"രക്ഷ വേണം കർഷകന്' പ്രതിഷേധ സദസ്

കട്ടപ്പന: കർഷക കോണ്‍ഗ്രസ് സംസ്ഥാനക്കമ്മിറ്റിയുടെ ആഹ്വാനപ്രകാരം രക്ഷവേണം കർഷകന് എന്ന മുദ്രാവാക്യവുമായി കർഷക കോണ്‍ഗ്രസ് ഇടുക്കി നിയോജക മണ്ഡലം കമ്മിറ്റിയുടെ നേതൃത്വത്തിൽ പ്രതിഷേധ സദ‌സ് സംഘടിപ്പിച്ചു. കർഷക കോണ്‍ഗ്രസ് സംസ്ഥാന ജനറൽ സെക്രട്ടറി ജോസ് മുത്തനാട്ട് ഉദ്ഘാടനം ചെയ്തു.

ജനവാസമേഖലയിൽ ഇറങ്ങുന്ന വന്യമൃഗളെയും നാട്ടിൽ നാശംവിതയ്ക്കുന്ന തെരുവുനായ്ക്കളെയും നിയന്ത്രിക്കുന്നതിനാവശ്യമായ നടപടികൾ അടിയന്തരമായി സ്വീകരിക്കണമെന്നും കർഷകർക്ക് അനുകൂലമായി വനനിയമം ഭേദഗതി ചെയ്യണമെന്നും അദ്ദേഹം ആവശ്യപ്പെട്ടു.
കർഷക കോണ്‍ഗ്രസ് നിയോജക മണ്ഡലം പ്രസിഡന്‍റ് ടോമി തെങ്ങുംപള്ളി അധ്യക്ഷത വഹിച്ചു.

സംസ്ഥാന സമതി അംഗം ജോയി ഈഴക്കുന്നേൽ, ജില്ലാ ഭാരവാഹികളായ ജോയി വർഗീസ്, ജോസ് ആനക്കല്ലിൽ, സ്യൂട്ടർ ജോർജ്, ആലീസ് ജോസ്, പി.എസ്. മേരി ദാസൻ, ഏബ്രഹാം കളപ്പുര, പി.എസ്. രാജപ്പൻ, സി.എം. തങ്കച്ചൻ, തോമസ് മുണ്ടൻമല, ജോബി വയലിൽ, റെജി വാലുമ്മേൽ എന്നിവർ പ്രസംഗിച്ചു.

ADVERTISEMENT

റംബുട്ടാൻ വില തിരിച്ചുകയറുന്നു; വില ഇടിക്കാൻ ആസൂത്രിത നീക്കമെന്ന് കർഷകർ

തൊടുപുഴ: കനത്ത മഴ മൂലം വിപണിയിൽ തകർച്ച നേരിട്ട റംബുട്ടാന്‍റെ വില വീണ്ടും ഉയരുന്നു. മഴ കുറഞ്ഞതും ഉത്പാദന സീസണ്‍ അവസാനിക്കാറായതുമാണ് വില വീണ്ടും ഉയരാൻ കാരണം. വിലയിടിവ് മൂലം കർഷകർക്കു കൈത്താങ്ങായി ഹോർട്ടികോർപ്പ് റംബുട്ടാൻ സംഭരണം ആരംഭിച്ചിരുന്നു. കേരളത്തിൽനിന്നു റംബുട്ടാൻ കൂടുതലായും ബംഗളൂരു, ചെന്നൈ, കോയന്പത്തൂർ വിപണികളിലേക്കാണ് കയറ്റി അയയ്ക്കുന്നത്. മെട്രോ നഗരങ്ങളിലെ വിപണികൾക്കു പുറമേ പ്രധാനപാതയോരങ്ങൾ, സൂപ്പർ മാർക്കറ്റുകൾ, മാളുകൾ തുടങ്ങിയ സ്ഥലങ്ങളിലാണ് റംബുട്ടാന്‍റെ വില്പന നടക്കുന്നത്. ഇത്തവണ സീസണ്‍ ആരംഭിച്ചപ്പോൾ കിലോയ്ക്ക് 130-150 രൂപ തോതിലായിരുന്നു വില. എന്നാൽ, വൈകാതെ മഴമൂലം വില്പന ഇടിഞ്ഞെന്ന കാരണം പറഞ്ഞ് വില 80-100 ലേക്ക് താണു. മൊത്തവ്യാപാരികൾ ഈ വിലയ്ക്കു മാത്രമേ വാങ്ങാൻ തയാറായുള്ളു. എന്നാൽ, സീസണ്‍ അവസാനിക്കാറായതോടെ വില കൂടുകയായിരുന്നു. നിലവിൽ മൊത്തവില 110-120 രൂപയിലേക്ക് ഉയർന്നിട്ടുണ്ട്. തൊടുപുഴയിലെ പാതയോരങ്ങളിൽ ചില്ലറ വില്പന 230-240 രൂപയ്ക്കാണ് നടക്കുന്നത്. അതേസമയം, റംബുട്ടാനു വിലയിടിക്കാൻ മൊത്തവ്യാപാരികൾ ആസൂത്രിത ശ്രമം നടത്തുന്നതായി കർഷകർ ആരോപിക്കുന്നു. അതിനാൽ കർഷകർ നേരിട്ടു വിപണിയിൽ എത്തിക്കാനുള്ള ശ്രമവും തുടങ്ങിയിട്ടുണ്ട്. റബർ വിലയിടിവിനെത്തുടർന്നു നൂറുകണക്കിനു കർഷകരാണ് റംബുട്ടാൻ കൃഷിയിലേക്കു തിരിഞ്ഞത്. ലാഭകരമാണെന്നു കണ്ടതോടെ കൂടുതൽ പേർ ഈ രംഗത്തേക്കു വന്നു. ഇതിനിടെയാണ് വിലയിടിവും പെരുമഴയും വിനയായത്. വിലയിൽ സ്ഥിരതയില്ലാത്തതാണ് പലരെയും അലട്ടുന്നത്. അതേസമയം, കൃത്യമായ വിപണി കണ്ടെത്തുകയും കയറ്റുമതി കൂട്ടുകയും ചെയ്താൽ റംബുട്ടാന് 200-250 രൂപ വില ലഭിക്കാൻ സാധ്യതയുണ്ടെന്നാണ് ഈ രംഗത്തു പ്രവർത്തിക്കുന്നവർ പറയുന്നത്. ഹോർട്ടികോർപ്പിന്‍റെ റംബുട്ടാൻ സംഭരണം സ്വാഗതാർഹം തൊടുപുഴ: വ്യാപക മഴ മൂലം പഴവർഗ വിപണിയിൽ വിലയിടിയുകയും കച്ചവടക്കാർ പിൻവാങ്ങുകയും ചെയ്ത സാഹചര്യത്തിൽ റംബുട്ടാൻ കർഷകർക്കു കൈത്താങ്ങായി കൃഷിമന്ത്രിയുടെ ഇടപെടലിൽ ഹോർട്ടി കോർപ് രംഗത്തെത്തിയതു സ്വാഗതാർഹമാണെന്നു ഫ്രൂട്ട്സ് വാലി ഫാർമേഴ്സ് പ്രൊഡ്യൂസർ കന്പനി ചെയർമാൻ അഡ്വ. ബിജു പറയന്നിലം.

കേരളത്തിൽ വലിയ തോതിൽ റംബുട്ടാൻ, അവക്കാഡോ, മാങ്കോസ്റ്റിൻ, ദുരിയാൻ, പാഷൻ ഫ്രൂട്ട് തുടങ്ങിയ എക്സോട്ടിക് ഫ്രൂട്ട്സ് ഉത്പാദിപ്പിച്ചാൽ മാത്രമേ വലിയ വിപണികൾ തുറക്കപ്പെടൂ. ഫ്രൂട്ട്സ് സ്റ്റോറേജിന്‍റെയും ട്രാൻസ്പോർട്ടിംഗിന്‍റെയും പരിഹാരത്തിനും ഉത്പന്നങ്ങളുടെ ഉത്പാദനത്തിനും കേന്ദ്ര-സംസ്ഥാന സർക്കാർ തലത്തിൽ ഇടപെടൽ ഉണ്ടായാൽ കേരളം ഫ്രൂട്ട്സ് ക്യഷി കൊണ്ട് സന്പന്നമാകും. എക്സോട്ടിക് ഫ്രൂട്ട്സ് കൃഷി പ്രോത്സാഹിപ്പിക്കാൻ തൊടുപുഴയിൽ ആരംഭിച്ച ഫ്രൂട്ട്സ് വാലി ഫാർമേഴ്സ് പ്രൊഡ്യൂസർ കന്പനി വഴി ആരംഭിച്ച റംബുട്ടാൻ സംഭരണം ഇന്നും നാളെയും കിലോയ്ക്ക് 140 രൂപ താങ്ങുവില നിശ്ചയിച്ച് മൂവായിരം കിലോ വീതം ശേഖരിക്കുമെന്നും ബിജു പറയന്നിലം പറഞ്ഞു. യോഗത്തിൽ ഫ്രൂട്ട്സ് വാലി ഡയറക്ടർമാരായ ജോമി മാത്യു, ജോസി കൊച്ചുകുടി, തോമസ് പീടികയിൽ, ചിന്തു ജോസ്, മാനേജർ സജീവ് വടക്കേൽ തുടങ്ങിയവർ പ്രസംഗിച്ചു.

പദ്ധതികൾക്ക് വനംവകുപ്പിന്‍റെ തടസം നീക്കും: മന്ത്രി റോഷി

ഇടുക്കി: ജില്ലാ ആസ്ഥാനത്ത് മിനി സ്റ്റേഷൻ നിർമാണത്തിന് മരം മുറിച്ചു നീക്കുന്ന നടപടികൾ ഉടൻ പൂർത്തിയാക്കുമെന്ന് മന്ത്രി റോഷി അഗസ്റ്റിൻ. മന്ത്രി എ.കെ. ശശീന്ദ്രനും വനംവകുപ്പ് ഉന്നത ഉദ്യോഗസ്ഥരുമായി നടത്തിയ ചർച്ചയിലാണ് ഇതു സംബന്ധിച്ച് തീരുമാനമായത്. മിനി സിവിൽ സ്റ്റേഷൻ നിർമാണത്തിന് 10 കോടിയും ചെറുതോണി ബസ് സ്റ്റാൻഡ് ബൈപാസ് റോഡിന് അഞ്ച് കോടിയും ചെറുതോണി കെഎസ്ആർടിസി സബ് ഡിപ്പോയ്്ക്കായി അനുവദിച്ച് ഉത്തരവായിരുന്നു. എന്നാൽ നിർമാണ പ്രവർത്തനങ്ങൾ നടത്തേണ്ട സ്ഥലത്തെ മരങ്ങൾ മുറിച്ചുനീക്കി വനംവകുപ്പ് സ്ഥലം പൊതുമരാമത്ത് വകുപ്പിന് കൈമാറിയിരുന്നില്ല. ഇതേത്തുടർന്നാണ് മന്ത്രി റോഷി അഗസ്റ്റിന്‍റെ നേതൃത്വത്തിൽ വനംമന്ത്രിയെ നേരിൽ കണ്ട് പരിഹാരമുണ്ടാക്കിയത്. വനംവകുപ്പ് റേഞ്ച് ഓഫീസ് മുഖേന മരങ്ങളുടെ വില നിർണയിച്ച് കോട്ടയം ഡിഎഫ്ഒയ്ക്ക് നൽകിയിട്ടുണ്ട്. അന്തിമ അനുമതി നൽകേണ്ടത് സിസിഎഫ് ആണ്. ചെറുതോണി ബസ് സ്റ്റാൻഡിൽനിന്ന് ടൗണ്‍ ഹാളിന് മുന്നിലൂടെ വിദ്യാധിരാജ സ്കൂളിന് സമീപത്തുകൂടി മെഡിക്കൽ കോളജ് ആശുപത്രിയിൽ എത്തുന്ന തരത്തിലാണ് പുതിയ ബൈപാസ്. പുതിയ റോഡ് നിർമിക്കുന്നതിനായി മുറിച്ചുനീക്കേണ്ട മരങ്ങളുടെ വില നിശ്ചയിക്കുന്നതിനും തുടർന്ന് മരം മുറിക്കുന്നതിനുമാണ് വനംവകുപ്പിന്‍റെ അനുമതി വേണ്ടത്. സ്ഥലം ജില്ലാ പഞ്ചായത്തിന് കൈമാറിയിട്ടുണ്ടെങ്കിലും നിലവിലുണ്ടായിരുന്ന മരങ്ങൾ മുറിച്ചുനീക്കേണ്ടത് വനംവകുപ്പാണ്. ചെറുതോണിയിൽ പുതുതായി നിർമിക്കുന്ന ബസ് സ്റ്റാൻഡിന് സമീപമാണ് കെഎസ്ആർടിസി സബ് ഡിപ്പോയുടെ ഗാരേജ് നിർമിക്കേണ്ടത്. ഈ സ്ഥലത്ത് മരങ്ങൾ ഇല്ലാത്തതിനാൽ വനം വകുപ്പ് ഇതിനോടകം അനുമതി നൽകിയിട്ടുണ്ട്. എന്നാൽ, ഓഫീസ് കോംപ്ലക്സ് നിർമിക്കുന്നത് വാഴത്തോപ്പ് പഞ്ചായത്തിന്‍റെ മാർക്കറ്റിന് സമീപമാണ്. ഈ വിഷയങ്ങൾക്കൊല്ലാം പരിഹാരം കണ്ടെത്താൻ കഴിഞ്ഞതായി റോഷി അഗസ്റ്റിൻ പറഞ്ഞു. അഡീഷണൽ പ്രിൻസിപ്പൽ ചീഫ് ഫോറസ്റ്റ് കണ്‍സർവേറ്റർ എൽ. ചന്ദ്രശേഖർ, ചീഫ് ഫോറസ്റ്റ് കണ്‍സർവേറ്റർ കെ.എസ്. ദീപ, വനംവന്യജീവി വകുപ്പ് അഡീഷണൽ സെക്രട്ടറി സൂസൻ ഗോപി എന്നിവരും യോഗത്തിൽ പങ്കെടുത്തു.

കരിമണ്ണൂർ ലയണ്‍സ് ക്ലബ് ഭാരവാഹികൾ

കരിമണ്ണൂർ: ലയണ്‍സ് ക്ലബ് ഭാരവാഹികളുടെ സ്ഥാനാരോഹണവും സ്നേഹ വീടുകളുടെ താക്കോൽദാനവും നടത്തി. ലയണ്‍സ് ക്ലബ് മൾട്ടിപ്പിൾ കൗണ്‍സിൽ ചെയർപേഴ്സണ്‍ രാജൻ എൻ. നന്പൂതിരി സ്ഥാനാരോഹണം നിർവഹിച്ചു. പഞ്ചായത്ത് പ്രസിഡന്‍റ് നിസാമോൾ ഷാജി സർവീസ് പ്രോജക‌്ടുകൾ ഉദ്ഘാടനം ചെയ്തു. ഡിസ്ട്രിക്‌ട് പ്രോഗ്രാം ചീഫ് കോ-ഓർഡിനേറ്റർ ജോസ് മഞ്ഞളി മുഖ്യാതിഥിയായിരുന്നു. റിന്‍റോ ചാണ്ടി-പ്രസിഡന്‍റ്, ബെറ്റ്സണ്‍ ജോയി-സെക്രട്ടറി, മാത്യു വരിക്കശേരി-ട്രഷറർ എന്നിവരാണ് ഭാരവാഹികളായി സ്ഥാനമേറ്റത്. വനിതാ വിഭാഗവും യുവജന വിഭാഗം ഭാരവാഹികളും ചുമതലയേറ്റു.

കഞ്ചാവുമായി രണ്ടുപേർ പിടിയിൽ

തൊടുപുഴ: നഗരത്തിൽ എക്സൈസ് നടത്തിയ പരിശോധനയിൽ 1.3 കിലോ കഞ്ചാവുമായി രണ്ടുപേർ പിടിയിൽ. തൊടുപുഴ പട്ടാണിക്കുന്ന് സ്വദേശി ഓണാട്ടുപുത്തൻപുര ഷിയാസ് (കാള ഷിയാസ് - 41) പശ്ചിമ ബംഗാൾ മുർഷിദാബാദ് സ്വദേശി മഹത്താബ് അലി മുണ്ടൽ (50) എന്നിവരെയാണ് തൊടുപുഴ എക്സൈസ് സംഘം ചൊവ്വാഴ്ച രാത്രി അറസ്റ്റ് ചെയ്തത്. വെങ്ങല്ലൂരിൽ നടത്തിയ പരിശോധനയ്ക്കിടയിലാണ് ഇരുചക്ര വാഹനത്തിൽ കഞ്ചാവുമായെത്തിയ പ്രതികൾ പിടിയിലായത്. സംഭവത്തിൽ കൂടുതൽ പേർ ഉൾപ്പെട്ടിട്ടുണ്ടെന്നും ഇവർക്കായി അന്വേഷണം നടക്കുകയാണെന്നും എക്സൈസ് ഉദ്യോഗസ്ഥർ പറഞ്ഞു. കോൽക്കത്ത, മൂർഷിദാബാദ് എന്നിവിടങ്ങളിൽനിന്നു കുറഞ്ഞ വിലയ്ക്ക് കഞ്ചാവ് വാങ്ങി കേരളത്തിൽ ഉയർന്ന തുകയ്ക്ക് വിൽക്കുന്ന സംഘത്തിലെ കണ്ണികളാണ് പ്രതികൾ. ഷിയാസിനെതിരേ ലഹരി കടത്ത് ഉൾപ്പെടെ നിരവധി കേസുകൾ നിലവിലുണ്ട്. എക്സൈസ് സർക്കിൾ ഇൻസ്പെക്ടർ ടി.കെ. രാജേഷ്, എക്സൈസ് ഇൻസ്പെക്ടർ ലിജോ ഉമ്മൻ, അസി. എക്സൈസ് ഇൻസ്പെക്ടർമാരായ ഒ.എച്ച്. മൻസൂർ, കെ.കെ. മജീദ്, പ്രിവന്‍റീവ് ഓഫീസർമാരായ വി.എസ്. അനീഷ്കുമാർ, ജോജു ടി. പോൾ എന്നിവരടങ്ങിയ സംഘമാണ് പ്രതികളെ പിടികൂടിയത്. പ്രതികളെ കോടതിയിൽ ഹാജരാക്കി.

മകന്‍റെ മർദനമേറ്റ് ചികിത്സയിലായിരുന്ന പിതാവ് മരിച്ചു

രാജാക്കാട്: സേനാപതി പഞ്ചായത്തിലെ ആത്മാവ് സിറ്റിയിൽ മകന്‍റെ മർദനമേറ്റ് കോട്ടയം മെഡിക്കൽ കോളജ് ആശുപത്രിയിൽ ചികിത്സയിലായിരുന്ന പിതാവ് മരിച്ചു. ആത്മാവുസിറ്റി വെട്ടിക്കുളം മധുവാ ണ് ( 57) മരിച്ചത്. കഴിഞ്ഞ 14ന് വൈകുന്നേരമാണ് ആക്രമണമുണ്ടായത്. മദ്യപിച്ച് വീട്ടിലെത്തിയ മകൻ സുധീഷ് അച്ഛനും അമ്മയുമായി വാക്കുതർക്കമുണ്ടായി. മധുവിനെ മകൻ ആക്രമിക്കാൻ ശ്രമിച്ചപ്പോൾ തടയാൻ ശ്രമിച്ച അമ്മയെയും ഇയാൾ മർദിച്ചിരുന്നു. ഇത് ചോദ്യം ചെയ്ത പിതാവ് മധുവിനെ അടുക്കള ഭാഗത്തുണ്ടായിരുന്ന വിറകുപയോഗിച്ച് തലയ്ക്കും ശരീര ഭാഗങ്ങളിലും അടിച്ച് പരിക്കേൽപ്പിക്കുകയായിരുന്നു. തലയ്ക്കും നെഞ്ചിലുമേറ്റ ഗുരുതര പരിക്കുകളാണ് മരണകാരണമെന്നാണ് പ്രാഥമിക നിഗമനം. പോസ്റ്റുമോർട്ട നടപടികൾക്കു ശേഷം മൃതദേഹം ബന്ധുക്കൾക്ക് വിട്ടുനൽകും. മകൻ സുധീഷ് റിമാൻഡിലാണ്.

വണ്ണപ്പുറത്തെ മോഷണം: പിടിയിലായ മൂന്നുപേരെ കസ്റ്റഡിയിൽ വാങ്ങി

വണ്ണപ്പുറം: അന്പലപ്പടിയിൽനിന്ന് സംശയാസ്പദമായ സാഹചര്യത്തിൽ പിടിയിലായ പ്രതികളെ പോലീസ് ഇന്നലെ കസ്റ്റഡിയിൽ വാങ്ങി. വണ്ണപ്പുറം മേഖലയിൽ അടുത്ത നാളുകളിൽ നടന്ന മോഷണക്കേസുകളിൽ ഇവർക്ക് ബന്ധമുണ്ടോയെന്ന കാര്യത്തിൽ വ്യക്തത വരുത്തുന്നതിനായാണ് പോലീസ് ഇവരെ കസ്റ്റഡിയിൽ വാങ്ങിയത്. കടവൂർ സ്വദേശികളായ കോട്ടക്കുടിയിൽ തോമസ്, പള്ളിക്കുന്നേൽ ജോസ്, അറയ്ക്കൽ അമൽ എന്നിവരെയാണ് കസ്റ്റഡിയിൽ വാങ്ങിയത്. ഇവർ മോഷണം നടത്താനാണ് വന്നതെന്ന നിഗമനത്തിലാണ് പോലീസ്. അതിനാൽ കഴിഞ്ഞ ദിവസങ്ങളിൽ മോഷണം നടന്ന സ്ഥലങ്ങളിൽ ഇവരെയെത്തിച്ച് പരിശോധന നടത്തും. ഇവരിൽ രണ്ടു പേരുടെ പേരിൽ പോത്താനിക്കാട്, തൊടുപുഴ സ്റ്റേഷനുകളിൽ മോഷണക്കേസുകളുണ്ട്. വണ്ണപ്പുറത്ത് നടന്ന മോഷണങ്ങൾക്ക് പിന്നിൽ ഇവരാണോ എന്ന് വ്യക്തമല്ല. ഇവരെ കൂടുതൽ ചോദ്യം ചെയ്യുന്നതിലൂടെ കൂടുതൽ തെളിവുകൾ ലഭിക്കുമെന്നാണ് പോലീസ് കരുതുന്നത്. കസ്റ്റഡിയിൽ വാങ്ങിയ ഇവരെ ചോദ്യം ചെയ്തു വരികയാണെന്നും കൂടുതൽ വിവരങ്ങൾ ഇവരിൽനിന്ന് ലഭ്യമായിട്ടില്ലെ ന്നും പോലീസ് പറഞ്ഞു. ഇതിനിടെ ദിവസേനയെന്നോണം മോഷണം നടക്കുന്നതിനാൽ തൊടുപുഴ ഡിവൈഎസ്പിയുടെ മേൽനോട്ടത്തിൽ പ്രത്യേക സ്ക്വാഡിനെ വണ്ണപ്പുറത്ത് പ്രത്യേകമായി നിയോഗിച്ചിട്ടുണ്ട്.

