ഡോ. റോയ്സ് മല്ലശേരി വൈസ്മെൻ അന്തർദേശീയ സമിതി അംഗം

പത്തനംതിട്ട: വൈസ്മെൻ ഇന്‍റർനാഷണലിന്‍റെ അന്തർദേശീയ സമിതി അംഗമായി ഇന്ത്യയിൽ നിന്നും ഡോ. റോയ്സ് മല്ലശേരി തെരഞ്ഞെടുക്കപ്പെട്ടു. ആഹാരം, പാർപ്പിടം, ആരോഗ്യം, വിദ്യാഭ്യാസം തുടങ്ങിയ മേഖലകളിൽ ഗ്രാമീണ തലത്തിൽ യുഎൻ പദ്ധതികൾ നടപ്പിലാക്കുന്ന വൈസ്മെൻ സമിതിയാണിത്.

വൈസ്മെൻ ആഗോള പ്രസിഡന്‍റ് അധ്യക്ഷനായ സമിതിയിൽ വിവിധ രാജ്യങ്ങളിൽ നിന്നുള്ള 10 പേർ അംഗങ്ങൾ ആണ്. വൈസ്മെൻ സെൻട്രൽ ട്രാവൻകൂർ റീജൺ മുൻ ലഫ്റ്റനന്‍റ് റീജിയണൽ ഡയറക്ടറും കോഴഞ്ചേരി സെന്‍റ് തോമസ് കോളജ് മുൻ പ്രിൻസിപ്പലുമാണ് ഡോ. റോയ്സ് മല്ലശേരി.

ADVERTISEMENT

നീര്‍വിളാകം കാര്‍ഷിക സംഭരണ വിപണനകേന്ദ്രം ഉദ്ഘാടനം ഇന്ന്

ആറന്മുള: ഗ്രാമ പഞ്ചായത്തിലെ നീര്‍വിളാകത്ത് ജില്ലാ പഞ്ചായത്ത് പുതിയതായി നിര്‍മിച്ച കാര്‍ഷിക സംഭരണ വിപണന കേന്ദ്രം ഇന്ന് ഉച്ചകഴിഞ്ഞ് 2.30ന് മന്ത്രി വീണാ ജോര്‍ജ് ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം അധ്യക്ഷത വഹിക്കും.. 2022-23 വാര്‍ഷിക പദ്ധതിയില്‍ ഉള്‍പ്പെടുത്തി 33 ലക്ഷം വിനിയോഗിച്ചാണ് കാര്‍ഷിക സംഭരണ വിപണന കേന്ദ്രം നിര്‍മിച്ചത്. കര്‍ഷകരുടെ ഉത്പന്നം സംഭരിച്ച് ഇടനിലക്കാരില്ലാതെ നേരിട്ട് വില്‍ക്കാനാകും. ജില്ലാപഞ്ചായത്ത് ആരോഗ്യവിദ്യാഭ്യാസ സ്ഥിരം സമിതി അധ്യക്ഷന്‍ ആർ. അജയകുമാര്‍, പന്തളം ബ്ലോക്ക് പഞ്ചായത്ത് പ്രസിഡന്‍റ് ബി.എസ് . അനീഷ്മോൻ, വൈസ് പ്രസിഡന്‍റ് അശ്വതി വിനോജ്, ആറന്മുള ഗ്രാമ പഞ്ചായത്ത് പ്രസിഡന്‍റ് ഷീജാ ടി. റ്റോജി, ജില്ലാ പഞ്ചായത്ത് സെക്രട്ടറി ഷെര്‍ലാബീഗം, മഹാത്മാഗാന്ധി സര്‍വകലാശാല സിന്‍ഡിക്കേറ്റ് അംഗം പി. ബി. സതീഷ്‌കുമാർ, ജില്ലാ ടൂറിസം പ്രൊമോഷന്‍ കൗണ്‍സില്‍ അംഗം എസ്. മുരളീകൃഷ്ണൻ, രാഷ്‌ട്രീയ സാമൂഹിക സംഘടനാ ഭാരവാഹികള്‍ തുടങ്ങിയവര്‍ പങ്കെടുക്കും. കുടുംബശ്രീ നേതൃത്വത്തിലുള്ള ഓണം വിപണിയും കേരളാ ദിനേശ് സഹകരണ സംഘം വക ഓണകലവറയും കാര്‍ഷിക സംഭരണ വിപണന കേന്ദ്രത്തിലുണ്ടാകും.

കെഎസ്ആർടിസി ബസ് സ്കൂട്ടറിലിടിച്ച് യുവതിക്കു പരിക്ക്

തിരുവല്ല : കെഎസ്ആർടിസി ബസ് ഇടിച്ച് സ്കൂട്ടർ യാത്രക്കാരിയായ യുവതിക്ക് പരിക്ക്. ചാത്തങ്കരി സ്വദേശിനിയായ മറിയാമ്മ (37) യ്ക്കാണ് പരിക്കേറ്റത്. തിരുവല്ല - കായംകുളം സംസ്ഥാനപാതയിലെ കാവുംഭാഗത്ത് ചൊവ്വാഴ്ച രാത്രി 7.30 ഓടെ ആയിരുന്നു അപകടം. പൊടിയാടി ഭാഗത്തുനിന്നു വന്ന കെഎസ്ആർടിസി ബസ് മറ്റൊരു വാഹനത്തെ മറികടക്കുന്നതിനിടെ എതിരേ വന്ന സ്കൂട്ടറിൽ ഇടിക്കുകയായിരുന്നു. അപകടത്തിൽ തലയ്ക്ക് പരിക്കേറ്റ മറിയാമ്മയെ തിരുവല്ലയിലെ സ്വകാര്യ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.

6.5 ലക്ഷം രൂപ അനുവദിച്ചു

തിരുവല്ല: എംസി റോഡിലെ പന്നിക്കുഴി പാലത്തിന്‍റെ അടിയില്‍ നീരൊഴുക്കിനു തടസമായി നി ല്‍ക്കുന്ന കോണ്‍ക്രീറ്റ് മാലീന്യങ്ങള്‍ നീക്കം ചെയ്യുന്നതിനും സംരക്ഷണഭിത്തി കെട്ടുന്നതിനുമായി 6.5 ലക്ഷം രൂപ അനുവദിച്ച് ഉത്തരവായിട്ടുള്ളതായി മാത്യു ടി. തോമസ് എംഎല്‍എ അറിയിച്ചു. പൊതുമരാമത്ത് ദേശീയപാത വിഭാഗം ചീഫ് എന്‍ജിനിയറാണ് ഇതിനായി പണം അനുവദിച്ച് ഉത്തരവിട്ടത്. പാലത്തിന്‍റെ അടിഭാഗത്തായി ഉറഞ്ഞിരുന്ന കോണ്‍ക്രീറ്റ് നിക്ഷേപം തോടിന്‍റെ ഒഴുക്കിനെ ഈ ഭാഗത്ത് തടസപ്പെടുത്തുകയും തിരുവല്ല നഗരസഭയിലെ ഒന്ന്, രണ്ട്, മൂന്ന്, 38 വാര്‍ഡുകളില്‍ മഴക്കാലത്ത് വെള്ളപ്പൊക്കവും തോടിന്‍റെ തീരത്തുള്ള വീടുകളില്‍നിന്ന് വെള്ളം ഇറങ്ങാത്ത സാഹചര്യവും സൃഷ്ടിച്ചിരുന്നു. ജില്ലാ വികസന സമിതിയില്‍ എംഎല്‍എ നിരന്തരം ഉന്നയിച്ചതിനെ തുടര്‍ന്നാണ് ഈ പ്രശ്‌നം പരിഹരിക്കാനുള്ള നടപടികളായത്.

സാധാരണ ജനങ്ങള്‍ക്കൊപ്പം ഇടതുപക്ഷ സര്‍ക്കാര്‍: ചിറ്റയം ഗോപകുമാർ

ചുങ്കപ്പാറ: ഓണവിപണിയില്‍ ജനങ്ങള്‍ക്ക് ഒപ്പം ഇടതുപക്ഷ സര്‍ക്കാര്‍ നിലകൊണ്ടതു മൂലം വിലക്കയറ്റം പിടിച്ചു നിര്‍ത്താനായതായി ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍. സിപിഐ എഴുമറ്റൂര്‍ മണ്ഡലം കമ്മിറ്റിയുടെ മെംബര്‍മാരുടെ പ്രവര്‍ത്തന ഫണ്ട് ഏറ്റുവാങ്ങുകയായിരുന്നു അദേഹം. ഓണത്തിന് മാവേലിസ്റ്റോറുകള്‍ ആവശ്യത്തിന് നിത്യോപയോഗ സാധനങ്ങള്‍ എത്തിച്ചു. സബ്സിഡി സാധനങ്ങള്‍ വിതരണത്തിന് എത്തിക്കുകയും സഹകരണ സംഘങ്ങള്‍ മുഖേന ഓണച്ചന്തകള്‍ ആരംഭിക്കുകയും ചെയ്തതോടെ കരിഞ്ചന്തയും പൂഴ്ത്തിവയ്പു ഒഴിവാക്കാനായെന്ന് ചിറ്റയം ഗോപകുമാർ പറഞ്ഞു. ഡോ. സാം മാത്യു അധ്യക്ഷത വഹിച്ചു. മണ്ഡലം സെക്രട്ടറി കെ. സതീഷ്, അസി.സെക്രട്ടറി അനീഷ് ചുങ്കപ്പാറ, കെ.എ. തന്‍സീര്‍, പ്രകാശ് പി. സാം, ഉഷാ ശ്രീകുമാര്‍, ഷാലിമാ നവാസ്, പി.പി. സോമന്‍, ഏബ്രഹാം തോമസ്, എം.ബി. ബിജു എന്നിവര്‍ പ്രസംഗിച്ചു.

മണിമലയാറിന്‍റെ തീരമിടിയുന്നു

മല്ലപ്പള്ളി: വായ്പൂര് മണിമലയാറിന്‍റെ തീരമിടിയുന്നു. ഇതുമൂലം പ്രദേശവാസികളുടെ ഏക്കറുകണക്കിന് ഭൂമിയാണ് മണിമലയാർ കവർന്നത്. ശാസ്താംകോയിക്കൽ ഭാഗത്ത് വൈദ്യശാല‌, അങ്ങാടി കടവുകൾ ഭാഗങ്ങളിലാണ് അപകടകരമായി ആറ്റുതീരം ഇടിയുന്നത്. ഇതുമൂലം മണിമലയാറിനോടു ചേർന്ന് താമസിക്കുന്ന ഭിന്നശേഷി പ്രദേശവാസികളുടെ വീടുകളും അപകടഭീതിയിലാണ്. വായ്പൂര്, പാടിമൺ, മല്ലപ്പള്ളി ജേക്കബ്സ് റോഡിനോടു ചേർന്നാണ് മണിമലയാറ് സ്ഥിതി ചെയ്യുന്നത്. തീരമിടിച്ചിൽ വ്യാപകമായതോടെ നൂറുകണക്കിന് വാഹനങ്ങൾ കടന്നുപോകുന്ന റോഡിനും അപകടാവസ്ഥ നേരിടുന്നുണ്ട്. മഴയും വെള്ളപ്പൊക്കവും രൂക്ഷമാകുന്നതോടെ ജനങ്ങൾ ഭീതിയിലാണ്. പ്രദേശവാസികളുടെ ജീവനു ഭീഷണിയാകുന്ന വിധമാണ് ആറ്റുതീരം ഇടിയുന്നത്. സുരക്ഷയ്ക്കു സംരക്ഷണ ഭിത്തി ഇല്ലാത്തതിനാൽ ആറിന്‍റെ ഒഴുക്ക് ശക്തമാകുമ്പോൾ പ്രദേശവാസികൾ ആശങ്കയിലാണ്. ഭീഷണിയുള്ള ഭാഗങ്ങളിൽ അടിയന്തരമായി സംരക്ഷണ ഭിത്തി നിർമിച്ച് സുരക്ഷയൊരുക്കണമെന്നാണ് നാട്ടുകാരുടെ ആവശ്യം. കൂടാതെ കുറഞ്ഞ നാളുകളിൽ ഏക്കറുകണക്കിന് ഭൂമികളാണ് മണിമലയാർ കവർന്നത്. കർഷകരുടെ അധ്വാനങ്ങളിൽ ഏറിയപങ്കും മലവെള്ളപ്പാച്ചിലിൽ ഒലിച്ചുപോയി. വൃക്ഷങ്ങളും കാർഷികവിളകളും ഒലിച്ചുപോയതോടെ ജനങ്ങൾ പ്രതിസന്ധിയിലാണ്.

ജനസേവനകേന്ദ്രം പ്രവർത്തകർക്ക് ഓണസമ്മാനമായി ഇലക്‌ട്രിക് സ്കൂട്ടർ

അടൂർ: അഗതി - അനാഥ പരിചരണം നടത്തുന്ന അടൂർ മഹാത്മ ജനസേവന കേന്ദ്രം പ്രവർത്തകർക്ക് ഓണസമ്മാനമായി ഇലക്‌ട്രിക് സ്കൂട്ടറുകൾ സമ്മാനിച്ചു. ജീവനക്കാരുടെ ക്ഷേമ പ്രവർത്തനങ്ങൾക്കായി കേന്ദ്രം സ്വരുക്കൂട്ടി നീക്കിവച്ച തുകയുപയോഗിച്ച് ഡൗൺ പേയ്മെന്‍റ് അടയ്ക്കുകയും ബാക്കി തുക തവണ വ്യവസ്ഥയിൽ വായ്പയെടുത്തു സ്ഥാപനത്തിന്‍റെ സഹായത്തോടെയും ജീവനക്കാരുടെ പങ്കാളിത്തത്തോടെയും അടച്ചുതീർക്കുന്ന രീതിയിലാണ് പദ്ധതി നടപ്പിലാക്കിയത്. നിലവിൽ അഞ്ച് പേർക്കാണ് വാഹനം നല്കിയത്. വാഹനത്തിന്‍റെ താക്കോൽദാനവും ഫ്ലാഗ് ഓഫും ജില്ലാ സാമൂഹൃനീതി വകുപ്പ് ഓഫീസർ ജെ. ഷംല ബീഗം നിർവഹിച്ചു. മഹാത്മ ചെയർമാൻ രാജേഷ് തിരുവല്ല അധ്യക്ഷത വഹിച്ചു. ലീഗൽ അഡ്വൈസർ മുജീബ് റഹ്മാൻ, കേന്ദ്രം സെക്രട്ടറി പ്രീഷിൽഡ, ട്രസ്റ്റി അക്ഷർരാജ് എന്നിവർ പ്രസംഗിച്ചു.

ഹരിതകർമസേനാംഗങ്ങൾക്കും ആശാ പ്രവർത്തകർക്കുമൊപ്പം ഓണം ആഘോഷിച്ച് മാർ സെറാഫിം മെത്രാപ്പോലീത്ത

പത്തനംതിട്ട: നഗരജീവിതത്തോട് ചേർന്നുനിൽക്കുന്ന ഹരിതകർമ സേനാംഗങ്ങളെയും ആശാ പ്രവര്‍ത്തകരെയും ചേർത്തുനിർത്തി ഓർ‌ത്തഡോക്സ് സഭ തുന്പമൺ ഭദ്രാസനാധിപൻ ഡോ.ഏബ്രഹാം മാർ സെറാഫിം മെത്രാപ്പോലീത്തയുടെ നേതൃത്വത്തിൽ ഓണാഘോഷം. പത്തനംതിട്ടയ്ക്ക് വൃത്തിയും ശുചിത്വവുമുളള ദിനങ്ങള്‍ സമ്മാനിക്കുന്ന ഹരിതകർമ സേനാംഗങ്ങളെയും ആശാ പ്രവര്‍ത്തകരെയും ആദരിച്ച് ഓണസമ്മാനം നൽകിയായിരുന്നു ആഘോഷം. ഇവർക്കായി ഓണസദ്യ ഒരുക്കി അതിൽ പങ്കാളിയായ മെത്രാപ്പോലീത്ത ഒരുമയുടെയും ഒത്തുചേരലിന്‍റെയും ഓണകാഴ്ചയും നിറച്ചു. ജീവിതത്തിലെ ഏറ്റവും സന്തോഷമുള്ള നിമിഷങ്ങളിലൊന്നാണ് ഇതെന്ന് ഏബ്രഹാം മാര്‍ സെറാഫിം പറഞ്ഞു. ആഘോഷങ്ങളിൽ പലപ്പോഴും പിൻനിരയിലാകുന്നവരാണ് ഹരിതകർമസേനാംഗങ്ങൾ. എന്നാൽ, അവരില്ലാതെ ആഘോഷം പൂർണമാകില്ല. നാടിനെ ശുചിത്വത്തോടെ നിലനിർത്തുന്നത് ഇവരാണ്. ഇത് കണക്കിലെടുത്താണ് ആദരിക്കലെന്നും അദ്ദേഹം പറഞ്ഞു. പത്തനംതിട്ട നഗരസഭ ചെയർമാൻ ടി. സക്കീർ ഹുസൈൻ, പത്തനംതിട്ട ഡിവൈഎസ്പി എസ്.ന്യൂമാൻ, തുമ്പമൺ ഭദ്രാസന സെക്രട്ടറി ജോൺസൺ കല്ലിട്ടതിൽ കോർ എപ്പിസ്കോപ്പ, പിആർഒ ബാബുജി ഈശോ, പ്രസ് ക്ലബ് പ്രസിഡന്‍റ് ബിജു കുര്യൻ, നന്നുവക്കാട് സെന്‍റ് ഗ്രിഗോറിയോസ് ഓർത്തഡോക്സ്‌ പള്ളി വികാരി ഫാ. സ്റ്റിനോ സ്റ്റാൻലി ജോൺസ് തുടങ്ങിയവർ പ്രസംഗിച്ചു.

ഓണത്തിരക്കേറി, സബ്സിഡി ഉത്പന്നങ്ങൾക്ക് വൻ ഡിമാൻഡ്

കോഴഞ്ചേരി: തിരുവോണത്തിനു ദിവസങ്ങള്‍ മാത്രം ബാക്കി നില്‍ക്കേ വ്യാപാര സ്ഥാപനങ്ങളില്‍ വന്‍ തിരക്ക്. തുടർച്ചയായി പെയ്ത മഴയ്ക്കു നേരിയ ശമനമുണ്ടായതോടെയാണ് വ്യാപാര മേഖല സജീവമായത്. വെളിച്ചെണ്ണ വിലയിലുണ്ടായ കുറവ് വീട്ടമ്മമാര്‍ക്ക് ആശ്വാസമായി. വിവിധ സർക്കാർ സ്ഥാപനങ്ങൾ മുഖേന സബ്സിഡി നിരക്കിൽ എത്തിച്ച ഓണം കിറ്റുകൾക്കും ആവശ്യക്കാരേറെയാണ്. സപ്ലൈകോയുടെ സമൃദ്ധി ഓണകിറ്റിന് വന്‍ ഡിമാന്‍ഡാണ്. മാവേലി സൂപ്പര്‍മാര്‍ക്കറ്റുകളില്‍ സമൃദ്ധി ഓണക്കിറ്റിന്‍റെ സ്‌റ്റോക്ക് തീര്‍ന്നു. 1000 രൂപ വിലയുള്ള ഓണക്കിറ്റില്‍ അരി, പഞ്ചസാര പായസം കിറ്റ്, പലവ്യഞ്ജനങ്ങള്‍ ഉള്‍പ്പെടെ 17 സാധനങ്ങളാണ് ഉള്ളത്. റേഷന്‍ കാര്‍ഡ് നിര്‍ബന്ധമല്ലാത്തതിനാല്‍ വന്‍ തിരക്കാണ് കിറ്റ് വാങ്ങാന്‍ ഉണ്ടാകുന്നത്. കണ്‍സ്യൂമര്‍ ഫെഡിന്‍റെ നീതി സ്റ്റോറില്‍ കിറ്റ് വാങ്ങുന്നതിന് റേഷന്‍ കാര്‍ഡ് നിര്‍ബന്ധമാണ്. ഗ്രാമപ്രദേശങ്ങളില്‍ വനിതകള്‍ നേതൃത്വം കൊടുക്കുന്ന സ്വാശ്രയ സംഘങ്ങളും സമുദായ സംഘടനകളുടെ കീഴിലുള്ള വനിതാ സമാജങ്ങളും കുടുംബശ്രീ യൂണിറ്റുകളും വിവിധ തരത്തിലുള്ള ഉപ്പേരികള്‍ ഉത്പാദിപ്പിച്ച് വില്‍ക്കുന്നുണ്ട്. ടൗണ്‍ ഏരിയാകളില്‍ റസിഡന്‍റ്സ് അസോസിയേഷന്‍റെ നേതൃത്വത്തിലാണ് ഉപ്പേരി വില്പന അടക്കം സജീവമാണ്. ഇതോടൊപ്പം ഇലക്‌ട്രോണിക്സ്, വസ്ത്രതുണി വ്യാപാരശാലകളിലും വന്‍ തിരക്കാണനുഭവപ്പെടുന്നത്. കൃഷി ഭവനുകളുടെ കീഴില്‍ പച്ചക്കറി വില്‍ക്കുന്ന ഇക്കോ ഷോപ്പുകളും, പഞ്ചായത്തുകളുടെ നേതൃത്വത്തില്‍ കുടുംബശ്രീകളുടെ ആഭിമുഖ്യത്തിലും പച്ചക്കറി വില്പന നടത്തുന്നുണ്ട്.

ഉത്രാടം നാളില്‍ ചെറുകോലില്‍ ജലോത്സവം

പത്തനംതിട്ട: പമ്പാനദിയില്‍ ചെറുകോല്‍ നെട്ടായത്തില്‍ പുതിയ ഒരു ജലോത്സവത്തിനു തുടക്കമാകുന്നു. ഉത്രാടം തിരുനാള്‍ ജലോത്സവം എന്ന പേരിലാണ് ചെറുകോല്‍പ്പുഴ ഹിന്ദുമത പരിഷത്തിനു മുകളിലായുള്ള നെട്ടായത്തില്‍ സംഘടിപ്പിക്കുകയെന്ന് ഭാരവാഹികള്‍ പത്രസമ്മേളനത്തില്‍ പറഞ്ഞു. ചെറുകോല്‍ 712 -ാം നമ്പര്‍ എന്‍എസ്എസ് കരയോഗവും തിരുവനന്തപുരം ശ്രീ ഉത്രാടം തിരുനാള്‍ മാര്‍ത്താണ്ഡവര്‍മ ഫൗണ്ടേഷനുമാണ് സംഘാടകർ‌. ചെറുകോല്‍ ശ്രീ സുബ്രഹ്മണ്യ സ്വാമിക്ഷേത്ര കടവില്‍ നിന്നാണ് ജലോത്സവം ആരംഭിക്കുന്നത്. ഉച്ചയ്ക്ക് ഒന്നിന് ആരംഭിക്കുന്ന ജലോത്സവത്തിന് ശ്രീ ഉത്രാടം തിരുനാള്‍ മാര്‍ത്താണ്ഡവര്‍മ ഫൗണ്ടേഷന്‍ മുഖ്യരക്ഷാധികാരി പൂരുരുട്ടാതി തിരുനാള്‍ മാര്‍ത്താണ്ഡവര്‍മ ഭദ്രദീപം തെളിയിക്കും. പൊതുസമ്മേളനം എന്‍എസ്എസ് ഡയറക്ടര്‍ ബോര്‍ഡ് അംഗവും റാന്നി താലൂക്ക് യൂണിയന്‍ പ്രസിഡന്‍റുമായ ജലോത്സവത്തോട വി.ആര്‍. രാധാകൃഷ്ണന്‍ ഉദ്ഘാടനം ചെയ്യും. ജലഘോഷയാത്രയുടെ ഉദ്ഘാടനവും ഫ്‌ളാഗ് ഓഫും പ്രമോദ് നാരായണന്‍ എംഎല്‍എ നിര്‍വഹിക്കും. മത്സര വള്ളംകളി സംഘാടക സമിതി ചെയര്‍മാന്‍ പി.ആർ. രാജീവ് ഉദ്ഘാടനം ചെയ്യും. എ, ബി ബാച്ചിലായി 15 പള്ളിയോടങ്ങള്‍ജലോത്സവത്തില്‍ പങ്കെടുക്കും. സംഘാടകസമിതി ചെയര്‍മാന്‍ പി. ആർ. രാജീവ്, ചെറുകോല്‍ എന്‍എസ്എസ് കരയോഗം പ്രസിഡന്‍റ് സി. കെ. ഹരിചന്ദ്രൻ, കെ. ബി. ശശികുമാർ, ഇ. എസ്. ഹരികുമാര്‍ എന്നിവര്‍ പത്രസമ്മേളനത്തില്‍ പങ്കെടുത്തു.

