സൗഹൃദ കൂട്ടായ്മയും ആദരവും സംഘടിപ്പിച്ചു

എടക്കര: "മന്ദാരപ്പൂക്കൾ’ കൂട്ടായ്മയും ചുങ്കത്തറ പ്രവാസി അസോസിയേഷൻ ഓഫ് കുവൈത്തും സംഘടിപ്പിച്ച സൗഹൃദ കൂട്ടായ്മയും ആദരവും പി.വി. അബ്ദുൾ വഹാബ് എംപി ഉദ്ഘാടനം ചെയ്തു. കൂട്ടായ്മ ചെയർമാൻ ഡോ. കെ.എം.ജോസ് അധ്യക്ഷത വഹിച്ചു. നിലന്പൂർ റെയിൽവേ വികസനത്തിന് പ്രയത്നിച്ച അബ്ദുൾ വഹാബ് എംപിക്ക് ആര്യാടൻ ഷൗക്കത്ത് എംഎൽഎ ഉപഹാരം സമർപ്പിച്ചു. എംഎൽഎക്കുള്ള കൂട്ടായ്മയുടെ ഉപഹാരം ഡോ. കെ.എം. ജോസ് സമ്മാനിച്ചു.

ചുങ്കത്തറ ബ്ലോക്ക് സാമൂഹികാരോഗ്യ കേന്ദ്രത്തിന്‍റെയും ഡയാലിസിസ് സെന്‍ററിന്‍റെയും വികസനത്തിനു പ്രവർത്തിച്ച നിലന്പൂർ ബ്ലോക്ക് പഞ്ചായത്ത് പ്രസിഡന്‍റ് പി. പുഷ്പവല്ലി, ജീവകാരുണ്യ മേഖലയിലും വിദ്യാഭ്യാസ, വികസന രംഗത്തും മികച്ച പ്രവർത്തനങ്ങൾ നടത്തിയ ഫാ. രാജു ജോർജ് തോട്ടത്തിൽ, അബ്ദുൾ ഹക്കിം ചങ്കരത്ത്, സി.കെ.സുരേഷ്, ഷൗക്കത്ത് കളത്തിങ്ങൽ, വി.വി. ജോണ്‍ എന്നിവരെയും ചടങ്ങിൽ ആദരിച്ചു.

ജില്ലാ പഞ്ചായത്ത് വൈസ് പ്രസിഡന്‍റ് ഇസ്മായിൽ മൂത്തേടം, പഞ്ചായത്ത് പ്രസിഡന്‍റുമാരായ വത്സമ്മ സെബാസ്റ്റ്യൻ (ചുങ്കത്തറ), ഒ.ടി. ജയിംസ് (എടക്കര), ജില്ലാ പഞ്ചായത്തംഗം ഷെറോണ റോയ്, ഓർത്തഡോക്സ് സഭ മാനേജിംഗ് കമ്മിറ്റി അംഗം ഫാ. മാത്യൂസ് വട്ടിയാനിക്കൽ, കെ.ടി. കുഞ്ഞാൻ,

ഫാ. വർഗീസ് തോമസ്, മോഹൻ ജോർജ്, എ.കെ. ബേബി, പി.എം. ഹമീദലി, കെ.എം. ജോർജ്, മാന്പള്ളി സലീം, കെ. കിരാതദാസ്, സി.എച്ച്. ഷൗക്കത്തലി, കെ.ടി. അഷ്റഫ്, കെ.എം. തോമസ്, എ.ജെ. സന്തോഷ്, പി.പി. അലവിക്കുട്ടി എന്നിവർ എന്നിവർ പ്രസംഗിച്ചു.

ADVERTISEMENT

കഞ്ചാവുമായി യുവാവ് പിടിയിൽ

കരുവാരകുണ്ട്: കഞ്ചാവുമായി യുവാവ് പിടിയിൽ. കരുവാരക്കുണ്ട് തരിശിലെ കോരൻങ്കണ്ടൻ ഹിഷാ(27) മിനെയാണ് പോലീസ് പിടികൂടിയത്. തരിശ് അങ്ങാടിയിൽ വിൽപ്പനക്കായിട്ടാണ് കഞ്ചാവ് കൊണ്ടുവന്നിരുന്നത്. പട്രോളിങ്ങിനിടെയാണ് പോലീസ് ഹിഷാമിനെ പിടികൂടിയത്. പ്രദേശത്ത് മദ്യ മയക്കുമരുന്നു വില്പന്ന വ്യാപകമാണെന്ന് നാട്ടുകാർ പറഞ്ഞു.

ആരോഗ്യ കേന്ദ്രത്തിന് ലീഗ് നേതാവിന്‍റെ പേര് വേണ്ടെന്ന്

മഞ്ചേരി : തൃക്കലങ്ങോട് പഞ്ചായത്ത് ജനകീയ ആരോഗ്യ കേന്ദ്രത്തിന് പ്രാദേശിക ലീഗ് നേതാവിന്‍റെ പേര് നല്‍കാനുള്ള നീക്കത്തില്‍ നിന്ന് ഭരണസമിതി പിന്‍മാറണമെന്ന് സിപിഐഎം തൃക്കലങ്ങോട് പഞ്ചായത്ത് കമ്മിറ്റി ആവശ്യപ്പെട്ടു. സ്ഥലം വിട്ടു നല്‍കിയവരോ ജനപ്രതിനിധികളോ ആയിട്ടുള്ള വ്യക്തികളുടെ പേരുകള്‍ മാത്രമാണ് പഞ്ചായത്ത് നിയന്ത്രണത്തിലുള്ള സ്ഥാപനങ്ങള്‍ക്ക് നല്‍കാന്‍ പൊതുവെ നിയമം അനുവദിക്കുന്നുള്ളു. അത് മറിക്കടന്നാണ് ആമയൂരിലെ ആശുപത്രി കെട്ടിടത്തിന് പഞ്ചായത്ത് അംഗം പോലും ആയിട്ടില്ലാത്ത പ്രാദേശിക ലീഗ് നേതാവിന്‍റെ പേര് നല്‍കാന്‍ ഭരണസമിതി തീരുമാനിച്ചത്. ചട്ടം അട്ടിമറിച്ച് സ്വതാല്‍പര്യം അടിച്ചേല്‍പ്പിക്കാനുള്ള യുഡിഎഫ് ഭരണസമിതിയുടെ നടപടിക്കെതിരേ പ്രതിഷേധം ശക്തമാക്കുമെന്ന് സിപിഐഎം പഞ്ചായത്ത് കമ്മിറ്റി അറിയിച്ചു. പ്രതിഷേധ യോഗത്തില്‍ കെ.പി. മധു, കെ.കെ. ജനാര്‍ദ്ദനന്‍, പി. രാജശേഖരന്‍ സംസാരിച്ചു.

ജനറല്‍ ആശുപത്രി : പ്രതിഷേധവുമായി യുഡിഎഫ് കൗണ്‍സിലര്‍മാര്‍ വീണ്ടും

മഞ്ചേരി: ജനറല്‍ ആശുപത്രി നഗരസഭക്ക് വിട്ടുനല്‍കിയിട്ടുണ്ടെന്ന ആരോഗ്യമന്ത്രിയുടെ പൊതുവേദിയിലെ പ്രസംഗത്തിന് പിന്നാലെ തുടര്‍പ്രതിഷേധങ്ങളുമായി ചെയര്‍പേഴ്‌സനും യുഡിഎഫ് കൗണ്‍സിലര്‍മാരും. മന്ത്രി പറഞ്ഞത് ശരിയാണെങ്കില്‍ ആശുപത്രിയുടെ എച്ച് എം സി രൂപീകരിക്കുന്നതിനും ഏതൊക്കെ കെട്ടിടങ്ങളാണ് നഗരസഭക്ക് വിട്ടുനല്‍കിയതെന്ന് വ്യക്തമാക്കണമെന്നാവശ്യപ്പെട്ടാണ് കൗണ്‍സിലര്‍മാര്‍ വീണ്ടും ആശുപത്രിയിലെത്തി പ്രതിഷേധിച്ചത്. ഇത് രണ്ടാം തവണയാണ് ഇതേവിഷയത്തില്‍ കൗണ്‍സിലര്‍മാര്‍ പ്രതിഷേധവുമായി ആശുപത്രിയിലെത്തുന്നത്. അടിയന്തിര നടപടി ആവശ്യപ്പെട്ട് ജില്ല കലക്ടര്‍, ജില്ല മെഡിക്കല്‍ ഓഫിസര്‍, സൂപ്രണ്ട് എന്നിവര്‍ക്ക് രേഖാമൂലം കത്ത് നല്‍കിയിരുന്നു. മെഡിക്കല്‍ വിദ്യാഭ്യാസ ഡയറക്ടര്‍ (ഡിഎംഇ), ഡയറക്ടര്‍ ഓഫ് ഹെല്‍ത്ത് സര്‍വീസ് (ഡിഎച്ച്എസ്), ജില്ല കലക്ടര്‍ എന്നിവരെ അറിയിച്ച് നാല് ദിവസത്തിനകം മറുപടി നല്‍കാമെന്നാണ് സൂപ്രണ്ട് അറിയിച്ചത്. ഈ മറുപടി തേടിയാണ് ജനപ്രതിനിധികള്‍ വീണ്ടും സൂപ്രണ്ടിന് മുന്നിലെത്തിയത്. തങ്ങളുടെ പരാതിക്ക് മറുപടി ലഭിക്കണമെന്നാവശ്യപ്പെട്ട് സൂപ്രണ്ടിനെ കണ്ടെങ്കിലും സര്‍ക്കാറില്‍ നിന്നും മറുപടിയൊന്നും ലഭിച്ചില്ലെന്നായിരുന്നു ആശുപത്രി അധികൃതരുടെ മറുപടി. ജില്ല കലക്ടര്‍, ഡിഎംഇ, ഡിഎച്ച്എസ് എന്നിവര്‍ക്ക് ചെയര്‍പേഴ്‌സന്‍റെ കത്ത് അന്ന് തന്നെ നല്‍കിയതായും സൂപ്രണ്ട് ഇവരെ അറിയിച്ചു. ഇതോടെ കൗണ്‍സിലര്‍മാര്‍ മുദ്രാവാക്യം വിളിച്ച് പ്രതിഷേധിച്ചു. മെഡിക്കല്‍ കോളജില്‍ ഉദ്ഘാടനത്തിനെത്തിയ ആരോഗ്യവകുപ്പ് മന്ത്രി ജനറല്‍ ആശുപത്രി 2016ല്‍ നഗരസഭക്ക് വിട്ടുനല്‍കിയെന്ന് പറഞ്ഞിരുന്നു. എന്നാല്‍ ജനറല്‍ ആശുപത്രി മെഡിക്കല്‍ കോളജില്‍ നിന്നും മാറ്റിയാല്‍ മെഡിക്കല്‍ വിദ്യാര്‍ഥികളുടെ പഠനത്തെ ബാധിക്കുമെന്ന കാര്യം പിന്നീടാണ് മന്ത്രി തിരിച്ചറിഞ്ഞതെന്നും എച്ച്എംസി രൂപീകരിക്കാന്‍ സര്‍ക്കാര്‍ യാതൊരുവിധ ഇടപെടലും നടത്തുന്നില്ലെന്നും ചെയര്‍പേഴ്‌സന്‍ വി.എം. സുബൈദ പറഞ്ഞു. ആശുപത്രി വിട്ടുനല്‍കിയാല്‍ ഭരണച്ചുമതല നഗരസഭ ഏറ്റെടുക്കുമെന്നും സൂപ്രണ്ടിനെ അറിയിച്ചു. സ്ഥിരംസമിതി അധ്യക്ഷരായ റഹീം പുതുക്കൊള്ളി, യാഷിക് മേച്ചേരി, എന്‍. കെ. ഖൈറുന്നീസ, സി. സക്കീന, എന്‍.എം. എല്‍സി, കൗണ്‍സിലര്‍മാരായ അഡ്വ. ബീന ജോസഫ്, മരുന്നന്‍ മുഹമ്മദ്, അഷ്‌റഫ് കാക്കേങ്ങല്‍, എന്‍.കെ. ഉമ്മര്‍ ഹാജി, ഹുസൈന്‍ മേച്ചേരി, എം.കെ. മുനീര്‍, ഷൈമ ആക്കല, മുജീബ് റഹ്മാന്‍ പരേറ്റ, ചിറക്കല്‍ രാജന്‍, ഫാതതിമ സുഹ്‌റ തുടങ്ങിയവര്‍ നേതൃത്വം നല്‍കി.

കളംപാട്ട് ശില്പശാല സംഘടിപ്പിച്ചു

മക്കരപ്പറമ്പ്: മക്കരപ്പറമ്പ് ഗവൺമെന്‍റ് വൊക്കേഷണൽ ഹയർ സെക്കൻഡറി സ്കൂളിൽ സംസ്കൃത ക്ലബിന്‍റെ ആഭിമുഖ്യത്തിൽ കളംപാട്ട് ശില്പശാല സംഘടിപ്പിച്ചു. ശില്പശാല പ്രധാനാധ്യാപകൻ ടി. അനിൽ കുമാർ ഉദ്ഘാടനം ചെയ്തു. പ്രകൃതിദത്തമായ പഞ്ചവർണ്ണങ്ങളാൽ ദേവരൂപങ്ങൾ എഴുതി പൂജ ചെയ്ത് സ്തുതി വച്ച് പാട്ടുപാടി ദേവതകളെയും പരിവാരങ്ങളെയും മന്ത്രതന്ത്രങ്ങളാൽ ഉണർത്തി അവർക്കു വേണ്ട ബലി കൊടുക്കുന്ന ചടങ്ങാണ് അനുഷ്ഠാന കലയായ കളംപാട്ട്. പാഠപുസ്തകത്തിന്‍റെ ഭാഗമായുള്ള കളമെഴുത്തുപാട്ടിനെ പരിചയപ്പെടുത്താനാണ് ശില്പശാല സംഘടിപ്പിച്ചത്. കേരള ബുക്ക് ഓഫ് റെക്കോർഡ് ജേതാവ് കടന്നമണ്ണ ശ്രീനിവാസൻ ശില്പശാല നയിച്ചു. കളംപാട്ടിന്‍റെ ആചാര അനുഷ്ഠാനങ്ങൾ, ഐതിഹ്യങ്ങൾ , ചടങ്ങുകൾ എന്നിവയെക്കുറിച്ചുള്ള സോദാഹരണ പ്രഭാഷണവും നന്തുണി ഉപയോഗിച്ചുള്ള കളം പാട്ടും കുട്ടികൾക്ക് നവ്യാനുഭവമായി. സംസ്കൃതം അധ്യാപിക പ്രീത മോൾ സ്വാഗതം നേർന്ന ചടങ്ങിൽ മറ്റ് അധ്യാപകർ സംബന്ധിച്ചു.

നിക്ഷേപതുകയിൽ തട്ടിപ്പ്: സഹകരണ ബാങ്കിലെ മൂന്ന് ജീവനക്കാർ അറസ്റ്റിൽ

പെരിന്തൽമണ്ണ: നിക്ഷേപ തുകയിൽ തട്ടിപ്പ് നടത്തി രണ്ട് നിക്ഷേപകരെ വഞ്ചിച്ച സംഭവത്തിൽ സർവീസ് സഹകരണ ബാങ്കിലെ മൂന്ന് ജീവനക്കാർ അറസ്റ്റിലായി. ആനമങ്ങാട് സർവീസ് സഹകരണ ബാങ്കിലാണ് രണ്ട് പേരുടെ പേരിലുള്ള 27,52,176 രൂപ തിരിമറി നടത്തി നിക്ഷേപകരെ വഞ്ചിച്ചത്. ബാങ്ക് ജീവനക്കാരായ തൂത പാറൽ ചമ്മൻകുഴി അൻവർ (52), ആനമങ്ങാട് കാഞ്ഞിരുട്ടിൽ അലി അക്ബർ (55), തൂത പാറൽ സ്വാലിഹ് (52) എന്നിവരെയാണ് പെരിന്തൽമണ്ണ പോലീസ് അറസ്റ്റ് ചെയ്തത്. മൂവരേയും കോടതിയിൽ ഹാജരാകണമെന്ന വ്യവസ്ഥയിൽ ജാമ്യത്തിൽ വിട്ടു. ബാങ്ക് മെമ്പറും നിക്ഷേപകനുമായ മണലായ തുളിയത്ത് ഉസ്മാന്‍റെ പരാതിയിൽ ബാങ്ക് സെക്രട്ടറി അൻവർ , അക്കൗണ്ടന്‍റ് അലി അക്ബർ, ജീവനക്കാരായ അബ്ദുസലാം, ഇ.പി. സ്വാലിഹ്, എന്നിവരെ പ്രതി ചേർത്താണ് ഒരു കേസ് ഉസ്മാൻ ബാങ്കിൽ ഫിക്സഡ് ഡിപ്പോസിറ്റായി നിക്ഷേപിച്ച 15 ലക്ഷം രൂപ ഇയാളുടെ മകളുടെ അക്കൗണ്ടിലേക്ക് മാറ്റാൻ ആവശ്യപെട്ടിട്ടും അത് ചെയ്യാതെ തുക മാറ്റി നിക്ഷേപിച്ചെന്നാണ് ഉസ്മാന്‍റെ പരാതിയിൽ പറയുന്നത്. ബാങ്ക് മെമ്പറും കോൺട്രാക്ടറുമായ മങ്ങാടൻപറമ്പ് ഷറഫുദ്ദീന്‍റെ പരാതിയിൽ ബാങ്ക് സെക്രട്ടറി അൻവർ , ജീവനക്കാരായ അബ്ദുസലാം, നൗഫൽ,നോർത്ത് ഈസ്റ്റ് സ്മോൾ ഫിനാൻസ് സ്ഥാപന നടത്തിപ്പുകാരൻ അഭിഷേക് ബഹ്റ എന്നിവർക്കെതിരേയാണ് മറ്റൊരു കേസെടുത്തത്. ഷറഫുദ്ദീന്‍റെ നിക്ഷേപ തുകയായ 12,52,171 രൂപ നിക്ഷേപകനറിയാതെ നോർത്ത് ഈസ്റ്റ് സ്മോൾ ഫിനാൻസ് സ്ഥാപനത്തിലേക്ക് ആർടിജിഎസ് ചെയ്ത് കൊടുത്ത് വഞ്ചന നടത്തിയതായാണ് ഷറഫുദ്ദീന്‍റെ പരാതിയിൽ പറയുന്നത്. ബാങ്കിലെ നിക്ഷേപമാറ്റം സംബന്ധിച്ച് തന്‍റെ മൊബൈൽ ഫോണിലേക്ക് മെസേജ് വരുന്നത് എതിർ കക്ഷികൾ തടഞ്ഞതായും പരാതിയിൽ പറയുന്നു.

ഇടതു സർക്കാരിൽ നിന്ന് കേരള ജനത മോചനം തേടുന്നു: നജീബ് കാന്തപുരം

പെരിന്തൽമണ്ണ: ജന ജീവിതത്തിനു മേൽ ഇത്രമാത്രം ദുരിതം വിതച്ച ഒരു സർക്കാർ കേരള ചരിത്രത്തിൽ ഉണ്ടായിട്ടില്ലെന്നും ഈ സർക്കാറിന്‍റെ പതനം ഓരോ മലയാളിയും ആഗ്രഹിക്കുകയാണെന്നും നജീബ് കാന്തപുരം എംഎൽഎ പറഞ്ഞു. പെരിന്തൽമണ്ണ നിയോജകമണ്ഡലം യുഡിഎഫ് നേതൃ ക്യാമ്പ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. നിത്യോപയോഗ സാധനങ്ങളുടെ വില വാണം പോലെ കുതിച്ചുയരുന്നു. വിലക്കയറ്റം തടയുന്നതിനോ നിയന്ത്രിക്കുന്നതിനോ സർക്കാർ യാതൊരു നടപടിയും സ്വീകരിക്കുന്നില്ല. ഏറ്റവും കൂടുതൽ വൈദ്യുതി ചാർജും വെള്ളക്കരവും നൽകുന്ന സംസ്ഥാനങ്ങളുടെ പട്ടികയിൽ കേരളം ഒന്നാം സ്ഥാനത്താണ്. കെട്ടിട നിർമാണ മേഖല സ്തംഭിച്ചു നിൽക്കുന്നു. ജനക്ഷേമ പദ്ധതികൾ മുടങ്ങിക്കിടക്കുന്നു. കേരളത്തിൽ യാതൊരു പണിയുമില്ലാത്തവരായി മന്ത്രിമാർ മാറിയിരിക്കുന്നു. ഈ ദുരവസ്ഥയിൽ നിന്ന് കേരള ജനത മോചനം തേടുകയാണെന്നും വരാനിരിക്കുന്ന പഞ്ചായത്ത് നിയമസഭാ, തെരഞ്ഞെടുപ്പുകളിൽ ഇടതുമുന്നണിയെ മൂലക്കിരുത്താൻ ജനം കാത്തിരിക്കുകയാണെന്നും അദ്ദേഹം പറഞ്ഞു. നിയോജക മണ്ഡലം യുഡിഎഫ് ചെയർമാൻ എം.എം. സക്കീർ ഹുസൈൻ അധ്യക്ഷത വഹിച്ചു. ജില്ലാ കൺവീനർ അഷ്റഫ് കോക്കൂർ മുഖ്യപ്രഭാഷണം നടത്തി. വി. ബാബുരാജ്, എ.കെ. നാസർ മാസ്റ്റർ, അഡ്വ. എ.കെ. മുസ്തഫ, സി. സുകുമാരൻ, ജോർജ്, ശശിധരൻ മണലായ, ബി. മുസമ്മിൽ ഖാൻ, നാലകത്ത് ഷൗക്കത്ത് സംസാരിച്ചു.

