ഡോ. ജാൻസി ജയിംസിന്‍റെ രണ്ടു പുസ്തകങ്ങൾ പ്രകാശനം ചെയ്തു

തിരുവനന്തപുരം: മുൻ വൈസ് ചാൻസലർ ഡോ. ജാൻസി ജയിംസിന്‍റെ ഇംഗ്ലീഷിലുള്ള രണ്ടു പുസ്തകങ്ങൾ പ്രകാശനം ചെയ്തു. ഫെമിനിസ്റ്റ് സാഹിത്യത്തെക്കുറിച്ചുള്ള പഠനങ്ങളുടെ സമാഹാരമായ ’ എംപവറിംഗ് സബ് വേർഷൻസ് ’ മുൻ ചീഫ് സെക്രട്ടറി കെ. ജയകുമാർ തിരുവനന്തപുരം എം.ജി. കോളജ് മുൻപ്രിൻസിപ്പൽ ഡോ. ഹേമ നായർക്കു നല്കി പ്രകാശനം ചെയ്തു.

സമൂഹം, ഭാഷ, സാഹിത്യം എന്നീ മേഖലകളിലുള്ള പഠനങ്ങളുടെ സമാഹാരമായ ’എക്സ്പോസിഷൻസ് മുൻ അംബാസഡർ ടി.പി. ശ്രീനിവാസൻ പോണ്ട ിച്ചേരി സെൻട്രൽ യൂണിവേഴ്സിറ്റിയിലെ മുൻ ഇംഗ്ലീഷ് വകുപ്പ് മേധാവി ഡോ. മുരളി ശിവരാമകൃഷ്ണനു നല്കി പ്രകാശനം ചെയ്തു.

പ്രിയദർശിനി പബ്ലിക്കേഷൻസ് വൈസ് ചെയർമാൻ അഡ്വ. പഴകുളം മധു അധ്യക്ഷത വഹിച്ചു. ഡോ. ജാൻസി ജയിംസ് പുസ്തകങ്ങൾ പരിചയപ്പെടുത്തി. വല്ലാത്ത് ബുക്സ് എംഡി ഡോ. കല്യാണി വല്ലാത്ത് സ്വാഗതവുംഡോ. എൻ. സുദീപ് നന്ദിയും പറഞ്ഞു.

ADVERTISEMENT

ക്രൈസ്റ്റ് നഗർ ഇംഗ്ലീഷ് ഹയർ സെക്കൻഡറി സ്കൂളിൽ ഓണാഘോഷം

തിരുവനന്തപുരം: ക്രൈസ്റ്റ് നഗർ ഇംഗ്ലീഷ് ഹയർ സെക്കൻഡറി സ്കൂളിലെ ഓണാഘോഷപരിപാടി ഓണപ്പൊലിമ 2025-26ന് തിരിതെളിഞ്ഞു. ഗിരീഷ് പരുത്തിമഠം ഭദ്രദീപം കൊളുത്തി ഉദ്ഘാടനം ചെയ്ത ചടങ്ങിൽ സ്കൂൾ മാനേജർ ഫാ. പോൾ മങ്ങാട് സിഎംഐ അധ്യക്ഷത വഹിച്ചു. പ്രിൻസിപ്പൽ ഫാ. ജിമ്മി മൂലയിൽ സിഎംഐ, വൈസ് പ്രിൻസിപ്പൽ ഫാ. റോബിൻ പതിനാറിൽചിറ സിഎംഐ, ഹെഡ്മിസ്ട്രസ് സംഗീത ഗോപീകൃഷ്ണൻ, അക്കാഡമിക് കോർഡിനേറ്റർ നിന്നു സൂസൻ ജോസഫ് എന്നിവർ സന്നിഹിതരായിരുന്നു. കണ്‍വീനർമാരായ താര ഗോപിനാഥ്, എസ്. ആർ. ശാനിലി എന്നിവർ ഓണാഘോഷ പരിപാടികൾക്ക് നേതൃത്വം നൽകി. ഓണപ്പരിപാടികൾക്ക് നിറംപകർന്നുകൊണ്ട് ബിഗ് എഫ്എമ്മിന്‍റെ മാവേലി സീസണ്‍-3യുടെ തത്സമയ പരിപാടി നടന്നു. തുടർന്ന് കുട്ടികളും അധ്യാപകരും പങ്കെടുത്ത വർണാഭമായ കലാപരിപാടികളും ഉണ്ടായിരുന്നു.

ഉള്ളൂരില്‍ ഒരുമാസമായി കുടിവെള്ളമില്ല

മെഡിക്കല്‍കോളജ്: ഉള്ളൂരില്‍ ഒരുമാസമായി കുടിവെള്ളമില്ലെന്നു പരാതി. കൊച്ചുള്ളൂര്‍, പോങ്ങുമ്മൂട് എന്നിവിടങ്ങളിലെ 120 ലേറെ കുടുംബങ്ങളായി വെള്ളം കിട്ടാതെ വലയുന്നത്. രാത്രി സമയത്ത് പ്രഷര്‍ കൂടുമ്പോള്‍ മാത്രം നൂല്‍വണ്ണത്തില്‍ വെള്ളം ലഭിക്കാറുണ്ടെന്ന് പ്രദേശവാസികള്‍ പറയുന്നു. ഈ ഭാഗത്തേക്ക് കടന്നുവരുന്ന എസി പൈപ്പിലെ അടവാണ് പ്രശ്‌നത്തിനു കാരണമെന്നാണ് പ്രദേശവാസികള്‍ പറയുന്നത്. വാട്ടര്‍ അഥോറിറ്റി പോങ്ങുമ്മൂട് സെക്‌ഷന്‍ പരിധിയിലുള്ള സ്ഥലമാണ് ഇവിടം. പൈപ്പിലെ അടവ് കണ്ടുപിടിക്കാനും അറ്റകുറ്റപ്പണി നടത്താന്‍ അധികൃതര്‍ തയ്യാറാകുന്നില്ല. പ്രശ്‌നം സംബന്ധിച്ച് വാട്ടര്‍ അഥോറിറ്റിക്ക് നിരവധി തവണ നിവേദനങ്ങള്‍ നല്‍കിയിട്ടും നടപടിയുണ്ടായിട്ടില്ല. റോഡ് ഉപരോധം ഉള്‍പ്പെടെയുളള സമരമാര്‍ഗങ്ങളിലേക്കു തിരിയുമെന്നാണ് നാട്ടുകാര്‍ പറയുന്നത്. അതിനിടെ ഉള്ളൂരില്‍ സ്വകാര്യാശുപത്രിക്കു സമീപത്തെ പ്രിമോ പൈപ്പ് വീണ്ടും പൊട്ടിയതോടെ റോഡ് വെള്ളക്കെട്ടായി മാറിയിട്ടുണ്ട്. മെഡിക്കല്‍കോളജിലേക്കും പോങ്ങുമ്മൂട്ടിലേക്കുമുള്ള പൈപ്പുകളാണ് പൊട്ടിയതെന്നാണു സൂചന. ഈ ഭാഗത്ത് അറ്റകുറ്റപ്പണി കഴിഞ്ഞിട്ട് ഒരു മാസം പിന്നിട്ടതേയുള്ളൂ.

ഉദ്ഘാടനം കഴിഞ്ഞിട്ടും വഴിയിടം അടഞ്ഞു തന്നെ...

പേരൂര്‍ക്കട: മേയര്‍ ആര്യ രാജേന്ദ്രന്‍ 2024 നവംബര്‍ 30ന് ഉദ്ഘാടനം ചെയ്ത വഴിയിടം അടഞ്ഞുകിടക്കാന്‍ തുടങ്ങിയിട്ട് ഒമ്പതുമാസം. കുടപ്പനക്കുന്ന് സിവില്‍സ്റ്റേഷന്‍ കോമ്പൗണ്ടില്‍ കളക്ടറേറ്റിന് എതിര്‍വശത്തായി നിര്‍മാണം പൂര്‍ത്തീകരിച്ച വഴിയിടത്തിൽ കഫറ്റേറിയ, അടുക്കള, പുരുഷന്മാര്‍ക്കും സ്ത്രീകള്‍ക്കുമുള്ള ടോയ്‌ലെറ്റുകള്‍, വിശ്രമസ്ഥലം, മുലയൂട്ടല്‍ കേന്ദ്രം, നാപ്കിന്‍ വെന്‍ഡിംഗ് സൗകര്യം എന്നിവയാണ് ഏര്‍പ്പെടുത്തിയിട്ടുള്ളത്. ഉദ്ഘാടനം കഴിഞ്ഞശേഷം അടച്ചിട്ട കേന്ദ്രത്തിന്‍റെ പിറകുവശത്തെ ജനാലകളിലും കോമ്പൗണ്ടിലെ ഗേറ്റും വരെ കാടുകയറിയ നിലയിലാണ്. വഴിയിടത്തിന് പൊതുവായി ഒരു ചുറ്റുമതില്‍ നിര്‍മിച്ചിട്ടുണ്ട്. ഇതിനുള്ളില്‍ മദ്യക്കുപ്പികളും ചപ്പുചവറുകളും കൂടിക്കിടക്കുന്നതും കാണാനാകും. രാത്രികാലങ്ങളില്‍ സാമൂഹികവിരുദ്ധരുടെ ഇടത്താവളമായി ഇവിടം മാറിയിരിക്കുകയാണ്. സ്ത്രീകള്‍ക്കും പുരുഷന്മാര്‍ക്കും അമ്മമാര്‍ക്കും ഏറെ പ്രയോജനം ചെയ്യേണ്ടതായ വഴിയിടമാണ് മാസങ്ങളായി അടഞ്ഞുകിടക്കുന്നത്. അതേസമയം റവന്യുവകുപ്പുമായി ബന്ധപ്പെട്ട പ്രശ്‌നമാണ് വഴിയിടം അടഞ്ഞുകിടക്കാന്‍ കാരണമെന്നതാണു സൂചന. ലേല നടപടികളിലേക്കു അധികൃതര്‍ കടന്നിട്ടുണ്ടെങ്കിലും ഏറ്റെടുക്കാന്‍ ആളെത്തിയിട്ടില്ലാത്തതാണ് വഴിയിടം അടഞ്ഞുകിടക്കാന്‍ കാരണമെന്നാണു തിരുവനന്തപുരം നഗരസഭയുടെ കുടപ്പനക്കുന്ന് സോണല്‍ ഓഫീസ് അധികൃതര്‍ പറയുന്നത്.

പാസ് ദുരുപയോഗം: കടത്തിയ തടികൾ പിടികൂടി

പാലോട്: പാലോട് റേഞ്ചിന്‍റെ പരിധിയിൽ പാസ് ദുരുപയോഹം ചെയ്ത് തേക്കിൻ തടികൾ കടത്തിയ ലോറിയും തടികളും വനം ഉദ്യോഗസ്ഥർ പിടിച്ചെടുത്തു. കോന്നി റെയിഞ്ച് ഓഫീസർ ഒപ്പിട്ട പാസ് ഉപയോഗിച്ച് ഒന്നിലധികം തവണ വിവിധ സ്ഥലങ്ങളിൽ നിന്ന് തടി കടത്താൻ ശ്രമിച്ച സംഘത്തെയാണ് പിടികൂടിയത്. കോന്നി കുമ്മന്നൂർ ഭാഗത്തുനിന്ന് വെള്ളറടയിലേക്ക് തടി കടത്താൻ കോന്നി റെയിഞ്ച് ഓഫീസിൽനിന്ന് നൽകിയ പാസ് ഉപയോഗിച്ചാണ് മറ്റു സ്ഥലങ്ങളിൽ നിന്ന് തടി കടത്താൻ ശ്രമിച്ചത്. സംഭവത്തിൽ ലോറി ഡ്രൈവർ ആയ നെയ്യാറ്റിൻകര ആനാവൂർ മണ്ണടി കോണത്ത് റോഡരികത്ത് വീട്ടിൽ അഖിലിനെയും കടത്താൻ ഉപയോഗിച്ച ലോറിയും, 70 തേക്കിൻ തടികളും കച്ചടിയിലെടുത്തു കോടതിയിൽ ഹാജരാക്കി. കേരളത്തിലെ വിവിധ സ്ഥലങ്ങളിൽ നിന്ന് ഉരുളൻ തടികൾ വ്യാജ പാസുകൾ ഉപയോഗിച്ച് തമിഴ്നാട്ടിലേക്ക് കടത്തുന്നുവെന്ന് കേരള തടിമിൽ അസോസിയേഷൻ വനം മന്ത്രിക്ക് പരാതി നൽകിയിരുന്നു. പാലോട് റേഞ്ച് ഓഫീസർ വിപിൻ ചന്ദ്രൻ. വി, സെക്‌ഷൻ ഫോറസ്റ്റ് ഓഫീസർമാരായ ബാബു, ബിജു, ഫോറസ്റ്റ് വാച്ചർ മോഹൻദാസ് എന്നിവരുടെ നേതൃത്വത്തിലാണ് ലോറിയും തടിയും പിടികൂടിയത്.

ഓണത്തിന്‍റെ വരവ് അറിയിച്ച് വര്‍ണ പന്തുകള്‍

നേമം : ഓണമെന്ന് കേട്ടാല്‍ കുട്ടികള്‍ക്ക് ആഘോഷവും ഉത്സാഹവുമാണ്. പതിവ് തെറ്റിക്കാതെ ഇത്തവണയും കുട്ടികളെ ആകര്‍ഷിക്കാന്‍ ഓണത്തിന് ദിവസങ്ങള്‍ മാത്രം ബാക്കിയുള്ളപ്പോള്‍ പല നിറത്തിലുള്ള പന്തുകള്‍ കടകളില്‍ സ്ഥാനം പിടിച്ചു . ഓണ വരവ് അറിയിച്ച് വിപണിയിലേയ്ക്ക് ആദ്യമെത്തുന്നവയാണ് ഈ വര്‍ണ പന്തുകള്‍. കര്‍ക്കിടകത്തിന് മുമ്പ് വര്‍ണ പന്തുകളുടെ ഉത്പാദനം തുടങ്ങും എന്നാല്‍ മാത്രമേ ഓണത്തിന് മുമ്പ് എല്ലാ കടകളിലും പന്ത് എത്തിക്കാനാകൂ. നഗരമെന്നോ നാട്ടിന്‍പുറമെന്നോ വ്യത്യാസമില്ലാതെ എല്ലാ കടക്കാരും ഓണത്തോടനുബന്ധിച്ച് ഈ പന്തുകള്‍ വില്‍പ്പനയ്‌ക്കെടുക്കും. ഓണത്തിന് മാത്രമേ ഇത്തരം പന്തുകള്‍ കടകളില്‍ വ്യാപകമാകാറുള്ളൂ. തമിഴ്‌നാട്ടില്‍ നിന്നുമെത്തുന്ന സംഘങ്ങളാണ് ഈ പന്ത് നിര്‍മ്മിക്കുന്നത്. റബ്ബര്‍പാലില്‍ കളറുകള്‍ ചേര്‍ത്ത് മോള്‍ഡില്‍ ഒഴിച്ച് ഗ്യാസ് നിറച്ചാണ് പന്തുകള്‍ നിര്‍മ്മിക്കുന്നത്. പല വലിപ്പത്തിലുള്ള പന്തുകള്‍ മറ്റ് കളറുകള്‍ക്ക് പുറമെ സ്വര്‍ണം, വെള്ളി നിറത്തിലും ലഭിക്കുന്നത് പ്രത്യേകതയാണ്. തമിഴ്‌നാട്ടില്‍ എല്ലാ സമയത്തും ഈ വര്‍ണ പന്തുകള്‍ ലഭിക്കും. കേരളത്തില്‍ ഓണത്തിന് മാത്രമേ ഇത്തരം പന്തുകള്‍ കൂടുതലായി വില്‍പ്പന നടത്താനാകൂ. അതു കൊണ്ട് ഓണ സീസണമാവുമ്പോള്‍ മൊത്ത കച്ചവടക്കാര്‍ തമിഴ്‌നാട്ടില്‍ നിന്നും തൊഴിലാളികളെ വരുത്തി പന്തുകള്‍ നിര്‍മിക്കും. ദിവസവും നിര്‍മുക്കുന്ന പന്തുകളുടെ എണ്ണം നോക്കിയാണ് ഇവര്‍ക്ക് കൂലി ലഭിക്കുന്നത്. പന്ത് നിര്‍മിച്ച് കഴിഞ്ഞാല്‍ അവ എണ്ണി വലിയ വലയ്ക്കകത്താക്കിയാണ് കടകളിലെത്തിക്കുന്നത്. സീസണ്‍ ആകുമ്പോള്‍ വര്‍ണ പന്തുകള്‍ വാഹനങ്ങളുടെ മുകളില്‍ വച്ച് വില്‍പ്പനയ്ക്ക് കൊണ്ടു പോകുന്നതും കൗതുക കാഴ്ചയാണ്.

