സമുദായ ശക്തീകരണം കാലഘട്ടത്തിന്‍റെ ആവശ്യം: മാർ തോമസ് തറയിൽ

ആലപ്പുഴ: സമുദായ ശക്തീകരണം കാലഘട്ടത്തിന്‍റെ ആവശ്യമാണെന്നും ഇതിനായി സമുദായങ്ങൾ മുന്നിട്ടിറങ്ങണമെന്നും ചങ്ങനാശേരി ആർച്ച്ബിഷപ് മാർ തോമസ് തറയിൽ.

കത്തോലിക്കാ കോൺഗ്രസ് തത്തംപള്ളി യൂണിറ്റിന്‍റെ വാർഷിക ആഘോഷ പരിപാടികളും ആദരവ് 2025 ഉദ്ഘാടനം ചെയ്ത് സംസാരിക്കായിരുന്നു അദ്ദേഹം. കത്തോലിക്കാ കോൺഗ്രസ് അതിരൂപത പ്രസിഡന്‍റ് ബിജു സെബാസ്റ്റ്യൻ മുഖ്യപ്രഭാഷണം നടത്തി.

യൂണിറ്റ് പ്രസിഡന്‍റ് ബിനു സ്കറിയ അധ്യക്ഷത വഹിച്ചു. എസ് എസ്എൽസി, പ്ലസ്ടു തുടങ്ങി വിവിധ മേഖലകളിൽ നേട്ടങ്ങൾ കൈവരിച്ചവരെ ആദരിച്ചു. ഇടവകയിലെ അസംഘടിത മേഖലയിലെ തൊഴിലാളികളുടെ ഡയറക്ടറി ജാലകം പ്രകാശനം ചെയ്തു. ഇടവക വികാരി ഫാ. ജോസ് മുകളേൽ അനുഗ്രഹപ്രഭാഷണം നടത്തി.

യൂണിറ്റ് ഡയറക്ടർ ഫാ. നവീൻ മാമ്മൂട്ടിൽ ആമുഖ സന്ദേശം നൽകി. കത്തോലിക്കാ കോൺഗ്രസ് ഫൊറോന പ്രസിഡന്‍റ് ദേവസ്യ പുളിക്കാശേരി, തോമസ് കൊരണ്ടക്കാട്, ഡയാന ജോയിക്കുട്ടി, റ്റോമി കടവിൽ, മോളമ്മ, രഞ്ജിനി, ജോമോൻ, സിജോ ജോൺ, ചാക്കോ തോമസ്, ലനു തോമസ്, റ്റോമി പൂണിയിൽ തുടങ്ങിയവർ പ്രസംഗിച്ചു.

ADVERTISEMENT

പരിക്കേറ്റയാള്‍ക്ക് സുരക്ഷയൊരുക്കി കെഎസ്ആര്‍ടിസി ജീവനക്കാർ

ചേര്‍ത്തല: അപകടത്തില്‍പ്പെട്ടു റോഡരുകില്‍ ചോരവാര്‍ന്നു കിടന്നയാള്‍ക്ക് രക്ഷയൊരുക്കി അതുവഴിവന്ന കെഎസ്ആര്‍ടിസി ബസിലെ ഡ്രൈവറും കണ്ടക്ടറും. ഇവരുടെ സമയോചിതമായ ഇടപെടലില്‍ പരിക്കേറ്റയാള്‍ക്ക് സമയബന്ധിതമായി ചികിത്സ ലഭിച്ച് അപകടനില തരണം ചെയ്തു. വ്യാഴാഴ്ച രാവിലെ എട്ടുമണിയോടെയാണ് ചേര്‍ത്തല-തണ്ണീര്‍മുക്കം റോഡില്‍ കൊക്കോതമംഗലത്ത് കാറിടിച്ചു സ്‌കൂട്ടര്‍ യാത്രക്കാരനായ കോടതിക്കവല മാത്തൂര്‍ ക്ഷേത്രം ശാന്തി തണ്ണീര്‍മുക്കം ശ്യാം നികേതനില്‍ ശ്യാ(50)മിനു പരിക്കേറ്റത്. റോഡരുകിലെ ഓടയില്‍ വീണ ശ്യാമിനും കാലിനും തലയ് ക്കുമാണ് പരിക്കേറ്റത്. പിന്നാലെയാണ് വാഗമണില്‍നിന്നും ആലപ്പുഴയ്ക്കുപോകുന്ന ഈരാറ്റുപേട്ട ഡിപ്പോയിലെ കെഎസ്ആര്‍ടിസി ബസ് ഇതുവഴിയെത്തിയത്. പരിക്കേറ്റയാളെ കണ്ട ഡ്രൈവര്‍ വണ്ടി നിര്‍ത്തി ഓടിയിറങ്ങി. ഇയാളെ താങ്ങിയെടുത്തു കണ്ടക്ടറും സഹായത്തിനെത്തി. യാത്രക്കാരും സഹായിച്ചതോടെ ശ്യാമിനെ ബസിന്‍റെ മുന്നിലെ വരിയിലുള്ള സീറ്റില്‍ കിടത്തി. പിന്നീട് ലൈറ്റുകളിട്ട് ആംബലന്‍സായാണ് ബസ് ചേര്‍ത്തല താലൂക്ക് ആശുപത്രിയിലെത്തിച്ചത്. ഉടന്‍തന്നെ അടിയന്തര ശുശ്രൂഷ നല്‍കി. പരിക്കു ഗുരുതരമായിതിനാല്‍ കോട്ടയം മെഡിക്കല്‍ കോളജ് ആശുപത്രിയിലേക്കുമാറ്റി. ഈരാറ്റുപേട്ട ഡിപ്പോയിലെ ഡ്രൈവര്‍ പൈന്‍വാലി സ്വദേശി കെ.ജെ. മാത്യുവും കണ്ടക്ടര്‍ തിരുവനന്തപുരം സ്വദേശി എ. ബിനുവുമാണ് ജോലിക്കിടയിലും മനുഷ്യത്വം മുറകെ പിടിച്ചത്. താലൂക്ക് ആശുപത്രിയിലെത്തിച്ച് ശ്യാമിന്‍റെ ബന്ധുക്കളുടെ നമ്പര്‍ തരപ്പെടുത്തി വിളിച്ചുവരുത്തിയ ശേഷമായിരുന്നു ബസിന്‍റെ മടക്കം. യാത്രക്കാരും ആശുപത്രി അധികൃതരുമടക്കം ഇവരെ അഭിനന്ദിച്ചു. ഇതിനു മുമ്പും ഡ്രൈവര്‍ മാത്യു ജോലിക്കിടയില്‍ ജീവന്‍ രക്ഷാപ്രവര്‍ത്തനം നടത്തിയിട്ടുണ്ട്. രാവിലെ ക്ഷേത്രത്തിലേക്കു പോകുമ്പോഴായിരുന്നു കാറിടിച്ച് അപകടമുണ്ടായത്. ബസിനു പിന്നാലെ അപകടത്തില്‍പ്പെട്ട കാര്‍യാത്രികരും ആശുപത്രിയിലെത്തിയിരുന്നു. തലയ്ക്കും കാലിനും പരിക്കേറ്റ ശ്യാം കോട്ടയം മെഡിക്കല്‍ കോളജില്‍ നിരീക്ഷണ വിഭാഗത്തിലാണ്.

തത്തംപള്ളി വേളാങ്കണ്ണി പള്ളിയിൽ തിരുനാൾ

ആലപ്പുഴ: തത്തംപള്ളി വേളാങ്കണ്ണി മാതാ പള്ളിയിൽ പരിശുദ്ധ വേളാങ്കണ്ണി മാതാവിന്‍റെ തിരുനാളിനു തുടക്കമായി. വികാരി ഫാ. സൈറസ് തോമസ് കാട്ടുങ്കൽതയ്യിൽ കൊടിയേറ്റി. തുടർന്ന് ഫാ. ക്രിസ്റ്റഫർ എം. അർഥശേരിയുടെ കാർമികത്വത്തിൽ വിശുദ്ധ കുർബാന നടന്നു. ഫാ.സിജു സോളമൻ വചന സന്ദേശവും നല്കി. അഞ്ചിന് വൈകുന്നേരം 5ന് ജമാല തുടർന്ന് വിശുദ്ധ കുർബാന ഫാ. സോളമൻ ഏലിയാസ് അരേശേരിൽ, വചനസന്ദേശം-ഫാ. റെയ്നോൾഡ് വട്ടത്തിൽ. ആറിന് വൈകുന്നേരം അഞ്ചിന് ജപമാല, വിശുദ്ധ കുർബാന-ഫാ. അലക്സാണ്ടർ കൊച്ചീക്കാരൻവീട്ടിൽ, വചനസന്ദേശം- ഫാ. അലക്സ് കൊച്ചിക്കാരൻവീട്ടിൽ. ഏഴിന് വൈകിട്ട് അഞ്ചിന് ജപമാല വിശുദ്ധ കുർബാന സീറോ മലബാർ ക്രമത്തിൽ ഫാ. ചാക്കപ്പൻ നടുവിലേക്കളം. തുടർന്ന് വചനസന്ദേശം. തിരുനാൾ ദിവസമായ എട്ടിന് വൈകുന്നേരം നാലിന് വിശുദ്ധ കുർബാന-ഫാ. യേശുദാസ് കൊടിവീട്ടിൽ, സഹകാർമ്മികർ-ഫാ. അഗസ്റ്റിൻ ബനവന്തുർ, ഫാ. മൈക്കിൾ കുന്നേൽ, ഫാ. ജോർജ്‌ കടവുങ്കൽ. വചനസന്ദേശം- ഫാ. ജയന്ത് മേരി. തുടർന്ന് തിരുനാൾ പ്രദക്ഷിണവും പരിശുദ്ധ കുർബാനയുടെ ആശീർവാദവും.

തിരുവോണത്തോണിയിലേറി, പള്ളിയോടങ്ങളുടെ അകന്പടിയിൽ ഭട്ടതിരി ആറന്മുളയിലേക്ക്

ആറന്മുള: ആറന്മുള പാര്‍ഥസാരഥി ക്ഷേത്രത്തിലെ തിരുവോണ സദ്യയ്ക്കുള്ള വിഭവങ്ങളുമായി കാട്ടൂരിൽ നിന്നുള്ള തോണി യാത്ര തുടങ്ങി. കാട്ടൂർ മഹാവിഷ്ണു ക്ഷേത്രക്കടവില്‍ നിന്ന് തോണി ഇന്നലെ വൈകുന്നേരമാണ് പന്പാനദിയിലൂടെ പരന്പരാഗത ആചാരങ്ങളോടെ ആറന്മുളയ്ക്കു പുറപ്പെട്ടത്. മങ്ങാട്ട് ഇല്ലത്തെ അനൂപ് നാരായണന്‍ ഭട്ടതിരിയാണ് ഇത്തവണ തോണി യാത്രയ്ക്ക് നേതൃത്വം നല്‍കുന്നത്. കാട്ടൂര്‍ ക്ഷേത്രത്തിലെ ദീപാരാധനയ്ക്കുശേഷം മേല്‍ശാന്തി പകർന്നു നൽകിയ ദീപം മങ്ങാട്ട് ഭട്ടതിരി ഏറ്റുവാങ്ങി തോണിയില്‍ പ്രതിഷ്ഠിച്ചു. കാട്ടൂര്‍ കരയിലെ നായര്‍ തറവാടുകളില്‍ നിന്നെത്തിച്ച ഓണവിഭവങ്ങൾ തോണിയിൽ കയറ്റി. ജനപ്രതിനിധികളും ദേവസ്വം ബോർഡ് ഭാരവാഹികളും അടക്കം വൻ ജനാവലി തോണിയെ യാത്ര അയയ്ക്കാൻ എത്തിയിരുന്നു. ആറന്മുള പള്ളിയോടങ്ങളുടെ അകന്പടിയോടെയാണ് തോണി ആറന്മുളയിലേക്കു പുറപ്പെട്ടത്. പമ്പയെ പ്രകാശപൂരിതമാക്കിയുള്ള യാത്രയെ ഇരുകരകളിലും മണ്‍ചിരാതുകള്‍ തെളിച്ച് സ്വീകരിച്ചു. ഇന്നു പുലര്‍ച്ചെ ആറന്മുള ക്ഷേത്രക്കടവിലെത്തുന്ന തോണിയില്‍ നിന്ന് ഭദ്രദീപം ക്ഷേത്ര ശ്രീകോവിലില്‍ കൊളുത്തും. മങ്ങാട്ട് ഭട്ടതിരിയെ ആചാരപരമായി വരവേൽക്കും. തോണിയിലെത്തിക്കുന്ന വിഭവങ്ങള്‍ ഉപയോഗിച്ചാണ് ക്ഷേത്രത്തില്‍ തിരുവോണ ദിവസം സദ്യ ഒരുക്കുന്നത്. സദ്യയ്ക്കുശേഷം പണക്കിഴിയും സമര്‍പ്പിച്ച് ഭട്ടതിരി മടങ്ങും. പന്പയെ പ്രകാശ പൂരിതമാക്കിയുള്ള യാത്രയുടെ സ്മരണയിലാണ് ഉത്തൃട്ടാതി നാളില്‍ പന്പാനദിയില്‍ പള്ളിയോടങ്ങള്‍ ജലഘോഷയാത്രയ്‌ക്കെത്തുന്നത്.

മലയാളി വരന് മ്യാൻമർ വധു

മാന്നാർ: മലയാളി വരൻ മ്യാൻമറിൽനിന്നുള്ള വധുവിന് വരണമാല്യം ചാർത്തിയപ്പോൾ സഫലമായത് ഏറെ നാളത്തെ പ്രണയം. മാന്നാർ കുട്ടംപേരൂർ സ്വദേശി സുധീഷിന് വധുവായത് മ്യാൻമ ർ സ്വദേശിനി വിന്നി. മാന്നാർ കുട്ടംപേരൂർ പുതുശേരത്ത് വീട്ടിൽ രാമചന്ദ്രൻപിള്ളയുടെയും സരസമ്മയുടെയും മകനായിരുന്നു വരൻ സുധീഷ്. മ്യാന്മർ സ്വദേശി യൂസോ വിനിന്‍റെയും ഡ്യൂ ക്യൂവിന്‍റെയും മകൾ വിന്നിയായിരുന്നു വധു. ഇവരുടെ വിവാഹം കുന്നത്തൂർ ശ്രീദുർഗ ഓഡിറ്റോറിയത്തിൽ നടന്നു. കഴിഞ്ഞ നാലുവർഷമായി ഇരുവരും പ്രണയത്തിലായിരുന്നു. ദുബായ് മാരിയറ്റ് ഹോട്ടൽ ജീവനക്കാരനാണ് സുധീഷ്, വിന്നി അക്വാർ ഹോട്ടൽ ജീവനക്കാരിയും. വിന്നിന്‍റെ മാതാപിതാക്കൾക്ക് കേരളത്തിൽ എത്തിച്ചേരാൻ കഴിഞ്ഞില്ല. മ്യാൻമറിൽ ബിസിനസ് കുടുംബമാണ് വിന്നിന്‍റേത്. മുതിർന്ന സഹോദരനും ഉണ്ട്. ദുബായിൽ നടക്കുന്ന റിസപ്ഷനിൽ ഇവർ എത്തിച്ചേരുമെന്ന് ദമ്പതികൾ അറിയിച്ചു. വധൂവരന്മാർ പന്ത്രണ്ടാം തീയതി തിരികെ ദുബായിയിലേക്കു പോകും.

ശാന്തിഭവനിൽ പൊന്നോണക്കനിവ്

അമ്പലപ്പുഴ: യുഡിഎഫ് പുന്നപ്ര കിഴക്ക് മണ്ഡലം കമ്മിറ്റിയുടെ നേതൃത്വത്തിൽ ശാന്തിഭവനിൽ പൊന്നോണക്കനിവ് സംഘടിപ്പിച്ചു. ശാന്തിഭവനിലെ 170 അന്തേവാസികൾക്ക് ഓണസദ്യ ഒരുക്കിയാണ് കനിവ് നടത്തിയത്. കെപിസിസി ജനറൽ സെക്രട്ടറി എം.ജെ. ജോബ് പരിപാടി ഉദ്ഘാടനം ചെയ്തു. കോൺഗ്രസ് പുന്നപ്ര കിഴക്ക് മണ്ഡലം പ്രസിഡന്‍റ് ഹസൻ എം. പൈങ്ങാമഠം അധ്യക്ഷത വഹിച്ചു. എ.വി. ദിനകരൻ ഓണസന്ദേശം നല്കി. കോൺഗ്രസ് ബ്ലോക്ക് പ്രസിഡന്‍റ് ടി.എ. ഹാമിദ്, മുസ്‌ലീം ലീഗ് അമ്പലപ്പുഴ നിയോജകമണ്ഡലം ജനറൽ സെക്രട്ടറി നാസർ ബി.താജ്, എ.ആർ. കണ്ണൻ, അൻസർ മൂലയിൽ, പി. ഉണ്ണികൃഷ്ണൻ, അബ്ദുൽ ഹാദി, ഷിഹാബ് പോളക്കുളം, പി.എ. കുഞ്ഞുമോൻ, സമീർ പാലമൂട്, എൻ. രമേശൻ, ഗീതാ മോഹൻദാസ്, ശ്രീജാ സന്തോഷ്, ജോസഫ് ഹറോൾഡ് എന്നിവർ പ്രസംഗിച്ചു.

അയിരൂർ പുതിയകാവ് ജലോത്സവം ഏഴിന്

പത്തനംതിട്ട: അയിരൂർ പുതിയകാവ് ജലമേള ഏഴിനു നടക്കുമെന്നു ഭാരവാഹികൾ പത്രസമ്മേളനത്തിൽ പറഞ്ഞു. ഉച്ചകഴിഞ്ഞ് രണ്ടിന് പുതിയകാവ് ദേവീക്ഷേത്രക്കടവിൽ പൊതുസമ്മേളനം മന്ത്രി വീണാ ജോർജ് ഉദ്ഘാടനം ചെയ്യും. ഗ്രാമപഞ്ചായത്ത് പ്രസിഡന്‍റ് അമ്പിളി പ്രഭാകരൻ നായർ അധ്യക്ഷത വഹിക്കും. ജലഘോഷയാത്ര ആന്‍റോ ആന്‍റണി എംപി ഉദ്ഘാടനം ചെയ്യും. പള്ളിയോടങ്ങൾക്കു ദക്ഷിണ നൽകി പ്രമോദ് നാരായൺ എംഎൽഎ സ്വീകരിക്കും. ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം മാനവമൈത്രി സന്ദേശം നൽകും. കളക്‌ടർ എസ്. പ്രേംകൃഷ്ണ‌ൻ പള്ളിയോടങ്ങൾക്കു ട്രോഫി വിതരണം ചെയ്യും. വഞ്ചിപ്പാട്ട് വിജയികൾക്കുള്ള ട്രോഫി വിതരണം ജില്ലാ പോലീസ് മേധാവി ആർ. ആനന്ദ് നിർവഹിക്കും. പള്ളിയോട സേവാസംഘം പ്രസിഡന്‍റ് കെ.വി.സാംബദേവൻ പള്ളിയോടങ്ങൾക്കു ഗ്രാന്‍റ് വിതരണം ചെയ്യും. ബ്ലോക്ക് പഞ്ചായത്ത് പ്രസിഡന്‍റ് സൂസൻ ഫിലിപ്പ് അത്തപ്പൂക്കള വിജയികൾക്കു സമ്മാനദാനം നിർവഹിക്കും. അയിരൂരിലേയും സമീപകരകളിലേയും 25 പള്ളിയോടങ്ങൾ ജലമേളയിൽ പങ്കെടുക്കും. ആറന്മുള ഉതൃട്ടാതി ജലമേള കഴിഞ്ഞാൽ ഏറ്റവും കൂടുതൽ പള്ളിയോടങ്ങൾ പങ്കെടുക്കുന്ന ജലമേളയാണിത്. ജലോത്സവം ഇക്കൊല്ലം മത്സരാടിസ്ഥാനത്തിൽ ആണെന്നുള്ള പ്രത്യേകത കൂടിയുണ്ട്. ജലഘോഷയാത്രയെത്തുടർന്നാണ് മത്സരവള്ളംകളി. അത്തപ്പൂക്കളം അടക്കം വിവിധ മത്സരങ്ങളും ഇതോടനുബന്ധിച്ചുണ്ടാകും. ഗ്രാമപഞ്ചായത്തിന്‍റെ ചുമതലയിലുള്ള ജലോത്സവത്തിനു സംസ്ഥാന ടൂറിസം വകുപ്പിന്‍റെ ധനസഹായവും പ്രതീക്ഷിക്കുന്നുണ്ട്. ഗ്രാമപഞ്ചായത്ത് പ്രസിഡന്‍റ് അമ്പിളി പ്രഭാകരൻ നായർ, വൈസ് പ്രസിഡന്‍റ് വിക്രമൻ നാരായണൻ, പ്രോഗ്രാം കമ്മിറ്റി ചെയർമാൻ സാംകുട്ടി അയ്യക്കാവിൽ, പബ്ലിസിറ്റി ചെയർമാൻ കെ.ടി. സുബിൻ എന്നിവർ പത്രസമ്മേളനത്തിൽ പങ്കെടുത്തു.

സന്തോഷ് ട്രോഫി ജലോത്സവം നാളെ

മാന്നാർ: ചെന്നിത്തല വാഴക്കൂട്ടം കടവ് സന്തോഷ് ആർട്സ് ആൻഡ് സ്പോർട്സ് ക്ലബ്ബിന്‍റെ ആഭിമുഖ്യത്തിൽ 40-ാമത് സന്തോഷ് ട്രോഫി ജലോത്സവം നാളെ നടക്കുമെന്ന് ഭാരവാഹികൾ വാർത്താസമ്മേളനത്തിൽ അറിയിച്ചു. ചെന്നിത്തല വാഴക്കൂട്ടം കടവിൽ നടക്കുന്ന ജലോത്സവത്തിൽ പ്രമുഖ കളി വള്ളങ്ങൾ പങ്കെടുക്കും. രാവിലെ എട്ടിന് പതാക ഉയർത്തും. ഉച്ചയ്ക്ക് 1.30ന് ക്ലബ്ബ് പ്രസിഡന്‍റ് എസ്. സേതുലക്ഷ്മി അധ്യക്ഷയാകുന്ന പൊതുസമ്മേളനം മന്ത്രി സജി ചെറിയാൻ ഉദ്ഘാടനം നിർവഹിക്കും. ജലോത്സവത്തിന്‍റെ ഉദ്ഘാടനം കൊടിക്കുന്നിൽ സുരേഷ് എംപി നിർവഹിക്കും. ചെന്നിത്തല തൃപ്പരുന്തുറ പഞ്ചായത്ത് പ്രസിഡന്‍റ് വിജയമ്മ ഫിലേന്ദ്രൻ ഫ്ലാഗ് ഓഫ് ചെയ്യും. എം. മുരളി മാസ്ഡ്രിൽ സല്യൂട്ട് സ്വീകരിക്കും. മന്ത്രി പി. പ്രസാദ്, രമേശ് ചെന്നിത്തല എംഎൽഎ, എച്ച്ആർ പിഎം നാഷണൽ പ്രസിഡന്‍റ് പ്രകാശ് ചെന്നിത്തല എന്നിവർ മുഖ്യ അതിഥികളാകും. മത്സരത്തിലെ വിജയികൾക്ക് കായംകുളം ഡിവൈഎസ്പി ടി. ബിനു കുമാർ സമ്മാനദാനം നിർവഹിക്കും. ക്ലബ്ബ് ജനറൽ കൺവീനർ ജിനു ജോർജ്, ജലോത്സവ കൺവീനർ തോമസുകുട്ടി, ജനറൽ കൺവീനർമാരായ റോമിയോ, തമ്പി കൗണടിയിൽ, സെക്രട്ടറി ബി. സുനീഷ് കുമാർ, ട്രഷറർ എസ്. രഞ്ജിത്, എക്സിക്യൂട്ടീവ് കമ്മിറ്റിയംഗം എസ്. ഇന്ദ്രജിത്ത് എന്നിവർ വാർത്താസമ്മേളനത്തിൽ പങ്കെടുത്തു.

