ADVERTISEMENT

ADVERTISEMENT

വികസന ശിൽപ്പശാല നടത്തി

വൈത്തിരി: കേരള ശാസ്ത്ര സാഹിത്യ പരിഷത്ത് മേഖല വികസന ശിൽപ്പശാല നടത്തി. ജില്ലാ പഞ്ചായത്തംഗം എൻ.സി. പ്രസാദ് ഉദ്ഘാടനം ചെയ്തു.

മേഖല പ്രസിഡന്‍റ് എബ്നെസർ സാമുവൽ അധ്യക്ഷത വഹിച്ചു. വികസന വിഷയസമിതി ജില്ലാ കണ്‍വീനർ എം.എം. ടോമി, റിസോഴ്സ് പേഴ്സണ്‍ പി. കുഞ്ഞിക്കൃഷ്ണൻ, പരിഷത്ത് ജില്ലാ പ്രസിഡന്‍റ് പി. അനിൽകുമാർ എന്നിവർ അവതരണങ്ങൾ നടത്തി.

ബ്ലോക്ക് പഞ്ചായത്ത് അംഗങ്ങളായ വി. ഉഷാകുമാരി, എൽസി ജോർജ്, പി. ഗഗാറിൻ, കെ.വി. ഫൈസൽ, കുന്നത്ത് സാജിദ്, കെ.ജെ. ഡാനിയേൽ, സി.കെ. കുമാർ, എ.ആർ. രഞ്ജിനി, എസ്. പ്രവീണ്‍ എന്നിവർ ചർച്ചയിൽ പങ്കെടുത്തു.

മേഖല സെക്രട്ടറി പി.എം. അനൂപ്കുമാർ യൂണിറ്റ് സെക്രട്ടറി വി. ജയകുമാർ എന്നിവർ സംസാരിച്ചു.

ADVERTISEMENT

സപ്ലൈകോ നെല്ല് സംഭരണം: കർഷകർ നട്ടം തിരിയുന്നു

കൽപ്പറ്റ: ജില്ലയിൽ സപ്ലൈകോയ്ക്ക് നെല്ല് നൽകിയ കർഷകർ നട്ടം തിരിയുന്നു. നെല്ല് സംഭരണവും വില വിതരണവും സമയബന്ധിതമായി നടത്താത്തതുമൂലം കൃഷിക്കാർ അനുഭവിക്കുന്നത് ദുരിതം. ജില്ലയിൽ കഴിഞ്ഞ ജൂണ്‍ മുതൽ സംഭരിച്ച നെല്ലിന്‍റെ വില കർഷകർക്ക് ലഭിച്ചില്ല. സപ്ലൈകോ അനുവദിക്കുന്ന പിആർഎസ്(പാഡി റസീറ്റ് ഷീറ്റ്) ഉപയോഗപ്പെടുത്തി ബാങ്കുകളിൽനിന്നു വായ്പയെടുത്തവർ സിബിൽ സ്കോർ കുറവുമൂലം മറ്റു വായ്പകൾ ലഭിക്കാതെയും പ്രയാസം നേരിടുകയാണ്. അനുവദിച്ച വായ്പ ബാങ്കിന്‍റെ അക്കൗണ്ടിൽ യഥാസമയം തിരിച്ചെത്താത്താണ് സിബിൽ സ്കോർ താഴുന്നതിന് കാരണമാകുന്നത്. കാലാവസ്ഥയിലെ മാറ്റങ്ങൾ മൂലം ജില്ലയിൽ നെൽക്കൃഷി ഇറക്കലും വിളവെടുപ്പും വൈകിയാണ് നടക്കുന്നത്. എന്നിരിക്കേ നഞ്ചക്കൃഷി സംഭരണ കാലാവധി ഡിസംബർ 31 ആയും പുഞ്ചക്കൃഷി സംഭരണ കാലാവധി ജൂണ്‍ 30 ആയും നിജപ്പെടുത്തിയത് മറ്റൊരു പ്രതിസന്ധിയാണ്. മില്ലുടമകളുടെ ചൂഷണവും കർഷകർ നേരിടേണ്ടിവരുന്നു. സംഭരണവേളയിൽ നെല്ലിന് വെള്ള, മട്ട എന്ന വേർതിരിവ് മില്ലുകാർ ഏർപ്പെടുത്തുകയാണ്. മട്ടയെ അപേക്ഷിച്ച് വെള്ളയ്ക്ക് ഡിമാൻഡ് കുറവാണ്. നെല്ലിന് തറവില കേന്ദ്ര സർക്കാർ ഓരോ ബജറ്റിലും വർധിപ്പിക്കുന്നുണ്ട്. എന്നാൽ ഇത്തരത്തിൽ വില കൂട്ടാൻ സംസ്ഥാന സർക്കാർ തയാറാകുന്നില്ല. നിലവിൽ സപ്ലൈകോ സംഭരിക്കുന്ന നെല്ല് കിലോഗ്രാമിന് 28.20 രൂപയാണ് കർഷകർക്ക് വില കിട്ടുന്നത്. കിലോഗ്രാമിന് കയറ്റിറക്ക് ചെലവിനത്തിൽ 12 പൈസയും അനുവദിക്കുന്നുണ്ട്. ജില്ലയിൽ സപ്ലോകോ സംഭരിച്ച നെല്ലിന്‍റെ വിലയായി കോടിക്കണക്കിനു രൂപ കൃഷിക്കാർക്ക് ലഭിക്കാനുണ്ടെന്ന് കണിയാന്പറ്റ നെൽക്കർഷക കൂട്ടായ്മ ഭാരവാഹികളായ ജോസ് മാത്യു, എ.ആർ. രമേശ്, പി. രാജീവ്, സാംസണ്‍ ജോയി എന്നിവർ പറഞ്ഞു. കണിയാന്പറ്റ പഞ്ചായത്തിൽ മാത്രം 18 പാടശേഖരങ്ങളിലെ കർഷകരാണ് വില യാഥാസമയം കിട്ടാതെ ബുദ്ധിമുട്ടുന്നത്. കർഷകരോടുള്ള അവഗണനയിൽ പ്രതിഷേധിച്ച് കർഷക ദിനമായ ചിങ്ങം ഒന്ന് യാചനാദിനമായി ആചരിക്കാനും കൃഷിഭവനുമുന്പിൽ പ്രതിഷേധം സംഘടിപ്പിക്കാനും കൂട്ടായ്മ തീരുമാനിച്ചതായി ഭാരവാഹികൾ പറഞ്ഞു. നെൽവില ചിങ്ങം ഒന്നിനു മുന്പ് ലഭ്യമാക്കുന്നപക്ഷം യാചനാദിനാചരണം ഒഴിവാക്കും.

സ്വതന്ത്ര കർഷക സംഘം കൃഷിഭവൻ മാർച്ചും ധർണയും നടത്തി

കൽപ്പറ്റ: സ്വതന്ത്ര കർഷക സംഘം പ്രവർത്തകർ ജില്ലയുടെ വിവിധ ഭാഗങ്ങളിൽ കൃഷിഭവനുകളിലേക്ക് മാർച്ചും തുടർന്ന് ധർണയും നടത്തി. വന്യമൃഗശല്യത്തിന് ശാശ്വത പരിഹാരം കാണുക, മഴക്കെടുതിയിൽ കൃഷിക്കുണ്ടായ നാശത്തിനു നഷ്ടപരിഹാരം നൽകുക, സപ്ലൈകോ സംഭരിച്ച നെല്ലിന്‍റെ വില അനുവദിക്കുക, കർഷക പെൻഷൻ കുടിശിക സഹിതം വിതരണം ചെയ്യുക, രാസവളക്ഷാമം പരിഹരിക്കുക, രാസവളങ്ങളുടെ വില കുറയ്ക്കുക, ക്ഷീരകർഷകരുടെ പ്രതിസന്ധി പരിഹരിക്കുക തുടങ്ങിയ ആവശ്യങ്ങൾ ഉന്നയിച്ചായിരുന്നു സമരം. പനമരം കൃഷിഭവനു മുന്പിൽ ധർണ ജില്ലാ പ്രസിഡന്‍റ് വി. അസൈനാർ ഹാജി ഉദ്ഘാടനം ചെയ്തു. ജനറൽ സെക്രട്ടറി പി.കെ. അബ്ദുൾ അസീസ്, വൈസ് പ്രസിഡന്‍റ് പൊരളോത്ത് അഹമ്മദ് ഹാജി, അസീസ് കുനിയൻ, സൗജത്ത് ഉസ്മാൻ എന്നിവർ പ്രസംഗിച്ചു. ബത്തേരി കൃഷിഭവന് മുന്പിൽ ധർണ മുസ്ലിം യൂത്ത്ലീഗ് നിയോജകമണ്ഡലം പ്രസിഡന്‍റ് അസീസ് വേങ്ങൂർ ഉദ്ഘാടനം ചെയ്തു. ഖാലിദ് വേങ്ങൂർ അധ്യക്ഷത വഹിച്ചു. ഇബ്രാഹിം, തൈത്തൊടി, മൊയ്തീൻകുട്ടി ചെതലയം, ബഷീർ നായ്ക്കട്ടി, കാസിം ഹാജി ബീനാച്ചി എന്നിവർ പ്രസംഗിച്ചു.

ബോധവത്കരണ സെമിനാർ സംഘടിപ്പിച്ചു

പുൽപ്പള്ളി: ഐസിഡിഎസ് പനമരം അഡീഷണലും പുൽപ്പള്ളി ഗ്രാമപ്പഞ്ചായത്തും ചേർന്ന് ലോക മുലയൂട്ടൽ വാരാചരണത്തോടനുബന്ധിച്ച് ആറു മാസം മുതൽ രണ്ട് വയസുവരെയുള്ള കുട്ടികളുടെ ബേബി ഷോയും അമ്മമാർക്കായി ബോധവത്കരണവും സംഘടിപ്പിച്ചു. ഐ.സി. ബാലകൃഷ്ണൻ എംഎൽഎ ഉദ്ഘാടനം ചെയ്തു. ഗ്രാമപ്പഞ്ചായത്ത് പ്രസിഡന്‍റ് ടി.എസ്. ദിലീപ്കുമാർ അധ്യക്ഷത വഹിച്ചു. ഗ്രാമപ്പഞ്ചായത്ത് വൈസ് പ്രസിഡന്‍റ് ശോഭന സുകു, പി. ലീഷ്മ, സ്ഥിരംസമിതി അധ്യക്ഷരായ എം.ടി. കരുണാകരൻ, ശ്രീദേവി മുല്ലയ്ക്കൽ, ഗ്രാമപ്പഞ്ചായത്തംഗങ്ങളായ ഉഷ ബേബി, അനുമോൾ ദിബീഷ്, ഐസിഡിഎസ് സൂപ്പർവൈസർ എം.വി. റെജീന എന്നിവർ പ്രസംഗിച്ചു.

അട്ടക്കൊല്ലി ചിറയുടെ നവീകരണം പുരോഗമിക്കുന്നു

മീനങ്ങാടി: മീനങ്ങാടി പഞ്ചായത്ത് ബസ് സ്റ്റാൻഡിനോട് അനുബന്ധിച്ചുള്ള അട്ടക്കൊല്ലി ചിറയുടെ നവീകരണം പുരോഗമിക്കുന്നു. ഇത്തവണ സന്നദ്ധ സംഘടനയാണ് നവീകരണത്തിനായി മുന്നിട്ടിറങ്ങിയിട്ടുള്ളത്. കഴിഞ്ഞ ഏതാനും വർഷങ്ങളായി ചിറയും പരിസരവും കാടുപിടിച്ച് കിടക്കുകയായിരുന്നു. കുളം, ജൈവവൈവിധ്യ പാർക്ക്, കുട്ടികളുടെ പാർക്ക് എന്നിവയും കാടുമൂടി. പാർക്ക് നിർമിച്ചതിനോടനുബന്ധിച്ച് വിനോദ സഞ്ചാരികളെ പ്രവേശിപ്പിക്കുക എന്ന ലക്ഷ്യത്തോടെ പ്രവേശന കൗണ്ടറും നിർമിച്ചിരുന്നു. എല്ലാം ഉപേക്ഷിക്കപ്പെട്ട നിലയിലായി. കുളത്തിനോടനുബന്ധിച്ചുള്ള ചുറ്റുമതിൽ നിർമാണത്തിന്‍റെ അപാകതയിൽ നിലംപതിച്ചതോടെ ഏറെ വിവാദമുണ്ടായി. അതോടെ കുളം വീണ്ടും കാടുപിടിക്കുന്ന അവസ്ഥയിലേക്ക് മാറി. സാമൂഹ്യവിരുദ്ധർ ഇവിടെ താവളമടിക്കാനും തുടങ്ങി. രണ്ടാഴ്ച മുന്പാണ് വീണ്ടും ഇവിടെ പണി തുടങ്ങിയത്. കുളത്തിലെ കാട് പൂർണമായും വെട്ടി. പാർക്കും നടപ്പാതയും യന്ത്ര സഹായത്താൽ വൃത്തിയാക്കി. പൊതുജനത്തിനെ പ്രവേശിപ്പിക്കാവുന്ന രീതിയിലുള്ള ഒരുക്കങ്ങളൊന്നും ഇത്തവണയില്ല. ഒരുകാലത്ത് മീനങ്ങാടി ടൗണിലെ വലിയ ജലസ്രോതസായിരുന്നു അട്ടക്കൊല്ലി ചിറ.

തെരഞ്ഞെടുപ്പ് അട്ടിമറി: കോണ്‍ഗ്രസ് പ്രകടനം നടത്തി

സുൽത്താൻ ബത്തേരി: വോട്ടർ പട്ടികയിൽ വ്യാപക ക്രമക്കേട് നടത്തി ജനാധിപത്യത്തെയും തെരഞ്ഞെടുപ്പ് കമ്മീഷന്‍റെ വിശ്വാസ്യതയെയും ബിജെപി തകർക്കുന്നതിൽ പ്രതിഷേധിച്ച് ബ്ലോക്ക് കോണ്‍ഗ്രസ് കമ്മിറ്റിയുടെ നേതൃത്വത്തിൽ നഗരത്തിൽ പ്രകടനവും യോഗവും നടത്തി. ഡിസിസി പ്രസിഡന്‍റ് എൻ.ഡി. അപ്പച്ചൻ ഉദ്ഘാടനം ചെയ്തു. ബ്ലോക്ക് പ്രസിഡന്‍റ് ഉമ്മർ കുണ്ടാട്ടിൽ അധ്യക്ഷത വഹിച്ചു. ഡി.പി. രാജശേഖരൻ, നിസി അഹമ്മദ്, സക്കരിയ മണ്ണിൽ, ബാബു പഴുപ്പത്തൂർ, ടിജി ചെറുതോട്ടിൽ, ശ്രീനിവാസൻ തൊവരിമല, ബാലസുബ്രഹ്മണ്യം, ജയ മുരളി, അമൽ ജോയ്, ലയണൽ മാത്യു, ശാലിനി രാജേഷ്, സി.എ. ഗോപി, അസീസ് മാടാല, ജിജി അലക്സ്, ഗഫൂർ പടപ്പ്, ഷമീർ മാണിക്യം, രാധ രവീന്ദ്രൻ, യൂനുസ് അലി, സീത വിജയൻ, ബാലകൃഷ്ണൻ,സിജോ മാത്യു, ജയകൃഷ്ണൻ, സനൽ ജോണ്‍, എം.യു. ജോർജ്, പ്രമോദ് പാലാക്കര, ഷിജു എളങ്ങരമറ്റം, മണി ചോയിമൂല, വാസു വടക്കനാട്, ഭാസ്കരൻ നായ്ക്കട്ടി തുടങ്ങിയവർ നേതൃത്വം നൽകി.

