ADVERTISEMENT

ADVERTISEMENT

ഫെൻസിംഗ് ചാന്പ്യൻഷിപ്പ്: മഞ്ചേരി ജേതാക്കൾ

മഞ്ചേരി: തുറക്കൽ എച്ച്എംയുപി സ്കൂളിൽ നടന്ന കാഡറ്റ്, ജൂണിയർ, സീനിയർ ഫെൻസിംഗ് ചാന്പ്യൻഷിപ്പിൽ മഞ്ചേരി സ്പോർട്സ്റ്റർ ഫെൻസിംഗ് ക്ലബ് ഓവറോൾ ചാന്പ്യൻമാരായി. മഞ്ചേരി അമൃത വിദ്യാലയം രണ്ടാം സ്ഥാനവും എച്ച്എംയുപി സ്കൂൾ തുറക്കൽ മഞ്ചേരി മൂന്നാം സ്ഥാനവും സ്പോർട്സ് പ്രമോഷൻ അക്കാഡമി നാലാം സ്ഥാനവും നേടി.

ജൂണിയർ വിഭാഗത്തിൽ പി. അമൃത പ്രസാദ്, ആദിദേവ് ധ്യാൻ, ആദിത്യ കിരണ്‍, ശിവാനി എസ്. നായർ, ഹൃതിക സനൂജ്, കെ.എൻ. നുബ ഫാത്തിമ എന്നിവരുംസീനിയർ വിഭാഗത്തിൽ ജാൻസിവ് യാഷിക, ടി. വിഗ്നേഷ്, കെ.പി. അമൃത പ്രസാദ്, അനന്യ അനിൽകുമാർ, നയന മനോജ് എന്നിവരും സ്വർണം നേടി. വിജയികൾക്ക് സംസ്ഥാന സ്പോർട്സ് കൗണ്‍സിൽ എക്സിക്യൂട്ടിവ് അംഗം എ. ശ്രീകുമാർ സമ്മാനങ്ങൾ വിതരണം ചെയ്തു.

കോട്ടയത്ത് നടന്ന സംസ്ഥാന മിനി, സബ് ജൂണിയർ സംസ്ഥാന ഫെൻസിംഗ് ചാന്പ്യൻഷിപ്പിൽ മലപ്പുറത്തിന് വേണ്ടി മെഡൽ നേടിയ 11 കായിക താരങ്ങളെ അനുമോദിച്ചു. കെ.എം. അബ്ദുൾ ഷുക്കൂർ, പി.ആർ. ഇന്ദു, അഡ്വ. അനൂപ് പറക്കാട്ട്, പി. മധുസൂദനൻ, നിഷ ധ്യാൻ, അരുണ്‍ എസ്. നായർ തുടങ്ങിയവർ പ്രസംഗിച്ചു.

ADVERTISEMENT

മഞ്ചേരിയിൽ തെരുവുനായ്ക്കൾക്ക് കുത്തിവയ്പ്

മഞ്ചേരി: നഗരത്തിൽ അലഞ്ഞുതിരിഞ്ഞു നടക്കുന്ന തെരുവ് നായ്ക്കൾക്ക് പേവിഷ ബാധക്കെതിരെയുള്ള പ്രതിരോധ കുത്തിവയ്പ് നടത്തി. നഗരസഭ ചെയർപേഴ്സണ്‍ വി.എം. സുബൈദ ഉദ്ഘാടനം ചെയ്തു. നഗരസഭ വാർഷിക പദ്ധതിയിൽ ഉൾപ്പെടുത്തി ഒരു ലക്ഷം രൂപ ചെലവഴിച്ചാണ് പദ്ധതി നടപ്പാക്കിയത്. ആദ്യദിനത്തിൽ 120 ലേറെ നായ്ക്കൾക്ക് കുത്തിവയ്പ് നൽകി. പ്രത്യേകം പരിശീലനം ലഭിച്ച സംഘമാണ് നായ്ക്കളെ പിടികൂടുന്നത്. കുത്തിവയ്പെടുത്ത നായ്ക്കളെ തിരിച്ചറിയുന്നതിനായി പ്രത്യേകം അടയാളം നൽകി വിടും. നഗര പരിസരത്ത് പൂർത്തിയാക്കിയതിന് ശേഷം വാർഡുകൾ കേന്ദ്രീകരിച്ച് കുത്തിവയ്പ് നടത്തിയെന്ന് സീനിയർ വെറ്ററിനറി സർജൻ ഡോ. ഇ. കുഞ്ഞിമൊയ്തീൻ പറഞ്ഞു. ലൈവ് സ്റ്റോക്ക് ഇൻസ്പെക്ടർ ഓഫീസർ ദീപു, ബാലകൃഷ്ണൻ ഡോഗ് ക്യാച്ചർമാരായ സുരേഷ, ഹസീബ്, മുകേഷ്, ജിദേഷ്, ഷബീബ് എന്നിവർ നേതൃത്വം നൽകി.

പനങ്കയം പാലം ശുചീകരിച്ചു

എടക്കര: സ്വാതന്ത്ര്യദിനം, ഓണം എന്നീ ആഘോഷങ്ങളുടെ ഭാഗമായി പനങ്കയം യുണൈറ്റഡ് സ്റ്റാർ ആർട്സ് ആൻഡ് സ്പോർട്സ് ക്ലബ് പ്രവർത്തകർ പനങ്കയം പാലവും പരിസര പ്രദേശങ്ങളും ശുചീകരിച്ചു. പാലം മുതൽ ക്ലബ് വരെയുള്ള റോഡിന്‍റെ ഇരുവശങ്ങളിലെയും കാടുകൾ വെട്ടിമാറ്റുകയും പ്ലാസ്റ്റിക് അടക്കമുള്ള മാലിന്യങ്ങൾ ശേഖരിച്ച് പ്രദേശം വൃത്തിയാക്കുകയും ചെയ്തു. ക്ലബ്് പ്രവർത്തകരായ നിസാർ കാഞ്ഞിരായിൽ, മാനു ഇരുപ്പക്കണ്ടൻ, നിഷാന്ത്, ശ്രീജു, പ്രജീഷ്, ഷാജിദ് റഹ്മാൻ, ഫാരിസ് എന്നിവർ നേതൃത്വം നൽകി. സമീപ ക്ലബ് അംഗങ്ങളും ശുചീകരണത്തിൽ പങ്കാളികളായി.

നിലന്പൂർ ജില്ലാ ആശുപത്രി വികസനം : കടുപ്പിച്ച് കോണ്‍ഗ്രസും സിപിഎമ്മും

നിലന്പൂർ: നിലന്പൂർ ജില്ലാ ആശുപത്രി വികസനത്തിന് സ്കൂളിന്‍റെ സ്ഥലം ഏറ്റെടുക്കലുമായി ബന്ധപ്പെട്ട് കോണ്‍ഗ്രസും സിപിഎമ്മും തമ്മിൽ പോര് മുറുകുന്നു. വിഷയത്തിൽ നിഷ്പക്ഷത പാലിച്ച് മുസ്ലിം ലീഗ്. തദ്ദേശ തെരഞ്ഞെടുപ്പിന് മൂന്ന് മാസം മാത്രം ബാക്കി നിൽക്കെ നിലന്പൂർ ജില്ലാ ആശുപത്രി വികസനവുമായി ബന്ധപ്പെട്ട് ഗവണ്‍മെന്‍റ് മോഡൽ യുപി സ്കൂളിന്‍റെ സ്ഥലം ഏറ്റെടുക്കുന്നതുമായി ബന്ധപ്പെട്ടാണ് കോണ്‍ഗ്രസും സിപിഎമ്മും തമ്മിൽ വാദപ്രതിവാദങ്ങളുയർത്തുന്നത്. ജില്ലാ ആശുപത്രിയുടെ അടിസ്ഥാന വികസനത്തിന് ഗവണ്‍മെന്‍റ് മോഡൽ യുപി സ്കൂളിന്‍റെ സ്ഥലത്ത് നിന്ന് 99 സെന്‍റ് സ്ഥലം വിട്ടുകൊടുത്തു കൊണ്ടുള്ള നഗരസഭ തീരുമാനം കൈമാറിയിരുന്നു. പി.വി.അബ്ദുൾ വഹാബ് എംപി, മുൻ എംഎൽഎ പി.വി. അൻവർ, ജില്ലാ പഞ്ചായത്ത് വൈസ് പ്രസിഡന്‍റ് ഇസ്മായിൽ മൂത്തേടം എന്നിവരുടെ ഇടപെടലിനെ തുടർന്നാണ് നഗരസഭ ആശുപത്രിയുടെ മേൽനോട്ടം വഹിക്കുന്ന ജില്ലാ പഞ്ചായത്തിന് സമ്മതപത്രം കൈമാറിയത്. നിലന്പൂർ ജില്ലാ ആശുപത്രിയിൽ കിഫ്ബി ഫണ്ട് ഉൾപ്പെടെ ഫണ്ട് ലഭ്യമാണെങ്കിലും പുതിയതായി കെട്ടിടങ്ങൾ നിർമിക്കാൻ സ്ഥലമില്ലാത്ത അവസ്ഥയിലാണ്. ആശുപത്രി വികസനത്തിന് പൂർണ പിന്തുണയുമായി കോണ്‍ഗ്രസ് നിൽക്കുന്പോഴും നിലന്പൂരിന്‍റെ ചരിത്രത്തിന്‍റെ ഭാഗമായ സ്കൂളിന്‍റെ സ്ഥലംവിട്ടു നൽകുന്നതിനോട് വിയോജിപ്പുണ്ട്. പകരം ഭൂമി കണ്ടെത്തണമെന്നും നടപടികൾ വേഗമാക്കണമെന്നുമാണ് കോണ്‍ഗ്രസ് നിലപാട്. സ്കൂളിന്‍റെ സ്ഥലം വിട്ടു നൽകികൊണ്ടുള്ള നഗരസഭയുടെ ഫയൽ ഇപ്പോൾ വിദ്യാഭ്യാസ മന്ത്രിയുടെ മുന്നിലാണ്. ആരോഗ്യ, വിദ്യാഭ്യാസ വകുപ്പ് മന്ത്രിമാർ ഇടപെട്ട് വേണം ഇക്കാര്യത്തത്തിൽ തീരുമാനമെടുക്കാൻ. തുടക്കം മുതൽ സ്കൂളിന്‍റെ സ്ഥലം ആശുപത്രി വികസനത്തിന് ഏറ്റെടുക്കണമെന്ന നിലപാടാണ് മുസ്ലിം ലീഗ് സ്വീകരിച്ചുവരുന്നത്. അതിനാൽ ഈ വിഷയത്തിൽ കോണ്‍ഗ്രസ്-മുസ്ലീം ലീഗ് കക്ഷികളിലെ ഭിന്നാഭിപ്രായം രാഷ്ട്രീയമായി മുതലെടുക്കാനുള്ള നീക്കമാണ് സിപിഎം നടത്തുന്നത്. സ്ഥല പരിമിതിമൂലം നിലന്പൂർ ജില്ലാ ആശുപത്രി നേരിടുന്നത് വലിയ പ്രതിസന്ധിയാണ്. കഴിഞ്ഞ ഉപതെരഞ്ഞെടുപ്പിൽ യുഡിഎഫിന് മണ്ഡലത്തിൽ ഏറ്റവും കൂടുതൽ ഭൂരിപക്ഷം ലഭിച്ചത് നിലന്പൂർ നഗരസഭയിൽ നിന്നാണ്. 3967 വോട്ടുകളുടെ ഭൂരിപക്ഷം ലഭിച്ചു. ഡിവിഷനുകൾ 33 - ൽ നിന്ന് 36 ആക്കി ഉയർത്തുകയും വാർഡ് വിഭജനത്തിലൂടെ തുടർ ഭരണം എൽഡിഎഫ് പ്രതീക്ഷിക്കുകയും ചെയ്യുന്ന അവസരത്തിലാണ് ഉപതെരഞ്ഞെടുപ്പിൽ കനത്ത പ്രഹരമേറ്റത്. കൂടാതെ എൽഡിഎഫ് വോട്ടുകളിൽ കടന്നു കയറി 2000 ത്തിലേറെ വോട്ടുകൾ പി.വി. അൻവർ നേടുകയും ചെയ്തു. തൃണമൂൽ കോണ്‍ഗ്രസും നിലന്പൂർ നഗരസഭയിൽ മുഴുവൻ ഡിവിഷനിലും മത്സരിക്കുമെന്ന് അറിയിച്ചിട്ടുണ്ട്. ചതുഷ്കോണ മത്സരത്തിനാണ് ഇക്കുറി നഗരസഭ വേദിയാകുക. അതിനാൽ തന്നെ ജില്ലാ ആശുപത്രി വികസനത്തിന് കോണ്‍ഗ്രസ് എതിര് നിൽക്കുന്നുവെന്ന പ്രചാരണത്തിന് മുൻതൂക്കം നൽകാനാണ് സിപിഎം ശ്രമം. എന്നാൽ വികസനത്തിന് കോണ്‍ഗ്രസ് എതിരല്ലെന്നും ജില്ലാ ആശുപത്രി വികസനം തങ്ങളാണ് കൊണ്ടുവന്നതെന്ന് തെളിയിക്കാനാണ് കോണ്‍ഗ്രസ് ലക്ഷ്യമിടുന്നത്.

എഴുത്തിന്‍റെ നല്ലപാഠങ്ങൾ പകർന്ന് കവി മണന്പൂർ രാജൻ ബാബു

അങ്ങാടിപ്പുറം: പൂക്കളുടെ ചിരിയും പക്ഷികളുടെ കൊഞ്ചലുകളും ആസ്വദിച്ച് കുട്ടികൾ വളരണമെന്ന് കവി മണന്പൂർ രാജൻ ബാബു. പ്രകൃതി നൽകുന്ന സ്നേഹപാഠങ്ങൾ പഠനത്തിന്‍റെയും ജീവിതത്തിന്‍റെയും ഭാഗമാക്കണമെന്നും അദ്ദേഹം പറഞ്ഞു. പരിയാപുരം സെന്‍റ് മേരീസ് ഹയർ സെക്കൻഡറി സ്കൂളിൽ വിദ്യാരംഗം കലാസാഹിത്യവേദിയുടെയും വിവിധ ക്ലബുകളുടെയും ഉദ്ഘാടനം നിർവഹിക്കുകയായിരുന്നു അദ്ദേഹം. വിദ്യാരംഗം സ്കൂളിൽ ഒരുക്കിയ വിവിധ മത്സരങ്ങളിലെ വിജയികൾക്ക് അദ്ദേഹം പുരസ്കാരങ്ങൾ നൽകി. പിടിഎ പ്രസിഡന്‍റ് സാജു ജോർജ് അധ്യക്ഷത വഹിച്ചു. പ്രധാനാധ്യാപകൻ പി.ടി.ബിജു, വിദ്യാരംഗം കോ ഓർഡിനേറ്റർ മനോജ് വീട്ടുവേലിക്കുന്നേൽ, ശ്രീജ ജോസഫ്, ആൻ മരിയ ടോണി എന്നിവർ പ്രസംഗിച്ചു.

അപകട ഭീഷണിയായ മരം മുറിച്ചുമാറ്റി

എടക്കര: വൈദ്യുതി ലൈനിന് സമീപം അപകടകരമാം വിധം വളർന്ന വൃക്ഷം വെട്ടിമാറ്റി ട്രോമാകെയർ പ്രവർത്തകരുടെ കരുതൽ. ഉപ്പട എൻഎസ്എസ് യുപി സ്കൂൾ വിദ്യാർഥികൾക്കും നാട്ടുകാർക്കും ഒരുപോലെ ഭീഷണിയായ മരമാണ് സ്കൂൾ പ്രധാനധ്യാപകൻ സന്തോഷിന്‍റെ നിർദേശപ്രകാരം ട്രോമാകെയർ പോത്തുകൽ സ്റ്റേഷൻ യൂണിറ്റ് വോളണ്ടിയർമാർ മുറിച്ചുമാറ്റിയത്. കഴിഞ്ഞ ദിവസം ഞെട്ടിക്കുളം കുടുംബാരോഗ്യ കേന്ദ്രത്തിന് സമീപം ഉണങ്ങിയ മരക്കൊന്പ് പൊട്ടി വീണിരുന്നു. ചികിത്സതേടി ആശുപത്രിയിലേക്ക് വന്ന രോഗികൾ ഭാഗ്യം കൊണ്ടാണ് മരക്കൊന്പ് ദേഹത്ത് പതിക്കാതെ രക്ഷപ്പെട്ടത്. ആശുപത്രി ജീവനക്കാരുടെ നിർദേശ പ്രകാരം ഉണങ്ങിയ മര ചില്ലകളും മറ്റും വെട്ടിമാറ്റി. വോളണ്ടിയർമാരായ നിഷാദ്, ബാബു മാത്യു, കമറുദ്ദീൻ, ഇ.കെ. ഹംസ, മിൻഷിദ്, എൻ.ടി. സുലൈമാൻ, എൽദോസ്, ചന്ദ്രിക, ഷിജോ, കെ. നവാസ് ബാബു, കെ. സുലൈമാൻ എന്നിവർ സേവന പ്രവർത്തനത്തിൽ പങ്കാളികളായി.

തേഞ്ഞിപ്പലം വൈഎംസിഎ പ്രതിഷേധ സംഗമം നടത്തി

തേഞ്ഞിപ്പലം : ഒഡീഷയിലെ ജലേശ്വറിൽ മലയാളി വൈദികർക്കും കന്യാസ്ത്രീകൾക്കും നേരേ തീവ്ര ഹിന്ദുത്വ സംഘടനയായ ബജ്രംഗ്ദൾ ആക്രമണം നടത്തിയതിനെതിരെ തേഞ്ഞിപ്പലം വൈഎംസിഎ പ്രതിഷേധ സംഗമം നടത്തി. തേഞ്ഞിപ്പലം വൈഎംസിഎ പ്രസിഡന്‍റ് കെ.സി.ജോസഫ് ഉദ്ഘാടനം ചെയ്തു. ഭാരതത്തിലെ ന്യൂനപക്ഷങ്ങളുടെ അവകാശങ്ങൾ ലംഘിക്കുന്നത് ഭരണകൂട ഭീകരതയാണെന്ന് അദ്ദേഹം പറഞ്ഞു. ക്രിസ്തീയ സേവനങ്ങളെ മറന്നുകൊണ്ട് പ്രവർത്തിക്കുന്ന സംഘപരിവാർ സംഘടനകളെ നിരോധിക്കണമെന്ന് അദ്ദേഹം ആഹ്വാനം ചെയ്തു. വൈസ് പ്രസിഡന്‍റ് കെ.എൽ.ആന്‍റണി അധ്യക്ഷനായിരുന്നു. സെക്രട്ടറി കെ.വി. അഗസ്റ്റിൻ, ജോയിന്‍റ് സെക്രട്ടറി അലോഷ്യസ് ആന്‍റണി, ഡയറക്ടർ ബോർഡംഗം കെ. ബിജു ജോർജ് എന്നിവർ പ്രസംഗിച്ചു.

