളിൽ നടന്ന ശിൽപശാല ഹയർസെക്കൻഡറി വിഭാഗം ജില്ലാ കോഓർഡിനേറ്റർ എം.കെ. ഷിവി ഉദ്ഘാടനം ചെയ്തു. പദ്ധതിയുടെ ഭാഗമായി രക്ഷിതാക്കളുടെ പ്രാദേശിക യോഗങ്ങൾ, കുട്ടികൾക്കുള്ള മോട്ടിവേഷൻ ക്ലാസുകൾ, ടാലന്‍റ് പ്രദർശനം, വിവിധ വിഷയങ്ങളിലുള്ള ബ്രിഡ്ജ് കോഴ്സ് എന്നിവ സംഘടിപ്പിക്കും. ബ്രിഡ്ജ് കോഴ്സിന്‍റെ ഭാഗമായി വിദഗ്ധ റിസോഴ്സ്പേഴ്സണ്‍മാരുടെ നേതൃത്വത്തിൽ എല്ലാ വിഷയങ്ങളിലും പ്രത്യേക മൊഡ്യൂളുകൾ തയാറാക്കിയാണ് പദ്ധതി നടപ്പാക്കുന്നത്. പട്ടികവർഗ വിഭാഗത്തിൽ നിന്ന് ഉയർന്നുവന്ന പ്രതിഭകളെയും ഉന്നത വിദ്യാഭ്യാസം നേടിയവരെയും പദ്ധതിയുടെ ഭാഗമായി കണ്ടെത്തും. ഇവരുടെ ജീവിത വിജയ കഥകൾ ഹയർസെക്കൻഡറി വിഭാഗത്തിലെ കുട്ടികളുമായി പങ്കുവയ്ക്കും. നാഷണൽ സർവീസ് സ്കീമിന്‍റെ പിന്തുണയും പദ്ധതി നടത്തിപ്പിനുണ്ടാവും. വിദ്യാകിരണം മിഷൻ കോഓർഡിനേറ്റർ വിൽസണ്‍ തോമസ് അധ്യക്ഷനായ പരിപാടിയിൽ കരിയർ ഗൈഡൻസ് ആൻഡ് അഡോളസെന്‍റ് കൗണ്‍സലിംഗ് സെൽ ജില്ലാ കോഓർഡിനേറ്റർ കെ.ബി. സിമിൽ, മാനന്തവാടി ട്രൈബൽ ഡെവലപ്മെന്‍റ് ഓഫീസർ എം. മജീദ്, മാനന്തവാടി ഗവ. വൊക്കേഷണൽ ഹയർസെക്കൻഡറി സ്കൂൾ പ്രിൻസിപ്പൽ പി.സി. തോമസ്, വിഎച്ച്എസ്ഇ ജില്ലാ കോഓർഡിനേറ്റർമാരായ എൻ.പി. മാർട്ടിൻ, ബിനുമോൾ ജോസ്, എസ്എസ്കെ ജില്ലാ പ്രോജക്ട് ഓഫീസർ കെ. രാജേഷ്, കരിയർ ഗൈഡൻസ് ആൻഡ് അഡോളസെന്‍റ് കൗണ്‍സിലിംഗ് സെൽ കണ്‍വീനർ ജിനീഷ് മാത്യു, ജില്ലാ ജോയിന്‍റ് കോഓർഡിനേറ്റർ മനോജ് ജോണ്‍ എന്നിവർ പ്രസംഗിച്ചു.

കേരള ജനതയെ ആഭ്യന്തര വകുപ്പ് വെല്ലുവിളിക്കുന്നു: എൻ.ഡി. അപ്പച്ചൻ

കൽപ്പറ്റ: പോലീസിനെ കയറൂരിവിട്ട് കേരള ജനതയെ ആഭ്യന്തര വകുപ്പ് വെല്ലുവിളിക്കുകയാണെന്ന് ഡിസിസി പ്രസിഡന്‍റ് എൻ.ഡി. അപ്പച്ചൻ. പോലീസ് രാജിൽ പ്രതിഷേധിച്ച് കോണ്‍ഗ്രസ് കൽപ്പറ്റ, മുട്ടിൽ, വെങ്ങപ്പള്ളി മണ്ഡലം കമ്മിറ്റികളുടെ സംയുക്താഭിമുഖ്യത്തിൽ കൽപ്പറ്റ പോലീസ് സ്റ്റേഷൻ പടിക്കൽ നടത്തിയ ധർണ ഉദ്ഘാടനം ചെയ്യുകയായിരുന്നു അദ്ദേഹം. ചെറുപ്പക്കാരും പ്രായമുള്ളവരും അടക്കം അനുഭവിച്ച പോലീസ് ഭീകരതയുടെ കഥകളാണ് ഓരോ ദിവസവും പുറത്തുവരുന്നത്. കുന്നംകുളം പോലീസ് സ്റ്റേഷനിൽ യൂത്ത് കോണ്‍ഗ്രസ് ചൊവ്വന്നൂർ മണ്ഡലം പ്രസിഡന്‍റ് സുജിത്തിനെ ക്രൂരമായാണ് മർദിച്ചത്. സുജിത്തിനെ തല്ലിച്ചതച്ച മുഴുവൻ പോലീസുകാരെയും സർവീസിൽനിന്നു നീക്കണം. തിരുവനന്തപുരം ജില്ലയിലെ യൂത്ത് കോണ്‍ഗ്രസ് നേതാവ് ജഷീറിനു തിരുവല്ലം സ്റ്റേഷനിൽ തിക്താനുഭവം ഉണ്ടായി. പീച്ചിയിൽ ഹോട്ടൽ ഉടമയെയും മകനെയും തൊഴിലാളികളെയും പോലീസ് മർദിച്ചു. കൊട്ടാരക്കര കുളത്തുപ്പുഴയിൽ തൊഴിലാളി അനിൽകുമാറിനെ സ്റ്റേഷനിലേക്ക് വിളിച്ചിപ്പിച്ച് പീഡിപ്പിച്ചു. പ്ലെയർ ഉപയോഗിച്ച് ഇദ്ദേഹത്തിന്‍റെ പല്ല് പിഴുതു. ഇതെല്ലാം അറിഞ്ഞ് പൊതുസമൂഹം വിറങ്ങലിച്ചു നിൽക്കുകയാണ്. ആഭ്യന്തരവകുപ്പിന്‍റെ ചുമതലയുള്ള മുഖ്യമന്ത്രി ഒന്നും കണ്ടില്ലെന്നു നടിച്ചും ഉരിയാടാതെയും ജനങ്ങളെ അപമാനിക്കുകയാണെന്നും അപ്പച്ചൻ പറഞ്ഞു. കൽപ്പറ്റ മണ്ഡലം പ്രസിഡന്‍റ് ഗിരീഷ് കൽപ്പറ്റ അധ്യക്ഷ വഹിച്ചു. കെപിസിസി അംഗം പി.പി. ആലി, ബ്ലോക്ക് പഞ്ചായത്ത് പ്രസിഡന്‍റ് ചന്ദ്രിക കൃഷ്ണൻ, ജില്ലാ പഞ്ചായത്ത് സ്റ്റാൻഡിംഗ് കമ്മിറ്റി ചെയർപേഴ്സണ്‍ ഉഷ തന്പി, ഡിസിസി ജനറൽ സെക്രട്ടറി ഒ.ആർ. രഘു, സീനിയർ സിറ്റിസണ്‍സ് കോണ്‍ഗ്രസ് ജില്ലാ പ്രസിഡന്‍റ് കെ.വി. പോക്കർ ഹാജി, കോണ്‍ഗ്രസ് മുട്ടിൽ മണ്ഡലം പ്രസിഡന്‍റ് ജോയ് തൊട്ടിത്തറ, വെങ്ങപ്പള്ളി മണ്ഡലം പ്രസിഡന്‍റ് എം.വി. രാജൻ, പെൻഷനേഴ്സ് അസോസിയേഷൻ സംസ്ഥാന സെക്രട്ടേറിയറ്റ് അംഗം വേണുഗോപാൽ കീഴ്ശേരി, യൂത്ത് കോണ്‍ഗ്രസ് നിയോജകമണ്ഡലം പ്രസിഡന്‍റ് ഡിന്‍റോ ജോസ്, എം.ഒ. ദേവസ്യ, ഫൈസൽ പാപ്പിന, കെ.കെ. രാജേന്ദ്രൻ, ശശി പന്നിക്കുഴി, പി.കെ. മുരളി, എസ്. മണി, മോഹൻദാസ് കോട്ടക്കൊല്ലി, സുന്ദർരാജ് എടപ്പെട്ടി, പദ്മനാഭൻ, രവീന്ദ്രൻ മാണ്ടാട്, വന്ദന ഷാജു, സെബാസ്റ്റ്യൻ കൽപ്പറ്റ, നജീബ് പിണങ്ങോട്, കെ. ശശികുമാർ, സുബ്രഹ്മണ്യൻ, ടി. സതീഷ്കുമാർ, രമേശൻ മാണിക്യൻ എന്നിവർ പ്രസംഗിച്ചു. പുൽപ്പള്ളി: സംസ്ഥാനത്തെ പോലീസ് തേർവാഴ്ച ആഭ്യന്തര വകുപ്പിന്‍റെ ചുമതലയുള്ള മുഖ്യമന്ത്രിയുടെ അറിവോടെയാണെന്ന് കെപിസിസി എക്സിക്യുട്ടീവ് കമ്മിറ്റിയംഗം കെ.എൽ. പൗലോസ്. പോലീസ് ഭീകരതയ്ക്കെതിരേ കോണ്‍ഗ്രസ് പുൽപ്പള്ളി, മുള്ളൻകൊല്ലി മണ്ഡലം കമ്മിറ്റികൾ സംയുക്തമായി പോലീസ് സ്റ്റേഷനു മുന്പിൽ സംഘടിപ്പിച്ച പ്രതിഷേധ സദസ് ഉദ്ഘാടനം ചെയ്യുകയായിരുന്നു അദ്ദേഹം. പോലീസിന്‍റെ നരനായാട്ടിനെതിരേ ഏതറ്റം വരെയും പോകാൻ കോണ്‍ഗ്രസ് മടിക്കില്ല. മുള്ളൻകൊല്ലിയിൽ കോണ്‍ഗ്രസ് വാർഡ് പ്രസിഡന്‍റിനെ ചതിയിൽപ്പെടുത്തി ജയിൽ അടച്ച സംഭവത്തിൽ കൃത്യമായ അന്വേഷണം നടത്തണം. യഥാർഥ പ്രതികളെ വെളിച്ചത്തു കൊണ്ടുവരണം. അല്ലാത്തപക്ഷം പോലീസ് സ്റ്റേഷൻ ഉപരോധം അടക്കം സമരത്തിന് കോണ്‍ഗ്രസ് പ്രവർത്തകർ നിർബന്ധിതരാകുമെന്നും പൗലോസ് പറഞ്ഞു. ഡിസിസി ജനറൽ സെക്രട്ടറി എൻ.യു. ഉലഹന്നൻ അധ്യക്ഷ വഹിച്ചു. ഡിസിസി സെക്രട്ടറി ബീന ജോസ്, പുൽപ്പള്ളി സർവീസ് സഹകരണ ബാങ്ക് പ്രസിഡന്‍റ് ശശിധരൻ, ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് വർഗീസ് മുരിയൻകാവിൽ, പുൽപ്പള്ളി പഞ്ചായത്ത് പ്രസിഡന്‍റ് ടി.എസ്. ദിലീപ്കുമാർ, പനമരം ബ്ലോക്ക് പഞ്ചായത്ത് പ്രസിഡന്‍റ് ഗിരിജ കൃഷ്ണൻ, മഹിളാ കോണ്‍ഗ്രസ് ജില്ലാ പ്രസിഡന്‍റ് ജിനി തോമസ്, ജോമറ്റ് കോതവഴിക്കൽ, റെജി പുളിങ്കുന്നേൽ, ശോഭന സുകു, ജോളി നരിതൂക്കിൽ, മണി പാന്പനാൽ, ശ്രീദേവി മുല്ലക്കര, രജനി ചന്ദ്രൻ, രാജു തോണിക്കടവ്, തോമസ് പാഴുക്കാല, ശിവരാമൻ പാറക്കുഴി, കുര്യാച്ചൻ പ്ലാക്കിൽ, ജോർജ് കൊല്ലിയിൽ, സാബു ഫിലിപ്പ്, വർക്കി പാലക്കാട്, ലിജോ ജോർജ് എന്നിവർ പ്രസംഗിച്ചു. കണിയാന്പറ്റ: കന്പളക്കാട് പോലീസ് സ്റ്റേഷന് മുന്പിൽ കണിയാന്പറ്റ, കോട്ടത്തറ മണ്ഡലം കോണ്‍ഗ്രസ് കമ്മിറ്റികൾ സംയുക്തമായി നടത്തിയ പ്രതിഷേധ സദസ് ഡിസിസി സെക്രട്ടറി മോയിൻ കടവൻ ഉദ്ഘാടനം ചെയ്തു. സി. സുരേഷ്ബാബു അധ്യക്ഷത വഹിച്ചു. ഡിസിസി സെക്രട്ടറി നജീബ് കരണി, വൈത്തിരി ബ്ലോക്ക് പ്രസിഡന്‍റ് പോൾസണ്‍ കൂവക്കൽ, മാണി ഫ്രാൻസിസ്, സി.സി. തങ്കച്ചൻ, ശകുന്തള സജീവൻ, സന്ധ്യ ലിഷു, ജസി ലെസ്ലി എന്നിവർ പ്രസംഗിച്ചു. ജോസ് മേട്ടയിൽ, എം.എ. മജീദ്, ടി.ടി. ദേവസ്യ, ഒ.ജെ. മാത്യു, സുരേഷ്ബാബു വാളൽ, മുത്തലിബ് പഞ്ചാര, താരിഖ് കടവൻ, റസാഖ് നെല്ലിയന്പം എന്നിവർ നേതൃത്വം നൽകി. കേണിച്ചിറ: കോണ്‍ഗ്രസ് പൂതാടി, ഇരുളം, വാകേരി മണ്ഡലം കമ്മിറ്റികളുടെ സംയുക്താഭിമുഖ്യത്തിൽ പോലീസ് സ്റ്റേഷനു മുന്പിൽ നടത്തിയ സമരം ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ ഉദ്ഘാടനം ചെയ്തു. സാധാരണക്കാരെയും പൊതുപ്രവർത്തകരെയും പോലീസ് കള്ളക്കേസുകളിൽ കുടുക്കുകയും കസ്റ്റഡിയിലെടുത്ത് ക്രൂരമായി മർദിക്കുകയും ചെയ്യുന്നത് ഭയാനകമായ സ്ഥിതിവിശേഷമാണ് പൊതു മണ്ഡലത്തിൽ ഉളവാക്കിയിരിക്കുന്നതെന്ന് അദ്ദേഹം പറഞ്ഞു. സമീപകാലത്ത് ജില്ലയിൽ പോലീസിനെതിരേ ഉയർന്ന ആരോപണങ്ങളിൽ വിശദാന്വേഷണം ഉണ്ടാകണമെന്ന് അദ്ദേഹം പറഞ്ഞു. കെ.ജി. ബാബു അധ്യക്ഷത വഹിച്ചു. എൻ. പ്രഭാകരൻ, പി.എ. പൗലോസ്, നാരായണൻ നായർ, കെ. ബാലൻ, മേഴ്സി സാബു എന്നിവർ പ്രസംഗിച്ചു. വെള്ളമുണ്ട: കോണ്‍ഗ്രസ് മണ്ഡലം കമ്മിറ്റി പോലീസ് സ്റ്റേഷൻ പടിക്കൽ സംഘടിപ്പിച്ച പ്രതിഷേധ സദസ് ഡിസിസി ജനറൽ സെക്രട്ടറി എം. വേണുഗോപാൽ ഉദ്ഘാടനം ചെയ്തു. മണ്ഡലം പ്രസിഡന്‍റ് ഷാജി ജേക്കബ് അധ്യക്ഷത വഹിച്ചു. ചിന്നമ്മ ജോസ്, പി. ചന്ദ്രൻ, ടി.കെ. മമ്മൂട്ടി, എൻ.കെ. പുഷ്പലത, ഒ.ടി. ഉനൈസ്, ടി.സി. തങ്കച്ചൻ, എം.ജെ. ജിൽസമ്മ, ജോയി പള്ളിപ്പുറം, കെ.എം.സി. മജീദ്, ടോമി മാത്യു, എം.എം, സാജു, മുനീർ തരുവണ എന്നിവർ പ്രസംഗിച്ചു. ചന്തു പല്ലോറ, ഷാജി പനമട, ഐ.സി. തോമസ്, പി. പ്രകാശൻ, ഖാലിദ് കീഴട്ട, കെ.എം. ബിജു, ബാലൻ മീത്തുംകുനി, ഷൈജി ഷിബു, മേരി പള്ളിപ്പുറം, മായ ജോർജ്, ദേവു ചന്ദ്രൻ എന്നിവർ നേതൃത്വം നൽകി. കൽപ്പറ്റ: യൂത്ത് കോണ്‍ഗ്രസ് തൃശൂർ ചൊവ്വന്നൂർ മണ്ഡലം പ്രസിഡന്‍റ് വി.എസ്. സുജിത്തിനെ ക്രൂരമായി മർദിച്ച പോലീസുകാരെ സർവീസിൽനിന്ന് പുറത്താക്കി നിയമനടപടിയെടുക്കണമെന്ന് ആവശ്യപ്പെട്ട് സംഘടന നിയോജകമണ്ഡലം കമ്മിറ്റിയുടെ നേതൃത്വത്തിൽ ഡിവൈഎസ്പിയുടെ കാര്യാലയത്തിലേക്ക് മാർച്ച് നടത്തി. ഓഫീസ് പരിസരത്ത് മാർച്ച് പോലീസ് തടഞ്ഞു. ഇതേത്തുടർന്ന് ചേർന്ന യോഗം കെപിസിസി അംഗം പി.പി. ആലി ഉദ്ഘാടനം ചെയ്തു. പോലീസിനെ രാഷ്ട്രീയ ലാഭത്തിനും ഇതര പാർട്ടികളിലെ പ്രവർത്തകരെ ഉപദ്രവിക്കുന്നതിനും ഉപയോഗിക്കുന്ന മുഖ്യമന്ത്രിയുടെയും സിപിഎമ്മിന്‍റെയും നിലപാട് പ്രതിഷേധാർഹമാണെന്ന് അദ്ദേഹം പറഞ്ഞു. പോലീസിലെ ക്രിമിനലുകളെ സംരക്ഷിക്കുന്നത് അവസാനിപ്പിക്കണമെന്ന് ആവശ്യപ്പെട്ടു. യൂത്ത് കോണ്‍ഗ്രസ് നിയോജകമണ്ഡലം പ്രസിഡന്‍റ് ഡിന്‍റോ ജോസ് അധ്യക്ഷത വഹിച്ചു. ജില്ലാ പ്രസിഡന്‍റ് അമൽ ജോയ്, സംസ്ഥാന ജനറൽ സെക്രട്ടറി സി.എ. അരുണ്‍ദേവ്, ജില്ലാ ഭാരവാഹികളായ ശ്രീജിത്ത് കുപ്പാടിത്തറ, നിത കെ. കേളു, ഹർഷൽ കോന്നാടൻ, മുത്തലിബ് പഞ്ചാര,സുകന്യ ആഷിൻ ഗിരീഷ് കൽപ്പറ്റ, മുഹമ്മദ് ഫെബിൻ, എം.ബി. വിഷ്ണു, ഡി. വിനായക്, ആഷിക് വൈത്തിരി,ആഷിർ വെങ്ങപ്പള്ളി, വിനോജ് കോട്ടത്തറ, ലിറാർ പറളിക്കുന്ന്, അൻവർ മേപ്പാടി, രേണുക കോട്ടത്തറ, അനീഷ് വൈത്തിരി, പ്രജീഷ് കോട്ടത്തറ എന്നിവർ പ്രസംഗിച്ചു. സുൽത്താൻ ബത്തേരി: പിണറായി വിജയന്‍റെ ഭരണത്തിൽ കേരളത്തിലെ പോലീസ് സ്റ്റേഷനുകളിൽ കിരാത ഭരണമാണ് നടക്കുന്നതെന്നും നരാധമൻമാരായ പോലീസുകാരെ നിലയ്ക്ക് നിറുത്താൻ മുഖ്യമന്ത്രി തയാറാകണമെന്നും ഐ.സി. ബാലകൃഷ്ണൻ എംഎൽഎ ആവശ്യപ്പെട്ടു. സുജിത്തിനെ മർദിച്ച പോലീസ് ഉദ്യേഗസ്ഥരെ പിരിച്ചുവിടണമെന്ന് ആവശ്യപ്പെട്ട് ബത്തേരി, വടക്കനാട് മണ്ഡലം കോണ്‍ഗ്രസ് കമ്മിറ്റികളുടെ നേതൃത്വത്തിൽ ബത്തേരി പോലീസ് സ്റ്റേഷനു മുന്നിൽ നടത്തിയ ജനകീയ പ്രതിഷേധ സദസ് ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. മണ്ഡലം പ്രസിഡന്‍റ് ബാബു പഴുപ്പത്തൂർ അധ്യക്ഷത വഹിച്ചു. നേതാക്കളായ ഉമ്മർക്കുണ്ടാട്ടിൽ, ലയണൽ മാത്യു, സി.എ. ഗോപി, ബെന്നി കൈനിക്കൽ, ഇന്ദ്രജിത്ത്, ജയചന്ദ്രൻ, റിനുജോണ്‍, നൗഫൽ കൈപ്പബേരി, ഗഫൂർ പടപ്പ്, കുന്നത്ത് അഷ്റഫ്, ബിന്ദു സുധീർ ബാബു, അസീസ് മാടാല, സഫീർ പഴേരി, കെ.പി. സാമുവൽ, ജിജി അലക്സ്, ഷൈലജ സോമൻ, ഷിജു എങ്ങനാമറ്റം, ജോർജ് നൂറനാൽ, സണ്ണി ചൂരിമല, പ്രജിത രവി, ടി.ഐ. ഏലിയാസ്, എം.ബി. പ്രസാദ്, ശാലിനി രാജേഷ് എന്നിവർ പ്രസംഗിച്ചു. ചീരാൽ: നൂൽപ്പുഴ, ചീരാൽ മണ്ഡലം കോണ്‍ഗ്രസ് കമ്മിറ്റികളുടെ നേതൃത്വത്തിൽ ഈസ്റ്റ് ചീരാലിൽ പ്രവർത്തിക്കുന്ന നൂൽപ്പുഴ പോലീസ് സ്റ്റേഷന് മുന്നിൽ ധർണ സംഘടിപ്പിച്ചു. ഡിസിസി ജനറൽ സെക്രട്ടരി അഡ്വ. രാജേഷ് കുമാർ ഉദ്ഘാടനം ചെയ്തു. സി.എം. അബു, വി.ടി. ബേബി, കെ.ആർ. സാജൻ, കെ.വി. ശശി, പ്രസന്ന ശശീന്ദ്രൻ, കെ. മുനീബ്, അഫ്സൽ പീച്ചു, പി.ടി. ആന്‍റണി, ബാലകൃഷ്ണൻ, റോയ് മാത്യു തുടങ്ങിയവർ പ്രസംഗിച്ചു. വി.ജെ. തോമസ്, കെ.സി.കെ. തങ്ങൾ, വി.ടി. രാജു, യശോധരൻ, ഷീല പുഞ്ചവയൽ, ജയലളിത, ഷിബു, വിഷ്ണു, വിജയൻ, തുടങ്ങിയവർ നേതൃത്വം നൽകി.