വീതി കൂട്ടാതെ ടാറിംഗ് ഭരണസമിതി തടഞ്ഞു

ഉപ്പുതറ: ചപ്പാത്ത് പമ്പിനു മുന്നിൽ മലയോര ഹൈവേയുടെ ടാറിംഗ് വീതി കുറച്ചു നടത്താനുള്ള നീക്കം അയ്യപ്പൻകോവിൽ പഞ്ചായത്ത് പ്രസിഡന്‍റിന്‍റെ നേതൃത്വത്തിൽ ജനപ്രതിനിധികളും നാട്ടുകാര്യം ചേർന്നു തടഞ്ഞു. കുട്ടിക്കാനം - പുളിയൻമല മലയോര ഹൈവേയുടെ രണ്ടാം റീച്ചിന്‍റെ ഭാഗമയ ചപ്പാത്ത് ടൗണിനു സമീപമുള്ള ടാറിംഗാണ് ബുധനാഴ്ച രാവിലെ തടഞ്ഞത്. രണ്ടാം റീച്ചിന്‍റെ നിർമാണത്തിനു ചപ്പാത്ത് ടൗണിനു സമീപത്തെ പമ്പ് ഉടമ ഭൂമി വിട്ടുകൊടുത്തിട്ടില്ല. പമ്പിന്‍റെ ഇടതു വശത്ത് 2.6 മീറ്ററും വലതുവശത്ത് 1.6 മീറ്ററും ഭൂമിയാണ് ഹൈവേ വീതി കൂട്ടി നിർമിക്കാൻ വിട്ടു നൽകേണ്ടത്. ഇത്രയും ഭാഗം ഒഴിച്ചുള്ള റോഡ് നിർമാണം ഭൂരിഭാഗവും ആറു മാസം മുൻപ് പൂർത്തിയായി. എന്നാൽ, പമ്പുടമയുടെ നിലപാട് കാരണം ഇവിടെ നിർമാണം നടത്താൻ കഴിഞ്ഞില്ലെന്നു ജനപ്രതിനിധികൾ പറയുന്നു. വീതിയില്ലാ റോഡ് ഇവിടെ വീതി എടുക്കാത്തതിനാൽ പമ്പിൽനിന്നു റോഡിലേക്ക് ഇറങ്ങുന്ന ഇരുവശത്തുമുള്ള മൺത്തിട്ടയും പരസ്യബോർഡും കാഴ്ച മറയ്ക്കുന്ന സ്ഥിതിയാണ്. ഇത് അപകടകാരണമാണെന്നും ഇവർ പറയുന്നു. എംഎൽഎയും പഞ്ചായത്ത് ഭരണ സമിതിയും രാഷ്‌ട്രീയ പാർട്ടി പ്രതിനിധികളും ഉൾപ്പെടെയുള്ളവർ ഇടപെട്ടിട്ടും ഭൂമി വിട്ടുകിട്ടിയിട്ടില്ല. തുടർന്ന് ജില്ലാ ഭരണകൂടം ഇടപെട്ട് ഭൂമി അളന്നപ്പോൾ രണ്ടു സെന്‍റ് റോഡ് പുറമ്പോക്ക് ഭൂമി പമ്പുടമ കൈവശം വച്ചതായി കണ്ടെത്തി. താലൂക്ക് സർവേയറുടെ റിപ്പോർട്ടിന്‍റെ അടിസ്ഥാനത്തിൽ ഭൂമി വീണ്ടെടുക്കാൻ ഉടുമ്പഞ്ചോല തഹസീൽദാർക്കു ഹൈക്കോടതി സിംഗിൾ ബഞ്ച് ഉത്തരവ് നൽകി. എന്നാൽ, ഉത്തരവ് നടപ്പാക്കുന്നതിൽ തഹസീൽദാർ കാലതാമസം വരുത്തി. അതിനിടെ ഭൂസംരക്ഷണ നിയമപ്രകാരം തഹസിൽദാരുടെ നടപടി തടയണം എന്നാവശ്യപ്പെട്ടു പമ്പുടമ ആർഡിഒയ്ക്കു പരാതി നൽകി. ആർഡിഒ ഇക്കാര്യത്തിൽ ഇതുവരെ നടപടി സ്വീകരിച്ചില്ല. തുടർന്നാണ് തടസമുള്ള ഭാഗം ഒഴിവാക്കി ടാറിംഗ് നടത്തി രണ്ടാം റീച്ചിന്‍റെ നിർമാണം പൂർത്തിയാക്കാൻ കരാറുകാരൻ നിർബന്ധിതനായത്. കരാറുകാരൻ പോയാൽ ടാറിംഗ് പൂർത്തിയാക്കി കരാറുകാരൻ പോയാൽ പിന്നീട് ഇവിടെ നിർമാണം നടക്കില്ല. അതിനാലാണ് ജനപ്രതിനിധികൾ ടാറിംഗ് തടഞ്ഞത്. അയ്യപ്പൻകോവിൽ പഞ്ചായത്ത് പ്രസിഡന്‍റ് ജയ്മോൾ ജോൺസൻ, വൈസ് പ്രസിഡന്‍റ് മനു കെ. ജോൺ, പഞ്ചായത്തംഗങ്ങളായ ബി. ബിനു, എം. കുഞ്ഞുമോൻ, സിപിഎം ലോക്കൽ സെക്രട്ടറി പി. ഗോപി, സിപിഐ ലോക്കൽ സെക്രട്ടറി ഷാജി മാത്യൂ എന്നിവരുടെ നേതൃത്വത്തിലാണ് ടാറിംഗ് തടഞ്ഞത്. മലയോര വിഭാഗം അസി. എക്സിക്യൂട്ടീവ് എൻജിനിയറുമായി ജനപ്രതിനിധികൾ ചർച്ച നടത്തി. തുടർന്ന് സ്ഥലം അളന്നപ്പോഴും രണ്ടര മീറ്ററോളം വീതിയിൽ 50 മീറ്ററോളം നീളത്തിൽ പമ്പുടമ റോഡ് പുറമ്പോക്ക് കൈവശം വച്ചിട്ടുണ്ടെന്നു കണ്ടെത്തിയെന്നും ജനപ്രതിനിധികൾ ചൂണ്ടിക്കാട്ടുന്നു.

അഞ്ച് നിയമസഭാ സീറ്റിലും യുഡിഎഫിനെ വിജയിപ്പിക്കും: പ്രഫ. എം.ജെ. ജേക്കബ്

കട്ടപ്പന: പ്രഖ്യാപനങ്ങൾ നടത്തി ജനങ്ങളെ കബളിക്കുന്ന സംസ്ഥാന സർക്കാരിന്‍റെ കർഷക - ജനവിരുദ്ധ നയങ്ങൾ മൂലം കഷ്ടപ്പെടുന്ന ജില്ലയിലെ ജനങ്ങൾ അടുത്ത തെരഞ്ഞെടുപ്പിൽ അഞ്ച് നിയമസഭാ സീറ്റുകളിലും യുഡിഎഫിനെ വിജയപ്പിക്കുമെന്ന് കേരള കോണ്‍ഗ്രസ് ജില്ലാ പ്രസിഡന്‍റ് പ്രഫ. എം.ജെ. ജേക്കബ് അവകാശപ്പെട്ടു. ലബ്ബക്കടയിൽ നടന്ന കേരള കോണ്‍ഗ്രസ് കാഞ്ചിയാർ മണ്ഡലം കണ്‍വൻഷൻ ഉദ്ഘാടനം ചെയ്യുകയായിരുന്നു അദ്ദേഹം.ത്രിതല പഞ്ചായത്ത്, മുനിസിപ്പൽ തെരഞ്ഞെടുപ്പുകളിലും യുഡിഎഫ് മികച്ച വിജയം നേടുമെന്നും അദ്ദേഹം പറഞ്ഞു. വായ്പകൾ തിരിച്ചടയ്ക്കാത്തതിന്‍റെ പേരിൽ നടക്കുന്ന ജപ്തി നടപടികൾ നിർത്തിവയ്ക്കണമെന്നും 2026 മാർച്ച് 31 വരെ കാർഷികവായ്പകൾക്ക് പലിശ മൊറട്ടോറിയം പ്രഖ്യാപിക്കണമെന്നും മുൻകാല പലിശ എഴുതിത്തള്ളാൻ ഇടുക്കി പാക്കേജിൽനിന്ന് 2,000 കോടി രൂപ മാറ്റിവയ്ക്കണമെന്നും അദ്ദേഹം ആവശ്യപ്പെട്ടു. വന്യമൃഗ ശല്യവും തെരുവ്നായ്ക്കളുടെ ശല്യവും പരിഹരിക്കുവാൻ സർക്കാരിനു കഴിയുന്നില്ല. ഭൂപ്രശ്നങ്ങൾ സംബന്ധിച്ച് നൽകിയ വാഗ്ദാനങ്ങൾ യാഥാർഥ്യമാക്കാൻ സാധിച്ചിട്ടില്ല. ചികിത്സാ സൗകര്യങ്ങൾ മെച്ചപ്പെടുത്താനോ തകർന്ന റോഡുകൾ ഗതാഗതയോഗ്യമാക്കാനോ സർക്കാർ ശ്രദ്ധിക്കുന്നില്ലെന്നും അദ്ദേഹം ആരോപിച്ചു. മണ്ഡലം പ്രസിഡന്‍റ് സാവിയോ പള്ളിപ്പറന്പിൽ അധ്യക്ഷത വഹിച്ചു. സംസ്ഥാന ഉന്നതാധികാരസമിതിയംഗം നോബിൾ ജോസഫ് മുഖ്യപ്രഭാഷണം നടത്തി. സംസ്ഥാന ഉന്നതാധികാര സമിതിയംഗം അഡ്വ. തോമസ് പെരുമന ആദ്യകാല പ്രവർത്തകരെ ആദരിച്ചു. സംസ്ഥാന സെക്രട്ടറി വി.എ. ഉലഹന്നൻ, ജില്ലാ ജനറൽ സെക്രട്ടറി ഫിലിപ്പ് ജി. മലയാറ്റ്, കേരള കർഷക യൂണിയൻ സംസ്ഥാന പ്രസിഡന്‍റ് വർഗീസ് വെട്ടിയാങ്കൽ, ഗ്രാമ പഞ്ചായത്ത് മെംബറും വനിതാ കോണ്‍ഗ്രസ് ജില്ലാ സെക്രട്ടറിയുമായ സന്ധ്യാ ജയൻ തുടങ്ങിയവർ പ്രസംഗിച്ചു.

ഏലത്തിന്‍റെ അനധികൃത ലേലം: മുന്നറിയിപ്പുമായി സ്പൈസസ് ബോർഡ്

കൊച്ചി: കേരളത്തിലും തമിഴ്നാട്ടിലുമായി നടക്കുന്ന അനധികൃത ഏലം ഇ-ലേലത്തിനെതിരേ മുന്നറിയിപ്പുമായി സ്പൈസസ് ബോർഡ്. അംഗീകൃത ലൈസൻസ് ഇല്ലാത്ത ആളുകളും സ്ഥാപനങ്ങളും നടത്തുന്ന ലേലങ്ങൾ അനധികൃതമാണെന്നും ഇതിനെതിരേ ശക്തമായ നടപടി സ്വീകരിക്കുമെന്നും സ്പൈസസ് ബോർഡ് വ്യക്തമാക്കി. ചില സ്ഥാപനങ്ങളും സംഘങ്ങളും ലൈസൻസുള്ള ചില വ്യാപാരികളും ഉൾപ്പെടെ അനധികൃത ലേലങ്ങളിൽ ഏർപ്പെട്ടിട്ടുണ്ടെന്ന് കണ്ടെത്തിയതായി സ്പൈസസ് ബോർഡ് അറിയിച്ചു. സിഎൽഎം. (കാർഡമം ലൈസൻസിംഗ് ആൻഡ് മാർക്കറ്റിംഗ്) നിയമങ്ങൾ പ്രകാരം സ്പൈസസ് ബോർഡിന്‍റെ ലൈസൻസ് ഉള്ള വ്യക്തികൾക്കും സ്ഥാപനങ്ങൾക്കും മാത്രമേ ലേലക്കാരായോ ഡീലർമാരായോ പ്രവർത്തിക്കാൻ കഴിയൂ. ലൈസൻസുള്ള ലേലക്കാരന് ബോർഡ് അംഗീകരിച്ച സ്ഥലങ്ങളിലും തീയതികളിലും സമയങ്ങളിലും മാത്രമേ ലേലം നടത്താൻ അധികാരമുള്ളൂവെന്നും ബോർഡ് വ്യക്തമാക്കി. അനധികൃത ലേലങ്ങൾ അധികൃത ലേലക്കാർക്കും ഏലം ഉത്പാദകർക്കും സാന്പത്തിക നഷ്ടവും വ്യാപാരത്തിലെ സുതാര്യതയ്ക്ക് പ്രതിസന്ധിയും ഉണ്ടാക്കുന്നതായി ബോർഡ് ചൂണ്ടിക്കാട്ടി. ലൈസൻസുള്ള വ്യാപാരികൾ രജിസ്റ്റർ ചെയ്ത എസ്റ്റേറ്റ് ഉടമകളിൽ നിന്നോ കർഷകരിൽനിന്നോ ലൈസൻസുള്ള ലേലക്കാരിൽനിന്നോ മാത്രമേ ഏലം വാങ്ങാവൂ എന്നും ബോർഡ് നിർദേശിച്ചു. ഏലം വ്യാപാരത്തിൽ സുതാര്യത ഉറപ്പാക്കുന്നതിനായി 1987ലെ ഏലം നിയമം (ലൈസൻസിംഗ് ് ആൻഡ് മാർക്കറ്റിംഗ്) പ്രകാരം ലൈസൻസ് കരസ്ഥമാക്കിയവർക്ക് മാത്രമേ ലേല നടപടികൾക്ക് അനുവാദമുള്ളൂ. ലൈസൻസ് ഉള്ളവർക്ക് ഇടുക്കിയിലെ പുറ്റടി, തമിഴ്നാട്ടിലെ ബോഡിനായ്ക്കനൂർ എന്നിവിടങ്ങളിലെ ഇ-ലേലത്തിലും മറ്റു സംസ്ഥാനങ്ങളിൽ നടക്കുന്ന ലേലത്തിലും പങ്കെടുക്കാം. ലേലം നടത്താൻ ലൈസൻസ് കരസ്ഥമാക്കിയവരുടെ വിവരങ്ങൾ സ്പൈസസ് ബോർഡിന്‍റെ ഒൗദ്യോഗിക വെബ്സൈറ്റിൽ (www.indianspices.com) ലഭ്യമാണെന്നും സ്പൈസസ് ബോർഡ് അറിയിച്ചു. ഏലം വ്യാപാരത്തിൽ സുതാര്യത ഉറപ്പാക്കുമെന്നും അധികൃതർ പറഞ്ഞു.

വനമേഖലയിൽ ടൂറിസം സാധ്യത പ്രയോജനപ്പെടുത്തും: മന്ത്രി

ഇടുക്കി: നിയോജക മണ്ഡലത്തിലെ വനമേഖലയോടു ചേർന്നുള്ള ടൂറിസം സാധ്യതകൾ പ്രയോജനപ്പെടുത്തുന്നതിനായി വനം വകുപ്പുമായി ചേർന്ന് പദ്ധതി ആവിഷ്കരിക്കുമെന്ന് മന്ത്രി റോഷി അഗസ്റ്റിൻ അറിയിച്ചു. വനംമന്ത്രി എ.കെ. ശശീന്ദ്രനുമായി നടത്തിയ ചർച്ചയിൽ ഇക്കാര്യത്തിൽ ഉടൻ പരിശോധിച്ചു നടപടി സ്വീകരിക്കാൻ കോതമംഗലം ഡിഎഫ്ഒയെ നിയോഗിച്ചതായും മന്ത്രി അറിയിച്ചു. വാഴത്തോപ്പ്, കഞ്ഞിക്കുഴി പഞ്ചായത്തുകളോട് ചേർന്ന് സ്ഥിതി ചെയ്യുന്ന പാൽക്കുളംമേട്, മീനുളിയാൻപാറ, കാഞ്ചിയാർ പഞ്ചായത്തിലെ അഞ്ചുരുളി എന്നിവിടങ്ങളിൽ വിനോദസഞ്ചാരികൾക്ക് എത്തുന്നതിനും അടിസ്ഥാന സൗകര്യങ്ങൾ ഉറപ്പാക്കുന്നതിനും നടപടി സ്വീകരിക്കണം. ഇതിനായി ആവശ്യമെങ്കിൽ വനസംരക്ഷണ സമിതി രൂപീകരിച്ച് ടൂറിസം സാധ്യതകൾ പ്രയോജനപ്പെടുത്തുകയും പ്രകൃതിയുടെ പരിപാലനം ഉറപ്പാക്കുകയും വേണം. നിരവധി സഞ്ചാരികൾ എത്തുന്ന കാമാക്ഷി പഞ്ചായത്തിലെ കാൽവരി മൗണ്ട്, കാഞ്ചിയാർ പഞ്ചായത്തിലെ മുനന്പ് എന്നിവിടങ്ങളിൽ സന്ദർശകർക്ക് കൂടുതൽ സൗകര്യങ്ങൾ ഉറപ്പാക്കാനും യോഗത്തിൽ തീരുമാനമായി. ജില്ലാ ആസ്ഥാനമായ പൈനാവിനോട് ചേർന്നുള്ള മന്ത്രപ്പാറയിൽ ഭൂമിയുടെ ഉടമസ്ഥാവകാശ തർക്കം പരിഹരിച്ച് വിനോദസഞ്ചാരികൾക്ക് തുറന്നുകൊടുക്കാൻ നടപടി സ്വീകരിക്കണമെന്ന് റോഷി അഗസ്റ്റിൻ ആവശ്യപ്പെട്ടു. ഇക്കാര്യം പരിഹരിക്കാൻ മന്ത്രി എ.കെ. ശശീന്ദ്രൻ ഉദ്യോഗസ്ഥർക്ക് നിർദേശം നൽകിയതായും മന്ത്രി അറിയിച്ചു.

അടിമാലി ടൗണില്‍ ട്രാഫിക് പരിഷ്‌കരണം നടപ്പാക്കണമെന്ന ആവശ്യം ശക്തം

അടിമാലി: അടിമാലി ടൗണില്‍ ട്രാഫിക് പരിഷ്‌കരണം നടപ്പാക്കണമെന്ന ആവശ്യത്തിന് ശക്തിയാര്‍ജിക്കുന്നു. ടൗണില്‍ ട്രാഫിക് പരിഷ്‌കരണം നടപ്പാക്കുകയും കൃത്യമായ മാനദണ്ഡങ്ങള്‍ കൊണ്ടുവന്ന് തോന്നുംപടിയുള്ള വാഹനപാര്‍ക്കിംഗടക്കം നിയന്ത്രിച്ച് ടൗണിലൂടെയുള്ള വാഹനയാത്രയും കാല്‍നടയാത്രയും ഒരേപോലെ സുഗമമാക്കണമെന്നുമുള്ള ആവശ്യം കാലങ്ങളായി നിലനില്‍ക്കുന്നതാണ്. എന്നാല്‍ ഇക്കാര്യത്തില്‍ ഇനിയും ശാശ്വതമായ പരിഹാരം ഉണ്ടായിട്ടില്ല. ടൗണിലൂടെ കടന്നുപോകുന്ന ഇരു ദേശീയ പാതയോരങ്ങളിലും നോ പാര്‍ക്കിംഗ് കേന്ദ്രങ്ങളിലുമൊക്കെ തോന്നുംപടിയുള്ള വാഹന പാര്‍ക്കിംഗ് തുടരുകയാണ്. നടപ്പാതകളില്‍ വരെ ഇരുചക്രവാഹനങ്ങള്‍ പാര്‍ക്ക് ചെയ്യുന്ന സ്ഥിതിയാണ്. ബസ് സ്റ്റാന്‍ഡ്, താലൂക്ക് ആശുപത്രി, പോലീസ് സ്റ്റേഷന്‍ പരിസരത്തുമൊക്കെ വാഹനങ്ങള്‍ തോന്നുംപടി പാര്‍ക്ക് ചെയ്യുന്നു. വ്യാപാര സ്ഥാപനങ്ങള്‍ക്ക് മുന്‍പിലെ അനധികൃത പാര്‍ക്കിംഗ് വ്യാപാരികള്‍ക്ക് ബുദ്ധിമുട്ടാകുന്നു. ഓണാഘോഷങ്ങളുടെ ഭാഗമായി മൂന്നാറിലേക്ക് കൂടുതല്‍ സഞ്ചാരികള്‍ എത്തുന്നതോടെ അടിമാലി ടൗണില്‍ ഇനിയും തിരക്കേറും.