ഫോർവേഡ് ബ്ലോക്ക് ക്വിറ്റ് ഇന്ത്യ ദിനാചരണം നടത്തി

കരുവാരക്കുണ്ട് :ഓൾ ഇന്ത്യ ഫോർവേഡ് ബ്ലോക്ക് വണ്ടൂർ നിയോജക മണ്ഡലം കമ്മിറ്റി ക്വിറ്റ് ഇന്ത്യ ദിനാചരണം നടത്തി. ദിനാചരണത്തിന്‍റെ ഭാഗമായി ക്വിറ്റ് ഇന്ത്യ സമരവും വർത്തമാനകാല ഇന്ത്യയും വിഷയത്തിൽ സെമിനാർ സംഘടിപ്പിച്ചു. ദിനാചരണം ഫോർവേഡ് ബ്ലോക്ക് സംസ്ഥാന കമ്മിറ്റി അംഗം ഷാക്കിർ തുവൂർ ഉദ്ഘാടനം ചെയ്തു. നേതാജിയുടെ മാർഗത്തിൽ ഇന്ത്യയെ പുനർനിർമിക്കേണ്ടത് കാലഘട്ടത്തിന്‍റെ ആവശ്യമാണെന്ന് അദ്ദേഹം പറഞ്ഞു. നിയോജക മണ്ഡലം പ്രസിഡന്‍റ് പി.നാരായണൻ അധ്യക്ഷത വഹിച്ചു. റബീസ് കൊരന്പയിൽ, ജാഫർ നിലന്പൂർ, ശിവൻ മങ്കട, നസീർ പെരിന്തൽമണ്ണ എന്നിവർ പ്രസംഗിച്ചു.

പൈപ്പ് പൊട്ടി ശുദ്ധജലം പാഴാകുന്നു

കൊളത്തൂർ: ജല അഥോറിറ്റിയുടെ മൂർക്കനാട് ശുദ്ധജല വിതരണ പദ്ധതിയുടെ പൈപ്പ് പൊട്ടി കൊളത്തൂർ തെക്കേക്കര എടയൂർ റോഡിൽ ജലപ്രളയം. തെക്കേക്കര ഭാഗത്താണ് വെള്ളം വലിയ തോതിൽ റോഡിലൂടെ പരന്നൊഴുകുന്നത്. ഏറെ നാളായി ഈ ഭാഗത്ത് പൈപ്പ് തകരാർ മൂലം റോഡിൽ ചെറിയ തോതിൽ ലീക്ക് അനുഭവപ്പെടുന്നുണ്ടായിരുന്നു. തകരാർ പരിഹരിക്കണമെന്ന് നാട്ടുകാർ പല തവണ ജല അഥോറിറ്റി അധികൃതരോട് ആവശ്യപ്പെട്ടിട്ടും നടപടി ഉണ്ടായിട്ടില്ല. ഇന്നലെ രാവിലെ മുതൽ റോഡിലൂടെ ജലം പാഴായി പോവുകയാണ്. മൂർക്കനാട് ശുദ്ധജല പദ്ധതിയിൽ നിന്ന് ഉയർന്ന ചില മേഖലകളിലെ ഉപഭോക്താക്കൾക്ക് ഇപ്പോഴും കൃത്യമായി കുടിവെള്ളം ലഭിക്കുന്നില്ലെന്ന പരാതിയുണ്ട്. അതിനിടെയാണ് ഇവിടെ പൈപ്പ് പൊട്ടി റോഡാകെ ജലമൊഴുകുന്നത്. പ്രശ്നം പരിഹരിക്കുന്നതിന് അധികൃതർ അടിയന്തര നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

കൃഷിഭവനുകളിലേക്ക് സ്വതന്ത്ര കർഷക സംഘം മാർച്ച് ഇന്ന്

നിലന്പൂർ:വിവിധ കാർഷിക പ്രശ്നങ്ങൾ ഉന്നയിച്ച് സ്വതന്ത്ര കർഷക സംഘം ഇന്ന് നിലന്പൂർ മണ്ഡലത്തിലെ കൃഷിഭവനുകളിലേക്ക് മാർച്ച് നടത്തും. നിലന്പൂർ നിയോജക മണ്ഡലത്തിലെ മുഴുവൻ കൃഷിഭവനിലേക്കും മാർച്ച് നടത്തുമെന്ന് മണ്ഡലം ഭാരവാഹികൾ വാർത്താ സമ്മേളനത്തിൽ അറിയിച്ചു. വന്യജീവിശല്യത്തിന് ശാശ്വത പരിഹാരം കാണുക, മഴക്കെടുതിയിൽ കൃഷി നാശം സംഭവിച്ച കർഷകർക്ക് നഷ്ടപരിഹാരം നൽകുക, നഷ്ടപരിഹാര തുക കാലോചിതമായി വർധിപ്പിക്കുക, കർഷക പെൻഷൻ 10000 രൂപയായി വർധിപ്പിക്കുക, നെല്ല് സംഭരണത്തിന്‍റെ കുടിശിക വിതരണം ചെയ്യുക, സംഭരണ സമയത്ത് തന്നെ നെല്ല് വില നൽകുക, ക്ഷീര കർഷകരുടെ പ്രതിസന്ധി പരിഹരിക്കുക, രാസവള വില കുറക്കുക,കാർഷികോത്പന്നങ്ങൾക്ക് ന്യായവില ലഭ്യമാക്കുക, കർഷകരുടെ കടം എഴുതിത്തള്ളുക, ജപ്തി, ലേല നടപടികൾ നിർത്തിവയ്ക്കുക, കേന്ദ്ര-സംസ്ഥാന സർക്കാരുകളുടെ കർഷക ദ്രോഹ നടപടി അവസാനിപ്പിക്കുക തുടങ്ങിയ ആവശ്യങ്ങൾ ഉന്നയിച്ചാണ് മാർച്ച് സംഘടിപ്പിക്കുന്നത്. വിവിധ സ്ഥലങ്ങളിൽ പ്രമുഖർ സംബന്ധിക്കുമെന്നും സ്വതന്ത്ര കർഷക ഭാരവാഹികൾ അറിയിച്ചു. വാർത്താ സമ്മേളനത്തിൽ നിയോജക മണ്ഡലം ജനറൽ സെക്രട്ടറി ബാപ്പനു മുത്തേടം, കുന്നുമ്മൽ സൈതലവി, കുഞ്ഞാലൻ ഹാജി, റസാഖ് എന്നിവർ പങ്കെടുത്തു.

ജൂണിയർ അത് ലറ്റിക്സ് മീറ്റ് : ഐഡിയൽ വീണ്ടും ചാന്പ്യൻമാർ

തേഞ്ഞിപ്പലം: കാലിക്കട്ട് യൂണിവേഴ്സിറ്റി സിന്തറ്റിക് സ്റ്റേഡിയത്തിൽ രണ്ട് ദിവസങ്ങളിലായി നടന്ന 54-ാമത് മലപ്പുറം ജില്ലാ ജൂണിയർ അത് ലറ്റിക്സ് മീറ്റിൽ തുടർച്ചയായ 17-ാം തവണയും ഐഡിയൽ കടകശേരി ചാന്പ്യൻമാർ. 54 സ്വർണവും 37 വെള്ളിയും 27 വെങ്കലവുമടക്കം 741 പോയിന്‍റുമായാണ് ഐഡിയലിന്‍റെ മുന്നേറ്റം. 21 സ്വർണവും 23 വെള്ളിയും 18 വെങ്കലവുമടക്കം 406 പോയിന്‍റ് നേടി റിയൽ റണ്ണേഴ്സ് പുത്തനത്താണി രണ്ടാം സ്ഥാനത്തെത്തി. 15 സ്വർണം 20 വെള്ളി 14 വെങ്കലവുമടക്കം 328.5 പോയിന്‍റ് കരസ്ഥമാക്കിയ തിരുനാവായ നവാമുകുന്ദ സ്പോർട്സ് അക്കാഡമിയാണ് മൂന്നാമത്. 229 പോയിന്‍റോടെ സിഎച്ച്എംഎച്ച്എസ്എസ് പൂക്കളത്തൂർ നാലാമതും 143 പോയിന്േ‍റാടെ കെഐച്ച്എംഎച്ച്എസ്എസ് വാളക്കുളവും അഞ്ചാമതും സ്ഥാനങ്ങളിലെത്തി. സമാപന ചടങ്ങ് യൂണിവേഴ്സിറ്റി കായിക വിഭാഗം മേധാവി ഡോ. വി.പി. സക്കീർ ഹുസൈൻ ഉദ്ഘാടനം ചെയ്തു. അത് ലറ്റിക്സ് അസോസിയേഷൻ ജില്ലാ പ്രസിഡന്‍റ് മജീദ് ഐഡിയൽ അധ്യക്ഷത വഹിച്ചു. അസോസിയേഷൻ സെക്രട്ടറി വി.പി. മുഹമ്മദ് കാസിം, പ്ലാനിംഗ് കമ്മിറ്റി ചെയർമാൻ കെ.പി.എം. സാക്കിർ, വൈസ് പ്രസിഡന്‍റ് ഷാഫി അമ്മായത്ത്, അബ്ദുൾ കാദർ ബാപ്പു, സൈഫ് സാഹിദ്, ഷുക്കൂർ ഇല്ലത്ത് എന്നിവർ പ്രസംഗിച്ചു.

യുഡിടിഎഫ് പ്രതിഷേധം സംഘടിപ്പിക്കും

മഞ്ചേരി: അമേരിക്കൻ പ്രസിഡന്‍റ് ട്രംപിന്‍റെ താരിഫ് ഭീഷണിക്കും മോദിയുടെ ദാസ്യവേലക്കുമെതിരെ യുനൈറ്റഡ് ഡെമോക്രാറ്റിക് ട്രേഡ് യൂണിയൻ ഫ്രണ്ട് (യുഡിടിഎഫ്) മുനിസിപ്പൽ പഞ്ചായത്ത് തലങ്ങളിൽ പ്രതിഷേധം സംഘടിപ്പിക്കും. 13ന് പന്തംകൊളുത്തി പ്രകടനങ്ങളും പ്രതിഷേധ സംഗമങ്ങളുമാണ് നടക്കുക. അധിക തീരുവ രാജ്യത്തിന്‍റെ സന്പദ് വ്യവസ്ഥയെ തകർക്കുമെന്നും നടപടി പിൻവലിക്കാൻ കേന്ദ്ര സർക്കാർ സമ്മർദം ചെലുത്തണമെന്നും യോഗം ആവശ്യപ്പെട്ടു. തുണിത്തരങ്ങൾ, കയറുത്പന്നങ്ങൾ, തേയില, കശുവണ്ടി, സുഗന്ധ ദ്രവ്യങ്ങൾ, ചെമ്മീനുൾപ്പടെയുള്ള സമുദ്രോത്പന്നങ്ങൾ, ഫർണീച്ചർ തുടങ്ങിയവയാണ് കേരളത്തിൽ നിന്ന് പ്രധാനമായും യുഎസ് വിപണിയിലെത്തുന്നത്. അധിക തീരുവ കേരളത്തിന്‍റെ കയറ്റുമതി വ്യവസായത്തെ തകർക്കുമെന്നും ജില്ലാ ചെയർമാൻ വി.എ.കെ. തങ്ങൾ, ജില്ലാ ജനറൽ കണ്‍വീനർ വി.പി. ഫിറോസ് എന്നിവർ പ്രസ്താവനയിൽ പറഞ്ഞു

ഗതാഗതക്കുരുക്കിൽ വീർപ്പുമുട്ടി അങ്ങാടിപ്പുറം

13 ന് കടകളടച്ച് പ്രതിഷേധ റാലി പെരിന്തൽമണ്ണ: ഗതാഗതക്കുരുക്കിൽ വീർപ്പുമുട്ടിയ ദേശീയപാതയിലെ അങ്ങാടിപ്പുറത്ത് 13 ന് കടകളടച്ച് പ്രതിഷേധ റാലി നടത്താൻ വ്യാപാരികളുടെ തീരുമാനം. ദിവസം തോറും രൂക്ഷമായിവരുന്ന അങ്ങാടിപ്പുറത്തെ ഗതാഗത കുരുക്ക് ഒഴിവാക്കാൻ അടിയന്തര നടപടി വേണമെന്നാവശ്യപ്പെട്ട് വ്യപാരി വ്യവസായി ഏകോപന സമിതി (കെവിവിഎസ്) മങ്കട, പെരിന്തൽമണ്ണ യൂണിറ്റ് പ്രവർത്തകരാണ് 13 ന് കടകളടച്ച് പ്രതിഷേധ റാലിയും ധർണയും നടത്തുന്നത്. രാവിലെ റെയിൽവേ മേൽപാലം പരിസരത്ത് നിന്ന് അങ്ങാടിപ്പുറം ജംഗ്ഷനിലേക്ക് മാർച്ച് നടത്തും. തുടർന്ന് നടക്കുന്ന ധർണ കെവിവിഎസ് ജില്ലാ പ്രസിഡന്‍റ് പി.കുഞ്ഞാവുഹാജി ഉദ്ഘാടനം ചെയ്യും. അന്നേ ദിവസം രാവിലെ 11 വരെ അങ്ങാടിപ്പുറത്ത് മുഴുവൻ കടകളും അടച്ചിടും. അങ്ങാടിപ്പുറത്ത് മണിക്കൂറുകൾ നീളുന്ന ഗതാഗതകുരുക്ക് കാരണം ജനങ്ങളും വ്യാപാരികളും ഒരുപോലെ ബുദ്ധിമുട്ടുകയാണ്. ഏതാനും നാളുകൾക്ക് മുന്പ് ഇവിടെ കട്ടപാകി റോഡ് ഗതാഗതയോഗ്യമാക്കിയെങ്കിലും അതുകൊണ്ടൊന്നും വാഹനതിരിക്ക് ഒഴിയുന്നില്ല. മിക്ക സമയത്തും അങ്ങാടിപ്പുറത്ത് വാഹനങ്ങളുടെ നീണ്ടനിരയാണ് കാണുന്നത്. രാഷ്ട്രീയ പാർട്ടികൾ ഇക്കാര്യത്തിൽ ശാശ്വത പരിഹാരം കാണുന്നില്ലെന്നാണ് ജനങ്ങൾ പറയുന്നത്. സാമൂഹ്യാഘാത പഠനം നടത്തുകയും 10 കോടി രൂപ ബജറ്റിൽ നീക്കിവയ്ക്കുകയും ചെയ്ത ഓരാടംപാലം- മാനത്തുമംഗലം ബൈപ്പാസ് യാഥാർഥ്യമാക്കാൻ രാഷ്ട്രീയ കക്ഷികൾ ആത്മാർഥ ശ്രമം നടത്തണമെന്നും രാഷ്ട്രീയ കക്ഷികൾ ഒന്നിച്ചിരുന്ന് ബൈപ്പാസ് യാഥാർഥ്യമാക്കണമെന്നും വ്യാപാരികൾ ആവശ്യപ്പെട്ടു. വൈലോങ്ങര- ഓരാടംപാലം ബൈപ്പാസ് പണി ഉടൻ ആരംഭിക്കുക, ചാത്തോലിക്കുണ്ട് റെയിൽവേ അണ്ടർപാസ് സ്ഥാപിക്കുക, ഹൈവേയിൽ ദിശാബോർഡുകൾ സ്ഥാപിക്കുക എന്നി ആവശ്യങ്ങൾ നടപ്പാക്കണമെന്നും വ്യാപാരികൾ ആവശ്യപ്പെട്ടു. വാർത്താസമ്മേളനത്തിൽ ജില്ലാ വൈസ് പ്രസിഡന്‍റ് പി.ടി.എസ്. മൂസു, ജില്ലാ സെക്രട്ടറി അക്രം ചുണ്ടയിൽ, പെരിന്തൽമണ്ണ മണ്ഡലം പ്രസിഡന്‍റ് യൂസഫ് രാമപുരം, മങ്കട മണ്ഡലം പ്രസിഡന്‍റ് മുഹമ്മദാലി തിരൂർക്കാട്, മണ്ഡലം ഭാരവാഹികളായ മനോജ് മേലാറ്റൂർ, ഗഫൂർ, ജബ്ബാർ അങ്ങാടിപ്പുറം, ലത്തീഫ് ടാലന്‍റ്, പി.പി. സൈതലവി തുടങ്ങിയവർ സംബന്ധിച്ചു.

സൗദിയിൽ തീപൊള്ളലേറ്റ് ചികിത്സയിലായിരുന്ന യുവാവ് മരിച്ചു

പെരിന്തൽമണ്ണ: തേക്കിൻക്കോടിലെ മുൻകാല ടാക്സി ഡ്രൈവറും ഫുട്ബോൾ താരവുമായിരുന്ന ആറങ്ങോടൻ സുബൈറിന്‍റെ മകൻ നിഷാദലി (42) സൗദി അറേബ്യ അബഹയിലെ അസീർ ആശുപത്രിയിൽ മരിച്ചു. ഇക്കഴിഞ്ഞ മേയ് 10 ന് ഖുൻഫുദക്കടുത്ത് ബാരിക്കിൽ താമസിക്കുന്ന റൂമിൽ വച്ച് ഗ്യാസിൽ നിന്ന് തീ പൊള്ളലേറ്റ് ചികിത്സയിലായിരുന്നു. ഭാര്യ : മാന്പറ്റക്കുന്നിലെ പേരഞ്ചി ഷെരീഫ (താഴെക്കോട്).മക്കൾ : ഫാത്തിമ മെഹറിൻ, മെഹ്ഫിൽ (ഇരുവരും വിദ്യാർഥികൾ). മാതാവ് :താമരത്ത് റുഖിയ (പൂപ്പലം, പെരിന്തൽമണ്ണ).

പാന്പ് കടിയേറ്റ് ആദിവാസി യുവാവ് മരിച്ചു

നിലന്പൂർ: വനത്തിൽ കൂണ്‍ പറിക്കാൻ പോകുന്നതിനിടയിൽ അണലിയുടെ കടിയേറ്റ് ആദിവാസി യുവാവ് മരിച്ചു. പെരുന്പത്തൂർ കാനക്കുത്ത് പനയംകോടൻ യദുകൃഷ്ണൻ (26) ആണ് മരിച്ചത്. ജൂലൈ 30 ന് ഉച്ചക്ക് ശേഷം കുട്ടികളോടൊപ്പം കാഞ്ഞിരപ്പുഴ വനം സ്റ്റേഷൻ പരിധിയിലെ കാനക്കുത്ത് വനമേഖലയിൽ കൂണ്‍ പറിക്കാൻ പോകുന്പോഴാണ് അണലിയുടെ കടിയേറ്റത്. കോഴിക്കോട് മെഡിക്കൽ കോളജാശുപത്രിയിൽ ചികിത്സയിലിരിക്കേ ശനിയാഴ്ച രാത്രി 12 മണിയോടെയാണ് മരിച്ചത്. ഭാര്യ: രഞ്ജിത. മക്കൾ: സാരംഗി, ശ്രീതുല്യ.

