ADVERTISEMENT

ADVERTISEMENT

യുവക്ഷേത്ര കോളജിൽ സെമിനാർ

മുണ്ടൂർ: യുവക്ഷേത്ര കോളജിലെ ഇഡി ക്ലബ്ബും കേരള സർക്കാരിന്‍റെ യംഗ്് ഇന്നോവേറ്റേഴ്സ് പ്രോഗ്രാം 8.0 ന്‍റെ നേതൃത്വത്തിൽ സംഘടിപ്പിക്കുന്ന സെമിനാറിന്‍റെ ഉദ്ഘാടനം പാലക്കാട് കെ-ഡിസ്ക് സീനിയർ പ്രോഗ്രാം ഓഫീസർ വൈഐപി സോണൽ മാനേജർ എം. കിരണ്‍ദേവ് നിർവഹിച്ചു. പ്രിൻസിപ്പൽ ഡോ.ടോമി ആന്‍റണി അധ്യക്ഷനായിരുന്നു.

വൈസ് പ്രിൻസിപ്പൽ റവ.ഡോ. ജോസഫ് ഓലിക്കൽകൂനൽ, ഐക്യുഎസി കോഓർഡിനേറ്റർ ഷൈലജ മേനോൻ എന്നിവർ ആശംസകളർപ്പിച്ചു. ഇഡി ക്ലബ് പ്രസിഡന്‍റ് ഡോ. എം.എസ്. കീർത്തി സ്വാഗതവും വിദ്യാർഥി ആഗ്നൽ കുര്യാക്കോസ് നന്ദിയും പറഞ്ഞു. സെമിനാറിൽ എം. കിരണ്‍ദേവ് ക്ലാസെടുത്തു.

ADVERTISEMENT

നെല്ലിയാന്പതിയിൽ മരംവീണ് ഗതാഗതം മുടങ്ങി

നെല്ലിയാമ്പതി: ശക്തമായ കാറ്റിലും മഴയിലും മരങ്ങൾ കടപുഴകി റോഡിനു കുറുകെവീണ് ഗതാഗതം തടസപ്പെട്ടു. ഇന്നലെ പുലർച്ചയോടെ ലില്ലി- കാരപ്പാറ റോഡിൽ എവിടി സൂപ്രണ്ട് ബംഗ്ലാവിന് സമീപമായി ആൽമരവും, വേപ്പുമരവും ഒരുമിച്ച് കടപുഴകി റോഡിനു കുറുകെവീണത്. ബസ് സർവീസിനെയും മറ്റു വാഹന യാത്രക്കാരെയും വലച്ചു. എവിടി എസ്റ്റേറ്റിലെ തൊഴിലാളികളെത്തി രണ്ടു മരങ്ങളും മുറിച്ചു മാറ്റിയതിനു ശേഷം വൈകുന്നേരമാണ് കാരപ്പാറ, വിക്ടോറിയ എന്നീ പ്രദേശങ്ങളിലേക്കുള്ള വാഹന ഗതാഗതം പുനഃസ്ഥാപിച്ചത്. രണ്ടുമരങ്ങൾ ഒരുമിച്ചു വീണതുകാരണം പകൽസമയം മുഴുവനും കാരപ്പാറയിലേക്കു ബസ് ഗതാഗതവും തടസപ്പെട്ടു.

കേന്ദ്ര സർക്കാർ ഉത്തരവ് വിനയായി; തൊഴിലുറപ്പുപദ്ധതി പ്രതിസന്ധിയിൽ

ശ്രീകൃഷ്ണപുരം: ചെയ്തു കൊണ്ടിരിക്കുന്ന ജോലികളിൽ ഭൂരിപക്ഷവും കേന്ദ്രസർക്കാർ നിബന്ധനകളെതുടർന്ന് പുറത്തായതോടെ തൊഴിലുറപ്പ് പദ്ധതി വൻ പ്രതിസന്ധിയിലായി. ഒരു കുടുംബത്തിന് നൂറുദിവസം തൊഴിൽ നൽകാൻ കഴിയാതെ ഉഴലുകയാണ് പഞ്ചായത്തുകൾ. ആവർത്തന സ്വഭാവമുള്ള പ്രവൃത്തികൾ നടപ്പിലാക്കാൻ പാടില്ലെന്നു നിയമം കർശനമാക്കിയതാണ് പദ്ധതിയെ ഇപ്പോൾ പ്രതിസന്ധിയിലാക്കിയത്. ഒരു പ്രവർത്തി ചെയ്താൽ പിന്നീട് അഞ്ചുവർഷത്തേക്ക് അതേപ്രവൃത്തി തന്നെ ചെയ്യാൻ പാടില്ലെന്നു ഓംബുഡ്സ്മാൻ, സോഷ്യൽ ഓഡിറ്റ് വിഭാഗങ്ങൾ കർശന നിർദേശം നൽകുകയും നടപടികൾ സ്വീകരിക്കുകയും ചെയ്തത് പഞ്ചായത്തുകൾക്ക് തിരിച്ചടിയായി. അങ്ങനെ ചെയ്ത പ്രവൃത്തികളുടെ തുക തിരിച്ചടയ്ക്കണമെന്നു ഓംബുഡ്സ്മാൻ, സോഷ്യൽ ഓഡിറ്റ് വിഭാഗങ്ങൾ പഞ്ചായത്തുകൾക്ക് രേഖാമൂലം നൽകിയതോടെ ജീവനക്കാരും ഭയപ്പാടിലായി. തോടുനവീകരണം, പൊതുകുളം നവീകരണം, കുളം നിർമാണം,വനവത്കരണം, അരികുചാൽ നിർമാണം,പച്ചക്കറി കൃഷിക്ക് നിലമൊരുക്കൽ തുടങ്ങിയ പ്രവൃത്തികളാണ് പഞ്ചായത്തുകൾ പ്രധാനമായും ഏറ്റെടുത്ത് നടപ്പിലാക്കിയിരുന്നത്. എന്നാൽ ഈ പ്രവൃത്തികൾ ഒന്നും അഞ്ചുവർഷത്തേക്ക് നടപ്പിലാക്കാൻ കഴിയില്ല. ഏറ്റെടുക്കാൻ കഴിയുന്ന പ്രവൃത്തിയായ തരിശുഭൂമിയെ കൃഷി യോഗ്യമാക്കുക എന്ന പദ്ധതി നിയമനൂലാമാലകളുള്ളതിനാൽ നടപ്പിലാക്കാൻ കഴിയാത്ത അവസ്ഥയിലാണ്. പഞ്ചായത്ത് സെക്രട്ടറി, കൃഷി ഓഫീസർ എന്നിവർ തരിശുഭൂമിയാണെന്നു സാക്ഷ്യപത്രം നൽകണം എന്നതാണ് പ്രധാന വെല്ലുവിളി. ഭാവിയിലുണ്ടായേക്കാവുന്ന പ്രശ്നങ്ങൾ ഭയന്ന് ഉദ്യോഗസ്ഥരും ഇക്കാര്യത്തിൽ താത്പര്യമെടുക്കുന്നില്ല. നിലവിലെ സാമ്പത്തിക വർഷം നാലുമാസം പിന്നിടുമ്പോൾ തൊഴിൽ ആവശ്യപ്പെട്ട ഒരു തൊഴിലാളിക്ക് ശരാശരി പത്തു തൊഴിൽദിനങ്ങൾ മാത്രമാണ് ലഭിച്ചത്. സാധാരണ കുടുംബങ്ങൾക്ക് നൂറുദിവസം തൊഴിൽ ലഭിക്കുമ്പോൾ മലയോരമേഖലകളിൽ താമസിക്കുന്ന പട്ടികവർഗ കുടുംബങ്ങൾക്ക് അവകാശപ്പെട്ട തൊഴിൽദിനങ്ങൾ ഇരുനൂറാണ്. കഴിഞ്ഞവർഷം നാലുമാസം പിന്നിട്ടപ്പോൾ 40 ദിവസം മുതൽ 100 ദിവസം വരെ തൊഴിൽ ദിനങ്ങൾ പൂർത്തിയാക്കിയവരായിരുന്നു സജീവ തൊഴിലാളികളിൽ ഭൂരിഭാഗവും. ഭൂപ്രകൃതിക്കും, കാലാവസ്ഥക്കും അനുയോജ്യമായ പ്രവൃത്തികൾ ഏറ്റെടുക്കാൻ വേണ്ട നിയമനിർമാണം സർക്കാറുകൾ ഏറ്റെടുക്കണമെന്ന് ലോക്കൽ ഗവൺമെന്‍റ് മെംബേഴ്സ് ലീഗ് ജില്ലാ വൈസ് പ്രസിഡന്‍റ് ഉമ്മർ കുന്നത്ത്, ഒറ്റപ്പാലം നിയോജകമണ്ഡലം കൺവീനർ ഇ.പി. ബഷീർ എന്നിവർ ആവശ്യപ്പെട്ടു. ഇതുസംബന്ധിച്ച് ബന്ധപ്പെട്ടവർക്കു നിവേദനം നൽകാനും തീരുമാനിച്ചു.

പനംകുറ്റി കരടിയളയിൽ ആനയിറങ്ങി കൃഷി നശിപ്പിച്ചു

വടക്കഞ്ചേരി: വാൽകുളമ്പ് പനംകുറ്റി കരടിയളയിൽ കാട്ടാനയിറങ്ങി കൃഷി നശിപ്പിച്ചു. അജീഷിന്‍റെ വീട്ടുവളപ്പിലെ തെങ്ങുകളും വാഴകളുമാണ് നശിപ്പിച്ചത്. കഴിഞ്ഞ അർധരാത്രിയോടെയാണ് ആനകളെത്തിയത്. പാട്ടകൊട്ടി ബഹളമുണ്ടാക്കിയാൽ ചില ആനകൾ സമീപത്തെ കാടുമൂടി കിടക്കുന്ന തോട്ടങ്ങളിൽ കയറും. ചിലത് ആക്രമിക്കാൻ പാഞ്ഞടുക്കും- അജീഷ് പറഞ്ഞു. കുറച്ചു കാലമായി വനാതിർത്തിയിലെ പൊന്തക്കാടു മൂടിയ സ്വകാര്യ തോട്ടങ്ങളിലാണ് ആനകളെല്ലാം തമ്പടിച്ചിട്ടുള്ളത്. ഇതിനാൽ ഏതുസമയവും ആനകൾ വഴികളിലും കൃഷിയിടങ്ങളിലുമെത്തും. വനാതിർത്തിയിലുള്ള സോളാർ ഫെൻസിംഗുകൾ തകർന്നു കിടക്കുന്നതിനാൽ പീച്ചി കാട്ടിൽനിന്നും യഥേഷ്ടം ആനകൾക്ക് വന്നുപോകാനുള്ള വഴികളുണ്ട്. കഴിഞ്ഞദിവസമാണ് കരടിയളക്കടുത്ത് താമരപ്പിള്ളിയില്‍ മലയോരപാതയിൽ ഇറങ്ങി കാട്ടാന വാഹനങ്ങൾതടഞ്ഞ് ഭീതിപരത്തിയത്. പ്രദേശത്തെ വിളകളും വ്യാപകമായി നശിപ്പിച്ചിരുന്നു. രണ്ടുകിലോമീറ്ററിനുള്ളില്‍ ഓരോ ദിവസവും ഓരോ സ്ഥലങ്ങളിലാണ് ആനകൾ ഇറങ്ങുന്നത്. ആനകളെ ഓടിച്ചും രാത്രി വിളകൾക്ക് കാവലിരുന്നും ജനങ്ങളും മടുത്തു. നാശനഷ്ടങ്ങളുടെ തോത് ഉയരുമ്പോൾ വനപാലകർ വല്ലപ്പോഴും സ്ഥലത്തെത്തി പരിശോധന നടത്തിപ്പോകും. ആനകളെ നിയന്ത്രിക്കാൻ യാതൊരു നടപടികളും വനംവകുപ്പിന്‍റെ ഭാഗത്തുനിന്നുമുണ്ടാകുന്നില്ലെന്നാണ് കർഷകരുടെ പരാതി.

കനത്ത മഴ, മണ്ണാർക്കാട് മലയോരമേഖലയിൽ വ്യാപകനാശനഷ്ടം; മൂന്നുപേർക്കു പരിക്ക്‌

കല്ലടിക്കോട്: മഴയിലും ശക്തമായ കാറ്റിലും കല്ലടിക്കോട്, പനയമ്പാടം, പാലക്കയം മേഖലകളിൽ വ്യാപക നാശനഷ്ടം, മൂന്നുപേർക്ക് പരിക്കേറ്റു. കല്ലടിക്കോട് അമ്പലപ്പള്ളിയാലിൽ എതിർപ്പുള്ളി മേലെമഠം ചാണ്ടാട്ടിൽ വീട്ടിൽ വാസു (88), ജാനകി (72), അഭിജിത്ത് (23) എന്നിവർക്കാണ് പരിക്കേറ്റത്. ഇന്നലെ വൈകുന്നേരം ആറോടെയാണ് സംഭവം. വാസുവിന്‍റെ മകൻ സുരേഷുമൊത്ത് വീടിനുള്ളിൽ ഇരിക്കുന്നതിനിടെയാണ് തെങ്ങ് വീടിനുമുകളിലേക്കു വീണത്. വീടിന്‍റെ മേൽക്കൂര തകർന്നു. പഞ്ചായത്ത് അംഗം കെ.കെ. ചന്ദ്രന്‍റെ നേതൃത്വത്തിൽ പരിക്കേറ്റവരെ തച്ചമ്പാറ സ്വകാര്യ ആശുപത്രിയിൽ എത്തിച്ചു. പനയമ്പാടം യുപി സ്കൂളിനു സമീപം തേക്കുമരം കടപുഴകിവീണ് മൂന്നു വൈദ്യുതി പോസ്റ്റുകൾ തകർന്നു. ബൈക്ക് വെട്ടിച്ചുമാറ്റിയതിനാൽ ഇതുവഴി കടന്നുപോയ ബൈക്ക് യാത്രക്കാരനായ രമേഷ് രക്ഷപ്പെട്ടു. പഴയ പാലക്കയത്ത് മരങ്ങൾ വീടിനു മുകളിൽവീണ് കീച്ചാലിൽ ടോമിയുടെ വീട് തകർന്നു. മരുതുംകാട്, കരിമല, മുണ്ടനാട്, ചീനിക്കപ്പാറ, അച്ചിലട്ടി, പായപ്പുല്ല്, ഇഞ്ചിക്കുന്ന് തുടങ്ങിയ പ്രദേശങ്ങളിലും മരങ്ങൾവീണ് കൃഷികൾ നശിച്ചിട്ടുണ്ട്.

ചിറ്റൂർ മെഗാഫെസ്റ്റ് ഓഗസ്റ്റ് 29 മുതൽ സെപ്റ്റംബർ രണ്ടുവരെ

ചിറ്റൂർ: ശ്രാവണം- 2025 ചിറ്റൂർ മെഗാഫെസ്റ്റിന്‍റെ പോസ്റ്റർ പ്രകാശനം കേരള സംഗീത നാടക അക്കാദമി അവാർഡ് ജേതാവ് പ്രകാശ് ഉള്ള്യേരി നിർവഹിച്ചു. ഓണം മെഗാഫെസ്റ്റിന്‍റെ ഭാഗമായ കലാസന്ധ്യയും വിപണനമേളയും ഓഗസ്റ്റ് 29 മുതൽ സെപ്റ്റംബർ രണ്ടുവരെ തത്തമംഗലം മേട്ടുപാളയത്തു നടത്തും. രാജീവ്ഗാന്ധി സോഷ്യൽ വെൽഫെയർ ആൻഡ് ചാരിറ്റബിൾ ട്രസ്റ്റ് ചിറ്റൂരിന്‍റെ നേതൃത്വത്തിലാണ് ശ്രാവണം 2025 ഒരുക്കുന്നത്. പ്രോഗ്രാം കൺവീനർ എം. രതീഷ് ബാബു, പ്രകാശ് ഉള്ള്യേരി, വൈസ് ചെയർമാൻ സനു എം. സനോജ്, ജോയിന്‍റ് കൺവീനർ ബി. മണികണ്ഠൻ എന്നിവർ പത്രസമ്മേളത്തിൽ പങ്കെടുത്തു.

സാക്ഷരതാസർട്ടിഫിക്കറ്റ് വിതരണവും രണ്ടാംഘട്ട പ്രവർത്തന ഉദ്ഘാടനവും നടത്തി

അഗളി: അട്ടപ്പാടിയിലെ ഉന്നതികൾ കേന്ദ്രീകരിച്ച് സാക്ഷരതാ മിഷൻ നടപ്പാക്കിയ സന്പൂർണ സാക്ഷരതാ പദ്ധതിയിൽ വിജയികളായവർക്കുള്ള സർട്ടിഫിക്കറ്റ് വിതരണവും സാക്ഷരതാ പരിപാടിയുടെ രണ്ടാംഘട്ട പ്രവർത്തന ഉദ്ഘാടനവും ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ നിർവഹിച്ചു. കുടുംബശ്രീ, അട്ടപ്പാടി ആദിവാസി സമഗ്ര വികസന പദ്ധതി, ജില്ലാ പഞ്ചായത്ത്, കേരള സാക്ഷരതാ മിഷൻ പാലക്കാട് എന്നിവരുടെ സഹകരണത്തോടെയാണ് പരിപാടി സംഘടിപ്പിച്ചത്. സന്പൂർണ സാക്ഷരതാ പദ്ധതിയിൽ പരീക്ഷ എഴുതി വിജയിച്ച 1438 പേർക്കുള്ള സർട്ടിഫിക്കറ്റുകളാണ് വിതരണം ചെയ്തത്. 2023ൽ കുടുംബശ്രീ സ്പെഷൽ പ്രൊജക്ടിന്‍റെ സഹായത്തോടെ സർവെ നടത്തി കണ്ടെത്തിയവരാണ് സാക്ഷരതാ പരീക്ഷ എഴുതിയത്. ഇവർക്ക് ആനിമേറ്റർമാരുടെയും വോളന്‍ററി അധ്യാപകരുടെയും നേതൃത്വത്തിൽ പരിശീലനം നൽകിയിരുന്നു. രണ്ടു വർഷത്തിനുള്ളിൽ ഉന്നതികളിൽ ബാക്കിയുള്ളവരെ കൂടി സാക്ഷരതരാക്കി തുല്യത പരീക്ഷക്ക് പ്രാപ്തരാക്കുകയാണ് പദ്ധതിയുടെ ലക്ഷ്യം. ന്യൂ ഇന്ത്യ ലിറ്ററസി പദ്ധതിയുടെ (ഉല്ലാസ്) ഭാഗമായാണ് അട്ടപ്പാടിയിലെ ഉന്നതികൾ കേന്ദ്രീകരിച്ച് സാക്ഷരതാ പ്രവർത്തനങ്ങൾ നടപ്പിലാക്കുന്നത്. പരിപാടിയിൽ ജില്ലാ പഞ്ചായത്ത് സെക്രട്ടറി എം. രാമൻകുട്ടി പഠിതാക്കൾക്കുള്ള പഠനോപകരണങ്ങൾ വിതരണം ചെയ്തു. അട്ടപ്പാടി വട്ട് ലക്കി ഫാമിംഗ് സൊസൈറ്റി ഹാളിൽ നടന്ന പരിപാടിയിൽ സംസ്ഥാന സാക്ഷരതാ മിഷൻ സംസ്ഥാന അസിസ്റ്റന്‍റ് ഡയറക്ടർ ഡോ. ലിജോ ജോർജ് അധ്യക്ഷനായി. അട്ടപ്പാടി അസിസ്റ്റന്‍റ് പ്രോജക്ട് ഓഫീസർ ബി.എസ്. മനോജ്, സാക്ഷരതാ മിഷൻ പാലക്കാട് അസിസ്റ്റന്‍റ് കോ-ഓർഡിനേറ്റർ പാർവതി, ജില്ലാ സാക്ഷരതാ സമിതി അംഗം വിജയൻ, കുടുംബശ്രീ പ്രോജക്ട് കോ-ഓർഡിനേറ്റർ കെ.ജെ ജോമോൻ, സാക്ഷരതാ മിഷൻ ജില്ലാ കോ-ഓർഡിനേറ്റർ സജി തോമസ്, കുടുംബശ്രീ പഞ്ചായത് സമിതി പ്രസിഡന്‍റുമാരായ സരസ്വതി മുത്തുകുമാർ, സലീന ഷണ്‍മുഖം, അനിത ബാബു, തുളസിമണി, കുടുംബശ്രീ പഞ്ചായത്ത് സമിതി അംഗങ്ങൾ, ആനിമേറ്റർമാർ, ബ്രിഡ്ജ് കോഴ്സ് അധ്യാപകർ, സാക്ഷരതാ പ്രേരക്മാർ തുടങ്ങിയവർ പങ്കെടുത്തു.

