ADVERTISEMENT

ADVERTISEMENT

കാർഗിൽ വിജയ സ്മരണയിൽ ദീപങ്ങൾ തെളിയിച്ചു

നീലേശ്വരം: കാർഗിൽ വിജയദിവസത്തോടനുബന്ധിച്ച് എൻസിസി 32 കേരള ബറ്റാലിയൻ നെഹ്റു കോളജ് യൂണിറ്റിന്‍റെ ആഭിമുഖ്യത്തിൽ വീരമൃത്യു വരിച്ച ധീരസൈനികരുടെ സ്മരണയ്ക്കായി ചെരാതുകൾ തെളിയിച്ചു.

എൻസിസി ക്യാപ്റ്റ ഡോ. നന്ദകുമാർ കോറോത്ത് ഉദ്ഘാടനം ചെയ്തു. സുബേദാർ കൈലാസ് ശർമ മുഖ്യ പ്രഭാഷണം നടത്തി. അണ്ടർ ഓഫീസർ കെ. ദർശന, സാനിയ വിൽസൺ, കെ. ആദിത്യൻ എന്നിവർ നേതൃത്വം നല്കി.

ADVERTISEMENT

മംഗല്‍പാടി താലൂക്ക് ആശുപത്രി കെട്ടിട നിര്‍മാണോദ്ഘാടനം നടത്തി

ഉപ്പള: മംഗല്‍പാടി താലൂക്ക് ആശുപത്രിയുടെ പുതിയ കെട്ടിടത്തിന്‍റെ നിര്‍മാണോദ്ഘാടനം ആരോഗ്യമന്ത്രി വീണ ജോര്‍ജ് ഓണ്‍ലൈനായി നിര്‍വഹിച്ചു. കിഫ്ബി ഫണ്ടില്‍ നിന്ന് 17.47 കോടി രൂപ ചെലവില്‍ 26,000 ചതുശ്രയടി വിസ്തീര്‍ണത്തിലാണ് ഇരുനിലകെട്ടിടം നിര്‍മിക്കുന്നത്. ഒപി, കാഷ്വാലിറ്റി, മൈനര്‍ ഒടി, എക്‌സ്‌റേ, അള്‍ട്രാ സൗണ്ട്, സിടി സ്‌കാന്‍, ഫാര്‍മസി, രണ്ട് ഒപി കണ്‍സള്‍ട്ടേഷന്‍ മുറികള്‍, സ്റ്റാഫ് റൂം, അന്വേഷണ, സ്വീകരണ കൗണ്ടറുകള്‍, കാത്തിരിപ്പുകേന്ദ്രം, ഇലക്ട്രിക്കല്‍ റൂം, പോലീസ് എയ്ഡ് പോസ്റ്റ്, ടോയ്‌ലറ്റ് എന്നിവ ഒരുക്കും. 15 മാസത്തിനകം പ്രവൃത്തി പൂര്‍ത്തീകരിക്കാനാണ് കരാര്‍. എ.കെ.എം. അഷ്‌റഫ് എംഎല്‍എ അധ്യക്ഷതവഹിച്ചു. ബ്ലോക്ക് പഞ്ചായത്ത് പ്രസിഡന്‍റ് ഷമീന, പഞ്ചായത്ത് പ്രസിഡന്‍റുമാരായ റുബീന നൗഫല്‍, ജീന്‍ ലെവീന മൊന്തേരോ, ജില്ലാ പഞ്ചായത്തംഗം ഗോള്‍ഡന്‍ അബ്ദുല്‍ റഹിമാന്‍, ജില്ലാ മെഡിക്കല്‍ ഓഫീസര്‍ ഡോ.എ.വി. രാംദാസ്, പി.കെ. മുഹമ്മദ് ഹനീഫ്, എ. ഷംസീന, ഇര്‍ഫാന ഇക്ബാല്‍, കെ. അശോക, കെ.വി. രാധാകൃഷ്ണ, പഞ്ചായത്തംഗങ്ങളായ ഖൈറുന്നിസ ഉമര്‍, ടി.എ. ഷെരീഫ്, സുധ, അശോക, റഷീദ ഹനീഫ്, അസീസ് മരിക്കെ, സാദിഖ് ചെറുഗോളി, ഫാറൂഖ് ഷിറിയ, രാഘവ ചേരാല്‍, അഷ്‌ഫ പച്ചിലമ്പാറ, അഹമ്മദലി കുമ്പള, താജുദ്ദീന്‍ മൊഗ്രാല്‍, പ്രിജു കെ. ബെള്ളാര്‍, ഷാഹുല്‍ ഹമീദ് ബന്തിയോട്, പി.എം. സലീം, കെ. അശോക് എന്നിവര്‍ സംസാരിച്ചു.

കാറഡുക്ക സൗരോര്‍ജവേലി; വാച്ച് ടവര്‍ ഉദ്ഘാടനത്തിനൊരുങ്ങി

കാറഡുക്ക: വന്യജീവി പ്രതിരോധത്തിനായി കാറഡുക്ക ബ്ലോക്ക് പഞ്ചായത്ത് ത്രിതല പഞ്ചായത്തുകളുടെ സഹായത്തോടെ നിര്‍മിച്ച സോളാര്‍ വൈദ്യുതിവേലി സംസ്ഥാനത്ത് തന്നെ മാതൃക പദ്ധതിയായി. മേഖലയില്‍ വന്യജീവികളെ നിരീക്ഷിക്കുന്നതിനും ആവശ്യസാധനങ്ങള്‍ സംഭരിക്കാനും മറ്റുമായി പുലിപ്പറമ്പില്‍ നിര്‍മിച്ച വാച്ച് ടവര്‍ ഉദ്ഘാടനത്തിനായി തയാറായി. 3.3 കോടി രൂപയാണ് പദ്ധതിയുടെ ചെലവ്. ഇതില്‍ 1.20 കോടി രൂപ ത്രിതല പഞ്ചായത്തുകള്‍ പദ്ധതിക്കായി കൈമാറി. കാട്ടാനശല്യം രൂക്ഷമായ കാറഡുക്ക ബ്ലോക്ക് പഞ്ചായത്തിന് കീഴിലെ വനാതിര്‍ത്തിയോട് ചേര്‍ന്നു നില്‍ക്കുന്ന ദേലംപാടി, കാറഡുക്ക, മുളിയാര്‍, കുറ്റിക്കോല്‍, ബേഡഡുക്ക പഞ്ചായത്തുകളില്‍ നടപ്പിലാക്കിയ സോളാര്‍ തൂക്കുവേലിയിലൂടെ നാടിന്‍റെ കാട്ടാന ശല്യത്തിനാണ് ശാശ്വതപരിഹാരമായത്. സോളാര്‍ തൂക്കു വേലിയുടെ എട്ടുകിലോമീറ്റര്‍ കൂടി വ്യാപിപ്പിക്കുന്നതിനായി ത്രിതല പഞ്ചായത്ത് വിഹിതമായി 50 ലക്ഷം രൂപ കൂടി അനുവദിച്ചിട്ടുണ്ട്. അടങ്ങാത്ത കാട്ടാന ആക്രമണത്തിൽ കോടിക്കണക്കിന് രൂപയുടെ കൃഷിനാശമാണ് അതിര്‍ത്തി ഗ്രാമത്തിലുണ്ടായത്. പലരും സ്ഥലം തന്നെ ഉപേക്ഷിച്ച് പേകാന്‍ നിര്‍ബന്ധിതമായി. ഇതിനൊരു ശാശ്വത പരിഹാരം വേണമെന്ന ആവശ്യം ശക്തമായതോടെയാണ് കാറഡുക്ക ബ്ലോക്ക് പഞ്ചായത്ത് സോളാര്‍ തൂക്കുവേലിയുടെ ആലോചനയില്‍ എത്തുന്നത്. ബ്ലോക്ക് പഞ്ചായത്തിന്‍റെയും പഞ്ചായത്തുകളുടെയും വനംവകുപ്പിന്‍റെയും നാട്ടുകാരുടെയും കുടിയാലോചനകളുടെ ഫലമായി വനം വകുപ്പിന്‍റെ പിന്തുണയില്‍ പദ്ധതി യാഥാര്‍ഥ്യമായി. വനംവകുപ്പുമായി ചേര്‍ന്ന് ത്രിതല പഞ്ചായത്തുകള്‍ നടപ്പിലാക്കുന്ന സംസ്ഥാനത്തെ ആദ്യത്തെ വന്യജീവി പ്രതിരോധ പദ്ധതി കൂടിയാണിത്. മാതൃകാപദ്ധതിയെന്ന നിലയില്‍ 60 ലക്ഷം രൂപ പ്രോത്സാഹന ധനസഹായവും അനുവദിച്ചു. കര്‍ണാടക അതിര്‍ത്തിയായ മണ്ടക്കോല്‍ തലപ്പച്ചേരി മുതല്‍ പുലിപ്പറമ്പ് വരെയുള്ള 29 കിലോമീറ്ററില്‍ തൂക്കുവേലി നടപ്പാക്കാനാണ് തീരുമാനിച്ചത്. ചാമക്കൊച്ചി മുതല്‍ വെള്ളക്കാന വരെയുള്ള എട്ടു കിലോമീറ്ററില്‍ ആദ്യഘട്ടത്തില്‍ സ്ഥാപിച്ചു. സംസ്ഥാനത്തിന്‍റെ വിവിധഭാഗങ്ങളില്‍ പ്രതിരോധ മതിലുകള്‍ നിര്‍മിച്ചു വൈദഗ്ധ്യമുള്ള കേരളാ പോലീസ് ഹൗസിംഗ് ആന്‍ഡ് കണ്‍സ്ട്രക്ഷന്‍ കോര്‍പറേഷനായിരുന്നു നിര്‍മാണ ചുമതല. രണ്ടരമീറ്റര് ഉരത്തില്‍ ഇരുമ്പ് തൂണുകള്‍ നാട്ടി നെടുകെ ലൈന്‍ വലിക്കും. ഈ ലൈനില്‍ നിന്ന് താഴോട്ട് കുറുകെ പയറുവള്ളികള്‍ പോലെ താഴ്ന്നു കിടക്കുന്നതാണ് വേലിയുടെ മാതൃക. ഇതിനോടനുബന്ധിച്ച് ക്യാമ്പ് ഷെഡ്, സെര്‍ച്ച് ടവര്‍ എന്നിവ പൂര്‍ത്തീകരിച്ചു. കഴിഞ്ഞ രണ്ടുവര്‍ഷമായി തൂക്കുവേലി നിലവില്‍ വന്ന പ്രദേശങ്ങളില്‍ ആനശല്യം പൂര്‍ണമായി ഒഴിവായതായി കര്‍ഷകര്‍ പറയുന്നു. തൂക്കുവേലിയുടെ പരിപാലനത്തിനും നിരീക്ഷണത്തിനും അടിക്കാടുകള്‍ വെട്ടുന്നതിനുമായി എട്ടു താത്കാലിക വാച്ചര്‍മാരുമുണ്ട്. കഴിഞ്ഞ 15 വര്‍ഷക്കാലമായി മുളിയാര്‍, കുറ്റിക്കോല്‍, ദേലംപാടി, കാറഡുക്ക പഞ്ചായത്തുകളില്‍ വ്യാപകമായിട്ടുള്ള കാട്ടാനപ്രശ്‌നം നിലനിന്നിരുന്നു. കാടും നാടും ഇടതൂര്‍ന്നു നില്‍ക്കുന്ന ഈ സ്ഥലത്ത് കാട്ടാനകള്‍ കൃഷിയിടത്തിലിറങ്ങി വ്യാപകമായ കൃഷിനാശവും വരുത്തിയിരുന്നു. 2021 കാറഡുക്ക ആനപ്രതിരോധ പദ്ധതി നിലവില്‍ വരികയും 2023 ഓടെ അതു പൂര്‍ത്തീകരിക്കുകയും ചെയ്തു. ഈ വേലികള്‍ വളരെ കാര്യക്ഷമമായി കൊണ്ട് പഞ്ചായത്തിന്റെയും വനസംരക്ഷണ സമിതിയുടെയും സഹായത്തോടെ സംരക്ഷിച്ചുവരുന്നതുകൊണ്ട് തന്നെ നിലവില്‍ കാട്ടാനപ്രശ്‌നം ഈ പഞ്ചായത്തുകളില്ല. ഇരുപത്തി രണ്ടോളം വരുന്ന കാട്ടാനകളെ വേലിക്ക് പുറത്തുനിര്‍ത്തുവാനും മുളിയാര്‍ കാറഡുക്ക, ദേലംപാടി, കുറ്റിക്കോല്‍, ബേഡഡുക്ക പഞ്ചായത്തുകളിലെ വ്യാപകമായ പ്രശ്‌നങ്ങള്‍ പരിഹരിക്കുവാനും നിലവില്‍ സാധിച്ചിട്ടുണ്ടെന്ന് ഡിവിഷണല്‍ ഫോറസ്റ്റ് ഓഫീസര്‍ കെ. അഷറഫ് പറഞ്ഞു.

കന്യാസ്ത്രീകളുടെ അറസ്റ്റിൽ എകെസിസി പ്രതിഷേധം

പാലാവയൽ: ഛത്തീസ്ഗഡിൽ മതപരിവർത്തനവും മനുഷ്യക്കടത്തും ആരോപിച്ച് ആൾക്കൂട്ട വിചാരണക്കൊടുവിൽ അസീസി സിസ്റ്റേഴ്സ് ഓഫ് മേരി ഇമ്മാക്കുലേറ്റ് സന്യാസസഭയിലെ അംഗങ്ങളായ സിസ്റ്റർ പ്രീതി മേരി, സിസ്റ്റർ വന്ദന ഫ്രാൻസിസ് എന്നിവരെ അറസ്റ്റ് ചെയ്ത് തുറങ്കിലടച്ച കിരാത നടപടിയിൽ എകെസിസി പാലാവയൽ യൂണിറ്റിന്‍റെ നേതൃത്വത്തിൽ പ്രതിഷേധറാലി നടത്തി. പാലാവയൽ സെന്‍റ് ജോൺസ് പള്ളി അസി.വികാരി ഫാ. അമൽ ചെമ്പകശേരിൽ ഉദ്ഘാടനം ചെയ്തു. യൂണിറ്റ് പ്രസിഡന്‍റ് ജോയി കൊച്ചുകുന്നത്തുപറമ്പിൽ, സെക്രട്ടറി പ്രശാന്ത് പാറേക്കുടിയിൽ, ട്രഷറർ പി.കെ. ജോസഫ് പുള്ളോലിൽ, മേഖല വൈസ് പ്രസിഡന്‍റ് മോളി തോമസ്, ഇടവക കോ-ഓഡിനേറ്റർ ടോമിച്ചൻ വട്ടോത്ത്, ട്രസ്റ്റി ജോസ് പെരിങ്ങല്ലൂർ എന്നിവർ നേതൃത്വം നൽകി. പടുപ്പ്: ഛത്തീസ്ഗഡില്‍ സിസ്റ്റര്‍മാരെ അന്യായമായി അറസ്റ്റ് ചെയ്തതില്‍ പ്രതിഷേധിച്ച് പടുപ്പ് സെന്‍റ് ജോര്‍ജ് ഇടവക എകെസിസിയുടെ നേതൃത്വത്തില്‍ പടുപ്പ് ടൗണില്‍ പന്തം കൊളുത്തി പ്രകടനം നടത്തി. അസി. വികാരി ഫാദര്‍ തോമസ് ചിന്താര്‍മണിയില്‍, എകെസിസി ഗ്ലോബല്‍ സെക്രട്ടറി പിയൂസ് പറേടം, ഫൊറോന സെക്രട്ടറി ജോസ് തൈപ്പറമ്പില്‍, യൂണിറ്റ് പ്രസിഡന്‍റ് ജോസ് അറക്കപ്പറമ്പില്‍, ജോയി കീച്ചേരി എന്നിവര്‍ നേതൃത്വം നല്‍കി. മാലോം: ഛത്തീസ്ഗഡിൽ കന്യാസ്ത്രീമാരെ അന്യായമായി കൽതുറങ്കിൽ അടച്ചതിൽ പ്രതിഷേധിച്ച് മാലോം ഫൊറോന കത്തോലിക്ക കോൺഗ്രസിന്‍റെ നേതൃത്വത്തിൽ പന്തംകൊളുത്തി പ്രതിഷേധം നടത്തി. ഫൊറോന വികാരി ഫാ. ജോസ് തൈക്കുന്നുംപുറം ഉദ്ഘാടനം ചെയ്തു. ബെന്നി തുളുമ്പൻമാക്കൽ അധ്യക്ഷതവഹിച്ചു. ടോമി തരിശിൽ, സ്കറിയ കാഞ്ഞമല എന്നിവർ പ്രസംഗിച്ചു.

ഭാരത് സ്‌പെഷല്‍ ഒളിമ്പിക്‌സ്: രജതശോഭയോടെ പാര്‍വതി

പെര്‍ള: ഛത്തീസ്ഗഡിലെ ബിലാസ്പൂരില്‍ നടന്ന ഭാരത് സ്‌പെഷല്‍ ഒളിംപിക്‌സില്‍ വെള്ളി മെഡല്‍ നേടി കേരളത്തിന് അഭിമാനമായി പെര്‍ള നവജീവന സ്‌പെഷല്‍ സ്‌കൂള്‍ വിദ്യാര്‍ഥിനി സി. പാര്‍വതി. ബൗളിംഗ് ഗെയിമായ ബോച്ചെയിലെ സീനിയര്‍ വിഭാഗത്തിലാണ് പാര്‍വതിയുടെ മെഡല്‍ നേട്ടം. ഭാരത് സ്‌പെഷല്‍ ഒളിമ്പിക്‌സില്‍ മെഡല്‍ നേടുന്ന ആദ്യ കാസര്‍ഗോഡ് സ്വദേശിനിയാണ് പാര്‍വതി. സീതാംഗോളിയിലെ എം. രവികുമാരയുടെയും സി. മിനിമോളുടെയും മകളാണ്. പാര്‍വതിക്കും കോച്ച് സാം ഡേവിഡ്‌സണും കാസര്‍ഗോഡ് റെയില്‍വേ സ്റ്റേഷനില്‍ നവജീവന സ്‌പെഷല്‍ സ്‌കൂള്‍ അധികൃതര്‍ സ്വീകരണം നല്‍കി. സ്‌കൂള്‍ മാനേജര്‍ ഫാ. ജോസ് ചെമ്പോട്ടിക്കല്‍, സിസ്റ്റര്‍ സെസിന്‍ എഫ്‌സിസി, സിസ്റ്റര്‍ ഷെന്‍സി ജോസ് എഫ്‌സിസി, സ്പീച്ച് തെറാപ്പിസ്റ്റ് അഞ്ജലി, ഫിസിയോതെറാപ്പിസ്റ്റ് അഞ്ജു, സ്‌പെഷല്‍ എഡ്യുക്കേറ്റര്‍മാരായ ശ്യാമിലി, നിഖില എന്നിവര്‍ നേതൃത്വം നല്‍കി.