ചെറിയനാട് സ്റ്റേഷനില്‍ ട്രെയിന്‍ നിര്‍ത്തിയില്ല; ഒരു കിലോമീറ്റര്‍ പിന്നോട്ടെടുത്തു

ചെങ്ങന്നൂര്‍: നാഗര്‍ഗോവില്‍-കോട്ടയം പാസഞ്ചര്‍ ട്രെയിന്‍ ചെറിയനാട് റെയില്‍വേ സ്റ്റേഷനില്‍ നിര്‍ത്താന്‍ വിട്ടുപോയതിനെത്തുടര്‍ന്ന് ഒരു കിലോമീറ്റര്‍ പിന്നോട്ടെടുത്ത് സ്റ്റേഷനില്‍ എത്തിച്ചു. ഇന്നലെ വൈകിട്ടായിരുന്നു സംഭവം. 6.24നാണ് ട്രെയിന്‍ സ്റ്റേഷനില്‍ എത്തേണ്ടിയിരുന്നത്. ലേറ്റായതിനെത്തുടര്‍ന്ന് 6.53ന് എത്തിയെങ്കിലും നിര്‍ത്തിയില്ല. പ്ലാറ്റ് ഫോമും കഴിഞ്ഞ് അറുനൂറുമീറ്ററോളം മുന്നോട്ടു പോയ മാമ്പള്ളിപ്പടിയില്‍ എത്തിയ ശേഷമാണ് ലോക്ക ോപൈലറ്റിന് വിവരം ലഭിച്ചത്. ഇതോടെ ട്രെയിന്‍ നിര്‍ത്തിയശേഷം പിന്നോട്ടെടുത്ത് സ്റ്റേഷനിലേക്ക് എത്തുകയായിരുന്നു. ഒരുമിനിട്ടാണ് ഇവിടെ സ്റ്റോപ്പുള്ളത്. ഓണ അവധിയോടനുബന്ധിച്ച് ചെറിയനാട് റെയില്‍വേ സ്റ്റേഷനില്‍ ഇറങ്ങാന്‍ നിരവധി യാത്രക്കാര്‍ ഉണ്ടായിരുന്നു. നേരത്തെ സമാനമായി രാവിലെ വേണാട് എക്‌സ്പ്രസ് നിര്‍ത്താന്‍ വിട്ടുപോവുകയും പിന്നോട്ട് എടുത്ത് സ്റ്റേഷനിലേക്ക് എത്തുകയും ചെയ്തിരുന്നു. റെയില്‍വെ സ്റ്റേഷനില്‍ സിഗ്നല്‍ ഇല്ലെന്നും പരിചയമില്ലാത്ത ലോക്കോ പൈലറ്റായതിനാലാണ് നിര്‍ത്താന്‍ വിട്ടുപോയതെന്നുമാണ് റെയില്‍വേ അധികൃതരുടെ വിശദീകരണം.

കുടിവെള്ളമില്ലാ ഒാണം; ദുരവസ്ഥയിൽ ഒരു നാട്

ആലപ്പുഴ: തിരുവോണനാളിലും കുടിവെള്ളത്തിനായി ക്ലേശിച്ച് ഒരു നാട്. പുറക്കാട് പഞ്ചായത്ത് ആറ്, ഏഴ് വാർഡുകളായ ഇല്ലിച്ചിറയിലെ എഴുപതോളം കുടുംബങ്ങളാണ് രണ്ടു മാസമായി കുടിവെള്ളം കിട്ടാതെ വലയുന്നത്. ഭൂരിഭാഗവും പട്ടികജാതി, പട്ടികവർഗ കുടുംബങ്ങളാണ് ഇവിടുള്ളത്. നേരത്തെ പൊതു ടാപ്പ് ഉണ്ടായിരുന്ന കാലത്തു കുടിവെള്ളത്തിന് ക്ഷാമമില്ലായിരുന്നു. എന്നാൽ, പിന്നീട് ഹൗസ് കണക്‌ഷൻ ഏർപ്പെടുത്തിയതോടെ കുടിവെള്ളം കിട്ടാക്കനിയായി. ചില സ്ഥലങ്ങളിൽ പൈപ്പ് ലൈൻ പൊട്ടിയതാണ് ഈ പ്രദേശത്തു കുടിവെള്ളം തടസപ്പെടാൻ കാരണം. പലതവണ പഞ്ചായത്ത്, വാട്ടർ അഥോറിറ്റി അധികൃതർക്കു പരാതി നൽകിയിട്ടും നടപടിയൊന്നുമുണ്ടായിട്ടില്ല. സ്ത്രീകൾ ഉൾപ്പെടെയുളളവർ കിലോമീറ്ററുകൾ അപ്പുറത്ത് ടിഎസ് കനാലിനു പടിഞ്ഞാറ് ഭാഗത്തുള്ള ഒരു വ്യക്തിയുടെ വീട്ടിൽനിന്നാണ് ഇവിടേക്കു വള്ളത്തിൽ വെള്ളം കൊണ്ടുവരുന്നത്. തോട്ടിലെ മലിനജലം കുളിക്കാനും മറ്റു വീട്ടാവശ്യങ്ങൾക്കും രണ്ടു മാസമായി വെള്ളമില്ല. മാലിന്യം നിറഞ്ഞ ഇല്ലിച്ചിറ തോട്ടിലെ വെള്ളം തുണി, പാത്രം എന്നിവ കഴുകാനും കുളിക്കാനും ഉപയോഗിക്കേണ്ട ഗതികേടിലാണ് നാട്ടുകാർ. കുടത്തിലും കലത്തിലുമൊക്കെ ഈ മലിനജലം വീട്ടമ്മമാർ തലയിലേന്തിയാണ് വീടുകളിലെത്തിക്കുന്നത്. ഒാണദിനത്തിലും കുടിവെള്ളത്തെക്കുറിച്ചാണ് ഇവരുടെ ആശങ്ക. മാസങ്ങളായി ഇത്രയും കുടുംബങ്ങൾ നരകയാതന അനുഭവിച്ചിട്ടും അധികൃതർ തിരിഞ്ഞു നോക്കുന്നില്ലെന്നാണ് ഇവർ പറയുന്നത്. കുടിക്കാനുള്ള വെള്ളമെങ്കിലും എത്തിച്ചുതരാൻ അധികാരികൾ കനിയണമെന്നാണ് ഇവരുടെ അപേക്ഷ.

അരൂര്‍-തുറവൂര്‍ ഉയരപ്പാത നിര്‍മാണം; കുരുക്ക് പരിഹരിക്കാന്‍ നടപടി വേണം: കെ.സി. വേണുഗോപാല്‍

തുറവൂർ: അരൂര്‍-തുറവൂര്‍ ഉയരപ്പാത നിര്‍മാണവുമായി ബന്ധപ്പെട്ട് അരൂര്‍ ജംഗ്ഷന്‍ മുതല്‍ തുറവൂർ വരെയുള്ള പ്രദേശങ്ങളിൽ അനുഭവപ്പെടുന്ന രൂക്ഷമായ ഗതാഗതക്കുരുക്ക് പരിഹരിക്കാന്‍ അടിയന്തര നടപടി സ്വീകരിക്കണമെന്ന് കെ.സി. വേണുഗോപാല്‍ എംപി. ഇക്കാര്യമാവശ്യപ്പെട്ട് ദേശീയപാത അഥോറിറ്റി ചെയർമാന് കത്തു നൽകിയ എംപി ജില്ലാ കളക്ടറോടും ജില്ലാ പോലീസ് മേധാവിയോടും പ്രശ്നത്തിൽ അടിയന്തരമായി ഇടപെടണമെന്ന് നിർദേശം നൽകി. ഓണത്തിരക്ക് കൂടിയായതോടെ അരൂര്‍ ക്ഷേത്രം, ബൈപാസ് കവല മുതല്‍ അരൂക്കുറ്റി, ചന്തിരൂര്‍ എന്നിവിടങ്ങളിലെത്താന്‍ രണ്ടുമണിക്കൂറോളം സമയമാണെടുക്കുന്നത്. അഞ്ചാമത്തെ റീച്ചായ അരൂര്‍ ക്ഷേത്രം കവല മുതല്‍ അരൂര്‍ ബൈപാസ് കവല വരെ കോണ്‍ക്രീറ്റ് ഗര്‍ഡറുകള്‍ സ്ഥാപിക്കുന്ന ജോലി നടക്കുകയാണ്. ലോഞ്ചിംഗ് ഗാന്‍ട്രി സ്ഥാപിക്കാന്‍ ഇരുവശങ്ങളിലും റെയിലുകള്‍ സ്ഥാപിച്ചിരിക്കുന്നതിനാല്‍ നാലുവരിപ്പാതയില്‍ ഇരുവശങ്ങളിലും റോഡിന്‍റെ വീതി കുറഞ്ഞതാണ് ഗതാഗതക്കുരുക്കിനു കാരണം.ആവശ്യത്തിന് വാഹനങ്ങള്‍ പാര്‍ക്ക് ചെയ്യാന്‍ സൗകര്യമില്ലാത്തതും പൊതുജനങ്ങളെ വലയ്ക്കുന്നുണ്ട്. ഓണത്തിരക്കുകള്‍ വര്‍ധിച്ചതോടെ അതിരൂക്ഷമായ ഗതാഗതക്കുരുക്കാണ്. സമാന്തര റോഡുകളിൽ കൂടി ഗതാഗതം തിരിച്ചുവിട്ട് യാത്രാദുരിതം പരിഹരിക്കുന്നതിന് നടപടി സ്വീകരിക്കണമെന്ന് ജില്ലാ ജില്ലാ കളക്ടറോടും ഗതാഗതക്കുരുക്കു പരിഹരിക്കുന്നതിന് ഗതാഗത പുനഃക്രമീകരണം ഉൾപ്പെടെയുള്ള അടിയന്തര നടപടികൾ സ്വീകരിക്കണമെന്ന് ജില്ലാ പോലീസ് മേധാവിയോടും എംപി ആവശ്യപ്പെട്ടു.

ഓട്ടിസം സെന്‍ററിൽ ഓണാഘോഷം

കായംകുളം: സമഗ്ര ശിക്ഷാ കേരള കായംകുളം ബിആർസിയുടെ ജില്ലാ ഓട്ടിസം സെന്‍ററിലെ ഓണാഘോഷം അഡ്വ. യു. പ്രതിഭ എംഎൽഎ ഉദ്ഘാടനം ചെയ്തു. നഗരസഭാ ചെയർപേഴ്സൺ പി. ശശികല അധ്യക്ഷയായി. ഭിന്നശേഷിയുള്ള കലാകാരന്മാരും കലാകാരികളും ഓണത്തപ്പൻ ചമഞ്ഞ് പുത്തനുടുപ്പുകൾ അണിഞ്ഞ് പൂവിളികളുമായി ഓണത്തെ വരവേൽക്കുന്നത് ഏവരുടെയും മനം നിറയ്ക്കുന്ന കാഴ്ചയായി. നഗരസഭാ ചെയർപേഴ്സൺ പി. ശശികല അധ്യക്ഷയായി. നഗരസഭ വൈസ് ചെയർമാൻ ജെ. ആദർശ് മുഖ്യപ്രഭാഷണം നടത്തി. വിദ്യാഭ്യാസ സ്ഥിരം സമിതി ചെയർപേഴ്സൺ ഷാമില അനിമോൻ ഓണസന്ദേശം നൽകി. ക്ഷേമകാര്യ സ്ഥിരം സമിതി ചെയർമാൻ എസ്. കേശുനാഥ്, ബിപിസി വി. ബിന്ദുമോൾ, ഗാന്ധിഭവൻ ആയാപറമ്പ് സെക്രട്ടറി മുഹമ്മദ് ഷമീർ, ചേതന എഫ്എം അസി. ഡയറക്ടർ ഫാ. ഫിലിപ്പ് ജമ്മത്ത് കളത്തിൽ, ബിആർസി സ്റ്റാഫ് സെക്രട്ടറി വി. അനിൽബോസ്, പ്രഥമാധ്യാപകരായ മായ, ഗോപീകൃഷ്ണൻ, ലെജുമോൾ, മുൻ ബിപിസി സീനത്ത്, ഡോ. ആർ. രാജേന്ദ്രൻ, സുധർമ രഘു, സ്വപ്ന പ്രദീപ് എന്നിവർ പ്രസംഗിച്ചു. ഭിന്നശേഷിക്കാരായ കുട്ടികൾക്ക് ഓണക്കിറ്റ് വിതരണവും നടത്തി. കുട്ടികളുടെയും അധ്യാപകരുടെയും രക്ഷാകർത്താക്കളുടെയും വിപുലമായ ഓണപരിപാടികളും നടന്നു.

കൂൺകൃഷിയിൽ നൂറുമേനി വിളവെടുപ്പുമായി കൃഷിമന്ത്രി

ചേർത്തല: കൂൺകൃഷിയിൽ നൂറുമേനി വിളവെടുത്ത് കൃഷിമന്ത്രി പി. പ്രസാദ്. മന്ത്രിയുടെ വീടിന്‍റെ മുൻവശം പ്രത്യേകം തയാറാക്കിയ ഷെഡിലാണ് കൂൺകൃഷി ചെയ്തത്. ചിപ്പി ഇനത്തിലുള്ള 500 ബഡ് ആണ് കൃഷി ചെയ്തത്. മികച്ച വിളവാണ് ലഭിച്ചത്. സംസ്ഥാനത്ത് കൂൺകൃഷി വ്യാപിപ്പിക്കാൻ കൂൺ ഗ്രാമങ്ങൾ ആരംഭിച്ചതായും കൂൺകൃഷി പ്രോത്സാഹിപ്പിക്കാൻ സർക്കാർ സബ്സിഡി നൽകുന്നതായും കൂണിൽനിന്ന് 100ലധികം മൂല്യവർധിത ഉത്പന്നങ്ങൾ ഉണ്ടാക്കി വിൽക്കാൻ എല്ലാ സഹായവും കർഷകർക്ക് ചെയ്യുന്നുണ്ടെന്നും മന്ത്രി പറഞ്ഞു. മന്ത്രിയുടെ വീട്ടിൽ ഉത്പാദിപ്പിക്കുന്ന കുൺ പ്രാദേശിക വിപണിയിലാണ് വിറ്റഴിക്കുന്നത്. വിളവെടുപ്പ് ചടങ്ങിൽ നഗരസഭാ ചെയർപേഴ്സൺ ഷേർളി ഭാർഗവൻ, ജില്ലാ പഞ്ചായത്ത് വൈസ് ചെയർമാൻ എൻ.എസ്. ശിവപ്രസാദ്, നഗരസഭാ വൈസ് ചെയർമാൻ ടി.എസ്. അജയകുമാർ, പഞ്ചായത്ത് പ്രസിഡന്‍റുമാരായ ഗീതാ കാർത്തികേയൻ, ജി. ശശികല, ഓമന ബാനർജി, ജയിംസ് ചിങ്കുതറ, നഗരസഭ സ്റ്റാൻഡിംഗ് കമ്മിറ്റി അധ്യക്ഷ ശോഭ ജോഷി, വയലാർ പഞ്ചായത്ത് വൈസ് പ്രസിഡന്‍റ് എം.ജി. നായർ, കുടുംബശ്രീമിഷൻ ഡയറക്ടർ ജില്ലാ കോ-ഓർഡിനേറ്റർ രഞ്ജിത്ത്, കെ.വി. ചന്ദ്രബാബു, എ.പി. പ്രകാശൻ എന്നിവർ പങ്കെടുത്തു.

എന്‍റെ ഓണം

തിരിക്കിന്‍റെ ദിനം എങ്കിലും ഈ തിരുവോണദിനം തിരക്കോടു തിരക്കാണ്. സിപിഐയുടെ സംസ്ഥാന സമ്മേളനം ആലപ്പുഴയില്‍ എട്ടുമുതല്‍ 12 വരെ നടക്കും. സ്വാഗതസംഘം ചെയര്‍മാന്‍ കൂടിയായതിനാൽ തിരക്കാണ്. എങ്കിലും ഇന്നു തിരുവനന്തപുരത്തെത്തി കുടുംബാംഗങ്ങളോടൊപ്പം അല്പനേരം ചെലവഴിക്കും. വീണ്ടും സംസ്ഥാന സമ്മേളനവുമായി ബന്ധപ്പെട്ടുള്ള തിരക്കിൽ മുഴുകും. പി. പ്രസാദ് (മന്ത്രി തിരക്കുള്ള ദിനം രാവിലെ സന്ദർശകരെ സ്വീകരിക്കും. തുടർന്ന് വിവിധ സംഘടനകളുടെയും ക്ലബുകളുടെയും ഓണാഘോഷം. ഉച്ചയോടെ വീട്ടിൽ തിരിച്ചെത്തും. അമ്മയോടും കുടുംബത്തോടും ഒപ്പം ഓണസദ്യ. ഉച്ചയ്ക്കു ശേഷം ഉദ്ഘാടന പരിപാടികളുണ്ട്. പതിവിലേറെ തിരക്കുള്ള തിരുവോണദിനം. സജി ചെറിയാൻ (മന്ത്രി) വലിയ ആഘോഷങ്ങളില്ല എംഎൽഎ ആകുന്നതിനു മുന്പു തന്നെ ഒാണക്കാലം പാട്ടുകാരി എന്ന നിലയിൽ തിരിക്കുകളുടെ കാലമാണ്. സഹോദരൻ ജോസഫ് പീറ്റർ കഴിഞ്ഞ മാസമാണ് മരിച്ചത്. അതിനാൽ ഈ വർഷം വലിയ ആഘോഷങ്ങൾ ഇല്ല. പതിവുപോലെ ഭർത്താവ് ജോർജ് ജോസഫിന്‍റെ തൈക്കലെ കാക്കരി വീട്ടിൽ ഒത്തുചേരും. അത്ര മാത്രം. ദലീമ ജോജോ എംഎൽഎ, അരൂർ അമ്മമാർക്കൊപ്പം എല്ലാവർഷത്തെയും പോലെ ഇത്തവണയും ഓണം എന്‍റെ അമ്മമ്മാർക്കൊപ്പമാണെന്ന് കുടുംബവീടായ കല്ലിമേൽ വീട്ടിലെ സ്വന്തം അമ്മയ്ക്കും ഭാര്യ സ്നേഹയുടെ മാതാവിനും ഒപ്പം തിരുവോണം ആഘോഷിക്കാനാണ് ആഗ്രഹിക്കുന്നത്. സ്വന്തം അമ്മയെ പോലെ തന്നെയാണ് ഭാര്യ മാതാവിനെയും കാണുന്നതെന്നും അതുകൊണ്ടാണ് ഓണം അമ്മമാർക്കൊപ്പം എന്നു പറയുന്നതെന്നും എംഎൽഎ പറഞ്ഞു. പിന്നെ മൂത്തമകൾ പീലിക്കൊപ്പം ഗ്രാംഷി മകൻ കൂടി ഇത്തവണ ഓണാഘോഷത്തിനുള്ള സന്തോഷവും എംഎൽഎ പങ്കുവച്ചു. എം.എസ്. അരുൺകുമാർ മാവേലിക്കര എംഎൽഎ പ്രീസ്റ്റ്ഹോമിൽ നല്ലോർമകളുടെ ദിനമാണ് ഒാണം. മുതിർന്ന തലമുറയാണ് ആ ഒാർമകൾ സമ്മാനിച്ചിട്ടുള്ളത്. തിരുവോണ ദിവസം രാവിലെ ചങ്ങനാശേരിയിലെ മുതിർന്ന വൈദികരോടൊപ്പം പ്രീസ്റ്റ് ഹോമിലായിരിക്കും. ഉച്ചയ്ക്കു രൂപതാ ആസ്ഥാനത്തു നടക്കുന്ന ലളിതമായ ഓണാഘോഷത്തിലും പങ്കെടുക്കും. മാർ തോമസ് തറയിൽ (ആർച്ച്ബിഷപ്, ചങ്ങനാശേരി) കൊച്ചി ബിഷപ് ഹൗസിൽ ഓണദിവസമായ ഇന്ന് കൊച്ചി ബിഷപ് ഹൗസിലായിരിക്കും ഓണം ആഘോഷിക്കുക. പതിവ് വിശുദ്ധ കുർബാനയും പ്രാർഥനകളും കൊച്ചി ബിഷപ് ഹൗസ് ചാപ്പലിലും മറ്റും നടക്കും. ചില അടിയന്തര മീറ്റിംഗുകളുമായി ബന്ധപ്പെട്ടുള്ള തിരക്കുള്ളതിനാൽ വീട്ടിൽ പോകുന്നില്ല. ഓണസദ്യയും ഓണാഘോഷവും ലളിതമായി ബിഷപ് ഹൗസിൽ നടക്കും. സാഹോദര്യത്തിന്‍റെയും സമത്വത്തിന്‍റെയും നല്ലനാളുകൾ ഓർമപ്പെടുത്തുന്ന ഓണത്തിന്‍റെ ആശംസകളും വായനക്കാർക്കു നേരുന്നു. ഡോ. ജയിംസ് റാഫേൽ ആനാപറമ്പിൽ (ബിഷപ്, ആലപ്പുഴ) ഗാന്ധിഭവനിൽ ജനപ്രതിനിധി ആയ ശേഷമാണ് ഓണം കൂടുതലായി ആഘോഷിച്ചത്. ഈ വർഷവും തിരുവേ ണത്തിനു പുന്നപ്രയിലെ ഗാന്ധിഭവനിലെ അന്തേവാസികളുടെ കൂടെയാണ് ഓണവും സദ്യയും. - എ.എം. ആരിഫ് (മുൻ എംപി) പൊതുപരിപാടിയില്ല ഇന്ന് ഒരു പൊതു പരിപാടിയിലും പങ്കെടുക്കില്ല. രാവിലെ മുതൽ ഫോണിൽ വിളിച്ചും മെസേജ് അയച്ചും എല്ലാവർക്കും ആശംസ നേരും. ഭാര്യ ആലീസ് മാത്രമെ വീട്ടിലുള്ളു. അതിനാൽ ഞങ്ങൾ ഒരുമിച്ച് ഓണസദ്യ കഴിക്കും. ജേക്കബ് തോമസ് അരികുപുറം (കേരള കോൺഗ്രസ്-എം നേതാവ്) വിശേഷപ്പെട്ട ഒാണം നബിദിനവും തിരുവാണവും ഒന്നിച്ചുവന്നതിന്‍റെ ഇരട്ടി സന്തോഷം. രാവിലെ മാന്നാറിലും തുടർന്ന് നിരണത്തുമായി മസ്ജിദിലെ പ്രാർഥനയിൽ പങ്കുചേരും. തുടർന്നു വീട്ടിൽ അമ്മയോടും ഭാര്യയോടുമൊപ്പം ഓണസദ്യ. ഉച്ചയ്ക്കു ശേഷം അടുത്ത സുഹൃത്തുകളുടെ വീടു സന്ദർശിക്കും. ക്ലബ്ബുകളുടെ ഒാണപരിപാടികളിൽ പങ്കെടുക്കും. മാന്നാർ അബ്ദു ൾ ലത്തീഫ് (കെപിസിസി സെക്രട്ടറി) പൂക്കളം കാണണം വേലിയാകുളത്തെ വലിയ പൂക്കളമാണ് എന്നും മനസിലുള്ളത്. തിരുവോണനാളിൽ വീട്ടിൽ ഉണ്ടെങ്കിൽ ഉറപ്പായും ആ പൂക്കളം കാണാൻ പോകും. പൂക്കളത്തിലെ പല നിറങ്ങളുടെ കൂടീച്ചേരൽ പോലെ ഓണത്തിന്‍റെ കൂടിച്ചേരലിന്‍റെ സൗന്ദര്യവും. ഷാഹി കബീർ (തിരക്കഥാകൃത്ത്, സിനിമാ സംവിധായകൻ) എത്ര തിരക്കുണ്ടെങ്കിലും വീട്ടിൽ എത്ര തിരക്കുണ്ടെങ്കിലും വീട്ടിലെത്തുന്ന ദിനം. നമുക്ക് മാത്രമായി കാത്തുവച്ചിരിക്കുന്ന ചില സൗഹ്യദങ്ങളുണ്ട്. എന്തെല്ലാം പരിപാടികൾ ഉണ്ടെങ്കിലും ഓണം വീട്ടുകാരോടൊപ്പമാണ്, നാട്ടിലെ നിഷ്കളങ്ക സൗഹൃദങ്ങളോടൊപ്പമാണ്. ഉബൈനി (സിനിമാ സംവിധായകൻ) കുടുംബത്തോടൊപ്പം ബാല്യകാലത്തെ ഓണം തിരിച്ചു കിട്ടുന്നില്ലല്ലോ എന്ന സങ്കടമുണ്ട്. ചേർത്തല പാണാവള്ളി ഷാലിമാർ വീട്ടിൽ മക്കളും മരുമക്കളും പേരക്കുട്ടികളുമായി സന്തോഷത്തോടെ ഈ ഓണവും ആഘോഷങ്ങളും. പൂച്ചാക്കൽ ഷാഹുൽ (സിനിമ,നാടക ഗാനരചയിതാവ്) ഒാണം ആശരണരോടൊപ്പം എല്ലാ വർഷത്തെപ്പോലെ എന്‍റെയും കുടുംബത്തിന്‍റെയും ഒാണം ശാന്തിഭവനിലെ അശരണരായ മനുഷ്യരോടൊപ്പമാണ്. ഒാണദിനത്തിൽ അവർക്ക് അല്പം സന്തോഷം കൂടുതൽ കൊടുക്കാൻ കഴിഞ്ഞാൽ അതാണ് ഈ ഒാണത്ിതന്‍റെ സംതൃപ്തി. മാത്യു ആൽബിൻ (ട്രസ്റ്റി ശാന്തിഭവൻ പുന്നപ്ര) ഓണം പലർക്കും പലതാണ്. ചിലർക്ക് സമൃദ്ധി, മറ്റു ചിലർക്ക് കണ്ണീർ. എല്ലാവരുടെയും വികാരങ്ങളോടും ചേർത്തുവച്ചാണ് എന്‍റെ ഒാണ ആഘോഷം. ശർക്കര വരട്ടി പോലെ മധുരം മാത്രം നല്കി അലിഞ്ഞു പോവുന്ന ഒരു മധുരമിഠായിയാണ് ഒാണം ഒാർമകൾ.ച ബിനു ദാമോദരൻ (സംസ്ഥാന ഡോക്യൂമെന്‍ററി പുരസ്‌കാര ജേതാവ്) സമത്വവും സഹോദര്യവും സമൃദ്ധിയും നിറഞ്ഞ സുന്ദരമായ ഒാണദിനത്തിൽ എല്ലാ വർഷത്തെയും പോലെ കുടുംബത്തിനൊപ്പം കൂടുതൽ സമയം ചെലവഴിക്കും. പ്രിയപ്പെട്ടവർക്ക് ആശംസകൾ നേരും. ജെയ്‌സപ്പൻ മത്തായി (പൊതുപ്രവർത്തകൻ)

