കുളത്തൂപ്പുഴ റസിഡൻഷ്യൽ സ്കൂളിൽ കായികമേളയ്ക്ക് തിരിതെളിഞ്ഞു

കുളത്തൂപ്പുഴ: ചോഴിയക്കോട്പട്ടികവർഗ വികസന വകുപ്പിന്‍റെ നിയന്ത്രണത്തിൽ കുളത്തൂപ്പുഴയിൽ പ്രവർത്തിക്കുന്ന ഗവ.മോഡൽ റസിഡൻഷ്യൽ സ്കൂളിൽ കായികമേളക്ക് തുടക്കം കുറിച്ചു. സ്കൂൾ പ്രഥമാധ്യാപിക സി. ഗിരിജയുടെ അധ്യക്ഷതയിൽ നടന്ന ചടങ്ങിൽ സീനിയർ സൂപ്രണ്ട് വി. സുരേഷ്കുമാർ ദീപശിഖ തെളിയിച്ച് കായികമേള ഉദ്ഘാടനം ചെയ്തു.

കായിക അധ്യാപകൻ സ്റ്റാലിൻ, സ്കൂൾ മാനേജർ എസ്. ഷാഹിർ, എസ്. ബിനുകുമാർ, അധ്യാപകരായ എസ്. സജുകുമാർ, എഫ്.എൽ. ബിനിൽകുമാർ, ആർ. ശിവപ്രസാദ് തുടങ്ങിയവർ പ്രസംഗിച്ചു.

ADVERTISEMENT

പ്രകൃതിയെ തൊട്ടറിയാൻ കുട്ടിക്കർഷകർ പാടത്തിറങ്ങി...

കുളത്തൂപ്പുഴ:ഭാരതീപുരം കാര്‍മല്‍ഗിരി സ്കൂളിലെകുട്ടികൾ ക്ക് നെല്‍കൃഷിയുടെ പ്രധാന്യം പകര്‍ന്നു നല്‍കുന്നതിനും കൃഷി നേരിട്ടുകാണുന്നതിനും പ്രകൃതിയോട് സംവദിക്കുന്നതിനുമായി അധ്യാപകർ ചിങ്ങപ്പുലരിയിൽ കുട്ടികളെ പാടശേഖരമായ ഏരൂര്‍ പഞ്ചായത്തിലെ പാണയം പ്രദേശത്ത് എത്തിച്ചു. കുളത്തൂപ്പുഴ പഞ്ചായത്തിന്‍റെ " ഏറ്റവും നല്ല കുട്ടിക്കർഷകൻ’ അവാർഡ് കരസ്ഥമാക്കിയ സഹപാഠി അലൻമാത്യു കൃഷി രീതികൾ വിവരിച്ചു നല്‍കിയതോടെ കുട്ടികൾക്ക് പ്രചോദനമായി. കുട്ടികളില്‍ കര്‍ഷക രീതികള്‍ പ്രോത്സാഹിപ്പിക്കുന്നതിനോടൊപ്പം നമ്മുടെ നിത്യ ജീവിതത്തിന് ആവശ്യമായ പച്ചക്കറികള്‍ നമ്മുടെ വീടുകളിൽ തന്നെ ഉത്പാദിപ്പിക്കുന്നതിന്‍റെ ആവശ്യകതകൂടി മനസിലാക്കി നല്‍കുകയായിരുന്നു ലക്ഷ്യം. കൃഷിയിടങ്ങളിലെ പ്രവര്‍ത്തനം കുട്ടികള്‍ക്ക് വേറിട്ട അനുഭവമായി. കര്‍ഷകരെയും കൃഷി രീതികളെയും കുറിച്ചു കൂടുതല്‍ അടുത്തറിയുന്നതിനും മനസിലാക്കുന്നതിനും പ്രവര്‍ത്തനത്തിലൂടെ കഴിഞ്ഞുവെന്ന് വിദ്യാര്‍ഥികള്‍ പറയുന്നു. കുട്ടികൾ കർഷക വേഷത്തിൽ പണി ആയുധങ്ങളുമായാണ് പാടത്തെത്തിയത്. സമീപ വാസികൾ വളരെ ആവേശത്തോടെയും കൗതുകത്തോടെ യുമാണ്അവരെ സ്വീകരിച്ചത്.

കർഷകൻ മാസിക യുവകർഷകർക്ക് പ്രചോദനം: മന്ത്രി കെ.എൻ. ബാലഗോപാൽ

എഴുകോൺ: കർഷകൻ മാസിക യുവ കർഷകർക്ക് പ്രചോദനമാണെന്ന് മന്ത്രി കെ. എൻ .ബാലഗോപാൽ. കർഷകദിനാചരണ ത്തോടനുബന്ധിച്ച് എഴുകോൺ പഞ്ചായത്തും കൃഷിഭവനും ചേർന്ന് സംഘടിപ്പിച്ച കർഷകരെ ആദരിക്കലും വിപണിയും പരിപാടിയിൽ ദീപിക സ്റ്റാൾ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ചടങ്ങിൽ ദീപിക കർഷകൻ മാസികയുടെ കോപ്പി മന്ത്രി കെ.എൻ ബാലഗോപാൽ പ്രാദേശിക ലേഖകനായ ജിജുമോൻ മത്തായിയിൽ നിന്ന് ഏറ്റുവാങ്ങി. അവാർഡ് ജേതാക്കളായ നിരവധി കർഷകർ പങ്കെടുത്തു. ദീപികയെ പ്രതിനിധീകരിച്ച് കൊല്ലം സർക്കുലേഷൻ ഏരിയാമാനേജർ സുധീർതോട്ടുവാൽ ,രാഷ്‌ട്രദീപിക ഏരിയ മാനേജർ അരുൺ ശശി എന്നിവർ പങ്കെടുത്തു.

കർഷക ദിനാചരണം കെങ്കേമമായി

കുളത്തൂപ്പുഴ: കുളത്തൂപ്പുഴ പഞ്ചായത്തിന്‍റെയും കൃഷിഭവ ന്‍റെയും സംയുക്താഭിമുഖ്യത്തിൽ കർഷക ദിനം ആചരിച്ചു . ഗ്രാമപഞ്ചായത്തിലെ മികച്ച കർഷകരെ ആദരിച്ചു അവാർഡ് നൽകുകയും ചെയ്തു. പഞ്ചായത്ത് പ്രസിഡന്‍റ് പി. ലൈല ബീവിയുടെ അധ്യക്ഷതയിൽ കൂടിയ യോഗം പി.എസ്. സുപാൽ എംഎൽഎ ഉദ്ഘാടനം ചെയ്തു. ജില്ലാ, ബ്ലോക്ക് പഞ്ചായത്ത് ജനപ്രതി നിധികൾ, സർവീസ് സഹകരണ ബാങ്ക് അംഗങ്ങൾ, കാർഷിക വികസന സമിതി അംഗങ്ങൾ, വിവിധ ക്ലസ്റ്റർ അംഗങ്ങൾ, പാടശേഖര സമിതി പ്രതിനിധികൾ എന്നിവർ പങ്കെടുത്തു. അഞ്ചൽ ബ്ലോക്ക് പഞ്ചായത്ത് പ്രസിഡന്‍റ് ഓമന മുരളി, ജില്ലാ പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി അംഗം കെ. അനിൽകുമാർ, പഞ്ചായത്ത് വൈസ് പ്രസിഡന്‍റ് ടി. തുഷാര, ബ്ലോക്ക് പഞ്ചായത്ത് അംഗം റീന ഷാജഹാൻ, ഇ. കെ.സുധീർ, റെജി ഉമ്മൻ, കേരള കോൺഗ്രസ് -എം മണ്ഡലം പ്രസിഡന്‍റ് ബോബൻ ജോർജ്, വൈഎംസിഎ പ്രസിഡന്‍റ് കെ .ജോണി, അഗ്രികൾച്ചർ അസിസ്റ്റന്‍റ് എസ് .എസ്. രാജി തുടങ്ങിയവർ യോഗത്തിൽ പ്രസംഗിച്ചു. ആര്യങ്കാവ് : പഞ്ചായത്തും കൃഷിഭവനും സംയുക്തമായി കര്‍ഷക ദിനം ആചരിച്ചു. ആര്യങ്കാവ്‌ കൃഷിഭവന്‍ കോണ്‍ഫറന്‍സ്‌ ഹാളില്‍ നടന്ന പരിപാടി ഗ്രാമപഞ്ചായത്ത് വൈസ് പ്രസിഡന്‍റ് രമണിയുടെ അധ്യക്ഷതയിൽ പ്രസിഡന്‍റ് സുജ തോമസ് ഉദ്ഘാടനം ചെയ്തു. കൃഷി ഓഫീസർ ഡോ. എബിമോൾ, ഭരണ സമിതി അംഗങ്ങളായ ജസീന്ത റോയി, ബിനിത ബിനു, മാമ്പഴത്തറ സലിം, യു.റെനിത, ബിജു ഏബ്രഹാം, സർവീസ് കോ-ഓപറേറ്റീവ് ബാങ്ക് പ്രസിഡന്‍റ് അഡ്വ. പി. ബി. അനിൽ മോൻ തുടങ്ങി രാഷ്ട്രീയ - സാമൂഹ്യ - സാംസ്കാരിക പ്രവര്‍ത്തകര്‍ പങ്കെടുത്തു. ചടങ്ങിൽ വിവിധ കാര്‍ഷിക മേഖലയില്‍പെട്ട പഞ്ചായത്തിലെ 13 കര്‍ഷകരെ ആദരിച്ചു. അഞ്ചല്‍ : ഏരൂര്‍ പഞ്ചായത്തിലെ കര്‍ഷക ദിനാചരണവുംഹരിത കേരള മിഷന്‍ ഏര്‍പ്പെടുത്തിയ ഹരിത സമൃദ്ധി പഞ്ചായത്ത് പ്രഖ്യാപനവും സംഘടിപ്പിച്ചു. പഞ്ചായത്ത് കോണ്‍ഫറന്‍സ് ഹാളില്‍ സംഘടിപ്പിച്ച ചടങ്ങ് പ്രസിഡന്‍റ് ജി. അജിത്തിന്‍റെ അധ്യക്ഷതയില്‍ പി.എസ്. സുപാല്‍ എംഎൽഎഉദ്ഘാടനം ചെയ്തു. തുടര്‍ന്നു വിവിധ മേഖലകളില്‍ നിന്നുള്ള മികച്ച കര്‍ഷകരെ ആദരിച്ചു. ഹരിത കേരള മിഷന്‍ ഏര്‍പ്പെടുത്തിയ ഹരിത സമൃദ്ധി പഞ്ചായത്ത് പ്രഖ്യാപനവും എംഎല്‍എ നിര്‍വഹിച്ചു. പഞ്ചായത്തിലെ എല്ലാ വാര്‍ഡിലും ഹരിത കേരള മിഷന്‍റെ മേല്‍നോട്ടത്തില്‍ പഞ്ചായത്ത്, കൃഷി വകുപ്പുകളുമായി സഹകരിച്ചുകൊണ്ട് പച്ചക്കറി കൃഷികള്‍ ആരംഭിച്ചിരുന്നു. ഒരു ലക്ഷം പച്ചക്കറി തൈകളും വിത്തുകളുമാണ് പഞ്ചായത്തും കൃഷി ഭവനും ചേര്‍ന്ന് പഞ്ചായത്തില്‍ വിതരണം ചെയ്തത്. പഞ്ചായത്ത് വൈസ് പ്രസിഡന്‍റ് വി. രാജി, ബ്ലോക്ക് പഞ്ചായത്ത് അംഗം എസ്. ശോഭ, സ്ഥിരം സമിതി അധ്യക്ഷന്‍മാരായ ഷൈന്‍ ബാബു, ഡോണ്‍ വി രാജ്, കൃഷി ഓഫീസര്‍ ബി. അജയകുമാര്‍, പഞ്ചായത്ത് അംഗങ്ങള്‍ ഉള്‍പ്പടെ നിരവധിപേര്‍ പ്രസംഗിച്ചു. ഏരൂര്‍ പഞ്ചായത്ത്, കൃഷി ഭവന്‍, സര്‍വീസ് സഹകരണ ബാങ്ക് എന്നിവയുടെ സംയുക്താഭിമുഖ്യത്തിലാണ് കര്‍ഷക ദിനം സംഘടിപ്പിച്ചത്. അഞ്ചല്‍ : അലയമണ്‍ പഞ്ചായത്ത്, കൃഷി ഭവന്‍ എന്നിവയുടെ സംയുക്താഭിമുഖ്യത്തിൽ കര്‍ഷക ദിനാചരണവും കര്‍ഷകരെ ആദരിക്കല്‍ ചടങ്ങും സംഘടിപ്പിച്ചു. കണ്ണംങ്കോട് എംടിയുപി സ്കൂളില്‍ സംഘടിപ്പിച്ച ചടങ്ങ് മന്ത്രി ജെ. ചിഞ്ചു റാണി ഉദ്ഘാടനം ചെയ്തു. പ്രതികൂല കാലാവസ്ഥയെ അതിജീവിച്ച് കര്‍ഷകവൃത്തിയില്‍ ഏര്‍പ്പെട്ടിരിക്കുന്നവര്‍ക്ക് പ്രചോദനവും ആവേശം പകരുന്നതുമാണ് ഇത്തരം ചടങ്ങുകളെന്നു മന്ത്രി പറഞ്ഞു. കര്‍ഷക രംഗത്തെ മികച്ച പ്രവര്‍ത്തനങ്ങള്‍ക്ക് പഞ്ചായത്തില്‍ നിന്നും തെരഞ്ഞെടുക്കപ്പെട്ട 18 കര്‍ഷകരെയാണ് ആദരിച്ചത്. വൈസ് പ്രസിഡന്‍റ് ജി. പ്രമോദ് അധ്യക്ഷത വഹിച്ചു. ജില്ലാ പഞ്ചായത്ത് അംഗം സി. അംബികാകുമാരി,പഞ്ചായത്ത് സ്ഥിരം സമിതി അധ്യക്ഷന്‍ എം. മുരളി, പഞ്ചായത്ത് അംഗങ്ങളായ അസീന മനാഫ്, രാജു, അമ്പിളി, ഷൈനി, ശോഭന, കൃഷി ഓഫീസര്‍ അഞ്ജന. ജെ.മധു തുടങ്ങി ജന പ്രതിനിധികള്‍, പൊതുപ്രവര്‍ത്തകര്‍ ഉള്‍പ്പടെയുള്ളവര്‍ പങ്കെടുത്തു. ചടങ്ങിന് മുന്നോടിയായി നടന്ന കര്‍ഷക സെമിനാര്‍ കാര്‍ഷിക വിജ്ഞാന കേന്ദ്രം ശാസ്ത്രജ്ഞന്‍ ഡോ. സരോജ് നയിച്ചു. കാര്‍ഷിക വിത്തുകള്‍, തൈകള്‍, കാര്‍ഷികോത്പന്നങ്ങള്‍ എന്നിവയുടെ വില്പന പ്രദര്‍ശനം എന്നിവയും സംഘടിപ്പിച്ചിരുന്നു. ചവറ: ചവറ കൃഷി ഭവനിൽ നടന്ന കർഷക ദിനാചരണം എൻ.കെ. പ്രേമചന്ദ്രൻ എംപി ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് അഡ്വ ജെ.ആർ .സുരേഷ് കുമാർ അധ്യക്ഷനായി . സുജിത്ത് വിജയൻ പിള്ള എംഎൽഎ മികച്ച കർഷകരെ ആദരിച്ചു. സന്തോഷ് തുപ്പാശേരി, സി.പി .സുധീഷ് കുമാർ ,എസ്. സോമൻ, സോഫിയ സലാം ,ഐ.ജയലക്ഷ്മി, ഗ്രാമ - ബ്ലോക്ക് പഞ്ചായത്ത് അംഗങ്ങൾ, കൃഷി ഓഫീസർ എൻ.ഷിജിന, സീനിയർ കൃഷി അസിസ്റ്റന്‍റ് കെ.ബി .സൗമ്യ, കാർഷിക വികസന സമിതി അംഗങ്ങൾ എന്നിവർ പ്രസംഗിച്ചു. കൊട്ടാരക്കര : നെടുവത്തൂർ ഗ്രാമ പഞ്ചായത്ത് കൃഷി ഭവന്‍റെ നേതൃത്വത്തിൽ കർഷകദിനാചരണവും അവാർഡ് വിതരണവും നടന്നു. പഞ്ചായത്ത്‌ പ്രസിഡന്‍റ്‌ സി. കെ. ജ്യോതി അധ്യക്ഷ ആയിരുന്നു. മന്ത്രി കെ.എൻ. ബാലഗോപാൽ ഉദ്ഘാടനം ചെയ്തു. ജില്ലാ പഞ്ചായത്ത് അംഗം വി. സുമലാൽ,ബ്ലോക്ക്‌ പഞ്ചായത്ത്‌ പ്രസിഡന്‍റ് എ. അഭിലാഷ്, പഞ്ചായത്ത്‌ വൈസ്പ്രസിഡന്‍റ് ജലജസുരേഷ് ,വാർഡ് അംഗം രാജശേഖരൻ പിള്ള, കൃഷി ഓഫിസർ സാജൻ. എസ്. തോമസ്. എന്നിവർ പ്രസംഗിച്ചു. കുണ്ടറ : കിഴക്കേ കല്ലട ഗ്രാമ പഞ്ചായത്തിന്‍റെയും കൃഷിഭവന്‍റെയും നേതൃത്വത്തിൽ കർഷകദിനാചരണവും കർഷകരെ ആദരിക്കൽ ചടങ്ങും കോവൂർ കുഞ്ഞുമോൻ എം എൽ എ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് കെ. ജി .ലാലി അധ്യക്ഷത വഹിച്ചു. വൈസ് പ്രസിഡന്‍റ് രാജു ലോറൻസ്, കൃഷി ഓഫീസർ ഡോ .പി .കെ. അനഘ , പഞ്ചായത്ത് മെമ്പർമാരായ റാണി സുരേഷ്, എ.സുനിൽ കുമാർ, പ്രദീപ് കുമാർ, പഞ്ചായത്ത് സെക്രട്ടറി ഇൻ ചാർജ് ശങ്കരൻകുട്ടി, സി ഡി എസ് ചെയർപേഴ്സൺ രശ്മി,വിനോദ് വില്ല്യേത്ത്, എൻ .എസ്.ശാന്തകുമാർ, സുരേഷ് ലോറൻസ് ,ആർദർ ലോറൻസ്, ചന്ദ്രൻ കല്ലട, എഡ്വേർഡ് പരിച്ചേരി,ഷിബു പി മാത്യൂ, ഷിബു തമ്പാർ, കെ .ആർ. സന്തോഷ്, സച്ചു , രത്നകുമാരി, അഭിലാഷ്, ശ്രീകുമാർ എന്നിവർ പ്രസംഗിച്ചു.

ലൈറ്റ് ആൻഡ് സൗണ്ട് ഷോ സ്ഥലത്ത് മോഷണം

തെന്മല : തെന്മല ഇക്കോ ടൂറിസത്തില്‍ അടുത്തിടെ ലക്ഷങ്ങള്‍ നടത്തി നവീകരിച്ച ലൈറ്റ് ആന്‍ഡ് സൗണ്ട് ഷോ സ്ഥലത്ത് മോഷണം. ഇതുസംബന്ധിച്ച് ഇക്കോ ടൂറിസം ജീവനക്കാര്‍ തെന്മല പോലീസില്‍ പരാതി നല്‍കി. ലൈറ്റ് ആന്‍ഡ് സൗണ്ട് ഷോയ്ക്ക് ഉപയോഗിക്കുന്ന കംപ്യൂട്ടര്‍ പ്രൊജക്‌ടര്‍, അനുബന്ധ ഉപകരണങ്ങള്‍ ഉള്‍പ്പെടെയുള്ളവ നഷ്‌ടമായി എന്നാണ് പ്രാഥമിക വിവരം. ടൂറിസം കേന്ദ്രത്തിനുള്ളില്‍ നിരവധി ഇടങ്ങളില്‍ സിസിടിവി കാമറകള്‍ സ്ഥാപിച്ചിട്ടുള്ള സുരക്ഷാ ജീവനക്കാരുള്ള ഇടത്താണ് മോഷണം നടന്നിരിക്കുന്നത്. തെന്മല പോലീസ് അന്വേഷണം ആരംഭിച്ചിട്ടുണ്ട്. എന്നാല്‍ മോഷണം സംബന്ധിച്ച് കൃത്യമായ വിവരങള്‍ ലഭിക്കാത്തതിനാല്‍ കേസ് രജിസ്റ്റര്‍ ചെയ്തിട്ടില്ലെന്നും ടൂറിസം കേന്ദ്രത്തിലെ മാനേജര്‍ ഉള്‍പ്പെടെയുള്ളവരെ വിവരങ്ങള്‍ ശേഖരിക്കുന്നതിന്‍റെ ഭാഗമായി ബന്ധപ്പെട്ടുവരികയാണെന്നും തെന്മല പോലീസ് പറയുന്നു.

