ADVERTISEMENT

ADVERTISEMENT

പ്രതിഷേധ സായാഹ്നം സംഘടിപ്പിച്ചു

നെയ്യാറ്റിൻകര: കന്യാസ്ത്രീകളുടെ മോചനത്തിന് കേന്ദ്രസർക്കാർ അടിയന്തരമായി ഇടപെടണമെന്നാവശ്യപ്പെട്ട് നെയ്യാറ്റിൻകര ബസ്‌സ്റ്റാൻഡ് ജംഗ്ഷനിൽ കേരളാ ലാറ്റിൻ കാത്തൊലിക് അസോസിയഷൻ നെയ്യാറ്റിൻകര രൂപത സമിതി നടത്തിയ പ്രതിഷേധ സായാഹ്നം സംഘടിപ്പിച്ചു.

മുൻ വികാരി ജനറൽ മോൺ. ജി. ക്രിസ്തുദാസ് ഉദ്ഘാടനം ചെയ്യുന്നു. പ്രസിഡന്‍റ് ഡി. ജി. അനിൽജോസ് അധ്യക്ഷത വഹിച്ച യോഗത്തിൽ ജനറൽ സെക്രട്ടറി പി.ജോൺ സുന്ദർരാജ്, രൂപത ശുശ്രൂഷ കോർഡിനേറ്റർ മോൺ.വി.പി. ജോസ്,

അൽമായ ഡയറക്ടർ ഫാ.എസ്. എം. അനിൽകുമാർ, രൂപത നേതാക്കളായ ജെ. രാജേന്ദ്രൻ, ജെ. അഗസ്റ്റിൻ, എഫ്.ഫെലിക്സ്, റ്റി. രാജൻ, സി. റ്റി. അനിത, തിരുപുറം ഷാജികുമാർ, സുരേഷ് ജോസഫ്, ആർ. സുനിൽ രാജ്, കെ. എൽ. സി. ഡബ്ല്യൂ. എ. പ്രസിഡന്റ്‌ ഉഷാ രാജൻ എന്നിവർ പ്രസംഗിച്ചു.

ADVERTISEMENT

കർക്കടകം ഫെസ്റ്റ് -2025

നെടുമങ്ങാട്: കർക്കടക മാസത്തിന്‍റെ പ്രാധാന്യവും ഭക്ഷണക്രമവും കുട്ടികളെ ബോധ്യപ്പെടുത്തുന്നതിനായി അമൃത കൈരളി വിദ്യാഭവനിൽ കർക്കടക ഫെസ്റ്റ് സംഘടിപ്പിച്ചു. മരിച്ചീനി, കാച്ചിൽ, ചേന, ചേമ്പ് തുടങ്ങിയ കിഴങ്ങ് വർഗ്ഗങ്ങൾ ഉപയോഗിച്ചുള്ള വിവിധ വിഭവങ്ങൾ, ഔഷധഗുണങ്ങളുള്ള ഇലകൾ ഉപയോഗിച്ചുള്ള കുറുക്കുകൾ, കറികൾ കർക്കടകക്കഞ്ഞി, ഔഷധ സസ്യങ്ങൾ തുടങ്ങിയവ പ്രദർശിപ്പിച്ചു. സ്കൂൾ മാനേജർ ജി.എസ്. സജികുമാർ, പ്രിൻസിപ്പൽ എസ്.സിന്ധു തുടങ്ങിയവർ നേതൃത്വം നൽകി.

കൊടിനട- വഴിമുക്ക് പാതവികസനം ഇഴയുന്നതായി ആക്ഷേപം

നെയ്യാറ്റിന്‍കര: ഓണത്തിന് ദിവസങ്ങള്‍ മാത്രം ശേഷിക്കെ ദേശീയപാത വികസനത്തിന്‍റെ ഭാഗമായ കൊടിനട മുതല്‍ വഴിമുക്ക് വരെയുള്ള പാതയോരത്തെ കെട്ടിടങ്ങള്‍ പൊളിക്കലും അവശിഷ്ടങ്ങള്‍ നീക്കം ചെയ്യലും ഇഴയുന്നതായി ആക്ഷേപം. പോരാത്തതിന്, ‍ഞായറാഴ്ച അടക്കമുള്ള അവധി ദിനങ്ങളില്‍ പോലും ആംബുലന്‍സ് ഉള്‍പ്പെടെയുള്ള വാഹനങ്ങള്‍ ഗതാഗതക്കുരുക്കില്‍പെട്ട് വലയുന്നു. കഴിഞ്ഞ ദിവസം നെയ്യാറ്റിന്‍കര ഭാഗത്തേയ്ക്ക് വന്നതും തിരുവനന്തപുരം ഭാഗത്തേയ്ക്ക് പോയതുമായ രണ്ട് ആംബുലന്‍സുകള്‍ വഴിമുക്കിനു സമീപത്തെ ഗതാഗതക്കുരുക്കില്‍ അകപ്പെട്ടു. വീതി കുറഞ്ഞ പാതയില്‍ അങ്ങോട്ടും ഇങ്ങോട്ടും വരിവരിയായി വാഹനങ്ങള്‍ കിടക്കുന്പോള്‍ തടസമില്ലാതെ മുന്നോട്ടുപോകാന്‍ രണ്ട് ആംബുലന്‍സുകളും പാടുപെട്ടു. രാവിലെ മുതല്‍ നീളുന്ന ഗതാഗതക്കുരുക്ക് ചിലപ്പോള്‍ രാത്രി വരെയും നീളാറുണ്ടെന്നാണ് തദ്ദേശീയരും യാത്രക്കാരും ചൂണ്ടിക്കാണിക്കുന്നത്. ഞായറാഴ്ച ഉള്‍പ്പെടെയുള്ള അവധി ദിവസങ്ങളില്‍ പോലും സ്ഥിതി വ്യത്യസ്ഥമല്ല. കരമന- കളിയിക്കാവിള പാതയില്‍ കൊടിനട മുതല്‍ വഴിമുക്ക് വരെയാണ് അടുത്ത ഘട്ടം വികസന പ്രവൃത്തികള്‍ നടക്കേണ്ടത്. പാതയോരത്തെ കെട്ടിടങ്ങള്‍ പൊളിക്കല്‍ പ്രവൃത്തികള്‍ വഴിമുക്ക് കഴിഞ്ഞും പുരോഗമിക്കുന്നുണ്ട്. എന്നാല്‍ ചിലയിടങ്ങളില്‍ പൂര്‍ണമായി പൊളിച്ചിട്ടില്ല. പൊളിച്ചു മാറ്റിയവ നീക്കം ചെയ്യുന്നതിലും കാലതാമസം നേരിടുന്നതായി ആക്ഷേപമുയരുന്നു. ഓണത്തിനു മുന്നോടിയായി ഈ മാസം പകുതിയോടെ ബാലരാമപുരം മുതല്‍ നെയ്യാറ്റിന്‍കര വരെയും വ്യാപാര കേന്ദ്രങ്ങളില്‍ തിരക്ക് സ്വാഭാവികമായും അനുഭവപ്പെടും. ഗതാഗതക്കുരുക്കിന് പരിഹാരം കണ്ടില്ലായെങ്കില്‍ ഓണം നാളുകളില്‍ യാത്രക്കാരും നാട്ടുകാരുമൊക്കെ വലയുമെന്നും പലരും കൂട്ടിച്ചേര്‍ത്തു.

വെങ്ങാനൂർ -ചാനൽക്കര റോഡ് തകർന്നു

വിഴിഞ്ഞം: മഴയിൽ വെങ്ങാനൂർ- ചാവടിനട- ചാനൽക്കര റോഡ് തകർന്ന് തരിപ്പണമായി. അധികൃതർ തിരിഞ്ഞ് നോക്കുന്നില്ലെന്ന് നാട്ടുകാർ. ടാറുകൾ ഇളകിമാറി വലിയ കുഴികൾ രൂപ പ്പെട്ട റോഡിലൂടെ കാൽനട പോലും ദുസ്സഹമായി. കഴിഞ്ഞ ദിവസങ്ങളിൽ പെയ്ത കനത്ത മഴയിൽ വെള്ളം കെട്ടിക്കിടന്ന കുഴികളിൽ പതിച്ച് നിരവധി ഇരു ചക്ര വാഹനങ്ങൾ തെന്നിവീണതായും നാട്ടുകാർ പറയുന്നു. വെങ്ങാനൂർ ചാവടി നടഹയർ സെക്കൻഡറി സ്കൂളിലേക്കുള്ള പ്രധാന റോഡാണിത്. നൂറ് കണക്കിന് വിദ്യാർഥികളും നാട്ടുകാരും കടന്നുപോകുന്ന റോഡിന്‍റെ ശോച്യാവസ്ഥയെക്കുറിച്ച് പരാതി ഉയർന്നെങ്കിലും ആരും തിരിഞ്ഞ് നോക്കിയില്ല. ആഴമേറിയ കനാലിന് ചേർന്നാണ് റോഡ് കടന്നുപോകുന്നത്. കുഴികളിൽ പതിക്കുന്ന വാഹനങ്ങൾ നിയന്ത്രണം തെറ്റിയാൽ വലിയ അപകടമുണ്ടാകാനുള്ള സാധ്യതയുമുണ്ട്. നാട്ടുകാരുടെ പരാതിയെ തുടർന്ന് വർഷങ്ങൾക്ക് റോഡിന്‍റെ നൂറ് മീറ്ററോളം മാത്രം ടാറിംഗ് നടത്തിയ അധികൃതർ പിന്നെ തിരിഞ്ഞ് നോക്കിയില്ലെന്നും ആക്ഷേപമുണ്ട്. മഴക്കാലത്ത് മറ്റ് പല റോഡുകളിൽ അറ്റകുറ്റപ്പണികൾ നടത്തിയവരും ചാനൽ ക്കര റോഡിനെ മറന്നു.

പരാതികള്‍ അവഗണിച്ചു; തിട്ടമംഗലത്തെ ക്ഷീരസംഘം കെട്ടിടം നിലംപൊത്തി

പേരൂര്‍ക്കട: പരാതികള്‍ അധികൃതര്‍ അവഗണിച്ചതോടെ വട്ടിയൂര്‍ക്കാവ് തിട്ടമംഗലത്തെ ക്ഷീരസംഘം കെട്ടിടം പൂര്‍ണ്ണമായും നിലംപൊത്തി. ഇന്നലെയുണ്ടായ ശക്തമായ മഴയിലും കാറ്റിലുമാണ് പ്രവര്‍ത്തനം നിലച്ച ക്ഷീരസംഘം കെട്ടിടത്തിന്‍റെ മേല്‍ക്കൂര ഉള്‍പ്പെടെ ഇടിഞ്ഞു താഴേക്കു വീണത്. പതിറ്റാണ്ടുകള്‍ക്കു മുമ്പ് പ്രവര്‍ത്തനം ആരംഭിക്കുകയും പിന്നീട് അടച്ചുപൂട്ടുകയും ചെയ്ത സ്ഥാപനമാണ് ക്ഷീരവ്യവസായ സംഘം. ക്ഷീരകര്‍ഷകരില്‍ നിന്നു പാല്‍ ശേഖരിച്ച് വിതരണം ചെയ്യുന്ന ഒരു ഔട്ട്‌ലെറ്റാണ് ഇവിടെയുണ്ടായിരുന്നത്. വര്‍ഷങ്ങളായി കെട്ടിടം ഉപയോഗിക്കാതെ കിടന്നതോടെ സാമൂഹികവിരുദ്ധരുടെ താവളമായി മാറിയിരുന്നു. മാസങ്ങള്‍ക്കു മുമ്പ് ഹരിതകര്‍മ്മ സേന സംഭരിക്കുന്ന പ്ലാസ്റ്റിക്കുകളും മറ്റും ചാക്കുകെട്ടുകളിലാക്കി സംഭരിക്കുന്നതിനുള്ള ഒരു ഇടമായി ഇവിടം മാറിയിരുന്നു. കഴിഞ്ഞ ജൂണ്‍ 26-ന് കെട്ടിടത്തിന്‍റെ തകര്‍ച്ചയിലായിരുന്ന ഒരുഭാഗം ഇടിഞ്ഞുവീണ് സമീപത്തു പാര്‍ക്ക് ചെയ്തിരുന്ന മൂന്നു ബൈക്കുകളും രണ്ടു സ്‌കൂട്ടറുകളും തകര്‍ന്നിരുന്നു. കെട്ടിടത്തിനു സമീപത്തുകൂടി നടന്നുപോയ രണ്ടു വയോധികര്‍ കഷ്ടിച്ചാണ് രക്ഷപ്പെട്ടത്. സംഭവത്തെ തുടര്‍ന്ന് വാര്‍ഡ് കൗണ്‍സിലര്‍ ഉള്‍പ്പെടെ നിരവധിപേര്‍ പരാതി നല്‍കിയിരുന്നതാണ്. എന്നാൽ കെട്ടിടത്തിന്‍റെ അവശേഷിക്കുന്ന ഭാഗം പൊളിച്ചുനീക്കാന്‍ അധികൃതര്‍ തയാറായില്ല.

ബാഷയ്ക്ക് രക്ഷകരായി പൊന്മുടി വന സംരക്ഷണ സമിതി അംഗങ്ങൾ

വിതുര : മാലിന്യ കുഴിയിൽ കുടുങ്ങിയ ബാഷയ്ക്ക് രക്ഷകരായി പൊന്മുടി വന സംരക്ഷണ സമിതി അംഗങ്ങൾ. പൊന്മുടിയിലെ വന സംരക്ഷണ സമിതി അംഗങ്ങൾക്കും പോലീസിനും പ്രിയപ്പെട്ട നായയാണ് ബാഷ. ഇവർ കൊടുക്കുന്ന ഭക്ഷണം കഴിച്ചിട്ട് പൊന്മുടിയുടെ കാവൽക്കാരനായി തുടരുന്ന ബാഷയെ രണ്ടുദിവസമായി കാണാനില്ലായിരുന്നു. പുലി പിടിച്ചതാണെന്ന് പലരും കരുതിയത്. കഴിഞ്ഞ ദിവസം സീതാ തീർത്ഥം ട്രക്കിംഗ് പോയിന്‍റിൽ പോയി മടങ്ങിയ വിഎസ്എസ് അംഗങ്ങൾ ശബ്ദം കേട്ട് സമീപത്തെ മാലിന്യ കുഴിയിൽ നോക്കിയപ്പോൾ അവിടെ കുടുങ്ങിക്കിടക്കുന്ന ബാഷയെ കണ്ടു. ഏണി ഉപയോഗിച്ച് കുഴിയിൽ ഇറങ്ങി നായയെ കരയ്ക്കത്തിച്ചു. പൊന്മുടി കഫ്റ്റേരിയയുടെ പിന്നിൽ നൂറു മീറ്ററോളം അകലെയുള്ള മാലിന്യ കുഴിയിലാണ് ബാഷ കുടുങ്ങിയത്.

ക്രിമിനല്‍ക്കേസ് പ്രതി ആന്ധ്ര അയ്യപ്പന്‍ അറസ്റ്റില്‍

പേരൂര്‍ക്കട: നിരവധി ക്രിമിനല്‍ക്കേസുകളിലെ പ്രതിയും കരമന സ്വദേശിയുമായ ആന്ധ്ര അയ്യപ്പന്‍ എന്നറിയപ്പെടുന്ന അയ്യപ്പനെ(32) കരമന സിഐ അനൂപ്, എസ്ഐ അജിത്കുമാര്‍, സിപിഒമാരായ ഹിരണ്‍, കൃഷ്ണകുമാര്‍, അജികുമാര്‍ എന്നിവര്‍ ചേര്‍ന്ന് അറസ്റ്റുചെയ്തു. തന്‍റെ താമസസ്ഥലത്തുള്ള ആന്ധ്രാ സ്വദേശികളുമായി ചങ്ങാത്തം വന്നതോടെയാണ് ഇയാള്‍ ആന്ധ്ര അയ്യപ്പന്‍ എന്ന് അറിയപ്പെടാന്‍ തുടങ്ങിയത്. തിരുവനന്തപുരം നഗരപരിധിയില്‍ കരമന സ്റ്റേഷന്‍ ഉള്‍പ്പെടെ വഞ്ചിയൂര്‍, മെഡിക്കല്‍കോളജ്, തമ്പാനൂര്‍, ഫോര്‍ട്ട് സ്റ്റേഷനുകളിലായി 15-ഓളം കേസുകള്‍ ഇയാള്‍ക്കെതിരേയുണ്ട്. 10 വയസുള്ള മകളെ മദ്യപിച്ചെത്തി മര്‍ദ്ദിച്ചതിനാണ് ഇയാള്‍ക്കെതിരേ കേസെടുത്തത്. ഒരാഴ്ച മുമ്പായിരുന്നു സംഭവം. മകളെ ആക്രമിക്കുന്നതു തടഞ്ഞപ്പോള്‍ ഭാര്യയെയും ആക്രമിക്കുകയായിരുന്നു. അറസ്റ്റിലായ പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