നാടും നഗരവും ഉത്രാടപ്പാച്ചിലിൽ

ആലപ്പുഴ: ഉത്രാടപ്പാച്ചിലിന്‍റെ തിരക്കിലമർന്നു നാടും നഗരവും. ഇന്നു വീഥികൾ തിങ്ങി നിറയും. വിപണികളിൽ തിരക്കേറും. സദ്യയ്ക്കുള്ള സാധനങ്ങൾ വാങ്ങാനും ഓണക്കോടി എടുക്കാനും പൂക്കൾ വാങ്ങാനും ആളുകൾ തിരക്കിട്ടിറങ്ങുന്ന ദിനം. ദൂരപ്രദേശങ്ങളിൽ ജോലി ചെയ്യുന്നവർ വീടുകളിലേക്കു മടങ്ങാൻ തിരക്കുകൂട്ടുന്ന ദിനം. ഉത്രാടപ്പാച്ചിൽത്തന്നെ ഒാണത്തിന്‍റെ കൗതുകകരമായ കാഴ്ചകളിലൊന്നാണ്. വീട്ടുമുറ്റങ്ങളിലെ പൂക്കളങ്ങൾക്കു സമാപനം കുറിച്ചു നാളെ പുലർച്ചെ ഓണത്തപ്പനെ വരവേൽക്കാൻ കുരുത്തോലയും തുമ്പപ്പൂവും തെങ്ങിൻ പൂക്കുലയും വാഴയിലകളും ഓണത്തപ്പന്മാരുമെല്ലാം ലഭിക്കുന്ന ഗൃഹാതുര ഓണവിപണിയാകും ഇന്ന്. ചട്ടിയും കലങ്ങളും നാഴിയും ഇടങ്ങഴിയും പറകളും പീഠങ്ങളും എല്ലാം ഈ കച്ചവടക്കാഴ്ചയിലെ ദൃശ്യങ്ങളാകും. നിറയെ വിരിഞ്ഞ് പൂവിപണി കഴിഞ്ഞ നാലു വർഷത്തിൽനിന്നു വ്യത്യസ്തമായി പൂവിപണി ഇത്തവണ വിപുലം. മഴയെപ്പേടിച്ചു പലേടത്തും ഷെഡുകൾ കെട്ടിയാണ് കച്ചവടം. ഇന്നലെ പൂവിപണിയിൽ നല്ല തിരക്കായിരുന്നു. ജമന്തി കിലോഗ്രാം 150 രൂപ മുതൽ മുകളിലേക്കായിരുന്നു വില. എല്ലാ പൂക്കളും കൂടിയുള്ള പ്രത്യേക കിറ്റും വിൽക്കുന്നുണ്ട്, വില 100 രൂപ. ചുവന്ന അരളിക്കാണു ജനപ്രീതിയേറെ. വീടുകളിൽ പൂക്കളം ഒരുക്കാൻ പൂ വാങ്ങുന്നവരുടെ എണ്ണം നന്നേ കുറഞ്ഞു. കോളജുകൾ, സ്കൂളുകൾ, സ്ഥാപനങ്ങൾ, സംഘടനകൾ എന്നിവ പൂക്കളമൊരുക്കാൻ വലിയ തോതിൽ പൂ വാങ്ങുന്നതാണു വിപണിയെ ചലിപ്പിക്കുന്നതെന്നു വ്യാപാരികൾ പറയുന്നു. പൂക്കൾ ലാഭത്തിൽ വാങ്ങാനായി തോവാളയിലേക്കു നേരിട്ടു പോകുന്ന കച്ചവടക്കാരുമുണ്ട്. വഴിയോരക്കച്ചവടവും തകൃതി നഗരത്തിലും പുറത്തുമുള്ള വ്യാപാര കേന്ദ്രങ്ങളിൽ നല്ല തിരക്കാണ് അനുഭവപ്പെടുന്നത്. മുല്ലയ്ക്കൽ, കലവൂർ മാർക്കറ്റുകൾ ഇന്ന് ഉത്രാടത്തിരക്കിലമരും. പ്രധാന വ്യാപാര സ്ഥാപനങ്ങൾക്ക് പുറമേ വഴിയോരക്കച്ചവടവും തകൃതിയാണ്. ഇന്നലെ വൈകുന്നേരം മാനം കറുത്തത് വ്യാപാരികൾക്കും മറ്റും തെല്ല് ആശങ്ക ഉയർത്തിയിട്ടുണ്ട്. മാളുകൾ ഉത്രാടപ്പാച്ചിലിന്‍റെ ഒരു കേന്ദ്രമാകുന്ന പുതിയ പ്രവണതയും ഇപ്പോൾ കണ്ടുവരുന്നുണ്ട്. ജില്ലയിലെ പ്രധാന വിപണിയായ മുല്ലയ്ക്കലിൽ വൻതോതിൽ പച്ചക്കറികളും പൂക്കളും എത്തിക്കഴിഞ്ഞു. സദ്യയ്ക്കുള്ള ഇലയ്ക്കും മാർക്കറ്റിൽ ആവശ്യക്കാരേറെ. പണ്ട് നാട്ടിൻപുറങ്ങളിൽ ധാരാളമായി വാഴക്കൃഷി ഉണ്ടായിരുന്നതിനാൽ വാഴയില സുലഭമായിരുന്നു. എന്നാൽ, ഇന്ന് ഇവയും വരവിനങ്ങളുടെ പട്ടികയിലായി. കനത്ത സുരക്ഷ തിരക്കു കണക്കിലെടുത്തു കനത്ത സുരക്ഷയും നഗരത്തിൽ ഒരുക്കിയിട്ടുണ്ട്. തിരക്കിനിടയിൽ ശ്രദ്ധിക്കേണ്ട കാര്യങ്ങളെപ്പറ്റി പ്രധാന നഗരങ്ങളിലെല്ലാം പോലീസ് വ്യാപാരികളുടെ സഹായത്തോടെ മൈക്ക് അനൗൺസ്‌മെന്‍റ് നടത്തുന്നുണ്ട്. ഓണക്കിറ്റ് വിതരണം ആലപ്പുഴ: റോട്ടറി ക്ലബ് ഓഫ് ആലപ്പി ഈസ്റ്റിന്‍റെയും ആലപ്പുഴ നോർത്ത് പോലീസ് സ്റ്റേഷന്‍റെയും സംയുക്താഭിമുഖ്യത്തിൽ കിടപ്പുരോഗികൾക്കും ഭിന്നശേഷിക്കാർക്കും ഓണക്കിറ്റുകൾ വിതരണം ചെയ്തു. കിടപ്പുരോഗികൾക്ക് വീടുകളിൽ കൊണ്ടുപോയാണ് നൽകിയത്. ആലപ്പുഴ നർക്കോട്ടിക് സെൽ ഡിവൈഎസ്പി ബി. പങ്കജാക്ഷൻ ഉദ്ഘാടനം ചെയ്തു. റോട്ടറി ക്ലബ്ബ് ഓഫ് ആലപ്പി ഈസ്റ്റ് പ്രസിഡന്‍റ് ജെ. വെങ്കിടാചലം അധ്യക്ഷത വഹിച്ചു. നോർത്ത് പോലീസ് സ്റ്റേഷൻ എസ്എച്ച്ഒ എം.കെ. രാജേഷ് മുഖ്യപ്രഭാഷണം നടത്തി. റോട്ടറി ഡിസ്ട്രിക്ട് അഡ്വൈസർ ബേബി കുമാരൻ, ഇന്നർ വീൽ ക്ലബ് പ്രസിഡന്‍റ് ഡോ. സിന്ധു ആസാദ് ബാബു, റോട്ടറി ക്ലബ് ഡയറക്ടർമാരായ പി.വി. മാത്യു, എസ്. അനിൽകുമാർ, ജോസഫ് ആന്ധ്ര പാർ, ഹരൻ ബാബു, സോളമൻ വർഗീസ്, തുടങ്ങിയവർ പ്രസംഗിച്ചു. തകൃതാളം അമ്പലപ്പുഴ: നാഷണൽ ഹെൽത്ത് മിഷൻ (എൻഎച്ച്എം) എംപ്ലോയീസ് യൂണിയൻ തകൃതാളം എന്ന പേരിൽ സംഘടിപ്പിച്ച ഓണാഘോഷം എച്ച്. സലാം എം എൽ എ ഉദ്ഘാടനം ചെയ്തു. യൂണിയൻ ജില്ലാ പ്രസിഡന്‍റ് വീണാ വർഗീസ് അധ്യക്ഷയായി. സഹൃദയിൽ ഓണാഘോഷം ആലപ്പുഴ: നന്മയുടെ സന്ദേശം നൽകി സഹൃദയ ആശുപത്രിയിൽ ഓണാഘോഷം നടത്തി. അശരണരായവർക്ക് അന്നമായി മാറുന്ന രീതിയിൽ അരിയും പയർവർഗങ്ങളും പലവ്യഞ്ജനങ്ങളും കൊണ്ട് അലങ്കരിച്ച അത്തപ്പൂക്കള മത്സരമായിരുന്നു സഹൃദയ കുടുംബം ക്രമീകരിച്ചിരുന്നത്. ഓണത്തിന്‍റെ ഓർമകൾ മനസിൽ സൂക്ഷിക്കാൻ ഒരുമയുടെ ഓണപ്പൂക്കളം സ്നേഹത്തിന്‍റെ കൈത്താങ്ങായി മാറുകയും ചെയ്തു.

മത്സ്യബന്ധനത്തിനിടെ വള്ളത്തിന് തീപിടിച്ചു ; അപകടം പാചകവാതകം ചോർന്ന്

ഹരിപ്പാട്: മത്സ്യബന്ധനത്തിനിടെ പാചകവാതകം ചോർന്ന് വള്ളത്തിന് തീപിടിച്ചു. ആറാട്ടുപുഴ കള്ളിക്കാട് വലിയപറമ്പിൽ രാജുവിന്‍റെ ഉടമസ്ഥതയിലുള്ള ഭാഗ്യനക്ഷത്രം വള്ളത്തിലാണ് തീപിടിത്തമുണ്ടായത്. ഇന്നലെ രാവിലെ ഏഴരയോടെ കായംകുളം ഹാർബറിന് പടിഞ്ഞാറ് കടലിൽ വച്ചായിരുന്നു അപകടം. സിലിണ്ടർ അടുപ്പുമായി ബന്ധിപ്പിക്കുന്ന പൈപ്പിലാണ് തീ പിടിച്ചത്. കാറ്റുള്ളതിനാൽ പെട്ടെന്ന് തന്നെ ആളിപ്പടർന്നു. സ്രാങ്ക് ഇരിക്കുന്ന ക്യാബിനുള്ളിലേക്കും തീ പടർന്നതോടെ തൊഴിലാളികൾ പരിഭ്രാന്തരായി. വെള്ളം പമ്പ് ചെയ്‌തെങ്കിലും അണയ്ക്കാൻ കഴിഞ്ഞില്ല. വള്ളത്തിൽ ഉണ്ടായിരുന്ന ഓയിലുകൾക്കും തീ പിടിച്ചതോടെ കത്തലിന്‍റെ വ്യാപ്തി കൂടി. അന്തരീക്ഷമാകെ കറുത്ത പുകനിറഞ്ഞു. സിലിണ്ടറിന്‍റെ അടുത്തെത്താൻ കഴിയാത്ത സ്ഥിതിയായിരുന്നു. ഒടുവിൽ ഉടമ രാജു മീൻ നിറച്ച കുട്ടകൾ വള്ളത്തിൽനിന്നു കരയിലേക്ക് ഉയർത്താൻ ഉപയോഗിക്കുന്ന കൊളുത്തുള്ള നീളമുളള കമ്പി കൊണ്ട് സിലിണ്ടർ വലിച്ചുമാറ്റി ഓഫ് ചെയ്താണ് തീ നിയന്ത്രണവിധേയമാക്കിയത്. വയർലെസ് സെറ്റ്, ജിപിഎസ് സംവിധാനം, എക്കോ സൗണ്ടർ, കാമറ തുടങ്ങിയ ഉപകരണങ്ങൾ കത്തിനശിച്ചു. വള്ളത്തിനും വലയ്ക്കും കേടുപാടുണ്ടായി. മൂന്നുലക്ഷം രൂപയുടെ നഷ്ടം കണക്കാക്കുന്നു. 45 തൊഴിലാളികളാണ് വള്ളത്തിൽ ഉണ്ടായിരുന്നത്.

അംഗപരിമിതന്‍ പെട്രോളൊഴിച്ച് തീകൊളുത്തി മരിച്ചു

ചേർത്തല: അവശനിലയിലായിരുന്ന അംഗപരിമിതന്‍ പെട്രോള്‍ ഒഴിച്ച് സ്വയം തീകൊളുത്തി മരിച്ചു. തിരുവനന്തപുരത്തു നിന്നും ചേര്‍ത്തലയിലെത്തി താമസിക്കുന്ന ഷാജി (51) ആണ് മരിച്ചത്. രണ്ടിന് രാത്രി എട്ടോടെ പട്ടണക്കാട് പഞ്ചായത്ത് എട്ടാം വാര്‍ഡ് പുതിയകാവ് താമരശേരി ചിപ്പിയുടെ വീടിനുസമീപം എത്തിയ ഷാജി കൈയിലുണ്ടായിരുന്ന പെട്രോളൊഴിച്ച് സ്വയം തീകൊളുത്തുകയായിരുന്നു. ഉടന്‍തന്നെ പ്രദേശവാസികള്‍ ചേര്‍ന്ന് ഇയാളെ വണ്ടാനം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചെങ്കിലും മൂന്നിന് രാവിലെ ആറോടെ മരിച്ചു. നവകേരള സദസിൽ കോട്ടയത്ത് ഷാജി ഡ്രൈവറായി ജോലിക്ക് പോയപ്പോൾ രാത്രിയിൽ ഉറങ്ങിയ സ്ഥലത്തുവച്ച് വലതുകാലിൽ എലി കടിക്കുകയും മുറിവ് വ്രണം ആവുകയും തുടർന്ന് കഴിഞ്ഞ ജൂണില്‍ കോട്ടയം മെഡിക്കൽ കോളജിൽ മുട്ടനുമുകളിൽ വച്ച് കാലു മുറിക്കുകയും ചെയ്തു. ചിപ്പിയുടെ മാതാവ് കോട്ടയം മെഡിക്കല്‍ കോളജ് ആശുപത്രിയില്‍വച്ചാണ് ഷാജിയെ പരിചയപ്പെടുകയും ചേര്‍ത്തലയില്‍ വാടക വീട് ശരിയാക്കി കൊടുക്കുകയും ചെയ്തത്. പിന്നീട് വാടകവീട് വെള്ളക്കെട്ടിലായതിനെത്തുടർന്ന് ഷാജി നഗരത്തിലെ വുഡ്‌ലാൻഡ് ലോഡ്ജിലേക്ക് താമസം മാറ്റി. അംഗപരിമിതന്‍ വരുമാനമില്ലാതെ ലോഡ്ജില്‍ കിടക്കുന്ന വിവരം വാര്‍ത്തയായപ്പോള്‍ മന്ത്രി പി. പ്രസാദ് ഇടപെടുകയും തിരുവനന്തപുരം ഗാന്ധിഭവന്‍ സംരക്ഷണം ഏറ്റെടുക്കുകയും ചെയ്തു. തുടര്‍ ചികിത്സയ്ക്കായി തിരുവനന്തപുരം ജനറൽ ആശുപത്രിയിലേക്ക് മാറ്റി. എന്നാല്‍, ആശുപത്രിയുമായി പൊരുത്തപ്പെട്ട് പോകാൻ കഴിയാതെ വന്നപ്പോൾ ലീഗൽ സർവീസ് അഥോറിറ്റിയുടെ പ്രത്യേക അനുവാദം വാങ്ങിയാണ് പട്ടണക്കാട് വീട്ടിലേക്ക് വന്നതെന്ന് പറയുന്നു. പട്ടണക്കാട് പോലീസ് കേസെടുത്തു.

സ്പിന്നിംഗ് മില്ലിൽ ഓണാഘോഷം

കായംകുളം: കരീലക്കുളങ്ങര സഹകരണ സ്പിന്നിംഗ് മില്ലിൽ നടന്ന ഓണാഘോഷം ‘ആരവം 2025’ യു. പ്രതിഭ എംഎൽഎ ഉദ്ഘാടനം ചെയ്തു. സ്പിന്നിംഗ് മിൽ ചെയർമാൻ എ. മഹേന്ദ്രൻ അധ്യക്ഷനായി. മുതുകുളം ബ്ലോക്ക് പഞ്ചായത്ത് പ്രസിഡന്‍റ് ഡി. അംബുജാക്ഷി, പത്തിയൂർ പഞ്ചായത്ത് പ്രസിഡന്‍റ് എൽ. ഉഷ, ബ്ലോക്ക് ആരോഗ്യ- വിദ്യാഭ്യാസ സ്ഥിരം സമിതി ചെയർപേഴ്സൺ മണി വിശ്വനാഥ്, മാനേജിംഗ് ഡയറക്ടർ പി.എസ്. ശ്രീകുമാർ, ഡെപ്യൂട്ടി മാനേജർ ജെ. ജയരാജ്, ആർ. ബിജു, ആർ. രാജീവ്, എം. ആശ എന്നിവർ പ്രസംഗിച്ചു.

വിശുദ്ധ മദർ തെരേസാ കാരുണ്യത്തിന്‍റെ മുഖം: റവ.ഡോ. ടോം പുത്തൻകളം

കുട്ടനാട്: മറ്റുള്ളവർക്ക് നന്മ ചെയ്തും കാരുണ്യം കാട്ടിയും ഓണസന്ദേശം തന്‍റെ ജീവിതത്തിൽ പ്രാവർത്തികമാക്കിയ കാരുണ്യത്തിന്‍റെ മുഖമായിരുന്നു വിശുദ്ധ മദർ തെരേസയെന്ന് പുളിങ്കുന്ന് സെന്‍റ് മേരീസ് ഫൊറോന പള്ളി വികാരി റവ.ഡോ. ടോം പുത്തൻകളം. നമുക്ക് മറ്റുള്ളവരെ സഹായിക്കാൻ ഒരു ആഗ്രഹമുണ്ടായാൽ ഈ പ്രപഞ്ചം വരെ നമ്മുടെ കൂടെ നിൽക്കുമെന്നും ഫാ. ടോം പുത്തൻകളം ഓണസന്ദേശത്തിൽ പറഞ്ഞു. കുട്ടനാട് വൈഎംസിഎ പുളിങ്കുന്ന് താലൂക്ക് ആശുപത്രിയിൽ നടത്തിയ വിശുദ്ധ മദർ തെരേസാ അനുസ്മരണവും ഓണാഘോഷ പരിപാടികളുടെ ഉദ്ഘാടനവും നടത്തി പ്രസംഗിക്കുകയായിരുന്നു അദ്ദേഹം. വൈഎംസിഎ പ്രസിഡന്‍റ് ടോമിച്ചൻ മേപ്പുറം അധ്യക്ഷത വഹിച്ചു. ആശുപത്രി സുപ്രണ്ട് ഡോ. വിനോദ്.വി, മുഖ്യപ്രഭാഷണം നടത്തി. രക്ഷാധികാരി ജോസ് ജോൺ വെങ്ങാന്തറ, ജനറൽ സെക്രട്ടറി ഔസേപ്പച്ചൻ ചെറുകാട്, വൈസ് പ്രസിഡന്‍റുമാരായ ജെ. കുര്യാക്കോസ്, ബാബു വടക്കേകളം, പുളിങ്കുന്ന് പഞ്ചായത്തംഗം അമ്പിളി ജോസ്, ടോമിച്ചൻ ചേന്നാട്ടുശേരി, സുനിൽ കുര്യാളശേരി, ജിജോ നെല്ലുവേലി തുടങ്ങിയവർ പ്രസംഗിച്ചു.

വിശുദ്ധ മദര്‍ തെരേസ മനുഷ്യസ്‌നേഹത്തിന്‍റെ ഉദാത്ത മാതൃക: ഫ്രാന്‍സിസ് ജോര്‍ജ്

ചങ്ങനാശേരി: വിശുദ്ധ മദര്‍ തെരേസ ജീവിച്ചിരുന്നപ്പോള്‍ മനുഷ്യസ്‌നേഹത്തിന്‍റെ ഉദാത്തമാതൃക കാണിച്ചുതന്ന വ്യക്തിത്വമായിരുന്നെന്ന് ഫ്രാന്‍സിസ് ജോര്‍ജ് എംപി. കുഷ്ഠരോഗികള്‍ക്കും അനാഥര്‍ക്കും താങ്ങായി നിന്ന മദര്‍ തെരേസയുടെ മാതൃക പിന്‍ചെല്ലാന്‍ എല്ലാവര്‍ക്കും കഴിയണമെന്നും ഫാന്‍സിസ് ജോര്‍ജ് എംപി പറഞ്ഞു. കത്തോലിക്കാ കോണ്‍ഗ്രസ് ചങ്ങനാശേരി ഫൊറോന സമിതിയുടെ ആഭിമുഖ്യത്തില്‍ നടത്തിയ വിശുദ്ധ മദര്‍ തെരേസായുടെ 28-ാം ചരമവാര്‍ഷികാചരണം മാര്‍ത്തോമ വിദ്യാനികേതന്‍ ഹാളില്‍ ഉദ്ഘാടനം ചെയ്തു സംസാരിക്കുകയായിരുന്നു എംപി. ഫൊറോന പ്രസിഡന്‍റ് കുഞ്ഞുമോന്‍ തൂമ്പുങ്കല്‍ അധ്യക്ഷത വഹിച്ചു. കത്തോലിക്കാ കോണ്‍ഗ്രസ് ഫൊറോന ഡയറക്ടര്‍ ഫാ. ലിബിന്‍ തുണ്ടുകളം അനുഗ്രഹ പ്രഭാഷണം നടത്തി. വി.ജെ. ലാലി മുഖ്യപ്രഭാഷണം നടത്തി. ഗ്ലോബല്‍ സെക്രട്ടറി ടോമിച്ചന്‍ അയ്യരുകുളങ്ങര അതിരൂപത സെക്രട്ടറിമാരായ സൈബി അക്കര, അതിരൂപത വൈസ് പ്രസിഡന്‍റ് സി.ടി. തോമസ് കാച്ചാങ്കോട്, കെ.എസ്. ആന്‍റണി കരിമറ്റം, ജനറല്‍ കണ്‍വീനര്‍ ബേബിച്ചന്‍ പുത്തന്‍പറമ്പില്‍, ജനറല്‍ സെക്രട്ടറി ഔസേപ്പച്ചന്‍ ചെറുകാട്, ട്രഷറര്‍ കെ.പി മാത്യൂ, ഷാജി മരങ്ങാട് തുടങ്ങിയവര്‍ പ്രസംഗിച്ചു. ചടങ്ങില്‍ ബേബിച്ചന്‍ പുത്തന്‍പറമ്പില്‍ (ജീവകാരുണ്യം), കാതറൈന്‍ കുര്യാക്കോസ് (അടുക്കളത്തോട്ടം), പാപ്പച്ചന്‍ നേര്യംപറമ്പില്‍ (മികച്ച കര്‍ഷകന്‍) ജയിംസ് കിടങ്ങറ (സിനിമ- സീരിയല്‍ ), ജേക്കബ് ജെ. പെരുമ്പ്ര (മികച്ച കര്‍ഷകന്‍, പാടശേഖരം), കെ.പി. മാത്യു (സഭാ രംഗം), ലാലിമ്മ ടോമി (മികച്ച ജനപ്രതിനിധി), ലിസി ജോസ് (സാമുദായിക-രാഷ്‌ട്രീയ രംഗം) എന്നിവരെ മദര്‍ തെരേസാ പുരസ്‌കാരങ്ങള്‍ നല്‍കി ഫ്രാന്‍സ് ജോര്‍ജ് എംപി സമ്മാനിച്ചു.