തൊഴിലുറപ്പ് പദ്ധതി നടത്തിലെ അഴിമതി: തൊണ്ടർനാട് പഞ്ചായത്ത് ഓഫീസിലേക്ക് മാർച്ച് നടത്തി

മക്കിയാട്: തൊണ്ടർനാട് പഞ്ചായത്തിൽ തൊഴിലുറപ്പ് പദ്ധതി നടത്തിപ്പിൽ നടന്ന അഴിമതിക്ക് ഉത്തരവാദികളായ മുഴുവൻ ആളുകളെയും നിയമത്തിനു മുന്പിൽ നിർത്തുക, പഞ്ചായത്ത് പ്രസിഡന്‍റും വൈസ് പ്രസിഡന്‍റും രാജിവയ്ക്കുക തുടങ്ങിയ ആവശ്യങ്ങൾ ഉന്നയിച്ച് യുഡിഎഫിന്‍റെ നേതൃത്വത്തിൽ തൊഴിലുറപ്പ് തൊഴിലാളികൾ പഞ്ചായത്ത് ഓഫീസിലേക്ക് മാർച്ച് നടത്തി. പഞ്ചായത്ത് ഓഫീസിനു കുറച്ചകലെ മാർച്ച് പോലീസ് തടഞ്ഞു. ഇതേത്തുടർന്നു നടത്തിയ ധർണ ഡിസിസി പ്രസിഡന്‍റ് എൻ.ഡി. അപ്പച്ചൻ ഉദ്ഘാടനം ചെയ്തു. കുസുമം അധ്യക്ഷത വഹിച്ചു. ഡിസിസി സെക്രട്ടറി എച്ച്.ബി. പ്രദീപ്, നേതാക്കളായ എസ്.എം. പ്രമോദ്, അബ്ദുള്ള കേളോത്ത്, ടി. മൊയ്തു, തൊഴിലുറപ്പ് തൊഴിലാളി യൂണിയൻ ഭാരവാഹികളായ റഷീദ ചേനോത്ത്, ജിജി മാത്യു എന്നിവർ പ്രസംഗിച്ചു. ആമിന സത്താർ സ്വാഗതവും കെ.എ. മൈമൂന നന്ദിയും പറഞ്ഞു. അഴിമതിയിൽ സമഗ്രാന്വേഷണവും നടപടിയും ആവശ്യപ്പെട്ട് എൻആർഇജി ഡയറക്ടർ, സംസ്ഥാന വിജിലൻസ് മേധാവി, ജില്ലാ കളക്ടർ തുടങ്ങിയവർക്ക് പരാതി നൽകിയതായി യുഡിഎഫ് നേതാക്കൾ അറിയിച്ചു. അഴിമതിയുമായി ബന്ധപ്പെട്ട കേസ് അന്വേഷണം അട്ടിമറിക്കാനുള്ള സിപിഎം ശ്രമത്തിൽ പ്രതിഷേധിച്ച് നാളെ വൈകുന്നേരം നാലിന് കോറോം അങ്ങാടിയിൽ ജനകീയ പ്രതിഷേധ സദസ് സംഘടിപ്പിക്കുമെന്ന് അവർ പറഞ്ഞു. അതിനിടെ, തൊഴിലുറപ്പ് പദ്ധതി നടത്തിപ്പിൽ നടന്ന ക്രമക്കേടുകൾ വിശദീകരിക്കുന്നതിന് സിപിഎം ലോക്കൽ കമ്മിറ്റി തൊണ്ടർനാടിൽ യോഗം നടത്തി. ജില്ലാ കമ്മിറ്റി അംഗം എ.എൻ. പ്രഭാകരൻ ഉദ്ഘാടനം ചെയ്തു.

ബിജെപിയുടേത് ജനാധിപത്യ കശാപ്പിനുള്ള ശ്രമം: കെ.എൽ. പൗലോസ്

പുൽപ്പള്ളി: വോട്ട് മോഷണത്തിലൂടെ ബിജെപി ജനാധിപത്യത്തെ കശാപ്പുചെയ്യാനാണ് ശ്രമിക്കുന്നതെന്ന് കെപിസിസി എക്സിക്യുട്ടീവ് കമ്മിറ്റി അംഗം കെ.എൽ. പൗലോസ്. വോട്ട് മോഷണം ആരോപിച്ച് കോണ്‍ഗ്രസ് മീനങ്ങാടി ബ്ലോക്ക് കമ്മിറ്റിയുടെ നേതൃത്വത്തിൽ ടൗണിൽ നടത്തിയ പ്രകടനത്തിനുശേഷം ചേർന്ന യോഗത്തിൽ പ്രസംഗിക്കുകയായിരുന്നു അദ്ദേഹം. ലോകത്തിൽ ഏറ്റവും കൂടുതൽ ജനങ്ങൾ പങ്കെടുക്കുന്ന ജനാധിപത്യ ഉത്സവങ്ങളാണ് രാജ്യത്തെ പൊതുതെരഞ്ഞെടുപ്പുകൾ. ഇന്ത്യയിലെ പൊതുതെരഞ്ഞെടുപ്പുകൾക്ക് ലോകം നൽകുന്ന ആദരവിന് വോട്ട് മോഷണത്തിലൂടെ ബിജെപി കളങ്കമേൽപ്പിക്കുകയാണ്. ബിജെപിയുടെ കുത്സിത നീക്കങ്ങളെ രാഹുൽഗാന്ധിയുടെ നേതൃത്വത്തിൽ ഭാരതത്തിലെ ജനാധിപത്യവിശ്വാസികൾ നേരിടുമെന്നും പൗലോസ് പറഞ്ഞു. ബ്ലോക്ക് പ്രസിഡന്‍റ് വർഗീസ് മുരിയൻകാവിൽ അധ്യക്ഷത വഹിച്ചു. ഡിസിസി ജനറൽ സെക്രട്ടറി മാരായ എൻ.യു. ഉലഹന്നാൻ, പി.ഡി. സജി, ബീന ജോസ്, ഇ.എ. ശങ്കരൻ, ജിനി തോമസ്, കെ.പി. മധു, മറ്റു നേതാക്കളായ പി.ഡി. ജോണി, കെ.ജി. ബാബു, എം.എസ്. പ്രഭാകരൻ, സണ്ണി ചാമക്കാല, ടി.എസ്. ദ്വിലീപ് കുമാർ, ശിവരാമൻ പാറക്കുഴി, മണി പാന്പനാൽ, ഷിജു പൗലോസ് എന്നിവർ പ്രസംഗിച്ചു.

വീണുകിട്ടിയ മാല ഉടമസ്ഥന് നൽകി മാതൃകയായി

പുൽപ്പള്ളി: വീണുകിട്ടിയ സ്വർണമാല ഉടമസ്ഥനു തിരികെ നൽകി മാതൃകയായി വീട്ടമ്മ. മാടൽ സ്വദേശിയായ തലക്കവയൽ ബിന്ദുവിന് കഴിഞ്ഞദിവസം ഉച്ചയോടെയാണ് മുള്ളൻകൊല്ലി ടൗണിലെ ഓട്ടോറിക്ഷ സ്റ്റാൻഡിന് സമീപത്ത് സ്വർണമാല കളഞ്ഞുകിട്ടിയത്. ഉടൻ ബിന്ദു ടൗണിലെ പഞ്ചായത്ത് ഓഫീസിലെത്തി ഉടമസ്ഥനെ കണ്ടെത്തി മാല തിരികെ ഏൽപ്പിക്കണമെന്നാവശ്യപ്പെട്ട് പ്രസിഡന്‍റ് പി.കെ. വിജയന് കൈമാറുകയായിരുന്നു. സീതാമൗണ്ട് സ്വദേശനി അലീനയുടെ ഒരു പവൻ തൂക്കമുള്ള സ്വർണ മാലയാണ് നഷ്ടപ്പെട്ടത്. മുള്ളൻകൊല്ലി ടൗണിലെ എടിഎമ്മിലെത്തിയപ്പോഴാണ് മാല നഷ്ടമായത്. സമൂഹമാധ്യമങ്ങളിലൂടെ നഷ്ടപ്പെട്ട ഒരു മാല പഞ്ചായത്ത് ഓഫീസിൽ ലഭിച്ച വിവരമറിഞ്ഞതോടെ അലിന അന്വേഷിച്ചെത്തുകയായിരുന്നു. തുടർന്ന് പഞ്ചായത്ത് പ്രസിഡന്‍റിന്‍റേയും ഭരണസമിതിയംഗങ്ങളുടെയും സാന്നിധ്യത്തിൽ ബിന്ദു അലീനയ്ക്ക് മാല കൈമാറി.

ശുചീകരണത്തൊഴിലാളികളെ എൽഎസ്ജിഡി പൊതുസർവീസിൽ ഉൾപ്പെടുത്തണം: കെഎംസിസിഇസി

കൽപ്പറ്റ: മുനിസിപ്പാലിറ്റികളിലെയും കോർപറേഷനുകളിലെയും ശുചീകരണത്തൊഴിലാളികളെ എൽഎസ്ജിഡി പൊതുസർവീസിൽ ഉൾപ്പെടുത്തണമെന്ന് എംജിടി ഹാളിൽ ചേർന്ന കേരള മുനിസിപ്പൽ ആൻഡ് കോർപറേഷൻ കണ്ടിജന്‍റ് എംപ്ലോയീസ് കോണ്‍ഗ്രസ്(ഐഎൻടിയുസി)ജില്ലാ കണ്‍വൻഷൻ സർക്കാരിനോട് ആവശ്യപ്പെട്ടു. മെഡിസെപ്പിലെ അപാകം പരിഹരിക്കുക, താല്കാലിക സിഎൽആർ/ഡിഎൽ ആർ തൊഴിലാളികളെ സ്ഥിരപ്പെടുത്തുക തുടങ്ങിയ ആവശ്യങ്ങളും ഉന്നയിച്ചു. മുനിസിപ്പൽ ചെയർമാൻ ടി.ജെ. ഐസക് ഉദ്ഘാടനം ചെയ്തു. ഐഎൻടിയുസി ജില്ലാ പ്രസിഡൻ് പി.പി. ആലി അധ്യക്ഷത വഹിച്ചു. കഐംസിസിഇസി സംസ്ഥാന ജനറൽ സെക്രട്ടറി പി.എൻ. പരമേശ്വരൻ മുഖ്യപ്രഭാഷണം നടത്തി. കെ.എസ്. ജംഷീദ്, ജി. സേവ്യർ, രാജീവൻ ഇരിട്ടി, മനോഹരൻ ശ്രീകണ്ഠപുരം, വിനു മാനന്തവാടി, ഡൊമനിക് മാനന്തവാടി, ലാൽ ജോസ് എന്നിവർ പ്രസംഗിച്ചു. ജില്ലാ ജനറൽ സെക്രട്ടറി ടി.ആർ. സുരേന്ദ്രൻ സ്വാഗതം പറഞ്ഞു.

തൊഴിലിടങ്ങളിലെ വനിത പ്രാതിനിധ്യം വർദ്ധിപ്പിക്കാൻ വിജ്ഞാന കേരളവും കുടുംബശ്രീയും കൈകോർക്കുന്നു

കൽപ്പറ്റ: തൊഴിലിടങ്ങളിൽ വനിത പ്രാതിനിധ്യം വർധിപ്പിക്കാൻ 5000 പേർക്ക് തൊഴിൽ നൽകാൻ കൈകോർത്ത് വിജ്ഞാന കേരളവും കുടുംബശ്രീയും. തൊഴിൽ മേഖലയിൽ സ്ത്രീ പങ്കാളിത്തം ഉയർത്തുന്നതിനൊപ്പം ഓരോ അയൽക്കൂട്ട കുടുംബങ്ങൾക്കും വരുമാനം വർധിപ്പിക്കാൻ കൂടി ലക്ഷ്യമിട്ട് പുത്തൻ തൊഴിലവസരങ്ങൾ സൃഷ്ടിക്കുകയാണ് ലക്ഷ്യം. വിജ്ഞാന കേരളം കാന്പയിനിലൂടെ തൊഴിൽ സന്നദ്ധരായ കുടുംബശ്രീ അംഗങ്ങൾക്ക് നൈപുണി പരിശീലനം നൽകും. കാന്പയിനിന്‍റെ ആദ്യഘട്ടത്തിൽ സെപ്റ്റംബറോടെ ഒരു ലക്ഷം ആളുകൾക്ക് വേതനാധിഷ്ഠിത തൊഴിൽ ലഭ്യമാക്കാനാണ് വിജ്ഞാനകേരളം മുഖേന കുടുംബശ്രീ ലക്ഷ്യമിടുന്നത്. ജില്ലയിലെ ഓരോ സിഡിഎസിലും 170 മുതൽ 200 പേർക്ക് ജോലി ലഭ്യമാക്കുകയാണ് പദ്ധതിയുടെ ലക്ഷ്യം. കാന്പയിനിന്‍റെ ഭാഗമായി ജില്ലയിലെ മുഴുവൻ സിഡിഎസുകളിലും വാർഡുതല പ്രവർത്തനങ്ങൾ ആരംഭിക്കും. കുടുംബശ്രീകളിൽ പ്രവർത്തിക്കുന്ന അഭ്യസ്തവിദ്യരുടെ വിവരങ്ങൾ കണ്ടെത്തി ജോലി ആവശ്യമുള്ളവരുടെ വിവരശേഖരണം നടത്തി പ്രാദേശിക തൊഴിലവസരങ്ങൾ കണ്ടെത്തി നൽകും. തൊഴിൽ സാധ്യതകൾ കണ്ടെത്താൻ തദ്ദേശ സ്വയംഭരണ സ്ഥാപന പരിധിയിൽ പ്രവർത്തിക്കുന്ന സൂപ്പർ മാർക്കറ്റ്, പെട്രോൾ പന്പ്, ഹോട്ടൽ, വ്യവസായ സ്ഥാപനങ്ങൾ, കുടുംബശ്രീ സംരംഭങ്ങൾ തുടങ്ങിയവയുടെ വിവരങ്ങൾ വാർഡ് അടിസ്ഥാനത്തിൽ തയാറാക്കും. തൊഴിൽ സ്ഥാപനങ്ങൾ സന്ദർശിച്ച് കണ്ടെത്തുന്ന ഒഴിവുകൾ പോർട്ടലിൽ/ഗൂഗിൾ ഫോമിൽ രേഖപ്പെടുത്തും. ജോബ് റോൾ, എണ്ണം, ശന്പളം, യോഗ്യത എന്നിവ തദ്ദേശ സ്ഥാപനതല ഒഴിവുകളായി പ്രസിദ്ധപ്പെടുത്തും. അയൽക്കൂട്ടതലങ്ങളിൽ നിന്നും യോഗ്യരായവരെ കണ്ടെത്തി പട്ടിക തയാറാക്കൽ, തൊഴിൽ ദാതാക്കളെയും ആവശ്യക്കാരെയും ബന്ധിപ്പിക്കൽ, തൊഴിൽ ദാതാക്കളുടെയും തൊഴിൽ ലഭിച്ചവരുടെയും വിവരങ്ങൾ വിജ്ഞാന കേരളം എംഐഎസിൽ അപ്ഡേറ്റ് ചെയ്യൽ, ത്രിതലപഞ്ചായത്ത് തലത്തിൽ സംഘടിപ്പിക്കുന്ന തൊഴിൽ മേളകളുമായി സഹകരിക്കൽ, കുടുംബശ്രീ അംഗങ്ങളെ പങ്കെടുപ്പിച്ച് ജോലി ലഭ്യമാക്കൽ എന്നിവയാണ് കാന്പയിനിലൂടെ ലക്ഷ്യമാക്കുന്നത്.