എഐജിയുടെ കാറിടിച്ചു പരിക്കേറ്റ വഴിയാത്രക്കാരനെതിരേ കേസെടുത്ത് തിരുവല്ല പോലീസ്

തിരുവല്ല: എഐജിയും മുൻ പത്തനംതിട്ട ജില്ലാ പോലീസ് മേധാവിയുമായി വി.ജി. വിനോദ് കുമാർ സഞ്ചരിച്ച സ്വകാര്യ കാറിടിച്ച് പരിക്കേറ്റ വഴി യാത്രക്കാരനെ പ്രതിയാക്കി വാഹനാപകട കേസ് എടുത്ത പോലീസ് നടപടി വിവാദത്തിൽ. വിശദമായ അന്വേഷണത്തിന് ജില്ലാ പോലീസ് മേധാവി ഉത്തരവിട്ടു. ഓഗസ്റ്റ് 30 ന് രാത്രി 10.50 നാണ് സംഭവം. പോലീസ് ആസ്ഥാനത്ത് ക്രമസമാധാന ചുമതലയുള്ള എഡിജിപിയുടെ ഓഫീസിലെ എഐജിയാണ് വി.ജി. വിനോദ് കുമാർ. കുറ്റൂരിലെ ഹോട്ടല്‍ തൊഴിലാളി നേപ്പാള്‍ സ്വദേശി ജീവന്‍ പ്രസാദ് ദുംഗലി(47)നാണ് പരിക്കേറ്റത്. തിരുവനന്തപുരത്ത് നിന്നു കോട്ടയത്തേക്കു വന്ന മഹീന്ദ്ര എസ്‌യുവിയാണ് അപകടമുണ്ടാക്കിയത്. പോലീസ് ഡ്രൈവര്‍ അനന്തുവാണ് വാഹനം ഓടിച്ചിരുന്നത്. എംസി റോഡില്‍ കുറ്റൂരിലാണ് ജീവന്‍ പ്രസാദിനെ വാഹനം ഇടിച്ചത്. തലയിലും മുഖത്തും തോളിനും പരിക്കേറ്റ ജീവനെ എഐജിയുടെ വാഹനത്തില്‍ തന്നെ പുഷ്പഗിരി ആശുപത്രിയിലാക്കി. തുടര്‍ന്ന് വിവരം പോലീസ് സ്‌റ്റേഷനില്‍ അറിയിക്കുകയും ഡ്രൈവറുടെ മൊഴി വാങ്ങി പരിക്കേറ്റയാള്‍ക്കെതിരേ കേസ് എടുക്കുകയുമായിരുന്നു. പോലീസ് നടപടി വിവാദമയാതോടെയാണ് അന്വേഷണത്തിന് ജില്ലാ പോലീസ് മേധാവി ഉത്തരവിട്ടത്. എസ്പി ആർ. ആനന്ദ് അവധിയിലായിരുന്ന സമയത്താണ് തിരുവല്ല പോലീസ് വഴിവിട്ടു പ്രവര്‍ത്തിച്ചത്. വിവരം യഥാസമയം എസ്പിയെ അറിയിക്കുന്നതില്‍ സ്‌പെഷല്‍ ബ്രാഞ്ചിനും വീഴ്ചയുണ്ടായി. സാധാരണ അപകടത്തിന് ഇരയാകുന്നവരുടെ മൊഴി എടുത്ത് വാഹനം ഓടിക്കുന്നവര്‍ക്കെതിരേയാണ് എഫ്ഐആര്‍ രജിസ്റ്റര്‍ ചെയ്യുന്നത്. വിശദമായ അന്വേഷണത്തിനും സിസിടിവി പരിശോധനയ്ക്കുമൊക്കെ ശേഷമാണ് എഫ്ഐആര്‍ ഇടുക. എന്നാല്‍, എഐജിയുടെ സ്വാധീനം മൂലം വാദിയെ പ്രതിയാക്കി എഫ്ഐആര്‍ രജിസ്റ്റര്‍ ചെയ്യുകയായിരുന്നു. വിവരം വൈകിയാണെങ്കിലും ശ്രദ്ധയിൽപെട്ട ജില്ലാ പോലീസ് മേധാവി ആര്‍. ആനന്ദ് ഇതു സംബന്ധിച്ച അന്വേഷണത്തിന് ജില്ലാ സി ബ്രാഞ്ച് ഡിവൈഎസ്പി കെ.എ. വിദ്യാധരനെ ചുമതലപ്പെടുത്തി. നിയമവിരുദ്ധമായി എഫ്ഐആര്‍ ഇട്ടത് ആരുടെ നിര്‍ദേശപ്രകാരമാണെന്നതാണ് അന്വേഷിക്കുന്നത്. എഐജിയുടെ ഭാഗത്തു നിന്ന് അധികാര ദുര്‍വിനിയോഗം ഉണ്ടായതായിട്ടാണ് രഹസ്യാന്വേഷണ വിഭാഗങ്ങളുടെ റിപ്പോര്‍ട്ട്. പത്തനംതിട്ട എസ്പിയായിരുന്ന വി.ജി. വിനോദ്കുമാറിനെ നിരവധി കേസുകള്‍ അട്ടിമറിച്ചതിന്‍റെ പേരിലാണ് ്ഥലം മാറ്റിയത്. എഡിജിപി എം.ആര്‍. അജിത്കുമാറിന് ശബരിമലയിലേക്ക് ട്രാക്ടര്‍ യാത്ര ഒരുക്കിയതും വിനോദ്കുമാര്‍ എസ്പി ആയിരിക്കുമ്പോഴാണ്. ഏറ്റവും ഒടുവിലായി രണ്ടു വനിതാ എസ്ഐമാര്‍ക്ക് രാത്രികാലങ്ങളില്‍ വാട്‌സാപ്പ് സന്ദേശം അയച്ചതിന്‍റെ പേരില്‍ വിനോദ്കുമാറിനെതിരേ ഡിഐജി മെറിന്‍ ജോസഫിന്‍റെ നേതൃത്വത്തില്‍ അന്വേഷണം നടന്നു വരികയാണ്. സ്വകാര്യ കാറില്‍ ഡിപ്പാര്‍ട്ട്‌മെന്‍റ് ഡ്രൈവറെ ഡ്യൂട്ടിക്ക് നിയോഗിച്ചത് അടക്കമുള്ള വിഷയങ്ങളില്‍ എഐജി വിശദീകരണം നല്‍കേണ്ടി വരും.

യുവതിയുടെ പിത്താശയത്തിൽനിന്നു നീക്കിയത് 222 കല്ലുകൾ

അടൂർ: ലൈഫ്‌ലൈൻ ആശുപത്രിയിൽ പത്തനംതിട്ട സ്വദേശിയായ നാല്പതുകാരി വീട്ടമ്മയുടെ പിത്താശയത്തിൽനിന്നും 222 കല്ലുകൾ ലാപ്രോസ്കോപ്പിക് കോളിസിസ്റ്റെക്ടമി ശസ്ത്രക്രിയയിലൂടെ നീക്കം ചെയ്തു. വളരെ അപൂർവമായാണ് ഇത്രത്തോളം കല്ലുകൾ പിത്താശയത്തിൽ കാണുകയെന്ന് ഡോക്ടർമാർ. ലൈഫ് ലൈൻ ജനറൽ ആൻഡ് ലാപ്രസ്കോപ്പി വിഭാഗം തലവൻ ഡോ. മാത്യൂസ് ജോണിന്റെ നേതൃത്വത്തിലാണ് ശസ്ത്രക്രിയ നടത്തിയത്. ഒരു വർഷമായി വയറുവേദന അനുഭവപ്പെട്ടിരുന്ന വീട്ടമ്മ ഒരു മാസത്തിനു മുമ്പേയാണ് ലൈഫ് ലൈനിൽ പരിശോധനകൾക്ക് എത്തുന്നത്. ആവർത്തിച്ചുള്ള വയറുവേദനയായതിനാൽ തുടർന്നു നടത്തിയ പരിശോധനയിലാണ് പിത്താശയക്കല്ലുകൾ കണ്ടെത്തിയത്. ഡോ. അജോ അച്ചൻകുഞ്ഞ്, ഡോ ഷീജ പി. വർഗീസ് , ഡോ. പി.എൻ. പ്യാരി, ഡോ. ഷഹനാ ഷാജി, ഡോ. കെ. എസ്. ലക്ഷ്മി ഭായി എന്നീ ഡോക്ടർമാരും,സിസ്റ്റർ ജ്യോതി രാജൻ, ടെക്‌നിഷൻമാരായ ഷിനു ഷാജി, വൈഷ്ണവി, ഷിജിൻ സാമുവേൽ, എന്നിവരും ഡോ മാത്യൂസ് ജോണിനെ ശസ്ത്രക്രിയയിൽ സഹായിച്ചു.

ജില്ലാ ആശുപത്രി ലക്ഷ്യ ലേബർ റൂം ഉദ്ഘാടനം ഇന്ന്

കോഴഞ്ചേരി: ജില്ലാ ആശുപത്രിയില്‍ സംസ്ഥാന സര്‍ക്കാരിന്‍റെ ആരോഗ്യ കേരളം പദ്ധതിയില്‍ ഉള്‍പ്പെടുത്തി 8.17 കോടി രൂപ ചെലവിൽ നവീകരിച്ച ലക്ഷ്യ ലേബര്‍ റൂം ആൻഡ് ഓപ്പറേഷന്‍ തിയറ്റർ, മെഡിക്കേറ്റഡ് ഐ യൂണിറ്റ്, വയോജന വാര്‍ഡ് എന്നിവയുടെ ഉദ്ഘാടനവും, 3.5 കോടി രൂപ ചെലവു ചെയ്തു നിർമിക്കുന്ന ജില്ലാ ടിബി സെന്‍ററിന്‍റെ നിര്‍മാണോദ്ഘാടനവും ഇന്ന് ഉച്ച കഴിഞ്ഞ് മൂന്നിന് മന്ത്രി വീണാ ജോര്‍ജ് ആശുപത്രി വളപ്പില്‍ നിര്‍വഹിക്കും. ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം അധ്യക്ഷത വഹിക്കും. ആന്‍റോ ആന്‍റണി എംപി മുഖ്യ പ്രഭാഷണം നടത്തും. ഉദ്ഘാടനത്തോടനുബന്ധിച്ച് പൊതു സമ്മേളനം വണ്ടിപ്പേട്ടയിലാണ് ക്രമീകരിച്ചിരിക്കുന്നത്. ദേശീയ ആരോഗ്യ ദൗത്യം സ്‌റ്റേറ്റ് മിഷന്‍ ഡയറക്ടര്‍ ഡോ. വിനായക് ഗോയല്‍ മുഖ്യാതിഥിയായിരിക്കും. ജില്ലാ കളക്ടര്‍ എസ്. പ്രേം കൃഷ്ണന്‍ മുഖ്യ പ്രഭാഷണം നടത്തും. മുന്‍ എംഎല്‍എ രാജു ഏബ്രഹാം, ജില്ലാ പഞ്ചതായത്ത് മുൻ പ്രസിഡന്‍റ് ഓമല്ലൂര്‍ ശങ്കരന്‍, ത്രിതല ജനപ്രതിനിധികളായ ആർ. അജയകുമാര്‍, ജെ. ഇന്ദിരാദേവി, ബീനാ പ്രഭ, സാലി ഫിലിപ്പ്, ജിജി മാത്യു, സി. കെ. ലതാകുമാരി, ബിജിലി പി. ഈശോ, ആശുപത്രി സൂപ്രണ്ട് ഡോ. നിതീഷ് ഐസക് ശാമുവേല്‍, വിവിധ രാഷ്‌ട്രീയ സംഘടനാ പ്രതിനിധികള്‍ എന്നിവര്‍ പ്രസംഗിക്കും.

ജസ്റ്റീസ് പി.ഡി. രാജന് സംസ്ഥാന സര്‍ക്കാരിന്‍റെ അന്ത്യോപചാരം

ആറന്മുള: അന്തരിച്ച റിട്ട. ജസ്റ്റീസ് പി. ഡി. രാജന് സംസ്ഥാന സര്‍ക്കാരിന്‍റെ അന്ത്യാഞ്ജലി. മന്ത്രി വീണാ ജോര്‍ജ് സംസ്ഥാന സര്‍ക്കാരിനും മുഖ്യമന്ത്രിക്കും വേണ്ടി അന്തിമോപചാരം അര്‍പ്പിച്ചു. ഭാര്യ ഡോ. കെ. വത്സലകുമാരിയേയും കുടുംബാംഗങ്ങളെയും മന്ത്രി അനുശോചനം അറിയിച്ചു. ജില്ലാ ഭരണകൂടത്തിനു വേണ്ടി എഡിഎം ബി. ജ്യോതി പുഷ്പചക്രം സമര്‍പ്പിച്ചു. ഇന്നലെ ആറന്മുളയിലെ വീട്ടുവളപ്പിലായിരുന്നു ജസ്റ്റീസ് പി.ഡി. രാജന്‍റെ സംസ്കാരം. പത്തനംതിട്ട ഇടയാറന്മുള സ്വദേശിയായ ജസ്റ്റീസ് പി. ഡി. രാജന്‍ തദ്ദേശ സ്വയംഭരണ വകുപ്പ് ഓംബുഡ്സ്മാനായി പ്രവര്‍ത്തിക്കുകയായിരുന്നു. 2013 മുതല്‍ 2019 വരെ ഹൈക്കോടതി ജഡ്ജിയായിരുന്നു. 1995ല്‍ ആലപ്പുഴ എംഎസിറ്റി ജഡ്ജിയായാണ് ജുഡീഷ്യല്‍ സര്‍വീസ് ആരംഭിച്ചത്. 2009ല്‍ നിയമസഭാ സെക്രട്ടറിയായി. 2012ല്‍ കൊല്ലം ജില്ലാ ജഡ്ജിയായി. 2013 ജനുവരി 28നാണ് ഹൈക്കോടതി ജഡ്ജിയായി നിയമിതനാകുന്നത്. എന്‍ആര്‍ഐ കമ്മീഷനായും പ്രവര്‍ത്തിച്ചിട്ടുണ്ട്. ഹൃദയാഘാതത്തെ തുടര്‍ന്ന് കൊച്ചിയിലെ സ്വകാര്യ ആശുപത്രിയിലായിരുന്നു അന്ത്യം

സമസ്യ ക്വിസ് 2025 ഗ്രാന്‍റ് ഫിനാലെ: കൂടൽ യൂണിറ്റിന് ഒന്നാം സ്ഥാനം

പത്തനംതിട്ട: എംസിവൈഎം പത്തനംതിട്ട ഭദ്രാസനത്തിന്‍റെ നേതൃത്വത്തില്‍ പുത്തന്‍പീടിക മഡോണ ഇന്‍റര്‍നാഷണല്‍ റസിഡന്‍ഷല്‍ സ്‌കൂളില്‍ നടന്ന സമസ്യ ക്വിസ് 2025 ഗ്രാന്‍റ് ഫിനാലെയില്‍ കൂടല്‍ യൂണിറ്റ് ഒന്നാംസ്ഥാനവും ഉള്ളന്നൂർ, ചന്ദനപ്പള്ളി യൂണിറ്റുകള്‍ രണ്ടും മൂന്നും സ്ഥാനങ്ങളും നേടി. എംസിവൈഎം ബത്തേരി ഭദ്രാസന പ്രസിഡന്‍റ് എബി ഏബ്രഹാം ക്വിസ് ഉദ്ഘാടനം ചെയ്തു. ഭദ്രാസന വൈസ് പ്രസിഡന്‍റ് ജിഷ ജോസ് അധ്യക്ഷത വഹിച്ചു. ഭദ്രാസന ഡയറക്ടര്‍ ഫാ. ജോബ് പതാലില്‍ ആമുഖ സന്ദേശം നല്‍കി. ആനിമേറ്റര്‍ സിസ്റ്റര്‍ ജൊവാന്‍ എസ്‌ഐസി പതാക ഉയര്‍ത്തി. ജനറല്‍ സെക്രട്ടറി സുബിന്‍ തോമസ് സ്വാഗതവും ഭദ്രാസന ട്രഷറാര്‍ വി.എൽ. വിശാഖ് നന്ദിയും പറഞ്ഞു. അഞ്ച് വൈദിക ജില്ലകളില്‍ നിന്നായി 15 ടീമുകളും 45 മത്സരാഥികളും പങ്കെടുത്തു. മുന്‍ എംസിവൈഎം സഭാതല ട്രഷറര്‍ ജോബിന്‍ ഡേവിഡ് ക്വിസ് മത്സരത്തിന് നേതൃത്വം നല്‍കി. ഒന്നാം സ്ഥാനം നേടിയ കൂടല്‍ യൂണിറ്റ് സഭാതലത്തില്‍ നടക്കുന്ന ക്വസ് മത്സരത്തില്‍ ഭദ്രാസനത്തെ പ്രതിനിധീകരിച്ച് പങ്കെടുക്കും. ക്വിസ് മത്സരത്തിന് ഭദ്രാസന സമിതി ഭാരവാഹികള്‍ നേതൃത്വം നല്‍കി.

വയോധിക കാറിടിച്ച് മരിച്ചു

വെണ്ണിക്കുളം: റോഡരികിലെ വെയ്റ്റിംഗ് ഷെഡിനു മുന്പിൽ ബസ് കാത്തു നിൽക്കുകയായിരുന്ന വയോധിക നിയന്ത്രണം വിട്ടെത്തിയ കാർ ഇടിച്ച് മരിച്ചു. ആനിക്കാട് വള്ളിയാംകുളം പാരിക്കൽ വീട്ടിൽ പൊടിയമ്മ പാപ്പനാ (78) ണ് മരിച്ചത്. ഇന്നലെ രാവിലെ ഒന്പതോടെ വാലാങ്കര - അയിരൂർ റോഡിൽ വാളക്കുഴി ചുഴനയ്ക്കു സമീപമുള്ള ബസ് സ്റ്റോപ്പിലായിരുന്നു അപകടം. ചുഴനയിലുള്ള മകളുടെ വീട്ടിൽ നിന്ന് ആനിക്കാട് വീട്ടിലേക്ക് പോകാൻ ബസ് കാത്തു നിൽക്കുമ്പോഴാണ് തിരുവല്ല ഭാഗത്തു നിന്ന് അമിത വേഗത്തിൽ നിയന്ത്രണം വിട്ടെത്തിയ കാർ പൊടിയമ്മയെ ഇടിച്ചു വീഴ്ത്തയിത്. ഗുരുതരമായി പരിക്കേറ്റ ഇവരെ ഉടൻ തന്നെ കോഴഞ്ചേരി ആശുപത്രിയിൽ എത്തിച്ചെങ്കിലും രക്ഷിക്കാനായില്ല. ഒപ്പം നിന്നിരുന്ന ചുഴനസ്വദേശി ഗീത നിസാര പരിക്കുകളോടെ രക്ഷപെട്ടു. കാറിന്‍റെ ഡ്രൈവർ ഉറങ്ങിയതാണ് അപകട കാരണമെന്ന് നിഗമനം. പരേതനായ പാപ്പനാണ് ഭർത്താവ്. മക്കൾ: കൃഷ്ണൻകുട്ടി, തങ്കപ്പൻ, ചെല്ലപ്പൻ, ഗീത, വത്സ. മരുമക്കൾ: മണിയമ്മ, മിനി, ജോയി, ജോളി പരേതയായ ലാലി. മൃതദ്ദേഹം പോസ്റ്റുമോർട്ടത്തിനു ശേഷം ബന്ധുക്കൾക്ക് വിട്ടു നൽകി. സംസ്കാരം പിന്നീട്.

പന്പാനദിയിൽ ഇറങ്ങിയ ദന്പതികൾ ഒഴുക്കിൽപ്പെട്ടു, ഭർത്താവ് മുങ്ങിമരിച്ചു

കോഴഞ്ചേരി: വള്ളസദ്യയിൽ പങ്കെടുക്കാനെത്തിയ ദമ്പതികൾ പമ്പാനദിയിൽ ഒഴുക്കിൽ പെട്ടു. ഭർത്താവ് മുങ്ങി മരിച്ചു. കായംകുളം കൃഷ്ണപുരം ചേരാവള്ളി കണ്ണങ്കര വീട്ടിൽ ഭാസ്കരൻ പിള്ളയുടെ മകൻ വിഷ്ണു (42) ആണ് മുങ്ങി മരിച്ചത്. മാലക്കര പള്ളിയോടത്തിന് ഇന്നലെ നടത്തിയ വള്ളസദ്യ വഴിപാടിൽ പങ്കെടുക്കാനെത്തിയ കായംകുളം സ്വദേശികളായ ദമ്പതികളും ബന്ധുക്കളും വള്ളസദ്യയിൽ പങ്കെടുത്ത ശേഷം മാലക്കര പള്ളിയോടക്കടവിൽ കുളിക്കാനിറങ്ങിയതിനിടയിലാണ് അപകടമുണ്ടായത്. ഒപ്പമുണ്ടായിരുന്ന ബന്ധുവായ കുട്ടി ഒഴുക്കിൽപ്പെട്ടപ്പോൾ രക്ഷിക്കാൻ ശ്രമിച്ച വിഷ്ണുവിന്‍റെ ഭാര്യ രേഖ ഒഴുക്കിൽപ്പെട്ടു . ഇവരെ രക്ഷപ്പെടുത്താനുള്ള ശ്രമത്തിൽ വിഷ്ണുവും ഒഴുക്കിൽപെടുകയായിരുന്നു. 20 മീറ്ററോളം ഒഴുകിപ്പോയ രേഖയെ നാട്ടുകാർ രക്ഷപ്പെടുത്തിയെങ്കിലും വിഷ്ണു മുങ്ങിത്താഴുകയായിരുന്നുവെന്ന് പറയുന്നു. പത്തനംതിട്ട ദുരന്ത നിവാരണ സേനയുടെ രണ്ട് ടീമും ഫയർ ആൻഡ് റസ്ക്യൂ ടീമും സ്ഥലത്തെത്തി നടത്തിയ തെരച്ചിലിനൊടുവിൽ വൈകുന്നേരം 6.30 ഓടെ മൃതദേഹം കണ്ടെടുത്തു. വിഷ്ണു ഒഴുക്കിൽപ്പെട്ടിടത്ത് അഗാധമായ കുഴിയും അടിയൊഴുക്കുമുണ്ടായിരുന്നതായി രക്ഷാപ്രവർത്തനം നടത്തിയ അഗ്നിശമന സേനാ ഉദ്യോഗസ്ഥർ പറഞ്ഞു. മൃതദേഹം കോഴഞ്ചേരിയിലെ ജില്ലാ ആശുപത്രി മോർച്ചറിയിൽ. ആറന്മുള പോലീസ് മേൽ നടപടികൾ സ്വീകരിച്ചു. മരിച്ച വിഷ്ണു പൊതുമരാമത്ത് വകുപ്പിൽ ഹരിപ്പാട് ബ്ലോക്ക് പഞ്ചായത്തിൽ ഉദ്യോഗസ്ഥനാണ്. ഭാര്യ രേഖ കായംകുളം സെന്‍റ് മേരീസ് സ്കൂളിലെ ജീവനക്കാരിയാണ്.