ടൗണ്‍ഷിപ്പിലെ ഭവനങ്ങളുടെ നിർമാണം പുരോഗമിക്കുന്നു

കൽപ്പറ്റ: പുഞ്ചിരിമട്ടം ഉരുൾപൊട്ടൽ ദുരന്ത ബാധിതർക്കായി കൽപ്പറ്റ എൽസ്റ്റണ്‍ എസ്റ്റേറ്റിൽ ഒരുങ്ങുന്ന ഭവനങ്ങളുടെ നിർമാണം പുരോഗമിക്കുന്നു. നിലവിൽ ഏഴ് വീടുകളുടെ വാർപ്പ് പൂർത്തിയായി. എൽസ്റ്റണ്‍ എസ്റ്റേറ്റിൽ അഞ്ച് സോണുകളിലായി നിർമിക്കുന്ന 410 വീടുകളുടെ നിർമാണ പ്രവർത്തനങ്ങൾ വിവിധ ഘട്ടങ്ങളിലായി പുരോഗമിക്കുകയാണ്. നിലവിൽ ആദ്യ സോണിലെ നിർമാണ പ്രവർത്തനങ്ങളാണ് പുരോഗമിക്കുന്നത്. 114 വീടുകളുടെ ബിൽഡിംഗ് സെറ്റ് ഔട്ട്, 114 വീടുകളുടെ ഉത്ഖനനം, 43 വീടുകളുടെ ഫൂട്ടിംഗ് കോണ്‍ക്രീറ്റ്, 34 വീടുകളുടെ സ്റ്റം കോളം, 12 വീടുകൾക്കുള്ള ബീമുകളുടെ കോണ്‍ക്രീറ്റ്, ഒന്പത് വീടുകളുടെ കോളം കോണ്‍ക്രീറ്റ് പ്രവൃത്തികൾ പൂർത്തിയായിയിട്ടുണ്ട്.ആദ്യ സോണിൽ 140, രണ്ടാം സോണിൽ 51, മൂന്നാം സോണിൽ 55, നാലാം സോണിൽ 51, അഞ്ചാം സോണിൽ 113 വീടുകളാണ് നിർമിക്കുന്നത്. 262 വീടുകൾക്കുള്ള ക്ലിയറിംഗ് ആൻഡ് ഗ്രബ്ബിംഗ് പ്രവൃത്തി പൂർത്തിയായി. 144 വീടുകളുടെ കോണ്‍ പെനട്രേഷൻ ടെസ്റ്റ് (മണ്ണിന്‍റെ ഘടന പരിശോധന), 80 വീടുകളുടെ പ്ലെയിൻ സിമന്‍റ് കോണ്‍ക്രീറ്റ് എന്നിവയും പൂർത്തിയായി. 200 വീടുകൾക്ക് ഏഴ് സെന്‍റ് വീതമുള്ള അതിരുകൾ നിശ്ചയിച്ചു. ടൗണ്‍ഷിപ്പിലൂടെ കടന്നുപോകുന്ന കെഎസ്ഇബിയുടെ ട്രാൻസ്മിഷൻ ലൈൻ മാറ്റി സ്ഥാപിക്കാൻ നാല് പ്രധാന ടവറുകളുടെ പ്രവൃത്തികൾ ആരംഭിച്ചു. സബ്സ്റ്റേഷൻ സ്ഥാപിക്കാൻ 2.35 ഏക്കർ സ്ഥലം ടൗണ്‍ഷിപ്പിനോട് അനുബന്ധമായി കണ്ടെത്തി പ്രവർത്തികൾ ആരംഭിക്കാനുള്ള നടപടികളും പുരോഗമിക്കുന്നുണ്ട്. സബ്സ്റ്റേഷൻ നിർമാണത്തിനുള്ള മണ്ണൊരുക്കൽ പ്രവർത്തികൾക്കായി ടെൻഡർ ക്ഷണിച്ചു. പ്രവർത്തികൾ ഒരാഴ്ചയ്ക്കകം ആരംഭിക്കുമെന്ന് കഐസ്ഇബി എക്സക്യുട്ടീവ് എൻജിനീയർ അറിയിച്ചു.

കന്പനീ തീരത്ത് നീർനായകളും

മാനന്തവാടി: കന്പനീ തീരത്ത് ചീങ്കണ്ണിക്കും മുതലയ്ക്കും പിന്നാലെ പുഴയോരങ്ങളിൽ നീർനായകളും. വള്ളിയൂർക്കാവ് പുഴയോരത്താണ് കഴിഞ്ഞ ദിവസം ഇവയെ കൂട്ടമായി കണ്ടത്. പുഴയരികിൽ അലക്കാനും കുളിക്കാനും എത്തുന്നവർക്ക് ഇത് ആശങ്കയ്ക്ക് ഇടനൽകുന്നുണ്ട്. വള്ളിയൂർക്കാവ് പുഴയിൽ ഒട്ടേറെ തവണ നാട്ടുകാർ ചീങ്കണ്ണികളെ കണ്ടിട്ടുണ്ടെങ്കിലും അപൂർവമായി മാത്രമാണ് നീർനായകളെ കാണാറുള്ളത്. സ്മൂത്ത് കോട്ടട് ഓട്ടർ എന്ന ശാസ്ത്രീയ നാമത്തിൽ അറിയപ്പെടുന്ന നീർനായകൾ പ്രത്യേക ആവാസ വ്യവസ്ഥയിൽ കഴിയാൻ ഇഷ്ടപ്പെടുന്നവയാണ്. പുഴയിൽ പാറക്കൂട്ടങ്ങൾക്കിടയിലാണ് ഇവ പതിങ്ങിയിരിക്കുന്നത്. പൂക്കോട്, ലക്കിടി മലനിരകളിലെ നീർച്ചാലുകൾ, കബനി, നരസിപ്പുഴ, പനമരം ചെറിയപുഴ, വയനാട് വന്യജീവി സങ്കേതം എന്നിവിടങ്ങളിലും ഇവയുടെ സാന്നിധ്യം അടുത്ത കാലങ്ങളിലായി റിപ്പോർട്ട് ചെയ്തിട്ടുണ്ട്. മത്സ്യങ്ങളാണ് ഇവയുടെ പ്രധാന ഭക്ഷണം. വള്ളിയൂർക്കാവ് പുഴയിൽ ചീങ്കണ്ണിയെയും നിരവധി തവണ കാണപ്പെട്ടിട്ടുണ്ടെങ്കിലും നീർനായകളെ 2018 ലെ പ്രളയത്തിന് ശേഷമാണ് കാണാൻ തുടങ്ങിയത്. കഴിഞ്ഞ മാസം വേമം പാടത്ത് വെള്ളം കയറിയപ്പോൾ നീർനായയെ കണ്ടിരുന്നു.

സംസ്ഥാന ടിടിഐ-പിപിടിടിഐ കലോത്സവം നാളെ ആരംഭിക്കും

സുൽത്താൻ ബത്തേരി: 29-ാമത് സംസ്ഥാന ടിടിഐ പിപിടിടിഐ അധ്യാപക കലോൽസവത്തിന് നാളെ സുൽത്താൻ ബത്തേരി വയനാട് ഡയറ്റിൽ തുടക്കം കുറിക്കുമെന്ന് സംഘാടക സമിതി ഭാരവാഹികൾ വാർത്താസമ്മേളനത്തിൽ അറിയിച്ചു. പതിനാല് ജില്ലകളിൽ നിന്നുമായി 459 പേരാണ് കലോത്സവത്തിൽ പങ്കെടുക്കക. ടിടിഐ വിഭാഗത്തിൽ 257 പേരും പിപിടിടിഐ വിഭാഗത്തിൽ 65 പേരും അധ്യാപക വിഭാഗത്തിൽ 137 പേരുമാണ് മത്സരിക്കുന്നത്. സംഘഗാനം, ലളിതഗാനം, മാപ്പിളപ്പാട്ട്, കവിയരങ്ങ്, മോണോ ആക്ട്, പ്രസംഗം, പ്രഭാഷണം എന്നീ ഇനങ്ങളിലാണ് മത്സരം. ഡയറ്റിന് പുറമെ സർവജന വിഎച്ച്എസ്എസ്, കൈപ്പഞ്ചേരി ഗവ.എൽപി സ്കൂൾ, അധ്യാപക ഭവൻ എന്നിവിടങ്ങളിലെ അഞ്ച് വേദികളിലാണ് മത്സരം. വയനാടിന്‍റെ പരന്പരാഗത സംഗീത ഉപകരണങ്ങളായ തുടി, കുഴൽ, പാണി, ഉടുക്ക്, ചീനി എന്നിവയുടെ പേരുകളിലാണ് വേദികൾ. 12ന് രാവിലെ ഒന്പതിന് പൊതു വിദ്യാഭ്യാസ ഡയറക്ടർ എൻ.എസ്.കെ. ഉമേഷ് പതാക ഉയർത്തുന്നതോടെ കലാമത്സരങ്ങൾ ആരംഭിക്കും. കലോൽസവത്തിന് സമാപനം കുറിച്ച് വൈകുന്നേരം നാലിന് നടക്കുന്ന പൊതുസമ്മേളനം ഐ.സി. ബാലകൃഷ്ണൻ എംഎൽഎ ഉദ്ഘാടനം ചെയ്യും. മുനിസിപ്പൽ ചെയർമാൻ ടി.കെ. രമേശ് അധ്യക്ഷത വഹിക്കും. വാർത്താസമ്മേളനത്തിൽ ജില്ലാ വിദ്യാഭ്യാസ ഉപഡയറക്ടർ വി.എ. ശശീന്ദ്രവ്യാസ്, ഡയറ്റ് പ്രിൻസിപ്പൽ കെ.എം. സെബാസ്റ്റ്യൻ, പ്രോഗ്രാം കമ്മറ്റി കണ്‍വീനർ പി.എസ്. ഗിരീഷ്കുമാർ എന്നിവർ പങ്കെടുത്തു.

വാഴവറ്റയിൽ മഹാശോഭയാത്ര 14ന്

കൽപ്പറ്റ: വാഴവറ്റ അയ്യപ്പ ക്ഷേത്രത്തിൽ ശ്രീകൃഷ്ണജയന്തി ആഘോഷത്തിന് ഇന്ന് രാവിലെ എട്ടിന് പതാക ഉയർത്തുന്നതോടെ തുടക്കമാകുമെന്ന് കമ്മിറ്റി ചെയർമാൻ സുരേഷ് അരിമുണ്ട, ജനറൽ കണ്‍വീനർ കെ.ബി. രാജുകൃഷ്ണ, കെ.ആർ. ബിജു, വി. മോഹനൻ, പി.ജി. രാജീവൻ, ജലജ വേടക്കണ്ടി, വി. സുരേന്ദ്രൻ, എ.ജി. രതീഷ് എന്നിവർ വാർത്താസമ്മേളനത്തിൽ അറിയിച്ചു. 14ന് ബാലഗോകുലത്തിന്‍റെയും പ്രദേശത്തെ ക്ഷേത്രങ്ങളുടെയും സഹകരണത്തോടെ മഹാശോഭായാത്ര നടത്തും. ഉച്ചകഴിഞ്ഞ് രണ്ടിന് മൂർത്തിക്കുന്ന്, കടവയൽ, കരിമത്ത്, നായിക്കൊല്ലി, മലങ്കര, എടത്തിൽ എന്നിവിടങ്ങളിൽ ഉപ ശോഭായാത്രകൾ പുറപ്പെട്ട് മൂന്നോടെ അയ്യപ്പ ക്ഷേത്രത്തിൽ എത്തും. ഇവിടെനിന്നു പുറപ്പെടുന്ന മഹാശോഭായാത്ര ശ്രീ കരുവില്ലി ക്ഷേത്രം, ശ്രീ പാക്കം ശാസ്താ ഭഗവതി ക്ഷേത്രം എന്നിവിടങ്ങളിൽ പ്രദക്ഷിണം ചെയ്ത് വാഴവറ്റയിൽ തിരിച്ചെത്തി പ്രസാദവിതരണത്തോടെ സമാപിക്കും.