തിരുവനന്തപുരം മെഡി.കോളജ് : പ്രോബുകള്‍ ഇല്ല; കീഹോള്‍ ശസ്ത്രക്രിയകള്‍ മുടങ്ങുന്നു

മെഡിക്കല്‍കോളജ്: കീഹോള്‍ ശസ്ത്രക്രിയകള്‍ക്ക് ഉപയോഗിക്കുന്ന ഉപകരണങ്ങളിലെ അവശ്യഘടകമായ പ്രോബുകള്‍ (ശരീരഭാഗം മുറിക്കാന്‍ ഉപയോഗിക്കുന്ന മൂര്‍ച്ചയുള്ള ഉപകരണം) ലഭ്യമല്ലാത്തതിനാല്‍ ശസ്ത്രക്രിയകള്‍ മുടങ്ങുന്ന അവസ്ഥ. തിരുവനന്തപുരം മെഡിക്കല്‍കോളജിലെ സര്‍ജിക്കല്‍, ഗ്യാസ്‌ട്രോ, യൂറോളജി, ഗൈനക്കോളജി, ജനറല്‍ സര്‍ജറി, ഓര്‍ത്തോപീഡിക് തുടങ്ങിയ വകുപ്പുകളിലാണ് ശസ്ത്രക്രിയകള്‍ക്കു മുടക്കം നേരിടുന്നത്. വിവിധ ശസ്ത്രക്രിയാ ഉപകരണങ്ങളില്‍ ഉപയോഗിക്കുന്ന വ്യത്യസ്ത വിധത്തിലുള്ള പ്രോബുകള്‍ ഹിന്ദുസ്ഥാന്‍ ലാറ്റക്‌സ് ആണ് നല്‍കിവന്നിരുന്നത്. ഇവര്‍ക്ക് ഇപ്പോള്‍ നല്‍കാനുള്ളത് 30 കോടിയിലധികം രൂപയാണ്. കുടിശിക ഉള്ളതിനാല്‍ ആരോഗ്യ ഇന്‍ഷ്വറന്‍സ് പദ്ധതിയിലൂടെയും പ്രോബുകള്‍ ലഭിക്കുന്നില്ല. ഈ സാഹചര്യത്തില്‍ രോഗികളില്‍ നിന്നും പണം പിരിച്ച് ഉപകരണങ്ങള്‍ വാങ്ങുന്ന അവസ്ഥയാണ് നിലനില്‍ക്കുന്നത്. ഇങ്ങനെ വാങ്ങുന്ന പ്രോബുകള്‍ വിലകുറഞ്ഞതായിരിക്കുമെന്നതിനാല്‍ കാര്യക്ഷമതയും സംശയത്തിലാണ്. 30-40 ലക്ഷം രൂപ വില വരുന്ന വിലയേറിയ ഉപകരണങ്ങളില്‍ വിലകുറഞ്ഞ പ്രോബുകള്‍ ഉപയോഗിക്കുന്നത് മെഷീനുകള്‍ കേടാകുന്നതിന് കാരണമാകും. ഇത് ഉപകരണങ്ങളുടെ കാര്യക്ഷമതയെ ബാധിക്കുകയും ചെയ്യും. 2008-09 കാലഘട്ടത്തില്‍ ഓര്‍ത്തോ വിഭാഗത്തിലെ ശസ്ത്രക്രിയാ ഉപകരണമായ സി-ആം മെഷീന്‍റെ കേബിളുകള്‍ ഹാക്‌സാ ബ്ലോക്ക് കൊണ്ട് മുറിച്ച സംഭവം മുതല്‍ യൂറോളജി വിഭാഗത്തിലെ 30 ഡിഗ്രി ടെലസ്‌കോപ്പ് മെഷീനിലെ അഞ്ചുലക്ഷം രൂപ വിലയുള്ള കേബിളുകള്‍ നശിപ്പിച്ചതുവരെയുള്ള അന്വേഷണം നിലവില്‍ എങ്ങുമെത്തിയിട്ടില്ല. വിഷയങ്ങള്‍ പരിഹരിക്കണമെന്നാവശ്യപ്പെട്ട് മുന്‍ മെഡിക്കല്‍കോളജ് വാര്‍ഡ് കൗണ്‍സിലര്‍ ശ്രീകാര്യം ശ്രീകുമാര്‍ മുഖ്യമന്ത്രിക്കു പരാതി നല്‍കിയിട്ടുണ്ട്.

വീട്ടില്‍ നിന്നു 55 ബോട്ടില്‍ വിദേശമദ്യം പിടികൂടി

പേരൂര്‍ക്കട: ഫോര്‍ട്ട് സ്റ്റേഷന്‍ പരിധിയില്‍ കുത്തുകല്ലിന്‍മൂട് ഭാഗത്ത് വീട്ടില്‍ പോലീസ് നടത്തിയ റെയ്ഡില്‍ 55 ബോട്ടില്‍ ഇന്ത്യന്‍ നിര്‍മിത വിദേശമദ്യം പിടിച്ചെടുത്തു. എസ്ഐ ഹരികുമാറിന്‍റെ നേതൃത്വത്തിലായിരുന്നു വീട്ടില്‍ പരിശോധന നടത്തിയത്. ബിജിലാല്‍ ആണ് വീടിന്‍റെ ഉടമസ്ഥന്‍ . പോലീസ് എത്തിയതറിഞ്ഞ് ഇയാള്‍ ഓടിരക്ഷപ്പെടുകയായിരുന്നു. ബിവറേജ് ഔട്ട്‌ലെറ്റുകളും ബാറുകളും അവധിയാകുന്ന ദിവസങ്ങളില്‍ ചില്ലറവില്‍പ്പനയ്ക്കായി സൂക്ഷിച്ചിരുന്നതാണ് മദ്യക്കുപ്പികളെന്നു ഫോര്‍ട്ട് സി.ഐ ശിവകുമാര്‍ പറഞ്ഞു. .

ഐക്യദാര്‍ഢ്യ യോഗം സംഘടിപ്പിച്ചു

വെള്ളറട : കന്യാസ്ത്രീകൾക്ക് ഐക്യദാര്‍ഢ്യം പ്രഖ്യാപിച്ച് വെള്ളറടയില്‍ കോണ്‍ഗ്രസ് യോഗം സംഘടിപ്പിച്ചു. ഛത്തീസ്ഗഡിലെ ജയിലില്‍ അടച്ച കന്യാസ്ത്രീ മാര്‍ക്ക് പിന്തുണ പ്രഖ്യാപിച്ചാണ് യോഗം സംഘടിപ്പിച്ചത്. ബ്ലോക്ക് കോണ്‍ഗ്രസ് പ്രസിഡന്‍റ് അഡ്വ.ഗിരീഷ് കുമാര്‍ അധ്യക്ഷത വഹിച്ച യോഗം പ്രവാസി കോണ്‍ഗ്രസ് ജില്ലാ പ്രസിഡന്‍റ് എല്‍.വി. അജയകുമാര്‍ ഉദ്ഘാടനം ചെയ്തു. റവ .ജോര്‍ജ് ഈപ്പന്‍, ഇമാം അമാനുള്ള മിഫ്താഹി, ഫാദര്‍ രതീഷ്, സുരേഷ് ശര്‍മ, കെ. ജി. മംഗള്‍ദാസ്, മണലി സ്റ്റാന്‍ലി, അശോകന്‍, രാജ് മോഹന്‍, മലയില്‍ രാധാകൃഷ്ണന്‍, പ്ലാങ്കാല ജോണ്‍സണ്‍, മണ്ണാത്തിപ്പാറ ജോണ്‍സണ്‍,സരളാവിന്‍സെന്‍റ്, ജയന്തി, ദീപ്തി,സജിതാജോണ്‍, അജയന്‍ തുടങ്ങി നിരവധി നേതാക്കള്‍ പ്രസംഗിച്ചു.

7.5 ലിറ്റര്‍ മദ്യവുമായി യുവാവ് പിടിയില്‍

പൂന്തുറ: ഏഴര ലിറ്റര്‍ ഇന്ത്യന്‍ നിര്‍മിത വിദേശ മദ്യവുമായി യുവാവിനെ പൂന്തുറ പോലീസ് അറസ്റ്റ് ചെയ്തു. മുട്ടത്തറ ബീമാപളളി ടിസി -71 /687-ല്‍ പ്രകാശ് (22) ആണ് പിടിയിലായത്. വ്യാഴാഴ്ച രാത്രി 9.00 മണിയോടുകൂടി മുട്ടത്തറ ബിവറേജസിനു സമീപത്തുവച്ച് സ്‌കൂട്ടറില്‍ കൊണ്ടുവരികയായിരുന്ന ഇന്ത്യന്‍ നിര്‍മിത വിദേശ മദ്യമാണ് പോലീസ് പിടികൂടിയത്. 15 ബോട്ടിലുകളിലായി 7.5 ലിറ്റര്‍ മദ്യമാണ് പ്രകാശില്‍ നിന്നും പൊലീസ് പിടിച്ചെടുത്തത്. നിയമപരമായി മൂന്ന് ലിറ്റര്‍ മദ്യം മാത്രമേ കൈവശം സൂക്ഷിക്കാന്‍ കഴിയുകയുളളു. ഇയാള്‍ വില്‍പ്പനയ്ക്കായി പല തവണകളായി മുട്ടത്തറ ബിവറേജസില്‍ നിന്നും വാങ്ങി സ്‌കൂട്ടറില്‍ സൂക്ഷിച്ച ഷേഷം വീട്ടിലേയ്ക്ക് കൊണ്ടുപോകുകയായിരുന്നതായി പോലീസ് പറഞ്ഞു. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

ഓണം സ്പെഷല്‍ ഡ്രൈവിന് ജീവനക്കാരില്ലാതെ എക്സൈസ്

നെയ്യാറ്റിൻകര: ഓണം സീസണോട് അനുബന്ധിച്ചുള്ള ലഹരി പദാര്‍ഥങ്ങളുടെ കടത്തും വില്‍പ്പനയുമൊക്കെ പ്രതിരോധിക്കുക എന്ന ലക്ഷ്യത്തോടെ എക്സൈസ് നടത്തുന്ന ഓണം സ്പെഷല്‍ ഡ്രൈവ് നാലിന് ആരംഭിക്കും. സെപ്തംബര്‍ എട്ടുവരെയുള്ള ഡ്രൈവിന്‍റെ ഭാഗമായി നെയ്യാറ്റിന്‍കര എക്സൈസ് റേഞ്ചുകളുടെ പരിധിയിലെ ചെക്പോസ്റ്റുകളില്‍ അയല്‍ ജില്ലകളില്‍ നിന്നുള്ള ജീവനക്കാരെയാണ് വിന്യസിക്കുക. അതേ സമയം, ആവശ്യത്തിനു ജീവനക്കാരില്ലാത്തത് എക്സൈസിന് കനത്ത വെല്ലുവിളിയാകുന്നു. തമിഴ്നാട് സംസ്ഥാനവുമായി കേരളം അതിര്‍ത്തി പങ്കിടുന്ന പ്രദേശങ്ങള്‍ അടക്കം നെയ്യാറ്റിന്‍കര എക്സൈസ് സര്‍ക്കിളിന്‍റെ പരിധിയില്‍ ഉള്‍പ്പെടുന്നതാണ്. നെയ്യാറ്റിന്‍കര, അമരവിള, തിരുപുറം, കാട്ടാക്കട എന്നീ റേഞ്ചുകളും അമരവിളയിലെ മേജര്‍ ചെക്പോസ്റ്റ് കൂടാതെ 11 ചെക്പോസ്റ്റുകളും സര്‍ക്കിളിന്‍റെ കീഴിലുണ്ട്. ഇക്കൂട്ടത്തില്‍ സുരക്ഷിതമായ സ്വന്തം ചെക്പോസ്റ്റ് കെട്ടിടം അമരവിളയിലേതുമാത്രം. ആറ്റുപുറം, കള്ളിക്കാട്, മണ്ഡപത്തിന്‍കടവ്, പെരുങ്കടവിള, പെരുന്പഴുതൂര്‍, അറക്കുന്ന് കടവ്, പാലക്കടവ്, പിരായുംമൂട്, മാവിളക്കടവ്, മൂന്നാറ്റുമുക്ക് എന്നിവിടങ്ങളിലെ ചെക്പോസ്റ്റുകള്‍ക്കു പുറമേ അതിര്‍ത്തി പ്രദേശമായ ചെങ്കവിളയിലും ജാഗ്രതയോടെ എക്സൈസ് രംഗത്തുണ്ട്. അയല്‍സംസ്ഥാനങ്ങളില്‍ നിന്നുള്ള ടൂറിസ്റ്റ് ബസുകള്‍ പുലര്‍ച്ചെ മുതലാണ് നെയ്യാറ്റിന്‍കര ഭാഗത്തു കൂടി തിരുവനന്തപുരത്തേക്കു വരുന്നത്. ഒന്നിനു പിറകെ ഒന്നായി ബസുകള്‍ എത്തുന്പോള്‍ അമരവിള എക്സൈസ് ചെക്പോസ്റ്റില്‍ പരിശോധന പതിവാണ്. ടൂറിസ്റ്റ് ബസുകളിലും ലഹരി പദാര്‍ഥങ്ങളുമായി ഒട്ടേറെ പേര്‍ എക്സൈസ് പിടിയിലായിട്ടുമുണ്ട്. നാല്‍പ്പതോളം യാത്രക്കാരുള്ള ടൂറിസ്റ്റ് ബസുകള്‍ പരിശോധിച്ച് പൂര്‍ത്തിയാക്കാന്‍ കുറഞ്ഞത് അര മണിക്കൂറെങ്കിലും വേണം. ഇത്തരം പരിശോധനകള്‍ അനാവശ്യമാണെന്ന ആക്ഷേപം പല യാത്രക്കാരും ഉയര്‍ത്താറുമുണ്ട്. എന്നാല്‍ പരാതികള്‍ പരിഗണിക്കാതെ എക്സൈസ് ജീവനക്കാര്‍ തങ്ങളുടെ കടമ ചെയ്യാറുണ്ടെന്നതും വാസ്തവം. ഒരേ സമയം ഒന്നിലേറെ ടൂറിസ്റ്റ് ബസുകള്‍ ചെക്പോസ്റ്റിലെത്തുന്പോള്‍ ആവശ്യത്തിന് ജീവനക്കാരില്ലായെന്നത് എക്സൈസിന് തലവേദനയാണ്.

റവ. ഡോ. ആന്നിയിൽ തരകന്‍റെ പുസ്തക പ്രകാശനം തിങ്കളാഴ്ച

തിരുവനന്തപുരം: റവ.ഡോ. ആന്നിയിൽ തരകൻ രചിച്ച മാർത്തോമാ ശ്ലീഹയേക്കുറിച്ചുള്ള "അപ്പോസൽ തോമസ് ആൻഡ് തോമസ് ക്രിസ്റ്റ്യൻസ് ഓഫ് ഇന്ത്യ: ദെർ കൾച്ചർ ആൻ ആന്ത്രോപ്പോളജി ഫ്രം ആൻ ഇന്ത്യൻ പെർസ്പെക്ടീവ് ' എന്ന ഗ്രന്ഥത്തിന്‍റെ പ്രകാശനം തിങ്കളാഴ്ച നടക്കും. നാലാഞ്ചിറ സർവോദയ സിബിഎസ്ഇ സ്കൂൾ ഓപ്പണ്‍ ഓഡിറ്റോറിയത്തിൽ രാവിലെ 10.30 നു നടക്കുന്ന ചടങ്ങിൽ കർദിനാൾ മാർ ബസേലിയോസ് ക്ലീമിസ് കാതോലിക്കാബാവ പുസ്തകം പ്രകാശനം ചെയ്യും. ജലവിഭവമന്ത്രി റോഷി അഗസ്റ്റിൻ ആദ്യപ്രതി ഏറ്റുവാങ്ങും. പത്തനംതിട്ട ബിഷപ് സാമുവൽ മാർ ഐറേനിയോസ് മുഖ്യപ്രഭാഷണം നടത്തും. പ്രഫ. കെ.വി. ജോസഫ് ഗ്രന്ഥാവലോകനം നടത്തും. ചങ്ങനാശേരി അതിരൂപത വികാരി ജനറാളും ലൂർദ് ഫൊറോന വികാരിയുമായ ഫാ. ജോണ്‍ തെക്കേക്കര മാർത്തോമശ്ലീഹായും മലബാർ സഭയും എന്ന വിഷയത്തെ അധീകരിച്ചു പ്രസംഗിക്കും. മാവേലിക്കര ബിഷപ് ഡോ. മാത്യൂസ് മാർ പോളികാർപ്പസ് സെന്‍റ് തോമസ് യൂറോപ്യൻ രാജ്യങ്ങളിൽ എന്ന വിഷയത്തിൽ പ്രഭാഷണം നടത്തും. മാർ ഈവാനിയോസ് കോളജ് പ്രിൻസിപ്പൽ ഡോ. മീര ജോർജ് , സർവോദയ സിബിഎസ്ഇ സ്കൂൾ പ്രിൻസിപ്പൽ ഫാ. കാരിക്കൽ ചാക്കോ വിൻസന്‍റ്, മിനു വർഗീസ് തുടങ്ങിയവർ പ്രസംഗിക്കും. മാർ ഈവാനിയോസ് കോളജിൽ ഇംഗ്ലീഷ് പ്രഫസറും അഞ്ചൽ സെന്‍റ് ജോണ്‍സ് കോളജ് പ്രിൻസിപ്പലും കേരള യൂണിവേഴ്സിറ്റിയിൽ എംഫിൽ പ്രഫസറുമായിരുന്നു ഗ്രന്ഥകർത്താവായ റവ.ഡോ. ആന്നിയിൽ തരകൻ.

യൂണിവേഴ്സിറ്റി കോളജിൽ എസ്എഫ്ഐക്കാർ ചേരിതിരിഞ്ഞ് സംഘർഷം

തിരുവനന്തപുരം : യൂണിവേഴ്സിറ്റി കോളജിൽ എസ്എഫ്ഐ പ്രവർത്തകർ തമ്മിൽ ചേരിതിരിഞ്ഞു സംഘർഷം. എസ്എഫ്ഐ ജില്ലാ പ്രസിഡന്‍റിനെ യൂണിറ്റ് കമ്മിറ്റിയിലെ അംഗങ്ങൾ ചേർന്നു മർദിച്ചതോടെയാണ് പ്രശ്നങ്ങൾ തുടങ്ങുന്നത്. പ്രവർത്തകർ ഇരുവിഭാഗങ്ങളായി സംഘടിച്ചതോടെ പോലീസെത്തിയാണു സ്ഥിതിഗതികൾ ശാന്തമാക്കിയത്. എസ്എഫ്ഐ പ്രവർത്തകരെ പോലീസ് ബലം പ്രയോഗിച്ചു കോളജിൽ നിന്നും പുറത്താക്കി. ഇന്നലെ രാത്രിയായിരുന്നു സംഭവം. യൂണിവേഴ്സിറ്റി കോളജിൽ എസ്എഫ്ഐ പ്രവർത്തകർ തമ്മിൽ നേരത്തേ സംഘർഷമുണ്ടായിരുന്നു. ഇതിന്‍റെ ഭാഗമായാണ് ഇന്നലെയും സംഘർഷമുണ്ടായത്. പരാതി ഇല്ലാത്തതിനാൽ ഇന്നലത്തെ സംഭവത്തിൽ പോലീസ് കേസെടുത്തില്ല.