ഭാഷോത്സവം; റണ്ണറപ്പായി ബ്രൂക്ക് ഇന്‍റർനാഷണൽ സ്കൂൾ

പോത്തൻകോട് : പോത്തൻകോട് മേരി മാതാ ഇംഗ്ലീഷ് മീഡിയം സ്കൂളിൽ നടന്ന കൊല്ലം സഹോദയ മലയാളം ഭാഷോത്സവത്തിൽ ബ്രൂക്ക് ഇന്‍റർനാഷണൽ സ്കൂൾ ഫസ്റ്റ് റണ്ണറപ്പായി. നാല് കാറ്റഗറിയിലായി ഫസ്റ്റ് റണ്ണറപ്പ് ഉൾപ്പെടെ 239 പോയിന്‍റുമായാണ് ബ്രൂക്ക് ഇന്‍റർനാഷണൽ ഓവറോളിൽ ഫസ്റ്റ് റണ്ണറപ്പായിരിക്കുന്നത്. തിരുവനന്തപുരം, കൊല്ലം, പത്തനംതിട്ട, ആലപ്പുഴ ജില്ലകളിലെ നാല്പതോളം സി ബി എസ് ഇ സ്‌കൂളുകളുടെ സംഘടനയായ കൊല്ലം സഹോദയയിലെ 21 സ്കൂളുകളിൽ നിന്നായി ആയിരത്തി ഇരുന്നൂറോളം കുട്ടികളാണ് മലയാളം ഭാഷോത്സവത്തിൽ പങ്കെടുത്തത്. 260 പോയിന്‍റോടെ അഞ്ചൽ സെന്‍റ് ജോൺസ് സ്കൂൾ ഒന്നാം സ്ഥാനവും, 215 പോയിന്‍റോടെ ഗായത്രി സെൻട്രൽ സ്കൂൾ മൂന്നാം സ്ഥാനവും കരസ്ഥമാക്കി.

ലാൽ ബഹാദൂർ സ്റ്റേഡിയത്തിന്‍റെ അവസ്ഥ പരമ ദയനീയം

അജി വള്ളിക്കീഴ് കൊല്ലം: നഗരത്തിൽ നൂറുകണക്കിനു കായികതാരങ്ങളുടെ ആശ്രയ കേന്ദ്രമായ ലാൽ ബഹാദൂർ സ്റ്റേഡിയത്തിന്‍റെ ഇന്നത്തെ അവസ്ഥ പരമ ദയനീയമെന്ന ആക്ഷേപം ഉയരുകയാണ്. കായിക താരങ്ങളോടുള്ള ജില്ലാ സ്പോർട്സ് കൗൺസിലിന്‍റെ നിരുത്തരവാദപരമായ സമീപനരീതിയും അവഗണയും ചൂണ്ടികാട്ടുന്നതാണ് ഇന്നത്തെ ദുരവസ്ഥ. സ്റ്റേഡിയത്തിലേക്ക് കയറിയാൽ കാട്ടിൽ കയറിയ പ്രതീതിയാണ് ആർക്കും ഉണ്ടാവുക. കാട് മൂടിയ സ്ഥലങ്ങൾ പാമ്പുകളുടെയും മറ്റു ഇഴ ജന്തുക്കളുടെയും വിഹാര കേന്ദ്രമായി മാറിയിരിക്കുന്നു. സ്റ്റേഡിയത്തിൽ എവിടെ നോക്കിയാലും കുപ്പിച്ചില്ലുകൾ. സാമൂഹ്യവിരുദ്ധർ ഇരുളിന്‍റെ മറവിൽ അഴിഞ്ഞാടുന്ന കേന്ദ്രമായി സ്റ്റേഡിയം മാറി എന്നും പറയാതിരിക്കാൻ വയ്യ. കായികരംഗത്ത് കൊല്ലത്തിന്‍റെ അഭിമാനമായിരുന്ന ലാൽ ബഹാദൂർ സ്റ്റേഡിയത്തിലേക്ക് കായിക താരങ്ങൾ പരിശീലനത്തിന് വരാൻ തന്നെ ഭയപ്പെടുകയാണ്. പാമ്പുകളുടെ ശല്യം ഒരു വശത്ത്. ഭക്ഷ്യാവശിഷ്്‌ടങ്ങൾ തള്ളുന്ന കേന്ദ്രമായി മാറിയതോടെ തെരുവുനായ്ക്കളുടെ ശല്യം മറു വശത്ത്. സാമൂഹ്യ വിരുദ്ധർ ലഹരിയുടെ ആസക്തിയിൽ ഉടച്ച് എറിയുന്ന കുപ്പിച്ചില്ലുകൾ ചവിട്ടേണ്ടി വരുമെന്ന ഭയവും ഒപ്പമുണ്ട്. സ്റ്റേഡിയത്തിലെ അപകടാവസ്ഥയ്ക്ക് പരിഹാരം ഉണ്ടാക്കണമെന്നാവശ്യപ്പെട്ട് സായ് അധികൃതർ കോർപറേഷന് പലതവണ കത്ത്‌ നൽകിയിട്ടും ഒരു ഫലവും ഉണ്ടായിട്ടില്ല. ഭയത്തോടെയാണ് കുട്ടികളിപ്പോൾ സ്റ്റേഡിയത്തിൽ പരിശീലനം തേടുന്നത്. ഈ സ്റ്റേഡിയത്തിൽ ഓടിയും ചാടിയും കാൽപ്പന്ത് കളിച്ചുമൊക്കെ കായിക ചരിത്രത്തിൽ ഇടം നേടിയവർ നിരവധിയാണ്. സ്പോർട്‌സ് അഥോറിറ്റി ഓഫ് ഇന്ത്യയിലെ കായികതാരങ്ങൾ പോലും സ്റ്റേഡിയത്തിൽ പരിശീലനം നേടാൻ ഒരു കാലത്ത് എത്തിയിട്ടുണ്ട്. സിന്തറ്റിക് ട്രാക്ക് നിർമിക്കുന്നതോടെ ദേശീയതലത്തിലുള്ള മത്സരങ്ങൾവരെ ഇവിടെ നടത്തുമെന്നായിരുന്നു അധികൃതർ പ്രഖ്യാപനങ്ങളും പ്രസ്താവനകളും ഫേസ് ബുക്ക് പോസ്റ്റുകളും നിരത്തി ഊതിക്കാച്ചി പറഞ്ഞിരുന്നത്. എന്നാൽ സിന്തറ്റിക് ട്രാക്ക് നിർമാണത്തിനായി 2023-ൽ സ്റ്റേഡിയം അടച്ചിട്ടതോടെ സ്റ്റേഡിയത്തിന്‍റെ കഷ്‌ടകാലം ആരംഭിക്കുകയായിരുന്നു. ഒളിമ്പ്യൻ സുരേഷ് ബാബു മൾട്ടി പർപ്പസ് ഇൻഡോർ സ്റ്റേഡിയം പദ്ധതിയിൽ ഉൾപ്പെടുത്തിയാണ് ലാൽ ബഹാദൂർ സ്റ്റേഡിയത്തിൽ സിന്തറ്റിക് ട്രാക്ക് നിർമിക്കുന്നത്. 5.42 കോടിയാണ് ആദ്യം അനുവദിക്കുന്നത്. കിറ്റ്‌കോ നിർവഹണ ഏജൻസിയായി കിഫ്ബി ഫണ്ടാണ് നവീകരണത്തിനായി ചെലവഴിച്ചത്. സിന്തറ്റിക് ട്രാക്ക് നിർമിക്കുന്നതോടെ ദേശീയതലത്തിലുള്ള മത്സരങ്ങൾ വരെ ലാൽ ബഹാദൂർ സ്റ്റേഡിയത്തിൽ നടത്താൻ കഴിയുമായിരുന്നു. പക്ഷേ എല്ലാം അസ്ഥാനത്തായി. ഒന്നും നടന്നില്ല. ചെലഴിച്ച പണത്തിന്‍റെ കണക്ക് ആവട്ടെ 6.89 കോടി വരെ എത്തി. സ്റ്റേഡിയം നവീകരണത്തിന്‍റെ കാര്യത്തിൽ കായിക താരങ്ങളും ജനങ്ങളും പരാതിയുമായി രംഗത്ത് ഇറങ്ങിയപ്പോൾ പവിലിയൻ മാത്രം പെയിന്‍റടിച്ച് കോർപപറേഷൻ ഉദ്ഘാടന മഹാമഹം നടത്തുകയാണ് ചെയ്തത്. തുടർന്ന് സായിയിലെ കുട്ടികൾക്കായി സ്റ്റേഡിയം ഭാഗികമായി തുറന്നു നൽകിയെങ്കിലും ഭയപ്പെടുത്തുന്ന സ്റ്റേഡിയത്തിലേക്ക് വരാൻ ഏവരും മടിക്കുകയാണ്. ഫുട്‌ബോൾ പരിശീലനത്തിന് സൗകര്യമില്ലാത്തതിനാൽ കുട്ടികൾ എസ്എൻ കോളജ് മൈതാനമാണ് അതിനായി ആശ്രയിച്ചു വരുന്നത്. സ്റ്റേഡിയം നവീകരണമെന്ന കൊല്ലത്തെ കായികപ്രേമികളുടെ ചിരകാലാവശ്യം സഫലീകരിയ്ക്കപ്പെടുകയാണെന്നു പറഞ്ഞിരുന്ന എംഎൽഎ ഫ്ളഡ് ലൈറ്റുകൾ, ഗാലറിയ്ക്ക് പവലിയൻ, വാമിംഗ് അപ്പ് ട്രാക്ക്, ഫെൻസിംഗ് എന്നിവ സ്ഥാപിക്കുമെന്നും അഞ്ചുകോടി അനുവദിച്ചിട്ടുണ്ടെന്നും അറിയിച്ചിരുന്നതാണ്. മുൻപ് കോർപറേഷൻ സ്റ്റേഡിയം എന്നറിയപ്പെട്ടിരുന്ന ലാൽ ബഹാദൂർ സ്റ്റേഡിയം 1988-89 ലാണ് നിർമിക്കുന്നത്. കോടികൾ ചെലവഴിച്ച് നവീകരിച്ചിട്ടും അന്താരാഷ്‌ട്ര മത്സരങ്ങൾ പോയിട്ട് കായിക താരങ്ങൾക്ക് പരിശീലനത്തിന് പോലും ഉപയോഗപ്പെടാത്ത നിലയിൽ ജില്ലാ സ്പോർട്സ് കൗൺസിൽ പാമ്പ് വളർത്തൽ കേന്ദ്രമാക്കി മാറിയിരിക്കുകയാണ് ലാൽ ബഹാദൂർ സ്റ്റേഡിയം.

കേരളത്തിൽ ലഹരി മാഫിയയുടെ വിളയാട്ടം: സൂരജ് രവി

ചവറ: കേരളം ലഹരി മാഫിയയുടെ കേന്ദ്രമായി മാറിയെന്നു കെപിസിസി സെക്രട്ടറി സൂരജ് രവി. ലഹരിക്കെതിരെ അമ്മമാർ എന്ന മുദ്രാവാക്യം ഉയർത്തി ചവറ ഈസ്റ്റ് മണ്ഡലം കോൺഗ്രസ് കമ്മിറ്റി നടത്തിയ മെഗാ കുടുംബമേള ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. തലമുറകളെ നശിപ്പിക്കുന്ന ലഹരി വ്യാപനത്തിനെതിരെ ചെറുവിരൽ അനക്കാൻ പോലും സർക്കാർ തയാറാകുന്നില്ലെന്ന് സൂരജ് രവി കുറ്റപ്പെടുത്തി. മണ്ഡലം പ്രസിഡന്‍റ് കിഷോർ അമ്പിലാക്കര അധ്യക്ഷനായി. മത്സര പരീക്ഷകൾക്ക് ഉന്നത വിജയം നേടിയ പ്രതിഭകളെ ഡിസിസി വൈസ് പ്രസിഡന്‍റ് ആർ. അരുൺരാജ് ആദരിച്ചു. ഡിസിസി ജനറൽ സെക്രട്ടറി ചക്കിനാൽ സനൽകുമാർ, ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് മേച്ചേഴുത്ത് ഗിരീഷ്, ചവറ ഗോപകുമാർ, ബാബുജി പട്ടത്താനം, അഡ്വ. സുരേഷ് കുമാർ, ശരത് പട്ടത്താനം, ചവറ ഹരീഷ് കുമാർ, എം. സുശീല തുടങ്ങിയവർ പ്രസംഗിച്ചു.

സമ്മാനങ്ങൾ വാരിക്കൂട്ടി നെടുന്പായിക്കുളം എംഎൻ യുപിഎസ്

എഴുകോൺ: പഞ്ചായത്തിന്‍റെ ആഭിമുഖ്യത്തിൽ നടന്ന സ്വാതന്ത്ര്യ ദിനാഘോഷത്തിൽ സമ്മാനങ്ങൾ വാരിക്കൂട്ടി നെടുമ്പായിക്കുളം എംഎൻ യുപിഎസ്. കല്ലുമ്പുറം ജംഗ്ഷനിൽ നിന്ന് ആരംഭിച്ച സ്വാതന്ത്ര്യ ദിനാഘോഷ റാലി എഴുകോൺ പഞ്ചായത്തിൽ അവസാനിച്ചു. റാലിയിൽ കുട്ടികൾ വിവിധ വേഷങ്ങളിൽ അണിനിരന്നു. റാലിയിൽ മികച്ച പ്രകടനം നടത്തിയ സ്കൂളിനുള്ള പുരസ്‌കാരവും ചരിത്ര ക്വിസ് വിഭാഗം ഒന്നാം സ്ഥാനവും ദേശഭക്തി ഗാനം എൽപി വിഭാഗം ഒന്നാം സ്ഥാനവും ദേശഭക്തിഗാനം യുപി രണ്ടാം സ്ഥാനവും എംഎൻയുപിഎസ് സ്വന്തമാക്കി. മാനേജർ തങ്കച്ചൻ പാപ്പച്ചൻ, എച്ച്എം ഇൻ ചാർജ് റീന പി. ചാക്കോ, പിടിഎ പ്രസിഡന്‍റ് ടിജോ ടി. അലക്സ്, വൈസ് പ്രസിഡന്‍റ് സോയ ജോൺസൺ, ചെറിയാൻ കോശി, പിടിഎ അംഗങ്ങൾ, അധ്യാപകർ, അനധ്യാപകർ, രക്ഷകർത്താക്കൾ എന്നിവർ നേതൃത്വം നൽകി.

ലഹരിയിലേക്ക് ഒഴുകി തീരാനുള്ളതല്ല യുവതലമുറ: പി. ജർമിയാസ്

ചവറ : ലഹരിയിലേക്ക് ഒഴുകി തീരാനുള്ളതല്ല യുവതലമുറയെന്ന് കെപിസിസി സെക്രട്ടറി അഡ്വ. പി. ജർമിയാസ്. ചവറ വെസ്റ്റ് മണ്ഡലം കോൺഗ്രസ് കമ്മിറ്റി കരിത്തുറയിൽ സംഘടിപ്പിച്ച ലഹരിക്കെതിരെ അമ്മമാർ എന്ന മുദ്രാവാക്യമുയർത്തി നടന്ന മെഗാ കുടുംബ സംഗമം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. വ്യാപകമായ പരിശോധനയും ബോധവത്കരണവും അധ്യാപകരും രക്ഷകർത്താക്കളും ലഹരിക്കെതിരെ കൈകോർത്തു നടത്തുന്ന കർക്കശ നടപടികളും കൊണ്ടേ ഭാവി തലമുറയെ ലഹരിയുടെ പിടിയിൽ നിന്നും മോചിപ്പിക്കാൻ സാധിക്കുകയുള്ളുവെന്നും ജർമിയാസ് പറഞ്ഞു. ചവറ വെസ്റ്റ് മണ്ഡലം പ്രസിഡന്‍റ് പി. ആർ. ജയപ്രകാശ് അധ്യക്ഷനായി. കുടുംബ സംഗമത്തിൽ ചക്കനാൽ സനൽകുമാർ, മേചേഴത്ത് ഗിരീഷ് , ചിത്രാലയം രാമചന്ദ്രൻ, അജയൻ , സെബാസ്റ്റ്യൻ ആംബ്രോസ്, റോസ് ആനന്ദ്, ജയചന്ദ്രൻ, മനോഹരൻ, ജിജി,സേവ്യർ, ഇക്ബാൽ തുടങ്ങിയവർ പ്രസംഗിച്ചു.

