ADVERTISEMENT

ADVERTISEMENT

ഓ‌സാനം സ്കൂളിൽ എൻസിസി യൂണിറ്റ്

കട്ടപ്പന: ഓ‌സാനം ഇംഗ്ലീഷ് മീഡിയം ഹയർ സെക്കൻഡറി സ്കുളിൽ എൻസിസി നേവൽ യൂണിറ്റ് ആരംഭിച്ചു. യൂണിറ്റിന്‍റെ റൈസിംഗ് ഡേ ചടങ്ങ് സ്കൂൾ ഓഡിറ്റോറിയത്തിൽ നടന്നു.

സ്കൂൾ മാനേജർ ഫാ. ജോസ് മംഗലത്തിൽ അധ്യക്ഷത വഹിച്ച ചടങ്ങ് കോട്ടയം ഗ്രൂപ്പ് കമാൻഡർ ബ്രിഗേഡിയർ ജി.വി.എസ്. റെഡ്ഡി ഉദ്ഘാടനം ചെയ്തു. കമാൻഡിംഗ് ഓഫീസർ ക്യാപ്റ്റൻ അനിൽ വർഗീസ് മുഖ്യപ്രഭാഷണം നടത്തി. സ്കൂൾ പ്രിൻസിപ്പൽ ഫാ. ജോർജ് മാത്യു, പിടിഎ പ്രസിഡന്‍റ് സജി നല്ലുവീട്ടിൽ, വൈസ് പ്രിൻസിപ്പൽ ഡൊമിനിക് ജേക്കബ് എന്നിവർ പ്രസംഗിച്ചു.

സ്കൂളിലെ ഓ‌സാനം സ്വിമ്മിംഗ് അക്കാദമിയാണ് എൻസിസി നേവൽ യൂണിറ്റ് സ്കൂളിൽ ലഭ്യമാകാൻ വഴിതെളിച്ചത്. എട്ടാം ക്ലാസിലെ 25 വിദ്യാർഥികൾ എൻസിസി കേഡറ്റുകളായി സത്യപ്രതിജ്ഞ ചെയ്തു. യൂണിറ്റ് സ്കൂളിൽ ആരംഭിക്കുന്നതിന് നേതൃത്വം നൽകിയ മുൻ പ്രിൻസിപ്പൽ ഫാ. മനു കെ. മാത്യു, ക്യാപ്റ്റൻ അനിൽ വർഗീസ്, റെജികുമാർ എന്നിവരെ ചടങ്ങിൽ അനുസ്മരിച്ചു.

ADVERTISEMENT

ജില്ലാ ആശുപത്രിയിൽ ലിഫ്റ്റിന് 34 ലക്ഷം: പി.ജെ. ജോസഫ്

തൊടുപുഴ: ജില്ലാ ആശുപത്രിയിൽ ലിഫ്റ്റ് സ്ഥാപിക്കുന്നതിന് 34 ലക്ഷം രൂപ എംഎൽഎ ഫണ്ടിൽനിന്ന് അനുവദിച്ചതായി പി.ജെ. ജോസഫ് എംഎൽഎ അറിയിച്ചു. പൊതുമരാമത്ത് വകുപ്പ് ഇലക്‌ട്രിക്കൽ വിഭാഗം തയാറാക്കിയ എസ്റ്റിമേറ്റും പദ്ധതി നിർദേശവും ജില്ലാ കളക്ടർക്ക് നൽകിയിട്ടുണ്ട്. ആശുപത്രിയിൽ നിലവിലുള്ള ലിഫ്റ്റ് കേടായാൽ രോഗികൾ ഉൾപ്പെടെയുള്ളവർക്ക് ഏറെ ബുദ്ധിമുട്ടുകൾ ഉണ്ടാകുന്ന സാഹചര്യത്തിലാണ് പുതിയ ലിഫ്റ്റിനു തുക അനുവദിച്ചതെന്നും എംഎൽഎ പറഞ്ഞു. നൂറുകണക്കിനു സാധാരണക്കാരായ രോഗികളാണ് പ്രതിദിനം ചികിത്സതേടി ഇവിടെ എത്തുന്നത്. ലിഫ്റ്റ് തകരാർ മൂലം പലപ്പോഴും രോഗികളെ ചുമന്നുകൊണ്ടുപോകേണ്ട സ്ഥിതിയാണുണ്ടായിരുന്നത്.

വിടവാങ്ങിയത് ‘ചങ്ക് ബ്രൊ’ ആയ മാഷ്

കട്ടപ്പന: വാഹനാപകടത്തിൽ മരണപ്പെട്ട ജോയ്സ് പി. ഷിബു വിദ്യാർഥികളുടെ ചങ്ക് ബ്രൊ. രാവിലെ കോളജിലെത്തിയ വിദ്യാർഥികൾ ഞെട്ടലോടെയാണ് തങ്ങളുടെ പ്രിയ അധ്യാപകന്‍റെ അപകട മരണം അറിഞ്ഞത്. തുടർന്ന് കലാലയം കണ്ണീരിലാഴ്ന്നു. അധ്യാപനം എന്ന സ്വപ്നത്തിനു ചിറകു മുളച്ച വേളയിലാണ് ദുർവിധി ജോയ്സിനെ കവർന്നെടുത്തത്. പുളിയന്മല ക്രൈസ്റ്റ് കോളജിൽ ബിബിഎ വിഭാഗത്തിൽ മാനേജ്മെന്‍റാണ് ജോയ്‌സ് പഠിപ്പിച്ചിരുന്നത്. 2019- 23 ബാച്ചിൽ ഇതേ കോളജിൽതന്നെ ബിബിഎ ബിരുദം പൂർത്തിയാക്കിയിരുന്നു. തുടർന്ന് ഏറ്റുമാനൂരിൽ പിജി പഠനം പൂർത്തിയാക്കിയശേഷം രണ്ടുമാസം മുമ്പാണ് ക്രൈസ്റ്റ് കോളജിൽ അധ്യാപകനായി ചുമതലയേറ്റത്. 24-ാം വയസിൽ ലഭിച്ച ജോലി ആത്മാർഥമായി നടത്തിവന്നു. അതിലുപരി വിദ്യാർഥികളുടെ ചങ്ക് ബ്രോയായിരുന്നു ജോയ്‌സ്. പാഠപുസ്തകങ്ങൾക്കപ്പുറം വിവിധങ്ങളായ പരിപാടികൾ കോളജിൽ സംഘടിപ്പിക്കാൻ ജോയ്സ് മുന്നിട്ടുനിന്നിരുന്നു. കലാലയത്തിലെ ടൂറിസം ക്ലബ്ബിന്‍റെ ഇൻ-ചാർജ് കൂടിയായിരുന്നു അദ്ദേഹം. വടംവലി മത്സരമടക്കം കലാലയത്തിൽ സംഘടിപ്പിക്കുവാൻ നേതൃത്വം നൽകി. അധ്യാപകൻ - വിദ്യാർഥി ബന്ധത്തിനപ്പുറം സുഹൃത്തായിത്തന്നെയാണ് ജോയ്‌സ് കുട്ടികളുമായി ഇടപെട്ടിരുന്നത്. തങ്ങളുടെ പ്രീയപ്പെട്ട അധ്യാപകന്‍റെ അകാലത്തിലുള്ള വിടവാങ്ങൽ ഓരോ വിദ്യാർഥിക്കും താങ്ങാനാവുന്നതിനപ്പുറമായിരുന്നു.

പച്ചപ്പിന്‍റെ വഴികളിലൂടെ കവന്തയിലേക്ക് ട്രക്കിംഗ്

ടൂറിസം ദിനം സൂപ്പറാക്കും മൂലമറ്റം: ലോക വിനോദ സഞ്ചാരദിന സന്ദേശം ജനങ്ങളിലെത്തിക്കുന്നതിനു ജനകീയ കൂട്ടായ്മയായ പി -4ന്‍റെ നേതൃത്വത്തിൽ നാളെ മൂലമറ്റം-കോട്ടമല റോഡിന്‍റെ ഭാഗമായ ഉളുപ്പൂണി കവന്തയിലേക്കു ട്രക്കിംഗ് നടത്തും. പ്രകൃതിയൊരുക്കിയ ദൃശ്യവിരുന്ന് ആസ്വദിച്ച് വളഞ്ഞും പുളഞ്ഞും കിടക്കുന്ന റോഡിലൂടെയുള്ള ട്രക്കിംഗാണ് ഒരുക്കിയിരിക്കുന്നത്. രാവിലെ ഒൻപതിനു മൂലമറ്റത്ത് അറക്കുളം പഞ്ചായത്ത് വൈസ് പ്രസിഡന്‍റ് സുബി ജോമോന്‍റെ അധ്യക്ഷതയിൽ ചേരുന്ന ചടങ്ങിൽ തൊടുപുഴ ഡിവൈഎസ്പി പി.കെ. സാബു ട്രക്കിംഗ് ഫ്ളാഗ് ഓഫ് ചെയ്യും. മൂലമറ്റം സെന്‍റ് ജോസഫ്സ് അക്കാദമി ഡയറക്ടർ റവ.ഡോ.തോമസ് പുതുശേരി ടൂറിസം ദിന സന്ദേശം നൽകും. പദയാത്ര, ബൈക്ക് റാലി മൂലമറ്റം കെസ്ആർടിസി ജംഗ്ഷൻ വരെ പദയാത്രയായി നീങ്ങിയ ശേഷം ഇവിടെനിന്നു ബൈക്കുകളിലും മറ്റു വാഹനങ്ങളിലുമായി മേമുട്ടം കവല വരെ എത്തും. ഇവിടെനിന്ന് 10.45ന് മുന്നൂറോളം പേർ കവന്തയിലേക്കും ഉളുപ്പുണി പുൽമേട്ടിലേക്കും ട്രക്കിംഗ് നടത്തും. കവന്തയിൽ അറക്കുളം, കുടയത്തൂർ, മുട്ടം, വെള്ളിയാമറ്റം പഞ്ചായത്തുകളുടെ ടൂറിസം സാധ്യതകളും പ്രതിബന്ധങ്ങളും എന്ന വിഷയത്തിൽ നടക്കുന്ന സെമിനാർ സെന്‍റ് ജോസഫ് അക്കാദമി പ്രിൻസിപ്പൽ ഡോ. തോംസണ്‍ ജോസഫ് ഉദ്ഘാടനം ചെയ്യും. കെ.ആർ. സന്തോഷ്കുമാർ, ആൽബിൻ കല്ലക്കാവുങ്കൽ, ജോസ് ഇടക്കര, ബിജു പാലക്കാട്ടുകുന്നേൽ തുടങ്ങിയവർ നേതൃത്വം നൽകും. 1.30 ന് ട്രക്കിംഗ് പൂർത്തിയാക്കി സംഘാഗങ്ങൾ മടങ്ങും.

ദേശീയപാത നിർമാണം: സത്യവാങ്മൂലം നൽകാത്തത് പ്രതിഷേധാർഹം: കേരള കോണ്‍ഗ്രസ്

അടിമാലി: ദേശീയപാത 85ന്‍റെ നിർമാണത്തിൽ സർക്കാർ സത്യവാങ്മൂലം നൽകാത്തത് ജനവഞ്ചനയാണെന്നു കേരള കോണ്‍ഗ്രസ് ഇരുന്പുപാലം മണ്ഡലം കണ്‍വൻഷൻ ചൂണ്ടിക്കാട്ടി. നിർമാണ പ്രവർത്തനങ്ങൾ മരവിപ്പിച്ചിട്ട് രണ്ടു മാസം കഴിഞ്ഞു. ഹൈക്കോടതി ഉത്തരവനുസരിച്ച് നേര്യമംഗലം മുതൽ വാളറവരെയുള്ള നിർമാണപ്രവർത്തനങ്ങൾ മരവിപ്പിക്കാൻ കാരണമായ അഡീഷണൽ ചീഫ് സെക്രട്ടറിയുടെ സത്യവാങ്മൂലം പിൻവലിച്ച് പുതിയത് നൽകുമെന്ന് സർക്കാർ അറിയിച്ചെങ്കിലും ഇന്നലെവരെ നൽകിയിട്ടില്ല. കഴിഞ്ഞ 18നകം സത്യവാങ്മൂലം മാറ്റിനൽകണമെന്ന് ഹൈക്കോടതി നിർദേശിച്ചിരുന്നെങ്കിലും ഇത്തവണയും നൽകിയിട്ടില്ല. സത്യവാങ്മൂലം തിരുത്തി നൽകിയില്ലെങ്കിൽ നേരത്തേ നൽകിയതുപോലെ റോഡ് കടന്നുപോകുന്ന ഭാഗം വനമായി പരിഗണിക്കപ്പെടുമെന്നും കോടതി വ്യക്തമാക്കിയിരുന്നു. ഇക്കാര്യത്തിൽ സർക്കാരിന്‍റെ അനാസ്ഥയ്ക്കെതിരേ ഉയരുന്ന പ്രതിഷേധങ്ങൾക്ക് കേരള കോണ്‍ഗ്രസ് പിന്തുണ പ്രഖ്യാപിച്ചു. ജില്ലാ പ്രസിഡന്‍റ് പ്രഫ. എം.ജെ. ജേക്കബ് കണ്‍വൻഷൻ ഉദ്ഘാടനം ചെയ്തു. മണ്ഡലം പ്രസിഡന്‍റ് എൽദോസ് പുളിഞ്ചോട്ടിൽ അധ്യക്ഷത വഹിച്ചു. സംസ്ഥാന കോ-ഓർഡിനേറ്റർ അപു ജോണ്‍ ജോസഫ് മുഖ്യപ്രഭാഷണം നടത്തി. കേരള കർഷക യൂണിയൻ സംസ്ഥാന പ്രസിഡന്‍റ് വർഗീസ് വെട്ടിയാങ്കൽ, ദേവികുളം നിയോജകമണ്ഡലം പ്രസിഡന്‍റ് ബാബു കീച്ചേരിൽ, സംസ്ഥാന കമ്മിറ്റിയംഗം പി.വി. അഗസ്റ്റിൻ, യുഡിഎഫ് മണ്ഡലം ചെയർമാൻ സി.പി.ഹസൻ എന്നിവർ പ്രസംഗിച്ചു. ജില്ലാക്കമ്മിറ്റിയംഗം കെ.ജെ. കുര്യൻ സ്വാഗതവും നിയോജകമണ്ഡലം ജനറൽ സെക്രട്ടറി ഷാബു ജോസഫ് നന്ദിയും പറഞ്ഞു.

ജെ.ബി. കോശി കമ്മീഷൻ റിപ്പോർട്ട് പ്രസിദ്ധീകരിക്കണം: കത്തോലിക്ക കോൺഗ്രസ്

ചെറുതോണി: ജസ്റ്റീസ് ജെ.ബി. കോശി കമ്മീഷൻ റിപ്പോർട്ട് അടിയന്തരമായി പ്രസിദ്ധീകരിക്കുകയും ക്രൈസ്തവ ന്യൂനപക്ഷങ്ങളുടെ ക്ഷേമത്തിനും അവകാശ സംരക്ഷണത്തിനുമായി കമ്മീഷൻ നിർദേശിച്ചിരിക്കുന്ന പദ്ധതികൾ അടിയന്തര പരിഗണനയോടെ നടപ്പിലാക്കാൻ സർക്കാർ തയാറാകണമെന്നും തങ്കമണിയിൽ ചേർന്ന കത്തോലിക്ക കോൺഗ്രസ് പ്രവർത്തകസമിതി യോഗം ആവശ്യപ്പെട്ടു. തങ്കമണി യൂണിറ്റ് ഭാരവാഹികളുടെ യോഗം ഇടുക്കി രൂപതാ ഡയറക്ടർ ഫാ. ഫ്രാൻസിസ് ഇടവക്കണ്ടം ഉദ്ഘാടനം ചെയ്തു. ഫൊറോന വികാരി ഫാ. ജോസഫ് പുത്തൻപുര അധ്യക്ഷതവഹിച്ചു. കത്തോലിക്ക കോൺഗ്രസ് രൂപതാ പ്രസിഡന്‍റ് ജോർജ് കോയിക്കൽ മുഖ്യപ്രഭാഷണം നടത്തി. വിവിധ സംസ്ഥാനങ്ങളിൽ നടപ്പിലാക്കിവരുന്ന മതപരിവർത്തന നിരോധന നിയമത്തിന്‍റെ മറവിൽ രാജ്യത്ത് വർധിച്ചുവരുന്ന ക്രൈസ്തവ പീഡനങ്ങളിലും പോലീസ് കേസുകളിലും യോഗം ഉത്കണ്ഠ രേഖപ്പെടുത്തി. യോഗത്തിൽ യൂണിറ്റ് പ്രസിഡന്‍റ് ഷാജി കുന്നുംപുറം, അസി. ഡയറക്ടർമാരായ ഫാ. ബസ്റ്റോ കുമ്പളന്താനം, സിസ്റ്റർ ട്രീസ എഫ്എസ്എച്ച്എ, ജോസ് തൈച്ചേരി, സൈബിച്ചൻ കരിമ്പൻമാക്കൽ, വാവച്ചൻ ജേക്കബ്, സെലിൻ വാണിശേരി, ഷാജി വാഴക്കപ്പാറ, ഷൈനി മാവേലിൽ തുടങ്ങിയവർ പ്രസംഗിച്ചു.

സഹകരണ പെൻഷൻകാരുടെ നിയമസഭാ മാർച്ച് 30ന്

തൊടുപുഴ: വിവിധ ആവശ്യങ്ങൾ ഉന്നയിച്ച് സഹകരണ പെൻഷൻകാരുടെ നിയമസഭാ മാർച്ച് 30നു നടക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. കേരള കോ-ഓപ്പറേറ്റീവ് പെൻഷനേഴ്സ് അസോസിയേഷന്‍റെ നേതൃത്വത്തിലാണ് മാർച്ച് നടത്തുന്നത്. സഹകരണ ജീവനക്കാരുടെ സ്വാശ്രയ പെൻഷൻ ബോർഡ് 1995 മുതൽ പ്രവർത്തനം ആരംഭിച്ചിരുന്നു. 2021 മുതൽ സഹകരണ പെൻഷൻകാർക്ക് ക്ഷാമബത്ത നിർത്തലാക്കി. ഇക്കാര്യം മന്ത്രി വി.എൻ. വാസവനെ ബോധിപ്പിച്ചെങ്കിലും ഇതുവരെ യാതൊരു നടപടിയും സ്വീകരിച്ചിട്ടില്ല. നിരവധി സമരങ്ങളുടെ ഭാഗമായി അഞ്ചംഗ കമ്മീഷനെ സർക്കാർ നിയമിച്ചെങ്കിലും തുടർനടപടിയുണ്ടായിട്ടില്ല. സംഘടനകളുമായി ചർച്ച നടത്തി പ്രശ്നം പരിഹരിക്കണമെന്നാണ് അസോസിയേഷൻ ആവശ്യപ്പെടുന്നത്. പത്രസമ്മേളനത്തിൽ സംസ്ഥാന പ്രസിഡന്‍റ് എം. സുകുമാരൻ, ജില്ലാ പ്രസിഡന്‍റ് ജോസ് കലയത്തിനാൽ, സംസ്ഥാന കമ്മിറ്റിയംഗം കെ.കെ. ജോസഫ്, ജില്ലാ ട്രഷറർ പി.എൻ. സുകു എന്നിവർ പങ്കെടുത്തു.

