ADVERTISEMENT

ADVERTISEMENT

ലൂർദ് മൗണ്ട് സ്കൂളിൽ ഹൗസ് ലീഡർമാരുടെ സ്ഥാനാരോഹണം

വെന്പായം: വട്ടപ്പാറ ലൂർദ് മൗണ്ട് സ്കൂൾസിലെ സ്കൂൾ ലീഡർമാരുടെയും വിവിധ ഹൗസ് ലീഡർമാരുടെയും സ്ഥാനാരോഹണ ചടങ്ങ് ഇന്‍റലിജൻസ് വിഭാഗം ഡെപ്യൂട്ടി ഇൻസ്പെക്ടർ ജനറൽ ആർ. നിശാന്തിനി ഉദ്ഘാടനം ചെയ്തു.

സ്കൂൾ മാനേജർ ബ്രദർ പീറ്റർ വാഴേപ്പറമ്പിൽ അധ്യക്ഷത വഹിച്ചു. സ്റ്റേറ്റ്, സിബിഎസ്ഇ വിഭാഗം പ്രിൻസിപ്പൽമാരായ ഡോ. ജോസ് ഡി. സുജീവ്, ഡോ. ഷാഫി തോംസൺ, സുപ്പീരിയർ ബ്രദർ കെ.ടി. മാത്യു, പിടിഎ പ്രസിഡന്‍റുമാരായ അരുൺ, ലാൽ, റീബ ജാസിം എന്നിവർ ആശംസകൾ അർപ്പിച്ചു.

എസ്എസ്എൽസി, ഹയർസെക്കൻഡറി വിഭാഗങ്ങളിൽ ഉന്നത വിജയം കരസ്ഥമാക്കിയവർക്ക് പുരസ്കാരം സമ്മാനിച്ചു. വേദിയിൽ വിവിധ ഹൗസുകളുടെ മാർച്ച് പാസ്റ്റ്, സൂമ്പ ഡാൻസ്, പിരമിഡ് എന്നിവയും അരങ്ങേറി.

ADVERTISEMENT

ഗുരുനാഥന് സ്നേഹാദരങ്ങളൊരുക്കി നെയ്യാറ്റിന്‍കരയില്‍ ഇന്ന് `രചനാവസന്തം’

നെയ്യാറ്റിന്‍കര : കന്യാകുമാരി മുതൽ കാസർഗോഡ് വരെയുള്ള പൊതുവിദ്യാലയങ്ങളിലും കലാലയങ്ങളിലും ഭാഷാധ്യാപകരായി സേവനം അനുഷ്ഠിക്കുന്നവരുള്‍പ്പെടെ നൂറു കണക്കിന് ശിഷ്യര്‍ പ്രിയപ്പെട്ട ഗുരുനാഥന് സ്നേഹാദരം അര്‍പ്പിക്കുന്ന `രചനാവസന്തം` ഇന്ന്. മാതൃഭാഷയെ സ്നേഹിച്ചും കൂടുതല്‍ അറിഞ്ഞും അറിയിച്ചും അറിവുകള്‍ പങ്കുവച്ചും ജീവിതയാത്ര തുടരുന്ന നെയ്യാറ്റിന്‍കര രചന ഭാഷാപഠന കേന്ദ്രം ഡയറക്ടര്‍ എന്‍‌. വേലപ്പന്‍നായരെയാണ് പൂര്‍വവിദ്യാര്‍ഥി കൂട്ടായ്മയുടെ ആഭിമുഖ്യത്തില്‍ ആദരിക്കുന്നത്. കവികളും കഥാകൃത്തുക്കളും പ്രഭാഷകരും ചിത്രകാരികളും സംഗീതജ്ഞരും കലാപ്രവർത്തകരും അഭിനേതാക്കളും മാധ്യമപ്രവർത്തകരും അടക്കം സാംസ്‌കാരിക രംഗത്തെ വലിയൊരു നിര വേലപ്പന്‍നായരുടെ ശിഷ്യഗണങ്ങളില്‍പ്പെടുന്നു. വൈജ്ഞാനിക രംഗത്ത് ഗവേഷണപ്രബന്ധങ്ങൾ സമർപ്പിച്ച് പിഎച്ച്ഡി നേടിയ നാല്‍പ്പതിലേറെ പൂർവവിദ്യാർഥികള്‍ രചനയുടെ യശസ് വര്‍ധിപ്പിക്കുന്ന ഘടകങ്ങളിലൊന്ന്. 150 ലേറെ മികച്ച ഗ്രന്ഥങ്ങൾ രചനയുടെ പൂര്‍വവിദ്യാർഥികൾ കൈരളിക്ക് സംഭാവന ചെയ്തിട്ടുണ്ട്. സമൂഹത്തിലെ വിവിധ സേവന മേഖലകളിൽ പ്രവർത്തിക്കുന്നവരും പഠനകാലത്ത് റാങ്കു ജേതാക്കളായവരും ഉൾപ്പെടെ ആയിരക്കണക്കിനാളുകള്‍ക്കാണ് വേലപ്പന്‍നായരും അദ്ദേഹത്തിന്‍റെ നേതൃത്വത്തിലുള്ള രചന ഭാഷാ പഠന കേന്ദ്രവും ജീവിതവെളിച്ചം സമ്മാനിച്ചിട്ടുള്ളത്. നെയ്യാറ്റിന്‍കര എസ്എന്‍ ഓഡിറ്റോറിയത്തില്‍ രാവിലെ ഒന്പതിന് നടക്കുന്ന ഉദ്ഘാടന സമ്മേളനത്തില്‍ പ്രഫ. വി. മധുസൂദനന്‍നായര്‍, ബെന്യാമിന്‍ എന്നിവര്‍ മുഖ്യാതിഥികളാകും. ഡോ. എ.എം. ഉണ്ണികൃഷ്ണന്‍ അധ്യക്ഷനാകും. 11.30 ന് ഹൃദയതാളം, 12.30 ന് ചിത്രണം, ഉച്ചയ്ക്ക് രണ്ടിന് സ്പര്‍ശം എന്ന ശീര്‍ഷകത്തില്‍ രചനയിലെ അധ്യാപകരുടെ സംഗമത്തില്‍ ഐ.ബി. സതീഷ് എംഎല്‍എ, സാക്ഷരതാ മിഷന്‍ ഡയറക്ടര്‍ പ്രഫ. എ.ജി. ഒലീന, ജില്ലാ വിദ്യാഭ്യാസ ഓഫീസര്‍ ഷിബു പ്രേംലാല്‍, കെഎസ്ടിഎ സംസ്ഥാന വൈസ് പ്രസിഡന്‍റ് എം.എസ്. പ്രശാന്ത് എന്നിവര്‍ മുഖ്യാതിഥികളാകും. വൈകുന്നേരം 3.30 ന് രംഗവേദിയില്‍ ലഘുനാടകങ്ങള്‍, ഓട്ടന്‍തുള്ളല്‍, കാവ്യഗീതിക എന്നിവ അരങ്ങേറും. 4.30 ന് നടക്കുന്ന സ്നേഹാദര സദസ് മന്ത്രി വി. ശിവന്‍കുട്ടി ഉദ്ഘാടനം ചെയ്യും. നഗരസഭ ചെയര്‍മാന്‍ പി.കെ രാജമോഹനന്‍ അധ്യക്ഷത വഹിക്കുന്ന ചടങ്ങില്‍ എംഎല്‍എ മാരായ കെ. ആന്‍സലന്‍, സി.കെ. ഹരീന്ദ്രന്‍, എം. വിന്‍സെന്‍റ് എന്നിവര്‍ വിശിഷ്ടാതിഥികളാകും. കേരള ഭാഷാ ഇന്‍സ്റ്റിറ്റ്യൂട്ട് മുന്‍ യറക്ടര്‍ പ്രഫ. വി. കാര്‍ത്തികേയന്‍നായര്‍ മുഖ്യപ്രഭാഷണം നടത്തും. പുസ്തക പ്രകാശനം, ചിത്രപ്രദര്‍ശനം, പുസ്തക പ്രദര്‍ശനം, അധ്യാപകര്‍ക്കും സാംസ്കാരിക പ്രതിഭകള്‍ക്കും ആദരം, രുചിയിടം, പുരാവസ്തു പ്രദര്‍ശനം, പ്രബന്ധങ്ങളുടെ പ്രദര്‍ശനം എന്നിവയും സംഘടിപ്പിച്ചിട്ടുണ്ട്.

കസ്റ്റംസ് ഉദ്യാഗസ്ഥനെ പിരിച്ചുവിട്ടു

വലിയതുറ: തിരുവനന്തപുരം വിമാനത്താവളം വഴി സ്വര്‍ണക്കടത്തിന് ഒത്താശ ചെയ്തുകൊടുത്ത കസ്റ്റംസ് ഉദ്യോഗസ്ഥനെ സര്‍വീസില്‍ നിന്നും പിരിച്ചുവിട്ട് ഉത്തരവിറങ്ങി. കസ്റ്റംസ് ഇന്‍സ്‌പെക്ടറായിരുന്ന കൊച്ചി കലൂര്‍ സ്വദേശി കെ.അനീഷിനെയാണ് സര്‍വീസില്‍ നിന്നും പിരിച്ചുവിട്ട് ഉത്തരവിറങ്ങിയത്. 2023-ല്‍ വിദേശത്തുനിന്നും തിരുവനന്തപുരം വിമാനത്താവളത്തിലിറങ്ങിയ രണ്ട് യാത്രക്കാരില്‍ നിന്നുമായി 4.5 കിലോയോളം തൂക്കം വരുന്ന സ്വര്‍ണം പിടികൂടിയ സംഭവത്തിലായിരുന്നു നടപടി. യാത്രക്കാരെ ചോദ്യം ചെയ്തതില്‍ നിന്നും ലഭിച്ച വിവരത്തിന്‍റെ അടിസ്ഥാനത്തില്‍ നടത്തിയ അന്വേഷണത്തിലാണ് അനീഷും ഇയാളുടെ മറ്റൊരു സഹപ്രവര്‍ത്തകനായ കസ്റ്റംസ് ഉദ്യാഗസ്ഥനുമാണ് സ്വര്‍ണം വിമാനത്താവളത്തിനു പുറത്തേയ്ക്ക് കടത്താന്‍ സഹായിച്ചതെന്ന് സ്വര്‍ണം കൊണ്ടുവന്ന യാത്രക്കാര്‍ ഡിആര്‍ഐ അധികൃതര്‍ക്ക് മൊഴി നല്‍കിയിരുന്നു. ഇതിന്‍റെ അടിസ്ഥനത്തില്‍ നടന്ന അന്വേഷണത്തെത്തുടര്‍ന്ന് അനീഷിനെയും സഹപ്രവര്‍ത്തകനെയും സസ്‌പെന്റ് ചെയ്തിരുന്നു. അനീഷിനെ ആറുമാസം സസ്പെന്‍ഷനില്‍ നിറുത്തിയ ശേഷം സര്‍വീസില്‍ തിരികെ എടുക്കുകയായിരുന്നു. കസ്റ്റംസ് മറൈന്‍ വിങ്ങിലായിരുന്നു സസ്‌പെന്‍ഷനു ശേഷം അനീഷിന് നിയമനം ലഭിച്ചത്. സര്‍വീസില്‍ തുടരവേ ആഭ്യാന്തര അന്വേഷണം കഴിയുകയും അന്വേഷണ റിപ്പേര്‍ട്ട് ലഭിച്ചതിനെത്തുടര്‍ന്ന് കഴിഞ്ഞ ദിവസം അനീഷിനെ സര്‍വീസില്‍ നിന്നും പിരിച്ചുവിട്ടുകൊണ്ട് കസ്റ്റംസ് പ്രിവന്റീവ് കമ്മീഷണര്‍ ഉത്തരവിറക്കുകയായിരുന്നു. അനീഷിന്‍റെ സഹപ്രവര്‍ത്തകനായ കസ്റ്റംസ് ഉദ്യോഗസ്ഥനെതിരെയുളള അന്വേഷണ റിപ്പേര്‍ട്ട് അടുത്ത ആഴ്ച ഇറങ്ങുമെന്നാണ് സൂചന.

വാമനപുരം മണ്ഡലത്തിലെ റോഡ് നവീകരണത്തിന് 87 ലക്ഷം

നെടുമങ്ങാട്: വാമനപുരം മണ്ഡലത്തിലെ വിവിധ ഗ്രാമീണ റോഡുകളുടെ നവീകരണത്തിന് എംഎൽ എ യുടെ ആസ്തി വികസന പദ്ധതി പ്രകാരം 87 ലക്ഷം രൂപയുടെ ഭരണാനുമതി ലഭിച്ചതായി ഡി.കെ. മുരളി എംഎൽഎ അറിയിച്ചു. പാങ്ങോട് പഞ്ചായത്തിലെ കുളമാൻ കുഴി മുണ്ടോ ണിക്കര റോഡ് നവീകരണം (20 ലക്ഷം), പനവൂർ പഞ്ചായത്തിലെ പനവൂർ ജംഗ്‌ഷൻ വികസന പദ്ധതി (40 ലക്ഷം), കട്ടയ്ക്കൽ - കൊച്ചനായികോണം റോഡ് നവീകരണം (12 ലക്ഷം), ആനാട് പഞ്ചായത്തിലെ പാങ്കോട്- മേത്തോട് - വട്ടറത്തല റോഡ് നവീകരണം (15 ലക്ഷം) എന്നീ പ്രവൃത്തികൾക്കാണ് എംഎൽഎ യുടെ ശുപാർശ പ്രകാരം ജില്ലാ കളക്ടർ ഭരണാനുമതി നൽകിയത്. എൽഎസ്ജിഡി എൻജിനിയറിംഗ് വിഭാഗത്തിനാണ് നിർവഹണ ചുമതല. ടെണ്ടർ നടപടികൾ പൂർത്തിയാക്കി റോഡ് നവീകരണ പ്രവൃത്തികൾ അടിയന്തിരമായി ആരംഭിക്കും.

കാട്ടുപന്നി കുറുകെ ചാടി; സ്കൂട്ടർ യാത്രികയ്ക്ക് ഗുരുതര പരിക്ക്

പാലോട്: കാട്ടുപന്നിയുടെ ആക്രമണത്തിൽ സ്കൂട്ടർ യാത്രികയ്ക്ക് ഗുരുതരമായി പരിക്കേറ്റു. പാലോട് ഇടിഞ്ഞാർ റോഡിൽ പെരിങ്ങമല മുക്കിക്കട ജംഗ്ഷനിൽ ഉച്ചയോടെയായിരുന്നു സംഭവം. ബൗണ്ടർ മുക്ക് സ്വദേശിനി നിസ(45)യ്ക്കാണ് പരിക്കേറ്റത്. പെരിങ്ങമലയിൽ നിന്നും വീട്ടിലേക്ക് പോകുന്ന വഴി സ്കൂട്ടറിനു മുന്നിൽ പന്നിക്കൂട്ടം ചാടുകയായിരുന്നു. സാരമായി പരിക്കേറ്റ നിസ മെഡിക്കൽ കോളജ് ആശുപത്രിയിൽ ചികിത്സയിലാണ്. നിസക്ക് തലയ്ക്കും കൈയ്ക്കും പരിക്ക് പറ്റിയിട്ടുണ്ട്.

യുവാവിനെ കാറില്‍ തട്ടിക്കൊണ്ടുപോയി മര്‍ദിച്ച രണ്ടുപേര്‍ അറസ്റ്റില്‍

പേരൂര്‍ക്കട: യുവാവിനെ കാറില്‍ തട്ടിക്കൊണ്ടുപോയി മര്‍ദിച്ചശേഷം വഴിയിലുപേക്ഷിച്ച സംഭവത്തില്‍ രണ്ടുപേരെ ഫോര്‍ട്ട് പോലീസ് അറസ്റ്റുചെയ്തു. കരിമഠം കോളനി സ്വദേശികളായ ബറോട്ട അനസ് എന്നുവിളിക്കുന്ന അനസ് (28), ശ്രീക്കുട്ടന്‍ എന്നുവിളിക്കുന്ന പ്രവീണ്‍ (19) എന്നിവരാണ് അറസ്റ്റിലായത്. ബുധനാഴ്ച പുലര്‍ച്ചെ 12.30നാണ് കേസിന്നാസ്പദമായ സംഭവം. കരിമഠം കോളനിയില്‍ താമസിക്കുന്ന ദില്‍ഷാദിനെയാണ് പ്രതികള്‍ തട്ടിക്കൊണ്ടുപോയത്. ദില്‍ഷാദിന്‍റെ ഉറ്റസുഹൃത്തായ ബിച്ചുവും പ്രതികളും തമ്മില്‍ വാക്കുതര്‍ക്കം നിലനില്‍ക്കുകയായിരുന്നു. സംഭവദിവസം ശ്രീക്കുട്ടന്‍ ദില്‍ഷാദിനെ ഫോണില്‍ വിളിച്ചുവരുത്തുകയും ചാലയിലെ പൂക്കടയ്ക്കു സമീപം നില്‍ക്കാന്‍ ആവശ്യപ്പെടുകയും ചെയ്തു. കാറിലെത്തിയ പ്രതികള്‍ ദില്‍ഷാദിനെ ഉള്ളിലേക്ക് വലിച്ചുകയറ്റുകയും വാഹനത്തിനുള്ളില്‍ വച്ച് വെട്ടുകത്തിക്കൊണ്ട് കാലിലും കൈകളിലും അടിച്ചുപരിക്കേല്‍പ്പിക്കുകയുമായിരുന്നു. രണ്ട് മണിക്കൂര്‍ നീണ്ടുനിന്ന മര്‍ദനത്തിനുശേഷം ദില്‍ഷാദിനെ ശ്രീകണേ്ഠശ്വരം ക്ഷേത്രത്തിനു സമീപം ഇറക്കിവിടുകയായിരുന്നു. പിടിയിലായ അനസ് കാപ്പ കേസിലെ പ്രതിയാണെന്നു പോലീസ് അറിയിച്ചു. കുറച്ചുനാള്‍ മുമ്പ് ചാലയിലെ അര്‍ഷാദിനെ കുത്തിപ്പരിക്കേല്‍പ്പിച്ച സംഭവത്തിലെ രണ്ടാംപ്രതിയാണ് ശ്രീക്കുട്ടന്‍. പ്രതികളെകോടതി റിമാന്‍ഡ് ചെയ്തു.