പുത്തിഗെ കൃഷി ഓഫീസർക്കെതിരെ പരാതിയുമായി കിസാൻ സേന

കുമ്പള: സാങ്കേതിക കാരണങ്ങളുടെ പേരിൽ സൗജന്യ വൈദ്യുതി നിഷേധിക്കപ്പെട്ടതുൾപ്പെടെയുള്ള വിവിധ പ്രശ്നങ്ങൾ ഉന്നയിച്ച് പുത്തിഗെ കൃഷിഭവനു മുന്നിൽ സമരം നടത്തിയ കർഷകരെ കാർഷിക വികസനസമിതി യോഗത്തിൽവച്ച് കൃഷി ഓഫീസർ അപമാനിക്കുകയും വിമർശിക്കുകയും ചെയ്തതായി ചൂണ്ടിക്കാട്ടി കിസാൻ സേനയുടെ നേതൃത്വത്തിൽ മുഖ്യമന്ത്രിക്കും കൃഷിമന്ത്രിക്കും ജില്ലാ പ്രിൻസിപ്പൽ കൃഷി ഓഫീസർക്കും പരാതി നല്കി. ഈ മാസം 10 നാണ് കിസാൻ സേനയുടെ നേതൃത്വത്തിൽ സമരം നടത്തിയത്. ചിങ്ങം ഒന്ന് കർഷക ദിനാചരണ പരിപാടികളുമായി ബന്ധപ്പെട്ട കൂടിയാലോചനകൾക്കായാണ് ശനിയാഴ്ച കാർഷിക വികസനസമിതി യോഗം ചേർന്നത്. എന്നാൽ ഈ വിഷയം മാറ്റിവച്ച് നേരത്തേ നടന്ന സമരത്തെ വിമർശിക്കാനാണ് കൃഷി ഓഫീസർ സമയം കണ്ടെത്തിയതെന്ന് പരാതിയിൽ പറയുന്നു. രാഷ്ട്രീയ താല്പര്യമുള്ള ചിലരെ കൂട്ടുപിടിച്ച് കർഷകരിൽ ചേരിതിരിവുണ്ടാക്കാനാണ് കൃഷി ഓഫീസർ ശ്രമിച്ചതെന്നും കിസാൻ സേന ജനറൽ സെക്രട്ടറി ഷുക്കൂർ കണാജെ ആരോപിച്ചു.

ബഡ്സ് സ്കൂളിലെ നിയമനത്തിൽ ഭിന്നശേഷിക്കാരിയെ തഴയാൻ ശ്രമിക്കുന്നതായി പരാതി

തൃക്കരിപ്പൂർ: വലിയപറമ്പ് പഞ്ചായത്തിലെ ഇടയിലെക്കാട് ബഡ്സ് സ്കൂളിൽ ആയയെ നിയമിക്കുന്നതിനായി തയ്യാറാക്കിയ മുൻഗണനാ പട്ടികയിൽ ഉൾപ്പെട്ട ഭിന്നശേഷിക്കാരിയെ തഴയാൻ ശ്രമിക്കുന്നതായി പരാതി. തൃക്കരിപ്പൂർ കടപ്പുറം സ്വദേശിനി കെ.പി. റയ്ഹാനത്താണ് പഞ്ചായത്തിനെതിരെ നിയമനടപടിക്കൊരുങ്ങുന്നത്. മതിയായ യോഗ്യതയുണ്ടായിട്ടും അഭിമുഖത്തിനെത്തിയപ്പോൾ പഞ്ചായത്ത് പ്രസിഡന്‍റ് അടക്കമുള്ളവർ തന്‍റെ ശാരിരിക വൈകല്യം എടുത്തുപറഞ്ഞ് താങ്കൾക്ക് ഈ ജോലി ചെയ്യാൻ കഴിയില്ലെന്ന് പറഞ്ഞ് പിന്തിരിപ്പിക്കാൻ ശ്രമിക്കുകയും ആക്ഷേപിക്കുകയും മാനസികമായി തളർത്തുകയും ചെയ്തതായി റയ്ഹാനത്ത് പത്രസമ്മേളനത്തിൽ ആരോപിച്ചു. ഉടുമ്പുന്തല ബഡ്സ് സ്കൂളിലും ചെറുവത്തൂർ കാടങ്കോട്ടെ സ്കൂളിലും 12 വർഷത്തോളം ആയയായി ജോലി ചെയ്തിട്ടുള്ള ഇവർ വലിയപറമ്പ് പഞ്ചായത്ത് നേരത്തെ തയ്യാറാക്കിയ റാങ്ക് പട്ടികയിൽ രണ്ടാം സ്ഥാനക്കാരിയാണ്. ഒന്നാം റാങ്കുകാരിക്ക് ജോലിയിൽ ചേരാൻ താത്പര്യമില്ലാത്ത സാഹചര്യത്തിൽ തന്നെ നിയമിക്കേണ്ടതിനു പകരം മറ്റൊരാളിന് നിയമനം നല്കാനാണ് പഞ്ചായത്ത് അധികൃതർ ശ്രമിക്കുന്നതെന്നും റയ്ഹാനത്ത് പറഞ്ഞു. ഈ വിഷയത്തിൽ മനുഷ്യാവകാശ കമ്മീഷന് പരാതി നല്കിയിട്ടുണ്ടെന്നും നിയമനം ലഭിക്കുന്നത് വരെ നിയമ നടപടികളുമായി മുന്നോട്ടു പോകുമെന്നും അവർ അറിയിച്ചു. പത്രസമ്മേളനത്തിൽ പഞ്ചായത്തിലെ യുഡിഎഫ് അംഗങ്ങളായ സി. ദേവരാജൻ, എം.ടി. ബുഷ്റ, എം. ഹസീന, റയ്ഹാനത്തിന്‍റെ ഭർത്താവ് സി.എ. മുഹമ്മദ് എന്നിവരും പങ്കെടുത്തു.

പട്ടികജാതി ഗോത്രവര്‍ഗ കമ്മീഷന്‍ സിറ്റിംഗ് ആരംഭിച്ചു

കാസര്‍ഗോഡ്: സംസ്ഥാന പട്ടികജാതി ഗോത്രവര്‍ഗ കമ്മീഷന്‍റെ ജില്ലയിലെ പരാതി പരിഹാര അദാലത്ത് കാസര്‍ഗോഡ് മുനിസിപ്പല്‍ കോണ്‍ഫറന്‍സ് ഹാളില്‍ ആരംഭിച്ചു. 152 പരാതികളില്‍ ആദ്യദിനം 82 എണ്ണമാണ് പരിഗണിച്ചത്. ഇതില്‍ 72 എണ്ണത്തിന് പരിഹാരം കണ്ടെത്തി. പട്ടയം സംബന്ധിച്ച 76 പരാതികള്‍ക്ക് പരിഹാരം കാണാന്‍ കളക്ടറുടെ ഓഫീസിലേക്ക് നിര്‍ദേശിച്ചിട്ടുണ്ട്. ബാക്കിയുള്ള 152 പരാതികളില്‍ 59 എണ്ണം റവന്യൂ വകുപ്പുമായും 14 എണ്ണം പോലീസ് വകുപ്പുമായും 14 എണ്ണം ജില്ലാ പട്ടിക ജാതി പട്ടികവര്‍ഗ വകുപ്പുമായും മൂന്നെണ്ണം കെഎസ്ഇബിയുമായി ബന്ധപ്പെട്ടതും 37 എണ്ണം തദ്ദേശസ്വയംഭരണവകുപ്പുമായി ബന്ധപ്പെട്ടതും രണ്ടു വീതം പാരാതികള്‍ വിദ്യാഭാസം, സിവില്‍ സപ്ലൈസ് വകുപ്പുകളുമായും ബാങ്കുമായും ബന്ധപ്പെട്ടവയാണ്. കമ്മീഷന്‍ ചെയര്‍പേഴ്സണ്‍ ശേഖരന്‍ മിനിയോടന്‍ അധ്യക്ഷതവഹിച്ചു. അംഗങ്ങളായ സേതു നാരായണന്‍, ടി.കെ. വാസു, അസി.സെക്ഷന്‍ ഓഫീസര്‍ വി. പ്രണവ്, എഡിഎം പി. അഖില്‍, ജില്ല പോലീസ് മേധാവി ബി.വി. വിജയഭാരത് റെഡ്ഡി എന്നിവര്‍ പങ്കെടുത്തു. ഇന്നും സിറ്റിംഗ് തുടരും.

പ്ലസ് വൺ വിദ്യാർഥിനിയെ പീഡിപ്പിച്ച യുവാവ് അറസ്റ്റിൽ

പരപ്പ: പ്ലസ് വൺ വിദ്യാർഥിനിയെ സ്മാർട്ട് ഫോൺ വാങ്ങി നൽകി പ്രലോഭിപ്പിച്ച് ലൈംഗികപീഡനത്തിരയാക്കിയ യുവാവ് അറസ്റ്റിൽ. പരപ്പയിലെ വാഹന ബ്രോക്കറും പച്ചക്കറി വ്യാപാരിയുമായ ഷറഫുദ്ദീനെയാണ് (44) വെള്ളരിക്കുണ്ട് പോലീസ് അറസ്റ്റ് ചെയ്തത്. ലഹരിക്ക് അടിമപ്പെട്ട യുവാവിനെ ഡിഅഡിക്ഷൻ സെന്‍ററിൽ വച്ചാണ് വെള്ളരിക്കുണ്ട് പോലീസ് അറസ്റ്റ് ചെയ്തത്. രണ്ടുമാസം മുമ്പാണ് സംഭവം. പെൺകുട്ടിയുടെ കൈയിൽ മൊബൈൽ ഫോൺ കണ്ട രക്ഷിതാക്കൾ ആരാണ് വാങ്ങിത്തന്നതെന്ന് ചോദിച്ചപ്പോഴാണ് പീഡനവിവരം പറയുന്നത്. ഉടനെ പോലീസിൽ അറിയിക്കുകയായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

കേന്ദ്രസർവകലാശാലയ്ക്ക് സമീപം വീണ്ടും പുലിഭീതി; വളർത്തുനായയെ കൊന്നുതിന്ന നിലയിൽ

പെരിയ: നാലുമാസത്തെ ഇടവേളയ്ക്ക് ശേഷം ജില്ലയില്‍ വീണ്ടും പുലിഭീതി പടരുന്നു. പെരിയ കേന്ദ്രസര്‍വകലാശാല കാമ്പസിന് സമീപം വളര്‍ത്തുനായയുടെ ജഡം പകുതി ഭക്ഷിച്ച നിലയില്‍ കണ്ടെത്തി. തണ്ണോട്ട് പുല്ലാഞ്ഞിക്കുഴിയിലെ ജി.വി. ഗൗരിയമ്മയുടെ വളര്‍ത്തുനായയെയാണ് കടിച്ചുകൊന്നത്. ഇന്നലെ പുലര്‍ച്ചെയാണ് ജഡം കണ്ടെത്തിയത്. വീടിന്‍റെ ഉമ്മറത്തെ തൂണില്‍ ചങ്ങലയില്‍ കെട്ടിയിട്ടിരുന്ന പട്ടിയെയാണ് കൊന്നുതിന്നത്. കാഞ്ഞങ്ങാട് റെയിഞ്ച് ഓഫീസർ രാഹുലിന്‍റെ നേതൃത്വത്തില്‍ എത്തിയ വനപാലകര്‍ പ്രദേശത്ത് രണ്ടു കാമറകള്‍ സ്ഥാപിച്ചു. മഴയായതിനാല്‍ കാല്‍പാടുകള്‍ കണ്ടെത്താനായില്ലെന്ന് വനപാലകര്‍ അറിയിച്ചു. നാലുമാസം മുമ്പ് ജില്ലയിലൊട്ടാകെ പുലിഭീതി പടര്‍ന്ന കാലത്തും കേന്ദ്ര സര്‍വകലാശാലയ്ക്ക് സമീപം പുലിയെ കണ്ടതായി നാട്ടുകാരും വാഹനയാത്രക്കാരും പറഞ്ഞിരുന്നു. സര്‍വകലാശാലയുടെ വിശാലമായ കാമ്പസില്‍ കെട്ടിടങ്ങളൊഴികെയുള്ള ഭാഗങ്ങള്‍ പലതും കാടുപിടിച്ചുകിടക്കുകയാണ്. നേരത്തേ പ്ലാന്‍റേഷന്‍ കോര്‍പറേഷന്‍റെ കശുമാവിന്‍തോട്ടമായിരുന്ന കാലത്തുതന്നെ കാട്ടുപന്നികളും ചെറുമൃഗങ്ങളും ഈ ഭാഗങ്ങളില്‍ എത്താറുണ്ടായിരുന്നു. ഇപ്പോള്‍ പൂര്‍ണമായും കാടുമൂടിയതോടെ ഇവയ്ക്ക് പിന്നാലെ പുലിയും എത്തിയിരിക്കാമെന്നാണ് നാട്ടുകാരുടെ ഭീതി. മുളിയാറിലും പനത്തടി പഞ്ചായത്തിലെ കല്ലപ്പള്ളിയിലും കഴിഞ്ഞ ദിവസങ്ങളില്‍ വളര്‍ത്തുനായ്ക്കള്‍ക്കു നേരെ പുലിയുടെ ആക്രമണമുണ്ടായിരുന്നു.

കര്‍ഷക കോണ്‍ഗ്രസ് പ്രതിഷേധമാര്‍ച്ച് നടത്തി

കാഞ്ഞങ്ങാട്: വന്യമൃഗാക്രമണത്തില്‍ നിന്നു കര്‍ഷകന്‍റെ ജീവനും സ്വത്തിനും സംരക്ഷണം നല്‍കാന്‍ നടപടി എടുക്കണമെന്നാവശ്യപ്പെട്ടു താമരശേരി ഡിഎഫ്ഒ ഓഫീസിലേക്ക് മാര്‍ച്ച് നടത്തിയ കര്‍ഷക കോണ്‍ഗ്രസ് സംസ്ഥാന പ്രസിഡന്‍റ് മാജുഷ് മാത്യു അടക്കമുള്ള സംസ്ഥാന ജില്ലാ നേതാക്കളെ അറസ്റ്റ് ചെയ്ത് ജയിലിലടച്ച പോലീസ് നടപടിയില്‍ പ്രതിഷേധിച്ച് കര്‍ഷക കോണ്‍ഗ്രസ് ജില്ലാ കമ്മിറ്റിയുടെ നേതൃത്വത്തില്‍ കാഞ്ഞങ്ങാട് സിവില്‍ സ്റ്റേഷന് മുന്നില്‍ നടത്തിയ പ്രതിഷേധ മാര്‍ച്ച് നടത്തി. ഡിസിസി ജനറല്‍ സെക്രട്ടറി പി.വി. സുരേഷ് ഉദ്ഘാടനം ചെയ്തു. കര്‍ഷക കോണ്‍ഗ്രസ് സംസ്ഥാന ജനറല്‍ സെക്രട്ടറി കെ.എ. ജോയ് അധ്യക്ഷതവഹിച്ചു. അശോക് ഹെഗ്ഡെ, കെ.പി. ബാലകൃഷ്ണന്‍, കെ.കെ. ബാബു, അനില്‍ വാഴുന്നോറടി, എം.പി. ജോസഫ്, എം. കുഞ്ഞികൃഷ്ണന്‍ എന്നിവര്‍ പ്രസംഗിച്ചു. ജില്ലാ വൈസ് പ്രസിഡന്‍റ് ഡോ. ടിറ്റോ ജോസഫ് സ്വാഗതവും സെക്രട്ടറി പ്രഭാകരന്‍ ചീമേനി നന്ദിയും പറഞ്ഞു.

അനീഷിന്‍റെ ചികിത്സയ്ക്കായി നാടൊരുമിക്കുന്നു

കൊന്നക്കാട്: പാമത്തട്ടിലെ അനീഷ് ആന്‍റണിയുടെ (42) ചികിത്സയ്ക്കായി നാടൊരുമിക്കുന്നു. ബ്രെയിൻ ട്യൂമർ ബാധിച്ച് കണ്ണൂർ മിംസ് ആശുപത്രിയിൽ ചികിത്സയിൽ കഴിയുകയാണ്. ഡ്രൈവർ ജോലി ഉപജീവനമാർഗമാക്കി ജീവിക്കുന്ന അദ്ദേഹത്തിന് ആശുപത്രി ചിലവുകൾ താങ്ങാവുന്നതിലും അപ്പുറമാണ്. ഭാര്യയും കുട്ടിയമടങ്ങുന്ന അനീഷിന്‍റെ കുടുംബം സാമ്പത്തികമായി വളരെ ബുദ്ധിമുട്ട് അനുഭവിക്കുകയാണ്. അനീഷിനെ സഹായിക്കുന്നതിന് നാട്ടുകാരുടെ നേതൃത്വത്തിൽ കമ്മിറ്റി രൂപീകരിച്ചിട്ടുണ്ട്. ബളാൽ പഞ്ചായത്ത് പ്രസിഡന്‍റ് രാജു കട്ടക്കയം രക്ഷാധികാരിയായും വാർഡ് മെംബർ ബിൻസി ജെയിൻ ചെയർമാനായും ജി. ദിബാഷ് കൺവീനറായും പി.കെ. ജോസ് ട്രഷററായും കമ്മിറ്റി രൂപീകരിച്ച് പ്രവർത്തനം ആരംഭിച്ചിട്ടുണ്ട്. യൂണിയൻ ബാങ്ക് വെള്ളരിക്കുണ്ട് ശാഖയിൽ അക്കൗണ്ട് ആരംഭിച്ചിട്ടുണ്ട്. അക്കൗണ്ട് നന്പർ: 179122010 001068. IFSC UBIN 0917915. GPay: 75580579 22

കന്യാസ്ത്രീകളെ ജയിലിലടച്ചതിനെതിരെ മഹിള- യുവജന പ്രതിഷേധം

പരപ്പ: പതിറ്റാണ്ടുകളായി തിരുവസ്‌ത്രമണിഞ്ഞ് വടക്കേയിന്ത്യൻ സംസ്ഥാനങ്ങളിൽ ആതുരശുശ്രൂഷ രംഗത്തും ജീവകാരുണ്യ പ്രവർത്തനങ്ങളിലും വ്യാപൃതരായി പ്രവർത്തിച്ചുകൊണ്ടിരിക്കുന്ന മലയാളികളായ രണ്ടു കന്യാസ്ത്രീകളെ കള്ളക്കേസെടുത്ത് ജയിലിലടച്ച നടപടിക്കെതിരെ ജനാധിപത്യ മഹിളാ അസോസിയേഷന്‍റെയും ഡിവൈഎഫ്ഐയുടെയും നേതൃത്വത്തിൽ പരപ്പ ടൗണിൽ പ്രതിഷേധ പ്രകടനവും പൊതുയോഗവും നടത്തി. കെ.വി. തങ്കമണി അധ്യക്ഷത വഹിച്ചു. രമണി രവി, എ.ആർ. അഗജ, എ.ആർ. രാജു, സി.വി. മന്മഥൻ, ബി. രാഹുൽ, എ.ആർ. വിജയകുമാർ, ടി. സ്വർണലത, ടി.പി. തങ്കച്ചൻ, സി. രതീഷ്, അമൽ തങ്കച്ചൻ എന്നിവർ നേതൃത്വം നല്കി.

മലബാര്‍ പ്ലാന്‍റ് പ്രൊട്ടക്ഷന്‍ സൊസൈറ്റിക്കു തുടക്കമായി

പടന്നക്കാട്: സസ്യാരോഗ്യവുമായി ബന്ധപ്പെട്ട വിവിധ വിഷയങ്ങള്‍ ചര്‍ച്ച ചെയ്യുന്നതിനും ശാസ്ത്രീയമായി അവയെ അവലോകനം ചെയ്യുന്നതിനുമായി കൃഷിശാസ്ത്രജ്ഞരും പടന്നക്കാട് കാര്‍ഷിക കോളജ് വിദ്യാര്‍ഥികളും കര്‍ഷകരും ചേര്‍ന്ന് രൂപപ്പെടുത്തിയ മലബാര്‍ പ്ലാന്‍റ് പ്രൊട്ടക്ഷന്‍ സൊസൈറ്റിക്ക് തുടക്കമായി. കോഴിക്കോട് സുഗന്ധവിള ഗവേഷണകേന്ദ്രം സസ്യസംരക്ഷണ വിഭാഗം മേധാവി ഡോ. ഈശ്വരഭട്ട് ഉദ്ഘാടനം ചെയ്തു. ഡോ.കെ.എം. ശ്രീകുമാര്‍ അധ്യക്ഷതവഹിച്ചു. കായംകുളം തോട്ടവിള ഗവേഷഷണകേന്ദ്രം കീടശാസ്ത്രവിഭാഗം പ്രിന്‍സിപ്പല്‍ സയന്‍റിസ്റ്റ് ഡോ. ജോസഫ് രാജ്കുമാര്‍, ഡോ. സൈനമോള്‍ കുര്യന്‍, ഡോ.പി.കെ. മിനി, ഡോ. അജിതകുമാരി, ഡോ.പി.കെ. സജീഷ്, വിനീത് എന്നിവര്‍ സംസാരിച്ചു.

