ADVERTISEMENT

ADVERTISEMENT

സുവിധ സമാഗം ബോധവത്കരണം

പാലക്കാട്: എംപ്ലോയീസ് പ്രൊവിഡന്‍റ് ഫണ്ട് ഓർഗനൈസേഷൻ, എംപ്ലോയീസ് സ്റ്റേറ്റ് ഇൻഷ്വറൻസ് കോർപറേഷൻ എന്നിവയുടെ ആഭിമുഖ്യത്തിൽ നിധി ആപ്കേ നികട് 2.0 പദ്ധതിയുടെ ഭാഗമായി സുവിധ സമാഗം എന്ന പേരിൽ ബോധവത്കരണ പരിപാടി നടത്തി.

ജൈനിമേടിലുള്ള ഇഎസ്ഐ ആശുപത്രി ഹാളിൽ നടന്ന പരിപാടി ആർഎംഒ ഡോ.എസ്.എം. ദിലീപ് ഉദ്ഘാടനം ചെയ്തു. ഇപിഎഫ്ഒ എൻഫോഴ്സ്മെന്‍റ് ഓഫീസർമാരായ നിധീഷ് സിൻഹ, ബി. ബിബിൻ, ഇഎസ്ഐസി കഞ്ചിക്കോട് ബ്രാഞ്ച് മാനേജർ എസ്. രശ്മി എന്നിവർ പരാതികൾക്കും സംശയങ്ങൾക്കും മറുപടി നൽകി.

ADVERTISEMENT

ഛത്തീസ്ഗഡിൽ കന്യാസ്ത്രീകളുടെ അറസ്റ്റ്: ജില്ലയിലെങ്ങും പ്രതിഷേധപ്രകടനങ്ങൾ

ഭാരതം നവീന കൊളോസിയമാകുന്നു: മാർ പീറ്റർ കൊച്ചുപുരയ്ക്കൽ പാലക്കാട്: ഛത്തീസ്ഗഡിൽ രണ്ടു മലയാളി സന്യസ്തരെ വ്യാജ ആരോപണങ്ങളുടെ പേരിൽ അറസ്റ്റ്ചെയ്ത കിരാതനടപടിയിൽ പ്രതിഷേധിച്ച് സുൽത്താൻപേട്ട രൂപത പ്രതിഷേധറാലിയും സമ്മേളനവും സംഘടിപ്പിച്ചു.

പാലക്കാട് രൂപത മെത്രാൻ മാർ പീറ്റർ കൊച്ചുപുരയ്ക്കൽ ഉദ്ഘാടനം ചെയ്തു. ഭാരതം നവീന കൊളോസിയം ആയിക്കൊണ്ടിരിക്കുന്നെന്നും ഇതിനെതിരെ ഒരുമിച്ചുനിൽക്കണമെന്നും ഉദ്ഘാടനപ്രസംഗത്തിൽ അദ്ദേഹം പറഞ്ഞു. ക്രൈസ്തവസഭ എല്ലാവരെയും ഉൾക്കൊള്ളുന്നതും സമഗ്രവികസനം ലക്ഷ്യം വയ്ക്കുന്നതാണെന്നും സന്യസ്തരുടെ അറസ്റ്റ് തികച്ചും അപലപനീയമാണെന്നും സുൽത്താൻപേട്ട രൂപത ബിഷപ് ഡോ. അന്തോണിസാമി പീറ്റർ അബീർ അധ്യക്ഷ പ്രസംഗത്തിൽ പറഞ്ഞു. പാലക്കാട് സ്റ്റേഡിയം ബസ് സ്റ്റാന്‍റിൽ നിന്നും ആരംഭിച്ച റാലി രൂപത പ്രോക്യുറേറ്റർ ഫാ. ആന്‍റണി സേവ്യർ പയസ് ഫ്ളാഗ്ഓഫ് ചെയ്തു. ഫാ. വിജീഷ്, സിസ്റ്റർ ട്രീസ, കെഎൽസിഡബ്ലിയുഎ സെക്രട്ടറി ഷീബ ജോണ്‍, കെസിവൈഎം ഫൊറോന പ്രസിഡന്‍റ് മറിയം വോയ്സ്, സിസ്റ്റർ ലളിത എന്നിവർ പ്രതിഷേധം അറിയിച്ചു. സുൽത്താൻപേട്ട രൂപത വികാരി ജനറാൾ ഫാ. മരിയ ജോസഫ്, പാലക്കാട് രൂപത വികാരി ജനറാൾ മോണ്‍. ജീജോ ചാലയ്ക്കൽ, കെഎൽസിഎ പ്രസിഡന്‍റ് ജോണ്‍ ജോസഫ്, ആൾഡോ പ്രഭു എന്നിവർ സന്നിഹിതരായിരുന്നു. വടക്കഞ്ചേരിയിൽ പ്രതിഷേധറാലിയും പ്രതിഷേധസംഗമവും വടക്കഞ്ചേരി: കത്തോലിക്ക കോൺഗ്രസ് ഫൊറോന സമിതിയുടെ നേതൃത്വത്തിൽ വടക്കഞ്ചേരി ടൗണിൽ വമ്പിച്ച പ്രതിഷേധറാലിയും പ്രതിഷേധസംഗമവും നടന്നു. ഫൊറോനയിലെ വിവിധ ഇടവകകളിൽ നിന്നായി സ്ത്രീകളും കുട്ടികളും ഉൾപ്പെടെ നൂറുകണക്കിന് വിശ്വാസികൾ പ്രതിഷേധപരിപാടികളിൽ പങ്കെടുത്തു. വിവിധ സഭാ വിഭാഗങ്ങളിൽ നിന്നായി നിരവധി സിസ്റ്റേഴ്സും വൈദികരും പ്രതിഷേധറാലിയിലും പ്രതിഷേധ സംഗമത്തിലും അണിചേർന്നു. വൈകുന്നേരം ലൂർദ്മാതാ ഫൊറോന പള്ളി അങ്കണത്തിൽ നിന്നും ആരംഭിച്ച റാലി ടൗൺചുറ്റി മന്ദം ജംഗ്‌ഷനിൽ സമാപിച്ചു. തുടർന്നായിരുന്നു പ്രതിഷേധസംഗമം. കത്തോലിക്ക കോൺഗ്രസ് ഫൊറോന ഡയറക്ടറും ഫൊറോന വികാരിയുമായ ഫാ. അഡ്വ. റെജി പെരുമ്പിള്ളിൽ പ്രതിഷേധസംഗമം ഉദ്ഘാടനം ചെയ്തു. നാനാജാതി മതസ്ഥർക്കായി ക്രിസ്തു കാട്ടിതന്ന സേവനവഴിയിലൂടെ പ്രവർത്തിക്കുന്ന നിരപരാധികളായ സിസ്റ്റേഴ്‌സിനെ ജയിലടച്ചത് മനുഷ്യത്വരഹിതവും അത്യന്തം ഹീനവുമായെന്ന് ഫാ.അഡ്വ. റെജി പെരുമ്പിള്ളിൽ പറഞ്ഞു. ഫൊറോന പ്രസിഡന്‍റ് വിൽസൺ കൊള്ളന്നൂർ അധ്യക്ഷത വഹിച്ചു. വള്ളിയോട് അസീസി സ്നേഹഭവൻ ആശ്രമം സുപ്പീരിയർ ഫാ. മാത്യു പുത്തൻ പറമ്പിൽ (ടിഒആർ), കത്തോലിക്ക കോൺഗ്രസ് ഗ്ലോബൽ സെക്രട്ടറി ഡെന്നി തെങ്ങുംപള്ളി, സിസ്റ്റർ അഞ്ജല തെരേസ്, ഗ്ലോബൽ സമിതി അംഗം ജിജോ അറക്കൽ, കെസിവൈഎം രൂപത പ്രസിഡന്‍റ് അഭിഷേക് പുന്നാംതടത്തിൽ, മാതൃവേദി പ്രതിനിധി ഷീബ ജോയ്, സെന്‍റ് വിൻസന്‍റ് ഡി പോൾ സൊസൈറ്റി രൂപത പ്രസിഡന്‍റ് ജെയിംസ് പടമാടൻ, കത്തോലിക്ക കോൺഗ്രസ് രൂപത വൈസ് പ്രസിഡന്‍റ് ജോസ് വടക്കേക്കര, രൂപത സെക്രട്ടറി ജയിംസ് പാറയിൽ എന്നിവർ പ്രസംഗിച്ചു. ദീപ ബൈജു, കൈക്കാരന്മാരായ സണ്ണിനടയത്ത്, ബാബു തെങ്ങുംപള്ളി, മരിയൻ സൈന്യം വേൾഡ് മിഷൻ ജില്ലാ പ്രസിഡന്‍റ് ജോൺ മണക്കളം, എബി വടക്കേക്കര വിവിധ സംഘടനാ ഭാരവാഹികൾ എന്നിവർ നേതൃത്വം നൽകി. സന്യസ്തർ വെല്ലുവിളികളെ അതിജീവിക്കാൻ കരുത്തുള്ളവർ: ഫാ. ചെറിയാൻ ആഞ്ഞിലിമൂട്ടിൽ കല്ലടിക്കോട്: ക്രൈസ്തവ സന്യസ്തർ വെല്ലുവിളികളെ അതിജീവിക്കാൻ കരുത്തുള്ളവരാണെന്ന് കത്തോലിക്ക കോൺഗ്രസ് രൂപത ഡയറക്ടർ ഫാ. ചെറിയാൻ ആഞ്ഞിലിമൂട്ടിൽ. ഏതു പ്രതികൂല സാഹചര്യങ്ങളേയും നേരിടാനും പാർശ്വവത്ക്കരിക്കപ്പെട്ടവർക്കുവേണ്ടി നിരന്തരം ജീവിക്കാനും പ്രതിജ്ഞാബദ്ധരാണെന്നും അദ്ദേഹം പറഞ്ഞു. ഛത്തീസ്ഗഡിലെ സന്യസ്തർക്ക് അനുഭാവം പ്രകടിപ്പിച്ച് കരിമ്പ എക്യുമെനിക്കൽ ചർച്ചസിന്‍റെ ആഭിമുഖ്യത്തിൽ കല്ലടിക്കോട് നടത്തിയ നടത്തിയ പ്രതിഷേധസദസ് ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. കരിമ്പ സെന്‍റ് തോമസ് മാർത്തോമ ചർച്ച് വികാരി റവ. ജോർജ് അബ്രഹാം അധ്യക്ഷത വഹിച്ചു. ഫാ. മാർട്ടിൻ കളമ്പാടൻ മുഖ്യപ്രഭാഷണം നടത്തി. ഫാ. പൗലോസ് കിഴക്കിനേത്ത്, സിസ്റ്റർ ലിസ്ബത്ത്, ഫാ. ജോജി വടക്കേക്കര, സിസ്റ്റർ ലിറ്റിൽ ഫ്ലവർ, തോമസ് ആന്‍റണി, സജീവ് ജോർജ്, എയ്ഞ്ചല മേരി സണ്ണി, തമ്പി തോമസ്, ഡോ. മാത്യു കല്ലടിക്കോട് തുടങ്ങിയവർ പ്രസംഗിച്ചു. കെസിവൈഎം, മാതൃവേദി, കത്തോലിക്ക കോൺഗ്രസ്, സിഎംഎൽ തുടങ്ങിയ സംഘടനകളുടെ നേതൃത്വത്തിൽ കല്ലടിക്കോട് ചുങ്കത്തു നിന്നും റാലിയായാണ് എത്തിയത്.

വടക്കഞ്ചേരി ടൗണിൽ തെരുവുനായയുടെ പരാക്രമം; നാലുവയസുകാരൻ ഉൾപ്പെടെ നിരവധിപേർക്കു കടിയേറ്റു

വടക്കഞ്ചേരി: ടൗണിൽ കമ്മാന്തറ, ഗ്രാമം, പുഴക്കലിടം, ചന്തപ്പുര തുടങ്ങിയ സ്ഥലങ്ങളിൽ തെരുവുനായയുടെ ആക്രമണം. നാലു വയസുകാരൻ ഉൾപ്പെടെ നിരവധി പേർക്ക് കടിയേറ്റു. പ്രധാനി കൂട്ടക്കുഴി മണികണ്ഠ (45) നെയാണ് ഇന്നലെ പുലർച്ചെ കമ്മാന്തറ സ്കൂളിനടുത്തുവച്ച് കറുത്തനിറമുള്ള നായ ആദ്യം കടിച്ചത്. മണികണ്ഠന്‍റെ തുടയിൽ നിരവധി കടിയേറ്റു. വീട്ടിൽനിന്നും ടൗണിലേക്ക് വരുന്നതിനിടെയായിരുന്നു നായയുടെ ആക്രമണമുണ്ടായത്. പാഞ്ഞുനടന്ന നായ പിന്നീട് വഴികളിൽ കണ്ടവരെയെല്ലാം കടിക്കുകയായിരുന്നു. പരിക്കേറ്റവരെല്ലാം ചികിത്സയിലാണ്. മറ്റു തെരുവുനായ്ക്കളെയും വളർത്തുമൃഗങ്ങളെയും നായ കടിച്ചിട്ടുണ്ട്. പരാക്രമം നടത്തിയ നായയെ പിന്നീട് ചത്തനിലയിൽ കണ്ടെത്തി. നായക്ക് പേ വിഷബാധയുണ്ടായിരുന്നോ എന്ന് പോസ്റ്റ്മോർട്ടം നടത്തി പരിശോധിക്കും. ഇതിനായി നായയുടെ ജഡം മണ്ണുത്തിയിലേക്ക് കൊണ്ടുപോയി. അതേസമയം നായ്ശല്യം ഒഴിവാക്കാൻ പഞ്ചായത്ത് അധികൃതർ തക്ക നടപടി സ്വീകരിക്കാത്തതാണ് ടൗൺപ്രദേശത്ത് ഇത്രയേറെ നായ്ക്കൾ പെരുകാൻ കാരണമായതെന്ന് ചൂണ്ടിക്കാട്ടി വലിയ പ്രതിഷേധങ്ങളുമുയർന്നു. ഇതേതുടർന്ന് നായ്പിടുത്ത സംഘം ടൗൺ പ്രദേശങ്ങളിലെത്തി അലഞ്ഞുനടക്കുന്ന ഏതാനും നായ്ക്കളെ പിടികൂടി. എന്നാൽ ടൗണിന്‍റെ പല ഭാഗത്തും ഇപ്പോഴും നായ്കൂട്ടങ്ങളുണ്ട്. നായശല്യത്തിന് പരിഹാരം കാണണമെന്നാവശ്യപ്പെട്ട് പലതവണ പഞ്ചായത്തിൽ നേരിട്ടും അല്ലാതെയും പരാതി നൽകിയിരുന്നെന്ന് വടക്കഞ്ചേരി സർക്കാർ ആശുപത്രി സൂപ്രണ്ട് ഡോ. ജയന്ത് പറഞ്ഞു. നായ്ക്കൾ പെരുകി ജനങ്ങൾക്ക് പുറത്തിറങ്ങാനാകാത്ത സ്ഥിതിയാണെന്ന് കാണിച്ച് കഴിഞ്ഞദിവസവും ജില്ലാ ഭാരവാഹികളുടെ നേതൃത്വത്തിൽ പഞ്ചായത്തിലും ഗ്രാമസഭകളിലും പരാതി നൽകിയിരുന്നെങ്കിലും പഞ്ചായത്തിന്‍റെ ഭാഗത്തുനിന്നും നടപടിയുണ്ടായില്ലെന്ന് ബിജെപി മണ്ഡലം പ്രസിഡന്‍റ് പി.കെ. ഗുരു പറഞ്ഞു.

ബസ് നിയന്ത്രണം വിട്ട് മതിലിലിടിച്ച് അപകടം

പട്ടാന്പി: അമിതവേഗതയിലെത്തിയ ബസ് നിയന്ത്രണംവിട്ട് മതിലിലിടിച്ച് അപകടം. ചാലിശേരി പെരിങ്ങോട് ഇന്നലെ വൈകുന്നേരം അഞ്ചോടെയായിരുന്നു അപകടം. അമിതവേഗതയിലെത്തിയ ബസ് നിയന്ത്രണംവിട്ട് മതിലിൽ ഇടിച്ചുകയറുകയായിരുന്നു. വിദ്യാർഥികളടക്കം 20 ലധികം പേർക്ക് പരുക്കേറ്റു. ഇവരെ പെരുന്പിലാവിലെയും കുന്നംകുളത്തേയും സ്വകാര്യ ആശുപത്രികളിൽ പ്രവേശിപ്പിച്ചു. ആരുടേയും പരിക്ക് ഗുരുതരമല്ല. പട്ടാന്പി കറുകപുത്തൂർ ചാലിശേരി റൂട്ടിൽ സർവീസ് നടത്തുന്ന മിനി ബസാണ് അപകടത്തിൽ പെട്ടത്. ഇടിയുടെ ആഘാതത്തിൽ ബസിന്‍റെ മുൻ ചക്രങ്ങൾ വേർപെട്ടു. റോഡരികിലെ വീടിന്‍റെ മതിലും ഗേറ്റും ഇടിച്ച് തകർത്തശേഷമാണ് ബസ് നിന്നത്. പട്ടാന്പി കറുകപുത്തൂർ- ചാലിശേരി റൂട്ടിൽ സർവീസ് നടത്തുന്ന മിസ്റ്റ് ബസാണ് അപകടത്തിൽപെട്ടത്. റോഡരികിലെ സർവേക്കല്ലിൽ തട്ടിയതിനെതുടർന്ന് ടയർ തെന്നിമാറിയതാണ് അപകടത്തിന് കാരണമെന്നാണ് ലഭിക്കുന്ന വിവരം.

നെല്ലിയാമ്പതിയിൽ കാട്ടാന വഴിതടഞ്ഞു; ഗതാഗതം തടസപ്പെട്ടു

നെല്ലിയാമ്പതി: നെന്മാറ- നെല്ലിയാമ്പതി റോഡിൽ കാട്ടാന റോഡിൽകേറി നിലയുറപ്പിച്ചതിനെതുടർന്ന് വാഹനഗതാഗതം തടസപ്പെട്ടു. ഇന്നലെ വൈകുന്നേരം പതിനാലാം മൈലിനു സമീപമാണ് ഒറ്റയാൻ അരമണിക്കൂർ നേരം റോഡിൽ തടസം ഉണ്ടാക്കിയത്. കുറച്ചുകഴിഞ്ഞു ആന റോഡിന്‍റെ സൈഡിലേക്കു മാറിയ ശേഷമാണ് വാഹനങ്ങൾ കടന്നുപോയത്. ആനയെ കണ്ടു നിർത്തിയിട്ട ബസിനരികിലൂടെ ആന പോയപ്പോൾ ബസിലെ യാത്രക്കാർ പേടിച്ചെങ്കിലും ആന അക്രമിക്കാതെ പോയി.

