വിബിസി ക്യാപ്റ്റന്‍ ബിഫിക്കും നെഹ്‌റു ട്രോഫിക്കും ചങ്ങനാശേരിയില്‍ ആഹ്ലാദ വരവേല്‍പ്പ്

ചങ്ങനാശേരി: ചങ്ങനാശേരി സ്വദേശി ബിഫി പുല്ലുകാട് ക്യാപ്റ്റനായ വിബിസി കൈനകരിക്കു ലഭിച്ച നെഹ്‌റു ട്രോഫിക്കും തുഴച്ചില്‍കാര്‍ക്കും ചങ്ങനാശേരിയില്‍ വരവേല്‍പ്പു നല്‍കി. ചങ്ങനാശേരി ക്ലബ്ബില്‍ നടന്ന സമ്മേളനം ജോബ് മൈക്കിള്‍ എംഎല്‍എ ഉദ്ഘാനം ചെയ്തു. മുനിസിപ്പല്‍ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍, വൈസ് ചെയര്‍മാന്‍ മാത്യൂസ് ജോര്‍ജ് തുടങ്ങിയവര്‍ പ്രസംഗിച്ചു.

വിക്ടറി ജാഥയ്ക്ക് സെന്‍റ് മേരീസ് മെത്രാപ്പോലീത്തൻ പള്ളിയിലും ചങ്ങനാശേരി അതിരൂപതാ ആസ്ഥാനത്തും സ്വീകരണം നൽകി. വികാരി ഫാ. ജോസഫ് വാണിയപ്പുരയ്ക്കൽ, ഫാ. ജോസഫ് കുറശേരി, കൈക്കാരന്മാരായ കുര്യാച്ചൻ ഒളശയിൽ, ചാൾസ് പാലത്ര, എ.ജെ. ജോസഫ്, ഫൊറോന കൗൺസിൽ സെക്രട്ടറി സൈബി അക്കര, മുൻ ചെയർപേഴ്സൺ ബീന ജോബി, ജോബി തുമ്പുങ്കൽ തുടങ്ങിയവർ സ്വീകരണത്തിനു നേതൃത്വം നൽകി.

ചങ്ങനാശേരി അതിരൂപത ആസ്ഥാനത്ത് വികാരിജനറാൾ മോൺ. ആന്‍റണി എത്തയ്ക്കാട്ട്, പ്രൊക്യുറേറ്റർ ഫാ. ജയിംസ് മാളേയ്ക്കൽ, ഡോ. റൂബിൾ രാജ്, വി.ജെ. ലാലി തുടങ്ങിയവരുടെ നേതൃത്വത്തിൽ സ്വീകരിച്ചു.

റോഡ് ഷോ വിവിധ സ്ഥാപനങ്ങളുടെ സ്വീകരണം ഏറ്റുവാങ്ങി കുരിശുംമൂട് സര്‍ഗക്ഷേത്രയില്‍ സമാപിച്ചു. സര്‍ഗക്ഷേത്രയില്‍ ഡയറക്ടര്‍ ഫാ. അലക്‌സ് പ്രായിക്കളത്തിന്‍റെ നേതൃത്വത്തില്‍ സ്വീകരണം നല്‍കി.

ADVERTISEMENT

വിജയരാഘവന് അവാര്‍ഡുകളുടെ പൂക്കാലം, ആദരവുകളുടെ പെരുമഴക്കാലം

ജോമി കുര്യാക്കോസ് നാല്‍പ്പതുകാരനായും എണ്‍പതുകാരനായും അനായാസം ഭാവവിസ്മയങ്ങള്‍ കാഴ്ചവയ്ക്കുന്ന കോട്ടയം അയ്മനംകാരുടെ കുട്ടന്‍ എന്ന വിജയരാഘവന് ഈ ഓണം സ്‌പെഷലാണ്. ഇരുത്തം വന്ന അഭിനയ ചാരുതയില്‍ ദേശീയ, സംസ്ഥാന അവാര്‍ഡുകള്‍ സ്വന്തമാക്കിയ വിജയരാഘവന് അഭിനന്ദന പ്രവാഹം തുടരുകയാണ്. തൊടിയിലെ പൂക്കള്‍ പറിച്ചും വേലിയിലെ കായകള്‍ പറിച്ചും വീട്ടങ്കണത്തിലെ വിശ്വകേരള നാടകക്കളരിയില്‍ അച്ഛന്‍ എന്‍.എന്‍. പിള്ളയെന്ന നടനകുലപതിക്കൊപ്പം അത്തംമുതല്‍ തിരുവോണംവരെ പൂക്കളമിട്ടിരുന്ന ബാല്യം മനസില്‍ ഊഞ്ഞാലാടുന്നുണ്ട്. അച്ഛന്‍, അപ്പച്ചി, പ്രതിഭാധനരായ നടീനടന്‍മാര്‍ എന്നിവരൊക്കെ ആടിപ്പാടിയ അടിപൊളി ഓണങ്ങള്‍. പൊന്നോണവിശേഷങ്ങള്‍ ദീപികയോട് വിജയരാഘവന്‍ പങ്കുവയ്ക്കുന്നു. അച്ഛന്‍ എന്ന വലിയ തണല്‍ എന്‍.എന്‍. പിള്ളയെന്ന കൂറ്റൻ ആല്‍മരത്തണലിലാണ് ഞാന്‍ വളര്‍ന്നത്. അച്ഛനും അപ്പച്ചിയും വേദികളില്‍നിന്നു വേദികളിലേക്ക് ഓടുന്ന കാലമാണ്. എത്ര തിരക്കുണ്ടെങ്കിലും അച്ഛനൊപ്പം ഓണം ആഘോഷിക്കുന്നതില്‍ വിട്ടുവീഴ്ചയുണ്ടായിട്ടില്ല. എന്നാല്‍ സിനിമയിലെത്തിയതോടെ പലപ്പോഴും ഷൂട്ടിംഗ് സെറ്റുകളിലായി ഓണം. ഷൂട്ടിംഗ് ഇല്ലെങ്കില്‍ കുടുംബത്തോടൊപ്പം കഴിയാനാണ് ആഗ്രഹം. ആ വേളയില്‍ അയ്മനം ഡയനീഷ്യയില്‍ വിജയരാഘവന്‍ വീട്ടുകാരുടെയും നാട്ടുകാരുടെയും കുട്ടനായി മാറും. 1969ല്‍ എന്‍.എന്‍. പിള്ള നിര്‍മിച്ച വീടാണ് ഡയനീഷ്യ. എന്‍.എന്‍. പിള്ളയുടെയുടെയും നടി ചിന്നമ്മയുടെയും മകനായി 1951 ഡിസംബര്‍ 20നു മലേഷ്യയിലെ ക്വലാലംപൂരിലാണ് വിജയരാഘവന്‍ ജനിച്ചത്. എന്‍.എന്‍. പിള്ളയ്ക്ക് അക്കാലത്ത് അവിടെയായിരുന്നു ജോലി. നാട്ടിലെത്തി നാടകത്തെ പ്രണയിച്ച എന്‍.എന്‍. പിള്ളയുടെ വിശ്വകേരള കലാസമിതിയിലൂടെയാണ് ഞാനും അഭിനയത്തിലേക്ക് ചുവടുവച്ചത്. എനിക്ക് ഏറ്റവും അടുപ്പമുള്ള കൂട്ടുകാരനായിരുന്നു അച്ഛന്‍. വീട്ടിലെ സിനിമാ ചര്‍ച്ചകളില്‍ ഭാര്യമുതല്‍ കൊച്ചുമക്കള്‍വരെ അഭിപ്രായം പറയും. അതില്‍ വിമര്‍ശനം കാണും, അഭിനന്ദനവും കാണും. അഭിനയം ജീവനും ജീവിതവും 1962 മുതല്‍ 1987 വരെ കുടുംബമൊന്നാകെ നാടകത്തില്‍ സജീവമായിരുന്നു. സിനിമയിലെ അച്ഛനെയല്ല നാടകത്തില്‍ കാണാനാകുക. നാടകം അതിന്‍റെ യഥാര്‍ഥ അവസ്ഥയിലൂടെ കടന്നുവരുന്നതാണ്. തിന്മകളെയും തെറ്റുകളെയും അച്ഛന്‍ നിശിതമായി വിമര്‍ശിച്ചിരുന്നു. നാടകമെന്ന കലാരൂപത്തിന് ആത്മസമര്‍പ്പണം കൂടുതല്‍ വേണം. അമ്മയുടെ വിയോഗശേഷം അന്നുതന്നെ നാടകത്തില്‍ അഭിനയിക്കേണ്ട സാഹചര്യം അച്ഛനുണ്ടായി. നാടകത്തില്‍ കര്‍ക്കശക്കാരനായിരുന്നെങ്കിലും കുടുംബത്തില്‍ അദ്ദേഹം അങ്ങനെയായിരുന്നില്ല. നേതാജിയുടെ ഇന്ത്യന്‍ നാഷണല്‍ ആര്‍മിയില്‍ ഫീല്‍ഡ് ഓഫീസറായിരുന്നു മുന്‍പ് അച്ഛന്‍. അക്കാലത്ത് അച്ഛനെ പോലീസ് പിടിച്ചുകൊണ്ടുപോയിട്ടുണ്ട്. തിരിച്ചെത്തിയ അച്ഛന്‍ നാടകത്തില്‍ സജീവമായി. സിനിമയുടെ തിരക്കിലും നാടകം കൈവിടാന്‍ അച്ഛനൊരുക്കമായിരുന്നില്ല. എനിക്ക് സിനിമയില്‍ ഏതു റോള്‍ ചെയ്യേണ്ടിവന്നാലും അച്ഛന്‍ പകര്‍ന്ന ആത്മബലം കരുത്തായി മാറും. ഞാന്‍ അഭിനയിക്കാനായി മാത്രം ജനിച്ചതാണ്. മറ്റൊരു ജോലിയും ചെയ്യാനാകുമെന്നു തോന്നുന്നില്ല. പ്രേക്ഷകരുടെ ആദരവും അംഗീകാരവും നഷ്ടപ്പെടാതിരുന്നാല്‍ മതി. അന്‍പത് വര്‍ഷം പ്രേക്ഷകരുടെ ആദരം നേടാനായത് ആ കരുത്തിലാണ്. നാടകത്തില്‍ ബാലതാരമായിട്ടായിരുന്നു അരങ്ങേറ്റം. സിനിമയിലേക്കുള്ള ചുവട് നാടകവേദിയില്‍ അപ്പച്ചി അഥവാ എന്‍.എന്‍. പിള്ളയുടെ സഹോദരി കെ.ജി. ഓമനയുടെ അഭിനയം എന്നെ വിസ്മയിപ്പിച്ചിട്ടുണ്ട്. നൊടിയിടെയാണ് കഥാപാത്രത്തിലേക്കുള്ള അപ്പച്ചിയുടെ മാറ്റം. അന്നൊന്നും എന്‍റെ വിദൂര സ്വപ്‌നത്തില്‍പ്പോലും സിനിമയില്ല. എന്‍.എന്‍. പിള്ളയുടെ കാപാലിക എന്ന നാടകം ക്രോസ്ബെല്‍റ്റ് മണി സിനിമയാക്കിയപ്പോള്‍ ഞാന്‍ അഭിനയിച്ചേ പറ്റൂവെന്നായി. 1973 ല്‍ ആദ്യമായി സിനിമയില്‍ അഭിനയിച്ചു. സിനിമാ ഷൂട്ടിംഗ് കാണുന്നതും അന്നാണ്. അതില്‍ പോര്‍ട്ടര്‍ കുഞ്ഞാലിയെ അവതരിപ്പിച്ചുകൊണ്ട് 22-ാം വയസില്‍ അഭ്രപാളിയില്‍ അരങ്ങേറ്റം കുറിച്ചു. പിന്നീട് പൂക്കാലം വരെയുള്ള വേഷങ്ങളോരോന്നും കലയ്ക്കായുള്ള സമര്‍പ്പണമാണ്. 1982ല്‍ എസ്. കൊന്നനാട്ട് സംവിധാനം ചെയ്ത സുറുമയിട്ട കണ്ണുകളില്‍ നായകനായി. ന്യൂഡല്‍ഹി എന്ന സിനിമയിലായിരുന്നു ശ്രദ്ധേയവേഷം. അരനൂറ്റാണ്ടിനിടെ സിനിമയിലുണ്ടായ മാറ്റങ്ങളെല്ലാം അടുത്തുകണ്ടു. അഭിനയത്തില്‍ കാര്യമായ മാറ്റമുണ്ടായിട്ടില്ല. എന്നാല്‍ സാങ്കേതിക പരീക്ഷണങ്ങളാണു പ്രധാനം. കാമറ ആംഗിള്‍, സൗണ്ട് എഡിറ്റിംഗ് എന്നിവയില്‍ ഒരുപാട് പരീക്ഷണങ്ങള്‍ നടക്കുന്നു. ഇതെല്ലാം സിനിമയുടെ വളര്‍ച്ചയ്ക്ക് ഗുണകരമാണ്. അഭിനയമാണ് രാഷ്‌ട്രീയം രാഷ്‌ട്രീയം എനിക്കു വഴങ്ങില്ല. അഭിനയമാണ് എന്‍റെ രാഷ്‌ട്രീയം. രാഷ്‌ട്രീയം പറഞ്ഞ് ജനങ്ങളെ പ്രബുദ്ധരാക്കേണ്ടത് എന്‍റെ ജോലിയല്ല. അതല്ലെങ്കില്‍ മുഴുവന്‍ സമയം രാഷ്‌ട്രീയക്കാരനാകണം. അതെനിക്കു പറ്റില്ല. സിനിമാക്കാര്‍ രാഷ്‌ട്രീയം പറയുന്നതിനോടും താത്പര്യമില്ല. വിജയരാഘവനെ ആദരിക്കാനെത്തിയ തിരുവഞ്ചൂര്‍ രാധാകൃഷ്ണന്‍ എംഎല്‍എ, കോട്ടയം നഗരസഭ ചെയര്‍പേഴ്സണ്‍ ബിന്‍സി സെബാസ്റ്റ്യന്‍, രാഷ്‌ട്രദീപിക ലിമിറ്റഡ് മാനേജിംഗ് ഡയറക്ടര്‍ ഫാ. മൈക്കിള്‍ വെട്ടിക്കാട്ട്, കാരിത്താസ് ആശുപത്രി ഡയറക്ടര്‍ റവ.ഡോ. ബിനു കുന്നത്ത്, മാന്നാനം കെ.ഇ. സ്‌കൂള്‍ പ്രിന്‍സിപ്പല്‍ റവ.ഡോ. ജയിംസ് മുല്ലശേരി, ദര്‍ശന സാംസ്‌കാരിക കേന്ദ്രം ഡയറക്ടര്‍ ഫാ. എമില്‍ പുള്ളിക്കാട്ടില്‍, ദീപിക പിആര്‍ഒ മാത്യു കൊല്ലമലക്കരോട്ട് എന്നിവര്‍ക്കൊപ്പമിരുന്നാണ് വിജയരാഘവന്‍ ഓണസ്മരണകള്‍ അയവിറക്കിയത്.

ഉത്രാടക്കിഴി കൈമാറി

കോട്ടയം: ഉത്രാടദിനത്തില്‍ കോട്ടയം വയസ്‌കര രാജ്ഭവന്‍ കോവിലകത്ത് എത്തി മന്ത്രി വി.എന്‍. വാസവന്‍ ഉത്രാടക്കിഴി കൈമാറി. വയസ്‌കര കോവിലകത്തെ എന്‍.കെ. സൗമ്യവതി തമ്പുരാട്ടിക്കാണ് 1001 രൂപ അടങ്ങിയ ഉത്രാടക്കിഴി കൈമാറിയത്. കൊച്ചി രാജാവ് രാജകുടുംബാംഗങ്ങളായ സ്ത്രീകള്‍ക്ക് ഓണത്തോടനുബന്ധിച്ചു നല്‍കിയിരുന്ന സമ്മാനമായിരുന്നു ഉത്രാടക്കിഴി. കൊച്ചി രാജവംശത്തിന്‍റെ പിന്മുറക്കാരിയെന്ന നിലയിലാണ് വയസ്‌കര കോവിലകത്തെ രാജരാജവര്‍മയുടെ ഭാര്യ സൗമ്യവതിക്ക് കിഴി കൈമാറിയത്. തൃശൂര്‍ കളക്ടറേറ്റില്‍ നിന്നനുവദിക്കുന്ന തുക ബന്ധപ്പെട്ട തഹസില്‍ദാര്‍മാര്‍ക്ക് കൈമാറുകയാണു ചെയ്യുന്നത്. തിരുവഞ്ചൂര്‍ രാധാകൃഷ്ണന്‍ എംഎല്‍എ, ജില്ലാ കളക്ടര്‍ ചേതന്‍കുമാര്‍ മീണ, കോട്ടയം തഹസില്‍ദാര്‍ എസ്.എന്‍. അനില്‍കുമാര്‍, കോട്ടയം വില്ലേജ് ഓഫീസര്‍ ജെബോയി മാത്യു എന്നിവരും സന്നിഹിതരായിരുന്നു.

മണര്‍കാട് കത്തീഡ്രലില്‍ റാസ നാളെ; നടതുറക്കല്‍ മറ്റന്നാള്‍

മണര്‍കാട്: സെന്‍റ് മേരീസ് യാക്കോബായ സുറിയാനി കത്തീഡ്രലില്‍ എട്ടുനോമ്പ് പെരുന്നാളിനോടനുബന്ധിച്ചു കുരിശുപള്ളികളിലേക്കുള്ള ഭക്തിനിര്‍ഭരവും വര്‍ണാഭവുമായ റാസ നാളെ നടക്കും. ഏഷ്യയിലെ ഏറ്റവും വലിയ ആധ്യാത്മിക ഘോഷയാത്രയായ മണര്‍കാട് കത്തീഡ്രലിലെ റാസയില്‍ പതിനായിരക്കണക്കിനു മുത്തുക്കുടകളും നൂറുകണക്കിനു പൊന്‍-വെള്ളിക്കുരിശുകളും കൊടികളും വെട്ടുക്കുടകളുമായി വിശ്വാസിസഹസ്രങ്ങള്‍ അണിചേരും. ഉച്ചനമസ്‌കാരത്തെ തുടര്‍ന്ന് മുത്തുക്കുടകള്‍ വിതരണം ആരംഭിക്കും. ഉച്ചകഴിഞ്ഞ് രണ്ടിന് അംശവസ്ത്രധാരികളായ വൈദികര്‍ പ്രാര്‍ഥനകള്‍ക്കുശേഷം പള്ളിയില്‍നിന്ന് ഇറങ്ങി കല്‍ക്കുരിശിലെ ധൂപപ്രാര്‍ഥനയ്ക്കുശേഷം റാസയില്‍ അണിചേരും. കണിയാംകുന്ന്, മണര്‍കാട് കവല എന്നിവിടങ്ങളിലെ കുരിശിന്‍തൊട്ടികളും കരോട്ടെ പള്ളിയും ചുറ്റി മൂന്നര കിലോമീറ്ററിലേറെ സഞ്ചരിച്ചാണു തിരികെ വലിയപള്ളിയിലെത്തുക. ഏഴിന് രാവിലെ 11.30ന് മധ്യാഹ്ന പ്രാര്‍ഥനയെത്തുടര്‍ന്ന് ശ്രേഷ്ഠ കാതോലിക്കാ ബസേലിയോസ് ജോസഫ് ബാവായുടെ മുഖ്യകാര്‍മിത്വത്തില്‍ നടതുറക്കല്‍ ശുശ്രൂഷ നടക്കും. കത്തീഡ്രലിന്‍റെ പ്രധാന മദ്ബഹയിലെ ത്രോണോസില്‍ സ്ഥാപിച്ചിരിക്കുന്ന വിശുദ്ധ ദൈവമാതാവിന്‍റെയും ഉണ്ണിയേശുവിന്‍റെയും ഛായാചിത്രം പൊതുദര്‍ശനത്തിനായി വര്‍ഷത്തില്‍ ഒരിക്കല്‍ മാത്രം തുറക്കുന്ന ചടങ്ങാണു നടതുറക്കല്‍ ശുശ്രൂഷ. തുടര്‍ന്ന് കറിനേര്‍ച്ചയ്ക്കുള്ള പന്തിരുനാഴി ഘോഷയാത്ര. വൈകുന്നേരം 7.30ന് കരോട്ടെ പള്ളി ചുറ്റിയുള്ള പ്രദക്ഷിണം. 8.45ന് ആകാശവിസ്മയം. 10ന് പരിചമുട്ടുകളി, മാര്‍ഗംകളി. രാത്രി 12ന് കറിനേര്‍ച്ച വിതരണം.

ഗതാഗതം നിയന്ത്രിച്ചു താരമായത് ചന്പക്കര സ്വദേശി സുരേഷ്

കറുകച്ചാല്‍: ഒാണത്തിരക്കിൽ ആകെ കുരുങ്ങിയ കറുകച്ചാൽ ടൗണിൽ പോലീസ് എത്താതിരുന്നതോടെ ഗതാഗതം നിയന്ത്രിച്ചു വാർത്തകളിൽ നിറഞ്ഞ അജ്ഞാത യുവാവ് ചന്പക്കര സ്വദേശി സുരേഷ് ആണെന്നു തിരിച്ചറിഞ്ഞു. കഴിഞ്ഞ ദിവസമാണ് കറുകച്ചാൽ ടൗൺ വൻ ഗതാഗതക്കുരുക്കിൽ വലഞ്ഞത്. വ്യാപാരികളും നാട്ടുകാരും പോലീസിനെ അറിയിച്ചെങ്കിലും ആരും എത്തിയില്ല. ഇതോടെ വഴിയാത്രക്കാരനായി കടന്നുപോയ സുരേഷ് ഗതാഗത നിയന്ത്രണം ഏറ്റെടുക്കുകയായിരുന്നു. കറുകച്ചാല്‍ സെന്‍ട്രല്‍ ജംഗ്ഷനിലാണ് ഗതാഗതക്കുരുക്ക് രൂക്ഷം. ഷര്‍ട്ടും കൈലിയും ധരിച്ച് മണിക്കൂറുകളോളം ഗതാഗതം നിയന്ത്രിച്ച അദ്ദേഹത്തിന്‍റെ വീഡിയോ സോഷ്യല്‍ മീഡിയയിൽ വൈറലാണ്. സുരേഷിന്‍റെ മാതൃകാപരമായ പ്രവൃത്തിയില്‍ നാട്ടുകാര്‍ അഭിനന്ദിക്കുകയും നോട്ടുമാല ചാര്‍ത്തുകയും ചെയ്തിരുന്നു. മൂന്നു റോഡുകള്‍ വന്നു സംഗമിക്കുന്ന കറുകച്ചാല്‍ ടൗണില്‍ത്തന്നെയാണ് പോലീസ് സ്റ്റേഷനും. പോലീസ് സ്റ്റേഷനില്‍ ഓണാഘോഷമായിരുന്നെന്നും അതാണ് പോലീസുകാർ ഗതാഗതപ്രശ്നം കണ്ടില്ലെന്നു നടിച്ചതെന്നുമാണ് നാട്ടുകാരുടെ ആരോപണം.

ഇന്ന് പൊന്നോണം; പൂക്കളമിടാം അണിഞ്ഞൊരുങ്ങാം സദ്യയുണ്ണാം

കോട്ടയം: ഇന്ന് ഏവര്‍ക്കും പൊന്നിന്‍ ചിങ്ങമാസത്തിലെ തിരുവോണം. ഓണപ്പുടവയിട്ടും ഊഞ്ഞാലാടിയും അത്തപ്പൂക്കളമിട്ടും നാടും നഗരവും മാവേലിത്തമ്പുരാനെ സ്മരിച്ച് പൊന്നോണത്തെ വരവേല്‍ക്കും. വീട്ടുകാരൊന്നാകെ സ്‌നേഹക്കൂട്ടായ്മയില്‍ പൊന്നോണസദ്യ ഒരുക്കും. തുമ്പപ്പൂച്ചോറും പത്തിരുപതുകൂട്ടം രുചിക്കറികളും പഴവും പായസവും തൂശനിലയില്‍ വിളമ്പിയുണ്ണുന്നതിന്‍റെ കേരളത്തനിമ ഒന്നു വേറെയാണ്. നാട്ടിലും വീട്ടിലും പൂക്കള്‍ കുറഞ്ഞതോടെ കടകമ്പോളങ്ങളില്‍നിന്ന് ബന്തിയും ജമന്തിയും വാടാമുല്ലയും വാങ്ങിവേണം മനോഹരമായ പൂക്കളമൊരുക്കാന്‍. കുളിച്ചൊരുങ്ങി കസവ് നെയ്ത മുണ്ടും സാരിയും അണിയുമ്പോഴാണ് ഓണപ്രഭയുടെ പ്രതീതിയുണ്ടാകുക. അടുക്കളവട്ടത്തില്‍ ചിരിവര്‍ത്തമാനങ്ങളുമായിരുന്നാണ് അരിഞ്ഞും അരച്ചും പെറുക്കിയും ഓണസദ്യ ഒരുക്കുക. പ്രായഭേദമന്യേ ഒരുമിച്ചിരുന്നുള്ള ഓണസദ്യ ഒരുമയുടെയും സ്‌നേഹത്തിന്‍റെയും രുചിഭേദമാണ്. ഉപ്പേരിയും ശര്‍ക്കരവരട്ടിയും പപ്പടവും പായസവും തിരുവോണത്തിന്‍റെ കേരളരുചിയാണ്. സപ്ലൈകോയ്ക്കും കുടുംബശ്രീക്കും നേട്ടം കോട്ടയം: സപ്ലൈകോ ഓണം ഫെയറില്‍ വന്‍വില്‍പന. തിരുനക്കര ജില്ലാതല ഫെയറില്‍ കഴിഞ്ഞ മാസം 26 മുതല്‍ ഇന്നലെ വരെ 25 ലക്ഷം രൂപയുടെ വ്യാപാരം നടന്നു. ഗിഫ്റ്റ് വൗച്ചറുകള്‍ക്കും സ്‌പെഷല്‍ കിറ്റുകള്‍ക്കും ആവശ്യക്കാരേറെയായിരുന്നു. കുടുംബശ്രീ ആദ്യമായി ആവിഷ്‌കരിച്ച ഓണസദ്യക്ക് ജില്ലാതലത്തില്‍ മൂവായിരം ഓര്‍ഡറുകള്‍ ലഭിച്ചു. ഇന്നലെ വൈകുന്നേരം ബുക്കിംഗ് സമാപിച്ചു. കുടുംബശ്രീയുടെ അടുക്കളക്കിറ്റിനും ആവശ്യക്കാരേറെയുണ്ടായിരുന്നു. അയ്യായിരം കിറ്റുകളാണ് വിതരണം ചെയ്തത്. പെരുന്നയിലെ ഓണം ഫെയറിലും വന്‍തിരക്കുണ്ടായി.

യുവജനങ്ങള്‍ക്കായി പ്രിവിലേജ് കാര്‍ഡ്

പാലാ: എസ്എംവൈഎം കെസിവൈഎം പാലാ രൂപത, പാലാ മാര്‍ സ്ലീവാ മെഡിസിറ്റിയുടെ സഹകരണത്തോടെ, പാലാ രൂപത യുവജനപ്രസ്ഥാനത്തില്‍ സജീവമായി പ്രവര്‍ത്തിക്കുന്ന യുവജനങ്ങള്‍ക്കായി യൂത്ത് പ്രിവിലേജ് കാര്‍ഡ് പുറത്തിറക്കി. പ്രിവിലേജ് കാര്‍ഡ് ബിഷപ് മാര്‍ ജോസഫ് കല്ലറങ്ങാട്ട് എസ്എംവൈഎം പാലാ രൂപതാ പ്രസിഡന്‍റ് അന്‍വിന്‍ സോണി ഓടച്ചുവട്ടിലിനു നല്‍കി ഉദ്ഘാടനം ചെയ്തു. രൂപതയുടെ പ്ലാറ്റിനം ജൂബിലിയോടനുബന്ധിച്ച് തുടക്കമിടുന്ന പ്രിവിലേജ് കാര്‍ഡുവഴി മെഡിസിറ്റിയിലെ സേവനങ്ങള്‍ക്ക് നിശ്ചിത ശതമാനം ഇളവുകള്‍ രൂപതയിലെ എണ്ണൂറോളം യുവജനങ്ങള്‍ക്ക് ലഭിക്കും. മാര്‍ സ്ലീവാ മെഡിസിറ്റി ഡയറക്ടര്‍ ഫാ. ഗര്‍വാസീസ് ആനിത്തോട്ടത്തില്‍, എസ്എംവൈഎം പാലാ രൂപതാ ഡയറക്ടര്‍ ഫാ. മാണി കൊഴുപ്പന്‍കുറ്റി, ജനറല്‍ സെക്രട്ടറി റോബിന്‍ ടി. ജോസ് താന്നിമല, ഓഫീസ് സെക്രട്ടറി ഡോണ്‍ ജോസഫ് സോണി എന്നിവര്‍ പ്രസംഗിച്ചു.

വെള്ളികുളത്തേക്കു വരൂ, വള്ളത്തിലിരുന്ന് മീൻപിടിക്കാം

മലയോരത്തെ വഞ്ചിയാത്ര കൗതുകമാകുന്നു വെള്ളികുളം: വെള്ളികുളത്തെ പള്ളിക്കുളത്തിൽ വള്ളം ഇറങ്ങിയപ്പോൾ മലയോര ജനതയ്ക്ക് കൗതുകവും പുതുമയും. സ്വപ്നത്തിൽ പോലും വള്ളമെത്തുമെന്നു വിചാരിക്കാത്ത ഒരു നാട്ടിൽ പള്ളിയോടു ചേർന്നുള്ള കുളത്തിൽ വള്ളം ഇറക്കിയത് നാടിന് വലിയ ആഹ്ലാദമായി. പള്ളിക്കുളത്തിലെ വള്ളം കാണാനും വള്ളത്തിൽ കയറാനും നിരവധി പേർ ആദ്യ ദിവസം തന്നെയെത്തി. കുട്ടികൾക്ക് ആവേശം വള്ളവും വള്ളത്തിലുള്ള യാത്രയും പലപ്പോഴും ചിത്രങ്ങളിലും വീഡിയോകളിലും കണ്ടിട്ടുള്ളവർക്ക് മലനാട്ടിലും കണ്ടപ്പോൾ ആവേശം. വള്ളം കണ്ടിട്ടില്ലാത്ത കുട്ടികൾക്കായിരുന്നു ഏറ്റവും സന്തോഷം. ഇടവക വികാരി ഫാ. സ്കറിയ വേകത്താനം വള്ളം വെഞ്ചിരിച്ച് ഇടവകാംഗങ്ങളുടെ സാന്നിധ്യത്തിൽ നീറ്റിലിറക്കി. ലൈഫ് ജാക്കറ്റ് ധരിച്ച് വള്ളത്തിൽ കയറിയുള്ള വികാരിയച്ചന്‍റെ കന്നിയാത്ര കരയ്ക്കു നിന്നവർ കൈയടിച്ചു പ്രോത്സാഹിപ്പിച്ചു. വള്ളത്തിലിരിക്കുന്പോൾ അല്പം ആശങ്കയും പേടിയുമുണ്ടായിരുന്നെന്ന അച്ചന്‍റെ കമന്‍റ് ചിരി പടർത്തി. പള്ളിയോടു ചേർന്നുള്ള കുളത്തിൽ ഇക്കഴിഞ്ഞ നാലു വർഷങ്ങളായി മീൻ വളർത്തലുണ്ട്. നല്ല വിസ്തൃതിയുള്ള കുളത്തിൽ എന്തുകൊണ്ട് വള്ളം ഇറക്കിക്കൂടാ എന്ന് അച്ചനു തോന്നിയ ആശയമാണ് ഇപ്പോൾ സഫലമായിരിക്കുന്നത്. ടൂറിസം പദ്ധതികൾ ആറു മാസം മുമ്പാണ് വെള്ളികുളം പള്ളിയിൽ അച്ചൻ വികാരിയായി ചുമതലയേറ്റത്. വാഗമൺ ടൂറിസവുമായി ബന്ധപ്പെടുത്തി നവീന ആശയങ്ങൾ പ്രദേശത്തു നടപ്പാക്കാനാണ് തീരുമാനം. കുട്ടവഞ്ചിയും പെഡൽ ബോട്ട് സൗകര്യവും ഏർപ്പെടുത്തി ടൂറിസ്റ്റുകളെ ആകർഷിക്കാനും പദ്ധതിയുണ്ട്. വള്ളത്തിലിരുന്നു ചൂണ്ടയിട്ട് മീൻ പിടിക്കാനുള്ള സൗകര്യവും ഏർപ്പെടുത്തും. കുളത്തിൽ ഇപ്പോൾ മൂവായിരത്തിലധികം ഗിഫ്റ്റി, തിലോപ്പിയ മത്സ്യങ്ങളുണ്ട്. ആറു മാസം കൂടുമ്പോൾ വിളവെടുപ്പ് നടത്തും. വള്ളയാത്രയ്ക്ക് 50 രൂപ ഫീസ് ഏർപ്പെടുത്തിയിട്ടുണ്ട്. ഒാണാഘോഷത്തിന്‍റെ ഭാഗമായി വള്ളയാത്ര സൗകര്യമുണ്ട്. ഫോൺ: 9446121275, 8606820593.