തിരൂർക്കാട് സ്കൂളിൽ എസ്പിസി യൂണിറ്റ്

അങ്ങാടിപ്പുറം : തിരൂർക്കാട് എഎംഎച്ച്എസിൽ സ്റ്റുഡന്‍റ് പോലീസ് കേഡറ്റ് യൂണിറ്റ് (എസ്പിസി)ആരംഭിച്ചു. മഞ്ഞളാംകുഴി അലി എംഎൽഎ ഉദ്ഘാടനം ചെയ്തു. ജില്ലാ വിദ്യാഭ്യാസ ഡയറക്ടർ പി.വി. റഫീഖ് അധ്യക്ഷനായിരുന്നു. ചടങ്ങിൽ രാജ്യപുരസ്കാർ, എസ്എസ്എൽസി, പ്ലസ്്ടു, യുഎസ്എസ്, എൽഎസ്എസ്, എൻഎംഎംഎസ് എന്നിവയിൽ മികച്ച നേട്ടം കൈവരിച്ചവരെ അനുമോദിച്ചു. ജില്ലാ പഞ്ചായത്ത് അംഗം ഷഹർബാൻ, അഡ്വ. ടി.കെ. റഷീദലി, ബ്ലോക്ക് പഞ്ചായത്ത് അംഗം നജ്മ തബ്സീറ, പഞ്ചായത്ത് അംഗങ്ങളായ ഷംസാദ് ബീഗം, ഷിഹാദ് പേരയിൽ, ഡിഇഒ കെ. ശ്രീജ, എസ്പിസി ജില്ലാ നോഡൽ ഓഫീസർ ബിജുരാജ്, അസിസ്റ്റന്‍റ് നോഡൽ ഓഫീസർ പി. കൃഷ്ണദാസ്, ഡിവൈഎസ്പി എ. പ്രേംജിത്ത്, മങ്കട എസ്എച്ച്ഒ അശ്വിത് കാരണ്‍മയിൽ, എസ്ഐ ഷാജഹാൻ, മങ്കട ബിപിഒ എ.പി. ബിജു, എഇഒ അമീറ, പ്രധാനാധ്യാപകൻ ഇ.കെ. അബ്ദുൾ മജീദ്, സ്കൂൾ ലീഡർ കെ. നവാസ്, പ്രിൻസിപ്പൽ ടി.കെ. സലീം, സ്റ്റാഫ് സെക്രട്ടറി പി. ഫിറോസ് ബാബു എന്നിവർ പ്രസംഗിച്ചു.

അമേരിക്കയുടെ നിലപാടിനെതിരേ കോണ്‍ഗ്രസ് പ്രതിഷേധിച്ചു

മലപ്പുറം: ഇന്ത്യൻ ഉത്പ്പന്നങ്ങൾക്ക് മേൽ 50 ശതമാനം ഇറക്കുമതി തീരുവ ചുമത്താനുള്ള അമേരിക്കൻ പ്രസിഡന്‍റ് ഡൊണാൾഡ് ട്രംപിന്‍റെ തീരുമാനം നരേന്ദ്ര മോദിയുടെ പൊള്ളയായ വിദേശനയത്തിന്‍റെ മുഖത്തേറ്റ കനത്ത പ്രഹരമാണെന്ന് ഡിസിസി പ്രസിഡന്‍റ് വി.എസ്. ജോയ് പറഞ്ഞു. റഷ്യയിൽ നിന്ന് എണ്ണ ഇറക്കുമതി ചെയ്യുന്നതിനെതിരെ ഇന്ത്യക്ക് വൻതോതിൽ തീരുവ ചുമത്തിയ യുഎസ് നടപടി ഇരട്ടത്താപ്പെന്നും അദ്ദേഹം വ്യക്തമാക്കി. അമേരിക്കയുടെ ഇന്ത്യ വിരുദ്ധ നിലപാടുകൾക്കെതിരെയും മോഡി ഭരണകൂടത്തിന്‍റെ നയ പരാജയങ്ങൾക്കെതിരെയും കെപിസിസി നിർദേശ പ്രകാരം മലപ്പുറത്ത് നടത്തിയ പ്രതിഷേധ പ്രകടനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഡിസിസി വൈസ് പ്രസിഡന്‍റ് ഷാജി പച്ചേരി അധ്യക്ഷത വഹിച്ചു. കെപിസിസി മെംബർമാരായ എ.എം. രോഹിത്, വി.എസ്.എൻ. നന്പൂതിരി, ഡിസിസി ഭാരവാഹികളായ അഡ്വ. നസ്റുള്ള, ഹാരിസ് ബാബു ചാലിയാർ, സി.കെ. ഹാരിസ്, സി. സുകുമാരൻ,പി.പി. ഹംസ, ഹൈദ്രോസ്, കെ.വി. ഇസ്ഹാക്ക് തുടങ്ങിയവർ പ്രസംഗിച്ചു.

യൂത്ത് കോണ്‍ഗ്രസ് സ്ഥാപകദിനാചരണം

പെരിന്തൽമണ്ണ: പെരിന്തൽമണ്ണ മണ്ഡലം യൂത്ത് കോണ്‍ഗ്രസ് കമ്മിറ്റി ക്വിറ്റ് ഇന്ത്യ ദിനാചരണവും പതാക ഉയർത്തലും നടത്തി യൂത്ത് കോണ്‍ഗ്രസ് സ്ഥാപകദിനം ആചരിച്ചു. ബ്ലോക്ക് കോണ്‍ഗ്രസ് പ്രസിഡന്‍റ് അറഞ്ഞിക്കൽ ആനന്ദൻ പതാക ഉയർത്തി ഉദ്ഘാടനം ചെയ്തു. യൂത്ത് കോണ്‍ഗ്രസ് മണ്ഡലം പ്രസിഡന്‍റ് ഷഫീഖ് ചക്കാലി അധ്യക്ഷത വഹിച്ചു. മണ്ഡലം പ്രസിഡന്‍റ് രാജേന്ദ്രൻ എന്ന കൊച്ചു, രാജേഷ്, ജില്ലാ യൂത്ത് കോണ്‍ഗ്രസ് വൈസ് പ്രസിഡന്‍റ് അഡ്വ. വിശ്വനാഥ്, മനോജ് പാതായ്ക്കര, യൂണിറ്റ് പ്രസിഡന്‍റ് ഫാസിൽ മൊയ്തീൻ എന്നിവർ പ്രസംഗിച്ചു. മൊയ്തു കിഴക്കേതിൽ, ഷെബിൽ, അലി ചേരിയിൽ, യൂത്ത് കോണ്‍ഗ്രസ് മണ്ഡലം വൈസ് പ്രസിഡന്‍റുമാരായ അജിത്ത്, പ്രതീഷ്, സൈനു, ജിതിൻ, ഫൈസൽ, നിഖിൽ എന്നിവർ നേതൃത്വം നൽകി.

നിലന്പൂർ ജില്ലാ ആശുപത്രി വികസനം: വിവാദം മുറുകുന്നു

നിലന്പൂർ: നിലന്പൂർ ജില്ലാശുപത്രി വികസനവുമായി ബന്ധപ്പെട്ട് ഭരണ, പ്രതിപക്ഷ കക്ഷികൾ തമ്മിൽ വാദപ്രതിവാദങ്ങൾ മുറുകുന്നു. നഗരസഭാ ചെയർമാൻ മൂക്കാതെ പഴുത്ത നേതാവാണെന്നും ജില്ലാ ആശുപത്രി വികസനത്തിന് കോണ്‍ഗ്രസ് എതിരാണെന്ന നഗരസഭാ ചെയർമാന്‍റെ പ്രസ്താവന രാഷ്ട്രീയ പക്വത ഇല്ലാത്തതാണെന്നും പ്രതിപക്ഷ നേതാവ് പാലോളി മെഹബൂബ് പറഞ്ഞു. 1903 ൽ സ്ഥാപിതമായ നിലന്പൂർ ഗവണ്‍മെന്‍റ് മോഡൽ യുപി സ്കൂളിന്‍റെ സ്ഥലം ആശുപത്രി വികസനത്തിന് ഏറ്റെടുക്കുന്നതിലെ പ്രയോഗിക ബുദ്ധിമുട്ടുകൾ മാത്രമാണ് ചൂണ്ടിക്കാട്ടിയത്. നഗരസഭ രണ്ട് വർഷം മുന്പ്് സ്ഥലം വിട്ട് കൊടുക്കാൻ അനുമതി നൽകിയിട്ടും എന്തുകൊണ്ട് തുടർനടപടി നടന്നില്ലെന്നും പാലോളി മെഹബൂബ് ചോദിച്ചു. ഒരേക്കറിൽ താഴെ മാത്രം സ്ഥലമാണ് വീട്ടിക്കുത്ത് സ്കൂളിനുള്ളത്. രണ്ടേക്കറിൽ കൂടുതൽ സ്ഥലം മോഡൽ യുപി സ്കൂളിനുണ്ട്. ഈ സ്ഥലത്തിന് പകരം വീട്ടിക്കുത്ത് സ്കൂളിനോട് ചേർന്ന് ഒരു സെന്‍റ് സ്ഥലം പോലും പുതിയതായി വാങ്ങിയിട്ടില്ല. 506 കുട്ടികൾ കൂടി വീട്ടിക്കുത്ത് സ്കൂളിലേക്ക് എത്തിയാൽ അവർക്ക് കളിക്കളം പോലും ഇല്ലാത്ത അവസ്ഥയാകും. നിലന്പൂർ ജില്ലാ ആശുപത്രി വികസനത്തിന് എന്നും കോണ്‍ഗ്രസും യുഡിഎഫും പിന്തുണ നൽകിയിട്ടേ ഉള്ളൂ. കഴിഞ്ഞ ഉപതെരഞ്ഞെടുപ്പിൽ യുഡിഎഫിന് ഏറ്റവും വലിയ ഭൂരിപക്ഷം ലഭിച്ചത് നിലന്പൂർ നഗരസഭയിൽ നിന്നാണ്. ഇതിന്‍റെ ജാള്യത മറക്കാനാണ് നഗരസഭ ചെയർമാൻ കോണ്‍ഗ്രസ് വിരുദ്ധ പ്രസ്താവനയുമായി രംഗത്ത് വന്നിരിക്കുന്നത്. നഗരസഭയിലെ ചൂരക്കുളം അഴിമതി ഉൾപ്പെടെയുള്ള കാര്യങ്ങൾ ഉന്നയിച്ച് യുഡിഎഫ് സമരം നടത്തുമെന്നും പ്രതിപക്ഷ നേതാവ് പറഞ്ഞു. ആര്യാടൻ മുഹമ്മദ് ജില്ലാ ആശുപത്രിയുടെവികസനത്തിന് ഒന്നും ചെയ്തില്ലെന്ന നഗരസഭാ ചെയർമാന്‍റെ പ്രസ്താവന പരിഹാസ്യമാണെന്ന് ഡിസിസി അംഗവും നിലന്പൂർ ജില്ലാ ആശുപത്രി എച്ച്എംസി അംഗവുമായ എ. ഗോപിനാഥ് പറഞ്ഞു. ആര്യാടൻ മുഹമ്മദ് കൊണ്ടുവന്നതല്ലാതെ എന്തു വികസനമാണ് കഴിഞ്ഞ ഒന്പത് വർഷമായി നടപ്പാക്കിയതെന്ന് ചെയർമാൻ വ്യക്തമാക്കണം. 2015 ൽ നിലന്പൂർ താലൂക്ക് ആശുപത്രി ജില്ലാ ആശുപത്രിയായി ഉയർത്തിയത് ആര്യാടൻ മുഹമ്മദാണ്. അന്ന് ഉണ്ടായിരുന്ന സ്റ്റാഫ് പാറ്റേണ്‍ മാത്രമാണ് ഇപ്പോഴുമുള്ളത്. ഒരു അറ്റൻഡറെ പോലും അധികമായി നിയമിക്കാൻ കഴിഞ്ഞിട്ടില്ല. ആര്യാടൻ മുഹമ്മദ് കൊണ്ടുവന്ന മാതൃ ശിശു സംരക്ഷണ കേന്ദ്രം എൽഡിഎഫ് സർക്കാർ ഒന്പത് വർഷമായിട്ടും എന്തുകൊണ്ട് പൂർത്തിയാക്കിയില്ലെന്നും ഗോപിനാഥ് ചോദിച്ചു.

റോഡ് റോളർ സംരക്ഷിക്കണമെന്നാവശ്യം; സലീമിന്‍റെ ശ്രമങ്ങൾ പാഴായില്ല

മഞ്ചേരി: നൂറ്റാണ്ടുകൾ പഴക്കമുള്ള റോഡ് റോളർ അവഗണിക്കപ്പെടുന്നുവെന്ന പരാതിയിൽ നടപടി ആവശ്യപ്പെട്ട് ജില്ലാ കളക്ടർ തിരുവനന്തപുരം പുരാവസ്തു വകുപ്പ് ഡയറക്ടർക്ക് കത്തയച്ചു. ഗിന്നസ് ജേതാവും വിപുലമായ പുരാവസ്തു ശേഖരണത്തിന്‍റെ ഉടമയുമായ മഞ്ചേരി മുള്ളന്പാറ പടവണ്ണ സലീം നൽകിയ പരാതിയുടെ അടിസ്ഥാനത്തിലാണ് നടപടി. മഞ്ചേരി പാണ്ടിക്കാട് റോഡ് ബൈപ്പാസ് ജംഗ്ഷനിൽ ട്രാഫിക് ഐലന്‍റായി ഉപയോഗിക്കുന്ന റോഡ് റോളറിനോട് അധികൃതർ തികഞ്ഞ അവഗണനയാണ് കാണിക്കുന്നതെന്ന് ചൂണ്ടിക്കാട്ടിയാണ് സലീം കളക്ടർക്കും ജനപ്രതിനിധികൾക്കും പരാതി നൽകിയിരുന്നത്. ബ്രിട്ടീഷ് ഭരണകാലത്ത് മഞ്ചേരിയിലെയും മലപ്പുറത്തെയും നിരവധി റോഡുകൾ നിർമിക്കാനായി ഉപയോഗിച്ച റോഡ് റോളർ മഞ്ചേരി പാണ്ടിക്കാട് റോഡിൽ ചെങ്ങണയിൽ മണ്ണിൽ പുതഞ്ഞു കിടക്കുകയായിരുന്നു. പതിനഞ്ച് വർഷം മുന്പാണ് മഞ്ചേരി കിഴക്കേതലയിലെയും താണിപ്പാറയിലെയും യുവാക്കൾ ചേർന്ന് ജെസിബിയുടെ സാഹായത്തോടെ റോളർ സിഎച്ച് ബൈപ്പാസ് ജംഗ്ഷനിലെത്തിച്ചത്. ഈയിടെ നഗരസഭ ഈ റോഡ് റോളർ, ബൈപ്പാസ് ജംഗ്ഷനിൽ ട്രാഫിക് ഐലന്‍റാക്കുകയും സ്വകാര്യ സ്ഥാപനത്തിന് പരസ്യം സ്ഥാപിക്കാൻ നൽകുകയുമായിരുന്നു. പരസ്യം സ്ഥാപിച്ചതോടെ നാടിന്‍റെ ചരിത്രം പറയുന്ന റോഡ് റോളർ പൊതുജനങ്ങൾക്കും ചരിത്രാന്വേഷകർക്കും കാണാൻ പോലും പറ്റാത്ത അവസ്ഥയിലായി. പൈതൃക ടൂറിസത്തിനും വിദ്യാർഥികൾക്ക് ചരിത്രപഠനത്തിനും ഉപയോഗിക്കാനാകാതെ നഗര വികസനത്തിന്‍റെ കഥ പറയുന്ന ശേഷിപ്പ് മതിയായ പരിഗണന നൽകി സംരക്ഷിക്കണമെന്നായിരുന്നു സലീമിന്‍റെ ആവശ്യം.

അങ്കണവാടി പ്രവർത്തകർ സമരം നടത്തി

കരുവാരക്കുണ്ട്: കാളികാവ് അഡീഷണൽ പ്രൊജക്ടിലെ അങ്കണവാടി പ്രവർത്തകർ കാളികാവ് അഡീഷണൽ ഓഫീസിന് മുന്നിൽ സൂചനാ സമരം നടത്തി. അങ്കണവാടി പ്രവർത്തകരെയും പൊതുജനങ്ങളെയും ബുദ്ധിമുട്ടിക്കുന്ന ഇകെവൈസിയും എഫ്ആർഎസും നിർത്തലാക്കുന്നതിന് വേണ്ടിയും പോഷൻ ട്രാക്കർ പ്രവർത്തനങ്ങൾ നടത്താൻ നിലവാരമുള്ള ഉപകരണങ്ങൾ ലഭ്യമാക്കുന്നതിനും പിഎംഎംവിവൈ പദ്ധതി മുന്പ് ചെയ്തിരുന്നതുപോലെ തന്നെ അപേക്ഷകൾ ഓണ്‍ലൈൻ അല്ലാതെയുള്ള രീതിയിൽ തുടരുന്നതിനും വേതനം പുതുക്കി വർക്കർമാർക്ക് 28000 രൂപയും ഹെൽപ്പർ മാർക്ക് 23000 രൂപയും ഉയർത്തണമെന്നും ഉന്നയിച്ചാണ് സമരം സംഘടിപ്പിച്ചത്. കരുവാരകുണ്ട്, തുവൂർ, എടപ്പറ്റ പഞ്ചായത്തുകളിലെ അങ്കണവാടി പ്രവർത്തകരാണ് സമരത്തിൽ പങ്കെടുത്തത്. സഫിയബീഗം, ഹസീന, ശാന്തകുമാരി എന്നിവർ പ്രസംഗിച്ചു. ആവശ്യങ്ങൾ അംഗീകരിച്ചില്ലെങ്കിൽ ശക്തമായ സമരം തുടരാനാണ് തീരുമാനം.