നിലമ്പൂർ ജില്ലാ ആശുപ്രതി വികസനം എംഎൽഎയും കോൺഗ്രസും തടസം നിൽക്കുന്നു

ആശുപത്രിക്ക് മുന്നിൽ ധർണ സംഘടിപ്പിച്ച് എൽഡിഎഫ് നിലമ്പൂർ: ജില്ലാ ആശുപത്രിയുടെ വികസനം തടയാൻ എംഎൽഎയുടെ നേതൃത്വത്തിൽ കോൺഗ്രസ് ശ്രമമെന്ന് നഗരസഭാ ചെയർ പേഴ്സൺ മാട്ടുമ്മൽ സലീം. എൽഡിഎഫ് കൗൺസിലർമാരുടെ നേതൃത്വത്തിൽ നിലമ്പൂർ ജില്ലാ ആശുപത്രിക്ക് മുന്നിൽ കോൺഗ്രസ് നിലപാടിൽ പ്രതിഷേധിച്ച് എൽഡിഎഫ് കൗൺസിലർമാർ നടത്തുന്ന ധർണ ഉദ്ഘാടനം ചെയ്യത് സംസാരിക്കുകയായിരുന്നു അദ്ദേഹം. കോൺഗ്രസ് ഒഴികെ മറ്റെല്ലാ രാഷ്ട്രീയ പാർട്ടികളും നിലമ്പൂർ ജില്ലാ ആശുപത്രിയുടെ വികസനത്തിൽ ഒറ്റക്കെട്ടാണെന്നും നഗരസഭാ ചെയർ പേഴ്സൺ പറഞ്ഞു. നിലമ്പൂർ ഗവ. മോഡൽ യുപി സ്ക്കൂളിന്‍റെ 92 സെന്‍റ് സ്ഥലം ഏറ്റെടുത്ത് ജില്ലാ ആശുപത്രിയുടെ വികസനം അന്തിമ ഘട്ടത്തിലേക്ക് നീങ്ങുന്പോഴാണ് ഉപതെരഞ്ഞെടുപ്പിലൂടെ കോൺഗ്രസ് നേതാവ് ആര്യാടൻ ഷൗക്കത്ത് എംഎൽഎയായത്. ഇതോടെയാണ് ആശുപത്രി വികസനം തടയുന്നതിന് എംഎൽഎയുടെ നേതൃത്വത്തിൽ കരുനീക്കം നടക്കുന്നത്. നഗരസഭയിൽ സ്ക്കൂളിന്‍റെ സ്ഥലം ആശുപത്രി വികസനത്തിന് വിട്ട് കൊടുക്കുന്നതിൽ പ്രതിഷേധിച്ച് വിയോജന കുറിപ്പ് എഴുതിയവരാണ് കോൺഗ്രസിലെ 9 അംഗങ്ങളെന്നും മാട്ടുമ്മൽ സലിം പറഞ്ഞു. കോൺഗ്രസിന്‍റെയും എംഎൽഎയുടെയും നിലപാടുകൾ പൊതുജനങ്ങളെ ബോധ്യപ്പെടുത്താനുള്ള ക്യാമ്പയിന്‍റെ തുടക്കമാണിതെന്നും ചെയർ പേഴ്സൺ പറഞ്ഞു. നിലമ്പൂർ നഗരസഭയിൽ മുമ്മുള്ളിൽ മാത്രമാണ് അർബൻ സബ് സെന്‍റർ ഉണ്ടായിരുന്നത്. ഇപ്പോൾ 4 അർബൻ സെന്‍ററുകൾ ഉണ്ട്. നിലമ്പൂർ ജില്ലാ ആശുപത്രി ഇന്ന് സാധാരണക്കാരുടെ ആശ്രയമായി മാറിയത്. ഇടത് സർക്കാറിന്‍റെ പ്രവർത്തന ഫലമായാണ്. ആശുപത്രിയെ ആശ്രയിക്കുന്ന രോഗികളുടെ എണ്ണവും. ജീവനക്കാരുടെ എണ്ണത്തിൽ ഉണ്ടായിട്ടുള്ള വർധനവും പരിശോധിച്ചാൽ ഇത് വ്യക്തമാകും. വികസന സ്റ്റാന്‍റിംഗ് കമ്മറ്റി ചെയർ പേഴ്സൺ പി.എം. ബഷീർ അധ്യക്ഷത വഹിച്ചു. എംഎൽഎ യുടെ നേതൃത്വത്തിൽ ആരംഭിക്കാൻ പോകുന്ന സൂപ്പർ മൾട്ടി സ്പെഷ്യലിറ്റി ആശുപത്രിക്ക് വേണ്ടിയാണ് നിലമ്പൂർ ജില്ലാ ആശുപത്രിയുടെ വികസനത്തിന് തുരങ്കം വെയ്ക്കുന്നതെന്നും പി.എം. ബഷീർ പറഞ്ഞു. വൈസ് ചെയർ പേഴ്സൺ അരുമ ജയകൃഷ്ണൻ. സ്റ്റാന്‍റിംഗ് കമ്മിറ്റി ചെയർ പേഴ്സൺ മാരായ കക്കാടൻ റഹീം. സ്ക്കറിയ ക്നാം തോപ്പിൽ. യു.കെ. ബിന്ദു. ഷൈജിമോൾ. കാളികാവ് ബ്ലോക്ക് പഞ്ചായത്തംഗം കെ. ഷെരീഫ. സിപിഎം ജില്ലാ കമ്മറ്റി അംഗം ഇ. പത്മാക്ഷൻ. ഏരിയാ സെക്രട്ടറി കെ. മോഹൻ. എന്നിവർ സംസാരിച്ചു. എൽഡിഎഫ് പ്രവർത്തകർക്ക് അഭിവാദ്യമർപ്പിച്ച് പ്രകടനവും നടത്തി.

വിസിബി കം ബ്രിഡ്ജും അപ്റോച്ച് റോഡ് നിർമാണവും പാതിവഴിയിൽ

പരാതി അന്വേഷിക്കാൻ ജഡ്ജി നേരിട്ടെത്തി കാളികാവ്: കാളികാവ്-ചോക്കാട് പഞ്ചായത്തുകളെ ബന്ധിപ്പിക്കുന്ന വെന്തോടൻപടി മുത്തംതണ്ട് വിസിബി കം ബ്രിഡ്ജും അപ്റോച്ച് റോഡ് നിർമാണവും വൈകുന്നതിൽ ഹൈക്കോടതിയുടെ ഇടപെടൽ. ഫീൽഡ് തല അന്വേഷണത്തിനായി ജഡ്ജി നേരിട്ട് സ്ഥലം സന്ദർശിച്ചു. ലീഗൽ സർവീസ് അതോറിറ്റി സെക്രട്ടറിയും സീനിയർ ഡിവിഷൻ സിവിൽ ജഡ്ജുമായ ഷാബിർ ഇബ്രാഹിമിന്‍റെ നേതൃത്വത്തിലുള്ള സംഘമാണ് പാലം സന്ദർശിച്ചത്. വെന്തോടൻപടി മുത്തംതണ്ട് വിസിബി കം ബ്രിഡ്ജും അപ്പ്രോച്ച് റോഡും വൈകുന്നത് സംബന്ധിച്ച് ഹൈക്കോടതിയിൽ നൽകിയ ഹർജിയുടെ ഭാഗമായിട്ടാണ് ഫീൽഡ് തല അന്വേഷണത്തിനായി ജഡ്ജി നേരിട്ട് വന്നത്. 2025 ജനുവരി മാസത്തിലും ജഡ്ജി സ്ഥലം സന്ദർശിച്ചിരുന്നു. അന്ന് 2025 ജൂൺ മാസത്തിൽ വിസിബി കം ബ്രിഡ്ജ് പണി തീർക്കുമെന്നാണ് ജില്ലാ പഞ്ചായത്ത് അധികൃതർ അറിയിച്ചിരുന്നത്. തുടർന്ന് നിലമ്പൂർ കോടതിയിലെ അദാലത്തിൽ സിൽക്ക് കമ്പനി അഭിഭാഷക യുദ്ധകാല അടിസ്ഥാനത്തിൽ അപ്റേച്ച് റോഡ് 2025 സെപ്റ്റംബറിൽ തന്നെ തീർക്കുമെന്നും അറിയിച്ചു. എന്നാൽ ഓഗസ്റ്റ് അവസാനമായിട്ടും പാലം പണി തന്നെ പൂർത്തീകരിച്ചിട്ടില്ല. പ്രദേശത്തുകാരുടെ ബുദ്ധിമുട്ട് കണക്കിലെടുത്ത് അനന്തമായി നീളുന്നതിനെതിരേ പ്രദേശത്തെ പൊതുപ്രവർത്തകനായ യുവാവ് അജ്മൽഷാ പാലേങ്ങര വീണ്ടും കേരള ലീഗൽ സർവീസ് അതോറിട്ടിയെ സമീപിച്ചു. തുടർന്ന് ജില്ലാ ലീഗൽ സർവീസ് അതോറിറ്റി സെക്രട്ടറിയും സീനിയർ ഡിവിഷൻ സിവിൽ ജഡ്ജുമായ ഷാബിർ ഇബ്രാഹിമിന്‍റെ നേതൃത്വത്തിലുള്ള സംഘമാണ് പാലം സന്ദർശിച്ചത് . പ്രദേശത്തുകാരോടും പാലം കരാർ ഏറ്റെടുത്ത കമ്പനി പ്രതിനിധിയോടും, കോൺട്രാക്ടറോടും കാര്യങ്ങൾ ചോദിച്ചറിഞ്ഞു. ഉടൻ പണി തീർക്കാമെന്ന് സിൽക്ക് എഞ്ചിനീയർ, കോൺട്രാക്ടർ എന്നിവർ ജഡ്ജിയോട് പറഞ്ഞു. പണി അടിയന്തരമായി പൂർത്തീകരിച്ചില്ലെങ്കിൽ വരാനിരിക്കുന്ന തിരഞ്ഞെടുപ്പുകളുടെ വിജ്ഞാപനത്തിലും മറ്റ് നിയമക്കുരുക്കുകളിലും പെട്ട് പണി തടസ്സപ്പെടാൻ ഇടയാകുമെന്ന മുന്നറിയിപ്പും ജഡ്ജി ബന്ധപ്പെട്ടവരോട് പറഞ്ഞു. നാല് മാസത്തിനുള്ളിൽ പണി തീർക്കുമെന്ന് കരാറുകാർ അറിയിച്ചതായും ഇത് റിപ്പോർട്ടാക്കി കോടതിയിൽ സമർപ്പിക്കുമെന്നും അദ്ദേഹം പറഞ്ഞു. കെഎസ്ഇബിയുടെ വൈദ്യുതി തൂണുകളാണ് നിലവിലെ തടസ്സം എന്നാണ് കമ്പനിയുടെ ഭാഷ്യം. എന്നാൽ ഇത് ആളുകളെ കണ്ണിൽ പൊടി‍യിടാനുള്ള തന്ത്രം മാത്രം എന്നാണ് നാട്ടുകാരുടെ വാദം. കഴിഞ്ഞ ഒന്നരമാസമായി മഴയുടെ പേര് പറഞ്ഞ് കരയിലുള്ള പണി നിർത്തിവച്ചിരിക്കുകയാണ്. മാത്രമല്ല മാളിയേക്കൽ ഭാഗത്തെ അപ്റോച്ച് റോഡിന്‍റെ പണിയും എങ്ങും എത്തിയിട്ടില്ല. ഇനിയും പണി വൈകിപ്പിച്ചാൽ വീണ്ടും കോടതിയെ സമീപിക്കാനും മറ്റു പ്രതിഷേധങ്ങൾക്ക് തുടക്കം കുറിക്കാനുമാണ് നാട്ടുകാരുടെ തീരുമാനിച്ചിരിക്കുന്നത്.

മലപ്പുറം സഹോദയ ഇന്‍റർ സ്കൂൾ ബാഡ്മിന്‍റൺ ചാമ്പ്യൻഷിപ്പ് പെരിന്തൽമണ്ണ ഓറ ഗ്ലോബൽ സ്കൂൾ ഓവറോൾ ചാമ്പ്യന്മാർ

പെരിന്തൽമണ്ണ: മൂന്ന് ദിവസങ്ങളിലായി വേങ്ങര കിംഗ്സ് ബാഡ്മിന്‍റൺ അക്കാഡമിയിൽ സംഘടിപ്പിച്ച മലപ്പറം സഹോദയ ബാഡ്മിന്‍റൺ ചാമ്പ്യൻഷിപ്പ് സമാപിച്ചു . പീസ് പബ്ലിക് സ്കൂൾ വേങ്ങരയുടെയും കോട്ടക്കൽ പീസ് പബ്ലിക് സ്കൂളിന്‍റെയും സംയുക്താഭിമുഖ്യത്തിലാണ് മത്സരങ്ങൾ സംഘടിപ്പിച്ചത്.128 പോയിന്‍റുകൾ നേടി പെരിന്തൽമണ്ണ ഓറ ഗ്ലോബൽ സ്കൂൾ ഓവറോൾ ജേതാക്കളായി 126 പോയിന്‍റുകൾ വീതം നേടി മഞ്ചേരി ബെഞ്ച്മാർക്സ് ഇന്‍റർനാഷണൽ സ്കൂൾ , പാണക്കാട് സ്ട്രെറ്റ്പാത്ത് ഇന്‍റർനാഷണൽ സ്കൂൾ എന്നിവർ രണ്ടാം സ്ഥാനം പങ്കിട്ടപ്പോൾ 122 പോയിന്‍റുകൾ വീതം നേടി വളാഞ്ചേരി എംഇഎസ് സെൻട്രൽ സ്കൂളും തിരുനാവായ എംഇഎസ് സെൻട്രൽ സ്കൂളും മൂന്നാം സ്ഥാനം പങ്കിട്ടു. വൈകുന്നേരം നടന്ന സമാപന സമ്മേളനത്തിൽ സഹോദയ ജില്ലാ ജനറൽ സെക്രട്ടറി എം. ജൗഹർ വിജയികൾക്ക് ട്രോഫികൾ വിതരണം ചെയ്തു. പീസ് വേങ്ങര സ്കൂൾ പ്രിൻസിപ്പാൾ ജാസ്മീർ ഫൈസൽ അധ്യക്ഷത വഹിക്കുകയും വ്യക്തിഗത സമ്മാനങ്ങൾ വിതരണം ചെയ്യുകയും ചെയ്തു. അഡ്മിനിസ്ട്രേറ്റർ ഖമറുസ്സമാൻ, കായികാധ്യാപകരായ കെ.ടി. ജസീം, ആതിര , രവികുമാർ, ഇവന്‍റ് കോഡിനേറ്റർമാരായ നിഷാദ് ,ബബിത ബഷീർ , ജെസീം, കൃഷ്ണ സ്വരൂപ്, ഇർഷാദ് ബാബു, എന്നിവർ പങ്കെടുത്തു വിജയിച്ച സ്കൂളുകളെയും ചാമ്പ്യൻമാരെയും സഹോദയ മേഖല പ്രസിഡന്‍റ് എം. അബ്ദുൽ നാസർ അഭിനന്ദിച്ചു. ജില്ലയിലെ 25 വിദ്യാലയങ്ങളിൽ നിന്ന് പത്ത് കാറ്റഗറിയിലായി 800 ൽ പരം വിദ്യാർഥികൾ പങ്കെടുത്തു.

പട്ടികജാതി വീട്ടമ്മക്ക് മര്‍ദനം : യുവാവിന് തടവും പിഴയും

മഞ്ചേരി : പട്ടികജാതിയില്‍പ്പെട്ട വീട്ടമ്മയെ മര്‍ദിച്ച യുവാവിനെ മഞ്ചേരി എസ് സി എസ് ടി സ്‌പെഷ്യല്‍ കോടതി ഒരു വര്‍ഷവും മൂന്നു മാസവും തടവിനും 1000 രൂപ പിഴയടക്കാനും ശിക്ഷിച്ചു. വഴിക്കടവ് കാരക്കോട് അമ്പലക്കുന്ന് പനങ്ങേല്‍ വീട്ടില്‍ ഷിബു (40)നെയാണ് ജഡ്ജ് ടി.ജി. വർഗീസ് ശിക്ഷിച്ചത്. 2022 ഡിസംബര്‍ അഞ്ചിന് രാത്രി എട്ടു മണിക്കാണ് സംഭവം. ആറു മാസം മുമ്പ് കടം വാങ്ങിയ പൈപ്പ് തിരികെ ചോദിച്ചതിലുള്ള വിരോധമാണ് അക്രമത്തിന് കാരണം. 55കാരിയായ വീട്ടമ്മയെ അയല്‍വാസിയായ പ്രതി വീട്ടില്‍ അതിക്രമിച്ചു കയറി മർദിക്കുകയും അസഭ്യം പറയുകയും ജാതിപ്പേര് വിളിച്ച് അപമാനിക്കുകയുമായിരുന്നു. വഴിക്കടവ് പൊലീസ് രജിസ്റ്റര്‍ ചെയ്ത കേസില്‍ കൊണ്ടോട്ടി അസി. പോലീസ് സൂപ്രണ്ടായിരുന്ന വിജയ്ഭാരത് റെഡ്ഡിയാണ് പ്രതിയെ അറസ്റ്റ് ചെയ്തത്.

വിദ്യാര്‍ഥിയുടെ മരണം : ചികിത്സാ പിഴവെന്ന് സംശയം

മഞ്ചേരി: മൂക്കിലെ ദശ നീക്കം ചെയ്യാന്‍ ശസ്ത്രക്രിയ ചെയ്യാനെത്തിയ വിദ്യാര്‍ഥിയുടെ മരണം ചികിത്സാ പിഴവ് മൂലമെന്ന് സംശയിക്കുന്നതായി നാട്ടുകാര്‍. എന്നാല്‍ സംഭവത്തില്‍ പരാതിയില്ലെന്ന നിലപാടിലാണ് ബന്ധുക്കള്‍. കാളികാവ് മാളിയേക്കല്‍ പെരുക്കാടന്‍ ഷിഹാബുദ്ധീന്‍-റംസീന ദമ്പതികളുടെ മകന്‍ മുഹമ്മദ് തസ്ലിം (19) ആണ് മരിച്ചത്. ബുധനാഴ്ച വൈകീട്ട് 6.30ന് മഞ്ചേരിയിലെ സ്വകാര്യ ക്ലിനിക്കിലാണ് സംഭവം. വൈകീട്ട് അഞ്ചരക്ക് ഓപ്പറേഷന്‍ തിയേറ്ററില്‍ പ്രവേശിപ്പിച്ചു. ശസ്ത്രക്രിയക്കു മുമ്പായി അന്സ്തേഷ്യ നല്‍കി. ഇതോടെ വിദ്യാര്‍ഥിക്ക് ശക്തമായ പനിയും ശ്വാസതടസ്സവും അനുഭവപ്പെടുകയായിരുന്നുവെന്ന് ബന്ധുക്കള്‍ പറഞ്ഞു. ആറരയോടെ മരിക്കുകയും ചെയ്തു. പോസ്റ്റ്മോര്‍ട്ടം ഇല്ലാതെ മൃതദേഹം കൊണ്ടുപോകുവാന്‍ ബന്ധുക്കള്‍ ശ്രമം നടത്തിയെങ്കിലും പൊലീസ് ഇടപെട്ടു തടഞ്ഞു. ഇവിടെ നിന്നും പോസ്റ്റ് മോര്‍ട്ടത്തിന് ശേഷം മൃതദേഹം ബന്ധുക്കള്‍ക്ക് വിട്ടുനല്‍കി. പോസ്റ്റ്‌മോര്‍ട്ടം പ്രാഥമിക റിപ്പോര്‍ട്ടിലും മരണം ചികിത്സാ പിഴവാണെന്ന് കണ്ടെത്തിയിട്ടില്ല.

