ADVERTISEMENT

ADVERTISEMENT

കണിയാരത്ത് സർഗോത്സവം നടത്തി

കണിയാരം: ഫാ.ജികഐം ഹയർ സെക്കൻഡറി സ്കൂളിൽ സർഗോത്സവവും ഗുരുവന്ദനവും സംഘടിപ്പിച്ചു.

ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ജുനൈദ് കൈപ്പാണി ഉദ്ഘാടനം ചെയ്തു.

ഫാ.ജെറിൻ പൊയ്കയിൽ അധ്യക്ഷത വഹിച്ചു. പ്രിൻസിപ്പൽ എൻ.പി. മാർട്ടിൻ, അദ്വൈത്, അജി കൊളോണിയ, കെ. ബിനു, അലോണ മേരി, ജിഷ ജോർജ്, ഇ. നിഹാൽ എന്നിവർ പ്രസംഗിച്ചു.

ADVERTISEMENT

ബൈരക്കുപ്പയെ സാമൂഹ്യ വിരുദ്ധകേന്ദ്രമാക്കിയത് കോണ്‍ഗ്രസ് നേതൃത്വം: ബിജെപി

പുൽപ്പള്ളി: ബൈരക്കുപ്പ പാലം പണിയാൻ 1994 ൽ തറക്കല്ലിട്ടെങ്കിലും മൂന്ന് പതിറ്റാണ്ടിന് ശേഷവും തറക്കല്ല് മാത്രമായി അവശേഷിക്കാൻ സാധിച്ചത് ജില്ലയിലെ കോണ്‍ഗ്രസിന്‍റെ ചരിത്രപരമായ നേട്ടമായി കാണണമെന്നും എംപി ഉൾപ്പെടെയുള്ളവർക്ക് പ്രത്യേക പുരസ്കാരം നൽകണമെന്നും ബിജെപി ജില്ലാ പ്രസിഡന്‍റ് പ്രശാന്ത് മലവയൽ പറഞ്ഞു. ബൈരക്കുപ്പ പാലത്തിന് തറക്കല്ലിട്ട സ്ഥലത്തേക്ക് ബിജെപി മുള്ളൻകൊല്ലി പഞ്ചായത്ത് നടത്തിയ മാർച്ച് ഉദ്ഘാടനം ചെയ്യുകയായിരുന്നു അദ്ദേഹം. പുൽപ്പള്ളി, മുള്ളൻകൊല്ലി പ്രദേശം പതിറ്റാണ്ടുകളായി അവഗണന നേരിടുന്ന പ്രദേശമാണ്. ബൈരക്കുപ്പ പാലം വന്നാൽ പ്രദേശത്തിന് സമഗ്ര വികസനമുണ്ടാകും. വികസനത്തിന് തുരങ്കം വയ്ക്കുന്നത് കേരളം മാറി മാറി ഭരിച്ച ഇടത്, വലത് മുന്നണികളാണെന്നും തറക്കല്ലിൽ റീത്ത് സമർപ്പിച്ച ശേഷം പ്രശാന്ത് മലവയൽ പറഞ്ഞു. ബിജെപി മുള്ളൻകൊല്ലി പഞ്ചായത്ത് പ്രസിഡന്‍റ് ഐക്കരശേരി ഗോപാലകൃഷ്ണൻ അധ്യക്ഷത വഹിച്ചു. മണ്ഡലം പ്രസിഡന്‍റ് മനു പ്രസാദ്, അഖിൽ പ്രേം, കെ.ഡി. ഷാജി ദാസ്, വി.എസ്. ഷിബി, ഇന്ദു സുകുമാരൻ, ഇ.കെ. സനൽകുമാർ, അനീഷ് പള്ളത്ത്, ആശാ ഷാജി, ലീന വിനോദ്, രാജൻ പാറക്കൽ, കെ.എസ്. അനിൽ, ജോബിഷ് മാവടിയിൽ, അരുണ്‍ എന്നിവർ പ്രസംഗിച്ചു.

മുനീശ്വരന്‍കുന്നിനെ ഹരിത ടൂറിസം കേന്ദ്രമായി പ്രഖ്യാപിച്ചു

മാനന്തവാടി: തലപ്പുഴ പുതിയിടം മുനീശ്വരന്‍കുന്നിനെ വടക്കേ വയനാട്ടിലെ ആദ്യ ഹരിത ടൂറിസം കേന്ദ്രമായി പ്രഖ്യാപിച്ചു. ഹരിത ടൂറിസം കേന്ദ്രം പ്രഖ്യാപനവും സാനിറ്ററി നാപ്കിന്‍ ഇന്‍സിനിനേറ്റര്‍ ഉദ്ഘാടനവും തവിഞ്ഞാല്‍ പഞ്ചായത്ത് പ്രസിഡന്‍റ് എല്‍സി ജോയ് നിര്‍വഹിച്ചു. നോര്‍ത്ത് വയനാട് ഡിഎഫ്ഒ സന്തോഷ്കുമാര്‍, ഹരിത കേരള മിഷന്‍ ജില്ലാ കോ ഓര്‍ഡിനേറ്റര്‍ സുരേഷ്കുമാര്‍ തുടങ്ങിയവര്‍ പങ്കെടുത്തു. സമുദ്രനിരപ്പില്‍നിന്ന് 3,355 അടി ഉയരത്തിലാണ് മുനീശ്വരന്‍കുന്ന്. ഇവിടെനിന്നുള്ള പ്രകൃതിദൃശ്യം ഹൃദ്യമാണ്. മലനിരകളുടെയും തേയിലത്തോട്ടങ്ങളുടെയും മനോഹര കാഴ്ച മുനീശ്വരന്‍കുന്നിന്‍റെ സവിശേഷതയാണ്. ചെറിയ പുല്ലുകളും വൈവിധ്യമാര്‍ന്ന ഔഷധസസ്യങ്ങളും നിറഞ്ഞ പുല്‍മേടിലൂടെയാണ് മുനീശ്വരന്‍കുന്നിലേക്കുള്ള ഹൈക്കിംഗ് പാത. ആന, കടുവ, പുള്ളിപ്പുലി, കാട്ടുനായ, മാന്‍ തുടങ്ങിയവയുടെ ആവാസ കേന്ദ്രമാണിവിടം. മുനീശ്വരന്‍കുന്നിലെ മുനീശ്വരന്‍ കോവില്‍ നൂറുകണക്കിന് വര്‍ഷം പഴക്കമുള്ളതാണ്. മലയാളമാസത്തിലെ "തിരുവാതിര’ നാളില്‍ മാസത്തിലൊരിക്കല്‍ മാത്രമാണ് ക്ഷേത്രം തുറക്കുന്നത്. തവിഞ്ഞാല്‍ പഞ്ചായത്തിലാണ് മുനീശ്വരന്‍ മലയും കോവിലും. ബേഗൂര്‍ ഫോറസ്റ്റ് റേഞ്ചിനു കീഴിലാണ് ഈ പ്രദേശം. രാവിലെ ഏഴ് മുതല്‍ വൈകുന്നേരം ആറ് വരെയാണ് പ്രവേശനം സമയം.

തിരുന്നാളിന് കൊടിയേറി

പുൽപ്പള്ളി: സർവമത തീർഥാടന കേന്ദ്രമായ ചീയന്പം മോർ ബസേലിയോസ് യാക്കോബായ സുറിയാനി പള്ളിയിൽ പരിശുദ്ധ യൽദോ മോർ ബസേലിയോസ് ബാവായുടെ ഓർമ പെരുന്നാൾ ആഘോഷങ്ങൾക്ക് കൊടിയേറി. തലശേരിയിൽ നിന്നു കൊണ്ടുവന്ന പതാക വിശുദ്ധ കുർബാനയ്ക്ക് ശേഷം വികാരി ഫാ. മത്തായിക്കുഞ്ഞ് ചാത്തനാട്ടുകുടി ഉയർത്തി. വിശുദ്ധ മൂന്നിൻമേൽ കുർബാനയ്ക്ക് ഡോ. ഗീവർഗീസ് മോർ സ്തേഫാനോസ് മെത്രാപ്പോലീത്ത മുഖ്യകാർമികത്വം വഹിച്ചു. തുടർന്ന് ബൈബിൾ കണ്‍വൻഷനും അദ്ദേഹം ഉദ്ഘാടനം ചെയ്തു. ഐ.സി. ബാലകൃഷ്ണൻ എംഎൽഎ, ട്രസ്റ്റി സിജു പൗലോസ് തോട്ടത്തിൽ, സെക്രട്ടറി ഏബ്രാഹാം ചുമതയിൽ തുടങ്ങിയർ പ്രസംഗിച്ചു. ഒക്ടോബർ മൂന്ന് വരെയാണ് തിരുനാൾ.

ലൈംഗിക പീഡന പരാതി: യൂത്ത് കോണ്‍ഗ്രസ് ദേശീയപാത ഉപരോധിച്ചു

കൽപ്പറ്റ: വയനാട്ടിലെ ഡിവൈഎഫ്ഐ നേതാവിനെതിരേയുള്ള ലൈംഗിക പീഡന പരാതിയിലും പ്രതിയെ അറസ്റ്റ് ചെയ്യാൻ വൈകിപ്പിക്കുന്ന പോലീസ് നടപടിയിൽ പ്രതിഷേധിച്ചും യൂത്ത് കോണ്‍ഗ്രസ് ജില്ലാ കമ്മിറ്റിയുടെ നേതൃത്വത്തിൽ കൽപ്പറ്റ ടൗണിൽ പ്രതിഷേധ പ്രകടനം നടത്തുകയും ദേശീയപാത ഉപരോധിക്കുകയും ചെയ്തു. ഇരയായ സ്ത്രീയുടെ ഭർത്താവിന്‍റെ സുഹൃത്തായ പിണങ്ങോട് സ്വദേശിയായ ഡിവൈഎഫ്ഐ ജില്ലാ നേതാവ് വീട്ടിൽ കയറി കടന്നു പിടിച്ചു എന്നാണ് സ്ത്രീയുടെ പരാതി. എത്രയും വേഗം പ്രതിയെ അറസ്റ്റ് ചെയ്ത് നീതിപീഠത്തിന് മുന്പിൽ കൊണ്ടുവരണമെന്ന് യൂത്ത് കോണ്‍ഗ്രസ് ആവശ്യപ്പെട്ടു. സിപിഎം ജില്ലാ സെക്രട്ടറിയുടെ പിൻബലത്തിലാണ് ഡിവൈഎഫ്ഐ ഇത്തരത്തിലുള്ള നീജമായ പ്രവർത്തികൾക്ക് നേതൃത്വം കൊടുക്കുന്നതെന്നും യൂത്ത് കോണ്‍ഗ്രസ് ആരോപിച്ചു. യൂത്ത് കോണ്‍ഗ്രസ് ജില്ലാ പ്രസിഡന്‍റ് അമൽ ജോയ്, സംസ്ഥാന സെക്രട്ടറി ജിജോ പൊടിമറ്റത്തിൽ, യൂത്ത് കോണ്‍ഗ്രസ് ജില്ലാ ജനറൽ സെക്രട്ടറി ഹർഷൽ കോന്നാടൻ, ബിൻഷാദ് കെ. ബഷീർ, അനീഷ് റാട്ടക്കുണ്ട്, ആൽഫിൻ അന്പാറയിൽ, രോഹിത് ബോധി, ഡിന്‍റോ ജോസ്, വിഷ്ണു മേപ്പാടി, ആഷിർ വെങ്ങപ്പള്ളി, ആഷിക് വൈത്തിരി, എബിൻ മുട്ടപ്പള്ളി, ഗൗതം ഗോകുൽദാസ്, മുബാരിഷ് ആയ്യാർ, അർജുൻ ദാസ്, വി.സി. വിനീഷ്, എം.ടി. ജിബിൻ, ലിറാർ പറളിക്കുന്ന് തുടങ്ങിയവർ നേതൃത്വം നൽകി.

കല്ലിങ്കര ഉന്നതിയിൽ സാംസ്കാരിക നിലയം നിർമാണം തുടങ്ങി

ചീരാൽ: നെൻമേനി പഞ്ചായത്തിലെ കല്ലിങ്കര ഉന്നതിയിൽ സാംസ്കാരിക നിലയം നിർമാണം തുടങ്ങി. ബത്തേരി ബ്ലോക്ക് പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ എടക്കൽ മോഹനൻ ശിലാസ്ഥാപനം നടത്തി. വാർഡ് അംഗം വി.ടി. ബേബി അധ്യക്ഷത വഹിച്ചു. ജെ.എ. രാജു, കെ.സി.കെ. തങ്ങൾ, വി.ടി. രാജു, ടി.കെ. രാധാകൃഷ്ണൻ, എം. സുനിൽകുമാർ, ഇ.പി. പുഷ്കരൻ, കെ.സി. വേലായുധൻ, പീഞ്ചൻ, ഷാജി എന്നിവർ പ്രസംഗിച്ചു. പഞ്ചായത്ത് വാർഷിക പദ്ധതിയിൽ ഉൾപ്പെടുത്തി 6,47,000 രൂപ വകയിരുത്തിയാണ് പ്രവൃത്തി നടത്തുന്നത്. ബത്തേരി ലേബർ കോണ്‍ട്രാക്ട് സൊസൈറ്റിക്കാണ് നിർമാണച്ചുമതല.

വോട്ട് ചോരിക്കെതിരേ നടത്തുന്ന സിഗ്നേച്ചർ കാന്പയിന് ജില്ലയിൽ തുടക്കം

കൽപ്പറ്റ: രാഹുൽ ഗാന്ധിയുടെ നേതൃത്വത്തിൽ രാജ്യവ്യാപകമായി നടക്കുന്ന വോട്ട് ചോരി സിഗ്നേച്ചർ കാന്പയിനിന്‍റെ ജില്ലാതല ഉദ്ഘാടനം കൽപ്പറ്റ പോസ്റ്റ് ഓഫീസിനു മുന്നിൽ തയാറാക്കിയ വോട്ട് ചോരി സിഗ്നേച്ചർ കാൻവാസിൽ ഒപ്പ് ചാർത്തി ഡിസിസി പ്രസിഡന്‍റ് എൻ.ഡി. അപ്പച്ചൻ നിർവഹിച്ചു. ഭരണഘടനയെയും ഇന്ത്യൻ ജനാധിപത്യത്തെയും സംരക്ഷിക്കുന്നതിനായി രാഹുൽഗാന്ധി രാജ്യവ്യാപകമായി നടത്തുന്ന വോട്ട് ചോരി കാന്പയിന് ജില്ലയിൽ നിന്നും ശക്തമായ പിന്തുണ നൽകാൻ കക്ഷി രാഷ്ട്രീയത്തിന് അതീതമായി എല്ലാവിഭാഗം ജനങ്ങളും സഹകരിക്കണമെന്നും ഡിസിസി പ്രസിഡന്‍റ് പറഞ്ഞു. രാജ്യവ്യാപകമായി അഞ്ചു കോടി ഒപ്പുകൾ ശേഖരിക്കുക എന്ന ലക്ഷ്യത്തിന്‍റെ ഭാഗമായി ജില്ലയിൽ നിന്നും ഒരു ലക്ഷം ഒപ്പുകൾ ശേഖരിച്ച് കെപിസിസിക്ക് നൽകും. ഇതിനുള്ള പ്രാരംഭ പ്രവർത്തനങ്ങൾ ആരംഭിച്ചു. ബ്ലോക്ക്, മണ്ഡലം, വാർഡ്തലങ്ങളിൽ നിന്നും പ്രത്യേകം തയാറാക്കിയ ഫോമിൽ എല്ലാ വീടുകളും സന്ദർശിച്ച് നമ്മുടെ സമ്മതിദാനാവകാശം മോഷ്ടിക്കപ്പെടാതിരിക്കാൻ നാനാതുറകളിലുള്ള ജനങ്ങളിൽ നിന്നും ഒപ്പ് ശേഖരണം നടത്തും. ചടങ്ങിൽ ഒ.വി. അപ്പച്ചൻ, ചന്ദ്രിക കൃഷ്ണൻ, ശോഭന കുമാരി, പോക്കർഹാജി, ഗിരീഷ് കൽപ്പറ്റ, ജോയ് തൊട്ടിത്തറ, പദ്മനാഭൻ, സുന്ദർരാജ്, ആയിഷ പള്ളിയാൽ, ശ്രീദേവി ബാബു, എം.ഒ. ദേവസ്യ, ഷിജു ഗോപാലൻ, കെ.കെ. രാജേന്ദ്രൻ, ഹർഷൻ കോങ്ങാടൻ, എസ്. മണി, മാടായി ലത്തീഫ്, ഗിരിജ സതീഷ്, നിഷ സുധാകരൻ, സതീഷ് കുമാർ, സെബാസ്റ്റ്യൻ എന്നിവർ പ്രസംഗിച്ചു.

കാട്ടുപന്നിശല്യത്താൽ പൊറുതിമുട്ടി നെൽകർഷകർ

സുൽത്താൻ ബത്തേരി: കാട്ടുപന്നിശല്യത്താൽ പൊറുതിമുട്ടി നെൽകർഷകർ. സുൽത്താൻ ബത്തേരി നഗരസഭയിലെ കരുവള്ളിക്കുന്ന്, പുതുച്ചോല, കുപ്പാടി, പാടശേഖരങ്ങളിലെ കർഷകരാണ് കാട്ടുപന്നികളാൽ പൊറുതിമുട്ടിയിരിക്കുന്നത്. നെൽച്ചെടികൾ വേരടക്കമാണ് പന്നിക്കൂട്ടങ്ങൾ കുത്തി നശിപ്പിക്കുന്നത്. ഇത് മറ്റ് നെൽച്ചെടികളുടെ വേരിളകാനും ഉണങ്ങാനും കാരണമാകുന്നു. വയൽവരന്പുകൾ പന്നികൂട്ടം ഉഴുതുമറിച്ചനിലയിലാണ്. ഇത് കാരണം വയലുകളിൽ ആവശ്യത്തിന് വെളളം കെട്ടിനിർത്താനും കർഷകർക്ക് കഴിയുന്നില്ല. സമീപത്തെ കാടുമൂടി കിടക്കുന്ന തോട്ടങ്ങളിൽ തന്പടിച്ച പന്നിക്കൂട്ടങ്ങളാണ് ദിവസേന ഇറങ്ങി കൃഷി നശിപ്പിക്കുന്നത്. പന്നിശല്യം രൂക്ഷമായതിനാൽ ഈ ഭാഗത്തെ ഹെക്ടർകണക്കിന് നെൽവയലുകളാണ് കർഷകർ തരിശിട്ടിരിക്കുന്നത്. പന്നിശല്യത്തിന് പരിഹാരം കാണണമെന്ന ആവശ്യമാണ് കർഷകർ ഉന്നയിക്കുന്നത്.