നേന്ത്രക്ക വിലയിടിവ് കർഷകർക്ക് കനത്ത സാന്പത്തിക നഷ്ടം

കരുവാരകുണ്ട്: ഓണം മുന്നിൽ കണ്ട് നേന്ത്രവാഴ കൃഷി ചെയ്തവർ വില തകർച്ചയെ തുടർന്ന് വൻ സാന്പത്തിക നഷ്ടത്തിലേക്ക്. ഉത്പ്പാദനം വർധിച്ചതും ഇതര സംസ്ഥാനങ്ങളിൽ നിന്ന് കേരളത്തിലേക്കുള്ള നേന്ത്രക്ക ഇറക്കുമതിയുമാണ് കർഷകർക്ക് തിരിച്ചടിയായത്. കഴിഞ്ഞ ഓണത്തിന് മുന്പ് ഒരു കിലോ നേന്ത്രക്കായ്ക്ക് 60 മുതൽ 65 രൂപ വരെ വില ലഭിച്ചിരുന്നു. എന്നാൽ ഇന്ന് അതേ സ്ഥാനത്ത് മുന്തിയ ഇനം നേന്ത്രക്ക ഒരു കിലോക്ക് 30 രൂപ പ്രകാരമാണ് കർഷകരിൽ നിന്ന് വ്യാപാരികൾ ശേഖരിക്കുന്നത്. ചില ദിവസങ്ങളിൽ ഈ വിലക്കും വാങ്ങാൻ വ്യാപാരികൾ തയാറാകുന്നില്ല. നേന്ത്രക്കായ്ക്ക് ഉത്പാദന ചെലവ് പോലും ലഭിക്കാത്ത സാഹചര്യത്തിൽ കൃഷി വകുപ്പ് കർഷകർക്ക് നഷ്ടപരിഹാരം നൽകണമെന്ന ആവശ്യവും ശക്തമാണ്. പ്രതികൂല സാഹചര്യങ്ങളെ തരണം ചെയ്ത് വാഴ കൃഷി നടത്തുകയും അതിന്‍റെ വിളവെടുപ്പ് തുടങ്ങിയപ്പോൾ മാന്യമായ വിലക്ക് ഉത്പ്പന്നം വിറ്റഴിക്കാൻ കർഷകർക്കാകുന്നില്ല. നേന്ത്രക്ക വാങ്ങാൻ ആളില്ലാതായതിനെ തുടർന്ന് കർഷകർ നേന്ത്രക്കുലകൾ മലയോര ഗ്രാമങ്ങളിലെ റോഡരികിൽ കൂട്ടിയിട്ട് കുറഞ്ഞ വിലക്ക് പൊതുജനങ്ങൾക്ക് വിൽപ്പന നടത്തി വരുന്നവരെയും കാണാം. അതേസമയം കർഷകരിൽ നിന്ന് 30 രൂപക്ക് വാങ്ങുന്ന ഒരു കിലോ നേന്ത്രപ്പഴത്തിന് 50 രൂപക്കും മുകളിലാണ് വ്യാപാരികൾ വിൽക്കുന്നത്. ഇപ്പോഴത്തെ വില തകർച്ച കർഷകരെ കടുത്ത സാന്പത്തിക പ്രതിസന്ധിയിലാക്കുന്നു. സാധാരണ ജനങ്ങൾ സാന്പത്തിക ഞെരുക്കത്തിലായതാണ് നേന്ത്രപഴ വിപണിയിൽ മാന്ദ്യത്തിന് മറ്റൊരു കാരണമായി വ്യാപാരികൾ ചൂണ്ടിക്കാട്ടുന്നത്. കാലവർഷത്തിൽ അനുഭവപ്പെട്ട കാറ്റിലും മഴയിലും വൻതോതിൽ നേന്ത്ര വാഴകൃഷി നശിച്ചിരുന്നു. ഓണം നാളുകളിൽ തമിഴ്നാട്ടിൽ നിന്ന് സംസ്ഥാനത്തേക്കുള്ള നേന്ത്രക്കാവരവ് തുടങ്ങിയാൽ നിലവിൽ ഇന്ന് കിട്ടുന്ന വില പോലും ലഭിക്കില്ലെന്നും കർഷകർ ചൂണ്ടിക്കാട്ടുന്നു. രാസവളത്തിന്‍റെയും മറ്റും വില വർധനവിനെ തുടർന്ന് മലയോര ജനതയും മറ്റും വൻ തുക ചെലവഴിച്ചാണ് നേന്ത്രവാഴ കൃഷി ചെയ്യുന്നത്. കാട്ടാന, കാട്ടുപന്നി, കാട്ടുപോത്ത്, വാനരപട തുടങ്ങിയ വന്യജീവികൾ കൃഷിക്കാർക്ക് പേടി സ്വപ്നമാണ്. ഇവയുടെ ശല്യത്തിൽ നിന്ന് കൃഷിയെ സംരക്ഷിക്കാൻ രാവും പകലും കാവലിരുന്നാണ് വാഴ കൃഷിയെ സംരക്ഷിക്കുന്നത്. ഇതിനു തന്നെ വൻ തുക ചെലവഴിക്കണം. വാഴ തോട്ടത്തിനു ചുറ്റും താല്ക്കാലിക സൗരോർജ വേലി നിർമിച്ചാലും കാട്ടാനകൾ നിമിഷ നേരം കൊണ്ട് നാശം വരുത്തുമെന്നും കർഷകർ പറയുന്നു. പാട്ടത്തിന് സ്ഥലമെടുത്ത് വാഴകൃഷി നടത്തുന്നവരാണ് ഭൂരിപക്ഷവും.

പൊന്നാനിക്ക് ഇരട്ടിമധുരം : ഇൻഡോർ സ്റ്റേഡിയത്തിന് പുറമേ മറ്റൊരു കളിക്കളം കൂടി

പൊന്നാനി: പൊന്നാനിയുടെ കായിക വികസനത്തിന് പൊൻതൂവൽ ചാർത്തുന്ന അക്വാട്ടിക് സ്പോർട്സ് കോംപ്ലക്സ് ആൻഡ് ഇൻഡോർ സ്റ്റേഡിയത്തിന്‍റെ നിർമാണോദ്ഘാടനം കായിക- ന്യൂനപക്ഷ ക്ഷേമ- വഖഫ്- ഹജ്ജ് വകുപ്പ് മന്ത്രി വി. അബ്ദുറഹ്മാൻ നിർവഹിച്ചു. കായിക പ്രേമികൾക്ക് ഇരട്ടിമധുരം പകർന്ന് മറ്റൊരു കളിക്കളം കൂടി നിർമിക്കുമെന്ന് മന്ത്രി പ്രഖ്യാപിച്ചു. പി. നന്ദകുമാർ എംഎൽഎയുടെയും മുൻസിപ്പൽ ചെയർമാന്‍റെയും ആവശ്യപ്രകാരം നഗരസഭയുടെ കീഴിൽ ഹൈവേയോട് ചേർന്ന് കിടക്കുന്ന സ്ഥലമാണ് കുട്ടികൾക്കായി കളിക്കളത്തിന് കണ്ടെത്തിയിരിക്കുന്നത്. ഒന്നാം ഘട്ടം എന്ന നിലയിൽ ഒരു കോടി രൂപ ചെലവിൽ ആറുമാസം കൊണ്ട് നിർമാണം പൂർത്തീകരിക്കാൻ കഴിയുന്ന രീതിയിലാണ് പദ്ധതി വിഭാവനം ചെയ്യുന്നത്. നിളയോര പാതയിലെ ഇൻഡോർ സ്റ്റേഡിയത്തിൽ ബാഡ്മിന്‍റണ്‍, വോളിബോൾ, കബഡി എന്നിവയ്ക്കുള്ള പരിശീലനവും ഒൗട്ട്ഡോറിൽ ഫുട്ബോൾ, ക്രിക്കറ്റ് പരിശീലനവും നടത്താം. നീന്തൽ പരിശീലനത്തിനായി സ്വിമ്മിംഗ് പൂൾ നിർമിക്കും. 1400 കോടി രൂപ വിവിധ ഫണ്ടുകൾ വകയിരുത്തി കേരളത്തിലുടനീളം സ്റ്റേഡിയങ്ങൾ സർക്കാർ നിർമിച്ചിട്ടുണ്ട്. ജില്ലാ ആസ്ഥാനങ്ങളിൽ ഇൻഡോർ സ്റ്റേഡിയങ്ങൾ നിർമിച്ചു. 356 സ്റ്റേഡിയങ്ങൾ ഒന്പത് വർഷത്തിനുള്ളിൽ നിർമാണം പൂർത്തീകരിക്കാനായി. കൂടാതെ എല്ലാ പഞ്ചായത്തിലും ഒരു കളിക്കളം എന്ന കായിക വകുപ്പിന്‍റെ പദ്ധതിയിൽ 120 കളിക്കളങ്ങൾ പൂർണതയിലേക്ക് വരികയാണ്. മറ്റ് സംസ്ഥാനങ്ങളിൽ ഉള്ളതിനേക്കാൾ കേരളത്തിൽ കായിക സൗകര്യങ്ങൾ സർക്കാർ മെച്ചപ്പെടുത്തിയിട്ടുണ്ട്. രാജ്യത്ത് ആദ്യമായി കേരളമാണ് സ്പോർട്സ് ഇക്കോണമിയും കായിക നയവും നടപ്പാക്കിയതെന്ന് മന്ത്രി പറഞ്ഞു. കിഫ്ബി സഹായത്തോടെ 17 കോടി രൂപ ചെലവിലാണ് അക്വാട്ടിക് സ്പോർട്സ് കോംപ്ലക്സിന്‍റെ നിർമാണം. ട്രാക്ക് വയനാട് എന്ന കന്പനിക്കാണ് നിർമാണ ചുമതല. ഈശ്വരമംഗലത്തെ നിള തീരത്തുള്ള നഗരസഭയുടെ മിനി സ്റ്റേഡിയത്തിലാണ് പദ്ധതി നടപ്പാക്കുന്നത്. കബഡി കോർട്ട്, അക്വാട്ടിക് നീന്തൽകുളം, വോളിബോൾ, ബാഡ്മിന്‍റണ്‍, ഷട്ടിൽ കോർട്ട്, ഓപ്പണ്‍ ജിം, റോളർ സ്കേറ്റിംഗ് ട്രാക്ക്, ചിൽഡ്രൻ സ്പോർട്സ് പാർക്ക്, എന്നിവയെ കൂടാതെ വിശാലമായ പാർക്കിംഗ് സൗകര്യവും കോംപ്ലക്സിൽ ഒരുക്കുന്നുണ്ട്. 18 മാസം കൊണ്ട് നിർമാണം പൂർത്തീകരിക്കാനാണ് ലക്ഷ്യമിടുന്നത്. ചടങ്ങിൽ പി. നന്ദകുമാർ എംഎൽഎ അധ്യക്ഷത വഹിച്ചു. സ്പോർട്സ് കേരള ഫൗണ്ടേഷൻ എക്സിക്യൂട്ടീവ് എൻജിനീയർ എ.പി.എം. അഷറഫ് റിപ്പോർട്ട് അവതരിപ്പിച്ചു. പൊന്നാനി നഗരസഭ ക്ഷേമകാര്യ സ്ഥിരം സമിതി ചെയർമാൻ രജീഷ് ഉൗപ്പാല, വാർഡ് കൗണ്‍സിലർ കെ.വി. ബാബു, വിവിധ രാഷ്ട്രീയ പാർട്ടി പ്രതിനിധികൾ തുടങ്ങിയവർ സംബന്ധിച്ചു. നഗരസഭ ചെയർമാൻ ശിവദാസ് ആറ്റുപുറം സ്വാഗതവും വിദ്യാഭ്യാസ സ്ഥിരം സമിതി ചെയർമാൻ ടി മുഹമ്മദ് ബഷീർ നന്ദിയും പറഞ്ഞു.

മേൽമുറി സ്കൂൾ നിലനിർത്തണമെന്ന ആവശ്യത്തിൽ മനുഷ്യാവകാശ കമ്മീഷന്‍റെ ഇടപെടൽ

മലപ്പുറം: കുഴിമണ്ണ കിഴിശേരിയിൽ 2004 മുതൽ പ്രവർത്തിക്കുന്ന മേൽമുറി ബദൽ സ്കൂൾ എൽപി സ്കൂളായി നിലനിർത്തണമെന്നാണ് നാട്ടുകാർ ആവശ്യപ്പെടുന്നതെന്നും സ്കൂൾ അടച്ചുപൂട്ടാനുള്ള സർക്കാർ ഉത്തരവ് കോടതി സ്റ്റേ ചെയ്തിരിക്കുകയാണെന്നും കിഴിശേരി ജില്ലാ വിദ്യാഭ്യാസ ഓഫീസർ മനുഷ്യാവകാശ കമ്മീഷനെ അറിയിച്ചു. സ്കൂൾ അടച്ചുപൂട്ടരുതെന്ന് ആവശ്യപ്പെട്ട് രക്ഷിതാക്കൾ നൽകിയ പരാതിയിൽ കമ്മീഷൻ ജുഡീഷൽ അംഗം കെ. ബൈജുനാഥ് ആവശ്യപ്പെട്ട റിപ്പോർട്ടിലാണ് ഇക്കാര്യമുള്ളത്. നാല് കിലോമീറ്റർ പരിസരത്ത് മറ്റൊരു പൊതുവിദ്യാലയമില്ലെന്നും മേൽമുറി ബദൽ എൽപി സ്കൂളിൽ എല്ലാ അടിസ്ഥാന സൗകര്യങ്ങളും ലഭ്യമാണെന്നും പരാതിക്കാർ അറിയിച്ചു. സ്കൂൾ അടച്ചുപൂട്ടാനുള്ള സർക്കാർ ഉത്തരവിന്‍റെ അടിസ്ഥാനത്തിൽ നാല് അധ്യാപകരെ മറ്റ് സ്കൂളുകളിലേക്ക് മാറ്റി നിയമിച്ചതായി ജില്ലാ വിദ്യാഭ്യാസ ഓഫീസർ വ്യക്തമാക്കി. അടച്ചുപൂട്ടിലിനെതിരേ നാട്ടുകാർ കോടതിയെ സമീപിച്ച് സ്റ്റേ ഉത്തരവ് വാങ്ങി. 50 സെന്‍റിലുള്ള സ്കൂളിന് എംപി ഫണ്ടിൽ നിന്ന് 10 ലക്ഷവും എംഎൽഎ ഫണ്ടിൽ നിന്ന് 38 ലക്ഷവും ലഭിച്ചതിന്‍റെ അടിസ്ഥാനത്തിൽ നിർമിച്ച കോണ്‍ക്രീറ്റ് കെട്ടിടങ്ങളുണ്ട്. സർക്കാർ നൽകുന്ന ഉച്ചഭക്ഷണ പദ്ധതിയിൽ നിന്നാണ് കുട്ടികൾക്ക് ഭക്ഷണം നൽകുന്നത്. പിടിഎ നിയമിച്ച മൂന്ന് അധ്യാപകർക്ക് പിടിഎ തന്നെയാണ് വേതനം നൽകുന്നത്. പരാതി വിഷയം കോടതിയുടെ പരിഗണനയിലായതിനാൽ കേസ് തീർപ്പാക്കി. എംജിഎൽസി മേൽമുറി പിടിഎ പ്രസിഡന്‍റ് എം. ഫിറോസ് സമർപ്പിച്ച പരാതിയിലാണ് നടപടി.

കാറിൽ മദ്യവിൽപ്പന; മിഠായി കച്ചവടക്കാരൻ പിടിയിൽ

മഞ്ചേരി: മിഠായി കച്ചവടം നടത്താനുപയോഗിക്കുന്ന കാർ "ബാറാക്കിയ’ 47കാരൻ എക്സൈസ് സംഘത്തിന്‍റെ പിടിയിലായി. തിരൂരങ്ങാടി ഊരകം പള്ളിയാളി വീട്ടിൽ അസീസിനെയാണ് മഞ്ചേരി സ്റ്റേറ്റ് ബാങ്ക് പരിസരത്ത് വച്ച് അസിസ്റ്റന്‍റ് എക്സൈസ് ഇൻസ്പെക്ടർ എം.എൻ. രഞ്ജിത്ത് അറസ്റ്റു ചെയ്തത്. നാനോ കാർ ഉപയോഗിച്ച് ജില്ലയിലെ വിവിധ ഭാഗങ്ങളിൽ മിഠായി വിൽപ്പന നടത്തി വരികയായിരുന്നു അസീസ്. എന്നാൽ മിഠായിയേക്കാൾ ലാഭം മദ്യവിൽപ്പനക്കാണെന്ന് മനസിലാക്കിയ ഇയാൾ പോകുന്ന വഴികളിലെ ബീവറേജസ് ഔട്ട്‌ലെറ്റുകളിൽ നിന്ന് ഇന്ത്യൻ നിർമിത വിദേശ മദ്യം വാങ്ങുകയും ഇത് കൂടിയ വിലയ്ക്ക് ആവശ്യക്കാർക്ക് എത്തിച്ചു നൽകുകയുമായിരുന്നു. എക്സൈസ് വകുപ്പിന്‍റെ ഓണം സ്പെഷൽ ഡ്രൈവിന്‍റെ ഭാഗമായി നടത്തിയ പരിശോധനയിൽ നാനോ കാറിൽ സൂക്ഷിച്ച 20 കുപ്പി മദ്യം പിടികൂടുകയായിരുന്നു. മദ്യം കടത്താനുപയോഗിച്ച കാറും അന്വേഷണ സംഘം കസ്റ്റഡിയിലെടുത്തു. പ്രിവന്‍റീവ് ഓഫീസർ പി. സഫീർ അലി, സിവിൽ എക്സൈസ് ഓഫീസർമാരായ എം. ഷഹദ് ശരീഫ്, കെ. ജിതിലാജ്, സി.ടി. അക്ഷയ്, എം. ആതിര എന്നിവരുടെ നേതൃത്വത്തിലായിരുന്നു റെയ്ഡ്. തുടർന്നും മദ്യം ഉൾപ്പെടെയുള്ള ലഹരി വിപണനത്തിനെതിരേ ശക്തമായ നടപടികൾ ഉണ്ടാകുമെന്ന് മഞ്ചേരി എക്സൈസ് ഇൻസ്പെക്ടർ വി. നൗഷാദ് അറിയിച്ചു.

