ADVERTISEMENT

ADVERTISEMENT

പരവൂർ എസ്എൻവി സമാജം ഗുരുസമാധി ദിനം ആചരിച്ചു

പരവൂർ : എസ്എൻവി സമാജത്തിന്‍റെ ആഭിമുഖ്യത്തിൽ എസ്എൻവി ഗേൾസ് ഹൈസ്കൂളിലും സമാജം ഓഡിറ്റോറിയത്തിലും 98-മത് ഗുരു മഹാസമാധി ദിനം ആചരിച്ചു. സമാജം പ്രസിഡന്‍റും സ്കൂൾ മാനേജരുമായ എസ്. സാജൻ സ്കൂൾ അങ്കണത്തിൽ ഭദ്രദീപം തെളിച്ച് ഉദ്ഘാടനം ചെയ്തു.

സമാജം സെക്രട്ടറി അഡ്വ. എ. അരുൺലാൽ, ട്രഷറർ ടി.ജി. പ്രതാപൻ,സമാജം ഭരണ സമിതി ഭാരവാഹികൾ, സ്കൂൾ ജീവനക്കാർ, സമാജം അംഗങ്ങൾ, രക്ഷാകർത്താക്കൾ, വിദ്യാർഥികൾ എന്നിവർ പങ്കെടുത്തു. രാവിലെ എട്ടുമുതൽ ഗുരുപൂജ, സമൂഹ പ്രാർഥന ,ഗുരുദേവ പാരായണം ,പായസവിതരണം എന്നിവ നടന്നു.

ADVERTISEMENT

ഓട്ടോ ബ്രേക്കിട്ടപ്പോൾ തെറിച്ചുവീണ് വീട്ടമ്മ മരിച്ചു

കുണ്ടറ: ഓട്ടോറിക്ഷ ബ്രേക്കിട്ടപ്പോൾ തെറിച്ചു വീണ് വീട്ടമ്മയ്ക്ക് ദാരുണാന്ത്യം. മുളവന കൊല്ലൂർകൊണം ജയന്തി കോളനിയിൽ വിജയകുമാരി (50) ആണ് മരിച്ചത്. ആശുപത്രിമുക്ക് എസ്ബിഐ ബാങ്കിന് മുന്നിൽ ഇന്നലെ രാവിലെ 11.30 ഓടെ ആയിരുന്നു അപകടം. ആശുപത്രിമുക്ക് ഭാഗത്തു നിന്നും കാഞ്ഞിരകോട് താലൂക്ക് ആശുപത്രിയിലേക്ക് പോവുകയായിരുന്ന ഓട്ടോ എസ്ബിഐ ബാങ്കിന് മുന്നിൽ വച്ച് മുൻപേ പോയ ഇന്നോവയിൽ ഇടിക്കാതിരിക്കാൻ ബ്രേക്കിട്ടപ്പോൾ വിജയകുമാരി തെറിച്ച് റോഡിലേക്ക് വീഴുകയായിരുന്നു. പിന്നാലെ ഓട്ടോ അവരുടെ മുകളിലേക്ക് മറിഞ്ഞു. കുണ്ടറയിലെ സ്വകാര്യ ആശുപത്രിയിലും തുടർന്ന് കൊല്ലം ജില്ലാ ആശുപത്രിയിലും എത്തിച്ചെങ്കിലും ജീവൻ രക്ഷിക്കാനായില്ല.

ദന്പതികൾ മണിക്കൂറുകളുടെ വ്യത്യാസത്തിൽ മരിച്ചു

ഓച്ചിറ: മണിക്കൂറുകളുടെ വ്യത്യാസത്തിൽ ദന്പതികൾ മരിച്ചു. മഠത്തിൽകാരാണ്മ മുനീറുൽ ഇഖ്‌വാൻ ജമായത്ത് പള്ളിക്കു സമീപം ചക്കാലയിൽ, കെ. ജലാലുദീൻ കുഞ്ഞും (81) , റഹിമാബീവി (75) എന്നിവരാണ് മരിച്ചത്. ചെവ്വാഴ്ച രാത്രി ഒന്പതോടെ കുഴഞ്ഞുവീണ റഹിമാബീവിയെ ചങ്ങൻകുളങ്ങര സ്വകാര്യ ആശുപത്രിയിൽ പ്രവേശിപ്പിച്ച് കാർഡിയോളോജിസ്റ്റിനെ കാണണമെന്നുള്ള വിവരം അറിഞ്ഞപ്പോൾ ജലാലുദിൻകുഞ്ഞു കുഴഞ്ഞുവീഴുകയായിരുന്നു. ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. 9 .30 ഓടെ ജലാലുദിൻകുഞ്ഞും ചികിത്സയിലായിരുന്ന ഭാര്യ റഹിമാബീവി ഇന്നലെ പുലർച്ചെയും അന്തരിച്ചു. മക്കൾ: സൈനുദ്ദീൻ (ദുബൈ), ബുഷ്‌റ, നുസ്രത്ത്‌. മരുമക്കൾ: നസീറ, ഷാജി, ഷാജി.

വളര്‍ത്തുനായയെ വിഴുങ്ങാന്‍ ശ്രമിച്ച പെരുമ്പാമ്പിനെ പിടികൂടി

തെന്മല : വളര്‍ത്തു നായയെ വിഴുങ്ങാന്‍ ശ്രമിക്കുന്നതിനിടെ കൂറ്റന്‍ പെരുമ്പാമ്പ് ആര്‍ആര്‍ടി സംഘത്തിന്‍റെ പിടിയിലായി. കഴിഞ്ഞ ദിവസം തെന്മല തടി ഡിപ്പോയ്ക്കു സമീപത്തായിരുന്നു സംഭവം. ഡിപ്പോയ്ക്കു സമീപത്തെ വീട്ടിലെ നായയുടെ കുരകേട്ട് ഓടിയെത്തിയ വീട്ടുകാരാണ് പെരുമ്പാമ്പിനെ കാണുന്നത്. ഉടന്‍ തെന്മല ആര്‍ ആര്‍ ടിയെ വിവരം അറിയിക്കുകയായിരുന്നു. ആര്‍ആര്‍ടിയിലെ ബീറ്റ് ഫോറസ്റ്റ് ഓഫീസര്‍ രാധാകൃഷ്ണന്‍റെ നേതൃത്വത്തിലെത്തിയ സംഘം പാമ്പിനെ പിടികൂടി.

പരവൂരിൽ ദേവരാജ മ്യൂസിയം ഒരുങ്ങുന്നു

പരവൂർ: മലയാള ചലച്ചിത്രഗാന സംവിധാന രംഗത്തെ കുലപതി ജി. ദേവരാജൻ മാസ്റ്ററുടെ പേരിൽ അദ്ദേഹത്തിന്‍റെ ജന്മനാടായ പരവൂരിൽ മ്യൂസിയം ഒരുങ്ങുന്നു. ഒട്ടേറെ സവിശേഷതകൾ ഉള്ള മ്യൂസിയം കലാ കേരളത്തിനായി സജ്ജീകരിക്കുന്നത് തെക്കൻ കേരളത്തിലെ പ്രശസ്തമായ പരവൂർ ഫൈൻ ആർട്സ് സൊസൈറ്റി ( ഫാസ് ) ആണ്. ഫാസിന്‍റെ ഒല്ലാലിൽ സ്ഥിതി ചെയ്യുന്ന ആസ്ഥാന മന്ദിരത്തിലെ ഒന്നാം നിലയിൽ മ്യൂസിയത്തിലെ പ്രദർശന വസ്തുക്കളുടെ ചിട്ടപ്പെടുത്തൽ പ്രവർത്തനങ്ങൾ പുരോഗമിക്കുന്നു. അഞ്ച് മുറികളിലായിട്ടാണ് മ്യൂസിയം തയാറാക്കുന്നത്. ഒപ്പം പഠന ഗവേഷണ കേന്ദ്രവും ഇവിടെ ഉണ്ടാകും. ദേവരാജൻ മാസ്റ്ററുടെ പേരിലുള്ള സംസ്ഥാനത്തെ ആദ്യ മ്യൂസിയം കൂടിയാണ് ഇതെന്ന പ്രത്യേകതയുമുണ്ട്. മാഷ് സംഗീത സംവിധാനത്തിന് ഉപയോഗിച്ചിരുന്ന ഉപകരണങ്ങൾ, സംഗീതം നൽകിയ ഗാനങ്ങളുടെ നൊട്ടേഷനുകൾ, അദ്ദേഹത്തിന് ലഭിച്ച അനേകം പുരസ്കാരങ്ങൾ, മൊമന്‍റോകൾ, സംഗീത ലോകത്തിന് സംഭാവന ചെയ്ത ഷഡ്കാല പല്ലവികൾ, പാട്ടുകളുടെയും പുസ്തകങ്ങളുടെയും ശേഖരം തുടങ്ങി വിലമതിക്കാനാകാത്ത ഒത്തിരി സംഭാവനകൾ മ്യൂസിയത്തിൽ ഒരുക്കും. ചലച്ചിത്രഗാന രചനാ രംഗത്തെ എക്കാലത്തെയും "വലിയ തമ്പുരാൻ" എന്ന് വിശേഷിക്കപ്പെടുന്ന വയലാർ രാമവർമയും ദേവരാജൻ മാഷും ചേർന്ന് ഗാനങ്ങൾ ചിട്ടപ്പെടുത്തുന്ന വേളയിൽ ഇരിക്കാൻ ഉപയോഗിച്ചിരുന്ന ചൂരൽ കസേരകളും ടീപ്പോയും മ്യൂസിയത്തിന്‍റെ പ്രധാന ആകർഷണങ്ങളിൽ ഒന്നാണ്. മാസ്റ്ററുടെ കൈപ്പടയിൽ എഴുതിയ രചനകളും ശേഖരത്തിൽ ഉൾപ്പെടും. മ്യൂസിയത്തിന്‍റെ പ്രധാന കവാടം തുറക്കുമ്പോൾ ആദ്യമായി കാണാനാകുക മാഷിന്‍റെ ജീവിതരേഖ പകർത്തിയ 80 ഫോട്ടോകളാണ്. ഫ്രീലാൻസ് ഫോട്ടോഗ്രാഫർ ജി. ജിജോയാണ് കളറിലും ബ്ലാക്ക് ആന്‍റ് വൈറ്റിലുമുള്ള അപൂർവം ചിത്രങ്ങൾ ചിട്ടപ്പെടുത്തിയിട്ടുള്ളത്. മാഷിന്‍റെ സ്വകാര്യ ശേഖരങ്ങൾ എല്ലാം ഭദ്രമായി അദ്ദേഹത്തിന്‍റെ ചെന്നൈയിലെ വസതിയിലാണ് സൂക്ഷിച്ചിരുന്നത്. ഇവ അദ്ദേഹത്തിന്‍റെ കുടുംബാംഗങ്ങൾ കുറച്ചുനാൾ മുമ്പ് ഫൈൻ ആർട്സ് സൊസൈറ്റിയുടെ ഭാരവാഹികൾക്ക് കൈമാറിയിരുന്നു. മാഷ് ഉപയോഗിച്ചിരുന്ന കണ്ണടയും പാദരക്ഷകളും ഇപ്പോഴും അദ്ദേഹത്തിന്‍റെ കുടുംബം നിധിപോലെ വീട്ടിൽ തന്നെ സൂക്ഷിക്കുകയാണ്. ഇവയും മറ്റൊരവസരത്തിൽ മ്യൂസിയത്തിന് കൈമാറാൻ തന്നെയാണ് കുടുംബത്തിന്‍റെ തീരുമാനം. മാഷിന്‍റെ 98-ാം ജന്മവാർഷികദിനമായ 27ന് വൈകുന്നേരം അഞ്ചിന് മ്യൂസിയത്തിന്‍റെ ഉദ്ഘാടനം നടക്കും. ഫാസ് ആസ്ഥാന മന്ദിരാങ്കണത്തിൽ നടക്കുന്ന ചടങ്ങിൽ മാസ്റ്ററുടെ പത്നി പെരുന്ന ലലാമണിയാണ് ഉദ്ഘാടനം നിർവഹിക്കുക.ജി.എസ്.ജയലാൽ എംഎൽഎ മുഖ്യപ്രഭാഷണം നടത്തും. നഗരസഭാ ചെയർപേഴ്സൺ പി. ശ്രീജ, എ. സഫർ ഖയാൽ, ടി.സി. രാജു, ബി. മധു, നെടുങ്ങോലം രഘു, കെ. സേതുമാധവൻ, എൻ.സദാനന്ദൻ പിള്ള, അഡ്വ . കിഴക്കനേല സുധാകരൻ എന്നിവർ പ്രസംഗിക്കും. ദേവരാജൻ മാസ്റ്റർ അന്ത്യവിശ്രമം കൊള്ളുന്നതും പരവൂരിലെ മുനിസിപ്പൽ നെഹ്റു പാർക്ക് അങ്കണത്തിലാണ്. അവിടെയും വിവിധ സംഘടനകളുടെ ആഭിമുഖ്യത്തിൽ അന്ന് ഗാനാഞ്ജലി അടക്കമുള്ള പരിപാടികളും സംഘടിപ്പിച്ചി ട്ടുണ്ട്.

‘മാ കെയർ’ പദ്ധതിക്ക് കരുനാഗപ്പള്ളിയിൽ തുടക്കം

കരുനാഗപ്പള്ളി : വിദ്യാർഥികൾക്ക് ആരോഗ്യകരവും പോഷക സമ്പുഷ്ടമായ ലഘുഭക്ഷണങ്ങൾ, പാനീയങ്ങൾ, സ്കൂൾ സ്റ്റേഷനറി ഐറ്റങ്ങൾ, സാനിട്ടറി നാപ്കിനുകൾ എന്നിവ ലഭ്യമാക്കുന്നതിന് കുടുംബശ്രീയുടെ നേതൃത്വത്തിൽ നടത്തുന്ന മാ കെയർ പദ്ധതിക്ക് കരുനാഗപ്പള്ളിയിൽ തുടക്കമായി. കരുനാഗപ്പള്ളി ഗവ. ഹയർസെക്കൻഡറി സ്കൂളിൽ പദ്ധതിയുടെ ഉദ്ഘാടനം നഗരസഭ ചെയർമാൻ പടിപ്പുര ലത്തീഫ് നിർവഹിച്ചു. സിഡിഎസ് ചെയർപേഴ്സൺ ഷീബ അധ്യക്ഷയായി. നഗരസഭാ സ്ഥിരം സമിതി അധ്യക്ഷൻ റെജി ഫോട്ടോപാർക്ക്, വാർഡ് കൗൺസിലർ രമ്യ സുനിൽ, പിടിഎ പ്രസിഡന്‍റ് സനോജ്, പ്രഥമാധ്യാപിക മീര ബി.നായർ, കെ എസ് പുരം സുധീർ,രാധിക തുടങ്ങിയവർ പങ്കെടുത്തു. വിദ്യാർഥികൾക്ക് ആരോഗ്യകരവും പോഷക സമ്പുഷ്ടമായ ലഘുഭക്ഷണങ്ങൾ, പാനീയങ്ങൾ, സ്കൂൾ സ്റ്റേഷനറി ഐറ്റങ്ങൾ, സാനിട്ടറി നാപ്കിനുകൾ എന്നിവ ലഭ്യമാക്കുന്നതിന് സ്കൂൾ കോമ്പൗണ്ടിൽ തന്നെ സ്റ്റോറുകൾ തുറക്കുകയാണ് പദ്ധതിയുടെ ലക്ഷ്യം. വിദ്യാർഥികൾ, അധ്യാപകർ എന്നിവരുൾപ്പെടെയുള്ളവർക്ക് ഇവിടെ നിന്നും ഭക്ഷണ പാനീയങ്ങളും മറ്റു സാധനങ്ങളും മിതമായ നിരക്കിൽ വാങ്ങാനാകും.കുടുംബശ്രീ വനിതകൾക്ക് വരുമാനം ലഭ്യമാക്കുന്നതോടൊപ്പം ഉപജീവന മേഖലയെ ശക്തിപ്പെടുത്തുന്നതു കൂടി ലക്ഷ്യമിട്ടു കൊണ്ടാണ് മാ കെയർ പദ്ധതി നടപ്പാക്കുക. പദ്ധതി ആരംഭിക്കുന്നതു വഴി ലഘുഭക്ഷണങ്ങളും പാനീയങ്ങളും പഠന സഹായത്തിനാവശ്യമായ സ്റ്റേഷനറികളും ഉൾപ്പെടെ ലഭ്യമാക്കുന്നതു വഴി സ്കൂൾ സമയത്ത് കുട്ടികൾ സ്കൂളിൽ നിന്നും പുറത്തു പോകുന്നത് ഒഴിവാക്കാന ും അനാരോഗ്യകരമായ ഭക്ഷണങ്ങളും ലഹരി പദാർഥങ്ങളും ഉപയോഗിക്കുന്നതിനുള്ള സാഹചര്യങ്ങൾക്ക് തടയിടാനും കഴിയും. കിയോസ്കുകൾ എന്ന പേരിട്ടിരിക്കുന്ന ഇത്തരം സ്റ്റോറുകൾ നടത്താൻ താൽപര്യമുള്ള സംരംഭകരെ സിഡിഎസിന്‍റെ പിന്തുണയോടെ കണ്ടെത്തും. കുടുംബശ്രീയുടെ നേതൃത്വത്തിൽ സംരംഭ മാതൃകയിൽ ഇവർക്ക് പരിശീലനം നൽകും. കമ്യൂണിറ്റി എനർപ്രൈസ് ഫണ്ട്, ലിങ്കേജ് വായ്പ, ത്രിതല പഞ്ചായത്തുകളുടെ പദ്ധതി വിഹിതം എന്നിവ വഴി സംരംഭം ആരംഭിക്കുന്നതിനുള്ള സാമ്പത്തിക സഹായവും ലഭ്യമാക്കും.