ഹയർസെക്കൻഡറി സ്കൂളുകളിൽ ജീവിതോത്‌സവം പദ്ധതിക്ക് തുടക്കമായി

സുൽത്താൻ ബത്തേരി: കൗമാരക്കാരായ ഹയർസെക്കൻഡറി വിദ്യാർഥികളുടെ സർഗശേഷിയും ഊർജവും പുതുവഴികളിലൂടെ ചിട്ടയോടെ പ്രസരിപ്പിച്ച് അവരുടെ വ്യക്തിത്വം സമഗ്രമായി സ്ഫുടം ചെയ്തെടുക്കാൻ ലക്ഷ്യമിട്ട് നടപ്പിലാക്കുന്ന പദ്ധതിയാണ് ജീവിതോത്സവം. ലഹരി വസ്തുക്കളുടെ ഉപയോഗം, ഡിജിറ്റൽ അഡിക്ഷൻ, ആത്മഹത്യ പ്രവണത, അപകടകരമായ അക്രമവാസന തുടങ്ങിയ വിപത്തുകൾക്ക് കേവലം ബോധവത്കരണം കൊണ്ട് പരിഹാരം ആകില്ലെന്ന് ബോധ്യമായിട്ടുണ്ട്. ഇതിന്‍റെ വെളിച്ചത്തിലാണ് 21 ദിവസങ്ങൾ നീണ്ടുനിൽ പ്രവർത്തനാധിഷ്ഠിതമയ ചലഞ്ചുകൾ ഉൾപ്പെടുത്തി വ്യക്തിഗത പ്രവർത്തന പദ്ധതിക്ക് രൂപം നൽകിയത്. പ്രസ്തുത പദ്ധതിയുടെ പരിസമാപ്തിയോടനുബന്ധിച്ച് സ്റ്റേറ്റ് ഇന്‍റഗ്രേഷൻ കാർണിവൽ വിദ്യാർഥികൾക്ക് സംഘടിപ്പിക്കാനും ഹയർസെക്കൻഡറി നാഷണൽ സർവീസ് സ്കീം ലക്ഷ്യമിടുന്നു. നല്ലൊരു നാളെക്കായി നമുക്ക് ഒരുക്കാം 21 സുദിനങ്ങൾ എന്ന ലക്ഷ്യത്തോടെയാണ് പദ്ധതി ആരംഭിച്ചത്. 21 ദിവസത്തെ പരിപാടികളിൽ ലഹരിക്കെതിരേ ഒപ്പുമരം, ഏകദിന ഡിജിറ്റൽ ഉപവാസം, ലഹരി വിരുദ്ധ ചിത്രമതിൽ, ജീവിതോത്സവം കാർണിവൽ എന്നിവ സംഘടിപ്പിക്കും. ജില്ലാതല ഉദ്ഘാടനം ബത്തേരി സെന്‍റ് മേരീസ് കോളജ് ഹയർസെക്കൻഡറി സ്കൂളിൽ നഗരസഭ വൈസ് ചെയർപേഴ്സണ്‍ എൽസി പൗലോസ് നിർവഹിച്ചു. വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ പി.എസ്. ലിഷ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ സാലി പൗലോസ്, ആരോഗ്യകാര്യ സ്റ്റാൻഡിങ് കമ്മിറ്റി ചെയർപേഴ്സണ്‍ ഷാമില ജുനൈസ്, വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സണ്‍ ടോം ജോസ്, പൊതുമരാമത്ത് സ്റ്റാൻഡിംഗ് കമ്മിറ്റി ചെയർപേഴ്സണ്‍ കെ. റഷീദ്, എൻഎസ്എസ് ജില്ലാ കണ്‍വീനർ കെ.എസ്. ശ്യാൽ, ക്ലസ്റ്റർ കണ്‍വീനർമാരായ എ.വി. രജീഷ്, എം.കെ. രാജേന്ദ്രൻ, വി.പി. സുഭാഷ്, സ്കൂൾ പ്രിൻസിപ്പൽ ആർ. ഉഷ, പിടിഎ പ്രസിഡന്‍റ് റോയ് മാത്യു, വ്യാപാരി വ്യവസായി ഏകോപന സമിതി പ്രസിഡന്‍റ് പി.വൈ. മത്തായി, വൈഎംസിഎ പ്രസിഡന്‍റ് സി.ഇ. ഫിലിപ്പ്, എൻഎസ്എസ് പ്രോഗ്രാം ഓഫീസർ സ്വപ്ന ജേക്കബ്, ലീഡർ അനിറ്റ് മറിയം ഏലിയാസ് എന്നിവർ പ്രസംഗിച്ചു.

ജില്ലാ കളക്ടറുടെ അദാലത്തിൽ 32 പരാതികൾക്ക് പരിഹാരമായി

കൽപ്പറ്റ: എടവക പഞ്ചായത്തിൽ സംഘടിപ്പിച്ച ജില്ലാ കളക്ടറുടെ പരാതി പരിഹാര അദാലത്തിൽ 32 പരാതികൾക്ക് പരിഹാരമായി. പഞ്ചായത്ത് സ്വരാജ് ഹാളിൽ നടന്ന അദാലത്തിൽ ജില്ലാ കളക്ടർ ഡി.ആർ. മേഘശ്രീ, എഡിഎം കെ. ദേവകി, സബ് കളക്ടർ അതുൽ സാഗർ എന്നിവരാണ് പരാതികൾ പരിഗണിച്ചത്. ഓണ്‍ലൈനായി രജിസ്റ്റർ ചെയ്ത 18 പരാതികൾക്ക് പുറമേ 62 പരാതികൾ കൂടി നേരിട്ട് അദാലത്ത് വേദിയിൽ ലഭിച്ചു. ആകെ ലഭിച്ച 80 പരാതികളിൽ 32 എണ്ണം അദാലത്തിൽ തന്നെ അപേക്ഷകർക്ക് അനുകൂലമായ തീരുമാനമെടുത്ത് തീർപ്പാക്കി. തുടർ നടപടികൾ ആവശ്യമുള്ള പരാതികൾ ബന്ധപ്പെട്ട വകുപ്പുകളിലെ ഉദ്യോഗസ്ഥരുമായി ചർച്ച ചെയ്തശേഷം തുടർനടപടിക്കായി കൈമാറി. വിവിധ വകുപ്പുകളിലെ ജില്ലാ, താലൂക്ക്തല ഉദ്യോഗസ്ഥരും പഞ്ചായത്ത്, റവന്യു ഉദ്യോഗസ്ഥരും ഗ്രാമപ്പഞ്ചായത്ത് ജനപ്രതിനിധികളും അദാലത്തിൽ എത്തിയിരുന്നു. വിവിധ സർക്കാർ വകുപ്പുകളുമായി ബന്ധപ്പെട്ട് പൊതുജനങ്ങൾ ഉന്നയിക്കുന്ന പരാതികൾക്ക് എത്രയും വേഗം പരിഹാരം കാണുകയാണ് ലക്ഷ്യമെന്നും ജില്ലയിലെ എല്ലാ പഞ്ചായത്തുകളിലും അദാലത്ത് നടത്തുമെന്നും ജില്ലാ കളക്ടർ പറഞ്ഞു. മൂന്ന് പഞ്ചായത്തുകളിലെ അദാലത്തുകളാണ് ഇതിനോടകം പൂർത്തിയായത്. മാനന്തവാടി ബ്ലോക്ക് പഞ്ചായത്ത് പ്രസിഡന്‍റ് ജസ്റ്റിൻ ബേബി, എടവക പഞ്ചായത്ത് പ്രസിഡന്‍റ് ബ്രാൻ അഹമ്മദ് കുട്ടി, പഞ്ചായത്ത് വൈസ് പ്രസിഡന്‍റ് ഗിരിജ സുധാകരൻ, ജില്ലാ പഞ്ചായത്ത് അംഗം കെ. വിജയൻ, പഞ്ചായത്ത് സെക്രട്ടറി മുഹമ്മദ് ഇഖ്ബാൽ, പഞ്ചായത്ത് അംഗങ്ങൾ, മറ്റ് പ്രതിനിധികൾ, വിവിധ വകുപ്പുകളിലെ ഉദ്യോഗസ്ഥർ തുടങ്ങിയവർ അദാലത്തിൽ പങ്കെടുത്തു. അക്ഷയ സേവനങ്ങളും മെഡിക്കൽ ക്യാന്പും അദാലത്തിന് അനുബന്ധമായി സംഘടിപ്പിച്ചിരുന്നു.

പ്രാഥമികതലത്തിൽ വിദ്യാഭ്യാസം മെച്ചപ്പെടുത്താൻ ദീർഘവീക്ഷണത്തോടെയുള്ള പദ്ധതികൾ ആവിഷ്കരിച്ചു: മന്ത്രി

കൽപ്പറ്റ: പ്രാഥമികതലത്തിൽ വിദ്യാർഥികളുടെ വിദ്യാഭ്യാസം മെച്ചപ്പെടുത്തുന്നതിനായി ദീർഘവീക്ഷണത്തോടെയുള്ള പദ്ധതികളാണ് സർക്കാർ ആവിഷ്കരിച്ചതെന്ന് പട്ടികജാതി-വർഗ-പിന്നാക്കക്ഷേമ മന്ത്രി ഒ.ആർ. കേളു. കണിയാന്പറ്റ ഗവ. മോഡൽ റസിഡൻഷൽ ഹയർ സെക്കൻഡറി സ്കൂളിൽ പുതിയ ഹയർ സെക്കൻഡറി ബ്ലോക്ക് കെട്ടിടത്തിന്‍റെ ഉദ്ഘാടനം നിർവഹിച്ചു പ്രസംഗിക്കുകയായിരുന്നു അദ്ദേഹം. എല്ലാ മേഖലകളിലും സമാനതകളില്ലാത്ത വികസന പദ്ധതികളാണ് സംസ്ഥാനത്ത് നടപ്പാക്കുന്നതെന്നും പട്ടികജാതി-വർഗ-വിദ്യാഭ്യാസ മേഖലയിൽ ഏറ്റവും പ്രാധാന്യം നൽകിയുള്ള പ്രവർത്തനങ്ങളാണ് നടത്തുന്നതെന്നും മന്ത്രി പറഞ്ഞു. കലാകായിക മേഖലകളിൽ വിദ്യാർഥികളുടെ പങ്ക് പ്രാധാന്യമർഹിക്കുന്നതാണെന്നും കായിക മേഖലയിൽ കണിയാന്പറ്റ എംആർഎസ് മറ്റ് ജില്ലക്കാർക്ക് മാതൃകയാണെന്നും മന്ത്രി കൂട്ടിച്ചേർത്തു.ടി. സിദ്ദിഖ് എംഎൽഎ അധ്യക്ഷത വഹിച്ചു. 1.12 കോടി രൂപ ചെലവിൽ 4700 ചതുരശ്രഅടി വിസ്തൃതിയിലാണ് സ്കൂൾ കെട്ടിടം നിർമിച്ചത്. ഉന്നത ഗുണനിലവാരത്തിൽ നിർമാണം പൂർത്തീകരിച്ച കെട്ടിടത്തിൽ മൂന്ന് ക്ലാസ് റൂം, പ്രിൻസിപ്പൽ റൂം, സ്റ്റാഫ് റൂം, സ്പോട്സ് റൂം, വിദ്യാർഥികൾക്കും ജീവനക്കാർക്കും ഉള്ള ആറ് ശുചിമുറികൾ, വാഷ് ഏരിയ തുടങ്ങിയ സൗകര്യങ്ങളാണുള്ളത്. 2.08 കോടിയുടെ ഹോസ്റ്റൽ കെട്ടിട നിർമാണത്തിന് ശിലയിട്ടു കണിയാന്പറ്റ മോഡൽ റസിഡൻഷൽ സ്കൂളിൽ പുതിയ ഹോസ്റ്റൽ കെട്ടിടം നിർമിക്കുന്നതിനായി 2.08 കോടി രൂപയുടെ ഭരണാനുമതി ലഭിച്ചിട്ടുണ്ട്. 8000 ചതുരശ്ര അടി വിസ്തീർണത്തിൽ രണ്ടു നിലകളിലായാണ് കെട്ടിടം നിർമിക്കുന്നത്. ആറ് ഡോർമറ്ററി റൂം, കുട്ടികൾക്കായി അഞ്ച് ബാത്ത് റൂം, ഏഴ് ശുചിമുറി, വാഷ് ഏരിയ, വാർഡൻ റൂം, ലോബി, സ്റ്റോർ റൂം, സിക്ക് റൂം, ജീവനക്കാർക്കായി രണ്ട് ശുചിമുറി, വരാന്ത, പാസേജ് എന്നിവയും ബാത്ത് അറ്റാച്ച്ഡ് ഗസ്റ്റ് റൂം, ടിവി റൂം, ലൈബ്രറി എന്നിവയുമാണ് കെട്ടിടത്തിൽ ഉണ്ടാവുക. കെട്ടിട നിർമാണത്തിന്‍റെ ശിലാസ്ഥാപനം മന്ത്രി ഒ.ആർ. കേളു നിർവഹിച്ചു. വിവിധ പോസ്റ്റ്മെട്രിക് കോഴ്സുകൾക്ക് പ്രവേശനം നേടിയ പട്ടികവർഗ വിഭാഗത്തിലെ സാന്പത്തികമായി പിന്നാക്കം നിൽക്കുന്ന വിദ്യാർഥികൾക്ക് യൂണിഫോം, പുസ്തകം എന്നിവ വാങ്ങുന്നതിനും ജില്ലയിൽ സ്ഥിരതാമസക്കാരായ പട്ടികവർഗ വിദ്യാർഥികളിൽ ജില്ലയ്ക്കു പുറത്ത് പോസ്റ്റ്മെട്രിക് കോഴ്സുകളിൽ പ്രവേശനം ലഭിച്ചവർക്ക് പ്രാരംഭചെലവുകൾക്കുള്ള ധനസഹായവും സിഎസ്ആർ ഫണ്ട് ഉപയോഗിച്ച് സ്കൂളിനായി അനുവദിച്ച കായിക ഉപകരണങ്ങളുടെ വിതരണവും മന്ത്രി നിർവഹിച്ചു. ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ, കണിയാന്പറ്റ ഗ്രാമപ്പഞ്ചായത്ത് പ്രസിഡന്‍റ് കെ.വി. രജിത, പട്ടികവർഗ വികസന വകുപ്പ് ഡയറക്ടർ ഡോ. മിഥുൻ പ്രേംരാജ്, കേന്ദ്രം എക്സി. സെക്രട്ടറി ഒ.കെ. സാജിദ്, ഐടിഡിപി പ്രോജക്ട് ഓഫീസർ ജി. പ്രമോദ്, ടിഡിഒമാരായ കെ.കെ. മോഹൻദാസ്, എം. മജീദ്, സ്കൂൾ പ്രധാനാധ്യാപിക ജസീല കൈനാടൻ, പിടിഎ പ്രസിഡന്‍റ് ഇ.എ. ബാലകൃഷ്ണൻ, അധ്യാപകർ, വിദ്യാർഥികൾ, രക്ഷിതാക്കൾ, ഉദ്യോഗസ്ഥർ, രാഷ്ട്രീയ പാർട്ടി പ്രതിനിധികൾ എന്നിവർ പങ്കെടുത്തു.

ഗുരുരത്ന അവാർഡ് പി.എസ്. ഗിരീഷ്കുമാറിന്

കൽപ്പറ്റ: ജനാധിപത്യ കലാസാഹിത്യവേദിയുടെ ഈ വർഷത്തെ ഗുരുരത്ന അവാർഡിന് എടപ്പെട്ടി ഗവ.എൽപി സ്കൂൾ പ്രധാനാധ്യാപകൻ പി.എസ്. ഗിരീഷ്കുമാറിനെ തെരഞ്ഞെടുത്തു. അധ്യാപനരംഗത്തെ മികവും മറ്റുമേഖലകളിലെ പ്രവർത്തനങ്ങളും പരിഗണിച്ചാണ് ഗിരീഷ്കുമാറിനെ പുരസ്കാരത്തിന് തെരഞ്ഞെടുത്തതെന്ന് വേദി സംസ്ഥാന ചെയർമാൻ കുന്നത്തൂർ ജെ. പ്രകാശ്, സെക്രട്ടറി സഹദേവൻ കോട്ടവിള എന്നിവർ അറിയിച്ചു. ഒക്ടോബർ 11ന് തൃശൂർ സാഹിത്യ അക്കാദമിയിലെ ചങ്ങന്പുഴ മന്ദിരത്തിൽ നടത്തുന്ന ചടങ്ങിൽ അവാർഡ് സമ്മാനിക്കും. എടപ്പെട്ടി സ്കൂളിനെ മുൻനിരയിൽ എത്തിക്കുന്നതിനുള്ള പ്രവർത്തനങ്ങളിൽ വിദ്യാർഥികൾക്കും പ്രദേശവാസികൾക്കും പിടിഎയ്ക്കും ഒപ്പം പ്രവർത്തിക്കുന്ന അധ്യാപകനാണ് ഗിരീഷ്കുമാർ.