നേമം സഹകരണ ബാങ്ക്: ഓണക്കാലത്ത് തുക ലഭിക്കുമെന്ന പ്രതീക്ഷയില്‍ നിക്ഷേപകര്‍

നേമം : നേമം സഹകരണ ബാങ്കില്‍ നിന്നും ഓണക്കാലത്ത് തുച്ഛമായ തുകയെങ്കിലും വിതരണം ചെയ്യുമെന്ന പ്രതീക്ഷയിലാണ് നിക്ഷേപകര്‍. അഡ്മിനിസ്‌ട്രേറ്റര്‍ ഭരണം ഏറ്റെടുത്ത് രണ്ടാഴ്ച പിന്നിടുമ്പോള്‍ വായ്പ കൊടുത്ത വകയില്‍ കുറെ പണം പിരിച്ചെടുക്കാനായിട്ടുണ്ട്. ഈ തുക പ്രത്യേക അക്കൗണ്ട് തുടങ്ങി അതില്‍ നിക്ഷേപിച്ച് നിക്ഷേപകര്‍ക്ക് പണം വരുന്നത് അനുസരിച്ച് ആദ്യം പണം കിട്ടേണ്ടവരുടെ ലിസ്റ്റ് തയ്യാറാക്കി വിതരണം ചെയ്യാനാണ് തീരുമാനം. നേമം ബാങ്കിലെ പെന്‍ഷന്‍ വിതരണവും നിര്‍ത്തി സമീപത്തെ മറ്റൊരു സഹകരണ ബാങ്ക് വഴിയാണ് ഇപ്പോള്‍ വിതരണം ചെയ്യുന്നത്. പെന്‍ഷന്‍ നല്‍കുന്നതിലും നേമം ബാങ്ക് വീഴ്ച വരുത്തിയതിനെ തുടര്‍ന്നാണ് ഈ നടപടി. 5 ലക്ഷം രൂപ അടിയന്തരമായി വിതരണം ചെയ്യണമെന്ന് നിക്ഷേപ കൂട്ടായ്മ രക്ഷാധികാരി ശാന്തിവിള മുജീബ് റഹ്‌മാനും കണ്‍വീനര്‍ കൈമനം സുരേഷും ആവശ്യപ്പെട്ടു. ക്രമക്കേടുമായി ബന്ധപ്പെട്ട സഹകരണ വകുപ്പിന്‍റെ 65 വകുപ്പ് പ്രകാരം അന്വേഷണത്തിന്റെ അന്തിമ റിപ്പോര്‍ട്ടിലെ വിവരങ്ങള്‍ വെച്ച് അടുത്ത് ഭരണ സമിതി അംഗങ്ങളുടെ ബാധ്യതകള്‍ നിശ്ചയിച്ച് റവന്യൂ റിക്കവറി നടപടികള്‍ സ്വീകരിക്കുന്ന നടപടികളിലേയ്ക്ക് കടക്കും. അന്വേഷണത്തില്‍ ഓരോ ഭരണ സമിതിയംഗങ്ങളില്‍ നിന്നും മുന്‍ സെക്രട്ടറിമാരില്‍ ഈടാക്കേണ്ട തുക അന്വേഷണ ഉദ്യോഗസ്ഥന്‍ കണക്കാക്കിയിട്ടുണ്ട്. മുന്‍ സെക്രട്ടറിമാര്‍ നടത്തിയത് ഗുരുതമായ നിയമലംഘനങ്ങളാണെന്ന് റിപ്പോര്‍ട്ടില്‍ പറയുന്നു. നിക്ഷേപ തുക മടക്കി നല്‍കണമെന്നാവശ്യപ്പെട്ട് നിക്ഷേപ കൂട്ടായ്മയുടെ നേതൃത്വത്തില്‍ സെക്രട്ടറിയേറ്റിന് മുന്‍വശത്ത് തിരുവോണത്തിന് നിരാഹാര സമരം നടത്തും.

പ്രഫ. എം.കെ.സാനു ദാർശനികനായ എഴുത്തുകാരൻ: ഡോ. വി.പി.ജോയി

തിരുവനന്തപുരം: ദാർശനികനായ എഴുത്തുകാരനായിരുന്നു പ്രഫ. എം.കെ.സാനുവെന്ന് മുൻ ചീഫ് സെക്രട്ടറിയും കവിയുമായ ഡോ. വി.പി.ജോയി. പ്രഫ. എൻ.കൃഷ്‌ണപിള്ള ഫൗണ്ടേഷൻ സംഘടിപ്പിച്ച പ്രഫ. എം.കെ.സാനു അനുസ്മരണം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. പ്രഫ.എൻ.കൃഷ്ണപിള്ളയുടെ ശിഷ്യനും ഫൌണ്ടേഷന്‍റെ ആദ്യ ചെയർമാനുമായിരുന്ന പ്രഫ.എം.കെ.സാനുവിന്‍റെ ഛായാചിത്രം ചടങ്ങിൽ വി.പി.ജോയി അനാച്ഛാദനം ചെയ്തു. പന്ന്യൻ രവീന്ദ്രൻ അധ്യക്ഷനായ ചടങ്ങിൽ ഡോ. എം.എൻ.രാജൻ എം.കെ.സാനു അനുസ്മരണ പ്രഭാഷണം നടത്തി. ലീലാ പണിക്കർ ഭദ്രദീപം തെളിച്ച് ആരംഭിച്ച ചടങ്ങിന് ഫൌണ്ടേഷൻ സെക്രട്ടറി ഡോ. എഴുമറ്റൂർ രാജരാജവർമ്മ സ്വാഗതവും ട്രഷറർ ബി.സനിൽ കുമാർ നന്ദിയും പറഞ്ഞു. എസ്.ഗോപിനാഥ്‌, ഡോ. സി.ഉദയകല, ഡോ. വി.എസ്.വിനീത് എന്നിവർ സംസാരിച്ചു.

ഹിന്ദുത്വ തീവ്രവാദം ഇന്ത്യക്ക് നൽകിയത് കടുത്ത ദാരിദ്ര്യം: എ.വിജയരാഘവൻ

കോവളം : ഹിന്ദുത്വ തീവ്രവാദം ഇന്ത്യക്ക് നൽകിയത് കടുത്ത ദാരിദ്രവും ശതകോടീശ്വരൻമാർക്ക് തീവെട്ടിക്കൊള്ള നടത്താനുള്ള അവസരവും മാത്രമാണെന്ന് സിപിഎം പോളിറ്റ്ബ്യൂറോ അംഗം എ.വിജയരാഘവൻ. സിപിഎം കോവളം ഏരിയാ കമ്മിറ്റി മുക്കോലയിൽ സംഘടിപ്പിച്ച മഹാത്മാ അയ്യൻകാളി ജന്മദിനാചരണം ഉദ്ഘാടനം ചെയ്ത് സംസാരിക്കുകായിരുന്നു അദ്ദേഹം. വില്ലുവണ്ടിയിലൂടെ എന്നല്ല നടന്ന് പോലും പോകുവാൻ സാധിക്കാത്ത സാഹചര്യത്തിൽ ആണ് അതിനെതിരെ അയ്യൻകാളി വില്ലുവണ്ടിയിൽ യാത്ര നടത്തിയത്. നല്ല മനുഷ്യർ നടത്തിയ ത്യാഗനിർഭരമായ പോരാട്ടങ്ങളും സമരങ്ങളും ആണ് ഇവ നമുക്ക് നേടി തന്നത്. സമരത്തിലൂടെ അല്ലാതെ നമ്മൾ ഒന്നും നേടിയിട്ടില്ല. - എ.വിജയരാഘവൻ പറഞ്ഞു. ജാതി മതിലുകൾ ഉള്ള, ദളിത് പിന്നോക്ക വിഭാഗങ്ങൾക്ക് എതിരെ വലിയ ആക്രമണങ്ങൾ നടക്കുന്ന സംസ്ഥാനങ്ങൾ നമ്മുടെ രാജ്യത്തുണ്ട്. എന്നാൽ കേരളത്തിലെ അവസ്ഥ തികച്ചും വ്യത്യസ്തമാണ്. ഭാഷ, പേര്, വസ്ത്രം എന്നിവയിലൂടെ ഒക്കെ ജാതി തിരിച്ചറിയാൻ സാധിക്കുന്ന കാലത്ത് നിന്നും നമ്മൾ ഏറെ മാറി. കേരളത്തെ ഇന്ന് കാണുന്ന കേരളമാക്കി മാറ്റുന്നതിൽ ഇടതുപക്ഷ പ്രസ്ഥാനങ്ങൾക്കും കമ്യുണിസ്റ്റ് പാർട്ടിക്കും വലിയ പങ്കാണ് ഉള്ളതെന്നും അദ്ദേഹം പറഞ്ഞു. സിപിഎം കോവളം ഏരിയാ കമ്മിറ്റി നിർമ്മിച്ച അയ്യൻകാളി സ്മൃതി മണ്ഡപത്തിൽ എ.വിജയരാഘവൻ പുഷ്പാർച്ചന നടത്തി. യോഗത്തിൽ സിപിഎം കോവളം ഏരിയാ സെക്രട്ടറി എസ്.അജിത്ത് അധ്യക്ഷനായി. യോഗത്തിൽ കർഷക തൊഴിലാളി യൂണിയൻ സംസ്ഥാന പ്രസിഡന്‍റ് ആനാവൂർ നാഗപ്പൻ, സിപിഎം ജില്ലാ സെക്രട്ടേറിയറ്റ് അംഗം പി.എസ്.ഹരികുമാർ, ജില്ലാ കമ്മിറ്റി അംഗം പി. രാജേന്ദ്രകുമാർ, അയ്യൻകാളിയുടെ പിൻമുറക്കാരനായ മധുസൂദനൻ തുടങ്ങിയവർ പങ്കെടുത്തു. പികെഎസ് സംസ്ഥാന പ്രസിഡന്‍റ് വണ്ടിത്തടം മധു സ്വാഗതവും സിപിഎം ജില്ലാ കമ്മിറ്റി അംഗം വി. അനൂപ് നന്ദിയും പറഞ്ഞു.

ജില്ലയിൽ ഏറ്റവുമധികം പൂക്കൃഷി ഇത്തവണയും കാട്ടാക്കടയിൽ

കാട്ടാക്കട: തിരുവനന്തപുരം ജില്ലയിൽ ഏറ്റവുമധികം പൂക്കൃഷിയുള്ള നിയോജകമണ്ഡലം എന്ന റെക്കാർഡ് ഇക്കുറിയും കാട്ടാക്കടയ്ക്ക്.'നമ്മുടെ ഓണം നമ്മുടെ പൂക്കൾ' പദ്ധതിയിൽ കഴിഞ്ഞ നാലുവർഷത്തെ അപേക്ഷിച്ച് ഇക്കുറി കാട്ടാക്കടയിലെ ആറ് പഞ്ചായത്തുകളിലായി 104 ഏക്കറിലാണ് പൂക്കൃഷിയും പച്ചക്കറി കൃഷിയും നടത്തിയത്. പള്ളിച്ചൽ കൊറണ്ടിവിളയിൽ മാത്രം എട്ട് ഏക്കർ വിസ്തൃതിയിലാണ് പൂക്കൃഷി. കൊറണ്ടിവിള,നരുവാമൂട്,വെള്ളാപ്പള്ളി,മുക്കംപാലമൂട്,കാട്ടാക്കട പഞ്ചായത്തിലെ കൊറ്റംപള്ളി,കൊല്ലോട്,കട്ടയ്‌ക്കോട്,കുളത്തുമ്മൽ, മാറനല്ലൂർ പഞ്ചായത്തിലെ ക്രൈസ്റ്റ് നഗർ,മലയിൻകീഴ് പഞ്ചായത്തിലെ അന്തിയൂർക്കോണം,വിളപ്പിൽ പഞ്ചായത്തിലെ പടവൻകോട്,വിളപ്പിൽശാല, വിളവൂർക്കൽ പഞ്ചായത്തിലെ ശാന്തമൂല,പൊറ്റയിൽ എന്നിവിടങ്ങളിലാണ് ഇത്തവണ പൂക്കൃഷി നടത്തിയത്. ഒരേക്കറിൽ നിന്ന് 120 കിലോ വരെ വിളവെടുത്തു. ജലക്ഷാമം നേരിട്ടിരുന്ന കാട്ടാക്കടയിൽ ഐ.ബി.സതീഷ് എംഎൽഎയുടെ നേതൃത്വത്തിൽ ജലസമൃദ്ധി പദ്ധതിയുടെ ഭാഗമായി ഭൂഗർഭ ജലനിരപ്പ് ഉയർത്തി. മരങ്ങൾ വച്ചുപിടിപ്പിച്ചും സ്വാഭാവിക നീർത്തടങ്ങൾ സംരക്ഷിക്കുകയും ചെയ്തതോടെ തരിശുകിടക്കുന്ന കാട്ടാക്കട മണ്ഡലത്തിലെ മിക്കയിടങ്ങളിലും കൃഷിയെത്തി. ഓണത്തിന് മറുനാടൻ പൂക്കളെന്തിന്, നമുക്ക് പൂക്കളുണ്ടാക്കാമെന്നുള്ള ആശയം എംഎൽഎ നാലുവർഷം മുമ്പാണ് മുന്നോട്ടുവച്ചത്. കഴിഞ്ഞ വർഷങ്ങളിലേതുപോലെ ഇക്കുറിയും കാട്ടാക്കടക്കാർക്ക് സ്വന്തം പൂവ് കൊണ്ട് ഓണത്തെ വരവേൽക്കാം. ഇക്കൊല്ലത്തെ പൂകൃഷി വിളവെടുപ്പ് ഉത്സവം ഐ.ബി.സതീഷ് എംഎൽഎ ഉദ്ഘാടനം ചെയ്തു.

ഓണം സംസ്കാരത്തിന്‍റെ പ്രതീകം: പ്രഫ. മ്യൂസ് മേരി

തിരുവനന്തപുരം: ഓണം സംസ്കാരത്തിന്‍റെ പ്രതീകമാണെന്ന് സർവവിജ്ഞാനകോശം ഡയറക്ടറും പ്രമുഖ എഴുത്തുകാരിയുമായ പ്രഫ. മ്യൂസ് മേരി ജോർജ് അഭിപ്രായപെട്ടു. നാലാഞ്ചിറ സെന്‍റ് ജോൺസ് മോഡൽ ഹയർ സെക്കൻഡറി സ്കൂളിൽ നടന്ന ഓണത്തുമ്പികൾ - ജൂബിലി നിറവിൽ പൊന്നോണം പരിപാടി ഉത്ഘാടനം ചെയ്ത് പ്രസംഗിക്കുകയായിരുന്നു അവർ. ഓണത്തിന്‍റെ ദാർശനിക കാഴ്ചപ്പാട് എക്കാലവും നാടിന്‍റെ സംസ്കൃതിയുമായി ബന്ധപ്പെട്ടാണിരിക്കുന്നത്. പൈതൃക സംരക്ഷമാണ് ഓണം മുന്നോട്ടുവയ്ക്കുന്ന സാംസ്കാരിക മൂല്യമെന്നും അവർ പറഞ്ഞു. പ്രിൻസിപ്പൽ ഫാ. ജോസ് ചരുവിലിന്‍റെ അധ്യക്ഷതയിൽ വൈസ് പ്രിൻസിപ്പൽ അജീഷ് കുമാർ ,പി.ടി എ വൈസ് പ്രസിഡന്‍റ് സുരേഷ് വണ്ടാഡൻ ,റേഡിയോ ജോക്കി ജോസ്ലിൻ എന്നിവർ പ്രസംഗിച്ചു.

എയര്‍ കണ്ടീഷണറിന് തീപിടിച്ച് ബെഡ്‌റൂം കത്തിനശിച്ചു

പേരൂര്‍ക്കട: എയര്‍ കണ്ടീഷണറിന് തീപിടിച്ച് ബെഡ്‌റൂം കത്തിനശിച്ചു. വട്ടിയൂര്‍ക്കാവ് നെട്ടയം മാമ്പഴക്കുന്ന് ഉഷസ്സില്‍ റെജികുമാറിന്‍റെ വീട്ടിലെ എസിയാണ് ഷോര്‍ട്ട് സര്‍ക്യൂട്ടുമൂലം കത്തിയത്. തിരുവനന്തപുരം ഫയര്‍‌സ്റ്റേഷനില്‍ നിന്ന് ഉദ്യോഗസ്ഥരെത്തിയാണ് തീയണച്ചത്.

കുഞ്ഞിക്കൈകളിൽ നെൽച്ചെടിയുമായി ...

കള്ളിക്കാട്: കുഞ്ഞി കൈകളിൽ നെൽച്ചെടിയുമായി കള്ളിക്കാട് സെന്‍റ് അന്നാസിലെ സ്കൂൾ വിദ്യാർഥികൾ. ശലഭം ബാല കർഷക ക്ലബ്ബിന്‍റെ ആഭിമുഖ്യത്തിൽ ഞാറ് നടീൽ ഉത്സവം സ്കൂൾ മാനേജർ റവ. ഫാദർ ബിനു വർഗീസ് ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് പന്ത ശ്രീകുമാർ, പഞ്ചായത്ത് മെമ്പർമാരായ ദിലീപ്, ശ്രീകല, ബിന്ദു.വി.രാജേഷ് എന്നിവർ പങ്കെടുത്തു. നെൽച്ചെടി നടുന്നതും പരിപാലിക്കുന്നതുമായ കാര്യങ്ങൾ കർഷകയായ പുഷ്പാ ശോഭി വിദ്യാർത്ഥികൾക്ക് വിശദമാക്കി. വിവിധ ക്ലാസുകളിൽ നെൽകൃഷിയുമായി ബന്ധപ്പെട്ട പഠന പ്രവർത്തനങ്ങൾ വിദ്യാർത്ഥികൾക്ക് പഠിക്കാനുള്ളതിനാലാണ് സ്കൂൾ കള്ളിക്കാട് പാട്ടേക്കോണത്ത് നെൽപ്പാടം ഒരുക്കി കൃഷി ആരംഭിച്ചത്. ഹെഡ്മാസ്റ്റർ എസ്. സെൽവരാജ്, അധ്യാപികമാരായ സിൻസി കെ. ഫ്രാൻസിസ്, ലിജി, ചൈതന്യ, അശ്വതി, മദർ പിടിഎ പ്രസിഡന്‍റ് പ്രിയ രാജീവ് എന്നിവർ ഞാറു നടീൽ ഉത്സവത്തിനു നേതൃത്വം നൽകി.