പികെഎസ് ഹെഡ് പോസ്റ്റ് ഓഫീസ് മാർച്ചും ധർണയും നടത്തി

കൽപ്പറ്റ: കേന്ദ്ര സർക്കാരിന്‍റെ നിയന്ത്രണത്തിലുള്ള ഉന്നത വിദ്യാഭ്യാസ സ്ഥാപനങ്ങളിൽ എസ്‌‌സി, എസ്ടി വിഭാഗത്തിന് സംവരണം ചെയ്ത മുഴുവൻ സീറ്റുകളിലും പ്രവേശനം ആവശ്യപ്പെട്ട് പട്ടികജാതി ക്ഷേമ സമിതി(പികെഎസ്) ജില്ലാ കമ്മിറ്റിയുടെ നേതൃത്വത്തിൽ ഹെഡ് പോസ്റ്റ് ഓഫീസിലേക്ക് മാർച്ചും തുടർന്നു ധർണയും നടത്തി. വിദ്യാർഥികൾക്ക് കോഴ്സ് പൂർത്തിയാക്കുന്നതിനു സൗകര്യം ഒരുക്കുക, സ്വകാര്യമേഖലയിൽ തൊഴിൽ സംവരണം നടപ്പാക്കാൻ നിയമം കൊണ്ടുവരിക, ഐഐടികളിലും എൻഐടികളിലും അധ്യാപക, അനധ്യാപക സംവരണ തസ്തികകളിൽ നിയമനം നടത്തുക, ജാതി സെൻസസിലെ അവ്യക്തത പരിഹരിക്കുക, പട്ടികജാതി-വർഗ പീഡന നിരോധന നിയമത്തിലെ പഴുതുകൾ അടയ്ക്കുക എന്നിവയും സമരാവശ്യങ്ങളായിരുന്നു. ജില്ലാ സെക്രട്ടറി എം. ജനാർദനൻ ഉദ്ഘാടനം ചെയ്തു. പ്രസിഡന്‍റ് കെ. സുഗതൻ അധ്യക്ഷത വഹിച്ചു. ടി.കെ. അയ്യപ്പൻ, സി. ഓമന, കെ. പ്രസാദ്, വിജയൻ, റജീഷ്, വി.പി. ബോസ് എന്നിവർ പ്രസംഗിച്ചു. കെ.വി. രാജു സ്വാഗതവും സുരേഷ്ബാബു നന്ദിയും പറഞ്ഞു.

പൂതാടി ശ്രീനാരായണ ഹയർ സെക്കൻഡറി സ്കൂൾ കെട്ടിട നിർമാണം: കരാറുകാരന്‍റെ ആരോപണങ്ങൾ അടിസ്ഥാനരഹിതമെന്ന്

കൽപ്പറ്റ: പൂതാടി ശ്രീനാരായണ ഹയർ സെക്കൻഡറി സ്കൂൾ കെട്ടിട നിർമാണവുമായി ബന്ധപ്പെട്ട് കരാറുകാരൻ സന്തോഷ് ബാബുവും എസ്എൻഡിപി സംരക്ഷണ സമിതി ഭാരവാഹികളെന്ന് അവകാശപ്പെടുന്നവരും ഉന്നയിച്ച ആരോപണങ്ങൾ അടിസ്ഥാനരഹിതമാണെന്ന് മാനേജർ എൻ.കെ. ഷാജി, കെട്ടിട നിർമാണ കമ്മിറ്റി കണ്‍വീനർ കെ.കെ. ധനേന്ദ്രൻ, കമ്മിറ്റി അംഗങ്ങളായ ഉണ്ണികൃഷ്ണൻ മാവറ, വി.എസ്. ഭാസ്കരൻ എന്നിവർ വാർത്താസമ്മേളനത്തിൽ പറഞ്ഞു. തെറ്റായ ആരോപണങ്ങൾ ഉന്നയിച്ച് സ്കൂൾ മാനേജ്മെന്‍റിനെയും കെട്ടിട നിർമാണ കമ്മിറ്റിയെയും അപകീർത്തിപ്പെടുത്തിയതിന് കാരാറുകാരനും എസ്എൻഡിപി സംരക്ഷണ സമിതി ഭാരവാഹികളെന്ന് പറയുന്നവർക്കുമെതിരേ കേണിച്ചിറ പോലീസ് പരാതി നൽകിയതായി അവർ അറിയിച്ചു. ഫൈനൽ ബില്ല് നൽകാതെ കെട്ടിട നിർമാണ കമ്മിറ്റി കബളിപ്പിച്ചുവെന്നാണ് കരാറുകാരന്‍റെ മുഖ്യ ആരോപണം. ഇത് ശരിയല്ല. 2024 ജൂണ്‍ 25ന് ഫൈനൽ ബിൽ തീർത്തുനൽകിയതാണ്. ബത്തേരിയിലെ സായ് സിവിൽ സ്ട്രെക്ചർ എൻജിനിയറിംഗ് ഓഫ് കണ്‍സൾട്ടേഷൻ മാനേജ്മെന്‍റ് തയാറാക്കിയതും 2020 ജൂലൈ 14ന് പൂതാടി പഞ്ചായത്ത് സെക്രട്ടറി അംഗീകരിച്ചതുമായ പ്ലാൻ പ്രകാരമാണ് കെട്ടിടം നിർമിച്ചത്. പിഡബ്ല്യുഡി റിട്ട.എൻജിനിയർ കെ. പ്രമോദ് തയാറാക്കിയ എസ്റ്റിമേറ്റ് അനുസരിച്ച് സെല്ലുലാർ ഫ്ളോർ, ഗ്രൗണ്ട് ഫ്ളോർ, ഫസ്റ്റ് ഫ്ളോർ എന്നിവയ്ക്ക് പ്രത്യേകം തുക കണക്കാക്കിയാണ് ടെൻഡർ നടപടികൾ സ്വീകരിച്ചത്. 2020 ഓഗസ്റ്റ് എട്ടിന് നടന്ന ടെൻഡറിൽ സന്തോഷ് ബാബു പങ്കെടുത്തിരുന്നില്ല. മതിയായ പരസ്യം നൽകാതെയും കൂടിയ നിരക്കിലുമാണ് ടെൻഡർ നടത്തിയതെന്നു ആരോപിച്ചും റീ ടെൻഡർ ആവശ്യപ്പെട്ടും ഇദ്ദേഹം എസ്എൻഡിപി യോഗം ജനറൽ സെക്രട്ടറിക്ക് പരാതി നൽകി. ഇതിന്‍റെ അടിസ്ഥാനത്തിൽ 2020 സെപ്റ്റംബർ 11ന് വീണ്ടും ടെൻഡർ നടത്തി. 1,10,67,000 രൂപയ്ക്കാണു സന്തോഷ്ബാബു ടെൻഡർ കൊണ്ടത്. ഇതിൽ രണ്ട് ശതമാനം കുറച്ച് 1, 08,52,520 രൂപയ്ക്കു ടെൻഡർ ഉറപ്പിച്ചു. നാല് ലക്ഷം സെക്യൂരിറ്റി ഡെപ്പോസിറ്റ് കെട്ടിവച്ച് 200 രൂപയുടെ മുദ്രപ്പത്രത്തിൽ എഗ്രിമെന്‍റ് വയ്ക്കണമെന്ന് ആവശ്യപ്പെട്ടതനുസരിച്ച് എസ്എൻഡിപി യോഗം ശാഖ അഡ്മിനിസ്ട്രേറ്റർ കെ.കെ. ധനേന്ദ്രനുമായി 2020 ഒക്ടോബർ 27ന് സന്തോഷ്ബാബു കരാറിൽ ഒപ്പിട്ടു. സെക്യൂരിറ്റി ഡെപ്പോസിറ്റ് പ്രവൃത്തിയുടെ ബില്ലിൽ നിന്നു കുറവുചെയ്ത് സഹായിക്കണമെന്നു കരാറുകാർ അപേക്ഷിച്ചത് നിർമാണ കമ്മിറ്റി അംഗീകരിച്ചു. 10 മാസമായിരുന്നു നിർമാണത്തിനു കാലാവധി. 2020 നവംബർ 10ന് പ്രവൃത്തി തുടങ്ങിയെങ്കിലും സമയബന്ധിതമായി പൂർത്തിയാക്കിയില്ല. നിർമാണത്തിന്‍റെ ഓരോ ഘട്ടത്തിലും അളവുകൾ രേഖപ്പെടുത്തി കരാറുകാരനും സൈറ്റ് എൻജിനിയറും എം ബുക്ക് ഒപ്പിട്ടു നൽകിയിട്ടുണ്ട്. കരാറുകാരന് അഞ്ച് ലക്ഷം രൂപ കടമായി നൽകിയിരുന്നു. ഇത് ഉൾപ്പെടെ 1,50,25,038 രൂപ 42 തവണകളായി കരാറുകാരൻ ചെക്ക് മുഖേന കൈപ്പറ്റിയിട്ടുണ്ട്. സാധനസാമഗ്രികളുടെ വിലയിലെ മാറ്റം കണക്കാക്കി കരാറിൽ പറഞ്ഞതിലും കൂടുതൽ തുക കരാറുകാരന് നൽകിയിട്ടുണ്ട്. വസ്തുതകൾ ഇതായിരിക്കേയാണ് വിദ്യാലയത്തെയും മാനേജ്മെന്‍റിനെയും എസ്എൻഡിപി യോഗം ജനറൽ സെക്രട്ടറിയെയും പൊതുമധ്യത്തിൽ അപകീർത്തിപ്പെടുത്തുന്നവിധം കരാറുകാരനും മറ്റും വ്യാജ പ്രചാരണം നടത്തിയതെന്നു സ്കൂൾ മാനേജരും മറ്റും പറഞ്ഞു.

വോട്ട് മോഷണം: കോണ്‍ഗ്രസ് നൈറ്റ് മാർച്ച് നാളെ

കൽപ്പറ്റ: രാജ്യവ്യാപകമായി നടന്ന വോട്ട് മോഷണത്തിൽ പ്രതിഷേധിച്ചും മോദി സർക്കാരിന്‍റെ രാജി ആവശ്യപ്പെട്ടും ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തിൽ നാളെ നഗരത്തിൽ നൈറ്റ് മാർച്ച് നടത്തും. രാത്രി ഏഴിന് മുനിസിപ്പൽ ഓഫീസ് പരിസരത്ത് ആരംഭിക്കുന്ന മാർച്ച് പുതിയ സ്റ്റാൻഡിനടുത്ത് സമാപിക്കും. പൊതുസമ്മേളനം കെപിസിസി പ്രസിഡന്‍റ് സണ്ണി ജോസഫ് എംഎൽഎ ഉദ്ഘാടനം ചെയ്യും. മാർച്ചിൽ ജില്ലയുടെ വിവിധ ഭാഗങ്ങങ്ങളിൽനിന്നുള്ള ആയിരക്കണക്കിന് പ്രവർത്തകർ അണിനിരക്കുമെന്ന് ഡിസിസി പ്രസിഡന്‍റ് എൻ.ഡി. അപ്പച്ചൻ അറിയിച്ചു.

റോഡ് നിർമിച്ചില്ലെങ്കിൽ തെരഞ്ഞെടുപ്പ് ബഹിഷ്കരിക്കുമെന്ന്

പന്തല്ലൂർ: ചേരങ്കോട് പഞ്ചായത്തിലെ കൊളപ്പള്ളി, കറുത്താട്, തട്ടാൻപാറ ഭാഗത്തേക്കുള്ള റോഡ് ടാറിംഗ് നടത്താത്തതിൽ പ്രതിഷേധിച്ച് നാട്ടുകാർ 2026ൽ നടക്കുന്ന നിയമസഭാ തെരഞ്ഞെടുപ്പ് ബഹിഷ്കരിക്കുമെന്ന് ഫ്ളക്സ് ബോർഡിൽ പ്രദർശിപ്പിച്ചു. രണ്ട് കിലോമീറ്റർ മണ്‍ റോഡാണ് ആദിവാസികൾ ഉൾപ്പെടെയുള്ളവർ ഉപയോഗിക്കുന്നത്. മഴക്കാലമായതോടെ ഈ റോഡ് പൂർണമായും ചെളിക്കുളമായി മാറിയിരിക്കുകയാണ്. നാട്ടുകാർ കടുത്ത പ്രതിസന്ധിയിലാണ്. വാഹനങ്ങൾ ട്രിപ്പ് വിളിച്ചാൽ പോലും വരുന്നില്ല. ആംബുലൻസ് പോലും വരുന്നില്ല. ഇത്കാരണം രോഗികളെ ആശുപത്രിയിലേക്ക് കൊണ്ടു പോകാനും പറ്റുന്നില്ല. നേരത്തെ നാട്ടുകാർ പല സമരങ്ങളും നടത്തിയിരുന്നുവെങ്കിലും റോഡ് ടാറിംഗ് നടത്താൻ അധികാരികൾ തയാറായിട്ടില്ല.

യുദ്ധവിരുദ്ധ സംഗമം നടത്തി

കൽപ്പറ്റ: ജില്ലാ ശിശുക്ഷേമ സമിതിയുടെയും മീനങ്ങാടി ജവഹർ ഗ്രന്ഥാലയത്തിന്‍റെയും ആഭിമുഖ്യത്തിൽ അപ്പാട് ഗവ. എൽപി സ്കൂളിൽ യുദ്ധവിരുദ്ധ സംഗമം നടത്തി. ശിശുക്ഷേമ സമിതി സെക്രട്ടറി കെ. രാജൻ യുദ്ധവിരുദ്ധ സന്ദേശം നൽകി. ഗ്രന്ഥശാല ഭാരവാഹികളായ കെ. അശോക് കുമാർ, കെ.എൻ. രവീന്ദ്രൻ എന്നിവർ പ്രശ്നോത്തരി മത്സരത്തിന് നേതൃത്വം നൽകി. ശിശുക്ഷേമ സമിതി ജോയിന്‍റ് സെക്രട്ടറി സി.കെ. ഷംസുദീൻ വിജയികൾക്ക് സമ്മാനങ്ങൾ വിതരണം ചെയ്തു. ശിശുക്ഷേമ സമിതി പ്രവർത്തക സമിതി അംഗങ്ങളായ പി. ഗീത, സി. ജയരാജൻ, പി.ആർ. ഗിരിനാഥൻ, ഹെഡ്മിസ്ട്രസ് എം.ബി. ജയശ്രീ, സ്റ്റാഫ് സെക്രട്ടറി അശ്വതി ബേബി എന്നിവർ പ്രസംഗിച്ചു.

പ്രതിസന്ധികളിലും നെൽകൃഷിയെ കൈവിടാത്ത ചേകാടിയിലെ കർഷകർ മാതൃക: മന്ത്രി ഒ.ആർ. കേളു

പുൽപ്പള്ളി: പ്രതിസന്ധികളിൽപ്പോലും നെൽകൃഷിയെ കൈവിടാതെ ചേകാടിയിലെ കർഷകർ മാതൃകയാണെന്ന് മന്ത്രി ഒ.ആർ. കേളു. ചേകാടി പാടത്ത് കന്പളനാട്ടി ഉത്സവം ഉദ്ഘാടനം ചെയ്യുകയായിരുന്നു അദ്ദേഹം. ഡോ. മൂപ്പൻസ് നഴ്സിംഗ് കോളജിന്‍റെയും ഒയിസ്ക ഇന്‍റർനാണൽ കൽപ്പറ്റ ചാപ്റ്റർ, കാർഷിക വികസന കർഷക ക്ഷേമ വകുപ്പ്, ആത്മ, ചേകാടി നവയും ചേർന്നായിരുന്നു പരിപാടി സംഘടിപ്പിച്ചത്. നെൽകൃഷിയുമായി ബന്ധപ്പെട്ട് ഗോത്ര വിഭാഗങ്ങളുടെ ആചാരമായ കന്പളനാട്ടി വിപുലമായ പരിപാടികളോടെയാണ് ചേകാടിയിൽ സംഘടിപ്പിച്ചത്. അന്പലവയൽ കാർഷിക കോളജിലെ വിദ്യാർഥികൾ ഉൾപ്പെടെയുള്ളവർ കന്പളനാട്ടി ഉത്സവത്തിൽ പങ്കെടുക്കാനെത്തിയിരുന്നു. കുലദൈവങ്ങളോടുള്ള പ്രാർഥനയും മുൻഗാമികളെ അനുസ്മരിക്കലോടെയായിരുന്നു ചടങ്ങുകൾ. ഐ.സി. ബാലകൃഷ്ണൻ എംഎൽഎ അധ്യക്ഷത വഹിച്ചു. ഗ്രാമപ്പഞ്ചായത്ത് പ്രസിഡന്‍റ് ടി.എസ്. ദിലീപ്കുമാർ, ജില്ലാ പഞ്ചായത്തംഗം എ.എൻ. സുശീല, അന്പലവയൽ പ്രാദേശിക കാർഷിക ഗവേഷണ കേന്ദ്രം അസോസിയേറ്റ് ഡയറക്ടർ ഡോ. യാമിനി വർമ, പനമരം കൃഷി അസി. ഡയറക്ടർ ടി.എസ്. സുമിന, ഡോ. മൂപ്പൻസ് നഴ്സിംഗ് കോളജിലെ ഡോ. ലിഡ ആന്‍റണി, കൽപ്പറ്റ ഒയിസ്ക ചാപ്റ്റർ പ്രസിഡന്‍റ് ഡോ.എ.ടി. സുരേഷ്, കൃഷി വിജ്ഞാന കേന്ദ്രം പ്രോഗ്രാം കോഓർഡിനേറ്റർ ഡോ. വി.വി. രാജൻ, വയനാട് പ്രിൻസിപ്പൽ കൃഷി ഓഫീസർ രാജി വർഗീസ്, ഗ്രാമപ്പഞ്ചായത്തംഗം രാജു തോണിക്കടവ്, കൃഷി ഓഫീസർ സാന്ദ്ര മരിയ സാജു എന്നിവർ പ്രസംഗിച്ചു.