ഓണം വിപണി ഉദ്‌ഘാടനത്തിന് അപ്രതീക്ഷിത അതിഥിയായി മന്ത്രി

മാങ്കാംകുഴി: തഴക്കര പഞ്ചായത്ത് കൃഷിഭവന്‍റെ നേതൃത്വത്തിൽ ആരംഭിച്ച ഓണസമൃദ്ധി പഴം-പച്ചക്കറി വിപണിയുടെ ഉദ്‌ഘാടനത്തിന് അപ്രതീക്ഷിത അതിഥിയായി മന്ത്രി ജെ. ചിഞ്ചുറാണി എത്തി. കോട്ടയത്ത് ഒരു പരിപാടിക്കായി തഴക്കരയിലൂടെ കടന്നുപോയതായിരുന്നു മന്ത്രി. എം.എസ്. അരുൺകുമാർ എംഎൽഎയുടെ അഭ്യർഥനയെത്തുടർന്ന് മന്ത്രി വാഹനം നിർത്തി തഴക്കര കൃഷിഭവന്‍റെ പഴം-പച്ചക്കറി വിപണിയുടെ ഉദ്‌ഘാടനം കൊച്ചാലുംമൂട്ടിൽ നിർവഹിച്ചു. കർഷകരിൽനിന്ന് പത്തു ശതമാനം വില കൂട്ടി ശേഖരിക്കുന്ന പച്ചക്കറി വിപണി വിലയേക്കാൾ മുപ്പതു ശതമാനം വില കുറച്ചാണ് വിറ്റഴിക്കുന്നതെന്നും കർഷകർക്ക് നല്ല വില നൽകുന്നതോടൊപ്പം സാധാരണക്കാരനും ഇടത്തരക്കാരനും ഓണം ബുദ്ധിമുട്ടില്ലാതെ ആഘോഷിക്കാനാണ് വിപണിയിലുള്ള ഇടപെടലിലൂടെ സർക്കാർ ഉദ്ദേശിക്കുന്നതെന്നും മന്ത്രി പറഞ്ഞു. ആദ്യവില്പന എം.എസ്. അരുൺകുമാർ എംഎൽഎ നിർവഹിച്ചു. പഞ്ചായത്ത് പ്രസിഡന്‍റ് ഷീബ സതീഷ്, വൈസ് പ്രസിഡന്‍റ് അംബിക സത്യനേശൻ, തഴക്കര കൃഷി ഓഫീസർ അനഘ കൃഷ്ണൻ എന്നിവർ പ്രസംഗിച്ചു.

ലൂര്‍ദ് മാതാ പള്ളിയിൽ പ്ലാറ്റിനം ജൂബിലി ആഘോഷം

ഈര: ലൂര്‍ദ് മാതാ പള്ളിയിൽ പ്ലാറ്റിനം ജൂബിലിയാഘോഷങ്ങള്‍ ഏഴിനു തുടക്കമാകും. വൈകുന്നേരം 4.30നു മാര്‍ ജോസഫ് പെരുന്തോട്ടത്തിന്‍റെ മുഖ്യകാര്‍മികത്വത്തില്‍ വിശുദ്ധ കുര്‍ബാന. 6.15നു പൊതുസമ്മേളനം ആരംഭിക്കും. പ്ലാറ്റിനം ജൂബിലി ആഘോഷങ്ങളുടെ ഉദ്ഘാടനം ഫ്രാന്‍സിസ് ജോര്‍ജ് എംപി നിര്‍വഹിക്കും.ആർച്ച്ബിഷപ് മാര്‍ ജോസഫ് പെരുന്തോട്ടം അധ്യക്ഷത വഹിക്കും. ഫൊറോന വികാരി ഫാ. ജേക്കബ് ചീരംവേലില്‍ ലോഗോ റീലിസിംഗ് നിര്‍വഹിക്കും. പഞ്ചായത്ത് പ്രസിഡന്‍റ് ടി.കെ. തങ്കച്ചന്‍, വികാരി ഫാ. ഫിലിപ്പോസ് കോഴപ്ലാക്കല്‍, കൈക്കാരന്മാരായ ടോമിച്ചന്‍ കൈതാരം, സണ്ണി പയ്യംപള്ളി, ജനറല്‍ കണ്‍വീനര്‍ സോജന്‍ ഇടയ്ക്കാട്ട്, മുന്‍വികാരി ഫാ. ജോസ് പുതിയാപറമ്പില്‍, ചങ്ങനാശേരി എസ്്‌ജെഎസ്എം മദര്‍ സിസ്റ്റര്‍ മറിയാമ്മ എന്നിവര്‍ പ്രസംഗിക്കും. തുടര്‍ന്നു പ്രദീപ് ഗോപിയും സംഘവും അവതരിപ്പിക്കുന്ന കലാവിരുന്ന്.

എല്ലാവർക്കും തിരുവോണം; കർഷകർക്കും അധ്യാപകർക്കും കണ്ണീരോണം

ചമ്പക്കുളം: എല്ലാവരും ഒാണം ആഘോഷിക്കുന്പോൾ ഉത്രാടവും ഒാണവും ആഘോഷിക്കാൻ കഴിയാത്ത രണ്ടു വിഭാഗമുണ്ട് നാട്ടിൽ, പ്രത്യേകിച്ച് കുട്ടനാട്ടിൽ. ഒരു കൂട്ടർ കർഷകർ, രണ്ടാമത്തെ വിഭാഗം നിയമനം അംഗീകരിച്ചു കിട്ടാത്ത അധ്യാപകർ. വിളയിച്ചെടുത്ത നെല്ല് സർക്കാർ ഏജൻസിക്കു കൊടുത്തിട്ടു വില കിട്ടാനായി പാഡി ഓഫീസിലും ബാങ്കുകളിലും മാസങ്ങളായി കയറിയിറങ്ങുകയാണ് കർഷകർ. 2019 മുതൽ നിയമനം ലഭിച്ചിട്ടും ശമ്പളം അംഗികരിച്ച് ലഭിച്ചിട്ടില്ലാത്ത സ്കൂൾ അധ്യാപകരാണ് ഈ ഒാണത്തിന്‍റെ മറ്റൊരു കണ്ണീർക്കാഴ്ച. വികസിത രാജ്യങ്ങളിൽ അടക്കം കർഷകരെയും അധ്യാപകരെയും ആദരവോടെ ഉൾക്കൊള്ളുന്പോൾ , കർഷകരെയും അധ്യാപകരെയും വളരെ മോശമായിട്ടാണ് കേരളത്തിൽ കൈകാര്യം ചെയ്യുന്നതെന്നു ചൂണ്ടിക്കാണിക്കപ്പെടുന്നു. കാലിയായ പോക്കറ്റ് മദ്യം വിറ്റ് സമൂഹത്തിന്‍റെ ആരോഗ്യം നശിപ്പിച്ച് അതുവഴി വരുമാനമുണ്ടാക്കുന്ന ബിവറേജസ് കോർപറേഷൻ ജീവനക്കാർക്ക് ഒരു ലക്ഷത്തിലധികം രൂപ ബോണസ് നൽകുന്ന സമൂഹത്തിലാണ് കർഷകരും അധ്യാപകരും അവകാശപ്പെട്ട പ്രതിഫലത്തിനായി അനിശ്ചിതമായി കാത്തിരിക്കുന്നത്. കടം വാങ്ങി കൃഷി ചെയ്തവരും കാലങ്ങളായി പ്രതിഫലമില്ലാതെ ജോലി ചെയ്യുന്നവർക്കും ഇതു കണ്ണീരോണമാണ്. നെല്ലിന്‍റെ വിലയ്ക്കു വേണ്ടി കർഷകർ കയറിയിറങ്ങുന്ന ഒാഫീസുകളിലെല്ലാം ഒാണാഘോഷ തിരക്കിലായിരുന്നു. കാലിയായ പോക്കറ്റുമായി ഉത്രാടപ്പാച്ചിൽ ദിനം നിരാശയോടെ തള്ളിനീക്കാൻ മാത്രമേ ഇവർക്കു കഴിയുന്നുള്ളൂ. കഴിഞ്ഞ പുഞ്ചകൃഷിയുടെ നെല്ല് സംഭരിച്ചവകയിൽ ഇനിയും 232 കോടി രൂപ കൊടുത്തു തീർക്കാനുണ്ടെന്നു സർക്കാർ സമ്മതിക്കുന്നുണ്ടെങ്കിലും കൊടുത്തുതീർക്കാൻ ക്രമീകരണമില്ല. കരുണയില്ലാത്ത നിലപാട് സർക്കാരിന്‍റെ നിഷേധാത്മക നിലപാട് മൂലം അംഗീകാരം കിട്ടാത്ത അധ്യാപകരാണെങ്കിൽ ഓണം ആഘോഷിക്കണമെങ്കിൽ അധ്യാപക ജോലി കഴിഞ്ഞുള്ള സമയത്തു മറ്റ് ജോലി കണ്ടുപിടിക്കേണ്ട ദയനീയ അവസ്ഥയിലാണ്. ഈ തിരുവോണ ദിനം അധ്യാപക ദിനം കൂടിയായിട്ടും അധ്യാപകർക്കു കണ്ണീരാണ് മിച്ചം. കുട്ടനാട്ടിലെ ഭൂരിപക്ഷം സ്കൂളുകളും ചങ്ങനാശേരി അതിരൂപത കോർപറേറ്റ് മാനേജ്‌മെന്‍റിന്‌ കീഴിലുള്ളവയാണ്. ഒരു നൂറ്റാണ്ടിലധികമായി കുട്ടനാട്ടിലെ വിദ്യാഭ്യാസ കാര്യങ്ങളിൽ നേതൃത്വം നല്കുന്നത് ഈ സ്കൂളുകളാണ്. കുട്ടനാട്ടിലെ വിവിധ സ്കൂളുകളിലായി നൂറ് കണക്കിന് അധ്യാപകരാണ് 2019 മുതലുള്ള നിയമന അംഗികാരം ലഭിക്കാതെ വലയുന്നത്. കോർപറേറ് മാനേജ്മെന്‍റിനു കീഴിൽ അഞ്ചു ജില്ലകളിലായുള്ള 110 സ്കൂളുകളിൽ 37 സ്കൂളുകളും കുട്ടനാട്ടിലാണ്.

ഓണം വിപണിയില്‍ വിലവര്‍ധന നിയന്ത്രിക്കുന്നതിന് കളക്ടറുടെ നേതൃത്വത്തിൽ മിന്നൽ പരിശോധന

ആലപ്പുഴ: ഓണം വിപണിയില്‍ അവശ്യസാധനങ്ങളുടെ കമ്പോള വില വര്‍ധന നിയന്ത്രിക്കുന്നതിനും വിലനിലവാരം ഏകീകരിക്കുന്നതിനും കരിഞ്ചന്ത, പൂഴ്ത്തിവയ്പ് എന്നിവ തടയുന്നതിനുമായി ജില്ലാ കളക്ടറുടെ നേതൃത്വത്തില്‍ വിവിധ വകുപ്പുകളെ ഉള്‍പ്പെടുത്തി രൂപീകരിച്ച സംയുക്ത സ്‌ക്വാഡ് ജില്ലയിൽ ശക്തമായ പരിശോധന തുടരുന്നു. ഇതുവരെ നടത്തിയിട്ടുള്ള 122 പരിശോധനയില്‍ അളവ് തൂക്ക ഉപകരണങ്ങള്‍ മുദ്രണം ചെയ്യാത്തതും പായ്ക്കറ്റ് ഡിക്‌ളറേഷന്‍ ഇല്ലാത്തതുമായ 10 സ്ഥാപനങ്ങള്‍ക്ക് ലീഗല്‍ മെട്രോളജി വകുപ്പ് നോട്ടീസ് നല്‍കി. വിലവിവരപ്പട്ടിക പ്രദര്‍ശിപ്പിക്കാത്ത 26 സ്ഥാപനങ്ങള്‍ക്ക് പരിശോധനാ വേളയില്‍തന്നെ ആയത് പ്രദര്‍ശിപ്പിക്കുന്നതിനുള്ള കര്‍ശന നിര്‍ദേശം നല്‍കി തുടര്‍ നടപടികള്‍ സ്വീകരിച്ചു. വരും ദിവസങ്ങളിലും ജില്ലാ-താലൂക്ക്തല സംയുക്ത സ്‌ക്വാഡ് പരിശോധന കര്‍ശനമായി തുടരുമെന്ന് ജില്ലാ സപ്ലൈ ഓഫീസര്‍ അറിയിച്ചു. ജില്ലാ സപ്ലൈ ഓഫീസര്‍ കെ. മായാദേവി, ഭക്ഷ്യസുരക്ഷ, ലീഗല്‍ മെട്രോളജി വകുപ്പുകളിലെ ഉദ്യോഗസ്ഥരും റേഷനിംഗ് ഇന്‍സ്‌പെക്ടര്‍മാരും പങ്കെടുത്തു.

അനധികൃത പാർക്കിംഗ്; ഗതാഗതം ബുദ്ധിമുട്ടിൽ

ചമ്പക്കുളം: ബസിലിക്ക ബസ് സ്റ്റാ ൻഡിലെ ഓട്ടോ സ്റ്റാൻഡ് പുതിയ സ്ഥലത്തേക്ക് മാറ്റിസ്ഥാപിക്കണമെന്ന് നാട്ടുകാർ. ഇതുകൂടാതെ ബിഎസ്എൻഎൽ ജംഗ്ഷന് തെക്കുഭാഗത്തുള്ള കടയുടെ മുൻപിലെ പാർക്കിംഗും ഗതാഗതം ദുരിതത്തിലാക്കുകയാണ്. ബസിലിക്ക ബസ് സ്റ്റാൻഡിൽനിന്ന് ആരംഭിക്കുന്ന ഓട്ടോസ്റ്റാൻഡ് പള്ളിപ്പാലവും കടന്ന് ബിഎസ്എൻഎൽ ജംഗ്ഷനിലേക്ക് നീളുമ്പോൾ പൊതുവേ ഇടുങ്ങിയ പൂപ്പള്ളി ചമ്പക്കുളം റോഡ് എന്നും അപകടം നിറഞ്ഞ ഒന്നായി മാറുന്നു. പാലത്തിൽനിന്ന് ഇറങ്ങിവരുന്ന വാഹനങ്ങൾ തമ്മിൽ ഉരസി അപകടം പതിവായി മാറിയിട്ടുണ്ട്. പടഹാരം, കഞ്ഞിപ്പാടം പാലങ്ങൾ ഗതാഗതയോഗ്യമായതോടുകൂടി ഇതുവഴിയുള്ള ഗതാഗതം പതിൻമടങ്ങ് വർധിച്ചിട്ടുണ്ട്. എസി റോഡിൽനിന്ന് ദേശീയപാതയിലേക്ക് ഈ വഴി കൂടുതൽ സൗകര്യപ്രദമാകയാൽ കൂടുതൽ വാഹനങ്ങൾ ഇതുവഴി സഞ്ചരിക്കുന്നതും പള്ളാത്തുരുത്തി പാലത്തിൽ ഗതാഗതനിയന്ത്രണം ഏർപ്പെടുത്തുമ്പോൾ ഇതുവഴി ഗതാഗതം തിരിച്ചു വിടുന്നതും പതിവാണ്. സ്കൂൾ ദിവസങ്ങളിൽ ഓട്ടോസ്റ്റാൻഡിന്‍റെ നീളം കൂടുന്നതനുസരിച്ച് അപകടവും കൂടും. ബിഎസ്എൻഎൽ ജംഗ്ഷനു സമീപമുള്ള കടയുടെ മുന്നിൽ റോഡിലേക്ക് ഇറക്കി വാഹനങ്ങൾ പാർക്ക് ചെയ്യുന്നതും അപകടത്തിനു കാരണമാകുന്നു. ഇടുങ്ങിയതും പടിഞ്ഞാറുനിന്നും കിഴക്കുനിന്നും റോഡുകൾ വന്നുചേരുന്ന ഇവിടെ വാഹനങ്ങൾ പലപ്പോഴും റോഡിൽ തന്നെ പാർക്ക് ചെയ്യുന്നത് വളവുതിരിഞ്ഞ് എത്തുന്ന വാഹനങ്ങൾക്ക് അപകടഭീഷണിയായി മാറിയിട്ടുണ്ട്. റോഡിന്‍റെ സൈഡ് ലൈനിന് അകത്ത് റോഡിലേക്ക് ഇറക്കി പാർക്ക് ചെയ്യാൻ തരത്തിൽ മാത്രമേ ഇവിടെ റോഡിന് വീതി ഉള്ളൂ. സമീപത്ത് മൂന്നു വിദ്യാലയങ്ങളും പള്ളിയും ബാങ്കും ഓഡിറ്റോറിയവും സ്ഥിതി ചെയ്യുന്ന പ്രദേശത്ത് റോഡിലൂടെ സ്കൂൾ ദിവസങ്ങളിൽ സൈക്കിളിലും കാൽനടയായും വിദ്യാർഥികൾക്ക് കടന്നുപോകാനാവാത്ത അപകടകരമായ അവസ്ഥയാണ് നിലവിലുള്ളത്. ബന്ധപ്പെട്ട അധികാരികളുടെ ഭാഗത്തുനിന്ന് അടിയന്തര ഇടപെടൽ ഉണ്ടാവുകയും ഓട്ടോറിക്ഷാ പാർക്കിംഗും വളവുകളിലെ അനധികൃത പാർക്കിംഗും നിയന്ത്രിച്ചില്ലെങ്കിൽ അപകടം ഇവിടെ തുടർക്കഥയാവും.

മുല്ലാക്കൽ ക്ഷേത്രം റോഡിൽ ദുരിതയാത്ര

ചമ്പക്കുളം: നെടുമുടി പഞ്ചായത്തിൽ 10, 11 വാർഡുകളെ വേർതിരിക്കുന്ന മുല്ലാക്കൽ ക്ഷേത്രം റോഡ് കാൽനടയാത്രക്കാർക്കു പോലും ഉപയോഗിക്കാനാവാത്തവിധം തകർന്നു. നെടുമുടി കരുവാറ്റാ റോഡിൽ പടഹാരം പാലത്തിന് വടക്ക് വശത്ത് മതിമഠം ജംഗ്ഷനിൽനിന്ന് ആരംഭിച്ച്‌ മുല്ലാക്കൽ ക്ഷേത്ര പുരയിടത്തിൽ അവസാനിക്കുന്ന റോഡിന്‍റെ പകുതി ഭാഗം പടഹാരം പാലത്തിന്‍റെ നിർമാണത്തോടനുബന്ധിച്ച് സർവീസ് റോഡ് നിർമിച്ചപ്പോൾ കൊക്കരാക്കൽ ക്ഷേത്രം വരെയുള്ള ഭാഗം ടാർ ചെയ്ത് യാത്രായോഗ്യമാക്കി. എന്നാൽ, തുടർന്നുള്ള 450 മീറ്റർ മാത്രം വരുന്ന ഭാഗം കാൽനടയാത്രയ്ക്ക് പോലും പറ്റാത്ത വിധം തകർന്നുകിടക്കുന്നു. നെടുമുടി കൃഷിഭവന് കീഴിലുള്ള മഠത്തിൽ മുല്ലാക്കൽ പാടശേഖരത്തിന്‍റെ നടുവിലൂടെ പോകുന്ന റോഡിലൂടെയാണ് നെല്ലുസംഭരണം നടത്തുന്നതിനുള്ള വാഹനങ്ങൾ എത്തുന്നത്. 200ലധികം വീടുകളിലെ ആളുകളുടെ ഏക യാത്രാമാർഗമായ റോഡിന്‍റെ ശോച്യാവസ്ഥ സംബന്ധിച്ച് നിരവധി പരാതികൾ ബന്ധപ്പെട്ട വാർഡ് മെമ്പർമാർക്കും എംഎൽഎയ്ക്കും നല്കിയിട്ടും വർഷങ്ങളായിട്ട് യാതൊരു നടപടി ഉണ്ടായിട്ടില്ല. മഴ പെയ്താൽ ദിവസങ്ങളോളം വെള്ളക്കെട്ടാകുന്ന റോഡിലൂടെ സന്ധ്യകഴിഞ്ഞാലുള്ള യാത്ര അപകടം പിടിച്ചതാണ്. കുട്ടനാട്ടിലെ കാർഷിക ചരിത്രത്തിൽ പ്രമുഖ സ്ഥാനം നേടിയിട്ടുള്ള മുല്ലാക്കൽ ക്ഷേത്രത്തിലേക്കുള്ള റോഡിനോടുള്ള അവഗണനയിൽ പ്രതിഷേധിച്ച് തദ്ദേശസ്വയംഭരണ തെരഞ്ഞെടുപ്പിന് മുൻപ് സമരപരിപാടികൾക്ക് ഒരുങ്ങുകയാണ് നാട്ടുകാർ.

എസി കനാലിൽ കൈയേറ്റം തകൃതി

ആലപ്പുഴ: എസി കനാൽ പള്ളാത്തുരുത്തി വരെ തുറക്കണമെന്ന് വിവിധ കോണുകളിൽനിന്ന് ആവശ്യമുയരുമ്പോൾ പള്ളാത്തുരുത്തി ഭാഗത്ത് നിർബാധം കനാൽ കൈയേറ്റം തുടരുന്നു. കഴിഞ്ഞ ഒരുവർഷത്തിനിടയിൽ കൈനകരി വില്ലേജ് പരിധിയിൽ നിരവധി കൈയേറ്റ നിർമിതികളാണ് ആലപ്പുഴ-ചങ്ങനാശേരി റോഡിന്‍റെ വശങ്ങളിൽ എസി കനാലിൽ നടക്കുന്നത്. പൊങ്ങ ജ്യോതി ജംഗ്ഷൻ മുതൽ പള്ളാത്തുരുത്തി വരെയുള്ള കനാൽ വശങ്ങളിലാണ് കൈയേറ്റം കൂടുതൽ. ഇക്കാര്യത്തിൽ നടപടി എടുക്കേണ്ട അ ധികൃതരുടെ നിസംഗതയാ ണ് കൈയേറ്റങ്ങൾ കൂടാനുള്ള പ്രധാന കാരണം. റോഡിന് ഇരുവശത്തും ഉയർന്നുനിൽക്കുന്ന ഓടകളും നടപ്പാതകളും വാഹന പാർക്കിംഗിന് തടസം സൃഷ്ടിക്കുന്നതിനാൽ ഇങ്ങനെ കൈയേറി നിർമിക്കുന്ന കടകൾക്കു മുന്നിൽ റോഡിൽ തന്നെ വാഹനങ്ങൾ പാർക്ക് ചെയ്യുന്നത് പലപ്പോഴും അപകടങ്ങൾക്കും കാരണമാകുന്നുണ്ട്. ലക്ഷങ്ങൾ മുടക്കി കനാലിൽ നിർമിക്കുന്ന ഇത്തരം കൈയേറ്റങ്ങൾക്ക് ഉത്തരവാദിത്വപ്പെട്ടവരുടെയും ഉദ്യോഗസ്ഥരുടെയും ഒത്താശയുണ്ടെന്ന് നാട്ടുകാർ സംശയിക്കുന്നു. പോലീസിന്‍റെയും ഉത്തരവാദിത്വപ്പെട്ട വകുപ്പുകളുടെയും അടിയന്തര ഇടപെടൽ ഇക്കാര്യത്തിൽ ഉണ്ടാകേണ്ടിയിരിക്കുന്നു.

ആടിയും പാടിയും കുരുന്നുകളുടെ ഓണാഘോഷം

അമ്പലപ്പുഴ: പതിവ് തെറ്റിക്കാതെ ആടിയും പാടിയും അത്തപ്പൂക്കളമിട്ടും ഓണസദ്യയൊരുക്കിയും കുരുന്നുകളുടെ ഓണാഘോഷം. കരുമാടി കളത്തിൽപ്പാലം 116-ാം നമ്പർ അങ്കണവാടിയിലാണ് ഓണാഘോഷം കാൽനൂറ്റാണ്ട് പിന്നിടുന്നത്. സംസ്ഥാനത്ത് ആദ്യമായി അങ്കണവാടി കുരുന്നുകൾക്ക് യൂണിഫോം ഏർപ്പെടുത്തിയത് ഇവിടെയാണ്. ഓണാഘോഷം കൂടാതെ ക്രിസ്മസ് നവവത്സരാഘോഷവും ശിശുദിന പരിപാടികളും മുടക്കം കൂടാതെ നിറപ്പകിട്ടാർന്ന രീതിയിലാണ് ഇവിടെ ആഘോഷിക്കുന്നത്. ഇത്തവണത്തെ ഓണാഘോഷവും വേറിട്ടുനിന്നു. പാലടപ്പായസം ഉൾപ്പെടെയുള്ള വിഭവങ്ങളുമായി കുരുന്നുകൾ ഓണസദ്യ ഉണ്ണുന്നത് വ്യത്യസ്തമായ കാഴ്ചയായിരുന്നു. ഓണപ്പാട്ടു പാടി ആർത്തുല്ലസിച്ച് കുരുന്നുകൾ നൃത്തച്ചുവടുമൊരുക്കി. കുരുന്നുകൾക്കൊപ്പം രക്ഷാകർത്താക്കൾക്കും ഓണസദ്യ നൽകി. തകഴി പഞ്ചായത്ത് വൈസ് പ്രസിഡന്‍റ് അംബികാ ഷിബു ഓണാഘോഷം ഉദ്ഘാടനം ചെയ്തു. വി. ഉത്തമൻ അമ്പലപ്പുഴ, കരുമാടി മോഹനൻ, ചമ്പക്കുളം രാധാകൃഷ്ണൻ അങ്കണവാടി വർക്കർ സൽമ, ഹെൽപ്പർ മേഴ്സി, ജസിമോൾ ജയിംസ്, കെ.എസ്. കൃഷ്ണപ്രീതി എന്നിവർ പങ്കെടുത്തു.