അമ്മയ്ക്കരുകിലേക്ക് കാളികാവിൽനിന്ന് അവരെത്തി, നാളെ 10 കിലോമീറ്റർ പദയാത്രയായി രത്‌നഗിരി ഇടവക

കുറവിലങ്ങാട്: നൂറുകണക്കായ ഇടവകാംഗങ്ങളെ അണിചേർത്ത് മുത്തിയമ്മയ്ക്കരുകിലെത്തി കാളികാവ് സെന്‍റ് സെബാസ്റ്റ്യൻസ് ഇടവക. മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന പള്ളിയിലെ എട്ടുനോമ്പാചരണത്തോടനുബന്ധിച്ചാണ് കാളികാവ് ഇടവക മുത്തിയമ്മ തീർഥാടനം നടത്തിയത്. മുത്തുക്കുടകളും കൊടിതോരണങ്ങളുമായി ഇടവകയുടെ സംഘശക്തി വെളിവാക്കിയാണ് തീർഥാടകർ എത്തിയത്. മുത്തിയമ്മയ്ക്കരുകിലെത്തിയ തീർഥാടകരെ ആർച്ച്പ്രീസ്റ്റ് റവ. ഡോ. തോമസ് മേനാച്ചേരി, സീനിയർ അസി. വികാരി ഫാ. ജോസഫ് മണിയഞ്ചിറ, അസി. വികാരിമാർ, കൈക്കാരന്മാർ, പള്ളിയോഗാംഗങ്ങൾ എന്നിവർ ചേർന്ന് സ്വീകരിച്ചു. മുത്തിയമ്മയുടെ തിരുസ്വരൂപം ഉപഹാരമായി നൽകി. വികാരി ഫാ. ജോസഫ് പാണ്ടിയാമാക്കൽ വിശുദ്ധ കുർബാനയർപ്പിച്ച് സന്ദേശം നൽകി. എട്ടുനോമ്പിന്‍റെ ആറാം ദിനത്തിൽ 10 കിലോമീറ്റർ കാൽനടയായി രത്‌നഗിരി ഇടവകാംഗങ്ങൾ മുത്തിയമ്മയ്ക്കരുകിലെത്തും. രത്‌നഗിരി സെന്‍റ് തോമസ് ഇടവകയിലെ നൂറുകണക്കായ ഇടവകാംഗങ്ങൾ രാവിലെ എട്ടിന് പദയാത്ര ആരംഭിക്കും. കുറവിലങ്ങാട് തീർഥാടന കേന്ദ്രത്തിലെത്തി അസി. വികാരി ഫാ. മാത്യു കണിയാംപടി വിശുദ്ധ കുർബാനയർപ്പിക്കും. നാളെ രാവിലെ പകലോമറ്റം തറവാട് പള്ളിയിൽനിന്ന് എസ്എംവൈഎം പാലാ രൂപതാ കമ്മിറ്റിയുടെ നേതൃത്വത്തിൽ പദയാത്ര നടത്തും. രൂപതാ ഡയറക്ടർ ഫാ. മാണി കൊഴുപ്പൻകുറ്റിയും രൂപതാ ഭാരവാഹികളും നേതൃത്വം നൽകും. നാളെ മൂന്നിന് ജീസസ് യൂത്ത് പാലാ സോൺ, കുറവിലങ്ങാട് ഫാമിലി സ്ട്രീം എന്നിവയുടെ നേതൃത്വത്തിൽ പുണ്യശ്ലോകൻ പനങ്കുഴയ്ക്കൽ വല്യച്ചൻ സ്മാരക പാർക്കിൽനിന്ന് ജപമാലറാലി നടത്തും. 3.15ന് രൂപതാ ഡയറക്ടർ ഫാ. മാത്യു എണ്ണയ്ക്കാപ്പള്ളിൽ വിശുദ്ധ കുർബാനയർപ്പിച്ച് സന്ദേശം നൽകും. ഇന്ന് 2.30ന് ഡിസിഎംഎസ് പാലാ രൂപതാ കമ്മിറ്റിയുടെ നേതൃത്വത്തിൽ മുത്തിയമ്മ തീർഥാടകരെത്തും.

വചനാധിഷ്ഠിത ആത്മീയത കാലഘട്ടത്തിന്‍റെ ആവശ്യം: റവ. ഡോ. ജോസ് കാക്കല്ലിൽ

കുറവിലങ്ങാട്: വചനാധിഷ്ഠിത ആത്മീയത കാലഘട്ടത്തിന്‍റെ ആവശ്യമാണെന്ന് പാലാ സെന്‍റ് തോമസ് കത്തീഡ്രൽ വികാരി റവ. ഡോ. ജോസ് കാക്കല്ലിൽ പറഞ്ഞു. കുറവിലങ്ങാട് മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന കേന്ദ്രത്തിൽ എട്ടുനോമ്പാചരണത്തിന്‍റെ നാലാം ദിനത്തിൽ വിശുദ്ധ കുർബാനയർപ്പിച്ച് സന്ദേശം നൽകുകയായിരുന്നു റവ. ഡോ. ജോസ് കാക്കല്ലിൽ. ദൈവമാതാവിനെപ്പോലെ വചനത്തെ ഹൃദയത്തിൽ സ്വീകരിക്കാൻ കഴിയണം. ഇത് പുതിയ ആത്മീയതയിലേക്കുള്ള ജനനം സമ്മാനിക്കും. വെല്ലുവിളികളെ വചനത്തിന്‍റെ വെളിച്ചത്തിൽ നോക്കിക്കണ്ട ദൈവമാതാവിനെ അനുകരിക്കണം. ഭൗതികസുഖങ്ങൾക്കുവേണ്ടിയുള്ള പരക്കംപാച്ചിലിലാണ് ലോകം. തിരക്കിന്‍റെ ലോകമാണ് കാണുന്നത്. മാറിമറിയുന്ന അഭിപ്രായപ്രകടനങ്ങൾ വർധിച്ചുവരുമ്പോൾ നോമ്പാചരണം കൂടുതൽ ആത്മീയത സമ്മാനിക്കുമെന്നും റവ. ഡോ. ജോസ് കാക്കല്ലിൽ പറഞ്ഞു. ഇന്ന് അഞ്ചിന് വടവാതൂർ പൗരസ്ത്യവിദ്യാപീഠം പ്രസിഡന്‍റ് റവ. ഡോ. പോളി മണിയാട്ട് വിശുദ്ധ കുർബാനയർപ്പിച്ച് സന്ദേശം നൽകും.

കൊട്ടാരമറ്റം അല്ല ഇത് സാമൂഹ്യവിരുദ്ധമറ്റം

പാലാ: കൊട്ടാരമറ്റം ബസ് സ്റ്റാൻഡ് എന്നാണ് പേരെങ്കിലും ഇപ്പോൾ ഇവിടെ തന്പടിക്കുന്നതു ബസുകളേക്കാൾ കൂടുതൽ സാമൂഹ്യവിരുദ്ധർ. മദ്യപിച്ചു ലക്കു കെട്ടവർക്ക് ഉറങ്ങാനും തമ്മിൽത്തല്ലാനും ചീത്തവിളിക്കാനുമൊക്കെ എല്ലാ സൗകര്യവും ഒരുക്കിക്കൊടുത്തതുപോലെയാണ് ഇവിടത്തെ അന്തരീക്ഷം. പാലാ നഗരസഭയുടെ വ്യാപാരകേന്ദ്രങ്ങളിലൊന്നായ കൊട്ടാരമറ്റത്തെ ഷോപ്പിംഗ് കോംപ്ലക്സ് മദ്യപരുടെയും സാമൂഹ്യവിരുദ്ധരുടെയും അഴിഞ്ഞാട്ട കേന്ദ്രമായി മാറിയിട്ടും അധികൃതർ അനങ്ങിയിട്ടില്ല. മറിച്ചു വാടക ബസ് ടെര്‍മിനലിന്‍റെ മുന്‍വശത്ത് പുറത്തേക്കു ഷീറ്റ് ഘടിപ്പിച്ചതോടെ രണ്ടും മൂന്നും നിലകളുടെ കാഴ്ച നഷ്ടമായി. ഇതോടെ രണ്ടും മൂന്നും നിലകളില്‍ സ്ഥാപനങ്ങള്‍ തുടങ്ങാൻ വ്യാപാരികള്‍ വിമുഖത കാട്ടി. ഓഫീസുകള്‍, കോച്ചിംഗ് സ്ഥാപനങ്ങള്‍ തുടങ്ങിയ ഏതാനും സ്ഥാപനങ്ങള്‍ മാത്രമേ ഇപ്പോള്‍ ഈ നിലകളില്‍ പ്രവര്‍ത്തിക്കുന്നുള്ളൂ. ബാക്കി ചില മുറികള്‍ അന്യസംസ്ഥാന തൊഴിലാളികള്‍ താമസത്തിനു വാടകയ്ക്ക് എടുത്തിരിക്കുകയാണ്. നഗരസഭയില്‍നിന്നു വാടകയ്ക്കെടുത്ത ചിലർ അന്യസംസ്ഥാന തൊഴിലാളികള്‍ക്കു മറിച്ച് വാടകയ്ക്കു മുറികള്‍ നല്‍കിയതാണെന്നും ആക്ഷേപമുണ്ട്. ദുർഗന്ധപൂരിതം ആവശ്യത്തിനു ശുചിമുറികള്‍ ഒന്നുമില്ലാത്തതിനാല്‍ തിണ്ണയിലും ടെറസിലും ഷീറ്റിലുമൊക്കെ മലമൂത്ര വിസര്‍ജനം നടത്തുന്നതും പതിവാണ്. ദുർഗന്ധം കാരണം മുകള്‍ നിലയിലേക്കു കയറാൻ തന്നെ പ്രയാസമാണ്. പുറമേനിന്നു നോക്കിയാല്‍ കാഴ്ച കിട്ടാത്തതിനാല്‍ മദ്യപരുടെയും അഴിഞ്ഞാട്ടക്കാരുടെയും അനാശാസ്യക്കാരുടെയും ആസ്ഥാനം കൂടിയാണ് കൊട്ടാരമറ്റം ബസ് ടെര്‍മിനല്‍. ബസ് സ്റ്റാൻഡിനോടു ചേര്‍ന്നുള്ള കെട്ടിടമായതിനാല്‍ താഴത്തെ നിലയില്‍ പ്രവര്‍ത്തിക്കുന്ന സ്ഥാപനങ്ങളില്‍ എത്തുന്നവരും ബസില്‍ കയറാന്‍ എത്തുന്ന വിദ്യാര്‍ഥിനികള്‍ അടക്കമുള്ളവരും ഏറെ ദുരിതത്തിലാണ്. അനിഷ്ടകരമായ പല സംഭവങ്ങളും അരങ്ങേറിയിട്ടും അധികൃതർ കണ്ടില്ലെന്നു നടിക്കുന്നതിൽ കടുത്ത പ്രതിഷേധത്തിലാണ് യാത്രക്കാരും വ്യാപാരികളും.

നാടിന് അഭിമാനമായി ബീറ്റ് ഗ്രീൻസ് ഇഞ്ചിയാനി

മുണ്ടക്കയം: ഇഞ്ചിയാനി ഗ്രാമത്തിന്‍റെ സ്വന്തം ചെണ്ടമേള ട്രൂപ്പായ ബീറ്റ് ഗ്രീൻസിന്‍റെ അരങ്ങേറ്റം നടത്തി. മതസൗഹാർദത്തിന്‍റെയും സാഹോദര്യത്തിന്‍റെയും സന്ദേശം പകർന്നുനൽകുന്ന ബീറ്റ് ഗ്രീൻസ് ഇഞ്ചിയാനി ഹോളി ഫാമിലി ദേവാലയത്തിന്‍റെ കൂട്ടായ്മയുടെ ഭാഗമാണ്. ഇഞ്ചിയാനി പള്ളിയോടു ചേർന്നുള്ള യുവജനങ്ങളുടെ കൂട്ടായ്മയിൽ ഉരുത്തിരിഞ്ഞ പുതിയ ആശയമായിരുന്നു ചെണ്ടമേളം പരിശീലനം. പഠനം, കൃഷി, സാമൂഹിക പ്രവർത്തനങ്ങൾ തുടങ്ങിയവയിൽ ഒരുമയോടെ കൈകോർത്ത് നാട്ടിലെ നാനാജാതി മതസ്ഥരായ 11 കുട്ടികളാണ് ചെണ്ട പരിശീലനം നടത്തി അരങ്ങേറ്റം കുറിച്ചത്. പ്രശസ്ത കലാകാരൻ കലാനിലയം ഉണ്ണിയാശാന്‍റെ കീഴിൽ മാസങ്ങൾ നീണ്ട പരിശീലനമായിരുന്നു ഇവർക്ക് ലഭിച്ചത്. ബുധനാഴ്ച വൈകുന്നേരം അരങ്ങേറ്റത്തോടനുബന്ധിച്ച് നടന്ന സമ്മേളനം കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ ഉദ്ഘാടനം ചെയ്തു. സെബാസ്റ്റ്യൻ കുളത്തുങ്കൽ എംഎൽഎ, ഇഞ്ചിയാനി ഹോളിഫാമിലി പള്ളി വികാരി ഫാ. ജോസഫ് കല്ലൂപ്പറമ്പത്ത്, മുണ്ടക്കയം പഞ്ചായത്ത് പ്രസിഡന്‍റ് രേഖാ ദാസ്, ജില്ലാ പഞ്ചായത്തംഗം പി.ആർ. അനുപമ, വൈസ് പ്രസിഡന്‍റ് ഷീലമ്മ ഡോമിനിക്, ഹൈസ്കൂൾ ഹെഡ്മിസ്ട്രസ് ഷാന്‍റിമോൾ, യുപി സ്കൂൾ ഹെഡ്മിസ്ട്രസ് ബിനോൾ കെ. മാത്യു എന്നിവർ പ്രസംഗിച്ചു.

ബിടിസി ക്യാമ്പും സര്‍ട്ടിഫിക്കറ്റ് വിതരണവും

അണക്കര: രൂപത വിശ്വാസജീവിത പരിശീലനകേന്ദ്രം വിശ്വാസ ജീവിത പരിശീലകര്‍ക്കായി നടത്തുന്ന ത്രിദിന ക്യാമ്പായ ബേസിക് ട്രെയ്‌നിംഗ് കോഴ്‌സ് (ബിടിസി) ഹൈറേഞ്ച് മേഖലയുടെ ഉദ്ഘാടനവും സര്‍ട്ടിഫിക്കറ്റ് വിതരണവും അണക്കര പാസ്റ്ററല്‍ അനിമേഷന്‍ സെന്‍ററിൽ നടത്തി. റവ. ഡോ. ജെയിംസ് ഇലഞ്ഞിപ്പുറം ക്യാമ്പ് ഉദ്ഘാടനം ചെയ്തു. കാഞ്ഞിരപ്പള്ളി രൂപത വിശ്വാസജീവിത പരിശീലന ഡയറക്ടര്‍ ഫാ. തോമസ് വാളന്മനാലിന്‍റെ നേതൃത്വത്തില്‍ വൈദികരും സന്യസ്തരും അല്മായരും അടങ്ങുന്ന റിസോഴ്‌സ് ടീം ക്ലാസുകള്‍ നയിച്ചു. സമാപന സമ്മേളനത്തില്‍ രൂപത വികാരി ജനറാള്‍ റവ.ഡോ. സെബാസ്റ്റ്യന്‍ കൊല്ലംകുന്നേല്‍ (ബിടിസി) കോഴ്‌സ് പൂര്‍ത്തിയാക്കിയവര്‍ക്ക് സര്‍ട്ടിഫിക്കറ്റുകള്‍ വിതരണം ചെയ്തു.

ദൈവത്തിന്‍റെ വാക്ക് പാലിക്കുന്നവരായിരിക്കണം: കർദിനാൾ മാർ ജോർജ് ആലഞ്ചേരി

കാഞ്ഞിരപ്പള്ളി: ദൈവത്തിന്‍റെ വാക്ക് പാലിക്കുന്നവരായിരിക്കണം നാമെന്ന് കർദിനാൾ മാർ ജോർജ് ആലഞ്ചേരി. സീറോ മലബാർ മേജർ ആർക്കി എപ്പിസ്കോപ്പൽ തീർഥാടന കേന്ദ്രമായ കാഞ്ഞിരപ്പള്ളി പഴയപള്ളിയിൽ എട്ടുനോന്പ് തിരുനാളിനോടനുബന്ധിച്ച് വിശുദ്ധ കുർബാന അർപ്പിച്ച് സന്ദേശം നൽകുകയായിരുന്നു മാർ ജോർജ് ആലഞ്ചേരി. ദൈവം നൽകിയിട്ടുള്ള രക്ഷയുടെ സന്ദേശം സ്വീകരിക്കുകയും ആ സന്ദേശത്തിനനുസരിച്ച് ലഭിക്കുന്ന ഉത്തരവാദിത്വങ്ങൾ നിറവേറ്റുകയും ചെയ്യുന്പോൾ നാം ദൈവഹിതം നിറവേറ്റുകയാണ്. കുടുംബത്തിൽ മാതാപിതാക്കൾ ദൈവസന്നിധിയിൽ പരിശുദ്ധ അമ്മയെപ്പോലെ നിൽക്കുന്നവരാകണം. പരിശുദ്ധ അമ്മ സഭയുടെ മാതാവാണ്. ഇതിലൂടെ സഭാമക്കളുടെ മാതാവായിത്തീർന്നു. പരിശുദ്ധാത്മാവിനാൽ നയിക്കപ്പെടുന്ന ക്രൈസ്ത ജീവിതം നയിക്കാനായി നമുക്ക് അനുദിനം പരിശ്രമിക്കാമെന്നും മാർ ജോർജ് ആലഞ്ചേരി കൂട്ടിച്ചേർത്തു. ഏഴിന് വൈകുന്നേരം 4.30ന് കാഞ്ഞിരപ്പള്ളി രൂപത മുൻ ബിഷപ് മാർ മാത്യു അറയ്ക്കലും എട്ടിന് വൈകുന്നേരം 4.30ന് കാഞ്ഞിരപ്പള്ളി ബിഷപ് മാർ ജോസ് പുളിക്കലും വിശുദ്ധ കുർബാന അർപ്പിച്ച് സന്ദേശം നൽകും.

പരിശുദ്ധ അമ്മ ഒരു പ്രേഷിതയാണ്: മാര്‍ ജോസ് പുളിക്കല്‍

കാഞ്ഞിരപ്പള്ളി: പരിശുദ്ധ അമ്മ ഒരു പ്രേഷിതയാണെന്ന് കാഞ്ഞിരപ്പള്ളി രൂപതാധ്യക്ഷൻ മാര്‍ ജോസ് പുളിക്കല്‍. കാഞ്ഞിരപ്പള്ളി രൂപത വിശ്വാസജീവിത പരിശീലനത്തിന്‍റെ ഭാഗമായി നടത്തിയ മരിയന്‍ തീർഥാടനത്തിൽ സന്ദേശം നൽകുകയായിരുന്നു മാർ പുളിക്കൽ. അമ്മയില്‍ വിളങ്ങിയിരുന്ന സുകൃതങ്ങളാണ് സ്‌നേഹം, ത്യാഗം, സേവനം,സഹനം. ഈ സുകൃതങ്ങള്‍ നമ്മുടെ ജീവിതത്തിലും പകര്‍ത്തി അമ്മയെ അനുകരിക്കുന്നവരും അനുഗമിക്കുന്നവരും വിശ്വാസത്തിന് സാക്ഷികളുമായി നമുക്ക് മാറാം. മിഷന്‍ലീഗിന്‍റെ മധ്യസ്ഥര്‍ നമുക്ക് നല്‍കുന്ന സന്ദേശവും ഇതുതന്നെയാണെന്നും മാര്‍ ജോസ് പുളിക്കല്‍ കൂട്ടിച്ചേർത്തു. വിശ്വാസപരിശീലനത്തില്‍ ഏര്‍പ്പെട്ടിരിക്കുന്ന ലോറേഞ്ച് മേഖലയിലെ ഒമ്പതാം ക്ലാസ് വിദ്യാർഥികള്‍ക്കായി ഒരുക്കിയ തീർഥാടനം രാവിലെ 9.30ന് കാഞ്ഞിരപ്പള്ളി സെന്‍റ് ഡൊമിനിക്‌സ് കത്തീഡ്രലിൽ വിശുദ്ധ കുര്‍ബാനയോടുകൂടി ആരംഭിച്ചു. തുടര്‍ന്ന് പഴയപള്ളിയിലേക്ക് ജപമാല പ്രാർഥനയോടുകൂടി മരിയൻ റാലി നടത്തി. തീർഥാടനത്തിന് രൂപത വിശ്വാസപരിശീലനകേന്ദ്രം ഡയറക്ടര്‍ ഫാ. തോമസ് വാളന്മനാല്‍, മിഷന്‍ ലീഗ് അസിസ്റ്റന്‍റ് ഡയറക്ടര്‍ ഫാ. ബോബി വേലിക്കകത്ത്, രൂപതാ എക്‌സിക്യൂട്ടീവ് അംഗങ്ങള്‍ എന്നിവര്‍ നേതൃത്വം നല്‍കി.

ഉത്രാടപ്പാച്ചിലിന്‍റെ ആരവങ്ങളൊഴിഞ്ഞു; ഇന്ന് തിരുവോണം

കാഞ്ഞിരപ്പള്ളി: പൊന്നിൻ തിരുവോണത്തിന് മുന്നോടിയായുള്ള ഉത്രാടപ്പാച്ചിലിന്‍റെ ആരവങ്ങളൊഴിഞ്ഞു. ഇന്ന് തിരുവോണം. സന്തോഷത്തിന്‍റെയും സമൃദ്ധിയുടെയും ഉത്സവത്തിലാണ് മലയാളികള്‍. ഉത്രാടനാളില്‍ അവസാനവട്ട ഒരുക്കങ്ങള്‍ പൂര്‍ത്തിയാക്കി കുടുംബങ്ങള്‍ തിരുവോണത്തിനൊരുങ്ങി. ഇടവിട്ടുള്ള മഴ വെല്ലുവിളിയായെങ്കിലും ഓണക്കാഴ്ചകൾ മങ്ങിയില്ല. സദ്യയ്ക്കുള്ള സാധനങ്ങൾ വാങ്ങാനും ഓണക്കോടി എടുക്കാനും പൂക്കൾ വാങ്ങാനും ആളുകൾ നിരത്തിൽ ഇറങ്ങി. വസ്ത്ര വ്യാപാരശാലകളിലും പച്ചക്കറി, പലചരക്ക് കടകളിലുമെല്ലാം തിരക്ക് രാത്രി വരെ നീണ്ടു. ഒറിജിനൽ പൂക്കൾകൊണ്ട് ഏറെ സമയമെടുത്ത് ചെയ്യുന്ന പൂക്കളത്തിന് പകരം പ്ലാസ്റ്റിക് പൂക്കളം വിപണിയിലുണ്ട്. ഓണക്കോടി പ്രധാനമായതിനാൽത്തന്നെ വ്യത്യസ്‌തമാർന്ന കേരളീയ വസ്‌ത്രങ്ങൾ ഇത്തവണത്തെ ഓണത്തിന് വിപണിയിൽ ലഭ്യമാണ്. ഓണത്തിന്‍റെ വരവറിയിച്ച് കഴിഞ്ഞ ദിവസങ്ങളായി ടൗണും വ്യാപാരസ്ഥാപനങ്ങളും ജനങ്ങളാല്‍ നിറഞ്ഞിരിക്കുകയാണ്. ഇത്തവണ ഓണവിപണിയില്‍ സാധനങ്ങള്‍ക്ക് താരതമ്യേന വില കൂടുതലാണെങ്കിലും ഓണത്തിന് ഒന്നിനും ഒരു കുറവും വരാതെയിരിക്കാൻ മലയാളികൾ ശ്രദ്ധിക്കാറുണ്ട്. ഗ്രാമക്കൂട്ടായ്മ പൊൻകുന്നം: ചിത്രാഞ്ജലി ചുള്ളൻസ് ഗ്രാമക്കൂട്ടായ്മയുടെ ഓണാഘോഷത്തിന്‍റെ ഭാഗമായി നാളെ രാവിലെ ഒന്പതുമുതൽ കലാകായിക മത്സരങ്ങൾ നടക്കും. വൈകുന്നേരം അഞ്ചിന് നടക്കുന്ന പൊതുസമ്മേളനം ചീഫ് വിപ്പ് ഡോ.എൻ. ജയരാജ് ഉദ്ഘാടനം ചെയ്യും.

ആരോഗ്യസദ്യയൊരുക്കി മേരിക്വീൻസ് മിഷൻ ആശുപത്രി

കാഞ്ഞിരപ്പളളി: തിരുവോണദിവസംപോലും വിശ്രമമില്ലാതെ നാടിന്‍റെയും നാട്ടുകാരുടെയും നല്ല ആരോഗ്യത്തിനായി അക്ഷീണം പ്രവർത്തിക്കുന്ന ആരോഗ്യപ്രവർത്തകർക്ക് ഓണസദ്യയൊരുക്കി കാഞ്ഞിരപ്പളളി മേരിക്വീൻസ് മിഷൻ ആശുപത്രിയുടെ ഓണാഘോഷം. മേരിക്വീൻസ് കുടുംബാംഗങ്ങൾക്കായി ഒരുക്കിയ ഓണക്കളികളും ആവേശമുയർത്തിയ വടംവലിയും ആദ്യദിവസത്തെ ഓണാഘോഷത്തിന് നിറംപകർന്നപ്പോൾ രണ്ടാം ദിനം മുപ്പത്തിമൂന്നോളം വിഭവങ്ങളുമായി ഒരുക്കിയ ഓണസദ്യ ശ്രദ്ധേയമായി. കൂടാതെ ഓണത്തിന്‍റെ വരവറിയിച്ചു കൊണ്ടുള്ള സംഗീതരാവും മേരിക്വീൻസിന്‍റെ ഓണാഘോഷചടങ്ങുകൾക്ക് കൂടുതൽ മിഴിവേകി. ജോലിയുടെ ഭാഗമായി പലപ്പോഴും ഓണസദ്യ കഴിക്കാൻ സാധിക്കാത്ത ആരോഗ്യപ്രവർത്തകർക്ക് സദ്യയൊരുക്കുകയെന്ന ആശയം വന്നപ്പോൾ അറുനൂറിൽ അധികം വരുന്ന ജീവനക്കാർക്കായി ആ വെല്ലുവിളി ഏറ്റെടുത്ത് മേരിക്വീൻസ് മിഷൻ ആശുപത്രിയുടെ സ്വന്തം ഫുഡ് ആൻഡ് ബിവറേജസ് വിഭാഗമായ സിംഫണിയാണ് ഇത്തവണ സദ്യയൊരുക്കിയത്. ആശുപത്രിയുടെ ഫിനാൻഷ്യൽ അഡ്മിനിസ്ട്രേറ്ററും സിഎംഐ കാർമൽ ഹൗസ് ആൻഡ് പ്രശാന്ത് ഭവന്‍റെ പ്രീഫെക്ടുമായ ഫാ. മാർട്ടിൻ മണ്ണനാലിന്‍റെ മേൽനോട്ടത്തിൽ നടത്തുന്ന മേരിക്വീൻസ് ഫാമിൽനിന്നുള്ള ഏത്തക്കുലകളും ചേനയും പാവയ്ക്കയും പയറുമടക്കുള്ള പച്ചക്കറികളും കൂടാതെ സമീപസ്ഥലങ്ങളിൽനിന്നും ലഭ്യമായ നാടൻ പച്ചക്കറികളും സദ്യയുടെ ഭാഗമായി. പായസപ്രേമികൾക്കായി മാമ്പഴപ്പായസം, പരിപ്പ് പായസം, പാലട പ്രഥമൻ, ചെറുപയർ പായസം, ഗോതമ്പ് പായസം, ബോളിയും പായസവും അടക്കമുള്ള വിഭവങ്ങൾ തിരുവോണം വരെയുള്ള എല്ലാ ദിവസവും സിംഫണിയിൽ ഒരുക്കുന്നുണ്ടെന്ന് അധികൃതർ പറഞ്ഞു. ജീവനക്കാരും ക്ഷണിക്കപ്പെട്ട അതിഥികളും ഉൾപ്പെടെ എണ്ണൂറോളം പേർക്ക് സദ്യയൊരുക്കിയും ഹരിത പ്രോട്ടോക്കോൾ ഉപയോഗിച്ചും നടത്തിയ ഓണാഘോഷ ചടങ്ങുകൾക്ക് ഫിനാൻഷ്യൽ അഡ്മിനിസ്‌ട്രേറ്റർ ഫാ. മാർട്ടിൻ മണ്ണനാൽ സിഎംഐ, ജോയിന്‍റ് ഡയറക്ടർമാരായ ഫാ. തോമസ് മതിലകത്ത് സിഎംഐ, ഫാ. സിറിൾ തളിയൻ സിഎംഐ തുടങ്ങിയവർ മേൽനോട്ടം വഹിച്ചു.

മട്ടുപ്പാവിൽ ചെണ്ടുമല്ലിത്തോട്ടം

തലയോലപ്പറമ്പ്: ഓണപ്പൂക്കളം തീർക്കാൻ വീടിന്‍റെ മട്ടുപ്പാവിൽ ചെണ്ടുമല്ലിത്തോട്ടം തീർത്തൊരുവീട്ടമ്മ. അഞ്ചു തവണ വടയാറിൽ വെള്ളപ്പൊക്കമുണ്ടായതിനെ തുടർന്ന് അങ്കണവാടി അധ്യാപികയായ പന്ത്രണ്ടിൽ ദീപാഷാജിയാണ് വീടിന്‍റെ ടെറസിൽ പൂന്തോട്ടമൊരുക്കിയത്. പൂകൃഷി വിപുലപ്പെടുത്താനുള്ള തീരുമാനത്തിലാണ്.

ദളവാക്കുളത്ത് നഗരചന്തയുമായി കുടുംബശ്രീ

വൈക്കം:നഗരവാസികൾക്ക് വിഷമയമില്ലാത്തജൈവ പച്ചക്കറി ലഭ്യമാക്കാൻ നഗരചന്തയുമായി കുടുംബശ്രീ. പ്രാദേശികമായി കുടുംബശ്രീ ഗ്രൂപ്പുകളും കർഷകരും ഉത്പാദിപ്പിക്കുന്ന പഴം, പച്ചക്കറികളും കുടുംബശ്രീ ഗ്രൂപ്പുകൾ ഉണ്ടാക്കുന്ന വിവിധയിനം ചിപ്സ്, അച്ചാറുകൾ, പലഹാരം എന്നിവയ്ക്കും വിപണി കണ്ടെത്തുന്നതിനായാണ് വൈക്കം ദളവാക്കുളം ബസ് ടെർമിനൽ വളപ്പിൽ നഗരചന്ത ആരംഭിച്ചത്. നഗരസഭ 11-ാം വാർഡിലെ ശ്രീലക്ഷമി കുടുംബശ്രീയിലെ സംരംഭകയായ ജാസ്മിനാണ് നഗരചന്തയുടെ പ്രവർത്തനത്തിന് നേതൃത്വം നൽകുന്നത്. നഗരസഭാ വൈസ് ചെയർമാൻ പി.ടി. സുഭാഷിന്‍റെ അധ്യക്ഷതയിൽ നടന്ന യോഗത്തിൽ നഗരസഭ ചെയർപേഴ്സൺ പ്രീതാ രാജേഷ് നഗരചന്തയുടെ ഉദ്ഘാടനം നിർവഹിച്ചു. നഗരസഭാ കൗൺസിലർമാരായ എൻ. അയ്യപ്പൻ, എ.സി.മണിയയമ്മ, രാധികശ്യാം , എബ്രഹാം പഴയകടവൻ,ആർ. സന്തോഷ്,നഗരസഭ സെക്രട്ടറി സൗമ്യഗോപാലകൃഷ്ണൻ,സിഡിഎസ് ചെയർപേഴ്സൺ സൽബിശിവദാസ് , വൈസ് ചെയർപേഴ്സൺ രത്നമ്മ വിജയൻ,അക്കൗണ്ടന്‍റ് സി.എൻ.നജീമ,സിറ്റി മിഷൻ മാനേജർ സുനു ജോൺ, എൻയുഎൽഎം കോ- ഓർഡിനേറ്റർ രഞ്ജിനി രാജേഷ്, എംഇസി ലത ശിവാനന്ദ്, ബ്ലോക്ക് കോ-ഓർഡിനേറ്റർ ആര്യ തുടങ്ങിയവർ സംബന്ധിച്ചു.

ഓണാഘോഷം: കുമരകത്തേക്ക് സഞ്ചാരികളുടെ ഒഴുക്ക്

കുമരകം: കോവിഡ് മൂലം മന്ദഗതിയിലായിരുന്ന വിനോദസഞ്ചാര മേഖലയ്ക്ക് പുത്തനുണർവ്. ഓണ സീസണെത്തിയതോടെ കുമരകത്തെ എല്ലാ റെസ്റ്ററന്‍റുകളും ഹോട്ടലുകളും വിനോദസഞ്ചാരികളെക്കൊണ്ട് നിറഞ്ഞുകഴിഞ്ഞു. എല്ലാ ഹോട്ടലുകളും ഹോംസ്റ്റേകളും റെസ്റ്ററന്‍റുകളും ഹൗസ്ഫുൾ ആണ്. വിനോദസഞ്ചാര സ്ഥാപനങ്ങൾ എല്ലാംതന്നെ പൂക്കൾ ഉപയോഗിച്ച് അലങ്കരിച്ചു. തിരുവോണനാൾ രാവിലെ പൂക്കളങ്ങൾ ഇടും. നല്ല പൂക്കളത്തിന് സമ്മാനം നൽകും. തുടർന്ന് തിരുവാതിരകളി, പുലികളി, കഥകളി, ഓട്ടൻതുള്ളൽ തുടങ്ങിയ കലാരൂപങ്ങൾ അരങ്ങേറും. ഒപ്പം ഓണപ്പാെട്ടന്‍റെ വരവായി. ഓണപ്പൊട്ടൻ വിനോദസഞ്ചരികളുടെ മുറികളിലെത്തി ആശംസകൾഅറിയിക്കും. ഉച്ചയ്ക്ക് ഒന്നിനാണ് ഓണസദ്യ . കുമരകത്ത് ആറിനും ഏഴിനും നടക്കുന്ന രണ്ടു പ്രധാന മത്സരവള്ളംകളികൾ കൂടാതെ 10ന് ഫൈബർ ചുണ്ടനുകളുടെ പ്രദർശന മത്സരം വിനോദസഞ്ചാരികൾക്കായി ഇക്കുറി ഒരുക്കിയിട്ടുണ്ട്. തദ്ദേശീയരായ തുഴച്ചിൽക്കാർക്കൊപ്പം ചുണ്ടൻവള്ളം തുഴയാനും വിനോദസഞ്ചാരികൾക്ക് അവസരം ലഭിക്കും. പത്തുപങ്കിലെ നയന മനോഹര ആമ്പൽവസന്തം വിനോദസഞ്ചാരികൾക്ക് പുതിയ അനുഭൂതിയാണ്. പുലർച്ചെ മുതൽ വെയിൽ ശക്തി പ്രാപിക്കുന്നതു വരെ വെള്ളത്തിനുമീതെ ഓളത്തിനൊപ്പം ആടി ഉലയുന്ന ആമ്പൽ പൂക്കളുടെ നീണ്ടനിര അസുലഭ കാഴ്ചവസന്തമാണ്. വിനോദസഞ്ചാര മേഖല ഉയിർത്തെഴുന്നേറ്റെങ്കിലും വിദേശീയരുടെ എണ്ണത്തിൽ വലിയ കുറവുണ്ടായിട്ടുണ്ട്. ഇതരസംസ്ഥാനക്കാരുടെ തിരക്കാണധികവും.