മാതൃഭാഷയിലെ ഭാഷാധിനിവേശം ചെറുക്കണം: എം.എൻ. കാരശേരി

സുൽത്താൻ ബത്തേരി: കേരളത്തിന്‍റെ മാതൃഭാഷയായ മലയാളം ഭാഷാധിനിവേശം എന്ന പ്രശ്നം വലിയതോതിൽ നേരിടുന്നു എന്ന "മലയാളഭാഷ നിലനിൽപ്പും പുരോഗതിയും’ എന്ന പുസ്തകത്തിലെ അഡ്വ. തങ്കച്ചന്‍റെ കണ്ടെത്തൽ തീർത്തും പ്രസക്തവും യാഥാർഥ്യവുമാണെന്നും ഭാഷാധിനിവേശ പ്രവണതകളെ ഫലപ്രദമായി ചെറുക്കാൻ കഴിഞ്ഞെങ്കിൽ മാത്രമേ മലയാളമെന്ന മാതൃഭാഷയെ നിലനിർത്താൻ കഴിയു എന്നും പ്രഫ.എം.എൻ. കാരശേരി പറഞ്ഞു. ബത്തേരി ടൗണ്‍ ഹാളിൽ അഡ്വ. തങ്കച്ചൻ രചിച്ച "മലയാളഭാഷ നിലനിൽപ്പും പുരോഗതിയും’ "പുരോസ്ഥിരചിന്ത ആശയവും പ്രയോഗവും’ എന്നീ രണ്ട് പുസ്തകങ്ങളുടെ പ്രകാശന ചടങ്ങിൽ മുഖ്യ പ്രഭാഷണം നടത്തുകയായിരുന്നു അദ്ദേഹം. മാതൃഭാഷയെ വിസ്മരിക്കുന്ന മലയാളി ഭാഷാപരമായി മേലാള കീഴാള മനോഭാവം വെച്ചുപുലർത്തുന്നു എന്നും അദ്ദേഹം പറഞ്ഞു. മിടുക്കരായ വിദ്യാർഥികൾക്കുപോലും മലയാളഭാഷ ശരിയായി എഴുതാനും വായിക്കാനും കഴിയാത്തത് ഏറെ നിരാശ ഉണ്ടാക്കുന്നു എന്നും പെറ്റമ്മയെ പോലെ പരിഗണിക്കപ്പെടാൻ യോഗ്യയായ മാതൃഭാഷയെ ഭാഷാധിധിനിവേശ പ്രവണതകളിൽനിന്നും നാശത്തിൽ നിന്നും ഫലപ്രദമായി ചെറുക്കുന്നതിനുള്ള പ്രവർത്തനങ്ങളിൽ "മലയാളഭാഷ നിലനിൽപ്പും പുരോഗതിയും’ എന്ന പുസ്തകം ശരിയായ വഴികാട്ടിയായി നിലനിൽക്കുന്നു എന്നും എം.എൻ. കാരശേരി കൂട്ടിച്ചേർത്തു. ഐസി ബാലകൃഷ്ണൻ എംഎൽഎ ചടങ്ങ് ഉദ്ഘാടനം ചെയ്തു. അബ്ദുൾ കലാം ആസാദ് കോഴിക്കോട്, ഡോ. മിനി ഉതുപ്പ് നൂൽപ്പുഴ എന്നിവരെ പരിപാടിയിൽ ആദരിച്ചു. അബ്ദുൾ കലാം ആസാദ് അധ്യക്ഷത വഹിച്ചു. അഡ്വ. തങ്കച്ചൻ, ജുനൈദ് കൈപ്പാണി, പ്രഫ. താരാ ഫിലിപ്പ്, ഫാ. സിജു കുര്യാക്കോസ്, കെ.ജെ. ദേവസ്യ, സി.പി. അഷ്റഫ് തോമസ് വടക്കനാട്, മുജീബ് റഹ്മാൻ അഞ്ചു കുന്ന് എന്നിവർ പ്രസംഗിച്ചു.

ദുരന്തബാധിതരുടെ പേരിൽ തോട്ടഭൂമി: മുസ്‌ലിം ലീഗ് ജനങ്ങളോട് മറുപടി പറയണം: സിപിഎം

കൽപ്പറ്റ: ദുരന്തബാധിതരുടെ പേരിൽ തോട്ടഭൂമി വാങ്ങി സാന്പത്തിക തട്ടിപ്പ് നടത്തിയ മുസ്‌ലിം ലീഗ് ജനങ്ങളോട് മറുപടി പറയണമെന്ന് സിപിഎം ജില്ലാ സെക്രട്ടറി കെ. റഫീഖ് വാർത്താസമ്മേളനത്തിൽ ആവശ്യപ്പെട്ടു. ദുരന്തബാധിതരേയും ജനങ്ങളെയും ലീഗ് ഒരുപോലെ വഞ്ചിച്ചു. ജനങ്ങളിൽനിന്ന് പിരിച്ച പണമാണ് ധൂർത്തടിക്കുന്നത്. തോട്ടഭൂമിയാണെന്ന് അറിഞ്ഞുകൊണ്ടാണ് ഉരുൾ ദുരന്തബാധിതർക്ക് വീട് നിർമിക്കാനായി തൃക്കൈപ്പറ്റയിൽ സ്ഥലം വാങ്ങിയത്. ടൗണ്‍ഷിപ് പ്രവൃത്തിക്ക് വേഗത പോരന്ന് പറഞ്ഞാണ് സർക്കാർ പദ്ധതിയിൽനിന്ന് ലീഗ് പിൻമാറിയത്. ടൗണ്‍ഷിപ്പിൽ വീട് നിർമാണം ദ്രുതഗതിയിൽ പുരോഗമിക്കുന്പോഴും ലീഗിന് സ്ഥലംപോലും ഉറപ്പിക്കാനായില്ല. അഞ്ചിരട്ടിവരെ വിലയ്ക്കാണ് തോട്ടഭൂമി വാങ്ങിയത്. വേറെ രണ്ട് സ്ഥലത്തിന് അഡ്വാൻസ് കൊടുത്തിരുന്നതായും ലീഗ് നേതാക്കൾതന്നെ പറയുന്നു. ഈ തുകയും നഷ്ടമായി. ജനങ്ങളുടെ പണമാണിതെല്ലാം. വാങ്ങിയത് തോട്ടഭൂമിയല്ലെന്ന കള്ളം ലീഗ് ആവർത്തിക്കുകയാണ്. സ്ഥലത്തിന്‍റെ രേഖകൾ പരിശോധിക്കുന്ന ആർക്കും തോട്ടഭൂമിയാണെന്ന് വ്യക്തമാകും. 2021 ഒക്ടോബർ 23ലെ സ്റ്റേറ്റ് ലാൻഡ് ബോർഡ് സെക്രട്ടറിയുടെ സർക്കുലർ ചൂണ്ടിക്കാണിച്ചാണ് ഭൂമി നൽകിയവരുടെ കൈവശം 15 ഏക്കറിൽ കൂടുതൽ ഇല്ലെന്നും അതിനാൽ ഭൂപരിഷ്കരണ നിയമത്തിന്‍റെ പരിധിയിൽ വരില്ലെന്നും നേതാക്കൾ പറയുന്നത്. ഇത് വസ്തുതാ വിരുദ്ധമാണ്. തോട്ടഭൂമിയിൽനിന്ന് ഒരേക്കർ വാങ്ങിയാലും ഭൂപരിഷ്കരണ നിയമപ്രകാരം അത് തോട്ടഭൂമിയായി നിലനിൽക്കും. ഇതുമറച്ചുവച്ചാണ് ലീഗ് നേതാക്കൾ ജനങ്ങളെ കബളിപ്പിക്കുന്നത്. വിൽപ്പന നടത്തിയ ഭൂമിക്ക് ഏതെങ്കിലും വിധത്തിൽ ഇളവ് ലഭിച്ചാൽ ആ പഴുത് ഉപയോഗിച്ച് അവശേഷിക്കുന്ന ഭൂമികൂടി തരം മാറ്റിയെടുക്കുന്നതിനുള്ള തന്ത്രമാണിത്. ഇവിടെ നിന്ന് ഏറെ മാറിയാണ് വാങ്ങിയ മറ്റുസ്ഥലങ്ങൾ. ദുരന്തബാധിതരുടെ പുനരധിവാസവും ആശങ്കകളുമൊന്നും ലീഗിന് പ്രശ്നമല്ല. എങ്ങനെ പണമുണ്ടാക്കാമെന്നതാണ് ചിന്ത. കോണ്‍ഗ്രസും യൂത്ത് കോണ്‍ഗ്രസും ഉരുൾബാധിതരുടെ പേരിൽ സമാഹരിച്ച കോടികൾ മുക്കി. എത്ര പിരിച്ചെന്നോ എന്ത് ചെയ്തെന്നോ പുറത്തുപറഞ്ഞിട്ടില്ല. ഇതും കൊടും വഞ്ചനയാണ്. ഈ നിലപാടുകൾ തിരുത്താൻ ലീഗും കോണ്‍ഗ്രസും യൂത്ത് കോണ്‍ഗ്രസും തയാറാകണമെന്നും റഫീഖ് പറഞ്ഞു. ജില്ലാ സെക്രട്ടേറിയറ്റ് അംഗങ്ങളായ വി.വി. ബേബി, എം. മധു എന്നിവരും വാർത്താസമ്മേളനത്തിൽ പങ്കെടുത്തു.

കാട്ടാന ആക്രമണത്തിൽ പ്രതിഷേധിച്ച് നാട്ടുകാർ ഓവാലിയിലെ ന്യുഹോപ്പിൽ സമരം നടത്തി

ഗൂഡല്ലൂർ: ഓവാലി പഞ്ചായത്തിലെ ന്യൂഹോപ്പിൽ തോട്ടം തൊഴിലാളിയായ മണിയെ കാട്ടാന കുത്തിക്കൊന്ന സംഭവത്തിൽ പ്രതിഷേധിച്ച് നാട്ടുകാർ ന്യുഹോപ്പിൽ റോഡ് ഉപരോധിച്ചു. ഇന്നലെ രാവിലെ പത്ത് മുതലാണ് സമരം ആരംഭിച്ചത്. മണിയുടെ മൃതദേഹം വിട്ടു നൽകാതെയാണ് സമരം നടത്തിയത്. ഗൂഡല്ലൂർ എംഎൽഎ അഡ്വ. പൊൻജയശീലൻ, ഇബ്നു, കേദീശ്വരൻ തുടങ്ങിയവരുടെ നേതൃത്വത്തിലാണ് സമരം നടത്തിയത്. സ്ത്രീ തൊഴിലാളികൾ ഉൾപ്പെടെയുള്ള നൂറുക്കണക്കിന് പേർ സമരത്തിൽ പങ്കെടുത്തു. അതേസമയം പോലീസും വനംവകുപ്പും സ്ഥലത്തെത്തി മൃതദേഹം ആശുപത്രിയിലേക്ക് മാറ്റാൻ ശ്രമിച്ചെങ്കിലും നാട്ടുകാർ അനുവദിച്ചില്ല. ആന ശല്യത്തിന് പരിഹാരം കണ്ടതിന് ശേഷമെ മൃതദേഹം വിട്ടുനൽകുവെന്ന് സമരക്കാർ അറിയിച്ചതോടെ ഗൂഡല്ലൂർ ഡിവൈഎസ്പി വസന്തകുമാർ, ഗൂഡല്ലൂർ ഡിഎഫ്ഒ വെങ്കിടേഷ് പ്രഭു എന്നിവരുടെ നേതൃത്വത്തിലുള്ള ഉദ്യോഗസ്ഥ സംഘം സ്ഥലത്തെത്തി നാട്ടുകാരുമായി ചർച്ച നടത്തി. കാട്ടാനയെ വനത്തിനുള്ളിലേക്ക് തുരത്തിയോടിക്കുമെന്നും കൂടുതൽ വനംവകുപ്പ് ജീവനക്കാരെ നിയോഗിച്ച് നിരീക്ഷണം ശക്തമാക്കുമെന്നും ആവശ്യമായ സ്ഥലങ്ങളിൽ തെരുവ് വിളിക്കുകൾ സ്ഥാപിക്കുമെന്നും ഉറപ്പ് നൽകിയതോടെ ഉച്ചയ്ക്ക് രണ്ട് മണിയോടെയാണ് സമരം അവസാനിപ്പിച്ച് മൃതദേഹം വിട്ടുനൽകാൻ സമരക്കാർ തയാറായത്. തോട്ടം തൊഴിലാളിയായ മണി രാവിലെ ന്യൂഹോപ്പ് എസ്റ്റേറ്റിലെ ഏലക്കാട്ടിൽ ജോലിക്ക് എത്തിയതായിരുന്നു. എസ്റ്റേറ്റിൽ നിന്ന് വിരമിച്ച ഇദ്ദേഹം ഇതേ തോട്ടത്തിൽ താത്കാലിക ജീവനക്കാരനായി ജോലി ചെയ്തു വരികയാണ്. വർഷങ്ങൾക്ക് മുന്പ് കേരളത്തിലെ ഷൊർണൂരിൽ നിന്ന് ഓവാലിയിൽ കുടിയേറിയതാണ് മണി. കൂടെയുണ്ടായിരുന്ന ആൾ ആനയെ കണ്ട് ഓടി രക്ഷപ്പെടുകയായിരുന്നു. മണിക്ക് ഓടാൻ പറ്റിയില്ല. ഇതേത്തുടർന്നാണ് ആനയുടെ മുന്പിൽ അകപ്പെട്ട് ജീവൻ നഷ്ടപ്പെട്ടത്.

യൂത്ത് കോണ്‍ഗ്രസ് പ്രഭാതഭേരി മുഴക്കി

കൽപ്പറ്റ: യൂത്ത് കോണ്‍ഗ്രസ് സ്ഥാപകദിനാഘോഷചത്തിന്‍റെ ഭാഗമായി മണ്ഡലം കമ്മിറ്റിയുടെ നേതൃത്വത്തിൽ ടൗണിൽ പതാക ഉയർത്തി. പ്രഭാതഭേരിയും ഭരണഘടനാപ്രതിജ്ഞയും നടത്തി. ജില്ലാ ജനറൽ സെക്രട്ടറി ഹർഷൽ കോന്നാടൻ, മണ്ഡലം പ്രസിഡന്‍റ് മുഹമ്മദ് ഫെബിൻ, പ്രതാപ് കൽപ്പറ്റ, മുബാരിഷ് ആയ്യാർ, അർജുൻദാസ്, ഇ. ഷബീർ, എം.വി. ഷനൂബ്, കെ.ബി. ഷൈജു, സി. ഷഫീഖ്, രഞ്ജിത്ത് ബേബി, സോനു എമിലി, സുവിത്ത് എമിലി, എൻ.കെ. വിഷ്ണു, എസ്. അരുണ്‍, ജംഷീദ് തുർക്കി, എം.വി. ജിഷാദ് എന്നിവർ നേതൃത്വം നൽകി.