ദേശീയപാത അഥോറിറ്റി ഉദ്യോഗസ്ഥർ വീരമലക്കുന്ന് സന്ദർശിച്ചു

ചെറുവത്തൂർ: ദേശീയപാത അഥോറിറ്റി ഉദ്യോഗസ്ഥർ വീരമലക്കുന്നിന്‍റെ താഴ്‌വാരം സന്ദർശിച്ചു. ഇന്നലെ ഉച്ച കഴിഞ്ഞാണ് ദേശീയ പാതയിലേക്ക് ഇടിഞ്ഞു വീണ കുന്നിന്‍റെ പശ്ചാത്തലം സന്ദർശനത്തിനെത്തിയത്. അതേ സമയം ദേശീയപാത നിർമാണത്തിന്‍റെ ഭാഗമായി ചെറുവത്തൂർ വീരമലക്കുന്നിലും മട്ടലായികുന്നിലും ഉൾപ്പെടെ ജില്ലയിലെ വിവിധ ഭാഗമായി കുന്നിടിച്ചിട്ടുള്ള മുഴുവൻ പ്രദേശങ്ങളുടെയും സുരക്ഷ ഉറപ്പുവരുത്തുന്നതിന് ആവശ്യമായ നടപടികൾ സ്വീകരിക്കണമെന്ന് എം. രാജഗോപാലന്‍ എംഎല്‍എ ആവശ്യപ്പെട്ടു. ദേശീയപാത റീജ്യണല്‍ ഓഫീസർ കേണല്‍ എ.കെ. ജാന്‍ബാസിന് ഇതു സംബന്ധിച്ച് അദ്ദേഹം കത്ത് നല്‍കി. മണ്ണിടിച്ചില്‍ തടയുന്നതിനാവശ്യമായ കാര്യങ്ങള്‍ ചെയ്യണമെന്ന് നിരവധി തവണ ആവശ്യപ്പെട്ടിട്ടും ശാശ്വത പരിഹാരമുണ്ടാക്കുവാന്‍ ദേശീയപാത അഥോറിറ്റിയുടെ ഭാഗത്തുനിന്നും കരാർ കമ്പനിയുടെ ഭാഗത്തുനിന്നും യാതൊരുവിധ നടപടിയും സ്വീകിക്കാത്തത് നീതീകരിക്കാനാവില്ലെന്നും അശാസ്ത്രീയമായ മണ്ണെടുപ്പ് തുടരുന്ന സ്ഥിതിയാണ് ഇവിടെ ഉണ്ടായതെന്നും എംഎൽഎ പറഞ്ഞു. സാധ്യമെങ്കിൽ ഇവിടെ സ്ലിപ്പ് റോഡിന് പകരം സർവീസ് റോഡ് നിർമിക്കുകയാണെങ്കിൽ ദേശീയപാതയ്ക്കും സമീപത്തുള്ള വിനോദ സഞ്ചാര കേന്ദ്രത്തിനും പ്രദേശവാസികള്‍ക്കും ഏറെ പ്രയോജനകരമാകുമെന്നും കത്തില്‍ സൂചിപ്പിച്ചു. അതോടൊപ്പം ഇത്തരം അപകടകരമായ രീതിയിൽ കുന്നിടിച്ചിട്ടുള്ള ജില്ലയിലെ തെക്കില്‍ ഉള്‍പ്പെടെയുള്ള മറ്റു പ്രദേശങ്ങളിൽ കൂടി സുരക്ഷിതത്വം ഒരുക്കുന്നതിനാവശ്യമായ നടപടികൾ കൂടി ദേശീയപാത റീജ്യണല്‍ ഓഫീസറുടെ ഭാഗത്ത് നിന്നുണ്ടാകണമെന്നുംനിവേദനത്തിലൂടെ ആവശ്യപ്പെട്ടു.

വോട്ടെടുപ്പിന് 5970 ബാലറ്റ് യൂണിറ്റുകളും 2110 കണ്‍ട്രോള്‍ യൂണിറ്റുകളും

കാസര്‍ഗോഡ്: ഈവര്‍ഷം നടക്കുന്ന തദ്ദേശസ്ഥാപനങ്ങളിലേക്കുള്ള പൊതു തെരഞ്ഞെടുപ്പിനായുള്ള ഇലക്ട്രോണിക്ക് വോട്ടിംഗ് മെഷീനുകളുടെ ഒന്നാം ഘട്ട പരിശോധന കളക്ടറേറ്റിലെ ജില്ലാ വെയര്‍ഹൗസിന് സമീപത്ത് തയ്യാറാക്കിയ പ്രത്യേക ഹാളില്‍ ആരംഭിച്ചു. ജില്ലാ തെരഞ്ഞെടുപ്പ് ഓഫീസര്‍കൂടിയായ ജില്ലാ കളക്ടര്‍ കെ. ഇമ്പശേഖര്‍ രാഷ്ട്രീയപാര്‍ട്ടി പ്രതിനിധികളുടെ സാന്നിധ്യത്തില്‍ വെയര്‍ഹൗസ് തുറന്ന് വോട്ടിംഗ് മെഷീനുകള്‍ ആദ്യഘട്ടപരിശോധനയ്ക്ക് നല്‍കി. 20 ടീമുകള്‍ അടങ്ങുന്ന ബാച്ചാണ് പരിശോധന നടത്തുന്നത്. ഒരു സമയം 20 കണ്‍ട്രോള്‍ യൂണിറ്റുകളും 60 ബാലറ്റ് യൂണിറ്റുകളും പരിശോധിച്ച് സൂക്ഷിക്കും. പരിശോധനയില്‍ ഇലക്ഷന്‍ ഡെപ്യൂട്ടി കളക്ടറുടെ ചുമതലകൂടിയുള്ള എഡിഎം പി. അഖില്‍, രാഷ്ട്രീയപാര്‍ട്ടി പ്രതിനിധികളായ എം. കുഞ്ഞമ്പു നമ്പ്യാര്‍, ടി.എം.എ. കരീം, എം. ശ്രീധര, ഉമ്മര്‍ പാടലടുക്ക എന്നിവര്‍ പങ്കെടുത്തു. വോട്ടിംഗ് മെഷീനുകളുടെ ഒന്നാംഘട്ട പരിശോധന ഓഗസ്റ്റ് 20 വരെ തുടരും. ആകെ 5970 ബാലറ്റ് യൂണിറ്റുകളും 2110 കണ്‍ട്രോള്‍ യൂണിറ്റുകളുമാണ് പരിശോധിക്കുക. ഒരു ദിവസം ഏഴു റൗണ്ടുകളിലായി 140 കണ്‍ട്രോള്‍ യൂണിറ്റുകളും 420 ബാലറ്റ് യൂണിറ്റുകളും പരിശോധിക്കും. തെരഞ്ഞെടുപ്പ് വിഭാഗം ഉദ്യോഗസ്ഥര്‍, വോട്ടിംഗ് മെഷീന്‍ നിര്‍മാണ കമ്പനിയായ ഇസിഐഎല്ലിന്‍റെ രണ്ട് എന്‍ജിനിയര്‍മാര്‍ തുടങ്ങിയവര്‍ പരിശോധനയ്ക്ക് നേതൃത്വം നല്‍കുന്നു.

ക്ലാസ് മുറികളിൽ പത്രങ്ങളുമായി ഈസ്റ്റ്‌ എളേരി പഞ്ചായത്ത്‌

ചിറ്റാരിക്കാൽ: വിദ്യാർഥികളിൽ വായനാശീലവും പൊതുവിജ്ഞാനവും വർധിപ്പിക്കാൻ ലക്ഷ്യമിട്ട് ഈസ്റ്റ്‌ എളേരി പഞ്ചായത്ത്‌. പഞ്ചായത്ത്‌ പരിധിയിൽ ഉള്ള മുഴുവൻ സ്കൂളുകളിലും ഓരോ ക്ലാസ് മുറിയിലും ഓരോ പത്രം വീതം വിതരണം ചെയ്യുന്ന പദ്ധതിക്ക് തുടക്കം കുറിച്ചു. 2025-26 വാർഷിക പദ്ധതിയിൽ ഉൾപ്പെടുത്തിയാണ് ദിനപത്രങ്ങൾ വിതരണം ചെയ്യുന്നത്. വർഷാവസാനം വരെ പത്രവിതരണം തുടരും. ദീപിക, മലയാള മനോരമ, മാതൃഭൂമി പത്രങ്ങളുമായി സഹകരിച്ചു 150 ഓളം പത്രങ്ങൾ ആണ് വിതരണം ചെയ്യുന്നത്. പത്രവിതരണത്തിന്‍റെ പഞ്ചായത്തുതല ഉദ്ഘാടനം കണ്ണിവയൽ ഗവ. ടിടിഐയിൽ പഞ്ചായത്ത്‌ പ്രസിഡന്‍റ് ജോസഫ് മുത്തോലി നിർവഹിച്ചു. പ്രിൻസിപ്പൽ ഡോ.പി. രതീഷ്, യുപി സ്കൂൾ മുഖ്യാധ്യാപകൻ ഹരികുമാർ എന്നിവർ ചേർന്ന് പത്രങ്ങൾ ഏറ്റുവാങ്ങി.

കല്ലപ്പള്ളിയിൽ വീണ്ടും പുലി; വീട്ടുമുറ്റത്തുനിന്ന് നായയെ പിടിച്ചു

പാണത്തൂർ: കല്ലപ്പള്ളിയിൽ വീണ്ടും പുലിയിറങ്ങി. ഇന്നലെ പുലർച്ചെ മൂന്നുമണിയോടെ ദൊഡമന ബാബുവിന്‍റെ വീടിനു സമീപത്തെത്തിയ പുലി ചായ്പിൽ ഉറങ്ങിക്കിടന്ന വളർത്തുനായയെ കടിച്ചെടുത്ത് ഓടിമറയുകയായിരുന്നു. നായയുടെ കരച്ചിൽ കേട്ട് വീട്ടുകാർ പുറത്തിറങ്ങി നോക്കുമ്പോഴേക്കും പുലി ഇരുട്ടിലേക്ക് മറഞ്ഞു. വീടിനു സമീപത്തെ ചെളിനിറഞ്ഞ മണ്ണിൽ പുലിയുടേതെന്ന് സംശയിക്കാവുന്ന കാല്പാടുകൾ പതിഞ്ഞിട്ടുണ്ട്. നേരം പുലർന്നതിനു ശേഷം സമീപസ്ഥലങ്ങളിൽ തെരച്ചിൽ നടത്തിയെങ്കിലും നായയുടെ അവശിഷ്ടങ്ങളൊന്നും കിട്ടിയില്ല. പനത്തടി സെക്ഷൻ ഫോറസ്റ്റ് ഓഫീസർ ബി. ശേഷപ്പയുടെ നേതൃത്വത്തിൽ വനംവകുപ്പ് ഉദ്യോഗസ്ഥർ സ്ഥലത്തെത്തി പരിശോധന നടത്തി. സംഭവത്തിൽ ഡിഎഫ്ഒയ്ക്ക് റിപ്പോർട്ട് നല്കി ആവശ്യമായ നടപടികൾ സ്വീകരിക്കുമെന്ന് അദ്ദേഹം പറഞ്ഞു. കഴിഞ്ഞ ആറുമാസത്തിനിടയിൽ നിരവധി തവണ കല്ലപ്പള്ളി മേഖലയിൽ പുലിയിറങ്ങി വളർത്തുമൃഗങ്ങളെ കൊണ്ടുപോയിട്ടുണ്ട്. ആഴ്ചയിലൊരുതവണയെങ്കിലും പുലിയിറങ്ങുന്നത് പതിവായിരിക്കുകയാണെന്ന് നാട്ടുകാർ പറയുന്നു. ജനവാസകേന്ദ്രങ്ങളിലിറങ്ങി വളർത്തുമൃഗങ്ങളെ പിടിച്ചതിനുശേഷം പുലി ഉൾവനത്തിലേക്കുതന്നെ മറയുകയാണെന്നാണ് സൂചന. വീടിനു സമീപത്തുപോലും പുലെയെത്തിയതോടെ ജനങ്ങൾ കടുത്ത ഭീതിയിലാണ്. തുടർച്ചയായി ഇത്തരം സംഭവങ്ങൾ ആവർത്തിക്കുന്നതിൽ ആശങ്കയുണ്ടെന്നും പുലിയെ പിടികൂടാനാവശ്യമായ അടിയന്തിര നടപടികൾ സ്വീകരിക്കണമെന്നും ബ്ലോക്ക് പഞ്ചായത്ത് അംഗം അരുൺ രംഗത്തുമല പറഞ്ഞു.

തകരാതെ കാക്കണം, രവീന്ദ്രന്‍റെ വീട്

നായ്ക്കയം: പാര്‍ശ്വഭാഗം ശക്തമായ മഴയില്‍ ഇടിഞ്ഞുവീണ് സമീപത്തുള്ള വീട് അപകടാവസ്ഥയില്‍. നായ്ക്കയത്തെ എന്‍. രവീന്ദ്രന്‍റെ (65) വീടാണ് ഏതുനിമിഷവും നിലം പതിക്കാവുന്ന അവസ്ഥയില്‍ ഉള്ളത്. അശാസ്ത്രീയമായ മണ്ണെടുപ്പാണ് ഇതിനു കാരണം. റോഡില്‍ നിന്നും ആറു മീറ്ററോളം ഉയരത്തിലാണ് വീട് സ്ഥിതിചെയ്യുന്നത്. വീടും റോഡും തമ്മില്‍ രണ്ടുമീറ്റര്‍ ദൂരം മാത്രമേയുള്ള. ഒരു മീറ്റര്‍ കൂടി ഇടിഞ്ഞാൽ വലിയ അപകടമുണ്ടാകും. ഒടയംചാല്‍-ചെറുപുഴ മേജര്‍ ജില്ലാ റോഡിന് വീതി കൂട്ടാനാണ് ഇവിടെ നിന്നും മണ്ണെടുത്തത്. ഇളക്കമുള്ള മണ്ണ് ആയതിനാല്‍ മണ്ണെടുക്കാന്‍ സമ്മതിക്കരുതെന്നും ഇത് അപകടമുണ്ടാക്കുമെന്നും നാട്ടുകാരില്‍ പലും രവീന്ദ്രനോട് പറഞ്ഞിരുന്നതാണ്. എന്നാല്‍ നാടിന്‍റെ വികസനത്തെ കരുതി മണ്ണെടുക്കാന്‍ രവീന്ദ്രന്‍ സമ്മതിക്കുകയായിരുന്നു. സംരക്ഷണഭിത്തി നിര്‍മിച്ചുനല്‍കാമെന്ന് കരാറുകാരും ഉറപ്പുനല്‍കിയിരുന്നു. എന്നാല്‍ 2022ല്‍ റോഡ് പ്രവൃത്തി പൂര്‍ത്തിയായിട്ടും സംരക്ഷണഭിത്തി നിര്‍മിച്ചുനല്‍കിയില്ല. ഒരു വര്‍ഷം മുമ്പ് ഇതിനു പാര്‍ശ്വഭിത്തികെട്ടുന്നതിന് 50 ലക്ഷം രൂപ അനുവദിച്ചതായി വകുപ്പ് അറിയിച്ചിരുന്നതായി രവീന്ദ്രന്‍ പറഞ്ഞു. ഇതിന് ശേഷം യാതൊരു നടപടികളും സ്വീകരിച്ചില്ല. കാന്‍സര്‍ രോഗിയായ രവീന്ദ്രന് തൊണ്ടയില്‍ ഓപ്പറേഷന്‍ നടത്തിയതിനാല്‍ സംസാരിക്കാന്‍ കഴിയില്ല. രോഗാവസ്ഥയും പ്രായാധിക്യവും തളര്‍ത്തുമ്പോഴും തന്‍റെ വീട് സംരക്ഷിക്കാനായി അടിയന്തരമായി പാര്‍ശ്വഭിത്തികെട്ടി നല്‍കണമെന്ന ആവശ്യവുമായി ഓടിനടക്കുകയാണ് ഇദ്ദേഹം.