പിഎം റോഡിൽ പൈപ്പ് പൊട്ടിയ ഭാഗത്തെ ടാറിംഗ് 15നകം പൂർത്തിയാക്കും

റാന്നി: പുനലൂർ - മൂവാറ്റുപുഴ റോഡിൽ തകർച്ച ഉണ്ടായ ഭാഗങ്ങളിലെ ടാറിംഗ് പ്രവൃത്തികൾ 15നകം പൂർത്തിയാക്കുമെന്ന് പ്രമോദ് നാരായൺ എംഎൽഎ. ഭാരതി എയർടെൽ കമ്പനിയുടെ ഒപ്ടിക്കൽ ഫൈബർ ലൈൻ സ്ഥാപിക്കുന്നതിനിടെ ഉണ്ടായ അശ്രദ്ധ മൂലം തിങ്കളാഴ്ചയാണ് പുനലൂർ - മൂവാറ്റുപുഴ സംസ്ഥാനപാതയിൽ ബ്ലോക്ക് പടിക്കും മന്ദിരം പടിക്കും മധ്യേ തകർച്ചയുണ്ടായത്. റോഡിന്‍റെ തകർന്ന ഭാഗങ്ങളിലെ നിർമാണ ജോലികൾ ചൊവ്വാഴ്ച ആരംഭിച്ചു. അഞ്ചു മീറ്റർ വീതിയിലും ആറ് മീറ്റർ നീളത്തിലും തകർന്ന ഭാഗങ്ങൾ പൂർണമായും പൊളിച്ചുമാറ്റി ജിഎസ്പി വിരിച്ചു ലെവൽ ചെയ്തിട്ടുണ്ട്. ഇത് ഉറച്ച ശേഷം പത്തോടെ ബിഎം ബിസി ടാറിംഗ് നടത്തി റോഡ് പൂർവസ്ഥിതിയിലാക്കും. നാശനഷ്ടം ഉണ്ടാക്കിയ കരാർ കമ്പനിയുടെ ചെലവിലാകും മുഴുവൻ നിർമാണ പ്രവൃത്തികളും നടത്തുക. ചൊവ്വാഴ്ച രാത്രിയോടെ സ്ഥലത്ത് നിയന്ത്രണങ്ങൾ ഒഴിവാക്കി റോഡിലൂടെ ഗതാഗതം സാധാരണ നിലയിലാക്കും. കുടിവെള്ള പൈപ്പുകൾ പുനസ്ഥാപിക്കുന്നതിനുള്ള നടപടികൾ ജല അഥോറിറ്റിയും നടത്തി വരുന്നുണ്ടെന്ന് എംഎൽഎ പറഞ്ഞു. കൂടുതൽ സ്ഥലങ്ങളിൽ പൈപ്പ് ലൈൻ തകരാർ ഉള്ളതിനാൽ ജലവിതരണം പൂർണമായും പുനരാരംഭിച്ചിട്ടില്ല. വ്യാഴാഴ്ചയോടെ ജലവിതരണം പൂർവസ്ഥിതിയിലാക്കാൻ സാധിക്കുമെന്നാണ് ഉദ്യോഗസ്ഥർ അറിയിച്ചിട്ടുള്ളത്. കെഎസ്ടിപി, ജലഅഥോറിറ്റി ഉന്നത ഉദ്യോഗസ്ഥർ എന്നിവർക്കൊപ്പം പ്രമോദ് നാരായൺ എംഎൽഎയും സ്ഥലം സന്ദർശിച്ചു.

കർഷകരെ കുരുക്കിലാക്കി സപ്ലൈകോ : ഉള്ള കടം വീട്ടില്ല, ഇനിയും കടം പറയും; ചോദിക്കരുത്!

പത്തനംതിട്ട: സപ്ലൈകോ ഏറ്റെടുത്ത നെല്ലിന്‍റെ വില നാലു മാസമായി ലഭിക്കുന്നില്ലെന്ന പരാതി നിലനിൽക്കേ പുതുതായി നെല്ല് ഏറ്റെടുക്കണമെങ്കിൽ വില ചോദിച്ചു പ്രശ്നമുണ്ടാക്കരുതെന്ന നിബന്ധനയും. കേന്ദ്ര, സംസ്ഥാന സർക്കാരുകൾ പണം നൽകുമ്പോൾ മാത്രമേ നെല്ലിന്‍റെ വില നൽകുകയുള്ളൂ എന്നിവ അംഗീകരിച്ച് കർഷകർ സാക്ഷ്യപത്രം നൽകണമെന്ന സപ്ലൈകോയുടെ പുതിയ നിർദേശം കർഷകരെ കുരുക്കിലാക്കിയിരിക്കുകയാണ്. ഇത്തവണത്തെ ആരംഭിച്ച ഓൺലൈൻ കർഷക രജിസ്‌ട്രേഷനൊപ്പമാണ് സാക്ഷ്യപത്രങ്ങൾ സപ്ലൈകോ ഉൾപ്പെടുത്തിയിരിക്കുന്നത്. വേനൽമഴയ്ക്കു ശേഷം കൊയ്തെടുത്ത നെല്ല് സപ്ലൈകോ നൽകി നാലു മാസം പിന്നിടുന്പോഴും സംഭരണ വില നൽകിയിട്ടില്ല. സാന്പത്തിക പ്രതിസന്ധിയിലായ കർഷകർക്ക് ഇത്തവണ ഓണം ഇല്ലെന്ന സ്ഥിതിയായിട്ടുണ്ട്. കൃഷിവകുപ്പും കൈയൊഴിഞ്ഞു നെല്ലിന്‍റെ സംഭരണ വില പാഡി രസീത് ഷീറ്റ് സമർപ്പിച്ചു ബാങ്ക് മുഖേന ലഭിക്കുമെന്നായതോടെ സംസ്ഥാന കൃഷിവകുപ്പ് കർഷകരെ കൈയൊഴിഞ്ഞ മട്ടാണ്. പലിശയ്ക്കു പണം വാങ്ങിയും പണയം വച്ചും നെൽകൃഷി ചെയ്ത കർഷകരാണ് വെട്ടിലായത്. ഏപ്രിൽ, മേയ് മാസങ്ങളിൽ കൊയ്ത്തു പൂർത്തിയാക്കി നെല്ല് സപ്ലൈകോയ്ക്കു കൈമാറിയതാണ്. പിആർഎസ് ലഭിച്ചെങ്കിലും ബാങ്കുകളിൽനിന്നു പണം നൽകുന്നില്ലെന്നാണ് ആക്ഷേപം. നെല്ലിന്‍റെ പണം ലഭിക്കാത്തതു മൂലം പലരുടെയും ജീവിതം ബുദ്ധിമുട്ടിലാണ്. ചികിത്സാ ചെലവുകൾക്കടക്കം പണം കണ്ടെത്താനാകാതെ ബുദ്ധിമുട്ടുകയാണ് കർഷകർ. കർഷകർ മേയ് പകുതിയോടെ നൽകിയ പിആർഎസ് രസീതുകൾ പത്തു ദിവസത്തോളം വൈകിയാണ് ഉദ്യോഗസ്ഥർ പാഡി ഓഫീസുകളിൽ രജിസ്റ്റർ ചെയ്തതെന്നും ഇതാണ് പ്രതിസന്ധിയായതെന്നും പറയുന്നു. സംസ്ഥാനത്താകമാനം കഴിഞ്ഞ സീസണിലെ നെല്ല് സംഭരിച്ച വകയിൽ 349.28 കോടിയാണ് സപ്ലൈകോ ഇനിയും കർഷകർക്കു നൽകാനുണ്ട്. ഈർപ്പം പാടില്ല നെല്ലിൽ 17 ശതമാനത്തിൽ കൂടുതൽ ഈർപ്പം പാടില്ലെന്നാണ് സംഭരണത്തിനുള്ള കേന്ദ്രനിബന്ധന. പതിര് മൂന്ന് ശതമാനം, കേടായത് നാല് ശതമാനം, കലർപ്പുകൾ ആറ് ശതമാനം, അജൈവ മാലിന്യങ്ങൾ ഒരു ശതമാനം എന്നിവയിൽ കൂടരുതെന്നും നിർദേശമുണ്ട്. എന്നാൽ, കർഷകരെ ഭീഷണിപ്പെടുത്താൻ ലക്ഷ്യമിട്ടാണ് നിബന്ധനകളെന്നു കർഷകസംഘടനകൾ ആരോപിക്കുന്നു. ഈർപ്പത്തിന്‍റെ അളവ് കൂടുന്നത് മഴയടക്കമുള്ള കാലാവസ്ഥ പ്രശ്നങ്ങൾ മൂലമാണ്. പാടശേഖരങ്ങളിൽനിന്നു നെല്ല് സംഭിക്കാൻ വൈകുന്നതും ഈർപ്പം വർധിക്കാൻ കാരണമാകുന്നുണ്ട്. അതേസമയം, കേന്ദ്ര നിബന്ധങ്ങൾ അനുസരിച്ചുമാത്രമേ നെല്ല് സംഭരിക്കാൻകഴിയൂകയുളളൂവെന്നു സപ്ലൈകോ പറയുന്നത്. ഇത് ഉറപ്പിക്കാൻ വേണ്ടിയാണ് സത്യവാങ്മൂലം. കൃത്യമായി ഉണക്കുകയും പതിര് നീക്കുകയും ചെയ്താൽ തടസമില്ലാതെ സംഭരണം നടത്താനാകും. തർക്കങ്ങളും ഒഴിവാകും. കേന്ദ്ര-സംസ്ഥാന വിഹിതം ഉപയോഗിച്ചാണ് നെല്ലിന്‍റെ വില നൽകുന്നതെന്നുമാണ് സപ്ലൈകോയുടെ വിശദീകരണം. കാലാവസ്ഥ ചതിച്ചു, പിന്നാലെ സർക്കാർ വകുപ്പുകളും പന്തളം കരിങ്ങാലിപ്പാടത്തെ കർഷകർക്ക് ഓണത്തിനു കണ്ണീരാണ് ബാക്കിയുള്ളത്. ഭാരിച്ച അധ്വാനത്തിലൂടെ വിളയിച്ച നെല്ലിന്‍റെ വിലയ്ക്കാണ് ബാങ്കുകൾ കയറിയിറങ്ങുന്നത്. കരിങ്ങാലിപ്പാടത്തെ 593 ഏക്കറിലായിരുന്നു കൃഷി. ചിറ്റിലപ്പാടം, വാരുകൊല്ല, വാളകത്തിനാൽ, ചിറമുടി, മഞ്ഞനംകുളം, മണത്തറ, തോണ്ടുകണ്ടം, വലിയകൊല്ല, ഈയാംകോട്, മേലെമൂപ്പത്തി, മൂന്നുകുറ്റി, കരിയിലച്ചിറ, മണ്ണിക്കൊല്ല എന്നിവിടങ്ങളിലായി 228 കർഷകരാണ് കൃഷിയിറക്കിയത്. വേനൽമഴ പല കൃഷിയിടങ്ങളെയും ബാധിച്ചു. ചിലരുടെ മൂന്നിലൊന്നും മഴയിൽ നശിച്ചു. പാടത്ത് ഡീവാട്ടറിംഗ് സൗകര്യമില്ലാത്തതു മൂലം വെള്ളം കെട്ടിയതാണ് കാരണം. മൂന്നുകുറ്റിയിൽ 50 ഏക്കറിൽ കൃഷിയിറക്കിയതിൽ 22 ഏക്കറിലെയും നെല്ല് നശിച്ചു പോയിരുന്നു. കേന്ദ്ര, സംസ്ഥാന സർക്കാരുകൾ കനിഞ്ഞാൽ മാത്രം വില സംഭരിച്ച നെല്ലിന്‍റെ തുക കേന്ദ്ര, സംസ്ഥാന സർക്കാരുകൾ സപ്ലൈകോയ്ക്കു നൽകുമ്പോൾ മാത്രമേ കർഷകർഷകർക്കു ലഭിക്കൂ. ഇക്കാര്യം പൂർണബോധ്യത്തോടെ അംഗീകരിക്കുന്നുവെന്നും ഇതിനു സമ്മതമാണെന്നുമാണ് കർഷകർ പുതുതായി ഒപ്പിട്ടു നൽകുന്ന സാക്ഷ്യപത്രത്തിൽ പറയുന്നത്. കേന്ദ്ര ഗുണമേന്മ മാനദണ്ഡങ്ങൾ പാലിക്കാത്ത പക്ഷം നെല്ല് സംഭരിക്കാതിരിക്കുന്നതടക്കമുള്ള ഏതു നടപടി സ്വീകരിക്കുന്നതിനു സപ്ലൈകോ അധികൃതർക്ക് പൂർണാധികാരമുണ്ടെന്നും എതിർപ്പില്ലെന്നും ഇത് അംഗീകരിക്കുന്നുവെന്നും രണ്ടാമത്തെ സത്യവാങ്മൂലത്തിൽ പറയുന്നു. 2025 - 26ലെ ഒന്നാംവിള സീസണിലേക്കുള്ള കർഷക രജിസ്‌ട്രേഷനാണ് നടക്കുന്നത്. ഇതുമായി ബന്ധപ്പെട്ട ഓൺലൈൻ അപേക്ഷയിലാണ് പുതിയ നിബന്ധനകൾ ഉൾപ്പെടുത്തിയിരിക്കുന്നത്. ഇത് അംഗീകരിക്കുന്നവർക്കു മാത്രമേ രജിസ്‌ട്രേഷൻ നടപടി പൂർത്തീകരിക്കാൻ കഴിയൂ. മുൻ വർഷങ്ങളിൽ സാക്ഷ്യപത്ര കോളമുണ്ടായിരുന്നെങ്കിലും ഇത്തവണ ഇതു പരിഷ്കരിച്ചു രണ്ടു പ്രത്യേക സത്യവാങ്മൂലങ്ങളാക്കി. ഒപ്പം നെല്ല് വില ഉൾപ്പെടുത്തുകയും ചെയ്തു.

നന്ദിയുടെ നല്ല വാക്കുകളുമായെത്തി മാര്‍ സെബാസ്റ്റ്യന്‍ വാണിയപ്പുരയ്ക്കല്‍

കാഞ്ഞിരപ്പള്ളി: നിയുക്ത കല്യാണ്‍ ആര്‍ച്ച്ബിഷപ് മാര്‍ സെബാസ്റ്റ്യന്‍ വാണിയപ്പുരയ്ക്കല്‍ ഇന്നലെ മാതൃരൂപതയായ കാഞ്ഞിരപ്പള്ളിയിലെത്തി ധന്യമായ പഴയ ഓര്‍മകള്‍ നന്ദിയോടെ അനുസ്മരിച്ചു. വാണിയപ്പുരയ്ക്കല്‍ കുടുംബവും മാതാപിതാക്കളും സഹോദരങ്ങളും തനിക്ക് പ്രഥമ ഭവനവും കാഞ്ഞിരപ്പള്ളി രൂപത രണ്ടാമത്തെ വിശാലമായ കുടുംബവുമാണെന്ന് അദ്ദേഹം പറഞ്ഞു. മേരിമാതാ മൈനര്‍ സെമിനാരി പരിശീലനം മുതല്‍ ഇന്നേവരെയുള്ള പ്രയാണത്തില്‍ കാഞ്ഞിരപ്പള്ളി രൂപതാ കുടുംബം നല്‍കിയ കരുതലും മാര്‍ ജോസഫ് പവ്വത്തില്‍, മാര്‍ മാത്യു വട്ടക്കുഴി, മാര്‍ മാത്യു അറയ്ക്കല്‍, മാര്‍ ജോസ് പുളിക്കല്‍ എന്നീ പിതാക്കന്മാരും വൈദികഗണവും സന്യസ്തരും വിശ്വാസികളും നല്‍കിയ കരുതലും പ്രാര്‍ഥനകളും വലിയ ബലം പകര്‍ന്നു. രൂപതയില്‍ വിവിധ ചുമതലകളില്‍ ലഭിച്ച അവസരങ്ങളും പ്രോത്സാഹനങ്ങളും അവിസ്മരണീയമായി സൂക്ഷിക്കുന്നു. യുവദീപ്തി ഡയറക്ടര്‍ ശുശ്രൂഷയ്ക്കുശേഷം റോമില്‍ ഉപരിപഠനത്തിനു പോയി മടങ്ങിയെത്തിയപ്പോള്‍ മാര്‍ മാത്യു അറയ്ക്കല്‍ ജുഡീഷല്‍ വികാരിയായി നിയമിച്ചു. ജനങ്ങളോടൊപ്പം കഴിയാനുള്ള ആഗ്രഹത്തില്‍ ഏതെങ്കിലുമൊരു ചെറിയ പള്ളിയില്‍ അസിസ്റ്റന്‍റ് വികാരി സ്ഥാനംകൂടി തരുമോ എന്നു ചോദിച്ചപ്പോള്‍ അറയ്ക്കല്‍ പിതാവ് വികാരിസ്ഥാനംതന്നെയാണ് ഏല്‍പ്പിച്ചത്. തുടര്‍ന്ന് പൂമറ്റം, ചെന്നാക്കുന്ന്, മുളംകുന്ന് പള്ളികളില്‍ വികാരിയായി. നല്ല ബന്ധങ്ങള്‍ വളര്‍ത്തുക മാത്രമല്ല എല്ലാവരെയും തുറവിയോടെ കേള്‍ക്കുക എന്നത് ഒരുപാട് അറിവും അനുഭവവും പകര്‍ന്നുകിട്ടാന്‍ ഇടയായി. രൂപതയിലും പുറത്തും അനേകരുമായി സ്ഥാപിച്ച ആത്മബന്ധമാണ് ജീവിതത്തിലെ ഏറ്റവും വലിയ കരുതല്‍. രൂപതയില്‍ ഇപ്പോള്‍ വലിയ ചുമതലകള്‍ വഹിക്കുന്ന വൈദികരേറെയും മൈനര്‍ സെമിനാരി പഠനം മുതല്‍ സഹപാഠികളും സഹപ്രവര്‍ത്തകരും ആത്മസ്‌നേഹിതരുമാണെന്നത് വലിയൊരു ബലമായി മാറി. മാര്‍ ജോസ് പുളിക്കല്‍ പിതാവുമായി മൈനര്‍ സെമിനാരിയില്‍ തുടങ്ങിയ സഹോദരബന്ധം ഇന്നും എന്നും ഊഷ്മളമായി സൂക്ഷിക്കുന്നു. മാര്‍ സെബാസ്റ്റ്യന്‍ വാണിയപ്പുരയ്ക്കല്‍ കാഞ്ഞിരപ്പള്ളി പ്രീസ്റ്റ് ഹോമില്‍ കഴിയുന്ന മുന്‍ മൈനര്‍ സെമിനാരി റെക്ടര്‍ ഫാ. മാത്യു ഏറത്തേടത്തെ സന്ദര്‍ശിച്ച് ഇന്നലെ അനുഗ്രഹം തേടി. പാസ്റ്ററല്‍ സെന്‍ററില്‍ ഒരുക്കിയ സ്വീകരണത്തിനുശേഷം മേജർ ആർക്കി എപ്പിസ്കോപ്പൽ മരിയൻ തീർഥാടന കേന്ദ്രമായ പഴയപള്ളിയില്‍ എട്ടുനോമ്പു തിരുനാള്‍ പ്രമാണിച്ച് വിശുദ്ധ കുര്‍ബാന അര്‍പ്പിച്ച ശേഷമാണു മടങ്ങിയത്. പാസ്റ്ററൽ ആനിമേഷൻ ഡയറക്ടർ ഫാ. സ്റ്റാൻലി പുള്ളോലിക്കൽ, പ്രൊക്കുറേറ്റര്‍ ഫാ. ഫിലിപ്പ് തടത്തില്‍, സിബിസിഐ ലെയ്റ്റി കൗൺസിൽ സെക്രട്ടറി ഷെവ. അഡ്വ. വി.സി. സെബാസ്റ്റ്യൻ, രൂപതാ പാസ്റ്ററല്‍ കൗണ്‍സില്‍ സെക്രട്ടറി ഡോ. ജൂബി മാത്യു എന്നിവര്‍ ക്രമീകരണങ്ങള്‍ക്കു നേതൃത്വം നല്‍കി.