കാളിയാർ സെന്‍റ് മേരീസിൽ സ്കൗട്ട്സ് ആൻഡ് ഗൈഡ്സ് പ്രോജക്ടുകളുടെ ഉദ്ഘാടനം

തൊടുപുഴ: കാളിയാർ സെന്‍റ് മേരീസ് ഹയർ സെക്കൻഡറി സ്കൂളിലെ ഭാരത് സ്കൗട്ട്സ് ആൻഡ് ഗൈഡ്സിന്‍റെ ആഭിമുഖ്യത്തിൽ പുതുതായി രണ്ടു പദ്ധതികൾ ആരംഭിക്കുമെന്ന് അധികൃതർ പത്രസമ്മേളനത്തിൽ അറിയിച്ചു. ലഹരിവിരുദ്ധ നവകേരളം പദ്ധതിയുടെ ഭാഗമായി ആന്‍റി ഡ്രഗ്സ് ആർമിയുടെ പ്രവർത്തനോദ്ഘാടനം നാളെ വൈകുന്നേരം അഞ്ചിന് തൊടുപുഴ അസി. എക്സൈസ് ഇൻസ്പെക്ടർ ഒ.എച്ച്. മൻസൂർ നിർവഹിക്കും. സ്കൂൾ മാനേജർ ഫാ. ജോസഫ് മുണ്ടുനടയിൽ അധ്യക്ഷത വഹിക്കും. പഞ്ചായത്ത് വൈസ് പ്രസിഡന്‍റ് ദിവ്യ അനീഷ്, സ്കൂൾ പ്രിൻസിപ്പൽ ലൂസി ജോർജ്, പിടിഎ പ്രസിഡന്‍റ് ജോബി ജോർജ്, ഗൈഡ് ക്യാപ്റ്റൻ ജൂലിൻ ജോസ്, സ്കൗട്ട് മാസ്റ്റർ ബിജു ജോസഫ് എന്നിവർ പ്രസംഗിക്കും. 28നു രാവിലെ 9.30ന് വണ്ണപ്പുറം പഞ്ചായത്ത് വാർഷിക പദ്ധതിയിൽ ഉൾപ്പെടുത്തി സ്കൂളിൽ നടപ്പാക്കുന്ന സന്പൂർണ നീന്തൽ പരിശീലന പരിപാടിയുടെ ഉദ്ഘാടനം സ്കൗട്ട്സ് ആൻഡ് ഗൈഡ്സ് ജില്ലാ ഓർഗനൈസിംഗ് കമ്മീഷണർ ജയസൂര്യ ഷാജി നിർവഹിക്കും. വണ്ടമറ്റം അക്വാറ്റിക് സെന്‍ററിൽ നടക്കുന്ന ഉദ്ഘാടനച്ചടങ്ങിൽ സ്കൂൾ മാനേജർ ഫാ. ജോസഫ് മുണ്ടുനടയിൽ അധ്യക്ഷത വഹിക്കും. പഞ്ചായത്ത് വൈസ് പ്രസിഡന്‍റ് ദിവ്യ അനീഷ്, പ്രിൻസിപ്പൽ ലൂസി ജോർജ്, നീന്തൽ പരിശീലകൻ ബേബി വർഗീസ്, സ്കൗട്ട് മാസ്റ്റർ ബിജു ജോസഫ്, ഗൈഡ് ക്യാപ്റ്റൻ ജൂലിൻ ജോസ് എന്നിവർ പ്രസംഗിക്കും. സന്പൂർണ നീന്തൽ പരിശീലന പദ്ധതി നടപ്പാക്കുന്ന ജില്ലയിലെ ആദ്യത്തെ സ്കൗട്ട്സ് ആൻഡ് ഗൈഡ്സ് യൂണിറ്റ് എന്ന ബഹുമതി ഇതോടെ കാളിയാർ സെന്‍റ് മേരീസ് ഹയർ സെക്കൻഡറി സ്കൂൾ കൈവരിക്കും. സ്കൗട്ട്സ് ആൻഡ് ഗൈഡ്സിന്‍റെ ആഭിമുഖ്യത്തിൽ നാലുവർഷം മുന്പ് ആറ് കിലോവാട്ടിന്‍റെ സോളാർ പാനൽ സ്കൂളിൽ സ്ഥാപിച്ച് പരിസ്ഥിതി സൗഹൃദ ഊർജോത്പാദക വിദ്യാലയമായി സംസ്ഥാന തലത്തിൽ സ്കൂൾ ശ്രദ്ധ നേടിയിരുന്നു. സ്കൂളിൽ നടക്കുന്ന ത്രിദിന ക്യാന്പിൽവിവിധ വിഷയങ്ങളിൽ വിദഗ്ധർ ക്ലാസ് നയിക്കും. ക്യാന്പിന്‍റെ ഭാഗമായി ട്രക്കിംഗും ക്യാന്പ് ഫയറും സംഘടിപ്പിച്ചിട്ടുണ്ട്. പത്രസമ്മേളനത്തിൽ പ്രിൻസിപ്പൽ ലൂസി ജോർജ്, സ്റ്റാഫ് പ്രതിനിധി ഫാ. സിജിൻ ഓവേലിൽ, സ്കൗട്ട് മാസ്റ്റർ ബിജു ജോസഫ്, ഗൈഡ് ക്യാപ്റ്റൻ ജൂലിൻ ജോസ് എന്നിവർ പങ്കെടുത്തു.

ശാന്തിഗിരിയിൽ ഭിന്നശേഷി പുനരധിവാസ പദ്ധതി ഉദ്ഘാടനം ഇന്ന്

തൊടുപുഴ: വഴിത്തല ശാന്തിഗിരിയിൽ ഭിന്നശേഷി പുനരധിവാസ നൂതന പദ്ധതികളുടെ ഉദ്ഘാടനം ഇന്നു നടത്തുമെന്ന് ഡയറക്ടർ ഫാ. പോൾ പാറക്കാട്ടേൽ അറിയിച്ചു. ഇന്ന് ഉച്ചകഴിഞ്ഞ് മൂന്നിന് ശാന്തിഗിരി കോളജിലെ ഫാ. ബീഡ് ഹാളിൽ ചേരുന്ന സമ്മേളനം പി.ജെ. ജോസഫ് എംഎൽഎ ഉദ്ഘാടനം ചെയ്യും. മൂവാറ്റുപുഴ കാർമൽ പ്രൊവിൻഷ്യൽ ഫാ. മാത്യു മഞ്ഞക്കുന്നേൽ അധ്യക്ഷത വഹിക്കും. സാമൂഹ്യനീതി ഓഫീസർ വി.എ. ഷംനാദ് മുഖ്യപ്രഭാഷണം നടത്തും. കാർമൽ പ്രോവിൻസ് കൗണ്‍സിലർ ഫാ. പോൾ കാടാംകുളം, കോളജ് പ്രിൻസിപ്പൽ ഫാ. ജോസ് തുറവയ്ക്കൽ, പുറപ്പുഴ പഞ്ചായത്ത് പ്രസിഡന്‍റ് എ.കെ. ഭാസ്കരൻ തുടങ്ങിയവർ പ്രസംഗിക്കും. ഫാ. പോൾ പാറക്കാട്ടേൽ സ്വാഗതവും പി.പി. തങ്കപ്പൻ നന്ദിയും പറയും. 150 തടസ രഹിത ഭവനനിർമാണ പദ്ധതിയായ ശാന്തിഭവനം പദ്ധതി, 100 സ്വയംതൊഴിൽ പദ്ധതികൾ ഉൾപ്പെടുന്ന ശാന്തി ശക്തീകരണം, മെഡിക്കൽ ക്യാന്പുകൾ, കൃത്രിമോപകരണങ്ങളുടെ വിതരണം, ബോധവത്കരണ പരിപാടികൾ, പഠനവൈകല്യമുള്ള കുട്ടികളുടെ പരിശീലന കോഴ്സ്, ഉന്നത വിദ്യാഭ്യാസവും തൊഴിൽ പരിശീലനവും, പുനരധിവാസ വിവരശേഖരണവും പ്രചാരണവും, ഭിന്നശേഷി സംഗമം, സെമിനാറുകൾ, തടസരഹിത നിർമാണ പ്രചാരവും വക്കാലത്തും തുടങ്ങിയ നൂതന പദ്ധതികളാണ് ഉദ്ഘാടനം ചെയ്യുന്നത്. 1988-ൽ വഴിത്തലയിൽ ആരംഭിച്ച ശാന്തിഗിരി പുനരധിവാസ കേന്ദ്രത്തിൽ ഭിന്നശേഷിക്കാരുടെ പുനരധിവാസ പ്രവർത്തനങ്ങൾ 37 വർഷം പിന്നിടുകയാണ്. ശാന്തിഗിരി ഹോസ്റ്റലിൽ ശാരീരിക ന്യൂനതയുള്ള കുട്ടികൾക്ക് സൗജന്യ താമസവും പഠന പരിശീലന സൗകര്യങ്ങളും നൽകിവരുന്നു. 2002-ൽ സ്ഥാപിതമായ ശാന്തിഗിരി കോളജിൽ ഏഴ് യുജി പ്രോഗ്രാമുകളിലും നാല് പിജി പ്രോഗ്രാമുകളിലുമായി ആയിരത്തിലധികം കുട്ടികൾ പഠനം നടത്തുന്നുണ്ട്. 2016-ൽ ആരംഭിച്ച എംബിഎ കോളജും ഇവിടെ പ്രവർത്തിക്കുന്നു. വീൽചെയറിൽ സഞ്ചരിക്കുന്നവർക്ക് തൊഴിൽ നൽകുകയെന്ന ലക്ഷ്യത്തോടെ 2004-ൽ സ്ഥാപിതമായ ശാന്തിഗിരി പ്രസ് ഭിന്നശേഷിക്കാർക്ക് തൊഴിൽ പരിശീലനവും നൽകുന്നു. ഐടി മേഖലയിൽ നൈപുണ്യമുള്ള ഭിന്നശേഷിക്കാർക്ക് ജോലി നൽകുകയെന്ന ലക്ഷ്യത്തോടെ 2006-ൽ സ്ഥാപിതമായ ശാന്തി സോഫ്റ്റ് ടെക്നോളജീസ് ഇന്നു സോഫ്റ്റ്‌വേർ വികസനത്തിലും ഉത്പന്ന നിർമാണത്തിലും വെബ്സൈറ്റ് നിർമാണത്തിലും പരിശീലന പ്രോഗ്രാമുകളിലും മുൻനിരയിലണ്. ശാന്തിഗിരി വർക്ക് ഷോപ്പ് ശ്രവണ വൈകല്യമുള്ളവർക്ക് തൊഴിൽ നൽകാൻ 2012- മുതൽ പ്രവർത്തിച്ചുവരുന്നു. സ്കൂൾ, കോളജ് ഫർണിച്ചറുകൾ, കെട്ടിടങ്ങളുടെ മേൽപ്പുര നിർമാണം തുടങ്ങിയവയും ശാന്തിഗിരി വർക്ക്ഷോപ്പ് ചെയ്തു നൽകുന്നു. ശാരീരിക വെല്ലുവിളികൾ നേരിടുന്നവർക്കായി ഫിസിയോതെറാപ്പി സെന്‍ററും പ്രവർത്തിക്കുന്നുണ്ട്. വൈകല്യമുള്ളവർക്ക് വിവാഹവും കുടുംബ ജീവിതവും സാധ്യമാണെന്ന സന്ദേശം നൽകാനായി 2002-ൽ മാര്യേജ് ബ്യൂറോ നിരവധിപ്പേർക്ക് താങ്ങുംതണലുമായിട്ടുണ്ട്.

സൗജന്യ മെഡിക്കൽ ക്യാന്പ് 28ന് കട്ടപ്പന പാരീഷ് ഹാളിൽ

കട്ടപ്പന: തൊടുപുഴ സെന്‍റ് മേരീസ് ഹോസ്പിറ്റലിന്‍റെ സഹകരണത്തോടെ കട്ടപ്പന സെന്‍റ് ജോർജ് ഫൊറോന പള്ളിയിലെ ഭക്തസംഘടനകളുടെ നേതൃത്വത്തിൽ 28ന് കട്ടപ്പന സെന്‍റ് ജോർജ് ഫൊറോന പാരീഷ് ഹാളിൽ രാവിലെ ഒൻപതു മുതൽ രണ്ടുവരെ സൗജന്യ മെഡിക്കൽ ക്യാന്പ് നടത്തും. കാർഡിയോളജി, ഗ്യാസ്ട്രോഎൻട്രോളജി, ന്യൂറോളജി, ന്യൂറോ സർജറി, നെഫ്രോളജി, യൂറോളജി, ജനറൽ സർജറി, ഇഎൻടി, ജനറൽ മെഡിസിൻ, പീഡിയാട്രിക്സ് തുടങ്ങി ഇരുപതോളം ഡിപ്പാർട്ട്മെന്‍റുകളിലെ ഡോക്ടർമാർ ക്യാന്പിനു നേതൃത്വം നൽകും. ക്യാന്പിൽ പങ്കെടുക്കുന്നവർക്ക് ഇസിജി, ഡോക്ടർ കണ്‍സൾട്ടേഷൻ, പ്രമേഹ പരിശോധന എന്നിവ സൗജന്യമായും മറ്റു ഓപ്പറേഷനുകളും ആൻജിയോഗ്രാം, ആൻജിയോപ്ലാസ്റ്റി തുടങ്ങിയ തുടർചികിത്സകൾ കുറഞ്ഞ ചെലവിൽ തൊടുപുഴ സെന്‍റ് മേരീസ് ഹോസ്പിറ്റലിലും ലഭ്യമാകും. സെന്‍റ് മേരീസ് ഹോസ്പിറ്റൽ കാർഡിയോളജി വിഭാഗം മേധാവി ഡോ. മാത്യു ഏബ്രഹാമിന്‍റെയും പീഡിയാട്രിക്സ് വിഭാഗം മേധാവി ഡോ. ജേക്കബ് ഏബ്രഹാമിന്‍റെയും ജനറൽ മെഡിസിൻ മേധാവി ഡോ. തോമസ് ഏബ്രഹാമിന്‍റെയും നേതൃത്വത്തിലുള്ള 20 വിദഗ്ധ ഡോക്ടർമാർ ക്യാന്പിൽ രോഗികളെ പരിശോധിക്കും. ക്യാന്പിൽ പങ്കെടുക്കുന്നവർക്കു ഡോക്ടർമാർ നിർദേശിക്കുന്ന മരുന്നുകൾ സൗജന്യമായി നൽകുമെന്നു സംഘാടകർ പത്രസമ്മേളനത്തിൽ അറിയിച്ചു. 28ന് രാവിലെ പത്തിന് മന്ത്രി റോഷി അഗസ്റ്റിൻ മെഡിക്കൽ ക്യാന്പ് ഉദ്ഘാടനം ചെയ്യും. കട്ടപ്പന സെന്‍റ് ജോർജ് ഫോറോനാ പള്ളി വികാരി ഫാ. ജോസ് മംഗലത്തിൽ യോഗത്തിൽ അധ്യഷത വഹിക്കും. കട്ടപ്പന നഗരസഭാ ചെയർപേഴ്സണ്‍ ബീന ടോമി, നഗരസഭാ കൗണ്‍സിലർമാരായ സോണിയ ജയ്ബി, ജാൻസി ബേബി, തൊടുപുഴ സെന്‍റ് മേരീസ് ആശുപത്രി ഡയറക്ടർമാരായ ഡോ. മാത്യു ഏബ്രഹാം,ഡോ. ജേക്കബ് ഏബ്രഹാം, ഡോ. തോമസ് ഏബ്രഹാം, ഫാ. മജു നിരവത്ത്, ഫാ. ജോർജ് പുല്ലാന്തനാൽ, ഫാ. അനൂപ് കരിങ്ങാട്, പിആർഒ തോമസ് ജോസ്, സുബിൻ മെച്ചേരിയിൽ, സലോമി മറ്റപ്പള്ളിൽ തുടങ്ങിയവർ പ്രസംഗിക്കും. ക്യാന്പിൽ പങ്കെടുക്കാൻ വിളിക്കുക ഫോൺ: 73562 40929.

റോഡുകളിൽ അപകടപ്പെരുമഴ

അഞ്ച് അപകടങ്ങൾ, ഒരു മരണം; 25 പേർക്കു പരിക്ക് ഹൈറേഞ്ച് മേഖലയിൽ ഇന്നലെ അപകടങ്ങളുടെ ദിനം. പലേടങ്ങളിലായി അപകടങ്ങളിൽ ഒരാൾ മരിക്കുകയും നിരവധി പേർക്ക് പരിക്കേൽക്കുകയും ചെയ്തു. ബൈക്ക് ഓട്ടോറിക്ഷയിൽ തട്ടി റോഡിലേക്കു മറിഞ്ഞുവീണ കോളജ് അധ്യാപകൻ ലോറി കയറി മരിച്ചതാണ് നാടിനെ ഞെട്ടിച്ചത്. കുമളി മുരിക്കടി പുളിക്കപ്പീടികയിൽ (ഐക്കരോട്ട്) ഷിബുവിന്‍റെയും സോളിയുടെയും മകൻ പുളിയന്മല ക്രൈസ്റ്റ് കോളജ് അധ്യാപകൻ ജോയിസ് പി. ഷിബു (24) ആണ് മരിച്ചത്. നെടുങ്കണ്ടത്ത് ജീപ്പ് മറിഞ്ഞ് 16 പേർക്ക് പരിക്കേറ്റു. ഉപ്പുതറയിൽ ഒാട്ടോറിക്ഷ മറിഞ്ഞ് ഏഴു പേർക്ക് പരിക്കേറ്റു. മൂന്നാറിൽ ട്രാക്ടർ അപകടത്തിൽ രണ്ടു പേർക്ക് പരിക്കേറ്റു. വണ്ണപ്പുറത്ത് ലോറി മറിഞ്ഞും അപകടമുണ്ടായി. ജീപ്പ് മറിഞ്ഞ് 16 പേർക്കു പരിക്ക്; ജീപ്പിലുണ്ടായിരുന്നത് 18 പേർ നെടുങ്കണ്ടം: തൊഴിലാളികളുമായി തമിഴ്നാട്ടിൽനിന്നെത്തിയ ജീപ്പ് നിയന്ത്രണംവിട്ടു മറിഞ്ഞ് 16പേര്‍ക്കു പരിക്ക്. ആരുടെയും പരിക്ക് ഗുരുതരമല്ല. സാരമായി പരിക്കേറ്റ നാലുപേരെ തമിഴ്‌നാട്ടിലെ വിവിധ ആശുപത്രികളില്‍ പ്രവേശിപ്പിച്ചു. മറ്റുള്ളവരെ നെടുങ്കണ്ടം താലൂക്കാശുപത്രിയില്‍ പ്രവേശിപ്പിച്ചു പ്രാഥമിക ചികിത്സ നല്‍കി. ഇന്നലെ രാവിലെ എട്ടോടെ താന്നിമൂട്- കോമ്പയാര്‍ റോഡില്‍നിന്നു വാസുകുട്ടന്‍പാറ റോഡിലേക്കുള്ള കയറ്റത്തിലാണ് അപകടം നടന്നത്. തൊഴിലാളികളെ കുത്തിനിറച്ചെത്തിയ വാഹനം കയറ്റത്തില്‍നിന്നു പോവുകയും മുന്നോട്ടെടുക്കാനുള്ള ശ്രമത്തിനിടയില്‍ നിയന്ത്രണം നഷ്ടപ്പെട്ടു ജീപ്പ് തലകുത്തനെ മറിയുകയുമായിരുന്നു. സ്ഥലത്തെത്തിയ നെടുങ്കണ്ടം ഫയർഫോഴ്സും സമീപത്തുണ്ടായിരുന്ന മണ്ണുമാന്തിയന്ത്രവും ഉപയോഗിച്ചാണ് വാഹനം ഉയര്‍ത്തി തൊഴിലാളികളെ പുറത്തെത്തിച്ചത്. 17തൊഴിലാളികളും ഡ്രൈവറും ഉള്‍പ്പെടെ 18 പേരായിരുന്നു വാഹനത്തിലുണ്ടായിരുന്നതെന്നു നാട്ടുകാര്‍ പറഞ്ഞു. തേനി കോംബൈ അടിവാരത്തുനിന്നെത്തിയവരാണ് അപകടത്തില്‍പ്പെട്ടത്. ഓട്ടോറിക്ഷ മറിഞ്ഞ് ഏഴു പേർക്ക് പരിക്ക് ഉപ്പുതറ: നിയന്ത്രണം നഷ്ടമായ ഓട്ടോറിക്ഷ മറിഞ്ഞ് ഏഴു പേർക്കു പരിക്ക്. ഓട്ടോഡ്രൈവർ പൊരികണ്ണി പുതിയ വീട്ടിൽ സ്റ്റാലിൻ, ഭാര്യ ബിന്ദു, പൊരികണ്ണി സ്വദേശികളായ ഉഷ, നബീസ, എലിസബത്ത്, ഓമന, അജിത എന്നിവർക്കാണ് പരിക്കേറ്റത്. ഉപ്പുതറ-വളകോട് റൂട്ടിൽ മാക്കപ്പതാൽ സെന്‍റ് തോമസ് പള്ളിക്കു സമീപം വ്യാഴാഴ്ച ഉച്ചകിഞ്ഞ് 3.30 നാണ് അപകടം. വളകോട്ടിൽനിന്നു സ്ത്രീ തൊഴിലാളികളുമായി ഉപ്പുതറയിലേക്കു വരുന്നതിനിടെ നിയന്ത്രണം നഷ്ടമായി തിട്ടയിലിടിച്ചു മറിയുകയായിരുന്നു. അജിത, എലിസബത്ത് എന്നിവർക്ക് ഉപ്പുതറ സിഎച്ച്സിയിൽ പ്രാഥമിക ചികിത്സ നൽകി വിട്ടയച്ചു. മറ്റുള്ളവരെ വിദഗ്ധ ചികിത്സയ്ക്കായി കട്ടപ്പന താലൂക്ക് ആശുപത്രിയിലേക്കു മാറ്റി. ട്രാക്ടർ അപകടത്തിൽ രണ്ടു പേർക്കു പരിക്ക് മറയൂർ: മൂന്നാർ-ഉടുമൽപ്പേട്ട അന്തർസംസ്ഥാന പാതയിൽ തലയാർ-കടുകുമുടി ഭാഗത്ത് തേയിലക്കൊളുന്ത് കയറ്റിവന്ന ട്രാക്ടർ നിയന്ത്രണംവിട്ടു മറിഞ്ഞ് ഡ്രൈവർ ഉൾപ്പെടെ രണ്ടുപേർക്കു പരിക്ക്. ഇന്നലെ ഉച്ചയ്ക്ക് ഒന്നരയോടെയാണ് അപകടം. കെഡിഎച്ച്പി കന്പനിയുടെ ഗുണ്ടുമലൈ എസ്റ്റേറ്റ് തെൻമല എസ്റ്റേറ്റിൽനിന്നു വാഗുവരൈ ഫാക്ടറിയിലേക്കു തേയിലക്കൊളുന്ത് കയറ്റിവന്ന ട്രാക്ടറാണ് തലയാർ സമീപം എത്തിയപ്പോൾ നിയന്ത്രണംവിട്ട് റോഡിൽ തലകീഴായി മറിഞ്ഞത്. ഗുണ്ടുമലൈ കടുകുമുടി ഡിവിഷൻ സ്വദേശിയും ട്രാക്ടർ ഡ്രൈവറുമായ മണികണ്ഠൻ (30), തെൻമല ഫാക്ടറി ഡിവിഷൻ സ്വദേശിയും ലോഡിംഗ് തൊഴിലാളിയുമായ മണി (30) എന്നിവർക്കാണ് പരിക്കേറ്റത്. നാട്ടുകാരുടെ നേതൃത്വത്തിൽ പരിക്കേറ്റവരെ മൂന്നാർ ടാറ്റാ ആശുപത്രിയിൽ പ്രവേശിപ്പിച്ചു. അപകടസമയത്ത് ട്രാക്ടറിൽ ഡ്രൈവർക്കൊപ്പം മൂന്നു ലോഡിംഗ് തൊഴിലാളികളും ഉണ്ടായിരുന്നു. ബാക്കി രണ്ടുപേർ പരിക്കില്ലാതെ രക്ഷപ്പെട്ടു. ലോറി നിയന്ത്രണംവിട്ടു മറിഞ്ഞു വണ്ണപ്പുറം: തേങ്ങ കയറ്റി വന്ന പിക്കപ്പ് ലോറി നിയന്ത്രണം വിട്ടു മറിഞ്ഞു. വണ്ണപ്പുറം - ചേലച്ചുവട് റോഡിൽ മുണ്ടൻമുടി ഇറക്കത്തിൽ വച്ചാണ് വാഹനം നിയന്ത്രണം വിട്ടു മറിഞ്ഞത്. ഇന്നലെ പുലർച്ചെ നാലോടെയാണ് അപകടം. തോപ്രാംകുടിയിൽനിന്ന് തേങ്ങയുമായി വഴിത്തലയ്ക്കു പോകുകയായിരുന്നു ലോറി. വാഹനത്തിൽ മൂന്നു പേരാണുണ്ടായിരുന്നത്. അപകടത്തിൽ ആർക്കും പരിക്കില്ല.