ചാരുംമൂട് ജംഗ്‌ഷനിൽ വാഹനങ്ങൾ ഡിവൈഡറിൽ ഇടിച്ചുകയറി അപകടം പതിവാകുന്നു

ചാരുംമൂട്: കൊല്ലം-തേനി ദേശീയപാതയും കായംകുളം-പുനലൂർ സംസ്ഥാന പാതയും സംഗമിക്കുന്ന ചാരുംമൂട് ജംഗ്‌ഷനിൽ വാഹനഗതാഗത നിയന്ത്രണത്തിനായി സ്ഥാപിച്ചിരിക്കുന്ന ഡിവൈഡറുകളിൽ വാഹനങ്ങൾ ഇടിച്ചുകയറി അപകടങ്ങൾ വർധിക്കുന്നു. ഡിവൈഡറിൽ മുന്നറിയിപ്പ് ബോർഡോ അപായ സൂചനയോ സ്ഥാപിക്കാത്തതാണ് പ്രധാന കാരണം. സിഗ്നൽ ലൈറ്റിന് കിഴക്ക് കെപി റോഡിലെ ഡിവൈഡറിലാണ് അപകടങ്ങൾ കൂടുതലായും സംഭവിക്കുന്നത്. സ്ഥല പരിചയമില്ലാത്ത ദീർഘദൂര യാത്രാവാഹനങ്ങളാണ് അപകടത്തിൽപ്പെടുന്നത്. കഴിഞ്ഞവർഷം ലോറി ഇടിച്ചുകയറി ഡിവൈഡർ തകർന്നതിനുശേഷം ഡിവൈഡർ പുനർനിർമിച്ചിരുന്നു. അന്ന് അപകടമുന്നറിയിപ്പ് സിഗ്നലുകൾ സ്ഥാപിച്ചെങ്കിലും ആറുമാസം മുമ്പ് വീണ്ടും വാഹനം ഡിവൈഡറിൽ ഇടിച്ചുകയറി. ഇതിനുശേഷം അപകടസൂചന ബോർഡുകൾ സ്ഥാപിച്ചിട്ടില്ല. ഇതാണ് നിരന്തരം വാഹനങ്ങൾ അപകടത്തിൽ പ്പെടാൻ കാരണം. ഡിവൈഡർ തുടങ്ങുന്നതിനു മുമ്പുള്ള ഹമ്പിനും മുന്നറിയിപ്പ് സംവിധാനമില്ല. വേഗതയിൽ വരുന്ന വാഹനങ്ങൾ ഹമ്പിൽ കയറി നിയന്ത്രണം തെറ്റി ഡിവൈഡറിലേക്ക് ഇടിച്ചുകയറുന്നതും പതിവാണ്. ചാരുംമൂട് കിഴക്ക് ചന്ത മുതൽ സിഗ്നൽ പോയിന്‍റുവരെയുള്ള റോഡിന്‍റെ ഇരുഭാഗത്തും വാഹനങ്ങൾ പാർക്ക് ചെയ്യുന്നതും അപകടസാധ്യത വർധിപ്പിക്കുകയാണ്.

ബാസ്കറ്റ്ബോൾ ചാമ്പ്യൻഷിപ്പ്: ആലപ്പുഴയും കോഴിക്കോടും ജേതാക്കൾ

ആലപ്പുഴ: മെഡിവിഷൻ സ്പോൺസർ ചെയ്ത ബാബു ജെ. പുന്നൂരാൻ മെമ്മോറിയൽ ട്രോഫിക്കുള്ള 50-ാമത് സബ് ജൂണിയർ കേരള സംസ്ഥാന ബാസ്കറ്റ്ബോൾ ചാമ്പ്യൻഷിപ്പിൽ ആലപ്പുഴയും കോഴിക്കോടും ജേതാക്കളായി. കോഴിക്കോടും എറണാകുളവുമാണ് റണ്ണേഴ്സ് അപ്പ്‌. ആൺകുട്ടികളുടെ വിഭാഗത്തിൽ ഫൈനൽസിൽ ആലപ്പുഴ, കോഴിക്കോടിനെയാണ് പരാജയപ്പെടുത്തിയത്. (67-48). എറണാകുളം, കോട്ടയത്തെ തോൽപ്പിച്ചു വെങ്കലം നേടി. (53-52). പെൺകുട്ടികളുടെ ഫൈനൽസിൽ കോഴിക്കോട്, എറണാകുളത്തെ പരാജയപ്പെടുത്തി. (69-18). മലപ്പുറം, തൃശൂരിനെ തോൽപ്പിച്ചു വെങ്കലം കരസ്ഥമാക്കി. (38-26). പുന്നപ്ര കപ്പക്കട ജ്യോതി നികേതൻ സീനിയർ സെക്കൻഡറി സ്കൂളിൽ നാലു ദിവസം നീണ്ട ചാമ്പ്യൻഷിപ്പിന്‍റെ സമാപന സമ്മേളനത്തിൽ കൊച്ചി ഗ്ലോബൽ പബ്ലിക് സ്കൂൾ ചെയർമാൻ പുരയ്ക്കൽ ജേക്കബ് ട്രോഫികൾ വിതരണം ചെയ്തു. എച്ച്. സലാം എംഎൽഎ, ആലപ്പുഴ രൂപത വിദ്യാഭ്യാസ ബോർഡ് ചെയർമാൻ ഫാ. നെൽസൺ തൈപ്പറമ്പിൽ എന്നിവർ മുഖ്യാതിഥികളായിരുന്നു. കെബിഎ പ്രസിഡന്‍റ് ജേക്കബ് ജോസഫ് അധ്യക്ഷത വഹിച്ചു. എഡിബിഎ പ്രസിഡന്‍റ് റോണി മാത്യു, പിആർഒ തോമസ് മത്തായി കരിക്കംപള്ളിൽ, ട്രഷറര്‍ ജെയിൻ ജോസ്, പ്രിൻസിപ്പൽ സെൻ കല്ലുപുര, മെഡിവിഷൻ മാനേജിംഗ് ഡയറക്ടർ ബിബു പുന്നൂരാൻ, കെബിഎ ലൈഫ് പ്രസിഡന്‍റ് പി.ജെ. സണ്ണി, ഷിഹാബ് നീരുങ്കൽ, പി.സി. ആന്‍റണി, സ്കൂൾ ഡയറക്ടർ സിസ്റ്റർ കല സാംസൺ തുടങ്ങിയവർ പങ്കെടുത്തു.

തകർപ്പൻ ഒാണക്കച്ചവടം

സ്വന്തം ലേഖകൻ ആലപ്പുഴ: ഓണക്കച്ചവടം തകൃതി. നഗരത്തിന്‍റെ വിവിധ ഭാഗങ്ങളിൽ ഉപ്പുതൊട്ടു കർപ്പൂരം വരെ ഓഫർ വാഗ്ദാനങ്ങളുടെ കച്ചവട പെരുമഴ. താത്കാലിക ഷെഡുകളിലും ബ്രാൻഡഡ് ഷോറൂമുകളിലുമെല്ലാം തിരക്കേറി. നഗരത്തിലെ കച്ചവട കേന്ദ്രമായ മുല്ലയ്ക്കലിൽ തുണിത്തരങ്ങളും പച്ചക്കറികളും പലവ്യഞ്ജനങ്ങളും ചെരുപ്പും ആഭരണങ്ങളും എല്ലാമായി ഓണക്കച്ചവടത്തിന്‍റെ ഓട്ടപ്പാച്ചിൽ. കൺസ്യൂമർ ഫെഡിന്‍റെ ഓണം വിപണി ജില്ലയിൽ തുടങ്ങിയിരുന്നു. ഗവ.സർവന്‍റ്സ് സഹകരണ ബാങ്കുമായി ചേർന്നാണ് വിപണി നടത്തുന്നത്. പച്ചക്കറി വിപണിയില്‍ പേടിച്ചത്ര വിലകയറാതെ നിൽക്കുന്നത് ആശ്വാസം പകരുന്നുണ്ട്. ഓണവും വിവാഹ സീസണും ഒന്നിച്ചുവന്നിട്ടും പച്ചക്കറി വിലയിൽ മാന്ദ്യമുള്ളത് ആശ്വാസം. എന്നാല്‍, ഓണത്തലേന്നു കഥ മാറുമെന്നാണ് വ്യാപാരികള്‍ പറയുന്നത്. വെളിച്ചെണ്ണ താരം നിലവില്‍ ഇഞ്ചി, കാരറ്റ്, പച്ചമുളക്, തക്കാളി എന്നിവയ്ക്കാണ് താരതമ്യേന വില കൂടിയിട്ടുള്ളതെന്ന് ആലപ്പുഴ മാർക്കറ്റിലെ വ്യാപാരികൾ പറയുന്നു. പയര്‍, ബീന്‍സ്, വെണ്ടയ്ക്ക, ഏത്തക്കായ എന്നിവയ്ക്ക് ഇന്നലത്തെ വിലയല്ല ഇന്ന്. നാളെ വില ഉയര്‍ന്നേക്കുമെന്നത് സ്വാഭാവികം. ഓണത്തിന് അധികമായി ഓര്‍ഡര്‍ നല്‍കുന്ന പച്ചക്കറികള്‍ക്ക് ഇടനിലക്കാർ വില ഉയർത്തുന്ന പതിവുണ്ട്. സാധാരണ സമയത്തേക്കാൾ ഇരട്ടിക്കച്ചവടമാണ് ഓണം സീസണിൽ കേരളത്തിൽ വെളിച്ചെണ്ണയ്ക്കുള്ളത്. ചരിത്രത്തിൽ ഇതുവരെയില്ലാത്ത വിലയ്ക്കു കൊപ്ര വാങ്ങി ഉയർന്ന വിലയ്ക്കു കേര വെളിച്ചെണ്ണ മാർക്കറ്റിലെത്തിച്ചെങ്കിലും വിപണിയിലെ നമ്പർ വൺ ബ്രാൻഡിനു വില്പന കുറവാണ്. കേര വെളിച്ചെണ്ണ സപ്ലൈകോ സ്റ്റോറിൽ പോലും 445 രൂപയ്ക്കാണു വിൽക്കുന്നത്. കൺസ്യൂമർ ഫെഡിന്‍റെ 14 ത്രിവേണി സൂപ്പർമാർക്കറ്റുകളും സഹകരണ സംഘങ്ങളുടെ 104 കേന്ദ്രങ്ങളും വഴി 118 ഓണച്ചന്തകളുമാണ് ജില്ലയിലുള്ളത്. നാളെ വരെയാണ് ഓണം വിപണി. 13 ഇനം നിത്യോപയോഗ സാധനങ്ങൾ 50 ശതമാനം വരെ വിലക്കുറവിൽ ലഭിക്കുന്നുണ്ടെന്ന് അവകാശവാദം. മറ്റ് നിത്യോപയോഗ സാധനങ്ങൾക്ക് 10 മുതൽ 40 ശതമാനം വരെ വിലക്കുറവുണ്ടെന്നു പറയുന്നു. കൂടാതെ ത്രിവേണി സ്റ്റോറുകൾ വഴി ആയിരം രൂപയ്ക്കു മുകളിൽ സാധനങ്ങൾ വാങ്ങുന്നവർക്കു പായസ കിറ്റ് സൗജന്യമുണ്ട്. കൺസ്യൂമർഫെഡ് , സംഘങ്ങളിലെ വില നിലവാരം ജയ അരി -33/കിലോ കുറുവ അരി - 33/കിലോ കുത്തരി -33/ കിലോ പച്ചരി - 29/കിലോ പഞ്ചസാര - 34.65/ കിലോ ചെറുപയർ - 90/കിലോ വൻകടല - 65/കിലോ ഉഴുന്ന് - 90/കിലോ വൻപയർ - 70/കിലോ തുവരപ്പരിപ്പ് - 93/കിലോ മുളക് - 115. 50/കിലോ മല്ലി - 40.95/ 500ഗ്രാം വെളിച്ചെണ്ണ - സബ്സിഡി അര ലിറ്റർ + നോൺ സബ്സിഡി അര ലിറ്റർ - 349/ ലിറ്റർ എന്നിങ്ങനെ. ജാഗ്രതവേണം വിലക്കയറ്റത്തിന്‍റെ മറവിൽ വൻതോതിൽ വ്യാജ വെളിച്ചെണ്ണയും. പാം കെർണൽ ഓയിലാണു വെളിച്ചെണ്ണയിൽ ഇപ്പോൾ വ്യാപകമായി ചേർക്കുന്നത്. ശുദ്ധമായ വെളിച്ചെണ്ണ റഫ്രിജറേറ്ററിൽ വച്ചാൽ എളുപ്പം കട്ടിയാവും. എന്നാൽ, പാം കെർണൽ ഓയിൽ 26 ഡിഗ്രി സെൽഷ്യസിൽ കട്ടിയാവും. വെളിച്ചെണ്ണയ്ക്ക് 24 ഡിഗ്രി വേണം. അതിനാൽ പാം കെർണൽ . ഓയിൽ ചേർത്ത വെളിച്ചെണ്ണയുടെ ശുദ്ധതാ പരിശോധന എളുപ്പത്തിൽ നടത്താം. വാഴയിലയ്ക്കും |പിടിവലി ഓണമെത്തിയതോടെ വാഴയിലയ്ക്ക് വന്‍ ഡിമാന്‍ഡ്. ചെറിയ ഇലയ്ക്ക് ഒന്നിന് ആറു രൂപയാണ് നിലവിലെ മാര്‍ക്കറ്റുവില. എട്ടു രൂപ ചില്ലറക്കച്ചവടക്കാരും ഈടാക്കുന്നുണ്ട്. ഉത്രാടത്തോടെ വില ഉയരുമെന്നാണ് വ്യാപാരികൾ പറയുന്നത്. തമിഴ്നാട്ടില്‍നിന്ന് എത്തിക്കുന്ന തേന്‍വാഴയിലയാണ് സദ്യ വിളമ്പാന്‍ നമ്മുടെ നാട്ടിൽ പ്രധാനമായും ഉപയോഗിക്കുന്നത്. ഓണാഘോഷം നടത്തുന്ന സ്‌കൂള്‍, കോളജ്, ഓഫീസ് കൂട്ടായ്മകൾ വാഴയിലയെ കാര്യമായി ആശ്രയിക്കുന്നു. പൂക്കളംകൊണ്ട് അലങ്കരിച്ച വീടുകൾ, ക്ഷേത്രങ്ങളിൽ പ്രത്യേക പൂജകൾ, സാംസ്കാരിക പരിപാടികൾ, ഓണം മേളകൾ, കഥകളി ഷോകൾ, നൃത്ത പരിപാടികൾ തുടങ്ങിയവ നടക്കുന്നു. എല്ലാം തകൃതിയായി പ്രതിഫലിക്കുന്നുണ്ട് വിപണിയിൽ.

പച്ചക്കറികൾക്കൊപ്പം മത്സ്യവിപണിയും സജീവം

അമ്പലപ്പുഴ: ഓണത്തെ വരവേൽക്കാൻ പച്ചക്കറികൾക്കൊപ്പം മത്സ്യവിപണിയും സജീവമായി. രുചിയേറിയ വിവിധയിനം കടൽ മത്സ്യങ്ങൾ റോഡുവക്കിലെ ചെറിയ തട്ടിൽ മുതൽ പ്രധാന മാർക്കറ്റുകളിൽ വരെ എത്തിത്തുടങ്ങി. കേര, ചൂര, തെരണ്ടി, സ്രാവ്, ആവോലി, മാച്ചാൻ, വലിയ ഇനം കണവ, വിവിധ ഇനം ചെമ്മീനുകൾ അടക്കമാണ് വിപണിയിൽ സുലഭം. ഇന്നലെ തോട്ടപ്പള്ളി ഹാർബറിൽ ഇടത്തരം മാച്ചാൻ 300 രൂപ വച്ചാണ് തൂക്കിയത്. ചെറുകിട കച്ചവടക്കാരാണ് കൂടുതലും എടുത്തത്. വലിയ കണവ, കേര തുടങ്ങിയ മീനുകൾക്ക് കിലോ 400 രൂപയാണ് വില. എന്നാൽ ബോട്ടുകൾ അടുക്കാൻ തുടങ്ങിയതോടെ കിളി, അയല, പല്ലിക്കോര, മാന്തൽ തുടങ്ങിയവയുടെ വിലയിൽ നേരിയ ഇടിവുണ്ട്. കൂറ്റൻ കേര ഒഴിച്ചുള്ള മത്സ്യങ്ങൾ കേരള തീരത്തുനിന്നുതന്നെയാണ് വിപണിയിലെത്തുന്നത്. അതേസമയം, ആഘോഷനാളുകളിൽ കേര, ചൂര തുടങ്ങിയ മത്സ്യങ്ങൾക്കാണ് ആവശ്യക്കാർ ഏറുന്നത്. പുറക്കാട്, കാക്കാഴം, വളഞ്ഞവഴി, പുന്നപ്ര, പറവൂർ, പുലയൻവഴി ഭാഗങ്ങളിലാണ് മീൻ കച്ചവടം കൂടുതൽ നടക്കുന്നത്. വരാൽ, കരിമീൻ, ആറ്റുവാള, തിലോപ്പിയ തുടങ്ങിയ ആറ്റുമത്സ്യങ്ങളും പച്ചയോടെ വിപണിയിലെത്തിത്തുടങ്ങി. ദേശീയപാത നിർമാണം നടക്കുന്നതിനാൽ വഴിയോരക്കച്ചവടക്കാർ ഏറെ ദുരിതം പേറിയാണ് കച്ചവടം നടത്തുന്നത്.

ശാന്തിഭവൻ ചാനൽ വാർഷികാഘോഷവും പുസ്തക പ്രകാശനവും

അമ്പലപ്പുഴ: ശാന്തിഭവൻ ചാനലിന്‍റെ 25-ാം വാർഷികാഘോഷവും ബ്രദർ മാത്യു ആൽബിന്‍റെ ജീവചരിത്ര പുസ്തകപ്രകാശനവും ശാന്തിഭവൻ അങ്കണത്തിൽ നടന്നു. ഒരു കുറ്റവാളിക്ക് എത്ര കണ്ട് മാറാമെന്നതാണ് മാത്യു ആൽബിന്‍റെ ജീവിതം കൊണ്ട് തെളിയിച്ചതെന്നു ചടങ്ങിൽ വിശിഷ്ടാതിഥിയായി പങ്കെടുത്ത് ചങ്ങനാശേരി ആർച്ച്ബിഷപ് മാർ തോമസ് തറയിൽ പറഞ്ഞു. ദൈവ പരിപാലനത്തിന്‍റെ ഉടമ കൂടിയാണ് ആൽബിനെന്നും അദ്ദേഹം പറഞ്ഞു. റോട്ടറി ക്ലബ് ഡിസ്ട്രിക് ഗവർണർ ഡോ.ടീന ആന്‍റണി പുസ്തകപ്രകാശനം നടത്തി. ഫാ. ഷിന്‍റോ ചാലിൽ അധ്യക്ഷത വഹിച്ചു. ദിവ്യബലിക്കു ഫാ. ആന്‍റണി കട്ടിക്കാട് കാർമികത്വം വഹിച്ചു. ഡോ. റോയി സി. മാത്യു, ഡോ. സിസ്റ്റർ എലൈസ, ബ്രദർ മാത്യു ആൽബിൻ, ഫാ. ഈനാശു ചിറ്റിലപ്പള്ളി, ഫീലിപ്പോസ് തത്തംപള്ളി, സി.എ. ജോസഫ്, ടോം ജോസഫ്, ഉത്തമക്കുറുപ്പ്, രാജു പള്ളിപ്പറമ്പിൽ, പുന്നപ്ര അപ്പച്ചൻ, പി.എ. കുഞ്ഞുമോൻ, കൈനകരി അപ്പച്ചൻ, ബിനോയ് തങ്കച്ചൻ തുടങ്ങിയവർ പ്രസംഗിച്ചു.

കെവിഎമ്മില്‍ ഓണാഘോഷം

ചേര്‍ത്തല: കെവിഎം ആശുപത്രിയില്‍ ഓണാഘോഷം സംഘടിപ്പിച്ചു. ആശുപത്രി ചീഫ് മെഡിക്കല്‍ ഓഫീസര്‍ ഡോ. വി.വി. ഹരിദാസ് ഭദ്രദീപം കൊളുത്തി ഉദ്ഘാടനം ചെയ്തു. തുടര്‍ന്ന് ആശുപത്രി മാനേജിംഗ് പാര്‍ട്ണര്‍ ഡോ. അവിനാശ് ഹരിദാസ് ഓണസന്ദേശം നല്‍കി. പഴയകാലത്തെ ഓണകളികളിലേക്കും കൃഷിരീതിയിലേക്കും ജനങ്ങള്‍ മടങ്ങണമെന്ന് അദ്ദേഹം ഉദ്‌ബോധിപ്പിച്ചു. തുടര്‍ന്ന് ജീവനക്കാര്‍ വിവിധ കലാപരിപാടികള്‍ അവതരിപ്പിച്ചു.

സംസ്ഥാന ജൂണിയർ ത്രോബോൾ ചാമ്പ്യൻഷിപ്: പാലക്കാടും എറണാകുളവും വിജയികൾ

മാന്നാർ: ചെന്നിത്തല ഗവൺമെന്‍റ് മോഡൽ യുപി സ്കൂളിൽ നടന്ന 24-ാമത് സംസ്ഥാന ജൂണിയർ ത്രോബോൾ ചാമ്പ്യൻഷിപ്പിൽ പെൺകുട്ടികളുടെ വിഭാഗത്തിൽ പാലക്കാട് ജേതാക്കളായി. രണ്ടാം സ്ഥാനം എറണാകുളവും കണ്ണൂർ, കോട്ടയം ടീമുകൾ മൂന്നാം സ്ഥാനവും കരസ്ഥമാക്കി. ആൺകുട്ടികളുടെ വിഭാഗത്തിൽ എറണാകുളം ഒന്നാം സ്ഥാനവും ആതിഥേയരായ ആലപ്പുഴ രണ്ടാം സ്ഥാനവും കരസ്ഥമാക്കിയപ്പോൾ പാലക്കാട്, മലപ്പുറം ടീമുകൾ മൂന്നാം സ്ഥാനത്തിന് അർഹരായി. സമാപന സമ്മേളനത്തിൽ യുവജനക്ഷമ ബോർഡ് ആലപ്പുഴ ജില്ലാ കോ ഓർഡിനേറ്റർ സി. ജയിംസ് സാമുവൽ വിജയികൾക്കുള്ള മെഡലുകൾ വിതരണം ചെയ്തു. ജില്ലാ സ്പോർട്സ് കൗൺസിൽ മെമ്പർ സിബു ശിവദാസ്, മുഹമ്മദ് റാഫി, ഷാഹുൽ ഹമീദ്, കെ. പ്രദീപ്, ഷാരോൺ ഗോപൻ, മുഹമ്മദ് മുജീബ് എന്നിവർ പ്രസംഗിച്ചു. കർണാടകയിൽ നടക്കുന്ന ദേശീയ ജൂണിയർ ത്രോബോൾ ചാമ്പ്യൻഷിപ്പിലേക്കുള്ള കേരള ടീം ക്യാമ്പിലേക്കുള്ള ആൺകുട്ടികളെയും പെൺകുട്ടികളെയും ഈ മത്സരങ്ങളിൽനിന്ന് തെരഞ്ഞെടുത്തു.