ഫുട്ബോൾ ടൂർണമെന്‍റ് സംഘടിപ്പിക്കും

പുൽപ്പള്ളി: ജീവകാരുണ്യ പ്രവർത്തനങ്ങൾക്കുള്ള ധനസമാഹരണത്തിനായി വ്യാപാരി വ്യവസായി ഏകോപന സമിതി യൂത്ത് വിംഗ് പുൽപ്പള്ളി യൂണിറ്റ് കമ്മിറ്റി നാളെ ഫൈവ്സ് ഫുട്ബോൾ ടൂർണമെന്‍റ് സംഘടിപ്പിക്കും. വടാനക്കവലയിലെ ടാംഗോ ടർഫിൽ വൈകുന്നേരം അഞ്ചുമുതലാണ് മത്സരങ്ങൾ. കേരളത്തിലെ വിവിധ ജില്ലകളിൽനിന്നുള്ള 16 ടീമുകളാണ് മത്സരത്തിൽ പങ്കെടുക്കുന്നത്. ടൂർണമെന്‍റിൽ ഒന്ന്, രണ്ട് സ്ഥാനം നേടുന്ന ടീമുകൾക്ക് യഥാക്രമം 15,000 രൂപയും ട്രോഫിയും 10,000 രൂപയും ട്രോഫിയും സമ്മാനമായി നൽകും. മൂന്നും നാലും സ്ഥാനക്കാർക്ക് ട്രോഫികളും പങ്കെടുക്കുന്ന മറ്റെല്ലാ ടീമുകൾക്കും ഉപഹാരങ്ങളും സമ്മാനിക്കും. മത്സരത്തിന് മുന്നോടിയായി വൈകുന്നേരം നാലിന് പുൽപ്പള്ളിയിൽ നിന്നും ബൈക്ക് റാലി നടത്തും. ടൂർണമെന്‍റ് ഐ.സി. ബാലകൃഷ്ണൻ എംഎൽഎ ഉദ്ഘാടനം ചെയ്യും. രാത്രി ഏഴിന് മത്സരങ്ങൾ ആരംഭിക്കും. കാണികൾക്ക് പ്രവേശനം സൗജന്യമാണ്. വ്യാപാരി വ്യവസായി ഏകോപന സമിതി യൂണിറ്റ് പ്രസിഡന്‍റ് മാത്യു മത്തായി ആതിര, യൂത്ത് വിംഗ് പ്രസിഡന്‍റ് വി.കെ. ഷിബിൻ, ജനറൽ സെക്രട്ടറി ജോബിഷ് യോഹൻ, ബാബു രാജേഷ്, സലീൽ പൗലോസ്, നിതിൻ പെർഫെക്ട്, കെ.എസ്. അജിമോൻ, ഷാജിമോൻ എന്നിവർ പ്രസംഗിച്ചു.

എംജെഎസ്എസ്എ ഭദ്രാസന കലോത്സവം; ബത്തേരി മേഖലയ്ക്ക് കിരീടം

മീനങ്ങാടി: മലങ്കര യാക്കോബായ സുറിയാനി സണ്‍ഡേ സ്കൂൾ അസോസിയേഷൻ ഭദ്രാസന കലോത്‌സവത്തിൽ ബത്തേരി മേഖല ഓവറോൾ കിരീടം നേടി. പുൽപ്പള്ളി, മീനങ്ങാടി മേഖലകൾ രണ്ടാം സ്ഥാനം പങ്കിട്ടു. നീലഗിരി മേഖലയ്ക്കാണ് മൂന്നാംസ്ഥാനം. സബ് ജൂണിയർ, ജൂണിയർ വിഭാഗങ്ങളിൽ മീനങ്ങാടി മേഖലയും സീനിയർ വിഭാഗത്തിൽ പുൽപ്പള്ളിയും, സൂപ്പർ സീനിയറിൽ ബത്തേരി മേഖലയും ഒന്നാം സ്ഥാനം നേടി. മീനങ്ങാടി ജെക്സ് കാന്പസിൽ മൂന്ന് വേദികളിലായിരുന്നു മത്സരങ്ങൾ. അസോസിയേഷൻ വൈസ് പ്രസിഡന്‍റ് ഫാ. ബേബി പൗലോസ് ഓലിക്കൽ പതാക ഉയർത്തി. കേന്ദ്ര സെക്രട്ടറി ടി.വി. സജീഷ് ഉദ്ഘാടനം ചെയ്തു. സമാപനസമ്മേളനം ഭദ്രാസന മെത്രാപ്പോലീത്ത ഡോ. ഗീവർഗീസ് മോർ സ്തേഫാനോസ് ഉദ്ഘാടനം ചെയ്തു. സമ്മാന വിതരണം അദ്ദേഹം നിർവഹിച്ചു. ഭദ്രാസന സെക്രട്ടറി ഫാ. ബേസിൽ കരനിലത്ത്, വൈദിക സെക്രട്ടറി ഫാ. മത്തായിക്കുഞ്ഞ് ചാത്തനാട്ടുകുടി, ഡയറക്ടർ അനിൽ ജേക്കബ് ,സണ്‍ഡേ സ്കൂൾ ഭദ്രാസന സെക്രട്ടറി ജോണ്‍ ബേബി, കേന്ദ്ര സമിതി അംഗങ്ങളായ ഇ.പി. ബേബി, പി.എം. രാജു എന്നിവർ പ്രസംഗിച്ചു. ഭദ്രാസന കമ്മിറ്റി അംഗങ്ങളായ എൻ.പി. തങ്കച്ചൻ, ടി.ജി. ഷാജു, എബിൻ പി. ഏലിയാസ്, ഷാജി മാത്യു, കെ.കെ. യാക്കോബ്, ടി.ജെ. ബാബു, സിജോ പീറ്റർ, പി.എഫ്. തങ്കച്ചൻ തുടങ്ങിയവർ നേതൃത്വം നൽകി.

തരിയോട് പഞ്ചായത്ത് കേരളോത്സവം തുടങ്ങി

തരിയോട്: സംസ്ഥാന യുവജനക്ഷേമ ബോർഡിന്‍റെ സഹകരണത്തോടെ പഞ്ചായത്ത് സംഘടിപ്പിച്ച കേരളോത്സവം ജിഎച്ച്എസ്എസ് ഗ്രൗണ്ടിൽ ക്രിക്കറ്റ് മത്സരത്തോടെ തുടങ്ങി. പഞ്ചായത്ത് പ്രസിഡന്‍റ് ഷമീം പാറക്കണ്ടി ഉദ്ഘാടനം ചെയ്തു. വൈസ് പ്രസിഡന്‍റ് പുഷ്പ മനോജ് അധ്യക്ഷത വഹിച്ചു. രാധ പുലിക്കോട്, വി.ജി. ഷിബു, സൂന നവീൻ, ബീന റോബിൻസണ്‍, വത്സല നളിനാക്ഷൻ, പഞ്ചായത്ത് സെക്രട്ടറി എം.പി. രാജേന്ദ്രൻ, യുവജനക്ഷേമ ബോർഡ് യൂത്ത് കോഓർഡിനേറ്റർ നീനു എന്നിവർ പ്രസംഗിച്ചു. 30 വരെ വിവിധ സ്ഥലങ്ങളിലും വേദികളിലുമായി കലാകായിക മത്സരങ്ങൾ നടക്കും.

കെപിഎ കണ്ണൂർ റേഞ്ച് പാഠശാല

കാവുമന്ദം: കേരള പോലീസ് അസോസിയേഷൻ കണ്ണൂർ റേഞ്ചിലെ സംസ്ഥാന കമ്മിറ്റി അംഗങ്ങൾക്ക് സംഘടിപ്പിച്ച ദ്വിദിന പാഠശാല കർലാട് സാജ് റിസോർട്ടിൽ വയനാട് ജില്ലാ അഡീഷണൽ എസ്പി എൻ.ആർ. ജയരാജ് ഉദ്ഘാടനം ചെയ്തു. കെപിഎ സംസ്ഥാന പ്രസിഡന്‍റ് ജി.പി. അഭിജിത്ത് അധ്യക്ഷത വഹിച്ചു. കെപിഒഎ ജില്ലാ സെക്രട്ടറി പി.സി. സജീവ്, ജില്ലാ പോലീസ് സഹകരണ സംഘം പ്രസിഡന്‍റ് കെ.എം. ശശിധരൻ, കെപിഎ സംസ്ഥാന ജനറൽ സെക്രട്ടറി സുധീർഖാൻ, സംസ്ഥാന നിർവാഹക സമിതിയംഗം സി.കെ. നൗഫൽ എന്നിവർ പ്രസംഗിച്ചു. 80 പ്രതിനിധികളാണ് പാഠശാലയിൽ പങ്കെടുക്കുന്നത്. ആർ.കെ. ജ്യോതിഷ്, സത്യൻ കാരയാട്, ഇ.വി. പ്രദീപൻ, സി.ആർ. ബിജു എന്നിവർ വിവിധ വിഷയങ്ങളിൽ ക്ലാസ് നയിക്കും.

കൽപ്പറ്റയിൽ ഉജ്വല മീലാദ് റാലിയുമായി ജംഇയ്യത്തുൽ മുഅല്ലിമീൻ

കൽപ്പറ്റ: നബിദിനാഘോഷത്തിന്‍റെ ഭാഗമായി നഗരത്തിൽ ഉജ്വല റാലി നടത്തി ജംഇയ്യത്തുൽ മുഅല്ലിമീൻ ജില്ലാ കമ്മിറ്റി. എസ്കെഎംജെ സ്കൂൾ പരിസരത്ത് ആരംഭിച്ച റാലിയിൽ റേഞ്ച് ഭാരവാഹികൾ, മഹല്ല്, മദ്രസ മാനേജ്മെന്‍റ് കമ്മിറ്റി പ്രതിനിധികൾ, ഖത്തീബുമാർ, മുഅല്ലിംകൾ, സമസ്തയുടെയും പോഷക ഘടകങ്ങളുടെയും ജില്ലാ, താലൂക്ക്, മേഖല, പഞ്ചായത്ത് ഭാരവാഹികൾ ഉൾപ്പെടെ നൂറുകണക്കിനാളുകൾ അണിനിരന്നു. സമസ്തയുടെയും പോഷക ഘടകങ്ങളുടെയും നേതാക്കളായ എസ്. മുഹമ്മദ് ദാരിമി, എം. ഹസൻ മുസ്ലിയാർ, ഇബ്രാഹിം ഫൈസി വാളാട്, ഇബ്രാഹിം ഫൈസി പേരാൽ, കെ.വി.എസ്. ഇന്പിച്ചിക്കോയ തങ്ങൾ, ഹാരിസ് ബാഖവി കന്പളക്കാട്, അഷ്റഫ് ഫൈസി പനമരം, അബ്ദുള്ളക്കുട്ടി ദാരിമി, കെ.എ. നാസർ മൗലവി, നൗഷീർ വാഫി, ജാഫർ ഹൈതമി, കെ.കെ.എം. ഹനീഫൽ ഫൈസി, ഷംസുദ്ദീൻ റഹ്മാനി, കെ. മുഹമ്മദുകുട്ടി ഹസനി, നൗഫൽ വാകേരി, അബ്ദുൾ ലത്തീഫ് വാഫി, അബ്ദുൾ മജീദ് അൻസ്വരി, അബ്ദുറസാഖ് ദാരിമി, വി. അബ്ബാസ് ഫൈസി, കെ.സി. മുനീർ, സി. അബ്ദുൾ ഖാദർ തുടങ്ങിയവർ നേതൃത്വം നൽകി. പുതിയ സ്റ്റാൻഡ് പരിസരത്ത് സമാപന സംഗമത്തിൽ ഷൗഖത്തലി മൗലവി വെള്ളമുണ്ട, മമ്മൂട്ടി നിസാമി തരുവണ എന്നിവർ മദ്ഹു റസൂൽ പ്രഭാഷണം നടത്തി. നോർത്ത് ജുമാ മസ്ജിദിൽ ഗ്രാൻഡ് മൗലിദ് ജൽസയും പലസ്തീൻ ഐക്യദാർഢ്യ പ്രാർഥനാസദസും നടന്നു. പ്രാർഥനയ്ക്ക് സമസ്ത ജില്ലാ പ്രസിഡന്‍റ് കെ.ടി. ഹംസ മുസ്‌ലിയാർ നേതൃത്വം നൽകി. ജില്ലാ ട്രഷറർ പി. സൈനുൽ ആബിദ് ദാരിമി ഐക്യദാർഢ്യ പ്രതിജ്ഞ ചൊല്ലിക്കൊടുത്തു. പിറന്ന മണ്ണിൽ ജീവിക്കാനുള്ള അവകാശത്തിനു പോരാടുന്ന പലസ്തീൻ ജനതയ്ക്ക് ഐക്യദാർഢ്യം പ്രഖ്യാപിച്ചു.

ഏച്ചോം ഗോപിയെ ആദരിച്ചു

പള്ളിക്കുന്ന്: എഴുത്തുകാരനും സാമൂഹിക, സംസ്കാരിക പ്രവർത്തകനുമായ എച്ചോം ഗോപിയെ വെള്ളച്ചിമൂല ഭാവന ആർട്സ് ക്ലബ് ആദരിച്ചു. ക്ലബ് പ്രസിഡന്‍റ് ജോണ്‍ അധ്യക്ഷത വഹിച്ചു. കണിയാന്പറ്റ പഞ്ചായത്ത് അംഗം ജസി ലെസ്‌ലി പൊന്നാട അണിയിച്ചു. എൻ.ജെ. സണ്ണി, മാത്യു വാഴയിൽ, സുനിൽ എന്നിവർ പ്രസംഗിച്ചു.

എൻഎബിഎച്ച് സർട്ടിഫിക്കേഷൻ നേടിയ 14 ആയുഷ് സ്ഥാപനങ്ങളെ അനുമോദിച്ചു

കൽപ്പറ്റ: ആയുഷ് സ്ഥാപനങ്ങൾ വഴി നൽകുന്ന സേവനങ്ങളുടെ ഗുണനിലവാരം ഉറപ്പു വരുത്തുന്നതിനായി ആരോഗ്യരംഗത്ത് ഏർപ്പെടുത്തിയ എൻഎബിഎച്ച് (നാഷണൽ അക്രഡിറ്റേഷൻ ബോർഡ് ഫോർ ഹോസ്പിറ്റൽസ് ആൻഡ് ഹെൽത്ത് കെയർ പ്രൊവൈഡേഴ്സ്) സർട്ടിഫിക്കേഷൻ നേടിയ ജില്ലയിലെ 14 ആയുർവേദ, ഹോമിയോ സ്ഥാപനങ്ങളെ അനുമോദിച്ചു. കളക്ടറേറ്റിലെ എ.പി.ജെ. അബ്ദുൾ കലാം ഹാളിൽ ചേർന്ന അനുമോദന യോഗം പട്ടികജാതി-വർഗ-പിന്നാക്കക്ഷേമ മന്ത്രി ഒ.ആർ. കേളു ഉദ്ഘാടനം ചെയ്തു. ജില്ലയിലെ ആയുർവേദ, ഹോമിയോ ആശുപത്രികൾ നിലവിൽ ശക്തീകരിക്കപ്പെട്ട നിലയിലാണെന്നും ഇപ്പോൾ ജില്ലയിലെ ഹോമിയോ, ആയുർവേദ ആശുപത്രികൾക്ക് മുന്പിൽ രോഗികളുടെ വരി കാണാമെന്നും മന്ത്രി ചൂണ്ടിക്കാട്ടി. ഈ മികവിനുള്ള അംഗീകാരമാണ് എൻഎബിഎച്ച് സർട്ടിഫിക്കറ്റ്. അംഗീകാരം നേടിയ സ്ഥാപനങ്ങളിലെ ജീവനക്കാരെ മന്ത്രി പ്രത്യേകം അഭിനന്ദിച്ചു. മീനങ്ങാടി, പുതുശേരി, തരിയോട്, മൂപ്പൈനാട്, അന്പലവയൽ, വെങ്ങപ്പള്ളി, കല്ലൂർ, കോട്ടത്തറ എന്നിവിടങ്ങളിലുള്ള ഗവ.ആയുർവേദ ഡിസ്പെൻസറികളും വാളേരി, വെള്ളമുണ്ട, സുൽത്താൻ ബത്തേരി, അന്പലവയൽ, മുള്ളൻകൊല്ലി, കോട്ടത്തറ എന്നിവിടങ്ങളിലുള്ള ഗവ.ഹോമിയോ ഡിസ്പെൻസറികളുമാണ് എൻഎബിഎച്ച് സർട്ടിഫിക്കേഷൻ നേടിയത്. പരിപാടിയിൽ ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ അധ്യക്ഷത വഹിച്ചു. ജില്ലാ പഞ്ചായത്ത് വൈസ് പ്രസിഡന്‍റ് എസ്. ബിന്ദു, വികസന സ്റ്റാൻഡിംഗ് കമ്മിറ്റി ചെയർപേഴ്സണ്‍ ഉഷ തന്പി, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ ജുനൈദ് കൈപ്പാണി, ഭാരതീയ ചികിത്സ വകുപ്പ് ജില്ലാ മെഡിക്കൽ ഓഫീസർ ഡോ.എ.പി. ബിനോയ്, ഹോമിയോപ്പതി ജില്ലാ മെഡിക്കൽ ഓഫീസർ ഡോ.പി. സുമേഷ്, ജില്ലാ ക്വാളിറ്റി നോഡൽ ഓഫീസർ (ഐഎസ്എം) ഡോ.സി.എൻ. രേഖ, നെൻമേനി ഗവ. ഹോമിയോപ്പതി ഡിസ്പെൻസറിയിലെ ചീഫ് മെഡിക്കൽ ഓഫീസർ ഡോ.കെ.ജി. രഞ്ജിത്ത്, അന്പലവയൽ ഗവ. ആയുർവേദ ഡിസ്പെൻസറിയിലെ സിഎച്ച്ഒ ഡോ. നിഖില ചന്ദ്രൻ, നാഷണൽ ആയുഷ് മിഷൻ ജില്ലാ പ്രോഗ്രാം മാനേജർ ഡോ. ഹരിത ജയരാജ് എന്നിവർ സംബന്ധിച്ചു.