കവളപ്പാറ ദുരന്തം: അനുസ്മരണം നടത്തി

എടക്കര: കവളപ്പാറ ഉരുൾപൊട്ടൽ ദുരന്തത്തിൽ മണ്‍മറഞ്ഞവർക്ക് ആദരാഞ്ജലി അർപ്പിച്ച് അനുസ്മരണം സംഘടിപ്പിച്ചു. പോത്തുകൽ ഗ്രാമപഞ്ചായത്താണ് കവളപ്പാറ അനുസ്മരണം നടത്തിയത്. ഗ്രാമപഞ്ചായത്ത് ഹാളിൽ നടന്ന പരിപാടി പ്രസിഡന്‍റ് വിദ്യാരാജൻ ദുരന്ത സ്മാരകത്തിൽ പുഷ്പാർച്ചന നടത്തി ഉദ്ഘാടനം ചെയ്തു. ജില്ലാ പഞ്ചായത്ത് അംഗം അഡ്വ. ഷെറോണ റോയ്, പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ എം.എ. തോമസ്, ബ്ലോക്ക് അംഗങ്ങളായ സോമൻ പാർലി, മറിയാമ്മ, പോത്തുകൾ ഗ്രാമപഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ തങ്ക കൃഷ്ണൻ, വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സണ്‍ റുബീന കിണറ്റിങ്ങൽ, മെന്പർമാരായ മുസ്തഫ പാക്കട, മിനി വെട്ടിക്കുഴ, റംലത്ത്, ഷറഫുന്നിസ, ഓമന നാഗലോടി, മോൾസി പ്രസാദ്, ഹരിദാസൻ, നാസർ സ്രാന്പിക്കൽ, മറിയാമ്മ കുഞ്ഞുമോൻ, സിഡിഎസ് ചെയർപേഴ്സണ്‍ സിന്ധു അശോകൻ, വിവിധ രാഷ്ട്രീയ പാർട്ടി പ്രതിനിധികളായ രാജു തുരുത്തേൽ, കുട്ടപ്പൻ, ഉബൈദ് കാക്കീരി എന്നിവർ പ്രസംഗിച്ചു. ഹരിത കർമസേന അംഗങ്ങൾ, കുടുംബശ്രീ അംഗങ്ങൾ, നാട്ടുകാർ, പഞ്ചായത്ത് ജീവനക്കാർ എന്നിവർ ചടങ്ങിൽ പങ്കെടുത്തു. എടക്കര: ട്രോമ കെയർ പോത്തുകൽ സ്റ്റേഷൻ യൂണിറ്റ് കവളപ്പാറ ദുരന്തഭൂമിയിൽ മണ്‍മറഞ്ഞവർക്കായി അനുസ്മരണം സംഘടിപ്പിച്ചു. ലീഡർ മിൻഷിദ്, അംഗങ്ങളായ കമറുദ്ദിൻ, എൽദോസ്, കെ.എം. സുലൈമാൻ, ഇ.കെ. ഹംസ, ബാബു മാത്യു, ഷൈജു, നവാസ് ബാബു, ചന്ദ്രിക, എൻ.ടി. സുലൈമാൻ എന്നിവർ പ്രസംഗിച്ചു. ദുരന്തത്തിൽ മരിച്ച 59 പേരുടെ സ്മരണ പുതുക്കി വോളണ്ടിയർമാർ 59 മെഴുകുതിരികൾ കത്തിച്ച് പുഷ്പാർച്ചന നടത്തി.

മിൽമ ക്ഷീര സദനം : വീടുകളുടെ തറക്കല്ലിടലും നിർമാണോദ്ഘാടനവും നടത്തി

ചെമ്മലശേരി: സാന്പത്തികമായി പിന്നാക്കം നിൽക്കുന്നവരും വാസയോഗ്യമായ വീടില്ലാത്തവരുമായ ക്ഷീരകർഷകർക്ക് വീട് വയ്ക്കുന്നതിന് ആറ് ലക്ഷം രൂപ വീതം സാന്പത്തിക സഹായം നൽകുന്ന മിൽമ ക്ഷീരസദനം പദ്ധതിയിൽ മലപ്പുറം ജില്ലയിലെ ഗുണഭോക്താക്കളുടെ വീടിന്‍റെ തറക്കല്ലിടലും നിർമാണ പ്രവർത്തനങ്ങളുടെ ഉദ്ഘാടനവും മിൽമ ചെയർമാൻ കെ.എസ്. മണി നിർവഹിച്ചു. പുലാമന്തോൾ ഗ്രാമപഞ്ചായത്ത് പ്രസിഡന്‍റ് പി. സൗമ്യ അധ്യക്ഷത വഹിച്ചു. ചെമ്മലശേരി ക്ഷീര സംഘത്തിലെ ഗുണഭോക്താവായ സുബൈദയുടെ വീട് നിർമാണത്തിനുള്ള ആദ്യഘട്ട ധനസഹായ വിതരണം മിൽമ ഭരണസമിതി അംഗം സണ്ണി ജോസഫും ചീനിച്ചോട് സംഘത്തിലെ ശാന്തകുമാരിക്കുള്ള ധനസഹായ വിതരണം മിൽമ ഭരണസമിതിയംഗം മുഹമ്മദ് കോയ യൂസിയും നിർവഹിച്ചു. മിൽമ ഭരണസമിതിയംഗം ടി. സുഹൈൽ, മുഹമ്മദ് മുസ്തഫ, ഉമ്മു സൽമ്മ, വി.പി. മുഹമ്മദ് ഹനീഫ, എൻ.പി. റാബിയ, കെ. ഊർമിളകുമാരി, അഞ്ജന, ധന്യ, അശ്വതി വാസുക്കുട്ടൻ തുടങ്ങിയവർ പ്രസംഗിച്ചു.

മഴക്കാല സെവൻസിൽ കോസ്കോ അരിപ്ര ജേതാക്കൾ

മങ്കട: മങ്കട ഗവണ്‍മെന്‍റ് ഹൈസ്കൂൾ ഗ്രൗണ്ടിൽ മങ്കട ഇൻഡിപെൻഡന്‍റ് സോക്കർ ക്ലബ് സംഘടിപ്പിച്ച മഴക്കാല സെവൻസ് ഫുട്ബോളിൽ കോസ്കോ അരിപ്ര ജേതാക്കളായി. ഫൈനലിൽ പോത്ത്പൂട്ട് കൂട്ടായ്മ ചേരിയത്തെയാണ് പരാജയപ്പെടുത്തിയത്. സമാപന ചടങ്ങിൽ പഞ്ചായത്ത് പ്രസിഡന്‍റ് കെ.അസ്ഗർ അലി, മങ്കട സിഐ അശ്വിത് എസ്. കാരൻമയിൽ, വാർഡ് അംഗം കളത്തിൽ മുസ്തഫ, പി.ടി.ഗ്രൂപ്പ് ചെയർമാൻ പി.ടി. ഇർഷാദ്, ടൂർണമെന്‍റ് കമ്മിറ്റി ജനറൽ കണ്‍വീനർ ഷാജി ആലങ്ങാടൻ, സുരേന്ദ്രൻ മങ്കട, ക്ലബ് സെക്രട്ടറി യു.പി. നൗഷാദ്, എസ്ഐ ഷാജഹാൻ, ക്ലബ് പ്രവാസി കൂട്ടായ്മ ഭാരവാഹികളായ സജിത്ത് റഹ്മാൻ, സി.പി.നാസർ, അൽ ഹിലാൽ ക്ലബ് പരിശീലകൻ ജിഷാർ മോൻ, എം. സൈതാലി, പി. അഭിരാം എന്നിവർ പ്രസംഗിച്ചു. സമദ് മങ്കട, ബാബു ആലങ്ങാടൻ എന്നിവർ ട്രോഫികൾ വിതരണം ചെയ്തു. ടൂർണമെന്‍റിന്‍റെ ലാഭവിഹിതത്തിൽ നിന്ന് തിരൂർക്കാട് സ്വദേശിയായ യുവാവിനുളള സഹായധനം ചടങ്ങിൽ കൈമാറി. ടൂർണമെന്‍റ് ഒരുമാസം നീണ്ടു നിന്നു.

പെരിന്തൽമണ്ണ ജില്ലാ ആശുപത്രി ഒപി കെട്ടിടം ഉദ്ഘാടനം 12ന്

പെരിന്തൽമണ്ണ: പെരിന്തൽമണ്ണ ജില്ലാ ആശുപത്രിയിലെ പുതിയ ഒപി ബ്ലോക്ക് 12ന് രാവിലെ 10ന് മന്ത്രി വീണാ ജോർജ് ഉദ്ഘാടനം ചെയ്യും. നിലവിലെ ഒപി ബ്ലോക്കിനോട് ചേർന്നാണ് പുതിയ ബ്ലോക്ക് നിർമിച്ചിട്ടുള്ളത്. ആരോഗ്യവകുപ്പ് എൻഎച്ച്എം മുഖേന അനുവദിച്ച 1.26 കോടി രൂപ വകയിരുത്തിയാണ് കെട്ടിടം നിർമിച്ചിരിക്കുന്നത്. ചടങ്ങിൽ നജീബ് കാന്തപുരം എംഎൽഎ അധ്യക്ഷത വഹിക്കും. ഇ.ടി. മുഹമ്മദ് ബഷീർ എംപി മുഖ്യാതിഥിയായിരിക്കും. ജില്ലാപഞ്ചായത്ത് പ്രസിഡന്‍റ്എം.കെ. റഫീഖ, നഗരസഭ ചെയർമാൻ പി. ഷാജി, ബ്ലോക്ക് പ്രസിഡന്‍റ് അഡ്വ. എം.കെ. മുസ്തഫ, കളക്ടർ വി.ആർ. വിനോദ്, ആരോഗ്യവകുപ്പിലെ ഉന്നത ഉദ്യോഗസ്ഥർ തുടങ്ങിയവർ പങ്കെടുക്കും. പുതിയ ഒപി കെട്ടിടം രണ്ട് നിലകളിലായാണ് പണിതിട്ടുള്ളത്. താഴത്തെ നിലയിൽ ജനറൽ മെഡിസിൻ, ചെസ്റ്റ്, ഡെർമറ്റോളജി, ഓർത്തോ ഒപികളും പ്ലാസ്റ്റർ റൂമും സജ്ജീകരിച്ചിട്ടുണ്ട്. ജനറൽ സർജറി, ഡ്രസിംഗ് റൂം, ഇഎൻടി, പ്രൊസീജ്യർ റൂം, ഓങ്കോളജി തുടങ്ങിയവ മുകളിലെ നിലയിലുമാണ്. ആധുനിക സൗകര്യങ്ങളോടെ പുതിയ കെട്ടിടം വരുന്നതോടെ ഇപ്പോൾ മാതൃശിശു ബ്ലോക്കിൽ പ്രവർത്തിക്കുന്ന സ്ത്രീകളുടെയും കുട്ടികളുടെയും ഒപികൾ ഒഴിച്ച് എല്ലാ ഒപികളുടെയും സേവനം ഒറ്റ കെട്ടിടത്തിലേക്ക് മാറുന്നതിനാൽ പൊതുജനങ്ങൾക്ക് ഏറെ സൗകര്യമാകും. ഇ-ഹെൽത്ത് സംവിധാനം ഉടനെ ആശുപത്രിയിൽ നടപ്പാകുന്നതോടെ ഡോക്ടറെ കാണാനും രോഗനിർണയം കാര്യക്ഷമമായി നടപ്പാക്കാനും സാധിക്കുമെന്ന് ജില്ലാ പഞ്ചായത്ത് പ്രസിഡന്‍റ് എം.കെ. റഫീഖ പറഞ്ഞു.

നിലന്പൂർ ജില്ലാ ആശുപത്രി വികസനത്തിന് കോണ്‍ഗ്രസ് തടസം നിൽക്കുന്നുവെന്ന് ചെയർമാൻ

നിലന്പൂർ: നിലന്പൂർ ജില്ലാ ആശുപത്രി വികസനത്തിന് കോണ്‍ഗ്രസ് തടസം നിൽക്കുന്നുവെന്ന് നഗരസഭാ ചെയർമാൻ മാട്ടുമ്മൽ സലീം. നിലന്പൂരിലെ സാധാരണക്കാരുടെ ആശ്രയമായ ജില്ലാ ആശുപത്രി വികസനത്തിന് കൂടെ നിൽക്കേണ്ട കോണ്‍ഗ്രസ് അടിസ്ഥാന വികസനത്തിന് ആവശ്യമായ ഭൂമി ഏറ്റെടുക്കാനുള്ള നീക്കത്തെ അട്ടിമറിക്കാൻ ശ്രമിക്കുകയാണെന്ന് വാർത്താ സമ്മേളനത്തിൽ ചെയർമാൻ ആരോപിച്ചു. നിലന്പൂരിലെ കോണ്‍ഗ്രസ് നേതൃത്വം വികസന വിരോധികളാണെന്നും ചെയർമാൻ പറഞ്ഞു. നിലന്പൂർ ജില്ലാ ആശുപത്രി വികസനത്തിന് ആശുപത്രിയോട് ചേർന്നു കിടക്കുന്ന ഗവണ്‍മെന്‍റ് മോഡൽ യുപി സ്കൂളിന്‍റെ സ്ഥലം ഏറ്റെടുക്കാനും പ്രവൃത്തികളുമായി മുന്നോട്ട് പോകാനും സംസ്ഥാന സർക്കാരും നിലന്പൂർ നഗരസഭ ഭരണസമിതിയും ആത്മാർഥ ശ്രമം തുടരുന്പോഴാണ് ഇതിന് കോണ്‍ഗ്രസ് തടസം നിൽക്കുന്നത്. നഗരസഭ കൗണ്‍സിൽ യോഗത്തിൽ സ്കൂളിന്‍റെ സ്ഥലം ഏറ്റെടുക്കാൻ പാടില്ലെന്ന് കോണ്‍ഗ്രസ് കൗണ്‍സിലർമാർ പാലോളി മെഹബൂബിന്‍റെ നേതൃത്വത്തിൽ ആവശ്യപ്പെട്ടിരുന്നു. ഇതുമായി ബന്ധപ്പെട്ട് വിയോജനക്കുറിപ്പ് നൽകിയതുമാണ്. ഇപ്പോൾ ജില്ലാ ആശുപത്രിയിൽ എൽഡിഎഫ് ഗവണ്‍മെന്‍റ് എൻഎച്ച്എം പദ്ധതിയിൽ 89 ലക്ഷം രൂപ ചെലവഴിച്ച് പുതിയ ബ്ലോക്ക് നിർമിക്കുന്ന പ്രവൃത്തിയുടെ ഉദ്ഘാടന ചടങ്ങിൽ താൻ സംസാരിച്ചപ്പോൾ ബഹളം വച്ച് കോണ്‍ഗ്രസ് അംഗങ്ങൾ തങ്ങളുടെ വികസന വിരുദ്ധത പരസ്യമാക്കി. നിലന്പൂർ ജില്ലാ ആശുപത്രിയുടെ വികസനത്തിൽ വളരെക്കാലം എംഎൽഎയും മന്ത്രിയുമായിരുന്ന ആര്യാടൻ മുഹമ്മദോ പഞ്ചായത്ത് പ്രസിഡന്‍റും മുൻസിപ്പൽ ചെയർമാനുമായിരുന്ന ആര്യാടൻ ഷൗക്കത്തോ ഇടപെടൽ നടത്തിയിട്ടില്ല. ആശുപത്രിക്ക് ഒരു സിറിഞ്ച് പോലും വാങ്ങി കൊടുക്കാൻ കഴിഞ്ഞിട്ടുണ്ടോയെന്ന് നഗരസഭ ചെയർമാൻ ചോദിച്ചു. മുൻ എംഎൽഎ പി.വി. അൻവറും രാജ്യസഭാംഗം പി.വി. അബ്ദുൾ വഹാബ് എംപി എന്നിവരുടെ ഇടപെടലും കൂടാതെ ജില്ലാ പഞ്ചായത്ത് ഭരണസമിതിയുടെ കത്തിന്‍റെയും അടിസ്ഥാനത്തിലാണ് നിലന്പൂർ നഗരസഭ ഭരണസമിതി സ്കൂളിന്‍റെ സ്ഥലം വിട്ടുനൽകാൻ തിരുമാനിച്ചത്. ഇതേതുടർന്നാണ് സർക്കാർ സ്ഥലം ആശുപത്രി വികസന പ്രവൃത്തികളിലേക്ക് കടന്നതെന്ന് നഗരസഭാ ചെയർമാൻ ചൂണ്ടിക്കാട്ടി. ജില്ലാ ആശുപത്രി വികസനത്തെ അട്ടിമറിക്കാൻ അനുവദിക്കില്ലെന്നും അദ്ദേഹം പറഞ്ഞു. വാർത്താസമ്മേളനത്തിൽ വൈസ് ചെയർപേഴ്സണ്‍ അരുമ ജയകൃഷ്ണൻ, ആരോഗ്യ സ്റ്റാൻഡിംഗ് കമ്മിറ്റി ചെയർമാൻ കക്കാടൻ റഹീം എന്നിവരും പങ്കെടുത്തു.

ഓട്ടോയിൽ കഞ്ചാവ് കടത്തിയ യുവാവിന് രണ്ടുവർഷം കഠിന തടവ്

‌മഞ്ചേരി: ഓട്ടോറിക്ഷയിൽ കഞ്ചാവ് കടത്തിയതിന് എക്സൈസ് സംഘം അറസ്റ്റുചെയ്ത പ്രതിക്ക് മഞ്ചേരി എൻഡിപിഎസ് കോടതി രണ്ടുവർഷം കഠിന തടവും 20000 രൂപ പിഴയും ശിക്ഷ വിധിച്ചു. തിരൂർ വളവന്നൂർ കോട്ടയിൽ വീട്ടിൽ റഫീഖി(40)നെയാണ് ജഡ്ജ് ടി.ജി. വർഗീസ് ശിക്ഷിച്ചത്. 2018 മാർച്ച് 18ന് തിരുനാവായ പല്ലാർ വൈരങ്കോട് ജംഗ്ഷനു സമീപത്തുവച്ചാണ് പ്രതിയെ കുറ്റിപ്പുറം എക്സൈസ് ഇൻസ്പെക്ടർ രാജേഷ് ജോണും സംഘവും പിടികൂടിയത്. പ്രതി ഓടിച്ച ഓട്ടോറിക്ഷയിൽ നിന്ന് 2.1 കിലോ കഞ്ചാവ് കണ്ടെടുത്തിരുന്നു. പിഴയടക്കാത്ത പക്ഷം ആറുമാസത്തെ അധിക തടവ് അനുഭവിക്കണമെന്നും കോടതി വിധിച്ചു. പ്രോസിക്യൂഷനു വേണ്ടി സ്പെഷൽ പബ്ലിക് പ്രോസിക്യൂട്ടർ അഡ്വ. പി. സുരേഷ് ഹാജരായി. പ്രതിയെ തവനൂർ സെൻട്രൽ ജയിലിലേക്കയച്ചു.

റോഡ് നന്നാക്കാത്തതിൽ "മീൻ പിടിച്ച് ’ പ്രതിഷേധം

നിലന്പൂർ: റോഡുകൾ പൊട്ടിപൊളിഞ്ഞതിന് പരിഹാരം കാണാത്ത അധികൃതരുടെ നിലപാടിൽ പ്രതിഷേധിച്ച് റോഡിലെ കുഴിയിൽ നിറഞ്ഞ വെള്ളത്തിൽ ചൂണ്ടയിട്ട് "മീൻ പിടിച്ച്’ പ്രതിഷേധ സമരവുമായി നിലന്പൂർ വികസന സമിതി. നിലന്പൂർ നഗരസഭയുടെയും പൊതുമരാമത്ത് വകുപ്പിന്‍റെയുംഅധീനതയിലുള്ള നിലന്പൂരിലെ മിക്ക റോഡുകളും തകർന്ന സാഹചര്യത്തിലാണ് നിലന്പൂർ വികസന സമിതി സമരവുമായെത്തിയത്. നഗരസഭയിലെ ഒട്ടുമിക്ക റോഡുകളും പൊട്ടിപൊളിഞ്ഞ് കാൽനടയാത്ര ദുഷ്കരമാണ്. ഇതിൽ പ്രതിഷേധിച്ചാണ് വികസന സമിതി നിലന്പൂർ പൊതുമരാമത്ത് റോഡ്സ് കാര്യാലയത്തിന്‍റെ മുന്നിൽ പ്രതിഷേധിച്ചത്. നിലന്പൂർ പുതിയ ബസ് സ്റ്റാൻഡ് പരിസരംവരെ സമരം നീണ്ടു. മജീഷ്യൻ ആർ.കെ. മലയത്ത് ഉദ്ഘാടനം ചെയ്തു. അഹമ്മദ്കുട്ടി കാപ്പിൽ അധ്യക്ഷത വഹിച്ചു. റഹ്മത്തുള്ള മൈലാടി, സി.പി. ബോബി, വിനോദ് പി. മേനോൻ, സുരേഷ് മങ്ങാട്ടുതൊടിക, യു. നരേന്ദ്രൻ, കെ.ആർ.സി. നിലന്പൂർ, ജോഷ്വാ കോശി, നൗഷാദ് തടത്തിൽ, സുരാജ് നിലന്പൂർ എന്നിവർ പ്രസംഗിച്ചു.