പിക്കപ്പ് വാൻ തട്ടിയെടുത്തയാളെ വാഹന ഉടമ കണ്ടെത്തി

കൊല്ലം: ഇതു പോലീസിന്‍റെ വിജയഗാഥയല്ല. പകരം മോഷ്ടിക്കപ്പെട്ട പിക്കപ്പ് വാൻ കണ്ടെത്താൻ വേണ്ടി പിന്നാലെ അലഞ്ഞ വാഹനമുടമയുടെ കഥയാണ്. അർധരാത്രിയിൽ നഷ്ടപ്പെട്ട വാഹനത്തെ കുറിച്ചു വിവരം അറിഞ്ഞ നിമിഷം മുതൽ പിന്നാലെ അന്വേഷിച്ചുനടന്ന വാഹനം ഉടമയ്ക്കു വാഹനവും കള്ളനെയും കണ്ടെത്താൻ കഴിഞ്ഞ കഥയാണിത്. പോലീസിൽ പരാതി കൊടുത്തശേഷം സ്വന്തം നിലയിൽ അന്വേഷിച്ചു കള്ളൻ വാഹനവുമായി പോയ വഴിയിലൂടെ സഞ്ചരിച്ചു വാസസ്ഥലത്തെത്തി അവനെ പൊക്കി അതേ വാഹനത്തിൽ തിരിച്ചെത്തിച്ചതും വാഹനമുടമയാണ്. കൊല്ലം നഗരത്തിൽ ഗ്യാസ് ഏജൻസി നടത്തുന്ന ശിവഗ്യാസ് ഉടമ വിനായകനാണ് താരം. മുണ്ടയ്ക്കൽ തുമ്പറ മാർക്കറ്റിനു സമീപം പാർക്ക് ചെയ്തിരുന്ന പിക്കപ്പ് വാൻ കഴിഞ്ഞദിവസം രാത്രി പേരൂർക്കട സ്വദേശി അക്ഷയ് കടത്തി കൊണ്ടുപോയത്. 17 കാലി ഗ്യാസ് സിലിണ്ടർ വാഹനത്തിലുണ്ടായിരുന്നു. ആക്രികച്ചവടത്തിന് എന്ന വ്യാജേനയാണ് അക്ഷയ് വാഹനമോഷണത്തിനെത്തിയത്. ഒരാഴ്ചയായി ഇയാൾ കറങ്ങി തിരിയുന്നുണ്ടായിരുന്നു. തിങ്കളാഴ്ച വാഹനം നഷ്ടപ്പെട്ട വിവരം അറിഞ്ഞപ്പോൾ വിനായകൻ പോലീസ് സ്റ്റേഷനിൽ പരാതി നൽകി. ഇതിനിടയിൽ സ്വന്തം നിലയിൽ അന്വേഷണം ആരംഭിച്ചു. നാട്ടിലെ സർവ കാമറകളും പരിശോധിച്ചു. ഇതിൽ നിന്നാണ് വാഹനവുമായി കടന്നു കളഞ്ഞയാളെ കണ്ടെത്തിയത്. വൈകുന്നേരത്തോടെ തെങ്കാശിയിൽ നിന്നും ഒരു യുവാവിന്‍റെ ഫോൺവിളി എത്തി. അവിടെ വാഹനം കൊണ്ടുവന്നയാളുടെ ഫോട്ടോ ഇട്ടുതരാൻ ആവശ്യപ്പെട്ടു. ഫോട്ടോ കണ്ടപ്പോഴാണ് അക്രിക്കാരനെ മനസിലായത്. വാഹനം പൊളിക്കാൻ കിട്ടിയപ്പോൾ സംശയം തോന്നി വാഹനത്തിലുള്ള ഫോണിൽ വിളിച്ചതായിരുന്നു ഇയാൾ. പൊളിക്കാൻ എടുക്കുന്ന സ്ഥാപനത്തിലെ ആളായിരുന്നു ഇത്. ഇതു കേട്ടതോടെ തെങ്കാശിയിലേക്കു സുഹൃത്തുക്കളുമായി പുറപ്പെട്ടു. തെങ്കാശിയിൽവച്ചു രക്ഷപ്പെടാൻ ശ്രമിച്ച മോഷ്ടാവിനെ സംഘം പിൻതുടർന്ന് പിടികൂടി. ഇതി നായി തെങ്കാശി പോലീസിന്‍റെ സഹായവും തേടി. തുടർന്ന് ഇയാളെ പോലീസ് കസ്റ്റഡിയിലെടുത്ത ശേ ഷം കൊല്ലം ഈസ്റ്റ് പോലീസിന് കൈമാറി. എന്‍റെ ഉപജീവനമാർഗമായ വാഹനം നഷ്ടപ്പെടുന്നത് എനിക്ക് സഹിക്കാൻ പറ്റില്ലെന്ന് വിനായകൻ ദീപികയോട് പറഞ്ഞു.

യൂണിറ്റി മാൾ കേരളത്തിലും; ഉദ്ഘാടനം ഫെബ്രുവരിയിൽ

കൊല്ലം: പരമ്പരാഗത ഉത്പന്നങ്ങളും ജിഐ ടാഗ് ചെയ്ത വസ്തുക്കളുടെ വില്പന പ്രോത്സാഹിപ്പിക്കുന്നതിനുള്ള കേന്ദ്ര സർക്കാർ സ്ഥാപനമായ യൂണിറ്റി (ഏകതാ) മാൾ കേരളത്തിലും. സൂക്ഷ്മ ചെറുകിട ഇടത്തരം സംരഭങ്ങളെ (എംഎസ്എംഇ ) പിന്തുണയ്ക്കുന്നതിനും കരകൗശല വിദഗ്ധർക്ക് വിപണി കണ്ടെത്തുന്നതിനുമുള്ള മാളിന്‍റെ നിർമാണ പ്രവർത്തനങ്ങൾ തിരുവനന്തപുരം ജില്ലയിലെ പള്ളിപ്പുറത്ത് യുദ്ധകാലാടിസ്ഥാനത്തിൽ പുരോഗമിക്കുകയാണ്. 2026 ഫെബ്രുവരിയിൽ മാൾ പ്രവർത്തന സജ്ജമാകുമെന്നാണ് അധികൃതരുടെ പ്രതീക്ഷ. 2.5 ഏക്കറിൽ 1.9 ലക്ഷം ചതുരശ്രയടി വിസ്തീർണത്തിലാണ് മാൾ നിർമിക്കുന്നത്. 120 കോടി രൂപയാണ് പദ്ധതിയുടെ ചെലവ്. ഊരാളുങ്കൽ ലേബർ കോൺട്രാക്ട് സൊസൈറ്റിക്കാണ് നിർമാണ ചുമതല. നിർമാണ പ്രവർത്തികളുടെ 65 ശതമാനം പൂർത്തിയായി.കേരളത്തിന്‍റെ തനതായ കയർ, കൈത്തറി, കരകൗശലം തുടങ്ങിയ പ്രാദേശിക ഉത്പന്നങ്ങൾ വിപണനം ചെയ്യുന്നതിനും സംസ്ഥാനത്തെ വിനോദ സഞ്ചാര മേഖലയ്ക്ക് ഉത്തേജനം നൽകുന്നതിനുമായുള്ള കേന്ദ്രമായി മാൾ മാറുമെന്നാണ് പ്രതീക്ഷ. ‘ഒരു ജില്ല - ഒരു ഉത്പണം' എന്ന ബാനറിൽ സംസ്ഥാനത്തെ എല്ലാ ജില്ലകളിൽ നിന്നുമുള്ള ഉത്പന്നങ്ങൾ പ്രദർശന വിപണനം നടത്തുന്നതിന് 50 സ്റ്റാളുകൾ മാളിൽ ഉണ്ടാകും. മറ്റ് സംസ്ഥാനങ്ങളിൽ നിന്നും കേന്ദ്രഭരണ പ്രദേശങ്ങളിൽ നിന്നുമുള്ള ഉത്പന്നങ്ങൾ വിപണനം നടത്തുന്നതിനും മാളിൽ പ്രത്യേക ഇടം നൽകും. ഇത് കൂടാതെ അതിവിശാലമായ റീട്ടയിൽ ഔട്ട് ലറ്റുകൾ, എക്സിബിഷൻ ഏരിയകൾ, 10000 പേർക്ക് ഇരിക്കാവുന്ന ഫുഡ് കോർട്ട്, 380 പേർക്ക് വീതം ഇരിക്കാവുന്ന രണ്ട് മൾട്ടിപ്ലക്സ് തിയേറ്ററുകൾ, ഇവൻ്റ് സോണുകൾ, ഗയിമിംഗ് സോൺ, 200 ൽ അധികം വാഹനങ്ങൾക്കുള്ള പാർക്കിംഗ് ഏരിയ എന്നിവയും മാളിന്‍റെെ ഭാഗമാണ്. രാജ്യത്തെ എല്ലാ സംസ്ഥാനങ്ങളിലും യൂണിറ്റി മാളുകൾ ആരംഭിക്കുന്ന എന്നതാണ് കേന്ദ്ര സർക്കാരിന്‍റെ പദ്ധതി, ആദ്യമാൾ മധ്യപ്രദേശിലെ ഉജ്ജയിനിയിൽ ഉടൻ പ്രവർത്തനം ആരംഭിക്കും. ഇതര സംസ്ഥാനങ്ങൾക്കെല്ലാം മാൾ ആരംഭിക്കുന്നതിന് പദ്ധതിയിൽ തുക അനുവദിച്ചിട്ടുമുണ്ട്.

ചെണ്ടുമല്ലി കൃഷി വിളവെടുപ്പ്

ആര്യങ്കാവ് : അഞ്ചൽ ബ്ലോക്ക് പഞ്ചായത്തിന്‍റെ വാർഷിക പദ്ധതിയിൽ ഉൾപ്പെടുത്തി ആര്യങ്കാവ് ഗ്രാമപഞ്ചായത്തിലെ ആര്യങ്കാവ് വാർഡിൽ പ്രവർത്തിക്കുന്ന കൈരളി അയൽക്കൂട്ടവും ആര്യങ്കാവ് എസ്എൻഡിപി ശാഖ വനിതാ സംഘവും സംയുക്തമായി നടത്തിയ ചെണ്ടുമല്ലി കൃഷിയുടെ വിളവെടുപ്പ് നടന്നു. ബ്ലോക്ക് പഞ്ചായത്ത് ക്ഷേമകാര്യ സ്ഥിരം സമിതി അധ്യക്ഷ ലേഖഗോപാലകൃഷ്ണന്‍റെ അധ്യക്ഷതയിൽ ഗ്രാമപഞ്ചായത്ത് പ്രസിഡന്‍റ് സുജാ തോമസ് വിളവെടുപ്പ് ഉദ്ഘാടനം നിര്‍വഹിച്ചു. കൃഷി ഓഫീസർ ഡോ. എബി മോൾ, കൃഷി അസിസ്റ്റന്‍റ് സുനിൽ രാജ് തുടങ്ങിയവർ പങ്കെടുത്തു.

കടൽ കയറ്റം: ചവറ കരിത്തുറ നിവാസികൾ ഭീതിയിൽ

ചവറ: രണ്ടുദിവസമായി ഉണ്ടായ കടൽ കയറ്റം കരിത്തുറ പള്ളിക്ക് തെക്ക് വശം തീരദേശവാസികളെ ഭീതിയിലാഴ്ത്തി.ഇന്നലെ രാവിലെ 11.30ന് തുടങ്ങിയ കടൽ കയറ്റം വൈകുന്നേരം മൂന്നു വരെ നീണ്ടു നിന്നു. കഴിഞ്ഞ 22ന് രാത്രിയിലും കടൽക്കറ്റം ഉണ്ടായതായി പ്രദേശവാസികൾ പറയുന്നു. ശക്തമായ തിരമാല അടിച്ചാൽ വീടുകളിലേക്ക് കടൽവെള്ളം കയറുന്ന അവസ്ഥയാണ്. ഇന്നലെ ഉച്ചയ്ക്ക് ഉണ്ടായ കടൽക്കയറ്റത്തിൽ കരയിലിരുന്ന കട്ട മരം ഒലിച്ചു പോയി. കടൽ കയറിയ ഭാഗത്ത് കടൽഭിത്തിക്ക് വേണ്ടത്ര പൊക്കം ഇല്ലാത്തതുകൊണ്ടാണ് കടൽ കയറാൻ ഇടയായതെന്ന് നാട്ടുകാർ ആരോപിക്കുന്നുണ്ട്. നിലവിൽ മൺ കൂനകൾ വച്ചാണ് കടൽക്കയറ്റം തടയാൻ ശ്രമിക്കുന്നത്. എന്നാൽ ശക്തമായ കടൽ കയറ്റം ഉണ്ടായാൽ ഈ മൺ കൂനകൾ എല്ലാം ഒലിച്ചു പോകുന്ന അവസ്ഥയാണ്. അധികൃതർ എത്രയും വേഗം ശാസ്ത്രീയമായ കടൽഭിത്തി നിർമിക്കാൻ വേണ്ട നടപടി കൈക്കൊള്ളണമെന്ന് പ്രദേശവാസികൾ ആവശ്യപ്പെട്ടു.

മുൻ മന്ത്രി സി.വി. പത്മരാജന് പൂർണ ഔദ്യോഗിക ബഹുമതി നൽകിയില്ലെന്ന് : വിവാദം കത്തുന്നു

കൊല്ലം: മാസങ്ങൾക്കു മുൻപ് അന്തരിച്ച മുൻ മന്ത്രിയും കെപിസിസി മുൻ പ്രസിഡന്‍റുമായ സി.വി. പത്മരാജന്‍റെ മരണാനന്തര ചടങ്ങിൽ പൂർണ ഔദ്യോഗിക ബഹുമതി നൽകിയില്ലെന്ന വിവരം പുറത്തുവന്നതോടെ വിവാദം കത്തുന്നു. കോൺഗ്രസ് നേതാക്കൾ പ്രസ്താവനകളുമായി രംഗത്തിറങ്ങി. കോൺഗ്രസ് ജില്ലാ നേതൃത്വവും സംസ്ഥാനനേതൃത്വവും ശക്തമായ ഭാഷയിലാണ് പ്രതികരിച്ചിരിക്കുന്നത്. ഇടക്കാലത്തു മുഖ്യമന്ത്രിയുടെ ചുമതല കൂടി വഹിച്ച മുതിർന്ന രാഷ്‌ട്രീയ നേതാവിന്‍റെ മരണാനന്തര ചടങ്ങിൽ പോലീസ് ഗാർഡ് ഓഫ് ഓണർ നൽകിയെങ്കിലും ആചാരവെടി നൽകാൻ മുഖ്യമന്ത്രിയുടെ പ്രത്യേക ഉത്തരവ് ഉണ്ടായില്ലെന്നാണ് വിവാദമായിരിക്കുന്നത്. ഭരണഘടനാ പദവികളോ മറ്റ് ഉന്നത പദവികളോ വഹിച്ചിരുന്നവർ അന്തരിക്കുമ്പോൾ അന്തിമോപചാരമായി ഔദ്യോഗിക ബഹുമതികളും പുറമേ ആചാരവെടിയും നൽകാറുണ്ട്. ഇതിനു മുഖ്യമന്ത്രിയുടെ പ്രത്യേക നിർദേശം വേണം. ആചാരവെടി മുഴക്കിയില്ലെന്നാണ് പുറത്തുവരുന്ന വിവരം. ബോധപൂർവമായ അവഗണന: ഡിസിസി പ്രസിഡന്‍റ് സി.വി. പത്മരാജന്‍റെ മരണാനന്തര ചടങ്ങ് പൂർണ ഔദ്യോഗിക ബഹുമതി നൽകാതിരുന്നത് ഒന്നുകിൽ സർക്കാരിന്‍റെ കെടുകാര്യസ്ഥത അല്ലെങ്കിൽ ബോധപൂർവമായ അവഗണനയെ ന്ന് ഡിസിസി പ്രസിഡന്‍റ് പി.രാജേന്ദ്രപ്രസാദ്. കെപിസിസി പ്രസിഡന്‍റായും രണ്ട് മന്ത്രിസഭകളിലായി വിവിധ വകുപ്പുകളുടെ ചുമതല വഹിച്ചിട്ടുള്ളയാളും കെ. കരുണാകരൻ അപകടത്തിൽപ്പെട്ട് ചികിത്സയ്ക്കു വിദേശത്തു പോയപ്പോൾ മുഖ്യമന്ത്രിയുടെ ചാർജ് വഹിച്ചിട്ടുള്ളയാളുമായ സി.വി. പത്മരാജന്‍റെ മരണാനന്തര ചടങ്ങുകൾക്ക് പൂർണ ഔദ്യോഗിക ബഹുമതി നൽകാതിരുന്നത് തികച്ചും പ്രതിഷേധാർഹമാണ്. താൻ ഏറ്റെടുത്തിട്ടുള്ള മുഴുവൻ സ്ഥാനങ്ങളും തികഞ്ഞ പ്രാഗൽഭ്യത്തോടെയും ഉത്തരവാദിത്തബോധത്തോടും കൈകാര്യം ചെയ്ത ഒരു പൊതു പ്രവർത്തകൻ അർഹിക്കുന്ന അംഗീകാരം നൽകുന്നതിൽ മുഖ്യമന്ത്രിയും സംസ്ഥാന ഗവൺമെന്‍റും കാട്ടിയ നിരുത്തരവാദപരമായ നിലപാടുകളിൽ ശക്തമായ പ്രതിഷേധം ജില്ലാ കോൺഗ്രസ് കമ്മിറ്റി രേഖപ്പെടുത്തി. ബഹുമതി നിഷേധിച്ചതിന് പിന്നിൽ രാഷ്്‌ട്രീയ വേർതിരിവ്: അഡ്വ. ബിന്ദു കൃഷ്ണ മുതിർന്ന കോൺഗ്രസ് നേതാവ് സി.വി. പത്മരാജന്‍റെ മരണാനന്തര ചടങ്ങിൽ പൂർണ ഔദ്യോഗിക ബഹുമതി നൽകാൻ സർക്കാർ വിസമ്മതിച്ചതിനു പിന്നിൽ രാഷ്‌ട്രീയമെന്നു കെപിസിസി രാഷ്ട്രീയ കാര്യ സമിതി അംഗം അഡ്വ. ബിന്ദു കൃഷ്ണ ആരോപിച്ചു. ആക്‌ടിംഗ് മുഖ്യമന്ത്രി പദവി വഹിച്ചിരുന്ന, എതിരാളികൾ പോലും ആദരിച്ചിരുന്ന സൗമ്യനുമായ മുതിർന്ന നേതാവ് സി.വി. പത്മരാജൻ അർഹിക്കുന്ന രീതിയിലുള്ള യാത്രയയപ്പ് നൽകാത്തത് മര്യാദകേടും അനാദരവുമാണെന്ന് അഡ്വ. ബിന്ദു കൃഷ്ണ കൂട്ടിച്ചേർത്തു. ഗാർഡ് ഓഫ് ഓണറിനൊപ്പം ആചാരവെടി മുഴക്കാൻ മുഖ്യമന്ത്രിയുടെ ഓഫീസിൽനിന്നു പെർമിഷൻ നിഷേധിച്ചത് കൊണ്ടാണ് സി.വി പത്മരാജന് പൂർണ ഔദ്യോഗിക ബഹുമതി നൽകി യാത്രയയക്കാൻ സാധിക്കാതിരുന്നതെന്നും അഡ്വ. ബിന്ദു കൃഷ്ണ പറഞ്ഞു.