ചങ്ങലീരിയിൽ രണ്ടരവയസുകാരിയെ തെരുവുനായ ആക്രമിച്ചു

മണ്ണാർക്കാട്: പൊമ്പ്ര ഞെട്ടരക്കടവ് പാലത്തിന് സമീപമുള്ള വീട്ടിൽ വീട്ടുമുറ്റത്ത് കളിച്ചുകൊണ്ടിരുന്ന രണ്ടര വയസുകാരിക്ക് തെരുവ് നായയുടെ കടിയേറ്റു. ഇന്നലെ ഉച്ചയ്ക്ക് 12.30 മണിയോടെയാണ് സംഭവം. കുഞ്ഞിന് അമ്മ ഭക്ഷണം കൊടുത്തുകൊണ്ടിരിക്കെ കാറിന് അടിയിലുണ്ടായിരുന്ന നായ കുട്ടിയെ കടിച്ചു വലിക്കുകയായിരുന്നു. ഏറെ പണിപെട്ടാണ് തെരുവ്നായയിൽ നിന്ന് കുഞ്ഞിനെ രക്ഷപ്പെടുത്തിയത്. കാലിൽ മുറിവേറ്റ കുഞ്ഞിനെ താലൂക്ക് താലൂക്ക് ആശുപത്രിയിൽ എത്തിച്ച് ചികിത്സ നൽകി.

നെന്മാറ-ഒലിപ്പാറ റോഡിന്‍റെ പണിക്കായി എത്തിച്ച യന്ത്രങ്ങൾ കടത്താനുള്ള നീക്കം തടഞ്ഞു

നെന്മാറ: രണ്ടുവർഷമായിട്ടും നവീകരണ പ്രവർത്തികൾ മുടങ്ങിക്കിടക്കുന്ന നെന്മാറ-ഒലിപ്പാറ റോഡിന്‍റെ പണിക്കായി എത്തിച്ച യന്ത്രസാമഗ്രികൾ കടത്തിക്കൊണ്ടു പോകാൻ കോൺട്രാക്ടറുടെ നീക്കം ആക്ഷൻ കമ്മിറ്റി തടഞ്ഞു. നെന്മാറ-ഒലിപ്പാറ റോഡിൽ നവീകരണത്തിന്‍റെ പേരിൽ രണ്ടുവർഷമായി റോഡ് പൊളിച്ചിടുകയും പകരം സംവിധാനം ഉണ്ടാക്കുകയോ യാത്രാദുരിതത്തിന് പരിഹാരം കാണുകയോ ചെയ്യാതിരിക്കുന്നതിനിടയാണ് ഇവിടുത്തെ പണി നിർത്തിവെച്ച് ഇടുക്കിയിലെ പണി ആരംഭിക്കാൻ യന്ത്രസാമഗ്രികൾ കടത്തിക്കൊണ്ടുപോകാൻ ശ്രമിച്ചത്. റോഡിന്‍റെ പണി ദ്രുതഗതിയിൽ ആക്കണം എന്ന് ആവശ്യപ്പെട്ട് പ്രദേശവാസികൾ ആക്ഷൻ കമ്മിറ്റി രൂപീകരിച്ച് സമരം ചെയ്യുന്നതിനിടയാണ് കോൺട്രാക്ടറുടെ പുതിയ നീക്കം. കോൺട്രാക്ടറുടെ നേതൃത്വത്തിൽ ഇടുക്കി രാജാക്കാട് നടക്കുന്ന വർക്ക് സൈറ്റിലേക്ക് ഇവിടെയുള്ള വിവിധതരം യന്ത്രങ്ങൾ കയറ്റി കൊണ്ടുപോകാൻ എത്തിയ ലോറിയാണ് തടഞ്ഞത്. തുടർന്ന് വാഹനവും വാഹനത്തിൽ വന്നവരേയും കമ്മിറ്റിക്കാർ തടയുകയും ബന്ധപ്പെട്ട അധികാരികളോ കരാറുകാരുമായി ബന്ധപ്പെട്ടവരോ വന്നിട്ടേ വാഹനം വിട്ടുനൽകൂ എന്ന് കമ്മിറ്റിക്കാർ നിലപാടെടുത്തു. പോലീസിൽ വിവരമറിയിച്ചതിനെ തുടർന്ന് നെന്മാറ പോലീസ് ഇൻസ്പെക്ടറുടെ നേതൃത്വത്തിൽ ഉദ്യോഗസ്ഥരുമായും കരാറുകാരുമായും ഫോണിലൂടെ നടത്തിയ ചർച്ചയെ തുടർന്ന് പൊതുമരാമത്ത് ദേശീയപാത വിഭാഗം വിഭാഗം എഇ നേരിട്ടെത്തി. കരാറുകാരനുമായി ഫോണിലൂടെ സംസാരിച്ച് ഉടൻതന്നെ കുഴികൾ അടച്ച് തുടങ്ങാമെന്നും റോഡ്നിർമാണത്തിന് കൊണ്ടുവന്ന വാഹനങ്ങൾ ഇവിടുത്തെ പണിപൂർത്തീകരിക്കാതെ കൊണ്ടുപോകില്ലെന്നും ഉറപ്പ് ലഭിച്ചതിന് ശേഷമാണ് പ്രതിഷേധക്കാർ പിരിഞ്ഞത്. റോഡ്പണി പുനരാരംഭിക്കാത്തതിനാൽ പ്രാദേശത്തുണ്ടാകുന്ന ക്രമസമാധാന പ്രശ്നം ആവശ്യമെങ്കിൽ ജില്ലാകളക്ടറെ അറിയിക്കുമെന്നും നെന്മാറ പോലീസ് ഇൻസ്പെക്ടർ പറഞ്ഞു. ആക്ഷൻ കമ്മിറ്റി ചെയർമാൻ കെ. രഘുകുമാർ, ജനറൽ കൺവീനർ എസ്.എം.ഷാജഹാൻ, എസ്. ഉമ്മർ, കെ. ശ്യാംസുന്ദർ, രാജേന്ദ്രൻ, വി.പി. രാജു , ശ്രീജേഷ്, ഷാജി, വിനേഷ്, വി.എം. സ്കറിയ, വി. ദാമോദരൻ, കെ.സതീഷ് എന്നിവരുടെ നേതൃത്വത്തിലാണ് കോൺട്രാക്ടറുടെ നീക്കം തടഞ്ഞത്.

ഹോസ്പിറ കോളജ് ഉദ്ഘാടനം ചെയ്തു

പാലക്കാട്: മാതാകോവിൽ സ്ട്രീറ്റിൽ ഹോസ്പിറ്റൽ അഡ്മിനിസ്ട്രേഷനിൽ ത്രിവത്സര ഡിഗ്രി കോഴ്സ് ആരംഭിച്ച ഹോസ്പിറ കോളജിന്‍റെ ഉദ്ഘാടനം അസിസ്റ്റന്‍റ് കളക്ടർ രവി മീണ നിർവഹിച്ചു. നഗരസഭ ചെയർപഴ്സൻ പ്രമീള ശശിധരൻ അധ്യക്ഷത വഹിച്ച ചടങ്ങിൽ രാജേഷ് ബാബു സ്വാഗതവും പ്രിൻസിപ്പൽ ദീപ ജയപ്രകാശ് റിപ്പോർട്ട് അവതരണവും നടത്തി. ആസ്റ്റർ ഗ്രൂപ്പ് ഡയറക്ടർ വി.എസ്. അഹമ്മദ് മൂപ്പൻ, റിട്ട. ഡെപ്യൂട്ടി ഡയറക്ടർ ഓഫ് പ്രോസിക്യൂഷൻ അഡ്വ.പി. പ്രേംനാഥ് എന്നിവർ മുഖ്യാതിഥികളായി. കൗണ്‍സിലർ അനുപമ പ്രശോഭ്, പാലന ആശുപത്രി ജോയിന്‍റ് ഡയറക്ടർ ഫാ. ബെൻസിഗർ, തങ്കം ആശുപത്രി ജനറൽ മാനേജർ മുഹമ്മദ് കാസിം, സുമേഷ് അച്യുതൻ എന്നിവർ ആശംസയും എ. അഞ്ജു നന്ദിയും പറഞ്ഞു. ആദ്യ ബാച്ചിന്‍റെ ക്ലാസ് നാളെമുതൽ ആരംഭിക്കുമെന്ന് പ്രിൻസിപ്പൽ ദീപ ജയപ്രകാശ് അറിയിച്ചു.

കൊലപാതകശ്രമം: രണ്ടുപേർ പിടിയിൽ

പാലക്കാട്: കാടാങ്കോട് മിലിറ്ററി കാന്‍റീനിന്‍റെ പരിസരത്ത് യാത്രക്കാരോട് തട്ടിക്കയറി കന്പിവടി കൊണ്ട് തലയ്ക്കടിക്കുകയും മർദിക്കുകയും ചെയ്ത കേസിൽ ഒലവക്കോട് സ്വദേശി വിവേക് (23), ചുണ്ണാന്പ്തറ വിദ്യാനഗർ സ്വദേശി ഗോവർധൻ (23) എന്നിവരെ ടൗണ്‍ സൗത്ത് പോലീസ് അറസ്റ്റ് ചെയ്തു. പിടികൂടിയ രണ്ട് പ്രതികളും ലഹരിക്കേസുകളിൽ ജയിൽശിക്ഷ അനുഭവിച്ചിട്ടുണ്ട്. ടൗണ്‍ സൗത്ത് ഇൻസ്പെക്ടർ എസ്. വിപിൻകുമാർ, എസ്ഐ മാരായ എം. മഹേഷ്കുമാർ, വി. ഹേമലത, സീനിയർ സിവിൽ പോലീസ് ഓഫീസർമാരായ ആർ. രാജീദ്, സി. സുനിൽ, കെ.സി. പ്രസാദ്, ടി. പ്രവീണ്‍ എന്നിവരാണ് കേസന്വേഷണം നടത്തി പ്രതികളെ അറസ്റ്റ്ചെയ്തത്.

പീപ്പിൾസ് സർവീസ് സൊസൈറ്റി ജിസിഡിഎം പ്രോജക്ട് രണ്ടാംഘട്ടത്തിനു തുടക്കം

വടക്കഞ്ചേരി: പീപ്പിള്‍സ് സര്‍വീസ് സൊസൈറ്റി പാലക്കാട് (പിഎസ്എസ്പി) നടപ്പാക്കിവരുന്ന ഹരിത കാമ്പസ് സൂക്ഷ്മ കാലാവസ്ഥാ മേഖല നിര്‍മിതി (ജിസിഡിഎം) പദ്ധതിയുടെ രണ്ടാംഘട്ട പ്രവര്‍ത്തനങ്ങളുടെ ഉദ്ഘാടനം വടക്കഞ്ചേരി ലൂര്‍ദ് മാതാ പള്ളിയില്‍ ഫോറോന വികാരി ഫാ. റെജി പെരുംപള്ളില്‍ നിര്‍വഹിച്ചു. പീപ്പിള്‍സ് സര്‍വീസ് സൊസൈറ്റിയുടെ വിവിധ പ്രവര്‍ത്തനങ്ങളെക്കുറിച്ചും പുതിയതായി ആരംഭിച്ചിരിക്കുന്ന പദ്ധതികളെക്കുറിച്ചും പിഎസ്എസ്പി എക്‌സിക്യൂട്ടീവ് സെക്രട്ടറി ഫാ. സീജോ കാരിക്കാട്ടില്‍ വിശദീകരിച്ചു. പിഎസ്എസ്പി ചീഫ് കണ്‍സള്‍ട്ടന്‍റ് കെ.ഡി. ജോസഫ് ഹരിത കാമ്പസ് കാമ്പയിന്‍ പദ്ധതിയുടെ പ്രവര്‍ത്തന വിശദീകരണം നടത്തി. പിഎസ്എസ്പി പ്രോജക്റ്റ് ഓഫീസര്‍ പി. ബോബി നന്ദി പറഞ്ഞു. പിഎസ്എസ്പി ആരംഭിച്ചിരിക്കുന്ന വെര്‍ട്ടിക്കല്‍/അര്‍ബന്‍ ഫാമിംഗ്, പീപ്പിള്‍സ് കെയര്‍ പദ്ധതികളുടെ വിശദീകരണവും പ്രദര്‍ശനവും പരിപാടിയുടെ ഭാഗമായി സംഘടിപ്പിച്ചിരുന്നു. വടക്കഞ്ചേരി ഫോറോനാ ഇടവകാംഗങ്ങള്‍ പങ്കെടുത്ത പരിപാടിക്ക് പിഎസ്എസ്പിയുടെ വിവിധ ഡിപ്പാര്‍ട്ടുമെന്‍റുകളുടെ കോ- ഓര്‍ഡിനേറ്റര്‍മാര്‍ നേതൃത്വം നല്‍കി. ഫ്രാന്‍സിസ് മാര്‍പാപ്പയുടെ "ലൗദാതോ സി' എന്ന ചാക്രിക ലേഖനത്തെ അടിസ്ഥാനമാക്കി ജില്ലയിലെ തിരഞ്ഞെടുക്കപ്പെട്ട 150 കാമ്പസുകളെ ഹരിത കാന്പസുകളാക്കി മാറ്റുക എന്നതാണ് ജിസിഡിഎം പദ്ധതി വഴി ഉദേശിക്കുന്നത്.

വ്യാപാരിസുരക്ഷാ പദ്ധതി ധനസഹായ വിതരണവും വിദ്യാർഥികളെ ആദരിക്കലും

പാലക്കാട്: യുണൈറ്റഡ് മർച്ചന്‍റ്സ് ചേംബർ ജില്ലാ കമ്മറ്റിയുടെ ആഭിമുഖ്യത്തിൽ വ്യാപാരി കുടുംബ സുരക്ഷാപദ്ധതിയിൽ അംഗത്വം നേടിയശേഷം മരണമടഞ്ഞവരുടെ ആശ്രിതർക്ക് രണ്ടുലക്ഷം രൂപവീതം ധനസഹായ വിതരണം ചെയ്തു. തുടർന്ന് വിവിധ വിദ്യാഭ്യാസ മേഖലകളിൽ ഉന്നതവിജയം നേടിയ വ്യാപാരികളുടെ മക്കളെ ആദരിച്ചു. ജില്ലാ പ്രസിഡന്‍റ് പി.എസ്. സിംപ്സന്‍റെ അധ്യക്ഷതയിൽ ചേർന്ന പരിപാടിയിൽ പാലക്കാട് മുനിസിപ്പൽ ചെയർപേഴ്സണ്‍ പ്രമീള ശശിധരൻ ഉദ്ഘാടനം നിർവഹിച്ചു. യുഎസി സംസ്ഥാന പ്രസിഡന്‍റ് ജോബി വി. ചുങ്കത്ത് മുഖ്യപ്രഭാഷണം നടത്തി. സംസ്ഥാന, ജില്ലാ നേതാക്കൾ പങ്കെടുത്തു.

മുടപ്പല്ലൂരിൽ കർഷക കോൺഗ്രസ് പ്രതിഷേധം

വടക്കഞ്ചേരി: കർഷക കോൺഗ്രസ് സംസ്ഥാന പ്രസിഡന്‍റിനെ അറസ്‌റ്റു ചെയ്തതിൽ പ്രതിഷേധിച്ച് ആലത്തൂർ നിയോജക മണ്ഡലം കർഷക കോൺഗ്രസ് കമ്മറ്റിയുടെ നേതൃത്വത്തിൽ മുടപ്പല്ലൂർ ടൗണിൽ പ്രതിഷേധയോഗം നടത്തി. സി. അരവിന്ദാക്ഷൻ മാസ്റ്റർ ഉദ്ഘാടനം ചെയ്തു. സി. മോഹൻദാസ് അധ്യക്ഷത വഹിച്ചു. ജോർജ് കോര, ജയപ്രകാശൻ, പി.ഐ. പൗലോസ്, കെ.എം. ശശീന്ദ്രൻ, കെ. രാമക്യഷ്ണൻ, എം.സുരേഷ് കുമാർ, ഗഫൂർ മുടപ്പല്ലൂർ, എസ്. പ്രദീപ്, ആർ.അനീഷ് പ്രസംഗിച്ചു.