പശുവിനെ കൊന്ന് തിന്ന സ്ഥലത്ത് വീണ്ടും കടുവയെത്തി

കാളികാവ്: അടക്കാക്കുണ്ട് 70 ഏക്കർ പ്രദേശത്തെ 50 ഏക്കറിൽ കടുവ പശുവിനെ കടിച്ചു കൊന്ന് ഭക്ഷിച്ച അതേ സ്ഥലത്ത് വീണ്ടും കടുവ എത്തി. വനം വകുപ്പ് പ്രദേശത്ത് നാല് കാമറകൾ സ്ഥാപിച്ചിരുന്നു. കടുവയെ വീണ്ടും കണ്ടതോടെ പ്രദേശത്ത് കെണികൂട് വച്ച് കടുവയെ പിടികൂടണമെന്ന ആവശ്യമുയർന്നിട്ടുണ്ട്. ഏഴുപതേക്കർ റോഡിനോട് ചേർന്ന മലയപ്പിള്ളി ജോസിന്‍റെ റൂഹ എസ്റ്റേറ്റിലെ തൊഴുത്തിൽ കെട്ടിയിട്ട നാല് പശുക്കളിൽ ഒന്നിനെയാണ് കടുവ കഴിഞ്ഞ ചൊവ്വാഴ്ച പുലർച്ചെ കടിച്ചെടുത്ത് കൊണ്ട് പോയി കൊന്നു തിന്നത്. പശുവിന്‍റെ ഒരു ഭാഗം ഭക്ഷിച്ചിച്ച നിലയിൽ തൊഴുത്തിന് സമീപത്ത് അമ്പത് മീറ്ററോളം അകലെയാണ് ജഡാവശിഷ്ട്ടം കാണപ്പെട്ടത്. ഈ സ്ഥലത്ത് തുടർന്ന് വനം വകുപ്പ് നാല് കാമറകൾ സ്ഥാപിച്ചിരുന്നു. സംഭവ സ്ഥലത്ത് സ്ഥാപിച്ച കാമറക്ക് സമീപത്ത് കടുവ വീണ്ടും എത്തിയതായിട്ടാണ് കാണപ്പെട്ടിട്ടുണ്ട്. കടുവ പിടിച്ച പശുവിന്‍റെ കൂടെ തൊഴുത്തിൽ ഉണ്ടായിരുന്ന മറ്റ് മൂന്ന് പശുക്കളെ ഏറെ പരിഭ്രാന്തിയിലാണ് കാണുന്നത്. തൊഴുത്തിൽ കേറാനോ, പുല്ല് തിന്നുന്നതിനോ പോലും കൂട്ടാക്കുന്നില്ല. ഇതിനിടെ കൂട് സ്ഥാപിച്ച് കടുവയെ പിടികൂടണമെന്ന ആവശ്യം ശക്തമായി. ടാപ്പിംഗ് തൊഴിലാളിയെ കൊലപ്പെടുത്തിയ റാവുത്തൻ കാടിന്‍റേയും, കഴിഞ്ഞ മാസം പുല്ലങ്കോട് എസ്റ്റേറ്റിൽ പശുവിനെ കടിച്ചു എന്ന് പറയപ്പെടുന്നതിന്‍റേയും നടുവിലായിട്ടാണ് ചൊവ്വാഴ്ച പശുവിനെ കൊന്നത്. ചെങ്ങണം കുന്ന്, ചേരുകുളമ്പ് തുടങ്ങിയ പ്രദേശങ്ങളിൽ നിരവധി കുടുംബങ്ങൾ കഴിയുന്നുണ്ട്. ഈ ഭാഗങ്ങളിലെ ജനങ്ങളെല്ലാം ഭീതിയിലാണ്.

വന്യമൃഗ ഭീഷണിയും തോരാ മാരിയും : ഇനി മാനം വെളുത്താലും മലയോരത്ത് ഓണം കറുക്കും

കരുവാരകുണ്ട്: കനത്ത മഴ മാറി മാനം തെളിഞ്ഞാലും മലയോരത്ത് ഓണം കറുക്കും. വന്യ മൃഗ ഭീഷണിയും പേമാരിയും കാരണം തൊഴിൽ നഷ്ടപ്പെട്ട തൊഴിലാളികളുടെ വീടുകളിലെല്ലാം ഇക്കുറി കണ്ണീരോണമാവും. കാളികാവ് അടക്കാക്കുണ്ടിൽ ടാപ്പിംഗ് തൊഴിലാളിയെ കടുവ പിടികൂടി കൊലപ്പെടുത്തിയ ശേഷം തോട്ടങ്ങളിൽ തൊഴിലെടുക്കാൻ തൊഴിലാളികൾ പോകാതെയായി. കടുവയെ പിടികൂടുന്നതിനുവേണ്ടി ദൗത്യ സംഘത്തിന് ഒന്നര മാസത്തോളം വേണ്ടി വന്നു. ഇക്കാലമത്രയും തൊഴിലാളികൾക്ക് വന്യമൃഗ ഭീഷണി കാരണം തൊഴിലടങ്ങളിൽ എത്തിപ്പെടാൻ സാധിച്ചില്ല. കടുവയ്ക്ക് പുറമേ പുലി, കാട്ടാന,കാട്ടുപന്നി എന്നിവയുടെ ആക്രമണവും തൊഴിലാളികളെ ഭീതിയിലാഴ്ത്തി. മാസങ്ങളോളം തൊഴിലെടുക്കാൻ കഴിയാതെയായതോടെ മിക്ക തൊഴിലാളികൾക്കും വലിയ കടബാധ്യതയാണ് വന്നു ചേർന്നിരിക്കുന്നത്. ചെറുകിട തോട്ടം ഉടമകൾക്കും വൻ നഷ്ടമാണ് സംഭവിച്ചത്. തിമർത്തു പെയ്ത മഴ കാരണം റബർ ടാപ്പിംഗ് പാടെ മുടങ്ങുകയും ചെയ്തു. അടയ്ക്ക, നാളികേരം, കൊക്കോ, ജാതി,വാഴ തുടങ്ങിയ വിളകളെയും പ്രതികൂല കാലാവസ്ഥയും മൃഗ ശല്യവും രൂക്ഷമായി ബാധിച്ചു. വന്യമൃഗ ശല്യം കാരണം റബർ ടാപ്പിംഗ് മുടങ്ങിയതോടെ റബർ തോട്ടങ്ങളിൽ റെയിൻ ഗാർഡനിങ് നടത്താനും ഉടമകൾ തയ്യാറായില്ല. ഇതുകൊണ്ട് തന്നെ മഴക്കാലത്തെടാപ്പിംഗ് പൂർണമായും നിലക്കുകയും ചെയ്തു. ടാപ്പിങ്ങിന് പുറമേ മലയോര മേഖലയിലെ തോട്ടം തൊഴിലിടങ്ങളിൽ മറ്റു തൊഴിലുകളും നിലക്കുകയും ചെയ്തു. നൂറു കണക്കിന് തൊഴിലാളികളാണ് തോട്ടം തൊഴിൽ മേഖലയെ ആശ്രയിച്ച് ജീവിക്കുന്നത്. അധ്യയന വർഷാരംഭത്തിൽ കുട്ടികൾക്ക് ആവശ്യമായ പഠനസാമഗ്രികൾ ലഭ്യമാക്കുന്നതിന് തന്നെ വായ്പയുടെത്തും ഉള്ള വസ്തുക്കൾ വിറ്റും പണയപ്പെടുത്തിയും തൊഴിലാളികൾ കടബാധ്യസ്ഥരായി മാറിയിരുന്നു. ഓണമുണ്ണാൻ കൂടെകടമെടുക്കാൻ കഴിയാത്ത അവസ്ഥയാണ് തൊഴിലാളികൾക്കുള്ളത്. സർക്കാർ നൽകുന്ന ഓണക്കിറ്റുകൾ നാമമാത്രമായ ആളുകൾക്ക് മാത്രമേ ലഭിക്കുകയുള്ളൂ. തോട്ടം തൊഴിൽ മേഖലയിലെ തൊഴിലാളികളെ കണ്ടെത്തി ഓണത്തിനെങ്കിലും സൗജന്യ റേഷനും അവശ്യവസ്തുക്കളും ലഭ്യമാക്കാൻ വേണ്ട അടിയന്തര നടപടികൾ കൈക്കൊള്ളണമെന്നാണ് പ്രദേശത്തെ പ്രമുഖ തൊഴിലാളി യൂണിയനുകൾ ആവശ്യപ്പെടുന്നത്.

പി. കൃഷ്ണപിള്ള ദിനം ആചരിച്ചു

മലപ്പുറം: കേരളത്തിലെ കമ്മ്യൂണിസ്റ്റ് പ്രസ്ഥാനത്തിലെ സ്ഥാപകരിൽ ഒരാളായ പി. കൃഷ്ണപിള്ള ദിനത്തിൽ സിപിഐ സംസ്ഥാന സമ്മേളന പതാക ദിനമായി ആചരിച്ചു. ജില്ലയിലെ വിവിധ കേന്ദ്രങ്ങളിൽ വിപുലമായ പരിപാടികൾ നടന്നു. സിപിഐ ജില്ലാ ആസ്ഥാനമായ മലപ്പുറത്തെ കെ. ദാമോദരൻ സ്മാരകത്തിൽ അഡ്വ. പി.പി. ബാലകൃഷ്ണൻ അധ്യക്ഷത വഹിച്ചു. എം.എ. റസാഖ്, ഒ.കെ. അയ്യപ്പൻ, ഷംസു കാട്ടുങ്ങൽ തുടങ്ങിയവർ പങ്കെടുത്തു. എളങ്കൂർ ലോക്കൽ കമ്മിറ്റി ഓഫീസിൽ ഇ. അബ്ദു പതാക ഉയർത്തി. മണ്ഡലം സെക്രട്ടറി ഐ. സനൂപ്, ജില്ലാ കമ്മിറ്റി അംഗം പി. സരോജിനി ചന്ദ്രൻ, അൻസാർ, എം. അപ്പൂട്ടി, ഇ. നിഷ എന്നിവർ പങ്കെടുത്തു. സിപിഐ എടപ്പാൾ ലോക്കൽ കമ്മിറ്റി അരാഷ്ട്രീയതയും പൊതുബോധവും വിഷയത്തിൽ സെമിനാർ സംഘടിപ്പിച്ചു. സിപിഐ തവനൂർ മണ്ഡലം സെക്രട്ടറി പ്രഭാകരൻ നടുവട്ടം ഉദ്ഘാടനം ചെയ്തു. പി.പി. മുസ്തഫ അധ്യക്ഷത വഹിച്ചു. പി.വി. ബൈജു, ടി. ശ്രീകുമാർ, കെ.വി. സുന്ദരൻ, സുരജ് ബാബു, എ.പി. ആഷിഖ് എന്നിവർ പ്രസംഗിച്ചു. തൃപ്രങ്ങോട് ലോക്കൽ കമ്മിറ്റി സംഘടിപ്പിച്ച അട്ടിമറിക്കപ്പെടുന്ന ജനാധിപത്യവും ഇന്ത്യൻ ഭരണഘടനയും സെമിനാർ അഡ്വ. കെ. ഹംസ ഉദ്ഘാടനം ചെയ്തു. മുതുവല്ലൂർ ലോക്കൽ കമ്മിറ്റിയുടെ നേതൃത്വത്തിൽ മുണ്ടിലാക്കലിൽ പി. കൃഷ്ണപിള്ള അനുസ്മരണം സംഘടിപ്പിച്ചു. സി.പി. നിസാർ ഉദ്ഘാടനം ചെയ്തു. കാരി ബീരാൻകുട്ടി അധ്യക്ഷത വഹിച്ചു. റഷീദ് ദേവർത്തൊടി, ചന്ദ്രൻ മുണ്ടിലാക്കൽ, മുഹമ്മദ് പോത്തുവെട്ടിപ്പാറ, അസ്ലം ഷേർഖാൻ, നീലകണ്ഠൻ എന്നിവർ പ്രസംഗിച്ചു. വണ്ടൂർ മണ്ഡലം കമ്മിറ്റി ഓഫീസിൽ മണ്ഡലം സെക്രട്ടറി പി. മുരളീധരൻ പതാക ഉയർത്തി.

ദേശീയ കോർഫ് ബോൾ : കേരളത്തിനു മൂന്നാംസ്ഥാനം

അങ്ങാടിപ്പുറം: തമിഴ്നാട്ടിലെ ചെന്നൈ താംബരം ഭാരത് ഇൻസ്റ്റിറ്റ്യൂട്ട് ഓഫ് ഹയർ എഡ്യുക്കേഷൻ ആൻഡ് റിസർച്ച് സ്റ്റേഡിയത്തിൽ നടന്ന ജൂണിയർ കോർഫ് ബോൾ ചാന്പ്യൻഷിപ്പിൽ കേരളത്തിനു മൂന്നാം സ്ഥാനം. ലൂസേഴ്സ് ഫൈനലിൽ 7 - 3ന് ഹരിയാനയെ തോൽപ്പിച്ചാണ് കേരളം മൂന്നാമതെത്തിയത്. മഹാരാഷ്ട്രയാണ് ജേതാക്കൾ. ഹിമാചൽപ്രദേശ് രണ്ടാമതെത്തി. കേരളാ ടീമിൽ മലപ്പുറം ജില്ലയിൽ നിന്ന് പരിയാപുരം സെന്‍റ് മേരീസ് ഹയർ സെക്കൻഡറി സ്കൂളിലെ നാലു കായികതാരങ്ങൾ ജഴ്സിയണിഞ്ഞു. സി.വിഷ്ണുദേവ്, ആൽഡ്രിൻ ബെന്നി, ട്രീസ ജോസ്, എൽസിറ്റ ജോസ് (മലപ്പുറം), ചെൽസ ജോബി, ഹെലൻ ജോയ്, അമൽദേവ് (തൃശൂർ), എ.എസ്.അഭിനന്ദന, മുനീബ് (കോഴിക്കോട്), സാരംഗ് പി.സതീഷ്, ഷഹാന പർവീൻ (വയനാട്), ബെനറ്റ് ജോസഫ് (കണ്ണൂർ), അക്ഷയ് മധു (ആലപ്പുഴ), ഡെൽമ ഡേവിസ് (എറണാകുളം) എന്നിവരാണ് കേരള ടീമിനായി അണിനിരന്നത്. മലപ്പുറം ജില്ലയിലെ നാലു താരങ്ങളും പരിയാപുരം മരിയൻ സ്പോർട്സ് അക്കാഡമിയിലാണ് പരിശീലനം നേടിയത്. അരുണ്‍ഷാദ് പരിശീലകനും അഭിരാമി ടീം മാനേജരുമാണ്.

പെരിന്തൽമണ്ണയിൽ കുടുംബശ്രീ ബസാർ മേള തുടങ്ങി

പെരിന്തൽമണ്ണ: പെരിന്തൽമണ്ണ നഗരസഭയിലെ കുടുംബശ്രീ ബസാറിന്‍റെ അഞ്ചാം വാർഷികത്തോടനുബന്ധിച്ച് മനഴി ബസ് സ്റ്റാൻഡിന് സമീപം കുടുംബശ്രീ ബസാർ വിപണന മേളക്ക് തുടക്കമായി. നഗരസഭ ചെയർമാൻ പി. ഷാജി ഉദ്ഘാടനം ചെയ്തു. കുടുംബശ്രീ ജില്ലാ മിഷൻ കോ ഓർഡിനേറ്റർ ബി. സുരേഷ്കുമാർ അധ്യക്ഷനായിരുന്നു. ബ്ലോക്ക് പഞ്ചായത്ത് പ്രസിഡന്‍റ് അഡ്വ. എ.കെ. മുസ്തഫ മുഖ്യാതിഥിയായിരുന്നു. നഗരസഭ സ്റ്റാൻഡിംഗ് കമ്മിറ്റി ചെയർമാൻമാരായ മുണ്ടുമ്മൽ ഹനീഫ, കെ.ഉണ്ണികൃഷ്ണൻ, കൗണ്‍സിലർമാരായ അജിതകുമാരി, സക്കീന സെയ്ദ്, പി. സീനത്ത്, ഷാഹുൽ ഹമീദ്, കുടുംബശ്രീ അസിസ്റ്റന്‍റ് മിഷൻ കോ ഓർഡിനേറ്റർമരായ ടി.വി. പ്രസാദ്, മുഹമ്മദ് അസ്ലം, ഇ. സമീറ തുടങ്ങിയവർ പ്രസംഗിച്ചു. കുടുംബശ്രീ ജില്ലാ മിഷൻ മുൻ കോ ഓർഡിനർരായ എം. ശ്രീധരൻ, ജാഫർ കക്കൂത്ത്, മുൻ അസിസ്റ്റന്‍റ് ഡിഎംസി കെ.പി. ജയേന്ദ്രൻ, സംസ്ഥാനത്തെ മികച്ച സരംഭമായി തെരഞ്ഞെടുത്ത സഞ്ജീവനി ഫുഡ് പ്രൊഡക്ടിനെയും മികച്ച സംരംഭകയായി തെരഞ്ഞെടുത്ത മുത്തൂസ് കാറ്ററിംഗ് ഉടമ ഷെരീഫയെയും മുതിർന്ന സംരംഭകയായ ദേവകിക്കുട്ടി അന്തർജനം എന്നിവരെയും ആദരിച്ചു. നഗരസഭ വൈസ് ചെയർപേഴ്സണ്‍ നസീറ സ്വാഗതവും സിറ്റി മിഷൻ മാനേജർ സുബൈറുൽ അവാൻ നന്ദിയും പറഞ്ഞു. വിപണന മേളയോടനുബന്ധിച്ച് കുടുംബശ്രീ പ്രവർത്തകർക്കായി സംഘടിപ്പിച്ച പായസം മത്സരത്തിൽ കെ.ടി. അനീസ വിജയിയായി. ഷെജിനി അങ്ങാടിപ്പുറത്തിനാണ് രണ്ടാംസ്ഥാനം. മേള ഇന്ന് വൈകുന്നേരം ആറിന് സമാപിക്കും.

പുലാമന്തോളിൽ 11.13 ടണ്‍ നെൽവിത്ത് വിതരണം ചെയ്തു

പുലാമന്തോൾ: പുലാമന്തോൾ ഗ്രാമപഞ്ചായത്തിലെ പാടശേഖരത്തിലേക്ക് അവശ്യമായ നെൽവിത്തിന്‍റെ വിതരണോദ്ഘാടനം പ്രസിഡന്‍റ് പി. സൗമ്യ നിർവഹിച്ചു. വികസന സ്റ്റാൻഡിംഗ് കമ്മിറ്റി ചെയർപേഴ്സണ്‍ ടി. സാവിത്രി അധ്യക്ഷത വഹിച്ചു. ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സണ്‍ എം.ടി. നസീറ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ കെ. മുഹമ്മദ് മുസ്തഫ, ഗ്രാമപഞ്ചായത്ത് ഭരണസമിതി അംഗങ്ങളായ എൻ.പി. റാബിയ, പി.ടി. പ്രമീള, കൃഷി ഓഫീസ് ജീവനക്കാർ, പാടശേഖര കമ്മിറ്റി അംഗങ്ങൾ, കർഷകർ തുടങ്ങിയവർ പങ്കെടുത്തു. 4.67 ലക്ഷം രൂപ വകയിരുത്തി എട്ട് പാടശേഖരങ്ങളിലെ 433 ഏക്കർ (173 ഹെക്ടർ) സ്ഥലത്ത് കൃഷി ചെയ്യാൻ 11.13 ടണ്‍ (പൊൻമണി 9.12 ടണ്‍, ഉമ്മ 2.1 ടണ്‍) ഇനത്തിൽ പെട്ട നെൽ വിത്താണ് വിതരണം ചെയ്തത്.