വെള്ളമുണ്ട പഞ്ചായത്തിലെ തൊഴിലുറപ്പ് പദ്ധതി നിർവഹണം അന്വേഷിക്കണമെന്ന്

വെള്ളമുണ്ട: പഞ്ചായത്തിൽ കഴിഞ്ഞ സാന്പത്തികവർഷങ്ങളിൽ നടന്ന തൊഴിലുറപ്പ് പദ്ധതി നിർവഹണം സമഗ്രാന്വേഷണത്തിന് വിധേയമാക്കണമെന്ന് കോണ്‍ഗ്രസ് മണ്ഡലം കമ്മിറ്റി ആവശ്യപ്പെട്ടു. തൊണ്ടർനാട് പഞ്ചായത്തിൽ മെറ്റീരിയൽ കോസ്റ്റ് ഉപയോഗിച്ചു നടത്തിയ തൊഴിലുറപ്പ് പദ്ധതികളിൽ രണ്ട് കോടിയിലേറെ രൂപയുടെ തട്ടിപ്പ് നടന്നതായാണ് കണ്ടെത്തൽ. സമാന പദ്ധതികൾ വെള്ളമുണ്ട പഞ്ചായത്തിലും നടപ്പാക്കിയിട്ടുണ്ടെന്ന് യോഗം ചൂണ്ടിക്കാട്ടി. പ്രസിഡന്‍റ് ഷാജി ജേക്കബ് അധ്യക്ഷത വഹിച്ചു. ചിന്നമ്മ ജോസ്, ടി.കെ. മമ്മൂട്ടി, എൻ.കെ. പുഷ്പലത, എം.എം. സാജു, സതീശൻ പാലിയാണ, പി. പ്രകാശൻ, ഷാജി പനമട, മുനീർ തരുവണ, ചന്തു പുല്ലോറ, ടി.സി. തങ്കച്ചൻ, ഐ.സി. തോമസ് എന്നിവർ പ്രസംഗിച്ചു.

ഹെഡ് പോസ്റ്റ് ഓഫീസിലേക്ക് മാർച്ച് നടത്തി

കൽപ്പറ്റ: രാജ്യത്ത് തെരഞ്ഞെടുപ്പ് കമ്മീഷനെ കൂട്ടുപിടിച്ച് തെരഞ്ഞെടുപ്പുകൾ അട്ടിമറിക്കുന്ന ബിജെപി നിലപാടിനെതിരേ പ്രതിഷേധിച്ച് തെരഞ്ഞെടുപ്പ് കമ്മീഷൻ ഓഫീസിലേക്ക് നടത്തിയ മാർച്ചിൽ പ്രതിപക്ഷ നേതാവ് രാഹുൽ ഗാന്ധി എംപിയെയും പ്രിയങ്ക ഗാന്ധി എംപി ഉൾപ്പെടെയുള്ള ഇന്ത്യാസഖ്യം നേതാക്കളെയും അറസ്റ്റ് ചെയ്ത നടപടിയിൽ പ്രതിഷേധിച്ച് കൽപ്പറ്റ മണ്ഡലം കോണ്‍ഗ്രസ് കമ്മിറ്റിയുടെ നേതൃത്വത്തിൽ കൽപ്പറ്റ ഹെഡ് പോസ്റ്റ് ഓഫീസിലേക്ക് മാർച്ച് നടത്തി. കെപിസിസി അംഗം പി.പി. ആലി മാർച്ച് ഉദ്ഘാടനം ചെയ്തു. മണ്ഡലം ഗിരീഷ് കൽപ്പറ്റ അധ്യക്ഷത വഹിച്ചു. അഡ്വ.ടി.ജെ. ഐസക്, കെ.കെ. രാജേന്ദ്രൻ, ഹർഷൽ കോന്നാടൻ, എസ്. മണി, ഡിന്‍റോ ജോസ്, ആയിഷ പള്ളിയാൽ, പി.കെ. മുരളി, മുഹമ്മദ് ഫെബിൻ, സെബാസ്റ്റ്യൻ കൽപ്പറ്റ തുടങ്ങിയവർ പ്രസംഗിച്ചു.

തെരഞ്ഞെടുപ്പ് അട്ടിമറി: കോണ്‍ഗ്രസ് പ്രകടനം നടത്തി

കൽപ്പറ്റ: രാജ്യത്തിന്‍റെ ഭരണഘടനക്ക് പുല്ലുവില കൽപ്പിച്ച്, ബിജെപിക്ക് വേണ്ടി തെരഞ്ഞെടുപ്പുകൾ അട്ടിമറിക്കാൻ കൂട്ടുനിൽക്കുന്ന തെരഞ്ഞെടുപ്പ് കമ്മീഷന്‍റെ നടപടിയിൽ പ്രതിഷേധിച്ചും കോടിക്കണക്കിന് കള്ളവോട്ടർമാരെ തിരുകിക്കയറ്റി ജയിച്ച മോദി സർക്കാർ രാജിവയ്ക്കണമെന്നും ആവശ്യപ്പെട്ട് ജില്ലാകോണ്‍ഗ്രസ് കമ്മിറ്റിയുടെ നേതൃത്വത്തിൽ കൽപ്പറ്റ ടൗണിൽ പ്രതിഷേധപ്രകടനം നടത്തി. ഡിസിസി പ്രസിഡന്‍റ് എൻ.ഡി. അപ്പച്ചൻ, പി.കെ. ജയലക്ഷ്മി, പി.പി. ആലി, ടി.ജെ. ഐസക്ക്, എൻ.കെ. വർഗീസ്, ഒ.വി. അപ്പച്ചൻ, എം.എ. ജോസഫ്, അഡ്വ. രാജേഷ് കുമാർ, നിസി അഹമ്മദ്, ഒ.ആർ. രഘു, കമ്മന മോഹനൻ, ബിനു തോമസ് തുടങ്ങിയ നിരവധി നേതാക്കൾ പ്രകടനത്തിൽ അണിനിരന്നു.

കലോത്സവവും കുടുംബസംഗമവും നടത്തി

പുൽപ്പള്ളി: ഭിന്നശേഷിക്കാരായ കുട്ടികളുടെ കലോത്സവവും കുടുംബ സംഗമവും പഞ്ചായത്തിന്‍റെ നേതൃത്വത്തിൽ നടത്തി. പഞ്ചായത്ത് കാര്യാലയത്തിലെ രാജീവ്ഗാന്ധി ഓഡിറ്റോറിയത്തിൽ പ്രസിഡന്‍റ് ടി.എസ്. ദിലീപ്കുമാർ ഉദ്ഘാടനം ചെയ്തു. വൈസ് പ്രസിഡന്‍റ് ശോഭന സുകു അധ്യക്ഷത വഹിച്ചു. ജില്ലാ പഞ്ചായത്തംഗങ്ങളായ ഉഷ തന്പി, ബിന്ദു പ്രകാശ്, ബീന ജോസ്, എ.എൻ. സുശീല, ബ്ലോക്ക് പഞ്ചായത്തംഗം മേഴ്സി ബെന്നി, പഞ്ചായത്ത് അംഗങ്ങളായ എം.ടി. കരുണാകരൻ, ശ്രീദേവി മുല്ലയ്ക്കൽ, ജോളി നരിതൂക്കിൽ, മണി പാന്പനാൽ, അനിൽ സി. കുമാർ, സിസ്റ്റർ ആൻസീന, എം.വി. റെജീന എന്നിവർ പ്രസംഗിച്ചു.

ലഹരിവിരുദ്ധ ബോധവത്കരണം നൽകി

തരിയോട്: ഗവ.ഹയർ സെക്കൻഡറി സ്കൂളിൽ എക്സൈസ് വിമുക്ത മിഷൻ, എസ്പിസി യൂണിറ്റ്, സോഷ്യൽ സർവീസ് സ്കീം, വിമുക്തി ക്ലബ് എന്നിവ സംയുക്തമായി ലഹരിവിരുദ്ധ ബോധവത്കരണം സംഘടിപ്പിച്ചു. ഹെഡ്മിസ്ട്രസ് ഉഷ കുനിയിൽ അധ്യക്ഷത വഹിച്ചു. അധ്യാപകരായ സി.പി. മറിയം മഹ്മൂദ്, അഞ്ജലി മോഹൻ, വിദ്യാർഥി പ്രതിനിധികളായ ജി.പി. അശ്വനി, കെ. കാർത്തിക് എന്നിവർ പ്രസംഗിച്ചു. വിമുക്തി മിഷൻ ജില്ലാ കോഓർഡിനേറ്റർ എൻ.സി. സജിത്ത്കുമാർ അച്ചൂരാനം ക്ലാസ് നയിച്ചു. വിദ്യാർഥികൾ ലഹരിവിരുദ്ധ പ്ലക്കാർഡുകൾ നിർമിച്ചു. സിപിഒ ബിന്ദു വർഗീസ് ,സി.സി. ഷിജി പ്രസംഗിച്ചു.

മേയാൻവിട്ട പശുക്കിടാവിനെ കടുവ കൊന്നു

പുൽപ്പള്ളി: കുറുവാ ദ്വീപിനടുത്ത് ചെറിയമല രാഘവന്‍റെ മൂന്നു വയസ് പ്രായമുള്ള പശുക്കിടാവിനെയാണ് കടുവ കൊലപ്പെടുത്തിയത്. ഇന്നലെ വൈകുന്നേരം ചെറിയമല വനമേഖലയിലാണ് സംഭവം. പ്രദേശത്ത് കടുവ ശല്യം രൂക്ഷമാണ്. വനപാലകർ സ്ഥലത്തെത്തി പ്രദേശത്ത് നിരീഷണ കാമറകൾ സ്ഥാപിച്ചു.

വെങ്ങപ്പള്ളിതെക്കുംതറ റോഡ് പ്രവൃത്തി 2.44 കോടിക്ക് റീ ടെൻഡർ ചെയ്തു

കൽപ്പറ്റ: വെങ്ങപ്പള്ളി, വാവാടി, ചൂര്യാറ്റ, തെക്കുംതറ റോഡ് പ്രവൃത്തി പൂർത്തിയാക്കി ഗതാഗതയോഗ്യമാക്കാൻ ടെൻഡർ ക്ഷണിച്ചതായി വെങ്ങപ്പള്ളി ഗ്രാമപഞ്ചായത്ത് പ്രസിഡന്‍റ് ഇ.കെ. രേണുക അറിയിച്ചു. റോഡ് പൂർത്തീകരണത്തിന് 2.44 കോടി രൂപയുടെ പ്രവർത്തനങ്ങൾക്കാണ് റീ ടെൻഡർ ചെയ്തത്. റോഡ് നിർമാണവുമായി ബന്ധപ്പെട്ട് പ്രചരിക്കുന്ന വാർത്തകൾ അടിസ്ഥാനരഹിതമാണെന്നും പ്രസിഡന്‍റ് അറിയിച്ചു. 2021 സെപ്റ്റംബർ 16നാണ് ഗ്രാമപ്പഞ്ചായത്ത് ഭരണസമിതി റോഡ് പ്രവൃത്തി പ്രധാൻമന്ത്രി ഗ്രാമീണ സഡക് യോജന (പിഎംജിഎസ് വെെ) പദ്ധതിക്കായി വിട്ടുനൽകിയത്. 2023 ഡിസംബർ 31നകം റോഡിന്‍റെ പണിപൂർത്തീകരിച്ച് അഞ്ച് വർഷത്തെ അറ്റകുറ്റപ്രവർത്തികൾക്ക് ശേഷം റോഡ് ഗ്രാമപ്പഞ്ചായത്തിന് തിരികെ ഏൽപ്പിക്കണമെന്നതായിരുന്നു വ്യവസ്ഥ. എന്നാൽ ഇതുവരെ പണി പൂർത്തീകരിക്കാത്തതിനാൽ കരാറുകാരനെ ടെർമിനേറ്റ് ചെയ്തു. ഏപ്രിൽ നാലിന് നടന്ന പിഎംജിഎസ് വെെ പ്രോഗ്രാം മാനേജ്മെന്‍റ് കമ്മിറ്റിയിൽ വെങ്ങപ്പള്ളി ഗ്രാമപഞ്ചായത്ത് വൈസ് പ്രസിഡന്‍റ് പി.എം. നാസർ റോഡ് തിരികെ ഏൽപ്പിക്കാൻ നിർദേശിക്കുകയായിരുന്നു. ഇതേത്തുടർന്ന് ജില്ലാ കളക്ടറുടെ നിർദേശാടിസ്ഥാനത്തിൽ റീ ടെൻഡർ നടപടികൾ ആരംഭിച്ചു.

ഇഞ്ചി കൃഷി നാശത്തിന് അടിയന്തര ധനസഹായം നൽകണം: ആം ആദ്മി പാർട്ടി

പുൽപ്പള്ളി: ജില്ലയിലെ ഇഞ്ചി കൃഷി ഫംഗസ് ബാധിച്ച് നശിച്ച സാഹചര്യത്തിൽ ദുരിതം അനുഭവിക്കുന്ന കർഷകർക്ക് അടിയന്തരമായി നഷ്ടപരിഹാരം നൽകണമെന്ന് ആം ആദ്മി പാർട്ടി മുള്ളൻകൊല്ലി പഞ്ചായത്ത് കമ്മിറ്റി ആവശ്യപ്പെട്ടു. കുരുമുളക് കൃഷി നശിച്ച സാഹചര്യത്തിൽ ബദൽ ആശ്രയമായി കണ്ട് ഇഞ്ചി കൃഷി നടത്തിയ കർഷകർ ഫംഗസ് ബാധയെ തുടർന്ന് കൃഷി പൂർണമായി നശിച്ച് ദുരിതത്തിലാണ്. ലക്ഷകണക്കിന് രൂപ ബാങ്കിൽ നിന്ന് ലോണ്‍ എടുത്തു കൃഷി ചെയ്ത കർഷകർ ഇനിയെന്ത് ചെയ്യുമെന്നറിയാത്ത അവസ്ഥയാണ്. വലിയ വില കൊടുത്ത് കീടനാശിനികൾ വാങ്ങി തളിച്ചിട്ടും യാതൊരു ഫലവും ഉണ്ടായിട്ടില്ല. കർഷകർക്ക് ആശ്വാസമാകേണ്ട കൃഷി വകുപ്പ് ഒരു പ്രതിരോധ മാർഗവും നിർദേശിക്കാൻ സാധിക്കാത്ത ദയനീയ സ്ഥിതിയിലാണ്. കൃഷി നാശം സംഭവിച്ച കർഷകർക്ക് അടിയന്തര ധനസഹായം നൽകാൻ വേണ്ട നടപടികൾ സർക്കാർ സ്വീകരിക്കണമെന്ന് ആം ആദ്മി പാർട്ടി മുള്ളൻകൊല്ലി പഞ്ചായത്ത് കമ്മിറ്റി ആവശ്യപ്പെട്ടു. യോഗം ആം ആദ്മി ബത്തേരി മണ്ഡലം പ്രസിഡന്‍റ് ലിയോ കൊല്ലവേലിൽ ഉദ്ഘാടനം ചെയ്തു. മുള്ളൻകൊല്ലി കമ്മിറ്റി പ്രസിഡന്‍റ് കെ.സി. വർഗീസ് അധ്യക്ഷത വഹിച്ചു. സജി പനച്ചകത്തിൽ, ആന്‍റണി പൂത്തോട്ടയിൽ, ഉലഹന്നാൻ മേമാട്ട്, ഷാജി വണ്ടന്നൂർ, സാബു ഏബാഹാം, തോമസ് ജോർജ് എന്നിവർ പ്രസംഗിച്ചു.