കേരള കോണ്‍ഗ്ര‌സ്-എം ആദ്യകാല കുടിയേറ്റ കർഷകരെ ആദരിച്ചു

ചെറുതോണി: കേരള കോണ്‍ഗ്ര‌സ്-എം കൊന്നത്തടി മണ്ഡലം കണ്‍വൻഷനിൽ കർഷകരെ ആദരിച്ചു. ആദ്യകാല കുടിയേറ്റ കർഷകരെയാണ് ആദരിച്ചത്. ത്രിതല പഞ്ചായത്ത് തെരഞ്ഞെടുപ്പിന് മുന്നൊരുക്കമായി വോട്ട് ചേർക്കൽ, വാർഡ് വിഭജനം ഉൾപ്പെടെ ചർച്ച ചെയ്ത കണ്‍വൻഷൻ ഓരോ വാർഡിലെയും വികസന പ്രവർത്തനങ്ങളും പോരായ്മകളും കണ്ടെത്തുന്നതിനും അവതരിപ്പിക്കുന്നതിനും വേദിയായി. കൊന്നത്തടി പഞ്ചായത്തിൽ മുരിക്കാശേരി - കന്പിളികണ്ടം റോഡ്, ചിന്നാർ - മങ്കുവ റോഡ്, പാറത്തോട് കാർഷികവിപണി റോഡ് തുടങ്ങിയവയുടെ നിർമാണം പൂർത്തിയായി. പണിക്കൻകുടി - കുരിശിങ്കൽ - ചെന്പകപ്പാറ റോഡ്,കൊന്പൊടിഞ്ഞാൽ - മരകാനം - പൊൻമുടി റോഡ് എന്നിവയ്ക്ക് തുക അനുവദിച്ചിട്ടുണ്ടെന്നും ജലജീവൻ പദ്ധതിയിൽ ഉൾപ്പെടുത്തി ഗ്രാമീണ മേഖലകളിൽ കുടിവെള്ളം എത്തിക്കുന്ന പദ്ധതിക്കായി 146.8 കോടി രൂപ അനുവദിച്ച് നിർമാണം നടന്നുവരുന്നു. ഇതിലൂടെ 7863 കുടുംബങ്ങൾക്ക് കുടിവെള്ളം എത്തിക്കുമെന്നും കണ്‍വൻഷൻ ഉദ്ഘാടനം ചെയ്ത മന്ത്രി റോഷി അഗസ്റ്റിൻ പറഞ്ഞു. പാർട്ടി ജില്ലാ പ്രസിഡന്‍റ് ജോസ് പാലത്തിനാൽ മുഖ്യ പ്രഭാഷണം നടത്തി. നിയോജക മണ്ഡലം പ്രസിഡന്‍റ് ഷാജി കാഞ്ഞമല, വിത്സണ്‍ മുത്തുകുന്നേൽ, ടി.പി. മൽക്ക, ജയിംസ് മ്ലാക്കുഴി, ജോർജ് അന്പഴം, ബേബി കോലത്ത്പടവിൽ, ദേവരാജൻ കൊളപ്പുറം, ജോസഫ് സേവ്യർ, ബിനു അന്പാട്ട്, ഷാജി കോച്ചേരി, മേരി ജോർജ് തുടങ്ങിയവർ പ്രസംഗിച്ചു.

ഈ മെഡി.കോളജ് കാട്ടിലാണ്!

ചെറുതോണി: ഇടുക്കി മെഡിക്കൽ കോളജ് ആശുപത്രി പരിസരം കാടു കയറിയിട്ടും നടപടിയെടുക്കാതെ അധികൃതർ. ഇഴജന്തുക്കളുടെയും വന്യമൃഗങ്ങളുടെയും തെരുവുനായ്ക്കളുടെയും താവളമായി മാറിയിരിക്കുകയാണ് ഇവിടം. പേടിയോടെയാണ് ആശുപത്രി പരിസരത്തെ പല ഭാഗങ്ങളിലേക്കും ആളുകൾ സഞ്ചരിക്കുന്നത്. നോക്കി നടന്നാൽ കൊള്ളാം നിർമാണം പൂർത്തിയാക്കിയ പുതിയ ബ്ലോക്കിന്‍റെയും പഴയ ബ്ലോക്കിന്‍റെയും പരിസരം കാടുകയറി. വിദ്യാർഥികളുടെ അക്കാഡമിക് ബ്ലോക്ക്, ഹോസ്റ്റലുകൾ, പ്രിൻസിപ്പൽ ഓഫീസ്, മറ്റ് അനുബന്ധ ഓഫീസുകൾ എന്നിവയുടെ പരിസരങ്ങളിലും കാടും പടലും വളർന്നുകയറി. വെള്ളാപ്പാറ ഫോറസ്റ്റ് ഡിവിഷനോടു ചേർന്നു കിടക്കുന്ന ഇവിടെ വന്യജീവികളുടെയും ഇഴജന്തുക്കളുടെയും സാന്നിധ്യമുണ്ടെന്നു നാട്ടുകാർ പറയുന്നു. പ്രതിദിനം നൂറു കണക്കിനു പേർ എത്തുന്ന ആശുപത്രിയുടെ പരിസരം വൃത്തിയാക്കിയിടാൻ അധികൃതർ ശ്രദ്ധവയ്ക്കുന്നില്ല. താമസസ്ഥലത്തും ശല്യം കൂട്ടിരിപ്പുകാരൊക്കെ രാത്രികാലങ്ങളിൽ ഭക്ഷണത്തിനും മരുന്നിനുമൊക്കെയായി പുറത്തിറങ്ങുമ്പോൾ ഇഴജന്തുക്കളെ പേടിച്ചാണ് നടക്കുന്നത്. പഴയ ബ്ലോക്കിൽനിന്നു പുതിയ ബ്ലോക്കിലേക്കു നടന്നു പോകുമ്പോഴും ഇതേ സ്ഥിതിയാണ്. ആശുപത്രിക്കും ജീവനക്കാരുടെയും വിദ്യാർഥികളുടെയും താമസസ്ഥലത്തും ഇഴജന്തുക്കളെ കാണുന്നത് പതിവായിട്ടുണ്ട്. കാട്ടുപന്നികൾ, മ്ലാവ്, കേഴ തുടങ്ങിയവയെയും ആശുപത്രി പരിസരത്തു കാണാം. അട്ടശല്യമാണ് മറ്റൊരു ദുരിതം. റോഡിൽനിന്നു നോക്കിയാൽ മെഡിക്കൽ കോളജ് ആശുപത്രി കാണാൻ പോലും സാധിക്കാത്ത വിധമാണ് കാടും വള്ളിപ്പടർപ്പുകളും വളർന്നുനിൽക്കുന്നത്. കാടു നിറഞ്ഞതോടെ തെരുവുനായ ശല്യവും പെരുകി. ആശുപത്രി വികസന സമിതിയും അധികൃതരും ആശുപത്രിയുടെ പരിസരം വൃത്തിയാക്കാൻ അടിയന്തര നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.

നെടുങ്കണ്ടം ചേതന വിജ്ഞാന കേന്ദ്രം പ്രവർത്തനം ആരംഭിച്ചു

നെടുങ്കണ്ടം: നെടുങ്കണ്ടം കേന്ദ്രമായി ചേതന വിജ്ഞാന കേന്ദ്രം പ്രവർത്തനം ആരംഭിച്ചു. "വിജ്ഞാനമാണ് ശക്തി’ എന്ന ആശയവുമായി പ്രഭാഷകനും എഴുത്തുകാരനും റിട്ടയേർഡ് കോളജ് അധ്യാപകനുമായ പ്രഫ. ഡോ. എം.ജെ. മാത്യുവിന്‍റെ നേതൃത്വത്തിലാണ് കേന്ദ്രം പ്രവർത്തനം ആരംഭിച്ചത്. വിജ്ഞാന കേന്ദ്രത്തിൽ മൂവായിരത്തിലധികം പുസ്തകങ്ങൾ, നിരവധി പത്ര, മാസികകൾ, വാരികകൾ, മത്സര പരീക്ഷാർഥികൾക്കുള്ള പ്രസിദ്ധീകരണങ്ങൾ എന്നിവ അടങ്ങിയ സൗജന്യ ലൈബ്രറി പ്രവർത്തിക്കുന്നുണ്ട്. കൂടാതെ കരിയർ കൗണ്‍സലിംഗ് സെന്‍റർ, മാനവ വിഭവശേഷി പരിശീലന കേന്ദ്രം, യോഗാ ആന്‍ഡ് വെൽനെസ് സെന്‍റർ എന്നിവയും വിദ്യാർഥികൾക്കും പൊതുജനങ്ങൾക്കുമായി ഒരുക്കിയിട്ടുണ്ട്. നെടുങ്കണ്ടത്തെ വിദ്യാഭ്യാസ സ്ഥാപനങ്ങളുടെ മേധാവികളും പൊതുപ്രവർത്തകരും അടക്കം പതിനഞ്ച് വിശിഷ്ടാതിഥികൾ തിരിതെളിച്ചാണ് ഉദ്ഘാടനം നിർവഹിച്ചത്. ഡയറക്ടർ പ്രഫ. ഡോ. എം.ജെ. മാത്യു ചടങ്ങിൽ അധ്യക്ഷത വഹിച്ചു. നെടുങ്കണ്ടം സെന്‍റ് സെബാസ്റ്റ്യൻസ് മേജർ ആർക്കി എപ്പിസ്കോപ്പൽ പള്ളി ആർച്ച് പ്രീസ്റ്റ് ഫാ. തോമസ് വട്ടമല, സംസ്ഥാന കർഷക കടാശ്വാസ കമ്മീഷൻ അംഗം ജോസ് പാലത്തിനാൽ, ഗ്രാമ പഞ്ചായത്ത് പ്രസിഡന്‍റ് പ്രീമി ലാലിച്ചൻ, പഞ്ചായത്ത് അംഗങ്ങളായ ഷിഹാബ് ഈട്ടിക്കൽ, ജോജി ഇടപ്പള്ളിക്കുന്നേൽ, സംസ്ഥാന സഹകരണ ഫെഡറേഷൻ അംഗം ജോസ് പൊട്ടംപ്ലാക്കൽ, മിസിസ് ഇന്ത്യ ഗ്ലോബ് 2024 ജേതാവ് സോഫിയ ജയിംസ്, വിദ്യാഭ്യാസ സ്ഥാപന മേധാവികളായ പ്രഫ. ടി.എ. ഫാത്തിമ സുല്ലമി, സിസ്റ്റർ ജെസ്റ്റീന ജോസഫ്, പ്രഫ. ദീപ റോസ്, ഡോ. ജോണിക്കുട്ടി ജെ. ഒഴുകയിൽ, കെ.എസ്. ഷീജ, പ്രഫ. കെ.എം. മേരിക്കുട്ടി, സെലിൻ മൈക്കിൾ, ഷേർലി കെ. പോൾ, എൻ. രാധാമണി, ഏലിസബത്ത് ഡെന്നി തുടങ്ങിയവർ പ്രസംഗിച്ചു.

സ്ത്രീകളും കുട്ടികളുമായി സൗഹൃദം പങ്കിട്ട് പോലീസ്

തൊടുപുഴ: മണക്കാട് പഞ്ചായത്തിലെ വിവിധയിടങ്ങളിൽ തൊടുപുഴ പോലീസ് സ്റ്റേഷന്‍റെയും വനിതാ ഹെൽപ്പ് ലൈനിന്‍റെയും ഇടുക്കി വനിതാ സെല്ലിന്‍റെയും ആഭിമുഖ്യത്തിൽ സന്ദർശനം നടത്തി. പഞ്ചായത്തിലെ ആൽപ്പാറ നഗർ, പുതുപ്പരിയാരം ഹരിജൻ നഗർ, ആൽപ്പാറ അങ്കണവാടി, തൊടുപുഴ കോ-ഓപറേറ്റീവ് കോളജ് എന്നിവിടങ്ങളിലാണ് സന്ദർശനം നടത്തിയത്. തൊടുപുഴ പോലീസ് സ്റ്റേഷൻ പിആർഒ വി.എ. ബിജു, ഇടുക്കി വനിതാ സെല്ലിലെ അസിസ്റ്റന്‍റ് സബ് ഇൻസ്പെക്ടർ പ്രിയാ മധുസൂദനൻ, തൊടുപുഴ വനിതാ ഹെൽപ്പ് ലൈനിലെ സിവിൽ പോലീസ് ഓഫീസർമാരായ താഹിറ, രജിത എന്നിവർ പ്രദേശവാസികളോടും കുട്ടികളോടും സംവദിച്ചു. പോലീസിൽ നിയമസഹായം തേടുന്ന സ്ത്രീകളെയും കുട്ടികളെയും സഹായിക്കുക, അവരുടെ പരാതികൾ ഭയമോ തടസമോ കൂടാതെ അവർക്ക് നേരിട്ടറിയിക്കാനുള്ള സാഹചര്യമൊരുക്കുക, പരാതികൾ ഉന്നത അധികാരികളിലേക്ക് എത്തിക്കാനുള്ള നടപടികൾ കൈക്കൊള്ളുക, സ്ത്രീകൾക്കും കുട്ടികൾക്കുമെതിരായി വീട്ടിലോ ജോലി സ്ഥലങ്ങളിലോ പൊതുസ്ഥലത്തോ ഉണ്ടാകുന്ന അതിക്രമങ്ങളെ ചെറുക്കുകയും സംരക്ഷണം നൽകുകയും ചെയ്യുക തുടങ്ങിയ സേവനങ്ങൾ വനിതാ സെല്ലിന്‍റെയും വനിതാ ഹെൽപ്പ് ലൈനുകളുടെയും നേതൃത്വത്തിൽ ജില്ലയിൽ നടന്നുവരുന്നുണ്ട്.

കുഴിയോടിപ്പടിയില്‍ കോണ്‍ക്രീറ്റ് പാലംനിര്‍മാണം വൈകുന്നു

കട്ടപ്പന: കാഞ്ചിയാര്‍ കക്കാട്ടുകട തൊവരയാര്‍ കുഴിയോടിപ്പടിയിലെ കോണ്‍ക്രീറ്റ് പാലം നിര്‍മാണം നിലച്ചതോടെ നാട്ടുകാര്‍ക്ക് യാത്രാദുരിതം. തടിയും മറ്റും ഉപയോഗിച്ച് നിര്‍മിച്ച താത്കാലിക പാലത്തിലൂടെയാണ് നാട്ടുകാര്‍ അക്കരെയിക്കരെ കടക്കുന്നത്. ഇവിടത്തെ പാലം രണ്ടരവര്‍ഷം മുമ്പാണ് പൊളിച്ചുനീക്കിയത്. മുഖ്യമന്ത്രിയുടെ ദുരന്തനിവാരണ ഫണ്ടില്‍നിന്ന് 35 ലക്ഷം രൂപ കോണ്‍ക്രീറ്റ് പാലം നിര്‍മിക്കാന്‍ അനുവദിച്ചിരുന്നു. മണ്ണ് പരിശോധനയില്‍ നിശ്ചിത താഴ്ചയില്‍ പാറയുടെ സാന്നിധ്യം സ്ഥിരീകരിച്ചതോടെ കൂടുതല്‍ ഫണ്ട് ആവശ്യമായിവന്നു. തുടര്‍ന്ന് പഞ്ചായത്തംഗം ഷാജി വേലംപറമ്പില്‍ 13 ലക്ഷംകൂടി അനുവദിച്ച് ടെന്‍ഡര്‍ പൂര്‍ത്തിയാക്കി. നിര്‍മാണം ആരംഭിച്ചപ്പോഴാണ് പാറയുടെ സ്ഥാനം അഞ്ചര അടി താഴെയാണെന്ന് വ്യക്തമായത്. തുടര്‍ന്ന് 74 ലക്ഷം രൂപയായി എസ്റ്റിമേറ്റ് തുക പുതുക്കി. ബാക്കിത്തുക ജില്ലാ പഞ്ചായത്തില്‍നിന്ന് വകയിരുത്തിയെങ്കിലും ഡിസൈനില്‍ വീണ്ടും മാറ്റം വേണമെന്ന് ഉദ്യോഗസ്ഥരും നിലപാടെടുത്തു. ഡിസൈന്‍ മാറ്റിയതോടെ എസ്റ്റിമേറ്റ് തുക ഒരു കോടിയായി. 35 ലക്ഷം ഉപയോഗിച്ച് ഇരുവശങ്ങളിലും അടിത്തറയും തൂണുകളുടെ കുറച്ചുഭാഗവും നിര്‍മിച്ചെങ്കിലും ബാക്കി പണമില്ലാത്തതിനാല്‍ നിര്‍മാണം നിലച്ചു. വിദ്യാര്‍ഥികള്‍ ഉള്‍പ്പെടെ തോടിനുകുറുകെയുള്ള നടപ്പാലത്തിലൂടെ ഭീതിയോടെയാണ് കടന്നുപോകുന്നത്. അടിയന്തരമായി പാലത്തിന്‍റെ നിര്‍മാണം പൂര്‍ത്തീകരിക്കാന്‍ നടപടിവേണമെന്ന് തൊവരയാര്‍ പള്ളി വികാരി ഫാ. ജോണ്‍ മുണ്ടക്കാട്ട് ആവശ്യപ്പെട്ടു.

ഡേവിഡ് ഇനി സ്നേഹമന്ദിരത്തിൽ

ചെറുതോണി: 40 വർഷമായി ഏകാന്ത ജീവിതം നയിച്ചിരുന്ന 85കാരന് പടമുഖം സ്നേഹമന്ദിരം അഭയമായി. ചിന്നക്കനാൽ സിംഗുകണ്ടം ഭാഗത്ത് ഒറ്റയ്ക്ക് കഴിഞ്ഞിരുന്ന ഡേവിഡാ (85) ണ് ഇപ്പോൾ സ്നേഹമന്ദിരത്തിന്‍റെ സംരക്ഷണത്തിലേക്ക് എത്തിയിരിക്കുന്നത്. സ്വന്തമായി വീടോ മറ്റാശ്രയമോ ഇല്ലാത്തതിനാൽ പ്രദേശവാസികളുടെ സംരക്ഷണയിലാണ് ഇദ്ദേഹം കഴിഞ്ഞിരുന്നത്. ഡേവിഡിന്‍റെ ഭാര്യയെയും മകനെയും സംബന്ധിച്ച് യാതൊരു വിവരങ്ങളും ലഭ്യമല്ല. പ്രായാധിക്യത്തോടൊപ്പം വിവിധ രോഗങ്ങളാലും തീർത്തും അവശനായിരുന്നു. ജോലി ചെയ്യാനോ നടക്കാനോ പോലും കഴിയാത്ത അവസ്ഥയിലാണ് അദ്ദേഹം. കഷ്‌ടതയിൽ കഴിയുന്ന ഡേവിഡിനെ പ്രദേശവാസികളുടെ ആവശ്യപ്രകാരമാണ് സ്നേഹമന്ദിരം ഡയറക്‌ടർ വി.സി. രാജു ഏറ്റെടുത്തത്.

ശാന്തമ്പാറ പഞ്ചായത്തിൽ വ്യാപകമായി ഇരട്ടവോട്ടുകൾ ചേർത്തതായി പരാതി

രാജാക്കാട്: ശാന്തമ്പാറ പഞ്ചായത്തിൽ സിപിഎം വ്യാപകമായി ഇരട്ട വോട്ടുകൾ ചേർക്കുന്നതായി കോൺഗ്രസ് ഭാരവാഹികൾ ആരോപിച്ചു. ശാന്തമ്പാറ പഞ്ചായത്തിൽ താമസിക്കുന്ന തമിഴ് വംശജരായ ചിലർ സിപിഎമ്മിന്‍റെ ഒത്താശയോടെ തമിഴ്നാട്ടിലെ സ്ഥിരതാമസക്കാരായിട്ടുള്ള അവരുടെ ബന്ധുക്കളെ വോട്ടേഴ്സ് ലിസ്റ്റിൽ ചേർത്തതായാണ് ആരോപണം. പാർട്ടി ഓഫീസിൽനിന്നുള്ള നിർദേശപ്രകാരം പഞ്ചായത്തിലെ ഹിയറിംഗ് ഉദ്യോഗസ്ഥൻ നേരിട്ടുള്ള ഹിയറിംഗ് നടത്താതെ ലിസ്റ്റിൽ പേര് ചേർത്തിട്ടുണ്ടെന്നാണ് ഇവരുടെ ആക്ഷേപം. മുള്ളൻതണ്ട്, പുത്തടി, പേത്തൊട്ടി, ആനയിറങ്കൽ, വേട്ടുവൻപാറ എന്നീ തമിഴ് സ്വാധീനമുള്ള മേഖലകളിലാണ് പഞ്ചായത്ത് പ്രസിഡന്‍റിന്‍റെയും ജീവനക്കാരുടെയും ഇടപെടൽ മൂലം അനധികൃതമായി ലിസ്റ്റിൽ പേര് ചേർക്കുന്നതെന്ന് കോൺഗ്രസ് ആരോപിക്കുന്നു. യുഡിഎഫിന് സ്വാധീനമുള്ള വാർഡുകളിൽ മറ്റു വാർഡുകളിൽനിന്ന് എൽഡിഎഫ് പ്രവർത്തകരെ ചേർത്തിട്ടുണ്ടെന്നും 30ന് അന്തിമവോട്ടർ പട്ടിക ഇറങ്ങുമ്പോൾ കള്ളവോട്ടുകളും ഇരട്ട വോട്ടുകളും ഉണ്ടെന്ന് ബോധ്യപ്പെട്ടാൽ തെരഞ്ഞെടുപ്പ് കമ്മീഷനും കളക്‌ടർക്കും പരാതി നൽകുമെന്നും നിയമപരമായി നേരിടുമെന്നും നേതാക്കളായ ബിജു വട്ടമറ്റം, എസ്. വനരാജ്, സുരേഷ് ആശാരിപറമ്പിൽ എന്നിവർ അറിയിച്ചു.