ഇണ്ടിളയപ്പൻ ക്ഷേത്രത്തിൽ നവരാത്രി ഉത്സവം തുടങ്ങി

കല്ലുവാതുക്കൽ: നടയ്ക്കൽ - വരിഞ്ഞം ഊഴായ്ക്കോട് ഇണ്ടിളയപ്പൻ ക്ഷേത്രത്തിൽ നവരാത്രി ഉത്സവം തുടങ്ങി. ക്ഷേത്രം തന്ത്രിഹോരക്കാട്ടില്ലത്ത് ഈശ്വരൻ നമ്പൂതിരി ഭദ്രദീപം തെളിച്ച് ഉദ്ഘാടനം ചെയ്തു. ചടങ്ങിൽ ക്ഷേത്രം മേൽശാന്തി കൃഷ്ണകുമാർ, ഭാരവാഹികളായ പി. പുരുഷോത്തമ കുറുപ്പ്, എസ്. സേതുലാൽ, എസ്. ആർ. മുരളീധര കുറുപ്പ്, പുഷ്പചന്ദ്രൻ ഉണ്ണിത്താൻ, കല്ലുവാതുക്കൽ അജയകുമാർ, വിനോദ്, രതീഷ് കുമാർ, വിജയകുമാർ, രാജീവ്, സുനൂ കുമാർ എന്നിവരും മറ്റു ഭക്തജനങ്ങളും പങ്കെടുത്തു. ആഘോഷ പരിപാടികൾ ഒക്ടോബർ രണ്ടിന് വിജയദശമി ദിനത്തിൽ സമാപിക്കും. നവരാത്രി പൂജകൾ, ദേവി ഭാഗവത പാരായണം, എല്ലാ ദിവസവും വൈകുന്നേരം അഞ്ചു മണി മുതൽ സമൂഹ ലളിതാസഹസ്രനാമജപം,സംഗീത കച്ചേരി, ഗാനാര്‍ച്ചന, പ്രഭാഷണം, വയലിൻ കച്ചേരി, കുട്ടികളുടെഭജന, കൈകൊട്ടിക്കളി, എന്നിവയും, 30ന് ദുർഗാഷ്ടമി ദിവസം വൈകുന്നേരം ആറിന് പൂജവയ്പ്പ് ചടങ്ങുകളും, ഒക്ടോബർ രണ്ടിന് വിജയദശമി ദിനത്തിൽ രാവിലെ എട്ടു മുതൽ പൂജയെടുപ്പ്, തുടർന്ന് വിദ്യാരംഭം, പൂജകൾക്ക് പുറമെ വൈകുന്നേരം ഏഴിന് സംഗീത കച്ചേരി.

റീടാറിംഗ് കഴിഞ്ഞ അമ്പതേക്കർ പാത നാലു മാസങ്ങൾക്കുള്ളിൽ തകർന്നു

കുളത്തൂപ്പുഴ: റീടാറിംഗ് കഴിഞ്ഞ് നാലു മാസങ്ങൾക്കുള്ളിൽ റോഡ് തകർന്നു. ആദിവാസി മേഖലയിലേക്കുള്ള ഗതാഗതസൗകര്യം സുഗമമാക്കുന്നതിനായി ജില്ലാ പഞ്ചായത്ത് ഫണ്ടുപയോഗിച്ച് നിർമിച്ച അമ്പതേക്കർ പാതയാണ് നിർമാണം പൂർത്തിയായി നാലുമാസം എത്തുന്നതിനു മുമ്പായി ടാർ പൊട്ടിയടർന്ന് മെറ്റലും പൊടിയും ഇളകി മാറി കുഴികൾ രൂപപ്പെട്ടിരിക്കുന്നത്. ഇക്കഴിഞ്ഞ മേയിലാണ് 30 ലക്ഷം രൂപ മുതൽ മുടക്കിൽ ഡീസെ ന്‍റുമുക്ക് മുതൽ അമ്പതേക്കറിലെ പടിഞ്ഞാറേ അംഗൻവാടിക്ക് സമീപംവരെ രണ്ടുകിലോമീറ്റർ ദൂരം പൊട്ടിപ്പൊളിഞ്ഞ പാത റീടാറിംഗ് ചെയ്തു നവീകരിച്ചത്. കനത്ത മഴയുള്ള സമയത്ത് നിർമാണജോലി ആരംഭിക്കുമ്പോൾ തന്നെ നാട്ടുകാരിൽ ചിലർ മഴക്കാലത്ത് ടാർ ചെയ്യുന്നത് ഗുണകരമാവില്ലെന്ന് കരാറുകാരെയും സ്ഥലത്തുണ്ടായിരുന്ന പൊതുമരാമത്ത് വിഭാഗം ഉദ്യോഗസ്ഥരേയും അറിയിച്ചിരുന്നു. എന്നാൽ, അത്തരം ആരോപണങ്ങൾക്കൊന്നും ശാസ്ത്രിയമായ അടിസ്ഥാനമില്ലെന്ന് പറഞ്ഞ് അധികൃതർ അതൊക്കെ തള്ളുകയായിരുന്നു. റോഡി െ ന്‍റ റീടാറിംഗ് മഴക്കാലത്ത് തന്നെ തുടർന്ന് പൂർത്തിയാക്കി. എന്നാൽ, നാലുമാസമെത്തും മുമ്പ് തന്നെ പലയിടങ്ങളിലായി നൂറു മീറ്റലധികം സ്ഥലത്തെ ടാർ പൊട്ടിപ്പൊളിഞ്ഞ് ഇളകിപ്പോവുകയായിരുന്നു. അവിടെ പലയിടത്തും കുഴികൾ രൂപപ്പെട്ടിരിക്കുകയാണ്. ഓരോ നിർമാണ പ്രവൃത്തികളുടെയും നിലനിൽപ് കാലാവധി വ്യക്തമായി കരാറിൽ രേഖപ്പെടുത്തിയിട്ടുണ്ടെന്നിരിക്കെ നാലുമാസം എത്തുന്നതിനുള്ളിൽ റോഡ് തകരാനിടയായത് നിർമാണ പ്രവർത്തിയുടെ ഗുണനിലവാരമില്ലായ്മയാണെന്ന് നാട്ടുകാർ ആരോപിച്ചു. അടിയന്തരമായി അധികൃതർ ഇടപെട്ട് റോഡിലെ തകരാർ പരിഹരിക്കുന്നതിനു നടപടിസ്വീകരിക്കണമെന്നാണ് നാട്ടുകാർ ആവശ്യപ്പെടുന്നത്.

ജില്ലയിലെ വിവിധ നിര്‍മാണ പ്രവര്‍ത്തനങ്ങള്‍ വേഗത്തിലാക്കും: മന്ത്രി ബാലഗോപാല്‍

കൊല്ലം: ജില്ലയില്‍തുടരുന്ന വിവിധ നിര്‍മാണപ്രവര്‍ത്തനങ്ങള്‍ വേഗത്തിലാക്കാന്‍ ജില്ലയുടെ ചുമതലയുമുള്ള മന്ത്രി കെ. എന്‍. ബാലഗോപാല്‍ നിര്‍ദേശം നല്‍കി. നിര്‍മാണപ്രവര്‍ത്തനപുരോഗതി വിലയിരുത്താനായി ചിന്നക്കട പൊതുമരാമത്ത് വിശ്രമമന്ദിരത്തില്‍ വിളിച്ചുചേര്‍ത്ത യോഗത്തില്‍ നിലവാരമുറപ്പാക്കിയുള്ള പദ്ധതിപൂര്‍ത്തീകരണത്തിനു പ്രാമുഖ്യം നല്‍കുമെന്നു മന്ത്രി വ്യക്തമാക്കി. കെഎസ് ആര്‍ടിസി ബസ് സ്റ്റേഷന്‍ നിര്‍മാണത്തിനുള്ള നടപടികളാണ് ദ്രുതഗതിയില്‍ പുരോഗമിക്കുന്നത്. ശ്രീനാരായണഗുരു സാംസ്‌കാരിക സമുച്ചയം, പിഎസ് സി ഓഫീസ്, ഉമ്മന്നൂര്‍, കരീപ്ര, എഴുകോണ്‍ വില്ലേജ് ഓഫീസുകള്‍ എന്നിവയുടെ നിര്‍മാണഘട്ടപുരോഗതിയും വിലയിരുത്തി. ജില്ലാ കളക്ടര്‍ എന്‍. ദേവിദാസ്, എഡിഎം ജി.നിര്‍മല്‍ കുമാര്‍, ഡെപ്യൂട്ടി കളക്ടര്‍ ആര്‍. ബീനാറാണി, തഹസില്‍ദാര്‍ ജി. വിനോദ് കുമാര്‍തുടങ്ങിയവര്‍ പങ്കെടുത്തു.

അമൃതാനന്ദമയി മഠം 6000 ശൗചാലയങ്ങൾ നിർമിച്ചു നൽകും

കൊല്ലം: അമൃതാനന്ദമയിയുടെ എഴുപത്തിരണ്ടാം ജന്മദിനാഘോഷങ്ങളുടെ ഭാഗമായി മാതാ അമൃതാനന്ദമയി മഠം കേരളം, തമിഴ്‌നാട്, കർണാടക എന്നീ സംസ്ഥാനങ്ങളിലായി 6000 നിർധന കുടുംബങ്ങൾക്ക് സൗജന്യമായി ശൗചാലയങ്ങൾ നിർമിച്ച് നൽകും. മഠത്തി ന്‍റെ അമലഭാരതം പദ്ധതിയുടെ ഭാഗമായാണ് ഈ ബൃഹദ് സംരംഭം. ഇന്ത്യയിലുടനീളം വെളിയിട വിസർജന വിമുക്ത ഗ്രാമങ്ങൾ യാഥാർഥ്യമാക്കുക എന്നതാണ് ഇതിലൂടെ ലക്ഷ്യമിടുന്നത്. മഠത്തി െന്‍റ ഗ്രാമീണ ശാക്തീകരണ പദ്ധതിയായ അമൃത സെർവിലൂടെ ഇതിനോടകം രാജ്യത്തെ നിരവധി ഗ്രാമങ്ങളിൽ ആയിരക്കണക്കിന് ശൗചാലയങ്ങൾ നിർമിച്ചു കഴിഞ്ഞു. സ്ത്രീകളുടെ വ്യക്തിപരമായ ശാക്തീകരണവും സുരക്ഷയും ഒരുപോലെ ലക്ഷ്യമിട്ട് അവർക്ക് കെട്ടിട നിർമാണത്തിൽ (മേസ്തിരിപ്പണിയിൽ) ആവശ്യമായ നൈപുണ്യ പരിശീലനവും മഠം നൽകിവരുന്നുണ്ട്. ഈ പ്രവർത്തനങ്ങളുടെ ഫലമായി നിരവധി ഗ്രാമങ്ങൾ വെളിയിട വിസർജന വിമുക്തമായി പ്രഖ്യാപിക്കപ്പെട്ടിട്ടുണ്ട്. 2015-ൽ ഭാരത സർക്കാർ ആവിഷ്കരിച്ച സ്വച്ഛ് ഭാരത് അഭിയാൻ പദ്ധതിയ്ക്ക്, ഗംഗാ നദിയുടെ തീരങ്ങളിൽ ശൗചാലയങ്ങൾ നിർമിക്കുന്നതിനായി 100 കോടി രൂപ സംഭാവന നൽകിയിരുന്നു.

അതുല്യ കേസ്: തുടർവാദം 29ന്

കൊല്ലം: ഷാര്‍ജയില്‍ ചവറ തേവലക്കര കോയിവിള സ്വദേശി അതുല്യയെ ജീവനൊടുക്കിയ നിലയില്‍ കണ്ടെത്തിയ കേസിലെ പ്രതി സതീഷ് ശങ്കറിന്‍റെ മുന്‍കൂര്‍ ജാമ്യാപേക്ഷ റദ്ദാക്കണമെന്ന ഹര്‍ജിയില്‍ തുടര്‍വാദം കേള്‍ക്കുന്നതിനു കേസ് 29ന് വീണ്ടും പരിഗണിക്കും. ജില്ലാ പ്രിന്‍സിപ്പല്‍ സെഷന്‍സ് ജഡ്ജി എന്‍.വി രാജുവാണ് കേസ് പരിഗണിക്കുന്നത്. അതുല്യയുടെ ശരീരത്തിലെ മുറിവുകളുടെ ഫോട്ടോകളുടേയും സതീഷ് ഉപദ്രവിക്കുന്നതിന്‍റെ വീഡിയോ ദൃശ്യങ്ങളുടേയും ശാസ്ത്രീയ പരിശോധനാഫലം പ്രോസിക്യൂഷന്‍ കോടതിയില്‍ ഹാജരാക്കിയെങ്കിലും ഫോട്ടോയെടുത്ത തീയതി സംബന്ധിച്ച അവ്യക്തത തുടരുകയാണ്. അതുല്യ ആത്മഹത്യ ചെയ്യുന്നതിനു മുമ്പുണ്ടായ മുറിവുകളാണെന്നാണ് പ്രതിഭാഗത്തിന്‍റെ വാദം. ഈ വാദം ശരിവച്ചാണ് കോടതി ചിത്രങ്ങളുടെ ആധികാരികത തെളിയിക്കുന്ന ശാസ്ത്രീയ പരിശോധനാ റിപ്പോര്‍ട്ട് ഹാജരാക്കാന്‍ പ്രോസിക്യൂഷനോട് ആവശ്യപ്പെട്ടത്. എന്നാൽ, ഫോട്ടോ എടുത്തത് ഏതു തീയതിയിലാണെന്നു തെളിയിക്കാൻ പ്രോസിക്യൂഷനായില്ല. ജൂലൈ 19ന് പുലര്‍ച്ചെയാണ് അതുല്യയെ ഷാര്‍ജയിലെ ഫ്‌ളാറ്റില്‍ മരിച്ച നിലയില്‍ കണ്ടെത്തിയത്. നിരന്തര പീഡനത്തെ തുടര്‍ന്നാണ് മകള്‍ ജീവനൊടുക്കിയതെന്നാണ് ശാസ്താംകോട്ട മനക്കര സ്വദേശി സതീഷ് ശങ്കറിന് എതിരായി മാതാപിതാക്കൾ പോലീസിൽ പരാതി നൽകിയിട്ടുള്ളത്.

കോഴിമുട്ട ഉത്പാദനത്തിൽ സ്വയംപര്യാപ്തതയിലേക്ക് ആദിച്ചനല്ലൂർ ഗ്രാമം

കൊട്ടിയം: കോഴിമുട്ട ഉത്പാദനത്തിൽ സ്വയംപര്യാപ്തത കൈവരിക്കുവാൻ ഒരു ഗ്രാമം ഒരുങ്ങുന്നു. കോഴിമുട്ട ആഹാരക്രമത്തിൽ ഉൾപ്പെടുത്തിയാൽ ലഭിക്കുന്ന ഗുണങ്ങൾ സാധാരണക്കാരിൽ എത്തിക്കുക, ഓരോ കുടുംബവും അവർക്കാവശ്യമായ കോഴിമുട്ട സ്വന്തം വീട്ടിൽ തന്നെ ലഭിക്കുന്നതിനായി ആദിച്ചനല്ലൂർ പഞ്ചായത്തിലെ പതിനാറാം വാർഡിലെ മുഴുവൻ വീടുകളിലും അഞ്ചു കോഴി കുഞ്ഞുങ്ങൾ വീതമുള്ള ഓരോ യൂണിറ്റ്‌ എന്ന പദ്ധതി ആരംഭിച്ചിരിക്കുകയാണ്. അടുക്കള മുറ്റത്തെ കോഴി വളർത്തൽ എന്ന ആദിച്ചനല്ലൂർ പഞ്ചായത്തി െ ന്‍റ പദ്ധതിപ്രകാരമാണ് ഇത്. ഓരോ റേഷൻ കാർഡിനും അഞ്ച് കോഴി കുഞ്ഞുങ്ങളടങ്ങുന്ന ഒരു യൂണിറ്റ് വീതമാണ് നൽകിയിരിക്കുന്നത്. പഞ്ചായത്തിലെ 16-ാം വാർഡിൽ നടപ്പാക്കിയ ഈ പദ്ധതിയുടെ ഉദ്ഘാടനം പഞ്ചായത്ത് മുൻ ക്ഷേമകാര്യ സ്റ്റാൻഡിംഗ്കമ്മിറ്റി ചെയർമാൻ പ്ലാക്കാട് ടിങ്കു നിർവഹിച്ചു. സിഡിഎസ് അംഗം ആർ. കലജാദേവി, ആർ. രമേശൻ, ശിവദാസൻ പിള്ള, ഇബ്രാഹിംകുട്ടി എന്നിവർ പ്രസംഗിച്ചു.