പുഞ്ചിരിമട്ടം ദുരന്തം: ജനകീയ ശാസ്ത്ര പഠന സമിതി റിപ്പോർട്ട് പ്രകാശനം 13ന്

കൽപ്പറ്റ: പുഞ്ചിരിമട്ടം ഉരുൾ ദുരന്തവുമായി ബന്ധപ്പെട്ട് ട്രാൻസിഷൻ സ്റ്റഡീസും പശ്ചിമഘട്ട സംരക്ഷണ സമിതിയും സംയുക്തമായി രൂപീകരിച്ച ജനകീയ ശാസ്ത്ര പഠന സമിതിയുടെ റിപ്പോർട്ട് 13ന് ഉച്ചകഴിഞ്ഞ് 3.30ന് ട്രിഡന്‍റ് ആർക്കേഡിൽ റിസ്ക് അനലിസ്റ്റ് സാഗർ ധാര പ്രകാശനം ചെയ്യും. പുസ്തകരൂപത്തിൽ തയാറാക്കിയ റിപ്പോർട്ടിന്‍റെ ആദ്യ കോപ്പി സാമൂഹിക വിമർശകനും രാഷ്ട്രീയ നിരീക്ഷകനുമായ ജോസഫ് സി. മാത്യു ഏറ്റുവാങ്ങും. ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ, എസ്. അഭിലാഷ്, ടി.വി. സജീവ്, സി.കെ. വിഷ്ണുദാസ്, ചെറുവയൽ രാമൻ,കെ.ആർ. അജിതൻ, സ്മിത പി. കുമാർ തുടങ്ങിയവർ പങ്കെടുക്കും. "തെന്നുന്ന ഭൂമി;ചിതറുന്ന ജീവിതങ്ങൾ’ എന്ന പേരിൽ തയാറാക്കിയ റിപ്പോർട്ട് പുഞ്ചിരിമട്ടം ഉരുൾ ദുരന്തത്തിന്‍റെ കാരണങ്ങൾ ഉൾപ്പെടെ വിശകലനം ചെയ്യുന്നതാണെന്ന് സ്വാഗതസംഘം ചെയർമാൻ എം.കെ. രാമദാസ്, കണ്‍വീനർ പി.ജി. മോഹൻദാസ്, പശ്ചിമഘട്ട സംരക്ഷണ സമിതി ചെയർമാൻ വർഗീസ് വട്ടേക്കാട്ടിൽ, വയനാട് പ്രകൃതി സംരക്ഷണ സമിതി പ്രതിനിധി ബാബു മൈലന്പാടി, മലബാർ നാച്വറൽ പ്രൊട്ടക്ഷൻ ഫോറം പ്രതിനിധി ബാവൻകുട്ടി എന്നിവർ വാർത്താസമ്മേളനത്തിൽ അറിയിച്ചു. ഭൗമശാസ്ത്രജ്ഞർ, റിസ്ക് അനലിസ്റ്റ്, കാലാവസ്ഥ ശാസ്ത്രജ്ഞർ, വന-സസ്യ ഗവേഷകർ, സാമൂഹിക ശാസ്ത്രജ്ഞർ, ആക്ടിവിസ്റ്റുകൾ എന്നിവർ ഉൾപ്പെടുന്ന സമിതിയാണ് ജനങ്ങളുടെ സഹകരണത്തോടെ റിപ്പോർട്ട് തയാറാക്കിയത്. പുസ്തക പ്രകാശനത്തിനു മുന്പ് ട്രിഡന്‍റ് ആർക്കേഡിൽ പരിസ്ഥിതി പ്രവർത്തകരുടെ സംഗമം നടക്കും. പ്രസിദ്ധ പരിസ്ഥിതി പ്രവർത്തക മേധ പട്കർ ഓണ്‍ലൈനിൽ ഉദ്ഘാടനം ചെയ്യും. അഡ്വ.പി. ചാത്തുക്കുട്ടി, അഡ്വ.വിനോദ് പയ്യട, ജോയ് കൈതാരം, ടി.വി. രാജൻ, എൻ. ബാദുഷ, എം.പി. കുഞ്ഞിക്കണാരൻ, വർഗീസ് വട്ടേക്കാട്ടിൽ തുടങ്ങിയവർ പങ്കെടുക്കും. ആനക്കാംപൊയിൽ-കള്ളാടി തുരങ്കപാത നിർമാണം ഉൾപ്പെടെ വിഷയങ്ങൾ സംഗമം ചർച്ച ചെയ്യും.

മരത്തിൽനിന്നു വീണ് ചികിത്സയിലായിരുന്ന കർഷകൻ മരിച്ചു

മാനന്തവാടി: മരത്തിൽനിന്നുവീണ് പരിക്കേറ്റ് ചികിത്സയിലായിരുന്ന കർഷകൻ മരിച്ചു. ആലാറ്റിൽ ചാത്തൻകോട്ട് ഷാജുവാണ്(49)ഇന്നലെ കൽപ്പറ്റയിലെ സ്വകാര്യ ആശുപത്രിയിൽ മരിച്ചത്. മൂന്നാഴ്ച മുന്പാണ് അപകടത്തിൽപ്പെട്ടത്. സംസ്കാരം ഇന്നു രാവിലെ 10.30ന് ആലാറ്റിൽ സെന്‍റ് മേരീസ് പള്ളിയിൽ. ഭാര്യ: ജിജ. മക്കൾ: അബിൻ, അലൻ.

ബുക്ക് ലെറ്റ് പ്രകാശനം ചെയ്തു

പുൽപ്പള്ളി: മലബാറിന്‍റെ കോതമംഗലം എന്നറിയപ്പെടുന്ന വയനാട്ടിലെ പ്രമുഖ സർവ്വമത തീർഥാടന കേന്ദ്രമായ ചീയന്പം മോർ ബസേലിയോസ് യാക്കോബായ സുറിയാനി പള്ളിയിൽ പരിശുദ്ധ യൽദോ മോർ ബസേലിയോസ് ബാവായുടെ ഓർമപ്പെരുന്നാൾ ആഘോഷങ്ങളുടെ മുന്നോടിയായി പ്രസിദ്ധീകരിക്കുന്ന ബുക്ക് ലെറ്റ് വികാരി ഫാ. മത്തായിക്കുഞ്ഞ് ചാത്തനാട്ടുകുടി പ്രകാശനം ചെയ്തു. ട്രസ്റ്റി സിജു തോട്ടത്തിൽ, സെക്രട്ടറി ഏബ്രഹാം ചുമതയിൽ, പബ്ലിസിറ്റി കണ്‍വീനർ എൽദോസ് പരത്തുവയലിൽ തുടങ്ങിയവർ നേതൃത്വം നൽകി. 24 മുതൽ ഒക്ടോബർ മൂന്ന് വരെയാണ് പെരുന്നാൾ.

കാരുണ്യവാരാചരണം: ഗൊരേത്തി ഭവൻ അന്തേവാസികൾക്ക് കിറ്റുകൾ നൽകി

നടവയൽ: എകെസിസി മാനന്തവാടി രൂപത സമിതി ആഹ്വാനം ചെയ്ത കാരുണ്യവാരാചരണത്തിന്‍റെ ഭാഗമായി യൂണിറ്റ് കമ്മിറ്റിയുടെ നേതൃത്വത്തിൽ ഗൊരേത്തി ഭവൻ അന്തേവാസികൾക്ക് അവശ്യവസ്തുക്കൾ അടങ്ങിയ കിറ്റുകൾ നൽകി. ഹോളി ക്രോസ് ആർക്കി എപ്പിസ്കോപ്പൽ തീർഥാടന കേന്ദ്രം ആർച്ച് പ്രീസ്റ്റ് ഫാ. ഗർവാസിസ് മറ്റം കിറ്റ് ഗൊരേത്തി ഭവൻ സൂപ്പിരിയർ സിസ്റ്റർ എമിലി സിഎംസിക്ക് കൈമാറി വിതരണോദ്ഘാടനം നിർവഹിച്ചു. എകെസിസി യൂണിറ്റ് പ്രസിഡന്‍റ് ഇ.വി. സജി അധ്യക്ഷത വഹിച്ചു. രൂപത വൈസ് പ്രസിഡന്‍റ് അന്നക്കുട്ടി ഉണ്ണിക്കുന്നേൽ, ഫൊറോന കൗണ്‍സിൽ പ്രസിഡന്‍റ് വിൻസന്‍റ് ചേരവേലിൽ, സ്റ്റാൻലി തെലങ്കാനയിൽ, ബേബി തുരുത്തിയിൽ, സാബു നിരപ്പിൽ, ജയിംസ് കളർതൊട്ടിയിൽ, ഇ.കെ. പൗലോസ്, മേഴ്സി സാബു, സന്ധ്യ ലിഷു, ഷീമ മാനുവൽ തുടങ്ങിയവർ നേതൃത്വം നൽകി.

സാക്ഷരതയിലൂടെ പുതിയ ഉയരങ്ങളിലേക്ക്; ജില്ലയിൽ ലോക സാക്ഷരതാ ദിനാചരണം സംഘടിപ്പിച്ചു

കൽപ്പറ്റ: ജില്ലാ സാക്ഷരതാ മിഷന്‍റെ നേതൃത്വത്തിൽ ലോക സാക്ഷരതാ ദിനാചരണം സംഘടിപ്പിച്ചു. ജില്ലാ പഞ്ചായത്ത് ഹാളിൽ നടന്ന പരിപാടി ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ ഉദ്ഘാടനം ചെയ്തു. ജില്ലയിലെ നിരക്ഷരരെ സാക്ഷരരാക്കാൻ ലക്ഷ്യമിട്ട് ന്യൂ ഇന്ത്യാ ലിറ്ററസി പ്രോഗ്രാമിന്‍റെ ഭാഗമായി സംഘടിപ്പിക്കുന്ന 230 ക്ലാസുകൾക്ക് ലോക സാക്ഷരതാ ദിനത്തിൽ തുടക്കം കുറിച്ചു. സന്നദ്ധരായ അധ്യാപകരാണ് ക്ലാസുകൾ നൽകുക. തുല്യതയ്ക്കൊപ്പം തൊഴിലും പദ്ധതിയുടെ ഭാഗമായി ഓരോ വാർഡുകളിൽ നിന്നും തെരഞ്ഞെടുക്കുന്ന അർഹരായ മൂന്ന് പേർക്ക് വീതം സ്മാർട്ട് കോഴ്സിലേക്ക് സൗജന്യമായി പ്രവേശനം നൽകാൻ തദ്ദേശ സ്വയംഭരണ സ്ഥാപനങ്ങളുമായി കൈകോർക്കും. പഠനസൗകര്യത്തിനായി മാനന്തവാടി, പനമരം, കൽപ്പറ്റ മേഖലകളിൽ സ്മാർട്ട് സബ്സെന്‍റുകളും ആരംഭിക്കാനും പദ്ധതിയുണ്ട്. ജില്ലാപഞ്ചായത്ത് തുല്യത പൂർത്തിയാക്കിയ പഠിതാക്കൾക്ക് വേണ്ടി ശ്രീനാരായണഗുരു ഓപ്പണ്‍ യൂണിവേഴ്സിറ്റിയുമായി സഹകരിച്ച ആരംഭിച്ച ഡിഗ്രി ക്ലാസുകളിലേക്ക് ഈ വർഷം 138 പേർക്ക് അഡ്മിഷൻ നൽകും. പ്ലസ് വണ്‍, പ്ലസ് ടു തുല്യതാ ക്ലാസുകൾ ഈ മാസം അവസാനത്തോടെ ആരംഭിക്കും. ജില്ലാ പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ എം. മുഹമ്മദ് ബഷീർ അധ്യക്ഷത വഹിച്ചു. തദ്ദേശ സ്വയംഭരണ വകുപ്പ് ഡെപ്യൂട്ടി ഡയറക്ടർ പി. ബൈജു, അസിസ്റ്റന്‍റ് ഡയറക്ടർ ജോമോൻ ജോർജ്, ജില്ലാ പഞ്ചായത്ത് ഫിനാൻസ് ഓഫീസർ എ.കെ. സുനില, സാക്ഷരത മിഷൻ ജില്ലാ കോഓർഡിനേറ്റർ പി. പ്രശാന്ത് കുമാർ, അസിസ്റ്റന്‍റ് ഇൻഫർമേഷൻ ഓഫീസർ ഇ. അഫ്സൽ, സാക്ഷരത മിഷൻ ഓഫീസ് സ്റ്റാഫ് പി.വി. ജാഫർ, പ്രേരക്മാരായ എ. മുരളീധരൻ, എം. കൊച്ചുറാണി, പി.എം. ഇന്ദിര എന്നിവർ പ്രസംഗിച്ചു.

റോഡിലെ കുഴികൾ അടച്ചു

സുൽത്താൻ ബത്തേരി: ഓടപ്പള്ളം-മൂലങ്കാവ്-ബത്തേരി ലിങ്ക് റോഡിലെ കുഴികൾ മൂലങ്കാവ് സെന്‍റ് ജൂഡ് അയൽക്കൂട്ടം അംഗങ്ങളും നാട്ടുകാരും ചേർന്ന് അടച്ചു. കുഴികൾ വാഹന ഗതാഗതം പ്രയാസത്തിലാക്കിയ സാഹചര്യത്തിലായിരുന്നു അയൽക്കൂട്ടം ഇടപെടൽ. ദിനേന നിരവധിയാളുകൾ യാത്രയ്ക്ക് ആശ്രയിക്കുന്നതാണ് ലിങ്ക് റോഡ്. അയൽക്കൂട്ടം പ്രസിഡന്‍റ് സണ്ണി വിളക്കുന്നേൽ, സെക്രട്ടറി വർഗീസ് മോളത്ത്, മാത്യു പുത്തൻപുര, അപ്പച്ചൻ വിളക്കുന്നേൽ, സഹദേവൻ തേലംപറ്റ, ഷിനോജ് പുത്തൻപുര എന്നിവർ നേതൃത്വം നൽകി. അടിയന്തരമായി ഫണ്ട് അനുവദിച്ച് റോഡ് നവീകരിക്കണമെന്ന് ഇവർ ആവശ്യപ്പെട്ടു.

ക്ഷേമനിധി ആനുകൂല്യങ്ങൾ വർധിപ്പിക്കണം: എകെടിടിയു

സുൽത്താൻ ബത്തേരി: ക്ഷേമനിധി ആനുകൂല്യങ്ങൾ വർധിപ്പിക്കണമെന്ന് ഓൾ കേരള തയ്യൽ തൊഴിലാളി യൂണിയൻ(എകെടിടിയു)താലൂക്ക് കണ്‍വൻഷൻ സർക്കാരിനോട് ആവശ്യപ്പെട്ടു. ജില്ലാ പ്രസിഡന്‍റ് ഉമ്മർ കുണ്ടാട്ടിൽ ഉദ്ഘാടനം ചെയ്തു. ഐഎൻടിയുസി ജില്ലാ സെക്രട്ടറി സി.എ. ഗോപി, മഹിളാ കോണ്‍ഗ്രസ് ജില്ലാ പ്രസിഡന്‍റ് ജിനി തോമസ്, ലീലാമ്മ സേവ്യർ, മേരി തോമസ്, നിഷ ശശി, ജിജി അലക്സ്, സാം കുര്യൻ എന്നിവർ പ്രസംഗിച്ചു. ജില്ലാ ജനറൽ സെക്രട്ടറി ജോയ് വടക്കനാട് ക്ഷേമനിധിയും ആനുകൂല്യങ്ങളും എന്ന വിഷയത്തിൽ ക്ലാസെടുത്തു.

തങ്കച്ചനെ കള്ളക്കേസിൽ കുടുക്കിയ സംഭവം : പ്രതികൾക്കായി പോലീസ് അന്വേഷണം ഊർജിതമാക്കി