ജില്ലാ വികസന സമിതി യോഗം ചേർന്നു

തിരുവനന്തപുരം: ജില്ലാ വികസന സമിതിയുടെ ആഗസ്റ്റ് മാസത്തെ യോഗം കളക്ടറേറ്റ് കോൺഫറൻസ് ഹാളിൽ ജില്ലാ കളക്ടർ അനു കുമാരിയുടെ അധ്യക്ഷതയിൽ ചേർന്നു. തിരുവനന്തപുരം, ആറ്റിങ്ങൽ ലോക്സഭാ മണ്ഡലങ്ങളിലെയും വട്ടിയൂർക്കാവ്, വർക്കല, ആറ്റിങ്ങൽ നിയമസഭ മണ്ഡലങ്ങളിലെയും വികസന പ്രവർത്തനങ്ങളുടെ നിലവിലെ പുരോഗതി യോഗത്തിൽ വിലയിരുത്തി. ഓണക്കാലത്തോടനുബന്ധിച്ച് ലഹരി പരിശോധന കർശനമാക്കേണ്ടതുണ്ടെന്നും ലഹരി കേസുകളിൽപ്പെടുന്ന കടകളുടെ ലൈസൻസുകൾ റദ്ദാക്കുന്ന നടപടി തുടരണമെന്നും വട്ടിയൂർക്കാവ് എംഎൽഎ വി.കെ.പ്രശാന്ത് പറഞ്ഞു. നഗരത്തിലെ സ്ട്രീറ്റ് ലൈറ്റുകളുടെ അറ്റകുറ്റപ്പണി അടിയന്തരമായി നടത്തണമെന്നും ഉദ്യോഗസ്ഥർക്ക് നിർദ്ദേശം നൽകി. വട്ടിയൂർക്കാവ് റവന്യൂ ടവറിലെ വില്ലേജ് ഓഫീസ് നിർമ്മാണം, തിരുവനന്തപുരം കോർപ്പറേഷനിലെ വെൻഡിങ് സോൺ, മേലേക്കാവ് ടൂറിസം പദ്ധതി, പട്ടം ഫ്ലൈ ഓവർ, പേരൂർക്കട മേൽപ്പാലം തുടങ്ങിയ വിഷയങ്ങളുടെ നിർമ്മാണ പുരോഗതിയും പ്രശാന്ത് എംഎൽഎ വിലയിരുത്തി. വട്ടിയൂർക്കാവ് മണ്ഡലത്തിലെ എംഎൽഎ റോഡ്, ഉദിയന്നൂർ റോഡ് എന്നിവിടങ്ങളിലെ കെഎസ്ആർടിസി ബസ് സർവീസ് പുന:സ്ഥാപിച്ചതായും അറിയിച്ചു. ആറ്റിങ്ങൽ മണ്ഡലത്തിൽ മുതലപ്പൊഴി ഹാർബറിൽ ആഴം കൂട്ടുന്നതിന്‍റെ ഭാഗമായി ഡ്രഡ്ജിങ്, സോയിൽ പൈപ്പിംഗ് പ്രവർത്തനങ്ങൾ വേഗത്തിൽ ആക്കണമെന്നും അതിനുള്ള സ്ഥിരം സംവിധാനം ഉണ്ടാക്കണമെന്നും സാങ്കേതിക പ്രശ്നം കാരണം അപകടങ്ങൾ ഉണ്ടാകരുതെന്നും യോഗത്തിൽ ആവശ്യപ്പെട്ടു. പ്രധാനമന്ത്രി ഗ്രാമ സഡക്ക് യോജന വഴിയുള്ള റോഡ് പണി പാതിവഴിയിൽ നിർത്തി വെക്കേണ്ട അവസ്ഥ ഉണ്ടായിട്ടുണ്ടെന്നും മഴമൂലം വൈകിയ പ്രവർത്തനങ്ങൾ അടിയന്തരമായി പുനരാരംഭിക്കുമെന്നും ബന്ധപ്പെട്ട ഉദ്യോഗസ്ഥർ പറഞ്ഞു. ഓണക്കാലത്തോടനുബന്ധിച്ച് റോഡ് അപകടങ്ങൾ വർദ്ധിക്കാനുള്ള സാഹചര്യം കണക്കിലെടുത്ത് മുൻകരുതലുകൾ എടുക്കേണ്ടതുണ്ടെന്നും ഔട്ടർ റിംഗ് റോഡിന്റെ ഭാഗമായി സ്ഥലം ഏറ്റെടുത്തവർക്കുള്ള ധനസഹായം അടിയന്തരമായി ലഭ്യമാക്കണമെന്നും ശശി തരൂർ എംപിയുടെ പ്രതിനിധി ആവശ്യപ്പെട്ടു. വർക്കല മണ്ഡലത്തിൽ പിറവം-വർക്കല ശിവഗിരി കെഎസ്ആർടിസി ബസ് സർവീസ് പുനസ്ഥാപിക്കുക, ഇടവ വില്ലേജ് ഓഫീസ് നിർമാണം വേഗത്തിലാക്കുക, വർക്കല താലൂക്ക് ആശുപത്രി ഗേറ്റിനു മുന്നിലുള്ള മരം മുറിച്ചു മാറ്റുക, വർക്കല മൈതാനം റെയിൽവേ അണ്ടർ പാസേജ് നടയറപ്പാലം ഓപ്പൺ എന്നിവ സൗന്ദര്യവൽക്കരിക്കുന്നതിന് ആവശ്യമായ നടപടി സ്വീകരിക്കുക തുടങ്ങിയ ആവശ്യങ്ങളും യോഗത്തിൽ ഉന്നയിക്കപ്പെട്ടു. ആറ്റിങ്ങൽ മണ്ഡലത്തിൽ കടലുകാണി ടൂറിസം പദ്ധതി, പള്ളിപ്പുറം സിആർപിഎഫ് ക്യാമ്പിന് അടുത്തുള്ള കെഎസ്ആർടിസി ബസ് സ്റ്റോപ്പ് പുന ക്രമീകരിക്കൽ തുടങ്ങിയവയും ചർച്ച ചെയ്തു. സാമ്പത്തിക സ്ഥിതിവിവരക്കണക്ക് വകുപ്പ് തയ്യാറാക്കിയ ജില്ലയിലെ പുഷ്പകൃഷിയെ കുറിച്ചുള്ള റിപ്പോർട്ട് 'പൂവിളി' വി.കെ പ്രശാന്ത് എം എൽ എ കളക്ടർ അനു കുമാരിക്ക് നൽകി പ്രകാശനം ചെയ്തു. യോഗത്തിൽ അസിസ്റ്റന്റ് കളക്ടർ ശക്തിവേൽ, എംഡിഎം വിനീത് ടി.കെ, ജില്ലാ പ്ലാനിംഗ് ഓഫീസർ ഇൻ ചാർജ് കലാമുദ്ദീൻ എം, വിവിധ വകുപ്പുകളിലെ ഉദ്യോഗസ്ഥർ തുടങ്ങിയവർ പങ്കെടുത്തു.

മണക്കാട് കാർത്തികതിരുനാൾ സ്കൂൾ പൂർവവിദ്യാർഥികൾ ഓണാഘോഷം നടത്തി

തിരുവനന്തപുരം: മണക്കാട് കാർത്തിക തിരുനാൾ വൊക്കേഷണൽ ഹയർ സെക്കൻഡറി സ്കൂളിലെ പൂർവവിദ്യാർഥിനികൾ ഓണാഘോഷം സംഘടിപ്പിച്ചു. പവർഹൗസ് റോഡിലെ അമല റസിഡൻസിയിൽ സംഘടിപ്പിച്ച പരിപാടിയിൽ തിരുവിതാംകൂർ രാജകുടുംബാംഗം അവിട്ടം തിരുനാൾ ആദിത്യവർമ വിശിഷ്ടാതിഥിയായി പങ്കെടുത്തു. ചലച്ചിത്ര നടി സ്മിനു സിജോ ഓണാശംസകൾ നൽകി. അബുദാബി ആസ്ഥാനമാക്കി പ്രവർത്തിക്കുന്ന വ്യവസായ പ്രമുഖൻ ഡോ. ഫ്രാൻസിസ് ക്ലീറ്റസ് പ്രസംഗിച്ചു. തുടർന്ന് ഓണസദ്യയും പൂർവ വിദ്യാർഥിനികളുടെ കലാപരിപാടികളും ഉണ്ടായിരുന്നു.

നെഞ്ചിൽ ട്യൂബ് കുടുങ്ങിയ സംഭവം : ഡോക്ടർക്കെതിരെ മൊഴി നൽകി യുവതി

കാട്ടാക്കട: ജനറൽ ആശുപത്രിയിലെ ശസ്ത്രക്രിയ പിഴവിനെ തുടർന്ന് യുവതിയുടെ നെഞ്ചിൽ ട്യൂബ് കുടുങ്ങിയ സംഭവത്തിൽ ഡോക്ടർക്കെതിരെ മൊഴി നൽകി യുവതി. കാട്ടാക്കട മലയിൻകീഴ് സ്വദേശി സുമയ്യയാണ് ഡോക്ടർമാരുടെ പിഴവ് മൂലം ദുരിതം അനുഭവിക്കുന്നത്. മെഡിക്കൽ കോളജ് പോലീസിനാണ് യുവതി മൊഴി നൽകിയത്. നീതി ലഭിക്കും വരെ പോരാട്ടം തുടരുമെന്നും പ്രശ്നം ആരോഗ്യവകുപ്പ് നിസാരമായി കാണുന്നുവെന്നും സുമയ്യയുടെ സഹോദരീ ഭർത്താവ് സബീർ പറഞ്ഞു. ഡോ. രാജീവ് കുമാറിന് ശസ്ത്രക്രിയയ്ക്ക് മുമ്പ് പണം നൽകിയിരുന്നുവെന്നും സബീർ പറഞ്ഞു. ആരോഗ്യവകുപ്പിൽ നിന്ന് ആരും സംസാരിച്ചിട്ടില്ലെന്നും സബീർ വെളിപ്പെടുത്തി.2023 മാർച്ച് 22 നാണ് തിരുവനന്തപുരം ജനറൽ ആശുപത്രിയിൽ സുമയ്യ ചികിത്സ തേടിയത്. തൈറോയ്ഡ് ഗ്രന്ഥി എടുത്തു കളയുന്ന ശസ്ത്രക്രിയ നടത്തിയത് ഡോ.രാജിവ് കുമാറാണ്. ശസ്ത്രക്രിയയ്ക്ക് ശേഷം രക്തവും മരുന്നുകളും നൽകാനായി സെൻട്രൽ ലൈനിട്ടു. ഇതിന്‍റെ ഗൈഡ് വയറാണ് നെഞ്ചിൽ കുടുങ്ങികിടക്കുന്നത്. ശസ്ത്രക്രിയയ്ക്ക് ശേഷം ഇത് തിരികെ എടുക്കാത്തതാണ് ദുരിതത്തിലാക്കിയത് എന്നാണ് പരാതി. ശ്രീചിത്ര ആശുപത്രിയിലടക്കം സുമയ്യ ചികിത്സ തേടി. എക്സ്റേ പരിശോധനയിൽ ട്യൂബ് ധമനികളോട് ഒട്ടിപ്പോയതായി കണ്ടെത്തി. ഇനി ശസ്ത്രക്രിയ നടത്തി ട്യൂബ് പുറത്തെടുക്കാനാകില്ലെന്നാണ് വിദഗ്ധ ഡോക്ടർമാർ അറിയിച്ചത്. ഗുരുതര പിഴവ് ഉണ്ടായതിൽ നീതി വേണമെന്നും വിദഗ്ധ ചികിത്സ നൽകണമെന്നുമാണ് സുമയ്യ ആവശ്യപ്പെടുന്നത്.

നാടൻ തോക്കും ചാരായവുമായി യുവാവ് പിടിയിൽ

പാലോട്: നാടൻ തോക്കും ആറ് ലിറ്റർ നാടൻ ചാരായവും 250 ലിറ്റർ കോടയുമായി യുവാവ് എക്സൈസിന്‍റെ പിടിയിൽ.കരിമൺകോട് ഊരാളി കോണത്ത് വാടകക്ക് താമസിക്കുന്ന പെരിങ്ങമ്മല താന്നിമൂട് സ്വദേശി നൗഷാദ് (42) ആണ് നെടുമങ്ങാട് എക്സൈസിന്‍റെ പിടിയിലായത്. ഇയാൾ വാടകക്ക് താമസിക്കുന്ന വീട്ടിൽ ചാരായം വാറ്റുന്നതായി ലഭിച്ച രഹസ്യവിവരത്തെ തുടർന്ന് കഴിഞ്ഞ കുറച്ചു ദിവസങ്ങളിലായി എക്സൈസ് സംഘം ഈ വീടും പരിസരവും നിരീക്ഷണത്തിലാക്കിയിരുന്നു. ഇയാൾ വാറ്റിയെടുക്കുന്ന ചാരായം ഈ പ്രദേശങ്ങളിൽ വിൽക്കുകയില്ലായിരുന്നു. ഇതിനാൽ തന്നെ സമീപവാസികൾക്കാർക്കും സംശയം ഇല്ലായിരുന്നു. വാടകക്ക് താമസിക്കുന്ന വീട്ടിൽ ഭാര്യയും കുഞ്ഞും ഇയാളുടെ പിതാവുമാണ് ഉണ്ടായിരുന്നത്.വീടിന്‍റെ പുറകുവശത്ത് ആടിനെ കെട്ടുന്നതിനു സമീപത്തായി ബാരലുകളിലാണ് ഇയാൾ വാഷ് സൂക്ഷിച്ചിരുന്നത്. വാറ്റാൻ ഉപയോഗിച്ചിരുന്ന സ്റ്റൗ ഉൾപ്പെടെയുള്ള വസ്തുക്കളും കണ്ടെടുത്തു. കൂടാതെ ഇയാളിൽ നിന്നും പിടിച്ചെടുത്ത നാടൻ തോക്ക് വന്യമൃഗങ്ങളെ വേട്ടയാടാൻ ഉപയോഗിച്ചിരുന്നു. ഈ തോക്ക് വെടിമരുന്ന് നിറച്ച നിലയിലാണ്.നേരത്തേയും സമാനമായ കേസിൽ ശിക്ഷ അനുഭവിച്ചിട്ടുള്ള ആളാണ് നൗഷാദ്. നെടുമങ്ങാട് എക്സൈസ് ഇൻസ്പെക്ടർ പ്രവീൺ, അസിസ്റ്റൻഡ് എക്സൈസ് ഇൻസ്പെക്ടർ സതീഷ് കുമാർ, ബിജു, ഷജിം, ഗോപിനാഥ്, ശ്രീലത, ശ്രീകേഷ് എന്നിവരടങ്ങിയ സംഘമാണ് പ്രതിയെ പിടികൂടിയത്.

പാലുവള്ളി ഷാജി വധം: സുഹൃത്തിന് എട്ടുവർഷം തടവും ഒരു ലക്ഷം രൂപ പിഴയും വിധിച്ചു

നെടുമങ്ങാട്: സുഹൃത്തിനെ വെട്ടിക്കൊന്ന കേസിൽ പാലോട് മീൻമുട്ടി അങ്കണവാടിക്ക് സമീപം പാലുവള്ളി തടത്തരികത്തു വീട്ടിൽ എസ്.സന്തോഷിനെ തിരുവനന്തപുരം അതിവേഗ കോടതി ജഡ്ജ് ആർ.രേഖ എട്ടുവർഷം കഠിന തടവിനും ഒരു ലക്ഷം രൂപ പിഴയൊടുക്കാനും അല്ലെങ്കിൽ ആറുമാസം കൂടി കഠിന തടവിനും ശിക്ഷിച്ചു. പാലുവള്ളി സ്വദേശി ഷാജിയെ കൊലപ്പെടുത്തിയ കേസിലാണ് അതിവേഗ കോടതി ശിക്ഷ വിധിച്ചത്. 2017 ഡിസംബർ 24നായിരുന്നു സംഭവം. മുൻവൈരാഗ്യത്തെ തുടർന്ന് സന്തോഷിനെ റോഡിൽ തടഞ്ഞുവെച്ച് മർദിച്ച സുഹൃത്ത് ഷാജിയെ ക്രൂരമായി വെട്ടിക്കൊലപ്പെടുത്തിയെന്നാണ് കേസ്. 51 വെട്ടുകൾ പോസ്റ്റ്മോർട്ടം സർട്ടിഫിക്കറ്റിൽ രേഖപ്പെടുത്തിയിരുന്നു. ദൃക്സാക്ഷികൾ കൂറുമാറിയ കേസിൽ സാഹചര്യ,ശാസ്ത്രീയ തെളിവുകളുടെ അടിസ്ഥാനത്തിലാണ് പ്രതിയെ കുറ്റക്കാരനായി കണ്ടെത്തിയത്. സന്തോഷിന്‍റെ സഹോദരൻ പ്രകാശിനെ തെളിവുകളുടെ അഭാവത്തിൽ വെറുതെ വിട്ടു. പ്രോസിക്യൂഷനുവേണ്ടി പബ്ലിക് പ്രോസിക്യൂട്ടർ അഡ്വ.എ.ആർ.ഷാജി ഹാജരായി. പ്രോസിക്യൂഷൻ ഭാഗത്തു നിന്ന് 12 സാക്ഷികളെ ഹാജരാക്കി.അഭിഭാഷകരായ എ.ഷമീർ വെമ്പായം, എ.അസീം, ആർ.എസ്.നീരജ് , അഖില അജി, അർച്ചന റെജി, ഫാദിയ, ഉദയൻ കൊല്ലം തുടങ്ങിയവരും ഹാജരായി.പാലോട് സിഐ ആയിരുന്ന കെ.ബി.മനോജ്‌ കുമാറാണ് കേസ് അന്വേഷിച്ച് കുറ്റപത്രം സമർപ്പിച്ചത്.