വെട്ടിക്കവല പെരുംകുഴി ഓർത്തഡോക്സ് പള്ളി വജ്ര ജൂബിലി ആഘോഷിച്ചു

കൊട്ടാരക്കര : വെട്ടിക്കവല പെരുംകുഴി സെന്‍റ് ജോർജ് ഓർത്തഡോക്സ് പള്ളിയുടെ വജ്ര ജൂബിലി ആഘോഷങ്ങൾ ഓർത്തഡോക്സ് സഭ സുന്നഹദോസ് സെക്രട്ടറി ഡോ. യൂഹാനോൻ മാർ ക്രിസോസ്റ്റമോസ് ഉദ്ഘാടനം ചെയ്തു. ഭദ്രാസനാധിപൻ ഡോ. യൂഹാനോൻ മാർ തേവോദോറോസ് അധ്യക്ഷത വഹിച്ചു. ചാരിറ്റി പ്രവർത്തനങ്ങളുടെ ഉദ്‌ഘാടനം തിരുവനന്തപുരം ഭദ്രാസനാധിപൻ ഡോ. ഗബ്രിയേൽ മാർ ഗ്രീഗോറിയോസ് നിർവഹിച്ചു. വികാരി എ.ജെ. ശമുവേൽ റമ്പാൻ, ഭദ്രാസന സൺ‌ഡേ സ്കൂൾ ഡയറക്ടർ ഡോ.എം. കെ.പി. റോയി, ട്രഷറർ ബിജു.എം.ജോൺ, എം .തോമസ്, ബിജോയ് തങ്കച്ചൻ, ഫാ.ജോസഫ് ജോർജ് എന്നിവർ പ്രസംഗിച്ചു. വിദ്യാഭാസ സ്കോളർഷിപ്പ്, ചാരിറ്റി വിതരണം, മുൻ വികാരിമാരെയും 75 വയസുകഴിഞ്ഞ മാതാപിതാക്കളെയും ആദരിക്കൽ എന്നിവയും നടന്നു.

ജ്വല്ലറിയിൽ നിന്നും മോതിരം കവർന്നു

കൊട്ടിയം: സ്വർണമോതിരം വാങ്ങാനെന്ന വ്യാജേന സ്വർണക്കടയിലെത്തിയ യുവാവ് മുക്ക് പണ്ടം പകരമായി വച്ച് രണ്ട് ഗ്രാം തൂക്കമുള്ള സ്വർണമോതിരം കവർന്നു. കൊട്ടിയം കണ്ണനല്ലൂർ റോഡിലുള്ള ശ്രീകൃഷ്ണജ്വല്ലറിയിലാണ് സംഭവം. ഇന്നലെ രാവിലെ 10നാണ് യുവാവ് കടയിലെത്തി മോതിരം വേണമെന്നാവശ്യപ്പെടുന്നത്. ബോക്സുകളിൽ നിന്നും പല ഡിസൈനുകളിലുള്ള മോതിരങ്ങളും നോക്കുകയും വിരലിലണിഞ്ഞ് പരിശോധിക്കുകയും ഉണ്ടായി. ഇതിനിടയിൽ കൈയിൽ കിടന്ന മുക്കുപണ്ടമായ മോതിരം സ്വർണ കടയിലെ ബോക്സിൽ തിരിച്ചേല്പിക്കുകയും രണ്ടു ഗ്രാം തൂക്കം വരുന്ന സ്വർണമോതിരം വിരലിലിടുകയും ചെയ്യുകയായിരുന്നു. ഡിസൈനുകൾ ഇഷ്ടമായില്ലെന്നു പറഞ്ഞാണ് ഇയാൾ മടങ്ങിയത്. മോതിരങ്ങളുടെ ബോക്സുകൾ തിരികെ അലമാരയിൽ വയ്ക്കുമ്പോഴാണ് ജീവനക്കാർ ചതി മനസിലാക്കിയത്. ഉടമ തുടർന്ന് കൊട്ടിയം പോലീസിന് വിവരം കൈമാറുകയും പരാതി നൽകുകയും ചെയ്തു.

കർഷക തൊഴിലാളി പെൻഷൻ നിഷേധിച്ചത് അന്വേഷിക്കണം: മനുഷ്യാവകാശ കമ്മീഷൻ

കൊല്ലം : കർഷക തൊഴിലാളി ക്ഷേമനിധിയിൽ 28 വർഷം അംഗമായിരിക്കുകയും 60 വയസു വരെ കുടിശിക ഇല്ലാതെ അംശാദായം അടയ്ക്കുകയും ചെയ്ത അംഗത്തിന് ക്ഷേമനിധി പെൻഷൻ നിഷേധിക്കാനുണ്ടായ സാഹചര്യത്തെ കുറിച്ച് കൊല്ലം കോർപറേഷനോട് വിശദീകരണം തേടി മുനുഷ്യാവകാശ കമ്മീഷൻ. മുനുഷ്യാവകാശ കമ്മീഷൻ അംഗം വി.ഗീതയുടേതാണ് നടപടി. അംഗങ്ങൾക്കുള്ള പെൻഷൻ നൽകുന്നത് തദ്ദേശ സ്വയം ഭരണ സ്ഥാപനങ്ങളാണെന്ന ക്ഷേമനിധി ബോർഡ് സെക്രട്ടറിയുടെ വിശദീകരണത്തിെ െ ന്‍റ അടിസ്ഥാനത്തിലാണ് കമ്മീഷ ന്‍റെ ഉത്തരവ്. താൻ ക്ഷേമനിധിയിൽ ചേരുന്നതിന് മുമ്പോ 2016 വരെയോ പെൻഷൻ നൽകാൻ യാതൊരു മാനദണ്ഡവും ഉണ്ടായിരുന്നില്ലെന്നും തനിക്ക് അടച്ച പണം പോലും കിട്ടിയില്ലെന്നും പരാതിക്കാരി അറിയിച്ചിരുന്നു. ഭർത്താവിന് ചെറിയ പെൻഷൻ ലഭിക്കുന്നുണ്ടെന്ന പേരിലാണ് തനിക്ക് പെൻഷൻ നിഷേധിച്ചതെന്നും പരാതിക്കാരിയായ ശാസ്താംകോട്ട സ്വദേശിനി അമ്മിണിക്കുട്ടി കമ്മീഷനെ അറിയിച്ചു.

തിരുമുക്കിലെ അശാസ്ത്രീയമായ അടിപ്പാത : വിദ്യാർഥി-യുവജന പ്രസ്ഥാനങ്ങൾ സമരത്തിന്‍റെ ഭാഗമാകണം: ബെനിൽ മാത്യു

ചാത്തന്നൂർ: തിരുമുക്കിലെ അശാസ്ത്രീയ അടിപ്പാതയ്ക്കെതിരെ നടക്കുന്ന സമരത്തിൽ യുവജനങ്ങളും വിദ്യാർഥികളും അണിചേരണമെന്ന് സെന്‍റ് ജോർജ്ജ് യുപിഎസ് ഹെഡ്മാസ്റ്റർ ബെനിൽ മാത്യൂ. തിരുമുക്കിൽ നടന്നുവരുന്ന റിലേ സത്യഗ്രഹത്തി െ ന്‍റ ആറാം ദിവസത്തെ സത്യഗ്രഹം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. വികസന സമിതി എക്സിക്യൂട്ടിവ് കമ്മിറ്റിയംഗം എൻ. അനിൽകുമാർ അധ്യക്ഷതവഹിച്ചു. സമരസമിതി ജനറൽ കൺവീനർ കെ.കെ.നിസാർ, ചാത്തന്നൂർ വികസന സമിതി ചെയർമാൻ. ജി. രാജശേഖരൻ, കൺവീനർ ജി.പി.രാജേഷ്, വ്യാപാരി വ്യവസായി സമിതി ചാത്തന്നൂർ യൂണിറ്റ് സെക്രട്ടറി എസ്. ബിനു, പരവൂർ യുവജന കൂട്ടായ്മയുടെ ഷിബിനാഥ് തുടങ്ങിയവർ പ്രസംഗിച്ചു. ചാത്തന്നൂർ വികസന സമിതി എക്സിക്യൂട്ടീവ് കമ്മിറ്റിയംഗവും സെന്‍റ് ജോർജ്ജ് യു പി.എസ് പിടിഎ പ്രസിഡന്‍റ ുമായ അനസ് ആണ് ആറാം ദിവസം സത്യഗ്രഹം അനുഷ്‌ടിച്ചത് സത്യഗ്രഹ സമരത്തി െ ന്‍റ ഏഴാം ദിവസമായ ഇന്ന് സാംസ്കാരിക പ്രസ്ഥാനമായ ഇപ്റ്റയുടെ നേതൃത്വത്തിലാണ് റിലേ സത്യഗ്രഹം നടക്കുക. ഇപ്റ്റയുടെ ചാത്തന്നൂർ മേഖലാ വൈസ് പ്രസിഡന്‍റ് ആർ.രാജേന്ദ്രൻ സത്യഗ്രഹം അനുഷ്ടിക്കും. ഇപ്റ്റ സംസ്ഥാന കമ്മിറ്റിയംഗം അഡ്വ.കെ.എസ്. ഷൈൻ ഇന്ന് രാവിലെ സത്യഗ്രഹം ഉദ്ഘാടനം ചെയ്യും.

തദ്ദേശതെരഞ്ഞെടുപ്പ് : ജില്ലയിൽ സംവരണ വാർഡ് നറുക്കെടുപ്പ് ഒക്‌ടോബർ 13 മുതൽ

കൊല്ലം : തദ്ദേശ തെരഞ്ഞെടുപ്പിന്‍റെ ചൂടിലേക്ക് ജില്ല അടുത്തുകൊണ്ടിരിക്കുന്നു. സംവരണ സീറ്റുകളെ സംബന്ധിച്ച ആകാംക്ഷയാണ് സ്ഥാനാർഥിമോഹികൾക്കും പാർട്ടികൾക്കും. ഏതൊക്കെ വാർഡിൽ ആർക്കൊക്കെ മത്സരിക്കാനാകും എന്നത് അറിയണമെങ്കിൽ കളക്ടറേറ്റിൽ നടക്കുന്ന വാർഡ് സംവരണക്രമ നറുക്കെടുപ്പുവരെ കാത്തിരിക്കണം. ഒക്‌ടോബർ 13 മുതൽ 16 വരെയായി പഞ്ചായത്തുകളുടെ നറുക്കെടുപ്പാണ് ആദ്യം നടക്കുക. ബ്ലോക്ക് പഞ്ചായത്തുകളുടേത് ഒക്‌ടോബർ 17നും ജില്ലാപഞ്ചായത്തിൽ ഒക്്ടോബർ 21നും നടക്കും. കോർപറേഷനുകളിലെ തീയതി ഇതുവരെ പ്രഖ്യാപിച്ചിട്ടില്ല. ജില്ലയിൽ 1,698 സീറ്റുകൾ തദ്ദേശസ്ഥാപന തിരഞ്ഞെടുപ്പിൽ ജില്ലയിൽ ആകെയുള്ളത് 1,698 സീറ്റുകളാണ്. ഇവയിൽ പട്ടികജാതി/വർഗം ഉൾപ്പെടെയുള്ള എല്ലാ വിഭാഗത്തിലുമുള്ള സ്ത്രീകൾക്ക് 867 സീറ്റുകൾ സംവരണം ചെയ്തിട്ടുണ്ട്. പട്ടികജാതി വിഭാഗത്തിന് 221 സംവരണ സീറ്റുകളും 123 സീറ്റുകൾ പട്ടികജാതിയിൽപ്പെട്ട സ്ത്രീകൾക്ക് മാത്രമായും സംവരണം ചെയ്തിട്ടുണ്ട്. പട്ടികവർഗ വിഭാഗത്തിന് സംവരണം ചെയ്തിരിക്കുന്നത് രണ്ട് സീറ്റുകളാണ്. ജില്ലാപഞ്ചായത്തിൽ 27 സീറ്റുകൾ ജില്ലാപഞ്ചായത്തിലെ 27 സീറ്റുകളിൽ സ്ത്രീകൾക്കായി 14 സീറ്റുകൾ സംവരണം ചെയ്തിരിക്കുന്നു. പട്ടികജാതി വിഭാഗത്തിന് നാല് സീറ്റുകളും പട്ടികജാതി സ്ത്രീകൾക്ക് രണ്ട് സീറ്റുകളും സംവരണം ചെയ്തിട്ടുണ്ട്. ജില്ലയിലെ 68 പഞ്ചായത്തുകളിൽ 1,314 സീറ്റുകളിൽ സ്ത്രീകൾക്ക് 672 സീറ്റുകൾ സംവരണം ചെയ്തിരിക്കുന്നു. 177 സീറ്റുകൾ പട്ടികജാതി വിഭാഗത്തിനും 100 സീറ്റുകൾ പട്ടികജാതി സ്ത്രീകളുടെ സംവരണ വിഭാഗത്തിനുമാണ്. പഞ്ചായത്തുകളിൽ രണ്ട് സീറ്റുകളാണ് പട്ടികവർഗ വിഭാഗത്തിന് സംവരണം ചെയ്തിരിക്കുന്നത്. 11 ബ്ലോക്ക് പഞ്ചായത്ത്: 166 സീറ്റുകൾ ജില്ലയിലെ 11 ബ്ലോക്ക് പഞ്ചായത്തുകളിൽ ആകെ സീറ്റുകളുടെ എണ്ണം 166 ആണ്. ഇവയിൽ സ്ത്രീകൾക്ക് 85 സീറ്റുകൾ സംവരണം ചെയ്തിട്ടുണ്ട്. 22 സീറ്റുകൾ പട്ടികജാതി വിഭാഗത്തിനും 11 സീറ്റുകൾ പട്ടികജാതി സ്ത്രീകളുടെ സംവരണ വിഭാഗത്തിലുമാണ്. 56 ഡിവിഷനുകളുള്ള കൊല്ലം കോർപറേഷനിൽ സ് ത്രീകൾക്കായി 28 സീറ്റുകൾ സംവരണം ചെയ്തിരിക്കുന്നു. പട്ടികജാതി വിഭാഗത്തിനായി നാല് സീറ്റും പട്ടികജാതിയിലുൾപ്പെട്ട സ്ത്രീകൾക്ക് രണ്ട് സീറ്റുകളും സംവരണം ചെയ്തിട്ടുണ്ട്.

ബൈക്ക് ഭിത്തിയിലിടിച്ച് ഗൃഹനാഥൻ മരിച്ചു

ചവറ: ദേശീയപാതയിൽ നീണ്ടകര എഎംസി മുക്കിന് സമീപം ബൈക്ക് സംരക്ഷണ ഭിത്തിയിൽ ഇടിച്ച് സ്വകാര്യ ആശുപത്രി ജീവനക്കാരനായ ഗൃഹനാഥൻ മരിച്ചു. ചവറ കൊറ്റൻകുളങ്ങര പഞ്ചായത്ത് ഓഫീസിനു വടക്ക് മുരുകാലയത്തിൽ പരമേശ്വരൻ പിള്ള - കമലാദേവി ദമ്പതികളുടെ മകൻ പ്രകാശ് (50) ആണ് മരിച്ചത്. കൊല്ലത്തെ സ്വകാര്യ ആശുപത്രിയിൽ ഡ്യൂട്ടി കഴിഞ്ഞു വീട്ടിലേക്കു പോകവേ ചവറ പാലത്തിനു തെക്ക് എഎംസി മുക്കിന് സമീപം വേണ്ടത്ര വെളിച്ചമില്ലാത്ത സ്ഥലത്ത് വച്ച് സംരക്ഷണ ഭിത്തിയിൽ ഇടിച്ച് ബൈക്ക് അപകടത്തിൽപ്പെടുകയായിരുന്നു. മണിക്കൂറുകളോളം യുവാവിന്‍റെ മൃതദേഹം റോഡിൽ കിടന്നുവെന്നാണ് വിവരം. ഭാര്യ : ഗീതാകുമാരി. ഏക മകൻ പ്രണവ്.

റബർമരത്തിൽ ചങ്ങലയിലിട്ട നിലയിൽ അജ്ഞാത മൃതദേഹം

പുനലൂർ: മുക്കടവിൽ റബർതോട്ടത്തിനുള്ളിൽ ജീർണിച്ച നിലയിൽ അജ്ഞാത മൃതദേഹം കണ്ടെത്തി. കൈ കാലുകൾ ചങ്ങലയ്ക്ക് ബന്ധിച്ച് റബർ മരത്തിൽ പൂട്ടിയിട്ട നിലയിലായിരുന്നു മൃതദേഹം. ഇന്നലെ ഉച്ചയോടെ കാന്താരി ശേഖരിക്കാൻ ഇവിടെയെത്തിയ പ്രദേശവാസിയാണ് മൃതദേഹം ആദ്യം കണ്ടത്. പുനലൂർ പോലീസ് സ്ഥലത്തെത്തി തുടർ നടപടികൾ സ്വീകരിച്ചു. റബർ തോട്ടം ഒഴിഞ്ഞ ഭാഗത്താണ്. മുക്കടവ് ജംഗ്ഷനു സമീപത്തുള്ള ഉയർന്ന മേഖലയിൽ ടാപ്പിംഗ് ഇല്ലാതിരുന്ന തോട്ടത്തിലാണ് മൃതദേഹം കണ്ടെത്തിയത്. പുരുഷന്‍റേതാണോ സ്ത്രീയുടെതാണോ മൃതദേഹമെന്നു സ്ഥിരീകരിച്ചിട്ടില്ല. മൃതദേഹം ഇൻക്വസ്റ്റ് നടത്തിയ ശേഷം പോസ്റ്റുമോർട്ടത്തിനായി പാരിപ്പള്ളി മെഡിക്കൽ കോളജിലേക്കു കൊണ്ടുപോയി.