കേബിള്‍ കമ്പനിയുടെ ഡ്രില്ലിംഗ്; പൈപ്പ് പൊട്ടി, കുടിവെള്ളം മുടങ്ങി

റാന്നി: പുനലൂര്‍ - മൂവാറ്റുപുഴ സംസ്ഥാന പാതയില്‍ സ്വകാര്യ മൊബൈല്‍ കമ്പനിയുടെ കേബിള്‍ ജോലികള്‍ക്കിടെ ജലഅഥോറിറ്റിയുടെ പ്രധാന പൈപ്പു ലൈന്‍ പൊട്ടി റോഡു തകര്‍ന്നു. റാന്നി ബ്ലോക്കുപടിക്കും മന്ദിരം പടിക്കും മധ്യേ പുതുച്ചിറപ്പടിയില്‍ ഇന്നലെ ഉച്ചകഴിഞ്ഞാണ് പൈപ്പ് പൊട്ടി റോഡില്‍ കുഴികളും ഗതാഗത തടസവുമുണ്ടായത്. റോഡിന്‍റെ അരികിലാണ് ഡ്രില്ലിംഗ് നടന്നിരുന്നതെങ്കിലും പ്രധാന പൈപ്പ് ലൈനില്‍ ഇതു തട്ടിയതാകാം വെള്ളം ഉയര്‍ന്ന് റോഡില്‍ കുത്തിയൊഴുകാന്‍ കാരണമായതെന്നു പറയുന്നു. റോഡിന്‍റെ മധ്യഭാഗം തകരുകയും ചെയ്തു. കെഎസ്ടിപി ഉദ്യോഗസ്ഥരുടെയും ജലഅഥോറിറ്റി ഉദ്യോഗസ്ഥരുടെയും സാന്നിധ്യം ഇല്ലാതെയാണ് സ്വകാര്യ കമ്പനിയുടെ തൊഴിലാളികള്‍ കേബിള്‍ സ്ഥാപിക്കാനായി റോഡിന്‍റെ സൈഡില്‍ ഡ്രില്ലിംഗ് നടത്തിയത്. ഇതിനിടെ ഉണ്ടായ അശ്രദ്ധയാണ് ജല അഥോറിറ്റിയുടെ പൈപ്പ് ലൈനുകള്‍ തകരാൻ കാരണം. കെഎസ്ടിപി പുനര്‍നിര്‍മാണം പൂര്‍ത്തീകരിച്ച സംസ്ഥാന പാതയിലാണ് തകര്‍ച്ച. ഇതോടെ സംസ്ഥാന പാതയില്‍ വാഹനങ്ങള്‍ അപകടത്തില്‍പ്പെടാനുള്ള സാധ്യതയേറി. കുഴി രൂപപ്പെട്ട സ്ഥലങ്ങളിലൂടെ വാഹനങ്ങള്‍ എത്തുന്നതൊഴിവാക്കാന്‍ പോലീസിന്‍റെയും ഫയര്‍ ഫോഴ്‌സിന്‍റെയും സഹായം തേടി. വാഹനങ്ങള്‍ വഴിതിരിച്ചുവിടാനുള്ള നടപടികളും താത്കാലികമായി സ്വീകരിക്കേണ്ടിവന്നു. മുന്നറിയിപ്പ് ബോര്‍ഡുകള്‍ സ്ഥാപിച്ചു വാഹനങ്ങളുടെ വേഗം നിയന്ത്രിച്ച് കടത്തിവിടാനാണ് ഇപ്പോഴത്തെ നീക്കം. ജലവിതരണവും തടസപ്പെട്ടു പ്രധാന പൈപ്പുലൈനിലെ തകരാറു കാരണം റാന്നിയിലും സമീപ പ്രദേശങ്ങളിലും കുടിവെള്ള വിതരണം തടസപ്പെട്ടു. മണ്ണാരക്കുളഞ്ഞിവരെയുള്ള മേഖലയില്‍ തടസമുണ്ടാകും. ജലവിതരണം പുനഃസ്ഥാപിക്കാന്‍ ദിവസങ്ങള്‍ വേണ്ടിവരുമെന്നാണ് സൂചന. ഡ്രില്ലിനിടെയുണ്ടായ പിഴവാണ് പൈപ്പ് തകരാന്‍ കാരണമായതെന്നു കണ്ടെത്തിയിട്ടുണ്ട്. പ്രധാന പൈപ്പ് പുനഃസ്ഥാപിക്കേണ്ടിവരുമെന്നാണ് സൂചന. ജലഅഥോറിറ്റി ഉദ്യോഗസ്ഥര്‍ സ്ഥലത്തെത്തി പരിശോധന നടത്തി. സംസ്ഥാന പാതയുടെ നവീകരണത്തെത്തുടര്‍ന്നു ലക്ഷക്കണക്കിനു രൂപ ചെലവഴിച്ചാണ് പൈപ്പ് ലൈനുകള്‍ പുനഃസ്ഥാപിച്ചത്. ഓണക്കാലത്ത് ജലവിതരണം തടസപ്പെടുന്നതൊഴിവാക്കാന്‍ അടിയന്തര നടപടികളുമായി ജലഅഥോറിറ്റി രംഗത്തെത്തിയിട്ടുണ്ട്. സ്വകാര്യ കമ്പനിയുടെ അനാസ്ഥ; നടപടി വേണമെന്ന് എംഎല്‍എ റാന്നി: പുനലൂര്‍ - മൂവാറ്റുപുഴ റോഡിനു നാശനഷ്ടം ഉണ്ടാക്കിയ സ്വകാര്യ കമ്പനിക്കെതിരേ നടപടി സ്വീകരിക്കണമെന്ന് പ്രമോദ് നാരായണ്‍ എംഎല്‍എ. പുനലൂര്‍ -മൂവാറ്റുപുഴ സംസ്ഥാന പാതയില്‍ റാന്നി മന്ദിരം പടിക്കു സമീപം റോഡിന്‍റെ മധ്യഭാഗം ഇടിഞ്ഞു താഴാന്‍ കാരണമായത് സ്വകാര്യ കമ്പനിയുടെ അശാസ്ത്രീയമായ നിര്‍മാണം മൂലമെന്ന് എംഎല്‍എ ചൂണ്ടിക്കാട്ടി. കെഎസ്ടിപി ചീഫ് എന്‍ജിനിയർ, ജില്ലാ കളക്ടര്‍ എന്നിവര്‍ക്ക് കത്ത് നല്‍കിയതായും പ്രമോദ് നാരായണ്‍ പറഞ്ഞു. കെഎസ്ടിപി ഉദ്യോഗസ്ഥരുടെയും വാട്ടര്‍ അഥോറിറ്റി ഉദ്യോഗസ്ഥരുടെയും സാന്നിധ്യം ഇല്ലാതെ റോഡില്‍ പണി നടത്തിയത് സ്വകാര്യ കമ്പനിയുടെ ഗുരുതരമായ അനാസ്ഥയാണ്. നാശനഷ്ടം ബന്ധപ്പെട്ട കമ്പനിയില്‍നിന്ന് ഈടാക്കണം. തുടര്‍ പ്രവൃത്തികള്‍ കെഎസ്ടിപി, ജല അഥോറിറ്റി ഉദ്യോഗസ്ഥരുടെ മേല്‍നോട്ടത്തില്‍ മാത്രമേ നടത്താവൂ. തടസപ്പെട്ട കുടിവെള്ള വിതരണം അതിവേഗം പുനഃസഥാപിക്കാൻ നടപടി സ്വീകരിക്കാന്‍ വാട്ടര്‍ അഥോറിറ്റി ഉദ്യോഗസ്ഥര്‍ക്കു നിര്‍ദേശം നല്‍കി. റോഡ് അതിവേഗം പൂര്‍വസ്ഥിതിയിലാക്കാൻ നടപടിയെടുക്കണമെന്നും എംഎല്‍എ നിര്‍ദേശം നല്‍കി.

ജസ്റ്റീസ് പി.ഡി. രാജന്‍റെ വിയോഗം ജന്മനാടിന് ദുഃഖമായി

കോഴഞ്ചേരി: കര്‍ഷക തൊഴിലാളി കുടുംബത്തില്‍ ജനിച്ച് കഠിനാധ്വാനത്തിലൂടെ ജുഡീഷറിയുടെ ഏറ്റവും വലിയ സ്ഥാനത്തെത്തിയ വ്യക്തിയായിരുന്നു കഴിഞ്ഞ ദിവസം അന്തരിച്ച റിട്ട. ജസ്റ്റീസ് പി.ഡി. രാജൻ. ആറന്മുള ഗ്രാമ പഞ്ചായത്തിലെ ഇടയാറന്മുള പന്നിപ്പുഴയില്‍ ദിവാകരന്‍ - ജാനകി ദമ്പതികളുടെ അഞ്ചുമക്കളില്‍ മൂത്ത മകനായി 1957 ല്‍ജനിച്ച രാജന്‍ പ്രാഥമിക വിദ്യാഭ്യാസത്തിനു ശേഷം കോഴഞ്ചേരി സെന്‍റ് തോമസ് കോളജില്‍ നിന്നും ധനതത്വ ശാസ്ത്രത്തില്‍ ബിരുദം സമ്പാദിച്ചതിനു ശേഷം കാലിക്കട്ട് സര്‍വകലാശാലയില്‍ നിന്നും നിയമ ബിരുദവും തുടര്‍ന്ന് എംജി സര്‍വകലാശാലയില്‍ നിന്ന് എല്‍എല്‍എമ്മും നേടി. പത്തനംതിട്ടയിലെ പ്രമുഖ അഭിഭാഷകനായിരുന്ന കെ. വി. ശിവന്‍പിള്ളയുടെ ജൂണിയറായി 1987 ല്‍ അഭിഭാഷക വൃത്തി ആരംഭിച്ചു. അഭിഭാഷക വൃത്തിയോടൊപ്പം ഇടതുപക്ഷ രാഷ്‌ട്രീയത്തില്‍ സജീവമായിരുന്ന രാജന്‍ 1991 ലെ ജില്ലാ കൗണ്‍സില്‍ തെരഞ്ഞെടുപ്പില്‍ കോയിപ്രം ഡിവിഷനില്‍ നിന്നും സിപിഎം സ്ഥാനാര്‍ഥിയായി മത്സരിച്ച് ജയിക്കുകയും ചെയ്തു. അഭിഭാഷകനായും ജില്ലാ കൗണ്‍സില്‍ അംഗമായും പൊതു രംഗത്ത് സജീവമായിരുന്ന രാജന്‍ 1995 ല്‍ ജില്ലാ ജഡ്ജിയുടെ റാങ്കില്‍ ആലപ്പുഴ എംഎസിറ്റി ജഡ്ജിയായാണ് ജുഡീഷറി സര്‍വീസ് ആരംഭിക്കുന്നത്. തുടര്‍ന്ന് നിയമസഭാ സെക്രട്ടറി , കൊല്ലം ജില്ലാ സെഷന്‍സ് ജഡ്ജി, 2013ല്‍ ഹൈക്കോടതി ജഡ്ജിയാകുകയും 2020 ല്‍ വിരമിക്കുകയും ചെയ്തു. പുല്ലാട് സ്വദേശിയായ ഡോ. കെ. വത്സല കുമാരിയാണ് ഭാര്യ. ഡോ. ആർ. ഇന്ദുശേഖര്‍, ആര്‍. ലക്ഷ്മി നായര്‍ എന്നിവര്‍ മക്കളാണ്. മരിക്കുന്നതിനു തലേ ദിവസമായ കഴിഞ്ഞ ശനിയാഴ്ച ആറന്മുള ഗ്രാമപഞ്ചായത്തിലെ പള്ളിയോടങ്ങള്‍ക്കുള്ള പഞ്ചായത്തിന്‍റെ ഗ്രാന്‍റ് വിതരണം ഉദ്ഘാടനം നടത്തിയതും പി.ഡി. രാജനായിരുന്നു. അദ്ദേഹം പങ്കെടുത്ത അവസാനത്തെ പൊതു പരിപാടി തന്‍റെ സ്വന്തം ഗ്രാമത്തിലായിരുന്നുവെന്നതും പ്രത്യേകതയായിരുന്നു. ആറന്മുള ഗ്രാമപഞ്ചായത്തിലെ ജനങ്ങളുമായി നല്ല സൗഹൃദം പുലര്‍ത്തിയിരുന്ന പി. ഡി. രാജന്‍റെ ആകസ്മിക മരണം പ്രദേശവാസികളെയും ദുഃഖത്തിലാഴ്ത്തി.

പത്തനംതിട്ട നഗരസഭ ഹാപ്പിനസ് പാർക്ക് ഉദ്ഘാടനം നാളെ

പത്തനംതിട്ട: നഗരസഭയുടെ ഓണസമ്മാനമായി ഹാപ്പിനസ് പാർക്ക് നാളെ നഗരസഭാ ചെയർമാൻ ടി. സക്കീർ ഹുസൈൻ നാടിന് സമർപ്പിക്കും. മുനിസിപ്പൽ ബസ് സ്റ്റാൻഡിന്‍റെ തെക്കുഭാഗത്തെ പ്രവേശന കവാടത്തോടു ചേർന്നാണ് പാർക്കും അനുബന്ധസൗകര്യങ്ങളും ഒരുക്കിയിരിക്കുന്നത്. വിശ്രമത്തിനും വിനോദത്തിനും ഒപ്പം ആസ്വാദ്യകരമായ നൈറ്റ് ലൈഫിനും സൗകര്യമൊരുക്കുക എന്ന ലക്ഷ്യത്തോടെ നഗരസഭ വിഭാവനം ചെയ്ത സാമൂഹ്യ ഇടങ്ങളിൽ ഒന്നു കൂടി പൂർത്തിയാവുകയാണ്. മുന്പ് പൂർത്തിയായ ടൗൺ സ്ക്വയർ നഗരത്തിന്‍റെ മുഖച്ഛായയിൽ മാറ്റമുണ്ടാക്കി. നാളെ വൈകുന്നേരം നാലിന് ടൗൺ സ്ക്വയറിൽ നടക്കുന്ന സമ്മേളനത്തിൽ ഹാപ്പിനസ് പാർക്ക് ഉദ്ഘാടനം ചെയ്യും. നിർമാണം പൂർത്തിയാക്കിയിരിക്കുന്ന പാർക്കിൽ കുട്ടികൾക്കായി വിവിധ കളി ഉപകരണങ്ങളും ഇരിപ്പിടങ്ങളും ഒരുക്കിയിട്ടുണ്ട്. ടേക്ക് എ ബ്രേക്ക്, കഫറ്റീരിയ എന്നീ അനുബന്ധസൗകര്യങ്ങളും നഗരസഭ ഇതോടൊപ്പം ഉറപ്പാക്കിയിട്ടുണ്ട്. നടപ്പാതയിൽ പൂച്ചെടികൾ പിടിപ്പിച്ചും മനോഹരമാക്കിയിട്ടുണ്ട്. ബസ് സ്റ്റാൻഡിനോടു ചേർന്ന് നഗരസഭ ഏറ്റെടുത്ത ട്രാവലേഴ്സ് ലോഞ്ചിൽ കുടുംബശ്രീയുടെ പ്രീമിയം കഫെ ഉടൻ പ്രവർത്തനം ആരംഭിക്കും. നഗരസഭ ബസ്് സ്റ്റാൻഡിൽ സ്പെഷൽ അസിസ്റ്റൻസ് പദ്ധതി പ്രകാരം ആരംഭിച്ച അഞ്ച് കോടി രൂപയുടെ നവീകരണ പ്രവർത്തനങ്ങൾ അവസാന ഘട്ടത്തിലാണ്. പദ്ധതിയുടെ ആദ്യഘട്ടമായി ബസ് സ്റ്റാൻഡിന്‍റെ പുനർനിർമാണം ശാസ്ത്രീയമായി പൂർത്തീകരിച്ചിരുന്നു. കാടുപിടിച്ചും മാലിന്യം നിറഞ്ഞു കിടന്ന ബസ് സ്റ്റാൻഡിന്റെ പിൻഭാഗം വൃത്തിയാക്കി പൂച്ചെടികൾ വച്ചുപിടിപ്പിച്ച് മനോഹരമാക്കിയിട്ടുണ്ട്. രണ്ടാം ഘട്ടത്തിൽ ഡ്രൈവ് വേ, നടപ്പാത എന്നിവയുടെ നിർമാണം അതിവേഗം പുരോഗമിക്കുകയാണ്. ബസ് സ്റ്റാൻഡ് ഭൂമിയുടെ ചുറ്റുമതിൽ നിർമാണത്തിന് ടെൻഡർ നടപടികളിലേക്ക് നഗരസഭ കടന്നിട്ടുണ്ട്. ഇത് പൂർത്തിയാകുന്നതോടെ ഡ്രൈവ് വേയുടെയും നടപ്പാതയുടെയും അവസാന ഘട്ടം പൂർത്തീകരിക്കാനാകും. അര കിലോമീറ്ററോളം നീളത്തിലാണ് ബസ് സ്റ്റാൻഡിനോടു ചേർന്നുള്ള നടപ്പാത ഒരുങ്ങുന്നത്. പ്രഭാത സായാഹ്ന സവാരി നടത്തുന്നവർക്ക് ഈ സൗകര്യം വളരെയേറെ പ്രയോജനപ്രദമാണ്. പരിമിതമായ പൊതു ഇടങ്ങൾ മാത്രം ഉണ്ടായിരുന്ന നഗരത്തിൽ കൂടുതൽ സാമൂഹ്യ സാംസ്കാരിക ഇടവും വിനോദത്തിനും വിശ്രമത്തിനുമായി കൂടുതൽ സൗകര്യങ്ങളും ഒരുക്കി മെച്ചപ്പെട്ടതും സുരക്ഷിതവുമായ സാമൂഹ്യ അന്തരീക്ഷത്തിൽ നഗര ജീവിതത്തിന പുതിയ മാനം നൽകുക എന്ന ഭരണസമിതിയുടെ ലക്ഷ്യമാണ് ഈ പ്രവർത്തനങ്ങളിലൂടെ സാക്ഷാത്കരിക്കപ്പെടുന്നതെന്ന് നഗരസഭ ചെയർമാൻ ടി. സക്കീർ ഹുസൈൻ പറഞ്ഞു.

ഒളിവിൽ പോയ കാപ്പ കേസ് പ്രതിയെ അടൂർ പോലീസ് അറസ്റ്റ് ചെയ്തു

അടൂർ: ജില്ലാ കളക്ടറുടെ തടങ്കൽ ഉത്തരവറിഞ്ഞ് ഒളിവിൽ പോയ കാപ്പ കേസ് പ്രതിയെ അടൂർ പോലീസ് അറസ്റ്റ് ചെയ്തു. അടൂർ പറക്കോട് ഇജാസ് മൻസിൽ ഇജാസ് റഷീദ് (26) നെയാണ് പിടികൂടിയത്. ഒട്ടേറെ ക്രിമിനൽ കേസുകളിൽ പ്രതിയായ ഇയാൾക്കെതിരേ കാപ്പ വകുപ്പ് 3 പ്രകാരം ജില്ലാ പോലീസ് മേധാവിയുടെ ശിപാർശയുടെ അടിസ്ഥാനത്തിൽ കളക്ടർ കഴിഞ്ഞ വർഷം തടങ്കൽ ഉത്തരവ് പുറപ്പെടുവിച്ചിരുന്നു. എന്നാൽ ഉത്തരവ് നടപ്പാക്കുന്നതിന് മുൻപ് ഇയാൾ ഒളിവിൽ പോയി. തുടർന്ന് അടൂർ പോലീസ് ഇയാൾഡക്കെതിരേ കഴിഞ്ഞ മാർച്ച് 21-ന് കേസ് എടുത്ത് അന്വേഷണം ആരംഭിച്ചു. ഓഗസ്റ്റ് 31ന് പറക്കോട് ജംഗ്ഷനിൽ നിന്നും എസ്ഐ ഡി.സുനിൽ കുമാറിന്‍റെ നേതൃത്വത്തിലുള്ള സംഘമാണ് ഇയാളെ കസ്റ്റഡിയിൽ എടുത്തത്. 2018 മുതൽ ഇയാൾ വധശ്രമം, മനഃപൂർവമല്ലാത്ത നരഹത്യാശ്രമം, ദേഹോപദ്രവം ഏല്പിക്കൽ, ഔദ്യോഗിക കൃത്യനിർവഹണം തടസപ്പെടുത്തൽ, കഞ്ചാവ് കൈവശം വയ്ക്കൽ തുടങ്ങിയ ഒട്ടേറെ ക്രിമിനൽ കേസുകളിൽ ഉൾപ്പെട്ടിട്ടുണ്ട്. അടൂർ പോലീസ് സ്റ്റേഷനിൽ ഒൻപതും പന്തളം പോലീസ് സ്റ്റേഷനിൽ ഒരു കേസുമാണ് ഇയാളുടെ പേരിൽ ഉള്ളത്.

ശ്രീനാദേവിയെ തള്ളി സിപിഐ

പത്തനംതിട്ട: രാഹുൽ മാങ്കൂട്ടത്തിൽ വിവാദത്തിൽ ജില്ലാ പഞ്ചായത്തംഗം ശ്രീനാദേവി കുഞ്ഞമ്മയെ തള്ളി സിപിഐ. ശ്രീനാദേവി ഇപ്പോൾ പാർട്ടി അംഗമല്ലെന്ന് സിപിഐ വ്യക്തമാക്കി. സിപിഐയുടെ ലേബലിൽ ജയിച്ച ജില്ലാ പഞ്ചായത്ത് അംഗമാണെങ്കിലും ഇപ്പോൾ പാർട്ടിയുമായി ബന്ധമില്ലെന്നാണ് വിശദീകരണം. അവരുടെ ഫേസ്ബുക്ക് പോസ്റ്റിൽ പാർട്ടിക്ക് ഉത്തരവാദിത്വമില്ലെന്നും സിപിഐ സംസ്ഥാന കൗൺസിലംഗവും അടൂർ മണ്ഡലം സെക്രട്ടറിയുമായ മുണ്ടപ്പള്ളി തോമസ് പറഞ്ഞു. രാഹുൽ മാങ്കൂട്ടത്തിൽ വിഷയത്തിൽ ഇരകളെ സൃഷ്ടിക്കാൻ ശ്രമമെന്നാരോപണവുമായി പത്തനംതിട്ട ജില്ല പഞ്ചായത്തംഗവും എഐവൈഎഫ് സംസ്ഥാന കമ്മിറ്റി അംഗവുമായ ശ്രീനാദേവി കുഞ്ഞമ്മ ഞായറാഴ്ചയാണ് രംഗത്തെത്തിയത്. തന്നെ ഇരയാക്കാൻ ഒരു ചാനൽ ശ്രമിച്ചെന്നും ഇവർ പറഞ്ഞിരുന്നു. രാഹുൽ മാങ്കൂട്ടത്തിൽ നിയമത്തിനു മുന്പിൽ തെറ്റുകാരനാണെങ്കിൽ ശിക്ഷിക്കപ്പെടണം. എന്നാൽ, ഈ വിഷയത്തിൽ സാങ്കല്പിക ഇരകളെ സൃഷ്ടിക്കാനുള്ള ശ്രമങ്ങൾ നടക്കുന്നുണ്ട്. ഇരകളെ മാത്രമല്ല ഇരകളെ സൃഷ്ടിക്കാൻ ശ്രമിക്കുന്നവരെയും ക്രൈംബ്രാഞ്ച് കണ്ടെത്തണമെന്നും ഫേസ്ബുക്ക് കുറിപ്പിൽ ഇവർ പറഞ്ഞു.

ഓണവിഭവങ്ങൾ ഒരുക്കാൻ ന്യായവില കടകൾ

പത്തനംതിട്ട: ഓണവിഭവങ്ങൾ ഒരുക്കാൻ ന്യായവില പച്ചക്കറി, പലവ്യഞ്ജന വ്യാപാരം ഉപഭോക്താക്കൾക്ക് ആശ്വാസമാകുന്നു. സഹകരണ മാർക്കറ്റുകൾ, സപ്ലൈകോ, ഹോർട്ടികോർപ് തുടങ്ങിയവയോടു ചേർന്നാണ് ന്യായവില വില്പനശാലകൾ ആരംഭിച്ചിരിക്കുന്നത്. ഓണച്ചന്തകളായി പ്രവർത്തിക്കുന്ന ഇത്തരം സ്ഥാപനങ്ങളിൽ ന്യായവിലയ്ക്ക് പച്ചക്കറിയും ഏത്തക്കായ ഉൾപ്പെടെയുള്ളവയും ലഭ്യമാകും. നാളെവരെയാണ് ഓണച്ചന്തകളുടെ പ്രവർത്തനം. മല്ലപ്പള്ളിയിൽ വിഎഫ്പിസികെ ചന്ത മല്ലപ്പള്ളി: വെജിറ്റബിൾ ആൻഡ് ഫ്രൂട്ട് പ്രമോഷൻ കൗൺസിലിന്‍റെ ആഭിമുഖ്യത്തിൽ പാതിക്കാട് സ്വാശ്രയ കർഷക വിപണിയോടനുബന്ധിച്ച് കർഷക ചന്ത ആരംഭിച്ചു. പ്രസിഡന്‍റ് ലെവി പോളിന്‍റെ അധ്യക്ഷതയിൽ ഗ്രാമപഞ്ചായത്ത് പ്രസിഡന്‍റ് എസ്. വിദ്യാമോൾ ഉദ്ഘാടനം ചെയ്തു. ആനിക്കാട് ഗ്രാമപഞ്ചായത്ത് പ്രസിഡന്‍റ് സൂസൻ ദാനിയേൽ, കുഞ്ഞുകോശി പോൾ, ഐ. ചാക്കോ, തോമസ്‌ കൊല്ലറക്കുഴി, വി.എം. ജോർജ്, സോജി ജോസ് എന്നിവർ പ്രസംഗിച്ചു. നാലുവരെ ഓണച്ചന്ത പ്രവർത്തിക്കും. നാടൻ പച്ചക്കറികൾ വിപണി വിലയേക്കാൾ 30 ശതമാനം വരെ വിലക്കുറവിൽ ലഭ്യമാകും. വടക്കടത്തുകാവിൽ ഓണച്ചന്ത അടൂർ: ഏറത്ത് കൃഷിഭവന്‍റെ നേതൃത്വത്തില്‍ വടക്കടത്തുകാവില്‍ ആരംഭിച്ച ഓണച്ചന്ത നിയമസഭാ ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍ ഉദ്ഘാടനം ചെയ്തു. കാര്‍ഷിക വിഭവങ്ങള്‍ മിതമായ നിരക്കില്‍ ജനങ്ങള്‍ക്ക് നല്‍കാന്‍ ഓണച്ചന്തയിലൂടെ കഴിയുമെന്ന് ഡെപ്യൂട്ടി സ്പീക്കര്‍ പറഞ്ഞു. ഏറത്ത് ഗ്രാമപഞ്ചായത്ത് പ്രസിഡന്‍റ് രാജേഷ് അമ്പാടി അധ്യക്ഷനായി. മറിയാമ്മ തരകൻ, റ്റി.ഡി. സജി, കൃഷി ഓഫീസര്‍ സൗമ്യ എന്നിവര്‍ പ്രസംഗിച്ചു. കാര്‍ഷിക ക്ഷേമവകുപ്പ് ജില്ലാതല ഓണച്ചന്ത അടൂരില്‍ അടൂർ: കാര്‍ഷിക ക്ഷേമ വകുപ്പിന്‍റെ ജില്ലാതല ഓണച്ചന്ത അടൂരില്‍ ആരംഭിച്ചു. നിയമസഭാ ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍ ഉദ്ഘാടനം ചെയ്തു. അടൂര്‍ നഗരസഭാ കൗണ്‍സിലര്‍ ഡി. സജി അധ്യക്ഷത വഹിച്ചു. ആദ്യ വില്‍പന പറക്കോട് ബ്ലോക്ക് പഞ്ചായത്ത് പ്രസിഡന്‍റ് എം.പി. മണിയമ്മ നിര്‍വഹിച്ചു. ജില്ലാ പ്രിന്‍സിപ്പല്‍ കൃഷി ഓഫീസര്‍ മാത്യു ഏബ്രഹാം, കൃഷി അസിസ്റ്റന്‍റ് ഡയറക്ടര്‍ റോണി വര്‍ഗീസ്, കൃഷി ഓഫീസര്‍ ഷിബിന്‍ ഷാജ് എന്നിവര്‍ പ്രസംഗിച്ചു.