വിജ്ഞാന കേരളം: ഒരു ലക്ഷം തൊഴിലവസരങ്ങള്‍ ലക്ഷ്യമെന്നു മന്ത്രി വി.ശിവന്‍കുട്ടി

തിരുവനന്തപുരം: വിജ്ഞാന കേരളം പദ്ധതി വഴി കൃത്യമായ അസൂത്രണത്തിലൂടെയും കൂട്ടായ പ്രവര്‍ത്തനത്തിലൂടെയും ഒരു ലക്ഷം പേര്‍ക്ക് തൊഴില്‍ നല്‍കി ചരിത്രം സൃഷ്ടിക്കുകയാണ് സര്‍ക്കാരിന്‍റെ ലക്ഷ്യമെന്ന് പൊതുവിദ്യാഭ്യാസ തൊഴില്‍ വകുപ്പ് മന്ത്രി വി. ശിവന്‍കുട്ടി. നെടുമങ്ങാട് ബ്ലോക്ക് പഞ്ചായത്ത് കുടുംബശ്രീയുമായി സംയോജിച്ച് സംഘടിപ്പിച്ച 'വിജ്ഞാന കേരളം' തൊഴില്‍ മേള ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. സാധാരണയായി തൊഴില്‍ അന്വേഷകര്‍ക്ക് അനുയോജ്യമായ ജോലി ലഭിക്കുവാനും കമ്പനികള്‍ക്ക് യോഗ്യരായ ഉദ്യോഗാര്‍ഥികളെ ലഭിക്കുന്നതിനും നേരിടുന്ന ബുദ്ധിമുട്ടുകള്‍ ഒഴിവാക്കി തൊഴില്‍ അന്വേഷകരെ തൊഴില്‍ ദാതാക്കളിലേയ്ക്ക് എത്തിക്കുക എന്ന ലക്ഷ്യമാണ് ഈ തൊഴില്‍ മേളയ്ക്കുള്ളതെന്നും മന്ത്രി പറഞ്ഞു. അൻപതോളം കമ്പനികളും 500-ഓളം ഉദ്യോഗാര്‍ഥികളും മേളയിൽ പങ്കെടുത്തു. നെടുമങ്ങാട് ബ്ലോക്ക് പഞ്ചായത്ത് പ്രസിഡന്‍റ് വി. അമ്പിളി അധ്യക്ഷത വഹിച്ച ചടങ്ങില്‍ ബ്ലോക്ക് പഞ്ചായത്ത് സെക്രട്ടറി എസ്. വിനോദ് കുമാർ, ആനാട് പഞ്ചായത്ത് പ്രസിഡന്‍റ് എൻ.ശ്രീകല, പനവൂര്‍ ഗ്രാമപഞ്ചായത്ത് പ്രസിഡന്‍റ് എസ്. മിനി, കരകുളം ഗ്രാമപഞ്ചായത്ത് പ്രസിഡന്‍റ് യു.ലേഖാറാണി, വെമ്പായം ഗ്രാമപഞ്ചായത്ത് പ്രസിഡന്‍റ് ബീനാ ജയന്‍ തുടങ്ങിയവര്‍ പങ്കെടുത്തു.

ആരോഗ്യമേഖലയെ ലോകോത്തര നിലവാരത്തില്‍ എത്തിക്കും: മുഖ്യമന്ത്രി പിണറായി വിജയൻ

പാറശാല : ആരോഗ്യ മേഖലയെ ലോകോത്തര നിലവാരത്തില്‍ എത്തിക്കുവാനുള്ള ശ്രമത്തിലാണ് സര്‍ക്കാരെന്നും ആരോഗ്യ മേഖലയിലെ ത്രിതല സംവിധാനം മെച്ചപ്പെട്ട കാലഘട്ടമാണ് ഇപ്പോഴെന്നും മുഖ്യമന്ത്രി പിണറായി വിജയൻ. ഇന്നലെ പാറശാല താലൂക്ക് ഹെഡ് ക്വാര്‍ട്ടേഴ്‌സ് ആശുപത്രിയുടെ പുതിയ മന്ദിരത്തിന്‍റെ ഉദ്ഘാടനം നിര്‍വ്വഹിച്ചു സംസാരിക്കുകയായിരുന്നു മുഖ്യമന്ത്രി പിണറായി വിജയന്‍. താലൂക്കാശുപത്രിയില്‍ ഡയാലിസ് സംവിധാനം ഒരുക്കിയിരിക്കുന്നത് സാധാരണക്കാരായ നൂറുകണക്കിന് വൃക്ക രോഗികള്‍ക്ക് ഗുണകരമായിരിക്കും. ഒരേസമയം 40 പേര്‍ക്ക് ഡയാലിസ് ചെയ്യുവാനുള്ള സൗകര്യം പുതുതായി പ്രവര്‍ത്തനം ആരംഭിച്ച പാറശാല താലൂക്ക് ഹെഡ് ക്വാര്‍ട്ടേഴ്‌സിന് ഉണ്ട്. സ്വകാര്യ ആശുപത്രികളോട് കിടപിടിക്കുന്ന രീതിയിലാണ് സര്‍ക്കാരാശുപത്രിയുടെ പ്രവര്‍ത്തനം ക്രമീകരിച്ചിരിക്കുന്നത്. 262 ആരോഗ്യ സ്ഥാപനങ്ങള്‍ക്ക് എന്‍ കെ എസ് അംഗീകാരം ലഭിച്ചിട്ടുണ്ട്. കേന്ദ്രത്തില്‍ നിന്ന് അര്‍ഹതപ്പെട്ട വിഹിതം യഥാസമയം ലഭിക്കുന്നില്ല. വായ്പയെടുക്കുവാനും അനുവദിക്കാത്തത് ചില പ്രതിസന്ധികള്‍ നേരിടുന്നുണ്ട്. കിഫ്ബി എടുക്കാന്‍ ഉദ്ദേശിക്കുന്ന വായ്പകള്‍ സര്‍ക്കാര്‍ ഫണ്ടില്‍ കുറവ് ചെയ്യുന്നത് സര്‍ക്കാറിന് ബുദ്ധിമുട്ടുണ്ടാക്കുന്നു. നാഷണല്‍ ഹൈവേ നടക്കാത്ത പദ്ധതിയെന്നാണ് പറഞ്ഞിരുന്നത്. അതിന് മാറ്റം വരുത്തുവാന്‍ സര്‍ക്കാരിന് കഴിഞ്ഞു- മുഖ്യമന്ത്രി പറഞ്ഞു. ആരോഗ്യവകുപ്പ് മന്ത്രി വീണാ ജോര്‍ജ് അധ്യക്ഷത വഹിച്ചു. സി. കെ. ഹരീന്ദ്രന്‍ എംഎല്‍എ സ്വാഗതം പറഞ്ഞു. ഡോ.കെ.ജെ.റീന, കെ.ആന്‍സലന്‍ എംഎല്‍എ, വി.ജോയ് എംഎല്‍എ, ഡോ.എന്‍ വൊബ്രാഗഡെ, അഡ്വ. ഡി.സുരേഷ് കുമാര്‍, അഡ്വ. എസ്.കെ.ബെന്‍ ഡാര്‍വിന്‍, എല്‍.മഞ്ജു സ്മിത, വി.ആര്‍.സലൂജ, അല്‍വേടിസ, ആര്‍.ബിജു, എസ്.ആര്യ ദേവന്‍, കെ.ജോജി, എൽ. ബിനു കുമാരി, വൈ.സതീഷ് തുടങ്ങി നിരവധി പേര്‍ സംസാരിച്ചു. മികച്ച പ്രവര്‍ത്തനങ്ങള്‍ കാഴ്ചവെച്ച കുന്നത്തുകാല്‍ പ്രാഥമിക ആരോഗ്യ കേന്ദ്രത്തിന് മുഖ്യമന്ത്രി അവാര്‍ഡ് നല്‍കി.

പേവിഷ ബാധയും ഏകാരോഗ്യവും: ഏകദിന ശില്പശാല

മെഡിക്കൽകോളജ്: പേ വിഷബാധയും ഏകാരോഗ്യവും എന്ന വിഷയത്തിൽ കേരള ആരോഗ്യ ശാസ്ത്ര സർവകലാശാല സ്കൂൾ ഓഫ് പബ്ളിക് ഹെൽത്തിന്‍റെ ആഭിമുഖ്യത്തിൽ ഏകദിന ശില്പശാല സംഘടിപ്പിക്കുന്നു. പേവിഷബാധയേറ്റുള്ള മരണം പൂർണമായി ഇല്ലാതാക്കുക എന്നതാണ് ലക്ഷ്യം. മെഡിക്കൽ കോളജ് കാമ്പസിലെ സ്കൂൾ ഓഫ് പബ്ളിക് ഹെൽത്ത് ഹാളിൽ ഇന്നു രാവിലെ ഒൻപതിന് പരിപാടി ആരംഭിക്കും. അന്താരാഷ്ട്ര ഏജൻസികളുടെ ഉപദേഷ്ടാവു കൂടിയായ പ്രമുഖ റാബിസ് വിദഗ്ധ ഡോ. കാറ്റി ഹാംപ്‌സണും അവരുടെ പിഎച്ച്ഡി ഫെലോ മാർത്ത ലൂക്കയും പങ്കെടുക്കും. ആരോഗ്യ ശാസ്ത്ര സർവകലാശാലയിലെ ഡോ. സിനിയ ടി. നുജും, ഡോ. തോമസ് മാത്യു എന്നിവർ നേതൃത്വം നൽകും.

വിനായക ചതുർഥി; ക്ഷേത്രങ്ങളിൽ തിരക്ക്

നെടുമങ്ങാട്: വിനായക ചതുർഥിയോടനുബന്ധിച്ച് ക്ഷേത്രങ്ങളിൽ വിശേഷാൽ പൂജകളും ഉണ്ണിയപ്പം വിതരണവും നടന്നു. നെടുമങ്ങാട് പഴവടി ശ്രീമഹാഗണപതി ക്ഷേത്രം, പഴകുറ്റി ശ്രീബാലഗണപതി ക്ഷേത്രം, കരിമ്പിക്കാവ് ശ്രീധർമ്മശാസ്താ ക്ഷേത്രം, പുതുമംഗലം ദേവീ ക്ഷേത്രം, പുത്തൻവിള ദേവീ ക്ഷേത്രം, ചുള്ളിമാനൂർ ചെറുവേലി തമ്പുരാൻ നഗർ പൊൻകുഴി മാടൻ തമ്പുരാൻ ക്ഷേത്രം എന്നിവിടങ്ങളിൽ ഭക്തജന തിരക്ക് അനുഭവപ്പെട്ടു. പൊൻകുഴി ക്ഷേത്രത്തിൽ മേൽശാന്തി ഗോകുൽകൃഷ്ണയുടെ മുഖ്യകാർമികത്വത്തിൽ അഷ്ട ദ്രവ്യമഹാഗണപതി ഹോമം നടത്തി.

അയ്യങ്കാളി അനുസ്‌മരണം

വിഴിഞ്ഞം: കോൺഗ്രസ് കാഞ്ഞിരംകുളം ബ്ലോക്ക് കമ്മിറ്റി വെങ്ങാനൂർ അയ്യങ്കാളി സ്മൃതി മണ്ഡപത്തിൽ നടത്തിയ അയ്യ ങ്കാളി അനുസ്മരണ സമ്മേളനം അഡ്വ. എം.വിൻസന്‍റ് എംഎൽഎ ഉദ്ഘാടനം ചെയ്തു. ബ്ലോക്ക് കമ്മിറ്റി പ്രസിഡന്‍റ് കരുംകുളം ജയകുമാർ അധ്യക്ഷത വഹിച്ചു. കെപിസിസി ജനറൽ സെക്രട്ടറി അഡ്വ. ജി. സുബോധൻ, മെംബർ അഡ്വ. വിൻസന്‍റ് ഡി. പോൾ, ഡിസിസി സെക്രട്ടറി അഡ്വ. ആഗ്നസ് റാണി, ദലിത് കോൺഗ്രസ് നേതാവ് സാബു ഗോപിനാഥ്, മുൻ ബ്ലോക്ക് പ്രസിഡന്‍റ് വെങ്ങാനൂർ ശ്രീകുമാർ, ബ്ലോക്ക് വൈസ് പ്രസിഡന്‍റുമാരായ സുജി, അനിൽ വി. സലാം, രവീന്ദ്രൻ, കോൺഗ്രസ് മണ്ഡലം പ്രസിഡന്‍റുമാരായ മുക്കോല ബിജു, പരണിയം ഫ്രാൻസിസ്, ആർ. തങ്കരാജ്, കോൺഗ്രസ് ബ്ലോക്ക് സെക്രട്ടറിമാരായ പാമ്പുകാല ജോസ്, അശോക് കുമാർ, കാഞ്ഞിരംകുളം ശരത്കുമാർ, വിഴിഞ്ഞം യേശുദാസ്, അനിൽകുമാർ, സാബു, മത്സ്യത്തൊഴിലാളി കോൺഗ്രസ് ബ്ലോക്ക് പ്രസിഡന്‍റ് വിഴിഞ്ഞം അൻസാരി, സേവാദൾ ബ്ലേക്ക് പ്രസിഡന്‍റ് ബിനു, പ്രദീപ് ശാന്തകുമാരൻ തുടങ്ങിയവർ പങ്കെടുത്തു.

ബഡ്‌സ് സ്കൂളിൽ ഓണഘോഷവും ഓണക്കിറ്റ് വിതരണവും

നെടുമങ്ങാട്: നഗരസഭ ബഡ്‌സ് സ്കൂളിലെ ഓണഘോഷത്തിന്‍റെയും ഗ്ലോബൽ കേരള ഇനിഷിയേറ്റീവ് കേരളീയത്തിന്‍റെ ആഭിമുഖ്യത്തിൽ നടന്ന ഓണക്കിറ്റ് വിതരണത്തിന്‍റെയും ഉദ്ഘാടനം മന്ത്രി ജി.ആർ. അനിൽ നിർവഹിച്ചു. നഗരസഭ ചെയർപേഴ്സൺ സി.എസ്. ശ്രീജ അധ്യക്ഷത വഹിച്ചു. നഗരസഭ ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ബി. സതീശൻ സ്വാഗതം പറഞ്ഞു. കൗൺസിലർമാരായ പുങ്കുമൂട് അജി, ബി.എം. അഖിൽ, കേരളീയം സെക്രട്ടറി ജനറൽ ലാലു ജോസഫ്, ട്രഷറര്‍ ജി. അജയകുമാർ, കോർ കമ്മിറ്റി അംഗം പി.ടിചന്ദ്രകാന്ത്‌ എന്നിവർ പങ്കെടുത്തു.

ശ്രീ ചിത്തിര തിരുനാള്‍ സ്‌കൂളില്‍ ഓണാഘോഷം

വെള്ളറട: കുന്നത്തുകാല്‍ ശ്രീ ചിത്തിര തിരുനാള്‍ റെസിഡന്‍ഷ്യല്‍ സെന്‍ട്രല്‍ സ്‌കൂളിലെ ഓണാഘോഷവും കലാഭവന്‍ ആര്‍ട്‌സ് ആൻഡ് കള്‍ച്ചറല്‍ സെന്‍ററിന്‍റെ ഉദ്ഘാടനവും ഐ.ബി. സതീഷ് എംഎല്‍എ നിർവഹിച്ചു. മുന്‍ അംബാസഡര്‍ ആൻഡ് ചെയര്‍മാന്‍ ടി.പി. ശ്രീനിവാസന്‍ സാംസ്കാരിക പരിപാടികൾ ഉദ്ഘാടനം ചെയ്തു. തുടര്‍ന്ന് തിരുവനന്തപുരം നാട്യശാല കഥകളി സംഘം അവതരിപ്പിച്ച പ്രഹ്‌ളാദ ചരിതം കഥകളി അരങ്ങേറി. ഓണസദ്യയ്ക്കുശേഷം വിദ്യാര്‍ഥികള്‍, അധ്യാപികമാര്‍, രക്ഷകര്‍ത്താക്കള്‍ എന്നിവര്‍ അവതരിപ്പിച്ച സാംസ്കാരിക പരിപാടികളും ഉണ്ടായിരുന്നു.

വിതുരയിൽ ജനവാസ മേഖലയിലിറങ്ങിയ കാട്ടുപോത്ത് ചത്തു

വിതുര: ജനവാസ മേഖലയിലേക്കിറങ്ങിയതിനു പിന്നാലെ മയക്കു വെടിവച്ചു പിടികൂടി പേപ്പാറ വനമേഖലയിൽവിട്ട കാട്ടുപോത്ത് ചത്തു. വിരണ്ടോടുന്നതിനിടെ വീണു ഗുരുതര പരുക്കേറ്റതാണു മരണ കാരണമെന്നാണ് പ്രാഥമിക നിഗമനം. ശനിയാഴ്ച രാവിലെയോടെ തൊളിക്കോട് പഞ്ചായത്തിലെ പനയ്ക്കോട് മേഖലയിൽ കണ്ട പോത്തിനെ ആർആർടി ഉൾപ്പെടെയുള്ള വനം വകുപ്പ് സംഘം റെസ്ക്യൂ ചെയ്യാനാണ് പദ്ധതിയിട്ടത്. എന്നാൽ പോത്ത് അവശതയിൽ ആയിരുന്നതിനാൽ മയക്കുവെടിവയ്ക്കാനുള്ള തീരുമാനത്തിലെത്തുകയായിരുന്നു. നാലു വയസോളം പ്രായമുള്ള പോത്തിന് ഓടുന്നതിനിടെ വീണ് പരുക്കേറ്റിരുന്നു.

കുഫോസ് വൈസ് ചാൻസലർ എ. ബിജുകുമാറിനെ ആദരിച്ചു

കോവളം: കേരള മത്സ്യബന്ധന സമുദ്ര ഗവേഷണ സർവകലാശാല (കുഫോസ് ) വൈസ് ചാൻസലറായി നിയമിതനായ ഡോ. എ. ബിജുകുമാറിനെ വെണ്ണിയൂർ എൻഎസ്എസ് കരയോഗം ആദരിച്ചു. കരയോഗം പ്രസിഡന്‍റ് അശോക് കുമാർ അധ്യക്ഷത വഹിച്ചു. താലൂക്ക് യൂണിയൻ വൈസ് പ്രസിഡന്‍റ് എം. കാർത്തികേയൻ നായർ ഉദ്ഘാടനം ചെയ്തു. സെക്രട്ടറി കെ.ജി. ഉദയകുമാർ, ജോയിന്‍റ് സെക്രട്ടറി എസ്.എൽ. രതീഷ് കുമാർ, വെങ്ങാനൂർ മേഖലാ കൺവീനർ മനു ടി. ജി. നായർ, ഡോ. എ. ബിജുകുമാർ എന്നിവർ പ്രസംഗിച്ചു.