മരിയഭക്തിയിലൂടെ ജീവിതം വിശുദ്ധമാക്കണം: റവ.ഡോ. അഗസ്റ്റിൻ പാലയ്ക്കപ്പറമ്പിൽ

കുറവിലങ്ങാട്: മരിയഭക്തിയിലൂടെ ജീവിതം വിശുദ്ധമാക്കണമെന്ന് ഭരണങ്ങാനം വിശുദ്ധ അൽഫോൻസാ തീർഥാടന കേന്ദ്രം റെക്ടർ റവ.ഡോ. അഗസ്റ്റിൻ പാലയ്ക്കപ്പറമ്പിൽ പറഞ്ഞു. മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന കേന്ദ്രത്തിൽ എട്ടുനോമ്പിനോടനുബന്ധിച്ച് വിശുദ്ധ കുർബാനയർപ്പിച്ച് സന്ദേശം നൽകുകയായിരുന്നു റവ.ഡോ. അഗസ്റ്റിൻ പാലയ്ക്കപ്പ റന്പിൽ. ദൈവമാതാവ് കൃപയുടെ നിറവാണ്. ജീവിതത്തെ ചിട്ടയായി ക്രമപ്പെടുത്താനും ക്രൈസ്തവധാരയിൽ മുന്നേറാനും മാതൃഭക്തി സഹായിക്കും. ഉറപ്പുള്ള ജീവിതത്തെ നേടാൻ ദൈവമാതാവിൽ ആശ്രയിക്കണമെന്നും റവ. ഡോ. അഗസ്റ്റിൻ പാലയ്ക്കപ്പറമ്പിൽ പറഞ്ഞു. ഫാ. ജോസഫ് അമ്പാട്ട് സഹകാർമികനായി.

കടുത്തുരുത്തിയില്‍ ഓണത്തിന് ഓളമായി വനിതാ മാവേലി

കടുത്തുരുത്തി: ഓണത്തോടനുബന്ധിച്ചു കടുത്തുരുത്തിയില്‍ വനിതാ മാവേലിയുടെ സന്ദര്‍ശനം. കുടുംബശ്രീ-ഹരിതകര്‍മസേന കടുത്തുരുത്തി സിവില്‍ സ്‌റ്റേഷനില്‍ സംഘടിപ്പിച്ച ഓണാഘോഷത്തോടനുബന്ധിച്ചായിരുന്നു കടുത്തുരുത്തിയില്‍ ആദ്യമായി വനിതാ മാവേലിയുടെ രംഗപ്രവേശനം. പത്താം വാര്‍ഡിലെ ഹരിതകര്‍മസേനാംഗം ലൗസി സ്റ്റീഫനാണ് മാവേലിയുടെ വേഷമിട്ടത്. ഓണാഘോഷത്തിനു ശേഷം കൂട്ടുകാര്‍ക്കൊപ്പം മാവേലി കടുത്തുരുത്തി ടൗണിലും സന്ദര്‍ശനം നടത്തി. വ്യാപാര സ്ഥാപനങ്ങള്‍ സന്ദര്‍ശിച്ച് വനിതാ മാവേലി ടൗണില്‍ ഓളം തീര്‍ത്തു. ഭര്‍ത്താവ് കെ.എസ്. സ്റ്റീഫനും മകന്‍ ജോജി സ്റ്റീഫനും മാവേലിയായെത്തിയ ലൗസിയെ അഭിനന്ദിച്ചു. ആദ്യമായിട്ടാണ് മാവേലിയുടെ വേഷമിടുന്നെതങ്കിലും ലൗസിയുടെ മാവേലി വേഷം തിളങ്ങി. ഇനിയും ആരെങ്കിലും ക്ഷണിച്ചാല്‍ മാവേലിയാകാന്‍ തയാറാണെന്നാണ് ലൗസിയുടെ പക്ഷം.

സില്‍ക്ക്-കോട്ടണ്‍- ജ്വല്ലറി എക്‌സ്‌പോ

കോട്ടയം: രാജസ്ഥാന്‍ ഹാന്‍ഡിക്രാഫ്റ്റ്‌സ് ഫര്‍ണിച്ചര്‍ സംഘടിപ്പിക്കുന്ന സില്‍ക്ക്-കോട്ടണ്‍ ജ്വല്ലറി എക്‌സ്‌പോ, കോട്ടയം പബ്ലിക് ലൈബ്രറിയിലെ കെപിഎസ് മേനോന്‍ ഓഡിറ്റോറിയത്തില്‍ ആരംഭിച്ചു. കോട്ടണ്‍, സില്‍ക്ക് കൈത്തറി, കരകൗശല ഒറീസ ടൈ ആന്‍ഡ് ഡൈ, ഡ്രസ് മെറ്റീരിയല്‍, ഒറീസ സാരികള്‍, പശ്ചിമ ബംഗാള്‍ കോട്ടണ്‍ സാരികള്‍ തുടങ്ങി നിരവധി വസ്തുക്കളുടെ ശേഖരം എക്‌സ്‌പോയിലുണ്ട്. കോട്ടൺ സില്‍ക്ക് സാരികള്‍, ഡ്രസ് മെറ്റീരിയല്‍സ്, പോച്ചമ്പള്ളി സാരികള്‍, ഖാദി ഷര്‍ട്ടുകള്‍, സ്യൂട്ട് പീസുകള്‍, ജയ്പൂര്‍ ഹാന്‍ഡ് ബ്ലോക്ക് ഷര്‍ട്ട്, ഫുല്‍ക്കാരി ദുപ്പട്ട, ടോപ്പുകള്‍, ജയ്പൂര്‍ കുട്ടികളുടെ വസ്ത്രങ്ങള്‍, കുര്‍ത്തികള്‍, ജയ്പൂര്‍ വസ്ത്രങ്ങള്‍, പശ്ചിമ ബംഗാളില്‍നിന്നുള്ള കാന്ത വര്‍ക്ക്, പരവതാനികള്‍, ആഭരണങ്ങള്‍, ലാക് വളകള്‍, തലയണ കവര്‍, പായ, ബെഡ്ഷീറ്റുകള്‍, സോഫാ കവര്‍, ഭഗല്‍പൂര്‍ ഡ്രസ് മെറ്റീരിയല്‍സ്, ഹോം ഡെക്കറേറ്റീവ്‌സ്, രാജസ്ഥാന്‍ ചപ്പലുകള്‍, കൊല്‍ക്കത്ത ബാഗുകള്‍, ടെറാക്കോട്ട ഉത്പന്നങ്ങള്‍, ജയ്പൂര്‍ സ്റ്റോണ്‍ ആഭരണങ്ങള്‍, ഒരു ഗ്രാം സ്വര്‍ണാഭരണങ്ങള്‍ തുടങ്ങിയവ പ്രദര്‍ശിപ്പിച്ചിട്ടുണ്ട്. രാവിലെ 10 മുതൽ രാത്രി ഒമ്പതുവരെയാണ് പ്രദര്‍ശനം. ഏഴിനു പ്രദര്‍ശനം സമാപിക്കും.

കുടിവെള്ള ടാങ്കിൽ കീടനാശിനി കലർത്തി : ദമ്പതികളെ അപായപ്പെടുത്താൻ ശ്രമം

വെച്ചൂർ: വയോധികരായ ദമ്പതികൾ മാത്രം താമസിക്കുന്ന വീട്ടിലെ കുടിവെള്ള ടാങ്കിൽ വിഷം കലർത്തി വീട്ടുകാരെ കൊലപ്പെടുത്താൻ സാമൂഹ്യവിരുദ്ധർ ശ്രമിച്ചതായി പരാതി. വെച്ചൂർ കൊടുതുരുത്തിൽ താമസിക്കുന്ന എൺപത്തിമൂന്നുകാരനായ മണിയന്‍റെ കുടിവെള്ള ടാങ്കിലാണ് വീട്ടിൽ ആളില്ലാതിരുന്ന ദിവസം മാരക കീടനാശിനി കലക്കിയത്. വീട്ടുമുറ്റത്ത് സ്ഥാപിച്ചിരുന്ന കുടിവെള്ള ടാങ്കിൽനിന്നു വെള്ളം കോരിയാണ് ഇവർ ഉപയോഗിച്ചിരുന്നത്. ടാങ്ക് തുറന്നപ്പോൾ കീടനാശിനിയുടെ രൂക്ഷഗന്ധം വന്നതാണ് വയോധികരായ മണിയനും ജാനമ്മയ്ക്കും രക്ഷയായത്. നിലത്തു വച്ചിരിക്കുന്ന നാലു ടാങ്കുകളിൽ പൈപ്പുവെള്ളം ശേഖരിച്ചാണ് ഇവർ ഉപയോഗിച്ചിരുന്നത്. ഇതിൽ കുടിക്കാനും പാചകത്തിനുമായി വെള്ളമെടുത്തിരുന്ന ടാങ്കിൽ മാത്രമാണ് കീടനാശിനി കലർത്തിയിരുന്നത്. ടാപ്പ് വഴിയാണ് വെള്ളം എടുത്തിരുന്നതെങ്കിൽ ജീവൻ നഷ്ടപ്പെടുമായിരുന്നെന്നു മണിയൻ പറഞ്ഞു. അഞ്ചുദിവസം മുമ്പ് കോട്ടയം കൊല്ലാട്ടുള്ള മകന്‍റെ വീട്ടിലെ ചടങ്ങിനായി ദന്പതികൾ പോയപ്പോഴാണ് ടാങ്കിൽ വിഷം കലർത്തിയതെന്നു കരുതുന്നു. ഞായറാഴ്ച ഇവർ മടങ്ങിയെത്തിയ ശേഷം പാചകത്തിനായി വെള്ളമെടുത്തപ്പോഴാണ് രൂക്ഷഗന്ധം അനുഭവപ്പെട്ടത്. വെള്ളത്തിനു നിറവ്യത്യാസംകൂടി കണ്ടതോടെയാണ് സംശയം ശക്തമായത്. മാരക കീടനാശിനിയാണ് കുടിവെള്ളത്തിൽ കലക്കിയിരുന്നതെന്ന് കർഷകൻ കൂടിയായ മണിയൻ പറയുന്നു. പരാതിയെത്തുടർന്ന് അന്നുതന്നെ പോലീസെത്തി പരിശോധനയ്ക്കായി ടാങ്കിലെ വെള്ളം എടുത്തെങ്കിലും സംഭവം വാർത്തയായാൽ പ്രതി രക്ഷപ്പെടാൻ സാധ്യതയുണ്ടെന്നു പറഞ്ഞ് വിലക്കിയാണ് മടങ്ങിയത്. മണിയനും ഭാര്യയും മടങ്ങിയെത്തിയ ദിവസം ഇവരെത്തുന്നതിന് മുമ്പ് ഉച്ചയോടടുത്തു രണ്ടുപേർ ബൈക്കിൽ വീട്ടിലെത്തി മടങ്ങിപ്പോയതായി സമീപവാസി പറഞ്ഞതായി മണിയൻ പറയുന്നു. മുൻവൈരാഗ്യമാകാം സംഭവത്തിനു കാരണമെന്നാണ് പോലീസ് നിഗമനം. സംഭവം ഉണ്ടായതിനോടടുത്ത ദിവസങ്ങളിൽ പ്രദേശത്തെ പാടശേഖരങ്ങളിൽ കീടനാശിനി പ്രയോഗിച്ചിരുന്നതായി പോലീസ് കണ്ടെത്തിയിട്ടുണ്ട്. ടാങ്കിലെ വെള്ളത്തിന്‍റെ പരിശോധനാഫലംകൂടി കിട്ടുന്നതോടെ പ്രതിയെ കണ്ടെത്താനാവുമെന്ന് പോലീസ് പറയുന്നു.

ഓണാഘോഷം: കുമരകത്തേക്ക് സഞ്ചാരികളുടെ ഒഴുക്ക്

കുമരകം: കോവിഡ് മൂലം മന്ദഗതിയിലായിരുന്ന വിനോദസഞ്ചാര മേഖലയ്ക്ക് പുത്തനുണർവ്. ഓണ സീസണെത്തിയതോടെ കുമരകത്തെ എല്ലാ റെസ്റ്ററന്‍റുകളും ഹോട്ടലുകളും വിനോദസഞ്ചാരികളെക്കൊണ്ട് നിറഞ്ഞുകഴിഞ്ഞു. എല്ലാ ഹോട്ടലുകളും ഹോംസ്റ്റേകളും റെസ്റ്ററന്‍റുകളും ഹൗസ്ഫുൾ ആണ്. വിനോദസഞ്ചാര സ്ഥാപനങ്ങൾ എല്ലാംതന്നെ പൂക്കൾ ഉപയോഗിച്ച് അലങ്കരിച്ചു. തിരുവോണനാൾ രാവിലെ പൂക്കളങ്ങൾ ഇടും. നല്ല പൂക്കളത്തിന് സമ്മാനം നൽകും. തുടർന്ന് തിരുവാതിരകളി, പുലികളി, കഥകളി, ഓട്ടൻതുള്ളൽ തുടങ്ങിയ കലാരൂപങ്ങൾ അരങ്ങേറും. ഒപ്പം ഓണപ്പാെട്ടന്‍റെ വരവായി. ഓണപ്പൊട്ടൻ വിനോദസഞ്ചരികളുടെ മുറികളിലെത്തി ആശംസകൾഅറിയിക്കും. ഉച്ചയ്ക്ക് ഒന്നിനാണ് ഓണസദ്യ . കുമരകത്ത് ആറിനും ഏഴിനും നടക്കുന്ന രണ്ടു പ്രധാന മത്സരവള്ളംകളികൾ കൂടാതെ 10ന് ഫൈബർ ചുണ്ടനുകളുടെ പ്രദർശന മത്സരം വിനോദസഞ്ചാരികൾക്കായി ഇക്കുറി ഒരുക്കിയിട്ടുണ്ട്. തദ്ദേശീയരായ തുഴച്ചിൽക്കാർക്കൊപ്പം ചുണ്ടൻവള്ളം തുഴയാനും വിനോദസഞ്ചാരികൾക്ക് അവസരം ലഭിക്കും. പത്തുപങ്കിലെ നയന മനോഹര ആമ്പൽവസന്തം വിനോദസഞ്ചാരികൾക്ക് പുതിയ അനുഭൂതിയാണ്. പുലർച്ചെ മുതൽ വെയിൽ ശക്തി പ്രാപിക്കുന്നതു വരെ വെള്ളത്തിനുമീതെ ഓളത്തിനൊപ്പം ആടി ഉലയുന്ന ആമ്പൽ പൂക്കളുടെ നീണ്ടനിര അസുലഭ കാഴ്ചവസന്തമാണ്. വിനോദസഞ്ചാര മേഖല ഉയിർത്തെഴുന്നേറ്റെങ്കിലും വിദേശീയരുടെ എണ്ണത്തിൽ വലിയ കുറവുണ്ടായിട്ടുണ്ട്. ഇതരസംസ്ഥാനക്കാരുടെ തിരക്കാണധികവും.

എപ്പോഴും പരിധിക്കു പുറത്ത് : ബിഎസ്എന്‍എല്‍ ഉപേക്ഷിച്ച് ഉപയോക്താക്കള്‍

ചങ്ങനാശേരി: ബിഎസ്എന്‍എല്‍ റേഞ്ചിനുപുറത്ത്. മൊബൈല്‍ ഫോണുകള്‍ തകരാറിലായിട്ട് മാസങ്ങള്‍ പിന്നിടുന്നു. സഹികെട്ട ഉപയോക്താക്കള്‍ കൂട്ടത്തോടെ ബിഎസ്എല്‍ ഫോണ്‍ കണക്ഷനുകള്‍ ഉപേക്ഷിക്കുന്നു. ഫോര്‍ ജി അപ്ഗ്രഡേഷന്‍റെ ഭാഗമായുള്ള തകരാറുകളാണ് ഫോണ്‍ കണക്ഷനുകളില്‍ വ്യാപകമായ പ്രതിസന്ധിക്കു കാരണമെന്നാണ് ബിഎസ്എന്‍എല്‍ അധികാരികള്‍ ചൂണ്ടിക്കാണിക്കുന്നത്. മാസങ്ങളായി പ്രതിസന്ധി തുടരുന്ന സാഹചര്യത്തിലാണ് ഉപയോക്താക്കള്‍ വന്‍തോതില്‍ ബിഎസ്എന്‍എല്‍ കണക്ഷന്‍ ഉപേക്ഷിക്കുന്നത്. ഫോണ്‍ വിളിച്ചാല്‍ ലഭിക്കാത്തതും ഇന്‍റര്‍നെറ്റ് തകരാറുകളും വ്യാപകമായത് ബിഎസ്എന്‍എല്‍ ഉപഭോക്താക്കളായ ആയിരക്കണക്കിനാളുകളെയാണ് ബാധിച്ചിരിക്കുന്നത്. പലരുടേയും ബിസിനസിനേയും ജോലികളേയും ഇതു സാരമായി ബാധിച്ചിട്ടുണ്ട്. തകരാറുകള്‍മൂലം ബിഎസ്എന്‍എല്‍ കണക്ഷനൊപ്പം മിക്കവർക്കും മറ്റ് സ്വകാര്യ മൊബൈല്‍ കണക്ഷനുകളും ഉപയോഗിക്കേണ്ട അവസ്ഥയാണ്. രണ്ട് കണക്ഷന്‍ ഉപയോഗിക്കുന്നത് സാമ്പത്തിക ബാധ്യതയായതോടെയാണ് പലരും ബിഎസ്എന്‍എല്‍ ഉപേക്ഷിക്കാന്‍ കാരണമായത്. കണക്ഷന്‍ പ്രശ്നങ്ങള്‍ പരിഹരിച്ചുവരികയാണെന്ന് ബിഎസ്എന്‍എല്‍ അധികൃതര്‍ പറയുമ്പോഴും വിഷയം വഷളാകുകയാണെന്നാണ് ഉപഭോക്താക്കള്‍ ചൂണ്ടിക്കാട്ടുന്നത്. അതേസമയം സ്വകാര്യ മൊബൈല്‍ കമ്പനികളെ സഹായിക്കുന്നതിന്‍റെ ഭാഗമാണിതെന്നും ബിഎസ്എന്‍എല്‍ ഉപയോക്താക്കള്‍ സംശയിക്കുന്നു. ബിഎസ്എന്‍എലിന്‍റെ നിരുത്തരവാദിത്വ നിലപാടിനെതിരേ ഉപയോക്താക്കള്‍ ആക്ഷന്‍ കൗണ്‍സില്‍ രൂപീകരിച്ച് സമരത്തിനും തയാറെടുക്കുന്നുണ്ട്.

ഈര ലൂര്‍ദ് മാതാ ദേവാലയ പ്ലാറ്റിനം ജൂബിലിക്ക് ഏഴിന് തുടക്കം

ഈര: ലൂര്‍ദ് മാതാ ദേവാലയത്തിലെ പ്ലാറ്റിനം ജൂബിലിയാഘോഷങ്ങള്‍ക്ക് ഏഴിനു തുടക്കമാകും. വൈകുന്നേരം 4.30ന് മാര്‍ ജോസഫ് പെരുന്തോട്ടത്തിന്‍റെ മുഖ്യകാര്‍മികത്വത്തില്‍ വിശുദ്ധ കുര്‍ബാന ഉണ്ടായിരിക്കും. 6.15നു പൊതുസമ്മേളനം ആരംഭിക്കും. പ്ലാറ്റിനം ജൂബിലി ആഘോഷങ്ങളുടെ ഉദ്ഘാടനം ഫ്രാന്‍സിസ് ജോര്‍ജ് എംപി നിര്‍വഹിക്കും. ആർച്ച്ബിഷപ് മാര്‍ ജോസഫ് പെരുന്തോട്ടം അധ്യക്ഷത വഹിക്കും. ഫൊറോന വികാരി ഫാ. ജേക്കബ് ചീരംവേലില്‍ ലോഗോ റിലീസിംഗ് നിര്‍വഹിക്കും. പഞ്ചായത്ത് പ്രസിഡന്‍റ് ടി.കെ. തങ്കച്ചന്‍, വികാരി ഫാ. ഫിലിപ്പോസ് കേഴപ്ലാക്കല്‍, കൈക്കാരന്‍മാരായ ടോമിച്ചന്‍ കൈതാരം, സണ്ണി പയ്യംപള്ളി, ജനറല്‍ കണ്‍വീനര്‍ സോജന്‍ ഇടയ്ക്കാട്ട്, മുന്‍വികാരി ഫാ. ജോസ് പുതിയാപറമ്പില്‍, ചങ്ങനാശേരി എസ്ജെഎസ്എം മദര്‍ സിസ്റ്റര്‍ മറിയാമ്മ എന്നിവര്‍ പ്രസംഗിക്കും. തുടര്‍ന്ന് പ്രദീപ് ഗോപിയും സംഘവും അവതരിപ്പിക്കുന്ന കലാവിരുന്നുമുണ്ടായിരിക്കും.

കിടങ്ങൂരിനെ മാലിന്യമുക്തമാക്കാന്‍ പദ്ധതിയുമായി ബ്ലോക്ക്പഞ്ചായത്ത്

കിടങ്ങൂര്‍: പഞ്ചായത്ത് മാലിന്യമുക്തമാക്കി സംരക്ഷിക്കുകയെന്ന ഉദ്ദേശ്യത്തില്‍ പാമ്പാടി ബ്ലോക്ക് പഞ്ചായത്ത് കിടങ്ങൂര്‍ പഞ്ചായത്തിന്‍റെ സഹകരണത്തോടെ വിവിധ പദ്ധതികള്‍ നടപ്പിലാക്കും. പഞ്ചായത്തിന്‍റെ വിവിധ വാര്‍ഡുകൾ കേന്ദ്രീകരിച്ച് കിടങ്ങൂര്‍ ഡിവിഷന്‍ മെംബര്‍ ഡോ. മേഴ്സി ജോണിന്‍റെ 2024-25 വര്‍ഷത്തെ പദ്ധതി വിഹിതമായ 5.3 ലക്ഷം രൂപ വിനിയോഗിച്ചു സിസിടിവി കാമറ സ്ഥാപിച്ചു. ചേര്‍പ്പുങ്കല്‍ ഹൈവേ ജംഗ്ഷനിലും പാലത്തിനു സമീപവും കക്കൂസ് മാലിന്യം സ്ഥിരമായി തള്ളുന്ന മുത്തോലത്ത് ഹാളിന്‍റെ സമീപവും കട്ടച്ചിറ ചെക്ക് ഡാമിന്‍റെ അടുത്തും കാമറകള്‍ സ്ഥാപിച്ചിട്ടുണ്ട്. പഞ്ചായത്തിനുള്ളില്‍ സ്ഥാപിച്ച പുതിയ ടിവി സ്‌ക്രീന്‍ ഉപയോഗിച്ച് നിരീക്ഷണം നടത്തും. 2025-26 വര്‍ഷത്തെ 5.2 ലക്ഷം ഫണ്ട് ഉപയോഗിച്ച് നാലാം വാര്‍ഡില്‍ ഗോള്‍ഡന്‍ ക്ലബിന് സമീപത്തെ ഉപയോഗശൂന്യമായ കുളിക്കടവ് പുനര്‍നിര്‍മിച്ചു സമീപപ്രദേശങ്ങള്‍ മാലിന്യ രഹിതമാക്കി സ്ഥലവാസികള്‍ക്കു പ്രയോജനം ലഭിക്കത്തക്ക രീതിയില്‍ സജ്ജീകരിക്കുന്ന പദ്ധതി യുടെ ടെന്‍ഡര്‍ നടപടികള്‍ പുരോഗമിക്കുന്നു. ചേര്‍പ്പുങ്കല്‍ പാലത്തിനു സമീപം മലിനമായിരുന്ന വഴിയോരം പൂന്തോട്ടം നിര്‍മിച്ചു മനോഹരമാക്കി. ചേര്‍പ്പുങ്കല്‍ റെസിഡന്‍ഷ്യല്‍ അസോസിയേഷന്‍ അംഗങ്ങളുടെ സഹകരണത്തോടെയാണ് പദ്ധതി പൂര്‍ത്തീകരിച്ചത്. പൂര്‍ത്തീകരിച്ച പദ്ധതികളുടെ ഉദ്ഘാടനം ഇന്നു വൈകുന്നേരം നാലിന് മോന്‍സ് ജോസഫ് എംഎല്‍എ നിര്‍വഹിക്കും. പാമ്പാടി ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയ്, ജില്ലാ പഞ്ചായത്തംഗം ജോസ്‌മോന്‍ മുണ്ടയ്ക്കല്‍, കിടങ്ങൂര്‍ പഞ്ചായത്ത് പ്രസിഡന്‍റ് ഇ.എം. ബിനു, ബ്ലോക്ക് പഞ്ചായത്തംഗം അശോകന്‍ പൂതമന, പഞ്ചായത്ത് മെംബര്‍ മിനി ജെറോം ഉള്‍പ്പെടെ വിവിധ രാഷ്‌ട്രീയ-സാമൂഹ്യ നേതാക്കള്‍ പ്രസംഗിക്കും.

ഓണത്തിനും കര്‍ഷകനു കഞ്ഞി കുമ്പിളില്‍ : ഉത്രാടദിനത്തിൽ കഞ്ഞിവച്ച് സമരം

കുറിച്ചി: നെല്ലു സംഭരണ വില മുഴുവനായും ഓണത്തിന് മുമ്പ് കർഷകർക്കു കൊടുത്തുതീര്‍ ക്കുമെന്ന മന്ത്രിയുടെ പ്രസ്താവന ജലരേഖയായി. ഇനിയും കൊടുത്തുതീര്‍ക്കാനുള്ളത് 319. 32 കോടി രൂപയാണ്. കുറിച്ചി പഞ്ചായത്തിലെ പല പാടശേഖരങ്ങളിലെയും കർഷകർക്ക് ഇനിയും തുക കിട്ടാനുണ്ട്. ഓണത്തിന് കര്‍ഷകന് കഞ്ഞികുമ്പിളില്‍ത്തന്നെ’’ യായി മാറിയിരിക്കുന്നു. ഇതിൽ പ്രതിഷേധിച്ച് നെല്‍കര്‍ഷക സംരക്ഷണ സമിതിയുടെയും പാടശേഖര സമിതികളുടെയും നേതൃത്വത്തില്‍ ഉത്രാട നാളായ ഇന്ന് ഉച്ചയ്ക്കു 12ന് മന്ദിരം കവലയില്‍ കഞ്ഞിവച്ച് ധർണ നടത്തും. കഞ്ഞിവച്ചുള്ള സമരം എന്‍ കെഎസ്എസ് രക്ഷാധികാരി വി.ജെ. ലാലി ഉദ്ഘാടനം ചെയ്യുമെന്ന് കണ്‍വീനര്‍ ഷമ്മി വിനോദ് അറിയിച്ചു.

കന്യകമറിയം സ്വയം സമർപ്പിച്ചവൾ: പൗലോസ് മാർ ഐറേനിയോസ്

മണര്‍കാട്: ലോകത്തിലെ പ്രയാസങ്ങളെയും പ്രതിസന്ധികളെയും അതിജീവിച്ച് ദൈവത്തിനായും സ്വര്‍ഗത്തിനായും സ്വയം സമര്‍പ്പിച്ചവളായിരുന്നു പരിശുദ്ധ കന്യകമറിയാമെന്ന് പൗലോസ് മാര്‍ ഐറേനിയോസ് മെത്രാപ്പോലീത്ത. സെന്‍റ് മേരീസ് യാക്കോബായ സുറിയാനി കത്തീഡ്രലിൽഎട്ടുനോമ്പ് പെരുന്നാളിന്‍റെ മൂന്നാം ദിനമായ ഇന്നലെ കത്തീഡ്രലില്‍ വിശുദ്ധ മൂന്നിന്മേല്‍ കുര്‍ബാനയ്ക്കുശേഷം വചനസന്ദേശം നല്‍കുകയായിരുന്നു അദ്ദേഹം. ദൈവവചനം അവളിലേക്ക് ഇറങ്ങിച്ചെന്നപ്പോള്‍ കന്യകമറിയാം ലോകത്തിലെ ഏറ്റവും ശ്രേഷ്ഠമായ വ്യക്തിത്വമായി രൂപാന്തരപ്പെട്ടു. കന്യകമറിയത്തിന്‍റെ ജനനപ്പെരുന്നാള്‍ ആചരിക്കുമ്പോള്‍ കന്യകമറിയത്തെ അനുകരിക്കാന്‍ നാം കടപ്പെട്ടവരാണെന്നും അദ്ദേഹം പറഞ്ഞു. പൊതുസമ്മേളനം ഇന്ന് എട്ടുനോമ്പ് പെരുന്നാളിനോട് അനുബന്ധിച്ചുള്ള പൊതുസമ്മേളനം ഇന്ന് വൈകുന്നേരം ആറിന് നടക്കും. മന്ത്രി വി.എന്‍. വാസവന്‍ ഉദ്ഘാടനം ചെയ്യും. സുന്നഹദോസ് സെക്രട്ടറി ഡോ. തോമസ് മാര്‍ തിമോത്തിയോസ് അധ്യക്ഷത വഹിക്കും. കാഞ്ഞിരപ്പള്ളി ബിഷപ് മാര്‍ ജോസ് പുളിക്കല്‍ അനുഗ്രഹപ്രഭാഷണം നടത്തും. കോര്‍എപ്പിസ്‌കോപ്പ സ്ഥാനം ലഭിച്ച കത്തീഡ്രല്‍ സഹവികാരി ജെ. മാത്യു മണവത്തിനെ ഡോ. കുര്യാക്കോസ് മാര്‍ തെയോഫിലോസ് ആദരിക്കും. സെന്‍റ് മേരീസ് ആശുപത്രിയിലെ ജെറിയാട്രിക് ഡിപ്പാര്‍ട്ട്മെന്‍റിന്‍റെ പുതിയ ബ്ലോക്ക് ഉദ്ഘാടനം ഫ്രാന്‍സിസ് ജോര്‍ജ് എംപിയും ഡയാലിസിസ് ഡിപ്പാര്‍ട്ട്മെന്‍റിന്‍റെ പുതിയ ബ്ലോക്ക് ഉദ്ഘാടനം ജില്ലാ കളക്ടര്‍ ചേതന്‍കുമാര്‍ മീണയും സെന്‍റ് മേരീസ് സണ്‍ഡേ സ്‌കൂളുകളുടെ സ്മാര്‍ട്ട് ക്ലാസ് ഉദ്ഘാടനം ചാണ്ടി ഉമ്മന്‍ എംഎല്‍എയും നിര്‍വഹിക്കും. ജെ. മാത്യു കോര്‍ എപ്പിസ്‌കോപ്പ മണവത്ത്, കത്തീഡ്രല്‍ സെക്രട്ടറി പി.എ. ചെറിയാന്‍, ഫാ. ലിറ്റു തണ്ടണ്ടാശേരില്‍, കത്തീഡ്രല്‍ ട്രസ്റ്റി ബെന്നി ടി. ചെറിയാന്‍ എന്നിവര്‍ പ്രസംഗിക്കും. മണര്‍കാട് പള്ളിയിൽ ഇന്ന് കരോട്ടെ പള്ളിയില്‍ രാവിലെ ആറിനു വിശുദ്ധ കുര്‍ബാന. കത്തീഡ്രലില്‍ രാവിലെ 7.30ന് പ്രഭാത പ്രാര്‍ഥന. 8.30നു വിശുദ്ധ മൂന്നിന്മേല്‍ കുര്‍ബാന. ഐസക് മാര്‍ ഒസ്താത്തിയോസ്. രാവിലെ 11ന് പ്രസംഗം ഐസക് മാര്‍ ഒസ്താത്തിയോസ്. ഉച്ചയ്ക്ക് 12ന് മധ്യാഹ്ന പ്രാര്‍ഥന. ഉച്ചകഴിഞ്ഞ് 2.30ന് പ്രസംഗം - ഫാ. അഭിലാഷ് ഏബ്രഹാം വലിയവീട്ടില്‍. വൈകുന്നേരം അഞ്ചിന് സന്ധ്യാപ്രാര്‍ഥന.ആറിന് - പൊതുസമ്മേളനം.

എംജി യൂണിവേഴ്‌സിറ്റിക്ക് 47.81 കോടി

സൂസൻ മേബിൾ തോമസ് ഇൻഡോർ സ്റ്റേഡിയത്തിനും സ്പോർട്സ് കോംപ്ലക്സിനുമായാണ് തുക അനുവദിച്ചത് കോട്ടയം: സൂസന്‍ മേബിള്‍ തോമസ് ഇന്‍ഡോര്‍ സ്റ്റേഡിയവും അന്താരാഷ്‌ട്ര സ്‌പോര്‍ട്സ് കോംപ്ലക്‌സും എംജി യൂണിവേഴ്‌സിറ്റി കാമ്പസില്‍ നിര്‍മിക്കുന്നതിന് സര്‍ക്കാര്‍ 47.81 കോടി രൂപയുടെ ഭരണാനുമതി നല്‍കിയതായി മന്ത്രി വി.എന്‍. വാസവന്‍ അറിയിച്ചു. നേരത്തേ 38.19 കോടി രൂപയുടെ ഭരണാനുമതി ലഭിച്ചിരുന്ന പദ്ധതിയുടെ തുക ഇന്നലെ ചേര്‍ന്ന മന്ത്രി സഭായോഗം വര്‍ധിപ്പിക്കുകയായിരുന്നു. സ്‌പോര്‍ട്സ് കേരള ഫൗണ്ടേഷനെ എസ്പിവി ആയി ഉള്‍പ്പെടുത്തി, കിഫ്ബി ഫണ്ട് ഉപയോഗിച്ച് കായിക യുവജനകാര്യ ഡയറക്ടര്‍ നിര്‍ദേശിച്ച ഭേദഗതികളോടെ നിര്‍മാണത്തിനു പുറപ്പെടുവിച്ചിരുന്ന ഭരണാനുമതി ഉത്തരവ് 47,8108,000 രൂപയായാണ് ഉയര്‍ത്തിയത്. എംജി യൂണിവേഴ്‌സിറ്റിയില്‍ പദ്ധതി നിര്‍മാണം ആരംഭിക്കുന്നതിനും അനുമതിയായി. രാജ്യാന്തര നിലവാരത്തിലുള്ള പരിശീലന സൗകര്യങ്ങള്‍ ഏറ്റുമാനൂര്‍ മണ്ഡലത്തില്‍ വരുമ്പോള്‍ വലിയ കായിക മുന്നേറ്റത്തിനുള്ള സാധ്യതയാണ് യൂണിവേഴ്‌സിറ്റിക്കും ജില്ലയ്ക്കും തുറന്നുകിട്ടുന്നതെന്ന് മന്ത്രി വി.എന്‍. വാസവന്‍ പറഞ്ഞു.