വിദ്യാലയങ്ങൾക്ക് കാലാനുസൃതമായ മാറ്റമാണ് സർക്കാർ ലക്ഷ്യം: മന്ത്രി വി. അബ്ദുറഹ്മാൻ

താനൂർ: എല്ലാ വിദ്യാലയങ്ങൾക്കും കാലാനുസൃതമായ മാറ്റം വരുത്താനാണ് സർക്കാർ ലക്ഷ്യം വയ്ക്കുന്നതെന്ന് കായിക മന്ത്രി വി. അബ്ദുറഹ്മാൻ. താനൂർ ദേവധാർ യുപി വിഭാഗം കെട്ടിടത്തിന്‍റെ ഉദ്ഘാടനവും സ്കൂൾ പ്രവേശന കവാടം, ചുറ്റുമതിൽ എന്നിവയുടെ പ്രവൃത്തി ഉദ്ഘാടനവും നിർവഹിച്ച് സംസാരിക്കുകയായിരുന്നു അദ്ദേഹം. 2016 ൽ മാസ്റ്റർ പ്ലാൻ തയാറാക്കി ആരംഭിച്ച പ്രവൃത്തികളാണ് ദേവധാർ സ്കൂളിൽ നടക്കുന്നത്. ആദ്യം 21 കോടിയുടെ പ്ലാനാണ് തയാറാക്കിയത്. ഇപ്പോഴത് 24 കോടിയുടെ പദ്ധതിയായി മാറി. ഹൈസ്കൂൾ വിഭാഗത്തിനായി നാലര കോടി കൂടി അനുവദിച്ചതോടെ ഇത് 29.5 കോടി രൂപയുടെ മാസ്റ്റർ പ്ലാനായി മാറിക്കഴിഞ്ഞെന്ന് മന്ത്രി പറഞ്ഞു. കേരളത്തിലെ തന്നെ ഏറ്റവും കൂടുതൽ പണം ചെലവഴിച്ച് വികസനം നടത്തുന്ന വിദ്യാലയമാണിത്. പ്രവൃത്തികൾ പൂർത്തിയാകുന്നതോടെ അന്താരാഷ്ട്രതലത്തിൽ തന്നെ മികച്ച വിദ്യാലയമായി ദേവധാർ ഹയർ സെക്കൻഡറി സ്കൂൾ മാറും. ദേവധാർ ഫ്ളൈ ഓവറിന് അടുത്തായി കുട്ടികളുടെ കായിക പരിശീലനം ലക്ഷ്യമിട്ട് രണ്ടു ഗ്രൗണ്ടുകൾ നിർമിക്കാൻ ലക്ഷ്യമിട്ടിട്ടുണ്ട്. രണ്ടുകോടി രൂപ ചെലവിലാണ് ഇത് വിഭാവനം ചെയ്യുന്നത്. വിദ്യാഭ്യാസവകുപ്പിന്‍റെ പ്ലാൻ ഫണ്ടിൽ നിന്ന് രണ്ട് കോടി രൂപ ചെലവഴിച്ച് നിർമിച്ച യുപി ബ്ലോക്കിൽ എട്ടുക്ലാസ് റൂമുകളാണുള്ളത്. സ്കൂൾ കവാടത്തിനും ചുറ്റുമതിലിനുമായി 35ലക്ഷം രൂപയാണ് അനുവദിച്ചിട്ടുള്ളത്. ജില്ലയിലെ സർക്കാർ വിദ്യാലയങ്ങളിൽ ഏറ്റവും കൂടുതൽ കുട്ടികൾ പഠിക്കുന്ന വിദ്യാലയമാണ് ദേവധാർ ഗവണ്‍മെന്‍റ് ഹയർ സെക്കൻഡറി സ്കൂൾ. ഒന്നാം ഘട്ടം പൂർത്തിയായ ഹൈസ്കൂൾ വിഭാഗത്തിന് 4.5 കോടി രൂപ കൂടി അനുവദിച്ചിട്ടുണ്ട്. താനൂർ ഫിഷറീസ് സ്കൂളിൽ വാനനിരീക്ഷണ കേന്ദ്രം സ്ഥാപിക്കും. കടലിലൂടെ സഞ്ചരിക്കുന്ന യാനങ്ങൾ നിരീക്ഷിക്കാൻ ടെലസ്കോപ്പും ലോകത്തിലെ സുപ്രധാന മത്സ്യങ്ങളെ പരിചയപ്പെടുത്തി അക്വേറിയവും ഫിഷറീസ് സ്കൂളിൽ സ്ഥാപിക്കുമെന്നും മന്ത്രി പറഞ്ഞു. ആധുനിക ശാസ്ത്ര മേഖലകളിലുള്ള അറിവ് മാത്രമല്ല പരിസ്ഥിതിയെ തൊട്ടറിയാനും കൂടെ കുട്ടികളെ പ്രാപ്തരാക്കുകയാണ് ഇതുവഴി ലക്ഷ്യമാക്കുന്നതെന്ന് മന്ത്രി കൂട്ടിച്ചേർത്തു. ചടങ്ങിൽ താനൂർ ബ്ലോക്ക് പഞ്ചായത്ത് പ്രസിഡന്‍റ് സൈനബ ചേനാത്ത് അധ്യക്ഷത വഹിച്ചു. പരപ്പനങ്ങാടി എഇഒ ആയി പോകുന്ന സ്കൂൾ എച്ച്എം പി. ബിന്ദുവിനെ മന്ത്രി വി. അബ്ദുറഹ്മാൻ പൊന്നാടയണിച്ച് ആദരിക്കുകയും പിടിഎയുടെ ഉപഹാരം കൈമാറുകയും ചെയ്തു. താനാളൂർ ഗ്രാമപഞ്ചായത്ത് പ്രസിഡന്‍റ് കെ.എം. മല്ലിക, ജില്ലാ പഞ്ചായത്ത് മെന്പർ വി.കെ.എം. ഷാഫി, താനാളൂർ ഗ്രാമപഞ്ചായത്ത് മെന്പർ കെ.വി. ലൈജു, എസ്എംസി ചെയർമാൻ ടി.പി. റസാഖ്, മലപ്പുറം ഡിഡിഇ പി.വി. റഫീഖ്, തിരൂരങ്ങാടി ഡിഇഒ കെ.ശശികുമാർ, എസ്എസ്കെ കോ ഓർഡിനേറ്റർ സുരേഷ് കൊളശേരി തുടങ്ങിയവർ സംബന്ധിച്ചു.

‘നിലന്പൂർ ബൈപാസ് ഒന്നാംഘട്ട നിർമാണം ഉടൻ’

നിലന്പൂർ: നിലന്പൂർ ബൈപാസിന്‍റെ ഒന്നാംഘട്ട നിർമാണത്തിന് ഉടൻ സാങ്കേതികാനുമതി നൽകി ടെൻഡർ നടപടികൾ വേഗമാക്കാൻ പൊതുമരാമത്ത് മന്ത്രി പി.എ. മുഹമ്മദ് റിയാസിന്‍റെ ഉറപ്പ് ലഭിച്ചതായി ആര്യാടൻ ഷൗക്കത്ത് എംഎൽഎ. നിലന്പൂർ നിയോജക മണ്ഡലത്തിലെ പൊതുമരാമത്ത് പ്രവൃത്തികളുടെ തടസങ്ങൾ നീക്കി പ്രവൃത്തി വേഗമാക്കാൻ മന്ത്രിതല യോഗം വിളിക്കാമെന്നും മന്ത്രിയുമായി നടത്തിയ ചർച്ചയിൽ ഉറപ്പ് ലഭിച്ചതായി എംഎൽഎ പറഞ്ഞു. ഇന്നലെ സെക്രട്ടറിയേറ്റിൽ മന്ത്രിയുടെ ഓഫീസിൽ വച്ചായിരുന്നു കൂടിക്കാഴ്ച. കഴിഞ്ഞ ദിവസം നിലന്പൂരിൽ പൊതുമരാമത്ത് പ്രവൃത്തി അവലോകന യോഗത്തിന്‍റെ അടിസ്ഥാനത്തിൽ വിശദമായ നിവേദനവും എംഎൽഎ മന്ത്രിയ്ക്ക് കൈമാറി. നിലന്പൂർ ബൈപാസിന് 227 കോടി രൂപയുടെ ഭരണാനുമതിയാണ് ലഭിച്ചത്. ഇതിൽ ആദ്യഘട്ട പൂർത്തീകരണത്തിന് 35 കോടി രൂപയുടെ സാങ്കേതികാനുമതിയാണ് തേടിയത്. 30 വർഷം മുന്പ് ബൈപാസിന് ഭൂമി വിട്ടുനൽകിയവർക്ക് നഷ്ടപരിഹാരം നിശ്ചയിക്കുന്പോൾ കെട്ടിടങ്ങളുടെ കാലപ്പഴക്കം കണക്കാക്കി കുറവ് വരുത്തരുതെന്നും എംഎൽഎ മന്ത്രിയോട് ആവശ്യപ്പെട്ടു. 12 വർഷത്തെ പലിശയും നൽകണമെന്ന ആവശ്യവും ഉന്നയിച്ചു. എടക്കര ബൈപാസ് റോഡിന്‍റെ രണ്ടാംഘട്ട നിർമാണത്തിന് സാങ്കേതികാനുമതിക്കായുള്ള നടപടി വേഗമാക്കുമെന്ന ഉറപ്പും ലഭിച്ചിട്ടുണ്ട്. രണ്ടുകോടി രൂപയാണ് എടക്കര ബൈപാസ് രണ്ടാംഘട്ടത്തിന് അനുവദിച്ചിട്ടുള്ളത്. ചന്തക്കുന്നിൽ നിന്ന് വെളിയംതോട് വരെ സിഎൻജി റോഡ് ഉയർത്തി വെളിയംതോടിൽ വെള്ളക്കെട്ടില്ലാതെ അഞ്ച് കോടി രൂപ ചെലവിൽ നവീകരിക്കുന്ന പ്രവൃത്തിയും ഉടൻ ആരംഭിക്കാനുള്ള നടപടപടിയുണ്ടാകണമെന്നും ആവശ്യമുന്നയിച്ചു. പൊതുമരാമത്ത് വകുപ്പ് നിലന്പൂർ നഗരസഭയിൽ നിന്ന് ഏറ്റെടുത്ത തൃക്കൈക്കുത്ത് പാലം അപ്രോച്ച് റോഡ് 1.80 കോടി രൂപയുടെ എസ്റ്റിമേറ്റിന് ഭരണാനുമതി നൽകണമെന്ന ആവശ്യവും എംഎൽഎ ഉന്നയിച്ചു. മലയോര ഹൈവേ പൂക്കോട്ടുംപാടം- മുണ്ടേരി റോഡിന്‍റെ മൂന്നാംഘട്ടം കാറ്റാടിക്കടവ് മുതൽ ചാത്തമുണ്ട വരെ 12 മീറ്ററായി പുനഃസ്ഥാപിച്ച് നിർമിക്കുക, പുഞ്ചകൊല്ലി പാലത്തിന്‍റെ 8.40 കോടി രൂപയുടെ എസ്റ്റിമേറ്റിന് ഭരണാനുമതി, കവളപ്പൊയ്ക- ഇല്ലിക്കാട് പാലത്തിന്‍റെ 7.33 കോടി രൂപയുടെ എസ്റ്റിമേറ്റിന് ഭരണാനുമതി അടക്കമുള്ള 12 പ്രധാന ആവശ്യങ്ങൾ ഉന്നയിച്ചാണ് നിവേദനം നൽകിയത്. ഇക്കാര്യങ്ങൾ വിശദമായി ചർച്ച ചെയ്ത് തീരുമാനമെടുക്കാൻ മന്ത്രിതല യോഗം വിളിക്കാമെന്ന ഉറപ്പ് ലഭിച്ചതായും ആര്യാടൻ ഷൗക്കത്ത് എംഎൽഎ പറഞ്ഞു.

ബസ് കാത്തിരിപ്പ് കേന്ദ്രങ്ങൾ പുനഃസ്ഥാപിക്കണം: നിവേദനം നൽകി

മഞ്ചേരി: നെല്ലിപ്പറന്പ് - കൊയിലാണ്ടി റോഡിന്‍റെ നവീകരണവുമായി ബന്ധപ്പെട്ട് പൊളിച്ച് നീക്കിയ ബസ് കാത്തിരിപ്പു കേന്ദ്രങ്ങൾ പുനഃസ്ഥാപിക്കണമെന്നാവശ്യപ്പെട്ട് നാട്ടുകാർ പൊതുമരാമത്ത് മന്ത്രി, എംഎൽഎ, ജില്ലാ കളക്ടർ എന്നിവർക്ക് നിവേദനം നൽകി. റോഡ് നവീകരണത്തിന്‍റെ പേര് പറഞ്ഞ് മഞ്ചേരി നഗരസഭാ പരിധിയിൽ നെല്ലിപ്പറന്പ്, ചെട്ടിയങ്ങാടി, പുല്ലൂർ എന്നിവിടങ്ങളിൽ ഒന്നു വീതവും കിടങ്ങഴിയിൽ രണ്ടും ബസ് കാത്തിരിപ്പ് കേന്ദ്രങ്ങളാണ് പൊളിച്ചു നീക്കിയത്. പ്രദേശത്ത് പോക്കറ്റ് റോഡുകളിൽ നിന്ന് ഒലിച്ചു വരുന്ന വെള്ളം ഹൈവേയിലെ സുഗമമായ യാത്രക്ക് തടസം സൃഷ്ടിക്കുകയും അപകടങ്ങൾ കാരണമാകുന്നതും പതിവാണ്. ഇക്കാര്യത്തിലും സത്വര നടപടി വേണമെന്നും നിവേദനത്തിൽ ആവശ്യപ്പെട്ടു. സി.ടി. മുഹമ്മദലി, പി.കെ. സൈനുദ്ദീൻ, വി.പി. സിദ്ദീഖ്, പി.കെ. ശരീഫ് എന്നിവരുടെ നേതൃത്വത്തിലാണ് നിവേദനം നൽകിയത്.

ഓട്ടിസം ബാധിച്ച ആറ് വയസുകാരനു നേരെ പീഡനം; അധ്യാപികക്കെതിരേ വകുപ്പുതല നടപടിയുണ്ടാകും

പെരിന്തൽമണ്ണ: ഓട്ടിസം ബാധിച്ച ആറ് വയസുകാരനെ പീഡിപ്പിച്ച അധ്യാപികക്കെതിരേ നടപടി ആവശ്യപ്പെട്ട് മുഖ്യമന്ത്രിക്കു നൽകിയ പരാതിയുടെ അടിസ്ഥാനത്തിൽ മലപ്പുറം വിദ്യാഭ്യാസ ഡയറക്‌ടറുടെ കാര്യാലയം പെരിന്തൽമണ്ണ ഉപജില്ലാ വിദ്യാഭ്യാസ ഓഫീസർക്കും ഇരവിമംഗലം എഎംയുപി സ്‌കൂൾ മാനേജർക്കും ചട്ടപ്രകാരമുള്ള അന്വേഷണം നടത്തി ആവശ്യമായ നടപടി എടുക്കാൻ നിർദേശം നൽകി. സ്‌കൂളിലെ അധ്യാപികയും കുട്ടിയുടെ രണ്ടാനമ്മയുമായ നിലമ്പൂർ വടപുറം സ്വദേശിനി ഉമൈറക്കെതിരേ ജൂലൈ രണ്ടിനാണ് പെരിന്തൽമണ്ണ പോലീസ് കേസ് രജിസ്റ്റർ ചെയ്തത്. ഓട്ടിസം ബാധിച്ച ആറ് വയസുകാരനെ തീപൊള്ളലേൽപ്പിച്ചും അതിക്രൂരമായ ദേഹോപദ്രവങ്ങൾക്ക് വിധേയനാക്കിയും പട്ടിണിക്കിട്ടും മാനസികമായി പീഡിപ്പിച്ചുവെന്നുമാണ് ഉമൈറക്കേതിരേയുള്ള പരാതിയിൽ പറയുന്നത്.

വനംവകുപ്പ് അധികൃതർ വാക്കുപാലിച്ചില്ലെന്ന് പരാതി

കരുവാരകുണ്ട്: വന്യമൃഗങ്ങളെ പിടികൂടാൻ സ്ഥാപിച്ച കെണിയിലേക്ക് വാങ്ങിച്ചു നൽകിയ ഇരയെ തിരിച്ചു നൽകുകയോ പണം നൽകുകയോ ചെയ്യാത്ത വനംവകുപ്പധികൃതർ വാക്കുപാലിച്ചില്ലെന്ന് പരാതി.കരുവാരകുണ്ട് ഗ്രാമപഞ്ചായത്ത് പ്രസിഡന്‍റും അംഗങ്ങളുമാണ് പരാതിയുമായി രംഗത്തെത്തിയത്. കടുവയെ പിടികൂടുന്നതിനുവേണ്ടി വനംവകുപ്പ് സ്ഥാപിച്ച കെണിയിൽ ഇരയായി ആട്, പോത്ത് എന്നിവയെ വാങ്ങി നൽകണമെന്ന് ഗ്രാമപഞ്ചായത്തധികൃതരെ അറിയിച്ചിരുന്നു. തുടർന്ന് ഗ്രാമപഞ്ചായത്ത് മെമ്പർമാർ പിരിവെടുത്താണ് കാൽ ലക്ഷത്തോളം രൂപ ചെലവഴിച്ച് പോത്തിനെയും ആടിനെയും വാങ്ങിച്ചു നൽകിയത്. ഇരയെ കടുവ ഭക്ഷണമാക്കുകയാണെങ്കിൽ വില തിരികെ നൽകാം എന്നായിരുന്നു പറഞ്ഞിരുന്നത്. കടുവയോ, പുലിയോ ഇരയെ ഭക്ഷിച്ചില്ലെങ്കിൽ അവ തിരിച്ചു നൽകാമെന്നും അറിയിച്ചിരുന്നു. എന്നാൽ കഴിഞ്ഞദിവസം ഇവയെ ലേലം ചെയ്ത് വിൽപ്പന നടത്തിയതായാണ് പത്രമാധ്യമങ്ങൾ വഴി അറിഞ്ഞതെന്ന് ഗ്രാമപഞ്ചായത്ത് പ്രസിഡന്‍റ് പറഞ്ഞു. പ്രസ്തുത പണം ഏതു വഴിക്കാണ് ചെലവഴിച്ചതെന്നും അധികൃതർ വ്യക്തമാക്കണമെന്നും നാട്ടുകാർ ആവശ്യപ്പെട്ടു.