ഉദിയന്‍കുളങ്ങരയില്‍ ലോറി മറിഞ്ഞ് ഒരാള്‍ക്ക് പരിക്ക്

പാറശാല: കരമന-കളിയിക്കവിള ദേശീയപാതയിലെ ഉദിയന്‍കുളങ്ങരയില്‍ നിര്‍മാണ പ്രവര്‍ത്തനങ്ങള്‍ക്കായി ഇഷ്ടിക കയറ്റി വന്ന ലോറി മറിഞ്ഞ് ഒരാള്‍ക്ക് പരിക്ക്. ഉദിയന്‍കുളങ്ങര ശിവശക്തി ക്ഷേത്രത്തിനു സമീപത്തായിരുന്നു അപകടം. നാഗര്‍കോവില്‍ ഭാഗത്തുനിന്നും തിരുവനന്തപുരത്തേക്ക് വരികയായിരുന്നു ലോറി.ലോറിയുടെ പുറക്ക് ഭാഗത്തെ ടയര്‍ പൊട്ടിയതിനെ തുടര്‍ന്നു നിയന്ത്രണംവിട്ട് മറിയുകയായിരുന്നു. വാഹനത്തില്‍ ഡ്രൈവര്‍ ഉള്‍പ്പെടെ അഞ്ചുപേരാണ് ഉണ്ടായിരുന്നത്. ഇതില്‍ മാര്‍ത്താണ്ഡം സ്വദേശിയായ ശശി (57 ) യുടെ കൈക്ക് ഗുരുതരമായ പരിക്കേറ്റു. ഇയാളെ നെയ്യാറ്റിന്‍കര ജനറല്‍ ആശുപത്രിയിലും തുടര്‍ന്നു തിരുവനന്തപുരം മെഡിക്കല്‍ കോളജ് ആശുപത്രിയിലേക്കും മാറ്റി. വാഹനത്തില്‍ ഉണ്ടായിരുന്ന മറ്റുള്ളവര്‍ നിസാര പരിക്കുകളോടെ അത്ഭുതകരമായി രക്ഷപ്പെട്ടു. ഡ്രൈവറും ക്ലീനറും മാത്രമാണ് പൊതുവേ ലോറിയുടെ ഫ്രണ്ട് സീറ്റില്‍ ഉണ്ടാവുക. ലോറിയില്‍ ഇഷ്ടിക കയറ്റിയതിനു മുകളില്‍ വാഹനങ്ങളില്‍ കൂടെ വരുന്ന തൊഴിലാളികള്‍ കിടന്നുറങ്ങുന്നതാണു പതിവ്. ഇന്നലെ പുലര്‍ച്ചെയുണ്ടായ ചാറ്റല്‍ മഴയെ തുടര്‍ന്നു പുറകില്‍ കിടന്നുറങ്ങുകയായിരുന്ന തൊഴിലാളികള്‍ ലോറിയുടെ ഫ്രണ്ട് സീറ്റില്‍ കയറിയതു വന്‍ അപകടം ഒഴിവാക്കി. രാവിലെ 6.15 നുണ്ടായ അപകടത്തെ തുടര്‍ന്നു വാഹനത്തിരക്കാണ് പ്രദേശത്ത് അനുഭവപ്പെട്ടത്. നാട്ടുകാര്‍ പോലീസിനെ അപ്പോള്‍ തന്നെ വിവരമറിയിച്ചെങ്കിലും എട്ടു മണി കഴിഞ്ഞതിനു ശേഷമാണ് അധികൃതര്‍ എത്തിയതെന്നു നാട്ടുകാര്‍ പറയുന്നു. തുടര്‍ന്ന് സമീപവാസികളായ ആളുകളാണ് ഇവിടത്തെ ഗതാഗത കുരുക്കില്‍ വാഹനങ്ങളെ നിയന്ത്രിച്ചത്.

നെയ്യാര്‍ മേളയ്ക്ക് ഇന്നു തുടക്കം

നെയ്യാറ്റിന്‍കര: നെയ്യാറ്റിന്‍കരയുടെ സ്വന്തം നെയ്യാര്‍ മേളയ്ക്ക് ഇന്നു തിരി തെളിയും. ഇനിയുള്ള പതിനേഴു നാളുകളില്‍ ആഘോഷത്തിരയിളക്കം. വിനോദസഞ്ചാര വകുപ്പിന്‍റെയും തദ്ദേശ സ്വയംഭരണ സ്ഥാപനങ്ങളുടെയും സഹകരണത്തോടെ കേരള സംസ്ഥാന വ്യാപാരി വ്യവസായി സമിതി നെയ്യാറ്റിൻകര ഏരിയ കമ്മിറ്റി സംഘടിപ്പിക്കുന്ന നെയ്യാർ മേളയുടെ പത്താമത് എഡിഷന്‍ മന്ത്രി വീണാ ജോര്‍ജ് ഉദ്ഘാടനം ചെയ്യും. ആറാലുംമൂട് മാര്‍ക്കറ്റ് ഗ്രൗണ്ടില്‍ വൈകുന്നേരം അഞ്ചിന് വിളംബരറാലിക്കും പതാക ഉയര്‍ത്തലിനും ശേഷം നടക്കുന്ന ഉദ്ഘാടന യോഗത്തില്‍ കെ. ആന്‍സലന്‍ എംഎല്‍എ മുഖ്യപ്രഭാഷണം നടത്തും. നഗരസഭ ചെയര്‍മാന്‍ പി.കെ. രാജമോഹനന്‍ അധ്യക്ഷത വഹിക്കും. സി.കെ. ഹരീന്ദ്രന്‍ എംഎല്‍എ, തിരുവനന്തപുരം ജില്ലാ പഞ്ചായത്ത് പ്രസിഡന്‍റ് അഡ്വ. ഡി. സുരേഷ് കുമാര്‍ എന്നിവര്‍ വിശിഷ്ടാതിഥികളാകും. വൈകുന്നേരം മൂന്നിനു വിളംബരറാലിയുടെ ഉദ്ഘാടനം ഡിവൈഎസ്പി എസ്. ചന്ദ്രദാസും പതാക ഉയര്‍‍ത്തല്‍ കര്‍മം സമിതി ഏരിയാ പ്രസിഡന്‍റ് പി. ബാലചന്ദ്രന്‍നായരും നിര്‍വഹിക്കും. നിംസ് മെഡിസിറ്റി എംഡി ഡോ. എം.എസ്. ഫൈസല്‍ഖാന്‍, സമിതി സംസ്ഥാന വൈസ് പ്രസിഡന്‍റ് വി. പാപ്പച്ചന്‍, ജില്ലാ സെക്രട്ടറി അഡ്വ. ആദര്‍ശ് ചന്ദ്രന്‍, ഡിസിസി സെക്രട്ടറി അഡ്വ. മഞ്ചവിളാകം ജയന്‍, ബിജെപി മണ്ഡലം പ്രസിഡന്‍റ് തിരുപുറം ഗോപാലകൃഷ്ണന്‍, മേള ജനറല്‍ കണ്‍വീനര്‍ എം. ഷാനവാസ് എന്നിവര്‍ സംബന്ധിക്കും. തലസ്ഥാന ജില്ലയുടെ തെക്കന്‍ പ്രദേശത്തെ ഏറ്റവും വിപുലമായ ഓണാഘോഷവും വ്യാപാരമേളയും സാംസ്കാരികോത്സവവുമായി കീര്‍ത്തിയാർജിച്ചുകഴിഞ്ഞ മേളയില്‍ വിവിധ തലമുറകളിലെ സന്ദര്‍ശകര്‍ക്ക് ആസ്വദിക്കാനാവുന്ന ഒട്ടനേകം വ്യത്യസ്ത വിഭവങ്ങളുണ്ടെന്നു സംഘാടകര്‍ അറിയിച്ചു.

തീരദേശ മേഖലയിൽ പിടിമുറുക്കി ലഹരി-ഗുണ്ടാ സംഘങ്ങൾ

വലിയതുറ: ശംഖുംമുഖം, വലിയതുറ, വെട്ടുകാട്, വള്ളക്കടവ്, കൊച്ചുവേളി മേഖലകൾ മോഷ്ടാക്കളുടെയും സാമൂഹ്യ വിരുദ്ധരുടെയും ലഹരി-ഗുണ്ടാ സംഘങ്ങളുടെയും പിടിയിലെന്ന് ആക്ഷേപം. തീരദേശ ബീച്ചുകളില്‍ ലഹരി-ഗുണ്ടാ സംഘങ്ങളുടെ ശല്യം വര്‍ധിക്കുന്നതായി കേരള മദ്യനിരോധന സമിതി സംസ്ഥാന വര്‍ക്കിംഗ് പ്രസിഡന്‍റ് പി. സ്റ്റെല്ലസ് ആരോപിക്കുന്നു. ശംഖുംമുഖം ബീച്ചിലെത്തിന്ന സന്ദര്‍ശകര്‍ക്കു സാമൂഹ്യ വിരുദ്ധരില്‍നിന്നും വളരെ മോ ശം പൊരുമാറ്റമാണു പലപ്പോഴും അനുഭപ്പെടുന്നത്. ഇതേത്തുടര്‍ന്നു വൈകുന്നേരങ്ങളില്‍ ബീച്ചിലെത്തുന്ന സന്ദര്‍ശകരുടെ എണ്ണം ഗണ്യമായി കുറഞ്ഞതായി പ്രദേശവാസികള്‍ പറയുന്നു. കഴിഞ്ഞ ഞായറാഴ്ച രാത്രി 11.00 മണിയോടുകൂടി ശംഖുംമുഖം ബീച്ചില്‍ സന്ദര്‍ശകരെ മദ്യലഹരിയില്‍ രണ്ടുപേര്‍ ശല്യം ചെയ്യുന്നുയെന്ന അറിയിപ്പിനെതുടര്‍ന്നു ബീച്ചിലെത്തിയ ഗ്രേഡ് എസ്ഐയുടെ മൂക്ക് അക്രമികള്‍ അടിച്ചുപൊട്ടിച്ച സംഭ വവുമുണ്ടായി. സന്ധ്യ മയങ്ങിയാല്‍ വലിയതുറ, ശംഖുംമുഖം പരിസരം പിടിച്ചുപറി സംഘത്തിന്‍റെയും ലഹരി മാഫിയാകളുടെയും പിടിയിലാണെന്നും പ്രദേശവാസികൾ ആരോപിക്കുന്നു. പകല്‍ സമയങ്ങളിലും രാത്രികാലങ്ങളിലും പോലീസ് ഈ ഭാഗങ്ങളിലേയ്ക്കു തിരിഞ്ഞു നോക്കാറില്ലെന്നും ഇതു സാമൂഹ്യ വിരുദ്ധര്‍ക്കും ഗുണ്ടകള്‍ക്കും മോഷ്ടാക്കള്‍ക്കും അനുഗ്രഹമായി മാറിയെന്നുമാണ് പൊതുജനങ്ങള്‍ക്കിടയിലുള്ള ആരോപണം. അത്യാവശ്യഘട്ടങ്ങളില്‍ സ്റ്റേഷനിലോ ബന്ധപ്പെട്ട അധികൃതരെയോ ഫോണില്‍ ബന്ധപ്പെടാന്‍ ശ്രമിച്ചാലും ോണ്‍ എടുക്കാറില്ലെന്നും ആരോപിക്കുന്നു. ഇതു മോഷ്ടാക്കള്‍ക്കും ഗുണ്ടാസംഘങ്ങള്‍ക്കും മയക്കുമരുന്നു വില്‍പ്പനക്കാര്‍ക്കും അനുകൂലമായ സാഹചര്യമാണ് ഒരുക്കുന്നത്. വലിയതുറ, ശംഖുംമുഖം, കൊ ച്ചുവേളി തുടങ്ങിയ മേഖലകളില്‍ വാഹന മോഷണം വര്‍ധിക്കുന്നതായും ആരോപണമുയരുന്നു. വാഹനം നഷ്ടപ്പെട്ടതായി പരാതി നല്‍കിയാല്‍ തന്നെ പോലീസിന്‍റെ ഭാഗത്തുനിന്നും യാതൊരന്വേഷണവും നടക്കാറില്ലെന്നും പരാതിക്കാര്‍ ആരോപിക്കുന്നു. മറ്റു പോലീസ് സ്റ്റേഷന്‍ പരിധികളില്‍ വാഹന പരിശോധനകള്‍ നടക്കുമ്പോള്‍ മാത്രമാണു കവര്‍ച്ച പോയ വാഹനങ്ങള്‍ പലപ്പോഴും തിരികെ ലഭിക്കാറുള്ളത്. മറ്റുള്ളവ അതിര്‍ത്തികടന്നു തമിഴ്‌നാട്ടിലെത്തിച്ചു പൊളിക്കുകയാണ് പതിവെന്നും സൂചനകള്‍ ലഭിക്കുന്നുണ്ട്. കഴിഞ്ഞ ദിവസം തീരദേശത്ത് റോഡില്‍ പാര്‍ക്ക് ചെയ്തിരുന്ന സ്‌കൂട്ടര്‍ മോഷണം പോയിയിരുന്നു. ശംഖുംമുഖം മേരിലാന്‍ഡിൽ‍ ഷിബിയുടെ സ്‌കൂട്ടറാണ് കൊച്ചുവേളിയില്‍നിന്നും കവര്‍ച്ച ചെയ്യപ്പെട്ടത്. അഞ്ചുവാഹനങ്ങളാണ് അടുത്തിടെ മോഷ്ടിക്കപ്പെട്ടത്.

അധ്യാപകദിനം: ആശംസാ കാർഡുകൾ ഒരുക്കി വിദ്യാർഥികൾ

മാറനല്ലൂർ: ക്രൈസ്റ്റ് നഗർ പബ്ലിക് സീനിയർ സെക്കൻഡറി സ്കൂൾ മാറനല്ലൂരിൽ അധ്യാപകദിനത്തിനു മുന്നോടിയായി കുട്ടികൾ അധ്യാപകർക്ക് ആശംസാകാർഡുകൾ ഒരുക്കി. പ്രിൻസിപ്പൽ ഫാ. ചാക്കോ പുതുകുളം സിഎംഐ അധ്യാപകദിന സന്ദേശം നൽകി. പ്രിൻസിപ്പലും, വൈസ് പ്രിൻസിപ്പൽ ഫാ. മാത്യു പുത്തൻപുരക്കൽ സിഎംഐയും ചേർന്നു അധ്യാപകർക്ക് ഉപഹാരങ്ങൾ സമ്മാനിച്ചു. എട്ടാംക്ലാസിലെ വിദ്യാർഥികളുടെ കലാപരിപാടികളും അരങ്ങേറി.

യുവതിയെ അപമാനിച്ചയാൾ അറസ്റ്റിൽ

പേരൂർക്കട: യുവതിയെ അപമാനിച്ചയാളെ ഫോർട്ട് പോലീസ് അറസ്റ്റു ചെയ്തു. തിരുവല്ലം പൂങ്കുളം സ്വദേശി പ്രദീപ് (52) ആണ് അറസ്റ്റിലായത്. 26നാണ് കേസിനാസ്പദമായ സംഭവം. വീട്ടിലേക്കു പോകാൻ കിഴക്കേക്കോട്ട സ്റ്റാൻഡിൽ ബസ് കാത്തുനിന്ന യുവതിയെയാണ് പ്രതി അപമാനിച്ചത്. ഇയാളെ ഫോർട്ട് സിഐ ശിവകുമാറിന്‍റെ നിർദേശപ്രകാരമാണ് അറസ്റ്റു ചെയ്തത്. പ്രതിയെ കോടതി റിമാൻഡ് ചെയ്തു.