ബൊക്കാഷി ബക്കറ്റ് വിതരണവും ബോധവത്കരണ ക്ലാസും

സുൽത്താൻ ബത്തേരി: മാലിന്യമുക്ത നവകേരളം കാന്പയിനിന്‍റെ ഭാഗമായി ജൈവമാലിന്യങ്ങൾ ഉറവിടത്തിൽ തന്നെ സംസ്കരിക്കുന്നതിനായി നഗരസഭ വാർഷിക പദ്ധതിയിൽ ഉൾപ്പെടുത്തി 500 കുടുംബങ്ങൾക്ക് ബൊക്കാഷി ബക്കറ്റ് വിതരണം നടത്തി. ഉറവിട മാലിന്യ സംസ്കരണത്തിന് പുതിയ മാതൃക അവതരിപ്പിക്കുന്ന പദ്ധതിയുടെ രണ്ടാംഘട്ട പ്രവർത്തനങ്ങളുടെ ഭാഗമായാണ് വിതരണം നടന്നത്. വിതരണത്തിന്‍റെ ഉദ്ഘാടനം നഗരസഭ ചെയർപേഴ്സണ്‍ ടി.കെ. രമേശ് നിർവഹിച്ചു. മാലിന്യമുക്തവും ആരോഗ്യമുള്ള നഗരമെന്ന ലക്ഷ്യത്തോടെ നഗരസഭ മുന്നോട്ട് വയ്ക്കുന്ന പദ്ധതി കുടുംബങ്ങൾക്കിടയിൽ മികച്ച സ്വീകാര്യത നേടി വരികയാണെന്ന് നഗരസഭ അധികൃതർ അറിയിച്ചു. നഗരസഭ ആരോഗ്യകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ ഷാമില ജുനൈസ് ശുചിത്വ പ്രതിജ്ഞ ചൊല്ലിക്കൊടുത്തു. ഗ്ലോബൽ ഫാർമസ്യൂട്ടിക്കൽ പ്രതിനിധി നന്ദു ബൊക്കാഷി ബക്കറ്റിന്‍റെ ഉപയോഗപരിപാലന രീതികൾ, പ്രായോഗിക നിർദേശങ്ങൾ എന്നിവ വിശദീകരിച്ച് ബോധവത്കരണ ക്ലാസ് കൈകാര്യം ചെയ്തു. നഗരസഭ ഡെപ്യൂട്ടി ചെയർപേഴ്സണ്‍ എൽസി പൗലോസ് അധ്യക്ഷത വഹിച്ചു. നഗരസഭ ക്ലീൻ സിറ്റി മാനേജർ പി.എസ്. സന്തോഷ് കുമാർ, നഗരസഭ സ്റ്റാൻഡിംഗ് കമ്മിറ്റി ചെയർപേഴ്സണ്‍മാരായ പി.എസ്. ലിഷ, ടോം ജോസ്, സാലി പൗലോസ്, കെ. റഷീദ്, നഗരസഭ ഹെൽത്ത് ഇൻസ്പെക്ടർ അനൂപ് കുമാർ എന്നിവർ പ്രസംഗിച്ചു.

ഭൂമിയുടെ രേഖകൾ തിരികെ നൽകാൻ നിർദേശം

സുൽത്താൻ ബത്തേരി: കാർഷിക കടാശ്വാസ കമ്മീഷൻ വായ്പാ തിരിച്ചടവിൽ ഇളവ് അനുവദിച്ചിട്ടും ഭൂമിയുടെ രേഖകൾ ബാങ്കിൽ നിന്ന് തിരികെ നൽകുന്നില്ലെന്ന പരാതിക്ക് ജില്ലാ കളക്ടറുടെ അദാലത്തിൽ പരിഹാരമായി. നായ്ക്കട്ടി സ്വദേശിയായ ജയചന്ദ്രനാണ് കാർഷിക ഗ്രാമവികസന ബാങ്കിൽ നിന്ന് വായ്പയെടുത്തത്. സാന്പത്തിക പ്രതിസന്ധി കാരണം തിരിച്ചടവ് മുടങ്ങി. പിന്നീട് കാർഷിക കടാശ്വാസ കമ്മീഷൻ രണ്ട് ലക്ഷം രൂപയുടെ ഇളവ് അനുവദിച്ചു. അവശേഷിച്ച തുകയായ 2.80 ലക്ഷം രൂപ തിരിച്ചടച്ചെങ്കിലും രണ്ട് വർഷം കഴിഞ്ഞിട്ടും ഭൂമിയുടെ രേഖകൾ ബാങ്ക് തിരികെ നൽകുന്നില്ലെന്നായിരുന്നു പരാതി. അദാലത്തിൽ ജില്ലാ കളക്ടർ ഇക്കാര്യം ആരാഞ്ഞപ്പോൾ രേഖകൾ തിരികെ നൽകേണ്ടത് തന്നെയാണെന്ന് സഹകരണ വകുപ്പ് അസിസ്റ്റന്‍റ് രജിസ്ട്രാർ അറിയിച്ചു. രേഖകൾ ഉടൻ നൽകണമെന്ന് കളക്ടർ നിർദേശം നൽകി. ഓഫീസിൽ നിന്ന് ജയചന്ദ്രന് രേഖകൾ കൈപ്പറ്റാമെന്ന് ബാങ്കും അറിയിച്ചു.

കുടിവെള്ളം നിഷേധിച്ചെന്ന വയോധികയുടെ പരാതിയിൽ കളക്ടറുടെ നടപടി

സുൽത്താൻ ബത്തേരി: നൂൽപുഴ ഗ്രാമപ്പഞ്ചായത്തിലെ 17-ാം വാർഡിൽ താമസിക്കുന്ന ജമീലയ്ക്ക് കുടിവെള്ളം ലഭ്യമാക്കാൻ അടിയന്തിര നടപടി സ്വീകരിക്കാൻ ജില്ലാ കളക്ടറുടെ ഇടപെടൽ. വിധവയും ഭിന്നശേഷിക്കാരിയുമായ ജമീല പ്രായമായ അമ്മയോടൊപ്പമാണ് കഴിയുന്നത്. വീട്ടിൽ ശുദ്ധജലം ലഭിക്കാത്തതിനാൽ വീടിനടുത്തുള്ള പൊതു കിണറിനെയാണ് ആശ്രയിച്ചിരുന്നത്. ഈ കിണറിൽ മോട്ടോർ വയ്ക്കാൻ ഇവർക്ക് ഗ്രാമപ്പഞ്ചായത്ത് അനുമതി നൽകിയെങ്കിലും പ്രദേശവാസിയായ ഒരാൾ അത് അനുവദിക്കുന്നില്ലെന്നും കിണർ തന്‍റേതാണെന്ന് പറഞ്ഞ് വഴി അടയ്ക്കുന്നു എന്നുമായിരുന്നു പരാതി. കിണർ ഗ്രാമപ്പഞ്ചായത്തിന്‍റേത് തന്നെയാണെന്നും പരാതിക്കാരി മോട്ടോർ വയ്ക്കുന്നതിന് അനുമതി നൽകിയെന്നും പഞ്ചായത്ത് അറിയിച്ചു. നേരത്തെ നൽകിയ പരാതികളിൽ നടപടികൾക്ക് എതിർകക്ഷി സന്നദ്ധനായിരുന്നില്ല. അദാലത്തിൽ എത്തിയ പരാതിപ്രകാരം പൊതു കിണറിൽ നിന്നും കുടിവെള്ളം ലഭ്യമാക്കാനും ആവശ്യമെങ്കിൽ പോലീസ് സംരക്ഷണത്തോടെ മോട്ടോർ സ്ഥാപിക്കാനും നൂൽപ്പുഴ ഗ്രാമപ്പഞ്ചായത്ത് സെക്രട്ടറിക്കും സുൽത്താൻ ബത്തേരി പോലീസിനും കളക്ടർ നിർദേശം നൽകി.

ജീവിക്കാനൊരു ആടിനെ വേണമെന്ന് മാധവൻ; അദാലത്തിൽ ഉടനടി പരിഹാരം

സുൽത്താൻ ബത്തേരി: പണപ്പാടി ഉന്നതിയിൽ നിന്ന് ജില്ലാ കളക്ടറുടെ പരാതി പരിഹാര അദാലത്തിലെത്തിയ മാധവന് ഒറ്റ ആവശ്യം മാത്രം. കാൻസർ രോഗിയായ തനിക്ക് ഈ പ്രായത്തിൽ മറ്റ് ജോലികളൊന്നും ചെയ്യാനാകുന്നില്ല. കീമോതെറാപ്പിയുടെ ക്ഷീണം വേറെ. ജീവിക്കാനായി തനിക്ക് ഒരു ആടിനെ വേണം. പരാതി കേട്ട കളക്ടർ കൃഷി, മൃഗസംരക്ഷണ വകുപ്പുകളിലേതുൾപ്പെടെയുള്ള ഉദ്യോഗസ്ഥരെയും കൂട്ടി എന്താണ് വഴിയെന്ന് ആലോചിച്ചു. ആലോചനയ്ക്കൊടുവിൽ രണ്ട് ആടുകളെ നൽകാമെന്ന് നൂൽപ്പുഴ ഗ്രാമപ്പഞ്ചായത്ത് അറിയിക്കുകയായിരുന്നു. അടുത്ത ദിവസം തന്നെ ആടുകളെ കൈമാറുമെന്ന് പഞ്ചായത്ത് വൈസ് പ്രസിഡന്‍റ് എൻ.എ. ഉസ്മാൻ നേരിട്ട് അറിയിക്കുകയും ചെയ്തു. ഒരാടിനെ ചോദിച്ചെത്തി, ഒടുവിൽ രണ്ട് ആടുകളെ ലഭിച്ച സന്തോഷത്തോടെ എല്ലാവർക്കും നന്ദി പറഞ്ഞാണ് മാധവൻ വേദിവിട്ടത്.

ജില്ലാ കളക്ടറുടെ പരാതി പരിഹാര അദാലത്തിൽ 73 പരാതികളിൽ നടപടി

സുൽത്താൻ ബത്തേരി: നൂൽപ്പുഴ ഗ്രാമപ്പഞ്ചായത്തിൽ സംഘടിപ്പിച്ച ജില്ലാ കളക്ടറുടെ പരാതി പരിഹാര അദാലത്തിൽ 73 പരാതികളിൽ നടപടി സ്വീകരിച്ചു. കല്ലൂർ സാംസ്കാരിക കേന്ദ്രത്തിൽ നടന്ന അദാലത്തിൽ നേരത്തെ ഓണ്‍ലൈനായി രജിസ്റ്റർ ചെയ്ത 23 പരാതികൾക്ക് പുറമെ 50 പരാതികൾ കൂടി നേരിട്ട് സ്വീകരിച്ചു. പൊതുജനങ്ങളുടെ പ്രശ്നങ്ങൾക്ക് അടിയന്തരമായി പരിഹാരം കാണുകയെന്ന ലക്ഷ്യത്തോടെ സംഘടിപ്പിച്ച പരിപാടിയിൽ ജില്ലാ കളക്ടർ ഡി.ആർ. മേഘശ്രീ, എഡിഎം കെ. ദേവകി എന്നിവരാണ് പരാതികൾ കേട്ടത്. അദാലത്തിൽ അപ്പപ്പോൾ തീർക്കാൻ സാധിച്ച പരാതികളിൽ കളക്ടറും എഡിഎമ്മും പരിഹാരം നിർദേശിക്കുകയും തുടർനടപടികൾ ആവശ്യമുള്ളവ ബന്ധപ്പെട്ട വകുപ്പുകളിലെ ഉദ്യോഗസ്ഥരുമായി ചർച്ച ചെയ്തശേഷം നടപടിക്കായി കൈമാറുകയും ചെയ്തു. വിവിധ വകുപ്പുകളിലെ ജില്ലാതലതാലൂക്ക്തല ഉദ്യോഗസ്ഥരും ഗ്രാമപ്പഞ്ചായത്ത് ജനപ്രതിനിധികളും അദാലത്തിൽ എത്തിയിരുന്നു. പരാതികൾക്ക് സമയബന്ധിതമായ പരിഹാരം കാണുകയാണ് ലക്ഷ്യമെന്ന് ജില്ലാ കളക്ടർ പറഞ്ഞു. അക്ഷയ, ബാങ്കിംഗ് സേവനങ്ങൾ, നൂൽപ്പുഴ പ്രാഥമികാരോഗ്യ കേന്ദ്രത്തിന്‍റെ നേതൃത്വത്തിലുള്ള ഹെൽത്ത് സ്ക്രീനിംഗ് എന്നിവയും അദാലത്ത് വേദിയിൽ ഒരുക്കിയിരുന്നു. വന്യമൃഗശല്യം, അങ്കണവാടിക്കായി വിട്ടുകൊടുത്ത ഭൂമിയുടെ രേഖകളിലെ അപാകതകൾ, വീടിനുള്ള അപേക്ഷകൾ, റേഷൻ കാർഡ് മുൻഗണനാ വിഭാഗത്തിലേക്ക് മാറുന്നതിനുള്ള അപേക്ഷ, വീടിനും മറ്റ് കെട്ടിടങ്ങളും ഭീഷണിയാവുന്ന മരങ്ങൾ മുറിച്ചുമാറ്റണമെന്ന ആവശ്യങ്ങൾ, റോഡ് അറ്റകുറ്റപ്പണി, സ്വയംസന്നദ്ധ പുനരധിവാസം, ഉന്നതികളിലേക്കുള്ള യാത്രാപ്രശ്നങ്ങൾ, മലിനജലം കൃഷിയിടങ്ങളിലേക്ക് ഒഴുക്കുന്നത് സംബന്ധിച്ചുള്ള പരാതി, വെള്ളം കയറുന്ന ഭൂമിയിൽ നിന്ന് മാറ്റിപ്പാർപ്പിക്കണമെന്ന അപേക്ഷ, ബസ് സർവീസ് വേണമെന്ന ആവശ്യം, ദേശീയപാതയിലെ അപകടകരമായ യാത്ര, കുടിവെള്ളവും വഴിയും മുടക്കുന്നത് സംബന്ധിച്ച പരാതി, ബാങ്കിൽ നിന്ന് രേഖകൾ തിരികെ കിട്ടാത്തത്, പട്ടയം, തൊഴിലുറപ്പ് പദ്ധതിയുമായി ബന്ധപ്പെട്ട പരാതികൾ, ആരോഗ്യ ഇൻഷ്വറൻസ് കാർഡിലെ പിഴവ്, ഉപജീവന മാർഗത്തിനായുള്ള അപേക്ഷ എന്നിങ്ങനെ വിവിധ വിഷയങ്ങളാണ് അദാലത്തിൽ പരിഗണനയ്ക്ക് എത്തിയത്. ദേശീയ പാതയിലൂടെ സഞ്ചരിക്കുന്ന വാഹനങ്ങളുടെ അമിതവേഗത സംബന്ധിച്ച് കല്ലൂർ പ്രദേശവാസികൾ നൽകിയ പരാതിയിൽ നടപടി ഉറപ്പാക്കാൻ മോട്ടോർ വാഹനവകുപ്പിന് കളക്ടർ നിർദേശം നൽകി. ഗ്രാമപ്പഞ്ചായത്തിലെ വിവിധ പ്രദേശങ്ങളിൽ അപകടഭീഷണിയുയർത്തുന്ന മരങ്ങൾ മുറിച്ചുമാറ്റണമെന്നാവശ്യപ്പെട്ടും നാട്ടുകാർ അദാലത്തിൽ പരാതി നൽകി. ഇവയിലും തുടർ നടപടിക്ക് നിർദേശം നൽകിയിട്ടുണ്ട്. നൂൽപ്പുഴ പഞ്ചായത്ത് വൈസ് പ്രസിഡന്‍റ് എൻ.എ. ഉസ്മാൻ, മറ്റ് പഞ്ചായത്ത് അംഗങ്ങൾ എന്നിവർ അദാലത്തിൽ ആദ്യവസാനം പങ്കെടുത്തു. ഇന്ന് എടവക ഗ്രാമപ്പഞ്ചായത്തിലും ജില്ലാ കളക്ടറുടെ പരാതി പരിഹാര അദാലത്ത് നടക്കും. സ്വരാജ് ഹാളിൽ രാവിലെ 10 മുതൽ ഉച്ച വരെയായിരിക്കും അദാലത്ത്.

ഉരുൾപൊട്ടൽ ദുരന്ത പുനരധിവാസം: രണ്ടാംഘട്ട പദ്ധതി രൂപീകരണവും പരിശീലനവും നടത്തി

കൽപ്പറ്റ: കാരിത്താസ് ഇന്ത്യയുടെ സാന്പത്തിക സഹായത്തോടെ കേരള സോഷ്യൽ സർവീസ് ഫോറം, വയനാട് സോഷ്യൽ സർവീസ് സൊസൈറ്റി, ശ്രേയസ് ബത്തേരി, ജീവന കോഴിക്കോട്, സിഒഡി താമരശേരി എന്നീ സാമൂഹ്യ സേവന പ്രസ്ഥാനങ്ങളുടെ നേതൃത്വത്തിൽ പുഞ്ചിരിമട്ടം, വിലങ്ങാട് ഉരുൾപൊട്ടൽ ദുരന്ത പുനരധിവാസം രണ്ടാംഘട്ട പദ്ധതിക്ക് തുടക്കമായി. ദുരന്തങ്ങളെ മുന്നിൽകണ്ട് അവയെ ഫലപ്രദമായി നേരിടാനുമുള്ള ശേഷി വർധിപ്പിക്കുക, ഉപജീവനസുരക്ഷ, മാനസികസാമൂഹിക ക്ഷേമം, സാമൂഹ്യാധിഷ്ഠിത ദുരന്ത അപകടസാധ്യതാ ലഘൂകരണം എന്നീ ലക്ഷ്യങ്ങളിൽ ഊന്നി രണ്ടുവർഷം നീണ്ടു നിൽക്കുന്ന ബൃഹത് പദ്ധതിയാണ് വിഭാവനം ചെയ്തിരിക്കുന്നത്. ഈ പദ്ധതി വയനാട് ജില്ലയിലെ മേപ്പാടി ഉൾപ്പെടെ ഏഴ് ഗ്രാമപ്പഞ്ചായത്തുകളിലും കോഴിക്കോട് ജില്ലയിലെ രണ്ട് ഗ്രാമപ്പഞ്ചായത്തുകളിലുമായി നടപ്പാക്കും. ഈ പദ്ധതിയുടെ പദ്ധതിരേഖ പരിചയപ്പെടുത്തുന്നതിന് രണ്ട് ദിവസത്തെ പരിശീലനം ബത്തേരി ശ്രേയസിൽ നടന്നു. കാരിത്താസ് ഇന്ത്യ അസിസ്റ്റന്‍റ് എക്സിക്യുട്ടീവ് ഡയറക്ടർ ഫാ. ബെന്നി എടയത്ത് ഉദ്ഘാടനം ചെയ്തു. കേരള സോഷ്യൽ സർവീസ് ഫോറം എക്സിക്യുട്ടീവ് ഡയറക്ടർ ഫാ. ജേക്കബ് മാവുങ്കൽ അധ്യക്ഷത വഹിച്ചു. ശ്രേയസ് ഡയറക്ടർ ഫാ. ഡേവിഡ് ആലുങ്കൽ, സ്റ്റേറ്റ് ഓഫീസർ അബീഷ് ആന്‍റണി, ഡബ്ല്യുഎസ്എസ്എസ് പ്രോഗ്രാം ഓഫീസർ പി.എ. ജോസ് എന്നിവർ പ്രസംഗിച്ചു. പരിശീലനത്തിന് കാരിത്താസ് ഇന്ത്യ ക്ലൈമറ്റ് ഡെസ്ക് ലീഡ് ഡോ.വി.ആർ. ഹരിദാസ്, ഡോ. ദിലീഷ് വർഗീസ്, ഫിനാൻസ് ഓഫീസർ ജാൻസി മാത്യു, സ്റ്റേറ്റ് പ്രോഗ്രാം ഓഫീസർ അബീഷ് ആന്‍റണി എന്നിവർ നേതൃത്വം നൽകി. 2024 ജൂലൈ 30ന് സംഭവിച്ച ഉരുൾപൊട്ടൽ ദുരന്തത്തെ തുടർന്ന് കേരളാ കത്തോലിക്കാ മെത്രാൻ സമിതിയുടെ (കെസിബിസി) ആഭിമുഖ്യത്തിൽ പുനരധിവാസ ഭവനനിർമാണ പ്രവർത്തനങ്ങൾ ഉൾപ്പെട്ട ഒന്നാംഘട്ട പ്രവർത്തനങ്ങൾ അന്ത്യഘട്ടത്തിൽ നടന്നുവരികയാണ്.