കടലേറ്റത്തിന്‍റെ മുറിപ്പാടുകൾ മായാതെ തീരദേശം

കാസർഗോഡ്: അജാനൂരും തൃക്കണ്ണാടും മാത്രമല്ല, ജില്ലയുടെ തീരദേശങ്ങളിൽ എല്ലായിടത്തും ഇപ്പോൾ കടലേറ്റം സൃഷ്ടിച്ച മുറിപ്പാടുകളാണ്. മഴയടങ്ങിയപ്പോൾ കടൽ അല്പമൊന്ന് പിൻവാങ്ങിയെങ്കിലും തിരമാലകൾ കോരിയെടുത്തു കൊണ്ടുപോയ കരയുടെ ബാക്കിപത്രവും വീണുകിടക്കുന്ന തെങ്ങുകളും മറ്റു മരങ്ങളും തകർന്ന കെട്ടിടങ്ങളുടെയും കടൽഭിത്തികളുടെയും അവശിഷ്ടങ്ങളുമെല്ലാം തീരദേശവാസികൾ അനുഭവിക്കുന്ന തീരാവേദനകളുടെ സാക്ഷ്യപത്രമാകുന്നു. അജാനൂരും കീഴൂരും ഉപ്പള ബേരിക്കയിലും തീരദേശ റോഡുകളെ കടലെടുത്തു. ഉദുമയിലും തൃക്കണ്ണാടും ചെമ്പരിക്കയിലും വീടുകൾക്ക് തൊട്ടടുത്തുവരെയെത്തി. അജാനൂരിൽ ഗതിമാറിയൊഴുകിയ ചിത്താരിപ്പുഴയെ ജലവിഭവ വകുപ്പിന്‍റെ നേതൃത്വത്തിൽ അഴിമുഖം അടച്ച് വഴിതിരിച്ചുവിട്ടതോടെയാണ് ഫിഷ് ലാൻഡിംഗ് സെന്‍റർ കെട്ടിടവും അടുത്തുള്ള വീടുകളും അപകടഭീഷണിയിൽനിന്ന് അല്പമെങ്കിലും രക്ഷപ്പെട്ടത്. ഉപ്പള ബേരിക്കയിലും പെരിങ്കടിയിലും ഒന്നര കിലോമീറ്ററോളം ദൂരത്തിലാണ് തീരദേശ റോഡിനെയും തീരസംരക്ഷണത്തിനായി നട്ടുപിടിപ്പിച്ച കാറ്റാടി മരങ്ങളെയും കടലെടുത്തത്. ശേഷിക്കുന്ന റോഡും കാറ്റാടി മരങ്ങളും ഇപ്പോഴും അപകടഭീഷമിയിലാണ്. റോഡിന് സമീപത്തെ നിരവധി വൈദ്യുത തൂണുകളും നിലംപതിച്ചു. കാറ്റാടി മരങ്ങൾ വീണും വൈദ്യുത തൂണുകളും ലൈനുകളും തകരാറിലായി. തീരവും റോഡും സംരക്ഷിക്കുന്നതിനായി നിർമിച്ച ജിയോബാഗ് കടൽഭിത്തിയും തകർന്നു. കീഴൂർ ചെമ്പരിക്കയിൽ ഒരു വീടിന്‍റെ അകത്തേക്കുപോലും തിരമാലകളെത്തി. വീട്ടുകാരോട് മാറി താമസിക്കാൻ അധികൃതർ നിർദേശിച്ചിട്ടുണ്ട്. കീഴൂർ കടപ്പുറത്തും ഒന്നര കിലോമീറ്ററോളം ദൂരത്തിലാണ് റോഡ് കടലെടുത്തത്. ഒട്ടേറെ വൈദ്യുത തൂണുകളും നിലംപതിച്ചു. ഈ റോഡിനു സമീപം നിർദിഷ്ട തീരദേശ ഹൈവേ പദ്ധതിയുടെ അലൈൻമെന്‍റിനായി സ്ഥാപിച്ച കുറ്റികളും കടലെടുത്തു. കൊപ്പൽ, കാപ്പിൽ, ജന്മ കടപ്പുറങ്ങളിലും തീരദേശ ഹൈവേയുടെ കുറ്റികൾ കടൽ കൊണ്ടുപോയി. തൃക്കണ്ണാട് കടപ്പുറത്ത് തീരദേശ ഹൈവേയുടെ ഭാഗമാക്കാൻ ഉദ്ദേശിച്ച സംസ്ഥപാതയുടെ തൊട്ടടുത്തുവരെ കടലെത്തി. മഞ്ചേശ്വരം കണ്വതീർഥയിലും കീഴൂരും തൃക്കണ്ണാടിന് സമീപവും വിനോദസഞ്ചാര പദ്ധതികൾ നടപ്പാക്കാനുദ്ദേശിച്ചിരുന്ന തീരങ്ങളെയാണ് കടലെടുത്തത്. തീരദേശ പഞ്ചായത്തായ വലിയപറമ്പിൽ ഈ വർഷവും നിരവധി തെങ്ങുകൾ കടലേറ്റത്തിൽ കടപുഴകി. മീറ്ററുകളോളം ദൂരത്തിൽ കരഭാഗവും നഷ്ടമായി. കുമ്പള പെർവാഡ് കടപ്പുറത്ത് മീറ്ററുകളോളം ഉള്ളിലേക്ക് കടൽ കടന്നുകയറിയതോടെ തീരദേശവാസികൾക്ക് ആശ്വാസവും വരുമാനമാർഗവുമായിരുന്ന തെങ്ങുകളോരോന്നായി നഷ്ടപ്പെടുന്നു. ഇന്നലെ രാവിലെ മാത്രം പത്തോളം തെങ്ങുകളാണ് തിരയടിച്ച് കടപുഴകി വീണത്. ഇവയെല്ലാം നേരത്തേ തീരത്തുനിന്ന് മീറ്ററുകളോളം അകലെയുണ്ടായിരുന്നവയാണ്. കഴിഞ്ഞദിവസം കോയിപ്പാടി കടപ്പുറത്തും നിരവധി തെങ്ങുകൾ കടലെടുത്തിരുന്നു. ട്രോളിംഗ് നിരോധനവും മത്സ്യലഭ്യതയുടെ കുറവും തീരത്തെ വറുതിയിലാക്കുന്ന കാലത്ത് നല്ല കായ്ഫലമുള്ള തെങ്ങുകളും ഓരോന്നായി നഷ്ടമാകുന്നത് തീരദേശവാസികളെ സങ്കടപ്പെടുത്തുകയാണ്. ഇനി തേങ്ങയും വിലകൊടുത്തു വാങ്ങേണ്ട അവസ്ഥയാകുമെന്ന് മത്സ്യത്തൊഴിലാളികൾ പറയുന്നു.

ആര്‍ച്ച് ബീം തകര്‍ന്നു; തെക്കില്‍ പാലത്തിലെ ഗതാഗതം വഴിതിരിച്ചുവിട്ടു

ചട്ടഞ്ചാല്‍: ദേശീയപാതയിലെ തെക്കില്‍ പഴയ പാലത്തിലെ ആര്‍ച്ച് ബീം തകര്‍ന്നതിനെതുടര്‍ന്ന് ചട്ടഞ്ചാല്‍-ചെര്‍ക്കള ദേശീയപാതയില്‍ വാഹനങ്ങള്‍ക്ക് നിയന്ത്രണം ഏര്‍പ്പെടുത്തി. കാസര്‍ഗോട്ടേക്കും തിരിച്ചുമുള്ള ബസുകളും ലോറികളും ചട്ടഞ്ചാലില്‍ നിന്നും ദേളി റോഡിലൂടെ സംസ്ഥാനപാത വഴി തിരിച്ചുവിട്ടു. നവീകരണപ്രവൃത്തി ആരംഭിച്ചു. പ്രവൃത്തി പൂര്‍ത്തിയായ ഉടന്‍ ഗതാഗതം പുനഃസ്ഥാപിക്കുമെന്ന് അധികൃതര്‍ അറിയിച്ചു. സംരക്ഷണഭിത്തി തകര്‍ന്നതിനെതുടര്‍ന്ന് നിര്‍ത്തിവെച്ച ബേവിഞ്ച വഴിയുള്ള ഗതാഗതം രണ്ടാഴ്ച മുമ്പാണ് പുനഃസ്ഥാപിച്ചത്.

ചെമ്പഞ്ചേരിയിലെ അപകടാവസ്ഥയിലുള്ള വൈദ്യുതതൂൺ മാറ്റണം

ബളാൽ: 33 കുടുംബങ്ങൾ താമസിക്കുന്ന ചെമ്പഞ്ചേരി ഉന്നതിയിൽ നടുപ്പുവഴിയുടെ സമീപത്തുള്ള 35 വർഷത്തിലേറെ പഴക്കമുള്ള അപകടാവസ്ഥയിലുള്ള വൈദ്യുതതൂണും ലൈനും എത്രയും പെട്ടന്ന് മാറ്റി സ്ഥാപിക്കാൻ വൈദ്യുതി വകുപ്പും ജില്ലാ ഭരണകൂടവും അടിയന്തരമായി ഇടപെടണമെന്ന് ബളാൽ മണ്ഡലം നാലാം വാർഡ് കോൺഗ്രസ് എക്സിക്യൂട്ടീവ് യോഗം ആവശ്യപ്പെട്ടു. ഊരുമൂപ്പൻ രാഘവന്‍റെ വസതിയിൽ ചേർന്ന യോഗത്തിൽ വാർഡ് പ്രസിഡന്‍റ് ജോസ് വർഗീസ് അധ്യക്ഷതവഹിച്ചു. ജോർജ് ജോസഫ് ആഴാത്ത്, ശോഭ അജി, എൻ.സി. ശാരദ, ശ്രീകാന്ത് മുരളി എന്നിവർ പ്രസംഗിച്ചു. ടി.വി. ചന്ദ്രൻ സ്വാഗതവും വേണു കുഞ്ഞിക്കണ്ണൻ നന്ദിയും പറഞ്ഞു.

ജില്ലാ ആശുപത്രിയിലെ കൂട്ടിരിപ്പുകാര്‍ക്ക് അക്ഷരസാന്ത്വനം

കാഞ്ഞങ്ങാട്: ജില്ലാ ആശുപത്രിയില്‍ രോഗികളുടെ കൂട്ടിരിപ്പിനെത്തുന്നവര്‍ക്ക് ഇനിമുതല്‍ കഥകളും കവിതകളും ഉള്‍പ്പെടെ വിവിധ പുസ്തകങ്ങള്‍ വായിക്കാം. ചര്‍ച്ചയുമാകാം. പൊതു ഇടങ്ങളില്‍ വായന പരിപോഷിപ്പിക്കുന്നതിന്‍റെ ഭാഗമായി വിദ്യാരംഗം കലാസാഹിത്യവേദിയുടെ നേതൃത്വത്തില്‍ ജില്ലാ ആശുപത്രിയില്‍ ഒരുക്കിയ വായന കോര്‍ണറിലാണ് ഇതിനുള്ള സൗകര്യമുള്ളത്. തുടക്കത്തില്‍ 250ഓളം പുസ്തകങ്ങളാണ് ഇവിടെയുള്ളത്. കൂടാതെ ആനുകാലികങ്ങളും വായിക്കാന്‍ ഒരുക്കും. ഹൊസ്ദുര്‍ഗ് ഉപജില്ലാ കമ്മിറ്റിയുടെ നേതൃത്വത്തിലാണ് പ്രത്യേകം തയാറാക്കിയ സ്ഥലത്ത് അക്ഷരസാന്ത്വനം എന്ന പേരില്‍ വായനാമൂല ഒരുക്കിയിരിക്കുന്നത്. ഹൊസ്ദുര്‍ഗ് ബിആര്‍സിയിലെ കലാവിഭാഗം അധ്യാപകരാണ് ഇത് അണിയിച്ചൊരുക്കിയിരിക്കുന്നത്. ഇന്ന് ഉച്ചകഴിഞ്ഞ് മൂന്നിനു ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍ ഉദ്ഘാടനം ചെയ്യും. നഗരസഭ ചെയര്‍മാന്‍ കെ.വി. സുജാത ആശുപത്രി സൂപ്രണ്ട് ഡോ. എം.പി. ജീജക്ക് പുസ്തകങ്ങള്‍ കൈമാറും.

ലോക സൗഹൃദദിനത്തില്‍ വൃക്ഷത്തൈ കൈമാറ്റവുമായി ഹരിതകേരളം മിഷന്‍

കാസര്‍ഗോഡ്: ലോക സൗഹൃദ ദിനമായ ഓഗസ്റ്റ് മൂന്നിന് സുഹൃത്തുക്കള്‍ തമ്മില്‍ വൃക്ഷത്തൈകളുടെ കൈമാറല്‍ പരിപാടിയുമായി ഹരിതകേരളം മിഷന്‍. സൗഹൃദം മഹാവൃക്ഷമായി വളരട്ടെ എന്ന ആശയവുമായി ഒരു തൈ നടാം ജനകീയ വൃക്ഷവത്കരണ കാമ്പയിന്‍റെ ഭാഗമായാണ് പരിപാടി സംഘടിപ്പിക്കുന്നത്. സൗഹൃദ ദിനത്തിലോ അനുബന്ധ ദിവസങ്ങളിലോ നടക്കുന്ന പരിപാടിയില്‍ സംസ്ഥാനത്തെ സ്‌കൂളുകള്‍, കലാലയങ്ങള്‍, ഓഫീസുകള്‍, സ്ഥാപനങ്ങള്‍, വായനശാലകള്‍ ക്ലബ്ബുകള്‍, സന്നദ്ധ സംഘടനകള്‍, കുടുംബശ്രീ അയല്‍ക്കൂട്ടങ്ങള്‍, മാധ്യമ സ്ഥാപനങ്ങള്‍ തുടങ്ങിയ സ്ഥലങ്ങളില്‍ സുഹൃത്തുക്കള്‍ക്ക് നട്ടുവളര്‍ത്താന്‍ വൃക്ഷത്തൈകള്‍ പരസ്പരം കൈമാറിയാണ് പരിപാടി സംഘടിപ്പിക്കുന്നത്. ഹരിത കേരളം മിഷന്‍റെ ആഭിമുഖ്യത്തില്‍ സംസ്ഥാനത്ത് സൃഷ്ടിച്ച പച്ചത്തുരുത്തുകളിലും അന്നു തൈകള്‍ നടും. പുതിയ നിരവധി പച്ചത്തുരുത്തുകള്‍ക്കും അന്നു തുടക്കം കുറിക്കും. പരിസ്ഥിതി പുനഃസ്ഥാപനം, നെറ്റ് സീറോ കാര്‍ബണ്‍ കേരളം എന്നീ ലക്ഷ്യങ്ങള്‍ മുന്‍നിര്‍ത്തിയാണ് പരിപാടി. ചങ്ങാതിയുടെ പേരില്‍ മണ്ണിലൊരു തൈ നട്ട് പരിപാലിക്കുന്നതിലൂടെ മണ്ണും മനുഷ്യനും തമ്മിലുള്ള ജൈവബന്ധവും സുഹൃത്തുക്കള്‍ തമ്മിലുള്ള ആത്മബന്ധവും മഹാവൃക്ഷം പോലെ വളരട്ടെയെന്ന സന്ദേശംകൂടി കുട്ടികളിലെത്തും. 2025 സെപ്തംബര്‍ 30 നകം ഒരുകോടി വൃക്ഷത്തൈകള്‍ നട്ടുപിടിപ്പിക്കാന്‍ ലക്ഷ്യമിട്ടുള്ള ഒരു തൈ നടാം കാമ്പയിന്‍ സംസ്ഥാനത്ത് പുരോഗമിക്കുകയാണ്. ഇതിനകം 21 ലക്ഷത്തിലധികം തൈകള്‍ നട്ടുകഴിഞ്ഞു. തദ്ദേശ സ്വയംഭരണ സ്ഥാപനങ്ങള്‍, വിദ്യാഭ്യാസ സ്ഥാപനങ്ങള്‍, കുടുംബശ്രീ അംഗങ്ങള്‍, അയല്‍ക്കൂട്ടങ്ങള്‍, മഹാത്മാഗാന്ധി ദേശീയ-ഗ്രാമീണ തൊഴിലുറപ്പ് പദ്ധതി, അയ്യങ്കാളി തൊഴിലുറപ്പ് പദ്ധതി സോഷ്യല്‍ ഫോറസ്ട്രി വിഭാഗം തുടങ്ങിയവയുടെ നേതൃത്വത്തില്‍ വ്യാപകമായി വൃക്ഷത്തൈ ഉല്പാദനവും ഓഗസ്റ്റ്-സെപ്റ്റംബര്‍ മാസങ്ങളിലായി നടക്കുമെന്ന് ഹരിതകേരളം മിഷന്‍ വൈസ് ചെയര്‍പേഴ്‌സണ്‍ ഡോ. ടി.എന്‍. സീമ അറിയിച്ചു.

പബ്ലിക് ചെസ് ബോർഡുമായി ചിറ്റാരിക്കാൽ ചെസ് അക്കാദമി

ചിറ്റാരിക്കാൽ: ചിറ്റാരിക്കാൽ ചെസ് അക്കാദമിയുടെ നേതൃത്വത്തിൽ ബസ് സ്റ്റാൻഡ് കം ഷോപ്പിംഗ് കോംപ്ലക്സിൽ പബ്ലിക് ചെസ് ബോർഡ് സ്ഥാപിച്ചു. പഞ്ചായത്ത് പ്രസിഡന്‍റ് ജോസഫ് മുത്തോലിൽ ഉദ്ഘാടനം ചെയ്തു. പ്രഫ. ഷിജിത്ത് കുഴുവേലിൽ അധ്യക്ഷതവഹിച്ചു. ചെസ് അക്കാദമി മാനേജർ മനോജൻ രവി, സെബാസ്റ്റ്യൻ പീടികപ്പാറ, റെനി മംഗലത്ത് എന്നിവർ പ്രസംഗിച്ചു. ചെസിൽ സ്റ്റേറ്റ് ചീഫ് ആർബിറ്റർ പദവി നേടിയ ടോണി സെബാസ്റ്റ്യൻ പീടിക്കപ്പാറയിലിനെയും ഫിഡെ റേറ്റഡ് താരം സെന്‍റ് മേരീസ് ഇംഗ്ലീഷ് മീഡിയം സ്കൂളിലെ വിദ്യാർഥി ദേവദർശ് ശ്രീരാജ് മറ്റക്കാട്ടിനേയും മൊമെന്‍റോ നൽകി ആദരിച്ചു.

നവീകരിച്ച റെയിൽവേ ഫ്ലാറ്റ് ഫോമുകളിൽ തെന്നിവീഴുന്നവരുടെ എണ്ണം കൂടുന്നു

കാസർഗോഡ്: റെയിൽവേ പ്ലാറ്റ്ഫോമുകളുടെ നവീകരണം പൂർത്തിയായതോടെ മഴക്കാലത്ത് തെന്നിവീഴുന്ന യാത്രക്കാരുടെ എണ്ണവും കൂടുന്നു. മേൽക്കൂരയില്ലാത്ത ഭാഗങ്ങളിൽ മിനുസമായി കോൺക്രീറ്റ് ചെയ്ത പ്രതലങ്ങളിൽ മഴവെള്ളം നേരിട്ടു വീഴുന്നതാണ് മിക്കയിടങ്ങളിലും അപകടക്കെണിയാകുന്നത്. ടൈൽസ് പതിച്ച ഭാഗങ്ങളിൽ മേൽക്കൂരയുണ്ടെങ്കിലും മറ്റു തരത്തിൽ വെള്ളമെത്തുന്നുണ്ട്. ട്രെയിൻ കയറാനായി ഓടിയെത്തുന്ന പ്രായമായവരും സ്ത്രീകളും കുട്ടികളുമെല്ലാം തെന്നി വീഴുന്നത് പതിവായിട്ടും ഇക്കാര്യത്തിൽ പ്രത്യേകിച്ചൊന്നംചെയ്യാനാകാത്ത നിലയിലാണ് റെയിൽവേ ജീവനക്കാർ.

ജില്ലയിൽ രണ്ട് കുടുംബാരോഗ്യ കേന്ദ്രങ്ങള്‍ക്ക് കൂടി ദേശീയ ഗുണനിലവാര അംഗീകാരം

കാസർഗോഡ്: ജില്ലയിലെ രണ്ട് ആരോഗ്യകേന്ദ്രങ്ങള്‍ക്ക് കൂടി നാഷണല്‍ ക്വാളിറ്റി അഷുറന്‍സ് സ്റ്റാന്‍റേര്‍ഡ്‌സ് (എന്‍ക്യുഎഎസ്) അംഗീകാരം. ചട്ടഞ്ചാല്‍, പാണത്തൂര്‍ കുടുംബാരോഗ്യ കേന്ദ്രങ്ങൾക്കാണ് പുതുതായി ദേശീയ ഗുണനിലവാര അംഗീകാരം ലഭിച്ചത്. ഇതോടെ ജില്ലയില്‍ എന്‍ക്യുഎഎസ് അംഗീകാരം ലഭിച്ച ആരോഗ്യ സ്ഥാപനങ്ങളുടെ എണ്ണം 15 ആയി. ഈ അംഗീകാരം ലഭിക്കുന്ന കുടുംബാരോഗ്യ കേന്ദ്രങ്ങള്‍ക്ക് രണ്ടു ലക്ഷം രൂപ വീതവും ജനകീയ ആരോഗ്യ കേന്ദ്രങ്ങള്‍ക്ക് ഒരു പാക്കേജിന് 18,000 രൂപ വീതവും മറ്റ് അശുപത്രികള്‍ക്ക് ഒരു കിടക്കയ്ക്ക് 10,000 രൂപ എന്ന നിരക്കിലും മൂന്ന് വർഷത്തേക്ക് വാര്‍ഷിക ഇന്‍സെന്‍റീവ് ലഭിക്കും. ഈ തുക ആശുപത്രിയിൽ കൂടുതൽ വികസന പ്രവർത്തനങ്ങൾ നടത്തുന്നതിന് വിനിയോഗിക്കാനാകും.

കാറ്റിൽ വ്യാപകനാശം; നിരവധി വീടുകൾ തകർന്നു

ചെറുവത്തൂർ: ഇന്നലെ രാവിലെ ഉണ്ടായ ശക്തയായ കാറ്റിലും മഴയിലും ചെറുവത്തൂരിൽ വ്യാപക നാശനഷ്ടം. കണ്ണോത്തെ ശോഭയുടെ വീടിന്‍റെ മുകളിലേക്ക് തൊട്ടടുത്ത പറമ്പിലെ തെങ്ങ് കടപുഴകി വീണു. മൊറക്കാട്ട് ബാലന്‍റെ വീട്ടിലേക്ക് അടുത്ത പറമ്പിലെ മാവ് ഒടിഞ്ഞുവീണു. ശുചിമുറിയുടെ മേൽക്കൂരയാണ് പ്ലാവ് വീണുതകർന്നത്. വീരഭദ്ര ക്ഷേത്രത്തിന്‍റെ വടക്ക് ഭാഗത്ത് ജാതിമരം കടപുഴകി വീണ് ഓട് തകർന്നു. കൊവ്വലിൽ വീടിന്‍റെ മേൽക്കൂരയിൽ നിന്ന് ഇരുമ്പ് ഷീറ്റുകൾ പാറന്ന് പോയ്. ശക്തമായ കാറ്റിൽ വൈദ്യുത കമ്പികൾ പൊട്ടിവീണു. കെ.വി. കുഞ്ഞികൃഷ്ണന്‍റെ വീട്ടുവളപ്പിലെ പ്ലാവും കമുകുകളും കടപുഴകി വീണു. രാജപുരം: ഇന്നലെ ഉച്ചയ്ക്കുണ്ടായ ശക്തമായ കാറ്റിൽ രാജപുരം ഒന്നാംമൈലിലെ കരോട്ടുപുളിക്കൽ അന്നമ്മയുടെ വീടിന് മുകളിൽ തെങ്ങ് കടപുഴകി വീണു. കുടുംബാംഗങ്ങൾ പരിക്കേൽക്കാതെ അത്ഭുതകരമായി രക്ഷപെട്ടു.