പുൽപ്പള്ളി: കാനാട്ടുമലയിൽ തങ്കച്ചനെ കള്ളക്കേസിൽ കുടുക്കിയ സംഭവത്തിൽ കൂടുതൽ പ്രതികൾക്കായി പോലീസ് അന്വേഷണം ഊർജിതമാക്കി. കഴിഞ്ഞ ദിവസം അറസ്റ്റിലായ പ്രസാദിന്‍റെ മൊഴിയിൽ നിന്നും സംഭവത്തിൽ ഉൾപ്പെട്ടവരെക്കുറിച്ച് പോലീസിന് സൂചന ലഭിച്ചിട്ടുണ്ട്. പ്രതികളെന്ന് സംശയിക്കുന്നവർ നിലവിൽ ഒളിവിലാണ്. ഇവരുടെ ഫോണുകൾ ഓഫായ നിലയിലാണ്. സമൂഹമാധ്യമങ്ങളിലുൾപ്പടെ പോലീസിനെതിരേ പ്രതിഷേധം ശക്തമായതോടെ സംഭവവുമായി ബന്ധപ്പെട്ട് പ്രതികളെ ഉടൻപിടികൂടുന്നതിനുള്ള തീവ്രശ്രമത്തിലാണ്. സംഭവം വിവാധമായതോടെ വരുംദിവസങ്ങളിൽ ഉന്നത ഉദ്യോഗസ്ഥരുടെ നേതൃത്വത്തിൽ അന്വേഷണം നടത്തി യഥാർഥ പ്രതികളെ കണ്ടെത്താനുള്ള ശ്രമം നടത്തണമെന്നാണ് നാട്ടുകാരുടെ ആവശ്യം. ഗൂഢാലോചന നടത്തിയവരെ നിയമത്തിന് മുന്നിൽ കൊണ്ടുവരണം: പ്രശാന്ത് മലവയൽ പുൽപ്പള്ളി: കോണ്‍ഗ്രസ് നേതാവായ കാനാട്ടുമല തങ്കച്ചനെ കള്ളക്കേസിൽ കുടുക്കാൻ ഒരു സംഘം ഗൂഢാലോചന നടത്തിയിട്ടുണ്ടെന്നും ഇതിൽ കോണ്‍ഗ്രസ് നേതാക്കൾക്കൊപ്പം പോലീസിനും പങ്കുണ്ടെന്നും ബിജെപി ജില്ലാ പ്രസിഡന്‍റ് പ്രശാന്ത് മലവയൽ. കൃത്യമായ അന്വേഷണം നടത്തി ഗൂഢാലോചന നടത്തിയവരെ നിയമത്തിനുമുന്നിൽ കൊണ്ടുവരണം. ഇത്തരത്തിലുള്ള സംഭവങ്ങൾ ആവർത്തിക്കപ്പെടാൻ പാടില്ല. രാഷ്ട്രീയം നോക്കാതെ തങ്കച്ചനും അദ്ദേഹത്തിന്‍റെ കുടുംബത്തിനും ബിജെപി എല്ലാവിധ പിന്തുണയും നൽകുമെന്നും അദ്ദേഹം പറഞ്ഞു. തങ്കച്ചനെ വീട്ടിലെത്തി ബിജെപി നേതാക്കൾ പിന്തുണയറിയിച്ചു. ഒബിസി മോർച്ച ജില്ലാ പ്രസിഡന്‍റ് കെ.ഡി. ഷാജിദാസ്, മണ്ഡലം പ്രസിഡന്‍റ് മനു പ്രസാദ്, ജനറൽ സെക്രട്ടറി ഇ.കെ. സനിൽകുമാർ, പഞ്ചായത്ത് കമ്മിറ്റി പ്രസിഡന്‍റ് ഐക്കരശേരി ഗോപാലകൃഷ്ണൻ നായർ, ജോബിഷ് മാവാടിയിൽ, രാജൻ പാറയ്ക്കൽ തുടങ്ങിയവർ സംഘത്തിലുണ്ടായിരുന്നു. കുറ്റക്കാർക്കെതിരേ നടപടി വേണം ബിജെപി പുൽപ്പള്ളി: കോണ്‍ഗ്രസ് നേതാവ് കാനാട്ടുമല തങ്കച്ചനെ കള്ളക്കേസിൽ കുടുക്കാൻ ശ്രമിച്ച മുഴുവൻ പ്രതികളേയും അറസ്റ്റ് ചെയ്യുകയും കേസ് അന്വേഷണത്തിൽ വീഴ്ചവരുത്തിയ പോലീസ് ഉദ്യോഗസ്ഥർക്കെതിരേ നടപടി സ്വീകരിക്കുകയും ചെയ്തില്ലെങ്കിൽ പോലീസ് സ്റ്റേഷൻ മാർച്ച് ഉൾപ്പെടെയുള്ള ശക്തമായ സമരങ്ങൾക്ക് നേതൃത്വം നൽകുമെന്ന് ബിജെപി നേതാക്കൾ വാർത്താസമ്മേളനത്തിൽ അറിയിച്ചു. പോലീസിന്‍റെ അന്വേഷണത്തിലെ വീഴ്ചമൂലം നിരപരാധിയായ തങ്കച്ചനെ 17 ദിവസം ജയിലിൽകിടക്കേണ്ടിവന്നത് കടുത്ത മനുഷ്യാവകാശ ലംഘനമാണ്. വാർത്താസമ്മേളനത്തിൽ ഒബിസി മോർച്ച ജില്ലാ പ്രസിഡന്‍റ് കെ.ഡി. ഷാജിദാസ്, മണ്ഡലം പ്രസിഡന്‍റ് മനു പ്രസാദ്, ജനറൽ സെക്രട്ടറി ഇ.കെ. സനിൽകുമാർ, മുള്ളൻകൊല്ലി പഞ്ചായത്ത് കമ്മിറ്റി പ്രസിഡന്‍റ് ഐക്കരശേരി ഗോപാലകൃഷ്ണൻ, പുൽപ്പള്ളി പഞ്ചായത്ത് കമ്മിറ്റി പ്രസിഡന്‍റ് കെ.കെ. അരുണ്‍, ജോബിഷ് മാവടിയിൽ തുടങ്ങിയവർ വാർത്താസമ്മേളനത്തിൽ പങ്കെടുത്തു. നിയമ നടപടി സ്വീകരിക്കണമെന്ന് സിപിഐ പുൽപ്പള്ളി: മുള്ളൻകൊല്ലി പഞ്ചായത്തിലെ കോണ്‍ഗ്രസിന്‍റെ വാർഡ് പ്രസിഡന്‍റിന്‍റെ വീട്ടിൽ മദ്യവും സ്ഫോടകവസ്തുക്കളും ഒളിപ്പിച്ചുവച്ച് കള്ളക്കേസിൽ കുടുക്കി ജയിലിലടപ്പിച്ച കോണ്‍ഗ്രസ് നേതാക്കൾക്കെതിരേ നിയമ നടപടി സ്വീകരിക്കണമെന്ന് സിപിഐ മുള്ളൻകൊല്ലി ലോക്കൽ കമ്മിറ്റി ആവശ്യപ്പെട്ടു. കഴിഞ്ഞ കുറേക്കാലങ്ങളായി മുള്ളൻകൊല്ലി പഞ്ചായത്തിലെ കോണ്‍ഗ്രസിലെ ഗ്രൂപ്പ് തർക്കം തെരുവ് യുദ്ധമായി മാറിക്കഴിഞ്ഞിരുന്നു. ഡിസിസി പ്രസിഡന്‍റിനെ കൈയേറ്റം ചെയ്യുന്ന സാഹചര്യം പോലുമുണ്ടായി. ഡിസിസി പ്രസിഡന്‍റിന്‍റെ ഗ്രൂപ്പിൽപെടാത്ത ഇതര ഗ്രൂപ്പ് പ്രവർത്തകരെ ഏതുവിധേനയും തകർക്കാനുള്ള നീക്കത്തിന്‍റെ ഭാഗമായാണ് തങ്കച്ചനെ കള്ളക്കേസിൽ കുടുക്കിയതിന് കാരണമെന്നാണ് പറയപ്പെടുന്നത്. രാഷ്ട്രീയ ശത്രുക്കൾ പോലും ചെയ്യാത്ത മാർഗമുപയോഗിച്ചാണ് തങ്കച്ചനെ കള്ളക്കേസിൽ കുടുക്കിയത്. തങ്കച്ചന്‍റെ മൊഴി വിശ്വാസത്തിലെടുത്ത് ഇതിന് പിന്നിൽ പ്രവർത്തിച്ചവരുടെപങ്ക് വെളിച്ചത്ത് കൊണ്ടുവരണം. ചാരായവും സ്ഫോടകവസ്തുക്കളും വീട്ടിൽ വയ്പ്പിച്ചവരുടെ ക്വട്ടേഷൻ സംഘവുമായുള്ള അവിഹിതബന്ധം സംബന്ധിച്ച് പഴുതടച്ച് അന്വേഷണം നടത്തണം. ഇക്കാര്യത്തിൽ പോലീസിനുണ്ടായ ജാഗ്രതക്കുറവും പിഴവും പരിശോധിക്കണമെന്നും സിപിഐ മുള്ളൻകൊല്ലി ലോക്കൽ കമ്മിറ്റി ആവശ്യപ്പെട്ടു. യോഗത്തിൽ പി.വി. പീറ്റർ അധ്യക്ഷത വഹിച്ചു. ടി.ജെ. ചാക്കോച്ചൻ, ടി.സി. ഗോപാലൻ, വി.എൻ. ബിജു, ജയ്മോൻ, ദിവാകരൻ നായർ എന്നിവർ പ്രസംഗിച്ചു.

പുഞ്ചിരിമട്ടം ദുരന്തം : ടിന്പർ മർച്ചന്‍റ്സ് അസോസിയേഷൻ നിർമിച്ച വീടിന്‍റെ താക്കോൽദാനം നടത്തി

കൽപ്പറ്റ: പുഞ്ചിരിമട്ടം ഉരുൾദുരന്ത ബാധിത ചൂരൽമല മാട്ടറക്കുന്ന് സലൂജ് നിവാസിൽ പരേതനായ സതീഷിന്‍റെ ഭാര്യ സുമിത്രയ്ക്കും മക്കൾക്കും ടിന്പർ മർച്ചന്‍റ്സ് അസോസിയേൻ പനമരം എരനെല്ലുരിൽ നിർമിച്ച വീടിന്‍റെ താക്കോൽദാനം പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു നിർവഹിച്ചു. പൊതുസമ്മേളനം ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ ഉദ്ഘാടനം ചെയ്തു. അസോസിയേഷൻ സംസ്ഥാന പ്രസിഡന്‍റ് വക്കച്ചൻ പുല്ലാട്ട് അധ്യക്ഷത വഹിച്ചു. നാസർ അടിമാലി, സി.എച്ച്. മുനീർ, ജാബിർ കരണി, കെ.സി.കെ. തങ്ങൾ, ജയിംസ് അന്പലവയൽ, എം. മുജീബ് റഹ്മാൻ, സുരേഷ്കുമാർ, എം.കെ. സുകുമാരൻ, കെ.ടി. സുബൈർ, എ.എം. മുഹമ്മദ് ഹനീഫ, കെ.എ. ടോമി, പി. ഷാഹുൽ ഹമീദ്, റാസിഖ്, സത്യൻ, ബെന്നി കൊട്ടാരം, ശ്രീനിവാസൻ, വി. ഉമ്മർ ഹാജി എന്നിവർ പ്രസംഗിച്ചു. എരനെല്ലൂരിൽ വിലയ്ക്കുവാങ്ങിയ 10 സെന്‍റിലാണ് 1,000 ചതുരശ്ര അടി വിസ്തീർണത്തിൽ ഭവന നിർമാണം നടത്തിയത്. സ്ഥലവിലയടക്കം 35 ലക്ഷം രൂപ ചെലവായി. ജില്ലയ്ക്ക് അകത്തും പുറത്തുമുള്ള മരം വ്യാപാരികളിൽനിന്നാണ് വീടുപണിക്ക് ധനസമാഹരണം നടത്തിയത്.

വയനാട് അതിജീവന മുന്നണി നിലവിൽവന്നു

കൽപ്പറ്റ: അതിജീവനം അവകാശം എന്ന മുദ്രാവാക്യവുമായി വയനാട് അതിജീവന മുന്നണി നിലവിൽ വന്നു. കഴിഞ്ഞ ദിവസം ട്രിഡന്‍റ് ആർക്കേഡിൽ ചേർന്ന ഒരു വിഭാഗം രാഷ്ട്രീയ-പരിസ്ഥിതി-സാംസ്കാരിക-സാമൂഹിക-കർഷക സംഘടനാ നേതാക്കളുടെ സമ്മേളനത്തിലായിരുന്നു മുന്നണി രൂപീകരണം. മുൻ എംഎൽഎ പി.വി. അൻവർ ഉദ്ഘാടനം ചെയ്തു. തൃണമൂൽ കോണ്‍ഗ്രസ് ജില്ലാ പ്രസിഡന്‍റ് പി.എം. ജോർജ് അധ്യക്ഷത വഹിച്ചു. കിസാൻ മസ്ദൂർ മോർച്ച സൗത്ത് ഇന്ത്യൻ കോ ഓർഡിനേറ്റർ പി.ടി. ജോണ്‍, എസ്ഡിപിഐ സംസ്ഥാന ജനറൽ സെക്രട്ടറി ജോയ് അറക്കൽ, പൂഴിത്തോട് റോഡ് ജനകീയ കർമ സമിതി പ്രതിനിധി യു.സി. ഹുസൈൻ, ഫാർമേഴ്സ് റിലീഫ് ഫോറം സംസ്ഥാന ചെയർമാൻ എ.സി. തോമസ്, മരിയനാട് ഭൂസമര സമിതി നേതാവ് സീത രാമൻ, വയനാട് ഡയറ്റ് മുൻ പ്രിൻസിപ്പൽ ഡോ.പി. ലക്ഷ്മണൻ, കേരള മുസ്‌ലിം ജമാഅത്ത് പ്രസിഡന്‍റ് ജമാലുദ്ദിൻ സഅദി പള്ളിക്കൽ, വയനാട് കർഷക കൂട്ടായ്മ പ്രസിഡന്‍റ് ഇ.പി. ഫിലിപ്പുകുട്ടി, ശ്രീനാരായണ സഹോദര ധർമ സംഘം പ്രതിനിധി രാജൻ പത്തിൽ, എഎപി ജില്ലാ ജോയിന്‍റ് സെക്രട്ടറി ഗഫൂർ കോട്ടത്തറ, വയനാട് ജൈന സമാജം പ്രതിനിധി ജിനേന്ദ്ര പ്രസാദ്, ബാലസാഹിത്യകാരി സുമ പള്ളിപ്രം, ഗോത്ര പ്രതിനിധി സൈമണ്‍ അന്പലവയൽ, വയനാട് ടൂറിസം അസോസിയേഷൻ പ്രസിഡന്‍റ് സെയ്ഫ് വൈത്തിരി, വയനാട് റിയൽ എസ്റ്റേറ്റ് വർക്കേഴ്സ് അസോസിയേഷൻ പ്രസിഡന്‍റ് നസീർ ബത്തേരി, എഐടിസി ജില്ലാ ജനറൽ സെക്രട്ടറി ഷൗക്കത്ത് പള്ളിയാൽ, എഐടിസി ജില്ലാ സെക്രട്ടറി അബ്ദുൾ റഹ്മാൻ ഇളങ്ങോളി ടിഎംസി ജില്ലാ സെക്രട്ടറി അബ്ദുൾ റഷീദ് ബത്തേരി എന്നിവർ പ്രസംഗിച്ചു. കോർ കമ്മിറ്റി ഭാരവാഹികളായി പി.എം. ജോർജ്(ചെയർമാൻ), ഇ.പി. ഫിലിപ്പുകുട്ടി, എ. യുസഫ് മുട്ടിൽ(വൈസ് ചെയർമാൻ), അബ്ദുറഹ്മാൻ ഇളങ്ങോളി(സെക്രട്ടറി) എന്നിവരെ തെരഞ്ഞെടുത്തു. വയനാടിന്‍റെ അതീവന പ്രശ്നങ്ങൾ മുന്നണി ഏറ്റെടുക്കുമെന്ന് കോർ കമ്മിറ്റി ഭാരവാഹികൾ പറഞ്ഞു.

ഓവാലിയിൽ കാട്ടാന ആക്രമണം തുടർക്കഥ: നടപടി സ്വീകരിക്കാതെ അധികൃതർ

13 ജീവനെടുത്ത് രാധാകൃഷ്ണൻ എന്ന ആന ഗൂഡല്ലൂർ: ഓവാലി പഞ്ചായത്തിൽ കാട്ടാന ആക്രമണത്തിൽ ഒരു മനുഷ്യ ജീവൻ കൂടി പൊലിഞ്ഞു. ഒരു മാസത്തിനിടെ ഇവിടെ രണ്ട് മനുഷ്യ ജീവനുകളാണ് കാട്ടാനയെടുത്തത്. ഇന്നലെ രാവിലെ ബാർവുഡ് എസ്റ്റേറ്റ് മേഖലയിലെ ഗുയിന്‍റിലേക്ക് ഇരുചക്രവാഹനത്തിൽ ജോലിക്ക് പോകുന്നതിനിടെയാണ് എസ്റ്റേറ്റ് ജീവനക്കാരൻ ബാർവുഡ് സ്വദേശി പി.ബി. മെഹ്ബൂബ് എന്ന ഷംസുദ്ധീൻ (48) കാട്ടാനയുടെ ആക്രമണത്തിൽ കൊല്ലപ്പെട്ടത്. ആക്രമണത്തിൽ ഗുരുതരമായി പരിക്കേറ്റ ഇദ്ദേഹത്തെ ഗൂഡല്ലൂർ ജില്ലാ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. കൂടെയുണ്ടായിരുന്ന എസ്റ്റേറ്റ് ഫീൽഡ് ഓഫീസർ ചെല്ലദുരൈക്ക് പരിക്കേറ്റു. ഇദ്ദേഹം ഓടി രക്ഷപ്പെടുകയായിരുന്നു. ചെല്ലദുരൈയെ ഗൂഡല്ലൂർ ഗവ. ആശുപത്രിയിൽ പ്രവേശിപ്പിച്ചു. കാട്ടാന ആക്രമണങ്ങൾ തുടർകഥയായിട്ടും തമിഴ്നാട് സർക്കാർ യാതൊരു നടപടിയും സ്വീകരിക്കുന്നില്ലെന്ന് നാട്ടുകാർ ആരോപിച്ചു. ജനങ്ങളുടെ ജീവനും സ്വത്തിനും സംരക്ഷണം നൽകാൻ വനംവകുപ്പിന് സാധിക്കുന്നില്ല. ഓവാലിയിൽ കാട്ടാന ശല്യത്തിന് പരിഹാരം കാണാൻ വനംവകുപ്പിന് സാധിക്കുന്നില്ലെന്നാണ് നാട്ടുകാരുടെ പരാതി. ഓവാലി പഞ്ചായത്തിൽ ഭീതി പരത്തുന്ന രാധാകൃഷ്ണൻ എന്ന കൊലയാളി ആനയെ മയക്കുവെടിവച്ച് പിടികൂടി മുതുമലയിലേക്ക് കൊണ്ടു പോകാൻ വനംവകുപ്പിന് ഇതുവരെ സാധിച്ചിട്ടില്ല. ആനയെ പിടികൂടണമെന്ന് ജനങ്ങൾ ഒന്നടങ്കം ആവശ്യപ്പെട്ടു വരികയാണ്. ഈ ആനയെ പിടികൂടുന്നതിനായി പതിനഞ്ച് ദിവസം മുന്പ് വസീം, വിജയ് എന്നീ കുംകിയാനകളെ മുതുമല ആന ക്യാന്പിൽ നിന്ന് ഓവാലിയിൽ എത്തിച്ചെങ്കിലും മേലധികാരികളിൽ നിന്ന് ആനയെ പിടികൂടാനോ ഉൾവനത്തിലേക്ക് തുരത്തിയോടിക്കാനോ ഉള്ള ഓർഡർ ഇതുവരെ ലഭിച്ചിട്ടില്ലെന്നാണ് പറയപ്പെടുന്നത്. കാട്ടാന കലിയിൽ മനുഷ്യ ജീവനുകൾ പൊലിയുന്പോഴും വനംവകുപ്പ് അനങ്ങാപാറ നയമാണ് സ്വീകരിക്കുന്നതെന്ന് നാട്ടുകാർ ആരോപിച്ചു. ഓവാലി പഞ്ചായത്തിൽ 13 മനുഷ്യ ജീവനുകളാണ് രാധാകൃഷ്ണൻ എന്ന കൊലയാളി ആന ഇതുവരെ അപഹരിച്ചത്. പത്ത് വർഷമായി ഈ ആന ഓവാലിയിൽ ഭീതി പരത്തുകയാണ്. നാട്ടുകാർ റോഡ് ഉപരോധിച്ചു ഗൂഡല്ലൂർ: ഓവാലി പഞ്ചായത്തിൽ കാട്ടാന ആക്രമണത്തിൽ എസ്റ്റേറ്റ് സൂപ്പർവൈസർ കൊല്ലപ്പെട്ടതിൽ പ്രതിഷേധിച്ച് നാട്ടുകാർ മേൽഗൂഡല്ലൂരിൽ ഊട്ടി-ഗൂഡല്ലൂർ ദേശീയ പാത ഉപരോധിച്ചു. മരണപ്പെട്ട ആളുടെ മകന് സർക്കാർ ജോലി നൽകുക, കാട്ടാന പ്രശ്നത്തിന് ശാശ്വത പരിഹാരം കാണുക, ജനങ്ങളുടെ ജീവനും സ്വത്തിനും സംരക്ഷണം നൽകുക തുടങ്ങിയ ആവശ്യങ്ങൾ ഉന്നയിച്ചാണ് സമരം നടത്തിയത്. ഇന്നലെ രാവിലെ പത്ത് മുതൽ ആരംഭിച്ച സമരം അര മണിക്കൂർ നീണ്ടു. പോലീസ് ഉദ്യോഗസ്ഥർ സ്ഥലത്തെത്തി സമരക്കാരുമായി ചർച്ച നടത്തിയെങ്കിലും തുടക്കത്തിൽ ഫലം കണ്ടില്ല. സമരക്കാരെ പോലീസ് അറസ്റ്റു ചെയ്യുകയായിരുന്നു. ഇതേത്തുടർന്ന് ഈ റൂട്ടിൽ ഗതാഗതം തടസപ്പെട്ടു. റോഡിന്‍റെ ഇരുവശങ്ങളിലും ധാരാളം വാഹനങ്ങൾ കുടുങ്ങി കിടന്നു. ദേവാല ഡിവൈഎസ്പി ജയപാൽ, ഗൂഡല്ലൂർ സിഐ രാജേന്ദ്ര പ്രസാദ്, എസിഎഫ്, തുഷാർ ഷിൻഡെ, തഹസിൽദാർ മുത്തുമാരി, ആശുപത്രി സിഎംഒ സുരേഷ്, ഓവാലി റേഞ്ചർ വീരമണി എന്നിവർ സ്ഥലത്തെത്തി രാഷ്ട്രീയ നേതാക്കളുമായും സമരക്കാരുമായും ചർച്ച നടത്തി. മരണപ്പെട്ട ആളുടെ മകന് വില്ലേജ് ഓഫീസ് അസിസ്റ്റന്‍റ് ജോലി നൽകുമെന്നും പത്ത് ലക്ഷം രൂപ നഷ്ട പരിഹാരം നൽകുമെന്നും വന്യജീവി പ്രശ്നത്തിന് പരിഹാരം കാണുമെന്നും രാധാകൃഷ്ണൻ ആനയെ പിടികൂടാനുള്ള ശ്രമം നടത്തുമെന്നും അറസ്റ്റു ചെയ്ത സമരക്കാരെ വിട്ടയക്കുമെന്നും ജനവാസ മേഖലയിൽ സോളാർ വേലി സ്ഥാപിക്കുമെന്നും ആശുപത്രിയിലെ ഡ്യുട്ടി ഡോക്ടർക്കെതിരേ കർശന നടപടി സ്വീകരിക്കുമെന്നും അധികാരികൾ ഉറപ്പ് നൽകി. അഡ്വ.എം. ദ്രാവിഡമണി, എം. പാണ്ഡ്യരാജ്, ബാബു, ഗൂഡല്ലൂർ നഗരസഭാ വൈസ് ചെയർമാൻ ശിവരാജ്, എൻ. വാസു, എ. മുഹമ്മദ് ഗനി, കെ. സഹദേവൻ, നാട്ടുകാർ തുടങ്ങിയവർ ചർച്ചയിൽ പങ്കെടുത്തു.