ജീവൻ പൊന്നാണ്, വിഷ്ണുവിനായി നാടൊന്നാകെ കൈകോർത്തു

തൊടുപുഴ: കൊല്ലത്തുണ്ടായ വാഹനാപകടത്തിൽ ഗുരുതരമായി പരിക്കേറ്റ വിഷ്ണുവിനെ നാട്ടിലെത്തിക്കാൻ നാട് കൈ കോർത്തു. തൊടുപുഴയിലെ സ്വകാര്യ ആശുപത്രിയിലാണ് കരിണ്ണൂർ തട്ടക്കുഴ സ്വദേശിയായ വിഷ്ണു(29)വിന് വിദഗ്ധ ചികിത്സ നൽകുന്നത്. രണ്ടേകാൽ മണിക്കൂർകൊണ്ട്. അഞ്ച് ജില്ലകൾ പിന്നിട്ടാണ് വിഷ്ണുവിനെ വഹിച്ചുള്ള ആംബുലൻസ് അതിവേഗം തൊടുപുഴയിലെത്തിയത്. വഴിനീളെ സുമനസുകൾ ആംബുലൻസിന് വഴിയൊരുക്കി. കൊല്ലത്ത് ഹോട്ടലിൽ ഷെഫായി ജോലി ചെയ്തുവരികയായിരുന്ന വിഷ്ണു കഴിഞ്ഞ് ഓഗസ്റ്റ് 15നാണ് അപകടത്തിൽപ്പെടുന്നത്. ജോലിക്കായി പോകുന്പോഴായിരുന്നു അപകടം. അപകടത്തിൽ തലയ്ക്കും തോളെല്ലിനും ഗുരുതരമായി പരിക്കേറ്റ വിഷ്ണുവിനെ കൊല്ലത്തെ സ്വകാര്യ ആശുപത്രിയിൽ പ്രവേശിപ്പിച്ചു. ഒരു മാസത്തോളമായി ഇവിടെ ചികിത്സയിലായിരുന്നു. തലയ്ക്ക് ഗുരുതരമായി പരിക്കേറ്റതിനാൽ തലയോട്ടി മാറ്റി വച്ചിരിക്കുകയാണ്. ആരോഗ്യനില മെച്ചപ്പെടുന്നതനുസരിച്ച് തലയോട്ടി പുനഃസ്ഥാപിക്കും. ചികിത്സാ സൗകര്യാർഥമാണ് തൊടുപുഴ മുതലക്കോടം ഹോളി ഫാമിലി ആശുപത്രിയിലേയ്ക്ക് മാറ്റിയത്. നാല് മണിക്കൂറിനുള്ളിൽ വിഷ്ണുവിനെ തൊടുപുഴയിലെത്തിക്കണമായിരുന്നു. സമയം വൈകിയാൽ സ്ഥിതി മോശമാകാൻ സാധ്യതയുണ്ട്. അതിനാൽ ഓരോ നിമിഷവും വിലപ്പെട്ടതായിരുന്നു. കൊല്ലത്തെ ആശുപത്രിയിൽനിന്ന് ഉച്ചയ്ക്ക് 11.56ഓടെയാണ് ആംബുലൻസ് പുറപ്പെട്ടത്. വൈകുന്നേരം നാലോടെ എത്തുമെന്നായിരുന്നു പ്രതീക്ഷിച്ചത്. എന്നാൽ 2.20ന് ആശുപത്രിയിലെത്തി. കൊല്ലം, കൊട്ടാരക്കര, അടൂർ, പന്തളം, ചെങ്ങന്നൂർ, തിരുവല്ല, കോട്ടയം, പാല, തൊടുപുഴ, മുതലക്കോടം എന്നിങ്ങനെയായിരുന്ന നിശ്ചയിച്ചിരുന്ന പാത. കടന്നുവരുന്ന പാതകളിലെല്ലാം സമൂഹ്യമാധ്യമങ്ങൾ വഴി മുന്നറിയിപ്പ് നല്കിയിരുന്നു. ചിലയിടങ്ങളിൽ നേരിയ തടസം നേരിട്ടതല്ലാതെ എല്ലായിടത്തും ആംബുലൻസിന് കടന്നുപോകാൻ വേണ്ട സംവിധാനം ഒരുക്കിയിരുന്നതായി ആംബുലൻസ് ഡ്രൈവർ മുഹമ്മദ് ഫസൽ പറഞ്ഞു. കോ-ഓർഡിനേറ്റർ അൻസാരി, എമർജൻസി മെഡിക്കൽ ടെക്നീഷ്യൻ സമീഷ് മർക്കോസ് എന്നിവരും ഒപ്പം ഉണ്ടായിരുന്നു. വിഷ്ണുവിനെ ഐസിയുവിൽ പ്രവേശിപ്പിച്ച് ചികിത്സ ആരംഭിച്ചെന്ന് മുതലക്കോടം ഹോളി ഫാമിലി ആശുപത്രി എമർജൻസി വിഭാഗത്തിലെ ഡോ. അത്തീഖ് ഉമർ, ന്യൂറോ സർജൻ ഡോ. ആന്‍റണി നെറ്റിക്കാടൻ എന്നിവർ അറിയിച്ചു.

കുത്തുങ്കൽ - നെടുങ്കണ്ടം വൈദ്യുതി ലൈൻ: ആക്‌ഷൻ കൗണ്‍സിൽ പ്രക്ഷോഭത്തിലേക്ക്

നെടുങ്കണ്ടം: കുത്തുങ്കൽ - നെടുങ്കണ്ടം 110 കെവി വൈദ്യുതി ലൈനുമായി ബന്ധപ്പെട്ട ആശങ്കകൾ പരിഹരിച്ചു ന്യായമായ നഷ്ടപരിഹാരം ലഭിച്ചില്ലെങ്കിൽ വൈദ്യുതി ബോർഡിന്‍റെ ഓഫീസ് ഉപരോധം ഉൾപ്പടെയുള്ള സമര പരിപാടി നടത്തേണ്ടിവരുമെന്ന് ആക്‌ഷൻ കൗണ്‍സിൽ ഭാരവാഹികൾ പത്രസമ്മേളനത്തിൽ മുന്നറിയിപ്പു നൽകി. കെഎസ്ഇബിയുടെ വഞ്ചന 2009ൽ വിഭാവനം ചെയ്തതാണ് ഈ പദ്ധതി. 2012 ൽ ഇതുമായി ബന്ധപ്പെട്ട് ബോർഡ്, കർഷകരെ സമീപിച്ചെങ്കിലും കൃഷിഭൂമിയും കാർഷിക വിളകളും ഇല്ലാതെയാക്കുന്ന പദ്ധതിക്കെതിരേ ഉയർന്ന പ്രതിഷേധത്തെത്തുടർന്ന് ബോർഡ് പിൻവാങ്ങുകയായിരുന്നു. എന്നാൽ, തുടർന്നുള്ള വർഷങ്ങളിൽ ജീവനക്കാർ നിശബ്ദമായി സർവേ നടപടി പൂർത്തീകരിക്കുകയും ഉടമസ്ഥർ അറിയാതെ അടയാളക്കല്ലുകൾ സ്ഥാപിക്കുകയും ചെയ്തു. സമീപകാലത്താണ് ഈ ലൈൻ കൊന്പൊടിഞ്ഞാലിൽനിന്നു പണിക്കൻകുടി, മേലേചിന്നാർ, മഞ്ഞപ്പാറ, പച്ചടി, ബഥേൽ, പത്തുവളവ് തുടങ്ങിയ ജനവാസമേഖലകളിലൂടെയാണ് കടന്നുപോകുന്നതെന്നു പ്രദേശവാസികൾ അറിയുന്നത്. ആക്‌ഷൻ കൗണ്‍സിൽ ഏറ്റെടുക്കുന്ന സ്ഥലത്തിന്‍റെ വിലയെപ്പറ്റിയോ കാർഷികവിളകളുടെ നഷ്ടപരിഹാരത്തെപ്പറ്റിയോ കർഷകരോടു സംസാരിക്കുകയോ ബോധ്യപ്പെടുത്തുകയോ ചെയ്യാതെ സർവേ നടപടി തുടരുകയും പണിക്കൻകുടിയിൽ നിർമാണ പ്രവർത്തനം ആരംഭിക്കുകയും ചെയ്ത സാഹചര്യത്തിലാണ് ആക്‌ഷൻ കൗണ്‍സിലിനു രൂപം നൽകിയതെന്ന് ഭാരവാഹികൾ പറഞ്ഞു. വികസനപ്രവർത്തനങ്ങൾക്ക് എതിരല്ല. നിർമാണപ്രവർത്തനങ്ങൾക്കു തടസം നിൽക്കാനും ആഗ്രഹിക്കുന്നില്ല. എന്നാൽ, പ്രദേശവാസികൾക്ക് അർഹമായ നഷ്ടപരിഹാരം ലഭിക്കണം. ആശങ്കകൾ പട്ടയം ലഭിക്കാത്ത നൂറുകണക്കിനു കർഷകർ ലൈൻ പരിധിയിൽ താമസിക്കുന്നുണ്ട്. ഇവർക്ക് ഏതു രീതിയിലുള്ള നഷ്ടപരിഹാരമാണ് നൽകുക എന്നതിൽ വ്യക്തതയില്ല. ചെറുകിട കർഷകർ തിങ്ങിപ്പാർക്കുന്ന പ്രദേശത്തുകൂടി ലൈൻ വലിക്കുന്പോൾ സ്ഥലം രണ്ടായി മുറിയുകയും വസ്തുവിന്‍റെ മൂല്യം കുറയുകയും വില്പന അസാധ്യമായി മാറുകയും ചെയ്യും. കർഷകരുടെ ഉപജീവന മാർഗവും അടയും. ഫെയർവാല്യുവിന്‍റെ ചെറിയൊരു ശതമാനം മാത്രമാണ് നഷ്ടപരിഹാരമായി ലഭിക്കുന്നത്. എന്നാൽ, സമീപകാലത്തു പട്ടയം ലഭിച്ചിട്ടുള്ള സ്ഥലങ്ങളിൽ നാമമാത്രമായ ഫെയർ വാല്യുവാണുള്ളത്. വിളകളുടെ എട്ട് വർഷത്തെ ആദായത്തിന്‍റെ തുകമാത്രം നഷ്ടപരിഹാരമായി നൽകുന്നത് കർഷകർക്കു കനത്ത നഷ്ടമാണ്. റബർ, ജാതി, തെങ്ങ്, കമുക്, മറ്റ് ഫലവൃക്ഷങ്ങൾ തുടങ്ങിയവയ്ക്കും എട്ട് വർഷത്തെ ആദായത്തിന്‍റെ തുക മാത്രമാണ് ലഭിക്കുന്നത്. ആവശ്യങ്ങൾ ലൈൻ/ടവർ കടന്നുപോകുന്ന കൃഷിസ്ഥലത്തിന്‍റെ ഉടമകളെ കൃത്യമായി വിവരം അറിയിക്കണമെന്ന് ഭാരവാഹികൾ ആവശ്യപ്പെട്ടു. ഫെയർ വാല്യുവിനു പകരം വിപണി വില നൽകുക, നിർമാണ പ്രവർത്തനങ്ങൾ ആരംഭിക്കുന്നതിന് മുന്പുതന്നെ നഷ്ടപരിഹാരത്തുക നൽകുക, പട്ടയമില്ലാത്ത കർഷകർക്കും കൃത്യമായ നഷ്ടപരിഹാരം നൽകുക, ദീർഘകാല വിളകളുടെ നഷ്ടപരിഹാര കാലയളവ് കൂട്ടുക, നഷ്ടപരിഹാരത്തുക വർധിപ്പിക്കുക തുടങ്ങിയ ആവശ്യങ്ങളാണ് ഉന്നയിക്കുന്നതെന്ന് ആക്‌ഷൻ കൗണ്‍സിൽ ചെയർമാൻ ഫാ. ജോസഫ് നടുപ്പടവിൽ, കണ്‍വീനർ ജോണ്‍സൻ കിഴക്കേക്കര, രക്ഷാധികാരികളായ സജി പേഴന്പത്തുവയലിൽ, രാജേഷ് അന്പഴത്തുങ്കൽ, ട്രഷറർ ബിനോയി ശൗര്യാംകുഴിയിൽ എന്നിവർ പറഞ്ഞു.

ജില്ലയിൽ ആയുർവേദ ദിനാചാരണം സംഘടിപ്പിച്ചു

ഇടുക്കി: ആരോഗ്യസംരക്ഷണത്തിലും രോഗപ്രതിരോധത്തിലും ശ്രദ്ധ കേന്ദ്രീകരിക്കുന്ന ചികിത്സാരീതിയായ ആയുർവേദത്തെ ലോകം മുഴുവൻ അംഗീകരിച്ചെന്ന് മന്ത്രി റോഷി അഗസ്റ്റിൻ. പാറേമാവ് ആയുർവേദ ആശുപത്രിയിലെ അസ്ഥി-സന്ധിരോഗ വിഭാഗത്തിനായുള്ള പ്രത്യേക ക്ലിനിക്കിന്‍റെയും നവീകരിച്ച നേത്രചികിത്സാ വിഭാഗത്തിന്‍റെയും ഉദ്ഘാടനം ഓണ്‍ലൈനായി നിർവഹിക്കുകയായിരുന്നു അദ്ദേഹം. ജില്ലാപഞ്ചായത്ത് പ്രസിഡന്‍റ് രാരിച്ചൻ നീറണാക്കുന്നേൽ ദേശീയ ആയുർവേദ ദിനാഘോഷ പരിപാടികളുടെയും സ്പെഷാലിറ്റി ഡയബറ്റിക്ക് ക്ലിനിക്കിന്‍റെയും ഉദ്ഘാടനം നിർവഹിച്ചു. ജില്ലാപഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ കെ.ജി. സത്യൻ അധ്യക്ഷത വഹിച്ചു. ദിനാഘോഷത്തോടനുബന്ധിച്ച് ഒരാഴ്ച നീണ്ടുനിൽക്കുന്ന പരിപാടികളാണ് ഭാരതീയ ചികിത്സാ വകുപ്പും നാഷണൽ ആയുഷ് മിഷനും ആയുർവേദ മെഡിക്കൽ അസോസിയേഷൻ ഓഫ് ഇന്ത്യയും ചേർന്ന് സംഘടിപ്പിക്കുന്നത്. പ്രമേഹരോഗികൾക്കായി പ്രത്യേക ഭക്ഷ്യവിഭവങ്ങളുടെ പ്രദർശനവും വിതരണവും ഇതോടൊപ്പം സംഘടിപ്പിച്ചു. ഹയർസെക്കൻഡറി തലത്തിലുള്ള പെണ്‍കുട്ടികൾക്ക് വിളർച്ചാ പരിശോധനാക്യാന്പ് നടത്തും. സ്കൂൾതലത്തിൽ പ്രബന്ധ രചന, ആയുർവേദ ഔഷധപരിചയ ക്വിസ് മത്സരങ്ങൾ, ബോധവത്കരണ ക്ലാസുകൾ, മെഡിക്കൽ ക്യാന്പുകൾ എന്നിവയും സംഘടിപ്പിക്കും. ചീഫ് മെഡിക്കൽ ഓഫീസർ ഡോ. സി.എം. ഹരിമോഹൻ, എ.പി. ഉസ്മാൻ, സണ്ണി ഇല്ലിക്കൽ എന്നിവർ പ്രസംഗിച്ചു.

കെപിഎസ്ടിഎ പരിവർത്തന സന്ദേശ യാത്ര നടത്തി

തൊടുപുഴ: സംസ്ഥാന സർക്കാരിന്‍റെ വിദ്യാഭ്യാസ മേഖലയിലെ വികലമായ പരിഷ്കാരങ്ങൾക്കും നയങ്ങൾക്കും ആനുകൂല്യ നിഷേധങ്ങൾക്കുമേതിരേ കെപിഎസ്ടിഎ സംസ്ഥാന പ്രസിഡന്‍റ് അബ്ദുൾ മജീദിന്‍റെ നേതൃത്വത്തിൽ നടത്തുന്ന പരിവർത്തന സന്ദേശ യാത്രയ്ക്ക് തൊടുപുഴയിൽ സ്വീകരണം നൽകി. ഡിസിസി പ്രസിഡന്‍റ് സി.പി. മാത്യു സ്വീകരണ സമ്മേളനം ഉദ്ഘാടനം ചെയ്തു. വികലമായ നയംമൂലം വിദ്യാഭ്യാസമേഖല ശിഥിലീകരിക്കപ്പെട്ടിരിക്കുകയാണെന്നും ആയിരക്കണക്കിന് അധ്യാപകരുടെ നിയമനങ്ങൾ വർഷങ്ങളായി അംഗീകരിക്കാത്ത സാഹചര്യമാണെന്നും അദ്ദേഹം പറഞ്ഞു. സംഘാടക സമിതി ചെയർമാൻ കെ. ദീപക് അധ്യക്ഷത വഹിച്ചു. കെപിസിസി സംസ്ഥാന ജനറൽ സെക്രട്ടറി അഡ്വ. എസ്. അശോകൻ, മുൻ ഡിസിസി പ്രസിഡന്‍റ് റോയി കെ. പൗലോസ്, സംസ്ഥാന സെക്രട്ടറി പി.എം. നാസർ , സീനിയർ വൈസ് പ്രസിഡന്‍റ് ബി. സുനിൽ കുമാർ, അസോസിയേറ്റ് ജനറൽ സെക്രട്ടറി എൻ. രാജ്മോഹൻ, സംസ്ഥാന സെക്രട്ടറിമാരായ ജോണ്‍ ബോസ്കോ, പി.എസ്. മനോജ് , പി.എം. ശ്രീജിത്ത്, ടി. ആബിദ്, ആർ. താനൂജ, ജോബിൻ കെ. കളത്തിക്കാട്ടിൽ, സുനിൽ ടി.തോമസ്, ഷിന്‍റോ ജോർജ്, ബിജോയ് മാത്യു, ജോർജ് ജേക്കബ്, സജി മാത്യു, ജോസ് കെ. സെബാസ്റ്റ്യൻ, സിബി കെ. ജോർജ്, സിനി ട്രീസ, ലിജോമോൻ ജോർജ് എന്നിവർ പ്രസംഗിച്ചു.

മുട്ടത്തും ബജറ്റ് ടൂറിസം ഉല്ലാസ യാത്ര ആസ്വദിക്കാം...

മുട്ടം: ലോക ടൂറിസം ദിനത്തോട് അനുബന്ധിച്ച് മുട്ടം പഞ്ചായത്തിലെ ടൂറിസം സാധ്യതകൾ അടുത്തറിയുന്നതിന് കെഎസ്ആർടിസിയുടെ ബജറ്റ് ടൂറിസത്തിന്‍റെ ഭാഗമായി മുട്ടം ടൂറിസം കൾച്ചറൽ സൊസൈറ്റിയുടെ നേതൃത്വത്തിൽ ഉല്ലാസ യാത്ര സംഘടിപ്പിക്കും. 27ന് രാവിലെ 8.30ന് മുട്ടം ടാക്സി സ്റ്റാൻഡിൽനിന്ന് കെഎസ്ആർടിസി ബസ് യാത്ര തിരിക്കും. തുടർന്ന് ശങ്കരപ്പള്ളി, പൂതക്കുഴി വെള്ളച്ചാട്ടം, പച്ചിലാംകുന്ന് വ്യൂ പോയിന്‍റ്, അരുവിക്കുത്ത് വെള്ളച്ചാട്ടം, മലങ്കര അണക്കെട്ട് വെള്ളച്ചാട്ടം വ്യൂ പോയിന്‍റ്, മലങ്കര ടൂറിസം ഹബ് എന്നി പ്രദേശങ്ങളിൽ സന്ദർശനം നടത്തും. ഉച്ചക്ക് 1. 30ന് യാത്ര ടൗണിൽ എത്തിന്പോൾ സമാപന യോഗവും യാത്രാനുഭവങ്ങൾ പങ്ക് വെക്കലും നടക്കും. തൊടുപുഴ മേഖലയിലെ വിദ്യാഭ്യാസ സ്ഥാപനങ്ങൾ, റെസിഡന്‍റ്സ് അസോസിയേഷനുകൾ, മർച്ചന്‍റ് അസോസിയേഷൻ, കുടുംബശ്രീ യൂണിറ്റുകൾ, ഗവ. ജീവനക്കാരുടെ സംഘടനകൾ തുടങ്ങിയവരുമായി സഹകരിച്ച് എല്ലാ മാസവും ഉല്ലാസ യാത്രകൾ സംഘടിപ്പിക്കുമെന്ന് കോ-ഓർഡിനേഷൻ സമിതി അംഗങ്ങളായ ടോമി ജോർജ് മൂഴിക്കുഴിയിൽ, പി.എം. സുബൈർ, സുജി പുളിക്കൽ, അജയൻ താന്നിക്കാമറ്റം എന്നിവർ അറിയിച്ചു.