കണ്ണമ്പ്രയിൽ പാപ്കോസ് റൈസ്മിൽ പ്രവർത്തനം വൈകുന്നു ; കോൺഗ്രസ് സമരത്തിലേക്ക്

വടക്കഞ്ചേരി: കണ്ണമ്പ്ര പഞ്ചായത്തിലെ മാങ്ങോട് പാപ്കോസ് കമ്പനിക്കായി സ്ഥലംവാങ്ങി ആറുവർഷത്തിലധികമായിട്ടും യാതൊരു പ്രവർത്തനങ്ങളും തുടങ്ങാത്തതിൽ കോൺഗ്രസ് ബ്ലോക്ക് കമ്മിറ്റി പ്രതിഷേധിച്ചു. കമ്പനി പ്രവർത്തിക്കാനുള്ള നടപടികൾക്ക് വേഗത കൂട്ടണമെന്നും അതല്ലെങ്കിൽ ശക്തമായ പ്രക്ഷോഭപരിപാടികൾ തുടങ്ങുമെന്നും കോൺഗ്രസ് നേതാക്കൾ പറഞ്ഞു. പ്രതിഷേധയോഗം കോൺഗ്രസ് ബ്ലോക്ക് പ്രസിഡന്‍റ് അഡ്വ.എം. ദിലീപ് ഉദ്ഘാടനം ചെയ്തു. മോഹനൻ കല്ലിങ്കൽപ്പാടം അധ്യക്ഷത വഹിച്ചു. സന്തോഷ് നടത്തിപ്പാറ, സുദേവൻ കൊട്ടേക്കാട്, പി.പി. തോമസ്, ശിവൻ രക്കാണ്ടി, ജോൺ മാങ്ങോട്, സുധാകരൻ രക്കാണ്ടി, ഹുസൈൻ ചൂർക്കുന്ന്, മാധവൻ വാളുവെച്ചപ്പാറ,മനോജ് ചൂർക്കുന്ന് പ്രസംഗിച്ചു. മാങ്ങോട്- ചാരക്കുന്ന് റോഡ് എന്നു പറഞ്ഞാണ് പാപ്‌കോസിലേക്ക് എട്ടുമീറ്റർ വീതിയിൽ റോഡിനായി ഇപ്പോൾ അക്വിസിഷൻ നടപടി നടക്കുന്നത്. എന്നാൽ പഞ്ചായത്ത് രജിസ്റ്ററിൽ ഈ റോഡ് എട്ടുമീറ്ററെന്ന് രേഖപ്പെടുത്തിയിട്ടുള്ളതായി നേതാക്കൾ പറഞ്ഞു. 2013 ലാണ് സർക്കാർ റോഡ് ഏറ്റെടുത്തത്. ചാരക്കുന്നിലേക്ക് റോഡ് അക്വയർ ചെയ്യാതെ കമ്പനി സ്ഥലത്തേക്ക് മാത്രമായാണ് മഞ്ഞക്കല്ലുകൾ നിലവിൽ സ്ഥാപിച്ചിരിക്കുന്നത്. പാപ്കോസ് എന്ന പേരുപോലും പറയാൻ ഭരണക്കാർക്കു പറയാൻ മടിയാണെന്നും കോൺഗ്രസ് കുറ്റപ്പെടുത്തി. ഭൂവുടമകളുടെ ആശങ്കകൾ പരിഹരിച്ച് എല്ലാവർക്കും നഷ്ടപരിഹാരം ലഭിക്കാൻ വേണ്ട നടപടികൾ സ്വീകരിക്കണമെന്നും റോഡ് വീതികൂട്ടി ചാരക്കുന്നിലേക്കുകൂടി എത്തിക്കണമെന്നും ആവശ്യപ്പെട്ടു.

വിദ്യാർഥികൾ ഇനി കടുവയുടെ തോഴർ

പാലക്കാട്: വംശനാശഭീഷണി നേരിടുന്ന കടുവയുടെ തോഴരാവാൻ പുതിയ തലമുറ. അന്താരാഷ്ട്ര കടുവാദിനത്തിന്‍റെ ജില്ലാതല ഉദ്ഘാടനം ഗവൺമെന്‍റ് മോയൻസ് എൽപി സ്കൂളിൽ ഇക്കോ ക്ലബ് ജില്ലാ കോ- ഓർഡിനേറ്റർ എസ്. ഗുരുവായൂരപ്പൻ നിർവഹിച്ചു. കടുവകളെക്കുറിച്ച് അറിയേണ്ടതെല്ലാം ചിത്രങ്ങളുടെയും കഥകളുടെയും അനുഭവത്തിന്‍റെയും അടിസ്ഥാനത്തിൽ പുതുതലമുറയ്ക്ക് അദ്ദേഹം പങ്കുവച്ചു. സ്കൂൾ ഹെഡ്മാസ്റ്റർ സി. സനൂജ് അധ്യക്ഷത വഹിച്ചു. ചടങ്ങിൽ അധ്യാപികമാരായ സുമതി, ദിവ്യ, സി സജിത എന്നിവർ മറ്റു പരിസ്ഥിതി സംരക്ഷണ പ്രവർത്തനങ്ങൾ, മാലിന്യ സംസ്കരണ മാർഗങ്ങൾ തുടങ്ങിയ വിഷയങ്ങളിൽ ക്ലാസെടുത്തു. പരിപാടിയിൽ പങ്കെടുത്ത കുട്ടികളെ കടുവകളുടെ തോഴരായി പ്രഖ്യാപിച്ചു. പരിപാടിയോടനുബന്ധിച്ച് നടന്ന കടുവ ക്വിസ് മത്സരത്തിൽ വിജയികളായവർക്കു കടുവക്കഥകൾ വിളിച്ചോതുന്ന സചിത്ര പുസ്തകങ്ങളും തുണിസഞ്ചികളും സമ്മാനിച്ചു. ഇതോടെ ഈ വർഷത്തെ ദേശീയ ഹരിതസേനയുടെ പ്രവർത്തനങ്ങൾക്കും തുടക്കമായി.

സ്ത്രീകളിൽ വായന പ്രോത്സാഹിപ്പിക്കാൻ "വായനച്ചിറക്’പരിപാടി

പാലക്കാട്: സ്ത്രീകളിൽ വായന പ്രോത്സാഹിപ്പിക്കുക എന്ന ലക്ഷ്യത്തോടെ വായനാനുഭവങ്ങൾ പങ്കുവയ്ക്കുന്ന വായന ച്ചിറക് പരിപാടി സംഘടിപ്പിച്ചു. കുടുംബശ്രീ മിഷന്‍റെയും ജില്ലാ പഞ്ചായത്തിന്‍റെയും ആഭിമുഖ്യത്തിൽ ജില്ലാ ജെൻഡർ റിസോഴ്സ് സെന്‍ററിന്‍റെ നേതൃത്വത്തിലാണ് പരിപാടി നടത്തിയത്. ജില്ലാ പഞ്ചായത്ത് ഹാളിൽ നടന്ന പരിപാടി ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ ഉദ്ഘാടനം ചെയ്തു. ജില്ലാ ഇൻഫർമേഷൻ ഓഫീസർ പ്രിയ കെ. ഉണ്ണികൃഷ്ണൻ മുഖ്യാതിഥിയായി. ജില്ലാ പഞ്ചായത്തിന്‍റെ സഹകരണത്തോടെ ജില്ലാ ജെൻഡർ റസോഴ്സ് സെന്‍ററിലാണ് വായനാശാല സജ്ജീകരിച്ചിട്ടുള്ളത്. ഇരുനൂറ്റിയന്പതോളം അംഗത്വമുള്ള ലൈബ്രറിയിൽ ഇരുനൂറിലധികം പുസ്തകങ്ങൾ ഒരുക്കിയിട്ടുണ്ട്.

കട്ടിലുകളും കുടിവെള്ള ടാങ്കുകളും വിതരണംചെയ്തു

കൊടുവായൂർ: ഗ്രാമപഞ്ചായത്ത് 2025-26 സാന്പത്തിക വർഷത്തെ പദ്ധതിയിൽ ഉൾപ്പെടുത്തി പട്ടികജാതി കുടുംബങ്ങൾക്ക് കുടിവെള്ളടാങ്കുകളും വയോജനങ്ങൾക്കു കട്ടിലുകളും വിതരണംചെയ്തു. ഗ്രാമപഞ്ചായത്ത് പ്രസിഡന്‍റ് വി. പ്രേമ സുകുമാരൻ വിതരണോദ്ഘാടനം നിർവഹിച്ചു. ഗ്രാമപഞ്ചായത്ത് വൈസ് പ്രസിഡന്‍റ് എം. മനോജ് അധ്യക്ഷനായി. വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ പി. ശാന്തകുമാരി, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ പി.എൻ. ശബരീശൻ, വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സണ്‍ എസ്. മഞ്ജു, വാർഡ് അംഗങ്ങൾ, പഞ്ചായത്ത് സെക്രട്ടറി ഇൻ ചാർജ് വി. ശ്രീലേഖ എന്നിവർ പങ്കെടുത്തു.

മംഗലംഡാം ലൂർദ്മാതാ സ്കൂളിലെ പാസ്‌വേഡ് ക്യാമ്പ് ശ്രദ്ധേയമായി

മംഗലംഡാം: സംസ്ഥാന ന്യൂനപക്ഷ ക്ഷേമവകുപ്പിന്‍റെ ആഭിമുഖ്യത്തിൽ ഹയർ സെക്കൻഡറി വിദ്യാർഥികൾക്കായുള്ള സൗജന്യ ഏകദിന വ്യക്തിത്വ വികസന , കരിയർ ഗൈഡൻസ് പരിശീലന പാസ് വേർഡ് ( ട്യൂണിംഗ് 2025 - 26 ) ക്യാമ്പ് ലൂർദ്മാതാ ഹയർ സെക്കൻഡറി സ്കൂളിൽ സംഘടിപ്പിച്ചു. കെ.ഡി. പ്രസേനൻ എംഎൽഎ ഉദ്ഘാടനം ചെയ്തു. പിടിഎ പ്രസിഡന്‍റ് ബിനു മുളംമ്പള്ളി അധ്യക്ഷത വഹിച്ചു. ന്യൂനപക്ഷ യുവജന പരിശീലനകേന്ദ്രം പ്രിൻസിപ്പൽ ഡോ.കെ. വാസുദേവൻപിള്ള മുഖ്യ പ്രഭാഷണം നടത്തി. വ്യക്തിത്വ വികാസം, കരിയർ ഗൈഡൻസ്‌, നേതൃത്വ പരിശീലനം, ടൈം മാനേജ്മെന്‍റ്, ഗോൾ സെറ്റിംഗ് തുടങ്ങിയ സെഷനുകൾക്ക് ട്രെയിനർമാരായ ബാബു പി. മാത്യു, എസ്. അബ്ദുൾ റഹിമാൻ എന്നിവർ നേതൃത്വം നൽകി. ക്യാമ്പിൽനിന്ന് ജില്ലാതല ഫ്ലവറിംഗ് ക്യാമ്പിലേക്ക് 16 പേരെ തെരഞ്ഞെടുത്തു. പ്രിൻസിപ്പൽ സിസ്റ്റർ ആൽഫിൻ, ക്യാമ്പ് കോ- ഓർഡിനേറ്റർ സിസ്റ്റർ റൂബി ആന്‍റോ പ്രസംഗിച്ചു.

"തെരുവുനായ ആക്രമണത്തിന് പരിഹാരമുണ്ടാകണം'

ഒറ്റപ്പാലം: തെരുവുനായശല്യം മൂലം ജനങ്ങൾക്ക് വീടിനു പുറത്തിറങ്ങാൻ പറ്റാത്ത സ്ഥിതി സംജാതമായിട്ടും മന്ത്രിയും തദ്ദേശ സ്വയംഭരണ അധികാരികളും പരസ്പരം കുറ്റപ്പെടുത്തുന്നതല്ലാതെ പരിഹാരമുണ്ടാകുന്നില്ലെന്ന് തോട്ടക്കര കൈരളി റസിഡൻസ് അസോസിയേഷൻ ആരോപിച്ചു. ആറുമാസത്തിനകം ഒരു ലക്ഷത്തോളംപേരെ തെരുവുനായ്ക്കൾ ആക്രമിക്കുകയും ഇരുപതോളം പേർ മരിക്കുകയും ചെയ്തിട്ടും സർക്കാർ കണ്ണുതുറന്നിട്ടില്ലെന്നും യോഗം കുറ്റപ്പെടുത്തി. പരിഹാരമുണ്ടായില്ലെങ്കിൽ ജനകീയ സമരം ആരംഭിക്കുമെന്നും മുന്നറിയിപ്പുനൽകി. പി. ജയപ്രകാശ് അധ്യക്ഷത വഹിച്ച യോഗത്തിൽ പി. കൃഷ്ണൻകുട്ടി, ആൻസൺ ജോൺ, എ. ശ്രീകുമാർ, ഓ എം. സുനിൽകുമാർ, എം.പി. റീന , എം. അനിൽ, കെ. അംബിക എന്നിവർ പ്രസംഗിച്ചു.

ചങ്ങാതിക്കൊരു തൈ വിതരണം

നെന്മാറ: ഗവ. ഗേൾസ് ഹയർ സെക്കൻഡറി സ്കൂളിൽ ചങ്ങാതിക്കൊരു തൈ വിതരണം ചെയ്തു. സൗഹൃദ ദിനത്തോടനുബന്ധിച്ചാണ് സ്കൂളിലെ ഒന്പതാം ക്ലാസിലെ വിദ്യാർഥികൾ സുഹൃത്തുക്കൾക്കായി തൈകൾ കൈമാറിയത്. നാട്ടുമാവ്, പേര, ആഞ്ഞിലി, നാരകം, ഉങ്ങ്, പേര തുടങ്ങിയ 86 തൈകൾ പരസ്പരം കൈമാറി. പ്രധാനാധ്യാപിക ശ്രീലത, പ്രകൃതി ക്ലബ് കോ- ഓർഡിനേറ്റർ സജിത, ഹരിതകേരളം റിസോഴ്സ് പേഴ്സണ്‍ എസ്.പി. പ്രേംദാസ്, അധ്യാപകർ പങ്കെടുത്തു.

ബിരുദ, ഡിപ്ലോമ, പ്രഫഷണല്‍ വിദ്യാർഥികൾക്കു ലാപ്ടോപ് നൽകി

മുതലമട: ഗ്രാമപഞ്ചായത്തിലെ 24-25 വാർഷിക പദ്ധതിയിൽ ഉൾപ്പെടുത്തി പട്ടികജാതി വിഭാഗത്തിൽ ഉൾപ്പെട്ട ബിരുദ, ഡിപ്ലോമ, പ്രഫഷണല്‍ വിദ്യാർഥികൾക്കായുള്ള ലാപ്ടോപ്പ് വിതരണോദ്ഘാടനം പ്രസിഡന്‍റ് ജാസ്മിൻ ഷെയ്ക് നിർവഹിച്ചു. വൈസ് പ്രസിഡന്‍റ് സി. വിനേഷ് അധ്യക്ഷത വഹിച്ചു. വികസനകാര്യ സ്ഥിരംസമിതി അധ്യക്ഷ കെ. ബേബിസുധ, വാർഡ് മെംബർമാരായ വി. രതീഷ്‌കുമാർ, നസീമ കമറുദീൻ, സെക്രട്ടറി ഷെയിൻ ചാക്കോ എന്നിവർ പ്രസംഗിച്ചു.

പുഴയിൽ കാണാതായയാളുടെ മൃതദേഹം കണ്ടെത്തി

നെന്മാറ: അയിലൂർ പഞ്ചായത്തിലെ അടിപ്പെരണ്ടയിൽ കഴിഞ്ഞ ശനിയാഴ്ച പുഴയിൽ കാണാതായ ഉമ്മർ ഫാറൂഖിന്‍റെ (45) ജഡം കണ്ടെത്തി. ചെരിപ്പും ഷർട്ടും കണ്ടെത്തിയ പള്ളത്താമടയിൽനിന്ന് മൂന്നര കിലോമീറ്റർ അകലെ വീട്ടക്കൽ കടവിലെ പാലത്തിനടിയിൽ നിന്നാണ് മൃതശരീരം കണ്ടെത്തിയത്. മരത്തടികളും കൊമ്പുകളും പാലത്തിൽ തങ്ങിനിന്നതിനിടയിൽ കുടുങ്ങിയ നിലയിലായിരുന്നു മൃതദേഹം. ഇന്നലെ രാവിലെ പാലത്തിനുസമീപം എത്തിയ പ്രദേശവാസികൾ ദുർഗന്ധം അനുഭവപ്പെട്ടതിനെതുടർന്ന് നോക്കിയപ്പോഴാണ് മൃതദേഹം കണ്ടത്. തുടർന്നു പോലീസിലും അഗ്നിരക്ഷാസേനയെയും വിവരമറിയിച്ചു. അഗ്നിരക്ഷാസേനയും പോലീസ് സ്ഥലത്തെത്തി രാവിലെ ഒന്പതോടെ വടംകെട്ടി ജഡം പുറത്തെത്തിച്ചു. ‌പോലീസ് ഇൻക്വസ്റ്റിനുശേഷം പാലക്കാട് ജില്ലാ ആശുപത്രിയിലേക്കു പോസ്റ്റ് മാർട്ടത്തിനായി മൃതദേഹം കൊണ്ടുപോയി. ഉച്ചയ്ക്കു 2.30-ഓടെ വീട്ടിലെത്തിച്ച മൃതദേഹം 3.30ന് അടിപ്പെരണ്ട ജുമാമസ്ജിദ് കബർസ്ഥാനിൽ കബറടക്കി. പുഴയിൽ ഒഴുകിവന്ന തേങ്ങ പിടിക്കാൻ പോയപ്പോഴാണ് ഉമ്മർ ഫാറൂഖ് അപകടത്തിൽപ്പെട്ടതെന്നു സംശയിക്കുന്നു. അടിപ്പെരണ്ട മണ്ണാംകുളമ്പ് പരേതനായ അവറാൻ സാഹിബിന്‍റെയും നബീസയുടെയും മകനാണ് ഉമ്മർ ഫാറൂഖ്. ഭാര്യ: ഷഹീദ. മക്കൾ: ഫിറോസ്, ഫർസാദ്.

കേരള കോൺഗ്രസ്-എം പ്രതിഷേധിച്ചു

പാലക്കാട്: ഛത്തീസ്ഗഡിലെ ദുർഗ് റെയിൽവേസ്റ്റേഷനിൽ മലയാളികളായ രണ്ടു കന്യാസ്ത്രീകളെ ബജ്‌രംഗ്ദൾ പ്രവർത്തകരായ സാമൂഹ്യവിരുദ്ധർ റെയിൽവേ പോലീസിന്‍റെ സാന്നിധ്യത്തിൽ അപമാനിക്കുകയും ഇവർ നൽകിയ കള്ളപ്പരാതിയുടെ അടിസ്ഥാനത്തിൽ അറസ്റ്റ്ചെയ്യുകയും മനുഷ്യക്കടത്ത്, നിർബന്ധിത മതപരിവർത്തനം തുടങ്ങിയ ഗൗരവമേറിയ കുറ്റങ്ങൾ ചുമത്തി ജയിലിൽ അടയ്ക്കുകയും ചെയ്ത സംഭവത്തിൽ കേരള കോണ്‍ഗ്രസ്-എം പ്രതിഷേധിച്ചു. ജില്ലാ പ്രസിഡന്‍റ് അഡ്വ.കെ. കുശലകുമാറിന്‍റെ നേതൃത്വത്തിൽ പന്തംകൊളുത്തി പ്രതിഷേധപ്രകടനം നടത്തി. വൈസ് പ്രസിഡന്‍റ് അഡ്വ. ടൈറ്റസ് ജോസഫ് അധ്യക്ഷത വഹിച്ചു. അഡ്വ. കെ. കുശലകുമാർ ഉദ്ഘാടനം ചെയ്തു. സംസ്ഥാന സ്റ്റിയറിംഗ് കമ്മിറ്റി അംഗം കെ.എം. വർഗീസ് മുഖ്യപ്രഭാഷണം നടത്തി. ജില്ലാ ഓഫീസ് ചാർജ് ജനറൽ സെക്രട്ടറി തോമസ് ജോണ്‍ കാരുവള്ളിൽ പ്രതിഷേധപ്രമേയം അവതരിപ്പിച്ചു. ജില്ലാ ജനറൽസെക്രട്ടറിമാരായ കെ. സതീഷ്, റെനി മാസ്റ്റർ കരിമാലത്ത്, ജില്ലാ ട്രഷറർ മധു ദണ്ഡപാണി, യൂത്ത്ഫ്രണ്ട് ജില്ലാ പ്രസിഡന്‍റ് ജോഷ്വാ, കെടിയുസി സംസ്ഥാന ജനറൽ സെക്രട്ടറി സുരേഷ് ബാബു, ജില്ലാ പ്രസിഡന്‍റ് ഇബ്രാഹിം, പാലക്കാട് നിയോജകമണ്ഡലം പ്രസിഡന്‍റ് എൽ. കൃഷ്ണമോഹൻ, ലോയേഴ്സ് കോണ്‍ഗ്രസ് ജില്ലാ പ്രസിഡന്‍റ് അഡ്വ. ജയപ്രകാശ്, സുന്ദരൻ കാക്കതറ, രാമചന്ദ്രൻ എലപ്പുള്ളി, രാമചന്ദ്രൻ വണ്ടാഴി, പ്രജീഷ് പ്ലാക്കൽ പ്രസംഗിച്ചു.