ശുചീകരണമില്ല; പേരൂര്‍ക്കട ഇഎസ്ഐ പരിസരം കാടുകയറിയ നിലയില്‍

പേരൂര്‍ക്കട: ശുചീകരണമില്ലാത്തതിനാല്‍ പേരൂര്‍ക്കട ഇഎസ്ഐ പരിസരം കാടുകയറിയ നിലയില്‍‌. ആശുപത്രിയിലെത്തുന്ന രോഗികളുടെ കൂട്ടിരിപ്പുകാര്‍ വാഹനങ്ങള്‍ പാര്‍ക്ക് ചെയ്യുന്നതിനു സമീപം വരെ കാടുപിടിച്ചു കിടക്കുകയാണ്. ഇവിടെ കാറുകളും ഇരുചക്ര വാഹനങ്ങളും പാര്‍ക്ക് ചെയ്യുന്നതിന് സ്ഥലദൗര്‍ലഭ്യമുണ്ട്. അതിനിടെയാണ് കൂറ്റന്‍ മരങ്ങളില്‍നിന്നു തൂങ്ങിയിറങ്ങുന്ന വള്ളിപ്പടര്‍പ്പുകളും തറയില്‍ വളര്‍ന്നു പൊങ്ങിനില്‍ക്കുന്ന കളകളും ഉള്‍പ്പെടെ കാടുകയറിയിരിക്കുന്നത്. അതേസമയം രാത്രികാലങ്ങളില്‍ ഇഴജന്തുക്കളുടെ ശല്യം ഇവിടെയുണ്ടെന്നാണ് രോഗികളെ കാണാനെത്തുന്ന കൂട്ടിരിപ്പുകാര്‍ പറയുന്നത്. പക്ഷേ, ആശുപത്രി അധികൃതര്‍ ഇതിനൊരു സ്ഥിരീകരണം നല്‍കിയിട്ടില്ല. വിഷമുള്ള പാമ്പുകളെ കൂടുതലായി കണ്ടുവെന്നു പറയുന്നില്ലെങ്കിലും ചേര ഉള്‍പ്പെടെയുള്ള ഉരഗങ്ങള്‍ മതില്‍ക്കെട്ടുകളിലൂടെ പുറത്തേക്ക് പോകുന്നത് പൊതുജനങ്ങളെ ഭയപ്പാടിലാക്കും. കൃത്യമായി ശുചീകരണ പ്രവര്‍ത്തനങ്ങള്‍ നടത്തിയിരുന്നുവെങ്കില്‍ ഇങ്ങനെയൊരു ഭീതി ഒഴിവാക്കാമായിരുന്നു. കേന്ദ്രസര്‍ക്കാരിനു കീഴിലുള്ള സ്ഥാപനമായതിനാല്‍ ഇഎസ്ഐയുടെ പരിപൂര്‍ണമായ ചുമതല കേന്ദ്രസംഘത്തിനു തന്നെയാണ്. ഇവിടത്തെ ജീവനക്കാര്‍ താമസിക്കുന്ന ക്വാര്‍ട്ടേഴ്‌സുകള്‍ക്കു സമീപം തണല്‍മരങ്ങള്‍ അപകടഭീഷണി സൃഷ്ടിക്കുന്നതുകൂടാതെ ഈ ഭാഗത്തും അവിടവിടെയായി കാടുവളര്‍ന്നു കിടക്കുന്നുണ്ട്.

കാപ്പ ആക്ട് പ്രകാരം ഒരാള്‍ അറസ്റ്റില്‍

പേരൂര്‍ക്കട: കാപ്പ ആക്ട് പ്രകാരം ക്രിമിനല്‍ക്കേസ് പ്രതിയെ പൂജപ്പുര പോലീസ് അറസ്റ്റുചെയ്തു. പൂജപ്പുര സ്വദേശി അരുണ്‍ ബാബു (40) ആണ് അറസ്റ്റിലായത്. കഞ്ചാവ്, എംഡിഎംഎ തുടങ്ങിയ നിരവധി കേസുകളില്‍ പ്രതിയായിട്ടുള്ള അരുണ്‍ ബാബു ഏറ്റവുമൊടുവില്‍ കഞ്ചാവ് വില്‍പ്പന നടത്തിയതുമായി ബന്ധപ്പെട്ട് രണ്ടുമാസത്തിനു മുമ്പ് ജയില്‍മോചിതനായതാണ്. തുടര്‍ച്ചയായി ക്രിമിനല്‍ക്കേസുകളില്‍ ഏര്‍പ്പെട്ടതോടെയാണ് ഇയാള്‍ക്കെതിരേ കാപ്പ ചുമത്താന്‍ ജില്ലാ ഭരണകൂടം തീരുമാനിച്ചത്.പൂജപ്പുര സിഐയുടെ നേതൃത്വത്തിലുള്ള സംഘം പിടികൂടിയ പ്രതിയെ തിരുവനന്തപുരം സെന്‍ട്രല്‍ ജയിലില്‍ കരുതല്‍തടങ്കലില്‍ പാര്‍പ്പിച്ചിട്ടുണ്ട്.

അബോധാവസ്ഥയിൽ കണ്ടെത്തിയ ആളെ ആശുപത്രിയിൽ പ്രവേശിപ്പിച്ചു

നെടുമങ്ങാട്: അബോധാവസ്ഥയിൽ കണ്ടെത്തിയ വയോധികനെ സാമൂഹ്യ പ്രവർത്തകരും പോലീസും ചേർന്ന് ആശുപത്രിയിൽ എത്തിച്ചു. കഴിഞ്ഞ ദിവസം രാവിലെയാണ് നെടുമങ്ങാട് പഴകുറ്റി പെട്രോൾ പമ്പിന് സമീപമായി അബോധാവസ്ഥയിൽ വയോധികനെ കണ്ടെത്തിയത്. വിവിധ ഇടങ്ങളിൻ വിവരം അറിയിച്ചെങ്കിലും ആരും തിരിഞ്ഞു നോക്കിയില്ല. അഞ്ചുമണിക്കൂറോളം റോഡരികിൽ ബോധമില്ലാതെ കിടന്നയാളെ നാട്ടുകാർ അറിയിച്ചതിനെ തുടർന്ന് സാമൂഹിക പ്രവർത്തകനായ അജൂ കെ. മധുവും നെടുമങ്ങാട് ട്രാഫിക് പോലീസ് എസ്ഐ എസ്.പി ഷിബുവും എഎസ്ഐ സനൽ, സിപിഒ അഖിലേഷ് എന്നിവർ ചേർന്ന് നെടുമങ്ങാട് ജില്ലാ ആശുപത്രിയിൽ എത്തിക്കുകയായിരുന്നു. പ്രാഥമിക ശുശ്രൂഷകൾ നൽകിയ ശേഷം ഇയാളെ മെഡിക്കൽ കോളജിലേക്ക് മാറ്റി. നെടുമങ്ങാട് സ്വദേശിയാണെന്നും പേര് ഗോപിനാഥാണെന്നും ബന്ധുക്കൾ ആരുമില്ല എന്നും അദ്ദേഹം പറഞ്ഞതായി ഡോക്ടർമാർ അറിയിച്ചു.

ഗ്രാമങ്ങളുടെ വികസനത്തിന് വേഗം കൂട്ടാൻ വായനയും അറിവും പ്രധാനം: മന്ത്രി അനിൽ

നെടുമങ്ങാട്: വായനയിലൂടെയുള്ള അറിവ് ഗ്രാമങ്ങളുടെ വികസനത്തിന് വേഗം കൂട്ടുമെന്ന് മന്ത്രി ജി. ആർ. അനിൽ. പി.എൻ. പണിക്കർ മുപ്പതാമത് ദേശീയ വായന മഹോത്സവത്തിന്‍റെ ഭാഗമായി തൊഴിലുറപ്പ് പദ്ധതി പണിയിടങ്ങളിൽ രാജ്യത്താകമാനം സംഘടിപ്പിക്കുന്ന ഒരു ലക്ഷം വായനാ സദസ്സിന്‍റെ ജില്ലാതല ഉദ്ഘാടനം നെടുമങ്ങാട് നഗരസഭയിലെ കരിങ്ങയിൽ ഉദ്ഘാടനം നിർവഹിച്ചു പ്രസംഗിക്കുകയായിരുന്നു മന്ത്രി. നഗരസഭ ചെയർപേഴ്സൺ സി.എസ്. ശ്രീജ അധ്യക്ഷത വഹിച്ചു. പന്ന്യൻ രവീന്ദ്രൻ മുഖ്യ പ്രഭാഷണം നടത്തി. പി.എൻ. പണിക്കർ ഫൗണ്ടേഷൻ ദേശീയ വൈസ് ചെയർമാൻ എൻ. ബാലഗോപാൽ, സ്റ്റാൻഡിംഗ് കമ്മിറ്റി ചെയർമാൻമാരായ പി. ഹരികേശൻ, ബി .സതീശൻ, ടി. വസന്തകുമാരി കൗൺസിലർമാരായ വിദ്യ, സിന്ധു കൃഷ്ണകുമാർ, ശ്രീകല എന്നിവർ പ്രസംഗിച്ചു.

വയോധികയില്‍നിന്നും സ്വര്‍ണമാല തട്ടിയെടുത്ത കേസില്‍ ഒരാള്‍ അറസ്റ്റിൽ

വെഞ്ഞാറമൂട്: വയോധികയെ കബളിപ്പിച്ച് നിന്നും ഒന്നരപ്പവന്‍ തൂക്കം വരുന്ന സ്വര്‍ണമാല തട്ടിയെടുത്ത കേസില്‍ ഒരാള്‍ അറസ്റ്റില്‍. തൃശ്ശൂര്‍ ഒരുമനയൂര്‍ തങ്ങള്‍പടി പട്ടത്ത് വീട്ടില്‍ തൊപ്പി എന്ന് വിളിക്കുന്ന യൂസഫാണ്(45) അറസ്റ്റിലായത്. വെഞ്ഞാറമൂട് കൊക്കോട് സീബാ ഭവനില്‍ ഭവാനിയമ്മയാണ്(70)തട്ടിപ്പിനിരയായത്. ഇക്കഴിഞ്ഞ ജൂലൈ 30ന് ആയിരുന്നു കേസിനാസ്പദമായ സംഭവം. വാര്‍ദ്ധക്യ പെന്‍ഷന്‍ വാങ്ങാന്‍ വെഞ്ഞാറമൂട് ജങ്ഷനിലേക്ക് നടന്നു വരുകയായിരുന്ന വയോധികയെ സമീപിച്ച് ഒന്നരപ്പവന്‍ തൂക്കമുള്ള സ്വര്‍ണ്ണമാല ഊരി വാങ്ങുകയായിരുന്നു. പ്രതിക്കെതിരേ സമാനകേസുകൾ വേറെയുമുണ്ട്. പ്രതി സ്ഥിരമായി ഗോള്‍ഫ് ക്യാപ്പ് ധരിക്കുന്ന ആളായതുകൊണ്ട് തൊപ്പി യൂസഫ് എന്ന അപരനാമത്തിലും അറിയപ്പെടുന്നുണ്ട്.

ഓട്ടോഡ്രൈവറെ കുത്തിപ്പരിക്കേല്‍പ്പിച്ച രണ്ടുപേര്‍ അറസ്റ്റില്‍

പേരൂര്‍ക്കട: ഓട്ടോഡ്രൈവറെ കുത്തിപ്പരിക്കേല്‍പ്പിച്ച സംഭവത്തില്‍ രണ്ടുപേര്‍ അറസ്റ്റില്‍‌. പേരൂര്‍ക്കട ഹാര്‍വിപുരം സ്വദേശി ആദിത്യന്‍ ഉണ്ണിക്കുട്ടന്‍ (18), മണക്കാട് സ്വദേശി സൂര്യനാരായണന്‍ (19) എന്നിവരാണ് അറസ്റ്റിലായത്. ദിവസങ്ങള്‍ക്കുമുമ്പാണ് കേസിന്നാസ്പദമായ സംഭവം. നെടുമങ്ങാട്ടേക്ക് പോകുന്ന ബസ് വെയിറ്റിംഗ് ഷെഡിനു സമീപം അടിപിടിയുണ്ടാക്കിയ സുഹൃത്തുക്കള്‍കൂടിയായ ആദിത്യനെയും സൂര്യനാരായണനെയും പിടിച്ചുമാറ്റാന്‍ ചെന്ന ഓട്ടോഡ്രൈവറെയാണ് കുത്തിപ്പരിക്കേല്‍പ്പിച്ചത്. പേരൂര്‍ക്കട സ്വദേശി അനീഷിനാണ് കുത്തേറ്റത്. സൂര്യനാരായണനാണ് അനീഷിനെ ആദ്യം കുത്തിപ്പരിക്കേല്‍പ്പിച്ചത്. സംഭവത്തിനുശേഷം ഒളിവിലായിരുന്ന ഇരുവരെയും പേരൂര്‍ക്കട സിഐ എം. ഉമേഷ്, എസ്ഐ ആശാചന്ദ്രന്‍ എന്നിവര്‍ ചേര്‍ന്നാണ് കസ്റ്റഡിയിലെടുത്തത്. പ്രതികളെ റിമാന്‍ഡ് ചെയ്തു.

ഒപ്‌റ്റോമെട്രിയുടെ മറവില്‍ തട്ടിപ്പ്; കണ്ണാശുപത്രിയിലെ ജീവനക്കാരന്‍ അറസ്റ്റില്‍

പേരൂര്‍ക്കട: കണ്ണിന്‍റെ പ്രശ്‌നങ്ങള്‍ കണ്ടെത്തി പഠിക്കുന്ന ശാസ്ത്രശാഖയായ ഒപ്‌റ്റോമെട്രിയുടെ മറവില്‍ പണം തട്ടിയ സംഭവത്തില്‍ കണ്ണാശുപത്രിയിലെ ജീവനക്കാരന്‍ അറസ്റ്റില്‍. കൊല്ലം ശാസ്താംകോട്ട മുതുപിലാകാട് പടിഞ്ഞാറ് എംടിഎംഎം കണ്ണാശുപത്രിക്കു സമീപം പ്ലാവിളയില്‍ ജി. പ്രവീണ്‍ (44) ആണ് അറസ്റ്റിലായത്. 2024-ലാണ് കേസിന്നാസ്പദമായ സംഭവം. തിരുവനന്തപുരം പിഎംജിയില്‍ പ്രവര്‍ത്തിക്കുന്ന പ്രിസൈസ് ഐ കെയര്‍ പ്രൈവറ്റ് ലിമിറ്റഡിലെ സ്റ്റാഫായിരുന്നു പ്രവീണ്‍. ഒപ്‌റ്റോമെട്രി പഠനത്തിന് ആശുപത്രിയില്‍ എത്തിച്ചേര്‍ന്ന ഏഴ് വിദ്യാര്‍ഥികള്‍ നല്‍കിയ സെമസ്റ്റര്‍ ഫീസാണ് ഇയാള്‍ സ്വന്തം അക്കൗണ്ടിലേക്ക് വാങ്ങിയത്. ഫീസ് തുക ആശുപത്രിയുടെ അക്കൗണ്ട് എന്ന വ്യാജേന തന്‍റെ അക്കൗണ്ടിലേക്ക് ട്രാന്‍സ്ഫര്‍ ചെയ്യിക്കുകയായിരുന്നു പ്രവീണ്‍‌. ഇപ്രകാരം രണ്ട് ലക്ഷം രൂപയാണ് ഇയാള്‍ തട്ടിയെടുത്തത്. സെമസ്റ്റര്‍ പരീക്ഷയെഴുതാനെത്തിയപ്പോഴാണ് തങ്ങള്‍ ഫീസടച്ചിട്ടില്ല എന്ന് അധികൃതര്‍ വിദ്യാര്‍ഥികളോടു വ്യക്തമാക്കിയത്. തുടര്‍ന്നു നടന്ന അന്വേഷണത്തിലാണ് വിദ്യാര്‍ഥികള്‍ ഒടുക്കിയ തുക പ്രവീണ്‍ സ്വന്തം അക്കൗണ്ടിലേക്ക് വാങ്ങി തട്ടിപ്പു നടത്തിയതായി ബോദ്ധ്യപ്പെട്ടത്. പ്രതിയെ കോടതി റിമാന്‍ഡ് ചെയ്തു.