മുട്ടം ഐഎച്ച്ആർഡി കോളജിൽ ബിരുദദാനം നാളെ

തൊടുപുഴ: ഐഎച്ച്ആർഡിയുടെ കീഴിലുള്ള മുട്ടം കോളജ് ഓഫ് അപ്ലൈഡ് സയൻസിൽ വിവിധ കോഴ്സുകൾ പൂർത്തിയാക്കിയ വിദ്യാർഥികളുടെ ബിരുദദാന ചടങ്ങ് ‘ലോറിയ ടുകെ 25’ നാളെ നടക്കുമെന്ന് പ്രിൻസിപ്പൽ വി.ടി. ശ്രീകല പത്രസമ്മേളനത്തിൽ അറിയിച്ചു. രാവിലെ 9.30ന് കോളജ് ഓഡിറ്റോറിയത്തിൽ ചേരുന്ന സമ്മേളനം ജില്ലാ സെഷൻസ് ജഡ്ജി പി.എസ്. ശശികുമാർ, ജില്ലാ കളക്ടർ ഡോ. ദിനേശൻ ചെറുവാട്ട് എന്നിവർ ചേർന്ന് ഉദ്ഘാടനം ചെയ്യും. ഐഎച്ച്ആർഡി ഡയറക്ടർ ഡോ. വി.എ. അരുണ്‍കുമാർ അധ്യക്ഷത വഹിക്കും. എറണാകുളം ഗവ.മോഡൽ എൻജിനിയറിംഗ് കോളജ് പ്രിൻസിപ്പൽ ഡോ. ഇ.എസ്. ജയചന്ദ്രൻ, കോളജ് ഓഫ് അപ്ലൈഡ് സയൻസ് കോ-ഓർഡിനേറ്റർ ഡോ. എസ്. സിന്ധു എന്നിവർ പ്രസംഗിക്കും. ബിഎസ്‌സി കംപ്യൂട്ടർ സയൻസ്, ബികോം കംപ്യൂട്ടർ ആപ്ലിക്കേഷൻ, എംഎസ്‌സി കംപ്യൂട്ടർ സയൻസ്, എംകോം ഫിനാൻസ് ആൻഡ് ടാക്സേഷൻ എന്നീ യുജി, പിജി, റെഗുലർ കോഴ്സുകൾ പൂർത്തീകരിച്ച വിദ്യാർഥികളെയും 2024-25 വർഷം നടത്തിയ ആഡ് ഓണ്‍ കോഴ്സുകൾ, ഷോർട്ട് ടേം കോഴ്സുകൾ എന്നിവ പൂർത്തിയാക്കിയവർക്കുമാണ് ബിരുദദാന ചടങ്ങ് സംഘടിപ്പിച്ചിരിക്കുന്നത്. പത്രസമ്മേളനത്തിൽ കംപ്യൂട്ടർ സയൻസ് വിഭാഗം മേധാവി ജീസ് ജോർജ്, അസി. പ്രഫസർമാരായ ജീസി എം. ജോസ്, സിനി കെ. സുലൈമാൻ, ഓഫീസ് അസിസ്റ്റന്‍റ് വിൻസെന്‍റ് അഗസ്റ്റിൻ എന്നിവരും പങ്കെടുത്തു.

കലയന്താനി സ്കൂളിൽ പച്ചക്കുടുക്ക പദ്ധതി

തൊടുപുഴ: കുട്ടികളുടെ കാർഷിക സന്പാദ്യ പദ്ധതിയായ കാഡ്സ് പച്ചക്കുടുക്ക കലയന്താനി സെന്‍റ് ജോർജ് ഹയർ സെക്കൻഡറി സ്കൂളിൽ ആരംഭിച്ചു. 50 കുട്ടികളാണ് പദ്ധതിയിൽ ചേർന്നത്. രണ്ടു ലക്ഷം രൂപയുടെ നാടൻ കാർഷിക ഉത്പന്നങ്ങൾ സംഭരിക്കുന്നതിനാണ് ലക്ഷ്യമിടുന്നത്. കാഡ്സ് ചെയർമാൻ ആന്‍റണി കണ്ടിരിക്കൽ ഉദ്ഘാടനം നിർവഹിച്ചു. സ്കൂൾ പ്രിൻസിപ്പൽ ഫാ. ആന്‍റണി പുലിമലയിൽ അധ്യക്ഷത വഹിച്ചു. കാഡ്സ് ഡയറക്ടർ സജി മാത്യു, പോൾ സേവ്യർ, എം.എസ്. സണ്ണി, കെ.എം. മത്തച്ചൻ എന്നിവർ പ്രസംഗിച്ചു. ആദ്യദിനത്തിൽ 4300 രൂപയുടെ ഉത്പന്നങ്ങളാണ് സംഭരിച്ചത്. മുരിങ്ങയില, കറിവേപ്പില,വഴുതന, കുന്പളം, കോവയ്ക്ക, ചേന, പപ്പായ, ചീര, പയർ, കാന്താരി മുളക് എന്നീ ഉത്പന്നങ്ങളാണ് കുട്ടികൾ എത്തിച്ചത്.

ഭൂനിയമ ചട്ടം: കേരള കോണ്‍. മാർച്ചും ധർണയും 30ന്

തൊടുപുഴ: സംസ്ഥാന സർക്കാർ അംഗീകരിച്ച ഭൂപതിവ് ചട്ട ഭേദഗതിയിലെ ജനദ്രോഹവ്യവസ്ഥകളിൽ പ്രതിഷേധിച്ച് കേരള കോണ്‍ഗ്രസ് ജില്ലാ കമ്മിറ്റിയുടെ നേതൃത്വത്തിൽ ചെറുതോണിയിൽ 30ന് കർഷക മാർച്ചും ധർണയും സംഘടിപ്പിക്കും. സർക്കാർ പുറപ്പെടുവിച്ച ഭൂ ചട്ടങ്ങൾ ജനങ്ങളെ പിഴിയാനുള്ള ഗൂഢാലോചനയാണെ ന്നും ജനങ്ങളിൽ അരക്ഷിതാവസ്ഥ സൃഷ്ടിക്കുന്നതാണെന്നും പാർട്ടി ജില്ലാ പ്രസിഡന്‍റ് പ്രഫ. എം.ജെ. ജേക്കബ് ആരോപിച്ചു. വർഷങ്ങളായി താമസിച്ചു വരുന്ന ഭൂമിയിൽ അവകാശം നിലനിർത്തണമെങ്കിൽ മുന്പ് പട്ടയത്തിന് അപേക്ഷിച്ചതുപോലെ വീണ്ടും സർക്കാരിൽ അപേക്ഷ സമർപ്പിക്കേണ്ട ഗതികേടിലാണ് കുടിയേറ്റ ജനത. വർഷങ്ങൾ കാത്തിരുന്ന ശേഷമാണ് കർഷകർക്ക് പട്ടയം ലഭിച്ചത്. എന്നാൽ പട്ടയം ലഭിച്ച ഭൂമിയിൽ വാസഗൃഹം ഉൾപ്പെടെയുള്ളവ തുടർന്നും കൈവശംവച്ച് അനുഭവിക്കണമെങ്കിൽ 2025ലെ ചട്ടങ്ങളിൽ പറയുന്ന അനുമതിക്കായി വീണ്ടും അപേക്ഷ സമർപ്പിക്കേണ്ടിവരും. ലക്ഷക്കണക്കിന് പേർ പുതിയ നിയമത്തിന്‍റെ അടിസ്ഥാനത്തിൽ അപേക്ഷകൾ സമർപ്പിക്കേണ്ടിവരും. 3000 ചതുരശ്ര അടി വരെയുള്ള കെട്ടിടങ്ങളെ പിഴ അടയ്ക്കുന്നതിൽനിന്ന് ഒഴിവാക്കിയിട്ടുണ്ടെങ്കിലും എല്ലാ അപേക്ഷകരും അപേക്ഷയ്ക്കൊപ്പം സർക്കാർ നിശ്ചയിച്ചിട്ടുള്ള അപേക്ഷാഫീസ് അടയ്ക്കേണ്ടിവരും. ഓരോ അപേക്ഷകരുടെയും മുഴുവൻ അപേക്ഷകളും ജില്ലയിലെ ഉദ്യോഗസ്ഥർ പരിശോധിച്ചതിനുശേഷം സംസ്ഥാന സർക്കാരിന്‍റെ അനുമതി വാങ്ങണമെന്ന വ്യവസ്ഥ വിഷയം സങ്കീർണമാക്കും. ഭൂമിയുടെ വിസ്തീർണം കണക്കാക്കി പിഴ അടയ്ക്കണമെന്ന വ്യവസ്ഥ ജില്ലയിലെ ടൂറിസം മേഖലയെയും കാര്യമായി ബാധിക്കുമെന്നും അദ്ദേഹം പറഞ്ഞു. പ്രതിഷേധ ധർണ പാർട്ടി ചെയർമാൻ പി.ജെ. ജോസഫ് എംഎൽഎ ഉദ്ഘാടനം ചെയ്യും.

മൂലമറ്റം -കളമശേരി 220 കെവി ലൈൻ പൊട്ടിവീണു

മൂലമറ്റം: അറക്കുളത്ത് 220 കെവി ടവർ ലൈൻ വൻ ശബ്ദത്തോടെ പൊട്ടിവീണു. ഇന്നലെ ഉച്ചകഴിഞ്ഞ് മൂന്നോടെയായിരുന്നു സംഭവം. അറക്കുളം ആലാനിക്കൽ - ഞരളംപുഴ റോഡിന് സമീപത്താണ് മൂലമറ്റം - കളമശേരി 220 കെവി ലൈൻ പൊട്ടി വീണത്. ഈ സമയം ലൈനിനു സമീപം ആളുകൾ ആരും ഇല്ലാതിരുന്നതിനാൽ വൻ ദുരന്തം ഒഴിവായി. ടവർ ലൈൻ എൽടി ലൈനിലേക്കും വീണതിനാൽ നിരവധി വീടുകളിലെ വൈദ്യുത ഉപകരണങ്ങൾ തകരാറിലായി. ലൈനിലൂടെ അധിക വൈദ്യുതി പ്രവാഹമുണ്ടായതാണ് തകരാറിനിടയാക്കിയത്. ലൈൻ പൊട്ടിവീണ വിവരം വൈദ്യുതി ബോർഡിൽ വിളിച്ചറിയിച്ചതിനെത്തുടർന്ന് ലൈൻ ഓഫ് ചെയ്തതാണ് അപകടം ഒഴിവാകാൻ ഇടയാക്കിയത്. ഇൻസുലേഷനു തകരാർ സംഭവിച്ചതാണ് ലൈൻ പൊട്ടി വീഴാൻ കാരണമെന്നാണ് പ്രാഥമികവിവരം. ഇതിനു മുന്പ് ഇവിടെയും ഇന്‍റർമീഡിയറ്റ് പ്രദേശത്തും ടവർ ലൈൻ പൊട്ടിവീഴുകയും നിരവധി പേരുടെ വൈദ്യുതി ഉപകരണങ്ങൾ തകരാറിലാവുകയും ചെയ്തിട്ടുണ്ട്. യഥാസമയം നടത്തേണ്ട അറ്റകുറ്റപ്പണികൾ നടത്താത്തതും ഉപകരണങ്ങളുടെ കാലപ്പഴക്കവുമാണ് ലൈൻ പതിവായി പൊട്ടി വീഴാൻ കാരണമെന്ന് ചൂണ്ടിക്കാണിക്കപ്പെടുന്നു.

ഈസ്റ്റ് സോണ്‍ കലാമത്സരം: ഹോളി ഫാമിലി ജേതാക്കൾ

തൊടുപുഴ: അൽ അസർ ലോ കോളേജിൽ നടന്ന ഈസ്റ്റ് സോണ്‍ കലാമത്സരത്തിൽ മുതലക്കോടം ഹോളി ഫാമിലി കോളജ് ഓഫ് നഴ്സിംഗ് തുടർച്ചയായി രണ്ടാം തവണയും ഓവറോൾ ചാന്പ്യൻമാരായി. ഇതിനു പുറമേ ഈസ്റ്റ് സോണിലെ മികച്ച എസ്എൻഎ യൂണിറ്റിനും അർഹരായി. സോണൽ അഡ്വൈസർ പ്രഫ. എസ്. ദീപ സമ്മാനങ്ങൾ വിതരണം ചെയ്തു. ഇടുക്കി, കോട്ടയം, പത്തനംതിട്ട എന്നീ ജില്ലകളിൽനിന്നുള്ള 500-ഓളം നഴ്സിംഗ് കോളജുകളിൽനിന്നുള്ള വിദ്യാർഥികളാണ് മത്സരങ്ങളിൽ പങ്കെടുത്തത്. സംസ്ഥാനതല കലാ മത്സരങ്ങൾക്കും ഹോളി ഫാമിലിയിലെ വിദ്യാർഥികൾ അർഹത നേടി. ഉന്നത വിജയം നേടിയ വിദ്യാർഥികളെ സ്കൂൾ ഓഡിറ്റോറിയത്തിൽ ചേർന്ന അനുമോദന യോഗത്തിൽ പ്രിൻസിപ്പൽ ഡോ. ജയൻ ജയിംസ്, മാനേജർ സിസ്റ്റർ മേഴ്സി ആഗ്നൽ, അധ്യാപകർ എന്നിവർ അഭിനന്ദിച്ചു.

നിർമലാസിറ്റിയിൽ നിയന്ത്രണം നഷ്ടപ്പെട്ട കാർ മറിഞ്ഞ് രണ്ടു പേർക്ക് പരിക്ക്

കട്ടപ്പന: നിർമലാസിറ്റിയിൽ നിയന്ത്രണം നഷ്ടപ്പെട്ട കാർ മറിഞ്ഞ് അപകടം. രണ്ടുപേർക്ക് പരിക്കേറ്റു. തൂക്കുപാലം തകിടിയേൽ പി.എസ്. ബിജുകുമാർ, ആലപ്പുഴ നെടിയംപതാൽ എം.ഡി. മജിമോൻ എന്നിവർക്കാണ് പരിക്കേറ്റത്. ബുധനാഴ്ച ഉച്ചകഴിഞ്ഞ് രണ്ടോടെയാണ് അപകടം ഉണ്ടായത്. ഇടുക്കി ഭാഗത്തുനിന്നുവന്ന ടാറ്റ പഞ്ച് വാഹനമാണ് അപകടത്തിൽപ്പെട്ടത്. റോഡിനു വശത്തെ രണ്ട് കലുങ്കുകൾ തകർത്തശേഷം വാഹനം മരത്തിൽ തങ്ങിനിന്നു. പരിക്കേറ്റവരെ കട്ടപ്പനയിലെ സ്വകാര്യ ആശുപത്രിയിൽ പ്രവേശിപ്പിച്ചു.

ക്ഷീരകർഷകരുടെ ഇൻസെന്‍റീവ് വർധിപ്പിക്കണം: കേരള കോണ്‍.-എം

തൊടുപുഴ: കേരള കോണ്‍ഗ്രസ്-എം നിയോജകമണ്ഡലം കമ്മിറ്റിയുടെ നേതൃത്വത്തിൽ കെ.എം. മാണി ഭവനിൽ ക്ഷീരകർഷക കണ്‍വൻഷൻ നടത്തി. നിയോജകമണ്ഡലം പ്രസിഡന്‍റ് ജിമ്മി മറ്റത്തിപ്പാറ ഉദ്ഘാടനം ചെയ്തു. ക്ഷീരകർഷകരുടെ ഇൻസെന്‍റീവ് വർധിപ്പിച്ചില്ലെങ്കിൽ മുന്നോട്ടുപോകാനാവാത്ത സ്ഥിതിയാണുള്ളതെന്ന് അദ്ദേഹം പറഞ്ഞു. ഒരു ലിറ്റർ പാലിന് 50 രൂപയോളം ചെലവു വരുന്ന സാഹചര്യത്തിൽ കാലിവളർത്തൽ നടത്തുന്ന കർഷകർ പ്രതിസന്ധിയിലാണ്. ഉത്പാദന ചെലവിന് ആനുപാതികമായി പാൽവില വർധിപ്പിക്കണമെന്നും അദ്ദേഹം ആവശ്യപ്പെട്ടു. ക്ഷീര കർഷക യൂണിയൻ നിയോജകമണ്ഡലം പ്രസിഡന്‍റ് ബിനോയ് മുടവനാട്ട് അധ്യക്ഷത വഹിച്ചു. ഭാരവാഹികളായ ബിനീഷ് മുഞ്ഞനാട്ടുകുന്നേൽ, കുഞ്ഞുമോൻ വെട്ടിക്കുഴിച്ചാലിൽ, ജോജോ അഴികണ്ണിക്കൽ, രാജേഷ് വീട്ടിക്കൽ, ജോർജ് കുഴിഞ്ഞാലിൽ, ബെന്നി ചെറുവള്ളാത്ത്, ജോണ്‍സണ്‍ അടപ്പൂർ, ബിറ്റോയ് കൊടിയംകുന്നേൽ, ജോയി തട്ടാറ, കുട്ടിയച്ചൻ താഴത്തുവീട്ടിൽ, എം.പി. മോഹനചന്ദ്രൻനായർ, മനു പുറവക്കാട്ട്, തോമസ് നടുപടവിൽ, ശശി മകരംചേരിൽ തുടങ്ങിയവർ പ്രസംഗിച്ചു.

കെഎസ്ആർടിസി ബസും ടൂറിസ്റ്റ് ബസും കൂട്ടിയിടിച്ച് അപകടം

പെരുവന്താനം: ദേശീയപാതയിൽ അമലഗിരിക്ക് സമീപം കെഎസ്ആർടിസി ബസും ടൂറിസ്റ്റ് ബസും കൂട്ടിയിടിച്ച് അപകടം. ഇന്നലെ രാവിലെ 9.30നായിരുന്നു സംഭവം. കോട്ടയത്തേക്ക് പോകുകയായിരുന്ന കെഎസ്ആർടിസി ബസ് എതിരെ വന്ന ടൂറിസ്റ്റ് ബസുമായി കൂട്ടിയിടിക്കുകയായിരുന്നു. അമലഗിരിക്ക് സമീപത്തെ കൊടുംവളവിലാണ് അപകടം നടന്നത്. അപകടത്തിൽ നിരവധി യാത്രക്കാർക്ക് പരിക്കേറ്റിട്ടുണ്ട്. ഇവരെ മുണ്ടക്കയം മെഡിക്കൽ ട്രസ്റ്റ് ആശുപത്രിയിൽ പ്രവേശിപ്പിച്ചു. ആരുടെയും പരിക്ക് ഗുരുതരമല്ല. അപകടത്തെത്തുടർന്ന് ദേശീയപാതയിൽ ഗതാഗത തടസവമുണ്ടായി. പെരുവന്താനം പോലീസിന്‍റെ നേതൃത്വത്തിൽ മേൽ നടപടികൾ സ്വീകരിച്ചു.

ഉന്നത വിജയികൾക്ക് ആദരവ് നൽകി ഗ്രീൻവാലി ഡെവലപ്മെന്‍റ് സൊസൈറ്റി

ഇടുക്കി: കോട്ടയം അതിരൂപതയുടെ സാമൂഹ്യസേവന വിഭാഗമായ ഗ്രീൻവാലി ഡെവലപ്മെന്‍റ് സൊസൈറ്റിയുടെ നേതൃത്വത്തിൽ എസ്എസ്എൽസി, പ്ലസ് ടു ബാച്ചുകളിൽ ഉന്നത വിജയം നേടിയ സ്വാശ്രയ സംഘം പ്രവർത്തകരുടെ കുട്ടികളെ ആദരിച്ചു. നാരകക്കാനം സെന്‍റ് ജോസഫ് പാരിഷ് ഹാളിൽ ചേർന്ന യോഗം കോട്ടയം അതിരൂപത വികാരി ജനറാൾ ഫാ. തോമസ് ആനിമൂട്ടിൽ ഉദ്ഘാടനം ചെയ്തു. ഗ്രീൻവാലി ഡെവലപ്മെന്‍റ് സൊസൈറ്റി സെക്രട്ടറി ഫാ. സുജിത്ത് കാഞ്ഞിരത്തുംമൂട്ടിൽ അധ്യക്ഷത വഹിച്ചു. മരിയാപുരം പഞ്ചായത്ത് വൈസ് പ്രസിഡന്‍റ് ബിൻസി റോബി, ഗ്രീൻവാലി ഡെവലപ്മെന്‍റ് സൊസൈറ്റി പ്രോഗ്രാം ഓഫീസർ സിറിയക് പറമുണ്ടയിൽ, പ്രോഗ്രാം കോ-ഓർഡിനേറ്റർ സിസ്റ്റർ ജിജി വെളിഞ്ചായിൽ, മെറിൻ ഏബ്രഹാം, ജസ്റ്റിൻ നന്ദികുന്നേൽ, അനിമേറ്റർ മിനി ജോണി, ബിജു അഗസ്റ്റിൻ, സിബി മാത്യു, ബിന്ദു റോണി എന്നിവർ പ്രസംഗിച്ചു. വിവിധ ഗ്രാമങ്ങളിലായി നൂറിലധികം കുട്ടികളെ ആദരിച്ചതായി ഗ്രീൻവാലി ഡെവലപ്മെന്‍റ് സൊസൈറ്റി സെക്രട്ടറി ഫാ. സുജിത് കാഞ്ഞിരത്തുംമൂട്ടിൽ അറിയിച്ചു.