മധു താരപരിവേഷങ്ങളില്ലാത്ത നടൻ: അടൂർ ഗോപാലകൃഷ്ണൻ

തിരുവനന്തപുരം: സ്വയംവരത്തിലെ വിശ്വത്തിനു ജീവൻ നല് കിയ മധുവിനെ കാണാനും ഓണക്കോടി സമ്മാനിക്കാനും സ്വയംവരത്തിന്‍റെ ശില്പി അടൂർ ഗോപാലകൃഷ്ണൻ ഇന്നലെ കണ്ണമ്മൂലയിലെ മധുവിന്‍റെ വസതിയിലെത്തി. മലയാള സിനിമാ ചരിത്രത്തിന്‍റെ ഏടുകളിൽ സുവർണാക്ഷരങ്ങളിൽ കുറിച്ചുവയ്ക്കേണ്ട ഒന്നായി മാറി മഹാനടന്‍റെയും സിനിമാ ഇതിഹാസത്തിന്‍റെയും സംഗമം. പ്രേംനസീർ സുഹൃദ്സമിതിയാണ് ചലച്ചിത്ര താരം മധുവിനു ഓണക്കോടി സമ്മാനിക്കുന്ന ഓണനിലാവ് 2025 സംഘടിപ്പിച്ചത്. ചലച്ചിത്ര മേഖലയിൽ ഇത്രയും കാലം ഇത്രയധികം സ്നേഹം ലഭിച്ച മറ്റൊരു നടനില്ല എന്ന വാക്കുകളോടെയാണ് മധുവിന്‍റെ തൊട്ടടുത്ത കസേരയിൽ ഇരുന്ന അടൂർ സംസാരിച്ചു തുടങ്ങിയത്. ഒരു താരത്തിന്‍റെ പരിവേഷങ്ങൾ ഒന്നും ഇല്ലാത്ത നായകനടനാണ് മധു. ആദ്യമായി സിനിമ എടുക്കുന്നവർക്കും സമീപിക്കാൻ കഴിയുന്ന ഒരു നടൻ കൂടിയാണ് അദ്ദേഹം. സ്വയംവരം എന്ന സിനിമയിൽ അഭിനയിച്ച മധുവിനു പ്രതിഫലം നല് കിയിട്ടുണ്ടോ എന്നു സംശയമാണെന്നും പുഞ്ചിരിയോടെ അടൂർ കൂട്ടിച്ചേർത്തു. 1972-ൽ സ്വയംവരമെടുക്കുന്നത് രണ്ടരലക്ഷം രൂപയ്ക്കാണ്. തന്‍റെ ആദ്യ മുഴുനീള കഥാചിത്രമായ സ്വയംവരത്തെ കുറിച്ചുള്ള വിശേഷങ്ങൾ പങ്കുവച്ചുകൊണ്ട് അടൂർ തുടർന്നു. ചിത്രത്തിൽ നായികയായി അഭിനയിച്ച ശാരദ 25,000 രൂപയാണ് ആവശ്യപ്പെട്ടത്. 1972-ൽ അത് വലിയൊരു തുകയായിരുന്നുവെന്നും അദ്ദേഹം പറഞ്ഞു. സാന്പത്തികമായ പരിമിതികൾക്കുള്ളിൽ നിന്നാണ് സ്വയംവരം സൃഷ്ടിച്ചത്. ചലച്ചിത്ര നടൻ കരമന ജനാർദനൻ നായർ വഴിയാണ് മധുവിനെ ആദ്യം പരിചയപ്പെടുന്നത്. നിർഭാഗ്യവശാൽ സ്വയംവരത്തിനു ശേഷം തന്‍റെ ഒരു സിനിമയിലും മധു അഭിനയിച്ചിട്ടില്ല. മധുവിനെ പോലെ സുന്ദരനായ ഒരു നടനും പിന്നീട് തന്‍റെ സിനിമയിൽ നായകനായിട്ടില്ല. സാധാരണക്കാരെക്കാൾ സൗന്ദര്യം കുറഞ്ഞ നടന്മാരാണ് പിൽക്കാലത്ത് തന്‍റെ സിനിമകളിൽ നായകന്മാരായതെന്നും അടൂർ ഗോപാലകൃഷ്ണൻ പറഞ്ഞു. മധുവിനെ പോലുള്ള നല്ല വ്യക്തികൾ കുറയുന്ന കാലമാണിത്. മറ്റുള്ളവരെ കുറ്റപ്പെടുത്തുന്നവരുടെയും വിമർശിക്കുന്നവരുടെയും എണ്ണം കൂടുന്നകാലം. സമൂഹമാധ്യമങ്ങളിലൂടെ അപവാദം പറയലിനു നല്ല പ്രചാരം ലഭിക്കുന്നുണ്ടെന്നും അടുത്തകാലത്ത് നടന്ന വിവാദങ്ങളെ പരോക്ഷമായി സൂചിപ്പിച്ചു കൊണ്ട് അടൂർ ഗോപാലകൃ ഷ്ണൻ ചൂണ്ടിക്കാട്ടി. കഴിഞ്ഞ 60 വർഷക്കാലമായി അടൂർ ഗോപാലകൃഷ്ണനുമായി അടുപ്പമുണ്ടെങ്കിലും അടൂർ ഇത്രയധികം സംസാരിക്കുന്നത് കേൾക്കുന്നത് ഇതാദ്യമായാണെന്നു മറുപടി പ്രസംഗത്തിൽ മധു പറഞ്ഞു. അടൂരിന്‍റെ പ്രസംഗം ധാരാളം കേട്ടിട്ടുണ്ട്. എന്നാൽ തന്‍റെ വീട്ടിൽ വന്നിത്രയും തുറന്ന് അടൂർ സംസാരിക്കുന്നത് ആദ്യത്തെ അനുഭവമാണ്. സ്വതസിദ്ധമായ ശൈലിയിൽ മധു പറഞ്ഞു. ചടങ്ങിൽ ട്രിവാൻഡ്രം ഡിസ്ട്രിക്ട് റോട്ടറി സെക്രട്ടറി എം. എൽ. ഉണ്ണികൃഷ്ണൻ, പ്രേംനസീർ സുഹൃദ്സമിതി സംസ്ഥാന സെക്രട്ടറി തെക്കൻ സ്റ്റാർ ബാദുഷ, പ്രസിഡന്‍റ് പനച്ചമൂട് ഷാജഹാൻ തുടങ്ങി പ്രസംഗിച്ചു. പ്രേംനസീർ സുഹൃദ്സമിതിയുടെ പ്രേംസിംഗേഴ്സ് ഓണപ്പാട്ടുകളും മധു അഭിനയിച്ച സിനിമകളിലെ ഗാനങ്ങളും ആലപിച്ചു.

മോഷണക്കേസിലെ പ്രതി പോലീസിന്‍റെ പിടിയിൽ

പേരൂർക്കട: വീട് കുത്തിത്തുറന്നു മോഷണം നടത്താൻ ശ്രമിച്ച സംഭവത്തിലെ പ്രതി പോലീസിന്‍റെ പിടിയിൽ. ശ്രീകാര്യം ചെറുവയ്ക്കൽ കുഞ്ചിവീട് ക്ഷേത്രത്തിനു സമീപം കേളാംവിളാകത്തു വീട്ടിൽ വാടകയ്ക്ക് താമസിക്കുന്ന രാജേഷ് (42) ആണ് പിടിയിലായത്. ഓഗസ്റ്റ് 17നു വട്ടിയൂർക്കാവ് സ്റ്റേഷൻ പരിധിയിൽ ശ്രീരാഗം ലെയിനിനു സമീപത്തെ വീട്ടിൽ മോഷണത്തിന് ശ്രമിച്ച് ഒളിവിൽ കഴിഞ്ഞു വരികയായിരുന്നു ഇയാൾ. മോഷണശ്രമം പരാജയപ്പെട്ടുവെങ്കിലും വീടിനു നാശനഷ്ടങ്ങൾ വരുത്തിയതിന്‍റെ അടിസ്ഥാനത്തിൽ വീട്ടുകാർ പോലീസിൽ പരാതി നൽകുകയായിരുന്നു. കന്‍റോൺ മെന്‍റ് എസി സ്റ്റ്യുവർട്ട് കീലറിന്‍റെ നിർദേശപ്രകാരം വട്ടിയൂർക്കാവ് സി.ഐ. അജേഷ്, എസ്ഐ തോമസ് എന്നിവർ ഉൾപ്പെട്ട സംഘമാണു പ്രതിയെ പിടികൂടിയത്. ഇയാളെ കോടതിയിൽ ഹാജരാക്കി റിമാൻഡ് ചെയ്തു.

പൂട്ടിയിട്ടിരുന്ന വീട്ടിൽ ആക്രമണം നടത്തിയ ഒരാൾ പിടിയിൽ

മലയിൻകീഴ്: പൂട്ടിയിട്ടിരുന്ന വീട്ടിൽ ആക്രമണം നടത്തിയ ലഹരി സംഘത്തിലെ ഒരാൾ പിടിയിൽ. മുക്കംപാലമൂട് മൂങ്ങോട് ശൈലേഷിന്‍റെ പൂട്ടിയിട്ടിരുന്ന വീടിന്‍റെ ജനൽ അടിച്ചു തകർത്ത കേസിലെ പ്രധാന പ്രതിയായ വിളപ്പിൽശാല കാവിൻപുറം ഗീതു ഭവനിൽ ആൽബിനെ (32)യാണ് വിളപ്പിൽശാല പോലീസ് അറസ്റ്റ് ചെയ്തത്. ഇക്കഴിഞ്ഞ ഞായറാഴ്ച പുലർച്ചെ 1.16 നായിരുന്നു സംഭവം. അക്രമി സംഘത്തിൽ അഞ്ചു പേരുണ്ടായിരുന്നു. വീട്ടിലെ സിസിടിവി കാമറയും മറ്റു ഉപകരണങ്ങളും പ്രതികൾ കവർന്നിരുന്നു. അക്രമികൾ വീടിനു മുന്നിലെ ബുദ്ധ പ്രതിമയുടെ കഴുത്ത് വെട്ടി തകർക്കുകയും കെഎസ്ഇബി മീറ്റർ ബോർഡ് തകർത്ത് ഫ്യൂസ് ഊരി മാറ്റുകയും ചെയ്തിരുന്നു. അക്രമികളിൽ രണ്ടു പേരുടെ ദൃശ്യം സമീപത്തെ സിസിടിവി കാമറയിൽ പതിഞ്ഞിട്ടുണ്ട്. ലഹരി ഉപയോഗിച്ച ശേഷം ബഹളം വയ്ക്കുന്നത് വിലക്കിയതിലുഉള്ള വൈരാഗ്യമാണ് ആക്രമണത്തിനു കാരണമെന്നും മറ്റു പ്രതികൾ ഉടൻ പിടിയിലാകുമെന്നും പോലീസ് പറഞ്ഞു. സംഘം സ്ഥിരമായി ഈ വീട്ടിനു സമീപമാണു ലഹരി സാധനങ്ങൾ ഉപയോഗിക്കാൻ എത്തുതെന്നും ആരോപണം ഉയരുന്നുണ്ട്.

വെട്ടുകാട് അടച്ചിട്ട വീട്ടില്‍നിന്നും 11 പവന്‍ കവര്‍ന്നെന്നു പരാതി

വലിയതുറ: വലിയതുറ പോലീസ് സ്റ്റേഷന്‍ പരിധിയില്‍ വയോധികരായ ദമ്പതികള്‍ മാത്രം താമസിക്കുന്ന വീടു കുത്തിത്തുറന്ന് 11 പവന്‍ സ്വര്‍ണാഭരണങ്ങള്‍ കവര്‍ന്നതായി പരാതി. വെട്ടുകാട് ഓള്‍സെയിന്‍റ്‌സ് ചര്‍ച്ച് റോഡിനുസമീപം സുരേന്ദ്രന്‍-സാവിത്രി ദമ്പതിമാരുടെ വീട്ടിലാണ് കവര്‍ച്ച നടന്നത്. കഴിഞ്ഞ ദിവസം സാവിത്രിയും ഭര്‍ത്താവും വീടുപൂട്ടി ബാങ്കില്‍ പോയിരുന്നു. ഒരു മണിക്കൂര്‍ കഴിഞ്ഞ് മടങ്ങിയെത്തിയപ്പോള്‍ അടുക്കള വാതില്‍ തുറന്നുകിടക്കുന്നതായി കണ്ടു. എന്നാല്‍ വാതില്‍ അടയ്ക്കാന്‍ മറന്നതാകാമെന്നു കരുതി തുടര്‍ പരിശോധനകള്‍ നടത്തിയില്ല. ദിവസങ്ങള്‍ കഴിഞ്ഞ് ആഭരണം എടുക്കാനായി മുറിയിലെത്തിയപ്പോഴാണ് കവര്‍ച്ച നടന്ന വിവരം അറിയുന്നത്. 24 ഗ്രാം വീതമുള്ള രണ്ടു മാലകളും 40 ഗ്രാമിന്‍റെ ഒരുമാലയുമാണ് നഷ്ടമായത്. ദമ്പതികള്‍ വീടുപൂട്ടി പോകുന്നതിനു മുമ്പ് മോഷ്ടാവു വീടിനുള്ളില്‍ കയറി പതുങ്ങിയിരുന്ന ശേഷം കവര്‍ച്ച നടത്തിയതാകാമെന്നാണു വീട്ടുകാരുടെ സംശയം. കവര്‍ച്ച നടന്നതായി കാണിച്ചു വീട്ടുടമ വലിയതുറ പോലീസില്‍ പരാതി നല്‍കി.

ബംഗ്ലാദേശ് സ്വദേശി പിടിയിൽ തിരുവനന്തപുരത്ത് പിടിയിൽ

ബ്രഹ്മോസിലെ കരാർ തൊഴിലാളിയെന്നു മൊഴി മെഡിക്കൽ കോളജ്: വ്യക്തമായ രേഖകൾ ഇല്ലാതെ ഇന്ത്യയിലേക്ക് കടന്ന ബംഗ്ലാദേശ് സ്വദേശിയെ പേട്ട പോലീസ് പിടികൂടി. പ്രണോയ് റോയി (29) ആണ് പിടിയിലായത്. ഇന്ത്യയിലേക്കു കടന്നുവന്ന ഇയാളുടെ കൈവശം വ്യാജ ആധാർ കാർഡാണ് ഉണ്ടായിരുന്നത്. ഇയാളുടെ ഫോണിൽ ബംഗ്ലാദേശ് പാസ്പോർട്ടിന്‍റെ വിവരങ്ങളും കൈവശം വെസ്റ്റ് ബംഗാളിൽ നിന്നും ഇയാൾ വ്യാജമായി നിർമിച്ച ആധാർ കാർഡും കണ്ടെത്തി. 2025 ലാണ് ബംഗ്ലാദേശിൽനിന്ന് ഇന്ത്യയിലേക്ക് അനധികൃതമായി എത്തിച്ചേർന്നത്. ഓൾ സെയിന്‍റ്സിനു സമീപം കൊച്ചുവേളിയിലാണ് ഇയാൾ താമസിച്ചിരുന്നത്. അന്യസംസ്ഥാന തൊഴിലാളികൾ താമസിക്കുന്ന ക്യാമ്പുകൾ കേന്ദ്രീകരിച്ച് പോലീസ് നടത്തിയ അന്വേഷണത്തിനിടെയാണ് ഇയാൾ പിടിയിലാകുന്നത്. സംശയം തോന്നി രേഖകൾ പരിശോധിക്കുന്നതിനിടെയാണ് ഫോണിനുള്ളിൽ ബംഗ്ലാദേശിൽ എടുത്ത പാസ്പോർട്ടിന്‍റെ കോപ്പി കണ്ടെത്തിയത്. ബ്രഹ്മോസിലെ കരാർ തൊഴിലാളി ആണെന്നാണ് പോലീസിനോട് പ്രണോയ് റോയി പറഞ്ഞത്. ഇതിന്‍റെ സത്യാവസ്ഥ അന്വേഷിച്ചു വരുന്നതേയുള്ളൂ. പേട്ട സിഐ വി.എം. ശ്രീകുമാറിന്‍റെ നിർദേശപ്രകാരം എസ്ഐമാരായ ബൈജു, ഗിരീഷ്, സിപിഒമാരായ ദീപു, ആദർശ് എന്നിവർ ചേർന്നാണ് പ്രതിയെ പിടികൂടിയത്.

അയ്യൻകാളിയുടെ 162-ാമത് ജന്മവാർഷികം ആചരിച്ചു

കോവളം : നവോഥാന നായകനായ മഹാത്മ അയ്യൻകാളിയുടെ 162-ാമത് ജന്മവാർഷികം ആച രിച്ചു. കെപിസിസി വിചാർ വിഭാഗ് കോവളം നിയോജകമണ്ഡലം കമ്മിറ്റിയുടെ നേതൃത്വത്തിൽ വിഴിഞ്ഞം ക്വാർട്ടേഴ്സ് ജംഗ്ഷനിൽ സംഘടിപ്പിച്ച ചടങ്ങിൽ അയ്യൻകാളിയുടെ ഛായാചിത്രത്തി ൽ പുഷ്പാർച്ചന നടത്തി. തുടർന്നു നടന്ന അനുസ്മരണ സമ്മേളനം ഡിസിസി ട്രഷറർ കെ.വി അഭിലാഷ് ഉദ്ഘാടനം ചെയ്തു. നിയോജകമണ്ഡലം പ്രസിഡന്‍റ് മുജീബ് റഹ്മാൻ അധ്യക്ഷത വഹിച്ചു. കോവളം മണ്ഡലം പ്രസിഡന്‍റ് വെള്ളാർ മധു, കർഷക കോൺഗ്രസ് ബ്ലോക്ക് പ്രസിഡന്‍റ് മഞ്ഞിലാസ്, സിദ്ദിഖ്, ജലീൽ മുഹമ്മദ്, നൗഷാദ്, സാഞ്ചു, ജയൻ, വിജയകുമാർ, അൻവർ, സാബു, വഹാബ്, നിസാമുദ്ദീൻ, സൽമാൻ, സക്കീർ ഹുസൈൻ തുടങ്ങിയവർ പങ്കെടുത്തു.