വോട്ടർപട്ടികയിലെ ക്രമക്കേട്: കോണ്‍ഗ്രസ് പ്രതിഷേധിച്ചു

പാലക്കാട്: തദ്ദേശ സ്വയംഭരണ തെരഞ്ഞെടുപ്പിന്‍റെ ഭാഗമായി പാലക്കാട് നഗരസഭ പ്രസിദ്ധീകരിച്ച വോട്ടർപട്ടികയിലെ വ്യാപകമായ ക്രമക്കേടിനെതിരേ പാലക്കാട് ബ്ലോക്ക് കോണ്‍ഗ്രസ് കമ്മിറ്റി പ്രതിഷേധിച്ചു. പല വാർഡുകളിലെയും വോട്ടർമാരെ വാർഡ് പുനർവിഭജനത്തിന്‍റെ നിബന്ധനകൾക്ക് വിരുദ്ധമായി മറ്റു വാർഡുകളിലേക്കു മാറ്റുകയും അതുപോലെ പല വാർഡുകളിലും വോട്ടർമാരെ വ്യാപകമായി ഒഴിവാക്കുകയും ചെയ്തു. ഇത് അടിയന്തരമായി പരിഹരിച്ചുമാത്രമേ പുതിയ വോട്ടർപട്ടിക പ്രസിദ്ധീകരിക്കാവൂ എന്ന് ബ്ലോക്ക് കോണ്‍ഗ്രസ് കമ്മിറ്റി ആവശ്യപ്പെട്ടു. നിലവിലെ മുനിസിപ്പാലിറ്റിയിലെ ഭരണകക്ഷി ഉദ്യോഗസ്ഥരെ സ്വാധീനിച്ചുകൊണ്ടാണ് ക്രമക്കേടുകൾ നടത്തിയതെന്ന് കമ്മിറ്റി ആക്ഷേപം ഉന്നയിച്ചു. പ്രശ്നം പരിഹരിക്കണമെന്ന് ആവശ്യപ്പെട്ട് ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് സി.വി. സതീഷ്, യുഡിഎഫ് നിയോജകമണ്ഡലം ചെയർമാൻ സുധാകരൻ പ്ലാക്കാട്ട്, നഗരസഭ അംഗങ്ങളായ കെ. ഭവദാസ്, എ. കൃഷ്ണൻ, മിനി ബാബു, ബി. സുഭാഷ്, മണ്ഡലം കോണ്‍ഗ്രസ് പ്രസിഡന്‍റുമാരായ അനിൽ ബാലൻ, എസ്.എം. താഹ, എസ്. സേവിയർ, രമേശ് പുത്തൂർ, നേതാക്കളായ ബോബൻ മാട്ടുമന്ത, വി. ആറുമുഖൻ, എ. സലിം, പ്രദീപ് കുണ്ടുകാട് തുടങ്ങിയവരുടെ നേതൃത്വത്തിൽ നഗരസഭാ സെക്രട്ടറിക്ക് കത്ത് നൽകി.

ചുള്ളിയാർമേട് റോഡ് തകർന്ന് വാഹനസഞ്ചാരം അപകടഭീതിയിൽ

മുതലമട: ചുള്ളിയാർമേട് - ആശുപത്രി റോഡ് തകർന്ന് വാഹനസഞ്ചാരം അപകടഭീഷണിയായി. മുതലമട കുടുംബാരോഗ്യകേന്ദ്രത്തിലേക്കു ദിവസേന നിരവധി പേർ ഇരുചക്രവാഹനത്തിലെത്തുന്ന വഴിയിലാണ് തുടർഗർത്തങ്ങളും വെള്ളക്കെട്ടും ഉണ്ടായിരിക്കുന്നത്. പുറകിൽ രോഗികളെ ചികിത്സയ്ക്ക് കൊണ്ടുവരുന്നതിനിടെ സ്കൂട്ടർ ഗർത്തത്തിൽ വീണ് പരിക്കേറ്റ അപകടങ്ങളും തുടർക്കഥയായി നീളുകയാണ്. ഹെവിലോഡ് ലോറികൾ സഞ്ചരിക്കുന്നതിനാലാണ് റോഡിൽ മെറ്റലിളകി തുടർഗർത്തങ്ങൾ ഉണ്ടായിരിക്കുന്നത്. 30 ടൺ ഭാരം രേഖകളിൽ കാണിച്ചാണ് തമിഴ്നാട്ടിൽ നിന്നും വരുന്ന മെറ്റൽകടത്തു വാഹനങ്ങൾ ഇരട്ടി ഭാരം കയറ്റുന്നത്. വല്ലപ്പോഴും ഇതുവഴി പട്രോളിംഗിനുവരുന്ന പോലീസ് അധികം ഭാരം കയറ്റുന്നതിന് പിഴ ഈടാക്കാറുണ്ട്. മുതലമട ഹയർ സെക്കൻഡറി സ്കൂളിലേക്കുള്ള വിദ്യാർഥികൾ ഇതുവഴി നടന്നുവരുന്നതും തീർത്തും സുരക്ഷിതമല്ലാതെയാണ്. ഗർത്തങ്ങളിലിറക്കാതിരിക്കാൻ വാഹനങ്ങൾ വലതും ഇടതും വശങ്ങൾ മാറി മാറിയാണ് സഞ്ചാരം. കാറുകളുടെ അടിഭാഗം ഗർത്തങ്ങളിലിടിച്ച് കേടുപാടുകൾ ഉണ്ടാവുന്നുണ്ട്. ഇക്കഴിഞ്ഞ ദിവസം നാട്ടുകാർ ഗർത്തത്തിൽ വൃക്ഷതൈ നട്ട് യാത്രക്കാർക്ക് അപകടമുന്നറിയിപ്പ് നൽകിയിരുന്നു. റോഡിന്‍റെ ശോച്യാവസ്ഥ സംബന്ധിച്ച് പൊതുപ്രവർത്തകൻ നിജാമുദീൻ ജില്ലാ കളക്ടർക്ക് പരാതി നൽകി. പൊതുമരാമത്തുവകുപ്പിനും പഞ്ചായത്തധികൃതർക്കും പലതവണ പരാതികൾ അറിയിച്ചിട്ടും നടപടികൾ ഉണ്ടായില്ലെന്നും പരാതിയിൽ നിജാമുദീൻ സൂചിപ്പിച്ചിട്ടുണ്ട്.

ചിറ്റൂർ താലൂക്കിൽ ചുഴലിക്കാറ്റിലും മഴയിലും വ്യാപകനാശം

ചിറ്റൂർ: ഇന്നലെ രാവിലെ താലൂക്കിന്‍റെ വിവിധ ഭാഗങ്ങളിൽ വീശിയടിച്ച ചുഴലിക്കാറ്റിലും മഴയിലും മരങ്ങൾ വീണ് ഗതാഗതം തടസപ്പെട്ടു. വൈദ്യുതി ലൈനുകൾ പൊട്ടിയും വ്യാപകനാശം. നല്ലേപ്പിള്ളി അഞ്ചാം മൈൽ റോഡിൽ മരം കടപുഴകി വീണ് ബസ് അടക്കമുള്ള വലിയ വാഹനങ്ങളുടെ സഞ്ചാരം മൂന്നു മണിക്കൂറോളം തടസപ്പെട്ടു. സംഭവസമയത്ത് വാഹനങ്ങൾ വരാതിരുന്നതിനാൽ അനിഷ്ട സംഭവങ്ങൾ ഒഴിവായി . എരിശേരി പത്മാവതിയുടെ വീട്ടിലുള്ള 50 അടി ഉയരമുള്ള വൃക്ഷമാണ് റോഡിനു കുറുകെ വീണത് . നെടുമ്പള്ളത്ത് തെങ്ങ് വീണ് വൈദ്യുതി ലൈനുകൾ പൊട്ടി. മുതലാംതോട് കന്നിമാരി, കൈതറവ് എന്നിവിടങ്ങളിലും മരങ്ങൾവീണ് വൈദ്യുതിവിതരണം നിലച്ചു. അഞ്ചുവെള്ളക്കാട്ടിൽ മരംവീണ് വൈദ്യുതിതൂൺ മുറിഞ്ഞു. വണ്ടിത്താവളം പന്തൽമുട്ടിയിലും മരശിഖരം റോഡിൽ പൊട്ടിവീണു. അതിശക്തമായ കാറ്റുവീശിയതിൽ വീടുകളിലും വ്യാപാരസ്ഥാപനങ്ങളിലുണ്ടായിരുന്നവർ ഭീതിയിലായി. ഗ്രാമങ്ങളിൽ വീടുകൾക്കു മുന്നിലെ സൺഷെയ്ഡുകളും വീണുനശിച്ചു. ഇന്നു വൈകുന്നേരത്തോടെ പൂർണതോതിൽ വൈദ്യുതി പുന:സ്ഥാപിക്കാനാവുമെന്ന് അധികൃതർ അറിയിച്ചു.

നേത്രപരിശോധനാ ക്യാമ്പ്

ഒലവക്കോട്: നന്മ അകത്തേത്തറയും ഒലവക്കോട് ചാരിറ്റബിൾ സൊസൈറ്റിയും അകത്തേത്തറ കുടുംബാരോഗ്യകേന്ദ്രത്തിന്‍റെയും ഗ്രാമപഞ്ചായത്തിന്‍റെയും സഹകരണത്തോടെ റെയിൽവേ കോളനി സെന്‍റ് ജോസഫ് ഫൊറോന പള്ളിയിൽ നേത്രപരിശോധനാ ക്യാമ്പ് നടത്തി. ഫാ. ഷാജു അങ്ങേവീട്ടിൽ ഉദ്ഘാടനം നിർവഹിച്ചു. നന്മ പ്രസിഡന്‍റ് മനോജ് കെ. മൂർത്തി അധ്യക്ഷത വഹിച്ചു. സെക്രട്ടറി സിബിച്ചൻ തോമസ്, ഡോ. അനീഷ്, ആന്‍റണി തരകൻ എന്നിവർ പ്രസംഗിച്ചു. ജില്ലാ ആശുപത്രിയിലെ നേത്രരോഗവിഭാഗത്തിലെ വിദഗ്ധഡോക്ടർമാർ നേതൃത്വം നൽകി. നൂറിലധികം രോഗികളെ പരിശോധിച്ചു. തുടർചികിത്സയും നിർദേശിച്ചു.

അതിശയംനിറച്ച് പാലക്കുഴി

ഫ്രാൻസിസ് തയ്യൂർ വടക്കഞ്ചേരി: പുരാതനചരിത്രവും കൃഷിമേന്മകളും പ്രകൃതി മനോഹാരിതയും നിറഞ്ഞുനിൽക്കുന്ന ഹരിതഭൂമികയാണ് മലമ്പ്രദേശമായ പാലക്കുഴി. പാലക്കുഴി സ്വപ്നഭൂമികയാണ്. റബറും കുരുമുളകും ജാതിയും ഏലവും വിളയുന്ന ലക്ഷണമൊത്ത കുടിയേറ്റഗ്രാമം. വടക്കഞ്ചേരിയുടെ വളർച്ചയ്ക്ക് മലഞ്ചരക്ക് ഉത്പന്നങ്ങളിലൂടെ പ്രധാന പങ്കുവഹിക്കുന്ന പാലക്കുഴിക്കു പൊക്കക്കുറവും ലവലേശമില്ല. സമുദ്രനിരപ്പിൽനിന്നും മൂവായിരത്തോളം അടി ഉയരം. ഈ തലയെടുപ്പുതന്നെയാണ് പാലക്കുഴിയെ മനോഹരിയാക്കുന്നതും. ഏതോ പുരാതനസംസ്കൃതിയുടെ ശേഷിപ്പുകളും ഇന്നും പാലക്കുഴിയിലുണ്ട്. പോത്തുമട ഭാഗത്താണ് ഇന്നും വലിയ കേടുപാടുകളില്ലാതെ നിലനിൽക്കുന്ന നന്നങ്ങാടികളുള്ളത്. പാലക്കുഴി മലമുകളിൽനിന്നും താഴേക്കുള്ള അതിദൂര കാഴ്ച അതിമനോഹരം എന്നുമാത്രമേ പറയാനാകു. പ്രദേശമൊട്ടാകെ ഈ മലമുകളിൽനിന്നു കാണാം. പ്രകൃതി സൗന്ദര്യം ആസ്വദിക്കാനാണ് അവധി ദിവസങ്ങളിലും മറ്റും നൂറുകണക്കിനാളുകൾ മലകയറുന്നത്. തിണ്ടില്ലം വെള്ളച്ചാട്ടം രൂപമെടുക്കുന്ന പുഴയും കുരുമുളകുതോട്ടങ്ങളുടെ പച്ചക്കാടുകളും വൈവിധ്യമാർന്ന പഴവർഗത്തോട്ടങ്ങളും സഞ്ചാരികളെ ഏറെ ആകർഷിക്കുന്നവയാണ്. വഴിനീളം വിസ്മയക്കാഴ്ചകൾ കുത്തനെയുള്ള കയറ്റങ്ങളുമായി പാലക്കുഴിയിലേക്കുള്ള വാഹന യാത്ര ചെറിയ ദുർഘടമാണെങ്കിലും വഴിയിലൂടനീളമുണ്ട് വിസ്മയ കാഴ്ചകൾ. വടക്കഞ്ചേരിയിൽ നിന്നും എട്ടു കിലോമീറ്റർ യാത്ര ചെയ്തു കണച്ചിപരുതയിലെത്തി അവിടെനിന്നുമാണ് എട്ടു കിലോമീറ്റർ പിന്നേയും ദൂരം വരുന്ന പാലക്കുഴിയിലേക്കുള്ള യാത്ര തുടങ്ങുന്നത്. പാലക്കുഴി റോഡിന്‍റെ വലതു ഭാഗം പീച്ചി വന്യമൃഗ സംരക്ഷണ കേന്ദ്രമാണ്. കുറച്ചുകാലം മുമ്പുവരെ പുല്ലംപരുത, താണിച്ചുവട് ഭാഗങ്ങളിൽ ആന ഇറങ്ങിയിരുന്നു. എന്നാൽ ഇപ്പോൾ സോളാർ ഫെൻസിംഗ് കാര്യക്ഷമമാക്കിയതോടെ ആനശല്യം കുറവുണ്ട്. ഇവിടെയാണ് താഴേക്കുള്ള നല്ലൊരു വ്യു പോയിള്ളത്. തുടർന്നുള്ള യാത്രകളിലെല്ലാം റബർ തോട്ടങ്ങളും കുരുമുളകുതോട്ടങ്ങളും കാണാനാകും. അഞ്ചുവഴികൾ സംഗമിക്കുന്ന അഞ്ചുമുക്ക് എന്ന സ്ഥലമാണ് പാലക്കുഴിയുടെ പ്രധാന സെന്‍ററുകളിലൊന്ന്. അഞ്ചുമുക്കിൽ നിന്നും 150 മീറ്റർ മാറിയാണ് തിണ്ടില്ലം മിനി ജലവൈദ്യുത പദ്ധതിക്കായുള്ള ചെക്ക്ഡാമുള്ളത്. ഇവിടെയാണ് പുഴ. പടപൊരുതി നേടിയത്... പാറക്കൂട്ടങ്ങളിൽ ആർത്തലച്ച് തട്ടിച്ചിതറി പായുന്ന പുഴുടെ ഒഴുക്ക് കാണാനും അപകടകരമല്ലാത്ത പ്രദേശത്ത് കുളിക്കാനുമായി ഇവിടെ വിനോദസഞ്ചാരികളെത്തുന്നു. ചെക്ക് ഡാമിന്‍റെ പാലത്തിലൂടെ കയറി രണ്ടുകിലോമീറ്റർ യാത്ര ചെയ്താൽ പോത്തുമടയിലെ നന്നങ്ങാടിയിലെത്താം. ഇത് ഒറ്റപ്പെട്ട സ്ഥലമാണ്. വഴികാട്ടിയായി പ്രദേശവാസികളുണ്ടായാൽ യാത്ര എളുപ്പമാകും. അതല്ലെങ്കിൽ വഴിതെറ്റി വലയും. പാലക്കുഴിയുടെ ഈ ഹരിത ശോഭയ്ക്കുപിന്നിൽ കുടിയേറ്റ കർഷകരുടെ വിയർപ്പിന്‍റെ കഥകളും ഏറെയുണ്ട്. പൂർവികരുടെ വലിയ യാതനകളുണ്ട് ഈ കർഷിക സമൃദ്ധിക്കെല്ലാം പിന്നിൽ. പ്രകൃതിയോടും കാട്ടുമൃഗങ്ങളോടും സർക്കാർ സംവിധാനങ്ങളോടും പടപൊരുതി നേടിയതാണ് ഇന്നുകാണുന്നതെല്ലാം. റബറും കുരുമുളകുമാണ് പാലക്കുഴിക്കാരുടെ പ്രധാന വരുമാന മാർഗം. രണ്ടിന്‍റെയും വിലയെ ആശ്രയിച്ചാണ് പാലക്കുഴിക്കാരുടെ ജീവിതം മുന്നോട്ടു പോവുക.