ഓണത്തിന് കുടുംബശ്രീ വിപണനമേളയും ചന്തകളും

ഇടുക്കി: ഓണക്കാലം ആഘോഷമാക്കാൻ കുടുംബശ്രീ ഇത്തവണയും വിപണിയിൽ സജീവമാകും. ഗുണമേന്മയേറിയ ഉത്പന്നങ്ങളും നാടൻ കാർഷിക വിഭവങ്ങളുമായി ഓണത്തെ വരവേൽക്കാൻ കുടുംബശ്രീ ജില്ലാ മിഷന്‍റെ നേതൃത്വത്തിൽ വിപുലമായ പരിപാടികളാണ് ഒരുക്കുന്നത്. ഓണവിപണിയെ ലക്ഷ്യമിട്ട് വിപണന മേളകൾ സംഘടിപ്പിക്കുന്നതിനൊപ്പം പ്രത്യേക ഗിഫ്റ്റ് ഹാംപറും ഒരുക്കിയിട്ടുണ്ട്. സംരംഭകർക്ക് അധികവരുമാനം ഉറപ്പാക്കുക എന്ന ലക്ഷ്യത്തോടെയാണ് ഈ ഉദ്യമം. ഓണത്തോടനുബന്ധിച്ച് എല്ലാ സിഡിഎസുകളിലും രണ്ട് സിഡിഎസ് തല ഓണച്ചന്തകൾ സംഘടിപ്പിക്കും. ഇതിനു പുറമേ ജില്ലാതല ഓണച്ചന്ത ചെറുതോണിയിൽ നടക്കും. പോക്കറ്റ് മാർട്ടിലൂടെ ഗിഫ്റ്റ് ഹാംപർ വീട്ടിലെത്തും. കുടുംബശ്രീയുടെ പോക്കറ്റ് മാർട്ട്, ദ കുടുംബശ്രീ സ്റ്റോർ എന്നീ ഓണ്‍ലൈൻ ആപ് വഴി ഓണക്കിറ്റുകൾ ഓർഡർ ചെയ്യാം. സംസ്ഥാനതലത്തിൽ ബ്രാൻഡ് ചെയ്ത എട്ട് ഉത്പന്നങ്ങളാണ് ഗിഫ്റ്റ് ഹാംപറിൽ ഉൾപ്പെടുത്തിയിട്ടുള്ളത്. ചിപ്സ്, ശർക്കര വരട്ടി, പായസം മിക്സ്, സാന്പാർ മസാല, മുളകുപൊടി, മല്ലിപ്പൊടി, മഞ്ഞൾപ്പൊടി, വെജ് മസാല എന്നിവയടങ്ങിയ കിറ്റ് 799 രൂപയ്ക്ക് രാജ്യത്തുടനീളം ലഭ്യമാക്കും. ഇതു കൂടാതെ സിഡിഎസ് തലത്തിൽ 750 രൂപയുടെ പ്രത്യേക കിറ്റുകളും ജിഎസ്ടി രജിസ്ട്രേഷനുള്ള കുടുംബശ്രീ സംരംഭങ്ങളുടെ ഉത്പന്നങ്ങളും ഈ കിറ്റുകളിൽ ഉൾപ്പെടുത്തും. ബ്രാൻഡഡ് കറിപൗഡർ കണ്‍സോർഷ്യം, ചിപ്സ് കണ്‍സോർഷ്യം എന്നിവയിൽനിന്നുള്ള ഉത്പന്നങ്ങൾ കിറ്റുകളുടെ പ്രത്യേകതയാണ്.

വിദ്യാർഥിക്ക് പോലീസ് മർദനം ; കേസ് മനുഷ്യാവകാശ കമ്മീഷൻ വീണ്ടും പരിഗണിക്കും

തൊടുപുഴ: രോഗിയായ വിദ്യാർഥിയെ കട്ടപ്പന എസ്ഐയും പോലീസുകാരും ചേർന്നു മർദിച്ചെന്ന കേസ് ഒക്ടോബർ 22ന് മനുഷ്യാവകാശ കമ്മീഷൻ പരിഗണിക്കും. ഇന്നലെ തൊടുപുഴ റസ്റ്റ് ഹൗസിൽ ചെയർപേഴ്സണ്‍ ജസ്റ്റീസ് അലക്സാണ്ടർ തോമസ് നടത്തിയ സിറ്റിംഗിൽ ആരോപണ വിധേയരായ പോലീസുകാർ ഹാജരാകാൻ സമയം നീട്ടിച്ചോദിച്ച സാഹചര്യത്തിലാണ് നടപടി. ആസിഫിനോട് പോലീസ് കാണിച്ച ക്രൂരതയുടെ യഥാർഥ വസ്തുതകൾ കമ്മീഷനിൽനിന്നു മറച്ചുവയ്ക്കാൻ ജില്ലാ പോലീസ് മേധാവിയും കട്ടപ്പന ഡിവൈഎസ്പിയും ശ്രമിച്ചത് ഗൗരവമായി കാണുമെന്ന് ജസ്റ്റീസ് അലക്സാണ്ടർ തോമസ് മുന്പ് നിരീക്ഷണം നടത്തിയ കേസാണിത്. 2024 ഏപ്രിൽ 25ന് കൂട്ടാർ സ്വദേശിയായ ആസിഫിനെ മർദിച്ച കട്ടപ്പന എസ്ഐയെയും സിപിഒയെയും സസ്പെൻഡ് ചെയ്തിരുന്നു. ജില്ലാ പോലീസ് മേധാവി 2024 മേയ് മൂന്നിന് എറണാകുളം ഡിഐജിക്ക് നൽകിയ റിപ്പോർട്ടിൽ എസ്ഐക്കും സിപിഒക്കുമെതിരേ ഗുരുതര കൃത്യവിലോപവും വീഴ്ചയും കണ്ടെത്തിയിരുന്നു. ഇവർ വ്യാജ കേസുണ്ടാക്കിയെന്നും വിദ്യാർഥിയെ മർദിച്ചെന്നും രേഖപ്പെടുത്തിയിരുന്നു. എന്നാൽ ഇതേ ഉദ്യോഗസ്ഥൻ 2024 ജൂലൈ രണ്ടിന് കമ്മീഷന് നൽകിയ റിപ്പോർട്ടിൽ ഇത്തരം വിവരങ്ങളെല്ലാം ഒഴിവാക്കി. പ്രധാനപ്പെട്ട വിവരങ്ങൾ കമ്മീഷനിൽനിന്നു മറച്ചുവച്ചതിന്‍റെ കാരണം ഡിപിസിയും ഡിവൈഎസ്പിയും വിശദീകരിക്കണമെന്ന് കമ്മീഷൻ അന്ന് ആവശ്യപ്പെട്ടിരുന്നു. കട്ടപ്പന ഡിവൈഎസ്പി ജൂണ്‍ 18ന് ഇടുക്കി ഡിപിസിക്ക് നൽകിയ റിപ്പോർട്ടിൽ ആസിഫിന്‍റെ മൊഴി എടുക്കാത്ത സാഹചര്യത്തിൽ ഇരയുടെ മൊഴി അഭിഭാഷകന്‍റെ സാന്നിധ്യത്തിൽ രേഖപ്പെടുത്തണമെന്ന് കമ്മീഷൻ നിർദേശിച്ചിരുന്നു. അഭിഭാഷകനെ ജില്ലാ ലീഗൽ സർവീസ് അഥോറിറ്റി സെക്രട്ടറി നിർദേശിക്കണം. ഡിസ്ട്രിക്ട് പോലീസ് മേധാവിയുടെ ഓഫീസിൽ വച്ച് ആസിഫിന്‍റെ മൊഴി അഭിഭാഷകന്‍റെ സാന്നിധ്യത്തിൽ കട്ടപ്പന ഡിവൈഎസ്പി രേഖപ്പെടുത്തണം. മൊഴിയുടെ എല്ലാ പേജിലും ഇരയും അഭിഭാഷകനും ഒപ്പിടണം. ആസിഫിനെ ചികിത്സിച്ച ഡോക്ടറുടെ മൊഴി ഇതിനൊപ്പം ഡിവൈഎസ്പി കമ്മീഷനിൽ ഹാജരാക്കണം. പോലീസ് ഉദ്യോഗസ്ഥരുടെ സസ്പെൻഷനുള്ള കാരണവും ഡിപിസി കമ്മീഷനെ അറിയിക്കണമെന്നും നിർദേശിച്ചിരുന്നു. എന്നാൽ ഈ റിപ്പോർട്ട് ഹാജരാക്കിയില്ല. ആസിഫിന്‍റെ ബൈക്ക് കൂട്ടുകാരൻ ഓടിക്കുന്നതിനിടെ കട്ടപ്പന എസ്ഐ കസ്റ്റഡിയിലെടുത്തിരുന്നു. ബൈക്ക് വിട്ടുകിട്ടാൻ ആസിഫ് രാഷ‌്ട്രീയ സ്വാധീനം ഉപയോഗിച്ചു. ഇതാണ് എസ്ഐക്ക് വൈരാഗ്യമുണ്ടാകാൻ കാരണമെന്ന് ആസിഫ് കമ്മീഷനെ അറിയിച്ചു. ഏപ്രിൽ 25ന് വാഹന പരിശോധനയ്ക്കിടയിൽ എസ്ഐ ആസിഫിനെ കസ്റ്റഡിയിലെടുത്ത് സ്റ്റേഷനിലെത്തിച്ച് മർദിച്ചതായി ആസിഫിന്‍റെ ബന്ധു കൂട്ടാർ സ്വദേശി സക്കീർ ഹുസൈൻ കമ്മീഷനിൽ സമർപ്പിച്ച പരാതിയിൽ പറഞ്ഞു. ആരോപണ വിധേയരായ ഉദ്യോഗസ്ഥർക്കെതിരേ നടക്കുന്ന അന്വേഷണത്തിന്‍റെ ഇപ്പോഴത്തെ അവസ്ഥയും കമ്മീഷനെ അറിയിക്കണമെന്ന് ജസ്റ്റീസ് അലക്സാണ്ടർ തോമസ് ആവശ്യപ്പെട്ടു. എസ്ഐ എൻ.ജെ. സുനേഘ്, എആർ സിപിഒ മനു പി. ജോസ് എന്നിവർക്കെതിരേയാണ് കേസ്.

താലൂക്കാശുപത്രിയിൽ ഹൃദയ ചികിത്സാവിഭാഗം ഇല്ല

ഹൈറേഞ്ചുകാർ ചികിത്സയ്ക്ക് മണിക്കൂറുകൾ താണ്ടണം അടിമാലി: ദേവികുളം, ഉടുമ്പന്‍ചോല താലൂക്കുകളിലെ ആളുകള്‍ ഹൃദയ ചികിത്സയ്ക്കായി നൂറിലേറെ കിലോമീറ്ററുകൾ യാത്ര ചെയ്യണം. ഹൃദയമിടിപ്പു നിലയ്ക്കാറാകുന്നവരുമായി കോട്ടയവും എറണാകുളവും അടക്കമുള്ള അയല്‍ ജില്ലകളെ ആശ്രയിക്കേണ്ട ഗതികേടാണ് ഇപ്പോഴും ഉള്ളത്. വട്ടവടയും മറയൂരും ഇടമലക്കുടിയും മൂന്നാറുമടങ്ങുന്ന ഇടങ്ങളില്‍നിന്ന് ആളുകള്‍ക്ക് രോഗികളുമായി അടിമാലിയില്‍ എത്തണമെങ്കില്‍തന്നെ മുപ്പത് മുതല്‍ നൂറു കിലോമീറ്റര്‍ വരെ സഞ്ചരിക്കണം. അടിമാലിയില്‍നിന്ന് അയല്‍ ജില്ലകളിലെത്തണമെങ്കില്‍ പിന്നെയും നൂറു കിലോമീറ്ററിനു മുകളിൽ സഞ്ചരിക്കണം. അടിമാലി താലൂക്കാശുപത്രിയിൽ ഹൃദയ ചികിത്സാവിഭാഗം ആരംഭിച്ചാൽ പ്രതിസന്ധിക്ക് അൽപ്പമെങ്കിലും പരിഹാരം ഉണ്ടാകുമെന്നാണ് നാട്ടുകാർ ചൂണ്ടിക്കാട്ടുന്നത്.

യുവജനനയം രൂപീകരിക്കണം: അപു ജോണ്‍ ജോസഫ്

അരിക്കുഴ: അഭ്യസ്തവിദ്യരായ യുവജനങ്ങൾ നാട്ടിൽ നിലനിൽക്കാൻ കാലാനുസൃത യുവജനനയം സർക്കാർ നടപ്പാക്കണമെന്ന് കേരള കോണ്‍ഗ്രസ് സംസ്ഥാന കോ-ഓർഡിനേറ്റർ അപു ജോണ്‍ ജോസഫ്. കേരള കോണ്‍ഗ്രസ് മണക്കാട് പഞ്ചായത്ത് പാറക്കടവ് വാർഡ് കണ്‍വൻഷനും സംരംഭകരെ ആദരിക്കലും ഉദ്ഘാടനം ചെയ്യുകയായിരുന്നു അദ്ദേഹം. വാർഡ് പ്രസിഡന്‍റ് പയസ് ചാത്തംകോട്ട് അധ്യക്ഷത വഹിച്ചു. സംസ്ഥാന ജനറൽ സെക്രട്ടറി എം. മോനിച്ചൻ, നിയോജക മണ്ഡലം പ്രസിഡന്‍റ് ബ്ലെയിസ് ജി. വാഴയിൽ, ഷൈൻ വടക്കേക്കര, ജോയി ജോസഫ്, ജോണ്‍സ് ജോർജ് കുന്നപ്പിള്ളി, ക്ലമന്‍റ് ഇമ്മാനുവേൽ എന്നിവർ പ്രസംഗിച്ചു. സംരംഭകരായ ടി.സി. രാജു തരണിയിൽ, മാത്യുസ് പുൽപ്പറന്പിൽ, മനു ജയിംസ്, മെർവിൻ ജോസഫ്, ജോബിഷ് അറയ്ക്കൽ, ഷിജോ ജോയി എന്നിവരെ ആദരിച്ചു.

വണ്ണപ്പുറത്ത് മോഷണം; നടപടിയില്ലെന്ന് യുഡിഎഫ്

വണ്ണപ്പുറം: പഞ്ചായത്തിൽ മോഷണ പരന്പര തുടർന്നിട്ടും പോലീസ് നിഷ്ക്രിയമാണെന്ന് യുഡിഎഫ് വണ്ണപ്പുറം മണ്ഡലം കമ്മിറ്റി ആരോപിച്ചു. കഴിഞ്ഞ ആറു മാസമായി വണ്ണപ്പുറത്തിന്‍റ വിവിധ ഭാഗങ്ങളിൽ മോഷണം വ്യാപകമാണ്. മുപ്പത്താറേക്കർ കണ്ടത്തിൽ റാഫേലിന്‍റ വീട്ടിൽനിന്നു മുക്കാൽ പവൻ സ്വർണം മോഷ്ടിച്ചായിരുന്നു തുടക്കം. പിന്നീട് ടൗണിന് സമീപത്തെ തുറയിൽ നൗഷാദിന്‍റെ വീട്ടിൽനിന്നു 11 ലക്ഷത്തിന്‍റെ സ്വർണവും വജ്രവും മോഷണം പോയി. ചങ്ങഴിമറ്റം കരീമിന്‍റ വീട്ടിൽനിന്ന് ഒന്നര പവന്‍റെ മാലയും എട്ടുതയ്യിൽ സോമന്‍റ വീട്ടിൽനിന്ന് ഒരു പവന്‍റെ പാദസരവും പുള്ളിക്കുടിയിൽ സൈനുദ്ദീന്‍റ വീട്ടിൽനിന്നു 3,000 രൂപയും എഴുപതേക്കർ ഇടക്കരചന്ദ്രന്‍റ വീട്ടിൽനിന്നു വീട്ടുപകരണങ്ങൾ, വണ്ണപ്പുറത്തെ രണ്ട് ക്ഷേത്രങ്ങളിൽനിന്നു പണം, വെണ്‍മറ്റം കോഴിക്കവലയിൽ കളപ്പുരയ്ക്കൽ ലിസിയുടെ രണ്ടുപവൻ മാല, മുപ്പത്താറേക്കർ പേണ്ടാനത്ത് ലൂസിയുടെ മൂന്നു പവന്‍റെ മാല, തൊമ്മൻകുത്ത് ചിരപ്പറന്പിൽ അനിതയുടെ പാദസരം എന്നിവയാണ് മോഷണം പോയത്. ഇനിയും നടപടിയാകാത്ത പക്ഷം പോലീസ് സ്റ്റേഷൻ മാർച്ച് ഉൾപ്പെടെയുള്ള സമരപരിപാടികൾആരംഭിക്കുമെന്നും യുഡിഎഫ് ചെയർമാൻ പി.എം. ഇല്ല്യാസ്, കണ്‍വീനർ ബേബി വട്ടക്കുന്നേൽ, സെക്രട്ടറി സണ്ണി കളപ്പുരയ്ക്കൽ എന്നിവർ പറഞ്ഞു.

വേറിട്ട പ്രദർശനവുമായി മരിയൻ കോളജ് ബിബിഎ വിദ്യാർഥികൾ

കുട്ടിക്കാനം: 2018ലെ പ്രളയത്തിന്‍റെയും വയനാട് ദുരന്തത്തിന്‍റെയും പശ്ചാത്തലത്തിൽ പ്രകൃതിദുരന്തനിവാരണ പ്രവർത്തനങ്ങളെക്കുറിച്ച് വിദ്യാർഥികളെ ബോധവാന്മാരാക്കുക എന്ന ലക്ഷ്യത്തോടെ കുട്ടിക്കാനം മരിയൻ കോളജിലെ രണ്ടാം വർഷ ബിബിഎ (എയ്ഡഡ്) വിദ്യാർഥികൾ സംഘടിപ്പിച്ച എക്സിബിഷൻ ശ്രദ്ധേയമായി. മണ്ണിനോട് മല്ലടിക്കുന്ന മനുഷ്യന്‍റെ മുന്നിൽ രൗദ്രഭാവം പൂണ്ടുനിൽക്കുന്ന പ്രകൃതിയെ അവതരിപ്പിക്കുകയായിരുന്നു എക്സിബിഷന്‍റെ ലക്ഷ്യം. ഫ്രം റൂയിൻസ് ടു റെസിലിയൻസ് എന്ന പേരിൽ രണ്ടു ദിവസങ്ങളിലായാണ് എക്സിബിഷൻ. പ്രകൃതിദുരന്തങ്ങളോടനുബന്ധിച്ച് ഇലക‌്ട്രിസിറ്റി നഷ്ടപ്പെടുന്ന പ്രദേശങ്ങളെ ഓർമപ്പെടുത്തി എക്്സിബിഷൻ സ്ഥലങ്ങളിൽ മൊബൈൽ വെട്ടം കരുതി വേണമായിരുന്നു സന്ദർശകർ പ്രവേശിക്കേണ്ടിയിരുന്നത്. പ്രകൃതിദുരന്തങ്ങളുമായി ബന്ധപ്പെട്ടുള്ള ചിത്രങ്ങളും പത്രവാർത്തകളും മോഡലുകളും എക്സിബിഷനെ ആകർഷകമാക്കി. മോഡലുകളുടെ വെളിച്ചത്തിൽ ഉരുൾപൊട്ടലും മണ്ണിടിച്ചിലും എങ്ങനെ ഉണ്ടാകുന്നുവെന്ന് വിദ്യാർഥികൾ സന്ദർശകർക്കു വിശദീകരിച്ചു. വിദ്യാർഥികളെ പ്രിൻസിപ്പൽ പ്രഫ. ഡോ. അജിമോൻ ജോർജ് അഭിനന്ദിച്ചു. ഡിപ്പാർട്ട്മെന്‍റ്് തലവൻ ഡോ. ജോഷി ജോണ്‍, ഫാ. ഡോ. സിബി ജോസഫ്, മെൽബി ജോസഫ് എന്നിവർ പ്രോത്സാഹനം നൽകി. എക്സിബിഷന് നതാഷ എ. പാറയ്ക്കൽ, അമൃത് ബി. ദേവ് എന്നീ വിദ്യാർഥികൾ നേതൃത്വം നൽകി.