സെന്‍റ് ജോൺസിലെ കൂട്ടുകാർ ഒരുക്കിയ സ്നേഹക്കൂട് സമ്മാനിച്ചു

തിരുവനന്തപുരം: നാലാഞ്ചിറ സെന്‍റ് ജോൺസ് സ്കൂൾ ഒരുക്കിയ സ്‌നേഹ കൂടാരം സമർപ്പിച്ചു. +2 വിഭാഗം രജത ജൂബിലിയുടെ ഭാഗമായാണ് സ്നേഹകൂടാരമൊ രുക്കിയത്. പൂർവ വിദ്യാർഥി സൗജന്യമായി നൽകിയ വസ്തുവിൽ എട്ടിലും ഒമ്പതിലും പഠിക്കുന്ന രണ്ടു നിർധനരായ കുട്ടികൾക്കാണ് വട്ടപ്പാറയ്ക്കടുത്തുള്ള മുളങ്കാട്ട് ആർച്ച് ബിഷപ് മാർ ഗ്രിഗോറിയോസ് നഗറിൽ വീടു നിർമിച്ച് നൽകിയത്. മേജർ അതിരൂപതാ വികാരി ജനറാൾ മോൺ. ഡോ.വർക്കി അറ്റുപുറത്ത് താക്കോൽ ദാനം നിർവഹിച്ചു. പ്രിൻസിപ്പൽ ഫാ. ജോസ് ചരുവിൽ, വൈസ് പ്രിൻസിപ്പൽ അജീഷ് കുമാർ ആർ.സി, പിടിഎ വൈസ് പ്രസിഡന്‍റ് സുമേഷ് വണ്ടാടൻ, സാൻജോം കൺവീനർ ബിജു. കെ. ജോർജ്, ജൂബിലി കൺവീനർ ബിന്നി സാഹിതി എന്നിവർ പങ്കെടുത്തു. സെന്‍റ് ജോൺസ് സോഷ്യൽ സർവീസ് ഫോറം സാഞ്ചോയാണ് ഭവന നിർമ്മാണ പദ്ധതിക്ക് നേതൃത്വം നൽകിയത്.

തെളിവെടുപ്പ് പൂര്‍ത്തിയായി : അനന്തപുരി മണികണ്ഠനും സുനിലും റിമാന്‍ഡില്‍

പേരൂര്‍ക്കട: നാലുദിവസം നീണ്ടുനിന്ന കസ്റ്റഡികാലാവധി അവസാനിച്ചതോടെ തെളിവെടുപ്പ് പൂര്‍ത്തിയാക്കി വസ്തുതട്ടിപ്പു കേസിലെ പ്രതികളായ അനന്തപുരി മണികണ്ഠനെയും സുനില്‍ബാബു തോമസിനെയും കോടതിയില്‍ ഹാജരാക്കി റിമാന്‍ഡ് ചെയ്തു. ജവഹര്‍ നഗറിലെ ഡോറ അസറിയ ക്രിപ്‌സിന്‍റെ വസ്തുവും വീടും വ്യാജ രേഖകള്‍ നിര്‍മിച്ച് തട്ടിയെടുത്ത സംഭവത്തിലെ കണ്ണികളാണ് ഇരുവരും. കഴിഞ്ഞദിവസം മണികണ്ഠനെ ഇയാളുടെ കിള്ളിപ്പാലത്തുള്ള ആധാരമെഴുത്ത് ഓഫീസിലും മേലാംകോടുള്ള വീട്ടിലും പുത്തന്‍കോട്ടയിലെ വാടകവീട്ടിലും എത്തിച്ചു വെളിവെടുത്തിരുന്നു. ആധാരമെഴുത്ത് ഓഫീസില്‍ ഇയാള്‍ നടത്തിയ തിരിമറികളുടെ വിവരങ്ങള്‍ പോലീസ് ശേഖരിച്ചു. ആധാരം രജിസ്റ്റര്‍ ചെയ്യുന്നതിനായി തന്‍റെ സഹോദരന്‍റെ യൂസര്‍ നെയിമും പാസ്‌വേര്‍ഡും ഉപയോഗിച്ചാണ് മണികണ്ഠന്‍ ലോഗിന്‍ ചെയ്തതെന്നു കണ്ടെത്തി. തട്ടിപ്പുനടത്തുന്നതിന് ഉപയോഗിച്ച വ്യാജരേഖകളുടെ ഫോട്ടോകോപ്പികളും ആധാരമെഴുത്ത് ഓഫീസില്‍ നിന്നു ലഭിച്ചു. മണികണ്ഠന്‍ താമസിച്ചിരുന്ന വീടുകളിലും ഇയാളെ എത്തിച്ചു. വീട്ടില്‍ നിന്ന് ആധാരമെഴുത്ത് ഓഫീസിലെത്തിയശേഷം അവിടെനിന്ന് സ്‌കൂട്ടറിലാണ് മണികണ്ഠന്‍ ശാസ്തമംഗലം സബ്‌രജിസ്ട്രാര്‍ ഓഫീസിലേക്ക് എത്തിയത്. അതേസമയം കേസിലെ പ്രധാന പ്രതിയായ അനില്‍ തമ്പി കഴിഞ്ഞ ഒരുമാസത്തിലേറെയായി ഒളിവിലാണ്. കേസില്‍ ആദ്യം അറസ്റ്റുചെയ്യപ്പെട്ട മെറിന്‍ ജേക്കബ് വസ്തു വിലയാധാരമായി എഴുതിനല്‍കിയ ചന്ദ്രസേനന്‍റെ മരുമകനാണ് അനില്‍ തമ്പി. തമ്പിയെ പിടികൂടുന്നതിനുവേണ്ടി കേരളത്തിലാകെ അന്വേഷണം നടത്തിയ പോലീസ് ഇപ്പോള്‍ അന്യസംസ്ഥാനങ്ങള്‍ കേന്ദ്രീകരിച്ച് അന്വേഷണം നടത്തിവരികയാണ്. ഇയാള്‍ വിമാനത്താവളത്തിലെത്താതിരിക്കാനുള്ള മുന്നൊരുക്കങ്ങള്‍ നടത്തിയിട്ടുണ്ടെന്നാണ് പോലീസ് പറയുന്നത്. അനില്‍തമ്പി ഉടന്‍ പിടിയിലാകുമെന്ന് മ്യൂസിയം പോലീസ് പറയുന്നു.

രേഖകൾ ഇല്ലാതെ മത്സ്യബന്ധനം നടത്തിയ തമിഴ്നാട് ട്രോളർബോട്ട് പിടിച്ചെടുത്തു

വിഴിഞ്ഞം: മതിയായ രേഖകൾ ഇല്ലാതെ മത്സ്യബന്ധനം നടത്തിയ തമിഴ്നാട് ട്രോളർ ബോട്ട് ഫിഷറീസ് അധികൃതർ പിടികൂടി. .തമിഴ്നാട് ഇരവി പുത്തൻ തുറ സ്വദേശി അജിതയുടെ ഉടമസ്ഥതയിലുള്ള ബോട്ടാണ് കസ്റ്റഡിയിലായത്. വിഴിഞ്ഞം ഫിഷറീസ് അസിസ്റ്റന്‍റ് ഡയറക്ടർ എസ്. രാജേഷിന്‍റെ നിർദേശപ്രകാരം മറൈൻ എന്ഫോഴ്സ്മെന്‍റ് സിവിൽ പോലീസ് ഓഫിസർ എ.അനിൽ കുമാർ, ലൈഫ് ഗാര്ഡുമാരായ മാർട്ടിൻ, റോബർട്ട് എന്നിവർ വിഴിഞ്ഞത്ത് നിന്നും മറൈൻ ആംബുലസിൽ നടത്തിയ പട്രോളിംഗിൽ പുത്തൻ തോപ്പ് ഭാഗത്തിനും ഉള്ളിലായാണ്ബോട്ട് കണ്ടെത്തിയത്. വരും ദിവസങ്ങളിലും വിഴിഞ്ഞത്തും മുതലപ്പൊഴിയിലും പരിശോധന നടത്തുമെന്നും നിയമ ലംഘനം നടത്തുന്ന ബോട്ടുകൾക്കെതിരെ കർശന നടപടി സ്വീകരിക്കുമെന്നും വിഴിഞ്ഞം ഫിഷറീസ്‌ അസിസ്റ്റന്‍റ് ഡയറക്ടർ അറിയിച്ചു.

ജില്ലയിൽ ആവേശമായി ദീപിക കളർ ഇന്ത്യ മത്സരം

തിരുവനന്തപുരം: ലഹരിക്കെതിരേയുള്ള പോരാട്ടവും രാജ്യത്തിന്‍റെ ഐക്യവും അഖണ്ഡതയും ഊട്ടിയുറപ്പിക്കാനുള്ള സന്ദേശവും കുട്ടികൾക്കു പകർന്നു നൽകുന്നതിനായി ദീപികയും ദീപിക ബാലസഖ്യവും കൈകോർത്തു സംഘടിപ്പിച്ച ദീപിക കളർ ഇന്ത്യ മത്സരത്തിന് തിരുവനന്തപുരം ജില്ലയിൽ ആവേശകരമായ പങ്കാളിത്തം. ജില്ലയിലെ നിരവധി വിദ്യാലയങ്ങളിലായി അരങ്ങേറിയ മത്സരത്തിൽ പതിനായിരക്കണക്കിനു വിദ്യാർഥികൾ പങ്കെടുത്തു. 4,346 വിദ്യാർഥികളെ മത്സരത്തിൽ അണിനിരത്തിയ പട്ടം സെന്‍റ് മേരീസ് ഹയർ സെക്കൻഡറി സ്കൂൾ ഏറ്റവും കൂടുതൽ വിദ്യാർഥികളെ പങ്കെടുപ്പിച്ച സ്കൂൾ എന്ന ബഹുമതി കരസ്ഥമാക്കി. നാലാഞ്ചിറ നവജീവൻ ബഥനി വിദ്യാലയത്തിൽ നടന്ന ചടങ്ങിൽ രാഷ്‌ട്രദീപിക ലിമിറ്റഡ് ചെയർമാൻ ഡോ. ഫ്രാൻസീസ് ക്ലീറ്റസ് ദീപിക കളർ ഇന്ത്യ മത്സരത്തിന്‍റെ ജില്ലാതല ഉദ്ഘാടനം നിർവഹിച്ചു. ദീപിക തിരുവനന്തപുരം യൂണിറ്റ് റസിഡന്‍റ് മാനേജർ റവ.ഡോ. വർക്കി ആറ്റുപുറത്ത് കോർഎപ്പിസ്കോപ്പ ആമുഖപ്രഭാഷണം നടത്തി. ഡിസിഎൽ പ്രവിശ്യ പ്രസിഡന്‍റ് അംബ്രോസ് പി. കുന്നിൽ ദേശീയോദ്ഗ്രഥന പ്രതിജ്ഞ ചൊല്ലിക്കൊടുത്തു. സ്കൂൾ കറസ്പോണ്ടന്‍റ് ഫാ. തോമസ് ജോർജ് ഒഐസി അധ്യക്ഷത വഹിച്ചു. പ്രിൻസിപ്പൽ ഷാന രഞ്ജിത്, ദീപിക തിരുവനന്തപുരം യൂണിറ്റ് സർക്കുലേഷൻ മാനേജർ ഇ.വി. വർക്കി തുടങ്ങിയവർ പ്രസംഗിച്ചു.

നെയ്യാറ്റിന്‍കര ആശുപത്രി; കുടിവെള്ളത്തിന്‍റെ പരിശോധനാഫലം ഇന്ന്

നെയ്യാറ്റിന്‍കര: നെയ്യാറ്റിന്‍കര ജനറല്‍ ആശുപത്രിയിലെ ഓപ്പറേഷന്‍ തിയറ്ററിലേക്കുള്ള ജലസംഭരണിയിലെ കുടിവെള്ള സാന്പിള്‍ പരിശോധനാഫലം ഇന്ന് ലഭിക്കുമെന്ന് സൂപ്രണ്ട് അറിയിച്ചു. കുടിവെള്ളം ഉപയോഗയോഗ്യമെന്ന് തെളിഞ്ഞാല്‍ 11 ന് ഓപറേഷൻ തിയറ്റര്‍ തുറക്കും. നെയ്യാറ്റിൻകര ജനറൽ ആശുപത്രിയിൽ ഓപ്പറേഷൻ തിയറ്ററിലെ ജലസംഭരണിയിലെ കുടിവെള്ളത്തിൽ കോളിഫോം ബാക്ടരിയയുടെ സാന്നിധ്യം കണ്ടെത്തിയതിനെ തുടർന്ന് ഇക്കഴിഞ്ഞ അഞ്ചിനാണ് തിയറ്റര്‍ അടച്ചത്. നേരത്തെ നിശ്ചയിച്ചിരുന്ന വിവിധ ശസ്ത്രക്രിയകളും താത്കാലികമായി മാറ്റി വച്ചു. ആശുപത്രിയില്‍ 70 ജലസംഭരണികളാണുള്ളത്. കാളിപ്പാറ ശുദ്ധജല വിതരണ പദ്ധതിയുടെ ഭാഗമായ വെള്ളമാണ് ജനറല്‍ ആശുപത്രിയിലേയ്ക്ക് നല്‍കുന്നത്. കഴിഞ്ഞ ദിവസം പരിശോധന നടത്തിയപ്പോള്‍ കുടിവെള്ളത്തില്‍ കോളിഫോം ബാക്ടരിയയുടെ സാന്നിധ്യം കണ്ടെത്തിയതിന്‍റെ അടിസ്ഥാനത്തില്‍ സംഭരണി പൂര്‍ണ്ണമായും ജലരഹിതമാക്കുകയും ശുദ്ധമാക്കുകയും ചെയ്തിരുന്നു.

നേമം സഹകരണ ബാങ്ക് ഭരണം അഡ്മിനിസ്‌ട്രേറ്റര്‍ ഏറ്റെടുത്തു

നേമം: തട്ടിപ്പ് നടന്ന നേമം സര്‍വീസ് സഹകരണ ബാങ്കില്‍ അഡ്മിനിസ്‌ട്രേറ്റര്‍ ഭരണം ഏര്‍പ്പെടുത്തി. സഹകരണ വകുപ്പിന്‍റെ ഉത്തരവില്‍ ബാങ്ക് ഭരണ സമിതിക്ക് എതിരേ ഗുരുതരമായ വീഴ്ചകളാണ് കണ്ടെത്തിയിരിക്കുന്നത്. പാപ്പനംകോട് യൂണിറ്റ് ഇന്‍സ്‌പെക്ടര്‍ സുജി. എസിനെയാണ് പാര്‍ട്ട് ടൈം അഡ്മിനിസ്‌ട്രേറ്ററായി നിയോഗിച്ചിട്ടുള്ളത്. ആറ് മാസത്തിനകം തിരെഞ്ഞടുപ്പ് നടത്തി പുതിയ ഭരണസമിതിയെ ഏല്‍പ്പിക്കണമെന്ന് ഉത്തരവില്‍ പറയുന്നു. സഹകരണ വകുപ്പിന്‍റെ 65-ാം വകുപ്പ് പ്രകാരം അന്വേഷണത്തിന്‍റെ അന്തിമ റിപ്പോര്‍ട്ടിന്‍റെ അടിസ്ഥാനത്തിലാണ് നടപടിയെന്ന് കരുതുന്നു. ബാങ്കിലെ ക്രമക്കേടുകളുടെ അന്വേഷണം നടക്കുമ്പോഴും ഭരണസമിതി വഴിവിട്ട പ്രവര്‍ത്തനങ്ങള്‍ നടത്തുന്നതായും എത്രയും പെട്ടെന്ന് ഭരണസമിതിയെ പിരിച്ചുവിട്ട് അഡ്മിനിസ്‌ട്രേറ്റീവ് ഭരണം ഏര്‍പ്പെടുത്തണമെന്ന ആവശ്യം കഴിഞ്ഞ കുറെ നാളുകളായി നിക്ഷേപ കൂട്ടായ്മ ആവശ്യപ്പെട്ടുകൊണ്ടിരിക്കുകയായിരുന്നു. ബാങ്ക് ഭരണ സമിതി മാസങ്ങളായി യോഗം വിളിക്കാറില്ലെന്ന് ഉത്തരവില്‍ പറയുന്നു. സഹകരണ വകുപ്പിന്‍റെ അന്വേഷണവുമായി ബന്ധപ്പെട്ട പരിശോധന സമയങ്ങളില്‍ ഭരണസമിതി അംഗങ്ങളോ പ്രസിഡന്‍റോ സെക്രട്ടറിയോ ഹാജരായില്ലെന്നും കടുത്ത സാമ്പത്തിക പ്രതിസന്ധിയുണ്ടായിട്ടും വായ്പ കുടിശിഖ തിരികെ പിടിക്കാന്‍ നിയമ നടപടികള്‍ സ്വീകരിച്ചില്ലെന്നും നിക്ഷേപകര്‍ക്ക് തുക മടക്കി നല്‍കാന്‍ ഭരണസമിതി ഏതതൊരു നടപടിയും എടുത്തില്ലെന്നും ഉത്തരവില്‍ പറയുന്നു. അന്വേഷണത്തില്‍ ബാങ്കില്‍ ഭരണസ്തംഭനം ഉണ്ടായതിനാല്‍ ഭരണസമിതിയെ പിരിച്ചുവിടുകയായിരുന്നുവെന്നാണ് ഉത്തരവില്‍ പറയുന്നത്. ക്രമവിരുദ്ധമായി നടത്തിയ ഇടപാടുകള്‍ വഴി ബാങ്കിന് 24,30,41,151 രൂപയുടെ നഷ്ടം സംഭവിച്ചതായി ഇടക്കാല റിപ്പോര്‍ട്ടില്‍ രേഖപ്പെടുത്തിയിട്ടുണ്ടായിരുന്നു. ഇനി അന്തിമ റിപ്പോര്‍ട്ട് പുറത്ത് വന്നാല്‍ മാത്രമേ നഷ്ടത്തിന്‍റെ യഥാര്‍ത്ഥ കണക്ക് അറിയാന്‍ കഴിയൂ.