മങ്കടയിൽ കർഷകരെ ആദരിച്ചു

മങ്കട: മങ്കട ഗ്രാമപഞ്ചായത്തിന്‍റെയും മങ്കട കൃഷിഭവന്‍റെയും നേതൃത്വത്തിൽ കർഷക ദിനം വിവിധ പരിപാടികളോടെ ആചരിച്ചു. തച്ചോത്ത് സ്കൂൾപടിയിൽ വാദ്യമേളങ്ങളുടെയും മുത്തുക്കുടയുടെയും അകന്പടിയോടെ ആരംഭിച്ച കലാജാഥ കൊല്ലേരിപാറ പാടത്ത് സമാപിച്ചു. തുടർന്ന് കന്നുപൂട്ട് ഉത്സവവും സംഘടിപ്പിച്ചു. പഞ്ചായത്തിലെ വിവിധ മേഖലകളിലെ 10 കർഷകരെ പൊന്നാട അണിയിച്ചും കാഷ് പ്രൈസും ഉപഹാരം നൽകിയും ആദരിച്ചു. മഞ്ഞളാംകുഴി അലി എംഎൽഎ ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്‍റ് അഡ്വ.അസ്ഗർ അലി അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് ടി. അബ്ദുൾകരീം, ബ്ലോക്ക് സ്റ്റാൻഡിംഗ് കമ്മിറ്റി ചെയർമാൻ ടി.കെ. ശശീന്ദ്രൻ, ബ്ലോക്ക് പഞ്ചായത്ത് മെംബർ സി.ടി. ഷറഫുദ്ദീൻ, കടന്നമണ്ണ സഹകരണ ബാങ്ക് പ്രസിഡന്‍റ് ഷൗക്കത്തലി, മങ്കട സഹകരണ ബാങ്ക് വൈസ് പ്രസിഡന്‍റ്് സമദ് മങ്കട, പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻമാരായ അബ്ബാസ് അലി പൊട്ടേങ്ങൽ, ശരീഫ് ചുണ്ടയിൽ, റുമൈസ കുന്നത്ത്, മെംബർമാരായ കളത്തിൽ മുസ്തഫ, പി.പി. നസീമ, നുസ്ര കളത്തിൽ, പി.പി. ബുഷ്റ, പാടശേഖര കമ്മിറ്റി കണ്‍വീനർമാർ തുടങ്ങിയവർ സംബന്ധിച്ചു.

കൗ ലിഫ്റ്റർ സജ്ജമാക്കി

വണ്ടൂർ: ക്ഷീര കർഷകരെ സഹായിക്കാനായി കൗ ലിഫ്റ്റർ വാങ്ങി പോരൂർ ഗ്രാമപഞ്ചായത്ത്. ഉപകരണം ആവശ്യമുള്ള കർഷകർക്ക് സൗജന്യമായി എത്തിച്ചു നൽകും. പദ്ധതിയുടെ ഉദ്ഘാടനം മൃഗാശുപത്രിയിൽ നടത്തിയ ചടങ്ങിൽ ഗ്രാമപഞ്ചായത്ത് പ്രസിഡന്‍റ് നീലങ്ങാടൻ മുഹമ്മദ് ബഷീർ നിർവഹിച്ചു. എണീക്കാൻ ബുദ്ധിമുട്ടുള്ള കന്നുകാലികളെ ഉയർത്തുന്നതിനാണ് കൗ ലിഫ്റ്റർ ഉപയോഗിക്കുന്നത്. വാർഷിക പദ്ധതിയിൽ 60,000 രൂപ വകയിരുത്തിയാണ് ഉപകരണം വാങ്ങിയത്. ഉപകരണം ആവശ്യമുള്ള കർഷകർ ആധാർ കാർഡുമായി മൃഗാശുപത്രിയെ സമീപിക്കണം. വൈസ് പ്രസിഡന്‍റ് ടി.പി. സക്കീന, വാർഡ് മെംബർമാർ, ക്ഷീരകർഷകർ, മൃഗഡോക്ടർ ഡോ. ബരീറ വള്ളിക്കാടൻ, അസിസ്റ്റന്‍റ് ഫീൽഡ് ഓഫീസർ മധുസൂദനൻ തുടങ്ങിയവർ സംബന്ധിച്ചു.

പ്രതി കുറ്റം സമ്മതിച്ചു; കോടതി ശിക്ഷ വിധിച്ചു

മഞ്ചേരി : വിചാരണ നടന്നുകൊണ്ടിരിക്കെ പ്രതി കുറ്റം സമ്മതിച്ചതിനെ തുടർന്ന് കോടതി ശിക്ഷ വിധിച്ചു. കഞ്ചാവ് കടത്ത് കേസിലെ പ്രതിയെയാണ് മഞ്ചേരി എൻഡിപിഎസ് കോടതി 10 മാസവും 19 ദിവസവും കഠിന തടവിനും 20000 രൂപ പിഴയടക്കാനും ശിക്ഷിച്ചത്. പിഴയടച്ചില്ലെങ്കിൽ ഒരു മാസത്തെ അധിക തടവ് അനുഭവിക്കണം. എറണാകുളം പള്ളരുത്തി നന്പ്യാന്പുറം മാളിയേക്കൽ സിജാസ് (30)നെയാണ് ജഡ്ജ് ടി.ജി. വർഗീസ് ശിക്ഷിച്ചത്. 2018 സെപ്തംബർ ഒന്പതിന് വൈകീട്ട് 6.15ന് തിരൂർ റെയിൽവെ സ്റ്റേഷനിൽ വച്ചാണ് പ്രതിയെ എക്സൈസ് സംഘം പിടികൂടിയത്. തിരൂർ എക്സൈസ് ഇൻസ്പെക്ടറായിരുന്ന പി.എൽ. ബിനുകുമാറിന്‍റെ നേതൃത്വത്തിലുള്ള സംഘം പ്രതിയിൽ നിന്ന് രണ്ട് കിലോ ഗ്രാം ഉണങ്ങിയ കഞ്ചാവും പിടികൂടിയിരുന്നു. മഞ്ചേരി എൻഡിപിഎസ് കോടതിയിൽ ഒന്നാം സാക്ഷിയെ വിചാരണ ചെയ്യുന്നതിനിടെ പ്രതി താൻ കുറ്റം ചെയ്തതായി ഏറ്റുപറഞ്ഞു. ഇതോടെ കേസ് മാറ്റിവച്ച കോടതി ഇന്നലെ വിധി പറയുകയായിരുന്നു. അറസ്റ്റിലായ പ്രതി ജാമ്യം നേടി പുറത്തിറങ്ങിയ ശേഷം വിചാരണക്ക് ഹാജരാകത്തതിനാൽ വീണ്ടും റിമാൻഡിലായിരുന്നു. ഇത്തരത്തിൽ രണ്ടു തവണ ആവർത്തിച്ചതിനാൽ പിന്നീട് പ്രതിക്ക് ജാമ്യം നൽകിയിരുന്നില്ല. ജയിലിൽ കിടന്ന കാലാവധി ശിക്ഷയിൽ ഇളവു ചെയ്യാൻ കോടതി ഉത്തരവിട്ടു. പ്രോസിക്യൂഷനു വേണ്ടി സ്പെഷൽ പബ്ലിക് പ്രോസിക്യൂട്ടർ അഡ്വ. പി. സുരേഷ് ഹാജരായി. പ്രതിയെ കോടതി തവനൂർ സെൻട്രൽ ജയിലിലേക്കയച്ചു.

മതപരിവർത്തന നിരോധന നിയമം: കോണ്‍ഗ്രസും ബിജെപിയും ഒരേ തൂവൽപക്ഷികളെന്ന് സിപിഎം

മക്കരപ്പറന്പ് : ഇന്ത്യയിൽ മതപരിവർത്തന നിരോധന നിയമം നടപ്പാക്കുന്നതിൽ കോണ്‍ഗ്രസും ബിജെപിയും ഒരേ തൂവൽ പക്ഷികളാണെന്ന് സിപിഎം സംസ്ഥാന സംസ്ഥാന സെക്രട്ടറിയറ്റ് അംഗം എം.വി. ജയരാജൻ പറഞ്ഞു. സിപിഎം മങ്കട ഏരിയ കമ്മിറ്റി സംഘടിപ്പിച്ച കൃഷ്ണപ്പിള ദിനം ഉദ്ഘാടനം ചെയ്യുകയായിരുന്നു അദ്ദേഹം. വോട്ടർമാരുടെ അവകാശം നിഷേധിക്കും വിധം നിയമങ്ങൾ കൊണ്ടുവന്ന് ജനാധിപത്യത്തെ കശാപ്പ് ചെയ്യുകയാണ് മോദി ഭരണമെന്നും ഇത്തരം നീക്കങ്ങളെ ജനങ്ങളെ അണിനിരത്തി തോൽപ്പിക്കുമെന്നും അദ്ദേഹം പറഞ്ഞു. സമാധാനപൂർവവും ഐശ്വര്യകരവുമായ കേരളം നിലനിൽക്കാൻ ജനങ്ങൾ മൂന്നാം തവണയും ഭരണം ഇടതുമുന്നണിയെ തന്നെ ഏൽപ്പിക്കുമെന്നും ന്യൂനപക്ഷ സംരക്ഷണത്തിന്‍റെ ഉത്തമ ഉദാഹരണമാണ് കേരള സർക്കാരെന്നും എം.വി. ജയരാജൻ വ്യക്തമാക്കി. സിപിഎം മങ്കട ഏരിയ സെക്രട്ടറി മോഹനൻ പുളിക്കൽ അധ്യക്ഷനായിരുന്നു. തിരൂർ ബ്ലോക്ക് പഞ്ചായത്ത് പ്രസിഡന്‍റ് അഡ്വ. യു. സൈനുദ്ദീൻ, പി.കെ. അബ്ദുള്ള നവാസ്, സിപിഎം ജില്ലാ കമ്മിറ്റിയംഗം എം.പി. അലവി, മങ്കട ഏരിയ കമ്മിറ്റിയംഗം അഡ്വ. ടി.കെ. റഷീദലി എന്നിവർ പ്രസംഗിച്ചു. മക്കരപ്പറന്പ് ടൗണിൽ ബഹുജന റാലിയും പൊതുയോഗ ശേഷം കലാപരിപാടികളും അരങ്ങേറി.

യുവാവിന് കുത്തേറ്റു

പെരിന്തൽമണ്ണ: ആലിപ്പറന്പിൽ യുവാവിന് കുത്തേറ്റു. ആലിപ്പറന്പ് തെക്കേപുറത്ത് കോടങ്ങാടൻ മുഹമ്മദ് ഷെഫീഖിനാണ് കുത്തേറ്റത്. വയറിനും കൈയ്ക്കും പരിക്കേറ്റ യുവാവിനെ പെരിന്തൽമണ്ണയിലെ സ്വകാര്യ ആശുപത്രിയിൽ പ്രവേശിപ്പിച്ചു. കഴിഞ്ഞദിവസം രാത്രി പത്തേമുക്കാലോടെ വീടിനടുത്തുള്ള കടയിൽ ഇരിക്കുന്പോഴാണ് സംഭവം. മുൻ വൈരാഗ്യമാണ് സംഭവത്തിന് കാരണമെന്നറിയുന്നു. പെരിന്തൽമണ്ണ പോലീസ് കേസെടുത്ത് അന്വേഷണം ആരംഭിച്ചു. സംഭവത്തിനുശേഷം വീട്ടിലേക്ക് ഓടി രക്ഷപ്പെടുന്നതിനിടയിൽ ഷെഫീക്കിന് നേരെ വാഹനം ഇടിച്ച് പരിക്കേൽപ്പിക്കാൻ ശ്രമിച്ചതായും പരാതിയുണ്ട്. പ്രതി മുൻകൂട്ടിയെത്തി ആക്രമിക്കുകയായിരന്നെന്നാണ് ഷെഫീഖ് പറയുന്നത്.

ബസ് ജീവനക്കാരും ഓട്ടോറിക്ഷ ഡ്രൈവറും തമ്മിൽ സംഘർഷം : കേസെടുത്തു

മഞ്ചേരി: വായ്പ്പാറപ്പടിയിൽ സ്വകാര്യ ബസ് ജീവനക്കാരും ഓട്ടോറിക്ഷ ഡ്രൈവറും തമ്മിലുണ്ടായ സംഘർഷത്തിൽ പോലീസ് കേസെടുത്തു. ബസ് ഡ്രൈവറുടെ പരാതിയിൽ ഓട്ടോറിക്ഷ ഡ്രൈവറടക്കം കണ്ടാലറിയാവുന്ന നാല് പേർക്കെതിരെയും ഓട്ടോറിക്ഷ ഡ്രൈവറുടെ പരാതിയിൽ ബസ് ജീവനക്കാർക്കെതിരെയുമാണ് കേസെടുത്തത്. കഴിഞ്ഞ തിങ്കളാഴ്ച ഉച്ചക്ക് രണ്ടിനാണ് പരാതിക്കിടയായ സംഭവം. പരപ്പനങ്ങാടിയിൽ നിന്ന് മഞ്ചേരിയിലേക്ക് വരികയായിരുന്ന ഐഫ ബസിലെ ഡ്രൈവർ പുൽപ്പറ്റ കളത്തുംപടി സ്വദേശി പാലക്കോട്ടിൽ സുധീഷ് (38), കണ്ടക്ടറായ സഫ് വാൻ എന്നിവരെ മർദിച്ചെന്നാണ് ഡ്രൈവറുടെ പരാതി. വായ്പ്പാറപ്പടിയിൽ നിന്ന് തെറ്റായ വശത്തൂടെ കയറി വന്ന ഓട്ടോറിക്ഷക്കാരനുമായുള്ള തർക്കത്തെ തുടർന്നാണ് സംഘർഷം ഉണ്ടായതെന്ന് പോലീസിന്‍റെ പ്രഥമവിവര റിപ്പോർട്ടിൽ പറയുന്നു. സുധീഷിനെയും സഫ് വാനെയും തടഞ്ഞുനിർത്തി അടിച്ച് പരിക്കേൽപ്പിച്ചെന്നാണ് കേസ്. ഇവർ മഞ്ചേരിയിലെ സ്വകാര്യ ആശുപത്രിയിൽ ചികിത്സ തേടിയിരുന്നു. വായപ്പാറപ്പടി സ്വദേശി ഓട്ടോ ഡ്രൈവറായ ഇസ്മായിലിനെ (58) ഓട്ടോറിക്ഷ തടഞ്ഞുനിർത്തി ബസ് ജീവനക്കാർ മർദിച്ചെന്നാണ് മറ്റൊരു കേസ്.

തദ്ദേശ തെരഞ്ഞെടുപ്പ്: നിലന്പൂർ ചതുഷ്കോണ മത്സരത്തിലേക്ക്

നിലന്പൂർ: തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പിന് മൂന്ന് മാസം കൂടി ഉണ്ടെങ്കിലും നിലന്പൂർ നഗരസഭയിൽ മുന്നെരുക്കത്തിലാണ് മുന്നണികൾ. നിലവിൽ മൂന്നിൽ രണ്ട് ഭൂരിപക്ഷത്തിന് മാട്ടുമ്മൽ സലീം ചെയർപേഴ്സണായ എഡിഎഫ് ഭരണ സമിതി ഉള്ളതെങ്കിലും ഭരണം നിലനിർത്തുക എന്നത് എളുപ്പമല്ലെന്ന് എൽഡിഎഫിനറിയാം. കഴിഞ്ഞ ഉപതെരഞ്ഞെടുപ്പിൽ യുഡിഎഫ് സ്ഥാനാർഥി ആര്യാടൻ ഷൗക്കത്തിന് നഗരസഭയിൽ നിന്ന് 3967 വോട്ടുകളുടെ ഭൂരിപക്ഷമാണ് ലഭിച്ചത്. ഇത് യുഡിഎഫ് കേന്ദ്രങ്ങളിൽ വലിയ ഉൗർജമാണ് ഉണ്ടാക്കിയിട്ടുള്ളത്. അതിനാൽ ഭരണം തിരിച്ചുപിടിക്കാമെന്ന പ്രതീക്ഷയിലാണ് യുഡിഎഫ്. പ്രതിപക്ഷമെന്ന നിലയിൽ കോണ്‍ഗ്രസിന് നഗരസഭയിൽ വേണ്ടവിധത്തിൽ പ്രതിരോധിക്കാൻ കഴിയാതിരുന്നതും ഡിവിഷൻ വിഭജനവും യുഡിഎഫിന് മുന്നിലെ പ്രതിസന്ധികളാണ്. പ്രധാനമുന്നണികൾ തമ്മിലുള്ള അങ്കം നിലന്പൂർ ജില്ലാ ആശുപത്രി വികസനവുമായി ബന്ധപ്പെട്ട് ഉയർന്നു കഴിഞ്ഞു. ഇരുമുന്നണികളുടെയും ഉറക്കംകെടുത്തി തൃണമൂൽ കോണ്‍ഗ്രസ് ഇക്കുറി 36 ഡിവിഷനിലും മത്സരിക്കും. ഉപതെരഞ്ഞെടുപ്പിൽ 2000 ത്തിലേറെ വോട്ടുകൾ നേടി പി.വി. അൻവർ നിലന്പൂർ നഗരസഭയിൽ തങ്ങളുടെ കരുത്ത് കാട്ടിയിരുന്നു. ചരിത്രത്തിലാദ്യമായി നിലന്പൂർ നഗരസഭയിൽ അക്കൗണ്ട് തുറന്ന ബിജെപി ഇക്കുറി ഒന്നിൽ കൂടുതൽ സീറ്റുകളിൽ വിജയം ലക്ഷ്യമിടുന്നു. 2010ൽ നഗരസഭയായി മാറിയ ശേഷം യുഡിഎഫും എൽഡിഎഫും തമ്മിലാണ് പ്രധാന മത്സരം നടന്നതെങ്കിൽ ഇക്കുറി ചതുഷ്കോണ മത്സരത്തിന് നിലന്പൂർ നഗരസഭ വേദിയാകും. അടുത്ത വർഷം ആദ്യം നിയമസഭാ തെരഞ്ഞെടുപ്പ് നടക്കാനിരിക്കെ നിലന്പൂർ നഗരസഭ ആര് നേടും എന്നത് നിർണായകമാണ്.

കെട്ടിട ഉടമകളെ ശത്രുക്കളായി കാണരുതെന്ന്

മലപ്പുറം: കെട്ടിട ഉടമകളെ ശത്രുക്കളായി കാണുന്ന സമീപനം റവന്യൂ വകുപ്പും ഗവണ്‍മെന്‍റും ഉപേക്ഷിക്കണമെന്നും അന്യായമായി വർധിപ്പിച്ച കെട്ടിട നികുതി പിൻവലിക്കണമെന്നും ബിൽഡിംഗ് ഓണേഴ്സ് അസോസിയേഷൻ ജില്ലാ വാർഷിക ജനറൽ ബോഡി യോഗം ആവശ്യപ്പെട്ടു. മലപ്പുറത്ത് ചേർന്ന യോഗം സംസ്ഥാന പ്രസിഡന്‍റ് അഡ്വ. യു.എ. ലത്തീഫ് എംഎൽഎ ഉദ്ഘാടനം ചെയ്തു. ജില്ലാ പ്രസിഡന്‍റ് സലീം കാരാട്ട് അധ്യക്ഷത വഹിച്ചു. മുനിസിപ്പൽ പ്രതിപക്ഷ നേതാവ് ഒ. സഹദേവൻ മുഖ്യപ്രഭാഷണം നടത്തി. ഫക്രുദീൻ തങ്ങൾ, സബാഹ് വേങ്ങര, അച്ചന്പാട്ട് ബീരാൻകുട്ടി, ഹൈദർ കോട്ടയിൽ, അഹമ്മദ് മൂപ്പൻ, കോയദീൻ, എയർലൈൻസ് അസീസ്, റസാഖ് മഞ്ചേരി, അഡ്വ. ഫാത്തിമ രോഷ്ന, അബ്ദുൾ അസീസ് പാലക്കാട്, ബ്രൈറ്റ് റസാഖ് എന്നിവർ പ്രസംഗിച്ചു.ഭാരവാഹികൾ: സബാഹ് വേങ്ങര (പ്രസിഡന്‍റ്), ഫക്രുദീൻ തങ്ങൾ (ജനറൽ സെക്രട്ടറി), ഷാഹുൽ ഹമീദ് മഞ്ചേരി (ട്രഷറർ).