"ഞങ്ങളും കോളജിലേക്ക്' രണ്ടാം ബാച്ചിന് തുടക്കം

രാമപുരം: മഞ്ഞളാംകുഴി അലി എംഎൽഎയുടെ വനിത തുടർ വിദ്യാഭ്യാസ പദ്ധതി "ഞങ്ങളും കോളേജിലേക്ക്' രണ്ടാം ബാച്ചിന്‍റെ ഉദ്ഘാടനം ജെംസ് കോളജിൽ വച്ച് നടന്നു. ശ്രീനാരായണഗുരു ഓപ്പൺ യൂണിവേഴ്സിറ്റി വൈസ് ചാൻസലർ ഡോ. വി.പി. ജഗതി രാജ് ഉദ്ഘാടനം നിർവഹിച്ചു. കോളജ് പ്രിൻസിപ്പൽ ഡോ. നവീൻ മോഹൻ അധ്യക്ഷത വഹിച്ചു. എംഎൽഎയും ജെംസ് കോളജ് ചെയർമാനുമായ മഞ്ഞളാംകുഴി അലി, വൈസ് ചെയർമാൻ എം. വാസുദേവൻ, ഡയറക്ടർ പി.ടി. ഹംസ, വൈസ് പ്രിൻസിപ്പൽ ഡോ. അബ്ദുസമദ്, പ്രോഗ്രാം കോഓർഡിനേറ്റർ അബ്ദുല്ലത്തീഫ് അസ്ലം എന്നിവർ സംസാരിച്ചു. ശ്രീനാരായണഗുരു ഓപ്പൺ യൂണിവേഴ്സിറ്റിയുടെ കീഴിൽ ബിഎ ഇംഗ്ലീഷ്, സോഷ്യോളജി, ബികോം എന്നീ വിഷയങ്ങൾ പഠിക്കുന്നതിനായി ജെംസ് കോളജിന്‍റെ സഹകരണത്തോടെ വനിതകൾക്ക് അവസരം ഉണ്ടാകും. ശ്രീനാരായണഗുരു ഓപ്പൺ യൂണിവേഴ്സിറ്റിയുടെ ലേണർ സപ്പോർട്ട് സെന്‍റർ ജെംസ് കോളജിൽ അംഗീകരിക്കപ്പെട്ടതിനാൽ ഈ വർഷം മുതൽ അഡ്മിഷൻ എടുക്കുന്ന വനിതകൾക്ക് കോളജിൽ തന്നെ രജിസ്ട്രേഷൻ ചെയ്യാനും സാധിക്കുന്നതാണെന്ന് ഭാരവാഹികൾ അറിയിച്ചു.

ചിയ്യാനൂരില്‍ ചിറകുളത്തില്‍ മത്സ്യക്കുഞ്ഞുങ്ങള്‍ കൂട്ടത്തോടെ ചത്തുപൊങ്ങി

ചങ്ങരംകുളം: ചിയ്യാനൂരില്‍ ചിറകുളത്തില്‍ മത്സ്യക്കുഞ്ഞുങ്ങള്‍ കൂട്ടത്തോടെ ചത്തുപൊങ്ങി. കഴിഞ്ഞ ദിവസമാണ് സംഭവം. നിരവധിപേര്‍ നീന്തല്‍ പരിശീലനത്തിനും ഉല്ലാസത്തിനും എത്തിയിരുന്ന കുളത്തില്‍ കുറച്ച് നാളായി പായല്‍ വന്ന് നിറഞ്ഞിരുന്നു. അടുത്ത ദിവസങ്ങളിലായി കുളത്തിലെ ഒരു ഭാഗത്ത് പായല്‍ ചീഞ്ഞ നിലയിലും വെള്ളം മലിനമായ നിലയിലുമായെന്ന് നാട്ടുകാര്‍ പറയുന്നു. മത്സ്യങ്ങള്‍ ചത്തുപൊങ്ങി അസഹ്യമായ ദുര്‍ഗന്ധം കൂടി വന്നതോടെ കുളത്തില്‍ ഇറങ്ങാന്‍ കഴിയാത്ത അവസ്ഥയാണെന്ന് നാട്ടുകാര്‍ പറഞ്ഞു. നിരവധി കുടുംബങ്ങളാണ് വൈകുന്നേരങ്ങളില്‍ ചിറകുളത്തിന് സമീപത്തെ പാര്‍ക്കില്‍ സമയം ചെലവഴിക്കാനായി എത്തുന്നത്. കുളം വൃത്തിയാക്കി പാര്‍ക്കിലെത്തുന്നവര്‍ക്ക് കുളിക്കാനും നീന്തല്‍ പരിശീനത്തിനും സൗകര്യം ഒരുക്കണമെന്നാണ് നാട്ടുകാരുടെ ആവശ്യം.

നിലമ്പൂർ സബ് രജിസ്ട്രാർ ഓഫീസിൽ വിജിലൻസ് പരിശോധന; 4700 രൂപ പിടിച്ചെടുത്തു

നിലന്പൂർ: സംസ്ഥാനത്തെ രജിസ്ട്രാർ ഓഫീസുകളിൽ വിജിലൻസ് നടത്തുന്ന ഓപറേഷൻ സെക്യുർലാൻഡിന്‍റെ ഭാഗമായി മലപ്പുറം വിജിലൻസ് സിഐ ജ്യോതിന്ദ്രകുമാറിന്‍റെ നേതൃത്വത്തിൽ നിലമ്പൂർ സബ് രജിസ്ട്രാർ ഓഫീസിൽ പരിശോധന നടത്തി. രജിസ്ട്രാർ ഓഫീസിലെ ഫയൽ റൂമിൽ സൂക്ഷിച്ച ആധാരങ്ങളുടെ പകർപ്പിൽ നിന്നാണ് പണം കണ്ടെത്തിയത്. ഒരു ആധാരത്തിന്‍റെ കോപ്പിയിൽ നിന്ന് 3000 രൂപയും മറ്റൊരുആധാരത്തിന്‍റെ കോപ്പിയിൽ നിന്ന് 1500 രൂപയും മറ്റൊന്നിൽ നിന്ന് 200 രൂപയുമാണ് കണ്ടെത്തിയത്. പണം അനധികൃതമായി വാങ്ങിയത് ഏത് ഉദ്യോഗസ്ഥനാണെന്ന് കണ്ടെത്താനായിട്ടില്ല. അതിനാൽ അനധികൃതമായ പണം കണ്ടെത്തിയതിന് സബ് രജിസ്ട്രാർ ഓഫീസിലെ മുഴുവൻ ജീവനക്കാർക്കെതിരേയും കുറ്റം ചുമത്തുമെന്ന് വിജിലൻസ് സിഐ ജ്യോതിന്ദ്രകുമാർ പറഞ്ഞു. ജീവനക്കാരുടെ മൊബൈലിൽ പണം ആവശ്യപ്പെടുന ശബ്ദ സന്ദേശവും വിജിലൻസ് കണ്ടെത്തി. ജീവനക്കാരുടെ വാഹനങ്ങളിലും വിജിലൻസ് പരിശോധന നടത്തി. നിലമ്പൂർ സഹകരണ വകുപ്പ് ഓഡിറ്റർ പ്രജീഷിന്‍റെ സാന്നിധ്യത്തിലാണ് വിജിലൻസ് പരിശോധന നടത്തിയത്. എഎസ്ഐ ഷൈജുമോൻ, എസ്‌സിപിഒ ധനേഷ്, സിപിഒ അഭിജിത് ദാമോദർ എന്നിവരും പരിശോധനയിൽ പങ്കെടുത്തു.

കര കവിഞ്ഞൊഴുകി പുഴ : അമ്പലക്കടവിൽ നിരവധി കുടുംബങ്ങൾ മണ്ണിടിച്ചിൽ ഭീതിയിൽ

കാളികാവ്: കഴിഞ്ഞ ദിവസങ്ങളിലുണ്ടായ ശക്തമായ മഴയിൽ പുഴ കരകവിഞ്ഞൊഴുകിയതോടെ അമ്പലക്കടവിൽ നിരവധി കുടുംബങ്ങൾ മണ്ണിടിച്ചിൽ ഭീതിയിലായി. സംരക്ഷണഭിത്തികെട്ടി വീടുകൾ സുരക്ഷിതമാക്കണമെന്നാണ് പ്രദേശവാസികളുടെ ആവശ്യം. പറമ്പാടൻ ജബ്ബാർ, കീരി മുസ്തഫ, പോക്കാവിൽ സാജിത, പട്ടിക്കാടൻ ഹംസ, വെള്ളമുണ്ട അസീസ്, എന്നിവരുടെ വീടുകളാണ് അപകട ഭീഷണിയിലായി നിൽക്കുന്നത്. പുഴ കരകവിഞ്ഞൊഴുകിയതോടെ ഇവരുടെ വീടുകളുടെ മുറ്റംവരെ മലവെള്ളമെത്തി. പുഴയുടെ വശം വലിയ തോതിൽ ഇടിഞ്ഞിട്ടുമുണ്ട്. വീടിന്‍റെ തറയുടെ മുകളിൽ വരെ വെള്ളം എത്തിയതോടെ വീടുകൾ ഇടിഞ്ഞുവീഴുമെന്ന അവസ്ഥയിലാണ്. മഴക്കാലമായാൽ രാത്രി സ്വസ്ഥമായി ഉറങ്ങാൻ കഴിയാതെ ഭീതിയിലാണ് ഇവിടത്തെ കുടുംബങ്ങൾ കഴിയുന്നത്.

സാക്ഷി മോഹൻ പെരിന്തൽമണ്ണ സബ്കളക്ടർ

മലപ്പുറം: പെരിന്തൽമണ്ണ സബ് കളക്ടറായി 2023 ബാച്ച് ഐഎഎസ് ഉദ്യോഗസ്ഥയായ സാക്ഷി മോഹൻ ചുമതലയേറ്റു. ഉത്തർപ്രദേശിലെ ലക്നൗ സ്വദേശിയാണ്. പെരിന്തൽമണ്ണ സബ് കളക്ടറായിരുന്ന അപൂർവ ത്രിപാഠി എൽഎസ്ജിഡി-ലൈഫ് മിഷന്‍റെ സിഇഒ ആയി സ്ഥലംമാറ്റം ലഭിച്ച ഒഴിവിലാണ് നിയമനം. അമൃത് മിഷൻ ഡയറക്ടറുടെ പൂർണ അധിക ചുമതല കൂടി ത്രിപാഠിക്ക് ലഭിച്ചിട്ടുണ്ട്.

നിലമ്പൂർ നഗരസഭയിൽ ജോബ് സ്റ്റേഷൻ പ്രവർത്തനം തുടങ്ങി

നിലമ്പൂര്‍: നഗരസഭയില്‍ ജോബ് സ്‌റ്റേഷന്‍ പ്രവര്‍ത്തനം തുടങ്ങി. ഇന്ന് രാവിലെ നഗരസഭാ ഹാളില്‍ ചേര്‍ന്ന പരിപാടിയില്‍ വിജ്ഞാന കേരളം സംസ്ഥാന കണ്‍സള്‍ട്ടന്‍റ് ഡോ. പി. സരിന്‍ ജോബ് സറ്റേഷന്‍റെ ഉദ്ഘാടനം നിര്‍വഹിച്ചു. സംസ്ഥാനത്തെ തൊഴില്‍ രീതികളില്‍ കാലാനുസൃതമായ മാറ്റങ്ങള്‍ വന്നുവെന്നും അതിന്‍റെ ഭാഗമായി സംസ്ഥാനത്ത് 250 ജോബ് സ്‌റ്റേഷനുകള്‍ നിലവില്‍ സ്ഥാപിച്ചുവെന്നും സരിന്‍ പറഞ്ഞു. ചടങ്ങില്‍ നഗരസഭാ ഉപാധ്യക്ഷ അരുമ ജയകൃഷ്ണന്‍ അധ്യക്ഷത വഹിച്ചു. സ്ഥിരംസമിതി അധ്യക്ഷരായ കക്കാടന്‍ റഹീം, പി.എം. ബഷീര്‍, യു.കെ. ബിന്ദു, സൈജിമോള്‍, നഗരസഭാംഗങ്ങളായ പി. ഗോപാലകൃഷ്ണന്‍, അഷ്‌റഫ് മങ്ങാട്, ഡിഎംസി സൗഫല്‍, സിഡിഎസ് അധ്യക്ഷ വസന്ത എന്നിവര്‍ സംസാരിച്ചു. രണ്ടായിരത്തോളം പേര്‍ ഇതിനകം നഗരസഭയുടെ ജോബ് സറ്റേഷനില്‍ ജോലിക്കായി രജിസ്റ്റര്‍ ചെയ്തിട്ടുണ്ട്.

അന്യരുടെ ഭൂമി പാട്ടത്തിനു നൽകി തട്ടിപ്പ്: പ്രതികൾ അറസ്റ്റിൽ

കാളികാവ്: തന്‍റേതല്ലാത്ത സ്ഥലം സ്വന്തം സ്ഥലമെന്ന് വിശ്വാസിപ്പിച്ച് പാട്ടത്തിന് നൽകി പണം തട്ടിയ പ്രതികൾ കാളികാവ് പോലീസിന്‍റെ പിടിയിൽ. പൂങ്ങോട് സ്വദേശിക്ക് മമ്പാട് പുള്ളിപ്പാടത്തുള്ള അഞ്ചേക്കർ കമുകിൻ തോട്ടം കാണിച്ച് തന്‍റേതാണെന്ന് പറഞ്ഞ് വിശ്വാസിപ്പിച്ച് രണ്ടുലക്ഷം രൂപ തട്ടിയ കേസിലെ പ്രതികളെ കാളികാവ് പോലീസ് ഇൻസ്പെക്ടർ വി. അനിഷാണ് അറസ്റ്റ് ചെയ്തത്. കബളിപ്പിക്കപ്പെട്ട പൂങ്ങോട് സ്വദേശിയുടെ പരാതിയുടെ അടിസ്ഥാനത്തിലാണ് കാളികാവ് പോലീസ് കേസെടുത്ത് അന്വേഷണം ആരംഭിച്ചത്. ഒളിവിൽ പോയ ഒന്നാം പ്രതി വണ്ടൂർ കരുമാരോട്ട് മുഹമ്മദ് അഷ്റഫി(55)നെ ഐക്കരപ്പടിയിലുള്ള വാടക വീട്ടിൽ നിന്നും രണ്ടാം പ്രതി പത്തപ്പിരിയം ചെറുകാട് മുനവർ ഫൈറൂസിനെ സ്വന്തം വീട്ടിൽ നിന്നുമാണ് അറസ്റ്റ് ചെയ്തത്. ഒന്നാം പ്രതി നിരവധി സ്ഥലങ്ങളിൽ റബർ തോട്ടങ്ങൾ കാണിച്ചും തെങ്ങിൻ തോപ്പുകൾ കാണിച്ചും മുമ്പും ഇത്തരം തട്ടിപ്പുകൾ നടത്തിയിട്ടുണ്ട്. തട്ടിപ്പ് നടത്തിയ ശേഷം ആർഭാട ജീവിതം നയിക്കുകയും മറ്റു സ്ഥലങ്ങളിൽ വാടകക്ക് താമസിക്കുകയുമായിരുന്നു രീതി. പ്രതികളെ മഞ്ചേരി കോടതിയിൽ ഹാജറാക്കി റിമാൻഡ് ചെയ്തു.

ഐസിഎആറും ജെംസ് കോളജും ധാരണാപത്രം ഒപ്പുവച്ചു

രാമപുരം: ഇന്ത്യൻ ഇൻസ്റ്റിറ്റ്യൂട്ട് ഓഫ് സ്പൈസസ് റിസർച്ച് ഐസിഎആറും (കോഴിക്കോട്) ജെംസ് ആർട്സ് ആൻഡ് സയൻസ് കോളജും (രാമപുരം- മലപ്പുറം) തമ്മിൽ ഗവേഷണ-അക്കാദമിക് സഹകരണത്തിനായി ധാരണാപത്രം ഒപ്പുവച്ചു. കോഴിക്കോട്ടുവച്ച് നടന്ന ചടങ്ങിലാണ് ഇരു സ്ഥാപനങ്ങളും ധാരണാപത്രത്തിൽ ഒപ്പുവെച്ചത്. വിദ്യാർഥികൾക്ക് മിനി പ്രോജക്ടുകൾ, ഹ്രസ്വകാല പരിശീലന പരിപാടികൾ, സംയുക്ത ഗവേഷണ പ്രവർത്തനങ്ങൾ എന്നിവ നടത്താൻ ഈ സഹകരണം ലക്ഷ്യമിടുന്നു. ഇതുകൂടാതെ, ഇരു സ്ഥാപനങ്ങളും സംയുക്തമായി കോഴ്സുകൾ, സെമിനാറുകൾ, കോൺഫറൻസുകൾ എന്നിവ സംഘടിപ്പിക്കുകയും അക്കാദമിക് പ്രസിദ്ധീകരണങ്ങൾ പുറത്തിറക്കുകയും ചെയ്യും. അഞ്ച് വർഷത്തേക്കാണ് ഈ ധാരണാപത്രത്തിന് കാലാവധിയുള്ളത്. ഐസിഎആർ ഡയറക്ടർ ഡോ. ആർ. ദിനേഷ്, പ്രിൻസിപ്പൽ സയന്‍റിസ്റ്റുകളായ ഡോ. ടി. ഇ. ഷീജ, ഡോ. ഈശ്വര ഭട്ട്, ശാസ്ത്രജ്ഞ ഡോ. ആർ. ശിവരഞ്ജനി എന്നിവർ ചടങ്ങിൽ പങ്കെടുത്തു. ജെംസ് കോളേജിനെ പ്രതിനിധീകരിച്ച് വൈസ് ചെയർമാൻ എം. വാസുദേവൻ, അക്കാദമിക് ആൻഡ് റിസർച്ച് ഡയറക്ടർ ഡോ. ബാലഗോപാലൻ ഉണ്ണി, പ്രിൻസിപ്പൽ ഡോ. നവീൻ മോഹൻ എന്നിവരും സന്നിഹിതരായിരുന്നു.