സംസ്ഥാനത്തു പുതിയ സംരംഭകരിൽ 31 ശതമാനവും സ്ത്രീകൾ: മന്ത്രി രാജീവ്

പാലക്കാട്: സംസ്ഥാനത്ത് ഈ സംരംഭകവർഷത്തിൽ 31 ശതമാനം പുതിയ സംരംഭകരും സ്ത്രീകളെന്ന് വ്യവസായമന്ത്രി പി. രാജീവ്. സംസ്ഥാന സർക്കാരിന്‍റെ "മിഷൻ 1000' പദ്ധതിയിൽ ഉൾപ്പെടുത്തി ജില്ലയിൽ ആദ്യമായി നിർമാണം പൂർത്തീകരിച്ചു പ്രവർത്തനം ആരംഭിക്കുന്ന നെന്മാറ മാക്സ് സുപ്രീം ടെക്സ്റ്റൈൽസ് ലിമിറ്റഡിന്‍റെ രണ്ടാമത് യൂണിറ്റ് ഉദ്ഘാടനവും സ്വിച്ച് ഓണ്‍കർമവും നിർവഹിച്ച് പ്രസംഗിക്കുകയായിരുന്നു മന്ത്രി. കന്പനിയിൽ പ്രദേശവാസികളായ സ്ത്രീകളാണ് ജോലി ചെയ്യുന്നത് എന്നത് പ്രചോദനമാകുന്നതാണ്. സ്ത്രീകൾക്ക് വരുമാനമുണ്ടായാൽ സ്ത്രീപദവി ഉയരും. വീടിനടുത്ത് തന്നെ ജോലി ലഭിക്കുന്നതും വലിയ കാര്യമാണ്. കേരളത്തിലെ വീടുകളിലാണ് അഭ്യസ്തവിദ്യരായ വീട്ടമ്മമാരുള്ളതെന്നും ഇത് കണക്കിലെടുത്താണ് വിജ്ഞാനകേരളം പദ്ധതി സർക്കാർ ആവിഷ്കരിച്ചതെന്നും മന്ത്രി പറഞ്ഞു. സ്വകാര്യ വ്യവസായ പാർക്ക് ആദ്യം ഉദ്ഘാടനം ചെയ്തത് പാലക്കാട് ജില്ലയിലാണ്. കൊച്ചി-ബാംഗ്ലൂർ ഇൻഡസ്ട്രിയൽ കോറിഡോറിന്‍റെ ഭാഗമായി 1710 ഏക്കറിലാണ് ഇൻഡസ്ട്രിയൽ സ്മാർട്ട് സിറ്റി വരുന്നത്. അവിടെ 50 ശതമാനത്തോളം ഇൻഡസ്ട്രിയും അതോടൊപ്പം ടൗണ്‍ഷിപ്പ്, പൊതുയിടങ്ങൾ, കണ്‍വൻഷൻ സെന്‍റർ ഉൾപ്പെടെയുള്ള അത്യാധുനിക സിറ്റിയായിരിക്കും വരാനിരിക്കുന്നത്. സംരംഭകവർഷം പദ്ധതി ആരംഭിച്ച് മൂന്നു വർഷം കൊണ്ട് മൂന്നരലക്ഷം പുതിയ സംരംഭങ്ങൾ ഉണ്ടായി. ഏഴേകാൽ ലക്ഷത്തോളം തൊഴിലവസരങ്ങൾ ഉണ്ടായി. യുവാക്കൾ മറുനാട്ടിൽ ചെയ്യുന്ന ജോലികൾ ഇവിടെ ചെയ്യാനുള്ള വ്യവസായ സാധ്യതകൾക്ക് കൂടി സർക്കാർ മുൻഗണന നൽകുന്നുണ്ടെന്നും മന്ത്രി കൂട്ടിച്ചേർത്തു. കെ. ബാബു എംഎൽഎ അധ്യക്ഷനായി. കെഎസ്എസ്ഐഎ സംസ്ഥാന പ്രസിഡന്‍റ് എ. നിസാറുദ്ദീൻ മുഖ്യപ്രഭാഷണം നടത്തി.

സംസ്ഥാനത്ത് 50 സ്വകാര്യവ്യവസായ പാർക്കുകൾ ആരംഭിക്കും: മന്ത്രി പി. രാജീവ്

പാലക്കാട്: സംസ്ഥാനത്ത് 50 സ്വകാര്യ വ്യവസായ പാർക്കുകൾ ആരംഭിക്കുമെന്നും ഇതിലൂടെ 750 ഏക്കർ ഭൂമി വ്യവസായ ഭൂമിയാക്കി മാറ്റാൻ കഴിയുമെന്നും വ്യവസായമന്ത്രി പി. രാജീവ് പറഞ്ഞു. സംസ്ഥാന സർക്കാരിന്‍റെ പ്രൈവറ്റ് ഇൻഡസ്ട്രിയൽ എസ്റ്റേറ്റ് സ്കീം പ്രകാരം സ്വകാര്യ സംരംഭകരുമായി സഹകരിച്ച് നടപ്പാക്കുന്ന മുളഞ്ഞൂർ ഹൈടെക് ഇൻഡസ്ട്രിയൽ പാർക്ക് ഉദ്ഘാടനം നിർവഹിച്ച് പ്രസംഗിക്കുകയായിരുന്നു മന്ത്രി. വ്യവസായരംഗത്ത് സ്വകാര്യ പങ്കാളിത്തം പ്രോത്സാഹിപ്പിക്കുന്നതോടൊപ്പം അടിസ്ഥാന സൗകര്യങ്ങൾ, തൊഴിൽ സാധ്യതകൾ, ഉത്പാദന ശേഷി എന്നിവ വളർത്തുകയാണ് പദ്ധതിയിലൂടെ ലക്ഷ്യമിടുന്നത്. ഒറ്റപ്പാലത്തെ ഡിഫൻസ് പാർക്ക് മൾട്ടി പാർക്ക് ആക്കുന്നതിനുള്ള തീരുമാനമെടുത്തതായും മന്ത്രി അറിയിച്ചു. കടന്പൂർ ഇൻഡസ്ട്രിയൽ പാർക്കിന്‍റെ ഉദ്ഘാടനവും ഇതോടൊപ്പം നടന്നു. മന്ത്രി കെ. കൃഷ്ണൻകുട്ടി ഉദ്ഘാടനം നിർവഹിച്ചു. നാടൻ കാർഷികോത്പന്നങ്ങൾ ഉപയോഗിച്ച് വ്യവസായം ആരംഭിക്കാൻ തയ്യാറായാൽ അത് സാധാരണ കർഷകർക്ക് കൂടി ഉപകാരപ്രദമാകുമെന്ന് മന്ത്രി കെ. കൃഷ്ണൻകുട്ടി അഭിപ്രായപ്പെട്ടു. മുളഞ്ഞൂർ ഹൈടെക് ഇന്‍റസ്ട്രിയൽ പാർക്കിൽ നടന്ന പരിപാടിയിൽ കെഎസ്എസ്ഐഎ സംസ്ഥാന പ്രസിഡന്‍റ് എ. നിസാമുദ്ദീൻ അധ്യക്ഷനായി. വ്യവസായ വാണിജ്യ വകുപ്പ് പ്രിൻസിപ്പൽ സെക്രട്ടറി എ.പി.എം. മുഹമ്മദ് ഹനീഷ്, ജില്ലാ വ്യവസായകേന്ദ്രം മാനേജിംഗ് ഡയറക്ടർ ബെനഡിക്ട് വില്യം ജോണ്‍സ്, ഹൈടെക് ഇൻഡസ്ട്രിയൽ മാനേജിംഗ് പാർട്ണർ ടി.വി. മമ്മു, കടന്പൂർ ഇൻസ്ട്രിയൽപാർക്ക് മാനേജിംഗ് പാർട്ണർ എൻ. ഹംസ പങ്കെടുത്തു.

അട്ടപ്പാടിയിൽ 400 കോടിയുടെ വികസനപ്രവർത്തനങ്ങൾ നടപ്പിലാക്കി: മന്ത്രി എം.ബി. രാജേഷ്

അഗളി: സംസ്ഥാന സർക്കാർ അട്ടപ്പാടിയിൽ 400 കോടിയോളം രൂപയുടെ വികസനപ്രവർത്തനങ്ങൾ നടപ്പിലാക്കിയെന്ന് മന്ത്രി എം.ബി. രാജേഷ് പറഞ്ഞു. അട്ടപ്പാടി ബ്ലോക്ക് പഞ്ചായത്തും പുതൂർ ഗ്രാമപഞ്ചായത്തും സംയുക്തമായി നിർമിച്ച ഉമ്മത്താംപടി വരഗാർപുഴ റെഗുലേറ്റർ കം കോസ് വേ ഉദ്ഘാടനം ചെയ്തു പ്രസംഗിക്കുകായിരുന്നു മന്ത്രി. മൂന്ന് റീച്ചുകളിലായിട്ടുള്ള അട്ടപ്പാടിയിലെ പ്രധാനപ്പെട്ട റോഡിന് 160 കോടി രൂപയാണ് അനുവദിച്ചിട്ടുള്ളത്. താവളം-മുള്ളി റോഡിന് 140 കോടിയും ഗവ. കോളജിനും സ്കൂളുകൾക്കുമായി 50 കോടി, കോട്ടത്തറ ആശുപത്രിയ്ക്ക് 15 കോടി രൂപ എന്നിവയുൾപ്പടെയുള്ള വികസന പ്രവർത്തനങ്ങൾ അട്ടപ്പാടിയിൽ നടപ്പിലാക്കിയിട്ടുണ്ട്. വരഗാർ പുഴയ്ക്ക് കുറുകെയുള്ള ഉമത്താംപടിയിലെ റെഗുലേറ്റർ കം കോസ് വേയിലൂടെ ഉന്നതി നിവാസികൾക്ക് മഴക്കാലത്ത് വാഹനത്തിലൂടെയും അല്ലാതെയും പുഴ മുറിച്ച് കടക്കാൻ സാധിക്കും. റെഗുലേറ്റർ വരുന്നതോടെ മഴക്കാലത്ത് ജലം സംഭരിക്കാനും കൃഷിയ്ക്കായി അത് പ്രയോജനപ്പെടുത്തുവാനും സാധിക്കും. തദ്ദേശ സ്ഥാപനങ്ങൾക്ക് സംയുക്തമായി വലിയ പദ്ധതികൾ ഏറ്റെടുക്കാൻ കഴിയുമെന്നാണ് ഇത് കാണിക്കുന്നതെന്നും മന്ത്രി പറഞ്ഞു. പുതൂരിൽ നടന്ന പരിപാടിയിൽ എൻ.ഷംസുദ്ദീൻ എംഎൽഎ അധ്യക്ഷനായി. അട്ടപ്പാടി ബ്ലോക്ക് പഞ്ചായത്ത് പ്രസിഡന്‍റ് മരുതി മുരുകൻ, പുതൂർ ഗ്രാമപഞ്ചായത്ത് പ്രസിഡന്‍റ് ജ്യോതി അനിൽകുമാർ, ജനപ്രതിനിധികൾ, രാഷ്ട്രീയ പാർട്ടി പ്രതിനിധികൾ, ഉദ്യോഗസ്ഥർ തുടങ്ങിയവർ പങ്കെടുത്തു.

ക്ഷാമം മാറി; നാടൻ നാളികേരവും പച്ചക്കറികളും മാർക്കറ്റുകളിൽ എത്തിത്തുടങ്ങി

വടക്കഞ്ചേരി: കഴിഞ്ഞ രണ്ട്മാസമായി ക്ഷാമം നേരിട്ടിരുന്ന നാടൻ നാളികേരവും പച്ചക്കറികളും മാർക്കറ്റിൽ എത്തിത്തുടങ്ങി. പാഞ്ഞുയർന്നിരുന്ന നാളികേരവിലയ്ക്ക് ഇപ്പോൾ ചെറിയ കുറവുണ്ടെന്ന് കച്ചവടക്കാർ പറയുന്നു. ഇപ്പോൾ നാട്ടിലെ പല ഭാഗത്തുനിന്നും നാളികേരം വരുന്നുണ്ടെന്ന് വിഎഫ്പിസികെ യുടെ പാളയത്തുള്ള കർഷക സ്വാശ്രയസംഘം പ്രസിഡന്‍റ് എം.ഇ. കണ്മണി പറഞ്ഞു. സംഘത്തിൽ കിലോക്ക് 68 രൂപ നിരക്കിലാണ് കർഷകരിൽ നിന്ന് നാളികേരം എടുക്കുന്നത്. എന്നാൽ പൊതുവിപണിയിൽ നാളികേര വില 75 രൂപയും 80 രൂപ വരെയുമുണ്ട്. ലഭ്യത കൂടിയിട്ടും പക്ഷെ, കടകളിൽ വിലകൾ കുറയുന്നില്ല. കൃത്രിമ വിലവർധനവ് തുടരുകയാണ്. വൻകിടക്കാരുടെ സ്റ്റോക്ക് വലിയ വിലയ്ക്ക് വില്പന നടത്താനുള്ള സൗകര്യങ്ങളാണ് സർക്കാർ ഏജൻസികൾ ചെയ്തു കൊടുക്കുന്നതെന്ന ആക്ഷേപവും ഇതിനിടെ ശക്തമായുണ്ട്. ഓണം സീസണിൽ വില ഉയരും എന്ന കണക്കുകൂട്ടലിൽ സൂക്ഷിച്ചുവച്ചിരുന്ന നാളികേരവും ഇപ്പോൾ വിപണിയിലെത്തുന്നുണ്ടെന്നാണ് വിലയിരുത്തൽ. മഴ വിട്ടുനിന്നാൽ നാളികേരവരവ് ഇനിയും കൂടും. വെളിച്ചെണ്ണ വിലയും വലിയ വർധനവിന് സാധ്യതയില്ലെന്ന് നാളികേര വ്യാപാരിയായ വാഴക്കുളമ്പിലെ സജി പറഞ്ഞു. തമിഴ്നാട്ടിൽ നാളികേരത്തിന്‍റെ സീസണാണിപ്പോൾ. ഇതിനാൽ വെളിച്ചെണ്ണ വില നിശ്ചയിക്കുന്ന കാങ്കയത്തേക്കും കേരളത്തിൽ നിന്നും നാളികേര കയറ്റുമതിയില്ല. മുൻവർഷങ്ങളിലെല്ലാം മഴക്കാലത്ത് കാങ്കയത്തേക്കാണ് ലോഡ് കണക്കിന് നാളികേരം കയറ്റി പോയിരുന്നത്. ഈ സ്ഥിതി മാറിയെന്ന് സജി പറയുന്നു. മഴക്കാലമാസങ്ങളിൽ നാടൻ നാളികേരം നൂറ് കിലോ ഉണക്കിയാൽ 25 കിലോ കൊപ്രയെ കിട്ടു. ഇതിനാൽ കാങ്കയത്തുകാർക്കും കേരള നാളികേരം വേണ്ട. തമിഴ്നാട്ടിൽ നാളികേര സീസണായതിനാൽ തന്നെ നാളികേര ലഭ്യതയും ഇനി നാട്ടിൽ കൂടും. അതുവഴി നാളികേര വിലയും വെളിച്ചെണ്ണ വിലയും കുറയുമെന്നാണ് വ്യാപാരികൾ പറയുന്നത്. ഇനി തമിഴ്നാട് നാളികേരവും മാർക്കറ്റുകളിലെത്തും. ശുദ്ധമായ നാടൻ വെളിച്ചെണ്ണ വില കിലോയ്ക്ക് ഇപ്പോൾ 450 രൂപയാണ്. വെളിച്ചെണ്ണ വില ഉയർന്നപ്പോൾ വ്യാജ വെളിച്ചെണ്ണയുടെ വിപണനവും വ്യാപകമായി. എന്നാൽ ആരോഗ്യവകുപ്പോ ഭക്ഷ്യസുരക്ഷാ വകുപ്പോ ഫലപ്രദമായ പരിശോധന നടത്താത്തതിനാൽ വ്യാജ വെളിച്ചെണ്ണയാണ് വിപണി കൈയടക്കുന്നത്. ഉത്പന്നങ്ങൾ പൂപ്പൽ പിടിക്കാതിരിക്കാൻ അടിക്കുന്ന ഓയിൽ ഉൾപ്പെടെ നിരവധി മാരക രാസവസ്തുക്കൾ ചേർത്തുള്ള വെളിച്ചെണ്ണയാണ് വിപണിയിലെത്തുന്നത്. ഇത്തരം വ്യാജ വെളിച്ചെണ്ണക്ക് വിലയും നന്നേ കുറവാണ്. തുടർച്ചയായ മഴയിൽ പച്ചക്കറി ഉത്പാദനത്തിൽ വലിയ കുറവുണ്ടായിരുന്നെങ്കിലും മഴയ്ക്ക് ശമനമായതോടെ പച്ചക്കറികളുടെ വരവും കൂടിയിട്ടുണ്ടെന്ന് കർഷകസംഘം പ്രസിഡന്‍റ് പറഞ്ഞു. പച്ചപയർ 50, മത്തങ്ങ 20, കുമ്പളങ്ങ 20, പാവയ്ക്ക 35, നേന്ത്രക്കായ 40, പൂവൻ 40, പാളയംകോടൻ 22, ഞാലിപ്പൂവൻ 40 എന്നീ വിലക്കാണ് വിഎഫ്പിസികെ യിൽ കർഷകരിൽ നിന്നും പച്ചക്കറികൾ എടുക്കുന്നത്.