തൊഴിൽ സുരക്ഷ: വനിതാ ബീറ്റ് ഓഫീസർമാർക്ക് പബ്ലിക് ഹിയറിംഗ്

ഇടുക്കി: സംസ്ഥാനത്ത് ആദ്യമായി വനംവകുപ്പിലെ വനിതാ ബീറ്റ് ഓഫീസർമാർക്കും വാച്ചർമാർക്കുമായി വനിതാ കമ്മീഷന്‍റെ നേതൃത്വത്തിൽ പബ്ലിക് ഹിയറിംഗ് സംഘടിപ്പിച്ചു. വിവിധ തൊഴിൽ മേഖലകളിൽ സ്ത്രീകൾ അനുഭവിക്കുന്ന പ്രശ്നങ്ങൾ നേരിട്ട് മനസിലാക്കുന്നതിനും പ്രശ്നപരിഹാരത്തിനുള്ള ശിപാർശ സർക്കാരിന് സമർപ്പിക്കുന്നതിനുമായാണ് പബ്ലിക് ഹിയറിംഗ് സംഘടിപ്പിച്ചത്. മൂന്നാറിൽ നടത്തിയ ഹിയറിംഗ് വനിതാ കമ്മീഷൻ അധ്യക്ഷ പി. സതീദേവി ഉദ്ഘാടനം ചെയ്തു. തൊഴിലിടങ്ങളിൽ സ്ത്രീകൾക്ക് ആത്മാഭിമാനത്തോടെ ജോലി ചെയ്യാനുള്ള സാഹചര്യമുണ്ടാകണമെന്ന് കമ്മീഷൻ അധ്യക്ഷ പറഞ്ഞു. 2017 മുതലാണ് വനിതകളെ ബീറ്റ് ഫോറസ്റ്റ് ഓഫീസർ തസ്തികയിൽ നിയമിച്ചു തുടങ്ങിയത്. സംസ്ഥാനത്ത് ആകെയുള്ള 3126 ബീറ്റ് ഫോറസ്റ്റ് ഓഫീസർമാരിൽ 700 പേർ വനിതകളാണ്. വനവും വനങ്ങളുടെ ആവാസവ്യവസ്ഥയും സംരക്ഷിക്കുന്ന ശ്രമകരമായ ജോലിയാണ് ബീറ്റ് ഫോറസ്റ്റ് ഓഫീസർമാരുടേത്. അവരുടെ ജോലിയുമായി ബന്ധപ്പെട്ട പ്രശ്നങ്ങൾ, തൊഴിലിടത്തിൽ ലഭ്യമാകേണ്ട പ്രാഥമിക സൗകര്യങ്ങൾ, ആരോഗ്യ പരിരക്ഷ, തൊഴിലിടത്തിലെ സുരക്ഷ തുടങ്ങിയ കാര്യങ്ങളാണ് ഹിയറിംഗിൽ ഉയർന്നുവന്നത്. പോലീസിലും എക്സൈസിലും ഫയർ ഫോഴ്സിലും സ്ത്രീകളുടെ സാന്നിധ്യമുണ്ട്. തൊഴിലുറപ്പ്, ഹരിതകർമസേന, ആശാ പ്രവർത്തകർ തുടങ്ങിയ മേഖലകളിൽ സ്ത്രീകൾ ജോലി ചെയ്യുന്നു. ഇത്തരത്തിൽ വിവിധ മേഖലകളിൽ തൊഴിലെടുക്കുന്ന സ്ത്രീകൾക്ക് നിയമപരമായ സംരക്ഷണം ഉറപ്പാക്കുകയാണ് വനിതാ കമ്മീഷന്‍റെ ലക്ഷ്യമെന്നും പി. സതീദേവി പറഞ്ഞു. ജില്ലയിലെ വിവിധ റേഞ്ചുകളിൽനിന്നുള്ള വനിതാ ബീറ്റ് ഓഫീസർമാരും വാച്ചർമാരുമാണ് ഹിയറിംഗിൽ പങ്കെടുത്തത്. കമ്മീഷനംഗം എലിസബത്ത് മാമ്മൻ മത്തായി അധ്യക്ഷത വഹിച്ചു. അംഗങ്ങളായ ഇന്ദിര രവീന്ദ്രൻ, വി. ആർ. മഹിളാമണി, വനിത കമ്മീഷൻ ഡയറക്‌ടർ ഷാജി സുഗുണൻ, മൂന്നാർ ഡിഎഫ്ഒ സാജു വർഗീസ്, വനിത കമ്മീഷൻ റിസർച്ച് ഓഫീസർ എ.ആർ. അർച്ചന എന്നിവർ പങ്കെടുത്തു.

വഴിവിളക്ക് മിഴിയടച്ചു; ദുരിതം ജനത്തിനും

അറക്കുളം: അലാനി കോളനിയിലേക്കുള്ള റോഡിലെ വഴിവിളക്കുകൾ മിഴിയടച്ചതോടെ ഇതുവഴിയുള്ള യാത്ര ദുഷ്കരമായി. റോഡും കുണ്ടും കുഴിയുമായ സ്ഥിതിയിലാണ്. നാലുവർഷം മുന്പുവരെ ഈ റോഡിൽ വഴിവിളക്കുകൾ പ്രകാശിച്ചിരുന്നു. പഞ്ചായത്തിൽ പരാതി പറഞ്ഞാൽ വൈദ്യുതി ബോർഡാണ് ഇതു സ്ഥാപിക്കേണ്ടതെന്നു പഞ്ചായത്തധികൃതർ പറയും. വൈദ്യുതി ബോർഡിൽ പരാതിപ്പെട്ടാൽ പഞ്ചായത്തധികൃതരാണ് അറ്റകുറ്റപ്പണി നടത്തേണ്ടതെന്നു പറഞ്ഞ് അവർ തലയൂരും. പഞ്ചായത്ത് പ്രദേശത്തെ മറ്റുസ്ഥലങ്ങളിലും വൈദ്യുതി വിളക്കുകൾ തെളിയുന്നില്ലെന്ന് ആക്ഷേപമുണ്ട്. ചുരുക്കം വൈദ്യുതി വിളക്കുകൾ മാത്രമാണ് പ്രകാശിക്കുന്നത്. മൂലമറ്റം കോളജിലെ വിദ്യാർഥികൾ രാവിലെയുംവൈകുന്നേരവും ഹോസ്റ്റലിലേക്കും മറ്റും നടന്നുപോകുന്നത് വഴിവിളക്കില്ലാത്ത റോഡിലൂടെയാണ്. ആലാനിക്കൽ തോട്ടത്തിലൂടെ ഏതാനും ദിവസം മുന്പ് നടന്നുപോയ വിദ്യാർഥിനികളെ അജ്ഞാതർ ഭീഷണിപ്പെടുത്തിയതായി ആക്ഷേപമുണ്ട്. കുട്ടികളും സ്ത്രീകളും ഉൾപ്പെടെയുള്ളവർ അനുദിനം സഞ്ചരിക്കുന്ന ആലാനിക്കൽ കോളനി റോഡിലും പഞ്ചായത്തിന്‍റെ വിവിധ വാർഡുകളിലും സ്ഥാപിച്ചിരിക്കുന്ന വഴിവിളക്കുകൾ തെളിക്കാൻ അടിയന്തര നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

കെണിയൊരുക്കി മലയോര റോഡുകൾ

ആറു മാസം, 552 അപകടം, 61 മരണം തൊടുപുഴ: ജില്ലയിലെ മലയോര പാതകളിൽ റോഡപകടങ്ങൾ പെരുകുന്നു. ഇന്നലെയുണ്ടായ വാഹനാപകടത്തിലും ഒരു ജീവൻ പൊലിഞ്ഞു. ഞായറാഴ്ച കുമളിയിലും പീരുമേട്ടിലും വാഹനാപകടങ്ങളുണ്ടായി. ജില്ലയിൽ ഈ വർഷം ജനുവരി ഒന്നു മുതൽ ജൂണ്‍ 30 വരെ ജില്ലയിൽ ചെറുതും വലുതുമായ 552 റോഡപകടങ്ങളാണ് റിപ്പോർട്ട് ചെയ്തത്. ഇത്രയും നാളത്തെ അപകടങ്ങളിൽ പൊലിഞ്ഞത് 61 ജീവനുകൾ. ഇന്നലെ കുട്ടിക്കാനം-കട്ടപ്പന മലയോര ഹൈവേയിൽ കരുന്തരുവി ആറാം മൈലിനു സമീപമുണ്ടായ അപകടത്തിൽ കോഴിമല കോടാലിപ്പാറ കാട്ടുമറ്റത്തിൽ സന്തോഷാണ് മരിച്ചത്. കാറിലുണ്ടായിരുന്ന മറ്റുള്ളവർക്കു സാരമായി പരിക്കേറ്റു. കെഎസ്ആർടിസി ബസിനു പിന്നിൽ കാർ ഇടിച്ചു കയറിയാണ് അപകടം. ബസിലിടിച്ചു നിയന്ത്രണം വിട്ട കാർ തിട്ടയിലിടിച്ചാണ് നിന്നത്. അടുത്ത നാളിലാണ് ഈ മലയോര ഹൈവേയുടെ നിർമാണം പൂർത്തിയാക്കിയത്. മാസം 10 മരണം ഒരു മാസം ശരാശരി കുറഞ്ഞത് 10 പേർ ജില്ലയിൽ വാഹനാപകടങ്ങളിൽ മരിക്കുന്നുവെന്നാണു കണക്കുകൾ. ആറു മാസത്തിനിടെ വാഹനാപകടങ്ങളിൽ 793 പേർക്കു പരിക്കേറ്റു. ഇതിനുപുറമെ കേസ് രജിസ്റ്റർ ചെയ്യാത്ത അപകടങ്ങളും ഏറെയുണ്ട്. അപകടത്തിൽപെടുന്നതിൽ ഏറെയും ഇരുചക്ര വാഹനങ്ങളാണ്. മോട്ടോർ വാഹന വകുപ്പും പോലീസും പരിശോധനകളും ബോധവത്കരണവും ശക്തമാക്കുന്പോഴും ജില്ലയിൽ അപകട മരണ നിരക്ക് ഉയർന്നു നിൽക്കുകയാണ്. അശ്രദ്ധ, അമിതവേഗം പല മലയോര പാതകളും ആധുനിക നിലവാരത്തിലേക്ക് ഉയർന്നതോടെയാണ് അപകടങ്ങളും വർധിച്ചത്. അമിതവേഗം, അശ്രദ്ധ എന്നിവയാണ് അപകടങ്ങൾക്കു പ്രധാന കാരണം. ഇത്തരത്തിൽ അപകടങ്ങൾ ക്ഷണിച്ചു വരുത്തുന്നതിലേറെയും യുവാക്കളാണ്. വളവുകളും തിരിവുകളും നിറഞ്ഞതാണു ജില്ലയിലെ റോഡുകളിൽ ഭൂരിഭാഗവും. ഇത്തരം റോഡുകളിലൂടെ അമിത വേഗത്തിൽ വാഹനമോടിക്കുന്നത് അപകടങ്ങൾക്കു വഴിവയ്ക്കും. ഡ്രൈവർമാർ വേണ്ടത്ര വിശ്രമമില്ലാതെ വാഹനമോടിക്കുന്നത്, മദ്യപിച്ചുള്ള ഡ്രൈവിംഗ്, രാത്രി ഹെഡ് ലൈറ്റ് ഡിം ചെയ്യാത്തത്, ഡ്രൈവിംഗിനിടയിലെ മൊബൈൽ ഫോണ്‍ ഉപയോഗം എന്നിവയെല്ലാം അപകടങ്ങൾക്കു കാരണമാകുന്നു. വാഹനപ്പെരുപ്പവും റോഡുകളുടെ അടിസ്ഥാന സൗകര്യങ്ങളുടെ അപര്യാപ്തതയും അപകടങ്ങൾക്കു കാരണമാകുന്നുണ്ട്.

ഓട വൃത്തിയാക്കി നാടിന് മാതൃകയായി

ചെറുതോണി: കല്ലും മണ്ണും ചപ്പുചവറുംകൊണ്ട് അടഞ്ഞുപോയ ഓട വൃത്തിയാക്കി ഭൂമിയാംകുളം സ്വദേശികൾ നാടിന് മാതൃകയായി. ഭൂമിയാംകുളം ടൗണിൽ റോഡിന് കുറുകെ നിർമിച്ചിരുന്ന കോൺക്രീറ്റ് സ്ലാബിട്ട് മൂടിയ ഓടയാണ് നാട്ടുകാർ വൃത്തിയാക്കിയത്. അരക്കിലോമീറ്ററിലധികം ദൂരത്തുനിന്നുള്ള മഴവെള്ളം ഈ ഓടയിലൂടെയാണ് ഒഴുകിയിരുന്നത്. മഴക്കാലം ആരംഭിച്ചപ്പോൾത്തന്നെ കല്ലും മണ്ണും ചപ്പുചവറുകളും ഒഴുകിയെത്തി ഓട അടഞ്ഞുപോയിരുന്നു. ഇതോടെ കുത്തിയൊഴുകി എത്തുന്ന മഴവെള്ളം റോഡിലൂടെ ഒഴുകുകയായിരുന്നു. റോഡിൽ ചെറുകല്ലുകളും ചെളിയും വന്നടിഞ്ഞ് വാഹനയാത്രയും അപകടകരമായിരുന്നു. ഭൂമിയാംകുളം പള്ളി വികാരി ഫാ. ജോൺസൺ ചെറുകുന്നേലിന്‍റെ നേതൃത്വത്തിൽ ഷർജൻ വള്ളിക്കാവുങ്കൽ, അനീഷ് ഊളാനിയിൽ, ബിബി ചക്കാലക്കൽ, ജോസുകുട്ടി കണിയാംകുടി, ജയിംസ് കാഞ്ഞിരത്തിങ്കൽ, ജോയി എള്ളിൽ, ജോർജ് പാലക്കാട്, ബിജു പുത്തൻപുരയിൽ, ജിനു തൊട്ടിയിൽ, കുഞ്ഞുമോൻ കുറമഠത്തിൽ, സിബു കല്ലുവേലിൽ തുടങ്ങിയവർ ചേർന്നാണ് ഓട വൃത്തിയാക്കിയത്.

നായശല്യം അതിരൂക്ഷമായിട്ടും എബിസി സെന്‍റർ മെല്ലെ മെല്ലെ...

തൊടുപുഴ: ജില്ലയിൽ തെരുവു നായ്ക്കളുടെയും ഇവയുടെ കടിയേൽക്കുന്നവരുടെയും എണ്ണം കുത്തനെ കൂടുന്പോഴും എബിസി സെന്‍റർ നിർമാണം ഇഴയുന്നു. നായ്ക്കളുടെ വന്ധ്യംകരണംകൂടി നിലച്ചതോടെ തെരുവനായ്ക്കളുടെ എണ്ണവും പെരുകുകയാണ്. വംശവർധന നിയന്ത്രിക്കാനായി സ്ഥാപിക്കുന്ന എബിസി സെന്‍ററിന്‍റെ നിർമാണം ജില്ലാ പഞ്ചായത്ത് തുടങ്ങിയിട്ട് നാളു കുറെയായെങ്കിലും ഇതുവരെ അടിത്തറ പോലും പൂർത്തിയായിട്ടില്ല. നായ പെരുകുന്നു ‌2019ൽ നടന്ന സെൻസസ് പ്രകാരം ജില്ലയിൽ 7,375 തെരുവു നായ്കളെ കണ്ടെത്തിയെന്നാണ് കണക്ക്. വളർത്തു നായ്ക്കൾ 55,354. ഈ വർഷം കണക്കെടുപ്പ് നടന്നെങ്കിലും എണ്ണം പുറത്തുവിട്ടിട്ടില്ല. ലൈവ് സ്റ്റോക്ക് ഇൻസ്പെക്ടർമാരും പശു സഖിമാരുമാണ് സെൻസസിൽ പങ്കെടുത്തത്. 2019നേക്കാൾ നായകളുടെ സാന്നിധ്യം എല്ലായിടത്തും പെരുകിയെന്നാണ് നാട്ടുകാർ പറയുന്നത്. 2022ൽ തദ്ദേശ സ്ഥാപനങ്ങളുടെ ഫണ്ട് ഉപയോഗിച്ച് നായ്ക്കളുടെ അനിമൽ ബർത്ത് കണ്‍ട്രോൾ പ്രകാരം വന്ധ്യംകരണം നടപ്പാക്കാൻ ലക്ഷ്യമിട്ടിരുന്നു. ഇത് എബിസി സെന്‍റർ ഒരുക്കണം. എന്നാൽ, ഇടുക്കിയിൽ മാത്രം എബിസി സെന്‍റർ നടപ്പായില്ല. ആദ്യം രണ്ട് ബ്ലോക്കുകൾക്കായി ഒരു എബിസി സെന്‍റർ തുടങ്ങാൻ ലക്ഷ്യമിട്ടെങ്കിലും പ്രാദേശിക എതിർപ്പു മൂലം നടപ്പായില്ല. പിന്നീടാണ് ത്രിതല പഞ്ചായത്തുകളുടെ ഫണ്ട് വിനിയോഗിച്ച് ജില്ലാ ആസ്ഥാനത്ത് ജില്ലാ പഞ്ചായത്തിന്‍റെ നേതൃത്വത്തിൽ എബിസി സെന്‍റർ നിർമിക്കാൻ തീരുമാനിച്ചത്. മൂന്നര കോടിയാണ് വിനിയോഗിക്കുന്നത്. കടിയേറ്റത് 4,200 പേർക്ക് ഈ വർഷം 4200 -ഓളം പേർക്ക് ജില്ലയിൽ നായ്ക്കളുടെ കടിയേറ്റു. ഒരു മാസം ശരാശരി അറൂനൂറോളം പേർക്ക്. കുട്ടികളും വയോധികരുമാണ് പ്രധാന ഇരകൾ. കഴിഞ്ഞ ദിവസം ജില്ലാ അതിർത്തിയായ കലൂരിൽ മൂന്നു പേർക്ക് കടിയേറ്റു. കുമാരമംഗലം പഞ്ചായത്തിൽ നായ്ക്കളും പശുക്കളും ഉൾപ്പെടെയുള്ള വളർത്തു മൃഗങ്ങളെയും നായ്ക്കൾ ആക്രമിച്ചു. നായ്ക്കളെ കണ്ട് ഭയന്നോടുന്ന കുട്ടികളെ കൂട്ടത്തോടെ പിന്നാലെയെത്തിയാണ് ആക്രമിക്കുന്നത്. ജില്ലയിലെ എല്ലാ സർക്കാർ ആശുപത്രികളിലും നായ്ക്കളുടെ കടിയേറ്റാൽ നൽകുന്ന ആന്‍റി റാബിസ് വാക്സിൻ ലഭ്യമാണെന്ന് ജില്ലാ ആരോഗ്യവിഭാഗം വ്യക്തമാക്കി. എല്ലാ ഗവ.ആശുപത്രികളിലും പേ വിഷബാധയ്ക്കെതിരെയുള്ള മരുന്നും ആന്‍റിവെനവും ലഭ്യമാക്കണമെന്ന് മനുഷ്യാവകാശ കമ്മീഷനും ആരോഗ്യ വകുപ്പിനു നിർദേശം നൽകിയിട്ടുണ്ട്.

വട്ടവടക്കാര്‍ ചോദിക്കുന്നു; ഇനിയെത്രനാള്‍ ഈ കുഴികള്‍ താണ്ടണം

അടിമാലി: വട്ടവട ഗ്രാമപഞ്ചായത്തിലെ തകര്‍ന്നുകിടക്കുന്ന വിവിധ റോഡുകളുടെ ടാറിംഗ് ജോലികള്‍ നടത്തണമെന്ന ആവശ്യം അധികൃതർ അവഗണിക്കുന്നു. പഞ്ചായത്തിലൂടെ കടന്നുപോകുന്ന വിവിധ റോഡുകള്‍ നിര്‍മാണം കാത്ത് കിടക്കാന്‍ തുടങ്ങിയിട്ട് നാളുകളേറെയായി. നിര്‍മാണം സംബന്ധിച്ച് ഇടയ്ക്കിടെ പ്രഖ്യാപനങ്ങള്‍ ഉണ്ടാകാറുണ്ടെങ്കിലും മുന്നോട്ട് പോക്കുണ്ടാകാറില്ല. മഴ പെയ്തതോടെ റോഡില്‍ പലയിടത്തും വലിയതോതില്‍ ചെളി രൂപം കൊണ്ടിരിക്കുകയാണ്. റോഡുകള്‍ തകര്‍ന്നതോടെ ആശുപത്രിയിലേക്കും സ്‌കൂളിലേക്കും മറ്റിതര ആവശ്യങ്ങള്‍ക്കുമൊക്കെയുള്ള ഗ്രാമവാസികളുടെ യാത്ര ദുഷ്‌കരമായി.പല റോഡുകളിലൂടെയും ഏറെ സാഹസപ്പെട്ടാണ് ഇരുചക്ര വാഹനങ്ങള്‍ ഉള്‍പ്പെടെ കടന്നുപോകുന്നത്. തകര്‍ന്ന റോഡുകള്‍ വട്ടവടയുടെ കാര്‍ഷിക-വിനോദസഞ്ചാര മേഖലകൾക്കു വലിയ തിരിച്ചടിയാണ്.

രാഹുൽ ഗാന്ധിയുടെ പ്രക്ഷോഭം രാജ്യത്തെ ഇളക്കി മറിച്ചു: വി.ഡി. സതീശൻ

തൊടുപുഴ: കോണ്‍ഗ്രസുകാർ മാത്രമല്ല ജനാധിപത്യത്തിൽ പ്രതീക്ഷ അർപ്പിച്ച എല്ലാ ജനവിഭാഗങ്ങളും ഏറ്റെടുത്ത നേതാവായി രാഹുൽ ഗാന്ധി മാറിയതായി പ്രതിപക്ഷനേതാവ് വി.ഡി. സതീശൻ. ഡിസിസിയുടെ ആഭിമുഖ്യത്തിൽ സംഘടിപ്പിച്ച കോണ്‍ഗ്രസ് ജില്ലാ നേതൃയോഗം ഉദ്ഘാടനം ചെയ്യുകയായിരുന്നു അദ്ദേഹം. വോട്ടു കൊള്ളയ്ക്കെതിരേ രാഹുൽ ആരംഭിച്ച പ്രക്ഷോഭം രാജ്യത്തെയാകെ ഇളക്കിമറിക്കുകയാണ്. കാലാകാലങ്ങളായി വോട്ടർപട്ടികയിൽ തിരിമറി നടത്തുന്ന രാഷ്‌ട്രീയപ്രസ്ഥാനങ്ങളുടെ അടിത്തറ ഇളക്കാൻ ഈ പ്രക്ഷോഭത്തിനു കഴിയും. യുഡിഎഫ് അധികാരത്തിൽ വരുന്പോൾ ജില്ലയിലെ ഭൂപ്രശ്നങ്ങൾക്കു ശാശ്വത പരിഹാരം കാണുമെന്നും അദ്ദേഹം പറഞ്ഞു. ഡിസിസി പ്രസിഡന്‍റ് സി.പി. മാത്യു അധ്യക്ഷത വഹിച്ചു. രാഷ്‌ട്രീയകാര്യ സമിതി അംഗം ജോസഫ് വാഴയ്ക്കൻ മുഖ്യപ്രഭാഷണം നടത്തി. ജോസി സെബാസ്റ്റ്യൻ, എസ്. അശോകൻ, ഇ.എം. ആഗസ്തി, ജോയി തോമസ്, റോയ് കെ. പൗലോസ്, ഇബ്രാഹിംകുട്ടി കല്ലാർ, ജോയി വെട്ടിക്കുഴി, തോമസ് രാജൻ, എം.എൻ. ഗോപി, എ.പി. ഉസ്മാൻ, എം.കെ. പുരുഷോത്തമൻ, നിഷ സോമൻ എന്നിവർ പ്രസംഗിച്ചു.