കോൺഗ്രസ് ജനസന്പർക്ക പരിപാടി

മല്ലപ്പുഴശേരി: അഴിമതിയും കെടുകാര്യസ്ഥതയും മുഖമുദ്രയാക്കി ഭരിക്കുന്ന പിണറായി ഭരണത്തിന് അന്ത്യം സമാഗതമായതായി ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പിൽ. കെപിസിസി ആഹ്വാനമനുസരിച്ച് വാർഡ് കോൺഗ്രസ് കമ്മിറ്റികളുടെ നേതൃത്വത്തിൽ നടത്തുന്ന ജനസമ്പർക്ക പരിപാടിയുടെ ജില്ലാതല ഉദ്ഘാടനം മല്ലപ്പുഴശേരിയിൽ നിർവഹിച്ച് പ്രസംഗിക്കുകയായിരുന്നു അദ്ദേഹം. ഡിസിസി വൈസ് പ്രസിഡന്‍റ് എ. സുരേഷ്‌കുമാർ അധ്യക്ഷത വഹിച്ചു. ഡിസിസി ജനറൽ സെക്രട്ടറി സാമുവൽ കിഴക്കുപുറം, ബ്ലോക്ക് പ്രസിഡന്‍റ് ജെറി മാത്യു സാം, മണ്ഡലം പ്രസിഡന്‍റ് ടൈറ്റസ് കാഞ്ഞിരമണ്ണിൽ, നേതാക്കളായ മേഴ്‌സി സാമുവേൽ, ഷിബു കാഞ്ഞിക്കൽ, വി. ജി. കൃഷ്ണദാസ്, പി.കെ. ഇക്ബാൽ, അജിത് മണ്ണിൽ, തോമസ് സ്‌കറിയ, സാലി ലാലു, റോസമ്മ മത്തായി, സ്റ്റീഫൻ ജോർജ്, ടി.എസ്. സാറ, സ്റ്റീഫൻ ജോർജ്, ടെറിൻ ജോർജ്, ബെന്നി കുഴിക്കാല, അച്ചൻകുഞ്ഞ് നെല്ലിക്കാല, സോണി ഗംഗാധരൻ, രമാ ഭാസ്‌കർ, സുജ മാത്യു, അനിൽ ജോർജ് എന്നിവർ പ്രസംഗിച്ചു.

പച്ചത്തുരുത്ത് നിര്‍മാണോദ്ഘാടനം

കോന്നി: ഗ്രാമപഞ്ചായത്തില്‍ പച്ചത്തുരുത്ത് നിര്‍മാണോദ്ഘാടനം പെരിഞ്ഞൊട്ടക്കല്‍ സിഎഫ്ആര്‍ഡി കോളജില്‍ പ്രസിഡന്‍റ് അനി സാബു തോമസ് നിര്‍വഹിച്ചു. കോന്നി ഗ്രാമപഞ്ചായത്ത് ആരോഗ്യ വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍പേ‌ഴ്സൺ തോമസ് കാലായില്‍ അധ്യക്ഷത വഹിച്ചു. മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയിലുള്‍പ്പെടുത്തി പ്രാദേശിക ജൈവവൈവിധ്യ സംരക്ഷണം എന്ന ലക്ഷ്യത്തോടെയാണ് ഒരു ഏക്കര്‍ വിസ്തൃതിയില്‍ പച്ചത്തുരുത്ത് നിര്‍മിക്കുന്നത്. ഔഷധസസ്യത്തോട്ടം, ഫലവൃക്ഷത്തോട്ടം, നക്ഷത്ര വനം എന്നീ വിഭാഗങ്ങളിലായി 4.65 ലക്ഷം രൂപയിലാണ് നിര്‍മാണം. ഹരിത കേരളം മിഷന്‍ ജില്ലാ കോ-ഓര്‍ഡിനേറ്റര്‍ ജി. അനില്‍കുമാര്‍ പദ്ധതി വിശദീകരിച്ചു. കോന്നി ഗ്രാമപഞ്ചായത്ത് വൈസ് പ്രസിഡന്‍റ് റോജി ഏബ്രഹാം, വാര്‍ഡ് മെംബര്‍ ജിഷ ജയകുമാർ, അസിസ്റ്റന്‍റ് സെക്രട്ടറി എസ്. സജിനി മോൾ, തൊഴിലുറപ്പ് വിഭാഗം എൻജിനിയര്‍ കെ. വി. സവിത, സിഎഫ്ആര്‍ഡി അഡ്മിനിസ്‌ട്രേറ്റീവ് ഓഫീസര്‍ ജയചന്ദ്രൻ, കൃഷി ഓഫീസര്‍ ലിജി എന്നിവര്‍ പങ്കെടുത്തു.

എട്ടുനോന്പാചരണം

കുന്പഴ സെന്‍റ് മേരീസ് കത്തീഡ്രലിൽ കുമ്പഴ: സെന്‍റ് മേരീസ് ഓർത്തഡോക്സ് വലിയ കത്തീഡ്രലിൽ എട്ടുനോമ്പിന് തുടക്കം കുറിച്ചുകൊണ്ട് തീർഥാടന വാരാഘോഷത്തിന്‍റെ ഉദ്ഘാടനം ഡോ. സാമുവേൽ മാർ ഐറേനിയോസ് മെത്രാപ്പോലീത്ത നിർവഹിച്ചു. മാത്യൂസ് മാർ തേവോദോസിയോസ് മെത്രാപ്പോലീത്ത മുഖ്യ സന്ദേശം നൽകി. ഇടവക വികാരി ഫാ. കെ. ജി. മാത്യു അധ്യക്ഷത വഹിച്ചു. സഭാ മാനേജിംഗ് കമ്മിറ്റി അംഗങ്ങളായ അനിൽ കെ. ടൈറ്റസ്, നിതിൻ മണക്കാട്ടുമണ്ണിൽ, പത്തനംതിട്ട മുനിസിപ്പൽ ആരോഗ്യകാര്യ സ്ഥിരം സമിതി അധ്യക്ഷൻ ജെറി അലക്സ്‌, വാർഡ് കൗൺസിലർ ബിജിമോൾ മാത്യു എന്നിവർ പ്രസംഗിച്ചു.ഇടവക ട്രസ്റ്റി അലക്സാണ്ടർ മൂലമുറിയിൽ സ്വാഗതവും സഹവികാരി ഫാ. അജിമോൻ പാപ്പച്ചൻ നന്ദിയും പറഞ്ഞു. വേങ്ങൽ പള്ളിയിൽ തിരുവല്ല: വേങ്ങൽ സെന്‍റ് മേരീസ് മലങ്കര സുറിയാനി കത്തോലിക്കാ പള്ളിയിലെ ഇടവക തിരുനാളിനും എട്ടുനോമ്പ് ആചരണത്തിനും തുടക്കം കുറിച്ചു. ഇടവക വികാരി ഫാ. ആന്‍റണി ചെത്തിപ്പുഴ തിരുനാൾ കൊടിയേറ്റ് കർമം നിർവഹിച്ചു. ഇന്നുമുതൽ ആറു വരെയുള്ള ദിവസങ്ങളിൽ വൈകുന്നേരം 4 .30ന് ജപമാലയും തുടർന്ന് വിശുദ്ധ കുർബാനയും നടക്കും. ഫാ. ഫിലിപ്പ് തായില്ലം, ഫാ. രഞ്ജിത്ത് മഠത്തിറമ്പിൽ, ഫാ. ജോസഫ് കരിപ്പായിൽ, റവ. ഡോ. തോമസ് പാറക്കൽ, ഫാ. മാത്യു പുനക്കളം തുടങ്ങിയവർ വിവിധ ദിവസങ്ങളിൽ വിശുദ്ധ കുർബാനയ്ക്ക് നേതൃത്വം നൽകും. ഏഴിനു രാവിലെ എട്ടിന് റവ ഡോ. വർഗീസ് മനക്കലേട്ടിന്‍റെ മുഖ്യകാർമികത്വത്തിൽ വിശുദ്ധ കുർബാന. വൈകുന്നേരം ആറിന് കന്യാകോണിൽ ചെറിയാൻ ഏബ്രഹാമിന്‍റെ ഭവനത്തിൽ സന്ധ്യാ പ്രാർഥനയ്ക്ക് ഫാ. തോമസ് ആലുങ്കൽ വചന സന്ദേശം നൽകും. തുടർന്ന് പള്ളിയിലേക്ക് ആഘോഷമായ തിരുനാൾ റാസ. എട്ടിന് രാവിലെ 8. 30 ന് ക്നാനായ കത്തോലിക്ക സഭ കോട്ടയം അതിരൂപത സഹായ മെത്രാൻ ഗീവർഗീസ് മാർ അപ്രേമിന്‍റെ മുഖ്യകാർമികത്വത്തിൽ ആഘോഷമായ വിശുദ്ധ കുർബാന. കുട്ടികളുടെ ആദ്യകുർബാന സ്വീകരണം, തിരുനാൾ പ്രദക്ഷിണം, സമാപന ആശീർവാദം, കൊടിയിറക്ക് എന്നിവ നടക്കും. തുടർന്ന് സ്നേഹവിരുന്നോടു കൂടി പരിപാടികൾ സമാപിക്കും. ഇടവക വികാരി ഫാ. ആന്‍റണി ചെത്തിപ്പുഴ, ട്രസ്റ്റി തോമസ് എം. മാത്യു, സെക്രട്ടറി ജെറിൻ ഏബ്രഹാം എന്നിവരുടെ നേതൃത്വത്തിൽ വിവിധ കമ്മിറ്റികൾ പ്രവർത്തിക്കുന്നു. തിരുമൂലപുരം പള്ളിയിൽ തിരുവല്ല: തിരുമൂലപുരം സെന്‍റ് മേരീസ് മലങ്കര സുറിയാനി കത്തോലിക്കാ പള്ളിയിലെ പരിശുദ്ധ ദൈവമാതാവിന്‍റെ ജനനത്തിരുനാളിനും എട്ടു നോമ്പാചരണത്തിനും തുടക്കമായി. ഇന്നു മുതൽ ആറു വരെയുള്ള എല്ലാ ദിവസങ്ങളിലും വൈകുന്നേരം അഞ്ചിന് വിശുദ്ധ കുർബാനയും തുടർന്ന് വചനപ്രഘോഷണവും നടക്കും. ഫാ. നൈനാൻ വെട്ടിലേത്ത്, ഫാ. ബിനീഷ് സൈമൺ കാഞ്ഞിരത്തിങ്കൽ, ഫാ. ഫിലിപ്പ് തായില്യം, ഫാ. ഈപ്പൻ പുത്തൻ പറമ്പിൽ, ഫാ. മാത്യു തുണ്ടിയിൽ എന്നിവർ വിവിധ ദിവസങ്ങളിൽ വിശുദ്ധ കുർബാനയ്ക്ക് നേതൃത്വം നൽകും. ഏഴിനു രാവിലെ 7. 30ന് ഇടവക വികാരി ഫാ. വർഗീസ് ചാമക്കാലയുടെ മുഖ്യ കാർമികത്വത്തിൽ വിശുദ്ധ കുർബാന. വൈകുന്നേരം ആറിന് മധ്യസ്ഥപ്രാർഥന, തുടർന്ന് തിരുമൂലപുരം ജംഗ്ഷനിലേക്ക് തിരുനാൾ റാസ. എട്ടിനു രാവിലെ 6. 45 ന് റവ. ഡോ. ഫിലിപ്പ് പയ്യമ്പള്ളിയുടെ പ്രധാന കാർമികത്വത്തിൽ വിശുദ്ധ കുർബാന. തുടർന്ന് നേർച്ചവിളമ്പോടെ തിരുനാൾ സമാപിക്കും.

പ്രസ്ക്ലബിൽ ഓണാഘോഷം

പത്തനംതിട്ട: പത്തനംതിട്ട പ്രസ്ക്ലബിൽ ഓണാഘോഷവും കുടുംബമേളയും നടന്നു. അത്തപ്പൂക്കളം ഒരുക്കി ദീപം തെളിച്ചുകൊണ്ടായിരുന്നു തുടക്കം. പത്തനംതിട്ട നഗരസഭ ചെയർമാൻ ടി. സക്കീർ ഹുസൈൻ ദീപം തെളിച്ചു. മാധ്യമ പ്രവർത്തകരുടെ മക്കളിൽ ഉയർന്ന മാർക്കുനേടി വിജയിച്ചവർക്ക് ഡെപ്യൂട്ടി സ്പീക്കർ ചിറ്റയം ഗോപകുമാർ പുരസ്കാരം വിതരണം ചെയ്തു. ഓണസദ്യയുടെ ഉദ്ഘാടനം ആന്‍റോ ആന്‍റണി എംപി നിർവഹിച്ചു. പ്രസ്ക്ലബ് പ്രസിഡന്‍റ് ബിജു കുര്യൻ അധ്യക്ഷത വഹിച്ചു. ജില്ലാ പഞ്ചായത്തംഗം റോബിൻ പീറ്റർ, ഡിസിസി പ്രസിഡന്‍റ് പ്രഫ.സതീഷ് കൊച്ചുപറന്പിൽ, ബിജെപി ജില്ലാ പ്രസിഡന്‍റ് വി.എ. സൂരജ്, കേരള കോൺഗ്രസ് സംസ്ഥാന ഉപാധ്യക്ഷൻ പ്രഫ.ഡി.കെ. ജോൺ, മുൻ ഡിസിസി പ്രസിഡന്‍റ് പി. മോഹൻരാജ്, പത്തനംതിട്ട ഡിവൈഎസ്പി എസ്. ന്യൂമാൻ, ഡിസിസി ജനറൽ സെക്രട്ടറി സാമുവേൽ കിഴക്കുപുറം, മൗണ്ട് സിയോൺ ഗ്രൂപ്പ് വൈസ് ചെയർമാൻ സാം ഏബ്രഹാം കലമണ്ണിൽ, ജില്ലാ സ്പോർട്സ് കൗൺസിൽ പ്രസിഡന്‍റ് കെ. അനിൽ കുമാർ, കേരള കോൺഗ്രസ് -എം ജില്ലാ വൈസ് പ്രസിഡന്‍റ് പി.കെ. ജേക്കബ്, കെയുഡബ്ല്യുജെ സംസ്ഥാന സമിതിയംഗം ബോബി ഏബ്രഹാം, പ്രസ്ക്ലബ് സെക്രട്ടറി ജി. വിശാഖൻ, വൈസ് പ്രസിഡന്‍റ് സി.കെ.അഭിലാൽ, ട്രഷറർ എസ്. ഷാജഹാൻ, ജോയിന്‍റ് സെക്രട്ടറി ബിനിയ ബാബു തുടങ്ങിയവർ പ്രസംഗിച്ചു.

പെരുനാട് ഗ്രാമപഞ്ചായത്തിൽ പൈതൃക ഫെസ്റ്റ്

പെരുനാട്: റാന്നി പെരുനാട് പൈതൃക ഫെസ്റ്റ് 2025 ഉദ്ഘാടനം മഠത്തുംമൂഴി ഇടത്താവളത്തില്‍ കാര്‍ട്ടൂണിസ്റ്റ് ഡോ. ജിതേഷ്ജി നിര്‍വഹിച്ചു. ഗ്രാമപഞ്ചായത്ത് പ്രസിഡന്‍റ് പി. എസ്. മോഹനന്‍ അധ്യക്ഷത വഹിച്ചു. ഗ്രാമപഞ്ചായത്ത്, കുടുംബശ്രീ, കൃഷിഭവന്‍ എന്നിവ സംയുക്തമായാണ് ഫെസ്റ്റ് സംഘടിപ്പിക്കുന്നത്. സെപ്റ്റംബര്‍ മൂന്നു വരെയാണ് ഫെസ്റ്റ്. സബ്‌സിഡി നിരക്കില്‍ കാര്‍ഷിക ഉത്പന്നങ്ങള്‍ ലഭ്യമാക്കുന്ന ഓണച്ചന്ത, പഴയ കാല കാര്‍ഷിക ഉപകരണങ്ങളും ഉത്പാദന ഉപാധികളും പരിചയപ്പെടുത്തുന്ന പ്രദര്‍ശനം, സെമിനാർ, കലാരൂപങ്ങള്‍ എന്നിവ ഒരുക്കിയിട്ടുണ്ട്. ഓണവിഭവങ്ങളുടെ 20 സ്റ്റാളും കലാസന്ധ്യയും കുടുംബശ്രീയുടെ നേതൃത്വത്തിലുണ്ട്. റാന്നി ബ്ലോക്ക് പഞ്ചായത്ത് പ്രസിഡന്‍റ് കെ. എസ്. ഗോപി, ഗ്രാമപഞ്ചായത്ത് വൈസ് പ്രസിഡന്‍റ് ഡി. ശ്രീകല, സ്ഥിരം സമിതി അധ്യക്ഷരായ സി. എസ്. സുകുമാരൻ, എം. എസ്. ശ്യാം, സിഡിഎസ് ചെയര്‍പേര്‍സന്‍ ഷീല സന്തോഷ് എന്നിവർ പ്രസംഗിച്ചു.

പന്തളം തെക്കേക്കരയിൽ ഓണം ഫെസ്റ്റ്

പന്തളം: പന്തളം തെക്കേക്കര ഗ്രാമപഞ്ചായത്തും കുടുംബശ്രീയും സംയുക്തമായി സംഘടിപ്പിക്കുന്ന ഓണം ഫെസ്റ്റ് നിയമസഭാ ഡെപ്യുട്ടി സ്പീക്കര്‍ ചിറ്റയം ഗോപകുമാര്‍ പറപ്പെട്ടിയില്‍ ഉദ്ഘാടനം ചെയ്തു. കുടുംബശ്രീ ഉത്പന്നങ്ങളും കൃഷി വകുപ്പിന്‍റെ പച്ചക്കറിയും മേളയില്‍ ലഭ്യമാകും. സെപ്റ്റംബര്‍ നാലുവരെയാണ് മേള. ഗ്രാമപഞ്ചായത്ത് പ്രസിഡന്‍റ് എസ്. രാജേന്ദ്രപ്രസാദ്, വൈസ് പ്രസിഡന്‍റ് റാഹേല്‍, സ്ഥിരം സമിതി അധ്യക്ഷരായ വി.പി വിദ്യാധരപ്പണിക്കർ, എന്‍.കെ ശ്രീകുമാര്‍, പ്രിയാ ജ്യോതികുമാര്‍, അംഗങ്ങളായ എ.കെ സുരേഷ്, ജയാ ദേവി, ശ്രീവിദ്യ, പൊന്നമ്മ വര്‍ഗീസ്, രഞ്ജിത്ത്, ശരത്കുമാർ, സിഡിഎസ് ചെയര്‍പേര്‍സന്‍ രാജിപ്രസാദ്, സെക്രട്ടറി സി.എസ് കൃഷ്ണകുമാർ, കുടുംബശ്രീ അംഗങ്ങള്‍ തുടങ്ങിയവര്‍ പ്രസംഗിച്ചു.

1136 കുടുംബങ്ങളെ പുനരധിവസിപ്പിക്കും; ചെങ്ങറയിൽ നടപടി വേഗത്തിലാക്കും

പത്തനംതിട്ട: ചെങ്ങറ ഭൂസമര പ്രദേശത്തെ കുടുംബങ്ങളുടെ ജീവിതാവസ്ഥ മെച്ചപ്പെടുത്തുന്നതുമായി ബന്ധപ്പെട്ട് മുഖ്യമന്ത്രി പിണറായി വിജയന്‍റെ അധ്യക്ഷതയില്‍ യോഗം ചേര്‍ന്നു. 1136 കുടുംബങ്ങളെ പുനരധിവസിപ്പിക്കാനുള്ള നടപടികള്‍ വേഗത്തില്‍ പൂര്‍ത്തീകരിക്കണമെന്ന് മുഖ്യമന്ത്രി നിര്‍ദ്ദേശിച്ചു. ബന്ധപ്പെട്ട മന്ത്രിമാര്‍ ഉദ്യോഗസ്ഥരുമായും പ്ലാന്‍റേഷന്‍, ഫാമിംഗ് കോര്‍പറേഷനുകൾ തുടങ്ങിയവരുമായും ചര്‍ച്ച ചെയ്ത് ഇക്കാര്യത്തില്‍ നടപടികള്‍ സ്വീകരിക്കണം. പ്രത്യേക ക്യാമ്പ് നടത്തി റേഷന്‍ കാര്‍ഡ് വിതരണം നടത്തിയിട്ടുണ്ട്. ഓണക്കിറ്റും വിതരണം ചെയ്തു. അടുത്തമാസം മുതല്‍ ഭക്ഷ്യ വസ്തുക്കള്‍ വിതരണം ചെയ്യാൻ സഞ്ചരിക്കുന്ന റേഷന്‍കടകള്‍ ആരംഭിക്കും. തൊഴില്‍ കാര്‍ഡ് വിതരണം ഉടന്‍ പൂര്‍ത്തിയാക്കും. കുട്ടികളുടെ പോഷകാഹാരപ്രശനം പരിഹരിക്കാന്‍ നിലവിലുള്ള അങ്കണവാടികളെ ശക്തമാക്കാനും തീരുമാനിച്ചു. ആരോഗ്യപ്രശ്‌നങ്ങള്‍ കണ്ടെത്തി മതിയായ ചികിത്സ ഉറപ്പാക്കുന്നതിന് നിശ്ചിത ഇടവേളകളില്‍ മെഡിക്കല്‍ ക്യാമ്പ് സംഘടിപ്പിക്കണം. മരുന്നുകളുടെ ലഭ്യത ഉറപ്പാക്കണം. വിദ്യാർഥികള്‍ക്ക് പഠിക്കാനായി സോളാര്‍ ലാമ്പ് നല്‍കാന്‍ നടപടി സ്വീകരിക്കും. കുടിവെള്ള ലഭ്യത ഉറപ്പാക്കാനുള്ള നടപടികള്‍ കൈക്കൊള്ളാനും മുഖ്യമന്ത്രി നിര്‍ദേശിച്ചു. മന്ത്രിമാരായ കെ. രാജൻ, കെ. കൃഷ്ണന്‍കുട്ടി, എ. കെ. ശശീന്ദ്രൻ, എം. ബി. രാജേഷ്, ജി. ആർ. അനില്‍, ഒ. ആര്‍ കേളു, വീണാ ജോര്‍ജ്, ചീഫ് സെക്രട്ടറി ഡോ. എ. ജയതിലക്, നിയമ വകുപ്പ് സെക്രട്ടറി കെ. ജി. സനല്‍കുമാർ, റവന്യു സെക്രട്ടറി എം. ജി. രാജമാണിക്യം തുടങ്ങിയവർ പ്രസംഗിച്ചു.