മഞ്ചേരി ജനറൽ ആശുപത്രി ഏറ്റെടുക്കൽ; എൽഡിഎഫ് മാർച്ചിൽ സംഘർഷം

മഞ്ചേരി : സർക്കാർ ഉത്തരവ് അനുസരിച്ച് മഞ്ചേരി ജനറൽ ആശുപത്രി ഏറ്റെടുത്ത് നടത്താൻ നഗരസഭ കൂട്ടാക്കാത്തതിൽ പ്രതിഷേധിച്ച് എൽഡിഎഫ് പ്രവർത്തകർ ഇന്നലെ നടത്തിയ മാർച്ചിൽ സംഘർഷം. മെഡിക്കൽ കോളജ് ആശുപത്രിയുടെ സമീപത്തുനിന്ന് ആരംഭിച്ച മാർച്ച് നഗരസഭാ ഓഫീസിന് മുന്നിൽ പോലീസ് തടഞ്ഞു. ഇത് നേരിയ സംഘർഷമുണ്ടാക്കി. പോലീസ് ബന്തവസ് മറികടന്ന് പ്രവർത്തകർ അകത്തു കയറി പ്രതിഷേധം മുഴക്കി. വി. ശശികുമാർ പ്രതിഷേധ മാർച്ച് ഉദ്ഘാടനം ചെയ്തു. സിപിഐ മണ്ഡലം സെക്രട്ടി സനൂപ് അധ്യക്ഷനായിരുന്നു. സിപിഎം ജില്ലാ സെക്രട്ടറിയറ്റ് അംഗം വി.എം. ഷൗക്കത്ത്, ഏരിയാ സെക്രട്ടറി അഡ്വ. കെ. ഫിറോസ്ബാബു, എൽഡിഎഫ് കണ്‍വീനർ കെ.സി. കൃഷ്ണദാസ്രാജ, എം. നിസാറലി, ഖാലിദ് മഞ്ചേരി, വല്ലാഞ്ചിറ അബ്ദുൾ നാസർ, അഡ്വ. പ്രേമാരാജീവ്, എഡ്വിൻ തോമസ്, മുഹമ്മദലി ഷിഹാബ് എന്നിവർ പ്രസംഗിച്ചു.

റെയിൽവേയുടെ ഓണസമ്മാനം : ഷൊർണൂർ - നിലന്പൂർ മെമു സർവീസ് 23 മുതൽ

അങ്ങാടിപ്പുറം: നിലന്പൂരിലേക്ക് മെമു ട്രെയിൻ യാഥാർഥ്യമാകുന്നു. യാത്രക്കാരുടെ കാലങ്ങളായുള്ള ആവശ്യമാണ് 23ന് ആദ്യ മെമു സർവീസ് ഷൊർണൂരിൽ നിന്ന് നിലന്പൂരിലേക്ക് പുറപ്പെടുന്നതോടെ സഫലമാകുന്നത്. ഈ പാതയിലെ യാത്രക്കാർ ഓണസമ്മാനമായാണ് മെമു സർവീസിനെ വരവേൽക്കുന്നത്. മെമു സർവീസ് എന്നാണ് ആരംഭിക്കുകയെന്ന ആശങ്കയിലായിരുന്നു യാത്രക്കാർ. അതിന് വിരാമമായി റെയിൽവേ ജീവനക്കാരുടെയും യാത്രക്കാരുടെയും കൂട്ടായ്മയായ ട്രെയിൻ ടൈം കൂട്ടായ്മയിലൂടെ ട്രെയിൻ ടൈം ചീഫ് കോ ഓർഡിനേറ്റർ സലീം ചുങ്കത്താണ് ഇക്കാര്യം പങ്കുവച്ചത്. എറണാകുളത്ത് നിന്ന് വൈകുന്നേരം 5.40 ന് പുറപ്പെട്ട് ഷൊർണൂരിൽ രാത്രി 8.40 ന് എത്തിയിരുന്ന എറണാകുളം-ഷൊർണൂർ മെമു നിലന്പൂരിലേക്ക് നീട്ടണമെന്ന് ആവശ്യം ആദ്യമായി പാലക്കാട് ഡിവിഷനിൽ എത്തിച്ചത് എസ്എൻആർപിഎ അധ്യക്ഷൻ ഷിജു എം. സാമുവൽ ആയിരുന്നു. പിന്നീട് പി.വി. അബ്ദുൾ വഹാബ് എംപിയുടെയും ജനപ്രതിനിധികളുടെയും വിവിധ സംഘടനകളുടെയും നിരന്തര ഇടപെടൽ ഉണ്ടാവുകയും ഇ.ടി. മുഹമ്മദ് ബഷീർ എംപി വിഷയം പാർലമെന്‍റിൽ അവതരിപ്പിക്കുകയും ചെയ്തത് ഏറെ ഗുണകരമായി. ട്രെയിൻ ടൈം കൂട്ടായ്മയുടെ നിരന്തര ഇടപെടൽ കേന്ദ്രമന്ത്രി ജോർജ് കൂര്യനിലേക്കും ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖറിലേക്കും എത്തിയതോടെ മെമുവിന്‍റെ സർവീസ് ഓണത്തിന് മുന്പ് തന്നെ തുടക്കം കുറിക്കാനായി. നിലവിലെ സമയം അനുസരിച്ച് 8.35ന് ഷൊർണൂരിൽ നിന്ന് പുറപ്പെട്ട് 9.55ന് നിലന്പൂരിലെത്തും. പിന്നീട് പുലർച്ചെ 3.40 ന് നിലന്പൂരിൽ നിന്ന് പുറപ്പെട്ട് 4.55 ന് ഷൊർണൂരിലെത്തും. രാവിലെ അഞ്ചിന് ഷൊർണൂരിൽ നിന്ന് ഇതേ റാക്ക് ഷൊർണൂർ-കണ്ണൂർ മെമു ആയി സർവീസ് നടത്തും. നിലന്പൂരിൽ നിന്ന് കോഴിക്കോട്, കണ്ണൂർ ഭാഗങ്ങളിലേക്ക് പോകുന്ന യാത്രക്കാർക്ക് ഇത് ഉപകാരപ്രദമാകും. നിലന്പൂരിൽ നിന്ന് ഷൊർണൂരിലേക്ക് പോകുന്പോൾ വാണിയന്പലത്തും അങ്ങാടിപ്പുറത്തും മാത്രമാണ് സ്റ്റോപ്പുള്ളത്. ഷൊർണൂരിൽ നിന്ന് നിലന്പൂരിലേക്ക് വരുന്പോൾ തൊടിയപ്പുലം, വാടാനംകുറുശി, തൂവൂർ എന്നീ സ്റ്റേഷനുകൾ ഒഴികെ മറ്റെല്ലാ സ്റ്റോപ്പുകളിലും ട്രെയിൻ നിർത്തും. ഷൊർണൂരിൽ നിന്നുള്ള മെമ്മുവിന്‍റെ പുറപ്പെടൽ സമയം 9.15ന് ആയാൽ വന്ദേഭാരതിന് കണക്ഷൻ ലഭിക്കും. ആലപ്പുഴ, കണ്ണൂർ എക്സിക്യൂട്ടീവ് എക്സ്പ്രസ്, തിരുവനന്തപുരം -മംഗളൂരു വന്ദേഭാരത് എക്സ്പ്രസ് എന്നിവയ്ക്കും കണക്ഷൻ ഉറപ്പിക്കാം. അതുപോലെ മെമുവിന്‍റെ പുലർച്ചെ നിലന്പൂരിൽ നിന്നുള്ള പുറപ്പെടൽ സമയം അൽപം കൂടി പിന്നോട്ടാക്കിയാൽ 4.30നുള്ള ഷൊർണൂർ എറണാകുളം ആലപ്പുഴ മെമു കണക്ഷൻ ലഭിക്കും. അതല്ലെങ്കിൽ എറണാകുളം യാത്രയ്ക്ക് 8.45ന്‍റെ എക്സിക്യൂട്ടീവ് വരെ കാക്കേണ്ടി വരും.

വ്യാജ വോട്ട് ചേർത്തെന്ന പരാതിയിൽ അഞ്ചുപേർക്കെതിരേ കേസെടുത്തു

മലപ്പുറം: ഉദ്യോഗസ്ഥരെ കൂട്ടുപിടിച്ച് വ്യാജ വോട്ട് ചേർത്തെന്ന പരാതിയിൽ മലപ്പുറം ഇത്തിൾപറന്പ് സ്വദേശികളായ അഞ്ചുപേർക്കെതിരെ മലപ്പുറം പോലീസ് ജാമ്യമില്ല വകുപ്പ് പ്രകാരം കേസെടുത്തു. എസ്എസ്എൽസി സർട്ടിഫിക്കറ്റിൽ വയസ് തിരുത്തി വോട്ടർ പട്ടികയിൽ ചേർക്കാൻ സമർപ്പിച്ചവർക്ക് എതിരെയാണ് കേസെടുത്തത്. സമഗ്ര അന്വേഷണം ആവശ്യപ്പെട്ട് യുഡിഎഫ് ഹൈക്കോടതിയിൽ കേസ് ഫയൽ ചെയ്തിട്ടുണ്ട്. സംസ്ഥാന തെരഞ്ഞെടുപ്പ് കമ്മീഷൻ, ജില്ലാ കളക്ടർ, എസ്പി എന്നിവർക്കും പരാതി നൽകിയിട്ടുണ്ട്. എസ്എസ്എൽസി ബുക്കിൽ കൃത്രിമം നടത്തി പത്താംതരത്തിലും പ്ലസ്ടുവിലും പഠിക്കുന്ന വിദ്യാർഥികൾക്കാണ് വ്യാപകമായി വ്യാജ രേഖകൾ സൃഷ്ടിച്ചു വോട്ട് ചേർത്തെന്നാണ് യുഡിഎഫിന്‍റെ പരാതി. വിവാദത്തത്തുടർന്ന് മലപ്പുറം നഗരസഭയിലെ എൻജിനിയറിംഗ് വിഭാഗം സൂപ്രണ്ട് ഷിബു അഹമ്മദിനെ കഴിഞ്ഞദിവസം ചുമതലകളിൽ നിന്ന് നീക്കിയിരുന്നു. വ്യാപകമായി കൃത്രിമ രേഖകൾ ചമക്കുന്നതിന് കൂട്ടുനിന്ന സൂപ്രണ്ടിനെതിരെ സസ്പെൻഷൻ ഉൾപ്പെടെയുള്ള നടപടികൾ ആവശ്യപ്പെട്ട് യുഡിഎഫ് നേതൃത്വം സർക്കാരിനെയും കോടതിയെയും സമീപിക്കുന്നതിനുള്ള നീക്കത്തിലാണ്.

കർഷകനെ ആദരിച്ചു

തേഞ്ഞിപ്പലം: കർഷകനായ പാലക്കോടൻ സുന്ദരനെ കർഷകദിനാചരണത്തിൽ തേഞ്ഞിപ്പലം വൈഎംസിഎ ആദരിച്ചു. വൈസ് പ്രസിഡന്‍റ് കെ.എൽ.ആന്‍റണി അദ്ദേഹത്തെ ഷാളണിയിച്ചു. തേഞ്ഞിപ്പലം പഞ്ചായത്തിലെ കഴിഞ്ഞ വർഷത്തെ മികച്ച കർഷകനുള്ള അവാർഡ് നേടുകയും ഈ വർഷത്തെ കർഷകദിനത്തിൽ പഞ്ചായത്ത് ആദരിച്ച എട്ട് കർഷകരിൽ ഒരാളാണ് സുന്ദരൻ. ജോസഫ് തണ്ണിപ്പാറ കർഷകദിന സന്ദേശം നൽകി. കാർഷിക ഉത്പന്നങ്ങളുടെ വില നിശ്ചയിക്കുന്നതും അതുവഴി കർഷകരെ ഏറ്റവും കൂടുതൽ ദ്രോഹിക്കുന്നതും കോർപറേറ്റുകളാണെന്ന് അദ്ദേഹം പറഞ്ഞു. പാലക്കോടൻ സുന്ദരൻ മറുപടി പ്രസംഗം നടത്തി. കൃഷി ചെയ്താൽ മാത്രം പോരെന്നും അത് ചെലവാക്കുന്ന കാര്യത്തിൽ സാമർഥ്യമുണ്ടെങ്കിലേ വിജയം കൈവരിക്കാൻ സാധിക്കുകയുള്ളുവെന്നും അദ്ദേഹം അഭിപ്രായപ്പെട്ടു. വൈസ് പ്രസിഡന്‍റ് കെ.എൽ.ആന്‍റണി അധ്യക്ഷത വഹിച്ചു. സെക്രട്ടറി കെ.വി. അഗസ്റ്റിൻ, കെ. ബിജു ജോർജ്, ജിമ്മി ആന്‍റണി എന്നിവർ പ്രസംഗിച്ചു.

ക്വിസ് മത്സര പ്രതിഭകളെ അനുമോദിച്ചു

പെരിന്തൽമണ്ണ: ജില്ലാ ഹയർ സെക്കൻഡറി കെമിസ്ട്രി ടീച്ചേഴ്സ് അസോസിയേഷൻ രസതന്ത്ര ക്വിസ് മത്സരവും പ്രതിഭകളെ അനുമോദിക്കലും നടത്തി. ഗവണ്‍മെന്‍റ് ഗേൾസ് ഹയർ സെക്കൻഡറി സ്കൂൾ ഓഡിറ്റോറിയത്തിൽ നടത്തിയ പരിപാടി പെരിന്തൽമണ്ണ നഗരസഭാ ചെയർമാൻ പി. ഷാജി ഉദ്ഘാടനം ചെയ്തു. മത്സരത്തിൽ പട്ടിക്കാട് ഗവണ്‍മെന്‍റ് ഹയർ സെക്കൻഡറി സ്കൂളിലെ ലക്ഷ്മി നന്ദ വിനോജ്, ഷിഫ്ന സബീർ എന്നിവർ ഒന്നാം സ്ഥാനവും കൊണ്ടോട്ടി ഇഎംഇഎ ഹയർ സെക്കൻഡറി സ്കൂളിലെ കെ. നാജിഹ് അഹമ്മദ്, കെ. ഫിദ എന്നിവർ രണ്ടാം സ്ഥാനവും എടരിക്കോട് പികെഎംഎം ഹയർ സെക്കൻഡറി സ്കൂളിലെ ടി.കെ. ഫാത്തിമ ഷൈമ, ഹാദി ഉമ്മർ ഷെരിഫ് എന്നിവർ മൂന്നാം സ്ഥാനവും നേടി. ഒന്നും രണ്ടും മൂന്നും സ്ഥാനക്കാർക്ക് 5000, 3000, 2000 രൂപയുടെ കാഷ് അവാർഡും സർട്ടിഫിക്കറ്റുകളും ചെയർമാൻ പി. ഷാജി വിതരണം ചെയ്തു. കെമിസ്ട്രി ടീച്ചേഴ്സ് അസോസിയേഷൻ ജില്ലാ പ്രസിഡന്‍റ് കെ.ബാബുരാജൻ അധ്യക്ഷത വഹിച്ചു. സെക്രട്ടറി വി.പി. ഫെമിദ, ട്രഷറർ കെ.ടി. ഷാജിമോൻ എന്നിവർ പ്രസംഗിച്ചു. പുലാമന്തോൾ ഗവണ്‍മെന്‍റ് ഹയർ സെക്കൻഡറി സ്കൂൾ പ്രിൻസിപ്പൽ പി.ജി. സാഗരൻ, കുന്നക്കാവ് ഗവണ്‍മന്‍റ് ഹയർ സെക്കൻഡറി സ്കൂൾ പ്രിൻസിപ്പൽ കെ. ശ്രീജിത്ത്, ഡോ. കെ.സി. മനോജ്, കെ.ആർ. രാജീവ്, അനസ് ബാബു, കെ. മുഹമ്മദ് അസീബ്, ജിബിൻ വർഗീസ്, കെ. ശ്രീലത, കെ.എസ്. ചിത്ര, ഷബ്ന മാറാക്കര എന്നിവർ നേതൃത്വം നൽകി.

മരം വീണ് വീടിന് നാശനഷ്ടം

പെരിന്തൽമണ്ണ: ശക്തമായ കാറ്റിൽ കുന്നപ്പള്ളി വളയംമുച്ചിയിൽ ചേലക്കാട്ട്തൊടി അബ്ദുൾ സമദിന്‍റെ വീടിന് മുകളിൽ തേക്ക് മരം വീണു. വീട്ന് ഭാഗികമായി കേടുപാടുകൾ സംഭവിച്ചിട്ടുണ്ട്. വിവരമറിഞ്ഞ് പെരിന്തൽമണ്ണ അഗ്നിരക്ഷാസേനയും സമീപവാസിയായ സലാഹും ചേർന്നാണ് മരം മുറിച്ചു മാറ്റിയത്. പെരിന്തൽമണ്ണ സ്റ്റേഷൻ ഓഫീസർ ബാബുരാജ്, സീനിയർ ഫയർ റെസ്ക്യു ഓഫീസർ സുർജിത്, ഫയർ ആൻഡ് റെസ്ക്യു ഓഫീസർമാരായ മുഹമ്മദലി, രഞ്ജിത്, സുജിത്ത്, നിതിൻ എന്നിവർ നേതൃത്വം നൽകി.

‘നിലന്പൂർ ജില്ലാ ആശുപത്രി വികസനത്തിന് കോണ്‍ഗ്രസ് തടസം നിൽക്കുന്നു’

നിലന്പൂർ: നിലന്പൂർ ജില്ലാ ആശുപത്രി വികസനത്തിന് കോണ്‍ഗ്രസ് തടസം നിൽക്കുന്നതായി നഗരസഭാ ചെയർമാൻ മാട്ടുമ്മൽ സലീം ആരോപിച്ചു. കോണ്‍ഗ്രസിന്‍റെ ആശുപത്രി വികസന നിലപാടിൽ പ്രതിഷേധിച്ച് നാളെ ജില്ലാ ആശുപത്രിക്ക് മുന്നിൽ എൽഡിഎഫ് കൗണ്‍സിലർമാർ രാവിലെ 10 മുതൽ ഉച്ചക്ക് ഒന്നുവരെ പ്രതിഷേധ ധർണ സംഘടിപ്പിക്കും. ഗൂഢല്ലൂർ മുതൽ ആയിരക്കണക്കിന് ആളുകൾ ആശ്രയിക്കുന്ന നിലന്പൂർ ജില്ലാ ആശുപത്രിയുടെ വികസനമാണ് കോണ്‍ഗ്രസ് അട്ടിമറിക്കാൻ ശ്രമിക്കുന്നത്. നിലവിലെ എംഎൽഎയുടെ നേതൃത്വത്തിൽ ആരംഭിക്കാൻ പോകുന്ന സ്വകാര്യ ആശുപത്രിയെ സഹായിക്കാനാണ് കോണ്‍ഗ്രസ് ജില്ലാ ആശുപത്രി വികസനത്തിന് തടസം നിൽക്കുന്നതെന്ന് ചെയർമാൻ ആരോപിച്ചു. യുഡിഎഫിൽ കോണ്‍ഗ്രസ് മാത്രമാണ് സ്കൂളിന്‍റെ സ്ഥലം ഏറ്റെടുക്കുന്നതിന് എതിര് നിൽക്കുന്നത്. സ്കൂളിന്‍റെ സ്ഥലം ഏറ്റെടുക്കുന്പോൾ അത് കുട്ടികളെ ബാധിക്കാതിരിക്കാൻ നാല് കോടി രൂപയുടെ കെട്ടിടം മുൻ എംഎൽഎ ഫണ്ടിൽ ഉൾപ്പടുത്തിയിട്ടുണ്ട്. കൂടാതെ ഇവിടെ പഠിക്കുന്ന കുട്ടികളിൽ നൂറിൽ താഴെ കുട്ടികൾ മാത്രമാണ് കെഎൻജി റോഡിന്‍റെ മറുഭാഗത്തുള്ളത്. ഇവർക്ക് വരാൻ സ്കൂൾ ബസും ലഭ്യമാക്കും. ഈ സാഹചര്യത്തിൽ കോണ്‍ഗ്രസിന്‍റെ ആശുപത്രി വികസന വിരുദ്ധ നിലപാടിനെതിരേ ജനങ്ങളുടെ പിന്തുണയോടെ സമരം ശക്തമാക്കുമെന്നും ചെയർമാൻ പറഞ്ഞു.വൈസ് ചെയർപേഴ്സണ്‍ അരുമ ജയകൃഷ്ണൻ, സ്റ്റാൻഡിംഗ് കമ്മിറ്റി ചെയർപേഴ്സണ്‍മാരായ കക്കാടൻ റഹീം, പി.എം. ബഷീർ എന്നിവരും സംസാരിച്ചു.