മ്രാല ദേവാലയത്തിൽ ജൂബിലിയാഘോഷം സമാപിച്ചു

മ്രാല: സെന്‍റ് പീറ്റർ ആൻഡ് പോൾ ദേവാലയത്തിന്‍റെ ഒരു വർഷമായി നടന്നുവന്ന പ്ലാറ്റിനം ജൂബിലി ആഘോഷങ്ങൾക്ക് പ്രൗഢോജ്വല സമാപനം. 2024 ഓഗസ്റ്റ് 15-ന് മാതൃ ഇടവകയായ തൊടുപുഴ ചുങ്കം പള്ളിയിൽ നിന്ന് ദീപശിഖാപ്രയാണത്തോടെ ആരംഭിച്ച് കോട്ടയം അതിരൂപത സഹായ മെത്രാൻ മാർ ജോസഫ് പണ്ടാരശേരിൽ ഉദ്ഘാടനം ചെയ്ത ജൂബിലി ആഘോഷങ്ങൾക്കാണ് സമാപനമായത്. സമാപനാഘോഷത്തോടനുബന്ധിച്ച് കോതമംഗലം രൂപതാധ്യക്ഷൻ മാർ ജോർജ് മഠത്തിക്കണ്ടത്തിലിന്‍റെ മുഖ്യകാർമികത്വത്തിൽ ജൂബിലി കുർബാന അർപ്പിച്ചു. തുർന്ന് നടന്ന സായാഹ്ന സമ്മേളനം ഡീൻ കുര്യാക്കോസ് എംപി ഉദ്ഘാടനം ചെയ്തു. മാർ ജോർജ് മഠത്തിക്കണ്ടത്തിൽ മുഖ്യാതിഥിയായിരുന്നു. ഫാ. ജയിംസ് പനച്ചിക്കൽ, വികാരി ഫാ. ഷാജി പൂത്തറ, സണ്ണി പച്ചിക്കര, ജോമോൻ മുടക്കോടിൽ, നിമ്മിച്ചൻ വടക്കുംചേരിൽ, ജിനു എടൂർ എന്നിവർ പ്രസംഗിച്ചു. സമാപന സമ്മേളനം മിയാവ് രൂപത ബിഷപ് മാർ ജോർജ് പള്ളിപ്പറന്പിൽ ഉദ്ഘാടനം ചെയ്തു. കോട്ടയം അതിരൂപത മെത്രാപ്പോലീത്ത മാർ മാത്യു മൂലക്കാട്ട് അധ്യക്ഷത വഹിച്ചു. ഫാ.ബിജി പല്ലോന്നിൽ, ഫാ. ഷാജി പൂത്തറ, ഫാ. തോമസ് കീന്തനാനിയിൽ, ഫാ. ഷാജു ചാമപ്പാറ, ഫാ. സിജോ കൊണ്ടാടുംപടവിൽ, സിസ്റ്റർ ഇമാക്കുലേറ്റ് എസ് വിഎം, കരിങ്കുന്നം പഞ്ചായത്ത് പ്രസിഡന്‍റ് കെ.കെ. തോമസ്, സണ്ണി പച്ചിക്കര, അനൂപ് മുല്ലപ്പള്ളിൽ, നിമ്മിച്ചൻ വടക്കുംചേരിൽ എന്നിവർ പ്രസംഗിച്ചു. സുവനീർ പ്രകാശനം മാർ മാത്യു മൂലക്കാട്ട് നിർവഹിച്ചു. ജൂബിലി സ്മാരകമായി നിർമിച്ചു നൽകിയ കാരുണ്യഭവനങ്ങളുടെ വെഞ്ചരിപ്പ് മാർ ജോർജ് പള്ളിപ്പറന്പിൽ നിർവഹിച്ചു.

മണ്ണിടിച്ചിൽ ഭീഷണിയിൽ മൂന്നാർ

മൂന്നാർ: കഴിഞ്ഞ ദിവസം പെയ്ത കനത്ത മഴയിൽ മൂന്നാർ ടൗണിനു സമീപം മണ്ണിടിഞ്ഞു. ദിവസങ്ങൾക്കു മുന്പ് ആർഒ ജംഗ്ഷനു സമീപം മണ്ണിടിഞ്ഞ് അപകടമുണ്ടായതിന് സമീപംതന്നെയാണ് വീണ്ടും മണ്ണിടിച്ചിലുണ്ടായത്. മണ്ണിടിച്ചിലിൽ ഈ ഭാഗത്തുണ്ടായിരുന്ന വഴിയോര കടകൾക്ക് നാശം സംഭവിച്ചു. കടകൾ അടഞ്ഞുകിടന്നിരുന്നതിനാൽ മറ്റപകടങ്ങൾ ഉണ്ടായില്ല. പ്രദേശത്ത് മണ്ണിടിച്ചിൽ സാധ്യത നിലനിൽക്കുന്നതിനാൽ ഇവിടെയുള്ള വഴിയോര കച്ചവടക്കാരും ഭീഷണിയിലാണ്. സഞ്ചാരികൾ വഴിയോരങ്ങളിൽ വാഹനങ്ങൾ പാർക്കു ചെയ്യുന്ന സ്ഥലം കൂടിയാണ് ഇവിടം. ഭീഷണി നിലനിൽക്കുന്ന സാഹചര്യത്തിൽ റവന്യു വകുപ്പിന്‍റെ നേതൃത്വത്തിൽ നടപടികൾ ആരംഭിച്ചു. ദേവികുളം സബ് കളക്ടർ വി.എം. ആര്യ സ്ഥലം സന്ദർശിച്ച് സാഹചര്യങ്ങൾ വിലയിരുത്തി. ഈ ഭാഗത്ത് വളർന്നു നിൽക്കുന്ന മരങ്ങൾ അപകടാവസ്ഥ ഉയർത്തുന്നതായുള്ള പരാതി കുറെക്കാലങ്ങളായി നിലനിൽക്കുന്നതാണ്. ഇതിനൊപ്പമാണിപ്പോൾ രണ്ടു തവണ മണ്ണിടിച്ചിലുണ്ടായത്. കനത്ത മഴയിൽ അപകടങ്ങൾ പതിവുള്ള ലോക്കാട് ഗ്യാപ്പിലും മണ്ണിടിച്ചിൽ ഭീഷണി നിലനിൽക്കുന്നുണ്ട്. മഴ തുടരുന്ന സാഹചര്യത്തിൽ ഇതുവഴിയായുള്ള രാത്രികാല ഗതാഗതത്തിന് നിരോധനം ഏർപ്പെടുത്തിയിട്ടുണ്ട്. കഴിഞ്ഞ ദിവസം ഉച്ചവരെയുള്ള 24 മണിക്കൂറിൽ 88.60 മില്ലീ മീറ്റർ മഴയാണ് മൂന്നാറിൽ പെയ്തത്. പരമാവധി സംഭരണശേഷിയോട് ജലനിരപ്പ് ഉയർന്നതോടെ മാട്ടുപ്പെട്ടി ഡാം തുറക്കാനുള്ള സാധ്യതയുമുണ്ട്.

വണ്ണപ്പുറത്തെ മോഷണം: യുവാവ് പിടിയിൽ

വണ്ണപ്പുറം: മോഷണക്കേസുമായി ബന്ധപ്പെട്ട് യുവാവിനെ കാളിയാർ പോലീസ് പിടികൂടി. നാൽപ്പതേക്കർ തൈവിളാകത്ത് അശ്വിനെ(20) ആണ് അറസ്റ്റ് ചെയ്തത്. ഇയാൾ മുന്പും നിരവധി മോഷണക്കേസുകളിൽ പ്രതിയാണ്. മോഷണക്കേസിൽ ശിക്ഷിക്കപ്പെട്ട ഇയാൾ 20 ദിവസം മുന്പാണ് ജയിലിൽനിന്നു പുറത്തിറങ്ങിയത്. കഴിഞ്ഞ ദിവസം വണ്ണപ്പുറം നാൽപ്പതേക്കറിലെ ഇടച്ചിറയിൽ ചന്ദ്രന്‍റെ വീട്ടിൽ മോഷണം നടത്തിയത് താനാണെന്ന് പ്രതി സമ്മതിച്ചതായി പോലീസ് പറഞ്ഞു. എന്നാൽ സമീപകാലത്ത് നടന്ന ക്ഷേത്രമോഷണങ്ങളിൽ പങ്കില്ലെന്ന നിലപാടിലാണ് ഇയാൾ. പ്രതിയെ കോടതിയിൽ ഹാജരാക്കി. അടുത്ത നാളുകളിൽ വണ്ണപ്പുറം മേഖലയിൽ മോഷണം പതിവായതിനെത്തുടർന്ന് കാളിയാർ പോലീസിനെതിരേ വലിയതോതിലുള്ള വിമർശനം ഉയർന്നിരുന്നു.

കാർ സ്കൂട്ടറിന് പിന്നിലിടിച്ചു; അമ്മയും കുട്ടിയും റോഡിലേക്ക് തെറിച്ചുവീണു പരിക്കേറ്റു

കുമളി: അമിത വേഗത്തിലെത്തിയ കാർ ഓടിക്കൊണ്ടിരുന്ന സ്കൂട്ടറിന് പിന്നിലിടിച്ച് സ്കൂട്ടറിൽ ഭർത്താവിനൊപ്പം സഞ്ചരിച്ചിരുന്ന വീട്ടമ്മയും കുട്ടിയും റോഡിലേക്ക് തെറിച്ചുവീണു. ഇന്നലെ വൈകുന്നേരം നാലരയോടെ കുമളി കൊളുത്ത് പാലത്തിന് സമീപമാണ് അപകടം. കുമളി ആറാംമൈൽ കുത്തുകല്ലുങ്കൽ അജിത്തും കുടുംബവും സഞ്ചരിച്ചിരുന്ന സ്കൂട്ടറിന്‍റെ പിന്നിലാണ് വണ്ടിപ്പെരിയാർ സ്വദേശികളുടെ കാർ ഇടിച്ചത്. ഇടിയുടെ ആഘാതത്തിൽ അജിത്തിന്‍റെ ഭാര്യ ശാലിനിയും മകൻ ആരോമലും റോഡിലേക്ക് തെറിച്ചുവീണു .ശാലിനി സ്കൂട്ടറിന് സമീപത്ത് വീണു. കുട്ടി മൂന്നു മീറ്ററോളം ദൂരേക്ക് തെറിച്ചുപോയി. സ്കൂട്ടറിൽ ഇടിച്ചതോടെ കാർ സഡൻ ബ്രേക്ക് ചെയ്തു. റോഡിലേക്ക് തെറിച്ചുവീണവരെ ഓടിക്കൂടിയ നാട്ടുകാർ കുമളി സർക്കാർ ആശുപത്രിയിലാക്കി ചികിത്സ നൽകി. ഇരുവർക്കും നേരിയ പരിക്കുകൾ മാത്രമാണുള്ളത്.

ജില്ലയിലെ അണക്കെട്ടുകളിലേക്കുള്ള നീരൊഴുക്ക് വര്‍ധിച്ചു

അടിമാലി: ശക്തമായ മഴയില്‍ ജില്ലയിലെ അണക്കെട്ടുകളിലേക്കുള്ള നീരൊഴുക്ക് വര്‍ധിച്ചു. സംസ്ഥാനത്താകെ ഒന്‍പത് ഡാമുകളിലായിരുന്നു ഞായറാഴ്ച വൈകിട്ടോടെ റെഡ് അലര്‍ട്ട് പ്രഖ്യാപിച്ചത്. ഇതില്‍ നാല് അണക്കെട്ടുകള്‍ ഇടുക്കിയിലാണ്. ജാഗ്രതാ നിര്‍ദേശം പുറപ്പെടുവിച്ച മാട്ടുപ്പെട്ടി, കല്ലാര്‍കുട്ടി, ഇരട്ടയാര്‍, ലോവര്‍ പെരിയാര്‍ അണക്കെട്ടുകള്‍ ഉള്‍പ്പെടെ ജില്ലയിലെ എല്ലാ അണക്കെട്ടുകളിലും ജലനിരപ്പ് ഉയർന്നു. കഴിഞ്ഞ ഏതാനും ദിവസങ്ങളായി പെയ്യുന്ന ശക്തമായ മഴയില്‍ നീരൊഴുക്ക് വര്‍ധിച്ചതാണ് ജലനിരപ്പുയരാന്‍ ഇടയാക്കിയിട്ടുള്ളത്. വ്യഷ്ടിപ്രദേശങ്ങളില്‍ ശക്തമായ മഴ പെയ്തതോടെ ഇടുക്കി അണക്കെട്ടിലേക്കടക്കം ഒഴുകിയെത്തുന്ന വെള്ളത്തിന്‍റെ അളവ് വര്‍ധിച്ചു. നിലവില്‍ കല്ലാര്‍കുട്ടി, മാട്ടുപ്പെട്ടി, ലോവര്‍ പെരിയാര്‍ അണക്കെട്ടുകളുടെ ഷട്ടറുകള്‍ ഉയര്‍ത്തി വെള്ളം പുറത്തേക്കൊഴുക്കുന്നുണ്ട്. പുഴകളിലും അരുവികളിലും ശക്തമായ വെള്ളമൊഴുക്കാണ്. വരുംദിവസങ്ങളിലും ശക്തമായ മഴ തുടര്‍ന്നാല്‍ കൂടുതല്‍ അണക്കെട്ടുകള്‍ പരമാവധി സംഭരണശേഷിയിലേക്കെത്തും. രണ്ട് ന്യൂനമര്‍ദങ്ങള്‍ രൂപപ്പെട്ടതാണ് കേരളത്തിലെ മഴ ശക്തമാക്കിയത്. ഇതുമൂലം കൊങ്കണ്‍ മുതല്‍ വടക്കന്‍ കേരളതീരംവരെ അറബിക്കടലില്‍ ന്യുനമര്‍ദ പാത്തിയും രൂപപ്പെട്ടിട്ടുണ്ട്. നിലവിലെ സാഹചര്യത്തില്‍ അടുത്ത ദിവസങ്ങളിലും ശക്തമായ മഴ തുടരുമെന്നാണ് കാലാവസ്ഥാ നിരീക്ഷണ കേന്ദ്രത്തിന്‍റെ വിലയിരുത്തൽ.

ബിടിസി ഉദ്ഘാടനവും എച്ച്ഡിസി സര്‍ട്ടിഫിക്കറ്റ് വിതരണവും

കാഞ്ഞിരപ്പള്ളി: രൂപത വിശ്വാസ ജീവിത പരിശീലനകേന്ദ്രം വിശ്വാസ ജീവിത പരിശീലകര്‍ക്കായി നടത്തുന്ന ത്രിദിന ക്യാമ്പായ ബേസിക് ട്രെയ്‌നിംഗ് കോഴ്‌സ് (ബിടിസി) ഉദ്ഘാടനവും 2024-25 അധ്യയന വര്‍ഷത്തില്‍ എച്ച്ഡിസി കോഴ്‌സ് പൂര്‍ത്തിയാക്കിയവരുടെ സര്‍ട്ടിഫിക്കറ്റ് വിതരണവും പൊടിമറ്റം നിര്‍മല റിന്യൂവല്‍ സെന്‍ററില്‍ നടത്തി. കാഞ്ഞിരപ്പള്ളി രൂപതാധ്യക്ഷൻ മാര്‍ ജോസ് പുളിക്കല്‍ ക്യാമ്പ് ഉദ്ഘാടനം ചെയ്ത് എച്ച്ഡിസി 2024-25 ബാച്ചിന്‍റെ സര്‍ട്ടിഫിക്കറ്റ് വിതരണം ചെയ്തു. കാഞ്ഞിരപ്പള്ളി രൂപത വിശ്വാസ ജീവിത പരിശീലന ഡയറക്ടര്‍ ഫാ. തോമസ് വാളന്മനാലിന്‍റെ നേതൃത്വത്തില്‍ വൈദികരും സന്യസ്തരും അൽമായരും അടങ്ങുന്ന റിസോഴ്‌സ് ടീം ക്ലാസുകള്‍ നയിച്ചു. സമാപന സമ്മേളനത്തില്‍ രൂപതാ പ്രോട്ടോ സിഞ്ചെല്ലൂസ് റവ. ഡോ. ജോസഫ് വെള്ളമറ്റം ബിടിസി കോഴ്‌സ് പൂര്‍ത്തിയാക്കിയവര്‍ക്ക് സര്‍ട്ടിഫിക്കറ്റുകള്‍ വിതരണം ചെയ്തു. കാഞ്ഞിരപ്പള്ളി രൂപത വികാരി ജനറാൾ ഫാ. ബോബി അലക്‌സ് മണ്ണംപ്ലാക്കല്‍, ചാന്‍സലര്‍ ഫാ. മാത്യു ശൗര്യാംകുഴിയില്‍, രൂപത പ്രൊക്യുറേറ്റര്‍ ഫാ. ഫിലിപ്പ് തടത്തില്‍ എന്നിവര്‍ പ്രസംഗിച്ചു.

ഭരണസമിതിക്കെതിരേ നടക്കുന്ന പ്രചാരണം അടിസ്ഥാനരഹിതമെന്ന് പ്രസിഡന്‍റ്

കട്ടപ്പന: ഉപ്പുതറ മാട്ടുത്താവളം വട്ടപ്പാറമെട്ട് കുടിവെള്ള പദ്ധതിയുടെ പേരില്‍ പഞ്ചായത്ത് ഭരണസമിതിക്കെതിരേ നടക്കുന്ന പ്രചാരണം അടിസ്ഥാനരഹിതമാണെന്ന് പ്രസിഡന്‍റ് കെ.ജെ. ജയിംസ്, വൈസ് പ്രസിഡന്‍റ് പി.എസ്. സരിത എന്നിവര്‍ അറിയിച്ചു. 2021-ല്‍ ജനപ്രതിനിധികളുടെ മേല്‍നോട്ടത്തില്‍ ഉപഭോക്തൃ സമിതി രൂപീകരിച്ചാണ് പദ്ധതിക്ക് രൂപരേഖ തയാറാക്കിയത്. ആദ്യഘട്ടത്തില്‍ ജലസേചന വകുപ്പ് ചെറുകിട കുടിവെള്ള പദ്ധതി അനുവദിക്കുമെന്ന ഉറപ്പിലാണ് പുളിക്കല്‍ ജോസ് എന്നയാളുടെ ഉടമസ്ഥതയിലുള്ള 10 സെന്‍റ് സ്ഥലം വാങ്ങാന്‍ തീരുമാനിച്ചത്. ഇതിനായി 96 ഗുണഭോക്താക്കളില്‍നിന്ന് 2,750 രൂപ വീതം വാങ്ങി ആകെ 1.85 ലക്ഷം രൂപ സ്ഥലമുടമയ്ക്ക് നല്‍കി. ആറുമാസത്തിനുള്ളില്‍ സ്ഥലം രജിസ്റ്റര്‍ ചെയ്യുമ്പോള്‍ ബാക്കി പണം നല്‍കുമെന്നായിരുന്നു കരാര്‍. എന്നാല്‍, ഉദ്ദേശിച്ച സ്ഥലം ഉള്‍പ്പെടുന്ന വസ്തുവിന്‍റെ പട്ടയം ബാങ്കില്‍ പണയത്തിലായിരുന്നു. യഥാസമയം വസ്തു രജിസ്റ്റര്‍ ചെയ്തുനല്‍കാന്‍ സ്ഥലമുടമ തയാറായില്ല. ഇതിനിടെ ജോയിന്‍റ് വെരിഫിക്കേഷന്‍ ഉള്‍പ്പെടെ പൂര്‍ത്തീകരിച്ചെങ്കിലും ഫണ്ടില്ലാത്തതിനാല്‍ പദ്ധതി ഉപേക്ഷിക്കേണ്ടിവന്നു. പിന്നീട് കൂടുതല്‍ കുടുംബങ്ങളില്‍ കുടിവെള്ളം എത്തിക്കുന്നതിനായി 12 കോടി രൂപ മുടക്കുള്ള പദ്ധതിയുടെ രൂപരേഖ തയാറാക്കി നബാര്‍ഡിന് സമര്‍പ്പിച്ചിരിക്കുകയാണ്. ഇതിനിടെയാണ് ചിലര്‍ വാസ്തവ വിരുദ്ധമായ പ്രചാരണം നടത്തുന്നതെന്നും പഞ്ചായത്ത് പ്രസിഡന്‍റും വൈസ് പ്രസിഡന്‍റും പറയുന്നു.

കൊടുംവളവില്‍ അപകടക്കെണിയായി മരത്തിന്‍റെ ഭാഗങ്ങള്‍

രാജാക്കാട്: കൊച്ചി - ധനുഷ്കോടി ദേശീയപാതയില്‍ ശക്തമായ മഴയിൽ കടപുഴകിവീണ മരം മുറിച്ചുനീക്കിയെങ്കിലും മുറിച്ചുമാറ്റിയ ഭാഗങ്ങള്‍ റോഡരികില്‍നിന്നു മാറ്റാന്‍ നടപടിയില്ല. ചുണ്ടലിന് സമീപം കൊടുംവളവിലാണ് കൂറ്റന്‍ മരത്തിന്‍റെ കഷണങ്ങളും ചില്ലകളും കൂട്ടിയിട്ടിരിക്കുന്നത്. വളവ് തിരിഞ്ഞുവരുമ്പോള്‍ എതിരേ വരുന്ന വാഹനങ്ങള്‍ കാണാന്‍ കഴിയാത്തവിധമാണ് ഇവ കിടക്കുന്നത്. മുമ്പ് നിരവധി അപകടങ്ങള്‍ നടന്ന കൊടുംവളവിലാണ് അപകടഭീഷണി ഉയര്‍ത്തി മുറിച്ചിട്ട മരത്തിന്‍റെ ഭാഗങ്ങള്‍ കിടക്കുന്നത്. പൂപ്പാറയില്‍നിന്നു ബോഡിമെട്ടിലേക്ക് പോകുന്ന വഴിയില്‍ ചൂണ്ടലിന് സമീപമാണ് ഏലത്തോട്ടത്തില്‍ നിന്നിരുന്ന കൂറ്റന്‍ മരം അപകടവളവിലേക്കു കടപുഴകി വീണത്.തുടര്‍ന്ന് അധികൃതരെത്തി മരം മുറിച്ച് ഗതാഗതം പുനസ്ഥാപിച്ചെങ്കിലും മുറിച്ചിട്ടിരിക്കുന്ന മരത്തിന്‍റെ ഭാഗങ്ങള്‍ റോഡരികില്‍നിന്ന് നീക്കം ചെയ്യാത്തതിനാല്‍ വലിയ അപകട ഭീഷണിയാണ് നിലനില്‍ക്കുന്നത്. വളവിന്‍റെ മറുവശത്ത് കൂറ്റന്‍ മരത്തിന്‍റെ മുറിച്ച ഭാഗങ്ങള്‍ കിടക്കുന്നതിനാല്‍ ബസും ലോറിയുമടക്കമുള്ള വാഹനങ്ങള്‍ക്ക് സൈഡ് കൊടുക്കാനും കഴിയാത്ത സ്ഥിതിയുണ്ട്. അടിയന്തരമായി ഇവ നീക്കം ചെയ്ത് അപകടസാധ്യത ഒഴിവാക്കണമെന്ന് നാട്ടുകാർ ആവശ്യപ്പെട്ടു.