ഭക്ഷ്യവിപണന ചന്തയൊരുക്കി കോട്ടത്തറ സിഡിഎസ്

കോട്ടത്തറ: സിഡിഎസിന്‍റെ നേതൃത്വത്തിൽ എഫ്എൻഎച്ച്ഡബ്ല്യു (ഫുഡ്, ന്യുട്രീഷൻ, ഹെൽത്ത് ആൻഡ് വാഷ്) അഗ്രിയുടെ ഭാഗമായി കർക്കടക ഭക്ഷ്യവിപണന ചന്ത സംഘടിപ്പിച്ചു. കർക്കടക ഔഷധക്കഞ്ഞി, പത്തില തോരൻ, പയറു തോരൻ, ചെറു ധാന്യ വിഭവങ്ങൾ, വിവിധതരം താള് കറികൾ എന്നിവയുടെ പ്രദർശന വിതരണ വിപണന ചന്ത കോട്ടത്തറ ഗ്രാമപഞ്ചായത്ത് പ്രസിഡന്‍റ് പി.പി. റനീഷ് ഉദ്ഘാടനം ചെയ്തു. സിഡിഎസ് ചെയർപേഴ്സണ്‍ ശാന്ത ബാലകൃഷ്ണൻ അധ്യക്ഷത വഹിച്ചു. വാർഡ് അംഗം സംഗീത് സോമൻ, ഐസിഡിഎസ് സൂപ്പർവൈസർ ഉമ, സിഡിഎസ് വൈസ് ചെയർപേഴ്സണ്‍ ജനി, ഗ്രാമപഞ്ചായത്ത് സെക്രട്ടറി മിനി, അസിസ്റ്റന്‍റ് സെക്രട്ടറി പ്രിൻസ്, എഫ്എൻഎച്ച്ഡബ്ല്യു റിസോഴ്സ് പേഴ്സണ്‍ നീതിമതി, തുടങ്ങിയർ പങ്കെടുത്തു.

ഹൈമാസ്റ്റ് ലൈറ്റ് സ്വിച്ച് ഓണ്‍ ചെയ്തു

മീനങ്ങാടി: ഗവ.ഹയർ സെക്കൻഡറി സ്കൂൾ കവാടത്തിലെ ഹൈമാസ്റ്റ് ലൈറ്റ് ഐ.സി. ബാലകൃഷ്ണൻ എംഎൽഎ സ്വിച്ച് ഓണ്‍ ചെയ്തു. പഞ്ചായത്ത് പ്രസിഡന്‍റ് കെ.ഇ. വിനയൻ അധ്യക്ഷത വഹിച്ചു. ജില്ലാ പഞ്ചായത്ത് ഡിവിഷൻ അംഗം സിന്ധു ശ്രീധരൻ, പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർമാൻ ബേബി വർഗീസ്, പഞ്ചായത്ത് അംഗങ്ങളായ ടി.പി. ഷിജു, നാസർ പാലക്കാമൂല, പ്രിൻസിപ്പൽ ഷിവി കൃഷ്ണൻ, ഹെഡ്മാസ്റ്റർ ഡോ.കെ.ടി. അഷ്റഫ്, എസ്. ഹാജിസ്, കെ.എ. അലിയാർ, മനോജ് ചന്ദനക്കാവ്, വിൻസി, ഡോ.ബാവ കെ. പാലുകുന്ന്, പി.ഒ. സുമിത, പി.കെ. സരിത എന്നിവർ പ്രസംഗിച്ചു. ഐ.സി. ബാലകൃഷ്ണൻ എംഎൽഎയുടെ ആസ്തി വികസന നിധിയിൽനിന്നു അനുവദിച്ച തുക വിനിയോഗിച്ചാണ് ലൈറ്റ് സ്ഥാപിച്ചത്.

ജോർജ് ഫ്രാൻസിസ് അനുസ്മരണം

കൽപ്പറ്റ: കേരള പോലീസ് അസോസിയേഷൻ സ്ഥാപക ജനറൽ സെക്രട്ടറി ജോർജ് ഫ്രാൻസിസിന്‍റെ മൂന്നാം ചരമവാർഷികം കേരള പോലീസ് ഓഫീസേഴ്സ് അസോസിയേഷൻ, കേരള പോലീസ് അസോസിയേഷൻ, കേരള പോലീസ് പെൻഷനേഴ്സ് അസോസിയേഷൻ എന്നിവയുടെ ജില്ലാ കമ്മിറ്റികൾ സംയുക്തമായി ആചരിച്ചു. ജില്ലാ പോലീസ് സഹകരണ സംഘം ഹാളിൽ പി.കെ. അലവിക്കുട്ടി ഉദ്ഘാടനം ചെയ്തു. ബിപിൻ സണ്ണി അധ്യക്ഷത വഹിച്ചു. കെ.എം. മുഹമ്മദ് ഷദീർ അനുസ്മരണ പ്രമേയം അവതരിപ്പിച്ചു. സണ്ണി ജോസഫ്, പി. ബാലചന്ദ്രൻ, പി. സുകുമാരൻ, കെ.ആർ. രഘുനാഥൻ, കെ.എം. ശശിധരൻ, പി.സി. സജീവ്, പി.എസ്. അജീഷ് എന്നിവർ പ്രസംഗിച്ചു.

ആദിവാസി ദിനാഘോഷം സംഘടിപ്പിച്ചു

വെള്ളമുണ്ട: ജില്ലാ പോലീസിന്‍റെ നേതൃത്വത്തിൽ ചെറുകര റിനൈസൻസ് ലൈബ്രറിയിൽ ലോക ആദിവാസി ദിനം ആഘോഷിച്ചു. ജില്ലാ പോലീസ് മേധാവി തപോഷ് ബസുമതാരി ഉദ്ഘാടനം ചെയ്തു. ഗോത്രജനതയുടെ എന്താവശ്യത്തിനും പോലീസ് കൂടെ ഉണ്ടാകുമെന്ന് അദ്ദേഹം പറഞ്ഞു. സ്വാതന്ത്ര്യപ്പോരാട്ടത്തിലടക്കം പങ്കാളികളായി ചരിത്രത്തിൽ ഇടംനേടിയവരാണ് കേരളത്തിലെ ആദിവാസികളെന്ന് അദ്ദേഹം അനുസ്മരിച്ചു. മാനന്തവാടി ഡിവൈഎസ്പി വി.കെ. വിശ്വംഭരൻ അധ്യക്ഷത വഹിച്ചു. ജനമൈത്രി ജില്ലാ അസിസ്റ്റന്‍റ് നോഡൽ ഓഫീസർ കെ.എം. ശശിധരൻ, റിനൈസൻസ് ലൈബ്രറി പ്രസിഡന്‍റ് പ്രേമരാജ് ചെറുകര, ജൂണിയർ എസ്ഐ ഷമീർ, കേളു അത്തികൊല്ലി എന്നിവർ പ്രസംഗിച്ചു. വിവിധ മേഖലകളിൽ കഴിവ് തെളിയിച്ചവരെ ആദരിച്ചു. യുവജനങ്ങൾക്കും വിദ്യാർഥികൾക്കും പഠനോപകരണങ്ങൾ വിതരണം ചെയ്തു. വയോധികർക്കും രോഗികൾക്കും കന്പിളി, പുതപ്പ്, കട്ടിൽ എന്നിവ നൽകി. അധ്യാപകനും മോട്ടിവേഷൻ സ്പീക്കറുമായ ദീപു ആന്‍റണി ക്ലാസെടുത്തു.

സണ്‍ഡേ സ്കൂൾ അധ്യാപക പരിശീലനം

മീനങ്ങാടി: യാക്കോബായ സുറിയാനി സണ്‍ഡേ സ്കൂൾ അസോസിയേഷൻ അധ്യാപക പരിശീലന ക്യാന്പ് സെന്‍റ് പീറ്റേഴ്സ് ആൻഡ് സെന്‍റ് പോൾസ് കത്തീഡ്രലിൽ നടത്തി. അസോസിയേഷൻ വൈസ് പ്രസിഡന്‍റ് ഫാ. ജയിംസ് കുര്യൻ പതാക ഉയർത്തി. ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ ഉദ്ഘാടനം ചെയ്തു. മലബാർ ഭദ്രാസനാധിപൻ ഡോ. ഗീവർഗീസ് മോർ സ്തേഫാനോസ് അധ്യക്ഷത വഹിച്ചു. വികാരി ഫാ. ബിജുമോൻ മുഖ്യപ്രഭാഷണം നടത്തി. ലിയോ ജോണി, ബെന്നി വെട്ടിക്കാട്ടിൽ, എൽബി വർഗീസ്, എം.ജെ. ഷാജി, എം.കെ. ബിജു എന്നിവർ ക്ലാസുകൾ നയിച്ചു. ഫാ. റെജി പോൾ ധ്യാനശുശ്രൂഷയ്ക്ക് നേതൃത്വം നൽകി. ജനറൽ സെക്രട്ടറി പി.വി. ഏലിയാസ്, ട്രഷറർ എൽദോ ഐസക്, സെക്രട്ടറിമാരായ ടി.വി. സജിഷ്, എൻ.എ. ജോസ്, പി.വി. പൗലോസ്, എം.കെ. വർഗീസ്, റോയി തോമസ്, ഭദ്രാസന വൈസ് പ്രസിഡന്‍റ് ഫാ. ബേബി ഓലിക്കൽ, ഡയറക്ടർ അനിൽ ജേക്കബ്, സെക്രട്ടറി ജോണ്‍ ബേബി. കേന്ദ്ര കമ്മിറ്റി അംഗങ്ങളായ ഇ.പി. ബേബി, പി.എം. രാജു, പള്ളിക്കമ്മിറ്റി ഭാരവാഹികളായ ടി.കെ. തോമസ്, പി.എം, സാബു, ജിതിൻ കാരുകുഴി, ടി.എം. എൽദോ, പി.വൈ. എൽദോ തുടങ്ങിയവർ നേതൃത്വം നൽകി. 300 പേർ ക്യാന്പിൽ പങ്കെടുത്തു.

കാവിവത്കരിക്കാൻ അനുവദിക്കില്ല: എസ്എഫ്സിടിഎസ്എ

പുൽപ്പള്ളി: കേരളത്തിലെ ഉന്നതവിദ്യാഭ്യാസ മേഖലയെ തകർക്കാനും കാവിവൽക്കരിക്കാനും അനുവദിക്കില്ലെന്ന് പുൽപ്പള്ളിയിൽ ചേർന്ന സെൽഫ് ഫിനാൻസിംഗ് കോളജ് ടീച്ചേഴ്സ് ആൻഡ് സ്റ്റാഫ് അസോസിയേഷൻ ജില്ലാ കണ്‍വൻഷൻ പ്രമേയത്തിലൂടെ അറിയിച്ചു. സർവകലാശാലകളിൽ സിൻഡിക്കേറ്റിനെ നോക്കുകുത്തിയാക്കി ആർഎസ്എസ് അജണ്ട നടപ്പാക്കാൻ ഗവർണറും വൈസ് ചാൻസിലർമാരും ശ്രമിക്കുകയാണ്. ഇതിനെ ചെറുത്തു തോൽപ്പിക്കും. 16ന് എറണാകുളത്ത് ചേരുന്ന സംസ്ഥാന കണ്‍വെൻഷൻ വിജയിപ്പിക്കാനും ജില്ലയിലെ മുഴുവൻ സ്വാശ്രയ കോളജ് ജീവനക്കാരെയും സംഘടനയുടെ അംഗങ്ങളാക്കാനും കണ്‍വൻഷൻ തീരുമാനിച്ചു. പുൽപ്പള്ളി അഴീക്കോടൻ മന്ദിരത്തിൽ നടന്ന കണ്‍വൻഷൻ ഡിവൈഎഫ്ഐ ജില്ലാ സെക്രട്ടറി കെ.എം. ഫ്രാൻസിസ് ഉദ്ഘാടനം ചെയ്തു. എൻ.കെ. ആദർശ് അധ്യക്ഷത വഹിച്ചു. കെ.എ. സാനിബ്, പി.എ. മുഹമ്മദ് എന്നിവർ പ്രസംഗിച്ചു. ഭാരവാഹികളായി സെക്രട്ടറി അജിത് കെ. ഗോപാൽ, പ്രസിഡന്‍റ് എൻ.കെ. ആദർശ്, ട്രഷറർ കെ.എ. സാനിബ് എന്നിവരെ തെരഞ്ഞെടുത്തു.

പരിഷ്കരിച്ച ഉച്ചഭക്ഷണം: ജില്ലയിൽ 79,158 ഗുണഭോക്താക്കൾ

കൽപ്പറ്റ: ജില്ലയിൽ പരിഷ്കരിച്ച ഉച്ചഭക്ഷണം ലഭിക്കുന്നത് 79,158 വിദ്യാർഥികൾക്ക്. 289 സ്കൂളുകളിൽ പ്രീ പ്രൈമറി മുതൽ എട്ടു വരെ ക്ലാസുകളിലാണ് ഇത്രയും ഉച്ചഭക്ഷണ ഗുണഭോക്താക്കൾ. പരിഷ്കരിച്ച ഉച്ചഭക്ഷണ മെനുവിൽ തൃപ്തരാണെന്നു മുണ്ടേരി ഗവ.സ്കൂളിലെ വിദ്യാർഥികളും വിഭവവൈവിധ്യം കുട്ടികളിൽ ഉച്ചഭക്ഷണത്തോടു താത്പര്യം വർധിപ്പിച്ചതായി അധ്യാപകരും പറയുന്നു. എല്ലാ കുട്ടികൾക്കും ആഴ്ചയിൽ ഒരു പുഴുങ്ങിയ മുട്ടയും രണ്ടുപ്രാവശ്യം 150 മില്ലി ലിറ്റർ തിളപ്പിച്ച പാലും നൽകുന്നുണ്ട്. മുട്ട കഴിക്കാത്ത കുട്ടികൾക്ക് നേന്ത്രപ്പഴം നൽകും.

വിദ്യാർഥികളെ വ്യാപാരി കോണ്‍ഗ്രസ് അനുമോദിച്ചു

കൽപ്പറ്റ: മുട്ടിൽ പരിയാരം പ്രദേശത്ത് എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയവരെ ഇന്ത്യൻ നാഷണൽ വ്യാപാരി വ്യവസായി കോണ്‍ഗ്രസ് ജില്ലാ കമ്മിറ്റി അനുമോദിച്ചു. ഇതിന് പരിയാരത്ത് സംഘടിപ്പിച്ച ചടങ്ങ് ഡിസിസി പ്രസിഡന്‍റ് എൻ.ഡി. അപ്പച്ചൻ ഉദ്ഘാടനം ചെയ്തു. മെമന്‍റോ വിതരണം അദ്ദേഹം നിർവഹിച്ചു. വ്യാപാരി കോണ്‍ഗ്രസ് ജില്ലാ പ്രസിഡന്‍റ് ഫൈസൽ പാപ്പിന അധ്യക്ഷത വഹിച്ചു. കോണ്‍ഗ്രസ് മുട്ടിൽ മണ്ഡലം പ്രസിഡന്‍റ് ജോയ് തൊട്ടിത്തറ, ഷിജു ഗോപാലൻ, ആർ. സുനിൽ, പി. പദ്മനാഭൻ, എസ്. സുധീഷ്, കെ. അബ്ദുറഹ്മാൻ, കെ. കുഞ്ഞബ്ദുള്ള, എം. മണി, എം. ഡാനി എന്നിവർ പ്രസംഗിച്ചു.