കെസിവൈഎം തിരുവനന്തപുരം ലത്തീൻ അതിരൂപത പ്രതിഷേധിച്ചു

വെള്ളയമ്പലം: ഛത്തീസ്ഗഡിൽ മതപരിവർത്തനം, മനുഷ്യക്കടുത്ത് എന്നീ വ്യാജ കുറ്റങ്ങൾ ആരോപിച്ച് മലയാളി ക്രൈസ്തവ കന്യാസ്ത്രീമാരെ അന്യായമായി അറസ്റ്റ് ചെയ്തതിൽ പ്രതിഷേധിച്ച് കെസിവൈഎം തിരുവനന്തപുരം ലത്തീൻ അതിരൂപത രാജ്ഭവിനു മുന്നിൽ പന്തം കൊളുത്തി പ്രതിഷേധിച്ചു. ഡയറക്ടർ ഫാ. ഡാർവിൻ ഫെർണാണ്ടസ് ഉദ്ഘാടനം ചെയ്തു. ഭാരതത്തിന്‍റെ ഭരണഘടനയ്ക്ക് ഏൽക്കുന്ന മുറിവാണ് കേന്ദ്രസർക്കാരിന്‍റെ ഭാഗത്തുനിന്നും ഉണ്ടാകുന്ന ഇത്തരം പ്രവണതകൾ എന്ന് ഫാ. ഡാർവിൻ ഫെർണാണ്ടസ് പറഞ്ഞു. കെസിവൈഎം തിരുവനന്തപുരം ലത്തീൻ അതിരൂപത ആനിമേറ്റർ സിസ്റ്റർ ആൻസി, അതിരൂപത പ്രസിഡൻറ് ജോൺ ബ്രിട്ടോ വാൾട്ടർ, ജനറൽ സെക്രട്ടറി ആർ.രാജീവ് തുടങ്ങിയവർ പ്രസംഗിച്ചു.

കളിയാക്കലിനെ തുടർന്ന് സഹപാഠിയുടെ പിതാവ് കുട്ടികളെ മർദിച്ചു

കാട്ടാക്കട: കളിയാക്കലിനെ തുടർന്ന് കുട്ടികളെ സഹപാഠിയുടെ പിതാവ് മർദ്ദിച്ചു. കാട്ടാക്കടയിലെ സ്വകാര്യ മൊബൈൽ ഷോപ്പിലെ ജീവനക്കാരനായ ശ്രീകുമാറിനെ കുട്ടികളുടെ പരാതിയിൽ അറസ്റ്റ് ചെയ്തു കേസ് ചെയ്യുകയും സ്റ്റേഷൻ ജാമ്യത്തിൽ വിട്ടയക്കുകയും ചെയ്തു. സംഭവത്തിൽ മൂന്ന് കുട്ടികളിൽ രണ്ടുപേർക്ക് ശരീരത്തിൽ പരിക്കേറ്റിരുന്നു. കാട്ടാക്കട പിആർ വില്യം സ്കൂളിലെ പത്താം ക്ലാസ്സ് വിദ്യാർഥികൾക്കാണ് സഹപാഠിയായ മറ്റൊരു വിദ്യാർഥിയുടെ പിതാവിൽ നിന്ന് മർദ്ദനം ഏറ്റത്. ഇന്നലെ വൈകുന്നേരത്തോടെയാണ് സംഭവം. സ്കൂളിൽ പഠിക്കുന്ന നാല് വിദ്യാർഥികൾ തമ്മിൽ കളിയാക്കിയതിനെ ചൊല്ലി നടന്ന തർക്കം സ്കൂൾ അധികൃതർ പരിഹരിച്ചിരുന്നു. മൂന്നുപേർ ചേർന്ന് ഒരാളെ കളിയാക്കി എന്നതായിരുന്നു സംഭവം.

മേല്‍പ്പല നിര്‍മാണം; ഈഞ്ചക്കല്‍ ഭാഗത്ത് ഇന്നും നാളെയും ഗതാഗത ക്രമീകരണം

പൂന്തുറ: മേല്‍പ്പാല നിര്‍മാണവുമായി ബന്ധപ്പട്ട് ഈഞ്ചക്കല്‍ ഭാഗത്ത് ഇന്നും നാളെയും രാത്രി 11.00 മുതല്‍ രാവിലെ 5.00 മണിവരെ പണി നടക്കുന്നതിനാല്‍ ഗതാഗത ക്രമീകരണങ്ങള്‍ ഏര്‍പ്പെടുത്തി. കോവളം ഭാഗത്തുനിന്നും കഴക്കൂട്ടം ഭാഗത്തേക്ക് പോകുന്ന വാഹനങ്ങള്‍ തിരുവല്ലം-അമ്പലത്തറ-അട്ടക്കുളങ്ങര-സ്റ്റാച്യൂ - വി.ജെ.ടി - പാറ്റൂര്‍-ചാക്ക വഴി ബൈപാസ് റോഡിലേക്ക് പോകണം. കഴക്കൂട്ടം ഭാഗത്തുനിന്നും കോവളം ഭാഗത്തേക്ക് പോകുന്ന വാഹനങ്ങള്‍ ചാക്ക സര്‍വീസ് റോഡുവഴി പേട്ട-പാറ്റൂര്‍-ആശാന്‍ സ്‌ക്വയര്‍ -പാളയം-സ്റ്റാച്യൂ-അട്ടക്കുളങ്ങര-മണക്കാട്-തിരുവല്ലം വഴി പോകണം. കിളളിപ്പാലം-പവര്‍ഹൗസ് റോഡ് ഭാഗത്തുനിന്നും ഈഞ്ചക്കല്‍ വഴി കഴക്കൂട്ടം ഭാഗത്തേക്ക് പോകുന്ന വാഹനങ്ങള്‍ ചൂരക്കാട്ടുപാളയം-തമ്പാനൂര്‍-പനവിള -ആശാന്‍ സ്‌ക്വയര്‍ -പാറ്റൂര്‍-ചാക്ക വഴിയോ , ശ്രീകണ്‌ഠേശ്വരം-ഉപ്പിടാമൂട്-പേട്ട-ചാക്ക വഴിയോ ബൈപ്പാസ് റോഡിലേയ്ക്ക് കടക്കണം. കോവളം ഭാഗത്തുനിന്നും ചാക്ക ഭാഗത്തേയ്ക്ക് പോകുന്ന കാര്‍ ഉള്‍പ്പെടെയുളള ചെറിയ വാഹനങ്ങള്‍ വാഴപ്പളളി-ശ്രീകണ്‌ഠേശ്വരം -ഉപ്പിടാമൂട്-നാലുമുക്ക്-പേട്ട-ചാക്ക വഴിയും പോകണം. ഗതാഗത ക്രമീകരണങ്ങളുടെ വിവരങ്ങള്‍ അറിയുന്നതിന് ഫോൺ - 0471-2558731 , 9497990005.

പുല്ലാങ്കുഴലില്‍ ആത്മാവ് തേടുന്ന മായാ സുബ്രഹ്മണിക്ക് നാളെ അരങ്ങേറ്റം

എസ്. മഞ്ജുളാദേവി തിരുവനന്തപുരം: അമേരിക്കയില്‍ ജനിച്ച് വളര്‍ന്ന മായ സുബ്രഹ്മണിയുടെ പുല്ലാങ്കുഴൽ സപര്യക്ക് നാളെ തിരുവനന്തപുരത്ത് സാക്ഷാത്കാരമാകും. കാലിഫോര്‍ണിയയിലെ ഫ്രീമോണ്ടിലെ വീടിനു സമീപമുള്ള ഒരു സ്റ്റുഡിയോയില്‍ പിയാനോ പഠിച്ച് കൊണ്ടിരുന്ന മായാ സുബ്രഹ്മണി എന്ന എട്ടു വയസുകാരിയുടെ കാതുകളിലേക്കു ഓടക്കുഴലിന്‍റെ നാദം ഒഴുകി വന്നത് തികച്ചും യാദൃച്ഛികമായിരുന്നു. താൻപോലുമറിയാതെ പുല്ലാങ്കുഴലിന്‍റെ മായാനാദ ലോകത്തേയ്ക്കുള്ള യാത്ര തുടങ്ങുകയായിരുന്നു മായാ സുബ്രഹ്മണി. കര്‍ണാടക സംഗീതവും പിയാനോ, ക്ലാരനറ്റ് ഉള്‍പ്പെടെയുള്ള പാശ്ചാത്യ സംഗീതവും കുട്ടിക്കാലം മുതല്‍ തന്നെ അഭ്യസിച്ചിരുന്നുവെങ്കിലും ഓടക്കുഴൽ നാദം ജീവിതത്തില്‍ അന്ന് ആദ്യം കേള്‍ക്കുകയായിരുന്നു. ഓടക്കുഴലിന്‍റെ സുഷിരങ്ങളിലൂടെ വന്ന ആ സംഗീതം മറക്കുവാന്‍ കൊച്ചുമായയ്ക്ക് കഴിഞ്ഞതേയില്ല. മകളുടെ ആഗ്രഹം മനസിലാക്കിയ അമ്മ സരസ്വതി പാശ്ചാത്യ ഓടക്കുഴല്‍ ക്ലാസില്‍ മായയെ ചേര്‍ക്കുകയും ചെയ്തു. പിന്നീട് പുല്ലാങ്കുഴല്‍ വിദ്വാനായ ജെ. എ. ജയന്ത് എന്ന ഗുരുനാഥനിലെത്തുകയായിരുന്നു. എട്ടുവയസുമാത്രമുള്ള ശിഷ്യയുടെ സിദ്ധി തിരിച്ചറിഞ്ഞ ഗുരു പുല്ലാങ്കുഴലിന്‍റെ അഭൗമലോകത്തേയ്ക്കുള്ള ജാലകം തുറക്കുകയും ചെയ്തു. അമേരിക്കയില്‍ ജനിച്ച് വളര്‍ന്ന മായ സുബ്രഹ്മണി പുല്ലാങ്കുഴലില്‍ ഓണ്‍ലൈന്‍ ക്ലാസ് ആരംഭിക്കുമ്പോള്‍ നര്‍ത്തകി കൂടിയായ അമ്മ സരസ്വതി കൈത്താളവുമായി ഒപ്പമുണ്ടായിരുന്നു. പിന്നീട് ഏഴുകടലുകളുടെ ദൂരമോ, സാങ്കേതിക പ്രയാസങ്ങളോ ഒന്നും മായ അറിഞ്ഞതെയില്ല. ആ ഓടക്കുഴല്‍ പഠനത്തിനു നാളെ അനന്തപുരിയില്‍ സാക്ഷാത്കാരമാകും. ശ്രീവരാഹം ചെമ്പൈ സ്മാരക ഹാളില്‍ നാളെ വൈകുന്നേരം ആറിനു മായാ സുബ്രഹ്മണിയുടെ അരങ്ങേറ്റം നടക്കും. അമേരിക്കയിലും ഇന്ത്യയിലെ പല വേദികളിലും പുല്ലാങ്കുഴല്‍ കച്ചേരി നടത്തിയിട്ടുണ്ടെങ്കിലും ഔപചാരികമായ അരങ്ങേറ്റം അച്ഛനമ്മമാരുടെ നാടായ തിരുവനന്തപുരത്ത് തന്നെ വേണമെന്ന ആഗ്രഹത്തിന്‍റെ പൂര്‍ത്തീകരണമാണ് നാളെ നടക്കുന്നത്. കാലിഫോര്‍ണിയയില്‍ ബിരുദപഠനത്തിനു തയാറെടുക്കുകയാണ് മായ. അച്ഛന്‍ കാലിഫോര്‍ണിയയില്‍ കമ്പ്യൂട്ടര്‍ എന്‍ജിനീയറായ സുബ്രഹ്മണിയും എല്ലാ പിന്തുണയുമായി ഒപ്പമുണ്ട്.

ബേക്കറി ഉടമയേയും ഭാര്യയേയും ആക്രമിച്ച പ്രതി പിടിയിൽ

വിതുര: ബേക്കറിയിലേക്ക് കാർ ഇടിച്ചു കയറ്റി ബേക്കറി ഉടമയെയും ഭാര്യയെയും ആക്രമിക്കുകയും നാശനഷ്ടം ഉണ്ടാക്കുകയും ചെയ്ത സംഭവത്തിൽ യുവാവ് അറസ്റ്റിൽ. തൊളിക്കോട് സ്വദേശി മുഹമ്മദ് ഇജാസ് (25)ആണ് അറസ്റ്റിലായത്. ബേക്കറിയിൽ എത്തിയ പ്രതിക്ക് സമയത്തിന് സിഗരറ്റ് കൊടുത്തില്ലെന്ന് ആരോപിച്ചായിരുന്നു അതിക്രമം. കഴിഞ്ഞദിവസം രാത്രിയിൽ തൊളിക്കോട് ഇരുത്തലമൂല ജംഗ്ഷനിലെ കടയിൽ ആയിരുന്നു സംഭവം. ബേക്കറി ഉടമയെയും ഭാര്യയെയും ഭീഷണിപ്പെടുത്തിയ ശേഷം അല്പം കഴിഞ്ഞ് കാറുമായി എത്തി ബേക്കറിക്കുള്ളിലേക്ക് ഇടിച്ചു കയറ്റുകയായിരുന്നു. തുടർന്ന് ബേക്കറി ഉടമയ്ക്ക് നേരെ കല്ലെറിഞ്ഞു. ഉടമയെ തടിക്കഷണം കൊണ്ട് ആക്രമിക്കുകയും ഗ്ലാസ് മേശ അടിച്ചു പൊട്ടിക്കുകയും ചെയ്തു. ഉടമയുടെ ഭാര്യയുടെ കൈപിടിച്ച് തിരിക്കുകയും അടിക്കുകയും ചെയ്തു. കഞ്ചാവ്, അടിപിടി കേസുകളിൽ പ്രതിയാണ് മുഹമ്മദ് ഇജാസ്എന്ന് പോലീസ് പറഞ്ഞു.

വീട്ടമ്മയുടെ സ്വർണവും പണവും മോഷ്ടിച്ച സ്ത്രീ പിടിയിൽ

കാട്ടാക്കട: കാട്ടാക്കട ചന്തയിൽ സാധനം വാങ്ങാനെത്തിയ വീട്ടമ്മയുടെ സ്വർണവും പണവും അടങ്ങുന്ന സഞ്ചി മോഷ്ടിച്ച നെടുമങ്ങാട് സ്വദേശിനിയെ കാട്ടാക്കട പോലീസ് അറസ്റ്റ് ചെയ്തു. നെടുമങ്ങാട് വേട്ടംപള്ളി നഗറിൽ ശ്യാമള(65)യെയാണ് അറസ്റ്റ് ചെയ്തത്. കിള്ളി സ്വദേശി യഹിയ കഴിഞ്ഞദിവസം ചന്തയിൽനിന്ന് സാധനങ്ങൾ വാങ്ങുന്ന തിരക്കിനിടെയാണ് തന്ത്രപരമായി ശ്യാമള സ്വർണവും പണവും അടങ്ങുന്ന കവർ തട്ടിയെടുത്തത്.വീട്ടിലേക്കു പോകാൻ തുടങ്ങുമ്പോഴാണ് കവർ കാണാനില്ലെന്ന്‌ വീട്ടമ്മ അറിയുന്നതും കാട്ടാക്കട പോലീസിൽ പരാതി നൽകിയതും. മൂന്ന് പവൻ തൂക്കംവരുന്ന മാല, രണ്ട് ഗ്രാമിന്‍റെ ലോക്കറ്റ്, നാല് ഗ്രാമിന്‍റെ മോതിരം, 7,000 രൂപ, ബാങ്ക് എടിഎം കാർഡ്, രേഖകൾ എന്നിവയാണ് കവറിൽ ഉണ്ടായിരുന്നത്. സിസിടിവി ദൃശ്യങ്ങൾ പരിശോധിച്ചപ്പോഴാണ് ശ്യാമള കവർ കൈക്കലാക്കിയതും പുറത്തിറങ്ങി ഓട്ടോറിക്ഷയിൽ കയറിപ്പോകുന്നതും കണ്ടെത്തിയത്. പിന്നാലെ നടത്തിയ അന്വേഷണത്തിൽ മോഷണശേഷം ഇവർ നെടുമങ്ങാട് ബസിൽ കയറിപ്പോയതായും വിവരംകിട്ടി. നെടുമങ്ങാട് പോലീസുമായി ബന്ധപ്പെട്ടപ്പോൾ ഇവർ മുൻപും മോഷണക്കേസുകളിൽ ഉൾപ്പെട്ടിട്ടുണ്ടെന്ന് വ്യക്തമായതോടെ കസ്റ്റഡിയിൽ എടുക്കുകയായിരുന്നു. മോഷണമുതലിന്‍റെ കുറച്ചുഭാഗം കണ്ടെത്തിയതായി പോലീസ് പറഞ്ഞു. പ്രതിയെ റിമാൻഡ് ചെയ്തു.