പെരുന്തട്ടയിൽ കടുവയും പുലിയും ഏറ്റുമുട്ടിയെന്ന് നാട്ടുകാർ

കൽപ്പറ്റ: വയനാട്ടിൽ കൽപ്പറ്റ നഗരത്തിനടുത്തുള്ള പെരുന്തട്ടയിൽ കടുവയും പുലിയും ഏറ്റുമുട്ടിയെന്ന് നാട്ടുകാർ. ജനവാസകേന്ദ്രത്തിൽ ഹെൽത്ത് സെന്‍ററിനു സമീപം തിങ്കളാഴ്ച രാത്രി പത്തോടെയായിരുന്നു വന്യമൃഗങ്ങളുടെ സംഘട്ടനമെന്ന് പ്രദേശവാസികളിൽ ചിലർ പറഞ്ഞു. ഇത് കുറച്ചുനേരം നീണ്ടുനിന്നതായി അവർ അവകാശപ്പെട്ടു. ഇന്നു രാവിലെ വനസേനാംഗങ്ങൾ സ്ഥലത്ത് പരിശോധന നടത്തിയെങ്കിലും പുലി-കടുവ ഏറ്റുമുട്ടൽ സ്ഥിരീകരിച്ചില്ലെന്നാണ് വിവരം. ഹെൽത്ത് സെന്‍റർ പരിസരത്ത് വന്യമൃഗത്തിന്‍റെ രോമവും വിസർജ്യവും കണ്ടെത്തിയിട്ടുണ്ട്. പുലി സാന്നിധ്യമുള്ള പ്രദേശമാണ് തോട്ടം മേഖലയിലുള്ള പെരുന്തട്ട. ഇവിടെനിന്നു ഏതാനും കിലോമീറ്റർ അകലെ ചുണ്ടേലിനു സമീപം കഴിഞ്ഞ ദിവസം കടുവ എത്തിയിരുന്നു.

തങ്കച്ചനെ കള്ളക്കേസിൽ കുടുക്കി ജയിലിലടച്ച സംഭവം: ഡിവൈഎസ്പിയുടെ നേതൃത്വത്തിൽ അന്വേഷണം ആരംഭിച്ചു

പുൽപ്പള്ളി: കോണ്‍ഗ്രസ് വാർഡ് പ്രസിഡന്‍റ് കാനാട്ടുമല തങ്കച്ചനെ കള്ളക്കേസിൽ കുടുക്കി ജയിലിൽ അടച്ച സംഭവത്തിൽ ബത്തേരി ഡിവൈഎസ്പി കെ.കെ. അബ്ദുൾ ഷെരീഫിന്‍റെ നേതൃത്വത്തിൽ അന്വേഷണം ആരംഭിച്ചു. തങ്കച്ചന്‍റെ മരക്കടവിലെ വീട്ടിലെത്തിയ ഡിവൈഎസ്പിയുടെ നേതൃത്വത്തിലുള്ള പുതിയ അന്വേഷണ സംഘം മൊഴിയെടുത്തു. ഇന്നലെ വൈകുന്നേരത്തോടെയാണ് അന്വേഷണ സംഘം തങ്കച്ചന്‍റെ വീട്ടിലെത്തിയത്. തങ്കച്ചനിൽനിന്നും കുടുംബങ്ങളിൽ നിന്നും അന്വേഷണ സംഘം വിശദമായ മൊഴിയെടുത്തു. കോണ്‍ഗ്രസിനുള്ളിലെ ഗ്രൂപ്പ് പോരാണ് കേസിനിടയാക്കിയതെന്ന ആരോപണത്തിന്‍റെ പശ്ചാത്തലവും ഇതിന് പിന്നിൽ ഗൂഢാലോചന നടത്തിയതായി സംശയിക്കുന്ന നേതാക്കളുടെ പേര് വിവരങ്ങളും തങ്കച്ചൻ അന്വേഷണ സംഘത്തിന് നൽകി.

ലോകസമാധാനം വിശ്വാസിയുടെ പ്രാർഥനയാകണം: ആർച്ച് ബിഷപ് ഡോ. വർഗീസ് ചക്കാലക്കൽ

കൽപ്പറ്റ: ലോകസമാധാനത്തിന് വിശ്വാസസമൂഹം പ്രാർഥനയോടെ പ്രവർത്തിക്കണമെന്ന് കോഴിക്കോട് അതിരൂപത ആർച്ച് ബിഷപ് ഡോ. വർഗീസ് ചക്കാലക്കൽ. മുണ്ടേരി പരിശുദ്ധ ആരോഗ്യമാതാ ദേവാലയത്തിൽ ദിവ്യബലിക്കിടെ സന്ദേശം നൽകുകയായിരുന്നു അദ്ദേഹം. ദേവാലയത്തിന്‍റെ 31-മത് തിരുനാൾ ആഘോഷത്തിൽ പങ്കെടുക്കുന്നതിനാണ് പിതാവ് മുണ്ടേരിയിലെത്തിയത്. തിരുഹൃദയ ഇടവക വികാരി ഫാ. വിൻസന്‍റ് പുളിക്കൽ, ഫാ.ഷാജൻ ജോസഫ്, പ്രസുദേന്തിമാർ, തിരുനാൾ കമ്മിറ്റി അംഗങ്ങൾ എന്നിവരുടെ നേതൃത്വത്തിൽ മുണ്ടേരി ജംഗ്ഷനിൽ പിതാവിനെ സ്വീകരിച്ച് ദേവാലയത്തിലേക്ക് ആനയിച്ചു.

ഗൂഡല്ലൂർ നഗരത്തിലെ റോഡിലെ കുഴികൾ അടച്ചു

ഗൂഡല്ലൂർ: ഗൂഡല്ലൂർ നഗരത്തിലെ റോഡിലെ കുഴികൾ താത്കാലികമായി അടച്ചു. പാടെ തകർന്ന റോഡിലെ വലിയ കുഴികളാണ് ട്രാഫിക് പോലീസ് അടച്ചത്. റോഡിന്‍റെ അറ്റകുറ്റ പ്രവൃത്തികൾ നടത്തിയത് വാഹനയാത്രക്കാർക്ക് ആശ്വാസമായിട്ടുണ്ട്. ഇത് അഞ്ചാംതവണയാണ് റോഡിന്‍റെ അറ്റകുറ്റ പ്രവൃത്തികൾ നടത്തുന്നത്. നാല് തവണ പൊതുമരാമത്ത് വകുപ്പിന്‍റെ നേതൃത്വത്തിലാണ് അറ്റകുറ്റ പ്രവൃത്തികൾ നടത്തിയത്. ഊട്ടി-മൈസൂർ ദേശീയ പാതയും ഗൂഡല്ലൂർ-കോഴിക്കോട് സംസ്ഥാന പാതയും പാടെ തകർന്നിരിക്കുകയാണ്. വലിയ കുഴികളാണ് പലയിടങ്ങളിലും രൂപപ്പെട്ടിരിക്കുന്നത്. ഗൂഡല്ലൂർ പഴയ ബസ്റ്റാൻഡിലാണ് റോഡിന്‍റെ അറ്റകുറ്റ പ്രവൃത്തികൾ നടത്തിയത്. നീലഗിരിയിലെ പ്രധാന നഗരത്തിലെ റോഡാണ് പാടെ തകർന്നിരിക്കുന്നത്. മഴക്കാലമായതോടെ നഗരത്തിൽ പലയിടങ്ങളിലും വെള്ളക്കെട്ടുകൾ രൂപപ്പെട്ടു. ദിനംപ്രതി ആയിരക്കണക്കിന് വാഹനങ്ങളാണ് ഗൂഡല്ലൂരിലൂടെ കടന്നു പോകുന്നത്. റോഡ് ടാറിംഗ് നടത്തണമെന്ന് ആവശ്യപ്പെട്ട് നാട്ടുകാർ നിരന്തരം സമരം നടത്തിയെങ്കിലും ഇതുവരെ റോഡ് ടാറിംഗ് നടത്താൻ അധികൃതർ തയാറായിട്ടില്ല. റോഡിലെ കുഴികളിൽ വാഹനങ്ങൾ വീണ് അപകടത്തിൽപ്പെടുന്നത് നിത്യസംഭവമായിരിക്കുകയാണ്. കേന്ദ്ര-സംസ്ഥാന സർക്കാറുകൾ റോഡുകൾ നന്നാക്കാൻ തയ്യാറാകണമെന്നാണ് ജനങ്ങൾ ആവശ്യപ്പെടുന്നത്.

ടാങ്ക് വൃത്തിയാക്കുന്നതിന്‍റെ ഭാഗമായി ജല വിതരണം മുടങ്ങും

കൽപ്പറ്റ: ജല അതോറിറ്റിയുടെ കൽപ്പറ്റ എസ്പി ഓഫീസ് പരിസരത്തെ ടാങ്ക് വൃത്തിയാക്കുന്നതിന്‍റെഭാഗമായി വിവിധ പ്രദേശങ്ങളിൽ ഇന്ന് രാവിലെ എട്ട് മുതൽ വൈകുന്നേരം 5.30 വരെ ജലവിതരണം മുടങ്ങുമെന്ന് അസിസ്റ്റന്‍റ് എൻജിനീയർ അറിയിച്ചു. ജലവിതരണം മുടങ്ങുന്ന പ്രദേശങ്ങൾ: എംജിടി മുതൽ മുനിസിപ്പാലിറ്റി ഒരു ഭാഗം, ടൗണ്‍, കന്യാ ഗുരുകുലം ഭാഗം, ചോയി റോഡ്, കൈനാട്ടി, എണ്ണപന റോഡ്, ഗാന്ധിനഗർ റോഡ്, വിദ്യാനഗർ റോഡ്, പുളിയർമല റോഡ്, പുളിയർമല ഉന്നതി ഭാഗം, കരടി മണ്ണ് റോഡ്, വടോത്ത് റോഡ്, കരിയാത്തൻകാവ് ഭാഗം, ഓടന്പം റോഡ്, ഓടന്പം ഉന്നതി ഭാഗം, ഓടന്പം അങ്കണവാടി കുന്ന്റോഡ്, എസ്പി ഓഫീസ് റോഡ് എമിലി റോഡ് വരെ, എസ്എൻ നഗർ, സ്നേഹനഗർ റോഡ്, എസ്പി ഓഫീസ് മുതൽ മണിയങ്കോട് വരെ, എമിലി പഴയ ടാങ്ക് ഭാഗം, എമിലി ഭജന മഠം ഭാഗം, എമിലി ഫാത്തിമ്മ കുന്ന് ഭാഗം, നെടുങ്കോട് ഭാഗം, നെടുങ്കോട്കുന്ന് ഭാഗം, നെടുങ്കോട് അഞ്ച് വീട് ഭാഗം, മണിയങ്കോട് ഭാഗം, മണിയങ്കോട് മുതൽ മുണ്ടേരിറോഡ് ഒരു ഭാഗം, മുണ്ടേരി മിച്ചഭൂമി ഭാഗം, മുണ്ടേരി ശാന്തിനഗർ 2 റോഡ്, മണിയങ്കോട് റേഷൻ ഷോപ്പ് ഭാഗം, മണിയങ്കോട് ഉന്നതി ഭാഗം, മണിയങ്കോട് മാടക്കര ഉന്നതി റോഡ്, കോകുഴി റോഡ്, കോക്കുഴി ഉന്നതി, കോക്കുഴി പൊയിൽ ഉന്നതി റോഡ്, നെടു നിലം റോഡ്, നെടു നിലം ഉന്നതി ഭാഗം, നെടു നിലം വൃന്ദാവൻ റോഡ് ഒന്ന്രണ്ട്, സിന്ദൂർകുന്ന് റോഡ്, കോട്ടച്ചിറ റോഡ്, പൊന്നട റോഡ്, പൊന്നട അങ്കണവാടി റോഡ്.

ബൈക്ക് യാത്രികൻ മരിച്ച സംഭവം; നാട്ടുകാർ പോലീസ് സ്റ്റേഷൻ ഉപരോധിച്ചു

സുൽത്താൻ ബത്തേരി: അന്തർസംസ്ഥാന പാതയായ സുൽത്താൻ ബത്തേരി - ഊട്ടി റോഡിൽ മുണ്ടക്കൊല്ലിയിലുണ്ടായ വാഹനാപകടത്തിൽ യുവാവ് മരിക്കാനിടയായ സംഭവത്തിൽ അപകടത്തിൽപ്പെട്ട കെഎസ്ആർടിസി ബസ് യാത്ര തുടരാൻ അനുവദിച്ച നൂൽപ്പുഴ പോലീസിന്‍റെ നടപടിയിൽ പ്രതിഷേധിച്ച് നാട്ടുകാർ പോലീസ് സ്റ്റേഷൻ ഉപരോധിച്ചു. നെല്ലാക്കോട്ട പാക്കണ മടക്കൽ വീട്ടിൽ മുഹമ്മദ് ഹാഷീം ഇസ്മയിൽ (32) ആണ് ഇന്നലെ രാവിലെ മുണ്ടക്കൊല്ലിയിൽ ഉണ്ടായ വാഹന അപകടത്തിൽ മരിച്ചത്. സുൽത്താൻ ബത്തേരിയിൽ നിന്ന് കോയന്പത്തൂർക്ക് പോകുകയായിരുന്ന കെഎസ്ആർടിസി ബസും എതിരേ വന്ന മുഹമ്മദ് ഹാഷീം ഇസ്മയിൽ സഞ്ചരിച്ച ബൈക്കും തമ്മിൽ കീട്ടിയിടിച്ചാണ് അപകടം. സംഭവ സ്ഥലത്ത് ബൈക്ക് യാത്രികനായ യുവാവ് മരിച്ചു. സ്ഥലത്തെത്തിയ നൂൽപ്പുഴ പോലീസ് ബസ് യാത്ര തുടരാൻ അനുവദിച്ചുവെന്നാരോപിച്ചാണ് നാട്ടുകാർ പോലീസ് സ്റ്റേഷൻ ഉപരോധിച്ചത്. കാലത്ത് പത്തിന് തുടങ്ങിയ ഉപരോധം ഉച്ചയോടെയാണ് അവസാനിച്ചത്. സുൽത്താൻ ബത്തേരി ഡിവൈഎസ്പി സംഭവ സ്ഥലത്തെത്തി പ്രക്ഷേഭകരുമായി ചർച്ച നടത്തുകയും സംഭവത്തിൽ പോലീസിന്‍റെ ഭാഗത്ത് നിന്ന് വീഴ്ചയുണ്ടായിട്ടുണ്ടങ്കിൽ നടപടിയെടുക്കുമെന്ന് അറിയിച്ചതോടെയാണ് സ്റ്റേഷൻ ഉപരോധം അവസാനിപ്പിച്ചത്.