വേണ്ടതെല്ലാം വാങ്ങിച്ചോണം

കോട്ടയം: ഇന്ന് ഉത്രാടപ്പാച്ചില്‍. നാളെ പൊന്നോളണത്തിനുള്ള വിഭവങ്ങളും ഉടയാടകളും പൂക്കളും വാങ്ങാന്‍ നാടും നഗരവും കമ്പോളങ്ങളില്‍ സംഗമിക്കും. ഓണത്തോടനുബന്ധിച്ച് തിരക്ക് പൂര്‍ണതയിലെത്തുന്നത് ഉത്രാടദിനത്തിലാണ്. ഒട്ടേറെ ഓഫറുകളും സമ്മാനങ്ങളുമൊക്കെ ഒരുക്കിയാണ് വിവിധ വ്യാപാര സ്ഥാപനങ്ങള്‍ ഓണവിപണിയെ വര്‍ണാഭമാക്കുന്നത്. പുത്തന്‍ ട്രെന്‍ഡുകളുടെ ശേഖരവുമായി തുണിക്കടകള്‍ ഓണത്തെ വരവേല്‍ക്കാന്‍ നേരത്തെതന്നെ ഒരുങ്ങിയിരുന്നു. ചെറുതും വലുതുമായ വസ്ത്രവില്‍പന ശാലകളിലെല്ലാം ഓണക്കോടി വാങ്ങാനെത്തുന്നവരുടെ തിരക്കാണ്. അയല്‍സംസ്ഥാനങ്ങളില്‍നിന്നുള്ള ഓണവിഭവങ്ങള്‍ ഇന്നലെ കേരളത്തിലെത്തി. പാല്‍ മുതല്‍ പഴം വരെ അയല്‍നാടുകളില്‍നിന്നാണ് എത്തുന്നത്. കേരളത്തില്‍ ഏറ്റവുമധികം പച്ചക്കറിയും പാലും വില്‍ക്കുന്നത് ഓണത്തിനാണ്. ഒരു ലിറ്റര്‍ പാലട പ്രഥമന് 180 മുതല്‍ 250 രൂപ വരെ വിലയുണ്ട്. കുടുംബശ്രീ ഓണസദ്യയും ഓണവിഭവങ്ങളും വീട്ടിലെത്തിക്കുന്നുണ്ട്. പച്ചക്കറിക്ക് ഏറ്റവും വില ഉയരുന്നതും ഉത്രാടത്തിനാണ്. വസ്ത്രാലയങ്ങളിലും വീട്ടുപകരണ കമ്പോളത്തിലും ഇലക്‌ട്രോണിക്‌സ് വിപണനകേന്ദ്രങ്ങളിലും വന്‍തോതില്‍ വ്യാപാരം നടക്കുന്നു. നാളെ ഒരുക്കാനുള്ള വിഭവങ്ങള്‍ സമാഹരിക്കാന്‍ ഇന്നു രാവിലെ മുതല്‍ കമ്പോളത്തില്‍ തിരക്കേറും. ഇന്നും നാളെയും മഴ ശക്തിപ്പെടുമെന്ന ആശങ്ക ഓണത്തിന്‍റെ തിളക്കം കെടുത്തിയേക്കാം. വഴിക്കമ്പോളങ്ങളില്‍ വില്‍പനയ്‌ക്കെത്തിയവർക്കാണ് ഏറ്റവും ആശങ്ക. ഓണത്തിന് കുടുംബത്തില്‍ സംഗമിക്കാന്‍ വിദൂരങ്ങളില്‍നിന്നുള്ളവരും നാട്ടിലെത്തും. വാഹനങ്ങളിലും ഇതോടെ വലിയ തിരക്കാണ് അനുഭവപ്പെടുന്നത്.

നല്ലോണം ഉണ്ണാൻ സദ്യ പാഴ്സൽ വേണം

കോട്ടയം: ഓണത്തിനു പ്രിയമേറി ഹോട്ടല്‍, കേറ്ററിംഗ് സദ്യ, ജോലിയുടെ തിരക്കുകള്‍ക്കിടയില്‍ സമയമെടുത്ത് സദ്യയുണ്ടാക്കാനുള്ള കഷ്ടപ്പാട് ഒഴിവാക്കാന്‍ ഹോട്ടലുകളില്‍നിന്നും കാറ്ററിംഗ് സ്ഥാപനങ്ങളില്‍നിന്നും ഓണസദ്യ പാഴ്‌സല്‍ വരുത്തി കഴിക്കുകയാണ് പുതിയ ട്രെന്‍ഡ്. ഹോട്ടലുകളില്‍ നേരിട്ടെത്തി സദ്യ കഴിക്കുന്നവരുടെയും എണ്ണം വര്‍ധിച്ചു. ഇത്തവണ ഹോട്ടലുകളും കാറ്ററിംഗ് സ്ഥാപനങ്ങളും പുതിയ പാക്കേജുകളാണ് ഒരുക്കിയിരിക്കുന്നത്. രണ്ടു പായസവും ബോളിയുമുള്‍പ്പെടെ അഞ്ചു പേരുടെ സദ്യ പാക്കേജിന് 1,500 മുതല്‍ 2,500 രൂപ വരെയാണ് ചാര്‍ജ്. 22 ഇനങ്ങളുടെ മിനി സദയ്ക്ക് 200 രൂപ മുതല്‍ 340 രൂപ വരെയും 28 ഇനങ്ങളുള്ള സദ്യക്ക് 349 രൂപ മുതല്‍ 449 രൂപയുമാണ് ചാര്‍ജ്. സ്റ്റാര്‍ ഹോട്ടലുകളിലും കുമരകത്തെ റിസോര്‍ട്ടുകളിലും ഓണസദ്യക്കു പുറമേ കുടുംബത്തോടൊപ്പം ഓണം ആഘോഷിക്കാന്‍ മത്സരങ്ങളും ഓണക്കളികളും ഉള്‍പ്പെടുത്തിയാണ് പാക്കേജ്. പഴയിടം രുചിപ്പെരുമ പ്രമുഖ പാചക, ഹോട്ടല്‍ ഗ്രൂപ്പായ പഴയിടം രുചി ഇത്തവണ വിപുലമായ രീതിയിലാണ് ഓണസദ്യ കഴിഞ്ഞ ഒരാഴ്ചയായി കുറിച്ചിത്താനത്തുള്ള പഴയിടം കിച്ചണിലും കേരളത്തിന്‍റെ വിവിധ ഭാഗങ്ങളിലുള്ള പഴയിടം രുചി ഹോട്ടലുകളിലും സദ്യയുടെ തിരക്കാണ്. ഗുരുവായൂര്‍, തിരുവനന്തപുരം ഹോട്ടലുകളില്‍ ദിവസവും മൂവായിരം മുതല്‍ രണ്ടായിരം മുതല്‍ മൂവായിരം പേര്‍ക്കു വരെയാണ് സദ്യ. ഇരുപതിനായിരം ലിറ്റര്‍ പായസമാണ് ഒരാഴ്ചയായി പഴയിടം കിച്ചണില്‍ തയാറാക്കിയിരുന്നത്. ഇന്നും നാളെയും അളവുകൂടും. ഇത്തവണ ഓണത്തിനു ബംഗളൂരു, ചെന്നൈ, മൈസൂര്‍ എന്നിവിടങ്ങളിലുള്ള മലയാളികള്‍ക്ക് നാടന്‍ ഓണസദ്യ ലഭ്യമാക്കാനുള്ള സൗകര്യവും പഴയിടം രുചി ഒരുക്കിയിട്ടുണ്ട്. പാചകവിദഗ്ധന്‍ പഴയിടം മോഹനന്‍ നമ്പൂതിരി ലണ്ടനിലെ ഓണാഘോഷങ്ങള്‍ക്ക് ഓണസദ്യ ഒരുക്കിയതിനു ശേഷം ഇന്നു പുലര്‍ച്ചെ കുറിച്ചിത്താനത്തെ വീട്ടിലെത്തും. തുടര്‍ന്ന് മകന്‍ യദുവിനൊപ്പം നാട്ടിലുള്ളവര്‍ക്ക് ഓണസദ്യ ഒരുക്കും. ലണ്ടനിലെ മുപ്പതോളം മലയാളി അസോസിയേഷനുകളുടെ ഒരാഴ്ച നീണ്ടുനിന്ന ഓണാഘോഷങ്ങള്‍ക്കായിട്ടാണ് പഴയിടം മോഹനന്‍ നമ്പൂതിരി ലണ്ടനിലേക്കു പോയത്. ഇനി ഓണം കഴിഞ്ഞ് ഗള്‍ഫ് ഉള്‍പ്പെടെയുള്ള നാടുകളില്‍ ഓണസദ്യ ഒരുക്കുന്നതിനായിട്ട് വീണ്ടും യാത്രതിരിക്കും.

അക്ഷരം മ്യൂസിയം : രണ്ട്, മൂന്ന്, നാല് ഘട്ടത്തിനായി 14 കോടി 98 ലക്ഷം രൂപയുടെ ഭരണാനുമതി

കോട്ടയം: സംസ്ഥാന സര്‍ക്കാരിന്‍റെ നേതൃത്വത്തില്‍ സാഹിത്യപ്രവര്‍ത്തക സഹകരണ സംഘത്തിന്‍റെ ഉടമസ്ഥതയിലുള്ള കോട്ടയം നാട്ടകത്തുള്ള അക്ഷരം മ്യൂസിയത്തിന്‍റെ രണ്ട്, മൂന്ന്, നാല് ഘട്ടങ്ങള്‍ക്ക് ഭരണാനുമതിയായി 14,98,36,258 (പതിനാല് കോടി തൊണ്ണൂറ്റിയെട്ട് ലക്ഷത്തി മുപ്പത്തിയാറായിരത്തി ഇരുന്നൂറ്റി അന്‍പത്തിയെട്ട് രൂപ) ചെലവില്‍ കിഫ്ബി ഫണ്ട് വിനിയോഗിച്ച് നടപ്പാക്കുന്നതിനാണ് ഇന്നലെ ചേര്‍ന്ന മന്ത്രിസഭാ യോഗം ഭരണാനുമതി നല്‍കിയതെന്ന് മന്ത്രി വി.എന്‍. വാസവന്‍ അറിയിച്ചു. ഒന്നാം ഘട്ടം പൂര്‍ത്തിയായ അക്ഷരം മ്യൂസിയത്തിന്‍റെ വരും ഘട്ടങ്ങളും 25,000 ചതുരശ്ര യടി വിസ്തീര്‍ണത്തിലാണ് വിഭാവനം ചെയ്യുന്നത്. ഇന്ത്യയിലെയും ലോകത്തിലെയും ഭാഷകളുടെയും ലിപികളുടെയും പരിണാമചരിത്രം, മലയാള കവിത സാഹിത്യ ചരിത്രം, ഗദ്യസാഹിത്യ ചരിത്രം, വൈജ്ഞാനിക സാഹിത്യം എന്നിവ അടങ്ങുന്ന വിപുലമായ ഗാലറികളാണ് അടുത്തഘട്ടത്തില്‍. മ്യൂസിയത്തില്‍ പ്രദര്‍ശന ഗാലറികളോടൊപ്പം തന്നെ ആക്ടിവിറ്റി കോര്‍ണറുകള്‍, ഡിജിറ്റൈസേഷന്‍ ലാബ്, ഓഡിയോ-വീഡിയോ സ്റ്റുഡിയോ, ചില്‍ഡ്രന്‍സ് പാര്‍ക്ക്, വിപുലമായ പുരാരേഖാ-പുരാവസ്തു ശേഖരങ്ങള്‍, കണ്‍സര്‍വേഷന്‍ യൂണിറ്റ്, പുസ്തകങ്ങളുടെ പ്രഥമ പതിപ്പുകളുടെ ശേഖരം, ലൈബ്രറി കോംപ്ലക്‌സ്, വിശാലമായ പാര്‍ക്കിംഗ് സൗകര്യം എന്നിവ ഉള്‍പ്പെടുത്തിയിട്ടുണ്ട്. എപ്പിഗ്രാഫി, മ്യൂസിയോളജി, ആര്‍ക്കൈവിംഗ്, കണ്‍സര്‍വേഷന്‍, പ്രിന്‍റിംഗ് ടെക്‌നോളജി എന്നീ ഇനങ്ങളിലായി ഹ്രസ്വകാല പഠന-പരിശീലന പരിപാടികളും നടപ്പിലാക്കാന്‍ ലക്ഷ്യമിടുന്നുണ്ട്. കൂടാതെ, ലോക ഭാഷാ ലിപികള്‍, മലയാള കാവ്യപാരമ്പ്യം, മലയാള ഗദ്യസാഹിത്യം, വൈജ്ഞാനിക സഹിത്യം, ലൈബ്രറി, സംവേദാത്മകമായ ക്ലാസ് മുറികള്‍ എന്നിവയും ഈ ഘട്ടങ്ങളില്‍ ഉള്‍പ്പെടുത്തും.

മണര്‍കാട് കത്തീഡ്രല്‍ അനുഗ്രഹിക്കപ്പെട്ട ദേവാലയം: വി.ഡി. സതീശന്‍

മണര്‍കാട്: മണര്‍കാട് കത്തീഡ്രല്‍ അനുഗ്രഹിക്കപ്പെട്ട ദേവാലയമാണെന്ന് പ്രതിപക്ഷ നേതാവ് വി.ഡി. സതീശന്‍. മണര്‍കാട് സെന്‍റ് മേരീസ് യാക്കോബായ സുറിയാനി കത്തീഡ്രലിലെ എട്ടുനോമ്പ് പെരുന്നാളിനോടനുബന്ധിച്ചു നടത്തിയ വയോജനങ്ങളെ ആദരിക്കലും മെറിറ്റ് ഡേയും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മാതാപിതാക്കളോടുള്ള കരുതലാണ് വളര്‍ന്നുവരുന്ന തലമുറയുടെ ഹൃദയത്തില്‍ ഏറ്റവും കൂടുതല്‍ ഉണ്ടാകേണ്ടത്. ക്രിസ്തു തന്‍റെ മാതാവിനോട് കാണിച്ച കരുതല്‍ നമ്മളോടും കാണിക്കുന്നുണ്ടെന്ന തിരിച്ചറവ് നമുക്കും ഉണ്ടാകണമെന്നും അദ്ദേഹം പറഞ്ഞു. ഇടവകയിലെ 80 വയസ് കഴിഞ്ഞ വയോധികരെ തിരുവഞ്ചൂര്‍ രാധാകൃഷ്ണന്‍ എംഎല്‍എ ഉപഹാരം നല്‍കി ആദരിച്ചു. യാക്കോബായ സുറിയാനി സഭയുടെ സുന്നഹദോസ് സെക്രട്ടറി ഡോ. തോമസ് മാര്‍ തീമോത്തിയോസ് അധ്യക്ഷത വഹിച്ചു. ഐസക് മാര്‍ ഒസ്താത്തിയോസ് മുഖ്യപ്രഭാഷണം നടത്തി. കത്തീഡ്രലിലെ കുട്ടികള്‍ക്ക് പരിചമുട്ടുകളി അഭ്യസിപ്പിച്ച ഇടവകാംഗങ്ങളും പരിചമുട്ടുകളി ആശാന്മാരുമായ എം.സി. മാത്യു, വി.സി. ഏബ്രഹാം, കെ.ഐ. ഏബ്രഹാം, പി.ഐ. ആന്‍ഡ്രൂസ്, വര്‍ഗീസ് കോര എന്നിവരെയും ആര്‍ട്ടിഫിഷല്‍ ഇന്‍റലിജന്‍സില്‍ ഏറ്റവും കൂടുതല്‍ പങ്കാളികളെ ഉള്‍പ്പെടുത്തി കോഗിനസ് കമ്പനിയെ പ്രതിനിധീകരിച്ച് ഗിന്നസ് റിക്കാര്‍ഡ് നേടിയ നിതിന്‍ ഈപ്പന്‍ ആന്‍ഡ്രൂസ്, സംസ്ഥാന ക്ലാസിക് പവര്‍ ലിഫ്റ്റിംഗില്‍ വെങ്കലം മെഡല്‍ നേടിയ അജോ തോമസ് വര്‍ഗീസ് എന്നിവരെയും തോമസ് മാര്‍ തിമോത്തിയോസ് ഉപഹാരം നല്‍കി ആദരിച്ചു. സൺഡേ സ്‌കൂളുകളില്‍ ഉന്നതവിജയം നേടിയ വിദ്യാര്‍ഥികള്‍ക്കായി വനിതാ സമാജം നല്‍കുന്ന ആന്‍ഡ്രൂസ് കോര്‍എപ്പിസ്‌കോപ്പ ചിരവത്തറ മെമ്മോറിയല്‍ അവാര്‍ഡ് ഐസക് മാര്‍ ഒസ്താത്തിയോസ് വിതരണം ചെയ്തു. കഴിഞ്ഞ അധ്യയന വര്‍ഷം ഉന്നതവിജയം കരസ്ഥമാക്കിയ ഇടവകാംഗങ്ങളായ വിദ്യാര്‍ഥികള്‍, പള്ളിവക സ്ഥാപനങ്ങളിലെ വിദ്യാര്‍ഥികള്‍ എന്നിവര്‍ക്കുള്ള മെറിറ്റ് അവാര്‍ഡ് വിതരണം എംജി സര്‍വകലാശാല വൈസ് ചാന്‍സിലര്‍ സി.ടി. അരവിന്ദകുമാര്‍ നിര്‍വഹിച്ചു. ജെ. മാത്യു മണവത്ത് കോര്‍എപ്പിസ്‌കോപ്പ, പ്രോഗ്രാം ജോയിന്‍റ് കണ്‍വീനര്‍ ഫാ. ലിറ്റു തണ്ടാശേരില്‍, പ്രോഗ്രാം കോ-ഓര്‍ഡിനേറ്റര്‍ ഡീക്കന്‍ ഡോ. ജിതിന്‍ കുര്യന്‍ ആന്‍ഡ്രൂസ്, കത്തീഡ്രല്‍ ട്രസ്റ്റിമാരായ സുരേഷ് കെ. ഏബ്രഹാം, ബെന്നി ടി. ചെറിയാന്‍, ജോര്‍ജ് സഖറിയ, കത്തീഡ്രല്‍ സെക്രട്ടറി പി.എ. ചെറിയാന്‍ എന്നിവര്‍ പ്രസംഗിച്ചു.

അച്ഛന്‍റെ പുടവയും അമ്മയുടെ പായസവും

ബാല്യകാല ഓണ ഓർമകൾ പങ്കുവച്ച്് കാഞ്ഞിരപ്പള്ളി എംഎല്‍എയും ഗവ. ചീഫ് വിപ്പുമായ ഡോ. എന്‍. ജയരാജ് തയാറാക്കിയത്: റെജി ജോസഫ് കോട്ടയം: എല്ലാ വീട്ടിലും പൊന്നോണം ഒന്നു മാത്രമുള്ളപ്പോള്‍ ഞങ്ങളുടെ തറവാട്ടില്‍ രണ്ട് ഓണമുണ്ടായിരുന്നു. അച്ഛന്‍ ചമ്പക്കര ചെറുമാക്കല്‍ പ്രഫ. കെ. നാരായണക്കുറുപ്പിന്‍റെ ജന്മനക്ഷത്രം അവിട്ടമായിരുന്നു. അതിനാല്‍ അച്ഛന്‍റെ അവിട്ടം നാളിനും അയല്‍ക്കാരെയും ബന്ധുക്കളെയും വിളിച്ചുകൂട്ടി ഗംഭീര ഓണസദ്യയുണ്ടാകും. ഒട്ടുമിക്ക കാര്‍ഷികവിഭവങ്ങളും വീട്ടില്‍ സുലഭമായിരുന്നതിനാല്‍ കറുകച്ചാലില്‍ ഓണച്ചന്തയ്ക്കു പോകാതെതന്നെ സദ്യയൊരുക്കാന്‍ അടക്കള സമൃദ്ധം. കുലയും പച്ചക്കറിയും നാളികേരവും മത്തങ്ങയും പാവയ്ക്കയും കോവലും കുമ്പളങ്ങയും അയലത്തും വാല്യക്കാര്‍ക്കും ഉത്രാടദിവസത്തില്‍ അച്ഛന്‍ സമ്മാനിച്ചിരുന്നു. രാഷ്‌ട്രീയക്കാരനും അധ്യാപകനുമായിരുന്ന അച്ഛന്‍ ഒന്നാം തരം കൃഷിക്കാരനുമായിരുന്നു. മൈതാനം പോലൊരു കോവല്‍പന്തലിനു കീഴില്‍ നിന്നു കുട്ടനിറയെ കായ പറിക്കുന്ന അച്ഛനും അമ്മയും ഓര്‍മയില്‍നിന്നു മായുന്നില്ല. ആ പാടങ്ങൾ ബാല്യത്തില്‍ വീടിനു താഴെ വിശാലമായ പാടങ്ങളായിരുന്നു. നെല്ല് കൊയ്തുമെതിച്ച് അരി സൂക്ഷിക്കാന്‍ രണ്ടു വലിയ പത്താഴങ്ങള്‍ തികയുമായിരുന്നില്ല. അതിനാല്‍ ഒരു അറപ്പുര കൂടി വീടിനു പിന്നില്‍ പണിതു. അറയും നിരയുമുള്ള തറവാടിന്‍റെ നാലു മുറ്റത്തും പുന്നെല്ലിന്‍റെ നറുമണമുണ്ടായിരുന്നു. തൊഴുത്തിനോടു ചേര്‍ന്ന് പന്ത്രണ്ടു മാസത്തേക്കും കെട്ടിയൊരുക്കിയ കച്ചിത്തുറുവില്‍ ഓടിക്കയറി ഉരുണ്ടുമറിയുന്നതിന്‍റെ രസം മറക്കാനാവില്ല. ഉത്രാടനാളില്‍ അച്ഛന്‍റെ ഉറപ്പുള്ള സമ്മാനമായിരുന്നു ഓണപ്പുടവ. വീട്ടിലെ പണിക്കാര്‍ക്കും ബന്ധുക്കള്‍ക്കുമുണ്ടാകും പുടവ. ഓടുമേഞ്ഞ വീട്ടുമുറ്റത്ത് വലിയ കിളിച്ചുണ്ടന്‍ മാവ്. വലിയ ഊഞ്ഞാല്‍ കെട്ടാന്‍ പാകത്തില്‍ അതിലൊരു ശിഖരവും. വീട്ടുകാരും കൂട്ടുകാരും രാവിലെ ആട്ടം തുടങ്ങിയാല്‍ ഇരുളുവോളമുണ്ടാകും വിനോദം. നിറയെ ഫലമുള്ള തെങ്ങുകളാല്‍ സമൃദ്ധമായിരുന്നു പറമ്പും പാടത്തുരുത്തുകളും. വീട്ടില്‍ വരുന്നവര്‍ക്കൊക്കെ കൊടുക്കും നാലു നാളികേരം. നാടന്‍തേങ്ങ വെട്ടിയുണക്കി ആട്ടിയെടുത്ത വെളിച്ചെണ്ണയിലാണ് നേന്ത്രക്കായ വറുക്കുക. മറക്കാത്ത രുചി അമ്മ ലീലാദേവി വറുക്കുന്ന ഉപ്പേരിയുടെയും ശര്‍ക്കരവരട്ടിയുടെയും രുചിക്കു പകരം വയ്ക്കാനൊന്നില്ല. തൊടിയില്‍ നിറയെ ചെറുമാവിന്‍ കൂട്ടമുണ്ടായിരുന്നതുകൊണ്ടാണ് വീട്ടുപേര് ചെറുമാക്കല്‍ എന്നായത്. ചെറുനാട്ടുമാവുകളില്‍ നിറയെ മാങ്ങയുണ്ടാകും. അമ്മ ഓണം മുന്നേ കണ്ട് കണ്ണിമാങ്ങ അച്ചാറിട്ടു വയ്ക്കും. ഉത്രാടത്തിനുച്ചയ്ക്കാണ് അച്ചാര്‍ ഭരണി തുറക്കുക. മുറ്റത്തു വരെ മണമെത്തും. വട്ടം കെട്ടിയ മറ്റൊരു ഭരണിയില്‍ കടുകുമാങ്ങയുണ്ടാകും. പഴയ പത്താഴവും ഉപ്പുമാങ്ങാ ഭരണിയും കൈമോശം വരാതെ ഇപ്പോഴും തറവാട്ടിലുണ്ട്. ഊഞ്ഞാലു കെട്ടിയിരുന്ന കിളിച്ചുണ്ടന്‍ മാവും തണലും നിഴലുമായി നിന്ന നാട്ടുമാവുകളും നാടുനീങ്ങിയതില്‍ വല്ലാത്ത സങ്കടമുണ്ട്. അത്തം മുതല്‍ രാവിലെ ഇറങ്ങും പൂക്കള്‍ പറിക്കാന്‍. തുമ്പയും ചെത്തിയും കൃഷ്ണകിരീടവും ബന്തിയും ജമന്തിയുമൊക്കെ ചേര്‍ത്തൊരു വലിയ പൂക്കളം വെയിലുദിക്കും മുന്‍പ് മുറ്റത്തു നിറയും. പൂക്കളമിടുന്നതും നോക്കി നാലും കൂട്ടി മുറുക്കിത്തുപ്പി അച്ഛന്‍ തിണ്ണയിലോ ചാരുകസേരയിലോ ഉണ്ടാകും. അച്ഛനു പിന്നില്‍ നിഴലായി അമ്മയും. അച്ഛന്‍റെ വെറ്റിലക്കൊടിയും മുറുക്കാന്‍ചെല്ലവും പാക്കുപെട്ടിയും തുപ്പല്‍കോളാമ്പിയുമൊക്കെ ഓണക്കാലത്ത് വൈകാരികത ഉണര്‍ത്തുന്ന ഓര്‍മയാണ്. തൂശനില വെട്ടാൻ അടുക്കളയില്‍ പപ്പടം വറുക്കുന്ന മണം വരുമ്പോഴറിയാം സദ്യക്കുള്ള അവസാനത്തെ വിഭവവും പാകമായെന്ന്. പിന്നെ സദ്യ ഉണ്ണാനുള്ള തൂശനില വെട്ടാന്‍ പാടവരമ്പിലേക്ക് ഓട്ടമാണ്. തിളങ്ങുന്ന ഞാലിപ്പൂവന്‍ തൂശനിലകള്‍ തോളില്‍ ചാരിയുള്ള കുട്ടിക്കൂട്ടത്തിന്‍റെ വരവിന് വരവേല്‍പ്പ് പ്രതീതിയായിരുന്നു. ഇലക്കെട്ടു വരുമ്പോഴേക്കും അച്ഛന്‍ അത്തത്തിന് വെട്ടിയ പൂവനും ഞാലിപ്പുവനും ചുണ്ടില്ലാനും പത്താഴമുറിയില്‍ പഴുത്തിരിപ്പുണ്ടാകും. ഉച്ചയ്ക്ക് ഒന്നോടെ കോലായില്‍ മുപ്പതില്‍ കുറയാതെ തൂശനില നിരക്കും. കുട്ടിപ്പടയും കൂട്ടുകാരും അച്ഛനമ്മാവന്മാരും നിലത്തെ പായയില്‍ ഇരുന്നാലുടന്‍ ഇടതുവശം ചേര്‍ത്തിട്ട ഇലയില്‍ വിഭവങ്ങള്‍ നിറഞ്ഞുവരും. മായം കലര്‍ന്ന സാധനങ്ങളൊന്നുംതന്നെ ഓണസദ്യയെ കളങ്കപ്പെടുത്തിയിരുന്നില്ലെന്നു പറയാതെ വയ്യ. പത്തിരുപതു കൂട്ടം പുന്നെല്ലരിയുടെ ചോറിനുണ്ടായിരുന്നു നല്ലൊരു മണം. നടുവില്‍ നെയ്യൊഴിച്ച് പപ്പടം പൊടിച്ചിട്ട് പരിപ്പുകറി ഒഴിച്ചു കഴിച്ചുതുടങ്ങിയാല്‍ മൂന്നു വട്ടമെങ്കിലും ചോറിടും. സാമ്പാറും കാളനും അവസാനം പച്ചമോരും. ഓണസമൃദ്ധിയുടെ അടയാളമായി അവിയല്‍, തോരന്‍, അച്ചാര്‍, കിച്ചടി, പച്ചടി, ഇഞ്ചിക്കറി, മധുരക്കറി, അച്ചാര്‍ എന്നിങ്ങനെ പത്തിരുപതു കൂട്ടം. ഇടയ്ക്കിടെ കൊറിക്കാന്‍ ഇലയിലും മടിയിലും ശര്‍ക്കരവരട്ടിയും ഉപ്പേരിയുമുണ്ടാകും. പഴം തിന്നുകഴിയേണ്ടതേയുള്ളൂ ഇലനടുവിലേക്ക് അടപ്രഥമന്‍ ഒഴുകുകയായി. അതുകഴിഞ്ഞാല്‍ പാല്‍പ്പായസം. ഓണസദ്യക്കുശേഷം വിശ്രമം എന്നതൊന്നില്ല. അയല്‍ വീട്ടില്‍ തുമ്പിതുള്ളലുണ്ടാകും. ചെണ്ടയടിയുടെ ശബ്ദം കടുവാകളിക്കാര്‍ വരുന്നതിന്‍റെ അറിയിപ്പാണ്. കടുവയെ തപ്പി ഒറ്റ ഓട്ടമാണ്. കടുവയും വേടന്മാരും ചേര്‍ന്നുള്ള ആ കളിഫലിതങ്ങളുടെ കമ്പം ഇക്കാലത്തെ കുഞ്ഞുങ്ങള്‍ കാണാതെപോയതില്‍ സങ്കടമുണ്ട്. അച്ഛന്‍ തന്ന ഓണപ്പുടവയുടെ മണവും അമ്മ വിളമ്പിയ പായസത്തിന്‍റെ രുചിയും എങ്ങനെ മറക്കാനാകും.

അമ്മമാർ കുടുംബത്തിന്‍റെ വിളക്കും യുവത സഭയുടെ കരുത്തും: മാർ ജോസ് പുളിക്കൽ

കാഞ്ഞിരപ്പള്ളി: അമ്മമാർ കുടുംബത്തിന്‍റെ വിളക്കായി സ്നേഹത്തോടെ പ്രാർഥനപൂർവം പങ്കുവച്ച് കുടുംബത്തെ ചേർത്തുപിടിക്കേണ്ടവരാണെന്ന് കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ. രൂപത എസ്എംവൈഎമ്മിന്‍റെയും മാതൃവേദിയുടെയും നേതൃത്വത്തില്‍ സെന്‍റ് ഡൊമിനിക്സ് കത്തീഡ്രലിൽനിന്ന് പഴയപള്ളിയിലേക്ക് നടത്തിയ മരിയൻ തീർഥാടനത്തിൽ സന്ദേശം നൽകുകയായിരുന്നു മാർ പുളിക്കൽ. കാവലും കരുതലും കരുത്തുമായിട്ട് മാറേണ്ടവരാണ് മാതൃവേദിയുടെ അമ്മമാർ. യുവജനങ്ങൾ ഭവനത്തിലും സഭയിലും സമൂഹത്തിലും കരുത്തുറ്റ വിശ്വാസത്തിന്‍റെ ജ്വലിക്കുന്ന സാന്നിധ്യങ്ങളായി നയിക്കേണ്ടവരാണ്. സഭയുടെ ഇന്നത്തെ കരുത്തും നാളെയുടെ സ്വപ്നവുമാണ് യുവജനങ്ങൾ. ഇന്നത്തെ സഭയ്ക്ക് കരുത്തു പകരുന്ന യുവസാന്നിധ്യങ്ങളെ സഭാമാതാവ് വലിയ സ്നേഹത്തോടുകൂടി ചേർത്തുപിടിക്കുന്നുണ്ട്. വിശ്വാസത്തിന്‍റെ ധീരസാന്നിധ്യങ്ങളും സാക്ഷികളുമായി യുവജനങ്ങൾ മാറട്ടേയെന്നും മാർ ജോസ് പുളിക്കൽ കൂട്ടിച്ചേർത്തു. ഈശോയുടെ മനുഷ്യാവതാരത്തിന്‍റെ മഹാജൂബിലിയുടെയും കാഞ്ഞിരപ്പള്ളി രൂപതയുടെ സുവര്‍ണ ജൂബിലിയുടെയും മാതൃവേദിയുടെ മുപ്പതാം വാര്‍ഷികത്തോടുമനുബന്ധിച്ചാണ് രൂപത മാതൃവേദിയുടെയും എസ്എംവൈഎമ്മിന്‍റെ നേതൃത്വത്തില്‍ മരിയന്‍ തീർഥാടനം നടത്തിയത്. രാവിലെ സെന്‍റ് ഡൊമിനിക്സ് കത്തീഡ്രലില്‍ പരിശുദ്ധ കുര്‍ബാനയുടെ ആരാധന നടത്തി. തുടര്‍ന്ന് രൂപത വികാരി ജനറാള്‍മാരായ റവ.ഡോ. ജോസഫ് വെള്ളമറ്റം മാതൃവേദി പതാകയും ഫാ. ബോബി അലക്‌സ് മണ്ണംപ്ലാക്കല്‍ എസ്എംവൈഎം പതാകയും രൂപത പ്രസിഡന്‍റുമാര്‍ക്കു നല്‍കി തീർഥാടനം ഉദ്ഘാടനം ചെയ്തു. തുടര്‍ന്ന് ജപമാല ചൊല്ലി ടൗണ്‍ചുറ്റി പഴയപളളി അങ്കണത്തിലെത്തി. പരിശുദ്ധ അമ്മയുടെ 30 പ്രത്യക്ഷീകരണങ്ങൾ ഉൾച്ചേർത്തുകൊണ്ട് നടത്തിയ ജപമാല പ്രദക്ഷിണം ഭക്തിസാന്ദ്രമായി. അക്കരപ്പള്ളിയില്‍ എത്തിച്ചേ ര്‍ന്ന തീർഥാടകരെ കത്തീഡ്രല്‍ വികാരി റവ.ഡോ. കുര്യന്‍ താമരശേരി സ്വാഗതം ചെയ്തു. രൂപത ഫാമിലി അപ്പോസ്തലേറ്റ് ഡയറക്ടര്‍ ഫാ. മാത്യു ഓലിക്കല്‍, രൂപത എസ്എംവൈഎം ഡയറക്ടര്‍ ഫാ. തോമസ് നരിപ്പാറ എന്നിവര്‍ വിശുദ്ധ കുർബാന അര്‍പ്പിച്ചു. തീർഥാടനത്തിന് മാതൃവേദി, എസ്എംവൈഎം ഡയറക്ടര്‍മാരായ ഫാ. മാത്യു ഓലിക്കല്‍, ഫാ. തോമസ് നരിപ്പാറ, ആനിമേറ്റര്‍ സിസ്റ്റർ റോസ്മി എസ്എബിഎസ്, റീജന്‍റ് ബ്രദര്‍ കെവിന്‍, എസ്എംവൈഎം ഡപ്യൂട്ടി പ്രസിഡന്‍റ് ഡിജു കൈപ്പന്‍പ്ലാക്കല്‍, ജനറല്‍ സെക്രട്ടറി ഷെബിന്‍ ജോയി, കൗണ്‍സിലർ‍ ആന്‍ മരിയ കൊല്ലശേരില്‍, ജോയിന്‍റ സെക്രട്ടറി മരീനാ സെബാസ്റ്റ്യന്‍, മീഡിയ വിംഗ് റോമല്‍ ടോമി, റീജന്‍റ് ബ്രദര്‍ ജെറി പുളിക്കല്‍ എന്നിവര്‍ നേതൃത്വം നല്‍കി. പഴയപള്ളിയിൽ ഇന്ന് രാവിലെ അഞ്ചിന് വിശുദ്ധ കുർബാന, 6.30ന് വിശുദ്ധ കുർബാന - ഫാ. വർഗീസ് പരിന്തിരിക്കൽ, 8.15ന് വിശുദ്ധ കുർബാന - ഫാ. അഗസ്റ്റിൻ പീടികമലയിൽ എസ്ജെ, 10ന് രോഗികൾക്കുവേണ്ടിയുള്ള വിശുദ്ധ കുർബാന - ഫാ. റോയി വടക്കേൽ, 11.30ന് മരിയൻ തീർഥാടനം - മാർ ജോസ് പുളിക്കൽ, 12ന് വിശുദ്ധ കുർബാന - ഫാ. ജയിംസ് ചവറപ്പുഴ, രണ്ടിന് വിശുദ്ധ കുർബാന - ഫാ. ജയിംസ് കൊല്ലംപറന്പിൽ, വൈകുന്നേരം 4.30ന് വിശുദ്ധ കുർബാന - കർദ്ദിനാൾ മാർ ജോർജ് ആലഞ്ചേരി, 6.15ന് ജപമാല പ്രദക്ഷിണം, രാത്രി ഏഴിന് വിശുദ്ധ കുർബാന.