റവന്യു ഭൂമിയിലെ അനധികൃത ഈട്ടിമുറി: ഡിഎഫ്ഒയുടെ ഹർജിയിൽ തീർപ്പ് വൈകുന്നു

കൽപ്പറ്റ: മുട്ടിൽ സൗത്ത് വില്ലേജിലെ റവന്യു പട്ടയഭൂമികളിൽനിന്നു നിയമവിരുദ്ധമായി മുറിച്ചതെന്നു കണ്ടെത്തി പിടിച്ചെടുത്ത് കുപ്പാടി വനം ഡിപ്പോയിൽ സൂക്ഷിച്ചിരിക്കുന്ന ഈട്ടിത്തടികൾ ലേലം ചെയ്യുന്നതിനു അനുവാദം തേടി സൗത്ത് വയനാട് ഡിഎഫ്ഒ സമർപ്പിച്ച ഹർജിയിൽ തീർപ്പ് വൈകുന്നു. ഏറ്റവും ഒടുവിൽ കഴിഞ്ഞ 20ന് അഡീഷണൽ ജില്ലാ കോടതി ഹർജി പരിഗണിച്ചെങ്കിലും ഒക്ടോബർ 18ലേക്ക് മാറ്റി. മുട്ടിൽ സൗത്ത് വില്ലേജിൽ അനധികൃതമായി മുറിച്ചതിൽ 231 ക്യുബിക് മീറ്റർ ഈട്ടി 2021 ജൂണിലാണ് വനംവകുപ്പ് കസ്റ്റഡിയിലെടുത്ത് ഡിപ്പോയിലേക്ക് മാറ്റിയത്. തടികൾ വെയിലും മഴയുമേറ്റ് നശിക്കുന്ന സാഹചര്യത്തിലാണ് ലേലം ചെയ്യുന്നതിന് അനുമതിക്ക് 2023 അവസാനത്തോടെ ഡിഎഫ്ഒ ഹർജി സമർപ്പിച്ചത്. ഇതിനകം നിരവധി തവണ കേസ് വിളിച്ചെങ്കിലും മാറ്റുകയായിരുന്നു. തടികളുടെ സംരക്ഷണച്ചുമതല ലഭിക്കുന്നതിന് മരംമുറിക്കേസിലെ പ്രതികളിൽ ചിലർ സമർപ്പിച്ച ഹർജിയും തീർപ്പായിട്ടില്ല. തടികൾ ലേലം ചെയ്ത് തുക ഖജനാവിൽ സൂക്ഷിച്ചാൽ അവ നശിക്കുന്നതുമൂലമുള്ള നഷ്ടത്തിന്‍റെ തോത് കുറയ്ക്കാൻ കഴിയും. ഇക്കാര്യം ഗൗരവത്തോടെ കാണാനും ഹർജിയിൽ അനുകൂല വിധി സന്പാദിക്കാനും വനം വകുപ്പ് ശുഷ്കാന്തി കാട്ടുന്നില്ലെന്ന ആക്ഷേപം വിവിധ കോണുകളിൽ ഉയരുന്നുണ്ട്. വനം വകുപ്പ് കസ്റ്റഡിയിൽ സൂക്ഷിക്കുന്ന തടികൾ മരക്കച്ചവടക്കാരായ തങ്ങൾ ഭൂവുടമകളിൽനിന്നു വിലയ്ക്കുവാങ്ങിയതാണെന്ന വാദം മുട്ടിൽ മരംമുറിക്കേസിലെ പ്രതികൾ കോടതിയിൽ ഉന്നയിച്ചപ്പോൾ ഡിഎഫ്ഒ എതിർത്തിരുന്നില്ല. മുറിച്ച മരങ്ങളുടെ പ്രായം നിർണയിച്ച സർട്ടിഫിക്കറ്റ് ഹാജരാക്കാൻ അനുവദിക്കണമെന്ന ഡിഎഫ്ഒയുടെ ഹർജി കഴിഞ്ഞ ജൂണിൽ കോടതി തള്ളിയിരുന്നു. കോടിക്കണക്കിനു രൂപ വിലമതിക്കുന്ന തടികളുടെ സംരക്ഷണത്തിന് 2023 ജനുവരി ആറിന് ജില്ലാ കോടതി നൽകിയ നിർദേശങ്ങൾ വനംവകുപ്പ് പാലിച്ചിട്ടില്ല. തടികൾ മേൽക്കൂരയുള്ള ഷെഡിൽ നിലത്തുനിന്നു മതിയായ ഉയരത്തിൽ വെയിലോ മഴയോ ഈർപ്പമോ തട്ടാതെ കേസ് തീർപ്പാകുന്നതുവരെ സൂക്ഷിക്കണമെന്നായിരുന്നു കോടതി നിർദേശം. ഉത്തരവ് തീയതി മുതൽ ഒരു മാസത്തിനകം തടികളുടെ സംരക്ഷണം ഉറപ്പുവരുത്തണമെന്നും കോടതി നിർദേശിച്ചിരുന്നു. തടികളുടെ സംരക്ഷണത്തിനു തക്കതായ നടപടികൾ സ്വീകരിക്കാതെയാണ് ലേലത്തിനു അനുമതി തേടി സൗത്ത് വയനാട് ഡിഎഫ്ഒ കോടതിയെ സമീപിച്ചത്. നിലവിലെ ചീഫ് സെക്രട്ടറി ഡോ.എ. ജയതിലക് റവന്യു സെക്രട്ടറിയായിരിക്കേ 2020 ഒക്ടോബർ 24ന് ഇറക്കിയ ഉത്തരവിന്‍റെ മറവിലാണ് വയനാട്ടിലടക്കം കേരളത്തിന്‍റെ വിവിധ ഭാഗങ്ങളിൽ റവന്യു പട്ടയഭൂമികളിൽ അനധികൃത ഈട്ടി, തേക്ക് മുറി നടന്നത്. നിയമവിരുദ്ധമായി മരങ്ങൾ മുറിച്ചതിനെതിരായ കെഎൽസി നടപടികളും മന്ദഗതിയിലാണ്.

പദ്ധതികൾ വിഭാവനം ചെയ്യുന്പോൾ അവരുടെ കണ്ണിൽ കൂടി കാണണം: പ്രിയങ്ക ഗാന്ധി എംപി

കൽപ്പറ്റ: ഉരുൾപൊട്ടൽ ദുരന്തത്തിന് ശേഷം മഴക്കാലത്ത് സ്വീകരിച്ച മുൻകരുതൽ നടപടികളിലും തയാറെടുപ്പുകളിലും വയനാട് ജില്ല മറ്റ് സംസ്ഥാനങ്ങൾക്ക് മാതൃകയെന്ന് പ്രിയങ്ക ഗാന്ധി എംപി. കളക്ടറേറ്റ് മിനി കോണ്‍ഫറൻസ് ഹാളിൽ നടന്ന ഡിസ്ട്രിക്ട് ഡെവലപ്മെന്‍റ് കോഓർഡിനേഷൻ ആൻഡ് മോണിട്ടറിംഗ് കമ്മിറ്റിയിൽ (ദിശ) സംസാരിക്കുകയായിരുന്നു എംപി. കാലാവസ്ഥ മൂലം സമാനമായ സാഹചര്യങ്ങൾ നേരിടുന്ന ഹിമാചൽ പ്രദേശ്, ഉത്തരാഖണ്ഡ് പോലുള്ള സംസ്ഥാനങ്ങൾക്ക് വയനാട്ടിൽ നിന്ന് പഠിക്കാനുണ്ടെന്ന് എംപി ചൂണ്ടിക്കാട്ടി. ഇത്തവണ മഴക്കാല അപകടം മൂലം ഒരു ജീവൻ പോലും പൊലിയാതെ കാത്തതിന് ജനപ്രതിനിധികളെയും ജില്ലാ കളക്ടർ ഉൾപ്പെടെയുള്ള ഉദ്യോഗസ്ഥരെയും എംപി അഭിനന്ദിച്ചു. ജില്ലയിലെ വിവിധ പദ്ധതികളുടെ പുരോഗതിയും അനുബന്ധമായി നടപ്പാക്കാവുന്ന പദ്ധതികളുടെ സാധ്യതയും യോഗം വിലയിരുത്തി. പട്ടികവർഗ വിഭാഗങ്ങൾക്കായുള്ള പദ്ധതികൾ ഗുണഭോക്താക്കളുടെ ആവശ്യവും ജീവിത രീതികളും തിരിച്ചറിഞ്ഞ് അതിന് അനുസൃതമായി രൂപകൽപന ചെയ്യണമെന്ന് എംപി നിർദേശം നൽകി. കാലാവസ്ഥ വ്യതിയാനത്തിന്‍റെ കാലത്ത് പട്ടികവർഗ വിഭാഗത്തിന്‍റെ പ്രകൃതിക്ക് അനുസൃതമായുള്ള ജീവിതരീതി നമ്മുടെ ഭാവിയിലേക്കുള്ള ചൂണ്ടുപലകയാണെന്ന് പ്രിയങ്ക ഗാന്ധി ചൂണ്ടിക്കാട്ടി. വിവിധ പദ്ധതികളിൽ കേന്ദ്ര ഫണ്ട് ലഭ്യമാവാത്തതുമൂലമുള്ള പ്രതിസന്ധി ഉദ്യോഗസ്ഥർ യോഗത്തിൽ ചൂണ്ടിക്കാട്ടി. ഇക്കാര്യം കേന്ദ്ര സർക്കാരിന് മുന്നിൽ ഉന്നയിക്കുമെന്ന് അവർ പറഞ്ഞു. ജനങ്ങളിൽ നിന്ന് വിവിധ മേഖലകളിൽ ലഭിച്ച പരാതികൾ ഉദ്യോഗസ്ഥർക്ക് മുന്നിൽ എംപി ഉന്നയിച്ചു. മാനന്തവാടി ഗവ. മെഡിക്കൽ കോളജ് ഉൾപ്പെടെ ജില്ലയിലെ ആരോഗ്യ മേഖലയിലെ വിവിധ പദ്ധതികൾ, വന്യമൃഗ ആക്രമണം, പട്ടികവർഗ വിഭാഗത്തിന്‍റെ ആരോഗ്യ പ്രശ്നം തുടങ്ങിയ വിഷയങ്ങൾ കേന്ദ്ര ആരോഗ്യമന്ത്രി ജെ.പി. നദ്ദയുമായും ചുരത്തിലെ മണ്ണിടിച്ചിൽ ഉൾപ്പെടെ മറ്റ് പ്രശ്നങ്ങൾ കേന്ദ്ര ഉപരിതല ഗതാഗത മന്ത്രി നിതിൻ ഗഡ്കരിയുമായും ചർച്ച ചെയ്തെന്ന് എംപി അറിയിച്ചു. പ്രദേശവാസികളുടെ അഭിപ്രായം പരിഗണിച്ച് ചൂരൽമലയിലെ ബെയിലി പാലത്തിലെ നിയന്ത്രണങ്ങൾ ഭാഗികമായി നീക്കിയ ജില്ലാ ഭരണകൂടത്തിന്‍റെ നടപടിയിൽ അവർ സന്തുഷ്ടി രേഖപ്പെടുത്തി. പദ്ധതികളുടെ പുരോഗതിയും ഇനി പൂർത്തിയാക്കാനുള്ള പദ്ധതികളുടെ വിശദാംശങ്ങളും ഉദ്യോഗസ്ഥർ യോഗത്തിൽ വിശദീകരിച്ചു. കൽപ്പറ്റ ജനറൽ ആശുപത്രിക്ക് ക്രിട്ടിക്കൽ കെയർ കെട്ടിടം പണിയാൻ എൽസ്റ്റണ്‍ എസ്റ്റേറ്റിൽ ഭൂമി കണ്ടെത്തി മാസ്റ്റർ പ്ലാൻ തയാറാക്കിയിട്ടുണ്ട്. ഇനി മന്ത്രിസഭയുടെ അനുമതി തേടണം. വെള്ളമുണ്ട-മോതക്കര റോഡ് പ്രവൃത്തി അടുത്ത മാസം പൂർത്തിയാകും. രാജ്യത്തെ ആസ്പിരേഷണൽ ജില്ലകളിൽ വയനാടിന്‍റെ റാങ്ക് 112 ൽ നിന്ന് 10 ആയി ഉയർന്നത് എംപി പ്രശംസിച്ചു. എല്ലാം വീടുകളിലും കുടിവെള്ള കണക്ഷൻ ലഭ്യമാക്കിയ കൽപ്പറ്റ നഗരസഭയെയും അഭിനന്ദിച്ചു. 2025-2026 വർഷം എംപി ലാഡ്സ് പദ്ധതിയിൽ ജില്ലയിൽ 17 പ്രൊപ്പോസൽ നൽകിയതിൽ 23 ലക്ഷം രൂപയുടെ ഒരു പദ്ധതിക്കാണ് അനുമതി ലഭിച്ചത്. ദേശീയ ആരോഗ്യ ദൗത്യം, ദേശീയപാത അഥോറിറ്റി, പുഞ്ചിരിമട്ടം ഉരുൾപൊട്ടൽ പുനരധിവാസം തുടങ്ങിയവയുമായി ബന്ധപ്പെട്ട് പ്രത്യേക ചർച്ചയും എംപിയുടെ അധ്യക്ഷതയിൽ നടന്നു. എംഎൽഎമാരായ ടി. സിദ്ദിഖ്, ഐ.സി. ബാലകൃഷ്ണൻ, ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ, കൽപ്പറ്റ നഗരസഭ അധ്യക്ഷൻ ടി.ജെ. ഐസക്, കൽപ്പറ്റ ബ്ലോക്ക് പഞ്ചായത്ത് പ്രസിഡന്‍റ് ചന്ദ്രിക കൃഷ്ണൻ, മുട്ടിൽ ഗ്രാമപ്പഞ്ചായത്ത് പ്രസിഡന്‍റ് ശ്രീദേവി ബാബു, ജില്ലാ കളക്ടർ ഡി.ആർ. മേഘശ്രീ, എഡിഎം കെ. ദേവകി, ദിശ കണ്‍വീനർ കൂടിയായ തദ്ദേശസ്വയംഭരണ വകുപ്പ് അസിസ്റ്റന്‍റ് ഡയറക്ടർ ജോമോൻ ജോർജ്, വിവിധ വകുപ്പ് മേധാവികൾ, ഉദ്യോഗസ്ഥർ തുടങ്ങിയവർ യോഗത്തിൽ പങ്കെടുത്തു.

സാന്ത്വനം പെയിൻ ആൻഡ് പാലിയേറ്റീവ് കെയർ സൊസൈറ്റി ഉദ്ഘാടനം ചെയ്തു

പുൽപ്പള്ളി: മുള്ളൻകൊല്ലി പഞ്ചായത്തിൽ ആരംഭിച്ച സാന്ത്വനം പെയിൻ ആൻഡ് പാലിയേറ്റിവ് കെയർ സൊസൈറ്റിയുടെ ഉദ്ഘാടനം പാടിച്ചിറയിൽ ഐ.സി. ബാലകൃഷ്ണൻ എംഎൽഎ നിർവഹിച്ചു. സാന്ത്വനം പെയിൻ ആൻഡ് പാലിയേറ്റീവ് കെയർ സൊസൈറ്റി പ്രസിഡന്‍റ് ജോയി നരിപ്പാറ അധ്യക്ഷത വഹിച്ചു. വിവിധ സംഘടനകളും വ്യക്തികളും സംഭാവന ചെയ്ത ഉപകരണങ്ങൾ പാലിയേറ്റീവ് രക്ഷാധികാരിയും പാടിച്ചിറ ഇടവക വികാരി ഫാ. സജി ഇടയിളത്തു ഏറ്റുവാങ്ങി. വോളണ്ടിയർ ഹോം കെയർ യൂണിറ്റിന്‍റെ ഉദ്ഘാടനം മുള്ളൻകൊല്ലി പഞ്ചായത്തു പ്രസിഡന്‍റ് പി.കെ. വിജയൻ നിർവഹിച്ചു. ഷിജു അയ്യാനിക്കാട്ട് പാലിയേറ്റീവിന് സംഭാവന നൽകിയ വാഹനത്തിന്‍റെ താക്കോൽ പാലിയേറ്റീവ് പ്രസിഡന്‍റ് ഏറ്റുവാങ്ങി. പഞ്ചായത്ത് വൈസ് പ്രസിഡന്‍റ് മോളി സജി, പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർമാൻ ഷിനു കച്ചിറയിൽ, ഫാ. ബിബിൻ കുന്നേൽ, പഞ്ചായത്ത് അംഗങ്ങളായ ലില്ലി തങ്കച്ചൻ, കെ. ചന്ദ്രബാബു, സുധ നടരാജൻ, ജെസി സെബാസ്റ്റ്യൻ, പാലിയേറ്റീവ് സെക്രട്ടറി സതീശൻ കിഴക്കുംകര, മെഡിക്കൽ ഓഫീസർമാരായ ഡോ. ലത, ഡോ. സൗമ്യ നരിപ്പാറ, പാടിച്ചിറ വ്യാപാരി വ്യവസായി പ്രസിഡന്‍റ് വിജയൻ മാടോലിൽ, വിവിധ രാഷ്ട്രീയ കക്ഷി പ്രതിനിധികളായ വർഗീസ് മുരിയൻ കാവിൽ, കെ.വി. ജോബി, ഗോപാലകൃഷ്ണൻ നായർ ഐക്കരശേരി, റെജി ഓലിക്കാരോട്ട് ഉദ്ഘാടന കമ്മിറ്റി കണ്‍വീനർ ജോയി താന്നിക്കൽ, ബെന്നി കുറുന്പാലക്കോട്ട് എന്നിവർ പ്രസംഗിച്ചു.