ക്യുആർ കോഡിലും തട്ടിപ്പ്: ജാഗ്രത പാലിക്കണം

പാലക്കാട്: സൈബർ തട്ടിപ്പുകൾ വർധിച്ചുവരുന്ന കാലത്ത് ക്യുആർ കോഡ് ഉപയോഗിച്ചുള്ള തട്ടിപ്പുകൾ പെരുകുന്നു. ധനകാര്യ വകുപ്പ് ഡെപ്യൂട്ടി സെക്രട്ടറിയും നിലവിൽ പാലക്കാട് ജില്ലാ പഞ്ചായത്ത് ഫിനാൻസ് ഓഫീസറുമായ പി. അനിൽകുമാർ നൽകിയ മുന്നറിയിപ്പുകളും ക്യുആർ കോഡ് തട്ടിപ്പുകളിൽനിന്ന് രക്ഷനേടാനുള്ള വഴികളും താഴെ വിവരിക്കുന്നു. എന്താണ് ക്യുആർ കോഡ്? ക്വിക്ക് റെസ്പോണ്‍സ് (ക്വിക്ക് റെസ്പോണ്‍സ്) എന്നാണ് ക്യുആർ- ന്‍റെ പൂർണ രൂപം. 1994 ൽ ജപ്പാനിലെ ഓട്ടോമോട്ടിവ് കന്പനിയായ ഡെൻസോ വേവിനായി കണ്ടുപിടിച്ച വെള്ളയും കറുപ്പും ചതുരങ്ങളിലുള്ള ഒരു ദ്വിമാന ബാർ കോഡാണ് ക്യുആർ. ഇതൊരു മെഷീൻ റീഡബിൾ ഒപ്റ്റിക്കൽ ലേബലാണ്. ഇവയിൽ ഒരു ആപ്ലിക്കേഷനിലേക്കോ, വെബ്സൈറ്റിലേക്കോ പോയിന്‍റ് ചെയ്യുന്ന ലോക്കേറ്റർ, അല്ലെങ്കിൽ ഐഡന്‍റിഫയർ ഉൾപ്പെട്ടിരിക്കുന്നു. ഉപയോക്താക്കൾക്ക് ക്യുആർ കോഡ് സൃഷ്ടിക്കാനും പ്രിന്‍റ് ചെയ്യാനും സാധിക്കും. തട്ടിപ്പിലെ വിവിധ മാർഗങ്ങൾ 1. ക്വിഷിംഗ്: ക്യുആർ കോഡ് തട്ടിപ്പുകളിൽ ഏറ്റവും സാധാരണയായി നടക്കുന്ന തട്ടിപ്പാണിത്. ഉപയോക്താവിനെ മനഃപൂർവം വഞ്ചിച്ച് ക്യു.ആർ കോഡ് സ്കാൻ ചെയ്യാൻ പ്രേരിപ്പിക്കുകയും വ്യക്തിയെ വ്യാജ വെബ്സൈറ്റിലേക്ക് റീഡയറക്ട് ചെയ്യുകയും ചെയ്യുന്നു. അവിടെ നിന്ന് ബാങ്ക് അക്കൗണ്ട്, ക്രെഡിറ്റ് കാർഡ് വിവരങ്ങൾ, പാസ്‌വേഡുകൾ എന്നിവ ചോർത്താൻ ശ്രമിക്കുകയും ചെയ്യുന്നു. 2. ഫിഷിംഗ്: ക്യുആർ ഫിഷിംഗ് എന്നത് ഒരു സോഷ്യൽ എൻജിനീയറിംഗ് ആക്രമണമാണ്. കത്ത്, വ്യാജ രേഖകൾ, സന്ദേശങ്ങൾ, പരസ്യങ്ങൾ, വ്യാജ ഇ-മെയിലുകൾ എന്നിവയിലൂടെ വ്യാജ ക്യുആർ കോഡ് ഉപയോഗിച്ച് വ്യക്തിഗത സെൻസിറ്റീവ് വിവരങ്ങൾ മോഷ്ടിക്കുന്ന രീതിയാണിത്. വിവരങ്ങൾ മോഷ്ടിക്കാനുള്ള പ്രധാനമാർഗം കൂടിയാണിത്. 3. മാൽവെയർ ഇൻസ്റ്റലേഷൻ: ഉപയോക്താക്കൾ സ്കാൻ ചെയ്യുന്ന ക്യുആർ കോഡ് വഴി ഉപകരണങ്ങളിൽ മാൽവെയർ സന്നിവേശിപ്പിക്കുന്നു. ഇതു ഫോണിലെ വിവരങ്ങൾ കൈമാറ്റം ചെയ്യപ്പെടുന്നതിനു വഴി വയ്ക്കുന്നു. സൂക്ഷിച്ചാൽ ദുഃഖിക്കേണ്ട 1.വിശ്വാസയോഗ്യമല്ലാത്ത ക്യുആർ കോഡ് സ്കാൻ ചെയ്യരുത്. 2. അപരിചിതർ നൽകുന്ന ക്യുആർ കോഡുകൾ സ്കാൻ ചെയ്യാതിരിക്കുക. 3. ഡിജിറ്റൽ ഉപകരണങ്ങളിൽ ആന്‍റി വൈറസ് ഇൻസ്റ്റാൾ ചെയ്ത് ഉപയോഗിക്കുക. 4. ഗൂഗിളിൽ കാണുന്ന നന്പറുകൾ, ക്യുആർ കോഡുകൾ തുടങ്ങിയവ ഉപയോഗിക്കാതിരിക്കുക. 5. ഒരു ക്യുആർ കോഡ് മറ്റൊന്നിന് മുകളിൽ സ്ഥാപിച്ചിരിക്കുന്നു എന്നു കണ്ടെത്തിയാൽ തട്ടിപ്പിന്‍റെ സൂചനയാകാം. 6. പൊതു വൈഫൈ നെറ്റ്‌വർക്കുകൾ ഉപയോഗിക്കുന്പോൾ അതീവ ജാഗ്രത പുലർത്തുക. 7. ഇവന്‍റ് രജിസ്ട്രേഷനായി നൽകുന്ന ലിങ്ക് ഫോം, ക്യുആർ എന്നിവയിലൂടെ തട്ടിപ്പുകാർ ഡേറ്റ ശേഖരണം നടത്താറുണ്ട്, ശ്രദ്ധിക്കണം. 8. ക്യുആർ കോഡ് സ്കാൻ ചെയ്യുന്പോൾ തെളിയുന്ന പേരും സ്വീകർത്താവിന്‍റെ പേരും തമ്മിൽ ക്രോസ്‌ചെക്ക് ചെയ്യുക. 9. ക്യുആർ കോഡ് സ്കാൻ ചെയ്യുന്പോൾ ലഭിക്കുന്ന യുആർഎൽ നന്നായി വായിക്കുക. ക്രമരഹിതമായ അക്ഷരങ്ങൾ വ്യാജമായിരിക്കാൻ സാധ്യതയുണ്ട്. 10. നിങ്ങളുടെ ഫോണിലെ ഓപ്പറേറ്റിംഗ് സിസ്റ്റവും സുരക്ഷ സോഫ്റ്റ്‌വെയറും പതിവായി അപ്ഡേറ്റ് ചെയ്യുക. ഇരയായാൽ ചെയ്യേണ്ടത്... 1. ബാങ്കുമായി ബന്ധപ്പെടുക, അക്കൗണ്ട് മരവിപ്പിക്കുക. 2. വ്യാജ വെബ്സൈറ്റിൽ ലോഗിൻ വിവരങ്ങൾ ഉപയോഗിച്ചിട്ടുണ്ടെങ്കിൽ നിങ്ങളുടെ പാസ്‌വേഡുകൾ മാറ്റുക. 3. ക്യുആർ കോഡ് തട്ടിപ്പ് ഫെഡറൽ ട്രേഡ് കമ്മീഷൻവഴി റിപ്പോർട്ട് ചെയ്യുക. 4. തട്ടിപ്പിന് ഇരയായാൽ ഉടൻ ലോക്കൽ പോലീസിൽ വിവരം അറിയിക്കുക, എഫ്ഐആർ ഫയൽ ചെയ്യുക. 5. നാഷണൽ സൈബർക്രൈം പോർട്ടൽ വഴിയും പരാതി സമർപ്പിക്കാം.

വയോധിക മരിച്ചനിലയിൽ

ആലത്തൂർ: കാവശേരി കൃഷിഭവനു സമീപമുള്ള പറമ്പിൽ വയോധികയെ മരിച്ചനിലയിൽ കണ്ടെത്തി. കാവശേരി ലക്ഷംവീട് മരുതംപാടം പൊന്നന്‍റെ ഭാര്യ ലക്ഷ്മി(79)യെയാണ് മരിച്ചനിലയിൽ കണ്ടെത്തിയത്. പറമ്പിലെ താത്കാലിക ഷെഡിലെ എർത്ത് കേബിളിൽനിന്നു ഷോക്കേറ്റതാകാം മരണകാരണമെന്നു കരുതുന്നു. ഇന്നലെ ഉച്ചയ്ക്കു രണ്ടോടെയാണ് മൃതദേഹം കണ്ടത്. തേങ്ങയും വിറകും ശേഖരിക്കാൻ പതിവായി പോവാറുള്ള ലക്ഷ്മി രാവിലെ ഒമ്പതുമണിയോടെ വീട്ടിൽനിന്നിറങ്ങിയതാണ്. ആലത്തൂർ പോലീസ് സ്ഥലത്തെത്തി മൃതദേഹം താലൂക്ക് ആശുപത്രി മോർച്ചറിയിലേക്കു മാറ്റി. ഇന്നു പാലക്കാട് ജില്ലാ ആശുപത്രിയിൽ പോസ്റ്റുമോർട്ടത്തിനുശേഷം സംസ്കാരം നടത്തും. ലക്ഷ്മിയുടെ മകൻ: ബാബു. മരുമകൾ: ഗിരിജ.

അപകടത്തിൽ പരിക്കേറ്റ രണ്ടാമത്തെയാളും മരിച്ചു

ശ്രീകൃഷ്ണപുരം: ബലിതര്‍പ്പണത്തിനു പോകുന്പോൾ ബസിടിച്ച് അപകടത്തില്‍പെട്ട സഹോദരങ്ങളില്‍ രണ്ടാമത്തെയാളും മരിച്ചു. മങ്ങോട് കരിമ്പിന്‍ചോല വീട്ടില്‍ പ്രസാദാണ് (43) മരിച്ചത്. അപകടത്തെതുടര്‍ന്നു ഗുരുതരാവസ്ഥയിലായിരുന്ന പ്രസാദ് തൃശൂര്‍ മെഡിക്കല്‍ കോളജില്‍ ചികിത്സയിലായിരുന്നു. അപകടം നടന്ന വ്യാഴാഴ്ചതന്നെ പ്രസാദിന്‍റെ ജ്യേഷ്ഠന്‍ രവികുമാർ മരിച്ചിരുന്നു. ബലിതര്‍പ്പണത്തിനു കരിമ്പുഴയിലേക്ക് ഇരുവരും സ്‌കൂട്ടറില്‍ പോകുന്നതിനിടെ മുണ്ടൂര്‍ - തൂത പാതയിലെ കള്ളുഷാപ്പിനു സമീപത്തെ വളവില്‍ മണ്ണാര്‍ക്കാട്ടുനിന്നു തൃശൂരിലേക്കു പോകുകയായിരുന്ന സ്വകാര്യബസ് ഇടിക്കുകയായിരുന്നു. ചെര്‍പ്പുളശേരി പോലീസ് കേസെടുത്തു.

പൊൽപ്പുള്ളി -പതി പാതയിലെ കുളത്തിന്‍റെ ബണ്ട് ബലപ്പെടുത്തണം

ചിറ്റൂർ: പൊൽപ്പുള്ളി -പതിവഴിയിലെ കുളത്തിനു കൈവരി നിർമിക്കണമെന്ന് ആവശ്യം. സ്ഥലത്തുള്ള ഹോമിയോ ഡിസ്പെൻസറി, വില്ലേജ് ഓഫീസ് എന്നിവിടങ്ങളി ലേക്ക് നിത്യേന നിരവധിപേർ എത്താറുണ്ട്. വീതി കുറഞ്ഞ പാതയിൽ കുളത്തിനരികെയാണ് വാഹനങ്ങൾ നിർത്തിയിടുന്നത്. കാലപ്പഴക്കം കാരണം കുളത്തിന്‍റെ കിഴക്കുഭാഗം റോഡരികിലെ ബണ്ട് ദുർബലമായി വരികയാണ്. അടുത്തുതന്നെയുള്ള പൊൽപ്പുള്ളി സ്കൂളിലേക്ക് വിദ്യാർഥികൾ നടന്നുവരുന്നതും അപകടഭീഷണിയുള്ള കുളത്തിന്‍റെ ബണ്ട് വഴിയാണ്. റോഡിൽ കാറോ ഇതര വാഹനങ്ങളോ എത്തിയാൽ ഈ സ്ഥലത്ത് സുരക്ഷിതമായി മാറിനിൽക്കാൻ പോലും സ്ഥലം ഇല്ലാത്ത അവസ്ഥയിലാണുള്ളത്. അപകടങ്ങൾ ഉണ്ടാകുന്നതിനു മുന്പ് നടപടിയെടുക്കണമെന്നാണ് നാട്ടുകാരുടെ ആവശ്യം.

വിമുക്തി മിഷനിലൂടെ ജില്ലയില്‍ 1358 പേര്‍ ലഹരിവിമുക്തരായി

പാലക്കാട്: വിമുക്തി മിഷനിലൂടെ 2018 മുതല്‍ ജില്ലയിലെ 1358 പേര്‍ ലഹരിമുക്തരായതായി ഡെപ്യൂട്ടി എക്‌സൈസ് കമ്മീഷണര്‍ അറിയിച്ചു. മദ്യവര്‍ജനത്തോടൊപ്പം മയക്കുമരുന്ന് ഉപയോഗത്തിന് തടയിടുന്നതിനായി സംസ്ഥാന സര്‍ക്കാര്‍ ആവിഷ്‌ക്കരിച്ച പദ്ധതിയാണ് വിമുക്തി മിഷന്‍. ജില്ലയിലെ സ്‌കൂള്‍, കോളജ് വിദ്യാര്‍ഥികള്‍ക്കിടയില്‍ എക്‌സൈസ് വകുപ്പിന്‍റെ ആഭിമുഖ്യത്തില്‍ വിവിധ വകുപ്പുകളുടെ സഹകരണത്തോടെ പൊതു ജനങ്ങള്‍ക്കിടയിലും, വിവിധ ക്ലബുകള്‍, സംഘടനകള്‍, ഉന്നതികള്‍, കോളനികള്‍ കേന്ദ്രീകരിച്ച് ലഹരി വിരുദ്ധ ബോധവത്കരണ ക്ലാസുകളും പരിപാടികളും വിമുക്തിയുടെ ഭാഗമായി നടന്നു വരുന്നു. മേയ് 31ന് പുകയില വിരുദ്ധ ദിനത്തോടനുബന്ധിച്ച് ലഹരി വിരുദ്ധ മാരത്തോണ്‍, ജൂണ്‍ അഞ്ചിന് പരിസ്ഥിതി ദിനത്തോടനുബന്ധിച്ച് വിവിധ സ്‌കൂളുകളില്‍ കുട്ടികളുടെ ബിനാലെ, ജൂണ്‍ 26ന് അന്താരാഷ്ട്ര മയക്കുമരുന്ന് വിരുദ്ധ ദിനത്തില്‍ സ്‌കൂള്‍ പാര്‍ലമെന്‍റ്, ലഹരിവിരുദ്ധ പ്രതിജ്ഞ, ജില്ലാതല ലഹരി വിരുദ്ധ ബോധവത്കരണ പരിപാടി, ലഹരിക്കെതിരെ ഫ്ലാഷ് മോബ്, റാലി തുടങ്ങിയവ ഇവയില്‍ ഉള്‍പ്പെടുന്നു. അട്ടപ്പാടി കോട്ടത്തറയിലുളള ഡി അഡിക്ഷന്‍ സെന്‍ററിലെ ചികിത്സയിലൂടെയാണ് 1358 പേര്‍ ലഹരിമുക്തരായത്. നിരവധിപേര്‍ക്ക് കൗണ്‍സിലിംഗും നൽകി. ലഹരി മുക്തിക്കായി പ്രവേശിപ്പിക്കപ്പെടുന്ന വ്യക്തിക്കും കൂട്ടിരിപ്പുകാര്‍ക്കും കോട്ടത്തറയിലുളള ഡി അഡിക്ഷന്‍ സെന്‍ററില്‍ താമസവും ചികിത്സയും പൂര്‍ണമായും സൗജന്യമാണ്. 21 ദിവസമാണ് ചികിത്സാ കാലഘട്ടമെങ്കിലും സാഹചര്യമനുസരിച്ച് കാലയളവ് വ്യത്യസ്തമാകും. ജില്ലാ പഞ്ചായത്ത് പ്രസിഡന്‍റ് ചെയര്‍മാനും ജില്ലാ കളക്ടര്‍ കണ്‍വീനറും ഡെപ്യൂട്ടി എക്സൈസ് കമ്മീഷണര്‍ വൈസ് ചെയര്‍മാനുമായ സമിതിയാണ് വിമുക്തി മിഷന്‍റെ പ്രവര്‍ത്തനങ്ങള്‍ ജില്ലയില്‍ നിയന്ത്രിക്കുന്നത്. വാര്‍ഡ് തലം വരെ സമിതിയുടെ പ്രവര്‍ത്തനങ്ങള്‍ ജില്ലയില്‍ കാര്യക്ഷമമായി നടന്നു വരുന്നു. 2024 -25 ല്‍ മാത്രം 13,394 റെയ്ഡുകള്‍ ജില്ലയില്‍ നടത്തി. ഇതില്‍ 1800 അബ്കാരി കേസുകള്‍, 525 എന്‍ഡിപിഎസ്, 6998 കോട്പ കേസുകളും രജിസ്റ്റര്‍ ചെയ്തു. കായികപ്രവൃത്തികളിലേക്ക് കുട്ടികളുടെ ശ്രദ്ധ കേന്ദ്രീകരിക്കാനും ഇത്തരം കഴിവുകളെ വളര്‍ത്തിയെടുക്കാനും ‘ഉണര്‍വ് - ലഹരിക്കെതിരെ കായിക ലഹരി' എന്ന പദ്ധതി നടപ്പിലാക്കിവരുന്നു. പിന്നാക്ക വിഭാഗത്തിലുള്ള കുട്ടികള്‍ പഠിക്കുന്ന സ്‌കൂളുകളാണ് പദ്ധതിയിലേക്ക് പരിഗണിക്കുന്നത്. പദ്ധതിയുടെ ഭാഗമായി പട്ടഞ്ചേരി ഗവ. ഹയര്‍ സെക്കന്‍ഡറി സ്‌കൂളിന് കായിക ഉപകരണങ്ങള്‍ വാങ്ങി നല്‍കി. അഗളി ജിവിഎച്ച്എസ്എസ് സ്‌കൂളില്‍ കായിക ഉപകരണങ്ങള്‍ക്കും ഫുട്ബോള്‍-വോളിബോള്‍ കോര്‍ട്ടിന്‍റെ നിര്‍മാണ പ്രവര്‍ത്തനങ്ങള്‍ക്കും ധനസഹായം നല്‍കി. അഞ്ച് ലക്ഷം രൂപ വീതമാണ് രണ്ട് സ്‌കൂളുകള്‍ക്കും നല്‍കിയത്. രണ്ട് വര്‍ഷങ്ങളിലായി ഓരോ വര്‍ഷവും വിവിധ എക്സൈസ് റേഞ്ച് പരിധികളില്‍ നിന്ന് മൂന്ന് സ്‌കൂളുകൾക്ക് വീതം 78 സ്‌കൂളുകളില്‍ പതിനായിരം രൂപ ചെലവില്‍ ജേഴ്‌സിയും കായിക ഉപകരണങ്ങളും വാങ്ങി നല്‍കി. 2025- 26 അധ്യയന വര്‍ഷത്തില്‍ ജില്ലയിലെ തെരഞ്ഞെടുത്ത മൂന്ന് സ്‌കൂളുകളില്‍ 2.50 ലക്ഷം രൂപ വീതം വിലവരുന്ന കായിക ഉപകരണങ്ങള്‍ വിതരണം ചെയ്യും.

കൊടുവായൂർ ബസ് സ്റ്റാൻഡ് നവീകരിക്കണമെന്ന ആവശ്യം ശക്തം

കൊടുവായൂർ: കോടികൾ ചെലവഴിച്ച് ഗ്രാമപഞ്ചായത്ത് നിർമിച്ച ബസ് സ്റ്റാൻഡ് കം കമ്യൂണിറ്റിഹാൾ അധികൃതരുടെ അവഗണനയിൽവ നാശോന്മുഖമാകുന്നു. 2012-13 വർഷം പി.കെ. ബിജു എംപിയുടെ പ്രാദേശിക വികസന ഫണ്ട് ഒന്നര കോടി ചെലവഴിച്ചാണ് ബസ് സ്റ്റാൻഡ് നിർമിച്ചത്. ആദ്യ വർഷം ഒരു വർഷത്തോളം ബസുകൾ സ്റ്റാൻഡിനകത്ത് കയറിയിരുന്നെങ്കിലും നിർമാണത്തിലെ അപാകത കാരണം ഘട്ടംഘട്ടമായി നിർത്തിവെയ്ക്കുകയാണുണ്ടായത്. സ്റ്റാൻഡിനകത്ത് ബസുകൾ കയറുന്ന വഴികൾ ഏറെ ദുർഘടമായതും ബസ് എത്തുന്നത് നിലയ്ക്കാൻ കാരണമായി. കോയമ്പത്തൂരിൽ നിന്നും കൊടുവായൂർ എത്തി മടങ്ങുന്ന ഒരു തമിഴ്നാട് സർക്കാർ ബസ് മാത്രമാണ് സ്റ്റാൻഡിലെത്തുന്നത്. ടൗണിൽ വിവിധ ആവശ്യങ്ങൾക്ക് എത്തുന്നവർ വാഹനം സ്റ്റാൻഡിൽ നിർത്തിതുടങ്ങി. നിലവിൽ വിപുലമായ കെട്ടിടം ഉണ്ടായിട്ടും യാത്രക്കാർ മഴയത്തും വെയിലത്തും റോഡിൽ നിന്നാണ് ബസ് കയറുന്നത്. സ്റ്റാൻഡിനകത്ത് കോമ്പൗണ്ട് തകർന്ന് വെള്ളക്കെട്ട് രൂപപ്പെട്ടു. സ്റ്റാൻഡിനകത്ത് ഇതര വാഹനങ്ങൾ നിർത്തുന്നതിരെ യാത്രക്കാരുടെ പ്രതിഷേധം ഉണ്ടായി. ഇതോടെ പഞ്ചായത്ത് അധികൃതർ സ്റ്റാൻഡിനകത്ത് അന്യവാഹനങ്ങൾ കയറുന്നതു തിരോധിച്ചതായി നോട്ടീസ് പതിച്ചു. എന്നാൽ സ്റ്റാൻഡിൽ ബസ് കയറാനുള്ള ഒരു നടപടിയും ഇതുവരെ ഉണ്ടായിട്ടില്ല.