ഓടിക്കൊണ്ടിരുന്ന കാർ കത്തി നശിച്ചു

ചവറ: ഓടിക്കൊണ്ടിരുന്ന കാർ കത്തി നശിച്ചു. കാറിൽ ഉണ്ടായിരുന്ന യുവാക്കൾ ബോണറ്റിൽ നിന്നും പുക വരുന്നത് കണ്ടു വാഹനം പെട്ടെന്ന് നിർത്തി രക്ഷപ്പെടുകയായിരുന്നു. തേവലക്കര അരിനല്ലൂർ സുശീല ഭവനത്തിൽ സന്തോഷ് കുമാറിന്‍റെ വാഹനമാണ് കത്തി നശിച്ചത്. ഇന്നലെ ഉച്ചകഴിഞ്ഞ് 3.30 ഓടെ അരിനല്ലൂർ മുട്ടം ഭാഗത്ത് വച്ചായിരുന്നു സംഭവം. സന്തോഷ് കുമാറിന്‍റെ വാഹനം സമീപവാസിയായ വ്യക്തിയാണ് ഓടിച്ചിരുന്നത്. ഒപ്പം ഉണ്ടായിരുന്ന ആളും വാഹനമോടിച്ച ആളും വാഹനത്തിൽ നിന്നും ഇറങ്ങി ഓടിയതിനാൽ രക്ഷപ്പെട്ടു. ചവറ അഗ്നിരക്ഷാ നിലയത്തിൽ നിന്നും ഒരു യൂണിറ്റ് എത്തിയാണ് തീ അണച്ചത്. ശാസ്താംകോട്ട അഗ്നിരക്ഷാ നിലയത്തിൽ നിന്നും ഒരു യൂണിറ്റ് എത്തിയിരുന്നുവെങ്കിലും തീ നിയന്ത്രണവിധേയമായിരുന്നു.

സമരം രാഷ്്‌ട്രീയ പാർട്ടികൾ ഏറ്റെടുക്കാത്തത് ലജ്ജാകരം: ബാബു പാക്കനാർ

ചാത്തന്നൂർ: സഞ്ചാര സ്വാതന്ത്ര്യത്തിന് വേണ്ടിയുള്ള സമരം രാഷ്ട്രീയ പാർട്ടികൾ ഏറ്റെടുക്കാത്തത് ലജ്ജാകരമാണെന്ന് കവി ബാബു പാക്കനാർ .സമരങ്ങളാണ് നാടിനെ പുരോഗതിയിലേയ്ക്ക്മാറ്റിയിട്ടുള്ളത്. ചാത്തന്നൂർ തിരുമുക്കിൽ അശാസ്ത്രീയമായ അടിപ്പാത നിർമാണത്തിനെതിരെ നടക്കുന്ന റിലേ സത്യഗ്രഹം ഉദ്ഘാടനം ചെയ്യുകയായിരുന്നു അദ്ദേഹം. പരവൂർ പ്രൊട്ടക്ഷൻ ഫോറം ചെയർമാൻ അഡ്വ.സത്ജിത്ത് അധ്യക്ഷത വഹിച്ചു ചാത്തന്നൂർ വികസന സമിതിയംഗം തൗഫീക്ക്ചാത്തന്നൂർ അഞ്ചാം ദിവസം സത്യഗ്രഹമനുഷ്ടിച്ചു. പിഡിപി സംസ്ഥാന ജനറൽ സെക്രട്ടറി മൈലക്കാട് ഷാ ,സെന്‍റ് ജോർജ് യു പിഎസ് ഹെഡ്മാസ്റ്റർ ബെനിൽ മാത്യൂ,ചാത്തന്നൂർ വികസന സമിതി ചെയർമാൻ.ജി.രാജശേഖരൻ, ജി.പി.രാജേഷ്, സമരസമിതി ജനറൽ കൺവീനർ കെ.കെ.നിസാർ, ഷിബിനാഥ് ,രാജൻ തട്ടാമല ,പരവൂർക്കാർ കൂട്ടായ്മയുടെ സന്തോഷ് പാറയിൽക്കാവ് എന്നിവർ പ്രസംഗിച്ചു. റിലേ സത്യഗ്രഹ സമരത്തിന്‍റെ ആറാം ദിവസമായ ഇന്ന് ചാത്തന്നൂർ വികസന സമിതി എക്സിക്യൂട്ടീവ് കമ്മിറ്റിയംഗവും സെന്‍റ് ജോർജ് യുപിഎസ് പിടിഎ പ്രസിഡന്‍റുമായ അനസ് സത്യഗ്രഹമനുഷ്ടിക്കും.സെന്‍റ് ജോർജ് യുപിഎസ് ഹെഡ്മാസ്റ്റർ ബെനിൽ മാത്യൂ രാവിലെ 10ന് സത്യാഗ്രഹ സമരം ഉദ്ഘാടനം ചെയ്യും. പിന്തുണയുമായി കൂടുതൽ സംഘടനകൾ ചാത്തന്നൂർ: തിരുമുക്കിലെ അശാസ്ത്രീയമായ അടിപ്പാതനിർമാണത്തിനെതിരെ തിരുമുക്ക് അടിപ്പാത സമര സമിതി നടത്തുന്ന റിലേ സത്യഗ്രഹത്തിന് പിന്തുണയുമായി കൂടുതൽ സംഘടനകൾ രംഗത്ത് എത്തുന്നു. സാംസ്കാരിക പ്രസ്ഥാനമായ ഇപ്റ്റ, കേരള മഹിളാസംഘം, ഐഎൻടിയുസി, തിരുമുക്കിലെ ഓട്ടോറിക്ഷ തൊഴിലാളി സംഘടന തുടങ്ങിയവ തുടർന്നുള്ള ദിവസങ്ങളിൽ റിലേസത്യഗ്രഹത്തിൽ പങ്കെടുക്കുമെന്ന് ഭാരവാഹികൾ അറിയിച്ചു.

കൊല്ലം സഹോദയ യുആർഐ കപ്പ്: ബ്രൂക്ക് ഇന്‍റർനാഷണൽ സ്കൂൾ ചാമ്പ്യന്മാർ

കൊട്ടാരക്കര : കൊല്ലം സഹോദയ യുആർഐ ട്രോഫിക്കു വേണ്ടിയുള്ള ഇന്‍റർ സ്കൂൾ ഫുട്ബോൾ മത്സരത്തിൽ ബ്രൂക്ക് ഇന്‍റർനാഷണൽ സ്കൂൾ ചാമ്പ്യന്മാരായി. കൊട്ടാരക്കര കരിക്കം ഇന്‍റർനാഷണൽ സ്കൂളിൽ നടന്ന വാശിയേറിയ ഫുട്ബോൾ മത്സരത്തിൽ മുഖത്തല സെന്‍റ് ജൂഡ് സ്കൂളിനെതിരെ 3-1 നാണ് ബ്രൂക്ക് ഇന്‍റർനാഷണൽ സ്കൂൾ ചാമ്പ്യന്മാരായത്. 10-ാം ക്ലാസിലെ അമാൻ ജെ ടൂർണമെന്‍റിന്‍റെ താരമായി മാറി. തിരുവനന്തപുരം, കൊല്ലം, പത്തനംതിട്ട, ആലപ്പുഴ ജില്ലകളിൽ നിന്നായി മത്സരരംഗത്തുണ്ടായിരുന്ന 17 ടീമുകളിൽ നിന്നും സെമിഫൈനൽ മത്സരങ്ങളിൽ കരിക്കം ഇന്‍റർനാഷണലിനെ തോൽപ്പിച്ചു സെന്‍റ് ജൂഡും മാർ ബസേലിയസ് ഓഷ്യൻ സ്റ്റാർ സ്കൂളിനെ തോൽപ്പിച്ചാണ് ബ്രൂക്ക് ഇന്‍റർനാഷണലും ഫൈനലിസ്റ്റുകളായത്. ലൂസേഴ്സ് ഫൈനലിൽ വിജയിച്ച കരിക്കം ഇന്‍റർനാഷണൽ സ്കൂളിനാണ് മൂന്നാം സ്ഥാനം.

കെ.എം. മാണി കാരുണ്യഭവനം പദ്ധതി; അഞ്ചാമത്തെ വീടിന്‍റെ താക്കോൽ നൽകി

കൊട്ടാരക്കര: കേരളാ കോൺഗ്രസ് നേതാവും മുൻ ധനകാര്യ മന്ത്രിയുമായിരുന്ന കെ.എം. മാണിയുടെ സ്മരണാർഥം ജില്ലയിൽ പണി കഴിപ്പിച്ച അഞ്ചാമത്തെ വീടിന്‍റെ താക്കോൽ പകൽക്കുറി ജിവി എച്ച്എസ്എസ് സ്കൂൾ വിദ്യാർഥിയുടെ കുടുംബത്തിന് നൽകി . അധ്യാപിക ആശാ മാത്യുവാണ് വീട് നിർമിച്ച് നൽകിയത്. കേരളാ കോൺഗ്രസ് -എം ചെയർമാൻ ജോസ് കെ മാണി എം പി താക്കോൽ നൽകി. ജില്ലാ പ്രസിഡന്‍റ് വഴുതാനത്ത് ബാലചന്ദ്രൻ അധ്യക്ഷനായിരുന്നു. നിർമാണ കമ്മിറ്റി കൺവീനർ മാത്യുസാം, ഹൈപ്പവർ കമ്മിറ്റി മെമ്പർ ബെന്നി കക്കാട് , ജില്ലാ ഓഫീസ് ചാർജ് ജനറൽ സെക്രട്ടറി സജിജോൺ കുറ്റിയിൽ ,സ്കൂൾ പ്രിൻസിപ്പൽ ജെ സജീന ,മാത്യു കെ. ലുക്ക്‌, അഡ്വ. അജു മാത്യു പണിക്കർ ,ജോണി ചക്കാലയിൽ, എം .ഹസീന, ക്രിസ്റ്റോ ബാബു, എഴുകോൺ മണ്ഡലം പ്രസിഡന്‍റ് ജിജുമോൻ മത്തായി തുടങ്ങിയവർ പ്രസംഗിച്ചു.

യുവാക്കളെ കൊലപ്പെടുത്താൻ ശ്രമിച്ച കേസ്: രണ്ടുപേർ പിടിയിൽ

അഞ്ചൽ: ഒന്‍പതാം ക്ലാസില്‍ പഠിക്കുന്ന ബന്ധുവായ പെണ്‍കുട്ടിയെ ശല്യംചെയ്യുന്നത് ചോദ്യം ചെയ്യുകയും വിലക്കുകയും ചെയ്ത യുവാവിനെയും സുഹൃത്തിനേയും വാള്‍ ഉപയോഗിച്ചു വെട്ടി കൊലപ്പെടുത്താന്‍ ശ്രമിച്ച കേസില്‍ രണ്ടുപേര്‍ അറസ്റ്റില്‍. കോക്കാട് കൊല്ലോണത്ത് പടിഞ്ഞാറ്റിൻകരയില്‍ സുനീഷ് (25), കോക്കാട് വാഴവിള പടിഞ്ഞാറ്റേതിൽ ജിത്തു എന്നുവിളിക്കുന്ന ജയദീപ് (25) എന്നിവരെയാണ് അഞ്ചല്‍ പോലീസ് അറസ്റ്റ് ചെയ്യുന്നത്. ഇക്കഴിഞ്ഞ 18ന് ചക്കുവരക്കല്‍ സ്വദേശിയും പെണ്‍കുട്ടിയുടെ ബന്ധുവുമായ മഹേന്ദ്രന്‍, സുഹൃത്ത് ശ്രീതു എന്നിവരെയാണ് പ്രതികള്‍ വാള്‍ ഉപയോഗിച്ച് വെട്ടിയത്. ഗുരുതരമായി പരിക്കേറ്റ ശ്രീതു തിരുവനന്തപുരം മെഡിക്കല്‍ കോളജ് ആശുപത്രിയിലും മഹേന്ദ്രന്‍ പുനലൂര്‍ താലൂക്ക് ആശുപത്രിയിലും ചികിത്സ തേടുകയായിരുന്നു. ഇവിടെയെത്തിയാണ് പോലീസ് മൊഴി രേഖപ്പെടുത്തിയ ശേഷം കേസെടുക്കയും പ്രതികളെ പിടികൂടുകയും ചെയ്തത്. പെണ്‍കുട്ടിയെ ശല്യം ചെയ്തതും രണ്ടാം പ്രതിയുടെ മാതാവിനോട് വിവരം പറയുകയും ചെയ്തുവെന്ന വൈരാഗ്യത്താലാണ് പ്രതികള്‍ ചക്കുവരക്കലില്‍ വിളിച്ച് വരുത്തി ആക്രമിച്ചതെന്നു പോലീസ് പറയുന്നു. സംഭവത്തിനുശേഷം ഒളിവിൽ പോയ പ്രതികളെ അഞ്ചൽ പോലീസ് കോക്കാട് ഭാഗത്ത് നിന്ന് പിടികൂടുകയായിരുന്നു. അറസ്റ്റ് രേഖപ്പെടുത്തിയ പ്രതികളെ തെളിവെടുപ്പിനും വൈദ്യ പരിശോധനയ്ക്കും ശേഷം കോടതിയില്‍ ഹാജരാക്കി റിമാൻഡ് ചെയ്തു. എസ്എച്ച്ഒ ഹരീഷിന്‍റെ നേതൃത്വത്തില്‍ എസ്ഐമാരായ പ്രജീഷ്കുമാര്‍, രാജശേഖരന്‍, സിവില്‍ പോലീസ് ഓഫീസര്‍മാരായ ചിന്തു, വിനോദ് വിഷ്ണു എന്നിവരടങ്ങിയ സംഘമാണ് പ്രതികളെ പിടികൂടിയത്.

നിരപരാധിയുടെ വീട്ടിൽ പരിശോധന : എക്സൈസ് കമ്മീഷണർ അന്വേഷിക്കണമെന്ന് മനുഷ്യാവകാശ കമ്മീഷൻ

കൊല്ലം : ഏഴുകോൺ എക്സൈസ് ഓഫീസിലെ ഉദ്യോഗസ്ഥർ വീട്ടിൽ അതിക്രമിച്ച് കയറി പരിശോധന നടത്തി അപമാനിച്ചെന്ന പരാതിയിൽ, തെറ്റായ വിവരത്തിന്‍റെ അടിസ്ഥാനത്തിൽ പരിശോധന നടത്തിയ ഉദ്യോഗസ്ഥർക്ക് പിഴവ് സംഭവിച്ചിട്ടുണ്ടെങ്കിൽ അവർക്കെതിരെ സ്വീകരിച്ച നടപടികൾ അറിയിക്കണമെന്ന് മനുഷ്യാവകാശ കമ്മീഷൻ അംഗം വി. ഗീത. പരാതിയെ കുറിച്ച് എക്സൈസ് കമ്മീഷണർ തലത്തിൽ അന്വേഷണം നടത്തണമെന്നും ഉത്തരവിൽ പറഞ്ഞു. കേസ് വീണ്ടും ഡിസംബറിൽ പരിഗണിക്കും. എഴുകോൺ സ്വദേശി വി. എസ്. ചന്ദ്രപ്രകാശിന്‍റെ പരാതിയുടെ അടിസ്ഥാനത്തിലാണ് നടപടി. 2023 ഓഗസ്റ്റ് 26 നാണ് സംഭവമുണ്ടായത്. ഉച്ചയ്ക്ക് 12 നു പരാതിക്കാരന്‍റെ വീട്ടിലെത്തിയ സംഘം വീട്ടിലേക്കു തള്ളികയറി പരിശോധന നടത്തിയെങ്കിലും ഒന്നും കണ്ടെത്തിയില്ലെന്നു പരാതിയിൽ പറയുന്നു. പരാതിക്കാരൻ വീട്ടിലില്ലെന്നു പറഞ്ഞിട്ടും ഭാര്യയെയും മകളെയും അപമാനിച്ചതായും പരാതിയിലുണ്ട്.കൊല്ലം ഡെപ്യൂട്ടി എക്സൈസ് കമ്മീഷണറിൽ നിന്നും കമ്മീഷൻ റിപ്പോർട്ട് വാങ്ങി. ലഹരി വസ്തുക്കളുടെ അനധികൃത വിൽപന തടയുന്നതിന്‍റെ ഭാഗമായി, ലഭ്യമായ വിവരത്തിന്‍റെ അടിസ്ഥാനത്തിലാണ് പരാതിക്കാരന്‍റെ വീട്ടിൽ പരിശോധന നടത്തിയതെന്നും ഇത്തരം പരിശോധനകളിൽ മാന്യമായി പെരുമാറാനും മനുഷ്യാവകാശ ലംഘനങ്ങൾ സംഭവിക്കാതിരിക്കാനും ഉദ്യോഗസ്ഥർക്ക് നിർദ്ദേശം നൽകിയിട്ടുണ്ടെന്നും റിപ്പോർട്ടിൽ പറഞ്ഞു. രഹസ്യ വിവരം ലഭിക്കുമ്പോൾ വിശ്വാസ്യത ഉറപ്പാക്കിയിട്ട് മാത്രമേ തുടർനടപടികൾ സ്വീകരിക്കാവൂവെന്ന് ഉദ്യോഗസ്ഥർക്കു നിർദ്ദേശം നൽകിയിട്ടുണ്ടെന്നും റിപ്പോർട്ടിൽ പറയുന്നു. മുമ്പ് അബ്കാരി കേസിൽ പ്രതിയായ ഒരാൾ തനിക്കൊപ്പം താമസിക്കുന്നു എന്ന തെറ്റായ വസ്തുത എക്സൈസ് ഉദ്യോഗസ്ഥർ കമ്മീഷനു നൽകിയ റിപ്പോർട്ടിലുണ്ടെന്നു പരാതിക്കാരൻ കമ്മീഷനെ അറിയിച്ചു. എന്നാൽ ഇയാൾ തന്‍റെ സമീപവാസി മാത്രമാണ്. തെറ്റായ റിപ്പോർട്ട് നൽകിയത് എക്സൈസിന്‍റെ പ്രവൃത്തിയെ ന്യായീകരിക്കാൻ വേണ്ടിയാണെന്നും പരാതിക്കാരൻ അറിയിച്ചു. പരാതിക്കാരനെതിരെ തെറ്റായ വിവരം നൽകിയയാളെഎക്സൈസിന് അറിയാമെങ്കിലും ഒരു നടപടിയും എടുത്തിട്ടില്ലെന്നും പരാതിക്കാരൻ ആരോപിച്ചു. നാലോളം അബ്കാരി കേസുകളിൽ പ്രതിയായ വ്യക്തിയുമായുള്ള സഹകരണമാകാം പരാതിക്കാരനെതിരായ നടപടിക്കു പിന്നിലെന്ന് കമ്മീഷൻ ഉത്തരവിൽ പറഞ്ഞു. ഇത്തരത്തിൽ ലഭിക്കുന്ന എല്ലാ രഹസ്യ വിവരങ്ങളുടെയും വിശ്വാസ്യത പരിശോധിക്കപ്പെടേണ്ടതല്ലേ എന്നും ഉത്തരവിൽ ചോദിച്ചു. പരാതിക്കാരനെതിരെ വ്യാജ വിവരം നൽകിയതിന്‍റെ അടിസ്ഥാനം ഉദ്യോഗസ്ഥർ പരിശോധിക്കേണ്ടതായിരുന്നു. പരാതിക്കാരന്‍റെ വീടിനുസമീപം പരാതിക്കാരനെ കുറിച്ചു മാന്യമായി അന്വേഷണം നടത്തിയിരുന്നെങ്കിൽ ഇത്തരത്തിലുള്ള ഒരു പരിശോധന ഒഴിവാക്കാമായിരുന്നു. പരാതിയിൽ കഴമ്പുണ്ടെന്നും ഇത് അന്വേഷിക്കേണ്ടതാണെന്നും ഉത്തരവിൽ പറഞ്ഞു.