നഗരത്തിൽ ഭിക്ഷാടക മാഫിയ വിലസുന്നു

തൊടുപുഴ: ഭിക്ഷാടനം നിരോധിച്ച നഗരത്തിൽ ഭിക്ഷാടക മാഫിയ വിലസുന്നു. ഇതര സംസ്ഥാനങ്ങളിൽനിന്നുള്ള സ്ത്രീകളാണ് കൂടുതലായും നഗരത്തിന്‍റെ വിവിധ ഭാഗങ്ങളിൽ തന്പടിച്ചു ഭിക്ഷാടനം നടത്തിവരുന്നത്. നഗരം ഭിക്ഷാടക മുക്തമാക്കിയിട്ടു വർഷങ്ങളായി. എന്നാൽ, ഓണത്തോടനുബന്ധിച്ചുള്ള ദിവസങ്ങളിലാണ് ഭിക്ഷാടകമാഫിയ തൊടുപുഴ കേന്ദ്രീകരിച്ചു പ്രവർത്തനം സജീവമാക്കിയത്. ഇതു വ്യാപാരികൾക്കും ഏറെ ബുദ്ധിമുട്ട് സൃഷ്ടിക്കുകയാണ്. ദിവസത്തിൽ പലപ്രാവശ്യം ഒരു കടയിൽത്തന്നെ ഭിക്ഷാടനത്തിന് ഇവർ എത്തുന്നുണ്ട്. ഇതിനു പുറമേ പ്രധാന ബസ് കാത്തിരിപ്പ് കേന്ദ്രങ്ങൾ, തുണിക്കടകൾ, ഹോട്ടലുകൾ, ബസ് സ്റ്റാൻഡ് പരിസരം തുടങ്ങിയ സ്ഥലങ്ങൾ കേന്ദ്രീകരിച്ചും ഭിക്ഷാടനം സജീവമാണ്. സമീപനാളിലെങ്ങും ഇല്ലാതിരുന്ന ഇവർ എവിടെനിന്ന് എത്തിയതാണെന്നു കണ്ടെത്തേണ്ടതുണ്ട്. ഇതിനു പിന്നിൽ വൻ റാക്കറ്റ് തന്നെ പ്രവർത്തിക്കുന്നതായാണ് സൂചന. നടത്തിപ്പുകാരുടെ കൈകളിൽ രാവിലെ വാഹനത്തിൽ വിവിധ ടൗണുകൾ കേന്ദ്രീകരിച്ചു ഭിക്ഷാടകരെ എത്തിച്ച ശേഷം വൈകുന്നേരം തിരികെ കൊണ്ടുപോകും. ദിനംപ്രതി ലഭിക്കുന്ന തുകയുടെ നിശ്ചിത ശതമാനം ഇവർക്കു നൽകും. ഇപ്രകാരം വിവിധ ടൗണുകളിൽനിന്നായി ദിനംപ്രതി ആയിരക്കണക്കിനു രൂപ നടത്തിപ്പുകാരുടെ കൈകളിലെത്തും. അവസരം ലഭിച്ചാൽ മോഷണം ഉൾപ്പെടെയുള്ളവയും നടത്തും. സംസ്ഥാനത്തിന്‍റെ വിവിധ ഭാഗങ്ങളിൽനിന്നു കുട്ടികളെ തട്ടിക്കൊണ്ടുപോകൽ അടക്കം നടത്തുന്നത് ഇത്തരം ഭിക്ഷാടക സംഘങ്ങളാണ്. നഗരത്തിലെ വ്യാപാരികൾക്കും ടൗണിൽ വിവിധ ആവശ്യങ്ങൾക്കായി എത്തുന്നവർക്കും ഭിക്ഷാടകസംഘം തലവേദന സൃഷ്ടിക്കുന്നുണ്ട്. അടിയന്തരമായി ഇക്കാര്യത്തിൽ നടപടി സ്വീകരിക്കണമെന്നും ഭിക്ഷാടന നിരോധനം ഫലപ്രദമായി നടപ്പാക്കണമെന്നുമാണ് ജനങ്ങളുടെ ആവശ്യം. നടപടി വേണം -മർച്ചന്‍റ്സ് അസോ. തൊടുപുഴ: ഭിക്ഷാടന വിമുക്തമാക്കിയ നഗരപ്രദേശത്തു സമീപനാളിൽ ഭിക്ഷാടകരുടെ എണ്ണം വർധിച്ചുവരികയാണ്. ഇതര സംസ്ഥാനങ്ങളിൽനിന്നുള്ളവരാണ് കൂടുതലായും എത്തുന്നത്. ഇതു വ്യാപാരികൾക്കും ബുദ്ധിമുട്ട് സൃഷ്ടിക്കുന്നു. ഇക്കാര്യത്തിൽ അടിയന്തര നടപടി സ്വീകരിക്കണമെന്നു മർച്ചന്‍റ്സ് അസോ.പ്രസിഡന്‍റ് രാജു തരണിയിൽ ആവശ്യപ്പെട്ടു. ഇതു സംബന്ധിച്ചു നഗരസഭാ ചെയർമാനു കത്ത് നൽകിയതായും അദ്ദേഹം പറഞ്ഞു.

നാശകാരിയായ കാട്ടുപന്നിയെ വെടിവച്ചു കൊന്നു

അടിമാലി: കൊന്നത്തടി മേഖലയിൽ നാളുകളായി നാശം വിതച്ച കാട്ടുപന്നിയെ പഞ്ചായത്തിന്‍റെയും വനം വകുപ്പിന്‍റെയും നേതൃത്വത്തില്‍ വെടിവച്ചു കൊന്നു. കഴിഞ്ഞ കുറച്ചുനാളുകളായി കൊന്നത്തടി പഞ്ചായത്തിന്‍റെ വിവിധമേഖലകളില്‍ കാട്ടുപന്നിശല്യം അതിരൂക്ഷമാണ്. കാട്ടുപന്നിശല്യം പ്രതിരോധിക്കാന്‍ ഇടപെടല്‍ വേണമെന്ന ആവശ്യം പ്രദേശവാസികള്‍ക്കിടയില്‍ നിലനില്‍ക്കെയാണ് മിഷന്‍ വൈല്‍ഡ് പിഗിന്‍റെ ഭാഗമായി നടത്തിയ ഡ്രൈവിലൂടെ പ്രദേശത്ത് നാശം വരുത്തിയ കാട്ടുപന്നികളില്‍ ഒന്നിനെ വെടിവച്ചു കൊന്നത്. ജനവാസമേഖലയില്‍ ഇറങ്ങി അതിക്രമം കാട്ടുന്ന കാട്ടുപന്നികളെ അംഗീകൃത ഷൂട്ടറുടെ സാന്നിധ്യത്തില്‍ വെടിവയ്ക്കാമെന്ന 2022ലെ ചീഫ് വൈല്‍ഡ് ലൈഫ് വാര്‍ഡന്‍റെ ഉത്തരവ് പിന്തുടര്‍ന്നാണ് നടപടി. ഏകദേശം രണ്ടു വയസ് തോന്നിക്കുന്ന പെണ്‍പന്നിയെയാണ് വെടിവച്ചു കൊന്നത്. പഞ്ചായത്തിലെ അംഗീകൃത ഷൂട്ടര്‍ ജിജോ കുളങ്ങരയുടെ സാന്നിധ്യത്തിലായിരുന്നു നടപടി. കൊന്നത്തടി പഞ്ചായത്തിലെ കുരുവിളസിറ്റി ഭാഗത്ത് കാര്‍ഷിക മേഖലയില്‍ വിളനാശം വരുത്തിവന്നിരുന്ന കാട്ടുപന്നികളില്‍ ഒന്നിനെയാണ് വെടിവച്ചത്. പന്നിയുടെ ജഡം മറവുചെയ്തു. വെടികൊണ്ട പന്നി ഏതാനും മീറ്റര്‍ ദൂരം ഓടി സമീപത്തെ കിണറ്റില്‍ വീഴുകയായിരുന്നു. കിണറ്റില്‍നിന്നു പുറത്തെടുത്താണ് ജഡം മറവുചെയ്തത്. വനംവകുപ്പ് 16 മുതല്‍ ഒക്ടോബര്‍ 30 വരെ നടത്തുന്ന വന്യമൃഗ ആക്രമണ ലഘൂകരണ തീവ്രയജ്ഞ പരിപാടിയുടെ ഭാഗമായി കൊന്നത്തടി പഞ്ചായത്തില്‍നിന്നു ഹെല്‍പ്പ് ഡെസ്‌ക്കുകള്‍ മുഖേന കാട്ടുപന്നി ശല്യത്തിനെതിരായ പരാതികള്‍ ലഭിച്ചിരുന്നു. ഈ പരാതികളുടെകൂടി അടിസ്ഥാനത്തിലാണ് വനംവകുപ്പിന്‍റെ ഇപ്പോഴത്തെ നടപടി.

മൂന്നാറിൽ സ്പാത്തോഡിയയുടെ "ഓപ്പറേഷൻ സിന്ദൂർ'

മറയൂർ: മൂന്നാറിനെയും പരിസര പ്രദേശങ്ങളെയും കൂടുതൽ സുന്ദരിയാക്കി സ്പാത്തോഡിയ മരങ്ങളുടെ ഒാപ്പറേഷൻ സിന്ദൂർ. പച്ചപ്പട്ടു പുതച്ച തേയിലത്തോട്ടങ്ങൾക്കിടയിൽ സിന്ദൂരം തൂവി നിൽക്കുന്ന സ്പാത്തോഡിയ മരങ്ങൾ വിസ്മയ കാഴ്ചയാണ് ഒരുക്കുന്നത്. മൂന്നാർ-ഉദുമൽപ്പെട്ട് അന്തർസംസ്ഥാന പാതയോരത്തു വാഗുവരൈ എസ്റ്റേറ്റ് മുതൽ ചട്ടമൂന്നാർ വരെയുള്ള പ്രദേശങ്ങളിലാണ് "മലേറിയ മരം'' എന്നറിയപ്പെടുന്ന ആഫ്രിക്കൻ ടുലിപ് മരങ്ങൾ വർണാഭമായി പൂത്തുനിൽക്കുന്നത്. കൊതുകിനെ കൊല്ലി ബ്രിട്ടീഷ് കാലത്തു മലേറിയ പനിയെ ചെറുക്കാൻ വേണ്ടി നട്ടുപിടിപ്പിച്ചതാണ് ഈ മരങ്ങളെന്നാണ് വിശ്വാസം. കൊതുകുകളെ ആകർഷിച്ചു നശിപ്പിക്കാനുള്ള അപൂർവ കഴിവാണ് സ്പാത്തോഡിയയുടെ പൂക്കളുടെ പ്രത്യേകത. പൂവിന്‍റെ കുന്പിളാകൃതിയിലുള്ള മൊട്ടുകൾ വെള്ളം നിറഞ്ഞവയാണ്, ഈച്ചകളെ കൊല്ലുന്ന സ്വാഭാവിക പ്രതിരോധശേഷിയും ഇവയ്ക്കുണ്ട്. പൂക്കൾ വിരിയുന്നതോടെ പരിസരത്തെ കൊതുകുശല്യവും കുറയുന്നു. ഇതു പ്രദേശവാസികൾക്കും സഞ്ചാരികൾക്കും അനുഗ്രഹമാണ്. ആഫ്രിക്കൻ ടുലിപ് ബിഗ്നോണിയേസി കുടുംബത്തിൽപ്പെട്ട സ്പാത്തോഡിയ കാന്പനുലാറ്റ "ആഫ്രിക്കൻ ടുലിപ്പ്’ അല്ലെങ്കിൽ ’കൃതജ്ഞതയുടെ ജ്വാല’ എന്നാണ് അറിയപ്പെടുന്നത്. ഏഴു മുതൽ 25 മീറ്റർ വരെ ഉയരത്തിൽ വളരുന്ന ഈ വൃക്ഷം ആഫ്രിക്കയിലെ ഉഷ്ണമേഖലാ വനങ്ങളിൽനിന്നുള്ളതാണ്. ചുവപ്പ്-ഓറഞ്ച് നിറത്തിലുള്ള മണിയാകൃതിയിലുള്ള പൂക്കൾ ഈ മരത്തെ അലങ്കാര വൃക്ഷമായി ലോകമെന്പാടും പ്രശസ്തമാക്കുന്നു. എന്നാൽ, ഈ മരം ലോകത്തെ ഏറ്റവും ആക്രമണകാരികളായ 100 ഇനങ്ങളിൽ ഒന്നായും നാമനിർദേശം ചെയ്യപ്പെട്ടിട്ടുണ്ട്, കാരണം ഉഷ്ണമേഖലാ പ്രദേശങ്ങളിൽ ഇത് അധിനിവേശ സസ്യമായി മാറാറുണ്ട്. ഓസ്ട്രേലിയയിലെ ക്വീൻസ്‌ലാൻഡിൽ 2002ലെ ലാൻഡ് പ്രൊട്ടക്‌ഷൻ ആക്ട് പ്രകാരം ഇത് ക്ലാസ് 3 കീട ഇനമായി പ്രഖ്യാപിക്കപ്പെട്ടിട്ടുണ്ട്.

ജനത്തെ വലച്ച് ജൽജീവൻ പദ്ധതി

മുട്ടം: മീനച്ചിൽ കുടിവെള്ളപദ്ധതിക്കായി ജൽജീവൻ മിഷൻ അധികൃതർ കുത്തിപ്പൊളിച്ച ചള്ളാവയൽ ഭാഗത്ത് റോഡിൽ വാഹനങ്ങൾ തുടർച്ചയായി താഴുന്നത് ഇതുവഴിയുള്ള ഗതാഗതം പ്രതിസന്ധിയിലാക്കുന്നു. കെഎസ്ആർടിസി ബസുകൾ, ചരക്ക് കയറ്റി വരുന്ന വലിയ ലോറികൾ ഉൾപ്പെടെ നിരവധി വാഹനങ്ങളാണ് കഴിഞ്ഞ ദിവസം കുഴിയിൽ ചാടിയത്. ഏതാനും ദിവസങ്ങളായി ഇതേനില തുടരുകയാണ്. ഇതേത്തുടർന്ന് ഇതുവഴിയുള്ള വാഹനങ്ങൾ മുന്നോട്ടു ചലിക്കാൻ കഴിയാതെ ഏറെ നേരമാണ് റോഡിൽ കുരുങ്ങുന്നത്. ഇന്നലെയും രാവിലെ മുതൽ നിരവധി വാഹനങ്ങൾ ഇവിടെ താഴ്ന്നു. പാലാ - ഈരാറ്റുപേട്ട - മുട്ടം മേഖലകളിലേക്കുള്ള മൂന്നു റോഡുകളുടെ സംഗമസ്ഥാനമാണ് ചള്ളാവയൽ. സാധാരണ നിലയിൽതന്നെ ഇവിടെ വാഹനങ്ങൾ തിരിഞ്ഞുപോകാൻ ഏറെ പ്രയാസമാണ്. ഇതിനിടയിലാണ് കുടിവെള്ള പദ്ധതിക്കായി റോഡ് കുത്തിപ്പൊളിച്ചത്. കുത്തിപ്പൊളിച്ച റോഡ് രണ്ടു വർഷങ്ങൾ കഴിഞ്ഞിട്ടും ടാറിംഗ് നടത്താത്തതിൽ പ്രതിഷേധിച്ച് കഴിഞ്ഞ ദിവസം തോട്ടുങ്കര വികസന സമിതിയുടെ നേതൃത്വത്തിൽ ജൽജീവൻ മിഷൻ അധികൃതരുടെ വാഹനം തടഞ്ഞു പ്രതിഷേധിച്ചിരുന്നു. മുട്ടം എംവിഐപി ഓഫീസിനു സമീപത്ത് ജൽജീവൻ മിഷന്‍റെ പണികൾക്ക് ഉപയോഗിച്ചിരുന്ന ജെസിബിയും റോഡിൽ താഴ്ന്നിരുന്നു. മാത്തപ്പാറ ഭാഗത്ത് ജൽജീവൻ മിഷൻ പദ്ധതിക്കു വേണ്ടി കുത്തിപ്പൊളിച്ച റോഡ് ടാറിംഗ് നടത്താത്തതിൽ പ്രതിഷേധിച്ച് പ്രദേശവാസികൾ നിരന്തരം സമരത്തിലായിരുന്നു. ഇതേത്തുടർന്നാണ് ഇവിടെ ടാറിംഗ് ജോലികൾ ആരംഭിച്ചത്.

വിദ്യാഭ്യാസ മന്ത്രി പൊതുവിദ്യാഭ്യാസ മേഖലയെ തകർക്കുന്നു: എ.പി. ഉസ്മാൻ

ചെറുതോണി: അശാസ്ത്രീയ പരിഷ്കാരങ്ങൾ കൊണ്ടുവന്ന് വിദ്യാഭ്യാസ മന്ത്രി പൊതുവിദ്യാഭ്യാസ മേഖലയെ തകർക്കുകയാണെന്ന് കെപിസിസി അംഗം എ.പി. ഉസ്മാൻ. കെപിഎസ്ടിഎയുടെ നേതൃത്വത്തിൽ നടത്തുന്ന പൊതുവിദ്യാഭ്യാസ പരിവർത്തന യാത്രയായ മാറ്റൊലിക്ക് ചെറുതോണിയിൽ നൽകിയ സ്വീകരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. എൽഡിഎഫ് സർക്കാരിന്‍റെ ഭരണകാലഘട്ടത്തിലെ പരിഷ്കാരങ്ങൾ പൊതു വിദ്യാഭ്യാസമേഖലയെ ചിന്നഭിന്നമാക്കിയിരിക്കയാണെന്നും നൂറുകണക്കിന് അധ്യാപകർക്കു ജോലി നഷ്ടപ്പെടാൻ ഇതു കാരണമായെന്നും ഉസ്മാൻ ആരോപിച്ചു. കെപിഎസ്ടിഎ ജില്ലാ പ്രസിഡന്‍റ് ജോബിൻ കളത്തിക്കാട്ടിൽ അധ്യക്ഷത വഹിച്ചു. ചടങ്ങിൽ ജോർജ് ജേക്കബ്, വി.കെ. ആറ്റ്‌ലി, ഡിസിസി ജന.സെക്രട്ടറി എം.ഡി. അർജുനൻ, സി.പി. സലീം, ടോമി പാലക്കിൽ, ജോസ് കെ. സെബാസ്റ്റ്യൻ തുടങ്ങിയവർ പ്രസംഗിച്ചു.

രാജാക്കാട് മേഖലയിൽ വൈറൽപനി പടരുന്നു

രാജാക്കാട്: രാജാക്കാട് മേഖലയിൽ വൈറൽ പനി പടരുന്നു. കഴിഞ്ഞ ഏതാനും ആഴ്ചകളായി പനിബാധിച്ച നിരവധിയാളുകൾ ചികിത്സയിലാണ്. രാജാക്കാട് കമ്യൂണിറ്റി ഹെൽത്ത് സെന്‍റർ നിലവിലുണ്ടെങ്കിലും കിടത്തിച്ചികിത്സ ഇല്ലാത്തതിനാൽ രോഗികൾ ഏറെ കഷ്ടപ്പെടുകയാണ്. ഒപി മാത്രം പ്രവർത്തിക്കുന്ന ഈ സാമൂഹ്യാരോഗ്യ കേന്ദ്രത്തിൽ ആവശ്യത്തിന് മരുന്നു പോലുമില്ലാത്ത സ്ഥിതിയാണുള്ളത്. രാജാക്കാടുള്ള സ്വകാര്യ ആശുപത്രികളെ ആശ്രയിക്കേണ്ട ഗതികേടിലാണ് സാധാരണക്കാരായ രോഗികൾ. 26 കിലോമീറ്റർ അകലെയാണ് കൂടുതൽ സൗകര്യങ്ങളുള്ള ആശുപത്രി ഉള്ളത്. രാജാക്കാട് മുല്ലക്കാനത്തുള്ള സർക്കാർ ആശുപത്രിയിൽ കെട്ടിടസൗകര്യങ്ങൾ ആവശ്യത്തിൽ കൂടുതലുണ്ടെങ്കിലും കിടത്തിച്ചികിത്സയില്ല. പതിറ്റാണ്ടുകളായി ഈ ആവശ്യമുന്നയിച്ച് വിവിധ രാഷ്‌ട്രീയ-സന്നദ്ധ സംഘടനകൾ പ്രക്ഷോഭങ്ങൾ സംഘടിപ്പിക്കുന്നുണ്ടെങ്കിലും അധികൃതരുടെ ഭാഗത്തുനിന്ന് അനുകൂലമായ ഒരു നടപടിയും ഉണ്ടാകുന്നില്ല. രാജാക്കാട് ഗ്രാമപഞ്ചായത്തിൽ പ്രവർത്തിക്കുന്ന ഈ ആതുരാലയം നെടുങ്കണ്ടം ബ്ലോക്ക് പഞ്ചായത്തിന്‍റെ കീഴിലുള്ളതാണ്.