ആനപ്രമ്പാല്‍ ജലോത്സവം: നെപ്പോളിയന്‍ ജേതാവ്

എടത്വ: കുട്ടനാട് സാംസ്‌കാരിക വേദിയുടെ നേതൃത്വത്തില്‍ നടന്ന ആറാമത് ശ്രീനാരായണ എവറോളിംഗ് ട്രോഫിക്കു വേണ്ടിയുള്ള ആനപ്രമ്പാല്‍ ജലോത്സവത്തില്‍ നെപ്പോളിയന്‍ ജേതാവ്. വെപ്പ് എ ഗ്രേഡ് വിഭാഗത്തില്‍ എര്‍വിന്‍ ഷിക്കു ക്യാപ്റ്റനായ ടീം നെപ്പോളിയന്‍ തുഴഞ്ഞ നെപ്പോളിയന്‍ വള്ളവും കൊച്ചമ്മനം നിറവ് ബോട്ട് ക്ലബ് തുഴഞ്ഞ അശ്വിന്‍ റെജി, മീനു റെജി തട്ടങ്ങാട്ട് ക്യാപ്റ്റനായ ഷോട്ട് പുളിക്കത്തറ വള്ളവുമാണ് ഫൈനല്‍ മത്സരത്തില്‍ പങ്കെടുത്തത്. ഇരുവള്ളങ്ങളും നേരിയ വ്യത്യാസത്തിലാണ് ഫിനിഷിംഗ് പോയിന്‍റ് മറികടന്നത്. ആദ്യം നെപ്പോളിയന്‍ വള്ളം വിജയിച്ചതായി സംഘാടകര്‍ പ്രഖ്യാപിച്ചെങ്കിലും ഷോട്ട് പുള്ളിക്കത്തറ വള്ളത്തില്‍ തുഴഞ്ഞ ക്ലബ്ബ് പ്രതിഷേധവുമായി രംഗത്തുവന്നു. ഇതോടെ വിജയികളുടെ പ്രഖ്യാപനം തത്കാലം മാറ്റിവച്ചിരുന്നു. ഫിനിഷിംഗ് പോയിന്‍റില്‍ സ്ഥാപിച്ച കാമറ പരിശോധിച്ചാണ് അന്തിമ ഫലപ്രഖ്യാപനം നടത്തിയത്. വെപ്പ് ബി ഗ്രേഡ് വിഭാഗത്തില്‍ കൊണ്ടാക്കല്‍ ബോട്ട് ക്ലബ് തുഴഞ്ഞ സാം കക്കുഴി ക്യാപ്റ്റനായ പി.ജി. കരിപുഴ ജേതാവായി. കൊച്ചമ്മനം-നിറവ് ക്ലബ് തുഴഞ്ഞ രഞ്ജു വര്‍ഗീസ് ക്യാപ്റ്റനായുള്ള ചിറമേല്‍ തോട്ടുകടവന്‍ രണ്ടാം സ്ഥാനവും നേടി. ഓടി വിഭാഗത്തില്‍ ബ്രദേഴ്സ് പായിപ്പാട് തുഴഞ്ഞ സജിന്‍ തോമസ് ക്യാപ്റ്റനായ ഡാനിയേല്‍ ജേതാവായി. സൗഹൃദ ബോട്ട് ക്ലബ് തുഴഞ്ഞ ഷെമിന്‍ പള്ളാത്തുരുത്തി ക്യാപ്റ്റനായുള്ള കുറുപ്പ്പറമ്പന്‍ രണ്ടാം സ്ഥാനം നേടി. ജലോത്സവ പൊതു സമ്മേളനം ആര്‍സി ചാരിറ്റബിള്‍ ട്രസ്റ്റ് ചെയര്‍മാന്‍ റെജി ചെറിയാന്‍ ഉദ്ഘാടനം നിര്‍വഹിച്ചു. ജലോത്സവ സമിതി ചെയര്‍മാന്‍ ബിജു പറമ്പുങ്കല്‍ അധ്യക്ഷത വഹിച്ചു. ജില്ലാ പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയര്‍മാന്‍ ബിനു ഐസക് രാജു ജലോത്സവ ഉദ്ഘാടനവും ഡെപ്യൂട്ടി എക്‌സൈസ് കമ്മീഷണര്‍ എസ്. അശോക് കുമാര്‍ സമ്മാനദാനവും നിര്‍വഹിച്ചു. ബ്രഹ്മശ്രീ ആനന്ദ് പട്ടമന, ബിഷപ് തോമസ് കെ. ഉമ്മന്‍ എന്നിവര്‍ അനുഗ്രഹ പ്രഭാഷണം നടത്തി. പഞ്ചായത്ത് പ്രസിഡന്‍റ് ഗായത്രി ബി. നായര്‍, ജലോത്സവ സമിതി ഭാരവാഹികളായ സുനില്‍ മൂലയില്‍, അരുണ്‍ പുന്നശേരില്‍, ഷാജി കറുകത്ര, പീയൂഷ് പി. പ്രസന്നന്‍, മനോഹരന്‍ വെറ്റിലക്കണ്ടം, സണ്ണി അനുപമ, ജിനു ശാസ്താംപറമ്പ്, തോമസുകുട്ടി ചാലുങ്കല്‍, എം.ജി. കൊച്ചുമോന്‍, കെ.വി. മോഹനന്‍ എന്നിവര്‍ പ്രസംഗിച്ചു.

ഈ ഇരുമ്പ് ചങ്ങാടത്തിൽ നിറയെ ദുരിതം

ഹരിപ്പാട്: നീണ്ട കാലത്തെ കാത്തിരിപ്പിനും പ്രതിസന്ധികൾക്കും ശേഷം നിർമാണം പുനരാരംഭിച്ച കരുവാറ്റ- നെടുമുടി കുറിച്ചിക്കൽ പാലത്തിന്‍റെ ആദ്യ കരാറുകാരുടെ അനാസ്ഥ നാട്ടുകാർക്കു വിനയാകുന്നു. പാലത്തിന്‍റെ നിർമാണ വസ്തുക്കൾ എത്തിക്കാനായി ഉപയോഗിച്ച ഇരുമ്പ് ചങ്ങാടം കുറിച്ചിക്കൽ പള്ളിക്കു മുന്നിലുള്ള ബോട്ട് ജെട്ടിക്കു സമീപം ഉപേക്ഷിച്ചു പോയതാണ് ശല്യമായി മാറിയിരിക്കുന്നത്. ഇതു ബോട്ടുകളും വള്ളങ്ങളും സുരക്ഷിതമായി അടുപ്പിക്കാൻ തടസമായി കിടക്കുകയാണ്. ഇതുമൂലം അപകടങ്ങളും ഉണ്ടാകുന്നതായി നാട്ടുകാർ പറയുന്നു. പാലം നിർമാണത്തിന് ആദ്യം കരാർ ഏറ്റെടുത്ത കമ്പനിയുടേതായിരുന്നു ചങ്ങാടം. ഇവരുടെ വീഴ്ച മൂലം കരാർ റദ്ദാക്കുകയായിരുന്നു. പിന്നീട് മറ്റൊരു കമ്പനി പാലം പണി ഏറ്റെടുത്തങ്കിലും ചങ്ങാടം ഇതുവരെ ഇവിടെനിന്നു മാറ്റിയിട്ടില്ല. നിലവിൽ കാടുകയറിയ നിലയിലാണ് കിടക്കുകയാണിത്. ഇതുമൂലം ബോട്ട് ജെട്ടിയിലേക്കു വള്ളങ്ങളും ബോട്ടുകളും ശരിയായ രീതിയിൽ അടുപ്പിക്കാൻ കഴിയുന്നില്ല. ജില്ലാ കളക്ടർക്ക് അടക്കം പരാതി നൽകിയിട്ടും നടപടിയുണ്ടായിട്ടില്ല. എന്തെങ്കിലും കാര്യമായ അപകടം നടന്നാൽ മാത്രമേ നടപടി വരികയുള്ളോ എന്നാണ് നാട്ടുകാരുടെ ചോദ്യം. നിർമാണം, അനിശ്ചിതത്വം 2016ൽ 28.25 കോടി രൂപ ചെലവിൽ തുടങ്ങിയ നിർമാണം തൊഴിൽ തർക്കങ്ങൾ, പ്രളയം, കരാർ കമ്പനിയുടെ വീഴ്ച തുടങ്ങിയ കാരണങ്ങളാൽ പലതവണ നിലച്ചിരുന്നു. 2018ലെ വെള്ളപ്പൊക്കത്തിനു ശേഷം പണി പൂർണമായി നിലച്ചു. കന്പനിയുടെ അനാസ്ഥ കണക്കിലെടുത്ത് കരാർ റദ്ദാക്കി. 260 മീറ്റർ നീളമുള്ള കുറിച്ചിക്കൽ പാലത്തിന് ഒൻപത് സ്പാനുകളാണുള്ളത്. ഇതിൽ ഏഴെണ്ണത്തിന്‍റെ പണി മാത്രമാണ് പൂർത്തിയായത്. രണ്ട് സ്പാനുകളുടെയും അപ്രോച്ച് റോഡിന്‍റെയും നിർമാണമാണ് ബാക്കിയുള്ളത്. കരാർ റദ്ദാക്കിയ ശേഷം നാലു തവണ ടെൻഡർ വിളിച്ചങ്കിലും ആരും ഏറ്റെടുത്തിരുന്നില്ല. പിന്നീട് 12 കോടി രൂപകൂടി അധികമായി അനുവദിച്ചു പുനർ ടെൻഡർ വിളിക്കുകയും കുറഞ്ഞ തുക വച്ച വടകര ഊരാളുങ്കൽ ലേബർ കോൺട്രാക്ട‌് സൊസൈറ്റിക്കു കരാർ നൽകുകയുമായിരുന്നു. പാലത്തിന്‍റെ മധ്യഭാഗത്ത് 55 മീറ്റർ നീളമുള്ള ബോ സ്ട്രിംഗ് ആർച്ച് മാതൃകയിലുള്ള സ്‌പാനും 23. മീറ്റർ നീളമുള്ള പ്രീ സ്ട്രെസ്ഡ് വോയ്ഡ് സ്ലാബും ഇരുകരകളിലും അപ്രോച്ച് റോഡുമാണ് ചെയ്യേണ്ടത്. ഒരു നാടിന്‍റെ സ്വപ്നം, യാത്രാദുരിതം കരുവാറ്റയിലെ ഒറ്റപ്പെട്ട തുരുത്തായ കാരമുട്ടിലെ ജനങ്ങൾക്കു പുറംലോകവുമായി ബന്ധപ്പെടാനുള്ള ഏക ആശ്രയമാകും ഈ പാലം. നിലവിൽ, ലീഡിംഗ് ചാനൽ കടക്കാനായി എസ്എൻ കടവിലെ ജങ്കാറിനെയും കുറിച്ചിക്കൽ കടവിലെ കടത്തുവള്ളങ്ങളെയും ആശ്രയിക്കേണ്ട സ്ഥിതിയിലാണ് ഇവർ. ഇരുചക്രവാഹനങ്ങൾ പോലും പലകയിട്ട് വള്ളത്തിൽ കയറ്റിയാണ് മറുകരയെത്തിക്കുന്നത്. മഴക്കാലത്ത് ജലനിരപ്പ് ഉയരുമ്പോൾ ഈ യാത്ര അതീവ സാഹസികമാണ്. സമയത്തിനു ചികിത്സ ലഭിക്കാതെ ആളുകൾ മരിച്ച സംഭവങ്ങളും ഉണ്ടായിട്ടുണ്ടെന്നു പ്രദേശവാസികൾ പറയുന്നു. കാരമുട്ടിലെ രണ്ട് എൽപി സ്കൂളുകളിലേക്കു പോകുന്ന കുട്ടികൾ പോലും അപകടകരമായ സാഹചര്യത്തിലാണ് യാത്ര ചെയ്യുന്നത്. ആരാധനാലയങ്ങൾ, പാടശേഖരങ്ങൾ എന്നിവിടങ്ങളിലേക്കുള്ള യാത്രയും ഈ കടത്തുവള്ളങ്ങളെ ആശ്രയിച്ചാണ്. ഏകദേശം 40 വർഷം മുൻപ് വിഭാവനം ചെയ്ത നെടുമുടി-കരുവാറ്റ റോഡിന്‍റെ പ്രധാന ഭാഗമാണ് കുറിച്ചിക്കൽ പാലം. കുട്ടനാട്ടിലെ കാർഷിക, ടൂറിസം മേഖലകൾക്കു വലിയ സാധ്യതകൾ നൽകുന്ന പാതയായിട്ടാണ് ഇതു വിഭാവനം ചെയ്തത്. 2025 ജനുവരിയിലാണ് വീണ്ടും പാലത്തിന്‍റെ പണി പുനരാരംഭിച്ചത്. പുതുവർഷത്തിൽ നിർമാണം പൂർത്തിയാക്കി പാലം ജനങ്ങൾക്കായി തുറന്നു കൊടുക്കുമെന്ന് രമേശ് ചെന്നിത്തല എംഎൽഎ പറഞ്ഞു. പുതുവർഷ സമ്മാനം ജനങ്ങൾക്കു പുതുവർഷ സമ്മാനമായിരിക്കും കുറച്ചിക്കൽ പാലം. 2016ൽ തുടങ്ങിയെങ്കിലും ആദ്യ കരാർ റദ്ദാക്കേണ്ടി വന്നു. തുക കൂടുതൽ അനുവദിച്ചു പുനർ ടെൻഡർ വിളിച്ചാണ് ഇപ്പോഴത്തെ കരാർ നൽകിയത്. അതിവേഗം പണികൾ പുരോഗമിക്കുകയാണ്. പുതുവർഷത്തിൽ പൊതുജനങ്ങൾക്കായി പാലം തുറന്നു കൊടുക്കും. - രമേശ് ചെന്നിത്തല ഏഴു വർഷമായി ഇവിടെ കിടക്കുന്ന ഈ ചങ്ങാടം വലിയ ദുരിതമാണ് സൃഷ്ടിക്കുന്നത്. കടവിൽ വള്ളങ്ങൾ അടുപ്പിക്കാൻ നന്നേ പ്രയാസമാണ്. ഈ ഇരുമ്പ് ചങ്ങാടം മാറ്റാൻ എംഎൽഎയ്ക്കും കളക്ടർക്കും അടക്കം പരാതിയിൽ നൽകിയിരുന്നു. ഒരു നടപടിയും ഇതുവരെ ഉണ്ടായിട്ടില്ല. സിബി വർഗീസ് (നാട്ടുകാരൻ)

ബാസ്കറ്റ്ബോളിൽ റഫറി കുപ്പായമണിഞ്ഞ് സഹോദരീസഹോദരന്മാർ

ആലപ്പുഴ: പുന്നപ്ര ജ്യോതിനികേതൻ സീനിയർ സെക്കൻഡറി സ്കൂളിൽ 50-ാമത് സബ് ജൂണിയർ സംസ്ഥാന ബാസ്കറ്റ്ബോൾ ചാമ്പ്യൻഷിപ്പിൽ കളി നിയന്ത്രിക്കുന്നത് സഹോദരീസഹോദരന്മാർ. സഹോദരങ്ങളായ ആഷിനും ആനും റഫറിമാരായി ബാസ്കറ്റ്ബോൾ കോർട്ടിലേക്ക് സമാനതകളില്ലാത്ത മികവാണ് കൊണ്ടുവരുന്നത്. അവരുടെ വിസിലുകൾ കൃത്യതയോടെയും അധികാരത്തോടെയും കോർട്ടിൽ മുഴങ്ങുന്നു. നീതിയും കായികക്ഷമതയും പരമപ്രധാനമാണെന്ന് ഉറപ്പാക്കുന്നുണ്ട് കോർട്ടിൽ. അവരുടെ തടസമില്ലാത്ത ആശയവിനിമയവും മൂർച്ചയുള്ള സഹജാവബോധവും കളിക്കാരിൽനിന്നും പരിശീലകരിൽനിന്നും ഒരുപോലെ ബഹുമാനം നേടിക്കൊടുക്കുന്നു. കെഎസ്ഇബിഎല്ലിൽ അസിസ്റ്റന്‍റ് എക്സിക്യൂട്ടീവ് എൻജിനിയറാണ് ആഷിൻ സേവ്യർ ഫിലിപ്പ്. തിരുവനന്തപുരം ടെക്നോ പാർക്ക്‌ അലയൻസിലാണ് സഹോദരി ആൻ റോസ് ഫിലിപ്പ് ജോലി ചെയ്യുന്നത്. മുൻ യൂണിവേഴ്സിറ്റി ബാസ്കറ്റ്ബോൾ താരം ആലപ്പുഴ സീവ്യൂ വാർഡ് ജൂബിലി റോഡ് കാട്ടേഴത്ത് അനുഗ്രഹയിൽ അന്തരിച്ച ഫിലിപ്പ് സേവ്യറിന്‍റെ മക്കളാണ്. ആലപ്പി ഡിസ്ട്രിക്ട് ബാസ്കറ്റ്ബോൾ അസോസിയേഷൻ (എഡിബിഎ ) മുൻ സെക്രട്ടറിയായിരുന്നു ഫിലിപ്പ് സേവ്യർ. പാതിരപ്പളളി ഗവ. യുപി റിട്ട. ഹെഡ്മിസ്ട്രസാണ് പാലാ ഇടമറ്റം അരിമറ്റത്തിൽ കുടുംബാംഗമായ മാതാവ് റോസമ്മ ഫിലിപ്പ്. മറ്റൊരു സഹോദരി: അനു റോസ് ഫിലിപ്പ് (ജർമനി).

അതിരൂപത നൂറുമേനി ഗ്രാൻഡ് ഫിനാലെ, മഹാസംഗമം 12, 13 തീയതികളില്‍

ചങ്ങനാശേരി: അതിരൂപത ബൈബിള്‍ അപ്പൊസ്തലേറ്റിന്‍റെ ആഭിമുഖ്യത്തില്‍ അതിരൂപതയിലെ 250 ഇടവകകളില്‍ നടത്തിയ നൂറുമേനി വചന പഠന മത്സരങ്ങളുടെ ഗ്രാൻഡ് ഫിനാലെയും മഹാസംഗമവും 12, 13 തീയതികളില്‍ എസ്ബി കോളജ് കാവുകാട്ട് ഹാളില്‍ നടത്തും. ഇടവക, ഫൊറോന, അതിരൂപത തലങ്ങളില്‍ വിജയികളായ നാലായിരത്തോളം പേര്‍ സംഗമത്തില്‍ പങ്കെടുക്കും. സെപ്റ്റംബര്‍ 12ന് നടക്കുന്ന ഗ്രാൻഡ് ഫിനാലെ മത്സരത്തില്‍ വിവിധ റീജണുകളില്‍ നിന്ന് മാത്യു തോമസ്, മേരിക്കുട്ടി തോമസ്, മെര്‍ലി ആന്‍ മാത്യു (കുട്ടനാട് റീജണ്‍), ജയിംസ് കെ. ജേക്കബ്, ഷൈനി സെബാസ്റ്റ്യന്‍ (ചങ്ങനാശേരി റീജണ്‍), സോജി ചാക്കോ-മരിയ മാത്യു (നെടുംകുന്നം റീജൺ), ഡോ. സുജിത്ത് ജോ മാത്യു, ഡോ. അനു വര്‍ഗീസ്, മരിയ റോസ് ജോ (കോട്ടയം), ഡോ. അഭിലാഷ് കെ. തോമസ്, ഡോ. റോണ ജോസഫ്, സെബാസ്റ്റ്യൻ തോമസ് കുഴിക്കാട്ടിൽ (തിരുവനന്തപുരം) എന്നീ കുടുംബങ്ങള്‍ പങ്കെടുക്കും. 13ന് രാവിലെ 8.30ന് കാവുകാട്ട് ഹാളില്‍ നടക്കുന്ന മഹാസംഗമം സീറോമലങ്കര മേജര്‍ ആര്‍ച്ച്ബിഷപ് കര്‍ദിനാള്‍ മാര്‍ ബസേലിയോസ് ക്ലീമിസ് കതോലിക്കാബാവ ഉദ്ഘാടനം ചെയ്യും. ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിക്കും. നൂറുമേനി ഗ്രാൻഡ് ഫിനാലെ മെഗാഷോ മത്സരം ആര്‍ച്ച്ബിഷപ് എമെരറ്റസ് മാര്‍ ജോസഫ് പെരുന്തോട്ടം ഉദ്ഘാടനം ചെയ്യും. സമ്മേളനത്തില്‍ എന്‍റെ സ്വന്തം ബൈബിള്‍ പദ്ധതി പ്രഖ്യാപനവും നടത്തപ്പെടും. ഇതോടനുബന്ധിച്ച് മാര്‍ത്തോമ വിദ്യാനികേതന്‍ ഹാളില്‍ നടന്ന നേതൃസമ്മേളനം ഡയറക്ടര്‍ ഫാ. ജോര്‍ജ് മാന്തുരുത്തില്‍ ഉദ്ഘാടനം ചെയ്തു. പരിപാടികളുടെ വിജയത്തിനായി 201 അംഗ കമ്മിറ്റികള്‍ രൂപീകരിച്ചു. ബൈബിള്‍ അപ്പൊസ്തലേറ്റ് പ്രസിഡന്‍റ് ഡോ. റൂബിള്‍ രാജ്, ജനറല്‍ കണ്‍വീനര്‍ ജോസി കടന്തോട്, ജോസുകുട്ടി കുട്ടംപേരൂര്‍, പ്രഫ. ജോസഫ് ടിറ്റോ, മറിയം പൊട്ടംകുളം, ടോമിച്ചന്‍ കൈതപ്പറമ്പില്‍, ജോബി തൂമ്പുങ്കല്‍, ആന്‍റണി മലയില്‍, അഡ്വ. ഡെന്നീസ് ജോസഫ്, ലാലി ഇളപ്പുങ്കല്‍, ബീനാ തൂമ്പുങ്കല്‍, റോയി വേലിക്കെട്ടില്‍, ജോഷി കൊല്ലാപുരം, ജോസ് സെബാസ്റ്റ്യന്‍, ലാലപ്പന്‍, ഇ.ജെ. ജോസഫ്, സിബി മുക്കാടന്‍, ജോര്‍ജി ജോസഫ് എന്നിവര്‍ പ്രസംഗിച്ചു.

ഒരു വീട്ടിൽ ഒരു കയർ ഉത്പന്നം-കാമ്പയിനു തുടക്കം

ആലപ്പുഴ: സംസ്ഥാന സർക്കാരിന്‍റെ ഒരു വീട്ടിൽ ഒരു കയർ ഉത്പന്നം കാമ്പയിൻ ഭാഗമായി കളക്ടറേറ്റിൽ പദ്ധതിയുടെ നോട്ടീസ് പ്രകാശനം നടന്നു. കയർഫെഡ് പ്രസിഡന്‍റ് ടി.കെ. ദേവകുമാറിന്‍റെ സാന്നിധ്യത്തിൽ ജില്ലാ കളക്ടർ അലക്സ് വർഗീസ് പ്രകാശനം നിർവഹിച്ചു. ഉപഭോക്താക്കൾക്ക് കയർഫെഡിന്‍റെ പ്രകൃതി സൗഹൃദ കയർ ഉത്പന്നങ്ങൾ ഓണക്കാലത്തെ പ്രത്യേക വിലക്കഴിവിൽ അവരുടെ വീടുകളിൽ എത്തിക്കുന്ന പദ്ധതിയാണിത്. വിപണന പദ്ധതി 2000 രൂപയ്ക്ക് മുകളിലുള്ള ഓരോ പർച്ചേസിനും ഒരു ബില്ലിനൊരു കൂപ്പൺ വീതം നൽകും. വിജയിക്കുന്ന ഭാഗ്യശാലിക്ക് വിലകൂടിയ വിവിധ സമ്മാനങ്ങൾ ലഭിക്കും. 5000 രൂപയുടെ ഗിഫ്റ്റ് വൗച്ചറുകളും സമ്മാനങ്ങൾക്കൊപ്പമുണ്ട്. കയർഫെഡ് പ്രസിഡൻ്റും ഭരണസമിതി അംഗങ്ങളും ജീവനക്കാരും ഉപഭോക്താക്കളെ തേടി വീടുകളിലേക്ക് പോകുന്ന പ്രത്യേക പ്രോഗ്രാമാണിത്.

17കാരനെ കാണാതായ സംഭവം: 27 കാരി റിമാന്‍ഡില്‍

ചേര്‍ത്തല: പതിനേഴുകാരനായ വിദ്യാര്‍ഥിയെ കാണാതായെന്ന കേസില്‍ 27കാരി റിമാന്‍ഡില്‍. വിദ്യാര്‍ഥിയുടെ വീട്ടുകാര്‍ നല്‍കിയ പരാതിയിലാണ് നടപടി. പള്ളിപ്പുറം സ്വദേശിനിയായ സനൂഷയെയാണ് കൊല്ലൂരില്‍നിന്നു ചേര്‍ത്തല പോലീസ് പിടികൂടിയത്. പോലീസ് പോക്‌സോ വകുപ്പുകള്‍ പ്രകാരം യുവതിക്കെതിരേ കേസെടുത്ത് ചേര്‍ത്തല ജുഡീഷ്യല്‍ ഒന്നാം ക്ലാസ് മജിസ്‌ട്രേറ്റ് കോടതി ഒന്നില്‍ ഹാജരാക്കിയ ഇവരെ റിമാന്‍ഡു ചെയ്ത് കൊട്ടാരക്കര ജയിലിലാക്കി. 12 ദിവസം മുമ്പാണ് ഇവര്‍ രണ്ടു കുട്ടികളുമായി വിദ്യാര്‍ഥിക്കൊപ്പം നാടുവിട്ടത്. വിദ്യാര്‍ഥിയെ കാണാനില്ലെന്നു കാട്ടി ബന്ധുക്കള്‍ കുത്തിയതോട് പോലീസിലും യുവതിയുടെ ബന്ധുക്കള്‍ ചേര്‍ത്തല പോലീസിലും പരാതി നല്‍കിയിരുന്നു. ഫോണ്‍ ഉപയോഗിക്കാതെയായിരുന്നു യാത്ര. ഇടയ്ക്ക് ബംഗളൂരുവില്‍ ഉണ്ടെന്ന വിവരത്തെതുടര്‍ന്ന് പോലീസ് സംഘം അവിടെയെത്തിയെങ്കിലും കണ്ടെത്താനായില്ല. തുടര്‍ന്ന് യുവതി ഫോണ്‍ ഓണ്‍ചെയ്ത് വാട്ട്‌സാപ്പില്‍ ബന്ധുവിന് മെസേജ് അയച്ചതാണ് പിടിവള്ളിയായത്. ഇതുപിന്തുടര്‍ന്നു ചേര്‍ത്തല പോലീസ് കൊല്ലൂരിലെത്തി പിടികൂടുകയായിരുന്നു. ഇരുവരെയും കുട്ടികളെയും നാട്ടിലെത്തിച്ച പോലീസ് വിദ്യാര്‍ഥിയെ ബന്ധുക്കള്‍ക്കൊപ്പം വിട്ടു. യുവതിയുടെ മക്കളെ അച്ഛനെയും ഏല്‍പിച്ച ശേഷമാണ് കോടതിയില്‍ ഹാജരാക്കിയത്.