എൽസ്റ്റൻ എസ്റ്റേറ്റ് തൊഴിലാളികൾക്ക് ആനുകൂല്യം നൽകണം: ഐഎൻടിയുസി

കൽപ്പറ്റ: പുഞ്ചിരിമട്ടം ഉരുൾ ദുരന്തബാധിത കുടുംബങ്ങളുടെ പുനരധിവാസത്തിന് കൽപ്പറ്റയ്ക്കു സമീരം സർക്കാർ ഏറ്റെടുത്ത എൽസ്റ്റൻ എസ്റ്റേറ്റിലെ തൊഴിലാളികൾക്ക് ആനുകൂല്യങ്ങൾ അടിയന്തരമായി നൽകണമെന്ന് ഐഎൻടിയുസി മേഖല കണ്‍വൻഷൻ സർക്കാരിനോട് ആവശ്യപ്പെട്ടു. എസ്റ്റേറ്റിന്‍റെ ഭാഗം ടൗണ്‍ഷിപ്പിനുവേണ്ടി ഏറ്റെടുത്തത് തൊഴിലാളികളുടെ പ്രശ്നങ്ങൾ പരിഹരിക്കാതെയാണ്. വിരമിച്ചവരടക്കം തൊഴിലാളികൾക്ക് ആനുകൂല്യങ്ങൾ കിട്ടാനുണ്ട്. തൊഴിൽ നഷ്ടമായ തൊഴിലാളികളും കുടുംബാംഗങ്ങളും ദുരിതത്തിലാണ്. തോട്ടം ഏറ്റെടുത്ത സാഹചര്യത്തിൽ തൊഴിലാളികൾക്ക് ആനുകൂല്യങ്ങൾ ലഭ്യമാക്കേണ്ടത് സർക്കാരിന്‍റെ ഉത്തരവാദിത്വമാണ്. എന്നാൽ സർക്കാരും തോട്ടം മാനേജ്മെന്‍റും പരസ്പരം പഴിചാരി തൊഴിലാളികളെ കൈയൊഴിയുകയാണ്. ടൗണ്‍ഷിപ്പിന് പ്രവൃത്തി നടക്കുന്ന ഭൂമിയിലെത്തി കേമത്തം പറയുകയും റീൽസ് എടുക്കുകയും ചെയ്യുന്ന ജനപ്രതിനിധികളടക്കമുള്ളവർ തൊഴിലാളികളുടെ ദുരിതം കണ്ടില്ലെന്നു നടിക്കുകയാണ്. ടൗണ്‍ഷിപ്പ് നിർമാണം നടക്കുന്ന ഭൂമി കൈയേറി തൊഴിലാളികൾ അവകാശസമരം നടത്തുന്ന സാഹചര്യം സർക്കാർ ഒഴിവാക്കണമെന്നും കണ്‍വൻഷൻ ആവശ്യപ്പെട്ടു. ജില്ലാ പ്രസിഡന്‍റ് പി.പി. ആലി ഉദ്ഘാടനം ചെയ്തു. മേഖല പ്രസിഡന്‍റ് കെ.കെ. രാജേന്ദ്രൻ അധ്യക്ഷത വഹിച്ചു. ബി. സുരേഷ്ബാബു, സി. ജയപ്രസാദ്, എൻ.കെ. ജ്യോതിഷ്കുമാർ, ഗിരീഷ് കൽപ്പറ്റ, മോഹൻദാസ് കോട്ടക്കൊല്ലി, നജീബ് പിണങ്ങോട്, ആർ. ഉണ്ണിക്കൃഷ്ണൻ, താരിഖ് കടവൻ, ഹർഷൽ കോന്നാടൻ, കെ. അജിത, ആയിഷ പള്ളിയാൽ, ആർ. രാമചന്ദ്രൻ, സി.സി. തങ്കച്ചൻ, എം. ഉണ്ണിക്കൃഷ്ണൻ, പി.എം. ജോസ്, തങ്കച്ചൻ പടിഞ്ഞാറത്തറ എന്നിവർ പ്രസംഗിച്ചു.

ശാസ്ത്ര പ്രചാരണം: സയൻസ് ഫിലിം ക്ലബ് രൂപീകരിച്ചു

കൽപ്പറ്റ: കേരള ശാസ്ത്ര സാഹിത്യ പരിഷത്ത് ജില്ലാ കമ്മിറ്റിയുടെ ആഭിമുഖ്യത്തിൽ "ലെൻസ്’ എന്ന പേരിൽ സയൻസ് ഫിലിം ക്ലബ് രൂപീകരിച്ചു. പരിഷത്ത് ജില്ലാ പ്രസിഡന്‍റ് പി. അനിൽകുമാർ, ശാസ്ത്രാവബോധസമിതി കണ്‍വീനർ ശാലിനി തങ്കച്ചൻ എന്നിവർ ചേർന്ന് ലോഗോ പ്രകാശനം ചെയ്തു. യുദ്ധവിരുദ്ധ ഹ്രസ്വചിത്രം പ്രദർശിപ്പിച്ചു. പരിഷത്ത് ജില്ലാ സെക്രട്ടറി കെ.പി. സുനിൽകുമാർ, ട്രഷറർ ടി.പി. സന്തോഷ്, കേന്ദ്ര നിർവാഹകസമിതിയംഗവും ഫിലിം ക്ലബ് കണ്‍വീനറുമായ കെ.എ. അഭിജിത്ത്, ജില്ലാ വൈസ് പ്രസിഡന്‍റ് ഇ.ജി. ചന്ദ്രലേഖ, ജോയിന്‍റ് സെക്രട്ടറിമാരായ എ. ജനാർദനൻ, കെ.ആർ. ചിത്രാവതി, യുവസമിതി ജില്ലാ ചെയർപേഴ്സണ്‍ ജോസഫ് ജോണ്‍, ജില്ലാ സമിതിയംഗം, സി. ജയരാജൻ, പുരോഗമന കലാസാഹിത്യ സംഘം ജില്ലാ സെക്രട്ടറി എം. ദേവകുമാർ എന്നിവർ പ്രസംഗിച്ചു. കെ.എ. അഭിജിത്തിന്‍റേതാണ് ലോഗോ രൂപകൽപന.

കോണ്‍ഗ്രസ് ക്വിറ്റ് ഇന്ത്യദിനം ആചരിച്ചു

കൽപ്പറ്റ: ജില്ലാ കോണ്‍ഗ്രസ് കമ്മിറ്റിയുടെ ആഭിമുഖ്യത്തിൽ ക്വിറ്റ് ഇന്ത്യ ദിനം ആചരിച്ചു. രക്തസാക്ഷി മണ്ഡപത്തിൽ പുഷ്പാർച്ചന നടത്തി. ഡിസിസി പ്രസിഡന്‍റ് എൻ.ഡി. അപ്പച്ചൻ ഭരണഘടന സംരക്ഷണ പ്രതിജ്ഞ ചൊല്ലിക്കൊടുത്തു. രാസലഹരികൾക്കും മയക്കുമരുന്നുകൾക്കും എതിരേയുള്ള ക്വിറ്റ് ഡ്രഗ്സ് വാക്കത്തോണ്‍ ഉദ്ഘാടനം അദ്ദേഹം നിർവഹിച്ചു. നേതാക്കളായ പി.കെ. ജയലക്ഷ്മി, പി.പി. ആലി, ടി.ജെ. ഐസക്, എൻ.കെ. വർഗീസ്, ഒവി. അപ്പച്ചൻ, എം.എ. ജോസഫ്, അഡ്വ. രാജേഷ് കുമാർ, നിസി അഹമ്മദ്, ഒ. ആർ. രഘു, കമ്മന മോഹനൻ, ബിനു തോമസ്, പി. ശോഭനകുമാരി, ചന്ദ്രിക കൃഷ്ണൻ, സുരേഷ്ബാബു, പോൾസണ്‍ കൂവക്കൽ, ഉമ്മർ കുണ്ടാട്ടിൽ, വർഗീസ് മുരിയൻകാവിൽ, ഡിന്‍റോ ജോസ് എന്നിവർ പ്രസംഗിച്ചു.

അത്‌ലറ്റിക്സ് ചാന്പ്യൻഷിപ്പ്: ആനപ്പാറ സ്പോർട്സ് അക്കാദമി ജേതാക്കൾ

കൽപ്പറ്റ: ജില്ലാ ജൂണിയർ, സീനിയർ അത്‌ലറ്റിക്സ് ചാന്പ്യൻഷിപ്പിൽ 330 പോയിന്‍റോടെ ആനപ്പാറ സ്പോർട്സ് അക്കാദമി ഓവറോൾ ജേതാക്കളായി. 188 പോയിന്‍റുമായി കാട്ടിക്കുളം അത്‌ലെറ്റിക് അക്കാദമി രണ്ടാം സ്ഥാനവും 109 പോയിന്‍റ് നേടി മീനങ്ങാടി അത്‌ലെറ്റിക് അക്കാദമി മൂന്നാം സ്ഥാനവും നേടി. സീനിയർ വിഭാഗത്തിൽ ആനപ്പാറ സ്പോർട്സ് അക്കാദമി 124 പോയിന്‍റ് നേടി ഒന്നാമതെത്തി. 70 പോയിന്‍റുമായി കാട്ടിക്കുളം പബ്ലിക് ലൈബ്രറിയാണ് തൊട്ടുപിന്നിൽ. 15 പോയിന്‍റുമായി പൂക്കോട് വെറ്ററിനറി കോളജ് മൂന്നാം സ്ഥാനം കരസ്ഥമാക്കി. ജൂണിയർ വിഭാഗത്തിൽ ആനപ്പാറ സ്പോർട്സ് അക്കാദമി 206 പോയിന്‍റുമായി ഒന്നാം സ്ഥാനം നേടി. 109 പോയിന്‍റുമായി കാട്ടിക്കുളം അത്‌ലെറ്റിക് അക്കാദമി രണ്ടാം സ്ഥാനവും 109 പോയിന്‍റോടെ മീനങ്ങാടി അക്കാദമി മൂന്നാം സ്ഥാനവും നേടി. ജില്ലാ അത്‌ലറ്റിക്സ് അസോസിയേഷനാണ് ചാന്പ്യൻഷിപ്പ് സംഘടിപ്പിച്ചത്. 14,16,18,20 വയസ് വിഭാഗങ്ങളിലായിരുന്നു മത്സരം. അസോസിയേഷനിൽ അംഗത്വമുള്ള സ്കൂൾ, കോളജ്, സ്പോർട്സ് അക്കാദമികൾ, ക്ലബുകൾ എന്നിവിടങ്ങളിൽനിന്നായി 600 ഓളം കായിക താരങ്ങൾ പങ്കെടുത്തു. ജില്ലാ സ്റ്റേഡിയത്തിൽ സമാപന സമ്മേളനം ഉദ്ഘാടനവും സമ്മാനവിതരണവും ജില്ലാ സ്പോർട്സ് കൗണ്‍സിൽ പ്രസിഡന്‍റ് എം. മധു നിർവഹിച്ചു. സി.പി. സജി ചങ്ങനാമഠത്തിൽ അധ്യക്ഷത വഹിച്ചു. എ.ഡി. ജോണ്‍, ലൂക്ക ഫ്രാൻസിസ്, സജീഷ് മാത്യു എന്നിവർ പ്രസംഗിച്ചു.

തൊണ്ടർനാട് തൊഴിലുറപ്പ് തട്ടിപ്പ് : അക്കൗണ്ടന്‍റ് റിമാൻഡിൽ, അക്രഡിറ്റഡ് എൻജിനിയർക്കായി ലുക്കൗട്ട് നോട്ടീസ്

കൽപ്പറ്റ: തൊണ്ടർനാട് പഞ്ചായത്തിൽ തൊഴിലുറപ്പ് പദ്ധതി നടത്തിപ്പിൽ കഴിഞ്ഞ രണ്ട് സാന്പത്തികവർഷത്തിനിടെ രണ്ടരക്കോടിയിൽപരം രൂപയുടെ തട്ടിപ്പ് നടത്തിയ കേസിൽ കഴിഞ്ഞ ദിവസം അറസ്റ്റിലായ അക്കൗണ്ടന്‍റ് വി.സി. നിധിൻ റിമാൻഡിൻ. തൊണ്ടർനാട് പോലീസ് അറസ്റ്റുചെയ്ത് ഹാജരാക്കിയ ഇയാളെ മാനന്തവാടി ജുഡീഷൽ ഒന്നാം ക്ലാസ് മജിസ്ട്രേറ്റ് കോടതിയാണ് റിമാൻഡ് ചെയ്ത്. കേസിലെ പ്രധാനിയും പഞ്ചായത്തിലെ തൊഴിലുറപ്പ് പദ്ധതി അക്രഡിറ്റഡ് എൻജിനിയറുമായ ജോജോ ജോണിയെ കണ്ടെത്തുന്നതിനുള്ള നീക്കങ്ങളുടെ ഭാഗമായി ജില്ലാ പോലീസ് ലുക്കൗട്ട് നോട്ടീസ് പുറപ്പെടുവിച്ചു. ജോണി വിദേശത്തേക്ക് കടന്നതായാണ് പോലീസിനു ലഭിച്ച വിവരം. വ്യക്തിഗത ആസ്തികൾ സൃഷ്ടിക്കുന്നതിന് നടപ്പാക്കിയ ആട്ടിൻകൂട്, കോഴിക്കൂട്, കിണർ തുടങ്ങിയ പ്രവൃത്തികളുടെ എസ്റ്റിമേറ്റ് തുക കൂട്ടിക്കാണിച്ചും മെഷർമെന്‍റ് ബുക്കിൽ രേഖപ്പെടുത്തിയതിന്‍റെ ഇരട്ടിയോളം തുകയ്ക്ക് ഫണ്ട് ട്രാൻസ്ഫർ ഓർഡർ നൽകി കരാറുകാരുടെയും മറ്റും അക്കൗണ്ടുകളിൽ പണം ലഭ്യമാക്കിയുമാണ് തൊണ്ടർനാട് പഞ്ചായത്തിൽ തട്ടിപ്പ് നടന്നത്. ലോക്കൽ ഫണ്ട് ഓഡിറ്റിലും പെർഫോമൻസ് ഓഡിറ്റിലും കണ്ടെത്താതിരുന്ന തട്ടിപ്പ് അടുത്തിടെ മാനന്തവാടി എൻആർഇജി പ്രോജക്ട് ഓഫീസറുടെ പരിശോധനയിലാണ് ശ്രദ്ധയിൽപ്പെട്ടത്. പഞ്ചായത്ത് സെക്രട്ടറിയുടെ പരാതിയിൽ തൊണ്ടർനാട് പോലീസ് രജിസ്റ്റർ ചെയ്ത കേസിൽ തൊഴിലുറപ്പ് ഓവർസീയർമാരായ പ്രിയ ഗോപിനാഥ്, റിയാസ് എന്നിവരും ഏതാനും കരാറുകാരും പ്രതികളാണ്. റിമാൻഡിലായ നിധിൻ സിപിഎം വളവിൽ ബ്രാഞ്ച് കമ്മിറ്റിയംഗമായിരുന്നു. ഇയാളെ പാർട്ടിയുടെ പ്രാഥമികാംഗത്വത്തിൽനിന്നു നീക്കിയിട്ടുണ്ട്. തൊണ്ടർനാട് പഞ്ചായത്തിലെ തട്ടിപ്പ് പുറത്തുവന്ന പശ്ചാത്തലത്തിൽ ജില്ലയിലെ മുഴുവൻ പഞ്ചായത്തുകളിലും കഴിഞ്ഞ 10 വർഷം തൊഴിലുറപ്പ് പദ്ധതിയിൽ നടത്തിയ പ്രവൃത്തികളിൽ സമഗ്രാന്വേഷണം വേണമെന്ന ആവശ്യം വിവിധ കോണുകളിൽ ഉയരുന്നുണ്ട്.

ഹിരോഷിമ ദിനാചരണം

കൽപ്പറ്റ: ശാസ്ത്ര സാഹിത്യ പരിഷത്ത് ജില്ലാ കമ്മിറ്റിയുടെ ആഭിമുഖ്യത്തിൽ ഹിരോഷിമ ദിനം ആചരിച്ചു. ജില്ലാ പ്രസിഡന്‍റ് പി. അനിൽകുമാർ അധ്യക്ഷത വഹിച്ചു. സെക്രട്ടറി കെ.പി. സുനിൽകുമാർ, ട്രഷറർ ടി.പി. സന്തോഷ്, വൈസ് പ്രസിഡന്‍റ് ഇ.ജി. ചന്ദ്രലേഖ, ജോയിന്‍റ് സെക്രട്ടറിമാരായ കെ.ആർ. ചിത്രാവതി, എ. ജനാർദനൻ, കേന്ദ്ര നിർവാഹക സമിതിയംഗം കെ.എ. അഭിജിത്ത് എന്നിവർ പ്രസംഗിച്ചു. പുരോഗമന കലാസാഹിത്യസംഘം ജില്ലാ സെക്രട്ടറി എം. ദേവകുമാർ "യുദ്ധത്തിന്‍റെ പാഠഭേദങ്ങൾ’ എന്ന വിഷയത്തിൽ പ്രഭാഷണം നടത്തി. മാത്യൂസ് വൈത്തിരി യുദ്ധവിരുദ്ധ ഗാനം ആലപിച്ചു. യുദ്ധവിരുദ്ധ ഹ്രസ്വചിത്രം പ്രദർശിപ്പിച്ചു.