ഇടതുമുന്നണിയിലും സർക്കാരിലും പാർട്ടി നോക്കുകുത്തി

സിപിഐ ജില്ലാ സമ്മേളനത്തിൽ നേതൃത്വത്തിനെതിരേ രൂക്ഷ വിമർശനം തിരുവനന്തപുരം : സിപിഐ തിരുവനന്തപുരം ജില്ലാ സമ്മേളനത്തിൽ പാർട്ടി നേതൃത്വത്തിനെതിരേയും പാർട്ടി മന്ത്രിമാർക്കെതിരേയും രൂക്ഷ വിമർശനം. ഇടതുമുന്നണിയിലും സർക്കാരിന്‍റെ ദൈനംദിന പ്രവർത്തനത്തിലും സിപിഐ അന്പേ പരാജയമെന്നു പ്രതിനിധികൾ. നേരത്തേ ഇടതുമുന്നണിയിൽ തിരുത്തൽശക്തിയായിരുന്ന സിപിഐ ഇപ്പോൾ എവിടെയാണെന്നാണു ബ്രാഞ്ചു തലം മുതൽ സാധാരണ പ്രവർത്തകർ ചോദിക്കുന്നത്. ഓണക്കാലത്തു പോലും വിലക്കയറ്റം പിടിച്ചുനിർത്താൻ സർക്കാരിനു കഴിയുന്നില്ല. എണ്ണ വില ദിനംപ്രതി കുതിച്ചുയരുന്പോൾ മന്ത്രി ജി.ആർ.അനിൽ സിപിഎം മന്ത്രി കെ.എൻ.ബാലഗോപാലിന്‍റെ കാരുണ്യം കാത്തു തെക്കുവടക്കു ഓടി നടക്കുകയാണെന്നും സിപിഐയ്ക്കു ഒരു കാലത്തും ഇങ്ങനെയൊരു ഗതികേട് ഉണ്ടായിട്ടില്ലെന്നും പ്രതിനിധികൾ വിമർശിച്ചു. പ്രവർത്തന റിപ്പോർട്ടിൽ ജില്ലാ സെക്രട്ടറി മാങ്കോട് രാധാകൃഷ്ണൻ പാർട്ടി നേതൃത്വത്തേയും പാർട്ടി മന്ത്രിമാരേയും പൊതുവേ ന്യായീകരിച്ചതിനെതിരേയും വലിയ വിമർശനം ഉണ്ടായി. പാർട്ടി സെക്രട്ടറിയുടെ റിപ്പോർട്ട് കേട്ടാൽ ഇതൊരു കമ്മ്യൂണിസ്റ്റു പാർട്ടിയുടെ സമ്മേളന റിപ്പോർട്ടായി തോന്നുകയില്ലെന്നും പ്രതിനിധികൾ വിമർശിച്ചു. രണ്ടാം ഇടതുപക്ഷ സർക്കാർ വലിയ പരാജയമാണെന്നു പറയാൻ കഴിയില്ല. എന്നാൽ അങ്ങനെ വരുത്തിതീർക്കാനുള്ള ശ്രമം സിപിഎമ്മിന്‍റെ ഭാഗത്തു നിന്നു തന്നെ ഉണ്ടാകുന്നു. ഭക്ഷ്യസിവിൽ-സപ്ലൈയ്സ് വകുപ്പിനെതിരേ സാധാരണ ജനങ്ങൾക്കിടയിൽ വലിയ പരാതിയാണ്. ആഘോഷ വേളകളിൽ പോലും ജനങ്ങൾക്കു വിലകുറച്ചു അവശ്യസാധനങ്ങൾ ലഭിക്കുന്നില്ല. പണം വകുപ്പിനു നൽകേണ്ടതു സിപിഎം മന്ത്രിയാണ്. എന്നാൽ അദ്ദേഹം ഇങ്ങനെയൊരു വകുപ്പു താൻ കൂടി പ്രതിനിധീകരിക്കുന്ന മന്ത്രിസഭയിൽ ഉണ്ടോയെന്നു പോലും ചിന്തിക്കുന്നില്ല. വർഷം ഒന്നാകുന്പോൾ 100 കോടി ഭക്ഷ്യവകുപ്പിന് അനുവദിച്ചെന്നു പത്രത്തിലൂടെ അറിയാൻ കഴിയുന്നുണ്ട്. പക്ഷേ സപ്ലൈകോയിൽ ഒരു സാധനവും ജനത്തിനു ലഭിക്കുന്നില്ല. സിപിഎം മന്ത്രിയുടെ കെടുകാര്യസ്തത മൂലം പഴി കേൾക്കുന്നതു സിപിഐയും പാർട്ടി മന്ത്രിയുമാണ്. കാനം രാജേന്ദ്രൻ പാർട്ടി സംസ്ഥാന സെക്രട്ടറിയായിരുന്നപ്പോൾ ഇങ്ങനെയൊരു ഗതികേട് സിപിഐയ്ക്ക് ഉണ്ടായിട്ടില്ല. കാനം മാറി ബിനോയ് വിശ്വം വന്നപ്പോൾ അങ്ങനെ ഉണ്ടായി എന്നല്ല. പക്ഷേ സിപിഐ നേതൃത്വം സർക്കാരിന്‍റെ പ്രവർത്തനത്തിൽ കൂടുതൽ ഗൗരവത്തോടെ ഇടപെടണമെന്നും തിരുത്തൽശക്തിയായി കൂടുതൽ ആർജവത്തോടെ പ്രവർത്തിക്കണമെന്നുമാണു സാധാരണ പാർട്ടി പ്രവർത്തകരും ജനങ്ങളും ആഗ്രഹിക്കുന്നതെന്നും ഇന്നലെ ചേർന്ന പ്രതിനിധി സമ്മേളനത്തിൽ പ്രതിനിധികൾ പറഞ്ഞു. ഇന്നലെ ജില്ലാ സെക്രട്ടറി മാങ്കോട് രാധാകൃഷ്ണൻ അവതരിപ്പിച്ച പ്രവർത്തന റിപ്പോർട്ടിൽ ജില്ലയിലെ പാർട്ടിയിലെ പോരായ്മകളെ സംബന്ധിച്ചു വലുതായൊന്നും സൂചിപ്പിച്ചില്ല. പൊതുവെ സിപിഐ സംസ്ഥാന നേതൃത്വത്തേയും നേതാക്കളെയും വിമർശിക്കാതെ പൊതുപരിപാടികളിൽ ഉണ്ടായ കുറവുകളെ സംബന്ധിച്ചു മാത്രമാണു വിമർശനമായി ഉന്നയിച്ചത്. ഇന്നും പ്രതിനിധി സമ്മേളനം ചേരും. പുതിയ പാർട്ടി സെക്രട്ടറിയേയും ജില്ലാ കൗണ്‍സിലിനേയും ഇന്നു തെരഞ്ഞെടുക്കും.

സിലിണ്ടറിൽ നിന്ന് ഗ്യാസ് ചോർന്ന് തീപടർന്ന് കാറ്ററിംഗ് സെന്‍റർ ഉടമ മരിച്ചു

നെടുമങ്ങാട് : സിലിണ്ടറിൽ നിന്ന് ഗ്യാസ് ചോർന്ന് തീ പിടിച്ച് കാറ്ററിംഗ് സെന്‍റർ ഉടമയ്ക്ക് ദാരുണാന്ത്യം.കരുപ്പൂര് മാണിക്യപുരം ജംഗ്ഷനിൽ ആർഷ ഫാസ്റ്റ് ഫുഡ് സെന്‍റർ നടത്തുന്ന പരുത്തിക്കുഴി നല്ലിക്കുഴി റോഡരികത്ത് വീട്ടിൽ എസ്. വിജയൻ (65) ആണ് മരിച്ചത്. ഇന്നലെ ഉച്ചയ്ക്ക് 12ഓടെയാണ് അപകടം.ഗ്യാസ് ചോർന്നു തീപിടിച്ചതോടെ കടയുടെ ഷട്ടർ വീണ് വിജയൻ കടമുറിയിൽ കുടുങ്ങുകയായിരുന്നു.നാട്ടുകാർ അറിയിച്ചതനുസരിച്ച് ഉടൻ പോലീസും പിന്നാലെ ഫയർഫോഴ്സും എത്തി ഷട്ടർ നീക്കം ചെയ്ത് തീ അണച്ച് പുറത്തെടുത്തപ്പോഴേക്കും വിജയൻ മരിച്ചു. ഭാര്യ ഗിരിജയും ചെറുമകനും കടയിൽ നിന്ന് വീട്ടിലേക്ക് മടങ്ങിയതിന് പിന്നാലെയായിരുന്നു ദുരന്തം. രണ്ട് ദിവസം മുന്പ് ഗ്യാസ് സിലിണ്ടറിൽ ചോർച്ച ഉണ്ടായിരുന്ന വിവരം ഏജൻസിയെ അറിയിച്ചിരുന്നതായി ബന്ധുക്കൾ പറയുന്നു. ഗ്യാസ് നിറച്ച ഒരു സിലിണ്ടറും ഒഴിഞ്ഞ നാല് സിലിണ്ടറുകളും കടയിൽ ഉണ്ടായിരുന്നു. ഇവ ഫയർഫോഴ്സ് പുറത്തേക്ക് മാറ്റി. മൃതദേഹം ഇൻക്വസ്റ്റിനുശേഷം മെഡിക്കൽ കോളജ് ആശുപത്രിയിൽ. പോസ്റ്റുമോർട്ടം കഴിഞ്ഞ് ഇന്ന് വീട്ടുവളപ്പിൽ സംസ്കരിക്കും. വലിയമല പോലീസ് കേസെടുത്തു. മക്കൾ: വിഷ്ണു (വെൽഡിംഗ്), അഞ്ജു (വട്ടപ്പാറ ദന്തൽ കോളജ്). മരുമക്കൾ : അഞ്ജു, ബൈജു.

സര്‍ട്ടിഫിക്കറ്റ് വിതരണം ചെയ്തു

പേരൂർക്കട: കേന്ദ്രടൂറിസം മന്ത്രാലയവും സ്വച്ഛ് ഭാരത് മിഷനും ഗ്രാമീണമേഖലകളില്‍ മികച്ച ആതിഥേയ സേവനം ലഭ്യമാക്കുന്ന ഹോട്ടലുകള്‍, റസ്റ്ററന്‍റുകള്‍, ഹോം സ്റ്റേകള്‍ തുടങ്ങിയ സ്ഥാപനങ്ങള്‍ക്ക് ഏര്‍പ്പെടുത്തിയിട്ടുള്ള സ്വച്ഛ്താ ഗ്രീന്‍ ലീഫ് റേറ്റിംഗ് ജില്ലയില്‍ 38 സ്ഥാപനങ്ങള്‍ക്ക് ലഭിച്ചു. ലീഫ് റേറ്റിംഗ് നേടിയ സ്ഥാപനങ്ങള്‍ക്കുള്ള ഗ്രീന്‍ ലീഫ് സര്‍ട്ടിഫിക്കറ്റുകള്‍ ജില്ലാ പഞ്ചായത്ത് വൈസ് പ്രസിഡന്‍റ് എ. ശൈലജ ബീഗം വിതരണം ചെയ്തു. ആറു സ്ഥാപങ്ങള്‍ക്ക് ഫൈവ് ലീഫും 19 സ്ഥാപങ്ങള്‍ക്ക് ത്രീ ലീഫും, 13 സ്ഥാപനങ്ങള്‍ വണ്‍ ലീഫും ലഭിച്ചു. രാജ്യത്തെ ഹോട്ടലുകള്‍, റസ്റ്ററന്‍റുകള്‍, ലോഡ്ജുകള്‍ എന്നിവയുടെ ശുചിമുറി മാലിന്യ സംസ്‌കരണ സംവിധാനം, ദ്രവ്യമാലിന്യ സംസ്‌കരണ സംവിധാനം, ഖരമാലിന്യ സംസ്‌കരണം എന്നിവ വിലയിരുത്തി, ഫൈവ് ലീഫ് സ്റ്റാറ്റസ്, ത്രീ ലീഫ് സ്റ്റാറ്റസ്, വണ്‍ ലീഫ് സ്റ്റാറ്റസ് എന്നിങ്ങനെ തരംതിരിച്ചാണ് റേറ്റിംഗ് നല്‍കുന്നത്. പരിസ്ഥിതി ദിനവുമായി അനുബന്ധിച്ച് തിരുവനന്തപുരം ജില്ലാ ഭരണകൂടവും ജില്ലാ ശുചിത്വമിഷനും സംയുക്തമായി സ്‌കൂള്‍, കോളജ് വിദ്യാര്‍ഥികള്‍ക്കായി നടത്തിയ റീല്‍സ് മത്സരങ്ങളുടെ സമ്മാനദാനവും ചടങ്ങിൽ നടത്തി. കുടപ്പനക്കുന്ന് കളക്ടറേറ്റ് കോണ്‍ഫറന്‍സ് ഹാളില്‍ നടത്തിയ ചടങ്ങിൽ ജില്ലാ കളക്ടര്‍ അനുകുമാരി അധ്യക്ഷത വഹിച്ചു. സബ് കളക്ടര്‍ ഒ.വി. ആല്‍ഫ്രെഡ്, ജില്ലാ ശുചിത്വ മിഷന്‍ കോ-ഓര്‍ഡിനേറ്റര്‍ പി.എൻ. അരുണ്‍രാജ് എന്നിവർ പങ്കെടുത്തു.

മരിയൻ ഇലക്ട്രോണിക്സ് അസോസിയേഷൻ ഉദ്‌ഘാടനം

തിരുവനന്തപുരം: മരിയൻ ഇലക്ട്രോണിക്സ് അസോസിയേഷന്‍റെ ഉദ്‌ഘാടനം ടെക്നോപാർക്കിലെ കൈസെമി കൺട്രോൾ സിസ്റ്റംസ് പ്രൈവറ്റ് ലിമിറ്റഡ് മാനേജിംഗ് ഡയറക്ടർ ജെഫ്‌റി സ്കോട്ട് ബോയ്‌റ്റ്‌കർ നിർവഹിച്ചു. മരിയൻ എൻജിനീയറിംഗ് കോളജ് പ്രിൻസിപ്പൽ ഡോ. എം. അബ്ദുൾ നിസാർ, ഡീൻ ഡോ. എ. സാംസൺ, വിവിധ വിഭാഗങ്ങളിലെ തലവന്മാരായ ഡോ. എം. മനോജ്, പ്രഫ. വിനിത ബി. എൽസ, ടോണി ജോസഫ് എന്നിവർ പ്രസംഗിച്ചു. അസോസിയേഷൻ കോ-ഓർഡിനേറ്റർമാരായ പ്രഫ. സി. മിന്നു ജയൻ, പ്രഫ. എസ്.എൽ. പ്രീത, ചെയർമാന്മാരായ കാർത്തിക് കുമാർ, എം.എ. അനീസ് ഫിതാൻ എന്നിവർ നേതൃത്വം നൽകി.

നേമം യുപി സ്കൂളിൽ ചങ്ങാതിക്കൊരു തൈ പദ്ധതി

നേമം: കൂട്ടുകാർക്ക് പരസ്പരം ഫലവൃക്ഷത്തൈകൾ കൈമാറി ആഗോളതാപനത്തിനെതിരെയുള്ള പരിസ്ഥിതി സൗഹൃദ കൂട്ടായ്മക്ക് നേമം ഗവ. യുപി സ്കൂളിൽ തുടക്കമായി. ഹരിതകേരളം മിഷന്‍റെ ആഭിമുഖ്യത്തിൽ നടപ്പാക്കുന്ന പദ്ധതി ഹരിതകേരളം മിഷൻ റിസോഴ്സ് പേഴ്സൺ ആർ. മല്ലിക നിർവഹിച്ചു. ഹെഡ്മാസ്റ്റർ എ.എസ്. മൻസൂർ, അധ്യാപകരായ എ.സി. അശ്വതി, എ.ആർ. അനൂപ്, എസ്.പി. ഷെർലി എന്നിവർ പങ്കെടുത്തു. കുട്ടികൾ ശേഖരിച്ച ഫലവൃക്ഷത്തൈകൾ സ്കൂളിലെത്തിച്ചു പ്രിയപ്പെട്ട കൂട്ടുകാർക്ക് കൈമാറുന്നതാണു പദ്ധതി. തുടർന്നു വീട്ടുമുറ്റത്തോ പറമ്പിലോ പൊതുസ്ഥലത്തോ ചെടികൾ നട്ടുനനച്ചു വളർത്താം. ചെടി നടുന്നതു മുതൽ വളർച്ച നിരീക്ഷിച്ചു കുട്ടികൾ സസ്യ ഡയറി തയാറാക്കാനും നിർദേശിച്ചിട്ടുണ്ട്. ഏറ്റവും കൂടുതൽ തൈകൾ കൈമാറി പരിപാലിക്കുന്ന വിദ്യാലയത്തിനു ഹരിത കേരളം മിഷന്‍റെ പ്രത്യേക പ്രോത്സാഹനവും നൽകും. അധ്യാപകരും തൈകൾ കൈമാറി.