ജനാധിപത്യത്തെ അട്ടിമറിക്കാനുള്ള ഗൂഢതന്ത്രമാണ് കേന്ദ്രസർക്കാർ ആസൂത്രണം ചെയ്യുന്നത്: വി.എസ്. ശിവകുമാർ

കൊല്ലം: ജനാധിപത്യ രാജ്യമായ ഇന്ത്യയിൽ തെരഞ്ഞെടുപ്പുകൾ അട്ടിമറിക്കാനുള്ള ഗൂഢതന്ത്രമാണ് കേന്ദ്ര സർക്കാരും അതിനു നേതൃത്വം നൽകുന്ന ബി ജെ പി യും ആസൂത്രണം ചെയ്യുന്നതെന്നു കെ പി സി സി രാഷ്ട്രീയകാര്യ സമിതി അംഗം വി.എസ് ശിവകുമാർ അഭിപ്രായപ്പെട്ടു. അതിന്‍റെ ഭാഗമാണ് രാജ്യം ഇപ്പോൾ സാക്ഷ്യം വഹിക്കുന്ന വോട്ട് കൊള്ള അഥവാ വോട്ട് ചോരിയെന്നും അദ്ദേഹം കൂട്ടിച്ചേർത്തു. കേന്ദ്ര സർക്കാരിന്‍റെ വോട്ട് കൊള്ളയ്‌ക്കെതിരേ ഡി സി സി യുടെ നേതൃത്വത്തിൽ ചിന്നക്കട ഹെഡ് പോസ്റ്റ് ഓഫീസിനു മുന്നിൽ നടന്ന സിഗ്‌നേച്ചർ കാംപെയിൻ ഉദ്ഘാടനം ചെയ്തു പ്രസംഗിക്കുകയായിരുന്നു ശിവകുമാർ. ഡി സി സി പ്രസിഡന്‍റ് പി.രാജേന്ദ്രപ്രസാദ് അധ്യക്ഷത വഹിച്ചു. കെപിസിസി രാഷ്ട്രീയകാര്യ സമിതിയംഗം ബിന്ദുകൃഷ്ണ, കെപിസിസി ജനറൽ സെക്രട്ടറി എം.എം. നസീർ നേതാക്കളായ എ.കെ ഹഫീസ്, സുരജ് രവി, കെ.ബേബിസൺ, എസ്.വിപിന ചന്ദ്രൻ, എൻ. ഉണ്ണികൃഷ്ണൻ, കൃഷ്ണവേണി ശർമ്മ, സി.ആർ. നജീബ്, കെ.കെ സുനിൽ കുമാർ, ആദിക്കാട് മധു, ബി.തൃദീപ് കുമാർ, വാളത്തുഗൽ രാജഗോപാൽ, ജി.ജയപ്രകാശ്, സേതുനാഥപിള്ള ,എം.എം .സഞ്ജീവ്കുമാർ,ആനന്ദ് ബ്രഹ്‌മാനന്ദ്, ഡി.ഗീതാകൃഷ്ണൻ, പ്രാക്കുളംസുരേഷ്, മേച്ചേഴത്ത്ഗിരീഷ്, എം. നാസർ , എസ്.എഫ്.യേശുദാസൻ, ജി.ആർ .കൃഷ്ണകുമാർ, ശോഭ സുധീഷ് തുടങ്ങിയവർ പ്രസംഗിച്ചു

ആക്രി പെറുക്കാൻ വന്നയാൾ പിക്കപ്പ് വാനുമായി തെങ്കാശിയിലേക്ക് കടന്നു

കൊല്ലം: ആക്രിപെറുക്കാരൻ എന്ന വ്യാജേന എത്തിയ ആൾ ഗ്യാസ് ഏജൻസിയുടെ പിക്കപ്പ് വാൻ തെങ്കാശിയിലേക്ക് കടത്തി. നിലവിൽവാഹനം തെങ്കാശിയിലാണ്. മുണ്ടയ്ക്കൽ തുന്പറ മാർക്കറ്റിനു സമീപം പാർക്ക് ചെയ്തിരുന്ന പിക്കപ്പ് വാൻ കഴിഞ്ഞദിവസം രാത്രിയിലാണ് കടത്തിയത്. 17 കാലി ഗ്യാസ് കുറ്റിയും വാഹനത്തിലുണ്ടായിരുന്നു. സംഭവവുമായി ബന്ധപ്പെട്ടു ശിവ ഗ്യാസ് ഏജൻസി ഉടമ വിനായകൻ ഈസ്റ്റ് പോലീസ് സ്റ്റേഷനിൽ പരാതി നൽകി. എന്നാൽ തെങ്കാശി പാവുച്ചത്രയിൽ നിന്നും ഫോൺ വന്നപ്പോഴാണ് വാഹനം തെങ്കാശിയിലുണ്ടെന്നറിയുന്നത്. വാഹനം വിൽക്കാൻ കൊണ്ടുവന്നപ്പോൾ സംശയംതോന്നിയ തെങ്കാശിസ്വദേശിയാണ് വാഹനത്തിലുള്ള ഫോൺ നന്പരിൽ വിളിച്ചത്. ഇതിനിടയിൽ നാട്ടിലെ സിസിടിവി കാമറ പരിശോധിച്ചപ്പോഴാണ് ആക്രിക്കാരനെ കണ്ടതായ് പറയുന്നത്. കഴിഞ്ഞ ഒരാഴ്ചയായി ഈ ആക്രിപെറുക്കുകാരൻ ഇവിടെയുണ്ടായിരുന്നു. ഇതിനിടയിൽ തെങ്കാശി സ്വദേശി അയച്ചുതന്നതും ഈആക്രിക്കാരന്‍റെ ചിത്രമാണ്. നഷ്ടപ്പെട്ട വാഹനം തിരിച്ചെടുക്കാൻ വാഹനമുടമ തെങ്കാശിയിലേക്ക് പോയിരിക്കുക‍ യാണ്.

വഴിയാത്രക്കാരനെ രക്ഷിക്കാനുള്ള ശ്രമത്തിനിടയിൽ വാഹനങ്ങൾ കൂട്ടിയിടിച്ചു

കുണ്ടറ : ബസിൽ കയറാനായി എതിർസൈഡിൽനിന്ന് അശ്രദ്ധയോടെ റോഡിന് കുറുകെ ചാടിയ യാത്രക്കാരനെ രക്ഷിക്കാനുള്ള ശ്രമത്തിനിടയിൽ വണ്ടികൾ കൂട്ടിയിടിച്ചു.നെടുമ്പായിക്കുളം ജംഗ്ഷനിൽ ഇന്നലെ ഉച്ചകഴിഞ്ഞ് 3.15 നായിരുന്നു അപകടം. കുണ്ടറയിൽ നിന്നും കൊട്ടാരക്കര ഭാഗത്തേക്ക് പോയ സ്വിഫ്റ്റ് കാറിന്‍റെ മുൻപിലൂടെ ഒരു യാത്രക്കാരൻ കൊല്ലം ബസിൽ കയറാനായി പെട്ടെന്ന് റോഡ് മുറിച്ചുകടക്കാൻ ശ്രമിക്കുകയായിരുന്നു . യാത്രക്കാരന്‍റെ ജീവൻ രക്ഷിക്കാൻ കാർ സഡൻ ബ്രേക്ക് ഇട്ടതോടെ പിന്നാലെ വന്ന ഒാമ്നിയും ബൈക്കും കാറിന് പിന്നിൽ ഇടിച്ചു. ബൈക്ക് യാത്രികൻ ഇടത്തേക്ക് മറിഞ്ഞു വീണതിനാൽ എതിരെ വന്ന ബസിനടിയിൽപ്പെടാതെ രക്ഷപ്പെട്ടു.

രാജ്യത്തെ മികച്ച ജനകീയ ലോട്ടറി സംവിധാനം കേരളത്തിൽ: മന്ത്രി ബാലഗോപാല്‍

കൊല്ലം: രാജ്യത്തെ മികച്ച ജനകീയ ലോട്ടറി സംവിധാനമാണ് കേരളത്തിലേതെന്നു മന്ത്രി കെ.എന്‍. ബാലഗോപാല്‍. സംസ്ഥാന ഭാഗ്യക്കുറി ഏജന്‍റുമാരുടെയും വില്‍പനക്കാരുടെയും ക്ഷേമനിധിബോര്‍ഡിന്‍റെയും ആഭിമുഖ്യത്തില്‍ നല്‍കുന്ന അംഗപരിമിതരായ അംഗങ്ങള്‍ക്കുള്ള സൗജന്യ മുച്ചക്രവാഹനവിതരണത്തിന്‍റെ സംസ്ഥാനതല ഉദ്ഘാടനം റോട്ടറി ക്ലബില്‍ നിര്‍വഹിക്കുകയായിരുന്നു അദ്ദേഹം. പൂര്‍ണമായും സര്‍ക്കാരിന്‍റെ ഉടമസ്ഥതയിലാണ് കേരളത്തിലെ ലോട്ടറി സംവിധാനം. ക്ഷേമനിധിബോര്‍ഡിന്‍റെ ആഭിമുഖ്യത്തില്‍ വിവാഹ, ചികിത്സ ധനസഹായങ്ങള്‍, പെന്‍ഷനര്‍മാര്‍ക്ക് ഉത്സവബത്തയും നല്‍കുന്നുണ്ട്. 160 വീടുകള്‍ യാഥാര്‍ഥ്യമാക്കുന്ന ഭവനപദ്ധതിയും വരുന്നുവെന്നും മന്ത്രി കൂട്ടിച്ചേര്‍ത്തു. സംസ്ഥാനത്താകെ 169 മുച്ചക്ര വാഹനങ്ങളാണ് വിതരണം ചെയ്യുക. കൊല്ലം, തിരുവനന്തപുരം, പത്തനംതിട്ട, ആലപ്പുഴ ജില്ലകളിലെ 69 അംഗങ്ങള്‍ക്കുള്ള വാഹനങ്ങളാണ് ചടങ്ങില്‍ വിതരണം ചെയ്തത്. 2.35 കോടി രൂപയാണ് ചെലവ്. 1,15,000 രൂപവിലയുള്ള മുച്ചക്ര വാഹനമാണ് സൗജന്യമായി നല്‍കുന്നത്. എം നൗഷാദ് എംഎല്‍എ അധ്യക്ഷനായി. ജില്ലാ പഞ്ചായത്ത് പ്രസിഡന്‍റ് ഡോ. പി.കെ. ഗോപന്‍ മുഖ്യപ്രഭാഷണം നടത്തി. സംസ്ഥാന ഭാഗ്യക്കുറി ക്ഷേമനിധി ബോര്‍ഡ് ചെയര്‍പേഴ്‌സണ്‍ ടി ബി സുബൈര്‍, പ്രോഗ്രാം കമ്മിറ്റി ചെയര്‍പേഴ്‌സണ്‍ അഡ്വ. ജി മുരളീധരന്‍, സംസ്ഥാന ഭാഗ്യക്കുറി ക്ഷേമ ഓഫീസര്‍ ഡി.എസ്.മിത്ര, ജില്ലാ ഭാഗ്യക്കുറി ഓഫീസര്‍ എസ്.രാജേഷ് കുമാര്‍, ലോട്ടറി ഏജന്‍സ് ആന്‍ഡ് സെല്ലേഴ്‌സ് യൂണിയന്‍ നേതാക്കള്‍ തുടങ്ങിയവര്‍ പങ്കെടുത്തു.

യുവാവിനെ മർദിച്ച് കൊലപ്പെടുത്താൻ ശ്രമിച്ച കേസ്: പ്രതി അറസ്റ്റിൽ

കൊല്ലം :മുൻ വിരോധം കാരണം യുവാവിനെ മർദിച്ച് കൊലപ്പെടുത്താൻ ശ്രമിച്ച കേസിലെ പ്രതി അറസ്റ്റിൽ. നീണ്ടകര പന്നയ്ക്കൽ തുരുത്തിൽ വടക്കേയറ്റത്ത് വീട്ടിൽ അമ്മാച്ചൻ രതീഷ് എന്ന രതീഷ്(42) ആണ് ചവറ പോലീസിന്‍റെ പിടിയിലായത്. നിരവധി കേസുകളിൽ പ്രതിയും കേരളാ സാമൂഹ്യ വിരുദ്ധ പ്രവർത്തനങ്ങൾ(തടയൽ) നിയമ പ്രകാരം നടപടിക്ക് വിധേയനായിട്ടുമുള്ള ആളാണ് ഇയാൾ. നീണ്ടകര, പന്നയ്ക്കൽ തുരുത്തിൽ, രാജേഷ് ഭവനിൽ രാജേഷിനെയാണ് ഇയാൾ ആക്രമിച്ച് കൊലപ്പെടുത്താൻ ശ്രമിച്ചത്. പ്രതിയായ രതീഷും ഇയാളുടെ ഭാര്യാ സഹോദരനും തമ്മിൽ മുന്പ് തർക്കം ഉണ്ടായപ്പോൾ രാജേഷ് അതിൽ ഇടപെട്ടു എന്നതാണ് ഇയാൾക്ക് രാജേഷുമായി വിരോധമുണ്ടാവാൻ കാരണം. ഈ വിരോധം കാരണം കഴിഞ്ഞദിവസം രാവിലെ 10ന് നീണ്ടകര പന്നയ്ക്കൽ തുരുത്തിൽ വച്ച് പ്രതിയായ രതീഷ് രാജേഷിനെ ചീത്ത വിളിച്ചുകൊണ്ട് മർദിച്ച് പരിക്കേൽപ്പിക്കുകയായിരുന്നു. മർദനത്തിൽ സാരമായി പരിക്കേറ്റ രാജേഷ് ചവറ പോലീസ് സ്റ്റേഷനിൽ നൽകിയ പരാതിയുടെ അടിസ്ഥാനത്തിൽ കേസ് രജിസ്റ്റർ ചെയ്ത ശേഷം പോലീസ് സംഘം നടത്തിയ അന്വേഷണത്തിൽ പ്രതിയെ കണ്ടെത്തി അറസ്റ്റ് ചെയ്യുകയായിരുന്നു. ചവറ പോലീസ് സ്റ്റേഷന്‍റെ ചാർജ് വഹിക്കുന്ന തെക്കുംഭാഗം ഇൻസ്പെക്ടർ ശ്രീകുമാറിന്‍റെ നേതൃത്വത്തിലാണ് ഇയാളെ അറസ്റ്റ് ചെയ്തത്.

വിജയോത്സവം ഉദ്ഘാടനം ചെയ്തു

കൊല്ലം: ഭിന്നശേഷി വിദ്യാര്‍ഥികളുടെ കലാ-കായിക കഴിവുകള്‍ വിപുലീകരിക്കാന്‍ ജില്ല ശിശുക്ഷേമ സമിതി തയ്യാറാക്കിയ ‘ചൈല്‍ഡ് ഹബ്' പദ്ധതിക്ക് സംസ്ഥാന സര്‍ക്കാര്‍ പിന്തുണ നല്‍കുമെന്ന് മന്ത്രി കെ.എന്‍. ബാലഗോപാല്‍. ജില്ലാ ശിശുക്ഷേമ സമിതി ചിന്നക്കട ക്രേവന്‍ എല്‍എംഎസ്എച്ച്എസില്‍ സംഘടിപ്പിച്ച വിജയോത്സവം പരിപാടിയില്‍വിവിധ പരീക്ഷകളില്‍ ഉന്നതവിജയം നേടിയ ഭിന്നശേഷി വിദ്യാര്‍ഥികള്‍ക്കുള്ള അവാര്‍ഡ് ദാനം ഉദ്ഘാടനം ചെയ്യുകയായിരുന്നു മന്ത്രി. ശിശുക്ഷേമ സമിതി വൈസ് പ്രസിഡന്‍റ് അഡ്വ. ഷീബ ആന്‍റ് ണി അധ്യക്ഷയായി. പഠനോപകരണങ്ങളുടെ വിതരണോദ്ഘാടനം എം നൗഷാദ് എംഎല്‍എ നിര്‍വഹിച്ചു. ജില്ലാ കളക്ടര്‍ എന്‍. ദേവിദാസ് വിദ്യാര്‍ഥികളെ ആദരിച്ചു.