താലൂക്ക് ആശുപത്രി കോമ്പൗണ്ടിലെ വഴിമുടക്കിയായ പഴയ വാഹനം മാറ്റണം

ചിറ്റൂർ: താലൂക്ക് ആശുപത്രി കോമ്പൗണ്ടിൽ വർഷങ്ങളായി വഴിമുടക്കിയായി കിടക്കുന്ന ഉപയോഗമില്ലാത്ത പഴയവാഹനം മാറ്റണമെന്ന് ആവശ്യം. എക്സ്റെ റൂം, സ്ത്രീകളുടെ അഡ്മിഷൻ വാർഡ്, മെഡിക്കൽ ഷോപ്പ് എന്നിവിടങ്ങളിലേക്ക് നടന്നും വീൽചെയറിലും രോഗികളും കൂട്ടിരിപ്പുകാരും സഞ്ചരിക്കുന്ന വഴിയിലാണ് വാഹനം കിടക്കുന്നത്. സ്ഥലമില്ലാത്തതു കാരണം 108 ആംബുലൻസ് വരെ കോമ്പൗണ്ടിനു പുറത്താണ് നിർത്തിയിടുന്നത്. 15 വർഷം കഴിഞ്ഞതിനാൽ ഫിറ്റ്നസ് പുതുക്കാത്തതാണ് വാഹനം ഓടിക്കാൻ കഴിയാത്ത സാഹചര്യം ഉണ്ടായിരിക്കുന്നത്. നിലവിൽ പുതിയ കെട്ടിടത്തിൽ ഒപിയും അത്യാഹിത വിഭാഗവും ഫാർമസിയും മാത്രമാണ് മാറ്റിയിരിക്കുന്നത്. എക്സ്റെ യൂണിറ്റ് മാറ്റണമെങ്കിൽ ഇനിയും കടമ്പകളേറെയുണ്ട്. ഈ സാഹചര്യത്തിൽ ചികിത്സക്ക് പോവുന്ന വഴിയെങ്കിലും ഉപയോഗപ്രദമാക്കേണ്ടതുണ്ട്. വീതി കുറഞ്ഞ വഴിയിലൂടെ എക്സ്റെ യൂണിറ്റിലേക്ക് നടന്നു പോവുന്നത് ഏറെ വിഷമകരവുമാണ്.

ജനകീയകൂട്ടായ്മയിൽ എടത്തനാട്ടുകര ജിഒഎച്ച്എസ്എസ് സോളാറിലേക്ക്

മണ്ണാർക്കാട്: എടത്തനാട്ടുകര ഗവ. ഓറിയന്‍റല്‍ ഹയര്‍ സെക്കൻഡറി സ്‌കൂളില്‍ പിടിഎ, എസ്എംസി, എംപിടിഎ സ്റ്റാഫ് കൗൺസിൽ, വിദ്യാര്‍ഥികള്‍, പൊതു ജനങ്ങള്‍, എന്നിവവരുടെ സഹകരണത്തോടെ സജ്ജീകരിച്ച സോളാര്‍ പദ്ധതിയുടെ ഉദ്ഘാടനം ഇന്ന് രാവിലെ 10ന് സ്‌കൂളില്‍ നടക്കും. 10 ലക്ഷത്തോളം രൂപ ചെലവഴിച്ച് 20 കിലോ വാട്ടിന്‍റെ സോളാർ പദ്ധതിയാണ് ജനകീയ കൂട്ടായ്മയിൽ സ്കൂളിൽ സജ്ജീകരിച്ചത്. കൂപ്പൺ ചലഞ്ച് അടക്കമുള്ള പദ്ധതികൾ പിടിഎയുടെ കീഴിൽ ഇതിനായി സംഘടിപ്പിച്ചിരുന്നു. മന്ത്രി എ.കെ. ശശീന്ദ്രൻ ഉദ്ഘാടനം ചെയ്യും. എന്‍. ഷംസുദ്ദീന്‍ എംഎൽഎ അധ്യക്ഷത വഹിക്കും. മണ്ണാര്‍ക്കാട് ബ്ലോക്ക് പഞ്ചായത്ത് പ്രസിഡന്‍റ് വി. പ്രീത, അലനല്ലൂര്‍ ഗ്രാമ പഞ്ചായത്ത് പ്രസിഡന്‍റ് പി.പി. സജ്ന സത്താര്‍, ജില്ലാ പഞ്ചായത്ത് അംഗം മെഹര്‍ബാന്‍ തുടങ്ങിയവർ പങ്കെടുക്കും.

കോയന്പത്തൂരിൽ പട്ടാപ്പകൽ കാട്ടാനയിറങ്ങി; ജനങ്ങൾ പരിഭ്രാന്ത്രിയിലായി

കോയന്പത്തൂർ: പട്ടാപ്പകൽ കോയമ്പത്തൂരിൽ കാട്ടാന റോഡ് മുറിച്ചുകടന്നു. പൊതുജനങ്ങൾ പരിഭ്രാന്തരായി. ജില്ലയിലെ കൽവീരംപാളയത്തിനടുത്തുള്ള ഭാരതിയാർ യൂണിവേഴ്സിറ്റി-മരുതമല റോഡിലാണ് കാട്ടാന പെട്ടെന്ന് റോഡ് മുറിച്ചുകടന്നത്. പകൽ സമയത്ത് ധാരാളം ആളുകൾ ഉള്ള പ്രദേശത്ത് ആന നടക്കുന്നത് കണ്ട് പൊതുജനങ്ങൾ പരിഭ്രാന്തരായി. ഇതേത്തുടർന്ന് വിവരമറിഞ്ഞ വനംവകുപ്പ് ഉദ്യോഗസ്ഥർ ഉടൻ സ്ഥലത്തെത്തി. പൊതുജനങ്ങളുടെയും വാഹനയാത്രക്കാരുടെയും സുരക്ഷ ഉറപ്പാക്കി ആനയെ സുരക്ഷിതമായി കാട്ടിലേക്ക് ഓടിച്ചു. കാട്ടാന കുറച്ചുനേരം റോഡിൽ കറങ്ങിനടന്നെങ്കിലും നാശനഷ്ടങ്ങളൊന്നും ഉണ്ടാക്കിയില്ല. കാട്ടാനകൾ തടാഗം, മരുതമല തുടങ്ങിയ പ്രദേശങ്ങളിൽ രാത്രി ഭക്ഷണം തേടി വരികയും രാവിലെ കാട്ടിലേക്ക് മടങ്ങുകയും ചെയ്യുന്നത് സാധാരണയാണ്. എന്നാൽ പട്ടാപ്പകൽ നഗരപ്രദേശത്ത് ആന ഇറങ്ങിയത് ജനങ്ങളിൽ ഭീതി ജനിപ്പിച്ചിട്ടുണ്ട്.

ക്ഷീരവികസന പദ്ധതികൾക്ക് അപേക്ഷിക്കാനുള്ള സമയം ഇന്ന് അവസാനിക്കും

പാലക്കാട്: ക്ഷീര വികസന വകുപ്പിന്‍റെ 2025-2026 സാമ്പത്തിക വർഷത്തിലെ വിവിധ പദ്ധതികൾക്കായി അപേക്ഷിക്കാനുള്ള സമയപരിധി ഇന്ന് അവസാനിക്കും. www.ksheerasree.kerala.gov.in എന്ന പോർട്ടൽ വഴി അപേക്ഷകൾ സമർപ്പിക്കാം. പുൽകൃഷി വികസനം, മിൽക്ക് ഷെഡ് വികസനം, ഡയറി ഫാം ഹൈജീൻ മെച്ചപ്പെടുത്തുന്നതിനുള്ള പദ്ധതി എന്നിവയിലേക്കാണ് അപേക്ഷകൾ ക്ഷണിച്ചിരിക്കുന്നത്. പുൽകൃഷി വികസന പദ്ധതിയിൽ 20 സെന്‍ററിന് മുകളിലുള്ള പുൽകൃഷി, തരിശുഭൂമിയിലുള്ള പുൽകൃഷി, ചോളക്കൃഷി, പുൽകൃഷിക്ക് വേണ്ടിയുള്ള യന്ത്രവത്കരണ ധനസഹായം, ജലസേചന ധനസഹായം എന്നിവ ഉൾപ്പെടുന്നു. മിൽക്ക് ഷെഡ് വികസന പദ്ധതിയിൽ ഡയറി ഫാമുകളുടെ ആധുനികവത്കരണവും യന്ത്രവത്കരണവും, കയർ മത്സ്യബന്ധന മേഖലകൾക്കായുള്ള പ്രത്യേക പുനരധിവാസ പദ്ധതി, 20 പശു യൂണിറ്റ്, 10 പശു യൂണിറ്റ്, 5 പശു യൂണിറ്റ്, 2 പശു യൂണിറ്റ്, ഒരു പശു യൂണിറ്റ് എന്നീ പശു യൂണിറ്റ് പദ്ധതികൾ, യുവജനങ്ങൾക്കായുള്ള പത്ത് പശു അടങ്ങുന്ന സ്മാർട്ട് ഡയറി ഫാം പദ്ധതി, മിൽക്കിംഗ് മെഷീൻ വാങ്ങിക്കുന്നതിനുള്ള ധനസഹായം, തൊഴുത്ത് നിർമാണ ധനസഹായം എന്നിവയും ഉൾപ്പെടുന്നു. കൂടാതെ ഡയറി ഫാമിന്‍റെ ഹൈജീൻ മെച്ചപ്പെടുത്തുന്നതിനുള്ള പദ്ധതികൾക്കും ഇതേ പോർട്ടൽ വഴി അപേക്ഷിക്കാം. കൂടുതൽ വിവരങ്ങൾക്കായി ബ്ലോക്ക് തലത്തിൽ പ്രവർത്തിക്കുന്ന ക്ഷീരവികസന യൂണിറ്റുമായി ബന്ധപ്പെടാം.

ഒറ്റപ്പാലം നഗരസഭ ആരോഗ്യവിഭാഗം നിഷ്ക്രിയമെന്നു പരാതി

ഒറ്റപ്പാലം: നഗരപരിധിയിലെ ഭക്ഷണശാലകളിൽ ഗുണമേന്മ ഉറപ്പാക്കാനും നിരോധിത പ്ലാസ്റ്റിക് ഉത്പന്നങ്ങളുടെ ഉപഭോഗം തടയാനും നടപടികളില്ല. പാതയോരങ്ങളിലെ ചാലുകളിലേക്കു മലിനജലം ഒഴുക്കിവിടുന്നതു തടയുന്നതടക്കമുള്ള വിഷയങ്ങളിലും ആരോഗ്യ വിഭാഗത്തിന്‍റെ ഭാഗത്ത് നിന്ന് നടപടികളുണ്ടാവുന്നില്ലന്നാണ് പരാതി. ഈസ്റ്റ് ഒറ്റപ്പാലം മേഖലയിലാണ് ഇത് സംബന്ധിച്ച് ഏറ്റവും പരാതിയുള്ളത്. നേരത്തെ സുരക്ഷിതമല്ലാത്ത നിലയിൽ ഭക്ഷ്യവസ്തുക്കൾ പിടിച്ചെടുത്ത ഭക്ഷണശാലകളിൽ സ്ഥിതി ഇപ്പോഴും വ്യത്യസ്ഥമല്ല. നിരോധിത പ്ലാസ്റ്റിക് കാരിബാഗുകളുടെ ഉപയോഗവും വിവിധ കച്ചവട സ്ഥാപനങ്ങളിൽ വ്യാപകമാണ്. ഒറ്റപ്പാലത്തെ മത്സ്യവ്യാപാരസ്ഥാപനങ്ങളിൽ നിന്നും മലിനജലം പാതയോരത്തെ ചാലുകളിലേക്ക് ഒഴുക്കിവിടുന്നതായും പരാതികൾ ഉണ്ട്. നഗരത്തിലെ മറ്റു മത്സ്യ, മാംസ വ്യാപാരസ്ഥാപനങ്ങളിലും ഇതാണ് സ്ഥിതി. ഭക്ഷണശാലകളിലും പാതയോരത്തെ ചാലുകളിലേക്കു മലിനജലം ഒഴുക്കിവിടാൻ സാധ്യതയുള്ള സ്ഥാപനങ്ങളിലും പരിശോധനയും നടപടികളും ഉണ്ടാവണമെന്നാണ് ജനകീയാവശ്യം. നിരോധിത പ്ലാസ്റ്റിക് കാരി ബാഗുകളുടെ ഉപഭോഗം തടയാനുള്ള നടപടികൾ കൂടി കർശനമായി നടപ്പാക്കേണ്ടതായിട്ടുണ്ട്.

കത്തോലിക്ക കോൺഗ്രസ് നേതൃസംഗമവും വിദ്യാർഥികളെ അനുമോദിക്കലും

വടക്കഞ്ചേരി: കത്തോലിക്ക കോൺഗ്രസ് വടക്കഞ്ചേരി ഫൊറോനസമിതി നേതൃസംഗമവും എസ്എസ്എൽസി, പ്ലസ്ടു പരീക്ഷകളിൽ ഫുൾ എപ്ലസ് നേടിയവരെ അനുമോദിക്കലും നടന്നു. വടക്കഞ്ചേരി സിഐ കെ.പി. ബെന്നി ഉദ്ഘാടനം ചെയ്തു. ഫൊറോന പ്രസിഡന്‍റ് വിൽസൺ കൊള്ളന്നൂർ അധ്യക്ഷത വഹിച്ചു. രൂപത പ്രസിഡന്‍റ് അഡ്വ. ബോബി ബാസ്റ്റിൻ മുഖ്യപ്രഭാഷണം നടത്തി. ഫൊറോന വികാരി ഫാ.അഡ്വ. റെജി പെരുമ്പിള്ളിൽ, ഗ്ലോബൽ സെക്രട്ടറി ഡെന്നി തെങ്ങുംപള്ളി, ഗ്ലോബൽ വർക്കിംഗ് കമ്മിറ്റി അംഗം ജിജോ അറയ്ക്കൽ, രൂപത ജനറൽ സെക്രട്ടറി ആന്‍റണി കുറ്റിക്കാടൻ, രൂപത വൈസ് പ്രസിഡന്‍റ് ജോസ് വടക്കേക്കര, രൂപത സെക്രട്ടറി ദീപ ബൈജു, ഫൊറോന വൈസ് പ്രസിഡന്‍റ് കുര്യൻ തോമസ്, മഞ്ജു ജെയ്മോൻ, ടെന്നി അഗസ്റ്റിൻ, എബി വടക്കേക്കര പ്രസംഗിച്ചു. തദ്ദേശ സ്വയംഭരണ തെരഞ്ഞെടുപ്പിൽ വോട്ടുചെയ്യാനുള്ള അവകാശം നിഷേധിക്കരുതെന്നും പട്ടികയിൽ പേരില്ലാത്തവർക്ക് പേരുചേർക്കാൻ ഒരുമാസമെങ്കിലും സമയംനൽകണമെന്നും നേതൃയോഗം ആവശ്യപ്പെട്ടു. ഇതു സംബന്ധിച്ച് തെരഞ്ഞെടുപ്പു കമ്മീഷനു പരാതിനൽകാനും യോഗം തീരുമാനിച്ചു.

കണ്ണുകളെന്തിന്, നീരജയുടെ വിജയങ്ങൾക്ക് ആത്മവിശ്വാസത്തിന്‍റെ വെളിച്ചം

ശ്രീകൃഷ്ണപുരം: വെളിച്ചമാകേണ്ട കണ്ണുകൾ കൂടെയില്ലാത്തതു നീരജയ്ക്ക് പോരായ്മയായില്ല. കാഴ്ച പൂർണമായും നഷ്ടപ്പെട്ട കണ്ണുകളാൽ പൊരുതിനേടിയ വിജയത്തിനു ഇപ്പോൾ ഇരട്ടി‌മധുരം. പൊളിറ്റിക്കൽ സയൻസിൽ ബിരുദാനന്തരബിരുദം നേടിയ നീരജ യുജിസിയുടെ നാഷണൽ എലിജിബിലിറ്റി ടെസ്റ്റ് പാസായി. ഗവേഷണത്തിന് യോഗ്യത നേടുകയും ചെയ്തു. കരിമ്പുഴ ഗ്രാമപഞ്ചായത്തിലെ തോട്ടരയിൽ ഈറാൻതോട്ടിൽ വീട്ടിൽ പരേതനായ രാഘവൻ- ജാനകി ദമ്പതികളുടെ മകളായ നീരജ പഠനത്തിൽ ചെറുപ്പം മുതലേ മികവുപുലർത്തിയിരുന്നു. കരിമ്പുഴ തോട്ടരയിൽ പ്രവർത്തിക്കുന്ന ഹെലൻ കെല്ലർ സ്മാരക അന്ധവിദ്യാലയത്തിലായിരുന്നു ഏഴാം ക്ലാസ് വരെയുള്ള പഠനം. തുടർന്ന് കരിമ്പുഴ ഹയർ സെക്കൻഡറി സ്കൂൾ തോട്ടരയിൽ നിന്ന് പ്ലസ് ടു വരെയുള്ള പഠനം പൂർത്തിയാക്കി. ഇതിനിടെ അച്ഛന്‍റെ മരണം ഇരുട്ടടിയായി. തോട്ടര ഹെലൻ കില്ലർ അന്ധവിദ്യാലയത്തിലെ ജീവനക്കാരിയായ അമ്മ ജാനകിയുടെ ചെറിയ വരുമാനമായിരുന്നു ഏക ജീവിതമാർഗം. ജീവിത പ്രാരബ്ധങ്ങൾ ഏറെയുണ്ടായിട്ടും ആഗ്രഹങ്ങളോടു സന്ധിചെയ്യാൻ നീരജ തയാറായില്ല. മണ്ണാർക്കാട് എംഇഎസ് കോളജിലെ ബിരുദപഠനം ജീവിതത്തിൽ വഴിത്തിരിവായി. പരിമിതികൾക്കിടയിലും നീരജ രാഷ്ട്രീയത്തിലും മികവുതെളിയിച്ചു. എംഎസ്എഫിനൊപ്പമാണ് വിദ്യാർഥി രാഷ്ട്രീയം ആരംഭിച്ചത്. തുടർന്ന് കാലിക്കട്ട് യൂണിവേഴ്സിറ്റി കാമ്പസിൽ നിന്നും ബിരുദാനന്തര ബിരുദം നേടിയപ്പോഴും എംഎസ്എഫ് വിദ്യാർഥിരാഷ്ട്രീയം ഉപേക്ഷിച്ചില്ല. കൂടുതൽ കരുത്തോടെ വിദ്യാർഥി രാഷ്ട്രീയം ആസ്വദിക്കുകയും ഹരിതയുടെ സംസ്ഥാന വൈസ് ചെയർപേഴ്സൺ പദവി വഹിക്കുകയും ചെയ്തു. എംഎസ്എഫിന്‍റെ ജില്ലാ സെക്രട്ടറിയായും പ്രവർത്തിച്ചിട്ടുണ്ട്. കാലിക്കട്ട് യൂണിവേഴ്സിറ്റി കാമ്പസിൽ എംഎസ്എഫ് പുറത്തിറക്കുന്ന മാഗസിന്‍റെ എഡിറ്ററായും പ്രവർത്തിച്ചിട്ടുണ്ട്. ഉന്നതവിദ്യാഭ്യാസ മന്ത്രി ഡോ. ആർ. ബിന്ദു ഉൾപ്പെടെയുള്ള പ്രമുഖർ നീരജയ്ക്ക് അനുമോദനങ്ങൾ അർപ്പിച്ചുകൊണ്ട് സോഷ്യൽ മീഡിയയിൽ പോസ്റ്റ് ഇട്ടിട്ടുണ്ട്.