ജോലി വാഗ്ദാനം ചെയ്ത് രണ്ടരക്കോടി രൂപ തട്ടിയെടുത്ത അഞ്ചുപേര്‍ അറസ്റ്റില്‍

വെഞ്ഞാറമൂട്: വിഎസ്എസ്‌സിയില്‍ ജോലി വാഗ്ദാനം ചെയ്ത് പലരില്‍ നിന്നായി രണ്ടരക്കോടിയിലധികം രൂപ തട്ടിയെടുത്ത കേസില്‍ അഞ്ച് പേര്‍ അറസ്റ്റില്‍. പോത്തന്‍കോട് പൂലന്തറ വീട്ടില്‍ റംസി(35), ഇവരുടെ ഭര്‍ത്താവ് ഓച്ചിറ മേമന അജ്മല്‍ മന്‍സിലില്‍ അജ്മല്‍(29), തിരുനെല്‍വേലി സീലാത്തിക്കുളം ഭജനമഠം തെരുവില്‍ മുരുകേശന്‍(59), ആറ്റിങ്ങല്‍ കാട്ടുമ്പുറം കടുവയില്‍ രോഹിണി നിവാസില്‍ വിഷ്ണു രാജ്(33), ആറ്റിങ്ങല്‍ അവനവഞ്ചേരി വിളയില്‍ വീട്ടില്‍ സുരേഷ് ബാബു(50) എന്നിവയാണ് അറസ്റ്റിലായത്. വെഞ്ഞാറമൂട് സ്വദേശിയായ അജ്ഞലി എന്ന യുവതി നല്കിയ പരാതിലാണ് നടപടി. ഇവരുടെ ഭര്‍ത്താവിന്‍റെ സുഹൃത്തായ പോത്തന്‍കോട് സ്വദേശി ശ്യാം എന്നയാളാണ് റംസിയെ പരിചയപ്പെടുത്തുന്നത്. തുടര്‍ന്ന് ഐഎസ്ആർഒയില്‍ മെക്കാനിക്കല്‍ എന്‍ജിനിയറാണ് താനെന്നും ഒന്‍പത് ലക്ഷം രൂപ നല്കിയാല്‍ അഡ്മിനിസ്‌ട്രേറ്റീവ് ഓഫീസറായി ജോലി തരപ്പെടുത്തി നല്കാമെന്ന് പറയുകയായിരുന്നു. ഇത് വിശ്വസിച്ച് അജ്ഞലി ആദ്യ ഗഡുവായി രണ്ട് ലക്ഷം രൂപ നല്കുകയും ബാക്കി പണം പല ഗഡുക്കളായി റംസിയുടെ അക്കൗണ്ടിലേക്ക് അയക്കുകയും ചെയ്തു. ഇതിതിനിടെ ഇതേ സംഘം തമിഴ് നാട്ടില്‍ നിന്നും ഇത്തരത്തില്‍ ജോലി വാഗ്ദാനം ചെയ്ത് രണ്ട് കോടി രൂപയോളം തട്ടിയെടുത്തുവെന്ന വാര്‍ത്ത പത്രങ്ങളില്‍ വരുന്നത്. ഇതോടെയാണ് കബളിക്കപ്പെട്ടു എന്ന് മനസിലാക്കി അജ്ഞലി വെഞ്ഞാറമൂട ‌പോലീസില്‍ പരാതി നല്കിയത്. വ്യാജ നിയമന ഉത്തരവുകള്‍, വിഎസ്എസ്‌സി ഐഡി കാര്‍ഡുകള്‍, അഡ്മിനിസ്‌ട്രേറ്റീവ് ഓഫീസറുടെ വ്യാജ സീലുകള്‍, നിരവധി സിം കാര്‍ഡുകള്‍, ലാപ് ടോപ്പ് എന്നിവ പ്രതികളില്നിന്നും പിടിച്ചെടുത്തിട്ടുണ്ട്. നാലും അഞ്ചും പ്രതികളായ വിഷ്ണുരാജ്, സുരേഷ് ബാബു, എന്നിവരാണ് വ്യാജ സീലുകളും നിയമന ഉത്തരവുകളും തരപ്പെടുത്തുന്നത്. വട്ടപ്പാറ, ആറ്റിങ്ങള്‍ പോലീസ് സ്‌റ്റേഷനുകളില്‍ പ്രതികള്‍ക്കെതിരെ കേസകളുണ്ടന്ന് പോലീസ് പറഞ്ഞു. പ്രതികളെ കോടതിയില്‍ ഹാജരാക്കി.

മർദനത്തിൽ പരിക്കേറ്റ മത്സ്യത്തൊഴിലാളി മരിച്ചു

വിഴിഞ്ഞം: മദ്യപിച്ച് സുഹൃത്തുകൾ തമ്മിലുണ്ടായ കൈ യ്യാങ്കളിയിൽ വീണ് തലയ്ക്ക് ഗുരുതരമായി പരിക്കേറ്റ മത്സ്യത്തൊഴിലാളി മരിച്ചു. ചപ്പാത്ത് അടിമലത്തുറ അമ്പലത്തുമൂലയിൽ തീർത്തപ്പൻ (57) ആണ് മരിച്ചത്. സംഭവവുമായി ബന്ധപ്പെട്ട് അയൽവാസിയായ സുഹൃത്ത് അലോഷ്യസിന് എതിരെ കൊലപാതക കുറ്റത്തിന് വിഴിഞ്ഞം പോലീസ് കേസെടുത്തു. തിങ്കളാഴ്ച്ച രാത്രി ഒന്പതിനുശേഷമാണ് ഇരുവരും തമ്മിൽ മദ്യപിച്ചശേഷം തർക്കമുണ്ടായത്. കൈയ്യാങ്കളിക്കിടെ തീർത്തപ്പൻ നിലത്ത് വീണ് തലയ്ക്ക് പരിക്കേറ്റു. തുടർന്ന് ചികിൽസതേടാതെ പരിക്കുമായി വീട്ടിലെത്തുകയായിരുന്നു. പിറ്റേദിവസം രാവിലെ അവശനിലയിൽ കണ്ട തീർത്തപ്പനെ വീട്ടുക്കാർ തിരുവനന്തപുരം മെഡിക്കൽ കോളജ് ആശുപത്രിയിൽ എത്തിച്ചെങ്കിലും ചികിൽസയിലിരിക്കെ ഇന്നലെ രാവിലെ മരണമടഞ്ഞു. തലയ്ക്കേറ്റ ഗുരുതരമായ മുറിവാണ് മരണത്തിന് കാരണമെന്ന് പോലിസ് പറഞ്ഞു. ഭാര്യ: മുത്തമ്മ. മക്കൾ: ശാന്തി, ഷൈനി. മരുമക്കൾ: യേശുദാസൻ, ജോൺസൺ. സംസ്കാരം ഇന്ന് രാവിലെ 9.30ന് അടിമലത്തുറ ഫാത്തിമ മാതാ ദേവാലയ സെമിത്തേരിയിൽ നടക്കും. ഒളിവിൽപോയ പ്രതിക്കായി വിഴിഞ്ഞം പോലീസ് അന്വേഷണം ആരംഭിച്ചു.

ബൈക്ക് തെന്നി മറിഞ്ഞ് വിദ്യാർഥി മരിച്ചു

പൂവാർ: നിയന്ത്രണം തെറ്റിയ ബൈക്ക് തെന്നി മറിഞ്ഞ് യാത്രികനായ ഐടിഐ വിദ്യാർഥി മരിച്ചു. കാഞ്ഞിരംകുളം മാങ്കാല എസ്എസ് ഭവനിൽ ഷിബുവിന്‍റെയും സരിതയുടെയും മകൻ വിശാൽ (19) ആണ് മരിച്ചത്. കഴിഞ്ഞദിവസം വൈകുന്നേരം നാലോടെ പുറുത്തിവിളയ്ക്ക് സമീപം മാങ്കൂട്ടത്തായിരുന്നു അപകടം നടന്നത്. സുഹൃത്തുകളെ കണ്ട് മടങ്ങിവരുന്നതിനിടയിൽ ബൈക്ക് നിയന്ത്രണം വിട്ട് മറിഞ്ഞ് തലയിടിച്ച് റോഡിൽ വീണ യുവാവിനെ നാട്ടുകാർ നെയ്യാറ്റിൻകര സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. വിശാൽ ചാക്ക ഐടിഐയിലെ ഒന്നാം വർഷ വിദ്യാർഥിയാണ്. പോസ്റ്റുമോർട്ടത്തിന് ശേഷം ബന്ധുക്കൾക്ക് കൈമാറിയ മൃതദേഹം സംസ്കരിച്ചു. വിവേക് സഹോദരനാണ്. പൂവാർ പോലീസ് കേസെടുത്തു.

വാട്ടര്‍ അഥോറിറ്റി പെന്‍ഷണേഴ്സ് കൂട്ടായ്മയുടെ പ്രകടനവും കൂട്ടധര്‍ണയും

നെടുമങ്ങാട്: കേരള വാട്ടര്‍ അഥോറിറ്റി പെന്‍ഷന്‍കാരുടെ കൂട്ടായ്മയുടെ ആഭിമുഖ്യത്തില്‍ വാട്ടര്‍ അഥോറിറ്റി ഹെഡ് ഓഫീസിലും ജില്ലാ ആസ്ഥാന ഓഫീസുകളിലും പ്രകടനവും കൂട്ടധര്‍ണയും സംഘടിപ്പിച്ചു. സംസ്ഥാന സര്‍ക്കാര്‍ പെന്‍ഷന്‍കാര്‍ക്ക് അനുവദിച്ച പെന്‍ഷന്‍ പരിഷ്കരണ കുടിശിക വാട്ടര്‍ അഥോറിറ്റി പെന്‍ഷന്‍കാര്‍ക്ക് നിഷേധിച്ചതിലും, പെന്‍ഷന്‍ ആനുകൂല്യങ്ങള്‍ അഞ്ച് വര്‍ഷത്തിനു മേലായി കുടിശികയായതിലും പ്രതിഷേധിച്ച് നടത്തിയ സമരം ഹെഡ് ഓഫീസിന് മുന്നില്‍ സംഘടനയുടെ ജനറല്‍ കണ്‍വീനര്‍ എം. രാധാകൃഷ്ണന്‍ ഉദ്ഘാടനം ചെയ്തു. പെന്‍ഷനേഴ്സ് ഓര്‍ഗനൈസഷന്‍ ജനറല്‍ സെക്രട്ടറി ടി. വത്സപ്പൻ നായര്‍ അധ്യക്ഷത വഹിച്ചു. പെന്‍ഷനേഴ്സ് അസോസിയേഷന്‍ വൈസ് പ്രസിഡന്‍റ് അരുവിക്കര വിജയൻനായര്‍ , വിവിധ പെന്‍ഷന്‍ സര്‍വീസ് സംഘടനാ നേതാക്കളായ അജിതാദേവി, പി. കെ. രവീന്ദ്രന്‍, ഒ.ആർ. ഷാജി, പി. ബിജു, എസ്. ഹസന്‍, തമ്പി, നിഖില്‍, സുരേഷ്, ജയകുമാര്‍, വി. ചന്ദ്രൻ എന്നിവര്‍ പ്രസംഗിച്ചു.

ബിജെപിയിൽനിന്ന് രാജിവച്ച് സിപിഐയില്‍

പാറശാല: ബിജെപി അമരവിള ഏരിയ പ്രസിഡന്‍റ് എസ്. മോഹനകുമാര്‍ സിപിഐയില്‍ ചേര്‍ന്നു. ബിജെപിയുടെ സ്ഥാനാര്‍ഥിയായി വ്ലാങ്ങാമുറി വാര്‍ഡില്‍ നിന്നും മത്സരിച്ചിരുന്നു. ബിജെപിയില്‍ ഉണ്ടായ അവഗണനെ തുടര്‍ന്നാണ് സിപിഐയില്‍ ചേര്‍ന്നത് എന്ന് സ്വീകരണയോഗത്തില്‍ മോഹനകുമാര്‍ പറഞ്ഞു. പികെവി സെന്‍ററില്‍ ചേര്‍ന്ന സ്വീകരണയോഗം പാര്‍ട്ടി സംസ്ഥാന കൗണ്‍സില്‍ അംഗം എ.എസ്. ആനന്ദകുമാര്‍ ഉദ്ഘാടനം ചെയ്തു. ടൗണ്‍ ലോക്കല്‍ കമ്മിറ്റി സെക്രട്ടറി ആര്‍‌. ടി. സനല്‍രാജ് അധ്യക്ഷനായ യോഗത്തില്‍ മണ്ഡലം സെക്രട്ടറി ജി. എന്‍. ശ്രീകുമാരന്‍, മണ്ഡലം കമ്മിറ്റി അംഗങ്ങളായ വി. എസ്. സജീവ് കുമാര്‍, എന്‍. കെ. അനിതകുമാരി, എസ്.എസ്.ഷെറിന്‍, എഐവൈ എഫ് .മണ്ഡലം സെക്രട്ടറി എല്‍. ടി. പ്രശാന്ത്, മണ്ഡലം പ്രസിഡന്റ് അഡ്വ. വി.വി.വിശാഖ് തുടങ്ങിയവര്‍ പ്രസംഗിച്ചു. ലോക്കല്‍ കമ്മിറ്റി അംഗങ്ങളായ ഇ. സ്റ്റാന്‍ലി ജോസ്, വിഷ്ണു, കെ. വി. ജയപ്രകാശ്, സി. എസ് .അനില്‍, എ. ഉണ്ണി, അഭിലാഷ്, മുത്തു കുമാര്‍ തുടങ്ങി നിരവധി പേര്‍ പങ്കെടുത്തു.

സ്വപ്ന സജി വെഞ്ഞാറമൂട് റോട്ടറി ക്ലബ് പ്രസിഡന്‍റ്

വെഞ്ഞാറമൂട് : വെഞ്ഞാറമൂട് റോട്ടറി ക്ലബിന്‍റെ ആദ്യ വനിതാ പ്രസിഡന്‍റായി സ്വപ്ന സജി ചുമതലയേറ്റു. ക്ലബിന്‍റെ മുപ്പത്തിയാറാമത് പ്രസിഡന്‍റായാണ് സ്വപ്ന സജി ചുമതലയേറ്റത്. വെഞ്ഞാറമൂട് റോട്ടറി ഹാളിൽ നടന്ന സ്ഥാനാരോഹണ ചടങ്ങിൽ സെക്രട്ടറിയായി എ.എ. റഷദും, ട്രഷററായി ദിലീപ് കുമാറും ചുമതലയേറ്റു. എം.ഐ. അനീഷ് അധ്യക്ഷനായ ചടങ്ങിൽ മുൻ അസിസ്റ്റന്‍റ് ഗവർണർ വി.വി.സജി, മുൻ ഡിസ്ട്രിക്ട് ഗവർണർ സജി മാത്യു, കെഎസ്ആർടിസി എംഡി പ്രമോജ് ശങ്കർ,ഗോകുലം ഗ്രൂപ്പ് വൈസ് ചെയർമാൻ കെ.കെ മനോജൻ ,മുൻ ഭാരവാഹികളായ രവീന്ദ്രൻ നായർ , ശശീന്ദ്രൻ നായർ , എസ് നജുമുദ്ദീൻ, ആനക്കുഴി റഷീദ്, പ്രേംരാജ് തുടങ്ങിയവർ പങ്കെടുത്തു. പ്രോജക്ടിന്‍റെ ഭാഗമായി ചടങ്ങിൽ കർഷകർക്കുള്ള പണിയായുധങ്ങൾ, കുട്ടികൾക്കുള്ള പഠനോപകരണം, ചികിത്സാ ധനസഹായ വിതരണം തുടങ്ങിയവ നടന്നു.

സ്കൂൾ വിദ്യാർഥികൾ നെടുമങ്ങാട് കോടതിയിൽ

നെടുമങ്ങാട് : കോടതിയിലേക്കുള്ള വിദ്യാർഥികളുടെ നിയമ പരിജ്ഞാനയാത്ര "സംവാദ'യുടെ ഭാഗമായി നെടുമങ്ങാട് ഗവ. ഗേൾസ് ഹയർ സെക്കൻഡറി സ്കൂൾ വിദ്യാർഥികൾ നെടുമങ്ങാട് കോടതിയിലെത്തി. ജുഡിഷ്യൽ ഫസ്റ്റ് ക്ലാസ് മജിസ്ട്രേറ്റ് (വനം കോടതി) ഹരിത വിദ്യാർഥികളുമായി സംവദിക്കുകയും ബാഡ്ജ് വിതരണം നിർവഹിക്കുകയും ചെയ്തു. കോടതി സന്ദർശനം, വിവിധ സെഷനുകൾ, ക്വിസ് മത്സരം എന്നിവയ്ക്ക് ശേഷം വിജയികൾക്ക് ലീഗൽ സർവീസ് അധികൃതർ സമ്മാനങ്ങൾ വിതരണം ചെയ്തു. നെടുമങ്ങാട് ബാർ അസോസിയേഷൻ പ്രസിഡന്‍റ് അഡ്വ.കോലിയക്കോട് സി.ഒ മോഹൻകുമാർ,താലൂക്ക് കോ-ഓർഡിനേറ്റർ അഡ്വ.കെ.ഉബൈസ് ഖാൻ, ലീഗൽ സർവീസ് സെക്രട്ടറി വൈശാന്ത്,അഡ്വ.അനില കെ.പി, അഡ്വ.സെന്തിൽകുമാർ,അഡ്വ. ലത പി.എസ് , അഡ്വ. ജയകുമാർ തീർത്ഥം, അഡ്വ.സജിത, പാരാ ലീഗൽ വോളന്‍റിയർമാരായ പ്രിയങ്ക,രമ്യാ,പ്രമീള തുടങ്ങിയവർ നേതൃത്വം നല്കി.

ലഹരി കടത്ത്; യുവാവ് കരുതല്‍ തടങ്കലില്‍

പൂന്തുറ: നിരന്തരമായി ലഹരി കടത്തുകേസുമായി ബന്ധപ്പെട്ട് യുവാവിനെ കരുതല്‍ തടങ്കലില്‍ പാര്‍പ്പിച്ചു. തിരുവനന്തപുരം മണക്കാട് ബലവാന്‍നഗര്‍ സ്വദേശി ജലാലിന്‍റെ മകന്‍ സബിനെ (28) ആണ് ആഭ്യന്തര വകുപ്പിന്‍റെ നിര്‍ദേശ പ്രകാരം ഒരു വര്‍ഷത്തേക്ക് കരുതല്‍ തടങ്കലില്‍ പാര്‍പ്പിച്ചത്. സബിന്‍ നിരവധി എംഡിഎംഎ , സ്റ്റാമ്പ് , കഞ്ചാവ് കേസുകളിലെ പ്രതിയാണെന്നും പിഐടി -എന്‍ഡിപിഎസ് (പ്രിവന്‍ഷന്‍ ഓഫ് ഇല്ലീഗല്‍ ട്രാന്‍സ്‌പോര്‍ട്ടേഷന്‍ ഓഫ് നാര്‍കോര്‍ട്ടിക് ട്രഗ്ഗസ് ) വകുപ്പ് പ്രകാരമാണ് ഇയാളെ കരുതല്‍ തടങ്കലില്‍ പാര്‍പ്പിച്ചതെന്നും പൂന്തുറ പോലീസ് അറിയിച്ചു.