പഞ്ചായത്ത് റോഡിന്‍റെ അരികുതകർന്നു : ടോറസ് ലോറി കുളത്തിലേക്കു മറിഞ്ഞ സംഭവം വിവാദത്തിലേയ്ക്ക്

വിളവൂർക്കൽ: പഞ്ചായത്ത് റോഡിന്‍റെ അരികുതകർന്നു ടോറസ് ലോറി കുളത്തിലേക്കു തലകീഴായി മറിഞ്ഞ സംഭവം വിവാദത്തിലേയ്ക്ക്. ഇരട്ടക്കലുങ്ക് മാമ്പഴച്ചിറ കുളത്തിലാണ് ലോറി മറിഞ്ഞത്. അപകടത്തിൽപ്പെട്ട വാഹനം ഓടിച്ചിരുന്ന ഡ്രൈവർ വെള്ളറട ആലുംകുഴി തലനിര പുത്തൻവീട്ടിൽ ഷിജോ(39) അത്ഭുതകരമായി രക്ഷപ്പെട്ടു. മാമ്പഴച്ചിറ കുളത്തിനുസമീപം പഞ്ചായത്ത് ഒൻപതുലക്ഷം രൂപ ചെലവഴിച്ച് ഹാപ്പിനസ് പാർക്ക് നിർമിച്ചിരുന്നു. ഇതിനോടനുബന്ധിച്ചാണ് റോഡിന്‍റെ വശം കോൺക്രീറ്റ് ചെയ്തത്. റോഡിന്‍റെ ബലക്കുറവ് അപകടത്തിനിടയാക്കിയെന്നും ആരോപണമുണ്ട്. പത്തു ടണ്ണിലധികം ഭാരമുള്ള വാഹനത്തിന് ഇതുവഴി പോകാൻ അനുവാദമില്ലെന്നും ഇതുസംബന്ധിച്ച് ബന്ധപ്പെട്ടവരെ രേഖാമൂലം അറിയിച്ചിരുന്നതായും പഞ്ചായത്ത് അംഗം ഒ.ജി. ബിന്ദു പറഞ്ഞു. ഇക്കാരണത്താൽ തകർന്ന റോഡും കുളത്തിന്‍റെ പാർശ്വഭിത്തിയും പുനർനിർമിച്ചു നൽകണമെന്ന് ഹോളോബ്രിക്സ് കമ്പനി ഉടമയോടും വാഹന ഉടമയോടും പഞ്ചായത്ത് ആവശ്യപ്പെട്ടിട്ടുണ്ട്. കൊല്ലം കടയ്ക്കലിൽനിന്ന് ഹോളോബ്രിക്സ് കമ്പനിയിലേക്കുള്ള ചല്ലിയുമായി വന്നതാണ് ലോറി. മഴയുള്ള സമയം പിറകിൽവന്ന സ്‌കൂട്ടർ യാത്രക്കാരിക്ക് കയറിപ്പോകാൻ വാഹനം അരികിലേക്കു ഒതുക്കിയപ്പോഴാണ് 15അടിയോളം താഴ്ചയിൽ കുളത്തിലേക്കു ലോറി മറിഞ്ഞതെന്നു സമീപവാസി പറഞ്ഞു. ലോറി കുളത്തിലേക്കു വീഴുമ്പോൾ കാബിനിലെ ഗ്ലാസ് തകർന്നതിനാൽ ഡ്രൈവർ അതുവഴി രക്ഷപ്പെട്ടു. അതിനിടെ ആരോപണവുമായി ബിജെപിയും കോൺഗ്രസും രംഗത്തു വന്നിട്ടുണ്ട്.

ബേക്കറി ജംഗ്ഷൻ അണ്ടർ പാസിൽ മാലിന്യം തള്ളുന്നതു പതിവാകുന്നു

പേരൂർക്കട: ബേക്കറി ജംഗ്ഷൻ അണ്ടർ പാസിൽ മാലിന്യക്കൂമ്പാരംമൂലം പൊതുജനങ്ങളും വാഹനയാത്രികരും ദുരിതത്തിൽ. കഴിഞ്ഞ ഒരു മാസമായി റോഡിനോടു ചേർന്ന ഭാഗത്തു മാലിന്യ നിക്ഷേപം രൂക്ഷമായിരുന്നു. ഹരിത കർമ സേന ചാക്കുകെട്ടിലാക്കി വച്ചിരിക്കുന്ന പ്ലാസ്റ്റിക് മാലിന്യങ്ങൾക്കു സമീപമാണ് ആഹാര അവശിഷ്ടങ്ങളും മറ്റും നിക്ഷേപിച്ചിരിക്കുന്നത്. കാരി ബാഗുകളിലും പ്ലാസ്റ്റിക് ചാക്കുകളിലും വരെ മാലിന്യം കൊണ്ടിടുന്നത് പതിവായിട്ടുണ്ട്. റോഡിനു സമാന്തരമായി ഫ്ലൈ ഓവർ കടന്നുപോകുന്നതിനാൽ അധികം ആൾക്കാർ ശ്രദ്ധിക്കില്ല എന്ന ധാരണയിലാണ് രാത്രികാലങ്ങളിൽ വാഹനങ്ങളിൽ എത്തിയശേഷം മാലിന്യം നിക്ഷേപിച്ചു കടന്നു കളയുന്നത്. ഇവ ഫുട്പാത്തിൽനിന്നു റോഡിലേക്കു വീണു കിടക്കുന്ന സന്ദർഭങ്ങളുമുണ്ട്. കാക്കകളും മറ്റു പക്ഷികളും മാലിന്യത്തിൽനിന്ന് ആഹാരം തേടാൻ എത്തുകയും ഇവ കൊത്തിവലിച്ചു കൊണ്ടുപോവുകയും ചെയ്യുന്നുണ്ട്. തെരുവുനായ്ക്കളും ആഹാരം അന്വേഷിച്ച് ഈ ഭാഗത്ത് എത്തുന്നത് വഴിയാത്രികർക്ക് ഭീഷണി സൃഷ്ടിക്കുന്നു. നഗരസഭ തൊഴിലാളികൾ ദിനംപ്രതി മാലിന്യങ്ങൾ നീക്കം ചെയ്യുന്നതു കൊണ്ടാണു മാലിന്യനിക്ഷേപം അധികരിക്കാത്തത്. രാത്രികാലങ്ങളിലെ മാലിന്യനിക്ഷേപം ഒഴിവാക്കുന്നതിന് അടിയന്തരമായി സിസിടിവി കാമറകൾ ഇതിന് അടുത്ത് തന്നെ സ്ഥാപിക്കണമെന്നാണ് ജനങ്ങളുടെ ആവശ്യം.

നെയ്യാര്‍ മേള 2025: മുന്നൊരുക്കങ്ങളായി

നെയ്യാറ്റിന്‍കര: സംസ്ഥാന വിനോദസഞ്ചാര വകുപ്പിന്‍റെയും തദ്ദേശ സ്വയംഭരണ സ്ഥാപനങ്ങളുടെയും സഹകരണത്തോടെ കേരള സംസ്ഥാന വ്യാപാരി വ്യവസായി സമിതി നെയ്യാറ്റിൻകര ഏരിയ കമ്മിറ്റി സംഘടിപ്പിക്കുന്ന നെയ്യാർ മേളയുടെ മുന്നൊരുക്കങ്ങള്‍ തുടങ്ങി. ആറാലുംമൂട് മാര്‍ക്കറ്റ് ഗ്രൗണ്ടില്‍ 29 മുതല്‍ സെപ്തംബര്‍ 14 വരെയാണ് മേള അരങ്ങേറുന്നത്. ഓണാഘോഷവും വ്യാപാരമേളയും സാംസ്കാരികോത്സവവും കൂടി ഉള്‍പ്പെട്ട മേളയുടെ പത്താമത് എഡിഷനാണ് ഇക്കുറി നടക്കുന്നതെന്നു സംഘാടകര്‍ അറിയിച്ചു. ആറാലുംമൂട് മാര്‍ക്കറ്റ് ഗ്രൗണ്ടില്‍ ജെസിബി ഉപയോഗിച്ച് മേളയ്ക്കു വേണ്ടിയുള്ള നിലം ഒരുക്കല്‍ ആരംഭിച്ചു. മേളയുടെ ഭാഗമായ ലക്കി കൂപ്പണ്‍ വിതരണോദ്ഘാടനം 11ന് നടക്കും. വൈകുന്നേരം നാലിനു നെയ്യാറ്റിന്‍കര അക്ഷയ ഷോപ്പിംഗ് കോംപ്ലക്സില്‍ കെ. ആന്‍സലന്‍ എംഎല്‍എ കൂപ്പണ്‍ വിതരണോദ്ഘാടനം നിര്‍വഹിക്കും. നിംസ് മെഡിസിറ്റി എംഡി ഡോ. എം.എസ്. ഫൈസല്‍ഖാന്‍ ആദ്യ കൂപ്പണ്‍ സ്വീകരിക്കും. സ്വാഗതസംഘം കമ്മിറ്റിക്കു പുറമേ രൂപീകരിച്ചിട്ടുള്ള 21 സബ് കമ്മിറ്റികളും മേളയുടെ ഒരുക്കങ്ങളുടെ തിരക്കിലാണ്.

രണ്ടര വയസുകാരനെ മാന്തിയ പൂച്ച ചത്തതു പേവിഷബാധയേറ്റല്ലെന്ന്

കുറ്റിച്ചൽ : അങ്കണവാടിയിൽ രണ്ടര വയസുകാരനെ മാന്തിയ പൂച്ച ചത്തതു പേവിഷബാധയേറ്റല്ലെന്നു പരിശോധനയിൽ വ്യക്തമായി. പാലോട് വെറ്ററിനറി ബയോളജിക്കൽ ഇൻസ്റ്റിറ്റ്യൂട്ട് ആൻഡ് റിസർച്ച് സെന്‍ററിൽ നടത്തിയ പൂച്ചയുടെ ജഡപരിശോധനാഫലം നെഗറ്റീവാണെന്നു അറിയിച്ചതായി ബ്ലോക്ക് ഐസിഡിഎസ് സിഡിപിഒ ലേഖ പറഞ്ഞു. കുറ്റിച്ചൽ പഞ്ചായത്തിൽ പേഴുംമൂട് വാർഡിലെ കുഴിയംകോണത്ത് വാടകക്കെട്ടിടത്തിലെ 126-ാം നമ്പർ അങ്കണവാടിയിലാണ് പേഴുംമൂട് സൈനബ മൻസിലിൽ മാഹീന്‍റെയും സൈനബയുടെയും മകൻ രണ്ടര വയസുള്ള ഹൈസിൻ സയാനിനെ പൂച്ച മാന്തിയത്. പിന്നാലെ പൂച്ച ചത്തു. ഈ വിവരം അങ്കണവാടി അധികൃതർ രഹസ്യമാക്കിവെച്ചതിനെ തുടർന്നു കുഞ്ഞിനു പ്രതിരോധ കുത്തിവെയ്പ് എടുക്കുന്നതു വൈകിയിരുന്നു. പൂച്ച ചത്തതോടെ മറ്റു കുട്ടികളുടെ രക്ഷാകർത്താക്കളും ആശങ്കയിലായിരുന്നു. ഐസിഡിഎസ് ജില്ലാ പ്രോഗ്രാം ഓഫീസർ ഉൾപ്പെടെയുള്ളവർ കുട്ടിയുടെ വീട്ടിലെത്തി രക്ഷാകർത്താക്കളെ പരിശോധനാഫലം അറിയിച്ചു. സുരക്ഷിതമല്ലാത്ത സാഹചര്യത്തിൽ പ്രവർത്തിക്കുന്ന അങ്കണവാടി താത്കാലികമായി അടുത്തുള്ള 111-ാം നമ്പർ അങ്കണവാടിയിലേക്ക് മാറ്റാനും തീരുമാനമായി.

സുരക്ഷ ഒരുക്കി 10 കാമറകൾ കൂടി എത്തി

കാട്ടാക്കട: കാട്ടാക്കട ടൗണിൽ 10 കാമറകൾകൂടി സ്ഥാപിക്കും. ഇതോടെ പ്രദേശത്തെ മുഴുവൻ ഭാഗങ്ങളും ബന്ധപ്പെട്ടവർക്കു വീക്ഷിക്കാനും സുരക്ഷാനടപടികൾ ഒരുക്കാനും കഴിയും. ഇതു സംബന്ധിച്ച് പോലീസ്, താലൂക്കുതല സംവിധാനമൊരുക്കിയതായും പ്രസിഡന്‍റ് അനിൽകുമാർ അറിയിച്ചു. അടുത്തിടെ ടൗണിന്‍റെ വിവിധ ഭാഗങ്ങളിൽ സാമൂഹ്യവിരുദ്ധശല്യം വർധിക്കുന്നതായും ആ ഭാഗത്തൊന്നും കാമറ സംവിധാനം ഇല്ലെന്നും കണ്ടെത്തിയിരുന്നു. ഇതിന്‍റെ അടിസ്ഥാനത്തിലാണ് കാമറ സംവിധാനം കൂടുതൽ ഇടങ്ങളിലേയ്ക്ക് വ്യാപിച്ചത്. കാട്ടാക്കട ബസ് ഡിപ്പോ, ചൂണ്ടുപലക, ചന്ത ജംഗ്ഷൻ, ട്രഷറി ജംഗ്ഷൻ, കട്ടയ്‌ക്കോട് റോഡ് തുടങ്ങിയ സ്ഥലങ്ങളിലായിരിക്കും വരിക. ഇതോടെ കാട്ടാക്കട പട്ടണം മുഴുവൻ കാമറ സംവിധാനത്തിലായി.

അപകടങ്ങൾ തുടർക്കഥയാകുന്നു : നെടുമങ്ങാട് ചന്തമുക്ക് റോഡിലെ ഡ്രെയിനേജ് തകർന്നു

നെടുമങ്ങാട്: ചന്തമുക്ക് മുതൽ ജില്ലാ ആശുപത്രി വരെയുള്ള റോഡിന് സമീപത്തുള്ള ഡ്രെയിനേജ് പൊട്ടിപ്പൊളിഞ്ഞ തകർന്നിട്ട് വർഷങ്ങളാകുന്നു. നവീകരണം നടക്കാത്തതിനാൽ വഴിയാത്രക്കാരും, വാഹനങ്ങളും അപകടത്തിൽപ്പെടുന്നകു പതിവാണ്. ഈ റോഡ് വീതി കുറവായതിനാൽ കൂടുതൽ സമയവും ഗതാഗതകുരുക്ക് നിത്യ സംഭവമാണ്. വളരെയധികം ചെറുകിട വ്യാപാരസ്ഥാപനങ്ങൾ ഈ റോഡിനു സമീപത്ത് പ്രവർത്തിക്കുന്നതിനാൽ ഇവിടെയെത്തുന്ന യാത്രക്കാരുടെ ഇരുചക്ര വാഹനങ്ങൾ ഉൾപ്പെടെ റോഡിനു സമീപം പാർക്കു ചെയ്യുന്നതും ഗതാഗത കുരുക്കിനു കാരണമായിട്ടുണ്ട്. വർഷങ്ങളായി തകർന്നു കിടക്കുന്ന ഡ്രൈയിനേജ് നിർമാണ പ്രവർത്തനങ്ങൾ നടത്തണമെന്ന പ്രദേശവാസികളുടെയും കച്ചവടക്കാരുടെയും ആവശ്യം അംഗീകരിക്കുവാൻ അധികൃതർ തയാറാകാത്തത് യാത്രക്കാരെയും, പ്രദേശവാസികളെയും ദുരിതത്തിൽ ആക്കുന്നു. നെടുമങ്ങാട് ടൗൺ മുസ്ലിം ജമാഅത്തിനു സമീപത്തുള്ള ഡ്രൈയിനേജ് തകർന്നതു കാരണം ഇവിടെ അപകടങ്ങളിൽനിന്നു രക്ഷ നേടുന്നതിനായി സ്ഥാപിച്ചിട്ടുള്ള പ്ലാസ്റ്റിക് സിഗ്നൽ ഓടയിൽ വീണു കിടന്നിട്ട് മാസങ്ങൾ കഴിഞ്ഞു. ഈ പ്രദേശത്ത് ഓടകളിലൂടെ ഒഴുകിയെത്തുന്ന മാലിന്യങ്ങൾ കെട്ടിനിന്നൃു ദുർഗന്ധം വമിക്കുന്നതു വ്യാപാരികളേയും സമീപവാസികളെയും, ദുരിതത്തിൽ ആക്കിയിട്ടുണ്ട്. ഇതുവഴി പോകുന്നവർ മൂക്കു പൊത്താതെ കടന്നുപോവുക അസാധ്യമാണ്. വിവിധ രാഷ്ട്രീയകക്ഷികൾ ഓടയുടെ നിർമാണം അടിയന്തിരമായി നടത്തണമെന്ന് ആവശ്യപ്പെട്ടുകൊണ്ട് അധികാരികൾക്ക് പരാതി നൽകിയിട്ടും ഏതൊരു നടപടിയും കൈക്കൊള്ളാത്തത് അധികാരികളുടെ ധിക്കാരപരമായ സമീപനമാണെന്നാണ് നാട്ടുകാരുടെ അഭിപ്രായം.

ഡിഎഫ്എസിന്‍റെ ജനസുരക്ഷ കാമ്പയിൻ

തിരുവനന്തപുരം: കേന്ദ്ര സർക്കാരിന്‍റെ സാമ്പത്തിക ഉൾപ്പെടുത്തൽ പൂർത്തീകരണത്തിന്‍റെ ഭാഗമായി എസ്ബിഐ പ്രാവച്ചമ്പലം ശാഖയുടെ ആഭിമുഖ്യത്തിൽ വിവിധ ദേശസാത്കൃത ബാങ്കുകൾ ചേർന്ന് "ജൻ സുരക്ഷാ ക്യാമ്പ് സംഘടിപ്പിക്കുന്നു. ഇന്നു രാവിലെ 10.30-ന് പ്രാവച്ചമ്പലം കല്ലിയൂർ സർവീസ് സഹകരണ ബാങ്ക് ഓഡിറ്റോറിയത്തിലാണ് ക്യാന്പ് നടത്തുന്നത്. ഓൺലൈൻ ഡിജിറ്റൽ തട്ടിപ്പുകളെക്കുറിച്ചും അവകാശികളില്ലാത്ത നിക്ഷേപങ്ങളെക്കുറിച്ചും പൊതുജനങ്ങൾക്ക് ബോധവത്കരണം നൽകുന്നതിനും, കേന്ദ്ര സർക്കാരിന്‍റെ വിവിധ ഇൻഷ്വറൻസ് പെൻഷൻ പദ്ധതികളിൽ അംഗമാകുന്നതിനുള്ള അവസരവും ഒരുക്കിയിട്ടുണ്ട്. കെവൈസി പുതുക്കാത്ത അക്കൗണ്ടുകളുടെ വിവരങ്ങൾ പുതുക്കി നൽകുന്നതിനുള്ള പ്രത്യേക കൗണ്ടറുകൾ സജ്ജമാക്കിയിട്ടുണ്ട്. എല്ലാ പൊതുജനങ്ങളും ഈ അവസരം പ്രയോജനപ്പെടുത്തണമെന്ന് എസ്ബിഐ പ്രാവച്ചമ്പലം ശാഖാ മാനേജർ അറിയിച്ചു.