സുറിയാനി സൂനോറോ പള്ളിയുടെ പ്ലാറ്റിനം ജൂബിലി സമാപിച്ചു

കോറോം: സെന്‍റ് മേരീസ് യാക്കോബായ സുറിയാനി സൂനോറോ പള്ളിയുടെ പ്ലാറ്റിനം ജൂബിലി സമാപനം ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ ജുനൈദ് കൈപ്പാണി ഉദ്ഘാടനം ചെയ്തു. മലബാർ ഭദ്രാസനാധിപൻ ഡോ. ഗീവർഗീസ് മാർ സ്തേഫാനോസ് മെത്രാപ്പോലീത്ത അധ്യക്ഷത വഹിച്ചു. ജില്ലാ പഞ്ചായത്ത് അംഗം കെ. വിജയൻ, മലബാർ ഭദ്രാസന വൈദീക സെക്രട്ടറി ഫാ. മത്തായിക്കുഞ്ഞ് ചാത്തനാട്ടുകുടി, തൊണ്ടർനാട് പഞ്ചായത്ത് അംഗം കെ.ജെ. ഏലിയാമ്മ, വികാരി ഫാ. എൽദോ കൂരൻതാഴത്തു പറന്പിൽ, ട്രസ്റ്റി ബൈജു തൊണ്ടുങ്ങൽ സഭാ മാനേജിംഗ് കമ്മിറ്റി അംഗം കെ.എം. ഷിനോജ്, പള്ളി സെക്രട്ടറി അഖിൽ ഏലിയാസ്, പെരുന്നാൾ ജനറൽ കണ്‍വീനർ ജിജോ വള്ളിക്കാട്ടിൽ, ഫാ. സിനു ചാക്കോ എന്നിവർ പ്രസംഗിച്ചു. മാതാവിന്‍റെ ജനനപ്പെരുന്നാളിന്‍റെ ഭാഗമായി കാൽനട തീർത്ഥയാത്ര, മൂന്നിൻമേൽ കുർബാന, മധ്യസ്ഥ പ്രാർഥന, സുനോറോ വണക്കം, നേർച്ച ഭക്ഷണം എന്നിവ നടന്നു. പെരുന്നാളിന്‍റെ ഭാഗമായി നടത്തിയ മത്സര വിജയികൾക്ക് സമ്മാനങ്ങൾ നൽകി. സ്കോളർഷിപ് വിതരണവും നടന്നു. ദൈവമാതാവിന്‍റെ സൂനോറോ സ്ഥാപിച്ച കോറോം സെന്‍റ് മേരീസ് യാക്കോബായ സുറിയാനി സൂനോറോ പള്ളിയിൽ നടന്ന് എട്ട് നോന്പാചരണത്തിനും സമാപനമായി.

അന്പലവയൽ ഗ്രാമപഞ്ചായത്ത് നവീകരിച്ച ഓഫീസ് ഉദ്ഘാടനം ചെയ്തു

സുൽത്താൻ ബത്തേരി: അന്പലവയൽ ഗ്രാമപ്പഞ്ചായത്തിലെ പുതിയ ഓഫീസ് കെട്ടിടവും നവീകരിച്ച കുടുംബശ്രീ ഓഫീസ് കെട്ടിടവും സുൽത്താൻ ബത്തേരി ബ്ലോക്ക് പഞ്ചായത്ത് പ്രസിഡന്‍റ് സി. അസൈനാർ ഉദ്ഘാടനം ചെയ്തു. കുടുംബശ്രീ തനത് ഫണ്ട് ഉപയോഗിച്ച് നവീകരിച്ച സിഡിഎസ് ഓഫീസിന്‍റെയും മാതൃകാ ജൻഡർ റിസോഴ്സ് സെന്‍ററിന്‍റെയും ഉദ്ഘാടനവും ചടങ്ങിൽ നടന്നു. മുപ്പതോളം ജീവനക്കാർ ജോലി ചെയ്യുന്ന അന്പലവയൽ ഗ്രാമപ്പഞ്ചായത്ത് ഓഫീസ് പഴയ കെട്ടിടത്തിലെ പരിമിതികൾ കാരണം വീർപ്പുമുട്ടുകയായിരുന്നു. പുതിയ കെട്ടിടത്തിലേക്ക് ഓഫീസ് പ്രവർത്തനം മാറുന്പോൾ പൊതുജനങ്ങൾക്ക് വിവിധ ആവശ്യങ്ങൾക്കായി രണ്ടാം നിലയിലേക്ക് കയറിയിറങ്ങേണ്ട ആവശ്യമില്ലെന്ന് മാത്രമല്ല സേവനങ്ങൾ കൂടുതൽ സൗകര്യപ്രദമായി ലഭ്യമാവുകയും ചെയ്യും. വിവിധ പ്രോജക്ടുകളിലായി ആകെ 96.48 ലക്ഷം രൂപ ചെലവഴിച്ചാണ് കെട്ടിട നിർമാണം പൂർത്തീകരിച്ചത്. ധനകാര്യ കമ്മീഷൻ ഗ്രാന്‍റ് ഉപയോഗിച്ച് 2022-2023 വർഷത്തിലാണ് കെട്ടിട നിർമാണം ആരംഭിച്ചത്. വയറിംഗ്, പെയിന്‍റിംഗ്, ഫർണിച്ചർ പ്രവൃത്തികൾ, ടോയ് ലറ്റ് നവീകരണം ഉൾപ്പെടെ അനുബന്ധ പ്രവൃത്തികൾ തുടങ്ങി മുഴുവൻ പ്രവൃത്തികളും ഇപ്പോൾ പൂർത്തിയായി. ഗ്രാമപ്പഞ്ചായത്ത് പ്രസിഡന്‍റ് സി.കെ. ഹഫ്സത്ത് അധ്യക്ഷത വഹിച്ചു. വൈസ് പ്രസിഡന്‍റ് കെ. ഷമീർ, സെക്രട്ടറി കെ.എ. അബ്ദുൾ ജലീൽ, സുൽത്താൻ ബത്തേരി ബ്ലോക്ക് പഞ്ചായത്ത് ആരോഗ്യവിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ അനീഷ് ബി. നായർ, ബ്ലോക്ക് പഞ്ചായത്ത് അംഗങ്ങളായ എ.എസ്. വിജയ, ഗ്ലാഡീസ് സ്കറിയ, അന്പലവയൽ ഗ്രാമപ്പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻമാരായ ഷീജ ബാബു, ജെസി ജോർജ്, ടി.ബി. സെനു, ഗ്രാമപ്പഞ്ചായത്ത് അംഗങ്ങളായ എൻ.സി. കൃഷ്ണകുമാർ, വി.വി. രാജൻ, അന്പലവയൽ സിഡിഎസ് ചെയർപേർസണ്‍ നിഷ രഘു, പി.കെ. സത്താർ, പഞ്ചായത്ത് അസിസ്റ്റന്‍റ് സെക്രട്ടറി കെ.ജി. ബിജു എന്നിവർ പ്രസംഗിച്ചു.

കോപ്പിപോഡ് സ്പീഷീസുകളുടെ ജനിതക ബാർകോഡ് പഠനവുമായി മേരിമാതാ കോളജ് ജന്തു ശാസ്ത്ര വിഭാഗം

മാനന്തവാടി: ജൈവസൂചികാ ഗണത്തിൽ പെടുന്ന ജീവികളുടെ നിർണായക ജനിതക ബാർകോഡ് പഠനവുമായി മേരിമാതാ കോളജ് ജന്തു ശാസ്ത്ര വിഭാഗം. സമുദ്രോപരിതലത്തിൽ ജീവിക്കുന്ന ജൈവ സൂചികാ ഗണത്തിൽപ്പെടുന്ന "പോണ്ടെല്ലിടെ’ കുടുംബത്തിലെ കോപ്പിപോഡ് സ്പീഷീസുകളുടെ ജനിത ബാർകോഡുകളെ കുറിച്ചുള്ള പഠനമാണ് ഇവർ നടത്തിയത്. സമുദ്രത്തിലെ മൽസ്യസന്പത്തുകളും ജൈവ വൈവിധ്യവും കാത്തു സൂക്ഷിക്കുന്നതിൽ നിർണായക പങ്കു വഹിക്കുന്ന ചെറുജീവികളാണ് കോപ്പിപോടുകൾ. സമുദ്രത്തിലെ പോണ്ടെല്ലിടെ കുടുംബത്തിൽ പെടുന്ന കോപ്പിപോഡ് സ്പീഷീസുകൾ അന്താരാഷ്ട്രസമുദ്രജല പ്രവാഹങ്ങൾ, സമുദ്രഅമ്ലീകരണം, സമുദ്ര താപനിലാ വ്യതിയാനം എന്നിവയുടെ പഠനത്തിനായുള്ള ജൈവ സൂചികകളായി ഉപയോഗിക്കുന്നു. ലക്ഷദ്വീപ് സമൂഹങ്ങളിലെ വിവിധ ലഗൂണുകളിലും അറബിക്കടലിലും നടത്തിയ പഠനത്തിൽ പതിമൂന്നു പോണ്ടെല്ല കോപ്പിപോഡ് സ്പീഷീസുകളുടെ എഴുപത്തിനാലോളം ജനിത ബാർകോഡുകളാണ് വികസിപ്പിച്ചത്. പസഫിക് സമുദ്രത്തിലെ ഹവായ് ദ്വീപിൽ കണ്ടുവന്നിരുന്ന കോപ്പിപോഡ് സ്പീഷീസ് ഉൾപ്പടെ തിരിച്ചറിയാൻ പ്രയാസം നേരിട്ടിരുന്നതും വിവിധ സമുദ്ര മേഖലകളിൽ നിന്നും നിലവിൽ തെറ്റായി വർഗീകരിച്ചിരുന്നതുമായ പല സ്പീഷീസുകളെയും ശരിയായ വർഗീകരണ പദവിയിൽ ഉൾപ്പെടുത്താൻ ഈ പഠനം സഹായിച്ചു. കൂടാതെ നിലവിൽ വികസിപ്പിച്ച ജനിത ബാർകോഡുകൾ ലോകത്തിലെ വിവിധ സാമുദ്രിക മേഖലകളിലെ കോപ്പിപോഡ് സ്പീഷീസുകളെ എളുപ്പത്തിലും ശരിയായും തിരിച്ചറിയാനും ഗവേഷകർക്ക് സഹായകരമാകുമെന്ന് പഠനത്തിന് നേതൃത്വം നൽകിയ മേരി മാതാ കോളജ് ജന്തു ശാസ്ത്ര വിഭാഗം തലവൻ ഡോ. സനു വി. ഫ്രാൻസിസ് അഭിപ്രായപ്പെട്ടു. കണ്ണൂർ യൂണിവേഴ്സിറ്റി മുൻ വൈസ് ചാൻസലറും കൊച്ചിൻ യൂണിവേഴ്സിറ്റി മറൈൻ ബയോളജി സീനിയർ പ്രഫസറും ഡീനുമായ ഡോ.എസ്. ബിജോയ് നന്ദൻ ഗവേഷണത്തിൽ പ്രധാനഭാഗമായിരുന്നു. ജേർണൽ ഓഫ് അക്വാട്ടിക് ബയോളജി ആൻഡ് ഫിഷറീസ് എന്ന ശാസ്ത്ര ജേർണലിന്‍റെ പുതിയ ലക്കത്തിൽ പഠനം പ്രസിദ്ധീകരിച്ചിട്ടുണ്ട്.

ഡി ഫോറസ്റ്റേഷൻ : യൂറോപ്യൻ യൂണിയന്‍റെ പുതിയ നിലപാട് തിരുത്തുവാൻ സർക്കാരുകൾ രംഗത്ത് വരണം: കെ.ജെ. ദേവസ്യ

സുൽത്താൻ ബത്തേരി: കാപ്പി കൃഷിക്കായി വനം നശിപ്പിച്ചിട്ടില്ലെന്ന സർക്കാർ സർട്ടിഫിക്കറ്റ് കർഷകർ ലഭ്യമാക്കണമെന്ന യൂറോപ്യൻ യൂണിയന്‍റെ പുതിയ നിലപാട് തിരുത്തുവാൻ കേന്ദ്ര-സംസ്ഥാന സർക്കാരുകൾ അടിന്തരമായി രംഗത്ത് വരണമെന്ന് സൗത്ത് ഇന്ത്യൻ കോഫി ഗ്രോവേഴ്സ് അസോസിയേഷൻ പ്രസിഡന്‍റ് കെ.ജെ. ദേവസ്യ ആവശ്യപ്പെട്ടു. ഇന്ത്യയിൽ കോഫി കർഷകർക്ക് ഇത്തരമൊരു സർട്ടിഫിക്കറ്റ് ലഭിക്കണമെങ്കിൽ ചുരുങ്ങിയത് അഞ്ച് ഓഫീസുകൾ എങ്കിലും കയറിയിറങ്ങണം. ഓരോ ഉത്പാദകരും ഡി ഫോറസ്റ്റേഷനുവേണ്ടി ഓഫീസുകൾ കയറിയിറങ്ങുന്നു ഗതികേടുണ്ടാക്കരുത്. ഇന്ത്യൻ പാർലമെന്‍റ് നിയമസഭകളിൽ ചർച്ച ചെയ്ത് ഇവരുടെ ആവശ്യം അനിവാര്യമെങ്കിൽ സർക്കാരുകൾ തന്നെ മുൻകൈയെടുത്ത് കേരളം, കർണാടകം, തമിഴ്നാട്, ആന്ധ്രപ്രദേശ്, തെലുങ്കാന അടക്കമുള്ള സംസ്ഥാനങ്ങളിൽ കാപ്പി ഉത്പാദിപ്പിക്കുന്നവർ വനം വെട്ടി കാപ്പി വച്ചു പിടിപ്പിച്ചവരല്ലായെന്ന പൊതുവായ സർട്ടിഫിക്കറ്റ് നൽകി ഈ വ്യാപാരത്തിന് പ്രയാസമില്ലാത്തവിധം തീരുമാനമുണ്ടാക്കുകയാണ് വേണ്ടത്. ആഗോള താപനിലയുടെ ഗതിമാറ്റ കാലാവസ്ഥ വ്യതിയാനം എന്നിവ മുൻനിറുത്തി യുറോപ്യൻ യൂണിയന്‍റെ കണ്ടെത്തൽ തികച്ചും ശരിയല്ല. ലോകത്തിലുള്ള ഉത്പാദക രാജ്യങ്ങളിലെ ഇതുമായി ബന്ധപ്പെട്ട് ചർച്ചകൾ നടത്താൻ തയാറാവുകയാണ് വേണ്ടത്. ഒരുഇനം കാപ്പിയുടെ കാര്യത്തിൽ മാത്രം വ്യതിയാന ഹേതു കണ്ടുപിടിക്കാൻ കഴിയില്ല. മാത്രമല്ല ഇന്ത്യയിലെ തോട്ടങ്ങൾ വനാവരണമുള്ളതാണ്. ഇവിടെയാകട്ടെ നശീകരണമെന്ന ആരോപണങ്ങളുമില്ല. ഭക്ഷ്യ വസ്തുക്കളിലും മറ്റും ഒരു പ്രത്യേക ഇനത്തെ ഉന്നം വച്ചുള്ള നിരീക്ഷണം ശരിയല്ലെന്നും കെ.ജെ. ദേവസ്യ പറഞ്ഞു.

പ്രകൃതി സംരക്ഷണവും ശുചിത്വവും ഉറപ്പ് വരുത്തുന്നതാവണം ജില്ലയിലെ ടൂറിസം വികസനം: മന്ത്രി ഒ.ആർ. കേളു

മാനന്തവാടി: പ്രകൃതി സംരക്ഷണവും ശുചിത്വവും ഉറപ്പുവരുത്തിക്കൊണ്ടാവണം ജില്ലയിലെ ടൂറിസം വികസനമെന്ന് പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു. സംസ്ഥാന സർക്കാർ, വിനോദ സഞ്ചാര വകുപ്പ്, ജില്ലാ ടൂറിസം പ്രമോഷൻ കൗണ്‍സിൽ, ജില്ലാ ഭരണകൂടം എന്നിവയുടെ നേതൃത്വത്തിൽ വിവിധ ടൂറിസം സംഘടനകൾ, തദ്ദേശ സ്വയം ഭരണ സ്ഥാപനങ്ങൾ എന്നിവയുടെ സഹകരണത്തോടെ സംഘടിപ്പിക്കുന്ന ഓണം വാരാഘോഷത്തിന്‍റെ ഉദ്ഘാടനം മാനന്തവാടി പഴശി പാർക്ക് കേന്ദ്രത്തിൽ നിർവഹിച്ച് പ്രസംഗിക്കുകയായിരുന്നു മന്ത്രി. ഇന്ത്യയിലെ തന്നെ ഏറ്റവും മികച്ച ടൂറിസം കേന്ദ്രമായി കേരളം മാറുന്നതായി കണക്കുകൾ പറയുന്നു. വയനാട് ജില്ലയുടെ പ്രകൃതിയാണ് ജില്ലയുടെ ഏറ്റവും വലിയ ടൂറിസം സാധ്യത. കാടും മലയും പുഴയും മൃഗങ്ങളും തന്നെയാണ് കേരളത്തിലെ ഏറ്റവും നല്ല വിനോദ കേന്ദ്രമാക്കി ജില്ലയെ മാറ്റിയത്. വിനോദ സഞ്ചരികൾക്ക് ആവശ്യമായ സൗകര്യം ഒരുക്കേണ്ടത് ജില്ലയിലെ ജനങ്ങളാണെന്നും മന്ത്രി പറഞ്ഞു. എല്ലാ ആഘോഷങ്ങളും ടൂറിസം മേഖലയുമായി ബന്ധിപ്പിച്ചു നടത്താൻ സാധിക്കണം. അതിനായി കാലത്തിനനുസരിച്ച് ദീർഘവീക്ഷണത്തോടെയുള്ള കാഴ്ചപ്പാടുണ്ടാവണം. ജില്ലയിലെ വിനോദസഞ്ചാര മേഖലയിലൂടെ തൊഴിൽ സാധ്യതകൾ ഉറപ്പുവരുത്താൻ സാധിക്കുമെന്നും മന്ത്രി കൂട്ടിച്ചേർത്തു. ജില്ലയുടെ വിവിധ ഭാഗങ്ങളിലായി വിപുലമായ പരിപാടികളോടെയാണ് ഓണം വാരാഘോഷം സംഘടിപ്പിക്കുന്നത്. മാനന്തവാടി പഴശി പാർക്ക് കേന്ദ്രത്തിൽ പിന്നണി ഗായിക ചിത്ര അയ്യർ നയിച്ച സംഗീത രാവ് ആസ്വദിക്കാൻ വൻ ജനാവലിയാണ് എത്തിച്ചേർന്നത്. മാനന്തവാടി നഗരസഭ കുടുംബശ്രീ അവതരിപ്പിക്കുന്ന മെഗാ തിരുവാതിരയും വയലിൻ ഫ്യൂഷൻ, മാജിക്ക് ഷോ, ചാക്യാർക്കൂത്ത്, മെന്‍റലിസം, വയനാട് സെവൻ ബീറ്റ്സ് അവതരിപ്പിക്കുന്ന ഗാനമേള എന്നിവയും മാനന്തവാടി ബ്ലോക്ക് പഞ്ചായത്ത് സംഘടിപ്പിക്കുന്ന നൃത്തനൃത്യങ്ങളും അരങ്ങേറി. മാനന്തവാടി നഗരസഭ ചെയർപേഴ്സണ്‍ സി.കെ. രത്നവല്ലി അധ്യക്ഷത വഹിച്ചു. സബ്കളക്ടർ അതുൽ സാഗർ, മാനന്തവാടി നഗരസഭ കൗണ്‍സിലർ അരുണ്‍ കുമാർ, ജില്ലാ ടൂറിസം വകുപ്പ് ഡെപ്യൂട്ടി ഡയറക്ടർ ടി.സി. മനോജ്, ഡിടിപിസി സെക്രട്ടറി ബിനോഷ് കുഞ്ഞപ്പൻ, മാനന്തവാടി നഗരസഭ സിഡിഎസ് ചെയർപേഴ്സണ്‍ ഡോളി രഞ്ജിത്ത്, ടൂറിസം വികസന ഉപസമിതി അംഗം അലി ബ്രാൻ, ഡിടിപിസി മാനേജർ വി.ജെ. ഷിജു, ജനപ്രതിനിധികൾ, രാഷ്ട്രീയപാർട്ടി പ്രവർത്തകർ, ഉദ്യോഗസ്ഥർ എന്നിവർ പങ്കെടുത്തു.