ഭക്തിയുടെ രുചിയുമായി നേർച്ചക്കഞ്ഞി

കാഞ്ഞിരപ്പള്ളി: സീറോ മലബാർ മേജർ ആർക്കി എപ്പിസ്കോപ്പൽ തീർഥാടന കേന്ദ്രമായ പഴയപള്ളിയിൽ എട്ടുനോമ്പാചരണത്തിന്‍റെ ഭാഗമായി വിതരണം ചെയ്യുന്ന നേർച്ചക്കഞ്ഞി കുടിച്ച് മടങ്ങുന്നത് ആയിരക്കണക്കിന് ഭക്തജനങ്ങൾ. രാവിലെ 10ന് തുടങ്ങുന്ന നേർച്ചക്കഞ്ഞി വിതരണം ഉച്ചകഴിഞ്ഞ് 2.30വരെ നീളും. ചൂട് കഞ്ഞിയും പയറും അച്ചാറും കഴിച്ച് വിശ്വാസനിറവോടെയാണ് ഭക്തർ മടങ്ങുന്നത്. വിശ്വാസികളുടെ സൗകര്യാർഥം പന്തലിൽ ഇരിപ്പിടങ്ങളും പ്രായമായവർക്കായി മേശയും ഒരുക്കിയിട്ടുണ്ട്. കാഞ്ഞിരപ്പള്ളി സെന്‍റ് ഡൊമിനിക്സ് കത്തീഡ്രലിലെ ഇടവകാംഗങ്ങളുടെ നേതൃത്വത്തിലാണ് നേർച്ചക്കഞ്ഞി തയാറാക്കി വിതരണം ചെയ്യുന്നത്. എട്ടുനോന്പ് തിരുനാളിലും തിരുക്കർമങ്ങളിലും പങ്കെടുക്കാൻ ഹൈറേഞ്ചിൽ നിന്നുൾപ്പെടെ വിദൂരസ്ഥലങ്ങളിൽ നിന്നുള്ള വിശ്വാസികളുടെ വലിയ തിരക്കാണ് പഴയപള്ളിയിൽ അനുഭവപ്പെടുന്നത്. പുരാതനമായ കൽക്കുരിശ് വണങ്ങിയും നേർച്ചകാഴ്ചകളർപ്പിച്ചുമാണ് കുഞ്ഞുകുട്ടികൾ ഉൾപ്പെടെയുള്ള വിശ്വാസികൾ മടങ്ങുന്നത്.

ബന്ദിപ്പൂത്തോട്ടമായി സ്കൂൾ പരിസരം

മുണ്ടക്കയം: 35ാംമൈൽ കള്ളിവയലിൽ പബ്ലിക് സ്കൂൾ വളപ്പിലാണ് വിദ്യാർഥികളും അധ്യാപകരും ചേർന്ന് ബന്ദിപ്പൂ കൃഷി നടത്തിയത്. ഓണത്തിന് മറുനാടൻ പൂക്കളെ ആശ്രയിക്കുന്ന മലയാളിയുടെ സംസ്കാരത്തിന് മാറ്റംവരുത്തി നാടൻ പൂക്കൾ വിപണിയിൽ എത്തിക്കുകയെന്ന ലക്ഷ്യത്തോടുകൂടിയായിരുന്നു കൃഷി ആരംഭിച്ചത്. ദേശീയപാതയോരത്ത് സ്കൂൾ വളപ്പിൽ ഒരേക്കർ സ്ഥലത്താണ് മൂവായിരത്തോളം ബന്ദിച്ചെടികൾ അധ്യാപകരും വിദ്യാർഥികളും ചേർന്നു നട്ടുപരിപാലിച്ചത്. കൂട്ടിക്കൽ കൃഷിഭവന്‍റെ സഹകരണത്തോടുകൂടിയായിരുന്നു ബന്ദിപ്പൂകൃഷി ആരംഭിച്ചത്. രണ്ടു നിറത്തിലുള്ള ബന്ദിത്തൈകൾ കൂട്ടിക്കൽ കൃഷിഭവനിൽനിന്നു വില കൊടുത്ത വാങ്ങി. 45 ദിവസത്തെ പരിപാലനത്തിനു ശേഷം ഓണത്തിന് രണ്ടുനാൾ ബാക്കിനിൽക്ക് വിളവെടുപ്പ് നടത്തി. കള്ളിവയലിൽ പബ്ലിക് സ്കൂൾ പ്രിൻസിപ്പൽ ഫാ. വർഗീസ് പുളിക്കൽ, ബർസർ ഫാ. ജിബിൻ എന്നിവരുടെ നേതൃത്വത്തിൽ അധ്യാപകരും വിദ്യാർഥികളും ചേർന്നാണ് ബന്ദിപ്പൂ കൃഷി നടത്തിയത്. കൃഷിയുടെ വിളവെടുപ്പ് സ്കൂൾ അധികൃതർ ആഘോഷമാക്കി. ബന്ദിച്ചെടികളിൽനിന്നു മികച്ച വിളവാണ് ഇവർക്കു ലഭിച്ചത്.

സ്റ്റാമ്പുകൾകൊണ്ട് പൂക്കളം ഒരുക്കി ഫാ. വിൽസൺ പുതുശേരി

കാഞ്ഞിരപ്പള്ളി: ഈ ഓണക്കാലത്തെ വേറിട്ട കാഴ്ചകളിലൊന്നായി മാറുകയാണ് സ്റ്റാമ്പുകൾ കൊണ്ട് തീർത്ത പൂക്കളത്തിന്‍റെ മാതൃക. കാഞ്ഞിരപ്പള്ളി എകെജെഎം സ്കൂളിന്‍റെ വൈസ് പ്രിൻസിപ്പൽ ഫാ. വിൽസൺ പുതുശേരിയാണ് സ്റ്റാമ്പുകൾ കൊണ്ടുള്ള പൂക്കളത്തിന്‍റെ മാതൃകയുടെ പിന്നിൽ. പൂക്കൾ ആലേഖനം ചെയ്ത ആയിരത്തിലേറെ സ്റ്റാമ്പുകളാണ് ഇതിനായി ഉപയോഗിച്ചിരിക്കുന്നത്. അന്പതിലധികം രാജ്യങ്ങളിലെ വ്യത്യസ്തങ്ങളായ സ്റ്റാമ്പുകൾ ഉപയോഗിച്ചിട്ടുണ്ടെങ്കിലും ഒരു സ്റ്റാമ്പു പോലും ആവർത്തിച്ചിട്ടില്ല. റോസ്, ലില്ലി, താമര, കണിക്കൊന്ന തുടങ്ങിയവയുടെ പുഷ്പങ്ങൾ മുതൽ വിദേശ രാജ്യങ്ങളിലെ വിവിധ ചെടികളുടെ പുഷ്പങ്ങളും ആലേഖനം ചെയ്തിരിക്കുന്ന സ്റ്റാമ്പുകൾ പൂക്കളത്തിന്‍റെ മാതൃക തീർക്കാൻ ഉപയോഗിച്ചിട്ടുണ്ട്. 1950 കളിലെ അടക്കം സ്റ്റാമ്പുകൾ ഇക്കൂട്ടത്തിലുണ്ട്. ഒറ്റ രാത്രി കൊണ്ടാണ് സ്റ്റാമ്പുകൾ കൊണ്ട് ഫാ. വിൽസൺ പൂക്കളത്തിന്‍റെ മാതൃക തീർത്തത്. കോട്ടയം ജില്ലയിലെ ഫിലാറ്റ്‌ലി അസോസിയേഷനിലെ ലൈഫ് ലോംഗ് മെംബർ കൂടിയാണ് ഫിലാറ്റ്‌ലിസ്റ്റ്‌ കൂടിയായ ഫാ. വിൽസൺ പുതുശേശി.

പൈക ഗവൺമെന്‍റ് ആശുപത്രിയിൽ ഫിസിയോ തെറാപ്പി യൂണിറ്റ്

എലിക്കുളം: പൈക സർക്കാർ ആശുപത്രിയിൽ ഫിസിയോ തെറാപ്പി യൂണിറ്റ് പ്രവർത്തനം ആരംഭിച്ചു. മല്ലികശേരി ഗ്ലെൻ റോക്ക് റബേഴ്‌സിന്‍റെ സിഎസ്ആർ ഫണ്ട് ആറുലക്ഷം രൂപ വിനിയോഗിച്ചാണ് യൂണിറ്റ് നിർമിച്ചത്. സമ്മേളനം പാമ്പാടി ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയ് മണിയങ്ങാട്ട് ഉദ്ഘാടനം ചെയ്തു. ഫിസിയോ തെറാപ്പി യൂണിറ്റ് ഗ്ലെൻ റോക്ക് റബേഴ്‌സ് മാനേജിംഗ് ഡയറക്ടർ ജോസഫ് എം. കള്ളിവയലിൽ പ്രവർത്തനത്തിനായി തുറന്നു കൊടുത്തു. എലിക്കുളം പഞ്ചായത്ത് പ്രസിഡന്‍റ് ജിമ്മിച്ചൻ ഈറ്റത്തോട്ട് അധ്യക്ഷത വഹിച്ചു. ബ്ലോക്ക് പഞ്ചായത്ത് വൈസ് പ്രസിഡന്‍റ് പ്രഫ.എം.കെ. രാധാകൃഷ്ണൻ, ബ്ലോക്ക് പഞ്ചായത്ത് സ്ഥിരംസമിതി അധ്യക്ഷ പ്രേമ ബിജു, എലിക്കുളം പഞ്ചായത്ത് വൈസ് പ്രസിഡന്‍റ് സൂര്യാമോൾ, പഞ്ചായത്തംഗങ്ങളായ അഖിൽ അപ്പുക്കുട്ടൻ, സിനി ജോയ്, മാത്യൂസ് പെരുമനങ്ങാട്ട്, ജെയിംസ് ജീരകത്തിൽ, ആശ റോയ്, സെൽവി വിൽസൺ, ദീപ ശ്രീജേഷ്, ആശുപത്രി ഉപദേശക സമിതി അംഗങ്ങളായ ടോമി കപ്പിലുമാക്കൽ, കെ.എം. ചാക്കോ കോക്കാട്ട്, മെഡിക്കൽ ഓഫീസർ ഡോ. ജെയ്‌സി എം. കട്ടപ്പുറം, ഹെൽത്ത് ഇൻസ്‌പെക്ടർ ഹരീഷ് എന്നിവർ പ്രസംഗിച്ചു.

ഓണം മൂഡിൽ കാഞ്ഞിരപ്പള്ളി; അവസാനവട്ട ഒരുക്കങ്ങളുമായി ഇന്ന് ഉത്രാടപ്പാച്ചില്‍

കാഞ്ഞിരപ്പള്ളി: ഓണത്തെ വരവേല്‍ക്കാനുള്ള അവസാനവട്ട ഒരുക്കങ്ങളുമായി ഇന്ന് ഉത്രാടപ്പാച്ചില്‍. തിരുവോണ നാളിന് ഇനി മണിക്കൂറുകള്‍ മാത്രം ബാക്കിനില്‍ക്കെ ഓണത്തപ്പനെ വരവേല്‍ക്കുവാനുള്ള തിരക്കിലാണ് കാഞ്ഞിരപ്പള്ളി ടൗൺ. കഴിഞ്ഞ രണ്ടു ദിവസമായി ടൗണിൽ വലിയ തിരക്കാണ് അനുഭവപ്പെടുന്നത്. ഉത്രാട ദിനമായതിനാൽ ഇന്നും തിരക്ക് വർധിക്കും. ഓണക്കോടികള്‍ വാങ്ങുന്നതിന് വസ്ത്രവ്യാപാരശാലകളില്‍ വന്‍ തിരക്കാണ്. സദ്യ വട്ടങ്ങള്‍ ഒരുക്കുന്നതിന് ആവശ്യമായ സാധനങ്ങള്‍ വാങ്ങുന്ന തിരക്കും അനുഭവപ്പെടുന്നുണ്ട്. ടൗണിലെ വലുതും ചെറുതുമായ എല്ലാ പച്ചക്കറി കടകളും സജീവമായിക്കഴിഞ്ഞു. ഓണസദ്യക്ക് ആവശ്യമായ പച്ചക്കറികളെല്ലാം തന്നെ കടകളിൽ എത്തിയിട്ടുണ്ട്. കുടുംബശ്രീയുടെ ചന്തകളും പഞ്ചായത്തിന്‍റെയും കൃഷിവകുപ്പിന്‍റെയും ഓണവിപണികളും ടൗണിൽ സജീവമായിരിക്കുകയാണ്. വിഭവസമൃദ്ധമായ ഓണസദ്യയും പായസവുമൊക്കെ ഒരുക്കി ഹോട്ടലുകളും കേറ്ററിംഗ് സര്‍വീസുകളും ഓണാഘോഷങ്ങള്‍ക്കു രുചി പകരാന്‍ രംഗത്തുണ്ട്. ഓണ സദ്യയുടെയും പായസത്തിന്‍റെയും ബുക്കിംഗ് തകൃതിയാണ്. വിവിധയിടങ്ങളില്‍ വഴിയോരങ്ങള്‍ കേന്ദ്രീകരിച്ചും പായസ മേളകള്‍ ഒരുക്കിയിട്ടുണ്ട്. സാംസ്‌കാരിക സംഘടനകളും ക്ലബുകളും വിവിധ റസിഡന്‍റസ് അസോസിയേഷനുകളും ഓണാഘോഷത്തിന്‍റെ ഭാഗമായി കലാപരിപാടികളും മത്സരങ്ങളും സംഘടിപ്പിച്ചിട്ടുണ്ട്. ഓണക്കോടിയെടുക്കാനും ഓണസദ്യ വട്ടങ്ങള്‍ക്കുള്ള വിഭവങ്ങള്‍ വാങ്ങാനും കൂടുതല്‍ പേര്‍ ഇന്ന് വ്യാപാര സ്ഥാപനങ്ങളിലെത്തും. തിരുവോണത്തെ വരവേല്‍ക്കാനുള്ള അവസാനവട്ട ഒരുക്കങ്ങളുടെ തിരക്കിലാവും ഇന്ന് നാട്.

കടനാട് ബാങ്കിൽ നിക്ഷേപകരുടെ‍ പട്ടിണിസമരം

കൊല്ലപ്പള്ളി: കടനാട് സര്‍വീസ് സഹകരണ ബാങ്ക് നിക്ഷേപക കൂട്ടായ്മയുടെ നേതൃത്വത്തില്‍ ബാങ്ക് കൊല്ലപ്പള്ളി ഹെഡ് ഓഫീസിനു മുമ്പില്‍ പട്ടിണിസമരം നടത്തി. കര്‍ഷക യൂണിയന്‍ സംസ്ഥാന ജനറല്‍ സെക്രട്ടറി മാര്‍ട്ടിന്‍ കോലടി സമരം ഉദ്ഘാടനം ചെയ്തു. ബാങ്കില്‍ നടന്ന ക്രമക്കേട് ഇഡി അന്വേഷിക്കണമെന്ന് അദ്ദേഹം ആവശ്യപ്പെട്ടു. നിക്ഷേപ കൂട്ടായ്മാ പ്രസിഡന്‍റ് എന്‍.എം. ജോസഫ് അധ്യക്ഷത വഹിച്ചു. ജോയിസ് പുതിയാമഠം, മനോജ് കല്ലാനിക്കവയലില്‍, ജോണ്‍ പുതിയാമഠം, തോമസ് കച്ചിറയില്‍, കുര്യാക്കോസ് ഏരിമംഗലം, മുരളി നീലൂര്‍, റോജന്‍ നെല്ലിത്താനം, മാത്യു കണ്ണോളില്‍, മാത്യു ഏബ്രഹാം തുടങ്ങിയവര്‍ പ്രസംഗിച്ചു.

കിടങ്ങൂര്‍ പഞ്ചായത്ത് മാലിന്യമുക്തമാക്കുന്നു

കിടങ്ങൂര്‍: പഞ്ചായത്ത് മാലിന്യമുക്തമാക്കി സംരക്ഷിക്കുക എന്ന ലക്ഷ്യവുമായി പാമ്പാടി ബ്ലോക്ക് പഞ്ചായത്ത്. കിടങ്ങൂര്‍ പഞ്ചായത്തിന്‍റെ സഹകരണത്തോടെ വിവിധ പദ്ധതികള്‍ നടപ്പിലാക്കും. പഞ്ചായത്തിന്‍റെ വിവിധ വാര്‍ഡ്കളെ കേന്ദ്രീകരിച്ച് കിടങ്ങൂര്‍ ഡിവിഷന്‍ മെംബര്‍ ഡോ. മേഴ്സി ജോണിന്‍റെ 2024-25 വര്‍ഷത്തെ പദ്ധതിവിഹിതമായ 5.3 ലക്ഷം രൂപകൊണ്ട് വാര്‍ഡുകളിലെ തെരഞ്ഞെടുത്ത കേന്ദ്രങ്ങള്‍ മാലിന്യമുക്തമാക്കിയതിനു ശേഷം സിസിടിവി സ്ഥാപിച്ചു. ചേര്‍പ്പുങ്കല്‍ ഹൈവേ ജംഗ്ഷനിലും പാലത്തിനു സമീപവും കക്കൂസ് മാലിന്യം സ്ഥിരമായി തള്ളുന്ന മുത്തോലത്തു ഹാളിന്‍റെ സമീപവും കട്ടച്ചിറ ചെക്ക് ഡാമിന്‍റെ അടുത്തും കാമറകള്‍ സ്ഥാപിച്ചു. പഞ്ചായത്തിനുള്ളില്‍ സ്ഥാപിച്ച പുതിയ ടിവി സ്‌ക്രീന്‍ ഉപയോഗിച്ച് നിരീക്ഷണം നടത്തും. 2025-26 വര്‍ഷത്തെ 5.2 ലക്ഷം ഫണ്ട് ഉപയോഗിച്ച് നാലാം വാര്‍ഡില്‍ ഗോള്‍ഡന്‍ ക്ലബിനു സമീപം പഴയ ഉപയോഗ ശൂന്യമായ കുളിക്കടവ് പുനര്‍നിര്‍മിച്ചു സമപപ്രദേശങ്ങള്‍ മാലിന്യ രഹിതമാക്കി സ്ഥലവാസികള്‍ക്കു പ്രയോജനം ലഭിക്കത്തക്ക രീതിയില്‍ സജ്ജീകരണം ഒരുക്കുന്ന പദ്ധതിയുടെ ടെന്‍ഡര്‍ നടപടികള്‍ പുരോഗമിക്കുന്നു. ചേര്‍പ്പുങ്കല്‍ പാലത്തിനു സമീപം മലിനമായിരുന്ന വഴിയോരം പൂന്തോട്ടം നിര്‍മിച്ചു മനോഹരമാക്കി. ചേര്‍പ്പുങ്കല്‍ റെസിഡൻ‌ഷല്‍ അസോസിയേഷന്‍ അംഗങ്ങളുടെ പൂര്‍ണ സഹകരണം പദ്ധതി പൂര്‍ത്തീകരണത്തിന് സഹായിച്ചു പൂര്‍ത്തീകരിച്ച പദ്ധതിയുടെ ഉദ്ഘാടനം ഇന്നു വൈകുന്നേരം നാലിന് മോന്‍സ് ജോസഫ് എംഎല്‍എ നിര്‍വഹിക്കും. പാമ്പാടി ബ്ലോക്ക് പ്രസിഡന്‍റ് ബെറ്റി റോയ്, ജില്ലാ പഞ്ചായത്ത് മെംബര്‍ ജോസ്‌മോന്‍ മുണ്ടക്കല്‍, കിടങ്ങൂര്‍ പഞ്ചായത്ത് പ്രസിഡന്‍റ് ഇ.എം. ബിനു, ബ്ലോക്ക് മെംബര്‍ അശോകന്‍ പൂതമന, പഞ്ചായത്ത് മെംബര്‍ മിനി ജെറോം തുടങ്ങിയവർ പ്രസംഗിക്കും.

കെസിവൈഎം നവീകരണ യാത്രയ്ക്ക് പാലായിൽ സ്വീകരണം

പാലാ : യുവത്വത്തിന്‍റെ കണ്ണിലൂടെ, കേരള സമൂഹത്തിന്‍റെ വികസനം എന്ന ആപ്തവാക്യവുമായി കെസിവൈഎം സംസ്ഥാന പ്രസിഡന്‍റ് എബിന്‍ കണിവയലിന്‍റെ നേതൃത്വത്തില്‍ കാസര്‍ഗോഡ് മുതല്‍ തിരുവനന്തപുരം വരെ നടത്തുന്ന കെസിവൈഎം സംസ്ഥാന സമിതിയുടെ കേരള നവീകരണ യാത്രയ്ക്ക് എസ്എംവൈഎം - കെസിവൈഎം പാലാ രൂപത പാലായില്‍ സ്വീകരണം നല്‍കി. യാത്രയുടെ ഭാഗമായി പാലാ കുരിശുപള്ളി ജംഗ്ഷനിലാണ് സ്വീകരണം നല്‍കിയത്. ലഹരിക്കെതിരേ പോരാട്ടം, യുവജന മുന്നേറ്റം, ക്രൈസ്തവ പീഡനങ്ങള്‍ക്കെതിരേ, മലയോര തീദേശ ദളിത് അവകാശ സംരക്ഷണം, വര്‍ഗീയതക്കെതിരേ, വികസന രേഖ തയാറാക്കല്‍, ഭരണഘടന അവകാശ സംരക്ഷണം തുടങ്ങിയ ലക്ഷ്യങ്ങള്‍ ഉയര്‍ത്തിപ്പിടിച്ചാണ് കേരള നവീകരണ യാത്ര നടത്തുന്നത്. എസ്എംവൈഎം പാലാ രൂപത പ്രസിഡന്‍റ് അന്‍വിന്‍ സോണി ഓടച്ചുവട്ടില്‍ അധ്യക്ഷത വഹിച്ച യോഗം കെസിവൈഎം മുന്‍ സംസ്ഥാന പ്രസിഡന്‍റ് സാജു അലക്‌സ് ഉദ്ഘാടനം ചെയ്തു. എസ്എംവൈഎം ഗ്ലോബല്‍ പ്രസിഡന്‍റ് സാം സണ്ണി ഓടയ്ക്കല്‍, കെസിവൈഎം സംസ്ഥാന ഡയറക്ടര്‍ ഫാ. ഡിറ്റോ കൂള, എസ്എംവൈഎം രൂപത ജനറല്‍ സെക്രട്ടറി റോബിന്‍ ടി. ജോസ് താന്നിമല, കെസിവൈഎം സംസ്ഥാന ജനറല്‍ സെക്രട്ടറി ജോബിന്‍ ജോസ്, സെക്രട്ടറിമാരായ വിപിന്‍ ജോസഫ്, ജോസ്മി മരിയ ജോസ്, സനു സാജന്‍, എബിന്‍ കല്ലറയ്ക്കല്‍, ഡോണ്‍ ജോസഫ് സോണി എന്നിവര്‍ പ്രസംഗിച്ചു.

ബസ് സ്റ്റാന്‍ഡ് കൈയടക്കി തെരുവുനായ്ക്കള്‍

പാലാ: ബസ് സ്റ്റാൻഡില്‍ യാത്രക്കാര്‍ക്ക് രക്ഷയില്ല. തലങ്ങും വിലങ്ങും പായുകയാണ് തെരുവുനായ്ക്കള്‍. സ്ത്രീകളും കുട്ടികളുമടക്കം നിരവധി യാത്രക്കാര്‍ വന്നുപേകുന്ന ബസ് സ്റ്റാൻ‌ഡില്‍ യാത്രക്കാരുടെയും വ്യാപാരികളുടെയും ജിവനു ഭീഷണിയായാണ് തെരുവുനായ്ക്കള്‍ വിഹരിക്കുന്നത്. സമീപത്തെ കെട്ടിടത്തിലെ കടകളിലേക്കു വരുന്നവരെയും ആക്രമിക്കാന്‍ തുനിയുന്നത് നിത്യസംഭവമാണ്. രാവിലെയും വൈകുന്നേരവുമാണ് നായ്ക്കളെ കൂടുതൽ ആക്രമണകാരികളായി കാണുന്നത്. ഇടസമയങ്ങളില്‍ കാണുന്നില്ലെന്നും കട ഉടമസ്ഥര്‍ പറയുന്നു. പലപ്പോഴും കുരച്ചുകൊണ്ട് യാത്രക്കാരുടെ പുറകേ ചാടും. ഇരുചക്ര വാഹനങ്ങള്‍ക്ക് പിറകേ ഓടും. പലരും കടിയില്‍നിന്ന് ഭാഗ്യത്തിനാണ് രക്ഷപ്പെടുന്നത്. ബസ് കാത്തുനില്‍ക്കുന്ന കുട്ടികള്‍ അടക്കമുള്ളവര്‍ ഭീതിയിലാണ്. വ്യാപാര സ്ഥാപാനങ്ങളിലേക്കു കടന്നുചെല്ലാന്‍ പോലും ആളുകള്‍ ഭയക്കുന്നതു കൊണ്ട് ബസ് സ്റ്റാന്‍ഡിലെ കാത്തിരിപ്പു കേന്ദ്രങ്ങളില്‍ തെരുവുനായ്ക്കള്‍ കയറിക്കിടക്കുന്നത് യാത്രക്കാരെ ബുദ്ധിമുട്ടിക്കുന്നുണ്ട്. പരസ്പരം കടിപിടികൂടുന്നതും കാല്‍നടക്കാര്‍ക്കു നേരേ കുരച്ചുചാടുന്നതും ജനങ്ങളില്‍ ഭയം ജനിപ്പിക്കുന്നുണ്ട്. ബസ് സ്റ്റാൻഡിനു സമീപത്തായി മാലിന്യം കുട്ടിയിട്ടിരിക്കുന്നതും തെരുവുനായ്ക്കള്‍ പെരുകാന്‍ കാരണമായി സമീപ വ്യാപാരികള്‍ പറയുന്നു. തെരുവുനായക്കള്‍ ജനങ്ങള്‍ക്ക് ദുരിതമാകുമ്പോഴും നിയമത്തിന്‍റെ നൂലാമാലകള്‍ അധികൃതരെ നടപടിയെടുക്കുന്നതില്‍നിന്ന് പിന്തിരിപ്പിക്കുകയാണ്. അധികൃതരെ പരാതി അറിയിച്ചിട്ടുണ്ടെന്നും നടപടി ഉടന്‍ സ്വീകരിക്കണമെന്നും ബസ് സ്റ്റാൻഡിലെ വ്യാപാരികളും യാത്രക്കാരും ആവശ്യപ്പെട്ടുന്നു.

മരിയഭക്തിയിലൂടെ ജീവിതം വിശുദ്ധമാക്കണം: റവ.ഡോ. അഗസ്റ്റിൻ പാലയ്ക്കപ്പറമ്പിൽ

കുറവിലങ്ങാട്: മരിയഭക്തിയിലൂടെ ജീവിതം വിശുദ്ധമാക്കണമെന്ന് ഭരണങ്ങാനം വിശുദ്ധ അൽഫോൻസാ തീർഥാടന കേന്ദ്രം റെക്ടർ റവ.ഡോ. അഗസ്റ്റിൻ പാലയ്ക്കപ്പറമ്പിൽ പറഞ്ഞു. മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന കേന്ദ്രത്തിൽ എട്ടുനോമ്പിനോടനുബന്ധിച്ച് വിശുദ്ധ കുർബാനയർപ്പിച്ച് സന്ദേശം നൽകുകയായിരുന്നു റവ.ഡോ. അഗസ്റ്റിൻ പാലയ്ക്കപ്പ റന്പിൽ. ദൈവമാതാവ് കൃപയുടെ നിറവാണ്. ജീവിതത്തെ ചിട്ടയായി ക്രമപ്പെടുത്താനും ക്രൈസ്തവധാരയിൽ മുന്നേറാനും മാതൃഭക്തി സഹായിക്കും. ഉറപ്പുള്ള ജീവിതത്തെ നേടാൻ ദൈവമാതാവിൽ ആശ്രയിക്കണമെന്നും റവ. ഡോ. അഗസ്റ്റിൻ പാലയ്ക്കപ്പറമ്പിൽ പറഞ്ഞു. ഫാ. ജോസഫ് അമ്പാട്ട് സഹകാർമികനായി. ഒരുമയുടെ നിറവുമായി അവർ അമ്മയ്ക്കരികിൽ കുറവിലങ്ങാട്: എട്ടുനോമ്പാചരണത്തിലെ സംഘടനാദിനത്തിൽ ഇടവക സംഘശക്തിയറിയിച്ച് മുന്നേറ്റം നടത്തി. മുഴുവൻ അത്മായ, ഭക്തസംഘടനകളും നിധീരിക്കൽ മാണിക്കത്തനാർ നഗറിൽ സംഗമിച്ച് മുത്തിയമ്മയ്ക്കരികിലേക്ക് റാലിയായി എത്തി. ഓരോ സംഘടനയും അതത് സംഘടനകളുടെ പതാകയ്ക്കു കീഴിൽ അണിചേർന്ന് സംഘാടക മികവും വ്യക്തമാക്കി. റാലിക്കു മുന്നോടിയായി അസി. വികാരി ഫാ. തോമസ് താന്നിമലയിൽ പ്രാർഥന നടത്തി. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, സീനിയർ അസി. വികാരി ഫാ. ജോസഫ് മണിയഞ്ചിറ, അസി.വികാരിമാരായ ഫാ. പോൾ കുന്നുംപുറത്ത്, ഫാ. ആന്‍റണി വാഴക്കാലായിൽ, ഫാ. ജോസഫ് ചൂരയ്ക്കൽ, ഫാ. തോമസ് താന്നിമലയിൽ എന്നിവർ പള്ളിയിൽ നടന്ന പ്രാർഥനകൾക്കു നേതൃത്വം നൽകി. ഓരോ സംഘടനയും തങ്ങളുടെ കൊടികൾ മുത്തിയമ്മയുടെ സന്നിധിയിൽ സമർപ്പിച്ച് ദൈവമാതാവിന്‍റെ മാധ്യസ്ഥ്യം തേടി. കുറവിലങ്ങാട് പള്ളിയിൽ ഇന്ന് വിശുദ്ധ കുർബാന- 5.30, 6.30, 7.30. കാളികാവ് ഇടവകയുടെ തീർഥാടനം- 10.30ന്. വിശുദ്ധ കുർബാന- ഫാ. ജോസഫ് പാണ്ടിയാമാക്കൽ- 11.00. വാഹനവെഞ്ചരിപ്പ് - 3.30. റംശാ നമസ്‌കാരം- 4.30. വിശുദ്ധ കുർബാന- റവ.ഡോ. ജോസ് കാക്കല്ലിൽ - 5.00. ജപമാല പ്രദക്ഷിണം- 6.30. വാഹനവെഞ്ചരിപ്പ് ഇന്ന് കുറവിലങ്ങാട്: വാഹന വെഞ്ചരിപ്പ് ദിനമായ ഇന്ന് മുത്തിയമ്മയ്ക്കരികിലേക്ക് ഇന്ന് വാഹനങ്ങളൊന്നാകെയെത്തും. മുത്തിയമ്മയുടെ സന്നിധിയിലെത്തിച്ച് പ്രാർഥിച്ച് മുത്തിയമ്മയുടെ തിരുപ്പടം പതിക്കുന്ന വാഹനങ്ങളെല്ലാം സുരക്ഷിത യാത്ര ഉറപ്പാക്കുമെന്ന വിശ്വാസമാണ് പരക്കെയുള്ളത്. ജപമാലപ്രദക്ഷിണത്തിൽ ഇന്ന് മുത്തിയമ്മയുടെ തിരുസ്വരൂപം സംവഹിക്കുന്നത് ഇടവക പ്രദേശത്തെ ഡ്രൈവർമാരുടെ കൂട്ടായ്മയാണ്. ഇതാദ്യമായാണ് സാരഥികൾ മുത്തിയമ്മയെ ഒരുമിച്ച് തോളിലേറ്റുന്നത്.

വീട്ടമ്മ കിണറ്റിൽ മരിച്ചനിലയിൽ

അമയന്നൂർ: ചക്കാലക്കടവിൽ (പെരുമ്പക്കുന്നേൽ) വീട്ടിൽ ബിജുവിന്‍റെ ഭാര്യ ദീപയെ (48) കിണറ്റിൽ മരിച്ച നിലയിൽ കണ്ടെത്തി. ഇന്നലെ രാവിലെ ഏഴോടെയാണ് സംഭവം. ശരീരത്തിൽ ഡീസലൊഴിച്ചു തീകൊളുത്തിയശേഷം കിണറ്റിൽ ചാടുകയായിരുന്നു. ഭർത്താവ് ബിജു കുറച്ചുദിവസമായി ആശുപത്രിയിൽ ചികിത്സയിലായിരുന്നു. അതുമൂലം മാനസിക ബുദ്ധിമുട്ടിലായിരുന്നെന്നും മരണം സംബന്ധിച്ചു മറ്റു ദുരൂഹതകളില്ലെന്നും പോലീസ് പറഞ്ഞു. ശരീരത്തിൽ പൊള്ളലേറ്റ പാടുകളുണ്ട്. മക്കൾ: ഗ്രീഷ്മ ബിജു, ചൈത്ര ബിജു. സംസ്കാരം ഇന്ന് 11ന് വീട്ടുവളപ്പിൽ നടക്കും.