സാമൂഹിക വിരുദ്ധരുടെ താവളമായി പുൽപ്പള്ളിയിലെ പഴയ സാമൂഹികരോഗ്യ കേന്ദ്രത്തിന്‍റെ കെട്ടിടം

പുൽപ്പള്ളി: ടൗണിലെ പഴയ സാമൂഹിക ആരോഗ്യ കേന്ദ്രത്തിന്‍റെ കെട്ടിടം സാമൂഹ്യവിരുദ്ധരുടെ താവളമായി മാറുന്നു. ഒരു വർഷം മുന്പാണ് ടൗണിന്‍റെ ഹൃദയഭാഗത്ത് സ്ഥിതി ചെയ്തിരുന്ന പഴയ കെട്ടിടത്തിൽ നിന്നും താഴെയങ്ങാടി 117ലെ പുതിയ കെട്ടിടത്തിലേക്ക് സാമൂഹിക ആരോഗ്യ കേന്ദ്രത്തിന്‍റെ പ്രവർത്തനം മാറ്റിയത്. നിലവിൽ ഇവിടെ ദന്തൽ ക്ലിനിക്ക് മാത്രമേ പ്രവർത്തിക്കുന്നുള്ളൂ. നിലവിൽ ആശുപത്രിയുടെ വളപ്പ് മുഴുവൻ കാടുകയറി. ഉപയോഗിക്കാതെ കിടക്കുന്നതിനാൽ കെട്ടിടങ്ങളും നാശത്തിന്‍റെ വക്കിലാണ്. കെട്ടിടത്തിന്‍റെ പലഭാഗത്തും ചിതലരിച്ചുതുടങ്ങി. പുതിയ കെട്ടിടത്തിലേക്ക് ആശുപത്രിയുടെ പ്രവർത്തനം മാറ്റുന്പോൾ പഴയ കെട്ടിടമിരുന്ന സ്ഥലത്ത് പുതിയ എന്തെങ്കിലും സംവിധാനം ആരംഭിക്കുമെന്നായിരുന്നു അധികൃതർ പറഞ്ഞിരുന്നത്. കാടുമൂടിക്കിടക്കുന്ന ഈ സ്ഥലത്ത് രാത്രി വെളിച്ച സംവിധാനമില്ലാത്തതിനാൽ സാമൂഹിക വിരുദ്ധരുടെ കേന്ദ്രമായി മാറിയിരിക്കുകയാണ്. ഈ ഭാഗത്ത് തെരുവുനായകളുടെ വലിയ കൂട്ടവും തന്പടിച്ചിട്ടുണ്ട്. ആശുപത്രി പരിസരം വൃത്തിയാക്കി കെട്ടിടങ്ങൾ മാറ്റാവശ്യങ്ങൾക്കായി വിനിയോഗിക്കണമെന്നാണ് നാട്ടുകാരുടെ ആവശ്യം.

രക്തദാന ക്യാന്പ് നടത്തി

ചീരാൽ: ഗവ. മോഡൽ ഹയർ സെക്കൻഡറി സ്കൂൾ എൻഎസ്എസ് യൂണിറ്റ് ബത്തേരി താലൂക്ക് ആശുപത്രി ബ്ലഡ് ബാങ്കിന്‍റെ സഹകരണത്തോടെ രക്തദാന ക്യാന്പ് സംഘടിപ്പിച്ചു. 50 ഓളം പേർ രക്തദാനം നടത്തി. ജില്ലാ പഞ്ചായത്ത് ഡിവിഷൻ അംഗം അമൽ ജോയ് ഉദ്ഘാടനം ചെയ്തു. പിടിഎ പ്രസിഡന്‍റ് എം.എ. സുരേഷ് അധ്യക്ഷത വഹിച്ചു. പ്രിൻസിപ്പൽ കെ.കെ. സുധാകരൻ, ഡോ.ശ്രീന, ബ്ലഡ് ബാങ്ക് സൂപ്പർവൈസർ ഫവാദ്, എൻഎസ്എസ് പ്രോഗ്രാം ഓഫീസർ കെ.ജി. ഷീജ, വോളന്‍റിയർ ലീഡർമാരായ അശ്വിൻ, വി.എം. തീർഥ എന്നിവർ നേതൃത്വം നൽകി.

ഓവാലിയിലെ കൊലയാളി കൊന്പനെ തളയ്ക്കാൻ ആനകൊട്ടിൽ തയാറാക്കി

ഗൂഡല്ലൂർ: ഓവാലി പഞ്ചായത്തിൽ പരിഭ്രാന്തി പരത്തുന്ന കൊലയാളി കൊന്പൻ രാധാകൃഷ്ണനെ തളയ്ക്കാൻ മുതുമല വന്യജീവി സങ്കേതത്തിലെ അഭയാറണിയിൽ ആനകൊട്ടിൽ ഒരുങ്ങി. തേക്ക്, യൂക്കാലിപ്റ്റസ് മരങ്ങൾ ഉപയോഗിച്ചാണ് അഭയാറണിയിലെ ആനപ്പന്തിയിൽ കൊട്ടിലിന്‍റെ നിർമാണം പൂർത്തിയാക്കിയത്. നാല് ദിവസത്തെ പരിശ്രമത്തിനൊടുവിലാണ് ആനക്കൊട്ടിൽ തയാറാക്കിയത്. പത്ത് വർഷത്തിലേറെയായി ഓവാലിയിൽ ഭീതിപരത്തുകയാണ് ആന. ഇതിനിടെ പതിമൂന്ന് മനുഷ്യ ജീവനുകളാണ് ആന അപഹരിച്ചത്. ആനയെ പിടികൂടണമെന്ന് ദീർഘകാലമായി നാട്ടുകാർ വനംവകുപ്പിനോട് ആവശ്യപ്പെട്ടുവരികയായിരുന്നു. അടുത്തിടെ രണ്ട് മനുഷ്യ ജീവനുകൾകൂടി അപഹരിച്ചതോടെ ഈ ആനയെ പിടിക്കണമെന്ന ആവശ്യം ശക്തമായി. ഇതേത്തുടർന്ന് ആനയെ പിടികൂടാൻ തീരുമാനിക്കുകയായിരുന്നു. ആനയെ പിടിക്കാനുള്ള ഉത്തരവ് ലഭിച്ചിട്ട് ഒരു ആഴ്ച പിന്നിട്ടെങ്കിലും നടപടിയുണ്ടായില്ല. നീക്കം മന്ദഗതിയിലാണെന്ന ആരോപണവും ഉയർന്നിരുന്നു. ഇന്നലെ മുതൽ ആനയെ പിടികൂടാനുള്ള നടപടികൾ പുരോഗമിക്കുകയാണ്. മയക്കുവെടിവച്ച് പിടിക്കാൻ ഡോ. രാജേഷ്കുമാറിന്‍റെ നേതൃത്വത്തിലുള്ള മെഡിക്കൽ സംഘവും തയാറാണ്. ശ്രീനിവാസൻ, ബൊമ്മൻ, വസീം, വിജയ് എന്നി നാല് കുംകിയാനകളുടെയും 100 വനപാലകരുടെയും സഹായത്തോടെ ആനയെ കണ്ടെത്താൻ തെരച്ചിൽ നടത്തുന്നുണ്ട്. ഡ്രോണ്‍ കാമറ വഴിയും ഏറുമാടങ്ങൾ വഴിയും ആനയെ നിരീക്ഷിക്കുന്നുണ്ട്. എന്നാൽ കൊലയാളി ആന എല്ലമല മേഖലയിൽ ഏലത്തോട്ടത്തിൽ തന്പടിച്ചിട്ടുണ്ടെന്ന് നാട്ടുകാർ പറഞ്ഞു. മയക്കുവെടി വച്ച് ആനയെ പിടികൂടി മുതുമലയിൽ എത്തിച്ച് അഭയാറണിയിൽ പ്രത്യേകം സജ്ജീകരിച്ച സ്ഥലത്ത് എത്തിച്ച് പരിശീലനം നൽകിയ ശേഷം ആനയെ കുംകിയാക്കി മാറ്റാനാണ് പദ്ധതിയിട്ടിരിക്കുന്നത്.

ചെട്ട്യാലത്തൂർ നിവാസികളുടെ പുനരധിവാസം; പട്ടിക തയാറാക്കി ഓരോന്നായി നടപ്പാക്കണമെന്ന് പ്രിയങ്ക ഗാന്ധി എംപി

സുൽത്താൻ ബത്തേരി: നൂൽപ്പുഴ ഗ്രാമപ്പഞ്ചായത്തിലെ ചെട്ട്യാലത്തൂർ നിവാസികളുടെ പുനരധിവാസ നടപടികളിൽ ശാശ്വത തീരുമാനമാകുന്നതുവരെ കാത്തുനിൽക്കാതെ നിവാസികളുടെ അടിസ്ഥാന ആവശ്യങ്ങൾ നിവർത്തിക്കാൻ നടപടി സ്വീകരിക്കണമെന്ന് പ്രിയങ്ക ഗാന്ധി എംപി. കളക്ടറേറ്റ് കോണ്‍ഫറൻസ് ഹാളിൽ ചെട്ട്യാലത്തൂർ നിവാസികൾ, ജനപ്രതിനിധികൾ, ഉദ്യോഗസ്ഥർ എന്നിവർ പങ്കെടുത്ത യോഗത്തിൽ സംസാരിക്കുകയായിരുന്നു എംപി. പുനരധിവാസ വിഷയം സങ്കീർണവും ശാശ്വത പരിഹാരം കാണാൻ സമയം എടുക്കുന്നതുമാണ്. എന്നാൽ അതുവരെ കാത്തുനിൽക്കാതെ ആളുകളുടെ അടിയന്തരമായ ആവശ്യങ്ങളുടെ പട്ടിക തയാറാക്കി ഓരോന്നായി നടപ്പാക്കണമെന്ന് എംപി നിർദേശിച്ചു. ചെട്ട്യാലത്തൂരിൽ റോഡ്, വെള്ളം, വൈദ്യുതി എന്നീ അടിസ്ഥാന ആവശ്യങ്ങൾ ഇല്ലെന്ന പരാതി പരിശോധിച്ച് നടപടി സ്വീകരിക്കണം. പുനരധിവാസത്തിന്‍റെ പേരിൽ 15 വർഷങ്ങളായി ചെട്ട്യാലത്തൂരിൽ ഒരു പ്രവൃത്തിയും നടക്കുന്നില്ലെന്ന് ജനം പരാതിപ്പെട്ടതായും എംപി പറഞ്ഞു. ചെട്ട്യാലത്തൂരിൽ നിന്ന് 107 പൊതുവിഭാഗത്തിൽപ്പെട്ട കുടുംബങ്ങളും 16 ഗോത്രവർഗ കുടുംബങ്ങളും ഇതിനകം പുനരധിവസിക്കപ്പെട്ടതായി വനം വകുപ്പ് ഉദ്യോഗസ്ഥൻ അറിയിച്ചു. നിലവിൽ അവിടെ കഴിയുന്ന പലരും സ്വന്തം ഭൂമിയിലല്ല. മഴക്കാലത്ത് വെള്ളം കയറി പലരേയും ക്യാന്പുകളിലേക്ക് മാറ്റേണ്ടി വരുന്നുണ്ട്. ഇതിന് പുറമെയാണ് വന്യജീവി ശല്യം. പുനരധിവാസത്തിന്‍റെ ഭാഗമായി മാറുന്നവർക്ക് ഒരു വർഷത്തിനുള്ളിൽ പുതിയ ഭൂമിയിൽ വീട് നിർമാണ പ്രവൃത്തി തുടങ്ങാമെന്ന് വനം വകുപ്പ് ഉദ്യോഗസ്ഥൻ അറിയിച്ചു. ചെട്ട്യാലത്തൂരിൽ നിന്ന് 10 ഓളം പേർ യോഗത്തിൽ പങ്കെടുത്തു. യോഗത്തിൽ എംഎൽഎമാരായ ടി. സിദ്ദിഖ്, ഐ.സി. ബാലകൃഷ്ണൻ, ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ, നൂൽപ്പുഴ ഗ്രാമപ്പഞ്ചായത്ത് പ്രസിഡന്‍റ് ഷീജ സതീഷ്, ജില്ലാ കളക്ടർ ഡി.ആർ. മേഘശ്രീ, എഡിഎം കെ. ദേവകി, വനം, പട്ടികവർഗ വികസന വകുപ്പ് ഉദ്യോഗസ്ഥർ തുടങ്ങിയവർ പങ്കെടുത്തു.

വായനോത്സവ മത്സരം സംഘടിപ്പിച്ചു

കൽപ്പറ്റ: ചെന്പട്ടി ട്രെെബൽ ലൈബ്രറിയുടെയും കേരള വെറ്ററിനറി ആന്‍റ് ആനിമൽ സയൻസസ് യൂണിവേഴ്സിറ്റി സംരംഭകത്വ വിജ്ഞാന വ്യാപന വിഭാഗത്തിന്‍റെ "ഒപ്പം’ പദ്ധതിയുടെയും സഹകരണത്തോടെ ജില്ലാ ലൈബ്രറി കൗണ്‍സിൽ വായനോത്സവം സംഘടിപ്പിച്ചു. ഗ്രന്ഥശാലാ തലത്തിൽ ചെന്പട്ടി വായനശാലയിലും സ്കൂൾ തലത്തിൽ യുപി വിഭാഗത്തിനായി പൂക്കോട് മോഡൽ റെസിഡൻഷ്യൽ സ്കൂളിലുമാണ് പരിപാടി സംഘടിപ്പിച്ചത്. മത്സരത്തിൽ 50 പേർ പങ്കെടുത്തു. യുപി വിഭാഗം മത്സരത്തിൽ ഇശൽ സൂര്യ ഒന്നാം സ്ഥാനവും അക്ഷയ കൃഷ്ണ രണ്ടാം സ്ഥാനവും ഗ്രന്ഥശാലാതലത്തിൽ ചെന്പട്ടി സ്വദേശിനി എം. മഞ്ജുഷയും വിജയിച്ചു. എംആർഎസ് പ്രിൻസിപ്പൽ സൂര്യപ്രതാപ് സിംഗ്, സ്കൂൾ മാനേജർ നൗഷാദ് എന്നിവർ സമ്മാനങ്ങൾ വിതരണം ചെയ്തു. ലൈബ്രറി അംഗങ്ങളായ സനൂപ്, സനീഷ്, കാർത്തിക്, ലൈബ്രേറിയൻ സി. അമൃത, വെറ്ററിനറി യൂണിവേഴ്സിറ്റി റിസർച്ച് അസിസ്റ്റന്‍റ് ജിപ്സ ജഗദീഷ്, ടീച്ച് ഫോർ നേച്ചർ ഫെല്ലോ സുശ്രുതൻ എന്നിവർ പങ്കെടുത്തു.

ഫിസിക്കൽ എഡ്യുക്കേഷൻ കോളജ് പ്രവർത്തനം ആരംഭിച്ചു

സുൽത്താൻ ബത്തേരി: മലങ്കര കത്തോലിക്ക ബത്തേരി രൂപതയുടെ കീഴിൽ ആരംഭിച്ച മാർതോമാ ഫിസിക്കൽ എഡ്യുക്കേഷൻ കോളജിന്‍റെ വെഞ്ചരിപ്പ് കർമ്മവും കോഴ്സിന്‍റെ ഉദ്ഘാടനവും നടത്തി. പട്ടരുപടി മാർ ബസോലിയോസ് കോളജ് ഹാളിൽ നടന്ന ചടങ്ങ് ബത്തേരി ബിഷപ് ഡോ. ജോസഫ് മാർ തോമസ് ഉദ്ഘാടനം നിർവഹിച്ചു. മോണ്‍സിഞ്ഞോർ ഡോ. ജേക്കബ് ഓലിക്കൽ അധ്യക്ഷത വഹിച്ചു. കോളജ് ബർസാർ ഫാ. വിൻസന്‍റ് പുതുശേരി മുഖ്യപ്രഭാഷണം നടത്തി. ചാൻസിലർ ഡോ. ജോസഫ് ചെരുവുപുരയിടം, കോളജ് പ്രിൻസിപ്പൽ ഡോ.സി.ആർ. അജിത് സെൻ, ഡിഎൽഎഡ് പ്രിൻസിപ്പൽ എം.കെ. സുന്ദർലാൽ, എം. ജയകല, അശ്വതി ഗോപാലകൃഷ്ണൻ എന്നിവർ പ്രസംഗിച്ചു.

അനുമോദിച്ചു

പുൽപ്പള്ളി: ഉന്നത വിദ്യാഭ്യാസത്തിന് 2023-2025 ലെ ദേശീയ തലത്തിൽ സ്കോളർഷിപ്പ് (എൻഎസ്പി) ലഭിച്ച പുൽപ്പള്ളി കതവക്കുന്ന് സ്വദേശിനി എം. മായ മേലേതിലിനെ ഗാന്ധി ദർശൻ സമിതി സുൽത്താൻ ബത്തേരി നിയോജക മണ്ഡലം കമ്മിറ്റിയുടെ ആഭിമുഖ്യത്തിൽ അനുമോദിച്ചു. മുൻ കെപിസിസി ജനറൽ സെക്രട്ടറി കെ.കെ. ഏബ്രഹാം ഉദ്ഘാടനം ചെയ്തു. ഗാന്ധി ദർശൻ സമിതി പ്രസിഡന്‍റ് കെ.സി. ജേക്കബ് അധ്യക്ഷത വഹിച്ചു. വി.എം. പൗലോസ്, സി.പി. ജോയി, കെ.ഡി. ചന്ദ്രൻ കൂർമുള്ളാനി, വിജയൻ പുത്തൻകണ്ടത്തിൽ, മധു സെബാസ്റ്റ്യൻ, കെ.വി. ക്ലീറ്റസ്, കെ.എം. ഷിനോയ്, കെ.എ. രാഘവൻ കാര്യന്പാതി, ബാബു പന്നപ്പുറം എന്നിവർ പ്രസംഗിച്ചു.