സ്വാതന്ത്ര്യദിനാഘോഷം നടത്തി

ചാത്തന്നൂർ: ള്ളിയനാട് കെ.പി. ഗോപാലൻ ഗ്രന്ഥശാലയിൽ സ്വാതന്ത്യ ദിനാഘോഷവും , ക്രിക്കറ്റ്, ഫുട്ബോൾ ടീമുകൾക്ക് ജഴ്സി വിതരണവും നടത്തി. ഗ്രന്ഥശാലാ വൈസ് പ്രസിഡന്‍റ് ബിജു അധ്യക്ഷനായിരുന്നു. സെക്രട്ടറി ടി.ആർ. ദിപു പതാക ഉയർത്തി സ്വാതന്ത്ര്യ ദിന സന്ദേശം നൽകി. ജഴ്സി വിതരണം എക്സിക്യൂട്ടീവ് അംഗങ്ങളായ സുനിൽകുമാർ, വിജയ കൃഷ്ണൻ നായർ എന്നിവർ നിർവഹിച്ചു. എക്സിക്യൂട്ടീവ് അംഗങ്ങളായ ശ്രീകല,തങ്കമണി, ദീപ, വിപേഷ്, ആർ.അനിൽകുമാർ എന്നിവർ പ്രസംഗിച്ചു. ക്വിസ് മത്സരവും വിജയികൾക്ക് സമ്മാനദാനവും നടത്തി. ചാത്തന്നൂർ : നടയ്ക്കൽ ഗാന്ധിജി ആർട്സ്, സ്പോർട്സ് ക്ലബ്‌ ആ ന്‍റ് ലൈബ്രറി സ്വാതന്ത്ര്യദിനാഘോഷം നടത്തി. സെക്രട്ടറി ഗിരീഷ്കുമാർ നടയ്ക്കൽ ഗാന്ധിജി ഗ്രന്ഥശാലയിൽ ദേശീയ പതാക ഉയർത്തി. തുടർന്ന് സ്വാതന്ത്ര്യസമരചരിത്ര ക്വിസും പായസ വിതരണവും നടത്തി. ചാത്തന്നൂർ : ഗവ. എൽപിഎസിൽ സ്വാതന്ത്ര്യദിനം വർണാഭമായ പരിപാടികളോടെ ആഘോഷിച്ചു. പ്രഥമാധ്യാപിക ജി.വി.ജ്യോതി ദേശീയ പതാക ഉയർത്തി. പിടിഎ പ്രസിഡന്‍റ് ഐ.ടി. ആരതി അധ്യക്ഷത വഹിച്ചു. വാർഡ് മെമ്പർ രേണുക രാജേന്ദ്രൻ കുട്ടികൾക്ക് സ്വാതന്ത്ര്യദിന സന്ദേശം നൽകി. കുട്ടികളുടെ സ്വാതന്ത്ര്യ സമരസേനാനികളുടെ വേഷം ധരിച്ചുള്ള റാലി, നൃത്താവിഷ്കാരം, പ്രസംഗം, ദേശഭക്തിഗാനാലാപനം, തുടങ്ങിയ വിവിധ പരിപാടികൾ നടന്നു. അധ്യാപകരും അധ്യാപക വിദ്യാർഥികളും പരിപാടികൾക്ക് നേതൃത്വം നൽകി. ചാത്തന്നൂർ : ചാത്തന്നൂർ ഗവ. വൊക്കേഷണൽ ആൻഡ് ഹയർസെക്കൻഡറി സ്കൂളിലെ സ്വാതന്ത്ര്യദിനാഘോഷം ജില്ലാ പഞ്ചായത്ത് വൈസ് പ്രസിഡന്‍റ് ശ്രീജ ഹരീഷ് ഉദ്ഘാടനം ചെയ്തു. പ്രിൻസിപ്പൽ ഡി.പ്രമോദ് കുമാർ,ഹെഡ്മിസ്ട്രസ് സി.എസ്. സബീല ബീവി, വിഎച്ച്എസ്ഇ പ്രിൻസിപ്പൽ ലിൻസി.എൽ. സ്കറിയ എന്നിവർ ചേർന്ന് പതാക ഉയർത്തി. പിടിഎ പ്രസിഡന്‍റ് ജി.ബിജു, എസ് എം സി ചെയർമാൻ ടി.ദിജു, എസ്.സേതുലാൽ, ജെസിയ ഷാജഹാൻ, എസ്. അലീഡ, പി.മോഹനൻ, വിജയൻ ദിവാകർ, എസ്. ബിജിലി തുടങ്ങിയവർ പ്രസംഗിച്ചു. സ്കൂൾ ബാൻഡ് ട്രൂപ്പിന്‍റെ അകമ്പടിയോടെ ജനപ്രതിനിധികൾ,വിദ്യാർഥികൾ, പിടിഎ, എസ്എംസി അംഗങ്ങൾ, എൻ സി സി, എസ് പി സി, ജെ ആർ സി, സ്കൗട്ട് ആൻഡ് ഗൈഡ്സ്, ലിറ്റിൽ കൈറ്റ്സ്, നാഷണൽ സർവീസ് സ്കീം അംഗങ്ങൾ തുടങ്ങിയവർ അണിനിരന്ന സ്വാതന്ത്ര്യദിന റാലി ചാത്തന്നൂർ ടൗണിൽ നടന്നു. കൊട്ടിയം : കൊട്ടിയം ആസ്ഥാനമായി പ്രവർത്തിക്കുന്ന തണൽ ചാരിറ്റബിൾ ട്രസ്റ്റിന് കീഴിലുള്ള നോളഡ്ജ് ഹബിൽ സ്വാതന്ത്ര്യ ദിനത്തോടനുബന്ധിച്ച് വൈവിധ്യമാർന്ന പരിപാടികൾ സംഘടിപ്പിച്ചു. ട്രസ്റ്റ് ട്രഷറർ ഷാജഹാൻ കൈപ്പള്ളി ദേശീയപതാക ഉയർത്തി. പ്രിൻസിപ്പൽ അൻഷാദ് സുല്ലമി അധ്യക്ഷനായി. വിദ്യാർഥികളായ ആസിഫ്, ഹാഷിർ, ആരിഫ് എന്നിവർ സ്വാതന്ത്ര്യദിന സന്ദേശം നൽകി. സജീവ്ഖാൻ ദേശീയോദ്ഗ്രഥന പ്രതിജ്ഞ ചൊല്ലിക്കൊടുത്തു. സഹദ് കൊട്ടിയം, ലൈലടീച്ചർ, അൻസൽ ഖാസിമി, സജീവ്ഖാൻ തുടങ്ങിയവർ പ്രസംഗിച്ചു.ദേശഭക്തി ഗാനാലാപനം, സ്വാതന്ത്ര്യദിന പ്രശ്നോത്തരി, ലഹരിവിരുദ്ധ പ്രതിജ്ഞ, കുട്ടികൾ അവതരിപ്പിച്ച വിവിധ കലാ-സാംസ്കാരിക പരിപാടികൾ എന്നിവയും സ്വാതന്ത്ര്യ ദിനാചരണ ഭാഗമായി നടന്നു. പരവൂർ: എസ്എൻവിജിഎച്ച്എസിൽ സ്വാതന്ത്ര്യദിനാഘോഷം വർണാഭമായി ന‌ടന്നു. സ്കൂൾ പ്രധാന അധ്യാപിക എസ്. പ്രീത പതാക ഉയർത്തി .എസ്പിസിയുടെ സല്യൂട്ട് സ്വീകരിച്ച് അഭിസംബോധന ചെയ്തു പ്രസംഗിച്ചു. സ്കൂൾ മാനേജർ എസ്. സാജൻ, പിടിഎ പ്രസിഡന്‍റ് സി. അശോക് കുമാർ, വാർഡ് മെമ്പർ ആർ. രഞ്ജിത്ത്, സമാജം ഭരണസമിതി അംഗങ്ങൾ, പിടിഎ, എംപി ടി എ അംഗങ്ങൾ, അധ്യാപകർ,അനധ്യാപകർ,രക്ഷിതാക്കൾ, പൂർവ വിദ്യാർഥികൾ തുടങ്ങി നിരവധി അംഗങ്ങൾ ചടങ്ങിൽ പങ്കെടുത്തു. തുടർന്ന് പരവൂർ നഗരത്തെ ചുറ്റി റാലിയും സ്കൂളിലെ എസ്പിസി, ജെആർസി, ലിറ്റിൽ കൈറ്റ്സ്, സ്കൗട്ട് തുടങ്ങി വിവിധ ക്ലബ ുകളുടെ നേതൃത്വത്തിൽ കലാപരിപാടികളും നടന്നു. മധുരവിതരണം, ക്രാഫ്റ്റ് നിർമാണം, ദേശഭക്തിഗാനാലാപനം, പതാക നിർമാണം എന്നിവയും സംഘടിപ്പിച്ചു. പാരിപ്പള്ളി: വേളമാനൂർ ഗാന്ധിഭവൻ സ്നേഹാശ്രമത്തിൽ സ്വാതന്ത്ര്യ ദിനം ആഘോഷിച്ചു. മുൻ സംസ്ഥാന ഡിജിപി ഡോ.അലക്സാണ്ടർ ജേക്കബ് ദേശീയപതാക ഉയർത്തി. എഴിപ്പുറം ഹയർ സെക്കണ്ടറി സ്കൂളിലെ എൻ സി സി, എസ് പി സികേഡറ്റുകൾ ഗാഡ് ഓഫ് ഓണർ നൽകിയാണു മുൻ ഡിജിപിയെ സ്വീകരിച്ചത്. 29 വർഷത്തെ സൈനിക സേവനം പൂർത്തികരിച്ച, ജവഹർജംഗ്ഷൻ ദേവകൃപയിലെ സുബേദാർ സാബു ആനന്ദ്, കൊച്ചിൻ ശാസ്ത്രസാങ്കേതിക സർവകലാശാലയിൽ നിന്നും രസതന്ത്രത്തിൽ ഡോക്ടറേറ്റ് നേടിയ പാമ്പുറം ശ്രീസായ് നിരഞ്ജന ശ്രീലാൽ, എഴിപ്പുറം ഹയർ സെക്കൻഡറി സ്കൂൾ ഹെഡ്മിസ്ട്രസ് വി.മിനി എന്നിവരെ സ്നേഹാശ്രമം അനുമോദിച്ചു. കേരള സ്റ്റേറ്റ് എക്സ് സർവീസസ് ലീഗ് പാരിപ്പള്ളിയൂണിറ്റ് ഭാരവാഹികൾ സ്വാതന്ത്ര്യദിനാഘോഷ പരിപാടികൾക്ക് നേതൃത്വം നൽകി. മധുസൂദനൻ നായർ, അജേഷ് എന്നിവർ പ്രസംഗിച്ചു. ഇടവജവഹർ പബ്ലിക് സ്കൂളിലെ വിദ്യാർഥികൾ സ്വാതന്ത്ര്യദിന കലാവിരുന്നു അവതരിപ്പിച്ചു. സ്നേഹാശ്രമം കുടുംബാംഗങ്ങൾ ദേശഭക്തിഗാനങ്ങൾ ആലപിച്ചു. സ്നേഹാശ്രമം ചെയർമാൻ ബി. പ്രേമാനന്ദ്, ഡയറക്ടർ പദ്മാലയം ആർ. രാധാകൃഷ്ണൻ, വർക്കിംഗ് ചെയർമാൻ തിരുവോണം രാമചന്ദ്രൻപിള്ള, സെക്രട്ടറി പി.എം. രാധാകൃഷ്ണൻ, കെ.എം. രാജേന്ദ്രകുമാർ, ബി. സുനിൽകുമാർ, ആർ.ഡി.ലാൽ, ജി. രാമചന്ദ്രൻ പിള്ള, ആലപ്പാട്ട് ശശിധരൻ, അനിൽകുമാർ, എം.കബീർ എന്നിവർ പരിപാടികൾക്ക് നേതൃത്വം നൽകി.

ആർച്ച് ബിഷപ് അലോഷ്യസ് മരിയ ബെൻസിഗറിന്‍റെ 83-ാം ചരമവാർഷിക ദിനം ആചരിച്ചു

കൊല്ലം: ദൈവദാസൻ ആർച്ച് ബിഷപ് അലോഷ്യസ് മരിയ ബെൻസിഗറിന്‍റെ 83-ാം ചരമ വാർഷിക ദിനം കൊല്ലം രൂപതയുടെ ആഭിമുഖ്യത്തിൽ ആചരിച്ചു. തങ്കശേരി ഇൻഫന്‍റ് ജീസസ് കത്തീഡ്രൽ പള്ളിയിൽ നടന്ന ശുശ്രുഷകൾക്ക് കൊല്ലം രൂപത ബിഷപ് ഡോ.പോൾ ആന്‍റണി മുല്ലശേരി നേതൃത്വം നൽകി . 31 വർഷകാലം അഭിഭക്ത കൊല്ലം രൂപതയെ നയിച്ച ബിഷപ് ബെൻസിഗർ പ്രാദേശിക ഭാഷയിൽ അതിഷ്ടിതമായ വെർണാകുലർ വിദ്യാഭാസത്തിന് പ്രാമുഖ്യം നൽകിയതു മാത്രമല്ല മികച്ച അധ്യാപകരെ വാർത്തെടുക്കുവാൻ വിദ്യാഭ്യാസ പരിശീലന കേന്ദ്രങ്ങൾ സ്ഥാപിച്ചു. തിരുവിതാംകൂറിൽ നേഴ്സിംഗ് ശുശ്രുഷ ബെൻസിഗർ പിതാവിലൂടെയാണ് യഥാർഥ്യമായതെന്നും ബിഷപ് പോൾ അന്‍റ ണി മുല്ലശേരി അനുസ്മരണ പ്രഭാഷണത്തിൽ പറഞ്ഞു. ദിവ്യബലിക്ക് ശേഷം ഛായാചിത്രത്തിൽ പുഷ്പാർച്ചനയും നടന്നു.

അങ്കണവാടികൾ കുരുന്നുകളുടെ അമ്മക്കൂട്: എൻ.കെ. പ്രേമചന്ദ്രൻ

കൊട്ടിയം: അങ്കണവാടികൾ കുരുന്നുകളുടെ അമ്മകൂടാണെന്ന് എൻ.കെ .പ്രേമചന്ദ്രൻ എംപി. അങ്കണവാടികൾ കുട്ടികൾക്ക് ഒരുക്കുന്ന ബൗദ്ധിക വികാസവും സുരക്ഷയും വിലമതിക്കാനാകാത്തതാണ്. കുട്ടികളുടെ ആരോഗ്യം, വിജ്ഞാനം, വിനോദം തുടങ്ങി സർവോന്മുഖ വികാസത്തിന് അങ്കണവാടികൾ കുട്ടികൾക്ക് അമ്മയൊരുക്കുന്ന തണലിടമാണെന്ന് എംപി കൂട്ടിച്ചേർത്തു. ആദിച്ചനല്ലൂർ പഞ്ചായത്തിലെ പതുനാറാം വാർഡിലെ മുപ്പത്തിരണ്ടാം നമ്പർ അങ്കണവാടിയുടെ കെട്ടിട നിർമാണ ശിലസ്ഥാപന കർമം നിർവഹിച്ചു പ്രസംഗിക്കുകയായിരുന്നു അദ്ദേഹം. പഞ്ചായത്ത്‌ പ്രസിഡന്‍റ്‌ രേഖ. എസ്. ചന്ദ്രൻ അധ്യക്ഷത വഹിച്ചു. പഞ്ചായത്ത്‌ അംഗവും മുൻ ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാനുമായ പ്ലാക്കാട് ടിങ്കു, ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയർമാൻ എൽ.ഷാജി, ബ്ലോക്ക് പഞ്ചായത്ത്‌ അംഗം ബിന്ദു ഷിബു, മുൻ ബ്ലോക്ക്‌ പഞ്ചായത്ത്‌ അംഗം എസ്. ശ്രീലാൽ, ഐ സിഡി എസ് സൂപ്പർവൈസർ നജീമ ബീവി, സി ഡി എസ് മെമ്പർ കലജാദേവി, വർക്കർ രമണി, വിനോദ് കുമാർ, ആർ. രമേശൻ എന്നിവർ പ്രസംഗിച്ചു. ഉദ്ഘാടനത്തിന് മുന്നോടിയായി നൂറുകണക്കിന് പേർ പങ്കെടുത്ത വർണാഭമായ ഘോഷയാത്രയും നടന്നു.

അമൃത്‌സരോവർ തിരംഗ യാത്ര നടത്തി

കിഴക്കേ കല്ലട: പഞ്ചായത്തിലെ രണ്ടാം വാർഡിൽ നടന്ന സ്വാതന്ത്ര്യദിനാഘോഷ ചടങ്ങിൽ പഞ്ചായത്ത് അംഗം ശ്രീരാഗ് മഠത്തിൽ അധ്യക്ഷത വഹിച്ചു.പഞ്ചായത്ത് പ്രസിഡന്‍റ് കെ.ജി .ലാലി പതാക ഉയർത്തി ഉദ്ഘാടനം ചെയ്തു. ഏറ്റവും നല്ല ജൈവകർഷകനായി തെരഞ്ഞെടുക്കപ്പെട്ട ചന്ദ്രൻ കല്ലടയെ കിഴക്കേ കല്ലട പഞ്ചായത്ത് പ്രസിഡന്‍റ് ആദരിച്ചു. ബ്ലോക്ക് പഞ്ചായത്ത് സെക്രട്ടറി ജോർജ് അലോഷ്യസ് സ്വാതന്ത്ര്യദിന സന്ദേശം നൽകി. പഞ്ചായത്ത് സെക്രട്ടറി ശങ്കരൻകുട്ടി, സോണിയ, ബ്ലോക്ക് മെമ്പർ ഉഷാകുമാരി, വിനോദ് വില്ലത്ത്, പ്രകാശ്, ശിവശങ്കരപ്പിള്ള എന്നിവർ പ്രസംഗിച്ചു. തൊഴിൽ ഉറപ്പുതൊഴിലാളികളുടെ നേതൃത്വത്തിൽ തിരംഗ യാത്രയും നടത്തി.

പ്രധാനമന്ത്രിക്ക് പോസ്റ്റ്‌ കാർഡുകൾ അയച്ചു

ഓയൂർ : ഫിൽഗിരി സ്വാതന്ത്ര്യദിനാഘോഷങ്ങളുടെ ഭാഗമായി ഫിൽഗിരി ഇടവകയിൽ സിസ്റ്റർ ടിൻസി വണ്ടകത്തിൽ സിഎംസി പതാക ഉയർത്തി. സെക്കുലറിസം സംരക്ഷിക്കുക, മതസ്വാതന്ത്ര്യം സംരക്ഷിക്കുക, ക്രിസ്തുമത വിശ്വാസികൾക്കെതിരെ നടക്കുന്ന പീഡനത്തിനെതിരേ നടപടി സ്വീകരിക്കുക എന്ന ആവശ്യങ്ങൾ ഉന്നയിച്ചു ചങ്ങനാശേരി അതിരൂപത കൊല്ലം ആയൂർ ഫൊറോന ഫിൽഗിരി ഇടവകയിലെ വിശ്വാസി സമൂഹം യുവദീപ്തി - എസ്എംവൈഎം ഫിൽഗിരി യൂണിറ്റിന്‍റെ ആഭിമുഖ്യത്തിൽ പ്രധാനമന്ത്രി നരേന്ദ്ര മോദിക്ക് 100 പോസ്റ്റുകാർഡുകൾ സ്വാതന്ത്ര്യ ദിനത്തിൽ അയച്ചു. യുവദീപ്തി എസ്എംവൈ എം ഫിൽഗിരി യൂണിറ്റ് പ്രസിഡന്‍റ് ജോമോൻ അരഞ്ഞാണിയിലിന്‍റെ നേതൃത്വത്തിൽ സംഘടിപ്പിച്ച പരിപാടിയിൽ വികാരി ഫാ. തോമസ് കന്യേക്കോണിൽ, സിസ്റ്റർ ടിൻസി വണ്ടകത്തിൽ സിഎംസി, കൈകാരന്മാർ,സിസ്റ്റേഴ്സ്, യുവജനങ്ങൾ, ഇടവക അംഗങ്ങൾ എന്നിവർ പങ്കെടുത്തു.

ലോക റെക്കോർഡുമായി കുട്ടികളുടെ സ്കേറ്റിംഗ് പ്രകടനം

അമൃതപുരി (കൊല്ലം): സ്വാതന്ത്ര്യ ദിനത്തോടനുബന്ധിച്ച് അമൃതപുരി മാതാ അമൃതാനന്ദമയി മഠത്തിലും അമൃത വിശ്വവിദ്യാപീഠം അമൃതപുരി കാമ്പസിലും സ്വാതന്ത്ര്യദിനാഘോഷം സംഘടിപ്പിച്ചു. തുരീയാമൃതാനന്ദപുരി ദേശീയപതാക ഉയർത്തി. അമൃതപുരിയിൽ സുരക്ഷാ ചുമതലയിലുള്ള എഫ്-221 ബറ്റാലിയനിലെ സിആർപിഎഫ് ഉദ്യോഗസ്ഥരും പോലീസ് ഉദ്യോഗസ്ഥരും ചടങ്ങിൽ പങ്കെടുത്തു. ആശ്രമത്തിലെ അന്തേവാസികളും ഭക്തരുമടക്കം ആയിരക്കണക്കിന് ആളുകൾ സ്വാതന്ത്ര്യദിനാഘോഷത്തിൽ പങ്കാളികളായി.അമൃതപുരി കാമ്പസിൽ നടന്ന സ്വാതന്ത്ര്യദിനാഘോഷ പരിപാടികളുടെ ഭാഗമായി സ്കേറ്റിംഗ് ലോക റെക്കോർഡ് പ്രദർശനങ്ങൾ സംഘടിപ്പിച്ചു. അമൃതപുരി കാമ്പസിലെ ഡിപ്പാർട്ട്മെന്‍റ് ഓഫ് ഫിറ്റ്നസ് ആൻഡ് സ്‌ട്രെംഗ്ത്ത് സ്പോർട്സ് അമൃത ഡയറക്ടറേറ്റ് ഓഫ് അഡ്മിഷൻ ആൻഡ് അക്കാദമിക്ക് ഔട്ട് റീച്ചി െ ന്‍റയും ആസ്‌ക്ക് യോൺ റോളർ സ്കേറ്റിംഗ് അക്കാദമിയുടെയും സഹകരണത്തോടെ സംഘടിപ്പിച്ച പ്രകടനത്തിൽ 82 കുട്ടികൾ 79 മിനുട്ട് പതാകയുമായി നിർത്താതെ സ്കേറ്റിംഗ് ചെയ്ത് സല്യൂട്ട് ചെയ്താണ് മൂന്ന് ലോക റെക്കോർഡുകൾ സ്വന്തമാക്കിയത്. യുണൈറ്റഡ് ഇന്ത്യ വേൾഡ് റെക്കോർഡ്, വേൾഡ് സ്പോർട്സ് റെക്കോർഡ്സ്, അമേസിംഗ് വേൾഡ് റെക്കോർഡ് എന്നിങ്ങനെ മൂന്ന് റെക്കോർഡുകളാണ് കുട്ടികൾ സ്വന്തമാക്കിയത്. കഴിഞ്ഞവർഷം സ്വാതന്ത്ര്യദിനത്തിൽ ഇതേ വേദിയിൽ തന്നെ മൂന്ന് ലോക റെക്കോർഡുകൾ സംഘം സ്വന്തമാക്കിയിരുന്നു. വിശ്വനാഥാമൃത ചൈതന്യ പരിപാടിക്ക് ഫ്ലാഗ് ഓഫ് നിർവഹിച്ചു. അസോസിയേറ്റ് ഡീൻ ഡോ. എസ്.എൻ. ജ്യോതി സ്കൂൾ ഓഫ് ബിസിനസ് ഡീൻ ഡോ.വിശ്വനാഥൻ, സ്കൂൾ ഓഫ് ഫിസിക്കൽ സയൻസസ് പ്രിൻസിപ്പൽ ഡോ.എം. നിധീഷ്, ഡിപ്പാർട്ട്മെന്‍റ് ഓഫ് ഫിറ്റ്നസ് ആന്‍ഡ് സ്‌ട്രെംഗ്ത്ത് സ്പോർട്സ് വിഭാഗം മേധാവി ബിജീഷ് ചിറയിൽ എന്നിവർ പ്രസംഗിച്ചു.