മാര്‍ ബസേലിയോസ് കോളജ് ഓഫ് എൻജിനീയറിംഗ് ആന്‍ഡ് ടെക്നോളജിയില്‍ അന്താരാഷ്ട്ര സമ്മേളനം

തിരുവനന്തപുരം: മാര്‍ ബസേലിയോസ് കോളജ് ഓഫ് എൻജിനീയറിംഗ് ആന്‍ഡ് ടെക്നോളജിയില്‍ ഇന്‍റര്‍നാഷണല്‍ കോണ്‍ഫറന്‍സ് ഓണ്‍ നെറ്റുവർ‍ക്ക്സ് ആൻഡ് അഡ്വാന്‍സസ് ഇന്‍ കമ്പ്യൂട്ടേഷണല്‍ ടെക്നോളജീസ് (നെറ്റ് ആക്ട് 25) ആരംഭിച്ചു. കോളജിലെ വിശ്വേശ്വരയ്യ ഹാളില്‍ നടന്ന ചടങ്ങ് എപിജെ അബ്ദുൾ കലാം ടെക്നോളജിക്കല്‍ യൂണിവേഴ് സിറ്റി വൈസ് ചാന്‍സലര്‍ ഡോ. കെ. ശിവപ്രസാദ് ഉദ്ഘാടനം ചെയ്തു. കോളജ് പ്രിന്‍സിപ്പല്‍ ഡോ. എസ്. വിശ്വനാഥ റാവു അധ്യക്ഷത വഹിച്ചു. കോണ്‍ഫറന്‍സ് കം പെന്‍ഡിയം ഓഫ് അബ്സ്ട്രാക്ട്സ് പ്രകാശനം ചെയ്തു. യൂണിവേഴ്സിറ്റി ഓഫ് കേരള കമ്പ്യൂട്ടര്‍ സയന്‍സ് പ്രഫ. ഡോ. വിനോദ് ചന്ദ്ര, ഐഐഎസ്ടി ഏവിയോണിക്സ് ഡിപ്പാര്‍ട്ട്മെന്‍റ് പ്രഫസറും ഐഇഇഇ കേരള സെക്‌ഷന്‍ ചെയര്‍മാനുമായ ഡോ. ബി.എസ്. മനോജ്, എൽപിഎസ്‌സി ഡെപ്യൂട്ടി ഡയറക്ടര്‍ പി.ആര്‍. അജയലാല്‍ എന്നിവര്‍ പ്രസംഗിച്ചു. സമ്മേളനത്തിന്‍റെ സാങ്കേതിക വശങ്ങളെക്കുറിച്ച് ടെക്നിക്കല്‍ പ്രോഗ്രാം ചെയര്‍ ഡോ. ജെസ്ന മോഹന്‍ വിശദീകരിച്ചു. കോളജ് മാനേജ്മെന്‍റിനെ പ്രതിനിധീകരിച്ചു കോളജ് ഡയറക്ടര്‍ ഫാ.ജോണ്‍ വര്‍ഗീസ് വിശിഷ്ടാതിഥികളെ ആദരിച്ചു.

കൂട്ടുകാരനു സ്നേഹക്കൂടാരം ഒരുക്കി സെന്‍റ് ജോൺസ് സ്കൂൾ

തിരുവനന്തപുരം: കൂട്ടുകാരനു സ്നേഹക്കൂടാരമൊരുക്കി സ്കൂൾ മാതൃകയാകുന്നു. നാലാഞ്ചിറ സെന്‍റ് ജോൺസ് മോഡൽ ഹയർ സെക്കൻഡറി സ്കൂളാണ് പ്ലസ് ടു വിഭാഗം രജത ജൂബിലിയുടെ ഭാഗമായി സ്നേഹക്കൂടാരമൊരുക്കിയത്. എട്ടിലും ഒമ്പതിലും പഠിക്കുന്ന കുട്ടികളുടെ നിർധനരായ വീടും വസ്തുവും ഇല്ലാത്ത കുടുംബത്തിനു സ്കൂളിലെ പൂർവ വിദ്യാർഥി സൗജന്യമായി നൽകിയ വസ്തുവിലാണു ഭവനനിർമാണം പൂർത്തീകരിച്ചത്. വട്ടപ്പാറയ്ക്കടുത്തുള്ള മുളങ്കാട് ആർച്ച് ബിഷപ് മാർ ഗ്രീഗോറിയോസ് നഗറിലാണു സ്നേഹവീട് ഉയർന്നത്. ഭവനത്തിന്‍റെ താക്കോൽ കൈമാറ്റം ഇന്നു രാവിലെ ഒന്പതിനു മേജർ അതിരൂപതാ വികാരി ജനറലും എംഎസ്‌സി സ്‌കൂൾ കറസ്പോണ്ടന്‍റുമായ മോൺ. ഡോ. വർക്കി ആറ്റുപുറത്ത് കോർഎപ്പിസ്കോപ്പ നിർവഹിക്കും. സ്കൂൾ പ്രിൻസിപ്പൽ ഫാ. ജോസ് ചരുവിൽ, വൈസ് പ്രിൻസിപ്പൽ അജീഷ് കുമാർ ആർസി എന്നിവർ പങ്കെടുക്കും. സെന്‍റ് ജോൺസ് സോഷ്യൽ സർവീസ് ഫോറം (സാൻജോ) മാണു ഭവന നിർമാണ പദ്ധതിക്കു നേതൃത്വം നൽകിയത്. കൺവീനർ ബിജു കെ ജോർജ്, പ്രിൻസ് രാജ്, ജിനി ജോസ് എന്നിവർ അടങ്ങിയ സാൻജോ നേതൃത്വം പണി പൂർത്തിയാക്കുന്ന രണ്ടാമത്തെ ഭവന പദ്ധതി കൂടിയാണിത്. സാമൂഹിക പ്രതിബദ്ധതയോടെ കൂടുതൽ ജീവകാരുണ്യ പ്രവർത്തനങ്ങൾ സാൻജോ -യുടെ നേതൃത്വത്തിൽ ഏറ്റെടുത്തു നടത്തുമെന്ന് സ്കൂൾ പ്രിൻസിപ്പൽ ജോസ് ചരുവിൽ പറഞ്ഞു.

കന്യാസ്ത്രീമാരെ അക്രമിച്ചപ്പോള്‍ ഓടിയെത്തിയത് കമ്യൂണിസ്റ്റുകാര്‍: ബിനോയ് വിശ്വം

തിരുവനന്തപുരം: ചത്തീസ്ഗഢില്‍ കന്യാസ്ത്രീമാര്‍ ആക്രമിക്കപ്പെട്ടപ്പോള്‍ ഓടിയെത്തിയതു കമ്യൂണിസ്റ്റുകാരെന്നു സിപിഐ സംസ്ഥാന സെക്രട്ടറി ബിനോയ് വിശ്വം. സിപിഐ ജില്ലാ സമ്മേളനം പുത്തരിക്കണ്ടം മൈതാനിയില്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. തങ്ങളുടെ ജീവന്‍ നല്‍കിയും അവരെ സംരക്ഷിക്കുന്നതിനു അവിടുത്തെ സിപിഐ പ്രവര്‍ത്തകര്‍ തയ്യാറായി അവിടെയുണ്ടായിരുന്നു. ഈ നാട്ടില്‍ കമ്മ്യൂണിസ്റ്റ് പ്രവര്‍ത്തകരുണ്ടെങ്കില്‍ സഹോദരിമാരേ നിങ്ങള്‍ ഇവിടെ ആരാലും അക്രമിക്കപ്പെടില്ല, ഞങ്ങളെയെല്ലാം അടിച്ചു വീഴ്ത്തിയിട്ടേ നിങ്ങള്‍ക്കു മേല്‍ ഒരു മണ്‍തരി പോലും വീഴുകയുള്ളൂ എന്ന് അവര്‍ ഉറപ്പു നല്‍കി. അന്ന് അവര്‍ക്ക് കൊടുത്ത ആ ഉറപ്പിന്‍റെ ബലം ചെറുതായിരുന്നില്ലെന്നു ഒരു സന്യാസിനിയുടെ സഹോദരന്‍ പറഞ്ഞതു മനസില്‍ തട്ടിയുള്ള വാക്കുകളായിരുന്നുവെന്നും അദ്ദേഹം പറഞ്ഞു.

റെഡ് വോളണ്ടിയര്‍ മാര്‍ച്ചിലും റാലിയും ആയിരങ്ങള്‍ പങ്കെടുത്തു

തിരുവനന്തപുരം: സിപിഐ ജില്ലാ സമ്മേളനത്തിന്‍റെ ഭാഗമായി നഗരത്തില്‍ ഇന്നലെ നടന്ന റെഡ് വോളണ്ടിയര്‍ മാര്‍ച്ചിലും ബഹുജന റാലിയിലും ആയിരക്കണക്കിനു പ്രവര്‍ത്തകര്‍ പങ്കെടുത്തു. സമ്മേളനത്തിന്‍റെ ഭാഗമായി നഗരത്തില്‍ ചെങ്കൊടികളും ചുവന്ന തോരണങ്ങളും നിറഞ്ഞിരുന്നു. അതിനിടയിലൂടെ റെഡ് വോളണ്ടിയര്‍മാരും ചെങ്കൊടികളേന്തി പാര്‍ട്ടി പ്രവര്‍ത്തകരും ചുവടുവച്ചു. വളരെ സാവധാനമാണ് പ്രകടനം ഓരോ പോയിന്‍റും കടന്നുപോയത്. 25-ാം പാര്‍ട്ടി കോണ്‍ഗ്രസിന്‍റെ പ്രതീകമായി ചുവന്ന വസ്ത്രങ്ങള്‍ ധരിച്ച പ്രവര്‍ത്തകര്‍ 25 ഇരുചക്രവാഹനങ്ങളിലായി പ്രകടനത്തിന്‍റെ ഏറ്റവും മുന്നില്‍ സഞ്ചരിച്ചു. പിന്നാലെ ജില്ലയിലെ 17 മണ്ഡലങ്ങളില്‍ നിന്നുള്ള പുരുഷ, വനി താ വോളണ്ടിയര്‍മാര്‍ അണിനിരന്നു. ബഹുജനറാലിയുടെ മുന്‍നിരയില്‍ ജില്ലാ കൗണ്‍സിലിന്‍റെ ബാനറില്‍ ജില്ലാ നേതാക്കള്‍ പങ്കെടുത്തു. അതിനുശേഷം വിവിധ മണ്ഡലം കമ്മിറ്റികളും അവിടങ്ങളിലെ ലോക്കല്‍ കമ്മിറ്റികളും പ്രത്യേകം പ്രത്യേകമായി ബാനറിനുപിന്നില്‍ പ്രവര്‍ത്തകരെ അണിനിരത്തി. മുതിര്‍ന്ന അംഗങ്ങളോടൊപ്പം ചെറുപ്പക്കാരും സ്ത്രീകളും കുട്ടികളും ആവേശത്തോടെ മുദ്രാവാക്യങ്ങള്‍ മുഴക്കി റാലിയില്‍ പങ്കാളികളായി. പാര്‍ട്ടിയുടെ തെരഞ്ഞെടുപ്പു ചിഹ്നമായ അരിവാളും ധാന്യക്കതിരും ഉള്‍പ്പെടെയുള്ളവ ചിത്രീകരിച്ച നിശ്ചലദൃശ്യങ്ങളും വിവിധ മണ്ഡലം ലോക്കല്‍ കമ്മിറ്റികള്‍ അവതരിപ്പിച്ചു. ചെണ്ട വാദ്യം, ബാന്‍ഡ് മേളം, തുടങ്ങിയവയും മാറ്റുകൂട്ടി.

പ്രസ് ക്ലബ് ജേണലിസം: പാര്‍വതി കെ. നായര്‍ക്ക് ഒന്നാം റാങ്ക്

തിരുവനന്തപുരം: തിരുവനന്തപുരം പ്രസ് ക്ലബ് ഇന്‍സ്റ്റിറ്റ്യൂട്ട് ഓഫ് ജേണലിസം അമ്പത്തിയേഴാമത് ബാച്ചിന്‍റെ പരീക്ഷാഫലം പ്രസിദ്ധീകരിച്ചു. പാര്‍വതി കെ. നായര്‍ക്കാണ് ഒന്നാം റാങ്ക്. എൽ. പാര്‍വതി‍, എ.വി. അഞ്ജു എന്നിവര്‍ക്കാണ് യഥാക്രമം രണ്ടും മൂന്നും റാങ്കുകൾ. തിരുവനന്തപുരം മരുതന്‍കുഴി സ്വദേശിനിയാണ് ഒന്നാം റാങ്ക് നേടിയ പാര്‍വതി കെ. നായര്‍. പരീക്ഷ എഴുതിയവരില്‍ 15 പേര്‍ക്ക് ഫസ്റ്റ് ക്ലാസും നാലുപേര്‍ക്ക് സെക്കന്‍ഡ് ക്ലാസും ലഭിച്ചു. ബിരുദദാനം സെപ്റ്റംബര്‍ അവസാനം നടക്കും.

പുനർഗേഹം പദ്ധതി : മുട്ടത്തറയിൽ "പ്രത്യാശ' ഫ്ലാറ്റുകളുടെ താക്കോൽ കൈമാറി മുഖ്യമന്ത്രി

തിരുവനന്തപുരം: സംസ്ഥാന ഫിഷറീസ് വകുപ്പിന്‍റെ "പുനർഗേഹം' തീരദേശ പുനരധിവാസ പദ്ധതിയുടെ ഭാഗമായി തിരുവനന്തപുരം മുട്ടത്തറയിൽ നിർമിച്ച "പ്രത്യാശ' ഫ്ലാറ്റ് സമുച്ചയത്തിലെ 332 ഫ്ലാറ്റുകളുടെ താക്കോൽദാനം മുഖ്യമന്ത്രി പിണറായി വിജയൻ നിർവഹിച്ചു. കടലാക്രമണ ഭീഷണിയിൽ ജീവിതം ദുസ്സഹമായ തീരദേശ മത്സ്യത്തൊഴിലാളി കുടുംബങ്ങൾക്ക് സുരക്ഷിതവും മാന്യവുമായ താമസം ഉറപ്പാക്കുന്നതിന്‍റെ ഭാഗമായാണ് ഭവനസമുച്ചയം നിർമിച്ചത്. മന്ത്രി സജി ചെറിയാൻ അധ്യക്ഷനായി. നാടമുറിച്ച ശേഷം മുഖ്യമന്ത്രി ഫ്ലാറ്റുകൾ സന്ദർശിച്ചു. മലപ്പുറം ജില്ലയിലെ താനൂരിൽ നിർമിച്ച 16 ഫ്ലാറ്റുകളുടെ ഉദ്‌ഘാടനവും മുഖ്യമന്ത്രി ഓൺലൈനായി നിർവഹിച്ചു. ഓരോ ഫ്ലാറ്റിലും ഇരിപ്പുമുറി, ഭക്ഷണമുറി, രണ്ട് കിടപ്പുമുറികൾ, ശൗചാലയം, അടുക്കള എന്നിവയാണ് ഉൾപ്പെടുന്നത്. ഒരു ഫ്ലാറ്റിന്‍റെ നിർമാണച്ചെലവ് ഏകദേശം 20 ലക്ഷം രൂപയ്ക്ക് മുകളിലാണ്. വൈദ്യുതി, കുടിവെള്ളം, റോഡ്, ഡ്രെയിനേജ്, നടപ്പാത, ചുറ്റുമതിൽ തുടങ്ങിയ എല്ലാ അനുബന്ധ സൗകര്യങ്ങളും ഒരുക്കിയിട്ടുണ്ട്. മന്ത്രിമാരായ വി. ശിവൻകുട്ടി, വി.എൻ. വാസവൻ, ജെ. ചിഞ്ചുറാണി, എംഎൽഎ ആന്‍റണി രാജു, മേയർ ആര്യ രാജേന്ദ്രൻ, ഫിഷറീസ് വകുപ്പ് സ്പെഷൽ സെക്രട്ടറി ബി. അബ്ദുൾ നാസർ, ഫിഷറീസ് ഡയറക്ടർ വി. ചെൽസാസിനി, ജില്ലാ കളക്ടർ അനുകുമാരി, ശാന്തഗിരി ആശ്രമം ജനറൽ സെക്രട്ടറി ഗുരുരത്നം ജ്ഞാനതപസ്വി, പാളയം ഇമാം സുഹൈബ് മൗലവി തുടങ്ങിയവർ ചടങ്ങിൽ പങ്കെടുത്തു.

ചങ്ങാതിക്ക് വൃക്ഷത്തൈകൾ കൈമാറി പട്ടം സെന്‍റ് മേരീസിലെ കുട്ടികൾ

പട്ടം : സെന്‍റ് മേരീസ് ഹയർ സെക്കൻഡറി സ്കൂളിൽ ഹരിത കേരള മിഷന്‍റെ ആഭിമുഖ്യത്തിൽ ചങ്ങാതിക്ക് ഒരു തൈ എന്ന പദ്ധതി നടപ്പാക്കി. ഹരിത കേരളം മിഷൻ സീനിയർ പ്രോഗ്രാം ഓഫീസർ ഹരിപ്രിയ ഉദ്ഘാടനം ചെയ്തു. പ്രിൻസിപ്പൽ ഫാ. നെൽസൺ വലിയവീട്ടിൽ അധ്യക്ഷത വഹിച്ചു. ഹരിത കേരളം മിഷൻ ജില്ലാ കോ-ഓർഡിനേറ്റർ അശോക് കുമാർ, വൈസ് പ്രിൻസിപ്പൽ റെജി ലൂക്കോസ്, പിടിഎ പ്രസിഡന്‍റ് കെ.എസ്. വിഷ്ണു, എംപിടിഎ പ്രസിഡന്‍റ് സജിനി, സ്കൂൾ പ്രോഗ്രാം കോ-ഓർഡിനേറ്റർ എൻ.ജി. റോയ്, ഹെൽത്ത് ഇൻസ്പെക്ടർ സുനിത, പബ്ലിക്ക് ഹെൽത്ത് ഇൻസ്പെക്ടർ ഷൈനി, നവകേരളം കർമ്മപദ്ധതി റിസോഴ്സ് പേഴ്സൺ റസീന, സ്കൂൾ വൈസ് ചെയർപേഴ്സൺ നിരഞ്ജൻ എന്നിവർ പ്രസംഗിച്ചു.