ബുക്ക് ലെറ്റ് പ്രകാശനം ചെയ്തു

മാനന്തവാടി: സെന്‍റ് ജോർജ് യാക്കോബായ സുറിയാനി പള്ളിയിൽ വിശുദ്ധ എൽദോ മോർ ബസേലിയോസ് ബാവയുടെ ഓർമ പെരുന്നാളിന്‍റെയും പായോട് കുരിശുംതൊട്ടിയുടെ കുദാശയുടെയും ഭാഗമായി പ്രസിദ്ധീകരിച്ച ബുക്ക് ലെറ്റ് പ്രകാശനം മന്ത്രി ഒ.ആർ. കേളു നിർവഹിച്ചു. വികാരി ഫാ. ബേബി പൗലോസ്, ട്രസ്റ്റി വിനു വാണാക്കുടി, ജോയിന്‍റ് സെക്രട്ടറി മനോജ് കല്ലരിക്കാട്ട്, നിർമാണ കമ്മിറ്റി കണ്‍വീനർ ബിജു ഉഴുന്നിങ്കൽ, പ്രധാന ശിശ്രൂഷകൻ പി.യു. അനീഷ്, യാക്കോബായസഭ മാനേജിംഗ് കമ്മിറ്റി അംഗം കെ.എം. ഷിനോജ് എന്നിവർ സംബന്ധിച്ചു.

വെള്ളപ്പാട്ട് അങ്കണവാടി ഉദ്ഘാടനം ചെയ്തു

സുൽത്താൻ ബത്തേരി: നഗരസഭയുടെ ടിഎസ്പി ഫണ്ടിൽ നിന്ന് 25 ലക്ഷം രൂപ ചെലവഴിച്ച് നിർമിച്ച വെള്ളപ്പാട്ട് അങ്കണവാടി നഗരസഭ ചെയർപേഴ്സണ്‍ ടി.കെ. രമേശ് ഉദ്ഘാടനം ചെയ്തു. പരിപാടിയിൽ നഗരസഭ ഡെപ്യൂട്ടി ചെയർപേഴ്സണ്‍ എൽസി പൗലോസ് അധ്യക്ഷത വഹിച്ചു. ഡിവിഷൻ കൗണ്‍സിലർ ഷീബ ചാക്കോ, സ്റ്റാൻഡിംഗ് കമ്മിറ്റി ചെയർപേഴ്സണ്‍മാരായ കെ. റഷീദ്, ഷാമില ജുനൈസ്, സിഡിപിഒ കെ. ബിന്ദു, എടിഡിഒ രാജശ്രീ, കൗണ്‍സിലർമാരായ കെ.സി. യോഹന്നാൻ, പ്രിയ വിനോദ്, സംഷാദ്, എ.സി. ഹേമ, ഐസിഡിഎസ് സൂപ്പർവൈസർ കെ.വി. ശ്രുതി എന്നിവർ പങ്കെടുത്തു.

മൂന്നാംവാർഷികം ആഘോഷിച്ചു

കേണിച്ചിറ: മലബാർ ഭദ്രാസനാധിപൻ ഡോ. ഗീവർഗീസ് മാർ സ്തേഫാനോസ് മെത്രാപ്പോലീത്തയുടെ മെത്രാഭിഷേകത്തിന്‍റെ മൂന്നാംവാർഷികം ആഘോഷിച്ചു. പൂതാടി സെന്‍റ് മേരീസ് യാക്കോബായ സുറിയാനി പള്ളിയിൽ മെത്രാപ്പോലീത്ത വിശുദ്ധ കുർബാന അർപ്പിക്കുകയും കേക്ക് മുറിക്കുകയും ചെയ്തു. ചടങ്ങിൽ വികാരി ഫാ. അജു ചാക്കോ അരത്തമ്മാംമൂട്ടിൽ, സൈമണ്‍ മാലിയിൽ കോർ എപ്പിസ്കോപ്പ, ട്രസ്റ്റി വി.ഡി. എൽദോ, സെക്രട്ടറി ഗീവർഗീസ് വെട്ടിക്കാട്ടിൽ തുടങ്ങിയവർ സന്നിഹിതരായിരുന്നു.

താലൂക്ക്തല ബാങ്കേഴ്സ് മീറ്റ് നാളെ

കൽപ്പറ്റ: ലോകബാങ്ക് പദ്ധതിയായ റൈസിംഗ് ആന്‍റ് ആക്സിലറേറ്റിംഗ് എംഎസ്എംഇ പെർഫോമൻസ് (റാംപ്) പദ്ധതിയുടെ ഭാഗമായി മാനന്തവാടി താലൂക്ക് വ്യവസായ ഓഫീസ് സംഘടിപ്പിക്കുന്ന താലൂക്ക്തല ബാങ്കേഴ്സ് മീറ്റ് നാളെ മാനന്തവാടി ഗ്രീൻസ് റസിഡൻസിയിൽ. സൂക്ഷ്മ, ചെറുകിട, ഇടത്തരം സംരംഭങ്ങളുടെ സാന്പത്തിക സാക്ഷരത മെച്ചപ്പെടുത്തുക, വായ്പ ലഭ്യത വർധിപ്പിക്കുക, ബാങ്കിംഗിൽ എംഎസ്എംഇകൾ നേരിടുന്ന പ്രശ്നങ്ങൾ പരിഹരിക്കുക എന്നീ ലക്ഷ്യങ്ങളോടെ സംഘടിപ്പിക്കുന്ന പരിപാടി രാവിലെ 10ന് നഗരസഭ ചെയർപേഴ്സണ്‍ രത്നവല്ലി ഉദ്ഘാടനം ചെയ്യും. വിവിധ ബാങ്കുകളും ധനകാര്യ സ്ഥാപനങ്ങളും ഇതര സർക്കാർ വകുപ്പുകളും പരിപാടിയിൽ പങ്കെടുക്കും. പുതിയ സംരഭകർക്ക് ഉദ്യം, കെ സ്വിഫ്റ്റ് രജിസ്ട്രേഷനുകൾക്കുള്ള സൗകര്യവും സംരംഭകർക്ക് ബാങ്കുമായി സംവദിക്കാനും വായ്പാ അപേക്ഷകൾ സമർപ്പിക്കാനും അവസരം ലഭിക്കും. സംരംഭകരും ബാങ്ക് പ്രതിനിധികളും അവസരം ഉപയോഗപ്പെടുത്തണമെന്ന് ഉപജില്ലാ വ്യവസായ ഓഫീസർ അഭ്യർഥിച്ചു.

കടുവ റോഡ് മുറിച്ചുകടക്കുന്ന ദൃശ്യം വൈറലായി

ഗൂഡല്ലൂർ: മുതുമല വന്യജീവി സങ്കേതത്തിലെ മസിനഗുഡിയിൽ കടുവ റോഡ് മുറിച്ചുകടക്കുന്ന വീഡിയോ സമൂഹമാധ്യമങ്ങളിൽ വൈറലായി. വിനോദ സഞ്ചാരികളാണ് ദൃശ്യം പകർത്തി സമൂഹമാധ്യമങ്ങളിൽ പങ്കുവച്ചത്. മസിനഗുഡിയിൽ റോഡിന്‍റെ ഇരുവശങ്ങളും വനമാണ്. ദിനംപ്രതി നിരവധി വാഹനങ്ങളാണ് ഇതുവഴി പോകുന്നത്.

എൻഎബിഎച്ച് അംഗീകാരം: അനുമോദനം നാളെ

കൽപ്പറ്റ: ജില്ലയിൽ എൻഎബിഎച്ച് അംഗീകാരം ലഭിച്ച 14 ആയുഷ് സ്ഥാപനങ്ങളെയും നേട്ടം കരസ്ഥമാക്കുന്നതിന് പ്രവർത്തിച്ച ജീവനക്കാരെയും ജില്ലാ പഞ്ചായത്തിന്‍റെ നേതൃത്വത്തിൽ അനുമോദിക്കുന്നു. ഇതിന് നാളെ ഉച്ചകഴിഞ്ഞ് രണ്ടിന് കളക്ടറേറ്റ് ആസൂത്രണഭവൻ എപിജെ അബ്ദുൾകലാം ഹാളിൽ സംഘടിപ്പിക്കുന്ന ചടങ്ങ് പട്ടികജാതി-വർഗ- പിന്നാക്ക ക്ഷേമ മന്ത്രി ഒ.ആർ. കേളു ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ അധ്യക്ഷത വഹിക്കും. ജില്ലാ കളക്ടർ ഡി.ആർ. മേഘശ്രീ, നാഷണൽ ആയുഷ് മിഷൻ ജില്ലാ പ്രോഗ്രാം മാനേജർ ഡോ.ഹരിത ജയരാജ്, ജില്ലാ പഞ്ചായത്ത് വൈസ് പ്രസിഡന്‍റ് എസ്. ബിന്ദു, സ്റ്റാൻഡിംഗ് കമ്മിറ്റി അധ്യക്ഷരായ എം. മുഹമ്മദ് ബഷീർ, ഉഷ തന്പി, ജുനൈദ് കൈപ്പാണി, ഭാരതീയ ചികിത്സാവകുപ്പ് ജില്ലാ മെഡിക്കൽ ഓഫീസർ ഡോ.എ.പി. ബിനോയ്, ഹോമിയോ ജില്ലാ മെഡിക്കൽ ഓഫീസർ ഡോ.പി.സുമേഷ്, ഐഎസ്എം ജില്ലാ ക്വാളിറ്റി നോഡൽ ഓഫീസർ ഡോ.സി.എൻ. രേഖ, നെൻമേനി ഗവ.ഹോമിയോ ഡിസ്പെൻസറി മെഡിക്കൽ ഓഫീസർ ഡോ.കെ.ജി. രഞ്ജിത്ത്, അന്പലവയൽ ഗവ.ആയുർവേദ ഡിസ്പെൻസറി സിഎച്ച്ഒ ഡോ.നിഖില ചന്ദ്രൻ തുടങ്ങിയവർ പങ്കെടുക്കും.

മാനന്തവാടി ബ്ലോക്ക് പഞ്ചായത്തിന് അംഗീകാരം

മാനന്തവാടി: ആസ്പിരേഷണൽ ഡിസ്ട്രിക്ട് ആൻഡ് പ്രോഗ്രാം സന്പൂർണത അഭിയാൻ കാന്പയിനിലെ മികച്ച പ്രകടനത്തിനു ബ്ലോക്ക് പഞ്ചായത്തിന് ലഭിച്ച മെമന്േ‍റാ പ്രസിഡന്‍റ് ജസ്റ്റിൻ ബേബി ജില്ലാ കളക്ടർ ഡി.ആർ. മേഘശ്രീയിൽനിന്നു ഏറ്റുവാങ്ങി. ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ, സബ് കളക്ടർ അതുൽ സാഗർ, എഡിഎം കെ. ദേവകി, ജില്ലാ പ്ലാനിംഗ് ഓഫീസർ കെ.എസ്. ശ്രീജിത്ത്, ബ്ലോക്ക് പഞ്ചായത്ത് വൈസ് പ്രസിഡന്‍റ് എ.കെ. ജയഭാരതി, ആരോഗ്യ-വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സണ്‍ പി. കല്യാണി, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ സൽമ മോയിൻ, ബ്ലോക്ക് പഞ്ചായത്ത് സെക്രട്ടറി കെ.കെ.രാജേഷ്, ജോയിന്‍റ് ബിഡിഒ ആലി വള്ളി എന്നിവർ സന്നിഹിതരായിരുന്നു.

കോക്കുഴി വയലിൽ നെൽക്കൃഷി ഇറക്കി

കൽപ്പറ്റ: ഡോ.മൂപ്പൻസ് നഴ്സിംഗ് കോളജ്, കരിങ്കുറ്റി ജിവിഎച്ച്എസ്എസ് എൻഎസ്എസ് യൂണിറ്റ് എന്നിവയുടെ സഹകരണത്തോടെ ഒയിസ്ക ചാപ്റ്റർ കോക്കുഴി വയലിൽ നെൽക്കൃഷി ഇറക്കി. കൃഷി അസിസ്റ്റന്‍റ് ഡയറക്ടർ മുഹമ്മദ് ഷഫീഖ് ഉദ്ഘാടനം ചെയ്തു. ചാപ്റ്റർ പ്രസിഡന്‍റ് ഡോ.എ.ടി. സുരേഷ് അധ്യക്ഷത വഹിച്ചു. കോട്ടത്തറ കൃഷി ഓഫീസർ കെ. വിപിൻ, ഒയിസ്ക ജില്ലാ സെക്രട്ടറി അഡ്വ.അബ്ദുറഹിമാൻ കാതിരി, കരിങ്കുറ്റി ജിഎച്ച്എസ്എസ് പിടിഎ പ്രസിഡന്‍റ് കെ.എസ്. ജിതേഷ്, കൃഷി റിട്ട.ഡപ്യൂട്ടി ഡയറക്ടർ ലൗലി അഗസ്റ്റിൻ, ഡോ. മണിലാൽ എന്നിവർ പ്രസംഗിച്ചു. പാരന്പര്യ കർഷകൻ ഗോപാലൻ നായരെ ആദരിച്ചു. ചാപ്റ്റർ സെക്രട്ടറി എൽദോ ഫിലിപ്പ് സ്വാഗതവും അഡ്വ.എസ്.എ. നസീർ നന്ദിയും പറഞ്ഞു. പുതുതലമുറയ്ക്കും സമൂഹത്തിലെ കർഷകർ അല്ലാത്ത വിഭാഗങ്ങൾക്കും പരിചയപ്പെടുത്തുകയെന്ന ലക്ഷ്യത്തോടെയാണ് കൃഷി ഇറക്കിയത്.

ഔട്ട് ഡോർ ക്ലാസും ചിൽഡ്രൻസ് പാർക്കുമായി ‘തണലിടം’

കൽപ്പറ്റ: എച്ച്ഐഎം യുപി സ്കൂൾ പിടിഎയുടെ ആഭിമുഖ്യത്തിൽ ന്ധതണലിടംന്ധ എന്ന പേരിൽ വിദ്യാലയത്തിൽ ഒരുക്കിയ ഔട്ട് ഡോർ ക്ലാസ് ആൻഡ് ചിൽഡ്രൻസ് പാർക്കിന്‍റെ ഉദ്ഘാടനം ഇന്ന് ജില്ലാ കളക്ടർ ഡി.ആർ. മേഘശ്രീ നിർവഹിക്കും. കുട്ടികൾക്ക് ഗണിത പഠനത്തിനോട് താല്പര്യം ജനിപ്പിക്കുന്ന രീതിയിൽ ഗണിത പാർക്കിൽ തുടങ്ങി വിവിധ വിഷയങ്ങളിലൂടെ കടന്ന് ചരിത്രത്തിൽ അവസാനിക്കുന്ന രീതിയിലാണ് പുറത്തെ പാർക്കിന്‍റെ തീം ഒരുക്കിയിരിക്കുന്നത്. ഒന്നാംഘട്ട പണികളാണ് പൂർത്തീകരിച്ച് ഇന്ന് ഉദ്ഘാടനം ചെയ്യുന്നത്. ചടങ്ങിൽ വാർഡ് കൗണ്‍സിലർ ഷരീഫ, വൈത്തിരി ഉപജില്ലാ വിദ്യാഭ്യാസ ഓഫീസർ ബാബു, സ്കൂൾ മാനേജർ പയന്തോത്ത് മൂസ, കല്ലങ്കോടൻ മൊയ്തു, പിടിഎ പ്രസിഡന്‍റ് എം.പി. നവാസ്, മദർ പിടിഎ പ്രസിഡന്‍റ് നീഷീദ, പ്രധാനാധ്യാപകൻ കെ. അലി തുടങ്ങിയവർ പങ്കെടുക്കും.

ജവാൻമാരുടെ കുടുംബങ്ങളുടെ സംരക്ഷണം സമൂഹത്തിന്‍റെ കർത്തവ്യം: മന്ത്രി ഒ.ആർ. കേളു

കൽപ്പറ്റ: രാജ്യത്തിന്‍റെ സമാധാനത്തിനും ഐക്യത്തിനും സുരക്ഷിതത്വത്തിനും പ്രവർത്തിക്കുന്ന ധീര ജവാൻമാരുടെ കുടുംബങ്ങൾക്ക് സംരക്ഷണവും പിന്തുണയും ഉറപ്പാക്കേണ്ടത് സമൂഹത്തിന്‍റെ കർത്തവ്യമാണെമന്ന് പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ കേളു. രണ്ടാം ലോകമഹായുദ്ധത്തിൽ പങ്കെടുത്ത സൈനികരുടെ ഭാര്യമാരിൽ ജില്ലയിൽ ജീവിച്ചിരിക്കുന്നവരെ ആദരിക്കുന്നതിന് ജില്ലാ സൈനിക ക്ഷേമ ബോർഡ്, സൈനിക സമൂഹം, സൈനികരുടെ സംഭാവന ആരോഗ്യ പദ്ധതി, എക്സ് സർവീസ്മെൻ കമ്മ്യൂണിറ്റി വയനാട് ബ്ലഡ് ഡോണെഷൻ കമ്മിറ്റി, കണ്ണൂർ ഡിഫൻസ് സർവീസ് സൊസൈറ്റി, സർക്കാർ സ്ഥാപനങ്ങൾ, പൊതു സംഘടനകൾ എന്നിവയുടെ സഹകരണത്തോടെ വയനാട് ചേംബർ ഓഫ് കൊമ്സ്േ ബത്തേരിയിൽ സംഘടിപ്പിച്ച ചടങ്ങ് ഉദ്ഘാടനം ചെയ്യുകയായിരുന്നു അദ്ദേഹം. രണ്ടാം ലോക മഹായുദ്ധത്തിൽ ലോകത്തെന്പാടുമായി 72 ദശലക്ഷത്തോളം സൈനികർ ജീവൻ ബലിയർപ്പിച്ചിട്ടുണ്ട്. ഇതിൽ 87000ത്തിലധികം പേർ ഇന്ത്യൻ സൈനികരാണെന്ന് മന്ത്രി പറഞ്ഞു. ചേംബർ പ്രസിഡന്‍റ് ജോണി പാറ്റാനി അധ്യക്ഷത വഹിച്ചു. ഐ.സി. ബാലകൃഷ്ണൻ എംഎൽഎ, ജില്ലാ കളക്ടർ ഡി.ആർ മേഘശ്രീ, ബ്രിഗേഡിയർ ജോർജ്, കേണൽ ഡി. സുരേഷ് ബാബു, ലെഫ്റ്റനന്‍റ് കേണൽ വി.ഡി. ചാക്കോ, ജില്ലാ സൈനിക വെൽഫയർ ഓഫീസർ ക്യാപ്റ്റൻ വിനോദ് മാത്യു, ക്യാപ്റ്റൻ വി.കെ. ശശീന്ദ്രൻ, പെൻഷനേഴ്സ് അസോസിയേഷൻ പ്രതിനിധി വിശ്വാനന്ദൻ, വി. അബ്ദുള്ള എന്നിവർ പ്രസംഗിച്ചു. 47 വനിതകളെ ആദരിച്ചു. ഇവർ ജീവിതാനുഭവങ്ങൾ പങ്കുവച്ചു.