വൻതോതിൽ വാഷും വാറ്റുപകരണങ്ങളും പിടികൂടി

നിലന്പൂർ: എക്സൈസിന്‍റെ നേതൃത്വത്തിൽ 1750 ലിറ്റർ വാഷും വാറ്റ് ഉപകരണങ്ങളും പിടികൂടി.മന്പാട് പഞ്ചായത്തിലെ ഓടായിക്കൽ പാലക്കടവിലെ വാറ്റ് കേന്ദ്രമാണ് എക്സൈസ് സംഘം നശിപ്പിച്ചത്. കാളികാവ് എക്സൈസ് റേഞ്ച് വിഭാഗവും എടക്കോട് വനം സ്റ്റേഷനിലെ വനപാലകരും ചേർന്ന് പാലക്കടവ് കവണപാറ അമ്മിക്കുട്ടി വനമേഖലയിൽ നടത്തിയ പരിശോധനയിലാണ് വാഷ് കണ്ടെടുത്ത് നശിപ്പിച്ചത്. കാട്ടരുവിയോട് ചേർന്ന് പാറകൾക്കിടയിൽ സുരക്ഷിതമായാണ് വാറ്റ് കേന്ദ്രം പ്രവർത്തിച്ചിരുന്നത്. 1750 ലിറ്റർ വാഷിന് പുറമെ 10 ഗ്യാസ് സിലിണ്ടറുകൾ, വലിയ ബർണർ ഘടിപ്പിച്ച സ്റ്റൗവ്, ഒരേ സമയം 200 ലിറ്റർ വാഷ് ചാരായമാക്കാൻ കഴിയുന്ന വെൽഡ് ചെയ്തു പിടിപ്പിച്ച വലിയ രണ്ട് വാറ്റുപാത്രങ്ങളും മറ്റു വാറ്റ് ഉപകരണങ്ങളുമാണ് പിടിച്ചെടുത്തത്. മലപ്പുറം ജില്ലയിൽ വർഷങ്ങൾക്ക് ശേഷമാണ് ഇത്രയും വലിയ നാടൻ ചാരായ വാറ്റുകേന്ദ്രം കണ്ടെത്തുന്നത്. കക്കാടംപൊയിൽ, തോട്ടുമുക്കം, വെറ്റിലപ്പാറ, നിലന്പൂർ, എടവണ്ണ ഭാഗങ്ങളിലേക്കെല്ലാം ഓർഡർ പ്രകാരം നാടൻ ചാരായം എത്തിക്കുന്ന കേന്ദ്രമാണിത്. ചാരായ കേന്ദ്രത്തിന്‍റെ ഉടമയെ കണ്ടെത്താൻ അന്വേഷണം ആരംഭിച്ചു. കഴിഞ്ഞ ദിവസം രണ്ട് ലിറ്റർ ചാരായവുമായി ഇവിടെ നിന്ന് ഒരാൾ പിടിയിലായിരുന്നു. ഇയാളിൽ നിന്നാണ് വാറ്റ് കേന്ദ്രവുമായി ബന്ധപ്പെട്ട വിവരം ലഭിച്ചത്. കാളികാവ് എക്സൈസ് റേഞ്ച് ഇൻസ്പെക്ടർ ടി.സി. അനീഷ്, അസിസ്റ്റന്‍റ് എക്സൈസ് ഇൻസ്പെക്ടർ ഗ്രേഡ് കെ.എം. ശിവപ്രകാശ്, അസിസ്റ്റന്‍റ് ഇൻസ്പക്ടർ ഗ്രേഡ് പി.കെ. പ്രശാന്ത്, പ്രവന്‍റീവ് ഓഫീസർ ഗ്രേഡ് കെ.എസ്. അരുണ്‍കുമാർ, സിവിൽ എക്സൈസ് ഓഫീസർമാരായ കെ.വി. വിപിൻ, കെ. അമിത്ത്, സവാദ് നാലകത്ത്, എടക്കോട് വനം സ്റ്റേഷനിലെ ബീറ്റ് ഫോറസ്റ്റ് ഓഫീസർ സുരേഷ് എന്നിവരും പരിശോധനയിൽ പങ്കെടുത്തു.

അതിജീവനം അവകാശം: മഞ്ചേരിയിൽ അമ്മത്തൊട്ടിൽ നവീകരിച്ചു

മഞ്ചേരി: മെഡിക്കൽ കോളജിലെ നവീകരിച്ച അമ്മത്തൊട്ടിൽ ബാലവകാശ സംരക്ഷണ കമ്മീഷൻ ചെയർപേഴ്സണ്‍ അഡ്വ. കെ.വി. മനോജ് കുമാർ ഉദ്ഘാടനം ചെയ്തു. വനിതാ ശിശു വികസന വകുപ്പ്, ശിശുക്ഷേമ സമിതി, ജില്ലാ ചൈൽഡ് വെൽഫെയർ കമ്മിറ്റി എന്നിവയുടെ സഹകരണത്തോടെ പാറമ്മൽ കുടുംബ കൂട്ടായ്മയാണ് അമ്മത്തൊട്ടിൽ നവീകരിച്ചത്. കുട്ടികളുടെ ഏറ്റവും പ്രധാന അവകാശം അതിജീവനമാണ്. അത് നിഷേധിക്കാൻ നമുക്കാവില്ല. കുട്ടികൾ കുടുംബാന്തരീക്ഷത്തിൽ വളരണം. അവരുടെ സംരക്ഷണത്തിനാണ് ശിശുക്ഷേമ സമിതികൾ നിലകൊള്ളുന്നത് എന്ന് ഉദ്ഘാടന പ്രസംഗത്തിൽ ബാലവകാശ സംരക്ഷണ കമ്മീഷൻ ചെയർപേഴ്സണ്‍ പറഞ്ഞു. "സനാത ബാല്യം സംരക്ഷിത ബാല്യം’ എന്ന മുദ്രാവാക്യത്തെ മുൻനിർത്തി ഉപേക്ഷിക്കപ്പെടുന്ന ശിശുക്കളെ സംരക്ഷിക്കാനും അവരെ വളർത്തിയെടുക്കുന്നതിനുമായി സർക്കാരിന്‍റെ നേതൃത്വത്തിൽ സംസ്ഥാന ശിശുക്ഷേമ സമിതിയുടെ സാമൂഹ്യ പ്രതിബദ്ധതയുള്ള പദ്ധതിയാണ് അമ്മത്തൊട്ടിൽ. ഇന്നുവരെ 1050 കുട്ടികളെയാണ് സംസ്ഥാനത്തെ അമ്മത്തൊട്ടിലിൽ ലഭിച്ചത്. അഡ്വ. യു.എ. ലത്തീഫ് എംഎൽഎ അധ്യക്ഷത വഹിച്ച പരിപാടിയിൽ സംസ്ഥാന ശിശുക്ഷേമ സമിതി ജനറൽ സെക്രട്ടറി അഡ്വ. അരുണ്‍ ഗോപി, ജില്ലാ ചൈൽഡ് വെൽഫെയർ കമ്മിറ്റി ചെയർപേഴ്സണ്‍ അഡ്വ. സുരേഷ്, ചൈൽഡ് വെൽഫെയർ കമ്മിറ്റി മെന്പർമാരായ അഡ്വ. പി. ജാബിർ, സി. ഹേമലത, ശ്രീജ പുളിക്കൽ, ജില്ലാ ചൈൽഡ് പ്രൊട്ടക്‌ഷൻ ഓഫീസർ ഷാജിത ആറ്റശേരി, പാറമ്മൽ കുടുംബ കൂട്ടായ്മ അംഗം ഹമീദ് പാറമ്മൽ, മഞ്ചേരി ജനറൽ ആശുപത്രി സൂപ്രണ്ട് ഡോ. പ്രഭുദാസ്, ജില്ലാ ശിശുക്ഷേമ സമിതി സെക്രട്ടറി പി. സതീശൻ എന്നിവർ പങ്കെടുത്തു.

ഓണം: പെരിന്തൽമണ്ണയിൽ കാർഷിക വാണിജ്യ വിപണന മേള 25 മുതൽ

പെരിന്തൽമണ്ണ: "ഓർമിക്കാൻ ഒരു ഓണം’ എന്ന പേരിൽ പെരിന്തൽമണ്ണ ബ്ലോക്ക് പഞ്ചായത്ത്, കൃഷി വകുപ്പ് (ആത്മ) അഗ്രോ സർവീസ് സെന്‍റർ, വിവിധ വകുപ്പുകൾ എന്നിവ സംയുക്തമായി 25, 26, 27 തിയതികളിൽ കാർഷിക വാണിജ്യ വിപണന മേള സംഘടിപ്പിക്കും. ബ്ലോക്ക് പഞ്ചായത്ത് വളപ്പിൽ ഒരുക്കുന്ന വിപണന മേളയിൽ ജൈവ പച്ചക്കറികൾ, വിവിധ ഉത്പന്നങ്ങൾ, ഫുഡ് കോർട്ട്, യന്ത്രോപകരണങ്ങളുടെ പ്രദർശനം എന്നിവ ഉണ്ടായിരക്കും. മൂന്നു ദിനങ്ങളിലും വൈകുന്നേരം കലാപരിപാടികൾ അരങ്ങേറും. 25 ന് നടക്കുന്ന ഉദ്ഘാടന പരിപാടിയിൽ ജനപ്രതിനിധികൾ, വകുപ്പ് മേധാവികൾ, കർഷക പ്രതിനിധികൾ പങ്കെടുക്കും. ബ്ലോക്ക്തലത്തിൽ നിന്ന് ജില്ലയിലേക്ക് തെരഞ്ഞെടുക്കപ്പെട്ട കർഷകരെയും അഗ്രോ സർവീസ് സെന്‍റർ ജീവനക്കാരെയും ചടങ്ങിൽ ആദരിക്കും. ഇവർക്കായി ഓണസദ്യ ഒരുക്കും. പഞ്ചായത്തുകളിൽ നിന്ന് തെരഞ്ഞെടുക്കപ്പെട്ട കർഷകരെ ഉൾപ്പെടുത്തി നെൽകൃഷിയെ അടിസ്ഥാനമാക്കിയുള്ള സെമിനാർ 25 ന് ഉച്ചക്ക് ശേഷം നടക്കും. കാർഷിക സർവകലാശാലയിലെ പ്രഗത്ഭർ സെമിനാറിൽ സംസാരിക്കും. 26ന് പട്ടികജാതി കർഷകർക്കും കർഷകത്തൊഴിലാളികൾക്കുമായി കൃഷി വിജ്ഞാന സദസ് സംഘടിപ്പിക്കും. അത്തം ദിനത്തിൽ അത്തപ്പൂക്കളമൊരുക്കും. പരിപാടികളുടെ ആലോചനാ യോഗത്തിൽ ബ്ലോക്ക് പഞ്ചായത്ത് പ്രസിഡന്‍റ് അഡ്വ. എ.കെ.മുസ്തഫ, വൈസ് പ്രസിഡന്‍റ് വനജ കുന്നംകുലത്ത്, വികസനകാര്യ സ്ഥിരസമിതി അധ്യക്ഷൻ പി.കെ. അയമു, ഭരണ സമിതി അംഗങ്ങൾ, കൃഷി ഓഫീസർമാർ, അഗ്രോ സർവീസ് സെന്‍റർ പ്രസിഡന്‍റ് ഫൈസൽ, വ്യവസായ ഓഫീസർ ജുബൈരിയ, ഡയറി എക്സ്റ്റഷൻ ഓഫീസർ ധന്യ, അസിസ്റ്റന്‍റ് കൃഷി ഡയറക്ടർ റിയ ജോസഫ്, ആലിപ്പറന്പ് കൃഷി ഓഫീസർ റെജീന എന്നിവർ പ്രസംഗിച്ചു.

ലഹരിക്കെതിരേ നടപടി ശക്തമാക്കി ഓണം സ്പെഷൽ ഡ്രൈവ്

പെരിന്തൽമണ്ണ: ഓണം സ്പെഷൽ ഡ്രൈവിനോടനുബന്ധിച്ച് പെരിന്തൽമണ്ണ, മങ്കട നിയോജക മണ്ഡലംതല ജനകീയ കമ്മിറ്റികൾ ചേർന്നു. മങ്കട ബ്ലോക്ക് ഓഫീസ് ഓഡിറ്റോറിയത്തിൽ ചേർന്ന യോഗത്തിൽ മഞ്ഞളാംകുഴി അലി എംഎൽഎ അധ്യക്ഷത വഹിച്ചു. പഞ്ചായത്ത് പ്രസിഡന്‍റുമാർ, ബ്ലോക്ക് പഞ്ചായത്ത് പ്രസിഡന്‍റ്, മറ്റു ജനപ്രതിനിധികൾ, രാഷ്ട്രീയ സാമൂഹിക രംഗത്തെ പ്രമുഖർ പങ്കെടുത്തു. പെരിന്തൽമണ്ണ ബ്ലോക്ക് പഞ്ചായത്ത് ഹാളിൽ നടത്തിയ നിയോജകമണ്ഡലംതല ജനകീയ കമ്മിറ്റി യോഗത്തിൽ നജീബ് കാന്തപുരം എംഎൽഎ അധ്യക്ഷത വഹിച്ചു. ജനുവരി മുതൽ ജൂലൈ വരെയുള്ള താലൂക്ക്തല എൻഫോഴ്സ്മെന്‍റ് പ്രവർത്തനങ്ങൾ എക്സൈസ് സർക്കിൾ ഇൻസ്പെക്ടർ വി.അനൂപ് വിശദീകരിച്ചു. താലൂക്ക് തലത്തിൽ നടത്തിയ 810 റെയ്ഡുകളിലായി 94 കഞ്ചാവ്,മയക്കുമരുന്ന് കേസുകളും 102 അബ്കാരി കേസുകളും രജിസ്റ്റർ ചെയ്തു. അബ്കാരി, എൻഡിപിഎസ് കേസുകളിലായി 182 പേരെ അറസ്റ്റ് ചെയ്തു. 381 കോട്ട്പ കേസുകളും ഈ കാലയളവിലുണ്ടായിരുന്നു. 17.741 കിലോ കഞ്ചാവും ഒരു കഞ്ചാവ് ചെടിയും 13.240 ഗ്രാം ഹെറോയിനും 830 ലിറ്റർ വാഷും 410 ലിറ്റർ വിദേശ മദ്യവും എട്ട് ലിറ്റർ ചാരായവും പിടികൂടി. സ്കൂളുകളും കോളജുകളും റസിഡന്‍റ് അസോസിയേഷനുകളും കേന്ദ്രീകരിച്ച് ബോധവത്ക്കരണവും നടത്തി. വിദ്യാർഥികളെ ലക്ഷ്യമാക്കിയുള്ള ലഹരി വിൽപ്പന സംഘങ്ങളെ അമർച്ച ചെയ്യാൻ എക്സൈസിന്‍റെ പ്രവർത്തനം ഊർജിതമാക്കണമെന്ന് എംഎൽഎമാർ ആവശ്യപ്പെട്ടു. അബ്കാരി എൻഡിപിഎസ് കുറ്റകൃത്യങ്ങൾ ശ്രദ്ധയിൽപ്പെട്ടാൽ എക്സൈസ് സർക്കിൾ ഇൻസ്പെക്ടർ: 9400069645, എക്സൈസ് ഇൻസ്പെക്ടർ: 9400069656, എക്സൈസ് സർക്കിൾ ഓഫീസ്: 04933 227653, എക്സൈസ് റേഞ്ച് ഓഫീസ്: 04933 227539 നന്പറിൽ വിവരം നൽകണം.

"നിർത്തിവച്ച കെഎസ്ആർടിസി സർവീസുകൾ പുനരാരംഭിക്കണം’

നിലന്പൂർ: വിവിധ കാരണങ്ങളാൽ നിർത്തലാക്കിയ മഞ്ചേരി-തിരൂർ, പെരിന്തൽമണ്ണ - പൊന്നാനി, വഴിക്കടവ് -കോഴിക്കോട് തുടങ്ങിയ റൂട്ടുകളിലെ കെഎസ്ആർടിസി സർവീസുകൾ ഉടൻ പുനരാരംഭിക്കണമെന്ന് കെഎസ്ആർടിഇഎ ജില്ലാ സമ്മേളനം പ്രമേയത്തിലൂടെ ആവശ്യപ്പെട്ടു. സമ്മേളനം സിഐടിയു സംസ്ഥാന വൈസ് പ്രസിഡന്‍റ് വി. ശശികുമാർ ഉദ്ഘാടനം ചെയ്തു. ജില്ലാ പ്രസിഡന്‍റ് അബ്ദുറഹിമാൻ അധ്യക്ഷത വഹിച്ചു. സംസ്ഥാന ട്രഷറർ സംഘടനാ റിപ്പോർട്ടും ജില്ലാ സെക്രട്ടറി പി.കെ. കൈരളിദാസ് പ്രവർത്തന റിപ്പോർട്ടും ട്രഷറർ രതീഷ് കണക്കും അവതരിപ്പിച്ചു. സിഐടിയു ഏരിയാ സെക്രട്ടറി ശിവാത്മജൻ, മാത്യു കാരാംവേലി, കെഎസ്ആർടിഇഎ സംസ്ഥാന സെക്രട്ടറിമാരായ പി.എസ്. മഹേഷ്, കെ. സന്തോഷ്, സിപിഎം നിലന്പൂർ ഏരിയാ സെക്രട്ടറി കെ. മോഹൻ എന്നിവർ പ്രസംഗിച്ചു. ഭാരവാഹികൾ: എ.കെ. ജയൻ (പ്രസിഡന്‍റ്), പി.അഷ്റഫ് (സെക്രട്ടറി), പി. പ്രസേന ചന്ദ്രൻ (ട്രഷറർ).

പുലാമന്തോളിലും പരിസരത്തും ആരോഗ്യവകുപ്പിന്‍റെ പരിശോധന

പുലാമന്തോൾ: പുലാമന്തോൾ ഗ്രാമപഞ്ചായത്തിലെ കട്ടുപ്പാറ, തിരുനാരായണപുരം, പുലാമന്തോൾ എന്നിവിടങ്ങളിലെ ഭക്ഷണ വിതരണ സ്ഥാപനങ്ങളിൽ ആരോഗ്യവകുപ്പിന്‍റെ നേതൃത്വത്തിൽ പരിശോധന നടത്തി. പഞ്ചായത്ത് ലൈസൻസ് ഇല്ലാതെയും ശുചിത്വ നിയമങ്ങൾ പാലിക്കാതെയും വൃത്തിഹീനമായ സാഹചര്യത്തിൽ ഭക്ഷണസാധനങ്ങൾ തയാറാക്കുകയും സൂക്ഷിക്കുകയും ചെയ്ത സ്ഥാപനങ്ങൾക്ക് പൊതുജനാരോഗ്യ നിയമപ്രകാരം നോട്ടീസ് നൽകി. ഭക്ഷണ വിതരണ സ്ഥാപനങ്ങളിലെ ജീവനക്കാർക്ക് ഹെൽത്ത് കാർഡ് നിർബന്ധമാണ്. തിളപ്പിച്ചാറിയ വെള്ളം മാത്രമേ കുടിക്കുവാൻ നൽകാവൂവെന്ന് കർശന നിർദേശം നൽകി. പുകവലി നിരോധന ബോർഡുകൾ സ്ഥാപിക്കാത്ത സ്ഥാപനങ്ങൾക്കെതിരേ പിഴ അടക്കമുള്ള നിയമ നടപടികൾ സ്വീകരിക്കുമെന്ന് അധികൃതർ അറിയിച്ചു. പരിശോധനക്ക് ചെമ്മലശേരി കുടുംബാരോഗ്യ കേന്ദ്രം ഹെൽത്ത് ഇൻസ്പെക്ടർ എൻ. അനിൽകുമാർ, ജൂണിയർ ഹെൽത്ത് ഇൻസ്പെക്ടർമാരായ ധന്യ, മുഹമ്മദ് റഫീഖ്, പബ്ലിക് ഹെൽത്ത് നഴ്സ് ബീന, ഗ്രാമപഞ്ചായത്തിലെ സന്ദീപ് എന്നിവർ നേതൃത്വം നൽകി. മഞ്ഞപ്പിത്തം അടക്കമുള്ള ജലജന്യരോഗങ്ങൾ റിപ്പോർട്ട് ചെയ്യുന്ന സാഹചര്യത്തിൽ വരും ദിവസങ്ങളിലും പരിശോധന തുടരുമെന്ന് കുടുംബാരോഗ്യ കേന്ദ്രം മെഡിക്കൽ ഓഫീസർ ഡോ. മുഹമ്മദ് ഫൈസൽ അറിയിച്ചു.