സിഎസ്ഐ എൽപി സ്കൂളിൽ "സർഗ ചുമർ' ഉദ്ഘാടനം

പാലക്കാട്: സിഎസ്ഐ ഇംഗ്ലീഷ് മീഡിയം എൽപി സ്കൂളിൽ സ്ഥാപിച്ച സർഗ ചുമരിന്‍റെ ഉദ്ഘാടനം സാഹിത്യകാരനും മുണ്ടശ്ശേരി അവാർഡ് ജേതാവുമായ എം. കൃഷ്ണദാസ് നിർവഹിച്ചു. കുട്ടികളുടെ സർഗാത്മകമായ കഴിവുകൾ സ്വതന്ത്രമായി പ്രകടിപ്പിക്കുന്നതിനുള്ള പ്ലാറ്റ്ഫോമായി ഈ ചുമർ ഉപയോഗപ്പെടുത്തുമെന്നു സ്കൂൾ അധികൃതർ പറഞ്ഞു. ഉദ്ഘാടന ചടങ്ങിൽ ഹെഡ്മാസ്റ്റർ റെജിനോൾഡ് അനിൽകുമാർ സ്വാഗതം പറഞ്ഞു. പിടിഎ പ്രസിഡന്‍റ് മുഹമ്മദ് യൂസഫ് ആധ്യക്ഷത വഹിച്ചു. മാനേജർ റവ. ജോയി അലക്സ് മുഖ്യപ്രഭാഷണം നടത്തി.സ്റ്റാഫ്‌ സെക്രട്ടറി ബി. വിദ്യ നന്ദി പറഞ്ഞു.

നെല്ലിയാന്പതി ഗ്രാമീണമേഖലകളിൽ സൗജന്യ മെഡിക്കൽ ക്യാമ്പ്

നെന്മാറ: നെന്മാറ സെന്‍റർ ഫോർ ലൈഫ് സ്കിൽസ് ലേണിംഗ്, കൊച്ചി ആസ്റ്റർ മെഡിസിറ്റി എന്നിവരുടെ നേതൃത്വത്തിൽ ലയൺസ് ക്ലബ് നെന്മാറയുടെയും, വനം- വന്യജീവി വകുപ്പ് നെല്ലിയാമ്പതിയുടെയും, ഓട്ടോ ടാക്സി ഡ്രൈവേഴ്സ് യൂണിയൻ നെല്ലിയാമ്പതിയുടെയും സഹകരണത്തോടെ നെല്ലിയാമ്പതിയിലെ ഗ്രാമീണമേഖലകളിൽ സൗജന്യ ജനറൽ മെഡിക്കൽ ക്യാമ്പ് സംഘടിപ്പിച്ചു. രണ്ടു ദിവസങ്ങളിലായി നടന്ന ക്യാമ്പിൽ ഇതര സംസ്ഥാന തൊഴിലാളികൾക്കുവേണ്ടി സീതാർകുണ്ട് പോബ്സ് എസ്റ്റേറ്റിലും, ഗ്രാമീണ മേഖലയിലുള്ള ആളുകൾക്കായി പുലിയമ്പാറയിലും, ഉന്നതികളിലെ ജനങ്ങൾക്കായി പുല്ലുകാട് കോളനിയിലും, തോട്ടം തൊഴിലാളികൾക്കായി നൂറടിയിലു ക്യാമ്പ് സംഘടിപ്പിച്ചു. പുലയമ്പാറയിൽ നടന്ന ക്യാമ്പിന്‍റെ ഉദ്ഘാടനം നെന്മാറ നെല്ലിയാമ്പതി ഡെപ്യൂട്ടി റേഞ്ച് ഫോറസ്റ്റ് ഓഫീസർ ജയചന്ദ്രൻ നിർവഹിച്ചു. സെന്‍റർ ഫോർ ലൈഫ് സ്കിൽസ് ലേർണിംഗ് ഡയറക്ടർ അശോക് നെന്മാറ അധ്യക്ഷനായി. ഫാ. ക്രിസ് മുഖ്യാതിഥിയായി. നെല്ലിയാമ്പതി നൂറടി ഭാഗത്ത് നടന്ന ക്യാമ്പ് നെന്മാറ ലയൺസ് ക്ലബ് പ്രസിഡന്‍റ് വിശ്വനാഥൻ ഉദ്ഘാടനം ചെയ്തു. ലയൺസ് സന്തോഷ് അധ്യക്ഷനായി.

മണ്ഡലത്തിൽ 32 ഹൈ, മിനിമാസ്റ്റ് ലൈറ്റുകൾകൂടി അനുവദിച്ചു

മണ്ണാർക്കാട്: എംഎൽഎ ആസ്തി വികസന ഫണ്ട്‌ ഉപയോഗിച്ച് മണ്ണാർക്കാട് നിലാവ് പദ്ധതിയിൽ മണ്ഡലത്തിൽ 32 ഹൈമാസ്റ്റ്, മിനിമാസ്റ്റ് ലൈറ്റുകൾകൂടി അനുവദിച്ചതായി എൻ. ഷംസുദ്ദീൻ എംഎൽഎ അറിയിച്ചു. കണ്ണംകുണ്ട് സെന്‍റർ, എടത്തനാട്ടുകര താണിക്കുന്ന്, ഇരട്ടവാരി ചർച്ച് പരിസരം, അമ്പാഴക്കോട് സെന്‍റർ, പള്ളിക്കുന്ന് എംഎ അസീസ് സാഹിബ് ഗ്രൗണ്ട് പരിസരം, പറവട്ടിപ്പടി ജുമാ മസ്ജിദ് പരിസരം, നെല്ലിപ്പുഴ ദാറുന്നജാത്ത് യത്തീംഖാന സ്കൂൾ പരിസരം, പാണ്ടിക്കാട് ബംഗ്ലാവ് പടി ജംഗ്ഷൻ, തെങ്കര വട്ടപ്പറമ്പ് ജുമാ മസ്ജിദ് പരിസരം, അമ്പംകുന്ന് തോടുകാട് ജംഗ്ഷൻ, കള്ളമല പഞ്ചായത്ത് ഗ്രൗണ്ട് പരിസരം, അഗളി മുക്കാലി താണിച്ചോട്, പുതൂർ ക്ഷേത്ര പരിസരം, മേലെ മഞ്ചിക്കണ്ടി ഉന്നതി, ബോഡിച്ചാള ഉന്നതി, എടത്തനാട്ടുകര ചുണ്ടോട്ടുകുന്ന്, പാലക്കടവ് സെന്‍റർ, അലനല്ലൂർ പഞ്ചായത്തിലെ പെരിമ്പടാരി, കോട്ടോപ്പാടം കൊടുവാളി ശിവക്ഷേത്ര പരിസരം, പാറപ്പുറം ഇളംപുലാവിൽ കുളമ്പ് ജംഗ്ഷൻ, വേങ്ങ എഎൽപി സ്കൂൾ പരിസരം, കഷായപ്പടി സെന്‍റർ, ചങ്ങലീരി അമ്പലപ്പടി മഹാവിഷ്ണു ക്ഷേത്ര പരിസരം, ചങ്ങലീരി സലഫി മസ്ജിദ് പരിസരം, ചങ്ങലീരി മോതിക്കൽ ഇടിഞ്ഞാടി ഉന്നതി, നാരങ്ങപ്പറ്റ മുൻസിപ്പൽ വെൽനസ് സെന്‍റർ പരിസരം, അരകുർശ്ശി കൊട്ടേപ്പടി ജംഗ്ഷൻ, തോരാപുരം അണ്ണാമലയാർ ക്ഷേത്ര പരിസരം, പുഞ്ചക്കോട് പാറമ്മേൽ പള്ളി പരിസരം, ചിറപ്പാടം മുനി ക്ഷേത്ര പരിസരം, ജവഹർ നഗർ, അഗളി പട്ടിമാളം ഉന്നതി എന്നീ സ്ഥലങ്ങളിലാണ് ഹൈമാസ്റ്റ് മിനി മാസ്റ്റ് ലൈറ്റുകൾ സ്ഥാപിക്കുക.

വിവിധ പാർട്ടികളിൽനിന്നു കോൺഗ്രസിൽ എത്തിയവർക്കു സ്വീകരണം നൽകി

മണ്ണാർക്കാട്: കോട്ടോപ്പാടം കച്ചേരിപ്പറമ്പ് വിവിധ പാർട്ടികളിൽനിന്നും രാജിവച്ച് കോൺഗ്രസിൽ ചേർന്നവർക്കു സ്വീകരണം നൽകി. ഡിസിസി പ്രസിഡന്‍റ് എ. തങ്കപ്പൻ ഉദ്ഘാടനം ചെയ്തു. പ്രവാസി കോൺഗ്രസ് മണ്ണാർക്കാട് ബ്ലോക്ക് സെക്രട്ടറി ടി.കെ. ഇപ്പു അധ്യക്ഷത വഹിച്ചു. കെപിസിസി സെക്രട്ടറി വി. ബാബുരാജ് മുഖ്യപ്രഭാഷണം നടത്തി. ഡിസിസി സെക്രട്ടറി പി. അഹമ്മദ് അഷറഫ്, ബ്ലോക്ക് കോൺഗ്രസ് പ്രസിഡന്‍റ് അസീസ് ഭീമനാട്, കോൺഗ്രസ് മണ്ഡലം പ്രസിഡന്‍റ് ഉമ്മർ മനച്ചിതൊടി, യൂത്ത് കോൺഗ്രസ് നിയോജകമണ്ഡലം പ്രസിഡന്‍റ് പി.കെ. നസീർ ബാബു, ബ്ലോക്ക് കോൺഗ്രസ് സെക്രട്ടറി നൗഫൽ താളിയിൽ, കർഷക കോൺഗ്രസ് ബ്ലോക്ക് പ്രസിഡന്‍റ് കെ.ജി. ബാബു, പ്രവാസി കോൺഗ്രസ് ജില്ലാ പ്രസിഡന്‍റ് സക്കീർ തയ്യിൽ, സംസ്ഥാന സെക്രട്ടറി നാസർ മറുകര, മഹിള കോൺഗ്രസ് നിയോജകമണ്ഡലം പ്രസിഡന്‍റ് ലൈല, മണ്ഡലം പ്രസിഡന്‍റ് ദീപാ ഷിന്‍റോ, യൂത്ത് കോൺഗ്രസ് മണ്ഡലം പ്രസിഡന്‍റ് ഷാനിർ മണലടി എന്നിവർ പ്രസംഗിച്ചു.

കൂൺകൃഷിയിൽ വിജയഗാഥ രചിച്ച് ശങ്കരംപാളയം ഗംഗാധരൻ

ചിറ്റൂർ: നൂതനവും ശാസ്ത്രീയവുമായ രീതിയിൽ കൂൺകൃഷി നടത്തി വിജയഗാഥ രചിച്ച് നല്ലേപ്പിള്ളി ശങ്കരാം പാളയം ഗംഗാധരനും കുടുംബവും. നാട്ടുകൽ ഗവ. കോളജിനു സമീപം 500 സ്ക്വയർഫീറ്റ് സ്ഥലത്ത് നാലുലക്ഷം മുലധന ചെലവിലാണ് കൂൺകൃഷിക്ക് കന്നിയങ്കം കുറിച്ചത്. പഴമയും പുതുമയും ഒത്തുചേർന്ന കൃഷിരീതി ഇവിടെ വേറിട്ടുനിൽക്കുന്നു. അറക്കപ്പൊടി നിരത്തിയാണ് കൂൺതിട്ട നിർമാണം. കാറ്റുംവെളിച്ചവും ലഭ്യമാകാൻ ആധുനിക സൗകര്യമൊരുക്കിയാണ് കൂൺപുരയും നിർമിച്ചിരിക്കുന്നത്. ഒരു കൂൺനിരപ്പിനു 70 മുതൽ 80 രൂപ ചെലവ് വരും. ഏകദേശം 2000 കൂൺബഡുകൾ ഉൾക്കൊള്ളുന്ന പുരയിലിപ്പോൾ 300 ബഡുകൾ ഏർപ്പെടുത്തിയിട്ടുണ്ട്. ദിവസേന മൂന്നുമുതൽ അഞ്ചുകിലോ വരെ വിളപ്പെടുപ്പും നടത്തുന്നുണ്ട്. ഗംഗാധരനും ഭാര്യ ചന്ദ്രികയും മകൻ ലികേഷും മരുമകൾ അക്ഷയയും ചേർന്നാണ് കൃഷിപരിപാലനം നടത്തിവരുന്നത്. സൂപ്പർമാർക്കറ്റ്, കുടുംബശ്രീ യൂണിറ്റൂകൾ, ഹോട്ടലുകൾ എന്നിവിടങ്ങളിലേക്കു നേരിട്ടു വിപണനം നടത്താനാണ് ഗംഗാധരന്‍റെ തീരുമാനം. ഗംഗാധരന്‍റെ വിജയഗാഥ മനസിലാക്കാൻ മേഖലയിലെ പച്ചക്കറികർഷകരും കൃഷിയിടത്തിൽ നിത്യസന്ദർശകരായി മാറിയിട്ടുണ്ട്.

അതിവേഗ റെയിൽപ്പാതയ്ക്ക് നടപടികൾ തുടങ്ങി

ഷൊർണൂർ: ഷൊർണൂർ മുതൽ കോയന്പത്തൂർ പോത്തനൂർവരെ അതിവേഗ റെയില്‌പാതയൊരുങ്ങുന്നു. പാതയിൽ ട്രെയിനുകളുടെ വേഗം 130 മുതൽ 160 കിലോമീറ്റർവരെ ഉയർത്താനുള്ള നടപടിക്രമങ്ങളിലാണ് റെയിൽവേ. ഇതിനുവേണ്ടുന്ന പ്രവൃത്തികൾ അതിവേഗം പുരോഗമിക്കുകയാണ്. പദ്ധതിയുടെ ഭാഗമായി റെയിൽപാളങ്ങൾക്കിരുവശങ്ങളും മതിൽകെട്ടി സുരക്ഷയൊരുക്കണം. ഇതിന്‍റെ നിർമാണ പ്രവൃത്തികൾ വിവിധ മേഖലകളിൽ നടന്നുവരികയാണ്. പദ്ധതി വരുമ്പോൾ മറ്റുയാത്രക്കാരുടെ സുരക്ഷയും ഉറപ്പാക്കേണ്ടതുണ്ട്. പാതയിൽ ഉൾപ്പെടുന്ന റെയിൽവേ ഗേറ്റുകൾ പൂർണമായും ഒഴിവാക്കാനാണ് തീരുമാനം. ഇത്തരത്തിൽ നിലവിൽ ഒരു പ്രധാന ഗേറ്റ് പ്രവർത്തിക്കുന്നത് ലക്കിടിയിലാണ്. തൃശൂർ ജില്ലയിലെ പാമ്പാടിയെയും പാലക്കാട് ജില്ലയിലെ ലക്കിടിയെയും ബന്ധിപ്പിക്കുന്നതാണ് ഈ ഗേറ്റ്. പാമ്പാടിയിലെ ഐവർമഠം, കോളജുകളിലേക്കും ആളുകൾ എത്തുന്നത് ഈ ഗേറ്റ് കടന്നാണ്. പാമ്പാടി ഭാഗത്തുള്ളവർ ആശുപത്രികൾക്കായും ട്രെയിൻ കയറാനും ആശ്രയിക്കുന്നത് ഒറ്റപ്പാലത്തേയുമാണ്. ഇതുകൊണ്ടുതന്നെ മേഖലയിൽ റെയിൽവേ മേൽപ്പാലം അത്യാവശ്യമാണന്നറിയിച്ചു കഴിഞ്ഞ ദിവസം കെ. രാധാക്യഷ്ണൻ എംപി കേന്ദ റെയിൽവേ മന്ത്രിക്ക് കത്തുനൽകിയിരുന്നു. ലക്കിടി ഗേറ്റ്, വല്ലാത്ത കടന്പ ഒരു ദിവസം 80 തവണയാണ് ലക്കിടി റെയിൽവേ ഗേറ്റ് അടയ്ക്കാറുള്ളത്. അതിൽ 35 തവണയോളം പകൽ സമയത്താണ്. 45 തവണയോളം രാത്രി സമയത്തും അടയ്ക്കും. ഇതോടെ ശവസംസ്കാരച്ചടങ്ങുകൾക്കായി മൃതദേഹവുമായി പോകുന്നവരുൾപ്പെടെ ഗേറ്റിൽ കുടുങ്ങും. ഇതിനുപുറമെ ഗേറ്റ് ഇടക്കിടെ തകരാറാകുന്നതും യാത്രക്കാരെ മണിക്കൂറുകൾ കുടുക്കും. നേരത്തെ മേൽപ്പാലത്തിനായി ബജറ്റിൽ ടോക്കൺ തുകയായി 20 കോടി രൂപ ഉൾപ്പെടുത്തുകയും 15 ലക്ഷം രൂപ ചെലവഴിച്ച് സാധ്യതാപഠനം പൂർത്തിയാക്കുകയും ചെയ്തിരുന്നു. ജില്ലാതിർത്തിയായ ചേലക്കര മണ്ഡലത്തിൽ എംഎൽഎയായിരിക്കുമ്പോഴും കെ. രാധാകൃഷ്ണൻ പാലം ആവശ്യത്തിനായി രംഗത്തെത്തിയിരുന്നു. റെയിൽ പാത അതിവേഗപാതയാക്കുന്നതിന്‍റെ ഭാഗമായി പ്രദേശത്ത് മേൽപ്പാലം വരുമെന്ന ഉറച്ച വിശ്വാസത്തിലാണ് പ്രദേശവാസികൾ.