അക്കാദമിക് കൗൺസിലർ പാനൽ; അപേക്ഷ സമർപ്പിക്കേണ്ട തീയതി നീട്ടി

കൊല്ലം: ശ്രീനാരായണഗുരു ഓപ്പൺ യൂണിവേഴ്സിറ്റി അക്കാദമിക് കൗൺസിലർമാരുടെ പാനലിലേക്ക് അപേക്ഷ സമർപ്പിക്കേണ്ട അവസാന തീയതി ഒക്ടോബർ നാലു വരെ ദീർഘിപ്പിച്ചു. ഇംഗ്ലീഷ്, മലയാളം, ഹിന്ദി, അറബിക്, സംസ്‌കൃതം, ഹിസ്റ്ററി, ഫിലോസഫി, സോഷ്യോളജി, ഇക്കണോമിക്സ്, അഫ്സൽ ഉൽ ഉലമ, കൊമേഴ്സ്, മാനേജ്മെന്‍റ്, കംപ്യൂ ട്ടര്‍ സയന്‍സ്/ആപ്ലിക്കേഷന്‍,സൈക്കോളജി, പൊളിറ്റിക്കല്‍ സയന്‍സ്, പബ്ലിക് അഡ്മിനിസ്ട്രേഷന്‍, എണ്‍വയണ്‍മെന്‍റല്‍ സയന്‍സ്, ജേര്‍ണലിസം, ലൈബ്രറി സയൻസ്, എം എസ് ഡബ്ല്യൂ,മൾട്ടി മീഡിയ, ഡേറ്റ ആന്‍റ് അനലിറ്റിക്‌സ്, ബി സിഎ, എംസി എ എല്ലാ ബിഎഡ് കോഴ്സുകൾ, തുടങ്ങി വിവിധ വിഷയങ്ങൾക്കാണ് അപേക്ഷ ക്ഷണിച്ചിരിക്കുന്നത്. കോളജ് / യൂണിവേഴ്സിറ്റി സർവീസിലുള്ളവർക്കും വിരമിച്ചവർക്കും അധ്യാപകരാകാൻ യു ജി സി നിഷ്കർഷിക്കുന്ന യോഗ്യതയുള്ളവർക്കും അപേക്ഷിക്കാവുന്നതാണ്. വിശദമായ നോട്ടിഫിക്കേഷൻ www.sgou.ac.in ൽ ലഭ്യമാണ്. നിലവിൽ യൂണിവേഴ്സിറ്റി, ഗവ. കോളജുകൾ,എയ്ഡഡ് കോളജുകൾ എന്നിവിടങ്ങളിൽ ജോലി ചെയ്യുന്ന അധ്യാപകർക്കും അപേക്ഷിക്കാം. ഫോൺ: 9497363445.

ഡ്രൈഡേയിൽ മദ്യവില്പന: യുവാവ് അറസ്റ്റിൽ

കൊല്ലം: ഡ്രൈ ഡേയിൽ വിൽപ്പന നടത്തുന്നതിന് വീട്ടിൽ സൂക്ഷിച്ചിരുന്ന 30 ലിറ്റർ വിദേശ മദ്യവുമായി കുപ്പണ സ്വദേശി ആനന്ദിനെ കൊല്ലം എക്സൈസ് സ്പെഷൽ സ്ക്വാഡ് അസിസ്റ്റന്‍റ് എക്സൈസ് ഇൻസ്പെക്ടർ ജി.ശ്രീകുമാറിന്‍റെനേതൃത്വത്തിലുള്ള സംഘം അറസ്റ്റ് ചെയ്തു. ഡ്രൈഡേ കളിൽ സ്ഥിരമായി മദ്യ വില്പന നടത്തിവന്നിരുന്ന ഇയാളെ കഴിഞ്ഞ കുറെനാളായി എക്സൈസ് സംഘം നിരീക്ഷിച്ചുവരികയായിരുന്നു. അര ലിറ്റർ മദ്യത്തിന്‍റെ 60കുപ്പികളാണ് റെയ്ഡിൽപിടിച്ചെടുത്തത്. കുപ്പണ, അഞ്ചാലുംമൂട്, കടവൂർ, താന്നിക്കമുക്ക് ഭാഗങ്ങളിലായിരുന്നു പ്രധാനമായും മദ്യ വില്പന നടത്തിയിരുന്നത്. ഫോണിൽ ബന്ധപ്പെടുന്നവർക്ക് എത്ര മദ്യം വേണമെങ്കിലും നിമിഷങ്ങൾക്കുള്ളിൽ എത്തിച്ചു നൽകാറുണ്ട് എന്നായിരുന്നു ലഭ്യമായ വിവരം. പ്രിവന്‍റീവ് ഓഫീസർ സുനിൽ ജോസ്, സിവിൽ എക്സൈസ് ഓഫീസർമാരായ ലാൽ, അനീഷ്, ജോജോ, ബാലു എസ് സുന്ദർ, തൻസീർ അസീസ്, വനിത സിവിൽ എക്സൈസ് ഓഫീസർ നിജി എന്നിവർ റെയ്ഡിൽ പങ്കെടുത്തു

കുളത്തൂപ്പുഴ സർവീസ് സഹകരണ ബാങ്കിന് എക്സലൻസ് അവാർഡ്

കുളത്തൂപ്പുഴ : കുളത്തൂപ്പുഴ സവീസ് സഹകരണ ബാങ്കിനു 2024-25 സാമ്പത്തിക വഷത്തെ പ്രവത്തന മികവിന്‍റെ അടിസ്ഥാനത്തിൽ ജില്ലാതലത്തിൽ എക്സലൻസ് അവാർഡ് ലഭിച്ചു. അടുത്തമാസം ഏഴിന് തിരുവനന്തപുരത്ത് മുഖ്യമന്ത്രി പങ്കെടുക്കുന്ന ചടങ്ങിൽ ബാങ്ക് പ്രസിഡന്‍റ് ബി.രാജീവ് മുഖ്യമന്ത്രിയിൽ നിന്നും അവാർഡ് ഏറ്റുവാങ്ങും. ബാങ്കിലെ നിക്ഷേപം, വായ്പ, വായ്പ കുടിശിക, സാമ്പത്തിക ഭദ്രത, ഓഡിറ്റ് റിപ്പോർട്ട ,അറ്റലാഭം, സഹകാരികളോടുള്ള സമീപനം, മെഡിക്കൽലബ്, ആംബുലൻസ് സർവീസ്, വളംഡിപ്പോ, നീതിസ്റ്റോർ തുടങ്ങിയ അനുബന്ധ സംരംഭങ്ങളുടെ മികവ് എന്നിവയാണു കുളത്തൂപ്പുഴ സർവീസ് സഹകരണ ബാങ്കിനെ തെരഞ്ഞെടുക്കാൻ കാരണമായത്.

സ്കൂൾ കെട്ടിടം ഉദ്ഘാടനം ചെയ്തു

പരവൂർ: നഗരസഭ പുറ്റിങ്ങൽ വാർഡിൽ കുറുമണ്ടൽ ഗവൺമെന്‍റ് എൽപി സ്കൂളിൽ നിർമിച്ച പുതിയ മന്ദിരം ഉദ്ഘാടനം ചെയ്തു. ദേശീയ ദുരന്തനിവാരണ ഫണ്ടിൽ നിന്നും ലഭ്യമായ 17 ലക്ഷത്തിൽപരം രൂപ ചെലവഴിച്ചാണ് മന്ദിരനിർമാണം നടത്തിയത്. ജി.എസ്.ജയലാൽ അധ്യക്ഷത വഹിച്ച പൊതുസമ്മേളനത്തിൽ വച്ച് എൻ.കെ.പ്രേമചന്ദ്രൻ എംപി കെട്ടിട ഉദ്ഘാടനം നിർവഹിച്ചു. ചടങ്ങിൽ നഗരസഭ ചെയർ പേഴ്സൺ പി.ശ്രീജ, വൈസ് ചെയർമാൻ എ. സഫർകയാൽ,വിവിധ സ്ഥിരം സമിതി അധ്യക്ഷന്മാരായ എസ്. ശ്രീലാൽ, വി. അംബിക, എസ് ഗീത, എ. മിനി, ജെ. ഷെരീഫ്, വാർഡ് കൗൺസിലർ ആർ.എസ്.സുധീർ കുമാർ, അഡ്വ.പി.രാജേന്ദ്ര പ്രസാദ്, നെടുങ്ങോലം രഘു , കെ.സേതുമാധവൻ, ജി.പ്രദീപ്, സ്കൂൾ പ്രധാന അധ്യാപിക ഗായത്രി, എസ്. സുജ തുടങ്ങിയവർ പ്രസംഗിച്ചു.

മെഡിക്കൽ ക്യാമ്പ് 28ന്

അഞ്ചൽ : തുമ്പോട് സെന്‍റ് കുറിയാക്കോസ് ഓർത്തഡോക്സ്‌ പള്ളിയും അഞ്ചൽ ലയൺസ് ക്ലബും സംയുക്തമായി 28ന് രാവിലെ ഒന്പതുമുതൽ തുമ്പോട് സെന്‍റ് കുറിയാക്കോസ് ഓർത്തഡോക്സ്‌ പള്ളിയിൽ മെഗാ മെഡിക്കൽ ക്യാന്പ് നടത്തും. ജനറൽ മെഡിസിൻ, ജനറൽ സർജൻ, അസ്ഥി രോഗം, മൂത്രാശയ രോഗങ്ങൾ,ശ്വാസകോശ രോഗങ്ങൾ,ഗൈ നക്കോളജി, അലർജി, ശിശു രോഗങ്ങൾ,ഇ എൻ റ്റി , കണ്ണ്, പല്ല് എന്നീ വിവിധ വിഭാഗങ്ങളിലായി വിദഗ്ധരായ ഡോക്ടർമാരുടെ സേവനം ലഭ്യമാകും.കൂടാതെ ക്യാമ്പിൽ വച്ച് ചെയ്യുന്ന ലാബ് ടെസ്റ്റുകളും പൂർണമായും സൗജന്യമാണ്.ഇതുമായി ബന്ധപ്പെട്ടു എഴുതി നൽകുന്ന ലാബ് ടെസ്റ്റുകൾക്ക് ലാബുകളിൽ 50 മുതൽ 70 ശതമാനം വരെ ഡിസ്‌കൗണ്ട് നൽകും. സൗജന്യ മെഗാ മെഡിക്കൽ ക്യാമ്പിൽ മുൻകൂറായി രജിസ്റ്റർ ചെയ്യുവാൻ 7356144276, 9048803023 ,88916 02986 എന്നീ നന്പറുകളിൽ വിളിക്കുക.

വൈദ്യുതി തൊഴിലാളികൾ പ്രതിഷേധ ദിനം ആചരിച്ചു

ചാത്തന്നൂർ: ഇലക്‌ട്രിസിറ്റി വർക്കേഴ്സ് അസോസിയേഷൻ (സിഐടിയു)ഡിവിഷൻ കമ്മിറ്റി പുതുച്ചേരിയിൽ നടപ്പാക്കിയവൈദ്യുതി സ്വകാര്യ വത്കരണത്തിനെതിരെ പ്രതിഷേധ സമരം സംഘടിപ്പിച്ചു.വൈദ്യുതി മേഖല അദാനിക്ക് നൽകാനുള്ള നടപടിക്കെതിരെ പുതുച്ചേരി വൈദ്യുതി സ്വകാര്യവത്കരണ വിരുദ്ധ സമരസമിതി രൂപീകരിച്ചാണ് വൈദ്യുത ജീവനക്കാർ ശക്തമായ പ്രക്ഷോഭ സമരത്തിന് രൂപം നല്കിയത്. പ്രതിഷേധ യോഗം ഡിവിഷൻ പ്രസിഡന്‍റ് എ.എ. സുനിൽ ഉദ്ഘാടനം ചെയ്തു. യൂണിറ്റ് പ്രസിഡന്‍റ് അധീന അധ്യക്ഷയായി. സംസ്ഥാന കമ്മിറ്റി അംഗം ഷഫീഖ്, സന്തോഷ് ജെറോം, ബി.സുനിൽകുമാർ, ഷാൻ അലിഎന്നിവർ പ്രസംഗിച്ചു. ഡിവിഷൻ പരിധിയിലുള്ള പാരിപ്പള്ളി, കൊട്ടിയം, കണ്ണനല്ലൂർ, മയ്യനാട്, പൂതക്കുളം, പരവൂർ ഓഫീസുകളിലും പ്രതിഷേധ യോഗം സംഘടിപ്പിച്ചു.

കർഷക കോൺഗ്രസ് ഇടമുളയ്ക്കൽ മണ്ഡലം സമ്മേളനം

ആയൂർ: ഇടമുളയ്ക്കൽ മണ്ഡലം കർഷകകോൺഗ്രസ് പ്രവർത്തകയോഗം പെരുങ്ങള്ളൂരിൽ നടത്തി. കർഷക കോൺഗ്രസ് സംസ്ഥാന ജനറൽ സെക്രട്ടറി വിളക്കുപാറ ഡാനിയേൽ ഉദ്ഘാടനം ചെയ്തു. കർഷകർ അനുഭവിക്കുന്ന വിവിധങ്ങളായ പ്രശ്നങ്ങളിൽ മുഖ്യമായത് വന്യമൃഗശല്യം, കാട്ടുപന്നിയുടെ ശല്യം എന്നിവ വർധിച്ചുവരികയാണെന്നും റബറിനും മറ്റ്‌ കാർഷികവിളകൾക്കും നാശനഷ്ടം സംഭവിക്കുന്നതിനൊപ്പം ദിനംപ്രതി വിലകുറയുന്നതിനാൽ കർഷകർ ക്യഷി ഉപേക്ഷിക്കുകയാണെന്നുംവിളക്കുപാറ ഡാനിയേൽ പറഞ്ഞു. യോഗത്തിൽ റിനോഷ്‌ ജോൺസൺ കളപ്പിലായെ കർഷകകോൺഗ്രസ് ഇടമുളയ്ക്കൽ മണ്ഡലം പ്രസിഡന്‍റായി തെരഞ്ഞെടുത്തു. റോയി കളപ്പില, കുഞ്ഞുമോൻ പണിക്കർ, ബേബി പൊയ്കവിള, തോമസ് മാത്തൻ, ജോജി തോമസ് തുടങ്ങിയവർ പ്രസംഗിച്ചു.

ഗുജറാത്തിൽ ട്രെയിനിൽ നിന്നും വീണ് മരിച്ചു

കുണ്ടറ: പടിഞ്ഞാറെ കല്ലട സ്വദേശിയായ യുവാവ് ഗുജറാത്തിൽ ട്രെയിനിൽ നിന്നും വീണ് മരിച്ചു. പടിഞ്ഞാറേ കല്ലട പഞ്ചായത്ത് ഓഫീസിന് സമീപം വലിയപാടം സനൽ ഭവനത്തിൽ ആനന്ദ ഭായിയുടെയും പരേതനായ സഹദേവൻ പിള്ളയുടെയും മകൻ സനൽകുമാർ (38) ആണ് ഗുജറാത്ത് ജാംനഗറിൽ ട്രെയിനിൽ നിന്നും വീണ് മരിച്ചത്.

കുളത്തിൽ മുങ്ങി മരിച്ചു

കൊട്ടാരക്കര: കോട്ടാത്തല തേവർ ചിറയിൽ കുളിക്കാനിറങ്ങിയയാൾ മുങ്ങിമരിച്ചു. കോട്ടാത്ത കാർത്തിക ഭവനിൽ ശിവാനന്ദൻ ആചാരി(60)യാണ് മരിച്ചത്. ഇന്നലെ ഉച്ചകഴിഞ്ഞ് മൂന്നോടെയാണ് സംഭവം. കൊട്ടാരക്കര നിന്നും ഫയർഫോഴ്സ് എത്തി ഇയാളെ പുറത്തെടുത്ത് താലൂക്ക് ആശുപത്രിയിലെത്തിച്ചെങ്കിലുംജീവൻ രക്ഷിക്കാനായില്ല. മൃതദേഹം താലൂക്ക് ആശുപത്രി മോർച്ചറിയിൽ സൂക്ഷിച്ചിട്ടുണ്ട്. ഇന്ന് പോസ്റ്റുമോർട്ടത്തിന് ശേഷം ബന്ധുക്കൾക്ക് വിട്ടുകൊടുക്കും. ഭാര്യ : ലീല. മക്കൾ: കാർത്തിക, രേവതി. കൊട്ടാരക്കര പോലീസ് കേസെടുത്തു.