മണ്ഡപം-കടുമേനി പാലം കെസിവൈഎം പ്രവർത്തകർ ശുചീകരിച്ചു

മണ്ഡപം: മഴക്കാലത്ത് ഇരുചക്രവാഹനങ്ങൾക്കും കാൽനടയാത്രകർക്കും ഏറെ ബുദ്ധിമുട്ടുണ്ടാക്കിയിരുന്ന മണ്ഡപം-കടുമേനി റോഡിൽ മണ്ഡപം പുഴയ്ക്ക് കുറുകെയുള്ള പാലം വൃത്തിയാക്കി മണ്ഡപം കെസിവൈഎം യൂണിറ്റ് മാതൃകയായി. മഴക്കാലത്ത് മുകളിലെ കുന്നിൽ നിന്നും ഒഴുകിവരുന്ന കല്ലും മണ്ണും പാലത്തിൽ അടിഞ്ഞു കൂടുകയും ഇരുചക്രവാഹന യാത്രക്കാരും കാൽനട യാത്രികരും അപകടത്തിൽപ്പെടുന്നതും പതിവാണ്. റോഡിന് ആവശ്യമായ ഓടകൾ നിർമിക്കാത്തതും കൈവരി പോലുമില്ലാത്ത പാലത്തിന് യഥാസമയം അറ്റകുറ്റപ്പണി നടത്താത്തതും ആണ് ഈ ദുരവസ്ഥയ്ക്ക് കാരണം. മണ്ഡപം ഭാഗത്തുനിന്നും പാലത്തിലേക്ക് പ്രവേശിക്കുന്ന ഭാഗത്ത് സുരക്ഷാവേലി നിർമിക്കേണ്ടത് അത്യാവശ്യമാണ്. കാടുമൂടി കിടക്കുന്ന ഈ ഭാഗം രാത്രികാലങ്ങളിൽ എത്തുന്ന വാഹനങ്ങൾ തിരിച്ചറിയാതെ വരികയും പുഴയിലേക്ക് വീഴുവാൻ സാധ്യത ഏറെയാണ്. അധികാരികൾ വേണ്ട നടപടികൾ അടിയന്തരമായി സ്വീകരിക്കണമെന്നാണ് നാട്ടുകാരുടെ ആവശ്യം. ശുചീകരണ പ്രവർത്തികൾക്ക് കെസിവൈഎം മണ്ഡപം യൂണിറ്റ് ആനിമേറ്റർ സ്റ്റീഫൻ ഷൈൻവില്ല, പ്രസിഡന്‍റ് ജോസഫ് ഞൊണ്ടമ്മാക്കൽ, ബോബിൻ, ആന്‍റോ, ബിൽബിൻ, തോമസ് എന്നിവർ നേതൃത്വം നൽകി.

റോഡരികിലെ കൂറ്റന്‍ ആല്‍മരം കടപുഴകി വീണു

കാസര്‍ഗോഡ്: റോഡരികിലെ നൂറ്റാണ്ട് പഴക്കമുള്ള കൂറ്റന്‍ ആല്‍മരം കടപുഴകി വീണു. ഇന്നലെ രാവിലെയുണ്ടായ അതിശക്തമായ കാറ്റിലാണ് ചെമ്മനാട്-ചളിയംകോട്-പള്ളിപ്പുറം റോഡരികിലെ നൂറ്റാണ്ടുകള്‍ പഴക്കമുള്ള കൂറ്റന്‍ ആല്‍മരം കടപുഴകി റോഡിലേക്ക് വീണത്. കുട്ടികള്‍ അടക്കം നിരവധി പേര്‍ കാല്‍നടയായും ഒട്ടനവധി വാഹനങ്ങളും പോകുന്ന റോഡ് ആണിത്. ആല്‍മരത്തിന് സമീപത്ത് വീടുകള്‍ ഉണ്ടായിട്ടും മരം റോഡിലേക്ക് വീണതിനാല്‍ വന്‍ ദുരന്തമാണ് ഒഴിവായത്. വൈദ്യുതി ലൈനും ഇതുവഴി കടന്നു പോകുന്നുണ്ടെങ്കിലും മരം വൈദ്യുതി ലൈനിലേക്ക് വീഴാതിരുന്നതിനാലും വലിയ അപകടമാണ് വഴിമാറിയത്. ഇതേതുടര്‍ന്ന് മണിക്കൂറുകളോളം ഇതുവഴിയുള്ള ഗതാഗതം തടസപ്പെട്ടു. സംഭവം അറിഞ്ഞ് ഓടിക്കൂടിയ നാട്ടുകാര്‍ കാസര്‍ഗോഡ് അഗ്‌നിരക്ഷാസേനയെ വിവരമറിയിച്ചതിനെ തുടര്‍ന്ന് സീനിയര്‍ ഫയര്‍ ആന്‍ഡ് റെസ്‌ക്യൂ ഓഫീസര്‍ സണ്ണി ഇമ്മാനുവലിന്‍റെ നേതൃത്വത്തില്‍ കാസര്‍ഗോട്ടു നിന്നും രണ്ടു യൂണിറ്റ് വാഹനം എത്തി മരം മുറിച്ചുമാറ്റി റോഡ് ഗതാഗതയോഗ്യമാക്കി. സേനാഗംങ്ങളായ എം. രമേശ, ഒ.കെ. പ്രജിത്ത്, എസ്. സാദിഖ്, ജിത്തു തോമസ്, ടി. അമല്‍രാജ്, ഹോംഗാര്‍ഡുമാരായ രാജേന്ദ്രന്‍, എം.കെ. ഷൈലേഷ്, കെ.വി. ശ്രീജിത്ത് എന്നിവര്‍ ഉണ്ടായിരുന്നു.

വടക്കേമലബാറിന്‍റെ ടൂറിസം ഹബ്ബാകാന്‍ കാസര്‍ഗോഡ്

കാസര്‍ഗോഡ്: വിനോദസഞ്ചാരമേഖലയില്‍ വടക്കന്‍മലബാറിന്‍റെ ഹബ്ബാകാന്‍ ഒരുങ്ങുകയാണ് കാസര്‍ഗോഡ്. ചരിത്രമുറങ്ങുന്ന കോട്ട കൊത്തളങ്ങളും പ്രകൃതി കനിഞ്ഞു നല്‍കിയ കടലും കായലും പുഴകളും മണ്ണില്‍ അലിഞ്ഞുചേര്‍ന്ന തുളുനാടന്‍ സംസ്‌കൃതിയും എല്ലാം ചേര്‍ന്നുള്ള ടൂറിസം സാധ്യകളെ കൈയെത്തിപ്പിടിക്കാനുള്ള സത്വര പ്രവര്‍ത്തനങ്ങളാണ് ടൂറിസം വകുപ്പിന്‍റെ നേതൃത്വത്തില്‍ ജില്ലയില്‍ നടന്നു വരുന്നത്. ബിആര്‍ഡിസിയുടെ കടന്നുവരവോടെ ജില്ലയിലെ ടൂറിസം രംഗം വേഗത്തില്‍ വളര്‍ന്നുതുടങ്ങി. 1995ല്‍ ബിആര്‍ഡിസി രൂപീകരിക്കുന്നതിന് മുന്പ് 50,000 സഞ്ചാരികള്‍ എത്തിക്കൊണ്ടിരുന്ന ബേക്കലില്‍ ഇന്ന് അഞ്ചു ലക്ഷത്തില്‍ അധികം ആളുകള്‍ എത്തുന്നു. ബേക്കല്‍ വിനോദ സഞ്ചാര പ്രവര്‍ത്തനങ്ങള്‍ക്ക് 32 ഏക്കര്‍ ഭൂമിയാണ് ഏറ്റെടുത്തത്. 150 കോടിയുടെ നിക്ഷേപമാണ് ഇത്. ബേക്കല്‍ ടൂറിസം പ്രൊജക്ടിന് കീഴിലായി മാലംകുന്നില്‍ ബേക്കലില്‍ ഗേറ്റ് വേ ബേക്കല്‍ ഫൈവ്സ്റ്റാര്‍ റിസോര്‍ട്ട് 2024 ഡിസംബറില്‍ മുഖ്യമന്ത്രി ഉദ്ഘാടനം ചെയ്തതോടെ മൂന്നു പഞ്ചനക്ഷത്ര ഹോട്ടലുകള്‍ ബിആര്‍ഡിസിയുടെ നേതൃത്വത്തില്‍ പ്രവര്‍ത്തനം ആരംഭിച്ചു. ബേക്കല്‍ ബീച്ച് പാര്‍ക്കിലേക്കുള്ള റോഡ് നവീകരിച്ച് ഒരു ഭാഗത്ത് നടപ്പാത നിര്‍മിക്കുകയും ഗതാഗതസൗകര്യം മെച്ചപ്പെടുത്തുകയും ചെയ്തതോടെ സഞ്ചാരികള്‍ക്ക് കോട്ടയിലെത്താന്‍ കൂടുതല്‍ സൗകര്യമായി. പാര്‍ക്കിനകത്ത് ശുചിമുറിയും ബേക്കല്‍ കോട്ടയില്‍നിന്നും ബീച്ചിലേക്ക് നടന്നു പോകുന്ന സഞ്ചാരികള്‍ക്കായി കെഎസ്ടിപി റോഡിനു ഇരുവശത്തുമായി ടൈല്‍ പാകിയ നടപ്പാത നിര്‍മിച്ചും കോട്ടയാത്രയ്ക്ക് ഭംഗി കൂട്ടി. ബേക്കല്‍ റെയില്‍വേ പാലത്തിന് അടിവശത്തായി മുള കൊണ്ടുള്ള ജൈവവേലി ഉണ്ടാക്കുകയും രണ്ടു വശങ്ങളിലും തെരുവ് വിളക്കുകള്‍ സ്ഥാപിക്കുകയും ചെയ്തു. ബേക്കല്‍ അന്താരാഷ്‌‌ട്ര ബീച്ച് ഫെസ്റ്റിവല്‍ കാസര്‍ഗോഡ് ജനത ഏറ്റെടുത്തു. മംഗളൂരു, കണ്ണൂര്‍ വിമാനത്താവളങ്ങളും നിര്‍മാണം പുരോഗമിക്കുന്ന ദേശീയപാത 66, മലയോര ഹൈവേ എന്നിവ ജില്ലയുടെ ടൂറിസം വികസനത്തിന് വേഗം കൂട്ടും. റാണിപുരം കാഴ്ചകള്‍ക്ക് മാറ്റുകൂടും കേരളത്തിന്‍റെ ഊട്ടിയായ റാണിപുരത്തിന് ഇനി മിഴിവേറും. സൗന്ദര്യവത്കരണത്തിനും പുനരുദ്ധാരണ പ്രവര്‍ത്തനങ്ങള്‍ക്കായി രണ്ടുകോടിയോളം രൂപയുടെ വികസന പ്രവര്‍ത്തനങ്ങളാണ് നടത്തിവരുന്നത്. ടൂറിസ്റ്റുകള്‍ക്ക് താമസിക്കാനുള്ള 12 മുറികളും അനുബന്ധ സൗകര്യങ്ങളുമുള്ള കോംപ്ലക്‌സില്‍ സഞ്ചാരികള്‍ക്ക് കൂടുതല്‍ സൗകര്യമേര്‍പ്പെടുത്തുന്നു. 65 ലക്ഷം രൂപ ചെലവില്‍ ഗസ്റ്റ് ഹൗസ് നവീകരണം, 13 ലക്ഷം രൂപ ചെലവില്‍ ശുചിമുറികളുടെയും കോട്ടേജുകളുടെയും നവീകരണം, പവലിയന്‍റെയും മീറ്റിംഗ് ഹാളിന്‍റെയും നവീകരണം തുടങ്ങിയവയാണ് നവീകരണ പദ്ധതികളുടെ ഭാഗമായി നടത്തുന്ന പ്രവര്‍ത്തനങ്ങള്‍. ഇരിപ്പിടങ്ങള്‍, റീടെയ്‌നിംഗ് വാള്‍, സ്വിമ്മിംഗ് പൂള്‍, എന്‍ട്രന്‍സ് ഗേറ്റ്, കോന്പൗണ്ട് വാള്‍, ലാന്‍ഡ്‌സ്‌കേപ്പിംഗ്, വിവിധ കളിയുപകരണങ്ങള്‍ തുടങ്ങിയവ പദ്ധതിയുടെ ഭാഗമാകുന്നു. ഗ്രാമക്കാഴ്ചകളുടെ വിസ്മയം തീര്‍ക്കാന്‍ ഉത്തരവാദിത്ത ടൂറിസം മിഷന്‍ ഗ്രാമീണജീവിതം മെച്ചപ്പെടുത്തുകയും അതുവഴി ഗ്രാമത്തിലേക്ക് വരുമാനം എത്തിക്കുകയും ദാരിദ്ര്യ നിര്‍മാര്‍ജനവും സ്ത്രീ ശാക്തീകരണത്തിന് ഊന്നല്‍ നല്‍കിയുള്ള ഗ്രാമവികസനവുമാണ് ഉത്തരവാദിത്ത ടൂറിസം മിഷന്‍റെ ലക്ഷ്യം. കര്‍ഷകര്‍ക്ക് മെച്ചപ്പെട്ട ജീവിതസാഹചര്യം ഒരുക്കുക, അധിക വരുമാനം ഉറപ്പാക്കുക, പാരമ്പര്യ കൈത്തൊഴിലുകള്‍ക്കു കൂടുതല്‍ സഹായങ്ങളൊരുക്കുക, അങ്ങനെ കൂടുതല്‍ മികച്ച സാമൂഹ്യ, പാരിസ്ഥിതിക സന്തുലനം സമൂഹത്തില്‍ ഉറപ്പാക്കുക എന്നിവയും ഉന്നമിടുന്നു. ജില്ലയിലെ ഉത്തരവാദിത്ത ടൂറിസം പ്രവര്‍ത്തനങ്ങള്‍ വളരെ മികച്ച രീതിയില്‍ ആണ് മുന്നോട്ടുപോകുന്നത്. ചെറുതും വലുതുമായ ആയിരക്കണക്കിന് യൂണിറ്റുകള്‍ ജില്ലയില്‍ ഉത്തരവാദിത്ത ടൂറിസത്തിന്‍റെ ഭാഗമായി കഴിഞ്ഞു. ഇതുവഴി യൂണിറ്റുകള്‍ക്ക് നിത്യവരുമാനവും ലഭിച്ചു തുടങ്ങി. ജില്ലയില്‍ പ്രധാനമായും മൂന്നു വില്ലേജ് ലൈഫ് എക്‌സ്പീരിയന്‍സ് പാക്കേജുകളാണുള്ളത്. ബേക്കല്‍ വില്ലേജ് ലൈഫ് എക്‌സ്പീരിയന്‍സ്, വലിയപറമ്പ് പാക്കേജുകള്‍ (രണ്ടെണ്ണം) എന്നിവ. കാസര്‍ഗോഡിന്‍റെ വില്ലേജ് ലൈഫ് എക്‌സ്പീരിയന്‍സ് പാക്കേജ് അഥവാ ഗ്രാമീണ ജനജീവിതങ്ങളുടെ നേര്‍ക്കാഴ്ച കാണാന്‍ നിരവധി ആള്‍ക്കാരാണ് എത്തിച്ചേരുന്നത്. ജില്ലയ്ക്ക് പുറത്തുള്ള പ്രദേശങ്ങളിലെ ഗ്രാമീണ കാഴ്ച കാണാനും മറ്റു സംസ്ഥാനങ്ങളിലെ കാഴ്ചകള്‍ കാണാനും സഹായിക്കുന്ന ടൂര്‍ പാക്കേജ് ആര്‍ടി മിഷന്‍റെ കീഴില്‍ രജിസ്റ്റര്‍ ചെയ്ത യൂണിറ്റുകള്‍ നടത്തി വരുന്നുണ്ട്. ജില്ലയിലെ ബേഡഡുക്ക പഞ്ചായത്ത്, ബാനം കേന്ദ്രീകരിച്ച് തുരങ്ക പാക്കേജും ഉത്തരവാദിത്ത ടൂറിസം മിഷന്‍ നടത്തിവരുന്നുണ്ട്. ഫാം ടൂറിസം നടപ്പിലാക്കുക എന്ന് ഉദ്ദേശത്തോടെ സംരംഭകര്‍ക്ക് പരിശീലനംനല്‍കുകയും അതുവഴി നിരവധി ഫാം ടൂറിസം യൂണിറ്റുകള്‍ ജില്ലയില്‍ നിലവില്‍ വരുകയും ചെയ്തിട്ടുണ്ട്. സ്ത്രീ സൗഹാര്‍ദ്ദ ടൂറിസം പദ്ധതിയും ജില്ലയില്‍ നടപ്പിലാക്കി വരുന്നു. ഇതിന്‍റെ ഭാഗമായി ട്രെയിനിംഗ് ലഭിച്ച റിസോഴ്‌സ് പേഴ്‌സണ്‍ ജില്ലയില്‍ പ്രവര്‍ത്തിച്ചുവരുന്നുണ്ട്. തെയ്യം കാലഘട്ടത്തില്‍ തെയ്യം പാക്കേജും നടപ്പിലാക്കുന്നു. തെയ്യം കാണാന്‍ മാത്രമായി നിരവധി വിദേശിയരും സ്വദേശീയരും എത്തുന്നുണ്ട്. സ്ട്രീറ്റ് (Sustainable Tangible Responsible Experiential Ethnic Tourism) പദ്ധതിക്കായി സംസ്ഥാനത്തു തന്നെ തെരഞ്ഞെടുക്കപ്പെട്ട 10 പഞ്ചായത്തുകളില്‍ ഒന്നാണ് വലിയപറമ്പ. സ്ട്രീറ്റ് പദ്ധതിയുടെ ഭാഗമായി ആദ്യഘട്ട പ്രവര്‍ത്തനങ്ങള്‍ പൂര്‍ത്തിയാക്കി. സ്ത്രീകള്‍ക്ക് സ്വയംതൊഴില്‍ എന്ന ലക്ഷ്യത്തോടെ നിരവധി പരിശീലന പരിപാടികള്‍ സംഘടിപ്പിക്കുന്നുണ്ട്. ശുഭയാത്രയൊരുക്കി യാത്രാശ്രീ ടൂറിസം മേഖലയില്‍ പെണ്‍കരുത്ത് തെളിയിച്ച് ജില്ലയിലെ യാത്രാശ്രീ അംഗങ്ങള്‍. കുടുംബശ്രീമിഷനുമായി ചേര്‍ന്ന് നടപ്പിലാക്കിയ പദ്ധതിയില്‍ ചെമ്മനാട്, ഉദുമ, പള്ളിക്കര, ഈസ്റ്റ് എളേരി, മടിക്കൈ, വലിയപറമ്പ് പഞ്ചായത്തുകളിലെ വനിതകളാണ് പദ്ധതിക്ക് ചുക്കാന്‍ പിടിക്കുന്നത്. 2022 മേയിൽ തദ്ദേശസ്വയംഭര വകുപ്പ് മന്ത്രി ഉദ്ഘാടനം ചെയ്ത പദ്ധതിയില്‍ നവംബര്‍ മാസം ആദ്യ ട്രിപ്പ് നടത്തി. 2025 നവംബറില്‍ ട്രിപ്പുകള്‍ തുടങ്ങി മൂന്നുവര്‍ഷം തികയാനിരിക്കെ ഇതുവരെ 100 ലധികം ട്രിപ്പുകള്‍ ജില്ലയ്ക്കകത്തും പുറത്തും നടത്തിയ അനുഭവമാണ് ഇവര്‍ക്ക് പറയാനുള്ളതത്. റോഡ്, റെയില്‍, വിമാന മാര്‍ഗങ്ങള്‍ ട്രിപ്പുകള്‍ക്കായി തെരഞ്ഞെടുക്കുന്നു. വിദ്യാര്‍ഥികള്‍, സ്ത്രീകള്‍ മാത്രമുള്ള യാത്രകള്‍, പുരുഷന്‍മാര്‍ക്ക് മാത്രമുള്ള യാത്രകള്‍, ഫാമിലി ട്രിപ്പുകള്‍ തുടങ്ങി വിവിധ വിഭാഗക്കാര്‍ക്ക് യാത്രാനുഭവം നല്‍കിവരുന്ന പദ്ധതി ജില്ലയ്ക്ക് അഭിമാനകരമാണ്. ബിആര്‍ഡിസി, കുടുംബശ്രീ എന്നിവ സംയുക്തമായാണ് യാത്രാശ്രീ എന്നപേരില്‍ ടൂര്‍ ഓപ്പറേഷന്‍ ഡിവിഷന്‍ ഉണ്ടാക്കി മേഖലയില്‍ കൂടുതല്‍ തൊഴിലവസരങ്ങള്‍ സൃഷ്ടിച്ചത്. യാത്രികര്‍ക്ക് നവ്യാനുഭവം നല്‍കുന്ന പൊസഡിഗുംപെ പദ്ധതി പ്രവൃത്തി ആരംഭിച്ചുകഴിഞ്ഞു. കാഞ്ഞങ്ങാട് കൈറ്റ് ബീച്ച്, നീലേശ്വരം അഴിത്തല ടൂറിസം പദ്ധതി, ചെമ്പരിക്ക ബീച്ച് പദ്ധതി, കണ്വതീര്‍ത്ഥ പദ്ധതി എന്നിവ ജില്ലയുടെ ടൂറിസം മേഖലയെ ശക്തിപ്പെടുത്തും.