അട്ടപ്പാടിയിൽ ആദിവാസിശിശു മരിച്ചു

അഗളി: അട്ടപ്പാടിയിൽ ഒന്നരവയസുള്ള ആദിവാസിശിശു മരിച്ചു. കാവണ്ടിക്കൽ നക്കപ്പതി ഉന്നതിയിലെ രമേശിന്‍റെ മകൻ അശ്വിൻ ആണ് മരിച്ചത്. മൂന്നുദിവസമായി പനിബാധിച്ച് കുട്ടി ചികിത്സയിലായിരുന്നു എന്നു പറയുന്നു. തിങ്കളാഴ്ച അഗളി സിഎച്ച്സിയിൽ ചികിത്സ തേടിയിരുന്നതായും മരുന്നു വാങ്ങി വീട്ടിലേക്കു മടങ്ങിയതായും ബന്ധുക്കൾ പറഞ്ഞു. പനി അധികരിച്ചതോടെ ഇന്നലെ രാവിലെ ഏഴുമണിയോടെ അഗളി സ്വകാര്യ ആശുപത്രിയിൽ എത്തിച്ചെങ്കിലും കുട്ടി മരിച്ചിരുന്നു. കുട്ടിയുടെ അമ്മ നെഞ്ചി ഒരുവർഷംമുമ്പ് മരണപ്പെട്ടിരുന്നു. രമേശ് - നെഞ്ചി ദമ്പതികളുടെ മൂന്നാമത്തെ കുട്ടിയാണ് അശ്വിൻ. മൃതദേഹം പോസ്റ്റ്മോർട്ടത്തിനായി പാലക്കാട് ജില്ലാ ആശുപത്രിയിലേക്ക് മാറ്റി.

ജില്ലയിലെ തരിശുഭൂമികൾ കൃഷിയോഗ്യമാക്കും: മന്ത്രി കെ. കൃഷ്ണൻകുട്ടി

പാലക്കാട്: ജില്ലയിലെ തരിശുഭൂമികൾ കൃഷിയോഗ്യമാക്കി മാറ്റണമെന്ന് വൈദ്യുതിമന്ത്രി കെ.കൃഷ്ണൻകുട്ടി. നവീന കൃഷിരീതികൾ അവലംബിച്ചുകൊണ്ട് ഉത്പാദനക്ഷമത വർധിപ്പിക്കണമെന്നും മന്ത്രി പറഞ്ഞു. കേരപദ്ധതി നിർവഹണ സ്ഥാപനങ്ങളിലെ ഉദ്യോഗസ്ഥർക്കായി സംഘടിപ്പിച്ച ബോധവത്കരണ ശില്പശാല ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. കർഷകർക്ക് ന്യായവില ഉറപ്പാക്കണം. കാർഷികോത്പന്നങ്ങൾ നേരിട്ട് വിൽക്കാതെ മൂല്യവർധിത ഉത്പന്നങ്ങളാക്കി മാറ്റാനുള്ള ശ്രമങ്ങൾ ഉണ്ടാകണം. ശാസ്ത്രീയമായ കൃഷിരീതികൾ പിന്തുടരേണ്ടതിന്‍റെ പ്രാധാന്യവും മന്ത്രി സൂചിപ്പിച്ചു. കേരളത്തിലെ കാർഷികമേഖലയുടെ സുസ്ഥിരവളർച്ചയും കാലാവസ്ഥാ വ്യതിയാനത്തെ പ്രതിരോധിച്ചുകൊണ്ടുള്ള കൃഷിരീതികളിലൂടെ വരുമാനവർധനവും ലക്ഷ്യമിട്ട് ലോകബാങ്ക് സഹായത്തോടെ കൃഷിവകുപ്പ് നടപ്പാക്കുന്ന പദ്ധതിയാണ് കേര. മാറുന്ന കാലാവസ്ഥയ്ക്ക് അനുയോജ്യമായ കൃഷിരീതികൾ പ്രോത്സാഹിപ്പിക്കാനും കാർഷികോത്പന്നങ്ങളുടെ ഉത്പാദനവും മൂല്യവർധനയും വിപണനവും വർധിപ്പിക്കാനും കർഷകർക്കിടയിൽ സംരംഭകത്വം വളർത്തിയെടുക്കാനുമാണ് കേര പദ്ധതി പ്രധാനമായും ലക്ഷ്യമിടുന്നത്. കാർഷിക പാരിസ്ഥിതിക യൂണിറ്റുകൾ അടിസ്ഥാനമാക്കി ഓരോ പ്രദേശങ്ങൾക്കും അനുസൃതമായ കൃഷിരീതികൾ നടപ്പിലാക്കാനും ചെറുകിട, ഇടത്തരം സംരംഭങ്ങൾക്ക് പ്രത്യേക സഹായവും കേരപദ്ധതിയിലൂടെ വിഭാവനം ചെയ്യുന്നുണ്ട്. റബർ, കാപ്പി, ഏലം തുടങ്ങിയ വിളകളുടെ പുനരുജീവനത്തിനും കർഷക ഉത്പാദക കന്പനികൾ, അഗ്രി സ്റ്റാർട്ടപ്പുകൾ, അഗ്രി പാർക്കുകൾ എന്നിവയുടെ സമഗ്ര വികസനത്തിനുമായി പ്രത്യേക പദ്ധതികളും ഉൾപ്പെടുത്തിയിട്ടുണ്ട്. ഇന്‍റർനാഷണൽ റൈസ് റിസർച്ച് ഇൻസ്റ്റിറ്റ്യൂട്ട്, കേരള കാർഷിക സർവകലാശാല, വ്യവസായ വാണിജ്യ വകുപ്പ്, ജലസേചന വകുപ്പ്, കിൻഫ്ര, സ്റ്റാർട്ടപ്പ് മിഷൻ, പ്ലാന്‍റേഷൻ ഡയറക്ടറേറ്റ്, മണ്ണ് പര്യവേഷണ സംരക്ഷണ വകുപ്പ്, സ്പൈസസ് ബോർഡ്, കോഫി ബോർഡ്, റബർബോർഡ്, വിഎഫ്പിസികെ സ്ഥാപനങ്ങളുടെ പങ്കാളിത്തത്തോടെ കൃഷിവകുപ്പാണ് പദ്ധതി നടപ്പിലാക്കുന്നത്. പരിപാടിയിൽ രാഹുൽ മാങ്കൂട്ടത്തിൽ എംഎൽഎ അധ്യക്ഷനായി. മുൻസിപ്പൽ ചെയർപേഴ്സണ്‍ പ്രമീള ശശിധരൻ മുഖ്യാതിഥിയായി. കേരസെൽ കോ-ഓർഡിനേറ്റർ ഡോ.എസ്. ലത, ജില്ലാ കൃഷി ഓഫീസർ അറുമുഖ പ്രസാദ്, ആത്മ പ്രൊജക്റ്റ് ഡയറക്ടർ എൻ. ഷീല, ജില്ലാ വ്യവസായകേന്ദ്രം മാനേജർ എം. ഗിരീഷ്, അസി. എക്സിക്യൂട്ടീവ് എൻജിനീയർ പി.അരുണ്‍, റീജണൽ പ്രൊജക്ട്് ഡയറക്ടർ ഉണ്ണിരാജൻ, ജോസഫ് ജോണ്‍ തേറാട്ടിൽ എന്നിവർ പങ്കെടുത്തു.

വൈദ്യുതിലൈൻ റോഡ് വഴിയാക്കണമെന്ന ആവശ്യം ശക്തമാക്കി മലയോരകർഷകർ

വടക്കഞ്ചേരി: പാലക്കുഴി മലമ്പ്രദേശത്തേക്കുള്ള വൈദ്യുതി ലൈൻ കണിച്ചിപരുതയിൽ നിന്നും റോഡ് വഴിയാക്കണമെന്ന ആവശ്യം ശക്തമാക്കി മലയോരവാസികൾ സമരരംഗത്തേക്ക്. നിലവിൽ താഴെ കൊന്നക്കൽകടവിൽനിന്നും കുത്തനെയുള്ള മലഞ്ചെരുവിലൂടെ കാടിനുള്ളിലൂടെയാണ് വൈദ്യുതിലൈൻ ഇരിക്കണപാറ വഴി പാലക്കുഴി അഞ്ചുമുക്കിലെത്തുന്നത്. കാടിനുള്ളിലെ ലൈനിൽ ഇടയ്ക്കിടെ മരംവീണും മരക്കൊമ്പ് വീണും ദിവസങ്ങളോളം വൈദ്യുതി മുടങ്ങുന്ന സ്ഥിതിയാണ്. കഴിഞ്ഞ മൂന്ന് ദിവസമായും പാലക്കുഴിയിൽ കറന്‍റില്ല. ഇതുമൂലം വൈദ്യുതോപകരണങ്ങളും കുടിവെള്ള സംവിധാനങ്ങളും താറുമാറായി. മൊബൈൽ ഫോൺ ചാർജ് ചെയ്യാൻ പോലും കഴിയാതെ ബുദ്ധിമുട്ടുകയാണ് മലയോര കർഷക കുടുംബങ്ങൾ. കുട്ടികളുടെ വിദ്യാഭ്യാസ സൗകര്യങ്ങൾ പോലും മുടങ്ങുന്ന സ്ഥിതിയായി. കറന്‍റില്ലാതെ ഫ്രിഡ്ജിൽ സൂക്ഷിക്കുന്ന അവശ്യമരുന്നുകൾ ഉൾപ്പെടെ സാധനങ്ങളെല്ലാം കേടുവന്നതായി ഊന്നുപാലത്തിൽ ജോസ് പറഞ്ഞു. കഴിഞ്ഞവർഷം ജൂലൈ ഒടുവിലും ഇത്തരത്തിൽ ഒരാഴ്ചയോളം കറന്‍റ് ഇല്ലാത്ത സ്ഥിതി വന്നു. മലഞ്ചെരുവിൽ ഉരുൾപൊട്ടലുണ്ടായി പോസ്റ്റുകൾ കൂട്ടത്തോടെ തകരുകയായിരുന്നു. പിന്നീട് പഞ്ചായത്ത് മെംബർ പോപ്പി ജോണിന്‍റെ നേതൃത്വത്തിൽ പാലക്കുഴിയിലെ നാല്പതോളം ചെറുപ്പക്കാർ സംഘടിച്ച് വടംകെട്ടി പോസ്റ്റുകൾ താഴെ ഇറക്കിയാണ് ലൈനുകൾ സ്ഥാപിച്ച് വൈദ്യുതി വിതരണം പുനഃസ്ഥാപിച്ചത്. താഴെ കൊന്നക്കൽകടവിൽ നിന്നും കിലോമീറ്ററുകളേറെ ദൂരം വൈദ്യുതി ലൈൻ കടന്നുപോകുന്നത് തെന്നുന്ന പാറക്കൂട്ടങ്ങളും പെരുംകാടിനുളളിലൂടെയാണ്. ഇതിനാൽ എവിടെയാണ് ലൈൻ തകരാർ എന്ന് കണ്ടുപിടിക്കാൻ പോലും പലപ്പോഴും സമയമെടുക്കുന്ന സാഹചര്യമുണ്ട്. കരടി, പുലി തുടങ്ങിയ കാട്ടുമൃഗങ്ങളുള്ള പ്രദേശത്തുകൂടിയാണ് ലൈൻ പോകുന്നത്. ഇതിനാൽ അതിസാഹസികമായ പരിശോധന നടത്തിയാണ് തകരാർ കണ്ടെത്തി പലപ്പോഴും വൈദ്യുതി പുനഃസ്ഥാപിക്കൽ പ്രക്രിയ നടക്കുന്നത്. കണച്ചിപരുതയിൽ നിന്നുള്ള ടാർ റോഡിലൂടെ പൂതനക്കയം വരെ വൈദ്യുതി ലൈൻ എത്തിയിട്ടുണ്ട്. അവിടെ നിന്നും നാലു കിലോമീറ്റർ കൂടി ലൈൻ വലിച്ചാൽ പോസ്റ്റുകളുള്ള പാലക്കുഴി അഞ്ചുമുക്കിലെത്തും. പാലക്കുഴികാർ നിരവധി തവണ ആവശ്യപ്പെടുന്നതാണ് ഇക്കാര്യം. വൈദ്യുതി ലൈൻ റോഡ് വഴിയാക്കിയാൽ അത് കെഎസ്ഇബി ക്കും വലിയ ആശ്വാസമാകും. ദിവസങ്ങൾ നീളുന്ന ലൈൻ വർക്കുകളും ഇതോടെ ഒഴിവാകും. ഇക്കാര്യത്തിൽ അധികൃതരുടെ ഭാഗത്തുനിന്നും അനുകൂലമായ നടപടികൾ ഇനിയും വൈകിയാൽ സമരമാർഗമല്ലാതെ തങ്ങൾക്കു മുന്നിൽ മറ്റുവഴികളില്ലെന്നാണ് മലയോരകർഷകർ പറയുന്നത്.

കെഎസ്ആർടിസി കെട്ടിടത്തിന്‍റെ കോൺക്രീറ്റ് പാളികൾ നിലംപതിക്കുന്നു

ചിറ്റൂർ: കെഎസ്ആർടിസി ഡിപ്പോയിലെ കോൺക്രീറ്റ് അടർന്നുവീണത് ആശങ്ക പരത്തി. കെട്ടിടത്തിന്‍റെ കാലപ്പഴക്കം കാരണം സ്റ്റേഷൻമാസ്റ്ററുടെ മുറിയിൽ ജനലുകൾപോലും ചിതലരിച്ച് നശിച്ചിട്ടുണ്ട്. കെട്ടിടത്തിന്‍റെ വിശ്രമമുറിയുടെ കോൺക്രീറ്റാണ് അടർന്നുവീണത്. വീണസമയത്ത് ജീവനക്കാരുണ്ടാവാതിരുന്നതിനാൽ അനിഷ്ട സംഭവം ഒഴിവായി. മെക്കാനിക്കൽ വിഭാഗത്തിന്‍റെ വിശ്രമമുറിയിലെ മേൽക്കൂരയുടെ കോൺക്രീറ്റ് ആണ് താഴേക്ക് വീണത്. രണ്ടുദിവസംമുന്പും വിശ്രമമുറിയുടെ സമീപത്തായി മെയിൻ സ്വിച്ച് സ്ഥാപിച്ചിരിക്കുന്ന മുറിയുടെ മേൽക്കൂരയിൽ നിന്നും കോൺക്രീറ്റ് അടർന്നുവീണിരുന്നു. കൂടാതെ അസിസ്റ്റന്‍റ് ഡിപ്പോ എൻജിനീയറുടെ മുറി, സബ് സ്റ്റോർ, സ്റ്റേഷൻ മാസ്റ്ററുടെ മുറിക്കു മുന്നിലെ വരാന്തയിലും മേൽക്കൂരയുടെ കോൺക്രീറ്റ് അടർന്നിട്ടുണ്ട്. ഡിപ്പോയിലെ ഏഴോളം ശുചിമുറിയുടെയും മേൽക്കൂരയുടെ ഭിത്തി പരിതാപകരമാണ്. കഴിഞ്ഞ വെള്ളിയാഴ്ച കെഎസ്ആർടിസി ഡിപ്പോയിൽ ഇ -സുതാര്യം സോഫ്റ്റ്‌വെയറിന്‍റെ ഉദ്ഘാടനം നടന്നിരുന്നു. ഉദ്ഘാടന ചടങ്ങിനെത്തിയ നഗരസഭ അധ്യക്ഷയോട് ജീവനക്കാർ വിവരം അറിയിച്ചിരുന്നു. 1991 ലാണ് ചിറ്റൂർ കെഎസ്ആർടിസി ഡിപ്പോയുടെ ഉദ്ഘാടനം നടന്നത്. അതിനുശേഷം അറ്റകുറ്റപ്പണികൾ ഒന്നും നടന്നിട്ടില്ലെന്നും വാർഡ് കൗൺസിലർ കെ.സി. പ്രീത് അറിയിച്ചു. ഡിപ്പോയ്ക്ക് പുതിയകെട്ടിടം നിർമിക്കുന്നതിനായി രണ്ടു കോടി രൂപ അനുവദിച്ചിട്ടുണ്ടെന്ന് നഗരസഭാ അധ്യക്ഷ കെ.എൽ. കവിത അറിയിച്ചു.

രാമനാഥപുരം രൂപതയിൽ വിശുദ്ധ അൽഫോൻസാമ്മയുടെ തിരുനാൾ ആചരിച്ചു

കോയമ്പത്തൂർ: സിറോ മലബാർസഭയുടെ പ്രഥമ വിശുദ്ധയായ വിശുദ്ധ അൽഫോൻസാമ്മയുടെ തിരുനാൾ രാമനാഥപുരം രൂപതയുടെ ആഭിമുഖ്യത്തിൽ രാമനാഥപുരം ഹോളി ട്രിനിറ്റി കത്തീഡ്രലിൽ രൂപതാധ്യക്ഷൻ മാർ പോൾ ആലപ്പാട്ടിന്‍റെ കാർമികത്വത്തിൽ വിശുദ്ധ കുർബാനയോടെ ആചരിച്ചു. രാമനാഥപുരം ഫൊറോന വികാരി ഫാ. മാർട്ടിൻ പട്ടരുമഠത്തിൽ, സെക്രട്ടറി ഫാ. ആന്‍റണി കൂട്ടുങ്ങൽ, രൂപത വിശ്വാസ പരിശീലന ഡയറക്ടർ ഫാ. അമല്‍ പാലാട്ടി, ഇടവക അസിസ്റ്റന്‍റ് വികാരി ഫാ. മെൽവിൻ ചൊവ്വല്ലൂർ എന്നിവർ സഹകാർമികരായിരുന്നു. തുടർന്ന് ലദീഞ്ഞും നൊവേനയും പ്രദക്ഷിണവും നടന്നു. തിരുനാൾ ആഘോഷങ്ങൾക്ക് രാമനാഥപുരം സെന്‍റ് ജോർജ് എഫ്സിസി സന്യാസസമൂഹം നേതൃത്വം നല്കി. എഫ്സിസി പാലക്കാട് സെറാഫിക് പ്രൊവിൻസ് പ്രൊവിൻഷ്യാൾ, രൂപതയിലെ വിവിധ സന്യാസ സമൂഹങ്ങളുടെയും ഇടവകകളുടെയും സംഘടനകളുടെയും പ്രതിനിധികൾ എന്നിവർ ഇടവകാംഗങ്ങളോടൊപ്പം തിരുനാൾ ആഘോഷങ്ങളിൽ പങ്കെടുത്തു.