സ്കൂൾ കെട്ടിടം ഉദ്ഘാടനം: കൗണ്‍സിലിൽ വാഗ്വാദം

തൊടുപുഴ: അടിസ്ഥാന സൗകര്യം ഒരുക്കാതെ സ്കൂൾ കെട്ടിടത്തിന്‍റെ ഉദ്ഘാടനം നടത്താനുള്ള നീക്കത്തെ ചൊല്ലി മുനിസിപ്പൽ കൗണ്‍സിലിൽ തർക്കം. സ്കൂളിന് വേണ്ട സൗകര്യങ്ങൾ ഒരുക്കാതെ തുറന്ന് നൽകരുതെന്ന് കൗണ്‍സിലർ സനീഷ് ജോർജ് യോഗത്തിൽ ആവശ്യപ്പെട്ടു. തർക്കത്തിനൊടുവിൽ സ്കൂൾ കെട്ടിട ഉദ്ഘാടനം തീരുമാനമാകാതെ കൗണ്‍സിൽ പിരിയുകയായിരുന്നു. നഗരസഭയിലെ 29-ാം വാർഡിൽ സ്ഥിതി ചെയ്യുന്ന കോലാനി യുപി സ്കൂളിന്‍റെ ഉദ്ഘാടനം നടത്തുന്നതുമായി ബന്ധപ്പെട്ടാണ് തർക്കം ഉടലെടുത്തത്. വാർഡ് കൗണ്‍സിലർ മെർലി രാജുവാണ് അജണ്ടയിൽ സ്കൂൾ ഉദ്ഘാടനം നടത്തണമെന്ന വിഷയം അവതരിപ്പിച്ചത്. അടിസ്ഥാന സൗകര്യം ഒരുക്കാതെ സ്കൂൾ തുറന്നുനൽകാനുള്ള നീക്കത്തെ സനീഷ് ജോർജ് എതിർത്തു. സ്കൂളിന് പുതിയ കെട്ടിടം നിർമിക്കുന്നതിനായി ഈ ഭരണസമിതിയുടെ കാലഘട്ടത്തിൽ പല തവണകളായി 47 ലക്ഷത്തോളം രൂപ അനുവദിച്ചിരുന്നു. കെട്ടിടനിർമാണം അന്തിമ ഘട്ടത്തിൽ എത്തുകയും ചെയ്തു. എന്നാൽ, വരാനിരിക്കുന്ന തദ്ദേശ തെരഞ്ഞടുപ്പ് മുന്നിൽക്കണ്ട് സിപിഎമ്മിന്‍റെ പ്രാദേശിക ഘടകത്തിന്‍റെ നിർദേശ പ്രകാരം വാർഡ് കൗണ്‍സിലർ മെർലി രാജുവും സിപിഎമ്മിന്‍റെ പ്രാദേശിക നേതാക്കളൂം ചേർന്ന് സ്കൂൾ കെട്ടിടം തട്ടിക്കൂട്ടി ഉദ്ഘാടനം നടത്താൻ തീരുമാനിക്കുകയായിരുന്നവെന്നാണ് സനീഷ് ജോർജ് ആരോപിച്ചത്. സ്കൂളിലെ പ്രധാന അധ്യാപകന്‍റെ നിർദേശം പാലിക്കാതെയും മുനിസിപ്പൽ കൗണ്‍സിലിന്‍റെയും മുനിസിപ്പൽ ചെയർമാന്‍റെയും അനുമതി തേടാതെയും ഒക്ടോബർ അഞ്ചിന് സ്കൂൾ കെട്ടിടം ഉദ്ഘാടനം ചെയ്യാനായിരുന്നു തീരുമാനം. എന്നാൽ, സ്കൂളിൽ ടോയ്‌ലെറ്റ് ഉൾപ്പെടെയുള്ള നിർമാണ പ്രവർത്തനങ്ങൾ ഇനിയും പൂർത്തിയാകാനുണ്ട്. ‌ ഇതിനെയാണ് സനീഷ് ജോർജ് എതിർത്തത്. സനീഷിന്‍റെ വാദങ്ങൾ ശരിയാണെന്ന് കണ്‍സിലിലെ ഭൂരിപക്ഷം അംഗങ്ങൾ അംഗീകരിക്കുകയും ചെയ്തു. സനീഷ് ജോർജ് വ്യക്തമാക്കിയ കാര്യങ്ങൾ വസ്തുതാപരമാണെന്ന് എൽഡിഎഫ് കൗണ്‍സിലർ ആർ. ഹരി ചൂണ്ടിക്കാട്ടി. നിർമാണം പൂർത്തിയാക്കാതെ തെരഞ്ഞെടുപ്പു രാഷ്‌ട്രീയലക്ഷ്യംവച്ച് സ്കൂൾ കെട്ടിടത്തിന്‍റെ ഉദ്ഘാടനം നടത്താൻ അനുവദിക്കില്ലെന്നും സനീഷ് വ്യക്തമാക്കി. തുടർന്ന് തീരുമാനം മാറ്റിവയ്ക്കാൻ ചെയർമാൻ കെ. ദീപക്കിന്‍റെ അധ്യക്ഷതയിൽ ചേർന്ന കൗണ്‍സിൽ തീരുമാനിയ്ക്കുകയായിരുന്നു. മങ്ങാട്ടുകവല ബസ് സ്റ്റാൻഡിൽനിന്നു വൈക്കം, പാലാ, മണക്കാട് റൂട്ടുകളിൽനിന്നുള്ള ബസുകൾ സർവീസ് ആരംഭിക്കാനുള്ള നടപടി സ്വീകരിക്കണമെന്ന പ്രമേയം നഗരസഭാ കൗണ്‍സിലിൽ അവതരിപ്പിച്ചു. മങ്ങാട്ടുകവലയിൽ നഗരസഭ പുതിയ ബസ് സ്റ്റാൻഡ് ഷോപ്പിംഗ് കോംപ്ലക്സ് നിർമിച്ച സാഹചര്യത്തിൽ പടിഞ്ഞാറൻ മേഖലയിൽനിന്നു വരുന്ന ബസുകൾ ഇവിടെവരെ സർവീസ് നീട്ടണമെന്നാണ് ആവശ്യം. കിഴക്കൻ മേഖലയിലേക്കു പോകുന്ന ബസുകൾ പുതിയ ഷോപ്പിംഗ് കോംപ്ലക്സിനു മുന്നിലേക്കു കയറ്റിനിർത്തണമെന്നും ആവശ്യപ്പെട്ടു. കൗണ്‍സിലർമാരായ എം.എ. കരിം, ജോർജ് ജോണ്‍ എന്നിവർ അവതരിപ്പിച്ച പ്രമേയം കൗണ്‍സിൽ അംഗീകരിച്ചു. ഇതിനായി ട്രാഫിക് അഡ്വൈസറി കമ്മിറ്റി ഉടൻതന്നെ വിളിച്ചുചേർക്കാൻ മോട്ടോർ വാഹന വകുപ്പ് അധികൃതരോട് ആവശ്യപ്പെടാനും യോഗത്തിൽ തീരുമാനിച്ചു.

ജില്ലയിൽ ഡിജിറ്റൽ വിള സർവേക്ക് തുടക്കം

തൊടുപുഴ: കാർഷിക വിളകളെക്കുറിച്ചുള്ള സമഗ്ര ഡേറ്റാബേസ് തയാറാക്കുന്ന കൃഷി വകുപ്പിന്‍റെ ഡിജിറ്റൽ ക്രോപ്പ് സർവേ നടപടികൾക്ക് ജില്ലയിൽ തുടക്കമായി. കാർഷിക വിളകളെക്കുറിച്ച് സമഗ്ര ഡേറ്റാബേസ് തയാറാക്കുന്ന പദ്ധതി ജില്ലയിൽ എട്ടു വില്ലേജുകളിലാണ് നടപ്പാക്കുന്നത്. ഓരോ ഭൂ ഉടമകളെപ്പറ്റിയുമുള്ള മുഴുവൻ കാര്യങ്ങളും ഈ അടിസ്ഥാന വിവരശേഖരണത്തിൽ ഉണ്ടാകും. വ്യക്തികളുടെ പേര്, സർവേ നന്പരുകൾ, സ്ഥലവിസ്തീർണം എന്നിവയ്ക്കു പുറമേ സ്ഥലത്തിന്‍റെ ലൊക്കേഷനും ഇതിലുണ്ടാകും. തൊടുപുഴ, ഇളംദേശം, ദേവികുളം, അടിമാലി ബ്ലോക്കുകളിലെ കാന്തല്ലൂർ, പള്ളിവാസൽ, വെള്ളത്തൂവൽ, ആലക്കോട്, കരിങ്കുന്നം, കോടിക്കുളം, മണക്കാട്, ഉടുന്പന്നൂർ വില്ലേജുകളിലാണ് പദ്ധതി നടക്കുന്നത്. ആദ്യം പദ്ധതി ആരംഭിച്ച കോടിക്കുളം വില്ലേജിൽ വിവിധ സർവേ നന്പരുകളിലുള്ള 500 ൽ അധികം പ്ലോട്ടുകളുടെ വിവരം ശേഖരിച്ചു കഴിഞ്ഞു. മറ്റുള്ള വില്ലേജുകളിൽ സർവേയർമാരെ തെരഞ്ഞെടുത്ത് പരിശീലനം നൽകുന്നത് അടക്കമുള്ള തുടർനടപടികൾ പുരോഗമിക്കുകയാണ്. നിലവിൽ അന്പതോളം സർവേയർമാർ ഇതിനുള്ള ശ്രമത്തിലാണ്. സർവേ നടത്തുന്നത് കൃഷിഭവനുകളുടെ നേതൃത്വത്തിൽ താത്കാലികമായി തെരഞ്ഞെടുത്ത സർവേയർമാരാണ്. പ്ലസ്ടു വിദ്യാഭ്യാസ യോഗ്യതയുള്ളവരെയാണ് തെരഞ്ഞെടുക്കുക. കൂടാതെ സ്മാർട്ട് ഫോണ്‍ കൈകാര്യം ചെയ്യാനുള്ള കഴിവും, പ്രദേശത്തെ സ്ഥലങ്ങളെയും വിളകളെപ്പറ്റിയും ധാരണയുമുണ്ടാവണം. ഒരു വാർഡിൽ ഒരാളെന്ന കണക്കിലാണ് നിയമനം. ഇവർക്ക് ഒരു പ്ലോട്ടിലെ വിവരം തയാറാക്കുന്നതിന് 20 രൂപയാണ് പ്രതിഫലം നൽകുക. ഒരാൾക്ക് പരാമാവധി 1500 പ്ലോട്ടുകളുടെ വിവരശേഖരണം നടത്താനാകും. ഇത് ഡേറ്റ പരിശോധിച്ച് ശരിയാണെന്ന് ബോധ്യപ്പെട്ട് അംഗീകാരം നൽകുന്പോൾ പണം നൽകും. പ്രതിഫലം ബാങ്ക് അക്കൗണ്ട് വഴിയാണ് കൃഷി വകുപ്പ് നൽകുക. സർവേക്കായി എട്ടു ലക്ഷം രൂപ വകയിരുത്തിയിട്ടുണ്ട്. 60:40 എന്ന അനുപാതത്തിൽ കേന്ദ്രസംസ്ഥാന സർക്കാരുകളാണ് തുക അനുവദിക്കുന്നത്. മൊബൈൽ ആപ്പിലൂടെ മുഴുവൻ വിസ്തീർണത്തിൽ കൃഷി ചെയ്യുന്ന സ്ഥലത്തിന്‍റെ അളവ്,വിളകൾ, നിലവിലെ അവസ്ഥ,ജലസേചന സൗകര്യം, വിളകൾ നട്ട തീയതി എന്നിവ രേഖപ്പെടുത്തും. കൂടാതെ വിളകളുടെ ജിയോടാഗ് ചെയ്ത ഫോട്ടോയും അപ്‌ലോഡ് ചെയ്യണം. ഇത് കൃഷിഭവൻ തലത്തിൽ പരിശോധിച്ച് അംഗീകാരം നൽകും. റവന്യു വകുപ്പ് ഡിജിറ്റൽ റിക്കാർഡ് തയാറാക്കിയ പഞ്ചായത്തുകൾ മാത്രമാണ് നിലവിൽ സർവേയിൽ ഉൾപ്പെടുക. മറ്റുള്ളവ ഡിജിറ്റലൈസ് ചെയ്ത് റവന്യു രേഖകൾ ലഭിക്കുന്ന ഘട്ടത്തിൽ സർവേ നടത്തും. ഒരു വർഷത്തിൽ രണ്ടു സീസണുകളിലാണ് സർവേ. കൃഷിഭൂമിക്ക് പ്രാധാന്യം നൽകിയാണ് സർവേ നടത്തുക. ഭാവിയിൽ പിഎം കിസാൻ, പിഎംഎഫ്ബിവൈ തുടങ്ങിയ ആനുകൂല്യങ്ങളും, കാർഷിക വായ്പകളും ഈ ഡേറ്റാബേസുമായി സംയോജിപ്പിക്കും. എല്ലാ വർഷവും സർവേക്ക് തുടർ പ്രവർത്തനങ്ങളുമുണ്ടാകും.

അധ്യാപക അവാര്‍ഡ് ജേതാവിന് ആദരവ്

നെടുങ്കണ്ടം: സംസ്ഥാന സര്‍ക്കാരിന്‍റെ എല്‍പി വിഭാഗം അധ്യാപകനുള്ള അവാര്‍ഡ് നേടിയ കോമ്പയാര്‍ സെന്‍റ് തോമസ് എല്‍പി സ്‌കൂള്‍ ഹെഡ് മാസ്റ്റര്‍ ബിജു ജോര്‍ജിനെ സ്‌കൂളില്‍ ആദരിച്ചു. സ്‌കൂള്‍ ഓഡിറ്റോറിയത്തില്‍ നടന്ന പരിപാടി എം.എം. മണി എംഎല്‍എ ഉദ്ഘാടനം ചെയ്തു. എംസിബിഎസ് പ്രൊവിന്‍ഷ്യല്‍ സുപ്പീരിയര്‍ ഫാ. സൈമണ്‍ ചിറമേല്‍ അധ്യക്ഷത വഹിച്ചു. നെടുങ്കണ്ടം പഞ്ചായത്ത് പ്രസിഡന്‍റ് പ്രിമി ലാലിച്ചന്‍ മുഖ്യപ്രഭാഷണം നടത്തി. ബ്ലോക്ക് പഞ്ചായത്തംഗം വനജ സജീവ് ലാല്‍, ഗ്രാമപഞ്ചായത്ത് അംഗം ജോജി ഇടപ്പള്ളിക്കുന്നേല്‍, കോമ്പയാര്‍ സെന്‍റ് മേരീസ് മലങ്കര പള്ളി വികാരി ഫാ. തോമസ് മണ്ണില്‍, സംസ്‌കാര പോഷിണീ വായനശാലാ പ്രസിഡന്‍റ് എസ്. ഓമനക്കുട്ടന്‍, ഉപജില്ലാ വിദ്യാഭ്യാസ ഓഫീസര്‍ ജെന്‍സി ബിനു, പിടിഎ പ്രസിഡന്‍റ് രാകേഷ് രാജന്‍ തുടങ്ങിയവര്‍ പ്രസംഗിച്ചു.

ഹൈറേഞ്ച് മേഖലാ കാല്‍നട തീര്‍ഥയാത്ര 30ന് ആരംഭിക്കും

അടിമാലി: കോതമംഗലം യെല്‍ദോ മോര്‍ ബസേലിയോസ് ബാവായുടെ കബറിങ്കലേക്കുള്ള ഹൈറേഞ്ച് മേഖല കാല്‍നട തീര്‍ഥയാത്ര 30ന് ആരംഭിക്കും. കോവില്‍ക്കടവ് സെന്‍റ് ജോര്‍ജ് പള്ളിയില്‍നിന്നും നെടുങ്കണ്ടം സെന്‍റ് മേരീസ് സിറിയന്‍ സിംഹാസന പള്ളിയില്‍നിന്നും കാല്‍നട തീര്‍ഥയാത്രയ്ക്ക് തുടക്കം കുറിക്കും. ഒക്ടോബർ ഒന്നിന് ശാന്തമ്പാറ, തൊട്ടിക്കാനം, മുരിക്കുംതൊട്ടി, മാങ്ങാത്തൊട്ടി, രാജകുമാരി, രാജാക്കാട്, പണിക്കന്‍കുടി, തോപ്രാംകുടി, വെള്ളത്തൂവല്‍, മാങ്കുളം, ബൈസണ്‍വാലി മേഖലകളിലെ വിവിധ ദേവാലയങ്ങളില്‍നിന്നു തീര്‍ഥയാത്ര പുറപ്പെടും. രാത്രി തീര്‍ഥയാത്രകള്‍ അടിമാലിയില്‍ എത്തിച്ചേരും. ഇതുമായി ബന്ധപ്പെട്ട ഒരുക്കങ്ങള്‍ പൂര്‍ത്തീകരിച്ചതായി യാക്കോബായ സഭ ഹൈറേഞ്ച് മേഖലാ മെത്രാപ്പോലീത്ത ഡോ. ഏലിയാസ് മോര്‍ അത്താനാസിയോസ് പത്രസമ്മേളനത്തില്‍ അറിയിച്ചു. രണ്ടിന് പുലര്‍ച്ചെ അടിമാലി സെന്‍റ് ജോര്‍ജ് കത്തീഡ്രലിൽനിന്ന് തീര്‍ഥയാത്ര കോതമംഗലത്തെ ബാവായുടെ കബറിങ്കലേക്ക് പുറപ്പെടും. രണ്ടിന് അടിമാലിക്കു പുറമേ വിവിധ മേഖലകളില്‍നിന്നു പുറപ്പെടുന്ന തീര്‍ഥയാത്രകള്‍ കുത്തുകുഴി മാരമംഗലം സെന്‍റ് ജോര്‍ജ് പള്ളിയുടെ മോര്‍ ബസേലിയോസ് കുരിശുംതൊട്ടിയില്‍ ധൂപപ്രാര്‍ഥനയില്‍ പങ്കുചേരും. തുടര്‍ന്ന്, ഹൈറേഞ്ചില്‍നിന്നുള്ള നാല്‍പ്പത്തി രണ്ടാമത് തീര്‍ഥയാത്രയുടെ സ്മരണാര്‍ഥം 42 പതാകകള്‍ വഹിച്ചുകൊണ്ടുള്ള പതാകപ്രയാണം നടക്കും. യാത്രയ്ക്ക് കോഴിപ്പിള്ളി കവലയില്‍ സ്വീകരണം നല്‍കും. വൈകുന്നേരം അഞ്ചോടെ തീര്‍ഥയാത്ര കബറിങ്കലെത്തി പ്രാര്‍ഥിച്ച് വഴിപാടര്‍പ്പിച്ച് പിരിയും.

ജസ്റ്റീസ് വി.കെ. മോഹനൻ കമ്മീഷൻ തെളിവെടുപ്പ് നടത്തി

ഇടുക്കി: താനൂർ ബോട്ടപകടവുമായി ബന്ധപ്പെട്ട് നിയമിക്കപ്പെട്ട ജസ്റ്റീസ് വി.കെ. മോഹനൻ കമ്മീഷൻ സംസ്ഥാന വ്യാപകമായി നടത്തുന്ന രണ്ടാം ഘട്ട പൊതു തെളിവെടുപ്പും ഹിയറിംഗും ദേവികുളത്ത് സംഘടിപ്പിച്ചു. മാട്ടുപ്പെട്ടി മേഖലയിലെ ഗതാഗത സൗകര്യം മെച്ചപ്പെടുത്തുക, വയോജനങ്ങൾക്കും ഭിന്നശേഷിക്കാർക്കും ദേവികുളത്തെ വിനോദസഞ്ചാര കേന്ദ്രങ്ങളിൽ ബോട്ടിംഗിന് സുഗമമായി എത്തിച്ചേരാനുള്ള സൗകര്യമൊരുക്കുക, ബോട്ടിൽ കയറ്റുന്ന സഞ്ചാരികളുടെ എണ്ണം ക്രമപ്പെടുത്തുക, എന്നിങ്ങനെ നിരവധി നിർദേശങ്ങൾ തെളിവെടുപ്പിൽ ഉയർന്നുവന്നു. രജിസ്റ്റർ ചെയ്ത 31 പേരിൽ ആറ് പേർ ഹിയറിംഗിൽ പങ്കെടുത്തു. ജലഗതാഗത മേഖലയിൽ ഭാവിയിൽ അപകടങ്ങൾ ആവർത്തിക്കാതിരിക്കുന്നതിന് പരിഹാര മാർഗങ്ങൾ ശിപാർശ ചെയ്യുക, നിലവിലുള്ള ലൈസൻസിംഗ് എൻഫോഴ്സ്മെന്‍റ് സംവിധാനങ്ങൾ പര്യാപ്തമാണോയെന്ന് പരിശോധിക്കുക, മുൻകാലങ്ങളിലുണ്ടായ ബോട്ട് അപകടങ്ങളെത്തുടർന്ന് നിയോഗിച്ച അന്വേഷണ കമ്മീഷനുകൾ സമർപ്പിച്ച റിപ്പോർട്ടുകളിൽ ബന്ധപ്പെട്ട വകുപ്പുകൾ സ്വീകരിച്ച നടപടികൾ അവലോകനം ചെയ്യുക തുടങ്ങിയ ലക്ഷ്യങ്ങളോടെയാണ് തെളിവെടുപ്പ് നടക്കുന്നത്. കമ്മീഷനംഗം ഡോ. കെ.പി. നാരായണൻ, മെംബർ സെക്രട്ടറി റിട്ട. ജില്ലാ ജഡ്ജി ടി.കെ. രമേഷ് കുമാർ, കോർട്ട് ഓഫീസർ റിട്ട. മുൻസിഫ് മജിസ്ട്രേറ്റ് ജി. ചന്ദ്രശേഖരൻ, കമ്മീഷൻ ജോയിന്‍റ് സെക്രട്ടറി ശിവ പ്രസാദ്, അഡ്വ. ടി.പി. രമേശ്, ഡെപ്യൂട്ടി തഹസിൽദാർ പി.എം. റഹീം, പഞ്ചായത്ത് വൈസ് പ്രസിഡന്‍റ് സെൽവൻ തുടങ്ങിയവർ പങ്കെടുത്തു. ഇന്ന് ഇടുക്കി കളക്‌ടറേറ്റ് കോണ്‍ഫറൻസ് ഹാളിലും നാളെ കുമളി ഡിടിപിസി ഹാളിലും ഹിയറിംഗ് നടക്കും.