സ്വാതന്ത്ര്യദിനം വിപുലമായി ആഘോഷിച്ചു

കുളത്തൂപ്പുഴ: കുളത്തൂപ്പുഴ പഞ്ചായത്തിൽ സ്വാതന്ത്ര്യദിനാഘോഷം വിവിധ പരിപാടികളോടെ നടത്തി. കുളത്തൂപ്പുഴ പഞ്ചായത്ത് ഓഫീസ് മന്ദിരത്തിൽ പ്രസിഡന്‍റ് പി .ലൈല ബീവി പതാക ഉയർത്തി. കുളത്തൂപ്പുഴ ഗവ.യുപിഎസ്, കല്ലുവെട്ടാൻ കുഴി ഗവ.ഹൈസ്കൂൾ, ചന്ദനക്കാവ് ബിഎം ജി എച്ച്എസ്, ബദനി എൽപിഎസ്, സ്റ്റെല്ലാ മേരി സ്കൂൾ, ഗുഡ് ഷെപ്പേഡ് പബ്ലിക് സ്കൂൾ, കുളത്തൂപ്പുഴ ബഡ്സ് സ്കൂൾ എന്നിവിടങ്ങളിൽ സ്വാതന്ത്ര്യദിനാഘോഷ പരിപാടികൾ നടത്തി. ഗവ. മോഡൽ റസിഡൻഷ്യൽ സ്കൂൾ അങ്കണത്തിൽ നടന്ന അസംബ്ലിയിൽ സ്കൂൾ സീനിയർ സൂപ്രണ്ട് വി.സുരേഷ്കുമാറും പ്രഥമാധ്യാപിക സി.ഗിരിജയും ചേർന്ന് ദേശീയ പതാക ഉയർത്തി. വിവിധ പള്ളികൾ, കുളത്തൂപ്പുഴ വൈഎംസിഎ തുടങ്ങിയ സ്ഥലങ്ങളിൽ ദേശീയ പതാക ഉയർത്തുകയും മധുരം വിതരണം ചെയ്യുകയും ചെയ്തു. കുളത്തൂപ്പുഴ വൈഎംസിഎ ഓഡിറ്റോറിയത്തിൽ സംഘടിപ്പിച്ച സ്വാതന്ത്ര്യദിന ആഘോഷ പരിപാടികൾ വൈഎംസിഎ പ്രസിഡന്‍റ് കെ. ജോണി പതാക ഉയർത്തി ഉദ്ഘാടനം ചെയ്തു. വൈസ് പ്രസിഡന്‍റ് റോയി ഉമ്മൻ, സെക്രട്ടറി സാനു ജോർജ്, ട്രഷറർ സണ്ണി തോമസ്, ജോയിന്‍റ് സെക്രട്ടറി ഷീനരാജേഷ് , ജോൺ തോമസ് മുളയറ, സി.എം. കുരുവിള, മാത്യു പട്ടത്താനം തുടങ്ങിയവർ പ്രസംഗിച്ചു. ചവറ : ചവറ ബ്ലോക്ക് പഞ്ചായത്തിന്‍റെ നേതൃത്വത്തിൽ വിവിധ പരിപാടികളോടുകൂടി സ്വാതന്ത്ര്യദിനാഘോഷം നടന്നു. പതാക ഉയർത്തിയും അതിനുശേഷ ലഹരിക്കെതിരെയുള്ള സന്ദേശവുമായി ബ്ലോക്ക് പഞ്ചായത്തിന്‍റെ നേതൃത്വത്തിൽ ഘോഷയാത്രയും സംഘടിപ്പിച്ചു. ബ്ലോക്ക് ഓഫീസ് അങ്കണത്തിൽ നിന്നും ആരംഭിച്ച ഘോഷയാത്രയിൽ ജനപ്രതിനിധികൾ, ജീവനക്കാർ, ആർഡി ഏജന്‍റുമാർ, പ്രമോട്ടർമാർ എന്നിവർ പങ്കെടുത്തു. ആഘോഷ പരിപാടികളുടെ ഉദ്ഘാടനം ബ്ലോക്ക് പഞ്ചായത്ത് പ്രസിഡന്‍റ് സന്തോഷ്‌ തുപ്പാശേരി നിർവഹിച്ചു. പഞ്ചായത്ത് വൈസ് പ്രസിഡന്‍റ് സോഫിയ സലാം അധ്യക്ഷയായി. ബ്ലോക്ക് പഞ്ചായത്ത് സ്ഥിരം സമിതി അധ്യക്ഷന്മാരായ എം .പ്രസന്നൻ ഉണ്ണിത്താൻ,ജോസ് വിമൽ രാജ്, നിഷ സുനീഷ്, ബ്ലോക്ക്‌ പഞ്ചായത്ത് അംഗങ്ങളായ, ആർ. ജിജി ,എ.സീനത്ത്, സി.രതീഷ്, സജി അനിൽ, സുമയ്യ അഷറഫ്, പ്രിയഷിനു, ബ്ലോക്ക്‌ പഞ്ചായത്ത് സെക്രട്ടറി പ്രേം ശങ്കർ, എസ് സിഡി ഒ.ബിന്ദു എന്നിവർ പ്രസംഗിച്ചു. ചവറ കോർട്ട് സെന്‍ററിൽ സ്വാതന്ത്ര്യദിനാഘോഷം നടന്നു. ചടങ്ങിൽ ചവറ ബാർ അസോസിയേഷൻ പ്രസിഡന്‍റ് അഡ്വ.എസ്. അനീഷ് ദേശീയപതാക ഉയർത്തി. ചവറ കുടുംബകോടതി ജഡ്ജ് വി ഉദയകുമാർ സ്വാതന്ത്ര്യദിന സന്ദേശം നൽകി. ചവറ ജുഡീഷ്യൽ ഒന്നാം ക്ലാസ് മജിസ്ട്രേറ്റ് ആശാ കോശി, ചവറ ഗ്രാമ ന്യായാധികാരി ആതിര ചന്ദ്രൻ, ബാർ അസോസിയേഷൻ സെക്രട്ടറി അഡ്വ. ഡി .ഹരിപ്രസാദ്, കുടുംബ കോടതി ശിരസ്താർ രഞ്ജിത്ത്, ജൂനിയർ സൂപ്രണ്ട് ഹാരിസ്, അഡ്വ. ക്ലാർക്ക് അസോസിയേഷൻ പ്രസിഡന്‍റ് ജ്യോതിലക്ഷ്മി, വി. അരുൺ തുടങ്ങിയവർ പ്രസംഗിച്ചു ചവറ സ്വാതന്ത്ര്യദിന ആഘോഷ ഭാഗമായി ചവറ എം എസ് എൻ കോളജ് ദത്ത് ഗ്രാമത്തിൽ പായസ വിതരണം നടത്തി. പ്രിൻസിപ്പൽ ഡോ.ആർ. മധു ദേശീയ പതാക ഉയർത്തി. തുടർന്ന് വിദ്യാർഥികളുടെയും അധ്യാപകരുടെയും നേതൃത്വത്തിൽ ദേശഭക്തിഗാനങ്ങളും പ്രസംഗങ്ങളും ഉൾപ്പെടെയുള്ള വിവിധ കലാപരിപാടികൾ അരങ്ങേറി. ചടങ്ങിൽ അധ്യാപകരും അനധ്യാപകരും വിദ്യാർഥികളും പങ്കെടുത്തു. പ്രഫ.സുരേഷ് ബാബു , പ്രഫ.അനന്തകൃഷ്ണൻ, പ്രഫ.അരുൺ അരവിന്ദ്, പ്രഫ.കാർമൽ തോമസ്, വിദ്യാർഥികളായ ടിജിൻ ഡിക്രൂസ്,ഗോഡ്വിൻ ബിജു എന്നിവർ നേതൃത്വം നൽകി. ചവറ ബേബി ജോൺസ് മാരക സർക്കാർ കോളജിൽ എൻഎസ്എസ്-എൻസിസി എന്നിവയുടെ സംയുക്താഭിമുഖ്യത്തിൽ വിവിധ പരിപാടികളോട് കൂടി സ്വാതന്ത്ര്യദിനം ആഘോഷിച്ചു. ഡോ.രശ്മി വിജയൻ പതാക ഉയർത്തി.തുടർന്ന് വിദ്യാർഥികൾ അവതരിപ്പിച്ച വിവിധ കലാപരിപാടികൾ നടന്നു. എൻഎസ്എസ് പ്രോഗ്രാം ഓഫീസർ ഡോ.ജി. ഗോപകുമാർ, എൻസിസി ഓഫീസർ ലെഫ്.കിരൺ, പിടിഎ സെക്രട്ടറി പ്രഫ.പി. ലൈജു, അജിത്ത്, ജീൻഷാ, ജലീൽ ഖാൻ, ആദിത്യൻ എസ് കുമാർ,ആസിഫ് മുഹമ്മദ്, ലക്ഷ്മി, അരുണിമ, സുബിൻ, നീനു, വിനായക് എന്നിവർ പ്രസംഗിച്ചു. ചവറ തേവലക്കര സർക്കാർ എൽപിഎസിൽ സ്വാതന്ത്ര്യ ദിനം ആഘോഷിച്ചു. പ്രധാനധ അ്യാപിക വി.വി.ജയലക്ഷ്മി പതാകയുയർത്തി. വിമുക്തഭടൻ സി.എൻ.രമണൻ പിള്ളയെ ആദരിച്ചു. വാർഡ് മെമ്പർ രാധിക ഓമനക്കുട്ടൻ, കാട്ടുവിള ഗോപാലക്യഷ്ണ പിള്ള,പിടിഎ പ്രസിഡന്‍റ് സരോജാക്ഷൻ, എ. അരുൺ കുമാർ , അഖില, ജ്യോതിഷ് കണ്ണൻ, ബിനിതാ ബിനു, ഷിബി, രാജ് ലാൽ തോട്ടുവാൽ എന്നിവർ പ്രസംഗിച്ചു. സ്വാതന്ത്ര്യ ദിന റാലി, ചിത്രരചനാ മത്സരം, ഫ്ലാഷ് മോബ്,മധുരവിതരണം എന്നിവ നടന്നു. ആയൂർ : ചെറുപുഷ്പ സെൻട്രൽ സ്കൂളിലെ സ്വാതന്ത്ര്യദിനാഘോഷം പ്രിൻസിപ്പൽ ഫാ.അരുൺ ഏറത്ത് പതാക ഉയർത്തി ഉദ്ഘാടനം ചെയ്തു. സ്കൂൾ ബർസാർ ഫാ.ജോൺ പാലവിള കിഴക്കേതിൽ സ്വാതന്ത്ര്യദിന സന്ദേശം നൽകി. ഉപന്യാസ രചന, ക്വിസ് മത്സരം, ദേശഭക്തിഗാന മത്സരം, പ്രസംഗ മത്സരം, നിശ്ചലദൃശ്യങ്ങൾ, ഐക്യഭാരതം എന്ന ആശയം മുൻനിർത്തിയുള്ള നൃത്തരൂപങ്ങൾ എന്നിവ കുട്ടികൾ അവതരിപ്പിച്ചു. ചവറ : സംസ്ഥാന പൊതുമേഖലാ വ്യവസായ സ്ഥാപനമായ കേരളാ മിനറല്‍സ് ആന്‍ഡ് മെറ്റല്‍സ് ലിമിറ്റഡില്‍ സ്വാതന്ത്ര്യദിനം വിപുലമായ പരിപാടികളോടെ ആഘോഷിച്ചു. യൂണിറ്റ് ഹെഡും ജോയിന്‍റ് ജനറല്‍ മാനേജറുമായ പി.കെ. മണിക്കുട്ടന്‍ ടിപി യൂണിറ്റില്‍ പതാക ഉയര്‍ത്തി. കമ്പനിയുടെ മിനറല്‍ െ സപ്പറേഷന്‍ യൂണിറ്റില്‍ യൂണിറ്റ് ഹെഡ് എം.യു. വിജയകുമാറും ടൈറ്റാനിയം സ്‌പോഞ്ച് യൂണിറ്റില്‍ യൂണിറ്റ് ഹെഡ് റോബി ഇടിക്കുളയും പതാക ഉയര്‍ത്തി. സുരക്ഷാ ജീവനക്കാരും അഗ്നിരക്ഷാ ജീവനക്കാരും ചേര്‍ന്ന് സല്യൂട്ട് നല്‍കി. മിനറല്‍ സെപ്പറേഷന്‍ യൂണിറ്റില്‍ മികച്ച സേവനം കാഴ്ചവെച്ച സെക്യൂരിറ്റി ജീവനക്കാരെ ചടങ്ങില്‍ ആദരിച്ചു. തുടർന്ന് മധുര വിതരണവും നടന്നു. ടൈറ്റാനിയം എംപ്ലോയീസ് റിക്രിയേഷന്‍ ക്ലബും കെ എം എം എല്‍ ഓഫീസേഴ്സ് ക്ലബും ദേശീയപതാക ഉയര്‍ത്തി മധുരം വിതരണം ചെയ്തും ആഘോഷത്തില്‍ പങ്കാളികളായി. അംഗീകൃത ട്രേഡ് യൂണിയന്‍ നേതാക്കള്‍, ഉന്നത ഉദ്യോഗസ്ഥര്‍, വിവിധ സെക്ഷനുകളിലെ ജീവനക്കാര്‍ തുടങ്ങിയവര്‍ പങ്കെടുത്തു. കൊട്ടാരക്കര :കലയപുരം എം എസ് സി എൽപി സ്കൂളിലെ സ്വാതന്ത്ര്യദിനാഘോഷം കലയപുരം ആശ്രയയിൽ നടന്നു. കലയപുരം ജോസ് പൊതുസമ്മേളനം ഉദ്ഘാടനം ചെയ്തു. സ്കൂൾ പിടിഎ പ്രസിഡന്‍റ് എസ്. പ്രതിഭ അധ്യക്ഷയായിരുന്നു. വാർഡ് മെമ്പർ കാഞ്ഞിരം മുകൾ മനോജ്‌, പൂർവ വിദ്യാർഥി കലയപുരം സന്തോഷ്‌, ലൈബ്രറി സെക്രട്ടറി പയ്യാളൂർ ഗോപി, സിജുജോർജ്, ആൻസിസഖറിയ, ആൻസിമോൾ, എന്നിവർ പ്രസംഗിച്ചു. പൊതുസമ്മേളനത്തിന് ശേഷം സ്വാതന്ത്ര്യദിന റാലി നടത്തി. കുട്ടികളുടെ വിവിധ കലാപരിപാടികളും നടന്നു. അഞ്ചല്‍ : എഴുപത്തിയൊമ്പതാമത് സ്വാതന്ത്ര്യ ദിനം നാടെങ്ങും സമുചിതമായി ആഘോഷിച്ചു. അലയമണ്‍ പഞ്ചായത്തില്‍ നടന്നസ്വാതന്ത്ര്യദിനാഘോഷം പ്രസിഡന്‍റ് എം. ജയശ്രീ പതാക ഉയര്‍ത്തി ഉദ്ഘാടനം ചെയ്തു. സെക്രട്ടറി, ജീവനക്കാര്‍ ഉള്‍പ്പെടെയുള്ളവര്‍ പങ്കെടുത്തു. അലയമണ്‍ സര്‍ക്കാര്‍ ന്യൂ എല്‍പി സ്കൂളില്‍ നടന്ന ആഘോഷ പരിപാടികള്‍ക്കു ഹെഡ്മിസ്ട്രസ് ബി.എസ്. സീമ പതാക ഉയര്‍ത്തിയതോടെ തുടക്കമായി. പിടിഎ പ്രസിഡന്‍റ് പി. സനില്‍കുമാര്‍ സ്വാതന്ത്ര്യദിന സന്ദേശം നല്‍കി. തുടര്‍ന്നു മധുര വിതരണവും കുട്ടികളുടെ വിവിധ കലാപരിപാടികളും നടന്നു. കണ്ണന്‍കോട് എംറ്റിയുപി സ്കൂളില്‍ എച്ച്എം ശാലിനി പതാക ഉയര്‍ത്തി. വാര്‍ഡ് അംഗം എം. മുരളി സന്ദേശം നല്‍കി. പിടിഎ പ്രസിഡന്‍റ് സജികുമാര്‍ അധ്യക്ഷത വഹിച്ചു. പഴയേരൂര്‍ റൂറല്‍ ഡവലപ്മെന്‍റ് കലാ കായിക വേദിയുടെ ആഭിമുഖ്യത്തില്‍ നടത്തിയ സ്വാതന്ത്ര്യ ദിനാഘോഷത്തില്‍ രക്ഷാധികാരിയും ഈസ്റ്റ് സർക്കാര്‍ ഹയര്‍ സെക്കണ്ടറി സ്കൂള്‍ പ്രിന്‍സിപ്പാളുമായ അനസ് കെ ബാബു പതാക ഉയര്‍ത്തി. പ്രസിഡന്‍റ് റാഫി ട്രഷറർ ഷരീഫ്, അംഗങ്ങളായ മൻസൂർ. മോനച്ചൻ എന്നിവര്‍ നേതൃത്വം നല്‍കി .

ബെൻസിഗർ ദിനം ആചരിച്ചു

കൊല്ലം: ബിഷപ് അലോഷ്യസ് മരിയ ബെൻസിഗറുടെ നാമധേയത്തിൽ ആരംഭിച്ച കൊല്ലത്തെ ആദ്യത്തെ സ്വകാര്യ ആശുപത്രിയായ ബിഷപ് ബെൻസിഗർ ഹോസ്പിറ്റലിൽ ബിഷപ് അലോഷ്യസ് മരിയ ബെൻസിഗർ അനുസ്മരണ ദിനം നടത്തി. ആശുപത്രി ഡയറക്ടർ ഫാ. ജോൺ ബ്രിട്ടോ ദീപം തെളിയിച്ച് പരിപാടികൾക്ക് തുടക്കം കുറിച്ചു. അഡ്മിനിസ്ട്രേറ്റർ സിസ്റ്റർ ജീന മേരി, അസോസിയേറ്റ് ഡയറക്ടർ ടി.ജെയിംസ് ,നഴ്സിങ് സൂപ്രണ്ടന്‍റ് സിസ്റ്റർ സിർള മേരി എന്നിവർ പ്രസംഗിച്ചു. ബിഷപ് ബെൻസിഗറുടെ സേവനങ്ങളെയും കാഴ്ചപ്പാടുകളെയും അനുസ്മരിച്ച് ഫാ. ജോൺ ബ്രിട്ടോയും സ്റ്റാഫ് അംഗങ്ങളും അദ്ദേഹത്തിന്‍റെ ഛായാചിത്രത്തിനു മുന്നിൽ പുഷ്പാർച്ചന നടത്തി.

തിരുമുക്ക് അടിപ്പാത സാധ്യമായ പരിഹാരം ഉണ്ടാക്കും: എൻ.കെ. പ്രേമചന്ദ്രൻ എംപി

പരവൂർ: തിരുമുക്ക് അടിപ്പാത വിഷയത്തിൽ സാധ്യമായ പരിഹാരം കണ്ടെത്താൻ ശ്രമിക്കുമെന്ന് എൻ.കെ. പ്രേമചന്ദ്രൻ എംപി. പരവൂർ പ്രൊട്ടക്ഷൻ ഫോറം പരവൂർ എസ്എൻവി ബാങ്ക് ഓഡിറ്റോറിയത്തിൽ സംഘടിപ്പിച്ച ജനകീയ കൺവൻഷൻ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. നിലവിലുള്ള ചെറിയ അടിപ്പാതയ്ക്ക് പകരം 10 മീറ്റർ നീളമുള്ള ഫ്ലൈഓവർ നിർമിക്കണമെന്ന ആവശ്യമുയർത്തിയാണ് പരവൂർ പ്രൊട്ടക്ഷൻ ഫോറം കൺവൻഷൻ സംഘടിപ്പിച്ചത്. ഇത്തിക്കരയിൽ അടിപ്പാതയില്ലാത്ത സാഹചര്യത്തിൽ, തിരുമുക്കിൽ ഫ്ലൈഓവർ നിർമിക്കുന്നതിലൂടെ ആ പ്രശ്നത്തിനും പരിഹാരമാകുമെന്ന് കൺവൻഷനിൽ അഭിപ്രായമുയർന്നു. പ്രശ്‍നം പരിഹരിക്കാൻ സംസ്ഥാന സർക്കാരി െ ന്‍റ ഭാഗത്തുനിന്നും എല്ലാ സഹായവും ഉറപ്പാക്കാൻ ശ്രമിക്കുമെന്ന് യോഗത്തിൽ അധ്യക്ഷത വഹിച്ച ജി.എസ്. ജയലാൽ എംഎൽഎ പറഞ്ഞു. രണ്ട് നഗരസഭകളിലെയും ഏഴ് പഞ്ചായത്തുകളിലെയും ജനങ്ങളെ ബാധിക്കുന്ന വിഷയത്തിൽ വേഗത്തിൽ പരിഹാരം കാണണമെന്ന് വിവിധ സംഘടനാ നേതാക്കൾ ആവശ്യപ്പെട്ടു. നഗരസഭാ ചെയർപേഴ്സൺ പി. ശ്രീജ, കെ. സേതുമാധവൻ, നെടുങ്ങോലം രഘു, ബി.ബി. ഗോപകുമാർ, അഡ്വ.വി.എച്ച്. സത്ജിത് , പി.കെ. മുരളീധരൻ, കെ.പി. കുറുപ്പ്, അഡ്വ. ജി. രാജേന്ദ്രപ്രസാദ്, അഡ്വ. ലത മോഹൻദാസ്, എസ്. സുനിൽകുമാർ, എൻ. സദാനന്ദൻപിള്ള, രാജശേഖരൻ, ഹാരിസ്, ഉണ്ണി, എം. ഹരികൃഷ്ണൻ എന്നിവർ കൺവൻഷനിൽ പ്രസംഗിച്ചു.

കാലാവസ്ഥ വ്യതിയാനം ക്ഷീരകര്‍ഷക മേഖലയെ പ്രതിസന്ധിയിലാക്കുന്നു : മന്ത്രി ജെ. ചിഞ്ചുറാണി

അഞ്ചല്‍ : സംസ്ഥാന ക്ഷീര വികസന വകുപ്പും അഞ്ചല്‍ ബ്ലോക്ക് പഞ്ചായത്തും സംയുക്തമായി ക്ഷീര കര്‍ഷക സംഗമം നടത്തി. കണ്ണങ്കോട് എംടിയുപി സ്കൂളില്‍ വച്ചാണ് വിവിധ പരിപാടികളോടെ ക്ഷീരകര്‍ഷക സംഗമം സംഘടിപ്പിച്ചത്. ബ്ലോക്ക് പഞ്ചായത്ത് അംഗം എം. മനീഷ് പതാക ഉയര്‍ത്തിയതോടെയാണ് പരിപാടികള്‍ക്ക് തുടക്കം കുറിച്ചത്. ചടങ്ങുകളുടെ ഭാഗമായി അഞ്ചല്‍ ബ്ലോക്ക് പഞ്ചായത്ത് പരിധിയിലെ വിവിധ പഞ്ചായത്തുകളില്‍ നിന്നും എത്തിച്ച കന്നുകാലി പ്രദര്‍ശനവും ഗോരക്ഷാ ക്യാമ്പും നടന്നു. പഞ്ചായത്ത് വൈസ് പ്രസിഡന്‍റ് ജി. പ്രമോദ് കന്നുകാലി പ്രദര്‍ശനം ഉദ്ഘാടനം ചെയ്തു. ബ്ലോക്ക് പഞ്ചായത്ത് സ്ഥിരം സമിതി അധ്യക്ഷ മായാകുമാരി അധ്യക്ഷത വഹിച്ച ചടങ്ങില്‍ പഞ്ചായത്ത് പ്രസിഡന്‍റ് എം. ജയശ്രീ, പഞ്ചായത്ത് അംഗം അസീന മനാഫ്, കണ്ണങ്കോട് ക്ഷീര സംഘം പ്രസിഡന്‍റ് എം. സുനില്‍കുമാര്‍, വൈസ് പ്രസിഡന്‍റ് മധുസൂദനന്‍ പിള്ള, ഡയറി ഫാം ഇന്‍സ്ട്രക്ടര്‍ എം.എസ് .കാര്‍ത്തിക തുടങ്ങിയവര്‍ പ്രസംഗിച്ചു. തുടര്‍ന്നു നടന്ന ക്ഷീര വികസന സെമിനാര്‍ ബ്ലോക്ക് പഞ്ചായത്ത് അംഗം ഇ.കെ. സുധീറിന്‍റെഅധ്യക്ഷതയില്‍ ബ്ലോക്ക് പഞ്ചായത്ത് വൈസ് പ്രസിഡന്‍റ് കെ.സി. ജോസ് ഉദ്ഘാടനം ചെയ്തു. ക്ഷീരകര്‍ഷക സംഗമം പി.എസ്. സുപാൽ എംഎൽഎ യുടെ അധ്യക്ഷതയില്‍ മന്ത്രി ജെ. ചിഞ്ചു റാണി ഉദ്ഘാടനം ചെയ്തു. കാലാവസ്ഥ വ്യതിയാനം ക്ഷീര കാർഷിക മേഖലയെ പ്രതികൂലമായി ബാധിക്കുന്നുവെന്ന് മന്ത്രി പറഞ്ഞു. ബ്ലോക്ക് പഞ്ചായത്ത് പ്രസിഡന്‍റ് ഓമനമുരളി , പഞ്ചായത്ത് പ്രസിഡന്‍റ്മാരായ എം. ജയശ്രീ, ജി .അജിത്ത്, ബ്ലോക്ക് പഞ്ചായത്ത് വൈസ് പ്രസിഡന്‍റ് കെ.സി. ജോസ്, ജില്ലാ പഞ്ചായത്ത് അംഗം സി .അംബികാകുമാരി, ക്ഷീര സംഘം പ്രതിനിധികള്‍ അടക്കമുള്ളവര്‍ പങ്കെടുത്തു. ചടങ്ങില്‍ ക്ഷീര മേഖലയില്‍ വിവിധ തലങ്ങളില്‍ മികച്ച പ്രവര്‍ത്തനം കാഴ്ചവച്ചവരെ ആദരിച്ചു.