സംസ്ഥാന എക്സൈസ് കലാകായിക മേള; സംഘാടക സമിതി രൂപീകരിച്ചു

കൽപ്പറ്റ: 21-ാമത് സംസ്ഥാന എക്സൈസ് കലാകായിക മേള ഒക്ടോബർ 17, 18, 19 തീയതികളിൽ വയനാട് ജില്ലയിൽ നടക്കും. കലാമത്സരങ്ങൾ മുണ്ടേരി ജിവിഎച്ച്എസ്എസിലും കായിക ഇനങ്ങൾ മരവയലിലെ എം.കെ. ജിനചന്ദ്രൻ മെമ്മോറിയൽ ജില്ലാ സ്റ്റേഡിയത്തിലുമായിരിക്കും നടക്കുക. ഇതാദ്യമായാണ് സംസ്ഥാന കലാകായിക മേള വയനാട് ജില്ലയിൽ നടക്കുന്നത്. തിങ്കളാഴ്ച കൽപ്പറ്റ ജില്ലാ ആസുത്രണ ഭവൻ എ.പി.ജെ ഹാളിൽ ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാറുടെ അധ്യക്ഷതയിൽ ചേർന്ന യോഗത്തിൽ സംഘാടക സമിതിക്ക് രൂപം നൽകി. ടി. സിദ്ദിഖ് എംഎൽഎ യോഗം ഉദ്ഘാടനം ചെയ്തു. മുഖ്യമന്ത്രി പിണറായി വിജയൻ, പ്രതിപക്ഷ നേതാവ് വി.ഡി. സതീശൻ, തദ്ദേശ സ്വയംഭരണ എക്സൈസ് മന്ത്രി എം.ബി. രാജേഷ്, പട്ടികജാതി പട്ടികവർഗ പിന്നാക്ക ക്ഷേമ മന്ത്രി ഒ.ആർ. കേളു എന്നിവരെ മുഖ്യരക്ഷാധികാരികളാക്കി രൂപീകരിച്ച സംഘാടക സമിതിയിൽ പ്രിയങ്ക ഗാന്ധി എംപി, ടി. സിദ്ദിഖ് എംഎൽഎ, ഐ.സി. ബാലകൃഷ്ണൻ എംഎൽഎ, ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ, എക്സൈസ് കമ്മീഷണർ എം.ആർ. അജിത് കുമാർ, ജില്ലാ കളക്ടർ ഡി.ആർ. മേഘശ്രീ, ജില്ലാ പോലീസ് മേധാവി തപോഷ് ബസുമതാരി, അഡീഷണൽ എക്സൈസ് കമ്മീഷണർ എസ്. ദേവമനോഹർ, എക്സൈസ് സ്റ്റേറ്റ് വിജലൻസ് ഓഫീസർ പി. വിക്രമൻ, കൽപ്പറ്റ മുനിസിപ്പൽ ചെയർപേഴ്സണ്‍ ടി.ജെ. ഐസക്, മാനന്തവാടി ബ്ലോക്ക് പഞ്ചായത്ത് പ്രസിഡന്‍റ് ജസ്റ്റിൻ ബേബി, സുൽത്താൻ ബത്തേരി ബ്ലോക്ക് പഞ്ചായത്ത് പ്രസിഡന്‍റ് സി. അസൈനാർ, കൽപ്പറ്റ ബ്ലോക്ക് പ്രസിഡന്‍റ് ചന്ദ്രിക കൃഷ്ണൻ എന്നിവരാണ് രക്ഷാധികാരികൾ. വയനാട് ഡെപ്യൂട്ടി എക്സൈസ് കമ്മീഷണർ എ.ജെ. ഷാജിയാണ് സംഘാടക സമിതി ചെയർമാൻ. എക്സൈസ് ഓഫീസേഴ്സ് അസോസിയേഷൻ സംസ്ഥാന പ്രസിഡന്‍റ് ആർ. മോഹൻ കുമാർ, എക്സൈസ് സ്റ്റാഫ് അസോസിയേഷൻ സംസ്ഥാന പ്രസിഡന്‍റ് ടി. സജു കുമാർ, വയനാട് വിമുക്തി മാനേജർ സജിത് ചന്ദ്രൻ, അസിസ്റ്റന്‍റ് എക്സൈസ് കമ്മീഷണർ വൈ. പ്രസാദ് എന്നിവരെ വൈസ് ചെയർമാൻമാരായി തെരഞ്ഞെടുത്തു. എക്സൈസ് സ്റ്റാഫ് അസോസിയേഷൻ സെക്രട്ടറി കെ. സന്തോഷ് കുമാറാണ് സംഘാടക സമിതി ജനറൽ കണ്‍വീനർ. ഓഫീസേഴ്സ് അസോസിയേഷൻ ജില്ലാ വൈസ് പ്രസിഡന്‍റ് ടി. ഷർഫുദ്ദിൻ, ജില്ലാ സെക്രട്ടറി സുനിൽ, എക്സൈസ് സ്റ്റാഫ് അസോസിയേഷൻ ജില്ലാ പ്രസിഡന്‍റ് പി.ആർ. ജിനോഷ്, സെക്രട്ടറി നിക്കോളാസ് ജോസ് എന്നിവർ ജോയിന്‍റ് കണ്‍വീനർമാരാണ്. സംഘാടക സമിതി രൂപീകരണ യോഗത്തിൽ ജില്ലാ കളക്ടർ ഡി.ആർ. മേഘശ്രീ, ഡെപ്യൂട്ടി എക്സൈസ് കമ്മീഷണർ എ.ജെ. ഷാജി, എക്സൈസ് സ്റ്റേറ്റ് സ്പോർട്സ് ഓഫീസർ കെ.ആർ. അജയ്, ഉത്തരമേഖലാ ജോയിന്‍റ് എക്സൈസ് കമ്മീഷണർ എം. സുഗുണൻ, കോഴിക്കോട് ഡെപ്യൂട്ടി എക്സൈസ് കമ്മീഷണർ ജിമ്മി ജോസഫ്, കണ്ണൂർ ഡെപ്യൂട്ടി എക്സൈസ് കമ്മീഷണർ പി.കെ. സതീശ് കുമാർ, എഎസ്പി എൻ.ആർ. ജയരാജ്, വിവിധ വകുപ്പുകളുടെ ജില്ലാ മേധാവികൾ, മറ്റ് ഉദ്യോഗസ്ഥർ തുടങ്ങിയവർ പങ്കെടുത്തു.

പാർട്ടിയിലും പോലീസിലും വിശ്വാസം: തങ്കച്ചൻ-സിനി ദന്പതികൾ

കൽപ്പറ്റ: പോർച്ചിൽ കാറിനടിയിൽ സ്ഫോടക വസ്തുക്കളും കർണാടക നിർമിത മദ്യവും വച്ച് തന്നെ കേസിൽ കുടുക്കി ജയിലിൽ അടച്ച സംഭവത്തിൽ പോലീസ് തുടരുന്നതും കെപിസിസി നേതൃത്വം കമ്മീഷൻ മുഖേന നടത്തുമെന്നു അറിയിച്ചതുമായ അന്വേഷണങ്ങളിൽ വിശ്വാസമുണ്ടെന്ന് മുള്ളൻകൊല്ലി മരക്കടവ് കാനാട്ടുമലയിൽ തങ്കച്ചൻ. ഭാര്യ സിനിക്കൊപ്പം പ്രസ്ക്ലബിൽ നടത്തിയ വാർത്താസമ്മേളനത്തിലാണ് അദ്ദേഹം ഇങ്ങനെ പറഞ്ഞത്. ജില്ലാ പോലീസ് മേധാവിയുടെ നിർദേശാനുസരണം പുൽപ്പള്ളി പോലീസ് ഇൻസ്പെക്ടറുടെ നേതൃത്വത്തിൽ തുടരുന്ന അന്വേഷണം സംഭവത്തിലെ ഗൂഢാലോചന വെളിച്ചത്തുവരാൻ പര്യാപ്തമാകുമെന്നാണ് കരുതുന്നത്. രഹസ്യവിവരത്തിന്‍റെ അടിസ്ഥാനത്തിൽ ഓഗസ്റ്റ് 22ന് രാത്രി 11 മണിയോടെ വീട്ടുവളപ്പിലെത്തി കാറിനടിയിൽ സ്ഫോടകവസ്തുക്കളും മദ്യവും കണ്ടെത്തിയ പോലീസ് സത്യാവസ്ഥ പരിശോധിക്കാതെ കേസെടുക്കാനും അറസ്റ്റുചെയ്യാനും തിടുക്കം കാട്ടി. എങ്കിലും ഓഗസ്റ്റ് 24 മുതൽ വസ്തുനിഷ്ഠമായ അന്വേഷണമാണ് നടന്നത്. ഇതാണ് താൻ നിരപരാധിയാണെന്നു പോലീസിനു ബോധ്യപ്പെടാനും കോടതിയിൽ റിപ്പോർട്ട് നൽകാനും സഹായകമായത്. ഗൂഢലക്ഷ്യത്തെടെ പോർച്ചിൽ മദ്യവും സ്ഫോടകവസ്തുക്കളും വച്ച സംഭവത്തിൽ അറസ്റ്റിലായ മരക്കടവ് സ്വദേശി പ്രസാദ് കോണ്‍ഗ്രസ് അനുഭാവിയാണ്. തന്‍റെ വീടുപണി കരാറെടുത്തിരുന്നത് ഇദ്ദേഹമാണ്. ഗൂഢാലോചനയിൽ ഉൾപ്പെട്ടവർ കർണാടക മദ്യം വാങ്ങാൻ പ്രസാദിനെ ഉപയോഗപ്പെടുത്തുകയായിരുന്നുവെന്നാണ് മനസിലാക്കുന്നത്. പ്രദേശത്തെ ഒരു കോണ്‍ഗ്രസ് നേതാവിനാണ് മദ്യം കൈമാറിയതെന്നു ഇദ്ദേഹം പോലീസിൽ മൊഴി നൽകിയതായാണ് അറിയുന്നത്. തനിക്കെതിരായ ഗൂഢാലോചനയിൽ ജില്ലാ കോണ്‍ഗ്രസ് കമ്മിറ്റിയിലെ പ്രമുഖരടക്കം ചിലർക്ക് പങ്കുണ്ട്. ഗൂഢാലോചനയിൽ ഉൾപ്പെട്ടവരെന്നു സംശയിക്കുന്ന ആറ് പേരെക്കുറിച്ചുള്ള വിവരം പോലീസിന് കൈമാറിയിട്ടുണ്ട്. പോർച്ചിൽനിന്നു കണ്ടെടുത്ത മദ്യത്തിന്‍റെയും സ്ഫോടക വസ്തുക്കളുടെയും വിവരം ഓഗസ്റ്റ് 23നു രാവിലെ പോലീസ് റിമാൻഡ് റിപ്പോർട്ട് തയാറാക്കുന്നതിനു മുന്പ് പെരിക്കല്ലൂർ സ്വദേശി അദ്ദേഹത്തിന്‍റെ ഫേസ്ബുക്ക് പേജിലും പിന്നീട് വാട്സ്ആപിലും പോസ്റ്റ് ചെയ്തിരുന്നു. ഇതിൽ ദുരൂഹതയുണ്ട്. മുള്ളൻകൊല്ലി പഞ്ചായത്ത് ഭരണസമിതിയംഗവും ആറുമാസം മുന്പ് കോണ്‍ഗ്രസിൽ തിരിച്ചെത്തിയതുമായ വ്യക്തി ഒളിവിലാണ്. പോർച്ചിൽ മദ്യവും സ്ഫോടകവസ്തുക്കളും ഉണ്ടെന്നു പോലീസിൽ വിളിച്ചറിയിച്ചയാളും ഗൂഢാലോചനയിൽ പങ്കാളിയാണ്. സ്ഫോടക വസ്തുക്കൾ ആർ, എവിടെനിന്നു വാങ്ങി എന്നത് തെളിയേണ്ടതുണ്ട്. ജൂലൈ 12ന് പാടിച്ചിറ സഹകരണ ബാങ്ക് ഓഡിറ്റോറിയത്തിൽ നടന്ന കോണ്‍ഗ്രസ് മുള്ളൻകൊല്ലി പഞ്ചായത്ത് വികസന സെമിനാറിൽ പ്രശ്നങ്ങൾ ഉണ്ടായിരുന്നു. ചില അരുതായ്മകൾ ചൂണ്ടിക്കാട്ടിയതിനെത്തുടർന്നു പ്രകോപിതനായ ഡിസിസി പ്രസിഡന്‍റ് വേദിവിട്ടിറങ്ങി സദസിലുണ്ടായിരുന്ന കോണ്‍ഗ്രസ് പ്രവർത്തകരിൽ ഒരാളുടെ കഴുത്തിനു കുത്തിപ്പിടിച്ചതാണ് പ്രശ്നങ്ങൾക്ക് കാരണമായത്. അന്ന് മുള്ളൻകൊല്ലിയിൽനിന്നുള്ള ഒരു ഡിസിസി നേതാവ് തന്നെ ഒരു ദിവസമെങ്കിലും തന്നെ ജയിലിൽ കിടത്തുമെന്ന് വെല്ലുവിളിച്ചിരുന്നു. പാടിച്ചിറ സംഭവത്തിൽ പട്ടികവർഗക്കാരനായ കോണ്‍ഗ്രസ് നേതാവ് സ്പെഷൽ മൊബൈൽ സ്ക്വാഡിൽ നൽകിയ കള്ളക്കേസിൽ താൻ ഉൾപ്പെടെ 12 പേർ പ്രതികളാണ്. ഗൂഢാലോചനയുടെ ഫലമാണ് ഈ കേസും. പോർച്ചിൽ മദ്യവും സ്ഫോടകവസ്തുക്കളും വച്ച സംഭവത്തിൽ കമ്മീഷനെ നിയോഗിച്ച് അന്വേഷണം നടത്തി ഒരാഴ്ചയ്ക്കകം നടപടിയെടുക്കുമെന്നാണ് കെപിസിസി അധ്യക്ഷൻ അറിയിച്ചത്. ഗൂഢാലോചനയിൽ പങ്കാളികളെന്നു കരുതുന്നവരെ സംബന്ധിച്ച വിവരം കെപിസിസി അധ്യക്ഷനും നൽകിയിട്ടുണ്ട്. അദ്ദേഹം പറഞ്ഞതുപോലെ നടപടി ഉണ്ടാകുന്നില്ലെങ്കിൽ എന്തുചെയ്യണമെന്ന് പിന്നീട് തീരുമാനിക്കും. കേസിൽ കുടുങ്ങി ജയിലിൽ കിടന്നപ്പോൾ ഡിസിസി പ്രസിഡന്‍റ് തന്നെ കാണാനോ കുടുംബത്തെ സന്ദർശിക്കാനും ആശ്വസിപ്പിക്കാനോ കൂട്ടാക്കിയില്ല. തന്നെ അറിയില്ലെന്നാണ് ഡിസിസി പ്രസിഡന്‍റ് ചില മാധ്യമങ്ങളോട് പറഞ്ഞത്. മുള്ളൻകൊല്ലി പഞ്ചായത്ത് രണ്ടാംവാർഡ് കോണ്‍ഗ്രസ് കമ്മിറ്റിയുടെ അധ്യക്ഷനായ തന്നെ അറിയില്ലെന്ന ഡിസിസി പ്രസിഡന്‍റിന്‍റെ നിലപാട് പരിഹാസ്യമാണ്. ചെയ്യാത്ത തെറ്റിനാണ് 17 ദിവസം ജയിലിൽ കിടന്നത്. അറസ്റ്റിലായതുമുതൽ ജയിൽമോചിതനാകുന്നതുവരെ മരവിച്ച അവസ്ഥയിലായിരുന്നു മനസെന്നും തങ്കച്ചൻ പറഞ്ഞു.