ഗുഡ് ബൈ, ഞങ്ങൾ വിട പറയുന്നു... ഉപ്പുകുന്നിലെ രണ്ടു സ്ഥാപനങ്ങൾ

ഉടുന്പന്നൂർ: മതിയായ സൗകര്യങ്ങൾ ഇല്ലാത്തതിനാൽ രണ്ടു സർക്കാർ സ്ഥാപനങ്ങൾ ഉപ്പുകുന്നിൽനിന്ന് പടിയിറങ്ങാൻ ഒരുങ്ങുന്നു. സർക്കാർ ഹോമിയോ ഡിസ്പെൻസറിയും വെറ്ററിനറി ആശുപത്രിയുമാണ് ഉപ്പുകുന്നിനോട് വിട പറയാനൊരുങ്ങുന്നത്. രണ്ടു സ്ഥാപനങ്ങളും മൂലേക്കാടിനു മാറ്റാനാണ് അധികൃതരുടെ ആലോചന. ആരെങ്കിലും സൗജന്യമായി സ്ഥലം വിട്ടുനൽകാൻ തയാറായാൽ മാത്രമേ സ്ഥാപനങ്ങൾ ഉപ്പുകുന്നിൽ നിലനിൽക്കൂ. രണ്ടു സ്ഥാപനങ്ങൾക്കും സ്വന്തമായി കെട്ടിടം ഉണ്ടെങ്കിലും ഇവയ്ക്ക് മതിയായ സൗകര്യങ്ങൾ ഇല്ല. തീർത്തും പരിമിതമായ സൗകര്യങ്ങളിലാണ് സ്ഥാപനങ്ങളുടെ പ്രവർത്തനം. ഹോമിയോ ആശുപത്രി നിലനിൽക്കുന്നത് പ്രകൃതി ദുരന്തസാധ്യതയുള്ള മേഖലയിലുമാണ്. ഇതിനാൽ രണ്ടു സ്ഥാപനങ്ങൾക്കും സൗകര്യപ്രദമായ കെട്ടിടം നിർമിക്കാൻ അനുയോജ്യമായ സ്ഥലം കണ്ടെത്താനുള്ള തയാറെടുപ്പിലാണ് ഉടുന്പന്നൂർ പഞ്ചായത്ത്.

ഉപ്പുകുന്നിൽ സ്ഥലം നൽകാൻ ആരും മുന്നോട്ടുവരാത്തതിനാൽ അധികം അകലെയല്ലാത്ത മൂലേക്കാടിന് ഇവ മാറ്റാനാണ് തീരുമാനം. എന്നാൽ ഉപ്പുകുന്നു ടൗണിൽ തന്നെ രണ്ടു സ്ഥാപനങ്ങളും നിലനിർത്താൻ നടപടി വേണമെന്നാണ് നാട്ടുകാരുടെ ആവശ്യം. ടൗണിന്‍റെ വികസനത്തിന് സ്ഥാപനങ്ങൾ ഇവിടെ നിലനിൽക്കണമെന്നാണ് നാട്ടുകാർ പറയുന്നത്.

വാളറയില്‍ വഴിയോര വിശ്രമകേന്ദ്രം വിശ്രമിച്ചു മടുക്കുന്നു!

അടിമാലി: അടിമാലി വാളറയില്‍ ടൂറിസം വകുപ്പിനു കീഴിലുള്ള വഴിയോര വിശ്രമകേന്ദ്രം കാടുകയറി നശിക്കുന്നു. വാളറ ടൗണിനു സമീപം ദേശീയപാത 85ന് അരികിലാണ് വിശ്രമകേന്ദ്രമുള്ളത്. 1987 ഫെബ്രുവരി 27നാണ് വാളറയില്‍ ടൂറിസം വകുപ്പിനു കീഴിലുള്ള വഴിയോര വിശ്രമ കേന്ദ്രത്തിന്‍റെ ഉദ്ഘാടനം നടന്നത്. മൂന്നാറിലേക്കെത്തുന്ന വിനോദസഞ്ചാരികള്‍ക്ക് വഴിമധ്യേ താമസിക്കാനും വിശ്രമിക്കാനും സൗകര്യമൊരുക്കുകയെന്ന ലക്ഷ്യത്തോടെയായിരുന്നു പദ്ധതി യാഥാര്‍ഥ്യമാക്കിയത്. എന്നാല്‍, വര്‍ഷം പലതു പിന്നിടുമ്പോഴും ഈ പദ്ധതിയുമായി ബന്ധപ്പെട്ട കെട്ടിട, സ്ഥല സൗകര്യങ്ങള്‍ ഇനിയും ടൂറിസം വകുപ്പ് വേണ്ടവിധം പ്രയോജനപ്പെടുത്തിയിട്ടില്ല. മുമ്പ് സ്വകാര്യവ്യക്തികള്‍ക്കു കരാര്‍ അടിസ്ഥാനത്തില്‍ വാടകയ്ക്കു നല്‍കിയായിരുന്നു ഈ കേന്ദ്രം. നിലവില്‍ കേന്ദ്രം അടഞ്ഞുകിടക്കുകയാണ്. കെട്ടിടവും പരിസരപ്രദേശങ്ങളും കാടുകയറി മൂടിയിരിക്കുകയുമാണ്. പരിപാലനമില്ലാതെ കിടന്നാല്‍ ലക്ഷങ്ങള്‍ മുടക്കി നിര്‍മിച്ചിട്ടുള്ള കെട്ടിടം ക്രമേണ നാശത്തിലേക്കു കൂപ്പുകുത്തും. ടൂറിസം വകുപ്പ് നേരിട്ട് നടത്തിയാല്‍പോലും വരുമാനമുണ്ടാക്കാന്‍ കഴിയുന്ന പദ്ധതിയാണിങ്ങനെ കാടുകയറി നശിക്കുന്നത്.

കെ.സി. ജോർജിന്‍റെ സൗഹൃദത്തിന്‍റെ ഓർമയിൽ സഹപ്രവർത്തകർ

കട്ടപ്പന: സൗഹൃദങ്ങളെ ഹൃദയത്തോടു ചേർത്തു പിടിച്ച അതുല്യ കലാകാരനായിരുന്നു കാലയവനികയിൽ മറഞ്ഞ കെ.സി. ജോർജ് എന്ന് പ്രമുഖ നാടക - സിനിമ സീരിയൽ നടൻ പ്രമോദ് വെളിയനാട്. നാടക രചയിതാവും സംവിധായകനും എഴുത്തുകാരനും സംസ്ഥാന നാടക അവാർഡ് ജേതാവുമായിരുന്ന കെ.സി. ജോർജിന്‍റെ ഒന്നാം ചരമവാർഷികദിനം ഉദ്ഘാടനം ചെയ്യുകയായിരുന്നു പ്രമോദ്. അക്ഷരങ്ങളിൽ അഴകു വിരിയിച്ചിരുന്ന കെസി എന്നു ചുരുക്കപ്പേരിൽ എല്ലാവരാലും അറിയപ്പെടുന്ന കെ.സി. ജോർജ് നമ്മുടെ എല്ലാം കണ്ണിൽനിന്നു മാത്രമേ മറഞ്ഞിട്ടുള്ളൂ, മനസിൽനിന്ന് ഒരിക്കലും മറയുകയില്ലെന്നും അദ്ദേഹം പറഞ്ഞു. നാടകം ഇരുതല മൂർച്ചയുള്ള ഒരായുധമാണ്, ഈ ആയുധത്തെ തേച്ചുമിനുക്കി മങ്ങലേൽപ്പിക്കാതെ കട്ടപ്പന എന്ന നാടിനെ ഏഴാം കടലുകൾക്കപ്പുറത്തേക്കെത്തിച്ച അതുല്യ പ്രതിഭകളായിരുന്നു എം.സി. കട്ടപ്പനയും കെ.സി. ജോർജുമെന്നും പ്രമോദ് വെളിയനാട് കൂട്ടിച്ചേർത്തു. കട്ടപ്പന സിഎസ്ഐ ഗാർഡൻ ഓഡിറ്റോറിയത്തിൽ നടന്ന അനുസ്മരണ യോഗത്തിൽ നഗരസഭ ചെയർപേഴ്സണ്‍ ബീന ടോമി അധ്യക്ഷത വഹിച്ചു. എം.സി. ബോബൻ സ്വാഗതം പറഞ്ഞു. രാജീവൻ മാന്പള്ളി അനുസ്മരണ പ്രഭാഷണം നടത്തി. കെ.സി. ജോർജിന്‍റെ പേരിലുള്ള പ്രഥമ സംസ്ഥാന നാടക അവാർഡ് ചടങ്ങിൽ എം.ജെ. ആന്‍റണിക്കു സമ്മാനിച്ചു. വി.ആർ. ശശി, ജോയി വെട്ടിക്കുഴി, വി.ആർ. സജി, ഫാ. ജോയ് നിരപ്പേൽ, ഇ.ജെ. ജോസഫ്, രതീഷ് വരകുമല, മനോജ് മുരളി, ജോയി ആനിത്തോട്ടം, സിജോമോൻ ജോയി, തങ്കച്ചൻ പുരയിടം തുടങ്ങിയവർ പ്രസംഗിച്ചു.

കാഞ്ഞാർ കപ്പേളയിൽ തിരുനാൾ

കാഞ്ഞാർ: ചെറുപുഷ്പം കപ്പേളയിൽ വിശുദ്ധ കൊച്ചുത്രേസ്യയുടെ തിരുനാൾ 26 മുതൽ ഒക്‌ടോബർ അഞ്ചുവരെ ആഘോഷിക്കും. 26നു വൈകുന്നേരം അഞ്ചിന് കൊടിയേറ്റ്-ഫാ. കുര്യൻ കാലായിൽ. തുടർന്നു വിശുദ്ധകുർബാന, നൊവേന-ഫാ. തോമസ് പുതുശേരി. 27 മുതൽ ഒക്‌ടോബർ രണ്ടുവരെ വൈകുന്നേരം അഞ്ചിനു നടക്കുന്ന വിശുദ്ധ കുർബാനയ്ക്കും നൊവേനയ്ക്കും ഫാ. ജോസഫ് കുറുപ്പശേരി, ഫാ. ജോർജ് ഒഴുകയിൽ, ഫാ. ജോസ് കുഴിഞ്ഞാലിൽ, ഫാ. അലോഷി ഞാറ്റുതൊട്ടിയിൽ, ഫാ. ജേക്കബ് പൊട്ടക്കുളം എന്നിവർ കാർമികത്വം വഹിക്കും. ഒക്‌ടോബർ രണ്ടിന് വൈകുന്നേരം 4.30നു വിശുദ്ധ കുർബാന, നൊവേന. ആറിന് വചനപ്രഘോഷണം-ഫാ. ജോർജ് കാരാംവേലിൽ ആന്‍ഡ് ടീം. മൂന്നിനും നാലിനും ഇതേസമയത്ത് വിശുദ്ധ കുർബാന, വചനപ്രഘോഷണം. അഞ്ചിന് പ്രധാന തിരുനാൾ. വൈകുന്നേരം നാലിന് തിരുനാൾ കുർബാന-ഫാ. സിറിയക് പുത്തേട്ട്. സന്ദേശം-ഫാ. ജിനോ പുന്നമറ്റത്തിൽ. ആറിന് പ്രദക്ഷിണം. തുടർന്നു ലദീഞ്ഞ്, സമാപന ആശീർവാദം എന്നിവയാണ് തിരുക്കർമങ്ങളെന്നു വികാരി ഫാ. ജോർജ് പാറേക്കുന്നേൽ അറിയിച്ചു.

സംരക്ഷണഭിത്തി നിർമിക്കണം: മനുഷ്യാവകാശ കമ്മീഷൻ

ഇടുക്കി: കുട്ടിക്കാനം - കട്ടപ്പന റോഡിൽ ഏറുന്പടം ജംഗ്ഷനിലുള്ള വീടിന്‍റെ സംരക്ഷണഭിത്തി കാലവർഷക്കെടുതിയിൽ തകർന്ന സാഹചര്യത്തിൽ റവന്യു അധികൃതർ സ്ഥലപരിശോധന നടത്തി നടപടിയെടുക്കണമെന്ന് മനുഷ്യാവകാശ കമ്മീഷൻ ചെയർപേഴ്സണ്‍ ജസ്റ്റീസ് അലക്സാണ്ടർ തോമസ് ജില്ലാ കളക്ടർക്ക് നിർദേശം നൽകി. പരാതിക്കാരനായ ചിന്നാർ ഏറുന്പടം സ്വദേശി മുഹമ്മദ് ഷെരീഫ് ഇതിനായി ജില്ലാ കളക്ടർക്ക് അപേക്ഷ നൽകണമെന്നും കമ്മീഷൻ നിർദേശിച്ചു. അപേക്ഷ ലഭിച്ച് രണ്ടു മാസത്തിനകം നടപടി പൂർത്തിയാക്കണം. പരാതിക്കാരന്‍റെ വീടും സ്ഥലവും മലയോര ഹൈവേയുടെ നിർമാണത്തിനായി ഏറ്റെടുത്തിട്ടില്ലാത്തതിനാൽ കിഫ്ബി ഫണ്ട് ഉപയോഗിച്ച് സംരക്ഷണഭിത്തി നിർമിക്കാനാവില്ലെന്ന് പൊതുമരാമത്ത് വകുപ്പ് പീരുമേട് റോഡ്സ് വിഭാഗം അസിസ്റ്റന്‍റ് എക്സിക്യൂട്ടീവ് എൻജിനിയർ കമ്മീഷനെ അറിയിച്ചിരുന്നു. എന്നാലിത് കമ്മീഷൻ അംഗീകരിച്ചില്ല. ഏലപ്പാറ വില്ലേജ് ഓഫീസർ തഹസിൽദാർക്ക് നൽകിയ റിപ്പോർട്ടിൽ സംരക്ഷണഭിത്തി നിർമിക്കേണ്ടത് അനിവാര്യമാണെന്ന് പറഞ്ഞതായി കമ്മീഷന് വ്യക്തമായി. റവന്യു അധികൃതർ സ്ഥലപരിശോധന നടത്തി സംരക്ഷണഭിത്തി നിർമിക്കേണ്ടത് ആവശ്യമാണെന്ന് കണ്ടെത്തിയാൽ പൊതുമരാമത്ത് അധികൃതർക്ക് നിർദേശം നൽകണമെന്നും ദുരന്തനിവാരണ നിയമപ്രകാരം നടപടിയെടുക്കണമെന്നും ജില്ലാ കളക്ടർക്ക് നൽകിയ ഉത്തരവിൽ പറഞ്ഞു.

നെടുങ്കണ്ടത്ത് സമരപ്രഖ്യാപന കണ്‍വന്‍ഷന്‍

നെടുങ്കണ്ടം: കേരള സ്റ്റേറ്റ് കോ-ഓപ്പറേറ്റീവ് സര്‍വീസ് പെന്‍ഷനേഴ്‌സ് അസോസിയേഷന്‍ ഉടുമ്പന്‍ചോല താലൂക്ക് കമ്മിറ്റിയുടെ സമരപ്രഖ്യാപന കണ്‍വന്‍ഷന്‍ നെടുങ്കണ്ടത്ത് നടന്നു. അസോസിയേഷന്‍റെ നേതൃത്വത്തില്‍ 30ന് നടക്കുന്ന നിയമസഭാ മാര്‍ച്ചിനു മുന്നോടിയായാണ് സമ്മേളനം നടന്നത്. സഹകരണ പെന്‍ഷന്‍കാര്‍ക്ക് 10 ശതമാനം ക്ഷാമാശ്വാസം അനുവദിക്കുക, 15 ശതമാനം ഇടക്കാല ആശ്വാസം അനുവദിക്കുക, മിനിമം പെന്‍ഷനും പരമാവധി പെന്‍ഷനും വര്‍ധിപ്പിക്കുക, മെഡിസെപ് മാതൃകയില്‍ മെഡിക്കല്‍ ഇന്‍ഷ്വറന്‍സ് നടപ്പിലാക്കുക, പെന്‍ഷന്‍ ഫണ്ടിലേക്ക് സഹകരണ സ്ഥാപനങ്ങളുടെ വിഹിതം ഉറപ്പാക്കാന്‍ നിയമനിര്‍മാണം നടത്തുക തുടങ്ങിയ ആവശ്യങ്ങളുന്നയിച്ചാണ് നിയമസഭാ മാര്‍ച്ച് നടത്തുന്നത്. നെടുങ്കണ്ടത്തു നടന്ന സമ്മേളനം ഉടുമ്പന്‍ചോല സര്‍ക്കിള്‍ സഹകരണ യൂണിയന്‍ ചെയര്‍മാന്‍ ജിന്‍സണ്‍ വര്‍ക്കി ഉദ്ഘാടനം ചെയ്തു. അസോസിയേഷന്‍ താലൂക്ക് പ്രസിഡന്‍റ് കെ.സി. ചാക്കോ അധ്യക്ഷത വഹിച്ചു. കെസിഎസ്പിഎ സംസ്ഥാന പ്രസിഡന്‍റ് എം. സുകുമാരന്‍, പ്രൈമറി കോ-ഓപ്പറേറ്റീവ് സൊസൈറ്റീസ് അസോസിയേഷന്‍ ജില്ലാ സെക്രട്ടറി ടി.എം. ജോണ്‍, അര്‍ബന്‍ കോ-ഓപ്പറേറ്റീവ് സൊസൈറ്റി പ്രസിഡന്‍റ് എം.എന്‍. ഗോപി, കെസിഇയു സംസ്ഥാന കമ്മിറ്റിയംഗം ആര്‍. രാധാകൃഷ്ണന്‍, ജില്ലാ പ്രസിഡന്‍റ് ജോസ് കലയത്തിനാല്‍, ട്രഷറര്‍ പി.എന്‍. സുകു, കെ.എസ്. രാധാകൃഷ്ണന്‍, രാധാകൃഷ്ണ മേനോന്‍ തുടങ്ങിയവര്‍ പ്രസംഗിച്ചു. തുടര്‍ന്ന് ടൗണില്‍ പ്രകടനവും നടത്തി.

കർഷക മുന്നേറ്റ പദയാത്ര: പരസ്യബോർഡുകൾ നശിപ്പിച്ചെന്ന്

ചെറുതോണി: ജനവിരുദ്ധമായ ഭൂപതിവ് ചട്ടഭേദഗതിക്കെതിരേ കർഷക കോൺഗ്രസ്‌ ജില്ലാ കമ്മിറ്റിയുടെ നേതൃത്വത്തിൽ 26ന് കരിമ്പനിൽനിന്നു ചെറുതോണിയിലേക്കു നടത്തുന്ന കർഷക മുന്നേറ്റ പദയാത്രയുടെ പരസ്യബോർഡുകൾ വ്യാപകമായി നശിപ്പിക്കുന്നതായി പരാതി. സംസ്ഥാന പ്രസിഡന്‍റ് മാജുഷ് മാത്യു നയിക്കുന്ന പദയാത്രയുടെ പ്രചാരണാർഥം ജില്ലയുടെ വിവിധ ഭാഗങ്ങളിൽ സ്ഥാപിച്ച ഫ്ലെക്സ് ബോർഡുകളാണ് കഴിഞ്ഞ രാത്രിയിൽ വ്യാപകമായി നശിപ്പിച്ചത്. ഇതുസംബന്ധിച്ച് അന്വേഷണം നടത്തണമെന്നാവശ്യപ്പെട്ട് ഇടുക്കി ഡിവൈഎസ്പിക്കു പരാതി നൽകിയതായി കർഷക കോൺഗ്രസ്‌ ജില്ലാ പ്രസിഡന്‍റ് ടോമി പാലയ്ക്കൻ അറിയിച്ചു.