പഞ്ചായത്ത് അവഗണിച്ച കർഷകയെ നാട്ടുകാർ ആദരിച്ചു

ചെറുതോണി: പഞ്ചായത്ത് അവഗണിച്ച മികച്ച സമ്മിശ്ര കർഷകയെ നാട്ടുകാർ മികച്ച കർഷകയായി തെരഞ്ഞെടുത്ത് ആദരിച്ചു. കർഷക ദിനത്തിൽ മികച്ച കർഷകയായി തെരഞ്ഞെടുക്കാൻ യോഗ്യയായ വനിതാ കർഷകയെ കഞ്ഞിക്കുഴി പഞ്ചായത്ത് അവഗണിച്ചതിൽ പ്രതിഷേധിച്ചാണ് ഇടുക്കി ബ്ലോക്ക് പഞ്ചായത്ത് അംഗം ബിനോയി വർക്കിയുടെ നേതൃത്വത്തിൽ കൃഷിഭവന് മുന്നിൽ ആദരിച്ചത്. കഞ്ഞിക്കുഴി സ്വദേശിയും സമ്മിശ്ര കർഷകയുമായ ചന്ദ്രൻകുന്നേൽ സെലിൻ മാത്യുവിനെയാണ് കൃഷിഭവന് മുൻപിൽ ആദരിച്ചത്. അർഹതയുണ്ടായിട്ടും സെലിൻ മാത്യുവിനെ അവഗണിക്കുകയായിരുന്നെന്നാണ് ആരോപണം. കഞ്ഞിക്കുഴി പഞ്ചായത്തിലെ മികച്ച കർഷകരെ ചേലച്ചുവട് ക്ഷീരസംഘം ഹാളിൽ ആദരിക്കുന്ന സമയത്താണ് സമീപത്തുള്ള കൃഷിഭവന് മുന്നിൽ സെലിൻ മാത്യുവിനെയും ആദരിച്ചത്. അഞ്ചേക്കർ സ്ഥലത്ത് സമ്മിശ്ര കൃഷി ചെയ്യുന്ന വിധവയായ സെലിൽ മാത്യുവിനെയാണ് പഞ്ചായത്ത് അവാർഡ് നിർണയ കമ്മിറ്റി അവഗണിച്ചത്. അർഹതയുള്ള കർഷകരെ ഒഴിവാക്കി വ്യക്തിതാത്പര്യങ്ങളുടെ പേരിൽ അവാർഡ് നൽകുന്ന പഞ്ചായത്ത് നടപടി യഥാർഥ കർഷകരോട് കാണിക്കുന്ന വഞ്ചനയാണെന്ന് നാട്ടുകാർ ആരോപിച്ചു.

വണ്ടിപ്പെരിയാർ മൗണ്ടിൽ വീണ്ടും ഒറ്റയാൻ ഇറങ്ങി

വണ്ടിപ്പെരിയാർ: വണ്ടിപ്പെരിയാർ മൗണ്ടിൽ വീണ്ടും ഒറ്റയാൻ ഇറങ്ങി. ഇന്നലെ രാവിലെയായിരുന്നു റോഡിനു സമീപം ഒറ്റയാൻ ഇറങ്ങിയത്. ഒട്ടനവധി വിനോദസഞ്ചാര വാഹനങ്ങളും എസ്റ്റേറ്റ് മേഖലയിൽ പണിക്കായി പോകുന്ന തൊഴിലാളികളും കാൽനടയാത്രക്കാരും ഉള്ള പ്രദേശത്താണ് കാട്ടാന ഇറങ്ങിയത്. കഴിഞ്ഞദിവസം പുലർച്ചെ പ്രദേശവാസിയായ അരുൾ ജ്യോതിയുടെ സ്‌കൂട്ടർ കാട്ടാന തകർത്തു. അരുൾ ജ്യോതിയും കുടുംബവും ബഹളംവച്ചതിനെത്തുടർന്ന് ഒറ്റയാൻ ഈ ഭാഗത്തുനിന്ന് മാറിപ്പോയി. രണ്ടു മാസങ്ങൾക്കു മുമ്പ് കാപ്പിത്തോട്ടത്തിൽ ജോലിചെയ്തുകൊണ്ടിരുന്ന അന്തോണി എന്ന ആളെ ആന ആക്രമിച്ച സംഭവവും ഉണ്ടായതാണ്. കഴിഞ്ഞദിവസം മൗണ്ട് എകെജിക്കു സമീപം കാട്ടാന കൃഷികൾ നശിപ്പിച്ചിരുന്നു. വനപാലകർ സ്ഥലത്തെത്തി പട്രോളിംഗ് നടത്തുന്നുണ്ടെങ്കിലും ഒറ്റയാനെ കാട്ടിലേക്ക് തുരത്താൻ കഴിയുന്നില്ല. ജനങ്ങളുടെ ജീവനും സ്വത്തിനും ഭീഷണിയാകുന്ന ഒറ്റയാനെ ഇവിടെനിന്ന് തുരത്താനുള്ള നടപടികൾ അടിയന്തരമായി ചെയ്യണമെന്നുള്ളതാണ് നാട്ടുകാരുടെ ആവശ്യം.

മുഖ്യമന്ത്രി രാജിവയ്ക്കണം: പി.സി. വിഷ്ണുനാഥ്

തൊടുപുഴ: എഡിജിപി എം.ആർ. അജിത്കുമാറിന്‍റെ പ്രവർത്തനങ്ങൾക്കു പിന്നിൽ അദൃശ്യശക്തികളുടെ സ്വാധീനം ഉണ്ടെന്ന ഹൈക്കോടതി നിരീക്ഷണത്തിന്‍റെ അടിസ്ഥാനത്തിൽ ആഭ്യന്തര വകുപ്പ് കൈയാളുന്ന മുഖ്യമന്ത്രി രാജി വയ്ക്കണമെന്ന് കെപിസിസി വർക്കിംഗ് പ്രസിഡന്‍റ് പി.സി. വിഷ്ണുനാഥ് ആവശ്യപ്പെട്ടു. തൊടുപുഴയിൽ യുഡിഎഫ് പഞ്ചായത്തുതല ഭാരവാഹികളുടെ ശില്പശാല ഉദ്ഘാടനം ചെയ്യുകയായിരുന്നു അദ്ദേഹം. ത്രിതല പഞ്ചായത്ത് തെരഞ്ഞെടുപ്പിന് മുന്നോടിയായി നടത്തിയ ശില്പശാലയിൽ പഞ്ചായത്ത്, മുനിസിപ്പൽ കണ്‍വൻഷനുകൾ നടത്തുന്നതിനും ആശാസമരത്തിന് ഐക്യദാർഡ്യം പ്രഖ്യാപിച്ച് എല്ലാ പഞ്ചായത്തുകളിലും പൊതുയോഗങ്ങൾ നടത്തുന്നതിനും യോഗം തീരുമാനിച്ചു. യുഡിഎഫ് ജില്ലാ ചെയർമാൻ ജോയി വെട്ടിക്കുഴി അധ്യക്ഷത വഹിച്ചു. ഡീൻ കുര്യാക്കോസ് എംപി മുഖ്യപ്രഭാഷണം നടത്തി. കണ്‍വീനർ പ്രഫ. എം.ജെ. ജേക്കബ്, ഡീൻ കുര്യാക്കോസ് എംപി, ഡിസിസി പ്രസിഡന്‍റ് സി.പി. മാത്യു, എസ്. അശോകൻ, ഇ.എം. ആഗസ്തി, എ.കെ. മണി, കെ.എം.എ. ഷുക്കൂർ, അപു ജോണ്‍ ജോസഫ്, സേനാപതി വേണു, ഇബ്രാഹിംകുട്ടി കല്ലാർ, റോയി കെ. പൗലോസ്, തോമസ് രാജൻ, എം.എൻ. ഗോപി എന്നിവർ പ്രസംഗിച്ചു.

നെടുങ്കണ്ടത്ത് കൂറ്റന്‍പാറ റോഡിലേക്ക് അടര്‍ന്നുവീണു; ഒഴിവായത് വന്‍ ദുരന്തം

നെടുങ്കണ്ടം: നെടുങ്കണ്ടം ബിഎഡ് കോളജിന് സമീപം സംസ്ഥാന പാതയോരത്ത് കൂറ്റന്‍പാറ അടര്‍ന്നുവീണു. ഒഴിവായത് വന്‍ ദുരന്തം. കുമളി - മൂന്നാര്‍ സംസ്ഥാന പാതയിലാണ് 10 അടിയോളം ഉയരവും 15 അടിയോളം വ്യാസവുമുള്ള പാറ അടര്‍ന്നുവീണത്. ഇന്നലെ ഉച്ചയോടെയാണ് സംഭവം. കെഎസ്ആര്‍ടിസി വര്‍ക്ക്‌ഷോപ്പിന് എതിര്‍വശത്തെ സ്വകാര്യ വ്യക്തിയുടെ ഭൂമിയിലെ വലിയ പാറക്കല്ല് നിരങ്ങി റോഡിന് സമീപത്തേക്ക് പതിക്കുകയായിരുന്നു. പാറ വീണ സ്ഥലത്ത് കാറുകള്‍ ഉള്‍പ്പെടെ നിരവധി വാഹനങ്ങള്‍ പാര്‍ക്ക് ചെയ്തിരുന്നു. ഇവിടെ പാര്‍ക്ക് ചെയ്തിരുന്ന ഓട്ടോറിക്ഷയുടെ സമീപത്തേക്ക് പാറ ഉരുണ്ടുവന്ന് നില്‍ക്കുകയായിരുന്നു. അപകടത്തില്‍ ഓട്ടോയുടെ പിന്‍ഭാഗത്ത് കേടുപാടുകള്‍ സംഭവിച്ചു. മറ്റു വാഹനങ്ങള്‍ക്ക് കേടുപാടുകള്‍ സംഭവിച്ചിട്ടില്ല. കോളജ്, കെഎസ്ആര്‍ടിസി ഗാരേജ്, പെട്രോള്‍ പമ്പ് തുടങ്ങി നിരവധി സ്ഥാപനങ്ങള്‍ പ്രവര്‍ത്തിക്കുന്ന ഭാഗത്താണ് അപകടമുണ്ടായത്. കനത്ത മഴയില്‍ അടിയില്‍നിന്ന് മണ്ണൊലിച്ചു പോയതിനെത്തുടര്‍ന്നാണ് കല്ല് ഉരുണ്ടുവീണത്. സമീപത്ത് നിരവധി കല്ലുകള്‍ അപകടഭീഷണി ഉയര്‍ത്തി സമാനമായ സാഹചര്യത്തിലുണ്ട്. വിനോദസഞ്ചാരികള്‍ ഉള്‍പ്പെടെ നിരവധി ആളുകൾ കടന്നുപോകുന്ന തിരക്കേറിയ റോഡ് കൂടിയാണിത്. ഉരുണ്ടുവന്ന പാറ റോഡിലേക്ക് പതിക്കാതിരുന്നതിനാല്‍ വന്‍ ദുരന്തം ഒഴിവാകുകയായിരുന്നു.

ചിങ്ങപ്പുലരിയില്‍ നാടെങ്ങും കര്‍ഷക ദിനാഘോഷം

ൊതൊടുപുഴ: ഐശ്വര്യത്തിന്‍റെയും സമ്പദ് സമൃദ്ധിയുടെയും വരവറിയിച്ച് ചിങ്ങപ്പുലരിയില്‍ നാടെങ്ങും കര്‍ഷക ദിനാഘോഷം സംഘടിപ്പിച്ചു. കാര്‍ഷിക മേഖലകളില്‍ മികവു പുലര്‍ത്തുന്ന കര്‍ഷകരെ ചടങ്ങില്‍ ആദരിച്ചു. മികച്ച മുതിര്‍ന്ന കര്‍ഷകന്‍, ജൈവകര്‍ഷകര്‍, സമ്മിശ്ര കര്‍ഷകര്‍, തേനീച്ച കര്‍ഷകര്‍, കുട്ടികര്‍ഷകര്‍, ക്ഷീരകര്‍ഷകര്‍, വനിതാ കര്‍ഷക, നെല്‍കര്‍ഷകന്‍ തുടങ്ങി വിവിധ മേഖലകളില്‍ മികവ് തെളിയിച്ചവര്‍ക്ക് ചടങ്ങുകളില്‍ ആദരവും പുരസ്‌കാരങ്ങളും നല്‍കി. കര്‍ഷകര്‍ക്കായി കാര്‍ഷിക പരിശീലന ക്ലാസുകളും സെമിനാറുകളും കാര്‍ഷിക ക്വിസ് മത്സരവും സംഘടിപ്പിച്ചു. കര്‍ഷകര്‍ക്ക് പച്ചക്കറി വിത്തുകളും തൈകളും വിതരണം ചെയ്തു. ശാന്തന്‍പാറ: പഞ്ചായത്തില്‍ നടത്തിയ കര്‍ഷകദിനാചരണം എം.എം. മണി എംഎല്‍എ ഉദ്ഘാടനം ചെയ്തു. ദേവികുളം ബ്ലോക്ക് പഞ്ചായത്ത് പ്രസിഡന്‍റ് ജിഷ ദിലീപ് സന്ദേശം നല്‍കി. ശാന്തന്‍പാറ പഞ്ചായത്ത് പ്രസിഡന്‍റ് ലിജു വര്‍ഗീസ് അധ്യക്ഷത വഹിച്ചു. ദേവികുളം കൃഷി അസിസ്റ്റന്‍റ് ഡയറക്ടര്‍ ജെ. ജയന്തി പദ്ധതി വിശദീകരിച്ചു. വാത്തിക്കുടി: പഞ്ചായത്തില്‍ സംഘടിപ്പിച്ച കര്‍ഷക ദിനാചരണം പ്രസിഡന്‍റ് ജോസ്മി ജോര്‍ജ് ഉദ്ഘാടനം ചെയ്തു. വൈസ് പ്രസിഡന്‍റ് പ്രദീപ് ജോര്‍ജ് അധ്യക്ഷത വഹിച്ചു. ഇടുക്കി ബ്ലോക്ക് പഞ്ചായത്ത് പ്രസിഡന്‍റ് എബി തോമസ് കര്‍ഷകദിന സന്ദേശം നല്‍കി. ത്രിതല പഞ്ചായത്തംഗങ്ങളായ ഷൈനി സജി, സിബിച്ചന്‍ തോമസ്, ബിജുമോന്‍ തോമസ്, കൃഷി ഓഫീസര്‍ ഇ.എം. മനോജ് എന്നിവര്‍ പ്രസംഗിച്ചു. കുടയത്തൂര്‍: പഞ്ചായത്തിന്‍റെ നേതൃത്വത്തില്‍ നടത്തിയ കര്‍ഷക ദിനാചരണം പ്രസിഡന്‍റ് കെ.എന്‍. ഷിയാസ് ഉദ്ഘാടനം ചെയ്തു. വൈസ് പ്രസിഡന്‍റ് ആഞ്ജലീന സിജോ അധ്യക്ഷത വഹിച്ചു. കൃഷി ഡെപ്യൂട്ടി ഡയറക്ടര്‍ ആര്‍. സോണിയ, സോയില്‍ കെമിസ്റ്റ് ശശിലേഖ രാഘവന്‍, ഗ്രാമീണ്‍ ബാങ്ക് മാനേജര്‍ വിജിത, കൃഷി ഓഫീസര്‍ റിയ ആന്‍റണി, കൃഷി അസിസ്റ്റന്‍റ് ടി.എസ്. റസിയ എന്നിവര്‍ പ്രസംഗിച്ചു. ചടങ്ങില്‍ മികച്ച കര്‍ഷകരെ ആദരിച്ചു. കോടിക്കുളം: പഞ്ചായത്തിന്‍റെയും കൃഷിഭവന്‍റെയും നേതൃത്വത്തില്‍ കര്‍ഷക ദിനാചരണം നടത്തി. പ്രസിഡന്‍റ് ടി.വി. സുരേഷ് ബാബു ഉദ്ഘാടനം ചെയ്തു. വൈസ് പ്രസിഡന്‍റ് ജേര്‍ളി റോബി അധ്യക്ഷത വഹിച്ചു. കൃഷി ഓഫീസര്‍ ആനന്ദ് വിഷ്ണു പ്രകാശ്, പഞ്ചായത്ത് സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ ഷേര്‍ളി ആന്‍റണി, കൃഷി അസിസ്റ്റന്‍റ് എന്‍.എസ്. അനുമോള്‍, യൂണിയന്‍ ബാങ്ക് മാനേജര്‍ എ.വി.ഗ്രീന എന്നിവര്‍ പ്രസംഗിച്ചു. മുട്ടം: പഞ്ചായത്തിന്‍റെ നേതൃത്വത്തില്‍ സംഘടിപ്പിച്ച കര്‍ഷകദിനാചരണത്തോടനുബന്ധിച്ച് വിളംബര ജാഥയും കര്‍ഷകരെ ആദരിക്കലും നടന്നു. പഞ്ചായത്ത് പ്രസിഡന്‍റ് മേഴ്‌സി ദേവസ്യ ഉദ്ഘാടനം ചെയ്തു. വൈസ് പ്രസിഡന്‍റ് ബിജോയി ജോണ്‍ അധ്യക്ഷത വഹിച്ചു. പഞ്ചായത്ത് മെംബര്‍മാര്‍, കൃഷി വകുപ്പ് ജീവനക്കാര്‍, കാര്‍ഷിക വികസന സമിതി അംഗങ്ങള്‍ എന്നിവര്‍ പങ്കെടുത്തു. മണക്കാട്: പഞ്ചായത്തും കൃഷിഭവനും ചേര്‍ന്ന് നടത്തിയ കര്‍ഷക ദിനാചരണം പഞ്ചായത്ത് പ്രസിഡന്‍റ് പി.എസ്. ജേക്കബ് ഉദ്ഘാടനം ചെയ്തു. വൈസ് പ്രസിഡന്‍റ് ഷൈനി ഷാജി അധ്യക്ഷത വഹിച്ചു. പന്നിമറ്റം: വെള്ളിയാമറ്റം പഞ്ചായത്തിന്‍റെയും കൃഷിഭവന്‍റെയും ആഭിമുഖ്യത്തില്‍ കര്‍ഷകദിനം ആചരിച്ചു. പ്രസിഡന്‍റ് മോഹന്‍ദാസ് പുതുശേരി ഉദ്ഘാടനം ചെയ്തു. വൈസ് പ്രസിഡന്‍റ് ഷേര്‍ളി ജോസുകുട്ടി അധ്യക്ഷത വഹിച്ചു. ജില്ലാ പഞ്ചായത്ത് മെംബര്‍ പ്രഫ. എം.ജെ. ജേക്കബ് മുഖ്യപ്രഭാഷണം നടത്തി. കൃഷി ഓഫീസര്‍ നിമിഷ അഗസ്റ്റിന്‍, സഹകരണ ബാങ്ക് പ്രസിഡന്‍റ് കെ.എം. ജോസ്, ഗ്രാമീണ്‍ ബാങ്ക് മാനേജര്‍ ആരതി, കാര്‍ഷിക വികസന സമിതി അംഗം സജി ജോസഫ്, കുരുമുളക് സമിതി പ്രസിഡന്‍റ് ജോസ് നെയ്‌‌വേലിക്കുന്നേല്‍ എന്നിവര്‍ പ്രസംഗിച്ചു. വണ്ടിപ്പെരിയാർ: വണ്ടിപ്പെരിയാർ കൃഷിഭവന്‍റെയും ഗ്രാമപഞ്ചായത്തിന്‍റെയും ആഭിമുഖ്യത്തിൽ നടത്തിയ കർഷക ദിനാചരണം വാഴൂർ സോമൻ എംഎൽഎ ഉദ്ഘാടനം ചെയ്തു. ഗ്രാമപഞ്ചായത്ത് വൈസ് പ്രസിഡന്‍റ് ആർ. ശ്രീരാമൻ അധ്യക്ഷത വഹിച്ചു. ജില്ലാ പഞ്ചായത്തംഗം എസ്.പി. രാജേന്ദ്രൻ, അഴുത ബ്ലോക്ക് പഞ്ചായത്ത് വൈസ് പ്രസിഡന്‍റ് ആർ. സെൽവത്തായി, ബ്ലോക്ക് പഞ്ചായത്തംഗം പി. എം. നൗഷാദ്, കൃഷി ഓഫീസർ ടിന്‍റുമോൾ ജോസഫ് എന്നിവർ പ്രസംഗിച്ചു. മറയൂര്‍: മറയൂര്‍ കൃഷിഭവന്‍റെ ആഭിമുഖ്യത്തില്‍ മറയൂര്‍ സഹകരണ ബാങ്ക് ഹാളില്‍ കര്‍ഷക ദിനാഘോഷം നടത്തി. ഗ്രാമ പഞ്ചായത്ത് പ്രസിഡന്‍റ് ദീപ അരുള്‍ ജ്യോതി ഉദ്ഘാടനം ചെയ്തു. വൈസ് പ്രസിഡന്‍റ് ജോമോന്‍ തോമസ് അധ്യക്ഷത വഹിച്ചു. പഞ്ചായത്തിലെ മികച്ച കര്‍ഷകരെ മറയൂര്‍ സഹകരണ ബാങ്ക് പ്രസിഡന്‍റ് ആന്‍സി ആന്‍റണിയും ജില്ലാ പഞ്ചായത്ത് മെംബര്‍ സി. രാജേന്ദ്രനും ചേര്‍ന്ന് ആദരിച്ചു.