കർഷക ദിനാചരണം ഇന്ന്

കുളത്തൂപ്പുഴ : കുളത്തൂപ്പുഴ പഞ്ചായത്തിന്‍റെയും കൃഷിഭവന്‍റെയും സംയുക്താഭിമുഖ്യത്തിൽ ഇന്ന് കുളത്തൂപ്പുഴ പഞ്ചായത്ത് കോൺഫറൻസ് ഹാളിൽ പഞ്ചായത്തിലെ മികച്ച കർഷകരെയും കർഷക തൊഴിലാളികളെയും മുതിർന്ന കർഷകരെയും ആദരിക്കും. പഞ്ചായത്ത് പ്രസിഡൻ് പി. ലൈല ബീവിയുടെ അധ്യക്ഷതയിൽ കൂടുന്ന യോഗത്തിൽ പി.എസ്. സുപാൽ എംഎൽഎ ഉദ്ഘാടനം നിർവഹിക്കും. ജില്ലാ, ബ്ലോക്ക് പഞ്ചായത്ത് ജനപ്രതിനിധികൾ, സർവീസ് സഹകരണ ബാങ്ക് അംഗങ്ങൾ, കാർഷിക വികസന സമിതി അംഗങ്ങൾ, വിവിധ ക്ലസ്റ്റർ അംഗങ്ങൾ, പാടശേഖര സമിതി പ്രതിനിധികൾ എന്നിവർ പങ്കെടുക്കും. അഞ്ചൽ ബ്ലോക്ക് പഞ്ചായത്ത് പ്രസിഡന്‍റ് ഓമന മുരളി, ജില്ലാ പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി അംഗം കെ. അനിൽകുമാർ, പഞ്ചായത്ത് വൈസ് പ്രസിഡന്‍റ് ടി. തുഷാര, ബ്ലോക്ക് പഞ്ചായത്ത് അംഗം റീന ഷാജഹാൻ, ഇ.കെ. സുധീർ, റെജി ഉമ്മൻ, കേരള കോൺഗ്രസ് -എം മണ്ഡലം പ്രസിഡന്‍റ് ബോബൻ ജോർജ്, വൈഎംസിഎ പ്രസിഡന്‍റ് കെ .ജോണി, അഗ്രികൾച്ചർ അസിസ്റ്റന്‍റ് എസ്.എസ്. രാജി തുടങ്ങിയവർ പ്രസംഗിക്കും

ചങ്ങാതിക്കൊരു മരം പദ്ധതിക്ക് തുടക്കമായി

കുളത്തൂപ്പുഴ : ബിഎംജി എച്ച് എസിൽ ചങ്ങാതിക്കൊരു മരം പദ്ധതി കുളത്തുപ്പുഴ പഞ്ചായത്ത് അംഗം പി. ആർ. സന്തോഷ്‌കുമാർ ഉദ്ഘാടനം ചെയ്തു. സ്കൂൾ ഇക്കോ ക്ലബ് സംഘടിപ്പിച്ച യോഗത്തിൽ ഹെഡ്മാസ്റ്റർ കെ. ഷാജുമോൻ അധ്യക്ഷത വഹിച്ചു. ലോക്കൽ മാനേജർ ഫാ. മാത്യു ചരിവുകാലായിൽ മുഖ്യപ്രഭാഷണം നടത്തി. ഇരുന്നൂറിലധികം ഫലവൃക്ഷത്തൈകൾ വിതരണം ചെയ്തു. ഹരിതമിഷൻ കോർഡിനേറ്റർ സ്മിത ക്ലാസ് നയിച്ചു. പിടിഎ അംഗം ഷൈജു ഷാഹുൽ, ഇക്കോ ക്ലബ് കൺവീനർ ലോറൻസി ജേക്കബ്, സ്റ്റാഫ് സെക്രട്ടറി ജെ. ജോസ്മോൻ, എബിൻ ലൂക്കോസ്, വൈ. സജയകുമാർ എന്നിവർ പ്രസംഗിച്ചു.

അധിക ചുങ്കം കർഷകർക്ക് കനത്ത ആഘാതം ഏൽപ്പിക്കും: കർഷക കോൺഗ്രസ്

അഞ്ചൽ: അമേരിക്ക ഏർപ്പെടുത്തിയ അധിക ചുങ്കം കേരളത്തിലെ കർഷകർക്ക ്കനത്ത ആഘാതം ഏൽപ്പിക്കുമെന്ന് കർഷക കോൺഗ്രസ് സംസ്ഥാന സെക്രട്ടറി വിളക്കുപാറ ഡാനിയേൽ പ്രസ്താവനയിൽ അറിയിച്ചു. കൊഞ്ച്, കണവ, ഞണ്ട്, കായൽ മത്സ്യങ്ങൾ തുടങ്ങി ഒട്ടേറെ സമുദ്രോല്പന്നങ്ങൾക്ക് കയറ്റുമതി വിപണിയിലെ ഈ അപ്രതീക്ഷിത തിരിച്ചടി ഏറെ ദോഷകരമാവും. അമേരിക്കൻ വിപണിയിൽ സമീപകാലത്തായി ഇന്ത്യൻ കശുവണ്ടിയുടെ വിപണി വിഹിതം ഗണ്യമായി വർധിച്ചിരുന്നു. 2023-24 കാലയളവിൽ 65808 മെട്രിക് ടൺ സംസ്കരിച്ച കശുവണ്ടിപ്പരിപ്പാണ് അമേരിക്കൻ വിപണിയിൽ മാത്രം കയറ്റി അയച്ചത്. 2900 കോടി രൂപയുടെ വാർഷിക കയറ്റുമതിയാണ് കുരുമുളക്, ജാതി, ഏലം, മഞ്ഞൾ എന്നിവയടങ്ങുന്ന ഇന്ത്യൻ സുഗന്ധവ്യഞ്ജന വിപണിക്ക് അമേരിക്കയിലുള്ളത്. ഈ രംഗത്ത് പ്രവർത്തിക്കുന്ന വ്യാപാരികളെയും കർഷകരെയും സുഗന്ധവ്യഞ്ജന മേഖലയിലെ തിരിച്ചടി ഏറെ പ്രതികൂലമായി ബാധിക്കുമെന്നും വിളക്കുപാറ ഡാനിയേൽ പറഞ്ഞു. കയർ, കയറുൽപ്പന്ന മേഖലക്കും പുതുക്കിയ 50ശതമാനം ചുങ്കം താങ്ങാവുന്നതല്ല. വിപണി വിഹിതം കുറവാണെങ്കിലും തേയില, കാപ്പി, എന്നിവയെയും തീരുവ വർധന ബാധിക്കും. എക്സ്പോർട്ട് ഇൻസെന്‍റീവ് സ്കീമുകൾ നടപ്പിലാക്കുക, കെട്ടിക്കിടക്കുന്ന ഉത്പന്നങ്ങൾക്ക് പുതിയ വിപണന സാധ്യത കണ്ടെത്തുക എന്നീ ആവശ്യങ്ങൾ കർഷക കോൺഗ്രസ് ഉന്നയിക്കുന്നതായും വിളക്കുപാറ ദാനിയേൽ അറിയിച്ചു.

സ്വിഗ്ഗി ജീവനക്കാർ സമരം നടത്തി

കരുനാഗപ്പള്ളി: ന്യായമായ വേതനം ആവശ്യപ്പെട്ട് ഓൺലൈൻ ഫുഡ് ഡെലിവറി കമ്പനിയായ സ്വിഗ്ഗി ജീവനക്കാർ കരുനാഗപ്പള്ളിയിൽ പ്രതിഷേധ ധർണ നടത്തി. വെയിറ്റിംഗ് ചാർജ് നൽകുക, കിലോമീറ്റർ ചാർജ് 10 രൂപയായി വർധിപ്പിക്കുക, റിട്ടേൺ ചാർജ് നൽകുക,ആഴ്ച തോറും നൽകി കൊണ്ടിരുന്ന വേതനം പുനസ്ഥാപിക്കുക പെട്രോൾ അലവൻസ് പുനസ്ഥാപിക്കുക തുടങ്ങിയ ആവശ്യങ്ങൾ ഉന്നയിച്ചുകൊണ്ടാണ് ജീവനക്കാർ ധർണ നടത്തിയത്. ഓൾകേരള ജിഗ് അസോസിയേഷൻ, എഐടിയുസിയുടെ നേതൃത്വത്തിൽ നടന്ന പ്രതിഷേധ ധർണ സിപിഐ മണ്ഡലം സെക്രട്ടറി ജഗത് ജീവൻ ലാൽ ഉദ്ഘാടനം ചെയ്തു. തൊഴിലാളികളുടെ ആവശ്യങ്ങൾ അംഗീകരിച്ച് കമ്പനി ചർച്ചയ്ക്ക് തയാറാകണമെന്ന് അദ്ദേഹം ആവശ്യപ്പെട്ടു. ഓൾ കേരള ജിഗ് അസോസിയേഷൻ പ്രതിനിധികളായ സിനോഷ് പള്ളിമുക്ക്, രോഹൻ ഷെഹീൻ എന്നിവർ പ്രസംഗിച്ചു. സമരത്തിൽ ഷാഫി, തൻസൽ, ഷേർഖാൻ, ടി.എസ്.അഖിൽ എന്നിവരും പങ്കെടുത്തു.

വാഹനപുക പരിശോധനയ്ക്കിടയിൽ കാർ നിയന്ത്രണംവിട്ട് ഇടിച്ചു കയറി

കുണ്ടറ: വാഹന പുക പരിശോധന കേന്ദ്രത്തിലെ ടെസ്റ്റിനിടയിൽ കാർനിയന്ത്രണം വിട്ട് ഇടിച്ചു കയറി അപകടം. കുണ്ടറ ആറുമുറിക്കട പഴയ ഫയർ സ്റ്റേഷന് സമീപം പ്രവർത്തിക്കുന്ന വാഹന പുക പരിശോധന കേന്ദ്രത്തിലേക്കാണ് കാർ ഇടിച്ചു കയറി അപകടം ഉണ്ടായത്. അഞ്ചൽ സ്വദേശികളായ ദമ്പതികൾ ആണ് കാറിൽ ഉണ്ടായിരുന്നത്. ഓട്ടോമാറ്റിക് കാറിന്‍റെ ഗിയർ അബദ്ധത്തിൽ ഡ്രൈവ് മോഡിൽ ആയിരിക്കെ പുക പരിശോധനയ്ക്കായി ആക്സിലേറ്റർ കൊടുത്തതാണ് അപകടത്തിന് കാരണമായത്. പരിശോധനകേന്ദ്രത്തിന്‍റെ കടമുറി വളരെ വലുതായതിനാലും ഉള്ളിലേക്ക് മറ്റ് ഫർണിച്ചറുകൾ ഒന്നുമില്ലാതിരുന്നതിനാലും വണ്ടി നിയന്ത്രണത്തിൽ ആക്കാൻ കഴിഞ്ഞു. പുക ടെസ്റ്റ് ചെയ്യുന്ന മെഷീൻ പ്രവർത്തിപ്പിക്കുന്ന ഒരു യുവാവ് മാത്രമേ കടയിൽ ഉണ്ടായിരുന്നുള്ളു.വണ്ടി ഇടിച്ചു കയറി വരുന്നത് കണ്ട യുവാവ് ഓടി മാറിയതിനാൽ രക്ഷപ്പെട്ടു.

മടത്തറയിലെ അപകടം : ബൈക്ക് യാത്രികന്‍ മരിച്ചത് കാട്ടുപന്നി ഇടിച്ചല്ലെന്ന് സൂചന

അഞ്ചല്‍ : മടത്തറയില്‍ കഴിഞ്ഞ ദിവസം ബൈക്ക് യാത്രികനായ യുവാവ് മരിച്ചത് കാട്ടുപന്നി ഇടിച്ചതുമൂലം ഉണ്ടായ അപകടത്തിലല്ലെന്നു സൂചന. തിരുവനന്തപുരം തിരുമല രാമമംഗലം ബംഗ്ലാവില്‍ ആദര്‍ശ് (26) ആണ് മരിച്ചത്. വെള്ളിയാഴ്ച പുലര്‍ച്ചെ അഞ്ചരയോടെ മലയോര ഹൈവേയില്‍ മടത്തറ വേങ്കൊല്ല ഫോറസ്റ്റ് ഓഫീസിന് സമീപമായിരുന്നു അപകടം. ആദര്‍ശും സുഹൃത്തുക്കളും അഞ്ചു ബൈക്കുകളിലായി കൊടൈക്കനാലിലേക്ക് വിനോദയാത്രക്കായി പോകവേയായിരുന്നു അപകടം. റോഡിന് കുറുകെ പാഞ്ഞെത്തിയ കാട്ടുപന്നി ആദര്‍ശിന്‍റെ ബൈക്കില്‍ ഇടിക്കുകയായിരുന്നുവെന്നും ഇതേ തുടര്‍ന്നു നിയന്ത്രണംവിട്ട ബൈക്ക് മറിഞ്ഞ് ഗുരുതരമായി പരിക്കേറ്റ ആദര്‍ശ് കടയ്ക്കല്‍ താലൂക്ക് ആശുപത്രിയില്‍ എത്തിച്ചപ്പോഴേക്കും മരിച്ചുവെന്നാണ് ഒപ്പമുണ്ടായിരുന്നവരും ഈസമയം ഇതുവഴി വന്ന തമിഴ്നാട് സ്വദേശികള്‍ സഞ്ചരിച്ചിരുന്ന കാറിലുണ്ടായിരുന്നവരും പറഞ്ഞത്. പാതയോരത്ത് കാട്ടുപന്നിയെ ചത്ത നിലയില്‍ കണ്ടെത്തുക കൂടി ചെയ്തതോടെ എല്ലാവരും ഇക്കാര്യം വിശ്വസിച്ചു. എന്നാല്‍ ഉച്ചയോടെ കാര്യങ്ങളുടെ ഗതി മാറി. ബൈക്ക് ഇടിച്ചാല്‍ കാട്ടുപന്നി ചാകാന്‍ സാധ്യത വിരളമായതിനാല്‍ അപകട സമയം എത്തിയ കാറുകാരനോട് കൂടുതല്‍ കാര്യങ്ങള്‍ അന്വേഷിക്കാന്‍ പോലീസ് തീരുമാനിക്കുകയായിരുന്നു. ഇതോടെയാണ് കാര്യങ്ങള്‍ വ്യക്തമായത്. കാട്ടുപന്നിയെ ഇടിച്ചത് തമിഴ്നാട് സ്വദേശികള്‍ സഞ്ചരിച്ചിരുന്ന കാറാണെന്നും ഇതേത്തുടര്‍ന്നു നിയന്ത്രണംവിട്ട കാര്‍ ബൈക്കിന്‍റെ ഹാന്‍റിലില്‍ തട്ടുകയും ആദര്‍ശ് റോഡിലേക്ക് വീഴുകയുമായിരുന്നുവെന്നാണ് പോലീസ് നൽകുന്ന സൂചന. ഈസമയം ഒരുപക്ഷേ കാര്‍ ആദര്‍ശിന്‍റെ ശരീരത്തിലൂടെ കയറിയിട്ടുണ്ടാകാം എന്നാണ് കാര്‍ ഡ്രൈവര്‍ പറയുന്നത്. ഇരുട്ട് ആയതിനാല്‍ ഒന്നും വ്യക്തമായിരുന്നില്ലെന്നും എന്നാല്‍ താന്‍ കരുതിയത് പന്നിയാകാം വാഹനത്തിനടിയില്‍പ്പെട്ടത് എന്നുമാണ് ഇയാള്‍ പോലീസിനോട് പറഞ്ഞത്. ആദര്‍ശിന്‍റെ കഴുത്ത്, താടിയെല്ല് ഉള്‍പ്പെടെയുള്ള ഭാഗത്ത് ഗുരുതരമായി പരിക്കേറ്റിട്ടുണ്ട്. കാര്‍ ഡ്രൈവറെ പോലീസ് അറസ്റ്റ് ചെയ്തിട്ടുണ്ട്. മനപൂര്‍വമല്ലാത്ത നരഹത്യാ കുറ്റം ചുമത്തിയാണ് തമിഴ്നാട് കടയനെല്ലൂര്‍ സ്വദേശി അബ്ദുള്‍ ഖാദര്‍ എന്നയാളെ ചിതറ പോലീസ് അറസ്റ്റ് ചെയ്തത്. ഇയാളെ കോടതിയില്‍ ഹാജരാക്കി. കാറും പോലീസ് കസ്റ്റഡിയില്‍ എടുത്തിട്ടുണ്ട്. സംഭവത്തില്‍ വിശദമായ അന്വേഷണം നടത്തുമെന്ന് ചിതറ എസ്എച്ച്ഒ പറഞ്ഞു.

ഓട്ടോറിക്ഷയിൽ ചരക്കുലോറിയിടിച്ച് രണ്ടുപേർ മരിച്ചു

ആയൂർ : ഓട്ടോറിക്ഷയിൽ ചരക്കുലോറി ഇടിച്ചു ഓട്ടോറിക്ഷാ ഡ്രൈവറും യാത്രക്കാരായ ദമ്പതികളിൽ ഭാര്യയും മരിച്ചു. ക്ഷേത്ര ദർശനത്തിന് പോയ ദമ്പതികൾ സഞ്ചരിച്ച ഓട്ടോറിക്ഷയിലെ ഡ്രൈവർ ആയൂർ അജ്‌മൽ മൻസിലിൽ സുൽഫിക്കർ (45), ഓട്ടോറിക്ഷ യാത്രിക ആയൂർ അകമൺ വൃന്ദാവനത്തിൽ ആർ.രതി (40) എന്നിവരാണ് മരിച്ചത്. രതിയുടെ ഭർത്താവ് സുരേഷ് (48) സാരമായ പരുക്കു കളോടെ തിരുവനന്തപുരം മെഡി ക്കൽ കോളജ് ആശുപ്രതിയിൽ ചികിത്സയിലാണ്. കഴിഞ്ഞദിവസം രാവിലെ 8.20 ന് എം സി റോഡിൽ ആയൂർ അകമൺ ഭാഗത്തെ വളവിലായിരുന്നു അപ കടം. അപകടത്തിൽ ഓട്ടോറിക്ഷ പൂർണമാ യും തകർന്നു. തൃശൂരിൽ നിന്ന് പാക്കറ്റ് ആട്ടമാവുമായി തിരുവനന്തപുരം ഭാഗത്തേക്കു പോയ ലോറിയും കൊട്ടാര ക്കര ഭാഗത്തേക്കു വരികയായിരുന്നു ഓട്ടോ റിക്ഷയുമാണ് കൂട്ടിയിടിച്ചത്.

ലോറികൾ കൂട്ടിയിടിച്ച് ഒരാൾ മരിച്ചു

കൊട്ടിയം: ദേശീയ പാതയിൽ ലോറികൾ കൂട്ടിയിടിച്ചുണ്ടായ അപകടത്തിൽ ഒരാൾ മരിച്ചു. പാഴ്സൽ കയറ്റി വന്ന മിനിലോറി ഡ്രൈവർ എറണാകുളം കുമ്പളങ്ങി കണ്ണമ്മാലി പള്ളിക്ക് സമീപം മീനങ്ങാട്ട് ഹൗസിൽ മാർസൽ ജോസഫ് (22) ആണ് മരിച്ചത്. ശനിയാഴ്ച പുലർച്ചെ തട്ടാമലയ്ക്ക് സമീപമാണ് അപകടമുണ്ടായത്. കഴക്കൂട്ടത്തുനിന്നുംആലപ്പുഴയിലേക്ക് ഗ്യാസ് സിലിണ്ടറുകളുമായി പോവുകയായിരുന്ന ലോറിക്കു മുന്നിലേക്ക് നിയന്ത്രണം വിട്ട പാഴ്സൽ മിനിലോറി ഇടിച്ചു കയറുകയായിരുന്നു. ഫയർഫോഴ്സ് സംഘം ഏറെ പണിപ്പെട്ടാണ് ലോറിയിൽ കുടുങ്ങി കിടന്ന ഡ്രൈവറെ പുറത്തെടുത്തത്. ഗ്യാസ് സിലിണ്ടറുകൾ കയറ്റിയ ലോറി മറിയാതിരുന്നതിനാലാണ് വലിയ ദുരന്തം ഒഴിവായത്.അപകടത്തെ തുടർന്ന് ദേശീയപാതയിൽ ഏറെ നേരം ഗതാഗത കുരുക്കുമുണ്ടായി.