ദീപിക കളർ ഇന്ത്യ മത്സരം ഇന്ന്

തിരുവനന്തപുരം: ഇന്ത്യ എന്ന വികാരം ഹൃദയതാളമായി മാറുന്ന ദീപിക കളർ ഇന്ത്യ മത്സരം ഇന്നു നടക്കും. പുതുതലമുറയിൽ ദേശഭക്തിയും സാഹോദര്യവും ഊട്ടിയുറപ്പിക്കുന്ന ദേശീയോദ്ഗ്രഥന മുന്നേറ്റത്തിനാണ് കുട്ടികൾ വർണം ചാർത്തുന്നത്. നാലാഞ്ചിറ നവജീവൻ ബഥനി വിദ്യാലയത്തിൽ നടക്കുന്ന ജില്ലാതല ഉദ്ഘാടനം രാവിലെ 9.30ന് രാഷ്ട്രദീപിക ലിമിറ്റഡ് ചെയർമാൻ ഡോ. ഫ്രാൻസിസ് ക്ലീറ്റസ് നിർവഹിക്കും. നവജീവൻ ബഥനി സ്കൂൾ അഡ്മിനിസ്ട്രേ റ്റർ ഫാ. തോമസ് ജോർജ് ഒഐസി അധ്യക്ഷത വഹിക്കും. ദീപിക റസിഡന്‍റ് മാനേജരും തിരുവനന്തപുരം മലങ്കര അതിരൂപത വികാരി ജനറാളുമായ മോൺ. ഡോ. വർക്കി ആറ്റുപുറത്ത് കോർ എപ്പിസ്കോപ്പ ആമുഖ പ്രഭാഷണം നടത്തും. നവജീവൻ ബഥനി സ്കൂൾ പ്രിൻസിപ്പൽ ഷന രഞ്ജിത്ത് ആശംസകളർപ്പിക്കും. ദീപിക സർക്കുലേഷൻ മാനേജർ ഇ.വി. വർക്കി സ്വാഗതവും ഡിസിഎൽ പ്രവിശ്യാ പ്രസിഡന്‍റ് ആംബ്രോസ് പി. കുന്നിൽ നന്ദിയും പറയും. എൽകെജി മുതൽ പ്ലസ് ടുവരെയുള്ള കുട്ടികളാണ് വിവിധ വിഭാഗങ്ങളിലായി ഈ മത്സരത്തിൽ അണിചേരുന്നത്. ലഹരിക്കെതിരേയുള്ള പോരാട്ടവും ഭാരതത്തിന്‍റെ ഐക്യവും അഖണ്ഡതയും ഊട്ടിയുറപ്പിക്കാനുള്ള സന്ദേശവും കുട്ടികൾക്കു പകർന്നു നൽകാൻ ലക്ഷ്യമിട്ടാണ് ദീപികയും ദീപിക ബാലസഖ്യവും മത്സരം സംഘടിപ്പിക്കുന്നത്.

തെരഞ്ഞെടുപ്പ് കമ്മീഷന്‍ രാജ്യത്തിന് ശാപവും അപമാനവും: ബിനോയ് വിശ്വം

തിരുവനന്തപുരം: തെരഞ്ഞെടുപ്പ് കമ്മീഷന്‍ രാജ്യത്തിനു ശാപവും അപമാനവുമാണെന്നു സിപിഐ സംസ്ഥാന സെക്രട്ടറി ബിനോയ് വിശ്വം. രാഹുല്‍ ഗാന്ധി പറഞ്ഞ കാര്യങ്ങള്‍ തെറ്റാണെങ്കില്‍, തെരഞ്ഞെടുപ്പ് കമ്മീഷന് തന്‍റേടമുണ്ടെങ്കില്‍ അദ്ദേഹത്തെ ശിക്ഷിക്കണമെന്നും ഇല്ലെങ്കില്‍ തെരഞ്ഞെടുപ്പ് കമ്മീഷന്‍ രാജിവയ്ക്കണമെന്നും ബിനോയ് വിശ്വം ആവശ്യപ്പെട്ടു. സിപിഐ തിരുവനന്തപുരം ജില്ലാ സമ്മേളനത്തിന്‍റെ ഭാഗമായി നടന്ന പൊതുസമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ബിജെപിയ്ക്കുവേണ്ടി സ്തുതി പാടുന്നവരെ മാത്രം ഉയര്‍ത്തിക്കാട്ടി എല്ലാ സ്ഥാപനങ്ങളെയും ബിജെപിയുടെ കൈയിലെ കളിപ്പാവയാക്കുന്നതിനെതിരെയുള്ള ജനങ്ങളുടെ പോരാട്ടങ്ങളില്‍ കമ്മ്യൂണിസ്റ്റ് പാര്‍ട്ടിയും ഉണ്ടാകുമെന്നും അദ്ദേഹം വ്യക്തമാക്കി. കര്‍ണാടകയിലും മഹാരാഷ്ട്രയിലും എല്ലാം തെരഞ്ഞെടുപ്പു കമ്മീഷന്‍ ബിജെപിക്കുവേണ്ടി കളിച്ച കള്ളക്കളിയെക്കുറിച്ചാണ് രാഹുല്‍ ഗാന്ധി ഇന്നലെ പറഞ്ഞത്. അതിനെക്കുറിച്ച് തെരഞ്ഞെടുപ്പ് കമ്മീഷന് ഉത്തരമുണ്ടെങ്കില്‍ പറയണം. സ്വതന്ത്രവും സത്യസന്ധവുമായ തെരഞ്ഞെടുപ്പിനു വേണ്ടിയാണ് തെരഞ്ഞെടുപ്പ് കമ്മിഷന്‍ പ്രവര്‍ത്തിക്കേണ്ടത്. അതിനു പറ്റിയില്ലെങ്കില്‍ രാജിവയ്ക്കുക തന്നെ വേണം. മത്സ്യ, കശുവണ്ടി, കയര്‍, കാര്‍ഷിക മേഖലയെല്ലാം തകര്‍ത്തെറിയുംവിധം നാടിന്‍റെ സാമ്പത്തിക വ്യവസ്ഥയെ മുഴുവന്‍ തകര്‍ക്കുന്ന വ്യാപാര ചുങ്കം എന്ന ഭ്രാന്തിന്‍റെ ശില്‍പിയാണ് ഡൊണാള്‍ഡ് ട്രംപ് എന്നും ബിനോയ് വിശ്വം ചൂണ്ടിക്കാട്ടി. വ്യാപാര ചുങ്കം കൂട്ടിയാല്‍ നാളെ അത് നമ്മുടെ സമസ്ത മേഖലയിലും പ്രതിഫലിക്കും. ട്രംപിനെക്കുറിച്ച് മോഡി ഒന്നും പറയുന്നില്ല. രാവിലെയും ഉച്ചയ്ക്കും വൈകിട്ടുമെല്ലാം മോഡിയെക്കുറിച്ച് ട്രംപ് പറഞ്ഞിട്ടും മോഡിക്ക് മിണ്ടാട്ടമില്ല. മോഡിയുടെ നാക്ക് ഇന്ത്യയ് ക്കുവേണ്ടി സംസാരിക്കുന്നുണ്ടെങ്കില്‍ ട്രംപിനോട് ഈ വ്യാപാര ചുങ്കം പിന്‍വലിക്കാന്‍ പറയണമെന്നും ബിനോയ് വിശ്വം പറഞ്ഞു. ട്രംപിനെ കണ്ടാല്‍ കവാത്ത് മറക്കാനെ മോഡിക്ക് ആകൂ. ട്രംപിനെ കാണുമ്പോള്‍ മോഡിയുടെ മുട്ടു കൂട്ടിയിടിക്കും. സ്വദേശിമിത്രം പറഞ്ഞു വിദേശ കൊള്ളക്കാര്‍ക്കുവേണ്ടി ദാസ്യപ്പണിക്കു പോകുന്ന പാര്‍ട്ടിയാണ് ബിജെപി. ഇന്ത്യയ്ക്കുവേണ്ടി സംസാരിക്കാന്‍ സിപിഐ ഉണ്ടായിരിക്കും. ട്രംപിനു മുന്നില്‍ കമ്മ്യൂണിസ്റ്റ് പാര്‍ട്ടിക്ക് പറയാന്‍ മടിയില്ലെന്നും അദ്ദേഹം പറഞ്ഞു. ഹിന്ദുവോ, ക്രിസ്ത്യാനിയോ, ജൈനനോ, മുസ്‌ലിമോ, പാഴ്‌സിയോ ആരുമാകട്ടെ നിങ്ങള്‍ ഇന്ത്യക്കാരാണെങ്കില്‍ കമ്മ്യൂണിസ്റ്റ് പാര്‍ട്ടി ചേര്‍ത്തു പിടിക്കും. സിപിഐ വോട്ടിനു വേണ്ടി എവിടെയും കേക്കുമായി പോകാറില്ല. സ്വര്‍ണം പൂശിയ കിരീടവുമായും പോകാറില്ല. മനുഷ്യന്‍റെ ഹൃദയത്തിലേക്കാണ് ഞങ്ങള്‍ പോകുന്നതെന്നും അദ്ദേഹം പറഞ്ഞു. പുത്തരിക്കണ്ടം മൈതാനിയില്‍ നടന്ന പൊതുസമ്മേളനത്തില്‍ സിപിഐ ജില്ലാ സെക്രട്ടറി മാങ്കോട് രാധാകൃഷ്ണന്‍ അധ്യക്ഷത വഹിച്ചു. സ്വാഗത സംഘം ചെയര്‍മാന്‍ കെ.എസ്. അരുണ്‍ സ്വാഗതം പറഞ്ഞു. മന്ത്രി ജി.ആര്‍. അനില്‍, സിപിഐ സംസ്ഥാന എക്‌സിക്യൂട്ടീവ് അംഗം എന്‍. രാജന്‍ എന്നിവര്‍ പ്രസംഗിച്ചു. അഡ്വ. രാഖി രവികുമാര്‍ നന്ദി പറഞ്ഞു. പ്രതിനിധി സമ്മേളനം ഇന്നും നാളെയുമായി വഴുതക്കാട് ടാഗോര്‍ തിയറ്ററിലെ കാനം രാജേന്ദ്രന്‍ നഗറില്‍ നടക്കും. രാവിലെ 10ന് ദേശീയ എക്‌സിക്യൂട്ടീവ് അംഗം അഡ്വ. കെ. പ്രകാശ് ബാബു ഉദ്ഘാടനം ചെയ്യും.

തട്ടിപ്പ്: യുവതി അറസ്റ്റിൽ

വിഴിഞ്ഞം: ലോട്ടറി കടയിൽനിന്ന് ലക്ഷങ്ങൾ തട്ടിയ ജീവനക്കാരി അറസ്റ്റിൽ. വിഴിഞ്ഞം കോട്ടപ്പുറം ചരുവിള വീട്ടിൽ അൽഫോൻസാമ്മയെയാണ് വിഴിഞ്ഞം പോലീസ് പിടികൂടിയത്. വിഴിഞ്ഞത്തെ ജെഎംജെ ലോട്ടറി ഏജൻസിയിലെ ജീവനക്കാരിയായിരുന്ന ഇവർ 2019 മുതൽ 2024 വരെ ലോട്ടറി വിറ്റു കിട്ടുന്ന പണം സ്വന്തം അക്കൗണ്ടിലേക്ക് മാറ്റിയതായാണു പരാതി. ചെറുകിട ലോട്ടറി ഏജന്‍റുമാരെ കൊണ്ട് കടം വാങ്ങിപ്പിച്ച് ഈ ലോട്ടറി വിറ്റുകിട്ടിയ പണം ഗൂഗിൾ പേ വഴി സ്വന്തം അക്കൗണ്ടിലേക്ക് മാറ്റിയാണ് തട്ടിപ്പു നടത്തിയതെന്നും ഒരു കോടിയിൽ പരം രൂപ തട്ടിയെടുത്തതായും ഏജൻസി ഉടമ എം വിൽഫ്രഡ് പറയുന്നു. അതേസമയം 25 ലക്ഷത്തോളം രൂപ തട്ടിയെടുത്തെന്ന് പ്രതി സമ്മതിച്ചതായി വിഴിഞ്ഞം പോലീസ് അറിയിച്ചു.

വനിതാ തിയറ്റര്‍ നാടക പരിശീലനക്യാമ്പ്

നെടുമങ്ങാട്: സ്ത്രീധന- ഗാര്‍ഹിക പീഡനങ്ങൾക്കെതിരെ സ്ത്രീശാക്തീകരണ നാടകവുമായി ആനാട് ഗ്രാമപഞ്ചായത്ത്. ഈ വര്‍ഷം ജില്ലയില്‍ ആദ്യമായി നടക്കുന്ന വനിതാജംഗ്ഷന്‍ പരിപാടിയിലാണ് പഞ്ചായത്ത് കനല്‍ എന്ന നാടകവുമായി രംഗത്തെത്തിയത്. കുടുംബങ്ങള്‍ക്കുള്ളില്‍ സ്ത്രീകള്‍ അനുഭവിക്കുന്ന മാനസികവും ശാരീരികവുമായ സങ്കടങ്ങളെ അതിജീവിക്കാനുള്ള പാഠങ്ങളാണ് നാടകം പകര്‍ന്നു നല്‍കുന്നത്. 40-മിനിട്ട് ദൈര്‍ഘ്യമുള്ള ചെറുനാടകത്തില്‍ 20-സ്ത്രീകളാണ് അരങ്ങിലും അണിയറയിലുമായെത്തുന്നത്. ഇരിഞ്ചയം സനല്‍ നാടകരചനയും അനില്‍ കാരേറ്റ് സംവിധാനവും നിര്‍വഹിച്ച നാടകം ജില്ലയിലെ എല്ലാ പഞ്ചായത്തുകളിലുമെത്തും. വീട്ടമ്മമാര്‍ മുതല്‍ വിദ്യാര്‍ഥിനികള്‍ വരെ നാടകത്തില്‍ അഭിനയിക്കുന്നുണ്ട്. കേരള പോലീസിലെ മിനിസ്റ്റീരിയല്‍ സ്റ്റാഫില്‍ നിന്നും വിരമിച്ച ജയകുമാരി, എട്ടാം ക്ലാസുകാരി അബിഷ്ട വരെ നാടകത്തിന് നിറപ്പൊലിമ പകരാന്‍ വേദിയിലെത്തുന്നുണ്ട്.

കളക്ടറേറ്റില്‍ ലീപ് കേരള ഹെല്‍പ്പ് ഡെസ്‌ക് തുടങ്ങി

പേരൂര്‍ക്കട: തദ്ദേശ സ്വയംഭരണ തെരഞ്ഞെടുപ്പിന് മുന്നോടിയായി ലീപ് കേരള (ലോക്കല്‍ ബോഡി ഇലക്‌ഷന്‍ അവയര്‍നെസ് പ്രോഗ്രാം) വോട്ടര്‍ ഹെല്‍പ്പ് ഡെസ്‌ക് കളക്ടറേറ്റില്‍ ആരംഭിച്ചു. ജില്ലാ കളക്ടര്‍ അനുകുമാരി ഉദ്ഘാടനം ചെയ്തു. വോട്ടര്‍ ബോധവത്കരണ പരിപാടി ആരംഭിക്കുക, യോഗ്യരായവരെ വോട്ടര്‍പ്പട്ടികയില്‍ ഉള്‍പ്പെടുത്തുന്നത് ഉറപ്പാക്കുക, വോട്ടിംഗ് പങ്കാളിത്തത്തില്‍ യുവ വോട്ടര്‍മാരുടെ ഇടയിലുള്ള നിസംഗത പരിഹരിക്കുക, തിരഞ്ഞെടുപ്പ് സംവിധാനത്തില്‍ പങ്കാളികളാകേണ്ടതിന്റെ പ്രാധാന്യം വോട്ടര്‍മാരെ ഉദ്ബോധിപ്പിക്കുക തുടങ്ങിയവയാണ് ലീപ് കാന്പയിന്‍റെ ലക്ഷ്യം. വോട്ടിംഗ് മെഷീനുകളുടെ പ്രാഥമിക പരിശോധനയും ജില്ലാ കളക്ടറുടെ നേതൃത്വത്തില്‍ നടത്തി.

സ്കൂൾ സുരക്ഷാസമിതി യോഗം

വെഞ്ഞാറമൂട് : വാമനപുരം ഗവ യുപി സ്കൂളിലെ സുരക്ഷാ സമിതി യോഗം ഹെഡ്മാസ്റ്ററുടെ അധ്യക്ഷതയിൽ നടന്നു. വെഞ്ഞാറമൂട് പോലീസ് സബ് ഇൻസ്‌പെക്ടർ വിനോദ്, ഹെൽത്ത്‌ ഇൻസ്‌പെക്ടർ സുരാജ്, കെഎസ്ഇബി പ്രതിനിധികൾ, എക്സൈസ് വകുപ്പ് ഇൻസ്‌പെക്ടർ അരുൺ, വാർഡ് മെമ്പർ ബിനിതകുമാരി, പിടിഎ പ്രസിഡന്‍റ് സാബു, എസ്എംസി ചെയർമാൻ എസ്.ആർ. രജികുമാർ, എംപിടിഎ പ്രസിഡന്‍റ് കാർത്തിക തുടങ്ങിയവർ പങ്കെടുത്തു.