പുന്നക്കാട് സ്കൂളിൽ ഒപ്പം ഒപ്പത്തിനൊപ്പം പദ്ധതി

കരുവാരകുണ്ട്: പുന്നക്കാട് മോഡൽ ജിഎൽപി സ്കൂളിൽ ഒപ്പം ഒപ്പത്തിനൊപ്പം പദ്ധതി തുടങ്ങി. ഗ്രാമപഞ്ചായത്ത് പ്രസിഡന്‍റ് വി.എസ്. പൊന്നമ്മ ഉദ്ഘാടനം ചെയ്തു. പഠന പിന്നാക്കക്കാരെ ഉയർത്തിക്കൊണ്ടുവരാനും പ്രതിഭകൾക്ക് കൂടുതൽ അവസരങ്ങൾ നൽകാനുമായി സ്കൂൾ നടപ്പാക്കുന്ന തനത് പദ്ധതിയാണിത്. ഇതിന്‍റെ ഭാഗമായി പുറത്തിറക്കിയ അഭിമാനരേഖ ഗ്രാമപഞ്ചായത്ത് വൈസ് പ്രസിഡന്‍റ് മഠത്തിൽ ലത്തീഫ് പ്രകാശനം ചെയ്തു. സ്കൂൾ അക്കാഡമിക് മാസ്റ്റർ പ്ലാൻ എഇഒ പ്രേമാനന്ദൻ പുറത്തിറക്കി. സ്ഥിരം സമിതി അധ്യക്ഷ ഷീന ജിൽസ്, വാർഡ് അംഗം സ്മിത അനിൽകുമാർ, പ്രധാനാധ്യാപിക കെ.പി. രാജശ്രീ, പിടിഎ പ്രസിഡന്‍റ് പി.ഷറഫുദ്ദീൻ, പ്രീത നായർ, ബാലകൃഷ്ണൻ, അധ്യാപകരായ എം.രാധാകൃഷ്ണൻ, അബ്ദുള്ള അമാനത്ത്, സോണിയ ജോസഫ്, ജയശ്രീ, പി.എം. ആര്യ, റുക്സാന ബീഗം, റിൻസിന, കെ.സന്ധ്യ, കെ.ശ്രീധരൻ എന്നിവർ പ്രസംഗിച്ചു. പദ്ധതിയുടെ ഭാഗമായി അഭിമാനത്തിളക്കം, കുട്ടിക്കൂട്ടം, നവചേതന, ദർപ്പണം, വീക്കിലി വിൻ എന്നീ പരിപാടികൾ നടപ്പാക്കും.

വനം വകുപ്പിന് വാഹനം വാങ്ങാൻ 14 ലക്ഷം അനുവദിച്ച് എംഎൽഎ

നിലന്പൂർ: ഏറനാട് മണ്ഡലത്തിലെ വന്യമ്യഗശല്യം പരിഹരിക്കാൻ അടിയന്തര നടപടികളുടെ ഭാഗമായി പി.കെ. ബഷീർ എംഎൽഎ തന്‍റെ ആസ്തി വികസന ഫണ്ടിൽ നിന്ന് 14 ലക്ഷം രൂപ നിലന്പൂർ നോർത്ത് ഡിവിഷന് നൽകും. വാഹനം വാങ്ങാനാണ് ഫണ്ട് നൽകുക. വന്യമൃഗശല്യം മൂലം മലയോര ജനത വലിയ പ്രതിസന്ധിയാണ് നേരിടുന്നത്. ഏറനാട് മണ്ഡലത്തിൽ സോളാർ വൈദ്യുത വേലികൾ സ്ഥാപിക്കാൻ നടപടിയെടുക്കും. എംഎൽഎ ഫണ്ട്, സിഎസ്ആർ ഫണ്ട്, പ്രിയങ്കാഗാന്ധി എംപിയുടെ ഫണ്ട്, വനം, കൃഷി വകുപ്പുകളുടെ ഫണ്ടുകൾ എന്നിവ ഉപയോഗപ്പെടുത്തും. ചാലിയാർ, എടവണ്ണ, ഊർങ്ങാട്ടിരി പഞ്ചായത്തുകളിൽ കാട്ടാന ശല്യം രൂക്ഷമാണ്. വാഹനങ്ങളുടെ കുറവ് മൂലം വനം-ആർആർടി വിഭാഗത്തിലെ ഉദ്യോഗസ്ഥർക്ക് യഥാസമയം സ്ഥലത്തൊൻ കഴിയാത്ത സാഹചര്യത്തിലാണ് വാഹനം വാങ്ങാൻ 14 ലക്ഷം നൽകുക. മുന്പെങ്ങുമില്ലാത്ത വിധം കേരളത്തിന്‍റെ പല ഭാഗങ്ങളിലും വന്യമൃഗ ശല്യം രൂക്ഷമാണെന്നും പി.കെ. ബഷീർ എംഎൽഎ പറഞ്ഞു.

മലവെള്ളപ്പാച്ചിലിൽ പുഴയോര റോഡ് തകർച്ചാ ഭീഷണിയിൽ

കരുവാരകുണ്ട്: മലയോര മേഖലയിൽ പെയ്ത കനത്ത മഴയെ തുടർന്നുണ്ടായ മലവെള്ളപ്പാച്ചിലിൽ മാന്പറ്റ പുഴയോര റോഡ് തകർച്ചാ ഭീഷണിയിൽ. മാന്പറ്റ പാലത്തിന് സമീപം നിരവധി കുടുംബങ്ങൾ താമസിക്കുന്ന ഭാഗത്തേക്കുള്ള റോഡാണ് തകർച്ച നേരിടുന്നത്. റോഡിന്‍റെ ഒരുവശം പുഴയാണ്. റോഡ് പുഴയിലേക്ക് ഇടിഞ്ഞ് വീഴാതിരിക്കുന്നതിന് നിർമിച്ച സംരക്ഷണഭിത്തിയാണ് മലവെള്ളപ്പാച്ചിലിൽ ഭാഗികമായി തകർന്നിരിക്കുന്നത്. സംരക്ഷണഭിത്തി അടിയന്തരമായി പുനർനിർമിച്ചില്ലെങ്കിൽ മലവെള്ളപ്പാച്ചിലിൽ റോഡ് കുത്തിയൊലിച്ച് പോയേക്കുമെന്നാണ് സമീപവാസികൾ പറയുന്നത്. റോഡ് ഇടിഞ്ഞു വീണാൽ മലവെള്ളം താമസസ്ഥലത്തേക്ക് ഒഴുകിയെത്തുമെന്നും ഇത് വലിയ നാശനഷ്ടങ്ങൾക്ക് കാരണമായേക്കുമെന്നും പ്രദേശവാസികൾ ചൂണ്ടിക്കാട്ടുന്നു. സ്ഥിരതാമസക്കാരായ ആളുകൾ വരുമാനം ലക്ഷ്യമാക്കി കോഴികൾ, പശുക്കൾ, ആടുകൾ എന്നിവയെയും വീടിനു സമീപം വളർത്തുന്നുണ്ട്. മലവെള്ളപ്പാച്ചിൽ ഇവയ്ക്കെല്ലാം ഭീഷണിയാകും. മഴ ഒഴിയുന്നത് വരെ കാത്തുനിൽക്കാതെ തകർന്ന ഭാഗത്ത് കരിങ്കല്ലുകൾ കൊണ്ടുവന്നിട്ടെങ്കിലും റോഡിന് സംരക്ഷണമൊരുക്കണമെന്നാണ് നാട്ടുകാരും ആവശ്യപ്പെടുന്നത്.

പെരിന്തൽമണ്ണ ഇൻഡോർ മാർക്കറ്റിന്‍റെ പ്രവൃത്തി പുരോഗമിക്കുന്നു

പെരിന്തൽമണ്ണ: പെരിന്തൽമണ്ണ നഗരസഭ ഇൻഡോർ മാർക്കറ്റിന്‍റെ രണ്ടാംഘട്ട നിർമാണ പ്രവൃത്തികൾ പുരോഗമിക്കുന്നു. 2019ലാണ് നിലവിലുള്ള മാർക്കറ്റ് പൊളിച്ച് മൂന്ന് ഏക്കർ സ്ഥലത്ത് 40 കോടി രൂപ ചെലവിൽ ആധുനിക ഇൻഡോർ മാർക്കറ്റ് എന്ന വാഗ്ദാനവുമായി നഗരസഭ ലേല നിക്ഷേപ സംഗമം നടത്തിയത്. നിക്ഷേപകരിൽ നിന്ന് പണം സ്വീകരിച്ച് മാർക്കറ്റ് നിർമാണം തുടങ്ങിയെങ്കിലും പൂർത്തിയാക്കാൻ കഴിഞ്ഞില്ല. ലേലത്തിൽ പങ്കെടുത്ത പ്രവാസികളായ 200ൽ പരം ഉടമകളാണ് മുറികൾക്കായി കാത്തിരിക്കുന്നത്. നഗരസഭയുടെ രജത ജൂബിലി പദ്ധതികളിൽ ഒന്നായിരുന്ന ഇൻഡോർ മാർക്കറ്റ്, ആയുർവേദ ആശുപത്രി എന്നീ പദ്ധതികൾ ഈ ഭരണസമിതിയുടെ കാലയളവിൽ പൂർത്തീകരിച്ച് ജനങ്ങൾക്ക് സമർപ്പിക്കുവാൻ നഗരസഭ ശ്രമം നടത്തുന്നുണ്ടെങ്കിലും സാധ്യമാകാനിടയില്ല. നാല് നിലകളിൽ പണിയുന്ന കെട്ടിടത്തിൽ ലിഫ്റ്റ് സൗകര്യം, 300 ലേറെ വാഹനങ്ങൾക്കുള്ള പാർക്കിംഗ്, മൂന്ന് പ്രധാന റോഡുകളിൽ നിന്ന് പ്രവേശന സൗകര്യം തുടങ്ങി ഹൈടെക് സൗകര്യങ്ങളോടെയാണ് മാർക്കറ്റ് വിഭാവനം ചെയ്തിരുന്നത്. 2020 ലാണ് ഒന്നാംഘട്ടം പൂർത്തിയാക്കി ഉദ്ഘാടനം ചെയ്തത്. എന്നാൽ നഗരസഭ സാന്പത്തിക പ്രതിസന്ധിയിലായതോടെ നിർമാണം നിലച്ചു. ഇപ്പോഴത്തെ ഭരണസമിതി ബാങ്കുകളിൽ നിന്ന് വായ്പയെടുത്ത് നിർമാണം പൂർത്തിയാക്കാൻ തീരുമാനിച്ചെങ്കിലും ഭൂരേഖ ലഭ്യമാക്കാൻ സാധിക്കാത്തതിനാൽ വായ്പ ലഭിച്ചതുമില്ല. പിന്നീടാണ് 30 കോടി രൂപ കെയുആർഡിഎഫ്സിയിൽ നിന്ന് വായ്പയെടുക്കാൻ സർക്കാർ അനുമതി നൽകിയത്. ഊരാളുങ്കൽ ലേബർ കണ്‍സ്ട്രക്‌ഷൻ കന്പനിയാണ് നിർമാണം നടത്തുന്നത്.

വിദ്യാർഥിയെ മർദിച്ച് പരിക്കേൽപ്പിച്ചതായി പരാതി

വണ്ടൂർ: സുഹൃത്തുക്കൾക്കൊപ്പം പോയ 17കാരനെ ഒരു സംഘമാളുകൾ ക്രൂരമായി മാർദിച്ചതായി പരാതി. തലയിലും പുറത്തും കൈക്കും ഗുരുതര പരിക്കേറ്റു. വണ്ടൂർ അയനിക്കോട് ആണ് സംഭവം.മർദനമേറ്റ കുട്ടിയുടെ പിതാവിന്‍റെ പരാതിയിൽ വണ്ടൂർ പോലീസ് കേസെടുത്തു. കഴിഞ്ഞ ഞാറാഴ്ച രാത്രി 7.15 ഓടെയാണ് പാണ്ടിക്കാട് ഗവണ്‍മെന്‍റ് ഹയർ സെക്കൻഡറി സ്കൂളിലെ പ്ലസ്ടു വിദ്യാർഥിയും പാണ്ടിക്കാട് പനന്പറ്റ സ്വദേശിയുമായ വിദ്യാർഥി സുഹൃത്തുക്കൾക്കൊപ്പം കാറിൽ പതിവായി ചായ കുടിക്കാൻ പോകാറുള്ള അയിനിക്കോട്ടെ ചായക്കടയിലേക്ക് പോയത്. കടയ്ക്കു മുന്നിൽ കാർ നിർത്തിയപ്പോൾ ഒരു സംഘം ആളുകൾ ചേർന്ന് ആക്രമിക്കുകയായിരുന്നു. കല്ലുകൊണ്ടും ജാക്കി ലിവറും ഉപയോഗിച്ചാണ് മർദിച്ചതെന്ന് വിദ്യാർഥി പറയുന്നു. കൂട്ടത്തിലുണ്ടായിരുന്ന വിദ്യാർഥിയുടെ സഹോദരനും പരിക്കേറ്റിട്ടുണ്ട്. കാറിൽ കയറി വാതിൽ അടച്ചതോടെ പിറകിലെ ഡിക്കി തുറന്ന് വീണ്ടും മർദിക്കുകയായിരുന്നു. സംഭവ സമയം അതുവഴി പോയ ബന്ധുക്കൾ ഇതുകണ്ട് രക്ഷപ്പെടുത്തുകയായിരുന്നു. തുടർന്ന് പതിനേഴുകാരനെ പാണ്ടിക്കാട്ടെ സ്വകാര്യ ആശുപത്രിയിലും പിന്നീട് മഞ്ചേരി മെഡിക്കൽ കോളജാശുപത്രിയിലും പ്രവേശിപ്പിച്ചു. തലയിലും പുറത്തും കാലിലും മുറിവുകളുണ്ട്. വലതുകൈ ഒടിഞ്ഞിട്ടുണ്ട്. പിൻഭാഗത്ത് നീളത്തിൽ മുറിവേൽപ്പിച്ച പാടുകളുണ്ട്. മർദിച്ച സംഘത്തിൽ ഒരാൾ പത്താം ക്ലാസിൽ വിദ്യാർഥിയോടൊപ്പം ഒരുമിച്ചു പഠിച്ചതാണ്. അന്ന് സ്കൂളിൽ ഉണ്ടായ പ്രശ്നത്തെ തുടർന്നുള്ള വൈരാഗ്യമാണ് മർദനത്തിന് കാരണമെന്നാണ് കരുതുന്നത്. പരിക്ക് കാരണം പതിനേഴുകാരന് ഓണപ്പരീക്ഷ എഴുതാൻ സാധിക്കില്ല. മർദനമേറ്റ സംഭവത്തിൽ വിദ്യാർഥിയുടെ പിതാവ് തെച്ചിയോടൻ മുഹമ്മദിന്‍റെ പരാതിയിൽ വണ്ടൂർ പോലീസ് അന്വേഷണം ആരംഭിച്ചു.

പ്രകൃതി വിഭവങ്ങൾ കൊണ്ട് അലങ്കാരപ്പൂക്കളുമായി ഷാഹിന

മലപ്പുറം: വിവിധ വസ്തുക്കൾ കൊണ്ട് വർണാഭമായ പൂക്കൾ തീർക്കുകയാണ് കൊണ്ടോട്ടി കിഴിശേരി സ്വദേശി അങ്ങാടിപ്പറന്പിൽ ഷാഹിന ബഷീർ. പുല്ല്, മുള, ഇലകൾ, അടയ്ക്കാത്തൊണ്ട്, ചോളത്തൊലി, മരത്തൊലി തുടങ്ങി ഏത് വസ്തുവിലും ഷാഹിന ആകർഷകമായ അലങ്കാരപ്പൂക്കളൊരുക്കും. പൂക്കളുണ്ടാക്കാൻ ഉപയോഗിക്കുന്ന ഓരോ വസ്തുവും എത്രകാലം കേടാവാതിരിക്കുമെന്ന് ഷാഹിനയ്ക്ക് അറിയാം. അവ തെരഞ്ഞുപിടിച്ച് ശേഖരിക്കുകയാണ് ആദ്യപടി. മൂക്കാത്ത പുല്ല് ഏറെനാൾ കേടുകൂടാതിരിക്കില്ല. അതിനായി മൂപ്പെത്തിയവ മാത്രം ശേഖരിക്കും. പിന്നീട് ഇവ കൊണ്ട് പൂക്കൾ തീർത്ത് ഫാബ്രിക് കളർ പൗഡറുകൾ വാങ്ങി പൂക്കളും തണ്ടുകളും ചായം തേച്ച് എക്സിബിഷനുകളിൽ എത്തിക്കുന്നു. സ്റ്റാളിലിരുന്ന് ആളുകളുടെ മുന്നിൽ വച്ചാണ് ബാക്കിയുള്ള നിർമാണം. പരിസ്ഥിതി സൗഹൃദമായ അലങ്കാരപ്പൂക്കൾ വീടുകളിൽ എത്തിക്കുക എന്നത് മാലിന്യം വിപത്താകുന്ന കാലത്ത് വളരെ പ്രാധാന്യമർഹിക്കുന്ന പ്രവൃത്തിയാണെന്ന് ഷാഹിന പറയുന്നു. മൂപ്പെത്തിയ തണ്ടും കായ്കളും മാത്രമാണ് അലങ്കാരച്ചെടികളുണ്ടാക്കാൻ തെരഞ്ഞെടുക്കുക. സഹായത്തിന് ആദിത്യയുമുണ്ട്. അലങ്കാരപ്പൂനിർമാണം സ്കൂൾ വിദ്യാർഥിയായ ആദിത്യയ്ക്കും ഇപ്പോൾ ഹരമാണ്. ഒപ്പം വരുമാനമാർഗവുമാണ്. കാഴ്ചപരിമിതർക്ക് മുളകൾ കൊണ്ട് അലങ്കാര വസ്തുക്കളുണ്ടാക്കാൻ പരിശീലനം നൽകുന്നുണ്ട് ഷാഹിന. അത്തരം കുട്ടികളെയും കൂട്ടി പലതരം പ്രദർശന, വിപണന മേളകളിൽ പങ്കെടുക്കണമെന്നതും ഷാഹിനയുടെ ആഗ്രഹമാണ്. കുടുംബശ്രീ വഴിയാണ് ഷാഹിന ആദ്യം പൂക്കളുടെ വിപണി തിരിച്ചറിഞ്ഞത്. കുടുംബശ്രീയുടെ എക്സിബിഷനിൽ പായസവുമായി പോകുന്ന ഉമ്മയുടെ കൈയിൽ ചില കരകൗശല വസ്തുക്കൾ കൊടുത്തയച്ചുനോക്കി. മികച്ച പ്രതികരണമാണ് ലഭിച്ചത്. പിന്നീട് കുടുംബശ്രീ മേളകളിൽ സ്ഥിരം സാന്നിധ്യമായി. വ്യവസായ വകുപ്പ്, ബാംബൂ കോർപ്പറേഷൻ, പിന്നാക്കവികസന വകുപ്പ് തുടങ്ങി വിവിധ വകുപ്പുകൾ ഷാഹിനയ്ക്ക് എക്സിബിഷനുകളിൽ ഇടം നൽകി. എന്‍റെ കേരളം, സരസ് തുടങ്ങിയ മേളകൾ വലിയ ഉൗർജമായി. ഓണ്‍ലൈൻ മാർക്കറ്റിംഗിന്‍റെ രീതികളറിയാത്തതുകൊണ്ട് സർക്കാർ ഒരുക്കുന്ന മേളകളാണ് തന്നെപ്പോലുള്ളവരെ നിലനിർത്തുന്നതെന്ന് ഷാഹിന പറയുന്നു. വർഷത്തിൽ എട്ടോ പത്തോ മേള മതി ഒരു വർഷത്തേക്കുള്ള വരുമാനം കണ്ടെത്താൻ. ഉത്പന്നങ്ങൾ എക്സിബിഷനുകളിൽ എത്തിക്കാൻ ജില്ലാ വ്യവസായ കേന്ദ്രം പ്രോത്സാഹനവും പിന്തുണയും നൽകിയിട്ടുണ്ട്. വ്യവസായ വകുപ്പ്, കുടുംബശ്രീ വഴി ഡൽഹി ഉൾപ്പെടെ കേരളത്തിന് പുറത്തും ധാരാളം വേദികളും കിട്ടുന്നു.