തിരുവല്ലയില്‍ കോണ്‍ഗ്രസ് നൈറ്റ് മാര്‍ച്ച്

തിരുവല്ല: തെരഞ്ഞെടുപ്പ് കമ്മീഷന്‍ മോദി സര്‍ക്കാരിന്‍റെ ഏജന്‍റായി മാറിയതായി ഡിസിസി പ്രസിഡന്‍റ് സതീഷ് കൊച്ചുപറമ്പില്‍. ഇന്ത്യയുടെ പ്രതിപക്ഷ നേതാവ് രാഹുല്‍ ഗാന്ധി നയിക്കുന്ന വോട്ടര്‍ അധികാര്‍ യാത്രയ്ക്ക് അഭിവാദ്യം അര്‍പ്പിച്ചു കൊണ്ട് മണ്ഡലം കോണ്‍ഗ്രസ് കമ്മിറ്റികള്‍ നടത്തുന്ന നൈറ്റ് മാര്‍ച്ചിന്‍റെ ജില്ലാതല ഉദ്ഘാടനം തിരുവല്ലയില്‍ നിര്‍വഹിച്ചു പ്രസംഗിക്കുകയായിരുന്നു അദ്ദേഹം. തിരുവല്ല ഈസ്റ്റ് മണ്ഡലം പ്രസിഡന്‍റ് സജി എം.മാത്യു അധ്യക്ഷത വഹിച്ചു. കോണ്‍ഗ്രസ് ബ്ലോക്ക് പ്രസിഡന്‍റ് ഈപ്പന്‍ കുര്യന്‍ മുഖ്യപ്രഭാഷണം നടത്തി. ഡിസിസി എക്‌സിക്യൂട്ടീവ് അംഗം ആര്‍.ജയകുമാർ, മണ്ഡലം പ്രസിഡന്‍റുമാരായ ശ്രീജിത്ത് മുത്തൂർ, പി.എം. ഗിരീഷ് കുമാര്‍, രാജേഷ് മലയിൽ, ബിജിമോന്‍ ചാലാക്കേരി, കൊച്ചുമോള്‍ പ്രദീപ്, റെജി മണലില്‍, ജേക്കബ് വര്‍ഗീസ്, ബിജു കാഞ്ഞിരത്തുംമൂട്ടിൽ, രാജന്‍ തോമസ്, നെബു കോട്ടയ്ക്കൽ, പി.ജി. രംഗനാഥന്‍, ശാന്തകുമാരി എന്നിവര്‍ പ്രസംഗിച്ചു.

രാഹുലിനെതിരേ ഉയർന്ന വിവാദ ഓഡിയോ സന്ദേശം സംശയാസ്പദമെന്ന് അടൂർ പ്രകാശ്

പത്തനംതിട്ട: ഗര്‍ഭ ഛിദ്രത്തിനു നിര്‍ബന്ധിച്ചെന്ന ഓഡിയോ സന്ദേശത്തില്‍ രാഹുല്‍ മാങ്കൂട്ടത്തിലിനെ പിന്തുണച്ച് യുഡിഎഫ് കണ്‍വീനര്‍ അടൂര്‍ പ്രകാശ് എംപി. ആർട്ടിഫിഷൽ ഇന്‍റലിജൻസ് കാലഘട്ടത്തിൽ എന്തും ഏതു തരത്തിലും ഉണ്ടാക്കിയെടുക്കാന്‍ കഴിയും. സിപിഐ വനിതാ നേതാവിന്‍റെ പ്രതികരണം ശ്രദ്ധേയമാണെന്നും അവരുടെ ഫേസ്ബുക്കിൽ പറയുന്ന കാര്യങ്ങൾ ഗൗരവമുള്ളതാണെന്നും അടൂർ പ്രകാശ് പറഞ്ഞു. പലരെയും ക്രൂശിക്കുന്നതുപോലെ രാഹുല്‍ മാങ്കൂട്ടത്തിലിനേയും ക്രൂശിക്കുന്നു. രാഹുല്‍ നിയമസഭയില്‍ വരരുതെന്ന് പറയാനുള്ള അവകാശം എം. വി. ഗോവിന്ദനും ഡിവൈഎഫ്ഐക്കും ഇല്ല. രാഹുല്‍ മാങ്കൂട്ടത്തിലിനെതിരേ ഇപ്പോഴും ഒരു പരാതി പോലും എവിടെയും ലഭിച്ചിട്ടില്ലെന്ന് അടൂർ പ്രകാശ് ചൂണ്ടിക്കാട്ടി.

ഇരവിപേരൂർ സെന്‍റ് ആൻസ് പള്ളിയുടെ നവതി ആഘോഷ സമാപനം

ഇരവിപേരൂർ: വിശുദ്ധ അന്നായുടെ നാമത്തിലുള്ള മലങ്കര കത്തോലിക്കാ സഭയിലെ പ്രഥമ ഇടവകയായ ഇരവിപേരൂർ സെന്‍റ് ആൻസ് പള്ളിയുടെ ഒരു വർഷം നീണ്ട നവതി ആഘോഷ സമാപനവും തിരുനാളും ഒന്പതുവരെ നടക്കും. ഇടവക തിരുനാളിന് തുടക്കം കുറിച്ച് വികാരി ഫാ. ഏബ്രഹാം കുളങ്ങര കൊടിയേറ്റി. അഞ്ചുവരെ രാവിലെ 6.45 ന് എട്ടുനോമ്പിനോടനുബന്ധിച്ച് വിശുദ്ധ കുർബാനയും, വൈകുന്നേരം ആറിന് പൊടിപ്പാറ കുരിശടിയിൽ മധ്യസ്ഥ പ്രാർഥനയും ഉണ്ടാകും. ആറിനു വൈകുന്നേരം 6.30ന് സന്ധ്യാ പ്രാർഥനയേ തുടർന്ന് ഫാ. മാത്യു പുത്തൻപീടികയിൽ തിരുനാൾ സന്ദേശം നൽകും. 7.15 ന് പൊടിപ്പാറ കുരിശടിയിൽ നിന്ന് ഇരവിപേരൂർ ജംഗ്ഷൻ വഴി പള്ളിയിലേക്ക് തിരുനാൾ റാസ. ഏഴിനു രാവിലെ 8.30 ന് ആർച്ച്ബിഷപ് ഡോ. തോമസ് മാർ കൂറിലോസിന്‍റെ കാർമികത്വത്തിൽ വിശുദ്ധ കുർബാനയും തുടർന്ന് നവതി സമ്മേളനവും. മുതിർന്നവരെയും, വിവാഹ ജീവിതത്തിൽ 25,50 വർഷങ്ങൾ പൂർത്തിയാക്കിയവരെയും ആദരിക്കും. എട്ടിനു രാവിലെ എട്ടിന് വിശുദ്ധ കുർബാനയ്ക്ക് ഫാ. ഡോ. ജോസ് മരിയദാസ് പടിപ്പുരയ്ക്കൽ കാർമികത്വം വഹിയ്ക്കും. തുടർന്ന് നേർച്ച വിളമ്പ് . ഒന്പതിനു രാവിലെ 6.45 ന് ഫാ. ഡോ. വർഗീസ് മനയ്ക്കലേട്ടിന്‍റെ കാർമികത്വത്തിൽ വിശുദ്ധ കുർബാന, തുടർന്ന് സെമിത്തേരിയിൽ ധൂപപ്രാർഥന. 1935 ജൂലൈ 26 നാണ് ഇരവിപേരൂരിൽ മലങ്കര കത്തോലിക്കാ ഇടവക ആരംഭിച്ചത്. പ്രഥമ ദേവാലയത്തിന്‍റെ ശിലാസ്ഥാപനവും,കൂദാശയും ആർച്ച് ബിഷപ് ഈവാനിയോസ് നിർവഹിച്ചു.

കരിയാട്ടം ചലച്ചിത്രമേള

കോന്നി: കരിയാട്ടത്തിന്‍റെ ഭാഗമായി ഇന്ന് രാവിലെ 11 മുതൽ ചലച്ചിത്രമേള നടക്കും. കരിയാട്ടം സംഘാടക സമിതിയും ട്രാവൻകൂർ ഫിലിം സൊസൈറ്റിയുമായി ചേർന്നാണ് ചലച്ചിത്രമേള നടത്തുന്നത്. ചലച്ചിത്രമേള കേരള നിയമസഭാ ഡെപ്യൂട്ടി സ്പീക്കർ ചിറ്റയം ഗോപകുമാർ ഉദ്ഘാടനം ചെയ്യും. ഫിലിം സൊസൈറ്റി പ്രസിഡന്‍റ് രാജേന്ദ്രൻ അധ്യക്ഷത വഹിക്കും. വൈകുന്നേരം നാലിനു ചേരുന്ന സമാപന സമ്മേളനം പ്രശസ്ത ചലച്ചിത്ര താരം മദൻലാൽ ഉദ്ഘാടനം ചെയ്യും.

യുവതീയുവാക്കൾക്ക് തൊഴിലുറപ്പാക്കി മെഗാ തൊഴിൽമേള

കോന്നി: കരിയാട്ടത്തിന്‍റെ ഭാഗമായി കെഎസ്ആർടിസി ഗ്രൗണ്ടിൽ മെഗാ തൊഴിൽ മേള നടത്തി. തൊഴിൽ മേളയിൽ 423 പേർ പങ്കെടുത്തു. 253 അഭിമുഖങ്ങൾ തൊഴിൽ മേളയുടെ ഭാഗമായി നടന്നു.127 പേരെ ഷോർട്ട് ലിസ്റ്റ് ചെയ്തു.38 പേരെ തൊഴിലിനായി കമ്പനികൾ സെലക്ട് ചെയ്തു. തൊഴിൽ മേളയിൽ റിക്രൂട്ട്മെന്‍റ് നടത്താൻ നിരവധി കമ്പനികളാണ് എത്തിയത്. പ്രവൃത്തിപരിചയം മുൻനിർത്തിയാണ് സെലക്ഷൻ നടപടികൾ നടന്നത്. തൊഴിൽ മേള കോന്നി പോലീസ് ഡിവൈഎസ്പി അജയ്നാഥ് ഉദ്ഘാടനം ചെയ്തു. നോളജ് ഇക്കോണമി മിഷൻ ജില്ലാ ഓഫീസർ ഹരികുമാർ വിശദീകരണം നടത്തി. ജില്ലാ ആസൂത്രണ സമിതി ഉപാധ്യക്ഷൻ അജിത്ത് കുമാർ, കുടുംബശ്രീ മിഷൻ ജില്ലാ കോ-ഓർഡിനേറ്റർ ആദില, നോളജ് ഇക്കോണമി മിഷൻ ജില്ലാ കോ ഓർഡിനേറ്റർ ഷിജു സാംസംഗ്, കുടുബശ്രീ എഡിഎം സി. ബിന്ദു രേഖ തുടങ്ങിയവർ പ്രസംഗിച്ചു.

കുറ്റൂർ ഗ്രാമപഞ്ചായത്ത് വനിതാ കലാമേള ‘ജ്വാല 2025’

തിരുവല്ല: കുറ്റൂർ ഗ്രാമപഞ്ചായത്തിന്‍റെ പദ്ധതി വിഹിതത്തിൽ ഉൾപ്പെടുത്തി വനിതകളുടെ കലാഭിരുചി വർധിപ്പിക്കുന്നതിനായി വനിത കലാമേള ജ്വാല 2025 സംഘടിപ്പിച്ചു. മേളയുടെ ഉദ്ഘാടനം പുളിക്കീഴ് ബ്ലോക്ക് പഞ്ചായത്ത് പ്രസിഡന്‍റ് സി.കെ. അനു നിർവഹിച്ചു. ഗ്രാമപഞ്ചായത്ത് പ്രസിഡന്‍റ് അനുരാ സുരേഷ് അധ്യക്ഷത വഹിച്ചു. സീനിയർ പോലീസ് ഓഫീസർ പുഷ്പദാസ് മുഖ്യപ്രഭാഷണം നിർവഹിച്ചു. ജില്ലാ പഞ്ചായത്തംഗം സി.കെ. ലതാകുമാരി സന്ദേശം നൽകി. ബ്ലോക്ക് പഞ്ചായത്ത് അംഗം ജിനു തോമ്പുംകുഴി, പഞ്ചായത്ത് വൈസ് പ്രസിഡന്‍റ് സാലി ജോൺ, അംഗങ്ങളായ എൻ.ടി. ഏബ്രഹാം, ജോ ഇലഞ്ഞിമൂട്ടിൽ, ശ്രീവല്ലഭൻ നായർ, സാറാമ്മ കെ. വർഗീസ്, സിന്ധുലാൽ, ആൽഫാ അമ്മിണി ജേക്കബ്, ബിന്ദു കുഞ്ഞുമോൻ, ഐസിഡിഎസ് സൂപ്പർവൈസർ ബേനസീർ മീരാൻ, സിഡിഎസ് ചെയർപേഴ്സൺ വി.എസ്. ലീലാമ്മ, പഞ്ചായത്ത് സെക്രട്ടറി സുനിത ആർ. പണിക്കർ എന്നിവർ പ്രസംഗിച്ചു.‌

സഹകരണ ജീവനക്കാരോട് സർക്കാരിന് ചിറ്റമ്മനയം: സതീഷ് കൊച്ചുപറന്പിൽ

പത്തനംതിട്ട: കേരളത്തിലെ സഹകരണ ജീവനക്കാരോട് സർക്കാർ തൊഴിലാളിവിരുദ്ധ നിലപാടും ചിറ്റമ്മനയവും സ്വീകരിക്കുന്നതായി ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പിൽ. കേരള കോ - ഓപ്പറേറ്റീവ് എംപ്ലോയീസ് ഫ്രണ്ട് അസിസ്റ്റന്‍റ് രജിസ്ട്രാർ ഓഫീസിനു മുന്നിൽ നടത്തിയ ധർണ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. പ്രാഥമിക സഹകരണ സംഘങ്ങളിലെയും ക്ഷീര, ഹൗസിംഗ് മേഖലയിലെ ജീവനക്കാർ അവഗണന നേരിടുന്നതായി സതീഷ് കൊച്ചുപറന്പിൽ പറഞ്ഞു. ജില്ലാ പ്രസിഡന്‍റ് ബിജു തുമ്പമൺ അധ്യക്ഷത വഹിച്ചു. കെപിസിസി ജനറൽ സെക്രട്ടറി അനീഷ് വരിക്കണ്ണാമല മുഖ്യപ്രഭാഷണം നടത്തി. ഡിസിസി ജനറൽ സെക്രട്ടറിമാരായ സാമുവേൽ കിഴക്കുപുറം, ജി. രഘുനാഥ്, കെസിഇഎഫ് സംസ്ഥാന ജനറൽ സെക്രട്ടറി ആക്കിനാട് രാജീവ്, അനിൽ തോമസ്, റെജി പി. സാം, അഖിൽ ഓമനക്കുട്ടൻ, എം.പി. രാജു, മനോജ് ചെറിയാൻ, ജി. പ്രമോദ്, സിജു ജോസഫ് എന്നിവർ പ്രസംഗിച്ചു.

വയോജന പകൽപരിപാലനകേന്ദ്രം സാമൂഹികവിരുദ്ധരുടെ താവളം

അടൂർ: പത്തനംതിട്ട ജില്ലാ പഞ്ചായത്തിന്‍റെ കീഴിൽ ഏനാദിമംഗലം പഞ്ചായത്തിലെ കുന്നിടയിൽ ആരംഭിച്ച വയോജന പകൽ പരിപാലന കേന്ദ്രം പ്രവർത്തനം ആരംഭിക്കാതെയും കെട്ടിടം വേണ്ടവിധത്തിൽ പരിപാലിക്കാതെയും നശിച്ചുതുടങ്ങി. അപ്പിനഴികത്തു ശാന്തകുമാരി ജില്ലാ പഞ്ചായത്ത്‌ പ്രസിഡന്‍റായിരുന്ന 2009 ജനുവരി 22നാണ് ഈ കെട്ടിടത്തിന്‍റെ ഉദ്ഘാടനം നിർവഹിച്ചത്. അന്നത്തെ വിദ്യാഭ്യാസ മന്ത്രി എം. എ. ബേബിയായിരുന്നു ഉദ്ഘാടകൻ. വയോജനങ്ങൾക്ക് ഒറ്റപ്പെടലിന്‍റെ വിരസതകളിൽനിന്നു മാറി മാനസികോല്ലാസത്തോടെ സമയം ചെലവഴിക്കാനുള്ള അവസരമൊരുക്കുന്ന കേന്ദ്രം എന്ന നിലയിലാണ് കെട്ടിടത്തിന്‍റെ പണി പൂർത്തീകരിച്ചത്. എന്നാൽ വർഷങ്ങൾ പിന്നിട്ടിട്ടും പകൽ പരിപാലന കേന്ദ്രം എന്ന നിലയിൽ യാതൊരു പ്രവർത്തനങ്ങളും നടന്നില്ലെന്ന് പ്രദേശവാസികൾ പറയുന്നു. ജില്ലാ പഞ്ചായത്ത് ഭരണസമിതി മാറി വന്നിട്ടും സ്ഥാപനത്തോടു തികഞ്ഞ അവഗണനയാണ് കാണിക്കുന്നത്. ജില്ല സാമൂഹികക്ഷേമ മിഷനു കീഴിൽ വയോജന പരിപാലനത്തിന് നിരവധി പദ്ധതികളുണ്ട്. ‌ സംസ്ഥാനത്തെ മിക്ക ജില്ലകളിലും പകൽ വീട് എന്ന നിലയിൽ ഇത്തരം കേന്ദ്രങ്ങൾ ആരംഭിച്ചിട്ടുണ്ടെങ്കിലും മിക്കവയും പ്രവർത്തനരഹിതമാണ്. നേരത്തേ വിവാഹ ആവശ്യങ്ങൾക്കായി കേന്ദ്രത്തിന്‍റെ ഹാൾ ഉപയോഗിച്ചിരുന്ന ു. എന്നാൽ ഇപ്പോൾ പൂർണമായും അടച്ചിട്ട നിലയിലാണ്. രാത്രികാലങ്ങളിൽ ഉൾപ്പെടെ ലഹരി മാഫിയയുടെയും സാമൂഹിക വിരുദ്ധരുടെയും താവളമായി സ്ഥലം മാറിയിരിക്കുന്നുവെന്ന് പ്രദേശവാസികൾ ആരോപിക്കുന്നു. പദ്ധതി വിജയകരമായി നടപ്പാക്കാമെന്നിരിക്കേ കെട്ടിടത്തിന്‍റെ നിയന്ത്രണം ഏറ്റെടുത്ത് പകൽ പരിപാലന കേന്ദ്രം തുറക്കാൻ ഗ്രാമപഞ്ചായത്തും തയാറാകുന്നില്ല. ഇത്തരം ഒരു കേന്ദ്രത്തിന്‍റെ ആവശ്യകത നാട്ടിലുണ്ടെങ്കിലും പദ്ധതി ഏറ്റെടുക്കാൻ അധികൃതർക്കു താത്പര്യമില്ലെന്നു പറയുന്നു. വീടുകളിൽ പകൽ ഒറ്റപ്പെട്ടു കഴി‍യുന്ന വയോജനങ്ങളെ വാഹനത്തിൽ കൊണ്ടു വരികയും വൈകുന്നേരം തിരികെ കൊണ്ടുപോകുകയും ചെയ്യുന്ന തരത്തിൽ പ്രവർത്തനം നടപ്പാക്കണമെന്നാണാവശ്യം.

ഭാര്യയെയും മക്കളെയും ദുരൂഹ സാഹചര്യത്തിൽ കാണാതായി; യുവാവിനെ തൂങ്ങിമരിച്ചനിലയിൽ കണ്ടെത്തി

തിരുവല്ല: നിരണത്തുനിന്നും മക്കള്‍ക്കൊപ്പം കാണാതായ റീനയുടെ ഭര്‍ത്താവ് കവിയൂര്‍ ഞാലിക്കണ്ടം മാറമല വീട്ടില്‍ അനീഷ് മാത്യു (32)വിനെ തൂങ്ങിമരിച്ചനിലയില്‍ കണ്ടെത്തി. ഞാലിക്കണ്ടത്തെ കുടുംബവീട്ടില്‍ ഞായറാഴ്ച വൈകുന്നേരം 4.30 നാണ് അനീഷിനെ മരിച്ചനിലയില്‍ കണ്ടെത്തിയത്. റീനയും മക്കളും ഓട്ടോറിക്ഷ ഡ്രൈവറായ ഭര്‍ത്താവ് അനീഷ് മാത്യുവിനൊപ്പം ആലുംതുരുത്തി ചന്തയ്ക്ക് സമീപത്തെ വാടകവീട്ടിലാണ് താമസിച്ചുവന്നിരുന്നത്. രണ്ടാഴ്ച മുന്പ് യുവതിയെയും രണ്ടു പെൺകുട്ടികളെയും കാണാതായ വിവരം റീനയുടെ സഹോദരന്‍ റിജോയാണ് പുളിക്കീഴ് പോലീസില്‍ അറിയിച്ചത്. പരാതി നല്‍കിയതിനു പിന്നാലെ അനീഷിനെ പോലീസ് ചോദ്യം ചെയ്യലിനായി ദിവസവും വിളിപ്പിച്ചിരുന്നതായി ബന്ധുക്കള്‍ പറഞ്ഞു. നിരണം അഞ്ചാം വാര്‍ഡില്‍ കാടുവെട്ടില്‍ വീട്ടില്‍ റീന കെ. ജയിംസ്, മക്കളായ അക്ഷര (എട്ട്), അല്‍ക്ക (ആറ്) എന്നിവരെയാണ് കാണാതായത്. ഇവരുമായി ബന്ധപ്പെട്ട സിസിടിവി ദൃശ്യങ്ങള്‍ പോലീസിനു ലഭിച്ചിട്ടുണ്ട്. ജില്ലാ പോലീസ് മേധാവി നിയോഗിച്ച പ്രത്യേക സംഘമാണ് അന്വേഷിക്കുന്നത്. ഇവരെ കാണാതായി രണ്ടു ദിവസത്തിനുശേഷമാണ് പോലീസിൽ പരാതി ലഭിക്കുന്നത്. ഇത് അന്വേഷണത്തിന്‍റെ തുടക്കത്തില്‍ ഏറെ ദുരൂഹതകള്‍ ഉണ്ടാക്കിയിരുന്നു. എന്നാല്‍, ഇപ്പോള്‍ ലഭിച്ച സിസിടിവി ദൃശ്യങ്ങള്‍ റീനയും മക്കളും എവിടെയോ യാത്രപോകാന്‍ ഉറപ്പിച്ച രീതിയിലാണുള്ളത്. ഇവരുടെ കൈവശം ബാഗുകളുണ്ട്. ഇവര്‍ക്കായുള്ള അന്വേഷണം സംസ്ഥാനത്തൊട്ടാകെ നടക്കുകയാണെന്ന് പോലീസ് അറിയിച്ചു.