സ്വാതന്ത്ര്യദിന സമാധാന സന്ദേശ റാലി നടത്തി

കൊല്ലം: തങ്കശേരി ഇൻഫന്‍റ് ജീസസ് ആംഗ്ലോ ഇന്ത്യൻ ഹയർ സെക്കൻഡറി സകൂളിലെ മൂന്ന്, നാല്, അഞ്ച് ക്ലാസുകളിലെ കുട്ടികൾ അണിനിരന്ന് സ്വാതന്ത്ര്യദിന സമാധാന സന്ദേശ റാലി നടത്തി. ഇന്ത്യൻ സ്വാതന്ത്ര്യ സമര സ്മരണകൾ ഉണർത്തുന്ന വേഷങ്ങൾ ധരിച്ചും ഭരണഘടനാസ്വാതന്ത്ര്യം ഉയർത്തിക്കാട്ടിയും യുദ്ധമില്ലാത്ത ലോകം എന്ന ആശയം അവതരിപ്പിച്ചും ലോക സമാധാനത്തിന്‍റെ സന്ദേശം ഉണർത്തി നടത്തിയ റാലി ഈസ്റ്റ് പോലീസ് സബ് ഇൻസെപ്കടർ സരിത ഉദ്ഘാടനം ചെയ്തു. പ്രിൻസിപ്പൽ റവ. ഡോ. സിൽവി ആന്‍റണി ഫ്ലാഗ് ഓഫ് ചെയ്തു. കുട്ടികളും അധ്യാപകരും റാലിയിൽ പങ്കെടുത്തു. റാലി ഇൻഫന്‍റ് ജീസസ് സ്കൂളിൽ നിന്നും ആരംഭിച്ച് തങ്കശേരി റോഡിലൂടെ മൗണ്ട് കാർമൽ സ്കൂൾ വഴി തിരികെ സ്കൂളിൽ എത്തിച്ചേർന്നു.

അഞ്ചൽ സെന്‍റ് ജോൺസ് കോളജിൽ സെമിനാർ സംഘടിപ്പിച്ചു

അഞ്ചൽ : സെന്‍റ് ജോൺസ് കോളജിലെ മലയാള വിഭാഗത്തിന്‍റെ ആഭിമുഖ്യത്തിൽ 'നമ്മുടെ കടൽ, നമ്മുടെ ഭാവി നമ്മുടെ ഉത്തരവാദിത്തം ' എന്ന വിഷയത്തിൽ സെമിനാർ സംഘടിപ്പിച്ചു. യുകെ യിലെ യൂണിവേഴ്സിറ്റി ഓഫ് സസക്സ് റിസർച്ച് ഫെലോ ഡോ. ജോൺസൺ ജാമന്‍റ് സെമിനാർ ഉദ്ഘാടനം ചെയ്തു. കടലിന്‍റെയും കടലോര ഭാഷയുടെയും പ്രാധാന്യത്തെക്കുറിച്ച് ഡോ. ജോൺസൺ ജാമന്‍റും തുമ്പ സെന്‍റ് സേവ്യേഴ്സ് കോളജ് അസി.പ്രഫസറും യു എൻ ഓഷ്യൻ കോൺഫറൻസ് പങ്കാളിയുമായ ഡോ. ലിസ്ബ യേശുദാസും ക്ലാസുകൾ നയിച്ചു. കോളജ് പ്രിൻസിപ്പൽ ഡോ. നിഷ തോമസ് അധ്യക്ഷത വഹിച്ചു. കോളജ് ബർസാർ ഫാ. ക്രിസ്റ്റി ചരുവിള , മലയാളവിഭാഗം അധ്യക്ഷ സോനു എൽ ജോൺസൺ, അധ്യാപകരായ ഡോ. വിനോദ് , ഡോ. ഷിജോ വി വർഗീസ്, വിദ്യാർഥികളായ വൈഷ്ണവി ,അനഘ ശശികുമാർ എന്നിവർ പ്രസംഗിച്ചു.

ബഡ്സ് റീഹാബിലിറ്റേഷൻ സെന്‍റർ ഉദ്ഘാടനം

ചവറ : തേവലക്കര പഞ്ചായത്തിൽ ആരംഭിച്ച ബഡ്സ് റീഹാബിലിറ്റേഷൻ സെന്‍ററിന്‍റെ (ബിആർസി) ഉദ്ഘാടനം ജില്ലാ പഞ്ചായത്ത് പ്രസിഡന്‍റ്് പി.കെ.ഗോപൻ നിർവഹിച്ചു. തേവലക്കര മാർക്കറ്റിന് സമീപം സജ്ജീകരിച്ച ബഡ്സ് റീഹാബിലിറ്റേഷൻ സെന്‍ററിന്‍റെ സൗകര്യങ്ങൾക്കായി 31ലക്ഷം രൂപയുടെ പദ്ധതികളാണ് തേവലക്കര പഞ്ചായത്ത് ഏറ്റെടുത്തിരിക്കുന്നത്. ഭൗതിക സാഹചര്യങ്ങൾ ഒരുക്കൽ, ടോയ്‌ലറ്റ് നിർമാണം, ഡിജിറ്റൽ ക്ലാസ് റൂം സജ്ജീകരണം, അത്യാധുനിക ഫർണിച്ചർ, ജീവനക്കാരുടെ വേതനം എന്നിവയ്ക്കായി 31 ലക്ഷം രൂപയുടെ പദ്ധതികളാണ് കെട്ടിടത്തിന് പുറമേ പഞ്ചായത്ത് ഏറ്റെടുത്തിരിക്കുന്നത്. ചടങ്ങിൽ തേവലക്കര പഞ്ചായത്ത് പരിധിയിൽപ്പെട്ട ആറ് അതിദരിദ്ര കുടുംബങ്ങൾക്ക് ഭൂമിവിതരണം നടത്തി. പഞ്ചായത്ത് പ്രസിഡന്‍റ് എസ്. സിന്ധു അധ്യക്ഷയായി. ഹരിതകർമസേന അംഗങ്ങൾക്ക് യൂണിഫോം വിതരണം ജില്ലാ പഞ്ചായത്ത് അംഗം എസ്. സോമൻ നിർവഹിച്ചു. അസി. സെക്രട്ടറി പ്രദീപ് എ.ഫെർണാണ്ടസ് റിപ്പോർട്ട് അവതരിപ്പിച്ചു. വൈസ് പ്രസിഡന്‍റ് അനസ് നാത്തയ്യത്ത്, സ്ഥിരംസമിതി അധ്യക്ഷരായ പി. ഫിലിപ്പ് , യു.ഫാത്തിമ കുഞ്ഞ്, സെക്രട്ടറി പി. ജയപ്രകാശ്, ബ്ലോക്ക് പഞ്ചായത്തംഗങ്ങളായ സുമയ്യ അഷ്റഫ്, സജി അനിൽ, പഞ്ചായത്തംഗങ്ങളായ ജി. പ്രദീപ് കുമാർ, ബി. രാധാമണി, അനസ് യൂസുഫ്, എൻ. അനീഷ്, ബിജി ആന്‍റണി, അൻസർ കാസിംപിള്ള, ഷെമീന താഹിർ, എസ്. പ്രസന്നകുമാരി, അജിത സാജൻ, ജിനേഷ് എന്നിവർ പ്രസംഗിച്ചു.

കഞ്ചാവ് ചെടി നട്ടുവളർത്തിയ കേസ്: ഒരാൾ അറസ്റ്റിൽ

ചവറ: കഞ്ചാവ് ചെടി നട്ടുവളർത്തിയ കേസിൽ യുവാവിനെ എക്സൈസ് സംഘം അറസ്റ്റ് ചെയ്തു. നീണ്ടകര പുത്തൻതുറയിൽ അഭിലാൽ ഭവനിൽ അമൽ ലാൽ (22 ) ആണ് അറസ്റ്റിലായത്. എക്സൈസ് എൻഫോഴ്സ്മെന്‍റ് ആൻഡ് ആന്‍റി നർക്കോട്ടിക് സ്പെഷൽ സ്ക്വാഡിലെ സർക്കിൾ ഇൻസ്പെക്ടർ എസ്.എസ്. ഷിജുവി െ ന്‍റ നേതൃത്വത്തിലുള്ള സംഘമാണ് യുവാവിനെ അറസ്റ്റ് ചെയ്തത്. സംഭവത്തിൽ എൻഡിപിഎസ് കേസ് എടുത്തു. എക്സൈസ് ഇൻസ്പെക്ടർ സി.പി. ദിലീപ്, അസിസ്റ്റന്‍റ് എക്സൈസ് ഇൻസ്പെക്ടർ നിർമലൻ തമ്പി, പ്രിവന്‍റീവ് ഓഫീസർ ജെ.ആർ. പ്രസാദ് കുമാർ , സിവിൽ എക്സൈസ് ഓഫീസർമാരായ എം. ആർ. അനീഷ്, ബി.എസ്.അജിത്ത്, അരുൺ ലാൽ, ബാലു എസ്. സുന്ദർ, ജൂലിയൻ ക്രൂസ്, എച്ച്. അഭിരാം, തൻസീർ അസീസ്, വനിത സിവിൽ എക്സൈസ് ഓഫീസർ ജി. ഗംഗ, എന്നിവർ പങ്കെടുത്തു.

കുന്നിക്കോട് പോലീസ് സ്റ്റേഷനില്‍ തെരുവുനായ പ്രതിരോധ കുത്തിവയ്പ് നടത്തി

കൊല്ലം: കുന്നിക്കോട് പോലീസ് സ്റ്റേഷനിൽ മൃഗസംരക്ഷണവകുപ്പിന്‍റെ റാപ്പിഡ് ആക്ഷന്‍ ഫോഴ്‌സിന്‍റെ നേതൃത്വത്തിൽ തെരുവുനായ പ്രതിരോധ കുത്തിവയ്പ് നടത്തി. ജില്ലാ പഞ്ചായത്തുമായി ചേര്‍ന്ന് നടപ്പാക്കുന്ന പദ്ധതിയുടെ കിഴക്കന്‍ മേഖലാതല പ്രവര്‍ത്തനത്തിനാണ് ഇതോടെ തുടക്കമായത്. ജില്ലയിലെ മുഴുവന്‍ തെരുവുനായ്ക്കള്‍ക്കും കുത്തിവയ്പ് ഉറപ്പാക്കുന്ന പദ്ധതിയാണിത്. 65 ലക്ഷം രൂപയാണ് ചിലവഴിക്കുന്നത്. ചിതറ, പത്തനാപുരം, തൊടിയൂര്‍, തഴവ, അലയമണ്‍, നീണ്ടകര, ക്ലാപ്പന, മയ്യനാട്, കുളക്കട, തൃക്കോവില്‍വട്ടം പഞ്ചായത്തുകളിലെ 8,241 ഓളം തെരുവുനായകള്‍ക്ക് വാക്‌സിനേഷന്‍ നല്‍കി. നാലു നായ് പരിപാലകരും ഒരു മൃഗ ഡോക്ടറും ഉള്‍പ്പെട്ടതാണ് ഒരു സ്‌ക്വാഡ്. നായ്ക്കളെ വാക്‌സിന്‍ നല്‍കി മാര്‍ക്ക് ചെയ്ത് വിട്ടയയ്ക്കുകയാണ് ഉണ്ടായത്. വാക്‌സിന്‍ കൈമാറ്റ ചടങ്ങ് പഞ്ചായത്ത് പ്രസിഡന്‍റ് റജീന തോമസ് ഉദ്ഘാടനം ചെയ്തു. അംഗങ്ങളായ എന്‍. അനില്‍കുമാര്‍, ആര്‍. ജയകുമാര്‍, ഷാഹുല്‍, അദമ്യ, ജില്ലാ മൃഗസംരക്ഷണ ഓഫീസര്‍ ഡോ.ഡി. ഷൈന്‍കുമാര്‍, സബ് ഇന്‍സ്പക്ടര്‍മാരായ സന്തോഷ്, സുനിതാ ബീഗം, ഡെപ്യൂട്ടി ഡയറക്ടര്‍ ഡോ. ഷീബ പി. ബേബി, ഡോ. ബിന്നി സാമുവല്‍, ഡോ. ആരമ്യ തോമസ്, ഡോ. അലോഷ്യസ്, ഡോ.വിശാഖ്, തുടങ്ങിയവര്‍ പ്രസംഗിച്ചു.

സിബിഎസ്ഇ സൗത്ത് സോൺ ഷൂട്ടിംഗ് ചാമ്പ്യൻഷിപ്പ് തുടങ്ങി

കൊല്ലം: സിബിഎസ്ഇ സൗത്ത് സോൺ ഷൂട്ടിംഗ് ചാമ്പ്യൻഷിപ്പ്– 2025 കൊല്ലം ഡൽഹി പബ്ലിക് സ്കൂളിൽ ആരംഭിച്ചു. സിബിഎസ്ഇ സൗത്ത് സോണിലെ വിവിധ സംസ്ഥാനങ്ങളിൽ നിന്നുള്ള ഷൂട്ടർമാർ പങ്കെടുക്കുന്നു. 353 സ്കൂളില്‍ നിന്നായി 861 മത്സരാർഥികൾ മാറ്റുരയ്ക്കും. ഡിപിഎസ് ഓഡിറ്റോറിയത്തിൽ നാവികസേന ലെഫ്റ്റനന്‍റ് കമാൻഡർ കെ. ദിൽന ഉദ്ഘാടനംചെയ്‌തു. ഡൽഹി പബ്ലിക് സ്കൂൾ കൊല്ലം ഡയറക്ടർ ഹസൻ അസീസ്, ലെഫ്റ്റനന്‍റ് കമാൻഡർ കെ. ദിൽനയെ ആദരിച്ചു. ഡൽഹി പബ്ലിക് സ്കൂൾ പ്രിൻസിപ്പൽ എസ്‌.എൽ. സഞ്ജീവ് കുമാര്‍, ഹെഡ്മിസ്ട്രസ് സിനിമേനോൻ എന്നിവർ പ്രസംഗിച്ചു. ചാമ്പ്യൻഷിപ്പ് 16ന് സമാപിക്കും.

കുഞ്ഞുങ്ങള്‍ക്ക് ഇനി സുഖനിദ്ര; അങ്കണവാടി കുട്ടികള്‍ക്ക് ബേബിമാട്രസ് വാങ്ങി നല്‍കും

ചവറ: അങ്കണവാടി കുട്ടികള്‍ക്ക് ബേബിമാട്രസ് വാങ്ങി നല്‍കുന്ന പദ്ധതിയ്ക്ക് തുടക്കമായി. സുജിത് വിജയന്‍പിളള എംഎല്‍എയുടെ പ്രത്യേക വികസനഫണ്ടില്‍നിന്നും അനുവദിച്ച അഞ്ച് ലക്ഷം രൂപ വിനിയോഗിച്ച് ചവറ നിയോജകമണ്ഡലത്തിലുളള അങ്കണവാടികളിലെ 625 കുട്ടികള്‍ക്കാണ് ബേബിമാട്രസ് വാങ്ങി നല്‍കുന്നത്. ബേബിമാട്രസിന്‍റെ തെക്കുംഭാഗം പഞ്ചായത്തിലെ വിതരണോദ്ഘാടനം പായിക്കര താഴെ മൂന്നാം നമ്പര്‍ അങ്കണവാടിയില്‍ സുജിത് വിജയന്‍പിളള എംഎല്‍എ നിര്‍വഹിച്ചു. വരും ദിവസങ്ങളിൽ പന്മന, തേവലക്കര, ചവറ, നീണ്ടകര, എന്നീ പഞ്ചായത്തുകളിലെ അങ്കണവാടികുട്ടികള്‍ക്കും മെത്ത വിതരണം നടത്തുമെന്ന് സുജിത് വിജയന്‍പിളള എംഎല്‍എ പറഞ്ഞു.

വിരമിക്കൽ ആനുകൂല്യം നൽകാൻ 10.73 കോടി അനുവദിക്കണം: മനുഷ്യാവകാശ കമ്മീഷൻ

കൊല്ലം : കേരള സംസ്ഥാന സ്പോർട്സ് കൗൺസിലിൽ നിന്നും വിരമിച്ച ജീവനക്കാർക്ക് ഹൈക്കോടതി ഉത്തരവിന്‍റെ അടിസ്ഥാനത്തിൽ നൽകാനുള്ള 10.73 കോടി രൂപ കൗൺസിലിന് അനുവദിക്കണമെന്നു മനുഷ്യാവകാശ കമ്മീഷൻ അംഗം വി. ഗീത സ്പോർട്സ് ആന്‍ഡ് യൂത്ത് അഫയേഴ്സ് സെക്രട്ടറിയോട് ആവശ്യപ്പെട്ടു. ഇതിനായി 10.73 കോടി രൂപ അനുവദിക്കണമെന്ന് അഭ്യർഥിച്ച് സ്പോർട്സ് കൗൺസിൽ സർക്കാരിന് കത്ത് നൽകിയിട്ടുള്ളതായി സെക്രട്ടറി കമ്മീഷനെ അറിയിച്ചു. എന്നാൽ സർക്കാർ തലത്തിൽ ഇക്കാര്യത്തിൽ തീരുമാനമെടുത്തിട്ടില്ല. യഥാസമയം പെൻഷനും വിരമിക്കൽ ആനുകൂല്യങ്ങളും ലഭിക്കുന്നില്ലെന്ന് പരാതിപ്പെട്ട് അനിലാലിന്‍റെ നേതൃത്വത്തിൽ വിരമിച്ച ജീവനക്കാർ സമർപ്പിച്ച പരാതിയിലാണ് നടപടി. ഇതിനകം മറ്റ് സ്ഥാപനങ്ങളിലെ ജീവനക്കാർക്ക് നൽകി കഴിഞ്ഞ 11-ാം ശമ്പള കമ്മീഷൻ ശുപാർശകൾ കൗൺസിൽ ജീവനക്കാർക്ക് നൽകിയിട്ടില്ലെന്ന് പരാതിക്കാർ ആരോപിക്കുന്നു. ഓൾഡ് ഏജ് കെയർ അലവൻസായി നൽകുന്ന 1000 രൂപയും നൽകുന്നില്ലെന്ന് പരാതിയിൽ പറഞ്ഞിരിക്കുന്നു. വിരമിക്കൽ ആനുകൂല്യം നൽകാൻ സർക്കാർ തീരുമാനം അനിവാര്യമാണെന്നും കൗൺസിൽ കമ്മീഷനെ അറിയിച്ചിരുന്നു.

വിഷ്ണു സഞ്ജയ് മികച്ച വിദ്യാർഥി കർഷകൻ

കൊട്ടിയം:ഈ വർഷത്തെ മികച്ച കലാലയ വിദ്യാർഥി കർഷകനുള്ള സംസ്ഥാന സർക്കാർ പുരസ്‌കാരം കൊട്ടിയം ശ്രീനാരായണ പോളിടെക്നിക് കോളജിലെ ഇലക്‌ട്രിക്കൽ വിഭാഗം രണ്ടാംവർഷ വിദ്യാർഥിയായ വിഷ്ണു സഞ്ജയിന്. മികച്ച കർഷകനായ കൊല്ലം വെളിയം സ്വദേശി സഞ്ജയ് കുമാറിന്‍റെ മകനാണ് വിഷ്ണു. അച്ഛന്‍റെ പാത പിന്തുടർന്ന് പഠനത്തോടൊപ്പം കൃഷി യേയും ചേർത്തുപിടിച്ചു വിഷ്ണു രണ്ട് ഏക്കർ സ്ഥലത്ത് പയർ, വെണ്ട, വഴുതന, പാവൽ, കുക്കുമ്പർ, തണ്ണിമത്തൻ മുതലായ പച്ചക്കറികളും കിഴങ്ങ് വിളകളും കൃഷി ചെയ്തു വരുന്നു. ശ്രീനാരായണ പോളിടെക്നിക് കോളജിൽ എസ് എൻ പോളിഅഗ്രി ടെക് ഇന്നൊവേഷൻസ് എന്ന വിദ്യാർഥികളുടെയും ജീവനക്കാരുടെയും കാർഷിക കൂട്ടായ്മ വിഷ്ണുവിന്‍റെ സ്വപ്നങ്ങൾക്ക് വഴിത്തിരിവായി. പ്രിസിഷൻ ഫാമിംഗ്, വെർട്ടിക്കൽ ഗാർഡനിംഗ്, ഹൈഡ്രോപോണിക്സ് മുത ലായ നൂതന കാർഷിക പ്രോജക്ടുകൾ വിഷ്ണുവിന്‍റെ നേതൃത്വത്തിൽ കോളജിൽ നടന്നുവരുന്നു. കൂടാതെ പോളിടെക്നിക് കോളജിൽ ആദിച്ചനല്ലൂർ കൃഷിഭവന്‍റെ സഹായത്തോടെ കുക്കുമ്പർ,മുളക്, പയർ എന്നീ വിളകൾ കോളജിൽ കൃഷി ചെയ്തുവരുന്നു. സംസ്ഥാന സർക്കാരിന്‍റെ വി ഡി പി പദ്ധതി പ്രകാരം കാമ്പസിൽ ഓപ്പൺ പ്രിസിഷൻ ഫാമിംഗിലൂടെ തക്കാളി,പച്ചമുളക്, പയർ വെണ്ട,പാവൽ,പടവലം എന്നിവ കൃഷി ചെയ്യുന്നതിന് വിഷ്ണു നേതൃത്വം നൽകിവരുന്നു. അഗ്രിടെക് ഇന്നോ വേഷൻസിന്‍റെ സാങ്കേതിക പഠനത്തിനൊപ്പം കൃഷി എന്ന ആശയത്തിലൂടെ സാങ്കേതിക വിദ്യയോടൊപ്പം കാർഷിക മേഖലയ്ക്ക് പ്രയോജനപ്പെടും വിധമുള്ള കണ്ടുപിടിത്തങ്ങൾക്ക് ശ്രീനാരായണ പോളിടെക്നിക് കോളജിൽ വിഷ്ണു നേതൃത്വം നൽകുന്നു. സാങ്കേതിക വിദ്യാഭ്യാസതോടൊപ്പം കാർഷിക മേഖലയിലെ പ്രവർത്തനങ്ങളും ഒപ്പം കർഷകർക്കും കാർഷിക സംരംഭകർക്കും സംരംഭക സാധ്യതകൾ സൃഷ്ടിക്കുകയാണ് വിഷ്ണുവിന്‍റെ സ്വപ്നം. വിഷ്ണുവിന്‍റെ പ്രവർത്തനങ്ങൾക്ക് പൂർണപിന്തുണയായ് നിൽക്കുന്ന അമ്മ ആശസഞ്ജയ് അഞ്ചൽ ഈസ്റ്റ് ഗവ.സ്കൂളിലെ അധ്യാപികയാണ്. അനിയൻ വൈഷ്ണവ് രണ്ടാം ക്ലാസിൽ പഠിക്കുന്നു. ഇതിനെല്ലാം പിന്തുണയുമായി ശ്രീനാരായണ പോളിടെക്നിക് കോളജ് പ്രിൻസിപ്പൽ വി. സന്ദീപ്, അഗ്രികൾച്ചൽ കോർഡിനേറ്റർ അനീഷ് ശശിധരൻ, സ്റ്റുഡന്‍റ്സ് കോർഡിനേറ്റർ ഹരിപ്രസാദ് എന്നിവരുമുണ്ട്.