വനം വകുപ്പിന്‍റെ പുതിയ വാഹനങ്ങള്‍ ഫ്‌ളാഗ്ഓഫ് ചെയ്തു

പേരൂര്‍ക്കട: വനം വകുപ്പിന് അനുവദിച്ച പുതിയ 10 വാഹനങ്ങളുടെ ഫ്‌ളാഗ് ഓഫ് വഴുതക്കാട്ടെ വനം ആസ്ഥാനത്ത് മന്ത്രി എ.കെ. ശശീന്ദ്രന്‍ നിര്‍വഹിച്ചു. വകുപ്പിലെ വിവിധ ഘടകങ്ങളുടെ പ്രവര്‍ത്തനങ്ങള്‍ കൂടുതല്‍ ഫലപ്രദമാകുമെന്ന് മന്ത്രി പറഞ്ഞു. വനം മേധാവി രാജേഷ് രവീന്ദ്രന്‍, ചീഫ് വൈല്‍ഡ് ലൈഫ് വാര്‍ഡന്‍ പ്രമോദ് ജി. കൃഷ്ണന്‍, ഉദ്യോഗസ്ഥരായ ജസ്റ്റിന്‍ മോഹന്‍, എല്‍. ചന്ദ്രശേഖര്‍ തുടങ്ങിയവര്‍ പങ്കെടുത്തു. ടൈം പേയ്മെന്റ് ഫണ്ടില്‍ നിന്ന് അനുവദിച്ച 93,73,300 രൂപ ചെലവഴിച്ചാണ് വാഹനങ്ങള്‍ വാങ്ങിയത്.

സംസ്‌കരണത്തിന്‍റെ ആദ്യപടി മാലിന്യം വേര്‍തിരിക്കുന്നത്: ജില്ലാ കളക്ടര്‍

പേരൂര്‍ക്കട: മാലിന്യം ശരിയാംവണ്ണം വേര്‍തിരിക്കുന്നതാണ് മാലിന്യസംസ്‌കരണത്തിന്‍റെ ആദ്യപടിയെന്നു ജില്ലാ കളക്ടര്‍ അനുകുമാരി. തൈക്കാട് മോഡല്‍ ബോയ്‌സ് ഹൈസ്‌കൂളില്‍ ഗ്രീന്‍ ചാമ്പ്‌സ് ഇങ്ക് ഷിഫ്റ്റ് പദ്ധതിയുടെ ഉദ്ഘാടനം നിര്‍വഹിക്കുകയായിരുന്നു അവര്‍. ഒറ്റത്തവണ പ്ലാസ്റ്റിക്കിന്‍റെ ഉപയോഗം പരമാവധി കുറയ്ക്കുകയും പ്രകൃതിയുടെ പുനരുജ്ജീവനത്തിനായി ലളിത ജീവിതം നയിക്കാന്‍ ഓരോരുത്തരും തയാറാവുകയും വേണം. ഇതിലൂടെ ഒരു ഗ്രീന്‍ ചാമ്പ്യനെ വളര്‍ത്തിയെടുക്കുക എന്നതാണ് പദ്ധതിയുടെ ലക്ഷ്യമെന്നും കളക്ടര്‍ കൂട്ടിച്ചേര്‍ത്തു. കുട്ടികള്‍ക്കായി ബോധവത്കരണ ക്ലാസ് ഉണ്ടായിരുന്നു. ഡിഡിഇ ശ്രീജ ഗോപിനാഥ് അധ്യക്ഷത വഹിച്ചു. അസിസ്റ്റന്‍റ് കളക്ടര്‍ ശിവശക്തിവേല്‍, സ്‌കൂള്‍ പ്രിന്‍സിപ്പല്‍ കെ.വി. പ്രമോദ്, ശുചിത്വമിഷന്‍ പ്രതിനിധികള്‍ തുടങ്ങിയവര്‍ പങ്കെടുത്തു.

വെള്ളനാട് സ്കൂളിൽ ജാഗ്രത സമിതി

നെടുമങ്ങാട്: കുട്ടികളുടെ സുരക്ഷിതത്വത്തിൽ നാട്ടുകാരുടെ പങ്കാളിത്തം ഉറപ്പുവരുത്തി വെള്ളനാട് ജി.കാർത്തികേയൻ സ്മാരക ഗവ. വൊക്കേഷണൽ & ഹയർ സെക്കൻഡറി സ്കൂളിൽ ജാഗ്രത സമിതി രൂപീകരിച്ചു. കൺവീനറായ ആര്യനാട് സർക്കിൾ ഇൻസ്പെക്ടർ ശ്യാംരാജ്.ജെ.നായർ ഉദ്ഘാടനം ചെയ്തു. പി.ടി.എ പ്രസിഡന്‍റ് വി.ചന്ദ്രശേഖരൻ അദ്ധ്യക്ഷത വഹിച്ചു. സ്കൂൾ പ്രൊട്ടക്ഷൻ ഗ്രൂപ്പിന്‍റെ രൂപീകരണവും നടന്നു.ജില്ലാപഞ്ചായത്തംഗം വെള്ളനാട് ശശി,വെള്ളനാട് ബ്ലോക്ക് പഞ്ചായത്ത് പ്രസിഡന്‍റ് എസ്.ഇന്ദുലേഖ,വെള്ളനാട് പഞ്ചായത്ത് വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ എസ്.ബിന്ദു, അസിസ്റ്റന്‍റ് എക്സൈസ് ഇൻസ്പെക്ടർ ബി.അജയകുമാർ, എസ്.എം.സി ചെയർമാൻ കെ.എസ് ബിനു, പ്രിൻസിപ്പൽ കെ.എസ്.രാജശ്രീ,വിഎച്ച്എസ്ഇ പ്രിൻസിപ്പൽ ആർ.ജയശ്രീ, ഹെഡ്മാസ്റ്റർ എൻ.ജെ.പ്രേംദേവാസ്,പി.ടി എ വൈസ് പ്രസിഡന്‍റ് വി.സുരേഷ്,എസ്എംസി വൈസ്ചെയർമാൻ കെ.പത്മകുമാർ, എസ്ആർജി കോ-ഓർഡിനേറ്റർ എസ്.ആർ.സംഗീത എന്നിവർ പ്രസംഗിച്ചു.

വയോധികയെ പീഡിപ്പിച്ച യുവാവിന് 21 വർഷം കഠിനതടവ്

തിരുവനന്തപുരം: ഒറ്റയക്കു താമസിച്ചു വരികയായിരുന്ന വയോ ധികയെ രാത്രി വീട്ടിൽ അതിക്രമിച്ചു കയറി പീഡിപ്പിച്ച കേസിൽ നെടുമങ്ങാട് പയ്യന്പള്ളി ശവക്കാടിന് സമീപം തടത്തരികത്ത് വീട്ടിൽ ഷഫീക്കി(34)ന് തിരുവനന്തപുരം അഡീഷണൽ ജില്ലാ ജഡ്ജി എം.പി. ഷിബു 21 വർഷം കഠിനതടവും 60,000 രൂപ പിഴയും ശിക്ഷ വിധിച്ചു. 2017 ലാണ് കേസിനാസ്പദമായ സംഭവം നടന്നത്. വയോധിക ഒറ്റയ്ക്കാണ് താമസം എന്ന് മനസിലാക്കിയ കൊടുംകുറ്റവാളിയായ പ്രതി രാത്രി വീട്ടിൽ അതിക്രമിച്ചു കയറി വയോധികയെ പീഡിപ്പിക്കുകയും സ്വർണാഭരണങ്ങൾ അപഹരിക്കുകയുമായിരുന്നു. വൃദ്ധയുടെ വീട്ടിലെ ആഭരണപ്പെട്ടിയിൽ നിന്നും ലഭിച്ച വിരലടയാളത്തിന്‍റെ അടിസ്ഥാനത്തിൽ കുറ്റവാളികളുടേതായി ഫോറൻസിക് വിഭാഗം സൂക്ഷിച്ചിരുന്ന വിരലടയാള രേഖകളുമായി ഫിംഗർപ്രിന്‍റ് ബ്യൂറോ ഒത്തുനോക്കിയതിൽ നിന്നാണ് പ്രതിയിലേക്ക് അന്വേ ഷണം എത്തിയത്. അറസ്റ്റ് ചെയ്യപ്പെട്ട പ്രതിയിൽ നിന്നും കളവുപോയ ആഭണങ്ങൾ കണ്ടെടുക്കാൻ കഴിഞ്ഞത് കേസിലെ വളരെ വിലപ്പെട്ട തെളിവായി. രാത്രി സമയത്ത് ഇരുട്ടിൽ നടന്ന സംഭവമായതിനാൽ വൃദ്ധയ്ക്ക് പ്രതിയെ തിരിച്ചറിയാനായില്ല. സാഹചര്യ തെളിവിനെ അടിസ്ഥാനപ്പെടുത്തിയാണ് പ്രതിയെ കോടതി ശിക്ഷിച്ചത്.

തെരുവുനായ കുറുകെ ചാടി ബൈക്ക് യാത്രികനായ സിഐക്ക് പരിക്ക്

നെടുമങ്ങാട്: തെരുവുനായ കുറുകെ ചാടി ബൈക്കിൽ സഞ്ചരിച്ചിരുന്ന നെടുമങ്ങാട് പോലീസ് ഇൻസ്പെക്ടർ വി.രാജേഷ് കുമാറിന് പരിക്ക്. വലതുകാലിനും കൈയ്ക്കും പരുക്കേറ്റ ഇൻ‍സ്പെക്ടർ സ്വകാര്യ ആശുപത്രിയിൽ ചികിത്സ തേടി. പോത്തൻകോട്ടെ കുടുംബ വീട്ടിലേക്ക് പോകുന്നതിനിടെ കഴിഞ്ഞദിവസം വൈകിട്ട് 3.30 ഓടെ ആണ് നന്നാട്ടുകാവ് ജംഗ്ഷനിലായിരുന്നു അപകടം. തെരുവുനായ ബൈക്കിൽ ഇടിച്ചതിനെ തുടർന്ന് വാഹനത്തിൽ നിന്ന് വീണു റോഡിൽ വീണു പരിക്ക് പറ്റുകയായിരിന്നു.

പാറശാല മണ്ഡലത്തില്‍ പുതിയ 11 വാര്‍ഡുകള്‍

മരിച്ചവരും പട്ടികയിലെന്ന പരാതിയുമായി ബിജെപി പാറശാല: തദ്ദേശ വാര്‍ഡ് പുനര്‍ നിര്‍ണ്ണയവും പുതിയ വാര്‍ഡുകളു ടെരൂപീകരണവും നടപ്പിലായതോടെ നിയോജക മണ്ഡലത്തില്‍ പുതിയ 11 വാര്‍ഡുകള്‍ കൂടി നിലവില്‍ വരും. സംവരണ, ജനറല്‍ വാര്‍ഡുകള്‍ ഏതൊക്കെയാകുമെന്നതില്‍ കാത്തിരിക്കേണ്ടവരും. മണ്ഡലത്തിലെ പുതുക്കിയ തദ്ദേശഭരണ സ്ഥാപനങ്ങളുടെ വാര്‍ഡ് പുനര്‍നിര്‍ണയവും പുതിയ വാര്‍ഡ് രൂപീകരണവും രാഷ്‌ട്രീയ ഭിന്നതകള്‍ക്കും കാരണമാകുന്നുണ്ട്. കുന്നത്തുകാലും കൊല്ലയിലും രണ്ട് വാര്‍ഡുകളും മറ്റു പഞ്ചായത്തുകളില്‍ ഓരോ വാര്‍ഡുമാണ് വര്‍ദ്ധിക്കുക. കുന്നത്തുകാല്‍ പഞ്ചായത്തില്‍ ആകെയുള്ള 21 വാര്‍ഡ് ഇനി 23 ആകും . ഉണ്ടന്‍കോട്, വള്ളിച്ചിറ വാര്‍ഡുകളാണ് പുതിയതായി നിലവില്‍ വന്നത്. കോരണംകോട്, അരുവിയോട്, പാലിയോട് വാര്‍ഡുകള്‍ വിഭജിച്ച് വള്ളിച്ചിറയും ചെറിയകൊല്ല ,നിലമാമൂട് ,എള്ളുവിള വാര്‍ഡുകളുടെ ഭാഗങ്ങള്‍ കൂട്ടിച്ചേര്‍ത്ത് ഉണ്ടന്‍കോട് വാര്‍ഡും രൂപീകരിച്ചു. ആര്യങ്കോട് പഞ്ചായത്തില്‍ ഒരു വാര്‍ഡ് വര്‍ദ്ധിച്ച് 17 വാര്‍ഡുകള്‍ ആയി. ഒറ്റശേഖരമംഗലത്ത് ചിത്തന്‍കാല വാര്‍ഡ് നിലവില്‍ വന്നതോടെ ആകെവാര്‍ഡ് 15 ആയി. കുരവറ, വട്ടപ്പറമ്പ് ,ഒറ്റശേഖരമം ഗലം വാര്‍ഡുകളുടെ ഭാഗങ്ങള്‍ ചിത്തന്‍ കാലയില്‍ ഉള്‍പ്പെടും. വെള്ളറട പഞ്ചായത്തില്‍ പഞ്ചാകുഴി, മുണ്ടനാട്, പൊന്നമ്പി, മാനൂര്‍ വാര്‍ഡു കളില്‍ നിന്നായി മുള്ളിലവ്വിള വാര്‍ഡ് നിലവില്‍ വരുന്നതോടെ ആകെ 25 വാര്‍ഡ് നിലവിലുണ്ടാകും. അമ്പൂരി പഞ്ചായത്തില്‍ ആനക്കുഴി വാര്‍ഡ് തൊടുമല ,അമ്പൂരി, കൂട്ടപ്പൂ വാര്‍ഡുകളുടെ ഭാഗങ്ങള്‍ ചേര്‍ത്ത് നിലവില്‍ വരുന്നതോടെ ആകെ 15 വാര്‍ഡ് ഉണ്ടാകും. കളളിക്കാട് പഞ്ചായത്തില്‍ വാവോട് ,കാളിപ്പാറ, ചാമവിളപ്പുറം, മൈലക്കര വാര്‍ഡുകളുടെ ഭാഗങ്ങള്‍ ചേര്‍ത്ത് മുകുന്ദറ വാര്‍ഡ് രൂപീകരിച്ച തോടെ ആകെവാര്‍ഡ് 14 ആയി മാറും. പാറശാല പഞ്ചായത്തില്‍ ഒരു വാര്‍ഡ് വര്‍ദ്ധിക്കും. നെടുവാന്‍വിള, മുള്ളുവിള കരുമാനൂര്‍ വാര്‍ഡുകളില്‍ നിന്നായി പുത്തന്‍കട കേന്ദ്രമായി പുതിയ വാര്‍ഡ് വരുന്നതോടെ എണ്ണം 24 ആകും. പെരുങ്കടവിളയില്‍ തത്തിയൂര്‍, ചുള്ളിയുര്‍ ,ആലത്തൂര്‍, പുളിമാങ്കോട്,മാരായമുട്ടം വാര്‍ഡുകളില്‍ നിന്നായി മണലുവിള വാര്‍ഡ് രൂപീകരിച്ചു. കൊല്ലയില്‍ പഞ്ചായത്തില്‍ നുളക്കോണം ,ഹൈസ്‌കൂള്‍ വാര്‍ഡുകളാണ് പുതിയതായി നിലവില്‍ വന്നത്. ഇതോടെ ആകെ വാര്‍ഡുകളുടെ എണ്ണം 18 ആയി .മണ്ഡലത്തില്‍ ആകെയുള്ള ഒന്‍പത് പഞ്ചായത്തുകളില്‍ അഞ്ചിത്ത് എല്‍ഡിഎഫ് മുന്നിടത്ത് യുഡിഎഫ് ഒരിടത്ത് ബിജെപി ഭരണസമിതിയാണ് നിലവിലുള്ളത്. പാറശാല: തദ്ദേശ തെരഞ്ഞെടുപ്പിന് മുന്നോടിയായി പാറശാല മണ്ഡലത്തിലെ വിവിധ പഞ്ചായത്തുകള്‍ പുറത്തിറക്കിയ കരട് വോട്ടര്‍ പട്ടികയിലെ പിഴവുകള്‍ സംബന്ധിച്ച് വ്യാപക പരാതി. വോട്ടര്‍ പട്ടികയിലെ പിഴവുകള്‍ തിരുത്തി കുറ്റമറ്റ രീതിയില്‍ പുതിയ പട്ടിക പ്രസിദ്ധീകരിക്കണമെന്ന് ബിജെപി പാറശാല മണ്ഡലം കമ്മറ്റി ആവശ്യപ്പെട്ടു.പട്ടികയിലെ പിഴവുകള്‍ തിരുത്തണമെന്നാവശ്യപ്പെട്ട് മണ്ഡലത്തിലെ വിവിധ ബിജെപി പഞ്ചായത്ത് കമ്മറ്റികള്‍ പഞ്ചായത്ത് സെക്രട്ടറിമാര്‍ക്ക് പരാതി നല്‍കി. ഭരണകക്ഷികള്‍ക്ക്പഞ്ചായത്തുകളില്‍ മേല്‍ക്കൈ നേടുന്ന വിധത്തിലാണ് പട്ടിക പ്രസിദ്ധീകരിച്ചതെന്നാണ് ആരോപണം. മരിച്ചവര്‍ പട്ടികയില്‍ ഉള്‍പ്പെട്ടുവെന്നും ഒഴിവാക്കപ്പെട്ടവര്‍ പ്രതിപക്ഷ പാര്‍ട്ടികളി ലുള്ളവരാണെന്നും അതിര്‍ത്തി പ്രദേശത്ത് തമിഴ്‌നാട്ടില്‍ നിന്നുള്ളവര്‍ വോട്ടര്‍ പട്ടികയില്‍ ഉള്‍പ്പെട്ടിട്ടുണ്ടെന്നുമാണ് ആരോപണം . വാര്‍ഡ് പുനര്‍നിര്‍ണയം നടന്ന ശേഷം പ്രസിദ്ധീകരിച്ച പട്ടികയില്‍ ഒരേ കുടുംബത്തിലുള്ളവര്‍ രണ്ടു വാര്‍ഡുകളില്‍ ഉള്‍പ്പെട്ടിട്ടുണ്ട്. പാറശാല പഞ്ചായത്തിലെ ഇഞ്ചിവിള വാര്‍ഡില്‍ താമസിക്കുന്ന കുടുംബത്തിലെ അച്ഛന്‍റെ വോട്ട് ചെറുവാരക്കോണം വാര്‍ഡിലും മകന്‍റെ വോട്ട് വന്യക്കോട് വാര്‍ഡിലുമാണ്. ഇങ്ങനെ വോട്ടര്‍മാരെ വാര്‍ഡു മാറ്റിയ ഒട്ടേറെ പരാതികളുണ്ട്. പാറശാല ടൗണ്‍ , നെടുവാന്‍വിള എന്നീ വാര്‍ഡുകളിലെ വോട്ടുകള്‍ പുതുതായി രൂപീകരിച്ച പുത്തന്‍കട വാര്‍ഡിലാണ് ഉള്‍പ്പെടുത്തിയിട്ടുള്ളത്. കുന്നത്തുകാല്‍, വെള്ളറട പഞ്ചായത്തുകളില്‍ നിയോജക മണ്ഡലം വിട്ട്താമസം മാറിപ്പോയവര്‍, മരിച്ചവര്‍ എന്നിവരുടെ വോട്ടുകള്‍ മാറ്റിയിട്ടില്ലെന്നും പരാതിയുണ്ട്. വാര്‍ഡ് വിഭജനത്തിലും പരാതി പഞ്ചായത്ത് ബ്ലോക്ക് ജില്ലാ വാര്‍ഡ് വിഭജനത്തിലും പരാതിയിലാണ് പ്രതിപക്ഷ കക്ഷികള്‍. ജില്ലാ പഞ്ചായത്തിലെ പുതിയ ഡിവിഷനായ ഒറ്റശേഖരമംഗ ലം ഡിവിഷനി ബ്ലോക്ക് ഡിവിഷനുകള്‍ ഉള്‍പ്പെടുത്തിയിരിക്കുന്നതാണ് ആക്ഷേപങ്ങള്‍ക്കിടയാക്കിയിട്ടുള്ളത്. ഉള്‍പ്പെട്ടിട്ടുള്ള പല ബ്ലോക്ക്ഡിവിഷനുകളും തമ്മില്‍ പരസ്പര ബന്ധമില്ല. പെരുങ്കടവിള ബ്ലോക്ക് പഞ്ചായത്തിന്‍റെ കള്ളിക്കാട്, മാരായമുട്ടം, പെരുങ്കടവിള, ആര്യങ്കോട്,ഒറ്റശേഖരമംഗലം ഡിവിഷനുകളാണ് പുതിയ ജില്ലാഡിവിഷനില്‍ ഉള്‍പ്പട്ടിരിക്കുന്നത്. ബ്ലോക്ക് പഞ്ചായത്തിന്‍റെ ഒറ്റശേഖരമംഗലം ആര്യങ്കോട് ഡിവിഷനുകള്‍ക്കിടയിലുള്ള ചെമ്പൂര് ഡിവിഷന്‍ ഇപ്പോഴും വെള്ളറട ജില്ലാപഞ്ചായത്ത് ഡിവിഷന്‍റെ ഭാഗമായി തുടരുകയുമാണ്.