യാത്രക്കാർക്കായ് കാത്തിരിപ്പിൽ ബസ് കാത്തിരിപ്പുകേന്ദ്രം

വടക്കഞ്ചേരി: ടൗണിൽ കിഴക്കഞ്ചേരി റോഡിൽ സ്ഥലം എംഎൽഎയും മന്ത്രിയുമായിരുന്ന എ.കെ. ബാലന്‍റെ എംഎൽഎ ഫണ്ട് ഉപയോഗിച്ച് നാലുവർഷംമുമ്പ് നിർമിച്ച ബസ് കാത്തിരിപ്പുകേന്ദ്രം ഇപ്പോഴും യാത്രക്കാരുടെ വരവ് പ്രതീക്ഷിച്ച് കാത്തിരിപ്പിലാണ്. ടൗൺ ജംഗ്ഷനിലെ തിരക്കുകുറയ്ക്കാൻ പദ്ധതിയിട്ടായിരുന്നു ലക്ഷങ്ങൾ ചെലവഴിച്ച് കാത്തിരിപ്പുകേന്ദ്രം നിർമിച്ചത്. പക്ഷേ, ബസുകളൊന്നും ഇവിടേക്ക് ഇറക്കിനിർത്താറില്ല. പതിനഞ്ചുമീറ്റർ പിറകിൽ പഴയപോലെതന്നെ ഇടുങ്ങിയ സ്ഥലത്തു യാത്രക്കാരെ കയറ്റിയാണ് ബസുകൾ പോകുന്നത്. ഇതിനെതിരെ പോലീസോ പഞ്ചായത്തോ നടപടിയെടുക്കാത്തതിനാൽ തിരക്കേറിയ സ്ഥലത്തു വാഹനക്കുരുക്കുണ്ടാക്കി തന്നെയാണ് ബസുകൾ നിർത്തുന്നത്. ഉപയോഗിക്കാത്തതിനാൽ ബസ് കാത്തിരിപ്പുകേന്ദ്രവും പരിസരവും മലിനമയമാണിപ്പോൾ. മാലിന്യങ്ങൾ വലിച്ചെറിയുന്നതുപോലും ഇപ്പോൾ ഇതിനു മുന്നിലേക്കാണ്. മഴപെയ്താൽ പുഴുവരിക്കുന്ന അഴുക്കുവെള്ളവും ഇതിനു മുന്നിലൂടെ ഒഴുകും. ഇതിനാൽ ഇവിടേക്കു മാറിനിൽക്കാൻ യാത്രകാർക്കും താത്പര്യമില്ല. യാത്രക്കാർക്ക് സൗകര്യപ്പെടുത്തണമെന്ന ആവശ്യം ശക്തമാണെങ്കിലും നടപടിയെടുക്കേണ്ട പഞ്ചായത്ത് അക്കാര്യങ്ങളിലൊന്നും ശ്രദ്ധിക്കുന്നില്ലെന്ന ആക്ഷേപവുമുണ്ട്.

മൊബൈൽ ടവറിന്‍റെ റൗട്ടർ, ബാറ്ററി മോഷണം: പ്രതി പിടിയിൽ

പാലക്കാട്: മൊബൈൽ ടവറിന്‍റെ ലക്ഷങ്ങൾ വിലയുള്ള റൗട്ടർ, ബാറ്ററി മോഷണംപോയ സംഭവത്തിൽ പ്രതി അറസ്റ്റിൽ. പാലക്കാട് കിണാശേരി വാക്കാട് പ്രവർത്തിക്കുന്ന ജിയോ മൊബൈൽ ടവറിന്‍റെ കോൾ നിയന്ത്രിക്കുന്ന റൗട്ടറാണ് മോഷ്ടിച്ചത്. പുള്ളോട് തേനൂർ മങ്കര സ്വദേശി സത്യരാജ് എന്ന എൻജിനീയർ സത്യനെ(35)യാണ് പാലക്കാട് ടൗൺ സൗത്ത് പോലീസ് മണിക്കൂറുകൾക്കുള്ളിൽ പിടികൂടിയത്. വർഷങ്ങൾക്കുമുമ്പ് മൊബൈൽ ടവറിന്‍റെ ടെക്നിക്കൽ വർക്കറായി ജോലിയിലായിരുന്നു. പല കമ്പനികളുടെയും വിലപിടിപ്പുള്ള ബാറ്ററി, റൗട്ടർ, കേബിൾ തുടങ്ങിയവ മോഷണം നടത്തുന്നതാണ് പ്രതിയുടെ രീതി. മൂന്നുമാസംമുമ്പ് മങ്കര പോലീസ് സ്റ്റേഷനിൽ സമാനരീതിയിലുള്ള കേസിൽ പിടിയിലായി ജയിലിൽനിന്ന് ഇറങ്ങിയ ശേഷമാണ് പുതിയ കളവിനെത്തിയത്. മോഷ്ടിച്ച റൗട്ടറിന് ഒന്നര ലക്ഷം രൂപയാണ് വില. അനധികൃതമായി പ്രവർത്തിക്കുന്ന സ്ക്രാപ്പ് കടകളിൽ നിസാര വിലയ്ക്ക് വിൽക്കുകയാണ് പതിവ്. വില്പന നടത്തിയ കടയിൽനിന്നും മറ്റൊരു മൊബൈൽ ടവറിന്‍റെ ഒരുലക്ഷംരൂപ വിലവരുന്ന രണ്ടു ബാറ്ററികളും കുഴൽമന്ദം പോലീസ് സ്റ്റേഷൻ പരിധിയിലെ കുത്തനൂരിൽനിന്നുമെടുത്തതും കണ്ടെത്തി. സത്യരാജ് കൂടുതൽ കേസുകളിൽ ഉൾപ്പെട്ടിട്ടുണ്ടോയെന്ന് അന്വേഷണം ആരംഭിച്ചിട്ടുണ്ട്. പാലക്കാട് എഎസ്പി രാജേഷ്കുമാറിന്‍റെ നിർദേശപ്രകാരം ടൗൺ സൗത്ത് ഇൻസ്പെക്ടർ എസ്. വിപിൻകുമാർ, എസ്ഐമാരായ എം. മഹേഷ്കുമാർ, വി. ഹേമലത, എഎസ്ഐ സജി, സീനിയർ സിവിൽ പോലീസ് ഓഫീസർമാരായ ടി.ആർ. പ്രദീപ്, ശശികുമാർ, കെ.സി. പ്രസാദ്, ആർ. രാജീദ്, നൗഫൽ, വിപിൽദാസ് എന്നിവരാണ് കേസന്വേഷണം നടത്തി പ്രതിയെ അറസ്റ്റുചെയ്തത്. പ്രതിയെ കോടതിയിൽ ഹാജരാക്കി റിമാൻഡു ചെയ്തു.

കാറിൽ കടത്തിയ പത്തര ലിറ്റർ മദ്യവുമായി യുവാവ് പിടിയിൽ

മുതലമട: തമിഴ്നാട്ടിൽനിന്നും വന്ന കാർ പരിശോധിച്ചതിൽ 10.5 ലിറ്റർ വിദേശമദ്യവുമായി യുവാവിനെപറമ്പിക്കുളം പോലീസ് പിടികൂടി. പറമ്പിക്കുളം പിഎപി കോളനിയിൽ സുബ്രഹ്്മണ്യന്‍റെ മകൻ സുരേഷ് (35) ആണ് അറസ്റ്റിലായത്. ഇന്നലെ ഉച്ചക്കു നടന്ന വാഹന പരിശോധനക്കിടെയാണ് പ്രതി മദ്യവുമായി പിടിയിലായത്. കാറിന്‍റെ പിന്നിൽ സിഎൻജി സിലിണ്ടറിനകത്തു ഒളിപ്പിച്ച നിലയിൽ 28 കുപ്പികളാണ് കണ്ടെത്തിയത്. എസ്എച്ച്ഒ ഇൻസ്പെക്ടർ കെ.ജി. വിപിൻകുമാർ, പറമ്പിക്കുളം ജനമൈത്രി പോലീസിലെ എസ്ഐബാലചന്ദ്രൻ, ബീറ്റ് ഓഫീസർമാരായ സന്തോഷ്‌, ശിവകുമാർ, സീനിയർ സിവിൽ പോലീസ് ഓഫീസർമാരായ സജിത്ത്, സുകുമാരൻ എന്നിവരടങ്ങുന്ന സംഘമാണ് മദ്യക്കടത്ത് പിടികൂടിയത്. കോടതിമുമ്പാകെ ഹാജരാക്കിയ പ്രതിയെ റിമാൻഡുചെയ്തു.

മീനാക്ഷിപുരത്തും അവക്കാഡോ വിളയും

വണ്ടിത്താവളം: കിഴക്കൻമേഖലയിലും വിളയും അവക്കാഡോ. പെരുമാട്ടി കൃഷിഭവന്‍റെ കിഴക്കേ അതിരായ മീനാക്ഷിപുരത്ത് യുവകർഷകനായ മഹേന്ദ്രന്‍റെ കൃഷിയിടത്തിലാണ് അവക്കാഡോ വിളയുന്നത്. തികച്ചും ജൈവകൃഷി അനുവർത്തിക്കുന്ന മഹേന്ദ്രൻ കഴിഞ്ഞ രണ്ടുവർഷം മുന്പാണ് ഐഐഎച്ച്ആർ ബാംഗ്ലൂരിൽനിന്നും അർക്ക സുപ്രീം, ആർക്കാ രവി എന്നീ രണ്ടിനങ്ങളിൽപെട്ട അവക്കാഡോ കൃഷിയിറക്കിയത്. തന്‍റെ കൃഷിയിടത്തിൽ നൂതനസാങ്കേതിക വിദ്യകളുപയോഗിച്ച് കൃഷി വിപുലീകരിക്കുന്നതു ശ്രമിക്കുന്നതിനിടെയാണ് അവക്കാഡോയിൽ മഹേന്ദ്രന്‍റെ ചിന്ത ഉടക്കിയത്. തെങ്ങും കവുങ്ങും മാത്രമല്ല അന്യരാജ്യങ്ങളിലെ ഫലവൃക്ഷങ്ങളും നമ്മുടെ മണ്ണിൽ വിളയുമെന്ന് തെളിയിച്ചിരിക്കുകയാണ് ഈ യുവകർഷകൻ. പരീക്ഷണാടിസ്ഥാനത്തിൽ തെങ്ങിൻതോട്ടത്തിൽ ഇടവിളയായി നൂറോളം അവക്കാഡോ തൈകൾ നടുകയായിരുന്നു. ജൈവവളങ്ങൾ കൃത്യമായ ഇടവേളകളിൽ നൽകി. ഇപ്പോൾ മരങ്ങൾ കായ്ച്ചുതുടങ്ങിയിട്ടുണ്ട്. പോഷകഗുണങ്ങളടക്കം ഗുണമേന്മ ഏറെയുള്ള അവക്കാഡോയ്ക്കു ഇന്നു വിപണിയിലും ആരോഗ്യരംഗത്തും നല്ല ഡിമാന്‍റുണ്ട്. നിലവിൽ വിദേശവിപണി ലക്ഷ്യമിട്ടാണ് ഇടവിളയായി അവക്കാഡോ കൃഷിയും പരീക്ഷിക്കുന്നത്. ആറേക്കർ കൃഷിയിടത്തിൽ തെങ്ങ്, കവുങ്ങ്, കുരുമുളക്, ജാതി, നാരകം തുടങ്ങിയ വിളകളുമുണ്ട്. ചെറുകിട ജൈവവളം നിർമാണ യൂണിറ്റും ഒരുങ്ങുന്നതായി മഹേന്ദ്രൻ പറഞ്ഞു.

റെഡ് റൺ ദീർഘദൂര ഓട്ടമത്സരം 30ന്

പാലക്കാട്: അന്താരാഷ്ട്ര യുവജന ദിനാചരണത്തിനു മുന്നോടിയായി ജില്ലയിലെ കോളജ് വിദ്യാർഥികൾക്കായി അഞ്ചുകിലോമീറ്റർ ദീർഘദൂര ഓട്ടമത്സരം സംഘടിപ്പിക്കുന്നു. ജില്ലാ മെഡിക്കൽ ഓഫീസിന്‍റെയും (ആരോഗ്യം) സംസ്ഥാന എയ്ഡ്‌സ് കൺട്രോൾ സൊസൈറ്റിയുടെയും നാഷണൽ സർവീസ് യൂണിറ്റിന്‍റെയും സംയുക്താഭിമുഖ്യത്തിലാണ് മത്സരം. യുവജനങ്ങൾക്കിടയിൽ എയ്ഡ്സ് , ലഹരി എന്നിവക്കെതിരെയുള്ള ബോധവത്കരണം, ആരോഗ്യകരമായ ജീവിത ശൈലിക്കായി യുവജനങ്ങളെ പ്രോത്സാഹിപ്പിക്കൽ എന്നിവ ഊർജിതപ്പെടുത്തുന്നതിന്‍റെ ഭാഗമായാണ് മത്സരം സംഘടിപ്പിക്കുന്നത്. ജില്ലയിൽ പഠിക്കുന്ന 17നും 25 നും ഇടയിൽ പ്രായമുള്ള കോളജ് വിദ്യാർഥികൾക്കു പങ്കെടുക്കാം. ആൺ, പെൺ, ട്രാൻസ്ജെൻഡർ എന്നീ മൂന്ന് വിഭാഗങ്ങളിലായാണ് മത്സരം. ഒന്ന്, രണ്ട്, മൂന്ന് സ്ഥാനക്കാർക്ക് 5000, 4000, 3000 രൂപ വീതം കാഷ് അവാർഡ് സമ്മാനിക്കും. 30ന് രാവിലെ 7.30 ന് മലമ്പുഴ മുതൽ കഞ്ചിക്കോട് വരെയുള്ള റോഡിലായിരിക്കും മത്സരം. കോളജ് ഐഡി അല്ലെങ്കിൽ കോളേജ് അധികൃതർ നൽകുന്ന സാക്ഷ്യപത്രം, പ്രായം തെളിയിക്കുന്ന രേഖ എന്നിവ മത്സരത്തിൽ പങ്കെടുക്കുന്നതിനുമുമ്പ് സമർപ്പിക്കണം. താത്പര്യമുള്ളവർ 28ന് വൈകുന്നേരം അഞ്ചിനു മുന്പായി ഗൂഗിൾഫോമിലൂടെ രജിസ്റ്റർ ചെയ്യണം. വിവരങ്ങൾ 9446396166, 9946211528 നന്പറുകളിൽ ലഭിക്കും.

കാട്ടാനകൾ കൃഷിനാശം തുടരുന്നു; പടക്കംപൊട്ടിക്കൽതന്നെ ശരണം

നെന്മാറ: കരിമ്പാറ മേഖലയിൽ കാട്ടാനകൾ കൃഷിനാശം തുടരുന്നു. ജനവാസ കാർഷിക മേഖലകളിൽ കഴിഞ്ഞ രണ്ടുദിവസമായി കാട്ടാനകൾ കൃഷിനാശം തുടരുകയാണ്. കരിമ്പാറ കൽച്ചാടിയിലൂടെ വരുന്ന കാട്ടാനക്കൂട്ടവും, ചള്ള വഴി പൂഞ്ചേരിയിലുമാണ് കൃഷിയിടങ്ങൾ നശിപ്പിച്ചത്. പൂഞ്ചേരിയിലെ ഷാജഹാന്‍റെ 15 തെങ്ങുകൾ കഴിഞ്ഞ രണ്ടുദിവസംത്തിനകം കാട്ടാനകൾ നിലംപരിശാക്കി. മരുതഞ്ചേരി കുന്നുപറമ്പ് ഷാജഹാന്‍റെ കൃഷിയിടത്തിൽ രണ്ടാഴ്ചയ്ക്കിടെ ഏഴാം തവണയാണ് കാട്ടാനകളെത്തി നാശം വരുത്തുന്നത്. കൽച്ചാടിയിലെ കർഷകരായ എം. അബ്ബാസ്, പി. ജെ. അബ്രഹാം, ബലേന്ദ്രൻ തുടങ്ങിയവരുടെ റബർതോട്ടങ്ങളിലാണ് കാട്ടാനകൾ ചവിട്ടിനടന്ന് തോട്ടത്തിലെ പ്ലാറ്റ്ഫോമുകൾ ചളിക്കുളമാക്കിയത്. കൽച്ചാടിയിൽ ആൾതാമസം ഒഴിഞ്ഞ പ്രദേശമായതിനാൽ ടാപ്പിംഗ് തൊഴിലാളികൾ മാത്രമാണ് ആനകളെ പേടിച്ച് രാവിലെ വളരെ വൈകി ടാപ്പിംഗ് നടത്തുന്നത്. പൂഞ്ചേരിയിലെ ഷാജഹാന്‍റെ കൃഷിയിടത്തിലേക്ക് ചെന്താമരാക്ഷൻ, ജോർജ് എന്നീ കർഷകരുടെ വീട്ടുവപ്പുകളിലൂടെയാണ് കാട്ടാനകൾ എത്തിയിട്ടുള്ളത്. വനം അധികൃതരെ വിവരം അറിയിച്ചതിനെ തുടർന്ന് നെന്മാറ ഡിവിഷനിലെ തിരുവഴിയാട് സെക്്ഷൻ അധികൃതർ പടക്കവുമായി വാച്ചർമാരെ ചുമതലപ്പെടുത്തിയെങ്കിലും അർധരാത്രിവരെ രാത്രി മുഴുവൻ പടക്കം പൊട്ടിച്ച് വാച്ചർമാർ കാവൽ ഇരുന്നിട്ടും കാട്ടാനകളുടെ വരവിനു ശമനമായിട്ടില്ല. വാച്ചർമാരായ റഷീദ്, ബാലൻ, ഷബീക്ക് എന്നിവർ ചേർന്ന് ആനകളെ കയറ്റിവിടുന്നുണ്ടെങ്കിലും മണിക്കൂറുകൾക്കകം മറ്റൊരു വഴിയിലൂടെ കാട്ടാനകൾ വീണ്ടും എത്തുകയാണ്. കാട്ടാനക്കൂട്ടത്തെ മറ്റേതെങ്കിലും സ്ഥലത്തേക്കു പിടിച്ചു മാറ്റണമെന്നാണ് പ്രദേശവാസികൾ ആവശ്യപ്പെടുന്നത്.