സിപിഎം പ്രകടനം നടത്തി

പുൽപ്പള്ളി: ഇന്ത്യയിൽനിന്നു ഇറക്കുമതി ചെയ്യുന്ന ഉത്പന്നങ്ങളുടെ തീരുവ 50 ശതമാനമാക്കിയ അമേരിക്കൻ നടപടിയിൽ പ്രതിഷേധിച്ച് മുള്ളൻകൊല്ലിയിൽ സിപിഎം ലോക്കൽ കമ്മിറ്റിയുടെ നേതൃത്വത്തിൽ പ്രകടനം നടത്തി. സെക്രട്ടറി സി.പി. വിൻസന്‍റ്, ബി. അനീഷ്, കെ.കെ. ചന്ദ്ര ബാബു, ഭാസി, കെ.കെ. ഉണ്ണിക്കുട്ടൻ എന്നിവർ നേതൃത്വം നൽകി.

കാരക്കാട്ടുകവല-ഉപ്പുകണ്ടം റോഡ് ഉദ്ഘാടനം ചെയ്തു

പുൽപ്പള്ളി: മുള്ളൻകൊല്ലി പഞ്ചായത്തിലെ കാരക്കാട്ടുകവല-ഉപ്പുകണ്ടം റോഡ് ഐ.സി. ബാലകൃഷ്ണൻ എംഎൽഎ ഉദ്ഘാടനം ചെയ്തു. പഞ്ചായത്തംഗം പി.കെ. ജോസ് അധ്യക്ഷത വഹിച്ചു. ഷൈജു പഞ്ഞിത്തോപ്പിൽ, എൻ.യു. ഉലഹന്നാൻ, വർഗീസ് മുരിയൻകാവിൽ, ബിജു കാരക്കാട്ട്, ജോർജ് മാതേക്കൽ എന്നിവർ പ്രസംഗിച്ചു. എംഎൽഎയുടെ പ്രാദേശിക വികസന നിധിയിൽനിന്ന് അനുവദിച്ച തുക വിനിയോഗിച്ചാണ് പ്രവൃത്തി നടത്തിയത്.

മുള്ളൻകൊല്ലി പഞ്ചായത്ത് ഓഫീസ് മറ്റൊരു കെട്ടിടത്തിലേക്ക് മാറ്റണമെന്ന്

പുൽപ്പള്ളി: മുള്ളൻകൊല്ലി പഞ്ചായത്ത് ഓഫീസ് പ്രവർത്തനം മറ്റൊരു കെട്ടിടത്തിലേക്ക് മാറ്റണമെന്ന് ഭരണ സമിതിയിലെ എൽഡിഎഫ് അംഗങ്ങളായ പി.എസ്. കലേഷ്, കെ.കെ. ചന്ദ്രബാബു, ജസി സെബാസ്റ്റ്യൻ, അമ്മിണി സന്തോഷ്, സുധാമണി നടരാജൻ, ശാന്തിനി പ്രകാശൻ, മഞ്ജു ഷാജി എന്നിവർ ആവശ്യപ്പെട്ടു. നിലവിലെ ഓഫീസ് കെട്ടിടം അപകടാവസ്ഥയിലാണ്. മൂന്നര പതിറ്റാണ്ട് പഴക്കമുള്ള കെട്ടിടത്തിന്‍റെ മേൽക്കൂരയിലേതടക്കം കോണ്‍ക്രീറ്റ് അടർന്നുവീഴുകയാണ്. തൂണുകളിൽ വിള്ളലുകളും പൊട്ടലുകളുമുണ്ട്. രണ്ടാംനിലയിലെ കൈവരി പൂർണമായും അടർന്നുവീണിട്ടു കാലമേറെയായി. ജീവനക്കാരും ഓഫീസിലെത്തുന്ന പൊതുജനങ്ങളും അപകടത്തിൽപ്പെടുന്നതിന് സാധ്യത കൂടുതലാണ്. ഈ സാഹചര്യത്തിൽ ഓഫീസ് മാറ്റേണ്ടത് അനിവാര്യതയാണെന്ന് എൽഡിഎഫ് അംഗങ്ങൾ പറഞ്ഞു.

തൊഴിലുറപ്പ് പദ്ധതി അട്ടിമറിക്കാനുള്ള നീക്കം ഉപേക്ഷിക്കണം: ഐഎൻടിയുസി

സുൽത്താൻ ബത്തേരി: തൊഴിലുറപ്പ് പദ്ധതി അട്ടിമറിക്കാനുള്ള നീക്കം കേന്ദ്ര സർക്കാർ ഉപേക്ഷിക്കണമെന്ന് ഐഎൻടിയുസി മേഖല കമ്മിറ്റി ക്വിറ്റ് ഇന്ത്യ ദിനത്തിൽ സംഘടിപ്പിച്ച കണ്‍വൻഷൻ ആവശ്യപ്പെട്ടു. തൊഴിലുറപ്പിൽ വാർഷിക തൊഴിൽദിനങ്ങൾ 200 ആക്കുക, തൊഴിലുറപ്പ് തൊഴിലാളികളെ ഇഎസ്ഐ പരിധിയിൽ കൊണ്ടുവരിക, അങ്കണവാടി ജീവനക്കാർക്ക് ക്ഷേമനിധി നടപ്പാക്കുക, അന്യായമായി പിഴ ചുമത്തി മോട്ടോർ തൊഴിലാളികളെ പീഡിപ്പിക്കുന്ന ആർടിഒ, പോലീസ് നടപടി അവസാനിപ്പിക്കുക, ഓട്ടോ-ടാക്സി ചാർജ് വർധിപ്പിക്കുക തുടങ്ങിയ ആവശ്യങ്ങളും ഉന്നയിച്ചു. ഐഎൻടിയുസി ജില്ലാ പ്രസിഡന്‍റ് പി.പി. ആലി ഉദ്ഘാടനം ചെയ്തു. മേഖല പ്രസിഡന്‍റ് സി.എ. ഗോപി അധ്യക്ഷത വഹിച്ചു. സംസ്ഥാന എക്സിക്യുട്ടീവ് കമ്മിറ്റിയംഗം ഉമ്മർ കുണ്ടാട്ടിൽ മുഖ്യപ്രഭാഷണം നടത്തി, മായ പ്രദീപ്, ജിജി അലക്സ്, കെ.എം. വർഗീസ്, കെ.യു. മാനു, ഉണ്ണിക്കൃഷ്ണൻ, മണി പാന്പനാൽ, അസീസ് മാടാല, റോയ് അന്പലവയൽ, പ്രജിത രവി തുടങ്ങിയവർ പ്രസംഗിച്ചു.

ബത്തേരി ഭദ്രാസന പൊതുയോഗം

സുൽത്താൻ ബത്തേരി: മലങ്കര ഓർത്തഡോക്സ് സുറിയാനി സഭ ബത്തേരി ഭദ്രാസന പൊതുയോഗം ഇടവക മെത്രാപ്പോലീത്ത ഡോ.ഗീവർഗീസ് മാർ ബർന്നബാസിന്‍റെ അധ്യക്ഷതയിൽ ചേർന്നു. കഴിഞ്ഞ വർഷത്തെ പ്രവർത്തനം വിലയിരുത്തി. ഭദ്രാസനത്തിന്‍റെ ഉയർച്ചയും ജനക്ഷേമവും മുൻനിർത്തിയുള്ള പദ്ധതികൾക്ക് രൂപം നൽകി. ഭദ്രാസനത്തിനു കീഴിൽ പ്രവർത്തിക്കുന്ന കാരുണ്യസ്പർശം ചാരിറ്റബിൾ ട്രസ്റ്റിന്‍റെ ഒരു വർഷത്തെ പ്രവർത്തന റിപ്പോർട്ട് അവതരിപ്പിച്ചു. ഭദ്രാസനപരിധിയിൽ എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയവർക്ക് കാഷ് അവാർഡ് സമ്മാനിച്ചു. അന്നമ്മ മത്തായി നൂറനാൽ എഡ്യുക്കേഷണൽ എൻഡോവ്മെന്‍റ് വിതരണം ചെയ്തു. ഭദ്രാസന സെക്രട്ടറി ഫാ.ബേബി ജോണ്‍ സ്വാഗതം പറഞ്ഞു.

നാൽപ്പതിന്‍റെ നിറവിൽ പ്രിയദർശിനി ബസ്

കൽപ്പറ്റ: പഴയ പ്രതാപമില്ലെങ്കിലും ക്ലച്ച് ചവിട്ടി, ഗിയർ മാറ്റി 40-ാം വർഷത്തിലേക്ക് വളയം തിരിക്കുകയാണ് ജില്ലാ പട്ടികജാതി-വർഗ സഹകരണ സംഘത്തിന്‍റെ പ്രിയദർശിനി ബസ് സർവീസ്. ഒരു കാലത്ത് വയനാടൻ റോഡുകളിൽ പേരുകേട്ട പ്രിയദർശിനി ബസുകൾ ഇപ്പോഴും മൂന്നെണ്ണം നിരത്തിലുള്ളപ്പോൾ മറ്റു ജില്ലകളിൽ സർവീസ് അവസാനിച്ചിട്ട് വർഷങ്ങളായി. മാനന്തവാടി-കോഴിക്കോട്, മാനന്തവാടി-ബത്തേരി, മാനന്തവാടി-വാളാട് റൂട്ടുകളിലാണ് നിലവിൽ ബസുകൾ ഓടുന്നത്. 1985ൽ എല്ലാ ജില്ലകളിലും ആരംഭിച്ച പട്ടികജാതി-വർഗ സഹകരണ ട്രാൻസ്പോർട്ട് സംഘം പിറ്റേ വർഷമാണ് ബസുകൾ വാങ്ങി സർവീസ് തുടങ്ങിയത്. 2016ൽ ജില്ലയിൽ എട്ട് പ്രിയദർശിനി ബസുകളാണ് ഓടിയിരുന്നത്. ജില്ലാ കളക്ടർ ചെയർമാനും സബ് കളക്ടർ എംഡിയുമായുള്ള സംഘത്തിന്‍റെ ബസുകൾ കെഎസ്ആർടിസി, സ്വകാര്യ ബസ് പണിമുടക്കുള്ള ദിവസങ്ങളിലും ഓടിയിരുന്നു. 2012ൽ സംഘം ടൂറിസ്റ്റ് ബസുകളും ഇറക്കി. പിന്നീട് വരുമാനത്തകർച്ച ഉൾപ്പെടെ കാരണങ്ങളാൽ സർവീസുകൾ ഒന്നൊന്നായി നിലച്ചു. ഒരു വർഷമായി തൊഴിലാളികൾക്ക് ലീസിന് നൽകിയാണ് പ്രിയദർശിനി ബസുകൾ ഓടുന്നത്. നിലവിൽ മൂന്ന് ബസുകളിലായി 18 തൊഴിലാളികളുണ്ട്.

മതേതര ഇന്ത്യ എന്നത് മതതാത്പര്യത്തിന് എതിരാണെന്ന് തെറ്റിദ്ധരിപ്പിക്കുന്നു: മന്ത്രി

സുൽത്താൻ ബത്തേരി: മതേതര ഇന്ത്യ എന്നത് മതതാത്പര്യത്തിന് എതിരാണെന്നു ചിലർ തെറ്റിദ്ധരിപ്പിക്കുകയാണെന്ന് വനം മന്ത്രി എ.കെ. ശശീന്ദ്രൻ. നാഷണലിസ്റ്റ് യൂത്ത് കോണ്‍ഗ്രസ് ജില്ലാ കമ്മിറ്റി "അസഹിഷ്ണുത വെടിയുക, സാഹോദര്യം നിലനിർത്തുക’ എന്ന മുദ്യാവാക്യം ഉയർത്തി സംഘടിപ്പിച്ച ക്വിറ്റ് ഇന്ത്യ ദിന കാന്പയിൻ ഉദ്ഘാടനം ചെയ്യുകയായിരുന്നു അദ്ദേഹം. ഛത്തീസ്ഗഡ് സംഭവത്തിന്‍റെ ചൂടാറുംമുന്പാണ് ഒഡീഷയിൽ വൈദികർക്കും സന്യസ്തർക്കും നേരേ അതിക്രമം ഉണ്ടായത്. ഇത്തരം ആക്രമണം കേരളത്തിലെത്താൻ അധികകാലം എടുക്കില്ല. വിവിധ മതങ്ങളിൽപ്പെട്ടവർ ഒന്നുചേരുന്പോഴാണ് ഇന്ത്യയെന്ന സങ്കൽപ്പം പൂർണമാകുന്നത്. മതപ്രചാരണം നടത്തിയാൽ ആക്രമിച്ച് തുറങ്കിലടയ്ക്കും എന്ന സന്ദേശമാണ് ചിലർ നൽകുന്നതെന്നും ഇതിനെതിരേ ജാഗ്രത പുലർത്തണമെന്നും മന്ത്രി പറഞ്ഞു. എൻവൈസി ജില്ലാ പ്രസിഡന്‍റ് എ.ജെ. ലിജോ അധ്യക്ഷത വഹിച്ചു. എൻസിപി-എസ് ജില്ലാ പ്രസിഡന്‍റ് ഷാജി ചെറിയാൻ, സംസ്ഥാന സെക്രട്ടറി സി.എൻ. ശിവരാമൻ, ബ്ലോക്ക് പ്രസിഡന്‍റ് എം.കെ. ബാലൻ, സാബു സുജിത് എന്നിവർ പ്രസംഗിച്ചു.

ക്രൈസ്തവർക്കെതിരായ അതിക്രമം തടയാൻ പ്രധാനമന്ത്രി ഇടപെടണം: കേരള കോണ്‍ഗ്രസ്-എം

സുൽത്താൻ ബത്തേരി: ഒഡീഷയിൽ കഴിഞ്ഞ ദിവസം വൈദികർക്കും കന്യാസ്ത്രീകൾക്കും നേരേ നടന്ന ബജ്റംഗ്ദൾ ആക്രമണത്തിൽ കേരള കോണ്‍ഗ്രസ്-എം നിയോജകമണ്ഡലം കമ്മിറ്റി പ്രതിഷേധിച്ചു. ജനാധിപത്യ, മതേതര മൂല്യങ്ങൾക്കെതിരേ നിലകൊളുന്ന ശക്തികൾ നിയമം കൈയിലെടുക്കുന്നത് ക്രൈസ്തവരടക്കം ജനവിഭാഗങ്ങളെ ആശങ്കയിലാക്കുകയാണ്. ഛിദ്രശക്തികളെ നിലയ്ക്കുനിർത്തുന്നതിനും ഭരണഘടനാദത്തമായ അവകാശങ്ങൾ എല്ലാ പൗരൻമാർക്കും ഉറപ്പുവരുത്തുന്നതിനും പ്രധാനമന്ത്രി ഇടപെടണമെന്ന് യോഗം ആവശ്യപ്പെട്ടു. സംസ്ഥാന ജനറൽ സെക്രട്ടറി കെ.ജെ. ദേവസ്യ ഉദ്ഘാടനം ചെയ്തു. നിയോജകമണ്ഡലം പ്രസിഡന്‍റ് ടി.ഡി. മാത്യു അധ്യക്ഷത വഹിച്ചു. ജില്ലാ പ്രസിഡന്‍റ് ജോസഫ് മാണിശേരി എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]