ഓണത്തിന് ലഹരിക്കടത്ത് തടയാന്‍ പ്രത്യേക പരിശോധന

കൊല്ലം: ഓണക്കാലത്ത് അനധികൃത വ്യാജമദ്യ വില്പനയും വിപണനവും സിന്തറ്റിക് ഡ്രഗ്‌സ് ഉള്‍പ്പെടെയുള്ള മയക്കുമരുന്നുകളുടെ വില്പന, സംഭരണം, ഉപഭോഗം എന്നിവ തടയുന്നതിന് എക്സൈസിന്‍റെ പ്രത്യേക പരിശോനയ്ക്ക് തീരുമാനം. ജില്ലാതല ചാരായ നിരോധന ജനകീയ നിരീക്ഷണ സമിതി യോഗത്തില്‍ അധ്യക്ഷനായ ജില്ലാ കളക്ടറുടെ ചുമതലയുള്ള എഡിഎം ജി. നിര്‍മല്‍കുമാര്‍ ബന്ധപ്പെട്ട വകുപ്പുകള്‍ക്ക് കര്‍ശന നിരീക്ഷണത്തിനും നടപടികള്‍ക്കും നിര്‍ദേശം നല്‍കി. റെയില്‍വേ സ്റ്റേഷന്‍, കര്‍ബല ജംഗ്ഷന്‍, എസ്എന്‍ കോളജ് ജംഗ്ഷന്‍, ബീച്ച്, കെഎസ്ആര്‍ടിസി, ബോട്ട് ജെട്ടി, വാടി കടപ്പുറം, ആര്യങ്കാവ്, തെന്മല തുടങ്ങിയ ഇടങ്ങളില്‍ നിരന്തര പരിശോധനകളുണ്ടാകും. ഇതരസംസ്ഥാന തൊഴിലാളികളുടെ വാസസ്ഥലങ്ങള്‍, ഫ്ലാറ്റുകള്‍, ഹോട്ടലുകള്‍ കേന്ദ്രീകരിച്ചും പരിശോധന നടത്തും. സ്‌കൂളുകളിലും കോളജുകളിലും ബോധവത്കരണം നല്‍കുന്നത് കൂടുതല്‍ ഊര്‍ജിതമാക്കും. സെപ്റ്റംബര്‍ 10 വരെയാണ് സ്പെഷല്‍ ഡ്രൈവ്. എക്സൈസ് ഡപ്യൂട്ടി കമ്മീഷണറുടെ കാര്യാലയത്തില്‍ 24 മണിക്കൂറും ജില്ലാ കണ്‍ട്രോള്‍ റൂം പ്രവര്‍ത്തിക്കുന്നുണ്ട്. ജില്ലയെ രണ്ടു മേഖലകളായി തിരിച്ച് എക്സൈസ് ഇന്‍സ്പെക്‌ടര്‍മാരുടെ നേതൃത്വത്തില്‍ പ്രവര്‍ത്തിക്കുന്ന രണ്ട് സ്ട്രൈക്കിംഗ് ഫോഴ്സ് യൂണിറ്റും ഓരോ അതിര്‍ത്തി - ഹൈവേ പട്രോളിംഗ് യൂണിറ്റുകളും 24 മണിക്കൂറും ചെക്ക്പോസ്റ്റുകളില്‍ ഉള്‍പ്പെടെ വാഹനപരിശോധനയും ശക്തിപ്പെടുത്തി. രാത്രികാല വാഹനപരിശോധനയും നടത്തും. ആകസ്മിക പരിശോധനകള്‍ക്ക് എക്സൈസ് സര്‍ക്കിള്‍ ഇന്‍സ്പെക്ടറുടെ ചുമതലയില്‍ 13 അംഗങ്ങളുള്ള പ്രത്യേക സംഘത്തെ രൂപീകരിച്ചു. പൊതുജനങ്ങള്‍ക്ക് ടോള്‍ഫ്രീ നമ്പരായ 155358 ല്‍ പരാതികള്‍/വിവരങ്ങള്‍ അറിയിക്കാം. പരാതിക്കാരുടെ പേരുവിവരം രഹസ്യമായി സൂക്ഷിക്കും. പോലീസ്, റവന്യൂ, ഫോറസ്റ്റ്, ഡ്രഗ്സ് കണ്‍ട്രോള്‍ വകുപ്പുകളുമായി ചേര്‍ന്ന് എക്സൈസ് വകുപ്പ് സംയുക്ത റെയ്ഡുകളും സംഘടിപ്പിക്കും. കള്ളുഷാപ്പുകളിലൂടെ ശുദ്ധമായ കള്ള് മാത്രം വില്‍പന നടത്തുന്നുവെന്ന് ഉറപ്പാക്കും. പെര്‍മിറ്റ് പ്രകാരം എത്തുന്ന കള്ള് കൃത്യമായി പരിശോധനാവിധേയമാക്കും. ലൈസന്‍സ് വ്യവസ്ഥകള്‍ ലംഘിച്ച് പ്രവര്‍ത്തിക്കുന്ന കള്ളുഷാപ്പുകള്‍ക്കെതിരെ കര്‍ശന നടപടികള്‍ സ്വീകരിക്കും. ആറു ശതമാനത്തില്‍കൂടുതല്‍ മദ്യാംശം സാമ്പിളില്‍കണ്ടെത്തുന്ന കള്ളുഷാപ്പുകളെ പ്രത്യേകമായി നിരീക്ഷിക്കുമെന്നും എഡിഎം വ്യക്തമാക്കി. ജില്ലയില്‍ മാര്‍ച്ച് 30 മുതല്‍ ഓഗസ്റ്റ് 10 വരെ 2139 റെയ്ഡുകള്‍ നടത്തി. 10189 വാഹനങ്ങള്‍ പരിശോധിച്ചു. 320 അബ്കാരി കേസുകളും 203 എന്‍ഡിപിഎസ് കേസുകളും, 2349 കോട്പ കേസുകളും രജിസ്റ്റര്‍ ചെയ്തു. 24 വാഹനങ്ങള്‍ പിടികൂടി.

അമൃത വിശ്വവിദ്യാപീഠവുമായി കൈകോർത്ത് ബാത്ത് സർവകലാശാല

അമൃതപുരി (കൊല്ലം): അക്കാദമിക - ഗവേഷണ രംഗത്ത് സഹകരിച്ച് പ്രവർത്തിക്കാൻ അമൃത വിശ്വവിദ്യാപീഠവും യുകെയിലെ യൂണിവേഴ്സിറ്റി ഓഫ് ബാത്തും ധാരണയായി. ഇതു സംബന്ധിച്ച ധാരണ പത്രത്തിൽ ഇരു സർവകലാശാലകളും ഒപ്പുവച്ചു. ഇരു സർവകലാശാലകളും ദീർഘകാലത്തേക്കുള്ള സഹകരണത്തിനാണ് ധാരണയായത്. അമൃത സ്കൂൾ ഓഫ് ബയോടെക്നോളജി വിഭാഗം ഡീൻ ഡോ. ബിപിൻ ജി. നായർ, സയൻസ് വിഭാഗം ഡീൻ പ്രഫ. ഡങ്കൻ ക്രെയ്ഗ്, അസോസിയേറ്റ് ഡീൻ, പ്രഫ. മൊമ്ന ഹെജ്മാദി എന്നിവർ ചേർന്ന് ധാരണാപത്രം കൈമാറി. ഗവേഷണം, അക്കാദമിക് കൈമാറ്റം, ബയോടെക്നോളജി രംഗത്തെ ഉയർന്ന നിലവാരത്തിലുള്ള പഠനാവസരങ്ങൾ എന്നീ മേഖലകളിലാണ് രണ്ടു സർവകലാശാലകളും സഹകരിച്ച് പ്രവർത്തിക്കുക. ധാരണാപത്രം പ്രകാരം അമൃത വിശ്വവിദ്യാപീഠത്തിലെ വിദ്യാർഥികൾക്ക് ഇന്ത്യയിൽ നിന്ന് ഒരു മാസ്റ്റേഴ്സ് ബിരുദം പൂർത്തിയാക്കി ബാത്ത് സർവകലാശാലയിൽ ബയോ ടെക്നോളജി വിഷയത്തിൽ മാസ്റ്റേഴ്സ് പഠനം തുടരാം. ഇരു സ്ഥാപനങ്ങളുടെയും അടിസ്ഥാന സൗകര്യങ്ങളും വൈദഗ്ധ്യവും പ്രയോജനപ്പെടുത്തി ലോകോത്തര അധ്യാപനവും ആധുനിക ഗവേഷണവും വൈവിധ്യമാർന്ന അക്കാദമിക് അനുഭവങ്ങളും വിദ്യാർഥികൾക്ക് ലഭ്യമാക്കുകയാണ് പദ്ധതി കൊണ്ട് ലക്ഷ്യമിടുന്നത്. ഇരുകൂട്ടർക്കും ലഭിച്ച വിജയകരമായ അവസരമാണിതെന്ന് ഡോ. ബിപിൻ ജി. നായർ അഭിപ്രായപ്പെട്ടു. 2025–26 അക്കാദമിക് വർഷം മുതൽ അമൃതയിലെ ആദ്യ ബാച്ച് വിദ്യാർഥികളെ ബാത്ത് സർവകലാശാല സ്വീകരിക്കുകയാണ്.

മാർച്ചും ധർണയും നടത്തി

കൊല്ലം: വിവിധ ആവശ്യങ്ങൾ ഉന്നയിച്ച് സംസ്ഥാന വ്യാപകമായി പട്ടികജാതി ക്ഷേമസമിതി സംഘടിപ്പിക്കുന്ന പ്രതിഷേധ പരിപാടിയുടെ ഭാഗമായി കൊല്ലം ഹെഡ് പോസ്റ്റ് ഓഫീസിലേക്ക് മാർച്ചും ധർണയും സംഘടിപ്പിച്ചു. ‌ രാജ്യത്തെ 42 കേന്ദ്ര സർവകലാശാലകളിൽ വിദ്യാർഥി പ്രവേശനത്തിലും അധ്യാപക നിയമനത്തിലും ഒഴിഞ്ഞുകിടക്കുന്ന സംവരണ സീറ്റുകളിൽ നിയമനം നടത്തുക, സ്വകാര്യ മേഖലയിൽ തൊഴിൽ സംവരണം നടപ്പിലാക്കാൻ നിയമം കൊണ്ടുവരുക, ജാതി സെൻസസുമായി ബന്ധപ്പെട്ട അവ്യക്തത പരിഹരിക്കുക, പട്ടികജാതി പട്ടികവർഗ പീഡന നിരോധന നിയമം പഴുതുകൾ പരിഹരിച്ച് നടപ്പിലാക്കാൻ കേന്ദ്രസർക്കാർ ഇടപെടുക തുടങ്ങിയ ആവശ്യങ്ങൾ ഉന്നയിച്ചാണ് കേന്ദ്രസർക്കാർ ഓഫീസുകളിലേക്ക് മാർച്ചും ധർണയും സംഘടിപ്പിച്ചത്. കൊല്ലം റെയിൽവേ സ്റ്റേഷന് സമീപത്തു നിന്നും ആരംഭിച്ച മാർച്ച് ഹെഡ് പോസ്റ്റ് ഓഫീസിനു മുമ്പിൽ സമാപിച്ചു. തുടർന്ന് ചേർന്ന ധർണാ സമരം സിപിഎം സംസ്ഥാന കമ്മിറ്റി അംഗം എസ്. ജയമോഹൻ ഉദ്ഘാടനം ചെയ്തു. പികെഎസ് സംസ്ഥാന കമ്മിറ്റി അംഗം സന്തോഷ് മതിര അധ്യക്ഷനായി. ജില്ലാ സെക്രട്ടറി ജി .സുന്ദരേശൻ, സംസ്ഥാന കമ്മിറ്റി അംഗം ടി.ഗോപാലകൃഷ്ണൻ, എ. പുഷ്പരാജൻ, എൻ .എസ്. ശാന്തകുമാർ, വി.കെ .സത്യശീലൻ, ബി. രാജേന്ദ്രൻ, എം . സുരേഷ് കുമാർ, ജെ. ബിജു തുടങ്ങിയവർ പങ്കെടുത്തു.

തൃക്കോവിൽവട്ടം പഞ്ചായത്ത് സെക്രട്ടറിയെ ഉപരോധിച്ചു

കുണ്ടറ : കണ്ണനല്ലൂർ ജംഗ്ഷനിൽ ശുചീകരണ ജോലിക്ക് പഞ്ചായത്ത്‌ നിയോഗിച്ച ജീവനക്കാർ മൂന്നു മാസമായി ജോലിക്ക് വരാതെ ശമ്പളം വാങ്ങുന്നതി െ നതിരെ യൂത്ത്‌ കോൺഗ്രസ്‌ തൃക്കോവിൽവട്ടം പഞ്ചായത്ത് സെക്രട്ടറിയെ ഉപരോധിച്ചു. യൂത്ത് കോൺഗ്രസ്‌ ജില്ലാ ജനറൽ സെക്രട്ടറി ഐശ്വര്യ, നിയോജക മണ്ഡലം വൈസ് പ്രസിഡന്‍റ് ഷാൻ മുട്ടക്കാവ്, മണ്ഡലം പ്രസിഡന്‍റ് ജയൻ, പ്രാദേശിക നേതാക്കളായ പ്രവീൺ രാജ്, ഷെഫീഖ് ചെന്താപൂര്, സനൽ പുതുച്ചിറ, നാസർ കണ്ണനല്ലൂർ, നാസറുദീൻ പാങ്കോണം, മെമ്പർ സീത ഗോപാൽ എന്നിവർ പങ്കെടുത്തു.

കെഎംഎംഎൽ ജീവനക്കാരുടെ ശമ്പള പരിഷ്കരണം പൂർത്തിയായി

ചവറ: പൊതുമേഖല സ്ഥാപനമായ കെഎംഎംഎല്ലിലെ ജീവനക്കാരുടെ ശമ്പള പരിഷ്കരണവുമായി ബന്ധപ്പെട്ട ദീർഘകാല കരാറിന് അംഗീകാരമായി. മന്ത്രി പി. രാജീവിന്‍റെ അധ്യക്ഷതയിൽ വ്യവസായ വകുപ്പ് പ്രിൻസിപ്പൽ സെക്രട്ടറി മുഹമ്മദ് ഹനീഷ്, കെഎംഎംഎൽ എംഡി പി. പ്രദീപ് കുമാർ എന്നിവരുടെ സാന്നിധ്യത്തിൽ ചേർന്ന യോഗത്തിലാണ് തീരുമാനമായത്. പതിമൂന്നര ശതമാനം ഫിറ്റ്‌മെന്‍റ് ബെനഫിറ്റിന്‍റ് വർധനവിനാണ് മന്ത്രി തല ചർച്ചയിൽ തീരുമാനമായത്. 2020 ഡിസംബർ 31 വരെ ബാധകമായ 22 ശതമാനം ക്ഷാമബത്ത അടിസ്ഥാന ശമ്പളത്തിൽ ലയിപ്പിക്കാൻ മുൻപ് നടന്ന ചർച്ചകളിൽ തീരുമാനമായിരുന്നു.ഇതനുസരിച്ച് തൊഴിലാളികൾക്ക് ശരാശരി 17 ശതമാനം വർധനവ് ലഭ്യമാകും. പുതുക്കിയ ശമ്പള വർധനവിന്‍റെ അടിസ്ഥാനത്തിൽ 4200 രൂപ മുതലുള്ള വർധനവ് ജീവനക്കാർക്ക് ലഭ്യമാകും. സെക്രട്ടറിയേറ്റിൽ നടന്ന ശമ്പള പരിഷ്കരണ ചർച്ചയിൽ പ്രതിപക്ഷ നേതാവ് വി.ഡി. സതീശൻ , പി.എസ്. സൂപാൽ എംഎൽഎ, ഷിബു ബേബിജോൺ , സുരേഷ ബാബു , സിഐടിയു കൊല്ലം ജില്ല സെക്രട്ടറി എസ് .ജയമോഹൻ, ടി. മനോഹരൻ, ശ്യാം സുന്ദർ തുടങ്ങിയവരും കമ്പനിയിലെ ട്രേഡ് യൂണിയൻ നേതാക്കന്മാരും പങ്കെടുത്തു.

വിദ്യാർഥിയെ ഇടിച്ചിട്ട് കാർ താഴ്ചയിലേക്ക് പതിച്ചു

ഓയൂർ: മരുതമൺ പള്ളിയിൽ കാൽ നടയാത്രികനായ വിദ്യാർഥിയെ ഇടിച്ച കാർ അഞ്ചടിയിലധികം താഴ്ചയിലേക്ക് മറിഞ്ഞു. അപകടത്തിൽ വിദ്യാർഥിക്ക് പരിക്ക് ഉണ്ട്. കാർ യാത്രികർ അത്ഭുതകരമായി രക്ഷപെട്ടു. മരുതമൺപള്ളി ക്ഷേത്രക്കര സ്വദേശിയും പൂയപ്പള്ളി ഗവ.ഹൈസ്കൂളിലെ പത്താക്ലാസ് വിദ്യാർഥിയുമായ തേജസി(15) നാണ് അപകടത്തിൽ പരിക്കേറ്റത്. തേജസ് ഇന്നലെ രാവിലെ ട്യൂഷന് പോകുന്നതിനായി പൂയപ്പള്ളിയിലേക്ക് നടന്ന് വരുന്നതിനിടയിൽ ഓയൂർ ഭാഗത്ത് നിന്നും വെളിയത്തേക്ക് പോയ കാർ മരുതമൺ പള്ളി എംവിഎം റിസർച്ച് ലാബിന് സമീപം നിയന്ത്രണം വിട്ട് തേജസിനെ ഇടിച്ച് വീഴ്ത്തിയ ശേഷം സമീപത്തെ വാഴത്തോപ്പിലേക്ക് പതിക്കുകയായിരുന്നു. പരിക്കേറ്റ തേജസ് ആശുപത്രിയിൽ ചികിത്സ തേടി. നടയ്ക്കൽ സ്വദേശിയായ ഡോ. ശ്രീഹരിയുടെ കാറാണ് അപകടത്തിൽപ്പെട്ടത്.