നേതൃസമ്മേളനം സംഘടിപ്പിച്ചു

നെയ്യാറ്റിൻകര: ലത്തീൻ രൂപത നെയാറ്റിൻകര ഇന്‍റഗ്രൽ ഡവലപ്മെന്‍റ് സൊസൈറ്റി കേരള ലേബർ മൂവ്മെന്‍റിന്‍റെ നേതൃത്വത്തിൽ ലോഗോസ് പാസ്റ്ററൽ സെന്‍ററിൽ നേതൃസമ്മേളനം സംഘടിപ്പിച്ചു. എൻഐഡിഎസ് പ്രസിഡന്‍റ് മോൺ. ജി. ക്രിസ്തുദാസ് അധ്യക്ഷത വഹിച്ച യോഗം നെയാറ്റിൻകര രൂപത സഹമെത്രാൻ റൈറ്റ് റവ. ഡോ. സെൽവരാജൻ ഉത്ഘാടനം ചെയ്തു. എൻഐഡിഎസ് ഡയറക്ടർ റവ. ഫാ. രാഹുൽ ബി. ആന്‍റോ, രൂപത കെഎൽഎം ഡയറക്ടർ റവ.ഫാ.ഡെന്നിസ് മണ്ണൂർ, കമ്മീഷൻ സെക്രട്ടറി ഫാ.ക്ലീറ്റസ്, കെഎൽഎം സംസ്ഥാന പ്രസിഡന്‍റ് ജോസ് മാത്യു, സെക്രട്ടറി ഡിക്സൻ മനീക്, ഖജാൻജി തോമസ് മാത്യു, പ്രോജക്ട് ഓഫീസർ മൈക്കിൾ, കെഎൽഎം രൂപത പ്രസിഡന്‍റ് ദേവരാജൻ, രൂപത സെക്രട്ടറി ബീനറാണി, രൂപത എൻഐഡിഎസ് സെക്രട്ടറി പ്രതിനിധി ശശിധരൻ, കെഎൽഎം രൂപത ഖജാൻജി കല, നെയ്യാറ്റിൻകര മേഖല ആനിമേറ്റർ ബീനകുമാരി എന്നിവർ പ്രസംഗിച്ചു. ജോസ് മാത്യു , ഡിക്സൻ മനീക്ക് എന്നിവർ ക്ലാസ് നയിച്ചു.

ഉമ്മൻ ചാണ്ടി മാനവ സ്നേഹത്തിന്‍റെ ഉദാത്ത മാതൃകയെന്ന് സണ്ണി ജോസഫ്

തിരുവനന്തപുരം: മാനവ സ്നേഹത്തിന്‍റെ ഉദാത്തമാതൃകയാണ് മുൻ മുഖ്യമന്ത്രി ഉമ്മൻ ചാണ്ടിയെന്ന് കെപിസിസി പ്രസിഡന്‍റ് സണ്ണി ജോസഫ് എംഎൽഎ. അദ്ദേഹത്തെ ജനഹൃദയങ്ങളുമായി ബന്ധിപ്പിച്ച പ്രധാന ഘടകം കാരുണ്യവും നന്മയും സ്നേഹവുമായിരുന്നു. കേരള സെക്രട്ടേറിയറ്റ് അസോസിയേഷൻ വജ്ര ജൂബിലി വേളയിൽ മുൻ മുഖ്യമന്ത്രി ഉമ്മൻ ചാണ്ടിയുടെ രണ്ടാം ചരമവാർഷികത്തിന്‍റെ ഭാഗമായി അസോസിയേഷൻ സംഘടിപ്പിച്ച ഉമ്മൻ ചാണ്ടി അനുസ്മരണവും കാരുണ്യോദയം പദ്ധതിയുടെ ഉദ്ഘാടനവും നിർവഹിക്കുകയായിരുന്നു സണ്ണി ജോസഫ്. ഉമ്മൻചാണ്ടി എല്ലാവരെയും സ്നേഹിക്കുകയും സംരക്ഷിക്കുകയും ആർക്കും ഒരു ദോഷവും വരുത്തിയിട്ടില്ലെന്ന് അനുസ്മരണ പ്രഭാഷണം നടത്തിയ ഭാര്യ മറിയാമ്മ ഉമ്മൻ ചാണ്ടി പറഞ്ഞു. അസോസിയേഷൻ പ്രസിഡന്‍റ് എം.എസ് ഇർഷാദ് അധ്യക്ഷത വഹിച്ചു. എം.വിൻസെന്‍റ് എംഎൽഎ, കെപിസിസി ജനറൽ സെക്രട്ടറി ജി.സുബോധൻ, കെ.പി പുരുഷോത്തമൻ, കെ.എം അനിൽകുമാർ, എ.സുധീർ തുടങ്ങിയവർ പ്രസംഗിച്ചു. കാരുണ്യോദയം പദ്ധതിയിൽ 300 പേർക്ക് ഭക്ഷ്യക്കിറ്റും ചികിത്സാ ധനസഹായവും വിതരണം ചെയ്തു.

ജയന്‍ ചലച്ചിത്ര ലോകത്ത് സ്വന്തം ഇടം സൃഷ്ടിച്ച നടന്‍: കെ. കെ. ശൈലജ

തിരുവനന്തപുരം: മറ്റൊരെയും അനുകരിക്കാതെ സ്വന്തം അഭിനയ ശൈലിയിലൂടെ മലയാള ചലച്ചിത്ര ലോകത്ത് സ്വന്തമായൊരു ഇടം കണ്ടെത്തിയ അഭിനേതാവാണ് ജയന്‍ എന്ന് എംഎല്‍എ കെ.കെ. ശൈലജ. ജയന്‍ കലാസാംസ്കാരിക വേദി ഇന്നലെ ഭാരത് ഭവനില്‍ സംഘടിപ്പിച്ച ജയന്‍ ജന്മദിനാചരണ ചടങ്ങ് ഉദ്ഘാടനം ചെയ്ത് പ്രസംഗിക്കുകയായിരുന്നു അവർ. എഴുപതുകളില്‍ കരുത്തിന്‍റെ പ്രതീകമായാണ് ജയന്‍ സിനിമാ ലോകത്തെത്തിയത്. സ്വന്തം അഭിനയസിദ്ധി പൂര്‍ണമായും പ്രകടിപ്പിക്കുവാന്‍ കഴിയും മുമ്പേ ഈ ലോകത്തു നിന്നും ജയന് വിടപറയേണ്ടിവന്നു എന്നും കെ. കെ. ശൈലജ ടീച്ചര്‍ പറഞ്ഞു. ചടങ്ങില്‍ മുന്‍ചീഫ് സെക്രട്ടറിയും കവിയുമായ കെ. ജയകുമാറിനെ കെ. കെ. ശൈലജ ടീച്ചര്‍ ആദരിച്ചു. ജയന്‍ കലാസാംസ്കാരിക വേദി പ്രസിഡന്‍റ് കെ. ജയരാജ് അധ്യക്ഷത വഹിച്ചു. ഭാരത് ഭവന്‍ മെമ്പര്‍ സെക്രട്ടറി ഡോ. പ്രമോദ് പയ്യന്നൂര്‍ പി. ജയചന്ദ്രന്‍, മങ്കൊമ്പ് ഗോപാലകൃഷ്ണന്‍, സി. എസ്. രാധാദേവി, രവികുമാര്‍ , എഴുത്തുകാരായ സബിര്‍ തിരുമല, സിജിത അനില്‍, മുന്‍ കൗണ്‍സിലര്‍ ചിഞ്ചു സുമേഷ്, ജയന്‍ കലാസാംസ്കാരിക വേദി സ്ഥാപക പ്രസിഡന്‍റ് കാഞ്ചിയോട് ജയന്‍, സെക്രട്ടറി ഷാജന്‍ ഷാജു തുടങ്ങിയവര്‍ പ്രസംഗിച്ചു. രാധിക അശോക് (സംഗീതം), ശ്രീജ ഗോപന്‍ (സാഹിത്യം) എന്നിവര്‍ക്കു കെ.കെ. ശൈലജ പുരസ്കാരങ്ങള്‍ സമ്മാനിച്ചു.

ക്രൈസ്തവർക്കെതിരേയുള്ള അക്രമം അപലപനീയം: സിഡിസി

നേമം: വടക്കേന്ത്യൻ സംസ്ഥാനങ്ങളിൽ ക്രൈസ്തവർക്കെതിരെ നടക്കുന്ന ആക്രമണങ്ങളിലും ഛത്തീസ്ഗഡിൽ രണ്ടു കന്യാസ്ത്രീകളെ ജയിലടച്ച സംഭവവും അപലപനീയമാണെന്ന് കൗൺസിൽ ഓഫ് ദലിത് ക്രിസ്ത്യൻസ് (സിഡിസി) കേരള. കൂടുതൽ ആക്രമണങ്ങൾക്ക് ഇരയാകുന്നത് ദലിത് ക്രൈസ്തവരാണ്. വിദ്യാഭ്യാസ,ജീവകാരുണ്യ രംഗങ്ങളിൽ മികച്ച സേവനം നടത്തുന്ന സന്യാസിനി സമൂഹത്തിലെ അംഗങ്ങളാണ് തടവിലാക്കപ്പെട്ട കന്യാസ്ത്രീകൾ. ഇത്തരം നടപടി ഭരണഘടന നൽകുന്ന അവകാശങ്ങളുടെ ലംഘനമാണെന്നും കേന്ദ്ര-സംസ്ഥാന സർക്കാരുകൾ ജാഗ്രതയോടെ ഇടപെടണമെന്നും സിഡിസി ജനറൽ കൺവീനർ വി.ജെ.ജോർജ്, എസ്.ജെ.സാംസൺ, അഡ്വ.കെ.ആർ.പ്രസാദ്,ജില്ലാ കൺവീനർ ജോയ് പോൾ,ചെയർമാൻ എസ്.ധർമ്മരാജ് എന്നിവർ ആവശ്യപ്പെട്ടു.

വിഴിഞ്ഞത്ത് പരപ്പാൻ ക്ലാത്തി ചാകര

വിഴിഞ്ഞം: ട്രോളിംഗ് നിരോധനത്തിന്‍റെ അവസാന ദിനത്തിൽ വിഴിഞ്ഞത്ത് നിന്ന് വള്ളമിറക്കിയ മത്സ്യത്തൊഴിലാളികളെ കടലമ്മ കനിഞ്ഞനുഗ്രഹിച്ചു. മരപ്പാൻ പരപ്പാൻ ക്ലാത്തി ചാകരയായിരുന്നു ഇന്നലെ തീരത്ത്. നൂറ് കണക്കിന് വള്ളങ്ങളിലായി തീരത്തണഞ്ഞത് ടൺ കണക്കിന് ക്ലാത്തിയും . അടുത്ത കാലത്ത് കണ്ടിട്ടുള്ളതിൽ വച്ച് ഏറ്റവും വലിയ ചാകര ദിനത്തിനാണ് ഇന്നലെ വിഴിഞ്ഞം തീരം വഴിമാറിയത്. ഒന്നര കിലോയോളം തൂക്കമുള്ള ക്ലാത്തി ഒന്നിന് രാവിലെ 220 രൂപ വരെ ഉണ്ടായിരുന്നെങ്കിലും ഉച്ചക്ക് ശേഷം മീൻ നിറച്ചുള്ള വള്ളങ്ങളുടെ വരവ് കൂടിയ തോടെ 160 രൂപയായി ഇടിഞ്ഞു. കയറ്റുമതിക്കായി വിഴിഞ്ഞത്തെ കമ്പനികൾ മത്സരിച്ച് മീൻ വാങ്ങിക്കുട്ടി യെങ്കിലും വിലയിൽ മാറ്റമുണ്ടായില്ല.നാട്ടുകാർക്ക് വേണ്ടെങ്കിലും ചൈനക്കാരുടെ ഇഷ്ട ഭോജനമായ ക്ലാത്തി ഇന്നും നാളെയുമായി കടൽ കടക്കും. രുചി ഭേദമില്ലെങ്കിലും കേരളത്ത്കാർക്ക് അത്ര കണ്ട് ഇഷ്ടമില്ലാത്ത മീൻ വിദേശ ഡിമാൻഡിനനുസരിച്ചുള്ള വിലയുള്ളതാണ് മീൻ പിടിത്തക്കാരുടെ നേട്ടവും. കാലാവസ്ഥാ മുന്നറിയിപ്പുകളും കാലം തെറ്റിയുള്ള കാറ്റും കോളും സീസന്‍റെ തുടക്കം മുതൽ പരമ്പരാഗത മത്സ്യത്തൊഴിലാളികൾക്ക് തിരിച്ചടി നൽകിയിരുന്നു. എന്നാൽ മറ്റ് തരം മീനുകൾ തേടി വിഴിഞ്ഞത്തെത്തിയ നൂറ് കണക്കിന് ആൾക്കാർ നിരാശയോടെ മടങ്ങി.

നെടുമങ്ങാട് കോൺഗ്രസ് കമ്മിറ്റിയുടെ പ്രതിഷേധ പ്രകടനം

നെടുമങ്ങാട്: ചത്തീസ്ഗട്ടിലെ കന്യാസ്ത്രീകളെ അകാരണമായി ജയിലിൽ അടച്ച നടപടി ചോദ്യം ചെയ്തുകൊണ്ടും ഇന്ത്യയുടെ മതേതര ജനാധിപത്യത്തെ വെല്ലുവിളിച്ചുകൊണ്ട് സംഘപരിവാർ അജണ്ട നടപ്പിലാക്കുന്ന ബിജെപിയുടെ ഇരയായി കേരളത്തിലെ ന്യൂനപക്ഷങ്ങളെ മാറ്റുന്ന, അതിനൊത്താശ നൽകുന്ന സുരേഷ് ഗോപിയും ജോർജ് കുര്യനും രാജിവയ്ക്കണമെന്ന് ആവശ്യപ്പെട്ടുകൊണ്ട് നെടുമങ്ങാട് മണ്ഡലം കോൺഗ്രസ് കമ്മിറ്റി പ്രതിഷേധ പ്രകടനം നടത്തി. കോൺഗ്രസ് കമ്മിറ്റിയുടെ പ്രസിഡന്‍റ് അഡ്വ. മഹേഷ് ചന്ദ്രന്‍റെ നേതൃത്വത്തിൽ കച്ചേരി നടയിൽ നടന്ന പ്രകടനവും പ്രതിഷേധയോഗവും ജില്ലാ കോൺഗ്രസ് കമ്മിറ്റിയുടെ ജനറൽ സെക്രട്ടറി അഡ്വ ബാജി ഉദ്ഘാടനം ചെയ്തു. നെട്ടറചിറ ജയൻ,ടി.അർജുനൻ, അഡ്വ അരുൺകുമാർ,മണ്ണൂർക്കോണം സജാദ്,കരിപൂര് ഷിബു,റാഫി ചിറമുക്ക്, ഫാത്തിമ,ജയകുമാർ, വാ ണ്ട സതീഷ് തുടങ്ങിയവർ പങ്കെടുത്തു.