പനംകുറ്റിയിൽ വാഹനങ്ങൾ തടഞ്ഞ് കാട്ടാന

വടക്കഞ്ചേരി: കിഴക്കഞ്ചേരി വാൽക്കുളമ്പ്- പന്തലാംപാടം മേരിഗിരി മലയോര പാതയിൽ പനംകുറ്റി താമരപ്പിള്ളിയിൽ റോഡിലിറങ്ങി വാഹനങ്ങൾ തടഞ്ഞ് കാട്ടാന. പനംകുറ്റിയിലെ വീട്ടിലേക്കു വാഹനത്തിൽ പോയിരുന്ന കുടുംബം രക്ഷപ്പെട്ടതു തലനാരിഴയ്ക്ക്. ആനയുടെ മുന്നിൽപ്പെട്ട പനംകുറ്റി അറയ്ക്കൽ സിബിയും കുടുംബവുമാണ് ഭാഗ്യംകൊണ്ട് രക്ഷപ്പെട്ടത്. ചൊവ്വാഴ്ച രാത്രി പതിനൊന്നോടെയായിരുന്നു സംഭവം. ഭാര്യവീട്ടിൽനിന്നും മലയോരപാത പന്തലാംപാടം മേരിഗിരി വഴി പിക്കപ്പ് വാനിലാണ് സിബിയും ഭാര്യ ഷിനുവും മക്കളായ ആൻ മരിയ, ആൽവിൻ എന്നിവർ പോയിരുന്നത്. വീടിനടുത്ത് എത്താറായപ്പോൾ താമരപ്പിള്ളിയിൽവച്ച് വഴിതടഞ്ഞ് ആന നിന്നു. ആളൊഴിഞ്ഞ പ്രദേശം, നന്നേ വീതി കുറഞ്ഞ റോഡ്, ഇതിനാൽ വാഹനം തിരിക്കാനും കഴിയില്ല. ധൈര്യം വിടാതെ വാഹനം ലൈറ്റിട്ടുനിർത്തി. കുറച്ചുസമയം കഴിഞ്ഞപ്പോൾ ആന തോട്ടത്തിലേക്ക് കയറിപ്പോയെന്നു സിബി പറഞ്ഞു. നാടൊട്ടാകെ വിളനാശം വാഹനങ്ങൾക്ക് ഭീഷണിയായി റോഡിൽനിന്ന ആന പിന്നീട് അർധരാത്രിയോടെ സമീപത്തെ തോട്ടങ്ങളിലിറങ്ങി വ്യാപകമായി വിളകൾ നശിപ്പിച്ചു. ടാർ റോഡിനോടു ചേർന്നുള്ള വരിക്കമാക്കൽ ജോസഫി (പാപ്പൻ) ന്‍റെ കൃഷിയിടത്തിലെ നിരവധി വാഴകളും തെങ്ങുകളും ആന നശിപ്പിച്ചു. വാഴകൾ റോഡിലേക്കു വലിച്ചിട്ടാണ് ആന തിന്നിരുന്നതെന്നു സമീപത്തെ താമസക്കാരനായ മോഹനൻ പറഞ്ഞു. ശബ്ദംകേട്ട് വീടിന്‍റെ മുറിക്കുള്ളിൽനിന്നും പുറത്തുവന്ന് നോക്കിയപ്പോൾ പത്തടി മാത്രം അകലത്തിൽ റോഡിൽ വലിയ ആന നിൽക്കുന്നതാണ് കണ്ടത്. ഒറ്റക്കായിരുന്നതും സമയം അർധരാത്രിയുമായതിനാൽ വീട്ടിൽ നിന്നും പുറത്തിറങ്ങിയില്ലെന്ന് മോഹനൻ പറഞ്ഞു. ഇതിനിടെ തെങ്ങുകളുടെ പട്ട ഒടിക്കുന്ന ശബ്ദം കേട്ട് റോഡിന്‍റെ മറുഭാഗത്ത് താമസിക്കുന്ന ജോസഫ് ബഹളംവച്ചു. ലൈറ്റിട്ട് ബഹളമുണ്ടാക്കിയപ്പോൾ ആന മുകളിലേക്ക് കയറിപ്പോയതായി ജോസഫ് പറഞ്ഞു. ഷാജൻ, ബേബി എന്നിവരുടെ തോട്ടങ്ങളിലും വിളനാശമുണ്ടാക്കിയിട്ടുണ്ട്. കവുങ്ങ്, തെങ്ങ് തുടങ്ങിയ വിളകളാണ് കൂടുതലും നശിപ്പിച്ചിട്ടുള്ളത്. ഒരുമാസം മുമ്പും ഇവിടെ ആന വന്നിരുന്നെങ്കിലും റോഡിലിറങ്ങി വാഹനങ്ങൾക്ക് ഭീഷണിയായിരുന്നില്ലെന്നു നാട്ടുകാർ പറഞ്ഞു. തകർന്ന് മലയോരപാത വാഹനം ഓടിക്കാനാകാത്ത വിധം തകർന്ന് തരിപ്പണമായി കിടക്കുകയാണ് മലയോരപാത. റോഡിലിറങ്ങുന്ന ആനകൾ അക്രമാസക്തമായാൽ വാഹനം വേഗത്തിൽ ഓടിച്ചു പോകാൻപോലും കഴിയില്ല. അത്ര വലിയ കുഴികളായി മാറിയിരിക്കുകയാണ് റോഡ്. മലയോരപാത പ്രയോജനപ്പെടുന്നത് കൂടുതലും കർഷകർക്കായതിനാൽ റോഡ് ഗതാഗത യോഗ്യമാക്കാൻ ബന്ധപ്പെട്ടവർക്കും താത്പര്യമില്ല. കർഷകർ സംഘടിച്ച് സമരത്തിനൊന്നും വരില്ലെന്ന ഉറപ്പാണ് പഞ്ചായത്തിനും എംഎൽഎമാർക്കും മറ്റു ജനപ്രതിനിധികൾക്കുമുള്ളത്. മലയോരപാതയുടെ നവീകരണത്തിനായി ഒരുകോടിരൂപ അനുവദിച്ചിട്ടുണ്ടെന്നു രണ്ടുവർഷംമുമ്പ് സ്ഥലം എംഎൽഎ പ്രഖ്യാപിച്ചിരുന്നു. ഫണ്ട് അനുവദിച്ച എംഎൽഎയെ അഭിനന്ദിച്ച് ഫ്ളക്സുകളും ഉയർത്തി. എന്നാൽ ഒന്നും നടന്നില്ല. പണി നടക്കാതായപ്പോൾ ഫ്ലക്സുകളെല്ലാം അഴിച്ചുമാറ്റി. ഫണ്ട് എവിടെപ്പോയി എന്ന് ആർക്കും അറിയില്ല. സോളാർ ഫെൻസിംഗ് പ്രവർത്തനരഹിതം പീച്ചി വനാതിർത്തിയിലെ ഫെൻസിംഗുകളെല്ലാം പേരിനുമാത്രം. മാൻകുട്ടിക്കുപോലും ഷോക്കേൽക്കാത്തവിധം നേരിയ കറന്‍റ് മാത്രമേ കമ്പിവഴി പ്രവഹിക്കുന്നുള്ളു. തൊട്ടാൽ ചെറിയ തരിപ്പുമാത്രം. ആനകൾ നിഷ്പ്രയാസമാണ് ഈ ഫെൻസിംഗ് വലിച്ചെറിഞ്ഞ് കൃഷിയിടങ്ങളിലും റോഡിലും ഇറങ്ങുന്നതെന്നു വർഷങ്ങളായി വിളനാശം അനുഭവിക്കുന്ന സമീപത്തെ ചെറുനിലം ജോണി പറഞ്ഞു. നെന്മാറ ഫോറസ്റ്റ് ഡിവിഷനു കീഴിലുള്ള സോളാർ ഫെൻസിംഗ് കാര്യക്ഷമമാണെന്നും പീച്ചി ഫോറസ്റ്റ് ഡിവിഷൻ പരിധി വഴിയാണ് ആനകൾ വരുന്നതെന്നു നെന്മാറ ഡിവിഷൻ വനം വകുപ്പ് അധികൃതർ പറയുന്നു. എന്നാൽ തങ്ങളുടെ പരിധിയിലെ ഫെൻസിംഗാണ് കുറ്റമറ്റ നിലയിൽ പ്രവർത്തിക്കുന്നതെന്ന് പീച്ചി വൈൽഡ് ലൈഫ് അധികൃതരും പറയുന്നു. ഒരേ വകുപ്പ് അധികൃതർതന്നെ ഇത്തരത്തിൽ പരസ്പരം പഴിചാരി ഒന്നും ചെയ്യാതിരിക്കാനുള്ള തന്ത്രങ്ങളാണ് നടത്തുന്നതെന്നു കർഷകർ കുറ്റപ്പെടുത്തുന്നു. സ്വയംരക്ഷയ്ക്കായി കർഷകർ ആന ഉൾപ്പെടെയുള്ള വന്യമൃഗങ്ങളെ നാട്ടിലേക്ക് ഇറക്കിവിട്ട് കഷ്ടപ്പെടുത്തുന്ന സ്ഥിതി ഇനിയും അധികകാലം തുടരാനാകില്ലെന്നു കർഷകർ. പരാതികളും നിവേദനങ്ങളുമായി നിരവധി തവണയാണ് വനംവകുപ്പ് ഓഫീസുകളിലും മറ്റും കയറിയിറങ്ങുന്നത്. ഇനിയും പരാതി പറയുന്നതിൽ അർഥമില്ല. ജീവനും സ്വത്തും സംരക്ഷിക്കാൻ തങ്ങളാലാകുന്നത് ചെയ്യുക എന്ന നിലപാടുളിലേക്കാണ് കർഷകർ എത്തിയിട്ടുള്ളത്. കർഷകസംരക്ഷകരെന്നു പറയുന്ന രാഷ്ട്രീയ പാർട്ടികളോ സംഘടനകളോ കർഷകരുടെ വിഷമതകൾകണ്ട് പരിഹാരമാർഗങ്ങൾക്കായി രംഗത്തു വരുന്നില്ല. ആന കുത്തി കൊല്ലപ്പെട്ടാൽ കൂടിവന്നാൽ പത്തുലക്ഷമെന്ന തുകയിൽ ഒതുക്കുകയാണ് നഷ്ടപരിഹാര നടപടികൾ. വനംവകുപ്പ് മനുഷ്യന്‍റെ വില നിശ്ചയിക്കണ്ട എന്നാണ് കർഷകർ പറയുന്നത്.

ഉമ്മൻ ചാണ്ടിക്ക് വിഎസിനോടുണ്ടായിരുന്നത് ആത്മബന്ധം: ചാണ്ടി ഉമ്മൻ എംഎൽഎ

മണ്ണാർക്കാട്: തന്‍റെ പിതാവ് ഉമ്മൻ ചാണ്ടിക്കു വിഎസിനോടുണ്ടായിരുന്നത് ആത്മബന്ധമായിരുന്നുവെന്നു ചാണ്ടി ഉമ്മൻ. തനിക്ക് അതുനേരിട്ട് ബോധ്യപ്പെട്ടിട്ടുണ്ടെന്നും ചാണ്ടി ഉമ്മൻ എംഎൽഎ പറഞ്ഞു. ൊ രാഷ്ട്രപതി എപിജെ അബ്ദുൽ കലാം മരിച്ചദിവസം ആദരാഞ്ജലി അർപ്പിക്കാൻ പോയപ്പോൾ തന്നെയും പിതാവ് ഒപ്പംകൂട്ടിയിരുന്നു. അവിടെവച്ച് ആൾക്കൂട്ടത്തിനിടയിൽ വിഎസിനെ കാണാതായപ്പോൾ തന്നെ കാണാതായതുപോലെയുള്ള വെപ്രാളമായിരുന്നു പിതാവിനെന്നും ചാണ്ടി ഉമ്മൻ കൂട്ടിച്ചേർത്തു. ൊ ഉമ്മൻചാണ്ടി ഫൗണ്ടേഷൻ സംഘടിപ്പിച്ച ഉമ്മൻചാണ്ടി അനുസ്മരണസമ്മേളനം ഉദ്ഘാടനം ചെയ്തു സംസാരിക്കുകയായിരുന്നു ചാണ്ടി ഉമ്മൻ. ട്രസ്റ്റ് ചെയർമാൻ പി. അഹമ്മദ് അഷറഫ് അധ്യക്ഷനായി. ഡിസിസി പ്രസിഡന്‍റ് എ. തങ്കപ്പൻ, വി. പ്രീത, അസീസ് ഭീമനാട് പ്രസംഗിച്ചു.

നേർച്ചപ്പാറയിൽ വീണ്ടും ആനയിറങ്ങി കൃഷി നശിപ്പിച്ചു

മംഗലംഡാം: നേർച്ചപ്പാറയിൽ വീണ്ടും ആനയിറങ്ങി വ്യാപകമായി കൃഷി നശിപ്പിച്ചു. കൊച്ചു കിഴക്കയിൽ ജോർജ്, നെല്ലിക്കലിടം ശ്രീകുമാർ, ജിജോ കൊല്ലത്താഴത്തിൽ എന്നിവരുടെ കൃഷിസ്ഥലങ്ങളിലാണ് വ്യാപകമായ നാശനഷ്ടങ്ങളുണ്ടാക്കിയിട്ടുള്ളത്. തെങ്ങ്, കമുക്, വാഴ തുടങ്ങിയവ നശിപ്പിച്ചു. വീടുകൾക്കിടയിലൂടെയാണ് ആന നടക്കുന്നത്. ഇതുജനങ്ങളിൽ വലിയ ഭീതി ഉണ്ടാക്കിയിട്ടുണ്ട്.ഒരു മാസം മുമ്പാണ് ഇവിടെ കടുവയിറങ്ങി ജനങ്ങളെ പേടിപ്പെടുത്തുന്ന സംഭവമുണ്ടായത്. ആർആർ ടീമിന്‍റെ സേവനം പ്രദേശത്ത് ഉറപ്പാക്കണമെന്നും വനംവകുപ്പിന്‍റെ രാത്രികാല പട്രോളിംഗ് സംവിധാനം ഏർപ്പെടുത്തണമെന്നും ഇന്നലെ വൈകുന്നേരം ചേർന്ന നേർച്ചപ്പാറ സംരക്ഷണ സമിതി യോഗം ആവശ്യപ്പെട്ടു. പഞ്ചായത്ത് മെംബർമാരായ മുഹമ്മദ് കുട്ടി, പി.ജെ.മോളി, കിഫ ജില്ലാ സെക്രട്ടറി അബാസ് ഉറവഞ്ചിറ, ഡോ. സിബി സക്കറിയാസ്, രമേശ് ചെവകുളം, നേർച്ചപ്പാറ സംരക്ഷണ സമിതി പ്രസിഡന്‍റ് തോമസ് പാലക്കാതടത്തിൽ, പരമേശ്വരൻ, അനീഷ്, സാജു വാഴചാരിക്കൽ പ്രസംഗിച്ചു. സോളാർ തൂക്കുവേലിയുടെ ബാക്കി ഭാഗം ഉടനടി തീർക്കണമെന്നും ഈയിടെ സ്ഥാപിച്ചിട്ടുള്ള സോളാർ തൂക്കുവേലികളിൽ മതിയായ വൈദ്യുത ചാർജില്ലെന്നും നാട്ടുകാർ ചൂണ്ടിക്കാട്ടുന്നു. ഇതാണ് ആനകൾ കൃഷിയിടങ്ങളിലിറങ്ങാൻ കാരണമാകുന്നത്. ഇതു സംബന്ധിച്ച് ജില്ലാ കളക്ടർക്കും ഡിഎഫ്ഒ ക്കും പഞ്ചായത്ത് പ്രസിഡന്‍റിനും പരാതി നൽകാനും തുടർസമര പരിപാടികൾക്കും യോഗം രൂപം നൽകി. അധികൃതരുടെ ഭാഗത്തു നിന്നും നടപടി ഉണ്ടായില്ലെങ്കിൽ ജീവനും സ്വത്തിനുമായി കോടതിയെ സമീപിക്കാനാണ് സമിതിയുടെ തീരുമാനം.

ലോട്ടറിമോഷ്ടാവ് പിടിയിൽ

വടക്കഞ്ചേരി: ടൗണിൽ ബസ് സ്റ്റാൻഡിന് എതിർവശത്തുള്ള വിനായക ലോട്ടറി ഏജൻസീസിൽനിന്ന് 5000 രൂപയും അറുപതിനായിരം രൂപയുടെ ലോട്ടറിടിക്കറ്റും കവർന്ന കേസിൽ യുവാവിനെ അറസ്റ്റുചെയ്തു. മണ്ണാർക്കാട് തെങ്കര പുഞ്ചക്കോട് സ്വദേശി സുരേഷ് (30) നെയാണ് അറസ്റ്റുചെയ്തത്. പ്രദേശത്തെ സിസി ടിവി കാമറയിൽ യുവാവിന്‍റെ ദൃശ്യങ്ങൾ പതിഞ്ഞിരുന്നു. ഇതിനിടെ പാലക്കാടു നടന്ന മോഷണവുമായി ബന്ധപ്പെട്ട് യുവാവിനെ പിടികൂടുകയുണ്ടായി. തുടർന്നുനടത്തിയ അന്വേഷണത്തിലാണ് വടക്കഞ്ചേരി മോഷണങ്ങളും തെളിഞ്ഞത്. കഴിഞ്ഞമാസം 19നാണ് ലോട്ടറി കവർച്ച നടന്നത്. ലോട്ടറിക്കടയുടെ മുന്നിലെ പച്ചക്കറിക്കടയിലും മോഷണം നടന്നിരുന്നു. യുവാവിനെ ഇന്നലെ ഉച്ചയ്ക്ക് പച്ചക്കറിക്കടയിലും ലോട്ടറിക്കടയിലും എത്തിച്ച് പോലീസ് തെളിവെടുപ്പു നടത്തി.

വണ്ടാഴി പയ്യാറോഡ് മേഖലയിൽ പകർച്ചവ്യാധി പടരുന്നു

വടക്കഞ്ചേരി: വണ്ടാഴി പഞ്ചായത്തിലെ വാർഡ് 19 പയ്യാറോഡ് മേഖലയിൽ പകർച്ചവ്യാധികൾ പടരുന്നതു തടയാൻ അടിയന്തിര നടപടി സ്വീകരിക്കണമെന്നാവശ്യപ്പെട്ട് യൂത്ത് കോൺഗ്രസ് വണ്ടാഴി ഹെൽത്ത്‌ ഇൻസ്‌പെക്ടർക്കു പരാതി നൽകി. ആഴ്ചകളോളമായി നിരവധിയാളുകൾ ആശുപത്രികളിലും വീടുകളിലുമായി ചികിത്സയിലാണ്. പ്രദേശത്ത് ആരോഗ്യവകുപ്പിന്‍റെ ഭാഗത്തുനിന്ന് കൃത്യമായ ഇടപെടലുകൾ നടത്തുകയും രണ്ടുതവണ മെഡിക്കൽ ക്യാമ്പ് സംഘടിപ്പിച്ചെങ്കിലും പ്രദേശത്ത് വിവിധ പകർച്ചവ്യാധികൾ വിട്ടൊഴിഞ്ഞിട്ടില്ല. ആരോഗ്യവകുപ്പും പഞ്ചായത്ത് അധികൃതരും കാര്യക്ഷമമായി ഇടപ്പെട്ട് പ്രദേശത്തു നിലനിൽക്കുന്ന ആരോഗ്യ പ്രശ്നങ്ങൾക്ക് പരിഹാരം കാണണമെന്ന് യൂത്ത് കോൺഗ്രസ് വണ്ടാഴി മണ്ഡലം കമ്മിറ്റി ആവശ്യപ്പെട്ടു. മണ്ഡലം പ്രസിഡന്‍റ് ആർ. അനീഷ്, കോൺഗ്രസ് മണ്ഡലം പ്രസിഡന്‍റ് കെ.എം. ശശീന്ദ്രൻ, ബ്ലോക്ക്‌ സെക്രട്ടറിമാരായ പ്രമോദ് തണ്ടലോട്, എൻ. വിഷ്ണു, പി.കെ. പ്രവീൺ, യൂത്ത് കോൺഗ്രസ് വൈസ് പ്രസിഡന്‍റുമാരായ കെ. അജിത്ത്, കെ. ഗൗതമൻ മറ്റു ഭാരവാഹികളായ പ്രകാശൻ, ആർ. മണികണ്ഠൻ, കെ.പി. കൃഷ്ണൻ, കണ്ടമുത്തൻ, എം. വിനുക്കുട്ടൻ തുടങ്ങിയവരുടെ നേതൃത്വത്തിലാണ് ഹെൽത്ത് ഇൻസ്പെക്ടർക്കു പരാതി നൽകിയത്.

ചിറ്റൂർ താലൂക്ക് ആശുപത്രി ആർഎംഒയെ ഉപരോധിച്ച് യൂത്ത് കോൺഗ്രസ്

ചിറ്റൂർ: കഴിഞ്ഞ ദിവസം ചിറ്റൂർ താലൂക്ക് ആശുപത്രി ജീവനക്കാരുടെ അനാസ്ഥയിൽ വൈദ്യസഹായം വൈകിയ വിഷയവും രോഗികൾക്കു താലൂക്ക് ആശുപത്രിയിൽ നേരിടേണ്ടിവരുന്ന ബുദ്ധിമുട്ടുകളും ചൂണ്ടിക്കാണിച്ച് യൂത്ത് കോൺഗ്രസ് ചിറ്റൂർ നിയോജകമണ്ഡലം കമ്മിറ്റി ആർഎംഒയെ ഉപരോധിച്ചു. പ്രതിഷേധക്കാരുടെ ആവശ്യങ്ങൾ പത്തു ദിവസങ്ങൾക്കുള്ളിൽ പരിഹരിക്കാമെന്ന് ആർഎം ഒ ഉറപ്പുനൽകിയത്തിന്‍റെ അടിസ്ഥാനത്തിൽ സമരക്കാർ ഉപരോധം അവസാനിപ്പിച്ചു. നിയോജകമണ്ഡലം പ്രസിഡന്‍റ് കെ. സാജൻ, ജില്ലാ ജനറൽ സെക്രട്ടറി എ. ഷഫീക്ക്, സംസ്ഥാന സെക്രട്ടറി ജിതേഷ് നാരായണൻ, നിയോജകമണ്ഡലം ഭാരവാഹികളായ യു. ജിതിൻ, ഷാഹിദ് തണ്ണിശ്ശേരി, സഞ്ജയ്, സുകന്യ, അതുൽ, അർജുൻ തുടങ്ങിയവർ സമരത്തിനു നേതൃത്വം നൽകി.