അതുൽ കൃഷ്ണയ്ക്ക് കുട്ടികർഷക പുരസ്കാരം

അങ്ങാടിപ്പുറം: അങ്ങാടിപ്പുറം പഞ്ചായത്തിലെ കുട്ടിക്കർഷകർക്കായി കൃഷിഭവൻ ഏർപ്പെടുത്തിയ പുരസ്കാരം പരിയാപുരം സെന്‍റ് മേരീസ് ഹയർ സെക്കൻഡറി സ്കൂളിലെ പ്ലസ് വണ്‍ വിദ്യാർഥി സി.അതുൽ കൃഷ്ണയ്ക്ക്. ഓണത്തിന് വിളവെടുപ്പിനായി ഒരുങ്ങുന്ന ചെണ്ടുമല്ലി തോട്ടമാണ് അതുലിന്‍റെ കൃഷിയിലെ ഹൈലൈറ്റ്. ആയിരത്തോളം ചെണ്ടുമല്ലി തൈകൾ ഓണവിപണി ലക്ഷ്യമിട്ട് അതുൽ വളർത്തുന്നു. കഴിഞ്ഞ ലോക്ക്ഡൗണ്‍ കാലത്ത് സൂര്യകാന്തി കൃഷി ചെയ്തായിരുന്നു അതുലിന്‍റെ കൃഷിയിലേക്കുള്ള അരങ്ങേറ്റം. വെണ്ട, വഴുതന, പച്ചമുളക്, കൂർക്ക, ചേന, കപ്പ, വാഴ, മഞ്ഞൾ തുടങ്ങിയ വിളകൾ ജൈവരീതിയിൽ കൃഷി ചെയ്യുന്നുണ്ട് ഈ മിടുക്കൻ. അങ്ങാടിപ്പുറം കൃഷി ഓഫീസർ ഡാസൽ സേവ്യറിന്‍റെ നേതൃത്വത്തിൽ മികച്ച പിന്തുണയും ലഭിക്കുന്നു. അങ്ങാടിപ്പുറം എം.പി.നാരായണമേനോൻ ഓഡിറ്റോറിയത്തിൽ നടന്ന ചടങ്ങിൽ മഞ്ഞളാംകുഴി അലി എംഎൽഎ ഉപഹാരം നൽകി. തിരൂർക്കാട് സ്വദേശികളും യോഗ പരിശീലകരുമായ ചെന്ത്രത്തിൽ സുനിൽകുമാറിന്‍റെയും ദീപശ്രീയുടെയും മകനാണ് അതുൽ. ബിടെക് വിദ്യാർഥിനിയായ അഞ്ജന സഹോദരിയാണ്.

യുവതി കിടപ്പു മുറിയിൽ തൂങ്ങി മരിച്ച നിലയിൽ

ചങ്ങരംകുളം: കോക്കൂരിൽ യുവതിയെ കിടപ്പുമുറിയിൽ മരിച്ച നിലയിൽ കാണപ്പെട്ടു. കോക്കൂർ തെക്കുമുറി വാളത്ത് വളപ്പിൽ രവീന്ദ്രന്‍റെ മകൾ കാവ്യ(21) യാണ് മരിച്ചത്. തിങ്കളാഴ്ച രാത്രി എട്ട് മണിയോടെയാണ് സംഭവം. കാവ്യ കിടപ്പുമുറിയിൽ കയറി വാതിലടക്കുകയായിരുന്നു. ഏറെ നേരം കഴിഞ്ഞ് കാണാതെ വന്നതോടെ വീട്ടുകാർ നോക്കിയപ്പോഴാണ് ഫാനിൽ തൂങ്ങിയ നിലയിൽ കണ്ടത്. ഉടനെ ചങ്ങരംകുളത്ത് സ്വകാര്യ ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു. എറണാകുളത്ത് ലോജിസ്റ്റിക് കോഴ്സ് പഠിക്കുന്ന കാവ്യ രണ്ടാഴ്ച മുന്പാണ് വീട്ടിൽ വന്നത്. ചങ്ങരംകുളം സണ്‍റൈസ് ആശുപത്രിയിൽ മോർച്ചറിയിൽ സൂക്ഷിച്ചിരുന്ന മൃതദേഹം ചങ്ങരംകുളം എസ്ഐ രാധാകൃഷ്ണന്‍റെ നേതൃത്വത്തിൽ ഇൻക്വസ്റ്റ് നടത്തി. പോസ്റ്റുമോർട്ടത്തിന് ശേഷം ബന്ധുക്കൾക്ക് വിട്ട് നൽകി. സംഭവത്തിൽ ചങ്ങരംകുളം പോലീസ് കേസെടുത്ത് അന്വേഷണം ആരംഭിച്ചു. മാതാവ്: ബിന്ദു. സഹോദരൻ: ഋതിക്.

വന്യമൃഗ ശല്യം: എംഎൽഎയുടെ അധ്യക്ഷതയിൽ അടിയന്തര യോഗം

നിലമ്പൂർ: ഏറനാട് മണ്ഡലത്തിലെ വന്യമൃഗ ശല്യത്തിന് പരിഹാരം തേടി പി.കെ. ബഷീർ എംഎൽഎയുടെ അധ്യക്ഷതയിൽ എടവണ്ണയിൽ പ്രത്യേക യോഗം ചേർന്നു. കാട്ടാനശല്യം രൂക്ഷമായ സ്ഥലങ്ങളിൽ സോളാർ വൈദ്യുത വേലി നിർമിക്കാൻ ധാരണയായി. വനം, കൃഷി വകുപ്പുകളുടെ ഫണ്ടും എംഎൽഎ ഫണ്ടും ചെലവഴിച്ചായിരിക്കും സോളാർ തൂക്കുവേലികൾ നിർമിക്കുക. ഓരോ പഞ്ചായത്ത് ഭരണ സമിതികളും കാട്ടാന ശല്യം രൂക്ഷമായ പ്രദേശങ്ങളിൽ എത്ര കിലോമീറ്റർ വൈദ്യുത വേലി നിർമിക്കണമെന്ന ആവശ്യം അറിയിക്കണം. കാട്ടുപന്നി ശല്യത്തിന് പരിഹാരം കാണാൻ ശല്യക്കാരായ കാട്ടുപന്നികളെ വെടിവെച്ച് കൊല്ലാനുള്ള അധികാരം ഗ്രാമ പഞ്ചായത്തുകൾ കാര്യക്ഷമമായി നടപ്പാക്കണമെന്നും യോഗം നിർദേശിച്ചു. ഏറനാട് മണ്ഡലത്തിലെ എടവണ്ണ, ചാലിയാർ, ഊർങ്ങാട്ടിരി, കാവനൂർ, അരീക്കോട്, കുഴിമണ്ണ, കീഴുപറമ്പ പഞ്ചായത്തുകളിലെ ജനപ്രതിനിധികളെ ഉൾപ്പെടുത്തി എടവണ്ണ പിഎസ് ഓഡിറ്റോറിയത്തിലാണ് യോഗം ചേർന്നത്. അരീക്കാട് ബ്ലോക്ക് പഞ്ചായത്ത് പ്രസിഡന്‍റ് പി.റുഖിയ ഷംസു, നിലമ്പൂർ ബ്ലോക്ക് പഞ്ചായത്ത് പ്രസിഡന്‍റ് പി. പുഷ്പവല്ലി, നിലമ്പൂർ നോർത്ത് ഡിഎഫ്ഒ പി.ധനേഷ്‌കുമാർ, നോർത്ത് എസിഎഫ് അനീഷ സിദ്ദീഖ്, നിലമ്പൂർ തഹസിൽദാർ എം.പി. സിന്ധു ഏറനാട് തഹസിൽദാർ കെ.എസ്. അഷറഫ്, എടവണ്ണ, ചാലിയാർ, ഊർങ്ങാട്ടിരി, കാവനൂർ, അരീക്കോട്, കുഴിമണ്ണ, കീഴുപറമ്പ എന്നീ പഞ്ചായത്തുകളിലെ പ്രസിഡന്‍റുമാർ, മെമ്പർമാർ, അരീക്കോട്, നിലമ്പൂർ ബ്ലോക്ക് പഞ്ചായത്ത് സെക്രട്ടറിമാർ, വില്ലേജ് ഓഫീസർമാർ, കൃഷി വകുപ്പ് ഓഫീസർമാർ, വനം വകുപ്പ് ഉദ്യോഗസ്ഥർ തുടങ്ങിയവർ സംബന്ധിച്ചു.

നേന്ത്രക്കായ വിലയിടിവ്; കർഷകർക്ക് കനത്ത സാമ്പത്തിക നഷ്ടം

കരുവാരകുണ്ട്: ഓണം മുന്നിൽകണ്ട് നേന്ത്രവാഴ കൃഷി ചെയ്തവർ വില തകർച്ചയെ തുടർന്ന് വൻ സാമ്പത്തിക നഷ്ടത്തിലേക്ക്. ഉല്പാദനം വർധിച്ചതും ഇതര സംസ്ഥാനങ്ങളിൽ നിന്നും കേരളത്തിലേക്കുള്ള നേന്ത്രക്കായ ഇറക്കുമതിയുമാണ് കർഷകർക്ക് വിനയായത്. കഴിഞ്ഞ ഓണത്തിനു മുമ്പ് ഒരു കിലോ നേന്ത്രക്കായക്ക് 60 മുതൽ 65 രൂപ വരെ വില ലഭിച്ചിരുന്നു. എന്നാൽ ഇന്ന് അതേ സ്ഥാനത്ത് മുന്തിയ ഇനം നേന്ത്രക്കായ ഒരു കിലോയ്ക്ക് 25 രൂപ പ്രകാരമാണ് കർഷകരിൽ നിന്നും വ്യാപാരികൾ ശേഖരിക്കുന്നത്. ചില ദിവസങ്ങളിൽ ഈ വിലയ്ക്കും വാങ്ങാൻ വ്യാപാരികൾ തയാറാകുന്നില്ല. അമിതകൂലി നൽകി നഷ്ടം സഹിച്ച് പ്രതികൂല കാലാവസ്ഥയെ തരണം ചെയ്ത് വാഴകൃഷി നടത്തി വിളവെടുപ്പ് തുടങ്ങിയപ്പോൾ നേന്ത്രക്കായക്ക് ഉല്പാദന ചെലവുപോലും ലഭിക്കാത്ത സാഹചര്യമായതോടെ കർഷകർ വൻ സാമ്പത്തിക പ്രതിസന്ധിയിലായി.ഇതേത്തുടർന്ന് കൃഷിവകുപ്പ് കർഷകർക്ക് നഷ്ടപരിഹാരം നൽകണമെന്ന ആവശ്യമാണ് കർഷകർ മുന്നോട്ടു വയ്ക്കുന്നത്. പ്രതികൂല സാഹചര്യങ്ങളെ തരണം ചെയ്ത് വാഴ കൃഷി നടത്തുകയും അതിന്‍റെ വിളവെടുപ്പ് തുടങ്ങിയപ്പോൾ തന്നെ മാന്യമായ വിലയ്ക്ക് ഉല്പന്നം വിറ്റഴിക്കാൻ കർഷകർക്കാകുന്നില്ല. നേന്ത്രക്കായ വാങ്ങാൻ ആളില്ലാതായതിനെ തുടർന്ന് നേന്ത്രക്കുലകൾ മലയോര ഗ്രാമങ്ങളിലെ റോഡരികിൽ കൂട്ടിയിട്ട് തുച്ഛമായ വിലയ്ക്ക് പൊതുജനങ്ങൾക്ക് വില്പന നടത്തുന്നവരെയും കാണാം. അതേ സമയം കർഷകരിൽ നിന്നും 25 രൂപയ്ക്ക് വാങ്ങുന്ന ഒരു കിലോ നേന്ത്രപ്പഴത്തിന് 50 രൂപയ്ക്കും മുകളിലാണ് വ്യാപാരികൾ വില്ക്കുന്നത്. കാലവർഷത്തിൽ അനുഭവപ്പെട്ട കാറ്റിലും മഴയിലും വൻതോതിൽ നേന്ത്രവാഴ കൃഷി നശിച്ചിരുന്നു. ഓണനാളുകളിൽ ഇതര സംസ്ഥാനങ്ങളിൽ നിന്നും സംസ്ഥാനത്തേക്കുള്ള നേന്ത്രക്കായയുടെ വരവ് തുടങ്ങിയാൽ നിലവിൽ ഇന്ന് കിട്ടുന്ന വില പോലും ലഭിക്കില്ലന്നും കർഷകർ ഭയക്കുന്നു. കാട്ടാന, കാട്ടുപന്നി, കാട്ടുപോത്ത്, കുരങ്ങുകൾ ഉൾപ്പെടെയുള്ള വന്യജീവികൾ കൃഷിക്കാർക്ക് ഇന്ന് പേടി സ്വപ്നമാണ്. വാഴ തോട്ടത്തിനു ചുറ്റും താല്ക്കാലിക സൗരോർജ വേലി നിർമിച്ചാലും കാട്ടാനകൾ നിമിഷ നേരം കൊണ്ട് നാശം വരുത്തുമെന്നും കർഷകർ പറയുന്നു. പാട്ടത്തിന് സ്ഥലമെടുത്ത് വാഴകൃഷി നടത്തുന്നവരാണ് ഭൂരിപക്ഷവും. മാണി താഴത്തേൽ

സാനിറ്ററി മാലിന്യങ്ങൾ ശാസ്ത്രീയമായി സംസ്കരിക്കുന്ന പദ്ധതിക്ക് അങ്ങാടിപ്പുറം പഞ്ചായത്തിൽ തുടക്കം

അങ്ങാടിപ്പുറം: പഞ്ചായത്തിൽ സാനിറ്ററി മാലിന്യങ്ങൾ ശാസ്ത്രീയമായി സംസ്കരിക്കുന്ന പദ്ധതിക്ക് തുടക്കമായി. സാനിറ്ററി മാലിന്യങ്ങൾ ശേഖരിക്കാൻ സർക്കാർ ചുമതലപ്പെടുത്തിയ ആക്രി ആപ്പുമായി സഹകരിച്ചാണ് പഞ്ചായത്ത് മാലിന്യം ശേഖരിക്കുന്നത്. ആപ്പിലൂടെ രജിസ്റ്റർ ചെയ്യുന്ന വീടുകളിൽ നിന്നും ഏജൻസി നേരിട്ട് എത്തി ആഴ്ചയിൽ ഒരു ദിവസം മാലിന്യം ശേഖരിക്കും. കിലോയ്ക്ക് 50 രൂപയും 12 ശതമാനം ജിഎസ്ടിയും ഫീസായി നൽകണം. എല്ലാ വീടുകളിൽ നിന്നും സ്ഥാപനങ്ങളിൽ നിന്നും സാനിറ്ററി നാപ്കിൻ, ഡയപ്പർ, ഗ്ലൗസ്, യൂറിൻ ബാഗുകൾ, ഡ്രസിംഗ് കോട്ടനുകൾ, കാലഹരണപ്പെട്ട മരുന്നുകൾ എന്നിവയാണ് ശേഖരിക്കുന്നത്. പഞ്ചായത്ത് ഓഫീസിൽ പഞ്ചായത്ത് അധ്യക്ഷ സഈദ മാലിന്യം ശേഖരിക്കുന്ന വാഹനത്തിന്‍റെ ഫ്ലാഗ് ഓഫ് നിർവഹിച്ചു. ഉപാധ്യക്ഷൻ ഷബീർ കറുമുക്കിൽ അധ്യക്ഷത വഹിച്ചു. സ്ഥിരം സമിതി അധ്യക്ഷരായ സെലീന, ഫൗസിയ, മെമ്പർമാരായ കെ.ടി. നാരായണൻ, ബഷീർ തൂമ്പലക്കാടൻ, പി.പി. ഷിഹാബ് , രത്നകുമാരി, വിജയകുമാരി, ഖദീജ, കോറാടൻ റംല, സെക്രട്ടറി സുഹാസ് ലാൽ,ആരോഗ്യ വിഭാഗം ഹെൽത്ത് ഇൻസ്പെക്ടർ സുധീഷ്, ശുചിത്വ മിഷൻ കോഓർഡിനേറ്റർ അരുൺ, പഞ്ചായത്ത്‌ ഹെൽത്ത്‌ ഇൻസ്‌പെക്ടർ ജിജി എന്നിവർ സംബന്ധിച്ചു.

ജില്ലാ ജൂഡോ ചാമ്പ്യന്‍ഷിപ്പില്‍ കൊട്ടുക്കര പിപിഎംഎച്ച്എസ്എസിന് കിരീടം

മഞ്ചേരി: മലപ്പുറം ജില്ലാ ജൂഡോ അസോസിയേഷനും സ്‌പോര്‍ട്സ് പ്രൊമോഷന്‍ അക്കാഡമിയും മഞ്ചേരി തുറക്കല്‍ എച്ച്എംഎസ്എ യുപി സ്‌കൂളില്‍ ജൂണിയര്‍, സബ് ജൂണിയര്‍, സീനിയര്‍ വിഭാഗങ്ങളിലായി നടത്തിയ രണ്ടു ദിവസത്തെ ജില്ലാ ജൂഡോ ചാമ്പ്യന്‍ഷിപ്പ് സമാപിച്ചു. 22 സ്വര്‍ണവും 16 വെള്ളിയും 24 വെങ്കലവും ഉള്‍പ്പെടെ 62 മെഡലുകള്‍ നേടി കൊട്ടുക്കര പിപിഎംഎച്ച്എസ്എസ് കിരീടം നേടി. 20 സ്വര്‍ണവും 19 വീതം വെള്ളി, വെങ്കലം മെഡലുകള്‍ നേടിയ പന്തല്ലൂര്‍ പിഎച്ച്എസ്എസ് ആണ് റണ്ണേഴ്‌സ് അപ്പ്. 37 മെഡലുകള്‍ നേടിയ കൊണ്ടോട്ടി എഎഫ്ടിയാണ് സെക്കന്‍റ് റണ്ണേഴ്‌സ് അപ്പ്. സമാപനച്ചടങ്ങില്‍ കേരള സംസ്ഥാന ജൂഡോ അസോസിയേഷന്‍ സെക്രട്ടറി റെന്‍ ട്രോഫികള്‍ വിതരണം ചെയ്തു. ജില്ലാ അസോസിയേഷന്‍ പ്രസിഡന്‍റ് അഡ്വ. മോഹന്‍കുമാര്‍, ജില്ലാ സെക്രട്ടറി നൗഫല്‍, എം.കെ. അലി, സ്‌പോര്‍ട്സ് കൗണ്‍സില്‍ സംസ്ഥാന എക്‌സിക്യൂട്ടീവ് അംഗം എ. ശ്രീകുമാര്‍, എ. ജിതിന്‍, എ. ജിഷിന്‍, സ്‌കൂള്‍ മാനേജര്‍ കെ.എം. അബ്ദുൾ ഷുക്കൂര്‍, പ്രഥമാധ്യാപകന്‍ കെ.എം.എ. സലീം, കായികാധ്യാപകന്‍ മുനീര്‍, പിടിഎ പ്രസിഡന്‍റ് റഷീദലി എന്നിവര്‍ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]