അദാനി റോയൽസ് കപ്പ് ക്രിക്കറ്റ് മൂന്നിന് കോവളത്ത്

തിരുവനന്തപുരം: അദാനി ട്രിവാൻഡ്രം റോയൽസിന്‍റെ ആഭിമുഖ്യത്തിൽ സംഘടിപ്പിക്കുന്ന പ്രഥമ അദാനി റോയൽസ് കപ്പ് ഏകദിന ക്രിക്കറ്റ് ടൂർണമെന്‍റ് മൂന്നിന് കോവളം വാഴമുട്ടം സ്പോർട്സ് ഹബിൽ നടക്കും. തീരദേശ മേഖലയിലെ, പ്രത്യേകിച്ച് വിഴിഞ്ഞം ഭാഗത്തെ ക്രിക്കറ്റ് പ്രതിഭകളെ പ്രോത്സാഹിപ്പിക്കുന്നതിനും വളർത്തിയെടുക്കുന്നതിനുമായാണ് ടൂർണമെന്‍റ് സംഘടിപ്പിക്കുന്നത്. ആദ്യഘട്ടത്തിൽ വിഴിഞ്ഞം, പൂവാർ, ശംഖുമുഖം എന്നിവിടങ്ങളിൽ നിന്നുള്ള താമസക്കാർക്ക് മാത്രമാണ് ടൂർണമെന്‍റിൽ പങ്കെടുക്കാൻ അവസരം. തുടർന്നുള്ള ടൂർണമെന്‍റുകളിൽ മറ്റു മേഖലകളെയും ഉൾപ്പെടുത്തും. മൂന്നിന് രാവിലെ എട്ടിന് ആരംഭിക്കുന്ന ടൂർണമെന്‍റിൽ 16 ടീമുകളാണ് പങ്കെടുക്കുന്നത്. വിജയികൾക്ക് ട്രോഫിയും കാഷ് പ്രൈസും സമ്മാനിക്കും. ടൂർണമെന്‍റിലെ മികച്ച ബാറ്റ്സ്മാൻ,മികച്ച ബൗളർ,ഏറ്റവും മൂല്യമുള്ള താരം എന്നിവർക്ക് പ്രത്യേക പുരസ്കാരങ്ങൾ നൽകും. ഇതിനുപുറമെ, ഓരോ മത്സരത്തിലെയും മികച്ച കളിക്കാരന് മാൻ ഓഫ് ദ മാച്ച് പുരസ്കാരവും സമ്മാനിക്കും. പ്രമുഖ ചലച്ചിത്ര സംവിധായകൻ പ്രിയദർശനും ജോസ് തോമസ് പട്ടാറയും നേതൃത്വം നൽകുന്ന പ്രോ-വിഷൻ സ്പോർട്സ് മാനേജ്മെന്‍റ് പ്രൈവറ്റ് ലിമിറ്റഡിന് കീഴിലുള്ള കണ്‍സോർഷ്യമാണ് ട്രിവാൻഡ്രം റോയൽസിന്‍റെ ഉടമകൾ. ഡോ. ശശി തരൂർ എംപിയാണ് ടീമിന്‍റെ മുഖ്യ രക്ഷാധികാരി.

മുതലപ്പൊഴി : 177 കോടിയുടെ നവീകരണ പദ്ധതി മുഖ്യമന്ത്രി ഉദ്ഘാടനം ചെയ്തു

തിരുവനന്തപുരം: മുതലപ്പൊഴി മത്സ്യബന്ധന തുറമുഖത്തിന്‍റെ 177 കോടി രൂപയുടെ സമഗ്ര വികസന പദ്ധതിയുടെ നിർമാണോദ്ഘാടനം മുഖ്യമന്ത്രി പിണറായി വിജയൻ ഓൺലൈനായി നിർവഹിച്ചു. മത്സ്യത്തൊഴിലാളികളുടെ സുരക്ഷയും പ്രദേശത്തിന്‍റെ വികസനവും ലക്ഷ്യമിട്ടാണ് പദ്ധതി രൂപീകരിച്ചതെന്ന് മുഖ്യമന്ത്രി പറഞ്ഞു. പഠനങ്ങളുടെ അടിസ്ഥാനത്തിലാണ് തുറമുഖ നവീകരണ പ്രവർത്തനങ്ങൾക്ക് തുടക്കമിടുന്നത്. മുതലപ്പൊഴി മൽസ്യബന്ധന തുറമുഖത്തിന്‍റെയും പ്രദേശത്തിന്‍റെ ആകെയും വികസനത്തിന് കരുത്തു പകരുന്നതാകും പദ്ധതി. മൊത്തം 177 കോടി രൂപയാണ് ചെലവ് പ്രതീക്ഷിക്കുന്നത്. കേന്ദ്ര സംസ്ഥാന സർക്കാരുകളുടെ സംയുക്ത പങ്കളിത്തത്തോടു കൂടിയാണ് പദ്ധതി നടപ്പിലാക്കുന്നത്. പുലിമുട്ടുകളുടെ നീളം വർധിപ്പിക്കൽ, പുലിമുട്ടുകളുടെ അറ്റകുറ്റപ്പണികൾ, ഡ്രെഡ്ജിംഗ് തുടങ്ങിയ കാര്യങ്ങൾ നടപ്പാക്കാനാണ് ഉദ്ദേശിക്കുന്നത്. മറ്റ് അടിസ്ഥാന സൗകര്യ വികസന പദ്ധതികളും ഇതിന്‍റെ ഭാഗമായി നടപ്പാക്കും. അതോടൊപ്പം മത്സ്യത്തൊഴിലാളികൾക്ക് ആവശ്യമായ ആധുനിക അടിസ്ഥാന സൗകര്യങ്ങളും സുരക്ഷയും ഒരുക്കും. മന്ത്രി സജി ചെറിയാൻ അധ്യക്ഷത വഹിച്ചു. കേന്ദ്ര സഹമന്ത്രി ജോർജ് കുര്യൻ മുഖ്യാതിഥി ആയിരുന്നു.

വസ്തുതട്ടിപ്പ് കേസ് : അനന്തപുരി മണികണ്ഠന്‍റെ സുഹൃത്തും പിടിയില്‍

പേരൂര്‍ക്കട: ജവഹര്‍ നഗറിലെ വസ്തു തട്ടിപ്പുമായി ബന്ധപ്പെട്ട് അനന്തപുരി മണികണ്ഠന്‍റെ ഉറ്റസുഹൃത്ത് പോലീസ് പിടിയില്‍‌. തിരുമല മുടവന്‍മുകള്‍ സ്വദേശിയും വെള്ളയമ്പലം ആര്‍ടെക് ലെക്സസ് ഫ്ളാറ്റ് നമ്പര്‍ ഡി. 10-ല്‍ താമസിച്ചുവരുന്നയാളുമായ അന്‍വര്‍ എന്നറിയപ്പെടുന്ന സെയ്ദാലി (47) ആണ് പിടിയിലായത്. ആധാരമെഴുത്തുകാരനായ അനന്തപുരി മണികണ്ഠന് മെറിന്‍ ജേക്കബിനെ പരിചയപ്പെടുത്തിക്കൊടുത്തത് സെയ്ദാലിയാണ്. സെയ്ദാലിയുടെ ഭാര്യ നടത്തിവരുന്ന വി ഗ്രോ ഫോറസ്റ്റ് എന്ന ഫൗണ്ടേഷന്‍റെ ട്രസ്റ്റി മെമ്പറായിരുന്നു മെറിന്‍ ജേക്കബ്. ജവഹര്‍ നഗറിലെ വസ്തുവിന്‍റെ ഉടമയായ ഡോറ അസറിയ ക്രിപ്സിന്‍റെ വളര്‍ത്തുപുത്രിയാണ് മെറിന്‍ ജേക്കബ് എന്ന് ആധാരത്തില്‍ കാണിച്ചാണ് മണികണ്ഠന്‍ വസ്തുതട്ടിപ്പിനുള്ള രേഖകള്‍ തയാറാക്കി നല്‍കിയത്. സെയ്ദാലിയും മണികണ്ഠനും വളരെ വര്‍ഷങ്ങളായി സുഹൃത്തുക്കളാണ്. സബ് രജിസ്ട്രാര്‍ ഓഫീസില്‍ ആധാരം രജിസ്റ്റര്‍ ചെയ്തുവെന്നു പറയുന്ന 2025 ജനുവരി 17ന് സെയ്ദാലി തന്‍റെ കാറിലാണ് മെറിനെ എത്തിക്കുന്നതും തിരികെ കൊണ്ടുവിടുന്നതും. മെറിനെ പരിചയപ്പെടുത്തി നല്‍കിയതിന് സെയ്ദാലിക്ക് 25 ലക്ഷം രൂപയാണ് മണികണ്ഠന്‍ വിവിധ സമയങ്ങളിലായി നല്‍കിയത്. പലര്‍ക്കുംവേണ്ടി തന്‍റെ ഭാവന ഉപയോഗിച്ച് പുസ്തകരചന നടത്തിയശേഷം ഉടമയുടെ പേരില്‍ പ്രസിദ്ധീകരിക്കുന്നതിന് അവസരമൊരുക്കുകയും അതിനുള്ള പ്രതിഫലം വാങ്ങുകയും ചെയ്തു വരികയായിരുന്നു സെയ്ദാലി. അനന്തപുരി മണികണ്ഠനുവേണ്ടി രാഹുല്‍ഗാന്ധിയെക്കുറിച്ച് ഒരു പുസ്തകം സെയ്ദാലി എഴുതി പൂര്‍ത്തീകരിച്ചിരുന്നു. എന്നാല്‍ കൈമാറ്റം നടക്കുന്നതിനു മുമ്പാണ് ഘട്ടം ഘട്ടമായി ഓരോരുത്തരായി അറസ്റ്റിലാകുന്നത്. വസ്തുവും വീടും തട്ടിയ സംഭവവുമായി ബന്ധപ്പെട്ട് സെയ്ദാലി അറസ്റ്റിലായതോടെ ഇതുവരെ പിടിയിലായവരുടെ എണ്ണം ഏഴ് ആയി. ഇതില്‍ ചന്ദ്രസേനന് കോടതി ജാമ്യം അനുവദിക്കുകയായിരുന്നു. കന്‍റോണ്‍മെന്‍റ് എ.സി സ്റ്റ്യുവര്‍ട്ട് കീലറിന്‍റെ നേതൃത്വത്തില്‍ സിഐ വിമല്‍, എസ്.ഐമാരായ വിപിന്‍, ബാലസുബ്രഹ്‌മണ്യം, സി.പി.ഒമാരായ രഞ്ജിത്ത്, ഷിനി, ഉദയന്‍, അനൂപ്, സാജന്‍, ഡിക്‌സണ്‍, അരുണ്‍, ഹൈനസ്‌ എന്നിവരാണ് അന്വേഷണസംഘത്തില്‍ ഉണ്ടായിരുന്നത്. അറസ്റ്റിലായ സെയ്ദാലിയെ വെള്ളിയാഴ്ച കോടതിയില്‍ ഹാജരാക്കും. അനില്‍ തമ്പിക്കുവേണ്ടി വല വിരിച്ച് പോലീസ് പേരൂര്‍ക്കട: ജവഹര്‍ നഗറിലെ ഡോറ അസറിയ ക്രിപ്‌സിന്‍റെ വസ്തുവും വീടും തട്ടിയെടുത്തതുമായി ബന്ധപ്പെട്ട കേസില്‍ ബുദ്ധികേന്ദ്രമായ അനില്‍ തമ്പിക്കുവേണ്ടി വലവിരിച്ച് മ്യൂസിയം പോലീസ്. വസ്തുതട്ടിപ്പിന്‍റെ അസല്‍ പ്രമാണം ഹാജരാക്കാന്‍ മ്യൂസിയം പോലീസ് ഇയാളോട് ആവശ്യപ്പെട്ടിട്ട് ആഴ്ചകള്‍ കഴിഞ്ഞുവെങ്കിലും അതുണ്ടായിട്ടില്ല. ഇതോടുകൂടി അനില്‍ തമ്പിയെ കസ്റ്റഡിയിലെടുക്കാനുള്ള നടപടികള്‍ പോലീസ് ആരംഭിച്ചുവെങ്കിലും ഇയാള്‍ വീട്ടില്‍നിന്നു മുങ്ങുകയായിരുന്നു.

നഗരസഭയിലെ ഫണ്ട് തട്ടിപ്പ് : 14 പ്രതികൾക്കും ജാമ്യം, അറസ്റ്റിൽ നടപടിക്രമം പാലിച്ചില്ലെന്നു കോടതി

തിരുവനന്തപുരം: നഗരസഭയിൽ നിന്നു പട്ടികജാതി-പട്ടികവർഗ വിഭാഗത്തിലെ സ്ത്രീകൾക്ക് സംരംഭങ്ങൾ തുടങ്ങാൻ അനുവദിച്ച സബ്സിഡി തുക ഫണ്ട് തട്ടിപ്പു നടത്തിയ കേസിലെ കോർപറേഷൻ ജീവനക്കാർ അടക്കമുള്ള 14 പ്രതികൾക്കും ജാമ്യം. തിരുവനന്തപുരം പ്രത്യേക വിജിലൻസ് കോടതിയുടെതാണ് ഉത്തരവ്. അറസ്റ്റ് ചെയ്യുന്ന സമയത്തു പാലിക്കേണ്ട നിയമ നടപടികൾ പാലിക്കാത്തതിനാലാണ് പ്രതികൾക്ക് ജാമ്യം അനുവദിച്ചത്. അന്വേഷണ ഏജൻസിക്ക് വേണമെങ്കിൽ വീണ്ടും ശരിയായ നടപടിക്രമം പാലിച്ച ശേഷം അറസ്റ്റ് ചെയ്യാം. സ്വന്തം ജാമ്യത്തിലാണ് പ്രതികൾക്ക് കോടതി ജാമ്യം അനുവദിച്ചത്. കുന്നുകുഴി വാർഡ് കൗണ്‍സിലർ മോനി ശേഖർ, ഇൻഡസ്ട്രിയൽ എക്സ്റ്റൻഷൻ ഓഫീസർമാരായിരുന്ന എം.ബി.ഷെഫിൻ, പ്രവീണ്‍ രാജ്, പട്ടം കോ ഓപ്പറേറ്റീവ് ബാങ്ക് മാനേജർ സോണി, തിരുവനന്തപുരം നഗരസഭയിലെ എസ്‌സി-എസ്ടി പ്രമോട്ടറായിരുന്ന സിന്ധു, സഹായി അജിത, ഇടനിലക്കാരായി പ്രവർത്തിച്ച മണക്കാട് സ്വദേശി ശ്രീകുമാർ, കഴക്കൂട്ടം സ്വദേശി സുരേഷ് ബാബു, കോവളം സ്വദേശി അനിരുദ്ധൻ, തിരുവല്ലം സ്വദേശിനി ബിന്ദു, ബാലരാമപുരം സ്വദേശിനി അശ്വതി, മുട്ടയ്ക്കാട് സ്വദേശിനി അശ്വതി, കല്ലിയൂർ സ്വദേശി വിഷ്ണു എന്നിവർക്കാണ് ജാമ്യം അനുവദിച്ചത്. 2020-21 സാന്പത്തിക വർഷം സംരംഭം തുടങ്ങുന്നതിന് പട്ടിക ജാതി-വർഗ വിഭാഗം വനിതകൾക്ക് 1.26 കോടി രൂപയും ബിപിഎൽ വിഭാഗം വനിതകൾ ക്ക് 1.14 കോടിയും സബ്സിഡി വായ്പയായി അനുവദിച്ച തുകയുടെ സബ്സിഡി തുകയിൽ തട്ടിപ്പു നടത്തിയെന്നാണു കേസ്. കോണ്‍ഗ്രസ്-ബിജെപി കൗണ്‍സിലർമാരുടെ പങ്ക് അന്വേഷിക്കണമെന്ന് സിപിഎം തിരുവനന്തപുരം : കോർപറേഷനിലെ എസ്‌സി-എസ്ടി ഫണ്ട് തട്ടിപ്പിൽ കോണ്‍ഗ്രസിന്‍റെയും ബിജെപിയുടെയും കൗണ്‍സിലർമാരുടെ പങ്കുകൂടി അന്വേഷിക്കണമെന്നു സിപിഎം ജില്ലാ സെക്രട്ടറി വി.ജോയി. അഴിമതി നടന്നതു പ്രതിപക്ഷ കൗണ്‍സിലർമാരുടെ വാർഡുകളിലാണ്. ഇവരുടെ സഹായം ഇടനിലക്കാർക്കു കിട്ടിയിട്ടുണ്ടെന്നു വ്യക്തം. അഴിമതിക്കു പിന്നിൽ വലിയ സംഘം പ്രവർത്തിച്ചിട്ടുണ്ട്. സ്വന്തം അഴിമതി മറച്ചുവയ്ക്കാനാണ് എൽഡിഎഫ് ഭരണസമിതിക്കെതിരേ ബിജെപിയും കോണ്‍ഗ്രസും നിരന്തരം സമരവും അക്രമവും നടത്തിയിരുന്നത് എന്നാണ് ഇപ്പോൾ വ്യക്തമാകുന്നതെന്നും വി.ജോയി പത്രസമ്മേളനത്തിൽ പറഞ്ഞു. കംപ്ട്രോളർ ആൻഡ് ഓഡിറ്റ് ജനറലിന്‍റെ റിപ്പോർട്ടിൽ ക്രമക്കേട് കണ്ടെത്തിയതിനെ തുടർന്നാണ് മേയർ ആര്യ രാജേന്ദ്രൻ പോലീസിൽ പരാതി നൽകിയത്. തുടർന്നു ജീവനക്കാരൻ പ്രവീണ്‍ രാജ്, എസ്‌സി പ്രൊമോട്ടർ സിന്ധു, സഹായി അജിത എന്നിവരെ അറസ്റ്റ് ചെയ്തിരുന്നു. അഴിമതിക്കു നേതൃത്വം നൽകിയതു കോണ്‍ഗ്രസിന്‍റെ മുൻ കൗണ്‍സിലറായിരുന്ന മോനി ശേഖറും യുഡിഎഫ് ഭരിക്കുന്ന പട്ടം സർവീസ് സഹകരണ ബാങ്കിന്‍റെ മാനേജർ സോണിയുമാണ്. പട്ടം സഹകരണ ബാങ്ക് വഴി സിന്ധു ആരംഭിച്ച അശ്വതി സപ്ലൈയേഴ്സ് എന്ന വ്യാജ സ്ഥാപനത്തിന്‍റെ ബാങ്ക് അക്കൗണ്ടിലേക്കും അവിടെനിന്നു മറ്റ് ഇടനിലക്കാരുടെ അക്കൗണ്ടിലേക്കും പണം മാറ്റുകയായിരുന്നു. ദളിത് കോണ്‍ഗ്രസിന്‍റെ സംസ്ഥാന സെക്രട്ടറി അനിരുദ്ധനും കേസിൽ അറസ്റ്റിലായിട്ടുണ്ട്. അനിരുദ്ധന്‍റെ മകൾ അജിത കോണ്‍ഗ്രസ് നേതാവും മുൻ എസ്‌സി പ്രൊമോട്ടറുമായിരുന്നു. ഇടനിലക്കാരായി പ്രവർത്തിച്ച പലരും കോണ്‍ഗ്രസ് അനുഭാവികളും പ്രവർത്തകരുമാണെന്നും ജോയി പറഞ്ഞു.