കനത്ത കാറ്റിൽ കള്ളാർ പഞ്ചായത്തിൽ വ്യാപക നാശം

രാജപുരം: വെള്ളിയാഴ്ച രാത്രി മഴയ്ക്കൊപ്പം വീശിയടിച്ച ശക്തമായ കാറ്റിൽ കള്ളാർ പഞ്ചായത്തിലെ വിവിധ പ്രദേശങ്ങളിൽ വ്യാപക നാശം. കാപ്പുംകര നളിനിയുടെ വീടിന്‍റെ മേൽക്കൂര തകർന്നു. പെരുമ്പള്ളിയിലെ പി.സി. ചന്ദ്രന്‍റെ വീടിനു മുകളിലേക്ക് റബർ മരം കടപുഴകി വീണു. രണ്ട് വൈദ്യുത തൂണുകളും നിലംപതിച്ചു. പെരുമ്പള്ളിയിലെ സുരേഷിന്‍റെ വീടിനു മുകളിലെ ഷീറ്റ് തകർന്നു. കൊട്ടോടിയിലെ പി.പി. അബ്ദുള്ള മൗലവിയുടെ വീട്ടുപറമ്പിലെ പ്ലാവിന്‍റെ കൊമ്പ് പൊട്ടിവീണ് വീടിന് കേടുപാടുകൾ സംഭവിച്ചു. പൂക്കുന്നത്ത് മാണിക്കത്തിന്‍റെ വീടിന്‍റെ ടെറസിനു മുകളിലേക്ക് തെങ്ങ് കടപുഴകി വീണു. കപ്പള്ളി നാഗത്തുംപാടിയിൽ തെങ്ങ് കടപുഴകി വീണതിനെ തുടർന്ന് അഞ്ച് വൈദ്യുത തൂണുകൾ തകർന്നു. ഇതുവഴിയുള്ള ഗതാഗതവും തടസപ്പെട്ടു. രണ്ടാം വാർഡ് ആടകത്തെ മണ്ണൂർ ഷിജു മാത്യുവിന്‍റെ വീടിനു മുകളിലെ ഷീറ്റിട്ട മേൽപ്പുര പൂർണമായും തകർന്നുവീണു. ഇന്നലെ രാവിലെയായിരുന്നു സംഭവം. മേൽപ്പുരയ്ക്കു മുകളിലെ സോളാർ പാനലടക്കമുള്ള ഇലക്ട്രിക്, ഇലക്ട്രോണിക് ഉപകരണങ്ങളും വാട്ടർ ടാങ്കും നശിച്ചു. പഞ്ചായത്ത് പ്രസിഡന്‍റ് ടി.കെ. നാരായണനും വാർഡ് മെംബർ സണ്ണി എബ്രഹാമും വില്ലേജ് അധികൃതരും സ്ഥലം സന്ദർശിച്ചു.

മേഘ കമ്പനിയെ ദേശീയപാത നിർമാണ ചുമതലയിൽനിന്ന് മാറ്റണം: രാജ്മോഹൻ ഉണ്ണിത്താൻ

ചെറുവത്തൂർ: മനുഷ്യരുടെ ജീവനും സ്വത്തിനും സംരക്ഷണം കൊടുക്കണമെങ്കിൽ മേഘ കൺസ്ട്രക്ഷൻ കമ്പനിയെ ദേശീയപാതയുടെ നിർമാണ ചുമതലയിൽ നിന്ന് മാറ്റിനിർത്തണമെന്ന് രാജ്മോഹൻ ഉണ്ണിത്താൻ എംപി പറഞ്ഞു. വീരമലക്കുന്നിന് താഴെ കഴിഞ്ഞ ദിവസം ദേശീയപാതയിലേക്ക് മണ്ണിടിഞ്ഞുവീണ പ്രദേശം സന്ദർശിക്കുകയായിരുന്നു അദ്ദേഹം. സംഭവം കേന്ദ്രമന്ത്രി നിതിൻ ഗഡ്കരിയുടെ ശ്രദ്ധയിൽ പെടുത്തിയിട്ടുണ്ടെന്ന് എംപി പറഞ്ഞു. ഷിരൂരിൽ സംഭവിച്ച ദുരന്തത്തിന് സമാനമായ അവസ്ഥയാണ് ചെറുവത്തൂരിലുമുണ്ടായത്. ഇവിടെ സോയിൽ നെയിലിംഗ് നടത്തിയതുകൊണ്ട് മലയിടിച്ചിൽ തടയാനാവില്ല. എല്ലാ ഭാഗങ്ങളിലും ശക്തമായ കോൺക്രീറ്റ് സംരക്ഷണഭിത്തി തന്നെ നിർമിക്കേണ്ടതുണ്ട്. പെരിയയിൽ ഫ്ലൈ ഓവർ തകർന്നപ്പോൾ തന്നെ മേഘ കമ്പനിയെ ഒഴിവാക്കണമെന്ന് ഞാൻ ആവശ്യപ്പെട്ടിരുന്നതായി എംപി പറഞ്ഞു. ഡിസിസി ജനറൽ സെക്രട്ടറിമാരായ കെ.വി. സുധാകരൻ, കെ.പി. പ്രകാശൻ, ബ്ലോക്ക് പ്രസിഡന്‍റ് മഡിയൻ ഉണ്ണികൃഷ്ണൻ, മണ്ഡലം പ്രസിഡന്‍റ് കെ. ബാലകൃഷ്ണൻ, പി. കുഞ്ഞിക്കണ്ണൻ, എം.വി. ഉദ്ദേശ്കുമാർ, എം.എ. അശോകൻ, ഒ. ഉണ്ണികൃഷ്ണൻ, കെ.കെ. കുമാരൻ, രാജേന്ദ്രൻ പയ്യാടക്കത്ത്, ഹംസൻ പയ്യങ്കി, എം. രജീഷ് ബാബു, ജയപ്രകാശ് മയിച്ച, സി. ചിത്രകാരൻ, രാജു മുട്ടത്ത് എന്നിവർ സംബന്ധിച്ചു.

കെപിഎസ്ടിഎ ഡിഇഒ ഓഫീസ് മാർച്ച് നടത്തി

കാസർഗോഡ്: വിവിധ ആവശ്യങ്ങൾ ഉന്നയിച്ചുകൊണ്ട് കെപിഎസ്ടിഎ ജില്ലാ കമ്മിറ്റിയുടെ നേതൃത്വത്തിൽ ഡിഇഒ ഓഫീസ് മാർച്ചും ധർണയും നടത്തി. എൻ.എ. നെല്ലിക്കുന്ന് എംഎൽഎ ഉദ്ഘാടനം ചെയ്തു. ജില്ലാ പ്രസിഡന്‍റ് പി.ടി. ബെന്നി അധ്യക്ഷനായി. കോൺട്രിബ്യൂട്ടറി പെൻഷൻ ഒഴിവാക്കി സ്റ്റാറ്റ്യുട്ടറി പെൻഷൻ പുനസ്ഥാപിക്കുക, 9,10 ക്ലാസുകളിൽ 1:40 അനുപാതം നടപ്പിലാക്കുക, അശാസ്ത്രീയമായ സമയമാറ്റം പിൻവലിക്കുക, ഉച്ചഭക്ഷണ തുക വർധിപ്പിക്കുക, ആലോചനയില്ലാതെ പ്രഖ്യാപിച്ച മെനു പുനപരിശോധിക്കുക, ജീവനക്കാർക്കും അധ്യാപകർക്കും വിശ്വാസയോഗ്യമായ ആരോഗ്യസുരക്ഷ ഉറപ്പുവരുത്തുക, മുഴുവൻ പ്രീപ്രൈമറി അധ്യാപകർക്കും ആയമാർക്കും തസ്തികയും ആനുകൂല്യവും അനുവദിക്കുക, ഖാദർ കമ്മിറ്റി റിപോർട്ട്‌ പിൻവലിക്കുക, എല്ലാ വിദ്യാലയങ്ങളിലും കായികാധ്യാപക തസ്തിക സൃഷ്ടിക്കുക തുടങ്ങിയ ആവശ്യങ്ങളാണ് ഉന്നയിച്ചത്. സംസ്ഥാന നിർവാഹക സമിതി അംഗങ്ങളായ പി. ശശിധരൻ, പ്രശാന്ത് കാനത്തൂർ, അലോഷ്യസ് ജോർജ്, ജോമി ടി. ജോസ്, സ്വപ്ന ജോർജ്, എം.കെ. പ്രിയ, പി. ജലജാക്ഷി, ജില്ലാ സെക്രട്ടറി കെ. ഗോപാലകൃഷ്ണൻ, ട്രഷറർ പി. ശ്രീജ എന്നിവർ നേതൃത്വം നല്കി.

കാസർഗോഡ് നഗരത്തിൽ കാട്ടുപന്നികളെ വെടിവച്ചുകൊല്ലാന്‍ നഗരസഭാധ്യക്ഷന്‍റെ ഉത്തരവ്

കാസർഗോഡ്: നഗരസഭാ പരിധിയിൽ ജനങ്ങളുടെ ജീവനും സ്വത്തിനും ഭീഷണിയായി മാറിയ കാട്ടുപന്നികളെ പ്രത്യേക പരിശീലനം ലഭിച്ച ഷൂട്ടര്‍മാരെ കൊണ്ടുവന്ന് വെടിവച്ച് കൊല്ലാന്‍ നഗരസഭ ചെയര്‍മാന്‍ അബ്ബാസ് ബീഗം ഉത്തരവിറക്കി. നഗരസഭയുടെ വിവിധ ഭാഗങ്ങളിൽ കാട്ടുപന്നികൾ കൃഷി നശിപ്പിക്കുന്നതും കുട്ടികളെയടക്കം ആക്രമിക്കുന്നതുമായി ബന്ധപ്പെട്ട് നിരവധി പരാതികൾ ഉയർന്നിരുന്നു. ഇതിന് പരിഹാരം കാണാനാണ് വന്യജീവി സംരക്ഷണ നിയമത്തിന്‍റെ 4(1) ബി വകുപ്പ് പ്രകാരം ഓണററി വൈല്‍ഡ് ലൈഫ് വാര്‍ഡന്‍റെ അധികാരം നല്കിയിട്ടുള്ള നഗരസഭ ചെയര്‍മാന്‍ പന്നികളെ വെടിവച്ച് കൊല്ലാന്‍ ഉത്തരവിട്ടത്. ഇതുമായി ബന്ധപ്പെട്ട് നഗരസഭയിൽ വിളിച്ചുചേർത്ത ചേര്‍ന്ന യോഗത്തിലാണ് തീരുമാനം. ചെയര്‍മാന്‍ അബ്ബാസ് ബീഗത്തിന്‍റെ അധ്യക്ഷതയിൽ നടന്ന യോഗത്തിൽ നഗരസഭ സ്ഥിരം സമിതി ചെയര്‍മാന്‍മാരായ സഹീര്‍ ആസിഫ്, ഖാലിദ് പച്ചക്കാട്, കൗണ്‍സിലര്‍മാരായ ബി.എസ്. സൈനുദ്ദീന്‍, മജീദ് കൊല്ലമ്പാടി, അസ്മ മുഹമ്മദ്, ടൗൺ പോലീസ് സ്റ്റേഷന്‍ ഹൗസ് ഓഫീസര്‍ കെ. ശശിധരന്‍, റെയ്ഞ്ച്ഫോറസ്റ്റ് ഓഫീസര്‍ സി.വി. വിനോദ് കുമാര്‍, ഡെപ്യൂട്ടി റെയ്ഞ്ച് ഫോറസ്റ്റ് ഓഫീസര്‍ എന്‍.വി. സത്യന്‍, കൃഷി ഓഫീസര്‍ കെ.വി. ശിവപ്രസാദ്, ഹെല്‍ത്ത് ഇന്‍സ്പെക്ടര്‍ മധു, ഷൂട്ടര്‍ ബി. അബ്ദുല്‍ ഗഫൂര്‍, ഹരിതകേരളം റിസോഴ്സ് പേഴ്സൺ പി.വി. ദേവരാജന്‍, ജൂണിയര്‍ ഹെല്‍ത്ത് ഇന്‍സ്പെക്ടര്‍മാരായ പി.പി. ഐശ്വര്യ, വി.പി. ദിവ്യശ്രീ എന്നിവർ സംബന്ധിച്ചു.

തെങ്ങുകൾ വീണ് രണ്ട് വീടുകൾക്ക് നാശം

തൃക്കരിപ്പൂർ: ഇന്നലെ പുലർച്ചെ മഴയ്ക്കൊപ്പം ആഞ്ഞടിച്ച ശക്തമായ കാറ്റിൽ തെങ്ങുകൾ വീണ് രണ്ട് വീടുകൾക്ക് നാശം. പൊറോപ്പാട്ടെ എം.പി. ഖദീജയുടെ ഓടിട്ട ഇരുനില വീടിന് മുകളിലേക്ക് തെങ്ങ് കടപുഴകി വീണു. മേൽക്കൂരയും ഓടുകളും തകർന്നു. ഉടുമ്പുന്തലയിലെ സുഹറ ഇബ്രാഹിമിന്‍റെ വീടിന് മുകളിലേക്ക് തൊട്ടടുത്തുള്ള റോഡിന്‍റെ മറുവശത്തുനിന്നാണ് തെങ്ങ് വീണത്. കൈക്കോട്ട് കടവ് സ്കൂളിന് സമീപവും റോഡിലേക്ക് തെങ്ങ് കടപുഴകി വീണു. പലയിടങ്ങളിലും വൈദ്യുത കമ്പികൾ പൊട്ടി വീണ് വൈദ്യുതി വിതരണം താറുമാറായി.

ഓടുന്ന ബസിന് മുകളിലേക്ക് മരം പൊട്ടിവീണു

പരപ്പ: ഓടുന്ന ബസിനു മുകളിലേക്ക് മരക്കൊമ്പ് പൊട്ടിവീണ് ഒൻപതുവയസുകാരിയടക്കം മൂന്ന് യാത്രക്കാര്‍ക്ക് പരിക്കേറ്റു. ബസിന്‍റെ മുന്‍വശത്തെ സീറ്റില്‍ ഇരിക്കുകയായിരുന്ന കല്യാണി(57), നിദാ ഫാത്തിമ(9), ഷക്കീന(38) എന്നിവർക്കാണ് പരിക്കേറ്റത്. ഇവരെ പരപ്പ കാരുണ്യ ഹോസ്പിറ്റലില്‍ പ്രവേശിപ്പിച്ചു. കൊന്നക്കാട് നിന്നും അടുക്കം വഴി കാഞ്ഞങ്ങാട്ടേക്ക് പോവുകയായിരുന്ന മലബാർ ബസിന് മുകളിലേക്കാണ് മരക്കൊമ്പ് പൊട്ടിവീണത്. ഇന്നലെ രാവിലെ 11 മണിയോടെ ഇടത്തോടിനും അടുക്കത്തിനും ഇടയിൽ കായക്കുന്നിൽ വച്ചായിരുന്നു സംഭവം. ബസിന്‍റെ മുൻഭാഗത്തെ ചില്ല് പൂർണമായും തകർന്ന് മരക്കൊമ്പിന്‍റെ ഭാഗങ്ങൾ ഉള്ളിലേക്ക് പതിച്ചാണ് യാത്രക്കാർക്ക് പരിക്കേറ്റത്.

കള്ളാറിൽ ‘ഒരുമയോടെ ഒരു കൈത്താങ്ങ് ’ പദ്ധതിക്ക് തുടക്കമായി

കള്ളാർ: ക്നാനായ കത്തോലിക്ക കോൺഗ്രസ് കള്ളാർ യൂണിറ്റിന്‍റെ ആഭിമുഖ്യത്തിൽ നടപ്പാക്കുന്ന ഒരുമയോടെ ഒരു കൈത്താങ്ങ് ജീവകാരുണ്യപദ്ധതിക്ക് തുടക്കമായി. സമൂഹത്തിലെ നിർധനരായ ആളുകൾക്ക് നല്കുന്നതിനായി അരി, പലവ്യഞ്ജനങ്ങൾ, വസ്ത്രങ്ങൾ എന്നിവ സമാഹരിക്കുകയാണ് പദ്ധതിയുടെ ലക്ഷ്യം. കെസിസി മലബാർ റീജിയൻ പ്രസിഡന്‍റ് ജോസ് കണിയാംപറമ്പിൽ ഉദ്ഘാടനം നിർവഹിച്ചു. കോട്ടയം അതിരൂപത വികാരി ജനറാൾ ഫാ. മൈക്കിൾ വെട്ടിക്കാട്ട്, രാജപുരം ഫൊറോന വികാരി ഫാ. ജോസ് അരീച്ചിറ, കളളാർ ഇടവക വികാരി ഫാ. ജോബിൻ പ്ലാച്ചേരിപ്പുറത്ത് എന്നിവർ സംബന്ധിച്ചു. മാത്യു തേക്കുംമുട്ടിൽ, ജെയിംസ് പൂഴിക്കാലായിൽ, മത്തായി പുഞ്ചാല എന്നിവർ ആദ്യ സംഭാവനകൾ നല്കി. ടോമി വാണിയംപുരയിടത്തിൽ, സിജു ചാമക്കാലായിൽ, ഫിലിപ്പ് കൊന്നക്കൽ, ചാണ്ടി കള്ളിക്കാട്ട്, അജീഷ് ചേരുവേലിൽ എന്നിവർ പ്രവർത്തനങ്ങൾക്ക് നേതൃത്വം നല്കി.