അറക്കുളം കർഷകകൂട്ടായ്മ പഠനക്ലാസ്

മൂലമറ്റം: സർക്കാർ കൊണ്ടുവന്ന ഭൂപതിവ് ഭേദഗതി ജനങ്ങൾക്ക് പ്രയോജനകരമല്ലെന്ന് അറക്കുളം കർഷക കൂട്ടായ്മ കുറ്റപ്പെടുത്തി. കൃഷിക്കും വീടിനും അനുവദിച്ച പട്ടയം മറ്റാവശ്യങ്ങൾക്കും ഉപയോഗിക്കാം എന്നു ചേർത്താൽ പ്രശ്നം പരിഹരിക്കാൻ കഴിയുമായിരുന്നു. ക്രമവത്കരണത്തിന്‍റെ പേരിൽ പിഴയടച്ച് ഓഫീസുകൾ കയറിയിറങ്ങേണ്ട സ്ഥിതിയാണ് ജനങ്ങൾക്ക് ഉണ്ടാകുന്നത്. പിഴയടച്ച് ക്രമവത്കരണം നടത്തണമെന്ന വ്യവസ്ഥ സർക്കാർ പിൻവലിക്കാൻ തയാറാകണം. തണ്ണീർത്തടങ്ങളുടെ തീർപ്പാക്കിയ അപേക്ഷവഴി സർക്കാരിന് 15,000 കോടി രൂപയാണ് ലഭിച്ചതെന്നും ആരോപിച്ചു. സബ് രജിസ്ട്രാർ ഓഫീസിനു മുന്നിൽ നടന്ന പഠനക്ലാസിന് മൈക്കിൾ പുരയിടം, ജെയ്സണ്‍ കുന്നുംപുറത്ത്, തങ്കച്ചൻ പെരുമാംപള്ളിയിൽ, ബേബിച്ചൻ മുതുപ്ലാക്കൽ, ജോസുകുട്ടി തുടിയംപ്ലാക്കൽ, ടോമി തുരുത്തിക്കര തുടങ്ങിയവർ നേതൃത്വം നൽകി.

ലത്തീഫ് ഇല്ലിക്കലിന് നാടിന്‍റെ യാത്രാമൊഴി

വണ്ണപ്പുറം: ഹൃദയാഘാതത്തെത്തുടർന്ന് കഴിഞ്ഞ ദിവസം അന്തരിച്ച കേരള കോണ്‍ഗ്രസ് ജില്ലാ സെക്രട്ടറി ലത്തീഫ് ഇല്ലിക്കലിന് നാടിന്‍റെ യാത്രാമൊഴി. സൗമ്യതയുടെ വേറിട്ട മുഖമായിരുന്ന ഇദ്ദേഹത്തിന് അന്തിമോപചാരമർപ്പിക്കാൻ സമൂഹത്തിന്‍റെ നാനാതുറകളിലുള്ളവർ എത്തിയിരുന്നു. കേരള കോണ്‍ഗ്രസ് ചെയർമാൻ പി.ജെ. ജോസഫ് എംഎൽഎ വീട്ടിലെത്തി മൃതദേഹത്തിൽ പാർട്ടി പതാക പുതപ്പിച്ചു. ഡെപ്യൂട്ടി ചെയർമാൻ കെ. ഫ്രാൻസിസ് ജോർജ് എംപിയും വീട്ടിലെത്തിയിരുന്നു. കബറടക്കത്തിനു ശേഷം നടന്ന അനുശോചന യോഗത്തിൽ പാർട്ടി സംസ്ഥാന കമ്മിറ്റിയംഗം സണ്ണി കളപ്പുര അധ്യക്ഷത വഹിച്ചു. പ്രഫ.എം.ജെ. ജേക്കബ്, അപു ജോണ്‍ ജോസഫ്, പഞ്ചായത്ത് പ്രസിഡന്‍റ് എം.എ. ബിജു, എം. മോനിച്ചൻ, വി.യു. ഉലഹന്നാൻ, ജോയി കൊച്ചുകരോട്ട്, ഫിലിപ്പ് ജി. മലയാറ്റ്, ടോമി കാവാലം, ബേബി വട്ടക്കുന്നേൽ, പി.എം. ഇല്യാസ്, ഷാഹുൽ ഹമീദ്, അന്പിളി രവികല, മാത്യു വർഗീസ്, ബ്ലെയിസ് ജി. വാഴയിൽ, അഡ്വ. ജി. സുരേഷ് കുമാർ, സെബാസ്റ്റ്യൻ ആടുകുഴി, അജിത് കുമാർ, എം.ടി. ജോണി, എം.ഒ. ജോസഫ്, ബെസി ഉറുപ്പാട്ട് എന്നിവർ പ്രസംഗിച്ചു.

ക്യാൻ ഹെൽപ്പ് - കാൻസറിനെതിരേ ബോധവത്കരണ പദ്ധതി

ചെറുതോണി: ഇടുക്കി രൂപത മാതൃവേദിയുടെ ആഭിമുഖ്യത്തിൽ പാലാ മാർ സ്ലീവാ കാൻസർ കെയർ ആൻഡ് റിസർച് സെന്‍ററിന്‍റെ നേതൃത്വത്തിൽ ക്യാൻ ഹെൽപ്പ് - കാൻസറിനെതിരേ ഒരുമിച്ച് എന്ന പദ്ധതിക്കു ജില്ലയിൽ തുടക്കമാകുന്നു. പദ്ധതിയുടെ ഇടുക്കി രൂപതാതല ഉദ്ഘാടനം 28ന് രാവിലെ 9.15 ന് വാഴത്തോപ്പ് സെന്‍റ് ജോർജ് കത്തീഡ്രലിൽ ജലവിഭവ വകുപ്പ് മന്ത്രി റോഷി അഗസ്റ്റിൻ നിർവഹിക്കും. മാർ സ്ലീവാ മെഡിസിറ്റി മാനേജിംഗ് ഡയറക്ടർ മോൺ. ഡോ. ജോസഫ് കണിയോടിക്കൽ അധ്യക്ഷത വഹിക്കും. ഇടുക്കി രൂപതാധ്യക്ഷൻ മാർ ജോൺ നെല്ലിക്കുന്നേൽ അനുഗ്രഹ പ്രഭാഷണം നടത്തും. ഓങ്കോളജി വിഭാഗം മേധാവി ഡോ. റോണി ബെൻസൺ പദ്ധതി വിശദീകരണം നടത്തും. വാഴത്തോപ്പ് കത്തീഡ്രൽ വികാരി ഫാ. ടോമി ആനിക്കുഴിക്കാട്ടിൽ സ്വാഗതം ആശംസിക്കും. പദ്ധതിയുടെ ഭാഗമായി ശലഭം എന്ന പേരിൽ വനിതകൾക്കായി സ്തനാർ‌ബുദത്തെക്കുറിച്ചു ബോധവത്കരണവും സ്ക്രീനിംഗ് പരിശോധനകളും നടത്തും. വായിലെ കാൻസർ, ഗർഭാശയ കാൻസർ എന്നീ പരിശോധനകളും നടക്കും. കൂടാതെ വിവിധ കാൻസർ രോഗങ്ങളെക്കുറിച്ച് ഡോക്ടർമാർ വിശദീകരിക്കും. ഡോക്ടർമാരുടെ സൗജന്യ കൺസൾട്ടേഷനും ലഭ്യമാണ്. മാമോഗ്രാം ആവശ്യമുള്ളവർക്ക് കുറഞ്ഞ നിരക്കിൽ മാർ സ്ലീവാ മെഡിസിറ്റിയിൽ എത്തി മാമോഗ്രാം പരിശോധന നടത്തുന്നതിനും അവസരമുണ്ട്. ഇടുക്കി രൂപതയിലെ മുഴുവൻ ഇടവകകളിലും പദ്ധതി നടപ്പാക്കും. കൂടുതൽ വിവരങ്ങൾക്കും രജിസ്ട്രേഷനും ഫോൺ - 94460 36421, 94950 12652.

വോട്ടുചോരിക്കെതിരേ ഒപ്പുശേഖരണം

ചെറുതോണി: വോട്ടു ചോരി സർക്കാരിനെതിരേ രാഹുൽ ഗാന്ധിയുടെ നേതൃത്വത്തിൽ രാജ്യവ്യാപകമായി നടക്കുന്ന ക്യാമ്പയിന്‍റെ ഭാഗമായി അഞ്ചു കോടി ഒപ്പുകൾ ശേഖരിക്കുന്നതിനു തുടക്കം കുറിച്ചു. വോട്ടുചോരിക്കെതിരേയുള്ള സിഗ്നേച്ചർ ക്യാമ്പയിന്‍റെ ജില്ലാ തല ഉദ്ഘാടനം ഇടുക്കി ജവഹർ ഭവനിൽ കെപിസിസി രാഷ‌്ട്രീയകാര്യ സമിതി അംഗം ജോസഫ് വാഴയ്ക്കൻ ഉദ്ഘാടനം ചെയ്തു. ശേഖരിക്കുന്ന ഒപ്പുകൾ രാഷ്‌ട്രപതിക്കും തെരഞ്ഞെടുപ്പു കമ്മീഷനും സമർപ്പിക്കും. വോട്ടർ പട്ടികയിലെ ക്രമക്കേടും ജനാധിപത്യത്തെ അട്ടിമറിക്കാനുള്ള തെരഞ്ഞെടുപ്പു കമ്മീഷന്‍റെയും ബിജെപിയുടെയും ഗൂഢാലോചനയും തുറന്നുകാട്ടുവാനുള്ള മഹത്തായ യജ്ഞത്തിൽ എല്ലാ ജനാധിപത്യവിശ്വാസികളും പങ്കാളികളാകണമെന്നു ജോസഫ് വാഴയ്ക്കൻ ആവശ്യപ്പെട്ടു. ഡിസിസി പ്രസിഡന്‍റ്് സി.പി. മാത്യു അധ്യക്ഷത വഹിച്ചു. നേതാക്കളായ ഇ.എം.ആഗസ്തി, ജോയി തോമസ്, റോയി കെ. പൗലോസ്, ഇബ്രാഹിംകുട്ടി കല്ലാർ, എ.കെ. മണി, ജോയി വെട്ടിക്കുഴി, ഡോ. പി.പി. ബാലൻ, തോമസ് രാജൻ, എം.എൻ. ഗോപി, എ.പി. ഉസ്മാൻ, സിറിയക് തോമസ്,ഡി. കുമാർ, എം.ഡി. അർജുനൻ, കെ.എസ്. അരുൺ തുടങ്ങിയവർ പ്രസംഗിച്ചു.

മരത്തില്‍ കുടുങ്ങിയ തൊഴിലാളിക്ക് ഫയർഫോഴ്സ് രക്ഷകരായി

നെടുങ്കണ്ടം: കൈയുടെ തോൾ ഇറങ്ങിയതിനെത്തുടര്‍ന്ന് മരത്തില്‍ കുടുങ്ങിയ ഇതരസംസ്ഥാന തൊഴിലാളിയെ നെടുങ്കണ്ടം ഫയര്‍ഫോഴ്‌സ് രക്ഷപ്പെടുത്തി. ഉടുമ്പന്‍ചോല കല്ലുപാലത്ത് സ്വകാര്യ ഏലത്തോട്ടത്തില്‍ ഇന്നലെ ഉച്ചയോടെയാണ് സംഭവം. മരത്തിൽ കയറി കൊപ്പ് ഇറക്കുകയായിരുന്ന മധ്യപ്രദേശ് സ്വദേശി ഗണേഷ് (42) ആണ് മരത്തില്‍ കുടുങ്ങിയത്. മരത്തിന്‍റെ മുകളില്‍വച്ച് ഗണേഷിന്‍റെ തോള്‍ ഇറങ്ങി ഒരു കൈയുടെ സ്വാധീനം നഷ്ടപ്പെടുകയും താഴെയിറങ്ങാന്‍ കഴിയാതെ ഇയാള്‍ ഒരു കൈകൊണ്ട് മരത്തില്‍ അള്ളിപ്പിടിച്ച് കിടക്കുകയുമായിരുന്നു. സംഭവം അറിഞ്ഞ് പ്രദേശവാസികള്‍ നെടുങ്കണ്ടം ഫയര്‍ഫോഴ്‌സില്‍ വിവരം അറിയിച്ചു. കയറും വലയും ഏണിയും ഉപയോഗിച്ച് ഏറെ നേരത്തെ പരിശ്രമത്തിന് ശേഷം സാഹസികമായാണ് ഗണേഷിനെ താഴെയിറക്കിയത്. തുടര്‍ന്ന് ഇയാളെ ആശുപത്രിയില്‍ പ്രവേശിപ്പിച്ചു. സീനിയര്‍ ഫയര്‍ ഓഫീസര്‍ സുഭാഷ്, സാം മാത്യു, അനീഷ്, അനൂപ്, ബിജു എന്നിവരുടെ നേതൃത്വത്തിലാണ് രക്ഷാപ്രവര്‍ത്തനം നടത്തിയത്.

അങ്കണവാടികളിൽ കളിപ്പാട്ട വിതരണം

കുട്ടിക്കാനം: മരിയൻ കോളജ് (ഓട്ടോണമസ്) സ്കൂൾ ഓഫ് സോഷ്യൽ വർക്ക് ഒന്നാം വർഷ ബിഎസ്ഡബ്ല്യു വിദ്യാർഥികൾ "ഗിഫ്റ്റ്സ് ഓഫ് പ്ലേ’ എന്ന പദ്ധതിയുടെ ഭാഗമായി കുട്ടിക്കാനം, പീരുമേട് അങ്കണവാടികളിൽ നൂറോളം കളിപ്പാട്ടങ്ങൾ വിതരണം ചെയ്തു. കുട്ടികളുടെ സമൂഹിക പ്രതിബദ്ധതയുടെ ഭാഗമായി അങ്കണവാടിയിൽ നടത്തിവരുന്ന പ്രവർത്തനങ്ങളുടെ ഭാഗമായിട്ടാണ് അങ്കണവാടികളിലെ കുട്ടികൾക്ക് കളിപ്പാട്ടങ്ങൾ വിതരണം ചെയ്തത്. കുട്ടികളോടൊപ്പം പാട്ടുകളും വിവിധ പരിപാടികളും അവതരിപ്പിച്ചു. കോളജിലെ അധ്യാപകരായ ഡോ. ജോബി ബാബു, ഫെബാ ആൻ വിൽസന്‍റ്, വിദ്യാർഥികളായ ബുഷ്റ അനസ്, സിസ്റ്റർ ജെസ്‌ലിൻ ജയിംസ്, മന്യ സുനിൽകുമാർ, ജോസഫ് കുര്യാക്കോസ് എന്നിവർ നേതൃത്വം നൽകി.

മാല പിടിച്ചുപറി കേസ്: രണ്ടാമനും അറസ്റ്റിൽ

ചെറുതോണി: ബൈക്കിലെത്തി വീട്ടമ്മയുടെ സ്വർണ മാല പറിച്ചെടുത്ത് കടന്ന കേസിലെ രണ്ടാമത്തെ പ്രതിയും പോലീസിന്‍റെ പിടിയിലായി. ചേർത്തല അന്ധകാരനഴി സ്വദേശി കാട്ടുങ്കതയ്യിൽ ലിഖിൻ ഇഗ്നേഷ്യസ് (24) ആണ് അറസ്റ്റിലായത്. ഒപ്പമുണ്ടായിരുന്ന കമ്പംമെട്ട് സ്വദേശി വീരാളശേരിയിൽ അമൽ സജി (24) നെ നേരത്തേ അറസ്റ്റ് ചെയ്തിരുന്നു. വെൺമണി ഭാഗത്ത് കഴിഞ്ഞ 12ന് ഉച്ചകഴിഞ്ഞ് മൂന്നിനാണ് ആക്രമണമുണ്ടായത്. റോഡിലൂടെ നടന്നുവരികയായിരുന്ന സ്ത്രീ യുടെ നാലേമുക്കാൽ പവൻ തൂക്കം വരുന്ന സ്വർണമാലയാണ് പ്രതികൾ പൊട്ടിച്ചെടുത്ത് സ്ഥലം വിട്ടത്. ഇടുക്കി ഡിവൈഎസ്പി രാജൻ കെ. അരമനയുടെ നേതൃത്വത്തിലുള്ള പ്രത്യേക അന്വേഷണ സംഘമാണ് പ്രതികളെ പിടികൂടിയത്. നാനൂറോളം സിസിടി വികളും ബൈക്കുകളും പരിശോധിച്ച് നടത്തിയ അന്വേഷണങ്ങൾക്കൊടുവിലാണ് അമൽ സജി (24)പിടിയിലായത്. കഞ്ഞിക്കുഴി എസ്ഐ താജുദീൻ അഹമ്മദ്, സജീവ് മാത്യു സീനിയർ സിപിഒ പി.എ.ഷെരീഫ്, കെ.ആർ. അനീഷ്, സുമേഷ്, സിപിഒമാരായ മനു ബേബി, ജയൻ, കെ.ബി. മനോജ് എന്നിവർ ചേർന്നാണ് പ്രതികളെ അറസ്റ്റ് ചെയ്തത്.

കുത്തുങ്കല്‍-നെടുങ്കണ്ടം ലൈന്‍ 500 കർഷകരുടെ ഭൂമിയിലൂടെ

നെടുങ്കണ്ടം: കുത്തുങ്കല്‍ - നെടുങ്കണ്ടം 110 കെ വി വൈദ്യുത ലൈനിന്‍റെ പണിക്കന്‍കുടി മുതല്‍ കല്ലാര്‍ വരെ ആരംഭിച്ചിട്ടുള്ള നിര്‍മാണം സംബന്ധിച്ച ആശങ്കകള്‍ പരിഹരിക്കണമെന്നു ആക്‌ഷന്‍ കൗണ്‍സില്‍. തിങ്കള്‍കാട് വഴി ദൂരം കുറച്ചു പോകാമായിരുന്ന ഈ വൈദ്യുതലൈന്‍ ചെറുകിട, നാമമാത്ര കര്‍ഷകര്‍ തിങ്ങിപ്പാര്‍ക്കുന്ന പണിക്കന്‍കുടി, ബഥേല്‍, മേലേചിന്നാര്‍, മഞ്ഞപ്പാറ, പച്ചടി, ചക്കക്കാനം വഴിയാണ് കെഎസ്ഇബി ഇപ്പോള്‍ നിര്‍മിക്കുന്നത്. 17 കിലോമീറ്റര്‍ ദൂരം വരുന്ന ഈ വൈദ്യുതി ലൈന്‍ 500 ഓളം പേരുടെ കൃഷി സ്ഥലത്തുകൂടിയാണ് കടന്നുപോകുന്നത്. ഇത് അനീതി ഈ പ്രദേശങ്ങളിലെ ചെറുകിട കര്‍ഷകരുടെ ഭൂമി പൂര്‍ണമായോ ഭാഗികമായോ നഷ്ടപ്പെടുന്ന സ്ഥിതിയാണ് ഉള്ളത്. കര്‍ഷകര്‍ക്കു നല്‍കുന്ന ആനുകൂല്യങ്ങളെപ്പറ്റി അവ്യക്തത തുടരുകയാണ്. സമീപകാലത്തു പട്ടയം ലഭിച്ചിട്ടുള്ള ഈ പ്രദേശങ്ങളില്‍ വളരെ കുറഞ്ഞ ഫെയര്‍ വാല്യുവാണ് സര്‍ക്കാര്‍ നിശ്ചയിച്ചിട്ടുള്ളത്. പട്ടയം ലഭിക്കാത്ത കര്‍ഷകര്‍ക്കു നഷ്ടപരിഹാരം ഒന്നും ലഭിക്കാത്ത സ്ഥിതിയുമുണ്ട്. കാര്‍ഷിക വിളകള്‍ക്ക് എട്ടു വര്‍ഷത്തെ ആദായത്തിന്‍റെ നഷ്ടപരിഹാരത്തുക മാത്രമാണ് ബോര്‍ഡ് നല്‍കുന്നത്. റബര്‍, ജാതി തുടങ്ങിയ വിളകള്‍ക്കു വളരെ കൂടുതല്‍ കാലം ആദായം ലഭിക്കാമെന്നിരിക്കെ എട്ടുവര്‍ഷത്തെ നഷ്ടപരിഹാരം മാത്രം നല്‍കുന്നത് അനീതിയാണ്. വിപണി വില നൽകണം കര്‍ഷകരുടെ ഭൂമിക്കു മാര്‍ക്കറ്റ് വില നല്‍കുക, കാര്‍ഷിക വിളകള്‍ക്കു ന്യായമായ നഷ്ടപരിഹാരം നല്‍കുക തുടങ്ങിയ ആവശ്യങ്ങള്‍ ഉന്നയിച്ചാണ് പ്രദേശവാസികളുടെ നേതൃത്വത്തില്‍ ആക്ഷന്‍ കൗണ്‍സില്‍ രൂപീകരിച്ചത്. ജില്ലയിലെ എല്ലാ ജനപ്രതിനിധികള്‍ക്കും നിവേദനം നല്‍കാന്‍ ആക്‌ഷന്‍ കൗണ്‍സില്‍ തീരുമാനിച്ചു. ബഥേല്‍ പാരീഷ് ഹാളില്‍ ചേര്‍ന്ന ആക്‌ഷന്‍ കൗണ്‍സില്‍ യോഗത്തില്‍ ചെയര്‍മാന്‍ ഫാ. ജോസഫ് നടുപ്പടവില്‍ അധ്യക്ഷത വഹിച്ചു. കൗണ്‍സില്‍ പ്രസിഡന്‍റ് ജോണ്‍സണ്‍ കിഴക്കേക്കര, പഞ്ചായത്ത് മെംബര്‍മാരായ ജോജി ഇടപ്പള്ളികുന്നേല്‍, രാജേഷ് അമ്പഴത്തിനാല്‍ തുടങ്ങിയവര്‍ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]