കാഴ്ച്ചയൊരുക്കി കാടിന്‍ മക്കള്‍ കവടിയാര്‍ കൊട്ടാരത്തില്‍

റിച്ചാര്‍ഡ് ജോസഫ് തിരുവനന്തപുരം: ഓണനാളുകളുടെ വരവറിയിച്ച് കവടിയാര്‍ കൊട്ടാരത്തില്‍ കാടിന്‍റെ മക്കളെത്തി. തിരുവനന്തപുരം ജില്ലയിലെ അഗസ്ത്യാര്‍കൂട വനപ്രദേശത്തും കന്യാകുമാരി ജില്ലയിലെ പേച്ചിപ്പാറ വനപ്രദേശത്തുമായി പശ്ചിമഘട്ട വനാന്തരങ്ങളില്‍ താമസിക്കുന്ന ആദിവാസി വിഭാഗമായ കാണി സമുദായക്കാരായ 150ഓളം പേരാണ് ഇന്നലെ കവടിയാര്‍ കൊട്ടാരത്തിലെത്തിയത്. എല്ലാ വര്‍ഷവും ചിങ്ങമാസത്തില്‍ തിരുവോണ നാളിനു മുമ്പായി കവടിയാര്‍ കൊട്ടാരത്തിലെത്തി രാജകുടുംബാംഗങ്ങളെക്കണ്ടു വനവിഭവങ്ങള്‍ കാഴ്ചയായി നല്‍കി വിശേഷങ്ങള്‍ പങ്കുവയ്ക്കുന്നത് ഇവര്‍ നൂറ്റാണ്ടുകളായി തുടര്‍ന്നുവരുന്നു. എട്ടുവീട്ടില്‍ പിള്ളമാരില്‍ നിന്നും മാര്‍ത്താണ്ഡവര്‍മയ് ക്ക് ഒളിത്താവളം ഒരുക്കിയ കാലം മുതലുള്ള ബന്ധമാണ് കോട്ടൂരിലെ കാണിക്കാര്‍ക്ക് തിരുവിതാംകൂര്‍ രാജകുടുംബവുമായുള്ളത്. രാജഭരണകാലത്ത് ആദിവാസി മൂപ്പന്മാര്‍ വര്‍ഷത്തില്‍ ഒരിക്കല്‍, നാടുഭരിച്ചിരുന്ന തിരുവിതാംകൂര്‍ രാജാക്കന്മാരെ മുഖം കാണിക്കുന്ന ഒരു ചടങ്ങ് നൂറ്റാണ്ടുകളായി നിലനിന്നിരുന്നു. ആ ചടങ്ങ് കോട്ടൂര്‍ മുണ്ടാണി മാടന്‍ തമ്പുരാന്‍ ക്ഷേത്രത്തിന്‍റെ നേതൃത്വത്തില്‍ ഇപ്പോഴും നടന്നുവരുന്നു. കൊട്ടാരത്തിലേക്കു പുറപ്പെടുന്ന കാണിക്കാര്‍ രാവിലെ തന്നെ ക്ഷേത്രത്തിലെത്തി കുലദൈവമായ മാടന്‍തമ്പുരാനെയും മലദേവതകളായ കാലാട്ടുതമ്പുരാനെയും കരിങ്കാളിയെയും പൂജിച്ചശേഷമാണ് കൊട്ടാരത്തിലേക്കു പുറപ്പെടുന്നത്. മുളം കുറ്റിയില്‍ നിറച്ച കാട്ടുചെറുതേന്‍, ഈറ്റയിലും ചൂരലിലും നെയ്‌തെടുത്ത പെട്ടികള്‍, കുട്ടകള്‍, പൂക്കുടകള്‍ എന്നിവയെല്ലാം കാണിക്കാര്‍ രാജകൊട്ടാരത്തില്‍ കാഴ്ചയായി എത്തിച്ചു. കാട്ടുകുന്തിരിക്കം, വാഴക്കുലകള്‍ തുടങ്ങിയ കാര്‍ഷിക വിളകളും എത്തിച്ചിരുന്നു. കവടിയാര്‍ കൊട്ടാരത്തിലെത്തിയ കാടിന്‍റെ മക്കളെ പൂയം തിരുനാള്‍ ഗൗരീ പാര്‍വതി ബായി, അശ്വതി തിരുനാള്‍ ഗൗരി ലക്ഷ്മി ബായി എന്നിവരുടെ നേതൃത്വത്തില്‍ രാജകുടുംബാംഗങ്ങള്‍ ചേര്‍ന്നു കൊട്ടാരവാതില്‍ക്കലെത്തി സ്വീകരിച്ചു. വനത്തിനുള്ളിലെ ജീവിതത്തെക്കുറിച്ചും ബുദ്ധിമുട്ടുകളെക്കുറിച്ചുമെല്ലാം രാജകുടുംബാംഗങ്ങള്‍ കാടിന്‍റെ മക്കളോടു ചോദിച്ചറിഞ്ഞു. വന്യമൃഗങ്ങള്‍ കൃഷി നശിപ്പിക്കുന്നതാണ് ഏറ്റവും വലിയ ബുദ്ധുട്ടെന്ന് ആദിവാസികള്‍ പറഞ്ഞു. ഊഞ്ഞാല്‍ കൊട്ടാനുള്ള കാട്ടുവള്ളി ഉള്‍പ്പെടെയുള്ള വിഭവങ്ങളാണ് ഇവര്‍ ഇന്നലെ രാജകൊട്ടാരത്തില്‍ കാഴ്ചയായിഎത്തിച്ചത്. രാജകുടുംബാഗങ്ങള്‍ ദക്ഷിണയും പുതുവസ്ത്രങ്ങളും സമ്മാനിച്ചാണ് ഇവരെ തിരികെ കാട്ടിലേക്കു യാത്രയാക്കിയത്.ശംഖുമുഖം ആറാട്ടുകടവ് സന്ദര്‍ശിച്ച ശേഷം ഇന്നലെ രാത്രി കോട്ടൂര്‍ ക്ഷേത്രത്തില്‍ താമസിച്ച ഇവര്‍ ഇന്നു പുലര്‍ച്ചെ ഊരുകളിലേക്കു മടങ്ങും.

ഗണേശ വിഗ്രഹ നിമജ്ജന ഘോഷയാത്ര നടത്തി

തിരുവനന്തപുരം: ശിവസേനയുടെയും ഗണേശോത്സവ ട്രസ്റ്റ് കമ്മിറ്റി കേരളയുടെയും നേതൃത്വത്തിൽ ഗണേശ വിഗ്രഹ നിമജ്ജന ഘോഷയാത്ര നടത്തി. പഴവങ്ങാടി മഹാഗണപതിക്ഷേത്രത്തിനു മുന്നിൽനിന്ന് ആരംഭിച്ച വിഗ്രഹ നിമജ്ജന ഘോഷയാത്ര കെപിസിസി മുൻ പ്രസിഡന്‍റ് കെ. മുരളീധരൻ ഉദ്ഘാടനം ചെയ്തു. മുൻമന്ത്രമാരായ വി.എസ്. ശിവകുമാർ, പന്തളം സുധാകരൻ, എം.എം. ഹസൻ, സ്വാമി അശ്വതി തിരുനാൾ, ലൂഥറൻ ചർച്ച ഓഫ് ഇന്ത്യ തിരുവനന്തപുരം മേജർ ആർച്ച്ബിഷപ്പ് ഡോ. റോബിൻസണ്‍ ഡേവിഡ് ലൂഥർ, സ്വാമി അസംഗാനന്ദ ഗിരി സംവിധായകൻ തുളസിദാസ് തുടങ്ങിയവർ പ്രസംഗിച്ചു. തുടർന്നു നഗരവീഥികളീലൂടെ ഘോഷയാത്രയായി ശംഖുമുഖം ആറാട്ടുകടവിലെത്തിച്ച വിഗ്രഹങ്ങൾ നിമജ്ജനം ചെയ്തു.

നെഞ്ചിൽ ട്യൂബ് കുരുങ്ങിയ സംഭവം : നീതി തേടി യുവതി: പുതിയ വാദവുമായി ആരോഗ്യ വകുപ്പ്

ചികിത്സാ പിഴവ് സമ്മതിച്ച് സർജൻ കാട്ടാക്കട: നെഞ്ചിൽ ട്യൂബ് കുരുങ്ങിയ സംഭവത്തിൽ നീതി തേടി മലയിൻകീഴ് സ്വദേശിയായ യുവതി. സംഭവത്തിൽ പുതിയ വാദവുമായി ആരോഗ്യ വകുപ്പ്. പരാതി ലഭിച്ചില്ലെങ്കിലും ഏപ്രിലിൽ തന്നെ അന്വേഷണം നടത്തിയിരുന്നതായാണ് ആരോഗ്യവകുപ്പ് പറയുന്നത്. സംഭവത്തിൽ വിദഗ്ദധ സമിതി രൂപീകരിച്ച് അന്വേഷണം നടത്തിയെന്നും ഗൈഡ് വയറ് കുരുങ്ങി കിടക്കുന്നതിനാൽ മറ്റ് ആരോഗ്യ പ്രശ്‌നങ്ങൾ ഇല്ല, പരാതി ലഭിച്ചാൽ അതും പരിധോധിക്കുമെന്നുമാണ് ആരോഗ്യവകുപ്പ് വിശദീകരണത്തിൽ പറയുന്നത്. തൊണ്ടയിൽ തൈറോയ്ഡ് സംബന്ധമായ ചികിത്സയ്ക്ക് 2023 ലാണ് സുമയ്യയെ തിരുവനന്തപുരം ജനറൽ ആശുപത്രിയിൽ പ്രവേശിപ്പിച്ചത്. പിന്നീട് മൾട്ടി ഗോയിറ്റർ രോഗം കണ്ടെത്തിയതിനെ തുടർന്നു ശസ്ത്രക്രിയക്ക് വിധേയമാക്കുകയായിരുന്നു. ഡോ. രാജിവ് കുമാറാണ് തൈറോയ്ഡ് ഗ്രന്ഥി എടുത്തു കളയുന്ന ശസ്ത്രക്രിയ നടത്തിയത്. ശസ്ത്രക്രിയയ്ക്കുശേഷം ഞരമ്പു കിട്ടാതെ വന്നപ്പോൾ രക്തവും മരുന്നുകളും നൽകാനായി സെൻട്രൽ ലൈനിട്ടു. ഇതിന്‍റെ ഗൈഡ് വയറാണ് നെഞ്ചിൽ കുടുങ്ങി കിടക്കുന്നത്. ശസ്ത്രക്രിയയ്ക്കുശേഷം ഇതു തിരികെ എടുക്കാൻ മറന്നതാണ് തന്നെ ദുരിതത്തിലാക്കിയതെന്നാണ് യുവതിയുടെ പരാതി. തുടർന്ന് ശ്രീ ചിത്ര ആശുപത്രിയിലടക്കം സുമയ്യ ചികിത്സ തേടി. എക്‌സ്‌റേ പരിശോധനയിൽ ട്യൂബ് ധമനികളോട് ഒട്ടിപ്പോയതായി കണ്ടെത്തി. ഇനി ശസ്ത്രക്രിയ നടത്തി ട്യൂബ് പുറത്തെടുക്കാനാകില്ലെന്നാണു വിദഗ്ധ ഡോക്ടർമാർ അറിയിച്ചത്. നീതിവേണമെന്നും വിദഗ്ധ ചികിത്സ നൽകണമെന്നുമാണ് സുമയ്യ ആവശ്യപ്പെടുന്നത്. ചികിത്സാ പിഴവ് സമ്മതിച്ച് തിരുവനന്തപുരം ജനറൽ ആശുപത്രിയിലെ സർജൻ തിരുവനന്തപുരം: ശസ്ത്രക്രിയയ്ക്കിടെ നെഞ്ചിൽ ട്യൂബ് കുടുങ്ങിയ സംഭവത്തിൽ ചികിത്സാപിഴവ് തുറന്നു സമ്മതിച്ച് തിരുവനന്തപുരം ജനറൽ ആശുപത്രിയിലെ സർജൻ ഡോ.രാജീവ്കുമാറിന്‍റെ ശബ്ദരേഖ. രോഗിയുടെ ബന്ധുവുമായുള്ള സംഭാഷണത്തിന്‍റെ ശബ്ദരേഖയാണ് ഇപ്പോൾ പുറത്തുവന്നിരിക്കുന്നത്. രണ്ടു മാസം മുമ്പാണു പരാതിക്കാരിയായ സുമയ്യയുടെ ബന്ധുവായ സബീർ ഡോക്ടറോട് സംസാരിച്ചത്. തെറ്റു പറ്റിപ്പോയെന്നു ഡോക്ടർ പറയുന്നതാണു ശബ്ദരേഖയിലുള്ളത്. അതേ സമയം ചികിത്സാപ്പിഴവിനെ തുടർന്നു യുവതിയുടെ നെഞ്ചിൽ ട്യൂബ് കുടുങ്ങിയ സംഭവത്തിൽ ജില്ലാ മെഡിക്കൽ ഓഫീസർ ഒടുവിൽ ഇടപെട്ടു. വിഷയത്തിൽ ജനറൽ ആശുപത്രി അധികൃതരോട് റിപ്പോർട്ട് തേടി. മരുന്നിനുള്ള ട്യൂബ് ഇട്ടവരാണ് ഉത്തരവാദികളെന്നും ഡോ. രാജീവ്കുമാർ യുവതിയുടെ ബന്ധുവിനോട് പറയുന്നുണ്ട്. ഡോക്ടർക്ക് ഇക്കാര്യം നേരത്തെ അറിയാമായിരുന്നുവെന്നും തങ്ങളോടു മറച്ചുവച്ചെന്നുമാണ് സംഭാഷണത്തിൽനിന്നു തനിക്കു മനസിലായതെന്ന് സബീർ വ്യക്തമാക്കി. ഉത്തരവാദിത്തത്തിൽനിന്നു ഒഴിഞ്ഞുമാറുന്ന സമീപനമാണ് ഡോക്ടർ സ്വീകരിച്ചതെന്നും സബീർ കൂട്ടിച്ചേർത്തു. ചികിത്സാപ്പിഴവ് സമ്മതിച്ച ഡോക്ടർ വിദഗ്ധ ചികിത്സക്കായി പണവും നൽകിയെന്നും സുമയ്യയുടെ ബന്ധു പറയുന്നു. ഡോക്ടർ പണം ഗൂഗിൾപേ വഴി അയച്ചു നൽകിയതിന്‍റെ സ്‌ക്രീൻ ഷോട്ടും പുറത്തുവന്നു.

കാർ ബൈക്കുകളെ ഇടിച്ച് തെറിപ്പിച്ചു; ഒരാൾ മരിച്ചു, ഒരാൾക്ക് ഗുരുതര പരിക്ക്

വിഴിഞ്ഞം: കോവളം -കാരോട് ബൈപാസിലുണ്ടായ അപകടത്തിൽ യുവാവിനു ദാരുണാന്ത്യം. ഒരാളെ ഗുരുതര പരിക്കോടെ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ബൈക്ക് യാത്രികനായ കാഞ്ഞിരംകുളം പൊട്ടക്കുളം മുള നിന്ന രതീഷ് ഭവനിൽ മാധവന്‍റെയും ജയയുടെയും മകൻ രതീഷ് കുമാർ (40) ആണ് മരിച്ചത്. മറ്റൊരു സ്കൂട്ടറിലെ യാത്രക്കാരനായ വിഴിഞ്ഞം ചൊവ്വര സ്വദേശി പ്രദീപിനെയാണ് ഗുരുതര പരിക്കോടെ ആശുപത്രിയിൽ പ്രവേശിപ്പിച്ചത്. തമിഴ്നാട്ടിൽ നിന്നുള്ള ദമ്പതികൾ സഞ്ചരിച്ച കാർ നിയന്ത്രണം തെറ്റി ബൈക്കിനെയും സ്കൂട്ടറിനെയും ഇടിച്ചു തെറിപ്പിക്കുകയായിരുന്നു. ഇന്നലെ വൈകുന്നേരം നാലരയോടെ ബൈപാസിൽ വിഴിഞ്ഞം മുക്കോല പാലത്തിനു സമീപത്തായിരുന്നു അപകടം. കോവളത്ത് നിന്ന് ഒരേ ദിശയിലേക്ക് വരുകയായിരുന്ന ഇരുചക്രവാഹനങ്ങളെ നിയന്ത്രണം തെറ്റിയ കാർ ഇടിച്ച് തെറിപ്പിക്കുകയായിരുന്നു. കാർ ഓടയിലൂടെ നൂറ് മീറ്ററോളം ഓടിയ ശേഷം ബൈപ്പാസിന്‍റെ മൺചുവരിൽ ഇടിച്ച് നിൽക്കുകയായിരുന്നു. കാർയാത്രികരായ പാറശാല ഇഞ്ചിവിള സ്വദേശികളായ ദമ്പതികൾ നേരിയ പരിക്കുകളോടെ രക്ഷപ്പെട്ടു. പരിക്കേറ്റവരെ ആശുപത്രിയിൽ എത്തിച്ച ശേഷം ബന്ധുക്കളോടൊപ്പം വീട്ടിലേക്ക് മടങ്ങിയ കാർ ഡ്രൈവർക്ക് വഴിയിൽ വച്ച് അസ്വസ്തത ഉണ്ടായതോടെ പാറശാല സർക്കാർ ആശുപത്രിയിൽ പ്രവേശിപ്പിച്ചതായി വിഴിഞ്ഞം പോലീസ് അറിയിച്ചു. ഫ്രിലാൻഡ് ഫോട്ടോഗ്രഫറായിരുന്നു അവിവാഹിതനായ രതീഷ് കുമാർ. സഹോദരങ്ങൾ: രേണുക (പൊതുമാരാമത്ത് വകുപ്പ്), രാജേഷ് (ഹെൽത്ത് സർവീസ്).

ജോലിസ്ഥലത്ത് കുഴഞ്ഞു വീണ യുവാവ് മരിച്ചു

വെള്ളറട: ജോലിസ്ഥലത്ത് കുഴഞ്ഞുവീണ യുവാവ് മരിച്ചു. കള്ളിക്കാട് പഞ്ചായത്ത് ചാമവിളപ്പുറം വാര്‍ഡില്‍ സുരേഷ് എന്ന് വിളിക്കുന്ന രഞ്ജിത്ത് (36)ആണ് മരിച്ചത്. കഴക്കൂട്ടത്ത് ജോലിസ്ഥലത്ത് ജോലി ചെയ്തുകൊണ്ടിരിക്കെ തളര്‍ച്ച ഉണ്ടായതിനാൽ തിരുവനന്തപുരം മെഡിക്കല്‍ കോളജിലെത്തിച്ചെങ്കിലും ഇന്നലെ പുലര്‍ച്ചെ മരിക്കുകയായിരുന്നു. ഭാര്യ: സിനി. രണ്ട് കുട്ടികളുണ്ട്.