വാഴ്ത്തപ്പെട്ട കുഞ്ഞച്ചന്‍റെ നാട്ടിൽനിന്ന് മുത്തിയമ്മയ്ക്കരികിലേക്ക് അവരെത്തി

കുറവിലങ്ങാട്: ആധ്യാത്മികതയ്‌ക്കൊപ്പം സാമൂഹിക മുന്നേറ്റത്തിനായി പ്രവർത്തിച്ച് അൾത്താരയിലെ വണക്കത്തിലേക്ക് ഉയർത്തപ്പെട്ട വാഴ്ത്തപ്പെട്ട തേവർപറമ്പിൽ കുഞ്ഞച്ചന്‍റെ പിൻമുറക്കാർ തറവാട്ടിലേക്ക് തീർഥാടകരായെത്തി. മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന ദേവാലയത്തിലെ എട്ടുനോമ്പാചരണത്തോടനൂബന്ധിച്ചാണ് രാമപുരം സെന്‍റ് അഗസ്റ്റ്യൻസ് ഫൊറോന ഇടവകാംഗങ്ങളായ നൂറുകണക്കിനാളുകൾ മുത്തിയമ്മയ്ക്കരികിലെത്തിയത്. തീർഥാടകസംഘത്തെ ആർച്ച്പ്രീസ്റ്റ് റവ.ഡോ. തോമസ് മേനാച്ചേരി മുത്തിയമ്മയുടെ തിരുസ്വരൂപം നൽകി സ്വീകരിച്ചു. വാഴ്ത്തപ്പെട്ട കുഞ്ഞച്ചൻ നാമകരണ നടപടികളുടെ വൈസ് പോസ്റ്റുലേറ്റർ റവ.ഡോ. തോമസ് വെട്ടുകാട്ടിൽ വിശുദ്ധ കുർബാനയർപ്പിച്ച് സന്ദേശം നൽകി. അസി.വികാരിമാരായ ഫാ. ജോവാനി കുറുവാച്ചിറ, ഫാ. ഏബ്രാഹം കുഴിമുള്ളിൽ, കൈക്കാരന്മാർ, പള്ളിയോഗപ്രതിനിധികൾ എന്നിവർ നേതൃത്വം നൽകി.

ധർണ നടത്തി

വൈക്കം: കാർഷിക മേഖലയെ പ്രതിസന്ധിയിലാക്കുന്ന പ്രശ്‌നങ്ങൾക്ക് പരിഹാരം കാണാൻ കേന്ദ്ര സർക്കാർ നടപടി സ്വീകരിക്കണമെന്നാവശ്യപ്പെട്ട് അഖിലേന്ത്യാ കിസാൻസഭ വൈക്കം മണ്ഡലം കമ്മിറ്റിയുടെ നേതൃത്വത്തിൽ വൈക്കം ബിഎസ്എൻഎൽ ഓഫീസിനു മുന്നിൽ ധർണ നടത്തി. രാസവളത്തിന്‍റെ വിലവർധന പിൻവലിക്കുക, കർഷകരു ടെ വായ്‌പകൾ എഴുതിത്തള്ളുക, നെല്ലിന്‍റെ താങ്ങുവില വർധിപ്പിക്കുക, സംഭരണവില കാലതാമസം കൂടാതെ കർഷകർക്ക് നൽകുക തുടങ്ങിയ ആവശ്യങ്ങൾ ഉന്നയിച്ചാണ് ധർണ നടത്തിയത്. ധർണാ സമരം സിപിഐ മണ്ഡലം സെക്രട്ടറി എം.ഡി. ബാബുരാജ് ഉദ്ഘാടനം ചെയ്തു. മണ്ഡലം പ്രസിഡന്‍റ് കെ.വി. പവിത്രൻ അധ്യക്ഷത വഹിച്ചു. സെക്രട്ടറി കെ.കെ. ചന്ദ്രബാബു, പി. പ്രദീപ്, കെ.സി. ഗോപാലകൃഷ്ണൻ നായർ, കെ. രമേശൻ, കെ.എസ്. ബേബി, മനോഹരൻ ടിവിപുരം, അശോകൻ വെളളവേലി, സുന്ദരൻ അറയ്ക്കൽ എന്നിവർ പ്രസംഗിച്ചു.

കേരളത്തിലെ നിക്ഷേപകര്‍ക്ക് സിംബാബ്‌വെ മന്ത്രിയുടെ ക്ഷണം

ചങ്ങനാശേരി: കേരളത്തിലെ നിക്ഷേപകര്‍ക്ക് ഏറ്റവും സാധ്യതയുള്ള രാജ്യമാണ് ആഫ്രിക്കന്‍ രാജ്യമായ സിംബാബ്‌വെയെന്ന് ഗുജറാത്തില്‍ കുടുംബവേരുകളുള്ള സിംബാബ്‌വെ വ്യവസായ-വാണിജ്യ സഹമന്ത്രി രാജേഷ്‌കുമാര്‍ ഇന്ദുകാന്ത് മോദി. കുറഞ്ഞ വിലയുള്ള പാദരക്ഷകള്‍, തുകല്‍ ഉത്പന്നങ്ങള്‍, കണ്‍സ്യൂമര്‍ ഇലക്‌ട്രോണിക് അസബ്ലിംഗ്, സൗരോര്‍ജ ഉപകരണങ്ങള്‍, കാര്‍ഷിക ഉത്പന്നങ്ങളുടെ സംസ്‌കരണം, റെയില്‍വേ നവീകരണം, ഇലക്‌ട്രോണിക്സ്, ഇപിസി എന്നീ മേഖലകളില്‍ കേരളത്തിലെ കമ്പനികള്‍ക്കുള്ള വൈദഗ്്ധ്യം തങ്ങള്‍ക്ക് ആവശ്യമാണെന്ന് അദ്ദേഹം പറഞ്ഞു. ചങ്ങനാശേരി ടൗണ്‍ റോട്ടറി ക്ലബ്ബിന്‍റെ ആഭിമുഖ്യത്തില്‍ റേഡിയോ മീഡിയാ വില്ലേജില്‍ സംഘടിപ്പിച്ച ബിസിനസ് കോണ്‍ക്ലേവ് -2025 ഉദ്ഘാടനം ചെയ്യുകയായിരുന്നു അദ്ദേഹം. ക്ലബ് പ്രസിഡന്‍റ് അഡ്വ. ബോബന്‍ ടി. തെക്കേല്‍ അധ്യക്ഷത വഹിച്ചു. അഡ്വ. ജോബ് മൈക്കിള്‍ എംഎല്‍എ മുഖ്യപ്രഭാഷണം നടത്തി. സിംബാബ്‌വെ ട്രേഡ് കമ്മീഷണര്‍ ബൈജു എം. കുമാര്‍, നമീബിയ ട്രേഡ് കമ്മീഷണര്‍ രമേഷ്‌കുമാര്‍, യൂറോപ്യന്‍ യൂണിയന്‍ ട്രേഡ് കമ്മീഷണറും കോമണ്‍വെല്‍ത്ത് രാജ്യങ്ങളുടെ ചുമതലയുള്ള രാഹുല്‍ സുരേഷ്, ടെനി നീലത്തുംമൂക്കില്‍, ഡോ. ജിജി ബോബന്‍, വിനോദ് പണിക്കര്‍, തോമസ് മാത്യു തെക്കേക്കര, ബേബിച്ചന്‍ പ്രാക്കുഴി, വിജയകുമാര്‍ മേനോന്‍, ഹഫീസ് നസീര്‍, ജോജിമോന്‍ ജോയ് തുടങ്ങിയവര്‍ പ്രസംഗിച്ചു. സിംബാബ്‌വെ ട്രേഡ് കമ്മീഷണറുടെ കീഴില്‍ 21 ഇന്ത്യന്‍ കമ്പനികളുടെ രജിസ്ട്രേഷന്‍ പൂര്‍ത്തിയായിട്ടുണ്ട്. സംരംഭം തുടങ്ങാന്‍ ആരംഭിക്കുന്നവര്‍ക്ക് ഏഴു പ്രവൃത്തി ദിനങ്ങള്‍ക്കുള്ളില്‍ ലൈസന്‍സ് നല്‍കും. പ്രത്യേക സാമ്പത്തിക മേഖലകളില്‍ അഞ്ചു വര്‍ഷത്തേക്ക് കോര്‍പറേറ്റ് നികുതി ഇല്ല. മൂലധന ഉപകരണങ്ങള്‍ക്ക് തീരുവ രഹിത ഇറക്കുമതിയും സാധ്യമാണ്. 2030 ഓടെ ഉയര്‍ന്ന- ഇടത്തരം വരുമാനമുള്ള രാജ്യമായി മാറാനാണ് സിംബാബ്‌വെ ലക്ഷ്യം ഇടുന്നത്. അതിനായി വ്യവസായവത്കരണം, പ്രകൃതി വിഭവങ്ങളുടെ മെച്ചപ്പെട്ട ഉപയോഗം, സുസ്ഥിര ഊര്‍ജം, ശക്തമായ നിക്ഷേപ പങ്കാളിത്തങ്ങളിലൂടെയുള്ള വളര്‍ച്ച എന്നിവയില്‍ ശ്രദ്ധ കേന്ദ്രീകരിക്കുകയാണെന്നും അദ്ദേഹം പറഞ്ഞു.

മുക്കാട്ടുകുന്ന്-നാട്ടുവ റോഡ് നവീകരണത്തിനു തുടക്കം

മാടപ്പള്ളി: പഞ്ചായത്തിലെ മുക്കാട്ടുകുന്ന്-നാട്ടുവ റോഡ് 47.28 ലക്ഷം രൂപ മുടക്കിയുള്ള നവീകരണ പ്രവർത്തനങ്ങൾ ആരംഭിച്ചു. ജോബ് മൈക്കിൾ എംഎൽഎ ഉദ്ഘാടനം നിർവഹിച്ചു. വത്തിക്കാൻ പ്രദേശത്തെ ഏക യാത്രാ മാർഗമാണ് ഈ റോഡ്. ബ്ലോക്ക് പഞ്ചായത്തംഗം സൈന തോമസ് അധ്യക്ഷത വഹിച്ചു. ബ്ലോക്ക് പഞ്ചായത്ത് അംഗം അലക്സാണ്ടർ പ്രാക്കുഴി, സോബിച്ചൻ അട്ടിക്കൽ, എം.എ. മാത്യു, ബിനോയ് മുക്കാടൻ, ലിനു ജോബ്, സിജോ തുടങ്ങിയവർ പ്രസംഗിച്ചു.

വിശുദ്ധ മദര്‍ തെരേസ മനുഷ്യസ്‌നേഹത്തിന്‍റെ ഉദാത്ത മാതൃക: ഫ്രാന്‍സിസ് ജോര്‍ജ്

47.28 ലക്ഷം രൂപയുടെ പദ്ധതി ചങ്ങനാശേരി: വിശുദ്ധ മദര്‍ തെരേസ ജീവിച്ചിരുന്നപ്പോള്‍ മനുഷ്യസ്‌നേഹത്തിന്‍റെ ഉദാത്തമാതൃക കാണിച്ചുതന്ന വ്യക്തിത്വമായിരുന്നെന്ന് ഫ്രാന്‍സിസ് ജോര്‍ജ് എംപി. കുഷ്ഠരോഗികള്‍ക്കും അനാഥര്‍ക്കും താങ്ങായി നിന്ന മദര്‍ തെരേസയുടെ മാതൃക പിന്‍ചെല്ലാന്‍ എല്ലാവര്‍ക്കും കഴിയണമെന്നും ഫാന്‍സിസ് ജോര്‍ജ് എംപി പറഞ്ഞു. കത്തോലിക്കാ കോണ്‍ഗ്രസ് ചങ്ങനാശേരി ഫൊറോന സമിതിയുടെ ആഭിമുഖ്യത്തില്‍ നടത്തിയ വിശുദ്ധ മദര്‍ തെരേസായുടെ 28-ാം ചരമവാര്‍ഷികാചരണം മാര്‍ത്തോമ വിദ്യാനികേതന്‍ ഹാളില്‍ ഉദ്ഘാടനം ചെയ്തു സംസാരിക്കുകയായിരുന്നു എംപി. ഫൊറോന പ്രസിഡന്‍റ് കുഞ്ഞുമോന്‍ തൂമ്പുങ്കല്‍ അധ്യക്ഷത വഹിച്ചു. കത്തോലിക്കാ കോണ്‍ഗ്രസ് ഫൊറോന ഡയറക്ടര്‍ ഫാ. ലിബിന്‍ തുണ്ടുകളം അനുഗ്രഹ പ്രഭാഷണം നടത്തി. വി.ജെ. ലാലി മുഖ്യപ്രഭാഷണം നടത്തി. ഗ്ലോബല്‍ സെക്രട്ടറി ടോമിച്ചന്‍ അയ്യരുകുളങ്ങര അതിരൂപത സെക്രട്ടറിമാരായ സൈബി അക്കര, അതിരൂപത വൈസ് പ്രസിഡന്‍റ് സി.ടി. തോമസ് കാച്ചാങ്കോട്, കെ.എസ്. ആന്‍റണി കരിമറ്റം, ജനറല്‍ കണ്‍വീനര്‍ ബേബിച്ചന്‍ പുത്തന്‍പറമ്പില്‍, ജനറല്‍ സെക്രട്ടറി ഔസേപ്പച്ചന്‍ ചെറുകാട്, ട്രഷറര്‍ കെ.പി മാത്യൂ, ഷാജി മരങ്ങാട് തുടങ്ങിയവര്‍ പ്രസംഗിച്ചു. ചടങ്ങില്‍ ബേബിച്ചന്‍ പുത്തന്‍പറമ്പില്‍ (ജീവകാരുണ്യം), കാതറൈന്‍ കുര്യാക്കോസ് (അടുക്കളത്തോട്ടം), പാപ്പച്ചന്‍ നേര്യംപറമ്പില്‍ (മികച്ച കര്‍ഷകന്‍) ജയിംസ് കിടങ്ങറ (സിനിമ- സീരിയല്‍ ), ജേക്കബ് ജെ. പെരുമ്പ്ര (മികച്ച കര്‍ഷകന്‍, പാടശേഖരം,), കെ.പി. മാത്യു (സഭാ രംഗം), ലാലിമ്മ ടോമി (മികച്ച ജനപ്രതിനിധി), ലിസി ജോസ് (സാമുദായിക-രാഷ്‌ട്രീയ രംഗം) എന്നിവരെ മദര്‍ തെരേസാ പുരസ്‌കാരങ്ങള്‍ നല്‍കി ഫ്രാന്‍സ് ജോര്‍ജ് എംപി സമ്മാനിച്ചു.

പ്രകാശിന്‍റെ കുടുംബത്തിന് വീട്

പായിപ്പാട് സൗഹൃദ കൂട്ടായ്മയുടെ തിരുവോണ സമ്മാനം പായിപ്പാട്: രണ്ടുവര്‍ഷം മുമ്പ് അകാലത്തില്‍ പൊലിഞ്ഞ ഓട്ടോറിക്ഷാ തൊഴിലാളി പ്രകാശിന്‍റെ കുടുംബത്തിനു മുണ്ടുകോട്ട, അമ്മത്താഞ്ചിറ പ്രദേശത്തെ സൗഹൃദ റെസിഡന്‍റ്സ് അസോസിയേഷനുകളുടെ നേതൃത്വത്തില്‍ ഓണസമ്മാനമായി വീടു നിര്‍മിച്ചു നല്‍കി. പ്രദേശത്തെ നാട്ടുകാരും അസോസിയേഷന്‍ ഭാരവാഹികളും ചേര്‍ന്ന് നടത്തിയ ഓണാഘോഷ പരിപാടിയില്‍ മാടപ്പള്ളി ബ്ലോക്ക് പഞ്ചായത്തംഗം വിനു ജോബ്, പ്രകാശിന്‍റെ ഭാര്യ ബിന്ദുവിന് താക്കോല്‍ കൈമാറി. നിര്‍മാണ കമ്മിറ്റി കണ്‍വീനര്‍ ജിബി ടി. ഏബ്രഹാമിന്‍റെ നേതൃത്വത്തിലായിരുന്നു വീട് നിര്‍മാണം പൂര്‍ത്തീകരിച്ചത്. അസോസിയേഷന്‍റെ ഓണാഘോഷ ചടങ്ങില്‍ പ്രസിഡന്‍റ് തോമസ് വര്‍ഗീസ് അധ്യക്ഷത വഹിച്ചു. യോഗം ബ്ലോക്ക് പഞ്ചായത്ത് അംഗം വിനു ജോബ് ഉദ്ഘാടനം ചെയ്തു. പഞ്ചായത്ത് ആസൂത്രണസമതി ചെയര്‍മാന്‍ രാജു കോട്ടപ്പുഴയ്ക്കല്‍ മുഖ്യപ്രഭാഷണം നടത്തി. അസോസിയേഷന്‍ സെക്രട്ടറി പി.എന്‍. ഹരികുമാര്‍ വീടിന്‍റെ വരവ്-ചെലവ് കണക്കുകള്‍ യോഗത്തില്‍ അവതരിപ്പിച്ചു. തൃക്കൊടിത്താനം സബ് ഇന്‍സ്‌പെക്ടര്‍ ഗിരീഷ്, സുധര്‍മ സന്തോഷ്, മാത്യു വര്‍ഗീസ്, കെ.ടി. വിജയന്‍ എന്നിവര്‍ പ്രസംഗിച്ചു. ഓണാഘോഷ ചടങ്ങില്‍ നാട്ടുകാരുടെയും കുട്ടികളുടെയും നിരവധി കലാമത്സരവും വടംവലിയും നടത്തി. യോഗാവസാനം നാട്ടുകാര്‍ ഒരുമിച്ച് ബിന്ദുവിന്‍റെ വീട് സന്ദര്‍ശിച്ച് നാട മുറിച്ച് ഭവനത്തില്‍ പ്രവേശിച്ചു. നാട്ടുകാര്‍ക്കു മുഴുവന്‍ നന്ദി പറഞ്ഞ കുടുംബം തിരുവോണനാളില്‍ പുതിയ വീട്ടില്‍ താമസം തുടങ്ങുമെന്നറിയിച്ചത് നാട്ടുകാര്‍ കരഘോഷത്തോടെ സ്വീകരിച്ചു.

വോട്ടര്‍ അധികാര്‍ യാത്രയ്ക്ക് പിന്തുണ

ചങ്ങനാശേരി: രാജ്യത്തെ പൗരന്മാരുടെ സമ്മതിദാനാവകാശം സംരക്ഷിക്കണമെന്ന് ആവശ്യപ്പെട്ടുകൊണ്ട് രാഹുല്‍ ഗാന്ധി നയിച്ച വോട്ടര്‍ അധികാര്‍ യാത്രയ്ക്ക് അഭിവാദ്യമര്‍പ്പിച്ചുകൊണ്ട് വാഴപ്പള്ളി മണ്ഡലം കോണ്‍ഗ്രസ് കമ്മിറ്റി മുന്തിരിക്കവലയില്‍നിന്ന് കുരിശുംമൂട്ടിലേക്ക് നൈറ്റ് മാര്‍ച്ച് നടത്തി. നൈറ്റ് മാര്‍ച്ച് മാടപ്പള്ളി ബ്ലോക്ക് പഞ്ചായത്ത് മെംബര്‍ വര്‍ഗീസ് ആന്‍റണി ഉദ്ഘാടനം ചെയ്തു. മണ്ഡലം പ്രസിഡന്‍റ് റോജി ആന്‍റണി അധ്യക്ഷത വഹിച്ചു. ബിജു പുല്ലുകാട്, ബിജി മൂലയില്‍, സാബു കളരിക്കല്‍, ജോമോന്‍ കുളങ്ങര, അപ്പു ആലുങ്കല്‍, പി.എം. തോമസ്, സിബിച്ചന്‍ പ്ലാമൂട്ടില്‍, ജോസഫ്കുഞ്ഞ് തേവലക്കര, ലാലിമ്മ ടോമി, സോഫി ലാലിച്ചന്‍, ടോമി കാലായില്‍, മറഡോണ ജോര്‍ജ്, പി.കെ. റഹീം, ബിനോയ് കാട്ടാമ്പള്ളി, പാപ്പച്ചന്‍ നേര്യംപറമ്പില്‍ എന്നിവര്‍ പ്രസംഗിച്ചു.

വഴിവിളക്കുകൾ കത്തിക്കാൻ നടപടിയില്ല : ഓണാഘോഷം ബഹിഷ്കരിച്ച് ധർണ നടത്താൻ പ്രതിപക്ഷം

ചങ്ങനാശേരി: കഴിഞ്ഞ ഒരു വർഷമായി നഗരസഭാ പരിധിയിൽ വഴിവിളക്കുകൾ കത്തിക്കാൻ ടെണ്ടർ നടപടികളടക്കം ഒരു തീരുമാനവും കൈക്കൊള്ളാൻ ഭരണസമിതിക്ക് കഴിഞ്ഞില്ലെന്നാരോപിച്ച് നഗരസഭയിൽ ഇന്നു നടക്കുന്ന ഓണാഘോഷ പരിപാടികൾ ബഹിഷ്കരിച്ച് ധർണ നടത്തുമെന്ന് പ്രതിപക്ഷ കൗൺസിലർമാർ അറിയിച്ചു. വഴിവിളക്കുകൾ കത്താത്തത് മൂലം നഗരത്തിലെ ഭൂരിഭാഗം വഴികളും ഇരുട്ടിലാണ്. ഇതുസംബന്ധിച്ചു നിരവധി തവണ ആവശ്യമുന്നയിച്ചെങ്കിലും യാതൊരു നടപടിയും കൈക്കൊള്ളാൻ ഭരണസമിതി തയാറായില്ല. എല്ലാ വാർഡുകളിലും തെരുവുനായ ശല്യം രൂക്ഷമാണ്. ഈ പ്രശ്നം പരിഹരിക്കുന്നതിനും നഗരസഭ ഇടപെടുന്നില്ല. നഗരപരിധിയിലെ ഭൂരിഭാഗം റോഡുകളും തകർന്നു കിടക്കുകയാണ്. റോഡുകൾ പുനർനിർമിക്കാനും യാതൊരു നടപടിയും കൈക്കൊള്ളുന്നില്ല. പരാജയപ്പെട്ടു നിൽക്കുന്ന ഭരണസമിതിക്കൊപ്പം ഓണം ആഘോഷിക്കാൻ താല്പര്യമില്ലെന്നും ഈ വിഷയങ്ങൾ ഉന്നയിച്ച് ഇന്ന് നഗരസഭാ കവാടത്തിൽ പ്രതിഷേധ ധർണ സംഘടിപ്പിക്കുമെന്നും പ്രതിപക്ഷ കൗൺസിലർമാരായ ജോമി ജോസഫ്, എം. മധുരാജ്, സന്തോഷ് ആന്‍റണി, ബെന്നി ജോസഫ്, സ്മിതാ സുരേഷ് എന്നിവർ അറിയിച്ചു.

ടിപ്പർ ലോറിയും കാറും കൂട്ടിയിടിച്ചു

തലയാഴം: നിയന്ത്രണംവിട്ട കാറും ടിപ്പർലോറിയും കൂട്ടിയിടിച്ച് ഇരു വാഹനങ്ങളുടെയും മുൻഭാഗം തകർന്നു. അപകടത്തിൽ കാറിൽ സഞ്ചരിച്ചിരുന്ന തിരുവല്ല സ്വദേശിക്ക് നിസാര പരിക്കേറ്റു. അപകടത്തെത്തുടർന്ന് വൈക്കം-വെച്ചൂർ റൂട്ടിൽ ഗതാഗതം മുക്കാൽ മണിക്കൂറോളം ഭാഗികമായി തടസപ്പെട്ടു. ഇന്നലെ വൈകുന്നേരം തലയാഴം മാടപ്പള്ളി ജംഗ്ഷനിലായിരുന്നു അപകടം. വൈക്കത്തേക്കുവന്ന ടിപ്പർലോറിയും വെച്ചൂർ ഭാഗത്തേക്കുവന്ന ലോറിയുമാണ് കൂട്ടിയിടിച്ചത്.

നായർ സമ്മേളനം: പന്തലിന്‍റെ കാൽനാട്ടുകർമം നടത്തി

വൈക്കം: താലൂക്ക് എൻഎസ്എസ് യൂണിയൻ 13ന് നടത്തുന്ന നായർ മഹാസമ്മേളനത്തിന്‍റെ മുന്നോടിയായി യൂണിയൻ ആസ്ഥാനത്തും യൂണിയനിലെ 13 മേഖലകളിലും 97 കരയോഗങ്ങളിലും എൻഎസ്എസ് പതാക ഉയർത്തി. വൈക്കം യൂണിയനിൽ പ്രസിഡന്‍റ് പി.ജി.എം. നായർ കാരിക്കോട് പതാക ഉയർത്തി. വൈസ് പ്രസിഡന്‍റ് പി. വേണുഗോപാൽ, സെക്രട്ടറി അഖിൽ ആർ. നായർ, ഭാരവാഹികളായ പി.എൻ. രാധാകൃഷ്ണൻ, ബി. ജയകുമാർ, ബി. അനിൽകുമാർ, എസ്. മുരുകേശ്, എം.സി. ഹരിക്കുട്ടൻ, പി.എസ്. വേണുഗോപാൽ, അയ്യേരി സോമൻ, ജയപ്രകാശ്, കെ. അജിത്, വി.എസ്. കുമാർ തുടങ്ങിയവർ പ്രസംഗിച്ചു. മഹാസമ്മേളനം നടക്കുന്ന ബീച്ച് മൈതാനിയിൽ ഒരുക്കുന്ന പന്തലിന്‍റെ കാൽനാട്ടുകർമം വൈക്കം യൂണിയനിൽ പ്രസിഡന്‍റ് പി.ജി.എം. നായർ കാരിക്കോട്, വൈസ് പ്രസിഡന്‍റ് പി. വേണുഗോപാൽ, സെക്രട്ടറി അഖിൽ ആർ. നായർ എന്നിവർ ചേർന്ന് നിർവഹിച്ചു.

കടത്തുരുത്തി ബ്ലോക്ക് പഞ്ചായത്ത് വനിതാ സാംസ്‌കാരിക പരിപാടി "സംസ്‌കൃതി 2025'

കടത്തുരുത്തി: ബ്ലോക്ക് പഞ്ചായത്ത് വാര്‍ഷിക പദ്ധതി 2025-26 വനിതാ സാംസ്‌കാരിക പരിപാടി "സംസ്‌കൃതി 2025' നടത്തി. ബ്ലോക്ക് പഞ്ചായത്ത് പ്രസിഡന്‍റ് ജോണ്‍സണ്‍ കൊട്ടുകാപ്പള്ളി ഉദ്ഘാടനം നിര്‍വഹിച്ചു. ബ്ലോക്ക് പഞ്ചായത്ത് വൈസ് പ്രസിഡന്‍റ് പി.കെ. സന്ധ്യ അധ്യക്ഷത വഹിച്ചു. ബ്ലോക്ക് പഞ്ചായത്ത് സ്റ്റാന്‍ഡിംഗ് കമ്മിറ്റിയധ്യക്ഷരായ സ്‌കറിയ വര്‍ക്കി, ശ്രുതി ദാസ്, സെലീനാമ്മ ജോര്‍ജ്, ബ്ലോക്ക് പഞ്ചായത്തംഗങ്ങളായ പി.വി. സുനില്‍, നയന ബിജു, കൈലാസ് നാഥ്, അമല്‍ ഭാസ്‌കര്‍, നളിനി രാധാകൃഷ്ണന്‍, ജിഷാ രാജപ്പന്‍ നായര്‍, തങ്കമ്മ വര്‍ഗീസ്, സുബിന്‍, ബിഡിഒ പി.ജി. റെജി തുടങ്ങിയവര്‍ പ്രസംഗിച്ചു. റാലിയോടെ ആരംഭിച്ച പരിപാടിയില്‍ കളരിപ്പയറ്റ്, കലാപരിപാടികള്‍, സമ്മാന വിതരണം, ഗാനമേള എന്നിവയും ഉണ്ടായിരുന്നു.

ക്വിസ് ചിത്രരചനാ മത്സരങ്ങൾ

വൈക്കം: ആശ്രയ സന്നദ്ധ സേവന സംഘടനയുടെ ആഭിമുഖ്യത്തിൽ വിദ്യാർഥികൾക്കായി ജില്ലാതല ചിത്രരചനാ ക്വിസ് മത്സരങ്ങൾ നടത്തി. ആശ്രമം സ്കൂളിൽ നടന്ന മത്സരം ചലച്ചിത്ര പിന്നണി ഗായകൻ വി. ദേവാനന്ദ് ഉദ്ഘാടനം ചെയ്തു. ആശ്രയ ചെയർമാൻ പി.കെ. മണിലാൽ അധ്യക്ഷത വഹിച്ചു. നഗരസഭാ ചെയർപേഴ്സൺ പ്രീത രാജേഷ്, വർഗീസ് പുത്തൻചിറ, ഇടവട്ടം ജയകുമാർ, ബി. ചന്ദ്രശേഖരൻ, പി.വി. ഷാജി, സന്തോഷ് ചക്കനാടൻ, വി. അനൂപ്, പി.എൻ. ശിവൻകുട്ടി, പി.ഡി. ബിജിമോൾ, രാജശ്രീ വേണുഗോപാൽ, സി. സുരേഷ്കുമാർ, ടി.സി. ദേവദാസ്, സന്ധ്യ വിനോദ് തുടങ്ങിയർ പ്രസംഗിച്ചു. ക്വിസ് മത്സരത്തിൽ ഹയർ സെക്കൻഡറി വിഭാഗത്തിൽ കടുത്തുരുത്തി സെന്‍റ് മൈക്കിൾസ് എച്ച്എസ്എസിലെ വിദ്യാർഥികൾ ഒന്നാം സ്ഥാനവും വൈക്കം ഗവൺമെന്‍റ് ബിഎച്ച്എസിലെ വിദ്യാർഥികൾ രണ്ടാം സ്ഥാനവും കരസ്ഥമാക്കി. ഹൈസ്കൂൾ വിഭാഗത്തിൽ വൈക്കം ഗവൺമെന്‍റ് ഗേൾസ് എച്ച്എസ്എസ്, ഗവൺമെന്‍റ് വിഎച്ച്എസ്എസ് എന്നീ സ്കൂളുകളും യുപി വിഭാഗത്തിൽ വൈക്കം സെന്‍റ് ലിറ്റിൽ തെരേസാസ് എച്ച്എസ്എസ്, കുമരകം എസ്കെഎം എച്ച്എസ്എസ്, പള്ളിപ്രത്തുശേരി സെന്‍റ് ലൂയീസ് യുപിഎസ്, പള്ളിയാട് എസ്എൻയുപിഎസ് എന്നീ സ്കൂളുകളിലെ വിദ്യാർഥികളും സമ്മാനങ്ങൾ കരസ്ഥമാക്കി.

രക്തദാന ക്യാമ്പും രക്തദാതാക്കളുടെ സംഗമവും

പെരുവ: മറ്റപ്പള്ളിക്കുന്ന് റെസിഡന്‍റ്സ് വെല്‍ഫെയര്‍ അസോസിയേഷനും(എംആര്‍എ) എറണാകുളം ഇന്ത്യന്‍ മെഡിക്കല്‍ അസോസിയേഷനും (ഐഎംഎ) സംയുക്തമായി രക്തദാന ക്യാമ്പും രക്തദാതാക്കളുടെ സംഗമവും നടത്തി. പെരുവ ഗവണ്‍മെന്‍റ് ഹയര്‍ സെക്കന്‍ഡറി സ്‌കൂളിലെ എന്‍എസ്എസ് യൂണിറ്റിന്‍റെ നേതൃത്വത്തില്‍ രക്തദാനത്തിന്‍റെ പ്രാധാന്യത്തെ ഉയര്‍ത്തിക്കാട്ടുന്ന ഫ്ളാഷ്മോബ് അവതരിപ്പിച്ചു. രക്തദാനം നല്‍കിയവരെ സര്‍ട്ടിഫിക്കറ്റുകള്‍ നല്‍കി ആദരിച്ചു. മുളക്കുളം പഞ്ചായത്ത് പ്രസിഡന്‍റ് ടി.കെ. വാസുദേവന്‍ നായര്‍ ക്യാമ്പ് ഉദ്ഘാടനം ചെയ്തു. അസോസിയേഷന്‍ പ്രസിഡന്‍റ് റോബര്‍ട്ട് തോട്ടുപുറം അധ്യക്ഷത വഹിച്ചു. എസ്ബിഐ റീജണല്‍ മാനേജര്‍ സി.എസ്. സിജോയ്, ഡോ. മുഹമ്മദ് ഷഫീഖ്, ഡോ. ബിനു സി. പുളിക്കല്‍, എ.സി. മണി, കെ.പി. ജോസഫ്, തോമസ് വെട്ടിക്കല്‍, സുബിന്‍ മാത്യു, പോള്‍സണ്‍ ആനിക്കുഴി എന്നിവര്‍ പ്രസംഗിച്ചു.

കാണിക്കവഞ്ചി തകര്‍ത്ത് മോഷണശ്രമം

കുറുപ്പന്തറ: റോഡരികില്‍ സ്ഥാപിച്ചിട്ടുള്ള കുറുപ്പന്തറ കണ്ടാറ്റുകാവ് ഭദ്രകാളി ക്ഷേത്രത്തിന്‍റെ കാണിക്കവഞ്ചി കുത്തിത്തുറന്ന് പണം കവരാന്‍ ശ്രമം. കുറുപ്പന്തറ-കല്ലറ റോഡില്‍ കുറുപ്പന്തറ റെയില്‍വേ ഗേറ്റിന് സമീപമുള്ള കാണിക്കവഞ്ചിയാണ് കുത്തിത്തുറക്കാന്‍ ശ്രമം നടന്നത്. ഇന്നലെ പുലര്‍ച്ചെ 3.20 ഓടെയാണ് സംഭവം. സമീപത്തെ സിസിടിവിയില്‍ മോഷ്ടാവിന്‍റേതെന്ന് കരുതുന്ന, പാന്‍റ്സും ഷര്‍ട്ടും ധരിച്ച ഒരാള്‍ ഈ സമയം ഇതുവഴി നടന്നു പോകുന്നതായുള്ള ദൃശ്യം പതിഞ്ഞിട്ടുണ്ട്. പൂട്ട് തകര്‍ത്തെങ്കിലും കാണിക്കവഞ്ചി തുറക്കാനാവാതെ വന്നതോടെ മോഷ്ടാവ് ശ്രമം ഉപേക്ഷിച്ചു കടന്നുകളയുകയായിരുന്നു. കാണിക്കവഞ്ചിയില്‍നിന്ന് പണം നഷ്ടപ്പെട്ടിട്ടില്ലെന്ന് ക്ഷേത്രത്തിന്‍റെ ദേവസ്വം അധികാരി രാജീവ് മറ്റപ്പള്ളി പറഞ്ഞു. സംഭവം സംബന്ധിച്ചു കടുത്തുരുത്തി പോലീസില്‍ പരാതി നല്‍കിയതായും രാജീവ് അറിയിച്ചു. മാഞ്ഞൂര്‍ പഞ്ചായത്തിന്‍റെ വിവിധ ഭാഗങ്ങളിലായി ക്ഷേത്രങ്ങളുടെ കാണിക്കവഞ്ചി കുത്തിത്തുറന്ന് മോഷണം നടത്തുന്ന സംഭവങ്ങള്‍ സമീപകാലത്ത് വര്‍ധിച്ചിട്ടുണ്ട്.