വന്യജീവി വാരാഘോഷം: ജില്ലാതല മത്സരം കൽപ്പറ്റയിൽ

കൽപ്പറ്റ: വന്യജീവി വാരാഘോഷത്തിന്‍റെ ഭാഗമായി വനം-വന്യജീവി സംരക്ഷണ വകുപ്പ് സ്കൂൾ, കോളജ് വിദ്യാർഥികൾക്ക് വിവിധ മത്സരങ്ങൾ സംഘടിപ്പിക്കുന്നു. ഒക്ടോബർ രണ്ട്, മൂന്ന് തീയതികളിൽ ജില്ലാതല മത്സരവും എട്ടിന് സംസ്ഥാനതല മത്സരവും നടത്തും. പ്രകൃതി, വന്യജീവി വിഷയങ്ങളുമായി ബന്ധപ്പെട്ട് എൽപി, യുപി വിദ്യാർഥികൾക്ക് പെൻസിൽ ഡ്രോയിംഗ്, വാട്ടർ കളർ പെയിന്‍റിംഗ് ഇനങ്ങളിലും ഹൈസ്കൂൾ, ഹയർ സെക്കൻഡറി, കോളജ് വിദ്യാർഥികൾക്ക് പെൻസിൽ ഡ്രോയിംഗ്, വാട്ടർ കളർ പെയിന്‍റിംഗ്, ക്വിസ്, ഉപന്യാസം(മലയാളം), പ്രസംഗം(മലയാളം)ഇനങ്ങളിലുമാണ് മത്സരം. ഹയർ സെക്കൻഡറി, കോളജ് വിദ്യാർഥികളെ ഒറ്റ വിഭാഗമായി കണക്കാക്കും. എസ്കെഎംജെ സ്കൂളിലാണ് വയനാട് ജില്ലാതല മത്സരങ്ങൾ. രണ്ടിന് രാവിലെ 9.30 മുതൽ 11.30 വരെ പെൻസിൽ ഡ്രോയിംഗിലും 11.45 മുതൽ 12.45 വരെ ഉപന്യാസത്തിലും 2.15 മുതൽ 4.15 വരെ വാട്ടർ കളർ പെയിന്‍റിംഗിലും മത്സരം നടക്കും. മൂന്നിനു രാവിലെ 10 മുതൽ ഉച്ചവരെ ക്വിസ് മത്സരവും ഉച്ചകഴിഞ്ഞ് രണ്ട് മുതൽ വൈകുന്നേരം നാല് വരെ പ്രസംഗ മത്സരവും നടത്തും. ജില്ലാതലത്തിൽ ആദ്യ മൂന്ന് സ്ഥാനം നേടുന്നവർ സംസ്ഥാനതല മത്സരത്തിന് യോഗ്യത നേടും. സംസ്ഥാനതലത്തിൽ മത്സരിക്കുന്നവർക്കും അനുഗമിക്കുന്ന രക്ഷിതാക്കളിൽ ഒരാൾക്കും സ്ലീപ്പർ ക്ലാസ് യാത്രച്ചെലവും താമസസൗകര്യവും ഭക്ഷണവും നൽകും. ജില്ലാതലത്തിൽ മത്സരിക്കാൻ ആഗ്രഹിക്കുന്നവർ സ്കൂളിൽനിന്നുള്ള തിരിച്ചറിയിൽ രേഖ സഹിതം അതത് ദിവസം രാവിലെ എട്ടിന് എസ്കഐംജെ സ്കൂളിൽ എത്തണം. വിശദവിവരത്തിന് 04936-202623, 8547603846, 9846099231 എന്നീ നന്പറുകളിൽ വിളിക്കാം.

നിലന്പൂർ - നഞ്ചൻഗോഡ് റയിൽപാത : ബജറ്റിൽ ഉൾപ്പെടുത്താൻ മന്ത്രിയുമായി ചർച്ച നടത്തും: പ്രിയങ്ക ഗാന്ധി

കൽപ്പറ്റ: നിലന്പൂർ - നഞ്ചൻഗോഡ് റയിൽപാത വരുന്ന ബജറ്റിൽ ഉൾപ്പെടുത്തുന്നത് സംബന്ധിച്ച് റയിൽവേ മന്ത്രിയുമായി ഉടൻ ചർച്ചനടത്തുമെന്ന് പ്രിയങ്ക ഗാന്ധി എംപി. റയിൽപാതയുടെ പ്രവർത്തന പുരോഗതി സംബന്ധിച്ച് നീലഗിരി വയനാട് എൻഎച്ച് ആൻഡ് റയിൽവേ ആക്ഷൻ കമ്മിറ്റിയുമായി നടത്തിയ ചർച്ചയിലാണ് എംപി ഇക്കാര്യം വ്യക്തമാക്കിയത്. ഈ റയിൽപാത തന്‍റെ പ്രധാന പരിഗണനാ വിഷയമാണെന്നും താൻ പാതയുടെ സാക്ഷാത്കാരത്തിനായി നിരന്തരശ്രമങ്ങൾ നടത്തിവരുന്നുണ്ടെന്നും എംപി അറിയിച്ചു. പാർലമെന്‍റിൽ അടുത്തിടെ വിഷയം ഉന്നയിക്കുകയും ഉദ്യോഗസ്ഥരുമായി ചർച്ചനടത്തുകയും ചെയ്തിരുന്നു. പാതയുടെ അന്തിമലൊക്കേഷൻ സർവേയും അലൈൻമെന്‍റ് നിർണയവും പൂർത്തിയായ സാഹചര്യത്തിൽ ഇപ്പോൾ നടന്നുവരുന്ന ഡിപിആർ എത്രയും പെട്ടെന്ന് പൂർത്തിയാക്കി റയിൽവേ ബോർഡിന്‍റെ പരിഗണനക്ക് സമർപ്പിക്കാൻ ആവശ്യമായ ഇട പെടലുകൾ നടത്തണമെന്നും ആക്ഷൻ കമ്മിറ്റി അഭ്യർഥിച്ചു. ഈ കാര്യത്തിൽ ആവശ്യമായ ഇടപെടലുകൾ നടത്തുമെന്ന് എംപി ഉറപ്പ്നൽകി. ദേശീയപാത 766 ലെ രാത്രിയാത്രാ തിരോധനത്തിന് പരിഹാരമായി സുപ്രീംകോടതി പരിഗണിക്കാൻ നിർദേശിച്ച ബന്ദിപ്പുർ വനത്തിലെ തുരങ്കപാത സംബന്ധിച്ച നിർദേശവും ആക്ഷൻ കമ്മിറ്റി എംപിയുമായി ചർച്ചചെയ്തു. ഇതു സംബന്ധിച്ച് ഉദ്യോഗസ്ഥരുടെ യോഗം ഉടൻ വിളിച്ച്ചേർത്ത് തുടർനടപടികൾ സ്വീകരിക്കുമെന്നും എംപി ഉറപ്പ് നൽകി. ചർച്ചയിൽ ടി. സിദ്ദിഖ് എംഎൽഎ, ആക്ഷൻകമ്മിറ്റി കണ്‍വീനർ അഡ്വ.ടി.എം. റഷീദ്, പി.വൈ. മത്തായി, മോഹൻ നവരംഗ്, ജോസ് കപ്യാർമല, ലക്ഷ്മണ്‍ദാസ് എന്നിവർ പങ്കെടുത്തു.

റിപ്പണ്‍-ആനടിക്കാപ്പ്-കാന്തൻപാറ റോഡ് നവീകരണത്തിന് ഭരണാനുമതി

കൽപ്പറ്റ: റിപ്പണ്‍-ആനടിക്കാപ്പ്-കാന്തൻപാറ റോഡ് നവീകരണത്തിന് ഒരു കോടി രൂപതയുടെ ഭരണാനുമതി ലഭിച്ചതായി ടി. സിദ്ദിഖ് എംഎൽഎ അറിയിച്ചു. കാന്തൻപാറ ടൂറിസ്റ്റ് കേന്ദ്രത്തിലേക്കും റിപ്പണ്‍, ആനടിക്കാപ്പ് ഉൾപ്പെടെ പ്രദേശങ്ങളിലേക്കും തിരിച്ചുമുള്ള യാത്രാക്ലേശത്തിന് റോഡ് നവികരണത്തോടെ പരിഹാരമാകും. റോഡ് നവീകരണവുമായി ബന്ധപ്പെട്ട് ടി. സിദ്ദിഖ് എംഎൽഎ ടൂറിസം മന്ത്രിയെ നേരിൽക്കാണുകയും നിവേദനം നൽകുകയും ചെയ്തിരുന്നു.

നിയമ ഭേദഗതി ബിൽ മലയോരജനതയുടെ കണ്ണിൽ പൊടിയിടാൻ: ബിജെപി

കൽപ്പറ്റ: സംസ്ഥാന മന്ത്രിസഭ അംഗീകരിച്ച വനം-വന്യജീവി സംരക്ഷണ നിയമ ഭേദഗതി ബിൽ തെരഞ്ഞെടുപ്പ് മുന്നിൽക്കണ്ടുള്ള തട്ടിപ്പാണെന്ന് ബിജെപി ജില്ലാ പ്രസിഡന്‍റ് പ്രശാന്ത് മലവയൽ, ജനറൽ സെക്രട്ടറിമാരായ എം.പി. സുകുമാരൻ, ടി.എം. സുബീഷ്, കർഷക മോർച്ച ജില്ലാ പ്രസിഡൻഫ് കെ.എം. പ്രജീഷ്, ജില്ലാ സെൽ കോഓർഡിനേറ്റർ മനോജ് വി. നരേന്ദ്രൻ എന്നിവർ വാർത്താസമ്മേളനത്തിൽ ആരോപിച്ചു. വിശ്വാസികളുടെ കണ്ണിൽ പൊടിയിടാനാണ് അയ്യപ്പസംഗമം നടത്തുന്നത്. അതുപോലെ വന്യജീവി ശല്യംമൂലം ഗതികേടിലായ മലയോരജനതയെ വഞ്ചിക്കാൻ തയാറാക്കിയതാണ് ഭേദഗതി ബിൽ. അക്രമകാരികളായ വന്യമൃഗങ്ങളെ മുൻപിൻ നോക്കാതെ കൊല്ലാനും കാട്ടുപന്നിയെ ക്ഷുദ്രജീവിയായി പ്രഖ്യാപിക്കാനും മറ്റും നിയമഭേദഗതിയിലൂടെ കഴിയുമെന്നുണ്ടെങ്കിൽ സർക്കാരിന് അത് നേരത്തേ ചെയ്യാമായിരുന്നു. നിയമഭേദഗതിക്ക് മുതിരാതെ കഴിഞ്ഞ ഒന്പത് വർഷം പാഴാക്കിയത് എന്തിനെന്ന് ജനങ്ങളോട് വിശദീകരിക്കാൻ മുഖ്യമന്ത്രി തയാറാകണം. ഇത്രയുംകാലം കേന്ദ്ര സർക്കാരിനെ കുറ്റപ്പെടുത്തി വന്യജീവി ആക്രമണങ്ങളെ ന്യായീകരിക്കുകയാണ് ഇടതുസർക്കാർ ചെയ്തത്. അക്രമകാരികളായ വന്യമൃഗങ്ങളെ കൊല്ലാൻ ഉത്തരവിടാൻ സംസ്ഥാന മുഖ്യവനപാലകന് അധികാരം നൽകുന്നതാണ് 1972ലെ വനം-വന്യജീവി സംരക്ഷണ നിയമം. എന്നിരിക്കേ ഇക്കാര്യത്തിൽ നിയമഭേദഗതി പ്രഹസനമാണ്. കേന്ദ്ര നിയമം വേണ്ടവിധം പ്രയോജനപ്പെടുത്തുന്നതിൽ സംസ്ഥാനം വീഴ്ചവരുത്തുകയാണ് ചെയ്തത്. കാട്ടുപന്നിയെ ക്ഷുദ്രജീവിയായി പ്രഖ്യാപിക്കണമെന്നത് മലയോരജനത വർഷങ്ങളായി ഉന്നയിക്കുന്ന ആവശ്യമാണ്. ബിജെപിക്കും ഇതേ അഭിപ്രായമാണ്. എന്നാൽ ഇതിന് നിയമത്തിൽ സംസ്ഥാന സർക്കാർ വരുത്തുന്ന ഭേദഗതി പര്യാപ്തമാകുമെന്ന് കരുതുന്നില്ല. സംസ്ഥാനത്തിന്‍റെ സാഹചര്യങ്ങൾ വിശദീകരിച്ച് കേന്ദ്ര നിയമത്തിൽ ആവശ്യമായ ഇളവ് നേടുന്നതിനുള്ള ശ്രമമാണ് ഉണ്ടാകേണ്ടത്. നിയമഭേദഗതിയിലൂടെ കർഷകർക്ക് എന്ത് ഗുണം ലഭിക്കുമെന്ന് സർക്കാർ പറയണം. വന്യജീവി ആക്രമണം തടയാനും കൃഷിഭൂമി സംരക്ഷിക്കാനും കാടും നാടും വേർതിരിക്കാനും ബില്ലിൽ വ്യവസ്ഥകളില്ല. വർധിച്ച വന്യജീവി ശല്യത്തിന്‍റെ പ്രധാനകാരണങ്ങൾ നിവാരണം ചെയ്യാനും ബില്ലിൽ വ്യവസ്ഥകളില്ല. ജില്ലയിൽ കഴിഞ്ഞ 10 വർഷത്തിനിടെ 45 പേർ വന്യജീവി ആക്രമണത്തിൽ കൊല്ലപ്പെട്ടു. നൂറുകണക്കിന് ആളുകൾക്ക് പരിക്കേറ്റു. ഇതിന് ഉത്തരവാദി സംസ്ഥാന സർക്കാരാണ്. രാജ്യത്തെ എല്ലാ സംസ്ഥാനങ്ങൾക്കും ബാധകമായ കേന്ദ്ര നിയമം കേരള സർക്കാർ ഭേദഗതി ചെയ്യുന്നത് കോടതികയറാൻ സാധ്യത ഏറെയാണെന്നും ബിജെപി നേതാക്കൾ പറഞ്ഞു.

ക്ഷീരകർഷകർക്ക് സബ്സിഡി നൽകി

പുൽപ്പള്ളി: പനമരം ബ്ലോക്ക് പഞ്ചായത്ത് 2025-26 വാർഷിക പദ്ധതിയിൽ ഉൾപ്പെടുത്തി ക്ഷീരകർഷകർക്കു സബ്സിഡി നൽകി. വിതരണോദ്ഘാടനം മുള്ളൻകൊല്ലി ക്ഷീരസംഘം ഹാളിൽ ബ്ലോക്ക് പഞ്ചായത്ത് പ്രസിഡന്‍റ് ഗിരിജ കൃഷ്ണൻ നിർവഹിച്ചു. വൈസ് പ്രസിഡന്‍റ് അബ്ദുൾഗഫൂർ കാട്ടി അധ്യക്ഷത വഹിച്ചു. മുള്ളൻകൊല്ലി പഞ്ചായത്ത് പ്രസിഡന്‍റ് പി.കെ. വിജയൻ, ജില്ലാ പഞ്ചായത്തംഗം ബീന ജോസ്, ബ്ലോക്ക് പഞ്ചായത്തംഗങ്ങളായ മേഴ്സി ബെന്നി, രജനി ചന്ദ്രൻ, ലൗലി ഷാജു, മോളി ആക്കാന്തിരി, ഷൈജു പഞ്ഞിത്തോപ്പിൽ, ചന്ദ്ര ബാബു, പി.കെ. ജോസ്, ലില്ലി തങ്കച്ചൻ, സുധ നടരാജൻ എന്നിവർ പ്രസംഗിച്ചു.

രണ്ട് കോടിയുടെ പ്രവൃത്തികൾക്ക് ഭരണാനുമതി

മാനന്തവാടി: ഗവ.മെഡിക്കൽ കോളജ് കാന്പസിലെ റോഡുകളും പോസ്റ്റ് ഓഫീസ് ജംഗ്ഷൻ മുതൽ പഴശി കുടീരം വരെ റോഡും നവീകരിക്കുന്നതിനു രണ്ട് കോടി രൂപയുടെ ഭരണാനുമതി ലഭിച്ചതായി മന്ത്രി ഒ.ആർ. കേളു അറിയിച്ചു. പോസ്റ്റ് ഓഫീസ് ജംഗ്ഷനിൽനിന്നു മെഡിക്കൽ കോളജ് ഭാഗത്തേക്കുള്ള റോഡ് ബിഎം ആൻഡ് ബിസി നിലവാരത്തിലാണ് നവീകരിക്കുക. മെഡിക്കൽ കോളജ് കവാടം മുതൽ മോർച്ചറി വരെയുള്ള റോഡ് നിരവധി രോഗികളും കൂട്ടിരിപ്പുകാരും ആശ്രയിക്കുന്നതാണ്. റോഡിന്‍റെ തകർച്ച വീൽചെയർ,സ്ട്രക്ച്ചർ എന്നിവ കൊണ്ടുപോകുന്നതിന് പ്രയാസം സൃഷ്ടിക്കുന്നുണ്ട്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]