കന്യാസ്ത്രീകളുടെ അറസ്റ്റ്: ഇന്ത്യൻ മതേതരത്വത്തിനേറ്റ കളങ്കം: കത്തോലിക്ക കോൺഗ്രസ്

പാലക്കാട്: ഛത്തീസ്‌ഗഡിലെ ദുർഗ് റെയിൽവേ സ്റ്റേഷനിൽ കഴിഞ്ഞദിവസം നടന്നത് ഇന്ത്യൻ മതേതരത്വത്തിനേറ്റ വലിയ കളങ്കമാണെന്ന് കത്തോലിക്ക കോൺഗ്രസ് പാലക്കാട് രൂപതാസമിതി. ആഗ്രയിലെ അസീസി സിസ്റ്റേഴ്സ് നടത്തുന്ന ആശുപത്രിയിലേക്ക് ക്രിസ്തീയവിശ്വാസികളായ പ്രായപൂർത്തിയായ സ്ത്രീകളെ ജോലിക്കായി കൊണ്ടുപോയ സിസ്റ്റേഴ്സിനെ ഒരു കാരണവുമില്ലാതെ ഗുരുതരവകുപ്പുകൾ ചേർത്ത് ജയിലിൽ അടച്ചത് സ്വതന്ത്ര ഇന്ത്യാചരിത്രത്തിൽ കേട്ടുകേൾവിയില്ലാത്ത സംഭവമാണ്. റെയിൽവേ സ്റ്റേഷനിൽ ടിടിആറിന്‍റെയും റെയിൽവെ പോലീസിന്‍റെയും ഒത്താശയോടെ ബജ്‌രംഗ്ദൾ പ്രവർത്തകർ ആക്ഷേപിക്കുകയും പോലീസിനെ ഉപയോഗിച്ച് ഗുരുതരകുറ്റങ്ങൾ ചുമത്തി അറസ്റ്റ് ചെയ്യുകയുമായിരുന്നു. ഇത് അത്യന്തം ഗുരുതരമായ മനുഷ്യാവകാശലംഘനവും ഇന്ത്യൻ ഭരണഘടനയോടുള്ള ഹീനമായ കടന്നുകയറ്റവും നഗ്നമായ ലംഘനവുമാണ്. നിയമവിരുദ്ധമായി ഒന്നും ചെയ്തിട്ടില്ലാത്ത കന്യാസ്ത്രീകളെ നിരുപാധികം വിട്ടയക്കാനുള്ള നടപടികൾ കേന്ദ്രസർക്കാരും ഛത്തീസ്ഗഡ് സർക്കാരും ചേർന്ന് സ്വീകരിക്കേണ്ടതും ഇവർക്കെതിരെ നടന്ന ക്രിമിനൽ ഗൂഢാലോചനയെകുറിച്ച് അന്വേഷിച്ച് കുറ്റക്കാർക്കെതിരെ ശക്തമായ നിയമനടപടികൾ സ്വീകരിക്കേണ്ടതുമാണെന്നും യോഗം ചൂണ്ടിക്കാട്ടി. യോഗത്തിൽ രൂപത പ്രസിഡന്‍റ് അഡ്വ. ബോബി ബാസ്റ്റിൻ അധ്യക്ഷത വഹിച്ചു. ഡയറക്ടർ ഫാ. ചെറിയാൻ ആഞ്ഞിലിമൂട്ടിൽ പ്രതിഷേധ പ്രമേയം അവതരിപ്പിച്ചു. രൂപത ജനറൽ സെക്രട്ടറി ആന്‍റണി കുറ്റിക്കാടൻ, ഗ്ലോബൽ വൈസ് പ്രസിഡന്‍റ് തോമസ് ആന്‍റണി, ട്രഷറർ ജോസ് മുക്കട, ഗ്ലോബൽ സെക്രട്ടറി ഡെന്നി തെങ്ങുംപള്ളി, രൂപത വൈസ് പ്രസിഡന്‍റ് ജോസ് വടക്കേക്കര, ജോമി മാളിയേക്കൽ, ജീജോ അറയ്ക്കൽ തുടങ്ങിയവർ പങ്കെടുത്തു.

ഉപയോഗശൂന്യമായ വസ്തുക്കൾ ശേഖരിക്കാൻ കോർപറേഷൻ

കോയന്പത്തൂർ: വീടുകളിൽനിന്ന് വലിച്ചെറിയുന്ന പഴയ കിടക്കകൾ, സോഫകൾ, മെത്തകൾ, മേശകൾ, കസേരകൾ, മറ്റ് വലിയ ഗാർഹിക മാലിന്യങ്ങൾ എന്നിവ ശരിയായ രീതിയിൽ സംസ്കരിക്കുന്നതിനായി കോയമ്പത്തൂർ മുനിസിപ്പൽ കോർപറേഷൻ ഓഗസ്റ്റ് രണ്ട്, മൂന്ന് തീയതികളിൽ പ്രത്യേക ശേഖരണ ക്യാമ്പ് സംഘടിപ്പിക്കും. ഈ രണ്ടുദിവസങ്ങളിൽ ആളുകൾക്ക് അവരുടെ വീടുകളിൽനിന്ന് വാർഡ് തിരിച്ചുള്ള കളക്്ഷൻ പോയിന്‍റുകളിൽ കൊണ്ടുവന്ന് കൈമാറാം. മാലിന്യങ്ങൾ തെരുവുകളിലോ റോഡുകളിലോ മറ്റു പൊതുസ്ഥലങ്ങളിലോ ഉപേക്ഷിക്കുന്നതു തടയുകയാണ് ലക്ഷ്യം. വാർഡ് ഓഫീസുകളും സോണൽ ഓഫീസുകളും ശേഖരണ കേന്ദ്രങ്ങളായി പ്രവർത്തിക്കും. കൂടുതൽ വിവരങ്ങൾക്ക് വാർഡ് ഹെൽത്ത് സൂപ്പർവൈസറെ ബന്ധപ്പെടാം. കൂടുതൽ വിവരങ്ങൾക്ക് നോർത്തേൺ മേഖല- 8925975980. വെസ്റ്റേൺ- 8925975981. സെൻട്രൽ- 8925975982. സതേൺ- 9043066114. ഈസ്റ്റേൺ- 8925840945 ഹെൽപ്‌ലൈൻ നന്പറുകളിൽ ബന്ധപ്പെടാം.

കരിന്പനകളെ ചേർത്തുപിടിച്ച് എൻഎസ്എസ് വോളന്‍റിയർമാർ

ഒലവക്കോട്: അകത്തേത്തറ എൻഎസ്എസ് എൻജിനീയറിംഗ് കോളജ് നാഷണൽ സർവീസ് സ്കീം യൂണിറ്റുകളുടെ ആഭിമുഖ്യത്തിൽ കോളജ് പരിസരത്ത് കരിന്പനനടീൽ പ്രവർത്തനത്തിനു തുടക്കംകുറിച്ചു. നേച്ചർ ഗാർഡ്സ് ഇനിഷ്യേറ്റീവ്, കരിമ്പനക്കൂട്ടം സംഘടനകളുടെ സഹകരണത്തോടെയാണ് പദ്ധതിക്കു തുടക്കമിട്ടത്. ദേശീയ ഹരിതസേന ജില്ലാ കോ- ഓർഡിനേറ്റർ എസ്. ഗുരുവായൂരപ്പൻ ഉദ്ഘാടനം നിർവഹിച്ചു. മുന്നൂറോളം കരിമ്പന വിത്തുകളാണ് നട്ടുപിടിപ്പിച്ചത്. എൻഎസ്എസ് പ്രോഗ്രാം ഓഫീസർ പ്രഫ.വി.എസ്. സജിത്ത്, ഭൂമിത്രസേന കോ-ഓർഡിനേറ്റർ പ്രദീപ് കുമാർ, എൻഎസ്എസ് കോ-ഓർഡിനേറ്റർമാർ, പരിസ്ഥിതിപ്രവർത്തകൻ ശ്യാംകുമാർ തേങ്കുറിശ്ശി , കരിമ്പനക്കൂട്ടം പ്രവർത്തകർ നേതൃത്വം നൽകി.

മണ്ണൂരിൽ നീന്തല്‍പരിശീലനം സമാപിച്ചു

മണ്ണൂര്‍: ഗ്രാമപഞ്ചായത്തിന്‍റെ നേതൃത്വത്തില്‍ നടത്തുന്ന നീന്തല്‍ പരിശീലനം സമാപിച്ചു. സമാപനപരിപാടി കെ. ശാന്തകുമാരി എംഎല്‍എ ഉദ്ഘാടനം ചെയ്തു. മണ്ണൂര്‍ ഗ്രാമപഞ്ചായത്ത് പ്രസിഡന്‍റ് എസ്. അനിത അധ്യക്ഷയായി. തുടര്‍ച്ചയായി ഏഴാം വര്‍ഷവും സൗജന്യ നീന്തല്‍പരിശീലനം നല്‍കുന്ന പരിശീലക ഹസീനയെ പരിപാടിയുടെ ഭാഗമായി ആദരിച്ചു. പത്തിരിപ്പാല യാസീന്‍ നഗര്‍ സ്വദേശിനിയായ ഹസീന ഈ വര്‍ഷം 48 വിദ്യാര്‍ഥികളെയാണ് സൗജന്യമായി നീന്തല്‍ പരിശീലിപ്പിച്ചത്. ഗ്രാമപഞ്ചായത്ത് വൈസ് പ്രസിഡന്‍റ് ഒ.വി. സ്വാമിനാഥന്‍, വാര്‍ഡ് അംഗം എ. ശിഹാബ്, നഗരിപ്പുറം ബാങ്ക് ഡയറക്ടര്‍ എസ്. നജീബ് പ്രസംഗിച്ചു.

മംഗലംഡാമിലെ വനപാലകർക്കു കുടകൾ നൽകി റോട്ടറി ക്ലബ് ഓഫ് ഗ്രീൻസിറ്റി പാലക്കാട്

മംഗലംഡാം: വടക്കഞ്ചേരി കേന്ദ്രമായി പ്രവർത്തിക്കുന്ന റോട്ടറി ക്ലബ് ഓഫ് പാലക്കാട് ഗ്രീൻസിറ്റിയുടെ പുതിയ ഭാരവാഹികളുടെ സ്ഥാനാരോഹണവുമായി ബന്ധപ്പെട്ട് മംഗലംഡാം ഫോറസ്റ്റ് റേഞ്ച് ഓഫീസിലെ മുഴുവൻ ജീവനക്കാർക്കും കുടകൾ നൽകി. റേഞ്ച് ഓഫീസിൽ നടന്ന ചടങ്ങിൽ ക്ലബ് പ്രസിഡന്‍റ് വിക്രം കെ. ദാസ്, സെക്രട്ടറി എൻ. മോഹൻദാസ്, ജിജിആർ സി. സഹദേവൻ, ടി. രഘുനാഥൻ, വി. വിജയകുമാർ, റേഞ്ച് ഓഫീസർ കെ.എ. മുഹമ്മദ് ഹാഷിം, സെക്്ഷൻ ഫോറസ്റ്റ് ഓഫീസർ കെ. സന്തോഷ് കുമാർ, ബീറ്റ് ഫോറസ്റ്റ് ഓഫീസർമാരായ യു. രമേശ്, എൻ. ദിവ്യ, എൻ. സജിത, കെ.പി. അജീഷ് പങ്കെടുത്തു.

ജിൻസ് വർഗീസ്: ഇന്ത്യൻ ബേസ്ബോൾ ടീമിലെ ചുണക്കുട്ടി

കരിന്പ: നേപ്പാളിൽ ഇക്കഴിഞ്ഞ 18 മുതൽ 21വരെ നടന്ന അന്താരാഷ്ട്ര സോഫ്റ്റ് ബേസ്ബോൾ ടൂർണമെന്‍റിലെ കിരീടനേട്ടത്തിന്‍റെ തിളക്കം ഇടക്കുറുശിയിലും. ഇന്ത്യൻ ടീമിലെ ഏക മലയാളിസാന്നിധ്യം കൂടിയായിരുന്നു ഇടക്കുറിശി ഓമച്ചേരിൽ ജിൻസ് വർഗീസെന്ന ഇരുപത്തിനാലുകാരൻ. നേപ്പാളിനെതിരേയായിരുന്നു കിരീടപോരാട്ടം. ഇക്കഴിഞ്ഞ മേയിൽ മഹാരാഷ്ട്രയിൽ നടന്ന ഫെഡറേഷൻ കപ്പ് നാഷണൽ ചാമ്പ്യൻഷിപ്പിലെ സ്വർണമെഡൽ നേട്ടത്തിനു പിന്നാലെയാണ് അന്താരാഷ്ട്ര കിരീടജേതാവെന്ന പട്ടവും ജിൻസിനെ തേടിയെത്തിയത്. കാലിക്കട്ട് സർവകലാശാലയിലെ ഫിസിക്കൽ എഡ്യൂക്കേഷൻ ബിരുദധാരിയായ ജിൻസ് നിലവിൽ തിരുവല്ല മാർ അത്തനാത്തിയോസ്‌ കോളജ് ഫോർ അഡ്വാൻസ്ഡ് സ്റ്റഡീസിലെ ഫിസിക്കൽ എഡ്യൂക്കേഷൻ അസിസ്റ്റന്‍റ് പ്രഫസറാണ്. ഓമച്ചേരിൽ കുടുംബത്തിലെ സജിയുടെയും കരിമ്പ സെന്‍റ് മേരീസ് ബഥനി സ്കൂൾ അധ്യാപികയായ അൽഫോൻസയുടെയും ഇളയ മകനാണ്. ജിസ് വർഗീസ്, ജിൽസ വർഗീസ് എന്നിവർ സഹോദരങ്ങൾ.

വനംവകുപ്പിന്‍റെ തേക്ക് റീപ്ലാന്‍റിംഗ് ടാർറോഡിനുചേർന്ന് ; കരിങ്കയത്ത് പ്രതിഷേധം

മംഗലംഡാം: ടാർ റോഡിനോടുചേർന്ന് തേക്കിൻതൈ നട്ട് വനംവകുപ്പ് വാഹനങ്ങൾക്കും മറ്റു യാത്രികർക്കും ബുദ്ധിമുട്ടുണ്ടാക്കുന്നതായി പരാതി. കരിങ്കയം ഫോറസ്റ്റ് ഓഫീസിനു സമീപം ഓടംതോട് റോഡിലാണ് റീപ്ലാന്‍റിംഗിന്‍റെ ഭാഗമായി റോഡിനോടുചേർന്ന് തേക്കിൻതൈകൾ നടുന്നത്. മരം വളരുന്നതോടെ തേക്കിന്‍റെ കമ്പുകൾ റോഡിലേക്കുവളർന്ന് വാഹനയാത്ര ബുദ്ധിമുട്ടിലാക്കുമെന്ന് ചൂണ്ടിക്കാട്ടുന്നു. തടസം വരുന്ന കമ്പുകൾപോലും പിന്നീട് മുറിക്കാൻ വനംവകുപ്പ് അനുമതിനൽകാത്ത സ്ഥിതിയുണ്ടാകും. ഇതിനാൽ തൈ നടുമ്പോൾ തന്നെ റോഡിൽ നിന്നും നിശ്ചിത ദൂരം പിറകോട്ട് മാറ്റി തേക്ക് പ്ലാന്‍റേഷൻ നടത്തണമെന്നാണ് നാട്ടുകാരുടെ ആവശ്യം.

കനത്ത മഴ ഒഴിവായത് വടക്കഞ്ചേരി മേഖലയ്ക്ക് ആശ്വാസം

വടക്കഞ്ചേരി: മേഖലയിൽ ഇന്നലെ പകൽസമയം കനത്ത മഴയില്ലാതിരുന്നത് വലിയ ആശ്വാസമായി. അതല്ലെങ്കിൽ കരിപ്പാലി പ്രദേശത്ത് നിരവധി വീടുകൾ മുങ്ങി നാശനഷ്ട കണക്കുകൾ ഉയരുമായിരുന്നു. പാലങ്ങൾ മുങ്ങി ഒഴുകിയിരുന്ന പുഴകളിലെ ജലനിരപ്പ് ഇന്നലെ വൈകീട്ടോടെ കുറഞ്ഞു. ഗതാഗതം പുനരാരംഭിക്കാനായി. പകൽ ചെറിയമഴ പെയ്തിരുന്നെങ്കിലും കനത്ത മഴ പെയ്തില്ല. ശനിയാഴ്ച രാത്രിയിലും കാര്യമായ മഴയുണ്ടായില്ല. മൂന്നുപഞ്ചായത്തുകളെ ബന്ധിപ്പിക്കുന്ന പാളയം- കരിപ്പാലി റോഡിലെ കരിപ്പാലി പാലമാണ് നേരത്തെ മുങ്ങിയത്. ഇതുമൂലം വാഹനഗതാഗതം തടസപ്പെട്ടിരുന്നു. പോത്തുണ്ടി ഡാം തുറന്നതും ഒലിപ്പാറ പ്രദേശത്തെ ശക്തമായ മഴയുമാണ് കരിപ്പാലി പുഴ പെട്ടെന്ന് കരകവിഞ്ഞൊഴുകാൻ കാരണമായത്. പാലം മുങ്ങിയും ജലനിരപ്പ് ഉയർന്നതോടെ ഈ പ്രദേശത്തെ ഏതാനും വീട്ടുകാർ ശനിയാഴ്ച രാത്രിയിൽ താമസം മാറിയിരുന്നു. മംഗലം ഡാമിന്‍റെ ഷട്ടറുകൾ കൂടുതൽ ഉയർത്തിയതും മംഗലം പുഴയിലും ജലനിരപ്പ് ഉയരാൻ കാരണമായി. ഉയരം കൂടിയ പുതിയ മംഗലം പാലത്തിൽ നിന്നും രണ്ടടി താഴെവരെ ജലനിരപ്പുയർന്ന് പുഴ ഒഴുകി.