നിത്യോപയോഗസാധനങ്ങള്‍ കൈമാറി

മാലം: തിരുവോണത്തിനു മുന്നോടിയായി മാലം മൗണ്ട് മേരി പബ്ലിക് സ്‌കൂളിലെ വിദ്യാര്‍ഥികള്‍ അനാഥമന്ദിരങ്ങളില്‍ നല്‍കുന്നതിനായി ശേഖരിച്ച നിത്യോപയോഗസാധനങ്ങള്‍ അമയന്നൂര്‍ ജ്യോതിര്‍ഭവന്‍, പുത്തനങ്ങാടി മാര്‍ തെയോഫിലോസ് സ്‌നേഹഭവന്‍ എന്നിവിടങ്ങളിലേക്കു കൈമാറി. അനാഥരായ അന്തേവാസികള്‍ക്കായി തുടര്‍ച്ചയായ രണ്ടാം തവണയും സഹായഹസ്തം നല്കാന്‍ കഴിഞ്ഞതിലുള്ള അഭിമാനത്തിലാണ് കുട്ടികളും മാതാപിതാക്കളും അധ്യാപകരും. അരി, എണ്ണ, പയര്‍, തേയിലപ്പൊടി, കാപ്പിപ്പൊടി, മസാലപ്പൊടി, പുതിയ വസ്ത്രങ്ങള്‍, സോപ്പ് തുടങ്ങി വിവിധതരത്തിലുള്ള അവശ്യസാധനങ്ങളാണ് കുട്ടികള്‍ ശേഖരിച്ച് അന്തേവാസികള്‍ക്കു കൈമാറിയത്. സ്‌കൂള്‍ മാനേജര്‍ ഫാ. സാം ഒറ്റക്കല്ലില്‍, പ്രിന്‍സിപ്പല്‍ എ.ഡി. ഷൈല, വൈസ് പ്രിന്‍സിപ്പല്‍ പി. രേണു, കോ-ഓര്‍ഡിനേറ്റര്‍മാരായ സുജാ കുമാരി, മിനിമോള്‍, ചിഞ്ചൂട്ടി ജോയ് എന്നിവരുടെ നേതൃത്വത്തിലാണ് സാധനങ്ങള്‍ സ്ഥാപനങ്ങളില്‍ എത്തിച്ചു നല്‍കിയത്.

നിര്‍മാണത്തൊഴിലാളി ക്ഷേമനിധി ബോര്‍ഡിനെ ദയാവധത്തിന് വിധിക്കരുത്: തിരുവഞ്ചൂര്‍

കോട്ടയം: നിര്‍മാണത്തൊഴിലാളികളുടെ ഏക പ്രതീക്ഷയായ 1990ല്‍ രൂപീകൃതമായി 20 ലക്ഷം തൊഴിലാളികള്‍ രജിസ്റ്റര്‍ ചെയ്തിട്ടുള്ള ക്ഷേമനിധിയായ നിര്‍മാണത്തൊഴിലാളി ക്ഷേമനിധി ബോര്‍ഡിനെ ദയാവധത്തിന് വിധിക്കരുതെന്ന് തിരുവഞ്ചൂര്‍ രാധാകൃഷ്ണന്‍ എംഎല്‍എ. വിവിധ ആവശ്യങ്ങള്‍ ഉന്നയിച്ച് കളക്‌ടറേറ്റിലേക്ക് നടത്തിയ മാര്‍ച്ച് ഉദ്ഘാടനം ചെയ്യുകയായിരുന്നു തിരുവഞ്ചൂര്‍. കഴിഞ്ഞ 16 മാസമായി പെന്‍ഷന്‍ കുടിശികയാണ്. ചികിത്സാ സഹായം, മരണാനന്തര സഹായം ഉള്‍പ്പെടെ യാതൊന്നും നല്‍കുന്നില്ല. പകുതിയിലധികം തൊഴിലാളികള്‍ അതുകൊണ്ടുതന്നെ ഈ വര്‍ഷം അംഗത്വം പുതുക്കിയിട്ടുമില്ല. കുടിശികയായ ആനുകൂല്യങ്ങള്‍ കൊടുത്തു തീര്‍ക്കണമെങ്കില്‍ 1500 കോടി രൂപയെങ്കിലും ആവശ്യമാണ്. മുടങ്ങിക്കിടക്കുന്ന ആനുകൂല്യങ്ങള്‍ കുടിശിക തീര്‍ത്ത് നല്‍കുക, പെന്‍ഷന്‍ കുടിശിക അനുവദിക്കുക, പെന്‍ഷന്‍ 5000 രൂപയാക്കുക, മറ്റ് ആനുകൂല്യങ്ങള്‍ കാലോചിതമായി പരിഷ്‌കരിക്കുക, നിര്‍മാണസാമഗ്രികളുടെ അനിയന്ത്രിതമായ വിലക്കയറ്റം തടയുക, ലഭ്യത ഉറപ്പുവരുത്തുക, നിത്യോപയോഗ സാധനങ്ങളുടെ വിലനിലവാരം പിടിച്ചുനിര്‍ത്തുക, ക്ഷേമനിധി ബോര്‍ഡിനെ സംരക്ഷിക്കുക തുടങ്ങിയ ആവശ്യങ്ങളാണ് ഉന്നയിച്ചത്. ജില്ലാ പ്രസിഡന്‍റ് വി.ജെ. ജോസ് അധ്യക്ഷത വഹിച്ചു. കുഞ്ഞ് ഇല്ലംപള്ളി, തോമസ് കല്ലാടന്‍, ബൈജു മാറാട്ടുകുളം, എം.പി. സന്തോഷ്‌കുമാര്‍, എസ്. രാജീവ്, സാബു മാത്യു, സക്കീര്‍ ചങ്ങംപള്ളി, റേച്ചല്‍ ജേക്കബ്, എന്‍.കെ. നാരായണന്‍ കുട്ടി എന്നിവര്‍ പ്രസംഗിച്ചു.

ഏറ്റുമാനൂരിൽ ഓണം വിപണനമേള

ഏറ്റുമാനൂർ: നഗരസഭയുടെയും കുടുംബശ്രീയുടെയും സംയുക്താഭിമുഖ്യത്തിൽ ഓണം വിപണനമേള തുടങ്ങി. നഗരസഭാ ബസ് സ്റ്റാൻഡിനു സമീപമുള്ള കുടുംബശ്രീ കെട്ടിടത്തിനു മുന്നിലായി ആരംഭിച്ച വിപണനമേള നഗരസഭാ ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ വിജി ചാവറ ഉദ്ഘാടനം ചെയ്തു. വെളിച്ചെണ്ണയിൽ വറുത്ത പലതരം ചിപ്സ്, ശർക്കര വരട്ടി, പച്ചക്കറികൾ, നിത്യോപയോഗ സാധനങ്ങൾ എന്നിവ മാർക്കറ്റ് വിലയിലും കുറഞ്ഞ നിരക്കിൽ മേളയിൽ ലഭ്യമാക്കിയിട്ടുണ്ട്. അച്ചാറുകൾ, കുടുംബശ്രീയുടെ ബ്രാൻഡഡ് ഉത്പന്നങ്ങൾ, തുണിത്തരങ്ങൾ തുടങ്ങിയവയും ലഭ്യമാണ്. സഹകരണ-ദേവസ്വം മന്ത്രി വി.എൻ. വാസവൻ വിപണനമേള സന്ദർശിച്ചു.

ജനകീയ വികസനസമിതി ഓണാഘോഷം ശനിയാഴ്ച

ഏറ്റുമാനൂർ: ജനകീയ വികസനസമിതിയുടെ ഓണാഘോഷം ശനിയാഴ്ച ലോട്ടസ് തിയറ്ററിന് സമീപമുള്ള മിനി ഓപ്പൺ ഹാളിൽ നടക്കും. ഉച്ചകഴിഞ്ഞ് 3.30ന് പൂക്കളം ഒരുക്കും. തുടർന്ന് അഞ്ചുവയസിനു താഴെയുള്ള കുട്ടികൾക്കായി മിഠായിപെറുക്ക് മത്സരം, താളം തിരുവാതിര സംഘം അവതരിപ്പിക്കുന്ന തിരുവാതിരകളി എന്നിവ നടക്കും. അഞ്ചിന് ആരംഭിക്കുന്ന സാംസ്കാരിക സമ്മേളനം ഫ്രാൻസിസ് ജോർജ് എംപി ഉദ്ഘാടനം ചെയ്യും. ജനകീയ വികസന സമിതി പ്രസിഡന്‍റ് ബി. രാജീവ് അധ്യക്ഷത വഹിക്കും. മാധ്യമ പ്രവർത്തകരെ ഫ്രാൻസിസ് ജോർജ് എംപി ആദരിക്കും. വേൾഡ് പീസ് മിഷൻ ഡയറക്ടർ ഫിലിപ്പ് ജോസഫ് മണിയാലിൽ, സീനിയർ സിറ്റിസൺസ് സംസ്ഥാന പ്രസിഡന്‍റ് എൻ. അരവിന്ദാക്ഷൻ നായർ, കെ.എൻ. വേണുഗോപാൽ, ജോയി പൂവംനിൽക്കുന്നതിൽ, പി. പ്രമോദ് കുമാർ, വിമല എം. നായർ, പി.എൻ. ശങ്കരൻ നായർ, മോഹൻകുമാർ മംഗലത്ത് എന്നിവർ പ്രസംഗിക്കും. ആയുഷ്‌ യോഗ സെന്‍ററിൽ കാണക്കാരി: കാണക്കാരി ഗവണ്‍മെന്‍റ് ആയുര്‍വേദ ഡിസ്‌പെന്‍സറി ആയുഷ്‌ യോഗ സെന്‍ററിന്‍റെ ആഭിമുഖ്യത്തില്‍ ഓണാഘോഷം നടത്തി. കാണക്കാരി പഞ്ചായത്ത്‌ പ്രസിഡന്‍റ് അംബിക സുകുമാരന്‍ ഉദ്‌ഘാടനം ചെയ്‌തു. കാണക്കാരി ഗവൺമെന്‍റ് ആയുര്‍വേദ ഡിസ്‌പെന്‍സറി മെഡിക്കൽ ഓഫീസർ ഡോ. ബിനോജ്‌ അധ്യക്ഷത വഹിച്ചു. ഹരികുമാര്‍ മറ്റക്കര കലാകായിക മത്സരങ്ങളിലെ വിജയികൾക്ക് സമ്മാനങ്ങള്‍ വിതരണം ചെയ്‌തു. കടപ്പൂര്‍ യോഗ സെന്‍റര്‍ സ്റ്റുഡന്‍റ്സ് കോ-ഓര്‍ഡിനേറ്റര്‍ അനിയപ്പാസ്‌, ഗോപാലനാചാരി, ബിന്ദു ജോസഫ്‌, ഷാജി, സിബി എന്‍. തുടങ്ങിയവര്‍ പ്രസംഗിച്ചു. വെട്ടിമുകൾ വി‌ക്‌ടറി ലൈബ്രറിയിൽ ഏറ്റുമാനൂർ: നവീകരിച്ചു പ്രവർത്തനം പുനരാരംഭിച്ച വെട്ടിമുകൾ വിക്‌ടറി ലൈബ്രറി ആൻഡ് റീഡിംഗ് റൂമിന്‍റെ ആഭിമുഖ്യത്തിൽ ഇന്ന് ഓണാഘോഷം നടത്തും. ഉച്ചകഴിഞ്ഞ് മൂന്നിന് ലൈബ്രറി അങ്കണത്തിൽ വിവിധ കായിക വിനോദ മത്സരങ്ങളും കലാപരിപാടികളും നടക്കും. ആറിന് സാംസ്കാരിക സമ്മേളനം മന്ത്രി വി.എൻ. വാസവൻ ഉദ്ഘാടനം ചെയ്യും. ലൈബ്രറി പ്രസിഡന്‍റ് സിറിൾ ജി. നരിക്കുഴി അധ്യക്ഷത വഹിക്കും. ഏറ്റുമാനൂർ നഗരസഭാ ചെയർപേഴ്സൺ ലൗലി ജോർജ്, പ്രതിപക്ഷ നേതാവ് ഇ.എസ്. ബിജു, കൗൺസലർ തങ്കച്ചൻ കോണിക്കൽ, സേവാഗ്രാം ഡയറക്ടർ ഫാ. ക്ലീറ്റസ് ഇടശേരി, താലൂക്ക് ലൈബ്രറി കൗൺസിൽ അംഗം ഡോ. വി.ആർ. ജയചന്ദ്രൻ തുടങ്ങിയവർ പ്രസംഗിക്കും.

അകലക്കുന്നത്ത് ജല്‍ ജീവന്‍ മിഷന്‍ പദ്ധതി പൂര്‍ത്തീകരിച്ച് നാടിന് സമര്‍പ്പിച്ചു

അകലക്കുന്നം: പഞ്ചായത്തിലെ വീടുകളില്‍ ശുദ്ധജലമെത്തിക്കുന്നതിനായി കേന്ദ്ര-സംസ്ഥാന സര്‍ക്കാരുകള്‍ സംയുക്തമായി നടപ്പിലാക്കിയ ജല്‍ ജീവന്‍ മിഷന്‍ പദ്ധതി പൂര്‍ത്തീകരിച്ച് നാടിനു സമര്‍പ്പിച്ചു. ജൽ ജീവന്‍ മിഷന്‍ പദ്ധതിയുടെ ആരംഭത്തില്‍ 23.5 കോടിയും തുടര്‍ന്ന് 22.12 കോടി രൂപയുടെ ഭരണാനുമതിയും പദ്ധതിക്കായി ലഭിച്ചു. മൂന്ന് പാക്കേജുകളിലായി പൂവത്തിളപ്പ്-ചെങ്ങളം സോണ്‍, കരിമ്പാനി സോണ്‍, പാദുവ മേമലക്കുന്ന് സോണ്‍ എന്നിങ്ങനെ മൂന്ന് ടെന്‍ഡറുകള്‍ നല്കി 225 കിലോമിറ്റര്‍ പൈപ്പ്‌ലൈന്‍ സ്ഥാപിച്ചു. ഈ പൈപ്പ് ലൈനിലൂടെ 3,345 കുടിവെള്ള കണക്‌ഷനുകളും നല്കി. പഞ്ചായത്തിലെ ഇലവനാല്‍ കുന്നിലും മേമലക്കുന്നിലും രണ്ടു ലക്ഷം ലിറ്റര്‍ ശേഷിയുള്ള ഉപരിതല സംഭരണിയും കരിമ്പാനിയിലും ചെങ്ങളത്തും മൂന്നു ലക്ഷം ലിറ്റര്‍ ശേഷിയുള്ള ഉന്നതതല സംഭരണിയും ഇടമുളയില്‍ പുതിയ പമ്പും പമ്പ് ഹൗസും പദ്ധതിക്കായി നിര്‍മിച്ചിട്ടുണ്ട്. അകലക്കുന്നം പഞ്ചായത്ത് ഹാളില്‍ നടന്ന സമ്മേളനത്തില്‍ മന്ത്രി റോഷി അഗസ്റ്റിന്‍ പദ്ധതി നാടിന് സമര്‍പ്പിച്ചു. ഫ്രാന്‍സിസ് ജോര്‍ജ് എംപി മുഖ്യപ്രഭാഷണം നടത്തി. പഞ്ചായത്ത് പ്രസിഡന്‍റ് സിന്ധു അനില്‍കുമാര്‍ അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് മാത്തുക്കുട്ടി ഞായര്‍കുളം, ഡിസ്ട്രിക് വാട്ടര്‍ ആൻഡ് സാനിറ്റേഷന്‍ മിഷന്‍ മെംബര്‍ സെക്രട്ടറി അനില്‍ രാജ്, ഷാജി പാമ്പൂരി, ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയി മണിയങ്ങാട്ട്, പഞ്ചായത്ത് അംഗങ്ങളായ ശ്രീലതാ ജയന്‍, ജേക്കബ് തോമസ്, ജാന്‍സി, ഫാ. ഫ്രാന്‍സിസ് ഇടത്തനാല്‍, മുഹമ്മദ് ഷാഹി എന്നിവരെ ചടങ്ങില്‍ ആദരിച്ചു.

ബൈപാസ് റോഡിൽ ഓട്ടോറിക്ഷയ്ക്ക് പിന്നിൽ കാറിടിച്ച് അപകടം

ഏറ്റുമാനൂർ: പട്ടിത്താനം-മണർകാട് ബൈപാസ് റോഡിൽ വീണ്ടും വാഹനാപകടം. ഓട്ടോറിക്ഷയ്ക്കു പിന്നിൽ കാറിടിക്കുകയായിരുന്നു. തവളക്കുഴിക്കും പട്ടിത്താനത്തിനുമിടയിൽ ഇന്നലെ ഉച്ചകഴിഞ്ഞ് 3.30നാണ് സംഭവം. പട്ടിത്താനം മാലിയേപ്പടി സ്വദേശി സതീഷ് ഓടിച്ചിരുന്ന ഓട്ടോറിക്ഷയാണ് അപകടത്തിൽപ്പെട്ടത്. ഇടിയുടെ ആഘാതത്തിൽ ഓട്ടോറിക്ഷ വൈദ്യുതി പോസ്റ്റിൽ ഇടിച്ചാണു നിന്നത്. ഓട്ടോറിക്ഷ പൂർണമായി തകർന്നു. സാരമായി പരിക്കേറ്റ സതീഷിനെ തെള്ളകത്തെ സ്വകാര്യാശുപത്രിയിൽ പ്രവേശിപ്പിച്ചു. പട്ടിത്താനം സ്വദേശി സുധീഷ് ഓടിച്ചിരുന്ന കാറാണ് ഓട്ടോറിക്ഷയിൽ ഇടിച്ചത്. സുധീഷ് ഡ്രൈവിംഗിനിടെ ഉറങ്ങിപ്പോയതാണെന്നു പറയുന്നു.

പരിശുദ്ധ കന്യാമറിയം സമൂഹനന്മയ്ക്കായി മെഴുകുതിരിയായവള്‍: കുര്യാക്കോസ് മാര്‍ ഈവാനിയോസ്

മണര്‍കാട്: സമൂഹനന്മയ്ക്കായി മെഴുകുതിരിപോലെ കത്തിത്തീരാന്‍ തയാറായവളായിരുന്നു പരിശുദ്ധ ദൈവമാതാവെന്ന് ക്നാനായ അതിഭദ്രാസനം റാന്നി മേഖലാ മെത്രാപ്പോലീത്ത കുര്യാക്കോസ് മാര്‍ ഈവാനിയോസ്. എട്ടുനോമ്പ് ആചരണത്തിലൂടെ വിശ്വാസികള്‍ പരിശുദ്ധ കന്യാമറിയത്തെപ്പോലെ കത്തിയെരിയുന്ന മെഴുകുതിരിയായി മാറണമെന്നും അദ്ദേഹം പറഞ്ഞു. എട്ടുനോമ്പ് പെരുന്നാളിന്‍റെ രണ്ടാം ദിനമായ ഇന്നലെ മണര്‍കാട് സെന്‍റ് മേരീസ് യാക്കോബായ സുറിയാനി കത്തീഡ്രലില്‍ വിശുദ്ധ മൂന്നിന്മേല്‍ കുര്‍ബാനയ്ക്കുശേഷം വചനസന്ദേശം നല്‍കുകയായിരുന്നു അദ്ദേഹം. മെറിറ്റ് ഡേയും വയോജനങ്ങളെ ആദരിക്കലും ഇന്ന് എട്ടുനോമ്പ് പെരുന്നാളിനോടനുബന്ധിച്ചുള്ള മെറിറ്റ് ഡേയും ഇടവകയിലെ മുതിര്‍ന്ന വയോജനങ്ങളെ ആദരിക്കലും ഇന്നു നടക്കും. വൈകുന്നേരം ആറിന് യാക്കോബായ സുറിയാനി സഭയുടെ സുന്നഹദോസ് സെക്രട്ടറിയും കോട്ടയം ഭദ്രാസനാധിപനുമായ ഡോ. തോമസ് മാര്‍ തിമോത്തിയോസ് മെത്രാപ്പോലീത്തയുടെ അധ്യക്ഷതയില്‍ ചേരുന്ന യോഗം പ്രതിപക്ഷ നേതാവ് വി.ഡി. സതീശന്‍ ഉദ്ഘാടനം ചെയ്യും. മൈലാപ്പൂര്‍, ബംഗളൂരു‍, യുകെ ഭദ്രാസനാധിപന്‍ ഐസക് മാര്‍ ഒസ്താത്തിയോസ് മെത്രാപ്പോലീത്താ മുഖ്യപ്രഭാഷണം നടത്തും. ഇടവകയിലെ 80 വയസ് കഴിഞ്ഞ വയോധികരെ തിരുവഞ്ചൂര്‍ രാധാകൃഷ്ണന്‍ എംഎല്‍എ ആദരിക്കും. ഉന്നത ബഹുമതികള്‍ ലഭിച്ച ഇടവകാംഗങ്ങള്‍, കഴിഞ്ഞ അധ്യയന വര്‍ഷം ഉന്നതവിജയം കരസ്ഥമാക്കിയ ഇടവകാംഗങ്ങളായ വിദ്യാര്‍ഥികള്‍, പള്ളിവക സ്ഥാപനങ്ങളിലെ വിദ്യാര്‍ഥികള്‍ എന്നിവര്‍ക്കുള്ള മെറിറ്റ് അവാര്‍ഡ് വിതരണം എംജി സര്‍വകലാശാലാ വൈസ് ചാന്‍സലര്‍ സി.ടി. അരവിന്ദകുമാര്‍ നിര്‍വഹിക്കും. കത്തീഡ്രല്‍ ട്രസ്റ്റി ജോര്‍ജ് സഖറിയ ചെമ്പോല സ്വാഗതവും കത്തീഡ്രല്‍ ട്രസ്റ്റി സുരേഷ് കെ. ഏബ്രഹാം കണിയാംപറമ്പില്‍ കൃതജ്ഞതയും പറയും. നേര്‍ച്ചക്കഞ്ഞിയില്‍ പങ്കുചേര്‍ന്ന് വിശ്വാസികള്‍ എട്ടുനോമ്പിനോടനുബന്ധിച്ച് കത്തീഡ്രലിന്‍റെ ചെറിയ പാരീഷ് ഹാളില്‍ ക്രമീകരിച്ചിരിക്കുന്ന നേര്‍ച്ചക്കഞ്ഞിയില്‍ പങ്കുചേരാന്‍ വിശ്വാസികളുടെ തിരക്ക്. ഏഴിന് അര്‍ധരാത്രി വരെയാണ് നേര്‍ച്ച ക്കഞ്ഞി വിതരണം. എല്ലാ ദിവസവും കത്തീഡ്രലിലെ കുര്‍ബാനയ്ക്കുശേഷം 10.30ന് നേര്‍ച്ചക്കഞ്ഞി വിതരണം ആരംഭിക്കും. വൈകുന്നേരം സന്ധ്യാപ്രാര്‍ഥനയെത്തുടര്‍ന്ന് ആറിനാണ് വൈകുന്നേരത്തെ കഞ്ഞിവിതരണം ആരംഭിക്കുന്നത്. രാത്രി 11 വരെയാണ് കഞ്ഞിവിതരണം. ചെറുപയര്‍, അച്ചാര്‍, ചമ്മന്തിപ്പൊടി എന്നിവയോടൊപ്പം ചൂട് കഞ്ഞിയാണ് വിശ്വാസികള്‍ക്കായി നല്‍കുന്നത്. അഞ്ചു ടണ്ണിലധികം അരിയാണ് പ്രതിദിനം കഞ്ഞി തയാറാക്കാന്‍ എടുക്കുന്നതെന്നും തങ്ങള്‍ക്കു ലഭിച്ച അനുഗ്രഹങ്ങള്‍ക്ക് നന്ദിസൂചകമായി നിരവധി വിശ്വാസികളാണ് നേര്‍ച്ചക്കഞ്ഞി സ്‌പോണ്‍സര്‍ ചെയ്യാനെത്തുന്നതെന്നും കത്തീഡ്രല്‍ ഭാരവാഹികള്‍ അറിയിച്ചു. കത്തീഡ്രലിൽ ഇന്ന് കരോട്ടെ പള്ളിയില്‍ രാവിലെ ആറിന് വിശുദ്ധ കുര്‍ബാന. കത്തീഡ്രലില്‍ രാവിലെ 7.30ന് പ്രഭാത പ്രാര്‍ഥന. 8.30ന് വിശുദ്ധ മൂന്നിന്മേല്‍ കുര്‍ബാന - കോഴിക്കോട് ഭദ്രാസനാധിപന്‍ പൗലോസ് മാര്‍ ഐറേനിയോസിന്‍റെ മുഖ്യകാര്‍മികത്വത്തില്‍. രാവിലെ 11ന് പ്രസംഗം - പൗലോസ് മോര്‍ ഐറേനിയോസ്. ഉച്ചയ്ക്ക് 12ന് മധ്യഹന പ്രാര്‍ഥന. ഉച്ചകഴിഞ്ഞ് 2.30ന് പ്രസംഗം - ഫാ. അലക്‌സാണ്ടര്‍ പട്ടശേരി. വൈകുന്നേരം അഞ്ചിന് സന്ധ്യാപ്രാര്‍ഥന. ആറിന് - മെറിറ്റ് ഡേയും വയോജനങ്ങളെ ആദരിക്കലും.

ഓണവിഭവങ്ങളുമായി അകമ്പടിത്തോണി യാത്ര തുടങ്ങി

കോട്ടയം: തിരുവോണത്തോണിയുടെ അകമ്പടിത്തോണിയായി ചുരുളന്‍ വള്ളത്തിലേറി അനൂപ് നാരായണ ഭട്ടതിരി യാത്ര പുറപ്പെട്ടു. തിരുവാറന്മുളയപ്പനു തിരുവോണനാളിലേക്കുള്ള വിഭവങ്ങളുമായി ഉത്രാടസന്ധ്യക്കു കാട്ടൂര്‍ ക്ഷേത്രക്കടവില്‍നിന്നും തിരുവോണത്തോണിയേറുന്നതിന് മുന്നോടിയായ യാത്രയ്ക്ക് ഇതോടെ തുടക്കമായി. ഇന്നലെ ഉച്ചയ്ക്ക് 12നു കുമാരനല്ലൂര്‍ മാങ്ങാട്ടില്ലക്കടവില്‍നിന്നും ഭക്തിയും പാരമ്പര്യവും ഇഴചേര്‍ന്ന അന്തരീക്ഷത്തിലായിരുന്നു യാത്ര. തിരുവാറന്മുളയപ്പന്‍റെ സന്നിധിയിലേക്ക് വള്ളം തുഴഞ്ഞു തുടങ്ങുമ്പോള്‍ വായ്ക്കുരവ ഉയര്‍ന്നു. യാത്രയ്ക്കു മുന്നോടിയായി രാവിലെ അനൂപ് നാരായണ ഭട്ടതിരി കുമാരനല്ലൂര്‍ ക്ഷേത്രദര്‍ശനം നടത്തി ചതുശതം പായസനിവേദ്യം കഴിച്ചു. തുടര്‍ന്ന് യാത്രയ്ക്ക് അമ്മയുടെ അനുജ്ഞ നേടി ഇല്ലത്തേക്ക് എത്തി. ഭഗവത് സന്നിധിയില്‍ തൊഴുത് പ്രാര്‍ഥിച്ചു. വിദ്യാസാഗര്‍ വൈലോപ്പള്ളി, വിനു എം. നായര്‍, സുധീഷ് ആര്‍. നായര്‍ എന്നീ തുഴച്ചില്‍ക്കാരോടൊപ്പമാണ് ഭട്ടതിരിയുടെ ആറന്മുളയാത്ര. ഉത്രാടദിവസമായ നാളെ അദ്ദേഹം കാട്ടൂരിലെത്തും. കാട്ടൂര്‍ മഹാവിഷ്ണുക്ഷേത്രത്തില്‍ വൈകുന്നേരത്തെ പൂജ കഴിഞ്ഞ് ഭദ്രദീപവും കരക്കാര്‍ ഒരുക്കുന്ന ഓണവിഭവങ്ങളുമായി രാത്രി തിരുവോണത്തോണിയില്‍ ആറന്മുളയിലേക്ക് തിരിക്കും. കാട്ടൂരില്‍നിന്നും 18 ദേശവഴിക്കാരുടെ പള്ളിയോടങ്ങള്‍ അകമ്പടിയാകും. നെല്ലുകുത്തിയെടുത്ത പുന്നെല്ലരി ഉള്‍പ്പെടെയുള്ളവയാണ് തോണിയില്‍ കയറ്റുക. തിരുവോണനാളില്‍ പുലര്‍ച്ചെ ആറന്മുള ക്ഷേത്രക്കടവില്‍ തോണിയെത്തും. ഭട്ടതിരി ഓണവിഭവങ്ങള്‍ ഭഗവാന് സമര്‍പ്പിക്കും. തിരുവോണ ദിവസം ആറന്മുള ക്ഷേത്രത്തില്‍ നടക്കുന്ന എല്ലാ ചടങ്ങുകളിലും പങ്കെടുത്ത് അത്താഴപൂജ കഴിഞ്ഞ് ചെലവുമിച്ചം പണക്കിഴി ഭണ്ഡാരത്തില്‍ നിക്ഷേപിച്ച് നിയോഗം പൂര്‍ത്തിയാക്കി കുമാരനല്ലൂരിലേക്ക് മടങ്ങും.

മറുനാടൻ തൂശനില തയാർ

കോട്ടയം: ഓണസദ്യ അടുക്കളയില്‍ തയാറാക്കിയാലും വിളമ്പാന്‍ തൂശനിലയില്ലാത്തവര്‍ നഗരങ്ങളിലും വാടകവീടുകളിലും ഫ്ലാറ്റുകളിലും ഏറെപ്പേരാണ്. ഉത്രാടത്തിനും പൊന്നോണത്തിനും തൂശനില വാങ്ങാന്‍ മാത്രം മാര്‍ക്കറ്റില്‍ എത്തുന്നവരുണ്ട്. അടയുണ്ടാക്കാനും ഇലയ്ക്ക് ആവശ്യക്കാര്‍ ഏറെപ്പേരാണ്. ഉപ്പേരി, ശര്‍ക്കരവരട്ടി, അച്ചാര്‍, കാളന്‍, മധുക്കറി, തോരന്‍, അവിയല്‍, ഓലന്‍, പരിപ്പ്, സാമ്പൂര്‍, പുളിശേരി, പഴം, പായസം എന്നിങ്ങനെ നീളുന്നതാണ് ഓണസദ്യ. ഓണസദ്യ രുചികളുടെ വൈവിധ്യമാണെന്നിരിക്കെ തൂശനിലയില്‍ ഉപ്പു മുതല്‍ വിളമ്പിയാല്‍ വിഭവങ്ങളുടെ രുചിയും ഗുണവും ഒന്നു വേറെതന്നെ. വാഴയിലകളില്‍ ഞാലിപ്പൂവന്‍ ഇലയാണ് ഏറ്റവും കേമം. ഇത്തവണയും സദ്യവട്ടത്തിലെ വിഭവങ്ങള്‍ക്കൊപ്പം ഓണത്തിന് ഇലയും അതിര്‍ത്തി കടന്നുവരികയാണ്. കോയമ്പത്തൂര്‍, തൂത്തുക്കുടി, തഞ്ചാവൂര്‍, തെങ്കാശി, കമ്പം, തേനി, തിരുനെല്‍വേലി എന്നിവിടങ്ങളില്‍നിന്നാണു വാഴയില എത്തുന്നത്. ഇന്നലെയും രണ്ടു ലോഡ് വാഴയില കോട്ടയം മാര്‍ക്കറ്റിലെത്തി. വാഴയിലയ്ക്കുമുണ്ട് മൊത്തവ്യാപാരികളും ചില്ലറവ്യാപാരികളും. പാലക്കാട്, മണ്ണാര്‍ക്കാട്, തൃശൂര്‍ എന്നിവിടങ്ങളില്‍നിന്ന് പരിമിതമായി മാത്രം നാടന്‍ വാഴയില എത്തുന്നുണ്ട്. ഇവിടങ്ങളില്‍ ഇല വില്‍പന മാത്രം ഉദ്ദേശിച്ച വാഴ നട്ടു വളര്‍ത്തുന്നവര്‍ പലരാണ്. നിലവില്‍ 100 ഇലയുള്ള (മുഴുവനായി) ഒരു കെട്ടിനു 3,000- 4000 രൂപ വരെയാണു വില. ഓണവാരം വന്നതോടെ കഴിഞ്ഞ ദിവസങ്ങളില്‍ വില കുതിച്ചുകയറി. ഒരു മുഴുവന്‍ ഇലയില്‍നിന്ന് ഒരു തൂശന്‍ മാത്രമേ മുറിച്ചെടുക്കാനാവുകയുള്ളൂ. ഇത്തരത്തില്‍ ഒരു കെട്ടില്‍നിന്നു 80 വരെ തൂശനിലയാണ് കിട്ടുക. ഇന്നലെ മുതല്‍ ഒരു ഇലയ്ക്ക് മാര്‍ക്കറ്റില്‍ 10-12 രൂപയാണ് നിരക്ക്. ഇല വില്‍ക്കാന്‍ മാത്രമായി തമിഴ്‌നാട്ടില്‍ നാട്ടുവാഴ, ചക്കവാഴ എന്നീ ഇനങ്ങള്‍ കൃഷി ചെയ്യുന്നുണ്ട്. ഇത്തരം വാഴയിലെ കുലകള്‍ക്ക് ഡിമാന്‍ഡില്ല. അവിയല്‍, സാമ്പാര്‍ എന്നിവയ്ക്ക് കറിക്കായ ആയാണ് ഇത് കൂടുതലായും ഉപയോഗിക്കുന്നത്. നാലു ദിവസത്തോളം വാടിതിരിക്കുമെന്നു മാത്രമല്ല പെട്ടന്ന് കീറുകയുമില്ല.