ഭാരത് സ്കൗട്സ് ആൻഡ് ഗൈഡ്സ് കൊല്ലം ബീച്ച് വൃത്തിയാക്കി

കൊല്ലം: തീരപ്രദേശങ്ങൾ വൃത്തിയായും സുരക്ഷിതമായും നിലനിർത്തുക എന്ന ലക്ഷ്യത്തോടെ ഭാരത് സ്കൗട്സ് ആന്‍ഡ് ഗൈഡ്സിന്‍റെ നേതൃത്വത്തിൽ തീരദേശ ശുചീകരണ വാരം ആചരിക്കുന്ന ഭാഗമായി കൊല്ലം ബീച്ച് വൃത്തിയാക്കി. ഭാരത് സ്കൗട്സ് ആൻഡ് ഗൈഡ്സ് കൊല്ലം ജില്ലാ അസോസിയേഷന്‍റെ നേതൃത്വത്തിൽ 500 സ്കൗട്ട് ഗെയിഡുകളും 100 യൂണിറ്റ് ലീഡർമാരും ശുചീകരണ പരിപാടിയിൽ പങ്കെടുത്തു. ജില്ലാ സെക്രട്ടറി ആർ. ഹിതേഷ്, ജില്ലാ കമ്മിഷണർ അലക്സ്‌ പി. വർഗീസ്, ഡിടിസി സുനിൽ ജോർജ്, ഡിഒസിമാരായ ജയകുമാർ, ഷമീനബീവി, എൽഎ സെക്രട്ടറിമാരായ അനീഷ്, ശിവ, സജിത, ലിസി മോൾ, മധുരി എന്നിവർ നേതൃത്വം നൽകി. ശുചീകരണത്തിനു ശേഷം അവിടെ നിന്നും ശേഖരിച്ച മാലിന്യങ്ങൾ ഹരിതകർമസേനയ്ക്ക് കൈമാറി.

കളി ഉപകരണങ്ങൾ നൽകി

അഞ്ചല്‍ : ഇക്കഴിഞ്ഞ യൂണിയന്‍ തെരഞ്ഞെടുപ്പില്‍ ഏരൂര്‍ സര്‍ക്കാര്‍ ഹയര്‍ സെക്കൻഡറി സ്കൂളിലെ വിദ്യാര്‍ഥികളുടെ മുന്നിലേക്കെത്തിയ എസ്എഫ്ഐ പ്രവര്‍ത്തകരോടും നേതാക്കളോടും കുട്ടികളില്‍ ചിലര്‍ തങ്ങള്‍ക്ക് കായിക ആവശ്യങ്ങള്‍ക്കുള്ള കളി ഉപകരണങ്ങളുടെ അപര്യാപ്തത ചൂണ്ടിക്കാട്ടിയിരുന്നു. ഇക്കാര്യം ബന്ധപ്പെട്ടവരുടെ ശ്രദ്ധയില്‍ കൊണ്ടുവരുമെന്ന് ഉറപ്പ് നല്‍കിയ എസ്എഫ്ഐ പ്രവര്‍ത്തകര്‍ മറ്റൊരുറപ്പ് കൂടി നല്‍കി. എസ്എഫ്ഐ നേതൃത്വം നല്‍കുന്ന യൂണിയന്‍ വന്നാല്‍ അത്യാവശ്യമായി വേണ്ട കളി ഉപകരണങ്ങള്‍ ലഭ്യമാക്കുമെന്നായിരുന്നു ഉറപ്പ്. എന്തായാലും ഇപ്പോള്‍ യൂണിയന്‍ വാക്ക് പാലിച്ചു. ക്രിക്കറ്റ് ബാറ്റ്, ഷട്ടില്‍ ബാറ്റ്, നെറ്റ്, വോളിബോള്‍, ഫുട്ബാള്‍, ക്രിക്കറ്റ് പന്തുകള്‍, ഗ്ലൗസുകളും കഴിഞ്ഞ ദിവസം സ്കൂളിൽ എത്തിച്ചു .ഡിവൈഎഫ്ഐ അഞ്ചല്‍ ബ്ലോക്ക് കമ്മിറ്റി സെക്രട്ടറിയും പഞ്ചായത്ത് സ്ഥിരം സമിതി അധ്യക്ഷനുമായ ഷൈന്‍ബാബു ചടങ്ങ് ഉദ്ഘാടനം ചെയ്തുകൊണ്ട് കളി ഉപകരണങ്ങള്‍ വിദ്യാര്‍ഥികള്‍ക്ക് കൈമാറി. പിടിഎ പ്രസിഡന്‍റ് എം .അജയന്‍റെ അധ്യക്ഷതയിൽ ചേർന്ന യോഗത്തിൽ പ്രിൻസിപ്പൽ ഹാഷിം, യൂണിയൻ ജനറൽ സെക്രട്ടറി നിഹാന , വൈസ് ചെയർപേഴ്സൺ അൽ മറിയം, ബിൻഷാ, കായിക വേദി സെക്രട്ടറി അനുഷ്‌, അഭിമന്യു, ഐശ്വര്യ, നജുമാ, പ്രവണ്യ, സഫ്ന എന്നിവർ പ്രസംഗിച്ചു.

മുക്ത്യോദയം പുതിയ മാനങ്ങളിലേക്ക്...

കൊല്ലം: കടന്നുപോയ ഒട്ടേറെ വീഥികളിൽ നിന്നും കണ്ടെത്തിയതും നിരവധി പ്രതിസന്ധികളോട് പടവെട്ടി ജീവിതത്തിന് നിറം പകരുവാൻ പരിശ്രമിച്ചു വരുന്ന യുവതി യുവാക്കളുടെ ശാക്തീകരണം ലക്ഷ്യമിട്ട് കൊല്ലം സിറ്റി പോലീസ് കമ്മീഷണർ കിരൺ നാരായണൻ മുൻ കൈയെടുത്ത് നടത്തി വരുന്ന മുക്ത്യോദയം (ബ്രേവ് ഹേർട്സ്) വ്യത്യസ്തതകൾ കൊണ്ട് പുതിയ മാനങ്ങളിലേക്ക്. ലഹരിവ്യാപനത്തിനെതിരേ വിവിധ വകുപ്പുകളെ സംയോജിപ്പിച്ച് കൊല്ലം സിറ്റി പോലീസ് നടപ്പാക്കുന്ന ‘മുക്ത്യോദയം’ കർമപദ്ധതിയുടെ ഭാഗമായി സമൂഹത്തിലെ വിവിധ മേഖലകളിലേയും വിദ്യാലയങ്ങളിലെയും 24 കുട്ടികളുമായി പോലീസ് കമ്മീഷണർ സംവാദം നടത്തുകയായിരുന്നു. മുക്ത്യോദയ ഭാഗമായി ജില്ലാ പോലീസ് മേധാവി കുട്ടികളുടെ ഹൃദയം തൊട്ടറിയാനാണ് ശ്രമിച്ചത്. കുട്ടികളുമായി ആരോഗ്യകരമായ ബന്ധം സ്ഥാപിക്കാനും കുട്ടികളുടെ അഭിപ്രായങ്ങളും ആശങ്കകളും നേരിട്ട് മനസിലാക്കാനും ആണ് കിരൺ നാരായണൻ ശ്രമിച്ചത്. ഒരു സാധാരണ പോലീസ് ഉദ്യോഗസ്ഥക്കപ്പുറം കുട്ടികളെ നെഞ്ചോട് ചേർത്ത് അവരിൽ മാനസികാരോഗ്യ, വ്യക്തിത്വ വികസനത്തിനുള്ള ശ്രമമാണ് അവർ ബ്രേവ് ഹേർട്സ് കൂട്ടായ്മയിലൂടെ നടത്തി വരുന്നത്. കുട്ടികൾ തമ്മിൽ പരസ്പരം പരിചയപ്പെട്ട ശേഷം അവരുടെ വാസനകളും കഴിവുകളും അവർ ജില്ലാ പോലീസ് മേധാവിയോട് പറയുകയായിരുന്നു. കിരൺ നാരായണൻ അപ്പോൾ അവർക്കൊപ്പം ഒരാളായി മാറി. കുട്ടികളിൽ ആത്മവിശ്വാസം വർധിപ്പിക്കുക, കുട്ടികളുടെ കഴിവുകളിലും വ്യക്തിത്വത്തിലും അവർക്ക് സ്വയം വിശ്വാസമുണ്ടാക്കാൻ ഉപകരിക്കും വിധം ഭയം കൂടാതെ ആശയവിനിമയം നടത്താനും, പൊതുവിടങ്ങളിൽ അഭിപ്രായങ്ങൾ പ്രകടിപ്പിക്കാനും അവരെ പ്രാപ്തരാക്കാനും വേണ്ട മർഗനിർദേശങ്ങൾ ജില്ലാ പോലീസ് മേധാവി അവർക്ക് നൽകി. തങ്ങൾ ആരാണോ അതിനെ ബഹുമാനിക്കാനും, അനാരോഗ്യകരമായ ബന്ധങ്ങളിൽ നിന്ന് ഒഴിഞ്ഞുനിൽക്കാനുമായി കിരൺ നാരായണൻ പറഞ്ഞ വാക്കുകൾ ശ്രദ്ധേയമായിരുന്നു. മുക്ത്യോദയം സൂചിപ്പിക്കുന്നത്, മോചനം (മുക്തി) നേടുക അല്ലെങ്കിൽ ഉദയം ചെയ്യുക എന്നാണ്. ഭയങ്ങളിൽ നിന്നും ആത്മവിശ്വാസമില്ലായ്മയിൽ നിന്നും കുട്ടികളെ മോചിപ്പിച്ച്, ശക്തമായ ഒരു വ്യക്തിത്വത്തിലേക്ക് അവരെ ഉയർത്തി കൊണ്ടുവരാൻ കിരൺ നാരായണൻ നടത്തുന്ന നീക്കങ്ങൾ പോലീസ് സേനയിൽ തന്നെ ശ്രദ്ധ നേടുകയാണ്. പോലീസ് മേധാവിയുടെ ഈ ഇടപെടൽ, കുട്ടികളുടെ സുരക്ഷയും സാമൂഹിക ശാക്തീകരണവും ലക്ഷ്യമിട്ടുള്ള ഒരു നല്ല മാതൃകയാവുകയാണ്. കുട്ടികളെ നിയമപാലകരുമായി കൂടുതൽ അടുപ്പിക്കാനും അവർക്ക് എന്തെങ്കിലും പ്രശ്നങ്ങളുണ്ടാകുമ്പോൾ മടിയില്ലാതെ പോലീസിനെ സമീപിക്കാൻ ഇടവരുത്താനും ബ്രേവ് ഹേർട്സ് വഴിയൊരുക്കും. കുട്ടികൾക്കൊപ്പം വന്ന മാതാപിതാക്കളോടും സംവാദം നടത്താൻ കിരൺ നാരായണൻ മറന്നില്ല.

തിന്മകളെ ഉടച്ചുവാര്‍ത്ത സാമൂഹ്യപരിഷ്‌കര്‍ത്താവായിരുന്നു ശ്രീനാരായണഗുരു: ജസ്റ്റിസ് പി. സോമരാജന്‍

പത്തനാപുരം: തിന്മകളെ ഉടച്ചുവാര്‍ത്ത സാമൂഹ്യപരിഷ്‌കര്‍ത്താവായിരുന്നു ശ്രീനാരായണഗുരുവെന്ന് കേരള റിയല്‍ എസ്റ്റേറ്റ് അപ്പലേറ്റ് ട്രൈബ്യൂണല്‍ ചെയര്‍മാന്‍ ജസ്റ്റിസ് പി. സോമരാജന്‍. ഗാന്ധിഭവനില്‍ ശ്രീനാരായണ ഗുരുസമാധി ദിനാചാരണം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. എസ്എന്‍ ട്രസ്റ്റ് മെമ്പര്‍ കെ. ജയപ്രകാശ് നാരായണന്‍ അധ്യക്ഷത വഹിച്ചു. ചടങ്ങില്‍ എസ്. സുവര്‍ണകുമാര്‍ വിശ്വശാന്തി സന്ദേശം നല്‍കി. ഗാന്ധിഭവന്‍ സെക്രട്ടറി പുനലൂര്‍ സോമരാജന്‍, കുണ്ടറ സെന്‍റ് തോമസ് വലിയ പള്ളി വികാരി ഫാ. പി. തോമസ്, തലയോലപ്പറമ്പ് വൈക്കം മുഹമ്മദ് ബഷീര്‍ സ്മാരക സമിതി ജനറല്‍ സെക്രട്ടറി പി.ജി. ഷാജിമോന്‍, എം.ടി. ബാവ, പിറവന്തൂര്‍ രാജന്‍, ഡോ. ഷാഹിദാ കമാല്‍, ബി. ശശികുമാര്‍, ബി. മോഹനന്‍, ജി. ഭുവനചന്ദ്രന്‍ എന്നിവര്‍ പ്രസംഗിച്ചു.

വൈവിധ്യവത്കരണ പാതയില്‍ ഓയില്‍പാം ഇന്ത്യ ലിമിറ്റഡ് : ആദ്യഘട്ട പച്ചക്കറി കൃഷിക്ക് നൂറുമേനി വിളവ്

അഞ്ചല്‍ : വൈവിധ്യവത്കരണ പാതയിലാണ് ഓയില്‍പാം ഇന്ത്യാ ലിമിറ്റഡ്. വിവിധങ്ങളായ പദ്ധതികള്‍ക്ക് പുറമെ ജൈവ പച്ചക്കറി കൃഷി മേഖലയില്‍ക്കൂടി കാല്‍വയ്പ്പ് നടത്തുകയാണിപ്പോള്‍. ഇതിലൂടെ കാര്‍ഷിക മുന്നേറ്റത്തിന് പുത്തന്‍ മാതൃക സൃഷ്ടിക്കാനാകുമെന്ന പ്രതീക്ഷയിലാണ് ഓയില്‍പാം മാനേജ്മെന്‍റ്. കുളത്തൂപ്പുഴ എസ്റ്റേറ്റില്‍ കണ്ടഞ്ചിറ തോട്ടത്തിലാണ് പരീക്ഷണ അടിസ്ഥാനത്തില്‍ പച്ചക്കറി കൃഷി ആരംഭിച്ചിരിക്കുന്നത്. ആദ്യ ഘട്ടത്തിൽ പയർ, കുക്കുംബർ, പച്ചമുളക്, കത്തിരി, തക്കാളി, വഴുതന തുടങ്ങിയവയാണ് കൃഷി ചെയ്തത്. പ്രത്യേക പോളീ ഹൗസ് നിര്‍മിച്ചുകൊണ്ടാണ് കൃഷിനടത്തിവരുന്നത്. കൃഷിയുടെ പരിപാലനത്തിനായി പരിശീലനം നല്കിയ തൊഴിലാളികളെ ഉള്‍പ്പെടുത്തിയാണ് മുന്നോട്ടുള്ള പ്രയാണം. ആദ്യഘട്ടത്തില്‍ നൂറുമേനി വിളവ് ലഭിച്ചതിന്‍റെ ആത്മവിശ്വത്തിലാണ് ഇപ്പോള്‍ മാനേജ്മെന്‍റ്. പച്ചക്കറികളുടെ വിളവെടുപ്പ് ഉത്സവാന്തരീക്ഷത്തില്‍ സംഘടിപ്പിച്ചു. മാനേജിംഗ് ഡയറക്ടർ ജോൺ സെബാസ്റ്റ്യൻ ആദ്യ വില്പന നടത്തി വിളവെടുപ്പ് ഉദ്ഘാടനം ചെയ്തു. പദ്ധതി വിജയകരമായാൽ ഓയിൽ പാം തോട്ടങ്ങൾക്കുള്ളിൽ ഇടവിളയായി പച്ചക്കറി കൃഷി വ്യാപിപ്പിക്കുമെന്ന് മാനേജിങ് ഡയറക്ടർ പറഞ്ഞു. കാർഷിക മേഖലയിലെ പുത്തൻ പരീക്ഷണങ്ങൾക്ക് ഇത് വഴിയൊരുക്കുമെന്നും അദ്ദേഹം കൂട്ടിച്ചേര്‍ത്തു. സീനിയർ മാനേജർ ജെയിംസ് പി. തോമസ് അധ്യക്ഷത വഹിച്ച ചടങ്ങിൽ എസ്റ്റേറ്റ് മാനേജർമാരായ ജെ. സന്തോഷ്‌കുമാർ, കെ.ആർ. കൃഷ്ണകുമാർ, എസ്. താജുദീൻ, ബ്രിജിത്ത് കുമാർ എന്നിവരും എസ്റ്റേറ്റ് തൊഴിലാളികളും ജീവനക്കാരും മാധ്യമ പ്രവര്‍ത്തകരും പങ്കെടുത്തു

ശ്രീനാരായണഗുരു സമാധിദിനാചരണം

കൊല്ലം: സംഘർഷങ്ങളും ഏറ്റുമുട്ടലുകളുമില്ലാതെ എല്ലാ വിധ വിഭാഗീയതകൾക്കും അതീതമായി സാഹോദര്യവും സമത്വവും ശാന്തി മന്ത്രമായി ശ്രീനാരായണ ഗുരു തലമുറകൾക്ക് കൈമാറുകയായിരുന്നുവെന്ന് കൊല്ലം എസ്എൻഡിപിയൂണിയൻ പ്രസിഡന്‍റ് മോഹൻ ശങ്കർ. 98-ാമത് മഹാസമാധി ദിനാചരണം കൊല്ലത്ത് ഉദ്ഘാടനം ചെയ്യുകയായിരുന്നു അദ്ദേഹം. യൂണിയൻ അങ്കണത്തിൽ നടന്ന സമ്മേളനത്തിൽ കൊല്ലം യൂണിയൻ സെക്രട്ടറി എൻ. രാജേന്ദ്രൻ അധ്യക്ഷത വഹിച്ചു. യോഗം കൗൺസിലർ പി. സുന്ദരൻ മുഖ്യപ്രഭാഷണം നടത്തി. യൂണിയൻ വൈസ് പ്രസിഡന്‍റ് അഡ്വ. രാജീവ് കുഞ്ഞുകൃഷ്ണൻ , കൊല്ലം യൂണിയൻ വനിതാ സംഘം പ്രസിഡന്‍റ് ഡോ.എസ്.സുലേഖ, ഷീലാ നളിനാക്ഷൻ, അനൂപ് എം.ശങ്കർ , അഡ്വ.കെ.ധർമരാജൻ, നേതാജി രാജേന്ദ്രൻ , ബി.പ്രതാപൻ ,ഷാജി ദിവാകർ , പുണർതം പ്രദീപ്, അഡ്വ. എസ്. ഷേണാജീ, എം.സജീവ് തുടങ്ങിയവർ നേതൃത്വം നൽകി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]