പോലീസിന്‍റെ അന്വേഷണമികവ് അബുബക്കറിന് തുണയായി

അമ്പലപ്പുഴ: പുറക്കാട് ഒറ്റപനയിൽ തനിച്ചു താമസിച്ച സ്ത്രീയുടെ കൊലപാതക കുറ്റത്തിൽനിന്നു അബുബക്കറിനെ ഒഴിവാക്കാനായത് പോലീസിന്‍റെ അന്വഷണമികവ്. മണ്ണഞ്ചേരി അമ്പനാകുളങ്ങര പുത്തൻവീട് അബൂബക്കർ (68) ആണ് കൊല നടത്തിയതെന്നതായിരുന്നു അമ്പലപ്പുഴ പോലീസിന് ആദ്യം മനസിലാക്കാനായത്. താനുമായി അടുപ്പത്തിലായിരുന്ന വയോധികയെ പീഡിപ്പിക്കാന്‍ ശ്രമിച്ചെന്നും കടുത്ത ശ്വാസതടസം ഉണ്ടായിരുന്ന വയോധിക അങ്ങനെ മരിച്ചതെന്ന് കരുതിയാണ് അബുബക്കര്‍ പോലീസിനോട് കുറ്റം സമ്മതിച്ചത്. ഇതാണ് മരണകാരണത്തിനു പിന്നില്‍ അബുബക്കര്‍ ആയിരിക്കുമെന്ന സംശയം പോലീസിനും ഉണ്ടായത്. അയാള്‍ തന്നെ കുറ്റം സമ്മതിച്ചെങ്കിലും ഇതില്‍ പോലീസിന് ബലമായ സംശയം ഉണ്ടായിരുന്നു. തുടര്‍ന്നാണ് അന്വേഷണം മറ്റ് പലരിലേക്കും തിരിയുന്നത്. നഷ്ടപ്പെട്ട മൊബൈലിനെക്കുറിച്ച് അബുബക്കറിനെ ചോദ്യം ചെയ്തെങ്കിലും യാതൊരുതുമ്പും ലഭിച്ചില്ല. അബുബക്കര്‍ റിമാൻഡിലായെങ്കിലും പോലീസിന്‍റെ അന്വേഷണം മൊബൈല്‍ ഫോൺ കേന്ദ്രീകരിച്ചായിരുന്നു. അതിന്‍റെ പിന്നാലെ ഉറക്കമില്ലാത്ത അന്വേഷണത്തിലായിരുന്നു പോലീസ്. വയോധികയുടെ നഷ്ടപ്പെട്ട മൊബൈൽ കേന്ദ്രീകരിച്ചുള്ള നിരീക്ഷണത്തിലാണ് യഥാർഥ പ്രതികളെ വലയിലാക്കാനായത്. കൊല നടന്ന് ദിവസങ്ങൾക്കുള്ളിൽ പ്രതികളെ വലയിലാക്കാനുമായി. മൊബൈൽ ഏതു സമയത്തും ഓണാക്കാനിടയുണ്ടെന്ന പോലീസിന്‍റെ നിഗമനം കൊലയാളിലേക്ക് എത്താനുള്ള വഴിത്തിരിവായി. പ്രതീക്ഷിച്ചപോലെ രാത്രിയോടെ കരുനാഗപ്പള്ളി ടവർ ലൊക്കേഷനിൽ മൊബൈൽ പ്രവർത്തിച്ചതായി പോലീസിന് വിവരം ലഭിച്ചു. ഒട്ടും വൈകാതെ തന്നെ യഥാർഥ പ്രതിയിലേക്ക് അന്വേഷണം എത്താനുമായി. തുടർന്നാണ് പല്ലന സ്വദേശിയും കരുനാഗപ്പള്ളിയിൽ വാടകയ്ക്ക് താമസിച്ചു വരുന്ന സൈനുലാബ്ദീൻ (കൊച്ചുമോൻ -44), ഭാര്യ അനീഷ(38) എന്നിവരെ പിടികൂടിയത്. തുടർന്നുള്ള ചോദ്യം ചെയ്യലിലാണ് ഇരുവരും കൊലപാതക കുറ്റം സമ്മതിക്കുന്നത്. കഴിഞ്ഞ 17 നാണ് പുറക്കാട് തനിച്ച് താമസിക്കുകയായിരുന്ന വയോധിക വീടിനുള്ളിൽ മരിച്ച നിലയിൽ കണ്ടെത്തുന്നത്. 16ന് രാത്രി അകത്തുകടന്ന് വയോധികയുടെ പണവും സ്വർണവും മോഷ്ടിക്കാനാണ് സൈനുലാബ്ദീനും അനീഷയും ശ്രമിച്ചത്. മോഷണശ്രമത്തിനിടെ റംലത്ത് ഇരുവരെയും കണ്ടതിനാൽ പിന്നീട് തിരിച്ചറിയുമെന്ന് കരുതി വയോധികയെ കഴുത്തു ഞെരിച്ച് കൊലപ്പെടുത്തിയതെന്ന് പ്രതികൾ പോലീസിനോട് പറഞ്ഞു. സ്വർണമോ പണമോ കാണാതിരുന്നതിനാൽ കൈയിൽ കിട്ടിയ മൊബൈലുമായി കടന്നുകളയുകയായിരുന്നു. പിന്നീട് മൊബൈൽ ഓഫാക്കിവച്ചു. അടുത്ത ദിവസം മൊബൈൽ കരുനാഗപ്പള്ളി ടവർ ലൊക്കേഷനിൽ പ്രവർത്തന സജ്ജമായതോടെയാണ് ദമ്പതികൾ പിടിയിലാകുന്നത്. പ്രതികളുടെ തെളിവെടുപ്പ് അമ്പലപ്പുഴ: തോട്ടപ്പള്ളി ഒറ്റപ്പനയിൽ തനിച്ചു താമസിച്ചിരുന്ന സ്ത്രീയെ വീട്ടിൽ മരിച്ച നിലയിൽ കണ്ടെത്തിയ സംഭവത്തിലെ പ്രതികളെ തെളിവെടുപ്പ് നടത്തി കോടതിയില്‍ ഹാജരാക്കി. ഒന്നാം പ്രതി സൈനുലാബ്ദീന്‍, ഭാര്യ അനീഷ എന്നിവരെയാണ് വയോധികയുടെ പുറക്കാടുള്ള വീട്ടില്‍ എത്തിച്ച് തെളിവെടുപ്പ് നടത്തിയത്. സ്ത്രീയുടെ മോഷ്ടിച്ച സ്വര്‍ണാഭരണങ്ങള്‍ കരുനാഗപ്പള്ളിയിലെ ഒരു ജ്വല്ലറിയില്‍നിന്നു കണ്ടെടുത്തു. പ്രതികള്‍ ഊരിമാറ്റിയ ഫോൺ സിമ്മും പോലീസ് കണ്ടെടുത്തു. വേണ്ടിവന്നാല്‍ വീണ്ടും തെളിവെടുപ്പ് നടത്താന്‍ കസ്റ്റഡിയില്‍ വാങ്ങും.

ആനപ്രമ്പാല്‍ ജലോത്സവം ഇന്ന്

എടത്വ: കുട്ടനാട് സാംസ്‌കാരികവേദിയുടെ നേതൃത്വത്തില്‍ 6-ാമത് ശ്രീനാരായണ എവറോളിംഗ് ട്രോഫിക്കുവേണ്ടിയുള്ള ആനപ്രമ്പാല്‍ ജലോത്സവം ഇന്ന് ഉച്ചകഴിഞ്ഞ് 2.30ന് പമ്പയാറ്റില്‍ നടക്കും. ജലോത്സവത്തിനു മുന്നോടിയായി നടക്കുന്ന പൊതുസമ്മേളനം സഹകരണ-ദേവസ്വം-തുറമുഖ വകുപ്പ് മന്ത്രി വി.എന്‍. വാസവന്‍ ഉദ്ഘാടനം ചെയ്യും. ജലോത്സവ സമിതി ചെയര്‍മാന്‍ ബിജു പറമ്പുങ്കല്‍ അധ്യക്ഷത വഹിക്കും. കൊടിക്കുന്നില്‍ സുരേഷ് എംപി ജലോത്സവം ഉദ്ഘാടനവും ആര്‍.സി. ചാരിറ്റബിള്‍ ട്രസ്റ്റ് ചെയര്‍മാന്‍ റെജി ചെറിയാന്‍ സമ്മാനദാനവും നിര്‍വഹിക്കും. ഡെപ്യൂട്ടി എക്‌സൈസ് കമ്മീഷണര്‍ എസ്. അശോക് കുമാര്‍ ലഹരി വിരുദ്ധ സന്ദേശം നല്‍കും. ആനന്ദ് പട്ടമന, ബിഷപ് തോമസ് കെ. ഉമ്മന്‍, സുജിത്ത് തന്ത്രികള്‍ എന്നിവര്‍ അനുഗ്രഹ പ്രഭാഷണം നടത്തും. പഞ്ചായത്ത് പ്രസിഡന്‍റ് ഗായത്രി ബി. നായര്‍, ജില്ലാ പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയര്‍മാന്‍ ബിനു ഐസക് രാജു എന്നിവര്‍ പ്രസംഗിക്കും. ജലോത്സവത്തിന്‍റെ ഒരുക്കങ്ങള്‍ പൂര്‍ത്തിയായതായും ജലോത്സവം പൂര്‍ണമായും ഹരിത ചട്ടം പാലിച്ചാണ് നടത്തുകയെന്നും 25 വള്ളങ്ങളിലായി കുട്ടനാട്ടിലെ പ്രമുഖ ടീമുകള്‍ അണിനിരക്കുമെന്നും ജലോത്സവസമിതി ഭാരവാഹികള്‍ അറിയിച്ചു. സുനില്‍ മൂലയില്‍, തോമസുകുട്ടി ചാലുങ്കല്‍, അരുണ്‍ പുന്നശേരില്‍, ഷാജി കറുകത്ര, പീയൂഷ് പി. പ്രസന്നന്‍, ജിനുകുമാര്‍ ശാസ് താംപറമ്പ്, മോനിച്ചന്‍, കെ.വി. മോഹനന്‍, മനോഹരന്‍, വെറ്റിലക്കണ്ടം, മനോജ് തുണ്ടിയില്‍ സുനില്‍ സാഗര്‍, വില്‍സണ്‍, സുകു പാക്കളില്‍ എന്നിവര്‍ നേതൃത്വം നല്‍കും.

നാടും നഗരവും ഓണത്തിരക്കിൽ

ചേർത്തല: കേരള സ്റ്റേറ്റ് ഭാരത് സ്കൗട്ട്സ് ആൻഡ് ഗൈഡ്സ് ചേർത്തല ജില്ലാ അസോസിയേഷന്‍റെ നേതൃത്വത്തിൽ നടത്തിയ ഓണാഘോഷ പരിപാടികൾ ചേർത്തല ബിപിസി പി.എസ്. വിജി ഉദ്ഘാടനം ചെയ്തു. ഗൈഡ് വിഭാഗം ജില്ലാ ട്രെയിനിംഗ് കമ്മീഷണർ എം. ഭരതമ്മാൾ അധ്യക്ഷത വഹിച്ചു. ഗൈഡ് വിഭാഗം ജില്ലാ ഓർഗനൈസിംഗ് കമ്മീഷണർ വി.എസ്. ഗ്രേസി, ജില്ലാ ട്രഷറർ സാജു തോമസ്, ബുൾബുൾ ജില്ലാ കമ്മിഷണർ പി. മറിയാമ്മ, ചേർത്തല എൽഎ സെക്രട്ടറി എം.എസ്. ജയകല, കെ.എം. ജയ്മോൻ, മെർലിൻ തോമസ് എന്നിവർ പ്രസംഗിച്ചു. കയർഫെഡ് ഓണം വിപണനമേള കായംകുളം: കരീലക്കുളങ്ങര സഹകരണ സ്പിന്നിംഗ് മിൽ ഗ്രൗണ്ടിൽ കയർഫെഡ് ഓണം വിപണനമേള ആരംഭിച്ചു. 15 വരെ മേള ഉണ്ടാകും. മേളയിൽ കയർഫെഡ് ഉത്പന്നങ്ങൾ വിലക്കുറവിൽ ലഭ്യമാകും. സ്പിന്നിംഗ് മിൽ ചെയർമാൻ എ. മഹേന്ദ്രൻ ഉദ്‌ഘാടനം നിർവഹിച്ചു. എച്ച്ആർ മാനേജർ ആശ, ഡെപ്യൂട്ടി മാനേജർ ജയരാജ്, ആർ. രാജീവ്, ആർ. ബിജു, ജിഷ രാജ് എന്നിവർ പ്രസംഗിച്ചു. കുടുംബശ്രീ ഓണം വിപണനമേള ചേര്‍ത്തല: നഗരസഭ കുടുംബശ്രീ സിഡിഎസിന്‍റെ ആഭിമുഖ്യത്തില്‍ നഗരസഭ ഓഫീസിനു മുന്നിലും കോടതിക്കവലയിലുള്ള കുടുംബശ്രീ നഗരച്ചന്തയിലും ഓണം വിപണമേള ആരംഭിച്ചു. നഗരസഭാ വൈസ് ചെയർമാൻ ടി.എസ്. അജയകുമാർ ഉദ്ഘാടനം ചെയ്തു. സിഡിഎസ് ചെയർപേഴ്സൺ പി. ജ്യോതിമോൾ, വൈസ് ചെയർപേഴ്സൺ എം.എ. മഞ്ജു, നസിയ നിസാർ, അനിമോൾ, ഓമന രാജു, ലത ബാബു, ശോഭ തിലകൻ, രതിമോൾ, ശാരിമോൾ തുടങ്ങിയവർ പങ്കെടുത്തു. വീയപുരം ചുണ്ടൻവള്ള സമിതിക്ക് ആദരം ഹരിപ്പാട്: ഗാന്ധിഭവൻ സ്നേഹവീട് ഓണാഘോഷങ്ങളുടെ ഭാഗമായി സംഘടിപ്പിച്ച ഓണോത്സവത്തിൽ നെഹ്റുട്രോഫി വള്ളംകളിയിൽ വിജയികളായ വീയപുരം ചുണ്ടൻ വള്ളസമിതിക്ക് ആദരവ്. ചെറുതന പഞ്ചായത്ത് പ്രസിഡന്‍റ് എബി മാത്യു അധ്യക്ഷത വഹിച്ചു. ജില്ലാ ചൈൽഡ് വെൽഫെയർ കമ്മിറ്റി ചെയർപേഴ്സൺ അഡ്വ. വസന്തകുമാരി ഉദ്ഘാടനം നിർവഹിച്ചു. ആലപ്പുഴ ജില്ലാ പഞ്ചായത്തംഗം എ. ശോഭ, ചലച്ചിത്ര തിരക്കഥാകൃത്ത് സതീഷ് മുതുകുളം, ആയപറമ്പ് രാമേന്ദ്രൻ, പ്രണവം ശ്രീകുമാർ, അബി ഹരിപ്പാട്, പ്രഫ. ശ്രീമോൻ, ബെനില സതീഷ്, ലതികനായർ, സുന്ദരൻ പ്രഭാകരൻ എന്നിവർ പ്രസംഗിച്ചു. ദേവികുളങ്ങരയിൽ കർഷകചന്ത കായംകുളം: ദേവികുളങ്ങര പഞ്ചായത്ത് കൃഷിഭവന്‍റെ ആഭിമുഖ്യത്തിൽ ഓണം സമൃദ്ധി കർഷകചന്ത ആരംഭിച്ചു. പഞ്ചായത്ത് പ്രസിഡന്‍റ് എസ്. പവനനാഥൻ ഉദ്‌ഘാടനം ചെയ്തു. വികസനകാര്യ സ്ഥിരം സമിതി അധ്യക്ഷ എസ്. രേഖ അധ്യക്ഷയായി. കൃഷി ഓഫീസർ കെ.പി. നിവേദിത, അസി. കൃഷി ഓഫീസർ ജി. ഹരികുമാർ. ഹരി മോഹൻകുമാർ, അനിരുദ്ധൻ, ജയറാം, കർഷകരായ ശിവജി എന്നിവർ പ്രസംഗിച്ചു. കൃഷിവകുപ്പിന്‍റെ ഓണസമൃദ്ധി അമ്പലപ്പുഴ: കൃഷിവകുപ്പ് ഓണസമൃദ്ധി എന്ന പേരിൽ കർഷകച്ചന്ത ആരംഭിച്ചു. ബ്ലോക്ക്തല ഉദ്ഘാടനം എച്ച്. സലാം എംഎൽഎ നിർവഹിച്ചു. അമ്പലപ്പുഴ തെക്ക് പഞ്ചായത്ത് കൃഷിഭവനിൽ ആരംഭിച്ച ഓണച്ചന്തയിൽ കർഷകരിൽനിന്ന് അവരുടെ ഉത്പന്നങ്ങൾ 10 ശതമാനം കൂടുതൽ വില നൽകി സംഭരിച്ച് 30 ശതമാനം വിലക്കുറവിലാണ് ഉപഭോക്താക്കൾക്ക് നൽകുന്നത്. അമ്പലപ്പുഴ തെക്ക് പഞ്ചായത്ത് പ്രസിഡന്‍റ് ശോഭ ബാലൻ അധ്യക്ഷയായി. സ്ഥിരം സമിതി അധ്യക്ഷൻ കെ. സിയാദ്, അംഗങ്ങളായ കെ. മനോജ് കുമാർ, നിഷ മനോജ്, സുഷമ രാജീവ്, മുതിർന്ന കർഷകൻ വി. മുകുന്ദൻ, കൃഷി അസി. ഡയറക്ടർ ടി. എസ്. വൃന്ദ, കൃഷി ഉദ്യോഗസ്ഥരായ ഹസീന, അഖില, പി. പ്രശാന്ത്, എൻ. സുരേഷ് എന്നിവർ സംസാരിച്ചു. മാന്നാർ: കൃഷിഭവന്‍റെ ഓണസമൃദ്ധി 2025 കർഷകച്ചന്തയ്ക്കു തുടക്കമായി. കർഷകർ, ഹോർട്ടിക്കോർപ് എന്നിവരിൽനിന്നു സംഭരിക്കുന്ന പച്ചക്കറികൾ വിപണി വിലയിൽനിന്നു മുപ്പതു ശതമാനം വിലക്കുറവിലാണ് ഓണസമൃദ്ധി കർഷക ചന്തയിലൂടെ വിറ്റഴിക്കുന്നത്. കർഷകർക്ക് അവരുടെ ഉത്പന്നങ്ങൾക്ക് വിപണിവിലയെക്കാൾ 10% കൂടുതൽ തുകയും നൽകും. മാന്നാർ കൃഷിഭവന് സമീപം പഞ്ചായത്ത് ഓഫിസിന് മുൻവശം ആരംഭിച്ച കർഷകച്ചന്തയുടെ ഉദ്ഘാടനം പഞ്ചായത്ത് വൈസ് പ്രസിഡന്‍റ് സെലീന നൗഷാദ് നിർവഹിച്ചു. വികസനകാര്യ സ്റ്റാൻഡിംഗ് കമ്മിറ്റി ചെയർ പേഴ്സൺ ശാലിനി രഘുനാഥ് അധ്യക്ഷയായി. കൃഷി ഓഫീസർ ഹരികുമാർ പി.സി. പദ്ധതി വിശദീകരണം നടത്തി. മുതുകുളം: മുതുകുളം പഞ്ചായത് കൃഷിഭവന്‍റെ നേതൃത്വത്തിൽ ഓണസമൃദ്ധി പഴം -പച്ചക്കറി വിപണി ആരംഭിച്ചു. പഞ്ചായത്ത് പ്രസിഡന്‍റ് കെ.വി. ജ്യോതിപ്രഭ ഉദ്ഘാടനം ചെയ്തു. വൈസ് പ്രസിഡന്‍റ് ജി. ലാൽമാളവ്യ അധ്യക്ഷനായി. ജില്ലാ കൃഷി ഡെപ്യൂട്ടി ഡയറക്ടർ എൽ. പ്രീത പദ്ധതി വിശദീകരണം നടത്തി. കൃഷി ഓഫീസർ ആതിര എം. നായർ, പഞ്ചായത്തംഗങ്ങളായ കെ. ശ്രീലത, എ. സുനിത, കാർഷിക വികസന സമിതി അംഗങ്ങളായ കെ. വാമദേവൻ, എസ്. രാമചന്ദ്രൻ ചിറത്തലയ്ക്കൽ, എൻ. രാമചന്ദ്രൻനായർ, കെ. ഉണ്ണികൃഷ്ണൻ, എൻ. മനോഹരൻനായർ എന്നിവർ പ്രസംഗിച്ചു.

തിരുനാളിന് കൊടിയേറി

മാവേലിക്കര: കല്ലുമല സെന്‍റ് മേരീസ് മലങ്കര സുറിയാനി കത്തോലിക്കാ പള്ളിയിൽ പരിശുദ്ധ ദൈവമാതാവിന്‍റെ തിരുനാളിനു കൊടിയേറി. ഫാ. ജെറിൻ തുണ്ടിൽ കൊടിയേറ്റ് കർമം നിർവഹിച്ചു. വികാരി ഫാ. ഗീവർഗീസ് കോശി ചരുവിള, ഫാ. സഖറിയ പുത്തൻപുരയിൽ എന്നിവർ പങ്കെടുത്തു. ഇന്ന് മാവേലിക്കര ഭദ്രാസനാധ്യക്ഷൻ ബിഷപ് മാത്യൂസ് മാർ പോളികാർപ്പോസിന്‍റെ കാർമികത്വത്തിൽ വിശുദ്ധ കുർബാനയും കുട്ടികളുടെ ആദ്യകുർബാന സ്വീകരണവും ധന്യൻ മാർ ഈവാനിയോസ് തിരുമേനിയുടെ സ്മരണയിലുള്ള ഇടവകയുടെ ചരിത്രഫലക അനാഛാദനവും നടക്കും. സെപ്‌റ്റംബർ എട്ടുവരെ എല്ലാ ദിവസവും വൈകിട്ട് അഞ്ചിന് ജപമാല, വിശുദ്ധ കുർബാന, മധ്യസ്ഥപ്രാർഥന, വചനസന്ദേശം, നേർച്ച എന്നിവ നടക്കും. നാളെ നടക്കുന്ന ഇടവക നവീകരണ ധ്യാനത്തിന് ഫാ. ജോൺ മരുതൂർ നേതൃത്വം നൽകും. ആറിന് ഭക്തസംഘടനകളുടെ വാർഷികവും ഏഴിന് വൈകിട്ട് ഏഴിന് ഭക്തിനിർഭരമായ റാസയും നടക്കും. എട്ടിന് വിശുദ്ധ കുർബാനയോടുകൂടി കൊടിയിറക്കി തിരുനാൾ സമാപിക്കുമെന്നും വികാരി ഫാ. ഗീവർഗീസ് കോശി ചരുവിള അറിയിച്ചു.

പൂപ്പള്ളി-ചമ്പക്കുളം റോഡിൽ പൈപ്പ് പൊട്ടി കുടിവെള്ളം പാഴാകുന്നു

ചമ്പക്കുളം: പൂപ്പള്ളി-ചമ്പക്കുളം റോഡിൽ ചമ്പക്കുളം മിൽമാ പാലത്തിന് വടക്ക് പൈപ്പ് ലൈൻ പൊട്ടി വെള്ളം പാഴാകാൻ തുടങ്ങിയിട്ട് മാസങ്ങളായി. വെള്ളം ഒഴുകി റോഡിൽ രൂപപ്പെട്ട കുഴിയിൽ വിണ് ഇരുചക്ര വാഹനയാത്രക്കാർ അപകടത്തിൽപ്പെടുന്നത് പതിവാണ്. നെടുമുടി പഞ്ചായത്തിലെ എട്ട്, ഒൻപത് വാർഡുകളിലേക്ക് പുല്പത്ര പമ്പ് ഹൗസിൽനിന്നു ജലവിതരണം നടത്തുന്ന പൈപ്പാണ് മാസങ്ങളായി പൊട്ടി വെള്ളം പാഴാകുന്നത്. ഒന്നിടവിട്ടുള്ള ദിവസങ്ങളിലാണ് ഈ ലൈനിൽ വെള്ളം വിതരണം നടന്നുവരുന്നത്. ടാർ റോഡിന് നടുവിലായി രൂപപ്പെട്ട പൊട്ടൽ പരിഹരിക്കാൻ വാട്ടർ അഥോറിക്ക് റോഡ് മുറിക്കാൻ പൊതുമരാമത്ത് വകുപ്പിന്‍റെ അനുമതി ആവശ്യമായിരുന്നു. അനുമതി ലഭിച്ച് റോഡ് മുറിക്കാനായപ്പോൾ ഒരു ദിവസത്തിലധികം വാഹന ഗതാഗതം നിരോധിക്കാനാവില്ല എന്ന നിബന്ധനയ്ക്ക് മുന്നിൽ നിസഹായനായി മെയിന്‍റനൻസ് കരാറുകാരൻ. പള്ളാത്തുരുത്തി പാലത്തിന്‍റെ നിർമാണ ജോലികൾ നടക്കുന്നതിനാൽ എസി റോഡിൽനിന്നു ദേശീയപാതയിലേക്കുള്ള പ്രധാന റോഡായ പൂപ്പള്ളി ചമ്പക്കുളം റോഡിൽ വാഹന ഗതാഗതം പതിവിലും കൂടുതലാണ്. സാധാരണ ദിവസങ്ങളിൽ പോലും വലിയ വാഹനത്തിരക്ക് അനുഭവപ്പെടുന്ന റോഡിൽ ഇപ്പോൾ ഗതാഗതത്തിരക്ക് അതിരൂക്ഷമാണ്. അതുകൊണ്ടുതന്നെ ഒന്നിലധികം ദിവസം റോഡ് ഗതാഗതം തടയാനാവില്ല എന്നതും പ്രധാനമാണ്. നിലവിൽ മൂന്നു മീറ്ററിലധികം ആഴത്തിലാണ് റോഡിന് കുറുകെ ജലവിതരണ പൈപ്പ് കടന്നുപോകുന്നത്. ഈ പൈപ്പാണ് ഇപ്പോൾ പൊട്ടി വെള്ളം റോഡിലേക്ക് ഒഴുകുന്നത്. റോഡ് പൊളിക്കാതെയും ഗതാഗതം തടസപ്പെടുത്താതെയും ജലവിതരണ പൈപ്പ് റോഡിന് വശങ്ങളിലൂടെ സ്ഥാപിച്ച് തകരാർ പരിഹരിക്കാനുള്ള ശ്രമത്തിലാണ് കരാറുകാരൻ.