ഫേസ് ഓഫ് തിരുവല്ല ഫൗണ്ടേഷൻ ഓണാഘോഷം

തിരുവല്ല: ഫേസ് ഓഫ് തിരുവല്ല ഫൗണ്ടേഷന്‍റെ നേതൃത്വത്തിൽ കുടുംബസംഗമവും ഓണാഘോഷവും ചാരിറ്റി വിതരണവും ഡോ. ഗീവർഗീസ് മാർ കൂറിലോസ് മെത്രാപ്പോലീത്ത ഉദ്ഘാടനം ചെയ്തു. തന്ത്രി അക്കീരമൺ കാളിദാസ ഭട്ടതിരിപ്പാട് ഓണപ്പതാക ഉയർത്തി. സാംസ്‌കാരിക സമ്മേളനവും ചാരിറ്റി വിതരണവും ജോബ് മൈക്കിൾ എംഎൽഎ ഉദ്ഘാടനം ചെയ്തു. ഫേസ് ഓഫ് തിരുവല്ലയുടെ പേഷ്യന്‍റ് മൊബൈലിറ്റി സർവീസിന്‍റെ ഔദ്യോഗിക ഉദ്ഘാടനവും അദ്ദേഹം നിർവഹിച്ചു. ആർ. സനൽ കുമാർ അംഗങ്ങൾക്കുള്ള ആദരവും ഓണക്കിറ്റ് വിതരണവും നടത്തി. പുഷ്പഗിരി മെഡിക്കൽ കോളജുമായി ചേർന്ന് ആരംഭിച്ച സാന്ത്വനം പദ്ധതിയുടെ (ജനറൽ മെഡിസിൻ വിഭാഗത്തിൽ ജനറൽ വാർഡിൽ അഡ്മിറ്റാകുന്ന രോഗികൾക്ക് മരുന്ന് ഉൾപ്പെടെ 600 രൂപ നിരക്കിൽ ചികിത്സ) ഹോസ്പിറ്റൽ മെഡിക്കൽ ഡയറക്ടർ ഡോ. ഏബ്രഹാം ജോർജ് പ്രസിഡന്‍റിനു നൽകി. ഫേസ് ഓഫ് തിരുവല്ല ഫൗണ്ടേഷൻ അംഗങ്ങൾക്ക് തിരുവല്ല മെഡിക്കൽ മിഷൻ ആശുപത്രി ഹെൽത്ത്‌ ചെക്ക് അപ്പ് കൂപ്പൺ ഹോസ്പിറ്റൽ മെഡിക്കൽ ഡയറക്ടർ ഡോ. ഡെന്നീസ് ഏബ്രഹാം കൂപ്പണുകൾ ഫൗണ്ടേഷൻ സെക്രട്ടറി സിബി തോമസിന് കൈമാറി. മുൻ എംഎൽഎ ജോസഫ് എം. പുതുശേരി ആശംസയർപ്പിച്ചു.

ഭക്ഷ്യക്കിറ്റുകൾ വിതരണം ചെയ്തു

പത്തനംതിട്ട: ഓണം സത്യസന്ധതയുള്ളതും സമാധാനമുള്ളതുമായ നല്ല നാളുകളെ അനുസ്മരിപ്പിക്കുന്നതാണെന്ന് മന്ത്രി വീണാ ജോർജ്. വിവരാവകാശ പ്രവർത്തകൻ റഷീദ് ആനപ്പാറയുടെ നേതൃത്വത്തിൽ നടന്ന ഓണക്കിറ്റ് വിതരണത്തിന്‍റെ സമാപനം ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. പത്തനംതിട്ട നഗരസഭ മുൻ വൈസ് ചെയർമാൻ പി. കെ ജേക്കബ് അധ്യക്ഷത വഹിച്ചു. ജില്ലാ പഞ്ചായത്തംഗം റോബിൻ പീറ്റർ, പ്രസ് ക്ലബ് ഭാരവാഹികളായ ജി. വിശാഖൻ, ബിജു കുര്യൻ, ഹോട്ടൽ ആൻഡ് റസ്റ്റോറന്‍റ് അസോസിയേഷൻ സംസ്ഥാന സെക്രട്ടറി കെ.എം. രാജ, മുനിസിപ്പൽ യൂണിറ്റ് വൈസ് പ്രസിഡന്‍റ് നവാസ് തനിമ, സക്കീർ ശാന്തി, അലങ്കാർ അഷറഫ്, സുരേഷ് കുമാർ എന്നിവർ പ്രസംഗിച്ചു.

നാടും നഗരവും ഓണത്തിരക്കിൽ

പത്തനംതിട്ട: ഓണം നാളുകൾ അടുത്തെത്തിയതോടെ നാടും നഗരവും തിരക്കിലായി. ആഘോഷങ്ങളും മേളകളും സജീവമായി. വിപണികൾ കൂടി ഉഷാറായതോടെ തിരക്കും വർധിച്ചു. വസ്ത്ര വില്പന ശാലകളിലാണ് തിരക്ക് ഏറെയും. ചെറുതും വലുതുമായ വസ്ത്രവ്യാപാര ശാലകളിലെല്ലാം തിരക്കുണ്ട്. വഴിയോര വസ്ത്രവ്യാപാരികളും എത്തിയിട്ടുണ്ട്. ഇതര സംസ്ഥാനങ്ങളിൽ നിന്നുള്ള വ്യാപാരികളാണ് വഴിയോരങ്ങൾ കൈയടക്കിയിരിക്കുന്നത്. ഓണക്കാല വിഭവങ്ങളുമായി പ്രത്യേക ഓണം വിപണനമേളകളും ആരംഭിച്ചു. സപ്ലൈകോ, കൺസ്യൂമർഫെഡ് വിപണനമേളകളിൽ തിരക്കേറിയിട്ടുണ്ട്. സബ്സിഡി ഉത്പന്നങ്ങൾ വാങ്ങാനെത്തുന്നവരുടെ തിരക്കാണ് ഏറെയും. സഹകരണ മേഖലയിലും ഓണം വില്പനശാലകൾ പ്രവർത്തിച്ചു തുടങ്ങി. ഏത്തക്കായ വിപണിയിലും തിരക്ക് വർധിച്ചു. നാടൻ ഏത്തക്കുലകളും വിപണിയിലെത്തിയിട്ടുണ്ട്. കിലോഗ്രാമിന് 50 രൂപയ്ക്കു പുറമേ നിന്നുള്ള ഏത്തക്കായ വിപണനം പൊടിപൊടിക്കുന്നതോടെ നാടൻ ഏത്തക്കുലയുടെ ഡിമാൻഡ് കുറഞ്ഞു. വെളിച്ചെണ്ണ വില ഉയർന്നു നിൽക്കുന്നതിനാൽ ഇക്കുറി ഉപ്പേരി തയാറാക്കൽ സാധാരണക്കാർക്കു ചെലവേറി. ഉപ്പേരി കിലോഗ്രാമിന് 480 രൂപ മുകളിലേക്കാണ് വില. കുടുംബശ്രീ ഓണം വിപണന മേള അടൂരിൽ അടൂർ: കുടുംബശ്രീ ജില്ലാതല ഓണംമേള അടൂർ ഓണം 2025നു തുടക്കമായി. ഡെപ്യൂട്ടി സ്പീക്കർ ചിറ്റയം ഗോപകുമാർ ഉദ്ഘാടനം ചെയ്തു. അടൂർ നഗരസഭ ചെയർമാൻ കെ. മഹേഷ് കുമാർ അധ്യക്ഷത വഹിച്ചു.അടൂർ റവന്യു ടവറിന് എതിർവശത്ത് സംഘടിപ്പിച്ചിരിക്കുന്ന ഓണം വിപണന മേള സെപ്റ്റംബർ നാലുവരെയാണ്. ജില്ലയിലെ വിവിധ കുടുംബശ്രീ യൂണിറ്റുകളിൽ ഉത്പാദിപ്പിച്ച പലതരം അച്ചാറുകൾ, കറിപ്പൗഡറുകൾ, ധാന്യപ്പൊടികൾ, നാടൻ പുളി, വെളിച്ചെണ്ണ, ശുദ്ധമായ വെളിച്ചെണ്ണയിൽ തയാർ ചെയ്ത പലഹാരങ്ങൾ,ദോശക്കല്ല്, തവ, മൺവെട്ടി, തൂമ്പ തുടങ്ങിയ ഇരുമ്പ് സാമഗ്രികൾ, ഗുണമേന്മയിൽ മികവു പുലർത്തുന്ന ബാഗുകൾ, തുണിത്തരങ്ങൾ, ലോഷനുകൾ, സോപ്പുകൾ, പച്ചക്കറികൾ തുടങ്ങി എല്ലാവിധ സാധനങ്ങളും മിതമായ നിരക്കിൽ മേളയിൽ ലഭ്യമാകും. ജില്ലയിലെ വിവിധ സംഘകൃഷി ഗ്രൂപ്പുകൾ ഉല്പാദിപ്പിക്കുന്ന കാർഷിക ഉത്പന്നങ്ങളും മേളയിൽ ലേഭ്യമാണ്. സാംസ്കാരിക ഘോഷയാത്രയോടെ തുടക്കം അടൂരിലെ ഓണത്തിനു തുടക്കം കുറിച്ചത് സാംസ്കാരിക ഘോഷയാത്രയോടെയാണ്. വിവിധ കലാരൂപങ്ങളും മാവേലി വേഷധാരിയുമൊക്കെ ഘോഷയാത്രയ്ക്ക് അകന്പടിയായി. ഘോഷയാത്ര അടൂർ സെൻട്രൽ ജംഗ്ഷനിൽ നിന്നും തുടങ്ങി ഓണാഘോഷ വേദിയിൽ എത്തിച്ചേർന്ന ഘോഷയാത്രയ്ക്ക് ഡെപ്യൂട്ടി സ്പീക്കർ ചിറ്റയ ഗോപകുമാർ, നഗരസഭ ചെയർമാൻ കെ. മഹേഷ് കുമാർ തുടങ്ങിയവർ നേതൃത്വം നൽകി. മൂന്നു ദിവസങ്ങളിലായി തിരുവാതിര മത്സരം, കൂത്തുപാട്ട്, വാക്ക് ചിരി മേളം,പാട്ടുകൂട്ടം, ഫോക്ക് ലോർ അക്കാദമിയുടെ വിവിധ പരിപാടികൾ, എന്നിവ നടക്കും. കുടുംബശ്രീ ഫുഡ് കോർട്ടുകളും വിപണമേളയുടെ പ്രധാന ആകർഷണമാണ്. കുടുംബശ്രീ ജില്ലാ മിഷൻ കോർഡിനേറ്റർ എസ്. ആദില, അസിസ്റ്റന്‍റ് ജില്ലാ മിഷൻ കോർഡിനേറ്റർ കെ. ബിന്ദുരേഖ, ജില്ലാ പഞ്ചായത്ത് അംഗം സി. കൃഷ്ണകുമാർ, ഏഴംകുളം ഗ്രാമപഞ്ചായത്ത് പ്രസിഡന്‍റ് വി.എസ്. ആശ, ഡി. സജി, ബിജു വർഗീസ്, പ്രഫ. വർഗീസ് പേരയിൽ, രൂപേഷ് അടൂർ, സാംസൺ ഡാനിയേൽ, കെ.ജി. വാസുദേവൻ, സിഡിഎസ് ചെയർപേഴ്സൺമാരായ രാജി പ്രസാദ്, രേഖ ബാബു, അജിതകുമാരി, സീജ മോൾ, ഫൗസിയ, വത്സലകുമാരി ,സിനി ആർട്ടിസ്റ്റ് ഡിനി ഡാനിയേൽ എന്നിവർ പ്രസംഗിച്ചു. ഓണം ക്യാന്പ് പത്തനംതിട്ട: മാർത്തോമമ ഹയർ സെക്കൻഡറി സ്കൂളിലെ എസ്പിസി യൂണിറ്റിന്‍റെ മൂന്നു ദിവസത്തെ ഓണം ക്യാമ്പ്, ശ്രാവണം 2025 ആരംഭിച്ചു. ക്യാമ്പിന്‍റെ ഉദ്ഘാടനം പത്തനംതിട്ട ഡിവൈഎസ്പി എസ്. ന്യൂമാൻ നിർവഹിച്ചു. പിടിഎ പ്രസിഡന്‍റ് ജോൺ പോൾ മാത്യു അധ്യക്ഷത വഹിച്ചു. പ്രിൻസിപ്പൽ ജിജി മാത്യു സ്‌ക്കറിയ, ലോക്കൽ മാനേജർ റവ. സജി തോമസ്, ഗാർഡിയൻ എസ്പിസി പ്രസിഡന്‍റ് റവ. ജേക്കബ് ജോൺ, സ്കൂൾ ഹെഡ്മിസ്ട്രസ് മിനി തോമസ്, ഡിഐ കെ. രാജേഷ്, എസിപിഒ ജിഷാ തോമസ്, അയന മറിയം ജേക്കബ് എന്നിവർ പ്രസംഗിച്ചു. ഓണാഘോഷവും സാംസ്കാരിക സമ്മേളനവും മല്ലപ്പള്ളി: മല്ലപ്പള്ളി ബ്ലോക്ക് പഞ്ചായത്ത് ബ്ലോക്ക് തല ഓണാഘോഷവും സാംസ്കാരിക സമ്മേളനവും മാത്യു ടി. തോമസ് എംഎല്‍എ ഉദ്ഘാടനം ചെയ്തു. ബ്ലോക്ക് പഞ്ചായത്ത് പ്രസിഡന്‍റ് ബാബു കൂടത്തില്‍ അധ്യക്ഷത വഹിച്ചു. എഴുത്തുകാരി മേഘ സുധീര്‍ മുഖ്യാതിഥിയായിരുന്നു. ജില്ലാ ലൈബ്രറി കൗണ്‍സില്‍ പ്രസിഡന്‍റ് കെ.പി. രാധാകൃഷ്ണന്‍ മുഖ്യസന്ദേശം നല്‍കി. ബ്ലോക്ക് വൈസ് പ്രസിഡന്‍റ് ആനി രാജു, ബ്ലോക്ക് പഞ്ചായത്ത് ആംഗങ്ങളായ ബിന്ദു ചന്ദ്രമോഹന്‍, ഈപ്പന്‍ വര്‍ഗീസ്, സിന്ധു സുഭാഷ്, ജോസഫ് ജോണ്‍, ജ്ഞാനമണി മോഹന്‍, ലൈല അലക്സാണ്ടര്‍, സുധികുമാര്‍, റിമി ലിറ്റി എന്നിവര്‍ പ്രസംഗിച്ചു. ഓണം വിപണി മല്ലപ്പള്ളി: കോട്ടാങ്ങൽ പഞ്ചായത്ത് കൃഷിഭവന്‍റെ നേതൃത്വത്തിൽ ഇന്നു മുതൽ നാലുവരെ കോട്ടാങ്ങൽ കൃഷിഭവൻ ഓഫീസിനു മുന്പിൽ ഓണം വിപണി നടത്തും. ഓണക്കാലത്തെ വിലക്കയറ്റം നിയന്ത്രിക്കുന്നതിനും കർഷകർക്ക് നേരിട്ട് സാമ്പത്തികനേട്ടം ഉറപ്പാക്കുന്നതിനുമായി കർഷകരിൽനിന്നും ഉത്പന്നങ്ങൾ വിപണി വിലയേക്കാൾ 10 ശതമാനം അധികം വില നൽകി സംഭരിച്ച് 30 ശതമാനംവരെ വിലക്കുറവിൽ വിറ്റഴിക്കും. ഇന്നു രാവിലെ 10ന് കോട്ടാങ്ങൽ ഗ്രാമപഞ്ചായത്ത് പ്രസിഡന്‍റ് ബിനു ജോസഫ് വിപണിയുടെ ഉദ്ഘാടനം നിർവഹിക്കും.

എട്ടുനോന്പാചരണം

‌നിർമലപുരം കുരിശുമല തീർഥാടന കേന്ദ്രത്തിൽ ചുങ്കപ്പാറ: കരുവള്ളിക്കാട് നിർമലപുരം കുരിശുമല തീർഥാടന കേന്ദ്രത്തിൽ എട്ടുനോമ്പാചരണവും പരിശുദ്ധ കന്യകമറിയത്തിന്‍റെ ജനനത്തിരുനാളും ഇന്നുമുതൽ എട്ടുവരെ നടക്കും. എല്ലാദിവസവും വൈകുന്നേരം 4.30ന് ജപമാല, വിശുദ്ധ കുർബാന, മധ്യസ്ഥ പ്രാർഥന, പ്രസംഗം എന്നിവ ഉണ്ടാകുമെന്ന് വികാരി ഫാ. മോബൻ ചൂരവടി അറിയിച്ചു. ഫാ. ജോസഫ് വരിക്കാപ്പള്ളി, ഫാ. ടോണി മണിയഞ്ചിറ, ഫാ. ജോസഫ് കിഴക്കേമുറി, ഫാ. ജോംസി പൂവത്തോലിൽ, ഫാ. മോബൻ ചൂരവടി, ഫാ. ആന്‍റണി കാച്ചാംകോട്ട്. ഫാ. ജോസഫ് മാമ്മൂട്ടിൽ എന്നിവർ കാർമികത്വം വഹിക്കും. സമാപനദിവസമായ എട്ടിനു വൈകുന്നേരം ആഘോഷമായ വിശുദ്ധ കുർബാനയ്ക്ക് ഫാ. മാത്യു അഞ്ചിൽ കാർമികത്വം വഹിക്കും. ജപമാല പ്രദക്ഷിണം, നേർച്ച വിതരണം എന്നിവയോടെ തിരുനാൾ സമാപിക്കും. ചുങ്കപ്പാറ സെന്‍റ് ജോർജ് പള്ളിയിൽ ചുങ്കപ്പാറ: സെന്‍റ് ജോർജ് മലങ്കര കത്തോലിക്കാ പള്ളിയിൽ എട്ടുനോന്പാചരണം ഇന്നു മുതൽ എട്ടുവരെ നടക്കും. എല്ലാദിവസവും വൈകുന്നേരം അഞ്ചിന് കുർബാന, മധ്യസ്ഥപ്രാർഥന എന്നിവ പള്ളിയിലും സെന്‍റ് മേരീസ് പള്ളിയിലുമായി ഉണ്ടാകും. വികാരി ഫാ. എബി വടക്കുംതല കൊടിയേറ്റ് നിർവഹിച്ചു. ഫാ. ചെറിയാൻ കുരിശുംമൂട്ടിൽ, ഫാ. എൽദോ മോഴശേരിൽ, ഫാ. നൈനാൻ വെട്ടീരേത്ത്, ഫാ. കോശി മണ്ണിൽ എന്നിവർ കാർമികരാകും. ഏഴിനു വൈകുന്നേരം ആറിന് സന്ധ്യാപ്രാർഥനയെത്തുടർന്ന് തിരുനാൾ പ്രദക്ഷിണം. എട്ടിനു രാവിലെഏഴിന് കുർബാനയ്ക്ക് ഫാ. ചെറിയാൻ കോട്ടയിൽ കാർമികത്വം വഹിക്കും. മധ്യസ്ഥ പ്രാർഥന, നേർച്ചവിളന്പ് എന്നിവയോടെ സമാപിക്കും. കൊറ്റനാട് സെന്‍റ് ജോർജ് പള്ളിയിൽ കൊറ്റനാട്: സെന്‍റ് ജോർജ് ഓർത്തഡോക്സ് പള്ളിയിൽ ഇന്നു മുതൽ എട്ടുവരെ എട്ടുനോന്പാചരണത്തോടനുബന്ധിച്ച് എല്ലാദിവസവും രാവിലെ 6.45ന് പ്രാർഥനയും 7.15ന് കുർബാനയും ഉണ്ടാകും. ഫാ. ഏബ്രഹാം ശാമുവേൽ, ഫാ. എം.ജെ. ജോൺ, മാത്യൂസ് റന്പാൻ, തോമസ് ജോൺസൺ കോർ എപ്പിസ്കോപ്പ, ഫാ. ജോജി മാത്യു, ഫാ. വിനോദ് ഫിലിപ്പ് എന്നിവർ വിവിധ ദിവസങ്ങളിൽ കാർമികത്വം വഹിക്കും. ഏഴിനു വൈകുന്നേരം വൃന്ദാവനം കുരിശിങ്കൽ പ്രാർഥനയും തുടർന്ന് പള്ളിയിലേക്ക് പ്രദക്ഷിണവും. എട്ടിനു രാവിലെ കുർബാനയ്ക്ക് വികാരി ഫാ. സൈമൺ വർഗീസ് കാർമികത്വം വഹിക്കും. കല്ലൂപ്പാറ സെന്‍റ് മേരീസ് പള്ളിയിൽ കല്ലൂപ്പാറ: സെന്‍റ് മേരീസ് ഓർത്തഡോക്സ് വലിയപള്ളിയിൽ പരിശുദ്ധ ദൈവമാതാവിന്‍റെ ജനനപ്പെരുന്നാൾ ഇന്നു മുതൽ എട്ടുവരെ കൊണ്ടാടും. ഇന്നു രാവിലെ ഫാ. ദിബു ജേക്കബ് വിശുദ്ധ കുർബാന അർപ്പിക്കും. തുടർന്നുള്ള ദിവസങ്ങളിൽ ഫാ. ജോർജ് പനയ്ക്കാമറ്റം, ഫാ. ഡോ. ജിജോ ജോസഫ് ഏബ്രഹാം, ഫാ.ബിനോ ജോൺ, ഫാ. എബിൻ സജി, ഫാ. ഡോ. വി. ജോൺസൺ, ഫാ. കോശി അലക്സാണ്ടർ തുടങ്ങിയവർ കാർമികത്വം വഹിക്കും. മൂന്നിനു രാവിലെ 10.30ന് അഭയം പ്രാർഥനാ സംഗമത്തിന് ഡോ. എം.എസ്. യൂഹാനോൻ റന്പാൻ നേതൃത്വം നൽകും. ഏഴിനു വൈകുന്നേരം 5.30ന് സന്ധ്യാപ്രാർഥനയെത്തുടർന്ന് കല്ലൂപ്പാറ ജംഗ്ഷൻ കുരിശടിയിലേക്ക് പ്രദക്ഷിണം. എട്ടിനു രാവിലെ കുർബാനയ്ക്ക് ബർസ്ലീബി റന്പാൻ കോർ എപ്പിസ്കോപ്പ കാർമികത്വം വഹിക്കും. പാച്ചോർനേർച്ച വിളമ്പോടുകൂടി പെരുന്നാൾ സമാപിക്കും. എല്ലാ ദിവസങ്ങളിലും 6.30ന് പ്രഭാതനമസ്കാരവും വിശുദ്ധ കുർബാനയെത്തുടർന്ന് മധ്യസ്ഥ പ്രാർഥനയും ഉണ്ടാകും. കുന്പഴ സെന്‍റ് മേരീസ് കത്തോലിക്കാ പള്ളിയിൽ കുന്പഴ: സെന്‍റ് മേരീസ് മലങ്കര കത്തോലിക്കാ പള്ളിയിൽ എട്ടുനോന്പാചരണത്തിനും തിരുനാളിനും കൊടിയേറി. വികാരി ഫാ. സജി മാടമണ്ണിൽ കൊടിയേറ്റ് നിർവഹിച്ചു. ഇന്നു മുതൽ വൈകുന്നേരം 4.30ന് ജപമാല, വിശുദ്ധ കുർബാന, മധ്യസ്ഥ പ്രാർഥന എന്നിവ ഉണ്ടാകും. ഫാ. കുര്യാക്കോസ് കൂത്തനേത്ത്, ഫാ. ജോർജ് കുളത്തുംകരോട്ട്, ഫാ. വർഗീസ് തയ്യിൽ, ഫാ. തോമസ് നെടുമാംകുഴി എന്നിവർ വിവിധ ദിവസങ്ങളിൽ കുർബാനയ്ക്ക് കാർമികരാകും. ഏഴിനു വൈകുന്നേരം കുർബാനയെത്തുടർന്ന് ജപമാല പ്രദക്ഷിണം. എട്ടിനു വൈകുന്നേരം അഞ്ചിന് കുർബാനയ്ക്ക് ബിഷപ് യൂഹാനോൻ മാർ ക്രിസോസ്റ്റം കാർമികത്വം വഹിക്കും. ആശിർവാദം, നേർച്ചവിളന്പ് എന്നിവയോടെ സമാപിക്കും.