വാഹനമോഷണം: പ്രതി പിടിയില്‍

പേരൂര്‍ക്കട: നിരവധി വാഹനമോഷണക്കേസിലെ പ്രതിയെ കന്‍റോൺമെന്‍റ് എസി സ്റ്റ്യു വര്‍ട്ട് കീലറിന്‍റെ നിര്‍ദേശപ്രകാരം പോലീസ് പിടികൂടി. ഒറ്റശേഖരമംഗലം മണ്ഡപത്തിന്‍കടവ് കനാല്‍ക്കര മേലേപുത്തന്‍ വീട്ടില്‍ ഷിജു (27) ആണ് പിടിയിലായത്. വട്ടിയൂര്‍ക്കാവ് തിട്ടമംഗലം എന്‍എസ്പി ലെയിന്‍ 106-ാം നമ്പര്‍ വീട്ടില്‍ വാടകയ്ക്കു താമസിക്കുന്ന പെരുമ്പഴുതൂര്‍ സ്വദേശി വിഷ്ണുവിന്‍റെ ഹോണ്ട ആക്ടീവ സ്‌കൂട്ടര്‍ മോഷണം പോയതുമായി ബന്ധപ്പെട്ടു നടത്തിയ അന്വേഷണത്തിലാണ് പ്രതി പിടിയിലായത്. തമ്പാനൂര്‍, കവടിയാര്‍ ഭാഗങ്ങളിലെ സിസിടിവി ദൃശ്യങ്ങള്‍ പരിശോധിച്ചതില്‍ നിന്നാണ് പ്രതിയെക്കുറിച്ചുള്ള വിവരങ്ങള്‍ ലഭിച്ചത്. വിവിധ സ്റ്റേഷനുകളിലായി 25 വാഹനമോഷണക്കേസുകള്‍ പ്രതിക്കെതിരേയുണ്ട്. ഒളിവിലായിരുന്ന പ്രതിയെ വീടിനു സമീപത്തുനിന്നാണ് പിടികൂടിയത്. അറസ്റ്റിലായ പ്രതിയെ കോടതി റിമാന്‍ഡ് ചെയ്തു.

ശസ്ത്രക്രിയ മുടങ്ങിയ സംഭവം: ബിജെപി റീത്തുവച്ചു പ്രതിഷേധിച്ചു

നെയ്യാറ്റിൻകര : ജനറല്‍ ആശുപത്രിയിൽ ഓപ്പറേഷൻ തിയേറ്റർ അടച്ചിട്ടതിൽ പ്രതിഷേധിച്ച് ബിജെപി ആശുപത്രിയിലേയ്ക്ക് നടത്തിയ മാര്‍ച്ച് പോലീസ് തടഞ്ഞു. പ്രവര്‍ത്തകര്‍ ആശുപത്രി കവാടത്തില്‍ റീത്ത് സമര്‍പ്പിച്ചു. ബിജെപി നെയ്യാറ്റിൻകര നിയോജക മണ്ഡലം കമ്മിറ്റിയുടെ നേതൃത്വത്തില്‍ സംഘടിപ്പിച്ച പ്രതിഷേധ സമരം സൗത്ത് ജില്ലാ പ്രസിഡന്‍റ് മുക്കംപാലമൂട് ബിജു ഉദ്ഘാടനം ചെയ്തു. മണ്ഡലം പ്രസിഡന്‍റ് ഗോപാലകൃഷ്ണന്‍ അധ്യക്ഷനായി. ജില്ലാ ജനറൽ സെക്രട്ടറി ഷിബു ബാലരാമപുരം, വൈസ് പ്രസിഡന്‍റ് മഞ്ചത്തല സുരേഷ് എന്നിവര്‍ പ്രസംഗിച്ചു.

കുടിവെള്ളക്ഷാമം : പാറശാല ഗവ. ആശുപത്രി സൂപ്രണ്ടിനെ ഉപരോധിച്ചു

പാറശാല : പാറശാല സര്‍ക്കാരാശുപത്രിയില്‍ കുടിവെള്ളക്ഷാമം രൂക്ഷം. രോഗികള്‍ കുടിവെള്ളത്തിനായി നെട്ടോട്ടം ഓടുന്നതിനെതിരെ പ്രതിഷേധം ശക്തമായിട്ടുണ്ട്. പൈപ്പ് ലൈൻ മാറ്റി സ്ഥാപിക്കുകയും കുടിവെള്ളക്ഷാമം പരിഹരിച്ചശേഷം പൊട്ടി പൊളിഞ്ഞുകിടക്കുന്ന റോഡ് ടാര്‍ ചെയ്ത് ബലപ്പെടുത്തണമെന്നാവശ്യപ്പെട്ടാണ് കോണ്‍ഗ്രസ് പ്രവര്‍ത്തകര്‍ പാറശാല സര്‍ക്കാര്‍ ആശുപത്രി സൂപ്രണ്ടിനെ ഉപരോധിച്ചത്. പഞ്ചായത്ത് മെമ്പര്‍മാരായ ലവന്‍ ജോയി, വിനയനാഥ്, താര തുടങ്ങിയവര്‍ക്കു പുറമേ കോണ്‍ഗ്രസ് പ്രവര്‍ത്തകരായ വത്സലന്‍ കുഴിഞ്ഞാന്‍വിള, ലത, അമ്പിളി മുള്ളുവിള തുടങ്ങിയ പ്രവര്‍ത്തകരും ചേര്‍ന്നാണ് സൂപ്രണ്ടിനെ ഉപരോധിച്ചത്. സര്‍ക്കാര്‍ ആശുപത്രിയിലെ കുടിവെള്ള ക്ഷാമം പരിഹരിച്ചില്ലെങ്കില്‍ ശക്തമായ പ്രതിഷേധം പരിപാടികള്‍ സംഘടിപ്പിക്കുമെന്നു കോണ്‍ഗ്രസ് മേതാക്കള്‍ മുന്നറിയിപ്പ് നല്‍കി.

ശസ്ത്രക്രിയ മുടങ്ങിയ സംഭവം : നെയ്യാറ്റിൻകര ജനറല്‍ ആശുപത്രിയില്‍ പ്രതിഷേധവുമായി യൂത്ത് കോണ്‍ഗ്രസ്

നെയ്യാറ്റിന്‍കര: നെയ്യാറ്റിന്‍കര ജനറല്‍ ആശുപത്രിയിലെ ശസ്ത്രക്രിയകള്‍ മുടങ്ങിയ സംഭവത്തില്‍ പ്രതിഷേധിച്ച് യൂത്ത് കോണ്‍ഗ്രസ് പ്രവര്‍ത്തകര്‍ ആശുപത്രി സൂപ്രണ്ടിനെ ഉപരോധിച്ചു. നെയ്യാറ്റിൻകര ജനറൽ ആശുപത്രിയിൽ ഓപ്പറേഷൻ തിയറ്ററിലെ ജലസംഭരണിയിലെ കുടിവെള്ളത്തിൽ കോളിഫോം ബാക്ടീരിയയുടെ സാന്നിധ്യം കണ്ടെത്തിയതിനെ തുടർന്നാണ് കഴിഞ്ഞ ദിവസം ഓപ്പറേഷൻ തിയറ്റർ അടച്ചിടുകയും നേരത്തെ നിശ്ചയിച്ചിരുന്ന ചില ശസ്ത്രക്രിയകള്‍ താത്കാലികമായി മാറ്റി വയ്ക്കുകയും ചെയ്തത്. മന്ത്രി വീണാ ജോര്‍ജ് രാജിവയ്ക്കണമെന്നതടക്കമുള്ള മുദ്രാവാക്യങ്ങളുമായി ആശുപത്രി വളപ്പിലെത്തിയ യൂത്ത് കോണ്‍ഗ്രസ് പ്രവര്‍ത്തകര്‍ സൂപ്രണ്ടിനെ ഓഫീസില്‍ ഉപരോധിച്ചു. യൂത്ത് കോണ്‍ഗ്രസ് നെയ്യാറ്റിന്‍കര ബ്ലോക്ക് കമ്മിറ്റിയുടെ നേതൃത്വത്തില്‍ നടന്ന ഉപരോധ സമരത്തിന് നിയോജകമണ്ഡലം പ്രസിഡന്‍റ് വിനീത് നേതൃത്വം നല്‍കി. നേതാക്കളായ ഋഷി എസ്. കൃഷ്ണ, ഷൈന്‍ദാസ്, ശ്യാംലാല്‍, അഹമ്മദ് റൈസ്, അരുണ്‍, ഹരി, അരുണ്‍ സേവ്യര്‍ എന്നിവര്‍ പ്രതിഷേധ സമരത്തില്‍ പങ്കെടുത്തു. നെയ്യാറ്റിന്‍കര പോലീസ് സ്ഥലത്തെത്തി പ്രതിഷേധ സമരക്കാരെ അറസ്റ്റ് ചെയ്ത് നീക്കി.

ഇഎസ്ഐ ക്വാര്‍ട്ടേഴ്സുകള്‍ നിലംപൊത്താറായ നിലയില്‍

അന്തിയുറങ്ങുന്നത് ജീവന്‍ പണയംവച്ച് പേരൂര്‍ക്കട: ഇഎസ്ഐ ആശുപത്രി ജീവനക്കാര്‍ താമസിക്കുന്ന ക്വാര്‍ട്ടേഴ്സുകള്‍ നിലംപൊത്താറായ നിലയില്‍. 12 ഓളം വരുന്ന ക്വാര്‍ട്ടേഴ്സുകളിലായി ജീവനക്കാരും അവരുടെ ആശ്രിതരുമായി ഏകദേശം 40 പേരുണ്ട്. മിക്ക കെട്ടിടങ്ങള്‍ക്കും 60 വര്‍ഷത്തെ പഴക്കമാണ് ഉള്ളത്. കേന്ദ്രസര്‍ക്കാരിന്റെ കീഴിലുള്ള ഇഎസ്ഐ കോര്‍പ്പറേഷനിലെ ക്വാര്‍ട്ടേഴ്സുകളുടെ ദുരവസ്ഥയെക്കുറിച്ച് വര്‍ഷങ്ങളായി ജീവനക്കാര്‍ തന്നെ പറഞ്ഞുവരുന്നതാണ്. കേരളത്തിലെ വിവിധ ജില്ലകളില്‍ നിന്നുള്ളവരാണ് ഇവിടെ ക്വാര്‍ട്ടേഴ്സുകള്‍ എടുത്തു താമസിക്കുന്നത്. 90 ശതമാനം വീടുകളുടെയും മേല്‍ക്കൂരയില്‍ ടാര്‍പോളിന്‍ കെട്ടിയിരിക്കുന്നതുകാണാം. കെട്ടിടങ്ങളുടെ മേല്‍ക്കൂരകള്‍ ഇളകുകയും ഓടുകള്‍ പൊട്ടുകയും ചെയ്തിട്ടുണ്ട്. അതിനൊപ്പം കോണ്‍ക്രീറ്റ് കെട്ടിടങ്ങളില്‍ ഈര്‍പ്പം പിടിച്ചു പായല്‍ വളര്‍ന്ന നിലയിലുമാണ്. മിക്ക വീടുകളുടെയും അടുക്കള ഭാഗങ്ങളില്‍ ആസ്ബസ്റ്റോസ് ഷീറ്റുകളും പാളകളും മറ്റും കാണാനാകും. വെള്ളം ഉള്ളിലേക്ക് വീഴാതിരിക്കാന്‍ ചെയ്തിരിക്കുന്നവയാണ് ഇത്. കെട്ടിടങ്ങളുടെ അവസ്ഥ വിലയിരുത്തുന്നതിനായി ഈ മാസം ഒടുവില്‍ കേന്ദ്രസംഘം പേരൂര്‍ക്കടയിലേക്ക് എത്തുന്നുണ്ട്. അങ്ങനെയെങ്കില്‍ കെട്ടിടങ്ങള്‍ പൊളിച്ചുമാറ്റി ജീവനക്കാരുടെ സുരക്ഷ ഉറപ്പാക്കാനായിരിക്കും അവര്‍ ശ്രമിക്കുക. എന്നാല്‍ നിരവധി ജില്ലകളിലുള്ളവര്‍ താമസിക്കുന്ന പ്രസ്തുത വീടുകള്‍ ഒഴിഞ്ഞുകൊടുത്താല്‍ ഇവര്‍ കൂട്ടത്തോടെ എവിടെ താമസിക്കുമെന്ന ചോദ്യം ഉയരുന്നുണ്ട്. അതേസമയം അത്യാഹിതം ഉണ്ടാകുന്നതിനു മുമ്പ് ജീവനക്കാരെ മാറ്റി കെട്ടിടങ്ങള്‍ പൊളിച്ചുനീക്കേണ്ടതുണ്ട്. കെട്ടിടങ്ങള്‍ അറ്റകുറ്റപ്പണി ചെയ്യാന്‍ സാധിക്കാത്തവിധം ചുമരുകള്‍പോലും ഇളകിവീഴാറായ നിലയിലാണ്. ഇഎസ് ഐ കോര്‍പ്പറേഷനാണ് എന്തെങ്കിലും ചെയ്യേണ്ടതെന്നും ജീവനക്കാരുടെ സുരക്ഷ ഉറപ്പാക്കുന്നതിനൊപ്പം അവര്‍ക്കു സ്വസ്ഥമായി കിടന്നുറങ്ങാനുള്ള സാഹചര്യവും ഉണ്ടാകേണ്ടതുണ്ടെന്നും പേരൂര്‍ക്കട ഇ.എസ്.ഐ ആശുപത്രി സൂപ്രണ്ട് ഡോ. സെന്‍റ് ജോര്‍ജ് പറഞ്ഞു.

കൊങ്ങണംഭദ്രകാളി ക്ഷേത്രത്തിൽ മോഷണം

നെടുമങ്ങാട്: കെ‌ാങ്ങണം ഭദ്രകാളി ക്ഷേത്രത്തിൽ കമ്മിറ്റി ഒ‌ാഫിസിലെയും കാണിക്കവഞ്ചിയുടെയും പൂട്ടു തകർത്ത് മോഷണം. കമ്മിറ്റി ഒ‌ാഫിസിൽ ഉണ്ടായിരുന്ന 20,000 രൂപയോളം കവർന്നതായി ക്ഷേത്ര ഭാരവാഹികൾ പറഞ്ഞു. ചൊവാഴ്ച്ച രാത്രിയാണ് മോഷണം. നടന്നത്. ആര്യനാട് പെ‌ാലീസ് അന്വേഷണം ആരംഭിച്ചു

പ്രണയമഞ്ഞ് പെയ്ത ഓഗസ്റ്റ് സന്ധ്യ..!

തിരുവനന്തപുരം: പുതിയ കാലത്തെ ഉന്മാദം തുടിക്കുന്ന പ്രണയവും ഒരു ചെന്പനീർപ്പൂവിന്‍റെ മണമുള്ള ഓമൽ പ്രണയവും വൈലോപ്പിള്ളി സംസ്കൃതി ഭവന്‍റെ സന്ധ്യയിൽ ഇന്നലെ മഞ്ഞിൽ കണങ്ങളായി പൊഴിഞ്ഞു വീണു... പാടി പെയ്ത പ്രണയ വർഷങ്ങളെ ഉണർത്തുവാൻ വൈലോപ്പിള്ളി സംസ് കൃതി ഭവൻ ഒരുക്കിയ അനുരാഗത്തിന്‍റെ ഓഗസ്റ്റിന്‍റെ സമാപന സന്ധ്യയിൽ എസ്.പി. ദേവാനന്ദും ദേവിക വി. നായരും നവതരംഗമായി. അഴലിന്‍റെ ആഴങ്ങളിൽ എന്നു പേരിട്ട പ്രണയസംഗീതത്തിൽ 2000 മുതൽ 2025 വരെയുള്ള മലയാളം, തമിഴ്, ഹിന്ദി പ്രണയഗാനങ്ങൾ നിറഞ്ഞു. 2019-ൽ പുറത്തിറങ്ങിയ അന്പിളി എന്ന ചിത്രത്തിലെ ആരാധികെ... എന്ന ഗാനത്തിലെ എന്‍റെ നെഞ്ചാകെ നീയല്ലെ... എന്ന വരികൾ യുവത്വത്തിന്‍റെ ഹൃദയമിടിപ്പായി... കഭി അൽവിദാ നകഹന എന്ന സിനിമയിലെ മിതുവാ... ദേവാനന്ദ് പാടിയതും വേറിട്ട പ്രണയത്തിന്‍റെ മാറ്റൊലിയായി മുഴങ്ങി.... ഹാരിസ് ജയരാജിന്‍റെ സംഗീതത്തിൽ ഒരു കാലം കൊണ്ടാടിയ വസീഗര... എന്ന ഗാനം ദേവിക പാടിയത് ബോംബെ ജയശ്രീയുടെ സംഗീതഭാവം ആവാഹിച്ചാണ്. ഇതോടൊപ്പം സ്വം എന്ന ചിത്രത്തിലെ ഒരു ചെന്പനീർ പൂവിറുത്തു ഞാനോമലേ... എന്ന ഗാനവും അലിഞ്ഞുചേർന്നു. അനുരാഗത്തിന്‍റെ ഓഗസ്റ്റിന്‍റെ ഭാഗമായി വൈലോപ്പിള്ളി സംസ്കൃതി ഭവൻ സംഘടിപ്പിച്ച പ്രണയ ഗാനാലാപന മത്സര വിജയികൾക്കുള്ള സമ്മാനദാനം വിജോയ് അലക്സാണ്ടറും ലേഖ കെ. നായരും ചേർന്നു സമ്മാനിച്ചു. സംസ്കൃതി ഭവൻ വൈസ് ചെയർമാൻ ജി. എസ്. പ്രദീപ്, മെന്പർ സെക്രട്ടറി പി. എസ്. മനേഷ് എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]