"ഓണത്തിന് ഒരു വട്ടി പൂവ്' പദ്ധതി വിളവെടുപ്പു നടത്തി

വെള്ളറട: പെരുങ്കടവിള പഞ്ചായത്തിലെ അയിരൂര്‍ വാര്‍ഡിലെ കുടുംബശ്രീ ഐശ്വര്യ ജെഎല്‍ജി ഗ്രൂപ്പിന്‍റെ നേതൃത്വത്തില്‍ നടത്തിയ ഓണത്തിന് ഒരു വട്ടി പൂവ് പദ്ധതിയുടെ ഭാഗമായി നടത്തിയ പൂക്കൃഷിയുടെ വിളവെടുപ്പ് ഉദ്ഘാടനം പഞ്ചായത്ത് വൈ. പ്രസിഡന്‍റ് എസ്. ബിന്ദു നിര്‍വഹിച്ചു. പഞ്ചായത്ത് അഗം സചിത്ര അധ്യക്ഷത വഹിച്ചു. വികസനസ്റ്റാൻഡിംഗ് കമ്മിറ്റി ചെയര്‍മാന്‍ കാനക്കോട് ബാലരാജ്, കൃഷി ഓഫീസര്‍ അജയകുമാര്‍, ശ്രീകുമാരി, വിജയകുമാരി എന്നിവര്‍ സംസാരിച്ചു.

കോട്ടയ്ക്കകം ശ്രീജയുടെ മരണം: അനുശോചന യോഗം ചേർന്നു

നെടുമങ്ങാട്: കേരളത്തിലുടനീളം കോൺഗ്രസ്‌ നേതാക്കളെ വ്യക്തിഹത്യ നടത്തി കൊല്ലുക എന്ന രാഷ്ട്രീയ നയം സിപിഎം തുടർന്നു വരികയാണെന്നു കെപിസിസി മുൻ പ്രസിഡന്‍റ് എം.എം. ഹസൻ പറഞ്ഞു. കോട്ടയ്ക്കകം വാർഡ് മെമ്പർ ശ്രീജയുടെ അനുശോചനയോഗം ഉദ്ഘാടനം ചെയ്യുകയായിരുന്നു അദ്ദേഹം. അഡ്വ. ഉവൈസ്ഖാൻ അധ്യക്ഷത വഹിച്ചു. അഡ്വ. വിതുര ശശി, വിനോബ താഹ, അഡ്വ. വിദ്യാസാഗർ, സി. ജ്യോതിഷ് കുമാർ, ശ്രീജ ഹരി, എസ്.കെ. രാഹുൽ, പുളിമൂട്ടിൽ ബി. രാജീവൻ, കെ.കെ. രതീഷ്, മണ്ണാറം പ്രദീപ്‌, കുളപ്പട ഫിറോസ്, കോട്ടൂർ സന്തോഷ്‌, ഭൂവനചന്ദ്രൻ നായർ, സുരേന്ദ്രൻ ചേരപ്പളളി തുടങ്ങിയവർ പങ്കെടുത്തു.

സപ്ലൈകോയുടെ "സഞ്ചരിക്കുന്ന ഓണച്ചന്തകൾ' ഓടിത്തുടങ്ങി

നെടുമങ്ങാട്: ഓണത്തോടനുബന്ധിച്ച് നെടുമങ്ങാട്,അരുവിക്കര, വാമനപുരം നിയോജക മണ്ഡലങ്ങളിലെ ഉൾപ്രദേശങ്ങളിലും ആദിവാസി മേഖലകളിലും സപ്ലൈകോയുടെ സഞ്ചരിക്കുന്ന ഓണച്ചന്തകൾ ആരംഭിച്ചു. നെടുമങ്ങാട് സപ്ലൈകോ ഡിപ്പോയുടെ കീഴിൽ പ്രവർത്തിച്ചു വരുന്ന സഞ്ചരിക്കുന്ന മാവേലി സ്റ്റോറിന് പുറമെയാണ് സഞ്ചരിക്കുന്ന ഓണച്ചന്തകൾ ക്രമീകരിച്ചിട്ടുള്ളത്. നഗരസഭയിലെ പരിയാരം, മുക്കോല, വിതുര പഞ്ചായത്തിലെ മൊട്ടമൂട്, പൊടിയക്കാല, പനവൂർ പഞ്ചായത്തിലെ പേരയം, പൂവക്കാട് എന്നിവിടങ്ങളിൽ ഭക്ഷ്യധാന്യ വിതരണം പൂർത്തിയാക്കിയതായി സപ്ലൈകോ ഡിപ്പോ മാനേജർ അറിയിച്ചു. 31നു രാവിലെ 10.30ന് വിതുര നരകത്തിൻകാല, ഉച്ചയ്ക്ക് രണ്ടിനു പെരിങ്ങമ്മല പഞ്ചായത്തിലെ ഞാറനീലി, സെപ്റ്റം. ഒന്നിനു രാവിലെ 10ന് ആര്യനാട് കൊക്കോട്ടേല, ഉച്ചയ്ക്ക് രണ്ടിനു ചെറുമഞ്ചൽ, രണ്ടിനു രാവിലെ 10ന് പേരുമല, ഉച്ചയ്ക്ക് രണ്ടിനു തെള്ളിക്കച്ചാൽ, മൂന്നിനു രാവിലെ 10ന് പന്തലക്കോട്, ഉച്ചയ്ക്ക് രണ്ടിനു തലയൽ എന്നിവിടങ്ങളിൽ ഓണച്ചന്ത എത്തിച്ചേരും. മന്ത്രി ജി.ആർ.അനിലിന്‍റെ നിർദേശപ്രകാരമാണ് ഓണച്ചന്തകൾ ആരംഭിച്ചത്.നെടുമങ്ങാട് നഗരസഭ ചെയർപേഴ്‌സൺ സി.എസ്.ശ്രീജ ഓണച്ചന്തകൾ ഫ്‌ളാഗ് ഓഫ് ചെയ്തു. വൈസ് ചെയർമാൻ എസ്.രവീന്ദ്രൻ അധ്യക്ഷനായി.

എസിയില്‍ നിന്നു ഷോര്‍ട്ട് സര്‍ക്യൂട്ട്; വീട് കത്തിനശിച്ചു

പേരൂര്‍ക്കട: എസിയില്‍ നിന്നുള്ള ഷോര്‍ട്ട് സര്‍ക്യൂട്ടുമൂലം വീട് കത്തിനശിച്ചു. മ്യൂസിയം സ്റ്റേഷന്‍ പരിധിയില്‍ നന്ദന്‍കോട് വൈലോപ്പിള്ളി സംസ്‌കൃതി ഭവനു സമീപം എന്‍ആര്‍എ 21 നളന്ദയില്‍ ശ്യാംമോഹന്‍റെ വീടിനാണ് തീപിടിച്ചത്. 26ന് അര്‍ധരാത്രിയോടടുത്താണ് തീപിടിത്തമുണ്ടായത്. വീടിനു തീപിടിച്ചതറിഞ്ഞു വീട്ടുകാര്‍ പുറത്തേക്കിറങ്ങി രക്ഷപ്പെട്ടു. രണ്ടുനില വീടിന്‍റെ ഗ്രൗണ്ട് ഫ്ലോറിലുണ്ടായ തീപിടിത്തത്തില്‍ വീട്ടുപകരണങ്ങളെല്ലാം അഗ്നിക്കിരയായി. ഇലക്ട്രിക് ഉപകരണങ്ങളും കത്തിനശിച്ചവയില്‍ ഉള്‍പ്പെടുന്നു. മരുന്ന്, വസ്ത്രങ്ങള്‍ എന്നിവയും കത്തിനശിച്ചു. അടുക്കള ഭാഗത്തുണ്ടായിരുന്ന ഗ്യാസ് സിലിന്‍ഡറുകള്‍, പോര്‍ച്ചിലുണ്ടായിരുന്ന വാഹനങ്ങള്‍ എന്നിവ സുരക്ഷിതമായി പുറത്തേക്കു മാറ്റി. തിരുവനന്തപുരം ഫയര്‍‌സ്റ്റേഷനില്‍ നിന്ന് സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ പ്രദീപ്കുമാറിന്‍റെ നേതൃത്വത്തില്‍ എഫ്ആര്‍ഒമാരായ ഷഹീര്‍, അനീഷ്, ഫിറോസ്ഖാന്‍, ഷമീര്‍ഖാന്‍, ഷമീര്‍, മനു, എഫ്ആര്‍ഒ ഡ്രൈവര്‍മാരായ ബിജു, സുജീഷ്, ഹോംഗാര്‍ഡ് രഞ്ജിത്ത് എന്നിവര്‍ രക്ഷാപ്രവര്‍ത്തനങ്ങളില്‍ പങ്കാളികളായി.

മാറനല്ലൂരിലെ മോഷണം: ഒരാൾ പിടിയിൽ

മാറനല്ലൂർ: മാറനല്ലൂരിലെ വിവിധ പ്രദേശങ്ങളിൽ അടുത്തിടെ നടന്ന മോഷണവുമായി ബന്ധപ്പെട്ട് ഒരാൾ പിടിയിലായി. വള്ളക്കടവ് ശ്രീവരാഹം നഗർ ഉഷ നിവാസിൽ ഷിനുമോൻ(25) ആണ് പിടിയിലായത്. ഇക്കഴിഞ്ഞ ദിവസം കണ്ടല ഹൈസ്കൂളിനു മുൻവശത്തായി പ്രവർത്തിക്കുന്ന മൊബൈൽ കട കുത്തിത്തുറന്ന് ഏകദേശം 20,000 രൂപ വിലപിടിപ്പുള്ള സാധനങ്ങൾ മോഷ്ടിച്ച കേസിലാണ് ഇയാൾ പിടിയിലായത്. കൂടെയുണ്ടായിരുന്ന ഇയാളുടെ ബന്ധു സുധിയുമൊന്നിച്ചാണ് മോഷണം നടത്തിയത്. കാട്ടാക്കടയിലുള്ള സുധിയുടെ പെൺ സുഹൃത്തിനെക്കണ്ടു മടങ്ങിവരവേ തിങ്കളാഴ്ച പുലർച്ചെ മൂന്നുമണിയോടുകൂടിയാണ് മൊബൈൽ കട കുത്തിത്തുറന്ന് മോഷണം നടത്തിയത്.

മുല്ലച്ചിറ, പേരയം റോഡുകൾ പൊട്ടിപ്പൊളിഞ്ഞു; യാത്രക്കാർ ദുരിതത്തിൽ

വിതുര: പഴകുറ്റി-പൊന്മുടി റോഡ് നിർമാണത്തിന്‍റെ ഭാഗമായി ചിറ്റാർ പാലം പുതുക്കിപ്പണിയുന്നതിനാൽ ഗതാഗതം തിരിച്ചുവിട്ട രണ്ടു റോഡുകൾ പൊട്ടിപ്പൊളിഞ്ഞു. മുല്ലച്ചിറയിൽനിന്നു രണ്ടായി തിരിയുന്ന റോഡുകളാണു ശോച്യാവസ്ഥയിലായത്. ഇരുചക്ര വാഹനങ്ങൾക്കു വേണ്ടി ശാന്തിനഗറിൽനിന്നു തിരിയുന്ന വഴി വീതിയില്ലാത്തതും കുണ്ടും കുഴിയും നിറഞ്ഞതാണ്. ഏറെ ബുദ്ധിമുട്ടിയാണ് ഇതുവഴി വാഹനങ്ങൾ കടന്നു പോകുന്നത്. കെഎസ്ആർടിസി ബസുകൾ ഉൾപ്പടെ കടന്നു പോകുന്ന മുല്ലച്ചിറ പേരയം റോഡും തകർന്ന അവസ്ഥയിലാണ്. അവധി ദിവസങ്ങളിൽ നിരവധി വിനോദ സഞ്ചാരികൾ പൊന്മുടിയിലേക്ക് പോകുന്ന പാതയാണിത്. വാഹനങ്ങൾക്ക് സൈഡ് കൊടുക്കാൻ പോലും കഴിയാത്ത അവസ്ഥയാണ്. കുണ്ടും കുഴിയും നിറഞ്ഞത് യാത്രക്കാരെ ഏറെ ബുദ്ധിമുട്ടിക്കുന്നു. സ് കൂൾ വാഹനങ്ങൾ ഉൾപ്പടെ കടന്നു പോകുന്ന വഴികൾ അടിയന്തിരമായി നവീകരിക്കണമെന്നാണ് നാട്ടുകാരുടെ ആവശ്യം.

ക്രൈസ്റ്റ് നഗർ സെൻട്രൽ സ്‌കൂളിൽ ആവണി മേളം

കവടിയാർ: ക്രൈസ്റ്റ് നഗർ സെൻട്രൽ സ്‌കൂളിലെ ഓണാഘോഷ പരിപാടി "ആവണിമേളം 2025' മന്ത്രി ജി.ആർ. അനിൽ ഉദ്ഘാടനം ചെയ്തു. സ്കൂ‌ൾ മാനേജർ ഫാ. പോൾ മങ്ങാട് സിഎംഐ അധ്യക്ഷത വഹിച്ചു. പ്രിൻസിപ്പൽ ഫാ. സേവ്യർ അമ്പാട്ട് സിഎംഐ ഓണാശംസകൾ ആശംസകൾ നേർന്നു. വൈസ് പ്രിൻസിപ്പൽ ഫാ. റോബിൻ പതിനാറിൽചിറ സിഎംഐ വിശിഷ്ടാതിഥിക്ക് ഉപഹാരം സമർപ്പിച്ചു. അക്കാഡമിക് കോ-ഓർഡിനേറ്റർ ജയ ജേക്കബ് കോശി ചടങ്ങിൽ സംബന്ധിച്ചു. വിവിധ കലാമത്സരങ്ങളിൽ വിജയിച്ചവർക്കുള്ള സമ്മാനദാനം വിശിഷ്ടാഅതിഥി നിർവഹിച്ചു. തുടർന്ന് കുട്ടികളും അധ്യാപകരും അവതരിപ്പിച്ച കലാപരിപാടികളും നടന്നു. ഓണാഘോഷ പരിപാടികളുടെ കൺവീനർമാരായ കെ. ജെ. സിനു, എസ്.ആർ. ജ്യോത്സന, ലക്ഷ്‌മി എം. നായർ എന്നിവർ പരിപാടികൾക്കു നേതൃത്വം നൽകി. ആൻസ മരിയ സാജു സ്വാഗതവും എവിൻ ആനന്ദ് ജോൺസ് നന്ദിയും പറഞ്ഞു.

ബാര്‍ട്ടന്‍ഹില്ലിലെ കൊലപാതക ശ്രമം; യുവാവ് പിടിയില്‍

പേരൂര്‍ക്കട: ബാര്‍ട്ടണ്‍ ഹില്‍ റോഡിലെ കൊലപാതക ശ്രമവുമായി ബന്ധപ്പെട്ടു നാലാംപ്രതിയെ കന്‍റോണ്‍മെന്‍റ് എസി സ്റ്റ്യുവര്‍ട്ട് കീലറിന്‍റെ നേതൃത്വത്തില്‍ മ്യൂസിയം സിഐ വിമല്‍, എസ്ഐമാരായ വിപിന്‍, സൂരജ് എന്നിവര്‍ ചേര്‍ന്നു പിടികൂടി. തമ്പാനൂര്‍ രാജാജി നഗര്‍ ഫ്‌ളാറ്റ് നമ്പര്‍ 397-ല്‍ നിരഞ്ജന്‍ സുനില്‍കുമാര്‍ (18) ആണ് പിടിയിലായത്. ഈമാസം 15-നാണ് കേസിനാസ്പദമായ സംഭവം. കാസര്‍കോഡ് ഹോസ്ദുര്‍ഗ് കോട്ടപ്പുറം സ്വദേശി മുഹമ്മദ് റിസ്വാന്‍ (22) ആണ് ആക്രമണത്തിന് ഇരയായത്. നിരഞ്ജന്‍റെ നേതൃത്വത്തിലുള്ള അഞ്ചംഗസംഘം സംഭവദിവസം എന്‍ജിനീയറിംഗ് കോളജിനു സമീപം നില്‍ക്കുകയായിരുന്ന മുഹമ്മദ് റിസ്വാനെ കമ്പുകൊണ്ടടിച്ചു പരിക്കേല്‍പ്പിക്കുകയും വാള്‍ ഉപയോഗിച്ച് വെട്ടിപ്പരിക്കേല്‍പ്പിക്കുകയുമായിരുന്നു. ക്രിമിനല്‍ക്കേസ് പ്രതിയും ബാര്‍ട്ടണ്‍ ഹില്‍ സ്വദേശിയുമായ രാജേഷിന് ഒന്നാംപ്രതിയായ കിച്ചാമണിയുടെ മാതാവുമായി ബന്ധമുണ്ടായിരുന്നു. ഇതിന്‍റെ വിരോധംമൂലം സംഭവദിവസം രാജേഷിനെ ആക്രമിക്കാനാണ് സംഘം എത്തിയത്. എന്‍ജിനീയറിംഗ് കോളജിനു സമീപത്തുകൂടി രാജേഷ് ഓടി രക്ഷപ്പെട്ടു. ആ സമയത്ത് കോളജിനടുത്ത് ഉണ്ടായിരുന്നയാളാണ് മുഹമ്മദ് റിസ്വാന്‍. ഇയാള്‍ രാജേഷിന്‍റെ സംഘത്തില്‍പ്പെട്ടയാളാണെന്നു തെറ്റിദ്ധരിച്ചായിരുന്നു ആക്രമണം. മുഹമ്മദ് റിസ്വാനെ ആക്രമിച്ചതുമായി ബന്ധപ്പെട്ട് ഒന്നും രണ്ടും പ്രതികള്‍ കോടതിയില്‍ കീടങ്ങിയിരുന്നു. മൂന്ന്, അഞ്ച് പ്രതികള്‍ക്കായി പോലീസ് അന്വേഷണം ഊര്‍ജിതപ്പെടുത്തി. സിപിഒമാരായ ഷൈന്‍, ഷീല, ദീപു, ഉദയന്‍, സുല്‍ഫി, സാജന്‍, അരുണ്‍, ഷംല, വൈശാഖ് എന്നിവരും അന്വേഷണസംഘത്തില്‍ ഉണ്ടായിരുന്നു. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]