സിപിഎം ജില്ലാസെക്രട്ടറി ബിജെപിയുടെ നാവായി അധപതിച്ചു: ടി. സിദ്ദിഖ് എംഎൽഎ

കൽപ്പറ്റ: സിപിഎം ജില്ലാസെക്രട്ടറി ബിജെപിയുടെ നാവായി അധപതിച്ചുവെന്ന് ടി. സിദ്ദിഖ് എംഎൽഎ. രാജ്യവ്യാപകമായി രാഹുൽ ഗാന്ധിയും കോണ്‍ഗ്രസും ഇന്ത്യാ മുന്നണിയുടെ ഭാഗമായി ബിഹാറിലും മറ്റും ഉന്നയിച്ച ‘വോട്ട് ചോരി’ പ്രചാരണത്തെ ദുർബലപ്പെടുത്തുന്ന നിലപാടാണ് തനിക്ക് ഇരട്ട വോട്ടുണ്ടെന്ന ആരോപണത്തിലൂടെ സിപിഎം ജില്ലാ സെക്രട്ടറി സ്വീകരിച്ചിരിക്കുന്നത്. ബിജെപിക്ക് ഉപയോഗിക്കാൻ ഒരു ആയുധം കൊടുക്കുന്നതിലൂടെ ബിജെപിയുടെ ജിഹ്വയായി സിപിഎം ജില്ലാ സെക്രട്ടറി മാറി. കൽപ്പറ്റ മുനിസിപ്പാലിറ്റിയിൽ വോട്ടർപട്ടികയിൽ ഉൾപ്പെടുത്താൻ ഫോം നാലു പ്രകാരം യഥാക്രമം അപേക്ഷ നൽകിയിരുന്നു. ഇതിനായി വോട്ടർ ഐഡിയുടെ പകർപ്പ് ഉൾപ്പെടെയാണ് അപേക്ഷ നൽകിയത്. ഇതുപ്രകാരം പെരുമണ്ണയിലെ വോട്ടർപട്ടികയിൽനിന്ന് പേരു നീക്കം ചെയ്യാൻ നിർദേശം നൽകേണ്ടത് തെരഞ്ഞെടുപ്പ് ഉദ്യോഗസ്ഥരാണ്. ഇതെല്ലാം മറച്ചുപിടിച്ചുകൊണ്ടാണ് സിപിഎം ജില്ലാസെക്രട്ടറി സ്ഥാനത്തിനിരിക്കുന്ന ഒരാൾ ബിജെപിയുടെ വക്താവായി പ്രവർത്തിക്കുന്നതെന്നും എംഎൽഎ പറഞ്ഞു. മാത്രമല്ല ഇതിന്‍റെ നടപടിക്രമം പൂർത്തിയാക്കാൻ ഇനിയും സമയമുണ്ട്. കോഴിക്കോട്ടെ വോട്ട് ഒഴിവാക്കണമെന്നു തെരഞ്ഞെടുപ്പ് ഉദ്യോഗസ്ഥരോടു നേരിട്ട് കത്തിലൂടെ ആവശ്യപ്പെട്ടിട്ടുമുണ്ട്. അത് നടപ്പാക്കേണ്ടതു തെരഞ്ഞെടുപ്പ് ഉദ്യോഗസ്ഥരാണ്. സിപിഎം ജില്ലാ സെക്രട്ടറിയുടെ ആരോപണം ജില്ലയിലെ സിപിഎമ്മിന്‍റെ ആഭ്യന്തര സംഘർഷങ്ങളിൽ നിന്ന് രക്ഷപ്പെടാനുള്ള നീക്കത്തിന്‍റെ ഭാഗമാണ്. എന്നാൽ മറ്റുള്ളവരുടെ മേലെ വ്യാജ ആക്ഷേപങ്ങൾ ഉന്നയിച്ച് സ്വന്തം പാർട്ടിയിലെ പടലപ്പിണക്കങ്ങൾ മറച്ചുപിടിക്കാമെന്നത് വ്യാമോഹം മാത്രമാണ്. വയനാട്ടിലെ സിപിഎം കടുത്ത വിഭാഗീയതയിലൂടെയാണ് കടന്നു പോകുന്നത്. പാർട്ടിയുടെ നിയന്ത്രണം നഷ്ടപ്പെട്ട ജില്ലാ സെക്രട്ടറിക്ക് പാർട്ടി പ്രവർത്തകരെ പിടിച്ചു നിർത്താൻ ബിജെപിയോടൊപ്പം ചേർന്ന് അവരുടെ നാവായി പ്രവർത്തിക്കുന്നത് സിപിഎം നേതൃത്വം തിരിച്ചറിയണമെന്നും എംഎൽഎ പറഞ്ഞു.

ടി. സിദ്ദിഖ് എംഎൽഎയ്ക്ക് ഇരട്ടവോട്ടെന്ന് സിപിഎം വയനാട് ജില്ലാ സെക്രട്ടറി

കൽപ്പറ്റ: കൽപ്പറ്റ എംഎൽഎയായ ടി. സിദ്ദിഖിനെതിരേ ആരോപണവുമായി സിപിഎം വയനാട് ജില്ലാ സെക്രട്ടറി കെ. റഫീഖ്. കോഴിക്കോട് ജില്ലയിലെ പെരുമണ്ണയിലും കൽപ്പറ്റയിലെ ഓണിവയലിലുമായി ഇരട്ട വോട്ടുണ്ടെന്നാണ് ആരോപണം. ഫേസ്ബുക്ക് പേജിലൂടെയാണ് ആരോപണം ഉന്നയിച്ചത്. നിയമവിരുദ്ധമായി കള്ളവോട്ട് ചേർത്ത് ജനാധിപത്യ സംവിധാനങ്ങൾ ദുർബലപ്പെടുത്തുകയാണ് ടി. സിദ്ദിഖ് എന്ന് അദ്ദേഹം ആരോപിച്ചു. വോട്ടർ പട്ടികയുടെ ചിത്രങ്ങൾ സഹിതമാണ് ഫേസ്ബുക്കിൽ ആരോപണം ഉന്നയിച്ചത്. ഫേസ്ബുക്ക് പോസ്റ്റ് ഇങ്ങനെ- “വോട്ടർ പട്ടികയിൽ ടി. സിദ്ദിഖ് എംഎൽഎ കോഴിക്കോട് ജില്ലയിലെ പെരുമണ്ണ പഞ്ചായത്തിലെ 20-ാം വാർഡായ പന്നിയൂർകുളത്ത് ക്രമനന്പർ 480 ൽ ഉണ്ട്. വയനാട് ജില്ലയിൽ കൽപ്പറ്റ നഗരസഭയിലെ ഡിവിഷൻ 25 ഓണിവയലിൽ ക്രമനന്പർ 799 ൽ വോട്ടർ പട്ടികയിലും ഉണ്ട്. ഒരാൾക്ക് തന്നെ രണ്ടിടത്ത് വോട്ട് ! ഉത്തരവാദിത്വപ്പെട്ട ഒരു ജനപ്രതിനിധി തന്നെ ഇത്തരത്തിൽ നിയമവിരുദ്ധമായി, ജനാധിപത്യവിരുദ്ധമായി പ്രവർത്തിക്കുന്നത്, കള്ളവോട്ട് ചേർക്കുന്നത് ജനാധിപത്യ സംവിധാനങ്ങളെ ദുർബലപ്പെടുത്തുന്നതും അങ്ങേയറ്റം പ്രതിഷേധാർഹവുമാണ്”.

തെരുവുനായയുടെ കടിയേറ്റ് മൂന്നാം ക്ലാസ് വിദ്യാർഥിക്ക് പരിക്ക്

പനമരം: പനമരം ഗവ. എൽപി സ്കൂൾ വിദ്യാർഥിക്ക് തെരുവുനായയുടെ കടിയേറ്റു. പനമരം ഗവ. എൽപി സ്കൂളിലെ മൂന്നാം ക്ലാസ് വിദ്യാർഥിയും നീരട്ടാടി നൂറുദ്ധീൻ ഉസ്താദിന്‍റെ മകനുമായ മുഹമ്മദ് ബിഷ്റുൽ ഹാഫി (എട്ട്) ക്കാണ് നായയുടെ കടിയേറ്റത്. ഇന്നലെ രാവിലെ സ്കൂളിലെത്തിയ കുട്ടിയെ തെരുവ് നായ ആക്രമിക്കുകയായിരുന്നു. കൂടെയുണ്ടായിരുന്നവർ ഒച്ചവച്ചതോടെയാണ് നായ പിൻതിരിഞ്ഞത്. ഇടതുകാലിന് പരിക്കേറ്റ കുട്ടിയെ പനമരം സിഎച്ച്സിയിൽ എത്തിക്കുകയും തുടർന്ന് രക്ഷിതാക്കളെത്തി മാനന്തവാടി ഗവ. മെഡിക്കൽ കോളജ് ആശുപത്രിയിൽ പ്രവേശിപ്പിച്ച് ചികിത്സ തേടി. ഓണാവധിയ്ക്ക് സ്കൂൾ പൂട്ടിയപ്പോൾ സ്കൂളും പരിസര പ്രദേശവും തെരുവ് നായയുടെ ആവാസ കേന്ദ്രമായി മാറിയിരുന്നു. ഇന്നലെ സ്കൂൾ തുറന്നെങ്കിലും കോന്പൗണ്ടിൽ കഴിഞ്ഞിരുന്ന നായ്ക്കൾ ഇവിടം വിട്ടു പോയിരുന്നില്ല.

സ്കൂൾ വിദ്യർഥിനി തൂങ്ങിമരിച്ച നിലയിൽ

പുൽപ്പള്ളി: സ്കൂള്‍ വിദ്യാര്‍ഥിനിയെ പുൽപ്പള്ളി ടൗണിനടുത്ത കൃഷിയിടത്തില്‍ തൂങ്ങിമരിച്ച നിലയില്‍ കണ്ടെത്തി. മീനംകൊല്ലി കനിഷ്ക നിവാസില്‍ കുമാറിന്‍റെ മകള്‍ കനിഷ്ക (16) ആണ് മരിച്ച നിലയില്‍ കണ്ടെത്തിയത്. ഞായറാഴ്ച വൈകുന്നേരം മുതല്‍ കനിഷ്കയെ കാണാത്തതിനെ തുടര്‍ന്ന് വീട്ടുകാര്‍ പുൽപ്പള്ളി പോലീസില്‍ പരാതി നല്‍കിയിരുന്നു. തുടര്‍ന്ന് പോലീസും നാട്ടുകാരും തിരച്ചില്‍ നടത്തുന്നതിനിടെയാണ് തിങ്കളാഴ്ച ഉച്ചയോടെ സ്വകാര്യ വ്യക്തിയുടെ കൃഷിയിടത്തില്‍ ജോലി ചെയ്യുന്ന തൊഴിലാളികളാണ് മൃതദേഹം കണ്ടെത്തിയത്. തുടര്‍ന്ന് പോലീസില്‍ വിവരമറിയിക്കുകയായിരുന്നു. പടിഞ്ഞാറത്തറയിലെ സ്കൂളില്‍ പത്താം ക്ലാസ് വിദ്യാര്‍ഥിനിയാണ് കനിഷ്ക. പുൽപ്പള്ളി പോലീസ് ഇന്‍സ്പെക്ടടര്‍ ബിജു ആന്‍റണിയുടെ നേതൃത്വത്തില്‍ ഇന്‍ക്വസ്റ്റ് നടപടികള്‍ ആരംഭിച്ചു. വിരലടയാള വിദഗ്ധരുള്‍പ്പെടെ സ്ഥലത്തെത്തിയിട്ടുണ്ട്. അമ്മ: വിമല. സഹോദരങ്ങള്‍: അമര്‍നാഥ്, അനുഷ്ക.

ബസും ബൈക്കും കൂട്ടിയിടിച്ച് യുവാവ് മരിച്ചു

ഗൂഡല്ലൂർ: സുൽത്താൻ ബത്തേരി പഴൂർ മുണ്ടക്കൊല്ലിയിൽ കെഎസ്ആർടിസി ബസും ബൈക്കും കൂട്ടിയിടിച്ച് യുവാവ് മരിച്ചു. പാക്കണ സ്വദേശി പരേതനായ മടക്കൽ ഇസ്മാഈലിന്‍റെ മകൻ മുഹമ്മദ് ഹാഷിം എന്ന മാനു (32) ആണ് മരിച്ചത്. സുൽത്താൻ ബത്തേരി-ഗൂഡല്ലൂർ അന്തർ സംസ്ഥാന പാതയിലെ പാട്ടവയലിനടുത്ത മുണ്ടക്കൊല്ലിയിൽ ഇന്നലെ രാവിലെ 8.15നാണ് അപകടം. സുൽത്താൻ ബത്തേരിയിൽ നിന്ന് കോയന്പത്തൂരിലേക്ക് പോകുകയായിരുന്ന ബസും പാക്കണയിൽ നിന്ന് ബത്തേരി ഭാഗത്തേക്ക് പോകുകയായിരുന്ന ബൈക്കുമാണ് അപകടത്തിൽപ്പെട്ടത്. അപകടത്തിൽ ബസിനടിയിലേക്ക് തെറിച്ച് വീണ യുവാവിന്‍റെ തലയിൽ ടയർ കയറി. യുവാവ് സംഭവ സ്ഥലത്ത് മരിച്ചു. ബത്തേരിയിലെ സ്വകാര്യ സ്ഥാപനത്തിൽ ജോലിക്കായി പോകുന്നതിനിടെയാണ് അപകടം. നൂൽപുഴ പോലീസ് അന്വേഷണം ആരംഭിച്ചു. ഭാര്യ: വാഹിദ. മക്കൾ: സയാൻ ഇസ്മയിൽ, സിദാൻ. മൃതദേഹം പോസ്റ്റ്മോർട്ടത്തിന് ശേഷം ബന്ധുക്കൾക്ക് വിട്ടുനൽകി.

ബാർബർ തൊഴിലാളി തൂങ്ങിമരിച്ച നിലയിൽ

പുൽപ്പള്ളി: ബാര്‍ബര്‍ തൊഴിലാളിയെ തൂങ്ങിമരിച്ച നിലയില്‍ കണ്ടെത്തി. പാതിരി പുത്തന്‍പുരയ്ക്കല്‍ പി.ജെ. ഷാജു (56)വിനെയാണ് മരിച്ച നിലയില്‍ കണ്ടെത്തിയത്. പാതിരി വെള്ളുപാടി കോളനിക്ക് സമീപം ആള്‍പ്പാര്‍പ്പില്ലാതെ കിടന്നിരുന്ന മലപ്പുറം സ്വദേശിയുടെ വീട്ടിനുള്ളിലാണ് ഷാജുവിന്‍റെ മൃതദേഹം കണ്ടെത്തിയത്. മൃതദേഹത്തിന് ഒരാഴ്ചത്തോളം പഴക്കമുണ്ട്. വീട്ടിനുള്ളില്‍ നിന്നും ദുര്‍ഗന്ധംവമിച്ചതിനെ തുടര്‍ന്ന് നാട്ടുകാര്‍ വിവരമറിയിച്ചതനുസരിച്ച് പുൽപ്പള്ളി പോലീസെത്തി പരിശോധിച്ചപ്പോഴാണ് ഷാജുവിനെ തൂങ്ങിമരിച്ചനിലയില്‍ കണ്ടെത്തിയത്. ഇന്‍ക്വസ്റ്റ് നടപടികള്‍ പൂര്‍ത്തിയാക്കിയ ശേഷം മൃതദേഹം പോസ്റ്റുമോര്‍ട്ടത്തിനായി ബത്തേരി ഗവ. താലൂക്ക് ആശുപത്രിയിലെ മോര്‍ച്ചറിയിലേക്ക് മാറ്റി. അച്ഛന്‍: ഉണ്ണി. അമ്മ: ലക്ഷ്മി. ഭാര്യ: ഗീത. മക്കള്‍: അനു, അരുണ്‍, അഞ്ജു.

വാഹനാപകടത്തിൽ യുവാവ് മരിച്ചു

കൽപ്പറ്റ: ബോലോറോയും സ്കൂട്ടറും കൂട്ടിയിടിച്ച് ഉണ്ടായ അപകടത്തിൽ സ്കൂട്ടർ യാത്രികൻ മരിച്ചു. റിപ്പണ്‍ സ്വദേശി അരീക്കാടൻ നൂറുദ്ധീൻ (44) ആണ് മരിച്ചത്. ഇദ്ദേഹത്തിന്‍റെ ഭാര്യ ഫസീലയെ ഗുരുതരപരിക്കുകളോടെ ആശുപത്രിയിൽ പ്രവേശിപ്പിച്ചു. മൃതദേഹം മാനന്തവാടി മെഡിക്കൽ കോളജ് ആശുപത്രിയിൽ.

കാട്ടാനശല്യത്തിനു പരിഹാരം കാണണമെന്ന്

ഗൂഡല്ലൂർ: താലൂക്കിലെ കാട്ടാനശല്യത്തിന് ശാശ്വത പരിഹാരം കാണണമെന്ന ആവശ്യം ശക്തമായി. താലൂക്കിൽ തുറപ്പള്ളി, മാക്കമൂല, കുനിൽവയൽ, അള്ളൂർവയൽ, പുത്തൂർവയൽ, വടവയൽ, ഏച്ചംവയൽ തുടങ്ങിയ ഭാഗങ്ങളിൽ കാട്ടാനശല്യം അതിരൂക്ഷമാണ്. മുതുമല വന്യജീവി സങ്കേതത്തോട് ചേർന്ന പ്രദേശങ്ങളാണിത്. ജനവാസകേന്ദ്രങ്ങളിൽ എത്തുന്ന ആനകൾ വലിയ തോതിലാണ് കൃഷി നശിപ്പിക്കുന്നത്. വനാതിർത്തികളിലെ കിടങ്ങുകൾ നന്നാക്കണമെന്നും ആവശ്യമായ സ്ഥലങ്ങളിൽ സോളാർ വേലികൾ സ്ഥാപിക്കണമെന്നും നാട്ടുകാർ ആവശ്യപ്പെട്ടു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]