രണ്ട് ലക്ഷം രൂപയുടെ പുകയില ഉത്പന്നങ്ങള്‍ പിടികൂടി

മഞ്ചേരി: എക്‌സൈസ് വകുപ്പിന്‍റെ ഓണം സ്‌പെഷല്‍ ഡ്രൈവിന്‍റെ ഭാഗമായി നടത്തിയ റെയ്ഡില്‍ രണ്ടു ലക്ഷത്തോളം രൂപ വില വരുന്ന നിരോധിത പുകയില ഉത്പന്നങ്ങള്‍ പിടികൂടി. മഞ്ചേരി എക്‌സൈസ് ഇന്‍സ്‌പെക്ടര്‍ വി. നൗഷാദിന് ലഭിച്ച വിവരത്തിന്‍റെ അടിസ്ഥാനത്തില്‍ അരീക്കോട് പോലീസിന്‍റെ സഹായത്തോടെ കാവനൂരില്‍ നടത്തിയ പരിശോധനയിലാണ് പുകയില ഉത്പന്നങ്ങള്‍ കണ്ടെത്തിയത്. കാവനൂര്‍ എകെസി ഇല്ലിക്കല്‍ സൈനബയുടെ വീടിനു പിറകുവശത്തുള്ള ഷെഡില്‍ നിന്നാണ് ഇവ കണ്ടെടുത്തത്. സംഭവവുമായി ബന്ധപ്പെട്ട് സൈനബയുടെ മകന്‍ ഷമീറി (24)നെ അറസ്റ്റ് ചെയ്തു. വിവിധ കടകളിലേക്ക് ഓര്‍ഡര്‍ അനുസരിച്ച് നിരോധിത പുകയില ഉത്പന്നങ്ങള്‍ എത്തിച്ചു നല്‍കുന്ന ഷമീറിന്‍റെ പേരില്‍ സമാനമായ കേസ് നിലവിലുണ്ടെന്ന് എക്‌സൈസ് അധികൃതര്‍ പറഞ്ഞു. ഇയാളില്‍ നിന്നും നിരോധിത പുകയില ഉത്പന്നങ്ങള്‍ വാങ്ങി വില്‍പ്പന നടത്തുന്ന കടകളും എക്‌സൈസിന്‍റെയും പോലീസിന്‍റെയും നിരീക്ഷണത്തിലാണ്. നിരോധിത പുകയില ഉത്പന്നങ്ങളും ലഹരി വസ്തുക്കളും വില്പന നടത്തുന്ന ആളുകളെ കര്‍ശനമായി നിരീക്ഷിച്ചു വരികയാണെന്ന് മഞ്ചേരി എക്‌സൈസ് ഇന്‍സ്‌പെക്ടര്‍ വി. നൗഷാദ് അറിയിച്ചു. എക്‌സൈസ് പ്രിവന്‍റീവ് ഓഫീസര്‍ കെ.പി. സാജിദ്, വനിത സിവില്‍ എക്‌സൈസ് ഓഫീസര്‍ എന്‍.കെ. സനീറ, സിവില്‍ എക്‌സൈസ് ഓഫീസര്‍ ഡ്രൈവര്‍ എം. ഉണ്ണികൃഷ്ണന്‍, അരീക്കോട് പോലീസ് സ്റ്റേഷനിലെ സീനിയര്‍ സിവില്‍ പോലീസ് ഓഫീസര്‍ എം. ലിജേഷ്, സിവില്‍ പോലീസ് ഓഫീസര്‍ മനു പ്രസാദ് തുടങ്ങിയവര്‍ ഉള്‍പ്പെടുന്ന സംഘമാണ് റെയ്ഡിന് നേതൃത്വം നല്‍കിയത്.

കടന്നമണ്ണ ബാങ്ക് 13 അംഗങ്ങൾക്ക് 11.77 ലക്ഷം രൂപ റിസ്ക് ഫണ്ട് ലഭ്യമാക്കി

മങ്കട: കടന്നമണ്ണ സർവീസ് സഹകരണ ബാങ്കിൽനിന്നും വായ്പയെടുത്ത് മരണപ്പെട്ടവരുടെ കുടുംബാംഗങ്ങൾക്കും മാരക രോഗം പിടിപെട്ട അംഗങ്ങൾക്കും 2024-25 സാമ്പത്തിക വർഷത്തിൽ 11.77 ലക്ഷം രൂപ റിസ്ക് ഫണ്ട് ധനസഹായം ലഭ്യമാക്കി. 13 അംഗങ്ങൾക്കാണ് ധനസഹായം ലഭ്യമാക്കിയത്. വായ്പ എടുക്കുന്ന സമയത്ത് അംഗങ്ങൾ അടവാക്കുന്ന റിസ്ക് ഫണ്ട് ഇൻഷ്വറൻസ് പദ്ധതിയിലാണ് കേരള സഹകരണ വികസന ക്ഷേമ നിധി ബോർഡ് വഴി തുക ലഭ്യമാക്കിയത്. കൂടാതെ മാരക രോഗം ബാധിച്ച നാല് പേർക്ക് 70000 രൂപ മെമ്പേഴ്സ് റിലീഫ് ഫണ്ട് ബോർഡ് വഴിയും ലഭ്യമാക്കിയിട്ടുണ്ട്. യോഗത്തിൽ പി. അബ്ദുസമദ് അധ്യക്ഷത വഹിച്ചു. സെക്രട്ടറി സൈഫുള്ള കറുമുക്കിൽ, ഭരണ സമിതി അംഗങ്ങളായ കെ. ഷംസുദ്ദീൻ, പി.കുഞ്ഞി മുഹമ്മദ്, ഷരീഫ് ചുണ്ടയിൽ, ഇ.സി. സേവ്യർ, കെ.പി. വാസു, പി. ഫിറോസ്, ടി. സഫീന, പി.സൈഫുന്നീസ, കെ. റഷീദ എന്നിവർ സംസാരിച്ചു.

ശാപമോക്ഷം കാത്ത് അങ്ങാടിപ്പുറം എഫ്സിഐ റോഡ്

അങ്ങാടിപ്പുറം: അങ്ങാടിപ്പുറം റെയിൽവേ സ്റ്റേഷനിൽ വന്നിറങ്ങുന്ന യാത്രക്കാർ ഏറെയും കടന്നുപോകുന്ന എഫ്സിഐ റോഡ് എന്നറിയപ്പെടുന്ന ഗുഡ്സ് ഷെഡ് റോഡിന് ഇന്നും ശാപമോക്ഷമായില്ല. കാലങ്ങളോളമായി കുണ്ടും കുഴിയുമായി കിടക്കുന്ന ഈ റോഡ് ആധുനിക രീതിയിൽ നവീകരിക്കും എന്ന് റെയിൽവേ പറയുന്നുണ്ട്. അതിനു മുന്നോടിയായി റോഡിന്‍റെ ഒരു ഭാഗത്തുണ്ടായിരുന്ന വലിയ മരങ്ങൾ എല്ലാം മുറിച്ച് മാറ്റുകയും ചെയ്തിരുന്നു. ഇത് ഒഴിച്ചാൽ മറ്റു പ്രവൃത്തികൾ ഒന്നും ഇതുവരെ നടത്തിയതായി കാണുന്നില്ല. വളരെ പ്രയാസപ്പെട്ടാണ് ഇതിലൂടെ ട്രെയിൻ ഇറങ്ങി വരുന്ന യാത്രക്കാർ ദേശീയപാതയിലേക്ക് എത്തിക്കൊണ്ടിരിക്കുന്നത്. റോഡിന്‍റെ ഇരുഭാഗങ്ങളിലും എഫ്സിഐയിലേക്ക് വരുന്ന ലോറികൾ വരിവരിയായി നിർത്തിയിടുന്നുണ്ട്. ഇതിനിടയിലൂടെയാണ് യാത്രക്കാർ സഞ്ചരിക്കുന്നത്. രാത്രികാല ട്രെയിനിലെ യാത്രക്കാർ ഇരുട്ടിൽ തപ്പിയാണ് റോഡിൽ എത്തുന്നത്. ഇതിനൊരു പരിഹാരം അധികൃതരുടെ ഭാഗത്തുനിന്ന് അടിയന്തരമായി ഉണ്ടാകുമെന്ന പ്രതീക്ഷയിലാണ് യാത്രക്കാർ.

ഓരാടംപാലം-മാനത്തുമംഗലം ബൈപാസ്: മുഖ്യമന്ത്രിക്ക് നിവേദനം നൽകി

മങ്കട: അങ്ങാടിപ്പുറത്തെ ഗതാഗതകുരുക്കിന് പരിഹാരം കാണാൻ ‌ഓരാടംപാലം-മാനത്തുമംഗലം ബൈപാസ് നിർമാണം ഉടൻ ആരംഭിക്കണമെന്ന് ആവശ്യപ്പെട്ട് സിപിഎം നേതാക്കൾ മുഖ്യമന്ത്രിക്ക് നിവേദനം നൽകി. പദ്ധതിക്ക് ആവശ്യമായ സ്ഥലം ഏറ്റെടുക്കൽ ത്വരിതപ്പെടുത്തണമെന്നും നേതാക്കൾ ആവശ്യപ്പെട്ടു. സിപിഎം ജില്ലാ സെക്രട്ടേറിയറ്റ് അംഗം വി. രമേശൻ, മങ്കട ഏരിയ കമ്മിറ്റി അംഗങ്ങളായ അഡ്വ. ടി.കെ. റഷീദലി, കെ.ടി. നാരായണൻ എന്നിവരാണ് നിവേദക സംഘത്തിൽ ഉണ്ടായിരുന്നത്.

‘നിലന്പൂർ ജില്ലാ ആശുപത്രി വികസനത്തിന് സ്ഥലം അനിവാര്യം’

നിലന്പൂർ: നിലന്പൂർ ജില്ലാ ആശുപത്രിയുടെ വികസനവുമായി ബന്ധപ്പെട്ട് ആര്യാടൻ ഷൗക്കത്ത് എംഎൽഎയുടെ അധ്യക്ഷതയിൽ അവലോകന യോഗം ചേർന്നു. ആശുപത്രിയുടെ അടിസ്ഥാന സൗകര്യങ്ങൾ, പരിമിതി, അടിയന്തരമായി നടപ്പാക്കേണ്ട കാര്യങ്ങൾ ഉൾപ്പെടെ ചർച്ച ചെയ്യാനാണ് എച്ച്എംസി അംഗങ്ങൾ പങ്കെടുത്ത യോഗം ചേർന്നത്. നിലവിലെ സാഹചര്യങ്ങൾ എംഎൽഎ ചോദിച്ചറിഞ്ഞു. ജില്ലാ മെഡിക്കൽ ഓഫീസർ, ആശുപത്രി സൂപ്രണ്ട്, ജില്ലാ പഞ്ചായത്ത് പ്രസിഡന്‍റ്, എൻഎച്ച്എം ജില്ലാ പ്രോഗ്രാം മാനേജർ ഉൾപ്പെടെ പങ്കെടുത്തു. നിലന്പൂർ ജില്ലാ ആശുപത്രിയുടെ പ്രശ്നങ്ങൾക്ക് ശാശ്വത പരിഹാരം കാണണമെങ്കിൽ അടിസ്ഥാന വികസനം യാഥാർഥ്യമാക്കാനുള്ള സ്ഥലം അനിവാര്യമാണെന്ന ആവശ്യമാണ് യോഗത്തിൽ ഉയർന്നത്. നിലന്പൂർ ഗവണ്‍മെന്‍റ് യുപി സ്കൂളിന്‍റെ 99 സെന്‍റ് സ്ഥലം ആശുപത്രി വികസനത്തിന് വിട്ടുകൊടുത്തതിന്‍റെ തുടർനടപടികൾ സംബന്ധിച്ച് എംഎൽഎ ആരോഗ്യമന്ത്രിയുമായി ചർച്ച നടത്തും. പിന്നീട് സർവകക്ഷി പ്രതിനിധികൾ ഉൾപ്പെടെ പങ്കെടുക്കുന്ന യോഗവും നടക്കും. നിലവിൽ കിഫ്ബിയുടെ 9.38 കോടി അടക്കം ആശുപത്രിയുടെ അടിസ്ഥാന വികസനത്തിനായി ലഭിച്ചിട്ടുണ്ട്. സ്ഥല പരിമിതിമൂലം പല ഫണ്ടുകളും നഷ്ടപ്പെടുന്ന സാഹചര്യമാണുള്ളത്. അതിനാൽ സ്ഥല പ്രശ്നത്തിന് പരിഹാരം വേണമെന്ന പൊതുഅഭിപ്രായമാണ് ഉയർന്നതെങ്കിലും ആശുപത്രിയോട് ചേർന്ന് കിടക്കുന്ന ഗവണ്‍മെന്‍റ് മോഡൽ യുപി സ്കൂളിന്‍റെ സ്ഥലം ഏറ്റെടുക്കുന്നതിനോട് യോജിപ്പില്ല. അതിനാൽ പകരം സ്ഥലം കണ്ടെത്തുന്ന കാര്യവും ചർച്ചയായെങ്കിലും നിലവിൽ എച്ച്എംഎസ് എടുത്ത തീരുമാനവുമായി മുന്നോട്ട് പോകാൻ തീരുമാനിച്ചു. സ്കൂൾ സ്ഥലം ഏറ്റെടുക്കുന്നത് വിദ്യാർഥികളുടെ പഠനത്തിന് ഉണ്ടാകുന്ന തടസങ്ങളും ചില അംഗങ്ങൾ ചൂണ്ടിക്കാട്ടി. ഒപി കൗണ്ടറുകൾക്ക് മുന്നിലെ ക്യൂ ഒഴിവാക്കാൻ നിലവിൽ ജൻ ഔഷധി കേന്ദ്രം കൂടി വിട്ടു കിട്ടണമെന്നും എന്നാൽ രണ്ട് കൗണ്ടറുകൾ കൂടി തുറക്കാൻ കഴിയുമെന്ന് സൂപ്രണ്ട് അറിയിച്ചു. പ്രതിദിനം 2000 മുതൽ 2500 പേരാണ് ഒപിയിൽ എത്തുന്നത്. തിങ്കളാഴ്ച 3000 പേരുവരെ എത്താറുണ്ട്. ഒപി ടിക്കറ്റ് ഓണ്‍ലൈനായി എടുക്കാൻ കൂടുതൽ ആളുകൾ തയാറാകണമെന്ന നിർദേശവും ഉയർന്നു. നിലവിൽ 142 പേരെ കിടത്തി ചികിത്സിപ്പിക്കാനുള്ള സംവിധാനമാണുള്ളതെങ്കിലും 306 പേരെ വരെ കിടത്തി ചികിത്സിക്കുന്നുണ്ട്. യോഗത്തിൽ ജില്ലാ പഞ്ചായത്ത് പ്രസിഡന്‍റ് എം.കെ. റഫീഖ, വൈസ് പ്രസിഡന്‍റ് ഇസ്മായിൽ മൂത്തേടം, ജില്ലാ പഞ്ചായത്തംഗം അഡ്വ. ഷെറോണ റോയ്, ജില്ലാ മെഡിക്കൽ ഓഫീസർ ഡോ.ആർ.രേണുക, എൻഎച്ച്എം ജില്ലാ പ്രോഗ്രാം മാനേജർ ഡോ. ടി.എൻ. അനൂപ്, ആശുപത്രി സൂപ്രണ്ട് ഡോ. ഷിനാസ് ബാബു തുടങ്ങിയവർ പങ്കെടുത്തു.

ആദിവാസികൾക്ക് ആനപ്പേടിയില്ലാതെ അന്തിയുറങ്ങാനാകുമോ?

നിസഹായരായി കരിങ്കംന്തോണി പറയൻമേടിലെ കുടുംബങ്ങൾ കരുവാരകുണ്ട്: ആനപ്പേടിയില്ലാതെ അന്തിയുറങ്ങാനാകുമോയെന്ന ചോദ്യം ഉയർത്തുകയാണ് ആദിവാസികൾ. കരിങ്കംന്തോണി പറയൻമേടിലെ ആദിവാസി കുടുംബങ്ങളാണ് ആനശല്യം കാരണം പൊറുതിമുട്ടിയിരിക്കുന്നത്. നേരത്തേ വീടിനു സമീപത്തെത്തിയ ആനകൾ ഭീകരാന്തരീക്ഷം സൃഷ്ടിച്ചിരുന്നു. ആനകളെ തുരത്താനായി ആദിവാസികൾ മരച്ചുള്ളികളും കമ്പുകളും ചേർത്തുവച്ച് കത്തിക്കുകയാണ് പതിവ്. മഴപെയ്തതോടെ തീ നിലനിൽക്കാത്ത അവസ്ഥയുമായി. കുട്ടികൾ ഉൾപ്പെടെയുള്ളവർ താമസിക്കുന്ന ഭാഗമാണ് പ്രദേശം. കഴിഞ്ഞദിവസം ആന എത്തിയപ്പോൾ പടക്കം പൊട്ടിച്ച് ആനയെ പിന്തിരിപ്പിക്കാൻ വീട്ടുകാർ ശ്രമിച്ചു. വീടിനു സമീപത്തുണ്ടായിരുന്ന നായകൾ കുരച്ച് ബഹളം വച്ചതോടെ വീടിന് സമീപത്തേക്കോടിയ ആന പാതിവഴിയിൽ വീഴുകയാണുണ്ടായതെന്ന് കുടുംബാംഗം പറഞ്ഞു. വീടിനു പുറത്തുണ്ടായിരുന്ന വീട്ടുപകരണങ്ങളിൽ ചിലത് ആന ചവിട്ടി നാശം വരുത്തുകയും ചെയ്തിരുന്നു. കുടുംബാംഗങ്ങൾ മറ്റിടത്തേക്ക് അന്തിയുറങ്ങാനായി പോവുകയാണ് പതിവ്. ആനയെ തുരത്താൻ പടക്കം വാങ്ങിക്കാൻ പോലും പണമില്ലെന്ന് താമസക്കാരനായ സുരേഷ് ബാബുപറഞ്ഞു. കഴിഞ്ഞ ഏതാനും ദിവസങ്ങളായി പ്രദേശത്ത് ആനകൾ തമ്പടിച്ചിരിക്കുകയാണ്. ഇവിടെ നിന്നാണ് ദിവസങ്ങൾക്കു മുമ്പ് ഇരിങ്ങാട്ടിരി, പായിപ്പുല്ല് ഭാഗങ്ങളിലേക്ക് കാട്ടാനകൾ കൂട്ടമായി എത്തിയത്. വട്ടമലയിലൂടെ യാത്രക്കാരുടെ നേരെയും ആനകൾ അതിക്രമം കാണിച്ചിരുന്നു. കൃഷി നശിപ്പിക്കുകയും ചക്കകൾ വ്യാപകമായി തിന്നു നശിപ്പിക്കുകയും ചെയ്തിട്ടുണ്ട്. ആനയെ തുരത്താൻ ആവശ്യമായ പടക്കം വാങ്ങിക്കാനെങ്കിലും പണം അനുവദിക്കണമെന്നും ആനപ്പേടിയിൽ നിന്ന് സുരക്ഷിതത്വം നൽകണമെന്നും താമസക്കാർ ആവശ്യപ്പെട്ടു. വനംവകുപ്പ് അധികൃതരെ പ്രശ്നം അറിയിച്ചെങ്കിലും കാര്യമായി പ്രതികരണം ഉണ്ടായില്ലെന്നും ആരോപണമുണ്ട്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]