ജില്ലാ പഞ്ചായത്ത് ഡിവിഷന്‍ പുനർനിർണയം: കരട് പ്രസിദ്ധീകരിച്ചു

പാലക്കാട്: ജില്ലയിലെ ജില്ലാ പഞ്ചായത്ത് ഡിവിഷനുകളുടെ എണ്ണം പുതുക്കി നിശ്ചയിച്ചു കൊണ്ടുള്ള കരട് വിജ്ഞാപനം സംസ്ഥാന ഡീലിമിറ്റേഷന്‍ കമ്മീഷന്‍ പ്രസിദ്ധീകരിച്ചു. ഡിവിഷനുകളുടെ എണ്ണം 31 ആക്കിയാണ് പുതുക്കി നിശ്ചയിച്ചിട്ടുള്ളത്. ഡിവിഷനുകളുടെ അതിര്‍ത്തികള്‍ നിര്‍ണയിക്കുന്നതിനുള്ള കരട് നിര്‍ദ്ദേശങ്ങളും ഉള്‍പ്പെടുത്തിയാണ് വിജ്ഞാപനം പ്രസിദ്ധീകരിച്ചിട്ടുള്ളത്. ഡീലിമിറ്റേഷൻ കമ്മീഷന്‍റെ വെബ് സൈറ്റിൽ ഈ കരട് നിർദ്ദേശങ്ങൾ പ്രസിദ്ധീകരിച്ചിട്ടുണ്ട്. കരട് നിർദ്ദേശങ്ങളെ സംബന്ധിച്ച് ഏതെങ്കിലും തരത്തിലുള്ള ആക്ഷേപങ്ങളോ അഭിപ്രായങ്ങളോ ഉണ്ടെങ്കിൽ പൊതുജനങ്ങൾക്ക് 26നകം സമർപ്പിക്കാവുന്നതാണെന്നു ജില്ലാ കളക്ടര്‍ അറിയിച്ചു. ഡീലിമിറ്റേഷൻ കമ്മീഷൻ സെക്രട്ടറി മുമ്പാകെയോ ജില്ലാ തെരഞ്ഞെടുപ്പ് ഉദ്യോഗസ്ഥയായ ജില്ലാ കളക്ടര്‍ മുമ്പാകെയോ നേരിട്ടോ രജിസ്ട്രേഡ് തപാൽ മുഖേനയോ അപേക്ഷകൾ സമർപ്പിക്കാം. അപേക്ഷയോടൊപ്പം രേഖകൾ സമര്‍പ്പിക്കുന്നവര്‍ സ്വയം സാക്ഷ്യപ്പെടുത്തിയ പകർപ്പും നല്‍കണം. ആക്ഷേപങ്ങളും അഭിപ്രായങ്ങളും യുക്തമെന്ന് തോന്നുന്ന പക്ഷം, അവ നൽകിയ വ്യക്തികളെ ഡീലിമിറ്റേഷൻ കമ്മീഷൻ നേരിട്ട് കേൾക്കുന്നതാണെന്നും ജില്ലാ കളക്ടര്‍ അറിയിച്ചു.

ആരോഗ്യ, വിദ്യാഭ്യാസ സ്ഥാപനങ്ങളില്‍ വൈദ്യുതിസുരക്ഷാ ഓഡിറ്റ് നടത്തും

പാലക്കാട്: ജില്ലയിലെ ആരോഗ്യ സ്ഥാപനങ്ങളിലും വിദ്യാഭ്യാസ സ്ഥാപനങ്ങളിലും വൈദ്യുത സുരക്ഷ ഉറപ്പാക്കുന്നതിന്‍റെ ഭാഗമായി സുരക്ഷാ ഓഡിറ്റ് നടത്തും. വൈദ്യുതിസുരക്ഷയുമായി ബന്ധപ്പെട്ട് എല്ലാ വിദ്യാഭ്യാസ സ്ഥാപനങ്ങളിലും ബോധവത്കരണ ക്ലാസുകളും നല്‍കും. ജില്ലാ കളക്ടർ ജി. പ്രിയങ്കയുടെ അധ്യക്ഷതയിൽ കളക്ടറേറ്റ് കോൺഫറൻസ് ഹാളിൽ ചേർന്ന ഇലക്ട്രിക്കൽ ആക്‌സിഡന്‍റ് പ്രിവൻഷൻ കമ്മിറ്റി യോഗത്തിലാണ് ഇതുസംബന്ധിച്ച നിർദേശങ്ങൾ നൽകിയത്. കൊല്ലം തേവലക്കരയിൽ സ്കൂൾവിദ്യാർഥി വൈദ്യുതാഘാതംമൂലം മരണപ്പെട്ടതിനെത്തുടർന്ന് വൈദ്യുതിമന്ത്രി കെ. കൃഷ്ണൻകുട്ടിയുടെ നിർദ്ദേശമനുസരിച്ചാണ് യോഗം ചേർന്നത്. ജില്ലയിലെ വിദ്യാഭ്യാസസ്ഥാപനങ്ങളിൽ വൈദ്യുത അപകടങ്ങൾ ഒഴിവാക്കുന്നതിനുള്ള നടപടികൾ ശക്തമാക്കാൻ യോഗം തീരുമാനിച്ചു. വൈദ്യുതിസുരക്ഷയുമായി ബന്ധപ്പെട്ട ബോധവൽക്കരണ ക്ലാസുകൾ എല്ലാ വിദ്യാഭ്യാസ സ്ഥാപനങ്ങളിലും നടത്തണമെന്ന് ജില്ലാ കളക്ടർ യോഗത്തിൽ നിർദേശിച്ചു. ആരോഗ്യസ്ഥാപനങ്ങളിലും, സ്കൂൾ, കോളജ്, അങ്കണവാടികൾ ഉൾപ്പെടെയുള്ള വിദ്യാഭ്യാസ സ്ഥാപനങ്ങളിലും ഇലക്ട്രിക്കൽ സേഫ്റ്റി ഓഡിറ്റ് നടത്തി പ്രശ്നങ്ങളുണ്ടെങ്കിൽ പരിഹാരം കണ്ടെത്തണം. വിദ്യാഭ്യാസ വകുപ്പ് ഡെപ്യൂട്ടി ഡയറക്ടർ, വനിതാ- ശിശുവികസന വകുപ്പ് ഡെപ്യൂട്ടി ഡയറക്ടർ, ജില്ലാ മെഡിക്കൽ ഓഫീസർ എന്നിവർ ഓഡിറ്റ് നടക്കുന്നുണ്ടോയെന്നു പ്രത്യേകം ശ്രദ്ധിക്കണം. വിദ്യാഭ്യാസ സ്ഥാപനങ്ങളുടെയും ആശുപത്രികളുടെയും മുകളിലൂടെ സജീവമായ ഇലക്ട്രിക്കൽ ലൈനുകൾ കടന്നുപോകുന്നില്ലെന്നു ഉറപ്പുവരുത്താൻ കെഎസ്ഇബി, ഇലക്ട്രിക്കൽ ഇൻസ്പെക്ടറേറ്റ് ഉദ്യോഗസ്ഥർക്ക് ജില്ലാകളക്ടർ നിർദേശം നൽകി. കെഎസ്ഇബിയും വിദ്യാഭ്യാസവകുപ്പും ചേർന്ന് ബോധവത്കരണ പ്രവർത്തനങ്ങളും ക്ലാസുകളും വിപുലമായി നടത്തുന്നുണ്ടെന്നു യോഗം വിലയിരുത്തി. യോഗത്തിൽ പാലക്കാട് ഇലക്ട്രിക്കൽ സർക്കിൾ ഡെപ്യൂട്ടി ചീഫ് എൻജിനീയർ ടി.സി. ഗിരിജ, ഇലക്ട്രിക്കൽ ഇൻസ്പെക്ടർ സുജേഷ് പി. ഗോപി, വിവിധ വകുപ്പ് ഉദ്യോഗസ്ഥർ തുടങ്ങിയവർ പങ്കെടുത്തു.

തിരുപ്പൂരിൽ തമിഴ്‌നാട്-തായ്‌വാൻ സാങ്കേതിക ഉച്ചകോടി

കോയന്പത്തൂർ: തമിഴ്‌നാട്-തായ്‌വാൻ ടെക്‌നിക്കൽ ടെക്‌സ്റ്റൈൽ പങ്കാളിത്ത ഉച്ചകോടിയുടെ ഭാഗമായി, തിരുപ്പൂർ എക്‌സ്‌പോർട്ടേഴ്‌സ് അസോസിയേഷൻ, കോൺഫെഡറേഷൻ ഓഫ് ഇന്ത്യൻ ഇൻഡസ്ട്രിയുമായി സഹകരിച്ച് തായ്‌വാൻ പ്രതിനിധി സംഘവുമായി ഉന്നതതല ആശയവിനിമയവും മീറ്റിംഗുകളും നടത്തി. സാങ്കേതിക തുണിത്തരങ്ങളുടെ വളർന്നുവരുന്ന മേഖലയിൽ പ്രത്യേകിച്ച് മനുഷ്യനിർമിത ഫൈബർ ആപ്ലിക്കേഷനുകളിലും നൂതന ടെക്‌സ്റ്റൈൽ സാങ്കേതികവിദ്യകളിലും സഹകരണ അവസരങ്ങൾ വളർത്തിയെടുക്കുന്നതിലാണ് ഉച്ചകോടി ശ്രദ്ധ കേന്ദ്രീകരിച്ചത്. തിരുപ്പൂർ എക്‌സ്‌പോർട്ടേഴ്‌സ് അസോസിയേഷനിലേക്കുള്ള തായ്‌വാൻ പ്രതിനിധി സംഘത്തെ തിരുപ്പൂർ എക്‌സ്‌പോർട്ടേഴ്‌സ് അസോസിയേഷൻ ഓണററി ചെയർമാൻ എ. ശക്തിവേൽ സ്വാഗതം ചെയ്തു. സബ് കമ്മിറ്റി ചെയർമാൻ അരുൺ രാമസാമി, സിഐഐ തമിഴ്‌നാട് ടെക്സ്റ്റൈൽ പാനലിന്‍റെ കൺവീനർ ജി.ആർ. ഗോപികുമാർ, ടിടിഎഫ് പ്രസിഡന്‍റ് ജസ്റ്റിൻ ഹുവാങ്, തമിഴ്‌നാട്ടിലെ ടെക്സ്റ്റൈൽസ് വകുപ്പിലെ ജോയിന്‍റ് ഡയറക്ടർമാരായ ശക്തി വിജയലക്ഷ്മി, രാഘവൻ, ടിഇഎ ബിസിനസ് പ്രമോഷൻ സബ് കമ്മിറ്റി വൈസ് ചെയർമാൻ മെഴിസെൽവൻ തുടങ്ങിയവർ നേതൃത്വം നൽകി. തിരുപ്പൂരിൽ നിന്നും തായ്‌വാൻ പ്രതിനിധി സംഘത്തിൽ നിന്നുമുള്ള 30 ലധികം പേർ പങ്കെടുത്തു.

കൊടുവായൂർ -ആൽത്തറ പാതയിൽ വാഹനക്കുരുക്കിൽ യാത്രക്കാർ വലയുന്നു

കൊടുവായൂർ: ആൽത്തറ - കുഴൽമന്ദം പാതയിൽ വാഹനകുരുക്കിൽ യാത്രക്കാർ വലയുന്നു. ഇന സ്ഥലത്തു റോഡിനു വീതികുറവാണ്. ഇരുവശത്തും വ്യാപാരസ്ഥാപനങ്ങളാണ്. ഇവിടെ വാഹനങ്ങൾ കടന്നുപോവാൻ ഏറെ പണിപ്പെടുകയാണ്. കാൽനടയാത്രക്കാർ ഈ സ്ഥലം മറികടക്കാൻ പ്രതിബന്ധങ്ങൾ ഏറെ തരണം ചെയ്യണം. പ്രധാനപാതയിൽനിന്നും കുഴൽമന്ദം പാതയിലേക്ക് വാഹനം തിരിച്ചുവിടുന്ന സമയങ്ങളിലെല്ലാം കുരുക്ക് ഒഴിയാബാധയായി നീളുകയാണ്. ഈ സമയങ്ങളിൽ അത്യാവശ്യ ചികിത്സക്കായി രോഗികളുമായി വരുന്ന ആംബുലൻസും കുടുങ്ങുന്ന അവസ്ഥയുണ്ട്. തൃശൂർ-പൊള്ളാച്ചി അന്തർസംസ്ഥാന പാതയാണിത്. 15 വർഷം മുന്പ് ബൈപ്പാസ് നിർമാണത്തിനു തുടക്കമിട്ടിരുന്നുവെങ്കിലും തുടർനടപടികൾ എങ്ങുമെത്താതിൽ ജനകീയ പ്രതിഷേധവും ശക്തമാണ്.

അവഗണനയുടെ സ്മാരകമായി കുഴൽക്കിണറും പമ്പും

ഇടക്കുർശി: ദേശീയപാതയോടുചേർന്ന് ഇടക്കുർശി- ശിരുവാണി കവലയിൽ നിർമിച്ച പമ്പ്‌ഹൗസ്‌ നശിക്കുന്നതായി പരാതി. വർഷങ്ങൾക്കുമുമ്പ്‌ സമീപത്തെ പട്ടിയപ്പൻ തരിശിലെ ഉന്നതിയിലേക്കു കുടിവെള്ളമെത്തിക്കാൻവേണ്ടി നിർമിച്ചതായിരുന്നു. ഉദ്ഘാടനദിവസം മുതൽ ഒരാഴ്ചവരെ പ്രവർത്തിച്ചെങ്കിലും തുടർന്നു നിലച്ചു. കാടുകയറി പുല്ലുകൾ വളർന്ന് പായലുംപടർന്ന് അപകടാവസ്ഥയിലാണ് ഈ പമ്പ്‌ഹൗസ്. ഇഴജന്തുക്കളും തെരുവുനായ്ക്കളും ഈഭാഗത്ത്‌ സ്ഥിരമാണ്. പമ്പ്‌ഹൗസ് പൊളിച്ചുകളയുകയോ പുനർനിർമിച്ച്‌ മോട്ടോർ മാറ്റിസ്ഥാപിച്ച്‌ കുടിവെള്ളവിതരണം ആരംഭിക്കുകയോ ചെയ്യണമെന്നുള്ള അവശ്യം ശക്തമായിട്ടുണ്ട്‌. നീരോട്ടമുള്ള പാടത്ത്‌ നാലടി താഴ്ത്തിയാൽപോലും ശുദ്ധജലം കിട്ടുമെന്നിരിക്കേയാണ് ഉന്നതിയിൽ നിന്നും ഒന്നരകിലോമീറ്റർ അകലെ കിണറും പന്പ്ഹൗസും നിർമിച്ചത്‌.

കണ്ണിയംപുറം ബധിരമൂക വിദ്യാലയത്തിലെ ചുമരുകളിൽ വിരിയുന്നതു ചിത്രപുസ്തകം

ഒറ്റപ്പാലം: ചിത്രങ്ങളിലൂടെ പഠനസഹായം സാധ്യമാക്കുന്ന "വിദ്യഭ്യാസ'വുമായി കണ്ണിയംപുറം സർക്കാർ ബധിര മൂക വിദ്യാലയത്തിന്‍റെ ചുമരുകൾ. ചുമരുകൾ ഇവിടെ കാൻവാസാണ്. പാഠഭാഗങ്ങളിലെ കഥാപാത്രങ്ങളെയും സംഭവങ്ങളേയും കോറിയിട്ടിരിക്കുന്നത് ഇതിലാണ്. കഥകളി കലാരൂപങ്ങൾ, കാർട്ടൂൺ ചിത്രങ്ങൾ, വൈക്കം മുഹമ്മദ് ബഷീറിന്‍റെ ഭൂമിയിലെ അവകാശികൾ തുടങ്ങി സൂര്യാസ്തമയവും ജീവൻതുടിക്കുന്ന ചിത്രങ്ങളുണ്ട് ഈ സ്കൂളിലെ ചുമരുകളിൽ. ചിത്രങ്ങൾ നിറഞ്ഞത് ആർട്ടിസ്റ്റായ അനീഷി (40) ന്‍റെ കലാവിരുതിലാണ്. സ്കൂളിനെ മികവിന്‍റെ കേന്ദ്രമാക്കി ഉയർത്തുന്നതിന്‍റെ ഭാഗമായാണ് പാഠഭാഗങ്ങളുമായി ബന്ധപ്പെട്ട ചിത്രങ്ങൾ വരച്ചത്. മൂന്നുവർഷംമുന്പ് ചുമർചിത്രങ്ങൾ വരയ്ക്കാനാണ് അനീഷ് ആദ്യമായി ഈ സ്കൂളിലെത്തുന്നത്. ചിത്രകലാ അധ്യാപകന്‍റെ താത്കാലിക ഒഴിവുണ്ടെന്ന് അറിഞ്ഞതോടെ അപേക്ഷിച്ചു. കൂടിക്കാഴ്ചയ്ക്കു പിന്നാലെ ജോലിയും ലഭിച്ചു. ഇതിനിടെ താത്കാലിക ജീവനക്കാർക്കും കെ- ടെറ്റ് യോഗ്യത വേണമെന്ന നിബന്ധനവന്നു. അപ്പോൾ അനീഷ് അധ്യാപകന്‍റെ കുപ്പായം അഴിച്ചുവച്ച് ചിത്രകാരന്‍റെ റോളിൽ മുന്നോട്ടുനീങ്ങി. യോഗ്യത നേടിയെടുക്കാനുള്ള പരിശ്രമങ്ങൾ തുടരുകയാണെങ്കിലും കലാകാരന്‍റെ വേഷത്തിലും സജീവമാണ്. രണ്ടുവർഷത്തെ ഡിപ്ലോമ കോഴ്സിലൂടെയാണ് ചിത്രരചനയിലെ തന്‍റെ അഭിരുചികളെ ഊട്ടിയുറപ്പിച്ചത്. കുട്ടികളിൽ വളരെ പെട്ടെന്നുതന്നെ പാഠഭാഗങ്ങൾ ഹൃദിസ്ഥമാക്കാൻ ചിത്രങ്ങൾ വളരെയേറെ ഉപയോഗപ്രദമാകുന്നുണ്ടെന്നാണ് വിലയിരുത്തൽ. അതുകൊണ്ടുതന്നെ ചുമരിലെ ചിത്രങ്ങൾ വിദ്യാർഥികൾക്കും അധ്യാപകർക്കും ഒരുപോലെ പ്രിയപ്പെട്ടതായി മാറിക്കഴിഞ്ഞു.

കുളപ്പുള്ളി ബസ് സ്റ്റാൻഡിനെ കൈയൊഴിഞ്ഞ് സ്വകാര്യബസുകൾ

ഷൊർണൂർ: ഉത്തരവുകളൊന്നും നടപ്പായില്ല, കുളപ്പുള്ളി ബസ് സ്റ്റാൻഡിൽ കയറാതെ സ്വകാര്യ ബസുകൾ. കെഎസ്ആർടിസി ഉൾപ്പെടെ എല്ലാ ബസുകളും കുളപ്പുള്ളി ബസ്‌ സ്റ്റാൻഡിൽ കയറണമെന്നായിരുന്നു ട്രാഫിക് റഗുലേറ്ററി കമ്മിറ്റിയുടെ തീരുമാനം. എന്നാൽ ആ ഉത്തരവിന് പുല്ലുവിലയാണ് സ്വകാര്യ ബസുകൾ കൽപ്പിച്ചുവരുന്നത്. കുളപ്പുള്ളിയിൽ ബസുകൾക്ക് വൺവേ സംവിധാനമേർപ്പെടുത്തിയായിരുന്നു പുതിയ ക്രമീകരണം നടത്തിയത്. തൃശൂരിൽനിന്ന് ഒറ്റപ്പാലം ഭാഗത്തേക്ക് പോകുന്ന ബസുകൾ കുളപ്പുള്ളി സ്റ്റാൻഡിൽ കയറി പോകണമെന്നും തിരിച്ച് വരുമ്പോൾ കുളപ്പുള്ളി സ്റ്റാൻഡിൽ കയറാതെ തൃശൂരിലേക്ക് പോകാമെന്നുമുള്ള ധാരണ ലംഘിക്കപ്പെടുന്ന സ്ഥിതി തുടരുകയാണ്. മുമ്പെല്ലാം തൃശൂർ ഭാഗത്തുനിന്നും വരുന്ന ബസ് ജീവനക്കാരായിരുന്നു പ്രശ്‌നം ഉന്നയിച്ചിരുന്നത്. എന്നാൽ അവരെക്കൂടി അറിയിച്ചെടുത്ത തീരുമാനവും ലംഘിക്കപ്പെട്ടു. ഇതോടൊപ്പം കെഎസ്ആർടിസി ബസുകളും കുളപ്പുള്ളി ബസ്‌ സ്റ്റാൻഡിൽ കയറിയെ പോകാവൂ എന്ന നിർദേശവും നഗരസഭ നൽകിയിരുന്നു. ഇതിനായി നഗരസഭാ കൗൺസിൽ പ്രമേയം പാസാക്കി കെഎസ്ആർടിസി അധികൃതർക്ക് നൽകുകയും ചെയ്തു. ഷൊർണൂർ-പട്ടാമ്പി, ഷൊർണൂർ- ചെർപ്പുളശേരി, ഷൊർണൂർ-മണ്ണാർക്കാട്, ഷൊർണൂർ-പാലക്കാട് എന്നിവിടങ്ങളിലേക്ക് കുളപ്പുള്ളിവഴി പോകുന്ന ബസുകളെല്ലാം സ്റ്റാൻഡിൽ കയറിയേ പോകാവൂ എന്നുമായിരുന്നു തീരുമാനം. കുളപ്പുള്ളി ടൗണിൽ തിരിവിലുള്ള ഓട്ടോ, ഇരുചക്രവാഹന പാർക്കിംഗ് നിരോധിക്കുകയും ചെയ്തിരുന്നു. ഭാരതപ്പുഴക്ക് സമീപമുള്ള പാലം മുതൽ കുളപ്പുള്ളിവരെയുള്ള റോഡിൽ ഗുരുതരമായ ഗതാഗതക്കുരുക്ക് രൂപപ്പെടുന്നുണ്ട്. ഇതുമൂലം വലിയതോതിൽ സമയം നഷ്ടം സംഭവിക്കുന്നുണ്ടെന്നും ഇതാണ് കുളപ്പുള്ളി ബസ് സ്റ്റാൻഡിൽ കയറാത്തതിന് കാരണം എന്നുമാണ് സ്വകാര്യ ബസുകൾ നൽകുന്ന വിശദീകരണം.