വന്യജീവി ആക്രമണങ്ങളിൽ വനംവകുപ്പിനെ കുറ്റവിചാരണ ചെയ്ത് കർഷകസ്വരാജ് കൂട്ടായ്മ

കാഞ്ഞങ്ങാട്: സംസ്ഥാനത്ത് വന്യജീവി ആക്രമണങ്ങൾ രൂക്ഷമായതിന്‍റെ പ്രധാന കാരണം വനംവകുപ്പിന്‍റെ വീഴ്ചകളാണെന്നു ചൂണ്ടിക്കാട്ടി കർഷകസ്വരാജ് സത്യാഗ്രഹ സമിതിയുടെ കുറ്റവിചാരണ സദസ്. ഓഗസ്റ്റ് 15 മുതൽ വെള്ളരിക്കുണ്ടിൽ ആരംഭിക്കുന്ന കർഷകസ്വരാജ് സത്യാഗ്രഹത്തിന് മുന്നോടിയായി കാഞ്ഞങ്ങാട് ശ്രമിക് ഭവനിലാണ് കുറ്റവിചാരണ സദസ് സംഘടിപ്പിച്ചത്. ഓരോ വനമേഖലയിലെയും വന്യമൃഗവാഹക ശേഷി സംബന്ധിച്ച ശാസ്ത്രീയപഠനം നടത്താൻ കൂട്ടാക്കാത്തതു മുതൽ ജീവനഷ്ടത്തിനും കൃഷിനഷ്ടത്തിനും നാമമാത്ര നഷ്ടപരിഹാരം മാത്രം നൽകുന്ന സമീപനം വരെ പരിപാടിയിൽ കണക്കുകളുടെ പിൻബലത്തോടെ ചോദ്യം ചെയ്യപ്പെട്ടു. രാഷ്ട്രീയ കിസാൻ മഹാസംഘ് സംസ്ഥാന പ്രസിഡന്‍റ് ബിനോയ് തോമസ് കുറ്റവിചാരണ പ്രസംഗം നടത്തി. പി.കെ. ഷേർളി, കെ.വി. രാഘവൻ, കുഞ്ഞിക്കണ്ണൻ കക്കാണത്ത്, അമ്പലത്തറ കുഞ്ഞികൃഷ്ണൻ, ഐശ്വര്യ കുമാരൻ, ഷാജി കാടമന, സണ്ണി പൈകട, ബേബി ചെമ്പരത്തി എന്നിവർ പ്രസംഗിച്ചു.

പരപ്പയിൽ ബസ് സ്റ്റാൻഡ് നിർമാണം ഉടൻ ആരംഭിക്കണം: കെവിവിഇഎസ്

പരപ്പ: മലയോരത്തെ പ്രധാന വാണിജ്യകേന്ദ്രവും ബ്ലോക്ക് പഞ്ചായത്ത് ആസ്ഥാനവുമായ പരപ്പയിൽ ബസ് സ്റ്റാന്‍റ് നിർമാണം ഉടൻ ആരംഭിക്കണമെന്ന് വ്യാപാരി വ്യവസായി ഏകോപന സമിതി പരപ്പ യൂണിറ്റ് ജനറൽ ബോഡി യോഗം ആവശ്യപ്പെട്ടു. ടൗണിൽ ഗതാഗത തടസം സൃഷ്ടിക്കുന്ന വിധത്തിലുള്ള ബസ് പാർക്കിംഗ് ഒഴിവാക്കണമെന്നും റോഡിൽ ഓവുചാലുകളുടെ അഭാവം മൂലം കടകളിലേക്ക് മഴവെള്ളം കയറി നാശനഷ്ടങ്ങളുണ്ടാകുന്ന സാഹചര്യം ഒഴിവാക്കണമെന്നും റോഡരികിലെ അനധികൃത കച്ചവടങ്ങൾ അവസാനിപ്പിക്കണമെന്നും യോഗം ആവശ്യപ്പെട്ടു. ജില്ലാ പ്രസിഡന്‍റ് കെ. അഹമ്മദ് ഷെരീഫ് ഉദ്ഘാടനം ചെയ്തു. യൂണിറ്റ് പ്രസിഡന്‍റ് വിജയൻ കോട്ടക്കൽ അധ്യക്ഷത വഹിച്ചു. ജില്ലാ ജനറൽ സെക്രട്ടറി കെ.ജെ. സജി മുഖ്യപ്രഭാഷണം നടത്തി. ജില്ലാ വൈസ് പ്രസിഡന്‍റ് തോമസ് കാനാട്ട്, എം.പി. സലീം, എ. സുധീഷ്, സി.എച്ച്. കുഞ്ഞബ്ദുള്ള, രാജീവൻ, ഡെന്നിസ് എന്നിവർ പ്രസംഗിച്ചു.

എഎച്ച്എസ്ടിഎ പ്രതിഷേധ സംഗമം

കാസർഗോഡ്: സ്കൂൾ ഏകീകരണ നടപടികൾ അവസാനിപ്പിക്കുക, ഒരു ബാച്ചിലെ കുട്ടികളുടെ എണ്ണം 50 ആയി പരിമിതപ്പെടുത്തുക, സ്റ്റാറ്റ്യൂട്ടറി പെൻഷൻ സമ്പ്രദായം പുനസ്ഥാപിക്കുക, അഞ്ചു വർഷം പൂർത്തിയാകുമ്പോൾ ജൂണിയർ അധ്യാപകർക്ക് സീനിയർ തസ്തികയിലേക്ക് സ്ഥാനക്കയറ്റം നല്കുക, പ്രിൻസിപ്പൽ തസ്തികയിൽ ഹയർ സെക്കൻഡറി അധ്യാപകരെ മാത്രം നിയമിക്കുക, ആശ്രിത നിയമനം അനുവദിക്കുക, 12-ാം ശമ്പള പരിഷ്കരണ കമ്മീഷനെ ഉടൻ പ്രഖ്യാപിക്കുക, മെഡിസെപ് പദ്ധതി കാര്യക്ഷമമാക്കുക, അധ്യാപക നിയമനങ്ങൾ അംഗീകരിക്കുക തുടങ്ങിയ ആവശ്യങ്ങൾ ഉന്നയിച്ചുകൊണ്ട് എഎച്ച്എസ്ടിഎ ജില്ലാ കമ്മിറ്റിയുടെ ആഭിമുഖ്യത്തിൽ പ്രതിഷേധ സംഗമം സംഘടിപ്പിച്ചു. ഡിസിസി പ്രസിഡന്‍റ് പി.കെ. ഫൈസൽ ഉദ്ഘാടനം ചെയ്‌തു. ജില്ലാ പ്രസിഡന്‍റ് എ.ബി. അൻവർ അധ്യക്ഷത വഹിച്ചു. പ്രിൻസിപ്പൽ ഫോറം ചെയർമാൻ മെജോ ജോസഫ്, എഫ്എച്ച്എസ്ടിഎ ജില്ലാ ചെയർമാൻ സുബിൻ ജോസ് കെ. ബാലചന്ദ്രൻ, രാകേഷ് കൊട്ലമൊഗറു, രാജേന്ദ്രൻ ബോവിക്കാനം, ജില്ലാ സെക്രട്ടറി പ്രവീൺ കുമാർ, ട്രഷറർ റംഷാദ് അബ്ദുള്ള എന്നിവർ പ്രസംഗിച്ചു.

പെണ്‍കുട്ടികള്‍ക്കിടയിൽ ആത്മഹത്യാ പ്രവണത കൂടുന്നത് ആശങ്കാജനകമെന്ന് വനിതാ കമ്മീഷന്‍

കാസർഗോഡ്: കേരളീയ സമൂഹത്തില്‍ അടുത്തകാലത്തായി പെണ്‍കുട്ടികള്‍ക്കിടയില്‍ ആത്മഹത്യാ പ്രവണത കൂടുന്ന സാഹചര്യം ആശങ്ക ഉളവാക്കുന്നതും ഭയപ്പെടുത്തുന്നതുമാണെന്ന് സംസ്ഥാന വനിതാ കമ്മീഷന്‍ അംഗം അഡ്വ.പി. കുഞ്ഞായിഷ പറഞ്ഞു. കുടുംബാന്തരീക്ഷത്തിലെ പ്രശ്‌നങ്ങള്‍ പരിഹരിക്കുന്നതിന് കുടുംബത്തിനകത്ത് നിന്നും സമൂഹത്തില്‍ നിന്നും പെണ്‍കുട്ടികള്‍ക്ക് നല്ല പിന്തുണ ലഭിക്കേണ്ടതുണ്ടെന്നും കളക്ടറേറ്റ് മിനി കോണ്‍ഫറന്‍സ് ഹാളില്‍ വനിതാ കമ്മീഷൻ നടത്തിയ സിറ്റിംഗിന് ശേഷം അവർ പറഞ്ഞു. ഗാര്‍ഹിക പീഡനം, സ്വത്ത് തര്‍ക്കം, സ്വര്‍ണം-ഭൂമി ഇടപാടുകള്‍ എന്നിവയുമായി ബന്ധപ്പെട്ട പ്രശ്‌നങ്ങളാണ് കൂടുതലായും കമ്മീഷന് മുന്നിലെത്തിയത്. സമൂഹത്തില്‍ വിദ്യാഭ്യാസ നിലവാരം ഉയരുമ്പോഴും സ്ത്രീകള്‍ക്കെതിരെ സാമൂഹികമാധ്യമങ്ങളില്‍ തെറ്റായ പരാമര്‍ശങ്ങള്‍ നടത്തുന്നതുപോലുള്ള തെറ്റായ പ്രവണതകള്‍ വളര്‍ന്നു വരുന്നുണ്ടെന്ന് കമ്മീഷന്‍ അംഗം നിരീക്ഷിച്ചു. സിറ്റിംഗില്‍ ആകെ 52 പരാതികള്‍ പരിഗണിച്ചു. ഒന്‍പത് പരാതികള്‍ തീര്‍പ്പാക്കി. ഒരു പരാതി ജാഗ്രതാ സമിതിക്ക് വിട്ടു. 42 പരാതികള്‍ അടുത്ത സിറ്റിംഗിലേക്ക് മാറ്റിവച്ചു. വുമണ്‍ സെല്‍ എസ്ഐ എം.വി. ശരണ്യ, എഎസ്ഐ എ.എം. ശാരദ, ഫാമിലി കൗണ്‍സലര്‍ രമ്യമോള്‍, ജില്ലാ ജാഗ്രതാസമിതി കൗണ്‍സലര്‍ പി. സുകുമാരി, ഐസിഡിഎസ് ജില്ലാ മിഷന്‍ കോ-ഓര്‍ഡിനേറ്റര്‍ അമല മാത്യു എന്നിവരും പങ്കെടുത്തു.

ബലിതർപ്പണ ചടങ്ങ് നടത്തി

വെള്ളരിക്കുണ്ട്: കർക്കടവാവ് ദിനത്തിൽ പിതൃക്കളുടെ മോക്ഷം തേടി നൂറുകണക്കിനാളുകൾ അടുക്കളക്കുന്ന് ഭഗവതി ക്ഷേത്രത്തിൽ എത്തി ബലിതർപ്പണ ചടങ്ങ് നടത്തി. പുലർച്ചെ 5.30 മുതൽ തന്നെ ചൈത്രവാഹിനി തീരത്ത്‌ ബലിതർപ്പണ ചടങ്ങുകൾ ആരംഭിച്ചിരുന്നു. ആചാര്യൻ ജയറാം ബെള്ളുള്ളായയുടെ കാർമ്മികത്വത്തിൽ അഞ്ചുപേർ അടങ്ങുന്ന കർമികളുടെ സാനിധ്യത്തിലാണ് ചടങ്ങുകൾ നടന്നത്. സുരക്ഷയ്ക്കായി വെള്ളരിക്കുണ്ട് പോലീസും നർക്കിലക്കാട് കുടുംബാരോഗ്യ കേന്ദ്രത്തിലെ ആംബുലൻസ് സർവീസും സ്ഥലത്ത്‌ ഉണ്ടായിരുന്നു.

ഓവുചാൽ ശുചീകരണവുമായി എസ്എംവൈഎം പ്രവർത്തകർ

ചിറ്റാരിക്കാൽ: എസ്എംവൈഎമ്മിന്‍റെ ശുചീകരണ പദ്ധതിയുടെ ഭാഗമായി തോമാപുരം ഇടവകയിലെ എസ്എംവൈഎം പ്രവർത്തകർ വൃത്തിഹീനമായി കിടന്നിരുന്ന പള്ളിക്കുന്ന് വളവിലെയും പരിസരപ്രദേശങ്ങളിലെയും ഓവുചാൽ വൃത്തിയാക്കി. ഫാ. ജുബിൻ കണിപറമ്പിൽ, ഡീക്കൻ അമൽ പൂക്കുളത്തേൽ, യൂണിറ്റ് പ്രസിഡന്‍റ് മാത്യൂസ് അമ്പലത്തിൽ, അതുൽ ചിരട്ടയോലിൽ, എലിസബത്ത് പ്ലാലിക്കൽ, ടോം മൂലേൽ, ആശിഷ്, ജോബിൻ, ടോം, സ്കറിയ, അജയ്, ജോസ്, സെബാൻ, ഡാനി, അസിൻ, ക്രിസ്, ക്രിസ്റ്റീന, ഡിൽന എന്നിവർ നേതൃത്വം നല്കി.

കണിച്ചിറ വളവിൽ വീണ്ടും ലോറി കുടുങ്ങി

മടിക്കൈ: കണിച്ചിറയിലെ അപകട വളവിൽ വീണ്ടും ചരക്കുലോറി കുടുങ്ങി. ഏറെനേരത്തെ ഗതാഗതക്കുരുക്കിനു ശേഷം ക്രെയിൻ എത്തിച്ച് ലോറി വലിച്ചു നീക്കുകയായിരുന്നു. ദിവസങ്ങൾക്കു മുമ്പും ഇവിടെ കൂറ്റൻ കണ്ടെയ്നർ ലോറി കുടുങ്ങിയിരുന്നു. ചെറുവത്തൂർ വിരമലക്കുന്നിലെ മണ്ണിടിച്ചിലിനെ തുടർന്ന് ദേശീയപാതയിൽ ഗതാഗതനിയന്ത്രണമുണ്ടായതോടെ ദീർഘദൂര ലോറികൾ ഉൾപ്പെടെ മടിക്കൈ, ചായ്യോത്ത്, കയ്യൂർ വഴിയുള്ള സമാന്തരപാതകൾ ഉപയോഗിക്കുന്നുണ്ട്. അതേസമയം വീരമലക്കുന്നിന് സമീപത്തു കൂടിയുള്ള ദേശീയപാതയിലൂടെ ടാങ്കർ, ഹെവി വാഹനങ്ങൾ മാത്രം ഉദ്യോഗസ്ഥരുടെ മേൽനോട്ടത്തിൽ കടത്തി വിടുന്നുണ്ടെന്ന് അധികൃതർ അറിയിച്ചു.

ജില്ലയിലെ സ്‌കൂളുകളില്‍ കൈറ്റ് 1627 റോബോട്ടിക് കിറ്റുകള്‍ വിതരണം ചെയ്തു

കാസര്‍ഗോഡ്: ഈ അധ്യയന വര്‍ഷം മുതല്‍ പത്താം ക്ലാസിലെ മുഴുവന്‍ കുട്ടികള്‍ക്കും റോബോട്ടിക്‌സ് മേഖലയില്‍ പഠനവും പ്രായോഗിക പരിശീലനവും നടത്തുന്നതിനായി ജില്ലയിലെ 133 സ്‌കൂളുകളില്‍ 1627 റോബോട്ടിക് കിറ്റുകളുടെ വിന്യാസം പൊതുവിദ്യാഭ്യാസ വകുപ്പിലെ കേരള ഇന്‍ഫ്രാസ്ട്രക്ചര്‍ ആന്‍ഡ് ടെക്‌നോളജി ഫോര്‍ എഡ്യുക്കേഷന്‍ (കൈറ്റ്) പൂര്‍ത്തിയാക്കി. പത്താംക്ലാസിലെ പുതിയ ഐസിടി പാഠപുസ്തകത്തിലെ റോബോട്ടുകളുടെ ലോകം എന്ന ആറാം അധ്യായത്തിലാണ് സര്‍ക്യൂട്ട് നിര്‍മാണം, സെന്‍സറുകളുടേയും ആക്യൂവേറ്ററുകളുടേയും ഉപയോഗം, കമ്പ്യൂട്ടര്‍ പ്രോഗ്രാമിംഗ് വഴി ഇലക്ട്രോണിക് ഉപകരണങ്ങളെ നിയന്ത്രിക്കുക തുടങ്ങിയ പ്രവര്‍ത്തനങ്ങളിലൂടെ റോബോട്ടിക്‌സിന്‍റെ പുതിയ ആശയങ്ങളും ആശയമാതൃകകളും കണ്ടെത്താന്‍ കുട്ടികള്‍ക്ക് അവസരം ലഭിക്കുന്നത്. സ്‌കൂളുകള്‍ക്ക് നല്‍കിയ റോബോട്ടിക് കിറ്റിലെ ആര്‍ഡിനോ ബ്രഡ് ബോര്‍ഡ്, ഐആര്‍ സെന്‍സര്‍, സെര്‍വോ മോട്ടോര്‍, ജമ്പര്‍ വെയറുകള്‍ തുടങ്ങിയവ പ്രയോജനപ്പെടുത്തി കൈയുടെ സാന്നിധ്യം തിരിച്ചറിഞ്ഞ് പ്രവര്‍ത്തിക്കുന്ന ഓട്ടോമാറ്റിക് സാനിറ്റൈസര്‍ ഡിസ്‌പെന്‍സര്‍ തയാറാക്കലാണ് ആദ്യ പ്രവര്‍ത്തനം. എഐ ഉപയോഗിച്ചുള്ള ഹോം ഓട്ടോമേഷന്‍ സംവിധാനത്തിലൂടെ മുഖം തിരിച്ചറിഞ്ഞ് സ്വയം തുറക്കുന്ന സ്മാര്‍ട്ട് വാതിലുകള്‍ തയ്യാറാക്കലാണ് പത്താം ക്ലാസിലെ ഓരോ കുട്ടിയും ചെയ്തുനോക്കേണ്ട അടുത്ത പ്രവര്‍ത്തനം. കൂടുതല്‍ റോബോട്ടിക് കിറ്റുകള്‍ ആവശ്യമുള്ള സ്‌കൂളുകള്‍ക്ക് അവ നേരിട്ട് വാങ്ങാനും കൈറ്റ് സംവിധാനമൊരുക്കിയിട്ടുണ്ട്. പത്താംക്ലാസില്‍ ഐസിടി പാഠപുസ്തകം പഠിപ്പിക്കേണ്ട ജില്ലയിലെ 480 അധ്യാപകര്‍ക്ക് റോബോട്ടിക്‌സിനായുള്ള പ്രത്യേക പരിശീലനം കൈറ്റ് ജൂലൈ മാസത്തോടെ പൂര്‍ത്തിയാക്കും. നിലവില്‍ നല്‍കിയ റോബോട്ടിക് കിറ്റുകള്‍ക്ക് പുറമെ ചലിക്കുന്ന റോബോട്ടുകള്‍ ഉള്‍പ്പെടെ നിര്‍മിക്കാന്‍ കഴിയുന്ന അഡ്വാന്‍സ്ഡ് കിറ്റുകള്‍ ഈ വര്‍ഷം തന്നെ ലിറ്റില്‍ കൈറ്റ്‌സ് യൂണിറ്റുകള്‍ക്ക് ലഭ്യമാക്കുമെന്ന് കൈറ്റ് സിഇഒ കെ. അന്‍വര്‍ സാദത്ത് അറിയിച്ചു. ഈ വര്‍ഷം സ്‌കൂളുകളില്‍ പ്രത്യേക റോബോഫെസ്റ്റുകളും കൈറ്റ് സംഘടിപ്പിക്കും.