ഓട്ടോഡ്രൈവർ ലോഡ്ജില്‍ മരിച്ചനിലയില്‍

മെഡിക്കല്‍കോളജ്: ഓട്ടോഡ്രൈവറെ ലോഡ്ജുമുറിയില്‍ മരിച്ചനിലയില്‍ കണ്ടെത്തി. തൈക്കാട് തട്ടംവിളാകം ടിസി 16/1177-ല്‍ വസന്തകുമാര്‍ (53) ആണ് മരിച്ചത്. ഇന്നലെ രാവിലെയാണ് തമ്പാനൂര്‍ സ്റ്റേഷന്‍ പരിധിയിലെ ഒരു ലോഡ്ജിനുള്ളില്‍ മൃതദേഹം കണ്ടെത്തിയത്. കുറച്ചുനാളായി ഇദ്ദേഹം ഒറ്റയ്ക്കു താമസിച്ചു വരികയായിരുന്നു. കഴിഞ്ഞദിവസം ഓട്ടോറിക്ഷ സവാരി കഴിഞ്ഞ് എത്തിയ വസന്തകുമാര്‍ മുറിയില്‍ വിശ്രമിക്കുന്നതിനായി കയറിയതാണ്. പിന്നീട് ഇയാളെ പുറത്തുകണ്ടിരുന്നില്ല. തുടർന്ന് സുഹൃത്തുക്കള്‍ എത്തി മുറി തുറന്നു നോക്കുമ്പോഴാണ് മൃതദേഹം കണ്ടെത്തിയത്. നിരവധി അസുഖങ്ങള്‍ ഉള്ളതായാളായിരുന്നു വസന്തകുമാറെന്നും ശാരീരിക അസ്വാസ്ഥ്യം മൂലമാണ് മരണമെന്നു കരുതുന്നതായും തമ്പാനൂര്‍ പോലീസ് അറിയിച്ചു. മൃതദേഹം തിരുവനന്തപുരം മെഡിക്കല്‍കോളജ് ആശുപത്രിയില്‍ പോസ്റ്റുമോര്‍ട്ടം നടത്തി.

നെയ്യാര്‍ മേള: സംഘാടക സമിതിയായി

നെയ്യാറ്റിൻകര : കേരള സംസ്ഥാന വിനോദസഞ്ചാര വകുപ്പിന്‍റെയും തദ്ദേശ സ്വയംഭരണ സ്ഥാപനങ്ങളുടെയും സഹകരണത്തോടെ കേരള സംസ്ഥാന വ്യാപാരി വ്യവസായി സമിതി നെയ്യാറ്റിൻകര ഏരിയാ കമ്മിറ്റി സംഘടിപ്പിക്കുന്ന നെയ്യാർ മേള- 2025 ന്‍റെ സംഘാടകസമിതി രൂപീകരണ യോഗം കെ. ആൻസലൻ എംഎൽഎ ഉദ്ഘാടനം ചെയ്തു. സ്വദേശാഭിമാനി ടൗൺ ഹാളിൽ ചേർന്ന യോഗത്തിൽ സമിതി ഏരിയാ പ്രസിഡന്‍റ് പി. ബാലചന്ദ്രൻനായർ അധ്യക്ഷനായി. സംസ്ഥാന വൈസ് പ്രസിഡന്‍റ് വി. പാപ്പച്ചൻ മുഖ്യപ്രഭാഷണം നടത്തി. ജില്ലാ സെക്രട്ടറി അഡ്വ. ആദർശ് ചന്ദ്രൻ മുഖ്യാതിഥിയായി. നഗരസഭ വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ ഡോ. എം.എ സാദത്ത്, കൗണ്‍സിലര്‍ കൂട്ടപ്പന മഹേഷ്, അതിയന്നൂര്‍ ആരോഗ്യ- വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ കൊടങ്ങാവിള വിജയകുമാര്‍, സമിതി ജില്ലാ കമ്മിറ്റി അംഗം കെ. ബിന്ദു, മുരുകേശൻ ആശാരി, ജി.എൻ. ശ്രീകുമാരന്‍, എന്‍.ആര്‍.സി നായര്‍, നാരായണറാവു, സമിതി ഏരിയാ സെക്രട്ടറി എം. ഷാനവാസ്, സജികുമാര്‍ പെരുങ്കടവിള എന്നിവർ സംബന്ധിച്ചു. സെപ്റ്റംബർ ഒന്നു മുതൽ 14 വരെ ആറാലുംമൂട് മാർക്കറ്റ് ഗ്രൗണ്ടിൽ നടക്കുന്ന പത്താമത് മേളയില്‍ ഇക്കുറി പുതുമകളേറെയുണ്ടെന്ന് സംഘാടകര്‍ അറിയിച്ചു. മേളയുടെ നടത്തിപ്പിനായി 21 സബ് കമ്മിറ്റികളും രൂപീകരിച്ചു.

നിറപുത്തരി ചടങ്ങ് നടത്തി

പാറശാല: ദക്ഷിണ കൈലാസം മഹേശ്വരം ശ്രീ ശിവ പാർവതി ക്ഷേത്രത്തില്‍ നിറപുത്തരി ചടങ്ങു നടത്തി. രാവിലെ നിർമാല്യം, ഗണപതി ഹോമം എന്നിവയ്ക്കുശേഷം മേല്‍ശാന്തി കുമാര്‍ മഹേശ്വരത്തിന്‍റെ കാര്‍മികത്വത്തില്‍ ഒരുക്കിവച്ച കതിര്‍ക്കറ്റകള്‍ കീഴ്ശാന്തിമാര്‍ തലയിലേറ്റി ക്ഷേത്ര വലംവച്ച് എഴുന്നള്ളിച്ചു. തലച്ചുമടായി ശ്രീകോവിലുനുള്ളില്‍ ഉമാ മഹേശ്വരനു സമര്‍പ്പിച്ചു. ഇതോടൊപ്പം തന്നെ നെല്ലു കുത്തി പുത്തരിയാക്കി പായസകൂട്ടുണ്ടാക്കി ഭഗവാനു നിവേദ്യമായി നൽകി. തുടര്‍ന്നു ദീപാരാധനയ്ക്കുശേഷം പൂജിച്ച കതിര്‍ക്കറ്റകളും നിവേദിച്ച പായസവും ക്ഷേത്രം മഠാധിപതി സ്വാമി മഹേശ്വരാനന്ദ സരസ്വതി ഭക്തജനങ്ങള്‍ക്ക് വിതരണം ചെയ്തു.

മുണ്ടേല രാജീവ്ഗാന്ധി സഹകരണ സംഘം : ക്രമക്കേട്; അറസ്റ്റിലായ രണ്ട് മുൻ ജീവനക്കാർക്ക് ജാമ്യം

നെടുമങ്ങാട്: മുണ്ടേല രാജീവ്ഗാന്ധി റെസിഡൻസ് വെൽഫെയർ സഹകരണ സംഘത്തിൽ നടന്ന കോടികളുടെ ക്രമക്കേടിൽ ക്രൈംബ്രാഞ്ച് അറസ്റ്റു ചെയ്ത രണ്ടു മുൻ ജീവനക്കാർക്ക് കോടതി ജാമ്യം അനുവദിച്ചു. സംഘത്തിലെ മുൻ അറ്റൻഡർ എ.എസ്. സുനിൽ കുമാർ, നൈറ്റ് വാച്ച്മാൻ എസ്. ബിജുകുമാർ എന്നിവർക്കാണ് നെടുമങ്ങാട് കോടതി ജാമ്യം നൽകിയത്. ക്രൈംബ്രാഞ്ച് അറസ്റ്റ് ചെയ്ത ഇരുവരെയും കഴിഞ്ഞ തിങ്കളാഴ്ച നെടുമങ്ങാട് കോടതിയിൽ ഹാജരാക്കിയിരുന്നു. അപ്പോൾ കോടതി ഇവരെ ക്രൈംബ്രാഞ്ചിന്‍റെ കസ്റ്റഡിയിൽ വിട്ടു. വീണ്ടും കോടതിയിൽ ഹാജരാക്കിയപ്പോഴാണ് ജാമ്യം അനുവദിച്ചത്. സംഘത്തിലെ മുൻ സെക്രട്ടറി രാഖിയെ ക്രൈംബ്രാഞ്ച് നേരത്തെ അറസ്റ്റ് ചെയ്തിരുന്നു. കേസിൽ പ്രതികളായവരുടെ വസ്തു വകകൾ കണ്ടുകെട്ടുന്നതിനായി വസ്തുക്കളുടെ സർവേ നമ്പർ ‍ഉൾപ്പെടെ കളക്ടർക്ക് നൽകിയിട്ടുണ്ടെന്നും കേസിൽ പ്രതികളായ രണ്ടുപേർ വിദേശത്തേക്ക് കടന്നിട്ടുണ്ടെന്നും ക്രൈംബ്രാഞ്ച് പറഞ്ഞു.

റോഡിലെ പൊടിശല്യം: ചൂണ്ടിക്കല്‍-ശൂരുവക്കാണി നിവാസികൾ വലയുന്നു

വെള്ളറട: റോഡിലെ പൊടികൊണ്ട് ജീവിക്കാന്‍ കഴിയാതെ ചൂണ്ടിക്കല്‍ മുതല്‍ ശൂരവക്കാണിവരെയുള്ള ജനങ്ങള്‍ വലയുകാണ്. ഈ ഭാഗത്ത് റോഡ് ജര്‍മ്മന്‍ ടെക്‌നോളജി ഉപയോഗിച്ച് പുനര്‍ നിര്‍മിക്കുന്നതിന്‍റെ ഭാഗമായി ഒന്നാം ഘട്ട പണികള്‍ പൂര്‍ത്തീകരിച്ച് മാസങ്ങള്‍ കഴിഞ്ഞുവെങ്കിലും റോഡിലെ ടാറിംഗ് ജോലികള്‍ തുടങ്ങാത്തതുകാരണം റോഡിലെ പൊടി വാഹനങ്ങള്‍ പോകുമ്പോള്‍ വീടുകളിലേക്കും കടകളിലേക്കും വ്യാപകമായി പറന്നെത്തുന്നു. റോഡു വക്കില്‍ താമസിക്കുന്ന ജനങ്ങള്‍ക്ക് ശുദ്ധവായു ശ്വസിക്കാന്‍ കഴിയാത്ത അവസ്ഥയിലാണ്. ശ്വാസ തടസവും പൊടികൊണ്ടുള്ള അലര്‍ജി കാരണം ശരീരം മുഴവന്‍ ചൊറിച്ചിലും കുട്ടികള്‍ക്ക് അനുഭവപ്പെട്ട് തുടങ്ങിയിരുക്കുകയാണ്. ആദ്യം നിര്‍മാണം കഴിഞ്ഞപ്പോള്‍ കരാര്‍ കമ്പനി റോഡില്‍ മൂന്നും നാലും പ്രാവശ്യം വെള്ളം ടാങ്കര്‍ ലോറിയില്‍ കൊണ്ടുവന്നു റോഡില്‍ നനക്കുമായിരുന്നു. എന്നാല്‍ ഇപ്പോള്‍ പേരിനുമാത്രം റോഡിനു നടുക്കു വെള്ളം നനക്കുന്നത്. അടിയന്തിരമായി റോഡ് ടാര്‍ചെയ്ത് പ്രശ്‌നത്തിന് പരിഹാരം കാണാന്‍ ബന്ധപ്പെട്ട അധികൃതര്‍ ശ്രമിച്ചില്ലെങ്കില്‍ ജനങ്ങളുടെ ദുരിതത്തിന് പരിഹാരമാകില്ല. ഇപ്പോള്‍ ഇടിഞ്ഞുപൊടിഞ്ഞുകിടന്ന പഴ റോഡായിരുന്നെങ്കില്‍ മതിയെന്നാണ് നാട്ടുകാര്‍ പറയുന്നത്. പൊടികൊണ്ടുള്ള രോഗങ്ങളില്‍ നിന്നും ജനങ്ങളെ രക്ഷിക്കാന്‍ അടിയന്തിര നടപടി സ്വീകരിക്കണമെന്നാണ് ആവശ്യം.

ഉമ്മൻചാണ്ടി അനുസ്മരണവും ഭക്ഷ്യക്കിറ്റ് വിതരണവും

പേരൂര്‍ക്കട: സാധാരണക്കാരായ ജനങ്ങളുടെ ഒപ്പം ജീവിച്ച മുഖ്യമന്ത്രിയായിരുന്നു ഉമ്മന്‍ചാണ്ടിയെന്നു കെ. മുരളീധരന്‍. കോണ്‍ഗ്രസ് വട്ടിയൂര്‍ക്കാവ് ബ്ലോക്ക് കമ്മിറ്റി സംഘടിപ്പിച്ച മുന്‍ മുഖ്യമന്ത്രി ഉമ്മന്‍ചാണ്ടി അനുസ്മരണവും ഭക്ഷ്യക്കിറ്റ് വിതരണവും ഉദ്ഘാടനം ചെയ്യുകയായിരുന്നു അദ്ദേഹം. ബ്ലോക്ക് പ്രസിഡന്‍റ് വെള്ളൈക്കടവ് വേണുകുമാര്‍ അധ്യക്ഷത വഹിച്ചു. ഡി. സുദര്‍ശനന്‍, ശാസ്തമംഗലം മോഹനന്‍, ആര്‍. രാജന്‍ കുരുക്കള്‍, മേലാത്തുമേലെ ജയചന്ദ്രന്‍, വി. മോഹനന്‍ തമ്പി തുടങ്ങിയവര്‍ പങ്കെടുത്തു.

സ്വദേശാഭിമാനി പാര്‍ക്ക് നവീകരിക്കണമെന്ന് ആവശ്യം

നെയ്യാറ്റിൻകര: നഗരസഭയുടെ നിയന്ത്രണത്തിലുള്ള സ്വദേശാഭിമാനി പാര്‍ക്ക് നവീകരിക്കണമെന്ന് കൗണ്‍സിലര്‍ മഞ്ചത്തല സുരേഷ്. ആസ്തി വികസന രേഖകളിൽ ഫോർട്ട് വാർഡിന്‍റേതായി പറയപ്പെടുന്ന ഈ പാർക്ക് ആലുംമൂടിന്‍റെയും ഫോർട്ടിന്‍റെയും മധ്യഭാഗത്തായാണ് സ്ഥിതി ചെയ്യുന്നത്. കരമന - കളിയിക്കാവിള പാതയില്‍ നെയ്യാറ്റിന്‍കര ശ്രീകൃഷ്ണസ്വാമി ക്ഷേത്രത്തിനു സമീപത്തായുള്ള ഈ പാര്‍ക്കില്‍ സ്വദേശാഭിമാനി കെ. രാമകൃഷ്ണപിള്ളയുടെ അര്‍ധകായ പ്രതിമ നിലവിലുണ്ട്. നെയ്യാറ്റിന്‍കരയുടെ ആജീവനാന്ത പത്രാധിപരായ സ്വദേശാഭിമാനിയുടെ പൂര്‍ണ വെങ്കല പ്രതിമ പാര്‍ക്കില്‍ സ്ഥാപിക്കണമെന്ന ആവശ്യവും കൗണ്‍സിലര്‍ ഉന്നയിച്ചു. സാംസ്കാരിക സമ്മേളനങ്ങൾ നടത്തുന്നതിനുള്ള വേദിയായി സ്വദേശാഭിമാനി പാര്‍ക്കിനെ മാറ്റുകയും വേണം. നിലവിലുള്ള നഗരസഭ ഭരണസമിതി സ്വദേശാഭിമാനി പാര്‍ക്കിനെ അവഗണിക്കുകയാണ് ചെയ്യുന്നത്. പാര്‍ക്ക് നവീകരിക്കണമെന്ന ആവശ്യം അംഗീകരിച്ചില്ലെങ്കില്‍ സമരപരിപാടികള്‍ സംഘടിപ്പിക്കുമെന്നും മഞ്ചത്തല സുരേഷ് അറിയിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]