അശാസ്ത്രീയ ഓടനിർമാണം: നാട്ടുകാരും യാത്രക്കാരും വലയുന്നു

അന്പലപ്പുഴ: അശാസ്ത്രീയമായ ഓടനിർമാണം മൂലം നാട്ടുകാരും യാത്രക്കാരും വലയുന്നു. ആശുപത്രിയിലേക്കുള്ള യാത്രയും തടസപ്പെട്ടു. ദേശീയപാതാ വികസനത്തിന്‍റെ ഭാഗമായി ആലപ്പുഴ മെഡിക്കൽ കോളജ് ആശുപത്രി സൂപ്പർ സ്പെഷാലിറ്റി ബ്ലോക്കിന് കിഴക്കുഭാഗത്താണ് ദേശീയപാതയോട് ചേർന്ന് അശാസ്ത്രീയമായ രീതിയിൽ ഓട നിർമിക്കുന്നത്. ഓട നിർമാണത്തിനായി വഴി കെട്ടിയടച്ചിട്ട് രണ്ടാഴ്ച പിന്നിടുന്നു. തുടക്കത്തിൽ സൂപ്പർ സ്പെഷാലിറ്റി ആശുപത്രിയിലേക്കും സമീപത്തെ കടകളിലേക്കും പോകാൻ ഒരു നടവഴി പോലുമില്ലായിരുന്നു. തുടർന്ന് വ്യാപാരികൾ സ്വന്തം കൈയിൽനിന്ന് പണം മുടക്കിയാണ് ഇതിലേക്ക് ഒരു നടവഴി നിർമിച്ചത്. ഇപ്പോൾ ഇരുചക്രവാഹനം മാത്രമാണ് ബുദ്ധിമുട്ടി ഇതിലേ സഞ്ചരിക്കുന്നത്. ദേശീയപാതയ്ക്കരികിലെ രണ്ടു വൈദ്യുത പോസ്റ്റുകൾ മാറ്റാതെയാണ് ഇവിടെ നാട്ടുകാരെയും യാത്രക്കാരെയും വലച്ച് ഓടനിർമിക്കുന്നത്. നേരത്തെ ദേശീയ പാതയിൽനിന്ന് രണ്ടു മിനിറ്റ് കൊണ്ട് സൂപ്പർ സ്പെഷാലിറ്റി ആശുപത്രിയിലെത്താമായിരുന്നു. ഇപ്പോൾ പ്രധാന കവാടത്തിലൂടെ ചുറ്റിവേണം സൂപ്പർ സ്പെഷാലിറ്റി ബ്ലോക്കിലെത്താൻ. ഒരാൾക്ക് കഷ്ടിച്ചു നടന്നുപോകാനുള്ള സൗകര്യമാണ് ഈ വഴിക്കുള്ളത്. കൂടാതെ ഓട നിർമാണം പൂർത്തിയായാലും പടിഞ്ഞാറ് നിന്നുള്ള വെള്ളം സുഗമമായി കിഴക്കോട്ട് ഒഴുകുന്ന തരത്തിലല്ല ഓടനിർമിക്കുന്നതെന്നാണ് നാട്ടുകാരുടെ ആരോപണം. വെള്ളമൊഴുകാൻ ഇനി പ്രത്യേക തൂമ്പ് നിർമിക്കേണ്ടി വരുമെന്നാണ് നാട്ടുകാർ പറയുന്നത്. പ്രാദേശിക ഭരണകൂടവുമായി പോലും യാതൊരു കൂടിയാലോചനയുമില്ലാതെ ആരംഭിച്ച ഓട നിർമാണത്തിന്‍റെ ദുരിതം ഇനിയും മാസങ്ങൾ അനുഭവിക്കേണ്ടിവരുമെന്ന ആശങ്കയാണ് നാട്ടുകാർക്കുള്ളത്.

പ്രതിസന്ധികളില്ലാത്ത നല്ല നാളേക്കായി പ്രാർഥിക്കണം: ശ്രേഷ്ഠ കാതോലിക്കാ ബാവ

കായംകുളം: വ്യവഹാരങ്ങളും പ്രതിസന്ധികളും ഇല്ലാത്ത ഒരു നല്ല നാളേക്കായി പ്രാർഥിക്കാനും പ്രവർത്തിക്കാനും വിശ്വാസികളായ ഏവർക്കും കഴിയണമെന്ന് യാക്കോബായ സുറിയാനിസഭ ശ്രേഷ്ഠ കാതോലിക്കയും മലങ്കര മെത്രാപ്പോലീത്തായുമായ മാർ ബസേലിയോസ് ജോസഫ് കാതോലിക്ക ബാവ പറഞ്ഞു. കട്ടച്ചിറ മരിയൻ തീർഥാടനകേന്ദ്രത്തിലെ എട്ടുനോമ്പ് തിരുനാളിന്‍റെ ഭാഗമായി നടന്ന വിശുദ്ധ കുർബാനയ്ക്ക് മുഖ്യകാർമികത്വം വഹിച്ച ശേഷം നടന്ന ആദരവ് സമ്മേളനത്തിൽ സംസാരിക്കുകയായിരുന്നു ബാവ. മൃതദേഹ സംസ്കാരവുമായി ബന്ധപ്പെട്ട് കട്ടച്ചിറയിൽ നിരന്തരമുണ്ടാവുന്ന തർക്കങ്ങൾ വേദനാജനകമാണ്. ഇത്തരം സംഭവങ്ങൾ ആവർത്തിക്കാതിരിക്കാൻ അധികാരികൾ ജാഗ്രത പുലർത്തണമെന്നും ബെസേലിയോസ് ജോസഫ് കാതോലിക്ക ബാവ പറഞ്ഞു. പൊതുസമ്മേളനത്തിൽ സമൂഹത്തിന്‍റെ നാനാതുറയിൽ ഉള്ളവർ ശ്രേഷ്ഠ ബാവയ്ക്ക് ആദരം അർപ്പിച്ചു. ഭരണിക്കാവ് പഞ്ചായത്ത് പ്രസിഡന്‍റ് കെ. ദീപ, സ്ഥിരം സമിതി ചെയർമാൻ ശശിധരൻ നായർ, കെപിസിസി സെക്രട്ടറി കറ്റാനം ഷാജി, ബ്ലോക്ക് പഞ്ചായത്ത് മെംബർ സുരേഷ് തോമസ് നൈനാൻ, പള്ളിക്കൽ സുനിൽ, സുഭാഷ് വാസു, വാർഡ് മെമ്പർ എ. തമ്പി, മഞ്ഞാടിത്തറ വിജയൻ, പ്രകാശ്, ജയേഷ്, സദാശിവൻ തുടങ്ങിയവർ പ്രസംഗിച്ചു. തുടർന്ന് എസ്എസ്എൽസി പ്ലസ് ടു പരീക്ഷകളിൽ ഉന്നത വിജയം കരസ്ഥമാക്കിയ വിദ്യാർഥികൾക്ക് എൻഡോവ്മെന്‍റ് വിതരണം നടത്തി. പൗരോഹിത്യ ശുശ്രൂഷയിൽ മുപ്പതുവർഷം പൂർത്തിയാക്കിയ വികാരി ഫാ. റോയി ജോർജ് കട്ടച്ചിറ ദക്ഷിണേന്ത്യയിലെ പ്രായം കുറഞ്ഞ ചിത്രകാരൻ ഏദൻ എൽദോ എന്നിവരെ ആദരിച്ചു.

സുധാകരനെ മാറ്റിനിർത്തി ആക്ഷേപിക്കുന്നത് സിപിഎമ്മിന്‍റെ സങ്കുചിത ചിന്താഗതി: അടൂർ പ്രകാശ്

കായംകുളം: പി. കൃഷ്ണപിള്ള ചരമവാർഷികത്തിൽനിന്ന് ജി. സുധാകരനെ മാറ്റിനിർത്തി ആക്ഷേപിച്ചത് സിപിഎമ്മിന്‍റെ സങ്കുചിത ചിന്താഗതിയാണെന്നും കായംകുളത്തെ സിപിഎം അക്രമത്തിനെതിരേ പ്രസംഗിക്കാൻ തന്നേക്കാൾ അനുയോജ്യൻ മുൻ മന്ത്രി ജി. സുധാകരൻ തന്നെയാണെന്നും യുഡിഎഫ് കൺവീനർ അടൂർ പ്രകാശ് എംപി. ഡിസിസി ജനറൽ സെക്രട്ടറിയും നഗരസഭ അംഗവുമായ കെ. പുഷ്പദാസിനെ സിപിഎം ആക്രമിച്ചതിൽ പ്രതിഷേധിച്ച് ബ്ലോക്ക് കോൺഗ്രസ് കമ്മിറ്റികൾ നടത്തിയ പ്രതിഷേധ സമ്മേളനം കായംകുളം പാർക്ക് മൈതാനിയിൽ ഉദ്ഘാടനം ചെയ്യുകയായിരുന്നു അദ്ദേഹം. സിപിഎം പറയുന്നതുകേട്ട് പ്രവർത്തിക്കുന്നവരായി പോലീസ് മാറിയെന്നും ഇത്തരം അക്രമങ്ങൾ തുടർച്ചയായി നടക്കുന്നത് അതിന്‍റെ ഭാഗമാണെന്നും അദ്ദേഹം കുറ്റപ്പെടുത്തി. സൗത്ത് ബ്ലോക്ക് പ്രസിഡന്‍റ് ചിറപ്പുറത്ത് മുരളി അധ്യക്ഷത വഹിച്ചു. ഡിസിസി പ്രസിഡന്‍റ് ബി. ബാബു പ്രസാദ്, കെപിസിസി ജനറൽ സെക്രട്ടറി കെ.പി. ശ്രീകുമാർ, കെപിസിസി സെക്രട്ടറിമാരായ ഇ. സമീർ, എൻ. രവി, എ. ത്രിവിക്രമൻതമ്പി, കറ്റാനം ഷാജി, ടി. സൈനു ലാബ്ദീൻ, യു. മുഹമ്മദ്, എ.ജെ. ഷാജഹാൻ എന്നിവർ പ്രസംഗിച്ചു.

ജിഎസ്ടി കൗണ്‍സിലിനെ കേന്ദ്ര സര്‍ക്കാര്‍ ദുരുപയോഗം ചെയ്യുന്നു: മന്ത്രി സജി ചെറിയാന്‍

എടത്വ: സംസ്ഥാനങ്ങള്‍ക്ക് ലഭിക്കേണ്ട വിഹിതം വെട്ടിക്കുറച്ച് ജിഎസ്ടി കൗണ്‍സിലിനെ കേന്ദ്ര സര്‍ക്കാര്‍ ദുരുപയോഗം ചെയ്യുന്നതായി ടൂറിസം-സാംസ്‌കാരിക മന്ത്രി സജി ചെറിയാന്‍. സിപിഎം എടത്വ വടക്ക് ലോക്കല്‍ കമ്മിറ്റി ഓഫീസ് ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. പിരിച്ചെടുക്കുന്ന ജിഎസ്ടിയില്‍ സംസ്ഥാനങ്ങള്‍ക്ക് നല്‍കിയിരുന്ന വിഹിതം വെട്ടിക്കുറച്ചു. വിദ്യാഭ്യാസ മേഖലയെയും തകര്‍ക്കാനുള്ള ശ്രമമാണ് ഇപ്പോള്‍ നടക്കുന്നത്. 1500 കോടി രൂപ വിദ്യാഭ്യാസ മേഖലയ്ക്ക് ലഭിക്കാനുണ്ട്. ആരോഗ്യ മേഖലയിലും ലഭിക്കാനുള്ള വിഹിതം കേന്ദ്ര സര്‍ക്കാര്‍ നല്‍കുന്നില്ല. 2.50 ലക്ഷം കോടി രൂപ ബജറ്റില്‍ വകകൊള്ളിക്കുന്ന കേരളത്തില്‍ വികസന പ്രവര്‍ത്തനങ്ങള്‍ നടത്താതെ ദ്രോഹിക്കുന്ന നടപടിയാണ് കേന്ദ്രം സ്വീകരിക്കുന്നതെന്ന് സജി ചെറിയാന്‍ പറഞ്ഞു. ഭവന നിര്‍മാണ പദ്ധതിയില്‍ 75000 രൂപ കേന്ദ്രം അനുവദിക്കുമ്പോള്‍ പ്രധാന മന്ത്രിയുടെ ഫോട്ടോ വീടിന് മുന്‍പില്‍ പതിക്കണമെന്നാണ് നിര്‍ദേശം. കേരളത്തില്‍ അത് നടപ്പാക്കില്ല. ഉത്തരേന്ത്യന്‍ സംസ്ഥാനങ്ങളില്‍ നോക്കിയാല്‍ മതി. വോട്ടു കൊള്ളയിലൂടെയാണ് ബിജെപി അധികാരത്തില്‍ എത്തിയത്. തൃശൂരില്‍ സുരേഷ് ഗോപി ആയിരക്കണക്കിന് കള്ളവോട്ട് ചെയ്യിപ്പിച്ചാണ് വിജയിച്ചത്. കേന്ദ്രസര്‍ക്കാര്‍ നിലപാടുകള്‍ ജനാധിപത്യ വിരുദ്ധമാണെന്ന് അദ്ദേഹം കൂട്ടിച്ചേര്‍ത്തു. സ്‌നേഹ വീടിന്‍റെ താക്കോല്‍ ദാനം സിപിഎം ജില്ലാ സെക്രട്ടറി ആര്‍. നാസർ നിര്‍വഹിച്ചു. കെ.ആര്‍. ഭഗീരഥന്‍, സി.കെ. സദാശിവന്‍, കെ.കെ. ഷാജു, റെജി പി. വര്‍ഗീസ്, എസ്. അജയകുമാര്‍, വര്‍ഗീസ് ആന്‍റണി തുടങ്ങിയവര്‍ പ്രസംഗിച്ചു.

പാടശേഖരങ്ങളില വെള്ളം വറ്റിക്കണമെന്ന് ആവശ്യം; സർക്കാർ ഇടപെടണമെന്നു നാട്ടുകാർ

ചമ്പക്കുളം: കുട്ടനാട്ടിലെ വെള്ളക്കെട്ട് മാറ്റാൻ പാടശേഖരങ്ങളിലെ വെള്ളം വറ്റിക്കുകയെന്നതാണ് അത്യാവശ്യം. ഇത് ആരു വറ്റിക്കുമെന്നതാണ് ചോദ്യം. വെള്ളം വറ്റിക്കാത്തതു കാരണം പാടശേഖരങ്ങളുടെ അകത്തുള്ള തുരുത്തുകളിലും ബണ്ടുകളിലും താമസിക്കുന്നവരുടെ ജീവിതം ദുരിതപൂർണമാണ്. വെള്ളം കെട്ടിക്കിടന്ന് പാടശേഖരങ്ങളിലൂടെ കടന്നുപോകുന്ന റോഡുകളും നശിക്കും. ജീവിതം പ്രതിസന്ധിയിൽ മഴ മാറിനിന്നാലും വെള്ളത്തിന്‍റെ വരവ് കുറഞ്ഞാലും പാടശേഖരങ്ങളിൽ ഒഴുകിയെത്തിയ വെള്ളം പെട്ടെന്ന് ഒഴിഞ്ഞുപോകില്ല എന്നതാണ് അനുഭവം. വെള്ളത്തിന് ഒഴുകിപ്പോകാനുള്ള മാർഗങ്ങളില്ല എന്നതാണ് പ്രശ്നം. ഇതു നിത്യജീവിതത്തെ മാത്രമല്ല, വിദ്യാഭ്യാസരംഗത്തെപ്പോലും പ്രതിസന്ധിയിലാക്കുന്നു. വെള്ളക്കെട്ട് മൂലം പല സ്കൂളുകളും പ്രവർത്തിക്കാൻ കഴിയാത്ത സ്ഥിതിയാണ്. ഈ വിദ്യാഭ്യാസ വർഷത്തിൽത്തന്നെ 20ൽ അധികം അധ്യയന ദിവസങ്ങൾ കുട്ടനാട്ടിലെ കുട്ടികൾക്കു നഷ്ടമായി. കുട്ടനാട്ടിലെ ഒരു സ്കൂളിനു സമീപത്തെ വെള്ളക്കെട്ടിന്‍റെ കാര്യത്തിൽ ഹൈക്കോടതി നേരത്തെ ഇടപെട്ടിരുന്നു. കുട്ടനാട്ടിലെ കൃഷിയിടങ്ങളിൽ സമുദ്രനിരപ്പിനേക്കാൾ ഒൻപത് അടിവരെ താഴ്ന്ന പ്രദേശങ്ങളുണ്ട്. അവിടെയാണ് വെള്ളം വറ്റിച്ചു നെൽകൃഷി നടത്തുന്നത്. സമയാസമയങ്ങളിൽ വെള്ളം വറ്റിക്കുക എന്നതു കർഷകർക്കു ഭഗീരഥ പ്രയത്നമാണ്. പല പാടശേഖരങ്ങളിലും ഒരു കൃഷി മാത്രമാണ്. ചിലേടങ്ങളിൽ രണ്ടും. കൃഷിസമയം കഴിഞ്ഞാൽ സമീപത്തെ നദികളിലെയും തോടുകളിലെയും ജലനിരപ്പായിരിക്കും മിക്ക പാടശേഖരങ്ങളിലും. തുക കൂട്ടണം പാടശേഖരത്തിന്‍റെ പുറംബണ്ട് സംരക്ഷണത്തിനും മറ്റുമായി പലേടത്തും ഏക്കർ ഒന്നിന് 3,000 രൂപയിൽ കൂടുതൽ ചെലവഴിക്കേണ്ടി വരുന്ന കർഷകർ തന്നെ വെള്ളം വറ്റിക്കലിന്‍റെയും ചുമതല വഹിക്കേണ്ടി വരുന്നത് ഇരട്ടി ഭാരമാണ്. വെള്ളം വറ്റിക്കലിന്‍റെ തുക പൂർണമായും സർക്കാർ നൽകണമെന്നാണ് ആവശ്യം ഉയർന്നിരിക്കുന്നത്. ഇപ്പോൾ വെള്ളം വറ്റിക്കലിനു നൽകുന്ന തുകയുടെ വ്യവസ്ഥ പരിഷ്കരിക്കണമെന്നും ആവശ്യമുണ്ട്. ഒരു പാടശേഖരത്തിൽ കൃഷി ചെയ്യുന്നതിനേക്കാൾ കൂടുതൽ വിസ്തൃതി പുരയിടപ്രദേശങ്ങൾക്ക് ഉണ്ടാകും. എന്നാൽ, കൃഷിയിടത്തിന്‍റെ വിസ്തൃതിയുടെ അടിസ്ഥാനത്തിൽ മാത്രമാണ് സർക്കാർ തുക നൽകുന്നത്. സർക്കാർ ചെയ്യേണ്ടത് കൃഷിവകുപ്പും പമ്പിംഗ് ലേലം നടത്തുന്ന റവന്യുവകുപ്പും സംയുക്തമായി ഇടപെടൽ പരിഹാരം കണ്ടെത്താമെന്നു ചൂണ്ടിക്കാണിക്കപ്പെടുന്നു. പമ്പിംഗ് ലേലം നടത്തുന്ന കാലാവധി ഒരു കൃഷി എന്നതിനു പകരം രണ്ട് കൃഷി ഉൾപ്പെടുന്ന ഒരു വർഷം എന്നാക്കണം. പമ്പിംഗ് സബ്സിഡി തുക കൂട്ടണം. എല്ലാ പാടശേഖരങ്ങൾക്കും സ്ഥിരം വൈദ്യുതി കണക്‌ഷൻ നൽകണം. ഒരു കൃഷി മാത്രം ചെയ്യുന്ന പാടങ്ങളിലും കൃഷിക്കു ശേഷം വെള്ളം വറ്റിക്കാൻ തുക അനുവദിക്കണം. പാടശേഖരത്തിന്‍റെ ആകെ ഭൂവിസ്തൃതി കണക്കാക്കി ആനുകൂല്യം നൽകണം. കൃഷി ഇല്ലാത്ത കാലത്തെ പമ്പിംഗും ലേല വ്യവസ്ഥയിൽ ഉൾപ്പെടുത്തണം. പെട്ടിക്കും പറയ്ക്കും പകരം കൂടുതൽ ശക്തിയുള്ള ജെറ്റ്പമ്പുകൾ പ്രോത്സാഹിപ്പിക്കണം. പാടശേഖരത്തിന്‍റെ പുറംബണ്ടുകൾ ബലപ്പെടുത്തി ഉയർത്തണം. നിയന്ത്രിത പമ്പിംഗ് സംബന്ധിച്ച കാര്യങ്ങളിൽ ഒരു പ്രാദേശികസമിതിയുടെ മേൽനോട്ടം ഉണ്ടാകണം. സമിതി വേണം വെള്ളപ്പൊക്ക കാലത്തെ നിയന്ത്രിത പമ്പിംഗ് അവലോകനം നടത്തേണ്ടത്. ഓരോ തദ്ദേശ സ്വയംഭരണ സ്ഥാപനങ്ങളും വാർഷിക പദ്ധതി വിഹിതത്തിൽ ഇതിനു തുക വകയിരുത്തണം. പാടശേഖര സമിതികൾ നട്ടം തിരിയുന്നു പുറംബണ്ടുകൾ ഒരുപരിധി വരെ ഉയർന്നതും ബലമുള്ളതുമായ പ്രദേശങ്ങളിൽ വെള്ളം പാടശേഖരങ്ങളിലേക്കു കയറില്ലെങ്കിലും വെള്ളപ്പൊക്കമുണ്ടായാൽ കയറും. ഇങ്ങനെ കയറുന്ന വെള്ളം പിന്നെ ഒഴുകിപ്പോകില്ല. ഇതു മോട്ടോർ ഉപയോഗിച്ചു വറ്റിക്കുകയാണ് പരിഹാരം. റവന്യു വകുപ്പിനു കീഴിലുള്ള പുഞ്ച സ്പെഷൽ ഓഫിസറാണ് പാടശേഖരങ്ങളിലെ വെള്ളം വറ്റിക്കാൻ നിശ്ചിത തുകയ്ക്ക് ഓരോ പാടശേഖരവും കൃഷിക്കായി ലേലം ചെയ്തു നല്കുന്നത്. അതിനാൽ ഒാരോ കർഷകനും കൈയിൽനിന്ന് രണ്ടായിരത്തിലേറെ രൂപകൂടി ചെലവഴിച്ചാണ് പലേടത്തും വെള്ളം വറ്റിക്കൽ നടത്തുന്നത്. പുഞ്ചകൃഷി ആയാലും രണ്ടാം കൃഷി ആയാലും ആറു മാസത്തേക്കാണ് പാടം ലേലം ചെയ്തു നല്കുന്നത്. കാലാവധി കഴിഞ്ഞാൽ കരാർ എടുത്തിരുന്ന ആൾ മോട്ടോറും മറ്റ് സാമഗ്രികളും എടുത്തുമാറ്റും. വൈദ്യുതി വകുപ്പ് വൈദ്യുതിയും വിച്ഛേദിക്കും. ഒരു കൃഷി മാത്രം ചെയ്യുന്ന പാടശേഖരങ്ങളിൽ പിന്നീടുള്ള ആറുമാസം വെള്ളം വറ്റിക്കാൻ മോട്ടോർ ഉണ്ടാവില്ല. ചിലേടങ്ങളിൽ, നാട്ടുകാരുടെ നിർബന്ധത്തെത്തുടർന്നു മോട്ടോർ തുടർന്നു പ്രവർത്തിപ്പിച്ച് നിയന്ത്രിത അളവിൽ വെള്ളം വറ്റിക്കാറുണ്ട്. മോട്ടോർ വാടക, ഡ്രൈവർ ശമ്പളം, വൈദ്യുതി ചാർജ്, മറ്റ് അറ്റകുറ്റപ്പണികൾ എല്ലാംതന്നെ പാടശേഖര സമിതികളാണ് വഹിക്കുന്നത്. കൃഷിയുടെ കാലം അല്ലാതിരുന്നിട്ടും ലക്ഷങ്ങൾ ചെലവഴിക്കേണ്ടി വരുന്ന പ്രതിസന്ധിയിലാണ് കർഷകരും പാടശേഖരസമിതിയും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]