മാലിന്യക്കൂമ്പാരം നീക്കാത്തതിൽ കോൺഗ്രസ് പ്രതിഷേധിച്ചു

കല്ലടിക്കോട്: കരിമ്പ പഞ്ചായത്തിലെ ഹരിതകർമസേന വീടുകളിൽ നിന്നും ശേഖരിച്ച പ്ലാസ്റ്റിക്ക് അടക്കമുള്ള മാലിന്യങ്ങൾ കല്ലടിക്കോട് ജലസേചന വകുപ്പ് ഓഫീസിനും കുടിവെള്ളടാങ്കിനും സമീപം അലക്ഷ്യമായി കൂട്ടിയിട്ടതിൽ കോൺഗ്രസ് പ്രവർത്തകർ പ്രതിഷേധിച്ചു. നിപ്പയടക്കമുള്ള പകർച്ചവ്യാധികൾ ഉണ്ടാകുമെന്നും നനഞ്ഞ് കിടക്കുന്ന കുപ്പിച്ചില്ലുകളടക്കമുള്ളവ ഉടൻ നീക്കം ചെയ്യണമെന്നും പഞ്ചായത്തിലെ വിവിധ ഇടങ്ങളിലായി കെട്ടിക്കിടക്കുന്ന മാലിന്യങ്ങൾ മുഴുവൻ ഒഴിവാക്കണമെന്നും പ്രവർത്തകർ ആവശ്യപ്പെട്ടു. ആന്‍റണി മതിപ്പുറം, ഡോ. മാത്യു കല്ലടിക്കോട്, അഷ്റഫ്,പി.കെ. മുഹമ്മദാലി, പി. വിൽസൺ, ജയ്സൺ പി. ചാക്കോ, ഡെന്നി ചെറുകരകുന്നേൽ, പി. സുരേഷ്, ജെന്നി ജോൺ, സനീഷ് എന്നിവർ പ്രതിഷേധത്തിന് നേതൃത്വം നൽകി.

കരിമ്പ പഞ്ചായത്ത് ശേഖരിച്ച മാലിന്യം പൊതുവഴിയിൽ നനഞ്ഞു നശിക്കുന്നു

കല്ലടിക്കോട്: കരിമ്പ പഞ്ചായത്ത് ശേഖരിച്ച മാലിന്യം പൊതുവഴിയിൽ കൂട്ടിയിട്ടിരിക്കുന്നതുമൂലം നാട്ടുകാരും പ്രദേശവാസികളും പകർച്ചവ്യാധി ഭീതിയിൽ. കരിമ്പ പഞ്ചായത്തിന്‍റെ കല്ലടിക്കോട് ഭാഗത്തുള്ള 3,4,5,6,7,8,9 വാർഡുകളിലെ പ്ലാസ്റ്റിക്കുകൾ, വസ്ത്രങ്ങൾ, കുപ്പികൾ, തെർമോകോൾ, ചെരിപ്പുകൾ തുടങ്ങിയവയാണ് കല്ലടിക്കോട് ടിബി കവലയ്ക്കു സമീപത്തെ വാട്ടർടാങ്കിനും ലൈബ്രറിക്കും സമീപം കൂട്ടിയിട്ടിരിക്കുന്നത്. മഴ പെയ്തതോടെ വെള്ളംകയറി നശിക്കാനും തെരുവ്നായ്ക്കൾ വലിച്ച് റോഡിലേക്ക് ഇടാനും തുടങ്ങിയിട്ടുണ്ട്. ഇറിഗേഷന്‍റെ ഓഫീസിലേക്കും ജലസേചനവകുപ്പിന്‍റെ ക്വാർട്ടേഴ്സിലേക്കും സമീപത്തെ വായനശാലയിലേക്കും പോകുന്നവർ മൂക്കുപൊത്തിയാണ് കടന്നുപോകുന്നത്. പഞ്ചായത്തിന്‍റെ 15 കിലോമീറ്റർ അപ്പുറത്തുള്ള കാരാകുർശി പഞ്ചായത്തിൽ നിപ്പ വ്യാപിച്ചതോടെ പ്രദേശവാസികൾ ഭീതിയിലാണ്. ഓരോ വാർഡിലേയും ഓരോ വീട്ടിൽനിന്നും പ്ലാസ്റ്റിക് ഉൾപ്പടെയുള്ള മാലിന്യങ്ങൾ ശേഖരിക്കുന്നതിന് മാസം 50 രൂപ സേവനനികുതിയായി പിരിക്കുന്നുണ്ട്. ഒരു വാർഡിൽ ഏകദേശം 400 വീടുകളാണുള്ളത്. ഒരുവാർഡിൽ നിന്നു ഒരു മാസം ഈ ഇനത്തിൽ ഫീസായി 20000 രൂപയാണ് പഞ്ചായത്തിന് കിട്ടുക.17 വാർഡുള്ള കരിമ്പ പഞ്ചായത്തിന് ഒരു മാസം ശരാശരി 3,40,000 രൂപ ഈ ഇനത്തിൽ ലഭിക്കുമ്പോഴാണ് നിരുത്തരവാദിത്വത്തോടെ പെരുമാറുന്നത്. 1, 11, 12, 13,14, 15, 16, 17 വാർഡുകളിൽ നിന്നും ശേഖരിക്കുന്ന പ്ലാസ്റ്റിക്കടക്കമുള്ള മാലിന്യങ്ങൾ ഇടക്കുർശിയിലെ പഞ്ചായത്തിന്‍റെ ഷോപ്പിംഗ് കോംപ്ലക്സിലാണ് സൂക്ഷിക്കുന്നത്. അവിടെയും സൂക്ഷിക്കാൻ സ്ഥലമില്ലാത്തതിനാൽ വരാന്തയിലും കോണിപ്പടിയിലും ആണ് വെച്ചിട്ടുള്ളത്. ഇവിടെ തെരുവ്നായ്ക്കളുടെ കിടപ്പിടമാണ്. നായകളെ പേടിച്ച് ആരും അവിടേയ്ക്ക് പോകാറില്ല. കട നടത്തിയിരുന്നവരും റൂമുകൾ ഒഴിഞ്ഞുപോകാൻ തുടങ്ങിയിട്ടുണ്ട്.

മരുതറോഡ് ഹോമിയോ ഡിസ്‌പെന്‍സറിക്ക് കായകല്പ് പുരസ്‌കാരം

പാലക്കാട്: മരുതറോഡ് ഗ്രാമപഞ്ചായത്ത് സര്‍ക്കാര്‍ ഹോമിയോപ്പതി ഡിസ്‌പെന്‍സറിക്ക് (ആയുഷ് ഹെല്‍ത്ത് ആൻഡ് വെല്‍നസ് സെന്‍റര്‍) കായകല്പ് പുരസ്‌കാരം. കമന്‍റേഷന്‍ അവാര്‍ഡിനാണ് അര്‍ഹമായത്. ഡിസ്‌പെന്‍സറിയുടെ ശുചിത്വം, മാലിന്യപരിപാലനം, അണുബാധ നിയന്ത്രണം എന്നിവയിലെ മികച്ച പ്രവര്‍ത്തനമാണ് അംഗീകാരത്തിന് അര്‍ഹമാക്കിയത്. ഹോമിയോപ്പതി വകുപ്പ് ഡിസ്‌പെന്‍സറികളില്‍ 90.42 ശതമാനം സ്‌കോര്‍ നേടി ജില്ലയില്‍ രണ്ടാം സ്ഥാനമാണ് മരുതറോഡ് പഞ്ചായത്ത് സര്‍ക്കാര്‍ ഹോമിയോപ്പതിക്ക് ലഭിച്ചത്. മരുതറോഡ് പഞ്ചായത്ത് ഭരണസമിതി, ജീവനക്കാര്‍, ഹോമിയോപ്പതി വകുപ്പ്, നാഷണല്‍ ആയുഷ് മിഷന്‍ തുടങ്ങിയവയുടെ സംയുക്ത പ്രവര്‍ത്തനമാണ് മരുതറോഡ് പഞ്ചായത്ത് സര്‍ക്കാര്‍ ഹോമിയോപ്പതി ഡിസ്‌പെന്‍സറിയെ ഉന്നതിയിലെത്തിച്ചതെന്നു അധികൃതർ പറഞ്ഞു.

അട്ടപ്പാടിയിൽ എക്സൈസ് റെയ്ഡിൽ എട്ടു കിലോ കഞ്ചാവ് പിടിച്ചെടുത്തു

അഗളി: അട്ടപ്പാടി കോട്ടത്തറയിൽ ഗവ. യുപി സ്കൂളിനു സമീപം കുറ്റിക്കാട്ടിൽ ഒളിപ്പിച്ച 8.200 കിലോ കഞ്ചാവ് അഗളി എക്സൈസ് പാർട്ടി കണ്ടെടുത്തു. പ്ലാസ്റ്റിക് കവറുകളിലായാണ് ഉണക്കകഞ്ചാവ് സൂക്ഷിച്ചിരുന്നത്. എക്സൈസ് ഇൻസ്പെക്ടർ പി.എം. മുഹമ്മദ് ഇഹ്‌ലാസ്, അസിസ്റ്റന്‍റ് എക്സൈസ് ഇൻസ്പെക്ടർ ഗ്രേഡ് വി. മണി, പ്രിവന്‍റീവ് ഓഫീസർ ഗ്രേഡ് എൻ.ടി. ശ്രീധർ, സിഇഒമാരായ അജീഷ്, രജീഷ്, ഉഷ, ചിത്ര എന്നിവരടങ്ങിയ സംഘമാണ് റെയ്ഡ് നടത്തിയത്.

ഇടക്കുർശി- പാലക്കയം റോഡ് അപകടാവസ്ഥയിൽ

കല്ലടിക്കോട്‌: വിനോദ സഞ്ചാരികളടക്കം നൂറുകണക്കിനാളുകൾ സഞ്ചരിക്കുന്ന ഇടക്കുർശി- പാലക്കയം- ശിരുവാണി റോഡ്‌ അപകടാവസ്ഥയിൽ. സംരക്ഷണഭിത്തിയില്ലാതെ ഏതുസമയവും ഇടിഞ്ഞുവീഴാമെന്ന നിലയിലാണ്. ഇരുട്ടായാൽ തെരുവുവിളക്കുകളും ഇല്ല. 1975ൽ കോയമ്പത്തൂരിലേക്കു കുടിവെള്ളം എത്തിക്കാനുള്ള പദ്ധതിയുടെ ഭാഗമായി തമിഴ്‌നാട്‌ സർക്കാർ നിർമിച്ചതാണീ റോഡ്‌. പാലക്കാട്‌- കോഴിക്കോട്‌ ദേശീയപാതയിലെ ഇടക്കുർശിയിൽനിന്നും ശിരുവാണിഡാം വരെയുള്ള 22 കിലോമീറ്റർ റോഡാണ് അപകടാവസ്ഥയിലായിട്ടുള്ളത്‌. ഈ റോഡിന്‍റെ പരിചരണവും അറ്റകുറ്റപ്പണികളും സംരക്ഷണവും തമിഴ്‌നാട്‌ സർക്കാരാണ് ചെയ്യുന്നത്‌. എല്ലാവർഷവും റോഡ്‌ സംരക്ഷണപ്രവർത്തനങ്ങൾ നടത്താമെന്നും വശങ്ങൾകെട്ടി റോഡിന്‍റെ ഇടിച്ചിൽ തടയാമെന്നും ആവശ്യമായ അടിസ്ഥാന സൗകര്യങ്ങളൊരുക്കാമെന്നുമായിരുന്നു ഇരുസംസ്ഥാന സർക്കാരുകളും തമ്മിലുണ്ടാക്കിയ കരാറിലുണ്ടായിരുന്നത്‌. കുറച്ചു വർഷങ്ങളായി തമിഴ്‌നാട്‌ സർക്കാർ ഈ റോഡ്‌ സംരക്ഷിക്കുന്നില്ലെന്ന പരാതിയുണ്ട്‌. നിരവ്‌ മുതൽ ഇരുമ്പാമുട്ടി ക്ഷേത്രത്തിനു താഴെവരെ റോഡ്‌ പൂർണമായും തകർന്നു. ഇരുചക്രവാഹനങ്ങൾപോലും കടന്നുപോകാൻ പ്രയാസമാണ്. മരങ്ങൾ വളർന്നും വശങ്ങൾ തകർന്നും തെരുവുവിളക്കുകൾ ഇല്ലാതെയും യാത്രക്കാർ കഷ്ടപ്പെടുകയാണ്. കാട്ടാനകളും പുലി, കടുവ, മാൻ, കുരങ്ങുകൾ തുടങ്ങിയവ റോഡിലൂടെ ഇറങ്ങി കൃഷിയിടങ്ങളിലും വീടുകൾക്കു സമീപവും എത്താറുണ്ട്‌. പ്രദേശവാസികൾ കാട്ടുമൃഗങ്ങളെ പേടിച്ച്‌ രാത്രി പുറത്തിറങ്ങാറുപോലുമില്ല. തെരുവുവിളക്കുകൾ സ്ഥാപിക്കുകയും റോഡിന്‍റെ വശങ്ങൾകെട്ടി പൊട്ടിപ്പൊളിഞ്ഞ റോഡ്‌ ടാർചെയ്ത്‌ നന്നാക്കുകയും ചെയ്യണമെന്ന ആവശ്യം ശക്തമായിട്ടുണ്ട്‌.

കുറവമ്പാടിയിൽ കൃഷിനാശം വിതച്ച് കാട്ടാനക്കൂട്ടം

അഗളി: അട്ടപ്പാടി ഷോളയൂർ പഞ്ചായത്തിൽ കുറവൻപാടിയിൽ വൻകൃഷിനാശം വിതച്ച് കാട്ടാന വിളയാട്ടം. ശിർവാണിപ്പുഴയോരത്തുള്ള കൃഷിത്തോട്ടങ്ങളിലാണ് ആന നാശംവിതച്ചത്. കർഷകരായ പുതുവേലിൽ ഗോപി, പാലത്തിങ്കൽ മധു എന്നിവരുടെ തോട്ടങ്ങളിൽ തെങ്ങ്, കമുക്, ഏലം, വാഴ തുടങ്ങി കൃഷികൾ നശിപ്പിച്ചു. കായ്ഫലമുള്ള തെങ്ങുകളും കമുകുകളും ഏലകൃഷിയുമാണ് നശിപ്പിച്ചത്. ഏലക്കൃഷികൾ സംരക്ഷിക്കാനാകാത്തവണ്ണം ചവിട്ടി നശിപ്പിച്ചു. ഇന്നലെ പുലർച്ചയോടെയാണ് തോട്ടത്തിൽ ആനകള്‍ എത്തിയതെന്നാണ് കരുതുന്നത്. ലക്ഷക്കണക്കിനുരൂപയുടെ നഷ്ടമുണ്ടായതായി കർഷകർ പറഞ്ഞു. ഷോളയൂർ ഫോറസ്റ്റർ രതീഷ് സ്ഥലത്തെത്തി കൃഷിനാശം വിലയിരുത്തി. നടപടിക്രമങ്ങൾക്ക് വിധേയമായി കൃഷിനാശം സംഭവിച്ചവർക്ക് മതിയായ നഷ്ടപരിഹാരം നൽകുമെന്ന് ഫോറസ്റ്റർ പറഞ്ഞു. ഒരു മാസത്തിലധികമായി ഷോളയൂർ പഞ്ചായത്തിലെ കുറവൻപാടിയിലും, അഗളി പഞ്ചായത്തിലെ പുലിയറ, കുറവൻപാടി, ഉണ്ണിമല, കട്ടേക്കാട് പ്രദേശങ്ങളിലും കാട്ടാനശല്യം തുടരുകയാണ്. വൈകുന്നേരമായാൽ ആളുകൾക്കു പുറത്തിറങ്ങാൻ പറ്റാത്ത സ്ഥിതിയാണ്. തികച്ചും ഒറ്റപ്പെട്ട പ്രദേശമായ ഇവിടെ വന്യമൃഗങ്ങളെ ഭയന്ന് രാത്രിയിൽ അത്യാവശ്യഘട്ടത്തിൽ ടാക്സിപോലും കിട്ടാത്ത സ്ഥിതിയാണന്നു നാട്ടുകാർ ചൂണ്ടിക്കാട്ടി.

വിഎസിന്‍റെ ഓർമകളിൽ മുൻഡ്രൈവർ സുന്ദരൻ

ജോജി തോമസ് നെന്മാറ: അളുവശേരി സുന്ദരൻ എന്ന അന്പത്തിയഞ്ചുകാരന് വി.എസ്. അച്യുതാനന്ദനുമായുള്ളത് വളരെ വൈകാരികമായ ബന്ധം. 27 വർഷക്കാലം വിഎസിന്‍റെ സ്വകാര്യ ഡ്രൈവറായി സേവനം ചെയ്ത കാലം സുന്ദരൻ ഓർത്തെടുക്കുന്നു. കുടുംബത്തിലെ ഒരു അംഗത്തെപ്പോലെ സ്നേഹിച്ചുവന്ന വി.എസുമായുള്ള നാളുകൾ യാത്രയിൽ വിഎസിന്‍റെ ഇഷ്ടഗാനങ്ങൾ, വായിക്കാനുള്ള പത്രങ്ങൾ, അവശ്യവസ്തുക്കൾ, കുടിക്കാനുള്ള ചൂടുവെള്ളം എന്നിവ കരുതുന്നതും പാലക്കാട് മലമ്പുഴയിൽ വരുമ്പോഴുള്ള ചിട്ടവട്ടങ്ങളും സുന്ദരൻ ഓർത്തെടുത്തു. കർക്കശക്കാരനാണെങ്കിലും യാത്രയ്ക്കിടയിൽ കാറിലെ പാട്ടു കേൾക്കുന്നതു വിഎസിനു ഇഷ്ടമായിരുന്നു. എൽഡിഎഫ് കൺവീനറായതു മുതൽ മുഖ്യമന്ത്രിയായ കാലത്തും പ്രതിപക്ഷ നേതാവായ കാലത്തും ഭരണപരിഷ്‌കാര കമ്മീഷനായപ്പോഴും സുന്ദരനെ വിഎസ് മാറ്റിനിർത്തിയില്ല. ഭരണകാര്യങ്ങളിൽ വലിയ കർക്കശക്കാരനാണെങ്കിലും തന്നെപ്പോലുള്ള ജീവനക്കാരോടു സൗമ്യസ്വഭാവത്തോടെ മാത്രമേ പെരുമാറിയിരുന്നുള്ളൂവെന്നും സുന്ദരൻ ഓർത്തെടുക്കുന്നു. വലിയ തിരക്കുപിടിച്ച സമയത്തും തന്‍റെ വിവാഹചടങ്ങിൽ പങ്കെടുക്കാൻവേണ്ടി ഡൽഹിയിൽനിന്നു കുഴൽമന്ദത്തെ കല്യാണമണ്ഡപത്തിലെത്തിയത് താനുമായുള്ള ആത്മബന്ധം കൊണ്ടാണെന്നും സുന്ദരൻ പറഞ്ഞു. മരണവാർത്ത അറിഞ്ഞതോടെ വിഎസിനെ അവസാനമായി ഒരുനോക്കുകാണാൻ സുന്ദരൻ തിരുവനന്തപുരത്താണുള്ളത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]