ക്ഷീരകര്‍ഷകര്‍ നാടിന്‍റെ നട്ടെല്ല്: മന്ത്രി റോഷി അഗസ്റ്റിന്‍

ഇടുക്കി: ക്ഷീരകര്‍ഷകര്‍ നാടിന്‍റെ നട്ടെല്ലാണെന്നും ഉത്പാദന രംഗത്ത് സ്വയംപര്യാപ്തത കൈവരിക്കാന്‍ വലിയ മുന്നേറ്റം നടത്തിയെന്നും മന്ത്രി റോഷി അഗസ്റ്റിന്‍ പറഞ്ഞു. മണിയാറന്‍കുടി സെന്‍റ് മേരീസ് പള്ളി പാരിഷ്ഹാളില്‍ ക്ഷീരവികസന വകുപ്പ് ഇടുക്കി യൂണിറ്റിന്‍റെ ആഭിമുഖ്യത്തില്‍ നടത്തിയ ഇടുക്കി ബ്ലോക്ക് ക്ഷീരസംഗമം ഉദ്ഘാടനം ചെയ്യുകയായിരുന്നു അദ്ദേഹം. സംസ്ഥാനത്ത് 3600ലധികം ക്ഷീരസംഘങ്ങളിലായി 2,75,000 കര്‍ഷകര്‍ ഈ മേഖലയില്‍ പ്രവര്‍ത്തിക്കുന്നുണ്ട്. കര്‍ഷകരുടെ താത്പര്യം സംരക്ഷിച്ചു സാമ്പത്തികഭദ്രത ഉറപ്പാക്കിയുള്ള പ്രവര്‍ത്തനങ്ങളാണ് ജില്ലയില്‍ നടപ്പാക്കുന്നതെന്നും അദ്ദേഹം പറഞ്ഞു. ത്രിതല പഞ്ചായത്തുകള്‍ തീറ്റപ്പുല്‍ കൃഷി, കാലിത്തീറ്റ തുടങ്ങിയവയ്ക്ക് സബ്‌സിഡി നല്‍കി മേഖലയ്ക്ക് മികച്ച പിന്തുണയാണ് നല്‍കുന്നതെന്നും മന്ത്രി പറഞ്ഞു. ജില്ലാ പഞ്ചായത്ത് പ്രസിഡന്‍റ് രാരിച്ചന്‍ നീറണാക്കുന്നേല്‍ അധ്യക്ഷത വഹിച്ചു. ക്ഷീരവികസന വകുപ്പ് ഡെപ്യൂട്ടി ഡയറക്ടര്‍ ബെറ്റി ജോഷ്വാ റിപ്പോര്‍ട്ട് അവതരിപ്പിച്ചു. രണ്ടു പതിറ്റാണ്ടായി പാലളക്കുന്ന മണിയാറന്‍കുടി ക്ഷീരസംഘത്തിലെ മുതിര്‍ന്ന കര്‍ഷകനായ 91കാരനായ തങ്കപ്പന്‍ ഒഴാങ്കലിനെയും ക്ഷീരമേഖലയില്‍ ആവശ്യമായ ഫണ്ട് വകയിരുത്തിയ ത്രിതല പഞ്ചായത്തുകളായ ഇടുക്കി ബ്ലോക്ക് പഞ്ചായത്ത്, വാഴത്തോപ്പ്, കാമാക്ഷി പഞ്ചായത്തുകളെയും ഏറ്റവും കൂടുതല്‍ പാല്‍ അളന്ന കര്‍ഷകരായ സേവ്യര്‍ ചാക്കോ കൊച്ചുവീട്ടില്‍, രോഷ്‌നി ബാബു ചേറാനിയില്‍, മിനി സുകുമാരന്‍ മാവുളയില്‍ എന്നിവരെയും ഓരോ ക്ഷീരസംഘങ്ങളിലും ഏറ്റവും കൂടുതല്‍ പാല്‍ അളന്ന കര്‍ഷകരെയും ചടങ്ങില്‍ ആദരിച്ചു. കാമാക്ഷി പഞ്ചായത്ത് പ്രസിഡന്‍റ് അനുമോള്‍ ജോസ്, ജില്ലാ പഞ്ചായത്ത് സ്ഥിരംസമിതി ചെയര്‍മാന്‍ കെ.ജി. സത്യന്‍, വാഴത്തോപ്പ് പഞ്ചായത്ത് വൈസ് പ്രസിഡന്‍റ് മിനി ജേക്കബ്, ബ്ലോക്ക് പഞ്ചായത്തംഗം ആന്‍സി തോമസ്, സ്ഥിരംസമിതിയംഗങ്ങളായ സിജി ചാക്കോ, ഏലിയാമ്മ ജോയി, സോണി ചൊള്ളാമഠം എന്നിവര്‍ പുരസ്‌കാരങ്ങള്‍ വിതരണം ചെയ്തു. കന്നുകാലി പ്രദര്‍ശനമത്സരത്തില്‍ ബേബി പുത്തന്‍പുരയ്ക്കല്‍ ഒന്നാം സമ്മാനം നേടി. കേരളബാങ്ക് പ്രതിനിധി കെ.ബി. ശ്രീജ ക്ലാസ് നയിച്ചു.

റോഡിനായി കേരള കോൺഗ്രസ് ധർണ

നെടുങ്കണ്ടം: വര്‍ഷങ്ങളായി തകര്‍ന്നുകിടക്കുന്ന നെടുങ്കണ്ടം-കട്ടക്കാല റോഡ് നിര്‍മാണം വൈകിക്കുന്ന കരാറുകാരന്‍റെ അനാസ്ഥയ്‌ക്കെതിരേ കേരള കോണ്‍ഗ്രസ് നെടുങ്കണ്ടം മണ്ഡലം കമ്മിറ്റിയുടെ നേതൃത്വത്തില്‍ പ്രതിഷേധ ധര്‍ണ നടത്തി. അര നൂറ്റാണ്ടിലധികം പഴക്കമുള്ള നെടുങ്കണ്ടം-കട്ടക്കാല റോഡ് വര്‍ഷങ്ങളായി തകര്‍ന്നുകിടക്കുകയാണ്. നാലര കിലോമീറ്റര്‍ ദൂരമുള്ള റോഡില്‍ അഞ്ഞൂറോളം കുഴികളാണുള്ളത്. ഇതുമൂലം ഓട്ടോറിക്ഷ ഉള്‍പ്പെടെയുള്ള വാഹനങ്ങള്‍ വിളിച്ചാല്‍ എത്താത്ത അവസ്ഥയാണ്. മഴപെയ്താല്‍ കാല്‍നടയാത്രപോലും പറ്റാത്ത സ്ഥിതിയാണുള്ളത്. റോഡ് നവീകരണത്തിന് അഞ്ചരക്കോടി രൂപ അനുവദിച്ച് 2023ല്‍ നിര്‍മാണം ആരംഭിച്ചിരുന്നു. എന്നാല്‍, 11 മാസം കൊണ്ട് പൂര്‍ത്തിയാക്കേണ്ട റോഡില്‍ ഏതാനും ഭാഗത്ത് മണ്ണുജോലികള്‍ ചെയ്തതല്ലാതെ രണ്ടു വര്‍ഷമായി തുടര്‍നടപടികള്‍ ഉണ്ടായില്ല. സ്‌കൂള്‍ ബസുകളും ഇരുചക്ര വാഹനങ്ങളും ഉള്‍പ്പെടെ ദിവസേന നൂറുകണക്കിന് വാഹനങ്ങളും ചാറല്‍മേട് സര്‍ക്കാര്‍ ആയുര്‍വേദ ആശുപത്രിയിലേക്ക് ചികിത്സയ്ക്കായി പോകുന്ന രോഗികളും ഉള്‍പ്പെടെ നിരവധി ആളുകളുമാണ് ഈ റോഡിലൂടെ യാത്ര ചെയ്യുന്നത്. മൈനര്‍സിറ്റി, ഉമ്മാക്കട, ചിന്നപ്പച്ചടി, ചാറല്‍മേട്, കട്ടക്കാല തുടങ്ങിയ സ്ഥലങ്ങളിലേക്ക് യാത്ര ചെയ്യുന്നതിനുള്ള ഏക മാര്‍ഗവും ഇതാണ്. പ്രതിഷേധ ധര്‍ണ കേരള കോണ്‍ഗ്രസ് സംസ്ഥാന കമ്മിറ്റിയംഗം ജോസ് പൊട്ടംപ്ലാക്കല്‍ ഉദ്ഘാടനം ചെയ്തു. മണ്ഡലം പ്രസിഡന്‍റ് ജോയി നമ്പുടാകത്ത് അധ്യക്ഷത വഹിച്ചു. ഉടുമ്പന്‍ചോല നിയോജകമണ്ഡലം പ്രസിഡന്‍റ് ജോജി ഇടപ്പള്ളിക്കുന്നേല്‍, ജോയി കണിയാംപറമ്പില്‍, ഫിലിപ്പ് കലയത്തുംകുഴിയില്‍, വര്‍ഗീസ് നെടുംപതാലില്‍ തുടങ്ങിയവര്‍ പ്രസംഗിച്ചു.

യുവാവിനെ മർദിച്ച് പരിക്കേൽപ്പിച്ച കേസിൽ രണ്ടുപേർ അറസ്റ്റിൽ

ശാന്തൻപാറ: ശാന്തൻപാറ പള്ളിക്കുന്നിൽ വാഹനത്തിനു സൈഡ് കൊടുക്കുന്നതുമായി ബന്ധപ്പെട്ടുണ്ടായ തർക്കത്തെത്തുടർന്ന് യുവാവിനെ മർദിച്ച് പരിക്കേൽപ്പിച്ച കേസിൽ രണ്ടുപേർ അറസ്റ്റിൽ. പുത്തടി സ്വദേശികളായ രൂപൻ (20), ഇയാളുടെ ബന്ധു മുരുകൻ (31) എന്നിവരെയാണ് ശാന്തൻപാറ സിഐ എസ്. ശരലാലിന്‍റെ നേതൃത്വത്തിലുള്ള പോലീസ് അറസ്റ്റ് ചെയ്തത്. മർദനത്തിൽ പരിക്കേറ്റ വാഴേപ്പറമ്പിൽ ബിജു (കുട്ടായി-46) തൊടുപുഴയിലെ സ്വകാര്യ ആശുപത്രിയിൽ ചികിത്സയിലാണ്. വെള്ളിയാഴ്ച രാവിലെ രൂപന്‍റെ സഹോദരൻ മോഹനനും ബിജുവും തമ്മിൽ ചേരിയാർ-പള്ളിക്കുന്ന് റോഡിൽവച്ച് വാഹനത്തിന് സൈഡ് കൊടുക്കുന്നതുമായി ബന്ധപ്പെട്ട് തർക്കമുണ്ടായി. അന്നു വൈകുന്നേരം പ്രതികൾ ബിജുവിനെ പള്ളിക്കുന്നിൽവച്ച് കമ്പിവടി കൊണ്ട് അടിക്കുകയായിരുന്നു. കേസിലെ ഒന്നാംപ്രതി മോഹനൻ ഒളിവിലാണെന്ന് പോലീസ് പറഞ്ഞു.

എയ്ഡഡ് സ്കൂൾ നിയമനം; സർക്കാർ നിലപാട് പ്രതിഷേധാർഹമെന്ന് ഇടുക്കി രൂപത ജാഗ്രതാസമിതി

കരിമ്പൻ: ഭിന്നശേഷി സംവരണവുമായി ബന്ധപ്പെട്ട് 2018 മുതൽ ഏഴു വർഷമായി നിയമനാംഗീകാരമില്ലാതെ ജോലി ചെയ്യുന്ന ആയിരക്കണക്കിന് അധ്യാപകരോടുള്ള സർക്കാർ നിലപാട് പ്രതിഷേധാർഹമെന്ന് ഇടുക്കി രൂപത ജാഗ്രതാ സമിതി. 1996 മുതൽ സംസ്ഥാനത്തെ എയ്ഡഡ് വിദ്യാഭ്യാസ മേഖലയിൽ സർക്കാർ നടപ്പിലാക്കിയ നാലു ശതമാനം അധ്യാപക സംവരണം ഒറ്റയടിക്ക് നടപ്പിലാക്കാൻ ശ്രമിച്ചതാണ് അധ്യാപകനിയമന പ്രശ്നം ഗുരുതരമാക്കിയത്. ഭിന്നശേഷി സംവരണം നടപ്പിലാക്കാൻ എയ്ഡഡ് സ്കൂളുകൾ സന്നദ്ധമായിരുന്നു. സർക്കാർ നിശ്ചയിച്ച മാനദണ്ഡ പ്രകാരമുള്ള തസ്തികകൾ മാറ്റിയിട്ട് സർക്കാരിനെ അറിയിക്കുകയും ചെയ്തതാണ്. എന്നാൽ, ഭിന്നശേഷി നിയമത്തിന്‍റെ പരിധിയിൽ വരുന്ന യോഗ്യരായ അധ്യാപകരുടെ അഭാവം മൂലം സർക്കാരിനു പോലും നിയമനം നടത്താൻ സാധിക്കാതെവന്നു. ഭിന്നശേഷി വിഭാഗത്തിൽ മൂവായിരത്തോളം ഒഴിവുകൾ വിവിധ എയ്ഡഡ് സ്കൂളുകൾ മാറ്റിവച്ചിട്ടുണ്ടങ്കിലും ഈ വിഭാഗത്തിൽ യോഗ്യതയുള്ള അഞ്ഞൂറോളം അധ്യാപകരെ മാത്രമേ നിയമനത്തിനായി എംപ്ലോയ്മെന്‍റ് എക്സ്ചേഞ്ചുകൾ വഴി ലഭ്യമായിട്ടുള്ളൂ. 25 വർഷത്തെ ബാക്ക്‌ലോഗ് പൂർണമായി പരിഹരിച്ചാൽ മാത്രമേ അധ്യാപക നിയമനങ്ങൾ അംഗീകരിക്കുകയുള്ളൂവെന്നാണ് സംസ്ഥാന സർക്കാർ നിലപാട്. ഈ ഉത്തരവാണ് എൻഎസ്എസ് സുപ്രീംകോടതിയിൽ ചോദ്യം ചെയ്തതും അനുകൂല വിധി സമ്പാദിച്ചതും. എൻഎസ്എസിനു ലഭിച്ച കോടതിവിധിയുടെ സമാന സാഹചര്യം ഉണ്ടായിട്ടും കത്തോലിക്ക സഭയുടെ മാനേജ്മെന്‍റുകളിലെ അധ്യാപക നിയമനം നിരസിച്ചുകൊണ്ട് ജൂലൈ 30ന് സംസ്ഥാന സർക്കാർ ഉത്തരവിറക്കിയത് കടുത്ത വിവേചനമാണെന്ന് ഇടുക്കി രൂപത ജാഗ്രതാസമിതി ആരോപിച്ചു. ഇടുക്കി രൂപത കാര്യാലയത്തിൽ കൂടിയ ജാഗ്രതാസമിതി യോഗത്തിൽ രൂപത വികാരി ജനറാൾ മോൺ. ജോസ് കരിവേലിക്കൽ അധ്യക്ഷത വഹിച്ചു. ജാഗ്രതാസമിതി ഭാരവാഹികളായ ഫാ. ജിൻസ് കാരക്കാട്ട്, ബിനോയി മഠത്തിൽ, എം.വി. ജോർജുകുട്ടി, ബിനോയി ചെമ്മരപ്പള്ളിൽ, ജിജി കൂട്ടുങ്കൽ, ജോർജ് കോയിക്കൽ, സിജോ ഇലന്തൂർ എന്നിവർ പ്രസംഗിച്ചു.

വയോധികരെ ചേർത്തുപിടിക്കുന്ന സംസ്കാരം വളർത്തിയെടുക്കണം: മാർ ജോൺ നെല്ലിക്കുന്നേൽ

അടിമാലി: വാർധക്യത്തിൽ എത്തിയവരെ ചേർത്തുപിടിക്കുന്ന സംസ്കാരം വളർത്തിയെടുക്കണമെന്ന് ഇടുക്കി രൂപത മെത്രാൻ മാർ ജോൺ നെല്ലിക്കുന്നേൽ പറഞ്ഞു. ഇടുക്കി രൂപതയുടെ നേതൃത്വത്തിൽ അടിമാലി സെന്‍റ് ജൂഡ് ഫൊറോന പള്ളിയിൽ നടന്ന വയോജനസംഗമം ഉദ്ഘാടനം ചെയ്യുകയായിരുന്നു ബിഷപ്. പ്രായമായവരെ കരുതേണ്ടതും പരിപാലിക്കേണ്ടതും പുതുതലമുറയുടെ ഉത്തരവാദിത്വമാണ്. അവരുടെ കഠിനാധ്വാനവും പ്രയത്നങ്ങളുമാണ് നമ്മുടെ കാലഘട്ടത്തെ ഇത്രമാത്രം സുന്ദരമാക്കുന്നത്. കേവലം ഒരു ദിവസത്തെ ആചരണത്തിനപ്പുറത്ത് ഇതൊരു സംസ്കാരമായി രൂപം പ്രാപിക്കണം. കഷ്ടതകളും മാനസിക പ്രതിസന്ധികളും അനുഭവിക്കുന്ന വയോധികർ ഉണ്ടാകാതിരിക്കുന്നതിനുള്ള ശ്രദ്ധ പുതിയ തലമുറയുടെ കടമയാണ്. ആരോഗ്യമുള്ള നല്ല കാലമത്രയും കുടുംബത്തിനും പൊതുസമൂഹത്തിനും വേണ്ടി ഏറെ ത്യാഗം സഹിച്ച പൂർവികർ ജീവിതത്തിന്‍റെ നിർണായക ഘട്ടത്തിൽ സമാധാനപൂർണം ശാന്തമായി ജീവിക്കുന്നതിനുള്ള സാഹചര്യം രൂപപ്പെടുത്താൻ എല്ലാവരും ശ്രമിക്കണമെന്നും മാർ നെല്ലിക്കുന്നേൽ പറഞ്ഞു. രൂപത ഫാമിലി അപ്പൊസ്തലേറ്റിന്‍റെ നേതൃത്വത്തിലാണ് പരിപാടികൾ സംഘടിപ്പിച്ചത്. വിശുദ്ധ കുർബാനയ്ക്ക് മാർ ജോൺ നെല്ലിക്കുന്നേൽ മുഖ്യകാർമികത്വം വഹിച്ചു. പൊതുസമ്മേളനത്തിൽ മാർ നെല്ലിക്കുന്നേൽ വയോജനങ്ങളെ ആദരിച്ചു. അടിമാലി സെന്‍റ് ജൂഡ് ഇടവകയിലെ വിവിധ ഭക്തസംഘടനകളുടെ നേതൃത്വത്തിൽ നിരവധി കലാപരിപാടികളും അവതരിപ്പിച്ചു. അടിമാലി ഫൊറോന വികാരി ഫാ. ജോർജ് പാട്ടത്തേക്കുഴി, ഫാ. മാത്യു അഴകനാക്കുന്നേൽ, സിസ്റ്റർ പ്രദീപ സിഎംസി, സിസ്റ്റർ സോഫിയ റോസ് സിഎംസി എന്നിവർ പ്രസംഗിച്ചു.

ജില്ലാ കോടതിവളപ്പില്‍ പച്ചപ്പിന്‍റെ ഓര്‍മത്തുരുത്തിനു തുടക്കം

മുട്ടം: ജില്ലാ കോടതിവളപ്പില്‍ പച്ചപ്പിന്‍റെ ഓര്‍മത്തുരുത്തിനു തുടക്കംകുറിച്ചു. ഹരിത കേരള മിഷന്‍റെ ചങ്ങാതിക്കൊരു തൈ, ഒരു തൈ നടാം ജനകീയ വൃക്ഷവത്കരണ കാമ്പയിന്‍റെ ഭാഗമായാണ് കോടതിവളപ്പിലെ ജില്ലാ ലീഗല്‍ സര്‍വീസസ് അഥോറിട്ടി ഓഫീസ് അങ്കണത്തില്‍ വൃക്ഷത്തൈകള്‍ നട്ടത്.12 കോടതികളാണ് ജില്ലാ കോടതി സമുച്ചയത്തിലുള്ളത്. ഇതിന്‍റെ പ്രതീകമായി 12 വൃക്ഷത്തൈകളുള്ള ഓര്‍മത്തുരുത്താണ് സജ്ജമാക്കുന്നത്. കെജിഒഎ, ജില്ലാ ലീഗല്‍ സര്‍വീസസ് അഥോറിട്ടി എന്നിവയുടെ സഹകരണത്തോടെയാണ് ഓര്‍മത്തുരുത്ത് ഒരുക്കുന്നത്. കെജിഒഎ സ്‌പോണ്‍സര്‍ ചെയ്ത വൃക്ഷത്തൈകള്‍ ജില്ലാ പ്രസിഡന്‍റ് ബിജു സെബാസ്റ്റ്യനില്‍നിന്നു പ്രിന്‍സിപ്പല്‍ സെഷന്‍സ് ഡിസ്ട്രിക്‌ട് ജഡ്ജി പി.എസ്. ശശികുമാര്‍ ഏറ്റുവാങ്ങി. തുടര്‍ന്ന് ചങ്ങാതിക്കൊരു തൈ എന്ന രീതിയില്‍ ന്യായാധിപര്‍ പരസ്പരം വൃക്ഷത്തൈകള്‍ കൈമാറി. ആദ്യ തൈ ജില്ലാ ജഡ്ജി നട്ടു. ഹരിത കേരളം മിഷന്‍ ജില്ലാ കോ-ഓര്‍ഡിനേറ്റര്‍ അജയ് പി. കൃഷ്ണ, വിവിധ ജഡ്ജിമാര്‍, കോടതി ജീവനക്കാര്‍, അഭിഭാഷകര്‍, കെജിഒഎ ഭാരവാഹികള്‍ തുടങ്ങിയവര്‍ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]