മാർത്തോമ്മ സഭാ പ്രതിനിധി മണ്ഡലം നാളെ മുതൽ

തിരുവല്ല: മലങ്കര മാർത്തോമ്മ സുറിയാനി സഭാ പ്രതിനിധി മണ്ഡലം നാളെ മുതൽ വ്യാഴംവരെ തിരുവല്ല ഡോ. അലക്സാണ്ടർ മാർത്തോമ്മ വലിയ മെത്രാപ്പോലീത്താ സ്മാരക ഓഡിറ്റോറിയത്തിൽ നടക്കും. നാളെ രാവിലെ പത്തിന് സഭാധ്യക്ഷൻ ഡോ. തിയഡോഷ്യസ് മാർത്തോമ്മ മെത്രാപ്പോലീത്തായുടെ അധ്യക്ഷതയിൽ യോഗം ആരംഭിക്കും. പ്രമുഖ സാഹിത്യകാരൻ പ്രഫ. എം. തോമസ് മാത്യു ധ്യാനപ്രസംഗം നടത്തും. സഭാ സെക്രട്ടറി റവ. എബി ടി. മാമ്മൻ വാർഷിക റിപ്പോർട്ടും വരവ് ചെലവ് കണക്കും അല്മായ ട്രസ്റ്റി ആൻസിൽ സഖറിയ കോമാട്ട് ബജറ്റും അവതരിപ്പിക്കും. "ഞങ്ങൾ വിശ്വസിക്കുന്നു: നിഖ്യായുടെ കാലിക പ്രസക്തി' എന്നതാണ് പഠന വിഷയം. കൺവീനർ റവ. ഡോ. ജോൺ ഫിലിപ്പ് അട്ടത്തറയിൽ വിഷയാവതരണം നടത്തും. ഭരണഘടനാ ഭേദഗതികൾ, പ്രമേയങ്ങൾ തുടങ്ങിയവയുടെ അവതരണവും നടക്കും. മൂന്നിന് 7.30 ന് തിരുവല്ല സെന്‍റ് തോമസ് മാർത്തോമ്മാ പള്ളിയിൽ നടക്കുന്ന വിശുദ്ധ കുർബാന ശുശ്രൂഷയ്ക്ക് ഡോ. ജോസഫ് മാർ ഇവാനിയോസ് എപ്പിസ്കോപ്പ നേതൃത്വം നൽകും.

സമൂഹമാധ്യമങ്ങൾ എല്ലാ മേഖലയെയും കീഴ്പ്പെടുത്തുന്നു: സ്പീക്കർ

കോന്നി: സമൂഹമാധ്യമ കാലഘട്ടത്തിലൂടെ ജീവിക്കുന്ന നമ്മൾ അറിയാതെതന്നെ റീൽസുകൾക്കു പിന്നാലെ നീങ്ങുകയാണെന്ന് നിയമസഭാ സ്പീക്കർ എ.എൻ. ഷംസീർ. കോന്നി കരിയാട്ടം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഒറ്റപ്പെടലിന്‍റെ കാലഘട്ടത്തിൽ കരിയാട്ടംപോലെയുള്ള കൂടിച്ചേരലുകൾ കാലഘട്ടത്തിന് ആവശ്യമാണെന്നും സ്പീക്കർ പറഞ്ഞു. യോഗത്തിൽ സംഘാടക സമിതി ചെയർമാൻ കെ.യു.ജനീഷ് കുമാർ എംഎൽഎ അധ്യക്ഷത വഹിച്ചു. വിശിഷ്ടാതിഥികളായി സഖറിയാസ് മാർ അപ്രേം മെത്രാപ്പോലീത്ത, എൻഎസ്എസ് ഡയറക്ടർ ബോർഡ് അംഗം ഹരിദാസ് ഇടത്തിട്ട, എസ്എൻഡിപി യൂണിയൻ സെക്രട്ടറി അനിൽകുമാർ, അബ്ദുൾ റസാഖ് മൗലവി, രാജുഏബ്രഹാം എക്സ് എംഎൽഎ, ജില്ലാ പഞ്ചായത്ത് വൈസ് പ്രസിഡന്‍റ് ബീന പ്രഭ, പറക്കോട് ബ്ലോക്ക് പഞ്ചായത്ത് പ്രസിഡന്‍റ് എം.പി. മണിയമ്മ, കാർട്ടൂണിസ്റ്റ് ജിതേഷ്ജി, സുരേഷ് സോമ, സംഘാടകസമിതി ഭാരവാഹികളായ പി.ജെ. അജയകുമാർ, ശ്യാംലാൽ, കേരള സർവകലാശാലാ സിൻഡിക്കേറ്റംഗം ആർ.ബി. രാജീവ് കുമാർ, ഗ്രാമപഞ്ചായത്ത് പ്രസിഡന്‍റുമാർ തുടങ്ങിയവർ പ്രസംഗിച്ചു. മെഡിക്കൽ ക്യാന്പ് കോന്നി: കോന്നി കരിയാട്ടത്തിന്‍റെ ഭാഗമായി ഗവ. മെഡിക്കൽ കോളജിന്‍റെ നേതൃത്വത്തിൽ മെഡിക്കൽ ക്യാമ്പ് നടത്തി. മഴക്കാല രോഗങ്ങൾ വ്യാപകമായ സമയത്തു നടന്ന ക്യാമ്പ് രോഗികൾക്ക് ആശ്വാസമായി. കെഎസ്ആർടിസി മൈതാനിയിലാണ് ക്യാമ്പ് നടന്നത്. സ്പെഷാലിറ്റി വിഭാഗങ്ങളിലുള്ള ഡോക്ടർമാരുൾപ്പടെ 11 ഡോക്ടർമാർ ക്യാമ്പിൽ പങ്കെടുത്തു. 484 പേർ ചികിത്സതേടിയെത്തി. സൗജന്യമായി നടത്തിയ ക്യാമ്പിൽ പങ്കെടുത്തവരിൽനിന്നു കൂടുതൽ ചികിത്സ ആവശ്യമുള്ളവർക്ക് മെഡിക്കൽ കോളജിൽ അതിനുള്ള സൗകര്യം ഒരുക്കും.

കല്ലേലിയിൽ വിരിഞ്ഞ ചുവന്ന വിസ്മയം

ജഗീഷ് ബാബു കോന്നി: വയനാട്, ഗവി വനമേഖലകളിൽ സൗന്ദര്യം വിടർത്തി നിൽക്കുന്ന ചുവപ്പൻ അലങ്കാരം കോന്നി കല്ലേലിയിലും. കല്ലേലി അക്കരക്കാലായിൽ വർഗീസ് പി. മാത്യുവിന്‍റെ വീട്ടുമുറ്റത്ത് വിരിഞ്ഞ റെഡ് ജേഡ് വൈൻ പൂക്കൾ നാട്ടുകാർ‌ക്കും വഴിയാത്രക്കാർക്കും അത്ഭുതക്കാഴ്ചയായി മാറുകയാണ്. ആദ്യനോട്ടത്തിൽ, വിശേഷദിനത്തിലേക്ക് ഒരുക്കിയ അലങ്കാരപ്പന്തൽപോലെ തോന്നിക്കുന്നതാണ് പൂക്കളുടെ ഈ കാഴ്ച. അടുത്തെത്തുന്പോൾ മാത്രമേ പ്രകൃതിയുടെ സ്വന്തം കലാകൃതിയുടെ സൗന്ദര്യാസ്വാദനം പൂർണമാകൂ. തീപ്പൊരിപോലെ ചുവന്ന നിറത്തിൽ കൊളുത്തുകളെ ഓർമിപ്പിക്കുന്ന പൂക്കൾ കുലകളായി തൂങ്ങിനിൽക്കുന്നു. ഓരോ പൂവും ഒറ്റയ്ക്കു ഭംഗിയുള്ളതാണെങ്കിലും കൂട്ടമായി വിരിയുമ്പോഴുണ്ടാക്കുന്ന കാഴ്ച അതുല്യമാണ്. സസ്യസൗന്ദര്യത്തിന് പിന്നിലെ കഥ ഈ അപൂർവ സസ്യസൗന്ദര്യത്തിന് പിന്നിൽ വർഗീസ് മാത്യുവിന്‍റെ ഭാര്യ ലിജി വർഗീസിന്‍റെ സമർപ്പണമാണ്. ചെടികളുടെ ലോകത്ത് ജീവിക്കുന്ന ഒരാളാണ് അവർ. സമൂഹമാധ്യമങ്ങളിൽ ആദ്യം റെഡ് ജേഡ് വൈൻ പൂക്കൾ കണ്ടപ്പോൾത്തന്നെ അതു സ്വന്തമാക്കണമെന്നു തീരുമാനിച്ചു. നിരവധി നഴ്സറികളിൽ അന്വേഷിച്ചാണ് ചെടി വാങ്ങിയത്. വെറും ഒരു വർഷം മുൻപ് വീട്ടുമുറ്റത്ത് നട്ട ചെടി, രണ്ട് ആഴ്ചകൾക്കു മുന്പ് ആദ്യമായി പൂത്തു. ചെടികൾ മുഴുവനായി വീടിനും നാടിനും ഒരുത്സവം പോലെയുള്ള കാഴ്ചയാണ്. പൂക്കളുടെ സ്വപ്നലോകം അറയും നിരയുമെല്ലാം ചേർന്ന അക്കരക്കാലായിൽ തറവാട്ട് വീടിന്‍റെ മുറ്റം ഒരു സ്വപ്ന പൂന്തോട്ടമാണ്. ഗോൾഡൻ കാസ്കേഡ്, ക്യാറ്റ്സ് ക്ലോ, സാൻഡ് പേപ്പർ വൈൻ, മണിമുല്ല, ബ്രൈഡൽ ബൊക്കെ, അനവധി ഓർക്കിഡുകൾ, ആന്തൂറിയം, ഇൻഡോർ പ്ലാന്‍റുകൾ, വിവിധയിനം റോസുകൾ, വിവിധ നിറങ്ങളിലുള്ള ബൊഗൻവില്ലകൾ എല്ലാം ചേർന്ന് മുറ്റത്തെ നിറവിസ്മയമാക്കി മാറ്റുന്നു. ഒരു കോണിൽ വിരിഞ്ഞ ബൊഹീമിയ സസ്യം ഒരേസമയം പല നിറങ്ങളിൽ പൂക്കൾ വിരിയിച്ച് കാഴ്ചയെ മായികമാക്കുന്നു. ഫലവൃക്ഷങ്ങളുടെ സമൃദ്ധി പൂക്കൾക്കൊപ്പം പഴവർഗങ്ങളും പച്ചക്കറികളും. മുന്തിരി, ഓറഞ്ച്, ചെസ്റ്റ്നട്ട്, കൂടാതെ 17 തരം പഴവർഗങ്ങൾ വീട്ടുമുറ്റത്ത് കാണാം. പച്ചക്കറികൾ വളർത്തുന്നതിനാൽ കുടുംബത്തിന്‍റെ ഒരോ ദിവസത്തെയും ഭക്ഷണത്തിനും ഒരു വലിയ പങ്ക് വീട്ടുമുറ്റം നിറവേറ്റുന്നു. വരാനിരിക്കുന്ന ഓണത്തിന് പൂക്കൾക്കായി 2,000ലധികം ബന്ദിത്തൈകളും ഒപ്പം മുളകുചെടികൾകൂടി നട്ടുപിടിപ്പിച്ചിട്ടുണ്ട്. കഴിഞ്ഞ വർഷം അരുവാപ്പുലം കൃഷിഭവനിൽനിന്ന് ഉദ്യാനപാലക അവാർഡ് നേടിയ ലിജി വർഗീസ്, തന്‍റെ കൃഷിപ്രേമവും പരിശ്രമവുംകൊണ്ട് നാട്ടുകാർക്കിടയിൽ മാതൃകയായിരിക്കുകയാണ്. പൂന്തോട്ടം നോക്കിയാൽ, അത് ഒരു വീട്ടുമുറ്റം മാത്രമല്ല പ്രകൃതിയോടുള്ള സ്‌നേഹം, കരുതൽ, ആത്മാർപ്പണം എന്നിവ ചേർന്നുണ്ടാക്കിയ ജീവിക്കുന്ന കലാസൃഷ്ടി തന്നെയാണ് ഇവടെ കാണാൻ കഴിയുക.

കാട്ടുമൃഗ ആക്രമണത്തിൽ കൃഷിനാശം : നഷ്ടപരിഹാരം അകലെ

പത്തനംതിട്ട: കാട്ടുമൃഗങ്ങളുടെ ആക്രമണത്തിൽ കൃഷിനാശമുണ്ടായ കര്‍ഷകര്‍ക്കുള്ള നഷ്ടപരിഹാരം വൈകുന്നു. ലക്ഷക്കണക്കിനു രൂപ കര്‍ഷകര്‍ക്ക് ലഭിക്കാനുണ്ട്. കാട്ടുപന്നി, കാട്ടാന, കാട്ടുപോത്ത്, കുരങ്ങ്, മലയണ്ണാന്‍, മയില്‍ തുടങ്ങിയവ വരുത്തിവച്ച നാശത്തിന്‍റെ കണക്കുകളുമായി കര്‍ഷകര്‍ വനംവകുപ്പ് ഓഫീസുകള്‍ കയറിയിറങ്ങുകയാണ്. തുച്ഛമായ തുകയാണ് കര്‍ഷകര്‍ക്ക് നഷ്ടപരിഹാരമായി നല്‍കുന്നത്. നഷ്ടപരിഹാരവുമായി ബന്ധപ്പെട്ട അപേക്ഷകള്‍ നല്‍കിയാല്‍ നടപടി ക്രമങ്ങള്‍ പൂര്‍ത്തീകരിക്കാന്‍ കാലതാമസമുണ്ട്. കാട്ടുപന്നി മൂലമുള്ള നാശനഷ്ടത്തിനാണ് അപേക്ഷകള്‍ ഏറെയുമെത്തിയത്. കാട്ടാനയും വന്‍തോതില്‍ നാശനഷ്ടം വരുത്തിയിട്ടുണ്ട്. കൃഷികള്‍ക്കും മരങ്ങള്‍ക്കും കാട്ടാന നാശം വരുത്തിയിട്ടുണ്ട്. റബര്‍ കര്‍ഷകരും തെങ്ങ് കര്‍ഷകരും ആനയുടെ ഭീതിയിലാണ്. തെങ്ങിനും മറ്റും തുച്ഛമായ നഷ്ടപരിഹാരമാണ് വനംവകുപ്പ് കണക്കാക്കുന്നതെന്ന് കര്‍ഷകര്‍ പറയുന്നു. വര്‍ഷങ്ങള്‍ക്കു മുമ്പേ നല്‍കിയ അപേക്ഷയില്‍പോലും തീരുമാനമുണ്ടായിട്ടില്ലെന്ന് കുമ്പളാത്താമണ്ണിലെ പ്രമുഖ കര്‍ഷകനായ ജോയ് കണ്ണാട്ടുമണ്ണില്‍ പറഞ്ഞു. മനുഷ്യനു നേരേയുള്ള ആക്രമണങ്ങള്‍ക്കും നഷ്ടപരിഹാരമില്ല കടുവയും പുലിയുംവരെ ജനവാസമേഖലയിലേക്കിറങ്ങിയതോടെ മലയോര ഗ്രാമങ്ങളിലെ ജീവിതം പ്രതിസന്ധിയിലാണ്. വന്യമൃഗങ്ങളുടെ ആക്രമണം ഭീതി ഇരട്ടിപ്പിക്കുന്നു. പാമ്പുകടിക്കുന്നതു മുതല്‍ കാട്ടുപന്നിയും കാട്ടാനയുമടക്കം ജില്ലയുടെ പേടിസ്വപ്നങ്ങളിലുണ്ട്. വന്യമൃഗങ്ങളാല്‍ ആക്രമിക്കപ്പെട്ട പലര്‍ക്കും കൃത്യമായി നഷ്ടപരിഹാരം ലഭിക്കാറുമില്ല. റാന്നി, കോന്നി വനം ഡിവിഷനുകളിലാണ് വന്യമൃഗ ആക്രമണങ്ങള്‍ക്കുള്ള നഷ്ടപരിഹാരത്തിന് അപേക്ഷകള്‍ ഓണ്‍ലൈനായി സ്വീകരിക്കുന്നത്. ഇതില്‍ കോന്നി ഡിവിഷനു കീഴില്‍ ഈ വര്‍ഷം ഏതാണ്ട് 200ല്‍ അധികം അപേക്ഷകളാണു ലഭിച്ചത്. ഇതില്‍ കുറച്ച് അപേക്ഷകള്‍ക്ക് താത്കാലിക പരിഹാരമുണ്ടായി. വന്യമൃഗ ആക്രമണത്തില്‍ ഒന്നിലധികം പേരാണു കൊല്ലപ്പെട്ടത്. എന്നാല്‍ സര്‍ക്കാര്‍ അനുവദിക്കുന്ന ഫണ്ട് ലഭിക്കുന്ന മുറയ്ക്കാണ് അപേക്ഷകര്‍ക്കു നഷ്ടപരിഹാരം നല്‍കുന്നതെന്നും അപേക്ഷിച്ചു മൂന്നുമാസത്തിനകം നഷ്ടപരിഹാരം നല്‍കാറുണ്ടെന്നും അധികൃതര്‍ വ്യക്തമാക്കി. അതേസമയം, ഇതുസംബന്ധിച്ച വിവരങ്ങള്‍ കൈമാറുന്നതു സര്‍ക്കാര്‍ വിലക്കിയിട്ടുണ്ടെന്നും സംസ്ഥാനതലത്തില്‍ വനംവകുപ്പ് ഓഫിസില്‍ നിന്നു മാത്രമേ ഇതുസംബന്ധിച്ച വിവരങ്ങള്‍ നല്‍കാവൂ എന്നാണു നിര്‍ദേശമെന്നും ഉദ്യോഗസ്ഥര്‍ പറഞ്ഞു. കാട്ടുപന്നി ഭീതി ഒഴിയുന്നില്ല ഇപ്പോള്‍ ജില്ലയുടെ താഴ്ന്ന മേഖലകളിലേക്കും നഗര പ്രദേശങ്ങളിലേക്കുമടക്കം എത്തിയിട്ടുണ്ട്. പത്തനംതിട്ട നഗരത്തിലെ മുണ്ടുകോട്ടയ്ക്കല്‍, വെട്ടിപ്രം, വല്യയന്തി മേഖലയില്‍ പന്നിശല്യം രൂക്ഷമാണ്. മൈലപ്ര, നാരങ്ങാനം, വള്ളിക്കോട്, പ്രമാടം, മലയാലപ്പുഴ, ഇലന്തൂര്‍, ചെറുകോല്‍, അയിരൂര്‍ പഞ്ചായത്തുകളിലും പന്നികളുടെ ആക്രമണംമൂലമുള്ള കൃഷിനഷ്ടം ഏറെയാണ്. റാന്നി പെരുനാട്, വടശേരിക്കര, നാറാണംമൂഴി, അങ്ങാടി, പഴവങ്ങാടി, വെച്ചൂച്ചിറ, കൊറ്റനാട് പഞ്ചായത്തുകളിലും റാന്നി ടൗണിലുമടക്കം പന്നികളുടെ ശല്യമുണ്ട്. കോന്നി, വകയാര്‍, അരുവാപ്പുലം, തണ്ണിത്തോട് തേക്ക്‌തോട്, കൊടുമണ്‍, ഏഴംകുളം, ഏനാദിമംഗലം, കലഞ്ഞൂര്‍, പന്തളം തെക്കേക്കര പഞ്ചായത്തുകളിലും ലക്ഷക്കണക്കിന് രൂപയുടെ നഷ്ടമാണ് ഇവ വരുത്തിയത്. പന്തളം ടൗണിന്‍റെ പരിസര മേഖലകളിലുമടക്കം പകല്‍പോലും പന്നികളെ കാണുന്നതു പതിവായി. അടൂര്‍ നഗരസഭയും പന്നിപ്രശ്‌നത്തില്‍നിന്നു മുക്തമല്ല. മല്ലപ്പള്ളി താലൂക്കിലെ കോട്ടാങ്ങല്‍, എഴുമറ്റൂര്‍, മല്ലപ്പള്ളി, കല്ലൂപ്പാറ പഞ്ചായത്തുകളിലും ശല്യം രൂക്ഷമാണ്. കോയിപ്രം, തോട്ടപ്പുഴശേരി, ആറന്മുള, മല്ലപ്പുഴശേരി പഞ്ചായത്തുകളിലും കാട്ടുപന്നി ശല്യമുണ്ട്. ജില്ലയിലെ 26 കേന്ദ്രങ്ങളാണു കാട്ടുപന്നിശല്യമുള്ള ഹോട്ട് സ്‌പോട്ടുകളായി വനംവകുപ്പ് കണ്ടെത്തിയിട്ടുള്ളത്. എന്നാല്‍ ശല്യം രൂക്ഷമായ പലമേഖലകളും ഇതിലുള്‍പ്പെട്ടില്ലെന്ന പരാതിയും വ്യാപകമാണ്. പന്നിയെ ഭയന്നു കൃഷി ഉപേക്ഷിച്ച കര്‍ഷകരുടെ എണ്ണവും ഏറെയാണ്.

ഓണാമൃതം 2025

പത്തനംതിട്ട: എൻഎസ്എസ് താലൂക്ക് യൂണിയന്‍റെയും വനിതാ യൂണിയന്‍റെയും സംയുക്ത ആഭിമുഖ്യത്തിൽ നടത്തിയ ഓണാമൃതം - 2025ഓണാഘോഷ പരിപാടികളുടെ ഉദ്ഘാടനം എൻഎസ്എസ് ഡയറക്ടർ ബോർഡ് അംഗവും താലൂക്ക് യൂണിയൻ പ്രസിഡന്‍റുമായ ആർ. ഹരിദാസ് ഇടത്തിട്ട നിർവഹിച്ചു. താലൂക്ക് യൂണിയൻ സെക്രട്ടറി വി. ഷാബു ഓണ സന്ദേശം നൽകി. വനിതാ യൂണിയൻ പ്രസിഡന്‍റ് പി.സി. ശ്രീദേവി അധ്യക്ഷത വഹിച്ചു. യൂണിയൻ വൈസ് പ്രസിഡന്‍റ് ഡി.അശോക് കുമാർ, ഇൻസ്പെക്ടർ ആർ. രാജേഷ് കുമാർ, യൂണിയൻ ഭാരവാഹികളായ ഗീതാ സുരേഷ്, എം.അജിത്ത്, ജി.കൃഷ്ണകുമാർ, രാജേന്ദ്രനാഥ് കമലം, അഖിലേഷ് കാര്യാട്ട്, മുരളീധരൻ നായർ, പി. എൻ. രഘൂത്തമൻ നായർ, വി.കെ. ബാലചന്ദ്രകുമാർ, ശശികുമാരൻനായർ, എം.ആർ. ശശിധരൻ നായർ, എ.ആർ. രാജേഷ്, കലമാസനൻ കാര്യാട്ട്, ശ്രീജിത്ത് പ്രഭാകർ, വത്സലകുമാരി, വിജയലക്ഷ്മി കാരണവർ, ജഗദമ്മ ടീച്ചർ, അംബിഅമ്മ, ജയലക്ഷ്മി എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]