ഊഞ്ഞാൽ കണ്ടിട്ടില്ലെന്നു കുട്ടികൾ; ഊഞ്ഞാൽ കെട്ടി മണിമല പള്ളി

മണിമല: ജീവിതത്തിൽ ഇന്നേവരെ ഒാണഊഞ്ഞാൽ കണ്ടിട്ടില്ലെന്നു കുട്ടികൾ പറഞ്ഞപ്പോൾ വൈദികർ അന്പരന്നുപോയി. എങ്കിൽ പള്ളി മുറ്റത്തുതന്നെ കുട്ടികൾക്ക് ഈ ഒാണക്കാലത്ത് ഊഞ്ഞാൽ കെട്ടിക്കൊടുക്കാൻ അവർ തീരുമാനിച്ചു. മണിമല ഹോളിമാഗി പള്ളിയിലാണ് കുട്ടികൾക്കായി ഊഞ്ഞാൽ കെട്ടി നൽകിയത്. ഊഞ്ഞാൽ കണ്ടിട്ടേയില്ലെന്നു ചില കുട്ടികൾ പറഞ്ഞതു മനസിൽ സ്പർശിച്ചതുകൊണ്ടാണ് വികാരി ഫാ. എബ്രാഹം തയ്യിൽ നെടുംപറമ്പിലും അസിസ്റ്റന്‍റ് വികാരി ഫാ. വർഗീസ് ചിറയിലും ഊഞ്ഞാൽ കെട്ടാൻ തീരുമാനിച്ചത്. തുടർന്നു ദേവാലയ ശുശ്രൂഷി ജോസുകുട്ടി ആലപ്പാട്ടിന്‍റെ നേതൃത്വത്തിൽ പള്ളിമുറ്റത്ത് ഊഞ്ഞാൽ കെട്ടുകയായിരുന്നു. തിരുബാലസഖ്യം കുട്ടികളും സൺഡേ സ്കൂൾ കുട്ടികളും അധ്യാപകരും ഊ ഞ്ഞാലാട്ടം ആസ്വദിച്ചു. മാതാപിതാക്കൾ കൊച്ചുകുട്ടികളെ കൊണ്ടുവന്ന് ഊഞ്ഞാലിലിരുത്തി. ഓണാഘോഷത്തിന്‍റെ ഭാഗമായി സൺഡേ സ്കൂൾ അധ്യാപകർ തയാറാക്കിയ സദ്യയും വേറിട്ടതായിരുന്നു. ഓരോ വിഭവങ്ങളും ഓരോ അധ്യാപകരാണ് തയാറാക്കി കൊണ്ടുവന്നത്. യുവജനങ്ങൾ പള്ളിമുറ്റത്ത് എത്തിച്ചേർന്ന എല്ലാവർക്കും വിവിധ മത്സരങ്ങൾ നടത്തി സമ്മാനവും വിതരണം ചെയ്തു. വൈദികരെ കൂടാതെ ഹെഡ്മിസ്ട്രസ് ഡെയ്സമ്മ ചാക്കോ, അധ്യാപകരായ ബെന്നി തോമസ്, അനീഷ് കെ. തോമസ്, ബിനോയി വർഗീസ് തുടങ്ങിയവർ പരിപാടികൾക്കു നേതൃത്വം നൽകി.

ദീപിക കോട്ടയം ഓഫീസില്‍ ഓണാഘോഷം

കോട്ടയം: ദീപിക കോട്ടയം ഓഫീസില്‍ ഓണാഘോഷവും ദീപിക വാര്‍ഷിക പതിപ്പിന്‍റെ പ്രകാശനവും നടന്നു. തിരുവഞ്ചൂര്‍ രാധാകൃഷ്ണന്‍ എംഎല്‍എയുടെ അധ്യക്ഷതയില്‍ ഓണക്കൂട്ടായ്മ വിജയപുരം രൂപത സഹായ മെത്രാന്‍ ഡോ. ജസ്റ്റിന്‍ മഠത്തിൽപ്പറമ്പില്‍ ഉദ്ഘാടനം ചെയ്തു. രാഷ്‌ട്രദീപിക ലിമിറ്റഡ് മാനേജിംഗ് ഡയറക്ടര്‍ ഫാ. മൈക്കിള്‍ വെട്ടിക്കാട്ട് ആമുഖ സന്ദേശം നല്‍കി. കെ. ഫ്രാന്‍സിസ് ജോര്‍ജ് എംപി, കോട്ടയം മുനിസിപ്പല്‍ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍, നവജീവന്‍ ട്രസ്റ്റി പി.യു. തോമസ്, അതിരമ്പുഴ സെന്‍റ് മേരീസ് ഫൊറോനാ വികാരി ഫാ. മാത്യു പടിഞ്ഞാറേക്കുറ്റ് എന്നിവര്‍ ഓണാശംസകള്‍ നേര്‍ന്നു. ദീപിക വാര്‍ഷിക പതിപ്പിന്‍റെ പ്രകാശനം ബിഷപ് ഡോ. ജസ്റ്റിന്‍ മഠത്തിൽപ്പറമ്പില്‍, ഫാ. ജോസുകുട്ടി പടിഞ്ഞാറേപീടിക സിഎംഐയ്ക്ക് നല്‍കി നിര്‍വഹിച്ചു. ദീപിക ചീഫ് എഡിറ്റര്‍ റവ. ഡോ. ജോര്‍ജ് കുടിലില്‍ വാര്‍ഷിക പതിപ്പിന്‍റെ അവതരണം നടത്തി. ഓണപ്പകര്‍ച്ച എന്ന പേരില്‍ ദീപിക കുടുംബാംഗങ്ങള്‍ സമാഹരിച്ച തുക നവജീവന്‍ ട്രസ്റ്റി പി.യു. തോമസിന് ഫാ. മൈക്കിള്‍ വെട്ടിക്കാട്ട് കൈമാറി. ജനറല്‍ മാനേജര്‍ (അഡ്മനിസ്‌ട്രേഷന്‍) ഫാ. രഞ്ജിത് ആലുങ്കല്‍ കൃതജ്ഞത പറഞ്ഞു. ദീപിക ജനറല്‍ മാനേജര്‍ (സര്‍ക്കുലേഷന്‍) ഫാ. ജിനോ പുന്നമറ്റത്തില്‍ മത്സരങ്ങള്‍ക്ക് നേതൃത്വം നല്‍കി. വിവിധ മത്സരങ്ങളും കലാപരിപാടികളും ഓണസദ്യയുമുണ്ടായിരുന്നു.

ഇസ്രയേലില്‍ മരിച്ച നഴ്‌സിന്‍റെ സംസ്‌കാരം നാളെ

പാലാ: ഇസ്രയേലില്‍ വാഹനാപകടത്തില്‍ മരിച്ച മലയാളി ഹോംനഴ്‌സ് വെളിയന്നൂര്‍ പുതുവേലി പുതുശേരില്‍ രൂപ രാജേഷിന്‍റെ (41) മൃതദേഹം ഇന്ന് നാട്ടില്‍ എത്തിക്കും. രാത്രി എട്ടിന് നെടുമ്പാശേരി വിമാനത്താവളത്തില്‍ എത്തിക്കുന്ന മൃതദേഹം സ്വകാര്യ ആശുപത്രി മോര്‍ച്ചറിയില്‍ സൂക്ഷിക്കും. നാളെ രാവിലെ എട്ടിന് ഭവനത്തില്‍ എത്തിക്കും. സംസ്‌കാരം ഉച്ചകഴിഞ്ഞ് രണ്ടിന് വീട്ടുവളപ്പില്‍. ഇസ്രേലി സ്വദേശിയുടെ വീട്ടില്‍ രോഗീപരിചരണ ജോലി ചെയ്തിരുന്ന രൂപ കഴിഞ്ഞ ഓഗസ്റ്റ് 19ന് രോഗിയുമായി ആശുപത്രിയിലേക്കു പോകും വഴി അഷ്ഗാമില്‍ ഉണ്ടായ അപകടത്തിലാണ് മരിച്ചത്. രാമപുരം ചക്കാമ്പുഴ മഞ്ഞപ്പിള്ളില്‍ രാമന്‍-രുഗ്മിണി ദമ്പതികളുടെ മകളാണ്. ഭര്‍ത്താവ്: രാജേഷ്. മക്കള്‍: പാര്‍വതി(ജര്‍മനി), ധനുഷ്(പ്ലസ് വണ്‍ വിദ്യാര്‍ഥി കൂത്താട്ടുകുളം).

വഴിയോര വസ്ത്രവിപണി സജീവം

കോട്ടയം: വന്‍കിട മാളുകളിലും സൂപ്പര്‍മാര്‍ക്കറ്റുകളിലും മാത്രമല്ല ഓണത്തിരക്ക്. ഓണവിഭവങ്ങളും ഉടയാടകളും മിതമായ നിരക്കില്‍ വാങ്ങാന്‍ സാധാരണക്കാരും പാവങ്ങളും വഴിയോര വിപണിയെ ആശ്രയിക്കുന്നു. പട്ടുപാവാടയും ബ്ലൗസും വാങ്ങാന്‍ ആവശ്യക്കാര്‍ ഏറെയാണ്. കസവുസാരിയും കസവുമുണ്ടും വെള്ളിനൂല്‍ കെട്ടിയ മുണ്ടും കൈലിയും ലുങ്കിയും തോര്‍ത്തും ഷര്‍ട്ടും വില്‍ക്കാന്‍ ഒട്ടേറെ വ്യാപാരികളാണ് നിരത്തുകളിലുള്ളത്. ബാലരാമപുരം, കുത്താമ്പുള്ളി ഉള്‍പ്പെടെ നെയ്ത്ത് ഗ്രാമങ്ങളില്‍നിന്ന് നേരിട്ടു വില്‍പനയ്ക്ക് വന്നവരുമുണ്ട്. ഈറോഡ്, തിരുപ്പൂര്‍, ഡല്‍ഹി എന്നിവിടങ്ങളില്‍നിന്നു വന്‍തോതില്‍ റെഡിമെഡ് വസ്ത്രങ്ങള്‍ വാങ്ങി വില്‍ക്കുന്നവരും ഏറെപ്പേരാണ്. ഡല്‍ഹിയില്‍നിന്നു ചെരിപ്പ്, ഷൂ, ബാഗ് എന്നിവ വാങ്ങി വില്‍ക്കുന്ന കച്ചവടക്കാര്‍ പലരാണ്. ഡല്‍ഹിയില്‍നിന്ന് ഇത്തരം സാധനങ്ങള്‍ വാങ്ങി ഇവിടെ ഇരട്ടി വിലയ്ക്കാണ് വില്‍പനയെങ്കിലും വന്‍കിട ബ്രാന്‍ഡുകളുടെ വില വരില്ല. മോശമല്ലാത്ത ഓണവ്യാപാരം നടക്കുന്ന വേളയിലാണ് മഴ പ്രശ്‌നമാകുമോ എന്ന ആശങ്ക. ഇന്നും നാളെയുമാണ് വഴിയോരവ്യാപാരം പൊടിപൊടിക്കുന്നത്. മഴ വന്നാല്‍ വില്‍പന നടക്കില്ല. ഓണം കഴിഞ്ഞാല്‍ വില്‍പന നടക്കുകയുമില്ല. വാനുകളിലും വഴിയോരത്തും വില്‍ക്കുന്ന പച്ചക്കറിക്ക് താരതമ്യേന വിലക്കുറവുണ്ട്. വെളുത്തുള്ളിയും ചുവന്നുള്ളിയും സവോളയുമായി തമിഴ് വ്യാപാരികള്‍ വാനില്‍ നാടു ചുറ്റുന്നു. ഓണപ്പപ്പടം വില്‍ക്കാന്‍ വഴിയോരത്തും മാര്‍ക്കറ്റുകളിലും നിരവധി പേര്‍. ഇതിനൊപ്പമാണ് കുടുംബശ്രീയും ചെറുകിട സംരംഭകരും പൊടികളും അച്ചാറുകളും പായസക്കിറ്റും കൊണ്ടാട്ടവുമൊക്കെയായി കടകള്‍ തുറന്നിരിക്കുന്നത്. ചില ഹോട്ടലുകളില്‍ പായസക്കച്ചവടവും സജീവമാണ്. ഇതിനൊപ്പമാണ് തമിഴ്‌നാട്ടില്‍നിന്ന് പൂക്കച്ചവടക്കാര്‍ നഗരങ്ങളില്‍ തമ്പടിച്ചിരിക്കുന്നത്. നാടന്‍ ഇഞ്ചിയും ചേനയും ചേമ്പും വാഴക്കുലയും വിളവെടുത്ത് നേരിട്ടു വില്‍ക്കുന്നവരും കുറവല്ല.

കുടുംബശ്രീയുടെ ഓണവിപണി ഹിറ്റ്

കോട്ടയം: ജില്ലയിലെ കുടുംബശ്രീയുടെ ഓണവിപണന പ്രവര്‍ത്തനങ്ങള്‍ വന്‍ വിജയത്തിലേക്ക്. നാടിന്‍റെ രുചിയും വീട്ടമ്മമാരുടെ കൈപ്പുണ്യവും നിറഞ്ഞ കുടുംബശ്രീ ഉത്പന്നങ്ങള്‍ ജനങ്ങള്‍ ആവേശത്തോടെ സ്വീകരിച്ചു. സിഡിഎസുകളുടെ നേതൃത്വത്തില്‍ കുടുംബശ്രീയുടെ വൈവിധ്യമാര്‍ന്ന ഉത്പന്നങ്ങള്‍ ഉള്‍പ്പെടുത്തി ഗിഫ്റ്റ് ഹാംപറുകളും ഒരുക്കിയിട്ടുണ്ട്. ഇവ ഓണച്ചന്തകളിലും വിപണനമേളകളിലും ലഭ്യമാണ്. കുടുംബശ്രീയുടെ പോക്കറ്റ് മാര്‍ട്ട് ഓണ്‍ലൈന്‍ ആപ്പിലൂടെയും ഉത്പന്നങ്ങള്‍ നേരിട്ട് ഓര്‍ഡര്‍ ചെയ്യാം. ഇതിനകം 5,335 ഓണകിറ്റുകള്‍ വിതരണം ചെയ്തു. ഓണസദ്യക്ക് 2,520 ഓര്‍ഡറുകളും ലഭിച്ചിട്ടുണ്ട്. ഉത്രാടം വരെ ഓര്‍ഡറുകള്‍ സ്വീകരിക്കുന്നതിനാല്‍ വരുമാനം ഇനിയും ഉയരുമെന്ന് പ്രതീക്ഷയിലാണ്. ജില്ലാതലത്തില്‍ നടക്കുന്ന പ്രധാന വിപണനമേളകള്‍ക്ക് പുറമേ, എല്ലാ സിഡിഎസുകളിലും രണ്ടുവീതം ഓണച്ചന്തകള്‍ സംഘടിപ്പിച്ചിട്ടുണ്ട്. കുടുംബശ്രീ സംഘകൃഷി ഗ്രൂപ്പുകളില്‍നിന്നുള്ള സംരംഭകരുടെ പച്ചക്കറികള്‍, പൂക്കള്‍, മറ്റ് ഉത്പന്നങ്ങള്‍ എന്നിവയും ഓണച്ചന്തകളില്‍ ലഭ്യമാണ്. ഓണത്തിന്‍റെ സന്തോഷവും നാട്ടിന്‍റെ തനിമയും കുടുംബശ്രീയുടെ കൈപ്പുണ്യവും ഒരുമിച്ചെത്തിക്കുന്ന ഓണച്ചന്തകളും വിപണനമേളകളും ജനപ്രീതിയോടെ മുന്നേറുകയാണ്.

ഓണവിപണിയില്‍ കര്‍ഷകന്‍ കൊള്ളയടിക്കപ്പെടുന്നു

കോട്ടയം: ഓണവിപണി മുന്നില്‍ക്കണ്ട് ഒരു വര്‍ഷത്തെ അധ്വാനത്തില്‍ കർഷകർ വിളയിച്ച കാര്‍ഷികോത്പന്നങ്ങളുടെ സാമ്പത്തികനേട്ടം ഇടനിലക്കാര്‍ക്കും വ്യാപാരികള്‍ക്കും. ചേന, ചേമ്പ്, കാച്ചില്‍, വാഴക്കുല തുടങ്ങി എല്ലാ വിഭവങ്ങളും വില്‍പനവിലയേക്കാള്‍ ഇരുപതും മുപ്പതും രൂപ താഴ്ത്തിയാണ് കര്‍ഷകരില്‍നിന്ന് വ്യാപാരികള്‍ വാങ്ങുന്നത്. ചില വ്യാപാരികള്‍ക്ക് നാടന്‍ വാഴക്കുല ഉള്‍പ്പെടെ വിഭവങ്ങളോടു താത്പര്യമില്ല. വിലക്കുറവില്‍ ലഭിക്കുന്ന ഗുണനിലവാരം കുറഞ്ഞ ഇതര സംസ്ഥാന സാധനങ്ങളാണ് ഇവര്‍ വില്‍ക്കാന്‍ താത്പര്യപ്പെടുന്നത്. കോവിഡ് കാലത്ത് നിലച്ചുപോയ കര്‍ഷകരുടെ ചന്തകളുടെ പ്രവര്‍ത്തനം പുനരാരംഭിക്കാത്തതിനാല്‍ സാധനങ്ങള്‍ വില്‍ക്കാന്‍ പ്രാദേശിക കച്ചവടക്കാരെ ആശ്രയിക്കണം. മാര്‍ക്കറ്റില്‍ കിലോ 80 രൂപയ്ക്ക് ചേന വില്‍ക്കുമ്പോള്‍ കര്‍ഷകര്‍ക്ക് ലഭിക്കുന്നത് 40-50 രൂപ മാത്രം. ശീമച്ചേമ്പിനും കണ്ണന്‍ചേമ്പിനും സ്ഥിതി ഇതുതന്നെ. പച്ച ഏത്തക്കായയ്ക്ക് കര്‍ഷകര്‍ക്ക് ലഭിക്കുന്നത് 35 രൂപയാണ്. വില്‍പന അന്‍പതു രൂപയ്ക്കും. പച്ചക്കപ്പ കൊടുത്താല്‍ പത്തു കിലോയ്ക്ക് ഒരു കിലോ അധികം വ്യാപാരികള്‍ക്ക് നല്‍കണം. അതാത് ദിവസം വിറ്റുപോകുന്ന കപ്പയ്ക്ക് തൂക്കക്കൂലി എന്ന പേരിലാണ് ഒരു കിലോ അധികം പറ്റുന്നത്. ഒരു കിലോ കപ്പ വില്‍ക്കുമ്പോള്‍ കര്‍ഷകന് ലഭിക്കുന്നത് 25-30 രൂപ. വില്‍പന വിലയാവട്ടേ 40 രൂപ. പതിനൊന്ന് കിലോ കപ്പ വില്‍ക്കുന്നമ്പോള്‍ കച്ചവടക്കാരന് ലഭിക്കുന്ന ലാഭം 150 രൂപ. കപ്പ നട്ട് പത്ത് മാസം വളര്‍ത്തി കഠിനാധ്വാനത്തില്‍ പറിച്ചു വില്‍ക്കുന്ന കര്‍ഷകര്‍ക്ക് ലഭിക്കുന്ന തുകയുടെ നേര്‍പ്പകുതി ലാഭം കച്ചവടക്കാരന്‍ അവകാശമാക്കുന്നു. വാഴക്കുലയ്ക്കും പച്ചക്കറികള്‍ക്കും ഇതു തന്നെയാണ് സാഹചര്യം. ഒരു വാഴ നട്ടുവളര്‍ത്തി കുല വില്‍ക്കുന്നതുവരെ കുറഞ്ഞത് 150 രൂപയുടെ ചെലവുണ്ട്. ഇക്കൊല്ലത്തെ കാറ്റിലും മഴയിലും വാഴകള്‍ വന്‍തോതില്‍ നശിക്കുകയും ചെയ്തു. ഇതിന് പുറമേ മലയോരമേഖലയില്‍ വന്യമൃഗങ്ങളും കൃഷി കവര്‍ന്നു.

ഇതര സംസ്ഥാന തൊഴിലാളി കണക്കെടുപ്പ് നിലച്ചു ; കേരളത്തിൽ വന്നുപോകുന്നത് ലഹരിത്തൊഴിലാളികള്‍

കോട്ടയം: കോട്ടയം ജില്ലയില്‍ എത്രയുണ്ട് ഇതര സംസ്ഥാന തൊഴിലാളികള്‍. തൊഴിലാളികളെ എത്തിക്കുന്ന കരാറുകാര്‍ പോലീസ് സ്റ്റേഷനുകളില്‍ നല്‍കിയ കണക്കിന് വര്‍ഷങ്ങളുടെ പഴക്കമുണ്ട്. സ്‌റ്റേഷന്‍ രജിസ്റ്ററില്‍ പേരും ഫോട്ടോയും വിലാസവുമുള്ള നല്ലൊരു ശതമാനം തൊഴിലാളികളും നാട്ടിലേക്ക് മടങ്ങിയിട്ട് കാലമേറെയായി. നിലവില്‍ പുതിയ തൊഴിലാളികളെ എത്തിക്കുന്ന ഏറെ കാരാറുകാരും അവരുടെ സംരക്ഷണയിലുള്ള ഫോട്ടോ, തിരിച്ചറിയല്‍ രേഖകളൊന്നും സ്‌റ്റേഷനുകളില്‍ ഹാജാരാക്കാറില്ല. കേരളത്തില്‍ കാലങ്ങളായി ജോലി ചെയ്യുന്ന ഇതര സംസ്ഥാനത്തൊഴിലാളികള്‍ നാട്ടില്‍ പോയി വരുമ്പോള്‍ പരിചിതരും ബന്ധുക്കളും അയല്‍വാസികളുമായ ഒരു പറ്റെത്തെ കൂട്ടിക്കൊണ്ടുവരികയാണു പതിവ്. ഇവരെ എത്തിക്കുന്നതിന് കമ്മീഷനും ലഭിക്കാറുണ്ട്. നാട്ടില്‍ ഇതര സംസ്ഥാന തൊഴിലാളികൾ പ്രതിയായ കുറ്റകൃത്യങ്ങള്‍ പെരുകുമ്പോഴും പോലീസ് ഇത് അന്വേഷിക്കുന്നുമില്ല. കരാറുകാരില്ലാതെ ജോലി അന്വേഷിച്ച് നേരിട്ടെത്തുന്ന ആയിരക്കണക്കിന് തൊഴിലാളികളുണ്ട്. ഇവര്‍ വിവിധ തൊഴിലിടങ്ങളില്‍ പോലീസിന്‍റെ അറിവില്ലാതെ ജോലി ചെയ്യുന്നുണ്ട്. ഇതിന്‍റെ മറവിലാണ് കഞ്ചാവും മയക്കുമരുന്നും വന്‍തോതില്‍ ജില്ലയിലെത്തുന്നത്. ഒഡീഷ, ആസാം, ജാര്‍ഖണ്ഡ്, ബിഹാര്‍, പശ്ചിമ ബംഗാള്‍ സംസ്ഥാനങ്ങളില്‍നിന്ന് ജില്ലയില്‍ ദിവസേന ഇരുപത് കിലോ കഞ്ചാവ് എത്തുന്നുണ്ടെന്നാണ് എക്‌സൈസ് പറയുന്നത്. ഇവ എറണാകുളം, ഏറ്റുമാനൂര്‍, കോട്ടയം തുടങ്ങി വിവിധയിടങ്ങളില്‍ കൈമറിഞ്ഞാണ് ലഹരിമാഫിയയുടെ കൈകളില്‍ എത്തുന്നത്. കഞ്ചാവ് നിശ്ചിത സ്ഥലത്ത് എത്തിച്ച് അന്നുതന്നെ നാട്ടിലേക്ക് മടങ്ങുന്ന മാഫിയ സംഘങ്ങളില്‍ സ്ത്രീകളും കണ്ണികളാണ്. ജില്ലയിലെ ലേബര്‍ ക്യാമ്പുകളില്‍ പോലീസും എക്‌സൈസും പരിശോധന നടത്തിയിട്ട് വര്‍ഷങ്ങളായി. കഞ്ചാവ് ഉപയോഗിക്കുന്നവരും വിപണനം നടത്തുന്നവരുമായ ഒട്ടേറെ തൊഴിലാളികള്‍ ജില്ലയിലുണ്ടെന്നാണ് സൂചന. ഇക്കൊല്ലം മാത്രം ജില്ലയില്‍ ഇതരസംസ്ഥാന തൊഴിലാളികളെന്ന് വ്യാജേനയെത്തിയ 12 പേരെയാണ് കഞ്ചാവ് കടത്തിന് അറസ്റ്റ് ചെയ്തത്. മാമ്മൂട്ടില്‍ ഇതരസംസ്ഥാന തൊഴിലാളികളുടെ ക്യാമ്പില്‍നിന്ന് ഒരു മീറ്റര്‍ ഉയരമുള്ള കഞ്ചാവ് ചെടി കണ്ടെത്തിയതും ഇക്കൊല്ലമാണ്. കഴിഞ്ഞ ഏപ്രിലില്‍ ഒഡിഷ സ്വദേശിയായ ഇതരസംസ്ഥാന തൊഴിലാളിയെ 6.1 കിലോ കഞ്ചാവുമായി പിടികൂടിയിരുന്നു. വീട്ടില്‍ പോയി മടങ്ങിവരുന്ന തൊഴിലാളികളില്‍ ചിലര്‍ ട്രെയിനിലാണ് കഞ്ചാവ് കൊണ്ടുവരുന്നത്. എറണാകുളം ജില്ലയില്‍നിന്നു വടക്കേ ഇന്ത്യയിലേക്കും വടക്കുകിഴക്കന്‍ സംസ്ഥാനങ്ങളിലേക്കും സര്‍വീസ് നടത്തുന്ന ടൂറിസ്റ്റ് ബസുകള്‍ വഴിയും ലഹരി വസ്തുക്കള്‍ എത്തുന്നതായി എക്‌സൈസ് പറയുന്നു. ‌ കഞ്ചാവിനു പുറമെ രാസലഹരികളായ എംഡിഎംഎ, ബ്രൗണ്‍ഷുഗര്‍, ഹഷീഷ് ഓയില്‍ എന്നിവ ടൂറിസ്റ്റ് ബസുകളില്‍ കേരളത്തിലേക്ക് യാത്ര ചെയ്യുന്ന ഇതരസംസ്ഥാന തൊഴിലാളികളുടെ പക്കല്‍ ഏല്‍പ്പിക്കുന്ന സംഘങ്ങളുണ്ട്. മയക്കുമരുന്ന് കാരിയര്‍മാര്‍ക്ക് യാത്ര സൗജന്യമാണ്. ട്രെയിനുകളില്‍ പരിശോധന കര്‍ശനമായതോടെയാണ് ടൂറിസ്റ്റ് ബസുകള്‍ ലഹരി കടത്തിന് ഉപയോഗിച്ചു തുടങ്ങിയതെന്ന് പറയുന്നു. ഇതരസംസ്ഥാന തൊഴിലാളികള്‍ക്കായുള്ള ഞായര്‍ മാര്‍ക്കറ്റുകളിലും കഞ്ചാവ് വില്‍പന വ്യാപകമാണ്.

വഞ്ചനക്കേസ്: പ്രതി അറസ്റ്റില്‍

പാലാ: രോഗാവസ്ഥയിലുള്ള അമ്മയുടെ ചികിത്സയ്ക്കെന്നു പറഞ്ഞുവിശ്വസിപ്പിച്ച് എട്ടു പവന്‍ ആഭരണങ്ങളും 1500 രൂപയും തട്ടിയെടുത്ത കേസിലെ പ്രതിയെ അറസ്റ്റു ചെയ്തു. കുടക്കച്ചിറയിലുള്ള ഡിവൈന്‍ മേഴ്‌സി റിട്ടയര്‍മെന്‍റ് ഹോമിലെ വയോധികയാണ് തട്ടിപ്പിനിരയായത്. കെ.എസ്. ശ്രീജിത്ത് (35) ആണ് അറസ്റ്റിലായത്. പാലാ എസ്എച്ച്ഒ പ്രിന്‍സ് ജോസഫിന്‍റെ നേതൃത്വത്തില്‍ എഎസ്ഐ സുബാഷ് വാസു, സിവില്‍ പോലീസ് ഓഫീസര്‍മാരായ ജോബി, അനീഷ് എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്.

പാലാ രൂപത എപ്പാര്‍ക്കിയല്‍ യൂത്ത് അസംബ്ലി സമാപിച്ചു

പാലാ: എസ്എംവൈഎം പാലാ രൂപതയുടെ അഭിമുഖ്യത്തില്‍ നടത്തിയ എപ്പാര്‍ക്കിയല്‍ യൂത്ത് അസംബ്ലി സമാപിച്ചു. പാലാ അല്‍ഫോന്‍സിയന്‍ പാസ്റ്ററല്‍ ഇന്‍സ്റ്റിറ്റ്യൂട്ടില്‍ മൂന്നു ദിവസങ്ങളിലായി നടന്ന എപ്പാര്‍ക്കിയല്‍ യൂത്ത് അസംബ്ലിയില്‍ യുവജനങ്ങള്‍ നേരിടുന്ന പ്രശ്‌നങ്ങള്‍ വിശദമായി ചര്‍ച്ച ചെയ്തു. സഭ, സംഘടന, രാഷ്‌ട്രീയം, സംരംഭകത്വം, കുടുംബം, സാങ്കേതികവിദ്യ എന്നീ വിഷയങ്ങള്‍ വിശദമായി ചര്‍ച്ച ചെയ്തു. ഇരുപത് ഫൊറോനകളില്‍നിന്നായി നൂറ്റമ്പതില്‍പരം യുവജനങ്ങള്‍ പങ്കെടുത്തു. സമാപന ദിവസം നടന്ന വിവിധ സെഷനുകളില്‍ രൂപത വികാരി ജനറാള്‍മാരായ മോണ്‍. സെബാസ്റ്റ്യന്‍ വേത്താനത്ത്, മോൺ. ജോസഫ് കണിയോടിക്കല്‍, നീതൂസ് അക്കാഡമി മാനേജിംഗ് ഡയറക്ടര്‍ നീതു ബോബന്‍ എന്നിവര്‍ യുവജനങ്ങളുമായി സംവദിച്ചു. എസ്എംവൈഎം രൂപത ഡയറക്ടര്‍ ഫാ. മാണി കൊഴുപ്പന്‍കുറ്റി, പ്രസിഡന്‍റ് അന്‍വിന്‍ സോണി ഓടച്ചുവട്ടില്‍, ജനറല്‍ സെക്രട്ടറി റോബിന്‍ ടി. ജോസ് താന്നിമല, സിസ്റ്റര്‍ നവീന സിഎംസി, ജോസഫ് വടക്കേല്‍, ബെനിസണ്‍ സണ്ണി, എഡ്വിന്‍ ജെയ്‌സ് എന്നിവര്‍ പ്രസംഗിച്ചു.

വിശാല കുറവിലങ്ങാട് മാതൃഭക്തിയുടെ വിളനിലം: റവ.ഡോ. ജോർജ് വർഗീസ് ഞാറക്കുന്നേൽ

കുറവിലങ്ങാട്: വിശാല കുറവിലങ്ങാട് മാതൃഭക്തിയുടെ വിളനിലമാണെന്ന് കത്തോലിക്ക കോൺഗ്രസ്, വിശ്വാസപരിശീലനകേന്ദ്രം രൂപത ഡയറക്ടർ റവ.ഡോ. ജോർജ് വർഗീസ് ഞാറക്കുന്നേൽ പറഞ്ഞു. കുറവിലങ്ങാട് മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന കേന്ദ്രത്തിൽ എട്ടുനോമ്പാചരണത്തോടനുബന്ധിച്ച് വിശുദ്ധ കുർബാനയർപ്പിച്ച് സന്ദേശം നൽകുകയായിരുന്നു അദ്ദേഹം. പരിശുദ്ധ ദൈവമാതാവ് സുവിശേഷം ജീവിച്ച വ്യക്തിയാണെന്നും അദ്ദേഹം പറഞ്ഞു. നാളെ വാഹനവെഞ്ചരിപ്പ് ദിനമാണ്. കാളികാവ് സെന്‍റ് സെബാസ്റ്റ്യൻസ് ഇടവകയിൽനിന്നുള്ള തീർഥാടനം നടക്കും. മുട്ടുചിറയിൽനിന്ന് തീർഥാടന പദയാത്ര കുറവിലങ്ങാട്: മുട്ടുചിറയിൽനിന്ന് മുത്തിയമ്മയ്ക്കരികിലേക്ക് തീർഥാടക പദയാത്രയെത്തി. മുട്ടുചിറ ഫൊറോനയിലെ കാഞ്ഞിരത്താനം, വാലാച്ചിറ, ജയ്ഗിരി, അൽഫോൻസാപുരം, ഫാത്തിമാപുരം, മലപ്പുറം ഇടവകകളിൽനിന്നുള്ള തീർഥാടകരാണ് ഫൊറോനാതലത്തിൽ സംഗമിച്ചെത്തിയത്. പനങ്കുഴയ്ക്കൽ വല്യച്ചൻ സ്മാരക പാർക്കിൽ നടന്ന ആരംഭപ്രാർഥനകൾക്ക് കാഞ്ഞിരത്താനം പള്ളി വികാരി ഫാ. ജയിംസ് വയലിൽ കാർമികത്വം വഹിച്ചു. ജയ്ഗിരി ക്രിസ്തുരാജ് പള്ളി വികാരി ഫാ. തോമസ് മലയിൽപുത്തൻപുരയിൽ വിശുദ്ധ കുർബാനയർപ്പിച്ചു. മുട്ടുചിറ ഫൊറോന അസി. വികാരി ഫാ. ആന്‍റണി ഞരളക്കാട്ട് സന്ദേശം നൽകി. ഫൊറോന വികാരി ഫാ. ഏബ്രഹാം കൊല്ലിത്താനത്തുമലയിൽ, അസി. വികാരി ഫാ. മാത്യു വാഴചാരിക്കൽ, കൈക്കാരന്മാർ എന്നിവർ നേതൃത്വം നൽകി. തീർഥാടക സംഘത്തെ കുറവിലങ്ങാട് മുത്തിയമ്മയുടെ തിരുസ്വരൂപം നൽകി ആർച്ച്പ്രീസ്റ്റ് റവ.ഡോ. തോമസ് മേനാച്ചേരി സ്വീകരിച്ചു. രാമപുരത്തുനിന്ന് ഇന്ന് കുറവിലങ്ങാട്: എട്ടുനോമ്പിലെ മൂന്നാംദിനമായ ഇന്ന് രാമപുരം സെന്‍റ് അഗസ്റ്റിൻസ് ഫൊറോന ഇടവകയിൽ നിന്നുള്ള തീർഥാടകർ മുത്തിയമ്മയ്ക്കരികിലെത്തും. ഇന്ന് 10.30നാണ് തീർഥാടനം. തുടർന്ന് രാമപുരം ഫൊറോന വികാരി ഫാ. ബെർക്കുമാൻസ് കുന്നുംപുറം വിശുദ്ധ കുർബാനയർപ്പിച്ച് സന്ദേശം നൽകും. ഉച്ചകഴിഞ്ഞ് 3.15ന് ഇടവകയിലെ വിവിധ സംഘടനകളിലെ അംഗങ്ങൾ ജൂബിലി കപ്പേളയിൽ സംഗമിച്ച് തീർഥാടനമായി പള്ളിയിലെത്തും. അഞ്ചിന് ഭരണങ്ങാനം വിശുദ്ധ അൽഫോൻസാ തീർഥാടനകേന്ദ്രം റെക്ടർ റവ.ഡോ. അഗസ്റ്റിൻ പാലയ്ക്കപ്പറമ്പിൽ വിശുദ്ധ കുർബാനയർപ്പിച്ച് സന്ദേശം നൽകും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]