കിദൂർ പക്ഷിഗ്രാമത്തിൽ സഞ്ചാരികൾക്കായി കൂടൊരുങ്ങുന്നു

കുമ്പള: ജില്ലയിലെ ആദ്യ പക്ഷിഗ്രാമമായി പ്രഖ്യാപിക്കപ്പെട്ട കിദൂരിൽ പക്ഷിനിരീക്ഷകർക്കും ഗവേഷകർക്കും സഞ്ചാരികൾക്കുമായുള്ള വിശ്രമകേന്ദ്രത്തിന്‍റെ നിർമാണം പൂർത്തിയായി. കിദൂർ കുണ്ടങ്കരടുക്കയിൽ സംസ്ഥാന വിനോദസഞ്ചാര വകുപ്പിനു കീഴിലാണ് വിശ്രമകേന്ദ്രം നിർമിച്ചത്. തദ്ദേശ തെരഞ്ഞെടുപ്പിനു മുമ്പ് കെട്ടിടത്തിന്‍റെ ഉദ്ഘാടനം നടത്താനാണ് ഒരുക്കങ്ങൾ നടക്കുന്നത്. വിശ്രമകേന്ദ്രത്തിന്‍റെ നടത്തിപ്പിനായി സ്വകാര്യ ഏജൻസികളിൽ നിന്ന് ടെൻഡർ വിളിക്കും. 2019 ൽ കാസർഗോഡ് വികസന പാക്കേജിൽ ഉൾപ്പെടുത്തി 60 ലക്ഷം രൂപ ചെലവിലാണ് കെട്ടിടത്തിന്‍റെ നിർമാണം തുടങ്ങിയത്. ജില്ലാ നിർമിതി കേന്ദ്രത്തിനായിരുന്നു നിർമാണ ചുമതല. പ്രവൃത്തികൾ പൂർത്തിയാക്കുന്നതിലുണ്ടായ കാലതാമസം വലിയ വിമർശനങ്ങളും ക്ഷണിച്ചുവരുത്തിയിരുന്നു. മീറ്റിംഗ് ഹാൾ,ഓഫീസ് മുറി, താമസത്തിനായുള്ള മുറികൾ, അടുക്കള എന്നിവയെല്ലാം കെട്ടിടത്തിൽ സജ്ജമാക്കിയിട്ടുണ്ട്. ദേശാടനക്കിളികളടക്കം 174 വ്യത്യസ്ത ഇനം പക്ഷികളെയാണ് 10 ഏക്കർ വിസ്തൃതിയിലുള്ള കിദൂർ കുണ്ടങ്കരടുക്ക പ്രദേശങ്ങളിൽ ഇതുവരെയായി കണ്ടെത്തിയിട്ടുള്ളത്. കടുത്ത വേനലിൽപോലും ഇതുവരെ വറ്റിയിട്ടില്ലാത്ത കാജൂർ പള്ളം എന്ന പ്രകൃതിദത്ത ജലാശയവും കിദൂറിന്‍റെ പ്രത്യേകതയാണ്. ഈ ജലാശയത്തിന്‍റെ സാന്നിധ്യമാണ് കൂടുതലായും പക്ഷികളെ ആകർഷിക്കുന്നത്. സഞ്ചാരികൾക്കായി അടിസ്ഥാനസൗകര്യങ്ങളൊരുങ്ങുന്നതോടെ കൂടുതൽ പക്ഷിനിരീക്ഷകരും ഗവേഷകരും വിദ്യാർഥികളും വിനോദസഞ്ചാരികളുമെല്ലാം കിദൂരിലേക്കെത്തുമെന്നാണ് പ്രതീക്ഷ. അനന്തപുരം തടാക ക്ഷേത്രം, മുജുംഗാവ് ക്ഷേത്രം, ബേള വ്യാകുലമാതാവിന്‍റെ പള്ളി, ആരിക്കാടി കോട്ട തുടങ്ങിയ സമീപ സ്ഥലങ്ങളുമായി ബന്ധപ്പെടുത്തി കുമ്പള കേന്ദ്രമായി ഒരു വിനോദസഞ്ചാര സർക്യൂട്ടിനും സാധ്യത തെളിയും.

നീലേശ്വരം റെയിൽവേ മേൽപ്പാലത്തിന്‍റെ ചവിട്ടുപടികൾ അപകടാവസ്ഥയിൽ

നീലേശ്വരം: രാജാ റോഡിലെ റെയിൽവേ മേൽപ്പാലത്തിന്‍റെ ചവിട്ടുപടികൾ കൂടുതൽ അപകടാവസ്ഥയിലായതോടെ നാട്ടുകാർ ആശങ്കയിൽ. റെയിൽപാത മുറിച്ചുകടക്കുന്നതിന്‍റെ അപകടം ചൂണ്ടിക്കാട്ടി തൊട്ടടുത്ത രാജാസ് ഹയർ സെക്കൻഡറി സ്കൂളിലെ വിദ്യാർഥികളെയുൾപ്പെടെ മേൽപ്പാലം ഉപയോഗിക്കാൻ പ്രേരിപ്പിക്കുന്നതിനിടയിലാണ് മേൽപ്പാലവും അപകടസ്ഥിതിയിലായത്. ചവിട്ടുപടികൾക്കു പുറമേ മേൽപ്പാലത്തിന്‍റെ ഒരു വശത്തുള്ള നടപ്പാതയും അപകടസ്ഥിതിയിലാണ്. രണ്ട് കോൺക്രീറ്റ് തൂണുകൾ ചരിഞ്ഞതോടെ ചവിട്ടുപടികൾക്കു സമീപവും നടപ്പാതയിലും വിള്ളലുകൾ പ്രത്യക്ഷപ്പെട്ടിട്ടുണ്ട്. ചവിട്ടുപടികൾ അപകടസ്ഥിതിയിലായതിനെ തുടർന്ന് നേരത്തേ ഇതുവഴി ആളുകൾ കയറുന്നത് കയറുകെട്ടി തടഞ്ഞിരുന്നു. പിന്നീട് ആളുകൾ പാളം മുറിച്ചുകടക്കുന്നതിനിടയിൽ അപകടങ്ങൾ ആവർത്തിച്ചതോടെ ഇത് വീണ്ടും തുറന്നു. 2001 മാർച്ചിൽ ഇ.കെ. നായനാർ മുഖ്യമന്ത്രിയായിരുന്ന കാലത്ത് നിർമാണം തുടങ്ങിയ മേൽപ്പാലം 2005 മാർച്ച് ഏഴിന് ഉമ്മൻ ചാണ്ടി മുഖ്യമന്ത്രിയായിരുന്ന സമയത്താണ് ഉദ്ഘാടനം ചെയ്തത്. കേരള റോഡ്സ് ആൻഡ് ബ്രിഡ്ജസ് കോർപ്പറേഷനു കീഴിലാണ് പാലം നിർമിച്ചത്. പാലത്തിന്‍റെ അറ്റകുറ്റപണികൾ നിർവഹിക്കാനുള്ള ചുമതലയും ഇവർക്കുതന്നെയാണെന്നാണ് പൊതുമരാമത്ത് വകുപ്പിന്‍റെ നിലപാട്. ചവിട്ടുപടികളും നടപ്പാതയും അപകടാവസ്ഥയിലായതോടെ സ്‌കൂൾ വിദ്യാർഥികളും അടുത്തുള്ള സഹകരണ ആശുപത്രികളിലേക്ക് പോകുന്നവരുമെല്ലാം വീണ്ടും റെയിൽപാത മുറിച്ചു കടക്കേണ്ട സ്ഥിതിയിലാണ്. നടപ്പാലം അപകടസ്ഥിതിയിലായതോടെ മേൽപ്പാലത്തിന് താഴെ കച്ചവടം നടത്തുന്നവരും അപകടഭീതിയിലാണ്.

അധികാരികളുടെ മൗനാനുവാദത്തോടെ വീരമലക്കുന്നിലെ ധാതുസമ്പത്ത് കൊള്ളയടിക്കപ്പെട്ടു: പി.കെ. ഫൈസല്‍

ചെറുവത്തൂര്‍: ദേശീയപാത നിര്‍മാണത്തിന്‍റെ പേരില്‍ വീരമലക്കുന്നിലെ കോടികള്‍ വിലമതിക്കുന്ന ധാതുസമ്പത്ത് മേഘ കണ്‍സ്ട്രക്ഷന്‍ കമ്പനിയുടെ നേതൃത്വത്തില്‍ കൊള്ളയടിക്കപ്പെട്ടതായും ഇതിനു കേന്ദ്ര-സംസ്ഥാനസര്‍ക്കാരുകളുടെ മൗനാനുവാദമുണ്ടായിരുന്നതായും ഡിസിസി പ്രസിഡന്‍റ് പി.കെ. ഫൈസല്‍. ഇപ്പോള്‍ വീരമലകുന്നിന്‍റെ വലിയൊരു ഭാഗം ഇടിയുകയും ചെയ്തിരിക്കുകയാണ്. അടിയന്തരമായി കേന്ദ്ര-സംസ്ഥാന സര്‍ക്കാരുകളും ദേശീയപാത അതോറിറ്റിയും വീരമലകുന്നിലെ മണ്ണിടിച്ചിലിന് ശാശ്വതമായ പരിഹാരം കാണുകയും ജനങ്ങളുടെ ആശങ്കകള്‍ അകറ്റണമെന്നും ദേശീയപാതയിലെ ഗതാഗതം പുനഃസ്ഥാപിക്കണമെന്നും അല്ലാത്തപക്ഷം ശക്തമായ രീതിയില്‍ ജനങ്ങളെ മുന്‍നിര്‍ത്തി പ്രക്ഷോഭം ആരംഭിക്കുമെന്നും ഫൈസല്‍ പറഞ്ഞു. വീരമലക്കുന്നില്‍ മണ്ണിടിച്ചില്‍ നടന്ന സ്ഥലം സന്ദര്‍ശിച്ച് സംസാരിക്കുകയായിരുന്നു അദ്ദേഹം. രമേശന്‍ കരുവാച്ചേരി, കെ.വി. സുധാകരന്‍, കെ.പി. പ്രകാശന്‍, എം.വി. ഉദ്ദേശ്കുമാര്‍, കെ. ബാലകൃഷ്ണന്‍, ഒ. ഉണ്ണികൃഷ്ണന്‍, കെ.കെ. കുമാര്‍, ജയപ്രകാശ് മയ്യിച്ച, എ.കെ. പ്രജീഷ് കുമാര്‍, പി.വി. കൃഷ്ണന്‍, ടി.വി. കൃഷ്ണന്‍ എന്നിവര്‍ ഒപ്പമുണ്ടായിരുന്നു.

കൊടിയമ്മ-കഞ്ചിക്കട്ട പാലം തകർച്ചയിലേക്ക്

കുമ്പള: 45 വർഷം പഴക്കമുള്ളൊരു ഒറ്റവരി പാലം. ഇരുവശങ്ങളിലും കൈവരികൾ പോലും ഇല്ലാതായിട്ട് കാലങ്ങളായി. കാലപ്പഴക്കം മൂലം പാലത്തിൽ തന്നെ അങ്ങിങ്ങ് വിള്ളലുകളുണ്ട്. താഴെ മലവെള്ളം കുത്തിയൊഴുകുന്ന വീതിയേറിയ പുഴ. മഴ ശക്തമാകുമ്പോൾ പാലത്തിനു മുകളിലൂടെയും മലവെള്ളം കുത്തിയൊഴുകും. ജീവൻ പണയംവച്ചുകൊണ്ട് ആരും ഇതുവഴി പോകരുതെന്ന് ഒന്നര വർഷം മുമ്പേ തന്നെ ജില്ലാ ഭരണകൂടം ഉത്തരവ് നല്കിയതാണ്. പക്ഷേ ആരിക്കാടി, താഴെ കൊടിയമ്മ, ഛത്രപള്ളം, ചൂരിത്തടുക്ക, കഞ്ചിക്കട്ട തുടങ്ങിയ പ്രദേശങ്ങളിലുള്ളവർക്ക് കുമ്പള ടൗണിലും തിരിച്ചും എത്താനുള്ള കുറഞ്ഞ ദൂരം ഈ പാലത്തിലൂടെയാണ്. വേനൽക്കാലങ്ങളിലെങ്കിലും പലപ്പോഴും പ്രദേശവാസികൾ വിലക്ക് മറികടന്ന് ഈ പാലം ഉപയോഗിക്കുന്നുണ്ട്. ജലസേചന വകുപ്പിനു കീഴിൽ വിസിബി കം ബ്രിഡ്ജ് ആയാണ് 45 വർഷം മുമ്പ് പാലം പണിതത്. സമീപപ്രദേശങ്ങളിലുള്ളവർക്ക് കൃഷി ആവശ്യത്തിന് വെള്ളം ലഭ്യമാക്കുന്നതിനും ഇത് സഹായകമായിരുന്നു. ഇത് ബലക്ഷയം മൂലം തകർച്ചയിലായതോടെ ഇവിടെ പുതിയൊരു റഗുലേറ്റർ കം ബ്രിഡ്ജ് നിർമിക്കണമെന്ന ആവശ്യം വർഷങ്ങളായി ഉയർന്നുകേൾക്കുന്നതാണ്. എന്നാൽ സർക്കാരിന്‍റെ നടപടിക്രമങ്ങൾ ഇഴഞ്ഞുനീങ്ങുന്നതാണ് പ്രശ്നം. ഇത്തവണ പാലത്തിനടിയിലൂടെയും മുകളിലൂടെയും പലതവണ മലവെള്ളം കുത്തിയൊഴുകിയതോടെ പാലം ഏറെക്കുറെ തകർച്ചയിലേക്കുതന്നെ നീങ്ങുകയാണെന്ന് നാട്ടുകാർ പറയുന്നു. എന്നിട്ടും ഇരുവശങ്ങളിലേക്കുമുള്ള കാൽനടയാത്രക്കാർ പലപ്പോഴും ഈ പാലം ഉപയോഗിക്കുന്നുണ്ടെന്നത് കടുത്ത ആശങ്കയാവുന്നുണ്ട്. ഇവിടെ പുതിയ വിസിബി കം ബ്രിഡ്ജ് നിർമിക്കുന്നതിനായി 27 കോടി രൂപയുടെ എസ്റ്റിമേറ്റ് തയ്യാറാക്കി നബാർഡിലേക്ക് സമർപ്പിക്കുന്നുണ്ടെന്നാണ് കൊടിയമ്മയിലെ പൊതുപ്രവർത്തകൻ എ.പി. അബ്ദുസ്സലാമിന് വിവരാവകാശ നിയമപ്രകാരം ജലസേചന വകുപ്പിൽ നിന്ന് ലഭിച്ച മറുപടി. സർക്കാരിന്‍റെ താലൂക്ക് തല അദാലത്തിൽ പരാതി നല്കിയവർക്കും ഇതേ മറുപടിയാണ് ലഭിച്ചത്. പുതിയ വിസിബി കം ബ്രിഡ്ജിന്‍റെ നിർമാണം ഈ വർഷം തന്നെ നബാർഡ് പദ്ധതിയിൽ ഉൾപ്പെടുത്തണമെന്നാവശ്യപ്പെട്ട് ഇതിനായി രൂപീകരിച്ച ആക്ഷൻ കമ്മിറ്റി ഭാരവാഹികൾ ജില്ലയിലെ എംഎൽഎമാരുടെ നേതൃത്വത്തിൽ കഴിഞ്ഞ ദിവസം ധനകാര്യ മന്ത്രി കെ.എൻ. ബാലഗോപാൽ, ജലവിഭവ മന്ത്രി റോഷി അഗസ്റ്റിൻ എന്നിവരെ കണ്ട് നിവേദനം നല്കിയിരുന്നു. എംഎൽഎമാരായ എ.കെ.എം. അഷ്റഫ്, എം. രാജഗോപാൽ, സി.എച്ച്. കുഞഞമ്പുഎന്നിവരാണ് നിവേദക സംഘത്തിൽ ഉണ്ടായിരുന്നത്. കുമ്പള പഞ്ചായത്ത് പ്രസിഡന്‍റ് താഹിറ യൂസഫ്, വൈസ് പ്രസിഡന്‍റ് നാസർ മൊഗ്രാൽ, പഞ്ചായത്തംഗം യൂസഫ് ഉളുവാർ, ആക്ഷൻ കമ്മിറ്റി അംഗങ്ങളായ മഞ്ജുനാഥ ആൾവ, ബി.എ. സുബൈർ, കെ. യോഗിഷ, അഷ്റഫ് കൊടിയമ്മ എന്നിവരും സംബന്ധിച്ചു.

പയ്യന്നൂരിലെ വയോധികയുടെ മരണം: അന്വേഷണം ക്രൈംബ്രാഞ്ചിന്

പയ്യന്നൂര്‍: വയോധികയെ കിണറ്റില്‍ മരിച്ചനിലയില്‍ കണ്ടെത്തിയ സംഭവത്തിന്‍റെ അന്വേഷണം ക്രൈംബ്രാഞ്ചിന്. പയ്യന്നൂര്‍ പോലീസ് മാസങ്ങളായി നടത്തുന്ന അന്വേഷണം എങ്ങുമെത്താത്ത സാഹചര്യത്തിലാണ് ക്രൈംബ്രാഞ്ചിന് കൈമാറിയത്. കഴിഞ്ഞ നവംബര്‍ ഒന്നിന് രാവിലെ പതിനൊന്നരയോടെ കാണാതായ പയ്യന്നൂര്‍ കൊറ്റി സുരഭി ഹൗസില്‍ സുലോചനയെയാണ് (76) വൈകുന്നേരത്തോടെ വീട്ടുപറന്പിലെ ഉപയോഗശൂന്യമായ കിണറ്റിൽ മരിച്ചനിലയിൽ കണ്ടെത്തിയത്. ചെരുപ്പുകള്‍ കിണറില്‍ നിന്ന് ഇരുപതോളം മീറ്റര്‍ അകലെ ദുരൂഹമായ സാഹചര്യത്തിൽ വ്യത്യസ്ഥമായ ഇടങ്ങളിലായാണ് കണ്ടെത്തിയത്. കഴുത്തിൽ ചെറിയ മുറിവ് ഉണ്ടായിരുന്നെങ്കിലും ഇതല്ല മരണകാരണമെന്നും കിണറ്റിൽ വച്ചാണ് ഇവർ മരിച്ചതെന്നുമായിരുന്നു പോസ്റ്റുമോർട്ടം റിപ്പോർട്ടിലുണ്ടായ സൂചനകൾ. അതേ സമയം സുലോചന ധരിച്ചിരുന്ന അഞ്ചു പവനോളം ആഭരണങ്ങൾ കാണാനില്ലാഞ്ഞതിലും ദുരൂഹതയുണ്ട്. ആഭരണങ്ങൾ കിണറ്റിലുണ്ടായേക്കാമെന്ന സംശയത്തിൽ കിണർ വറ്റിച്ച് പരിശോധന നടത്തിയെങ്കിലും കണ്ടെത്താനായില്ല. അതേസമയം വിരലില്‍ മുറുകിക്കിടന്നിരുന്ന മോതിരം നഷ്ടപ്പെടാതിരുന്നത് വീണ്ടും സംശയത്തിനിട നല്‍കി. പോലീസ് ബന്ധുക്കളില്‍നിന്ന് വിശദമായ മൊഴിയെടുത്തിരുന്നു. പോലീസ് പലരേയും ചോദ്യം ചെയ്തിട്ടും കേസിനു തുന്പ് ലഭിക്കാതെ അന്വേഷണം വഴി മുട്ടിയ നിലയിലായിരുന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]