എസ്എഫ്ഐക്ക് വിജയം

അഞ്ചല്‍ : സ്കൂള്‍ പാര്‍ലമെന്‍റ് തെരഞ്ഞെടുപ്പില്‍ കിഴക്കന്‍ മേഖലയില്‍ എസ്എഫ്ഐ വിജ യിച്ചു. പ്രധാന സ്കൂളുകളായ ഏരൂര്‍, കരുകോണ്‍, കുളത്തൂപ്പുഴ അടക്കമുള്ള സ്കൂളുകളില്‍ ഉജ്വല വിജയമാണ് എസ്എഫ്ഐ നേടിയത്. കരുകോണ്‍ ഹയര്‍ സെക്കൻഡറി സ്കൂളില്‍ 10 ജനറല്‍ സീറ്റില്‍ പത്തും എസ്എഫ്ഐ നേടി. ശാരിക പ്രിയയെ ചെയര്‍മാനായും അല്‍ഫയെ വൈസ് ചെയര്‍മാനായും എതിരില്ലാതെ തെരഞ്ഞെടുത്തു. തുടര്‍ന്നു എസ്എഫ്ഐ കരുകോണില്‍ ആഹ്ളാദ പ്രകടനവും നടത്തി .എസ്എഫ്ഐ മുന്‍ ജില്ലാ കമ്മിറ്റിയംഗം അഭിജിത്ത് ഉദ്ഘാടനം ചെയ്തു. ശ്രീരാജ്, അനന്ദു, ആദര്‍ശ്, നദീം എന്നിവര്‍ നേതൃത്വം നല്‍കി. ഏരൂര്‍ ഹയര്‍ സെക്കൻഡറി സ്കൂളിലും എസ്എഫ്ഐ നേടിയത് വൻ വിജയമാണ്. 10 ജനറല്‍ സീറ്റും നേടിയ എസ്എഫ്ഐ ജാമിയാ ജാഫറിനെ ചെയര്‍മാനായും അല്‍മറിയത്തെ വൈസ് ചെയര്‍മാനായും തെരഞ്ഞെടുത്തു. കുളത്തൂപ്പുഴ കല്ലുവെട്ടാംകുഴി ഹയര്‍ സെക്കണ്ടറി സ്കൂളില്‍ 12 ജനറല്‍ സീറ്റില്‍ എട്ടും എസ്എഫ്ഐ നേടി. നാല് സീറ്റ് എഐഎസ്എഫ് നേടി. എസ്എഫ്ഐയുടെ നിഖിലിനെ ചെയര്‍മാനായി ഇവിടെ തെരഞ്ഞെടുത്തു. അതേസമയം ശക്തമായ അടിത്തറയുള്ള ഇടങ്ങളില്‍ പോലും എഐഎസ്എഫ് അടിപതറിയ കാഴ്ചയാണ് സ്കൂള്‍ പാര്‍ലമെന്‍റ് തെരഞ്ഞെടുപ്പില്‍ കാണാനായത്.

കുളത്തൂപ്പുഴ പ്രാഥമിക ആരോഗ്യകേന്ദ്ര പരിസരം കാടുമൂടിയ നിലയിൽ

കുളത്തൂപ്പുഴ: കുളത്തൂപ്പുഴ നിവാസികളുടെ ആശ്രയ കേന്ദ്രമായ കുളത്തൂപ്പുഴ പ്രാഥമിക ആരോഗ്യ കേന്ദ്രത്തിന്‍റെ പരിസരം കാട് പിടിച്ച് കിടക്കാൻ തുടങ്ങിയിട്ട് നാളുകൾ ഏറെയായി.ഈ ഭാഗത്തു ഇഴജന്തുക്കളുടെ താവളമാണ് . കുളത്തൂപ്പുഴ പോലീസ് സ്റ്റേഷൻ, വില്ലേജ് ഓഫീസ്, സർക്കാർ സ്കൂൾ കെട്ടിടങ്ങൾ എല്ലാം ഈ ഭാഗത്താണ് സ്ഥിതിചെയ്യുന്നത്. അപകടാവസ്‌ഥയിൽ ഇവിടെ നിന്നിരുന്ന മരങ്ങൾ എല്ലാം അധികൃതർ മുറിച്ചു. ഈ തടികൾ ഇവിടെ നിന്നും നീക്കം ചെയ്യാതെ എല്ലാം ഇവിടെ കൂട്ടിയിട്ടിരിക്കുകയാണ്. ഇതിനും ചുറ്റിലും പൂർണമായും കാടുകയറി കിടക്കുന്നു. ആശുപത്രിയിൽ ദിവസവും 100 കണക്കിന് പേരാണ് എത്തിച്ചേരുന്നത്. കാടുപിടിച്ചു കിടക്കുന്ന ഭാഗത്താണ് ആംബുലൻസ് അടക്കം ഉള്ള വാഹനങ്ങൾ പാർക്ക് ചെയ്യുന്നത്. മിക്കപ്പോഴും വാഹനങ്ങളിൽ ഇഴജന്തുക്കൾ കേറി ഇരിക്കുന്നത് പതിവ് കാഴ്ചയാണ്. ഈ അടുത്തിടെയാണ് ആശുപത്രി ലാബിനുള്ളിൽ പെരുമ്പാമ്പിന്‍റെ കുഞ്ഞിനെ കണ്ടെത്തിയത്. കഴിഞ്ഞ ദിവസം ആശുപത്രി പരിസരത്തു നിന്നിരുന്ന മരങ്ങളുടെ ശിഖരങ്ങൾ എല്ലാം മുറിച്ചു തൊട്ടടുത്ത സ്കൂളിന്‍റെ പരിസരത്ത്‌ തള്ളിയത് വിവാദം ആയിരിക്കുകയാണ്. കാടുമൂടി കിടക്കുന്ന ഭാഗം വൃത്തിയാക്കി ഇടണമെന്നാണ് നാട്ടുകാരുടെ ആവശ്യം.

കരയോഗം ഭാരവാഹികൾ ചുമതലയേറ്റു

ചാത്തന്നൂർ : മീനാട് എൻ എസ് എസ് കരയോഗത്തിന്‍റെ പുതിയ ഭാരവാഹികൾ എൻ എസ് എസ് ചാത്തന്നൂർ യൂണിയൻ ആസ്ഥാനത്ത് എത്തി മന്നം പ്രതിമയ്ക്ക് മുന്നിൽ പ്രതിജ്ഞ ചൊല്ലി ചുമതലയേറ്റു. യൂണിയൻ വൈസ് പ്രസിഡന്‍റ്പരവൂർ മോഹൻദാസ് ഭദ്ര ദീപം കൊളുത്തി. യൂണിയൻ സെക്രട്ടറി പി. എം. പ്രകാശ് ചടങ്ങുകൾക്ക് നേതൃത്വം നൽകി. എസ്. വി. അനിത്ത് കുമാർ- പ്രസിഡന്‍റ് ,രതീഷ് ചന്ദ്രൻ -വൈസ് പ്രസിഡന്‍റ്, മനോജ്‌ മീനാട് -സെക്രട്ടറി , ശ്യാംരാജ്- ജോയിന്‍റ് സെക്രട്ടറി , ഗോപാലകൃഷ്ണപിള്ള -ട്രഷറർ എന്നിവരാണ് സത്യപ്രതിജ്ഞ ചൊല്ലിയത്.

ഹിന്ദുസ്ഥാൻ സ്കൗട്ട് ആന്‍ഡ് ഗൈഡ്സ് രാജ്യപുരസ്കാർ നിറവിൽ ശ്രീശ്രീ അക്കാദമി

എഴുകോൺ: ശ്രീശ്രീ അക്കാദമിയിലെ പന്ത്രണ്ട് വിദ്യാർഥികൾക്ക് ഹിന്ദുസ്ഥാൻ സ്കൗട്ട് ആൻഡ് ഗൈഡ്സ് രാജ്യപുരസ്കാർ അവാർഡുകൾ ലഭിച്ചു. കാലടി ശ്രീ ശാരദ സൈനിക് സ്കൂളിൽ സംഘടിപ്പിച്ച അവാർഡ്ദാന ചടങ്ങിൽ കേരള ഗവർണർ രാജേന്ദ്ര വിശ്വനാഥ് ആർലേക്കർ അവാർഡ് സമ്മാനിച്ചു. സംസ്ഥാന ചീഫ് കമ്മീഷണർ എം.അബ്ദുൾ നാസർ അധ്യക്ഷനായി. സ്കൂളിൽനിന്ന് സാധിക.ഡി, ജെ. ഭദ്ര, വേദ ശ്യാം, അദ്വൈത് എ നായർ, വി.വിശാൽ, എം.ആദികേശ് , എ.ആയുഷ് , എ.വൈശാഖ് , ദേവ്കൃഷ്ണ, ആർ.ഘന ശ്യാം , അഭയ് അനീഷ്‌, പ്രേംജിത്ത് എന്നീ കുട്ടികളാണ് അവാർഡിന് അർഹരായത്. പ്രിൻസിപ്പൽ അമ്പിളി പിള്ള, കുട്ടികളെ പരിശീലിപ്പിച്ച അധ്യാപകരായ ജെ. ആശ, ആർ. ബിജി എന്നിവർ ചടങ്ങിൽ പങ്കെടുത്തു. സിബിഎസ്‌ഇ തിരുവനന്തപുരം റീജിയണൽ ഓഫീസർ രജീബ് ബർവ ,സംസ്ഥാന സെക്രട്ടറി എം.ജൗഹർ,ആദിശങ്കര ട്രസ്റ്റ് ചെയർമാൻ അഡ്വ.കെ.ആനന്ദ്, സ്കൂൾ പ്രിൻസിപ്പൽ ഡോ.ദീപ ചന്ദ്രൻ, ദേശീയ ഓർഗനൈസിംഗ് കമ്മീഷണർ ക്യാപ്റ്റൻ കിഷോർ സിങ്ങ് ചൗഹാൻ, ജനറൽ മാനേജർ എൻ. ശ്രീനാഥ് എന്നിവർ ചടങ്ങിൽ പ്രസംഗിച്ചു.

പ്രതിഷേധ പ്രകടനം നടത്തി

ചാത്തന്നൂർ: കേന്ദ്രമന്ത്രി സുരേഷ് ഗോപിയുടെ ഓഫീസിനു നേരെ നടത്തിയ സി പിഎം ആക്രമണത്തിൽ പ്രതിഷേധിച്ചു ബിജെപി ചാത്തന്നൂർ പഞ്ചായത്ത്‌ സമിതിയുടെ നേതൃത്വത്തിൽ പ്രതിഷേധപ്രകടനം നടത്തി. തുടർന്ന് ചേർന്ന പ്രതിഷേധ ജ്വാല തിരുവനന്തപുരം മേഖല പ്രസിഡന്‍റ് ബി.ബി. ഗോപകുമാർ ഉദ്ഘാടനം ചെയ്തു. ബിജെപി ജില്ലാ ട്രഷറർ രാജൻപിള്ള, സഹകരണ സെൽ കൺവീനർ അനിത് കുമാർ, മുരളീധരൻ, ശ്രീകുമാർ എന്നിവർ പ്രസംഗിച്ചു. പഞ്ചായത്ത്‌ സമിതി പ്രസിഡന്‍റ് ശ്യാംരാജ് അധ്യക്ഷത വഹിച്ചു .ജനറൽ സെക്രട്ടറി ദിനേശ് കുമാർ, സുഗേഷ്,സിനു,ബൈജു ലൂക്കോസ്,ഷീജാ, മീരാ ഉണ്ണി,ജീവൻ, തുഷാരബിന്ദു എന്നിവർ നേതൃത്വം നൽകി.

മൊബൈല്‍ ഫോണ്‍ കട കുത്തിത്തുറന്ന് കവര്‍ച്ച : മൂന്നുപേര്‍ പിടിയില്‍

അഞ്ചൽ : കടകുത്തിത്തുറന്ന് ഫോണുകളും ലാപ്ടോപ്പുകളും കവര്‍ച്ച ചെയ്ത സംഭവത്തില്‍ മൂന്നുപേര്‍ അറസ്റ്റില്‍. കല്ലമ്പലം സ്വദേശികളായ അൽ അമീൻ, മുഹമ്മദ് ആഷിക്, മുഹമ്മദ് ഇർഫാൻ എന്നിവരെയാണ് ചടയമംഗലം പോലീസ് അറസ്റ്റ് ചെയ്തത്. കേസിലെ ഒന്നാം പ്രതി കിളിമാനൂർ സ്വദേശി ജസീം എന്നയാള്‍ ഒളിവിലാണ്. ഈമാസം ഒന്നിന് പുലര്‍ച്ചെയോടെയാണ് ചടയമംഗലത്തുള്ള ഒരു സ്ഥാപനത്തിന്‍റെ പിന്‍ഭാഗം കുത്തിപ്പൊളിച്ചു കടയിൽ സൂക്ഷിച്ചിരുന്ന 50 ഓളം മൊബൈൽഫോണുകളും മൂന്ന് ലാപ്ടോപ്പുകളും കേസിലെ ഒന്നാം പ്രതിയായ ജസീമും, അൽഅമീനും ചേർന്നു മോഷ്ടിച്ചു കടത്തിയത്. കവര്‍ച്ചയ്ക്ക് ശേഷം ബൈക്കില്‍ രക്ഷപ്പെട്ട പ്രതികള്‍ കാറില്‍ കാത്തുനിന്ന ആഷിക്, മുഹമ്മദ് ഇര്‍ഫാന്‍ എന്നിവര്‍ക്ക് മോഷണ വസ്തുക്കള്‍ കൈമാറി. മൊബൈല്‍ ഫോണുകളും ലാപ്ടോപ്പുകളുമായി എറണാകുളത്ത് എത്തിയ പ്രതികള്‍ ഇത് വില്‍ക്കാന്‍ ശ്രമിച്ചുവെങ്കിലും നടന്നില്ല. ഇതോടെ പ്രതികള്‍ ചെന്നൈയില്‍ എത്തുകയും ഇവിടെ മൊബൈല്‍ ഫോണുകള്‍ വില്‍പന നടത്തുകയും ചെയ്തു. സംഭവത്തില്‍ കടയുടമയുടെ പരാതിയില്‍ കേസെടുത്ത ചടയമംഗലം പോലീസ് വിവിധ സ്ഥലങ്ങളില്‍ നിന്നുള്ള നൂറിലധികം സിസിടിവി ദൃശ്യങ്ങള്‍ പരിശോധിച്ചാണ് പ്രതികളെ കുടുക്കിയത്. അറസ്റ്റിലായ മൂന്നുപ്രതികളേയും വീടുകളില്‍ നിന്നാണ് പിടികൂടിയത്. ഒളിവിലുള്ള ജസീമിന്‍റെ ടയര്‍ പഞ്ചര്‍ വര്‍ക്ക് കടയില്‍ നിന്നും ലാപ്ടോപ്പുകളും വില്‍പ്പന നടത്താതെ മാറ്റിവച്ചിരുന്ന മൊബൈൽ ഫോണുകളും പോലീസ് കണ്ടെടുത്തു. ഒളിവിലുള്ള ഒന്നാം പ്രതിക്കായി അന്വേഷണം ഊര്‍ജിതമാക്കിയതായി പോലീസ് പറഞ്ഞു. കവര്‍ച്ചയ്ക്കായി ഉപയോഗിച്ച ബൈക്ക് പോലീസ് കസ്റ്റഡിയില്‍ എടുത്തിട്ടുണ്ട്. ചടയമംഗലം എസ്എച്ച്ഒ സുനീഷ്, എസ്ഐ മോനിഷ് എന്നിവരുടെ നേതൃത്വത്തിലുള്ള സംഘമാണ് പ്രതികളെ പിടികൂടിയത്. അറസ്റ്റ് രേഖപ്പെടുത്തിയ പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.

വസ്ത്ര നിർമ്മാണത്തിന്‍റെ വഴികൾ തേടി മൈലക്കാട് യു പിഎസിലെ കുട്ടികൾ

ചാത്തന്നൂർ: പാഠഭാഗങ്ങളിലെ അറിവുകൾ ക്ലാസ്മുറികളുടെ പ്രവർത്തനങ്ങളിൽ മാത്രം ഒതുങ്ങി നിർത്താതെ പ്രായോഗിക പ്രവർത്തനങ്ങൾ കണ്ടു മനസിലാക്കേണ്ടതാണെന്ന് മൈലക്കാട് യു പിഎസിലെ അഞ്ചാം ക്ലാസിലെ കുട്ടികൾ പറയുന്നു. അഞ്ചാം ക്ലാസിലെ സാമൂഹ്യ ശാസ്ത്ര പാഠപുസ്തകത്തിലെ വസ്ത്ര നിർമിണത്തിന്‍റെ നാൾവഴികൾ എന്ന നാലാം യൂണിറ്റ് പഠനത്തിനിടയിലെ കുട്ടി ചർച്ചകളാണ് ചാത്തന്നൂർ സ്പിന്നിംഗ് മില്ലിലേക്കുള്ള ഫീൽഡ് ട്രിപ്പിന് വഴിതുറന്നത്. അഞ്ചാം ക്ലാസിലെ മുഴുവൻ കുട്ടികളെയും ഉൾപ്പെടുത്തി നടത്തിയ യാത്ര പഞ്ഞിയിൽ നിന്നും നൂൽ നിർമാണം വരെയുള്ള വിവിധ ഘട്ടങ്ങൾ നേരിട്ട് കാണാൻ കുട്ടികൾക്ക് അവസരം ലഭിച്ചു. വസ്ത്ര നിർമ്മാണത്തിന്‍റെ യന്ത്രവത്കരണവും ആധുനിക സാങ്കേതിക വിദ്യകളുടെ പ്രയോജനവും കുട്ടികൾ കണ്ടു മനസിലാക്കി.പ്രവർത്തനങ്ങൾക്ക് സാമൂഹ്യ ശാസ്ത്ര അധ്യാപകൻ അനുജിത്ത്.വി, ക്ലാസ്അധ്യാപകരായ പ്രസാദ് കർമ്മ, ദിവ്യ. ആർ, ഗീതു രത്നാകരൻ എന്നിവർ നേതൃത്വം നൽകി.

ആനയോളം അറിവു പകര്‍ന്ന് ലോക ഗജദിനത്തിൽ സെമിനാര്‍

കൊല്ലം: ആനകൾക്ക് മനുഷ്യനേക്കാള്‍ കേള്‍വി ശക്തിയുണ്ട്. 12 ലിറ്റര്‍ വെള്ളം തുമ്പികൈയില്‍ നിറയ്ക്കാം. ചെണ്ടത്താളത്തിനൊത്തല്ല, ശരീരതാപനില നിയന്ത്രിക്കാനാണ് ചെവിയാട്ടല്‍. ആനകളെകുറിച്ച് കൗതുകവും അത്ഭുതവും ഇടകലരുന്ന അറിവുകളാണ് ലോകഗജദിനത്തില്‍ ഇത്തവണ പങ്കുവെച്ചത്. പുത്തന്‍കുളം ആനത്താവളത്തില്‍ ദിനാചരണ ഭാഗമായി മൃഗസംരക്ഷണവകുപ്പും ഇന്ത്യന്‍ വെറ്ററിനറി അസോസിയേഷനും സംയുക്തമായി സംഘടിപ്പിച്ച സെമിനാർ ആനവിശേഷങ്ങള്‍ കൊണ്ട് കൗതുകമുണർത്തി. ഫോറസ്റ്റ് ചീഫ് വെറ്ററിനറി മുന്‍ ഓഫീസര്‍ ഡോ. ഇ. കെ. ഈശ്വരന്‍ സെമിനാര്‍ നയിച്ചു. ആനകള്‍ക്ക് ശബ്ദവും ഗന്ധവും തിരിച്ചറിയാന്‍ സവിശേഷ കഴിവുണ്ട് . തുമ്പികൈയില്‍ 40000 ചെറുപേശികളുമുണ്ട്. ആനക്കുട്ടികള്‍ക്ക് ജനനഭാരം 150 മുതല്‍ 200 കിലോ വരെയാണ്. കൊമ്പിന്‍റെ മൂന്നിലൊന്ന് മാത്രമാണ് പുറത്ത് കാണാവുന്നത്. മദപ്പാട്കാലത്ത് ആനകളെ മൂന്നു മാസമെങ്കിലും കെട്ടിയിടണം എന്ന നിര്‍ണായകവിവരവും സെമിനാറിൽ കൈമാറി. നാട്ടാനാകളുടെ എണ്ണം കുറയുന്നതായാണ് ഔദ്യോഗിക കണക്ക്. 2021 ല്‍ 510 നാട്ടാനകള്‍ ഉണ്ടായിരുന്ന സ്ഥാനത്ത് നിലവില്‍ ഉള്ളത് 382. ജില്ലയില്‍ 55 ആനകള്‍ക്കാണ് രജിസ്‌ട്രേഷനുള്ളത്. ക്ഷയം, പരാദരോഗങ്ങള്‍, പാദരോഗങ്ങള്‍, രക്താതിസാരം, ഹൃദ്‌രോഗം, എരണ്ടകെട്ട് എന്നിവയാണ് എണ്ണം കുറയാന്‍ പ്രധാനകാരണമായിട്ടുള്ളത്. പുതുക്കിയ വന്യജീവിസംരക്ഷണ നിയമപ്രകാരം ഇതരസംസ്ഥാനങ്ങളില്‍നിന്ന് ആനകളെ കൊണ്ടുവരുന്നതിനും കൈമാറ്റംചെയ്യുന്നതിനും കര്‍ശനവ്യവസ്ഥകള്‍ ആണ് ഉള്ളത്. ഉടമസ്ഥാവകാശ സര്‍ട്ടിഫിക്കറ്റും ജനിതക പഠന സര്‍ട്ടിഫിക്കറ്റും ഡാറ്റാ ഷീറ്റും നിര്‍ബന്ധമാക്കി. ജനിതക പഠന സാക്ഷ്യപത്രം ഡെറാഡൂണ്‍ വൈല്‍ഡ് ലൈഫ് ഇന്‍സ്റ്റിറ്റ്യൂട്ടില്‍ പരിശോധിച്ചാണ് ഉറപ്പാക്കുക. ആനക്കൊമ്പോ പല്ലോ ആനയുമായി ബന്ധപ്പെട്ട മറ്റ് മേനി ഉപാധികളോ വില്‍ക്കുന്നതിന് നിരോധനമുണ്ട്. നടയ്ക്കിരുത്തുകയോ പോറ്റാന്‍ നിര്‍വാഹമില്ലാതെ ആരാധനാലയങ്ങള്‍ക്ക് കൈമാറുകയോ ചെയ്യാമെന്നും സെമിനാറില്‍ വ്യക്തമാക്കി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]