വൈദ്യുതി പുനഃസ്ഥാപിക്കാൻ രണ്ടു ദിവസം: കെഎസ്ഇബി

പാലക്കാട്: ഒലവക്കോട് ഇലക്ട്രിക്കൽ സെക്്ഷൻ പരിധിയിലെ വെണ്ണക്കര, വള്ളിക്കോട്,വാർക്കാട്, പന്നിയമ്പാടം, ധോണി ഭാഗങ്ങളിൽ പൂർണമായും വൈദ്യുതി ബന്ധം പുനഃസ്ഥാപിക്കുന്നതിന് രണ്ടുദിവസവും കൂടി എടുക്കും. വെള്ളിയാഴ്ചയിലെ കനത്ത കാറ്റിലും മഴയിലും സെക്്ഷൻ പരിധിയിൽ 35 വൈദ്യുത തൂണുകൾ തകർന്നും നൂറോളം വൈദ്യുതി ലൈനുകൾ പൊട്ടുകയും ചെയ്തു. ലൈനിലേക്കുവീണ മരങ്ങൾ വെട്ടിമാറ്റിയും വൈദ്യുതി ലൈനിലെ തടസങ്ങൾ നീക്കംചെയ്തും സെക്്ഷനിലെ ഭൂരിഭാഗ പ്രദേശങ്ങളിലും വൈദ്യുതി പുനഃസ്ഥാപിച്ചിരുന്നു. കൂടുതൽ വൈദ്യുതി പോസ്റ്റുകൾ തകർന്ന വെണ്ണക്കര, വള്ളിക്കോട്, വാർക്കാട്, പന്നിയമ്പാടം, ധോണി പ്രദേശങ്ങളിൽ വൈദ്യുതിബന്ധം പൂർണമായും പുനഃസ്ഥാപിക്കുന്നതിനു പ്രവൃത്തികൾ നടത്തിവരുന്നതായി അധികൃതർ അറിയിച്ചു,

അടിപ്പെരണ്ടയിൽ കാണാതായ ആൾക്കുവേണ്ടി പുഴയിൽ തെരച്ചിൽ; കണ്ടെത്താനായില്ല

നെന്മാറ: അടിപ്പെരണ്ടയിൽ പുഴയിൽ കാണാതായ ആൾക്കുവേണ്ടി നടത്തിയ തെരച്ചിൽ വിഫലം. അടിപ്പെരണ്ട മണ്ണാംകുളമ്പ് എ. ഉമ്മർ ഫാറൂഖ് (45) നെയാണ് കഴിഞ്ഞദിവസം മുതൽ കാണാതായത്. ശക്തമായ മഴയുണ്ടായിരുന്ന ശനിയാഴ്ച വീട്ടിൽനിന്നു രാവിലെ പതിനൊന്നോടെ പുറത്തുപോയ ഉമ്മർ ഫാറൂഖ് മൂന്നുമണിയായിട്ടും തിരിച്ചെത്താത്തതിനെ തുടർന്നാണ് വീട്ടുകാർ അന്വേഷണം ആരംഭിച്ചത്. വീട്ടിൽ തന്നെ മൊബൈൽ വച്ചിരുന്നതിനാൽ പരിസരത്ത് അന്വേഷണം നടത്തുകയായിരുന്നു. അടിപ്പെരണ്ട പുഴയിൽ വെള്ളം ഉയരുമ്പോൾ ഒഴുകിവരുന്ന തേങ്ങ പിടിച്ചെടുക്കുന്ന ശീലം ഉണ്ടായിരുന്ന ഉമ്മർ ഫാറൂഖിനെ പുഴയോരത്ത് അന്വേഷണം നടത്തിയെങ്കിലും കഴിഞ്ഞ രാത്രിവരെ തുമ്പൊന്നും ലഭിച്ചിരുന്നില്ല. ശനിയാഴ്ച രാത്രിയോടെ പോലീസും ഫയർഫോഴ്സും സ്ഥലത്തെത്തി പുഴയുടെ സമീപത്ത് അന്വേഷണം നടത്തിയെങ്കിലും രാത്രിയായതോടെ അന്വേഷണം ഉപേക്ഷിക്കുകയായിരുന്നു. ഞായറാഴ്ച രാവിലെ നാട്ടുകാരും പോലീസും ഫയർഫോഴ്സും ചേർന്ന് നടത്തിയ അന്വേഷണത്തിലാണ് പുഴയോട് ചേർന്ന പള്ളത്താമടയിലെ തോട്ടത്തിനോടുചേർന്ന് ഉമർ ഫാറൂഖിന്‍റെ ചെരിപ്പുകൾ കണ്ടെത്തിയത്. ഇതോടെയാണ് ഒഴുക്കിൽപ്പെട്ടതായിരിക്കാം എന്ന സംശയം ഉയരാൻ ഇടയായത്. ആലത്തൂർ നിന്ന് അഗ്നിരക്ഷാസേനയും, നാട്ടുകാരും പോലീസും ചേർന്ന് ഇന്നലെരാവിലെ മുതൽ തെരച്ചിൽ ആരംഭിച്ചെങ്കിലും ഉച്ചയോടെ അടിപ്പരണ്ട പുഴയും ഒലിപ്പാറ പുഴയും സംഗമിക്കുന്ന അഞ്ചുകിലോമീറ്റർ ദൂരെയുള്ള രണ്ടുട്ടി വരെ അന്വേഷണം നീണ്ടെങ്കിലും തുമ്പൊന്നും കിട്ടിയില്ല. അന്വേഷണസംഘം വണ്ടാഴി പഞ്ചായത്തിലെ കരിപ്പാലി വരെ രാത്രി വൈകുംവരെ തെരച്ചിൽ തുടർന്നു. ഇവിടെ മംഗലംഡാമിൽ നിന്നും പോത്തുണ്ടി ഡാമിൽ നിന്നും ഉള്ള പുഴകളും കൂടെ ചേരുന്ന സ്ഥലമായതിനാൽ അമിതമായി പുഴയിൽ വെള്ളമുള്ളതിനാലും തെരച്ചിൽ ദുസഹമാണെന്ന് അന്വേഷണസംഘം പറഞ്ഞു.

മരംവീണും മണ്ണിടിഞ്ഞും ഗതാഗതം മുടങ്ങി

നെല്ലിയാമ്പതി: കനത്ത മഴയിൽ നെല്ലിയാമ്പതിയിൽ രണ്ടിടങ്ങളിലായി പടുകൂറ്റൻ മരങ്ങൾ കടപുഴകി വീണ് ഗതാഗതം സ്തംഭിച്ചു. മരപ്പാലത്തിനുസമീപവും കുണ്ടറചോല പാലത്തിന് തൊട്ടടുത്തുമാണ് കൂറ്റൻ മരങ്ങൾ കടപുഴകി വീണത്. മരപ്പാലത്തിന് മുകളിൽ മരം വീണതിനെ തുടർന്നുണ്ടായ ഗതാഗത തടസം പൊതുപ്രവർത്തകനായ പി.ഒ. ജോസഫിന്‍റെയും വനംവകുപ്പ് ജീവനക്കാരുടെയും നേതൃതത്തിൽ നീക്കം ചെയ്തു. ജോസഫും വനംവകുപ്പ് ഡെപ്യൂട്ടി റേഞ്ച് ഓഫീസർ ജയേന്ദ്രൻ, ജീവനക്കാരായ പ്രമോദ്, സദാനന്ദൻ, സുധീഷ്‌കുമാർ, അജ്മൽ റിക്കാബ്, സന്തോഷ്, ബിനേഷ്‌കുമാർ, മണികണ്ഠൻ എന്നിവരും ചേർന്നാണ് മരങ്ങൾ മുറിച്ചുമാറ്റിയത്. ഇവിടെ ഗതാഗതതടസം നീക്കം ചെയ്ത അതേസമയമായിരുന്നു കുണ്ടറചോലയ്ക്കു സമീപം മരം കടപുഴകി വീണത്. മണ്ണ് ഉൾപ്പടെ റോഡിലേക്കു വീണതിനെ തുടർന്നാണ് ഗതാഗതം സ്തംഭിച്ചത്. തുടർന്ന് ജെസിബിയുടെ സഹായത്തോടെ മണ്ണും മരവും നീക്കം ചെയ്താണ് യാത്ര സുഗമമാക്കിയത്. രണ്ടരമണിക്കൂറോളം സമയമാണ് കഴിഞ്ഞദിവസം നെല്ലിയാമ്പതി മേഖലയിൽ ഗതാഗതതടസം അനുഭവപ്പെട്ടത്. നിരവധി സഞ്ചാരികളാണ് വഴിയിൽ കുടുങ്ങിയത്. ഇരുന്നൂറോളം വാഹനങ്ങളും കെഎസ്ആർടിസി, സ്വകാര്യ ബസ് ഉൾപ്പടെയുള്ളവയും പെരുവഴിയിലായി. വിവിധ മേഖലകളിൽ ജോലി ചെയ്യുന്ന തൊഴിലാളികൾ, വിവിധ സ്ഥാപനങ്ങളിലെ ജീവനക്കാർ എന്നിവരും ജോലി കഴിഞ്ഞ് തിരിച്ചുപോകുന്നതിനായി വൈകി. വൈകീട്ട് 6.45ഓടെയാണ് ഗതാഗതം പുനഃസ്ഥാപിച്ചത്.

നിർമാണപ്രവൃത്തിയിൽ അശാസ്ത്രീയത ആരോപിച്ച് പ്രദേശവാസികൾ

നെല്ലിയാമ്പതി: നെല്ലിയാമ്പതിയിൽ മഴ കുറഞ്ഞതിനെ തുടർന്ന് നൂറടിപ്പുഴയിൽ വെള്ളം താഴ്ന്നു. കഴിഞ്ഞദിവസം കൂനംപാലം മുതൽ നൂറടി വരെയുള്ള ഭാഗങ്ങളിൽ കനത്ത മഴയെ തുടർന്ന് വെള്ളം ഉയർന്നിരുന്നു. നൂറടിയിലെ ചില വീടുകളിലും വെള്ളം കയറിയിരുന്നു. ഞായറാഴ്ച രാവിലെയോടെ വെള്ളം താഴ്ന്നു. നൂറടി മേഖലയിൽ വെള്ളപ്പൊക്കമുണ്ടാകുന്നതിനെ തുടർന്ന് നേരത്തെ 30 ലക്ഷത്തിലേറെ രൂപ ചെലവഴിച്ച് പുഴയുടെ വീതി കൂട്ടുകയും ചെളിയും മണ്ണും മാറ്റി പുഴയുടെ തീരത്ത് സംരക്ഷണ ഭിത്തിയും കോൺക്രീറ്റ് ചെയ്യുകയും ചെയ്തിരുന്നു. നിർമാണ പ്രവൃത്തി പൂർത്തിയാകാത്തതിനാലാണ് നൂറടി മേഖലയിൽ വീണ്ടും വെള്ളപ്പൊക്കമുണ്ടാവാൻ കാരണമെന്ന് പ്രദേശവാസികൾ ആരോപിച്ചു. ലക്ഷങ്ങൾ പാഴാക്കി എന്നല്ലാതെ നാട്ടുകാർക്ക് നേട്ടമുണ്ടായില്ല. ഒറ്റ മഴയിൽ തന്നെ വെള്ളം മുങ്ങുന്ന സ്ഥിതിയിൽ നിന്ന് നൂറടി പ്രദേശത്തിന് മാറ്റമുണ്ടായില്ല എന്നതാണ് വിമർശനം. പാലത്തിന് താഴെ പുഴയിൽ വീണു കിടക്കുന്ന മരത്തടികളും അടിഞ്ഞുകൂടിയ മണ്ണും 50 മീറ്ററോളം ദൂരത്തിൽ മാറ്റിയാൽ തീരുന്ന പ്രശ്നത്തിനാണ് ലക്ഷങ്ങൾ ചെലവാക്കി രണ്ടുവർഷത്തോളം സമയമെടുത്ത് നിർമാണ പ്രവർത്തി നടത്തിയത്. കഴിഞ്ഞ ഏപ്രിൽ മാസത്തിലാണ് നിർമാണം പൂർത്തിയാക്കിയത്. കഴിഞ്ഞദിവസം നെല്ലിയാമ്പതിയിൽ വെള്ളപ്പൊക്കമുണ്ടായ വീടുകളിൽ നെല്ലിയാമ്പതി പ്രാഥമിക ആരോഗ്യ കേന്ദ്രം ഹെൽത്ത് ഇൻസ്പെക്ടർ ആരോഗ്യം ജോയ്സണിന്‍റെ നേതൃത്വത്തിലുള്ള ആരോഗ്യപ്രവർത്തകർ എലിപ്പനി ബോധവത്കരണം നടത്തുകയും പ്രതിരോധ മരുന്നുകൾ നൽകുകയും ചെയ്തു.

കാട്ടാന ആക്രമണം: പുതൂർ ഫോറസ്റ്റ് സ്റ്റേഷനിലേക്ക് കോൺഗ്രസ് മാർച്ച്

അഗളി: അട്ടപ്പാടിയിൽ തുടർക്കഥയാകുന്ന കാട്ടാന ആക്രമണത്തിൽ പ്രതിഷേധിച്ച് പുതുർ മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ പുതൂർ ഫോറസ്റ്റ് സ്റ്റേഷനിലേക്കു മാർച്ച് നടത്തി. കഴിഞ്ഞ ഒരു മാസത്തിനിടെകാട്ടാനയുടെ ആക്രമണത്തിൽമൂന്നുപേരാണ് പുതൂരിൽ കൊല്ലപ്പെട്ടത് ഓരോ ദിവസവും നൂറുകണക്കിന് കർഷകരുടെകൃഷിയാണ് നശിപ്പിക്കപ്പെടുന്നത്. അട്ടപ്പാടി യുടെ വിവിധ പ്രദേശങ്ങളിലായി അന്പതിൽപരം ആനകളാണ് വിലസുന്നത്. തുടർനടപടികൾ സ്വീകരിക്കുന്നതിനു സർക്കാരും വനവകുപ്പും തയാറായിട്ടില്ല. കൊല്ലപ്പെടുന്നവരുടെ ആശ്രിതർക്ക് അഞ്ചുലക്ഷം രൂപയുടെ സഹായധനം നൽകുന്നത് ഫോട്ടോഷൂട്ട് ആക്കുന്നതിനാണ് മന്ത്രിക്കും ഉന്നത ഉദ്യോഗസ്ഥർക്കും താത്പര്യമെന്ന് സമരം ഉദ്ഘാടനം ചെയ്തു കോൺഗ്രസ് ബ്ലോക്ക് പ്രസിഡണ്ട് പി.എം. ഹനീഫ പറഞ്ഞു. മണ്ഡലം പ്രസിഡന്‍റ് എ. സെന്തിൽ കുമാർ, നേതാക്കളായ ഷിബു സിറിയക്ക്, ചന്ദ്രൻ ചീരക്കടവ്, രാധാകൃഷ്ണൻ പാലൂർ, ജോജി ഇലച്ചുവഴി, ഉണ്ണികൃഷ്ണൻ മുള്ളി, പഴനിസ്വാമി ചാവടിയൂർ, കുറുന്തജലം ചാവടിയൂർ തുടങ്ങിയവർ പ്രസംഗിച്ചു.

നെന്മാറ- ചാത്തമംഗലം റോഡിൽ കുഴികൾ; കെ. ബാബു എംഎൽഎ പരിശോധനക്കെത്തി

നെന്മാറ: പോത്തുണ്ടി ഡാമിൽ നിന്ന് പുഴയിലേക്കു വെള്ളം തുറന്നതിനെ തുടർന്ന് ചാത്തമംഗലം ചപ്പാത്ത് പാലം ആറ്റുവായി ഭാഗത്ത് പലയിടത്തും വലിയ കുഴികൾ രൂപപ്പെട്ടു. വീട്ടുവളപ്പിലൂടെ റോഡ് കവിഞ്ഞു പോയ ശക്തമായ വെള്ളമൊഴുക്കിനെ തുടർന്നാണ് നെന്മാറ കരിമ്പാറ റൂട്ടിൽ കുഴികൾ രൂപപ്പെട്ടത്. കഴിഞ്ഞ രാത്രി മുതൽ മഴയുടെ അളവ് കുറഞ്ഞതിനെത്തുടർന്ന് ഞായർ രാവിലെ വെള്ളം ഒഴുക്കിവിടുന്നതു ഭാഗികമായി കുറച്ചു. നെന്മാറ കരിമ്പാറ റോഡിൽ രാവിലെ ഏഴിനു ഭാഗികമായി ഗതാഗതം പുനഃസ്ഥാപിച്ചു. റോഡിലുണ്ടായ കുഴികളിൽ ക്വാറിവേസ്റ്റുകളും മറ്റുമിട്ട് ഒരു ഭാഗത്തുകൂടെ ഗതാഗതം സൗകര്യമൊരുക്കി. ആറ്റുവായ് ചപ്പാത്ത് ഭാഗത്ത് വീടുകളിൽ വെള്ളം കയറിയ താമസക്കാരെ റവന്യൂ അധികൃതരുടെ നേതൃത്വത്തിൽ മാറ്റി താമസിപ്പിച്ചു. പോത്തുണ്ടി ഡാമിന്‍റെ ജലനിരപ്പ് ഇപ്പോൾ ഓറഞ്ച് അലർട്ടിൽ നിലനിർത്തിയിരിക്കുകയാണ്. കഴിഞ്ഞദിവസം 25 സെന്‍റീമീറ്റർ വീതം ഷട്ടറുകൾ ഉയർത്തിയതോടെ പോത്തുണ്ടി ഡാമിൽ നിന്നും വരുന്ന പുഴയുടെ തീരപ്രദേശത്തുള്ള മിക്ക സ്ഥലങ്ങളും വെള്ളത്തിനടിയിലായി. നെന്മാറ പഞ്ചായത്തിലെ വക്കാവ്, അയിലൂർ പഞ്ചായത്തിലെ കോഴിക്കോട്, അയിലൂർ, മൂല തുടങ്ങിയ ഭാഗങ്ങളിൽ പാലത്തിനു മുകളിലൂടെ വെള്ളം കവിഞ്ഞൊഴുകി ഗതാഗതം തടസപ്പെട്ടു. പുഴയോരത്തുള്ള കൃഷിയിടങ്ങളിലും തോട്ടങ്ങളിലും വെള്ളം കയറിയതിനെ തുടർന്ന് വ്യാപകമായ കൃഷി നാശവുമുണ്ടായി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]